Ижевск-Удмурт Епархиен кивалтӥсь Архиерейлэн Николай Архиепископлэн Утисьмылэн вордсконэныз ӟечкылан гожтэтэз "Инмар сокм дуннеез яратӥз, Аслэсьтыз одӥг вордӥськем Пизэ сётӥз, котькудӥз но Солы оскись мурт медаз быры, солэн быронтэм улонэз мед луоз шуыса" (Ин. 3:16). Инмарен яратэм пастыръёс, инокъёс, инокиняос, агай-вынъёс, сузэръёс! Та шумпотоно, данлыко нуналъёсы сюлмысьтым ӟечкыласько Христос Инмармылэн Ворсдконэныз, сӥзисько тӥледлы вань ӟечсэ-умойзэ; оскон, оскиськон, яратон мед улозы тӥляд сюлмады. Туннэ быдэс дунне пачылмемын инмысь кылчинъёслэн кырӟанэнызы: "Дан вылӥсь Инмарлы, музъем вылын каньыллык, адямиослы ӟеч эрик" (Лк. 3:16). Музъем вылэ асьме понна, асьмелэн утиськонмы понна лыктӥз кема возьмам, пророкъёсын азьвыл ик верам Дуннеез Утись: адями мугорын Инмар лыктӥз (1 Тим. 3:16). Та секыт аръёсы, пӧртэм шугадӟонъёс пыр эскериське асьмелэн чиданмы, осконмылэн юнлыкез. Быдӟым Павел аспостоллэн кылъёсыныз Христослэн Черкез асьмелы таӵе визь- нод сётэ: "Самой бадӟым шумпотон - со Инмар азьын шонерлыко улон но маид вань, соин тыр луон. Дуне вылэ асьмеос номыр но ӧм вае, соин ик отысь но номыре сьӧрамы нуыны ум быгатэ. Сиёнмы вань ке, дӥськутмы вань ке, - соин тыр луоме". Инмарлэн адямиосыз шонер, ӟеч ужъёс лэсьтыса, оскыса, яратыса, чидаса, зӥбыт-востэм уло (1Тим. 6:6-8, 11). Инмарен яратэм вӧсяськись калыклэн возьмасьёсыз, пастыръёсыз, монахъёс, осконэн улӥсь агай-вынъёс, сузэръёс! Кузё-Инмармылэн Вордсконэныз, Выль арен ӟечкыласько. Дун-шектэм Ныллэсь вордскем Инмар Нуны Кузё-Инмармы Иисус Христос "тӥледыз котькыӵе но шумпотонэн, осконды пыр каньыллыкен тыр мед кароз, Святой Духлэн кужыменыз тӥлесьтыд оскондэс мед узырмытоз" (Рим. 15:13). Вифлеемын вордӥськем Христосэз яратыса Ижевск-Удмурт Епархилэн кивалтӥсь Архиерез Николай Архиепископ. Быръёнъёсъя комиссия ивортэ Удмурт Республикаысь Быръёнъёсъя комиссия "Россия Федерациысь гражданъёслэн быръёнъёсъя правооссылэн валтӥсь гарантиоссы но референдуме пыриськыны правозы сярысь" Федеральной законлэн 10-тӥ ёзэтэзлэн 3-тӥ люкетэз вылэ пыкиськыса, Удмурт Республикаысь Кун Кенешлэн кыкетӥ созываз депутатэ быръёнъёсты ортчытыны 1999 арын 4 апреле юнматӥз. Быръёнъёсъя комиссия валэктэ, Удмурт Республикаысь Кун Кенеше депутатэ быръёнъёс ортчо "Россия Федерациысь гражданъёслэн быръёнъёсъя правооссылэн валтӥсь гарантиоссы но референдуме пыриськыны правозы сярысь" Федеральной законъя, Удмурт Республикалэн Конституциезъя, Удмурт Республикалэн "Удмурт Республикаысь Кун Кенеше депутатъёсты быръёнъёс сярысь" Законэзъя (кутэмын 1994 арын 28 январе), федерацилэн но Удмурт Республикалэн мукет законъёссыя. Таӵе дыръя уже кутӥсько Федеральной законлэн нормаосыз, "Россия Федерациысь гражданъёслэн быръёнъёсъя правооссылэн валтӥсь гарантиоссы но референдуме пыриськыны правозы сярысь" Федеральной законлэн 1-тӥ ёзэтэзлэн 7-тӥ люкетэзъя но 11-тӥ ёзэтэзъя уже кутыны луэ "Удмурт Республикаысь Кун Кенеше депутатэ быръёнъёс сярысь" Законлэсь сыӵе люкетъёссэ гинэ, кудъёсыз Федеральной законлы пумит уг луо. Быръёнъёсъя комиссия Удмурт Республикаысь Кун Кенешлэн кыкетӥ созываз депуттаъёсты быръёнъёслы дасяськонъя ужрадъёсты ортчытыны таӵе валтӥсь рад юнматӥз: - Удмурт Республикаысь Быръёнъёсъя комиссиен быръёнъёсъя округъёсты кылдытонъя рад тупатон - 1999 арын 23 январёзь; - быръёнъёсъя округъёсты кылдытон радэз юнматон но печатлан - 1999 арын 02 февралёзь; - быръёнъёсъя участокъёсты кылдытон - 1999 арын 12 февралёзь; - улосвылъёсын, округъёсын быръёнъёсъя комиссиосты юнматон - 1999 арын 25 январёзь; - участокъёсын быръёнъёсъя комиссиосты юнматон - 1999 арын 22 февралёзь; - депутатэ кандидатъёсты ӵектон быръёнъёсъя округъёсты кылдытон радэз печатлам нуналысен 1999 арын 04 мартозь; - депутатэ кандидатъёс понна бырйисьёслэсь кинюртэмъёссэс люкан - округысь быръёнъёсъя комиссия кинюртэмъёсты люканэз кутскон сярысь ялэм нуналысен 1999 арын 04 мартозь; - депутатэ кандидатъёслэсь документъёссэс регистрацие сётон - 1999 арын 04 мартозь; - депутатэ кандидатъёсты пусъён - документъёсты регистрацие сётэм дырысен куинь нунал куспын (1999 арын 07 мартозь); - быръёнъёс азьын валэктон уж - кутске кандидатэз пусъем нуналысен но йылпумъяське быръён нуналозь сутка азьвыл (1999 арын 02 апреле 24.00 часын). Удмурт Республикаысь Быръёнъёсъя комиссия. Вуж арен! Кияды кутӥды туэ понна нырысетӥ газетмес. Кин но со - нырысьсэ, мукетыз - кызетӥ арзэ, куинетӥез - ньыльдон кыкетӥзэ. Пель сьӧрады чузъясько на ортчем нуналъёсы верам пӧртэм сӥзёнъёс. Шуд, тазалык, уж, дышетскон сярысь кылъёс. Сьӧд нянез ымын кема возьыку, сакыр сярысь малпаськод ке, кыл голькыт шӧмез шӧдэ. Паймонэз ӧвӧл. Озьы крахмал пӧрме глюкозалы. Тазьыгес ик улонэ пыӵалозы Выль аре верам мылкыд каронъёс. Вужаз тӥ кор ваиды ке, таяз осконды вань корка пырон карондылы. Вожась картты вӧзын одӥг вамыш но люкиськытэк улӥды ке, эн малпалэ, 1999-тӥ арын Билл Клинтон тӥледды Моника Левински интыын возёз шуыса. Озьыен, ойдолэ тодэ ваёме ортчемзэ, син азямы пуктоме туэлы лэсьтэм инъетмес. Асьмеос люкиським демократ шуонъёсын, та кылэз тышкаськонлы пӧрмытӥсьёсын. Кивалтонысь кошкыкузы, ӧсэз юн гинэ подӥзы. Та нуналысен, пе, ваньмыз понна кыл куто коммунистъёс, нош ми, экономикаен туж ӟеч кивалтыны дышемъёс, огвакытлы кулэтэм луим. Номыр уд шу, бадӟым ыштон. Секытгес вал музон ыштонъёс. Писатель Анатолий Рыбаков, артист Ролан Быков, яратоно суредасьмы Менсадык Гарипов. "Удмурт дунне" люкиськиз тодмо газетчиосын Николай Евсеевен, Анна Васильеваен, Геннадий Шишовен, Константин Михайловен. Кыллён интыды небыт медло! Аспӧртэм сямы вань: Выль аре выжыкумы учкисько вуж блокнотъёсме. 1998-тӥ ар пумын усьтӥ 1988-тӥ арын гожъямъёсме. Дас арскын быдэс даур ортчем кадь. 1988-тӥ ар. Тодады ваелэ: макем сэзь синмын учкимы соку азьлане! Быдтӥм тачак министерствоосты. Пенсие келямы телефон пыр кузёяськисьёсты. Шарае поттӥм вылӥ кивалтӥсьёслэсь нимысьтыз больницаоссэс, магазинъёссэс, дачаоссэс, буфетъёссэс. Оскимы: отысь горд мызь табере тубоз асьмелэн ӝӧк выламы. 1998-тӥ ар. Мызь тачак вуиз магазинэ. Нош дорамы сюрес ӧз шедьты. Дуныз куртчылӥське акула сямен. Со понна аракы ласянь майбыр. Сое вожмаськыса ӟизато кун заводъёс, лушкемак кылдытэм цехъёс, ас киын инъям бургыос. Ю, шузимы, нодтэм нылпи ворды, кузпалдэ тышка, бускельдэ ожалты! Сыӵе Россия кулэ Америкалы. Сыӵе калык кулэ "выль ӟучлы". 1988-тӥ ар. Газетчиосты кекатӥз...бумага. Ӧвӧл, пе, со. Тужгес нюлэсо кунын - СССР-ын, сико-тэлё элькунын - УАССР-ын, бумага поттон машина лэсьтӥсь "Ижтяжбуммаш" завод вӧзысь типографиын уг окмы кагаз шуон. Серем ӧвӧл-а? Серем. 1998-тӥ ар. Мызь но, кофе но, бумага но, аракы но талонтэк. Таяз учыре ӧвӧл чебер пужыосын суредам кагаз - коньдон. Мар адӟон? Карнанлэн огпалаз тыро ведра ошиськом, мукетаз - буш ведра, таяз ву понытозямы, соиз тырттэм кыле. Дышетӥсьёс но эмъясьёс уждун уг басьто кӧня ке толэзь понна, заводын тыршисьёс- ар понна, нянь будэтӥсьёс - кӧня ке ар понна. Та дыре ик СНГ шуонлэн подъясез (секретарез) Борис Березовский люказ 1 миллиард 1 миллион доллар, Газпромлэн кивалтӥсез Рем Вяхирев - 1,4 миллиард, банкир Владимир Потанин - 1,6 миллиард доллар. Кудзы чалякгес кык пол миллиардер луозы? 1988-тӥ ар. Улӟыны медэ кооперация. Тодӥсько на: дышетскыны январе Свердловске мыныкум, сьӧрам кутӥ сӧриськем зонтикме. Быдэс Ижын ӧвӧл сое тупатъясь мастерской. Одӥг но ӝыны манетэн лулъязы зонтикме. Вить минутскын. Табере асьме дорын быгатод тунгонэ выль усьтонъёс лэсьтыны, балконад укноос пуктытыны, велосипедад багажник инъятыны. Но... Юрист Михаил Горбачёв ялӥз: яра ваньзэ лэсьтыны, мае закон уг алы. 1998-тӥ ар. Гуртысь ноку замокаллямтэ ӧс борды вайыж зӧкта вамен корт шуккемын. Городысь укноос тюрьмаын музэн чебермамын решёткаен. Магазин доры кельтэм коляскаысь нылпи ыше. Законын верамык ӧвӧл ук, нуныез капыртыны уг яра шуыса. Кыӵе конституциын гожтэмын: дышетон но эмъян дунын? Кыӵе ёзэт (статья) алэ муртлэн почта ящикысьтыз "Удмурт дуннеез" капыртонлэсь? 1988-тӥ ар. Данак бумагаос вылысь ышиз "секретно" кыл. Газетчиос эркынак шокчизы. Цензура ӧвӧл. Гожъяськы но шумпотты лыдӟисьёсты! 1998-тӥ ар. Шумпотӥськом, шол. "Советской Удмуртия" газетэз ар ӵоже басьтон понна азьвыл 6 манет кулэ вал ке, табере - ог 60. Книга печатламед понна вазен гонорар сётъязы ке, али ас кисыысьтыд 40-60 сюрс манет потты. Футболэз телевизор пыр возьматыку, тынэсьтыд, "висисьлэсь", вушъемдэ экран пыр сётоно? Шугез ӧвӧл - тыр ... манет (кӧнязэ уг тодӥськы). 1988-тӥ ар. Люкиськиськом тачак орденъёслэсь но медальёслэсь. Ӝужыт пукон вылын пукид 50 (60, 75, 100) ар, калыклы номыр уродзэ ӧд лэсьты - басьты награда. Табере озьы уз лу! 1998-тӥ ар. Быриз Лев Рохлин. Следовательёс оскыто: сое ыбиз йӧнтэм кышноез. Тодосчиос (учёнойёс) верало: шонер, но Полина Рохлина сокем керӟег ӧвӧл, со усыкмытэмын вал радиотулкымен. Кин ке но палэнысен кышномуртлы лушкемак команда сётӥз картсэ быдтыны. Кинлы люкетӥз Рохлин? Ӧм вунэтэ на: генераллы Чечняын ожмаськемез понна Россилэн Героез ним сётэмын вал. Ӧз басьты: возьыт, пе. Демократ нергеослэн радысьтызы потӥз, армиез юнматон борды кутскиз. Кинлы ке ӧз кельшы. Виизы. Одӥгаз аре нырысетӥ мае демонстрацие потэм калыкез нушыосын тышканы косӥз югдурез утёнъя со вакытэ министр Виктор Ерин. Шумпотыса басьтӥз Россиысь Геройлэсь нимзэ. Сыӵеесь асьмелэн геройёсмы. Министерствозэ куашкатэмез понна солы берлогес мукет шуныт инты шедьтӥзы. Писатель Александр Солженицын пумит луиз куашкатэм Россилэн кивалтӥсез киысь Андрей Первозванный орден басьтыны. 1988-тӥ ар. Радиолалэсь кикутонзэ бергатӥськод но - отын шиетэ, татын жиетэ, отӥяз тачыртэ. Озьы асьмеос кысылӥм кунгож сьӧрысь радиостанциосты. Дас ар талэсь азьвыл сыӵе уж дугдытэмын. Дано мед луоз эрик! 1998-тӥ ар. Николай Сванидзе: Президент сыӵе юн но визьмо вамыш лэсьтӥз - коммунистъёслэн лысьӧмзы ик куажыртӥз. Михаил Швыдкой: война дыръя Германиысь ваем узырлыкъёсты немецъёслы ӧм сётэ ке, асьме шоры быдэс дунне кырыж учкоз. Малы визьмо президент немецъёслэн оркестрзы азьын ассэ дирижёр интые пуктэ? Малы немецъёс пал кыл но уг поттыло янтарь комнатамес берыктон сярысь? Кытын кылле эксэй Россилэн зарниез? Малы эрико журналистъёс таӵе юанъёсты уг сёто юн президентлы? Юанъёс тачак. Соос сярысь мургес малпаськиськод но амалтэк ӟырдаськод. Нош Выль ар - со политикаен герӟаськем нунал ӧвӧл. Ойдолэ кӧня ке вакытлы вунэтом вожвылъяськон сяммес. Выль ар бере шампаньды кылиз на-а? Ӧз ни? Нош нырйылды? Быриз? Сояз чаркаын тямага вань кадь. Синдэс кынелэ но малпалэ: отын кабак вина. Сьӧд нянь юдэстэс ымады кема возелэ. Табере ньылэ. Халва шӧм, оветь? Сябась! Алексей ШКЛЯЕВ. Василий Михайлов Выль ар уе Верос Ӝытазе куазь туж зол пелляськыны кутскиз. Лек тӧл лымыез бергатыса ӝутэ но укно шоры кырымен-кырымен пазя. Собере муръё пыр вузыны кутске. Ульча кузя кыстӥськись электроезъёс жин-н! вазё. Нош юбоос бордысь лампочкаос, кужмо ӟечыраса, ӧжыт гинэ уг палдыло. - Ма, учке ай, час даслэсь ортчем ини, ойдолэ ӝӧкмес дасялом, - вазиськиз Оля эшъёсызлы, интыысьтыз султыса. Ваньзы гурак ӝутскизы но ӝӧк вылэ пӧрамъёссэс, тусьты-пуньыос, тэркыос пуктылыны кутскизы. Выль арез тазьы огинын пумитаны гуртысь егитъёс, дышетӥсьлэн Ольга Ивановналэн эшъёсыз, азьвыл ик вераськизы. Со доры ик люкаськыны кенешизы. Нылъёс нуназе ик пӧраськизы. Верам дырлы пиос но вуизы. - Одӥг, кык, куинь... - пуконъёсты лыдъяса, тракторист Лёгор ӝӧк вӧзы соосты радэн-радэн пуктылӥз но кинлы кытчы интыяськыны валэктӥз. Оген но кыкен егитъёс ӝӧк сьӧры пуксьылыны кутскизы. - Оля, нош вӧзад кинлы-о инты кельтӥськод? - серем пыр юаз Лёгор. Радио кылзыса пукись шофёрлэсь, Колялэсь, ӵыжектэмзэ адӟыса, ваньзы лушкемак пырсйизы. - Нылъёс, пиос! Нош кытын-о асьмелэн доктормы? - паймыса юаз счетовод Юля. - Гирой сое трактореныз вае, луоз, соин кема лыкто, - нош ик ымзэ вуттӥз Лёгор. Со куспын ӧс усьтӥськиз, но корка тырмиз кезьыт омыр тулкымъёсын. Соос сылмемъя, бус пӧлын сямен адӟиськиз кинлэн ке ӝужыт мугорыз. - Гирой?! - огымысь кадь кеськизы егитъёс. - Ӧвӧл! - шокчиз Гирой, пукон вылэ лэзькыса. - Оло, му пыр вияз... - Кин ӧвӧл? Малы тазьы беромид? Нош кытын Кати? - Гиройлэсь вылысьтыз вылаз, вожмаськыса сямен юало эшъёсыз. - Ӧвӧл, ӧвӧл, - пыӵкылӥз сое Тоня. - Ветлӥськоды йыромыса. Починкае кошкиз шат? Починка кылэз кылыса, Гирой куалектӥз. Номыр куаретытэк, ӧс пала вамыштӥз. Тоня сое дугдытӥз. - Кытчы потӥськод? Ачид но ышод. Мон тонэ исай гинэ. Малы Катя Починкае мыноз Выль ар уйлы пумит? - Учке ай, ма, дас одӥг час ини, - сюлэмшугъяськыса шуиз Илья. - Тазьы Выль арез но пумитаны вунэтод. Таӵе дыре нокин но кӧбератэк пукыны уг чида ни. Кудӥз укноетӥ пеймыт уе учкылэ, мукетыз, азбаре ик потыса, пыд куараез кылзӥське. Нош номыр уз кылӥськы ни. Ваньмыз, адямиос но, инкуазь но, Выль ар азьын шып кариськыса, часлэсь шуккемзэ витё кадь. Гирой гинэ, четлыке шедем пӧйшур сямен, ас понназ лулӟылыса, солань- талань лёгаське. - Я, пуксим! - ӧтиз Ольга Ивановна эшъёссэ. Егитъёс интыяськыса гинэ вуизы - борддорысь бадӟым час дас кык пол шуккиз: жон! жон!.. Радио пыр но телевизорын президентлэсь ӟечкыланзэ лыдӟыны кутскизы. - Выль арен! - котьку сямен ик эшъёссэ азьпалтыса кеськиз Лёгор. Ваньзы султӥзы но, корка тыр жинграк! шуккиськиз ваче вуэм чаркаослэн куаразы. Гирой гинэ, вӧзысьтыз буш пукон шоры учкыса, винаез пичи гинэ веръяз но тыро чарказэ ӝӧк вылэ пуктӥз. - Мар тон, Гирой, пильмаськем тусо пукиськод? Выль арез но уд пумита ни-а? - юаз Илья, шораз жалясь синъёсын учкыса. - Вуж сямен пумитало ни, дас куинетӥ нуналаз, - шуиз соиз, йырзэ ошыса. - Ӧвӧл, пияш, тӥледлы туннэ Ильяен кыкнадылы вуоно ар понна но юыны возьыт уз луы, - вераськонэ итӥськиз Коля. - Учке ай, таӵе кӧс куазен но удалтэм ю-нянь будэтӥм, тӥ нормадэс кык поллы уногес лэсьтӥды. - Тонэ астэ но ӟечкыланы кулэ, - шуиз Юля султыса. - Колялэсь усто ужамзэ газетын но пусйиллям. - Вае бен юом азьмынӥсьёс понна! - чаркаосты тырмытъяса ӧтиз Тоня. Тыл шорын марӟан кадь пиштӥсь винаен тырмытэм чаркаос нош ик ваче шуккиськизы. Но... ымдуръёсы вуыса, тып! дугдӥзы. Нокин но таяз учыре виназэ веръяса ӧз вуы - ӧс вӧлак усьтӥськиз но, бусо тулкым ваньзэ юзмыт вуэн пылатӥз кадь. _ Дугдэ ай, эн юэ, - шокпотэм куараен мырдэм кеськиз пырись мурт. - Катя! - ӝӧк сьӧрын сылӥсьёс огымысь кадь ӵош кеськизы но, чаркаоссэс пуктыса, ӧс пала мынӥзы. Гирой гинэ интыяз кылиз. - Кытысь тон? Мар таӵе беромид? Учке ай, со быдэсак лымыпог кадь луэм ук! - кылӥсько куараос. Огез но мыдыз Катялы юрттыны туртто лымызэ сузяны, кылиськыны. Дӥсьсэ ӧс дорын ик курткыса, Катя сое диван вылэ куштӥз но ӝӧк доры вуиз. Пӧсям ымнырыз пӧсь гур дурын кадь ӵыжектэм. Кышетэз улысь потэм йырси нюжаосысьтыз ву шапыкъёс усьыло. - Вае ӝоггес рюмка вина! - Гирой азьысь чаркаез басьтыса ӝутӥз со. - Дугды ай, со Гиройлэн, тынад тӥни соиз, - Тоня солы куско чаркаен вина сётӥз. - Починкаослэсь бадӟым салам! - кеськиз Катя. Чарказэ пыдсозяз ик кымалтӥз. Нош эшъёсыз марзэ-созэ ӧз валалэ, ӝутэм чаркаоссэс огзы но ӧз юэ на. "Починкаослэсь"! - паймизы ваньзы. - Берло верало, вае али сётэ лулме шедьтыны, - шуиз Катя. - Шокпотӥ. Ӧжыт буйгатскемез но шунамез бере, Катя вераз ӝегатскем мугзэ. Тани кызьы вылэм со... Ужзэ быдэстэмез бере, Катя бертыны дӥсяськиз. Ӝӧк вылысь замокез басьтыса, тылэз кысыны малпа вал ини. Ӵап со куспын телефон жингыртӥз. - Катя, тон-а? - трубкаысь кылӥськиз пиосмурт куара. - Кин бен та? - юаз Катя ачиз но. - Тодмамтэ улсы эн кариськы. Мон та, Гирой, - шуиз пиосмурт. - Кылзы ай... Тыныд Тоня вераз, дыр, Выль арез огазьын, Ольга Ивановна дорын, пумиталом шуыса. Ӵош мыном, мон дорад пырало. - Ярам, - шуиз Катя. Гиройлэсь жингыртэмзэ со вите ни вал. Табере тани сюлэмыз нӧкы вӧй кадь шуназ. Шумпотӥз Выль арез огинын пумитаны кемдэмлы. Эшъёсыз ваньзы умоесь, соосын уд мӧзмы. Уката ик отын яратоно адямиед ке луиз. Гироен соос кылем гужем тодматскизы. Катя татысь эмъяськонние ужаны соку гинэ ыстэмын вал. Одӥг пол нуназе вакыт медпунктэ егит пи пыриз. Суд йырсиё, ӝужыт мугоро. Кужмо адӟиське. Вылысьтыз дӥсез борды вӧй но тузон пыӵамын. Ымнырыз, оло, тузонэн сэрен, оло, шунды пыжемен, ыргон кадь чиля. - Ну, доктор, эмъя чаляк, - шуиз со, котькуд кылзэ мертаса сямен, лад-лад. Ачиз ӝӧк вӧзысь пукон вылэ лэзькиз. - Тани чиньыме вӧсь карыны шедьтӥ... - Вае бен учком, кыӵе-сыӵе шырпу вӧсь карем табыдӟа адямиез? - со доры матэктӥз Катя. Собере трактористлэсь вӧсь луэм чиньызэ спиртэн чылкытатӥз но, йодэн зыраса, юн-юн биниз. - Эх-ма, кытчы спирт юнме быре, - жаляса серем пыр шуиз Гирой. - Шуныт вуэн гинэ миськы вал сое, спиртлы мукет инты сюрысал... Нош ачиз синъёссэ Катя шорысь уг вошъя... Тӥни сыӵе вал соослэн нырысь тодматсконзы. Катялэн али но, со нуналэз тодаз вайылыкуз, сюлэмыз юнгес йыгаськыны кутске. Нош Гирой? Солэн "чиньыосыз табере нуналлы быдэ вӧсь луыло". Нош одӥг пол солэсь сюлэмзэ "сьӧд коӵыш" ӵабъяны кутскиз. Шӧдӥз уго: медпунктэ ӵемгес кемдылыны кутскиз Починкаысь бригадирзы. Гирой солэсь медпункт азе думем валзэ нуналлы быдэ сямен адӟылэ. Катя сярысь сюлмаськон но сьӧрлось пиосмуртлы вожпотон бугыръяло солэсь мылкыдзэ. Но тани туннэ Катя солэсь сюлэмзэ шунтӥз, Выль арез ӵош пумитаны соглаш луиз. Медпунктлэсь ӧссэ ӵогаса, Катя ульчае потӥз. Куазь пелляське. Лек тӧл лымы пырыосты, зӥр бергатыса, солань-талань поръятэ, кенер вӧзы люка. Сюрес вылын но интыен-интыен лымы ӵыпетъёс кылдӥллям ни. Катя, ымнырзэ тӧллэсь ватыса, каллен гинэ дор палаз вамышъя. Аслаз ульчаяз потыса гинэ вуттӥз - кин ке сое сутӥз. - Екатерина Семеновна, тӥ-а? - юаз шокпотэм куараен пияш. - Мон медпунктэ мынэм вал, тыл ӧвӧлысь, квартираяды ветлоно кариськи. - Мар луиз? - кушетскыса юаз Катя. - Нэнэлы урод - вакчияк вераз пияш. Починка бригадаысь кунян сюдӥсь Натальлэсь чырткем пизэ тодмаз со. Валлян гинэ та пияш, нэнэез шуге-леке вуэмысь, Катяез доразы нуллыны ветлӥз вал. Наталь кенак - нылпи ваёно кышномурт. Озьыен, татын туннэ вераськон мынэ кык муртлэн тазалыкез сярысь. Азьло ветлыкуз, Катя кышномуртэ нылпи ваён корка келяны турттэ вал, нош соиз чутрак пумит луиз: мар-о, пе, нырысьсэ-а, мар-а тазьы, больницае мынод но, кема возёзы, нош али ӵапак кысык дыр, фермаын кунянъёс вордӥськыны кутскозы. Ӧз мыны, табере тани секыт учыре вуэм. Малпаськыса сылыны дыр ӧвӧл. Катя дораз ӧз ик пыра ни, берытскыса медпунктысь мар кулэ, сое сумкаяз тыриз но, сюрес вылэ потӥзы. Выль арез пумитан сярысь Гироен вераськемзэс ӧз ке но вунэты, али соин йырин ӧвӧл. - Вай, Семи, ӝоггес ворттыты валдэ, - дыртытэ ини ачиз но Катя. Починкае вуыкузы, тямыс час котырын вал ини. Катя сумказэ кутӥз но бызьыса корка пыриз. Наталь валес вылын ӝуштыса кылле, бускель кышномуртсы гур котырын берга, ву пӧсятэ. Катя кызьы кылиськемзэ но ӧз вала, гур дурын киоссэ шунтӥз, собере чылкытак миськиз но Натальлэн койка дораз мынӥз. - Озьыен, дырыз вуиз, - шуиз со кышномуртлы пальпотыса. - Верай вал, роддоме мыноно шуыса. - Верад вал, - озьы гинэ шуиз Наталь но выльысь шугомыны кутскиз. - Мын, Семи, атайдэ ӧть ӝоггес, - вазиськиз бускель кышно пияшлы. - Шур сьӧрысь Параскиез ӧтьыны мынӥз вал, олома ӝегатске: чарка шедиз-а, шай-а. Катя бускель кышноен Натальлы юртто. Коркан нырысь шыпыт вал, но тани ляньгес куара чузъяськиз. Пичи комокез соку ик чылкыт кутэтъёсын бинялтӥзы. - Ма, таос кык кузя, лэся, ук, - чабкиське бускель кышно, Катя киысь кыкетӥзэ пичи бугорез кутыса. - Остэ быри... Со куспын Натальлэн картэз, Педор но, вуиз. Капчиямез шӧдӥське ини. Бӧрсяз ик Параски но пыриз. - Осто, Педор, - шуэ бускель кышно. - Мугорын тон чик паймымон ӧвӧл кадь но, мар дауртэмед: Наталед кыктоосты вордӥз ук. Серекъялод но, бӧрдод но. Натальлы капчигес луэм бере, кышномуртъёслы ваньзэ кулэзэ валэктыса, Катя бертыны потӥз. Дыр дас кыке потэмын вал ини. Пияш валзэ шаплыгес улляны кутскиз. Со но пичи вынъёсызлы шумпотэмзэ уг вормы ни, лэся. Веранзэ быдтыса, Катя султӥз: - Кыктоос понна! - кеськиз со, эшъёсыз шоры котырак учкыса. Ваньзы султӥзы но чаркаоссэс бушатӥзы. - Со бордысен ик кутскы вал мадёндэ, - пальпотыса Гирой шоры учкиз Тоня. - Ми татын, Починкае кошкид шуыса, кытчы пырон инты ум шедьтӥське ни вал. - Уд шедьтэ угось, оломар но кулэтэмзэ малпады ке, - шуиз Катя, синпумтӥз гинэ Гирой пала учкылыса. Коркан уката шунытгес но югытгес луиз кадь. Егитъёс бер ӵукнаозь шулдыръяськизы. Правительствоысь иворъёс Выль арлэн кутсконаз Правительстволэн Тӧроез Павел Вершинин, коньдон ужпумъёсъя министр Владимир Бельтюков но Кун Кенешысь экономикаын политикая но бюджетъя комиссилэн кивалтӥсез Софья Широбокова Уралысь республикаослэн но улосъёслэн кивалтӥсьёссылэн пумиськоназы пырисько. Кенеш Екатеринбургын ортче. Отын дэмен эскеро одӥг ужпумез - кызьы центрлэсь но улосвылъёслэсь бюджетъя кусыпъёссэс радъяно. *** Шаерысьтымы самой бадӟым Выль ар кыз "Ижсталь" Йӧ двореце валлян 3 сюрслэсь трос нылпиосты люказ. Кун Кенеш но Правительство та шулдыр ужрадэ ӧтизы пинал усточиосты, олимпиадаосын но конкурсъёсын вормисьёсты, нылпи юртъёсысь но интернатъёсысь покчиосты. Выль ар выжыкылэ люкаськемъёсты шуныт ӟечкылаз Правительстволэн Тӧроез Павел Вершинин. Валамон ини, праздникын котькудӥз ческыт кузьым басьтӥз. Толон Йӧ двореце люкаськылӥзы мумы-бубытэк будӥсь 500 пиналъёс-ПТУ- осын дышетскисьёс. Нош Толсуре ӧлексы нылпиос понна праздник ортчоз Операя но балетъя театрын. Правительстволэн Тӧроезлэн секретариатысьтыз пресс-центр. Министрен пумиськон Кыткы, дядяй, пар машинадэ... Оло Выль арлэн матэктэмез шӧдӥськиз, оло экономикаын югдур сокем урод ӧвӧл, но Удмурт Элькунысь промышленностья министрлэн Виктор ДОЛГОВЛЭН журналистъёсын пумиськыкуз мылкыдыз умой вал. Со вакчияк вераз та министерствоен чакласа возёно удысъёсын югдур сярысь, тодматӥз арлы нырысетӥ йылпумъянъёсын. "Ижмаш", Чепца механической завод, Воткинск машзавод, "Удмуртнефть", "Удмуртэнерго" - тани соос, асьме промышленностьлэсь туала ымнырзэ возьматӥсь валтӥсь предприятиос. Котькудаз отын ар ӵоже ог миллиард манетлы ваньбур потто. Валамон, азьло аръёсы асьме заводъёс тросгес выризы обороналы кулэ луись тӥрлык лэсьтонэн. Берло дыре югдур воштӥськиз. Озьы ке но, огъя ваньбур поттонын сыӵе вузъёслэн быдӟалазы ог 20 процент луэ на. Тани алигес Саратов областьысь одӥгаз полкын "Тополь-М" ракетаос дежурствое интыямын. Та туж кужмо оружиез, кызьы тодмо, кылдыто но лэсьто Удмуртиын. Вань пусйымонэз мукет удысъёсын но. Басьтом нюлэс хозяйствоез ик. Кисьмам тэль ичи ӧвӧл, сое али уже кутыны луоно ни. Кылсярысь, "Увадрев" предприятиын малпало бадӟым фанера лист поттонэз радъяны. Та уже куаро писпу но ярасал. Бӧрысь дась продукциез кунгож сьӧры но келяны быгатысалмы. Кубометрез уго 300-400 доллар сылэ. Но со понна республикаямы юнматоно нюлэс хозяйствоез выльдонъя нимысьтыз программа но сое будэтонэ коньдон шедьтоно. Уралысь областьёс но республикаос огазеяськыны малпазы пияла поттон удысын. Кылдытэмын та удысын ужасьёслэн ассоциацизы. Кивалтэ соин Можгаысь "Свет" заводлэн директорез Владимир Мохначев. Оскон вань, пияла поттонын ӝоген радыз шедёз но озьы бюджетэ ватсаса коньдон вуоз шуыса. Пумиськон дыръя паськыт вераськон ӝутскиз "Ижмаш" но отчы пырись автозавод пумысен. Ар куспын асьмеос коть 30 сюрс машина поттысалмы ке, пусйиз министр, "Ижмаш-авто" ас кожаз но мукет валтӥсь предприятиосын артэ сылысал. Но... кылем арлэн нырысетӥ ӝыныяз завод ньӧмыз понна гинэ ужаз. Я нырысь ӧй вал моторъёс, я бӧрысь, ВАЗ-эн огкыл гожтыса, таосыз шедизы, но автозавод тросгес машина поттыны ачиз дась ӧй вал ни... "Орбитаез" басьтӥсь ичи ӧвӧл бере, сое поттоно. Виктор Долгов люкаськемъёсты оскытӥз, 1999 арын конвейер ӟечгес ужалоз шуыса. Мотопроизводство сярысь верано ке, "Ижъёс" ваньмыз ик берло дыре меӵак кошко кунгож сьӧры, Азиысь странаосы. Со чотын "Ижмаш" ӧжыт ке но каньылгес шокчыны быгатэ. - Асьме магазинъёсы мотоосмес келям ке, соосты шӧртчи ужбегатӥсьёс одно ик кунгож сьӧры келялозы, озьы Ижысь специалистъёслы пайдаё вузкарыны люкетозы гинэ, - шуиз Виктор Ивапович. Кызьы тодмо, "Ижмаш" алигес "кышнояськыны" малпаз, Чехиысь "Шкодаен" тодматскиз. Шонерзэ вераса, та кык предприятиос куспын азьланьын уртче ужаны мылкыд карон сярысь соглашение гожтэмын. Ваньмыз чакламъя ӧръяськиз ке, вуоно гужем, оло, договор но кылдоз, отӥяз, кин тодэ, "нылпи" но вордскоз. Огъя производстволы кутскон гинэ сётэмын ай, та ласянь уно ар ӵоже ужаськом ни ке но, пусйиз министр. "Форд" тодмо компаниен номыр ӧз пӧрмы. Американецъёслэн мылкыдзы вал металлургической комплексын но выль интыын машина поттыны-бичаны. Кореяысь "Хёндэ" турттӥз уже кутыны автозаводлэсь площадкаоссэ. Кореяын югдур уродмемен, таиныз но, кызьы шуо, ӝук ӧз пӧзьы. Германиысь "Фольксваген" дорамы кемалась учкылӥз ни, вуылӥзы отысь пӧртэм специалистъёс. Та фирма кӧня ке ар талэсь азьло басьтӥз "Шкодалэсь" 70 процентсэ акциоссэ. Озьы Чехиын кутскизы туала куронъёслы тупась ӟеч автомобиль поттыны. Табере тани немецъёс но чехъёс, оло, басьтӥськозы асьме заводэз выльдон борды. Мон малпасько, со луоз огъя предприятие, уже кутыны быгатом автозаводлэсь луонлыкъёссэ. Таӵе сюрес милемлы тупамонгес кадь потэ. Мылкыдмес юнматэ Россиысь правительстволэн та ужын мыло-кыдо юрттэмез но. Тӥни сыӵе осконъёсын улэ промышленностья министр. "Орбитамес" но "Фольксвагенэз" кытким ке, оло, зэмен но, нюре пуксем уробомес ӵошкыт азе поттыны быгатом?.. И. ЛЕБЕДЕВ. Луоз КСМ Октябрь толэзьлэн пумаз комсомол пусйиз 80 ар тырмонзэ. Зэм, али егитъёслэн сыӵе огазеяськонзы ӧвӧл ни. Ӧвӧл огазеясь кужым. Оло, соин но будэ, дыр, йыружъёслэн лыдзы. Нош Кияса ёросысь Ермолаево но Карамас-Пельга гурт администрациос кылдытӥзы егитъёсын ужанъя советъёс. Азьланяз ёросын КСМ но (Киясовский союз молодёжи) кылдытыны малпало. Г. ВАСИЛЬЕВ. Университет буре вае "кизилиоссэ" Удмурт кун университетлэн издательствояз потӥз "Вестник Удмуртского университета" журналлэн нимысьтыз номерез. Со сӥземын история наукаосъя докторлы, профессорлы В. Е. Майерлы (1918-1985) 80 ар тырмонлы. 40 ар ӵоже Василий Евгеньевичлэн нимыз, солэн наукаын но дышетон удысын тыршемез та учебной заведениен герӟаськемын вал. Журналын печатламын В. Е. Майерлэн озьы ик Ижевскысь, Ярославльысь, Нижний Новгородысь но мукет городъёсысь историкъёслэн ужъёссы. В. РОГАЛЕВ. Чупчи дурысь кибашлыос Поттэм вузъёслэн вылӥ ӟечлыксы но ужазы бадӟым пайда сётӥсь амалъёсты кутэмез понна ортчем арын Россия Федерациысь Правительстволэн премиез сётэмын "Чепецкий механический завод" акционер огазеяськонлэн коллективезлы. Заводлэн музеяз возиське США-лэн флагез. Сое предприятиын ужасьёслы Америкаысь одӥгез фирма кузьмаз вал татын поттэм аспӧртэмлыко вузъёслы вожъяськыса. Вераны кулэ: Чепецкой завод, Америкаысь "Wестихгхоусе" но Франциысь "Фраматоме" предприятиосын ӵош, дунне вылын цирконий но солэсь сплавъёс но конструкциос поттонъя дунне вылын одӥгез кужмоез луэ. Нош ваньмыз со кутӥське атомен ужась электростанциослэн ядерной реакторазы. Глазовысь ЧМЗ усьтӥськиз витьтон кык ар талэсь азьвыл. Солэсь азьлогес со заводын патрон лэсьтӥзы. Ядерной энергетика удысын та предприятие странаямы нырысетӥез вал. Ӵапак отысь цехъёсын рудалэсь корт уран поттыны ӧдъязы. Али но та завод Россиын одӥгез бадӟымез луэ. Кортлэсь уран поттон понна, тросэн кулэ корт кальций. Соин но сое татын ик дасяны кутскизы. Нырысетӥосыз уран-графитлэсь ядерной реакторъёс ужазы ляб бергась нейтронъёслэн кужыменызы. Соослэн шоразы кылдӥзы шуныт висъясь элементъёс. Со понна кулэ вал туж вылӥ температуралы чидась корт. Заводысь специалистъёс та уже кутыны ӵектӥзы туж аспӧртэмлыко кортэз - циркониез. Со уго котьмалы чидась, уг сётӥськы химической суретъёслы, но самой пусйымонэз - со ас пыртӥз лэзе нейтрон тылсиосты. Та кортлэн луонлыкъёсыз туннэ но пумозяз эскеремын ӧвӧл на. Озьыен, Глазовын нырысетӥ тонна цирконий поттыны кутскемын ньыльдон ар талэсь азьло. Со дырысен ик ЧМЗ атомной энергетикалы кортлэсь уран, кальций, цирконий но соослэсь сплавъёс поттонын одӥгез кужмоез предприятие луэ. Котькудӥз заводын ужась нырысетӥ нуналысеныз ик сюлмаськиз поттэм вузлэн вылӥ ӟечлыкез понна. Сыӵе курон арысь аре кужмояз. Соин но берло 20 аръёсы заводэ одӥг ӝожтӥськон но ӧз на вуы. Со бордын ик возиське 11 сюрсъем коллектив. Вералом таӵе учырез. Цирконийлэсь гумыос лэсьтӥсько аспӧртэмлыко технологиосъя - котькудӥз дась луэ 60 нуналскын, нош ӟечлыксэ дунъяло 15 куронъя. Татын микронъёс гинэ лыдэ уг басьтӥсько ни, эскериське котькуд гумылэн кристаллической решёткаез, кортлэн котькуд аспӧртэмлыкез. Сыӵе эскерон цехысь ОТК-ын гинэ радъямын ӧвӧл. Азьланяз сое эшшо но эшшо ортчыто на. Цирконийлэсь выль гумы поттон огшоры уж ӧвӧл. Со ортчыны кулэ "кезьыт" но "пӧсь" эскеронэз. "Кезьытэн" эскерон ӝыны ар кыстӥське. Ваньмыз ке умой ортче, басьтӥсько реактор пушкын пӧсьлы чиданэз эскерон борды. Конструкциез отчы арлы- кыклы интыяло. Бӧрысь, реакторысь поттыса, сое туж пыр-поч эскерон но выльысь отчы ик интыяло. Нош продукциез кунгож сьӧрысь атомен ужась электростанциослы вузан понна, эшшо вить ар ӵоже дасяськыны кулэ на. Нош сое меӵак вераськем дырлы келяно. Со секыт ужпум. Но глазовъёс сётэм кылзэс котьку дыраз быдэсто. Асьмелэн реакторъёсмы Европаын туж оскымонэсь лыдъясько но уно странаосын кутӥсько. Бен, цирконий - паймымон корт. Но, жаляса вераны кулэ, со "ватэмын" вал, промышленностьлэн мукет удысъёсаз ӧжыт кутӥськиз. Циркониез луэ нуйтыны, пачкатыны, вандыны, пӧзьтыны... Зэм, сыномисьтэм кортлэн сярысь, солэн дуныз данаклы вылӥынгес. Но со понна, кылсярысь, цирконийлэсь лэсьтэм аппаратураез нефть но газ поттӥсьёс 15 арозь кутыны быгато. Нош кыӵе паймымон гырлыос кисьтыны луэ та кортлэсь! Вылтуссыя соос зарниям-азвесям кадесь, нош куаразы кыӵе жингрес. Зэм, берло дас аръёсы Глазовын таӵе вуз поттон кулэсмиз. Отын шӧдӥськиз Чернобыльын луэм шудтэм учырлэн бервылыз но. Странаямы дугдытэмын вал лэсьтӥськись АЭС-ъёсты но выль блокъёсты ӝутон, куашказ СССР, куд-огез атомен ужась станциос кунгож сьӧры кылизы. Озьыен, кун заказъёс но вуэмысь дугдӥзы. Но наука но техника удысын азинсконэз уд дугдыты. Нош атомез уже кутон туала вакытэ самой дунтэм усе. Дунне вылын сое умой валало. Соин ик администрация мукет кунъёсын кусыпъёс тупатон сярысь сюлмаське. Валамон ини, со понна вузано вузлэн ӟечлыкез туж вылӥын луыны кулэ. Заводын ужасьёслэн тыршемзы юнме ӧз луы. Валлян арын завод ӟечлыкъя калык куспо исо-9002 сертификат басьтӥз. Самой со ик мукет странаосы потон понна усьтон луэ. Но капчиен ӧз сётскы со сюрес. Ар но ӝыны кулэ луиз кулэ документъёс дасяны, ӟечлыкез эскерон система кылдытыны но соин кивалтыны. Али ЧМЗ дасяське экологияя калык куспо исо-14000 сертификат басьтыны. Завод азе юнэсь куронъёс пукто уго заказ сётӥсьёс но. Соос быдэсъясько шуыса вера котырысь инкуазь но. Кылсярысь, Чупчи шурын пумиськылэ ни стерлядь. Нош та чорыг чылкыт вуэз яратэ. Завод мукетъёсыз сямен ик улэ но азинске экономика удысын шуг-секытъёсын нюръяськыса. Озьы ик кылдыло ог-огеныд зачёт амалэн ужан, бартер, уждун тыронъя пунэмъёс, пени но штрафъёс. Озьы ке но предприятие Удмуртилэн бюджетаз налогъёс тыронын куинетӥ инты басьтэ, нош городлэн казнаяз со 60 процентсэ коньдон сётэ. (Вераны кулэ: котькудӥз ньылетӥез городын улӥсь ЧМЗ-ын тырше). Кытысь бен коньдон шеде? Со вуэ калык куспо контрактъёсты быдэстэм понна. Озьы ик бадӟым саклык висъяське мукет вузъёсты поттонэз паськытатонлы. Вань та азинсконъёс басьтэмын Чепецкой механической заводлэн генеральной директорезлэн Н. А. Ганзалэн сюлмаськеменыз но, Николай Алексеевич та предприятие вуиз вить ар талэсь азьло. Нырысь-валысь калык сое чакласагес улӥз - уго вуэмын палэнысь, "бугыръяськись" Украинаысь. Но со дыре ик воксё палэнысь но уд шуы - Томскысь политехнической институтэз йылпумъяз. Адямиез ужезъя дунъяло, нош со син азьын. Берло аръёсы администрация тросгес сюлмаськиз "улэп кылён" но кибашлы ужасьёсты утён сярысь. Уно пол вошъяно луиз ужан амалъёсты. Одӥг пол озьы но луиз, 700 адямиез ӝыны арлы азбар ӵужисе келязы. Кышкатскиз калык. Зэм, рельсаос вылэ бен ӧз пот, но югдур лэчытомиз. Нош собере быдэстэм заказъёс понна коньдон вуиз. Ваньмыз интыяз пуксиз кадь. Куамын сизьым мурт гинэ ужысь кошконо кариськиз. Соосыз но куд-огез выльысь берытскизы. Собере эшшо одӥг йырвисён вуиз на - августэ гудыртэм кризис, уждун тырон ог куинь толэзьлы омыре "ошиськиз". Таӵе югдурез тодыса кадь ЧМЗ-ын пластиклэсь карточкаос тупатӥзы. Соосъя заводлэн сиён-юонэн, промышленной вузъёсын вузкарон магазинъёсысьтыз, столовойёсысьтыз, ресторанысьтыз вуоно уждун чотын кулэ вуз басьтыны луылӥз. Табере выль куректон - коньдонэз инфляция "сие". Соин ик кивалтӥсьлы выль заказчикъёс утчаса бызьылоно луэ. Таӵе кужмо заводэз куашкатыны уг яра. Кылем арын мартэ предприятиын быдэс коллектив пӧлын юалляськон ортчиз. Оскыны шуг, но "Кыӵеен лыдъяськоды ӵош ужась эшъёстэс?" юанлы 96 процентэз валэктӥз: "Умоен". "Нош кыӵеен лыдъяськоды кивалтӥсьёстэс?" юанлы сыӵе ик валэктон сётӥз 85 процентэз. Правительстволэн постановлениезъя завод социальной удысэз сётӥз городлы. Но озьы ик со коньдонэн юрттэ Спортъя йӧ дворецлы, культурая "Россия" дворецлы, юрттэ нылпи юртлы, возе хоккейной командаез, ПТУ-ез. Со дыре ик городын ужтэк кылемъёслэн лыдзы ӧжыт ӧвӧл. Котькудӥз городын улӥсь, со ачиз ЧМЗ-ын ке но уг ужа, вала, завод макем бадӟым инты басьтэ солэн улоназ. Но атомной промышленностьын кылдэм секыт югдурез валамзы уг пот куд-ог вылӥ кивалтӥсьёслэн. Вераськонъёс ветло, вылӥын куд-огез пукисьёс, пе, та ёзэз куашкатыса приватизировать карыны но солэсь ваньбурзэ тус-тас карыны малпало. Яке та ёзэз Минэнерголы сётыны ӵекто. Но отын специалистъёс-атомщикъёс ӧвӧл. Со министерствоын азьло сямен ик нырысь сюлмаськозы музъем эгыр но кизер эстӥськон шедьтон сярысь. Нош соку АЭС-ъёс ӵындӥсь гумыос пӧлы йыромозы. Озьы ке но, секыт висёнэн курадӟись Россия азьвыл сямен ик кужмо держава луэ. Со озьы возиськоз атомной промышленность вань дыръя гинэ. Со куашказ ке, асьмемын лыдъяськемысь дугдозы. Соин ик, номыр шоры учкытэк, заводын азьланез сярысь малпасько. Кутскиз цирконий поттонэз выльдон. Ялан паськытгес кутӥське цирконийлэн диоксидэз. Таиз корт ӧвӧл, сое керамикаен ӵошатыны луоз ни. Та материаллэсь ӟеч пӧрмо пӧсьлы но химической суретъёслы чидась посуда, шайбаос но вентильлы прокладкаос, хирургъёслы вандылон инструмент. Цирконийлэн диоксидэз вылын кылдытэмын электрохимической генератор но трос мукетыз. Азьланяз басьтӥськыны малпало чылкак выль уж борды. Со шер пумиськылӥсь рудаез кутон. Али солы кутскон гинэ сётэмын ай. Но коньдон ӧвӧлэн асьмелэн заказчикъёсмы ичигес на. Соин ик кусыпъёс тупатоно луоз мукет кунъёсын. Нош та дыре завод тырше выль пумо ядерной эстӥськонлы ватсэтъёс дасян бордын. Наука но техника удысын Россия но Америка уртче ужало. Глазовысь атомщикъёс США-е вуылыкузы, вераськон потӥз вал туж аспӧртэмлыко аккумуляторной батарейкаослы нимысьтыз сплав кылдытон пумысен. Со кутӥськыны быгатысал промышленностьлэн вань удысъёсаз. Американецъёс сыӵе компонентъёс кылдытон бордын кӧня ке ар ӵоже тыршиллям. Кык толэзь ортчыса, океан сьӧрысь куноос ЧМЗ-е вуизы. Соос соку чылкак паймизы - Удмуртиын сыӵе сплав кылдытэмын ни. Ӝоген выль батарейкаосты ӵошен поттон сярысь американецъёсын огкыл гожтэмын вал. Нош эшшо кык толэзь ортчыса, Ю. М. Лужковлэн кичӧлтэмезъя, столицаысьтымы кӧня ке предприятиослы глазовъёслэсь вуззэс келян сярысь кенешемын. Табере Глазовысь аккумляторъёсын ужалоз Москваысь электротранспорт. Озьы тӥни, наука, вылӥ технологиос но сюлмо адямиос огазеяськыса кылдыто ноку адӟымтэ-кылымтэ арбериосты. В. ЛОБАЧЕВ. Снимок вылын: тани соос, Чупчи дурысь кибашлыослэн лэсьтэм арбериоссы. Удмурт Республикаысь Правительство мур кайгыремзэ вера 1998 арын 31 декабре Яр ёросын сюрес вылын шуккиськыса быремъёслэн Поздеев Сергей Михайловичлэн, Поздеев Михаил Егоровичлэн, Поздеева Ольга Григорьевналэн, Демин Анатолий Васильевичлэн, Наймушин Александр Анатольевичлэн, Шутов Юрий Петровичлэн ӵыжы-выжыоссылы но матысь муртъёссылы. Дышетон удысын Пырысал-а Ломоносов университетэ туннэ? Вакчияк: Владимир Александрович БАЙМЕТОВ. Вордскемын Яр посёлокын. Йылпумъяз Москваысь Ломоносов нимо государственной университетэз. Психология наукаосъя кандидат. Проректор луыса ужа 1994-тӥ арысен. Удмурт кун университетысь дышетон ужъя проректор В. А. Байметов шуиз: - Физико-математической факультетэ пырысал, дыр, конкурсэз отын самой ичи, нош экономической, юридической факультетъёсы - шуг вераны. Гуртысь егитъёслы отчы шедьыны секытгес. Та кык факультет университетэ нимаз институт луыса пыре, таӵе статус сётӥське тужгес но кужмо ёзъёслы. Владимир Александрович верамъя, визьмо, быгатонлыко нылъёс но пиос районъёсын ӧжыт ӧвӧл, но соослэн тодон-валан инъетсы, городын улӥсьёсыныз ӵошатыса, шӧдскымон лябгес - сомында ай гурт школалэн луонлыкез. Городысь абитуриент шедьтэ на усто репетитор, нош кыдёкысь гуртысь кинэ медъялод, мае солы тырод? "Комсомольская правда" газет гожъямъя, Москваысь институтэ яке университетэ пырон кылем арын самой ӧжытсэ 20 сюрс доллар сылӥз. Дунъёс азьланьын но уз кулэсме, малы ке шуоно, англи кылъя репетитор 1 час ужамез понна гинэ басьтэ 50 доллар. Нош тужгес но престижной вузъёсысь дасясь (подготовительной) курсъёсын дышетскон, кылсярысь, МГИМО-ын (Международной кусыпъёсъя Москваысь кун институт) сылэ 2 сюрс доллар. Сое йылпумъяса но, кин тодэ, дипломатъёсты дасясь вузэ шедёд-а, уд-а. Ӵошатон понна: 1996-тӥ-1997-тӥ арын Россиын 573 кун вузын дышетскиз 2 миллион 800 сюрс мурт. 1995-тӥ-1996-тӥ арын 569 вузын - 2 миллион 600 сюрс. Со дыре ик кун луисьтэм 244 вылӥ дышетскон заведениын 1996-тӥ-1997-тӥ арын тодон-валан басьтӥзы 162,5 сюрс егитъёс, 1995-тӥ-1996тӥ арын 193 вузын - 135 сюрс нылъёс но пиос. Вылӥ верам лыдпусъёс борды нимысьтыз валэктон сётыны кулэ на меда? Огзэ пусъёмы: коньдон тырыса басьтэм диплом ӟеч специалистэз дасям сярысь уг вера на. Таин быдэсак соглаш В. А. Байметов но: - Мон понна валантэм: малы туннэ нуналозь нокин но сыӵе учреждениослы кулэезъя правовой дунъет уг сёты? Пӧлысьтызы тросэз асьсэды "университет" шуыса нимало, нош статуссыя дышетон удыслы матын но ӧвӧл, калыкез пӧян. Ижевскысь коммерческой вузъёс пӧлысь мон висъясал Инженеръёсты дасянъя калык куспо академиез гинэ (ректорез И. Е. Синицына). Татын, зэмен но, ӟеч кадръёсты будэто. Кылемъёсыз сярысь ӧзьы шуыны уг быгатӥськы. Дун тырыса дышетӥсь вузъёс пумысен лэчыт вераськон мынӥз Поволжье но Урал котырысь ректоръёслэн ноябре ортчем кенешоназы но. Россиысь калыкез дышетонъя министр азе соку меӵак ужпум пуктӥзы та выллем учреждениосты законъя эскеронъёс ортчытон ласянь. Зэмен но, кытын кулэ, отын малы ке но правоез утисьёс юн кылзэс вераны уг дӥсьто. Тани УдГУ-ысь куд-ог студентъёс, кивалтӥсьёссы тодытэк, огдыре дышетско Ижевскын но, Екатеринбургын но (огдыре - кыказ но очной отделениын). Тумошо ук. Сояз вузын уксёдэ гинэ дыраз тыр - оценка пуктозы, озьы ик диплом но сётозы. - Самой таӵе учыръёсты ик малы ке но прокуратура уг адӟы,- шуэ Владимир Александрович,- нош ми Можга педучилищеен ужаны гинэ кутским, соку ик эскерисьёс вуизы: законэз, пе, тӥяськоды, дышетыны лицензиды ӧвӧл. Огшоры адямилы, со коть сизьым пол учёной медло, туала улон-вылонлэсь радлыксэ валаны секыт. Удмурт кун университет котыр ласянь тыронъёсы выемын, со понна тылтэк но кельтылӥзы ни. Кун луисьтэм учреждениосын югдур мукет. Пиналъёсты соос дышето школаосын: директорен огъя кылэ вуид ке - сюлмаськонэд, йырвисёнэд данаклы кулэсмоз. Нош студентъёслы тодон-валан сёто... УдГУ-ысь ик преподавательёс. Тӥни озьы: кун луисьтэм вылӥ дышетскон заведение дан но кужым люка кун луисез чотын. Таӵе югдур асьме дорын гинэ ӧвӧл - быдэс Россиын. Кытчы со обществомес вуттоз - тодмо: студентъёсты визьзыя уз кутэ, нырысь ик учкозы кисызы шоры. - Учке ай, ма лэсьтӥське туннэ Ижевскысь технической университетын. Государство, шонерзэ ке верано, солэсь кулэлыксэ уг адӟы ни, оборона удыслы инженеръёсты дасян дыр быриз. Политика ӧз ке воштӥськы, зэмен но, 2-3 ар куспын университет куашкалоз, нош преподавательёсты киултозы коммерческой заведениос. Туж жаль: Правительство дышетон удыслэсь валтӥсь кужымзэ ӧз вала, валамез но уг поты кадь. Таӵегес мынам малпанэ национальной кадръёсты дасян ласянь но. Басьтом удмурт филологияя факультетэз. Быдэс дуннеын со - одӥг, но кунгож сьӧрын данэз вань. Берло аръёссэ гинэ удмурт кылэз дышетон вӧлмиз Францие, Германие, Австрие, финн-угор выжыосмес вератэк. Европаын улӥсьёс асьме борды кыстӥсько. Тае коть адӟыса, республикамылэн кивалтӥсьёсыз одӥг пол кутскыса, ӟеч-ӟеч юрттэ вал факультетлы! Зэм, солэсь 50 ар тырмон нруналзэ пусйизы ик... данъян грамотаен. Тау карон кылъёс вераны кулэ Нациосын ужанъя комитетлы, солэн кивалтӥсез С. К. Смирнова университетэз уг вунэты. Удмурт филологияя факультет висъяське ӟеч преподавательёсын - татын ужа наукая куинь доктор, мукетаз огаз но со мында ӧвӧл. Озьы ке но, удмурт кылэз дышетон престижнойёсыз радэ уз шедьы, малы ке шуоно, ас вордскем музъем вылаз но солэн валтӥсь интыез ӧз шӧдӥськы на. Проректор В. А. Байметов дасо арлы азьлане учкыса вера республикалэсь шугъяськонъёссэ. Гуртысь школа туала куронъёслы тупась абитуриентэз дасяны уз быгаты, уката но али - со понна кулэ туж ӟеч инъет. Асьмелэн со ӧвӧл, ванез но, коньдонлы ёрмыса, арысь аре вужме. Та - нырысетӥез. Кыкетӥез - уждунтэк пукись сютэм дышетӥсь, мур тодон-валан сётыны уз сюлмаськы. Озьыен, али школаез йылпумъясьёс эшшо но лябытгес луозы? - Партия кивалтон аръёсы национальной кадръёсты дасян зол пуктэмын вал. Соку чакласа возизы, кӧня удмуртъёс, гуртысь кӧня егитъёс шедьыны кулэ сояз яке таяз дышетскон заведение. Али квота быдтэмын. Целевой амалэн Правительство ласянь таяз дышетскон арын висъямын 80 инты очной но 40 инты заочной амалэн ужась отделениосын, коньдон вуыны кулэ федеральной бюджетысь. Но центрлэн юрттэмезлы оскон быремын ни, вуэм уксё ӝыны уждунлы но уг тырмы. Университетлэсь кивалтӥсьёссэ туннэ шугъяськытэ стипендия тырон но. Законъя сое басьтыны кулэ "отличникъёс" гинэ, нош сёто "ударникъёслы" но. Берлоосыз пӧлын - тросгес гуртысь егитъёс. Кызьы соослы юрттытэк? Проректор верамъя, прокуратура та борды зол-зол басьтӥськиз ке, стипендилы чаклам фонд быдэсак кошкоз "5"-лы дышетскисьёслы. Ватонэз ӧвӧл - ваньмыз сямен соос - городын, мумы-бубыоссы бордын улӥсьёс. - Сюлэмез тужгес но вӧсь каре дышетӥсьлэн, дышетскем адямилэн туала обществоын кулэтэм луэмез. Куке но самой гажано, данъяськоно профессилэн данэз пыд улэ лёгамын. Городын гинэ но (!) туннэ уг тырмо физикая, математикая, иностранной кылъя преподавательёс, нош ма лэсьтӥське ӟуч кылэз но литератураез дышетонэн? Со ялан уллань но уллань ваське, валтӥсь кужымзэ ыштэ. Медалистъёс но "отличникъёс" сярысь ке верано, 10 ар талэсь азьло школаез йылпумъямъёсын туалаоссэ уд ӵошаты. УдГУ: 1998 ар Районъёс Куриськон сётэмын Медален Пыремын Ӟучъёс Пыремын Удмуртъёс Пыремын Бигеръёс Пыремын Алнаш 63 38 6 5 6 6 54 29 3 3 Балезино 21 10 3 2 6 3 15 7 - - Вавож 20 8 2 2 7 3 13 5 - - Воткинск 27 20 2 2 20 14 5 4 1 1 Глазов 4 2 - - - - 4 2 - - Грахово 17 4 - - 5 1 9 2 1 1 Дебес 21 10 3 3 7 4 14 6 - - Завьялово 94 45 15 10 35 18 53 25 2 1 Игра 56 28 6 4 21 13 33 15 2 - Камбарка 8 4 2 1 4 2 2 - 2 2 Каракулино 19 9 2 1 17 7 - - 1 1 Кез 22 14 1 1 6 5 16 9 - - Кизнер 40 14 7 3 19 8 18 6 3 - Киясово 29 13 1 1 14 6 14 6 1 1 Красногорск 9 5 1 1 5 2 3 2 1 1 Пичи Пурга 69 39 15 12 11 9 57 30 1 - Можга 48 21 4 1 10 3 37 18 1 - Сарапул 9 4 2 2 6 3 2 1 1 - Селта 20 9 1 1 9 4 11 5 - - Сюмси 19 6 4 2 13 3 6 3 - - Ува 79 31 18 11 38 15 38 16 - - Шаркан 33 15 6 5 2 - 31 15 - - Юкаменск 8 4 - - 1 1 6 2 1 1 Як.-Бодья 41 23 9 6 18 13 22 10 - - Яр 7 1 1 - 4 1 3 - - - - ______________________________________________________________________ Ваньмыз 783 377 111 76 284 144 466 218 21 12 Городъёсъя суред таӵе: Ижевскысь ваньмыз вуэмын 1908 куриськон, пыремын 1067-ез; Камбаркаысь - 16, пыремын 10-эз, Глазовъя - 46-ысь-21 мурт, Можгаысь - 70(34), Воткинскысь - 122 (58), Сарапулысь - 97 (34). Статистика умой возьматэ ӵуказе улонмес. Лыдпусъёсъя али ик вераны луоз, квота тупатытэк, вылӥ школаын азьланяз дышетскозы городъёсысь умойгес улӥсь семьяосысь потэм нылпиос, гуртын будӥсь эшъёссэс соос капчиен палэнтозы. Югдур ке ӧз воштӥськы, вузын дышетскон ӝоген пӧрмоз "диплом вузан-басьтонлы", тодон-валан люкан кылёз кыкетӥ интые. Шонер пусъемын вал Россиысь ректоръёслэн дорамы ортчем кенешазы: дышетскем понна государство коньдон куре бере, соку мед висъялоз проценттэк кредит, ссуда. Таӵе амалэн аслыз кивоштӥсьёс дася быдэс дунне, вань азьмынӥсь странаос. Нош визьмо нылъёсмы но пиосмы асьмелэн тырмыт, сюрес гинэ соослы усьтоно. Людмила МЕДВЕДЕВА. * В. А. БАЙМЕТОВ - Удмурт кун университетысь дышетон ужъя проректор. Фотоез Владимир КАМАШЕВЛЭН. Синву пыр ӟечкылан Ньыльдон арлэсь но кема гожтӥськылӥ "Советской Удмуртия"-"Удмурт дунне" газетлы. Коньдон ӧвӧлэн, табере пятница номерлы гинэ гожтӥськыны быгатӥ. Туж ӝож потӥз таӵе улонмылы, почтаысь зар-зар бӧрдыса потӥ. Сизьым ар улӥсько ини одӥгнам, туж мӧзмыт потэ вӧзам нокин ӧвӧлысь. Кутскиськод но, газет лыдӟиськод - кинэн ке вераськиськод кадь. Сюлэм нош ик буйга. Нош таяз арын арнялы одӥг пол гинэ пумисько на яратоно газетэным, чидатэк возьмаса уло ни со нуналэз. Туж секыт потэ люкиськыны яратоно эшеным. Гажано редакциын ужасьёс! Мон бадӟым тау карисько тӥляд тыршемдылы, калык понна сюлмаськемдылы. Ваньдэсты ик - куамын куать муртэ - ӟечкыласько Выль арен. Е. Булычева. Вотка город. Оскон сётэ Гуртын югдур секыт. Берло дыре со уг тупатскы. Тани Агропромышленной комплексъя фондэ Глазовысь но Сарапулысь ликёро-водочной заводъёс, 2,6 миллион манет интые, ваньзэ-ӧвӧлзэ 333 сюрс манет гинэ висъязы. Соин ик гурт хозяйствоос оско СБС-АГРО банклэн нимаз фондысьтыз кредитъёслы. Озьы шаерысьтымы банклэн ёзэз та удысэз бурд улаз кадь басьтэ. Со кемалась юрттэ ни нянь будэтӥсьёслы, пудо утисьёслы, фермеръёслы но переработчикъёслы. Кредит басьтӥсьёслэн лыдзы пумен йылэ. Али соос 80 пала лыдъясько ни. Ваньзэ 75,5 миллион манет ссуда басьтыны чаклало. Фермеръёс но вунэтымтэ: 22 крестьян (фермер) хозяйство пунэмен 1 миллион манет басьтыны курон сётӥз ни. Г. РОМАНОВ. "Дэмен" но "Одо Мари ушем" эшъясько Удмурт культурая "Дэмен" огазеяськонысь эшъёс, поръёслэн дэменлыксылэн кивалтӥсеныз А. И. Радыгинэн ӵош люкаськыса, ужрадъёс ортчытъяны кенешизы. Нырысетӥез пумиськон Грах ёросын вал. РДК-лэн юртаз кузёос Ю. К. Рожин, А. В. Тарасова, А. И. Исхаков но татысь удмуртъёслэн но поръёслэн мукетъёсыз азьветлӥсьёссы туж шуныт пумитазы Ижысь куноосыз. Соос пӧлын вал "Дэменлэн" кивалтэтысьтыз В.А. Осипов, К. Н. Исупова, Ю.И. Кузьмина, "Одо Мари ушемлэн" тӧроез А. И. Радыгин, удмурт но пор артистъёс. Залын пукисьёс кужмо кичабонъёсын данъязы син шоры йӧтымон "Инвожо" ансамблез, Юлия Кузьминалэсь но Светлана сузэръёс, Яковлевалэсь, Михаил Журавлёвлэсь кырӟанъёссэс. Учкисьёс, сцена вылэ тубыса, нош ик лыктыны, удмурт но пор гуртъёсы вуылыны, гуртын улӥсьёслы шумпотон вайыны куризы. Тунсыкъяськизы Ю. Кузьминалэн сборникеныз. Юлия но Светлана, чебер кырӟаменызы сяна, учкисьёсты паймытӥллям аспӧртэмлыко туала удмурт дӥсенызы но сцена вылын чебер возиськеменызы. Грахысь поръёслэн дэменлыксылэн кивалтӥсез шуиз: "Асьмелы трос гинэ дышетсконо ай, вылӥ культураозь ӝутскон понна". Поръёс но удмуртъёс кузь сюресэз дугдылытэк кырӟаса ветлӥзы. Поръёс синмаськизы "Инвожолэн" пыдэстэм, ноку кысонтэм мылкыдызлы, ӟанзэ (лулсюлэмзэ) усьтыса, кыре поттыса возьматыны быгатэмезлы. Поръёс, валамон ини, туж чырмыт экто. Сьӧразы егитъёссэс но ваиллям. Соослэн вылазы асьсэлэн дӥсьсы вал, чебер эктӥзы но кырӟазы. Удмурт егитъёслэн "Шунды" огазеяськонзылы, поръёслэсь адӟем карыса, мур-мур пыриськоно вылэм калык культурамес утёнэ. Пиналъёсмылэн удмурт луэмзы ӧз поты ке, асьме калыкмылэн ӵуказе нуналыз вордӥськоз на шат?! Альберт Разин, Удмурт культурая "Дэмен" огазеяськонлэн тӧроез. Дэменъёс - котьку дэмен Удмурт культурая "Дэмен" огазеяськонлэн кивалтоназ быръемъёс таяз учыре но Выль арез пусйизы ваньзы огазьын - дэмен. Ӝӧк сьӧры пуксемзы бере, тӧрозы А. Разин ваньмызлы огкадь юан сётӥз: маин узыр вал ортчемез ар? Мар сӥзьысалды эшъёстылы вуонояз аре? Улонмы секыт ке но, трос шумпотымонзэ, пичиесь ке но, вормонъёссэс ивортӥзы дэменчиос: огезлы квартира сётӥллям, мукетызлэн семьяяз выль кен лыктэм, куинетӥезлэн пиез университетэ дышетскыны пырем. Мукет радын пукисьёс иворто: огез гожтэм выль кырӟан, мукетызлэсь пизэ Эстоние дышетскыны ыстӥллям, куинетӥезлы Удмуртиысь но Россиысь писательлэсь удостоверенизэ сётӥллям. Ӟечкыланъёс но туж тунсыкоесь вал. Пумиськонлэсь радзэ, пӧртэм ӵошатсконъёсты, конкурсъёсты ӟеч дасям кылбурчи, кырӟась Юлия Кузьмина. Ӝытэз нимысьтыз чебертӥз, шулдыртӥз Разинъёслэн шаплы Софи нылзы. Со дышетске шаерысьтымы пинал усточиослэн школа-интернатазы. Пӧрмытскем но зэмос кечпи кадь: юг-юг тӧдьы гоно керттэм дӥсен. Кык кырӟан кырӟаз. Зал гудыртӥз кичабонъёсын. Валамон ини: солы ик сюриз тужгес бадӟымез кузьым. 69 номеро школаын бер уёзь ӧз чалмылэ кырӟанъёс, мадиськонъёс, шудонъёс, эктонъёс, маскаръяськонъёс. Ӟеч сюрес тыныд, Выль ар! К. ЛОМАГИН. Тодматске - Владимир Александрович Байметов. Вордскемын Яр посёлокын. Йылпумъяз Москваысь кун университетэз. Психология наукаосъя кандидат. 1994-тӥ арысен Удмурт кун университетын дышетон люкетъя проректор луыса ужа. В. А. Байметовен интервьюез лыдӟе 2-тӥ бамысь. Туспуктэмез В. Камашевлэн. Тау ӟечкыланъёстылы но оскемдылы Удмурт Республикаысь Кун Кенешлэн Тӧроезлы Александр Волковлы вордскем нуналэныз валче вуизы трос ӟечкылан телеграммаос но гожтэтъёс Россия Федерациысь Правительствоезлэн Тӧроезлэн нырысетӥ воштӥсьёсызлэсь Вадим Густовлэсь но Юрий Маслюковлэсь, Россиысь но Удмуртиысь Праивтельствоослэн членъёссылэсь, губернаторъёслэсь, Россия Федерациысь Кун Думаысь депутатъёслэн фракциоссылэн кивалтӥсьёссылэсь, Удмурт Республикаысь Кун Кенешлэн депутатъёссылэсь, Удмуртиысь министерствоослэн но ведомствоослэн кивалтӥсьёссылэсь, ужась коллективъёсысь но нимаз гражданъёслэсь. Кылсярысь, "Отечество" общественно-политической огазеяськонлэн кивалтӥсез, Москва городлэн мэрез Юрий Лужков аслаз телеграммаяз пусйиз, Удмурт Республикаен но Москваен кусыпъёс азьланяз но умоялозы но юнмалозы, озьы ик Александр Волковлы кун ужъёсты быдэсъянын азьланяз но сӥзиз азинсконъёс, юн тазалык, шуд но ваньзэ умойзэ. Ӟечкыланъёс понна тау каронэн Александр Волков вазиськиз кун удысысь иворез вӧлмытон ёзъёслы: "Сюлмысьтым тау карисько шуныт кылъёстылы. Малпасько, тӥ озьы вераськоды мыным оскемдэс, озьы ик Удмурт Республикаысь Кун Кенешлэн ужъёссэ, кудъёсыз чакламын шаерысьтымы улӥсьёслэсь азьлань улонзэс но ужзэс азинтыны, шонерен лыдъяськоды. Выль аре ваньмызлы сӥзисько шуд, ӟеч мылкыд но ӟеч улон". Удмурт Республикаысь Кун Кенешлэн пресс-службаез. Тужгес йыбырскымонэз Олег ПОСКРЕБЫШЕВ - Удмуртиысь калык поэт, республикаысьтымы Кун премилэн лауреатэз. Нош алигес солы Удмурт Республикалэн дано (почетной) гражданинэз ним сётӥзы. Олег Алексеевичлэн уно кылбур книгаосыз потӥзы ни. Со проза амалэн но гожъяське. Улонысь чаклам суредъёсын выль книгаез - "Разнотравье" - потӥз туэ, выль ар азьын. Кызьы тодӥськом, 1999-тӥ ар - Александр Пушкинлэн вордскемез дырысен 200 ар тырмон ар. Кыӵе инты басьтэ быдӟым ӟуч поэт шаерысьтымы но Россиысь туж тодмо кылбурчилэн Олег Поскребышевлэн улоназ - со сярысь вераны курим ассэ Олег Алексеевичез. - Мынам син азям пуксе 1937-тӥ ар. Александр Пушкинлэн кулэмез дырысен соку сю ар тырмиз. Мон ӵапак мынӥ 1-тӥ классэ. Тетрадьёсмы вылэ пуктэмын вал вуоно быдӟым поэтлэн тусбуез - 5-6 арес дыръяз, бадӟым синмо, баблес йырсиё. Со дырысен мон сак синйылтылӥ Александр Сергеевичлэсь котькуд тусбуйзэ - котькин мед суредалоз сое. Художникъёс трос ужазы солэн портретэз бордын: Илья Репин, кылсярысь, куамын ар выриз туссэ пуктыны, озьы ке но, портретэз быдэсмытэк кылиз. Мон туж жалясько, А. С. Пушкинлэн туспуктэмез ӧвӧл шуыса: фотография уго кылдӥз, поэт бырем бере, ар ортчыса. Иське, асьмеос али адӟыны быгатысалмы ни солэсь зэмос туссэ. Юнме-а, одӥгзэ портретэз учкыса (В. А. Тропининлэсь кадь), Александр Сергеевич шуиз: Асме синучконысь кадь адӟисько мон, Но со монэ укыр чебермытэ. Со 1937-тӥ аре мон нырысьсэ сцена вылэ потӥ, лыдӟи Пушкинлэсь "Песнь о вещем Олеге" кылбурзэ. Пумен, быдэ вуэмея, Александр Сергеевич зэмос улэп адями кадь син азям пуксьыны ӧдъяз, соин вераськыны луэ вал... Сое нырысьсэ шӧдӥ, Дэбес шор ёзо школаын 9-тӥ классын Пушкинъя доклад дасякум. Тани, шуом, "вещий" Олег сярысь кырӟанын кылбурчи троссэ ас сярысьтыз вера кадь. Пушкин оске вал пӧртэм калык чакланъёслы. Тани со Михайловскойысен Петербурге дасяське. Но сюрес вылысен кык луд кечез пумита, священникез адӟе но - берытске: умойлы ӧвӧл та. Мукет дыръя солы туназы: витьымтэ шорысь басьтод коньдон, пумиськод вуж тодмоеныз, эшшо - кулод 37 арескын тӧдьы валэн яке тӧдьы адямиен сэрен. Нош вить декабристъёсты казнить каремзы бере, со уйвӧтаз адӟе, вить пиньыз усем шуыса... Та быдӟым адямиез яратонэ, гажанэ арысь аре будӥз, пумен вӧсь луыса шӧдӥ солэсь вазь быремзэ... Кудӥз произведениез юнгес кельше - та сярысь вераны шугъяськисько. Литературая дышетӥсь луыса ужасько вал бере, пиналъёсты кылбуръёссэ наизусть дышетыны курыса, соослэн верамзыя, ачим но дышылӥ но шӧдылӥ, макем чебер, синмаськымон та быдӟым поэтлэн соиз но, таиз но гожтэмез... Вань улытозям лыдӟисько но яратӥсько Пушкинэз - со Россилэн тужгес йыбырскымон адямиез. А. С. Пушкинлы сӥзем книгаос лыдтэм. Нош тужгес но син шоры йӧтымонэз, кулэез, мон сямен, В. В. Вересаевлэн "Пушкин в жизни" ужез. Вожъяськисько быдӟым поэтэн огвакытэ улэм, соин артэ вамышъям адямиослы. Соин герӟаськем интыосы вуылон, со сюресъёстӥ ортчон - озьы ик бадӟым шуд. Син азям пукто на таӵе суредэз. 1837-тӥ арын гужем. В. А. Жуковский эксэй пиен Александрен вортто Сибирь сюрес кузя. Соос ортчо Глазов, Балезино, мынам гуртэ - Бани, Полом пыр. Карета выже Пызеп шур вамен. Василий Андреевич учке ву вылэ - адӟе отысь бабыля пилемъёсты. Соос тодаз вайыто 1837-тӥ арын январе дуэльын бырем эшезлэсь бакенбардъёссэ. Кема уг быгаты со мӧзмыт малпанъёсызлэсь люкиськыны... Та сюрес кузя ортчыны быгатысал Александр Сергеевич Пушкин но. Аргантэк чидалод шат? Кияса культура юртын ортчиз Атабайысь шутэтскон коркалэн чеберлыкъя кивалтӥсезлэн Александр Викторович Кунгуровлэн ӝытэз. Татын асьсэлэсь быгатэмзэс возьматӥзы ёросысь кырӟаны-вераны яратӥсьёс - Атабай гуртысь "Журавушка" ансамбль, Первомайский посёлокысь ӟуч кырӟанъя "Росинка" ансамбль, Киясаысь "Непоседы" ансамбль но ветеранъёслэн хорзы. Ӝыт мыныку тодматӥзы А. В. Кунгуровлэн улон-вылонэныз. Культура удысын та адями ужам ини куамын ар. Дас арзэ кивалтэм "Журавушка" калык ансамблен. Али Александр Викторович дышетӥсь луыса ужа нылпи крезьгуръя школаын. Дышетэ баянэн шудыны. Кияса типографиын потӥз ни "Шихостанские дали" кылбур сборникез. Кылбуръёсызъя кырӟанъёс но ачиз ик кылдытъя. Соос но та ӝытын чузъяськизы. Крезьгурез А. В. Кунгуров яратӥз школаын дышетскыкуз ик. Анаез кырӟа вал соку хорын. Пиезлы велосипед ӧз басьты - арганэн шумпоттӥз. Пияш толэзь пала куатаськыса улӥз - арганэз доры ӧз ик матэктылы: велосипед сярысь гинэ малпаськылэ вал ук. Зэм, арганзэ кияз кутӥз ик - шудыны дышиз. Отӥяз баян борды но басьтӥськиз. Ас кожаз тодматскиз нотаосын. Собере музыкант луыса ужаны кутскиз. Ижысь крезьгуръя училищеез йылпумъяз кызь сизьым арескын (кык нылпиез вал ни). Со сяна, А. В. Кунгуров яратэ чорыганы. Ёрос газетэ гожъя инкуазь сярысь кылбуръёс, чорыган сярысь веросъёс, фельетонъёс, юморескаос. Тулыспалтолэзе солы витьтон арес тырмоз. Ӟеч азинсконъёсыз понна Александр Викторович Кунгуров пусъемын Удмурт Элькунысь Культурая министерстволэн Данъян грамотаеныз. В. ЛАГУНОВ. Кинлы - ма Филателиен - почта маркаосты, конвертъёсты, открыткаосты люканэн - пӧртэм профессиосын муртъёс выро. Соин тунсыкъяськыны кутскыны ноку бер ӧвӧл. Ӵемгес маркаосты люкало - одӥг странаын яке одӥг арын потэмъёссэ, яке одӥг пуштросъемъёссэ. Берлояз учыре коллекционер аслыз ачиз тема быръе, кылсярысь, "Космос", "Будосъёс но пудо-животъёс", "Искусство", "Спорт" но мукет. Маркаосты люкам сяна, адямилэн соос сярысь тросгес тодэмез но потэ. Озьы коллекционерлэн дунне сярысь тодон-валанэз муроме. В. РОГАЛЕВ. Рождество - Толсур Иисус Христос, дуннелэн утисез, вордскиз 1999 ар талэсь азьвыл 7 январе (вуж стилья - 25 декабре) Иудеяысь Вифлеем городын Август император кивалтон вакытэ. Август калыкез гожъян ортчытыны косӥз. Таин валче котькудӥз адями вордскем интыяз бертыны кулэ вал. Инмарлы оскись Иосиф Марияен Вифлеем городэ лыктӥзы. Татын соос пӧлын инты ӧз шедьтэ, соин ик город сьӧрысь гурезьысь пещерае интыяськизы. Татын Мария Иисусэз вордӥз. Дуннеез утисьлэн вордскемез сярысь нырысь ик тодӥзы пудо возьмасьёс. Соос Вифлееме Инмарлэн пиезлы йыбырттон понна лыктӥзы, шунды ӝужан палась визьнодо адямиос солы кузьымъёс кузьмазы. Варманайзэ "визьмаз" Харьковын улӥсь мӧйы нылкышно магазинысь бертэ но кӧшкемыт суред адӟе: одӥгаз комнатаысь ӝӧк вылын вир пӧлын эмеспиезлэн йырыз адӟиське. Кышномурт шуге-леке вуиз, вылаз ик, йыр синъёссэ усьтӥз но шимес куараен кеськиз: "Гав!" Варманаез инфарктэн больницае нуизы, эмеспизэ - милицие. Тодмо луиз, вармаеныз одӥг липет улын кӧня ке аръёс улыса, эмеспилэн вожпотонэз люкаськем, озьы пунэмзэ берыктыны малпам. Берлозэ куашетэмзы бере, воргорон ӝӧке пась лэсьтэм, сое ӝӧккышетэн шобыртэм, вылаз куреглэсь вирзэ виятэм. Собере ӝӧк улэ пырыса яратоно "мамазэ" витьыны кутскем. Милициысен Иван Петрович (озьы нимало эмеспиез) куректыса вераз: "Со мон шоры быдэс улонзэ ыргетыса улӥз, нош мон одӥг пол гинэ утӥ". Басьтэмын "Собеседник" газетысь. Удмурт Республикаысь Правительство мур куректэмзэ вера 1999 арын 10 январе Ижевск- Сарапул сюрес вылын шуккиськыса быремъёслэн но кулэмъёслэн семъяослы, ӵыжы-выжыослы но матысь муртъёслы, нош шудтэм учыре шедьыса улэп кылемъёслы ӝоггес тупатскыны мылкыд каре. Ӟечкылан Удмурт Республикаысь Кун Кенеш но Правительство сюлмысьтызы ӟечкылало республикаысьтымы Прокуратураын ужасьёсты но ветеранъёсты профессиональной праздникенызы. 277 ар ӵоже Россиысь прокуратура сак уте государствомылэсь законъёссэ, калыкмылэсь правооссэ но эриксэ. Туннэ, та огыр-бугыр вакытэ, прокуратуралэн кулэлыкез эшшо но юнгес шӧдӥське: солы оскемын законъёслэсь шонер быдэсъяськемзэс эскерон, преступностьлы пумит нюръяськонын правоез утёнъя кужымъёсты огазеян, экономика удысын воштӥськонъёсты радъян. Азязы пуктэм ужпумъёсты быдэсъяны юртто прокуратураын ужасьёслэн вылӥ быгатонлыксы, мӧйы эшъёсынызы кылдытэм сямъёсты утемзы но азинтэмзы. Тыршемдэс лыдэ басьтыса, сюлмысьтымы сӥзиськом тӥледлы ӟеч тазалык, юн мылкыд, азьланяз но утьыса возе законъёслэсь инъетсэс но право ласянь кунмылэсь радлыксэ. Удмурт Республикаысь Кун Кенеш Удмурт Республикаысь Правительство Азьдэ-бердэ чакла Куректон огназ уг ветлы, шуо. Удмурт Элькунысь Граждан оборона ужпумъёсъя но кышткыт учыръёслэсь утиськонъя комитетлэн лыдпусъёсызъя республикаямы кылем арын 3488 шудтэм учыр вал (со ваньмыз ӧвӧл на). 66 миллион манетлы уногес изъян адӟемын. Бен, лыдпусъёс шумпотынмонэсь ӧвӧл. Тылпуосын сутскиз 137 мурт, сюрес вылын быриз 239 адями, выйиз - 212-ез. Уно ыштонъёс адӟемын сильтӧллэсь, ву тутдӟонлэсь, тылпуослэсь. Берло дыре шудтэм учыръёслэн лыдзы данаклы будӥз. Татын шӧдӥськытэк ӧз кыльы экономикаын кылдэм секыт югдур но. Но соин ӵош пусйыны кулэ асьмелэсь тяпайтэммес но. Тани миым ик тудвуос кӧня ваньбурез гылтыса нуизы. Озьы, кылсярысь, секыт югдур кылдӥз Ижевск-Вотка сюрес вылысь Июль шур вамен выж "кошкем" бере. Кӧня мултэс коньдон кисьтоно луиз Кияса ёросын кӧткыль висёнэз быдтонлы. Капчи ӧй вал толлы дасяськон но. Соин валче республикаямы нимысьтыз кенешон но ортчытоно луиз. Чурыт вераськон бере гинэ улон интыосы шуныт но пӧсь ву лыктӥз. Ваньзэ та кышкыт учыръёсты палэнтыны луысал, куд-ог кивалтӥсьёс юромо пыдзэс ӧй ке пуктысалзы. Монополист шуонъёс югдурез юромо лэчытомытыны тыршо, озьы асьсэлэн кисыосазы уногес коньдон капыртыны сюлмасько. Сыӵеос пӧлы, кылсярысь, пыро "Удмуртэнерго", "Межрегионгаз" огазеяськонъёс. Котькуд ар трос ыштонъёс адӟиськом тылпуослэсь. Кылем арын соос уногес вал Шаркан, Кизнер, Дэбес, Алнаш ёросъёсын. Татын но мугез одӥг - асмьелэн азьмес- бермес чаклатэк ужаммы. Собере уно иинтыосын тылпуосын нюръяськон службаослэсь куштӥськыны ӧдъязы, тылпу кысон техника басьтэмысь дугдӥзы. Кышкыт учыръёсты палэнтонын уноез потэ городъёсысь но ёросъёсысь администрациослэн кивалтӥсьёссылэн, граждан обороная службаослэн ужамзы бордысь. Та ласянь пусйыны луэ Воткаез (мэрез В. Л. Фридрих). Отын 1995 арысен ужа нимысьтыз служба. Со городысь югдурез быдэсак ас кияз возе. Котькуд ивортонъя кулэ ужрадъёс дыраз кутӥсько. Воткаослэсь адӟем карыны умой луысал мукет городъёслы но. Кышкыт учыръёсты палэнтыны капчи ӧвӧл. Но соосты алыса умойгес луысал, дыр. Тани таиз тол нош ик бадӟым "кузьым" дася кадь. Асьтэос адӟиськоды, кӧня лымы люкаськиз ни та вакытэ. Кӧня уськытоз на ай азьланяз, инмар гинэ тодэ. Н. ЛЯЛИН. Кин юнгес кельше? Выль ар азьын Россиын юалляськон ортчытэмын. Юанэз таӵе вал: туннэ Кун Думае быръёнъёс ортчысалзы ке, кинэ бырйысалды? Уноез дурбасьтӥзы КПРФ-лы (21 поцентэз). Кыкетӥ интыын - "Яблоко" (12 процент), собере - "Отечество" (10 процент). А. Лебедьлэн партиез но А. Чубайслэн, Е. Гайдарлэн, Б. Немцовлэн, С. Кириенколэн "Правое делозы" быдэн 5 процент люказы. Иворъёсъя национальной служба. ГОЖТЭТ ӦТИЗ СЮРЕС ВЫЛЭ Суд гинэ дунъет сётоз Таиз гожтэт вуиз Можга районысь "Заря" колхозысь. Ыстэм сое хозяйствоысь азьвыл валтӥсь зоотехник, али пудо эмъясь фельдшер Надежда Парамоновна Николаева. Со ӝожтӥське председательзы Валерий Сергеевич Иванов вылэ. Колхоз кивалтӥсь ужасез вылэ 6 миллион манет (вуж уксёен) штраф понэм. Янгыш карем: пудоез мясокомбинатэ вузакуз, пе, Николаева алдаськыса колхоз коньдонэз капыртэм. Штрафен сяна, ултӥям на колхозникъёслэн огъя кенешазы: алдаськись, лушкаськись шуэм. Собере валтӥсь зоотехникысь куштэм, трудовой книжкаяз тазьы гожтыса: "осконэз ыштэмез понна". Надежда Парамоновна чутрак пумит луэ янгыше уськытэмзылы. Зэм, одӥгзэ кунянзэ вузам со мясокомбинатын ужасьлы. Но "ӝуась" путёвкая эмъяськыны кошкеменыз, уксёзэ колхоз кассае берло ини сётэм. Нош В. С. Иванов югдурез сэрттыны-пертчыны кутске но, мясокомбинатын ужась танӥське: ӧй басья, пе. Валерий Сергеевч шарая мукетсэ но. Николаева висись скал интые нуэм тазазэ, бустыр сӥльвирозэ. Фермаысь келякузы, пудо ӧвӧл мертамын. Озьыен, малпа председатель, Николаева вузаз скал, нош колхозэ берыктӥз пичи кунянлэсь дунзэ. Мар пӧрме? Николаева кескич амалэн колхоз коньдонэз капыртӥз. Югдурез эскере Можгаысь милиция. Николаевалэсь нокыӵе лушкаськемзэ уг шедьто. Со сярысь постановление но гожто. Валерий Сергеевич со пумысен таӵе валэктон сётэ: - Следствиез нуись оперуполномоченной институтын колхозмы чотын дышетскиз. Ми дорын трос ик ужаса ӧз вуы, милицие кошкиз. Ми сое дышетскем дунзэ берыктыны косӥм. Мар бен ӟечсэ витёд ӝоже усем адямилэсь? Пунэмзэ берыктэмзэ гинэ. Юан кылдэ. Председатель оперуполномоченноен соглаш ӧвӧл ке, малы ӧз вазиськы кивалтӥсьёсызлы? - Ярам, Николаева янгыш ӧвӧл ке, кызьы валэктыны луоз солэсь заявленизэ? Иванов вера: - Николаева заявленияз куре уждунысьтыз 3 миллион манетсэ кельтыны. Сомында тыриськонэз кылемын на вал. Озьыен, со вала ягышсэ. Тау мед кароз ай, жалямы шуыса. Вань сьӧлыкъёссэ шарае поттӥм ке? Мон тодӥсько, соос тачак шуыса. - Валерий Сергеевич, одӥгез но сьӧлыкез шараямын ӧвӧл. Со сярысь милициысь бумага но вань. Нош тӥ штраф сётӥськоды, адямиез ужысьтыз куштӥськоды, калык азьын ултӥяськоды. Законъя шат озьы? - Закон ке закон, но котькуд лушкаськисьлэсь йырзэ маяллямы ке, мар кылёз на колхозлэсь? - Мон валасько тӥледды, но кыл кутытоно законъя. - Ми асьмеос но быгатӥськом кыл кутытыны. Николаева янгыш но тӥни. Надежда Парамоновнаен ми пумиськимы больницаын. Со отын неврология отделениын эмъяське. Янгыш каремзы бере тазалыкез лябӟем. Со шуэ: - Коть оске, коть эн, но мон янгыш ӧвӧл. Колхозын 30 ар пала ужатозям, одӥг копейка но ӧй лушка. Нош монэ сокем ултӥязы, ӝоже уськытӥзы. Одӥг уйзэ но рос-прос уг кӧлӥськы, весь сюлэмы куректэ. - Янгыш ӧвӧл ке, малы заявление гожтӥды, уждундэс кельтыны курыса? - Ма, адвокат озы косӥз ук. Али, пе, гожты, отӥяз Ивановлэн сюлмыз берытскоз, буйгатскоз. Нош со монэ вань улытозяз адӟемпотостэм кароз, шӧдске. - Малы нош судэ ӧд вазиське, тӥледды юнме шорысь кыл кутыто ке? - Ветлӥ мон судэ. Судья Кириллов куронме ӧз басьты: бер ни, пе, трос дыр ортчиз. Жаляса верано луэ, Кирилловен пумиськыны ӧз удалты, со отпускын вал. Та югдур пумысен ми кенешимы редакциысь внештатной юристэн Лилия Шкляеваен. Юан таӵе: кӧня дыр ортчыса Н. Николаева судэ вазиськыны быгатэ? Лилия Алексеевна таӵе валэктон сётӥз: Вазиськыны луэ таӵе дыръёсы: - адями солэсь правооссэс тӥям сярысь тодэм бере куинь толэзь ӵоже; - адями солэсь чагиськонзэ эскерыны пумит луэмзы сярысь гожтэт басьтэм бере толэзь ӵоже яке чагиськон сётэм бере толэзь ортчыса, ваазеськемез пумысен нокыӵе ивор ӧз басьты ке. Та дыр ӵоже адями бадӟым мугъёсын йырын судэ вазиськыны ӧз вуы ке (секыт висиз, командировкае кошкилӥз яке мукет), суд сыӵе дыраз кузёмытыны быгатэ. Сыӵе мугъёс пӧлы озьы ик пыре адями вылэ тыриськон понон но законэз тӥяса кыл кутытон. Вазиськыны тупатэм дыр ортчемын ке но, уг яра чагиськонэз басьтытэк кельтыны. Судья пумит ке, валэктон гожтыны кулэ со пумысен. Солэн решениез пумысен выльысь чагиськон дасяны луэ. Тӥни сыӵе валэктон. Озьыен, Н. Николаева быгатэ судэ вазиськыны. Нялтас вераса, В. Иванов но пумит ӧвӧл таӵе вамышлы: мед, пе, судэ сётоз, мон уг кышкаськы. Веранэз ӧвӧл, сое судэн уд кышкаты. Валерий Сергеевич районын но, республикаын но гажано адями. Кызь арлэсь кема ини кивалтэ колхозэныз. Умой кивалтэ, шӧдске, та секыт вакытэ но хозяйствозэ куашканлэсь утьыны быгатэ бере. Со гинэ ӧвӧл, татын адямиос ӝеганъёстэк уждунзэс басьто. Арлы йылпумъянъёсъя ватсаса коньдон сётъяло. Но ваньмыз со сётэ шат право председательлы адямиез юнме шорысь вӧсь карыны? Ярам, оском, Николаева янгыш шуыса. Г. КОРЯКОВ. Визыла шурмы, чеберске гуртмы Удмуртъёс одно ик интыяськозы вылэм ошмеслы, шурлы матэгес. Озьы Алнаш районысь Удмурт Вишур гурт но Вишур шур дуре пуксем. Верамъёссыя, та шур, пе, дас куать ошмеслэсь, кылдэмын. Гуртмылэн кылдэмез сярысь нокыӵе документъёсын гожтэмын ӧвӧл. Пересьёслэн верамзыя, удмуртъёс татчы вуиллям Туймы шурлэн улӥязгес интыяськем Удмурт Шудья Вишурысь (Выль Шудьяысь). Нош гуртмылэн нимыз пӧрмемын Вишур шур бордысь. Выль интые нырысь ик вуиллям Харитон Васильевлэн песятаезлэн атаез кышноеныз но тямыс аресъем Вася пиеныз. Со вылэм ЪВИИИ даурлэн кутсконаз (1700-1710-тӥ аръёсы). Озьы кылдэм пичигес гурт. Шаермылэн пӧртэм сэрегъёсаз поръёс улыны интыяськемен, уно гинэ керетонъёс пуромиллям. Вишур дорысь Карашур нюкез асьсэлы карыны туртто вылэм. Родионлэн Иван пиез, гуртлэн старостаез сюлмаськемъя, Карашур нюкез поръёслэсь утьыны быгатӥллям вишуръёс. Уно секытъёсты адӟиз-чидаз гуртмы. Граждан ожез но вылаз шӧдоно луиз. Тани кызьы верало вылэм со сярысь гуртоос. - Кӧшкемыт зол ожмаськон вал Акташъён гурезьын. Милемыз ваньместы одӥг корка пыртӥзы. Кудӥз-огез мурӝолэ, гур вылэ, йӧгуэ ватскыса кылизы. Гуртлэн выллапалаз бомба пуштӥз, матаз сылӥсь корка но куашказ. Гордъёс вуыса, тӧдьыос Сарапул тракт кузя пегӟизы... 1921-тӥ арын шаерамы кӧс куазь кузёяськем. Вань бусыосты жуг-жаг норем. Ӟегез бичаллям йырын-йырын, со но кидыслы гинэ тырмем. Гурт калык сиёно луиз пот нянь. Ортчизы аръёс. Кылдыны кутскизы нырысетӥ колхозъёс. Озьы 7 апреле 1930-тӥ арын, сизьым семья огазеяськыса, "Кизили" колхоз кылдытӥллям, нош кивалтӥсе бырйиллям Петр Герасимович Герасимовез. Колхозын соку вылэм вить пиньем кутсаськон машина, дас сизьым вал. 1935-тӥ арын югдур тупатскизгес. Колхоз валъёслэн лыдзы но унолы йылэм, колхозникъёс но тросгес луиллям. Быдӟым ож бере но колхозын улон ӧз капчиёмы. Ужан нунал 15 часозь кыстӥськылэм, нош со понна тыро вылэм 2870 грамм ю тысь но 29 копейка. Жадёнэз валатэк тыршизы гуртоос, нош пумитъяськисьёссэ соку ик колхозысь поттылӥллям. Вератэк кельтыны уг луы Ижевск-Балезино чугун сюрес лэсьтӥсьёсты но. Сюреслэн котькуд метрез люкемын вылэм ёросъёс, колхоз бригадаос куспын. Палэнэ ӧз кыле вишуръёс но. Со: Марфа Филипповна Краснова (улэп на), Анна Григорьевна Григорьева, но Василий Федорович Мануилов. Со сяна, тросэз колхозникъёс келямын вал нюлэс дасянэ. Ныпъетлэн секытэз пиналъёслы но шӧдӥськиз. Уноез соос ӧз адӟе дышетсконлэсь югыт пиштӥсь тылсиоссэ. 1923-тӥ арын школа усьтэмын вал ке но, вань мылкыд карисьёс отын дышетскыны ӧз быгатэ. Пиналъёслы тодон-валан сётӥз гуртысьтымы ик сӥлы воргорон Семен Петрович Герасимов. Война кутскемен дышетскись пиналъёслэн лыдзы эшшо но ичиёмиз. Куинь класс бере ик колхоз ужез быдэсъяно луизы ни соос. Нуналъёс ортчо, улон воштӥське, гурт выьдӥське. Нош одӥгез - вашкала сямъёс но йылолъёс - туннэ но калык пӧлын уло на. Мӧйыос тужгес но бадӟым праздникен лыдъяло вылэм гырыны потонэз. Шулдыръяськонлэн азьвыл нуналаз гуртысь сӥлы карымон муртъёс люкаськыса эскерылӥллям быдэстоно ужпумъёсты. Вашкала йылолъя Егорлэн нуналозяз, 23 апрелёзь, мукет сямен (пӧськы, ваёбыж васькон) бусые поталлямтэ. Шулдыръяськон нуналэ, инмарлы вӧсяськыса но пудо-живот вандыса, быдэс гуртэз куноятӥзы бадӟым пуртыосын пӧзьтэм сиёнэн. Аспӧртэмлыко радъяло вылэм ваньмон дырзэс егитъёс но. "Пукон табань" нимаськись шудонэз котькуд гужем араны потэмлэсь азьвыл ортчытъяллям. Сьӧр гуртысь егитъёс кырӟаса лыкто, пе, вал. Шулдыръяськон сямен выль семья но кылдылэм. Шумпотымон, вашкала сямъёс-йылолъёс пӧлысь куд-огез пыӵаса кылемын туннэ улонамы но. Шуом, веме ӧтчаса, юрт ӝутон. Бӧлякъёс, оло, куамын пала но люкасько. Со-а ӧвӧл шумпотон? Ӝоген Удмурт Вишур гуртмылы 300 ар тырмоз. Аслаз азинскон, выльдӥськон сюресэныз ӵош воштӥськиз солэн вылтусыз но, улӥсь калыкез но, узырмиз йылол-сямъёсыз но. "Прогресс" колхозэ пырись гуртмы нуналлы быдэ чеберске. Улон юртъёсты шунтэ чагыр эстӥськон. Выль ӝутӥськись коркаос синэз ик палёмыто. Шоразы учкыса данъяськиськод, тӥни кыӵе милям етӥз, чырмыт но кибашлы гурт калыкмы. Нош ваньмызлы талы кутскон сётӥзы вашкала даурысь адямиос. Соослэн гудӟем ошмесысьтызы табере жильыртыса, бадӟымесь тулкымъёсын ӧръяськыса бызе дунлыко шур. Света Никитина, УдГУ-ын дышетскись. Коньдон дуннеын Владимир Бельтюков: Буш янчикен базаре уд мыны Шаерамы вуиз 1999-тӥ ар. Соин ӵош ик данакез быдэстымтэ ужъёсмы но коньдон ужпумъёсмы таяз аре выжизы. Сое тужгес но яркыт возьмато лыдпусъёс. Тани кылем арлы чаклам кун бюджетлэн доход люкетэз (выт бичанъя) 70 процентлы гинэ быдэстэмын. 900 миллион манет пала коньдон ӧз тырмы. - Миым туж шуген ужам, - шуиз коньдон ужпумъёсъя министр Владимир БЕЛЬТЮКОВ. - Ар ӵоже Россиын куинь правительство воштӥськиз. Котькыӵе ужрадъёс кутоно, амалъёс утчано луиз. Соин сэрен гинэ социальной удыс огсыр ужаз. Вуттэмын кӧня ке выль школаос, больницаос но мукет юртъёс. Республикамы Россиын юрттэт басьтӥсь улосвылъёс пӧлы пыртэмын. Озьы ке но, РФ-ысь Коньдон ужпумъёсъя министерстволэсь бюджет ссуда басьтытэк ӧйлась. Угось валля арын Россилэсь 646 миллион манет тыр юрттэт (трансферт) вуиз вал, нош миым - чылкак 274 миллион гинэ. Ваньмыз сямен со кутэмын газ ("Межрегионгаз") но электрокужым ("Удмуртэнерго") басьтэм понна тыронъёслы. Ватсаны кулэ, миым республика бюджет ссуда 110 миллион манет басьтӥз ке, 1997-тӥ арын со куинь пол трос вал (343 миллион манет). Мукет сямен вераса, кылем арын 1 январьлы пунэм тыронъёсмы 1 миллиард манетлэсь уно ке вал, туэ 1 январьлы кык поллы будӥз. Озьы бюджет чотын тыршисьёслы уждун 3,8 толэзьлы беромыса вуэ. Городъёс но районъёс уждун тыронъя лэсьтэм графикъёссэс уг быдэсъяло, данакез бюджетъёсазы ичи уксё пыртӥзы, доход люкетсэ ӧз тырмытэ. Республикаысьтымы Правительство уждун сётонэз туэ 1 январьлы 96 процентлы тырмытӥз ке, городъёс но районъёс - 46 процентлы гинэ. Нылпи пособие сётон но уг умоя. Кӧня ке вамыш лэсьтэмын Правительствоысь Пунэм тыронъя (Долговой) центр пыр. Со та уже кыскиз вузкарись организациосты но Калыкез улон-вылонын утёнъя министерствоез. Министрлэн ивортэмезъя, туэ кыкетӥ паларе вань удысъёсын югдур ӧжыт ке но умояны кулэ. Сыӵе оскон вань. Но со понна улӟыны кулэ ваньбур поттон, лэсьтӥськон но мукетыз. Нош кыӵе луоз туэлы кун бюджет? Оглом, чурыт. Малы ке шуоно, данак предприятиос 1999-тӥ аре бадӟымесь тыронъёсын потӥзы. Тани "Ижмашлэн" гинэ - соос 145 миллион манет люкаськемын, нош Правительство предприятилы 54 миллион бюджет кредит сётъяз. Со берыктымтэ. Кыкетӥез, али ке но тодмо ӧвӧл на кӧня уксё асьмелы Россия висъялоз. Алигес Кун Дума Вытъя кодексэ 14 воштон пыртӥз. Соос герӟаськемын НДС-эн, пайдалы налог басьтонэн но подоходной выт тыронэн. Россия чакла улосвылъёслэсь эшшо уногес коньдонзэс аслыз кыскыны. Тӥни озьы федеральной но улосвылъёсысь бюджет кусыпъёс йылаз-пумаз вуттымтэ на. Соин ик Удмуртилы юрттэт сётон но чакламтэ на. Али вераськон мынэ миым мында ик трансферт висъян сярысь. Но республика понна со туж ичи. Шаермылэн 1999-тӥ арлы бюджетэз герӟамын городъёслэн но районъёслэн бюджетъёсынызы, вань интыос утемын, шуыны луоз. Солэсь азьло интыосысь кивалтӥсьёсын, соослэн коньдонъя воштӥсьёсынызы пумиськонъёс вал. Котькудӥз куриз расход люкетсэ будэтыны, нош доходзэ кулэстыны. Кун бюджетлы инъетэз котькызьы бергаты, но интыослы 512 миллион манет юрттэт сётон пусъемын. Со сяна, Россилы 187 миллион манет пунэмез берыктоно, нош огъя кун тыронъёсмы туэ 687 миллион манет ни. Выль кун бюджетын 4-5 валтӥсь удыс висъямын. Отчы нырысь ик пыро калыкез дышетон, тазалыкез утён, гурт удыс, тыронъёсты берыктон но мукетыз. Коньдон висъялоз нимаз кун проблемаосты быдэстыны. Туэлы кун бюджетын нош ик коньдон уз тырмы. Озьы ке но, бюджетникъёслы 1-тӥ апрельысен уждунзэс йылэтыны чакламын, нырысетӥ разряд 60 манетысен 110 манетозь вуттыны учкемын. Мукет сямен, бюджетникъёслэсь уждунъя фондэз кык поллы будэтоно луоз. Кытысь бен уксё поттоно? Министр шуэ, оло, пе, нырысь-валысь ваньмыз озьы уз басьтэ, азьло ичи уждуно адямиослы сётом. Мар бен, али тунанын вазь на, улыса адӟом. Юнме уг верало ук, коньдон ужпумъёсъя министр - чурыт адями, котькуд манетэз шыръя, пайдаё кутыны тырше. Нош буш янчикен базаре уд мыны ук. Озьы ик луыны кулэ. Тани миым декабре Москваысь 77 миллион манет коньдон вуиз. Трос-а бен со? Ӧвӧл. Республикалы вань тыронъёсты ворсаны ичизэ 250 миллион манет уксё кулэ. Тӥни табере асьтэос малпаське, гажано лыдӟисьёс. Капчи-а меда йӧтэ министрлы коньдон люкылон? Геннадий Романов. Капчи атлетика Декабрьлэн пумаз Ижевскын ортчиз Удмуртилэн капчи атлетикая чемпионатэз. Нимысьтыз манеж ӧвӧлэн, ӵошатсконъёсы стандартлы тупасьтэм дистанциос но пыртэмын вал - 600 но 1000 метре бызьылонъёс. Ӵошатсконъёсы пыриськизы кужмо спортсменъёс, кылсярысь, дуннеысь спортъя мастер, дуннеысь чемпион Анатолий Корепанов, Алексей Белослудцев, Фарид Ганеев, Алексей Просандеев. 60 метре бызьылонын нылкышноос пӧлын нырысетӥ интые потӥз И. Маркова (Международной Восточно-Европейской университет); 200 метре бызьылонын - Е. Поздеева (Восточно-Европейской университет), 600 метре бызьылонын - Н. Порохова (Удмурт университет). 3000 метр дистнациын аслэсьтыз котькинлэсь кужмо луэмзэ возьматӥз Е. Семакина (Дэбесысь шор ёзо школа). Н. Медведцева ("Ижпланета") - тодмо биатлонистлэн В. Медведцевлэн сузэрез - спорт амалэн 5 километре ветлонын вормисе потӥз. 4х250 эстафетае нылкышноослэн 4 командазы пыриськиз. Нырысетӥ интые потӥз Удмурт кун университетлэн нырысетӥ командаез. 60 метре бызьылонын воргоронъёс пӧлын кужмоез луиз А. Чепкасов (Восточно- Европейской университет); 200 метре бызьылонын но со ик вормисе потӥз. Н. Алексеев ("Динамо") 600 метр дистанциын котькинлэсь вазь вуиз 1 но 5 километребызьыса ӵошатсконын вормизы Р. Чернышов (Удмурт кун университет) но Н. Константинов ("Динамо"). Спорт амалэн 10 километре ветлонын вылӥ быгатонлыкъёссэ возьматӥз С. Ловкин ("Ижпланета"). 4х250 эстафетаын нырысетӥ но кыкетӥ интыосты люкизы Удмурт кун университетысь кык команда. Та чемпионат возьматӥз, кинэ Удмуртилэн капчи атлетикая командаяз пыртыны луоно. Та команда Челябинскын январе зональной ӵошатсконъёсы пыриськоз. И. Михайлов. ОСКОН Калыке потод - трослы узырмод Кызьы ке одӥгаз конференциын пенсионеръёс районысь ветеранъёслэн кенешсылэн, пе, президиумезлы ӵектӥзы, ӵемгес, пе, пумиськылоно гуртъёсысь ожысь но ужысь ветеранъёсын, тодыны сюлмаськоно соослэсь кулэяськонъёссэс, юрттоно куронъёссэс быдэсъяны. Тӥни со дэмланъёсты лыдэ басьтыса, ветеранъёсын ужан амал чылкак мукет сямен радъяськиз. Ветеранъёс азьвыл пумиськылӥзы ке райцентрын, табере пленумъёс луыло ни меӵак колхозъёсын яке предприятиосын. Нырысетӥез сыӵе пленум ортчытыны чакламын вал "Мир" колхозын. Интыысь огазеяськонлэн кивалтӥсез А. И. Малых талы чутрак пумит кариськиз, милям, пе, номыр адӟем карымонэз ӧвӧл, эшъёсы азьын возьытэ гинэ вуод. - Тӥляд, Анна Ивановна, огазеяськонды мукетъёсызлэсь висъяське, вань ма сярысь люкаськемъёслы ивортыны, пыр-поч валэктоды ужан амалды сярысь, - шуизы солы президиуме быръемъёс. Пленум юнме ӧз ортчы та колхозын. Валамон, нырысь пыжем табань комоко луэ. Озьы ке но, интыосысь огазеяськонъёслэн кивалтӥсьёссылы ужрад кельшиз. Соос шедьтӥзы трос адӟем карымонзэ, вань мае ас ужазы кутыны. Анна Ивановна кема аръёс ӵоже вал Сюрногурт шор ёзо школалэн директорез. Калыкез туж ӟеч тодэ. Ӵем пыралля ветлыны быгатӥсьтэм пересьёс доры, ӟечкыла соосты вордскем нуналэнызы, пичи ке но кузьым сётэ. Котькуд аре татын вуж выль арез огазе люкаськыса пумитало. Ӝӧк сьӧры пуксьыса кырӟало, пичигес концерт но возьмато. Вуоноез пленум люкаськиз "Дружба" колхозысь культура юртэ. Гуртысь пенсионеръёс лыктэмъёсты мылысь-кыдысь пумитазы: перепечен но пыжиськемъёсын куноятӥзы. Вань татын но адӟем карымонэз. Кылдытэмын нимысьтыз кенеш. Отчы быръемъёс котькуд толэзе огазе люкаськыло. Кенешо, кыӵе ужпумъёсты матысь дыре быдэстоно, кинлы но маин юрттэт сётоно. - Меӵак колхозъёсын но предприятиосын орчытъям пленумъёс юртто интыосысь огазеяськонъёслэсь, ужзэс вырӟытыны, - шуэ Чапаев нимо колхозысь ветеранъёслэн кивалтӥсьсы А. А. Хохряков. - Соку гуртысь ваньмыз сямен пенсионеръёс быгато пленумлэн ужаз пыриськыны, асьсэлэсь малпанъёссэс вераны, умоесь ӵектонъёс сётыны. Чапаев нимо колхозысь огазеяськон мукетъёсызлэсь номырин уг висъяськы. Быгатэмзыя ожысь но ужысь ветеранъёс хозяйстволы гужем вылтӥ юртто пудо сиён дасяны, кутсам ю тысез чылкытатыны. Гуртын туж ӟеч тодо Г. Т. Никитинаез. Вань улон сюрессэ со герӟаз пудо вордонэн. Кызь арлэсь ятыр скалъёс кыскиз, районысь дояркаослэн ӵошатсконазы огпол гинэ вормисе ӧз потылы. Куатезлы пенсионеръёслы сётэмын "Устоез колхозник" дано ним. Огазеяськонлэн кивалтӥсез председателез Анатолий Александрович туж умой тодэ котькуд пенсионерлэсь кызьы улэмзэ, малы кулэяськемзэ. Тани Н. В. Шкляевалы, Хохряковлэн куремезъя, районысь калыклы улон-вылонын юрттэт сётонъя отдел корказэ тупатъяны кӧня ке коньдон висъяз. Трос ке но ӧз, пенсионер солы но шумпотӥз. - Куд-ог хозяйствоосысь ветеранъёслэн кивалтӥсьёссы ӝожтӥсько, колхозъёслэн председательёссы, пе, нокыӵе юрттэт уг сёто, - вера Анатолий Александрович. - Ми правлениен, профсоюзэн, культура удысын ужасьёсын юн кусып возиськомы. Кулэ дыръя соосты ӧтиськомы кенешамы, ноку пумит уг луо. Правленилэн председателез В. Л. Никитин трос сюлмаське пенсионеръёс сярысь. Пу вайыны, турын ворттыны котьку транспорт висъя, куашкам заборъёсты выльдыны материал но ужась кужым сётэ. Пенсионеръёс пичигес дунын ю тысь басьто. Интыысь огазеяськонлэн кивалтӥсез ваньмаз огназ уз вутскы. Соин ик ужез умойгес радъян вылысь кылдытэмын ветеранъёслэн кенешсы. Котькудӥз ас удысэз понна кыл кутэ. Кенешлэн ужаз мылысь-кыдысь пырисько И. П. Андреева, В. А. Хохряков но мукетъёсыз. Соос ӵем вуыло пенсионеръёс доры. Ветеранъёслэн районысь кенешсылэн президиумез берло пленумъёссэ ортчытӥз педагогической училищеын но му вӧй кыскон станциын. Бадӟымъёсаз огазеяськонъёсын кылдытъямын фольклор ансамбльёс. Ас гуртъёсазы концертъёс возьматэм сяна, соос потало бускель эшъёссы доры, вуыло. Тани кемалась ик ӧвӧл Тольёнысь пенсионеръёс ветлӥзы Бадӟым Зетым гуртэ. Возьматӥзы кырӟаны, шулдыръяськыны быгатэмзэс. Ӝӧк сьӧры пуксьыса чай юизы. Отын ог-огзылэн ужан амалъёсынызы тодматскизы. "Дружба" колхозысь ожысь но ужысь ветеранъёс тодматскизы Аргуртысь пенсионеръёслэн улэм-вылэменызы. Кылем арлэн пумаз интыысь огазеяськонъёсын ортчизы йылпумъянъёслы но быръёнъёслы сӥзем кенешонъёс. Ветеранъёс ӵектӥзы. Пенсиоссэс дыраз басьтон пумысен куронэн вазиськыны, со сяна, ёрос администрацилэн кивалтӥсьёсыз ӵемгес, пе, мед пумиськылозы гуртын улӥсьёсын. М. МОСОВ, Дэбес районысь ветеранъёслэн кенешсылэн президиумезлэн членэз. Выляз аре - выль школае Выль ар азьын бадӟым шумпотон вуиз Кияса ёросысь Ермолаево селоын но вӧзысьтыз гуртъёсын улӥсь калыклы. Аслэсьтыз ӧсъёссэ усьтӥз кема аръёс ӵоже возьмам выль школа. Пиналъёс но соослэн анай-атайёссы, дышетӥсьёс паймымон дуннее вуизы кадь. Кык этажъем выль юртын югытэсь, бадӟымесь классъёс, сиськонни, актовой зал. Спортэз яратӥсьёс понна вань душез но. Огъя вераса, ваньмыз туала куронъёсъя лэсьтэмын, республикаямы одӥг-ог гинэ ай таӵе школаос. Выль юртэз усьтыку, уно гинэ кузьымъёс сётӥзы. "Удмуртнефтепродукт" акционер огазеяськон автобус, компьютер кузьмаз, мукетъёс - буёло телевизоръёс, "Рассвет" эштосмы коньдон сётӥз. Нош "Италмас" ансамбльысь артистъёс кузьмазы капчи мылкыдзэс, чебересь кырӟанъёссэс, эктонъёссэс. М. МОРЯКОВА. Журналистъёсын пумиськонъёс выль дауре - выль кужымен Республикаямы вордскиз "Выль кужым" политической огазеяськон. Со сярысь журналистъёслы ивортӥз та огазеяськонэз кылдытонлэн огез кичӧлтӥсез Сергей Витальевич ЧИКУРОВ. Лыдӟисьёслы тодазы вайытӥськом: Сергей Чикуров, "УНГС-Город" ОАО-лэн генеральной директорез луэм сяна, Кун Кенешлэн но Ижевскысь мэрилэн депутатсы луэ на. "Выль кужымлэн" программаез сярысь Сергей Чикуров номыре ӧз иворты на. Озьы ик журналистъёслы верамын ӧй вал, кыӵе адямиосты котыраз люкалоз огазеяськон. Но кызьы валэктӥз егит политик, "Выль кужым" ас ужан амалъёсыныз быдэсак висъяськыны кулэ республикаысьтымы кык валтӥсь политической кужымлэсь. Салтыков дурбасьтэ Чубайслы но Гайдарлы, Волков - Юрий Лужковен кылдытэм "Отечестволы". Ми, шуиз С. Чикуров, огазе карыны турттӥськом вань кужымъёсты, кудъёсыз соглаш луозы милям куронъёсынымы. Улонэз секыт югдурысь поттыны туала власть уз быгаты ни. Соин ик выль дауре выжон понна, выль кивалтон ёзъёс кылдытоно. Сергей Чикуров таӵе малпанзэ вераз на: вуоно быръёнъёсын Кун Кенеше 130 депутат бырйыны чик но кулэ ӧвӧл. Со луоз бюджетысь мултэс коньдон кыскон гинэ. Депутатэн Виктор Хорошавцевен ӵош, шуиз со, ми ӵектонэн потӥм отчы 40-50 депутат гинэ бырйыны. Монэ выльысь бырйизы ке, шуиз С. Чикуров, быръёнъёсъя законэ та ӵектонмес одно ик пыртыны туртто. Депутатъёслэсь лыдзэс кулэстыса, соосты пайдаёгес ужатыны луоз. Керетонъёс но ӧжытгес потылозы, угось соку котькуд депутатлы ас кужымезлы оскиськыса ужано луоз. Выль политической огазеяськонэн но отчы пырем адямиосын журналистъёс пыр-поч тодматскыны быгатозы вуонояз пумиськонын, шуиз С. Чикуров. Т. БАННИКОВА. Гажано журналистъёс, печать удысын ужасьёс! Сюлмысьтымы ӟечкыласьком иворъёсъя ёзъёсын но полиграфияя предприятиосын вань ужасьёсты профессиональной праздникенызы - Россиысь прессалэн нуналэныз. Ортчиз эшшо одӥгез секыт но ӟырдыт ар. Мукет удысъёсысь ужасьёсын ӵош журналистъёс но полиграфистъёс трос лэсьтӥзы республикамылэсь политической но социальной улонзэ умоятон понна. Бадӟымесь ужпумъёсты быдэстоно луоз 1999 арын но. Азьвыл сямен ик улонлэсь азинсконзэ пыр-поч суредано, сюлмаськытӥсь ужпумъёсъя пӧртэм малпанъёсты возьматыса, со понна юн сям, зэмлыклы оскон но быгатэм кулэ. Оскиськом, азьланьын но кужым шедьтоды ужась адямиос сярысь зэмлыко материалъёс, туннэ нуналлы сӥзем лэчыт корреспонденциос гожъяны, калыклы дыраз шонер иворъёс вуттыны, синмаськымон полиграфической продукция поттыны. Тазалык тӥледлы, шуд но тыро улон! Удмурт Республикаысь Печатья но иворъёсъя министерство. "Номыр лэсьтыны луиз но..." Шуркынмон толэзе удмурт кыллэн узырлыкеныз тунсыкъяськисьёс доры визьмо книга вуиз. Со ӟуч кылын, нимыз - "Краткий курс удмуртской диалектологии: Введение. Фонетика. Морфология. Диалектные тексты. Библиография". Ижевск: Изд-во Удм-го ун- та, 1998, 386 с. Вераны кулэ: наука удысын таӵеез ӧй вал на. Асьме вакытэ потэм мукет книгаосын ӵошатоно ке, солэн вылыз гинэ синмаськымон пӧрмымтэ, пушкыз но туж ӝикыт лэсьтэмын. Книгалэн гожтӥсез уга, суп-сап ужасьёсты уг яраты шуыса, кемалась тодмо, ачиз но котькуд пусэз (точка со яке буква вадьсы ӝутэм кык точка, яке огшоры гож, яке - мукет маке) туж чакла. Дышетскон книгалэн авторез, Удмурт кун университетысь профессор, филология наукаосъя доктор В. К. Кельмаков таяз ужаз, азьло потэм книгаосаз сямен, удмурт диалектъёслэсь узырлыксэс текстъёсын гинэ адӟытымтэ, одӥг но ӝыны даур ӵоже диалектъёсты наука амалэн эскеронэз огъяса сётэм. Озьы бере, удмурт диалектология наукалэсь макем ӝутӥськемзэ но возьматыны быгатэм. Шонергес тупатсконо ке, книгае шуккем тросэз материалъёс, наукая йылпумъянъёс В. К. Кельмаковлэн аслаз луо. Малы ке шуоно, солэн удмурт диалектологиен кусыпез 60-тӥ аръёсысен ӧз ик уриськылы. Профессорлэн гожтэм программаосызъя УдГУ-лэн но ГГПИ-лэн удмурт отделениосысьтызы студентъёс удмурт диалектологиез дышето, диалектологияя практикаосы потало. Кызь арлэсь кема лыдӟе ни со та курсэз университетысь студентъёслы. Профессорлэн лекциосыз студентъёс понна огласянь трос тодон-валан сётэменызы тодмо но дуно луо, нош мукет ласянь, со тодон-валанэз лекциосысь я пӧртэм журналъёсысь, сборникъёсысь печатлам материалъёсын огазеяны туж секыт йӧтылӥз. Малы ке-а куд-ог азьло дышетэм студентъёсыз кыл бордын ужатэк но В. К. Кельмаковлэсь лекциоссэ дасо аръёсын семья архивазы ӝикыт возё. Зэм, Турку университетысь С. Сааринен профессорлэн берыктэменыз, 1994-тӥ арын "Удмурт диалектъёс" нимын финн кылын та выллем книга потӥз ни вал. Но со удмурт лыдӟись доры ӧз ик вуы, шуыны луоз. Соин ик потэм книгалэн удмурт наукаез дышетонын, азьланьтонын кулэлыкез ӧз ик бырылы. Таяз ужын, финн кылын потэменыз ӵошатыса, теория люкетэз но тупатъямын, диалектной текстъёс но: кык номераз сяна, выльёсыз пыртэмын. Вераны кулэ: В. К. Кельмаковлэн книгаез диалектологиен тунсыкъяськисьёслы но, удмурт кыллы дышетӥсьёслы но трос выльзэ сётыны быгатоз. Отын туж узыр библиография адӟытэмын, удмурт диалектология удысъя ЪВИИИ даурысен 1998-тӥ арозь потэм ужъёсты шедьтыны луоз. Нош книгалэн мукет интысаз пыро таӵе люкетъёс: пыртон, удмурт диалектъёсты дышетон история, удмурт кылэз диалектъёслы люкон, транскрипция. Фонетика люкетын гласной но согласной куараос ласянь диалект пӧртэмлыкъёс эскеремын. Морфология удысын бадӟым инты висъямын существительнойлы но глаголлэн формаосызлы. Озьы ик палэнэ кылемын ӧвӧл мукет вераськон люкетъёс но: тодметним, лыдним, нимвоштос, сямкыл но юрттӥсь вераськон люкетъёс. Книгаын озьы ик котькуд наречилэн, диалектлэн пӧртэмлыкез висъяса сётэмын. Диалектъёсын пумиськись пӧртэм учыръёсты пусйыса, авторез умой шарая соослэсь кылдэмзэс, наукалы соос сярысь макем тодмо яке азьланьын дышетоно луэмзэс. Озьыен, книгалэн авторез, ог кызё шараямтэ диалект явлениосты, азьланьын сэрттон-пертчонэз кулэ карись яке мургес эскеронэз возьмась кыл пӧртэмлыкъёсты нимаз пусйыса, егит учёнойёслы сюрес возьматэ, соослы ужан программа кылдытэ. Удмурт кыллы дышетӥсьёслы но татысь трос выльзэ синйылтытэк кельтоно вылымтэ. Фонетикаез дышетыку, [а] куараез [у], [о] куараосын одӥг радэ ке пуктыло вал (озьы ик туала научной грамматикаосын пусъемын), [а]-лэн радыз та книгаын шонер сётэмын - [ы], [ӧ] гласнойёслэн чуразы. Морфологиез дышетыку, удмурт грамматикаосын нулевой морфемаослэсь малы ке палэнскылӥзы, книгаын удмурт кылъёсын но нулевой морфемаос висъясько. Эскероно ужамы куд-ог терминъёсты кутонэз но радъяны тыршемын. Кылсярысь, вожминъяськон, корреспонденция. Удмурт диалектологилы дышетскон книгалэн потэмез - удмурт филологиын бадӟым ивор. Солы шумпотоно. Шумпотоно, пӧламы сыӵе уж лэсьтӥсьёс вань шуыса. Но книгаез кӧня поттэмез (со 300 экземпляр гинэ!), сое кызьы гожтэмез чакласькод ке, асьме Удмурт Республика понна возьдаськоно. Удмурт нациез утён, солэсь культуразэ ӝутон сярысь трос вераськиськом, нош уж вылын возьматоно ке луэ... Удмурт республикаысь вузъёсын удмурт культуралэсь инъетсэ - кылэз - дышетон, сое данъян, егитъёс пӧлы вӧлмытон, удмурт кылъя дышетскон книгаос гожтон дышетӥсьёслэн гинэ сюлмаськонзы луэмын. Таиз книга но сыӵе сюлмаськонэн гинэ гожтэмын. Малы ке-а, УдГУ-ысь удмурт кыл но литература удыслы 50 ар тырмонэз пусйыку, люкаськем калык азьын профессор В. К. Кельмаков ужамез сярысь огшоры вераз: "Тыршиськом дышетон бордын, нош номыр лэсьтыны луэ ке, наука бордын ужаськом, книга гожтӥськом". Ӝоген Кун Кенеше депутатъёсты бырйыны кутскомы. Азьлоосыз дышетӥсьлэсь ужзэ дунъяны ӧз быгатэ, шуыны луоз. Оло, вуонооссэ чакласькысагес быръём? Б. Каракулов, Глаз пединститутысь доцент, татысь удмурт филологияя кафедралэн кивалтӥсез. Нош ик адямиос быризы Таиз шудтэм учыр луиз 10 январе 9 час котырын ӵукна Сарапул - Ижевск сюрес вылын. Йӧвалеген сэрен, лыктӥсь машинаослы пумит потэм ВАЗ-2106 машина быгиськиз ВАЗ-2109 машинаен. Нырысетӥ машинаын пукись пассажиръёс 33 аресъем П. Татьяна но 7 аресъем А. Даша (Чайковскийысь) но кыкетӥ машинаысь 4 аресъем Д. Галя (Сарапулысь) соку ик быризы. Больницаысен кулӥз на 9 аресъем П. Дима. Тросэтӥ шуккиськемын но Сарапулысь больницаын кыллё ВАЗ-2106 машиналэн водителез 33 аресъем П. Олег но 7 пассажир, соос пӧлын кык 8 аресъем пинал. Удмурт Республикаысь МВД-лэн пресс-службаез. Удмурт Республикалэн Россия Федерациысь Сбербанклэн Удмурт банкезлы гарантиосыз сярысь Удмурт Республикалэн Законэз Та Закон юнматэ Удмурт Республикаын улӥсьёслы улон интыос лэсьтыны но басьтыны кредитъёс висъянын Удмурт Республикалэсь бюджетъя политиказэ. Та Законлэн право инъетэз луо Россия Федерацилэн Конституциез, Удмурт Республикалэн Конституциез, Россия Федерацилэн "Улон интыосъя федеральной политикалэн инъетъёсыз сярысь" Законэз но Удмурт Республикалэн "Удмурт Республикаын инвестициосъя ужез умоен лыдъян сярысь" Законэз. 1-тӥ ёзэт. Удмурт Республикалэн элькун бюджетэз сярысь законаз юнматоно: республикаын улон интыос лэсьтонэ кредитъёс висъян сярысь программаен кутэм огкылъёсты пумозяз быдэстытозь, арлы быдэ компенсация сётӥськоз, нимысьтыз адямиослэн басьтэм кредитъёссылэсь быдӟалазэс но ставкаен тупатэм процентсэс лыдэ басьтыса, кудзэ юнматэ Россия Федерациысь Сбербанк, озьы ик араз сизьым процентэз, кудӥз басьтӥське улон интыосъя кредит пунэмасьёслэсь, со сётӥське Россиысь Сбербанклэн Удмурт банкысьтыз но Удмурт Республикалэн бюджетысьтыз компенсациос чотын люкам коньдонлэн люкетысьтыз. 2-тӥ ёзэт. Та Закон кужыме пыре газетын печатлам дырысен 10 нунал ортчыса. Удмурт Республикаысь Кун Кенешлэн Тӧроез А. А. Волков. Ижевск город, 1998 арын 6 октябре. �672-1 Ӵошен капчигес Киров областьысь Кильмезь ёросысь библиотекарьёс кварталлы быдэ кенеше люкаськыло. Автобусэ билетъёс дунтэмесь дыръя библиотекарьёс толэзьлы быдэ пумиськылӥзы. Берлояз семинаре бибилотекарын ужасьёс ваньзы сямен люкаськизы. Вуоно арын ужан амалъёс сярысь вераськизы, литература улонлэсь бере кылёнтэм вылысь выль книгаосын, журналъёсын тодматскизы,. Паски гуртысь библиотекарь С. С. Шапкина удмурт калыкен, лыдӟисьёсын ужамез сярысь мадиз. Светлана Степановналэн та удысын туж бадӟым быгатонлыкъёсыз. Уно аръёс ӵоже ини со удмурт лыдӟисьёсын пӧртэм ужрадъёс ортчытъя, соосты ортчытон- радъянъя литература люка. Н. ТУРИН. Берпуметӥез медаз лу Алнаш музъем азьло но дано вал, али но дано трос гинэ визьмо адямиосыныз. Соос пӧлын - кылбурчиос, кырӟасьёс, тодосчиос, кылчиос, культура удысын ужасьёс. Озьы ик ярато татын, огинэ люкаськыса, пӧртэм ужрадъёс ортчытъяны, вашкала сямъёсты, йылолъёсты утьыны. 12-тӥ толсуре но Асангуртын, Трофим Кузьмич Борисовлы сӥзьыса, фольклор коллективъёслэн пумиськонзы ортчиз. "Трокай" нимо ужрад нырысетӥез ӧвӧл: кык ар талэсь азьло Асангуртын вал ини таӵе пумиськон. Туэ Трофим Борисовлы вордӥськемез дырысен 107 ар тырмысал. Пумиськонэ трос гинэ калык люкаськиз. Лыктэмын вал озьы ик куноос - Алнаш ёрос кивалтэтлэн тӧроезлэн воштӥсез Нина Андреевна Образцова, Трофим Кузьмич Борисовлэн аликаез, Коля вынызлэн нылыз, Екатерина Николаевна Чернова. Дунъясьёс вал Н. Л. Софронов (ёрос кивалтэтысь культура ёзлэн кивалтӥсез), В. М. Булдаков (Алнаш музъемъёслэн директорзы), Н. А. Новгородцева (дышетӥсь) но мукетъёс. Фольклор праздникез усьтӥз "Молодая гвардия" колхозлэн тӧроез М. А. Крылов. Со ик вал та ужрадлэн спонсорез но. Михаил Александрович вераз Трофим Борисовлэн Можга педучилищеез (азьвыл педтехникумез) усьтэмез сярысь. Таиз туэ, 11-тӥ толсуре, пусйиз кылдэмез дырысен 80 ар тырмонзэ. Михаил Александрович ӵектӥз педучилищелы Трофим Борисовлэсь нимзэ сётыны. Та ужрадэ пыриськизы дас кык гуртысь фольклор коллективъёс. Соос возьматӥзы ныл келянэз, сюанэз, нуны сюанэз, зор куронэз но трос мукет удмурт йылолъёсты. Сцена вылэ нырысь потӥзы туймыйылъёс. Соос возьматӥзы ӟазег йыр сиёнэз. Бӧрысь асьсэос кузёос адӟытӥзы пинал куноосын юмшанэз. Ашальчи Окилэн Алнаш музейысьтыз ужасьёс возьматӥзы зор куронэз: азьло, куазь кӧс луэ ке, вашкалаос, возь вылын ӝук пӧзьтыса, вӧсяськыса, инмарлэсь шуныт зорзэ куро вылэм. Кызьы тупатэмын ини улонын, сое уд вошты: ныллы бызёно, пилы кышнояськоно. Капчи ӧвӧл вордэм анайлы аслэсьтыз нылзэ атыкай юртысьтыз поттыны. Уката вашкала дыръя егитъёслэсь уг но юало вылэм, потэ-а, уг-а ныллэн соизлы яке таизлы кен но кышно луэмез. Анай-атайёс куспазы кенешо вылэм но - тӥни. Соин но, дыр, удмуртъёслэн ныл келян гурзы сюлэмез позыртӥсь, ӝож: Гурыё-гурыё льӧмпу сяська тӧлӟе меда, тӧлӟемез потыса, Тӧлӟемез потыса тӧлӟысал ке, ӧй, усьысал, котыртӥз бергаса. Ой, ныл даур, шулдыр даур ортче меда, ортчемез потыса, Ортчемез потыса ортчысал ке, ӧй, бӧрдысал, кымин выдыса. Та кырӟанэн сцена вылэ потӥзы кузёбайёс. Туж быгатыса но лулысь-сюлмысь возьматӥзы соос ныл келянэз. Сотэк-а нылкышноос синзэс ӵушылыса пукизы? Кин тодэ, оло, быземзэс тодазы ваизы? Яке нылзэс алигес сётӥзы-а? Кузёбайёс ик бӧрысь возьматӥзы ӟазег сётонэз. Малы ке шуоно, нылдэ сётэм сяна, пирданзэ но - сандыксэ, тушаксэ но - сьӧраз лэзёно. Ӟазегзэ, ыжпизэ, ветылзэ сётоно. Ыжпи сёто, кечпи сёто, кулэ ке, чипу сёто. Эх-эх-эхе, кулэ ке, чипу сёто. Расход карим кадь йӧтӥз ке, ӟазег йыр сиыны ӧтём - Эх-эх-эхе, ӟазег йыр сиыны ӧтём. Таӵе кырӟан гурен кузёбайёс йылпумъязы ӟазег сётонзэс. Сырьезъёс тунсыко возьматӥзы сюанэз. Тӧрозэс но, миндэр вылэ пуктыса, учкисьёс вискытӥ сцена вылэ дӧдьыен тубытӥзы. Утчанъёс, гурворсэтэз йыгаса, "нуны-сюан каризы". Удмурт фольклор йылолъёсты возьматӥзы на Удмурт Гондыргурт, Шайтангурт, Байтэрек но мукет гуртъёс. Нош учкисьёслы тужгес яразы асангуртъёслэн, кузёбайёслэн, улысь сырьезъёслэн но ёрос культура юртын ужасьёслэн кырӟан-веранъёссы. Алнашъёс мылысь-кыдысь возьматӥзы вить ар ӵоже улэм-вылэм выль кенъёсты. Ужрадэз йылпумъяса, шулдыр кырӟанъёс чузъяськизы. Пумиськонэз радъясьёс но асан нылъёс кырӟазы тодмоссэ но выльёссэ гуръёсты. Бӧрысь ини сцена вылэ потӥз Н. Л. Софронов но тодматӥз дунъясьёслэн мылкыдынызы. Вылӥ устолыксэс возьматэмзы понна, нырысетӥ интые потӥзы асангуртъёс, кыкетӥ интые - утчанъёс, куинетӥ интые - кузёбайёс. Нырысетӥ но кыкетӥ интыосты басьтэмъёслы сётӥзы магнитофон, куинетӥезлы - коньдон кузьым. Ӟеч но шулдыр ортчиз пумиськон. Оскем потэ: та ужрад берпуметӥез уз луы. Галина Савина, Удмурт кун университетын дышетскись. Быръёнъёс матэкто 1999 арын 6 январе Удмурт Республикаысь Быръёнъёсъя комиссилэн кенешез ортчиз. Отын эскеремын Удмурт Республикаысь Кун Кенешлэн кыкетӥ созываз депутатъёсты быръёнэн герӟаськем ужпумъёс: быръёнъёслы дасяськыку но соосты ортчытыку, Россия Федерацилэсь но Удмурт Элькунлэсь законъёссэс кутон; бырйисьёслэн огазеяськонъёссылэн но блокъёссылэн быръёнъёсы пыриськемзы сярысь; быръёнъёсъя документъёслэн формаоссы сярысь; быръёнъёслы коньдон висъян сярысь но мукет ужпумъёс. Со нуналэ ик Удмурт Республикаысь Быръёнъёсъя комиссия республикаысьтымы ёросъёсысь но городъёсысь быръёнъёсты радъясьёсын кенеш ортчытӥз. Ужрадэ ветлэмъёс эскеризы Кун Кенеше депутатъёсты быръёнлы дасяськонэн валче туннэ быдэстоно ужпумъёсты, тодматскизы быръёнъёсты ортчытонлэн правоя инъетэныз, сэрттӥзы-пертчизы быръёнъёслы дасяськонъя мукет юанъёсты. Удмурт Республикаысь Быръёнъёсъя комиссия. Жалянэз уг вала Кылем толэзьлэн пумаз милиция ортчытӥз йыружъёслэсь утиськонъя ужрадъёс. Соос "Вихрь-3" ним улсын ортчизы. Отчы чырмыт пыриськизы тылпулэсь утиськонъя управлениысь инспекторъёс но. Кылсярысь, эскеремын вал Ижевскысь "Электротехника в быту" магазин дорысь вузкарон киоскъёс. 16 ларёк пӧлысь кыказ гинэ тыл кысконъёссы (огнетушительёс) вылӥллям. Инспекторлэн "кытын тылпуэз кысон арбериосты" юанэзлы вузкарисьёс пельпумъёссэс гинэ паймыса ӝутъяло, сыӵеос сярысь ӧм ик кылылэ, пе. Пусйыны кулэ, вузкарыны лэзись документъёсты басьтыкузы, соосты тылпуослэсь утиськонъя ужрадъёсты быдэсъяны косо. Но кузкарисьёс соос сярысь соку ик "вунэто", лэся. Ваньмыз сямен киоскъёсын тыл ваись ёзъёс вужмемын, сисьмемын, ошиськемын ини. Соосты тупатъяны ужбергатӥсьёслэн коньдонзы жаль потэ, дыр. Нош тылпу потӥз ке, кӧня манетлы изъян ваемын луоз, со сярысь ларёкын ужасьёс уг малпасько. Тани вузкарись Бессонова вераз, езъёс ваче луыса, тылпулэсь ӧжыт гинэ утиськыны быгатӥм шуыса. Озьы ке но, киоскын али ке но электропроводка выльдымтэ. Толалтэ ларёкъёсын кезьыт луэ. Соин ик вузкарисьёс электроприборъёсын шунтӥсько, куд-огез сыӵе арбериез ас киыныз но лэсьтыны йӧндыре. Таӵе учыре тылпуозь - одӥг вамыш. Огез сыӵе шунтӥськон маке аракыен вузкаронъя киоскын шедьтэмын вал. Вузкарись Королькова танӥськытэк ивортӥз, соин, пе, ар ӵоже шунтӥськисько ини, но кышкыт учыре ӧй шедьылы на. Ларёкъёслэсь вӧлдэтъёссэс "чеберъяло" тылпулэсь утиськонъя сигнализацилэн датчикъёсыз. Соос кемалась ини куара сётэмысь дугдӥзы , шуо вузкарисьёс. Сигнализация нокинлы кулэ ӧвӧл - укыр дуно усе сое утялтон-возён. Табере уин со интыын - возьмаськисьёс, угось таослы уксё ичигес мынэ. Коньдонэз шыръян - со, валамон, туж ӟеч сям. Но татын но эсэпез валам кулэ. Сю манеттэ шыръяса, сюрссэ медад ышты вал - тылпу жалянэз уг вала. А. ЕМЕЛЬЯНОВ. Улон кожъёс Даурез ортчиз Америкаын, сюлмыз кылиз Кам дуре Улон - сильтӧл. Кужмоссэ някыръя, жуге, посэ - пыд йылысьтызы погыртыны моӵез уг сузььы. Лябъёссэ, векчи ӝуг-жаг пырыез музэн, поръятэ, пилемозь ӝутыса, музъем шоры жалятэк сале, дунне пасьтана пазяса кельтэ. Инкуазен сётэмлэсь уд ортчы, адӟонлэсь уд пегӟы. Со шонер. Кам шур дурын вордскем Михаил Безносов уйвӧтаз но ӧз адӟылы, дыр, ноку но ӧз малпалля, улон гумырез Америкалэн Калифорния штатаз ортчоз шуыса. Воткинск но США матысь ӵыжы-выжы кадь луозы, ракетаосты быдтон кык странаез ог-огзылы матэ кароз, сюрес усьтоз шуэмъёслы Вотка палан будэм воргорон ноку но ӧй оскысал. Дырыз уго мукетгес вал: Россиын лопыръяськиз граждан ож, вуиз со Кам котыре, Вотка заводэ но. Ӟечгес улӥсьёсыз бинялскизы тӧдьыос борды. Начаръёсыз - султӥзы гордъёс пала. Егит приказчик Безносов шедиз нырысьёсыз пӧлы. Ачиз но мазэ-созэ валатэк, пыраклы палдӥз мурт дуннее. ... Воткинскын чугун сюрес вокзал пала нуись ульчаын улэ Федор Павлович Тукмачев, дышетӥсь-пенсионер. Небыт сямо, визьмо, котькыӵе ужлы дышем воргорон. Кык комнатаен квартираез тупа краеведениея сэреглы: татысь оломае но адӟод, олома но тодод. Америкаын улэм ӵыжы-выжыезлэн гожтэтъёсыз но, соос сюлэсь ятыр, огез вылэ огез лач- лач тырыса, ӝикытак керттылэмын, вуэмзыя толэзен-арен, нуналэн-числоен пусйылэмын. Гожтыса ыстэм чуръёс - со ваньмыз, мар кылемын адямилэсь, кӧня ке туспуктэмъёсты вератэк. Федор Павлович усе, куд-ог дыръя вылысь но кутскыса лыдӟе мӧзмонэн пыӵам кылъёсты, син азяз пуктэ берпуметӥ пумиськемзэс, американецлэсь гурен кеськыса бӧрдэмзэ. Ма шуод, асьмеос котькудмы но улон сюресмес асьмеос лёгиськом: кырыж-а, шонер-а - кинлэн кызьы пӧрме ни. Безносов Михаиллэн со егитысен ик конгыляса кошкиз. Воткинск районысь Хорохоры ӟуч гуртэн артэгес пичи гинэ Дуйки нимо гурт сылӥз. Ёрмыса улӥсь Безносов Григорийлэн семьяяз куинь пи но ньыль ныл вордске. Пиоссы Михаил, Игнатий но Дмитрий пичи дыръязы ик чупрес будӥзы. Мумылы-бубылы сомында ымез сюдоно ведь! Сютэм кылёнлэсь кышкаса, нодоосызгес калык вылэ ужаны потӥзы. Бадӟымзэ пизэ атаез дышетыны малпаз: шӧдӥз, вылды, Мишаезлэсь чырмыт сямзэ, визьмо будэмзэ. Собере воргоронлы оскымон юрттӥсь но, кивоштӥсь но бордаз кулэ ук. Лэзиз дышетскыны церковно-приходской школае. Ӝӧк вылысь нырысетӥ шорем нянь юдэс - Мишалы. Выль кутам кут - нош ик солы, юг-юг куэм бинялтон, шорт дэрем - валамон ини, грамоталы дышетскись пизылы. Кызьы-о сотэк. Оло, ӵапак Михаил луоз ай ёрмонысь югыт дуннее поттӥстьсы, сюдӥсьсы-вордӥсьсы, выжызэс данъясьсы. Школаез быдтыса, со кошке Воткинске, уж утчаны шуыса. Интыяське Андриянов Егор купец доры приказчике. Кӧня ке дыр ортчыса, кузёезлы эмеспи луэ ни. Егитъёс ог-огзэс яратӥзы ке но, ӵош улыны кема ӧз кылды: кышноез висиз. Нылпиен но инмар соосты обидиз. Шедьтымтэ шудзэ тарказ на граждан ож: Безносовъёслэсь бадӟым пизэс со туж кыдёке, ноку бертылыны луонтэм мурт шаере нуыса кошкиз. Вынъёсыз шедизы Горд Армие, ожмаськизы Совето власть понна. - Колчак асьме пала вуон азьын Михаил ӵапак Екатеринбурге вуз утчаны кошкем вылэм,- анаезлэсь верамъёссэ тодаз вае Федор Павлович.- Собере со чиптэм-чаптэм ышиз. Вань ӵыжы-выжыосыз быремен лыдъяло вал ини, черке мыныса, сюсьтыл но пуктылӥзы. Нош со улэп кылем, тӧдьыос сьӧры калъяськыса, Китаёзь вуэм. 30-тӥ аръёсы Харбинысь гожтэтъёс ысъяз, отысь Японие кошкем, собере - Америкае. Игнат дядяймес, братэд тушмон шуыса, пытсэт улын но возизы. Зарезь сьӧры потыса, Безносов интыяське Калифорние, кузпалъяське Хортина нимо фермершаен. Ачиз татын но, Воткаын сямен, вузкаронэн выриз. - Кӧня Америкаын улӥз, сомында ик оскиз ас палъёсаз одно берытскоз на шуыса. Туж мӧзмиз Кам шурлэсь, Галёволэсь. Кулэмез но потэ вал вордскем музъем вылаз... Ма шуод, мурт шаере шедемъёс тросэз выризы на дор палъёсазы берытскыны - сыӵе шуд усиз ӧжытэзлы. Палдэм шелепез интыяз озьы гинэ уд лякы ни вылэм. Нош Удмуртия сярысь ке верано, иностранецъёс понна со воксё пытсамын вал. М. Г. Безносов СССР-е кык пол вуылӥз: нырысяз - Москвае, кыкетӥяз - Сочие. Федор Павлович кык полаз но соин пумиськылӥз. Москвае вань ӵыжы-выжыенызы ветлӥзы. Со вал 1968-тӥ арын. Озьы Дуйки гуртын вордскем воргорон, ӝыны даур эмиграциын улыса, Россие вуиз турист интыын. Мукет амал ӧй вал. Воткаос быдэс сюрессэс, Москвае вуытозязы, син азязы олокӧня пол пуктыны выризы бадӟым кӧто, ӝужыт мугоро капиталистэз-американецез. Кызьы соин вераськоно, ма сярысь? Оло, маке мултэссэ но шараяны шедьтод? Пумитазы, пальпотыны вырыса, пумен нюромем синъёссэ ӵушылыса лыктэ огшорыгес гинэ дӥськутэн, шоро-куспо мугоръем пурысьтам йырсиё пиосмурт. Ӟыгырскизы, чупаськизы, ог-огзылэсь киоссэс кутылӥзы, ваньзы синвуаськизы. Отӥяз кыл бӧрсьы кыл, тодэ ваёнъёс ог-огзэс воштӥзы, бугор сэраз. Люкиськон нунал но вуиз. - Михаил Григорьевич куараен бӧрдӥз, милемды келякуз. Воргоронлэсь синкылиоссэ адӟыны секыт, уката но матысь ӵыжы-выжыедлэсь. Мынам анаелэн со родной братэз вал ук, ӵош будӥзы, ӵош шудӥзы, вирмы одӥг. Кыкетӥзэ, но берпуметӥзэ соос пумиськизы на Сочиын. Тупаны но кулэ: Ф. П. Тукмачевлэн пиезлы Батумиысь санаторие путёвка сёто. Пыдзэ чигтыса, ачиз мыныны ӧз быгаты, интыяз атайзэ ыстэ. Та вакытэ ик Сочие эмъяськыны лыктэ Калифорниысь дядез. Озьы вить нунал ӵоже котьма сярысь вераськизы, вань улонзэс кутскыса "сӥсъязы- сэзъялтӥзы". - Сомында ар ӵоже мурт калык пӧлын улыса, ӟуч кылэз ӧз вунэты. Гожтэтъёссэ но янгышъёстэк гожъяз. Улӥзы шоро-куспо, нылпи ласянь таяз но семьяяз ӧз удалты. Сочиын со тазалыксэ юнматӥз, пиньёссэ эмъяз. Американы, пе, ваньмыз туж дуно. Отысь улон- вылонэз сокем ӧз ушъялля, ялан Россие бертон сярысь вераськылӥз. Таяз люкиськыкумы, пичи мурт сямен, зар-зар кутскыса бӧрдӥз. Шӧдӥз кадь, озьы мыным потэ, пыраклы люкиськемзэ. Кык операция пыр потыса ӧз катьяськы ни. Кулэмзэ но ӧм тодэ: нокин ивортӥсь ӧйлась. Хартинаез ӟуч сямен уг тоды вал, соин но, вылды, одӥг кыл но ӧз гожты. Михаил Григорьевичлэн берло гожтэтъёсызъя ми валатским: солэн эмъяськыны коньдонэз но ӧй вал ни, дыр, вань улытозяз 300 сюрс люкам долларзэ банкын арестовать кариллям, налогъёссэ дыраз тырымтэез понна. Ваньбурез но кылиз государстволы. Мугорзэ но кин ватӥз, кызьы ватӥзы - ум тодӥське. Огез гинэ жаль: егит дыръяз умойтэм лэсьтэм вамышез вань улонзэ йырин-чукин берыктӥз, шайгуэз но ноку сюлмаз лякиськымтэ мурт дуннее кылиз. Нош вордскем палъёсаз, ӵыжы-выжыосыз дорын, сӥзьыл куар кадь ӵужектэм гожтэтъёсыз кыллё. Соос гинэ верало на адямилэн ӟугыриё, сэрттыны луонтэм гумырезлэн гердэз сярысь. Трос пол вазиськылӥз М. Безносов СССР-лэн США-ысь консулэзлы, Удмуртие бертыны виза курыса. Гожтэт гожъяз Громыколы, иностранной ужъёсъя министрлы. Котькытын басьтӥз алон. Зэмен но, кин со - Безносов? Малы сокем кыстӥське Воткинске? Родиназэ огпол вузам мурт кыкетӥзэ но уз вуза-а? Ракетаосты поттӥсь город соку уго сизьым тунгон сьӧрын ворсамын вал. Туннэ югдур воштӥськиз. Кин тодэ, туала вакытэ, оло, Михаил Безносов но берытскысал ни ас гуртаз, кӧт тырымоназ учкысал на тӧдьы Кам шоры. Та малпанэз солэн озьы ик кылиз быдэсмытэк, трос мукетъёсыз сямен. 1968-тӥ ар, 2-тӥ сентябрь. Америка. Калифорния. Гажано ӵыжы-выжыосы! Москва бере нокызьы но сюлэмы ӧз буйга на. Ялан пель сьӧрам кылӥсько тӥляд куараосты. Бадӟым тау тӥледлы саламъёсты понна. Узылэсь шӧмзэ мон 50 ар ӵоже вунэтӥ ни вал. Ӝӧк вылам пуко тӥляд киосыныды бичам, пӧзьтэм сутэрлэсь, кудымульылэсь варенняос. Соосты вань улытозям син азям возьысал. Шоразы учкыса, Кам дуре вуылӥсько кадь... Тӥляд М. Г. Безносовды. 1974-тӥ ар, 22-тӥ март. Америка. Калифорния. Америкаын тамында ар улыса, мон быдэсак ӟуч кыли. Яратоно сузэре, Анисья Григорьевна! Тод вал, мон туннэ ик лобыса мынысал Кам шурмы дуре, Галевое. Туж юн адӟеме потэ вордскем гуртме, со котырсь возьёсты, тэльёсты, бусыосты. Отын мынам самой шудо егит дыры ортчиз. Кыӵе ӟеч асьмелэн калыкмы! Нош татын егитъёсмы умоесь ик ӧвӧл. Ушъяны номырзэс. Хиппи соосты шуо. Кузь йырсиё, кесяськем, курмем дӥсен, наркотикен вырисьёс. Соос нокинлы но кулэ ӧвӧл, куштэм адямиос. Ӧйтӧд, кыӵе улонэ вуод таӵе поколениен. Тӥляд М. Г. Безносовды. 1974-тӥ ар, 17-тӥ сентябрь Тросэз фермеръёс урожайзэс октозы ни. Емыш пӧлысь татын тужгес но удалтэ виноград, миндаль, грецкой мульы. Кукуруза арамтэ на, со пудолы мыноз. Скалъёсмылы турын витетӥзэ турнаськом. Пудо сиён дасян вакытэ юрттӥсьёсты медъяськом, асьме кужымен гинэ секыт йӧтэ. Йӧл татын удно. Берло дыре котьмалы дунъёс будӥзы, тужгес но курег пузлы. Туж кема вырисько ни выль машина басьтыны - номырлы но коньдон уг тырмы. Оскисько, ӝоген пумиськомы шуыса. Малпасько ветлыны консул доры, Удмуртие бертыны курисько. Тӥляд М. Г. Безносовды. 1975-тӥ ар, 29-тӥ июль. Ми дорын али - урожай октон дыр. Ар ӵоже татын ньыль пол араськом-кутсаськом. Калифорния сярысь ке верано, со ӝыны Америкаез сюдэ. Мынам одӥг гинэ малпанэ: Удмуртие бертыны виза басьтон. Нош ик ветлӥ посольствое. Кӧня ке возьманы косӥзы на. Алигес выль машина басьтӥ. Улӥсько огшоры. Оскисько, ӝоген Удмуртие берто шуыса. Калифорниын монэ ӟеч тодо, "русский самородок" шуо. Ваньмон дыр шедьыку яратӥсько губияны, чорыганы. Син азям нош - Кам котырысь тэльёс. Тӥляд М. Г. Безносовды. Книга ӝажыяды Осконлэн кужымез бадӟым Выль книга - нырысь ик бадӟым шумпотон солэн авторезлы, собере ини - ӵыжы- выжыосызлы, тодмоосызлы, лыдӟисьёслы. Со - пӧсь гурысь потэм буй-буй нянь колды кадь яке - кема возьмам нылпи кадь. Ма вань на та дунне вылын няньлэсь но нылпилэсь дуноезгес но данъямонэзгес? Алигес "Удмуртия" издательство поттӥз кылбуръёсын "Урт" нимо книга. Солэн авторез - А. А. Ельцов. Алексей Алексеевич та дырозь тодмо ни вал нылпиослы кылбуръёсыныз, озьы ик лыдӟись кие вуиз солэн арлыдоослы сӥзем "Ӟардонлы пумит" нимо нырысетӥез книгаез но. Нош таиз ужез соку ик паймытэ аслаз нимыныз. Ма со урт? Ӟуч кылэ берыктӥськод ке, дух, бодрость шуэм луэ. Та кылэз ик пумитаськомы кылбур чуръёсысь но: "Уртэ выльысь уг берт, лэся,- Оло, синву гылтӥз? Сьӧрам ветлэ, йыга ӧсам: Тани со мон, бертӥ! Мон критик ӧвӧл, огшоры лыдӟись. Озьы ке но, "Урт" нимо книгаез киям кутӥ но, со монэ бордаз кыскиз, пушказ йырыным омырски кадь но одӥг шокчемен пумозяз ик лыдӟи. Дунъямон но данъямон книга, соин ик, лэся, кылдӥз таӵе шара веранэ. Уг янгыша, шуи ке, А. А. Ельцов одӥг липет улэ люкам сыӵе кылбуръёссэ - соос тросэз та дырозь нокытын но печатламын ӧй вал. Нош мукет ласянь, удмуртъёслэн сюлэмзылы туж ярась кырӟан гуръёс но инты шедьтӥллям. Соос авторлэн ог куамын пала люкасько ини. Пӧртэм крезьгурчиос А. Ельцовлэн кылбуръёсызъя гуръёс гожтыны басьтӥсько. Чуръёсты лыдӟиськод но, син шоры пуксё авторлэн утчаськон сюресъёсыз, аслэсьтыз куаразэ сётонэз. Туж сюлмаське, "...улонэ медаз лу мышкин" шуыса. Соин но, дыр, кылбур чуръёсысь лирической герой улонын аслэсьтыз интызэ утча, сюрес вылаз сюосын- сюосын юанъёс пуксё: ... Но уг луы потэме Бус пӧлысь. Сайкато меда асме Иземысь? яке: ... Куазь вошъяськон кадь мылкыдын Та дуннеын мон улӥсько. Кытын меда шудэ, кытын? Аслым ачим вазиськисько. Лирической герой куректэ, сюлмаське, лэсьтоно но ӝыныё-урдсо кылем ужзэ пумаз- йылаз вуттымтэысьтыз: ... Кӧт туж ӝож: Малпанъёс буш кылё ке, Чуръёсы но тросэз гожтымтэ... Ортчозы кӧтӝожъёс но куке - Калык рад улэме туж потэ. Пересьёс ялан вераны дырто: "Адями кадь ул! Адямиослэсь пӧртэм эн лу!" Таӵе сям пичи дырысен ик удмурт вире пыӵа. Оло, соин-а асьмеос ог-огмылэсь висъяськыны ум тыршиське, эшъёслэсь мукетгес луыны ум дыртӥське? Дышиськомы ӵош улыны, ог-огмылэсь куректонмес шори люкыны. Оло, соин но, лэся, кылбур чуръёсысь лирической герой туж сюлмаське вӧзаз улӥсь адямиос сярысь. Сыӵе малпанъёс кылдо, "Районысь музейын" но "Вуж фотоез учкыса" балладаосты лыдӟыса. Туспуктэмын тодмо адями - солдат Иван Русских. Войналэн нырысетӥ нуналъёсаз ик Брест дорын пияш бырыны шеде. Кышномурт туспуктэм азьын мур малпаськыса сылэ. Солэн пель сьӧраз али но кылӥське кадь: "Мон берто..." Озьы ик гожтэмын угось фото вылын но. ... Могак луиз ульча калык, Быриз, чалмиз серем пыры. Уг валаськы, азьло малы Озьы ӧз учке со шоры?! - озьы гожтэ ини А. Ельцов "Ульча кузя мынэ пересь" нимо балладаяз. Вуж пальтоен, тулыс куазен гын сапеген мынэ арлыдо адями. Ваньмыз паймо солы, серекъяны тыршо. Нокинлэн но син шораз уг йӧты, ож пыр потэм пиосмуртлэн гадь бордаз Зарни Кизили медаль пиштэ шуыса. Улонысь басьтэм учыр. Шат ӧжыт луыло возьытэн тырмем югдуръёс арлыдо адямиосын? Котькин мед луоз адями - ож пыр потыса, Герой дано ним басьтэмез-а, огшоры солдат-а, война вакытэ заводъёсын яке бусыын, нюлэскын ужамез-а - соосты данъяны кулэ, уг яра вунэтыны. Озьы вераны тырше кадь автор "Ульча кузя мынэ пересь" нимо балладаяз. Чик паймонэз ӧвӧл урамысь серекъяны малпась муртлы. Со мукет дуннеын уг улы ук. Ачиз кун (государство) ож пыр потэмъёслэсь, арлыдоослэсь палэнскиз ини, соослы пенсизэс гинэ но сётыны уг быгаты ни бере, мае возьманы кулэ на? Арлыдоос зэмос урт вылын гинэ уло на. Соин ик, кин татын янгыш, кин золгес серекъя но мыскылля - шуак вераны кыл ик уд шедьты. Афганистан - Мынам лул висёнэ! Афганистан Йыръе визез-сӧнэз. Кылбурчи Алексей Ельцов сюлэмшугъяськытэк уг ортчы таӵе бурмисьтэм яра вӧзтӥ. Егит пиос, гурезьёсын ожмаськемзы бере, асьсэ куназы мултэс луизы. Та висён тросэзлы умой-умой кӧлыны но уг сёты, ӵуказе нуналлы умой-умой оскыны кужым но уг пырты. Аръёс ортчемъя ке но, вылӥ кивалтӥсьёс пумозяз мед валасалзы "афганистан синдромез", солэсь кылем-мылемъёссэ мед утялтысалзы. Табере бордаз ватсаськизы на чечен черен висисьёс но. Тросэз тодо на, дыр: пичи дыръя анай-атайёс я созэ, я тазэ ческыт сиёнэз уг сёто, ваньзэ шыръяны тыршо. Ярам коть, бадӟымгес будэммы бере ке но юнме шорысь керӟегъяськеммес валаськомы. Но сыӵе малпан йыре ӵемысь туж бер вуэ ини: ... Ветлӥськом шайвылаз, ваиськом весь буре. Синкыли кисьтэмзэ но тодӥм табере - Кӧттырмон сиыны ӧй, ӧй вал ук няньмы, Тӥнь соин ик "чурыт" потылӥз мумымы. Соин ик, лэся, пумитаськод таӵе кылбур чуръёсты: "Кин тросгес меда али кунын: куанер мурт яке куштэм пуны?" Шуге-леке вуэм лирической герой ма карыны пайме, собере ачиз ик шонер сюрес шедьтэ кадь: ... Кошкем муртлэн аслаз гуртэз, Юртэз но вань, лулэз сяна. Уд берыкты ыштэм урттэ. Кытын меда со? Кытчы киргаса ыше-быре? Но кыле на та дунне вылын огез - умоезлы оскон. Соин ик "Кузёос" кылбураз автор гожтэ: ... Но оскон бырымтэ, со юнма ай, Весь уг луы кезьыт но сютэм: Тол бере ик вуэ югыт май, Со сяська но, емыш но сётэ. Пӧртэм кылбуръёс огинэ биниськемын. Соос возьмато авторлэсь улон сюрессэ, солэсь малпанъёссэ, сюлэмвисёнъёссэ. Секыт асьме вакытэ ваньзэ умой, капчи ласянь гинэ возьматыны. Малы ке но шузи-мази вакытэ син шоры ӵемысь пуксё секыт пинал дыръёс, вордӥськем палъёс ас бордазы кыскыны кутско. Шонерзэ вераса, тодмо интыос гинэ улыны кужым сёто, дыр, соин ик йырез но уд ошиськы, киос но уг юскисько. Алексей Ельцов но кылбур сборниказ бадӟым саклык висъя пичи дырызлы, тодмо интыосызлы. Но, мынам малпамея, автор та вакытэ шедьтэ одӥг гинэ шонер сюрес: со - Оскон. Соин ик котькинлы кылымон кадь шуэ: ... Выль сюрес на мон усьто, Вамышто азьлань. Музъемез мон берыкто - Кужыме ай вань! Нош алигес эшшо одӥг шумпотымон ивор вуиз А. А. Ельцов кылбурчилы. Со кутэмын Россиысь Писательёслэн огазеяськоназы. Улонын выль вамыш азьлань лэсьтэмын. Озьы бере, Алексей Ельцовлэн уртэз тырмоз на лыдӟисьёссэ мукет выль ужъёсыныз шумпоттыны. Георгий ГРЯЗЕВ, "Арсенал" телекомпаниысь журналист. Сюресэз аслаз Макем узыр ми палъёс гожъяськисьёсын: мон верасько Ува ёрос сярысь. Тани Галина Романова вордӥськемын но будэмын Булай починкаын, Людмила Кутянова - Выль Вамья гуртын. Татын ик - Парсьгурт. Отын перозэ шере Геннадий Мадьяров. Уд оскелэ, эшъёс, но куинез ик гурт одӥг "Дружба" эштосэ пыре. Ма быдӟа дан со! Вордӥськем палъёсам алигес бертылыкум пумиськылӥ Геннадий Михайлович Мадьяровен. Вераськонмы ошмес ву кадь ӧръяськиз: - Геннадий Михайлович, кӧня арес вал тӥледлы, кияды перо нырысетӥзэ кутыкуды? - Гожъяськыны кутскыкум, куамын арес вал. Ужасько вал соку колхозын, нош, дыр сюрыку, веросъёс гожъялляй. Нырысетӥез уже потӥз "Молот" журналын. Со вал верос. Нимаськиз тазьы: "Кинлэн пиез тон, Ондӥ?" Берло дыре веросъёс уг ни гожъяськы, бадӟым произведениос бордынгес ужасько. - Котькуд ужын - верос-а со, повесть-а - геройёс вань. Тӥляд соос зэмос улонысь басьтэмын-а яке юри малпамын-а? - Зэмзэ верано ке, соос асьме пӧлын ветло. Адямиез син азе пуктӥськод, солэсь сямъёссэ чакласькод. Озьы ик сюжет но собере кылдэ. - Гожъяськон понна мылкыд кулэ на, дыр? - Зэм, мылкыд но, дыр но кулэ. Али одӥг повесте йылпумъямтэ на. Нимыз "Утялты монэ, Инмаре" луоз. Туала улон сярысь гожъяны кутски вал. Огъя пуштросэз таӵе: пинал адямиос гуртысь городэ кошко но биньгозылэсь лябамзэ шӧдыса эрказъяськыны кутско, сӧрисько. Зэм, гужем гожъяськыны дыр уг тырмы. Толалтэ кузь ӝытъёсы тазэ ужме пумозяз вуттыны чакласько. Азьланезлы но малпанъёсы вань. - Нош выль книга поттыны уд малпаське-а? - "Аналтэм сяська" нимоез потӥз ни. Али кыкетӥзэ дасясько. Таяз малпасько тросгес уж пыртыны - сборник мактал луоз со: "Сьӧд Италмас" повесте печатласькоз ("Инвожо" журналын потӥз), мукет повестьме пумозяз вуттыса интыяло, собере трос гинэ веросъёсы вань на. - Нырысетӥ ужъёстэс редакциын тупатъяло вал-а? - Нырысь веросъёсме Генрих Перевощиковлы ысъялляй. Янгышъёстэк кызьы? Тупатъяло вал. Куддыръя пуштроссэ но быдэсак вошто вал. Мыным туж ярало Михаил Петровлэн, Трофим Архиповлэн, Кедра Митрейлэн ужъёссы - соос гожъяськыны быгато вылэм. - Тӥ соос сяменгес ик тыршиськоды-а? - Уг. Сюресэ аслам мед луоз. - Кызьы чаклай, нырысетӥ книгады ӝажы вылын тузон бичаса ӧз кылльы - туж ӝог шедьтӥз аслэсьтыз лыдӟисьсэ... - Мон тыршисько огшоры, валамон кылын гожъяны. Зэмос улонэз, чик чеберматэк возьматыны турттӥсько. Зэмзэ но, книгае лыдӟись доры сюрес туж чаляк шедьтӥз. Мынам сое ӟуч кылэ но берыктэме потэ вал. Зэм, вань малпанъёс куанер улонэн сэрен быдэсмытэк кылё. - Шудо-а Тӥ? - Асме шудтэм шуыны инмар азьын возьыт. Мынам котьмаи вань: йыр йылам - липетэ, гид тросам - пудо-животэ. Ньыль нылпи будэтӥ - ваньзэс пыд йылазы султытӥ. Табере соослэн асьсэлэн семьяоссы вань ни. Мон сямен, шудтэм адямиос туэ ураме кылемын. Кенешиз Елена Петрова, Удмурт кун университетын дышетскись. Толшор: тодмо нимъёс но нуналъёс 1. - Вордскемез дырысен 80 ар тырмиз Советской Союзлэн Героезлы И. Д. Вечтомовлы (1919-1944). 5. - 80 ар талэсь азьло (1919) Малмыж уездысь (али Киров область) Ципья волостьысь Ципья селоын К. П. Чайников (Куӟебай Герд) нырысьсэ аслаз пьесаезъя удмурт кылын "Югыт сюрес вылэ" спектакль пуктӥз; - 65 арес тырмиз А. А. Ермолаевлы, литературая критиклы но тодосчилы, Удмурт Элькунысь культура удысын дано ужасьлы. 7. - 55 арес тырмиз А. К. Леонтьевлы, удмурт кылбурчилы, Удмурт Элькунысь культура удысын дано ужасьлы. 11. - 80 ар талэсь азьло ужаны кутскиз Можгаысь педагогической училище. 13. - 75 арес тырмиз П. П. Любомировлы, тодмо журналистлы, писательлы, Россия Федерациысь культура удысын дано ужасьлы; - 55 ар талэсь азьвыл (1944) огдырлы уже кутэмын Ижевск-Балезино чугун сюрес. 15. - Вордскемез дырысен 90 ар тырме И. К. Зеленинлы (1909-1993) Социалистической Ужысь Геройлы, РСФСР-ысь дано дышетӥсьлы. 17. - 25 ар талэсь азьвыл (1974) Удмурт Автономной Советской Социалистческой Респбуликалы сётэмын "Калыкъёслэн эшъяськонзы" орден. 21. - Вордсккемез дырысен 80 ар тырме В. Г. Самаринлы (1919-1998), тодмо суредасьлы, Удмурт Элькунысь культура удысын дано ужасьлы. 22. - Вордскемез дырысен 80 ар тырме А. П. Верещагинлы, медицина наукаосъя докторлы (физиолог) профессорлы. 24. - 60 арес тырме Кизнер ёросэз кылдытэм дырысен. 28. - Вордскемез дырысен 60 арес тырме В. А. Садаевалы, Россиысь калык артисткалы. 29. - Вордскемез дырысен 115 ар тырме М. П. Прокопьевлы (1884-1919), удмурт кылбурчилы, партийной но общественной ужасьлы; - 225 ар талэсь азьвыл (1774) Удмурт шаере вуизы Емельян Пугачевлэн отрядъёсыз; - вордскемез дырысен 90 ар тырме Александр Эриклы (А. Н. Наговицын, 1909- 1952), удмурт кылбурчилы, прозаиклы, критиклы, журналистлы. ИСТОРИЫСЬ ЧУРЪЁС Озьы но шуо, тазьы но шуо, зэмлыкез - таӵе Колхозъёс кылдэм дырысен ик соосын кивалтӥзы ужез яратӥсь, крестьян калыкез гажась адямиос. Бен, соослэн ӧй вал дипломъёссы, но со понна умой тодо вылэм гурт улонэз. Усто кивалтӥсьёс пӧлы пыртысал Степан Кузьмич Васильевез но Андрей Федорович Вахрушевез, кудъёсыз кивалтӥзы Каганович нимо но "Выль гурт" колхозъёсын. Соослэн кивалтэмзы улсын хозяйствоос ӝог юнмазы, син азьын ӝутскиз гурт калыклэн культураез но улонэз. Война кутскемлэсь азьло ик Бызиново но Нырошур гуртъёсын ӝуаны кутскизы электротылъёс, вераськиз радио, асьсэлэн вал ини автомашинаоссы. Ужаны кутскизы столовойёс, нылпи площадкаос, нош колхозникъёс трудоденьзылы уноен басьяны ӧдъязы ю тысь. Пум понэмын вал сютэм улонлы. Та статьяям вераме потэ 1950-1980 ужам председательёс сярысь. аръёсы. Соосты мон умой тодӥсько вал, уго трос пумиськылӥ, партилэн Шаркан райкомезлэн инструкторез луыса ужакум. Чунарев Василий Васильевич кивалтӥз "Россия" но "Идеал" колхозъёсын, Иванов Алексей Иванович - Пушкин нимо, Широбоков Вячеслав Васильевич - "Пахарь" (азьлогес "Муш"), Шикалов Николай Михайлович - Азин нимо,Каштанов Григорий Захарович - Мичурин нимо, Черкасский Яков Антонович - "Красный партизан", Пушин Василий Васильевич - "Путь Ильича", Трефилов Владимир Сергеевич - "Светлый путь", Пушкин нимо, Курбатов Михаил Андреевич - ЪВИИ партсъезд нимо, Спиркин Константин Кириллович - "Восход" колхозъёсын. Титов Степан Сидорович - "Большевик", Смолин Степан Гаврилович - "Искра" колхозъёсын. Калинин нимо, "Большевик" но "Победа" колхозъёсын кызё арлэсь ятыр кивалтӥз Ложкин Афанасий Николаевич. Али тросэз газетъёс, радио, телевидение туж ярато зульыны, азьло, пе, реформаос кутскытозь, колхозъёслэн кивалтӥсьёссы асьсэ коже номыр но лэсьтыны ӧз быгатылэ. Улӥзы но ужазы вылӥ начальникъёслэн косэмзыя гинэ. Ялан, пе, витьыса улӥзы: кыӵе культураос кизёно, ку кутсконо гырыны, кизьыны, араны но мукет со выллем косэмъяськонъёсты. Но мон меӵак верасал: тросэз кивалтӥсьёс улӥзы ас малпамзыя - чырты вылазы асьсэлэн йырзы вал. Ватонэз ӧвӧл: со дыре трос гинэ янгышъёс луылӥзы, ачимъяськисьёслэн но лыдзы окмылӥз. Косылӥзы мур гырыны, клеверъёсты быдтыны, кукуруза мултэс кизьыны, чылкыт паръёс но чутрак кулэстэмын вал. Но тросэз сыӵе косъяськонъёс кыльылӥзы быдэсъяськытэк. Колхоз кивалтӥсьёс кыл вылын соглаш луэмзэс возьматъязы, нош уж вылын ас сяменызыгес лэсьтылӥзы. Тани "Россия", Азин но Пушкин нимо колхозъёслэн председательёссы В. В. Чунарев, Н. М. Шикалов, А. И. Иванов ӧз лэзе бусыоссэс мур гырыны, соин и та колхозъёс арлы быдэ вылӥ урожай басьтӥзы, али но татын югдур умойгес. Озьы ик вал "Восход" колхозын но. Та вылӥ верам но озьы ик "Идеал" но Мичурин нимо колхозъёс ӧз кулэстэ клевер бусыоссэс. Татысь кивалтӥсьёс но агрономъёс тодыса улӥзы: клеверез ке кулэстӥд, етӥн но будэмысь дугдоз. Тӥни озьы, кытын клевер - отын етӥн, отын коньдон, ӟеч пудосиён. Озьы Мичурин, Азин, Пушкин нимо но "Идеал" колхозъёс арлы быдэ етӥнлэсь вылӥ урожай бичазы. Соинтэк-а Мичурин нимо колхозысь етӥн будэтонъя звеньевоез Нина Александровна Вахрушеваез КПСС-лэн ХХИИ съездаз делегатэ бырйылӥзы. Со вакытэ курадӟонэз адӟытэк ужаз етӥн завод но. Реформаос кутскем бере, тросэз хозяйствос етӥн будэтэмысь дугдӥзы, соин сэрен етӥн заводмы но куашкан калэ вуиз. Улӥськом туннэ нуналэн, азьпала учкытэк. Дышемын курланы кукурузаез. Но кытын сое валаса утялтӥзы, сокузёезлы ӟечен берытскылӥз. Гектарысь 400-500 но солэсь ятыр центнер вож пудо сиён бичаллязы ЪВИИ партсъезд нимо, Пушкин нимо, "Путь Ильича" (кивалтӥсьёссы М. А. Курбатов, А. И. Иванов, В. В. Пушин) но куд-ог мукет колхозъёс. Кукуруза юрттӥз районлы йӧл кысконэз шӧдскымон ӝутыны, пинал пудоез но парсьёсты куайытыны. Нош "Искра" колхозысь председатель С. Г. Смолин трос саклык висъялляз лэсьтӥськон ужлы. Со кивалтон вакытэ Сюрсовай гуртын гинэ пуктэмын вал 4 скал гид, 16 квартираем улыно-вылыно кык кирпич корка, лэсьтэмын магазин, столовой, выльдэмын итымъёс но складъёс. Колхозлэсь экономиказэ азинтон вылысь, нырысь ик кутскиз Шаркан-Сюрсовай сюрсэз тупатъян бордысен. Сое али но калык смолинской тракт шуэ. Нош "Красный партизан" колхозлэн председателез Я. А. Черкасский районын нырысьсэ емышо сад но бакча сиёнъёсборды басьтӥськиз. Удалто вал соос татын. Кылсярысь, та ужен вырыны яратылӥз председательлэн кузпалыз. Али кылыны луэ, азьвыл колхозэн кивалтӥсьёс, пе, ужан дисциплинаез, калыкез зӥбыса гинэ возьылӥзы, соос, пе, туж лекесь, урод тышкаськон кылъёсын вераськылӥллям. Шонер ӧвӧл со. Туж интеллигентноесь вал С. С. Титов А. И. Иванов, В. В. Чунарев, В. В. Пушин. Та эшъёс, мон сямен, "мать" но карыны ӧз быгатылэ. Нош Г. З. Каштановез колхозникъёс ӟег нянь кадь туж лякыт шуылӥзы. Дисциплинаез юнматон уже кутылӥзы партийной, профсоюзной организациослэсь кужымзэс, ӵем ортчытъязы пудо вордӥсьёс но механизаторъёс пӧлын кенешонъёс. Вань предъёслэн самой валтӥсез сюлмаськонзы вал - хозяйствоослэсь экономиказэ ӝутон но колхозникъёслэсь улонзэс умоятон. Та адямиос кивалтон вакытэ колхозъёслэн улоназы пыӵаз электричество, телевизоръёс, мотоциклъёс, автомашинаос. Куд-огез али тазьы но шуэ: председательёс, пе, асьсэ понна гинэ сюлмаськыса улӥзы. Таиз но зэм ӧвӧл. Одӥгез но кивалтӥсь аслыз кыӵе ке бадӟым корка ӧз лэсьты, улӥзы колхоз квартираосын, тросэз ужатозязы ӧз быгатэ легковой машина гинэ но басьтыны. Уждун но трос ӧз октылэ. Азьмынӥсь механизаторъёс но пудо вордӥсьёс соослэсь бадӟымгес уждун бичаллязы. Та кивалтӥсьёс - зэмос коммунистъёс вал. Ваньмыз сямен ик Быдӟым Отечественной войнае ветлэмъёс. Соин ик соослы трос улыны но ӧз кылды, уноез улонысь кошкемын ни. Кылемез но висем пыр уло. Мон сямен социализм вакытэ колхозъёслэсь ужамзэс курласа гинэ возьматоно ӧвӧл. Нош данъяно соосты: мабыдӟа азинсконъёс басьтыны быгатӥзы колхозъёс берло кызё аръёс куспын гинэ (1960-1990), та адӟемпотостэм "реформа" шуонъёс кутскытозь. А. Вахрушев. Шаркан черкогурт. "Сталин вань полководецъёслэсь визьмогес вал" Та нуналъёсы пӧртэм интыосын пусйыло Иосиф Сталинлэсь вордскем нуналзэ. Кытын кызьы. Грузиын солэсь музейзэ паськытатӥзы. Челябинскын усьтӥзы памятник. Альберт Макашовлы сётӥзы Сталин орден. Виктор Анпиловлэн партиез Москваын ортчытӥз митинг. Та ужрадэ мон сюри шӧдтэк шорысь. Горд карлуд (Красной площадь) пала вамышъякум кылӥ уно адямиослэсь черекъямзэс. Георгий Жуковлы сӥзем памятник вӧзын ог 500 мурт. Микрофон пыр кужмоятэм куараос Манеж дорозь ик шуккисько: - Сьӧд зарезетӥ уяны кулэ "Иосиф Сталин" авианосец! - Пыдесъяськыса улытозь - сылыса кулом! - Президентлэсь постсэ быдтон сярысь референдум луоз! - Сионизм куашкатӥз СССР-ез! Пулъёслэсь сэрытак шуккем трибуна вылэ тубо национал-большевик, Офицеръёслэн огазеяськонысьтызы адями, СССР-ысь калык депутат, Ростов областьысь шахтёр. - Сталин вал тужгес ӟучез грузин! - Быдэс Россиын стачка яломе! Кылдытъялэ забастовочной комитетъёс! - Агрессоръёслы бырон! Быдэсак омыр тырмемын вожпотон мылкыдын. Кинъёс ке бызьыло "Лимонка" газетэн. Кык егит пиослэн киязы Ираклы дурбасьтӥсь ӧтён. Адямиос пӧлын пичи "митингъёс" пуромыло: - Зын пуны тон! - Малы татчы лыктӥд, мать вылэ мать! - Сталин берытскоз но тонэ кулэ интые келялоз ай! Урмыса кырыжам ымныръёс пӧлын Виктор Анпилов адӟиське Ален Делон кадь чебер. Со кыл сётэ кыӵе ке тодосчилы (учёнойлы). Таиз шуэ: - Сталинэз 1940-тӥ-1941-тӥ аръёсы кӧня косылӥзы частьёсмес выжтыны шунды пуксён палагес - Западной Украинае, Западной Белоруссие, Прибалтикае. Ӧз кылзы. Война кутскем бере, соин валче гинэ вань армиосмы котыртэме ӧз сюре. Данакез частьёсмы утиськизы но отӥяз юн-юн султӥзы Гитлерлы пумит. Сталин вань полководецъёсмылэсь визьмогес вал. Ура! Кӧтсы тырымон вераськыса-кылзӥськыса, адямиос вамыштӥзы Иосиф Сталинлэн шайгуэз доры. Отчы понӥзы сяська керттэт. Собере ӧтизы Лубянка площаде. Отын, КГБ-лэн юртэз азьын, азьвыл сылӥз Феликс Дзержинскийлы памятник. Али - Сталин вакытэ вӧсь каремъёсты буре ваён из. Туннэ возьматозы, пе, Ельцин дыръя курадӟытэмъёслы сӥзем памятниклы проектъёсты. Мон Лубянкае ӧй мыны. Куазь лекос кезьыт вал. Митингын укыр ӟырдаме бере пыэд кутонлэсь кышкай. Гожтӥз но туспуктӥз А. ШКЛЯЕВ. Калыклы - эстӥськон Эгыр тырмоз-а тулысозь? Правительство ваньзэ ужпумъёсты син азяз возе. Тужгес но бадӟым инты висъя кезьыт толэз ортчытонлы но калыклы эстӥськон сётонлы. Шаерамы та уж оскемын "Удмуртлестоппром" кун предприятилы. Удыс выль ӧвӧл, кылдӥз со 30 ар талэсь азьло. Нимыз - вошъяськылӥз ке но (управление, министерство, огазеяськон), оскем ужзэ котьку умой быдэсъя. - Шуг-секытъёсмы вань, - шуэ предприятилэн кивалтӥсез Анатолий Перевозчиков. 0 Куд-огез пичи ёзъёсмы люкиськизы, нимаз огазеяськонъёс луизы, но улонзы ӧз воштӥськы. Азьло куинь заводмы торфобрикет лэсьтэ вал. Табере соос кулэ ӧвӧл ни. Арлы быдэ шорлыдын 350 сюрс тонна музъем эгыр басьтӥськом. Со пӧлысь 18 сюрссэ калыклы вузаськом. Эгыр вуэ Кузбассысь. Азьло мукет интыосын но кусып возим, али соослэсь палэнским. Тырмоз-а бен эстӥськон тулысозь? Али шаерамы 15 февралёзь ваемын. Декабре 14 сюрс тонна вуиз. Одӥг толэзь куспын 140 вагон эгыр вуттэмын. Предприятилэн Ижысь ёзэз Выль ар праздник нуналъёсы но ужаз, музъем эгырез ӝоктӥз. Ваньмыз сямен со мынэ нылпи учреждениосты, пересьёслэсь юртъёссэс, школаосты, больницаосты, медпунктъёсты эстыны. "Лестоппромлэн" али 13 предприятиез. Берло дыре со бускель Киров но Пермь областьёсысь пу басьтэ (дунтэмгес, пе, усе - Г. Р.). Калыклы одӥг кубометрез 27 манетэн вуза, нош аслыз предприятилы сое дасян 70-100 манет усе. Соин ик юрттэт сётэ интыысь бюджет. Музъем эгырез калыклы 1 тонназэ вуза 250 манетэн, нош ачиз басьтэ 400 манетэн. Таизъя но юрттэт вуэ. Удысын 800 мурт ужа, шоро-куспо уждун - 1 сюрс манет. Со дыраз вуэ, Кизнерысь леспромхоз но Сарапулысь ёзэз сярысь вератэк. - Ми арлы быдэ 5 сюрс адямилы эстӥськон вузаськом, - ватса Ижысь предприятилэн кивалтӥсез Олег Страх. - Со пӧлысь 4,2 сюрсэз пу басьтэ, нош 800-эз - Эгыр. Калык уг ӝожтӥськы. Берло дыре одӥг куиньмоссэ пуэз вандыса вузаськом. Мукет услугаос но сётӥськом: ужан дӥсь вуриськом, пиломатериал дасяськом но музон. Г. РОМАНОВ. Грахысь ю тысез эскеронъя инспекцилэн кивалтӥсез Надежда Николаевна Городскова но "Родина" колхозысь фермалэн кивалтӥсез Зинаида Алексеевна Ямщикова. Туспуктэмез Владимир Беломорскихлэн. Зарезьын улон майбыр... Ар талэсь азьло Татарстанын республикалэн кулэяськонъёсызлы зарни люканы кутскизы. Али "Заречье" банкын 113 килограмм зарни утиське, ивортэ "Татар- информ". Люкам узырлык юрттоз уксёез дунтэмамлэсь утьыны но ваньбур поттонэ инвестициос кыскыны. Республикаысь коньдон ужпумъёсъя министрлэн воштӥсез Айдар Ахатов малпамъя, Татарстанлы тырмыт инвестициос басьтон понна 20 тонна зарни кулэ. Арлы быдэ со одӥг тонналы йылыны кулэ. Зарнилэсь запас кылдытон ужпум туннэ нырысетӥ интые потӥз, малы ке шуоно, манет куашкамен но му вӧйлы дунъёс усемен, республика уксёлы юн шугъяське. Татарстанлэн аслаз зарниез ӧвӧл. Но со вань Чита областьын. Соин ик та кык улосъёс куспын огкыл гожтэмын: Читае бигер шаерысь нуо кабак вина, фуфайка, пӧзь но мукет вузъёс, Татарстанэ Читаысь -зарни. Та ужрадэз ортчытыны коньдон трос гинэ кошке ке но, со нокинэ уг сюлмаськыты: складъёсын сисьмытозь, фуфайка-изьыос адямиосыз мед шунтозы. Матысь дыре Читаен выллем огкылъёс кутэмын луозы Якутиен, Магадан, Амур, Иркутск областьёсын. Люкам зарниен залогъя нырысетӥ операциос январе ортчытэмын луозы ини. Ахатов верамъя, Россиысь но кунсьӧрысь 38 банкен кусып тупатэмын, уноез соос ӵош ужаны соглаш луо. Россиысь Кун Думалэн Инкуазь узырлыкъёсъя но соосты уже кутонъя комитетэзлэн огез кивалтӥсез Вера Савчук та пумысен малпанъёссэ вераз. Улосъёсын зарниез люкан Россиез куашкатоз, сое пичи юдэсъёслы люкоз, шуиз со. Нош Евгений Примаков улосъёслы вань зарнизэс Центробанклы сётыны дэмлаз. Татарстан солэсь кылзӥськыны уг малпа, лэся. Айдар Ахатов вала ке но, асьсэлы зарни люкаса, республикаос центрен кусыпъёссэс лябӟыто шуыса. Но озьы ке но, республикаез инфляцилэсь утён понна зарни люкан - тужгес умоез но дунтэмез амал, малпа со. Иворъёсъя национальной служба. ГОЖТӤСЬКОН-99 "Корт вал" гырдалтэ - сюлэм дыректэ Ёросъёс 1998 арын 1 январьысен 1999 арын 1 январьысен тамында гожтӥськемын тамында гожтӥськемын 1. Алнаш 1798 1870 2. Балезино 634 705 3. Вавож 350 433 4. Воткинск 94 79 5. Глазов 193 176 6.Грах 196 245 7. Дэбес 455 1488 8. Завьялово 539 724 9. Игра 767 855 10. Ижевск 254 176 11. Каракулино 4 3 12. Камбарка 6 5 13. Кез 366 431 14. Кизнер 304 339 15. Кияса 433 426 16. Красногорск 24 24 17. Пичи Пурга 1551 1867 18. Можга 1252 1327 19. Сарапул 50 32 20. Селта 176 190 21. Сюмси 39 28 22. Ува 261 288 23. Шаркан 1465 1543 24. Юкаменск 91 84 25. Як.-Бодья 326 311 26. Яр 95 92 27 Удмуртилэн палэназ 163 201 Ваньмыз 11928 13942 Вылӥын сётэм та лыдпусъёс возьмато почта ёзъёс пыр кӧня мурт гожтӥськиз "Удмурт дунне" газетлы. Гожтӥськонъя лыдӟисьёслы мукет амалъёс но ӵектэмын вал. Ижевскын улӥсьёс газетлы гожтӥськыны быгатӥзы "Информпечатьлэн" киоскъёсыз пыр, озьы ик газетлэн редакцияз. Со сяна, Шарканын, Пичи Пургаын, Воткинскын улӥсьёс ёросазы потӥсь газетэн ӵош "Удмурт дунне" газетлы но меӵак ёрос редакциын гожтӥськыны быгатӥзы. Ваньмыз та гожтӥськемъёс пӧлысь кинъёслы ке но шуд усёз мотоцикл, ошпи, электропила но мукет кузьымъёс басьтыны. Матысь дыре люкаломы лотереяен шудонъя комиссия. Тодомы, кыӵе ёросэ, кыӵе почта ёзъёсы кошкозы кузьымъёс. Нош шудо лыдӟисьёсмылэсь нимъёссэ тодомы ни, интыосы потаса (кудӥз почта ёзэ сюрес усёз). Лотерея шудонлэн берпум люкетэз - турез ортчоз лыдӟисьёсмылэн газетлы гожтӥськем квитанцоссыя. Куд-огез лыдӟисьёсмы валатэк редакцие ыстӥллям гожтӥськем квитанциоссэс. Соин ик ивортӥськом: эн сюлмаське, эшъёс, тӥляд ёросты но гуртты шудоосыз пӧлы сюриз ке, квитанциосты одно ик лотереяен шудытонэ кутэмын луозы. Гидысьтымы "корт вал" гырдалля ни, тодэмез потэ зэмос кузёзэ. Мар, бен, кема возьманы ӧз кыльы ни. Л. МАЛЫХ. Ӟеч лу, кино! Туэ январьысен Юкаменск районысь Ежево но Шамардан культура юртъёсын кино возьматэмысь дугдӥзы. Соин валче ньыль мурт ужысьтыз мозмытэмын луоз. Ёросын ужалоз на одӥг гинэ киноустановка - со районысь культура юртын. Но киноаппаратура тус-тас каремын уз луы. Кин тодэ, оло, искусствоын тужгес валтӥсь инты басьтӥсез удыс - кино - берытскоз на? А. БАЛТАЧЕВА. Ӟечкыласьком! Паймоно кадь: улон дася адямилы пӧртэм кузьымъёс. Одӥгъёссэ сюрес кузя валтэ, чик зуркатытэк. Музонъёссэ сӥсъя но поръя, питыръя но погылля. Таосыз, тужгес яркыт гомась кизилизы доры сузьтӥськытозь, зол гинэ сэстӥсько. Ӵапак сыӵеос пӧлысь ик, дыр, удмурт шаерысьтымы одӥгез дано крезьгурчи Пантелей Николаевич Кузнецов. Удмурт калыкезлэсь сюлэмзэ дырекъятӥсь кырӟанъёсызлы луыса, та адямиез туннэ тодэ ни быдэс улос. Солэсь крезьгурзэ соку ик тодмалод вань мукетъёсыз пӧлысь: удмурт шаерлэн одӥгаз яркыт сэрегаз, алнаш музъем вылын, вордӥськем адями ӟеч тодэ кырӟанлэсь кылзэ, шӧдэ солэсь ненег сюлэмзэ... Нош туннэ тужгес чебер нунал: удмурт улосысьтымы одӥгез яркыт крезьгурчи Удмурт Элькунысь культура удысысь сӥё-дано ужась Пантелей Николаевич Кузнецов луиз Россия Федерациысь культура удысысь сӥё-дано ужась. "Удмурт дунне" газетлэн редакциез но удмуртлыксэс ӟеч утись но вань сюлэмынызы гажась адямиос ӟечкылало яратоно эшсэс таӵе (такем) дуно данъетэн! Улон, иське, огинтыяз уг сылы. Нош адями берпуметӥ осконзэ ыштытозь мед дуроз вормонэз! Эшшо огпол ӟечкыласьком! Зэмзэ но "кыкетӥ нянь" Алнаш ёросын азьвыл аръёсы котькудаз хозяйствоын быдэн 50-60 гектар вылын картофка будэтылӥзы. Унояз эштосъёсын табере "кыкетӥ нянь" уг мертто ни. Та ужлэсь уг куштӥсько Азин нимо колхозын. Ортчем арын та культура сокем ӧз ке но удалты, гуртоослы со пайда сётӥз ик. Картофка чотын басьтӥзы техникалы эстӥськон но вӧй, музъем эгыр. Му емышсэс дунтэк сётӥзы школалы но нылпи садъёслы. Картофказэс медицина страхование чотын висъязы ёрос больницалы. "Алнаширемтехпред" акционер огазеяськонлы бакча сиёнзэс сётӥзы, техниказэс тупатъям понна. Озьы ик со кылиз на вузаны но. Озьы тӥни, картофка зэмен но "кыкетӥ нянь" луыса берытске. Н. КОНДРАТЬЕВ. Журналистъёсын пумиськонъёс Кин чакла дунъёсты? Кылем вторнике, 12 январе, журналистъёсын пумиськиз Правительствоысь Дунъёсъя но тарифъёсъя кун комитетлэн тӧроезлэн воштӥсез Евгений АГАФОНОВ. Та ёз шаерамы алигес кылдытэмын. Но кулэлыкез котькинлы тодмо. Берло дыре сиён-юонъёслы, емышъёслы но мукетызлы дунъёс маял вылын кадь будо. Соин ик люкаськемъёс Евгений Ивановичлы уно юанъёс сётъязы. Малы берло дыре дунъёс син азьын будӥзы? Нырысь ик, со туж яркыт возьматӥз государствомылэсь калыкез сярысь сюлмаськымтэзэ, солэсь лябӟемзэ. Одӥг кунын (странаын) но, рос-прос чаклатэк, ужрадъёс уг кутыло, Россиын гинэ озьы лэсьтӥське. Кыкетӥез, соку кытын вал вань калыкен быръем Президентмы? Малы солэн туж бадӟым администрациез 17 август бере дунъёсты будэтонлы пумит нокыӵе ӧз кариськы? Табере быдэс кунысь адямиос юн мур шокчыло но али ке но ӧз валалэ, мар дауртӥське таӵе бадӟым но узыр Россиын. Нош интыосын югдурез ӧжыт коть умоятон-капчиятон вылысь, кыӵе но ужрадъёс уг куто. Республикаямы но озьы ик ужаськом. Тани Кун Кенеш, ньыль пол эскерыса, "Удмурт Республикаын дунъёсты но тарифъёсты кун радъян сярысь" Закон кутӥз. Соя нуналмысь кулэ луись куд-ог вузъёслы сое поттӥсьёс дунзэс йылэтыны уг быгато. Отчы пыро 3 пумо нянь (1-тӥ сорт чабей, Дарницкой но Украинской выль подовой нянь, йӧллэсь 4 пумо сиён, курег пуз но мукетыз. Правительство озьы ик син азяз возе монополистъёслэсь дунъёссэс. Нош электрокужымлы но шуныт сётонлы дунъёс уз воштӥське. - Но дунъёсты будэтонлэн но сое возёнлэн бодылэн кадь кык пумыз,- шуэ Евгений Иванович.- Асьмелэн сиёнмы бускель республикаосын но музон улосвылъёсын сярысь дунтэмгес ке, со амалтэк палэнэ кошкоз. Нош солы пумит ужрадъёс кутыны уг лэзё Россиысь законъёс. Собере вунэтыны уг яра шаермылэсь палэнысь мар басьтэмзэ. Асьмеос ваиськом ю тысь, кӧс вӧй, сахар, кеньыр но музонзэ. Мукет улосвылъёс асьсэлэсь вузъёссэс палэнэ ӧз ке сётэ, асьмеос трос ыштонъёс адӟом. Со вакытэ ик, правоя улӥсь государствоын но рынокен экономикаын улыны дасяськиськом бере, дунъёсты радъяса возьыны кулэ ӧвӧл. Сыӵе мылкыдзэ вераз Евгений Агафонов. Но Москвалэсь янгышъёссэ ӧжыт ке но тупатон вылысь, Удмурт Республикаысь Правительство ужрадъёс кутэ калыкез утён ласянь. Соос нырысь ик герӟаськемын сиён- юонъёслэсь дунъёссэс йылэтыны лэзёнтэмен. Соин ик Правительство выль ар азьын тая нимысьтыз постановление кутӥз. Но отын, вылӥ верам законын сярысь, дунъёсты радъян сюбеггес басьтэмын. Депутатъёслэн ӵектэмзыя, законын сыӵе вузъёс пӧлы пыртэмын чорыг, нылпи книга-тетрадьёс но мукетыз. Но туннэ тани мае верам потэ на. Правительстволы вазьгес таӵе решение кутоно вал. Куд-огез сиён-юон но вуз поттӥсьёс токма шорысь дунъёссэс йылэтъязы. Валэктонзы одӥг вал: кунгож сьӧрысь, пе, долларен сырьё, бинялтон бумага басьтӥськом. Но эскеронъёс возьматӥзы, огазеяськонъёслэн со вуттэмын вал миым май-июнь толэзьёсы. Тӥни озьы вуз поттӥсьёс пӧяськон сюрес вылэ султо но калыклэн куанермемез вылын узырмыны, улонзэс умоятыны тыршо. Кызьы сое умоен лыдъялод? Бен, туала дыре дунъёсъя шорзэ шедьтыны кулэ: калыклы но секыт медаз луы, бускельёс шоры но учкылоно. Тани асьмеос ӧм вунэтэ на республикаысьтымы кылем сӥзьыл ӵушыса кадь палэнэ (Москва, Санкт-Петербург, Пермь, Киров) нуизы вӧймес но сӥльмес. Собере гинэ асьмеос сайкам но туж беромыса куд-ог ужрадъёс чаклам, но жаляса верано луэ, соос трос ӧз юрттэ ни. Соин сэрен шаерысьтымы сӥль комбинатъёс (Игра, Сарапул) мырдэм ужало, пудо вузасьёс кулэсмизы. Таӵе огыр-бугыр улонамы кыӵе но мугъёс ум шедьтӥське, югдурез уката уродмытон понна. Тани басьтом водительёслэсь документъёссэс воштонэз ик. ГАИ (али ГИБДД) выль ар азьын адямиосты кыӵе кышкатӥз, нош Правительство но кун комитет ас дыраз кылзэс ӧз вералэ, пресса но палэнэ кылиз. Нош Евгений Ивановичлэн ивортэмезъя, правоосты выльдон сокем дуно уз усьы. ГИБДД-лэн кык пумо правоосыз вань: дуноез но, дунтэмез но. Россиын но, Удмуртиын но дунъёсты радъян азьланьын но мыноз. Озьы ке но, куд-ог огазеяськонъёс но фирмаос материалъёссэс эскерисьёслэсь вато, соослы уг возьмато. Соин ик дунъёсты чаклан шугоме, кытысь, кызьы со потэмын, тодмо уг луы. Продукцилэсь асдунзэ но шонер лыдъяны уг быгато. Мукет но умойтэм учыръёс пумиськыло. Кылсярысь, нылпиос понна юрттэт сиён-юонэн сётъяны кутскизы, но куд-ог интыосын вузъёслэсь дунзэс кык поллы будэто. Тӥни кыӵе асьмеос нылпиосты яратӥськом. Огъя вераса, дунъёс огинтыын уз улэ. Тани Россиын быдэс арлы коньдонлэн кужымез 30 процентлы кулэсмыны кулэ. Нош специалистъёслэн-экономистъёслэн верамзыя, со нырысетӥ кварталэ ик луоз. Озьыен, ар ӵоже кӧнялы лябӟом - асьтэос малпаське. Кин бен тодэ? Инфляция, оло, озьы уз ортчы. Со герӟаськемын выль коньдон печатланэн но производстволэн улӟеменыз. Геннадий РОМАНОВ. Дунне вылын Кинлы люкетэ Ирак? Гажано редакция! Коньдонлы ёрмемен, тросэз семьяос али одӥг гинэ газет басьто. Ми но 20-тӥ арзэ гожтӥськиськом "Удмурт дуннелы" ("Советской Удмуртилы"). Газетты лыдӟымон, но берло аръёссэ малы ке воксё гожъямысь дугдӥды дуннеысь югдур сярысь. Туж тодэм потэ вылэм бадӟым политикалэсь кудпала бергамзэ. Тани Иракез ик басьтом. Америка кутскиз но та страна вылэ ракетаос, бомбаос куяз. Со сярысь радио, телевидение дугдылытэк ивортӥзы, нош мугзэ озьы ик ӧз валэктэ: кинлы Ирак сокем люкетэ, малы та государствоез быдтыны выро? Мон тодэмъя, 10 ӵоже НАТО сое кык-куинь пол кутскыса вӧсь кариз ини. А. ЖУРАВЛЁВ. Завьялово район, Первомай посёлок. ... Тросгес лыдӟем потэ политика сярысь: ма лэсьтӥське Россиын но солэн палэназ, ма бордын ужало Россиысь депутатъёс. Сюлэм висе Воткинске пуктыны чаклам выль военной завод пумысен но. Н. МАТВЕЕВ, Игра районысь Порвай гуртын улӥсь. Лыдӟисьёсмылэсь мылкыдзэс санэ басьтыса пусъём: зэмен но, газетмылэн бамъёсысьтыз дуннеысь иворъёсты али шергес адӟод, тросгес саклык висъяны кутским дорамы кылдэм политической но экономической югдурлы. Янгышмес тупатыны секыт ӧвӧл, солы юрттоз Интернетэн кусыпмы. Компьютер луонлык сётэ вакчи дыр ӵоже быдэс дуннеен герӟаськыны но кулэ ивор басьтыны. Ирак сярысь вераськонэз, туала югдурез сэрттон-пертчон понна, умойгес кутскыны луоз 1991-тӥ арысен, "Буря в пустыне" шуыса нимам военной операция бордысен. 80-тӥ аръёслэн пумазы Ирак шӧдскымон "узырмиз" пӧртэм пумо пыӵал тӥрлыкен, та ваньбурлы паськыт сюрес усьтӥськиз Иранэн ожмаськон вакытэ но страналэн уй палаз улӥсь курдъёслы пумит кема аръёс ӵоже война нуыкуз. Жуммем страналы пыд йылаз султон понна кулэ луиз трос коньдон. Со понна президент Саддам Хуссейн Иракысь поттэм нефтьлы дунзэ ӝутэ. Талы пумит луэмзэс соку ик верало Кувейт но Саудовской Аравия. С. Хуссейн 1990 арын 18 июле Кувейтэз янгыше уськытэ, та государство, 1980 арысен кутскыса, Ираклэсь нефтьсэ лушка шуыса. Со понна бускельзэ 2,4 миллиард доллар тырыны косэ, со сяна, 10 миллиард доллар пунэмен тыронзэ "ӵушыны" куре. 31 июле Джезд городын (Саудовской Аравия) Ирак но Кувейт куспын переговоръёс кутско. Одӥг нунал ортчыса, соос куспетӥ каремын вал - 2 августэ Ираклэн армиез Кувейтлэн музъем вылаз пыриз. Кувейтлэн шейхез Джабер ас-Сабах пегӟе Саудовской Аравие. Нефтен узыр интыосты Ирак кие шедьтонтэм вылысь, США но Великобритания 9 августэ "Щит пустыни" нимаськись операция яло, войскооссэс ӝегатскытэк Персидской заливе вутто. ООН-лэн Кышкытлыклэсь утиськонъя советэз вить но ӝыны толэзь ӵоже Ираклы вазиськыса но солэсь действиоссэ умойтэмен лыдъяса кутэ 12 резолюция. С. Хуссейнлэсь нокыӵе валэктон басьтытэк, ООН 29 ноябре кутэ решение Ираклэсь армизэ Кувейтысь улляны, "со понна пӧртэм амалъёсты кутыса". Ираклы пумит луэмзэ вераз 28 страна. США но Великобритания сяна, Персидской залив доры военной кужымъёссэс кыскизы Франция, Египет, Сирия, Саудовской Аравия, Кувейт, Огазеяськем Арабской Эмиратъёс, Бахрейн, Катор, Оман. Соосын кивалтӥз американской генерал Н. Шварцкопф, со ик ужаз "Буря в пустыне" операциез ортчытон бордын. Та ожмаськонэ пыриськиз ог 600 сюрс мурт, ог 2 сюрс пала боеовой самолётъёс, 4 сюрслэсь ятыр танкъёс, 100-лэсь трос боевой корабльёс, кык линкор - "Миссури" но "Висконсин", кыксылэн но бордазы - "Томагавк" бурдо ракетаос. Ираклэн кужымез: ог 750-900 сюрс солдатъёс но офицеръёс, 5 сюрслэсь ятыр танкъёс, ог 700 самолёт, артиллерия. Со сяна, иракской армилэн вал СКАД "земля-земля" тактической ракетаослы ог 500 установка (поттэмын Воткинскын). 15 январе ультиматумен тупатэм дыр быре, та числоысен ик Персидской залив вадьсын кутско тужгес но пеймыт, толэзьтэм уйёс. 17 январе Багдад дорын 3 часэ ӵукна США- лэн, Великобританилэн, Саудовской Аравилэн но Кувейтлэн самолётъёсыз ӝутско инме, котькуд 2 минут ортчыса, городлэн ульчаосаз бомба куяло. США-лэн Военно-Морской кужымъёсыз ракетаосын кужмо шуккет сёто Ираклэн ПВО-езлы. Куашкато Багдад вӧзысь атомной центрез, военной заводъёсты но правительстволэсь юртъёссэ. Куинь нунал ӵоже Ираклэн военной кужымез шӧдскымон синӥз. Озьы ке но, со утиз боевой самолётъёссэ, тушмон син азьысь нимысьтыз укрытиосы ватыса, но СКАД ракетной установкаоссэ. 18 январе Ирак ачиз ыбылӥз ни Израиль но Саудовской Аравия пала. Ракетаослы пумит США Израиле пуктэ "Пэтриал" установказэ но ыштонъёсты ичиёмытэ. Иракез быдэсак чалмытон вылысь, генерал Шварцкопф сётэ команда Багдад вылэ бомбаос куянэз азинтыны. Нунал ӵоже огазеяськем ВВС омыре ог 2500 пол ӝутскылӥз. Ираклэн столицаяз кӧня ке арня куспын куашкатэмын вал правительстволэн вань зданиез, кылиз "Рашид" отель гинэ - отын улӥзы иностранной журналистъёс. 15 феврале Ирак лэсьтэ заявление Кувейтысь войскооссэ поттон сярысь. Сётэм кылзэ быдэстыса уг вуы, огазеяськем трос нациен военной кужымъёс пыро Кувейтлэн территорияз, 27 феврале сое быдэсак мозмыто С. Хуссейнлэн солдатъёсыз улысь. Озьы йылпумъяськиз "Буря в пустыне" военной операция. Ирак та ожмаськонын ыштӥз 70 сюрс солдатсэ но офицерзэ, ог 65 сюрсэз сюриз пленэ, 30 сюрсэз чиптэм-чаптэм ышиз, 360 пала самолётсэ, 2700 танксэ, 5 боевой корабльзэ, 25 катерзэ, ог 40 ракетной установказэ. Огазеяськем кужымъёс ласянь ыштонъёссы таӵе: быриз 795 мурт, 69 самолёт, 28 вертолёт, трос бронетехника. Кыкетӥ мировой война бере "Буря в пустыне" операция дуннеын огез бадӟым ожмаськон вал. Отчы пыриськиз дасо пала государство. Татын нырысьсэ ассэ возьматӥз Ф117 А самолёт-невидимка, спутник пыр кусып тупатон, туала ракетно-зенитной комплекс, "Томагавк" ракета. Та ожмаськон пыртэмын "100 великих битв" нимаськись историяя учебнике. Ираклэн узырлыкез понна жугиськон мынӥз кӧня ке нунал ӵоже кылем арлэн пумаз но. Со ортчиз "Лиса в пустыне" кодовой операция улсын. США но Великобритания Багдадлы но город котырысь военной объектъёслы нош ик кужмо шуккет сётӥзы. Югдур али но тупатскымтэ на. Персидской залив дорын гомӟем тылӝу озьы гинэ уз кысы, солэн мугез валамон: му вӧй ваньмызлы кулэ, тужгес но - ас кужымзэс шӧдӥсь государствоослы. Л. МЕДВЕДЕВА. Малпанме верасько Визьмо пиосмы быризы шат? Улон-вылон шоры учкыса, йыре лыкто пӧртэм малпанъёс. Соос герӟаськемын вуоно быръёнъёсын но. Удмуртъёс отын шер вормо. Депутат луо ке но, парламентын ужамзы туж ик уг адӟиськы. Республикаямы куке но президент быръёмы кадь потэ. Сотэк улонлэн пайдаез уз луы, дыр. Президент одно ик кулэ. Удмуртъёслы асьме пӧлысь кандидат дасяно. Серафима Благинина аслаз газетаз интервью басьтэ Сергей Щукин политологлэсь. Таиз шуэ, удмуртъёслэн, пе, агрессивностьсы, одержимостьсы уг тырмы президент луыны. Мар ӟуч кыл со одержимость? Ожеговлэн словаряз тазьы гожтэмын: "Одержимый: всецело охваченный (каким-нибудь чувством, переживанием, мыслью)". Нош кызьы берыктоно сое удмурт кылэ? Шонерзэ вераса, солы тупась кыл но ӧвӧл кадь. Вылӥ ӝутскем мылкыдо ужась мурт шуэмлы кельше со. Нош Кукмор палась удмуртъёслэн солы тупась кылзы вань. Соос шуо (дарт, дарлы, дартлык). Озьы бере, "одержимость" кылэз удмурт сямен дартлык ик шуом ини. Нош та сям сётэ-а адямилы будыны, карьера лэсьтыны? Мон сямен, уг. Асьмемыз будэтӥзы, карьера кылваланэз умойтэм паласен возьматыса. Нош Шунды пуксён палан карьера кыл умоен лыдъяське. Мон сямен, карьера кыллэн куинь пумо валатонэз. Шуом, адями, карьера лэсьтыкуз, ачиз понна гинэ сюлмаське. Сое умоен уд лыдъя. Нош адями ужа ке, калыкез понна сюлмаськыса, соиз ини ӟеч шӧмо луэ. Куиньметӥез, адями карьера лэсьтэ, калыкез понна сюлмаськыса, но ассэ но уг вунэты. Таиз ини шоро-куспо луэ. Карьера лэсьтон - со секыт уж. Мед луоз зол сямыд, адямиосын вераськыны но, кивалтӥсьёсын кусып возьыны но быгатонлыкед, азьланезлы ужан программаед. Таос пӧлысь одӥгез ке ӧз быдэсъяськы, ужед уз пӧрмы. Мон аслэсьтым ортчем сюресме чакласа, али валасько, кытын янгыше вал. Кивалтӥсьёсын вераськыны быгатонлыке ӧй вал. Соос монэ зӥбизы, азям "шлагбаум" пуктӥзы. Трос вал, дыр, мынам меӵак, синмазы веран учыръёсы. Та янгышъёсме мон туж бер, пенсие потон азям гинэ валай ни. Бератаз ыль но, вӧй но луыны выри, быгатӥ но кадь. Монэ вылэ но ӝутыны турттӥзы, асьсэлы кивоштӥсь. Азьло котькыӵе уже партия нырзэ чуртна вал уго. Партком, обком тодӥзы но, соку ик команда сётӥзы: озьы, пе, уг луы. Тӥни озьы карьерае быриз. Малы мон та вераськонэз поттӥсько? Будӥсь удмурт пиналъёс мед быгатозы вылэм лэсьтыны асьсэлэсь улон сюрессэс. Мед луозы вылэм заводъёслэн но институтъёслэн директоръёссы удмурт пияшъёс. Президент но мед луоз вылэм удмурт. Ӟучъёс шуо, удмуртъёс пӧлын, пе, президент луымон кандидатура ӧвӧл. Мон солы уг оскиськы. Правительствомылэн Тӧроез П. Н. Вершинин тупано кадь адями. Но вань солэн тырмымтэосыз но. Мон сямен, адямиосын но вераськыны быгатонлыкез вань. Вань кадь потэ мыным солэн дартлыкез но (тазэ солы золгес будэтоно). Но солэн кемалы ужаны программаез уг адӟиськы. Та сярысь мур малпаськоно. Шуом, монэ ке президентэ бырйиды, мон пукто нефтехимической завод, со огназ быгатоз калыкез сюдыны, собере "Ижмаш" заводэз ӝутыны но ужатыны. Кутсконо агрогородъёс лэсьтыны. Сыӵе программаен кандидатлы адями оскысал но куаразэ сётысал. х х х Туж трос вераськонъёс мыно удмуртлыкез ӝутонъя. Со понна удмуртъёслы пыриськоно улонэз вырӟытӥсь но азьлане нуись ужпумъёсы. Мон эшелэсь юай: ма улонэз выльдэ, воштэ, азьлань нуэ? Наука, пе. Нош наукаын кыӵе удыс? Физика. Шонер! Физика наукалы сётэ трос выльзэ. Адями тодӥз, улоназ кутӥз парез, газэз, электричествоез, атом кужымез. Электричество улонмес воксё воштӥз. Табере кытчы гинэ уг кутӥськы. Солэсь кылдӥз радио, телевидение, кибернетика, электроника но мукетыз. Физика ик сюрес усьтэ химилы, биологилы. Вань-а та наукаос бордын ужась визьмо удмуртъёсмы? Ӧжыт. Мед луысалзы асьмелэн удмурт ньютонъёсмы, ломоносовъёсмы, эйнштейнъёсмы, курчатовъёсмы, королёвъёсмы. Соку удмурт калык шоры мукет сямен учкысалзы. Алигес лыдӟи Пётр Черновлэсь "Пинал дыр кырӟанъёс" книгазэ. Ведь со школаез медален быдтэм, Москвае быдэс ёросэн дышетскыны келяллям. Малы со журналистика институтэ донгиськем? Малы физикаез йырйыны пырымтэ? Татын но, дыр, дышетӥсьёслэн вань тырмымтэоссы. Ас вылтӥм вераса, озьы ик дышетӥсьёсме янгыше уськытӥсько. Табере серем потэ ни: 8 классэз быдтыса лыдӟиськыны ӧй дышы. Библиотекаысь одӥг но книга йӧназ ӧй лыдӟы. Дышетӥсьёслэсь верамзэс, косэмзэс туж кылзӥськисько вал. Шуысалзы ке, тыныд лыдӟиськыны кулэ, мон одно ик пичиысен лыдӟиськыны кутскысал. Но озьы косӥсь нокин но ӧй вал. Гужемаз война дыръя кужмысь Сарапулэ ФЗО-е келязы. Отысен ас мылкыд каремъя армие кошки. 1945 арын госпитальын кылльыкум гинэ лыдӟиськыны дыши. Али гожтӥ фантастикая пичи гинэ уж - "2099-й или пятая сила". Та брошюраез удмурт пиналъёслы, студентъёслы лыдӟыны дэмласал. Соослэн сюлэмзы мед бугыртӥськысал наука бордын ужаны. Ф. КЕФИН. Вотка пилэн вормонэз Кылем арлэн пумаз шумпотымон ивор вуиз Воткинскысь чеберлыклы дышетонъя школае. Отысь кыкетӥ классын дышетскись Сергей Березин Польшаысь Торуни городын ортчем графикая калык куспо ХИ выставкаын дипломант луэм. Польшае асьсэлэсь 11 сюрслэсь уно ужъёссэс ыстӥллям вылэ 53 кунысь суредасьёс. Россиысь отчы быръемын вал 98 графика. Сергеез суреданы дышетэ Надежда Дмитриевна Сусекова. Солэн дышетэм пиналъёсыз калык куспо адӟытонъёсы нырысьсэ уг пырисько ни. Н. СЕРГЕЕВ. Россия Федерацилэн кун наградаосыныз пусъён сярысь Россия Федерацилэн Презедентэзлэн УКАЗЭЗ Культура удысын кема аръёс ӵоже пайдаё ужамез понна "Россия Федерациысь культура удысын дано ужась" сӥлы карон ним сётоно: КУЗНЕЦОВ Пантелей Николаевичлы - Ува посёлокысь искусствоосъя нылпи школалэн директорезлы. Россия Федерацилэн Президентэз Б. ЕЛЬЦИН. Москва, Кремль. 1998 арын 28 декабре. � 1655. ТУЛКЫМ Вумульыос сьӧры... Верос Гужем уй. Пеймыт шобретэн возъяськиз ин. Интыен-интыен кизили пужыос пуксизы. Шыпыт. Уйжомем пуны ум йылтӥз куаньгетэ, шуак гуньдэ. Котыр улос умме усемын. Надилэн кӧлэмез уг луы. Кӧня пол со солань-талань берыкъяськиз ни. Йырвизез сюпсись малпанъёсыз секыт изэн гадьзэ зӥбо. Уг, нокызьы уг луы солэн умме усемез. Укно сьӧрын мӧзмыт толэзь лэйка, егит ныл шоры жальмаса учке. Надя синъёссэ кыниз. Тани-тани быдэс дунне тыр кеськоз: "Малы, я малы улонын озьы луэ? Малы?!" Дыртыса питырась синкылиосыз миндэрез котто, дырекъясь ымдуръёссэ куртчылэ... Ӧз чида. Вӧзысьтыз ческыт уммен кӧлӥсь вынзэ шобыртӥз но пыдчиньы йылаз кариськыса кыре потӥз. Восьтэт мугорез сьӧд уй соку ик ньылӥз. Юзмыт тӧл йырсизэ маялтӥз. Надя азе пыдэстэм сьӧд ин усьтӥськиз. Кизилиос кырмышъяло. Уг валало соос егит ныллэсь мылкыдзэ! Сюресэз чаклатэк мынэ Нади. Кытчы - ӧйтӧд. Ялан шыпыртэ: "Малы, малы озьы?.. Со лек, лек сямо, тодӥсько. Мар каром мон та каръян сюлмыным? Ой-ой, лулы-сюлмы! Уг быгатӥськы тазьы улыны, уг быгатӥськы! Ялан Олег пала кыске... кыӵе ке вормонтэм кужым... Кызьы, кызьы мозмом на? Викышъя нылаш. - Олеге мынам, я малы монэ пӧяд? Адӟемпотостэм карисько! Нылъёслэсь йырзэс берыктэменыд дан поттӥськод! Синмы но медаз адӟы ни тонэ! Олеге... Яратонэ... Кызьы вунэтом?!" Нылаш ӧз но шӧды паськыт ӧр доры вуэмзэ. Татын, та кызьпу улын, шур дурын яратылӥз со пукыны, мусо кызьпуэн эшеныз сямен вераськыны. Татын ик соос Олеген ӵош вал... - Кызьпуэ, тон валаськод монэ. Мыным али туж секыт. - Нади писпу борды ӟыгырскиз. - Мыным сое вунэтыны кулэ. Озьы ук? Нош кызьы? Уй но нунал йырам Олег, Олег, Олег... Жади ни. Кытысь кужым шедьтом? Кызьы асме вормом? Надялэн бам вылтӥз кузьыт синкылиос питырало. Кызьпу куаръёсыныз маяляське, ӵаштыртэ, эшсэ буйгатыны выре. Огдырлы нылаш буйгаз. Мӧзмыт учкиз сьӧд тулкымъяськись шур вылэ. "Кӧня егит нылъёс ас улонзэс вуэ тэтчыса быдтӥзы... Шудтэм яратонэн сэрен... - малпаз Нади. - Нош мон, мар умойзэ витисько на мон? Олег яратонме лёгаз. Нош мон оскыса улӥ. О! Кыӵе шузи! Сьӧраз ветлӥ, асме ултӥяса ветлӥ ук! - киоссэ куртчылыса ик бӧрдэ нылаш. - Эшъёсы мыскыл каро, анае гинэ но, мусо анае, калгись пуныен ӵошатӥз, коркась потаны ик уг лэзьы. Мар понна?! - Ы-ых, сюлэмы, тэтчы вал мур коже - ву ньылоз, ваньзэ ньылоз..." Надя льӧмпу бордысь шуак палэнскиз, синъёсыз синкылиен чилектӥзы, ымнырыз кӧдэктэмын. "Мар бен, озьы ик медло. Мед басьтоз шуре, ӟеч лу, кызьпуэ..." - егит ныл синъёссэ лэзиз... Куашетэ Вало, тулкымъёс ярдуре шуккисько, пазьгисько... Нош... ма со?.. Шур кузя, ву вылын бергаса-бергаса ваське тӧдьы вумульыосын керттэт. Толэзь зарни сиоссэ кисьтэмъя, вумульыос зарнивуамын кожалод. Нади шарак луиз. Кыӵе ке кӧшкемыт вӧтэзлэсь мӧзмытскиз кадь. Вумульыос... Вумульыос? Шуак сэзъялскиз но сяська керттэт сьӧры бызиз. Тӧдьы вумульыос отӥ-татӥ ву улысь мынекто... малы Надилы та сяськаос? Ачиз но уг тоды. Нош азвесен чилясь,бергась вулэсь мозмытэмез потэ. Тани куасьмем вай. Нылаш сяськаосты шедьтӥз но кезьыт вуысь поттӥз. Вумульысяськаос лач-лач ворсаськиллям. Мыкыртэм йыръёссы, модоссы кузя юзыр карись ву ваське. Паймымон сяськаос та: бадӟым, кӧшкемыт ты шорын ик будо... Нылаш тугокозэ гадь бордаз ӝиптӥз. Али солы сыӵе умой. Сюлмысьтыз вань висёнъёсыз кытчы ке кыдёке-кыдёке кошкизы кадь. Дунне вылын ваньмыз алама гинэ ӧвӧл. Тани та сяськаос но кыӵе чебересь, бордысьтызы шуныт лыктэ. Соос сьӧд уйлэсь ватӥськыса ворсаськиллям. Нош ӵуказе, нырысь шунды сиосын ӵош нош ик усьтӥськозы... Нади тыпак луиз. Нош со? Туннэ уродэзлы, сюлэм висёнэзлы чидатэк, вуэ тэтчысал ке, сайкасалыз на-а ӵуказе? Быдэс мугортӥз кезьыт тулкым ортчиз... Нылаш вырӟиз, каллен гинэ вамыштӥз шур кузя. Тани тодмо кызьпуэз, бадӟым куректонэн зӥбем пересь выллем, ву вылэ вайёссэ лэзем. Нылаш бордаз ӟыгырскиз. - Э, кызьпуэ, кызьпуэ. Валэкты, нодъя вал тон монэ. Мар таӵе мон улӥсько? Мылкыды ялан кытчы ке куриське... Шур палась кезьыт тӧл пельтэмъя, кызьпу куалекъяны ӧдъяз. Нылаш векчи киоссэ юн- юн мыжыке кырмиз но черектӥз: - Нош мон озьы но вунэто тонэ! Вунэто, пыраклы сюлмысьтым кушто! Шат вань егит даурме тазьы ортчытом? Уг! Ныл сюлэмез тӥямедлы, Олеге, эн шумпот. Мон, мон тонэ адӟемпотостэм карисько... Нылашлэн пельпумъёсыз дыректӥзы, ӝож синкылиосыз эрикез шӧдыса кадь бамзэ коттӥзы... - Надя, Нади... - кылӥськиз пеймытысь. Егит ныл котыр учкиз. - - Нади, мар ке луиз шат?.. Нылаш палэнынгес сылӥсь Алёшаез тодмаз. Асэныз одӥг классын дышетскем пияш, востэм маке. Со Надялы котьку но тунсыко пичи пи кадь потылӥз. Йырсиез выжыкылысь Ванялэн кадь баблес, но малы ке горд. - Номыр но ӧз, - лулӟиз нылаш. - Учкы али, кыӵе мусоесь сяськаос... - Бен ачид кадесь ик. - Кин ке соосты ву кузя лэзем. Нош мыным жаль потӥзы... Алёша синъёсэ палэнтӥз. - Нош, Алёши, вумульыос ты шорын гинэ будо ук. Тылэн пушказ кыскись кужымез вань шуо. Нокин отын уяны уг дӥсьты. Кин ке тани кышкамтэ. Огшап шып улӥзы... Гурт палась пунылэн ум йылтӥз вушйылыса кадь утэмез кылӥскьиз. - Тыныд кезьыт ук, Надя, оло, тае вылад понод? Нылаш али гинэ кынмемзэ валаз. Алёшалэн курткаез улын шуныт. Кык егитъёс шур дуре пуксизы. - Лёши, кельше-а тыныд Валомы?.. - Бен, мон яратӥсько шур дурын пукыны, ӝытъёсы толэзь шоры учкыны... - Мон но яратӥсько... Пукисько но малпасько... - Нылашлэн куараез дыректӥз. - Олег сярысь, - ватсаз пияш. - Бен, Олег сярысь... Надялы нош ик секыт луиз. Сюлэмысьтыз кыӵе ке сиез тэрс кариз. - Олег сярысь... Яратӥсько ук мон сое, Лёши, яратӥсько... Тон но тани монэ серекъяськод, дыр. Шедьтэм, шу, яратон. Э-эх, тон монэ уд вала. Ас поннад шузи шуиськод ни, дыр... - Малы тон озьы, Надя? Вождэ эн потты, но тон, юнме гинэ озьы вераськиськод, юнме астэ вӧсь кариськод. Мон туж ӟеч валасько тонэ. Ма карод, яратон угось уг юа, вуэ но гадьдэ сутыны кутске. Тон тыл кадь гомаськод, уйжомыса ветлӥськод. Вань малпанъёсыд яратоно адямиед сярысь... - Кыӵе тон чебер вераськод, Лёши, - нылаш егит пи шоры нырысьсэ адӟем кадь учкиз. - Пырак мынэсьтым мылкыдме, малпанъёсме лыдӟиськод ук. Оло нош ачид но кинэ ке яратӥськод? - Яратон, яратон... Со асьмемыз ялан сьӧраз чортэ... Э-эх, Надюша, мон Олег интыын луысал ке, шумпотыса вань дуннеез ӟыгыръясал, чупасал. Кема аръёс ӵоже лушкем яратон - со тон, мусо Нади. Коть йырдэ кур кар, коть эн. Нош тынад сюлэмыд Олеген висе... - Кужмысь яратоно уд луы, - лулӟиз Нади. - Уд луы... - вазиз Алёша но. Уй куараосты кылзыса, кема гинэ пукизы на соос. Егит пи Надиез капка дорозяз келяз. Люкиськыкузы нылаш тӧдьы вумульыосын керттэтсэ гадь бордаз ӝиптӥз но лушкем пальпотӥз: - Тон, Лёши, эн ишкы ни соосты. Тыын интыосыз кышкытэсь... - Уг ни, - пальпотӥз Алёша но. Нади корка пыриз. Выныз ум йылтӥз мар ке чоп каре. Пичи пияшез бордаз ӟыгыртыса, егит ныл кема дыр ӵоже нырысьсэ гань-гань умме усиз. Гурт пумысь кӧлыны валасьтэм атаслэн куараез шуккиськиз. Укно дурын, пияла посудаын, тӧдьы вумульыос сылӥзы... ЕЛЕНА ПАНФИЛОВА. Кусыпсы "тэшказ" Россия Федерациысь атом кужымъя министр Евгений Адамов Красноярскын ортчись кенеше пыриськиз. Отын пусъемын вал: матысь дыре Россия ядерной кылем-мылемъёсты утёнэн но быдтонэн герӟаськем ужпумъёссэ быдэстыны ӧз быгаты ке, солэсь рынокын интызэ мукет государствоос басьтозы. Министрлэн Сибире вуэмезлэн мугез таӵе: декабре улосвыллэн администрациезлэн но Железногорскысь горно-химической комбинатлэн кусыпсы "тэшказ". Александр Лебедь пумит луиз Украинаысь АЭС-ёслэсь уже кутэм ядерной эстӥськонзэс Красноярске интыяны, сое утьыны, пе, Украина ичи коньдон висъя. Таӵе югдурез куд-ог странаос витьыса гинэ улӥллям, шӧдске. Кышкытлык ваись кылем-мылемъёсты утён интыоссэс Киевлы ӵекто Великобритания но Франция. Китай но Россилэсь интызэ басьтыны дась. Александр Лебедь чурыт кылзэ верам дырысен толэзь ӵоже ини уже кутэм эстӥськонэн литерной поезд Украинаын сылэ. Иворъёсъя национальной служба. "Горд кизилиысь" кизилиос Котькудӥз школаын дышетскем мурт одно ик кутылӥз луоз Можгаысь "Красная звезда" фабрикаын лэсьтэм арбериосты. Со линейкаос, треугольникъёс, пеналъёс... Нош кин ӧз нискыла отын куасам куасъёсын. Али та предприятие акционер огазеяськон шуыса нимаське. Азьло сямен ик отын пулэсь дышетскон арбериос лэсьто, пиналъёслы пӧртэм шудонъёс потто. Тани, кылсярысь, "Бича корка" шудонзы кылем арын Россиысь устоез сю вуз пӧлы пыртэмын. Али татысь кибашлыос арбериоссэс Германиын ортчоно выставкаын возьматыны дасясько. Кунгож сьӧрысь куасъёс асьмелэсь рынокмес ӝокатыны кутскемзы бере, та вузъёсты поттон цехез огдырлы ворсано луиз. Табере тани со выльысь улӟиз. Кыкетӥ арзэ ини лэсьто пӧртэм буёло капчиесь куасъёс. Миым со басьяськисьёслы 7 сюрс 700 куз келямын вал. Озьы ик пӧйшурасьёслы 800 куз куас дасямын. Али кутскизы чорыгасьёслы чаклам вуз но поттыны. Со куас паськыт но вакчигес. Туала арын улыны быгатэ выльзэ утчасез гинэ. Соин ик предприятиын мукет арбериосты поттон борды но басьтӥськизы. Али пиналъёслы чаклам 13 пумо кровать лэсьто. Дасяны кутскизы пӧртэм пумо ӝӧкъёс, комодъёс, пуконъёс. Кылем арын огазеяськон вуз поттонзэ быдэстӥз 115 процентлы. Та лыдпус ялан будэ. Предприятиын каллен йыло выль ужан интыос. Татын уг луо уждун тыронэн ӝеганъёс. Мар бен, вань на вылэм асьмелэн но кибашлы кизилиосмы. Мед пиштозы соос азьланяз но. Н. Байтеряков. Тани со можгаослэн куасъёссы; Римма Николаевна Князева мастер, со быдэс улонзэ татын тырше ни. Туспуктэмъёсыз В. Камашевлэн. ГОЖТЭТ ӦТИЗ СЮРЕС ВЫЛЭ Узырлык но шуд Таяз учыре гожтэт вуиз Пичи Пурга ёросысь Итеш гуртысь. Ыстэм сое Екатерина Александровна Фокина. Бадӟым кӧтӝожзэ кисьтэ аслаз гожтэтаз егит нылкышно. Бырем картэзлэн выныз сое коркасьтыз улляны турттэ. Законъя, Иван Семенович шонер кадь. Юрт лыдъяське вал солэн атаезлэн, Семен Гавриловичлэн. Со кулон азяз завещание кельтэм Иван Семенович вылэ. Нош коркаез йылаз-пумаз вуттӥзы вал Екатерина Александровна но картэз, Валерий. Выль корказы улыны пыризы 1994 арын. Кык ар ортчыса, Валерий бырыны шеде. 1997 арлэн кутсконаз атаез но кулӥз. Со дырысен Иван Семенович юртъер понна ожмаськон нуэ. Вал ини районысь судлэн заседаниез. Суд решение кутӥз Е. А. Фокиналы корка дунлэсь одӥг куиньмоссэ сётыны. И. С. Фокин таин соглаш ӧз луы, Вылӥ судэ вазиськиз. Вылӥ суд районысьсэ судэз косӥз югдурез выльысь сэрттыны-пертчыны. Заседание пусъемын 22 январьлы. Суд завещаниез гинэ лыдэ басьтӥз ке, юртъерлэн кузёез луоз И. С. Фокин. Нош вань югдурез пыр-поч эскероно ке? Екатерина Александровна картэныз ӵош трос кужымзэс но коньдонзэс понӥзы корка лэсьтонэ. Иван Семенович копейказэ но ӧз быдты. Зэм, кык пол вуылӥз ик юрттыны. Юртъер понна налог тыре Екатерина Александровна. Со огназ анай лыдъяське, пиез вань. Кышномуртлэсь корказэ талазы ке, анаез-атаез доры улыны мыноно луоз. Нош отын сотэк но семьязы бадӟым. Иван Семенович кышноезлэн корказ улэ. Зэм, корказы лябгес ини, пичи но, вылаз ик, Семьяязы куинь пиналъёссы. Екатерина Александровна Иван Семеновичлы атайзылэсь вужзэ корказэ ӵектэ, со ӟеч на ай. Нош таиз пыкиське, выльзэ куре. Зэмзэ верано ке, закон Иван Семенович палан, со вылэ угось завещание гожтэмын. Но гожъям законъёс сяна, вань на ук адями кусыпъёсты радъясь сямъёс но. Иван Семенович соосты лыдэ уг басьты, шӧдске. Соин пумиськон сыӵе мылкыд кельтӥз. Кыӵе гинэ кылъёсын ӧз курла воргорон кензэ но бырем вынзэ. Солы осконо ке, Валерий - азьтэм, тордос вылэм. Нош кышноез - наркоманка. Кытысь кылэм адӟем Иван Семенович кенэзлэсь наркотикъёсын эшъяськемзэ, тодмо ӧвӧл. Солэн ик кылъёсызъя, кузпалъёс ялан жугыса возиллям атайзэс. Валерий таизлэн йыраз кирпичен шуккем но, Семен Гаврилович кулэм. Али шуг ини зэмзэ тодыны, кинлэн коньдонэныз пуктэмын юртъер. Вылаз ик, Екатерина Александровналэн нокыӵе квитанциосыз ӧвӧл. Лэсьтӥськон материалъёс угось басьязы гуртэ вуэм вузкарисьёслэсь. Ярам, шуом, корка лэсьтэмын переслэн коньдонэныз. Но со бордын ужазы ук Валерий но кузпалыз. Валамон, завещание - со оскымон документ. Но кызьы со гожтэмын? Семен Гаврилович берло аръёссэ юн висем, бадӟым давлениен курадӟем, югдаз улон учыръёс но вылӥллям, йырсазьыз сураськылэм. Иван Семенович сое сыӵе дыръяз нотариус доры нуллэм шуыса малпа Екатерина Александровна. Нялтас вераса, атайзылэн висемез сярысь гожтэмын солэн медицинской картаяз но. Иван Семенович, судлэсь решенизэ витьытэк, егит нылкышноез коркасьтыз кужмын но улляны турттэ, жуге сое. Нялтас шеде дурбасьтӥсь бускельёслы. Воргоронэз со понна судэ вутто, условно кыл кутыто. Иван Семенович районысь судлэн корка пумысен решениеныз чутрак соглаш ӧз луы. Вылӥ судэ чагиськон гожтӥз. 22 январе Пичи Пурга районысь суд ужпумез выльысь эскероз. Кинэ со шонерен лыдъялоз, али шуг вераны. Но зэмос пиосмурт данзэ саптатэк, ачиз но ӟеч амал шедьтысал югдурез сэртто- пертчон понна. Иван Семеновичлэн азбараз кык автомашина сылэ, одӥгез - иномарка. Ӧй быгатысал шат, одӥгзэ вузаса, Екатерина Александровналэсь пайзэ коньдонэн сётыны? Но Фокин вожпотонэныз сэрен нокыӵе эсэпсэ уг вала ни, адӟемпотостэм каре бырем вынызлэсь кышнозэ. Тӥни кытчы вуттэ ваньбур понна вожмаськон. Г. КОРЯКОВ. Мӧйыос паймыто Вань шуг-секытъёс шоры учкытэк, Санкт-Петербургысь нылкышноос нылпи ваё, гожтэ "Известия" газет. Россиысь нуны ваем кышномуртъёс пӧлын котькинлэсь мӧйыэз луиз куатьтон аресъем В. А. Скобликова. Виктория Андреевналэн нылыз чаклам кадь ик дыраз таза вордӥськиз (3500 грамм, 52 сантиметр). Нимазы Анна шуыса. Нылпи вайыны мылкыд карись нылкышноосты, арессы витьтонлэсь ортчемын ни ке, Санкт-Петербургысь акушерствоя но гинекологияя институтэ вутто. Та выллем учыр толэзяз шорлыдын кык пол луэ. Тани алигес 52 аресъем кышномурт кыктоосты ваиз. Таӵеез Россия Федерациын одӥг пол но ӧй вал на. Иворъёсъя национальной служба. КОНЬЫ ТОЛЯ Малпаськыны ке кутсконо... *** Жаль но ӝожмыт луэ куддыр, малпаськыны ке кутсконо: малы улон одӥг гинэ сётэ пинал дырзэ, одӥг гинэ егит дырзэ, нырысь яратонзэ. Эшшо но ӝож каре мукет малпан: пумен кыдёкегес кошкиськомы пинал дыръя шудонъёслэсь, егит дыръя кылдэм малпанъёслэсь, кыдёкегес ялан кылё нырысь яратонэн герӟаськылэм шумпотонъёс. Тужгес эшшо но ӝож луэ, малпаськоно ке, малы та югыт дуннеямы чеберлыклы синмаськыса но паймыса, улонмылы шумпотыса улыны дыр укыр ӧжыт ук сётэмын... Вордӥськеммы бере ик мертамын котькудмылэн улон дырмы. *** Огзы бӧрсьы огзы вис карытэк, шӧдскылонтэм кошко улонысьтым нуналъёсы. Соосын жаль люкиськыны мыным... Кошко, нуо соос ас сьӧразы быдэстымтэ малпанъёсме, гожтылымтэ кылбуръёсме. Жаль но ӝожмыт мыным... Котькуд нунал нуэ сьӧраз сюлэмылэсь ог люкетсэ, берыктонтэм вылысь. Котькуд нунал улонысьтым кошке ук шайвылэ - берытсконтэм вылысь... *** Пельске но пельске. Уз лу туннэ нокин лыктӥсь. Ачим пукисько Быдэс ӝыт укно дурын весь, - Уз ву-а кин ке? Витисько... *** Уг тодӥськы, уг тодӥськы, кыӵе меда сяськаялоз садысьтымы мак сяськамы; Уг тодӥськы, уг тодӥськы, кыӵе меда емыш сётоз ӵош мерттылэм улмопумы; Уг тодӥськы, уг тодӥськы, уӵы лыктоз на-а меда яратоно кызьпуамы; Уг тодӥськы, уг тодӥськы, жингыртозы меда выльысь ӵош кырӟаллям крезьгуръёсмы; Уг тодӥськы, уг тодӥськы, уг тодӥськы, кыӵе луоз но мар вите улонамы; Огзэ гинэ мон тодӥсько но оскисько: Асьмелэн ваньмыз ӟеч луоз, ӧз кысы ке яратонмы, ӧм куштэ ке огмес огмы. АНАТОЛИЙ ЛЕОНТЬЕВ *** О, Музъеме-аныкае! Тонэ ӟырдыт яратӥсько. Яратӥсько но тон сярысь мон буйгасьтэм шугъяськонэн шугъяськыса весь улӥсько. О, Музъеме-аныкае! Луысалыз ке амалы,ӧй сётысал вадьсад инты шурдыт но лек пилемъёслы. О, Музъеме-аныкае! Сузьысалзы ке киосы, бордам ӝик-ӝик ӟыгыртысал. Соку тонэ мон нокинлы вӧсь карыны ӧй сётысал. *** Ки улам шедьыку, азвесьсэ Мон кулэ ик ӧй кар малы ке. Весь оски ук - куто зарнизэ, Вань зарни чорыге кытын ке. Мон ортчи ни улон сюресме, Ӝож малпан сюлэмме весь поре: Ӧй, ӧй куты зарни чорыгме, Азвесез но кошкиз табере. *** Потоз одно бертылэмед Вордскем гуртад, Атай юртад. Потоз ук нош ик адӟемед Ваньзэ, мае возькод тодад. Потоз одно бертылэмед Вордскем гуртад... Коть ӝамдэлы Потоз тынад вуылэмед Йыбырттыны ас гуртэдлы. Ачим понна Уг бӧрд сюлмы, Сюлэмы тӥ понна бӧрдэ, Кинлэн ӧвӧл ни, Быдтэмын вордскем гуртэз, Атай юртэз. Потоз одно бертылэмед, Гуртэд ке но ӧвӧл тынад... Потоз, потоз вуылэмед Коть ӝамдэлы Гурт бервылад. Потоз одно бертылэмед Вордскем гуртад, Атай юртад... Ӧз ке но лу вамышъямед, Тон бертылод уйвӧтъёсад. Потоз одно бертылэмед Вордскем гуртад... Гурт бервылад... Потоз, потоз на адӟемед Ваньзэ, мае возькод сюлмад. *** Малпанъёсам, мынам сюлмам одӥг кыл весь улэ. Уг гожтӥськы ке но, сое пыртӥсько вань кылбуръёсам: со кыл - УЛОН. *** Зор-кот акыльтӥзы. Зорыса весь улэмен, Сюресъёс кизермизы, Ветлонтэм нӧд луэмын. Кык иськем гинэ ини Мынонэ кылиз мынам, Нош озьы ке но, Тани Вуэме уг лу дорам. Мон асфальт сюрес вылысь Кожыны ик кышкасько. Собере дэри пӧлысь Ӝог уд пот ни - тодӥсько. Гурт пала учкылӥсько, Жалясько гуртоосты. Нош но нош тышкаськисько Кивалтӥсь агайёсты. Гурт дортӥ ик лэсьтӥзы Карта кадь вӧл-вӧл сюрес. Нош гуртэз - обидизы, Палэнтӥ кошкиз сюрес. Ӟеч сюрес гуртэ ӧз ву, Юнме-нэ витиз калык. Гурт сярысь малпась ӧз лу, Тодазы но, дыр, ӧз лык. Кӧня пол гуртоосы Выль сюрес курылӥзы, Трос пӧртэм кенешъёсы Куронъёс ысъялязы. Шуыло: "Лэсьтом одно..." Нокин но пумит ӧвӧл. Малы ке Али ке но Сюресэз лэсьтӥсь ӧвӧл. Коть сӥзьыл, Коть толалтэ Уд но пыры, уд но пот. Сюрес ку луоз гуртэ, Вераны нокин уг тод. Мон кожи асфальт вылысь, Коласько нап дэриез. ...Тракторен потто гуртысь Йӧл нуллӥсь машинаез. *** Тём пеймыт урамын Тӧл вузэ но берга... Кин ке та улонын Адӟонзэ, дыр, карга. Кинлэн ке ук ӧвӧл Кайгуэз но воксё. Кинлы ке нош лек тӧл Изьыны чик уг сёт. Байлыкын, шуд пӧлын Пылаське, дыр, кин ке. Пичи нянь юдэслы Вань ёрмись кытын ке. Люкиське, дыр, кин ке Улонэн та вие... Нош кин ке вордӥське Та югыт дуннее. Кинлэн ке улонэз Юг нунал кадь луоз, Кинлэн ке адӟонэз Сьӧд уйлы укшалоз. Адями вордӥське Кайгулы я шудлы... Вань улон люкиське Тӧдь но сьӧд буёллы. Кык гинэ буёло Улонэз адӟисько... Сое зэм но, оло, Валамысь дугдӥсько? *** Тушмонэз капчигес вормыны. Утча ай тон астэ вормыны, куке шуг-секытлы сётскиськод, кужмыдлы оскемысь дугдӥськод, куке тон тодӥськод, улыны туж ӧжыт кылемын ни тыныд... Ыштытэк улонлы оскондэ, утча ай вормыны тон астэ. Тол Бабай, Лымы ныл но мукетъёс Тол каникулъёс дыръя, номыр шоры учкытэк (коньдон ӧвӧл-а, кезьыт-а), нылпиос ветлӥзы Сарапулысь драмая театре. Татын соосыз пумиталлязы но шулдыртылӥзы Тол Бабай, Лымы ныл, Баба-яга, клоунъёс. Собере нылпиос понна возьматӥськылӥз "Приключение кота Макмура" спектакль. Пичиос сюлэмзы ырак луыса учкылӥзы, кызьы урод клоун лушканы выриз коӵышлэсь чебер кыззэ. Спектаклез дасяз режиссёр В. Мельник. Шудӥзы республикаысьтымы дано артистъёс Е. Потапов, И. Афремов, Г. Есырева но артистка М. Лотарева. С. Беловлэсь пьесазэ пуктыны юрттӥзы егитъёс - студие ветлӥсьёс но. Куд-огез та студие ветлэмъёс дышетско ни Екатеринбургысь театральной институтлэн заочной отделенияз, соос пӧлын Светлана Шляпина, Артур Казберов, Наталья Кисенко. Сарапулысь драмтеатр али дася выль ужзэ - А. Островскийлэн пьесаезъя "Без вины виноватые" спектакльзэ. Пуктэ сое В. Сафонов. Та бадӟым уженыз коллектив возьматыны тырше драматурглэсь вужмисьтэм луэмзэ но аслэсьтыз кужымзэ. В. ЛАГУНОВ. Чупалоз-а, уз-а Выль аре? Тӥ ӧд быгатэ Выль арез пумитаны? Мон но. Мылкыдыд, коньдонэд но луиз ке, котьку праздник уг пӧрмы вылэм. Кин ке со уй кыдёкысь городъёсы поездэз валтӥз, кин ке кеносэз возьмаса пукиз, кин ке узыр муртъёсты ресторанын сюдӥз, нош кин ке нылпи ваиз. Но праздник ӧз быры на. Вашкалаосмы Выль арез 14 январе пусъё вылэм ук, маин асьмеос пӧртэм. Эсьма, оло, куазь но умойгес луоз ай. Сябась карыны винаед ке ӧвӧл, вожо кариськыса, бускелед доры пыр. Вожояськисьёсты-пӧртмаськисьёсты азьло дыръя куноятэк уг лэзё вылэм. Соос, пе, корка шуд пырто. Собере ӵош пуксьыса тунаськылӥллям. Зэм, али егитъёс гинэ тунасько на кадь. Кинлэн уз поты туганэз, вуоно кузпалэз сярысь тодэмез? Оло нош туэ институтэ дышетскыны пырыны быгатод, ӟеч уж шедьтод? Быдэсмоз-а малпанэд? Мар бен, ойдолэ ӧжыт тунаськоме. Вуоно кузпалзэс адӟон понна, нылъёс синучкон азе пуксьылӥллям. Мышласянь эшшо одӥг синучкон пуктылӥллям на, мыд-мыд ласянь сюсьтыл ӝуатъяллям. Сюсьтылэз шунтыса вуэн тэркые кисьтылӥллям. Сюсьлэн кисьтӥськем тусыз вуоно аре луоно воштӥськонъёс сярысь, пе, вера. Толсур (ымусьтон) уе адӟем вӧт зэма, пе. Нош Йӧ вылэ султон уе кышномурт тодыны быгатоз, пе, кӧня нылпиез луоз. Малпанъёстэс бумага вылэ гожтыса вуэн таз дуре тыре. Грецкой мульылэн кӧмаз пичигес гинэ ӝуась сюсьтыл юнматыса "уяны" лэзе. Кудӥз бумага борды тыл йӧтскоз, соиз ик малпанды быдэсмоз. Быдэсмоз-а эшшо кудӥз ке малпанды? Кутэ кияды шудон картаос. Колодаысь шедьтоно черви дамаез но черви королез. Дамаез пононо ӝӧк вылэ, королез - колода улэ. Табере Дама вӧзы одӥген-одӥген одӥг чуре картаосты тыроно. Котькуд куинетӥез карта дама яке черви пусэн укшаз ке, радысь басьтоно нырысетӥ но куинетӥез вискысь картаез. Озьы ик радысь куяно кык огкадь пусэн яке лыдэн картаос вискы пуксемъёссэ, озьы ик луэ кыксэ ӵош но куштыны (шуом, кык тузъёс вискын восьмёрка но валет). Куиньзэ уг яра. Одӥг чурын бӧрсьысь бӧрсе куинь огкадь пусэн яке лыдэн картаос усизы ке, куштоно шорысьсэ. Ӝӧк вылэ черви дама но черви король ӵошен гинэ кылизы ке, малпанды быдэсмоз - Тӥ но таяз аре Короленыды уртче луоды. И. ТУНАЕВА. "Буммаш" акционер огазеяськонлэн корт ӵыжатон комплексаз выль продукция дасян бордын мылысь-кыдысь тыршо шлифовщик Леонид Григорьев но участокен кивалтӥсь Алексей Дружинин. В. Камашевлэн туспуктэмез. Будо выль кивалтӥсьёс Кызьы тодмо, Россиын выль кивалтӥсьёс дасянъя нимысьтыз программа кутэмын. Сое президентлэн шуо. Али программа улонэ пыӵа но республикаямы но со шӧдӥське ни. Европаысь но Азиысь валтӥсь предприятиосын но фирмаосын 30 специалистмы тодон- валанзэ будэтӥз ни, нош конкурс пыр потэмын 48 мурт. Президентлэн программаезъя одӥг адямиез дышетон ичизэ 50 сюрс доллар усе. Кытын бен соос ужаны кулэ? Муресь тодон-валанъёсын, рынокез ӟеч тодӥсь выль кивалтӥсьёслы осконо банкротэ шедем предприятиосты но огазеяськонъёсты. Соос быгатозы ужъёсты кулэезъя радъяны но экономикаез юнматыны. Юнме шорысь соосты дышетыны сомында уксё уг висъяськы ук. Нош асьмелэн специалистъёсмы кунгож сьӧрын асьсэды туж умоен возьмато. Озьыен, соос ужаны но быгатозы. Г. РОМАНОВ. ТУЛКЫМ Шудтэмез сюрес одӥг? Алигес лыдӟи Николай Никифоровлэсь "Инвожо" журналын потэм "Чильтэр сьӧрысь вужер" повестьсэ. Оглом вераса, со пӧрмемын кадь потӥз. Повестьлэн шорсюлмаз - юись, калгись кышномурт, вылаз ик аслэсьтыз вордэм нылзэ курадӟытӥсь. Нырысь ик, лыдӟем бере, таӵе юан кылдэ: малы кышномурт, Зинаида, сокем юн возьдаське карттэк ваем нуныезлэсь? Мон валасько, я, шуом, коть 60-тӥ, 70-тӥ аръёсы со серемос вал. Нош али дыре кӧня огназы нылпиоссэс будэтӥсь анайёс! Ведь со асьме улонамы "норма" луэмын законэн юнматэм выллем. Собере гуртын таӵезэ ватыса возьыны нокызьы но уд быгаты. Эшшо ик - кышномурт юыны яратэ на ке. Татын мар но со "суредамын" писателен. Повестьлэн пумаз ваньмыз шараяське. Зинаида соку гинэ вала ас сьӧлыксэ, шуэ автор. Солы возьыт луэ адямиослэсь, но азьпал улонэзлы осконэз чутрак чиге. Бен капчигес вал меда солы шараямтэ сьӧлыкеныз? Нош соку, куке ваньмыз шараяськиз, юрттыны кулэ ӧй вал-а солы самой со адямиос ик, кудъёсыз лушкаськись музэн юртъераз пыразы но утчазы солэсь шексэ? Писатель туж капчиен но жалятэк героинязэ вуттэ ассэ ачиз быдтонэ. Адями янгышсэ вала ке, солы одӥг сюрес - кулон гинэ кыле на шат? Нош шудо луоз на меда Таня нылыз? Дас ньыль ар пытсам ӧс сьӧрын улыса, солы секыт луоз калыклы, солэн кылызлы дышыны. Пиналъёс но сое исалозы, серекъялозы, вӧсь карозы - ведь со мугорын но, визьмын но пӧртэмгес, пӧрмостэмгес соослэсь. Соин ик нокыӵе нылпи юртын но Таня шудо луыны уз быгаты ни. Умойгес луысалыз, анай, ас янгышсэ валаса, нылзэ йӧнатысал ке ачиз, вӧзаз ке возьысал, азьпалан шуг-секытъёслэсь ке утьысал. Анайлы кулэ вал улыны, табере ини нылыз понна - озьы со инмар азьын быдэсак ас сьӧлыксэ но быдтысалыз, ас янгышез понна но дурыныз тырысалыз. Литератураямы одӥг гинэ таӵе гожтэмез луысал ке! Котькуд кыкетӥез-куинетӥез произведение адямилэн ассэ ачиз быдтонэныз быре. Озьы ик кулэ кадь. Лыдӟисьёс но, критика но та шоры гань-гань учко, лэся. Нош суицид (астэ быдтон) республикаямы лэчыт ужпумен сылэ. Адямиез вие ке мукетыз - о-о, со йыруж, тюрьма. Нош кыӵе правоен ассэ ачиз быдтэ адями? Кин сое солы сётӥз? Кытысен? Яке асьме обществоын сыӵе закон вань-а? Уг поты меда та асьме сюлэм чурытмы бордысь, измиськом ини, лэся... Нош туала удмурт проза юнматэ гинэ, лэся, тае. Тодамы ваём В. Титовлэсь "Всем смертям назло" повестьсэ. Кыӵе юн нюръяське татысь герой улон понна! Кулон гижыос улысь, кулонлэн ымысьтыз мозмытскыны ворме: секыт операциосты чида, копак суйёстэк, сӧсырлэсь но сӧсыр кыле. Йыраз чилектылэ ик ассэ ачиз быдтон сярысь малпан, но со шедьтэ аслыз кужым эшъёсыныз, кышноеныз ӵош вамыш бӧрсьы вамыш лэсьтыны, улонэ кыльыны. Ас кужымзэ но ӟигарзэ со уг быдты ассэ ачиз жалянлы. Солэн потэ улэмез. Адями кулэ улыны, асэныз ачиз "жугиськыса" - жалятэк, кулонэз вормон понна. Тодам лыктэ одӥг фильм ( нимзэ вунэтӥ). Кык боецъёс Быдӟым ож вакытэ сюро пленэ. Одӥгез соос пӧлысь пал кыл но уг вера, нош мукетыз предатель луэ. Нырысетӥзэ виё, нош кыкетӥез улэп кыле. Татын туж шуг адямиез огназэ гинэ янгыше уськытыны. Нырысетӥез лулыныз-сюлмыныз туж бай адями вал, дыр. Соин ик со кышкатэк пумитаз ас эзельзэ, нош кыкетӥез "духовно нищий", шуыны луоз... Кытын асьмелэн туэ духовной, лул "сиёнмы", кыӵе со, отысь потэ адями но - солэн улон манерыз, улон секытлы чиданэз, яратонэз валамез но огъя учконэз. Мон но тросгес луыны кулэ асьме обществоын , асьме нацимы пӧлын. Светлана Ильина, дышетӥсь. Ӝегатэмын героинэн Россия Федерациысь ФСБ-лэн Удмурт Республикая управлениез Казахстанысь Россие лушкемен героин келян сюресэз кортназ. Со шараямын вал, трос эскеронъёс ортчытэм бере. Героин уноен вуэ вылэм Россилэн куд-ог улосъёсаз, озьы ик Ижевске но. Синмаськымон операция ортчытыса, контрабандаез кунгож вамен келян амалъёс дыраз синйылтэмын вал. Соку ик кырмемын йыртэмасьёс но. Ӝегатэмын Казахстан Республикаысь куинез мурт, таламын 1,3 килограмм героин, валюта но автомобиль. Ӵапак со машинаен ик наркотикез вортто вылэм. УФСБ-лэн следствиосъя ёзэз та пумысен 188-тӥ (2-тӥ люкетэз) но 228-тӥ (4-тӥ люкетэз) ёзэтъёсъя уголовной уж ӝутӥз. Россия Федерациысь ФСБ-лэн Удмурт Республикая управлениезлэн пресс-службаез. Правительствоысь иворъёс Правительстволэн кивалтӥсез Павел Вершинин 10 январе ветеранъёслы госпитальын кенеш ортчытӥз. Кызьы ивортылэмын вал ини, отын тупатъян-выльдон ужъёсты министръёслэн кабинетсылэн тӧроез ачиз нимысьтыз эскерыса возе. Ужъёслэн кызьы мынэмзы сярысь ивортӥзы элькунысьтымы лэсьтӥськонъя комитетлэн председателез Геннадий Батищев, тазалыкез утёнъя министр Сергей Шадрин, лэсьтӥськон ужъёсты быдэсъясь организациослэн кивалтӥсьёссы. Пусъемын вал: та юртэз тупатъяны, кулэ оборудование басьтыны тырмыт коньдон висъян ласянь Правительство сётэм кылзэ быдэстӥз. Та ужлы сётэмын 1 миллион манет. Со сяна, 2,4 миллион манет ортчытэмын ог-огеныд зачёт амал пыр. Дас нунал ортчыса, Павел Вершинин нош та выллем ик кенеш ортчытоз. *** Правительствоысь аппаратлэн ортчем совещанияз Удмурт Элькунысь Быръёнъёсъя комиссилэн председателез Афанасий Тубылов вераз Удмурт Республикаысь Кун Кенеше вуоно быръёнъёслэн аспӧртэмлыксы сярысь. Со пусйиз: быръёнъёс сярысь интыысь Законын федеральной Законлы ог 100 пала тупамтэосыз вань. Соин валче Быръёнъёсъя комиссилы таӵе югдурысь потон понна кӧня ке валэктонъёс, но положениос но дэмланъёсын гожтэтъёс дасяно луиз. Таяз быръёнъёсы пыриськыны быгатозы 1 миллион 151 сюрс адями, быръёнъёсъя комиссиосын ужалоз 10 сюрслэсь уно мурт. Таӵе югдуре, шуиз Правительстволэн Тӧроез Павел Вершинин, асьмелы ужаны кулэ Удмурт Республикалэн Конституциезъя, "Удмурт Республикалэн Правительствоез сярысь" Законъя, ужано, калыкмес шуг-секытъёслэсь утён вылысь. Али быдэстоно ужъёс трос гинэ, уноез соос выжизы ортчем арысь но. Соос пӧлысь тужгес бадӟым инты басьтэ бюджет удысын тыршисьёслы уждунъя пунэмъёсты тырон. Солы республикаямы декабре 20 миллион манет вуиз, январьлэн нырысетӥ нуналъёсаз федеральной бюджетысь вуыны кулэ на эшшо 20 миллион манет. Со коньдон азьло сямен ик мыноз республикаысьтымы бюджет чотысь уждун басьтӥсь организациослы, дотация чотын улӥсь городъёслы но ёросъёслы. *** Екатеринбургын 5-6 январе Урал улоысь областьёслэн но республикаослэн экономика удысын ог-огеныд ӵош ужанъя ассоциацизылэн Советэзлэн заседаниез ортчиз. Отын эскеремын Россиен но солэн субъектъёсыныз ӵош ужан кусыпъёс. Кызьы лыдъяло улосъёслэн кивалтӥсьёссы, Россилэн Правительствоез, 1999 арлы бюджет дасякуз, субъектъёслэсь кулэяськонъёссэс лыдэ басьтымтэ, налогъёсысь висъям коньдон улосъёслы тырмыт уз луы. Удмуртилэн Правительствоез Россия Федерациысь Госдумаысь депутатъёсын ӵош та пумысен Кун Думае гожтэт ыстӥз. *** Правительство, городъёсысь но ёросъёсысь администрациос куспын январе дасямын луоз огкыл. Со бюджетысь коньдон висъян радлыкез юнматыны кулэ. Кылсярысь, отын верамын луозы уждун тырон, эмъюмъёс, эстӥськон но вӧйёс, удобрениос висъян, нылпиослы пособиос тырон, пунэмъёсты тырон но сиён-юон висъян сярысь ужпумъёс. Та документ, пусйиз Павел Вершинин, азинтыны кулэ кылем арын феврале Завьяловоын гожтэм протоколэз. *** Туэ но Правительство аслаз ужаз бадӟым саклык висъялоз бюджетлэсь доходъя люкетсэ юнматонлы. Казнае выт тыронлэсь пеган сюресъёсты пытсаны кулэ. Выт тыронэз радъяно производстволэн интыяськемезъя гинэ. Правительстволэн кивалтӥсез, ог-огеныд зачёт амалэн ужанэз кулэстон но бюджетэ уногес коньдон кысконэз будэтон вылысь, ужрадъёс дасяны косӥз. Татын, шуиз Павел Вершинин, ужмес кужмоятыны кулэ, со сярысь калыклы ивортылоно газетъёс, радио но телевидение пыр. Удмурт Республикаысь Правительстволэн пресс-центрез. Сюсь мугоръёс Удмурт Элькунлэн Национальной музеяз нош вуизы Санкт-Петербургысь сюсь персонаос. Та учыре музейын ужасьёс ваиллям 22 йӧспӧртэм вордскем муртлэсь сюсь мугорзэс. Сыӵеесь луо 1877 арын вордскем кык вынъёс Джованни но Джакомо: огзы борды огзы бурмемын. Ужаллям соос циркын, трос коньдон люкамзы бере, Венеция котыре вилла басьтыса, кык сузэръёсты кышно ваиллям. Кулӥллям 1940 арын. Учкисьёс тужгес но паймозы "адями-ӟозлы", "кышномурт-вазалы". "Адями-ӟоз" йырзэ но синзэ берыкъятэк адӟыны быгатэ вылэм, мар лэсьтӥське солэн мышказ. Нош "кышномурт-вазалэн" ӧвӧл пыдыз но, суйыз но: озьы со дунне вылэ вордскем. Мумиз кулэ карытэк сюрес дуре сое куштэм. Кӧня ке дыр ортчыса, нылаш вӧзтӥ цирк балаган ортчем но сое адӟыса, сьӧраз басьтэм. Озьы нылаш циркын будэм, отын ик ужам. Сое циркын экспонат чотын калыклы возьматъяллям. Учкисез паймытыны быгатоз "адями-рак (раката)" - киыз но пыдыз раклэн кадь. Та йӧспӧртэмъёс пӧлын озьы ик вань сюро адями, куинь синмо, кык ныро, луд кеч ымдуро адямиос. Та сяна, адӟытонын "тодматскыны" луоз на тушо кышномуртэн, самой зӧк но ӝужыт пиосмуртэн. Выставкае озьы ик ваемын Гиппократлэн, Петр И-лэн, Моисейлэн но мукет адямиослэн сюсь мугоръёссы. Мылкыд карисьёс музейысьтымы та выставкаез адӟыны быгатозы 31 январёзь.Со ужа 11 часысен 18 часозь шутэтскон нуналтэк. Е. КУДРЯВЦЕВА, Национальной музейын ужась. * Куинь синмо кышномурт. * Моисей. Пусъемын МЧС-лэн знакъёсыныз Кышкыт учыръёсты алонын бадӟым уж нуэмзы но оскем ужзэс синмаськымон быдэсъямзы понна Россия Федерациысь граждан обороная ужпумъёсъя но кышкыт учыръёслэсь утиськонъя но солэсь бервылъёссэ быдтонъя министрлэн приказэзъя Россиысь МЧС-лэн гадь вылын нуллон "За заслуги" знакеныз пусъемын: - Вершинин Павел Николаевич, Удмурт Республикаысь Правительстволэн Тӧроез, Удмурт Республикаысь граждан обороная ужпумъёсъя начальник; - Габричидзе Тамази Георгиевич, граждан оборона ужпумъёсъя начальниклэн воштӥсез, Удмурт Республикаысь граждан оборона ужпумъёсъя но кышкыт учыръёслэсь утиськонъя комитетлэн председателез, полковник; - Фомин Пётр Матвеевич, та комитетысь ик председательлэн оперативной ужпумъёсъя воштӥсез. ЕГИПЕТЫСЬ ЧУРЪЁС Дауръёс но адямиос Миым мартысен кутскыса, газетчи Алексей Шкляев "Удмурт дуннеын" трос мадиз Египетэ ветлэмез сярысь. Паймоно кадь: удмурт лыдӟисьёс юн тунсыкъясько вылэм асьме шаерлы копак кельшисьтэм кунэн. Авторен пумиськонъёс дыръя олокыӵе но юанъёс сётъяло. Сопал дуннеысь кужымъёс шӧдӥсько-а пирамида пушкын? Котькуд воргоронлы ньыль кузпал возьыны лэземын ке, куспазы тупало-а кышнооссы? Зэмен ик чылкыт-чылкыт зарнилэсь-а кисьтэмын фараонъёслэн коросъёссы (гробъёссы)? Валамон ини, ортчем ӝыны ар куспын Египетлэн уно сюрс аръем историяз номыр ӧз воштӥськы. Нош Алексей Шкляев сыӵе абдрамон кун сярысь весь маке но выльзэ тодэ. "Москва-тур" фирма пыр кусып возе Египетэн но, отчы ветлӥсь адямиосын но, шедьтэ тунсыко книгаос но фильмъёс. Азьвыл гожъямъёсыз кытӥ-кытӥ уг тупало ни выль тодон- валамезлы. Соин ик автор мылкыд кариз куд-ог гожъямъёсты выльдыны. 1. Из даур Вашкала дырез куддыръя нимало палеолит - из даур. Туала наука оскытэмъя, со кутскиз адями кылдэм дырысен, 2 миллион ар талэсь азьвыл. Кыстӥськиз асьме вакытлэсь (эралэсь) 10 сюрсэтӥ арозь. Малы азьло из даур? Ужан тӥрлыксэ адями вӧлӥз кӧльылэсь, чарпалэсь, лылэсь. Египетлэн туала улосвылаз (территорияз) соку ӧй вал луо нёжал. Быдэсакез сямен кырал шобырскемын нюрен. Собере омыр пумен куасьмиз, нюр кӧсаз, отысь ву люкаськиз одӥг ӧре. Озьы кылдӥз дуннеысь тужгес кузез шур - Нил (6 сюрс 671 иськем). Палеолитэз воштӥз неолит - вылез из даур - асьме вакытлэсь азьло 8-3 сюрсэтӥ аръёс. Соку Нил котырын улӥз кык пӧртэм калык. Африкалэн шорысьтыз вуэмъёс сьӧдэсьгес, Азиысь лыктэмъёс ӟарытэсьгес. Кӧняез ке тодосчиос (учёнойёс) шуо: Ливия пыр Египетэ вуизы паймымон Алтантида шормуӵысь адямиос. Музъем зуркаку, пе, шормуӵ васькиз ву улэ, отысь визьмо калык лыктӥз Нил дуре. Оскод-а, уд-а, но туннэ Египетысь адямиос лекос абдрамонэсь. Негръёс бен ваньзы су кадесь. Араб воргоронъёс куренесь, кышноос тӧдьыесь. Музейысь учкы ай дано излэсь корам мугор суредъёсты. Пиосмуртъёс вӧлэмын гордпыръем гранитлэсь, нылкышноос - юг- юг мраморлэсь. Туннэ нокин но уз вера, кыӵе дауре Египетэн кивалтӥз эксэй (фараон) Осирис (Озирис). Куд-ог тодосчиос оскыто: асьме вакытлэсь азьвыл 4200-тӥ арын. Со одӥг кунэ огазеяз пӧртэм куо адямиосты. Осирисэз сокем данъязы - кулэмез бере пӧрмытӥзы инмарлы. Сое суредаллязы мумияез (сирен тырмытэм шӧез) музэн. Зэм, Осирислы отӥяз ӧз удалты. Вашкала мадёнъёслы осконо ке, инмарлы пӧрмиз солэн Сетх нимо агаез но. Таиз вииз Осирисэз. Мугорзэ оло дас куинь, оло ньыльдон кык люкетлы кораз но Египетлэн пӧртэм интыосаз куяз. Осирислэн сузэрез Исида соку луиз ни вал Осирислэн ик кышноез (вашкала дыръя апай- вынъёслэн но атай-нылъёслэн куспазы малы паръяськемзы сярысь отӥяз мадём). Исида Осирислэсь ваньзэ сямен люкетъёссэ ваиз Абидос городэ. Одӥг юдэссэ гинэ ӧз шедьты, сое чорыг ньылэм. Озьы бере, Осирис атай луыны уг быгаты. Пиосмуртэз кышномурт лулъяз аслаз яратон кужыменыз. Воргорон синмысьтыз тылсизэ пиштытӥз. Та си ик Исидалы нуны сётӥз. Соослэн вордӥськиз Хор (Гор) нимо пизы. Та выжыкыл тодамы вайытэ Библиез, кулэм но лулъяськем Христосэз, Каинэз но Авелез. Исида пӧрмиз удалтонлэн, вулэн, тӧллэн, зарезь вамен уясьёслэн инмарзылы. Хор луиз фараонлэсь кивалтонзэ утись маке. Осирис, Исида, Хор - тужгес тодмо инмаръёс. Осирис - ӟеч мылкыдэз утись. Со ик кузёяськиз сопал дуннее выжемъёсын. Кулэм муртлэн лулыз пуксе шунды кадь ворекъясь дано пыже. Сопал дуннеетӥ уякуз, пыж пиштэ каргам лулъёс шоры. Таосыз шумпотыса пумитало сое, малы ке шуоно, югытэз адӟыны татчыозь ӧз быгатылэ. Пыж отӥяз вуэ Осирис доры. Отын ик пуке ньыльдон кык судья. Кулэм муртлэсь сюлэмзэ поно веслэн одӥг ӵашаяз, Маат нылкышно-инмарлэсь тылызэ - музон ӵашаяз. Ӟеч ужъёс, уродъёсыз сярысь, уногес вал ке, лул огазеяське Осирислэн адскисьтэм мугорыныз. Йӧнтэм ужъёс тросгес ке, сюлэмез ньылэ крокодил йыро сьӧсь. Адямилэн сопал дуннеын ӟеч улонлы нокыӵе осконэз уг кыльы ни. Египетъёс вӧсяськылӥзы пӧртэм инмаръёслы. Нылкышно-инмар Хатхор улӥз писпуын. Нылкышно-инмар Нейт, ачиз ныл кыльыса, нылпиос вайылӥз. Исидаез суредаллязы скал йырын кышномуртэз сямен. Хор - ӧрӟи. Хнум - така. Инмаръёсты-пӧйшуръёсты сямен ик, адямиос сӥлы карылӥзы улэп макеосты. Выжыкылын но, зэмос улонын но крокодил - шимес маке. Озьы ке но, Фивы (Луксор) городын сое лыдъяллязы инмар кадь дано маин ке. Огзэ крокодилэз дышетӥзы адямиос вӧзынгес улыны, чеберъязы зарни кульчоосын но пель угыосын. Зэм, музон интыосын сое сокем дано ӧз карылэ но сӥльзэ сиылӥзы. Мемфисын бакель (благословение) сётъязы ошлы. Сое нималлязы Апис. Ош улӥз кизили дуннеез кылдытӥсь Птах инмарлы сӥзем храм азьын. Кулэм Аписэз ватылӥзы из гурезь пушкы, фараонлы кадьгес гудэм гробницае. 1851-тӥ арын Саккара городысь музъем улын шедьтэмын ошъёслэн мумияосынызы галерея. Соосты тыриллям гранитлэсь, известняклэсь яке базальтлэсь корам коросъёсы. Котькудӥзлэн ӝуждалаез 4 метр, секталаез 70 тонна. Кулэм Апис интые мукетсэ туж кема утчаллязы. Солэн кымесаз медло куинь сэрего пус, чыртыяз - ӧрӟи тусо вишты, урдэсаз - толэзь кадь суред. Коӵыш тусо Бастет нылкышно-инмарез ӵошатылӥзы шундылэн шунытэныз. Бубаст (Зигазиг) городын лэсьтэмын Бастетлы сӥзем храм. Коӵышез озьы ик пыртылӥзы дано пӧйшуръёс пӧлы. Сое шӧдтэк кыльыса виись муртэ ассэ быдтылӥзы. Бени-Хасан городысь шедьтэмын кулэм коӵышъёслэн бальзамен измытэм мугоръёссы. Адямилэсь мугорзэ мумиялы пӧрмытон амалъёс сярысь мон гожъяй азьло мадёнъёсам. Соин ик та ужпумез али ум сэрттэ-пертче ни. Юан кылдэ: вашкала египетъёслэн трос но кужмо инмаръёссы вал ке, кызьы отӥяз соос интые аллах пуксьыны быгатӥз? Аллах гинэ меда? Христос но. Кунын 90 поцент арабъёс, 10 процент копт выжыос - христианъёс. Асьме вакытлэсь азьло 332-тӥ арын грек выжыысь Александр Македонскиез Египетысь калык куриз кунэз пӧртэм тушмонъёслэсь утьыны. Быдӟым Македонский оскемзэс быдэстӥз, соин ӵош татчы пыӵатӥз христианствоез. Асьме вакытэ 639-тӥ арын кунэз киултӥзы исламлы дурбасьтӥсьёс. Со дырысен Египетын кузёяськизы пӧртэм выжыосысь эксэйёс но корольёс, французъёсты но англичанъёсты вераса. Нош арабъёсты аллахлы оскемысь дугдытыны нокин но амал ӧз шедьты. АЛЕКСЕЙ ШКЛЯЕВ. Осирис инмар. Вашкала инмаръёс. Объявление По просьбе контрольно-ревизионного управления Министерства финансов Российской Федерации в Удмуртской Республике сообщаем банковские реквизиты центральной аттестационно-лицензионной аудиторской комиссии Минфина России: ИНН 7710168360 БИК 044501002 ОПЕРУ-1 при Центрбанке РФ г. Москва текущий счет 40503810000000000149. Солдатэз буре вайыса Юкаменск ёросысь Засеково школаын дышетскемез бере, Ильдус Биянов армие кошкиз. Нош 1995 арын со чечен войнаын бырыны шедиз. Ильдусэз школаяз котьку буре ваё. Нош солэн вордскем нуналаз дышетскисьёс но дышетӥсьёс линейкае султо но одӥг минут ӵоже чалмыт сыло. Биянов туж яратэ вал спортэз, тужгес но гажалляз теннисэн шудонэз. Солэн классэныз кивалтӥсь Н. Г. Митюков ӵектӥз вал Ильдус Бияновез буре ваёнлы сӥзьыса, 23 феврале теннисэн шудонъя турнир ортчытъяны. Отчы пырисько мукет школаосын дышетскисьёс но. Сыӵе ӵошатскон ортчоз туэ но. Ивортӥз ёросысь "Знамя Октября" газет. Дышетӥсьёслы юрттэт Кык кылъёс - ваче ки Нылпиосты школаын удмурт но ӟуч кылъёслы дышетонэз ог-огзылы матэгес карон сярысь ужпум выль ӧвӧл, национальной школа кылдэм дырысен ӝутскемын дыр. Курон таӵе: школаын та предметъёс ог-огзылы мед юрттозы, кылъёслэсь аспӧртэмлыкъёссэс лыдэ басьтыса мед азинскозы. Нош али тросаз школаосын кылъёслы дышетон ас понназы, чылкак нимазы радъямын, куспазы ӧжыт герӟаськыло. Соин ик методистъёс та ужез наукалэн куронъёсызъя радъяны ӵекто. Азьмынӥсь дышетӥсьёс со югдурез котьку сямен валаса ужаллязы, луоз. Кылсярысь, ӝыны даур талэсь азьло мынам Лудорвайысь школаям нылпиосты ӟуч кылъя дышетӥз Е. В. Помосова, удмурт кылъя - А. Е. Евсеева. Валамон, котькудзы ас тодэмзыя-валамзыя дышетӥзы. Но кыксы ик куспазы кенешыса ужазы, пиналъёслэсь тодон-валанъёссэс кыкезъя ик предметъя лыдэ басьтылӥзы: шӧдӥськом вал, сюлмысь ужало, яратӥм соосты. Елена Васильевна, ачиз ӟуч ке но, ялан удмурт кыллы дышетскиз, удмурт сямен вераськеммес вала вал, удмурт кылэн ӵошатыса, милемлы пӧртэм юанъёс сётъялляз. Туэ Дышетӥсьёслэсь тодон-валанзэс будэтонъя институт удмурт но ӟуч кылъёсты дышетонъя выль пособие поттӥз. Ӟуч сямен со тазьы нимамын: "Интегрированное обучение в средней школе (на материале удмуртского и русского языков)". Авторез - институтлэн ӟуч кылъя но литературая кафедраысьтыз доцент Н. А. Шутова. Со ас ужаз таӵе югдурез возьматэ: школаын ӟуч но удмурт кылъёсты дышетон огдышем сямъёсъя мынэ, выль амалъёс ӧжыт кутӥсько, нимаз предметъёс куспазы туж ӧжыт герӟаськемын. Озьы удмурт кылъя урокын ортчем темаез-материалэз выльысь ортчоно-валэктоно луэ ӟуч кылъя урокын но. Тодмо темалы эшшо огпол дыр быдтоно луэ на, нош кыл волятонлы дыр ӧжытгес кыле ни. Сыӵе темаосын сэрен, дышетскисьёс предметэз мылпотытэк дышетыны ӧдъяло. Удмурт нылпиослэн вордскем кылъя урокъёссы но мултэс потыны кутско, дышетэмзы уг поты ни. Удмурт но ӟуч кылъёсъя национальной школалэн программаосыз но учебникъёсыз туала куронъёслы ӧжыт тупало. Табере со программаосты но учебникъёсты выльысь эскероно, пуштроссэс ог-огзылы тупамонгес кароно, наукая исследованиос нуоно но тупамонзэ дышетонэ пыртоно. Тӥни со сярысь сюлмаське методист Н. А. Шутова. Методикая пособиын кылъя дышетӥсьёслы ӵектэмын 5-тӥ но 6-тӥ классъёслы удмурт но ӟуч кылъёсъя дышетонэз огвакытлыгес, огвыллем темаосты огазеяса ужан программа. Собере та классъёслы ик сётэмын сыӵе амалэн ужаны дасям темаос. Та книгаен тодматскыса, пӧртэм юанъёс но кылдо. Тросэз-а меда дышетӥсьёс таӵе методикаез ужазы куто ни? Автор ай кӧня ке нимъёсты гинэ вера. Кылсярысь, дышетӥсьёсты Г. Е. Николаеваез, В. Ф. Байсароваез, Т. П. Гоголеваез но куд-ог мукетъёссэ. Национальной школаосын нылпиосты ӟуч кыллы дышетыны кулэ ас вордскем кылзэ туж ӟеч тодӥсь дышетӥсь. Тазьы лыдъя Пычас шор ёзо школаысь дышетӥсь Галина Евстафьевна Николаева. Та малпанэз уже пыӵатон бордын озьы ик ужало учёнойёс-педагогъёс Н. С. Качалина, Г. Н. Никольская, З. В. Суворова, Г. А. Ушаков. Нош отӥосыз кызьы валало та ужпумез? Тодмоосын вераськон возьматэ: валало, кулэ сыӵе амалъёс вордскем кылзэс тодӥсь муртъёслы но, ӟучомем удмуртъёслы но. Нош интеграция амалэн дышетонэз улонэ пыӵатыны туннэ шуг. Кудӥз тазьы шуэ: классын кыкезъя ик кылъёсъя одӥг мурт ке дышетӥз, солы планъёс лэсьтыны каньылгес луоз. Нош кык дышетӥсьлы ӵош но куспазы тупаса ужаны дыр но луонлыкъёс уг тырмо. Туннэ олокыӵе но шуг-секытъёс кылдо. Кылсярысь, удмуртъёс туртто асьсэ кылзэс чылкытатыны, "мурт" кылъёслэсь куштӥськыны, лексикаязы пырто олокыӵе но азьло тодмотэм кылъёсты. Ӟучъёс - калыкез рыноке валтӥсьёс, асьсэлэсь кылзэс саптало, шугомыто кунгож сьӧрысь уно кылъёсын, озьы ик вульгаризмъёсын, кыллэн чылкытлыкез понна ляб нюръясько. Нош выльдэм кыллюкамъёс школаын ӧвӧл на, ку луозы - валантэм. Дышетон уката шугоме. Собере туала вакытэ кылдэм национальной ужпумез но котыр ласянь эскероно, дыр. Огласянь, тыршиськом кадь, элькунысь выжы калыклэсь кылзэ тодӥсьёс ялан мед йылозы, со понна тырше удмуртъёслэн движенизы но. Мукет ласянь, та удысын кун политика уг юнма, эшшо лябоме, вылӥын трос вераськонъёс, нош ужъёс ӧжыт. Сотэк маин валэктод, Удмуртиын та дырозь кылъёс сярысь закон кутэмын ӧвӧл на шуыса? Собере дышетӥсьёс толэзен-толэзен уждун уг басьто. Соос нырысь ик малпаськоно луо семьяоссэс сюдон сярысь, дышетонлэсь ӟечлыксэ умоятон сярысь малпаськыны дырзы уг кыльы ни. Югдур тужгес но шуг гуртын. Дышетӥсь бакчаяз ӧз ужа, тырмыт пудо ӧз ворды ке, ма кароз? Шат азьло аръёсы гуртысь интеллигенция сокем секыт югдуре кельтэмын вал?! Л. ФЁДОРОВ. 02 Туэ, 10 нунал ӵоже... Январь толэзе 10 нунал ӵоже 539 йыруж но йыртэман учыр пусъемын, со пӧлысь шараямын но пумаз-йылаз вуттэмын 390-эз. 9 мурт виемын (7-ез тодмо), 3 мурт эриктэмамын (ваньмыз шедьтэмын), 195 пӧлысь милиция ки улэ сюриз 83 лушкаськись. Ульчаосысь утялтэмын 1592 кудӟем, 962-ез келямын сазьтӥськонниосы. 685 пол милиция потаз жугиськись семьяосы. Сюрес вылын та дыр куспын гинэ 30 шудтэм учыр пусъемын. Отын бырыны шедиз 14 мурт, 44-ез шуккиськиз. 74 пол тылпу потаз, сутскемын 7 мурт, 5-ез тыляра басьтӥз, сӧсырмиз. Сыӵе секыт лыдпусъесын кутскиз вылез ар. Ленин районысь угророзыскын ужасьёс ӝегатӥзы 4 лушкаськисез. Суд улэ шедьылэмъёс 32 аресъем Г. Сергей но Н. Рамиль, 17-18 аресъемъёс С. Евгений но Г. Раушания кӧтсэс тырыны малпаллям дасез чотын. Но лушкаськем сиён-юонэн шулдыръяськонзэс ӝыныё кариз милиция. Ваньзэ берыктоно луиз Кирзаводской ульчаысь 74-тӥ коркан улӥсь кузёезлы. Таӵегес ик юлтошъёс кырмемын Буммашын. Суд улэ шедьылэм воргоронъёс В. Вячеслав но П. Антон, дышетскисьёс Л. Андрей но Ш. Денис шедизы, машина питранъёсты лушкакузы. Кӧня ке дыр ӵоже соос ялкарозы ни бышкись ез сьӧрын. Удмурт Республикаысь МВД-лэн пресс-службаез. Егит учёнойёс азинто Тодмо ӟуч но советской этнографлы, фольклористлы Дмитрий Константинович Зеленинлы миым вордскемез дырысен 120 ар тырмысал. Нош вордскиз со Завьял ёросысь Люк черкогуртын. Та юбилеез элькунамы паськыт ӧз пусъе. Соин ик национальной музейлэн методикая люкетэз соин валче алигес научно-практической конференция радъяз. Отын ик музейысь егит ужасьёсты тодматыны чакламын вал туала этнография но фольклористика азьын сылӥсь ужпумъёсын. Кенешез нуиз тодмо этнограф В. Е. Владыкин. Со тодматӥз этнография наукалэн кылдэменыз но азинскеменыз. Мукетыз тодосчи Л. С. Христолюбова тодматӥз Д. К. Зеленинлэн улон-вылон сюресэныз, удмуртъёс но бесермянъёс сярысь ужъёсыныз. Кызьы ке 1951-тӥ арын учёнойёслэн одӥгаз конференциязы Зеленин Сталин вылтӥ погыльтыса вераськем. Сое кылзыса, ваньзы ик кушетскиллям, табере, пе, одно ик маке но луоз. Но ваньмыз лякытэн ортчем: оло Сталин номырзэ валамтэ, оло "кыдэз бертэм" пересьлэсь номырзэ басьтыны шуиллям. Дмитрий Константинович 1954-тӥ арын ужан ӝӧк сьӧраз ик кулӥз. Ноку но ӧз кышнояськылы. Вань улонзэ сӥзиз наукалы, ог 300 пала уж печатлаз. Со пӧлысь витьтонэз сӥземын Ватка улослы. История наукаосъя кандидатъёс пӧлысь самой егитэз А. Е. Загребин ивортӥз финн учёнойёслэн Хольмберглэн но Хамялай нелэн удмурт воршуд пумысен ченгешемзы сярысь. Соос вераськон ӝутӥзы Д. К. Зеленинлэн 1948 арын гожтэм ужезъя. Нош калык доры со уж вуиз 1980 арын гинэ. Конференциын вераськизы мукет егит учёнойёс но. Кенешон пайдаё ортчиз. Шумпотоно, вуоно тодосчиос этнографиез но фольклорез азинтон борды ӝабыр-ӝабыр басьтӥсько шуыса. Б. БОТАЛОВ. Анаелы Крезьгурез Пантелей Кузнецовлэн Кылъёсыз Ирина Самигуловалэн Тодӥсько: тон монэ уй-нунал малпаськод. Тодӥсько: котькуд ӝыт туж кема витиськод. Шӧдӥсько: мынэсьтым чидантэм мӧзмиськод. Валасько: тон монтэк туж секыт улӥськод. Адӟисько: бертыкум пумитам бызиськод. Адӟисько: котькинлэсь но шудо луиськод. Шӧдӥсько: келякуд синъёстэ ватӥськод. Валасько: сюлмыныд тон соку бӧрдӥськод. Кылӥсько тынэсьтыд мусоясь куарадэ, Кылӥсько Инмарез утьыны куремдэ. Анае, мусое, мон ваньзэ тодӥсько, Кылӥсько, адӟисько, шӧдӥсько, валасько. Сундурысь усточиос Сяськаё возьёс, чебер Лоза шур, со дурысь льӧмпуос, борыё бамалъёс - улыны-вылыны синмаськымон инты бырйиллям Эгра ёросысь Сундур гуртысь адямиос. Игра посёлок дорысен одӥг иськемын гинэ ке но уло, Сундурысь пудо вордӥсьёс, ю- нянь будэтӥсьёс удмуртлыкез зол возё. Татын кемалась ужа ини ёросысь тужгес узыр но тунсыко музей. Отысь адӟыны луэ вашкала удмуртъёслэсь пӧртэм арбериоссэс, вань туала кибашлыослэн но лэсьтэмъёссы. Нош тужгес тодмо сундуръёс асьсэлэн "Ӟардон" фольклор ансамбленызы. Сое кылдытыку, "Россия" колхозлэн шор гуртысьтыз клублэн кивалтӥсез Нина Ившина трос тыршиз. 1975-тӥ арын Сундур гуртысь артистъёс концертъёс возьматъяны кутскизы, нош дас ар ортчыса, соослы калык ансамбль сӥё-дано ним сётэмын вал ни. Со дырысен "Ӟардонысь" усточиос быгатонлыксэс, данзэс арысь аре будэтӥзы. Ижын но районазы сяна, уно концертъёс мукет ёросъёсын но сётылӥзы. Соосты ӟырдыт пумиталлязы Чуваш кунын но. Арлэсь трос ик дыр уз ортчы - Сундурысь артистъёс коллективзылэсь кызь вить ар тырмонзэ пусъёзы. Али "Ӟардонэз" азьлань валтэ Игра ёрос кивалтэтысь культура отделлэн тӧроез Анатолий Чирков. Арганчиос Борис Тронин но Александр Ломакин синмаськымон шудэменызы кырӟан-эктонъёсты уката чебер каро. Ансамбль кылдэм дырысен татчы ветло Эмма Клементьева но Людмила Корепанова. Задор мылкыдзэс, быгатонлыксэс егитъёслы сюлмысь сёто. Татчы ветлӥсьёс пӧлысь тросэз йылпумъямын Ижысь культурая училищеез. 1998-тӥ арлэн пумаз Удмурт драмтеатрлэн юртаз концертсы дыръя егитъёс Людмила Чиркова, Валентина Ившина, Елена Феоктистова синмаськымон эктӥзы но, кырӟазы но. Соос али ужало Игралась но Сундурысь клубъёсын, училищеын басьтэм тодон-валанзэс тапалан улӥсь калыклы сёто. "Ӟардон" ансамбль эшлыко кусыпъёс возе Ижевскысь "Тюрагай" но "Инвожо" ансамбльёсын. Соос ог-огзы доры концертэн, куное но ӵем ветло. Та ансамбльёслэн ужазы пыриськылӥ бере, Сундуре одӥг пол гинэ ӧй вуылы. Быгато татын куноосты пумитаны. Нырысь ик, "Тюрагаен" ветлыкумы, концерт висъёс дыръя Лоза шурын пылаським но, чорыгам но, гурезь бамалысь боры но сиим. Нош табере инкуазь куанермизгес: Лоза шуре му вӧй шедемен, отын пыласькем но уз ни поты, шурын кисло- кусло но быриз, чорыг но визнанэ туж шер шеде. "Ӟардон" "Тюрагай" ансамблен кусып тупатӥз 1980-тӥ арын Удмурт автономилы 60 ар тырмонлы сӥзем концертъёс дыръя. Та коллективъёс али но эшласько. Куинь ар талэсь азьло сундуръёс Ижысь выль эш шедьтӥзы. Со - "Инвожо" ансамбль. Таиз но, нырысетӥ пумиськон, Удмурт кунлыклэн юбилеез дыръя вал (солы 75 ар тырмыку). Табере соос куинь ар пумиськыло ини. "Инвожоос" Сундуре кык пол ветлӥзы. Отчы вуылыкузы, концертъёс возьмато. Вуж арлэн берпуметӥ нуналъёсаз "ӟардонъёс" эшъёссы доры куинетӥзэ вуизы. Удмурт драмтеатрын "Инвожоен" ӵош бадӟым концерт возьматӥзы, калык уно люкаськиз, кыксэ ик ансамблез ӟырдыт пумитаз. "Инвожо" ансамбльлы дас кык ар но ӧвӧл ай ке но, отын ветеранъёс вань ни. Соос - арганчи Михаил Журавлёв, кырӟась-эктӥсь сузэръёс Фирая но Назида Фахриеваос. Та нылашъёс Иже Башкириысь лыктӥзы. Табере, асьме палась пиослы бызьыса, Журавлёва но Бахматова луизы. Апнсамбле кылдэмез дырысен ини ветлэ Алнаш ёросын вордскем чебер дыды Валентина Векшина. Коллективын кемалась кырӟало-экто Шаркан районын вордскем кузпалъёс Алевтина но Анатолий Поткинъёс. Берло дыре учкисьёсты шумпотто егитъёс Светлана Петкова но Галина Пантелеймонова, концертэз нуись Леонид Овчинников. Нош Олег Корепанов баянэныз концертэз уката чебер каре. Озьы кемалась лыктэм артистъёс но, туалаосыз но концертэз котькыӵе адямилы учкымон каро. Таин валче ик учкисьёслэн но лыдзы будэ, артистъёслэн мылкыдзы но ӝутске. Ансамбльёс концерт ӵош сётыку, калык тросгес люкаське. Озьы ик артистъёс, ог- огзылэсь кырӟам-эктэмзэс адӟыса, золгес шӧдо асьсэлэсь янгышъёссэс, маке но выльзэ басьто. Со сяна, кыдёкысь ансамбльёсын эшъяськон луонлык сётэ тросгес концертъёс возьматъяны. Концерт бере эктонъёс артистъёслэсь но учкисьёслэсь кусыпъёссэс уката матэ каризы. Н. ВОЗИСОВ. Шӧкыч Ӟенеликъёсын сылӥсь воргорон: - Тон мар, Курбат, инбамысь доллар усьылэ кожад шат? Мын, пока, нахаляву водка сётъяло! Суредэз Л. ПРОЗОРОВЛЭН. ШӦКЫЧ Уксё интые - паспорт Берло дыре гуртъёсы паймымон шӧртчи адямиос ветлыны ӧдъязы. Зӧк кисыос но тӥни. Сётӥськод, шуом, солы сӥльдэ яке картоптэ, со соку ик манетъёссэ мыче. Зэм, ӧжытак кутча ик ке но, мар карод - коньдон кулэ ук. Но тани Кияса палъёсы эшшо но кескич перекупщик шуон вуылэм. Лыктэм Подгорное посёлоке. Калыкен тодматскем, ассэ но возьматыны быгатэм. Вылаз ик, сӥльлы туж вылӥ дун пуктэм. Гуртоос шумпотӥзы сыӵе узыр басьяськисьлы. Сӥльзэс вожмаськыса вортто, ява! Зэм, коньдон интые бумагаяз нимтулъёсты гинэ гожъяз. Коньдонзэ бӧрысь лыктыкум ваё шуыса оскытӥз. Нош мед оскозы шуыса, адямиослы паспортсэ возьматъяз. Ваньмыз интыяз кадь - патретэз но, пропискаез но. Ортче нунал, кык, куинь... Калык керӟегъяське, пӧсекъя. Сӥль басьтӥсь но уг вуы, коньдон но уг адӟиськы. Куд-огез паспортын гожтэм адресъя кошкизы. Нош отын... воксё мукет адями улэ вылэм. Сыӵе юмоке шедиллям ни Карамас-Пельгаын но Киясаын улӥсьёс. Н. СЕМЕНОВ. Кытчы мынӥськод, пияш? Улонысь учыр Куазь асьмелэсь уг юа, ялан вошъяське: толон гинэ шуныт вал кадь, нош туннэ, ме тыныд, кызь вить градус кезьыт. Сюрес кузя будӥсь кызьпуос но шымырскиллям, кожалод. Кышкасьтэм вузкарисьёс гинэ, кубиста кадь биняськыса, ас интыязы бергало. Остановкаын сылӥсь адямиос но интыязы сылыны уг чидало, кин тэтча, кин мыд-мыдлань ветлэ. Кынмыса сылытозь, пыдын но, оло, вуысалыд ни. Озьы малпаськонъям, кулэ луись троллейбус вуиз. Калыкез но трос ӧвӧл, ма, таӵе дыръя адями ураме пунызэ гинэ но уз лэзьы, дыр. Татысен ик син азям йӧтӥз пичи пияш. Пыдкукез вылтӥ ошиськемын кышъям штаниосыз. Нош пальтоезлэн саесъёсыз бушесь. Оло, кезьытлэсь ватыса, киоссэ ас бордаз ӝиптэм. Мугорызъя та пияшлы вить арес сётыны луоз. Ымнырын кунэрскемын, али гинэ бӧрдэм, лэся. Йырам шуак юан шуккиз - ма, пияш огназ мынэ ук?! Ӧй чида ни, вераськыны кутски. - Пияш, кызьы нимыд? - Сергей,- йырзэ улэ лэзьыса каллен вазиз, нош синъёсыз кинэ ке утчало но, со дыре ик, вӧсь карозы шуыса-а, мар-а, кышкало кадь. - Серги, огнад мынӥськод-а? - Огнам. - Нош кытын анаед-атаед улэ, тодӥськод-а? - Буммашын. Вераськонэ кондуктор но итӥськиз. Со пияш, пе, маршрутлэн кутсконысеныз ик мынэ ни. - Сергей, нош кытчы мынӥськод? - Агае доры. - Нош кытын агаед? - Черкын. - ??? - Мама косэ. - Кӧня арес агаедлы? - Вить. - Нош тыныд? - Ньыль. - Собере тӥ кытчы мыноды? - Доре бертом. - Общежитиын улӥськоды-а? - Озьы. - Ваньмыз валамон,- шуиз кондуктор,- озьы пиналъёссэс юонлы уксё бичато. Малы соку вордыны кулэ вал, пиналъёс янгыш шат? Соос асьсэлы анай-атай ӧз быръе ук. Учке ай пияш шоры, кыӵе со дӥсяськемын! - Я, мар пияш азьын озьы вераськиськоды,- шуиз мукетыз нылкышно.- Со ведь ваньзэ вала. Кондуктор аслэсьтыз янгышсэ шӧдыса, лэся, кошкиз ужзэ быдэсъяны. Мон пияшен огнам кыли. - Серги, туннэ понна сиськид-а ни? Номыр вазьытэк йырыныз гинэ шонтӥз. Соку мон сое столовое ӧти. Нырысь Сергей пыкиськиз ке но, собере соглаш луиз. Ӝукысьтыз котлетсэ нянь вылэ понӥз. Абдраменым юай: - Ӧз кельшы шат? - Кельшиз, только мон тазэ агаелы кельто... Либыт сюлэмо потӥз мыным Сергей. Пичиысен ик таӵе улонэз адӟыса, уз луы-а меда анай-атаез кадь? Олокыӵе но малпанъёс йыре лыкто. - Тау, апай, мон агае доры кошки,- малпаськонме куспетӥ кариз пияш. - Сюрес шедьтод-а? - Черке мон трос пол ветлӥ ни... Пияшен вераськеме ялан тодам на. Сое малпаса, сюлэм ик вӧсь луэ. Малы озьы луэ меда, малы тросэз пыкиське но кыле юанэн? Тросэз адямиос, секытлы чидатэк, зын вуэн эшъясько. Бен, шуг-секытысь потон амалъёс ӧвӧл ни шат мукетъёсыз? Семья куспын керетонъёс но тросэз юнме шорысь "чилектыло" кадь. Кузпалъёс уг тыршо ог-огзэс валаны, ог-огзылы секыт учырысь потыны. Керетонъёс, "чебер" кылъёс выжо собере пиналъёс вылэ. Янгыштэм, школае ветлӥсьтэм пиналзэс кураськыны лэзё. Туж оскеме потэ, Сергей улон сюрессэ шонер быръёз шуыса. Лена ЯМЩИКОВА, Удмурт кун университетын дышетскись. Кун Кенешлэн "Удмуртиысь коммунистъёс" огазеяськоназ пырись депутатъёслэн кенешсылэн вазиськонэз Удмурт Республикалэн Кун Кенешезлэн нырысетӥ созывез аслэсьтыз ужзэ йылпумъя туж секыт вакытэ, со нырысь ик герӟаськемын кивалтӥсьёсмылэн огкылысь ужаны быгатымтэенызы. Быръёнъёслы дасяськон кутскиз ни, соин сэрен юри малпаса куспетӥ каремын вал 16-тӥ но 24-тӥ декабре усьтӥськоно сессиослэн ужзы. Кун Кенешлэн Президиумез но законэз тӥяса ӧз пусйы чакламтэ сессиез ортчытонъя нуналэз, сыӵе курон пуктэмын ке но вал депутатъёслэн куиньмос люкетэнызы. "Удмуртиысь коммунистъёс" огазеяськонлэн кенешез Кун Кенешлэн депутатъёсызлэсь тазьы ужамзэс умойтэмен лыдъя, сессие лыктымтэенызы сэрен, соос куашкато Удмурт Республикалэсь представительной, законодательной но чаклась-эскерись ёзъёссэ. Ми соглаш Россия Федерациысь Быръёнъёсъя центральной комиссилэн шугъяськонэныз, Удмурт Республикаын апреле ортчытоно быръёнъёс дыръя бырйисьёслэн правооссы тӥямын луозы шуыса, малы ке шуоно, 1994 арын кутэм "Удмурт Республикаысь Кун Кенеше быръёнъёс сярысь" Законын но "Россия Федерациысь гражданъёслэсь референдуме пыриськонъя но быръёнъёсы пыриськонъя валтӥсь правооссэс утён сярысь" Федеральной законын ог-огзылы тупамтэ интыос вань. Со ик вуттыны быгатоз быръёнъёсты умойтэм ортчытонэ. Умой-умой дасямтэ кампание трос коньдон кисьтӥськоз. Законэн чакламтэ но юнматымтэ куронъёстэк ортчытэм быръёнъёс пӧрмозы зӧк кисыен кандидатъёс куспын нюръяськонлы. Милям малпанмы одӥг: Кун Кенешлэн депутатъёсыз, асьсэлэсь но фракциоссылэсь мылкыдзэс палэнтыса, Удмурт Республикамы но бырйисьёсмы понна сюлмаськыса, одно ик ортчытыны кулэ азьвыл чакламтэ сессиез, бер ӧвӧл на "Удмурт Республикаысь Кун Кенеше депутатъёсты быръён сярысь" Удмурт Республикалэсь законзэ кутыны но пусйыны быръёнъёсты ортчытонъя нуналлэсь дырзэ. Удмуртилы кулэ ӧвӧл юри малпаса кылдытэм шуг-секытъёс, социально-экономической но политической югдур ласянь соос секыт бервыл кельтозы. А. Бегунов, А. Горохов, А. Красильников, А. Кузнецов, Е. Мальцева, Ю. Семенов, Н. Чувашов, М. Шишкин. Гажано эшъёс! Кун Кенешлэн Эскерон палатаез вуоно быръёнъёслы дасяськонын кутӥськись государственной коньдонэз но мукет амалъёсты чакланэз быдэсак ас вылаз басьтэ. Таин валче ми вазиськиськом шаерамы улӥсь вань калыклы: кин пумиськоз быръёнъёсъя законэз тӥян учырен, депутатэ кандидатъёслэн "мултэс" сюлмаськеменызы, бырйисьёсты кӧяны- вӧяны турттӥсьёсын - ивортэ Эскерон палатае. Соин ӵош ми, Эскерон палатаын ужасьёс, Кун Кенешлэн депутатъёсыз Е. Л. Мальцева, Н. Ф. Чувашов, М. И. Шишкин лыдъяськом: сётэм "кузьымъёссылэсь" эн алӥське, малы ке шуоно, со асьтэлэн ужаса поттэм ваньбурдылэн ик туж пичи юдэсэз. Но сыӵе кандидатъёс сярысь одно ивортоно, малы ке шуоно, кузьмаськыса но ӵектӥськыса мандат басьтэм депутат калык понна ноку уз сюлмаськы. Жингыртэ таӵе телефонъёсъя: 75-38-16, 75-04-04, 75-45-56. Е. Мальцева, Н. Чувашов, М. Шишкин. Шӧкыч Гороскопезъя - "Така" Берло дыре котькуд газетын сямен гороскоп шуонъёсты печатлало. Кин оске соослы, кин киыныз гинэ шонтэ. Та мадёсысьтымы Ижысь 30 аресъем Алексей Столбов гороскопъёслы ноку ӧз оскылы. Нош гороскопъя Олёш - Овен, мукет сямен вераса - Така. Гороскоплэн дэмламезъя 30 декабре солы сюрес вылэ автомашинаен потыны ӵектэмын ӧй вал. Но ӵапак соку варманаезлэн нылыз доры мыныны мылкыдыз ӝутскем. Мар бен, вармайлэн кылыз - закон. Ваньмыз умой ортчиз вал кадь ини. Бертыкуз "Москвичсэ" кин ке зол-зол "чупаз", корт ик куажыр вазиз. Пурысь "Волга" мырӟем вылэм сое. Таизлы номыр ик луымтэ, нош Алексейлэн машинаез паньгаз. Тупатъям бере буёл кулэ луоз табере. Зэм, туала вакытэ буёл шедьтон - сялӟымон уж. Но соиз жаль: Выль ар азьын котькуд коньы лыдъямез яратэ. Соку ик вашкала тодмоезлэн Геннадийлэн ушъяськемез тодаз лыктӥз. Соиз дунтэмен буёл шедьтӥсько шуиз вал. Озьы Столбов кие вуиз полиэтиленлэсь 3 литръем канистраен пожалэс сурет. Лак-а, буёл-а - нокыӵе инструкциез ӧвӧл. Дораз вуыса, буёлзэ ваннаяз пӧсь вуэн шунтыны ӧдъяз. Буёл кутскиз ук шиетыны! Собере нырез чатыртӥсь зын потӥз - коть противогаз дӥся. Зӥбломытоно кызьы ке но сое!. Олёш пазьгиз кезьыт ву. Нош буёл вуӵыртыны кутскиз ини табереяз. Вылаз ик, нап ӵын но ӝутскиз на. Кышкатскиз Столбовед. Ӵын бускельёсызлэсь но нырзэс чатыртыны вуэм ни. Тылпу кысӥсьёсты ӧтьытэк ӧйлась. Зэм, "горд атас" лопыръяськыса ӧз вуы. Алексей ӵынэз кызьы но озьы лапкытӥз ик. Ванна гинэ номырлы ярантэм кылиз. Табере героймы гороскопъёслы оскыны кутскем, шуо. А. ЕМЕЛЬЯНОВ. Валэктэ юрист Сэрегез нуэ адвокат Лилия Шкляева Банк уг сёты коньдонмес Коньдонме "Почтовый" банке понӥ вал. Табере дорамы газ кыско, дунзэ али ик тыроно. Банк коньдонме уг сёты. Ма кароно? Е. МИНАГУЛОВА. Пичи Пурга черкогурт. Мыным басьтоно кадь корка сюриз. Нош "Почтовый" банке понэм коньдонме уг берыкто. Кытчы вазиськоно? П. КЕДРОВ. Алнаш ёросысь Кадик гурт. Сётэм кылзэ банк быдэстыны кулэ. Нош коньдон ӧвӧл шуыса, муг шедьтэ ке, тӥ вазиськыны кулэ судэ. Кудаз? Банклэн интыяськем районаз ужась судэ. Со понна тӥ госпошлина тыроно уд луэ. Озьы валэктэмын "Кун политика сярысь" 1995-тӥ арын 31-тӥ декабре кутэм законын. Пусйыны кулэ сое но. Куд-ог банкъёс, таӵе ужпумъёсты эскерыку, судэ асьсэлэсь адямизэс уг ысто. Россия Федерациысь Граждан ужпумъёсъя кодекс лэзе югдурез ответчиктэк сэрттыны-пертчыны таӵе учыръёсы: ответчик ӧтьыса вылысь судэ уг лыкты ке (решение кутӥське заочной амалэн); ответчик нокыӵе мугтэк судэ уг лыкты ке; ответчик судын эскероно ужпумез юри берлолы кельтыны выре ке. ВЫЛЬ КНИГАОС Шыпыт куараос Илья Байметовлэн веросъёсын сборникез сярысь "Удмурт кенеш" огазеяськонлэн удмурт интеллигенцилы сӥзем кенешаз мон витьымтэ шорысь кузьым басьтӥ: Илья Михайлович Байметов лыз выло пичигес но ӝикытгес книга кузьмаз. Нимаське со "Сюлэмам тон гинэ". Кык ӝыт куспын лыдӟи. Кутски вал оскытэкгес: малы политикае пырем мурт литературае но чуртнаське на? Мар меда пӧрмытэм? Кыксэ вероссэ лыдӟеме бере, быдэсаксэ лыдӟоно кариськи - угось соос монэ "дэмӟытӥзы". Маинызы меда? Кӧня ке малпаськеме бере валай: шыпыт гинэ но туж зэмлыко куараенызы, аспӧртэмлыко кылынызы. Веросъёс пӧртэм дыре гожтэмын ке но, соосты огазея ӟеч мылкыдо адямиосты суредан, лыдӟисьлы но шуныт мылкыд пыӵатыны тыршон. Сборникез усьтэ "Ваёбыжъёс" верос. Отысь сюжет сэрттӥське-пертчиське пичи пияшлэн верамез пыр. Ваёбыжъёс шудтэм учыре шедиллям - сильтӧл карзэс ишкалтыса уськытэм. Гонтэм ваёбыжпиос тани-тани бырозы.Яке - коӵыш сиёз. Нош шимес учыр ӧз луы. Нодлыко пияш, кар интыяз вуж гын сапеглэсь юдэссэ вандыса, выльысь кар шукке, отчы пазяськем гонзэс понэ но бурдо эшъёсызлэсь пиоссэс каллен гинэ интыя. Ваёбыжъёс, корка котыртӥ кӧня ке бергаса-лобаса, бӧрсьысь бӧрсе пыразы выль каразы. Пиоссылэсь отынзэс валаса, лэся, кесяськемысь дугдӥзы. Огзы бӧрсьы огзы гын кар пушкы пыразы. Ваёбыжпиос чалмытскизы, ачим но буйгатски". Тазьы йылпумъяське верос. Адями пичи дырысеныз ӟеч уж лэсьтыны дышетске, шуге-леке вуэмъёслы юрттэ. Озьыен, герой-веросчи будӥз ке, уката тросгес ӟеч ужъёс лэсьтоз: угось солы со дась ни. Верос гожтэмын, Л. Н. Толстойлэсь адӟем карыса. Зэм, соизлэназ нылпиос утё коӵышпиез. Но огъя соосты дидактической шӧмо луэмзы. Та веросэз одно ик дэмлано школаын 2-тӥ-3-тӥ классъёсын дышетскисьёслы. Ваньмыз сямен веросъёс улонысь учыръёс вылэ пыкиськыса кылдытэмын. Сыӵе мылкыд кыле, соосты лыдӟем бере, Озьыен, соос зэмлыкоесь. "Кен ваён" верос фабулаезъя выль ӧвӧл кадь, но отын умой возьматэмын удмурт но бигер семьяослэн эшласьконзы, тодэ ваён пыр вашкала улон но начаръёслэн ог-огзылы юрттэмзы. Та веросын туж умой пӧлэстӥське вашкалаез но алиез, тунсыко йӧтэ сюан нергеосты возьматон. Егит дыръяз Темейлэн юртэз сутскиз (вань коркаос, куроен липемъёсыз, тӧло куазен сутскизы угось), солэн семьяезлы бигер пи, Мулланур, юрттӥз. Ачиз Темей пыдтӥз ошем Мулланурез быронлэсь утиз вал азьлогес: сое бускель гуртысь бигер вунэтымтэ. Озьы ӟеч лэсьтэм уж ӟечен ик берытске - та калык веранэз писатель геройёсызлэн улэменызы, кусыпъёсынызы юнматэ кадь. Та веросын, мон сямен, мултэсгес кадь тросэтӥ пырем бигер кылъёс гинэ. Пӧртэм калык кусыпъёсты соостэк но оскымон возьматыны луэ ук. Сюлэме кемалы кыле "Мылем юдэс" верос. Со сӥземын кык удмурт пиослэн, службазэс нуыкузы, шуге-леке вуэмзылы но отысь адями сямен потыны быгатэмзылы. Геня Бородин сержантлэн Валера рядовойлы йыркурзэ возьматыны, пунэмзэ берыктыны мугез вань угось. Но со Валера шуге-леке вуэм дыръя пунэмзэ берыктон сярысь уг малпа ни: быгатэмъяз уте дышетсконъёс дыръя пыдзэ вольтчытэм Валераез, ныпъяса вуттэ сое эшъёсыз доры. Нош Валерийлэн кырсь ужез таӵе вал: соин сэрен Геннадий яратонзэ ыштэ. Лида нимо нылэн пумиськыны мыныкуз, Валера но солэн кудӟем эшъёсыз Генаез, штакетникен жугыса, нюке кельто. Лида сое ӧз возьма ни, алдаз кожаз. Сыӵе пӧялляськисьёс мыным кулэ ӧвӧл шуыса гожтэт гинэ лэзиз. Озьы уретэмын вал нырысь яратон. Улонын, оло, урод лэсьтэмлы чутрак пумит султонэз янгышен котьку ик уд ке но лыдъя, та веросын урод ужлы пумит ӟечсэ лэсьтон геройёс понна умоен берытске, ворме зэмос эшъяськон, шуг-секытэз ӵошен вормон. Озьыен, тазэ но веросэз лыдӟонъя урокын кутыны луоно (6-тӥ-7-тӥ классъёсын). Секытгес мылкыд кельтэ "Ӧй, ӧй вуза, нылы" верос. Угось со сӥземын юись кышномуртлэсь секыт эзельзэ возьматонлы. Калтыртыса, юыса ветлэмез понна, нылзэ аналтэмез понна, суд Катьырнаез анай правотэк кельтӥз, нылпиосты школа-интернатэ келязы. Бадӟым куараен мултэс визьнодатэк, автор нимаз учыръёс вылын адӟытэ улонысь умойзэ но, кырсьсэ но. Оске со, лыдӟись моральзэ ачиз валалоз шуыса. Жаляно луэ: юись муртъёс, тужгес кышномуртъёс, книга-газет киязы туж ик уг кутыло. Нош кулэ вылэм: малпаськыса, оло, эмъяськыны мынысалзы. Вань веросъёс пӧлысь тужгес кельшымон йӧтӥз мыным "Кынмем синкыли" верос. Одӥг лыдӟисьлэн но палэнтӥз, тужгес но нылпиослэн, медаз ортчы вылэм. Верослы дунъет сётэм сяна, мон соя 5-тӥ-6-тӥ классъёсын лыдӟон конференция ортчытон пумысен кӧня ке дэмланъёсме но верало. Гуртысь дышетӥсьлы Корневлы секы операция пыр потоно луиз. Йӧнаны кутскем воргорон дораз кема кылльыны ӧз быгаты. Шур йӧэн шобырскем бере, толалтэ визнаськон арбериоссэ кутыса, йӧ вылэ васькиз. Кема ик пукыса ӧз вуы - шуге-леке вуэм койыкез адӟиз. Секыт пӧйшур улын йӧ пилиськем но сое курадӟонэ вуттэм: азь пыдъёссэ койык поттыны турттэ ке но, йӧ чиге. Жуммем пӧйшур бырыны шедёз шуыса, дышетӥсь солы юрттоно кариське, аслаз операция бере вурысэз бурмымтэ на ке но. "Койыклэн ӝож куараез вылтырзэ ик юзыр-кезьыр кариз. Со чылкак паймиз: койыклэн синмысьтыз быгылес шапыкъёсын синвуосыз оген-кыкен быльыразы. Пӧйшурлэсь вуэ выемзэ учкыса сылыны ӧз чида ни - кыштыр гинэ со пала кыстӥськиз. Пичи тӥреныз йӧэз коралтыса оскалтӥз". Озьы пырак ярдур пала мырдэм кораз кузь люкмес. Ӝоген койык пыд вылаз султыны быгатӥз. Син азе умой пуксе дышетӥсьлэн курадӟемез но: "Яков Владимировичлэн йырыз поромиз. Собере йӧ вылэ золтӥськиз. Кӧня кыллиз, ачиз но уг тоды. Койык но, ангесэныз йӧ борды зӥбиськыса, мырдэм гинэ возиське на". Отӥязгес тазьы гожтэмын: "Бер пыдъёсыныз ву пыдсысь музъем вылэ лёгиськемез бере, мур шокчиз, оло, мугорысьтыз вань омырзэ поттӥз. Яков Владимирович койыкез чыртытӥз маялтӥз, вешаз, пельсьӧрзэ кормалтӥз на. - Ойдо, тэтчы, гыдыке, тэтчы. Мон тыныд юрттӥсь ӧвӧл ни... Койык кӧня ке дырлы чусомиз. Вань чырты быгытъёсыз золтӥськизы. Йырзэ урдӥз. Собере пезьгыт тэтчиз..." Потыны кема курадӟиз койык. Но адямилэн юрттэмезлы оскыса сямен, весь потыны выриз. "Чурыт ярдурез шӧдэмез бере, пыдъёсыз лябыразы. Али гинэ вордӥськем кунян кадь, пыдъёссэ шер-вай карыса сылэ". Собере, йырыныз дышетӥсьлы шонаса, нюлэс пала кошкиз. Нош дышетӥсь... выльысь хирург доры сюриз: кеськыны шедем вурыссэ нош ик вуризы, юнматӥзы. Нош вуоно толаз пӧйшурасьёс утем койыксэ ыбыны шедьто. Озьы ик ыбыны туртто вал солэсь пизэ, нош Корнев дышетӥсь пыӵалзэс талаз но инме ыбиз. Егит койык тэле пегӟиз. "Васька, Кекон Петырлэн пиез, кисыяз пыриз но, кыӵе ке бумагаос поттыса, Яков Владимирович пала вамыштӥз: - Юнме озьы. Ми ведь браконьеръёс ӧвӧл. Тани лицензимы вань, - кылдэм югдурез тупатон понна, мӧйы муртлы пыриськыны ӧдъяз. - Берло мар на. Сое уд султыты! - кыллись койык пала огпол берытскиз на, мышсэ учкылытэк, гурт пала вамыштӥз. Губырес адӟиське. Пельпум вылаз быдэс йыды мешок куштӥзы кадь. Воксё пересь мурт но тӥни". Таӵе кылъёсын йылпумъяське верос. Тӥни озьы, висись дышетӥсь койыкез уте, нош егит пӧйшурасьёс быдто. Яков Владимирович матысь адямизэ ыштэм бере кадь куректэ: губырес адӟиське шуэмын. Веросъя лыдӟон конференцилы таӵе юанъёс пуктоно: 1. Кыӵе югдуре шеде Корнев дышетӥсь? 2. Чорыганы потэм дышетӥсь мар ужано луиз? 3. Кӧня пол возьматэмын койыклэн курадӟемез, малы? 4. Кызьы юрттэ дышетӥсь выйыны ӧдъям койыклы? 5. Малы Яков Владимирович выльысь больницае сюре? 6. Кыӵе югдур сое нош ик сюлэм висёнэ вуттэ? 7. Оскымон-а койыклэн адями пала кыстӥськемез? 8. Кылэмды вань-а пӧйшурасьёслэсь, шуге-леке вуыкузы, адямилэсь юрттэт возьмамзы сярысь веранъёсты? Вань ке, вералэ со сярысь. "Комсомольская правда" газет огпол печатлаз таӵе югдур сярысь ивортон: одӥг леспромхозлэн посёлок дураз улӥсь воргорон толалтэ ӟезьы дураз тырем пуклёоссэ пильылэ вылэм. Возьмамтэ шорысь со доры нюлэскы нуись сюрес кузя ӝож куараен бӧксӥсь койык вуэм. Кӧтурдэсэныз ик матэ кариськыса, пе, ӝож куаразэ поттэ. Воргорон адӟем кионэн кесем кузэ но яразэ, отысь вир шапыкъёсыз весь васько но васько. Чылкыт ӟустариос, вуж простыня юдэсъёс поттыса, йод вайыса, воргорон солэсь яразэ вурылэм но биням. Койык йырзэ ик воргоронлэн пельпум вылаз поныса выретэм. Адями солы сукыри нянь поттыса сюдэм, ведраен шуныт ву поттэм на. Кӧня ке шутэтскемез бере, Койык дыртытэк гинэ нюлэс пала вамыштэм. Тӥни озьы, куд-ог пӧйшуръёс, шуге-леке вуо ке, адями доры юрттэт курыны вуо. Тужгес но - койыкъёс но пужейёс. Адями сыӵе дыръя соослы одно ик юрттыны кулэ. Фабулаез ласянь тунсыко йӧтэ "Ышиз мынам зундэсэ" верос но. Со адями кусыпъёслы сӥземын. Егит дыръязы матысь кусып тупатылэм но люкиськем нылаш но пияш, аспирант, трос аръёс ортчыса, ӵош мыныны кемдо Москваысь Иже мынӥсь поездын но ог-огзэс соку ик уг тодмало. Нимъёссэс верало ке но. Кышномуртлэн внучкаез Николаен гожтэм кылбурез лыдӟем бере гинэ тодма со нырысь яратонзэ, Ритаез. Внучказы нош весь ӟабыльтэ: - Бабуш, а кытын дедушка? - Кулӥз, нылы. Верай вал ни ук со сярысь. - Кемалась-а? - Бубид вордскемын ӧй вал на. "Кызьы кулӥз? Улэп ук мон, улэп. Тани ук мон, тани, тӥледын артэ!" - вера вал - ымыз тунгонаськем. Нош пушкыз бӧрдэ, бӧрдэ, бӧрдэ. Куаратэк". Собере пересь кышномурт внучкаеныз Кизнере васько. Николай Степаныч, табере ини наукаосъя доктор, чапчара огназ кыле. Солэн семья кылдытэмез таки ӧйлась. Ритаез егитысен вӧсь каремез бере, ассэ али но шараямез ӧз луы - шудзэ палэнтӥ келяз. Та выллем сюжето произведениос вань ке но, верос пайдатэм уз луы. Но, мон малпамъя, геройёслэн ог- огзэс тодмамтэзы оскымон уггес йӧты. Сюжетаз вань гинэ юромо кемдытэм учыръёсыз (случайность шуонъёс). Оглом вераса, И. М. Байметовлэн книгаез пӧрмемын. Веросъёсыз жанрез азинтонын асьсэлэсь интызэс шедьтозы. Кыксэ нош, оло, школалы программае но учебнике пыртозы. Авторезлы мылкыд карем потэ азьланяз но выль творческой азинсконъёс басьтыны. Р. ЯШИНА, кылтодон наукаосъя кандидат, Удмурт Элькунысь наукаосъя сӥё-дано ужась. Правительствоысь иворъёс Правительстволэн Тӧроез Павел Вершинин пыктос висёнъёсты эмъянъя центрлэсь выль ёззэ усьтонъя кенеш ортчытӥз. Туннэ нуналлы оскон вань, туэ нырысетӥ кварталэ химиотерапияя отделение 70-лэсь уно висисез кутыны быгатоз шуыса. Усьтӥськозы выль эмъян кабинетъёс, луозы висёнъёсты эскеронъя но рентген ортчытонъя нимысьтыз оборудование. Кенешемын: та ёзлы дыраз сётэмын луоз ву но шуныт, висъяськоз кулэ техника. Правительстволэн Тӧроез лэсьтӥськонэз йылпумъянлы нимысьтыз дыр тупатӥз, со мартлэн кутсконэзлы чакламын. Ӝеганъёс медаз луэ шуыса, ватсаса коньдон шедьтон амалъёс пусъемын. Элькунлэн бюджетысьтыз со понна висъямын 200 сюрс манет. *** 12 январе Правительстволэн кивалтӥсез Павел Вершинин пумиськылӥз СБС-Агро-лэн асьме улосъёсъя управлениезлэн директореныз Алексей Безумовен но СБС-Агро банклэн Удмурт региональной филиалэзлэн директореныз Игорь Останинэн. Отын бадӟым вераськон мынӥз Правительство но банк куспын гурт удысэз азинтыны ватсаса коньдон висъян пумысен. Чакламын странаысьтымы одӥгеныз кужмоеныз банкен но республикаен кусыпъёсты туэ но уката азинтон сярысь. Правительстволэн Тӧроезлэн секретариатысьтыз пресс-центр. ПОНЕДЕЛЬНИК, 18 января 06.10 - "Визыл". Иворъёсын программа. 06.35 - 07.00 - "Денница". Инф. рограмма. 07.10 - Новости. 07. 25 - Объявления, реклама. 07.45 - 08.00 - "Эрикрад". Радиоверан. 12.10 - Новости. 12.20 - Объявления, реклама. 12.25 - "Тӥляд юанъёсты - милям валэктонъёсмы". 12.40 - 13.00 - "Писпу вайысь ӵуж уӵыед". Радиоверан. 19.00 - Новости. 19.20 - "Свободы сеятель пустынный". К 200-летию А. Пушкина и 100-летию Кузебая Герда. 19.40 - Объявления, реклама. 19.50 - 20.00 - "Чагыр, чагыр дыдыке..." ВТОРНИК, 19 января 06.10 - "Визыл". Иворъёсын программа. 06.35 - 07.00 - "Денница". Информационная программа. 07.10 - Новости. 07.25 - Объявления, реклама. 07.45 - 08.00 - "Правовой канал".. 12.10 - Новости. 12.20 - Музыкальная открытка. Объявления. 12.30-13.00 - "Дунне кизилиос". Киргиз писатель Чингиз Айтматов но солэн "Нунал кыстӥське даурлэсь но кузьгес" романэз. 19.00 - Новости. 19.20 - Объявления, реклама. 19.30 - " Очрашу". Радиожурнал. 20.00-20.10 - "Чагыр, чагыр дыдыке..." СРЕДА, 20 января 06.10 - "Визыл". Иворъёсын программа. 06.35 - 07.00 - "Денница". Информационная программа. 07.10 - Новости. 07.25 - Объявления, реклама. 07.45 - 08.00 - "Табыш". Радиоверан. 12.10 - Новости. 12.20 - Музыкальная открытка. Объявления. 12.30-13.00 - "Ибырвесь". Радиожурнал. 19.00 - Новости. 19.20 - Объявления, реклама. 19.30 - "Алые паруса". Программа для старшеклассников. 20.00-20.10 - "Чагыр, чагыр дыдыке..." ЧЕТВЕРГ, 21 января 06.10 - "Визыл". Иворъёсын программа. 06.35 - 07.00 - "Денница". Инф. программа. 07.10 - Новости. 07.25 - Объявление, реклама. 07.45 - 08.00 - "Бизнес-клуб". 12.10 - Новости. 12.20 - Музыкальная открытка. Объявления. 12.30 - 13.00 - "Для вас и с вами". Радиожурнал. 19.00 - Новости. 19.20 - Объявления, реклама. 19.30 - "Тулпар". Егитъёслы программа. 20.00 - 20.10 - "Чагыр, чагыр дыдыке..." ПЯТНИЦА, 22 января 06.10 - "Визыл". Иворъёсын программа. 06.35 - 07.00 - "Денница". Инф. программа. 07.10 - Новости. 07.25 - Объявления, реклама. 07.45 - 08. 00 - "Сӧзнэт". Радиоверан. 12.10 - Новости. 12.20 - Музыкальная открытка. Объявления. 12.30 - 13.00 - "Зарни крезь". 19.00 - Новости. 19.20 - Объявления, реклама. 19.30 - "Актриса". Россиысь калык артистка В. Садаева сярысь радиоочерк. 20.00 - 20.10 - "Чагыр, чагыр дыдыке..." СУББОТА, 23 января 07.10 - Новости. 07.15 - "Выльвыл сад". Радиоочерк. 07.55 - Объявления. 08.00 - Радио России. 09.00 - "Субботний калейдоскоп". 09.30 - 10.00 - "Ладилэн азбараз". ВОСКРЕСЕНЬЕ, 24 января 07.10 - "Ялыке!" Радиожурнал. 07.45 - "Кузьыли кар". Нылпиослы радиогазет. 08.00 - Радио России. 09.00 - "Между Волгой и Уралом". Радиожурнал. 10.00 - "Арня ӵукна". Радиожурнал. 10.30 - 11.00 - "Вам песня в подарок!" Концерт. *** Вещание радиостанции "Ингур" (ГТРК "Удмуртия") на УКВ-канале (70,4 Мгц) и третьей программе проводного радиовещания Ежедневно кроме субботы и воскресенья): 8.10-11.00 Информационно-музыкальная программа на рус. языке 15.00-17.00 информационно-музыкальная программа на удм. языке Суббота и воскресенье 13.00- 17.00 Радиостанция "Ингур". Все остальное время с 8 до 01 ночи на этом канале и по проводному вещанию - "Радио России - Ностальжи". Шӧкыч Мынам телевизоре Ӧд тыр алимент, кырмоз тонэ мент Одӥг азьвыл тодмое шуылоз вал: "Нылпи лэсьтон - ческыт уж, будэтонэз секыт вылэм туж". Странамы вазенгес кужмо нюръяськоз вал алимент тыронлэсь пегась атайёсын. Табере Союз кир-пазь луиз. Утча на али алиментщикъёсты. Оло соос СНГ-ын уло, оло кыдёкысь кунсьӧрын тыршо? Секыт луиз тыронъёслэсь пегась бубыосты утчаны. Оскон вань на дано милицилы гинэ. Тани таяз передачаям сётӥсько Ижевскысь югдурез утёнъя Первомай отделысь вуэм тусбуйёсты. Оло, тодмалоды та агайёсты? Тани нырысетӥез тусбуез Саппаров Тальгат Хамбелеевичлэн. Вордскемын Бурятия Республикаысь Дирес...туй городын. Кыкетӥяз пуктэмын Серебро (!) Николай Дмитриевич. "Азвесь" атай вордскем Брянск областьысь Сосновка селоын. А-у, атайёс! Тӥлесьтыд жингыртэмдэс витё 37-95-64 но 37-93-76 телефонъёсъя. Н. ЛЯЛИН. Ӟечкылан Игра районысь Выселок Кушья гуртын улӥсь анаймылы, ӵужанаймылы, песянаймылы Анна Сергеевна Прозоровлы 19 январе 75 арес тырме. Юн гажаса но вань сюлмысьтымы яратыса ӟечкыласьком вордӥскьем нуналэныд. Сӥзиськом азьлань улонад шудбур но тазалык. Сяськалэсь чебергес Вань меда на маке? Адӟыса ик кӧтыд тырымон! Мемилэсь мусогес Вань меда на маке? Учкыса ик сюлмыд буйгамон! Ой, ӧвӧл, дыр, ӧвӧл мемилэсь мусогес Возь вылысь италмас сяськаед. Ой, ӧвӧл, дыр, ӧвӧл мемилэсь дуногес Дуннеын нокыӵе кузьымед. Яратыса куать нылпиосыд но нылпиосыдлэн нылпиоссы, кенъёсыд, эмеспиосыд. Кивалтэмед потэ - дышетскы Россия Федерациысь калык хозяйствоя удысъёсын ужасьёслэсь тодон-валанзэс будэтон вылысь усьтӥсько нимысьтыз курсъёс. Отын вакчи дыр куспын дышетскыны луоз "Менеджмент", "Маркетинг", "Финансъёс но кредитъёс" специальностьёсъя. Озьы ик дышетозы кунгожсьӧр кылъёслы. Дышетон радъямын луоз Россиысь устоосаз вузъёсын но бизнес-школаосын. Асьсэлэсь адямиоссэс отчы ыстыны быгатозы промышленностья но гурт удысъя предприятиос. Элькунысьтымы мылкыд карисьёс та пумысен тодыны быгатозы 25- 97-91 телефонъя. Н. СЕРГЕЕВ. Ширтомы "Фелициосын" но "Октавиаосын" Матысь дыре "Ижмаш-авто" заводын поттыны кутскозы "Фелиция" но "Октавиа" автомобильёсты. Со сярысь огкыл гожтэмын тодмо "Шкода" но "Фольксваген" фирмаосын. 2001 арын та машинаосты поттыны чакламын ог 80 сюрс, нош ньыль ар ортчыса, со кык поллы будыны кулэ ни. Кызьы верало, сыӵе луонлык сётэмын, Юрий Маслюковлэн юрттэмезъя. Уго та вылӥ кивалтӥсь уно аръёс ӵоже ужаз вал "Ижмашын". Н. ПЕТРОВ. БЫРЪЁНЪЁСЛЫ ДАСЯСЬКЫСА Вӧйын няньдэ си - но малпа Кун Кенешлэн кыкетӥ созываз депутат луон понна нюръяськон ӟырдыт луоз. Со али ик кутскиз ни, быръёнъёслэн нуналзы ке но ялымтэ на. "Удмуртиысь коммунистъёс" фракциысь депутатъёс таин валче юн шугъяськемзэс верало. Кызьы шуиз огазеяськонлэн кивалтӥсез Александр Бегунов, республикалэн валтӥсь ёзъёсаз шедьыны выро коньдоно муртъёс, пӧртэм политической группировкаос. Соос ик вань быгатонозэ лэсьто, Кун Кенешлэсь сессизэ ортчытонтэм понна. Та муген кылем арын юнматытэк кылемын судьяос, кутэмын ӧвӧл быръёнъёсты ортчытонъя выль закон. - Эн малпалэ, со умойтэм дасямын но ужаны ярантэм вал шуыса. Ӵапак закон ласянь юн инъетэныз но депутатэ кандидатъёс азе чурыт пуктэм куронъёсыныз валче тырмыт куара ӧз люка, собере воксё куд-ог депутатъёс сессиосы ветлэмысь дугдэмен учкытэк но юнматытэк кылиз. Таӵе шудон "тузъёслы" туж кельше. Кун Кенешлэсь азьвыл чакламтэ сессизэ люканы бер ӧвӧл на, ӧм бероме ай быръёнъёслэсь дырзэс тупатонэн но, - пусйиз Александр Григорьевич. Сыӵе ик мылкыдыз Эскерон палаталэн кивалтӥсезлэн М. И. Шишкинлэн: - Такем шуге-леке, экономика но, политика ласянь но вераса, республикамы ӧз шедьылы на. Мандат понна нюръяськон зол мыноз, Ижевскысь мэрие кадь ик. Коньдоно муртъёс, калыклэн ваньбуреныз кивалтӥсьёс пӧртэм амалэн бырйисьёсты ас палазы кыскозы - кин дунтэм вӧен алдалоз, кин пызен, кин кеньырен но сакырен. Мон вазиськисько котькуд адямилы: кузьмаськем вӧйын нянь сиыкуд малпа, кин понна куарадэ сётод, эн янгыша. Коммунистъёслэн шугъяськонъёссы юнме шорысь уг кылдо. Угось ӟеч, майбыр улӥсь кивалтӥсьёс, депутатлэсь мандатсэ басьтыса, асьсэлэсь нырысетӥ обязанностьсэс - сессие ветлонэз - соку ик вунэто. Соос уг пырисько республикамы понна туж кулэ луись законъёсты эскеронэ-кутонэ, уг выро бырйисьёссылэсь куронъёссэс быдэсъян бордын. Огъя вераса, депутатлэсь нимзэ басьтыны сюлмасько асьсэды утён понна гинэ, ӟуч сямен вераса, "неприкосновенной" луон вылысь. Сыӵеосты бырйиськом асьмеос, янгыше уськытыны нокинэ. Л. МЕДВЕДЕВА. ГАЗЕТ ГОЖЪЯМ БЕРЕ "Кырныжъёс" татын но вань Ортчем арын "Удмурт дунне" газет улон-вылонмес котыр ласянь возьматыны тыршиз. Тужгес но тодэ кылиз ожысь но ужысь ветеранлэн В. Михайловлэн "Малы кушетскизы "кырныжъёс?" нимо гожтэмез. Автор пыр-поч эскере политикаысь туала югдурез. Басьтом приватизация ортчытонэз ик. Солэн "атаез" А. Чубайс котькуд адямилы Россия ваньбурысь пайзэ ваучерен сётэмъяськиз. Туж "визьмо" вамыш вал со: адямиос валаса ик ӧз вуэ, мар со ваучер. Коньдонэз но со вакыт дунъяны шуг вал, 1 манет сюрс луиз, собере 10 сюрсозь вуиз. Сое лыдэ басьтӥзы "кырныжъёс": ваучеръёсты берен ас киязы люказы но магазинъёсты, предприятиосты, мукет ваньбурез киултӥзы. Соин гинэ ӧз тырмы Чубайслы, бӧрысь но со приватизация чотын коньдон жильдӥз на. Вить кузя соос приватизация ортчем сярысь книга поттӥзы на. Со понна быдэн 50 сюрс доллар пала коньдонэз кисыязы понӥзы. Паймод но бырод, со книгазы, зарнивуаса ке но лэсьтӥд, сыӵе дуно ӧй луысал. Президент вӧзын дыръяз но Чубайс, асьме производствоез азинтон, кулэ луись вузъёс поттон сярысь сюлмаськем интые, кунгож сьӧрысь валютая фондъёслэсь пунэмаськон сярысь гинэ малпаса улӥз. Дасез вылын улон капчи, собере пунэмзэ Чубайс уз тыры ук, нош ик калык кисыысь поттозы. Россиысь калык курадӟе-а, уг-а солы нокыӵе уг поты: президент вӧзысь палэнто ке, солэн "шуныт" интыез дась, нош ик РАО ЕЭС-аз гылӟиз. Радио, телевизор пыр учкыса, кылзыса, газетъёсысь лыдӟыса одӥгез гинэ валамон: Гайдар, Чубайс, Явлинский, Немцов но соослэн эшъёссы кыл вылын туж чебересь. "Президент но соосъя кариськемысь "рельсоас вылэ ӧз выды, нош калыкез со калэ вуттӥз. Кема ик уз ортчы, президентэ быръёнъёс вуозы. Нош ик-а меда ассэ ӵектоз ӟичыяськись Явлинский? Та адями азё-беро выременыз паймытэ. Я со кык киыныз ик выль Правительстволэн кивалтӥсез Евгений Примаков палан, нош уж вылын солы юрттэмез ӧз поты, правительствое ӧз пыры ӧтьыса вылысь но. Кышка, лэся, куашкан калэ вуттэм странаез ӝутыны секыт луоз шуыса. Со сяна, Явлинский чылкак паймытэ мукет ласянь но. Примаков правительствоен кивалтыны кутскем бере, коррупция сярысь вераськыны ӧдъяз. Тодӥсько, пе, тросэз отысь кивалтӥсьёс лушкасько, нош нимъёссэс уг вера, шуэ. Зэмзэ ик, туж секыт вакытэ ужаны кутскиз Е. Примаков. Калыклэсь осконзэ берыктыны туж шуг луоз. Дуннеысь одӥгаз странаын но ужам понна дыраз коньдон басьтытэк уг уло. Куке вал меда Россиын таӵе югдур: вордӥськисезлэсь уно луиз кулӥсез. Нош дуннеысь тодмо тодосчиос верамъя, асьмелэн быдӟа государствоез ӟеч-ӟеч азинтон вылысь, калыкез 700-800 милион луыны куэ. 1998-тӥ ар секытэн йылпумъяськиз. Государство коньдон печатласа но тырше ни кызьы ке улон-вылонэз ас радаз пыртыны. Со бӧрсьы амалтэк дунъёс тэтчаны кутско. Сыӵе вакытэ реформаторъёс вань шуг-секытъёсты мурт вылэ погыльто. Валамон ини, ваньмыз понна нырысь ик "янгыш" луо коммунистъёс. Кызьы гинэ уг тышкасько соосты, кин гинэ уг шуо! Нош демократъёс, ачиз президент кытын будӥзы? Соос но коммунистъёс вал ук, но туж чаляк партбилетсэс куштӥзы. Соин ик соослы оскон ӧвӧл. Ярам ай, ар бырон азьын пичияк югыт пиштӥз. Кылдӥз "Отечество" общественной движение. Москвалэн мэрез Ю. М. Лужков огинэ люканы быгатӥз пӧртэм улосвылъёсысь азьветлӥсьёсты. Программазэ веракуз, Ю. М. Лужков туж чурытэсь юанъёс пуктӥз приватизациез ортчытӥсьёс азе. Уноез ваньбур "зӧк кӧтъёсын" лушкамын, кунгож сьӧры келямын. Со интые асьме доры вуэ курег пыд, сыскиськон, зын но курыт ву. Гуртъёсын фермаос бушамын, техника пазямын. Кӧня миллионъёсын коньдон быриз меда, огсыр ӧръяськем улон-вылонэз президентмы резь-куаж тӥямен? Али но син азям Юри гуртысь лэсьтыны кутскем школазы. Борддоръёссэ ӝутыса вуиллям ик, нош липет улэ пыртэмын ӧвӧл бере, 2-3 ар ортчыса, со борддоръёс тэшказы, пилиськылӥзы, кирпичез зоръёс улын сылме. Сыӵегес ик суред ужасьтэм предприятиосын но. Со понна Иж котырамы кыӵеесь коттеджъёс ӝутскизы, эсьма быдэс дворецъёс. Со вакытэ ик тросгес но тросгес луо куяськон интыостӥ утчаськыса-бичаськыса ветлӥсьёс. Россиын ваньзэ вузан-басьтон каремен валче, табере музъемез но вузлы пӧрмытыны малпало. Со понна тужгес но выре президент. Политикъёс пӧлын туннэ олокинэз но вань, огез лыктэ, мукетыз кошке. Кин пӧяське, кин калык сярысь сюлмаське - уд но вала. Соин ик ожысь но ужысь ветеранлэн В. Михайловлэн "кырныжъёс" сярысь гожтэмез туж вакытаз, калыкез малпаськытэ. Автор пыр-поч валэктыны тырше, кинъёс асьмелэн кивалтӥсьёсмы. В. Михайловлэн гожтэмез малпаськытэ на шаерамы кылдэм югдур пумысен но. Туэ асьмеос Кун Кенеше депутат быръёмы. Кинъёс отчы шедёзы, кинъёс ӵуказе улон-вылонмес азинтон ласянь малпаськозы, со сярысь вунэтоно ӧвӧл. "Кырныжъёс" асьме палан но вань угось. А. ПЕТРОВ. Кыскод - йырситэм кылёд Тамак кыскон кызонэ вуттэ, солэсь шокан пась пытсаське, пиньёс ӵужекто, кисыриос кылдо, сюлэм висе, рак кылдэ... Ваньзэ тае лыдӟыса, кысконлэсь куштӥскьемды ӧз поты на ке, кызьы тӥ учкиськоды йыпситэк кылён но пурысьтан шоры? Кунсьӧрын ортчытэм эскеронъёсъя, 30-50 аресъем нылкышноос вазьгес пурысьтало, тамак кыско ке. Нош кыскись воргоронъёс, вазь пурысьтам сяна, чылкак йырситэк кыльыны быгато. "Здоровье" газетысь. Ялонъёс Вуж Выль аре ужасьёсмылэсь нылпиоссэс ӟечкыланы кулэ Тол Бабай. Ӵектӥськись мед будэтоз туш. х х х Вуж Выль аре ЗАГС уз ужа. Кулӥсьёс мед вазиськозы Выль ар бере. х х х Выль юртэ пыремъёс! Сюлмысь куриськомы: Вуж Выль ар котырын выль юртэ выжим шуыса но шумпотыса, сантехникъёсмес эн секталэ. Домоуправление. "МиГ" лобе Перуе "МиГ" авиационной научно-производственной комплекслэн кивалтӥсез Михаил Коржуев верамъя, Россия миым кызьзэ "МиГ-29" самолётъёсты вузан сярысь куинь странаен огкыл гожтӥз. Истребительёсты дасясь но лэсьтӥсь предприятиослы озьы 300 миллион доллар пала барыш вуиз. Кылем арын гужем ньыль самолёт басьтз Перу. Мукетъёсыз контрактъёс Африкаысь странаосын гожтэмын. Иворъёсъя национальной служба. Уксёен тодматскоды Кызетӥ дауре 130 кунын бумагалэсь печатлам коньдонэн тодматскемды луоз туэ 19-30 январе. "Дуннеысь валюта" адӟытон ужалоз элькунысьтымы Национальной библиотекаын. Удмурт Республикаысь Кун Кенешлэсь кызь куинетӥ (азьвыл чакламтэ) сессизэ люкан сярысь Удмурт Республикаысь Кун Кенешлэн Президиумезлэн Постановлениез Удмурт Республикаысь Кун Кенешлэн Президиумез пуктэ: Удмурт Республикаысь нырысетӥзэ ӧтчам Кун Кенешлэсь кызь куинетӥ (азьвыл чакламтэ) сессизэ люкано 1999 арын 28 январе Ижевск городын. Удмурт Республикаысь Кун Кенешлэн Тӧроез А. А. Волков. Ижевск город, 1999 арын 19 январе � 616-И. Кун Кенешлэн кызь куинетӥ сессияз чакламын эскерыны таӵе ужпумъёсты: Кун Кенеше депутатъёсты быръёнъя 100 округез кылдытон радэз юнматон; "Удмурт Республикаысь Кун Кенеше депутатъёсты быръён сярысь" законлэсь инъетсэ эскерон; Кун Кенеше депутатъёсты быръён нуналэз юнматон; Удмурт Республикаын 1999 арын социальной удысэз но экономикаез азинтонъя программаез эскерон; "1999 арлы республикалэн бюджетэз сярысь" законлэсь инъетсэ сэрттон-пертчон. Кин валэктоз, кытын дышетӥсьёслэн уждунзы? Пичи Пурга ёросысь уноез дышетӥсьёс 11-тӥ январьысен школаосазы пыдзэс но ӧз лёгалэ на. Шонерзэ верано ке, классъёсы соос лыкто, отын пуко, но нылпиосты дышетыны пумит луо, сентябрь-декабрь понна уждун басьтытозязы. Пумитъяськон ужрадэ 19 январьлы 29 школа но нылпи сад пыриськиз. Дышетӥсьёсты котьмалэсь зол пурӟытӥз таӵе учыр. Тодӥськоды на, луоз, Выль ар азьын премьер-министрмы Е. Примаков бюджет чотын ужасьёслы кык толэзь понна уждун сӥзиз вал, талы уксё выль арозь ик лэземын луоз, шуиз. Примаков кылзэ быдэстэм ке, кытчы пыриз дышетӥсьёслэн коньдонзы? Та пумысен сюлэмшугъяськонзэс вераса но югдурез валэктыны косыса, Пичи Пурга ёросысь дышетӥсьёс гожтэт ыстӥзы Е. Примаковлы но Президентлэн Удмуртиын оскем муртэзлы В. Балакинлы. Нош 19 январе ёрос администрациен пумиськылӥзы школаослэн, нылпи садъёслэн, дышетӥсьёслэн профсоюззылэн кивалтӥсьёссы. Ёросысь вылӥ кивалтӥсьёс ӵектӥзы январь понна уждунзылэсь куиньмос люкетсэ тырыны, нош кылем толэзьёс понна уждунэз "кынтыны", кварталлы быдэ одӥг "кынтэм" толэзь понна уждунэз сётъяса. Озьыен, 1998 арын декабре басьтоно уксёзэс дышетӥсьёс ар ортчыса гинэ басьтозы... Тодон- валан сётон удысын ужасьёс таин соглаш ӧз луэ, сентябрь понна уждунзэс январе ик тырыны куризы. Администрациын кенешон ортчыку, Правительстволэн Тӧроезлэн воштӥсезлэсь А. Лисиналэсь таӵе ивортон вуиз: Удмуртиысь Коньдон ужпумъёсъя но Калыкез дышетонъя министерствоос Пичи Пурга ёросэ нимысьтыз комиссия ысто. Со эскероз, кызьы ёрос администрация бюджетысь коньдонэз кутэ. Ӧйтӧд, сэрттоз-пертчоз-а комиссия, кытчы пырем дышетӥсьёслэн уждунзы, нош асьсэлэн дышетӥсьёслэн сюлэмзы интыяз ӧвӧл. Уг быгато соос нылпиосты ас эрказы куштыны. Уром шор ёзо школаын 9-тӥ но 11-тӥ классъёсын дышетскисьёс понна урокъёс нуисько ини. Мукет школаосысь дышетӥсьёс но эшъёссы борды итӥськыны малпало... В. СТЕРЛЯДЕВ. НАТАЛЬ Вить нылпиё анайёсты туала дыре ӵем уд пумита ни. Ирина Гаязова - Ува ёросысь Кизварь гуртын улӥсь - сыӵеос пӧлысь. Ай пусйымонэз со но: Ирина Анатольевналэн ваньмыз пиналъёсыз - нылъёс. Ирина ГАЯЗОВА нылпиосыныз. Туспуктэмез В. Камашевлэн Кызьы ужаськод, пудо утись? Лыдӟисьёсмылэн тодэмзы потэ пудо вордӥсьёслэн кызьы ужамзы сярысь. Ӵошатыны мед луоз шуыса, ми туэ но одӥг-ог печатлалом сводкаосты. Туннэ возьматӥськом, кӧня йӧл кыско нуналлы быдэ котькуд скаллэсь республикаысьтымы ёросъёсын. Артэ сётэмын кылем арлы лыдпусъёс. Озьы ик адӟыны луэ скал уллёлэсь лыдзэ (1 январьлы вераса). Ёросъёс Скаллы быдэ кыскемын Скалъёслэн лыдзы туэ кылем арын туэ кылем арын Яр 3,7 3,9 5302 5987 Глаз 6,0 7,2 7763 7507 Юкаменск 4,7 4,7 5088 5031 Балезино 5,8 6,2 8953 8758 Красногорск 3,9 3,8 3770 3938 Кез 5,2 4,7 5616 5950 Дэбес 5,8 5,2 4738 4971 Игра 7,5 6,9 3848 3801 Як.-Бодья 4,8 4,7 2341 2392 Шаркан 5,9 5,6 4708 4704 Селта 5,1 4,1 3824 3629 Сюмси 3,8 2,9 1621 1955 Ува 8,3 6,9 7405 7501 Вавож 7,6 6,6 5131 5123 Кизнер 5,0 4,9 4116 4217 Можга 8,1 7,8 9286 9271 Грах 5,2 4,7 3164 3289 Алнаш 6,0 6,3 6519 6423 Пичи Пурга 6,9 6,6 6723 6836 Кияса 3,9 4,6 4697 4654 Каракулино 3,3 4,0 3501 4104 Завьял 7,5 7,0 7890 8502 Воткинск 6,8 7,0 5274 5641 Сарапул 4,3 5,0 7167 8203 Камбарка 3,8 3,2 737 747 Республикая 5,9 5,8 129182 133134 Коньдон но политика Ӟеч но бур, евро! Асьмеды номырин но уд паймыты ни, уката но выль коньдон нимъёсын.90-тӥ аръёсы соос кыӵе но ӧз вордске! Табере дунне вылэ потӥз евро. Вераськонъёс кема ке но мынӥзы, малпан быдэсмиз: 11 страна улоз но ужалоз одӥг коньдонэн, ас валютаезлэсь куштӥськыса. Марка, франк но музонэз кылёзы историе, 1 январьысен Европаын кузёяське выль коньдон - евро. Нош ма воштӥськоз, юалоз куд-огез. Кунгож сьӧрысь валюталэн сотэк но данэз вань, манет сямен со ассэ ӧз вуза. Озьы ке но, евро юнме шорысь ӧз кылды. Мугез вал, уката ик дауръёс воштӥськон вакытэ. Политикъёс тае ӟеч тодо: кыдёке азьпала учкыса ужало. Али троссэ шугъяськытэ дуннелэн ХХИ даурын кудпала шонскемез: яке быдэсак пачкатоз Америка, яке котькудӥз регион выроз ас визьмыныз улыны-вылыны. Нырысетӥез ке вормиз, государствоос кыскозы США-лэсь ныпъетсэ, кыкетӥез ке - нюръяськозы мурт сямъёсты пыӵатонлы пумит. Та "пуртые" шудёз, ог-огзэсты котыр ласянь эскероз экономика ласянь дуннеысь тужгес но зол куинь центр: США, Западной Европа но Япония. "Ожмаськонын" вормон понна огазеямын вань амалъёс. Америкалэн Соединённой Штатъёсызлы "трос полюсъем" дунне кулэ ӧвӧл, та муген ик вооружённой кужымъёссэ юнматонэ со миллиардъёсын коньдон кисьтэ. Ас кожазы ужаны дӥсьтӥсь регионъёсты, кыӵе ке но муг шедьтыса, одно ик зӥбоз. Та экономической нюръяськонын валтӥсь инты басьтэ коньдон, военной кужымъёсты но со азьпалтӥз ни. Америка валаз: вир кисьтытэк, концлагерь пуктылытэк, дуннеез вормыны луэ, доллар гинэ дыраз мыч. Со долларед ик бергатоз, узырмытоз экономикадэ, нацидэ. Асьмеос али но оскиськом на США ачиз ас калыксэ сюдыны-вордыны быгатэ шуэмзылы, ялан вожъяськыса учкылӥськом зарезь сьӧрын улӥсьёс шоры, соосъя кариськыны тыршиськом. Пӧяськон ук со ваньмыз! Дуннеысь быдэс экономика туннэ Америка вылэ гинэ ужа. Музъем вылын улӥсьёс пӧлысь 5 процентэз луыса, американецъёс 40 процентсэ вань поттэм ваньбурез асьсэлы басьто, мукет сямен вераса, котькудӥз американец сие но юэ 8-12 адями понна. Со дыре ик мукетъёсыз сютэм, ёрмыса уло. Тӥни ма чотын узырме Америка! Кӧня миллиардэн, триллионэн печатламын долларъёсыз - одӥг инмар гинэ тодэ, дыр. Та бумагаосыз быдэс дуннеез вотсазы ни, Россия но ӝокатэмын, кекатэмын вож наштам буёлэн. Долларен шудыса, США вань странаослэсь кача узырлыксэс, экономиказэс куашкатэ. Солэн "кирос бубиз" - Ротшильд, тодмо финансовой аферист. США-лы та ужын туж ӟеч юртто Дуннеысь банк но Дуннеысь валютая фонд. Тӥни кинъёслы асьмеос сомында узырлыкмы вань вылысь дугдылытэк йыбыртъяськом. Западной Европаын Америкалэсь коньдон системазэ кемалась валазы. Соин ик, асьсэды утён вылысь, евро валюта кылдытӥзы. СССР-ын но кӧня ар ӵоже оскымон ужаз асьмелэн манетмы, 15 союзной республикаослэн аспӧртэмлыко "еврозы". Дыр возьматоз, утёз-а Европалэсь экономиказэ выль валюта. Но ХХИ даурез выль сямен пумитан - умой ни. Соин ик евролы паськыт вож сюрес сӥзем потэ. И. ОБРАЗЦОВ, история наукаосъя кандидат. Кун Кенешын Вожвылъяськон Кун Кенешлэн 23-тӥ сессиез Удмурт парламентлэн историяз весяклы кылёз, дыр. Со ортчыны кулэ вал ини декабрь толэзе. Но, куд-ог депутатъёс вожвылъяськемен, али но ӧз люкаськы на. Та ужпумез сэрттон-пертчон бордысен ик кутскиз Кун Кенешлэн Президиумезлэн берло кенешонэз. 15 минут куспын ортчытыны чаклам ужпум кыстӥськиз 2 час пала. Огкылэ вуытэк ялэмын вал 10 минутлы вис. Со бере Президиуме быръемъёс эскеризы мукет ужпумъёсты. Нош вуонозэ сессиез люканъя эчешонлы пум понӥз ӝытазе ортчем заседание гинэ. 23-тӥ сессия ортчыны кулэ 28 январе. Депутатъёс люкаськизы ке, сессия эскероз кык валтӥсь ужпумез: судьяосты юнматонэз но быръёнъёсъя выль закон кутонэз. Таяз учыре коть асьмелэн быръем адямиосмы ужан интыязы лыктозы шуыса оскем потэ. Соостэк уго нокин но Удмурт Республика понна законъёсты уз юнматы, быръёнъёсты уз ортчыты. Л. МЕДВЕДЕВА. Вазиське, эшъёс! Быдӟым Отечественной война аръёсы Глазове интыяськемын вал 2-тӥ Ленинградской военно-пехотной училище. Городысь ветеранъёслэн советсы отын дышетскемъёслы куронэн вазиське. Ыстэлэ милемлы тодэ ваёнъёстэс, туспуктэмъёстэс но мукет материалъёстэс. Гожтоно таӵе адресъя: 427600, Удмурт Республика, Глазов город, Динамо ульча, 6, 130-тӥ комната. Яке жингыртэ 3-30-80 телефонъя. Ф. МЕДВЕДЕВ. НАТАЛЬ Картэд улэп, Сибирьын улэ" Кытын ке, кинлэсь ке кылэме вань: асьмеос, пе, та улонын - куноос, часталы гинэ лыктэмын. Мукетыз улон вань на, пе, сояз дуннеын. Куноын-а, ӧвӧл-а, созэ шуг вераны. Улон-вылон сямен, пӧртэм адямиосын пумиськылыса, пумен мургес малпаськонэ усёно, амалтэк ӵошатоно. Огез, зэмзэ ик, куноын кадь улэ, ваньмыз солэн бусьтыр, мукетызлы нош ялан - куректон, курадӟон, бӧрдон. Пересьмон аръёссэ Александра Павловна Фокина нунал пӧрат огназ пукыса ортчытэ. Нылыз уж дурын бере, эшез одӥг - удмурт радио. Ӵукна но, нуназе но, ӝыт но пельзэ радио вӧзы ик карыса пуке, соин ӵош кырӟа-вера, бӧрдэ но, дыр. Кыӵе-кыӵе шудо егит дырыз ӧръяськиз вал Сандра апайлэн. Шаркан ёросысь Мувырын будэм нылаш ас парзэ шедьтӥз Якшур-Бодья палась Чекер гуртысь. Кузпалызлэн анай- атай юртаз улыны интыяськизы, вордскиз Алевтина нылзы. Но атаезлы нылзэ мусояса будэтыны ӧз кылды, Горд Армие басьтӥзы. Отысь бертыса ӧз вуы, война пуромиз. Кӧня ке ивор сётӥз ик собере чиптэм-чаптэм ышиз. Сое возьмаса, куректонэз но, гуртын улонлэн война вылтӥ секытэз но - ваньмыз Сандра апай вылэ усиз. Вылаз ик, картэзлэсь быдэ вуымтэ вынъёссэ утялтон но ас вылаз кылиз. Али но синву пыр тодаз вае со, кызьы курадӟизы, фронтэ келяно нюлэс дасякузы. Со аръёсы лымы но тросгес вылэм, вылды, куазь но кезьытгес улылэм, лэся. Пыдазы кутэн, бинялтонэн нылкышноос лымыез коласа поттазы ыльыс коръёсты. Огполаз, ужзы бере кӧлан корказы вуыса, йӧэн кокормем кутъёссэ, пыд бинялтонзэ куштэмез ӧйлась ни. Серекъялод но, бӧрдод но - штаниеныз ӵош куштоно луэм. Нюлэскын сокем секыт ужаса вылысь, кӧттырымон сиськонэз но ӧз адӟе соос. Картофка вылэ сылал пызьнаны, вӧзаз пот нянь ке вань, ярам ини, чидазы. Ма, ваньмызлы огкадь секыт вал угось. Ортчиз шимес война, куд-огез воргоронъёс, сӧсырмыса ке но, дор палазы вуизы, нош Сандра апайлэн кузпалыз ялан ивор уг сёты. Та куректон вӧзы ватсаськиз на мукетыз. Картэзлэн выныз семья кылдытӥз но нылкышноез пичи нылыныз дорысьтызы улляны кутскиз, картэд улэп ке, бертысал ини, пе. Малпамтэ шорысь нылпиё кышномурт пыдйылчи кылиз. Муртъёс дортӥ патер утчаса ветлоно луизы. Кызьы улӥзы-вылӥзы нылыныз Алевтинаен, кӧня кӧтӝожъёсты чидаса синву кисьтӥзы, инмар гинэ тодэ. Война бере ни, кӧня ке ар ортчыса, ивор вуиз: кузпалыд улэп, кытын ке Сибирьын мукет семьяен, пе, улэ. Талэсь но бадӟым чигиськон ӧвӧл, дыр, нылпиё кышномуртлы. Улэп картэд вань вылысь сомында курадӟыса ул ай! Ярам, туж чидась вылэм Сандра апай, пиосмуртъёсын огкадь ужез бергатъяз - кытчы косо, отчы мынылӥз. Дышетӥз пичи нылзэ Алевтинаез. Ялан оскыса улӥз ӟеч улон вуонлы, оло, пӧй, кузпалыз но бертоз ай... Одӥг аре, зэмзэ ик, картэз вынъёсыз доры адӟиськыны бертӥз. Алевтиналы соку ог 14 аресъёс вал ини. Со ӝытэ ик нылыз атайзэ адӟыны вамыштӥз. Нош Сандра апай, кытчы пырон инты шедьтытэк, корка пушкытӥз поръяз. Кыӵе гинэ малпанъёс йыраз ӧз бергалэ. Сюлэмыз шымырскыса возьмаз ӧс усьтӥськемез. Жаль но потэ кузпалыз. Пленэ сюрем вылэм, мозмытэмзы бере ини Сибире келяллям. Отын ик тодматскем госпитальын ужась кышномуртэн. Озьы ке но, адӟиськем потэ. Кыӵе коть тусбуйыз ни, тазалыкез? Мыныса ачид ик учкы, юа вал. Чидатскиз, аслэсьтыз лыктэмзэ возьмаз. Нылыз ӧс куспытӥ вамыштӥз гинэ, кышномурт сюлэм нош ик чигиськиз, валаз со - номыр ӟечсэ эн возьма. Озьы ик луиз уго. Бадӟым будэмед ини нылы шуыса, атаез нылызлэсь йырзэ маялтэм одӥг кулёк кампет сётэм на. Тӥни соку Алевтина но валаз, мар со кӧтӝож, мар со кышномурт куректон, кайгу. Бен, али Сандра апай улонлы уг ӝожтӥськы, уло соос нылыныз Ижын, вань асьсэлэн квартиразы. Нылыз визьмо вылэм, дышетскиз, ужа бухгалтерын. Ӝоген солэн но пенсие потон дырыз вуэ ни. Дӥсьсы вань, сиёнлы уг ёрмо, корка пушказы шуныт, чылкыт. Мар кулэ на кадь адямилы? Нош выльысь но выльысь тодам ваисько ке, пумиськеммес, вераськыса пукеммес аслам ик сюлэмы шымырске. Мар война вал та? Кыӵе гинэ курадӟон ӧз вайы со асьме калыклы. Мукетыз но туж малпаськытэ: улон-вылонлэн секытэзлы, вӧсь каремезлы чидалод ик ай, нош адями ик адямиез жаляны уг вала ке, вӧзтӥз ик вазьытэк, адӟытэк ортче ке? А. Петров. СПОРТ Вылӥе ӝутскон вылысь Волейболэн шудонъя нылкышноослэн Ижысь "Аксион" командазы нырысетӥ лигаын нюръяське. Но луонлыкез вань вылӥегес но ӝутскыны. "Аксион" азе сыӵе "вож тыл ӝуатскиз", куке со 3:0 но 3:1 лыдын вормиз нырысетӥ интыын мынӥсь Москваысь МГФСО командаез. Табере асьмелэн нылъёсмы кужымзэс мерталозы Серпуховысь, Новочеркасскысь, Волгодонскысь, Москваысь но Крымскысь эшъёсынызы. Кык устоез команда вылӥ лигае шедёз. *** Та выллем ик нюръяськонлы дасясько "Ижстальысь" хоккеистъёс. Чемпионатлэн нырысетӥ люкетаз "Восток" дивизионын соос нырысетӥ интые потӥзы. 32 пумиськонын "Ижсталь" 42 очко люказ. Очколы ӧжытгес Лениногорскысь "Нефтяниклэн" (Татарстан), 39 очко люказ Усть-Калиногорскысь "Торпедо" (Казахстан). Ширто куасъёс Ижысь Галина Кулакова нимо спорткомплексын бызьылӥзы шаерысьтымы кужмоосыз куасчиос. Нылъёс пӧлын кык пол вормисе потаз Сарапулысь Валентина Новикова. Егит пиос пӧлын кужмо луэмзэс возьматӥзы Максим Вылегжанин но Александр Месяцев. Нылкышноос пӧлын котькинлэсь ӝог бызьылӥзы Людмила Тарасова но Юлия Шамшурина. Воргоронъёс пӧлын финише котькинлэсь ӝог вуиз Балезиноысь Владимир Корепанов но Удмурт университетын дышетскись Алексей Вальчук. Берпуметӥез спортъя мастерлэсь куронъёссэ быдэстӥз. М. КУЗЬМИН. Ялон 23-тӥ толшоре 14 часын Кун филармонилэн юртаз (Пушкинской урам, 245) ортчоз Дэбес землячествоез кылдытонлы сӥзем кенеш. Ӧтиськомы Дэбес ёросын вордӥськемъёсты но вань мылкыд карисьёсты. Оргкомитет. Мон тазьы малпасько Мар понна чидаськом? Уг ке янгышаськы, радио пыр кылӥ Павел Вершининлы кыӵе ке награда сётэмзы сярысь иворез. Зэм ке ӧвӧл, вождэс эн вае. Ӵап со вакытэ чиданэ пӧсьтӥз, лэся. Уго сюлэм кемалась ӟырдамын ни вал. Ма, кызьы озьы? Кыӵе дунъет, кыӵе награда сётыны луоно туала кивалтӥсьёслы? Соослы таӵе улон туж кельше, шӧдске. Соиз валамон, кузёос уго уждунтэк одӥг толэзьзэ но уг пуко. Мон сямен, орден сётоно мукетъёсызлы, кин арен но солэсь тросэн уг басьты ни уждун. Озьы но ужа. Коть чидамзэс лыдэ басьтыса ке но, сётоно. Сыӵеос кемалась вунэтӥзы ни Совето власть дыръя кадь столовойын сиськемзэс. Али туж тросэз калык кураськыса улэ. Толон тани бускеле аслэсьтыз кӧтӝожзэ вераса сылӥз. Ужа автозаводын, коньдон кемалась уг сётъяло, кышноез но вить толэзь коньдон уг басья ни. Пизы дышетске механической институтын, 4-тӥ курсын. Дышетскыны пыриз коньдонтэк но, мар но - аслаз быгатэменыз. Ӝоген йырме кыӵесэ поно ни, шуэ 45 аресъем пиосмурт. Пиме дышетыны но, няньлы но, пу басьтыны копейка коньдонэ ӧвӧл, шуэ. Кышно ӟуре, уксё куре, нош мон мар каром? Синъёсаз учкисько но, синвуэз быльыр потэ. Ма, неужто та бускеле сьӧд уж лэсьтоз? Кин тодэ, пумаз вуид ке, кыӵесэ но пырод, ява. Тӥни озьы. Нош тӥ, вылӥын пукисьёс, асьтэлэн гадяды асьтэос наградаос тыриськоды. Тӥледлы таӵе улон кышкыт ӧвӧл, пиналъёстэс но граница сьӧры келяны быгатоды, коньдонды трос. Война дыръя калык чидаз вормон понна. Нош али со малы курадӟе? Кивалтӥсьёс весь пӧясько. Ӧскем ик потэ ни. Нош тӥ асьтэдыз инмар тусбуё возьматыны выриськоды. Совето власть дыръя сётъям наградаосты али лыдэ но уз басьтылэ ни. Нош соку соосыз юнме шорысь ӧз сётъялэ. Со вакытэ огшоры калык но адями чотын улӥз. Али ке огшоры калыклэн нимыз но, тулыз но ӧвӧл ни. Адямиос куинь категорилы люкемын: дышетӥсьёс, врачъёс но пенсионеръёс. Мукетъёсыз ӧвӧл ни, кожалод. Кузёос быдэс странаез, озьы ик Удмуртиез, тарказы, вузазы, быдтӥзы. Колхозъёс пазьгемын, бусыос кусокен люкемын. Со понна тӥлесьтыд кылдэс юано, уго ваньды тӥ - ыжкуэн быдэскем кионъёс. Сыӵе синмын ми учкиськом али шорады. Вот, шуоды, вань йыркурзэ гожтэм та адями. Озьы ӧвӧл. Веран туж трос на. Бӧрдыса улӥсь калыкез вылӥын пукисьёс уг но адӟо, уг но кыло. Юнме шат асьсэдыз быдтӥсьёслэн лыдзыя асьмеос ваньзэсты азьпалтӥськом. Нош ик орденъёс сярысь верам потэ. Соосты али, мон сямен, нокинлы но сётъяны кулэ ӧвӧл. Калык уго ужтэк пуке. Солэн мылкыдыз кулэм муртэ ватэм бере кадь. Кӧня юанъёс. Малы колхозникъёс вордэм пудо-животсэс, сӥльзэс гинэ но асьсэос вузаны уг быгато? Мугез тодмо: базарын кивалтэ одӥг компания - мафия. Гурт калык чотын кин гинэ уг узырмы! Тӥ ваньзэ тае тодӥськоды, но номыр уд лэсьтӥське. Нош вералом-а тӥледлы, кызьы мон туэ "Удмурт дунне" газетлы гожтӥськи? Выны вордскем гуртам куное бертылӥз. Отысь саламлы сӥль, картофка, кубиста лэзизы. Со кузьымме бускелелы вузаса гожтӥськи газетлы. Уго уждунме вить толэзь уг адӟиськы ни. Тӥни озьы. Кытын-о чиданэд луоз на? Табере редакциын ужасьёслы вазиськеме потэ. Уг тодӥськы, кин кие вуоз та бӧрдыса гожтэме. Курисько воштытэк газетэ сётыны - мед учкозы лыдӟисьёс. Яке кышкаськоды-а шонерзэ гожтыны? Тӥни сыӵе мылкыдын пумитасько мон Выль арез. Ӟеч луэ. Л. Н., Ижевскын улӥсь. Одӥг буёлэн возьматэ Л. Н. Секыт мылкыд кельтэ нимзэ ватэм эшлэн гожтэтэз. Соин ик сое Лыдӟись гинэ шуом. Куд-ог верамъёсыныз соглаш кариськеммы уг поты ке но, редакцие вуэм гожтэтэз ми печатласьком. Малы? Кызьы пусъе автор, калык уго, зэм но, туж курадӟыса улэ, солэн Москваысь но, республикаысьтымы но, интыосысь но кивалтӥсьёслы осконэз быремын ни. Лыдӟисьмылэн чиданэз пӧсьтэм, кыӵе ке награда сётон сярысь кылыса. Мон малпасько, со вал куд-ог эшъёслы Россия Федерациысь Кышкыт учыръёсъя министерстволэсь "За заслуги" знакъёссэ сётон сярысь ивор. Пӧлазы чузъяськиз Павел Вершининлэн нимтулыз но. Зэм, таӵе вакытэ орденэн йырин ӧвӧл кадь. Но татын вераськон мынэ ук шудтэм учыръёсты алонын оскем ужзэс умой быдэстон сярысь. Адямиос юнматэм куронъёсты кулэезъя быдэсъяло бере, сьӧлык луоз шат, соослы кыӵе ке амалэн тау карид ке? Лыдӟисьмы, сое валаны но луэ кадь ке но, кылдэм югдурез одӥг буёлэн гинэ возьматэ. Котырысь сьӧдзэ гинэ адӟиськом шат асьмеос? Туж трос умойтэменыз артэ вань ук ма но со ӟечез но. Шуг-секытъёс шоры учкытэк, адямиос уло, нылпи ваё, дышетско, корка лэсьто. Учке ай, куд-ог гуртъёсын быдэс урамъёс кылдӥзы ни ук берло аръёсы. Шумпотоно визьмо, ас интызэс шедьтыны быгатӥсь ужбергатӥсьёс понна. Бен, пӧлазы выжыысьтымы потэмъёс трос ӧвӧл на. Но соослэн лыдзы йылэ. Власть шоры но пӧртэм синмын учкыны луэ, дыр. Уго отын но улэп адямиос ужало. Котькудӥзлэн вань, вылды, ӟеч палыз но, умойтэм сямыз но. Кудӥзлэн умоез уногес, кудӥзлэн - уродэз. Лыдӟисьмы туала премьермылэсь нимзэ поттылӥз бере, мынам тодам лыктӥз Павел Вершининлэн кылем арын отпуске потамез бере мур лулскемез: дыр ортчиз, нош ик одӥг нуналзэ но шутэтскыны ӧйлась... Нош Выль арлы сӥзем интервьюаз со пусъе, тужгес но пыдлось малпанэз куке но соку умой-умой кӧлонэн герӟаськемын шуыса. Я, адӟисез адӟоз, шуо калыкын. Адӟоз но, дунъет но сётыны быгатоз. Уго азьпалан асьмемыз витё быръёнъёс. Кӧям-вӧям чебер кылъёс сьӧрысь адямилэсь зэмос пуштроссэ синйылтӥм ке, куарамес кӧня ке мурт пӧлысь оскымонэзлы сётӥм ке, власть но выльдӥськоз, соин ӵош улонмы но тупатскоз. Сыӵе осконэз асьмелы нокызьы но ыштыны уг яра. Лыдӟисьмы гожтэтэзлэн пумаз ӟеч кылъёсын вазиське "Удмурт дуннеын" ужасьёслы (со люкетсэ газетэ ум сётӥське ни). Тау! Ми но тӥледлы сӥзиськом умойзэ гинэ. Шумпотӥськом, уно газетъёс пӧлысь тӥ милесьтымзэ бырйиды шуыса. Только таӵе куронмы вань: гажано Лыдӟисьмы, эн возьдаське нимдэс-тулдэс, адрестэс, телефондэс гожтыны. Табере таӵе гожтэтъёс понна Сибире но уг келяло ни, кылэз но уг юало ни. Со но ӧвӧл шат ӟеч тодметъёс пӧлысь одӥгез? Витиськом выль иворъёстэс. Гожъялэ, эн возьдаське, сюлэмшугъяськондэс пушкады гинэ возьытозь, малпандэс кисьтэ бумага вылэ. Асьтэлы но капчигес луоз. Мукетъёсыз но, оло, маин ке юрттыны быгатозы. Иван ЛЕБЕДЕВ, валтӥсь редакторез воштӥсь. Геройлэн ужез медаз вуны Удмурт шаерысь калыкез дышетон удысын ужасьёс понна та ивор туж бадӟым но шумпотымон луиз: СССР-ысь Вылӥ Кенешлэн президиумезлэн 1968-тӥ арын 1-тӥ июле потэм указэныз Шаркан ёросысь Сосновка школаысь дышетӥсьлы Иван Константинович Зеленинлы сётэмын вал Социалистической Ужысь герой ним. Асьме элькунысь дышетӥсьёс пӧлысь, сӥлы карыса, сыӵе вылэ ӝутэмын чылкак одӥг мурт гинэ - азьло но, берло но сыӵе учыръёс ӧй вал ни. Зэм, асьмеос тодӥськом: ӧжыт ӧвӧл бадӟым награда басьтэмъёс, трос гинэ асьмелэн Удмуртиысь яке Россиысь но школалэн сӥё-дано дышетӥсез ним нуллӥсьёсмы. Одӥгезлы, Балезино ёросысь Е. М. Корепановалы, "СССР- ысь калык дышетӥсь" ним но сётэмын. Ужысь Геройлэн И. К. Зеленинлэн наградаосыз солэсь азьло но тырмыт гинэ вал ини. Герой ним басьтӥсь муртлы сётӥське вал "Серп и молот" зарни медаль но Ленин орден. Иван Константиновичлэн таиз таӵе орденэз кыкетӥез луиз, нырысетӥзэ сётӥзы кык ар солэсь азьло. Герой луэмезлэсь дас ар азьло со вал ини РСФСР-ысь школалэн сӥё-дано дышетӥсез. Собере мукетъёссэ но наградаоссэ, 50-60-тӥ аоъёсы басьтылэмъёссэ, оло, вераса-гожтыса но уд быдты. Со аръёсы Сосновка школа арысь аре азинсконъёссэ возьматылӥз СССР-ысь ВДНХ-ын. Школалэн коллективезлы но азьветлӥсезлы И. К. Зеленинлы сётылӥзы отысь пӧртэм дипломъёс но медальёс. Собере малпасько лыдэ басьтытэк ӧз кельтэ, дыр, ветеранлэсь Быдӟым Отечественной войнаын ожмаськемзэ но: ожгарчи трос тылӝуосы пырамын, олокӧня фронт сюресъёсыз ортчылэмын, кык пол сӧсырмылэмын, со сюресъёсыз пусъемын Горд Кизили, нырысетӥ степенё Отечественной война орденъёсын, "За отвагу", "За победу над Германией" но мукет медальёсын. Туала вакытысь лыдӟисьёслы, озьы ик дышетӥсьёслы но, оло, озьы но валантэмгес потоз, ма понна, кыӵе бадымесь ужъёсыз понна сокем данъямын, сӥлы каремын вал Шаркан палъёсын будэм но отын ик туж сюлмысь тыршем удмурт пи? Нош вордскемын со пичи гинэ Бызиново гуртын 1909-тӥ арын 15-тӥ январе (толшоре). Дышетӥсе дышетскиз нырысь ик Иж педтехникумын, быдтӥз сое 1928-тӥ арын, со арысен ик Кыква школаын ужаны кутскиз. Куамынэтӥ аръёсы Пермь универстетын дышетскиз на, 1938 арын биолог но химик луиз. Нош война бере, выльысь яратоно ужез борды кутскыса, 1948-тӥ арын Сосновка шоро-куспо школае лыктӥз но отын, вань кужымзэ, визьзэ, быгатонлыкъёссэ- талантсэ сётыса, мӧйымытозяз тыршиз. Озьы тыршиз, ужъёсты радъяз, Сосновкае И. К. Зеленинлэсь дышетскыны, солэсь лэсьтэм ужъёссэ, ужан амалъёссэ адӟыны вуылӥзы котькуд палась дышетӥсьёс но музъем ужез яратӥсьёс. Со котькытын "пионер" вал: лыктэмез берегес ик республикаямы нырысьёсыз пӧлын туж синмаськымон школа бакча кылдытӥз, туж валаса но быгатыса нуиз аслаз предметъёсызъя кружокъёс. Адӟыны быгатылӥз визьмо но уж борды кыстӥськись пиналъёсты. Солэн предметъёсызъя бере кылисьёс ӧз луылэ. Школа дас одӥг ар ӵоже одӥг но кык ар пукисьёстэк ужаз. Нылпиосты люказ производственной бригадае школа котырын гужем ӵоже бер сӥзьылозь ӝуаллязы синъёсты мальдытӥсь йылъёсын сяськаос. Арысь аре писпуос мерттылыса, школа котыре куашетӥсь сад кылдӥз. Бакчазы но производственной бригадалэн пичи бусыез гурт хозяйствоя пӧртэм опытъёс нуон но музъем ужаны дышетскон центрлы пӧрмиз. Асьсэлэн будэтэм турлы кидысъёссы "Дружба" колхоззылы но висъяны шедьылӥз. Нош производственной бригадазы колхоз музъем вылын сыӵе таза сяртчы- куузика но Сосновский нимо колыс будэтылӥз - пиналъёслэн будэтэм урожайзы колхоз пудо сюдыны кемалы тырмылӥз. Со аръёсы ик азинлыко ужаз Сосновкаын школьной лесничество но. Ваньмыныз со ужъёсын кивалтӥз, быдэс коллективзэ, дышетӥсьёсты но, дышетскисьёсты но, сьӧраз валтӥз биолог Иван Константинович Зеленин. Сое Сосновкаын гинэ ӧвӧл, быдэс Шаркан ёросын гажазы. Огшоры биолог гинэ ӧй вал со - наукалэсь вань куронъёссэ чакласа ужаны тыршылӥз. Агроном но, зоотехник но, эколог но, музъемлэсь удалтонлыксэ ӝутыны сюлмаськылӥз. Туэ шуысалзы на: зэмос эколог. Трос валэктон уж нуылӥз калык пӧлын дышетон-визьнодан удысъя. Гажаса, туж шуныт тодаз вайылэ героез пинал натуралистъёслэн республиканской станцизылэн азьвыл директорез, Удмурт Элькунысь школалэн дано дышетӥсез Раиса Демъяновна Русских. - Асьме республикаын,- шуэ со,- пинал натуралистъёслэн движенизы паськыт вӧлмиз ӵапак 60-тӥ аръёсы, И. К. Зеленин, Л. Д. Белоусов, А. Д. Черных, А. Н. Кузьмин, Ивановъёс но мукет дышетӥсьёс-биологъёс сюлмысь тыршемен. Музъем вылын ужаны егитъёсты быгатыса дышетылӥзы озьы ик Алнаш ёросысь Байтеряковоын, Сарапул ёросысь Ершовкаын, Балезино ёросысь Карсовайын но мукет интыосын. Нош Иван Константинович аслэсьтыз но коллективезлэсь ужан амалъёссэ ватыса ӧз возьылы, вуылӥз юннатъёслэн слётъёсазы валэктон уж нуыны, опытъёссэ вераны но возьматыны, туж лякыт но вазиськись вал. Пӧртэм интыосы ӧтьылӥзы. Ушъяськон сямыз ноку ӧй вал солэн. Усто дышетӥсь но музъем ужась вал со. Сосновка школаын дышетэмъёсыз тросэз солэсь сюрессэ бырйизы яке гуртъёсын ужась специалистъёс луизы. Школаын туала вакытэ но тросэз ужало И. К. Зеленин ки улын быдэ вуэм муртъёс. Та геройлэсь гуртын, музъем вылын ужам подвигзэ ӵошатыны луоз шат Уралысь мукетызлэн нянь будэтӥсьлэн - Социалистической Ужысь кык пол Геройлэн Терентий Семенович Мальцевлэн подвигеныз. Мӧйымыса И. К. Зеленин кӧня ке арзэ улӥз на Ижын нылпиосыз дорын. Татын но тэк улонэз ӧз тодылы, тодон-валанъёссэ, люкам опытсэ калыклы сётыны тыршылӥз. Кыӵе гинэ пумиськонъёсы ӧз вуылы меда со. Гажано куно вал со редакциосын но: тодам ваисько солэсь "Советской Удмуртия" но "Дась лу!" газетъёсы пырамзэ, со газетъёсын печатласькемзэ, интервью сётылэмзэ, журналистъёсын К. Ломагинэн, Н. Евсеевен но мукетъёсыныз ӟеч кусып воземзэ. И. К. Зеленин улонэныз люкиськиз 1993-тӥ арын пӧсьтолэзе (июне), инкуазьлэн туж шулдыр вакытаз. Но сое келян туж шыпыт ортчиз, лэся, сыӵе шимес нуналэз тодӥсьёс туж ӧжыт. Оскисько, Сосновка калык сое ноку уз вунэты, отысь шайвылэ ик Дышетӥсь ватэмын но. Нош тодаз возёз-а удмурт калыклэсь визьмо пизэ, одӥг гинэ героймес, ачиз удмурт калык? Туала вакытысь адямиослэсь кӧня муртлэсь со сярысь тодэ-а шуыса юай, жаляса верано луэ: уг тодо. Уз, Шаркан калык ноку уз вунэты. Буре ваизы сое гуртоосыз вордскемез дырысен 90 ар тырмон нуналаз но. Нош улонысь кошкиз Иван Константинович толон гинэ кадь - куать ар ортче ини. Трос визьмо кылъёсыз но ужъёс пель сьӧрын кылӥсько, адӟисько на. Л. ФЕДОРОВ. АНАЙ-АТАЙЁСЛЫ ШКОЛА Нылпи вамыштэ тодон-валан дуннее Нылпилэсь школае мыныны дась луэмзэ валаны луэ: а) пинал ачиз дышетскыны мылкыд каре; б) пинал дась мукет улон ӧре выжыны; в) люкам тодон-валанъёсызъя. а) Дышетскыны дасяськись пинал тодыны кулэ ни, мар со школа, дышетскон, дышетӥсьёс, кызьы астэ возёно. Школа пиналэз бордаз кыскыны кулэ ӧвӧл вылласянь гинэ (книгаосын, тетрадьёсын, чебер портфелен), солэн выль тодон-валанъёс басьтэмез мед потоз, дась мед луоз урок ӵоже пукыны. б) Школалэн улон ӧраз выжон понна, пиналлы пыӵатоно эшъёсыныз, дышетӥсьёсын ӟеч кусып возён сямъёс. Дышетскисьёс школаын ваньзы одӥг ужен выро, соин ик пиналлы соосъя кариськоно луоз. Кылзӥськем сяна, ассэ но утьыны мед быгатоз. в) Пинал школае мыныны кулэ ни, нимаз тодон-валанъёс люкаса. Дышетскыны дась луон понна мед луозы пӧртэм быгатонлыкъёсыз но - чакласькон, ӵошатон, малпаськон, тодаз возьыны быгатон... Пинал валаны кулэ вераськемез, ачиз но мед дышетскоз мадьыны. Киосыныз, чиньыосыныз, синъёсыныз ужаны мед быгатоз. Пиналлэсь тодон-валанъёссэ чакланы луоз Г. Вицлаклэн тестэзъя, 15 пӧртэм ужез быдэстыса. 1.Суредъёсъя мадёс Пинал азе пононо кыӵе ке но одӥг учырез бӧрсьысь бӧрсе возьматӥсь куинь суред. Мед мадёз, мар сярысь вераськон мынэ отын. Суредъёсты син азьысьтыз басьтыса, выльысь мадьыны косоно на со сярысь ик. 2.Буёлъёсын тодматскон Пинал азе пононо пӧртэм буёлэн 12 бумага юдэс (горд, гордмыт-ӵуж, ӵуж, вож, чагыр, лыз, бусӥр (фиолетовой), льӧль, сьӧд, пурысь, тӧдьы, курень). Юалэ, тодэ-а со буёлъёсты. 3. Кылбур дышетон Лыдӟе пиналдылы кылбур, кылсярысь, таӵезэ: "Лымы ӧз быр на шаерын, Вырйылъёсын гинэ шуназ. Нош гурезё пужым ягын Кечсин сяська юг-юг ӝужаз." Собере, кык чурзэ выльысь лыдӟыса, бӧрсяды вераны куре. Нош ик кык чурзэ лыдӟе. Отӥяз нылпи быдэсаксэ ас понназ вераны мед турттоз. Кулэ ке, куинь пол выльысь лыдӟе на. 4. Мар та таӵе? Нылпи азе пононо 9 суред (яблок, ӵуж кушман, роза, груша, тюльпан, кубиста, шундыберган, вишня, гвоздика). Суредъёсты мукетэныз но воштэмды луоз. 5. Лыдъяськон Нылпилы возьматоно 4-тӥ ужын кутэм суредъёсты. Лыдъяны куроно, кӧня арбери та суредъёсын. 6. Кӧняозь лыдъяське? Вераны куре, кӧняозь нылпиды лыдъяськыны быгатэ. 7 аресъем дышетскисьтэм нылпи понна 22-озь лыдъяськон умой ни. 7. Арбериосты радъян Нылпиослы возьматоно 4-тӥ ужын кутэм суредъёсты. Мед люкоз соосты -сяськаослы, емышъёслы но бакча сиёнъёслы. 8. Лыдлэсь вошъяськемзэ валан Нош ик кулэ луозы 4-тӥ ужысь суредъёс. Сяськаосынзэ басьтыса юано, кӧня ваньмыз арбери кылиз ӝӧк вылэ. Собере ваньзэ суредэз огинэ кароно. Нош ик юано, кӧня арбери ваньмыз луиз. 9. Фигураосты радъян Нылпи азе пононо круген, треугольникен, квадратэн быдэн 3 суред. Юано, мар отын суредамын. Собере юано, малы треугольник нимаське треугольникен, круг - круген, квадрат - квадратэн нимамын. Собере вань суредъёсты нылпи мед радъялоз нимаз-нимаз - ог-огзылы тупамзыя. 10. Суредъёсты ӵошатон Нылпи азе пононо ньыль куз суред. Котькуд кузысь одӥгез суред ӧжытлы гинэ мукетызлэсь висъяське. Вераны куроно, кыӵе пӧртэмлыкъёссы суредъёслэн. 11. Буёлэз но формаез огазеян Нылпи азе пононо пӧртэм буёло 4 прямоугольник: лыз, горд, вож, ӵуж. Одӥгезлэн шораз вандэмын квадрат, мукетъёсаз треугольник, прямоугольник, круг. Нылпилэн кияз сётоно сыӵе быдӟалаен ик вандэм квадрат, треугольник, прямоугольник, круг - котькудӥз 4 пумо буёлэн. Одӥгез но фигура пась медам кыльы шуыса, нылпи соосты тупамзыя ворсаны кулэ. 12. Кылбурез мадён Нылпиез вераны куроно куинетӥ ужысь кылбурез. Вунэтэм ке, быдэн кык чурен лыдӟыса, сьӧрады мед вералоз. Собере эшшо куинь пол лыдӟоно. 13. Учкыса суредан Учкыса суреданы нылпилы ӵектоно треугольник, кирос (крест) - прописной шрифтлы тупась кык пужы - 14. Тупасьсэ шедьтон Нылпилы сётоно юанъёс: 1) Нуназе югыт, нош ӝытазе?.. (пеймыт). 2)Тылобурдо кырӟа, нош пуны?.. (утэ). 3) Машина мынэ, нош самолёт?.. (лобе). 4) Дыдык лоба, нош чорыг?.. (уя). 5) Коӵышлэн гон, нош ӵӧжлэн?.. (тылы). 6) Дэрем вуро басмалэсь, нош пыдкутчан?.. (кулэсь). 15. Суредъя мадёс. Нылпилы возьматоно суред (пиналъёс азбарын шудо, салазкиен нискылало, лымы мунё лэсьто яке мукет со выллем). Мадьыны куроно, мар ужало пиналъёс. Нылпи мадьыны мед быгатоз могаллятэк, кузьгес предложениосын. Быгатонлыксэ вылӥегес дунъяны луоз, суред вылысь адӟемзэ верам сяна, пиналъёслэсь сюлмаськонъёссэс, азьланезлы малпанъёссэс усьтыны турттӥз ке. Кызьы адӟиськом, та тестысь ужъёс нылпилэсь быгатонлыкъёссэ котыр ласянь усьтыны юртто. Умой луысал, пиналъёслы удмурт но ӟуч кылын валатонъёс сётыса. Озьы соос капчиен дышысалзы кыкезлы ик кылъёслы, тодон-валанзы, йыр визьзы уката но юнмасал. Улонын но соослы озьы капчигес луоз. Л. ТРЕФИЛОВА, психолог. Приближается весна, а вместе с ней сезон посевных работ. Уважаемые садоводы и огородники! ГП "Удмуртторф" предлагает своевременно позаботиться о щедром урожае. В хозяйственных магазинах города Ижевска вы можете приобрести экологически чистые торфяные грунты, микрогрядки, удобрения для выращивания рассады. Используйте уникальные плодородные свойства удмуртского торфа! Торфяные грунты "Садовая земля", "Урожайный", "Здоровье", "Плодородие" содержат все необходимые растениям питательные вещества, микроэлементы и стимуляторы роста. Они позволяют улучшить всхожесть семян и приживаемость рассады, получить высокий урожай. Наши постоянные покупатели отмечают удобство и высокую эффективность, применения продукции ГП "Удмуртторф". Уважаемые руководители торговых предприятий! Учитывая наступление сезона и повышенный покупательский спрос на грунты и удобрения для рассады, предлагаем вам заключить договоры на поставку продукции ГП "Удмуртторф" на выгодных для вас условиях. Наш телефон: 78-08-88. (1) <Д:\Удмурт дунне\Уважаемые садоводы.wри> 15.01.99 10:30 Цлов: 118 Цимволов: 877 Пинал даурен пумиськон Аръёс ортчо, мӧйымон дыр но вуэ. Егит дырме, дышетскемме, ужамме тодам вайыса учкисько фотографиосме. Тани син шорам война вылтӥ Якшур-Бодья педучилищеын дышетскем эшъёсы. Соос шоры учкыса, жальзылы вормыны уг луы вал. Азьвыл машинаос ӧз ветлэ, сомында иськемез пыдын ортчоно луылӥзы - бертылӥзы сиён, картофка дуре. Тросэз вал Шаркан палась пӧртэм гуртъёсысь. Нош мынам Якшур гуртэ куинь километр кеме интыяськемын. Куд-ог дыръя эшъёсме дорам но вайылӥ. Нэнэе шуэ вал: "Асьмеос трос ке но ( куать пиналъёс ми вал) эшъёстэ вай, картофка, кубиста, аръян вань, уз "тэргалэ". 14 декабре радио пыр ивор кылӥ. Кин, пе, герӟаськемын Якшур-Бодья педучилищеен, люкаськиськомы музее. Шумпотыса мынӥ. Трос гинэ куноос вуиллям. Шаркан палъёс дас кык кузя лыктӥллям, соослы нимысьтыз автобус висъяллям. Эшъёсме адӟи но, пыдъёсы ик ликыр-ликыр луизы. Ваньмыз со малпамтэ шорысь вал. Огмылэсь огмы нимъёсмес но вунэтӥськеммы. Азьвыл сярысь ваньмы воштӥськемын - 65, 70, 72, 77 аръёсы вуиськеммы ведь. Пумиськонэз туж ӟеч радъяз музейлэн директорез Валентина Никифоровна Иванова - вань сюлэмзэ сётыса ужа со. Культура юртын ужасьёс милемлы ӟеч концерт дасяллям. 2000-тӥ аре 14-тӥ декабре Якшур-Бодья педучилищелы 70 ар тырме. Соин ик вазиськеме потэ, кин дышетскиз Бодьялан, сюлмаське вал йыг-йыг пыд йылады сылыны, тазалык люканы. Ог-огдылы вераны. Музее шуыса, сьӧрады вайыны дасялэ вашкала арбериос - со луоз асьтэ сярысь синпель кузьым. Таяз пумиськонамы Шаркан, Игра, Якшур-Бодья но мукет районъёсысь ваньмыз ик дышетскемъёс ӧз ветлэ, но оскиськом, вуонояз люкаськонамы эшъёсмы тросгес луозы. П. ШИРОБОКОВА. Якшур-Бодья село. КИВАЛТӤСЕН КЕНЕШОН Пишто яркыт тылъёс Владимир Перевозчиков - Воткинскын тодмо адями. Со 7-тӥ арзэ кивалтэ ни городысь муниципальной "Коммунальные электрические сети" (МПКЭС) предприятиен. Со татын одӥгез огсыр усто ужась коллектив. Предприятилэн умой улонэз нырысь ик герӟаськемын директорлэн сюлмаськеменыз-быгатэменыз. Владимир Михайлович кылем тулыс гордысь думалэн депутатэз луиз. Тазэ но ужзэ умой быдэсъя, бырйисьёсыз понна трос лэсьтэ. Тӥни таӵе кивалтӥсен-адямиен Выль ар азьын пумиськылӥз газетлэн корреспондентэз Геннадий РОМАНОВ. Но солы кӧня ке юанъёс сётъяз. Владимир Михайлович, нырысь одӥг дышем юан сёто. Кызьы йылпумъяды 1998-тӥ арез, мар со тӥледлы ваиз? - Арез, зэмзэ но, умой потӥм. Предприятиослы, организациослы, учреждениослы но калыклы котьку дыраз, тырмыт, чик вис карытэк электрокужым но тыл сётӥськом. Со милям одӥгез самой бадӟымез сюлмаськонмы, соин герӟаськемын ваньмыз ужъёсмы. Соя ик коллективмес дунъяло. Нош хозяйствомы пичи ӧвӧл: 262 иськем кабель, омыретӥ 500 иськем езъёс кыскемын, ульчаосты югдытыны 142 трансформатор подстанциосмы но мукет. Йылаз-пумаз вуттэмын тупатъян ужъёс. Али корт ӵыжатонын ужасьёслы инты пуктӥськом. Быдэс ар ӵоже шудтэм учыръёсмы ӧй вал. Огъя верано ке, омыретӥ 92,5 иськем ез кузя тыл сётӥськом. Ӝыныез выльдыны вуэмын ни. Миым 2587 киловатт-час электрокужым басьтӥм. Милям али 2817 светильникъёсмы. Со пӧлысь огшорыез - 381, ртутенэз - 2269, нош натриенэз - 167 лампа. Ортчем арын 1,5 иськем омыретӥ выль ез юбоос кыским. Тани Володарский ураметӥ 0,55 иськем луиз, Курчатоветӥ - 0,1, Железнодорожноетӥ 0,4 но Чапаевоетӥ - 0,53 иськем. Нимаз улӥсьёслы 121 лампа пуктӥм. Выльысь югдытыны ӧдъям Механизаторъёслэсь но Тихая ульчаосты. Ньылетӥ кварталэ 400 сюрс манетлэсь унолы монтаж ужъёс быдэстэмын. - Коллективды сярысь мар верасалды? - Ужасьёсмы трос ӧвӧл, али 144 лыдъяське. Миым ужаны ньыль выль инты усьтӥм. Туэ но кӧня ке ватсаськыны кулэ. Адямиосмы тыршисесь. Тани миым энергетикъёслэн нуналзы азьын Удмурт Правительстволэн Почёт грамотаеныз пусъемын электромонтер Андрей Бондаренко, нош муниципалитет грамота сётӥз электромонтерлы Иван Галасеевлы но мастерлы Николай Щенинлы. Тӥни озьы кин тырше, сое адӟо. - Мар возьмаськоды туэ? - Бен, ортчемез ар нокинлы капчи ӧй вал. Таиз, оло, ӧжыт ке но умойгес мед луысал но туэ электрокужым басьтӥсьёсмы уксёзэс дыраз мед тырысалзы. Соку ми но "Удмуртэнерго" огазеяськонэз шуге-леке ӧй вуттысалмы. Туэ нокыӵе шудтэм учыръёсмы медаз луэ. - Владимир Михайлович, кызьы депутат ужъёсты борды басьтӥськиды? - Зэм, таиз ватсаса сюлмаськон луэ. Но калык тыныд оскиз бере, сое умой быдэсъяны вырисько. Округам нимаз коркаосын улӥсьёс шедемын. Нош соослэн кулэяськонъёссы трос. Али бырйисьёсылы газ кыскыны юрттӥсько, соослэн юртъёсазы туэ "чагыр" эстӥськон вуоз. Соин ӵош музон куронъёссэс уг вунэтӥськы. Котьку яркыт тылъёс мед пиштозы. Милям ужмы сыӵе Ленинэз буре вайыса Даурлы огпол вордско Котьмае луэ, дыр, вормыны, дырез гинэ уд дугдыты. Тани-тани выжомы ХХИ дауре, азьпалан выль улон усьтӥськоз кадь. Нош маин тодэ кылёз меда ортчись даурмы, кинъёс син азе пуксёзы, сое тодэ вайыку? Мон малпасько, нырысь ик, адямиос пӧлын тодэ кылёз Владимир Ильич Ленин. Зэм, та вакытэ экономика куашкан, государство сазнаськон, калык узырлы-куанерлы висъяськон дыръя, сураське-пожаське йырвизь но. Мар гинэ уг верало, мар гинэ уг гожъяло али Владимир Ильич Ленин сярысь но. Куддыръя озьы ик шӧдӥськод ни: ваньзэ та кылдэм шуг-секытъёсты но со вылэ погыльтыны тыршо. Марлы, пе, кулэ вал 1917-тӥ арын ортчем революция? Та юанлы В. И. Ленин ачиз ик туж ӟеч вераса кельтӥз ук: революциос ортчо соку, куке кивалтӥсьёслэн калыкез ас сьӧразы валтэмзы уг лу, нош калыклэн азьвыл сямен улэмез уг поты. Социализм амалэн улонлы дышетыса, В. И. Ленин нырысь интые пуктӥз вал котькуд адямилэсь сюлэмшугъяськонзэ капчиятонэз, солэсь тодон-валанзэ будэтонэз, тазалыксэ утёнэз но трос мукетсэ. Нош мае адӟиськомы асьмеос туннэ? Адямиос ужтэк кылемын, уно сюрс нылпиос дышетскытэк будло, нош школае ветлӥсьёсыз, дышетӥсьёссы уждун басьтымтэен, арняен-арняен доразы пуко. Эмъяськыны коньдон тырмымтэен, берло дыре вордӥськисезлэсь уно луиз ни улонысь кошкисез. Бен, валамон. Асьме экономикаын гинэ куашкан учыръёс уг луо, мукет кунъёсын но озьы курадӟо. Асьмелэн нош сое валэктыны выро, коммунистической идеология янгыш вылоэм шуыса. Табере кужмысь берытскыны выро капитализме. Кин тодэ, кудӥз умойгес - социализм-а, капитализм-а, озьы ке но, кӧня ке государствоос социализмлэн азинсконъёсызлэсь куштӥськыны уг дырто ук. Асьмеос гинэ кыӵе ке мукет сюресъёс утчаськом. Азьвыл басьтэм вормонъёсмес азинтэм интые, ялан куашкатӥськом гинэ. Собыдӟа держава ляб азинскем кунъёс пӧлы пыриз. Со сярысь -а малпа вал В. И. Ленин?.. 75 ар талэсь азьло йыгаськемысь дугдӥз визьмо муртлэн сюлмыз. Сыӵе адямиос даурлы одӥг пол вордско, шуо калыкын. Ленин шоры ӟеч мылкыдын учкон, оскисько, асьме обществое берытскоз ай. Анатолий ПЕТРОВ. Объявление По просьбе Удмуртской Республиканской Поисково-спасательной службы МЧС России сообщаем об изменении адреса и телефонов Удмуртской Республиканской Поисково- спасательной службы. 426028, Удмуртская Республика, г. Ижевск ул. Областная, 6 Телефоны: 71-13-07 Оперативный дежурный УР ПСС МЧС России (круглосуточно); 71-14-34 (Фаъ) Начальник УР ПСС МЧС России. Быръёнъёслы дасяськыса Дурбасьтозы огшоры адями понна Политика ласянь но, экономика ласянь но Удмуртия туннэ шуге-леке шедемын. Таӵе секыт вакытэ кутске вуоно быръёнъёслы дасяськон. Соин валче кылем арня пумын КПРФ- лэн Удмурт организациезлэн азьвыл чакламтэ пленумез ортчиз. Коммунистъёс пыр-поч эскеризы туала кризислэсь мугъёссэ но отысь потоно амалъёсты. Кызьы пусйиз КПРФ-лэн Центральной Комитетэзлэн членэз, Кун Думалэн депутатэз Н. И. Сапожников, данакез тырмымтэос пото республикалэн кивалтӥсьёсыз бордысь, соослэн огъя кылэ вуымтэысьтызы. - 1998-тӥ ар секыт ортчиз шуиськом, вуоноез но капчи уз луы. Калыклэн улон-вылонэз нуналысь нуналэ уродме, сое умоятон понна ма лэсьтӥське? Кыӵе ужрадъёс пыр уте ас калыксэ кун Кенеш но Правительство? Шонерзэ вераса, соос кыксы но, синзэс кыньыса сямен, мыно Ельцинлэн нокытчы нуисьтэм сюрестӥз, мукетаз кожыны уг дӥсьто,- шуиз Николай Иванович.- Дыр вуэмын котькудӥзлы чурыт кылзэ вераны, ас йырыныз малпаськыны, ас визьмыныз улыны но ужаны. Депутатъёс-коммунистъёс, соослэн фракцизылэн кивалтӥсез А. Г. Бегунов, Кун Кенешысь ялан ужась комиссилэн кивалтӥсез Ю. В. Семенов таяз пумиськонын но журналистъёслы веразы шугъяськытӥсь ужпумъёссы сярысь. Соос нырысь ик герӟаськемын быръёнъёсъя выль закон кутымтэен, депутатэ кандидатэ узыр кузёос мерскемен. Коммунистъёс куд-ог мукет фракциосын ӵош соглаш туннэ ик А. А. Волковез но П. Н. Вершининэз кыкназэс но отставкае келяны, малы ке шуоно, соослы осконзы быриз. Дась-а КПРФ-лэн республикаысь ёзэз Удмуртиысь властез ки улаз кутыны? Кӧняез бырйисьёс куаразэс сётозы коммунистъёс понна? - Азямы ми властез киултон сярысь ужпум ум пуктӥське,- шуиз Н. И. Сапожников.- Таяз созывысь депутатъёс пӧлын басьтӥськом витьмос люкетсэ, вуонояз ятыргес луыны кулэ. Со сярысь вера калык пӧлын ноябре ортчытэм юалляськон. Отын 25 процентэз КПРФ пала дурбасьтэ. Озьыен, оскон вань. Оскон вӧзы кужым кулэ на. Таиз потоз калык бордысь: кинэ со быръёз, кинлы куаразэ сётоз. Коммунистъёс мылкыдзэс веразы: соос дурбасьтӥзы но дурбасьтозы огшоры ужась адями понна. Л. МЕДВЕДЕВА. Дыр висъямын, берыкты пунэм тырондэ Россия Федерациысь Пенсиосъя фонд предприятиослэсь пунэм тыронъёссэс басьтон ужзэ 1999-тӥ арын радъя, Россия Федерацилэн Президентэзлэн 1998-тӥ арын 28-тӥ декабре кутэм "Россиысь Пенсиосъя фонлэ тыронъёсты радъянъя ватсаса ужрадъёс сярысь" указэз вылэ пыкъяськыса. Вань пунэм тыронъёсты берыктэм понна ватсаса йылэтэм пениос со указъя куштӥськозы. Предприятие пунэм тыронъёссэ берыктӥз ке 1999-тӥ арын 1-тӥ апрелёзь, пени 100 процентэз ик куштӥськоз, 1999-тӥ арын 1-тӥ июлёзь - 70 процентэз, 1999-тӥ арын 1-тӥ сентябрёзь - 50 процентэз. Тыронъёсты ворсаны луоз, коньдонэз Россиысь Пенсиосъя фондлэн расчётной счётаз ыстыса. Яке та фондлэн интыосысь ёзъёсаз Россия Федерациысь Пенсиосъя фондлэсь вексельёссэ сётыса. Вексельёсты басьтыны луоз Москваысь ПФР-лэн дирекциысьтыз яке кин ке пыр, доходлэсь 30 процентсэ лыдэ басьтыса. Пенсиосъя фондлэн ёзъёсыз вексельёсты басьто тупатэм дунзыя ик, пунэм тыронъёсты берыктон дыр тупатытэк. Вексельёсты сётэм нуналысен пунэм тыронъёс кулэсмо соослэн дунзы мында. Россиысь Пенсиосъя фондлэн комиссиезлэн пуктэмезъя гинэ предприятиос сётымтэ налогъёссэс та аре озьы тырыны быгатозы. Пунэм тыронъёсты кузёмытон дыр сярысь ужпумез комиссия эскероз, интыосысь документъёс вуэмъя. Нош документъёсты ПФР-лэн комиссияз ыстонэн выро Пенсиосъя фондлэн интыысь ёзэз но ачиз налог тырись. Соизлэсь яке таизлэсь предприятилэсь пунэм тырон дырзэ кузёмытон ужпумъя нимаз тупан кыл (соглашение) гожтӥське. Россия Федерацилэн Правительствоез 1998-тӥ арын 2-тӥ октябре кутэм Постановлениезъя пунэм тыронъёсты берыктон рад сярысь ужпум эскериське гурт удысъя но Агропромышленной комплекслэн предприятиосызъя. Сыӵе предприятиосъя но организациосъя ужпумез ПФР-лэн ёзэз ачиз учкоз, республикаысьтымы кивалтэт ёзъёсын кенешыса. Таосызлы пунэм тыронъёссэс берыктыны дыр вить арозь сётӥське, 2000-тӥ арысен кутскыса. Пени уз басьтӥськы, но одно ик тыроно луоз выльёссэ люкаськем взносъёсты. Пунэм тыронъёсъя ужъёсын выре Россиысь Пенсиосъя фондлэн удмурт ёзысьтыз пунэм тыронъёсты берыктонъя отдел. Юанъёсын вазиськоно таӵе телефонъёсъя - 37-85-44, 37- 52-03, факс - 37-69-98. Россиысь Пенсиосъя фондлэн удмурт ёзысьтыз пресс-служба. Нобель премиен пусъемъёс Кутсконэз тазьы вал Асьмеос тодӥськом: арлы быдэ дуннеысь усто адямиослы сёто Нобельлэсь премизэ. Альфред Бернхард Нобель вал инженер, химик, изобретатель но промышленник. Кулон азяз 31 миллионъем кроназэ, акциос но облигациос карыса, пайдалыксэ одӥг кадь люкыса, арлы быдэ сётылыны куриз медицина, литература но тупаса улонэз утён удысын тыршисьёслы. Зарни медальын Нобельлэн тусбуез пуктэмын. Премия, фондлэсь будэмзэ чакласа, 30-ысен 70 сюрс долларозь луэ. Сое сӥё-дано сёто Нобельлэн кулэм нуналаз, 10-тӥ декабре, Стокгольмын яке Ослоын. Альфредлэн ӵыжы-выжыосыз но бадӟым ужъёс лэсьтӥзы. Солэн атаез, Эммануэль Нобель (1801-1872), ву пушкын пуштытъян минаос лэсьтӥз. 1842-тӥ -1859-тӥ аръёсы улӥз Петербургын. Отын кылдытӥз механической завод. 1853-тӥ-1856-тӥ аръёсы, Крым ож мыныку, ӟуч армилы сётӥз пыӵал тӥрлык. Нобель премия сётыны мылкыд карись Альфред Бернхард (1833-1896) но Россиын тодматскиз Н. Н. Зининлэн но В. Ф. Петрушевскийлэн нитроглицеринэз уже кутон технологиенызы. 1867-тӥ арын Великобританиын, пуштытонъя динамитлы патент басьтыса, Шунды пуксён пал Европалэн вань странаосаз сое поттыны кутскизы. Собере Альфред аслаз агай-вынъёсыныз Бакуын кылдытӥз нефть поттӥсь кужмо предприятие. Нобельёс Ижысь корт поттон заводэн но умой кусып возизы. Улонэз капчиен ӧз сётскы Быдӟым ӟуч писатель Борис Леонидович Пастернак вордскиз Москваын 1890-тӥ арын 29- тӥ январе (10 феврале). Атаез, Леонид Пастернак, художник вал, нош анаез, Разелия Исидоровна, пианиноен шудылӥз, мылкыд карисьёсыз доразы музыкаен тодматыса, семьяезлы коньдон люканы юрттылӥз. Пастернакъёс доры вуылӥзы музыкантъёс, писательёс но художникъёс - Поленов, Левитан, Серов. Тужгес но гажаса пумиталлязы Л. Н. Толстоез но А. Н. Скрябинэз. Сӥё-дано адямиосын пинал дыръяз ик тодматскемез Борис Пастернаклы будыны сюрес усьтӥз. Университетлэн философияя факультетаз дышетскыса, нырысетӥ курсъёсын ик кылбуръёс гожъяны ӧдъяз. Егитъёсын кылдытэм "Лирика" альманахын солэсь вить кылбурзэ печатлазы. Нош 1915-тӥ арын та издательство ик кылбуръёсыныз книга поттӥз. Со тулыс ик пумиськиз Владимир Маяковскиен но, солэсь дэмланъёссэ лыдэ басьтыса, уката умоесь кылбуръёс гожъяны ӧдъяз. Империалистической война кутскем бере, сое армие ӧз басьтэ. Уралын, собере Кам дорысь Бондюга (али Менделеевск) городын оборона понна ужась химической заводысь контораын тыршиз. Урал солы туж яраз аслаз нюлэсъёсыныз, гурезьёсыныз но бадӟымесь шуръёсыныз. 1916-тӥ арлэн пумаз кылбуръёсыныз кыкетӥ книгазэ поттӥзы. Бондюгаын тодматскиз биохимилы дышетӥсен Борис Збарскиен, вуоно академикен. Пастернак ӟеч кусыпъёс возиз кылбурчиен Марина Цветаеваен. Соослэсь ваче ысъям трос гожтэтъёссэс Скрябин нимо музейын ужась, электричкаын мыныкуз, вагонысен ыштэм. Цветаевалэн кулэмез сярысь Пастернак соку ик ӧз тоды. Малпан кылдэ: со Марина Цветаевалы сӥзем кылбурзэ, 1943-тӥ арын, Елабугае, нылкышно кылбурчилэн шайвылаз ветлыса, солы сӥзем кылбур гожтӥз. Пастернак вуылэм Ижевске но. Корт поттон заводэ ветлэм отчы ыстэм инженерен Збарскиен пумиськыны но соин ӵош куд-ог ужъёсты быдэстыны. Оскон кылдэ: татчы ветлыкуз, Пастернак тодматскиз, дыр, Пугачевлэн шаерамы вуылэменыз. Февраль революция сярысь тодыса, Пастернак бертӥз Москвае. Со аре ик гожтэм "Сестра моя - жизнь" сборникез лыдӟисьёслы туж яраз. Со сярысь ӟеч мылкыдзэс веразы Брюсов, Маяковский, Мандельштам но Асеев. Октябрь революция ортчем бере, Пастернак малпаз бадӟым проза борды басьтӥськыны. "Детство Люверс" повестьсэ ушъязы Горький, Цветаева но мукетъёс. Быдӟым Отечественной война дыръя Пастернак кӧня ке улӥз Москваын, собере - Чистопольын но выльысь Москваын. Тушмонэз вормемзы бере, мылкыдыз ӝутскиз бадӟым произведение гожтыны - басьтӥськиз "Доктор Живаго" романэз борды. Малпа вал кык-куинь ар куспын сое йылпумъяны, но та уж дасо ар кыстӥськиз. 1952-тӥ арын сӥзьыл, Гётелэсь "Фаустсэ" берыктэмез бере, секыт инфаркт зӥбиз. Больницаысь потыса, Пастернак Большево санаторийысен 1953-тӥ арын мартэ аслаз эшезлы В. Ф. Асмуслы таӵе кылъёсын гожтэт ыстӥз: "Мыным капчи. "Живагоез" йылпумъян бордын тыршисько". Романаз берпум тупатъянъёс пыртӥз со 1955-тӥ арын толалтэ. Сётӥз сое "Новый мир" журналэ. Но солэн редакторез К. М. Симонов романзэ печатланы пумит луиз. 1957-тӥ арын ноябре "Доктор Живагоез" Италиын поттӥзы. Собере кунгож сьӧрысь мукет ӟуч изданиосын но печатлазы. 1946-тӥ арысен Пастернаклы Нобельлэсь литературая премизэ сётыны ӵектӥзы. 1958-тӥ арын премия сётыны мылкыд каремзы сярысь ивор Швециысь вуиз. Но асьме странаын куд- ог писательёс но критикъёс вожъяськыса, Борис Леонидовичез ултӥяса, олома но гожъязы. Пастернак премия басьтыны пумит луиз. Со сяна, сое Писательёслэн огазеяськонысьтызы куштӥзы. Гожъямзэ поттамысь дугдӥзы но уждунтэк кельтӥзы. 1960-тӥ арын 30-тӥ мае Борис Пастернак кулӥз, вань курадӟонзэ сопал дуннее нуиз. Куамын ар ортчыса гинэ "Доктор Живагоез" но Пастернаклэсь мукет произведениоссэ бадӟым тиражъёсын асьме дорын но печатланы ӧдъязы. Ваньмыз со яркыт возьматэ писательлэсь азьло гожтэмзэ: "Мон кулэм бере трос аръёс ортчыса гинэ валалозы, кызьы ужай берпум аръёсы". "Доктор Живаго" сярысь академик Д. С. Лихачев пусйиз: отын паськыт возьматӥське асьме история. Шонерак вераса, ма но ӧй вал граждан ож дыръя тӧдьыослэн но гордъёслэн армиосазы. Сое адӟыны луэ романысь геройлэн Юрий Живаголэн улэмез пыр. Дас одӥгетӥ главаяз яркыт возьматэмын солэн партизанъёсын ӵош тӧдьыосын нюръяськемез. Та романэз контрреволюционноен лыдъясь критикъёс но вал. Книгаын вераськон мынэ, вужзэ сэрпалтыса, дунне вылын выль улон лэсьтон сярысь. Роман йылпумъяське Юрий Андреевич Живаголэн кылбуръёсыныз. Асьмеос тодӥськом: соосты Пастернак ачиз гожтӥз. Озьы ке но, соос пыр мур возьматэмын геройлэн улон шоры учкемез, инкуазь, яратон но люкиськон. Кызьы верамы ини, Пастернак берпум аръёссэ туж секыт ке но улӥз, творческой ужын сюлэмзэ буйгатылӥз. Со тыршиз лыдӟисьёслы ярамон произведениос кылдытыны. Улон, гожъяз Пастернак, сётэ "куремлэсь тросгес". Борис Пастернаклэн улэмез асьмелы яркыт возьматэ: улэп дыръяз адямиез гажаны кулэ. Сопал дуннеын со уг кылы ни ачиз сярысь шуныт кыл верамез. Асьмелы но сыӵе сӥё-дано адямиосмылэсь ортчем сюрессэс тодыны кулэ. Мед дышетозы соос ог-огдэ ултӥятэк улыны. Владимир ЧЕРНОВ. НАТАЛЬ Эх, улон, кирень куртчон Улонысь суред - Ведӥнь тон, ведӥнь! - урмем ош сямен бурсыса корка пыриз Иван. - Тонэн йырин, тон каргаськемен сэрен суйме чигтӥ! - кышноез азе мыжыксэ урдӥз. - Кин ке но тордыса суйёссэ тӥялоз, нош кин ке но собере ведӥнь! - картэз пумитэ кеськиз Зоя. - Мар-о, ӧвӧл-а, мар-а? Анаед но, ачид но ведӥньёс! - аслэсьтыз каре пыд вылаз мырдэм сылӥсь воргорон. Кышномурт талы йырзэ кур уг кары ни. Коть ведӥнь, коть пери шу, но инмар азьын со чылкыт. Картэз нош тӥни оломар но пӧртмаса ветлэ. Юэ но, я суйзэ, я куксэ чигтэ, я усьыса шаньги кадь ымнырын бертэ, нош янгыш - кышноез. Я, коть мар мед вералоз, медаз гинэ жугы ни. Егитгес дыръяз кӧня вӧсь карылӥз. Ки улаз из-а, зыр-а сюрылӥз, соин ик "вешалляз". Нош мар понна? Табере тани кыл вӧлдӥз, мынам кышное, пе, ведӥнь. Гуртын уноез нылкышно шоры кырыж синмын учкыло ни, тордослэн, вераскьемезлы оскыса, Зояез пӧртэм жоб кылъёсын пазяло. Тани кемалась ик ӧвӧл фермаын ӵашетон потӥз. Одӥгезлэн скалэз висьыны кутскем, нош толоназ со кышномурт ас интыяз Зояез скал кыскыны келлям. Ӵукна, пе, васькисько но, скалэ уг султы. Соку ик янгыш мурт сюриз. - Ведӥнь Зоя скалме ведназ, соин ик Зоренькае уг султы ни! - гид тыр урмытэ кышномурт. - Мон мар ке тодысал ке, - картме но юисьтэм, асме но егит но висисьтэм карысал ини! - могӟытӥз Зоя. Соиз ак но бак но ӧз вазьы ни, берыктӥськиз но кошкиз, аслыз но умой ик ӧз йӧты, лэся. Эх, улон, улон, кирень куртчон! Кинлы тон шудэн зориськод, нош кинлы ке чечы пуньыен но сётыны жаляськод. Зоя но туж жадиз ини таӵе улонлэсь, туж жадиз! Ферма, кудӟем карт, кырыж учкылонъёс! Кызь арлэсь ятыр ни озьы. Ачиз вылэ киыныз но шонтысал ини, нылпиос жалесь. Соос сярысь пичи но уг сюлмаськы ук Иван. Юон но кыл бышкон гинэ мед луоз солэн, уж но, нылпиос но кулэ ӧвӧл. Нош соос кыӵе возьдасько ук, куке шоразы чиньыенызы возьмато, тӥни, пе, соослэн атайзы тордос, нош анайзы ведӥнь. Нылзы тани ӝоген институтэз йылпумъялоз, кызьы но озьы тыршиз, дышетӥз сое Зоя. Бызён дырыз но вуиське. Оло нош анай-атаеныз йырин нокин но кулэ но уз кары? Пизылы но семьяезлы луыса нокин ӧз бызьы ке? Таӵе но мукет пӧртэм малпанъёс лыкто кышномуртлэн йыраз кузесь, изьытэк ортчытъям уйёссы. Соослэсь сюлэм ик шымырске, вылтыртӥ кузьылиос бызьылыны кутско кадь... Таӵе улон сярысь малпалляз шат Зоя егит дыръяз? Ӧз, ма кин-о азьпал улонзэ сыӵе пеймытэн адӟоз? Нылашлэн вал аслаз сюлмысь яратонэз. Кыӵе яратӥзы соос ог-огзэс! Кыӵе яратӥзы! Но ваньзэ сураз-пожаз Иван, кырныж музэн пыриз со кык дыдыкъёслэн висказы. Ӝоген ныл курасьёс вуизы, нокинлэсь юатэк пегӟыны вырись Зояез кужмысь вал дӧдьые пуктӥзы но нуизы... Кӧня бӧрдӥз нылаш, кӧня мӧзмиз, нош Иван сое сак эскерыса возиз, тюрьмаын кадь. Ортчиз ар, вордӥськиз нылзы, но яратон ӧй вал. Ӧз чида Зоя, нылзэ кутӥз но бертӥз анаез доры. Ӵош бӧрдӥзы, жалязы берыктыны луонтэм ортчемзэ. Нылмуртлэн нырысь яратонэз кышнояськем ни. Но калыклэсь кылӥз Зоя, шудзэ шедьтымтэ Паша. Ар но улымтэ кышноеныз, люкиськиллям. Тани али лобӟы вал со доры, номыр шоры учкытэк ӟыгыртӥськы вал бордаз весяклы, быдэс улонлы, но уг тоды со кытын Пашаез. Зоя кошкем бере Иван ӧз чида кышноезтэк, нылызтэк. Мӧзмон воксё куасалтӥз сое. Дӥсьтыса но дӥсьтытэк вуиз со вармесказ, пыдес вылаз куриз Зояез берытскыны, мон тӥледыз ноку уг обидьы, ки вылам нулло шуыса оскытӥз. Жаляз нылкышно сюлэм, оскиз, берытскиз кузпалыз доры, нош шудо ӧз луы ни. Иван туж ӝог вунэтӥз кыл сётэмзэ, юыны, калгыны, жугиськыны кутскиз. Али ке но Зоя ӵемысь малпалля азьвыл яратонзэ, вӧталля соин. Тодэ солэсь кытын улэмзэ, тодэ, Пашаезлэн но улонэз ӧз пӧрмы - кӧня кышно вылэ вуылӥз ини. "Тазалыке ке луысал, ваньзэ куштысал но мынысал со доры, нылпиосы но валасалзы, дыр, монэ, соос бадӟымесь ини. Но ӧвӧл ини азьвыл тазалыке, ӧвӧл ни азьвыл чебере но кужыме, ваньзэ быдтӥд тон, каргам Иван! Кӧня адямиосты шудтэм карид! Тюрьмаын возён понна лушкад-а, мар-а? Уг валаськы, уг но вала". - Пеймыт коркан, кезьыт валес вылын тазьы кыласа-бураса бӧрдэ Зоя. Одӥгназ со, нылпиосыз дышетскон интыосазы, карт шуонэз кытӥ ке юмша. Нош отын, урамын, зоре. Векчи зор шапыкъёс я Зояез буйгатыны турттыса, я эшшо но золгес ӝожомытыса йыгасько укное... Лилия Бакаева. Тодматскон сэрег . Аб. 259.Удмурт пияш, 24/175/ 70, улӥсько гуртын, тракторист. Тодматскысал 25 аресозь нылпитэм удмурт нылашен, Пичи Пурга котырысь мед луысал. Аб. 260. Удмурт пияш, 25/174, гороскопея Рак, тусыя учкымон. Тодматскысал гуртын яке городын улӥсь капчи мылкыдо чебер нылэн. Возьмало фотографиен гожтэт. Аб. 261. Удмурт воргорон, 44 арес, ужасько гуртын специалист луыса. Вань аслам хозяйствое, пудо-животэ. Улӥсько висись анаеным ӵош. Тодматскысал гурт котырын берганы яратӥсь 35-45 аресозь нылкышноен, пумит ӧвӧл нылпиезлы. Аб. 262. Удмурт нылаш, 18/170, гороскопея Козерог. Улӥсько но ужасько гуртын. Тодмасткысал 20-28 аресозь лякыт но зӥбыт сямо пияшен. Военной мед луысал, пумит ӧвӧл тодматскыны гуртысь пинал пиосын но. Аб. 263. Удмурт нылаш, 17/165, гороскопея Водолей, улӥсько но ужасько гуртын. Тодматскысал 20-24 аресъем пинал пияшен. Вина юисез но пытсэт сьӧрын пукылэмез медам вазиськы. Редакцилэсь: Лыдӟисьёсмылэсь ялонъёссэс тодматскон сэреге сётӥськомы, дун басьтытэк. Нимзэс, кытысь луэмзэс газет пыр ум шараяське, ваньмызлэн адресъёссы редакциын. Ялон сётӥсен тодматскыны мылкыд карисьёслы ивортӥськом: адресъёсты ми нокинлы ум келяське. Абонентлэсь номерзэ пусйыса, редакцие гожтэт ыстэ. Нош кинлы ке сӥзем гожтэттэс маркаен чылкыт конвертэ понэ - ыстомы кулэ адресъя. "Я+я" Таиз служба ужа Юкаменскын, улӥын сётэм абонентъёсын тодматскемды потӥз ке, гожтэ таӵе адресъя: 427630, Удмурт Республика, п. Юкаменское, а/я 10 "С 3" аб. �... Куронъёссы милям кадесь ик - гожтэтады маркаен чылкыт конверт понэ - ыстозы кулэ адресъя. Абонентъёслэн ваньзылэн одӥг куронзы вань: пытсэт сьӧрын пукылэмъёс медаз вазиське. "Я+я" служба ужа ке но Юкаменскын, гожтэтъёс отчы вуо быдэс республикаысьтымы. Озьы ик Россиысь но солэн палэнысьтыз. Юрттэт сёто дунтэк. Куд-ог абонентъёсын тодматыны мылкыд каризы "Удмурт дунне" газетэз лыдӟисьёсты но. Воргоронъёс Аб. 10. Тодматско 23-29 аресъем нылкышноен, нылпиезлы пумит ӧвӧл. Ачим сярысь: 27/175, веськрес мугоро, ужаны яратӥсь, дышетскемея - электрик. Улӥсько анай- атаеным. Яратӥсько лыдӟиськыны, чорыганы. Аб. 53. Тодматско векчигес мугоро 37 аресозь нылкышноен. Ачим сярысь: 43/171/ 71, техник-строитель, юон шоры уг учкиськы. Яратӥсько астрологиез, книгаосты, бакча котырын вырыны. Вань юртэ, улӥсько атаеным. Аб. 59. Тодмасткысал урод сямъёстэм муспотон нылашен - 18-20 аресозь. Ачим сярысь: 20/170, удмурт, Весы. Суд йырсиё, чагыр синмо. Ужасько, винаен уг эшъяськиськы. Нылкышноос Аб. 0336. 28/158, удмурт, экономист, нылылы 5 арес. Лякыт сямо. Яратӥсько сяська будэтыны, керттӥськыны. Гороскопея - Кеч-Козерог. Тодматскысал юыны яратӥсьтэм 30-35 аресозь воргоронэн, гороскопезъя Коӵыш, Вал, Кабан мед луоз. Аб. 0337. 33/164, удмурт, дышетскеме средне-специальной, ужасько. Пиелы 14 арес, улон интылы но коньдонлы уг ёрмиськы, улӥсько райцентрын. Тодматскысал 35-40 аресозь воргоронэн, ӝуждалаезъя - 170-180 см, дышетскемез средне-специальной яке вылӥ мед луоз, ужаны яратӥсь, улон интылы но коньдонлы ёрмисьтэм. Уломы мон дорын. Аб. 0338. 46/167/80, картэ кулӥз, нылпиосы бадӟымесь ни, улон интылы уг ёрмиськы, дышетскеме средне-специальной. Возьдаськись сямо. Гажасько котыр ласянь ӟеч муртъёсты. Ӵош луон вылысь тодмасткысал 40-50 аресозь юисьтэм воргоронэн. Аб. 0340. 17/165/50, удмурт, вазиськись. Тодматскысал веськрес мугоро ужез яратӥсь, урод сямъёстэм 17-20 аресозь пияшен. Герой сярысь вылез "Удмуртия" издательстволэн 1985 арын поттэм "Герои Советского Союза - наши земляки" книгаяз верамын Иван Васильевич Клевцов сярысь но. Нош кытын со али улэ? Клевцов вордскиз 1923-тӥ арын 19-тӥ январе Алнаш районысь Ласточкино гуртын. Алнашын сизьым классэз быдтэмез бере, со дышетскыны ӧдъяз Сарапулысь кооперативной техникумын. 1939-тӥ арын пыриз комсомолэ но дышетскиз аэроклубын. Вуоно араз со - военно-авиационной школаысь курсант ни. Война кутскем бере, штурмовой авиациысь лётчик И. В. Клевцов ожмаськиз Калининской фронтын, собере Волховской, Западной но Кыкетӥ Украинской фронтъёсын. Секыт война аръёсы со инбаме кык сю ньыль пол ӝутскылӥз. Тушмонлэсь 6 самолётсэ, 18 танксэ, 43 автомашиназэ быдтӥз. Вуоно герой ожез йылпумъяз Венгриын. Родина вылӥ дунъяз землякмылэсь подвигзэ, гвардиысь лейтенантлы И. В. Клевцовлы 1946-тӥ арын 15-тӥ мае Советской Союзлэн Героез ним сётэмын. Отставкаысь генерал- майор али улэ Москваын. Клевцов уг вунэты таӵе учырез. 1943-тӥ арын гудырикошкон толэзе со ИЛ-2 штурмовикеныз нош ик тушмон пала лобиз. Витьымтьэ шорысь самолётэз ӝуаны ӧдъяз. Со парашютэн Ельня город палась пичигес гурт доры тэтчиз. Соку лётчикез тушмонъёслэсь утиз Ваня нимо пияш. Иван Васильевич утисьсэ берло ньыльдон ар утчаз. Шедьтӥз ведь. Москваын улэ вылэм. Солэн утисез, Иван Семёнович Громаков, Иностранной ужъёсъя министерствоын тырше. Ижевскысь 73 номеро школаын вань Советской Союзлэн Геройёсызлы сӥзем калык музей. Соин кивалтэ Раиса Михайловна Сонина. Кылем арын со Москваын пумиськылӥз генерал- майоръёсын И. В. Клевцовен но И. С. Громаковен. Та пумиськон сярысь материал ӝоген одно ик музее инты шедьтоз. В. ЧЕРНОВ. НАТАЛЬ МАЛПАМТЭ МАДЁС Анайзы Тазьы нимало бигер шаерысь Балтась ёросын улӥсь выль кенъёс кузпалзылэсь анайзэ. Но та кылэз вераны уг дырто соос. Шудон уж ӧвӧл: кыӵе азинскоз улонзы, кыӵеесь луозы кусыпъёссы? Ас нылыз интыын адӟоз-а арлыдо кышномурт кензэ, юрттоз-а ужен, визь-кенешен? Семьяын тупан ӧвӧл ке, выль кен эшъёсыз пӧлын лабыртэ ни: "Милям пересь озьы шуиз, милям пересь куное кошкиз ай..." Гурт калык соку ик валатске, кыӵеесь кусыпъёссы выль кылдэм семьяын. Огласянь секыт уж но ӧвӧл кадь, кут но анайзы шуыса вазиськы. Ӧвӧл, вылэм. Бускель нылмы бызем бераз мадиз. Анаеныз кусыпъёсмы туж ӟеч. Шораз озьы вазиськыны гинэ ымы уг усьтӥськы, соку ик вордэм анаелэн тусбуез син азям пуксе. Амал шедьтӥ ик - мурӝолэ картошкалы васьки но, отысен анайзы шуыса вазиськи. Табере дыши ни. Одотья кенаклэн куинь нылпиосыз вал. Кык нылъёс но одӥг пи. Нылъёсыз кузпаллы бызьыса, со кемалась аби (варманай) кариськиз ни. Нош анайзы луо меда, яке пересен- а кылё? - сюлмасьылӥз со. Анае буйгатылӥз: - Ӟеч сюлэмо кышномурт ук тон, Одотья кенак. Кенэд луиз ке, одно ик анайзы шуыса вазиськоз. Покчи визьмыным малпалляй: "Шедьтӥллям сюлмаськон! Коть шуод, коть уд - маке шат?" Ӧвӧл, вылэм. Дыр ортчыса, улэм-вылэмъя гинэ сое валаськод. Котькуд арлыдо муртлэн ас данзэ, дунзэ возьматэмез потэ, луоз. Кен басьтыса, Одотья кенаклэн семьяяз шулдыр сюан ортчытӥзы. Но кенэз ӧз дырты анайзы шуыса вазиськыны кышномуртлы. Дорамы вуылыкуз кайгыроз вал: - Маин-о уг яраськы меда кенэлы? Ужысь бертыкуз, сиёнэз дась, лек кыл вераме ӧвӧл. Ческыт сиёнме но нырысь солы сётыны тыршисько. Огпол парсь вандӥм но, Одотья кенаклэн кенэз Лида ми доры сӥль басьтыны лыктӥз. Кутылэ, эскере сӥльмес. Анае юа: - Бер макессэ мертало-а, Лида? Быгыт сӥль гинэ ук. - Акыльтӥз ни мыным быгыт сӥль, Надя апай, - ӝожкиз Лида. - Пересьмы монэ весь быгытэн сюдэ. Ачиз кучым-кучым лы йыръе. Сыӵе вожъяськыса учкисько шораз. Ог-огедлы верам кылэз берыктыса вераны умойтэм сям. Озьы ке но, анае Одотья кенаклы ӵектӥз: - Сёт кенэдлы но ӧжыт лы йырйыны. Тыныд, пе, вожъяськисько. - Э-э, лэсянтэм, - киыныз шонтӥз бускель кышномурт. - Мон сое сӥлы карыса, котьку быгытсэ сётыны тыршисько. Нош со ӟеч лэсьтэмме но мыддоринтэ. Эх, улон-вылон! Ӧз, Одотья кенакез анайзы нимась ӧз луы. Кенэныз пиезлэн но улонзы тэшказ. Люкиськизы. Аръёс ортчыса ни Лидаез пумитай. Со но та сярысь вераськыса сылэммы бере шуиз: - Анайзылы мынэсьтым салам вера. Ӟеч адями вал, дыраз дунъяны ӧй быгаты. - Ӟеч кылъёстэ вераны беромид ни, Лида, - шуисько. - Малы? - паймытскиз кышномурт. - Арня талэсь азьло гинэ Одотья кенакез берпуметӥ сюресаз келямы. Номыр ӧз вазьы Лида, кышет пумыныз синъёссэ гинэ ӵушылӥз. Н. Турин. Киров область Бураши гурт. Ӟечкылан Алнаш ёросысь Туймыйыл гуртысь Ольга Кузьминична Анисимовалы январь толэзе тырме 60 арес. Ми, солэн нылпиосыз, сюлмыстымы ӟечкыласьком мусо но дуно адямимес вордскем нуналэныз. Сӥзиськом азьлань улонад шудбур, тазалык, байлык, оскон - тод, нылпиосыд ноку но уз вунэтэ вордӥськем юртсэс, котьку но шумпотыса бертозы дорад ческыт пӧрамдэ сиыны. Яратыса но гажаса вань нылпиосыдлэн нимынызы Лена нылыд. Адями быдтӥсьёс кырмемын Кылем арлэн пумаз Россия Федерациысь ФСБ-лэн Удмурт Элькунъя Управленияз ужасьёс ӝегатӥзы йыружъёс лэсьтэм группировкаысь кык адямиез. Ужрадэ МВД-лэн ёзъёсыз но пыриськизы. Оперативникъёс малпало, та ӝегатэм муртъёс косэмъя, адямиосты но быдтылӥзы. Одӥгезлэсь сыӵе йыружлэсь ӝегатэмъёс асьсэос но уг танӥсько. Йырвандӥсьёс уже кутӥллям милиционеръёслэсь дӥсьсэс но удостоверениоссэс. Ӝегатэм адямиослэсь шедьтэмын 2,3 килограмм "пластит" пуштытон арбериос, 2 граната, детонаторъёс, пӧртэм ож тӥрлык, милициын ужасьёслэн документъёссы но соослы чылкыт бланкъёс, кӧня ке дас сюрс манет пӧяса лэсьтэм коньдон. Ӝутэмын уголовной уж, мытэмын следствие. РФ-ысь ФСБ-лэн Удмурт Элькунъя Управлениезлэн пресс-службаез. Асьмемыз асьмеос ик утём Куатьтон ар тырмиз Кизнер ёросмылы. Соин валче кызь кыкетӥ толшоре ёрос шоркарын ортчозы талы сӥзем ужрадъёс. Кизнеръёс троссэ тодазы ваёзы. Нырысь ик - ӟеч сюлэмо, улонмес умойгес карон вылысь, дырзэс но кужымзэс жалятэк тыршем адямиосты. Соос сярысь ёрос газет нимысьтыз рубрика но усьтыса гожъяз ини. Валамон, соос сярысь верамын луоз юбилейын но. Луозы шумпоттӥсь ӟечкыланъёс, наградаос, луозы, дыр, сюлэмшуго малпанъёс, веранъёс но. Соос туннэ укыргес но уно. Тани, шуом, кизнеръёс доры уг вуо на Ижысь телетулкымъёс гинэ но. Кӧня верасько ни со пумысен! Кун Кенеше быръёнъёс азьын кандидатъёсмы юн кылзэс сётылӥзы: милемыз бырйиды ке, телеканал но, музонзэ но лэсьтом! Кытын соослэн но туннэ "юн" кылзы?! Нош хими ожтӥрлыкез ке басьтоно? Макем кышкыт со вань ёросмылы! Оло, солы гинэ ӧвӧл - трос мукетъёсызлы но? Нош со сярысь кивалтӥсьёслэн уно вераськемзы уг поты. Калык сярысь сюлмаськись мурт сое огнуналлы но вунэтыны кулэ ӧвӧл. Ялан ваньмызлы тодымон вераса возёно, мар лэсьтэмын. Калык ачиз но та кышкытэз валаса, оло, ӧз на вутты. Шып гинэ пуке. Нош со озьы луыны кулэ ӧвӧл ук! Асьмеос ке ӧм сюлмаське, кин асьмемыз утёз-вордоз?! Сыӵе сюлэмшуген юбилейлы сӥзьыса гожтӥ та чуръёсме. Пыктос Вордске меда кин ке йыркураны? Ӟеч уж лэсьтон - мугез вордскеммылэн. Ачид ке ӟеч, муртэ шат курлано? Кытын-о ошмесэз йыркуранлэн? Кытысь вуиз та химия ожмос? Кинлы пумит мыжык вал кырмемын? Кизнер музъем вылам Ӝужйиз-будӥз пыктос - Лулы-сюлмы урен кадь тырмемын. Уртчоз-а та висён ылен-кырсен? Яке сюроз на-а эмъясь-пеллясь?.. Кӧня меда ортчем даурысен Улӥм татын? Вуим нош кудпалась?.. Кизнер калык! Вордскем дор палъёсы! Ма, та пыктос ик шат ни кекатоз? Бӧдья, Пельга, Какся выжыосы Инмысь ке шат Утись Инмар лыктоз? Инмар ке вань, оло, зэмзэ юрттоз. Воршудмылы иназ медло юртъер! Но химия... Лек химия пыктос Тодоз-а жаляны Та лулгажан уртмес? Шуръёс, тэльёс! Пӧйшур! Кизнер калык! Уд сётӥське тӥ, уд сьӧд адӟонлы! Пыктос выллем дунне йыркуранлы Пужит султоз огъя ӝутӥськонды! Василий Ванюшев, филология наукаосъя доктор, Педагогикая международной академиысь академик, Удмуртиысь Кун премилэн лауреатэз. Горбачёв но кризис вакытэ куанермем Кунгож сьӧрысь огез журналлы интервьюаз СССР-лэн экс-президентэз Михаил Горбачёв ӝожтӥськиз, вань люкам коньдонзэ (450 сюрс франк) августэ, крзис вакытэ, ыштӥз шуыса. Учреждение, кудаз Горбачёв уксёзэ уте вылэм, чылкак куашкам. Советской Союзлэн азьвыл президентэз ивортӥз на, солэсь нимзэ нуллӥсь фондын ужасьёслы кӧня ке толэзь ӵоже уждунзэс тырыны уг быгатӥськы шуыса. " Мон сыӵе ик узыр ӧвӧл, Западын озьы уг малпало ке но. Москваын "выль ӟучъёс" ӵемысь одӥг уйскын уксёзэс быдто сомында, кӧня мон ар ӵоже басьтӥсько",- ватсаз со. Али Михаил Горбачёв гожтэ книга, со сӥземын Германиез огазеям дырысен 10 ар тырмонлы. Иворъёсъя национальной служба. Вань губернаторъёслы губернатор Россиысь Журналистъёслэн союззы но Дуннеысь прес-клуб Самара областьлэсь губернаторзэ Константин Титовез "арлэн губернатореныз" ялӥзы. Сое бырйыку лыдэ басьтэмын вал кӧня ар ужамез, улослэн кыӵе улэмез,иворъёсты вӧлмытӥсь ёзъёслэн кӧня пол со сярысь гожъямзы, губернаторлэн журналистъёс понна шара луэмез. Иворъёсъя национальной служба. Кудӥз ӟечгес? Индиысь правительстволэн политика удысын ужпумъёсъя комитетэз умоен лыдъяз Россилэсь куинь сюлэсь ятыр "Т-90" танксэ басьтонэз. Со 1,2 миллиард доллар мында усёз. Танкъёсты миым сентябре Москваын дыръяз Индиысь обороная министрлы возьматӥзы. Бӧрысь та техникаез басьтыны пумит луиз азьвыл премьер Деве Говда. Солы "Т-90" туж дуно потӥз, со сяна, танк Индилэн музъем вылаз эскеремын ӧй вал на. Пусйыны кулэ, экс-премьер Россиысь техника басьтонлы ӧз пумитъяськы, со малпамъя, "Т-90" танкен ӵошатыса, "Т-72С" оскымонгес но ӟечгес. Иворъёсъя национальной служба. Выль ар - выль ужпумъёс Валлян ортчиз "Удмурт кенеш" огазеяськонлэн исполкомезлэн кенешонэз. Люкаськемъёс эскеризы но юнматӥзы та арлы ужан планэз. Нырысетӥ кварталэ, валамон ни, уноез ужрадъёс герӟаськемын луозы Кун Кенеше быръёнъёсын. Соослы ик сӥзьыны чакламын ассоциацилэн Пичи кенешезлэсь вуоно толэзе люкаськонзэ. Малпан вань "Удмурт кенешлэсь" статуссэ ӝутыны. Но со понна Кун Кенеш кутыны кулэ нимысьтыз закон. Ужрадъёс пӧлысь озьы ик пусйыны луоз "котырес ӝӧк" сьӧрын семья кусыпъёсты радъянлы сӥзем вераськонэз, Москваын, Эстониын но республикалэн палэнысьтыз мукет интыосын дышетскись удмурт студентъёсын пумиськонэз, Башкоротостанысь удмуртъёслэсь Ижын ортчытыны чаклам праздниксэс, нылкышноослэсь кызьы улэмзэс эскеронъя экспедициосты. Куаразэ юнматыны турттэ Политической клуб но. Кызьы пусйиз вице-президент Валерий Митрофанов, та клуб Ижысь уногес калыкез "Удмурт кенеш" котыре огазеяны быгатоз. О. МАРКОВ. ПРАВИТЕЛЬСТВОЫСЬ ИВОРЪЁС Выт тырон сярысь законъёс Правительстволэн Президиумез эскериз Кун Кенешын эскероно постановлениослэсь инъетъёссэс. Нырысетӥез документ чакла пичи ужбергатӥсьёслэсь налог басьтон радлыкез капчиятыны. Озьы ик куд-ог организациос но нимаз ужбергатӥсьёс понна арлы патентлэн дуныз воштэмын луоз. Солэсь дунзэ юнматозы городъёслэн но ёросъёслэн администрациоссы, пичи ужбергатонэз азинтон понна кыл кутӥсь ёзъёсын кенешыса. Кыкетӥез постановление кыкетӥзэ эскериське ини. Отын вменённой табышысь выт тырон но налогез тырем пумысен свидетельство сётон рад сярысь вераськон мынэ. Му вӧй - шаерлэн узырлыкез Новоселкинской нефть поттон интыын му вӧез кыскыны право сётӥсь лицензия сётон сярысь постановление эскеремын. Удмуртиысь Правительство но Башкортостанысь Министръёслэн кабинетсы куспын огкылъя сыӵе луонлык сётӥськоз "Удмуртгеология" огазеяськонлы яке "Белкамнефть" ОАО-лы. Лицензия му вӧез 20 ар ӵожепоттыны луонлык сётэ. Нюлэсэз - калыклы Глазов, Игра, Можга, Ува но Якшур-Бодья ёросъёсысь гурт организациослы 10209 гектар нюлэсъёс 49 арлы сётэмын, дун тырыны курытэк. Программа быдэсъяськоз "Россиысь ипотечной ассоциацилэн Удмурт люкетэз" "ОАО-лэн соучредителеныз луиз Удмуртия. Ассоциацилэн Удмуртиысь люкетэз "Семьядылы юрт" программаез быдэсъян бордын тыршоз. Архитектурая но лэсьтӥськонъя кун комитетэз косэмын ОАО-лы соучредитель луыны но солэн уставной капиталаз 28 сюрс манет сётыны. Мусульманъёсты ӟечкылан Правительстволэн Тӧроез Павел Вершинин ӟечкылаз Удмуртиысь мусульманъёслэн Духовной управленизылэсь муфтий-хазратсэ Габдулла Мухаметшинэз Ураза-байрам праздникен. Та праздник кӧс утемлэсь йылпумъяськемзэ возьматэ. Павел Вершинин вань мусульманъёслы сӥзиз юн тазалык, секытъёсты вормыны кужым, ужын вормонъёс, Удмуртилэн сяськаянэз понна. Правительстволэн Тӧроезлэн секретариатысьтыз пресс-центр. ШӦКЫЧ Кызьы чиган Митреез пӧяз Улонысь учыр Кышномурт Митрейзэ базаре ковёр басьтыны ыстӥз: - Мотри, - чеберзэ но дунтэмзэ басьты. Кема утчаз. Ӧз шедьты. Шонергес вераса, ковёръёс туж трос, но Митрейлэн самой дунтэмзэ но басьтыны коньдонэз уг тырмы. Ӝож мылкыдын бертыны потӥз. Базар вӧзын ик вузкарись чиган кышноез синйылтӥз. Ӵапак ковёръёс дэмла. Бетон кенер вылэ ошылэм - туж чебересь. Дунъёссэ но кагаз вылэ гожъям. Митрей матэктӥз но воксё паймиз - куинь поллы дунтэмгес! - Нош малы сыӵе пичи дунын вузаськоды?- юа воргорон. - кыӵе ке шекъёсыз вань-а, мар-а? - Мар тӥ, мар тӥ! - воксё кушетскиз чиган кышно. - Ваньмыз соос Персиысь ваемын. Тани учке ай асьтэос. Митрей учкиз, кутылыса чаклаз. Кельшиз. Туж шумпотӥз. Ма, Песиысь ковёр сыӵе дунтэмен шедьты ай. Вот кышноез лӧптоз ни! Митрей шумпотэмзэ чиганлы возьматыны уг тыршы. Шӧдӥз ке, дунзэ будэтоз. Чалякгес коньдонзэ мыче. - Кенер йылысь асьтэос басьтоды, дыр, - шуэ чиган, сю манетъем кагазъёсты кисыяз донгыса. Сыӵе дунтэмен шедьтэмез Митрейлы осконтэм кадь потэ. Соин ик чиган кышно валатскемлэсь азьло ковёр борды ӝабырскиз. Чалякгес бине. Шӧдтэк шорысь ковёрзэ кин ке но кенерлэн мукет палтӥз ас дораз кысканы кутскиз. Митрей юнгес кыске, со палтӥ эшшо но кужмогес карисько. Кыкнапала кысканъязы Митрей катьттэммыса ковёр бордысь лэзькиз. Со палан дымбыр-шалтыр вазиз но жоб кылъёсын тышкаськем кылӥськиз. Митрей чиган вылэ урдскыны малпа вал но, таиз кытчы ке но ышем ни. "Кузёез ӧвӧл дыръя мукетсэ ковёрез басьто", - малпа воргорон. Ӝоггес кыкетӥез борды ӝабырскиз. Тазэ но ас палаз кыскыны ӧз вормы. Кенер со палан кужмо адямиос, шӧдске. Митрей соку ик куинетӥез доры. Йӧтскыса ик ӧз вутты - ковёр кенер сьӧры гылӟиз. Нош берпуметӥез борды Митрей юн-юн ӝабырскиз. - Тазэ уг сёт ни, - шуэ, - юнме шат мон коньдон тыри! Воргорон ульча тыр черекъя, жоб кылъёсын тышкаське. Валаса но ӧз вутты - ковёрен ӵош ачиз но кенер сьӧры "лобӟиз". Синзэ усьтӥз но бакомиз - базаре сюрем. Ваньзы со шоры долкаса учко. Митрей соку гинэ валатскиз: алдам уг сое чиган кышно. Муртлэсь ковёрзэ вузам. Саесъёссэс пужалляса матэктӥсь кык таза воргоронъёсты адӟыса, Митрей кызьы кенер вылтӥ тэтчемзэ но ӧз вала. Чалякгес пегӟиз отысь. Гуртаз бертэмез бере кышномурт Митреез ушъяз гинэ. Нош кык азьпиньёссэ Митрей сотэк но ишкалтыны малпа вал ини. Ортчыт висизы куддыр. Ф. МИННИГАРАЕВ. ШӦКЫЧ ШӦКЫЧЛЭН КЫРӞАН КРУЖОЕЗ Лу монэн Владимир Котковлэсь кылъёссэ тупатъяз Фёдор Миннигараев. Крезьгурез Геннадий Ганьковлэн. Кытысен кельшид тон мыным, Кытысен гажай сюлмыным? Нырысьсэ мынӥд мон сьӧры Шыпытак кыскид куак пӧлы. Припев: Киосад - Мынам пыдъёсы. Синъёсад - Гольык мугоры. Улонэд - Мынам улонэ. Лу монэн. Мон тазьы весяк кылльысал, Тон понна тылси луысал, Эн гинэ пегӟы, гажанэ, Эн кельты куак пӧлы огнаме. Нош секыт луиз ке тыныд, Сӥялскиз ке куке мугорыд, Яратон шунтоз, мусое, Сётӥсько тыныд мон сое. Музеез кылдытӥсь Элькунысьтымы милицилэсь ортчем сюрессэ син азе умой пуктӥськод, Югдурез утёнъя министерстволэн музееныз тодматскыса. Нырысь со интыяськемын вал Дзержинский нимо клублэн фойеаз. Нош милицилы 75 ар тырмыку, 1992-тӥ арын 5-тӥ ноябре, со выжиз спортъя "Динамо" комплекслэн юртаз. Сое кылдытӥсез, отставкаысь майор В. Ф. Татаринов лыдъя: музей вордӥськиз 1972-тӥ арын 21-тӥ июне. Соку возьматэмын нырысетӥ экспонатъёс. Ӵапак со вакытэ асьме доры вуылӥз СССР-ысь внутренней ужъёсъя министр генерал Н. А. Щелоков. Мар бен, музей табере бадӟымаз, узырмиз. Нош сое кылдытонлы Виктор Федорович уно кужымзэ сётӥз шуыса, нокин поттылӥсь ӧвӧл. Вунэтӥзы солэсь нимзэ. Кык-куинь чурен ке но пусйыны луысал ук солэсь нимтулзэ. Татаринов со пумысен элькунысьтымы югдурез утёнъя министрлы Владимир Щербаковлы куинь гожтэт ыстӥз ни. Отысь одӥг ивор но ӧз вуы на. Музеез кылдытон сярысь вера таӵе документ: "Справка сётэмын Татаринов Виктор Федоровичлы, со 1972-тӥ арын 1-тӥ мартэ УАССР-ысь МВД-лэн ЯЧ 91/1 учрежденияз (али 9 номеро ИТК) нырысетӥ разрядэн комплектовщик луыса ужаз но отын куинь ар лыдъяськиз яке 1975-тӥ арын 8-тӥ мартозь. Со аръёс ӵоже Татаринов МВД-лэн историезлы сӥзем музей кылдытӥз, огдыре ик вал министерствоысь ветеранъёслэн советсылэн председателез". Та документ юнматэмын кивалтӥсьёслэн кинюртэмъёсынызы. Виктор Татаринов трос кужымзэ сётӥз журналистикалы. Солэн гожъямъёсыз поталлязы республикаысьтымы вань газетъёсын но журналъёсын. Со сяна, Виктор Федорович укмыс книга но поттӥз. Берло дыре автор ужа Удмуртиысь милицилэн историезлы сӥзем бадӟым книга гожтон бордын. Н. БАЙТЕРЯКОВ. * В. Ф. Татаринов. *Азьпал радын - паллянысен куинетӥез УАССР-ысь МВД-лэн министрез И. А. Желнов, СССР-ысь МВД-лэн министрез Н. А. Щелоков но КПСС-лэн Удмурт обкомезлэн нырысетӥ секретарез В. К. Марисов. (Туспуктэмъёс басьтэмын В. Ф. Татариновлэн архивысьтыз). Ульчаос "пуштылӥзы"... Выль ар азьын шукрес учыръёс вал Киров улосысь Кильмезь гуртын: татын улӥсь калыкез "сайкатъязы" ульчаын пуштылӥсь петардъёс. Покчи пиос, ческыт кутэмнянь сярысь вунэтыса, таӵе "кузьымез" туж тросэн басьязы но шумпотыса музэн пуштытъязы сое ульчаосын, школаосын но улон юртъёсын. Кировын, таӵе йӧнтэм арберилэсь курдаса, одӥг пересь кышномурт ульчаын ик усиз. Бервылыз кайгуо - кизэ чигем. Нош дас кык аресъем пуштытъясь ымнырзэ секыт сӧсыртӥз. Кильмезьын таӵе шудонъёсты алон вылысь, тылпуослэсь утёнъя 35 номеро частьын ужасьёс кышкыт тӥрлыкен вузкарись интыосты нимысьтыз эскеризы. Частьлэн кивалтӥсезлэн воштӥсез А. Г. Сморкалов вераз: - Вузкаронлэсь куронъёссэ лыдэ басьтоно ке, таӵе вузъёслэн нимысьтыз сертификатсы луыны кулэ. Сертификатын - печатез. Нош со интые ксерокопия гинэ ке, юнматэмын мед луоз Кировысь тылпуослэсь утёнъя управлениен. Пиротехникалэсь арбериослэн нимысьтыз валэктонъёссы но мед луозы. Уг яра соосты дас куать ареслэсь покчигес пиналъёслы вузаны. Кильмезьысь вузкарон интыостӥ ортчыса тодӥмы: пиротехникалэсь арбериослэн сертификатъёссы куронъёслы ӧз тупалэ. Соин валче соосты вузан алэмын. Нош таӵе эскеронъёс луозы азьланяз но. Н. ТУРИН. Удмурт Республикалэн улосвылаз Вузкаронысь налогез лыдъян но тырон рад сярысь положениез юнматон сярысь Удмурт Республикаысь Правительстволэн Постановлениез 1999 арын 11 январе Ижевск город � 5 1998 арын 17 ноябре юнматэм "Удмурт Республикалэн улосвылаз вузкаронысь налогез басьтонлэн аспӧртэмлыкъёсыз сярысь" Удмурт Республикалэсь 710-1 номеро Законзэ быдэсъян вылысь, Удмурт Республикаысь Правительство ПУКТЭ: 1. Удмурт Республикалэн улосвылаз Вузкаронысь налог лыдъян но тырон рад сярысь положениез юнматоно. 2. Удмурт Республикаысь министерствоос но ведомствоос кык арня ӵоже, приложение вылэ пыкиськыса, Удмурт Республикаысь Налогъёсъя кун инспекцие сётыны кулэ Удмурт Республикалэн улосвылаз Вузкаронысь налогез лыдъян но тырон рад сярысь положенилэн 2-тӥ люкетэзлэн 2-тӥ пунктаз юнматэм вузъёсъя (быдэстэм ужъёсъя, сётэм юрттэтъёсъя) переченез. Удмурт Республикаысь Правительстволэн Тӧроез П. Н. Вершинин. х х х Та Законъя вузкаронысь налог басьтӥськоз подакцизной вузъёслэн, дуно мебельлэн, дӥськутлэн, радиотехникалэн, сиён-юонлэн, автомобильёслэн но мукет арбериослэн дунзылэсь, соос вузасько ке коньдонэн яке кредитной карточкаос, банкъёслэн чекъёссы пыр яке калыклы вузъёс (ужъёс, юрттэтъёс) мукет вузъёсын (ужъёсын, юрттэтъёсын) воштӥсько ке. Со вакытэ ик уноезлэсь вузъёслэсь таӵе налог уг басьтӥськы. Соос пӧлы пыро: - Удмуртиын поттэм но вузам вузъёс, аракы сяна; - нянь, йӧл, кӧс вӧй, сӥль, чорыг, макаронъёс, пызь, кеньыръёс, сакыр-песок, сылал, картошка но мукет бакча сиёнъёс, улмо, курег пуз, нылпи сиён, диабетэн висисьёслы сиёнъёс; - нылпи дӥськут но пыдкутчан; - майталъёс но порошокъёс; - эмъюмъёс, протезно-ортопедической изделиос; - жилищно-коммунальной юрттэтъёс; - медицинской юрттэт; - нылпи пособиос, вузъёсын сётэмъёсыз; - нылпиослы, ӧлексыослы, Быдӟым Отечественной войнае но мукет ожмаськонъёсы ветлэмъёслы шутэтскыны путёвкаос. Подпись Шӧкыч Дышетӥсьёслы уждун тырон, тужгес но гуртысьёсызлы, толэзьысь толэзе ӝега. Куд-ог школаосын гужем отпусксы понна но коньдон тырымтэ на. Нош кивалтӥсьёс доры вазиськиськод ке, соос мукет азе ысто. (Гожтэтысь). Литератураысь геройёс: - Малы дышетӥсьёсмес обидиськоды? - Ку тыроды уждун? - Малы пӧяськоды соосты? Кивалтӥсь: - Мон янгыш ӧвӧл, отчы, вылӥе, вазиське... Суредэз Л. ПРОЗОРОВЛЭН. Сӥлы каризы директорез Кемалась ик ӧвӧл Сарапулысь радиоколледжлэн директорезлы В. Л. Быковлы "Россия Федерациысь дано дышетӥсь" сӥлы карон ним сётэмын. Вениамин Леонидович ужан сюрессэ мытӥз татысь ик радиозаводысен. Бӧрысь директорлэн социальной ужпумъёсъя воштӥсез вал, собере партийной ужын тыршиз. Кык ар улӥз Англиын, Советской посольствоын радиоаппаратурая специалист вал. Али колледжын ог 900 пала егитъёс дышетско, со пӧлысь 576-ез - дунтэк. Татын ялан тыршо материально-технической базаез юнматон сярысь. Алигес гинэ чылкак туала компьютеръёс басьтӥзы. Колледж юнэсь кусыпъёс возе Удмурт кун но Ижысь технической университетъёсын. Пусйымон соиз: та дышетскон заведениез йылпумъямъёс уже интыян ласянь уг шугъясько. Нимысьтыз профессия сяна, отын эшшо кык-куинь специальность басьто на, кылсярысь. ЭВМ-я оператор, нимысьтыз компьютерен ужась оператор, покчи предприятилэн бухгалтерез. Озьы ик дышето ни ужбергатонлы, юриспруденцилы, коньдонэн но кредитъёсын ужаны. Директорлэн но коллективлэн сюлмаськемзы уж вылын шӧдӥське. Колледжын вазенгес сётӥзы ни декабрьлы стипендия но уждун. Н. НИКИТИН. Пересьёсты ӟечкылазы Алигес Ижевскысь уй пал микрорайонысь 20 номеро домоуправление доры ӵыж выль автобус дугдӥз. Со вакытэ ик отчы люкаськизы мӧйы адямиос, асьме кунмылы трос лэсьтэм адямиос, нош табере, шутэтскыны дырзы вуыса, пенсие потэмъёс. Ӝоген соосты шуныт автобусэ пуктӥзы но одӥгаз баре вуттӥзы. Чай юон пӧрмиз ӵош шутэтсконлы но кенешонлы, пенсионеръёслэсь азьлань улонзэс тунсыкогес ортчытъян сярысь сюлмаськонлы. Соосты та пумиськонын ӟечкылаз но азьланезлы юн тазалык сӥзиз "Аспэк" вузкарон юрт. Солэн директорез Наталья Резанова люкаськемъёслы пыр-поч мадиз "Аспэклэн" каллен ужамез сярысь. - Ми дорын вузкарисьёс гинэ 1500 кузя ужало,- шуиз со,- налогъёсмес пал кыл вератэк но дыраз тыриськомы. Азинтӥмы асьмелэсь производствомес, ми колбаса но поттӥськом, лэсьтӥськисьёсмы но асьмелэн. Тани Глазовысь тылобурдо вордон фабрика куашкатӥз вал ас ужзэ. Соин ик ми со фабрикаез басьтӥмы но ваньзэ кулэезъя радъямы, нош басьтыкумы отын одӥг атассы гинэ но ӧй ни вал. Ми ужаськомы, манетмес кык карыны турттыса. Валаськомы, шуг-секытэ шедемъёслы юрттыны кулэ шуыса. Соин кылдытӥмы благотворительной фонд. Отысь адямиос, бухгалтер сяна, ваньмыз дунтэк ужало. Кивалтӥсь мадиз, кызьы соос юртто Кизнерысь нылпи юртлы, Можгаысь быдэ вуымтэослэн колонизылы - пичи йыртэмасьёсты шонер сюрес вылэ султыны юрттон вылысь, Ижевскысь школа-интернатлы, озьы ик пенсионеръёслы. П. Скобелев. ШӦКЫЧ Федор Миннигараев Стипендия Коньдон янчикме кышъясько. Вуоно арняын стипендия сётозы шуо. Зэм-а со, ӧвӧл-а - тодмо ӧвӧл на. Мед сётысалзы. Коньдонэн ке висъясалзы, эшшо но умойгес луысал. Азьлозэ туалетн кагазэн сётӥзы но, кытчы карыны ик пайми. Нырысь. Собере ӧжыт потӥз. Кык рефератлы но ӧз тырмы. Базарысь басьтоно луиськиз на. Дассэ басьтэмелы вузкарись песянай паймиз. - Ма, шуэ, - тамында туалет кагаз октытозь, аптекаысь эмъюм гинэ басьты вал. - Мар тӥ, мар тӥ, песянай, - буйгатыны вырисько, - мон сое рефератлы басьтӥсько ук. - Кемалы-а меда та ваньбур рефератэдлы тырмоз?- юа со. - Ма, - шуисько, - пычкиськыса-пычкиськыса пукид ке, кык уйскын ик быроз. Песянайлэн паймеменыз синъёсыз йыртышказ тубизы. - Ма, соку эшшо но тросгес басьты ук, - шуэ. - Со куанер рефератэд уин туалетысь уг ик поталля, шӧдске. Эшшо дассэ басьтӥ на. Доре бертыку ӵош дышетскись эшме пумитай. Сомында ваньбурме адӟиз но коньдонэ вань шуыса валатскиз, лэся. Стипендиозь дас манетме пунэмен куриз. Мон коньдонме сётӥ но нош ку стипендия луоз шуыса юасько. - Кытысь мон тодом, - шуэ, - тон стипендия басьтӥськод ук. Мынам воже потӥз: - Ӵуказеозь ӧд берыкты ке, мыдъяд одӥг коньыме но уг сёт ни! - Иське, тон озьы! - пурӟиз со, - соку вай ай эшшо дас мнеттэ! Ӧй, ӧй сёт ни. Кин тодэ, вуоно арняын, оло, чик но стипендия уз сётэ. Нош анайлэн сётэм коньдонэз быре ни. Собере нош ик вань студентъёс кадь ик улоно луоз. Бертӥськод ӝытпал но малпаськиськод: сиськи вал кадь... толон ӵукна... а сёравно сием потэ, однако. Эх, кыӵе умой луысал, вуоно арняе коньдон ке сётысалзы. Тодӥськоды-а, кыӵе мылкыд ӝутске, куке стипендия басьтӥськод? Быдэс нунал кырӟам-эктэм потэ, ява! Нош ӝытпал эшъёсыныд ӵош ӝӧк сьӧрын анекдотъёс мадьыса пукиськод но... ӵуказеяз номыре но уд тодӥськы ни. Нош ик стипендия возьманы кутскиськод. Озьы бере, малы меда сое витёд? Юнме йырме висьытӥсько. Коть басьты, коть эн - сёровно ӝыныез алимент тырыны быре. Котьма шу но, коньдон янчикме кышъяло ик ай мон. Кин тодэ, оло зэмзэ но вуоно арняе стипендия сётозы. ВАЛЭКТЭ ЮРИСТ Сэрегез нуэ адвокат Лилия Шкляева Судэ взиськем понна дун Азьло ужан интыысьтым кошки ар талэсь азьло. Уждунме туннэ но ӧз сётэ на. Соин ик судэ вазиськыны малпай. Бускельёсы алӥзы: эн ветлы отчы, курондэ быдэстозы оло уз, нош олома мында пошлина тыроно луод. Пенсионеръёс судэ дунтэк вазиськыны уг быгато шат? И. Невоструев. Тӥ валэктон шедьтоды Россия Федерацилэн Гражданско-процессуальной кодексысьтыз. 82-тӥ ёзэт (статья) ивортэ: искен курон (нырысьсэ сётэмез но, кинлы ке пумит луыса гожтэмез но), судын эскерон (процесс) мыныку, ченгешонэн валче дасям выль курон но, нимысьтыз ужрадэ (производствое) кутэм ужъя курон но, кассацияя ӝожтӥськон но басьтӥсько кун пошлина тырем бере. Таизлэсь быдӟалазэ тупатэ Россия Федерацилэн "Кун пошлина сярысь" Законэз. Вылӥ верам документъёс пенсионеръёсты оглом уг мозмыто дунлэсь. Нош куд-ог учыръёсы ужзэс эскерыны курисьёс (истецъёс) пошлина уг сёто. Кылсярысь, уждунэз тырыны яке лэсьтэм изъянэз берыктыны курыку. Учырез сэрттыкуз-пертчыкуз, суд яке судья чакла кусыпсэс радъяны курисьёслэсь узыр яке куанер улэмзэс. Соос ёрмо ке, судьянэн герӟаськем дунэз луэ пичиятыны, берлолы кельтыны яке пичиен-пичиен берыктыны. Куд-ог учыръёсы адямиез пошлиналэсь копак мозмыто. Гердлэн кизилиез кысонтэм Удмуртиысь писательёслэсь творчествозэс эскерон Москваын ӵем уг луылы. Кызьы тодӥськом, 1966-тӥ арын сыӵе шуд усиз Геннадий Красильниковлы. Нош 1977-тӥ арын - Флор Васильевлы. Собере кызь ар вис луиз. Берло дыре инбамамы выльысь яркыт ӝуатскиз Куӟебай Гердлэн кизилиез. Солы юрттӥз Зоя Богомоловалэн "Как молния в ночи" книгаез но. Герд сярысь тодэ ваёнъёсын, статьяосын, гожтэтъёсын, документъёсын, туспуктэмъёсын та бадӟым сборникез дасясьлы (составительлы) алигес озьы ик шуд усиз Москвае вуылыны, Россиысь Писательёслэн огазеяськонзылэн секретариатэз ӧтемъя. "Как молния в ночи" книга сярысь татын бадӟым вераськон ӝутӥзы. Ас малпанъёссэс веразы писательёс Валентин Распутин, Ямиль Мустафин, Валентин Сорокин, Вадим Дементьев, Михаил Числов но мукетъёсыз. Кенешонэз нуиз Россиысь Писательёслэн огазеяськонзылэн правлениезлэн тӧроез Валерий Ганичев. Пусъемын вал: Куӟебай Герд - пичи (ӧжыт лыдъем) калыклэн туж яркыт кизилиез, со быдэс дуннелы адскымон. Соин валче ик та книга но мукетъёсызлы адӟем карымон, усто пӧрмем. Презентацие ветлӥзы Удмурт Элькун Кивалтэтысь Нациосын ужанъя комитетлэн тӧроез Светлана Смирнова, отысь валтӥсь специалист Лариса Буранова но. Комитетлэн нимыныз тау карон гожтэт сётӥзы Евгений Зотович Разумовлы, кудӥз трос лэсьтӥз Гердлэсь чылкыт нимзэ берыктон понна, партилэн ЦК-яз ужакуз. Гердлэн арез ӧз йылпумъяськы на. 22 январе ас дораз куноосты нош ик пумиталоз Вавож. Т. ПЕТРОВА. Ошмы вите ни кузёзэ Газетмылы гожтӥськон йылпумъяськиз. Озьыен, дыр вуиз сётэм кылмес быдэстыны. Кызьы тодӥськоды, "Удмурт дуннеез" туэ басьтӥсьёслы ми сӥзим ош, коляскаен "Иж" мотоцикл но электротылэн ужась бычкы (пила). Лыдӟисьёс трос люкаськизы - соиз шумпотымон. Малпаммыя, котькуддылэн ик луонлыкты вань шудо муртъёс пӧлы пырыны. Кызьы бен ортчоз лотерея? Озьы но, тазьы но кенешыса, таӵе амал тупатӥм. Кылдытоно гожтӥськемъёслэн лыдзыя ог-огзылэсь туж ик висъяськисьтэм округъёс. Котькудаз ог 800 мурт мед пыроз. Шуом, Шаркан ёросын газетмес, шорлыдын вераса, 1600 адями басьтэ ке, отын кык округ луоз. Нош куд-огаз 100-200 мурт гинэ ке, сыӵе районъёсты огинэ кароно. Лыдъяса-чотаса тани ма пӧрмиз. 1. Алнаш - И 2. Алнаш - ИИ 3. Яр, Балезино 4. Вавож, Ува, Селта, Сюмси 5. Як.-Бодья, Каракулино, Камбарка 6. Дэбес - И 7. Дэбес - ИИ 8. Кез, Кизнер, Красногорск, Юкаменск 9. Завьял 10. Пичи Пурга - И 11. Пичи Пурга - ИИ 12. Шаркан - И 13. Шаркан - ИИ 14. Можга, Грахово - И 15. Можга, Грахово - ИИ 16. Игра 17. Ижевск, Воткинск, Сарапул, Глазов, республикалэн палэнысьтыз гожтӥськемъёс. Лотерея ортчытыса тодыны быгатом, кыӵе округе кошкоз редакцилэн ошез. Собере кыкетӥ шар возьматоз мотоцикллэн кузёезлэсь кытын улэмзэ. Озьы ик тодом, кинлы шедёз электропила. Мар отӥяз? Шуом, кузьым шедиз округе. Ми та округысь лыдӟисьёсты кӧня ке группалы люком (кылсярысь, почта отделениосъя). Одно ик тыршом, котькудаз гожтӥськемъёслэн лыдзы огкадьгес мед луоз шуыса. Соку быгатом ни тодыны, кыӵе гуртэ валтозы ошмес. Таин лотереялэн нырысетӥ вакытэз йылпумъяськоз. Кыкетӥ люкетсэ кылем арын сямен ик ёросэ яке городэ потыса ортчытом. Валамон ни, куинь интые вуылоно луоз (кузьымъёслэн лыдзыя). Пумиськонэ ӧтёмы шудо группаысь ваньзэ гожтӥськемъёсты. Соку тодомы ошлэсь но мукет призъёслэсь кузёзэс. Лотереяез редакциын ужасьёс гинэ медам ортчытэ шуыса, нимысьтыз кылдытэм комиссие пыртэмын пӧртэм адямиос. Соос пӧлын - Кун Кенешысь ялан ужась комиссилэн кивалтӥсез Аркадий Малков, Правительстволэн Тӧроезлэн пресс-секретарез Николай Танаев но Почта кусыпъёсъя федеральной службалэн Удмурт управлениысьтыз специалист Галина Кузнецова. Кузьым сётӥсьёслэн (спонсоръёслэн) нимынызы комиссиын ужалоз Пичи Пурга ёросысь "Красная звезда" эштослэн кивалтӥсез Василий Окунев. Лыдӟисьёслэн дэмламзыя, отчы озьы ик пыртэмын Завьял черкогуртын улӥсь Елизавета Камашева но Ижысь тодмо писатель Петр Поздеев. Лотереялэсь нырысетӥ люкетсэ вуоно средае 11 часын редакциын ортчытыны чакласьком. Кыкетӥ турез ортчытон пумысен ивортон газетын печатламын луоз ни бӧрысьгес. Ватсаса тани ма верам потэ на. Куд-ог эшъёсмы газетлы квитанциоссэс редакцие келяло. Озьы кароно ӧвӧл. Кызьы валэктӥм ни, лотерея мукет сямен радъямын. И. ЛЕБЕДЕВ. Россия вань но луоз! Луоз сяськаяськись но эрико! Юрий Лужков, Москвалэн йырыз (мэрез) Нырысь ик котькудӥз кыл мед сётоз: верано зэмлыкез гинэ. Алдаськон куашкатӥз Россилэсь инъетсэ, адямиослэсь ӟечезлы осконзэс. Улоно пӧяськытэк, верано зэмлыкез - "Отечество" организацилэн нырысетӥ куронэз сыӵе. Со понна рос-прос малпаськоно куд-ог юанъёс сярысь. Мар луиз Россиен? Малы экономикалэсь куашканзэ ӵошатыны луоз Быдӟым ожысь ыштонъёсын? Кызьы дано бадӟым кун пӧрмиз возьыттэк пунэмаськись государстволы? Кызьы со ыштӥз ас азяз сылӥсь бадӟым ужпумъёсты, малы калык йыромиз? Кызьы лябӟытэмын но ултӥямын армия? Малы асьме спецслужбаос но правоез утись ёзъёс кутӥсько политикаын нюръяськонэ? Кызьы дасо миллион адямиос пыдйыл кельтэмын? Малы историысь выльысь туала улонэ берытскизы кӧт сюман, кынмон, куашкан, кураськон, анай-атайтэк будон, ожалъяськон? Малы Россиысь кошко тужгес визьмо муртъёс? Сыӵе югдур кӧня ке нимтулэн гинэ герӟаськемын ӧвӧл. Мугъёс муресьгес. 100 ар талэсь азьло Россия утемын ӧй вал марксизмлэн тужгес умойтэм тулкымезлэсь, 10 ар талэсь азьвыл - шунды пуксён палась пельтӥсь редикал-либерализм шуонлэсь. Малы кунын сюризы сое одно ик пыӵатӥсьёс? Малы соосты эрказъяськыны лэзизы? Кин ортчемзэ вунэтэ, со вуонозэ ыштэ. Куд-огез оскытэ ни: та умойтэм кунлэн улыны правоез ӧвӧл, со западлы изъян гинэ вае, со - "сьӧд пась", "сыръясь нюр", кырсьсэ-пожзэ люкан гу". Зэмзэ вераса, Советъёс вакытэ басьтэмын бадӟымесь азинсконъёс. Быдӟым кунысь адямиос пазьгизы тужгес шукырмыт кужымез - нацизмез, ӝутӥзы городъёсты, дышетскизы, выльзэ кылдытӥзы. Ӟеч тыршизы визьмо тодосчиос (учёнойёс). Асьмелэнъёс нырысь ик ӝутскизы инсьӧре (космосэ), уже кыткизы атомез. Асьме кунтэк син шоры уд пукты туала дуннеез. Ортчем дыре вал мукетыз но - идеологиын огнын кузёяськон, политикаын адямиосты курадӟытон, кун ласянь котькытчы пыриськон, ваньмызлы огкадьгес уждун тырон. Пайдатэк ужазы промышленность но гурт удыс. Кивалтӥсьёс висъяськизы калыклэсь. Экономикаын но улонын тырмымтэос будон вакытэ шунды пуксёнысь кунъёс басьязы бадӟымесь азинсконъёс. Соин ик асьме экономикаысь шуг-секытъёс кулэ каризы воштӥськонъёсты. Выльдӥськонэз калык пумитаз ӟырдыт мылкыдын. Но амалтэк тодэ лыктэ вашкала дыръя верам маке: "Ӟеч кылъёслэн шӧлказы ватӥсько урод ужъёс, бадӟым тусбуйлэн вужерез - лэсянтэм сюлэм". Озьы ик луиз. Выль власть ӧз дунъя бадӟым опытэн кивалтӥсьёсты. Мар тон карид 1991-тӥ арын августэ? Та юанлы ӟеч валэктон сётымтэ муртъёсты уллязы экономикаысь но промышленностьысь. Соос интые пуксизы "книга вылын визьмаськемъёс", радикал- монетарист шуонъёс. Сыӵеос ӧз тодэ но ӧз дунъялэ ас калыксэс. Тужгес ик - крестьянъёсты. Соос, пе, берлане кыскисьёс но пеймыт кужымъёс. Гурт олокӧняетӥзэ чидано луиз улонлэсь люкем малпанъёслэсь шуккетсэс. Тужгес бадӟымесь решениос кутэмын шунды пуксёнысь визь-кенешчиос дэмламъя. Адямиослы возьматэмын ӧй вал азьлане сюрес. Нош 150 ар талэсь азьло быдӟым Достоевский тазьы вералляз: "Вылӥ малпантэк улыны уг быгаты адями но, калык но". Тямыс ар ӵоже Россиын валэктэмын ӧй вал одӥг ужпум но, одӥг программа но. Ӧтён одӥг - рынокен экономикае выжон сярысь огъя кылъёс. Уж вылын быдэсъяськиз радикалъёслэн дэмланзы. Дунъёс эркын лэземын. Огъя ваньбур киултэмын, ваучеръёс шӧлкы ватскыса. Налогъёсын, пошлинаосын, тарифъёсын но кредитъёсын ваньмыз сурамын. Кун но калык таркамын. Огъя узырлыкез асваньбурлы пӧрмытэм (приватизация ортчытэм) бере кылдӥзы пӧртэм пирамидаос - "Тибет", "Хопёр", МММ но мукет. Соосты кортнан ласянь власть номыр ӧз лэсьты. Одӥг лушкаськисьлэсь но кылзэ законъя ӧз юалэ. Со гинэ ӧвӧл ай, кун ачиз адӟем кариз капыръясьёслэсь. Мон нокызьы но уг валаськы вал таӵе учырез. МММ-лэсь кузёзэ Мавродиез Лефортовое ньыль нуналлы гинэ ворсазы но лэзизы. Табере ятвылтӥ: кивалтӥсьёс та дыр куспын солэн ужан амалэныз рос-прос тодматскизы но асьсэос пирамида инъяны ӧдъязы. Тӥни озьы куашказ экономика. Шуге-леке сюриз лулчеберлык (духовной) удыс. Россия уно дауръёс ӵоже дуннелы кузьмаз тачак дано нимъёсты. Табере со кекатэмын жугиськонэз, шудтэм учыръёсты, курданэз, сантэманэз возьматонэн. Кузёослэн таӵе кивалтонзы йылпумъяськиз августэн. Кивалтэт (Кириенко) но Центробанк (Дубинин - Алексашенко) туж зол шуккизы кунэз но, адямиосты но. Экономика шальтраз, президентлы, банкъёслы но властьлы оскон быриз. Ваньмызлы валамон табере: сыӵе монетаризмез улонэ пыӵатыны луоз, но со понна жаляно ӧвӧл странаез но калыкез. Асьмеды сыӵе югдуре вуттэм муртъёс шонер лэсьтысалзы, калык азьын верасалзы ке янгышамзэс. Нош соос весь тэтчало телеэкранын, асьмеды дышето кызьы улыны. Ваньзэ тае чидаса, асьмеос оскыса вераны кулэ: "Эскерон йылпумъяськиз, ӟеч господинъёс!" Веранэн буйгатсконо ӧвӧл. Вань силё-сюрноез утялтыны кулэ. Нырысь ик йылпумъян лэсьтоно огъя ваньбурез нимаз кузёослы вузанлы. "Приватизацилэн атайёсызлэсь" кемалась сӥзем йӧн-йӧн ужзэс чидатэк витиськом. Соос котьма мед гожъялозы, но дуннеысь экономикалэн историяз та вузаськон лыдъяськоз туж бадӟым алдаськонэн, калыкез но кунэз тарканэн. Со ик вуттӥз туж уно йыртэманэ но кузьмаськонэ. Озьы ке но, ми ум ӧтиське приватизациез воштонэ но ваньбурез выльысь люкылонэ. Рос-прос учконо на лушкаськыса, законэз тӥяса, капыръяса лэсьтэм учыръёсты. Соос кунлэн хозяйство нуоназ лачак. Ваньбур поттон пайдаё радъямтэ ке, сыӵе заводъёсты но фабрикаосты берыктоно кунлы. Реформа шуон аръёсы кунгож сьӧры туж уно коньдон кошкиз. Лушкам коньдон! Сое берыктон сярысь но кун сюлмаськыны кулэ. Ӝог но лякытак уд быдэсты сыӵе ужпумез. Но мур малпаськытэк уг луы. Вераны кулэ пирамидаос сярысь но. Сое кылдытӥсьёслэсь кылзэс законъя юн юано. Озьы ик - ГКО нимо пирамидаез малпасьёслэсь. Мукетыз сюлмаськон - зэмос экономикалы саклык висъян. Дасоосын банкъёс коньдон люказы "омырысь": валютаосын шудыса, одӥг уй-нуналлы кредит сётыса. Азьвыл со спекуляция нимаськылӥз. Тазэ мед воштоз зэмос экономика. Со понна улӟытоно бадӟымесь предприятиосты но, пичи ужбергатонэз (предпринимательствоез) но. Йыртэманэн нюръяськон. Правоез утись ёзъёс (органъёс) таӵеесь ик кылизы ке, асьмеос азинскыны ум быгатэ. Калык мед гажалоз погонэн адямиез. Но сое медаз кыскалэ политикаын нюръяськонэ. Вунэтоно ӧвӧл нырысетӥ ужпумез - улон-вылонмес умоятонэз. Со ӟечгес луэ - озьыен, выльдӥськон шонер радъямын. Улон уродме - маке но умойтэм. Соку чӧлсконо ӧвӧл ни приватизация, либерализация, монетаризация но музон гайдаризация вылэ. Власть - калыкен кӧня ке дырлы кылдытэм огкыл (договор). Быръён азьын кыл сётӥд - быдэсты. Сое ӧд лэсьты - огкылэз дырызлэсь вазь дугдытоно. Конституциын но законъёсын чот-чот люконо властьёсты. Россиын медло: кужмо но чупырес президент, калыкъёслэсь кулэяськонъёссэс кужмо утись парламент, кужмо но ас кылзэ быдэсъясь кивалтэт (правительство), кужмо, эрико но кузьым басьясьтэм суд. Мон вералляй но верасько: Россилы кулэ ӧвӧл парламентэн кивалтӥськись республика. Президент киын но сомында власть медаз луы. Туала вакытэ президент уте политикаысь ёзъёсты, кунэз но обществоез. Конституциез куашкатоно ӧвӧл, сое азинтоно, кулэ дыръяз - малпаськыса тупатъяно. "Отечество" организация аслыз сыӵе ним басьтэ, котькуд адями сярысь сюлмаськыса. Улонлэн пӧртэм удысъёсаз вань калыкъёслэн правооссы огкадесь медло. Россиын уно дауръёс ӵоже пӧртэм выжыос тупаса улӥзы. Соин ик ми ум куштэ нокинэ но, Союз куашкам бере шуге-леке сюремъёсты но. Милемлы уг тупа кыӵе ке калыкез висъян но, ӟучъёсты вылӥе пуктон но, еврейёсты ултӥян но. Тӥни малы Москваысь кивалтэт алӥз Русское национальное единство нимо организацилэсь ӧтчамзэ ортчытыны. Таиз ӝутэ одӥг калыкез гинэ, пусъёсыз но ужан манеръёсыз кельшо фашистъёслэн сямъёссылы. Демократия бадӟым эрик сётӥз ивор вӧлмытон ёзъёслы. Соосты зӥбыны уг яра. Асьмеос утьыны кулэ журналистъёслэсь эриксэс. Но та эрик медаз пӧрмы политикаын нюръяськон кивалтослы но алдаськонлы. Тачакез ӟеч адямиос Россиын вӧсь каремын озьы. Ми умойтэмен лыдъяськом армимы вылэ сяласьёсты. Кун чик ӝегатскытэк мед юнматоз сое но обороналы ужась промышленностез. Туала дунне чаляк воштӥське. Кин но со турттэ Музъемез выльысь люкылыны. Тӥни малы юнматоно ожгарчиослэсь (военнослужащийёслэсь) данзэс. Офицеръёслы но соослэн семьяоссылы кун сётыны кулэ секыт ужзылы тупась уждун. Аслаз интыезъя Россия медло бадӟым зарезь кузё. Соин ик юрттоно Сьӧд зарезьысь, уй палась, Тихий океанысь, Балтикаысь флотъёслы. Асьме дорысь но кунгож сьӧрысь ужбергатӥсьёс пусъё: Россия валтӥсь инты мед басьтоз космосын но ракетаос лэсьтонын. Ми Ярославль областьлэн кивалтӥсеныз Анатолий Лисицынэн ӵош юрттыны кутским СУ самолётэ 21-тӥ даурлы тупась двиагатель лэсьтӥсьёслы. Ваньмыз умой вал. Табере син шорады пуктэ югдурез. Россиын сюризы Лисицынэз та уж бордысь палэнтыны вырись кужымъёс. Соос курдатъяны ӧдъязы. Со огъя кышкытлык гинэ ӧвӧл, со - висён, со пыре асьме промышленносте, асьме экономикае. Нимысьтыз инты висъяны кулэ ваньбур поттонлы, юртъёс лэсьтонлы, кышномуртъёслы, егитъёслы. Ойдолэ малпаськоме. Асьмеос кыӵе кун лэсьтыны малпаськом? Кыӵе общество? 20-тӥ дауре пӧртэм революциос, ожъёс но опытъёс пыр потыса, Россия валатскиз кадь: солы кулэ огсыр азинскись социал-демократия. Отын медло пайдаё рынокен экономика, адямилы дурбасьтӥсь, дуннеысь азинсконъёсты но Россиысь сямъёсты герӟась политика, правоосты но эрикъёсты утись кун. Шӧкыч Ӧвӧл видео, чалмыт радио Ас вакытаз сюдӥсь-вордӥсь атаймы Иосиф Сталин шуиз вал: "Улон умойгес луиз, улыны шулдыргес луиз". Оло, со зэмзэ но озьы вал. Уго гуртъёсы пумен вуизы электротыл но радио. Витьтонэтӥ аръёслэн кыкетӥ ӝыныяз одӥг пичи гуртэз но радиотэк ӧз кельтэ ни. Нош война вакытэ селоосын вераськизы "сьӧд табаос". Тани Ижевск вӧзын вань Нагорный шуон посёлок. Ачиз со бадӟым но ӧвӧл, сокем пичи но уд шуы. Отчы ик интыяськемын огназы кылем пересьёслэн но висисьёслэн интернатсы. Азьвыл та посёлок Завьял ёросэ пыре вал. Табере со Ижысь Октябрь районлэн луиз. Соку ик таын улон куашканы ӧдъяз кадь. Нырысь ик клуб ворсаськиз. Вить ар талэсь азьло радио лабыртэмысь дугдӥз. Табере куд-огез, оло, уг но тодо ни, мар лэсьтӥське югыт дунне выламы. Тани ӝоген Кун Кенешамы депутатъёсты но быръём ини. Нош Нагорный посёлокын со сярысь тодӥсез туж ичи. Соин ик депутатэ кандидатъёслы вазиськоно луиськом. Ау, кандидатъёс! Вуоно быръёнъёсын уногес куара люкамды ке потэ, посёлокысьтымы радиомес "улӟытэ". Котьма ке но, со политика ук. Нагорный посёлокын улӥсьёслэн нимынызы гожтӥз П. СКОБЕЛЕВ. Карлудлэн кутсконаз удмурт кыл улӟе Карлуд шурлэн кутсконаз трос сю аръёс ӵоже улӥзы удмуртъёс. Тужгес бадӟым гуртсы Удмурт Карлуд (Кечтака) нимаське вал. "Ижтяжбуммаш" заводэз но автозаводэз лэсьтыку, гуртсы пумен быриз. Коркаос но бакчаос интые пуксизы цехъёс, трос этажъем кирпич юртъёс. Карлуд шур но пичиёмиз-вакчияз. Али солэн кутсконэз Буммаш микрорайонысь трамвай котырсконын. Пырак татын ик 52-тӥ шор ёзо школа сылэ. Ижлэн та палаз трос школаос, нош одӥгаз но пиналъёсты удмурт кыллы азьвыл ӧз дышетылэ. Нош Индустриальной но Устинов районъёсын, мукет ёросъёсын сярысь, тужгес уно удмуртъёс уло. Али пичияк шумпотоно солы - Кечтака гурт интые пуктэм тросаз школаосын пиналъёс ас кылзэс дышето ини. Али шуг вераны, быгатозы-а соос удмурт сямен вольыт вераськыны. Нош ас калыксэс, вордскем шаерзэс золгес гажаны дышозы. Мынам улон интые 52-тӥ школаен артэ бере, отысь удмурт классъёс сярысь нимысьтыз гожтэме потӥз. Татын удмурт классъёсын нырысь Раиса Кадрова ужаны кутскиз. Бадӟымъёсыз пиналъёс 3-тӥ классэ ветло ини. Оля Леконцевалэн, Алёша Семеновлэн, Оксана Искандировалэн тодон-валанъёссы тужгес ӟечесь. Али удмурт кылэз дышето куинь классын. Раиса Кадрова сяна, та ужын ӟеч тыршо Галина Вахрушева но Алевтина Анисимова. Удмурт кылэз дышетон сярысь сюлмаське школалэн директорез Галина Мезенцева но. Раиса Кадрова шутэскон дырзэ но ӵемысь пиналъёсын ортчытэ: соосын ӵош тэле ветлэ, инкуазен - будосъёсын, тылобурдоосын, пӧйшуръёсын но мукет лулосъёсын - тодматэ. "Ударник" кинотеатр дорысь тэльысен соосты ӵем пумиталлясько. Пиналъёсты кырӟаны-эктыны но дышето. Соос калыклы концерт возьматыло. Ортчем арын вить пол шулдыртылӥзы. Выль арын но кык пол шумпоттылӥзы ини. Раиса Кадроваез мон кемалась тодӥсько. Соку ачим пиналъёсты 49-тӥ школаын дышетӥ. Нош Раиса Тихоновна соку 81-тӥ школаын дышетӥз. Отын но пиналъёс понна сюлмысь тыршиз. Гуждор праздникез ортчытъяку, пичи эшъёсыныз шулдыръяськонэ пыриськылӥз. Таӵе сюлмысь, валаса ужась дышетӥсьёсын валче, калыкмы улӟоз, уз быры. Солэн ӵош ужась эшъёсыз - Галина Вахрушева, Алевтина Анисимова - но удмурт пиналъёсты дышетонлы вань мылкыдзэс, тодон-валанзэс сёто, нош пиналъёс пумен дышо мумы-бубы кылъёссылы. Умой луысал, гуртазы но удмурт сямен вераськысалзы ке. Н. ВОЗИСОВ. ШУНДЫ 25-тӥ январе - Татьяналэн нуналэз. Сое мыло-кыдо пусъё Россиысь студентъёс но интеллигенция. Угось ӵап 12(25) январе 1755-тӥ арын императрица Елизавета Москваын университет усьтон сярысь указ поттӥз. Та нуналэ студентъёс шулдыръяськылӥзы, профессоръёссэс ӟечкылаллязы, чузъяськылӥз Гаудеамус - студентъёслэн гимнзы. Нош Таня нимо студенткаослы та кык полэс праздник луэ. Соин ик, вань студентъёсты но институтъёсын азьвыл дышетскем муртъёсты ӟечкыласа, туннэ тодматӥськом кык Татьянаосын. Зор, зорые, кырӟась Такъянмы вылэ Татьяна Ишматова. Егит, чебер нылаш. Удмурт эстрадалэн осконэз. Выль ар азьын Сыктывкарын егит кырӟасьёслэн региональной конкурссы ортчиз. "Национальной кырӟанъёс" номинацияя Таня вормисе потӥз. Кырӟаны кутскиз возьмамтэ шорысь. Алнашысь школалы "Шундыкаре" мыныны путёвкаос вуизы. Таня умой дышетске, пӧртэм ужрадъёсы мыло-кыдо пыриськылэ бере, ӵектӥзы солы но. Кыӵе отрядэ мыноно? Суредаськонэ-а, журналистикае-а, оло, лидер луыны дышетсконо? Эстрада но вань. Отын экто, дыр. Таня эктыны яратылӥз бере, отчы ик гожтӥськиз. Но дышетӥсьсы Надежда Эдуардовна Уткина кырӟаны, куарадэ пуктыны, астэ сцена вылын возьыны дышетӥз. Нылаш - быдэс сменаен мылкыдтэк улӥз: солэн ноку кырӟаллямез ӧвӧл. Анаен атае но уг кырӟало, песянае ке шат. Мар дышетсконэз? Но лагерь смена ворсаськон нуналэ Надежда Эдуардовна сое кырӟаны косӥз. Люкиськон азязы вуоно гужем но лагере лыктыны косӥз. Таня паймиз ке но, вуонояз но, вальысяз но лыктӥз. Лагерьын кырӟаны дышетскемез бере Алнашысь, Ижысь сценаос вылысен кырӟаны кутскиз. 11-тӥ классын дышетскыкуз, Сыктывкарын ортчылӥсь "Юрган" конкурсэ пыриськиз. Отысь дипломен бертӥз. Дышетӥсез (табере ини эшез) Надежда Уткина крезьгуръя тодон-валанъёссэ будэтыны ӵектӥз, но Таня университетысь романо-германской филологияя факультетэ дышетскыны пыриз. Со пумысен Танялэсь юатэк ӧй чида: - Оло, тынад Надежда Эдуардовналэн пытьытӥз мынэмед потэ? - Малы ке ваньмыз озьы малпало но, со озьы ӧвӧл. Тупа, дыр. Кыӵе ке кунсьӧр кылэз ӟеч тодон сярысь мон кемалась малпаськылӥ. Нош Надежда Эдуардовналэн творчествоез мыным зэмзэ но туж кельше, солэн кырӟанъёсыз мыным матын пото. Мон быгатӥсько лирическойёссэ но кырӟаны, но сцена вылысен мукетъёссэгес - малпаськытӥсьёссэ кырӟам потэ. Ваньмыз монэ уз но валалэ, уз яратэ, но куинь-ньыль мурт ке но валаз ке, со умой ини. - Но туэ Сыктывкарын тонэ туж умой пумиталлям кадь? - Кызьы вераны уг тодӥськы. Со кыӵе ке кизили зор вал. Нырысетӥ тураз ик быгатӥ учкисьёсты но, дунъясьёсты (жюриез) но ас палам берыктыны. Нош пумаз, куке потӥ П. Захаровлэн кылъёсызъя гожтэм "Мон кошкисько" кырӟанэн, учкисьёс улӟизы, дорам лыктыны кутскизы. Мыным, али кырӟаны кутскись муртлы, сяська кузьмало! Валаськоды- а? Адямиос катанчи сьӧры лыктыса чупало, ушъяло, кылъёссэ, фонограммазэ куро. Воркутаос, архангельскъёс удмурт кырӟан куро, валаськоды-а? Нош мон ымтэм сылӥсько, бам кузям синкылиос васько. Жюрилэн кивалтӥсез, крезьгурчи Михаил Герцман ваньмызлы шуиз: - Тӥни кызьы яратоно аслэсьтыд калыктэ! Соку солэн кылыз ваньмызлы валамон луэ. Монэ озьы асьме дорын но ӧз пумиталлялэ на вал. Тау Надежда Уткиналы но Ваня Григорьевыхлы. Соос ке ӧй юрттысалзы, мон ноку но кырӟаны ӧй кутскысал, дыр. Кырӟаны быгатэм сяна, сцена вылэ потыны туж трос коньдон кулэ. Мынам али ӧвӧл аслам фонограммаосы, дасез вылын кырӟасько. Умой но ӧвӧл ни Надежда Эдуардовна азьын. Мон валасько, со мыным весь юрттыны уз быгаты, но али аслам нокыӵе луонлыкъёсы ӧвӧл, соин ик тросэз малпанъёсы малпанэн кылё. Но Таня оске, куке но малпанъёсыз одно быдэсмозы, удмурт эстрадае со выль ӧр пыртыны быгатоз шуыса. Со кырӟалоз аслыз гинэ тупась куараен. Толон Таня эшшо огзэ сессизэ йылпумъяз. Ваньзэ экзаменъёссэ "5"-лы сётӥз. "Кырӟаны сяна, мон дышетскыны но, малпаськыны но быгатӥсько ук, - пальпотэ со. - Яратэме но потэ. Мон огшоры нылаш ук. Огшоры Такъян". З. Рябинина. Коньдон но политика Кризис ас кожаз уг кылды Газетъёс малы ке но ӧжыт гожъязы но гожъяло Юго-Восточной Азиын луэм финансовой кризис пумысен. Нош кулэ вылэм. Берло ог дасо аръёссэ кызьы гинэ ӧз ушъялэ Южной Кореяез, Тайванез, Гонконгез, Сингапурез, Малайзиез, Филиппиныез, Таиландэз, Индонезиез! Япониез вератэк ни. Соос дуннеысь экономикалэн тигръёсыз, тигрпиосыз но шуыса нималлязы. Тазьы вераны мугез но вал уго. Трос аръёс ӵоже индустриализация но научно-технической прогрессэз азинтон удысын та странаос азьветлӥсьёс радын мынӥзы. Экономиказы ар ӵоже 10-12 процентлы будӥз, дуннеысь ваньзэ азьпалтыса. Берло 30 арзэ гинэ Юго-Восточной Азие пырись государствоос вузкарон удысын 17-ысен 40 процентозь ӝутскизы, поттэм ваньбуренызы рынокез быдэсак киултӥзы, шуыны луоз. Дуннеысь банк Азилэсь азинскон амалзэ умоен лыдъяз, нош узыр инвесторъёс, кредит чотын та странаослы миллиардъёсын коньдонзэс сётон вылысь, черодэ султӥзы. Табере со ваньмыз огкутскемен куашказ. Таиландысь но Южной Кореяысь кивалтӥсьёс вань калыксылы вазисько, огдырлы ке но, зарни арбериоссэс государстволы пунэмен сётыны курыса. Нош Филиппиныын государственной чиновникъёслы, кунгож сьӧры командировкаосы потакузы, отельёсын улыны алэмын: коньдонэз шыръян понна, соос кӧлало тодмооссы дорын. Коньдон но политика куспазы люкыны луонтэм герӟаськемын. Шуге-леке вуон учыръёс но ас кожазы уг кылдо. Учком солэсь географизэ. Кризис шуон малы ке но "бырйиз" Юго- Восточной Азиез но Южной Кореяез, палэнэ кельтӥз Австралиез, Новой Зеландиез - англо-саксонской странаосты, соос вылӥ верам государствоосын юн кусып возё ке но. Со вакытэ ик Япония, Китай но шуг-секытъёслы ӧз сётске. Китайлэн экономикаез та кризисэз шӧдыса но ӧз вуы кадь. Со дыраз утьыны быгатӥз аслэсьтыз выль провинциоссэ но - Гонконгез но Тайванез. Кризис улэ сюрем странаосты чакласа адӟоно, Тихий океан котырын США-лы пумит кужым возёнын Япония но Китай понна Гонконг но Тайвань ӟеч плацдарм луо. Пусйымон таиз но. Кризис кутске 1997-тӥ арын 2-тӥ июле. Гонконг вадьсысь британ флагез воштэ Китайлэн флагез. Ӵуказеяз ик Таиландлэн национальной валютаез - бат, шуак уллань ваське. Азьпала учкыса вераны луоз, вуоно даурын экономикалэн шорсюлмыз Азие выжоз: яке быдэсак вормоз США, яке солы пумит султыны выроз Азия. Америкалы, валамон, ас понназы экономиказэс азинтыны быгатӥсь государствоос кулэ ӧвӧл. Кызьы-о мукет сямен валэктод США-лэсь но Южной Кореялэсь кусыпъёссэс? Зарезь сьӧрын малпазы, лэся, СССР куашкамен, "кезьыт ож" йылпумъяськемен, Китай рыноке выжемен, Кореялэн "бадӟым эшезлэн" кулэлыкез лябӟиз шуыса. Дыр вуиз союзникъёсты интыязы пуктыны, ӧжытак зуркатыны. Кризис шукыръяськон вакытэ США Южной Кореялы юрттэмлэсь палэнске, алэ Япониез но. Шуге-леке сюрем странаез кураськыны ысто Дуннеысь валютая фондэ (МВФ). Соос умой тодо: выись муртэ со эшшо но мургес выйтоз. Акулаос асьсэлы "сиён" азьвыл ик валаса дасязы. Трофей интыын асэстӥзы трос сю миллиард долларез, Юго-Восточной Азиысь странаослэсь ужаса поттэм ваньбурзэс. Пичигес Малайзия гинэ 3 толэзь куспын 150 миллиард долларзэ ыштӥз. Ма чотын узырме, шуоды, МВФ? Кинлы со юрттэ? Нырысь ик, кин быдэсъя та фондлэсь куронъёссэ: иностранной банкъёслы сюрес усьтэ, ас кожаз ужась рыноке гылӟе. Рынок шуэм улсын уго котьма даурты - пумзэ-йылзэ утчась уз лу. Нош Южной Кореялы сӥземын вал туж бадӟым займ - 57 миллиард доллар! Мон малпамъя, ваньмыз та коньдон зарезь сьӧры кошкиз, али берытскыны выре музон амалэн. Туала дунне шоры учкыса, тросэз странаос, отын улӥсьёс, соослэн культуразы малы ке но вож пинал кадь потэ: кужымтэм, азьпал улон-вылонзэ тодыны быгатӥсьтэм. Огез но ассэ кулэ дыръяз йӧн-йӧн утьыны уг пӧрмыты, кризисэ шедьыса пачкало. Озьы-а государстволэн данэз возиськоз? США-е каръяськем дуннеысь финансовой олигархия дуннеен кивалтэ кужмо банковской система пыр, солы юртто Америкалэн экономической но военной кужымъёсыз. Соос ваньзэ ас чакламзыя бергато: странаосты куашкато, коньдонзэс кулэтэм бумагалы пӧрмыто. Собере "пеньлы" пӧрмем экономикаез "выльдонэ- ӝутонэ" кыскемъясько Дуннеысь валютая фондэз. 1994-тӥ арын та амалъя сӥсъязы-качазы Мексикаез. Али со нош ик пыдъяськиз ини, ӝоген выльысь кутскыса сэзъялтозы, ваньбурзэ талалозы. Калык верамъя, визьмо мурт мукетызлэн янгышъёсыз вылын визь люка, нодтэмез гинэ мажес вылэ кык пол лёгиське. Асьмелы, Россиын улӥсьёслы, Юго-Восточной Азиын луэм учыр ма сярысь вераны турттэ меда? Валэктонэз 4,7 миллиард доллар лыдпус бордын. Ӵапак сомында асьмелэн туэ арлы январь толэзьлы кылем долларовой запасмы. Оло, соиз но туннэ нуналлы ӧвӧл ни? И. ОБРАЗЦОВ, история наукаосъя доктор. Ивор сётон - ӧвӧл шудон Ивор вӧлмытон ёзъёслэн миым ужамзы сярысь веранзэ та удысъя министр Юрий Медведев мытӥз "Удмурт дунне" бордысен. Газет ас тиражзэ вуттэ ни 15 сюрсозь. Тросгес печатласько "Известия Удмуртской Республики" но "Ӟечбур". Утиськизы городъёсысь но районъёсысь газетъёс. Та дыре ик лыдӟисьёссэс ыштӥзы "Удмуртская правда", журналъёс, Пичи Пургалась "Маяк". Министерстволы бюджетысь миым висъяны кулэ вал 13 миллион манет. Вуиз 11,2 миллион - 85,6 процент. Музон удысъёсын ӵошатыса, сокем урод ӧвӧл кадь. Но ивор вӧлмытӥсьёслэн, лыдӟисьёслэн, учкисьёслэн, кылзӥсьёслэн улон-вылонзы пумен секытгес луэ. Газетъёс шергес но "векчигес" пото, передачаос кулэсмо. Весь дуноя бумага. Чыры-пыры ужпум кадь со - телепрограммаез печатлан. Коньдон окмымтэен, сое шедьтонын но вань шуг-секытъёс. Быръёнъёс матэктэмен валче политикаын югдур пумен лэчытоме. Журналистъёсты туннэ ик кыскыны выро ини пӧртэм "шудонъёсы". Юмоке усёнтэм вылысь, сак чаклано законъёсты. Зэм, Кун Кенеш соосты йылаз-пумаз вуттыны уг дырты ай. Таяз пумиськонын тросгес вераськизы удмуртъёс. "Удмуртия" издательстволэн валтӥсь редакторез Вениамин Ившин тодматӥз аслаз сюлэмшугъяськонъёсыныз. Коньдон висъямтэен, мукет арлы выжтэмын удмурт энциклопедиез печатлан. Со вужме, тупатъянъёс пыртэмез но ватсаса коньдон висъямез кулэ каре. Ӝега нылпиослы книгаос дасян. Ог люкетэз писательёс асьсэ произведениоссэс поттыны спонсор шедьто но вазисько коммерциен вырись издательствоосы. Озьы бюджетысь коньдон палэнэ кошке. Эшшо но умойтэм мукетыз. Озьы печатлам книгаос уг тупало кун куронъёслы (стандартъёслы). Шарканысь "Вестник" газетлэн редакторез Надежда Аверкиева ивортӥз лыдӟисьёсын ужамзэс. Гожтӥськыны луэ пунэмен тыронъя вексельёсын но нылпи пособиосын. Та удысэз умой радъясь газетчиос ватсаса уждун басьто. Надежда Михайловна оскытэ: макем трос мадёд кыдёкысь гуртъёс но огшоры адямиос сярысь, сокем уногес эшъёс люкалод. Зэм, "Инвис" удмурт газетлэн лыдыз кӧнялы ке кулэсмиз. Кивалтӥсь озьы ик вераз рекламаен выремзы сярысь. Редакция вазьгес тодэ организациослэсь но адямиослэсь вордскем нуналъёссэс, ортчытоно ужрадъёссэс, сыӵе учыръёсы дунын материалъёс печатла. Коньдонэз шыръяны юрттэ газетъёсты ас почтальонъёс пыр нуллон. Котьку сямен ик, таяз но пумиськонын ӟырдыт вераськон пуромиз редакциос но типографиос куспын. Огласянь, редакциослэн полиграфистъёслы тыронъёссы пумен будо. Соин сэрен куд-ог журналъёсты печатлан дугдытэмын яке дугдытэмын луоз. Мукет ласянь, кызьы шуиз "Удмуртская правда" газетлэн валтӥсь редакторез Николай Нестеренко, полиграфистъёслэсь вить ар юаськом мар понна кӧня дун басьтэмзэс - сыӵе лыдпусъёс уг сёто. "Удмурт дуннелэн" валтӥсь редакторез Алексей Шкляев сётӥз куинь ӵектон. Нырысетӥез: кулэстоно гожъяськисьёслэсь уждунзэс (окладзэс), будэтоно гожъяськемзы понна дунзэс (гонорарзэс). Утчаськись муртъёслэн огъя удунзы соку, оло, дыго- могоослэн сярысь, лачаклы уногес люкаськоз. Кышкано ӧвӧл. Газетлэн пуштросэз соку чутрак муромоз но паськыталоз. Кыкетӥ дэмлан: утёно 90-тӥ аръёсы усьтэм выль изданиосты. Вераськон потылэ "Луч" ӟуч журналэз ворсан сярысь, "Янарыш" бигер газетэз пичиятон сярысь. Соосты шымыртыса, мукет редакциосын югдур уз умоя, нош отӥяз сюрозы удмурт журналъёс вылэ пинь шерись но. Куинетӥез. Куд-ог редакциос укыр етӥз выльдыны выро удмурт кылмес. Таин валче ум усе меда умойтэм югдуре? Вуж кылмес но вунэтом, вылезлы но ум дыше. Кулэ-а асьмелы аслобет (самолёт), ӧри (комиссия), мерлык (общество)? Коллегилэн ужаз пыриськиз Правительстволэн Тӧроез Павел Вершинин. "Удмурт дуннелэсь" куиньзэ ик ӵектонзэ умоен лыдъяз. Со озьы ик тодматӥз экономикаысь огъя югдурен. Со секыт ке но, Евгений Примаковлы оскон вань. Россиез кызь одӥгетӥ дауре огсыр выжтоз. Умойгес радъяны кулэ республикалэсь, городъёслэсь но районъёслэсь кусыпъёссэс, кун властьлэсь но интыысь аскивалтонлэсь ӵош ужанзэс. "Ижмаш" огазеяськон налогъёссэ тыремысь дугдӥз но, Ижлэн бюджетэз шуге-леке сюриз. Вуоно быръёнъёс азьын Правительство депутатэ котькуд кандидатэз огкадь гажалоз- дунъялоз. Сыӵе ик курон пуктоз интыысь администрациос азе но. Татысь йыръёс медаз дурбасьтэ соизлы яке таизлы. Кивалтӥсь сыӵе вожвылъяськонъёсы пыриське ке, сое ассэ ужысьтыз палэнтыны выро. Озьы быдэс город яке район тэргаськонэ сюре. Павел Николаевич озьы ик мадиз Правительстволэн ивор вӧмытӥсьёслы пӧртэм-пӧртэм юрттэт сётэмез сярысь. 1999-тӥ ар тужгес секытэз ар медаз лу - выль вакытэ выжон ар медло. Эскерем ужпумъя коллегия кутӥз решение. Татын ик ӟечкылазы пӧртэм конкурсъёсын вормисе потэмъёсты. Ивор вӧлмытон ёзъёсын югдур сярысь министр Юрий Медведев "Удмурт дунне" пыр азьланьын рос-просгес вералоз ай. И. СИДОРОВ. КИВАЛТОН НО ЗАКОНЪЁС Кулэ-а ӵем вошъяны? Улон туннэ интыысь ас коже но кун кивалтӥсьёс азе бадӟымесь куронъёс пуктэ. Кызьы бен Удмурт Правительство кусыпъёс возе городъёсысь но районъёсысь йыръёсын (главаосын) но отысь кивалтӥсь ёзъёсын? Тая Аскивалтэтын нимысьтыз управление кылдытэмын. Солэсь ужзэ радъя Александр Скобкарев. Со интыосын мар лэсьтӥське, ваньзэ син азяз возьыны тырше. Нош кызьы со пӧрме - мукет ужпум. Кызьы бен интыосын ас коже кивалтон пыӵа? Котькыӵе выль уж сямен ик, таӵе кивалтон амалъёс но секытэн сюрес лёго. Со нырысь ик герӟаськемын туала законодательствоез выльдонэн, улонлы матэ каронэн. Республикаямы та уж урод ӧз кутскы вал, уката ик Россиен ӵошатыса. Асьмеос котькинлэсь вазь кутӥм интыосын ас коже кивалтон сярысь закон. Со вал 1994-тӥ ар. Нош Москва та ужен ӧз дырты. Таӵе выллем, ас коже кивалтонлэн огъя радлыкез сярысь закон данаклы бер, 1995-тӥ арын августэ гинэ, вуттэмын. - Тӥни соин ик уно тупамтэос но валантэмъёс кылдо кун власть но ас коже кивалтон куспын, - вера Александр Николаевич. - Малы ке шуоно та кык кивалтон вайёс ласянь полномочиоссы кулэезъя люкылымтэ. Али ӝегатскытэк сыӵе закон кутоно. Нош кун власть сярысь закон улонэ ӧз пыӵа. Али озьы ик дыртоно "Муниципальной служба сярысь" Закон юнматонэн. Соку тросэз вожвылъяськонъёс, валамтэос бырысалзы. Со Кун Кенешлэн сессияз одӥг пол лыдӟемын ни. Нош таӵе законопроект ӧвӧлэн интыосын юнме шорысь уно кивалтӥсьёсты вошъян мынэ. Шаерамы кылем гужем, июле, район администрациослы тӧроос быръемын. Кивалтонэ 14- ез выль адями лыктӥз. Трос со. Вуж тӧроос пӧлысь куинез (Селта, Каракулино но Яр) али ке но уже интыямтэ на. Ас коже кивалтонъя тыро-пыдо законъёс дыраз кутымтэен, ваньмыз сямен выль йыръёс (главаос), кулэ-а, ӧвӧл-а, вуж воштӥсьёссэс асьсэ адямиосын воштӥзы. Уноез выльдэмын отделъёслэн кивалтӥсьёссы. Шонер-а со? Ӧвӧл, конечно. Выльёсыз вӧзы вуж кивалтӥсьёс одно ик кыльыны кулэ. Партия сое юн чакла вал. Музонэз лэчыт ужпум герӟаськемын йыръёсты Кенешъёслэн сессиосазы быръёнэн. Со туж огшоры лэсьтӥськиз. Депутатъёс пӧлысь ӝыныезлэсь вылтӥ 1-2 депутат кизэ ӝутӥз ке, адями тӧро луэ. Табере кивалтӥсь одӥг ар но ӧз ужа на, нош депутатъёс сое куштонэн кышкатъяско ни. Али 5-6 районъёсын сыӵе югдур кылдэмын ни. Ӝыны яке ар ортчыса, кузёосмес вошъяны ӧдъям ке, кытчы меда асьмеос вуом? Соин ик ӝоггес кутоно полномочиосты люкон но муниципальной служащийёс сярысь законъёс. Соку гинэ ваньмыз интыяз пуксёз. Интыосын кузёосты быръён котькытын огкадь умой ӧз ортчы. Вань таӵе но учыръёс. Депутат райсоветлэн сессияз уг лыкты, Иже кошке, нош сое сюрес вылысен берыкто но районлы тӧрое быръё. Табере асьтэос малпаське, кыӵе ужась-кивалтӥсь со луоз? Бен, Правительство законопроектъёсты дасян бордын ужа. Но куд-огезъя, оло, бере но кыле. Озьы ке но, Аскивалтэт ялан сюлмаське интыосын кусыпъёссэ юнматон, соослы юрттон, ужан амалъёссэ выльдон сярысь. Тани берло дыре сяме пыӵаз ни Правительстволэн Тӧроезлэн Павел Вершининлэн интыосы потаса ужанэз. Солэн пайдаез бадӟым. Тӧро но соин ӵош лыктэм кивалтӥсьёс калыкен пумиськыло, югдурен тодматско но кенешын йылпумъянъёс лэсьто. Интыысь кивалтӥсьёслы но таӵе амал кельше. Тани Павел Вершиним миым 9 районъёсы но 4 городъёсы вуылӥз. Со сяна, Можгаын, Воткинскын но Сарапулын ортчытэмын Правительстволэн кенешез. Но таиз ужрад, оло, сокем трос пайда уг сёты. Г. РОМАНОВ. Журналистъёсын пумиськонъёс Кутымтэ кужым Мар лэсьтӥське республикаямы егитъёслэсь улонзэс умоятон понна? Та ужпумлы сӥземын вал Кун Кенешысь Наукая, дышетонъя, культурая но егитъёсын ужан политикая комиссилэн тӧроезлэн А. Ерёменколэн журналистъёсын пумиськонэз. Солы та ужпумез сэрттыны юрттӥзы на Правительствоысь Наукая, вылӥ но шор профессиослы дышетонъя комитетлэн кивалтӥсез С. Решетников но озьы ик Егитъёсын ужанъя кун комитетысь но Калыкез уже интыянъя кун комитетысь но департаментысь лыктэм адямиос. Егитъёс сярысь закон кутэм дырысен ар ортчиз ни. Нош солэн уже пыӵамез туж ляб шӧдӥське. Сыӵе малпанэ вуоно, пумиськонэ лыктэм кивалтӥсьёслэсь верамзэс кылзыса. Егитъёс пӧлын туж трос ужтэк кылемъёс но дышетсконзэс аналтэмъёс. Удмуртия та ласянь Россиысь бере кылись дас улосвыл пӧлы пыре. Шӧдске, "Уже интыянъя Закон" но (кутэмын 1996-тӥ арын) республикаямы югдурез ӧз капчияты. Зэм, куд-ог предприятиосын егитъёслы ужан интыос висъян сярысь огкылъёс тупатэмын. Но сыӵе предприятиос сокем ик трос ӧвӧл. Ӟечен пусйыны луоз "Буммаш", ЭМЗ заводъёсты, "Инко" но "Меди" предприятиосты. Кылем арын Правительствомы "Улон инты" нимо программа кутӥз. Соя учкемын егит семьяослы но улон инты висъяны. Но кызьы со быдэсъяськоз, куке тросэз егит семьяос уждун басьтытэк но ужтэк пуко ке. Егитъёсын ужанъя кун комитет оскытэ: таяз аре выльысь улӟытыны быгатомы МЖК амалэн юртъёсты ӝутонэз. Но та уж пӧрмоз меда, бюджетэ нош ик коньдон ӧз люкаськы ке. Федеральной законэз азьпалтысагес республикаямы 1996-тӥ арын дышетскон сярысь закон кутэмын вал, шуиз С. Решетников. Собере потӥз Правительствомылэн постановлениез выль адямиосты дышетонэз предприятиослэсь но гурт хозяйствоослэсь куронъёссэс лыдэ басьтыса радъян сярысь. Зэмзэ ик, гуртъёслы специалистъёсты дасян умойгес мынӥз. Но промышленной предприятиослэн вузъёсын кусыпъёссы та ласянь сокем ик умоесь ӧвӧл. Вылӥ школаос соос понна специалистъёсты дасяло, нош предприятиос соосты уже уг куто. Озьы ке но, асьме вузъёсын, рыноклэсь куронъёссэ лыдэ басьтыса, ялан выль ужасьёсты дасянъя факультетъёс усьтӥсько. Берпуметӥ кык ар ӵоже гинэ 38 пумо выль специальностьёсъя дышетон интыос кылдытэмын. Дунтэк дышетскон сярысь верано ке, шуиз С. Решетников, асьме республикаын со ньыль ар ӵоже одӥг интылы но ӧз кулэсмы. Нош туэ дунтэк дышетскисьёслэн лыдзы, кылем арын сярысь, одӥг сюрслы йылӥз но. Огъя верано ке, кылем арын интыосы 3700 адями дунтэк дышетскыны кутэмын вал. Та дыре Удмуртиын 10 сюрс адямилы быдэ 212 студент усе, бускель улосвылъёсын ӵошатыса, со тросгес луэ. Журналистъёслэн куремзыя, С. Решетников валэктонъёс сётӥз стипендия тырон пумысен. Федеральной законъя стипендия тыриськыны кулэ "витьлы" дышетскисьёслы, сӧсыр но сирота нылпиослы. Ваньзы соос басьтыны кулэ ичи уждунлэсь кык быдӟалазэ (168 манет 70 копейка). Но мукет студентъёсты жаляса но соослы дурбасьтыса, асьме вузъёслэн ректоръёссы берло аръёсы стипендия тырылӥзы вань ӟеч дышетскись студентъёслы. Валамон ини, озьы тырыса, студентъёс тупатэм стипендилэсь 60-70 процентсэ гинэ басьтылӥзы. Таӵе амалэз прокуратура умойтэмен но Федеральной законэз тӥямен лыдъям. Тӥни озьы табере асьме вузъёс вылӥ законлэсь куронъёссэ чакласа ужаны кулэ. Депутатъёслы кема ужаны ӧз кыльы ни. Кӧня гинэ журналистъёсын пумиськонъёс ӧз ортчылэ, мынам тодэмея, егитъёс сярысь вераськон, оло, нырысьсэ ӝутэмын вал. Республикаямы кутэм законъя егит муртэн лыдъясько 30 аресозь вуымтэос, мукет сямен вераса, та арлыдэ пыро тужгес но мыло-кыдо, утчаськись, осконзэс ыштымтэ адямиос. Оло, та адями кужымез кутыны быгатымтэенымы ик, асьмеос сокем улонлэсь бере кылиськом? Т. БАННИКОВА. Вуылэ пичи дырады 1998-тӥ-1999-тӥ арын 130 ар тырме Шаркан ёросысь Сосновка школалы. Нырысь со земской церковноприходской школа шуыса нимаськиз, собере кык классъем каризы. Революция бере со егит крестьянъёслэн школазы луиз, нош 30-тӥ аръёсы луонлык кылдӥз 7 классъем образование басьтыны. Война азьын школамы уката паськытам - 10 классэз ик пиналъёс татын йылпумъяны быгатылӥзы. Трос пиналъёс тодон-валан басьтӥзы ни татын. Али соос быдэс Россие пазьгиськемын, кин кытын ужа. Пӧлазы вань тодмо адямиос но. Ми соосын данъяськиськом. Школаын дышетскыку, мар но уг луы: шумпотонъёс-вормонъёс но нырысетӥ "2", эшъёсын походъёсы ветлонъёс, шулдыр ӝытъёс, нырысетӥ яратон, нырысетӥ вальс... Аръёс ортчыса тодэ кыле чеберез но умоез гинэ. Тани тон куке но ӟуч кылъя дышетӥсед вылэ йыркуръяськид вал, нош али тау шуиськод. Али валаськод ни, макем тон понна сюлмаське вылэм со. Но шӧдтэк шорысь ваньмыз быре: жингыртэ берпуметӥез гырлы куара, тон потӥськод бадӟым улонэ. Но яратоно школады котьку шумпотыса возьма тӥледды, азьло дышетскисьёссэ. Арлы быдэ, февраль толэзьлэн нырысетӥ субботаяз, со юри тӥ понна вӧлак усьтэ ӧсъёссэ - ӧте пумиськон ӝытэ. Одӥг ӝытлы ке но пичи дырады берытскылэмды потэ ке, лыктэ 6 феврале 7 часын ӝыт яратоно школаяды. Ми, туэ школаез йылпумъясьёс, тӥледлы мӧзмыны ум сётэ. Люба АЛЕКСАНДРОВА, 11-тӥ класс. Шаркан ёрос, Сосновка школа. Шунды "Кыкетӥ дор" Тодэ, мар со: кык муртлы одӥг пукон Гуртэ бертылыса, анайлэсь пӧрамзэ-пыжемзэ сиыса, нош ик Ижевске вуисько. Кык но ӝыны ар ини дышетскисько та городын, улӥсько общежитиын. Сылалтэмен-пыжкемен секыт сумкаосме мырдэм тубтӥсько сизьыметӥ этаже. Комнатаям вуытозь, сюлэмы луб-луб! тэтчаны ӧдъя. Усьтон шальк! вазе но - тани мон улон интыям. Пеймытын (автобусэ бер ӝыт вуэ) киы тыл ӝуатъянэз утча. Шедьтӥ кадь. А-а-а! Тӧдьы клеёнкаен шобыртэм ӝӧк вылтӥ сьӧд тараканъёс бызьыло. Юрӟым. Но асьсэлы ми озьы но туж мусо вазиськиськом: "Стасикъёс" - семья ук. Я, соос утыр пегӟо но, мон дӥсьтысагес дӥсьме куштӥсько. Ну, ӟечбур, кыкетӥ доре! Та комнатаын ми ньыль кузя улӥськом. Ньыль мурт вылысь кык ӝажы но кык пукон сётӥзы. Курыкумы ӧвӧл шуизы, нош огпол складзэс усьякузы адӟим: гурезь мында пуконъёс тузон пӧлын лошъясько. Одӥг пукон вылын кык кузя сиськыса, сиён ӧжытгес мыноз шуизы, дыр. Маин ке тараканъёсты но сюдоно ук, уть тэркыос вискытӥ ӵошатскыса бызьыло. Кемалась ик ӧвӧл котькуд комнатаысь уксё бичазы: "изьверъёсты" быдтон яд, пе, басьтом. Арня ортчыса, со ядэз люкылӥзы. Шумпотыса выжлёгетъёсмес октӥм-калтӥм но котырак тӧдьы порошок пызьнам. Нырысь тараканъёс резь-куаж бызьылыны кутскизы, эсьма, штораос кузя но тубо, йырсиысьтымы сэрпалтӥськом. Собере пегӟизы кытчы ке. Нош кык-куинь нунал ортчыса, выльысь уллёен вуизы. Паймыса киынымы гинэ шонтӥм: инмар лул сётэм бере, мед бызьылозы. Нош уйлы йырамы кышет керттом, соку пелямы уз пыре. Тараканъёс тусьты висъёстӥ гинэ бызьыло ке, шыр макаронмес-кеньырмес но йырйыны кер уг поты - уйбыт йырйиське, коть кеньыр пуйыдэ йыр улад поныса кӧлты. Но ми туж ум куректӥське - тани туннэ но сумка тыр гуртысь ваиськи, арнялы тырмоз. Ма, ку ни та нылъёс вуозы, туннэ берпуметӥез тунаськон нунал ук! Бен, бен, ӵуказе бере экзамен сярысь ӧжытгес сюлмаськисько кадь. Толон тунаськыкум черви корольлэн усемез сюлмаськытэ. Нош сессиез сётыны быгатӥмы ке, экваторез пусйыны бадӟым муг - ӝыныез дышетскон быремын. Ӧжыт ӝожгес но кадь - ку эшшо тазьы шулдыръяськыса, лӧптылыса улод на. Тодэ ваёнъёсы уго умоез гинэ кыле на. Кыкетӥ дор - со кыкетӥ дор, вань-а отын тараканэз, ӧвӧл-а. Азьпалзэ малпаса, мон али ик мӧзмисько кадь та шальтрам койкаелэсь. З. ЗАЙЦЕВА. Выжыкыл тусбуё Можга вордскем дорез кадь дуно луиз Анатолий Кузьмич Леонтьев понна. Пичи Пурга ёросысь Эдэйгуртын вордскем но будэм пияш нырысь дышетскиз Можга педучилищеын, кӧня ке ужаз Вылӥ Кватчи школаын, собере, вылӥ образование басьтыса, пиналъёсты дышетӥз 1, 3 но 10 номеро школаосын. 1971-тӥ арын егит суредась-дышетӥсь лулысь-сюлмысь басьтӥськиз художественной школа кылдытыны, кивалтӥз но соин. Огвакытэ ик сюлэмаз ӝужазы кылбуръёс. 1980-тӥ арын Анатолий Леонтьевез кутӥзы писательёслэн радазы. Со дырозь кылбурчилэн куать книгаез потэмын вал ни. Та дыре Анатолий Леонтьев - Коньы Толя - кызь книгалэн авторез луэ. Гожъяськон удыс быдэсак ас палаз кыскиз ке но, Анатолий Кузьмич суредаськонзэ ӧз кушты. Сое адӟыны луиз Можга городысь библиотекаын усьтӥськем выставкаысьтыз. Акварелен, карандашен, тушен, гуашен лэсьтэм ужъёсысьтыз ("Кезьыт", "Жингрес сӥзьыл", "Зор бере", "Бадӟым толэзь", "Ландышъёс" но мукет) адӟиське, макем яратэ суредась ас вордэм музъемзэ, инкуазез - котькуд турын-куар, сяська, писпу мусояса-маялляса гожъямын-буямын кожалод. Нырысетӥ книгазэ ик Анатолий Леонтьев ачиз суредаз. Со вал 1968-тӥ арын потэм "Мед сяськаяськоз" книгаез. Дас ар ортчыса чебермаз пиналъёслы ик "Лесное чудо" нимсо сборниксэ. Собере туж тыршыса лэсьтэмын вал 1994-тӥ арын потэм "Шумпотон сяська" нылпи сборникезлы суредъёс. Со сяна, Анатолий Кузьмич суредъёсыныз улӟыны юрттӥз Куӟебай Гердлэн "Туриос", И. Гавриловлэн "Жингрес сӥзьыл", Г. Даниловлэн "Кыл дуннее - куное", Г. Ходыревлэн "Чибориё буко" но "Отчего ива говорлива" книгаоссылы. Нош ас кылбуръёсыз вӧзы суредаса, со эшшо но тросгес сюлэм шунытсэ сётэ кадь, чуръёсын-кылъёсын возьматонозэ пырак син азе адскымон каре. Тазьы ик тырше Анатолий Кузьмичлэн нылыз, Ирина Леонтьева. Со атаезлэсь "Ӧтисько кыл дуннее" книгазэ туж мусоесь пиналъёсын тырмытӥз. Нош покчиослы "Букварез" чебермамез понна мукет суредасьёсын ӵош республикамылэн Кун премиезлэн лауреатэз луиз. Кызьы уд шумпоты, нылыд ас сюрестӥд мынэм бере. Кун премиен ачиз Анатолий Кузьмич но пусъемын - 50 арес тырмонэз азьын. Табере тани ортчиз эшшо вить ар. Мар лэсьтэмын со аръёсы - син азьын, выставкаын адӟиське. Выль суредъёс ватсаськизы, выль книгаос гожтэмын - кисть но перо та адямилэн ки улаз люконтэм, таланы луонтэм. Уката шумпотымонэз - Анатолий Леонтьев нылпиос понна нырысьсэ литератураямы кылдытӥз удмурт калыклэн вашкала вакытэз сярысь повесть- легенда - кузьмадёс-дауркыл. Тани куинетӥ люкетэз но йылпумъяське ни кадь. Нош со сяна, Анатолий Кузьмичлэн куинь-ньыль дась зӧкос рукописез ӝикытак папкаын кылле: тужгес пичиослы, бадӟымгес нылпиослы, мӧйы лыдӟисьёслы кылбур бичетьёсыз. Ку ай соос, книгалы пӧрмыса, лыдӟись кие вуозы? Ӝожтӥськыны кулэез ӧвӧл, дыр,- мукетъёсыныз ӵошатыса, А. Леонтьев, оло, ӵемгес печатлаське издательствоосын, - но со дырез азьпалтыны турттыса кадь ужа, эрказъяськыны шӧтам висёнзэ сюрлытӥз кырмыса возе. Зэм, улонэз яратон, та дунне вылэ ас пытьыдэ кельтыны тыршон мылкыд котьмар сьӧлтэтъёсыз ворме. Соин ик Анатолий Кузьмич саесъёссэ пужалляса ужа но ужа... Крезьгур но эшъяське соин. Алнаш пиос Николай Постников но Владимир Соловьев кисьматыса ик лэзё солэн кылъёсызъя "Эх, мынам шаян йыры" кырӟанэз. Нош Вылӥ литературной курсъёсын дышетскыкуз, усто эшъёс шедьтэменыз, ӟуч кылэ берыктэм кылбуръёсызъя гожтэм кырӟанъёс печатласькизы Москваын потэм сборникъёсын, соос пӧлын - "Солнца лучик золотой" (1981), "Звонкоголосые скворцы" (1985), "Песни для малышей" (1986). Огъя вераса, Коньы Толя, Кузьмич (гажаса тазьы гинэ вазисько) - огшоры адями ӧвӧл. Со выжыкыл тусбуё, вормись. Вань улэменыз, тыршеменыз, нюръяськеменыз возьматӥз: адями дуннее юнме гинэ уг вордӥськы. Соин ик туж шумпотоно: таӵе адямиез Можга городын ӝутӥзы, данъязы. Суредъёссэ но книгаоссэ библиотекаын адӟытон эшшо огпол со сярысь вера. Малпасько, ас эшъёсыз, городысь кивалтӥсьёс, педучилищеын, чеберлыкъя школаын дышетскисьёс гинэ со сярысь уз тодэ - ёросысь калык но вуылоз татчы. Нош художник понна соиз но дуно: таӵе выставкаез - нырысьсэ. Т. ПЕТРОВА. Кытын будо зэмос воргоронъёс? Вооружённой кужымъёслэн нуналзы азьын Ижевскын толэзь ӵоже буре ваёзы Быдӟым оже ветлэмъёсты, Атыкай музъеммес утисьёсты. Кызьы ивортӥз городлэн администрациысьтыз Егитъёсын ужанъя комитетлэн тӧроез М. Вострикова, чакламын уно ужрадъёс ортчытыны. Отчы пыриськозы Ижевскысь егит ожгарчиослэн вань клубъёссы, кадетской классъёс, Быдӟым Отечественной войнаысь но Афганистан ожмаськонысь ветеранъёслэн огазеяськонъёссы. Асьмеос дышим ини быдэ вуымтэослэн ваньмон дырзэс калгыса, эрказъяськыса ортчытэмзылы. Соин ик егитъёслэн пайда вайыны тыршемзы, азьланез сярысь сюлмаськемзы шумпоттэ. Паймыса но, оскытэкгес но кылзӥзы журналистъёс егит ожгарчиослэн клубъёссылэн (военно-патриотической клубъёслэн) ужамзы сярысь. Ижевскын соос - 10. Клубъёслэн ужазы 5 сюрс егит пиос пырисько (ӵошатон понна: Ижевскын 120 сюрс быдэ вуымтэос, соос пӧлысь ӝыныез - нылъёс). Татын егитъёсты зэмос ожгарчи луыны, таин герӟаськем шуг-секытъёсты вормыны дышето. Нош "Ожгарчи" клублэн кивалтӥсез А. Межуев шуиз, ми, пе, зэмос воргоронъёсты будэтӥськом. "Ожгарчи" клублэн спортивной кружокъёсаз пиос сӥль-вирзэс кыдато, службаез нуонэн герӟаськем тодон-валанъёс басьто. "Армиын солдатъёс кык ар ӵоже огпол - присяга сётон азьын - автоматысь ыбыло ке, ярам ини. Нош милям пиосмылы арскын кык-куинь пол сыӵе шуд усе, - ушъяськыса сямен ивортӥз на А. Межуев. "Ожгарчи" клуб кадетской классъёсты кылдытонын кичӧлтон сётӥз. Али Ижевскысь пияшъёс понна 24 сыӵе класс ужа ини. Быдэс кадетской корпус кылдытон сярысь ӵектонъёс кылӥськыло ини. Котькинлы сямен ик, "Ожгарчилы" но капчи ӧвӧл туала шуг-секытъёсын нюръяськыны. Парашютистъёсты дасямысь но татын дугдӥзы ини, коньдон ӧвӧлэн. Вылӥ кивалтӥсьёс клублэн тӧроезлы дэмлало пиослэсь кружокъёсы ветлэмзы понна дун курыны. А. Межуев пӧсекъя: "Куд-огезлэн анай-атаез, нылпизэ армилэсь мозмытон понна, коньдон тырыса ветлэ. Нош ми армие мыныны дасяськись пияшлэсь уксё курыны кутском-а?!." Пинал пиослэн пыӵал тӥрлыкен сыӵе вазь тодматскемзы, оло, умой но ӧвӧл. Но... Соос пичи дырысенызы ик автоматъёсын но танкъёсын уйбырто, войнаен шудо. Туала пиослэсь Рэмбо кадь луыны тыршемзэс шонер ӧре гинэ выжтоно. Та ласянь Ижевскысь "Ожгарчи", "Дельфин", "Граница" но мукет военно-патриотической клубъёс номырин воштонтэмесь. Татын ву но тыл пыртӥ потэм пияш, армие вуыса, ассэ ултӥяны но уз сёты, шуг-секытъёс азьын но уз чигна. О. ВАХИТОВА. *** Мон гожтӥсько мӧзмыт верос, Эн гожеръя азьтӥм, кылбур; Мон утчасько ӝожмыт кылъёс - Уггес пӧрмы, йыры но кур: Кылбур, Киме кутыса, Юг листоке кылъёс кизе; Нош ӝож верос Сюлэмам Тӧдьы уммен изе. Кармен-сирень Эгыр выллем мур синъёсы, Паллян бамам - сьӧд мень. Монэ кожад вал юг льӧмпу, Мон вылӥськем сирень. Пӧсь зангари мылкыд пӧлам шунто... Ведь льӧмпуос озьы уг быгато..? *** Т. Пантелеева, Удмурт университетысь студентка. Мар вера нимыд, Такъян? Татьяна. Косъяськись (греч.). Соос туж оскымон адямиос луо. Уг ярато лек но кас муртъёсты. Ас азязы пуктэм ужпумзэс пумозяз вуттыны, усто быдэстыны тыршо. Данэз ярато, адямиосты гажаны быгато. Син азе пуксё Можга ёрос радъяськем дырысен туэ 70 ар тырмоз. Калыклэсь улэм-вылэмзэ ӟеч тодыны луэ интыосысь музейёсын. Узыресь соос Бадӟым Сибыын, Поршурын, Бадӟым Учаын, Пычасын. Учаос туэ озьы ик пусйыны дасясько бӧляксылэсь, авиациысь маршаллэсь, Ф. Я. Фалалеевлэсь, вордскемез дырысен 100 ар тырмонзэ. Можга ёрос узыр дано адямиосыныз, татын вордсикзы писательёс Игнатий Гаврилов, Трофим Архипов, Михаил Коновалов, Михаил Покчи-Петров но трос туала егит гожъясьёс. Соос сярысь но трос тунсыкозэ тодод музейёсысь, син азе пуксё ортчем аръёс. П. АНАТОЛЬЕВ. Лымы букосъёс ӧвӧл Сюресъёсты улон вирсэръёсын ӵошато. Можга палъёсын асфальтэн шобыртэмез гинэ со 200 иськемлэсь уно ини, 100-лэсь тросэз - из сюресъёс. Выль ӵошкыт сюрес миым асфальтэн шобыртэмын Бадӟым Пудгаысен Люга станциозь, тупатъямын Николо Сюгае вуттӥсез, умоятэмын Можгаысь Вавоже но Бемыже нуисьёсыз. Сюресчиос ялан чакласа возё Ижевскысь Казане кошкись бадӟым трассаез но, тулыслы уно сюрс тоннаосын дасямын луо но сылал, соку нош ик 40 иськемез сюрес асфальтэн шобыртэмын луоз. Сюресъёсты возён туж дуно ке но усе, сотэк улон уката шугоме угось. Та вакытэ но вазь ӵукна ик гурето тракторъёс, скреперъёс. Соин ик лымы букосъёсты Можга палан уд пумита. Т. АНДРЕЕВ. Удмурт национальной театр 11 феврале - Н. Сидоров. "Улӥськом-вылӥськом, шу..." кык ёзэн драма. Нылпиослы: 17, 18 феврале - В. Метальников. "Анчутка" ӟуч кылын кык ёзэн выжыкыл. Кутске 10 но 13 часэ. 19 феврале - К. Гольдони. "Кык кузёослэн ляльчизы" кык ёзэн комедия. 24 феврале - Е. Загребин. "Эш-Тэрек" кык ёзэн исторической драма. 26 феврале - А. Григорьев. "Эмезь кисьмаку" кык ёзэн комедия. 27 феврале - В. Метальников. "Анчутка". Кутске 11 часэ. Спектакльёс кутско 18 часэ. Юалляськоно 78-79-81, 78-45-92 номеро телефонъёсъя. Удмурт Республикалэн Кун наградаосъя положенияз ватсанъёс пыртон сярысь Удмурт Республикаысь Кун Кенешлэн Президиумезлэн Постановлениез Удмурт Республикаысь Правительстволэсь "Удмурт Республикаысь дано архитектор" сӥлы карон ним тупатон сярысь ӵектонзэ эскерыса но архитектура но лэсьтӥськон ужпумъёслы бадӟымгес саклык висъян вылысь, Удмурт Республикаысь Кун Кенешлэн Президиумез пуктэ: Удмурт Республикаысь Кун Кенешлэн Президиумезлэн 1995 арын 18 июле юнматэм 36-1 номеро постановлениезъя Удмурт Республикалэн Кун наградаосъя положенияз пыртоно таӵе ватсанъёс: "Удмурт Республикаысь дано эколог" кылъёс бере 12-тӥ пунктлэн "б" люкетаз "Удмурт Республикаысь дано архитектор" кылъёс гожтоно; 13-тӥ пунктэ таӵе люкет ватсано: Удмурт Республикаысь дано архитектор - архитектура но лэсьтӥськон ёзъёсын, проект дасясь организациосын, предприятиосын ужасьёслы но общественной организациослэн ёзчиоссылы, архитектура но лэсьтӥськон удысын бадӟымесь азинсконъёс басьтэмзы понна. Удмурт Республикаысь Кун Кенешлэн Тӧроез А. А. Волков. Ижевск город, 1999 арын 19 январе. � 619-И Усьтӥськымтэ сяська сямен Усьтӥськымтэ Сяська сямен Йырме оши. Лулы тыре... Бен, тон - майсы. Сяська уг бырйы Майсыез - *** Тон кошкод азьлань, Мон берад кылё. Кузь сюрес дурын Туж кема сыло. Йыр - ошиськемын, Зор пыӵа музэ... Сӧсыртэм кион Дунне тыр вузэ. *** Уй. Салкым. Кӧс толэзь Кырмышъя Буш синмын. Огназ лулы Мынам лобе Мурт дуннее Та сьӧд инмын. *** Мон уг юиськы Ӵектэм винадэ. Мон уг кылӥськы Вужмем кылъёстэ. Мон понна тон мурт. Кошкы дорысьтым. ... Уг, уг сётскы пурт - Кошкы. Мын. ТАНЯ ПАНТЕЛЕЕВА, Вуж монья гурт. "Шеп" лэсьтӥське Юкаменск районысь "Шеп" крестьян хозяйствоын паськыт мынэ лэсьтӥськон удыс. Отын уноен пукто улон но ужан юртъёс. Нош алигес йылпумъязы улыно-вылыно социально- культурной юрт ӝутонзэс. Отчы интыяськиз магазин, столовой, кафе. Чебер юртлэсь проектсэ но "Шепысь" лэсьтӥськисьёс асьсэос ик дасязы. Юрт пуктэмын асьсэ дорын поттэм шлакоблоклэсь но кирпичлэсь. Н. СЕРЁГИН. Шунды ТЕСТ Быгатӥськод-а астэ ачид вормыны? Ассэ ачиз вормись мурт улонын бадӟым вормонъёс басьтыны быгатэ, пе. Но со понна трос кужым кулэ. Быгатӥськод-а тон астэ кельшисьтэм ужез но быдэстытыны? 1. Тыныд ӵуказе туж кулэ муртэн пумиськыны кулэ. Кыӵе дыре пумиськыны вераськод соин? а) вазь ӵукна, б) нуназе бере, в) солэсь юало. 2. Эшъёсыд спортивной секцие ветло. Тынад туж мылкыдыд ӧвӧл ке но, гожтӥськоно кариськид. а) арня но уг чида, б) мылы потэмъя ветло, в) котькудаз ветло, туж секыт потӥз ке но. 3. Матысь эшед тамак кыске. Ялан тыныд но ӵектэ. а) юнме тазалыкме быдтыса уг кыскы, б) эскеро, дыр, в) эшъёсы пӧлын гинэ кыско. 4. Анаед шуиз: "Дорысь ужез ӧд ке лэсьты, дискотекае уд мыны" а) вуттӥ ке, лэсьто, б) одно ик лэсьто, в) ӧй ке но лэсьты, номыр уз луы. 5. Тӥ пуны басьтыны малпады. Сое вазь ӵукна ик кыре поттылоно. Быгатод-а ас вылад со ужез басьтыны? а) быгато, б) уг, в) черодэн поттылом: одӥг нунал мон, одӥг нунал атай. 6. Школаысь вуэмед бере, кӧня ке шутэтскыса, басьтӥськиськод-а урокъёстэ дасян борды? а) мылы ке потэ, б) бен, в) уг быгатӥськы асме косыны - яке телевизор учкисько, яке кӧлӥсько. 7. Анаед ческыт торт пыжем. Тон огкутскемен быдэссэ сиыны дась. а) уг, мынам сузэре но вань на, б) кӧня сиеме потӥз сиё, в) уг тодӥськы. 8. Тыныд тунсыко книга сётӥзы. Нокызьы но дугдэмед уг луы ни, но урокъёсыд лэсьтымтэ на, ма карод? а) главалэн пумозяз лыдӟо но урокъёсме дасяны кутско, б) нырысь урокъёсме дасяло, в) кызьы сыӵе тунсыко книгаез пумозяз лыдӟытэк куштод? Валэктонъёс. Юан Валэктон а б в 1 6 0 3 2 0 3 6 3 6 0 3 4 3 6 0 5 6 0 3 6 3 6 0 7 6 0 3 8 3 6 0 0-13 балл. Тон туж азьтэм адями. Астэ номыр но лэсьтыны косыны уд быгатӥськы. Жаль, азьланяз но озьы ик улӥд ке, тыныд туж секыт луоз. Кыдаты астэ - кыӵе ке ужез кужмысь лэсьтыны дышетскы. Шуом, ӵукна вазь султыны, уроктэ дасяны. 21-36 балл. Тон мылкыдъя улӥсь адями, соин ик ас азяд чурыт куронъёс пуктыны уд быгатӥськы. Нуналлы быдэ сямен шуиськод: "Ӵуказеысен кутско", но со дартэд кемалы уг тырмы. 39-48 балл. Туж юн адями. Тыныд троссэ вожъясько. Угось тон ас азяд куронъёс пуктыны быгатӥськод, нокыӵе шуг но секыт ужлэсь уд палэнскиськы. Но куддыръя ӧжытак шутэтскылыны кулэ. Ӧз пӧрмы... Кылем пятницае ортчиз Камбарка ёросысь депутатъёслэн сессизы. Кызь мурт куаразэ сётӥз, администрацилэсь тӧрозэ Владимир Шеимовез ужысьтыз мозмытон понна. Озьы калыкен быръем муртъёс кылем гужем гинэ ёрос кивалтӥсе юнматэм адямилы оскымтэзэс возьматӥзы. Кызьы пусъемын вал, Шеимов урод ужаз налог бичанэз радъян, экономикаез юнматон бордын, бюджетысь коньдонэз кулэтэм иинтыосы эсэпсэ валатэк кутылӥз. Владимир Шаимов Камбаркаын вордскемын ке но, берло аръёссэ Ижын ужаз. Пӧртэм мугъёсъя мылкыд кариз ассэ ёросэн кивалтонын эскерыны. Но... Котьмалэсь урод соиз. Та выллем югдур куд-ог мукет ёросъёсын но кылдэмын. И. КРИЧЕВ. Германиысь фермер дорын Ӝыны ар ӵоже немец семьяын улӥз но ужаны дышетскиз Юкаменск районысь Татарские Ключи гуртысь егит пияш Шариф Арасланов. Дышетске со Ижевскысь Гурт удысъя академиын. Отысь куать эшъёсыныз ӵош кылем арын 6 толэзьзэ ортчытӥз Германиын. Ма выльзэ тодӥз, кыӵе тодон-валан басьтӥз кунгож сьӧрын? Со сярысь Шарифен вераське Юкаменскысь райгазетын ужась корреспондент Лев Сунцов. - Немецъёслэн инкуазез утёнъя огазеяськонзы пыр Россиысь студентъёс ужан практиказэс ортчо Германиын. Ижевскысь сельхозакадемилы миым 7 инты висъямын вал. Со сярысь ялӥзы 3-тӥ-4-тӥ курсын дышетскисьёслы. Студентъёс азе пуктэмын вал кык пумо курон: ӟечгес дышетоно немец кылэз но механизаторлэсь удостоверенизэ басьтоно. Бӧрысьгес вуизы кык фермеръёс, 40 мурт пӧлысь бырйизы 20-зэ. Котькудӥныз нимаз- нимаз вераськизы. Мон туж ик ӧй оскы вал, Германие мынӥсьёс пӧлы шедёнэлы, малы ке шуоно, Починковской школаямы иностранной кылэз ми йӧскадь ӧм дышетэ, со борды умой- умой басьтӥськи, шуыны луоз, институтысен гинэ. Тодон-валанме "витьлы" дунъязы. Ас поннам дышетски на гурт удыслы сӥзем учебникъёсъя но аудиокассетаосъя. Нош механизаторлэсь удостоверенизэ басьтӥ вал школаысен ик. Мынэсьтым юалляськиз фермер Зоммерфельд. Вераськон мынӥз немец кылын. 20 муртэ бырйыса, милемлы дасязы кунгож сьӧры мынон паспортъёс но визаос. Феврале ортчим кыкетӥ быръёнъёсты, таяз учыре тодонлыкмес эскериз фермер Хартвич Менен. Мынэсьтым улон интыме но кыӵе пудо вордэмме юаз. Немец сямен шуген вераськемме адӟыса, фермерлэн басьтэмез уг поты вал, ӵош лыктэм эшез косэмен гинэ соглаш луиз. 20 мурт пӧлысь кылим 7 кузя, 3-тӥ курсысь мон огнам, эшъёсы - 4-тӥ курсысь. Майлэн шораз милемыз ӧтизы Москвае, Тимирязев нимо академие. Россиысь пӧртэм вузъёсысь отчы люкаським 115 кузя. 40 час ортчыса, автобусъёс вуттӥзы Германие. Монэ кельтӥзы Нижний Саксониысь Ганновер город доры, кылемъёссэ нуизы Кёльн но Франкфурт пала. Сётӥзы словарь, тетрадь, улон интыозям билет. Норден городысен монэ фермере пумитаз но нуиз Хагермарш нимаськись гуртаз. Солэн коркаез но 80 гектар музъемез интыяськемын гурт дорысь ӝыны иськемын, Северной зарезен артэ. - Немецкой фермер кельше-а колхозникмылы? - Асьмеос соослэсь 100 арлы бере кылемын ни. Мон улӥ 50 аресъем Карл Людвиг Рафленбойль фермерлэн семьяяз. Ужамезъя сое яке инженер, яке агроном шуысал. Мумы- бубыосыз но фермер вылӥллям. Пизылы 20 арес тырмем бере, солы та коркаез но музъемез басьтӥллям. Улон корказылы, пе, 80 ар ини. Карл Людвиг дышетскемын гурт удысъя мастере, практиказэ ортчем Швециысь фермер дорын. Умой вала котькыӵе техникаез, ачиз гыре-кизе. Будэтэ картофка но тысё культураос (чабей, сезьы, йыды, пудо сюдон бобы). Азьвыл аръёсы пудо но вордэм, но быдэс семьяен сӥль сиемысь куштӥськыса, пудозэс быдтӥллям. Быдэс хозяйствозэ со ас кужыменыз ӝутэм. Маргрет кышноез будэмын рабочийлэн семьяяз. Школа бере дышетскем телеграфисткае, картлы бызьыса, гурт котырысь ужъёсты нуонъя курсъёсты йылпумъя. Дӥськут миське, сиён дася, куинь нылъёссэ будэтэ. 18 аресъем Зилия дышетске вал школаын (отын 13 ар дышетсконо), 16 аресъем Бирта США-ын англи кыллы дышетске. Со дырозь отын ик ар ӵоже англи кылъя тодон-валанзэ будэтӥз Зилия. 10 аресъем Геза ветлэ музыкая огшоры школае. Тол вылтӥ быдэс семьяен шутэтскыло США-ын. Немец сямен вераськыны пӧрмытымтэеным, нырысетӥ кык-куинь арнязэ мон туж юн возьдаськылӥ. Но та семъяын пизы интыын улӥ. Коркалэн кузёез но нылъёсыз, немец кылын сяна, умой верасько француз но англи, нош Маргрет - испан кылын. - Кытчы улыны интыязы, кыӵе уж сётӥзы? - Корказы улыно-вылыно, туж бадӟым. Ваньмыз валаса, быгатыса лэсьтэмын. Мыным висъязы туалетэн, душен, телевизорен, видеомагнитофонэн нимысьтыз комната. Ӝытлы быдэ утялтылӥзы шоколадэн но емышен. Карллэн ужасьёсыз сярысь ке верано, мон огнам вал. Ужан нуналэ 8 часысен 18 часозь кыстӥськылӥз. Озьы ке но, жадемме ӧй шӧдылы - ческыт но ӵем сюдӥзы: 7 час 30 минутэ но 10 часэ ӵукна, нуназеян дыр - 13 часэ, со бере час ӵоже шутэтскон, 16 часэ - нош ик сюдо, 19 часэ - ӝытазеян. Будэтоно культураос пӧлысь валтӥсь инты басьто картофка но чабей, соин ик бусыын сокем трос уж ӧй вал. Картофкаез сямен, чабей чур висъёстӥ но культиваторен бугыртыса возё, тракторе сюбег шинаен нимысьтыз питранъёс тырыса. Чабеез ми сӥзьыл кутсам, гектарезлы быдэ 80 центнер люкаськиз. Вераны кулэ, Карл Людвиг минерал сылалэз но, ядохимикатэз но ужаз уг куты, нош кин удобрение муосаз пыртэ, урожайзэ 120 центнерозь вуттэ. Но со понна фермерлэсь продукцизэ вылӥ дунын басьто. Хозяйствояз 4 колёсной тракторез, огез 24 ар ужа ни. Тырмыт кулэ луись инвентарез. Людвиг соку ик монэ пуктӥз электроникаен ужась выль тракторе. Пудо вордӥсь бускель фермерлы ми юрттӥм гуосы силос тырыны, нош со кузёлы юрттӥз тысё культураосты утялтыын. Фермаысьтыз кыедзэ бусыосамы ворттӥм на. Тӥяськем техникаез отын тупатэ нимысьтыз служба, ужамзы понна коньдон тыриське банк пыр. - Будэтэм урожаез семьязэ сюдыны-вордыны тырмыт-а? - Тырме кадь, но Карл Людвиг котьмалэсь коньдон поттыны дась. Кылсярысь, кык семьялы пуктэм улыно-вылыно корказэ со шутэтскисьёслы сётэ, зарезь дуре вуэм пиналъёс понна кык пони возе. Отысь но коньдон поттэ. Тэк пукемзэ мон солэсь огпол но ӧй адӟы. Ужлэсь ваньмон дыръям сьӧраз городэ басья вал, фермеръёс куремъя, магазинэ картофка но тысь нуллӥм. Но одӥг мешок но мынам ӝутэме ӧвӧл - ваньзэ лэсьтэ техника. Карл Людвиг ялан учкылэ гуртын ужанъя туала машинаослы сӥзем журналъёсты, уксё люкаса, ярамонозэ одно ик басьтэ. - Шариф, нош кызьы, ку тон шутэтскылӥд? - Ӝытлы быдэ сямен пыласькылӥ зарезьын, шутэтскон нуналъёсы лумбытэн отын кыллисько вал. Бускель фермерлэн нылыз милемыз ас машинаеныз нуэ-вае вал. - Германие ветлыса, асьме улон-вылонмы шоры учконэд воштӥськиз-а? - Туэ юн. Отысь мон адӟи зэмос демократиез. Выль канцлерзы сӥзьыл пал ӧдъя вал 6 пфеннинглы бензин дунэз ӝутыны - калык ӧз сёты, пумит султӥз. Асьмеос туннэ нуналэн гинэ улӥськом, 10 манет киямы шеде ке, 9-сэ юыны быдтӥськом. Нош немец, 10 манет басьтыса малпа, кызьы отысь 20 манет поттыны. Соос но юытэк уг уло, но одӥг стакан ӟеч винаен быдэс ӝытэз эшъёсынызы ӵош вераськыса пукозы. Котькытын шӧдӥське вылӥ культура: дэриен-нӧдэн уд наштаськы, уд курмы. Уд пумита ульчаосысь кудӟем ымныръёсты, уд кылы жоб кылъёсты. Со понна котькуд городысь пумиталод азьвыл СССР- ысь потэмъёсты, куд-огез понна немецъёс азьын ӵыжектоно но луэ. - Вераны яра ке, ужамед понна кӧня коньдон тыризы? Выльысь отчы мынэмед потэ на- а? - Чакламъя фермеръёс милемыз быдэсак ас вылазы басьтыны (сюдыны-дӥсяны) но толэзяз 250 марка уждун тырыны кулэ вал. Но Карл Людвиг монэ ас пизэ кадь возиз бере, ужаме но солы кельшиз, ужам понна толэзяз 600 марка тыриз. Отысь мон ваи телевизор, видеомагнитофон, кузьымъёс, люкаськем коньдонлэсь ог люкетсэ дышетскыны кельтӥ. Зэмзэ ке верано, Германилэсь мон мӧзмисько ни. 4-тӥ курсэз йылпумъяса, нош ик отчы мынэме потэ, эшшо но умойгес - 5 арлы кошкыса. Мынэсьтым ӵемысь юало: асьмелэн фермеръёсмы ӝоген-а немецъёсын оградэ султозы ни? Таӵе дыре мон возьматӥсько азьлане, инвис шоры: макем солы матэ вуиськод, инбамез но музъемез огинэ вуттӥсь гож сокем кыдёке кошке. Шунды Золушка Газетмылэн кылем аре потэм 134-тӥ номераз ивортӥм вал, "Учительская газетаен" ялэм "Имею право!" конкурсын Пичи Пурга ёросысь Вуж Монья школаысь Таня Пантелеева вормисе потӥз но Англие мыныны дасяське шуыса. Сыӵе усто кузьым вормисьёслы дасям Москваысь английской посольство. Англиысь бертэмез бере, ми Таняен нош пумиськылӥм. Аслаз адӟеменыз, паймеменыз со тӥледды тодматэ дневникысьтыз чуръёсыз пыр. 2 ноябрь, 1998 ар. Агрыз вокзалысен поезд вырӟиз но туж мӧзмыт луиз. Малы мон сюрес вылэ потӥ? Укное учкыса акыльтӥз ни - нюлэсъёс, нюлэсъёс... Ку пумыз вуоз? Кызьы ке мырдэм умме усиськем. 6 час 25 минутэ Москвае вуим. Часме юри ӧй тупаты. Моньялан али 7 час. Папаен мырдэм редакциез шедьтӥм (милемыз пумитаны юри машина ветлэм, но ми ӧм тодэ). Соин ик метроетӥ ветлоно луиз. Ой, кыӵе адӟем уг пот сое: сыскоз кадь потэ эскалатор. Шимес маке. Нош жетонме куштыку, сюлэмы потыны ӧдъя: коньдонэ кулэ интыозяз уз вуы но монэ пачкатӥз ке? Чаляк потӥсько. Я, редакциез шедьтӥм. Монэ отын кыӵе ке принцессаез сямен пумитазы: котькуд кабинетэтӥ нулло, чай сектало. Кӧня ке улыса, мукетъёсыз но вормисьёс вуизы. Ньыль нылъёс вылӥськеммы. Со нунал ик милемды "Благовест" благотворительной центре нуизы. Тортэн, шоколадэн чаен утялтӥзы... Ням, ням. А эшшо... эшшо милемлы трос-трос шукрес чебер дӥськут но туфли сётӥзы. Парижысь шуизы. Аслым Золушка кадь потыны кутски. Собере мынӥм английской посоллэн аппартаментъёсаз. "Ужас!" - малпасько. - Мон таӵезэ киноысь гинэ адӟылӥ ай. Сыӵе чебер - выжыкылын кадь. Нош милемын королеваосын сямен верасько, быдэс ӟыгыртэт улэп сяська кузьмало... Нош журналистъёс сьӧрамы "позвольте" шуыса бызьыло. Азьтӥмы чилясь подносъёсын официанткаос ветло, адӟылымтэ сиёнъёсын утялто. Сокез йӧэн сёто. Эшшо пӧртэм- пӧртэм винаоссы вал, но мон веръяны ӧй дӥсьты. Вуим гостиницае. Пыд йылысьтым пограсько ни. Маке но мон чеберлы чаль дыши кадь - чильк-вальк кисьтаськись гостиница нокыӵе уг поты ни. Жадемысьтым-а сыӵе. 4 ноябрь 1998 ар. Туннэ туж вазь султӥм. Гостиницамылэн рестораназ сиським. Во- обще! Нырысьсэ веръяй ассорти салат: киви, банан, куинь пӧртэм виноград, апельсин, арбуз - ваньмыз суро - ой, кыӵе ческыт. Со сяна но оломар пӧртэм сиён, басьты, си - мар кулэ. Собере потӥм экскурсие. Ваньмыз та Англиын ни. Ми татчы "Учительская газеталэн" валтӥсь редактореныз Григорий Положевецен лыктӥм. Мукетъёсыз нылъёс Москваысь, Челябинскысь но Иркутскысь. Пуксим кык этажо автобусэ. Коньдон тыроно водителезлы. Сумкаосмес нырысь этаже ӝажы вылэ кельтыны косӥзы. Мон кельтӥ но ачим весь куалекъяса мынӥсько: мынам отын 30 стерлинге! Кин ке лушказ ке, куло. Учкисько, нокин но уг керӟегъяськы, мон но ӧжыт буйгай. Сётъязы наушникъёс. Кнопкаез зӥбиськод но гидлэсь (экскурсия ортчытӥсь муртлэсь) верамзэ ӟуч сямен кылӥськод. Вуим Тауэре. Отӥ вань лёгъёстӥз-гопъёстӥз ортчим. Сомында интереснойзэ адӟи. Жаль, фотое уськытыны ӧз лэзе. Адӟим монархъёссылэсь бриллиантъёсын чеберъям коронаоссэс. Шик! Собере мынӥм шудонъёс вузан магазинэ. Со, пе, Европаысь самой-самой бадӟымез. Музейтӥ кадь ветлӥ - ньыль этажъем магазин тыр шудонъёс. Эшшо вуылӥмы на Дианалэн парказ, сюлэм оломар луыса кошкиз. Лондонэз но Амстердамез самолётысен но адӟи, юри вадьсытӥзы поръямы - сыӵе чебер адӟиське: тылъёс, тылъёс, тылъёс... Табере мон самолётлэсь но, метролэсь но уг кышкаськы ни. Эскалаторез туганме кадь яратыны кутски, лумбыт ворттылысал. Малы меда Ижын метро ӧвӧл? Нош ресторанъёстӥ быдэс улонме ветлӥ кадь. Моллюск-а, лосось-а, адӟылымтэ салатъёс-а, пепси-а - кӧня мылыд потэ, си-ю. Англичанъёс туж ӧжыт сылал сиё, ярато сыр, пӧзьтэм бакча сиёнъёсты. Сырзы, оло, кызь пӧртэм, кыӵеез но ӧвӧл. Гостиница - класс! Москваысеныз уд ӵошаты. Маизлы паймиськем вылэм? Учкы ай, кыӵе валесэ. Тэтчасько, тэтчасько, нош со уката буй-буйгес луэ. Миндэръёс омыр кадь капчи, котькӧня лэзьяськы, мамыкез уг пурӟы. 5 ноябрь. Ӵукна ик ветлӥм англиqской школае. Отын кык ӟуч нылъёс вань вылэм. Ростов-на-Донуысь но Казахстанысь. Школазы туж бадӟым. Соослэн вань дизайнъя, драмая, вуриськонъя, пӧраськонъя урокъёссы. Дышетскыны мыно 5 арескысен. 13 классэз йылпумъяло. Собере мынӥм Национальной музее. Кыӵе отын картинаос! Ренеа, Пикассо, Микеланджело, Рафаэль... Монэ Ренуалэн картинаосыз бордысь мырдэм ишкалтӥзы. Огшоры мазокъёс гинэ кадь, нош кыӵе суред! Лондон кузя пыдын туж трос ветлэмысь лэся, пыдъёсы тӧрназы, пыдкутчанэ уг тэры ни. Бӧрдэме потыса улӥсько ни вал, но мюзиклэ ӧтё шуизы. "Катс" нимаське. Мон абдрамын. Вань адӟемме вераны кылъёс уг тырмо. 6 ноябрь. Туннэ кыӵе ке бадӟым паркетӥ поръям, коньыосты, юсьёсты, дыдыкъёсты сюдӥм. Собере мынӥм королевской двореце. Азьло отын улэм королева Виктория, кыӵе ке Маргарита, принцесса Диана, али - королева Елизавета. Адӟим Елизаветалэсь дэремъёссэ. Класс! Огезлэсь пӧртэм мукетыз: зэмос азвесен, зарниен кисьтаське. Соосты, пе, со одӥг пол гинэ дӥсяллямын. Таиныз сыӵе-сыӵе арын Индие ветлэм, таиныз эшшо кытчы ке. Ой, майбыр. Эшшо возьматӥзы на Викториялэсь кӧлан интызэ, кыӵезэ верай ке, уд оске. Ӝыт ветлӥм зэмос Макдональтсэ. Ческыт ке ческыт ни: биг-маг, узыен мороженой но эшшо, оло, сю пӧртэм ческытъёс. Но мон малы ке мамалэн пирожкиосызлэсь мӧзмыны кутски ни. Татын пыжиськемзы ческыт ӧвӧл. Я, ӵуказе бертӥськом ни, кӧлоно. Дорам чыры-пыры кузьымъёс басьтӥ, 1 пенсуме кельтӥ. Умме усеме уг луы: неужто ӵуказе ваньмыз та чебер выжыкыл быроз? "Луоз на-а со куке, Золушка?" - юасько мон аслэсьтым. ПИНАЛ КУАРАОС Атаелэн мӧзмонэз Мыным кык арес гинэ вылэм ай, куке анаеным атае Шадрасак-Кибья гуртысь Варзи- Ятчие улыны кошкиллям. Соин ик мон со гуртэз уг тодӥськы. Но гужем шутэтскон нуналъёсаз, со монэ мотоциклаз пуктэ но Кибьялась шур дуре нуэ вал. Бакча берамы ик Варзи шур бызе, чорыгъёсыз но вань: карпъёс, юшъёс, уттыос... Нош Кибьяла мынӥськом но, кӧня ке пичиесь карппиосты гинэ поттаськом визнанэн. Шур вӧзын нюлэс. Атае, чорыганы яратӥсь мурт, визнанзэ монэ чакланы косыса, нюлэскы кошке. Кема уг улы отын, берытске. "Малы татчы лыктоно вал, та дырозь бакча берамы кӧня кутысалмы ни", - шуисько. Нош атае "татын чорыгез ческытгес", - шуэ но ачиз пальпотэ. - Нош малы нюлэскы ветлӥд? - юасько. - Мынам отын тодмо писпуэ вань, чакланы ветлӥ. ... Ортчизы аръёс, тодам лыктӥз со верамъёсыз. Кылем гужем атаеным Кибья нюлэскы губияны ветлӥмы. Соку ик со сярысь юай. Возьматӥз со аслэсьтыз писпузэ. Пересьмемын ни со, но лыдӟыны луэ на "К. А. Д." букваосты. Атаелэн со инициалъёсыз. Тодэме потӥз, ку но малы озьы гожтэмез сярысь. Армие кошкон азязы кибьяос, пе, ветло нюлэсэнызы люкиськыны. Отын ик, пе, картофка пыжо, шулдыръясько. Котькудӥзлэн аслаз яратоно интыез вань. Нюлэс пичи гинэ, нош котькуд интылэн аслаз нимыз вань. Паймытэ соиз но: пичи гинэ нюлэс, нош отын куамын куинь турлы куаро писпуос будо. Армиысь бертэм беразы но, пиос отчы дырто. Нош али мынам агае армиысь адӟиськыны бертӥз. Кык-куинь нунал атае Кибьяла чортыса улӥз милемыз. Мар-о весь отчы мынэмды потэ, атай? - юай мон. - Будӥд ке, валалод ай, - шуиз но, тамаксэ аратыса, кыре потӥз. Нош Кибьяла вуэммы бере валай, кыӵе умой адямиос уло отын. Ваньзы милемды доразы ӧтчало, ӟечъясько, ӟыгыръяло. Юртэз но атаелэн быдэс на, ми пырамы отчы. Нош яратоно нюлэсэз сярысь атай быдэс сюрес мадьыса мынӥз. Юра Кибардин. Варзи-Ятчи школа, 8-тӥ класс. Алнаш ёрос. ДАНО АДЯМИОС Артист ӧз ке но луы, калык синмысь ӧз усьы Секыт вакытэ вордӥськиз Пичи Пурга ёросысь Баграш Бигра гуртысь Чибышев кузпалъёслэн витетӥез, берпуметӥез, пизы. Пиналлы Витя ним понӥзы но, вань бускельёссы сое песятаезлэн нимыныз Акон Витя гинэ шуизы. Мар ватонэз, алама аръёс вал со дыре. Война, сютэм улон, курадӟон. Оло курадӟонлы сётскыса, оло мукет муген, вить нылпиё бадӟым семья анайтэк кыле. Озьы Акон Витя укмыс аресысен кык сюрмумыен улоно луиз. Ческыт ӧй вал улон ӧрыз, кӧня курытсэ но секытсэ пельпум вылаз куштӥз со пичи пияшлы. Яратоно анаезлэсь кадь ӧз кылы ни небыт верам кылъёсыз, шуныт киосын тыбырзэ вешамез. Школаысь бертыса, анаез солы гурысь ческыт зыно шыдзэ веръяны ӧз потты ни. Котькыӵе мед луоз сюрмумы, но яратон анайзэ Витялэсь ноку но со ӧз вошты. Секытлы, ёрмонлы сётскытэк, Витя школаын умой дышетскиз. Али но тодаз вайылэ таӵе учырез. Пичи Пурга селоын Алнаш но Пурга школаос куспын художественной самодеятельностья смотр ортчиз. Финише кыкез ик школаос одӥг кадь лыдпусэн вуиллям. Мар карыны? Одно ик кулэ вал кыӵе ке но номер возьматыны. Акан Вити аслаз индейской эктонэныз Пурга школаез нырысетӥ интые поттэм. Сыӵе быгатонлыксэ шӧдыса, ёросысь кивалтӥсьёс Витямылы Ленинградысь театрально- художественной училищее дышетскыны направление сётӥзы. Мылкыд пияшлэн ӧръяськиз, малпаз: одно ик артистэ дышетско. Но шумпотыны вазь вылэм, сюрмумы вазиз: "Уксё ӧвӧл, штаниед но пась. Кыӵе ваньбурен мон тонэ дышетом?"Тӥни озьы, ӧз кылды Витялы кыдёкысь Ленинградын дышетсыны, ӧз кылды солы артист луыны. Но дышетскон сярысь ӧз чигы солэн малпанэз. Дас классэ быдтыса, кошкиз Сарапулысь лесомеханической техникуме. Сузэръёсыз но агайёсыз ӧз куштэ пичи вынзэс, быгатэмзыя юрттӥзы техникумез йылпумъяны. Нош Витя шумпоттӥз соосты ӟеч дышетскыны тыршеменыз. Техникум бере Ижысь сельхозинститутэ пыриз вал, уксёлы ёрмыса, дышетсконзэ ӝыныё куштоно луиз. Собере вал армия, Алнаш ёросысь Варзи-Ятчи сюресэз лэсьтон. Нош 1971-тӥ арысен кутскыса та нуналозь Виктор Петрович Чибышев ужа Ижевскысь "Дормострой" трестын валтӥсь прораб луыса. Ужез аслыз туж кельше, та дыр куспын ноку но ӧз ӝожтӥськылы секытлы. Киосыз но воргоронлэн "зарниесь", кӧня сӧриськем тракторъёс но бульдозеръёс соос пыр потэмын. Нош кӧня машина ёзъёс малпамын но лэсьтэмын. Эшъёсыз одӥг дыре серекъяса верало вал: - Милям ремонт гаражамы Чибышевской тракторной завод кылдӥз. Мар ке лэсьтоно-выльдоно ке, гуртоосызлы но ноку пумит ӧвӧл юрттыны - быгатонлыкъёссэ ватыса уг возьы. Бен, 29 ар ӵоже одӥг интыын ужаса, оломарзэ но лэсьтыны быгатод. Но со вӧзы кулэ на уждэ мылысь-кыдысь яратэм. Виктор Петровичлэсь тыршемзэ юнме ӧз дунъялэ, дыр, сокем вылӥ. Кӧня данъян грамотаосын, вылӥ наградаосын пусъемын со, нош тужгес но бадӟымез - "Знак Почёта" орден. Аслэсьтыз юбилей нуналзэ, 60 арес тырмонзэ, В. П. Чибышев бадӟым вормонъёсын пумита. Артист ӧз ке но луы, улон театрлэн сцена вылаз Акон Витя ассэ шедьтӥз. Т. ПОЛЯКОВА. Кӧня? Бен, кӧня меда лыдъясько туннэ нуналлы Россиын политической огазеяськонъёс? РФ-ысь Юстицияя министерство туэ нырысетӥ январьлы 141 политической огазеяськон пусйиз. Ваньзы соос законъя пыриськыны быгато быръёнъёсы но гражданъёс пӧлын ортчытоно референдуме. Россиысь Кун Думае быръёнъёслэн матэктэмзы шӧдӥське выль движениос, партиос, огазеяськонъёс кылдытонэн валче но. Кылем арын декабре гинэ Россиын куаразэ сётӥз 41 огазеяськон. Со пӧлын Юрий Лужковлэн "Отечество" организациез. Озьы ик вань "Молодые республиканцы", "Российская консервативная партия предпринимателей", "Новые левые" но мукет огазеяськонъёс. Н.РЯБОВ. Воргоронъёс но уг кылё Юкаменск ёросысь "Пышкетский" эштослэн Турчино фермаез кылем арын скаллы быдэ 3537 кило йӧл кыскизы. Нош дояр Владимир Зямбахтин та лыдпусэз 3852-озь вуттӥз. Пудо куайытонын умой азинскон басьтӥзы мукет воргоронъёс но. Юрий Ешмеметьевлэн но Алексей Зямбахтинлэн группаязы ошъёссы уй-нунал ӵоже 839 граммлы йылӥзы. С. ТРИФОНОВ. Азьмынӥсь хозяйствоос: Кезысь сырзавод Кострома сьӧры уисько Кез район туэ июль толэзе пусъе 70 ар тырмон юбилейзэ. Солы дасяськон миым ик кутскиз ни. Котькудӥз предприятие, коллектив, шуг-секытъёс шоры учкытэк, сюлмаське праздник азьын эшшо но ӟечгес ужаны, выль азинсконъёс басьтыны. Та аспӧртэмлыко ӵошатсконын "Кезский сырзавод" АО-лэн - аслаз интыез. Солэн генеральной директорез Анатолий Юрьевич Максимов трос лэсьтэ, азьвыл аръёсы басьтэм данзэс утён но азинтон вылысь. Зэмен но, сыр лэсьтӥсьёслэн поттэм продукцизы табере Удмуртиын гинэ ӧвӧл, быдэс Россиын тодмо, тужгес но Урал котырысь городъёсын но гуртъёсын. Соос кема дыр ӵоже ни Кезысь мастеръёсын кусып возё. Кылем сӥзьыл Москваын ортчиз Россиысь сиён-юон поттӥсь предприятиослэн ужъёссылы сӥзем ярмарка. Кезъёс отчы мыло-кыдо, ас кужымзылы оскыса пыриськизы. Ӧз янгышалэ. Сыр лэсьтӥсьёс пӧлын вылӥ дунъет но зарни медаль басьтӥзы костромаос. Озьы ик луыны но кулэ, дыр, уго соос 120 ар оже та сиёнэз дасяло ни. Нош кыкетӥ интыез но азвесь медалез экспертъёс огкылысь сётӥзы Кезысь сырзаводлы. Ярмаркае вуэм 576 коллектив пӧлысь вормисьёс радэ шедён - со туж бадӟым дан. Тӥни кызьы ужало кезъёс! Синмаськымон, адӟем карымон, ушъяськымон. Та кылъёс сьӧрын - жадёнэз валатэк ужась киос. Сыр лэсьтӥсьёс пӧлын данакез - нылкышноос. Нош тужгес но кема ужасез - Лидия Демьяновна Данилова. Пенсие потыса но, та кышномурт яратоно коллективысьтыз кошкыны уг ӵыды: быдэс улонэз уго солэн татын ортчиз. Лидия Демьяновналы миым сӥзьыл сётэмын сӥё-дано ним. Озьы пусъемын солэн трос аръёс ӵоже быгатыса сыр пӧзьтэмез. - Азьвыл директоренымы, Федосеевен, мон кема ужай. Азьвыл ай ваньзэ сямен киын лэсьтоно вал, ар ӵоже 60 тонна сыр пӧзьтӥд ке, умой ини. Али сюрс тонналэсь ятыр поттӥськом. Юрттэ выль технология. Сырзавод син шорын воштӥське. Л. Д. Данилова ортчемез сярысь, соку секытгес ке но вал ужан условиоссы, одӥг кылын но уг ӝожтӥськы, нош вылезлы шумпотэ. - Сыр 45 нунал ӵоже "кисьманы" выре. Сое ялан берыкъяно, ӟечлыкез, шӧмыз умой мед луоз шуыса. Но али та ужлэсь но каллен-каллен мозмиськом ини: ӵуж плёнкаен бинялтэм сукыри ас понназ вуэ, берыкъяны кулэез ӧвӧл. Бадӟым опытэн мастер ас удысэзъя трос кивоштӥсь будэтӥз ни. Озьы бере Лидия Демьяновналы тау карисьёс вань гинэ. Ми но соос борды итӥськиськом но сӥзиськом тӥледлы юн тазалык, азьланяз но чырткем но таза возиськыны, быгатэмдыя яратоно уждэс азинтыны. Ольга Семеновна Кондратьева ас вакытаз быдэс республикалы тодмо адями вал, УАССР- ысь Вылӥ Советэ депутатэ кык пол бырйылӥзы. Таӵе дан котькудӥзлы уг усьы. Озьыен, оскымон, син шоры йӧтымон нылкышно. Ӵош ужась эшъёсыз со сярысь озьы ик верало. 25 ар ӵоже ог-огдэ янгышатэк дунъяны луэ ни, дыр. Ольга Семеновналэн быдэс семьяез татын ужа: пиез но, кенэз но. Кин тодэ, оло, соослэн пиналъёссы но улонзэс герӟалозы ай сыр, вӧй поттонэн. Озьы медло. Сыӵе ик шуныт кылъёс вераны луоз Татьяна Вениаминовна Корепанова сярысь. Солы оскемын кузятэм (творог), кефир, йӧгурт, йӧлвыл поттон удыс. Ма шуод, небыт нылкышно киос гинэ быгато, дыр, та сиён-юонэз ческыт дасяны. Ӟеч продукциез кужмысь басьтыны косонэз ӧвӧл. Сое басьтӥсь ачиз вала, ачиз быръе. Кезысь сырзавод та ласянь уг шугъяськы, малы ке шуоно, дасям сырлы, вӧйлы но музон сиён-юонэзлы черод уг бырылы, дуныз но уго, Ижын сярысь, ичигес. Малы ке-а пермьёс но мукетъёсыз татчы вожмаськыса лыкто. Кыскем йӧлзэс но соос Кезэ ваё. Нуналаз 100 тоннаозь йӧл вуэ - ваньмыз 5 районысь. Ӟечлыкез, лаборатория верамъя, умой. Сое эскерон бордын ужало кык Иринаос: Васильева но Вихарева. Сыр сукыриосты киын бинялто, тытчы, жаляса верано, автоматика ӧз вуы на. Та ужез нош ик быдэсъяло кышномурт киос: Ольга Главатских, Людмила Поздеева, Галина Сальникова но мукетъёсыз. Татын чупрес выроно, дась продукция тӧласа медаз вуы. Бригада озьы ик ужа: ӝегатскытэк, вис карытэк, ог-огзэс вошъяса но ог-огзылы юрттыса. Сыр лэсьтӥсьёс районзылэсь юбилейзэ пумиталозы ӟеч поттэм сиён-юонэнызы. Со шӧдӥськоз калыклэн но ӝӧк вылаз, празднике вуэм куноос но шӧмъятэк уз кошке. Людмила МЕДВЕДЕВА. Владимир КАМАШЕВ (фото). "Яратӥсько... Уг яратӥськы..." Удмурт радиоез уно аръёс ӵоже кылӟисьёс пӧлын вань меда отын ужасез Галина Лузинаез тодӥсьтэмез? Сыӵеос туж ӧжыт, дыр. Уго та кышномурт - пӧртэм удысэз тодыны тыршись журналист. Туннэ эфирын чузъяське "Мы с вами идём к доктору" передача, ӵуказеяз Галина Ивановна кылзӥсез валтэ гондыр кушысь нюлэс дасясьёс доры, бӧрысь одно ик тодматоз шоркарысь шуг-секытъёсын, микрофон доры ӧтёз Виктор Туганаевез яке Пётр Ёлкинэз. Отӥяз... Отӥяз но луозы трос тунсыко передачаос. Ӵуказе Галина Лузина доры трос куноос вуозы. Мугез но вань уго - вордскем нунал. Ӟечкыласьком ми но! Азьланьын но таӵе ик луэ, Галина Ивановна, паймись но со паймонэз кылзӥсь доры вуттыны быгатӥсь. Дэмласьком тодматскыны журналистлэн одӥг эссееныз. Нимаське со - "Яратӥсько... Уг яратӥськы..." И. ЛЕБЕДЕВ. Яратӥсько сӥзьылэз, пурысь инбамез, но отысь одӥг-ог одно ик шундыез адӟем потэ, со мычиське ке, мон шуисько: "Ӟечбур. Мынам ваньмыз умой". Яратӥсько акшан вакытэз. Соку мылкыд луэ малпаськыны, гожъяськыны. Яратӥсько эрикез. Котьмалэсь зол. Яратӥсько ӟеч сямо, ужез гажась адямиосты, кин быгатэ валаны но юрттыны, жаляны но уродзэ вунэтыны. Яратӥсько юрттыны. Яратӥсько олокыӵе но адямиосын пумиськылыны, аръёс ортчемъя, та мылкыды уг лябомы. Соин ик мон понна пӧртэмез ӧвӧл: коть даурмес мукет пала берыктыны тыршись академик, коть ёрос эмъяськонниысь песянай - ваньзы дуно. Яратӥсько пиосме. Соос - котьмалэсь но ваньмызлэсь кулэез. Соос понна мон улӥсько но ужасько. Одӥг тодмое шуиз: пиналъёсы азьын, пе, пыдес вылам султыны дась. Мон но. Яратӥсько ваньзэ чеберзэ. Бунинлэсь, лэся, лыдӟи: "Мон ишкалтӥ сяськаез, со шуяз. Мон кутӥ бубылиез, со кулӥз мынам кырым пыдэсам. Соку мон валай, чеберлык борды сюлмын гинэ йӧтскыны луэ шуыса". Со дырысен улон шоры мукет синмын учкисько. Яратӥсько быдэс дуннеез но вань калыкез. Сотэк улонмы бездэ, кулэлыксэ ыштэ... Уг яратӥськы адямиослэн кусыпъёсысьтызы кырсез. Уг яратӥськы пӧяськисьёсты. Уг яратӥськы бадӟымъяськисьёсты. Кинлэсь вылӥ луэмзэс возьматыны выро сыӵеос? Уг яратӥськы ужаны быгатӥсь азьтэмъёсты. Уг яратӥськы "небыт валисьёсты". Уг яратӥськы эсэпез валасьтэмъёсты. Уг яратӥськы пыриськисьёсты, кин аслэсьтыз туссэ ялан вошъя. Дунне берытскыны быгатоз, нош сыӵеос котьку "вал вылын" луозы. Уг яратӥськы саптаськем укноосты но ӧсъёсты, пилиськем тэркыосты но куасьмем сяськаосты. Уг яратӥськы на сыномем корт тусо буёлэз. Галина ЛУЗИНА. * Журналист Галина ЛУЗИНА кенеше "Буммаш" заводлэн валтӥсь директореныз Валентин ЖЕБРОВСКИЕН. Шораз - предприятиысь пресс-атташе Владимир СЕНЧЁНОК. Фотоез Г. ЮСАЕВЛЭН Ижевской ульча Пермьын Сыӵе ульча вань бускель Пермь городын. Номырин но со мукетъёсызлэсь сокем уг висъяськы. Отчы интыяськемын ТЭЦ, 10 ар талэсь азьло отчы интыяськиз выль - Южной - автовокзал. Отысь автобусъёс кошко Кунгур палась улосъёсы. В. РОГАЛЁВ. Картофка... тысьлэсь? Асьмелэн Россимы картофка будэтон ласянь азинсконъёсыныз сокем ик ушъяськыны уг быгаты. Тани кылем арын "кыкетӥ нянь" гектарысьтыз 11 но ӝыны тонна гинэ басьтэмын. Нош со дыре ик Европаысь куд-ог кунъёсын со быдӟа музъем вылын ик со ог 45 тонна люкамын. Улӥ урожай басьтӥськом, картофка пӧртэм висёнъёслы сётскемен сэрен. Паласькись висён арысь аре аля, нош музъем емыш ялан кулэсме. Бакча возисьёс тодо: куинь арлы быдэ картофка кидыстэ одӥг пол ке ӧд вошты, солэн удалтонлыкез пумен начармоз. Биотехнической амалъёсты кутыса, кидысэз бен воштыны луонлыкъёс вань ик. Но солы трос дыр но уно коньдон кулэ. Соин ик учёнойёс басьтӥськизы выль амал борды. Со - картофкаез кидысэн будэтон. Помидор тысьлэсь но пичигес кидыс араз ӝыны килограммлэсь уно усто картофка сётыны быгатэ. Но татын ваньмыз ини потэ музъем бордысь но. Отӥяз ини тысьлэсь басьтэм картофкалэсь кык арскын тырмыт кидыс дасяны луоно. Россиысь учёнойёс туэ картофка будэтӥсьёслы дэмлало ай одӥг пумозэ гинэ кидыс. Со гибрид "Золушка" шуыса нимаське. Та картофка арлы быдэ удалтэ. Емышез вольыт, котырес, чимыосыз векчиесь. Картофка 150-250 граммозь будэ. Пудэз вакчи, музъем вылэ уг выды. Гибрид уг сётскы висёнъёслы, чида пӧсез но мускытэз. Картофкаез кема возьыны луэ. Нырысетӥ араз кидыслэсь ӟеч картофка басьтыны луоз 110-150 нуналскын. Сыӵе дыръя сое пырак убое кизёно. Нош гужем 70-80 нунал гинэ кыстӥське ке, картофкаез удатыса мерттыны умойгес луоз. Учёнойёс матысь дыре эшшо 6 пумо кидыс дасялозы. "Золушкаез" будэтон но утялтон, кидыс шедьтон сярысь умойгес тодэмды луоз, кылем арын декабре потэм "Приусадебное хозяйство" но "Новый садовод и фермер" журналъёсын тодматскыса. Н. СЕРГЕЕВ. Ижын но Байгурезь вань Чупчи дурысь Байгурезь сярысь кылылӥзы, вылды, Дэбесэ ноку вуылымтэос но. Азьланьын сое эшшо уноез тодозы. Алигес Ижын ортчиз Дэбесысь потэм адямиослэн пумиськонзы. Соос кылдытӥзы "Байгурезь" огазеяськон. Асьсэлы кивалтӥсе бырйизы дано композиторез Геннадий Корепанов-Камскиез. Малы кулэ таӵе огазеяськон? Ижъёс котькыӵе юрттэт сётозы асьсэ вордскем ёроссылы. Егитъёсты дышетон, вузкаронэз радъян, культураез азинтон - ма, ӧжыт-а азинтоно удысъёс. Луэмезъя Дэбес но юрттоз Иже кошкем бӧлякъёсызлы. Удмурт шаерлэн шоркараз асьсэ огазеяськонзэс кылдытӥзы ни шарканъёс, алнашъёс, якшур-бодьяос, кизнеръёс, Башкириысь но музон интыосысь удмуртъёс. Маин пӧртэмгес "Байгурезь"? Отчы пырыны быгато мукет интыосысь адямиос но, соос кызьы ке герӟаськемын ке Дэбесэн. Кылсярысь, Можга палан будэм тодмо тодосчи (учёной) Михаил Шишкин егит дыръяз кема кивалтӥз Дэбес ёросэн. Сое бырйизы "Байгурезьлэн" ревизионной комиссияз. Лыдъямын ӧвӧл, но Дэбес котькинлэсь уно сётӥз, дыр, артистъёсты, культурая азьвыл министрез Анетта Сидороваез но вераса. Пӧлазы Фаина Будина, Николай Кардапольцев, Евгений Андреев, Валентина Бекманова. Эсьмаса, Валентина Пудовалэн но мумиз Уздумошурысь. Трос тодосчиос, политикъёс, экономистъёс. Тӥни сыӵе кизилиос Дэбес палъёсты уката данъялозы. А. ИВАНОВ. Кенешо Ижевскысь депутатъёс Та нуналъёсы люкаськылӥз Ижевскысь гордумалэн сизьыметӥ сессиез. Депутатъёс огкылысь кутскыса эскеризы Кун Кенеше быръёнъёслы дасяськонэз. Вераськон мынӥз быръёнъёсъя Ижевск городын территориальной комиссиос кылдытон пумысен. Законъя отчы шедьыны кулэ 13 мурт. Соосты дэмлалозы общественной но политической огазеяськонъёс. Туннэ нуналлы ваньмыз сямен соос ас мылкыдзэс веразы ни. Кызьы пусйиз городлэн мэрез Анатолий Салтыков, быръёнъёсъя комиссилы таяз учыре ужаны секыт луоз, малы ке шуоно, Удмурт Республикаын Кун Кенеше быръёнъёсъя выль закон кутэмын ӧвӧл. Отысь ик потозы пӧртэм пумо валантэмъёс но споръяськонъёс. Тае лыдэ басьтыса, гордума сизьыметӥ сессизэ ортчытыны чаклаз 2 нунал ӵоже, солэн вуоно кенешез люкаськоз на 1-тӥ феврале. Отчыозь Кун Кенеш аслаз 23-тӥ сессияз быръёнъёсъя законэз йылаз-пумаз вуттоз шуыса, оскон вань. Ижысь депутатъёс эскеризы на инвестициосъя налоглы кредит висъянэз. Та амалъя 1997-тӥ арысен ужало электромеханической завод но "Буммаш". Соослы кредит чотын висъямын вал 5 миллион манет (туала уксёен вераса). Кыкез но предприятие та коньдонэз быгатыса кутэ производствозэ выльдонэ-паськытатонэ. Жаляса верано, 1998-тӥ арын, доллар дуноямен валче, таӵе юрттэт нокинлы но висъямын ӧй вал. 1-тӥ феврале сессия учкоз Ижевскысь рынокъёслэсь ужан радзэс, кылзоз Эскерон палаталэсь отчётсэ. Озьы ик вераськон мыноз ульчаослэн ӝикытлыксы но налогъёсты тырон сярысь. Л. МЕДВЕДЕВА. Кун Кенешысь иворъёс 25 январе Кун Кенешлэн Тӧроез Александр Волков вуылӥз Глазове. Та городысь администрацилэн покчиосты школалэсь азьвыл визьноданъя отделэзлы 5 ар тырмон юбилейын Александр Волков шуныт ӟечкылаз люкаськемъёсты. "Та нунал асьмеды ваньместы огазея, малы ке шуоно, асьмелэн улонмы нылпиосын герӟаськемын. Асьмеос шумпотӥськом, нылпиосмес оскымон киосы сётӥськом ке", - пусйиз Кун Кенешлэн Тӧроез, Глазовысь нылпи учреждениослэн тужгес усто кивалтӥсьёссылы наградаос сётъякуз. Глазовысь администрациын ортчиз Кун Кенеше быръёнъёслы сӥзем пумиськон. Та нуналэ ик Александр Волков вуылӥз Ольга Дерендяевалэн, 14 номеро школа- колледжысь крезьгуръя дышетӥсьлэн, творческой ӝытаз. *** 25 январе ортчиз Кун Кенешлэн Президиумезлэн заседаниез. Эскеремын Кун Кенеше депутатъёсты быръёнъя округъёсты кылдытон рад. Быръёнъёсъя комиссилэн ӵектонъёсыз шараямын вал. Та ужпум пыртэмын Кун Кенешлэн кызь куинетӥ сессиезлэн повесткаяз. *** 26 январе Кун Кенешлэн Тӧроез Александр Волков Москвае кошкиз, Федерацияя Кенешлэн ужаз пыриськон понна. Отын куамынлэсь уно ужпумъёс эскеремын луозы. Кылсярысь, нимаз адмиослэсь подоходной налог сярысь, нимаз адямиослэсь табышсэс но расходъёссэс эскерон сярысь федеральной законъёсы воштонъёс пыртыны, Россия но Украина куспын кусып возён сярысь огкыл сэрттыны-пертчыны чакламын. Кулэ-а сыӵе "юрттэт"... Туэ Россиысь сиён-юонлы шугъяськись улосъёсы Европаысь юрттэт вуыны кулэ: 1 миллион тонна чабей но 50 сюрс тонна ӟег, 50 сюрс тонна рис, 250 сюрс тонна кынтэм сӥль, 50 сюрс тонна йӧл порошок. Ваньмыз ӝыны миллиард долларлы. Европаысь вуэм сиён-юонъёс - кузьым ӧвӧл, соос калыклы вузамын луозы. Иворъёсъя национальной служба. Кык кеч сьӧры уиськод... Пичи Пурга ёросысь Депутатъёслэн кенешсылэн куинетӥ сессиез кык толэзь пала кыстӥськиз. Мугез солэн таӵе: ёрос администрацилэн кивалтӥсез чутрак пумит луиз депутат мандатэзлэсь куштӥськыны. Нош туала законодательствоя ӵапак озьы луыны кулэ. Михаил Иванович ассэ шонере поттыны тыршиз, Россия Федерацилэн "Россия Федерациын муниципальной служба сярысь" Законэз вылэ пыкиськыса. Но та документ должносте быръем муртъёслэсь правоя статуссэс уг радъя ук. Ӵапак сыӵе должность луэ ёрос администрацилэн кивалтӥсез. М. И. Назаров озьы ик вераны выриз, республикаысьтымы мукет администрациослэн йыръёссы но, пе, депутат луо но "гань-гань" ужало. Нош таӵе югдур возьматэ ини мукетсэ: интыосысь ас кивалтонъя ёзъёс, озьы ик ёрос прокуратураос туала законэз тӥяло. Угось депутатлы ёрос администрациен кивалтыны уг яра. Озьы депутат М. И. Назаров но, законъя учконо ке, администрациен кивалтӥсь луыны уг быгаты. 24-тӥ ноябре сессиын "Законность и правопорядок" группа та ужпумез ӝутӥз. Но, тросэз депутатъёс ужрадэ лыктымтэен, сессия ӧз ортчы. 29-тӥ декабре калыкен быръем муртъёс нош ик люкаськизы. Та дырлы М. И. Назаров депутат полномочиосызлэсь куштӥськон сярысь куриськон гожтӥз. Нош куке тодӥськод, данакез депутатъёс пумит вазьыны уз дӥсьтэ шуыса, кыӵе ке воштӥськонъёслэсь кышканэз ӧвӧл. Зэмзэ но, тросэз депутатъёс М. И. Назаровез депутатысь мозмытыны пумит луизы. Сессилэн ужаз пыриськиз прокурор В. П. Гудцев. Со, законэз тӥясь югдурез алэм интые, люкаськемъёсты оскытӥз, ваньмыз законъя лэсьтӥське шуыса. Соку "Законность и правопорядок" группа валэктыны курыса вазиськиз ёрос судлэн кивалтӥсезлы Б. Н. Горбушинлы. Со рос-прос вераз: кенеш депутатлэсь М. И. Назаровлэсь полномочиоссэ уг кушты бере, озьыен, сое администрациен кивалтонлэсь мозмытоно. Таӵе кылъёс бере куд-ог депутатъёс сазьтӥськизы, лэся. 17 мурт депутатлэсь полномочиоссэ куштон понна куаразэ сётӥз. Кызьы тодмо, таӵе югдур быдэс шаерамы кылдэмын. Пусйыны кулэ: тросэз ёрос администрациослэн кивалтӥсьёссы депутатлэн мандатэныз люкиськизы ни, мукетъёсыз нош азьланяз таӵе вамыш лэсьтоно луозы. Ми, "Законность и правопорядок" группаысь депутатъёс, кыӵе ке бадӟым вормон басьтӥм шуыса ум малпаське. Но уж вылын возьматӥм, депутатъёс кулэ дыръяз администрацилэсь кивалтӥсьсэ но косыны быгато законэз гажаны, интыысь прокуратура но мукет ёзъёс чалмыт уло ке но. Озьы бере, депутатъёслэн кужымзы вань. Ужам-тыршим ке, законъя улом, уждун но, пенсиос но, нылпи пособиос но луозы. Нош со понна бырйисьёс но юн кылзэс вераны кулэ. Ю. НИКИТИН, Пичи Пурга ёросысь Депутатъёслэн кенешсылэн депутатэз, "Законность и правопорядок" группалэн кивалтӥсез. Герд Кытын тӥ, бӧлякъёс? Политклублэн нырысетӥ вамышъёсыз сярысь Кызьы тодмо, "Удмурт кенешлэн" кичӧлтэмезъя, Ижын кылдытэмын Политической клуб. Ма, кивалтэ но соин вице-президент Валерий Митрофанов. Кыӵе тужгес но валтӥсь ужпум сылэ выль ёз азьын? Шоркарын улӥсь удмуртъёслэсь асваланзэс ӝутон, соосты политика улонэ кыскон но озьы асьме калыклэсь кулэяськонъёссэ ӟечгес быдэсъян. Та ужпум капчи ӧвӧл. Городэ кошкыса, удмурт ӵем дыръя гурт выжыоссэ но вунэтыны ӧдъя, выль, туала сямъёслы-йылолъёслы но туж ик дышыса уг вуы. Сыӵе югдурез яркыт возьматэ, шуом, "Удмурт дуннемылы" ик гожтӥськон. Быдэс бадӟым городын улӥсь сю сюрслэсь ятыр удмуртъёс пӧлысь ог 200-эз но уг басьты ворскем кылыныз потӥсь газетэз. Бен-бен, вить сю мурт пӧлысь огез, оло, адӟе ик изданимес! Зол-а? Мон уг вераськы ни, кӧня мурт басьтэ "Кенешез", "Ӟечбурез" но мукетъёссэ. Гожтыны ик возьыт. Калыкез ӝутоно - соиз ваньмызлы валамон. Но кызьы? Кызьы валэктоно удмурт адямилы, быръёнъёс дыръя, кылсярысь, со ас выжыысьтыз потэмъёсызлы ик мед дурбасьтысал шуыса? Удмурт туннэ, валамон ни, бырйисьёсызлы кило вӧй но, сукыри нянь но сётыны уз быгаты. Но сое кивалтон ёзъёсысь воксё уллям ке, ӵуказе кин ке отын тодаз ваёз на меда кытын, кыӵе музъем вылын улэмзэ? Кулэ кароз на-а со "Италмасмес", театрмес, секыт югдуре шедем быдэс калыкмес? Ӵапак та юанъёслы ик валэктон утчаны туртто Политклубез радъясьёс. Жаль, калык уг дырты на солэн ужрадъёсаз. Нырысетӥяз пумиськонын ог 150 мурт гинэ вал. Кыкетӥяз, ӟеч воштӥськонлы оскон вань вылысь, кӧня ке дасо адямилы гинэ тросгес луиз. Ваньмыз сямен - тодмо ымныръёс, мукет удмурт ужрадъёсы ветлӥсьёс, ӵапак соос, кинлы валэктыны кулэ ӧвӧл ни удмуртлык сярысь. Нош кытын выль адямиос, кытын егитъёс? Котькудаз пумиськонын Валерий Митрофанов вазиське: ӧте сьӧрады тодмоостэс, чортэ выжы-кумъёстэс, вае нылпиостэс. Курон та дырозь куронэн ик кыле на. Газет пыр вазиськон но пайдатэк кыле, лэся - "Удмурт дуннеез" Ижын лыдӟисьёс чиньыен лыдъямон бере, кытысь-о потоз толыкез. Куддыр таӵе но малпан кылдэ ни: оло, вазиськоно гуртысь лыдӟисьёсмылы, соос городын улӥсь ӵыжы-выжыоссылы ивортозы, отын "Удмурт кенеш", солэн пӧртэм ёзъёсыз удмурт калык понна ужало шуыса? А-а?.. Политклублэн вуоно занятиез ортчоз Удмурт филармониын ик 4-тӥ феврале. Таяз учыре куное ӧтемын тодмо экономистъёсмы. Вераськон мыноз туала секыт вакытэ экономикаез улӟытон амалъёс сярысь. Тӥляд но мылкыдды ӧвӧл-а та пумысен малпанъёсыныды люкаськемъёсты тодматыны?.. Вераськон-кенешон бере мылкыддэс капчиятоз Культурая училищеысь "Инву гур" фольклор ансамбль. И. ЛЕБЕДЕВ. Яков Моисеевич МАЗО кивалтэ "Удмуртсельстрой" компаниысь директоръёслэн советэнызы. Ӝоген со пусъёз 70 арес тырмон юбилейзэ. Арлыдыз шоры учкытэк, та адями али но котыр ласянь чупрес, сэзь мылкыдо. Яков Моисеевичлэн ужан сюресэз пусъемын орденъёсын но медальёсын, сётэмын "Россия Федерациысь сӥё-дано строитель" ним. Али кин меда лыдъялоз, кӧня улон коркаос, больницаос, школаос пуктэмын шаерамы Мазо сюлмаськемен-бызьылэмен? Ваньмыз пӧлысь тужгес но висъяське кортлэсь но бетонлэсь лэсьтӥськон арбериосты поттонъя Камской завод, Воткинск район гинэ уг, быдэс республика отчы кулэ луись материаллы вазиське. Яков Моисеевич улонысьтыз 50 арзэ сӥзиз яратоно удысэзлы. Кутскиз прорабысен, вуиз "Удмуртсельстроен" кивалтонозь. Огшоры адямиослы памятник уг пукто, Мазолы но со быдӟа дан сётымтэ ай, но солэн нимыз юн герӟаськемын Ижевскысь Ледовой дворецен, Медициная академиен, ӝыны Ижевскен, трос районъёсын. Отын но кылемын Яков Моисеевичлэн кибервылыз, быгатонлыкез, ужаны быгатон амалъёсыз. Вуись юбилеез азьын сӥзём солы юн тазалык, ӟеч ужан мылкыд, шудо-буро улон. Туспуктэмез В. БЕЛОМОРСКИХЛЭН. Лыдӟись вера малпанзэ "Толлоос" но "сьӧрлосьёс" Кулэ на-а соослы оскыны? Кечтакаос сямен ваче люкаськемзы бере, Кун Кенешлэн депутатъёсыз Москваысь кивалтӥсьёс визьмам бере ялӥзы элькунамы 4-тӥ апреле быръёнъёс ортчытон сярысь. Озьыен, матысь кык-куинь толэзьёс ӵоже Кун Кенешысь кивалтӥсьёс калыклэн улон- вылонэз пумысен малпаськыны дыр уз шедьтэ ни. Вань сюлмаськонзы луоз одӥг - ас адямиоссэс депутатэ кандидатэ ӵектон. Тодӥсь адямиослэн верамзыя, али ик ини калыкетӥ, пе, ветло депутат луыны малпась узырчиос, ӵекто дуноесь кузьымъёс. Нош кин-о меда соосты сыӵе уже лӧпкытъя? Шонер: кин ас адямиоссэ Кун Кенеше люканы малпа. Нош мар-о малпало меда та пумысен бырйисьёс, кызьы шуиськом, огшоры калык? Вае бен кенешом со пумысен. Депутатэ выльысь быръемын луыны мылкыд карозы, луоз, алиосыз ужась депутатъёсмы но. Нырысь ик, пӧртэм кивалтон ёзъёсын пукисьёсыз. "Пукисьёсыз" шуыса мон юнме уг вераськы, малы ке шуоно, вить ар ӵоже ужамзы республикамылы номыр но ӟечсэ ӧз вайы. Азьло сямен ик, промышленность но куашка, гурт хозяйство но, куд-огъёссэ колхозъёсты вератэк, мырдэм века, калыклэн улонэз но ялан уродме. Нош кивалтӥсьёсмы? Кудзы-о соос уждунзэс ӝегатэмен, дунъёс будэмен шуге-леке вуизы? Дасо печатьёсын юнматэм кагазъёссы луизы ке но, мон уг оскы, кудӥз ке кивалтӥсь яке бизнесмен аслаз киосыныз но визьмыныз ужаса поттэм коньдонэн улыно-вылыно коттедж пуктӥз яке кунгож сьӧрысь дуно машина басьтӥз шуыса. Сыӵеос узырмизы калык чотын. Калыклэсь коньдонзэ, ваньбурзэ лушканы мурт кисые пыратэк но луэ. Тани, шуом, адями ньыль-вить ар ӵоже кивалтон интыын пукиз. Со вискын нокыӵе ӟеч уж лэсьтыны ӧз ке но быгаты яке ӧз ке но тыршы, солы толэзьлы быдэ, одӥг нуналлы но ӝегатэк, суменак коньдон тыризы. Со коньдонэз уждун шуыны луэ-а? Мон сямен, уг. Со ужаса поттэм маке ӧвӧл ук. Озьыен, со калыклэсь коньдонзэ юнме басьтэм луэ. Маин со пӧртэм лушкамлэсь? Одӥг министр но, одӥг директор но, мукет кивалтӥсь но ӧз вера на, мон юнме шорысь трос коньдон басьтӥсько шуыса. Нош, соос огшоры ужасьёс сярысь, сю пол но, сюрс пол но тросгес басьто ук. Муртлэн кисыысьтыз утчаськыны умой ӧвӧл шуо ке но, куд-огезлэсь эскерыны мултэс ӧй луысал, дыр, кытысь но кин чотын со узырмыны быгатӥз. Тани асьмеос газетъёсысь ӵем дыръя лыдӟиськом Березовский, Чубайс, Черномырдин кадьёслэн калык чотын, солэсь поттэм ваньбурзэ киултыса узырмемзы сярысь. Соос арскын уно миллиардъёсын доход потто. Интыосын но сыӵеос ӧвӧл шат? Зэм, макем улӥынгес кивалтон ёз, сокем ичигес, дыр, озьы узырмисьёслэн доходзы но. Но сыӵеос вань котькытын. Тӥни ӵапак соос котькинлэсь азьло мерско быръёнъёсы но. Азьвыл люкам узырлыксэс, шуныт интызэс ыштэмлэсь кышкам сяна, соос туртто азьланяз уката тросгес киултыны. Тӥни ӵапак сыӵеосты мон нимасько "толлоос" шуыса. Соос мед кылёзы вылэм толло нуналэ, медаз уродмытэ ни ӵуказе улонмес. Быръёнъёс сярысь вераськом бере, асьмеос быръёмы угось ӵуказелы сюрес. Соин ик нокин но туннэ кӧбертэк улыны уг быгаты, ойдо, кинэ ке быръёзы, со ик яралоз шуыса. Шонер гожтэ со пумысен "Удмурт дунне" газетэ (19 январе) Шарканын улӥсь Анатолий Вахрушев. Мон уг вераськы, азьвыл быръем депутатъёсмы, кивалтӥсьёсмы ваньзы лушкаськисьёс, нодтэмъёс яке мукет сыӵе урод адямиос шуыса. Вань соос пӧлын бырйисьёслэсь куронъёссэс, дэмланъёссэс умой быдэсъясь адямиос. Одӥгзэ гинэ дэмламе потэ: куарадэ сётоно сыӵеослы, кинэ тон пыр-поч тодӥськод, кинлы оскиськод. Пумиськонъёс дыръя соослы меӵак юан пуктоно: мар лэсьтӥд тон депутат луыса ужатозяд калык понна, мар лэсьтыны турттӥд ачид понна. Табере тани мар сюлэмшугъяськытэ но, паймытэ но. Асьмелэн кызь вить районмы пӧлысь дас куатяз ортчем быръёнъёсы Кун Кенеше быдэн одӥг гинэ депутат бырйизы. Малпано вал, озьы бере, отчы ас районысьтызы адямизэс ыстыны тыршозы шуыса, кинлы оскыны луоз асьсэлэсь кулэяськонъёссэс быдэсъяны. Озьы ӧз луы. Сизьымысьтыз районъёсысь бырйисьёс шедьтӥллямтэ асьсэ пӧлысь оскымон адямиоссэс. Кун Кенеше депутатэ бырйиллям сьӧрлось адямиосты. Ма, сокем-а начар меда Вавож, Селта, Сюмси, Яр но куд- ог мукет районъёс ӟеч тодӥсь-валась, оскымон адямиосын? Яке соос малпазы-а, сьӧрлось кивалтӥсез бырйим ке, со районлы тросгес юрттыны быгатоз шуыса. Элькунысьтымы котькудӥз кивалтӥсь депутатэ бырйытэк но ас удысэзъя котькуд районлы юрттыны кулэ. Собере Удмурт Элькунлэн Конституцияз (78-тӥ статья) шуэмын ук: "Кун Кенешысь депутатъёс уг быгато... кун властьлэн быдэсъясь органъёсаз должносте кутэмъёс луыны". Нош асьмелэн депутатъёсмы пӧлын министръёс но, мукет кивалтӥсьёс но вань гинэ. "Сьӧрлось" адямиос депутатэ быръемын озьы ик Глазов, Воткинск городъёсъя. Вунэтыны кулэ вылымтэ мукетсэ но. Тани элькунамы улӥсь калыкъёс пӧлын 30 процентэзлэсь уно удмуртъёс луо. Нош Кун Кенешысь сю депутат пӧлын чылкак дас куатез гинэ удмуртъёс. Ӵем дыръя соослэн кужымзы уг тырмы калыкмылэн улон-вылонэныз герӟаськем туж кулэ ужпумъёсты но быдэсъяны, соин герӟаськем законъёс но кутыны. Мон сямен, бырйисьёс, тужгес но удмуртъёсыз, азьланяз сое лыдэ басьтыны кулэ. Азьвыл быръёнъёсын сямен ик, таяз но пыриськозы пӧртэм партиос но движениос. Татын но бырйисьёс медаз йыроме вылэм. Пыр-поч тодматсконо соослэн программаосынызы. Табере чебер кыланы-бураны, кӧяны-вӧяны ваньмыз дышемын. Чакласькытэк оскись муртэ соос Кам шур йылэ но вуттозы. Кин улон-вылонмес калыклэсь кулэяськонъёссэ лыдэ басьтыса выльдыны малпа, экономика, культура, тазалыкез утён, калыкез дышетон но мукет удысъёсын Конституциен сётэм правоосмес юн быдэсъяны кыл сётэ, кинэ азьвыл но али ужъёсызъя ӟеч тодӥськом,- тӥни соослы оскыны кулэ. Ма тани неужто оскисьёс луозы на быдэс странамес куашкатэм, калыкез бырон калэ вуттэм "демократъёслы"? Мар малпаса туннэ соос пала кариське Ижевсклэн мэрез А. И. Салтыков? Чик но валантэм. Улон-вылонмылэсь кудпалзэ гинэ уд басьты - котькытын ӝомыт, оскон тылсиос чик но уг пишто ни. Тани котькуд ар кутскыку, Кун Кенешысь тӧромы оскытэ: экономикаын кутскоз азинскон, 2-3 процентлы ӝутскоз производство. Нош уж вылын - арысь аре уллань гылӟон. Туэлы но ӟеч планъёсты ум адӟиське. Бен, рынок дыръя, пе, кыӵе планъёс луозы на. Экономикая министр Е. М. Аверьянов алигес вераз: тодмо ӧвӧл ай, кӧня коньдон висъялоз федеральной власть, сотэк шуг вераны, кызьы азинскоз экономикамы. Республиканской программаос данакез сюбегатэмын луозы. Му вӧй поттонэз радъянын но нокыӵе радыз ӧвӧл. Кунгож сьӧры ветлэмзылы быдэ кивалтӥсьёс автозаводэз улӟытыны выль "эшъёс" шедьто: я Италиысь, США-ысь, Кореяысь, собере Япониысь, табере Германиысь. Нош уж вылын - огшоры супыльтон. Кызьы-о азьланяз ӟеч улонмылы оскод на, вузъёс поттон ялан синэ, нош дунъёслы нокыӵе серметъёс ӧвӧл ни бере. Татын но тӧлъя шонаськон шӧдӥське. Журналистъёсын пумиськыкуз, дунъёсъя но тарифъёсъя комитетлэн кивалтӥсезлэн воштӥсез Е. Агафонов шуиз: асьме дорын дунъёс, бускельёслэн сярысь, улын медаз луэ, сотэк вань вузъёсмы сьӧрло кошкозы. Юан кылдэ: малы бен кулэ та комитет, дунъёсты радъян ласянь номыр лэсьтыны уг быгаты бере? Оло, Вузкаронъя министерство но кулэтэм маке гинэ. Кивалтон удысын кӧня сыӵе кулэтэм макеос. Соос калык чотын уло ук. Москваын кивалтон ёзын ужасьёсты кулэстон сярысь верасько ке, асьмелэн солы арысь аре мултэс коньдон висъяське. Но со сярысь калыклы шонерак вераны малы ке мылзы уг поты. Тани Кун Кенешлэн депутатъёсыз асьсэос но уг тодо, кӧня коньдон кошке татысь аппаратэз возьыны, кӧня уждун басьто отын пукисьёс. Тӥни таӵе улон-вылонмес кӧня ке но умоятон понна, вылӥын верай ини, Кун Кенеше быръёно республикамылэсь экономиказэ, калыклэсь улонзэ ӝутон но азинтон сярысь зэмос сюлмаськись адямиосты. Соос мед быгатозы йӧспӧртэм реформаосты выль сюрес вылэ выжтыны. Шонер гожъяз Шарканысь Анатолий Вахрушев: калык понна сюлмаськись депутат ӧм ке быръе, ӟеч улонэ ум вуэ. Кызьы шуо, мае кизёд, сое ик аралод. Василий МИХАЙЛОВ, журналист. Складъёс бушесь Ортчемзэ арез азинлыко йылпумъяз Ижысь механической завод. Нырысь ик быдэсак ворсамын уждун тырон. Ар ӵоже 15 пол сётэмын толэзьем уждун. Озьы ик кылем арын вузъёсты мукет странаосы келян йылӥз 20 процентлы. Электроинструментэз дасян бордын ужась конструкторъёс-технологъёс вуззылэсь ӟечлыксэ дунне вылын тупатэм куронозь вуттӥзы. Озьыен, туэ со уката но тросгес поттэмын луоз. Огкылын вераса, предприятиын поттэм ваньмыз сямен вуз басьяськисьлы келямын. Али складъёсын ӧвӧл ни электроинструмент, кухняын кутӥськись комбайн, газэн ыбылон пистолет, компрессоръёс, пӧйшуран пыӵалъёс. Директорлэн приказэзъя учкемын уждун тырон. Озьы туэ нырысетӥ кварталэ шоро-куспо уждун 900-950 манетозь вуоз, нош арскын - 1100-1200 манетозь. Н. БОРИСОВ. Укмыс нунал нюръяськизы Сомында нунал ӵоже ӵошатскизы Ижевскысь ветеранъёс, шахматэн шудонъя вормисьёс пӧлы потон вылысь. Нырысетӥ группаын (55-60 арлыдъемъёс) кужымзэ эскериз ньыльдон воргоронъёс. Отын ик вал 55 ареслэсь мӧйы нылкышноос но 60 ареслэсь бадӟым воргорон. Нюръяськизы солэсь бадӟым арлыдо шахматистъёс но. Ӵошатсконзэс огдыре огкадь очкоен вить мурт йылпумъяз. Очкоосты ватсаса лыдъям-чотам бере гинэ тодмо луиз вормисьлэн нимтулыз. Озьы мӧйы арлыдосс пӧлысь Ижлэн чемпионэз луиз спортъя мастер Иоганн Вельтмандер (6 но ӝыны очко). Мукет интыос люкемын тазьы - Гартий Ермаков ("Темп"), 2-тӥ ТЭЦ-ысь инженер, спортъя мастере кандидат Виталий Акименко, спортъя мастер Владимир Федосеев но Виктор Меркульев (кыкназы ик "Темпысь"). Нылкышноос пӧлын нырысетӥ но кыкетӥ интыосты люкизы (9 луоноез пӧлысь 4 но ӝыны очко люкаса) Удмуртилэн азьвыл уно пол чемпионэз, Россиын ортчем нюръяськонъёсы ветлэм шахматистка Зинаида Иютина ("Темп") но "Ижсталь" акционер огазеяськонысь планово-экономической бюролэн кивалтӥсез Ильсия Вольникова. Укмыс луоноез пӧлысь 6 очко люканы быгатӥзы шахмат удысэн "кивалтӥсьёс" - спортъя мастере кандидат, Удмуртиысь шахмат федерацилэн председателез Юрий Клейменов, Ижевскысь шахмат федерацилэн тӧроез Вячеслав Пикулев. Ӵошатсконъёсты радъяны коньдонэн юрттӥз Ижевскысь "Октябрь" культурая дворецлэн директорез Владимир Красноперов. Столицаысьтымы кужмоосыз шахматистъёс городын нырысетӥ инты басьтон понна нюръяськыны кутскозы 7-тӥ февральысен. И. ШАХОВ. Ужтэк пуко егитъёс Ужлы ёрмон котькытын сямен ик тужгес но вӧлмемын Можгаысь егитъёс пӧлын но. Куинь сюрс пӧлысь ӝыныезлэсь уноезлы 30 арес но ӧвӧл на. Со пӧлысь тросэз дышетскемъёс. Нош ӝыныез азьвыл ужысьтызы кошкемын ас мылкыдзыя. Йылэ ужтэк арлэсь кема пукемъёслэн лыдзы. С. ПЕТРОВ. Удмурт Республикаын дунъёсты радъян сярысь Удмурт Республикаысь Праивтельстволэн Постановлениез 1999 арын 25 январе Ижевск город � 91 Калыклы улон-вылонын юрттэт сётонъя удыс ласянь утьымтэ калыклэсь кулэяськонъёссэ утён но дунъёслэсь эсэпсэ валатэк будэмзэс возён понна, Удмурт Республикаысь Правительство пуктэ: 1. Юнматоно сиён-юон поттӥсь предприятиослэсь тужгес бадӟым оптово-отпускной дунъёссэс йӧллэсь таӵе сиён-юон понна: мертаса тырем йӧл 2,5 процент вӧйын - 3 манет 50 коньы 1 литрез понна; вышкыысь, бидонысь вузано йӧл 2,5 процент вӧйын - 3 манет 40 коньы 1 литрез понна мертаса тырымтэ вӧйтэк кузятэм - 11 манет 50 коньы 1 килограммез понна; мертаса тырем вӧйтэк кузятэм - 12 манет 1 килограммез понна; мертаса тырымтэ йӧлвыл 20 процент вӧйын - 14 манет 1 килограммез понна; мертаса тырем йӧлвыл 20 процент вӧйын - 14 манет 50 коньы 1 килограммез понна. 2. Юнматоно розницаен вузкарись предприятиосын, асваньбурез кызьы кутэмзы но кыӵе ведомствоысь луэмзы шоры учкытэк, розницая дунъёслэсь вылӥ быдӟалазэс йӧллэсь таӵе сиён-юон понна: мертаса тырем йӧл 2,5 поцент вӧйын - 4 манет 20 коньы 1 литрез понна; вышкыысь, бидонысь вузано йӧл 2,5 процент вӧйын - 4 манет 10 коньы 1 литрез понна; мертаса тырымтэ вӧйтэк кузятэм - 13 манет 80 коньы 1 килограммез понна; мертаса тырем вӧйтэк кузятэм - 14 манет 40 коньы 1 килограммез понна; мертаса тырымтэ йӧлвыл 20 процент вӧйын - 16 манет 80 коньы 1 килограммез понна; мертаса тырем йӧлвыл 20 процент вӧйын - 17 манет 40 коньы 1 килограммез понна. 3. Удмурт Республикаысь Гурт хозяйствоя но сиён-юонъя министерстволы, Удмурт Республикаысь Вузкаронъя но улон-вылонын юрттэт сётонъя министерстволы юнматоно 1- тӥ пунктын верам сиён-юонэз поттонъя квотаосты но соосты ивортоно йӧллэсь сиён-юон поттӥсь предприятиослы. 4. Удмурт Республикаысь Вузкаронъя но улон-вылонын юрттэт сётонъя министерстволы городъёсысь но ёросъёсысь администрациосын, Удмуртпотребсоюзэн ӵош тупатоно вузкарись предприятосын, мертаса тырымтэ йӧлэз, йӧл вылэз, вӧйтэм кузятэмез вузан понна. Сиён-юон поттонъя пичи предприятиослы, Удмуртпотребсоюзлэн предприятиосызлы сяна, уг яра сиён-юон поттыны сётэм сыръёслэсь продукция поттыны. 5. Удмурт Республикаысь Правительстволэн 1998 арын 30 декабре юнматэм "Удмурт Республикаын дунъёсты (тарифъёсты) радъян сярысь" 1244 номеро постановлениезлэн 1- тӥ но 2-тӥ пунктъёсыныз юнматэм радэз, кудӥз йӧл промышленностьлэн продукциезлэсь дунъёссэ радъя, кужымзэ ыштэмен лыдъяно. 6. Та постановленилэсь быдэсъяськемзэ эскерыны косоно Удмурт Республикаысь Гурт хозяйствоя но сиён-юонъя министерствоез, Удмурт Республикаысь Тарифъёсъя но дунъёсъя кун комитетэз, Удмурт Республикаысь Вузкаронъя но улон-вылонын юрттэт сётонъя министерствоез. Удмурт Республикаысь Правительстволэн Тӧроез П. Н. Вершинин. Герд Одӥг писпулэн вайёсыз Ӵош кариськом - тросгес лэсьтом Кызьы тодмо, асьме дорын кылдытэмын ни пӧртэм выжыосысь потэмъёслэн огазеяськонъёссы. Соос пӧлысь одӥгез - "Одо Мари Ушем", Удмуртиысь поръёслэн союззы. Солэн ужъёсыз син азьын. Кылем тулыс Ижын пор кырӟанъя но эктонъя фестиваль ортчиз. Октябре вал туала пор эстрадной кырӟанэз яратӥсьёслэн ӵошатсконзы. "Одо Мари Ушем" пыре "Элькун" общественно-политической огазеяськонэ. Шаерысьтымы пор калыклэн улэм-вылэмез сярысь вераны ми курим Анатолий РАДЫГИНЭЗ. - Анатолий Ильич, макем трос калык пыриське поръёслэн огазеяськонзылэн ужаз, кыӵе ужпумъёс пуктӥськоды тӥ ас азяды? - Кык ар ӵоже улэм-вылэммы возьматӥз, таӵе огазеяськон юнме шорысь ӧз кылды шуыса. Туннэ нуналлы вань ни интыосын ужась дас куать ёзмы. Октябре егитъёсмы огазеяськизы "Ӟардон" дэменлыке. Соин кивалтэ гурт хозяйствоя академиысь студент А. Виноградов. Поръёс огазе кариськыса ужало Каракулино, Алнаш, Завьял, Пичи Пурга ёросъёсын, Ижевск, Сарапул, Воткинск городъёсын. Нимысьтыз пусйыны кулэ Грах районэз. Татын уго кык сюрслэсь ятыр поръёс уло. Озьы ке но, ёросын пор кылэз школаез йылпумъятозь дышетӥсь одӥг школа но ӧвӧл. Унояз гуртъёсын, отын уно выжыосмы вань вылысь, вордскем кылмылы дышетон радъямын ӧвӧл. Соин ик калык йылолъёсмы но пумен ышыны ӧдъяло. Таӵе югдур, шонерзэ верано ке, нокинэ ик туж уг сюлмаськыты кадь. Соин ик огазеяськонмылэн валтӥсь ужпумез луэ пор калыклэсь культуразэ утён но азинтон. - Милям чакламмыя, ужъёсты пӧлын берло аръёсы адскымон ортчо "Семык" праздникъёсты... - Гырон-кизён ужъёсты йылпумъямлы сӥзем шулдыръяськонъёсы калык, зэм но, пумен тросгес пыриське. Адямиос кыстӥсько ог-огзы доры. Но озьы ӧй луысал, калык сямъёсты улӟытон борды азьмынӥсьёсмы рос-прос ӧз басьтӥськысалзы ке. Сыӵеос пӧлын - А. И. Искаков, А. С. Морозова, Т. И. Семикеева (Грахово ёрос), Р. И. Токмурзин (Каракулино ёрос), А. И. Коростин (Сарапул город) но мукетъёсыз. Но туннэ мынам уно вераме потэ быдэстымтэ ужъёс сярысь. Соос трос. Тани кыкетӥ арзэ ми ум быгатӥське ни асьме Правительстволэсь но Кун Кенешлэсь валэктон басьтыны. Ужпум со бордын. Грах ёросысь поръёс вазиськизы Бадӟым Ерыкса гуртэз Татарстанысь Менделеевск районысь Ильнеть гуртэн герӟан сярысь куронэн. Сыӵе сюрес калык кусыпъёсты радъяны туж юрттысал. 1994-тӥ арын ай Удмурт Республика басьтӥськиз "Удмуртия" ГТРК-ын пор кылын передача возьматонэз радъяны. Дыр ортчиз, нош малпан чакламъя ӧз быдэсмы. "Поро Кас" кӧня ке пол потаз но... ышиз. - Анатолий Ильич, тӥляд огазеяськонды республикаысь мукет объединениосын но кусып возе ук. Ма, собере Удмуртилэн палэнысьтыз поръёсын но зол эшъяськиськоды кадь? - Кусыпъёсмы умоесь. Калыкъёслэсь эшъяськонзэс юнматон но асьмелэсь кулэяськонъёсмес утёнъя кыӵе ке но амал шедьтон вылысь, ми огазеяським "Элькун" блоке, кытын валтӥсь инты басьтэ "Удмурт кенеш". Нош ӵыжы-выжыосынымы, поръёсын, эшъяськеммы сярысь верано ке, та ласянь лэсьтэмез ичи ӧвӧл. Юн кусып возиськом Татарстанысь, Башкортостанысь, валамон ни, Марий Элысь бӧлякъёсынымы. Алигес тодматским финнъёслэн одӥг огазеяськонэнызы. Мон тодӥсько, ми ай сюреслэн кутсконаз гинэ, азьпалан туж трос ӟечез вите. Сюлэм шумпотэ, адямиослэсь асьсэ улонзэс умоятыны тыршемзэс адӟыса. Кылем арын концертэн потамы Грах ёросысь Мари-Возжай гуртэ. Татын кылдытэмын ӟеч музей, люкамын уно материал, вань асьсэлэн калык ансамбльзы. Ми вуылон нуналэ гуртын ортчиз огъя ӧтчам. Соку ик гуртоос кенеш бырйизы. Отчы 19 тужгес но гажано адями пыриз. Урод шат, сыӵе ужъёс огшоры улӥсьёслэн мылпотэмзыя радъясько ке? Мынам малпамея, Кун Кенеше быръёнъёс ортчытозь кылдытоно вылэм Удмуртиын улӥсь калыкъёслэсь ассамблеязэс. Со юрттысал асьме огазеяськонъёслэсь кужымзэс огинэ ӧръяны. "Удмурт кенеш" огазеяськонлы газет пыр вазиськон "Удмурт дунне" газетлэн туэ 19-тӥ январе потэм номерысьтыз лыдӟим Банниковалэсь "Кин туэ басьтоз Ашальчи Оки нимо премиез?" гожтэмзэ. Ми валам, та премия нылкышноослы гинэ сётӥське шуыса. Озьы ке но, огкылысь но огымысь шуим: "Ашальчи Окилэн одӥг гинэ вордэм пиез Валерий Иванович Карачев!" Малы озьы меӵак вераны дӥсьтӥськом но быгатӥськом? Ашальчи Окилэн музеяз 11 ар ужаса, Валерий Ивановичен гожтэт пыр кусып возьыса, солэн тыршемезлы но сюлмаськемезлы дунъет сётыны быгатӥськом. Нырысь ик, В. И. Карачев анай-атай юртсэ музей усьтом шуэмысьтызы кузьмаз калыклы, нокинлэсь одӥг коньы но курытэк, анай-атайёсыз сое 1952-тӥ арын дуно дунын ке но басьтӥзы вал. Нош Валерий Иванович кинлы ке вузасал ке та юртэз, туннэ Ашальчи Окилэн улэм коркаезлэн пытьыез но ӧй кыльысал ни, кызьы ке луиз Грах ёросысь Кузёбай гуртысь вордӥськем юртэныз. Музейлэсь калыклы кулэлыксэ коньдонэн лыдъяны но, мертаны но уг луы. Будӥсь нылпиос понна со - лулпушъет. Кыкетӥез, кӧня тодон басьтӥм ни ми Валерий Ивановичлэн гожтэтъёсыз пыр Лина Григорьевна сярысь. Ведь со ваньмыз удмурт калыклэн историяз кылёз. Тодосчиослы ужаны капчигес луоз. Тае адӟыны луэ, А. А. Ермолаевлэсь дышетӥсьёслы но дышетскисьёслы "Ашальчи Оки" нимо пособизэ лыдӟыса но. Валерий Иванович Карачев, анаез кадь ик, востэм адями. Ӝожъяськонлы солэн мугъёсыз, валамон ни, вань гинэ, ачиз уг ке но вера. Республикаын но, ёросын но кӧня пол пусйылӥмы ини анаезлэсь юбилейёссэ: ноку но, нокин но пиезлы ӟечкылан но, ӧтён билет но ӧз лэзья. Вань ортчись но ортчем ужрадъёс сярысь Карачев тодэ музейын ужасьёслэн гожтэтъёсысьтыз но бандерольёсысьтызы. "Удмурт дуннелы" милям бадӟым осконмы: тӥ пыртӥ чалякгес вырӟытыны быгатом, дыр, "Удмурт кенешын" ужасьёслэсь сюлэмзэс. В. И. Карачевез кызьы ке но пусйыны кулэ вал шуыса, ми трос пол вазьылӥським ини "Удмурт кенешлэн" ёросысь ёзаз. Но малы ке туннэ нуналозь но куаразы уг кылӥськы. Та гожтэтмы ӝожтӥськон ӧвӧл. Бадӟым курон! Ашальчи Окилэсь премизэ воргоронлы сётыны уг луы ке, Куӟебай Герд чик но пумит ӧй луысал, вылды, гажано эшезлэн пиезлы премия сётонлы. В. И. Карачев вордӥськемын 1930-тӥ арын, дышетскемын Казаньысь университетын, Ленинградысь аспирантураын. 1961-тӥ арысен улэ Владивостокын. Инкуазез чакласа уямын куинь океанъёстӥ, пӧртэм зарезьёстӥ. Ог 30 странае вуылэмын. Та шара гожтэтэз-вазиськонэз гожтӥзы Ашальчи Окилэн музеяз усьтэм дырысеныз ужасьёс Людмила Ивановна Посадова но Наталья Михайловна Фадеева, кыкмы но районысь дано гражданинъёс. 1999-тӥ арын 20-тӥ январе Алнаш черкогурт. "Шинель сётӥзы, мон дӥсяй..." (калык кырӟан) Москваысь М. С. Щепкин нимо Вылӥ театр училищеез йылпумъяса, Драмая удмурт кун театре вуизы пинал актёръёс. Соос пӧлын ик - Михаил Васильев. Зэм, сцена вылын егит пияш тямыс толэзь гинэ ужаны вуиз. Мылысь-кыдысь шудӥз "Эмеспиос" спектакльын, "Сказ о скоморохе и царе Горохе" выжыкылын. Миым, май толэзе, армие кошкиз. Службаез ортче Пермьын. Труппаысь эшшо ньылез пинал актёръёс армиын. Таосыз мугорзэс кыдато Киров, Тюмень, Чита, Пермь улосъёсын. Ачиз Михаил Васильев вордӥськемын но будэмын Пичи Пурга ёросысь Вуж Монья гуртын. Миым, толсур толэзе, актёр армилэсь шутэтскыны вуылӥз. Бертон нуналаз ик мон сое театрысен пумитай но тусбуйзэ кагаз вылэ пуктыны чаклай. Пӧрмиз таӵе суред. Тӥ азьын - Драмая удмурт кун театрысь пинал актёр Михаил Васильев. Л. ПРОЗОРОВ. Бӧляк Политклублэн заседаниосаз азьланьын ӧтьыны чакламын Правительстволэсь Тӧрозэ Павел Вершининэз, удмурт министръёсты, мартэ татчы асьсэос сюрес лёгозы, вылды, депутатэ кандидатъёс. Отӥяз вераськыны пусъемын асьме кылэз азинтон пумысен. Огзэ пумиськонэз сӥзёзы писательёслы. Малпанъёс трос. Но соосты быдэстон понна кулэ уно адямиослэн валче ужаны мылкыдзы. Египет чуръёс 5. Берло вакыт Дауръёс ӵоже сяськаяськись Египет пумен лябомиз. Фараон Рамсес ХИ (оло нош Рамсес ХИИ) кунэз шоры урдскылӥсьёслы пезьдэт сётыны ӧз пишмыты ни. Со вал Египетлэн берпуметӥ фараонэз - ас кузёез. Тушмонъёсын котыртэм калыклы юрттыны соглаш луиз Македония кунлэн эксэез Александр Македонский. Асьме вакытлэсь азьвыл 332-тӥ арын солэн кивалтэмез улсын эллинъёс (грекъёс) лыктӥзы Египетэ. Со дырысен кунэн асьсэос египетъёс ӧз кузёяське ни. Та вакытэз ик нимало бер эксэйлык (ӟуч сямен - позднее царство). Пусйыны кулэ на тани мае. Вашкала Египетлэсь ортчем сюрессэ оглом вить люкетлы висъяськомы ке но, со кельше уно пол позыръям гозылы. Шуом, туала Каир доры пирамидаос инъямын вашкала эксэйлык дыре - 4 сюрс 500 ар талэсь азьвыл. Ачиз Каир Египетлэн шоркарез луиз асьме вакытэ гинэ. Озьы бере, со сярысь вераны луысал кыкетӥ медёнам но, таяз люкетын но. Пӧртэм вакытъёсын герӟаськемын музон городъёс но. Абу-Симбел городэз кылдытӥз выль эксэйлык дыре улэм быдӟым фараон Рамсес ИИ. Нош ньылетӥ мадёнам Абу-Симбелэз рос- прос ӧй поттылы. Малы ке шуоно, таиз город бадӟым инты басьтэ кызетӥ даурын но. *** Рамсес ИИ малпаз Нубия нимо кунын, Абу-Симбелын, туж бадӟым храм лэсьтыны. Отын, пе, мед кузёяськоз куинь инмар - Амон-Ра, Хармакис но Птах. Храм пуктэмын ӧвӧл гранит юбоослэсь. Со инъямын, меӵак из гурезез кораса - тӥръёсын, кукчоосын, ожонъёсын. Пасьталаез 38 метр, мурдалаез 65 метр. Городысь квартирамылэн из борддораз одӥг сантиметр гутё лэсьтыны но курадӟиськом. Нош татын - 65 метр! Скульпторъёс Пиаэй нимо кузёзы косэмъя храм азе инъязы фараонлэсь ньыль мугорзэ. Котькудӥз 20 метр ӝужда, пельысен пелёзь 4 метр, ымыз 1 метр кузьда. Соос, Рамсесэз данъям сяна, пельпумъёссы вылын возё быдэс храмлэсь секталазэ. Гурезьлэн шорсюлмаз, 65 метре пырыса адӟиськод ньыль мугорез. Артэ пуко инмаръёс Амон-Ра, Хармакис но Птах. Ньылетӥез бен кин? Валамон ини - Рамсес ИИ. Со ассэ но инмаръёс радэ инъяны курем. Тӥни малы вашкала кылбурчиос гожъязы: инмар выллем быдӟым Рамсес ИИ. Храм лэсьтэмын туж аспӧртэм. Арскын кык пол, 21-тӥ мартэ но 21-тӥ сентябре, 5 час но 58 минутэ шунды си ӧсэтӥ меӵак пыре храм пушкы, 65 метре, кызь минутскын югдытэ Амон-Раез, Рамсесэз но Хармакисэз. Собере храмысь кошке. Малы уг йӧтылы ньылетӥ инмар - Птах - борды? Мугез тодмо. Таиз - пеймытлэн инмарез, шунды улэ шедьыны солы сьӧлык. Рамсесэз архитекторъёс музэн ик данъязы кылбурчиос но. Огез, Пентаур нимо маке, рос-прос маде фараонлэн хеттъёсын ожмаськемез сярысь. Витетӥ арзэ кивалтыкуз, сое алдазы тушмонъёсызлэн медооссы-шпионъёссы - бедуинъёс - Африкаетӥ чиганъёс музэн калгисьёс. Фараон сюриз соослэн кульчоязы - 2 сюрс 500 колесница вискы. Солы дурбасьтӥсьёслэн 75 колесницазы. Кышкыт учыре сюрем эксэй вазиське Амон-Ра инмарлы, тодаз вайытэ солы 30 сюрс ошен вӧсяськемзэ, гранитлэсь храмъёс но синпелетъёс пуктэмзэ. Инмар юрттэ хеттъёсты пазьгыны. Музъем пылаське вирен. Шӧйёс вискы пыдэз нокытчы пуктыны. Фараон нялтас данъяно кариськиз Нефертари кышнозэ но (эн суралэ Нефертитиен). Солы сӥзьыса лэсьтылӥз пичи храм ( 10 метр пасьта). Зэм, ньӧмыз понна таиныз кузёяськиз Хатхор нимо кышномурт-инмар. Египетысь одӥг нылкышнолэсь но мугорзэ ӧз инъяллялэ храм азе. *** Уно сюрс аръёс ӵоже сылӥзы Нил вӧзысь та синпелетъёс. Кызетӥ даурлэн шораз Египет СССР-лы вазиськиз: юрттэлэ шурез ӵыпыны но электростанция лэсьтыны. Озьы ӝутскиз Асуан тымет. Храмъёслы кышкытлык кылдӥз. Соос кыльыны кулэ ву улэ. Паймымон кун Атлантида васькиз, пе, зарезь улэ, музъем зуркаку. Нош татын адями ас киыныз быдтоз шат сыӵе дуно узырлыкез? ЮНЕСКО юрттыны куриз быдэс дуннеез. Трос дэмланъёс пӧлысь бырйизы шведъёслэсь ӵектонзэс. Храме но вӧзысьтыз из гурезе 17 сюрс гутё портӥзы, отчы сир выллем маке но андан бодыос пыртӥзы. 33 тонна сыӵе лякон кулэ луиз. Из табере уз пырды ни. Храмез но гурезез уно сюрс люкетлы вандӥзы. Котькудӥз кыске 30 тонна. Соосты 90 метрлы вылэгес ӝутӥзы. Уно зоремен но Нил чакламлэсь ӝоггес ӝутскемен, ужъёсты сэрытгес радъяно луиз. 1965 арын Рамсес ИИ но, Нефертари но интыяськизы выль интые. Уно сюрс аръёс ӵоже сямен ик, шунды сиос огдырлы югдытӥзы куинь инмарез, вужере кельтӥзы Птахез. Озьы Абу-Симбалысь храм пӧрмиз вашкала но туала Египетлэн огъя синпелетсылы. 1965-тӥ арын мон газетъёсты лыдӟисько ни вал. Нош малы ке чик ӧй тодылы Нил дурын сыӵе бадӟым ужъёсты. Вуж газетъёсын алигес юри бугыръяськи. Пал кыл но ӧй шедьты. Юри ватӥллям-а, мар-а. Асуан тыметэз ӝутыны Египетлы СССР юрттӥз. Асьме страна ик кышкытлык кылдытӥз дано храмлы. Таин валче Союзэз быдэс дунне ӧз пыкылы меда? Маин валэктод асьме странаысь печатьлэсь чалмыт улэмзэ? *** Египетысь мон быдэс килограмм пала кӧльыос ваи. Пирамидаос выжыысь но, шундыен сутэм нёжалысь но, мукет интыосысь но. Чарпаос люкакум, Россиысь эшъёсы шорам учкылӥзы быльккес синъёсын. Табере куректӥсько: малы меда ичи октӥськем? Соосты кузьмай тодмо историклы Маргарита Гришкиналы, Пичи Пурга ёросысь пинал шаерчилы Ольга Никитиналы, Алнаш ёросысь дышетӥсьлы Аркадий Прокопьевлы но мукетъёсызлы. Егит кырӟась Анна Плотникова сыӵе изме басьтӥз но кӧня ке толэзь ортчыса шуиз: - Аллахлы оскись шаерысь ваем маке асьме инмарен герӟаськем муртлы шуд уз вайы, веразы мыным. Солы валэктоно луи: Египет - мусульманъёслэн гинэ кунзы ӧвӧл. 10 процентэз копт нимо адямиос - христианъёс. Тросэз ик ӧз кылылэ: дунеысь тужгес вашкалаез христиан черк туннэ но сылэ Египетын. Со вӧзын - пичи епархия. Кызьы кылдӥз со? Асьме вакытэ 500-тӥ аръёс котырын христианстволы дурбасьтӥсь Византия кунэн кивалтӥз эксэй Юстиниан. Со косӥз Синай шормуӵысь Джебел Катрина нимо гурезе ньыль сэрего юртъер (базилика) пуктыны. Берлогес таиз луиз Преображение черк. Александр Македонскийлы сӥзем Александрия городын, Египетлэн шоркараз, улӥз патриарх Евтихий. Со тазьы гожъяз вылӥ верам гурезь сярысь: та инты, пе, паймымон кужым сётэ, соин ик татчы лэсьтоно Христослэн мумизлы Мариялы сӥзем часовня. Пичи черк интыын берлогес ӝутскиз святая Екатерина нимо монастырь. Со пӧрмиз нокинэн басьтонтэм крепостьлы. Монастырьын али возё туж вашкала мудоръёсты но гожтэтъёсты. Бен, туала Египет - мусульман город. Лыдтэм-чоттэм мечетъёс, муллаос, толэзь пусъёс. Но ум вунэтэ: аллахлы татын оскыны ӧдъязы асьме вакытэ 639-тӥ арын гинэ, Христос вордскем бере, куинь даур ортчыса. Египетын улэ ог 40 миллион адями, Каирын - 12 миллион. Отын чик но мурт уг каро христианъёсты. Еврейёс вӧсясько асьсэ синагогаосазы. Африкаысь тужгес бадӟым городын уд адӟы юэмъёсты, уд пумиськы лушкаськонэн. Таин мон йылпумъясько Египет сярысь мадёнъёсме. Лыдӟисьлы маке выльзэ сётыны быгатӥ ке - шумпото. Ӧй ке - вожзэ медаз вайы. Вашкалаос шуылӥзы: мон лэсьтӥ кӧня быгатӥ, кин быгатэ - умойгес мед лэсьтоз. АЛЕКСЕЙ ШКЛЯЕВ. Абу-Симбелысь дано храм. Египетысь православие пырись черкъёс. Туала Каир. Герд Шулдыр пумиськон Толсур толэзе Вотка ёросысь Кукуи гуртын ортчиз районысь удмурт коллективъёслэн "Шулдыр пумиськон" шуыса нимам шутэтскон ӝытсы. Сое лулысь-сюлмысь дасяны тыршизы "Дыдык син" удмурт клублэн активистъёсыз. Пумиськонэ ӧтемын вал вань гуртъёсысь делегациос. Куд-ог эшъёс лыктыны ӧз быгатэ, малы ке шуоно, кузёос-тӧроос калыксэс татчы вуттыны сокем ӧз сюлмаське уго. Нош тыршисьёсыз машина но, бензин но шедьтӥзы. Ас калыкез понна сюлмаськисьёс пӧлы пыртыны луоз районысьтымы Верхняя Талица гурт администрацилэсь тӧрозэ Перевозчиков Кронид Серафимовичез. Ужрадэз усьтӥз Кукуи гурт администрацилэн тӧроез Г. Н. Меньшикова. Ёросамы удмуртлыкез ӝутон сярысь малпанъёссэс веразы на татын Е. А. Лушникова, Т. И. Бочкарева, К. С. Перевозчиков. Собере вал концерт. Быгатэмзэс возьматӥзы Кукуи клубысь удмурт драматической коллектив, отысь ик удмурт кырӟанъя ансамбль но Вотка городысь "Тюрагай" ансамбль. Концерт бере шулдыръяськон вал. А. ПЕРЕВОЩИКОВА. Вотка ёрос. СИЁН-ЮОН ПОТТОН Ӝӧк вылды тыр медло Шаерамы сӥль сиён дасясь предприятиос пӧлысь одӥгез бадӟымез луэ "Сарапульский мясокомбинат" огазеяськон. АО-ен кивалтэ егит специалист Геннадий Березнев. Со вань ужъёсты быгатыса радъя, тужгес но умоесь кусыпъёс тупатӥз сӥль сётӥсь хозяйствоосын. Озьы комбинат, 3 сюрс тонна интые, арлы быдэ ичизэ 4 сюрс тонна пӧртэм колбаса поттэ. Сиёнзэ данак интыосын басьто. Алигес Геннадий Березневен пумиськылӥз но, кӧня ке юанъёс сётъяз газетлэн корреспондентэз Геннадий Романов. - Геннадий Михайлович, дыр ӝог ортче, кызьы йылпумъяды кылем арез? - Зэмзэ но, дырез уд кортна. Со туж чаляк ортче. Тани выль арлэн одӥг толэзез быре ни. Нош 1998-тӥ ар сярысь ке верано, оглом сое урод ӧм йылпумъялэ. Но туж жаляса верано луэ, огсыр ужаны ӧм дыше на. Оло тросгес политикаен шудӥськом, оло экономикаез куашкатӥськом. Верасько мон миым 17 август сярысь. Со милемлы бадӟым шуккет луиз. Сӥльлы дун 2 поллы йылӥз, нош доллар - куинь поллы. Кинлы со кулэ? - шуг валаны. Тани ми сентябре шорлыдын одӥг килограмм сӥлез 12 манетэн ке басьтӥськом вал, табере со лыдпус 24-ёзь вуиз. Огласянь учконо ке, сӥль будэтӥсьёслы, хозяйствоослы умой луиз. Соос та удыслэсь, быдэсак пудо вордонлэсь пайда басьтыны быгатозы. Нош мукет ласянь, магазинъёсы, калыклы кыӵе дуно колбаса вуэ. Озьы басьяськисьёслэн лыдзы чутрак синӥз. Асьме Правительство нокызьы ӧрзэ уг шедьты. Ведь кемалась тодмо ни вал, сӥль но йӧл поттон изъян вае, асдуныз вылӥын. Шат уг луы вал дунтэмгес продукция поттонэз радъяны, асдунзэ кулэстонъя ужрадъёс кутыны. Малпаськыны кулэ вал. Ведь Россиын визьмо учёнойёсмы (тодосчиосмы) экономистъёсмы юн трос. Соос нырысь ас кылзэс вераны кулэ вал. Соос, шӧдске, мукет амал уг шедьто ни продукцилэсь дунзэ будэтон, манетлэсь кужымзэ лябӟытон сяна. - Я бен ӵок со кӧня ке политикаен герӟаськемын. Нош тӥ хозяйственник. Кин но кытысь тӥледлы сӥль вуттэ, кытчы вузаськоды колбасадэс? - Удмуртиысь 16 районысь хозяйствоос ваё, Татарстанысь - 12, Башкортостанысь но Киров областысь - 8 район. Ваньзэ вераса, 276 хозяйствоен ужаськом, кусыпъёс возиськом, соос поставщикъёсмы луо. Но тросгес сӥль вутто Сарапул, Каракулино, Кияса но мукет районъёс. Тани районысьтымы "Кигбаевский" парсь вордон коплекслы пудо сиён басьтыса сётӥськом. Со милемлы сӥль вае. Продукцимес данак интыосын басьто. Колбасамес вузаськом бускель Башкортостанэ, Пермь областе, Татарстанэ, Свердловске, Красноярск крае но музон азе. Трос мынэ Сарапулын но районын, умой басьто каракулиноос, камбаркаос но мукетъёсыз. - Геннадий Михайлович, кӧня пумо колбаса лэсьтӥськоды, кыӵезэ калык яратыса басьтэ? - Ми 50 пумо колбаса, ӵынатэм сӥль но мукетсэ поттыны быгатӥськом. Но али 15-20 пумозэ гинэ лэсьтӥськом. Дунъёс будэмен, адямиос уногес басьто пӧзьтэмзэ но "ливерная" колбасаез. - Азьланезлы кыӵе осконды? - Кызьы бен сотэк улод. Али консерваос лэсьтон цех пуктӥськом. Конечно, со туж секытэн мынэ. Оборотной средствоосмы чик ӧвӧл, шуыны луоз. Калыклэн куанермемез ми вылын но зол шӧдӥське. Нош сӥль вузасьёс азьло ик коньдон куро. Гуртын улӥсьёс туж ичи сӥльзэс сёто, ваньмыз пӧлысь 1 процент гинэ луэ. Соин ик поставщикъёсын кусыпъёсмес ялан умоятӥськом. Выль арез но ӵош пумитаськом. Дорамы 150 хозяйствоослэн кивалтӥсьёссы но отысь зоотехникъёс ветлӥзы. Куатетӥ арзэ таӵе ужрад ортчытӥм ни. Ӵуказеезлы осконмы бырымтэ. - Нош асьтэлэн улонады мар верамонэз, шумпотымонэз вань? - Выль ар азьын кыкетӥ пие вордскиз, 30-тӥ декабре сое но кышноме роддомысь ваи. Озьы тазэ арез бадӟым семьяен пумитам. - Асьтэлы но, быдэс семьядылы но мылкыд карисько юн тазалык но шудо улон. Таӵеез ӧй вал на "Можгинский" акционер огазеяськонысь пудо вордӥсьёсты шаерамы ӟеч тодо. Татын куке но ужаз Социалистической Ужысь Герой Елизавета Иванова. Солэсь данзэ уг уськыто туала егитъёс но. Нош алигес быдэс ёрослы паймымон ивор вуиз: Антонида Романова ортчем арын утялтоно скалъёсызлэсь быдэн 5152 килограмм йӧл кыскем. таӵеез ёросын ой вал на. А. СИБИН. Журналистъёсын пумиськонъёс Депутатъёслы пӧсь йӧтоз Депутатъёсты али сюлмаськытэ одӥг ужпум: кызьы ортчозы Кун Кенеше вуоно быръёнъёс? Со сярысь вераськон лэчыт ӝутскоз, дыр, 28-тӥ январе ортчоно сессиын но, шуиз Александр Семёнович Борзенков, Кун Кенешысь Законъёсты быдэсъямез чакланъя, калыкез кышкытлыклэсь утёнъя но гражданъёслэн правооссыя ялан ужась комиссилэн тӧроез. Лыдӟисьёсмылы валамон ини, мар бордын али сокем куашето депутатъёс. Вераськон мынэ Кун Кенеше быръёно депутатъёслэн лыдзы сярысь. Кӧня мурт быръёно: 100 яке 130? - Мынам малпамея, 100 лыдпус вылэ дугдоно,- шуиз А. Борзенков.- Алигес Москваын ортчиз быръёнъёслы сӥзем кенешон. Отын верамын вал, Россилэн пӧртэм улосвылъёсаз депутатъёслэн лыдзы кулэсме шуыса, котькытын 100 пала возиське, нош Москваын тани 30 мурт гинэ быръемын. Асьме республикаын Кун Кенеше быръёнъёсты туэ 4-тӥ апреле ортчытыны чакламын. Со дырозь ӝегатскытэк кылдытоно быръёнъёсъя округъёс. Нош малы уг яра кельтыны азьвыл тупатэм округъёсты? - Зэмзэ но, озьы туж лякыт луысал,- валэктӥз Александр Семёнович.- Но уг луы. Куд- ог округъёсын бырйисьёслэн лыдзы я будӥз, я кулэсмиз. Кылсярысь, Ижевскын, 40 округ интые, 41 округ кылдытоно луоз, угось Ленин районын бырйисьёслэн лыдзы трослы йылӥз. Нош Быръёнъёс сярысь законъя соослэн лыдзы округын 10 процентлы воштӥське ке, округлэсь быдӟалазэ но выль сямен тупатоно луэ ни. Округъёсты кылдытон - со туж бадӟым уж, угось соин герӟаськемын кӧня куара бичаны быгатоз депутатэ кандидат. Быръёнъёсъя валтӥсь комиссия ваньзэ сое лыдэ басьтыны кулэ. Быръёнъёсъя законэз тӥямен сэрен куд-ог интыосын, шуом, Владивостокын, туж валантэм учыръёс луыло. Кызьы валэктӥз А. Борзенков, асьме депутатъёслы таяз сессиын туж пӧсь йӧтоз, угось соослы юнматоно вуоно депутатъёслэсь лыдзэс но, округъёсты но. Нош куд-ог адямиос сессилэсь ужан радзэ юри тарканы туртто. Кылсярысь, соос дасясько сессия азе таӵе ӵектонъёсын потыны: Кун Кенешлэсь Тӧрозэ А. Волковез али ик ужысьтыз мозмытон но быръёнъёсты ортчытон нуналэз мукет дыре выжтон сярысь. Сыӵе шудонъёс соослы кулэ, ас адямиоссэс кун кивалтонэ пуктон понна. Уг валаськы, шуиз А. Борзенков, малы куд-ог адямиослэн сокем кивалтэмзы потэ. Т. БАННИКОВА. ПРАВИТЕЛЬСТВОЫН Дунъёслэн будэмзылы пумит Правительстволэн Тӧроез Павел Вершинин министръёсын кенешонын нырысетӥ интые пуктӥз сиён-юонъёслы дунъёсты радъян ужпумез. Йӧллэсь продукцилы дунъёсты кулэстоно, пусйиз со. Крестьян калыклэсь йӧлзэ басьтыса, нокин медаз узырмы. Колхозъёс но молокозаводъёс куспы посредникъёс чуртнаськизы ке, со экономикаез куашкатэмен лыдъяськоз. Колхозъёс, молокозаводлы сяна, кинлы ке мукетызлы йӧлзэс вузазы ке, сыӵе хозяйствоос кун ласянь юрттэт уз басьтэ. Гуртоослы - юрттэт Правительстволэн Президиумез эскериз агропромышленной комплекслэн ужпумъёсызъя проектъёсты. Кылсярысь, крестьянъёслы кизёнэз но уборкаез ортчытонын, туэ толалтэ тырмыт сӥль-йӧл поттонын юрттэт сётонъя ужпум сэрттэмын-пертчемын, ӟеч кидыс но ядохимикатъёс басьтон вылысь, коньдон висъяны чакламын. Асваньбур - оскымон киосын Удмурт Республикаысь Асваньбуръя кун комитетлэсь ужамзэ эскеронлы йылпумъянъёс лэсьтэмын. Кылем арын комитетлэсь ужамзэ эскеризы Ижевскысь Октябрь ёросысь налогъёсъя инспекция, Россиысь Коньдон ужпумъёсъя министерстволэн Удмурт Республикая управлениез, Эскеронъя кун комитет, Удмуртиысь прокуратура. Та организациосысь муртъёс эскеронъёслэн йылпумъянъёссы сярысь ивортӥзы, вань тырмымтэос та нуналлы палэнтэмын ини шуыса веразы. Вераськисьёс пусйылӥзы, кунлэн оскем муртъёсызлэн акционер огазеяськонъёсын ужамзылы нимысьтыз саклык висъямын вал шуыса. Асваньбуръя кун комитетэз косэмын Удмуртиын кунлэн асваньбуреныз кивалтонъя концепция кылдытыны. Быръёнъёсъя комиссиын воштӥськонъёс Правительстволэн Президиумез мозмытӥз Виталий Андреевич Волковез Быръёнъёсъя комиссиын быдэсъяно ужъёсызлэсь, сое Удмуртиысь Вылӥ судлэн судьяеныз юнматэмен валче. Быръёнъёсъя комиссие пыртэмын Александр Николаевич Скобкарев, Правительстволэн аппаратысьтыз Интыосын но аскивалтонъя ёзъёсын кусып возёнъя управлениезлэсь кивалтӥсьсэ. Правительстволэн Тӧроез Павел Вершинин пумиськиз Великобританилэн Екатеринбургын генеральной консулэныз Стивен Харрисонэн но Великобританилэн Москваын посольствоысьтыз кыкетӥ секретарен Чарльз Лондейлэн. Кызьы ивортӥз Харрисон, Удмуртие со лыктӥз, вузкарон удысын кусыпъёс тупатыны но республикалэн экономикаяз инвесторъёсты кысконъя луонлыкъёсты утчаса. Со пумиськиз Ижевсклэн мэреныз Анатолий Салтыковен, промышленной предприятиослэн, Удмурт кун университетлэн кивалтӥсьёсынызы. Правительстволэн Тӧроезлэн секретариатысьтыз пресс-центр. Ошмесо шаерын чылкыт вуэз уд шедьты Удмуртиысь Инкуазь узырлыкъёсъя но инкуазез утёнъя министерство кылем арын ужамезлы йылпумъянъёс лэсьтӥз но туэлы ужрадъёс чаклаз. Кызьы ивортӥз инкуазь узырлыкъёсъя но инкуазез утёнъя министр В. Катков, кылем арын экологиен герӟаськем югдур шаерамы ӧз уродмы. Инкуазез утёнлы коньдон чакламлэсь ичигес но висъямын вал, омырлэсь, вулэсь, музъемлэсь чылкытсэс эскеронлэн пайдаез йылӥз. 2 сюрс эскеронъёс ортчытыса, 328 сюрс манет тыр штрафъёс басьтэмын вал. Нош инкуазез утёнэн, чылкытатонэн герӟаськем ужрадъёсы 38 миллион манет кошкиз. Глазовысь ТЭЦ-ез тупатъянэ но чылкытатӥсь сооружениосты лэсьтонэ гинэ 11 миллион манет висъямын вал. Со сяна, Уваын чылкытатӥсь сооружениос кутэмын, Ижевскын дамба лэсьтэмын, Яр ёросысь Пудем посёлокын пруд тупатъямын, Чур посёлоке но Як.-Бодья ёрос центре газ кыскемын но мукет ужрадъёс ортчытэмын. Кызьы тодӥськоды, шаерамы секыт югдур кылдэмын юон вуэз чылкытатонэн. Куд-ог ёросъёсын, водопровод пасяськемен но ву кырсёмемен, кӧткыль висён вӧлмылӥз. Соин ик бадӟым саклык висъямын вулэсь ӟечлыксэ эскеронлы. Та ласянь чырмыт ужазы Ижевскысь, Воткинскысь, Можгаысь, Уваысь инкуазез утёнъя комитетъёсын ужасьёс. Быдэс республикаын ортчытэм эскеронъёс возьматӥзы, пусйиз министр, ошмесо шаерамы чылкыт ву ӧвӧл шуыса. Экологиен умой пала воштӥськонъёс ортчозы, котькудӥз адями валаз ке, омырлэн, музъемлэн, вулэн чылкытлыксы понна ачиз кыл кутэ шуыса. Соин ик министерство ас азяз бадӟым ужпум пуктӥз: калыклэсь, нырысь ик - кивалтӥсьёслэсь, огъя экологической культуразэс ӝутоно, адямиез инкуазен тупаса улыны дышетоно. Нырысетӥ вамышъёс та ласянь лэсьтэмын ини: школаосын нылпиос "Экология" предметэз дышето, Удмурт кун университетын но Ижевскысь технической университетын экологияя кафедраос ужало. Валамон, лэсьтэмын трос, но быдэстоноез эшшо но уногес. "1999-тӥ арлы бюджет туж начар луоз, - пусйиз В. Катков, - соин ик инкуазез утёнлы кылем арынлэсь но ичигес висяськоз". Таин валче унозэ ужрадъёсты ас вылазы басьтоно луозы котыр улосэз тужгес юн кырсёмытӥсь предприятиос - "Удмуртнефть" огазеяськон, "Ижмаш", "Ижсталь" заводъёс, Чепецкой механической завод но мукетъёсыз. О. ВАХИТОВА. ГОЖТӤСЬКОН-99 Ошлэн сюресэз тодмо Толон редакциын ортчиз "Удмурт дунне" газетлы гожтӥськисьёс пӧлын радъям лотореялэн нырысетӥ люкетэз. Нимысьтыз быръем комиссилэн чакламез улсын корзинаысь поттэмын погылиос. Йылпумъянъёс таӵеесь: ош кошкоз Кизнер ёросэ (ӵапак отысь вал кылем арын редакцилэн кузьмам ош), кызьы тодӥськоды на, дыр, со сюриз Пичи Пурга ёросысь "Красная звезда" колхозэ. Мотоциклэз келяно луоз Игра ёросысь Кабачигуртэ. Нош электробыӵкы шедёз Пичи Пурга черкогуртын но со вӧзысь гуртъёсын улӥсь лыдӟисьмылы. Л. МАЛЫХ. Огинын шулдыртэ Ижевскысь ветеранъёслэн кенешсы мӧйыос понна пӧртэм ужрадъёс ортчытъя, уно саклык висъя "Ветеран" клублэн ужамезлы. Та клублэн занятиосыз толэзьлы быдэ ортчыло. Тани 28-тӥ январе но Кун филармонилэн юртаз (Пушкинской ульча, 245) 11 часын ожысь но ужысь ветеранъёс кенеше люкаськозы. Соосын пумиськозы Калыклы улон-вылонын юрттэт сётонъя министерствоын ужасьёс. Пумиськонлэн пумаз концерт возьматэмын луоз. Эрико шормуӵлы сӥземын Ижевскысь Некрасов нимо библиотекаын Кубаын революция ортчем дырысен 40 ар тырмонлы сӥзем возьматон радъямын. Отын адӟытӥсько Эрико шормуӵ сярысь книгаос, открыткаос, журналъёс. Сыӵе выставка ужа Удмурт кун университетлэн лыдӟиськон залаз но. В. РОГАЛЁВ. Тыл но газ понна дунъёс йылозы Россиысь Энергетикая комиссилэн тӧроез Андрей Задернюк ивортэмъя, Россиын улӥсьёс 2000-тӥ арын электрокужым понна солэн асдунызъя тырозы, мукет кылын вераса, государство электрокужым понна дотациослэсь чылкак куштӥськоз. Та вакытэ пӧртэм улосъёсын улӥсьёс тыл дунлэсь 30-40 процентсэ тыро, туэ та лыдпус 50 процентозь вуттэмын луоз. Андрей Задернюк верамъя, газ понна тыронъёс мартэ эшшо 12 процентлы йылозы на. Озьы газлэсь дунзэ калык быдэсак тырыны кутскоз. Со вакытэ ик Энергетикая комиссилэн тӧроез оскытӥз, куанеръёс понна льготаос утемын луозы шуыса. Иворъёсъя национальной служба. Сыӵеез странаын одӥг Кылем арлэн пумаз 40 ар тырмиз нырысетӥ оперативно-технической ракетаез лэзем дырысен. Воткинскысь машиностроительной заводын поттэм 8А61 ракета 150 иськеме лобыны быгатӥз. Со вакытэ та предприятиын 23 сюрс 500 мурт тыршиз. Отысен кутскиз Воткинскын ракетаосты лэсьтон вакыт. Нырысьёсыз пӧлын вал 8Ҡ1, 8Ҡ4, "Темп-С" шуон изделиос (озьы нималлязы соку ракетаосты). 70-тӥ аръёсы кылдытэмын "Пионер" (СС-20), "Ока", 80-тӥ аръёсы - "Точка-У", "Тополь" (СС- 25), "Тополь-М" (СС-27) но мукет ракетаос. Та предприятие трос лэсьтӥз Воткинскез азинтонын. Город будӥз, чеберскиз. Ӝутэмын уно улон юртъёс, школаос, культура учреждениос, больницаос, шутэтскон интыос. Воткинскын лэсьтэм ракетаос одӥг пол но ӧз янгышаллялэ на. Сыӵе азинскон странаямы одӥг завод но ӧз басьтылы на. Озьыен, воткаос азьланяз но Вооружённой Кужымъёслы трос выльзэ лэсьтозы на. Со сярысь гожтӥз "Воткинские вести" газет. Европаысь кужмоосыз - Ижын Туэ 1-7 феврале Ижевскысь спортивно-стрелковой комплексын ортчоз биатлонъя Европалэн чемпионатэз. Вераны кулэ: та выллем ӵошатскон Россиын нырысьсэ ортче. Асьме доры вуыны мылкыд каризы ни 14 кунысь спортсменъёс - Германиысь, Норвегиысь, Финляндиысь, Италиысь, Франциысь, Словекиысь но мукет интыосысь. Н. НИКИТИН. "Ижсталь" азьпалан Кызьы ивортылӥм ни, хоккеен шудонъя "Ижсталь" команда, ас группаяз вормыса, вылӥ лигаысь кужмоосыныз нюръяськыны луонлык басьтӥз. Нырысетӥ пумиськоназ со Тамбовын 8:1 лыдын вормиз татысь "Авангардэз". 25-тӥ толшоре кужымзэ мертаз Подольскысь "Витязен". Нош ик лэчытгес шудӥзы асьмелэн хоккеистъёсмы. "Ижсталь" 6:3 лыдын утӥз но турнир таблицалэн азьпалаз интыяськиз. Табере Ижысь хоккеистъёс 5 пумиськонзэс доразы ортчыто. 31-тӥ январе "Ижсталь" шудэ Санкт-Петербургысь "Спартакен". М. КУЗЬМИН. Америкалы пумит Германиысь огез газет Россилэн но Белоруссилэн матэктэмзы сярысь гожтэ. Газет малпамъя, талы луонлык кылдытэ вань славян калыкъёсты огазеняны тыршон. Сербиысь националист Воислав Шешель Сербилэсь, Россилэсь но Белоруссилэсь федеративной государство кылдытыны ӵектӥз вал ини, НАТО-лы но Европейской союзлы пумит луон понна. Нош Кун Думалэн спикерез Геннадий Селезнёв ивортэмъя, та кунэ пырыны Болгария но мылкыд кариз вал. Но славянъёслэн огазеяськемзылэсь кышкано ӧвӧл, гожтэ газет. Малы ке шуоно, 19 дауре ик сыӵе тыршонъёс вал ини, но соос нокыӵе пайда ӧз вае. Со гинэ ӧвӧл - нырысетӥ мировой война вакытэ ӟучъёс но сербъёс болгаръёслы пумит ожмаськизы. Зэмзэ верано ке, Москва, Минск но Белград США-лэн дуннеын кузёяськемезлы пум поныны амал утчало, нош калыкъёслэн одӥг выжыысь луэмзы кыкетӥ интыын сылэ. Сое возьмато Россиысь премьер-министрлэн Делилы ӵектонъёсыз. Индилэн кивалтӥсьёсызлы дэмламын вал Москва - Пекин - Дели треугольник кылдытыны, озьы ик Америкалы пумит луон понна. Кызьы адӟиськоды, та учыре калыкъёслэн одӥг выжыысь луэмзы лыдэ уг басьтӥськы ни, пусъе газет. Иворъёсъя национальной служба. ГЕРДЭ Адямилы но кулэ бурдъёс Берло дыре уваос, Пантелей Кузнецовлэн жин-жин кырӟанъёсыныз сяна, асьме калыкез шумпоттыло на усто киужъёсынызы, ӧнерлыкеныз (ремеслоез) азинтэменызы но. Пумен ӵемгес син шоры йӧтылыны кутскиз Узей-Тукляысь киужлы дышетонъя юрт. Отын директор луыса ужа Удмурт университетлэсь Искусствоосъя факультетсэ быдтэм усточи Геннадий Евгеньевич Сидоров. Та адямилы инкуазь пӧртэм быгатонъёс сётэм. Солэн уго ӵыжы- выжыосыз но ушъямонэсь вылӥллям. Атаез трос муртлы чебер корка пуктылэм, нош песятаезлэн дораз пичи кебитэз но вылэм. Туж паймымон дуриське вылэм. Солэн куд-ог шыпвозёнъёсыз мон дорозь но вуизы на угось. Кылсярысь, со анданэз аспӧртэмлыко амалъёсын кыдатон сярысь веранъёс. Со сямен кисьтэм корт ныжомисьтэм но туж лэчыт кивалтос, ужан тӥрлык лэсьтыны мынэ. Геннадий Евгеньевичлэн огез агаез али Сюмси ёросын Лялиноын фермер луыса ужа. Соослэн ӟеч вамышъёссы сярысь газетъёс но трос гинэ гожъязы ни. Нош выныз тунсыкъяське удмурт историен, асьме сямъёсын-йылолъёсын. Сузэрзы Алнаш районысь Ӟунньяшурысь колхозын тырше. Геннадий Евгеньевичлэн но солэн кузпалызлэн Надежда Родионовналэн нимтулъёссы алигес потазы вал "Удмурт дунне" газет бамъёсы. Соос асьме республикаын ӧнерлыклэсь азинскемзэ возьматӥсь выставкаын усто лэсьтэм ужъёсынызы кыкназы но лаурат луизы уго. Нош алигес Уваын усьтӥськем адӟытонын возьматэмын ини Узей- Тукляысь киужлы дышетонъя юртын ужасьёслэн, дышетӥсьёслэн но дышетскисьёслэн туж учкымон ужъёссы. Тужгес но трос ужам ачиз Сидоров. Со лэсьтылэм вӧё буёлэн суредъёс но, лулпуэз, суемез вандылыса но кызьпу туез пужъятыса но, зӥбытъяса- паньгатъяса но ужъёс. Син шоры йӧтэ удмурт калыклэн дано пиезлэн Куӟебай Гердлэн тусбуез. Автор пӧртэм писпу чокморъёслэсь кылдытъям синмаськымон чебер арбериос. Туж адӟоно кадь но малпаськытӥсь луэ пулэсь лэсьтэм композициез. Нимыз - "Вашкалаосмылэн дуннезы". Сузьетын возьматэмын удмуртлэн малпаськон сямыз: отын ик вань Инмар дунне но, та югыт дунне но, сопал дунне но. Озьы ик мудрон лэсьтэмын "Муш утись" композициез. Со шоры учкыса, сур юэм потыны ӧдъя, котыраз дурыос ошылэм угось. Нош лулпулэсь лэсьтэм чильпырась вазазэ киын бергатонъя, кинзэ-марзэ гинэ уд адӟиськы отысь: дукъязэ но, бызаразэ но, коньызэ но. Ваньзы бызьыло кадь нюлэскытӥ. Нош Надежда Родионовналэн куэм ворпо ӵушконъёсыз, чебер азькышетъёсыз, вашкала устоосмылэсь быгатонзэс азинтыса куэм шобыръёсыз чебер буёлъёсынызы синъёсыз ик бордазы кыско. Тросэз ужъёсыз солэн трос вырто куиськонын куэмын. Кулэ уж борды басьтӥськем Надежда Родионовна. Ува палан куиськон вунон калэ вуэмын уго. Шуныт мылкыд кыле сюлэме, Узей-Тукляысь мастерлэсь Михаил Николаевич Шахтаринлэсь ужъёссэ адӟыса. Со ачиз ик арбериоссэ кысконэн (токарной станокен) но быгыльтэ, гудӟе, пужъятэ но. Пулэсь шӧмзэ-лулзэ туж ӟеч валась адями. Нош кузпалыз Алевтина Ивановна усто чильпаське, пӧртэм салфеткаос лэсьтэ. Пулэсь арбериоссэ яркытгес но синме йӧтӥсь каре росьписья мастер Анна Владимировна Блинова. Со урало-сибирской росьпись шуон амалэн ужа. Нош егит мастер- методист Сергей Иванович Гук, пуэз вандыса, чеберлыкез азинтыны тырше. Солэн трос дурыё чебермам сур бекчеез пермьской звериной стиль амалэнгес лэсьтэмын, отын вал йыръёсыз но мукет пужыосыз. Та ньыль-вить усточиос котыразы дасяллям-будэтӥллям ини быгатӥсь кивоштӥсьёс. Соослэн дышетэм нылпиоссылэн но ужъёссы адӟытонэ вуттэмын. Нылъёс суем пулъёс вылэ туж капчи но чебер пужы кылдытъяллям. Пиослэн но соослы сётскемзы потымтэ, лэся, соос но умой тыршиллям. Тужгес чебересь ужъёс лэсьтылэм Андрей Конышев. Солэн вазаосыз, пужъятэм пичи шыкысъёсыз, чебермам пу тэркыосыз вузаны но мынозы. Нылъёслэн суредъёссы-пужъятэмъёссы улын нимтулъёссы гожтэмын ӧй вал. Соин гинэ нимъёссэс вераса ушъяны ӧй быгаты, ужъёссылы туж синмаськи ке но. Та выставкаын вань на пичиесь чебересь котырес шкатулкаос. Пӧртэм буёлъёсын чеберъям суредъёс лакен шобыртэмын на. Та пичи шыкысъёс вылын - адямиосыз но инкуазез возьматӥсь умой-умой лэсьтэм суредъёс. Бадӟыматӥд ке, со суредасьлэсь зэмос картинаос но лэсьтыны луоно. Шӧдӥське: авторез быгатӥсь мурт. Нимтулыз солэн Михаил Иванович Гребин. Суреданы дышетскем удмурт университетын. Табере басьтӥськем Узей-Тукляысь чебер киужъёсъя юртлэсь Выль Мултанын филиалзэ кылдытон борды. Шумпотоно, устоосмы син азьын йыло-пушъё шуыса. Калык устолыко киужъёс бырыны, сюрс аръёс ӵоже люкам-шедьтэм быгатонъёс но тодонъёс тӧлӟыны кутскизы вал ини. Киужъёсъя юртъёс улӟыто ышыны кутскем устолыкез, чеберез валанэз. Отын ужасьёс егит муртлы аслыз оскон пыӵато но улонэ потыны чеберлык вамен сюрес возьмато. Та школаосыз ортчем нылпиос будэм беразы но юыса жугиськыса уз ветлэ, шуысал мон! Котькуд школаын, котькуд гуртын, починкаын кулэ вылэм та выллем школа, студия, яке кружок кылдытыны. Нош Узей-Тукляысь (Бызараысь), киужлы дышетонъя юрт, дышетскисьёсты сяна, дышетӥсьёсты но трос выль ужъёслы дышетэ. Тани Геннадий Сидоров туэ аслаз ужъёсыныз сюрыны быгатӥз ини туж сӥё-дано выставкае - "Бадӟым Волгае". Солы сюрес усьтӥськиз ини Россиысь Суредасьёслэн союзазы. Оскисько: таӵеос вӧзын мукетъёс но будозы. Вакчияк вераса, та ӟеч ужез котыр ласянь азинтыны кулэ, Уваысь администрация азьланяз но Узей-Тукляысь киужлы дышетонъя юртлы юрттоз шуыса малпаськом. Озьы ик та ужлэсь медаз палэнтӥське вылэм шаерысьтымы Культурая министерство но Ижевскысь чеберлыкъя усточиослэн юртсы. Семен Виноградов, Удмуртиысь калык художник. Кинлы оском улонмес? Али Россилэн политикаяз но экономикаяз секыт югдур кылдэмын. Президентлэн висьыса но мунё интыын улэмез ваньмызлы акыльтӥз ини. Страна вые пунэмъёсаз, калык куанерме. Ельцин ужа шуыса кылоно ик ӧвӧл: ялан иворто, тазалыкез урод шуыса. Кылем арын 17-тӥ августысен огшоры ужась адями куинь поллы куанермиз. Но чиданлэн пумыз вань. Мар возьма асьмемыз азьпалан шуг вераны. Ас вакытаз тодмо ӟуч поэт Ф. Тютчев шуиз вал: "Россиез визьмын уд вала, огъя аршинэн уд мерта..." Мон малпамъя, таяз арын калыклэн улонэз туж ик уз капчия. Власть понна нюръяськон Москваын гинэ уг мыны. "ческыт нянез" яратӥсьёс ичи ӧвӧл. Учке ай, макем ӟырдыт кивалто удмурт шаерен палэнысь лыктэмъёс! Ваньбурез палэнэ келяло, "Удмуртнефтьлэн" акциосыз Москваысь, ай солэсь но ортчыт - Великобританиысь, кивалтӥсьёс киын. Кун Кенеш туж трос дырзэ быдтӥз кун властез тупатонлы. Малпам, оло, урод ӧй вал, но, номыр ӧз пӧрмы ук. Дорамы кутэм законъёсты Конституцияя суд умойтэмлы лыдъяз. Экономикаен герӟаськем ужпумъёсты пыр-поч эскерыын парламентмылэн дырыз ӧз кыльы ни кадь. Куддыр таӵе но малпанэ вуисько. Оло, паймонэз ӧвӧл, удмуртъёс кырсь ужынгес ужало шуыса? Палэнысь лыктэм мурт сюлмаськоз шат калык пона, асьмелэн нылпиосмы вордскем кылзэс мед дышетозы шуыса? Мон уг паймы ни, дыр, удмурт кылэз нокытын но дышетоно ӧвӧл шуыса ӵуказе закон кутӥзы ке но. Кӧня ке дыр ортчыса, Кун Кенеше депутатъёсты быръём. Соос пыр калык ваньмыныз кузёяськыны кулэ. Но тае вунэтӥськомы яке малпаны ум турттӥське. Кандидатъёсты чебер, умой вераськемзы понна бырйиськом яке куарамес воксё но ныырсетӥ сюремезлы сётӥськом. Тросэз али киынызы шонто: "А, котькин мед луоз, номыр уз воштӥськы". Умойтэм со. Котькудӥзлы валано: кинэ тон бырйид, сыӵе ик улоэд но луоз. Котькуд кунлэн, калыклэн вуоноез егитъёс киын. Кызьы асьмеос соосты будэтом - озьы ик улом. Юнме уг шуо ук: мае кизид, сое ик аралод. Туннэ ӧжытэз гинэ егитъёс дунне питранлэсь бергамзэ валало. Алигес Ижысь пӧртэм вузъёсысь студентъёсын вераськи. Нылъёс пӧлысь одӥгез но кылдэм югдур сярысь вераны ӧз быгатэ. Куд-огез пиос валало ик мае но сое. Одӥгез гинэ, витетӥ курсысь пияш, туннэ политикаен тодмо. Удмурт нылкышноослэсь огазеяськемзэс пӧлысьтызы нокин уг тоды. Ӵемысьгес "Шундыез" поттылӥзы. "Удмурт кенеш" сярысь кылэмзы вань ке но, солэсь мар ужамзэ уг тодо. Студентъёс удмурт депутатъёслы пумит ӧвӧл. Нош кызьы соосты отчы поттоно - соиз, пе, милям ужмы ӧвӧл. Ум но оскиське, шуо, удмуртъёс депутатэ потыны быгатозы шуыса. Студентъёслэсь ӵемысь кылоно: "Малы мыным политика? Со мыным номыр уг сёты. Туннэ сур но юдэс нянь луиз ке, номыр но кулэ ӧвӧл ни. Нош дуннеез монтэк но бергатозы, малы ӵуказеез понна сюлмаськод?.." Тӥни озьы. Студентъёслы туннэ шулдыр, нош ӵуказе коть дунне мед пилиськоз. Уг валало на созэ: макешатъфсбкон мылкыдзэс кинлы кулэ, со ик басьтэ. Соослы тодмотэм на ужтэк кылён. Тодон-валанзэс паськытатыны одӥг но мылзы уг поты - асьсэлэн специальностья гинэ дышетскыны кужымзы тырме. Возьыт. Ӝоген вылӥ образование басьтоно муртъёс сыӵе сюбег тодон-валанэн. Улонын вань шуг-секытъёс дышетскымтэысь пото. Визь бордын нацилэн азинскемез но. Тросэз удмурт студентъёс матысь дыре гуртъёсы кошкозы, нош соос уг валало, мар лэсьтӥське дуннеын. Валамзы уг поты. Мае валэктыны быгатозы соос гуртоослы? Студентлэсь юады ке, ку со берлозэ удмурт газетъёсты но журналъёсты лыдӟиз - вераны уз тоды. Республикаын вылӥ образованиен удмуртъёслэн лыдзы ӟучъёслэсь но, бигеръёслэсь но ӧжыт. Маин валэктыны луоз вузъёсын дышетскись удмуртъёслэсь ӧжыт луэмзэс? Гуртысь абитуриентъёс лябесьгес, огъя конкурс пыр ортчыны соослы секыт. Эшшо асьмелы уг тырмы на тодон-валан басьтыны юн мылкыдмы. Удмурт университетлэн очной люкетаз удмуртъёс 19 процент гинэ. Туннэ нуналлы тужгес но кулэ луись специальностья ёзъёсын удмуртъёсыз кӧня ке гинэ: экономикаын - 6, юриспруденциын - 9 процент. История факультетысь ӟуч студень мыным шуиз: "Малы 30-тӥ аръёсы Удмурт пединститут кылдытэмын вал? Республика аслыз национальной кадръёс мед дасялоз шуыса. Нош тӥ, удмуртъёс, дырын-дырын сое вунэтӥськоды". Дуннелэсь бергамзэ валамед потэ ке, улонэз ас киыныд лэсьтэмед потэ ке, тодон- валандэ паськытатоно. Юнме уг шуо ук: тон ке уд выриськы политикаен, со тонэн вырыны кутскоз. Та визьмо верамез егитъёс медаз вунтылэ вылэм. Алексей Андриянов, студент, исполкоме быръем мурт. Клара Быкова но салья такмакъёс Пинал нылаш, анаез лӧпкытэмъя, 1953-тӥ арын кошконо кариськиз выльвыл ӝутыны. Со аръёсы уго уно егитъёс шонтӥзы целинае. Клара Казахстан степьёсы комсомоллэн путёвкаезъя мынӥз. Солы соку кызь арес но ӧй вал на, вылаз ик, чиед. Мынӥз, ӧз кышка. - Нош кыӵе мӧзмиськомы вал,- шуэ али Клара Петровна, - выдӥськомы ковыль вылэ, бӧрдӥськомы. Мыным юрттӥз, лэся, салья музъем, та гуртысь кырӟанъёс, частушкаос (такмакъёс). Дас кык ар улӥ Казахстанын, но вордскем палъёс дуноесь - бертӥ Сарапулэ. Алигес со нош ик вуылӥз ас вордскем гуртаз. Сюлэм мӧзме уго. 45 ар ини со улэ Сальяезлэсь палэнын, но али ке но вунэтымтэ на татысь частушкаосты, салья гуръёсты. "Мон вераськыны шуггес вераськисько ни, но кырӟанъёсты тодӥсько,- шуэ Клара Петровна.- Мӧзмыкум весь Салья пал кырӟанъёсты нёръясько". Туж паймымонэз ӧвӧл кадь, но со кышномурт - ӟуч, ӝыны даур ортчыса но ӧз вунэты удмурт крезьгурез, такмакъёсты. Кыӵе сюлме пырымон кырӟаз со Поколь, Митран кож, Кулак, Ӟазег урам сярысь. Ваньмыз со Салья гуртэн герӟаськемын. - Мон татын будӥ, удмурт кыллы, кырӟаны дыши,- шуэ Клара Петровна.- Улонлэн котькыӵе дырыз вал, но та гуртын улэм аръёсы - самой дуноесь, вунонтэмесь. Соин ик кыске татчы сюлэм. Г. ПАРФЕНОВ. Кияса ёрос. Газетысь чуръёслы вазиськыса Ӵектӥсько Пантелей Кузнецовез Ӧжытак ӝожомыса но сюлэмшугъёссэ туж валаса лыдӟи кылбурчилэсь Татьяна Черновалэсь "Ау, премия!" статьязэ. Со печатламын миым, 26-тӥ ноябре, "Удмурт дунне" газетын. Бадӟым ужпумез ӝутэ редакциысь культура ёзлэн тӧроез. Зэмзэ но, берло аръёсы Удмурт Республикалэн Кивалтэтэз кӧня ке пол ини литература но искусство удысъёсысь тужгес бадӟымесь ужъёсты кун премиосын пусйытэк кельтӥз. Валамон: таӵе югдур творчество удысын тыршисьёслэсь вожмаськыса ужан мылкыдзэс, ӟеч произведениос кылдытӥсь кужымзэс уг ӧръя - зӥбломытэ гинэ. Малы бен таӵе калэ вуимы? Нырысь ик, мыдланес реформаос но муньылон кризисъёс юн шӧдӥськыны ӧдъязы литература, искусство удысъёсын но. Книга поттон, кылсярысь, уно сюрс манетъёсын чырты сьӧрад пуксе. Сое гожтэм понна, уксё тыро ини... курегез ар ӵоже сюдымон гинэ. Ма, собере "Удмуртия" издательство но писательёслэн выль ужъёсынызы азьлолэсь кык пол, оло, шергес шумпоттыны ӧдъяз. Таин валче, оло, кун премиос сётъян сярысь валэктонъёсы выльдонъёс пыртоно? Книга поттыны туж шуг луиз бере, писательёсмылэсь тужгес устооссэ произведениоссэс данъяны, шуом, мед луысал "Кенеш" но "Инвожо" журналъёсын печатламъя ик. Премилы ӵектон дырез но кык арысен вить арозь йылэтоно, дыр. Уногес лыдӟисьёс мед тодматскозы выль ужъёсын. Ятыргес данъяны ӵектылоно наука удысысь ужъёсты. Секыт адӟонэ сюремын пьесаос кылдытӥсьёс, театръёс, суредасьёс - оглом, быдэс интеллигенция. Соин, лэся, вылӥ кивалтӥсьёсмы но тазьы малпало: премиен пусйымон чеберлыко, зэмос дуно ужъёс кин али кылдытоз на? Кун премиосъя ӧрие быръемъёс но лябгес утчаськыны кутскизы кадь. Нош умой-умой малпаськоно ке, литература но искусство удысъёсын данъямон ужасьёсмы трос али но. Татьяна Чернова унозэ пусъе статьяяз. Нимаз-нимаз адямиос ке ичи пото, данъяны луысал коллективъёсты. Ӧрие дэмлам эшъёс шоры гинэ учконо ӧвӧл, калык, общество ачиз ӟырдытгес мед ӵектылоз премиослы усточиосмес. Нош, умой-умой басьтӥськысалмы ке, мон сямен, крезьгурчиез, кылбурчиез, арганчиез, кырӟасьмес Пантелей Николаевич Кузнецовмес миым ик ини, оло, пӧрмытысалмы кун премиен пусйыны. Со - быдэс шаермылэн тужгес гажамон-яратымон пиез али. Кырӟанъёсыз но жин-жинэсь, сюлэме пырымонэсь, удмуртлыкмес данъя но муромытэ. Кыӵе бадӟым уж нуэ калык пӧлын! Бадӟымесь концертъёсыз но ӵем луыло, фестивальёсын но вормылэмын. Пантелей Николаевич мылысь-кыдысь пыриське "Удмурт кенеш" но "Дэмен" огазеяськонъёслэн огъя ужазы но. Крезьгурчиосмы пӧлын со али тужгес яркытэз кизили. Сюлэсь но ятыр ни, вылды, удмурт искусстволэн зарни шыкысаз пыртэм крезьгуръёсыз- кырӟанъёсыз. Нош, дано нимын сяна, нокыӵе премиосын татчыозь пусъемын ӧвӧл на. Оскисько: та ӵектонлы дурбасьтозы вань композиторъёс но, "Италмас" ансамбль но, Удмурт радиоез кылзӥсьёс но, газетъёсты лыдӟисьёс но, пӧртэм огазеяськонъёс но. Кирилл Ломагин, Россиысь Писательёслэн огазеяськонзылэн членэз, Удмурт культурая "Дэмен" огазеяськонлэн кивалтэтаз быръем мурт. ШӦКЫЧ Шизга-бызга, пе Магазин азе Сиктан Микаль палдурес арганэн вуиз: кинэн ке керетыкуз, бас палъёссэ, юбо борды шуккыса палгытэм. Йырзэ кычыльтыса ик учкиз со сюдӥсь-сектасез шоры. Собере, пинь пыртӥз дыльдызэ чизъйыса, уробо вылэ тубиз. Магазин азе картошка ваем калык тачак люкаськемын вал бере, ваньмыз Микаль шоры долказы. - Та Сиктан пи нош ик маке-со йӧндыроз инь, - лушкеменгес кин верась луиз. - Мар мар-о солэсь возьмалод, кыӵе ке выль покус-мокусъёссэ возьматоз, дыр, - кылӥськиз вӧзаз мукет куара. - Арганэз понна кайгыре, дыр - шуиз кин ке. - Ма кызьы уз кайгыры - сюдӥсез-сектасез но арган вал ук. Сиктан Микаль, туж ӝожмыт мылкыдын лулскылыса кыдёкысь бусыосы, тэльёс, пилемъёс шоры учкыса, кӧня ке сылӥз но киысьтыз палдурес кылем арганзэ ваяк" выскиз. Жинграк! Вазьыса сайказ Котныр урам. Калык дэймиз: оло, шайтанэз-а юрттэ та Микальлы, сузмем арганысь шулдыр гур вӧлскиз. Сиктан Микальлэн чиньыосыз палдурес арганэзлэн огпалтӥз тысь вылтӥ шыръёс кадь чырткем бызьыло. Ачиз но гадьзэ мычыса шонерскиз, йырзэ урдӥз, урдсӥне пинь пыртӥз гинэ чизъиз но кутскиз ук кырӟаны. Эк! чиньдыр-ваньдыр, Сультыр-сальтыр Шивилью на выльвылью, - Эк ма, таидлэн туннэ сюлэм ӝожомем ук шӧдӥське, - лулскиз кин ке, - эсьма кырӟамысьтыз верам кылзэ ик валаны уг лу ук. - Ма, сокем-сокем эшез, арганэз, ӧлексы кылем бере, куректод угось, - будэтӥз на мукетыз ас малпанзэ. - Шиньги-биньги, чиньди-миньди, Шокор-мокор, бокора. Гурт пумысен, мукет пал пумозяз кылӥськымон куаразэ поттӥз Микаль. Котыраз калык пумен люкаське ини. Контораысь бертӥсьёс но кожизы люкаськемъёс пала. - Нош ик тордэмын-а мар-а та шакшы, - пуштэм вал колхоз тӧро но, калык паймыса ик, шып гинэ кылзӥськемысь, ымзэ пытсаз. Микаль нош сак вылэм, солэсь ваземзэ кылыса, со пала ик берыктӥськиз. Арганэз вик-вак! гинэ вазе. -Гундыр, бундыр, карака, Шылдыр, шалдыр, арака. Тургы, мургы, сырыкы, Пургы, тургы, мырыкы. Валамтэ кылъёсты кылыса, куд-огез пырсйылыны кутскизы. - Мар ке та аракыез но бургыез но тодаз ваиз кадь, - кин ке лулскись луиз. - Ма, кемалась-а, дораз пыраса, аракы пӧзьтон бургыоссэ талазы ук. Тӥяса куштӥзы, нош солэн со юри дасямез вылэм, запчасть шуод-а, мар-а... - будэтӥз кин ке. - Зол ик йырыз кур луэм, угось, быдэс нунал контор азьын пукиз ук, забастовкае пе, хи-хи-хи! - векчи коньдон кадь пазьгиськиз нылкышно серекъям. Колхоз тӧро амалтэк син азяз пуктӥз, кызьы со контор укноетӥ потыса кошкиз вал, "забастовщикез" медаз пумита шуыса. Таяз учыре но лушкемен пегӟыны шӧтаз. - Ма, тӧромы но, учке ай, был да нет, гылӟиз ук! - вожмаськыса горо воргоронъёс. - Давай, давай, Микаль! Сиктанэн кадь бералты соосты! Молодца! - кесясько люкаскьемъёс. - Газ пыртом шуизы, кыл вылын кык ар алдаса возё! - пушто пумен огез-кыкез. - Уждун уг сёто! Асьсэлэн дак кӧтсы тыр! Вирсэртэмъёс! Кытысь ке ӧвӧл, участковой вуэм. -Мар таӵе юр-яр кариськоды? - Шыньыр-шаньыр, шылында, Тюньыр-тяньыр гылында Трась-вась кекора, Шлуч-шлач межора! Участковой малпаз: э, ма талэсь басьтод, ойдо мед серекъятоз, монэ гинэ медаз иса, вал, шуыса киыныз гинэ шонтӥз. Бургы утчаса ветлыкуз, гид пушкысь скал кыед вылын гылӟыса усемез тодаз лыктӥз луоз. Каллен-каллен калык пӧлысь со но гылӟем бере, куд-огез кӧтсэс кутыса серекъяны кутскизы. Тордай Иванэд, курег кадь куара сётэ, погылляськисез гинэ ӧвӧл на. Эсьма Пельтэм Онтон но, ас понназ мыня, мае ке вала кадь. Кин ке ӧз чида ни, Сиктан Микалез саестӥз кыскаса, уробоысь васькытӥз. Гырдаллясь воргоронъёс Микалез, котыртӥзы, тыбыраз топ-топ! гинэ вешало. Кунулскыса кошкизы урам кузя: таӵе усто маскарчи-арганчи понна кинлэсь ке черык аракызэ лӧдозы инь. Ма, мар со черыкед? Жаль-а, мар-а?! Шизга-бызга, иськавынъёс! Анатолий Петров. ТАЗАЛЫК Пиньдэ эмъя сессия бере Стресс адямиез пушкысеныз йыръе, висёнъёслэсь утиськыны кужымзэ лябӟытэ. Берло дыре трос верасько, мултэс сюлмаськонъёс, шуг-секытъёс висись муртлы бурмыны уг сёто шуыса. Тае возьматӥзы США-ысь Огайо университетысь студентъёслэн опытъёссы но. Дас одӥг студентлэсь-стоматологлэсь ым пушсэс ӵабъям выллем ӧжыт гинэ сӧсыртӥллям. Кызьы тодмо, ӵабъяськем интыос туж чаль бурмо, нокыӵе пытьы кельтытэк. Нырысьсэ сыӵе эксперимент ортчытӥллям гужем, студентъёс нырысетӥ курс понна экзаменъёссэс сётэм бере. Кыкетӥ курслэн тужгес шуг экзаменэз азьын, экспериментэз выльысь ортчытӥллям. Та учыре яраослы бурмыны дыр 40 процентлы тросгес кулэ луэм. Нош вирез эскерон возьматэм, мугорлэн висёнъёслы пумитъяськон кужмыз 2/3 люкетлы синэм шуыса, нырысетӥ учырен ӵошатоно ке. Озьыен, экзаменъёсын герӟаськем сюлмаськонъёс мугорез лябӟыто. Таин валче таӵе дэмлан, стресс вакытэ адями тазалыкез сярысь нимысьтыз сюлмаськыны кулэ, ӵыжы- выжыосыз но та сярысь медаз вунэтэ. Тазалык Пичи дыды ньылӥз бирды Покчиос понна котькудӥз вылез арбери - тодмотэм дунне. Соос йӧтылытэк уг кельто ӝӧк вылысь бирдыез но, песянаезлэсь эмъюмзэ но, быректӥсь чайникез но. Ваньзэ кутоно, погмано, ыме пононо. Та вакытэ пиналдэ огшаплы ке но огназэ кельтӥд ке, кыдёкын ӧвӧл шудтэм учырозь но. Нылпидэс инмар мед утёз, но котькудӥз анай-атай шуге-леке шедем пиналызлы юрттыны быгатыны кулэ. Тани кыӵе дэмланъёс сётӥзы травматологической поликлиникаысь врачъёс. Нылпиды пӧсьвуаськиз ке, гордэктэм интызэ кезьыт ву улын возёно, вӧсь луэмзэ лӥятон понна. Собере сугонэз шори вандоно но сутскем интызэ зырано, соку ву пульыос, оло, уз но кылдэ. Нош соос потӥзы ке, мазьёсын зыраны, эмъюмъёсын пызьнаны уг яра. Пульыосты бинтэн туж эскериськыса бинёно. Сутскем инты нылпилэн киызлэсь бадӟымгес ке, врачлы вазиськоно. Покчиос туж ӵем усьыло но йырзэс шукко. Соку нылпидэс валесэ выдтоно, шуккем интые кезьыт вуэн коттэм ӵушкон пононо, сое ӵем вошъяно. Нош нылпидылэн сюлмыз шуг луиз яке йырыз берганы кутскиз ке, врачез ӧте - мискиньлэн йырвимез зуркам, дыр. Ӵемысь асьмеос вунэтӥськом эмъюмъёсты пыдлогес ватыны. Ческыт сиён кожаса, нылпиды таблеткаез ньылӥз ке, сое одно ик ӧскытоно. Со понна азьчиньыдэс бинтэн бинялтоно, нылпилэсь ымзэ усьтоно но кылвыжыяз чиньыен зӥбоно. Ӧскем бераз пиналэз сак эскероно, отравление ӧз-а меда луы шуыса. Нылды яке пиды трос кӧлэ, ичи шудэ, ымнырыз гордэктэ ке, врачез ӧтёно. Покчиос пичи арбериосты но ньылыло. Нылпиды пичи, котырес мае ке ньылӥз ке, шуом, бирдыез, сюлмаськонэз ӧвӧл. Сыӵе арбери пуш ёзъёслы кышкыт ӧвӧл, со, нунал ортчыса, ас понназ капчияк потоз. Нош нылпи пушкы шедиз ке йылсо, шакрес арбери, соку ини кышкыт, малы ке шуоно, со ненег ӝушез, сюлъёсты сӧсыртыны быгатоз. Соин ик ӝегатскытэк врачез ӧтёно. Со вуон куспын нылпидэс небыт сиёнэн сюдэ. Уг яра (!) кӧтэз кизертӥсь (слабительной) эмъюмен удыны. Пичи экелэн шокан пасяз пичи арбери вуиз ке, сое кызыны косоно. Кызӥсь нылпиез ал вылады пуктэ но йырзэ уллань мыкыртэ. Вож пиналлэн тыбыраз каллен гинэ мыжганы яра, солэсь азьвыл сое пыдъёстӥз йырин уллань ошыса. Покчиос мур шоканы уг быгато, соин ик арбери шокан ёзъёсысь капчиен потэ. Пиналъёс ныразы, пельёсазы кӧжы, весь, векчи уксё донганы ярато. Пельысь векчи арбериез поттэ врач. Пичи пельысь сое поттыны туж кышкыт, чакласьконо, арбери пыдлогес медаз пыры но барабанной перепонказэ медаз пася шуыса. Бирды выллем арбери ныре шеде ке, нылпилэсь буш ныр пасьсэ пытсано но зырымаськыны косоно. Пинал шоканы кулэ ым пыртӥз гинэ - нырыныз шоказ ке, арбериез пыдлогес кыскоз. О. ВАХИТОВА. Пероез медаз ныжомы Выль аре выль азинсконъёсын вамыштӥз Кияса ёросысь "Знамя труда" газетын ужась Геннадий Парфёнов. Со редакторлэн воштӥсез луэ. Таиз ар Геннадий Васильевич понна пусйымон соин но: газетын нырысьсэ печатласькемез дырысен тырме (толшор толэзе) 30 ар. - 6-тӥ классын дышетскыкум вал со. Мон нырысьсэ гожтӥ "Дась лу" газетэ заметка. Пиналъёслы газет потыны кутскемлы туж шумпотӥ, - тодаз вае Геннадий Васильевич. Со дырысен ортчизы уно аръёс, люкаськизы пӧртэм тодон-валанъёс. Вуж Салья шор ёзо школаын алигес Г. В. Парфёновлэн творчетсовезлы 30 ар тырмонэз пусйизы. Пумиськонэ лыктӥзы дышетӥсьёсыз-пенсионеръёс А. Ильина, Ю. Григорьева, ӵош дышетскем эшъёсыз С. Зыкова, М. Полянская, очеркъёсызлэн геройёсыз Е. Бочкарева, К. Долгова но мукетъёс. Шуныт кылъёс веразы Геннадий Васильевич сярысь. - Ёрос газетэз кемалась яратыса лыдӟисько. Нырысь учкисько Геннадий Парфёновлэсь гожтэмъёссэ , - маде Алевтина Ивановна Ильина. - Сочинениос туж тунсыко гожтэменыз висъяське вал Геня Парфёнов. Пичи дыръяз эшъёсыз шуозы вал, со, пе, школа библиотекаысь книгаосты лыдӟыса быдтэм но гуртысь библиотекае ветлэ ни лыдӟиськыны, - вераськонэ итӥськиз Юлия Владимировна Григорьева. - Огвакытэ школаямы солэн кичӧлтэмезъя кылдытэмын вал пинал гожъяськисьёслэн кружоксы. Пиналъёс мылысь-кыдысь гожъяськыны кутскизы. Кылбураськом вал, вожмаськыса кадь, - вера школалэн завучез Николай Григорьевич Трофимов. Геннадий Парфёновлэн ёрос газетэз лыдӟымон но син шоры йӧтымон каремез потэ. 1990-тӥ арысен ини ачиз дася но поттэ удмуртъёслы "Италмас" бам, отын печатласько гожъяны кутскисьёслэн кылбуръёссы, веросъёссы, заметкаоссы. Пумиськонэ лыктэмъёс тодмасткыны быгатӥзы гажано адямизылэн туспуктэмъёсыныз, гожтэм ужъёсыныз, солы сӥзем эшлыко чуръёсын. - Герое сярысь гожтон понна, нырысь со сярысь ваньзэ тодоно, солы синмаськыны кулэ, куд-огезлы уно дыр висъяно, - вера Геннадий Васильевич. Г. В. Парфёнов пыриське удмурт дэменлыклэн ужаз но. Киясаын адӟем карымон семья луо кузпалъёс Геннадий Васильевич но Антонина Анатольевна. Будэто кык нылпизэс. Сергей пизы дышетске университетысь история факультетын, нош нылзы школае ветлэ на. Нош Антонина Анатольевна - калыкез дышетон удысысь отличник. Люкаськемъёсты шулдыресь кырӟанъёсынызы шумпоттӥзы "Кубо" огазеяськонэ ветлӥсьёс. Сиён-юонэн куноятыны юрттӥзы "Рассвет" эштосысь валтӥсь зоотехник А. К. Пчёлкин но мукетъёсыз... Пумиськонэз радъязы дышетӥсь Н. В. Бочкарёва но гуртысь нылкышно огазеяськон. НИКОЛАЙ МОРЯКОВ. Эшлыко чуръёс Г. В. Парфёновлы Вуж Сальялась Идок Генямылэн Йыраз малпан чилектылэ. Кызьы ошмес но пӧзьыса потэ, Йыраз малпан бугырскылэ. Озьы уг луы котькинлэн гожъяськемез - Сыӵе со инмарлэн, дыр, сётэмез. Кудӥз, оло, вожъяськыса Выро маке гожъяськыны. Чуръёсы нош... вогъясько, Шугъяськоно соосыз валаны. Нош Генямы куамын арскын Кӧня гурт калыксэ данъяз Уно пӧртэм газетъёсын, Кудзэ пичияк пыкылӥз, нодъяз... Нош бератаз Усьтӥз со газет бам калыкмылы - Со "Италмас" - удмурт кылын. Соин ик сӥзёмы та эшмылы: Мед пероез луоз эшшо лэчыт, Нош гожъяськон манеред туж вольыт. МАРИНА МОРЯКОВА. Ӝуам сюлэм "Мон малпасько, Чечняын али но ог сюрс пала асьме пиос, ивортэк быремъёссэ но лыдэ басьтыса... Ростов-на-Дону городын ог 500 пала тодмамтэ солдатъёслэн но офицеръёслэн шӧйёссы кыллё. Эскерон ужен 124-тӥ лаборатория выре..." Борис Громов, "ТРУД-7" газет, 92-тӥ номер, 22-тӥ май, 1998-тӥ ар. *** Учёнойёс верамъя, СССР вакытэ асьмеос 26 странаосын 26 пол ожмаським, Испаниез но Халхин-Голэз лыдэ басьтоно ке. Туала Россия но палэнэ уг кыльы. Уно аръёс ӵоже адями сюлэмъёсын бурмисьтэм яра кадь улоз на чечен калыклы пумит пурӟем валантэм ожмаськон. Тросэз адямиос татчыозь нокызьы валаны уг быгато, йыразы уг тэры, кызьы омырскод ас калыкед вылэ, куашкатод городъёсты, аулъёсты, уно пиналъёсты анай- атайтэк кельтод. Одӥг семьяын кадь улӥсь калыкъёс шорияк люкиськоно луизы. Кин со ожын шонер вал? - туннэ шуг вераны. Вань та йырчукин берыгъяськонъёсты нокызьы уг валало Игра ёросысь Факел посёлокын улӥсь Шкляевъёс но. Соослэсь яратоно Олег пизэс чечен оже сюлэм бордысьтызы ишкалтыса сямен басьтӥзы. Тямыс толэзь служить карыса вуэ, пияш чиптэм-чаптэм ыше: (анай-атаез но ӵыжы-выжыосыз понна гинэ). Нош военной кивалтӥсьёс тодо ни вал, Удмурт шаерын вордӥськем но будэм рядовой Шкляев 1996-тӥ арын 6 августэ Грозный город шорын ик бырыны шедиз шуыса. Со югдурен герӟаськем документъёс вуо Играысь военкоматэ, но Валерий Михайлович но Татьяна Николаевна со кузьыт синкылиен тырмем кагазэз 1997-тӥ арын 27-тӥ январе гинэ киязы басьто. Ӝыны арлэсь азьло бырем солдат сярысь малы сокем ӝегаса ивортӥллям меда? Маке кышкытсэ лэсьтӥз шат рядовой Шкляев? Яке со чечен калык пала потӥз-а, яке пленын быриз-а? Пӧртэм малпанъёс йырвизьмез порто. Зэмзэ но, та улонамы трос на валантэмез, йырин уллань сылӥсез. *** Факел посёлоке сюрес туж кузь потӥз. Сюлэм уг чида ни вал Шкляевъёсын пумиськытэк. Машинаын пукисько но син азям куректонэн пачылмем пиосмурт но кышномурт пуксё. Дырын-дырын, оло, долкаллясько но, лэся, машинаяз зуркатэм бере гинэ ас дуннеысьтым потӥсько зэмос улонэ йырыным омырскисько. Играез ортчем бере, сюрес уй пала сюсьтыл кадь шонер кошке. Сюрес дуре зыл-зыл сылӥсь кызъёс, ньылпуос, кызьпуос но бадьпуос гинэ кылё на. Собере сюрес ӟечыраны кутскиз, машина вырйылъёстӥ лэйкаса музэн мынэ, соосты маялля, кожалод. Писпуос пӧлысь шуак кирпичлэсь ӝутэм зӧк муръё адскиз. Со Факел посёлоклэн данъяськонэз но сюлмаськонэз - татысь пияла поттон завод. Шкляевъёслэн доразы нокин вылымтэ. Август толэзь вал бере, кенер вискытӥ бакчае учки, картошка уг окто меда шуыса. Отын чал-чал. Умой адямиос валэктӥзы, Валерий Михайлович пияла поттон заводын ужа, пе. Отчы шонтӥмы. Проходнойын трос юалляськыса ӧз улэ, валазы, лэся, ма муген Шкляевъёс доры журналистъёс вуиллям. Ми пумиськимы ӝужыт мугоро, тӧлын тугам тӧдьыалэс йырсиё воргоронэн. Ӟечбуръяськем бере ик валай, пиосмуртлэсь юн-юн кужымзэ, пель сьӧрам боз-боз куараез кылӥськиз. Шкляевъёс уло кык семьялы лэсьтэм из коркан. Бакча палась кузпалыз Татьяна Николаевна но вуиз. Мон сое адӟиськымтэ. Нырысь-валысь куалектэм кадь луиз, пичиесь синъёсыз, пазьгиськем кӧжыос музэн, одӥг адями бордысь мукетыз пала бызьыло, котькудзэ дунъя кадь. Верандаез ортчыса, ми корка пушкы пыримы. Татын салкым, векчи носкиен пыдъёс юзманы ӧдъязы. Кузпалъёс поттӥзы магнитофон, кӧня ке гинэ туспуктэмъёс, но озьы ик быдэс ӟыгыртэт мында пӧртэм бумагаос: куриськонъёс, вазиськонъёс, телеграммаос, телефонограммаос, судэ ӧтёнъёс, нимысьтыз тетрадьын шуге-леке вуэмзы сярысь тодэ-ваёнъёссы. Соослы гинэ отысь котькуд кыл тодмо, котькуд суред валамон, уго Шкляевъёс бырем пизэс ӝыны ар пала асьсэос утчано луизы. Государство соослэсь яратоно пизэс армие басьтэ, нош кулэм бераз, солэсь пытьызэ шедьтыны, гижы йыл быдӟа но ӧз юртты. Курыт синкылиен ӵокӟем нуналъёс кураськон кудыен сямен, Олегзэс утчан вылысь, кузь но тодмотэм сюрес вылэ потӥзы. Россия кык пол вииз Шкляевез - нырысь ик Грозныйын мугорыз быриз, собере - лулзэ но тус-тас, оло, карыны малпало вал. Бӧрдыса, мур лулӟылыса Валерий Михайлович но Татьяна Николаевна пизы сярысь вераны кутскизы. Мон бакомем мурт кадь луи, соослэн чидамзылы чылкак абдрай. Асьме калык гинэ сыӵе юн, дыр. *** 1997-тӥ арын 27-тӥ январе Игра ёросысь Факел посёлокысь Шкляевъёслэн пыд улазы кынмем музъем но зурканы кутскиз, лэся. Сюлэмзы шӧдӥз ни, Олег пиенызы маке но умойтэм шуыса. Соку Чечен шаерысь дырын-дырын чылкыт осконэз ныж пуртэн вандылӥсь иворъёс вуыло на вал. Бумага вылын ожмаськон быриз кадь, нош адями визьмын сое луоез сямен гинэ пазяны уг луы, чус вакытэ, уйвӧтъёсын кышкыт суредъёс тодэ лыкто, кылем сьӧд пытьы сярысь анай-атай ымныръёсысь учкыса валатскыны луэ. Олеглэсь июль толэзьысен гожтэтэз ӧй вал ни. Верамзыя, со Моздокын, пе, служить каре, нош конвертсэ сакгес учкиськод ке, одӥгез гожтэтэз вуэмын Курчатовысь, мукетыз - Москваысь, куинетӥез - Курскысь. "Кыӵе гуртэ бертэм потэ ини! - ӵемысь гожъялляз рядовой Шкляев. - Тӥледын кӧня ке улыса, нош ик армие кошкысал". Калыкен вераськыса, кузпалъёс валазы, кыкетӥез но пизы чечен музъем вылын ожмаське шуыса. Неужто Олег но воштӥськоз? Валерий Михайлович но Татьяна Николаевна соку ик валазы бадӟым пизылэсь, Сергейлэсь, воштӥськемзэ: ас понназгес луиз, трос уг вераськы, ӵемысь йыр висемлэсь таблеткаос сиыны кутскиз. Шкляевъёс ноку но ӧз малпаллялэ, соослэн кыкетӥ пизы но "пӧсь гуре" сюроз шуыса. - Мон чылкак паймисько, кызьы сое армие басьтӥзы? - синкылиосыз кисьтӥсько анайлэн, пумен ныр кышетэн ӵушылыны тырше ке но, сюлэмын люкаськем куректон пачыласа потэ но потэ. - Солэн плоскостопие вал, бызьылыны но курадӟиз. Школа бере ик ДОСААФ-е дышетскынын пырыны малпа вал. Висись шуыса ӧз басьтэ. Кема ик дыр ӧз ортчы, армие мыныны повестка сёто. Чылкак паймисько мон та улонлы! Нуналлы быдэ сямен радио пыр Чечняысь вуись иворъёсты кылзыны тыршизы, телевизор пыр, оло, пимес адӟомы шуыса, "Время" програмамез учкыны быдэс семьяен пуксьылӥзы. Пытсам гуын кадь улӥзы, нош толшоре соос вадьсын югыт куазен гудыртӥз. Та нуналэ Шкляевъёс Олеглэн геройлыко быремез сярысь извещение басьто. Вань малпанъёс колӟаськизы, киос юскиськизы, пыд быгытъёс кисальӟизы, адями кужым тӧлъя-буръя лобӟиз. Шкляевъёс понна Факел посёлок вадьсы, оло, сьӧд пурты кымалскиз. Йырез эшшо поромытӥз на мукетыз ивортон: "Рядовой Шкляев быремын Грозный городын 1996-тӥ арын 6-тӥ августэ. Та дырозь мугорыз сярысь нокыӵе ивор ӧвӧл". Оло нош Олег быремын но ӧвӧл? Оло, воинской частьлэн командиръёсыз янгышазы? Ожмаськон дыръя ӧжыт шат луо валантэмъёс? Инмар ке сётэм, оло, со чечен пленын? Йырыз гинэ быглес мед кыльысал, югыт дуннеез мед адӟысал, ӵыжы-выжыоссэ, тодмооссэ мед тодмасал, соосын мед лабыртысал! Арня пала Шкляевъёс гуньдэм кадь улӥзы. Маке но кароно. Валэктон сётӥз Удмурт Республикаысь солдат анайёслэн огазеяськонзылэн кивалтӥсез Людмила Акатьева. Со герӟаськиз Грозныйысь, Ростовысь но Ставропольысь военной кивалтӥсьёсын. Шкляевъёсты мед, пе, ӧтёзы военной лабораторие, кытын кыллё тодмотэм солдатъёслэн шӧйёссы, соосты эскерыны, утчаны мед лэзёзы. Анай-атайлэсь кин умой тодэ нылпизэ, таӵе амалэн гинэ, оло, соку утчан ужез трослы ӝогомытыны луысал. Ӧтён гожтэт вуэм бере, Валерий Михайлович но Татьяна Николаевна кошко Ростове. Коньдон ӧвӧл. Пунэмаса но кызьы люкаськиз кадь. Ростов туж ик ӟеч ӧз пумита. Татысь военной госпитальын но лабораторийын Шкляевъёс кадь уно гинэ семьяос люкаськемын вылэм, ваньзы утчало яке пизэс, яке кузпалзэс. Бадӟым юрттэт сётӥз инспектор Щербаков. Солы но ужаны капчи ӧвӧл. - Тӥ тодӥськоды-а пидылэсь ӝуждалазэ?.. Кыӵе размер пыдкутчан но изьы нуллэ вал? - юаз офицер. Таӵе вераськон кузпалъёсты чылкак паймытӥз. Быдэ вуэм воргоронэз басьто армие, нош со сярысь номыре уг тодо. - Ӝуждалаез одӥг метр но 77 сантиметр вал шуыса гинэ тодӥсько, - мур лулӟыса вераз Валерий Михайлович. - Тӥ асьтэос тодыны кулэ кадь, кыӵе солэн мугорыз! Кытысь ми ваньзэ йырын возьыны кулэ, вылаз ик, егит мурт толэзьлы быдэ воштӥське. Солэн документъёсыз ӧвӧл шат?.. Юан юанэн ик кылиз. Пумзэ-йылзэ шедьтод на меда уйпери ортчем бере. Кык арня витёно луиз вань та лыдпусъёсты люкан понна. Госпитальысь но лабораториысь телефонъёс гордэктон калэ вуо ни вал. Кузьылиос кадь бызьылӥзы Игралась военкоматын ужасьёс. Вераськем понна, трос гинэ коньдон сётоно луиз. Ростове пиоссэс, картъёссэс утчаны лыктэмъёсты ӵемысь пумитаны луэ вал "киноысь". Пичи гинэ зал, отын видеомагнитофон сылэ. Вазь ӵукна ик татчы лыкто бус пушкысь тыллэсь куд палась пиштэмзэ утчасьёс, пумзэ-йылзэ шедьтыны тыршисьёс. Соослы возьмато номерен пусъем шӧйёсты, шонергес вераны луоз, дыр, мугорлэсь кылем-мылемъёссэ. Ӟукыртӥсь пукон вылын пукись утисьёслэн али азьтӥзы пыдтэм, йыртэм шӧйёс ортчо - вала на кытын тынад пиед! Таӵе йыртӥян сётӥз анай-атайёслы валантэм война. Сьӧд-сьӧд кышетэн одӥгез кышномурт толэзь ӵоже уте ни та "киноез", та дырозь пичильтык буйган но ӧз шедьты на, кырым пыдэсаз бӧрдэ но кошке. Ӵуказеяз выльысь вуэ. Кыӵе кужым сое татчы кыске на? Таӵе "кинолэсь" ӧскем но потыны кутске. Но берлань чигнаны пыдъёс уг мыно ни - шедьтоно Олеглы кельшись мугорез. Укмыссэ кылем-мылемъёсты валаны ик уг луы ни, ма со? - сюен сураськем лыосын кӧтсюл сяна, номыр кыльымтэ ни. Шкляевъёсын ӵош ялан ветло вал Борисов кузпалъёс но. Экран вылын 604-тӥ номеро мугор. Ӝыныез сяна ӧвӧл ни, со но сутскемын: сюрлы бордаз йырыз мырдэм возиське, одӥг гинэ пыдыз кылем на. - Таиз мынамезлы кельше кадь! - зал тыр кеськиз Борисов. Инспекторен ӵош соос лабораторие кошкизы. "Таос коть пизэс шедьтӥзы, лэся, - ас понназ малпаськыса кылизы Удмуртиысь лыктэм кузпалъёс. - Нош кытын меда Олегмы? Шонер-а меда сое утчаськомы? Таӵе дыре со пал кыл ке но вазьыны быгатысал ке... Пу бодыез борды пыкъяськыса, ӧс пала вамыштӥз кышноез но, кузпалыз сьӧры нокызьы уг вуы. Солы ог 50 арес пала ини, тазалыкез вылэ ялан ӝожтӥське. "Пие сьӧры ачим но кошко ини! - чик кӧбератэк вера пурысьтам йырсиё кышномурт, - малы дунне вылын улонэз на? Одӥг пие вал, сое пыд вылаз султытыны тырши... Куректон асме турналтэ кадь ини". Шкляев кузпалъёс 566 номерен мугорез пизылы кельшытӥзы. Сюлэмзы ик пирсэкъяны кутскиз. "Неужто та Олег!?" Таӵеен-а сое доре нуомы? Шат таӵе улон понна ми сое будэтӥмы вал? - пӧртэм юанъёс соку ик йыразы муш палэп кадь кылдӥзы. 566-тӥ номерлэн йыркобыез, супыр-супыр пуньырӟем лысьӧмез но одӥг пыдыз сяна, номыриз кыльымтэ ини, тыл но дыр асьсэлэсь ужзэс лэсьтӥллям. Семенов, Ермаков экспертъёс мугорез пертчыны кутскизы, Олег Шкляевлэсь тодмо пусъёссэ утчало. - Мон аслэсьтым пиме тодманы кулэ, - офицеръёсты палэнтыса, шӧй вӧзы султӥз Татьяна Николаевна. - Со тямыс толэзьем вордскиз. Йырсиез туж нап вал, вылаз ик, соос ыжпилэн кадь бабыльскылӥзы. Куд-огез ӧз но оскылэ, Олег пие дунне вылын улоз шуыса. Пичи дыръяз ик йыр пыдэсаз одӥг тодметэз кылиз: небыт интыезлэн шокамез син азьын шӧдӥське вал, куажым интые лы нокызьы но будыны ӧз вормы. Куэн шобыртэм небыт, луло интызэ вожмаськыса сямен учкиськомы вал. Берло ми со сярысь вунэтӥмы. Куд-ог дыръя гинэ пие, "тани учке ай, мынам йырам небыт вить копейкае вань" шуыса, милемлы серекъяса вера вал. Озьы ик со кылиз, школаез быдтэм бераз гинэ кужымез золтӥськиз кадь. Нырыз но солэн пӧртэмгес вал, Олег гайморитэн висиз, шоканы курадӟылӥз. Озьы ик вунэтоно ӧвӧл - солэн плоскостопие вал, луо вылэ лёгиське ке, табань лякем бере кадь, пытьы кыльылӥз, выж вылтӥ ветлыны ик керпотэ вал. Суть-суть пӧсятозь ужазы экспертъёс. Урамын салкым кадь, нош лабораториын шоканы уг луы: пӧртэм зынъёс ньылонэз ӵоксало. Ляб сюлэмо адямилы татӥ ветлыны трос кужым кулэ, выж вылын кыллись мугоръёс вӧзы ик медаз выды шуыса. Офицеръёс ог-огзы шоры паймем синъёсын учко, кӧня ке секунд шокаса сыло но, выльысь уж борды басьтӥсько. Вӧзазы сылӥсь Шкляевъёс но та секыт ужын юрттыны тыршо. Ермаков ымнырысьтыз тӧдьы масказэ куштэмез бере, кузпалъёс но, оло, каньсыразы, лэся: оло, таин уж быриз? - Тӥляд та пиды ӧвӧл кадь! Али одӥгзэ гинэ вераны быгатӥськомы: тодметъёс 60 процентлы гинэ тупало, - кымес вылысьтыз пӧсям вузэ ӵушылыса, вазиз Ермаков. - Пумозяз ик тодон вылысь, тӥляд сюрлыысьтыды виымзэ басьтыса, эскероно луоз! Но тӥ сое туж умой тодӥськоды, макем со дуно усе. Курскысь одӥг кышномурт но малпам вылэм котьмае тодӥсь но шараясь аппарат пыр пизэ шедьтыны. Мугорысьтыз басьтэм виымзэ келяло Москвае. (Сыӵе аппарат Ростовын со вакытэ вылымтэ.) Врачъёслэн тазьы дауртэмзы понна, кышномуртлэсь 10 миллион манет (вуж сямен) коньдон куриллям. Куръяса но мараса, сомында уксё шедьтэм. Москваын эскеремзы бере, солы ивортӥллям: 70 процентэз сяна, огкадез ДНК-осты ӧвӧл. Эшшо одӥг пол таӵе ик ужрад ортчытоно луоз на, пе. Кышномурт солы дась вылымтэ. Жоб дыльдыен сялӟыса, вить этажъем но ыме тэрисьтэм кылъёсын вераса, госпитальысь потэм. Нош Шкляевъёслэн кытын сомында коньдонзы? Котькуд копейказэс, манетсэс лыдъяса сямен уло. Телефон пыр вераськемзы понна гинэ, кӧня коньдон тыроно луизы ни, сиён-юонзэс чакласа возизы. Герӟасько я Играен, я Ижевскен, я Москваен, я Ставрополен, я Моздокен. Кисыысь коньдон сӥсъяськыса кадь быре но быре. Ярам коть, Валерий Михайловичлэн ужан интыысьтыз, Факелысь пияла поттон заводысь, вуоно уждунэз чотын, пунэмен 2 миллион коньдон ыстӥзы. Бертэм беразы уксёез одно ик берыктозы шуыса верамзылы, заводысь кивалтӥсьёс оскизы. Нош ик возьман дыр вуиз. Дунне вылын ма меда вань возьман ужлэсь секытэзгес. Ма кароно на? Кытысь утчано на? Кыӵе номерез эскероно на? Тазьы долкаса пукыкузы, вӧзазы дугдӥзы Борисов кузпалъёс. - Милемлы 604-тӥ номер но ӧз тупа, - йырысьтыз картуззэ басьтыса, кияз посыны кутскиз пиосмурт. - Кӧня юнме дыр быриз! Талэн куке-соку пумыз-йылыз луоз меда? Тӥледлы но шат ӧз удалты? - Шудтэм муртлы ку меда удалтоз ини, - горд-горд синъёссэ ӝутыса, мырдэм вазиз Татьяна Николаевна. - Инмарлэн малы ке но пиелэн кулэм бераз но сое умоен музъеме басьтэмез уг поты. Сьӧлыкоесь, лэся, асьмеос та югыт дунне вылын... Со дунне туннэ понна югыт на ке. Оло, тӥледлы эскероно 604 номерез. Верады вал ук, пидылэн йыр пыдэсаз небыт интыез вань шуыса. Милям но сыӵе пусэз луыны кулэ вал. Витямылэн йыр вылаз усем бере, со кылдӥз вал. Со но чельы йыл быдӟа сяна ӧй вал. Таиз бадӟымгес. Оло учкоды, тазьы жальмаса, сюлэмдэс чигыса улытозь. Оло, одӥг сантиметрлы утчаськонды азьлань мыноз. Туала вакытэ дасьсэ возьмаса ул ай, усьтэм ымад жоб зырым гинэ сялӟозы. Мукет сямен сое нокызьы вераны но уг валаськы ни... Сутскем шӧйёсты партчан - со луло мугор вылысьтыд яраез выжыеныз ишкалтэм кадь. Кӧтпуш позырске ини, синъёслэн номыр но адӟемзы уг поты ни. Пук ини вал гуртад, вӧзад мед луысалзы матысь адямиосыд, умоез сярысь гинэ малпаськыса пук вал. Малпаны гинэ озьы луэ. Дор кыдёкын, нош Ростовын кытын ке но соослэн пизы кылле (оло нош воксё татын но ӧвӧл!) Татьяна Николаевна тросгес сюлмаське ини Факелэ кылем нылыз, песянаез сярысь. Ма меда каро? Коньдонзы тырме меда? Телефон пыр гинэ, дыр, песянаез тазалыкез умой шуыса вера Татьяна Николаевна солы уг оскы. Кыӵе валась адями таӵе вакытэ шуг- секытэз сярысь поттылыны кулэ! Куректонэз шори люкыны тырше луоз. Капчи ӧвӧл, дыр, Людмила нылызлы но. Мукет нуналаз Шкляевъёс пыризы Северо-Кавказской военной округысь 124 номеро судебно-медицинской лабораторилэн начальникез В. В. Щербаков доры. Военной адями соку ик валаз, Удмурт шаерысь вуэм семья нош ик пизы пумысен юалляськыны лыктӥз шуыса. Маин соослы юрттоно на? Кыӵе сюрес шедьтоно, та пеймыт гуысь потон вылысь? Маин ке лӥятыны луоз на шат, ныж пуртэн вандылэм сюлэмъёсты? Нырысь дуринчиос мында юанъёс кизилиё погонэн пельпумъёс вылэ нош ик мешокен зӥбем кадь пуксизы. Оло, солы чидатэк, полковник нырысь ачиз пукон вылаз пуксиз, собере гинэ пырем адямиослы пуксьыны ӵектӥз. Вераськон вакчи вал: Шкляевъёслэн одӥг куронзы - 604 номерез эскерон. В. В. Щербаков дась котькыӵе дэмланъёслы, утчаськон сюрес вылын одӥг вамыш ке но азьлань лэсьтыны луысал ке. Владимир Владимирович быгатэмея юртто шуиз. Вуэ выйись мурт куро борды но кырмиське. Ростовын толэзь ӵоже улыса, Шкляев кузпалъёс утчаськон-сюлмаськон ужлэсь жадизы, ваньмыз ныр дӥне вуиз ини. Син шоры секыт пуктыны ӝуаса но кема дыр ӵоже кылльыса, куашканы кутскем шӧйез сэртон- пертчонэз. Сое Валерий Михайлович но Татьяна Николаевна гинэ тодо. Та нуналэ ма меда вал: пумлэн кутсконэз яке утчаськонлэн пумыз? Туннэ гинэ соос ас синмынызы адӟизы йыр кобыысь 5 копейка быдӟа пасез. Пичи дырысь небыт пус интылэн кылемез. Кылем-мылем ныр котырызъя но валатскизы: гайморит черен висем бере, таӵе пытьы кыле. Вань та тодметъёсын соглаш луизы эскерись врачъёс но. Одӥг граммлы ке но сюлэмын капчи луиз кадь. Нош мукет ласянь: та кылем-мылем пӧлысь кин валалоз на та пизы шуыса. Сюлэм пумитъяське ке но, йырвизь ваньзэ радэн- радэн пуктылэ: та Олег Шкляев. Вуиз доре бертон нунал. Соос - куинь кузя. Табере ваньзэ коросэ тыроно? Ӵапак соку адямиос чиптэм-чаптэм ышизы, граната пуштэм бере кадь ик. "Звезда" гостиница доры ваизы Олеглэсь шӧйзэ. Одӥг люке тырем лыосты адӟыса, куд-ог кышномуртъёс пыд вылысьтызы ик пограллязы, уго соос асьсэос татчыозь ӧз шедьтэ на пиоссэс. Коть таӵеен ке но. - Лыосты коросэ тыроно вал, - каллен гинэ вазиз Татьяна Николаевна йырсазьзэ ыштэм кышномуртэ ӝутыны тыршись картэзлы. - Мынам но йыры пороме ини. Тани ук, ньылонэз но сюрлыез воксё сьӧд-сьӧд. Оло, вуэн гылтоно вал. Кырсен музъеме уд пон ук. Сюлмаськемзэс кык пиос валазы кадь. Соос Валерий Михайлович доры вамыштӥзы. - Юрттыны кулэ-а? - Мае но сое коть кезьыт вуэн гылтоно вал, - пиосмурт интые мырдэм вазиз кышномурт, уг но вала ни, ӵыж-ӵыж горд ымныр вылаз сьӧд-сьӧд кышетэз лэзиськем шуыса. - Коньдондэс вае - соку миськомы, - чик кӧбератэк вераз пырон-потан ӧс пасьта пельпумо пияш, огез кышномуртлэн жадем синъёсаз чорк-чорк учке. Киосыз паськыт штани кисыосаз тыремын. Кышномуртэз нушыен обыбказы кадь, оло, музъем пыр кошкиз. Мае но уд чида вылэм та дунне вылын! Шонер верамын: "Из но, му но, пилиське но - адямилы чидано!" Олокытысь кужымез потӥз на: ассэ ачиз кутӥз, шальтраса ӧз вуы, ымнырысьтыз вань быгытъёсыз золтӥськизы кадь, лек синъёсын учкиз пиос шоры, кужымез луысал ке, вань йырсиоссэс ишкасал, дыр. Сурон бамъёс долкаса ик сылӥзы. Бызись ву гинэ но ӧвӧл, юрдоно, ӧскем ик потыны ӧдъя. Одӥг йыркобыез гинэ чылкыт вал, со но пӧземын. Кык кышномуртъёс юрттӥзы ни ваньзэ коросэ тырыны. Одӥгез песянай соку но йырсазьзэ ыштӥз на. Солы ныр улаз сазьмытӥсь эмъюм сётоно луиз. *** Со вал 1996-тӥ арын 6 августэ. Грозный городын куашкало коркаос, лобало вертолётъёс но самолётъёс, уг чалмыло автомат куараос. Адямиосты туж шер адӟод, соос но йырзэс мыкыртыса гинэ бызьыло. Тросгес танкъёс но БТР-ъёс. Ожмаськон мынэ город шорысь Минутка нимаськись площадь понна. Куинь БТР-ъёсын российской солдатъёс задание потӥзы. Толон пушказ пуксьыны одӥг интыез но буш ӧй вал. Соку но рядовой Шкляев эшъёсыныз ӵош городэ потыны малпа вал. Малпамъя гинэ дунне вылын улыны уг лу. Удмуртиысь пияш ужтэк пукыны уг чида - маке но лэсьтоно. Нош 6-тӥ августэ веразы, туннэ, пе, луонлык вань БТР-ен задание мыныны. 10 час но 40 минутэ воинской частьысь куинь машинаос ӟукыртӥсь ӧсъёс сьӧры потӥзы. Корт пушкын 44 егит пиос иинтыяськемын. Командирзы валэктӥз, соос туннэ цементной завод пала мынозы шуыса. Отысь боевикъёсты пурӟытоно, пе, укыр эрказъяськыны кутскиллям, автомат гумыос уг чалмыло, асьсэды дуринчиос кадь возё. Та егит солдатъёс пӧлысь кин ке малпаз меда, туннэ со туннэ берпуметӥзэ задание потэ шуыса. Ӧз, дыр. Дунне вылын улонлэсь ӵуказе нуналзэ ке тодысал, соку тросэз тунсыкоез но чеберлыкоез бездысал, малпанъёс сураськысалзы, улон нюжалэн аспӧртэмлыкез бырысалыз. Военной частьлэн капкаетӥз потэм бере, 52 минут ортчиз. 11 час 32 минутэ куинез но машинаос "капканэ" сюризы. ... Мон пукисько Факел посёлокысь Шкляевъёслэн корказы. Пуксимы диван вылэ. Валерий Михайлович аудиокассета поттӥз. Ми гожтыса ваимы та заданиысь луло потэм солдатъёслэсь куараоссэс. Асьтэос кылзэ, ма соос верало. Магнитофон ужаны кутскиз. Мугор ик юзыр-кезьыр луиз: кылӥсько ыбылэм куараос, кортъёс ӵажырто, кыдёкысь шуш кесяскьемъёс кылӥськыло, троссэ кылъёсты валаны но уг луы. "80-тӥ номеро БТР эскерон пункт пала котырскиз, собере тыпак дугдӥз. Боевикъёс малпаллям, лэся, та машинаын нокин но лулоез ӧвӧл ни шуыса. Ыбылӥськон огдырлы чалмиз, пельёсты дол-дол ӵоксаз. Асьме солдатъёс кӧт вылазы нюжтӥськыса, со машина пала кошкизы. Тӥни соку шӧдтэк шорысь гудыртэм куара кылӥськиз, син азьын номыр уг адскы ни, омырын суэн-луоен сураськем суралтэт лӧсъяське. Корт юдэсэн Стахеевлэсь сюрлызэ ишкалтӥз. Адями йырсазьзэ ыштӥз кадь. Шузимем мурт ньыльпыдъяськыса, ми пала лыктэ. Юрттыны малпаськомы вал, соку снайпер ужаны кутскиз, йырез гинэ но ӝутыны уг лэзьы ни. Сӧсырмем солдатэз кызьы но озьы БТР улэ кыскыны луиз. Уно дыр ортчиз вирзэ дугдытыны... 78 номеро БТР-ен старшой лейтенант Пишикин кивалтӥз. Бригадалэсь ог 500 метре гинэ палэнэ кошкыса вуизы, гудыртэм кадь ыбылӥськон пуромиз. Машина гомӟиз. Пишикинлэн эшез люкетӥ потыны ӧдъя вал но со снайпер винтовка гумы вылэ сюриз. Сӧсырмиз. Машиналэн кивалтӥсез потыны ӧз быгаты ни, консерва банка пушкын кадь оло ӝуаз, оло пыжиз. Юрттыны ӧм быгатэ... Рядовой Шкляев но 78 номеро БТР дорын вал. Ожмаськон кутскон азьпалан, ми соин музъем вылын ваче пельпум кыллимы. Уламы сюй но ӝуа кадь. Кӧтпыдэс вылам нюжтӥськыса, мон сюрес урдсы выдӥ но боевикъёсты эскерыны кутски. Эше азьло интые кылиз. Йыртышкыным шӧдӥсько, ватскем гуысьтыз снайпер ужаны ӧдъяз. Адӟисько: рядовой Шкляев вез-вез кылле, йырзэ лэзем. Снайпер пуля сое пыд вылысьтыз погыртэм. Шкляев ӧз ни султылы. Отысь кошкем бере, кӧня дыр ортчиз - вераны уг тодӥськы. Эше син азям быриз, шуыны луоз... Трос солдатъёслэсь таӵе кышкыт учыръёс сярысь мадемзэс кылзоно луиз. 6-тӥ августэ 44 егит солдатъёс но офицеръёс пӧлысь 27-лы частязы берытскыны ӧз кылды. 11 час 32 минутэ егитъёслэн сюлэмъёссы жугиськемысь дугдӥзы. 52 минут гинэ кыстӥськиз задание ветлон. Ышем-быремъёс пӧлын вал рядовой Шкляев но. Кытын табере кылле со? Кытысь сое утчано? Ыбылӥськем куараос чалмем бере, утчаськон ужез нуись бригада городэ потӥз. Трос шӧйёсты шедьтӥзы, соосты чылкак тодманы уг луы ни. Вера Олег Шкляевлэн анаез Татьяна Николаевнна: - Мугорзылэсь кылем-мылемзэс цементной завод дорысь шедьтӥллям. Со Грозный городлэн шорысьтыз кыдёкын ик ӧвӧл. Милям пиосмы 4 нунал ӵоже асфальт вылын кыллиллям. Тодӥськоды ук, кыӵе пӧсь куазь август толэзе лымшор палась городын: асфальт ӵыжектэм таба пыдэс кадь луэмын, ваньмыз сисьме, куасьме, тузонэн пуксе. Милемлы видеоплёнка возьматӥзы. Отын ӵапак милям пиосмы пуктэмын вылэм: кинлэн ке одӥг пыд, кинлэн ке одӥг киыз гинэ кылемын на, мукетызлэн часэз адӟиське на. Луло кылем пуныос калго, асьсэлы сиён утчало. Таӵе йырвандон дыръя пуныослы сюан вакыт кадь потэ, дыр. Милям пиосмы чечен нылкышноослэн син улазы шедиллям. Чиданзы тырмымтэ. Жаленызы, мугоръёсты воронка пыдэсы куяллям. Нырез купыртӥсь зын медаз вӧлъяськы шуыса, одӥгез кышномурт дэмлам пиосты бензинэн пальккыны. Таӵе дыръя эстӥськон шедьтыны сокем ик шуг ӧвӧл. Гу пыдэсын ик сутӥллям. Собере ик сюен согиллям. Нырысьсэ гуэз 14 авгстэ гинэ копаллям. Отын Олегмы вылымтэ. Дас нунал ортчыса гинэ мукет "ватосэз" усьтыны быгатӥллям. Тӥни отысь шедьтӥллям мынэсьтым пиме. Кык арнялэсь трос Олег музъемын кыллем ни вылэм..." Анай синъёс курыт синкылиосын тырмизы. Кышет дурыныз ымзэ пытса, долкаса кадь учке пиезлэн гожтэтъёсыз шоры. Мон висись яразэ эшшо одӥг пол копалтӥ кадь. Нош таӵе синву кисьтон учыръёс кӧня пол ни вал меда? Шат дунне вылэ адями чиданы гинэ вордӥське? Ставропольеын Шкляевъёс пумисько 24 аресъем Сергей Курскиен. Татьяна Николаевна сое аслэсьтыз пизэ кадь ӟыгыртӥз, кужымез но оло тӧлья-буръя кошкиз кадь, оло дунне вылысь вань уродзэ огдырлы вунэтӥз. Кема вераськыса пукизы, уго Сергей Олег Шклявез туж усто тодэ вылэм. Ачиз но со сӧсырмыны шеде, пельпумтӥз 9 граммъем свинец пуля пыр потӥз. - Олеген ми ӵош служить каримы, - мур лулӟыса, вераны кутскиз армиысь вань кырсьсэ но жобзэ адӟем егит пияш. - Нырысь ик, со штабын пукиз, пӧртэм документъёсты лэсьтылӥз. Малы меда со оже Шкляев одно ик куриськем. Та юан пумысен номыр вераны уг тодӥськы. Одӥгзэ тодӥсько: 5 августэ ик со БТР-е пуксьыны малпа ни вылэм. Соку инты сюрымтэ. Нош мукет нуналаз ӵапак одӥг интызы вылэм на. Бронежилет но автомат кутыса, машина пушкы гинэ зымиз. Со ик луиз берпуметӥ задание кошконэз... Ыбылӥськыны кутскем бере, пукыса малпаськыны дыр ӧй вал ни. Куке Олегез сӧсыртӥзы, со, пыд вылаз султыса, шузимем мурт кадь ыбылӥз. Эшшо одӥгзэ верам потэ на: Шкляев автоматэз кияз куинь пол гинэ кутылыса вуиз. Кин отын янгыш?" Цинк коросэз вуттӥзы Факел посёлоке. Доразы кылемъёслэн витён чиданзы мырдэм тырмем на. Посёлокын улӥсьёс огыр-бугыр луизы, вераськонзы Олег Шкляев сярысь гинэ вал. Кин быгатӥз, ваньмыз лыктӥз гуртоенызы люкиськыны. Куръяса сямен ик коньдон люказы яратоно пизэс ватыны. Оло, сое ик валаса, куд-огез коньдон корос вылэ ик тыризы. Быдэс посёлокен ик ватӥзы, куректонэн пачкатэм семьялы берпуметӥ сюрес вылэ пизэс келякузы, ваньмыз юрттыны тыршизы. Но та кузь сюреслэн кутсконэз гинэ вылэм. Шкляев кузпалъёслы тодмооссы валэктӥзы, тӥледлы, оло, коньдонэн юрттэт сётозы ёросысь администрациын яке ёрос военкоматын. Зэмзэ но, егит солдат быриз вордскем кунэз понна, быдэстӥз Присягалэсь куронъёссэ, тушмон азьын одӥг вамыш но берлань ӧз чигна. Адями улонэз коньдонэн дунъяны уг луы ке но, кузпалъёс малпазы, оло, Ростовын, Ставропольеын утчамзы-улэмзы понна, пизэс ватэмзы понна пыд вылазы султымон ке но коньдон висъялозы шуыса. Осконзы вал: государство соос пала кариськоз шуыса, куректонзэс ӧжыт ке но лапкомытозы. Ёрос военкоматын соку ик пумит луизы: асьмеос, пе, мырдэм шокаськомы, одӥг копейкамы но ӧвӧл. Соку Шкляевъёс вазиськон гожто ёросысь депутатъёслэн сессиязы. 1997-тӥ арын 10-тӥ апреле калыкен быръемъёс валазы Шкляевъёслэсь куректонзэс но коньдон висъян пумысен огкылэ вуизы. Солы пумит султӥз ёрос администрацилэн азьвыл кивалтӥсез Галина Вишневская. Профессиезъя дышетӥсь куректон вылэ сялӟиз, вылаз ик, ёросысь прокурорез но ӝутӥз. Таиз но депутатъёслэсь решенизэс умойтэмен лыдъяз. Бумагаос судэ кошкизы. Кутскизы кабинетъёстӥ бызьылонъёс. Россиын гинэ таӵе учыръёс колӟасько, дыр. Та ужпумез эскеризы ёросысь но республикаысь судъёсын. Югдурез, куректонэз ваньмыз валало кадь, нош уж вылын юрттыны нокин но ӧз басьтӥськы. - Мынам пие ведь армиысь ӧз пегӟы, автоматэн кияз бырыны шедиз, - чабкиське кышномурт, ма карыны ёрмыса, четлыке сюрем тылобурдо кадь, омыре потыны ӧс утча. - Со ведь аслаз странаез понна быриз. Приказ сётӥзы - со быдэстӥз. Табере солдатэз, солэсь ӵыжы-выжыоссэ ик дэрие лёгало. Мынам кадь пие котькуд анай-атайлэн мед луысалыз! Ёросысь кивалтӥсьёс ымазы ву ӟузем сямен уло, та соослэн ужзы но ӧвӧл кадь. Одӥг ласянь Олеге районлы дан но ваиз, зэмос солдат луэменыз. Котькудӥз быгатоз меда Олеглэн интыяз султыны, со кадь ик кышкасьтэм вамыш лэсьтыны. Бырем солдатэз данъяса, оло монумент, оло памятник но пуктоно вал. Кытын, пе! Пиме военкомат армие басьтӥз странамес утён вылысь. Со быриз, табере Олегез воксё вунэтӥзы, асьмелы бызьылоно луэ. Малы шуге-леке вуэм семьяез государство ас вылаз уг басьты, малы палэнске, мултэс каре? Тӥни озьы, йыр йылозь куректонэнызы Шкляев кузпалъёс ваче син кылизы. Депутатъёсын висъяны чаклам коньдон кагаз вылэ ик бурмизы, пӧртэм кабинетъёсысь басьтэм бумагаос пӧлы ик инты шедьтӥз. Отчы гожтэм лыдпуслэн но кинюртэмлэн куке- соку кужымез луоз на меда? Чал-чал луиз Шкляевъёслэн коркаязы, дыр вуиз мыным Ижевске кошкыны. Ачим но уг валаськы, сюлэм вылэ маке но зӥбе кадь, ырак шокчем уг луы. Ӧсэтӥ потыку ини, Валерий Михайлович шуиз на: - Та валантэм чечен ожмаськон мынэсьтым пиме гинэ ӧз басьты. Юнме уг верало, куректон огназ уг ветлы шуыса. Мынам нырысетӥ пие но Чечняын вал. Та дырозь но солэн йырыз висе на. Люда нылы Глазовысь пединститутын дышетсконзэ куштоно луиз. Куректонлы чидатэк, улонысь кошкиз кышноелэн анаез, аслам анае но больницаын кема дыр ӵоже эмъяськиз.Пыд вылысьтыз Татьяна но пограз, пыдъёсыз зӧкомизы. Тӥни кытчы вуттӥз милемды кытын ке но кыдёкысь гурезьёсын мынэм ожмаськон . Нош Россиысь кӧня меда семьяосты ныж корт ньыро ньӧлыныз йӧттӥз "чечен война"!? Куд-огез татчыозь но пизэ яке кузпалзэ возьмаса улэ на, уг тодо, ӵыжы-выжыоссы виемын-а, пленын-а? Луло адямиосын сямен верасько, праздникъёс дыръя ӝӧк вылазы сю грамм пукто, мумыкоре шуккем чук шоры возьмась ымныр тусо учкылыло. Мукет палыз но вань на: вунэтӥськомы ожысь бертэмъёсты но. Кызьы ивортӥз шаерысьтымы Афганистанын но Чечняын ожмаськемъёслэн союззылэн кивалтӥсез В. В. Алёхин, куинь ар ӵоже Удмуртиысь 2 сюрс 50 адями Кавказын Конституциен юнматэм радлыкез юнматонэ пыриськиз, 49-эз быриз, 21-ез сӧсыр кылиз. Таӵе семьяос берыктонтэм шуг-секытъёсын пумисько: чечен оже пыриськемъёс, кызьы шуо соосты, "чеченецъёс" мултэс адямиос луизы кадь, кема дыр ӵоже ожмаськемъёсын оградэ пуктыны кышказы, лэся, кызьы ӵошатод 20-22 аресъем пияшез но песятаез? Озьы малпазы, лэся, асьмелэн вылӥ кивалтӥсьёсмы, небыт креслоосын пукыса, нош асьсэлэн пиоссы армие мынон интые, шуны кабинетъёсын, кондоно интыосын дырзэс ортчытӥзы, кильтрес нылъёслэсь мугоръёссэс ӟыгыръязы, чебер ӟенеликъёсысь курытсэ лэзьязы. *** Учкисько "Время" программаез. Видеосуред возьмато, кызьы Чечен Республикаысь 14 егит солдатъёсты мозмыто. Нош ик дас ньыль семьяе кема возьмам пиоосы вуизы. Игра ёросысь Факел посёлокысь Шкляевъёс доры куке-соку шумпотон пыроз на меда? Ӝуам сюлэм куке-соку улӟоз на меда? Выжыкылъёсын гинэ быремъёс лулъясько, нош улонын со мукет сяменгес луэ. Георгий Грязев, "Арсенал" телекомпаниысь журналист. ШӦКЫЧ Одӥг карын, кылем арын Кылэм-адӟем учыр Картэз. Мон шузи-а мара ужаны, кусме тӥяны? Али нокытын коньдон дыраз уг тыро. Яке сое ар ӵоже уд адӟылы. Нош кышное весь тылобурдо сямен пиккетэ: "Уже пыр, уже пыр!" Тынылем берам, садикын возьмаськись луыса ужамъяськи. Мар пайдаез? Быдэс толэзь тыршеме понна уксё ӧз сётэ. Тау шуисез но ӧй вал. Кошки. Матушка сюдоз ай. Мон солэн одӥг пиез. Со мынам, ох-ох, фронтовичка! Пенсия басьтоз - кыкмылы ик тырмоз. Али тросэз уг ужало. Вот соос визьмоесь. Мон маин пӧртэм? А? Мынам но кудыям ма но со берга на. Нылпиосы? Соос бадӟымесь ини. Асьсэос мед сюлмаськозы. Монэ но медаз вунэтэ. Как-жо, атайзы луисько ук. Нош кышноелэн зулемез? Пуны утэ - тӧл нуэ. Малы соин огазеяськи? Картэз понна мед сюлмаськоз шуыса. Мон - вор-го-рон! Кышноез. Ой-ёй, кызьы меда улод но кызьы меда кулод? Заводын но ужасько, техничкаын но дауртӥсько. Трос нылпиё семьяослэн союзазы но тыршисько. Мыным ик ӟеч кыл но ӧвӧл. Мардэ, пе, тынэсьтыд адӟиськом? О, инмаре! Сӥзьыл ке вуэ, отпуске куриськисько, колхоз бусыысь кӧланы гинэ бертасько на. Бертэмелы быдэ кык-куинь ведра картошка, горд кушман, кубиста ваисько. Озьы со толлы но, оло, тырмысал. Но картэ, Валера-калера, сое лушкемен вуза но бутылкалы пӧрмытэ. Уж утчаны ыстӥсько: "Мынам, пе, тазалык нэ позволяет". Сторожысь но уллязы бере, кытчы со интыяськоз? Сиыны ке буйвол кадь таза. Куасамзэ уг вала. Ческытсэ, мон медам адӟы шуыса, штора сьӧры ватскыса тыке. Чылкак пичи нуны кадь. Уждун ке басьтӥсько, дӥськут нырысь ик Валера-калералы мед луоз. Юнме-а гижыоссэ эголэн сузя. Паськыт синкашъёссэ пинцетэн сюбег каре. Бызьыны дасяськись ныл кадь дауртэ. Нош нылпиосыз мон вылэ куштэ. Тынад, пе, со окты-калтыосыд. Берпум дӥсьтэ вуза но соосыз утялты, шуэ. Ой-ёй, кышномурт пельпумысь чидан ноку чигымтэ, лэся ! Анайзы. Господи! Мар даурто таос? Ялан-а кенэ ужысьтыз укмыс часын берталоз? Валерчикме картэн но уг лыдъя ни шат? Маин со мужикъёслэсь пӧртэм? Зарни комоке но пиосмурт. Мон ведь весь даур уг улы. Тазалыке так но ӧвӧл ини. Кулӥ ке, кенэ вӧсь уз кар меда пиме? О, Господи! Мар луэ та улонын? Покчи нылыз. Берло дыре анаймы висе-а, мар-а? Бер берта, "отметкаосме" уг юа. Ӝогак сиён лэсьтэ но изьыны выдэ. Кытын ке сюдо-а, мар-а сое. Песяй шуэ: "Мукет дядяен кушласькем". Озьы ини со: вал секыт ужез ке но быдэсъя, сое ик сюлоен "сюдо". ВИТАЛИЙ АГБАЕВ. Дэбёсъёс огазеяськизы "Вить чиньыосты огазе карид ке - мыжык луоз, дас чиньыосты ке - кувалда", - шуо калыкын. Сыӵе малпанэн мон потӥ "Дэбес бӧляклэсь" (землячестволэсь) огазеяськонзэ кылдытонъя нырысетӥ люкаськонысь. Мар ватонэз, удмурт калык дауръёсын зӥбыса воземын, оло, соин но, дыр, со кепырась, дӥсьтӥсьтэм. Соин ик кулэ калыкез ӝутӥсь, валтӥсь кужым. Ӵошатон понна вераме потэ коми-зырян калык сярысь. Мон уго Коми шаерын 23 ар ӵоже дышетӥсь луыса ужай. Комиос асьме калык сярысь ӝынылы ичигес. Нош кыӵе соос асьэды вылӥын возё. Бадӟым кивалтӥсе быръё асьсэ калыксэс гинэ. Шуом, пинал ке вордске, солы дунтэк кузьым сёто. Пересьёслы аптекаын дунтэк эмъюм висъяло. Шаерамы со сярысь кылылэмзы но ӧвӧл кадь. Пайми, кӧня вылэм Дэбес палась потэм дано адямиосмы! Артистъёс, тодосчиос, жруналистъёс... Вуоно быръёнъёс азьын бертылоно вылэм соослы вордскем палъёсазы. Мед верасалзы калыклы - кытын зэмлык, кытын пӧяськон! Нырысетӥ пумиськонэ ог 400 пала адями ветлӥз. Малпамея, со ӝыныез но ӧвӧл на. Кылсярысь, мынам дышетэм пиналъёсы ик кӧняез городын уло ук. Малпасько, вуоно пумиськонамы уногес калык люкаськоз шуыса. Люкаськонын 14 муртлэсь комиссия кылдытэмын, кутэмын ужан программа. Соин ик, эшъёс-бускельёс, ойдолэ ум вунэтэ вордскем музъеммес, кузьыт синкылиосмес, егит шулдыр мылкыдес. Юрий Шкляев, (азьло улӥ Вылӥ Четкер гуртын, али - Ижевскын). *** Огазеяськозы алнашъёс но Таяз кӧс нуналэ, 30 январе, 10 часын Удмурт кун университетлэн нырысетӥ корпусаз люкаськоз "Алнаш бӧляк" (землячество) огазеяськонэз кылдытонъя кенеш. Отчы ӧтиськом ваньзэ Алнаш палан вордскемъёсты, ваньзэ кин улонзэ герӟаз та чебер но узыр музъемен. Дунне колёса Туж шуг туннэ дунне колёсалэсь бергамзэ валаны, тужгес но Россия кадь шукырес кунын. Тани та дыре учкисько, кылзӥсько, газетъёсысь лыдӟисько Кун Думалэсь олокыӵе но законъёс эскерем-кутэмзэ. Умой кадь со, но одӥгезлы паймисько: огшоры адямилы, йыртэма ке, пытсэт дась, синазькыль карон кылъёс но туж уно. Нош странаен кивалтӥсьёс кипырмесэсь шуыса верась ӧвӧл, уз но лу, вылды. Соос "пусъем", "нимазлы" карем адямиос-а, мар-а? Кин туннэ вералоз, кӧня куректон ваиз Афганистанын ялэм но ялымтэ война? Кӧня йӧно пиосмы юнме шорысь сӧсырмизы, кулӥзы-быризы, со гинэ мар ай, сьӧразы ваизы на йӧнатыны луонтэм кылез - наркотикъёсты. Соос янгыш ӧвӧл. Мон соос понна, асэным ӵош дышетскем эше Вениамин Платонов понна, вӧсяськылӥ но ас поннам. Ярам ай, со сӧсырмыса ке но бертӥз дораз. Нош кӧня вал бертымтэос. Тужгес но мур куректонэз адӟиз асьме удмурт калык мукет ласянь но: ваё гуртэ огшоры гинэ корт шыкыс, отын, пе, бырем солдатлэн лысьӧмыз сутыса, пень карыса тыремын. Оло со Кибья пилэн, оло со Туймыйылын вордскем-будэмезлэн - тодӥсь- марась, выжыятӥсь ӧй вал. Вылаз ик, анай-атайёссылы кивалтӥсьёс индылӥзы: эн поттылэ, пе, кытын но кызьы быриз нылпиды... Сыӵе вакытъёс вал угось, сыӵе вакытъёс. Алигес мукетыз эше, таиз мӧйыгес ини, куректонэ выиз. Пиез быриз Чечня ожгаре. Шуг вераны, война-а со, яке кивалтӥсьёс ваче одӥг кыл шедьтытэк пуромон-а, нош ик сомында егит пиосты тыл, снаряд, пуля шорын сӧсыр каризы, нош кӧняезлэсь лул-сюлэмзэс тарказы, уд но лыдъя. Пиез быремысь эше юон вылэ чӧлскиз, уж дураз янгыш лэсьтӥз. Табере куректо кузпалыз, анай-атаез, ӵыжы-выжыосыз - одӥг кайгу биниз ас котыраз ог 20-30, оло нош 100 адямиез. Нош кинлы-о кулэ вал со война? Кин-о со понна туннэ кыл кутоз? Кивалтӥсьёсмылэн, шуг-секытэ шедё ке, одӥг веранзы: умой мед луоз шуиськом, пе, вал но... котьку сямен мыдланес пӧрмиз. Мон малпасько, вуоз ай сыӵе дыр, куке мыдланес лэсьтӥсьёслы но та улонын шедёз кортнэт. Сотэк та дуннемы ноку но уз берытскы инмарен дэмлам улонэ. Дунне колёса берга-берга, адямилы гинэ кулэ сое ӟеч валаны. Быдӟым ӟуч гожъяськись Достоевский ялан вералоз вал, куректыса бӧрдӥсь пичи ныллэсь синкылизэ адӟытозь, дуннелэн чеберез но кысоз шуыса. Уг яра вунэтыны туннэ со сярысь. А. ПЕТРОВ. Фестиваль но Пушкин Воткинскысь администрацилэн культурая отделэз дасяське П. И. Чайковскийлы сӥзем крезьгуро фестивальлы. Со 22-тӥ апреле усьтӥськыны кулэ Пермьысь Операя но балетъя кун театрлэн "Пиковая дама" операеныз. Россиысь одӥгез дано театр ик 24-тӥ апреле возьматоз "Спящая красавица" балетсэ. Таяз фестивале тросгес возьматӥськозы быдӟым ӟуч поэтлэн А. С. Пушкинлэн произведениосыз. Уго солы туэ вордскемез дырысен тырме 200 ар. Н. СЕРГЕЕВ. Тазалык быре ненег вакытысен Россиын 15-17 аресъем нылпиос пӧлысь 5,3 процентэз гинэ юн тазалыкоесь. Москваын 30 процентэз дышетскисьёс кӧтпуш висёнъёсын курадӟо, 23 процентэзлэн шокан ёзъёссы висё, 22 процентэзлэн нервной системазы лябӟемын. Берло 20 ар ӵоже 2-тӥ-4-тӥ классъёсын дышетскисьёс пӧлын ляб адӟисьёслэн лыдзы кык поллы йылӥз, нош бадӟым классъёсын дышетскисьёс пӧлын - 30 процентлы. 18 арессэс тырмытэм егитъёс пӧлысь котькудӥз куинетӥез армие мыныны уг яра, тазалыкез ляб луэмен. "АиФ-Здоровье". ТАЗАЛЫК Эзельлэсь эмъюм вань Дунне вылын тужгес паськыт вӧлмемын куинь пумо висёнъёс: шуккиськем, сӧсырмем бере пушъем черъёс, сюлэм-вирсэр висёнъёс но нерваослэн (лулсӥослэн) висёнъёссы. Экономикалэн куашкамез, улонлэн секыт луэмез нырысь ик лябӟыто адямилэсь нервной системазэ, йырвимлэсь но тыбырвимлэсь вирсэръёссэс. Озьы йырвиме вир но, кислород но тырмыт уг вуо. Секыт учыръёсы адямилы инсульт луэ. Куке кӧня ке минут ӵоже, шергес - часъёс ӵоже, адями вырӟылын быгатӥсьтэм ӧлексылы пӧрме: визьзэ ыштэ, ӵыжы- выжыоссэ тодмамысь, вераськемысь, сиськемысь, киоссэ-пыдъёссэ выретэмысь дугдэ. Ижевскын арскын 1600-1700 адями инсульт луыса сыӵе калэ вуэ. Лулсӥослэн мукет висёнъёссы аляло, йыркобы, йырвим шуккиськыса, эсэпсэ валатэк аракы юыса, наркотикъёслэсь, химической абтериослэсь отравление луыса, лемтэй висёнэн, менингитэн черласа. Озьы Ижевскын арскын 8 сюрс адями лулсӥ висёнъёс пыр потэ, Удмуртиын - 20 сюрс мурт. Уноез соос пӧлысь тыро-пыдо, дыраз уг эмъяськы но ӧлексы кыле, ужаны быгатэмысь дугдэ. Нош ӝыныез висисьёс чик уг эмъясько - врачъёслы вазиськымтэенызы, больницаосын интыос тырмымтэен, эмъюмъёс дуноен. Таин валче 20-30 процентэз улонысь кошке. Инсульт луэмъёс пӧлын та лыдпус эшшо но бадӟым - 60-80 процент. Улэп кылемъёсызлы, бурмон понна, невропатологлэн юрттэмез кулэ. Жаляса верано, ёрос больницаосын сыӵе специалистъёс тырмымтэен, лулсӥ висёнъёсын черламъёсты эмъяло но чаклало терапевтъёс. Калык пӧлын паськыт вӧлмем висён сярысь но - остехондроз сярысь вератэк кельтыны уг луы. Улытозяз огезлэн но адямилэн я кускыз, я чырты берыз, я киыз-пыдыз висьытэк уг кыльы, дыр. Врачлы вазиськем интые, уноез ас быгатэм-валамезъя эмъяське но эшшо но уродме. Нош шонерзэ верано ке, сыӵе висисьёсты лякытэн эмъяны луэ. Одӥгъёсызлы неврологлэн визь-кенешез гинэ но юрттэ. Мукетъёсызлы эмъюмъёс, пӧртэм процедураос пайда ваё, адями висьыны кутскем бераз ик, кема возьматэк, эмъяськыны кутске ке. Куинетӥосыз мануальной терапия бере пыд йылазы султо. Йылпумъяса таӵе визь-кенеш: сюрлы, киос яке пыдъёс висё ке, ӝегатскытэк вазиськоно неврологлы. Йыр висьыса сюлэм шуг луэ ке, йыр берга, пельёсын (йырын) жонгетэ ке, адямилэн визьмыз сураське, со шуген вераськыны, сиськыны шӧдтэк шорысь шӧта ке, киоссэ, пыдъёссэ мырдэм ӝутъя - соку ини висисез машинаен больницае келяно. Быгатэмзыя юрттэт сётыны, визьманы быгатозы Маммологической центрысь врачъёс но: А. С. Копосов - нейрохирург но невролог, медицинской наукаосъя кандидат, Ижысь медициная академиысь неврологияя но нейрохирургияя кафедралэн ассистентэз, но Ю. В. Симаков - мануальной терапевт. Гожтӥськон-99 Кинлы кузьмалод ошез, Алина? Таиз ар понна газетмылы гожтӥськемъёслэн шудзы оскемын вал куинь аресъем муспотон дыдылы Алина Лукиналы. Со озьы ик шуиз, мон, пе, туннэ ужаны лыктӥ. Кызьы валатскиды ни луоз, вераськон мынэ ошез, коляскаен "Иж" мотоциклэз но электротылэн ужась бычкыез лотереяен шудытон сярысь. Газетмылэн 9-тӥ номераз пыр-поч валэктэмын вал ни лотереяез ортчытон радлык. Лыдӟисьёсмылэсь лыдзэс чакласа, ёросъёсъя кылдытэмын 17 округ. Лыдпусъёсын сомында ик шаръёс понэмын вал корзинае лотереялэн нырысетӥ люкетаз. Нырысь ик шудытэмын бычкы. Алина поттэ 10 номеро шарез. Лотереяез ортчытонъя комиссилэн тӧроез Пётр Поздеев ивортэ сыӵе номерен округез. Со - Пичи Пурга ёрос. Мотоцикл усе Игра ёросысь лыдӟисьёслы. Мар та таӵе? Шуд кизили шат пиштэ играос вадьсын? 14-тӥ сентябрьысен 20-тӥ сентябрёзь Россия Федерацилэн Почта кусыпъёсъя удмурт ёзэз газет-журналъёсын ӵош ортчытӥз вал "Гожтӥськисьлэсь арнязэ". "Удмурт дунне" газет, "Кенеш" но "Кизили" журналъёсын огазеяськыса, Игра ёросысь лыдӟисьёс пӧлын лотерея ортчытон сярысь ялӥз - но гожтӥськоно куинезлы ик изданилы. Гожтӥськиз куинь адями, кыкез Сеп почта ёзысь, одӥгез - Вылын Шорниысь. Сепе потаса, декабрьлэн кутсконаз ортчытӥм лыдӟисьёсын пумиськон. Газетмылы татын сю мурт гожтӥськем бере, калык клуб тыр люкаськиз. Куинь мурт пӧлын шудытӥм электробычкыез. Солэн кузёез луиз Лудошурын улӥсь Г. В. Корепанов. Утюгаськон доскаез, утюгез но мукет кузьымъёсмес шудытӥм ни вань гожтӥськемъёс пӧлын. Лотерея ортчытонъя комиссиен кивалтӥз Валентин Усков, Игра ёрос администрацилэн тӧроез. Неужто пичи дыдылэн киыз мотоцикллэсь рульзэ Сеп пала ик берыктоз? Но нырысь тодоно ошлэсь кудпала шонтэмзэ. 8 номеро шар усиз Кез, Кизнер, Красногорск, Юкаменск ёросъёсты огазеясь округе. Таин лотереялэн нырысетӥ люкетэз йылпумъяськиз. Ёросъёсы жингыръяса, табере тодоно почта ёзъёсты, озьы ик кӧня мурт котькудаз гожтӥськемын газетмылы. Тазэ ужез быдэстыны милемлы юрттӥз Татьяна Дерендяева, Почта кусыпъёсъя удмурт ёзысь газет- журналъёслы гожтӥськонэз радъянъя валтӥсь инструктор. Лыдӟисьёслэн шоро-куспо лыдзыя нош ик кылдытӥмы округъёс - табере ини почта ёзъёсъя. Алиналы туж кельшиз, лэся, корзинаысь шаръёсты поттаса, люкаськем агайёслы но апайёслы одӥген-одӥген возьматъяны. Пичи Пурга ёрос понна кыскиз 19 лыдпусэн шарез, озьыен, 19-тӥ округез. Отчы пыризы: передвижной почта ёзэ пырись Кечур, Курчум-Норья, Миндэр, Пичи Бодья, Абдульменево, Постол, Вишур гуртъёс, озьы ик Яган, Пугачёво, редакция пыр гожтӥськемъёс. Игра ёросъя удалтӥз кабачигуртъёслы - гожтӥськемын 104 мурт. Нош ошез люконо луиз ньыль ёросысь гожтӥськемъёс пӧлын. Шуд усиз кизнеръёслы, нош шонергес ке верано - 5-тӥ округлы. Отчы пыро Айдуан-Чабья, В-Тыжма, Балдейка, Синяр- Бодья, Муркозь-Омга, Копки, Кизнер-2, Короленко почта ёзъёс. Озьы тӥни, Мичурин нимо колхозысь ошпи, силь-вирзэ кыдатыса, выльысь ас палъёсаз берытсконо кожаз. Табере тодыны кылиз на, кинлэн азбараз со пыроз. Озьы ик мотоциклэн бычкы но кузёоссэс возьмало ни. Интыосы потаса, матысь нуналъёсы редакция радъялоз лотереялэсь берпуметӥ люкетсэ. Таяз шудонэ пыриськозы ни асьсэос лыдӟисьёс. Нош оскем ужзэ ӟеч быдэстэмез понна, Алиналэн пыдлось малпанэз быдэсмиз - солы кузьмазы бадӟым шоколад. Л. МАЛЫХ. Шӧкыч Лидия ЧЕРНОВА Кион но Ыж (Басня) Кион Сюрес вожысен Пумиськем Ыжен: - Сюрес, шуо, вакчи ӵошен. Тупала выжом - Шашлык пыжом... Ыжлэн... марым - Йырыз - кочон. Тылыс дурын Сое Кион Качам. Мораль таӵе: Инмарез Лыдъяло ни янгышен. Дунне вордскем дырысен, Шуо, соин сэрен Ыжед, зэм, зэм, Шуйно йыро кылем. Кизилиё сюрестӥ Кылбурчилы, дунъясьлы, радиоверасьлы Виктор Ивашкинлы - 60 арес Гожъяськон мылкыд Викторлы пыӵаз Яган-Докъя школаын дышетскыкуз ик. Нырысетӥ классъёсысен, сое шӧдыса, дышетӥсез пияшлы бордгазет поттыны ӵектӥз. Шумпотыса басьтӥськиз со аслыз ярась уж борды. - Мон вань дышетскон аръёсам - Яган-Докъя семилеткаын, Пичи Пурга шор ёзо школаын, Удмурт пединститутын студент дыръям, - тодаз вае Виктор Михайлович, - весяк бордгазетъёслэн редакторзы вал. Нош институтын киын гожъям "Азьлань" альманах но поттылӥ... Пичи Пурга шор ёзо школаысен Виктор шедьтӥз аспаръёссэ - гожъяськыны яратӥсь пияшъёсыз Саша Титовез но Кузьма Кузнецовез. Пияшъёслэн шудзы вылэм: соослы удалтӥз. Со аръёсы Пурга школаын литературалы дышетӥз Галина Алексеевна Коновалова - сӥё-дано писательлэн Михаил Алексеевич Коноваловлэн но Можга педучилищеын ужам визьмо дышетӥсьлэн Екатерина Алексеевна Коноваловалэн сузэрзы. Галина Алексеевнаен кивалтоно литературной кружоке мылысь-кыдысь ветлӥзы но гожъяськыны дышетскизы вылӥ верам эшъёс но. Ваньзы соос - Виктор Ивашкин, Александр Титов, Кузьма Кузнецов - улонзэс сӥзизы гожъяськон ужлы. Зэм, мынам егит эше (аслам арлыдэным ӵошатыса, озьы шуыны дӥсьтӥсько) ӝот-ӝот гожъяськыны кутскон азяз улон-вылонэз валаны дышетскиз, армиын службазэ нуыкуз, Ижысь технической училищеын дышетскыкуз, механической заводын ужакуз. Нош гожъяськон борды ӝабресгес басьтӥськон понна, тодон-валанзэ будэтэмез потӥз. Эшез, Саша Титов, соку пединститутын дышетскись, быгатӥз Викторез студентъёслэн семьяязы кыскыны. Татын ини Виктор Пургалан сямен ик Даниил Яшинэн кивалтоно литературной кружоклэн ужаз мылысь-кыдысь пыриськиз но гожъяськон удыссэ паськытатӥз, шуыны луоз. Кунамы потӥсь газетъёсын сяна, солэн гожъямъёсыз, соос пӧлын - кылбуръёсыз но, печатласькыны кутскизы огъя сборникъёсын. 1962-тӥ арын "Удмуртия" издательство поттӥз кылбуръёсын "Егит сюлэм кырӟа" сборник. Кылбурчиос пӧлын Виктор Ивашкинлэн но нимыз-тулыз вань. Синпелез сямен уте со 1955-тӥ арын "Егит большевик" (бӧрысь "Удмуртиысь комсомолец") газетын поттэм нырысетӥ кылужзэ (статьязэ). Нош ужпум тазьы вал. Сокугес гинэ потӥз Михаил Петровлэн "Вуж Мултан" романэз. "Советской Удмуртия" газетын литконсультантлэсь ужзэ быдэсъясь егит писатель Семен Самсонов, Пичи Пурга школаысь литературной кружокын выль романэн азьвыл ик тодматыса, солэсь пуштроссэ сэрттон-пертчон ортчытэм но курем отчы пыриськем дышетскисьёсыз асьсэлэсь малпанъёссэс ивортыны. Ивашкин гожтэм романысь геройлэн, Герейлэн, образэз сярысь - Михаил Петровлэн выль романэзлы "Советской Удмуртия" кык бамзэ сӥзем. ... Институтэз йылпумъяса, пияш кык ар ӵоже Советской Армилэн радаз кужымзэ, сӥльвирзэ юнматэ но радиотелеграфистлэн ужезлы дышетске. Нош одӥг учыр адямилэсь улон сюрессэ чылкак воштӥз. Армиысь берытскемез бере, Пичи Пургалэн одӥгаз ульчаяз со пумиськиз Валентин Баталовлэн соку комсомоллэн Пичи Пурга райкомезлэн нырысетӥ секретареныз. Кыл бӧрсьы кыл - Баталове, сое райкомаз пыртэ но аслыз юрттӥсе - райкомлы кыкетӥ секретаре дэмла. Партилэн райкомезлэн нырысетӥ секретарез Федор Захарович Яговкин та ӵектонэз умоен лыдъяз. Ӝоген Баталовез комсомоллэн обкомаз басьтӥзы. Викторез районысь комсомоллы кузё карыны малпазы. Со пумитъяське - Яговкин зӥбе. - Та уж сюлэмъям ӧвӧл, - шуэ Ивашкин. - Нош кыӵе удыс яра тыныд? - Гожъяськон. - Сыл ай - тынад алигес лэсьтэм докладэд публицистикалы тупагес, Виктор. "Удмуртиысь комсомолец" газетысь жингыртӥзы алигес. Комсомолэн кивалтон но егитъёслэн ужъёссы сярысь статья куро. Пумит уд луы ке, ойдо ӵош со докладдэ статьялы пӧрмытом. - Шумпотыса, Фёдор Захарович. Но куронме санэ басьтэ вал. - Пумит уг луы - ачим жингырто: егитъёслэн газетсылэн редакторезлы тӥледыз отын ужаны дэмлало. ... Ӟуч кылын гожъяськон капчиен ӧз сётскы: "Комсомолец Удмуртии" угось удмурт кылэ берыктыса потэ вал. Заводын ужамзэ тодыса, Викторез егит рабочийёс сярысь но гожъяны курылӥзы. Секретариатын ужасьёс олокӧня пол тупатъяны косыса берыктылӥзы гожъямъёссэ. Огзэ сыӵе материалзэ кык пол тупатъяз но кылкутӥсь секретарьзылы Надежда Главатскихлы сётӥз. - Наконец-то Ивашкин заметно вырос! - шуиз соиз. - Зарисовка "Резец и станок" написана от души - два шага вперёд в твоём творчестве. Но вамышъёсыз тужгес но шӧдскымон луизы, "Дась лу!" газетын ужакуз. Татын со удмурт литератураямы тодмо луэм писательёсын - Григорий Симаковен, Герман Ходыревен - артэ тыршиз. Тани кызьы дунъяз сое улонысь укыр вазь кошкем кылбурчи "Ӟеч визь- кенеш котьку дуно" книгаезлы автографаз: "Гажано Виктор Михайлович Ивашкинлы. "Дась луын!" ӵош, кенешыса ужам аръёсмес тодэ ваён понна. Нырысьсэ тазьы дасям книгаям трос тодмо муртъёс вань. Соос пӧлын ик - Саша Титов. Татын мон со сярысь гожтӥ. Солэсь книгазэ дасямдэ туж вылӥ дунъясько. Айбат тазалык но сэзь гожъяськон мылкыд тыныд. Аслэсьтыд но выль книгадэ чидатэк возьмасько, лыдӟыны мылкыдме бурдъясько. Зӥбыт эш мылкыдме вераса - Герми. Авторез Герман Ходырев. 18.07.89". Виктор Ивашкин понна творчествояз йыг-йыг вамыш луиз 1976-тӥ ар. "Удмуртия" издательство поттӥз солэсь кылбуръёсын "Шуныт сюлэм" сборниксэ. Литературной критикъёс но усто дунъет сётӥзы. Но поэзия но критика удысъёсын Виктор Ивашкин азьлань малы ке ӧз вамышъя ни. Аслаз верамезъя, мылкыдыз сӥяз но, сюлэмзэ бордаз быдэсак кыскиз радиожурналистика. "Дась лу!" газетын дас ар пала ужамез бере, Виктор Михайлович лыктӥз ми доры, Удмурт радиое. Но газетысь кошкон азяз удмурт нылпиослы усто кузьым кельтӥз. "Удмуртия" издательствоын нылпиослэсь "Дась луын!" печатлам устооссэ веросъёссэс, кылбуръёссэс но суредъёссэс, огазе люкаса, "Жингрес куараос" сборник поттӥз. Лякыт сямо, керӟегъяськисьтэм, котькыӵе мылкыдо адямиосын одӥг кыл шедьтӥсь воргорон коллективамы ӝоген асьмелэн эшмы луиз. Радиожурналист, чебер гожъяськыны быгатэм, сяна, эфирын ӟеч мед вераськоз, кылзӥсьёслэсь мылкыдзэс мед шунтоз. Та ласянь Виктор Ивашкин аслэсьтыз интызэ шедьтӥз. Удмурт кылын но, ӟуч кылын но куараез туж чылкыт, ваньмызлы валамон чузъяське. Сыӵе быгатонлык радиоын ужась понна зэмос шедьтос луэ. Али но пель сьӧрам чузъяське на Виктор Михайловичлэн "Курисько кельтыны" радиоспектаклез. Эфирын чузъяськемез бере, ми доры, авторлы тау карыса, уно гожтэтъёс вуизы. Нош Москваын ортчем фестивальын та уж дипломен пусъемын. Солэсь но мар дуно на меда авторлы?.. Радиоын ӵош ужам вакытмы сярысь туж уно гожтыны луысал. Верасал, кызьы Ивашкин нюръяськиз радиолэсь вераськон дырзэ будэтон понна, кызьы со быгатыса кивалтӥз пӧртэм общественной огазеяськонъёсын, кылдытъяз выль программаос. Соос пӧлын ик - мӧйыослы радиожурнал. Мадьысал, кызьы со, Съездъёслэн Кремльысь Дворецазы Россия Федерация но Удмурт Элькун куспын ог-огедлы юрттыса ужан сярысь огкыл улэ Б. Н. Ельцин, В. С. Черномырдин, А. А. Волков но П. Н. Вершинин гожтӥськыку, удмурт кылын вазиськиз Черномырдинлы, солэсь интервью басьтӥз... Зэмос радиоверась но усто радиожурналист тон, гажано Виктор Михайлович! Леонид Емельянов. Шӧкыч Вуоно депутатлэн дневникысьтыз Понедельник Ӝоген Кун Кенеше быръёнъёс. Соин ик туннэ нуналысен подписьёс (ӵушемын) кинюртэмъёс люкано кариськи. Улон юртъёстӥ ветлӥ. Нунал ӵоже: Шузи кылъёсын тышкаськизы - 18 пол Вылам пож ву кисьтӥзы - 3 пол Сисьмем помидорен лэзизы - 2 пол Жалязы - 5 пол Конь дон куризы - 36 пол Егит на шуизы - 11 пол Кышнояськыны дэмлазы - 1 пол Жади... Мырдэм но кызьы 6 кинюртэм люкай. Вторник Ульчаостӥ котыръяськи. Пумитай кык чебер нылашъёсты. Соос мукет партия понна кинюртэмъёс люкало вылэм. Одӥгеныз быръёнъёсъя блок кылдытӥм. Ӵукна пал гинэ люкиським. Платформаосмы ӧз тупалэ. Среда Аслым план пуктӥ - 15 кинюртэм люкано! Мынӥ аракы вузан магазин доры. 32 кинюртэм люкай. Со понна 8 ӟенелик басьтоно луиз. Куиньзэ сьӧрам ваи. (Отӥяз мар гожтэмын валаны уг луы). Четверг Йыр висе. Кык (ӵушемын) одӥг но ӝыны (ӵушемын) ӝыны ӟенелик тыр аракые кылиз на. Пятница Куазь туж зол жобаське кадь. Педлон лымыя, йырын гудыръя, кисыын тӧл шула. Ӝоггес депутат луэме потэ ни! (Отӥяз дневникезлэн бамъёсыз кесемын). Вуоно депутатлэсь гожъямъёссэ шедьтӥз Ф. Миннигараев. Тазалык Кызьы шутэтсконо? Вешаськыса Лумбыт ӵоже гурпӧрен вырыса, пудо сюдыса, ӝытазе диван вылэ пуксиськод но... телевизор учкем уг луы: суйёс-пыдъёс кужектыса висё, сюрлы ӵогъя-золтэ. Вӧсез зибломытон понна чальгес эмъюм юиськод. Нош огпол ке но утчалэ ай массаж лэсьтыса. Та амал нырысь вӧлмиз Шунды ӝужан палан. Али Россиын но паськыт кутӥське ни - эмез син азьын уго. Небыт киосыныз покчиосты укмыс ар эмъя ни Ижысь 1-тӥ нылпи больницаысь массажист Валентина Петровна Пермякова. Нылпиеным нырысьсэ дораз мыныкум куалектӥ вал - мыноз- а мурт кие, пайдаез луоз-а? Мар пӧртэмез - ачим-а, м урт-а тыбырзэ маяллялоз-посоз? Но Валентина Петровна массаж лэсьтӥз но, пие ӝӧк вылысь уг султы ни, бӧрдэ. Эшшо, пе, Валя апай. Веша на. Мон ӧжыт ӝожоми: муртлэн киосыз пиелы анайлэнлэсь небыт пото. Но, мукет анайёсын вераськыса, валай - со озьы ик вылэм. Валя апайлэн чупрес небыт киосыз улын гань-гань кылле вожез но, тэ-тэ карыны кутскисез но, вӧжоезгес но пинал. Котькудӥныз - покчи муртэн но, солэн анаеныз но - огкыл шедьтэ эмъясь. Кудӥныз массаж лэсьтытозь ӟабыльтэ, нош кудӥзлы чалмыт лэсьтэ - ваньмыз вераськыны но уг ярато уго. Лыктэмзылы быдэ тазалыксы сярысь юаське, тужгес тупась амалъёс утча. - Гуртын улӥсьёслэн нылпиоссэс эмъяны таӵе луонлыксы ваньмызлэн ӧвӧл ук. Луэ-а массаж аслыд ачид лэсьтыны? - юасько солэсь. - Кулэ. Но туж чакласькыса. Массаж адямилэн тазалыкезлы пайда гинэ мед ваёз, уродэн медаз берытскы. Котькуд висёнэз нимаз амалэн эмъяно, соин ик одӥг кадь массаж лэсьтыны уг яра тыбырлы но кӧтлы, пыдъёслы но йырлы. Умой луысал, та эмъян амал сярысь анай-атайёс азьло ик книгая ке но тодматскысалзы ке. - Вешам нокинлы но изъян уз вайы, дыр. Нош кыӵе янгышъёс ӵемгес пумиськыло? - Уг яра сюрлы кузяна зӥбылыны, сюрлы ёзэтъёс вискысь герӟетъёсты массаж лэсьтоно. Собере, тросэз вылтӥзы нылпиоссэс ветлыны косо. Со туж кышкыт. Пинал уг вала вӧсь карыса лёгаськемзэ - шуак шокчыку сюрлы герӟетъёс вискы зол лёгиськиз ке, сюрлы чигыны быгатоз. Уг яра тӧдьы вир нёредлы (лимфоузеллы) матэ массаж лэсьтыны, гордэктытозь, вӧсь луытозь посыны. - Али вибромассажёръёсты туж ушъяло кадь? - Мыным соос уг кельшо. Асьсэос ӵошатэ ай, мар умойгес - небыт киос-а яке токен ужась арбери-а? Я, табере маяллялэ, посэ, лумбыт бызьылыса жадем пыдъёёстэс. Юрттӥз-а? Шутэтске. З. ВАХРУШЕВА. Нюлэс гомамлы адями янгыш Удмурт Республикаысь Нюлэс хозяйствоя министерство ивортэмъя, кылем арын шаерамы 177 гектар нюлэсъёс ӝуазы. 79 процент учыръёсы тыл гомамлы янгыш тэльын ужась, шутэтскись калык. Нюлэс дасясьёс но азьзэс-берзэс чаклатэк ӵемысь ужало. Чугун сюресъёс кузя тэльёс гомало, бусыосын вуж куроез сутыку, тыл нюлэсъёс вылэ урдске. Кызьы адӟиськоды, вань та учыръёсы адями янгыш. Инкуазез тэльёс быремлы 2 процент учыре гинэ янгыше уськытыны луысал, кылсярысь, гудыръяку писпуэз ӵашйыса потэм тылпуос понна. О. МАКСИМОВА. Киясаос иворто Удалтӥз Надя нимоослы Уд но оске, ява, но туэ Кияса ёросын скал кыскисьёс пӧлын вормизы Надя нимоосыз гинэ. Нырысетӥ интые потӥз чырмыт нылкышно - "Ашальчи" коллективлэн уӵыез", Кияса фермаысь Надежда Данилова. Со миым котькуд скалэзлэсь кыскиз 3447 кило йӧл. Кыкетӥ интыен - нош ик Надюш, таиз чебер апай ужа Подгорное фермаын. Со Надежда Шудегова, егит скал кыскись. Куинетӥ луиз Первомайской посёлокысь Надежда Мудрик. Нош кунян судӥсьёс пӧлын куинетӥ луиз Надежда Коновалова, со ужа "Киясовское" эштосын. Ар ӵоже солэн кунянъёсыз суткалы быдэ 700 граммлэсь унолы чеберскизы. Нош таиз ар кыӵе апокъёслы меда удалтоз? Ним бордын ужпум ӧвӧл, быгатонлык но устолык бордысь потэ азинскон. Бере эн кыльы, нылы "Киясовское" эштослэн Игрово фермаяз трос гинэ тыршо семьяосын. Гурт пичи, соин вань ужасез ферма бордын. Тани Николай Бесогонов дас ар пала ини скал кыске, ялан вормисьёс радын. Бере уг кыльы солэн Лилия кузпалыз но, со но скал кыске. Лилиялэн но Николайлэн куинез ик пиоссы ферма бордын, гужем пудо возьмало, толзэ - фермаын. Та коллективын ик тыршо Лилиялэн апаез Липиада Емшанова но солэн нылыз Людмила. Липиада Андреевна ортчем аре кыскиз 3147 кило йӧл, нош нылыз - 2820. Ма, трослы ик бере ӧз кыльы, кин тодэ, оло, азьланяз вормись радэ потоз ай. 40 ар ортчыса - выль школае Ӵапак 40 ар талэсь азьло Ермолаево школаысь потӥзы нырысетӥ аттестат басьтэмъёс. Нош кылем ар пумын та селоын усьтӥськиз улыно-вылыно, кирпичлэсь ӵыжак выль дышетскон юрт. Сое лэсьтонэ мылысь-кыдысь пыриськиз "Удмуртнефтепродукт" огазеяськон, уго, со ик юрттӥз коньдонэн. Талэсь азьвыл та коллектив ик юрттӥз вал Подгорное посёлоке бадӟым школа ӝутыны, нош таяз Выль ар азьын корка пырон ортчытӥзы Ермолаево селоын. Табере черод вуоз, дыр, Мушак школалы но, уго, со даурлэсь азьло ӝутэмын ини, куашка, нылпиос куинь юртын дышетско. Ёрослы уно юрттэ Кун Кенешлэн депутатэз Н. С. Сычев, сотэк школаосмы, оло, ӧй но выльдӥськысалзы. Вань куноосты, лэсьтӥськисьёсты шумпоттӥз "Италмас" ансамбль. Азьланяз, кызьы оскытӥз Николай Сычев, со тыро-пыдо басьтӥськоз ёросэ газ кыскон борды. "Италмаслэн" ньыльдонэтӥ номерез Туэ ёросын улӥсь удмурт лыдӟисьёс басьтӥзы "Италмаслэсь" ньыльдонэтӥ номерзэ. Ӟуч ёросын удмурт кылын газет бам шер ке но потэ, лыдӟисьёс туж шумпото солы. Та газетэз котькуд семья сямен басьтэ. "Италмас" бере ик сюрес усьтӥськиз бигер "Чулпанлы", пор "Семыклы". Вунэтэмын ӧвӧл Кавказ палась вуэмъёс но, соос понна газет "Наринэ" страница поттэ. "Италмас" потэ чылкак удмурт кылын, бигеръёслы - ӝыныез ас кылынызы, мукетъёсыз - ӟуч сямен. Таӵе газет бамъёс лыдӟись пӧлын тужгес но яратоноосыз. Азьланяз но та уж уз вуны: оло, азьланяз дасяно луоз украин но белорус кылын ӵош номер. Г. ПАРФЕНОВ. 40 миллион манет - уждунлы Москвае ветлыкузы, Правительстволэн Тӧроез Павел Вершинин но коньдон ужпумъёсъя министр Владимир Бельтюков пумиськизы Виктор Христенкоен - Россиысь коньдон ужпумъёсъя министрлэн нырысетӥ воштӥсеныз. Вераськон мынӥз кунлэсь уксёен герӟаськем ужпумъёссэ быдэсъян сярысь. Та пумысен программаез шаерысьтымы Правительство кылем арын июнь толэзе юнматӥз вал. Кенешын пусъемын вал, Удмуртиысь Правительство ас азяз пуктэм ужпумъёссэ быдэсъя шуыса. Кылсярысь, бюджет чотын ужась учреждениосты кулэстэмен валче, 7 миллион манет шыръямын. 1997-тӥ арен ӵошатыса, калыклэн жилищно-коммунальной юрттэтъёс понна тырыны быгатонлыкез 15 процентлы йылӥз. Бюджет чотын ужасьёслы уждун тыронъя пунэмъёс декабрь толэзе, ноябрен ӵошатыса, 8,6 миллион манетлы кулэсмизы. Удмуртиысь Правительстволэсь уждун тырыны но налогъёсты уногес бичаны тыршемзэ лыдэ басьтыса, Виктор Христенко республикамылы 40 миллион манет ссуда висъян сярысь распоряжение гожтӥз. Иворъёсты вӧлмытӥсь ёзъёслы югдурез валэктыса, Павел Вершинин пусйиз, январе Правительство бюджет чотын ужасьёслы уждун тырыны быгатӥз шуыса. Ссудалэсь бадӟым люкетсэ Ижевсклы, дотация чотын улӥсь городъёслы но ёросъёслы ыстыны чакламын. Со сяна, Павел Вершинин вераз на, феврале администрациослэн кивалтӥсьёссы доходлэсь 40 процентсэ уждун тыронэ висъяны кулэ шуыса. Озьы гинэ луонлык кылдэ уждунэз толэзьлы быдэ тырыны но кылем ар понна пунэмъёсты берыктыны. Правительстволэн Тӧроезлэн секретариатысьтыз пресс-центр. Удмурт Республикаысь кыкетӥзэ ӧтчам Кун Кенеше депутатъёсты быръён нуналэз шонерен лыдъян сярысь Удмурт Республикаысь Кун Кенешлэн Постановлениез Удмурт Республикаысь Кун Кенеш пуктэ: Удмурт Республикаысь Быръёнъёсъя комиссилэн Удмурт Республикаысь кыкетӥзэ ӧтчам Кун Кенеше депутатъёсты быръёнэз 1999 арын 4 апреле ортчытон сярысь решениеныз соглаш кариськоно. Удмурт Республикаысь Кун Кенешлэн Тӧроез А. А. Волков. Ижевск город, 1999 арын 28 январе. � 720-И. Кыткетмы одӥг - калык сярысь сюлмаськон,- шуэ Михаил Елеонский Директорлэн кабинетаз пыриз шоро-куспо мугоро, сыӵе ик арлыдо чиль-чиль сьӧд йырсиё воргорон. Ӧс куспысен ик вазиз, мон, пе, вуи. "Тани со милям Михаил Елеонскиймы, мынам самой матысь юрттӥсе,- шорам меӵак учкыса тодматӥз Сергей Аркадьевич.- Оскем ужзэ вить чиньызэ кадь тодэ..." Бен, таӵе дунъет юнме шорысь сётымтэ вал. Та удысын Елеонский одӥгез устоез ужась но ветеран луэ. Жилищно-коммунальной хозяйствое лыктӥз 1981-тӥ арын. Нош дас ар талэсь азьло, куке Можгалан кылдӥз жилищно-коммунальной хозяйствоя огазеяськон, Михаил Харлампиевичлы самой секыт но выль уж оскизы. Со радъяз аварийно- диспетчерской службаез (АДС). Нош вылез ноку каньылэн уг сётскы. Городын нырысьсэ таӵе ёз усьтӥськиз. Калык но сое уг тоды вал, ужан интызы но йӧскадь ӧй вал. Огазеяськон выль удыслы висъяз транспорт, теплосеть сётӥз кык комната. Берло АДС выжиз Наговицын урамысь 20 номеро корка. Но улон возьматӥз: кулэ нимаз юрт. Озьы коммунальникъёс асьсэ кужымен ар куспын нимаз корка пуктӥзы. Валамон, татын трос бызьылоно-утчаськоно луиз Михаил Елеонскийлы. Собере татчы лыктӥзы усто специалистъёс, лэсьтӥзы радиостанциос. Одӥг транспорт чотын гинэ 30 процентлы ыштонъёсты кулэстӥзы. Вань ӟечсэ бен вераса уд быдты. Сое туж умой тодо городын улӥсьёс но Михаил Елеонский. Тани аварийной службаысь коллектив али 400-лэсь уно юртъёсты син азяз возе, нош ву, газ, шуныт, электротыл сётонын котькыӵе учыръёс луыло. Адями нырысь ик кытчы вазиське? Аварийно-диспетчерской службае. Соку Михаил Елеонскийлэн адямиосыз вань тӥяськонъёсты чаляк палэнто. Михаил Елеонский - городын тодмо адями. Миым со жилищно-коммунальной предприятилэн директорезлэн воштӥсез луиз. Нош улон сюресэз туж тунсыко. Вордскиз Кизнер районысь Возьпум (Арвазь-Пельга) гуртын. 1975-тӥ арын быдтӥз Казаньысь авиационной техникумез. Армилэсь азьло но со бере ужаз отысь моторостроительной заводын, самолётъёслы газэн ужась турбинаос бичаз: слесарь-сборщик, технолог, сменной мастер вал. Нош вордскем палъёсыз ялан бордазы кыскизы. 1979-тӥ арын Можгае вуиз, 3 номеро ДСУ-е (дорожно-строительной участоке) интыяськиз, кык ар асфальт поттонын тыршиз. Нош 1981-тӥ арын теплосете старшой мастере кутӥзы, собере котельнойёсъя валтӥсь инженер луиз. Со вал огазеяськонлэсь кык ар вазьгес. - Ужъёсмы пумен ватсасько,- маде Михаил Елеонский.- Тани матысь кык ар ӵоже коммунальной услугаосмы 2 поллы йылӥзы, нош адямиослэн ӝожтӥськонъёссы чик ӧвӧл, шуыны луоз. Берло дыре умояз коркаосты шунтон, тыл но ву сётон. Калыклэсь куронъёссэ дыраз быдэсъяськом. Милям со одӥгез бадӟым сюлмаськонмы. Калык капчи мылкыдын мед ужалоз. Толалтэ милемлы пӧсь йӧтэ. Кылсярысь, огдыре лымыез утялтыны ум вуиське вал. Вань техникамы уен-нуналэн ужа. Али урамъёсты утялтӥм ни. Нош ик калык шумпотӥз. Кызьы шуо, милям кыткетмы одӥг - калыклы ӟеч лэсьтон. Мар бен, шонер вера Михаил Елеонский. Коммунальникъёс ужало калык понна. Азьланьын но озьы ик мед тыршозы. Г. ВАСИЛЬЕВ. Кызь одӥгетӥ дауре - эшлыко кусыпъёсын Удмурт Республикаысь Правительстволэн Нациосын ужанъя комитетэз ас ужамезлы йылпумъянъёс лэсьтӥз. Та комитетэн ньыль ар талэсь азьло кылдэмез дырысен ялан кивалтэ одӥг адями - егит нылкышно Светлана Константиновна СМИРНОВА. Та дыр ӵоже комитет быгатӥз национальной ужпумъёслы законъёсын юнматэм кужым пыӵатыны. Кызьы шуиз С. Смирнова, правовой поле кылдытӥз. Республикаямы кутэмын национальной политикая концепция, кудзэ умоен лыдъязы Россия Федерациын но. Дасямын Удмуртиын улӥсь калыкъёслэн кылъёссы сярысь законлэн проектэз. Со эскеремын ни министерствоосын но ведомствоосын. С. Смирновалэн верамезъя, сое таяз арлэн нырысетӥ кварталаз кутыны чакламын. Но комитетын ужасьёсты, озьы ик троссэ удмуртъёсты, туж сюлмаськытэ Конституциын юнматэм кык кун кылъёс сярысь статьялэн быдэсъяськымтэез. Со понна висъяны чаклам 2 миллион манет коньдонысь копейкаез но комитетэ вуымтэ. Соин ик та дырозь ум адӟиське кык кылын гожъямъёсты, ум кылӥське вокзалъёсын кык кылын сётэм ялонъёсты. Комитетлэн тыршеменыз, республикаямы табере ужа ини пӧртэм калыкъёслэн 18 огазеяськонзы - бигеръёслэн, ӟучъёслэн, немецъёслэн, поръёслэн но мукет. Озьы шаерамы улӥсь 60 пумо выжыысь потэм калыкъёслэсь кусыпъёссэс нокыӵе керетонъёстэк радъяны луиз. Табере соослэсь кужымзэс огъя гердэ биньыны быгатоно. Комитетлэн чакламезъя, та ужлы бадӟым юрттэт сётысал, Удмуртиын улӥсь калыкъёслэсь ассамблеязэс ортчытыны луысал ке. Солы дыр но тупатэмын ни - ортчытоно туэ май толэзе. Озьы ик мылысь-кыдысь ужано удмурт шаерысь калыкъёслэсь эшъяськонзыя юртсэс усьтон бордын. Комитетлэн туннэ лябгес кусыпъёсыз куд-ог министерствоосын. Кылсярысь, Югдурез утёнъя, Калыкез дышетонъя, Культурая, Иворъёсты вӧлмытонъя министерствоосын. Оло, умойгес луысал, со министерствоосын нациосын ужанъя ёзъёс кылдытысалмы ке, шуиз С. Смирнова. Мукетгес ӵектонзэ вераз Удмуртиысь Наукаосъя академилэн президентэз В. Ковриго: республикамы понна пайдаёгес луоз, комитет интые нациосын ужанъя министерство кылдытӥмы ке. Кылем ар ортчиз Куӟебай Гердлэн но Ашальчи Окилэн юбилейёссы улсын. Соослэсь нимъёссэс вунэтонтэм карон понна, комитет азьланяз но ужалоз на. Но ӧвӧл вунэтоно мукет калыкъёслэсь но дано адямиоссэс. Туэ комитет А. Пушкинлы сӥзем куд-ог ужрадъёс чаклаз. В. Ковриго тодаз вайытӥз венгер писатель Ш. Петефи сярысь но - солэн кулэмез дырысен туэ 150 ар тырме. Нациосын ужанъя комитет вань калыкъёсын валче но эшъяськыса ужаны турттэ. Со туж шумпотымон. Со сярысь ик вераз удмурт экономист Ю. Семёнов но. Тодосчи таӵе учырез вераз: коми-пермякъёслэн, пе, одӥг но вуззы вылымтэ. Нош соослэн округазы 167 сюрс адями улэ. Юрттоно кариським. Табере Кудымкарын но вылӥ дышетсконнизы вань. Та уже вань калыкъёс пыриськизы. Удмуртъёслэн берлояз съездазы пыриськемъёс туж ӟеч тодо на та учёноймылэсь вераськемзэ. Соку Ю. Семёнов асьме экономикамес ӝутон сярысь данак ӵектонъёссэ вераз. Солэсь ӵектонъёссэ вылӥын но синйылтӥллям, соос бордын ужаны куриллям. Ю. Семёнов та уж борды мукет учёнойёсты но огазеям. Кин тодэ, оло, соослэсь дасям программазэс асьме Правительство зэмзэ ик умоен лыдъялоз? Удмурт экономист туж зол оске, республикамес азинтон понна, пӧртэм луонлыкъёсты шедьтыны луэ шуыса. Кенеше люкаськемъёс комитетлэсь ужамзэ огъя умоен лыдъязы. Нош С. Смирнова оскемзэ вераз, азьланяз асьмелэн выль правительствомы но выль быръем депутатъёсмы национальной ужпумъёслы, оло, бадӟымгес но саклык висъяны быгатозы шуыса. Мар бен, ХХИ дауре эшлыко калык кусыпъёсын выжон понна кутскон сётэмын ни. Т. БАННИКОВА. Сталинградын быдӟым вормонлы - 56 ар Ноку вылымтэ ож Ӝоген витьтон куать ар тырмоз Сталинград ожмаськонлы. Синазькыль тушмонэн кышкатэк нюръяськизы асьме солдатъёс. Со сярысь ик вера таиз гожтэтмы. 1942-тӥ арын гужем ноку адӟылымтэ вир кисьтон пуромиз Сталинград дорын. 28-тӥ июне тушмон асьме Брянск фронтлэсь армиоссэ пазьгиз но кык нуналскын 80 иськемозь азьлань донгиськыны быгатӥз. Куд-ог дивизиос, корпусъёс котыртэме кылизы. Со дыре ик туж зол шуккет сётэмын вал артысь Юго-Западной фронтлэн войскоосызлы. Таосыз но ас интызэс кельтоно луизы. Воронеж дорын фашистъёс Донлэн паллян ярдураз ӝабырскизы. Бадӟым ыштонъёс вал Уй пал Кавказ палан, Крымын, Донбассын, Харьков котырын. Горд Армиын толалтэ вормонъёсын валче кылдэм шумпотон пумен кысӥз. Воинъёс пӧлын мултэс курдан, куалекъян, вормонлы оскисьтэмгес мылкыдъёс вӧлмыны ӧдъязы. Кытӥ-отӥ дисциплина лябомиз, приказъёс урод быдэсъяськизы. Тае лыдэ басьтыса, 28-тӥ июле Сталин 227 номеро приказ поттӥз. "Берлань - одӥг вамыш но!" - сыӵе ним сётӥзы солы калык, армия. Приказ юрттӥз, шуыны луоз, армиын дисциплинаез золомытыны. Но мабыдӟа дун тыроно луиз со понна! Война вакытэ 227-тӥ приказъя военной трибунал судить кариз ӝыны миллионлэсь ятыр муртэ. Тросэз соос ыбемын вал. Кӧшкемыт лыдпус. Со секыт аръёсы данаксэ сьӧд суредъёсты война кылдытылӥз. Ма карод, дырыз сыӵе вал бере. Но военной трибуналлэн приговорезъя ӝыны миллион ёрос калыкедлэсь лулзэ басьтонлы ӟеч дунъет сётыны кылыд нокызьы уз берытскы. Сталин 227-тӥ приказзэ гожтыку, фашистъёс Донлэн Волга пала бадӟым берытскемаз вал ини. 17-тӥ июле кутскиз но вуоно арысь 2-тӥ февралёзь кыстӥськиз дуннеын ноку вылымтэ ожмаськон. 19-тӥ ноябрёзь тушмон Сталинградэз быдэсак киултыны турттӥз, асьмелэнъёс пезьдэт сётъязы. Отӥяз ини котыртэме сюрем но сётскыны шӧтасьтэм тушмон армиез быдтон ожъёс гомӟизы. Вир кисьтон Волга дурын дугдӥз оккупантъёсты пумозяз быдтэм, соосты пленэ кутон бырем бере гинэ. Сталинград дорын фашистъёс асьсэлы Волга дуре сюбеггес инты кырмыны быгатӥзы 23-тӥ августэ. Кӧшкемыт нунал вал со. Город вадьсы 2 сюрс пала тушмон самолёт вуылӥз. Соос пӧлысь 90-зэ асьмелэнъёс быдтӥзы. Сталинград ӝуаз. Тыл уката зол выриз нефтен тырмытэм базаос но нефть ворттӥсь судноос котырын. Ӝуась му вӧй Волгае бызиз но шур вылын лекъяськиз. Калыклы ву шедьтыны ӧйлась. Электрокужым кысӥз. Каре кылемын на вал татысь 400 сюрс ёрос улӥсь. Бырыны шедемзылэсь кышкаса, соос ватскылӥзы нюкъёсы- гопъёсы, подвалъёсы. Нош заводъёсты ужатыны турттӥзы, быгатэмзыя рабочийёс ож тӥрлык поттӥзы. 24-тӥ августэ кутскыса, куинь арня ӵоже Волгалэн сопалаз поттэмын вал 300 сюрс мында пересьёс, нылкышноос, пиналъёс, сӧсырмемъёс но изъянмыны шедьымтэ уно кун узырлык. 27-тӥ августэ Западной фронтлэсь командующийзэ Г. К. Жуковез Москвае ӧтизы. Сое И. В. Сталинлы Верховной Главнокомандующийлэсь ужзэ быдэсъянъя воштӥсе пуктӥллям. Сталин Жуковез ӝегатскытэк Волга дуре келяз. Со дыре отчы кошкемын вал ини генерал А. М. Василевский, Генштаблэн начальникез. Ожын кивалтонэ тужгес бадӟым авторитетъёс пыриськыса но туж секыт югдур сокем ӧз воштӥськы. 3-тӥ сентябре, телефон пыр вераськыкуз, Верховной Жуковлэсь юа: - Сталинград туннэ ик тушмон киын луоз, шуэ Ерёменко, фронтэ юрттэт дыраз ӧз вуы ке. Зэм-а со? Жуков озьы уг лыдъя вал, но юн лябӟытэм дивизиосын тушмонэз вормыны уз луы, шуиз. 12-тӥ сентябре Жуков но Василевский Верховной Главнокомандующийлэн кабинетаз вераськизы Сталинградлы юрттэт сётон сярысь. Волга дуре одно келяно вал на, со дыре келямъёссэ лыдэ басьтытэк, ӧжытсэ вераса, выльысь дасям одӥг общевойсковой армия, танкъёсын корпус но куинь бригада, гаубичной пушкаос, лётчикъёсын одӥг воздушной армия. Ставкалэсь резервъёссэ возьматӥсь карта поттыса, Сталин чусомиз. Гожъямъёсты учке, сэрттэ-пертче, йырвизьзэ сына. Василевский Жуковен, ӝӧк вӧзысь палдурскыса, куспазы шыпыт кенешо. Кыл потӥз Сталинград шоры мукет ласяньгес учкон сярысь. - Кудласянь? - йырзэ карта вылысь ӝутӥз Верховной. Уд но малпа: лушкем кадь вераськемез но сокем ӟеч кылэ вылэм. - Изьверъёсты котыртоно но отын ик быдтоно! Озьы тӥни нырысьсэ шара верамын вал татчыозь нокинлэн шӧтаз усьылымтэ кыл: котыртон. Тушмонэз мешоке шымыртоно! Пӧзись пуртые тулляно! Мукет нуналаз Жуков но Василевский лумбыт Генштабын тыршизы. Ма веранэз, Горд Армия, ожъёсын оккупантлы пезьдэт сётыны турттыса, трос ыштонъёс адӟиз. Ерёменко бӧрдэ, шуыны луоз, тырмыт юрттэт вуымтэлы чидатэк. Толон но Сталинлы ӝожтӥськиз. Ерёменколы секыт йӧтэ. Солы гинэ-а бен? Но Ставкалэн азьланезлы дасям резервъёсыз со дыре вал ини. Сыӵе узырлыкез нюръяськонэ кутоно визьмын но дыраз. Кык генералъёс ӝытазе Сталин доры пыризы. Солы тыршемзы оглом вераса яраз. Пуктӥзы: ноку вылымтэ операцилы дасяськон кык толэзьлэсь кема кыстӥськыны кулэ ӧвӧл. План сярысь нокинлы пал кыл но поттылыны уг яра. Дырыз вуытозь, сое тодыны кулэ куинь мурт гинэ: Сталин, Жуков, Василевский. Нош Сталинградын ож ялан муромиз но паськытаз. Сентябрьлэн шор вакытаз асьмелэнъёс понна уката секыт нуналъёс вуизы. 13-тӥ сентябре тушмон городэз ас кияз быдэсак басьтон борды кутскиз. Тужгес зол шуккет сётэмын вал Мамаев курган но вокзал дорын. 14-тӥ сентябре вокзал немец кие сюриз. 27-тӥ сентябрёзь со киысь кие дас куинь пол выжылӥз. 16-тӥ сентябре Мамаев курган ыштэмын вал. Тушмон Купоросное палан Волга дуре вуиз. Оло, котькуд ульчаын, площадьын ыбылӥськонъёс уй но, нунал но ӧз кысылэ. Озьы - нуналысь нуналэ, арняысь арняе, пырак 19-тӥ ноябрёзь. Сталинградын тушмонлы пумит зол нюръяськиз В. И. Чуйковлэн 62-тӥ армиез. Сентябре та армия котыртэме шедиз. Эрико шоканы солдатлы часъёсын гинэ дыр кылиз на кадь. Юрттыны Волга сьӧрысен луэ на вал. Чуйков доры выжтӥзы А. И. Родимцевлэсь гвардейской дивизизэ. Чуйковлэсь армизэ быдтыны турттӥсь тушмонэз Родимцевлэн дивизиез вормиз. Гвардеецъёслэн контратаказы, Жуковлэн верамезъя, немецъёслы тыпак витёнтэм луэм. Городысь центр соку ик мозмытэмын вал. Ӝоген Мамаев курганысь но вир юисьёсты тузӥзы. Но ож таин ӧз йылпумъяськы. 15-тӥ октябре противник трактор заводэ пырыны быгатӥз. Отысен Волга дуре чуртнаськиз. Асьмелэнъёслы нош ик туж секыт луиз. Нокыӵе ыштонъёсыз шоры учкытэк, Паулюс генерал кызьы ке но ӝоггес турттӥз Гитлерлы ивортыны: "Сталинград быдэсак асьме киын!" Адӟылымтэ вир кисьтонъёслы уй-нунал пум ӧй вал. Ӵемысь автомат но, граната но кулэ ӧз луылэ ни: штык, приклад но мукетыз секыт маке ожын соосты воштылӥзы. Кӧня калык соку быриз! Куд-ог дивизиосын дас сюрс пӧлысь кӧня ке дасо мурт гинэ киязы винтовка возьыны быгатэ на вал. Но соос нюръяськизы. Из юртъёсын гвардеецъёс, порыны луонтэм пужым лӥял выллем, юн сылӥзы. Историе со интыос кылизы ас нимъёсынызы: "Я. Ф. Павлов сержантлэн юртэз", "Н. Е. Заболотный лейтенантлэн юртэз", "4 номеро вуко"... Чуйковлы юрттыны дыраз вуиз Волга сопалась И. И. Людниковлэн дивизиез. Со дыре ик кутскиз Донской фронтлэн наступлениез (Сталинградлэн уй пал вӧзаз). Фашистъёс кӧня ке кужымзэс Донской фронтлы пумит оже выжтоно луизы. Чуйковлэн армиез вылэ зӥбон лябомиз. 11-тӥ ноябре тушмон эшшо огпол кутскылӥз на Сталинградэз быдэсак басьтон борды. "Баррикады" завод палан со Волга дуре вутскиз. Одӥгез асьме дивизия котыртэмын вал. Но Сталинградын фашистъёслэн та "вормонзы" берлоез луиз ни. Ноябрьлэн шор вакытаз асьме войскоос контрнаступление выжыны дась вал ини. Тушмонэз котыртонлы дасям план вылэ кипус понӥзы Жуков но Василевский. Берло кык толэзе соос дырзэс Волга палангес быдтылӥзы. Сталин дасям планэз юнматӥз, кизэ нюртӥз. Дырыз вуыса, план бордын ужазы Генштаб, бронетанковой, артиллерийской, воздушной но мукет войскоослэн командующийёссы. Собере - Сталинградской (9-тӥ августысен кивалтӥз А. И. Ерёменко), Донской (28-тӥ сентябрьысен - К. К. Рокоссовский), выльысь кылдытэм Юго-Западной (22-тӥ октябрьысен - Н. Ф. Ватутин) фронтъёслэн военной советъёссы но штабъёссы. Контрнаступление кутскон азьын планэн тодматскон мынӥз дивизиосын, полкъёсын. Волга пала лушкемгес интыосы 27 сюрс машинаосын пумтэм-йылтэм груз ворттӥзы: оже калык но, пыӵал тӥрлык но трос кулэ вал. Нуналлы быдэ чугун сюресъёс вылтӥ солдатъёсын но техникаен 1300 вагон лыктылӥз. Нош тушмон ялан изьверъяськиз, ӧз шӧды бырон вуэмез. 1942-тӥ арын 14-тӥ октябре Берлинын поттэм приказын верамын вал: ӟучъёс берло ожъёсын юн лябомизы но, кылем толалтэ выллем, резерв уз шедьтэ ни. Фашист войскоослэн меӵак кивалтэтысьтызы штаблэн начальникез Йодль генерал Сталинградын ож бырем бере верано луиз: "Ми одӥг но ӧм малпалэ, Волга дурын ӟучъёслэн сомында кужымзы луоз шуыса". Кыкетӥ мировой войнаын немец военной разведкалэн тужгес бадӟым янгышез татын вал, шуиз со. 14-тӥ ноябре Жуков но Василевский берлозэ эскерыны кулэ вал: ваньмыз-а дась ни тушмонэз котыртон ож борды кутскыны? 17-тӥ ноябре Жуковез Москвае ӧтизы. Сталин сое Западной но Калининской фронтъёсы келяз. Татын, тушмонэз алдан вылысь, асьмелэнъёс наступление выжыны кулэ вал. 19-тӥ ноябрь азьын куинь фронтъёслэн советъёссы войскоосы приказ но вазиськон лэзизы. Та документъёсын тодматэмын вал ваньмыз офицеръёс но солдатъёс. Котькытын ортчизы партийной, комсомольской собраниос, люкаллязы митингъёсы. Ваньмызлэн мылкыдзы ӝутскемын вал. Штабъёсы, политуправлениосы трос гожтэтъёс вуизы. "Оже пырыкум, командованилы кыл сётӥсько,- гожтэ солдат, - тушмонэз вормонлы, кулэ ке луиз, уг жаля вирме но, лулме но, быгатыса, валаса, зол жугисько. Сӧсырмыны ке шеди, ожлэсь уг палэнскы, берло шокчытозям. Саламен, эшъёс-коммунистъёс! Беспартийной М. Ф. Ополченцев". Огъя ӝутскем мылкыдэз возьматӥз партилэн радаз куриськисьёслэн унолы будэмзы но. Солдат тодэ вал: война со - война, котькудӥныз олома но луыны быгатоз. Кудӥз нырысь ожын ик, оло, быроз... Но атакае потыны сигнал сётэмез чидатэк витиз. Сыӵе минутъёсы йырысь вань кулэтэмзэ пыдло донге одӥг малпан: вир юисез азьпалтоно, сэзьгес луоно, пунэмзэ пумозяз берыктоно. Я, вуиз со дыр - 19-тӥ ноябрь. Ӵукна 7 час но 30 минутэ Донской но Юго-Западной фронтъёслэн артподготовказы кутскиз. Воинъёс атакае вырӟизы. Сокем зол - номырин ӵошатонтэм шуккетэз витисьтэм тушмон ӧз чида. Куд-огез, бырымтэосыз, пленэ сётскизы, отӥыз пегӟыны турттӥзы. Атака эшшо кужмояз. Лымшорысь но уй палась армиос ог-огзы пала матэктыны дыртӥзы. Пумиськизы ке, мешок пытсаськоз. Тушмон котыртэмын луоз. 20-тӥ ноябре, планэн чакламъя, атаказэ кутскиз Сталинградской фронт. Сталинград палан асьме фронтъёс, тушмонлы пумит ньыль но ӝыны сутка ӵоже жугиськыса, сое пӧзись пуртые туллязы, шуыны луоз. Ньыль толэзьлэсь кема (17-тӥ июльысен 19-тӥ ноябрёзь) Паулюс фельдмаршал, мукет немец генералъёс, пумтэм кисьтӥськись вир вылтӥ вамышъяса, Волга дуре ӝиптӥськыны турттӥзы. Малы? Наградаос интые, ньыль но ӝыны нуналскын чыртыязы кыӵес мед золтозы шуыса-а? Ӧз, Паулюсэз нокин ӧз ошы-кекаты, мукетъёссэ, луло кылем 23 генералэз, музэн ик. 91 сюрс немец солдатъёс пӧлын соос пленэ сётскизы. Ваньзэ верано ке, Сталинград дорын котыртэмын вал Паулюслэн 6-тӥ армиысьтыз но 4-тӥ танковой армиысь 330 сюрс фашистъёсын 22 дивизия но 160 нимаз часть. Кык толэзьлэсь кема пумитъяськизы соос. 30 дивизия люкаса, Манштейн генерал котыртэмъёслы Гитлерлэн приказэзъя педласянь юрттыны турттӥз. Сталинградэ вуон понна, солы ожмаськыса 100 иськемлэсь трос ортчоно вал. Юн выриз Манштейн. 40 иськем гинэ кылиз на вал Паулюс дорозь. Ӧз быгаты генерал - ӧз пӧрмыты. Асьме войскоос Манштейнлэсь армизэ пазязы. Ачиз генерал котыртэмъёслы, салам интые, пыдберзэ возьматоно луиз. Сталинградын фашист вир юисьёслэн шундызы пуксён пала берытскиз но, уллань лэзиськонзэ дугдытыны ӧз быгатэлэ ни. Ливий УРАКОВ, история наукаосъя кандидат. Можгалась коммунальникъёс дорын: тодмастке ӟеч амалэн Сергей Пантюхин: "Огазеськон ваньмызлы шумпотон ваиз" Сергей Пантюхин - Можгалан тодмо адями. 1977-тӥ арын Ижысь механической институтэз (али кун технической университет) йылпумъямез бере, кӧня ке ужаз "Ижтяжбуммашын" но Можгалась авторемонтной заводъёсын. Собере егит специалистэз бырйизы комсомоллэн Можга горкомезлы нырысетӥ секретаре. Вить ар ужамез бере басьтӥзы горисполкомлэн тӧроезлы воштӥсе. Татын но 5 ар тыршиз. Нош дас ар талэсь азьло лыктӥз жилищно-коммунальной хозяйствое, валтӥсь инженер луиз. Миым апреле городысь та муниципальной предприятилы (МП ЖКХ) директоре пуктӥзы. - Сергей Аркадьевич, та удысэ тӥ ӵапак выльдӥськон вакытэ лыктӥды. Мар тӥледлы но городын улӥсьёслы огазеяськон сётӥз? - Ваньзэ. Таӵе ужрадлэсь, огазеяськонлэсь кулэзэ ас вылам шӧдӥ ни вал горисполкомын ужакум ик. Дас ар талэсь азьло, 1988-тӥ арын ноябре, огазеяськизы водоканал, котельнойёс, теплосеть, коммунальной предприятиосъя но благоустройствоя комбинат (ККПиБ) но мукетыз. Бырйим кивалтӥсь. Куать кандидат пӧлысь вормиз Игорь Николаевич Семенов. Азьло со ККПиБ-ен кивалтэ вал. Озьы производствоя огазеяськон луиз городысь администрацилэн ёзэз, нош республикаысьтымы Жилищно-коммунальной хозяйствоя производственной огазеяськонэн огкылъя гинэ ужаськом. 1994-тӥ арын огазеяськонмы луиз Жилищно-коммунальной хозяйствоя муниципальной предприятие (МП ЖКХ). Таӵе выльдӥськон туж дыраз ортчытэмын вал. Солэсь кулэзэ ачиз улон возьматӥз. Тани водоканаллэн одӥг экскаваторез вал. Ванез но техника нимаз-нимаз предприятиос киын мырдэм возиськиз. Огазе кариськыса юнмаз техника ласянь кужыммы но. - Огазеяськондылэн нырысетӥ вамышъёсыз кыӵеесь вал? Оглом вераса, мар бордысен кутскиды? - Нырысь ик туж кулэ вал аварийно-диспетчерской служба (АДС). Ведь ми калыклэсь куронъёссэ быдэсъяськом, соос понна ужаськом. Азьло сантехниъёсты, слесарьёсты, электромонтёръёсты но мукет ужасьёсты улон интыосысьтызы утчаса ветлылӥм. Табере 40 радиостанция ужа, али котькуд аварийной машинаез тодӥсько, кытын со. Тани одӥг гинэ учыр. Туэ Ымусьтон уе, 6-тӥ январе 9 часэ ӝытазе, одӥгаз подстанциын трансформатормы ӝуаз. Шедьтӥм выльзэ, сое пуктӥм но 4 часэ ӵукна тыл ӝуатскиз ни. Кыкетӥез вамышмы. Туж секыт вал техникаез ужатыны. Усьтӥм нимаз автохозяйство. Та кабзэ выль ёз луиз. Со вань цехъёс понна ужа. Отчы усто специалистъёс лыктӥзы. Озьы техникаез ужатон син азьын умояз. Табере нокыӵе керетонъёс уг потыло, валантэм учыръёс быризы. Берытско на аварийной служба борды. Огазеяськон вордскиз толалтэ, коммунальникъёс понна пӧсь вакытэ. Соин ик та служба нырысь вамышъёсысеныз ик ассэ юн умоен возьматӥз, тужгес но шутэтскон, праздник нуналъёсы, ӝытазе но уин. Предприятие нуналмысь юнмаз, паськытаз. Берло 10 ар ӵоже данаклы будӥз коммунальной услугаос сётон, нош утялтоно улон коркаослы 4 поллы йылӥз: 90 сюрс квадратной метр ке вал, али 377 сюрс пала вуэ ни. Табере кык пол тросгес сётӥськом ни шуныт, гумыосмы 17 иськемысен 60-озь вуттэмын, водопроводъя - 60-ысен 102-озь, канализацияя - 10-ысен 40 иськемозь, нош электрокужым висъян 1,5 поллы йылӥз. - Сергей Аркадьевич, таӵе азинсконъёс материальной инъетэз кужмоятытэк уд басьты. Кызьы адӟиське ӵуказе нуналды? - Вуоноез сярысь арысь аре сюлмаськиськом, огинтыямы ум сылӥське, лэсьтӥськиськом, гумыосмес выльдӥськом но мукет. Кылсярысь, спецавтохозяйствоын но водоканалын (2 блок) гараж пуктӥм, водительёслы - диспетчерской но горд сэрег, электросетьын - административной юрт. Таин ӵош ик выль техника но басьтӥськом, сое валаса ужатоно. Ужъёсмы тырмыт. Тани шуныт сётӥсь гумыосты (теплосеть) предприятиослэсь туж уродэн кутӥськом, 80 процентэз соос вужмемын, тупатъяно-выльдоно луэ. - Нош кыӵе ужпумъёс тӥледды уката ик сюлэмшугъяськыто? - Ӧжыт ӧвӧл соос. Тани берло дыре предприятиос улон коркаоссэс но социальной удыслэсь мукет люкетсэ милемлы сёто. Но уноез юртъёссы, гумыоссы куашкан калэ вуэмын, аналтэмын. Тани "Мэкон" огазеяськон тол эстӥськон кутскон азьын милемлы сётӥз 2 аварийной котельнойзэ но шуныт кошкись гумоыссэ. Ваньзэ соку ик тупатъяно луиз. Нош 20 процентэз предприятиос ("Конус", элеватор но музонэз улон интыоссэс, гумыоссэс муниципальной асваньбуре выжтыны уг но малпало. Кӧня тяпайто, озьы ик юртъёс вужмо. Ушъяме потэ "Свет" огазеяськонэз гинэ. Со ваньзэ лэсьтӥз, кызьы кулэ озьы, графикъя сётӥз коркаоссэ, сетьёссэ но документъёссэ. Кыкетӥез, милям туж шуген мынэ улон коркаосты но юртъёсты тупатъян. Мукет интыосын (Ижын) сямен, улӥсьёслэсь ми квартираоссэс выльдыны дун ум басьтӥське. Соин ик та ужъёслы коньдонмы уг тырмы. Али та ужпумез эскериськом, туэ, оло, улонэ пыӵатыны быгатом. Бюджетысь но та ужлы туж ичи уксё висъяське. Озьы ке но, берло (1996-1998) аръёсы арлы быдэ 2 корка тупатъям яке 3,5 сюрс квадратной метр. Но со юн ӧжыт (али 377 сюрс квадратной метр улон интымы). Мукет юртъёслэсь липетъёссэс (5 сюрс квадратной метр) выльдӥм, 2500 метр панель висъёсты юнматӥм, 15 пыран-потанъёс но коркаосын 340 метр водопровод гумыос тупатъямын. Ньыль коркаосты шунтон газэ выжтэмын. - Коллективды сярысь мар верасалды, Сергей Аркадьевич? - Али милям 900-лэсь ятыр ужасьёсмы. Соос пӧлысь дас арлэсь кема тырше ни 160-эз. Одӥг куиньмосэзлы 30 арес но ӧвӧл ай. 500-лэсь уноез вылӥ быгатонлыкен ужасьёс. Соослы 30-50 арес. Вылӥ тодон-валанэн 68 мурт, техникум дипломъёсын - 170. Али огдыре ужаса 28-эз дышетске, со пӧлысь 11-ез - вузъёсын. Ужасьёсмы уг вошъясько. Дас ар ӵоже вис карытэк хозяйствоен кивалтӥз Игорь Семенов. Алигес быръемын городысь администрацилы тӧрое. Мыным трос юртто воштӥсьёсы М. Елеонский но Н. Желдыбин, цехъёслэн кивалтӥсьёссы Г. Сабирзянов (водоканал), А. Николаев (теплосеть), М. Маренин (спецавтохозяйство), Т. Сергеева (ПТО-лэн кивалтӥсез) но трос мукетъёсыз. Профкомен кемалась вошъяськытэк кивалтэ ни мунчо- мисьтаськон хозяйствоысь инженер С. Кашин. - Сергей Аркадьевич, нош кызьы возиськиды 1990-тӥ-1991-тӥ аръёсы? Ведь республикаысьтымы мукет городъёсын таӵе выллем огазеяськонъёс куашказы ук. - Шонер юан. Татын туж бадӟым тыршемез, кужым сётэмез Игорь Николаевич Семеновлэн. Со ке ӧй луысал, ми но куашкасалмы, дыр. Кин тодэ. Но ми чидам, шуг- секытэз вормим. Тани Глазовез басьтом. Отын коммунальной удысын 9 кивалтӥсьсы, сомында ик валтӥсь инженеръёссы но музонэз. Вылаз ик, отын кужымзы, техниказы пазяськемын нимаз-нимаз предприятиосын. Кызьы бен сое ӟеч ужатод? Ноку уд. Милесьтым огазеям предприятимес ке басьтоно, бюджетлы но умой, пӧртэм предприятиосъя выт бичаса ветлонэз но ӧвӧл. Коммунальной удысын мон огнам кузё, ваньмыз понна кыл кутӥсько. Тӥни озьы ми улӥськом но ужаськом. Ортчем арез но умой йылпумъям. Толлы но ӟеч дасяським. Калыклэсь куронъёссэ тырмыт быдэсъяны тыршиськом. Котькуд коркан, юртын мед луоз шуныт, тыл, ву, ульчаосмы сузямын лымылэсь но котькытын чылкыт. Тӥни со милям самой бадӟымез сюлмаськонмы, нош огазеяськонмы ваньмызлы шумпотон гинэ вае: ужасьёслы но, городын улӥсьёслы но. Тазьы ужаммы котькинлы кельше. Усто опыт ӟечен берытске. Вераськиз ГЕННАДИЙ РОМАНОВ. Туспуктӥз Владимир Камашев. Гожтӥськон-99 Мото ворттэ Кабачие Кызьы ивортӥм ни, таиз ар понна газетмылэн кузьымъёсыз шудытэмын вал. Нош коляскаен "Иж" мотоцикл шедиз Игра районысь Кабачигурт почта ёзэ. Мотоциклэз лотереяен шудытон ужрад ортчоз Кабачигуртын 4-тӥ феврале 19 часын. Г. ВАСИЛЬЕВ. Лыдпусъёс югдурез возьмато Удмурт Республикаысь Коньдон ужпумъёсъя министерство ивортэмъя, кылем арын бюджетлэн доходъя люкетэз 78,8 процентлы гинэ быдэстэмын. Со герӟаськемын бадӟым промышленной предприятиослэн ляб ужаменызы, дуннеын му вӧйлы дунъёс кулэсмемен но налогъёсты тыронъя пунэмъёс тачак люкаськемен (96 миллион манет). Бюджет азьын пунэме кылемъёс пӧлын "Ижмаш" завод - 9 миллион манет, "Ижмаш-авто" - сомында ик, "Гамбринус" - 3 миллион манет но мукет предприятиос. Бюджет "пась" кылиз бере, расходъёсъя план но 76 процентлы гинэ быдэсмиз. Таин валче бюджет чотын ужасьёс азьын пунэмъёс 40 миллион манет люкаськизы. Шор лыдын вераса, дышетӥсьёс, врачъёс, мукет бюджетникъёс 3 толэзь ӵоже уждун ӧз басьялэ ни. Кылем арын вань удысъёс пӧлысь тужгес трос коньдон висъямын тазалыкез утёнлы - 161 миллион манет, кыкетӥ интыын - гурт хозяйство 131 миллион манетэн, собере - правоез утись ёзъёс, таос 86 миллион манет басьтӥзы. Калыкез дышетон удысэ мынӥз 60 миллион, нош культураез но искусствоез азинтонэ - 27 миллион манет. Со вакытэ ик кунэн кивалтонэ, чиновникъёсты сюдонэ-вордонэ - 75 миллион манет. О. ВАХИТОВА. Спорт "Улон сюресъёстӥ" Быдӟым Отечественной война вакытэ Ленинград 900 нунал ӵоже тушмонлэн "кульчоеныз" котыртэмын вал. Уй пал столицаез фашистъёслэсь мозмытэм дырысен алигес тырмиз 55 ар. Та нуналэз ас сяменызы куамынэтӥ арзэ пусъё ни марафонецъёс, яке 42 иськем 95 метр кеме бызьылӥсьёс. Со ужрад нимаське "Улон сюресъёстӥ". Туэ та ӵошатсконэ пыриськиз 120 спортсмен. Россиысь сяна, отчы ветлӥзы Эстониысь, Казахстанысь, Украинаысь но Белоруссиысь марафонецъёс. Санкт-Петербургын ӵошатсконын нырысетӥ интые потӥз Кезысь удмурт пи Алексей Белослудцев. Отын калык куспо классъем спортъя мастер рекорд возьматӥз но кузь сюресэз 2 час 23 минут 45 секундскын ортчиз. Алексей кылем арын 100 иськеме бызьылонын Европалэн чемпионэз луиз вал. Кыкетӥ интыез басьтӥз Санкт-Петербургысь Олег Карачев. Нош куинетӥ вуиз Балезино ёросын вордскем спортсмен дуннелэн чемпионэз калык куспо классъем спортъя мастер Анатолий Корепанов. И. МИХАЙЛОВ. Уже потон - шумпотон Та вакытэ самой бадӟымез шумпотон - со нуналлы быдэ уже потан. Каракулино ёросын та шумпотонлэсь люкемын 566 мурт. Кылем арын уже интыянъя департаментэ вазиськылӥз 647 адями, уж сюриз 233 муртлы, 38-эз дышетскыны келямын. Ужтэк кылемъёс пӧлын тужгес бадӟым инты басьто нылкышноос но егитъёс. Уноез али осконзэс герӟало "Белкамнефть" компаниен. Уго нефть поттон интыосын со алигес кузё луиз. Азьвыл "сьӧд зарниен" кузёяськиз "Арланбашнефть" управление. "Белкамнефтьлэн" генеральной директорез Олег Кузьменко, уго ёросын улӥсьёслы ватсаса ужан интыос висъяны кыл сётӥз. Озьы ик кивалтӥсь Кам котырысь инкуазез кырсёмытонлэсь ужрадъёс кутыны но дасяське. Н. Сергеев. "Шунды ке ӟечгес пиштысал выль огречмы басьяськись доры вуысал ни",- шуиз бакча сиён будэтонъя "Завьяловский" комбинатлэн валтӥсь агрономез З. И. Грязнова. Зэм, витаминэн узыр вож сиён будэтӥсьёслы яркытэсь, шундыё нуналъёсын туэ ӧзгес удалты. Шунды ялан пилемъёс сьӧры ватскыса улэ. Та вакытэ огреч сяськаяське ни. Февральлэн шорвадесаз емыш магазинъёсы вуоз. Нош Атыкай музъеммес утисьёслэн нуналзылы, 23 февральлы, со тырмыт луоз ни. Собере пумен кисьмалоз помидор, вуоз перец, баклажан. Ваньмыз бакча сиён асьме дорын вузаськоз. Комбинат туэ но сад-бакча возисьёслы вузалоз томат, вазь вуись кубиста, пӧсьтурын удъёсты. Б. Никитин. Гажано эшъёс! "Удмурт кенеш" огазеяськон ӧте тӥледыз пыриськыны Политикая клублэн ужаз. Пумиськон ортчоз 4-тӥ феврале 18 часэ Удмурт филармонилэн концерт залаз. Тӥледын пумиськозы экономикая тодосчиос но юристъёс. Дасялэ юанъёстэс. Пумиськон йылпумъяськоз Республикаысьтымы искусствоосъя интернат-школаысь дышетскисьёслэн концертэнызы. "Удмурт кенеш" огазеяськон. Удмурт Республикаысь Кун Кенеш, Правительство, Ижевскысь администрация мур куректыса иворто, кема висемез бере 63 аресказ мыныкуз, 1999-тӥ арын 30-тӥ январе улонысь кошкиз Удмурт Республикаысь Министръёслэн Кенешсылэн азьвыл тӧроез, Верховной Советлэн депутатэз, 13 номеро подшипниковой кун заводлэн азьвыл директорез Миронов Николай Ефимович но ӵыжы-выжыосызлы но матысь муртъёсызлы кайгыремзэс верало. *** Николай Ефимович Мироновен люкиськон ортчоз 2-тӥ феврале 11 часысен культурая "Металлург" юртын. Эшмес буре вайыса Кема висемез бере 1999-тӥ арын 30-тӥ январе улонысь кошкиз Удмуртиысь Министръёслэн Кенешсылэн азьвыл тӧроез Николай Ефимович Миронов. Туэ солы 63 арес тырмысал. Николай Ефимович Миронов вордскиз 1936-тӥ арын 8-тӥ мае Удмурт АССР-ысь Грах ёросысь Вуж Ятчи гуртын крестьян семьяын. 1954-тӥ арын йылпумъяз Бемыжысь шор ёзо школаез. Ужаны кутскиз 1955-тӥ арын, Ижевскысь 9 номеро ГПТУ-ын дышетскемез бере. Ужаз электрик, технолог, мастер, валтӥсь мастер луыса Ижевскысь механической заводын. Со вакытэ ик дышетскиз Ижевскысь механической институтлэн ӝыт отделенияз. Сое быдэстэмез бере 1961-тӥ арын 47 номеро цехлэн кивалтӥсезлы техникая воштӥсе юнматӥзы. 1965-тӥ-1969-тӥ аръёсы ужаз КПСС-лэн Удмурт обкомезлэн промышленностья но транспортъя отделаз инструктор луыса, нош 1969-тӥ арын КПСС-лэн Ижевскысь Индустриальной райкомезлы нырысетӥ секретаре быръемын вал. 1981-тӥ арын СССР-ысь Автомобильной но сельскохозяйственной машиностроениея министерстволэн подшипник поттонъя 13 номеро заводэзлы директоре юнматэмын. 1990-тӥ арын апреле Удмурт АССР-ысь Верховной Советлэн сессиез сое УАССР-ысь Министръёслэн Кенешсылы тӧрое юнматӥз. Со аре ик Верховной Советэ депутатэ быръемын. Николай Ефимович Миронов Министръёслэн Кенешенызы кивалтӥз 1993-тӥ арын июнёзь. Берло аръёсы ужаз Ижевскысь подшипник поттонъя заводлэн генеральной директорезлэн юрттӥсез луыса. Николай Ефимович Миронов ассэ но дырзэ жалятэк ужаз, вань малпанъёссэ улонэ пыӵатыны тыршиз, адямиослы юрттыны быгатӥз. Ужъёсты радъяны, адямиосты ӝутканы быгатэмез, хозяйственной ужъёсты тодэмез, выльзэ, азьмынӥсьсэ кутыны быгатэмез юрттӥзы солы быдэсъясь властьлэн вылӥ ёзэзлэсь ужзэ ӟеч радъяны, республикалэсь экономиказэ азинтонъя ужпумъёсты быдэсъян понна. Калык, государство азьын вормонъёсыз понна со пусъемын Трудовой Горд Знамя орденъёсын, "Знак Почёта" орденъёсын, медален. Николай Ефимович Мироновлэн улонэз адӟем карымон, музъем вылэ кельтэм пытьыез быронтэм. Со сярысь тодэ ваёнъёс, солэн тусбуйыз пыраклы кылёзы сюлэмъёсамы. Удмурт Республикаысь Кун Кенеш. Удмурт Республикаысь Правительство. Ижевск городысь администрация. Чемпионат кутскиз Туннэ спортэз яратӥсьёс понна шаерамы бадӟым праздник. Столицаямы кутскиз Европалэн биатлонъя чемпионатэз. Сое сӥё-дано усьтон туннэ ӝытазе ортчоз "Ижсталь" йӧ дворецын. Тренеръёслэн чакламзыя - та ӵошатсконъёсы пыриськозы Ижевскысь Татьяна Рябова, Максим Максимов но Алексей Кобелев. Нюръяськон кутске ӵуказе - воргоронъёс 20 иськеме бызьылозы. Н. Никитин. Удмурт Республикаысь Кун Кенеш, Правительство куректо, СССР-ысь калык депутатъёслэн нырысетӥ съездзылэн делегатэз, Удмурт АССР-ысь дасэтӥ, дас одӥгетӥ ӧтчам Верховной Советлэн депутатэз Байрамова Надежда Никифоровна улонысь дырызлэсь вазь кошкемен валче но ӵыжы выжыосызлы но матысь муртъёсызлы мур кайгыремзэс верало. БУСКЕЛЬЁС ДОРЫН Мильымзы - вӧё, кунооссы - дуно Дышымтэ сюрес Куать час мынӥськом ни машинаен карлыганэ, "таможняез" но потӥм ни, но сюресчиосы гань-гань пуко, котырзэс дасяны ик уг малпало на. - Ку вуом ни? - юасько. - Туннэ ик, - серекъяло "Катанчиысь" артистъёс. Эшшо одӥг кунгожез ортчоно на, пе. Карлыган кыдёкын ӧвӧл ук - 400 иськем гинэ. Сюрес вылын шутэтскылыса, тямыс час гинэ мыноно. Ай выльысь аслыд но, пе, матын потоз. Ми арлы быдэ вуылӥськом, висказ соос лыкто. Ну малпасько, потӥськиз таосын, сиемед но потыса кулод. - Эн куректы, Маша, пӧсь мильымен возьма ни, дыр, , - шуо. Нош ӧйлась. Маша шуэмысьтызы, кудзылэн ке туганзы, дыр, малпай вал. Алдаськиськем. Со, пе, Мария Аркадьевна Главатских - Марий Элысь удмурт культурая центрлэн кивалтӥсез. Марий Элын удмуртъёс Мари-Турек ёросынгес уло бере, культурая центрзэс Карлыганэ каризы. Кивалтӥсьлы тупась адямиез но интыяз, гуртэз но удмурт шӧмогес. Бигер кылысь берыктыса, карлыган сутэр шуэм луэ. Но удмуртъёс гуртсэс Ӟаны шуо. Нокыӵе сутэр вольыез но ӧвӧл, малы, пе, озьы нималлям? Со понна мыло-кыдо калыкез татын трос. Арлы быдэ удмурт культурая нуналъёс ортчыто. Тани туннэ но со муген ӧтчасько. "Катанчиос"-корелгес Гуртысьтызы "Ӟардон" ансамбль Мари-Турек районын гинэ ӧвӧл, быдэс Марий Элын но бускель республикаосын усто кырӟаны-вераны, шулдыръяськыны быгатэменыз далай тодмо ни, но "сьӧрлось преник корелгес" шуэм мактал татын чидатэк витё Ижысь артистъёсты. Клубын вырӟон инты ӧвӧл. Тросэз ӧс куспын сыло. Сцена вылэ катанчиос пото но карлыган нылъёс лулӟылыны кутско. Анна Плотниковалэсь нимзэ яло гинэ но, учкисьёс, егит кырӟасьлэн нош ик доразы вуэмезлы шумпотыса, кужмо чабыны кутско. Аспӧртэм, паймымон кыска баянзэ Аня - татысь арганчиос паймо. Задор кырӟамез, эсьма, ветлӥсьтэмзэ но эктытоз. Бӧрсяз потэ шундыныл - Надежда Уткина. Учкисьёсты нырысь аслаз чебереныз палёмытэ, собере ... лулэз сайкатон сеанс орчытыны кутске. Надялэн огез но кырӟанэз сюлэмез вырӟытытэк уг кельты уго: мылкыдэз бурдъям сяна, соос визез ужато, лулпуштэ эскерыны, чылкататыны, эгесъёслэсь мозмытскыны косо. Мон артистка ӧвӧл бере, газетмы сярысь мадисько. Жаль, карлыганъёс сое али уг лыдӟо. Но Мария Аркадьевнаен кылмы тупаз кадь. Культурая центразы ке но басьтыны, оло, туэ ик луонлык шедьтозы ай. Огшоры муртъёсты лотереяен шудонмы гочатэ. Кин тодэ, спонсоръёсмы кайта аре но мотоцикл сётӥзы ке, мар-о солы пор удмуртъёс доры ворттонтэмез? Гозыям пуконъёс Пайми ке пайми ни татысь клублы. Кызьы но уг тыршо соос гурт калыклэсь улонзэ шулдыртон понна. Праздниклы быдэ концерт, маскаръяськон. Кырӟамед потэ, - кырӟа - кык ансамбль ужа. Мылкыдыд ке вань, баянэн, домраен, балалайкаен шудыны дышетскы. Эктыны яратӥсьёс понна, эсьма, куинь ансамбльзы. Вань асьсэлэн балетмейстерзы но. Эктон-кырӟан сяна но, лачак кружокъёссы ужало, соин ик пиналъёслэн но егитъёслэн йыртэмаса ветлыны дырзы ӧвӧл. Концерт азьын залысь гозыен котыртэм пуконъёсты синйылтӥ. Со озьы совхозлэн директорез, пе, ужасьёсызлы инты пусйыны ветлэм. - Сямыз аслаз кадь, - шуо ужасьёсыз, - но ужась муртэ гажа. Рафаил Габдурахманович Сабиров сюлмаськемен, колхозысь гуртъёсы газ кыскемын. Тэк пукисьёсыз татын трос ӧвӧл. Совхозын бадӟым парсь вордон но скал кыскон фермаоссы вань. Ӟеч гинэ пайда басьтыны быгато. Сотэк быгатысал-а огшоры доярка толэзяз 500-600 манет басьтыны? Азьмынӥсезлэн 800 манетозь но вуэ. Вераны кулэ, уждунзэс татын толэзьлы быдэ сёто. Но сберкассае тырыны уг дырто, бадӟым, чебер юртъёс ӝуто, машина-трактор басьто. Шудпуйы: яке вал интые - 150 вал. Евгений Мараков но ёрмыса уг улы. Но машиналы трактормы мында уксё люканы секыт: куинь нылпиез сюдоно-дышетоно, коркаез быдэстоно, 12һ3 метр быдӟаез ар ӵоже уд быдэсты ук. Вылаз ик, гужем уг но ваньмылы, сыӵе ини трактористлэн но комбайнерлэн ужез. 1978-тӥ арысен комбайнэг ара-кутса со ю-нянь. Мари-Турек ёросысь "Восход" совхозын ю-нянь котьку ик удалтэ - гектарысьтыз 24 центнерен но басьто. Вазь ӵукнаысен уйшорозь тыршо комбайнеръёс. Евгений Васильевич кемалась азьмынӥсь комбайнерын ветлэ ни. Валля арын совхоззылэн директорез шуиз: - Давайте ужалэ. Азьмынӥсьёслы вал но кунян сётом. Аран дыр быриз, вормисьёс тодмо ни. Пыриз огпол Мараков конторае. Вераськон сямен вал сярысь но юаз. Нош Габдурахманович шуэ: - Сёт, Мараков, валдэ кыкетӥ интые потэмезлы. - Малы? - Тыныд Президент (Марий Элысь - З. Р.) машина сёто шуиз. Республикая самой трос кутсамед. Евгений Васильевич ӧз ик оскы кадь. Но агропромышленной комплексын ужасьёслэн нуналазы Президент В. А. Кислицын Мараковлы ачиз "Иж-2775" (пикатп) машиналэсь усьтонъёссэ но автографеныз час кузьмаз. Одӥг вал интые 75 вал кужым луиз! Чассэ Евгений Васильевич юрттӥсезлы Женя Мараковлы (нимзы но тупаны кулэ ук) кузьмаз. Лӧптӥз ке лӧптӥз ни пияш. Кылем арын куазь урод улӥз, юос капчи вал. Но Мараков быгатӥз 1432 тонна ю тысь кутсаны. Нош ик республикая нырысь интые потӥз. Машина сярысь, валамон, ӧз ик малпаськы - весь уз сётэ ук. Но Президент шуиз: туэ но сётом! Табере Мараковлэн кык машинаез. Табере ини 150 валлэсь кужымзэ воштымон. Кин тодэ, кайта, оло, куинетӥзэ но утоз. Евгений Васильевичез шудпуйы шуоно ке, лотереяен утэмын ӧвӧл, машинаосыз аслаз нюлам вуэныз поттэмын. Но ачиз воргорон шуэ: - Шудо ик, дыр. Ужам уждэ дунъяны быгато ке, со шуд ӧвӧл шат? Нош милям Президентмы быгатэ ужась муртэ дунъяны. Соос чабо... кризислы Ӵуказеяз Татарстанысь Балтаси ёросысь Дургае потӥм. Отын но, пе, трос удмуртъёс уло. Но отчы вуылыса вылысь, мон сое туж ӧй шӧды. Клубын пумиськон 7 часкын ӝыт кутскыны кулэ вал. Артистъёс, оло, 6 часлы ик мынӥзы - дасяськоно ук. Карлыганын концерт кутскытозь, кык часлы азьло клубе калык вуыны ӧдъяз ке, татын 7 часкын ньыль-вить мурт сяна люкаськемын ӧй вал ай. Мынам таӵезэ адӟылэме ӧй вал ай. Удмурт гуртъёсын куное озьы ӝытбыт мыныны выро, ӝӧк сьӧры пуксьытозязы уйшор матэктэ ни. 8 часлы ӝыны зал люкаськиз ни. Но артистъёс малы ке туж уг керӟегъясько. Вуозы ай, пе, каллен, котькуд гуртлэн аслаз сямыз. 8 но ӝынылы, зэмзэ но, клубысь зал тырмиз кадь. Лыкто гань-гань, уг но юасько, уг но верасько - кыӵе ке быръёнъёсын кадь. Вуиз колхоззылэн кивалтӥсез Эдуард Камалов но. Мон сое тусызъя тодмай, юаськытэк: вот кин батыр ке батыр - пушказ быдэс "Катанчи" тэроз. Бигер ке но, быдэс концертэз пумозяз учкиз. Дун но колхоз кассаысь тыром, пе. Тон - удмурт, тон - пор, мон - бигер шуыса татын дан уг потто - тупаса уло. Зэмзэ ке, мыным та пал удмуртъёслэн асваланзы, асшӧдонзы - ментальностьсы, кызьы шуо али - бигеръёслы матын потӥз. Трос уг супыльто, ужзэс ужало, артистъёслы мултэс уг чабо, выльысь сцена вылэ потыны курыса уг черекъяло. Ми, пе, концертъёслы ӧвӧл дышемын. - Зэм, берло аръёсы калык клубе шергес ветлыны кутскиз, - шуэ татысь культура юртлэн кивалтӥсез Николай Александрович Алексеев. - Гурт котырын уж трос. Куд-огез быдэн 30 парсьпи вордо, бадӟым бакча возё. Со понна ваньмыз выль юртъёс ӝуто, машина-трактор басьяло. Тани Василий Андреевмылэн хозяйствояз сизьым пӧртэм техникаез: мотоциклэз но, "Жигулиез" но, грузовоез но, оломаиз но вань. - Со тӥляд фермерды, дыр? - Милям фермеръёсмы ӧвӧл, ваньмыз колхозын тыршо. - Кыӵе толэзь понна уждун басьтӥды ни? - юасько колхозникъёссылэсь. - Таизлы аванс сётъяло. Но али маке сиён-юонлы чек ӵектыны кутскизы ай. Милям аръёсын уждун уг басьяло шуэмелы уг паймо. - Тӥляд Шаймиевды ӧз буды на уго. Тодӥсько мон, шаерады но ужатэк уг уло, но бигеръёсты уд суты - шуэ егит воргорон Слава Колесников. - Ма, тӥледыз нокыӵе кризис но ӧвӧл куалектытэм кадь? - Милемлы умойгес луиз - сӥльмес-вӧймес дуно дунын вузаны луонлык кылдӥз. Шуг- секытлэсь кышкано ке, выль корка но ӝутоно ӧвӧл, дунне быре ни шуыса сисьмемаз пуконо. *** Бигер гуртын узыр уло, но Карлыганын шулдыргес. Кыкетӥ нуналаз мон аслым сьӧрлон кадь ӧй ик поты ни. Мильымзы но асьмелэн кадь ик вӧё, ческыт, тапыртыса эктонъёсмы но тупало. Доре бертон сюрес туж кыдёкын ӧз поты ни. Только туж кулэ арбериме Карлыганэ вунэтыса кельтӥськем. Выльысь берытскылон вылысь, пе, озьы луэ. Кин тодэ. З. РЯБИНИНА. Февраль Таиз толэзь йылпумъя толэз, "ӧс ӵоге" тулысэ потыны. Вашкала удмурт календарьын февралез "тулыс пал" нимало вылэм. Нунал ялан будэ. Пумен вылэгес-вылэгес ӝутскись шунды асьме шоры вешась тусынгес учкылэ ини. Нуназе, чыс-чыс дыръёсы, со ӧжытак шунтылэ но. Нош толэзь пумын куд-ог нуналъёсы липет вылысь шапыкъёс но усьыло, чильпырась йӧ ӟузыриос ошиськыло. Кезьытэн бусаськем, гӧртыса пурысьтам тол ӝог пересьмыны кутскиз. Озьы ке но, солэн кужымез трос на: "пересьмы провор но сэзь на". Кынмем музъем вадьсын чепыллясь тӧл юмша, лымыез зӥр бергатэ, тулкымен-тулкымен погылляса нуллэ, сюресъёсты ӵокта. Кизилиё, толэзё уйёсы ӟырт кезьыт. Лек тӧласькыку, нюлэскын писпуосысь векчи йӧ лымы пужнӥськыса ваське, кызъёс, пужымъёс йылысь южсам лымы куашка. Сайкыт адскись нюлэсо гурезь вадьсын, вылӥын, сьӧд кырныжъёс поръяло но кесясько: "Трон трос! Трон трос!" Чырткемгес карисько тылобурдоос но пӧйшуръёс. Пислэг писпуостӥ сиён утчаса ветлон куспетӥз кырӟа но кырӟа - тулыслэсь лыктэмзэ данъя. "Тулыс гурен" кырӟа зиллё но: "Синь... зинь..." Кайсыос пи поттэмзылы шумпотыса кылбурало. Феврале тылобурдоос сиёнтэк тужгес курадӟо. Соин ик соосты сюдон сярысь али юнгес сюлмаськоно. Пиналъёс медаз вунэтэ асьсэлэсь ӟеч ужзэс: кормушкаосы турын кидысъёс, нянь пырыос ӵемгес мед тырылозы. Собере али ик умой луысал ни юбер чуркаосты ошылыны - соос тӧласалзы. Ӵыжак выль "юртъёсы" бурдоос кышкасагес каръясько. Мур лымы вылтӥ асьсэлэсь улон интыоссэс вошто, оскымонгес азьёсы воштӥсько бадӟым тылобурдоос, пӧйшуръёс. Коньылэн запасэз быре, кызысь ӵем васькаса, лымы вылтӥ бызьылэ - дасям сиёнъёссэ утча. Лосьёс трос кузя люкасько но чалмыт тэльёсын, писпу сикъёсын уло. Лымы южса ке, соослэн югдурзы секытоме, пыдзы вӧсь луыса но гужтылыса, сэзь ворттылыны уг быгато ни. Соку соос ӵем дыръя балянъёслэн но кионъёслэн гижыоссы улэ шедё. Шуныт гуосазы усто, сюлмаськытэк толъё гондыръёс, барсукъёс, кучырмоос. Мумы гондыр та вакытэ пия. Пиосыз коӵышпи быдӟаесь гинэ вордско. ... Инбам пурысь шобретэн возъяськемын. Лымыя. Дыртытэк гинэ, поръяса тӧдьы мамыкъёс усё. Кытысь ке, пилем сьӧрысь возьёс вылысь, тӧдьы пуныжильыос тӧлӟыса музъем вылэ усьыло кадь. Тӧл умой-умой уг шӧдӥськы. Шуныт. Кызьы таӵе дыръя куасэн, конькиен уд нискыла. Бен, куазь лымыя, жобаське. Тол кутскем пумысь лымы пуктосъёсты ӧм ик адӟылэ ке, табере соос йыло но бадӟымало. Нош котьма ке но, омырысь тулыс шӧм кылӥське ни. Василий ШИРОБОКОВ. Кун Кенешлэн сессияз Саессэс пужалляса Азьвыл чакламтэ 23-тӥ сессия кема гинэ люкаськыны выриз. Котьма ке но, со ортчиз, шуыны луоз ни. Депутатъёс таяз учыре ӝот-ӝот кутскыса ужазы, дырзэс эсэпаса, юнме шорысь пӧсекъятэк, керӟегъяськытэк, ог-огзы вылэ мултэс урдэсъяськытэк. Зэмос парламент сыӵе ик луыны кулэ, дыр. Нырысь нуналэ 98 депутат пӧлысь залын пукиз 95- ез. Пусйымон кворум! Учкыны чаклам ужпумъёс секытэн ке но та нуналэ йылаз-пумаз вуттэмын вал. Нырысь ик, юнматэмын судьяос. Соос та нуналэз толэзьлэсь ятыр витёно луизы. Вераны кулэ, депутатъёс правоез утён удысын ужасьёс пӧлысь куд-огез азе лэчыт юанъёс пуктӥзы, соин ӵош голосование дыръя ӵектэм кандидатуралы пумит луэмзэс но возьматӥзы. Озьы ке но, судьяос ваньзы тырмыт куара люказы, табере соосты юнматыны кулэ Россия Федерацилэн Президентэз. Кыкетӥез туж кулэ ужпум - Кун Кенеше депутатъёсты быръёнъя выль законэз кутон но быръёнъёсъя округъёсты юнматон. Удмурт Республика понна со лек яралы пӧрмиз ни. Соин валче ик кемалы кыстӥськиз 23-тӥ сессиез люкан но депутатъёсты огъя кылэ вуттон. Таяз учыре но залын пукисьёс дась ни вал 100 но 130 лыдпусъёс котырын выльысь кутскыса эчешыны. Мылкыдзэс интыязы пуктӥз Москваысь лыктэм куно С. Н. Самойлов - Президентлэн администрациысьтыз интыосын ужанъя ёзлэн кивалтӥсез. Со 2 час пала валэктыны выриз быръёнъёсъя выль законлэсь кулэлыксэ. Депутатъёс трос юан сётӥзы. Огкылэ вуон вылысь, фракциос нимаз-нимаз люкиськыса ужазы, собере ӝыны час пала куспазы кенешизы на фракциослэн кивалтӥсьёссы. Озьы гинэ толэзьлэсь ятыр бергатэм ужпум интыяз пуксиз кадь. Ӝытазе депутатъёс огкутскемен юнматӥзы Кун Кенеше быръёнъёсъя выль законэз но быръёнъёсъя 100 округез, озьы ик быръён нуналэз. Удмуртиын Кун Кенеше депутатъёсты быръён ортчоз 4-тӥ апреле. Жаляса верано, солы дасяськон дыр законэн чакламлэсь ӧжытгес кылиз ни. Кинэ со понна янгыш карод, туала парламентэз сяна? Неужто Москваысь юрттэт ӧтьытэк, депутатъёсмы уг быгато ни ас кожазы ужаны но республикамы понна кыл кутыны? Сессилэн кыкетӥ нуналаз зал 10 депутатлы кулэсмиз. Ӵукнаысен кутскыса ӝытозь парламентарийёсмы пыр-поч эскеризы Удмурт Республикалэсь туэ арлы чаклам социально- экономической программазэ. Солэн инъетэныз люкаськемъёсты тодматӥз экономикая министр Е. М. Аверьянов. Та документэн ӵош депутатъёс эскеризы туала бюджетэз кутонъя законлы проектэз. Сое лыдӟиз коньдон ужпумъёсъя министр В. В. Бельтюков. Котькудӥзъя трос юанъёс сётэмын вал. Депутатъёсты тужгес но шугъяськытэ бюджетэ пыртэм "омырысь" басьтэм куд-ог лыдпусъёс. Азьвыл сямен соос нош ик бумага вылэ уз кыле-а? Данакез залын пукисьёс оскымтэзэс веразы. Озьы эскероно ужпум, лумбыт ужаса но, пумаз-йылаз ӧз вуы. Сое эскерон борды парламент берытскоз на 24-тӥ феврале. Ма шуод, та кык нуналзэ депутатъёс сюлмысь тыршизы, озьы, кызьы ужаны кулэ вал, дыр, котькудаз сессиын. Огез жаль: вожвылъяськонъёсын быдтэм дырез табере уд берыкты ни. Соин ӵош куд-огезлэн калык азьын данэз но бездӥз. Л. МЕДВЕДЕВА. Тулыспал: тодмо нимъёс но нуналъёс 1. - 60 арес тырмиз В. М. Ивашкинлы, журналистлы но кылбурчилы. 4. - 55 арес тырме А. Г. Шкляевлы, филологической наукаосъя кандидатлы, литературоведлы но критиклы, Удмурт Элькунысь наука удысын дано ужасьлы. 7. - Вордскемез дырысен 70 ар тырме М. Ф. Муравьёвлы (1929-1993), профессорлы, медицина наукаосъя докторлы. 10. - Вордскемез дырысен 80 ар тырме Г. С. Симаковлы (1919-1997), нылпи писательлы, журналистлы. 16. - 80 ар талэсь азьло Выль Мултан черкогуртын усьтэмын дышетӥсьёсты дасянъя удмурт семинария, бӧрысь со педагогической техникум луиз. 19. - Вордскемез дырысен 65 ар тырме Ф. И. Васильевлы (1934-1978), тодмо удмурт кылбурчилы, Удмуртиысь Комсомоллэн премиезлэн лауреатэзлы. Кулэмез бере поэтлы 1978-тӥ арын Удмуртилэн кун премиез сётэмын. 22. - Вордскемез дырысен 100 ар тырме А. К. Пухидскийлы (1899-1966), медицина наукаосъя докторлы фармаколог), профессорлы, Удмурт Элькунысь наука удысын дано ужасьлы. 23. 15 ар талэсь азьвыл "Ижмаш" огазеяськонын поттэмын 7 миллионэтӥез мотоцикл. 27. - 80 арес тырме В. Г. Широбоковлы, писательлы, журналистлы, удмурт кылэ берыктӥсьлы. - 75 ар талэсь азьвыл Сарапулысь рабочийёслэн, крестьянъёслэн но гордармеецъёслэн кенешсылэн исполкоменызы городын драмая театр кылдытон сярысь постановление кутэмын. 28. - Вордскмез дырысен 90 ар тырме Н. В. Мельниковлы (1909-1980), инженерлы, гурезь ужъёсъя тодосчилы, академиклы, Социалистической Ужысь Геройлы. Вордскемын Сарапулын. Азьвыл кадь ик пиштэ толэзь... - Тӥ солы туж бадӟым салам вералэ! Тау карисько мон, улонын ас интыме шедьтӥ шуыса,- тазьы йылпумъяськиз милям Якшур-Бодьялась Виктор Николаевич Широбоковен вераськонмы. Бӧрысьгес ини Ижысен пумитай тодмо крезьгурчимес Николай Егорович Шкляевез но шумпотыса верасько солы: озьы но озьы - тӥледыз туж ӟеч мылкыдын тодаз вае одӥг адями. Киды капчи вылэм. Ӟеч мылкыд но сётыны быгатӥллямды: тӥледлы луыса, улонын ас интызэ шедьтэм. Табере тодмо адями луиз ни: Россия Федерациысь культура удысын дано ужась Виктор Николаевич Широбоков. Умойтэм учыре шедем мурт кадь луиз крезьгурчимы: вождэс эн ваелэ, шуэ, нокызьы но тодам уг ваиськы, кин со. Озьыез но озьы луоз: ӧжыт-а калык ортчиз Н. Е. Шкляевлэн син азьтӥз, пенсие потытозяз: Удмурт Элькун театрын ужакуз, артистъёсын ӵош гуртъёсы потакуз. Ваньмыз йыре уг кыльы угось. Калык сюлмын гинэ ӟеч карем уг вуны. Озьыгес ик луиз В. Н. Широбоковен но. Трос дыр ортчемын ни со дырысен - ог ньыльдон ар пала. Со пичи дыръя анай-атаез театрын ужало вылэм: атаез спектакльёслы декорациос лэсьтылэм, анаез сузяськылэм- бичаськылэм. Пичи пизы крезьгурез яратэмысь, соос арган басьтоно кариськиллям. Нош кыӵезэ быръёно - уггес валало. Тӥни соку вазиськиллям Н. Е. Шкляевлы. Егит дыръяз ик крезьчи тодмо вылэм, лэся. Соин ӵош вузкаронние мыныса бырйиллям арган. Пичи Викторлы отын ик вуоно композитор шудыса сётэм шулдыр крезьгурзэ. Ӟеч кыл верам на, умой эшед мед луоз шуыса. Со дырысен Виктор Николаевичлэн киысьтыз арган, баян ӧз усьылэ. Пельыз сак вылэм крезьгуръёслы, чиньыосыз шаплыесь арган, баян бирдыос вылтӥ бызьылыны. Нош кыӵе но вакытъёсыз ӧй вал ас улоназ, мае гинэ чидано ӧз луы. Пичи дыръяз, арган басьтэмзы берегес ик, синадӟонэз шӧдтэк шорысь лябомыны ӧдъяз. Шунды но, толэзь но, вож турын-куар но, ворекъясь ву шапыкъёс но вотэс пыр кадь адскыны кутскизы. Быдэ вуон вакытаз со шундыез но лампочка кадь гинэ адӟе ни вал. Кайгу огназ уг ветлы, шуо. Быдэ вуон вакытаз синтэм пияш анай-атайтэк кылиз, ӵыжы- выжыосыз дорын улылӥз. Кӧтӝож дыръёссэ тодаз ваемез уг поты: юн сюлэмо кариськем, ассэ быдтон дыръёсыз ке но вылӥллям. Соин ик туннэ туж паймоно куд-огезлы: одӥг-кык чурыт кыл верамысь яке уж дуразы маке пӧрмымтэысь, улон секыт луэмын шуэмысь, кыӵесэ пыро. Бадӟым оскон сётэмен ӵош, ӟеч юрттӥзы Виктор Николаевичлы синтэмъёслэн огазеяськонысьтызы эшъёсыз. Арганэн, баянэн усто шудэменыз, со ялан калык пӧлын вал. Огвакыт вокально-инструментальной ансамблен джазэз, мукет туала гуръёсты шудылӥзы. Собере дышетскыны ыстӥзы сое Курске, синтэмъёслэн крезьгуръя училищеязы. Отын со зэмос баянист луиз, нотаосъя шудыны дышиз Брайльлэн дышетэмезъя, чиньыйыгыриосыныз "адӟылӥз" пусъёсты. Улон дунне адскыны кутскиз крезьчилэн чиньыосаз. Лыдӟиське но озьы ик. Тани та дыре, кылсярысь, туж яратыса тодматске Д. Мамин-Сибиряклэн гожтэмъёсыныз. Ӝӧк вылын - "Приваловские миллионы", "Золото", "Горькое гнездо" романъёс. Ярам ай, улон-вылон дуно луэмын ке но, синтэмъёс сярысь государство сюлмаське на: дунтэк книгаос поттэ. Ӧжытгес ке но, кагазэз уродгес ке но, со но юрттэт ук. Виктор Николаевичлэн сюлмыз шуг луэ, синтэм нылпиослы учебникъёс дыраз вутымтэысь. Со угось, крезьчи сяна, дышетӥсь но. Якшур-Бодьялась дышетӥсь кулэм бере, сое тодазы ваизы, синтэм пиналъёслэн интернатазы ужаны ӧтизы. Со дырысен кызь вить ар ортчиз ини. Та пичи юбилеез пусъён нуналэ ик пумиськимы Виктор Николаевичен. Уно калык люкаськиз культура двореце: ветеранъёслэн хорзы, дворецысь самодеятельной артистъёс, интернатысь пиналъёс... Кык часлэсь кема кыстӥськиз дышетӥсез, крезьчиез данъян. Удмурт, ӟуч кырӟанъёс, ӟеч мылкыд но тазалык сӥзись кылъёс вань калыкез паймытӥзы. Вылаз ик, Виктор Николаевич Широбоковлы сётӥзы "Отличник Всероссийского общества слепых" но "Отличник народного образования" дано нимъёс. Сюлэме тужгес но усьымон луизы дышетскисьёсызлэн кырӟам-верамъёссы-шудэмъёссы. Нылпиослэн оркестрзы, струнной ансамбльзы, "Русская песня" ансамбль, ветеранъёслэн хорзы калыкез шулдыртӥзы крезьчилэн баянэн шудэменыз ӵош. Ас кожаз но со кырӟаз удмурт, ӟуч кырӟанъёсты. Тӥ асьтэос удмурт кадь но, маке ӟуч сяменгес вераськиськоды шуэмысь, Виктор Николаевич секыт лулскиз гинэ: - Кытчы пырод, ма карод... Так получилось: издержки воспитания. Ведь тридцать- сорок лет назад удмуртский язык в городах не преподавался, на улицах, в транспорте не услышишь. В загоне был родной язык. Сами люди стеснялись говорить на своем языке. Сейчас вот - другое дело. Яратэ крезьчи калык кырӟанъёсты кырӟаны - ӟучсэ, удмуртсэ. Удмуртъёсыз пӧлысь тужгес но ярало Пантелей Кузнецовен кылдытэмъёсыз. Шумпотэ дышетӥсь соизлы но: куд-ог дышетскисьёсыз солэн сюрестӥз вамыштӥзы. Курскысь синтэмъёслэсь крезьгуръя училищезэс йылпумъязы ни куатез нылъёс-пиос, нош Александр Коростелев Казань консерваторилэсь баянэн шудонъя люкетсэ йылпумъяз, али аспирантураын дышетске. Сюлмаське, али пиналъёслы дышетскыны секытгес луиз шуыса. Интернатын та дыре куд- ог классъёсын нотаосты чиньыен лыдӟонъя книгаоссы ас киын лэсьтылэмын. Малпаськылэ крезьчи нылъёсыз сярысь но. Кыкез ик мыло-кыдо кырӟало-экто. Со сяна, пичиез гитараен шудыны дышетске искусствоосъя школаын. Данъяське В. Н. Широбоков кузпалэныз. Егит дыръязы тодматскизы вал. Одӥг пол концертэн мынӥзы нылпи садэ. Тӥни соку ик вуоно кузпалэз, йӧно, чебер нылкышно, та адями мынам луоз шуэм но ачиз ик тодматскем синтэм егит пиен. Со дырысен ялан ӵош соос: доразы но, ӝытъёсы но - культура дворецын но, интернатын но. Нош уж дураз Виктор Николаевичез келяло нылъёсыз. Паймымон та адямилэн улонэз. Соин ик юатэк ӧй чида: "Мӧзмиськоды, дыр, ук яркыт шундылэсь, чагыр инбамлэсь?.." Виктор Николаевич огшоры гинэ вераз: - Монэ жаляны кулэ ӧвӧл. Туж уг яратӥськы, со сярысь тодам вайыто ке. Нош тӥледлы верало: шундыез, толэзез, вож куаръёсты адӟыса будӥ бере, кыӵеесь соос - тодӥсько. Ма карод, учкысал на инбамез но... Но... Пӧртэм адямиос уло-выло, ужало-тыршо, шулдыръясько Виктор Николаевич вӧзын. Пиналъёс, мӧйыос, пересьёс - ваньзы огмылкыдын гажаса вазисько солы. Соин ик умой соосын. Шӧдэ мылкыдзэс, сюлэмшунытсэс. Нош кинэн ке кусып тупатыны, огкыл шедьтыны ӧйлась ке, ма карод - улон со. Анатолий ПЕТРОВ. Асьмелы юрттоз дэмен кенешон Автормылэн та гожтэтэз вуиз вал кылем арлэн пумаз, удмурт интеллигенцилы сӥзем научно-практической конференция азьын, кудзэ ортчытӥз "Удмурт кенеш". Статьяын пуктэм юанъёсты та ужрадын сэрттыны-пертчыны выризы учёнойёс но. Тани С. Воронцов статьяяз ӝожтӥське, малы, пе, куд-ог удмурт интеллигентъёс ас выжызэс вунэто. Но удмуртъёслэн гинэ озьы уг луы, шуиз конференциын философ А. Разин. Котькуд калык пӧлын озьы берытскыса кошке: адями вылӥе тубе ке, калыксэ вунэтэ. Юнме шорысь таӵе веран но кылдэмын ӧвӧл, дыр: "Вышел из народа и ... не вернулся". Малы озьы луэ? Адями пушкын бугыръяськись мылкыдъёс пӧлын ворме национальной нигилизм, шуиз А. Разин. Пушкын пукись пумитъяськон мылкыд сэрен ик, вылды, визьматскем удмуртъёс (ваньмыз сярысь озьы вераны уг ке но луы) пумен палэнско ас калыксылэсь. Туж паймымон лыдпусъёсын ужрадэ люкаськемъёсты тодматӥз Г. Шкляев, философия наукаосъя кандидат, ИжГТУ-ысь доцент. Удмурт интеллигентъёс пӧлысь 52 процентэз ас кылынызы лыдъяло ӟуч кылэз. Озьы ик тросэз пумит луо нылпиоссэс удмурт кыллы дышетонлы, Удмурт дӥськутэн но дэремъёсын ветлонлы, вузъёсы дышетскыны пырыку квота сётонлы. Соос ик уродэн уг лыдъяло музъемез нимаз кузёослы сётонэз, сое палэнысь лыктэмъёслы вузаны луонлыкез лыдэ басьтыса но. Та ужпумъёсты Г. Шкляев валэктыны выриз кӧня ке мугъёсын. Нырысь интые со пуктӥз вылӥ образование басьтэмез. Дышетскем удмуртъёс ас вылазы мургес шӧдӥзы азьвыл идеологилэсь зӥбетсэ, шуиз со, соин ик ӟучъёслэн малпанъёссы но культуразы соос пушкы мургес пыӵамын. Дышетскем удмуртъёс туж ляб пырисько общественной улонэ. Та ужпум пумысен но пӧртэм учёнойёс ас малпанъёссэс веразы. Удмуртъёс пӧлын ортчытэм юалляськон таӵе суредэз возьматэ: 8 процентэз гинэ удмуртъёс тодо вылэм асьсэлэсь азьветлӥсьёссэс (лидеръёссэс), нош удмурт огазеяськонъёслэн ужамзы сярысь кык куиньмос люкетэз гинэ тодэ. Жаляса верано, конференциын вераськисьёс, та лыдпусъёсты шараяку, номыр ӧз вералэ мукет калыкъёс сярысь, Мон сямен, мукет калыкъёслэн интеллигенцизы но, асьме сярысь сокем ик уг висъяськы общественной улонэ пыриськеменыз но, ас кичӧлтӥсьёссэс тодэменыз но. Туж шонер йылпумъянъёс лэсьтэм вылэм та пумысен ӟуч тодосчи Н. Бердяев: "Огъя национальной идея борды огазеяськем интеллигентъёс сярысь одӥг учырез но вераны уз луы". Зэм, котькуд калыклэн интеллигенциез нимазъяськысагес улэ но, ужа но. Интеллигенция - со пумозяз валамтэ но дунъямтэ маке. Та кыл но вераськонамы ай ЪИЪ даурлэн 60-70-тӥ аръёсаз гинэ пырем. Нырысьсэ та кылэз уже кутыны кутскем ӟуч тодосчи П. Бабарыкин. Интеллигенция мукет сӥослэсь визьмыныз висъяське. Визьмо адями мургес малпаське, соин ик улон шоры учконъёсыз но солэн мукетгес, паськытгес, эрикогес. Тодосчи И. Клестов конференциын Куӟебай Гердлэсь кылъёссэ тодаз вайытӥз: "Интеллигенцилы властен герӟаськыны уг яра". Соку ик тодам лыктӥзы кылем арын гужем радио пыр тодмо ӟуч драматурглэн В. Розовлэн верамъёсыз. Со но ӵапак Куӟебай Герд сямен ик шуиз. Интеллигенция, пе, нокыӵе властен но политикаен герӟаськытэк ужаны кулэ. Драматурглы кивалтон удыс ӵекто вылэм - нош со сыӵе ужлы пумит кариськем. Огъя верано ке, конференциын ӝутэм вераськонъёс лэчытэсь но, муресь но вал. Умой соиз но: удмурт интеллигенцилэн асьме обществоын интыез сярысь ас малпанъёссэс веразы пӧртэм калыкысь потэм учёнойёс но. Ми малпаськом, та ужпумъя вераськон газетамы азьланьтӥськоз на шуыса. Ӵош кенешон одно ик пайдаен берытскоз. Т. БАННИКОВА, газетлэн корреспондентэз. Кин тросгес йыртэма Элькунысьтымы милицилэн ивортэмезъя, берло дыре йыружъёс уногес лэсьто ужасьтэм адямиос. Кылем арын соос 10 сюрслэсь уно пол йӧнтэмъяськизы но, валлян арын сярысь, йыружъёслэн лыдзы 20,8 процентлы йылӥз. Киоссэс тросгес лэзьязы азьвыл пытсэт сьӧрын пукемъёс но - 7 сюрс 604. Берло дыре тросгес йыружъёс лэсьтӥсько огазеяськыса. Бере уг кылё быдэ вуымтэос но. Н. ЕФИМОВ. МАЛПАСЬКЫТӤСЬ УЖПУМ Кинэн-о тӥ, эшъёс? "Удмуртъёслы куке но удалтоз-а?" - таӵе нимын потӥз вал газетады (1998-тӥ арын 21-тӥ июле) удмурт профессорлэн К. И. Куликовлэн статьяез. Солэн гожъямъёсыз монэ мур малпаськонэ уськытӥзы. Зэмзэ но, удмуртъёс пӧлын но вань зэмос интеллигентъёс. Соос пӧртэм удысъёсын ужало, государствоен кивалтонэз вераса но. Огез валантэм: малы меда куд-ог удмурт интеллигентъёс вунэто кыӵе выжыысь потэмзы сярысь. Мон но сыӵеосын пумиськылӥ. Пумиськылӥ но паймылӥ. Малы соос сокем адӟемпотостэм каро ас калыксэс? Соин ик тазьы малпасько: удмурт интеллигентъёсты огазеятэк, асьмеос калыкмы азьын сылӥсь ужпумъёсты ноку но пумозяз ум быдэстэ. Озьы ик асьмеос чик но ум гажаське удмурт калык понна ужась визьмо адямиосмес. Та пумысен таӵе учыръёсты вераме потэ. Туж кема аръёс ӵоже ини (1976-тӥ арысен) Дышетӥсьёслэсь тодон-валанзэс будэтонъя институтэн кивалтэ удмурт воргорон Рудольф Федорович Березин. Удмурт кылэз но литератураез дышетонъя со кӧня учебникъёс но пособиос дасяз ини. Солэн сюлмаськеменыз ик институтын аспирантура но усьтэмын. Отын табере трос профессоръёс но наукаосъя докторъёс ужало. Мон сямен, Рудольф Федоровичлы кемалась дано ним сётоно ни, нош солэн та дырозь нокыӵе учёной званиез но ӧвӧл. Татын, оло, нош ик асьмеос, удмуртъёс, ягышесь - ӟече потӥськомы ке, сюрес усьтӥсьёсмес вунэтӥськомы. Совето власть вакытъёсы нимысьтыз политика нуиське вал, ичи лыдъем калыкысь потэм визьмо адямиослы вылӥегес ӝутскыны юрттон понна. Табере шуиськом: сюрес усьтоно профессионалъёслы. Усьтӥмы. Асьсэдыз профессионал шуыса, кивалтонэ вуизы коньдоно адямиос - потанинъёс, березовскийёс но мукет амало адямиос. Таӵе валантэм югдур кылдӥз бере, асьме удмурт интеллигенцилы огъя кариськыса ужано вылэм визьмо удмурт адямиосмес кивалтонын возён понна. Тани кыӵе али секыт йӧтэ Правительствоенымы кивалтӥсьлы Павел Николаевич Вершининлы, кӧня пож ву кисьтӥське со вылэ! Но со шат янгыш туала секыт улонмы понна? Ӧз, со экономикаез но, культураез но, наукаез но ӧз куашкаты. Солы кивалтыны кемдӥз демократъёсын таркам улонмы дыръя. Соин ик мылкыд сӧриське, куке П. Вершининэз курласьёс пӧлысь кылӥськод куд-ог удмурт интеллигентъёслэсь но куараоссэс. "Ельцинъёс" лыкто но кошко, нош калык кыле. Калыклэн сюлмаськонъёсыз секыт ныпъетэн погыльско туала республикаослэн кивалтӥсьёссы вылэ но. Таӵе секыт вакытэ но удмурт калыклы дурбасьтыса ужало В. К. Тубылов, К. И. Куликов, П. Н. Вершинин. Мон сямен, удмурт интеллигенцилы соос котыре кариськоно. С. ВОРОНЦОВ. Алнаш район, Асан посёлок. Асьмелы юрттоз дэмен кенешон Автормылэн та гожтэтэз вуиз вал кылем арлэн пумаз, удмурт интеллигенцилы сӥзем научно-практической конференция азьын, кудзэ ортчытӥз "Удмурт кенеш". Статьяын пуктэм юанъёсты та ужрадын сэрттыны-пертчыны выризы учёнойёс но. Тани С. Воронцов статьяяз ӝожтӥське, малы, пе, куд-ог удмурт интеллигентъёс ас выжызэс вунэто. Но удмуртъёслэн гинэ озьы уг луы, шуиз конференциын философ А. Разин. Котькуд калык пӧлын озьы берытскыса кошке: адями вылӥе тубе ке, калыксэ вунэтэ. Юнме шорысь таӵе веран но кылдэмын ӧвӧл, дыр: "Вышел из народа и... не вернулся". Малы озьы луэ? Адями пушкын бугыръяськись мылкыдъёс пӧлын ворме национальной нигилизм, шуиз А. Разин. Пушкын пукись пумитъяськон мылкыд сэрен ик, вылды, визьмасткем удмуртъёс (ваньмыз сярысь озьы вераны уг ке но луы) пумен палэнско ас калыксылэсь. Туж паймымон лыдпусъёсын ужрадэ люкаськемъёсты тодматӥз Г. Шкляев, философия наукаосъя кандидат, ИжГТУ-ысь доцент. Удмурт интеллигентъёс пӧлысь 52 процентэз ас кылынызы лыдъяло ӟуч кылэз. Озьы ик тросэз пумит луо нылпиоссэс удмурт кыллы дышетыны, удмурт дӥськутэн но дэремъёсын ветлонлы, вузъёсы дышетскыны пырыку квота сётонлы. Соос ик уродэн уг лыдъяло музъемез нимаз кузёослы сётонэз, сое палэнысь лыктэмъёслы вузаны луонлыкез лыдэ басьтыса но. Та ужпумъёсты Г. Шкляев валэктыны выриз кӧня ке мугъёсын. Нырысь интые со пуктӥз вылӥ образование басьтэмез. Дышетскем удмуртъёс ас вылазы мургес шӧдӥзы азьвыл идеологилэсь зӥбетсэ, шуиз со, соин ик ӟучъёслэн малпанъёссы но культуразы соос пушкы мургес пыӵамын. Дышетскем удмуртъёс туж ляб пырисько общественной улонэ. Та ужпум пумысен но пӧртэм учёнойёс ас малпанъёссэс веразы. Удмуртъёс пӧлын ортчытэм юалляськон таӵе суредэз возьматэ: 8 процентэз гинэ удмуртъёс тодо вылэм асьсэлэсь азьветлӥсьёссэс (лидеръёссэс), нош удмурт огазеяськонъёслэн ужамзы сярысь кык куиньмос люкетэз гинэ тодэ. Жаляса верано, конференциын вераськисьёс, та лыдпусъёсты шараяку, номыр ӧз вералэ мукет калыкъёс сярысь. Мон сямен, мукет калыкъёслэн интеллигенцизы но асьме сярысь сокем ик уг висъяськы общественной улонэ пыриськеменыз но, ас кичӧлтӥсьёссэс тодэменыз но. Туж шонер йылпумъянъёс лэсьтэм вылэм та пумысен ӟуч тодосчи Н. Бердяев: "Огъя национальной идея борды огазеяськем интеллигентъёс сярысь одӥг учырез но вераны уз луы". Зэм, котькуд калыклэн интеллигенциез нимазъяськысагес улэ но, ужа но. Интеллигенция - со пумозяз валамтэ но дунъямтэ маке. Та кыл но вераськонамы ай ЪИЪ даурлэн 60-тӥ-70-тӥ аръёсаз гинэ пырем. Нырысьсэ та кылэз уже кутыны кутскем ӟуч тодосчи П. Бабарыкин. Интеллигенция мукет сӥослэсь визьмыныз висъяське. Визьмо адями мургес малпаське, соин ик улон шоры учконъёсыз но солэн мукетгес, паськытгес, эрикогес. Тодосчи И. Клестов конференциын Куӟебай Гердлэсь кылъёссэ тодаз вайытӥз: "Интеллигенцилы властен герӟаськыны уг яра". Соку ик тодам лыктӥзы кылем арын гужем радио пыр тодмо ӟуч драматурглэн В. Розовлэн верамъёсыз. Со но ӵапак К. Герд сямен ик шуиз. Интеллигенция, пе, нокыӵе властен но политикаен герӟаськытэк ужаны кулэ. Драматурглы кивалтон удыс ӵекто вылэм - нош со сыӵе ужлы пумит кариськем. Огъя верано ке, конференциын ӝутэм вераськонъёс лэчытэсь но, муресь но вал. Умой соиз но: удмурт интеллигенцилэн асьме обществоын интыез сярысь ас малпанъёссэс веразы пӧртэм калыкысь потэм учёнойёс но. Ми малпаськом, та ужпумъя вераськон газетамы азьланьтӥськоз на шуыса. Ӵош кенешон одно ик пайдаен берытскоз. Т. БАННИКОВА, газетлэн корреспондентэз. Котькуд кыкетӥез юрттэтлы кулэяське Калыклэсь улон-вылонзэ умоятон пумысен Россия Федерацияя но, Удмурт Республикая но пӧртэм ужрадъёс, законъёс кутӥсько. Озьы ке но, калыклэн улонэз уг умоя, пумен улӥе лэзиське. Туннэ нуналлы шаерамы котькуд кыкетӥез улӥсь юрттэтлы кулэяське. Удысазы кылдэм ужпумъёс сярысь валэктонъёс сётэ калыкез улон-вылонын утёнъя министр Николай БЕССОГОНОВ. - Николай Михайлович, калыкез улон-вылонын утёнъя министрлэн туннэ нуналлы кыӵеесь тужгес но сюлэмшугъяськытӥсь ужпумъёсыз? - Странаямы выльдӥськонъёс но воштӥськонъёс ортчемен валче, калыклэн улон-вылонэз пумен секытоме. Адями сярысь сюлмаськыса кутьэм законъёс но тросэз улонэ уг пыӵало - уг висъяськы тырмыт коньдон. 1999-тӥ ар понна бюджетысь висъям коньдонэз уката но шыръяса кутоно луоз. Соин валче юнгес эскерыны кулэ коньдонлэсь кытчы мынэмзэ, озьы ик сое пайдаё кутон ласянь сюлмаськоно. Удысмес шуг-секытысь поттон понна утчано выль сюресъёс но амалъёс. Туннэлы вань луонозэ лэсьтыны тыршоно тужгес но шуге-леке сюрем гражданъёслы законэн сётэм правооссэс но кулэяськонъёссэс быдэстон ласянь. Со понна юрттэт сётонэз радъяно нимаз-нимаз адямиосъя. Таяз арын та ужпум нырысетӥ интыын луыны кулэ. Россия Федерациын Пенсиосъя закон йылаз-пумаз вуттымтэен, трос юанъёс кылдо пенсиос тыронъя; радъяны кулэ нылпиослы пособие тыронэз; котькуд вазиськисьлы дырыз дыръя но янгышъёстэк пенсилэсь но пособилэсь быдӟалазэ тупатоно яке выльысь лыдъяно- чотано; йылпумъяно юрттэтлы кулэяськисьёсын ужанэз (банк данных) техника амалэ выжтонэз; паськытатоно калыклы улон-вылонын юрттэт сётӥсь учреждениосты но соослэсь ужзэс; азьланьтоно удысамы пырись учреждениосты выльдон-тупатъянэз, лэсьтӥськонэз. - Нош кыӵегес ужпумъёс тужгес но сюлэмшугъяськыто дорады вазиськисьёсты? - Сояз арын пӧртэм юанъёсын министерствое вазиськиз 12 сюрс мурт, нош калыкез улон-вылонын утёнъя мукет ёзъёсы - 400 сюрс мурт. Кӧня ке аръёс ӵоже ини юанъёс одӥгъёсыз ик кылё: пенсиосты ӝегатон, пенсиос тыронъя законодательствоын валамтэос, льготаосъя. Туж ӧжыт уждун басьтэмзы пумысен вазисько асьсэос но милям удысамы ужасьёс. Оглом вераса, вань юанъёс пӧлысь 60 процентэз пенсиосъя но пособиосъя, 32 процентэз - калыклы юрттэт сётонъя, льготаосъя. - Пенсиосъя ужпум нырысетӥ интыын сылэ бере, малпасько, лыдӟисьёсмылэн но со сярысь пыр-почгес тодэмзы потэ. - 1999-тӥ арын 1-тӥ январьлы пенсия басьтӥсьёс 388 сюрс мурт - республикаямы вань улӥсьёсты лыдэ басьтыса, со луэ 23,7 процентэз. 1998-тӥ арын гинэ пенсионеръёслэн лыдзы 26 сюрс пала йылӥз, 150 сюрс муртлэн пенсизы выльысь лыдъямын-чотамын. Россия Федерацилэн кун пенсиос сярысь законаз, кудӥз улонэ пыӵаз 1992-тӥ арын, 80- лэсь ятыр воштонъёс но ватсанъёс пыртэмын. 19 пол лэсьтэмын пенсиослы индексация, 6 пол воштӥськылӥз компенсацилэн быдӟалаез. Нош 1998-тӥ арын февраль толэзьысен Россия Федерация кутӥз кун пенсиосты выль сямен лыдъян но будэтон сярысь закон, соя лыдэ басьтӥське пенсионерлэн индивидуальной коэффициентэз. Выль законъя лыдъянъёс лэсьтэм бере, шаерысьтымы 30 процентэз пала арлыдо адямиос ятыргес пенсия басьтыны кутскизы. Шорлыдын вераса, пенсилэн быдӟалаез будӥз 16 процентлы, яке 59 манетлы. Вуж законъя пенсия басьтӥсьёслэн шоро-куспо пенсизы али толэзяз 374 манет усе, нош выль законъя басьтӥсьёслэн - 430 манет. Ӵошатон понна: 1995-тӥ арын толэзьлы 201 манет пенсия усе вал. Но, жаляса верано луэ, улон югдур секытоме, соин валче пенсионеръёслэн коньдон ласянь шугъяськонъёссы эшшо йыло. Вылаз ик, пенсия тыриське, кык толэзь пала ӝегаса. Пенсионеръёс со шуг-секытъёсты адӟоно луо, республикамылэн Пенсиосъя фондаз налогъёс вуымтэен. Ваньмыз со потэ Россиын но, республикаямы но экономикалэн куашкамез бордысь. Нош шаерысьтымы пенсионеръёслы гинэ толэзьлы быдэ 160 миллион манет кулэ. - Экономикамылэн чутэмез шӧдӥське нылпи пособиос вылын но. - 1998-тӥ арлэн нырысетӥ паларезлы нылпи пособиосъя пунэм тыронъёс люкаськемын 96 миллион 357 сюрс манет пала, нырысетӥ категорияя - 63 сюрс манет котыр. Пунэм тыронъёсты берыктон понна вузъёс висъямын но юрттэт сётэмын 30 сюрс манет пала. Тужгес но секыт югдуре шедем 26 семьялы коньдонэн юрттыны быгатӥм Центральной но Северной рынокъёс пыр. Соослы висъямын 19 сюрслэсь ятыр коньдон. Городъёсын но районъёсын нылпи пособиосты тыронъя югдур одӥг кадь ӧвӧл. Нырысетӥ паларлы нылпи пособие тыронзы туннэ нуналлы йылпумъяськиз ни Воткинск но Можга городъёсын, Як.-Бодья районын. Ёрос администрациосын кусып тупатыса, мукет ёросъёслы но чупресгес кариськоно. Министерствоысь пенсиосъя но пособиосъя отделын усьтэмын нылпи пособиосты ӝегатонъёсын ужась ёз. Озьы ик кылдытэмын пунэме кылем предприятиосын ужась комиссия. Соос но югдурез тупатыны юртто. Калыкез улон-вылонын утёнъя министерстволэн ужан удысэз паськыт. Отын ик шуге-леке сюремъёслы юрттэт сётон, пересьёслы но висисьёслы интернат юртъёсты ӝутон но возён, протезъя но ортопедияя предприятилэсь но медико-социальной экспертизалэсь (ВТЭК интые кылдытэмын) ужзэс радъян. Николай Михайлович валэктонъёс сётӥз таосыз удысъёс пумысен но. Соослэн ужъёсынызы газет лыдӟисьёсмес азьланяз пыр-поч тодматом. Л. МАЛЫХ. Удмурт Республикаысь Кун Кенешлэсь кызь ньылетӥ сессизэ люкан сярысь Удмурт Республикаысь Кун Кенешлэн Постановлениез Удмурт Республикаысь Кун Кенеш пуктэ: Удмурт Республикаысь Кун Кенешлэсь кызь ньылетӥ сессизэ люкано 1996 арын 9 феврале. Удмурт Республикаысь Кун Кенешлэн Тӧроез А. А. Волков. Ижевск город, 1999 арын 28 январе. �717-И. *** Сессиын чакламын эскерыны Удмурт Республикалэн Музъем кодексаз воштонъёс но ватсанъёс пыртон, иворъёсты вӧлмытонъя ёзъёсын кусып возёнъя эскерись кенеш кылдытон, Удмуртиын ву понна дун тырон сярысь ужпумъёсты но мукет юанъёсты. ИЖЫСЬ РАДИОЗАВОДЫН Ӟечлыкъя дуннелэн сертификатэз Акциосын ужась "Ижевский радиозавод" пыд йылаз пумен умойгес султэ. Берло дыре татысь коллектив трос лэсьтэ продукциезлэсь ӟечлыксэ ӝутон ласянь. Тыршемзы- сюлмаськемзы юнме уг луы. Алигес огазеяськонэ шумпотымон ивор вуиз. Предприятие ӟечлыкъя дуннелэн сертификатэныз пусъемын. Со тупа дуннеысь ИСО9000 стандартъёслы. Нош сотэк кунгож сьӧры вузкарыны уд поты. Нырысь ик продукцилэсь ӟечлыксэ учко, сертификатсэ юало. Россиысь предприятиослы дуннеысь дано но тодмо организацилэсь сертификатсэ басьтон туж бадӟым вормон луэ. Мар бен со предприятилы сётэ? Нырысь ик, сертификат луонлык сётэ продукцилы сыӵе дун тупатыны, кӧняен со быдэс дуннеын вузаське. Кыкетӥез, со туж бадӟым реклама луэ. Малы ке шуоно, предприятие шеде сертификатъёсын ужась предприятиослэн Реестразы. Куинетӥез, усто специалистъёслэн ӟечлыкен ужанэз чакламзы юрттэ предприятиын кивалтонэз умоятыны, продукцилэсь ӟечлыксэ ӝутыны но производствоын ыштонъёсты кулэстыны. Сертификат басьтонъя бадӟым но секыт уж йылпумъямын. Ортчытэмын уно эскеронъёс. Предприятие азьло басьтӥз Россиысь сертификат. Собере дуннеысь куронъёсъя ӟеч продукция поттыны быгатэмзэ возьматӥз. Туэ 28 январе предприятиын тунсыко но аспӧртэмлыко ужрад ортчиз. "Ижевский радиозавод" ОАО-лы ӟечлыкъя дуннелэсь сертификатсэ сётӥз "Бюро Веритас Кволити Интернэшнл" фирмалэн Россиысь ёзэзлэн валтӥсь директорез К.-О. Петтерсен. - Нырысетӥ ӟеч вамыш лэсьтэмын, - шуиз огазеяськонлэн валтӥсь директорез Игорь Валиахметов. - Та ужлы ми одӥг но ӝыны ар дасяським. Сертификат басьтэмен ум буйгатске. Азьланьын сюлмаськом продукцилэсь ӟечлыксэ уката умоятыны. Поттэм вузъёсмы рынокын ас интызэс мед шедьтозы. Ведь, куинь ар ортчыса, сертификатэз нош ик юнматоно луоз. Но таиз ужрад капчиенгес ортчоз ни. Басьтонэз секытэн мынэ. Огъя вераса, Ижысь радиозаводлы кык сертификат сётэмын: одӥгез американской, мукетыз - германской. Предприятие понна со шӧдскымон вамыш луэ. Азьланезлы оскон кылдэ. Г. РОМАНОВ. К итогам переоценок и проблемы учета основных средств. Настоящий материал и практические выводы по вопросам бухучета появились в ходе обследования оценщиками Единой системы "Экспертиза собственности" ТПП РФ более 30 000 объектов ОС (в рамках переоценки). Следует отметить, что ошибки и недостатки в учете ОС были выявлены практически на каждом из обследованных предприятий. Один из таких вариантов - это несоответствие шифров "Единых норм амортизационных отчислений на полное восстановление основных фондов". Следствием этого является искажение в учете, завышение или занижение начисляемого износа. К чему это ведет? 1. Занижение норм амортизационных отчислений приводит к завышению налога на имущество, занижению себестоимости продукции и, соответственно, увеличивается налог на прибыль. В данной ситуации предприятие наказывает себя самостоятельно. 2. При завышении норм амортизационных отчислений происходит неоправданное завышение себестоимости, и, следовательно, занижение базы по налогу прибыль. Одновременно с этим уменьшается база по налогу на имущество. Т. е. и по налогу на имущество, и по налогу на прибыль будут начислены штрафы. Выявленные ошибки, в одном случае могли бы повлечь значительные налоговые санкции со стороны ГНИ, в другом - нет, но в любом случае предприятия, где были обнаружены и исправлены указанные ошибки, оптимизировали законным способом свои налоговые платежи и себестоимость производимой продукции и оказываемых услуг. Генеральный директор ООО "Экспертиза собственности - Ижевск" Эксперт ТПП РФ К. В. Ашихмин. Коньдон, коньдон, кытын-о тон? Алнаш ёросысь выт бичасьёс тазэ арез секытэнгес мытӥзы. Кылсярысь, спирт поттӥсьёс 948 сюрс манетлы пунэме кылемын, ОАО "Тойма! - 1410 сюрс манетлы. Выт бичасьёс, ужбергатӥсьёсты эскерыса, 56 муртлы 10187 сюрс манетлы тыриськон ялӥзы. Сотэк нош кызьы - бюджетэ коньдон кулэ ук. А. СИБИН. Калмез батырлы - 75 Та нуналъёсы 75 арес тырме быдэс республикамылы ӟеч тодмо адямилы - Николай Фомич Соловьевлы. Уно аръёс ӵоже со кивалтӥз Селта ёросысь Ленин нимо колхозэн. Председательлэн ӟеч ужъёсыз пусъемын уно наградаосын. Со ужан вакытэ хозяйство юнмаз, зол азинскиз. Николай Фомич биньгозызэ та палан ик будэм етӥз воргоронлы Петр Ильич Базилевскихлы сётыса кельтӥз. Пенсие потыса но Соловьев буйгатсконэз уг тоды, пӧртэм удысъёсы пыриське, колхоз сюлмаськонъёслэсь но уг палэнскы. Ӟечкыласьком мӧйы эшмес юбилееныз. Шуд но тазалык, Николай Фомич! Петр Коробов, "Удмурт кенешлэн" Селта ёросысь ёзэзлэн тӧроез. Иже люкаськизы Кызьы тодмо, финн-угор калыкъёслэн конгрессы ньыль арлы огпол ортче. Вуоноез, куинетӥез, ӧтчам люкаськоз Финляндиын вуоно аре. Конгрессъёс вискын ужа нимысьтыз кылдытэм консультативной комитет. Солэн заседаниосыз финн-угор странаосысь но улосъёсысь пӧртэм городъёсын ортчыло. Вуоно пумиськонэз дасян вылысь, комитетлэн ыстэм муртъёсыз али Иже люкаськемын. Дорамы лыктэмын Венгриысь, Эстониысь, Финляндиысь, Россилэн финн-угор республикаыоссьтыз специалистъёс. Удмуртилэн нимыныз кенешонэ пырисько Светлана Смирнова, Нациосын ужанъя комитетлэн кивалтӥсез, но Валентин Тубылов, "Удмурт кенеш" огазеяськонлэн тӧроез. И. КРИЧЕВ. "Ижсталь" - азьлань! Куноын 2 пумиськонзэ вормыса, "Ижсталь" дораз но сётскыны ӧз малпа, юн сямзэ- мылкыдзэ возьматӥз. Санкт-Петербургысь "Спартаклы" асьме хоккеистъёсмы шудонлэн кутсконаз 0:2 лыдын келяло вал. Нюръяськонлэн ӧраз пырыса, "Ижстальысь" пиос пумен шудон биньгозыез киязы кырмизы. Нырысь лыдэз ӵошатӥзы,. Куноос выльысь азьпала пото. "Ижстальысь" Владимир Трошинлэн но Михаил Кузнецовлэн тыршеменызы, команда эшшо 2 гол пыртӥз на. 4:3 лыдын вормиз "Ижсталь". Таӵе лыдын ик йылпумъяськиз Завоолжьеысь "Моторен" нюръяськон. Нош ик кужмогес вал асьме спортсменъёс. М. КУЗЬМИН. Кезысь сырзаводлэн данэз паськыт вӧлмемын. Солэсь продукцизэ шумпотыса басьто шаерамы но, солэн палэназ но. Предприятиын сюлмо тыршись адямиоссы уно.Соос пӧлын тужгес но гажаса верало Татьяна Вениаминовна КОРЕПАНОВАЛЭСЬ но Ольга Семёновна КОНДРАТЬЕВАЛЭСЬ нимъёссэс. В. КАМАШЕВЛЭН туспуктэмез. Кун Кенешын Удмурт Республикаысь Кун Кенешлэн Президиумаз юнматэмын Кун Кенешлэн вуоно кык сессияз эскероно ужпумъёс. Депутатъёс сэрттозы-пертчозы 1999-тӥ арлы республикалэн бюджетэз сярысь, Удмурт Республикалэн Музъем кодексаз воштонъёс но ватсанъёс пыртон сярысь ужпумъёсты, республикалэсь социальной удыссэ но экономиказэ азинтон сярысь программаез. Кун Кенешлэн Президиумез соглаш кариськиз Правительстволэн "Балезино посёлокын спирт завод лэсьтонлы коньдон висъян сярысь" постановлениеныз. Удмуртиысь вузкаронъя но улон-вылонын юрттэт сётонъя министр Пётр Пономарёв дунъёсты радъян пумысен юанъёслы валэктӥз. Дунъёслэсь будэмзэс чаклан понна, сельхозпродукциез поттӥсьёс, солэсь сиён-юон поттӥсь предприятиос но вузкарись организациос огкылъёс куто. Но дунъёсты радъян понна та амал туж ик тупамон ӧвӧл, малы ке шуоно, кылем арын данакез вузкарись предприятиос изъян вайыса ужазы, пусйиз министр. Кун Кенешысь пресс-служба. ЛЭЧЫТ УЖПУМ Вуоз-а гуртэ выль техника? Рынокен экономикае выжемен валче, гурт хозяйствоос азе уката лэчытэсь ужпумъёс пуксизы. Соос пӧлысь одӥгез луэ удысэз выль техникаен узырмытон но вужзэ тупатъянэз радъян. Выльдӥськон аръёсы гуртын техника кабзэ вужмиз но кулэсмиз. Али 70 процент тракторъёслэн ужан дырзы быремын, нош комбайнъёс 75 процентэз вужмемын. 1991-тӥ арен ӵошатыса, гурт удысын тракторъёслэн лыдзы 28 процентлы синӥз, ю тысь но пудо сиён октӥсь комбайнъёслэн - 35 процентлы. Таӵе югдур кылдэмын, гуртын техникаез тупатъян кулэезъя радъямтэен. Мастерскойёсын техника ласянь куронъёсты уг быдэсъяло, миськон интыоссы но чаклан-эскерон стендъёссы ӧвӧл. Ёзъёсты воштон-бичан тӥрлыксы быремын яке уг ужало. Тӥни озьы техника дырызлэсь вазь ужамысь дугдэ, ӝоггес куашка. Нош ремонтно-технической предприятиослэн (РТП-ослэн) мастерскойёссы буш кыллё. Малы ке шуоно, воштос ёзъёссы ӧвӧл. Татын берло дыре озьы ик ляб мынэ вуж детальёсты выльдон. 1985-тӥ арен ӵошатыса, та уж 5 поллы синӥз но 7-8 процент гинэ луэ. Гуртысь ваньбур поттӥсьёс, коньдонзы ӧвӧлэн, кабзэ выль техника но воштос ёзъёс басьтыны уг быгато. Соин ик ремонтной предприятиос но агроснабъёс ужлы ёрмыса уло, юрттэт сётонзэс данаклы кулэстӥзы. Воксё быронтэм вылысь, соос мукет уж утчало. Тросэз агроснабъёс вузало ю тысь но калыклы кулэ луись мукет вузъёс. РТП-ос но МТС-ъёс берло дыре ю тысь но пудо сиён октонъя отрядъёс кылдытъязы. Соос хозяйствоослы бадӟым юрттэт сёто. Гуртысь ваньбур поттӥсьёслэсь техниказэс тупатъянэз умоятон вылысь, РТП-ослэн но Агроснабъёслэн директоръёссылэн советэз Удмурт Республикаысь Кун Кенеше но Правительствое таӵе куронъёсын вазиськиз: 1. Быдэсак мозмытоно яке 3 арлы бергес тыроно кун бюджетэ таӵе вытъёсты: - музъемлы; - ваньбурлы; - сюрес фондэ. 2. РТП-ослы но Агроснабъёслы тупатоно квота, гурт хозяйствоослы услугаос сётэмзы понна, фуражлы кӧня ю тысь басьтыны быгато. 3. Ремонтной предприятиослы сётоно кун заказ тракторъёслы но мукет сельхозмашинаослы воштос ёзъёс тупатъянъя. Та удысысь предприятиослэсь ужзэс умойгес радъян, кусыпъёссэс юнматон вылысь директоръёслэн советсы кылдытэмын. Тӧрое быръемын Глазовысь "Реммаш" огазеяськонлэн кивалтӥсез Николай Веретенников. Та советлэсь вазиськонзэ алигес эскериз Правительство. Со ивортэ: Аскивалтэт гуртысь техникаез выльдонлы бадӟым инты висъя. Кылсярысь, миым 21 декабре со шаерысьтымы предприятиосын сельхозтехника но воштос ёзъёс поттон сярысь 1176 номеро постановление кутӥз. Та решениез быдэстон вылысь, Гурт удысъя но сиён-юонъя министерство конкурс ортчытыны комиссия но ужась группа кылдытӥз. Условиосыз газетъёсын печатламын. Правительство али выль постановление дася. Со сӥземын гуртысь ваньбур поттӥсьёслэсь техниказэс тупатъянлы. Отын ремонтной предприятиослы выт тыронъя льготаос учкисько. Вуоз-а бен гуртэ выль техника? Оскон вань, но трос ӧвӧл. Али кылем техникаез ӟечгес ужатон но выльдон сярысь малпаськоно. Со туж лэчыт ужпум. Сое син азяз возьыны кулэ Кун Кенеш но, Правительство но. Г. Романов. Выль кужым Озьы нимаськись организация вордске та нуналъёсы Ижын. Сое кылдытонъя комитетэн кивалтэ Кун Кенешлэн но Иж городысь Думалэн депутатсы, "УНГС-Город" предприятилэн валтӥсь директорез Сергей Чикуров. Та нуналъёсы со пумиськиз журналистъёсын. Малы кулэ луиз "Выль кужым"? Асьме республикаын югдур лэчыт. Экономика уг улӟы. Политикаысь кужымъёс куспазы вожвылъясько. Адямиос ӟечезлы оскемысь дугдо. Югдурез тупатыны быгатозы выль адямиос.Соос оско: вуоноезлы Кун Кенешлы бырйисьёс юнгес дурбасьтозы. Воштыны кулэ властьёслэсь кусыпъёссэс. Кун Кенеш мед кылдытъялоз законъёс. Отчы быръёно 30-40 депутат (али 100). Быдэсъясь (исполнительной) властьлэн кивалтӥсез мед луоз республикалэн йырыз. Мукет сямен ужано бюджетэн. Отын чаклано уждун но пособиос тыронэз, улон инты но мукетыз понна дотациос висъянэз. Льготаос медло пенсионеръёслы, сӧсыръёслы но трос нылпиен семьяослы гинэ. Выль сямен радъяны кулэ Москваен но интыысь аскивалтонэн кусыпъёсты. Огез но ёрос ассэ ултӥямен медаз лыдъя. Сергей Витальевич шуэ: - "Выль кужым" огазеялоз уно сӥосты. Отчы пырозы пӧртэм калыкъёс, дышетӥсьёс, ужбергатӥсьёс (предпринимательёс). Сергей Чикуровен ӵош пумиськонэ ветлӥзы Россиысь Кун Думалэн депутатэз Андрей Солуянов но Кун Кенешлэн депутатэз, тодмо ужбергатӥсь Виктор Хорошавцев. Таосыз "Выль кужыме" ӧз пыре на, но солы мылысь-кыдысь дурбасьтэмзэс веразы. Люкаськемъёслы газетчиос сётӥзы пӧртэм юанъёс. - Организация нимаське "Новая сила". Вӧзаз удмурт ним ут утчаське-а? - Тазэ ӧм малпалэ на. Кызьы луоз удмурт сямен? "Выль кужым"? Ӟеч ӵектон. - Россиысь кыӵе кужымлы тӥ матынгес? - Али данак движениослэн программаоссы валантэмесь. Коммунистъёслэн но, "Отечестволэн" но соос огкадесьгес. Ми матынгес Евгений Примаковлы, таизлэн аслаз партиез ӧвӧл ке но. - Шуом, Чикуровез Кун Кенеше уз быръе. Ма луоз "Выль кужымен"? - Мон ке ӧй сюры, дурбасьтӥсь музон адямиос шедёзы Кун Кенеше. Соос ик улонэ пыӵатозы милесьтым пусъем ужъёсмес. А. ШКЛЯЕВ. ИНКУАЗЬ ГЕРДЪЁС Гондыр кутон гур Кильмезь ёросэ улыны выжытозям, мон гондыр сярысь книгаосысь, телеэкранысь гинэ тодӥсько вал. Сыӵе батыр, кужмо пӧйшурез куке но ас синъёсыным адӟо шуыса, ноку но ой малпалля. Уго Татарстанысь Вуж Турья гурт вӧзысьтымы пашпуо тэле кионъёс гинэ но шер кожаллязы. Ог ньыль ар талэсь азьло, вазь ӵукна ик пиеным куштэм гурт бервылтӥ вамышъяськом. Уин зорыса ортчиз вал. Турын-куакъёс сучыр-сучыр котмемын, сюрес вылэ ке потӥськод, пыдъёс гылӟо. Гурезь улысь тымет дуре васькыкумы, гондырез шӧдтэк шорысь адӟи. Пиелэн кӧтурдэсаз мырӟыса, лушкемен шыпыртӥсько: "Азьпалдэ учкы. Гондыр!" "Кытын?"- юа со, синъёссэ питыртыса. Нош бадӟым, сьӧдмыт пӧйшур оло куараез кылӥз, оло адӟиз, куать-сизьым метыръем сюрес вамен кык пол гинэ тэтчиз но куакъёс пӧлы ышиз. Шонергес луоз, дыр, адями зынэз шӧдӥз шуыны. Книгаосын гожъямъя, гондыр ас синъёсызлы но пельёсызлы сокем уг оскы. Нош адями зынэз, тӧл со пала пельтыку, иськемысен, пе, шодэ ни. Ми азьпала вамыштыны курдаса огшап сылӥмы на. Ӵапак гондырлэн ватскем сюресаз кельтэмын вал велосипедъёсмы. Кӧбераса сылэммы бере азьпала вамыштыны дӥсьтӥм ик. Пие гондырез адӟыса ӧз вутты, верамелы но уг оскы. Дэриё сюрес вылысь кут быдӟаесь гижы бервылъёссэ адӟемез бере, йырсиосыз ик пежырскизы. Уг ваты: бадӟым пӧйшурез таӵе матысен адӟыса, нырысь-валысь ачим но юн курдай. 0тчы-тагчы утчалляськисько. Кытчы ватсконо? Уиськиз ке кызьы пегӟоно? Тодӥсько, писпуэ тубыса, гондырлэсь уд пегӟы. Уго та сьӧсь сярысь гожьяло: сюсьтыл кадь веськрес писпуэ но туж ӝог тубе. Малпанэ одӥг вал: бызёно! Нош берлогес тодӥ: ӝоглык ласянь, пе, гондырен котькудӥз пуны но ӵошатскыны уз быгаты. Алигес "Вятский край" газет таӵе учыр сярысь ивортӥз. Сюрес вылтӥ ширтӥсь "Жигули" машиналэн азьпалтӥз гондыр кык пиосыныз ортчем. Шофёр шудыса вылем сигнал сётэм. Кутскиз ук, пе, гондыр машинаез уйыны! Кышкатскем, луоз, шофёр но. Нош пӧйшур, машинаез сутыса, багажник бордаз гижы бервылъёссэ ик кельтыны вутскем. Озьыен, та изьверлэсь нокызьы мозмытскыны луонлык ӧвӧл? 0ло зэм, оло ӧвӧл, пӧйшуруасьёс одӥг дэмлан ӵекто ик. Ӝогак ӝутсконо, пе, улваё писпуэ. Нырысетӥ улвае ошыса кельтоно вылдӥсьтэ но аслыд вылӥегес тубоно. Гондыр дӥськутэз кесяса буйтатске но, ас сюрестӥз кошке, шуо? Нош асьме вашкала песятайёсмы тазьы дэмлалозы вылэм."Гондырен пумиськид ке, солы тазьы шуоно: "Тынад, пересь дядяй, сюресэд нимаз, мынам нимаз. Мын ас сюресэтӥд, монэ эн иса". Гондыр уз иса, аслаз сюрестӥз кошкоз. Гондыръёс асьме палан каллен кулэсмо. Нош Германиын берпуметӥ гондырзэс ыбизы ни сю ар талэсь азьло, Англиын та пӧйшурез выжытэм быдтӥзы Ъ дауре ик. Зэм, "пересь дядяез" нюлэскысен шер пумиталод. Нош пытьыоссэ, кыедаса кельтэм интыоссэ ӵемысь пумитаны быгатод. Адямиос вылэ, пе, урдскыло сӧсыр гондыръёс гинэ. Соин ӵош ик кышкытэсь луо нылпиосыныз ӵошен юмшась анай гондыръёс, толалтэ калгисьёсыз. Та бадӟым пӧйшуръёс тодмо луо ӟеч уясь, чорыгась луэменызы но. Ма, соос кӧттыр сярысь трос сюлмаськоно луо ук. Толалтэлы тырмыт кӧй дасяно. Учёнойёс эскеремъя, бадӟым гондыр мугораз 130 кило кӧй люка. Пӧйшур яратэ будос выжыосты, пӧртэм емышъёсты, губиез, ӵем вуылэ сезьы бусыосы. Мултэс уг кары чечыез но, вуылэ муш бакчаосы. Куддыръя, сиёнлы ёрмыкуз, изъянтэ гурт пудоез но. Гондыр, гопе небыт валес дасяса, толалтэлы умме усе. Нош солэн уммез туж сак. Котькуд кужмо куаралэсь сайка. Толалтэ ик вордско пӧзьы быдӟаесь нылпиосыз. Ӵемысь 2-3 кузя. Нош биологъёс гожъямъя, куатез но вордскылэ. Гондыр анай ас нылпиосыныз юн кусып возе. Мукет гужемаз но сьӧраз ветлытэ ай муспотонъёссэ. Та пӧйшур сярысь трос гожъяны луысал, дыр. Йылпумъяса огзэ гинэ пусъё на. Пӧйшурасьёс, биологъёс огкылысь шуо: "Гондыр визьмо, ужез гажась, кышкасьтэм но сьӧсь изьвер". Та сярысь вунэтыны уг яра. Ма, гондыр кутон гурез нёжъяны но котькуд пӧйшурасьлы шуд уг усьы. Нош сое, пе, тазьы кырӟалозы вылэм: Сьӧд ошмес шур сьӧры Потӥ но, ялан, дыр, Утчась ай пуные. Ланг-ланг ай кариз но, Отчы ай, уроме, Гондырез зӥбылӥ... НИКОЛАЙ ТУРИН. УдмуртРеспубликаысь Кун Кенеше депутатъёсты быръёнъёсъя округъёслэн гожъёссы. Газетмес лыдӟисьёс данакез гуртъёсын уло бере, Ижевскысь быръёнъёсъя округъёсты печатлатэк кельтӥськом. Сётӥськом республикалэн ёросъёсысьтыз быръёнъёсъя округъёслэсь гожъёссэс гинэ. Алнаш ёрос Алнаш ёросысь 66 номеро быръёнъёсъя округ (центрез - Алнаш черкогурт, ёрос администрацилэн юртэз, бырйисьёслэн лыдзы - 12.132) Округе пыро: Алнаш ёросысь Азамат, Алнаш, Варзи-Ятчи, Кузёбай, Писэйгурт, Блатгурт, Техникум, Туймыл сельсоветысь гуртъёс7 Балезино ёрос Балезино посёлокысь 67 номеро быръёнъёсъя округ (центрез - Балезино посёлок, ёрос администрацилэн юртэз, бырйисьёслэн лыдзы - 12.211) Округе пыре Балезино посёлок татысь администрациен кивалтоно улосэн ӵош. Балезиноысь 68 номеро быръёнъёсъя гурт округ (центрез - Карсовайысь гурт администрацилэн юртэз, бырйисьёслэн лыдзы - 12.290 Округе пыро: Балезино ёросысь Бадӟым Варыж, Верх.-Люкино, Воегурт, Каменное Заделье, Карсовай, Кестым, Киршонки, Кожиль, Люк, Пыбьино, Сергино, Турецкое, Маркогурт сельсоветысь гуртъёс. Вавож ёрос Вавож ёросысь 69 номеро быръёнъёсъя округ (центрез - Вавож черкогурт, ёрос администрацилэн юртэз, бырйисьёслэн лыдзы - 12.160) Округе пыро Вавож ёросысь вань гуртъёс. Воткинск ёрос Воткинск ёросысь 70 номеро быръёнъёсъя округ (центрез - Воткинск город, ёрос администрацилэн юртэз, бырйисьёслэн лыдзы - 12.569) Округе пыро Воткинск ёросысь вань гуртъёс, Первомайский посёлок, Черепаново гурт, Камское черкогурт, Гавриловка, Беркуты, Кукуи гуртъёс сяна. Глазов ёрос Глазов ёросысь 71 номеро быръёнъёсъя округ (центрез - Глазов город, ёрос администрацилэн юртэз, бырйисьёслэн лыдзы - 12.065) Округе пыро: Глазов ёросысь Адам, Верхняя Богатырка, Гылёгурт, Дондыгурт, Пӧжы, Качкашур, Кочишево, Курегово, Люм, Октябрьский, Чебершур, Понино, Ураково, Чура сельсоветъёсысь гуртъёс. Грах ёрос Грах ёросысь 72 номеро быръёнъёсъя округ (центрез - Грахово черкогурт, ёрос администрацилэн юртэз, бырйисьёслэн лыдзы - 12.613) Округе пыро: Грах ёросысь вань гуртъёс но Кизнер ёросысь Балдейка, Бемыж, Васильево, Бызара, Крымская Слудка, Лака-Тыжма, Саркуз сельсоветъёсысь гуртъёс. Дэбес ёрос Дэбес ёросысь 73 номеро быръёнъёсъя округ (центрез - Дэбес черкогурт, ёрос администрацилэн юртэз, бырйисьёслэн лыдзы - 12.379) Округе пыро: Дэбес ёросысь вань гуртъёс но Шаркан ёросысь Корчумвай, Кыква, Суронгурт,Сюрсовай сельсоветысь гуртъёс. Завьялово ёрос Завьялово ёросысь 74 номеро быръёнъёсъя округ (центрез - Завьялово черкогурт, ёрос администрацилэн юртэз, бырйисьёслэн лыдзы - 11.729) Округе пыро: Завьял ёросысь Завьял, Изгурт, Октябрьский, Юськи сельсоветъёсысь гуртъёс. Камской 75 номеро быръёнъёсъя округ (центрез - Первомай ёросысь гурт администрацилэн юртэз, бырйисьёслэн лыдзы - 10.930) Округе пыро: Завьял ёросысь Гольяны, Италмас, Новая Казмаска, Первомай, Хохряки, Ягул, Якшур сельсоветъёсысь гуртъёс. Лесной 76 номеро быръёнъёсъя округ (центрез - Вараксиноысь гурт администрацилэн юртэз, бырйисьёслэн лыдзы - 11.700) Округе пыро: Завьял ёросысь Вараксино, Люк, Пироггурт, Подшивалово, Ӵӧжгурт, Шаберды сельсоветъёсысь гуртъёс. Игра ёрос Игра посёлокысь нырысетӥез 77 номеро быръёнъёсъя округ (центрез - Игра посёлок, ёрос администрацилэн юртэз, бырйисьёслэн лыдзы - 11.091) Округе пыро: Играысь Лозо шурлэн бур ярдураз интыяськем микрорайонъёс но ульчаос (ГУДП-лэн улон коркаосыз сяна); Факел посёлок татысь администрациен кивалтоно улосэн ӵош, Нагорный посёлок. Игра посёлокысь кыкетӥез 78 номеро быръёнъёсъя округ (центрез - Игра посёлокысь администрацилэн юртэз, бырйисьёслэн лыдзы - 12.476) Округе пыро: Играысь Лозо шурлэн паллян ярдураз интыяськем ульчаос; Пионерский посёлок, Игра ёросысь Выль Ӟатча, Комсомольский сельсоветъёсысь гуртъёс; Як.-Бодья ёросысь Варавай, Старые Зятцы сельсоветъёсысь гуртъёс. Зураысь 79 номеро быръёнъёсъя округ (центрез - Зураысь гурт администрацилэн юртэз, бырйисьёслэн лыдзы - 10.925) Округе пыро: ГУДП-лэн улон юртъёсыз; Игра ёросысь Зура, Игра, Кабачигурт, Ключевской, Кушья, Лоза, Мужбер, Сеп, Сепож, Чутырь сельсоветъёсысь гуртъёс; Як.- Бодья ёросысь Лынга сельсоветысь гуртъёс. Камбарка ёрос Камбарка ёросысь 80 номеро быръёнъёсъя округ (центрез - Камбарка город, ёросысь администрацилэн юртэз, бырйисьёслэн лыдзы - 11.303) Округе пыро: Камбарка город, Камский посёлок, Камбарка ёросысь Михайловка сельсоветысь гуртъёс. Каракулино ёрос Каракулино ёросысь 81 номеро быръёнъёсъя округ (центрез - Каракулино черкогурт, ёрос администрацилэн юртэз, бырйисьёслэн лыдзы - 10.732) Округе пыро: Каракулино ёросысь вань гуртъёс но Сарапул ёросысь Мостовое черкогурт. Кез ёрос Кезыс 82 номеро быръёнъёсъя округ (центрез - Кез посёлок ёрос администрацилэн юртэз, бырйисьёслэн лыдзы - 10.533) Округе пыро: Кез посёлок, татысь администрациен кивалтоно улосэн ӵош, Кез ёросысь Кез, Стеньгурт, Сыга, Пажман, Полом, Пужмезь сельсоветъёсысь гуртъёс. Кулигаысь 83 номеро быръёнъёсъя округ (центрез - ёрос администрацилэн юртэз, бырйисьёслэн лыдзы - 11.046) Округе пыро: Кез ёросысь Абросята, Бадӟым Олып, Гыя, Кабалуд, Кулига, Кузьма, Мысы, Новый Унтем, Степаненки, Тортым, Удмурт Зязьгор, Чепца, Юски сельсоветъёсысь гуртъёс но Балезино ёросысь Андрейшур, Исаково сельсоветъёсысь гуртъёс. Кизнер ёрос Кизнер ёросысь 84 номеро быръёнъёсъя округ (центрез - Кизнер посёлок, ёрос администрацилэн юртэз, бырйисьёслэн лыдзы - 12.391) Округе пыро: Кизнер посёлок, Кизнер ёросысь Безменшур, Гыбдан, Кизнер, Короленко, Муркозь-Омга, Старая Бодья, Старые Копки, Ягул сельсоветъёсысь гуртъёс. Кияса ёрос Кияса ёросысь 85 номеро быръёнъёсъя округ (центрез - Киясово черкогурт, ёрос администрацилэн юртэз, бырйисьёслэн лыдзы - 10.859) Округе пыро: Кияса ёросысь вань гуртъёс но Пичи Пурга ёросысь Аксакшур но Кечёво сельсоветъёсысь гуртъёс. Красногорск ёрос Красногорск ёросысь 86 номеро быръёнъёсъя округ (центрез - Красногорское черкогурт, ёрос администрацилэн юртэз, бырйисьёслэн лыдзы - 10.665) Округе пыро: Красногорск ёросысь вань гуртъёс но Балезино ёросысь Юнда сельсоветысь гуртъёс. Пичи Пурга ёрос Яган-Докъяысь 87 номеро быръёнъёсъя округ (центрез - Бураново сельсоветлэн администрациезлэн юртэз, бырйисьёслэн лыдзы - 11.027) Округе пыро: Пичи Пурга черкогурт - Октябрьская но Пушкина урамъёсысен уй пал люкетэз, Пионерская, Кирова, Верхняя, Вишнёвая, Союзная, Сиреневая, Молодежная, Тюрагай, Инвожо, Италмас, Зангари, Ошмес, Мира, Школьная, Дружбы, Новая, Победы, Лесная, Залесная, Труда, Трактовая, Угловая, Закира Султанова, Будёного ульчаосты, Будёного пролкаез, Садовая, Коммунальная, Первомайская, Свободы, Северная, Юбилейная, Восточная, Строителей, Удмуртская, Ворошилова, Советская ульчаосты, 57- 117 номеро но 52-114 номеро юртъёсты пыртыса; Курчум-Норья гурт; Абдульменево гурт; Столярово гурт; Курчумский посёлок; Пичи Пурга ёросысь Бураново, Постол, Пугачёво, Яган сельсоветъёсысь гуртъёс но Завьял ёросысь Ожмос сельсоветысь гуртъёс. Уромысь 88 номеро быръёнъёсъя округ (центрез - Уромысь гурт администрацилэн юртэз, бырйисьёслэн лыдзы - 10.749) Округе пыро: Пичи Пурга черкогурт - лымшор люкетэз, Октябрьская, Пушкина, Кабельная, Майская, Родниковая, Белокаменная, Сосновая, Набережная, Новонабережная, Западная, Гагарина, Лунина, Колхозная, Полевая урамъёсты, Кирзаводэз, Южная урамез, Южный пролкаез, Ленина, Азина, Береговая, Советская урамъёсты, 1-53 юртъёсты, 2-40 юртъёсты пыртыса; 4-тӥ километрысь юртъёс; Пичи Пурга ёросысь Баграш-Бигра, Бобья- Уча, Иваново-Самарское, Уча, Улын-Юри, Норья, Вуж Монья, Уром сельсоветъёсысь гуртъёс. Можга ёрос Бадӟым Учаысь 89 номеро быръёнъёсъя округ (центрез - Бадӟым Учаысь гурт администрацилэн юртэз, бырйисьёслэн лыдзы - 10.938) Округе пыро: Можга ёросысь Бадӟым Пудга, Бадӟым Сибы, Бадӟым Уча, Люга, Тылойыл, Можга, Ненек, Ныша, Пазял, Сюгаил, Черёмушки сельсоветъёсысь гуртъёс. Пычасысь 90 номеро быръёнъёсъя округ (центрез - Пычас посёлокысь администрацилэн юртэз, бырйисьёслэн лыдзы - 11.387) Округе пыро: Пычас посёлок татысь администрациен кивалтоно улосэн ӵош, Можга ёросысь Александрово, Бадӟым Кибъя, Вылын Юри, Кватчи, Удмурт Пычас, Пычас, Вуж Какся сельсоветъёсысь гуртъёс но Алнаш ёросысь Улын Асангурт, Байтэрек, Вуж Утчан сельсоветъёсысь гуртъёс. Сарапул ёрос Сарапул ёросысь 91 номеро быръёнъёсъя округ (центрез - Сигаево черкогурт, ёрос администрацилэн юртэз, бырйисьёслэн лыдзы - 10.532) Округе пыро: Сарапул ёросысь Кигбаево, Мазунино, Оленье Болото, Сигаево, Соколовка, Тарасово, Усть-Сарапулка, Шадрино, Шевырьялово, Юрино сельсоветъёсысь гуртъёс, Мостовое сельсоветысь Заборье, Старая Бисарка гуртъёс. Прикамской 92 номеро быръёнъёсъя округ (центрез - Северный гуртысь администрацилэн юртэз, бырйисьёслэн лыдзы - 10.818) Округе пыро: Сарапул ёросысь Девятово, Дулесово, Нечкино, Северный, Уральский сельсоветъёсысь гуртъёс но Камбарка ёросысь Кама посёлок, Шолья посёлок, Армязь, Ершовка сельсоветъёсысь гуртъёс. Селта ёрос Селта ёросысь 93 номеро быръёнъёсъя округ (центрез - Селта черкогурт, ёрос администрацилэн юртэз, бырйисьёслэн лыдзы - 12.147) Округе пыро: Селта ёросысь вань гуртъёс но Ува ёросысь Выль Мултан, Поршур-Тукля, Удугучин сельсоветъёсысь гуртъёс. Сюмси ёрос Сюмси ёросысь 94 номеро быръёнъёсъя округ (центр - Сюмси черкогурт, ёрос администрацилэн юртэз, бырйисьёслэн лыдзы - 11.916) Округе пыро Сюмси ёросысь вань гуртъёс. Ува ёрос Увалэн уй палысьтыз 95 номеро быръёнъёсъя округ (центрез - Ува посёлок, ёрос администрацилэн юртэз, бырйисьёслэн лыдзы - 11.898) Округе пыро: Ува посёлок - северо-западной люкетэз чугун сюресозь, Первомайской микрорайон, Павлова ульча, Фрунзе ульча Пионерский пролкаысен пумозяз, Парковая ульча кутсконысеныз Лесной пролкаозь; Подмой посёлок; Ува ёросысь Каркалай, Кыйлуд, Мушковай, Областная, Сям-Можга, Ува-Тукля, Узей-Тукля, Чекан сельсоветъёсысь гуртъёс. Увалэн лымшор палысьтыз 96 номеро быръёнъёсъя округ (центрез - Ува посёлокысь администрацилэн юртэз, бырйисьёслэн лыдзы - 11.965) Округе пыро: Ува посёлок - Увалэн уй палысьтыз 95 номеро быръёнъёсъя округе пырисьтэм люкетэз; Ува ёросысь Булай, Жужгес, Красное, Кулябино, Нылга, Петропавлово, Чистостем сельсоветъёсысь гуртъёс. Шаркан ёрос Шаркан ёросысь 97 номеро быръёнъёсъя округ (центрез - Шаркан черкогурт, ёрос администрацилэн юртэз, бырйисьёслэн лыдзы - 12.353) Округе пыро: Шаркан ёросысь Бородули, Быги, Зюзино, Карсашур, Ляльшур, Мишкино, Улын Кивар, Петуньки, Пороз, Сосновка, Шаркан сельсоветъёсысь гуртъёс. Юкаменск ёрос Юкаменск ёросысь 98 номеро быръёнъёсъя округ (центрез - Юкаменск черкогурт, ёрос администрацилэн юртэз, бырйисьёслэн лыдзы - 11.097) Округе пыро: Юкаменск ёросысь вань гуртъёс, Яр ёросысь Вортца сельсоветысь гуртъёс но Биграгурт сельсоветысь Байдагурт, Дзякино гурт, Биграгурт посёлок, Мосейгурт, 1128, 1129, 1130, 1135 километрысь юртъёс. Якшур-Бодья ёрос Якшур-Бодья ёросысь 99 номеро быръёнъёсъя округ (центрез - Якшур-Бодья черкогурт, ёрос администрацилэн юртэз, бырйисьёслэн лыдзы - 11.978) Округе пыро, Якшур-Бодья ёросысь вань гуртъёс, Варавай, Лынга, Старые Зятцы сельсоветъёсысь гуртъёс сяна. Яр ёрос Яр ёросысь 100 номеро быръёнъёсъя округ (центрез - Яр посёлок, ёрос администрацилэн юртэз, бырйисьёслэн лыдзы - 11.632) Округе пыро: Яр посёлок но Пудем посёлок татысь администрациосын кивалтоно улосъёсын ӵош, Яр ёросысь Бадӟымгурт, Елово, Зюино, Казакгурт, Никольское, Укан, Юр сельсоветъёсысь гуртъёс, Биграгурт сельсоветысь Бармашур гурт, Кычагурт, Яр гурт, 1124 километрысь коркаос. Ужа вылэм - уж ӧвӧл Дас ар талэсь азьло Америкаысь ужтэк кылемъёс сярысь вераськылыкузы, киынымы шонтӥськом вал: "Соос асьмелэсь кыдёкын". Кыдёкын вылымтэ. Уродэз чаль вуэ уго. Югдур арысь аре уродме. Кызьы вераз 28-тӥ январе ортчытэм пресс-конференциын Удмурт Республикаысь Калыкез уже интыянъя федеральной кун службалэн департаментэзлэн кивалтӥсез Юрий Михайлович Брусянский. 1998-тӥ арын 50065 ужтэк кылем мурт уже интыянъя службаосын пусйиськемын. Со валля арынлэсь кык поллы тросгес. Ӵошатон понна: бускель Пермь но Челябинск улосвылъёсын ужтэк кылемъёслэн лыдзы вить поллы ичи. Огвакыт кивалтӥсьёс шуизы вал: ужтэк кылемъёслы пособие тыронэз юри ӝегатоно, соку, оло, шаплыгес уж утчалозы. Серем потыса кылзӥ соку: неужто кивалтӥсьёс 86 манет сётӥськись пособиез кӧттырымонэн лыдъяло? Табере юри гинэ ӧвӧл, сётэмзы потыса но коньдон шедьтыны уг быгато. Ужтэк кылемъёс 20 толэзь ӵоже ини пособие уг басьто, но биржаосы вазиськисьёслэн лыдзы уг кулэсмы. Тужгес секыт югдур Красногорск, Кизнер, Камбарка, Селта ёросъёсын. Валамон, уже интыянъя службаос ваньмызлы уж ӵектыны уг быгато, но тыршо кыӵе ке но юрттэт сётыны: выль ужлы дышетскыны, квалификацизэс будэтыны ысъяло, асьсэлы выль уж усьтыны дэмлало. Со ласянь юрттэ Правительство. Кылем арын уже интыянъя службаос 8 сюрс муртэ дышетӥзы. Пӧлысьтызы 90 процентэз уже интыяськыны быгатӥзы. 1,5 сюрс мурт асьсэлэсь ужзэс усьтӥзы. Соослы нырысь предпринимательствоя тодон-валанъёс сётэмын, субсидиос висъямын но дун курытэк вузкарыны лэзем сярысь свидетельствоос сётъямын вал. Туж шуг уже интыяны ӧлексы муртъёсты, арлыдоосты, школаез яке училищеосты йылпумъям егитъёсты. Уж ӵектӥсь (работодатель) чурыт куронъёс пуктэ: дышетскемез но, ужаны быгатонлыкез (опытэз) но, тазалыкез но юн медло. Кылсярысь, бухгалтер мед быгатоз юристлэсь но, экономистлэсь но ужзэ быдэсъяны, штукатур - малярлэсь но, облицовщиклэсь но. Правительствоен кутэм "Ужан интылы квотаос сётон сярысь" постановление кутэмын. Соя ужтэк кылем муртъёслы ужан инты сётӥсь организацилэсь яке предприятилэсь выт ичигес басьтӥське. Вераны кулэ созэ но: ужтэк кылем мурт туж бырйиське, бадӟым уждунэн инты утча. Ужаны мыныны аналско анай-атайтэк кылем нылпиос. Мугез валамон - толэзяз 850 манет сётӥськись пособиез пичи уждунэн уд вошты. Ӵекто ик-а али кыӵе ке уж предприятиос? Бен. Котьку кулэясько вылӥ квалификациен лэсьтӥськисьёслы, юристъёслы, мукет вылӥ образованиен муртъёслы. Кызьы шуо: визь ке вань, нянь но сюроз. З. РЯБИНИНА. Удмурт Элькун улосвылын сиён-юонлы мынӥсьтэм сырьёлэсь поттэм этил спиртэз басьтон-вузан рад сярысь Удмурт Элькунысь Правительстволэн Постановлениез 1999 ар 22 январь Ижевск город � 78 Россия Федерацилэсь 1996 арын 8 феврале кутэ "Этил спиртэз басьтон-вузан радэз юнматон сярысь" 129 номеро постановленизэ быдэсъян вылысь, Удмурт Элькун Кивалтэт пуктэ: Юнматоно Удмурт Элькун улосвылын сиён-юонлы мынӥсьтэм сырьёлэсь поттэм этил спиртэз басьтон-вузан радэз уже кутон сярысь положениез. Удмурт Элькун Кивалтэтлэн Тӧроез П. Н. Вершинин. Та положениея: - сиён-юонлы мынӥсьтэм сырьёлэсь поттэм этил спиртэз басьтон-вузан быдэсъяське юридической лицоослэн куронъёссыя (заявка), кулэ луись расчётъёсты лыдэ басьтыса; - Удмурт Элькунысь Экономикая министерство дася сиён-юонлы мынӥсьтэм сырьёлэсь поттэм этил спиртэз басьтон-вузанлэсь элькунъя огъя быдӟалазэ (объём) но сое келя Россия Федерациысь Экономикая министерствое; - Удмурт Элькунысь министерствоос но ведомствоос этил спирт басьтон-вузан квоталэсь быдӟалазэ юнматэм бере дас нунал куспын ысто Удмурт Элькунысь Налогъёсъя кун инспекцие но Экономикая министерствое перечень, кинъёслы висъямын этил спирт басьтон-вузан квота; - квотаосты тупатъяны-вошъяны быгато Удмурт Элькунысь министерствоос но ведомствоос, квоталэсь огъя быдӟалазэ лыдэ басьтыса. Но сое будэтыны луэ, налогъя но мукет тыронъёсъя пунэмъёс ӧвӧл ке; - тупатъян-воштонъёс сярысь ивортон куинь нунал куспын ыстӥське Удмурт Элькунысь Кун инспекцие но Экономикая министерствое. Удмурт Элькунын 1999 арын Быдэс дуннеысь арлыдо адямиослэн арзылы сӥзем ужрадъёсты ортчытон сярысь Удмурт Элькунысь Правительстволэн Постановлениез 1999 ар 22 январь Ижевск город � 77 Россия Федерациысь Президентлэн 1998 арын 2 декабре юнматэм "Россия Федерациын Быдэс дуннеысь арлыдо адямиослэсь арзэс ортчытон сярысь" 1455 номеро Указэз вылэ пыкиськыса, озьы ик интыын аскивалтонъя но кун властьлэн ёзъёссылэсь, городъёсысь но ёросъёсысь администрациослэсь, пӧртэм асваньбурен предприятиослэсь но общественной формированиослэсь та ласянь ужзэс радъян вылысь, Удмурт Элькун Кивалтэт пуктэ: 1. Удмурт Элькунын 1999 арын Быдэс дуннеысь арлыдо адямиослы сӥзем ужрадъёсты дасянъя но ортчытонъя оргкомитетэ ӵектэм муртъёсты юнматоно. 2. Удмурт Элькунын 1999 арын Быдэс дуннеысь арлыдо адямиослэсь арзэ ортчытонъя план юнматоно. 3. Удмурт Элькунысь Коньдон ужпумъёсъя министерстволы та ужрадъёсты ортчытонлы 140 сюрс манет коньдон висъяно. 4. Удмурт Элькунысь печатья но иворъёсъя министерстволы иворъёсты вӧлмытӥсь ёзъёсын радъяно Быдэс дуннеысь арлыдо адямиослэн арзылы сӥзем нимысьтыз рубрикаос. 5. Интыын аскивалтонъя тӧроослы, городъёсысь но ёросъёсысь администрациослэн тӧрооссылы ӵектоно 1999 арын Быдэс дуннеысь арлыдо адямиослэсь арзэс городъёсын но ёросъёсын радъянъя но ортчытонъя кулэ ужрадъёс кутыны. 6. Та постановленилэсь быдэсъяськемзэ эскероз Удмурт Элькун Кивалтэтлэн аппаратысьтыз Социальной азинсконъя управленилэн семья ужпумъёсъя, тазалыкез но калыкез улон-вылонын утёнъя отделэз. Удмурт Элькун Кивалтэтлэн Тӧроез П. Н. Вершинин. Шара гожтэт Удмурт Республикаысь Правительстволэн Тӧроезлы П. Н. Вершининлы, Удмурт Республикаысь городъёсысь но ёросъёсысь интыысь аскивалтонлэн быръем но быдэсъясь ёзъёсызлэн кивалтӥсьёссылы Удмурт Республикаысь Общественной палаталэн секретариатэз вазиське тӥледлы таӵе ӵектонэн: чырмыт пыриське Удмурт Республикаысь кун властьлэн но кивалтонлэн ёзъёсыз, калык огазеяськонъёс но "Ог-огедлы юрттон, азинскон понна" огазеяськонэ пырись иворъёсты вӧлмытӥсь ёзъёс куспын ӵош ужан сярысь огкылэз кутонэ. Удмурт Республикаысь Общественной палата сюлэсь ятыр организациосты огазея но туннэ нуналлы республикаямы тужгес бадӟымез огазеяськон луэ. Аслаз статусэзъя со калыкез огазеясь, государственной луись, визь-кенеш сётыны быгатӥсь ёз луэ. Палата бадӟым уж ортчытэ пайда вайыны быгатӥсь кужымъёсты огазеянъя, гражданъёслэсь кулэяськонъёссэс но правооссэс, огазеяськонъёссэс утён но республикаез кризисысь поттон понна. Таин валче Общественной палаталэн секретариатэз куре тӥледыз республикаын улӥсьёслэн данак люкетэзлэсь мылкыдъёссэс санэ басьтыны. Ижевской огкылэз гожтон но Общественной палаталэн ужаз пыриськон пумысен юанъёсын вазиськыны луоз 22-07-80 телефонъя. 1998 арын 29 январе. Удмурт Республикаысь Общественной палаталэн кенешезлэн тӧроез А. С. Кудрин. Удмурт Республикаысь Кун Кенешлэн Общественной палатаын оскем муртэз С. Л. Бехтерев. Быръёнъёс азьын Та нуналъёсы шаерысьтымы Быръёнъёсъя комиссия Кун Кенешлэн кыкетӥ созываз быръёнъёсты ортчытон пумысен кенеш ортчытӥз. Отын тупен-тупен вераськон мынӥз быръёнъёсъя окружной, территориальной но участковой комиссиос кылдытон сярысь. Быръёнъёсъя кун комиссилэн секретарез Георгий Пчельников люкаськемъёслы рос-прос мадиз быръёнъёсын герӟаськем ужъёсты радъян но нуон сярысь. Кылсярысь, вераськон мынӥз кытын но кызьы кылдытӥсько быръёнъёсъя окружной комиссиос. Шаерамы али кылдытъямын ни быръёнъёсъя территориальной комиссиос. Нош участковой комиссиос ужаны кутско 17 февраль бере. Таяз быръёнъёсын данакез районъёс одӥглы- кыклы люкылэмын. Соин ик сётӥське быръёнъёсъя округлэн но участоклэн номерез. Туэ быръёнъёсы пыриськозы больницаосын эмъяськисьёс но судлэсь решенизэ возьмасьёс, законэз тӥямен валче ӝегатэмъёс. Ижын гинэ сыӵе адямиос 2 сюрс пала люкасько. Али лэсьтоно ни бырйисьёслэсь списокъёссэс но дасяно кандидатъёсты возьматонъя пулъёс. Г. РОМАНОВ. Пукысал но кылзысал на... Котькуд гуртын вань аспӧртэмлыко, сӥлы адямиос. Сыӵеос асьме улонмес узыргес, чебергес каро. Соосын пумиськылыса, ӵош вераськыса пукыку, ачид но воштӥськиськод кадь, дунне шоры но мукетгес синмын учкиськод. Кизнер ёросысь Безменшур гуртэ вуылыкум, мыным пумиськыны кылдӥз мӧйы кузпалъёсын Ксения Григорьевна Васильеваен но Иван Тимофеевич Ивановен. Витьтон одӥг арзэ ини соос одӥг ӝӧк сьӧрын пуко, одӥг сюлмаськонъёсын уло. Кыкназылы ик котьмае адӟыны кылдӥз - кезьытсэ-пӧсьсэ но чидано луиз, трос гинэ шӧгзэ-кузьытсэ но шӧмъязы. Озьы ке но, ӧз ыше, ӧз йыроме югыт дуннелэн куддыръя пеймыт луись сэрегъёсаз, ӧз коже палэнэ читыр-чутыр, лёго-выро сюресысьтызы. Вань секытсэ пельпум вылазы пумозяз нуизы. Учко кузпалъёс ог-огзы шоры но я лулӟо, я пальпото. Кытын ини мыным валаны, мар соослэн сюлэмазы, мае ог-огзылы верало синъёсынызы. Нош мыным мадьыны тыршо ӟечсэ, умойзэ гинэ. Ксения Григорьевналы туж секыт аръёсы ужано луиз школаын: 1940-тӥ арысен 1975-тӥ арозь. Куамын вить арзэ со сётӥз нылпиослы, удмурт но ӟуч кылъёслы но литературалы дышетӥз. - Егит дыры тупаз война но со бере секыт аръёсы, - шуэ Ксения Григорьевна. - Но пинал дыр со пинал дыр ини. Котькыӵе секыт дыръя но шудон-серектон вормылӥз. Шулдыр улӥмы. Удмурт пьесаос, концертъёс пуктӥськом вал. Калык ми доры кыстӥськылӥз, гуртын кулэ луэммес шӧдӥськомы вал. Ксения Григорьевналэсь ӟеч, тыршыса ужамзэ синйылтӥзы - Удмурт АССР-ысь Верховной Советэзлэн витетӥ ӧтчамаз депутатэ бырйизы. Со вал 1959-тӥ ар. Нош 1960-тӥ арын солы ветлыны кылдӥз Москвае - быдэс Россиысь дышетӥсьёслэн съездазы. Отын Ксения Григорьевналы "РСФСР-ысь сӥё-дано дышетӥсь" ним сётӥзы. - Ноку вунонтэм нуналъёс вал со, - пальпотэм улсын малпаськыса вера Ксения Григорьевна. - Милемыз ки йылазы нуллӥзы Москваысь кивалтӥсьёс. Праивтельствоысь ваньмыз сямен ужасьёссы, лэся, милемын ӵош ветлӥзы, одӥг ӝӧк вылысь ӵош сиимы- юимы. Никита Сергеевич Хрущев ӟеч кылъёс вераз но кошкиз. Нош ми Тайницкой садэ шулдыръяськыны мынӥм. Отын Правительствоын ужасьёсыз но милемыз, дышетӥсьёсты, векчи гозыен висъязы. Тани Свешников нимо хор шулдыр кырӟан мытӥз. Учкиськом но, Микоян азязы потэм но ну эктэ ук, ну эктэ ук! Пӧлысьтымы одӥгез дышетӥсь ӧз чида, висъясь гозыез ӝутӥз но Микоянэн эктыны кутскиз. Кӧня ке улыса, висъясь гозы ӧй вал ни - ми но Правительствоын ужасьёс сураськимы, ӵош шулдыръяським. Ксения Григорьевна ӟечен тодаз вае СССР-ысь культурая министрез Екатерина Фурцеваез. Паймоно кадь кышномурт, пе, вал со. Ӟырдыт, котырысьтыз адямиосты малпанэныз, кылыныз кенжытыны, ӝуатыны быгатӥсь. Тайницкой нимо садын шулдыръяськизы, Екатерина Фурцева съездэ лыктэм дышетӥсьёслэсь список курем, тодэм, соос пӧлысь кудӥзлэн кыӵе наградаосыз вань. Собере отын ик Правительствоысь кивалтӥсьёсты люкам но наградаос сётыны решение кутэм. Отчы Ксения Григорьевна но сюрем. - Дышетӥсьёслэн съездзы собере одӥг пол гинэ вал на, - лулскыса шуэ Ксения Григорьевна. - Дышетӥсьлэн данэз пумен-пумен усиз. Али учкисько, кылзӥсько дышетӥсьёслэн улэм-вылэмзы сярысь верамъёссэс но, сюлэм вӧсь луэ. Война дыръя но, со бере но пичи ке но уждун сётъязы, тазьы ӝыны арен ӧз возе. Конечно, со уг тырмы вал. Но дышетӥсьлы музъем, ужаны вал сётылӥзы. Война но со бере аръёсы будэтэм емышъёсмес, бакча сиёнъёсмес школа валэн ик базаре нуллӥськом, вузаськом вал. Юрттэт луылӥз. Ма, али но со калэ вуиськом ини. Соиз гинэ пӧртэм - табере дышетӥсьлы техника аслыз утчано луэ. Иван Тимофеевич кузпалыныз вераськеммес чал-чал кылзыса пуке но кылрадмес йылпумъяса кадь шуэ: - Вань курадӟонъёсмы кивалтӥсьёс бордысь пото. Нокыӵе радыз ӧвӧл, ас кисызы понна гинэ сюлмаськисьёс вылӥын пуко. Сое калык шӧдэ, адӟе. Учке-учке но ачиз но пумен сӧриське. - Азьвыл кыӵе но секыт дыръёс ӧй вал, адямиос сютэм но кулылӥзы, - вераськонамы итӥське Ксения Григорьевна, - но гуртын лушкаськисьёсты кылыны ӧз луылы... Коркамес ноку но ӵогаса ӧм возьылэ. Табере учкыса гинэ уло, кытысь мае лушкано. Гуртамы колхозникъёс коньдон басьтэмзэс вунэтӥзы ини. Нош али ваньмыз со бордын возиське. Шонер ӧвӧл со. Коньдон сяна, вань на адями, солэн лул-сюлмыз. Соиз сярысь вылӥысь кивалтӥсьёс чик уг сюлмасько. Иван Григорьевич 1939-тӥ арын армие кошкиз но гуртаз бертӥз 1947-тӥ арын гинэ. Войнае ветлэмъёс пӧлысь Безменшурын кык мурт гинэ кылиз на: Иван Тимофеевич - бадӟымез, туэ гужем солы тямыстон арес тырмоз ини. Быдӟым Отечесвтенной война сярысь юалляськыкум, янгыше усем мурт сямен шуэ: - Ӧз кылды мыным немецъёсын ваче син ожмаськыны. Кыдёкысь шунды ӝужан пала кадръёс дасяны ыстӥзы - рядовой солдатъёсыз ожмаськыны дышетӥмы. Ожмаськонэ мыныны куриськонъёс трос пол гожъяй - ӧз лэзе. Берло пыриськи ини японъёсын ожмаськонэ. Иван Тимофеевичлэсь японъёсын ожмаськемзэ пусйизы "За боевые заслуги", "За отвагу" медальёсын. Война бере пенсие потытозяз ужаз валтӥсь механик луыса, ӟеч тыршемез трос грамотаосын пусйылэмын. - Ми, войнае ветлэмъёс, пумен ӧжытгес но ӧжытгес кылиськом, - шуэ Иван Тимофеевич. - Мар ватонэз, туала кивалтӥсьёс милемыз уг вунэто. Пенсия но ӟеч сёто, котькуд ар Вормон нуналэ ачиз Борис Ельцин ӟечкыланъёс но ыстэ, колхозмы но быгатэмезъя юрттэ. Но будӥсь егитъёс жалесь - соослэн азьпаллы осконзы чигтэмын. Мон юатэк уг чидаськы: - Тӥледлы японецъёсын трос пол ваче син вуылыны кылдӥз, луоз. Али соос быгатэменызы быдэс дуннеез паймытъяло, нош соку кыӵеесь вал? - Соку но таӵеесь ик вал. Ноку но уг вунэтӥськы одӥг учырез. Ми пленэ басьтӥмы трос солдатъёссэс, техниказэс. Ми азьын япон солдатъёс танксэс дас вить минут куспын паровозлы пӧрмытӥзы. Малпанзы пӧрмысал ке, соос чугун сюрес кузя танкенызы- паровозэнызы туж чаляк Свердловске вуысалзы. Америка соосты жуммытыса вуиз, асьме вылэ омырскыны кужымзы ӧз ни тырмы... Кузпалъёслэн чылкыт, ӝикыт, шуныт коркасьтызы тол ураме потэм но уг поты ни. Пукысал но кылзысал, кылзысал... Та эли-кеби улонамы берло вакытэ угось туж ӧжыт дыр сюре, лач-лач пуксьыса, кинэ ке кылзыны, кинлэсь ке сюлэмшугзэ валаны-шӧдыны. Оло, соин но ӧжытгес адӟиськом, шумпотӥськом та чебер дуннелы, отысь ӟечсэ-уродзэ висъяны курадӟиськом. Галина Романова. Кузпалъёс егит дыръязы но али. Владимир Беломорскихлэн туспуктэмъёсыз. Правительствоысь иворъёс Дышетӥсьёс ужаны потӥзы Пичи Пурга ёросысь дышетӥсьёс 1-тӥ феврале ужаны потӥзы. Тодӥськоды, луоз, соос 11-тӥ январьысен забастовка ялӥзы шуыса. Солэн мугез - уждунзэс басьтымтэзы. 1-тӥ февраль азьын дышетӥсьёсын, райсоветлэн депутатъёсыныз пумиськиз Правительстволэн Тӧроез Павел Вершинин. Вераськон мынӥз Правительстволэн социальной удысысь но экономикаысь ужпумъёсты быдэстыны, уждунэз тырыны амалъёс утчамез сярысь. Собере дышетӥсьёс, соослэн профсоюзэнызы кивалтӥсьёс но депутатъёс пыриськизы Правительство но ёросысь администрация куспын огкылэз эскеронэ. Министръёслы та ужрад сярысь ивортыса, Павел Вершинин пусйиз, Пичи Пурга ёросысь администрация уждунэз дыраз тырыны но вань пунэмъёсты берыктыны кылзэ сётӥз шуыса. Со понна луонлыкъёс вань. Ёрослэн бюджетаз 900 сюрс манет недоимка люкаськемын. Налогъёсты тырыны кулэ ваньмыз, пусйиз Правительстволэн Тӧроез. Республика ёросъёсы дотация ыстэ, уждунэз тырон понна. Татчы мынэ люкам налогъёслэн данак люкетэз. Кылсярысь, Пичи Пурга ёросэ 29 январе 380 сюрс манет ыстэмын. Республика но, ёросъёс но обязательствооссэс быдэсъязы ке, уждун толэзьлы быдэ тыремын, вань пунэмъёс берыктэмын луозы. Кин чаклалоз посредникъёсты Республикаын улӥсьёс капчияк шокчизы, Правительство дунъёсты радъян сярысь постановление кутэм бере. Гуртын продукция поттӥсьёс но сое ӟеч мылкыдын пумитазы. Гуртоос уждун басьтыны, тулыс ужъёслы коньдон люканы шӧтазы. Басьяськисьёс но изъян ӧз адӟе. Со вакытэ ик Правительстволэн постановлениез сиён-юон поттӥсь предприятиослэсь табыш поттыны луонлыкъёссэс сюбегатӥз, посредникъёсты но шуккиз. Озьы ке но, Правительство соослэн кузязы ветлыны уг малпа. Таин валче, ӵектӥз Павел Вершинин, сыӵе организациосты сак чакласа возёно. Та ужез быдэсъяны быгатысалзы профсоюзъёс но. Экономикаен герӟаськем ужпумъёс Правительстволэн Президиумез эскериз пичи ужбергатонлы юрттэт сётонэн, "Улон инты 2005 арозь" программаез быдэсъянэн, калыклы уж сётонэн, 1999-тӥ арын нылпиос понна пособиосты тыронэн герӟаськем ужпумъёсты. Пичи ужбергатонэз азинтонъя комитетлэн тӧроез Михаил Зайцев ивортэмъя, туэ пичи ужбергатонэ уногес калык лыктыны кулэ. Производство 106 процентлы йылоз. Валамон, ваньмыз со бюджетысь инвестициосты кулэ кароз. Президиумын та пумысен споръяськонъёс потӥзы. Программалэн инъетэз бордын ужаны ӵектэмын на. Архитектурая но лэсьтӥськонъя кун комитетлэн ӵектонъёсыз капчиен ортчизы. Солэн тӧроез Геннадий Батищев дэмлаз туэ нырысетӥ кварталэ кылдытыны нимаз адямиослы юрт басьтыны яке лэсьтыны ссуда сётон сярысь положениез, нош кыкетӥ паларе кутыны "Егитъёслы улон инты 1999-2005 аръёсы" программаез. Калыклы уж сётонъя ужрадъёсын тодматыса, Калыклы уж сётонъя федеральной службалэн Удмурт Республикая департаментэзлэн кивалтӥсез Юрий Брусянский ивортӥз, туэ 64 сюрс адями уже интыямын луоз шуыса. 1 сюрс адямилы ужбергатонэн вырыны юрттэмын луоз. "1999 арын нылпи понна кун пособиосты толэзьлы быдэ тырон сярысь" постановление печатламын луоз. Правительстволэн Тӧроезлэн секретариатысьтыз пресс-центр. Директормес музон азе медаз басьтэ, пе Атай юртысь - интернатэ Кыӵе инты басьтэ "Буммаш" Ижевсклэн, Удмурт Республикалэн но Россилэн улоназ? Со одӥгез бадӟым предприятие. Юнме шорысь шат Индустриальной районэз но дышем сямъя Буммаш нимало. Туннэ вераськон мыноз йӧно заводлэн одӥг люкетэз сярысь гинэ - кивалтон удыс сярысь. Валтӥсь директорез Валентин ЖЕБРОВСКИЙ сярысь. Пичи дыръяз со улӥз анай-атайёсыныз ӵош. Школаын ваньзэс паймытылӥз визьмыныз но шаплы сямыныз. Сое синйылтӥзы но ӵектӥзы Москвае мыныны. Интернатэ. Кызьы озьы? Улэп но таза анай-атай бордысь - интернатэ? Абдранэз ӧвӧл. Огшоры интернатэ уг кошкы ук - визьмо нылпиосты дышетон интые. Озьы Валентин сюриз физикаен но математикаен тунсыкъяськись нылпиос пӧлы. Москваысь Бауман нимо Вылӥ технической училище егит пияшлы зэмзэ ик паськыт сюрес усьтӥз. Сое йылпумъямез бере, 1974-тӥ арын, Жебровский лыктӥз Ижысь "Прогресс" институтэ, отӥяз - электромеханической заводэ. Соку ож тӥрлык дурон удыслы бадӟым саклык висъязы. Визьмо муртлы будыны но луонлык вал. Мастер, цехлэн кивалтӥсезлэн воштӥсез, отделлэн кивалтӥсез. Редакцие пыриз "мурт" Вуо 90-тӥ аръёс. Демократилэн тулкымъёсыз вуизы заводэ но. Ялэмын предприятилы директор быръён сярысь. Та интые дас одӥг мурт куриськиз. Берло кылиз кыкез - Тюльпин но Жебровский. Ужасьёс бырйизы Тюльпинэз. Малы? Таиз ужа огсыргес, солань- талань шонаськытэк. Отӥяз сыӵе ик ӵошатскон ялӥзы "Ижтяжбуммаш" заводын. Валентин Витальевич выльысь мылкыд кариз кужымзэ мертаны. Мурт уз каре меда? Со шедьтӥз усто амал. Кожиз заводысь журналистъёс доры, куриз "Буммашевец" газетлэсь номеръёссэ, тодматскиз отын гожъямъёсын. Син азяз яркыт пуксизы предприятилэн улэм-вылэмез но лэчыт ужпумъёсыз. Собере ортчиз цехъёстӥ но отделъёстӥ, вераськиз адямиосын, тодматӥз аслаз программаеныз. Ужчиос Жебровскиез мурт ӧз каре. Шӧдӥзы уга: воргорон уг чеберъяськы, зэмен ик сюлмаське огъя удыс сярысь. Ӵошатсконын вормыса, Валентин Витальевич луиз огезлэн бадӟым заводлэн валтӥсь директорез. Тӥни озьы, быръёнъёс быдэсак воштӥзы адямилэсь но заводлэсь улон гожзэс. Президентлы шуныт корка Шуг-секытъёс ӧз куасалтэ "Буммашез". Туннэ со - огез азинскись предприятие. Арлы быдэ выльдэ аслэсьтыз ваньбурзэ. 1997-тӥ арын усьтэмын андан ӵыжатонъя автомат-комплекс. Со юрттӥз туала рыноке капчиенгес выжыяськыны. Озьы заводын поттыны кутскизы олокыӵе но пӧртэм арбериос. Куд-огез таӵе предприятилы копак уг тупало кадь. Кылсярысь, йӧспӧртэм гуръёс. Соос эстӥсько эгырен но, мазутэн но, газэн но. Кулэ ке - чылкытатымтэ му вӧен (нефтен). Зэм, сыӵе гуръёссэ предприятие трос уг потты - быдэсъя нимаз куронъёсты гинэ. Кыксэ куризы Казане. Огаз озьы шунтӥськись коркан улэ Татарстанлэн президентэз Минтимер Шаймиев. Утчаськытэк туэ уд улы. Выль гуръёс-пуртыос бордын ужан азьланьтӥське. Интыосы вуттыса, соосты соку ик эстыны луэ. Сыӵе макеосты туж возьмало кыдёкысь посёлокъёсын ужась газовикъёс но нефтяникъёс. Соин ик заводлэн огез валтӥсь заказчикез - дано "Газпром". Жебровский кивалтэм улсын выльысь ужаны кутскизы бумага поттон машинаос бордын. Выльдӥське картон лэсьтон техника. Соосты куро Соликамске, Набережные Челные, Рязане но мукет интыосы. Бадӟым инты басьто выль макеос: насосъёс, сюрес лэсьтон техника, линолеум. Коньдон лябӟе ке но... Кивалтӥсе быръемзы бере но, али но Валентин Витальевич палэнэ уг кельты адями сярысь сюлмаськонэз. Со вылын возиське угось быдэс завод. Предприятие та секыт вакытэ но ӧз куштӥськы лагерьёсызлэсь, шутэтскон базаезлэсь, профилакториезлэсь, спортъя комплексэзлэсь. Нош палэнэ кельтод шат республикалэсь но городлэсь улонзэс? Кӧня ке ар талэсь азьло заводын кылдӥз "Удмурт кенеш" огазеяськонлэн ёзэз. Сое соку ик умоен лыдъяз заводлэн директорез Жебровский. - Директор милемлы котькызьы юрттыны тырше,- шуэ заводысь удмуртъёслэн кичӧлтӥсьсы Клавдия Исупова. Берло дыре заводын ӵемгес но ӵемгес ортчыло удмурт культуралы сӥзем ужрадъёс, выльысь улӟо калык йылолъёс. Пусйымон соиз но: Кун Кенешлэн депутатэзлэн Валентин Жебровскийлэн округаз улӥсь коммунистъёс матэктӥсь быръёнъёс азьын солэсь гинэ кандидатуразэ ӵектыны малпало: со, пе, лулызъя-сюлмызъя компартилы матын. Бугырес вакытэ но директорлы оскон уг кулэсмы: заводын уждун дыраз тыро, адямиосты кулэстонэн уг курдато. Банкъёс миым 17-тӥ августэ куашкам бере, курдан мылкыд вал ик. Но югдур тупатскиз. Туэ 1-тӥ февральысен вань ужасьёслэн уждунзы 20 процентлы будэ. Вань татын мукет кышкан. Директормес музон интые медаз басьтэ вылэм, пе. Зэмен ик шимод, ява. Россия Федерациысь дано машиностроитель, Удмурт Республикаысь Кун премиен пусъем маке. Нимтулыз - республикамылэн Данъян пул вылаз. Лилия КНЯЗЕВА. Дас ньыль кузя люкаськизы Олег Поскребышев, Павел Куляшев, Зоя Богомолова, Надежда Кралина, Владимир Емельянов, Герасим Иванцов, Валерий Болтышев, Анатолий Андреев но мукетъёсыз - Удмуртиысь Писательёслэн огазеяськонысьтызы ӟуч секцие пырись писательёс, ваньмыз 14 кузя ини. Алигес соос асьсэлэсь кенешсэс люкаллязы но вераськизы, кызьы азинтоно "Луч" журналэз, кыӵе удмурт произведениосты та вакытэ ӟуч кылэ берыктоно, маин пумитано А. С. Пушкинлэсь 200 аръем юбилейзэ. Секцилы кивалтӥсе быръемын прозаик Анатолий Андреев. Т. НИКОЛАЕВА. Гожтӥськыны али но бер ӧвӧл Газетъёслы но журналъёслы гожтӥськон понна, нимысьтыз висъям дыр толэзь талэсь азьло йылпумъяськиз ни ке но, туннэ ми та ужпумъя вераськонэ выльысь берытсконо кариським. Малы ке шуоно, уноез семьяос "Кенеш" журналэз басьтыны мылкыдзы туж луыса вылысь но таяз аре яратоно издынизытэк кылиллям. Табере соос редакциямы вазиськыло, выль арлэн нырысетӥ толэзьысеныз гожтӥськыны быгатозы на-а шуыса. Со адямиослэсь сюлмаськемзэс валаны луэ: выль произведениез котькин но кутсконысеныз лыдӟыны турттэ. Гожтӥськытэк кылемъёслы та ласянь ӧз удалты. Лыдӟисьёсмы азьын трос пол вераллямы: выль арысен сётыны кутском егит прозаиклэсь Вячеслав Ар- Сергилэсь алигес гинэ гожтэм тунсыко романзэ. Журналмылэн куинь-ньыль номеръёсаз поттыны чаклам произведенилэн нырысетӥ люкетэз лыдӟисьёсмы доры вуоз толсур толэзе. Озьы ик вераны луысал мукет романъёс но повестьёс сярысь, кудъёсыз асьсэлэсь аспӧртэмлыко черодзэс витё. Нош табере гожтӥськытэк кылемъёслы валэктонмес вераськом. "Кенеш" журналэз нырысетӥ номерысеныз басьтыны одӥг почта но уз юртты ни. Ачиз редакция гинэ югдурез тупатыны быгатоз. Со понна тӥледлы, мылкыддэс вераса, ӝегатскытэк вазиськоно 21-57-73 номеро телефонъя. Журналмылэн огъя тиражез вӧзы кӧня ке номеръёс ватсаса поттӥськом бере, куд-ог семьяослэн юрттэт басьтыны луонлыксы вань. Тодады вайытӥськом: редакция пыр быдэс арлы гожтӥськон дун � 24 манет. Вераны кулэ на, дыр, тани мар сярысь но. Гожтӥськисьёс понна трос пӧртэм каталогъёс потто. Лыдӟисьёслэсь газет-журнал быръёнын ужзэс капчиятон вылысь малпамын кадь со. Улонын мукет сямен луэ: трос сюосын изданиослэн нимъёссы пӧлысь адямиос асьсэлы кулэзэ быръёнэн шугъясько. Ӵапак соин валче куд-огезлэн милемыз пыкылэмез потэ, малы каталоге уд пыриське шуыса. Зэм, котькуд ар отчы шедьыны уд но быгаты. Тани, кылсярысь, туэ каталоге пырытэк кылёмы. Малы ке шуоно, со понна кык сюрс манетлэсь ятыр коньдон тыроно. Сыӵе луонлыкъёсмы ӧвӧл. Азьвыл ик со сярысь ивортӥськом, 1999 арлэн кыкетӥ люкетэзлы каталогъёсысь "Кенеш" журналэз утчано медад луэ шуыса. Шаермылэн палэназ улӥсь удмуртъёс тани мае тужгес лыдэ мед басьтысалзы. Дырлэсь ортчемзэ шӧдылытэк кылёды. Али ик малпаськоно ни та арлэн кыкетӥ ӝыныез понна гожтӥськон сярысь. "Кенешез" быръёнэн юрттоз Россия Федерациысь связья но информатизацияя кун комитетлэн огазеям каталогез. Ӵапак соя почтаос али ужало. Нырысетӥ томезлэн 150-тӥ бамысьтыз журналмы сярысь гожтэмез шедьтоды. Отын кык индексъёс сётэмын: 73251 � ӝыны арлы гожтӥськисьёс но 73977 � быдэс арлы гожтӥськисьёс понна. Озьыен, гажано эшъёс, "Кенеш" журналлы гожтӥськыны ноку но бер ӧвӧл. Лыдӟе но, гожъяське но. Нош ми тӥледлы таиз ар понна аспӧртэмлыко синпель кузьым лэсьтон сярысь малпаськимы ини. Котьку сямен, сое журналлы гожтӥськем муртъёс басьтозы. Пётр СЕРГЕЕВ, "Кенеш" журналлэн валтӥсь редакторезлэн воштӥсез. Экономика Александр Злобин: "Малпасько ужтэк уг кыльы" Журналистъёслэн берло пумиськоназы Правительстволэн Тӧроезлэн нырысетӥ воштӥсез Александр Злобин бадӟым инты висъяз производстволэн ужамезлы но му вӧй поттонлы. Коть озьы, коть тазьы бергаты, но шаермы ортчем аре ӝутскыны ӧз быгаты. Быдэс республикая 17 миллиард 200 миллион манет тыр продукция поттоно ке вал, 80 миллион манетлы ваньбур ӧз люкаськы. Сыӵе лыдпус потӥз нырысь лыдъямъя. Тани промышленность будонлыкезъя 100,1 процентозь вуиз. Кызьы бен ужазы предприятиос? Азьло сямен ик умой азинско "Ижсталь", "Буммаш", "Воткинский завод", Чепецкой механической завод но мукетъёсыз. Лябӟиз энергетика удысын услугаос сётон, чигна металлургия, нюлэс коран но музонэз. Валля арен ӵошатыса, миым "Ижмаш" 4 процентлы тросгес ваньбур поттӥз. 10479 автомобиль бичаз, мотоциклъёссэ кулэстӥз, уногес вузаз воштос ёзъёс. Берыктыны кутскиз 1997-тӥ арлы тыронъёссэ. Нош кыӵе югдур му вӧй кысконын? Оглом урод ӧвӧл кадь. Республикая чакламын вал 8 миллион тонна "сьӧд зарни" люканы, но 50 сюрс тонналы ичигес поттэмын. Туж каллен вырӟо выль нефть кыскон ёзъёс (Удмурт нефтяной но Национальной нефтяной компаниос). Шӧдске: "Сэмсон" компания асьмемын уз выры. Мугез тодмо: музъем узырлыкъёсты люкон сярысь федеральной закон кутымтэ на. Собере куд-огез нефть поттӥсьёсмы солы пумит луо. Соос шуо, музъем узырлыкъёсмы пумтэм-йылтэм ӧвӧл ук, куке но бырозы, малы, пе, кулэ американецъёслэсь юрттэт, асьмеос но му вӧй кыскыны быгатӥськом. Малы бен таӵе веранлы пумит луод? Асьмелэн музон бадӟым сюлмаськонъёсмы вань. Котькин возьма автозаводлэсь улӟемзэ. Кылсярысь, "Шкода-Фольксваген" огкыл ужаны кутскысал ке, предприятие пыд йылаз султысал, бюджетэ коньдон вуысал. Али тая завод бизнес-план дася. Югдур озьы ик уг воштӥськы ож тӥрлык поттӥсь предприяторсын. Обороная удыслэн берло кык ар ӵоже соослы 600 миллион манетлэсь ятыр тыронэз люкаськемын. Туэ но та удыслы Россиын ӧжыт уксё висъяло. Валамон, асьмеос Россилэсь нимаз азинскыны, ӟеч улон лэсьтыны ум быгатӥське. Но данакез луонлыкъёсмы уже уг кутӥсько. Тани "Ижмаш" арлы быдэ быгатэ ичизэ 350 сюрс мотоцикл бичаны, нош автомобильёс - 180 сюрс. Нош али кӧня поттӥськом? Серем ук со! Туэ 4 апреле Кун Кенеше быръёнъёс ортчем бере кылдытэмын луоз выль правительство. Соин валче Александр Григорьевичлэсь журналистъёс юазы: - Та ужады ӧд ке кыле, кытчы мыноды? - Нокечно, али шуг вераны: кельтозы-а, уз-а, но малпасько ужтэк уг кыльы. Г. РОМАНОВ. Городлэн - аслаз сюлмаськонэз Ижевскысь гордумалэн сизьыметӥ сессиез таяз учыре кык нунал ӵоже ужаз. Вис каремын вал Кун Кенешлэн 23-тӥ сессиез ужамен но быръёнъёсъя выль закон кутэмен. Городысь депутатъёс кыкетӥ нуналаз пумаз-йылаз вуттӥзы Кун Кенеше быръёнэн герӟаськем ужпумъёсты, эскеризы избирательной округъёсты но быръёнъёсъя комиссиосты. Ижевскын 41 округъя Удмурт парламентэ быръемын луоз 41 депутат. Ижевсклэн мэрез А. И. Салтыков ивортӥз бюджет удысын ужасьёслы 20 миллион манет ссуда вуэм пумысен. Та коньдон кошкоз ноябрь понна пунэмъёсты пытсаны, кӧня ке - гужем толэзьёслы кылем тыриськонъёслы. Городысь администрацилэн эскерон палатаезлэн кивалтӥсез Л. И. Забродина кылем арын ужамзылы йылпумъянъёс лэсьтӥз. Пӧртэм фондъёсты эскерыса-чакласа шараямын трос гинэ тырмымтэос. Ваньмыз соос герӟаськемын коньдонэз умойтэм кутонэн. Со понна куд-ог адямиос ужысьтызы мозмытэмын вал. Нимысьтыз вераськон ӝутскиз рынокъйс пумысен. Отысь налог городлэн бюджетаз чакламлэсь ӧжыт вуэ, тужгес но Восточной рынокысь. Та ласянь умоен пусъемын трамвайной кольцоысь вузкарон инты. Депутатъёс кылпум поттӥзы картофкаен, бакча сиёнэн пырак машинаысь вузкарон сярысь. Таӵе луонлык сётэмын Сеннойысь базарлы гинэ. Л. МЕДВЕДЕВА. Туэ - Дуннеысь арлыдоослэн арзы Шуг-секытлы сермет-юрттэт 1999 ар ООН-эн ялэмын Дуннеысь арлыдоослэн аренызы. Соин валче Удмурт Республикаысь Правительствоен кутэмын нимысьтыз постановление. Шаерысьтымы пӧртэм комитетъёс, министерствоос но ведомствоос, арлыдоосты сӥлы карыса но соосолэсь улон югдурзэс умоятон понна, быдэс арлы нимысьтыз ужрадъёс чаклазы. Но арлыдоос сярысь сюлмаськон нырысь ик усе Калыкез улон-вылонын утёнъя министерстволы. Нырысетӥез ик бадӟым ужрад, кудӥз сӥземын вал Дуннеысь арлыдоослэн нуналзылы, ортчиз 27 январе Воткинскысь "Юбилейной" культура дворецын. Шаерысьтымы калыклы улон-вылонын юрттэт сётон удысысь устоосыз ужасьёс пӧлын ортчиз смотр-конкурслы йылпумъян. Конкурслэн нырысетӥ но кыкетӥ люкетэз радъямын вал сояз арын. Нырысь ик ӵошатскизы арлыдоослы, инвалидъёслы, висись ныпиослы но шуге-леке сюрем семьяосысь нылпиослы юрттэт сётӥсь 31 центрын ужасьёс - кудӥз ёз ассэ ӟечгес возьматыны быгатоз. Юрттэт сётон удысын ужасьёс возьматыны кулэ вал льготаосъя законодательствоез тодэмзэс. Со сяна, кыӵе ке но кылдэм шуг-секытысь потон амал шедьтоно. Шуом, картэз кулыса, песянай кылиз пиез но кенэз вӧзы. Нош соосыз анайзэс коркась поттыны туртто. Яке мукет со выллем учырез сэрттоно-пертчоно. Кыӵе ке но ужпумен вазиськем муртлы юрттоно. Ӵошатсконэ пыриськизы котькуд центрысь 4-5 ёзъёс: ӝог юрттэт сётонъя; дорын юрттэт сётонъя; нуназе ужась ёз; улон интылы ёрмисьёслы огдырлы юрттэт сётон; секыт семьяосысь нылпиослы юрттон. Котькуд ёзъя вормисе потэмъёслы сётэмын ужысь устоез ним. Ноябре-декабре ӵошатсконъёс радъямын ни вал сизьым зоная. Котькуд зонаын вить муртэн быдэн 4-5 команда. Таяз учыре юрттэт сётӥсьёс возьматӥзы ужазы кулэ луись быгатонлыкъёссэс. Со сяна, шудэм улсын возьматоно вал кыӵе ке но учырез, отысь потон амалъёсты. Котькуд зоная вормисе потӥз быдэн одӥг команда. Со - Ижевскысь Ленин ёросысь, Сарапул городысь, Вавожысь, Играысь, Каракулиноысь, Кизнерысь, Сюмсиысь калыклы улон-вылонын юрттэт сётӥсь центръёс. Йылпумъян конкурсэз ортчытыны вераськемын вал Воткинскын, соин ик та сизьым команда вӧзы ватсаськизы на воткаос. Таяз учыре конкурслы ужъёс тросгес вал, пуштроссыя но муресьгес. Пӧртэм законъёсты тодэм но арлыдоослы но инвалидъёслы шуг-секытъёсысь потыны юрттэм сяна, шудон пыр усьтоно ужедлэсь кулэлыксэ. Озьы ик возьматоно калыклы юрттэт сётон удыслэсь вуоно дауре азинскемзэ. Конкурсын нырысетӥ инты басьтӥзы сарапулъёс, кыкетӥ луизы воткинскъёс, куинетӥ интыез люкизы Играысь но Ижевскысь Ленин ёросысь калыклы улон-вылонын юрттонъя центръёсын ужасьёс. Вормисе потэмъёслы сётэмын вал Калыкез улон-вылонын утёнъя министерстволэн грамотаосыз но дуно кузьымъёс. Нош Сарапул городысь центрлы сётэмын на 1998 арысь устоез учреждение ним. Мукетъёсыз но командаос ӧз кыле синпель кузьымъёстэк - котькудӥз мар ке ласянь но возьматыны быгатӥз ассэ. Калыклы улон-вылонын юрттэт сётонъя центрын ужасьёслэн нырысетӥез таӵе бадӟым ӵошатсконзы зэмос праздниклы пӧрмиз, шуыны луоз. 500 интыем залын калык тросаз люкаськемын вал. Соос пӧлын - шуге-леке сюремъёслы юрттэт сётӥсь вань учреждениослэн директоръёссы но калыкез улон-вылонын утён удысысь ёрос кивалтӥсьёс. Ужрадэ озьы ик пыриськизы Удмурт Республикаысь Кун Кенешлэн Социальной ужпумъёсъя, ужъя, тазалыкез но инкуазез утёнъя ялан ужась комиссиезлэн тӧроез Светлана Андреева, Воткинск городлэн мэрез Валерий Фридрих. Валтӥсь дунъясе - жюриен кивалтӥсе - пуктэмын вал калыкез улон-вылонын утёнъя министрлэн юрттӥсез Галина Липина. Ортчытэм ужрадлы йылпумъянъёс лэсьтыса, со шуиз: - Конкурс юрттӥз вылӥе ӝутыны калыклы улон-вылонын юрттэт сётӥсьёслэсь ужзэс. Туннэ нуналлы соослэн небыт киоссытэк, шуныт кылъёссытэк тросэзлы шуге-леке сюремъёслы уката но секыт луысал та улонын. Та вакытлы шаерамы соос 3 сюрс пала лыдъясько. Соиз ар понна юрттэт сётӥзы 156 сюрс пенсионеръёслы но инвалидъёслы. 1995 арын сыӵе юрттэт сётэмын вал 27 сюрс муртлы. Пӧртэм пумо юрттэтъёс чотын гинэ пенсионеръёс кылем арын шыръяны быгатӥзы пенсизылэсь 40 процентсэ. Калыклы улон-вылонын юрттэт сётӥсь центръёсын ужасьёс пӧлын кык-куинь арлы одӥг пол таӵе конкурсъёс министерство азьланяз но ортчытъяны чакла. Со юрттоз та удысысь ужасьёслэсь быгатонлыкъёссылэсь будэмзэс адӟыны, озьы ик шуге-леке сюремъёслы юрттэт сётон но умоялоз. Л. МАЛЫХ. Тылскем кадь кыске ас бордаз "Тынад ужан интыед (мастерскоед) самой усто",- тазьы шуизы Можгаысь художниклы Владимир Кашинлы Ижевскысь лыктэм эшъёсыз. Зэмзэ но, та суредасьлы огвакытысен удалтыны кутскиз, шуыны луоз. 1995-тӥ арын сое кутӥзы Россиысь Художникъёслэн огазеяськоназы. Можгалан нырысетӥез со луэ. Кылем гужем Владимир Кашинлы шуд усиз Нижний Новгородын ортчем "Большая Волга" зональной выставкае вуылыны. Отчы быръемын вал "Автопортретэз". В. Кашинэн ӵош асьме ошмесо шаермес данъязы П. Елкин, П. Семенов, Б. Постников, А. Русских, В. Кононов, В. Морозов, М. Гарипов, В. Овчинников но мукетъёсыз. Соослэн 90-лэсь ятыр ужъёссы собере возьматӥськизы на Ижевскысь Выставочной залын. Можгаысь художниклэн ас кужымезлы осконэз будэ, юнма. Вӧё буёлэн лэсьтэм ужъёсыз пӧлысь синмаськымон луэ Н. Байтеряковез, А. Белоноговез, А. Леонтьевез, Г. Павловез но соосын ӵош ассэ пуктэм ужез. Можгалэн данъяськон адямиосыз кырымпыдэс вылын кадь син азьын, шоразы ик югыт тусбуеныз висъяське калык кылбурчи Николай Байтеряков. Владимир Павлович ужа Можга педучилищеын, дышетэ суредаськыны, пуэз вӧлыны. Кема аръёссэ кезьыт но ӟоскыт мастерскойын пачкаса улэмез бере, солы ужан инты сётӥзы педучилищелэн выль общежитияз. Сиськоннилы чаклам инты луиз вӧл-вӧл мастерской, висъетъёсыз но вань. Огъяулонние пырем бере ик пулэсь вӧлэм чебересь панноосыз адӟыса шӧдӥськод, татын кибашлы мурт вань шуыса. Нош мастерскойысь борддоръёс кузя рад-рад суредъёс - быдэсмемез но, али лэсьтоноез но. Вордскем палысьтыз инкуазь, тодмо возьёс, тэльёс, бусыос, сюлэмызлы дуно адямиос - ваньмыз со Владимир Павловичлы сётэ творчество удысын ӝуан кужым. Ас дор музъемезлэн шуныт шокамез шӧдӥське трос ужъёсаз. Гужемлы быдэ уго со вуылыны тырше Кильмезь шур дурысь пичи но шыпыт гинэ Пумси гуртаз, уно суредъёссэ отын лэсьтэ. Владимир Кашинлэн мастерскояз табере музее сямен пыралляло Можгала лыктэм куноос но. Тылскем кадь кыске со ас бордаз. Туэ вуж Выль ар нуналэ, кылсярысь, татчы люкаськылӥзы Можга городын улӥсь пенсионеръёс, художниклэсь суредъёссэ учкизы, мадемзэ кылзӥзы, юанъёс сётъязы. Нош вуттӥз соосыз татчы Римма Ивановна Данилова, педучилищеысь дышетӥсь. Кемалась ик ӧвӧл Владимир Кашинлэсь суредъёссэ адӟытон усьтӥськиз Пичи Пургалась ёрос библиотекаын. Табере Можгалаысь усточилэн ужъёсыныз тодматскыны быгатозы та палан улӥсьёс, дышетскисьёс но. Т. ПЕТРОВА. Героез - Герд Удмуртиысь Писательёслэн огазеяськоназы 56 мурт люкаськиз ни. Берло кутэмъёс пӧлын висъяське Анатолий Ермолаевич Комаров, вить книгалэн авторез, со нырысьсэ асьме прозаикъёс пӧлысь басьтӥськиз Куӟебай Гердлэсь чеберлыко образзэ кылдытон борды. Повестьысьтыз люкетъёсыз потӥзы ини "Кенеш", "Инвожо", "Вордскем кыл" но "Кизили" журналъёсын. Та произведенизэ автор бадӟым эпопеяозь вуттыны чакла. Т. НИКОЛАЕВА. Европаысь "кизилиос" - Ижын Толон-валлян Ижевск пумитаз дуно кунооссэ. Городлэн шор площадяз сӥё-дано усьтэмын вал Европалэн биатлонъя чемпионатэз. Асьме доры лыктӥзы дас ньыль странаысь спортсменъёс - Италиысь, Латвиысь, Чехиысь, Словакиысь, Германиысь, Австриысь, Эстониысь... Куноосты ӟечкылазы шаерысьтымы вылӥ кивалтӥсьёс - Правительстволэн Тӧроез Павел Вершинин, Кун Кенешлэн Тӧроез Александр Волков, Ижлэн мэрез Анатолий Салтыков. Соос пӧлын ик Элькунысьтымы тодмо но дано адямиос: Михаил Калашников, Галина Кулакова, Валерий Медведцев. Дуннеысь биатлонистъёслэн огазеяськонзы юнме шорысь Ижевскез ӧз синйылты. Уго асьмелэн спортъя комплексмы ӟеч тупа таӵе чошатсконъёсты ортчытыны. Озьы ик вань спортлэсь та удыссэ ӟеч валась судьяос, мукет специалистъёс. Биатлонистъёслэн калык куспо союззы умой дунъет сётэ пыӵал лэсьтӥсьёсмылы но. Чемпионатэз ортчытон дуно гинэ усе. Соин ик утчано луиз коньдонэн юрттӥсьёсты но. Ӟечен вазиськизы Москваысь спонсоръёс, Кирово-Чепецкысь химкомбинат. Удмуртия ласянь пусйыны кулэ Сарапулысь но Глазовысь аракы поттӥсь заводъёсты, Сарапулысь сӥлькомбинатэз но отысь электрогенераторной заводэз. Комплексэз выльдон-тупатъянын трос ужаз Лэсьтӥськонъя 17-тӥ управление. Кызьы верамы ни, дорамы вуэмын трос дано спортсменъёс. Татын ик кужымзэ эскероз Россиысь егитъёслэн огазеям командазы но. Со пӧлын куасэн бызьылозы но ыбылӥськозы Удмуртиысь Максим Максимов но Татьяна Рябова. Толон воргоронъёс бызьылӥзы 20 иськеме. Нылкышноос но юниоръёс ӵошатскизы 15 иськемъем сюрес вылын, юниоркаос кужымзэс мертазы 12 но ӝыны иськеме бызьылонын. Туннэ спортсменъёс шутэтско. Вань биатлонистъёслы сӥзём чылкыт сюресъёс но шонересь ыбылӥськонъёс. Н. БАЙТЕРЯКОВ. Адӟем карымон Ува ёросысь "Свобода" эштосын арыс аре тросгес йӧл кыско. Валля арын татын 30 сюрс центнер кыскизы вал ке, миым - 35 сюрс центнер. Туэ та лыдпус эшшо но йылоз на шуыса, оскон вань. Малы ке шуоно, та нуналъёсы эштосын скаллы быдэ 9 килограмм йӧл кыско, кылем арлэн та вакытэныз ӵошатыса, со 2 килограммлы уногес. Вань скал кыскисьёс пӧлын "кизилиос", зарни киё адямиос но. Хозяйстволэн Кунгур фермаысьтыз Корепанова Алевтина Анатольевна миым 6500 килограмм йӧл кыскиз. Сомында йӧл кыскисьёс асьме республикаын чиньыен лыдъямон гинэ. Кызьы быгато пудо вордӥсьёс сокем пайдаё ужаны, юалоды тӥ. Хозяйстволэн кивалтӥсьёсыз ӧз жалялэ коньдонзэс, Удмуртилэн палэнысьтыз улосъёсысь белокен узыр сиёнъёсты басьтон понна. Табере быдтэм уксёзэс кык полэс берыкто ини, продукцизылэсь лыдзэ но ӟечлыксэ йылэтыса. "Свобода" эштослэсь мукет хозяйствоос но адӟем каризы. Кылсярысь, Ленин нимо, "Луч", "Дружба" эштосъёс, "Искра" колхоз пудоез ӟеч сиёнъёсын сюдон сярысь сюлмасько. Пайдаез син азьын - шуом, "Луч" эштосын али скаллэсь 14 килограмм йӧл кыско. Г. Земцова. Югдур ас палаз берыктэ Гожъяськыны кутскемез дырысен, ньыльдон ар куспын, 55 аресэ вуытозяз ортчем сюрессэ син азяз пуктэ но куд-ог ӟуго малпанъёссэ шарая филология наукаосъя кандидат, Удмурт кун университетысь доцент, критик но литературовед, журналист но кылбурчи Александр Григорьевич ШКЛЯЕВ. - Витьтон вить аресэз, пе, паськыт пусъёно ӧвӧл. Ойдолэ ай, "паськыт пусйытэк" гинэ, Александр Григорьевич, тодамы ваём, кыӵеесь вал та берло аръёсы вамышъёсты. Собере литература ужпумъёс вылэ но выжыны луоз. - Котьку сямен ик, ортчем аръёс куспын маке но лэсьтэмын, маке но ыштэмын. Малпасько, маке лэсьтоно ке, солы сётоно вань кужымдэ, вань улондэ. Пичильтык лэсьтэм уж но соку вормон луэ ини. Тани берло вить арез ке верано, мон поттӥ "Ӵашъем нимъёс" книга. Кӧня со бордын выроно луиз! Гожтэме бере но, сыӵе югдур кылдӥз: то потто, то уг. Ярам, издательствоын кин ке но валаз. Михаил Федотов кызьы ке ӧтиз но шуиз, туж кулэ книга, поттоно. Собере Бибинур Загуляеваен кутскимы "Калык кылос но сое бичан" борды. Фольклор экспедициос дыръя люкам материалъёс - со студентъёсты дышетон книга луэ. Со сяна, та вить ар кошкиз журналистъёсты дасян уже. Тани туэ нырысетӥосыз студентъёс басьтозы ни диплом. Соослы дышетскон вылысь кылдытӥ "Журналист" газет, со потэ толэзьлы быдэ. 20 номерез лыдӟись доры вуиз ини. Аслым но дышетсконо луиз на. Та дыр куспын кык пол вуылӥ Голландие, Маастрихт городэ, туала журналистикалы дышетскыны. Пырпотӥ журналистикаывн правоя кык арняем российско-американской школаез. Стажировка ортчи Финляндиысь Турку городын. Лекция лыдӟыны ветлӥ та кунысь ик Оулу университетэ. Журналистика специальностья мынэсьтым азьло диссертация гожтӥсь ӧй вал на. Собере журналистъёсты дасян ужын мон азьвыл но ужай. Соин ик журналистикая кафедраен кивалтыны мыным оскизы. Пыкиськыны ӧй быгаты - мон котьку но лэсьтӥсько сое, мае мыным оско бере. Гожъяськыса гинэ улоно вылэм, дыр, но югдур котькугес ик ас палаз берыктэ. - Тӥ пӧртэм интыын ужады ни: УдНИИ-ын но, "Молот" журналын но, Писательёслэн союзазы но - котьку ик-а мылкыддылы пумитгес кариськыса ужано луылӥз? - Бен, озьыгес луэ: "ас кырӟанэдлэн гульым вылаз" султоно луэ (Маяковскийлэн кылъёсызъя). Кылсярысь, аспирантураысь бертэме бере, монэ университетэ (соку пединститутэ) ужаны ӧз басьтэ. Мыноно луи УдНИИ-е. Ньыль-вить ар ужай но, Д. А. Яшинэн И. В. Тараканов туж куризы выжыны университетэ - соос малпазы журналистикая специализациез йыг-йыг пыд йылаз султытыны. Мынам отчы чик мынэме уг поты ни вал. Сюлворыны нырысь ик лыктӥз Даниил Александрович. Кызьы но озьы мон солэсь соку мозми. Д. А. Яшин уга небыт сямо вал, адями вылэ кужмысь зӥбыны ӧз быгатылы, мултэссэ ватсаса номыр ӧз вералля. Соку мон борды кутскиз И. В. Тараканов. Милемды С. В. Соколовен (сое но соку университетэ куризы) ӧтиз ректор доры. Соиз милемыз кӧяз-вӧяз, созэ но, тазэ но лэсьтом шуиз но - ми сётским. Университетлы ми туж кулэ шуыса мынӥм. Ньыль ар пала ужай, ректор сётэм кылзэ одӥгзэ но ӧз быдэсты. Собере монэ ӧтиз Флор Иванович "Молот" журналэн кивалтыны. Солэсь азьвыл Писательёслэн союззы, Ф. И. Васильевлэн куремезъя, мыным квартира сётӥз вал но - пумит кариськеме ӧз луы, университетлы туж дыши ке но вал ини. Татысен югдур озьы берытскиз: Писательёслэн огазеяськонэнызы кивалтоно луи. Та дыр куспын ӧжыт ӧй лэсьты кадь, кылсярысь, дасяй "Йыр вадьсын - инбам", "Край родниковый", "Песни солнечного леса", "Кузебай Герд. Ступени", "Молотлы-60" книгаос. Ваньмыз со - аслым гинэ ӧвӧл - быдэс союз понна но лэсьтэм уж. Солэсьгес азьвыл люкай "Кузебай Герд. Гажан эше!", "Между Волгой и Уралом" книгаос. "Молотын" ужакум, мон аслэсьтым ужъёсме но печатланы кепырасько вал: валтӥсь редактор ассэ печатланы яратэ медам шуэ. Тодӥсько на, одӥг пол А. А. Ермолаев, мынэсьтым шугъяськонме валаса кадь, кенешын ужпум ӝутӥз, малы редактормы уг печатласькы, печатласькиз ке, отын номыр курламонэз ӧвӧл шуыса. Соку мон дасяй В. Г. Широбоков, туала проза сярысь статьяос. Арлы быдэ ортчытъямы соку егитъёслэсь семинарзэс. Бен, соку ужаммес алиеныз нокызьы уд ӵошаты. Туннэ Писательёслэн союззылэн аппаратэз аслыз гинэ ужа, ассэ гинэ тодэ. Нош кызьы писательёс уло, мар каро - со нокинлы кулэ ӧвӧл. Егитъёсын ужан но чапчара чалмиз. Союзын ужакум мон тыршисько вал, котькуд ужрад умой дасямын мед луоз, ар пумын одно ик йылпумъянъёс лэсьтэмын мед луозы шуыса. Йыг-йыг но мур малпанъёсын доклад дасяны тыршылӥ. Туннэ учкисько ке, кивалтӥсь маке со эк-бек шуэ но, соин тырмытске. Туннэ бен нокинэ нокин эскерись-куаретӥсь ӧвӧл, кинлэн ма лэсьтэмез потэ - лэсьтэ, нош кин уг лэсьты - озьы ик кыле. - Тодӥськом, тӥ критик, "жугыны" яратӥськоды. Нош кутскиды литературае сюрестэс тросэз сямен ик, кылбур бордысен... - Таяз аре ӵапак 40 ар тырме нырысетӥ кылбурме "Советской Удмуртия" газетын печатламлы. Со кылбуре вал "Военной изьы". Газетын литконсультантын соку вал А. Н. Клабуков. Зол гинэ ужатӥз монэ кылбуре бордын. Одӥг пол лэзисько солы, кыкетӥзэ - со нош но нош гожтэ: татӥзэ тупаты на, отӥзэ. Олокӧня туртскеме бере гинэ кылбуреным редакцие лыктӥ но, Аркадий Николаевич "пӧрамме" лыдӟыса лопырскиз, вот табере умой шуыса монэ ӟыгыртӥз, ӝутӥз но - одно ик поттом шуыса эктӥз но, мараз но кадь. Озьы ке но, кылбуре, оло, куинь-ньыль толэзь потытэк улӥз на, нош мон котькуд нунал чидатэк почтальонлэсь вуэмзэ витьыса улӥ... Ӧйтӧд, юри-а озьы лэсьтӥз Аркадий Николаевич, ӧз-а, но мон валай, макем секыт но макем трос чидамез кулэ каре литература удыс. - Тӥ уд кышкаське-а сюрестылэсь кутсконзэ Аркадий Клабуковлэн нимыныз герӟаны? Шуо ук, со Гердлы пумит трос ужаз, солэсь рукописьёссэ но лушказ, "Тютю Максиез" но будто ке аслаз ӧвӧл? - Аркадий Николаевичлэн сьӧлыкез вань Михаил Коновалов азьын: со гожтӥськиз "Враждебный роман" статья улэ. Мукет фактъёсты мон уг тодӥськы. Ваньзэ мукетсэ солэн одӥг тушмонэз озьы вӧлдэ. Аркадий Николаевич кемалась ӧвӧл ни, нош тушмонэз ялан соин нюръяське на. Чаклалэ ай тани огзэ гинэ. Клабуков туж урод адями луысал ке, Ашальчи Оки соин кусып ӧй возьысал, солэсь палэнскысал. Нош кӧня гожтэтъёсыз кылемын солэн Клабуковлы. Нош куке Айво Иви кулэ, Ашальчи Оки уг быгаты со доры Чур станцие мыныны, отчы ыстэ Аркадий Николаевичез. Собере мон уг тодӥськы сыӵе удмурт писателез, кудӥз сомында мед ужасал егитъёсын: быдэс том люкаськоз солэн гожъяны кутскисьёслы гожтэтъёсыз-консультациосыз. Аркадий Николаевич вал одӥгез туж бадӟым эрудициен, вылӥ культураё адями. Трос аръёс ӵоже мон соин тодмо вал, нош Куӟебай Герд сярысь солэн одӥг урод кыл но мыным верамез ӧвӧл. - Нош асьтэос кызьы учкиськоды Герд шоры? Тӥ кемалась со бордын ужаськоды ни ук. - Бен, Гердэз калыке вуттон понна трос лэсьтэмын. Но мон малпасько, солэн трос малпанъёсыз улонэ пыӵатэмын ӧвӧл. Туннэ, шуом, Куӟебай Герд тубысал ке Кун Кенешлэн трибуна сьӧраз, солы вераськыны ӧй сётысалзы. Малы ке шуоно, со вазиськысал удмурт кылын, сое курысалзы вераны ӟуч кылын, нош со шуысал: ма, мар со сыӵе удмурт парламент луоз, отын удмурт сямен вераськемез уг валало бере. Озьы пуромысал вожвылъяськон, керетон. Бен, Гердэн пуктэм ужпумъёс туннэ но йылаз-пумаз вуттэмын ӧвӧл. Татчыозь кутэмын ӧвӧл кылъёсъя закон. - Кызьы тодӥськом, тӥ писательёс пӧлысь Пётр Черновен ӵош вал Удмурт клубез но Удмурт культурая дэменлыкез кылдытӥсьёс пӧлын. Нош али малы ке уг луы тӥледыз адӟыны "Удмурт кенешысь". - Бен, нырысь-валысь та огазеяськонъёсын кивалто вал В. А. Осипов но солэн эшъёсыз, собере ми ӧтим К. А. Пономаревез но, со ас котыраз трос калыкез люказ, мон соосын мылысь-кыдысь ужай. Ӵапак со вакытэ Удмурт культурая общество дэмлаз В. К. Тубыловез но Ю. Ф. Кедровез республикамылы кивалтӥсе бырйыны. Чаклалэ ай, кыӵе кемызъя вал та дэмлан. Собере удмурт движенилэсь нырысь ужасьёссэ куд-ог укыр чупрес адямиос палэнтыны кутскизы, тӥ ужпумъёсты меӵ уд пуктӥське шуыса. Озьы ӵаш-маш карон кутскиз, тэргаськон потӥз. Вуизы радикалъёс-горлопанъёс но кутскем ужез ӧжытак гинэ быдэс ӧз куашкатэ. Монэ кенешъёсазы но ӧтчамысь дугдӥзы, мон куке но кивалтӥсь- коммунист вал шуыса. Котькугес со озьы луэ. Кыӵе ке уж пӧрме, юнма ке, со котыре трос калык вуэ но, одно ик шедё ужез курласьёс, люкетӥсьёс. Озьы луиз вал 20-тӥ аръёсы но. К. Герд но Т. Борисов кылдытӥзы писательёслэсь ассоциацизэс, собере ӝоген Гердэз отысь палэнтӥзы. Бен, туннэ "Удмурт кенеше" вуиз йыг-йыг политик. Валентин Кузьмичез шуисько. Но туннэ национальной движение Салтыковен но Волковен куспын споръяськонын ас интызэ утчаны выре кадь. Мон сямен, отчы пыриськыны кулэ ӧвӧл. Национальной движенилэн аслаз ужпумъёсыз. - Малпанъёсты вылӥетӥ лобало, нош уд вунэтӥське-а тӥ асьтэ сярысь? Шуом, узырмон сярысь малпанды - вань-а со? - Ӧйтӧд, но мон вань улытозям машина но басьтыны ӧй быгаты. Кылем арын гинэ нырысьсэ аслым шуба басьтӥ. Дачае но садоогородэ мынам - анаен-атаен кельтэм юртэ. Мон улӥсько озьы ик, кызьы уло тросэз удмурт писательёс но учёнойёс - нуналысь нуналэ копейкаез чотаса, одӥг уждун вылын. Нош гонораръёс сярысь верано ке... Асьтэос тодӥськоды - курег серекъямон. Туала югдур писательёслы, дышетӥсьёслы, врачъёслы тужгес но юн шуккет сётӥз. - Тӥледлы печатласькон сюрес "Советской Удмуртия" усьтӥз, шуиды. Озьыен, мар ӵектысалды тӥ газетмылы? - Газетлы мынам вань рекламкылбуре. Тани со: Лыдӟиды ке "Удмурт дуннеез", Усьтоды тӥ югыт дуннеез. Кин ӧз басьты сое, шуом ми, Со уз луы дунне адями. Вунэтоз шаерзэ но кылзэ, Собере анайзэ-атайзэ. Но кылёз со озьы огназэ, Собере вунэтоз со ассэ. - Ми но сӥзиськом тӥледлы, Александр Григорьевич, та улон шурын-зарезьын огнады, полысъёстэк уяны медаз кылды. Выль азинсконъёс тӥледлы пинал журналистъёсты будэтонын но, наукаын но, литератураын но. Юалляськиз Т. ПЕТРОВА. Лидия Чернова Пышкылон ... Мон кошки Кезэ, Тон кошкид Иже Ышытымтэ шудмес утчаны... Гильман Касимов. Оломар таӵе Луи ни зульым. Сюлэмы кушке Утчаны ӟаным. Сюлэмлы ёркыт, Пӧсекъя, пыже. Кезамы ӝокыт - Ширто ай Иже... Ӟаныме вужез Вунонтэм, тодын. Лобисько кужен - Мылкыд лӧптэмын. Малпанэ чебер: Ваньмаз лушкан. Вуиськем ук бер! - Пыдессин куашказ. Э, шайян, шайян, Пӧязы аръёс. Шат зарни сюан?! - Шудо ымныръёс... Мар кылиз мыным! - Берытскын Кезэ. Кышное, марым... Ну, пыже, кесе! Янгышай ке но, Ченгешим ке но, Сиресь пу - кышно Нош бордам мертче. Ма кытчы кошкод? - Улӥськом уртче. Начарезлы юрттоно Туннэ ваньмызлы капчи ӧвӧл. Соин ик калыкез улон-вылонын утён удысын ужасьёслэн сюлмаськонъёссы уката будо. Со нырысь ик герӟаськемын куанер улӥсьёслы юрттонэн. Шаерамы кызьы та уж мынэ, журналистъёслы мадиз калыкез улон-вылонын утёнъя министр Николай Бессогонов. Со озьы ик вераз пенсиосты будэтон, нылпиос понна пособиос сётон но удыслэсь инъетсэ юнматон сярысь. Николай Михайловичлы люкаськемъёс трос юанъёс сётъязы. Г. ВАСИЛЬЕВ. Ненег но кужмо - Мед луысал милям театрмылэн музеез. Ализэ но азьвылзэ артистъёсыз герӟась кусып медаз чигы вылэм. Егитъёс дорамы лыктыса мед быгатозы адӟыны, шуом, Григорий Овечкинлэсь, Анна Чубуковалэсь,Анна Колесниковалэсь... Борис Безумовлэсь, Иван Кудрявцевлэсь, Нина Бакишевалэсь тусбуйёссэс, вуж спектакльысь дӥсьёсты, арбериосты, програмкаосты. Верамзыя, К. Маркс урамысь пу коркась театрлэн котыръёсыз шкафен-шкафен поттыса сузямын, сутэмын. Азьвыл аръёсы но со нокинлы кулэ луымтэ, вуоно вакытысь учкисьёс сярысь малпаськиллямтэ, али но театрлэсь кылем ваньбурзэ люкан, лачан сярысь уг сюлмсько на Культурая министерство но, мукетъёсыз но. Театрамы реставрация луоз шуыса оскытыны выро ни бере (вылез сярысь малпаны ум ни дӥсьтӥське), мед сётысалзы милемлы Советской, 1 юртысьтымы коть одӥг этажез, коть кӧня ке комната. Мед луысал милям пичи залмы, сценамы. Котькуд актёрлэн потэ пумозяз ассэ усьтэмез, мар со пӧрмытэ. Бадӟым спектакльёсын гинэ шудон уг сёты сыӵе луонлык. Нош таӵе зал "одӥг актёрлэн театрез" выллем но луысал, мылкыд карисез быгатысал кылбуръёс яке мукетсэ лыдӟыны, огъя вераса, экспериментъёс ортчытъяны. Кӧня спектакльёс али кылё пуктытэк, малпанъёс - кыл вылын гинэ. Тани, шуом, Вячеслав Байков уг быгаты Эзопъя "Ӟичы но виноград" пьеса пуктыны. Мукетыз но озьы ик. Огъя вераса, артистъёсмылы ӧвӧл сётэмын луонлык асьсэды пуш ласянь узырмытыны, соин ӵош ик выль учкисьёсты будэтыны, театре кыскыны. Ведь кӧня верало огез но, мукетыз но: театрады уг поты мынэм - ӧвӧл лулэз чылкытатӥсь спектакльёсты, весь корка пушкын но гид котырын бергаськоды. Зэм, ӧвӧл уго асьмелэн туала тупась пьесаосмы. Тани ми "Уй пал кизили" спектакльмес Казаньысь театрын пуктыкумы паймим вал: кивалтӥсьлэн ӝӧк вылаз быдэс гурезь пуктыны ярамон пьесаос кыллё, черодзэс витьыса. Нош асьмелэн, мон шуысал, одӥг пьеса но режиссёр, артистъёс юрттытэк югыт дуннеез уг адӟы (чылкак тазьы бен шуыны уг луы Анатолий Григорьев сярысь)... - огкутскемен таӵе малпанзэ кисьтӥз Удмуртиысь но Россиысь калык артистка Вероника Алексеевна Садаева. Актрисалэн сюлмаськонъёсыз - со театрысь коллективлэн сюлэм вӧсез. Театрлэн ӵуказе нуналлы осконэз - со актрисалэн югыт малпаськонъёсыз. Ас сярысьтыз вераны Вероника Алексеевна уг яраты. Нош быдэс тусбуеныз со син азямы пуксе шудэм рольёсызъя: Катя Серебрякова ("Уй пал кизили"), Катерина ("Гроза", "Катерина Измайлова"), Медея ("Яратон но вожан"), Насьта ("Насьток но Исьток"), Марина ("Мынам яратонэ татын"), Кыть Надька ("Бугрес тулыс"), Такъян ("Асьмелэн со одӥг")... Соос кужмо нылкышноос, ас ӟырдытлыкенызы мукетъёссэ ӝуатӥсесь. Рольёс, рольёс... Котькыӵеосыз соос вань. Улонлэн зӥбетэзлы чидатэк чигиськем нылкышноос но: Антонина ("Чебер апайёс"), Ольгака ("Югдазмемъёс"). Озьы ик "Бызьыны вуэм песяйёс" спектакльысь Ольга (тазэ ролез Вероника Алексеевна туннэ юбилей ӝытаз шудэ). Удмурт театрын со одӥгез тужгес чеберез актриса. Вылласянь но, пушласянь но. Та малпанэлы пумит Вероника Алексеевна вераз: - Мыным асьме театрысь артистъёс оломалы ваньмыз огъя чебересь пото, мукет театръёсын ӵошатыса. Шудыкузы но соос вань сюлэм ӟырдытсэс поттыса шудо. Озьы, дыр. Ас семьяяд ваньмыз чебересь, мусоесь. Нош зэмос шудоесь соку, куке йыр вадьсад виясьтэм липетэд, чилясь выжъёсыд, оскымон борддоръёсыд, пӧртэм-пӧртэм висъетъёсыд. Нош театрын, со сяна, бадӟым залэз сяна, пичи залэз но, музеез но вань ке... Т. ПЕТРОВА. "Насьток но Исьток" спектакльысь суред. Насьток - Вероника Садаева, Исьток - Борис Безумов. Музъем - со вуз, иське... Та "выль" улонэ выжонмы ӟече вуттоз-а, уз-а - шуг вераны. Страна куашкамен валче, Россиын ма вань вузаноез - вузамын. Табере музъеммы борды ӝабырско ини, сое но вузлы пӧрмытыны туртто. Россиын, Удмуртиын улӥсьёслэн та ласянь пӧртэм малпанъёссы. Сергей Шартдинович Шартдинов, Удмурт Республикаысь дано агроном, Россиысь музъем бордын дано ужась, сизьым ар ӵоже кивалтӥз Гурт удысысь министерствоен: - Музъем - со вань калыклэн, государстволэн узырлыкез. Со асьмеды сюдэ- вордэ. Кизёно муосмы умоязы ни вал, 16-18 центнер ю тысь басьтыны дышимы. Араз государстволы вузаллямы 125 тонна сӥль, табере - 40-45 тонна гинэ, 385 сюрс тонна йӧл, али - 300 сюрс. Ужась, визьмо, музъем понна сюлмаськись адямилы ю-нянь будэтыны, пудо вордыны арендае сётыны мон пумит ӧвӧл, но соку но музъемез чакласа возёно. Мон малпамъя, музъемез вузан понна выро кивалтӥсьёс, гурт улонэз тодӥсьтэм- валасьтэм депутатъёс. Соослэсь мылкыдзэс валаны шуг ӧвӧл. Музъемез вузлы пӧрмытӥзы ке, кузёос налог тыроно луозы. Со налог чотын "реформаторъёс" малпало экономика удысын лэсьтэм янгышъёссэс тупатыны, бюджетэз кышъяны, кунгож сьӧрысь басьтэм пунэмъёсты тырыны. Александр Борисович Белослудцев, Каракулино ёросысь "40 лет Победы" клхозлэн кивалтӥсез, республикаысь музъем бордын дано ужась. - Музъем пумысен малпанэ мынам одӥг: умой-умой закон кутытэк, сое вузаны- басьтыны уг яра. Тани милям сельсоветамы фермер вань, агроном. Ми сое колхозысь уллямы гербицидэз уже валатэк кутэмысьтыз. 200 гектар муосты гольык кельтӥз, ю-нянь но ӧз поты, жуг-жаг турын гинэ но куасьмиз. Со фермере мерскиз. Музъем пайзэ сётытэк ӧз лу. Механизаторъёсты умойёссэ бордаз кыскиз вал. Бӧрысь валазы - кескич адями аслаз кисыез понна гинэ ужамъяське. Уллязы пӧлысьтызы. Со кошкиз палэнэ, табере 18 гектар музъемез буш кылле. Колхозлэн но сое берлань басьтэмез уг лу, ачиз но уг утялты. Нош музъем маин янгыш? Цӧриське ук со, уката но тулыс. Музъемез утялтоно, пичи пиналэн кадь выроно. Аналмем муэз выльысь ӝутыны 4-5 ар кулэ. Ярам, шуом, таӵеос ӧжыт на ай, мукет фермеръёс тыршо ик но, мон чакламъя, 1992-тӥ арысен кутскыса, одӥгез но соос колхозамы кадь ю-нянь ӧз будэтэ на, сӥль-йӧл потэмзы но туж ик вылын ӧвӧл. Радио, телевидение, газетъёс весь фермере мыныны косо. Мукет странаос сярысь верало. Но учке ай, США-ын фермеръёслэн лыдзы арысь аре кулэсме. Али, пе, соос музъем ужасьёс пӧлын 3-4 процент гинэ на. Ю-нянь будэтон, пудо вордон удыс отын али бадӟымесь корпорациос, фирмаос киын. Милям но молокозаводмы агрофирма выллем ужаны кутскиз вал. Дас вить хозяствоосмы сое кылдытон вылысь огазеяськизы. Аслаз счётэз усьтӥськиз, вакчи дыр куспын пыд вылаз султӥз, куашкам дыре вуэмын вал ини. Табере юнмаз но - ми солы кулэ ӧвӧл ни. Ас вакытаз поттылӥ, али но со понна "Каракулино" агрофирма, пӧй, кылдытоно. Мукет специалистъёс но, СБС-АГРО банклэн ёросысь ёзэтэзлэн кивалтӥсез но монэн огкылысь. Куд-огез кивалтӥсьёсмы, шӧдске, ас вылазыгес ужаны сюлмасько. Нош со агрофирмамы пайда сётысал пичиезлы но, бадӟымезлы но гуртъёслы. Мон бадӟым крестьян семьяын будэмын, тросэныз городысь улӥсьёсын вераськыса но тодӥсько, музъемез вузкарон зӧк кисыё муртъёслы гинэ кулэ. Соос ведь урод музъемъёсты уз ӝутэ, ӟечсэ басьтыны тыршозы, кунгож сьӧрысь капиталистъёс но озьы ик ӟечсэ гинэ нюлыштыса уло. Нош асьме калык пилиськем тусь дуре кылёз. Соин ик музъем сярысь йыг-йыг закон кутыны кулэ. Гожтӥз А. Петров. ШӦКЫЧ Лушкало ӟусъёсты Та нуналъёсы Ижысь Молодёжной урамын, шимес эрказъяськон вал: ышизы яке тӥямын азбарысь ӟусъёс. Бускельёс-пересьёс подъездъёссы дорын тулысысен сӥзьылозь пукылӥзы, котьма сярысь вераськыны песянайёслы но песятайёслы туж умой вал. Чебересь скамьяосты туж ик кемалась ӧз пуктылэ, собере кылем гужем соосты ӝикыт буязы. Табере соос интые кылизы на чигтылэм, пазям векчиесь пулъёс гинэ, металлэз кытчы ке кайпалтӥллям. Лушкаськисьёс со кырсь ужзэс ваньзэ лэсьтӥллям уин. Нош кин ке адӟиз-а укылтэмъёсты? Кинлы кулэ луиз сыӵе лушкаськон - аслэсьтыд но бускельёсыдлэсь огъя ваньбурзэс таркан? Тодӥсь ӧвӧл кадь. Нокинэ но китӥз кутӥсь ӧвӧл, лэся. Укылтэмъяськонлэсь мугзэ валаны шуг ӧвӧл вылэм. Городлэн кузёосыз асьсэос сыӵе мастер-ломастеръёслы лушкаськыны луонлык кылдытӥзы. Металлэз пӧртэм интыосын басьто. Нош мае учко со пунктъёсын, отчы лушкам ваньбурез вутто шуыса адӟо-а? Верало, милям азбарысьтымы ик бойлерной дорын быдэс люк корт яке алюминий кылле вал - ышемын. Металлэз чырты сьӧрад ӝутыса уд нуы - лушкаськисьёс машинаосын вуо. Сыӵе кырсь ужъёс быдэс городын вӧлмемын ни, дыр. Лушкаськисьёс пӧлысь кин ке, кытын ке кыл кутӥз-а ини? Тодо-а меда сыӵе югдурез милям коркаосмылэн кузёооссы - 21 номеро ЖРП-лэн кивалтӥсьёсыз? Тодо ке но, мар карыны уг валало, кин лушкаське, изъянтэ, нокин но ивортӥсь, кутӥсь ӧвӧл. Милиция но номыр уг тоды. Озьы валэктӥз мынам юанъёсылы ЖРП-лэн директорез В. И. Никитский: - Скамьяосты тӥяло, шуиськоды? Коть ивортӥсь мед луоз вылэм. Л. Федоров. "Мылысь-кыдысьлы" - 1 ар Удмурт телевиденилэн "Мылысь-кыдысь" передачаез эфире потыны кутскемез дырысен тырме 1 ар. Соин валче передачаез дасясьёс туэ 19 феврале 18 часысен "Металлург" культура дворецын ужрад ортчытэ. Люкаськемъёсты ӟечкылалозы удмурт эстрадаысь тодмо кырӟасьёс - Надежда Уткина Геннадий Бекманов, Любовь Быкова, Ольга Зорина, Андрей Ураськин, Анна Плотникова, Иван Григорьевых но мукетъёсыз. Билетъёс вузасько дворецлэн кассаяз. Юалляськоно 23-17-27 но 59-83-55 телефонъёсъя. Ужрадэз ортчытыны юрттэ Удмурт коммерческой комиссия. Президентэз Леонид Черных. Нырысетӥ кузьымъёс - Россиын Биатлонъя Европалэн чемпионатэзлы кутскон сётэмын. Удмурт шаермы куноосты нырысетӥ нуналаз ик кезьыт куазеныз "шумпоттӥз". Соин ик стартэз кӧнялы ке ӝегатоно луиз. Чаклам куронъёсъя уго ӵошатсконъёсты 20 градуслэсь кезьыт куазен ортчытыны уг яра. Озьы ке но, нылкышноос но юниоркаос со нуналэ ӧз нюръяське. Куинетӥ феврале воргоронъёс бызьылӥзы 20 иськеме, ньыль пол ыбылӥськыса. Нырысетӥ интые потӥз Россилэн огазеям командаысьтыз биатлонист Сергей Коновалов. Вераны кулэ: со ачиз улэ Чайковский городын. Журналистъёсын пресс-конференция дыръя Сергей пусйиз, мон, пе, ыбылӥськисько Ижевскын поттэм винтовкаен гинэ. Кыкетӥ интыез утӥз Германиысь Ульф Каркошка, куинетӥ интыын Норвегиысь Терие Ауне. Дас кужмоосыз пӧлы шедиз Ижевскысь Алексей Кобелев. Юниоръёс та нуналэ ӵошатскизы 15 иськем сюрес вылын. Нырысетӥ кык интыосы потӥзы Россилэн командаысьтыз Виктор Чайн но Максим Максимов (таиз пияш Ижевскысь). Бронза медален пусъемын Чехиысь Юрий Фалтус. Толон куазь уката кезьытгес вал. Соин ик ӵошатсконъёс ӧз ортче. Нош кыӵе дунъет сётэ асьме дорын ортчись чемпионатлы дуннеысь биатлонистъёслэн огазеяськонзылэн президентэз господин Андрес Бессибери? Со вакчияк шуиз: "Ваньмыз умой, ваньмыз тупа туала куронъёслы". Н. БАЙТЕРЯКОВ. Усто кузьым луоз Али гинэ лыдӟисьёс доры вуиз ӵыжак выль книга-альбом. Нимаське со "Ашальчи Оки. Грах дневникъёсысь". Дасям та кузьымез Граховоысь журналист Кун Кенешлэн депутатэз Михаил Козлов. Книгаын сётэмын Ашальчи Оки сярысь тодэ ваёнъёс, трос гинэ печатламын туспуктэмъёс, удмурт литератураен тунсыкъяськисьёслы та усто кузьым луоз. Дневник поттэмын Удмурт Республикаысь Калыкъёсын ужанъя комитетлэн но Грах ёросысь калык ужпумъёсты азинтонъя центрлэн юрттэменызы. Н. СЕРГЕЕВ. Шӧкыч Берло дыре куд-ог гуртъёсын воксё вал уг вордо ни. Бакча возисьёс ма карыны ик уг тодо - трактор медъяны коньдон ӧвӧл. Кылем арын Завьял ёросысь Кены гуртын улӥсьёс картошказэс асьсэос герыен ӝуткано луизы ни. Кивалтӥсьёслы нош номыр ик ӧвӧл кадь. (Гожтэтысь). Суредэз Л. ПРОЗОРОВЛЭН. Войналэн бервылъёсыз Шунтӥз игра калык Вить ар талэсь азьло ӧжытак ужай райгосархивын. Пенсиос тырон сярысь законъёсы кӧня ке воштӥськонъёс пыртэмен валче, архиве соку трос гинэ пенсионеръёс вуылӥзы. Одӥгез лыктэ документ утчаны, мукетыз юрттэт куре справкаос гожтонъя. Таӵе пумиськонъёс ӵем дыръя сюлмысь кенешонлы пӧрмыло вал. Одӥг пол вазь ӵукна ик дорамы пыриз лапеггес мугоро кышномурт. Солэсь дӥсьтӥсьтэм выроссэ но куректӥсь тус ымнырзэ адӟыса, малы ке но малпай, таид секыт улонэз адӟем адями, дыр, шуыса. - Матэгес лыктэ но пуксе. Мар муген дорамы вуиды? - либытак юай кышномуртлэсь. - Мон Германова Татьяна Владимировна, вордскемын но будэмын Белоруссиысь Орша городын,- вазиз со. - Война аръёсы мон но Белоруссие вуылӥ,- шуисько. - Бомбаосын но снарядъёсын куашкатэм городъёстэс адӟи, Оршае ӧй вуылы. Озьы ке но, та городэз уноез тодытэк ӧз кыле, дыр, малы ке шуоно, татысь паровоз депоын ужась партизанъёс урмем немецъёслы пумит кужмо шуккет сётылӥзы. Соослэн геройлыко нюръяськемзы умой возьматэмын "Константин Заслонов" кинофильмын. Таӵе учырез мадеме бере, Татьяна Владимировналэн ымнырыз воштӥськиз, пальпотӥз. - Костяез мон туж умой тодӥсько. Немецъёс монэ но кӧня ке егит нылъёсты, Германие лагере келяны шуыса, товарной вагонэ пуктӥзы. Составез нуыны косэмын вылэм паровозлэн машинистэзлы Костялы. Со азьлогес милем вераз: мон, пе, тӥледлы луонлык сёто вагонысь тэтчаны, нюлэс пыр ортчыкум, калленгес мыно. Озьы ми вагонысь тэтчам но нюлэскы ватским. Уин ваньмы гуртамы берытским. Тӥ умой тодӥськоды, асьтэос адӟиды, кызьы немецкой оккупантъёс калыкез курадӟытыса но сантэмаса возизы. Ми туж кышкаса улӥм. Бубымес 1937-тӥ арын репрессировать каризы. Со птицефабрикалэн кивалтӥсез но компартилэн членэз вал. Кытчы келямзэс ӧм тодылэ, ачиз но гожтэт ӧз ысъя. Милемыз, вить пиналъёсты, мумымы огназ сюдӥз-вордӥз. Бубымылэсь коммунист луэмзэ тодыса, лэся, полицайёс нэнэймес юн жугизы, сӧсырмеменыз улыны кема ӧз чида, кулӥз. Скалмес но нуизы. Одӥг пол витьымтэ шорысь коркамы вадьсы фургонэн машина дугдӥз. Коркамы пырем немецъёс шорамы учкизы, собере милемыз ӝогак дӥсяськыны косӥзы но сьӧразы поттӥзы. Фургон дорын сылӥсь немец косӥз ваньместы отчы пуксьыны. Машинаын пукись солдатъёс куспазы ас сяменызы верасько, кытчы нуэмзэс милем уг верало. Городысь потыса, сюрес урдсын сылӥсь гуртъёс одӥгез, кыкез, мукетыз кылё. Оло таосыд кытчы ке лагере келяло, оло кытын ке ыбылыса кельтозы, сыӵе малпанъёс но йыре пыро. Нюлэс пыр ортчыкумы, машинамы тыпак дугдӥз. Кабинаысь потэм немец фургонлэсь ӧссэ усьтыса кеськиз: - Пиналъёс, чаль ваське машинаысь! Васькыса гинэ вуим - машина азьлань кошкиз. Мазэ-созэ валатэк сылыкумы адӟимы сюреслэн огпал дуртӥз лыктӥсь кышномуртэз. Дорамы вуэмез бере, шорамы лякытэн вазиськиз: - Эн кышкалэ мынэсьтым. Шорады учкыса ик валасько секыт мылкыддэс, сиемды но потэ, дыр. Ойдолэ мон доры. Тӥни коркае, нюлэсэн артэ. Шутэтскоды, сиськоды. Солэн кылъёсыз сюлэммес небӟытӥзы. Нюлэсэз ортчыса, пичигес гуртэ вуим. Выль тодмомы туж умой утялтӥз. Куинетӥ нуналаз укно доры ӧтьыса шуиз: "Учке ай, пиналъёс, учке, немецъёс гуртмес бышкись езэн котырто ук! Ӟечлы ӧвӧл со. Маке но шимес уж даурто. Соин ик мон тӥледыз дорам кема возьыны уг дӥсьтӥськы. Вуоно уй ик нюлэс пыр городэ лушкемак келяло". Ми сярысь сюлмаськемез но умой утялтэмез понна, лякыт сюлмо кышномуртлы люксиькыкумы бадзым тау каримы. Зэм но, бератаз секыт ивор кылӥм: со гуртэз немецъёс улӥсьёсыныз ӵош сутӥллям. Сыӵе учыръёс мукет интыосын но вал. Татьяна Владимировна пӧртэм кышкыт учыръёсы шедьылэмез сярысь но мадиз на. Нош кызьы тӥ Удмурт шаерамы вуиды шуыса юамелы, секыт лулскыса вераз: - Бадӟымез Марья сузэре ас мылкыдызъя армие мыныны куриськиз. Солэсь куронзэ санэ басьтӥзы но медсанчасте ужаны интыязы. Армиын служить карыкуз тодматске офицерен Матвей Ефимович Матвеевен. Война бере соос кузпалъясько. 1946-тӥ арын Матвеевез гуртаз лэзё, кузпалъёс вуо Игра районысь Порвай гуртэ. Кӧня ке шутэтскыса, Матвеев ужаны кутске посёлокысь корка лэсьтон заводын. Сузэреным ми ог-огмылы гожтэтъёс ысъям. Кыкез вынмы Оршаысь Донбасс пала кошкизы но кыкназы ик шахтае ужаны интыяськизы. Али ке но соос отын уло. Сузэре гожтэтъёсаз ялан гожъялляз, лыкты ай, пе, дорамы, адӟод Удмурт шаерез. Матвеевъёслэн семьяенызы нырысетӥез ик пумиськон вунонтэм кылиз. Мыным туж кельшиз татысь инкуазь, Игра посёлок котырысь нюлэсъёс, паськытэсь бусыос, чебер сяськаосын шобырскем возьёс, посёлок пыр бызись Лоза шур, тужгес но лякыт сямоесь, куспазы тупаса улӥсь но ужез яратӥсь адямиос. Сузэрелэн картэз корка лэсьтон заводысь кадръёсъя отделын ужа вал. "Таня, ми валатским, ачид но вераськиськод: Игра палан улон кельше. Мылкыдыд вань ке, заводамы ужасьёс кулэ",- куспамы вераськыкумы шуиз Матвей кырси. Мон соглаш луи. Озьы 1951-тӥ арын заводэ ужаны пыри, 1983-тӥ аре отысь ик пенсие кошки. Ужам стаже ӧжытак окмымтэен, пенсия ичигес тыро. Оршаын Я. Купала нимо пединститутын техничка луыса ужай, но со сярысь трудовой книжкаям гожтэмез ӧвӧл. Соин ик отчы гожтэт ыстӥ, ужаме сярысь справка курыса. Малы ке нокыӵе ивор ӧвӧл. Оло, тӥ маин ке юрттоды? Самой таӵе куронэн дорады лыктӥ. Вазиськеммы бере Оршаысь городской администрация но загслэн отделэз Германовалэн институтын ужамез сярысь справка ыстӥзы. Татьяна Владимировнаен алигес нош ик пумиськылӥм. Юрттэммылы со тау каре. Куспамы вераськонъя юай: уд ик-а тодӥське бубыдылэсь кытчы луэмзэ? Сталинлэн кулэмез бере лагерьёсы келям калыкез троссэ реабилитировать карыны кутскизы уга. - Бубымы Воркутаысь лагерьын вылэм, гожтэт ысъянлэсь алӥллям. Марья сузэре солэсь уй пал городысь лагерьын улэмзэ тодэм, пӧртэм интыосы гожтэтъёс гожъяса. Нош бубымы лагерьысь эшеныз Сибире, Красноярск пала, улыны интыяськем. Малпаз, вылды, Орша палан нокинэз ӧвӧл ни шуыса. Министерствоысь ыстэм адресъя бубыенымы гожтэт пыр кусып тупатӥм. Тодӥм: со кышнояськем, куинь пиналъёсыз будо. Марья апаен Матвей кырси отчы улыны мынӥзы. Мон но буби доры адскыны ветлӥ, но улыны ӧй кыльы, ужан но улон интыме воштэме ӧз поты ни. Татын улэ но ужа нылы, внуке школаын дышетске. Нылы воспитатель луыса нылпи садын ужа, пиеныз благоустроенной квартираын уло. Нош мыным улон сэрег сётӥз завод. - Белоруссиям берытскон сярысь уг малпаськы ни. Удмуртия табере вордскем палъёсы кадь потэ. Тӥни озьы кыдёкысь Белоруссиысь лыктэм егит нылкышно улонзэ пырак азелы удмурт калыкен герӟаз. Сӥзём солы тазалык но шудбур. К. КОНДРАТЬЕВ, Игра посёлокын улӥсь, ожысь но ужысь ветеран. Табере сур но пӧзьтэ Глазовысь ликёро-водочной заводэз тодӥсьтэмез ӧвӧл, дыр. Со данэ потэмын вылӥ ӟечлыкен водка, бальзам но мукет пумо вина поттонэн. Нош табере предприятие сур пӧзьтыны кутскиз. Таӵе продукция угось уй пал районъёсын уг тырмы вал. Соин ӵош ик завод Балезиноын спирт поттонъя цех пуктэ. Туэ со вуттэмын луоз. Берло дыре завод син азьын выльме, кужмоя. Али со аракылы вуэз чылкытатонэз умоятӥз но ляб кужымен винаос пӧзьтыны ӧдъяз. Табере солэсь водказэ кунгож сьӧрын но шумпотыса басьто. Г. РОМАНОВ. Валэктэ юрист Сэрегез нуэ адвокат Лилия Шкляева Детдомын будэмъёслы улон инты Будӥ Алнашысь детдомын. Бызи отын ик улэм пилы. Кык пинал вордӥськом. Улӥм муртъёс дорын. Алнашысь администрацие квартира курыса вазиськи но, ӧз юрттэ. Тодӥмы: одӥг адями пичигес юртсэ вуза. Картэлы уждунзэ кирпичен сётӥзы, сое вузамы но юртъерлэн дунызлэсь ог люкетсэ тыримы. Коньдонмы ӧз тырмы. Администрация дэмламъя, куинь арлы ссуда басьтӥм но корка дунэз тырим. Али картэ пичи уждунэн ужа, мон ужтэк кылемын, дырын-дырын гинэ кинэ но сое вошъясько. Нош пунэмен курем коньдонэз кызьы ке берыктоно ук. Тодэме потэ вал: детдомын будэмъёслы квартира висъян ласянь кыӵе ке льготаос вань- а? Вань ке, пичи ке но квартира басьтыны осконо-а? Осконо ке, юртъер басьтыны быдтэм коньдонмес милемлы берыктозы-а? Г. АХМЕТШИНА, Алнашын улӥсь. Сыӵе юанлы валэктон сётэмын РСФСР-лэн Улон инты сярысь кадексысьтыз 37-тӥ ёзэтын (статьяын). Нылпи учреждениын, ӵыжы-выжыос дорын яке сюдӥсь-вордӥсьёс (опекунъёс но попечительёс) дорын будэм муртъёслы улон инты черодтэк сётӥське, соослы берыктыны уг луы ке азьвыл улэм интызэс. Со понна вазиськоно интыысь аскивалтон ёзэ - администрацие. Черодтэк но нырысетӥ черодэ квартира басьтоно муртъёсты гожто нимаз списоке. Туала вакытэ котькудаз списоке шедь, пичи сэрег но висъянлы оскыны шуг. Соин ик тӥляд одӥг гинэ осконды вылэм - улон интылы кредит курон. Сое тӥ басьтӥллямды. Ӟеч квартира кулэ ке, амалды одӥг: асьсэ коркадэс воштоно тӥледлы тупамон квартираен. Дэбесын - Байгурезь, Алнашын - Булда гурезь Дэбесъёс данъясько Байгурезенызы. Ижын вордӥськем огазеяськонзылы но соос "Байгурезь" ним сёто. Ми, Алнаш ёросысь Кузёбай школаын дышетскем муртъёс, куспамы вераськыса, огкылэ вуимы, маин милям Булда гурезьмы Байгурезьлэсь пӧртэм? Анае вераллялоз вал, кызьы со Булда гурезе, Булда вӧсьлы вӧсяськыны ветлылӥз. Удмурт гуртъёс Кузёбай, Усо, Чумолё, Сьӧд Ошмес та ужрадзэс (вӧсяськонзэс) огазьын ортчытъяло вылэм. Анае Будӟым инмарлы вӧсяськиз. Инкуазьлэн кужымезлы оскиз, кулэмъёсты буре ваиз. Мынам улонэ, егит дыры Совето власть дыръя тупаз. Туннэ кадь ик тодӥсько на, начальной классын дышетскыкумы вӧсчськеммес, бӧрысь со понна дышетӥсьмы зол пыжиз. Озьы школа милемыз мукет сюресэ выжтӥз. Дыр ортчемъя, мукет валанэ вуим: Кузёбайысь пересьёс визьмогес вылӥллям. Дыраз адӟиллям соос, кудпала дунне берытске. Булда гурезь урод синъёслэсь ватӥз но утиз Булда вӧсез - удмуртъёслэсь вӧсяськон интызэс. Гурт калык ӧз сёты, асьсэлэн пурысьтам пересьёссылэн куала бервылысьтызы пеньзэ тус- тас карыны. Озьы Булда гурезьысь Булда вӧсь тылкизили (священный огонь) ноку ӧз кысылы. Тӥни малы дуно со Булда гурезь калыкмылы. 30-тӥ толшоре Ижевскын "Алнаш" общественно-политической огазеяськон кылдытэмын. Но отын вань одӥг аспӧртэмлыкез. Кузёбай, Усо, Чумолё но Сьӧд Ошмес гуртъёсын улӥсьёс ог-огзэс ӟеч тодо. Со гуртъёсысь потэмъёс Ижын но ог-огзэс тодо. Сое возьматӥз берло пумиськонмы но. Мӧзмиськомы ми гольык пыд бызьылэм интыосмылэсь. Со музъем вылын гомаз нырысь яратон. Сое чакласа, "Алнаш" огазеяськон пушкы ми эшшо одӥг ёз кылдытӥмы на, нимамы сое "Булда гурезь" шуыса. Ми быдэсъяломы "Алнашлэсь" куронъёссэ. Но асьме куспын кылдэм учыръёсты тыршомы асьмеос учкыны но быдэстыны. Туэ Алнаш ёрослы 70 ар тырме. Со юбилеез ми ас сяменымы пумиталомы. Булда гурезе, вордӥськем гуртамы писпуос мерттомы. Мед лэзёзы соос зол выжы, вӧзаз выль пушъетъёсыз пушъёзы. Алнаш музъем милемыз вордӥз, будэтӥз. Писпуос луозы милям тау кареммы. Булда гурезь йылэ тубыса, ми ум адӟе Байгурезез, кусыпмы кыдёкын. Кусыпмы кыдёкын ке но, лулмы матын. Малпанъёсмы, быдэсъяно ужъёсмы одӥг. Вай бур кидэ, "Байгурезь". Кабыл (ӟеч) кар милемыз, Быдӟым инмар кузёмы! Афанасий СТЕПАНОВ. Сарапулын пумиськонъёс Та нуналъёсы Кун Кенешлэн Тӧроез Александр Волков вуылӥз Сарапулэ. 23 номеро школаын лэсьтӥськон-тупатъян ужъёслэн мынэменызы тодматскиз, вань тырмымтэосты ӝегатскытэк палэнтыны дэмлаз. Нош школаез тупатъясьёс быдэс ар ӵоже уждун басьямтэзылы ӝожтӥськизы. Та нуналэ ик городлэн администрацияз Сарапулын лэсьтӥськон ужъёслэн мынэмзы пумысен кенешон ортчиз. Со кутскиз 23 номеро школаез тупатъянэн герӟаськем ужпумъёсысен. Кенеше люкаськемъёс малпамъя, школаез тупатъян йылаз-пумаз нокызьы уг вуы коньдон ӧволэн, подрядчик но заказчик, озьы ик городлэн администрациез та удысэз ляб чакламен. Александр Волковен ӵош Сарапулэ вуылӥзы Удмуртиысь Архитектурая но лэсьтӥськонъя кун комитетлэн тӧроез Г. Батищев, калыкез дышетонъя министрлэн воштӥсез Л. Захарова. Кун Кенешлэн пресс-службаез. Законлы закон вань Кылем арын Ижевскысь аскивалтонъя ёзъёс - городлэн Думаез, администрациез - одӥг но ӝыны сюрс решениос, распоряжениос, постановлениос кутӥзы. Соослэсь Удмуртилэн но Россилэн законъёссылы тупамзэс эскере Ижевскысь администрацилэн правоя управлениез. Та сярысь ивортӥз управленилэн кивалтӥсез Л. А. Бельских. Со дунъямъя, Ижевскысь аскивалтонъя ёзъёслэн правовой актъёссы вылӥ ӟечлыкоесь. Одӥг но ӝыны сюрс документъёс пӧлысь сизьымез пумысен гинэ судэ вазиськемын, нош палэнтэмын куинез гинэ. Управленилэн кылем арын эскерем ужъёсыз пӧлын - "Удмурт Республикалэн шоркарезлэн статусэз сярысь" Закон. Али со Кун Кенешын, депутатъёслэсь юнматэмзэс возьма. Малы кулэ луиз таӵе документ, кыӵе пайда ваёз со городлы? Ижевск - Удмуртилэн шоркарез. Татын интыяськемын шаеренымы кивалтӥсь вань ёзъёс, татын ортчыло уно ужрадъёс, кытчы люкаськыло быдэс республикаысь, Россиысь яке дуннеысь куноос (Европалэсь биатлонъя чемпионатсэ ик басьтоно ке). Со ужрадъёс республикалэн гинэ бюджетэз чотын уг ортчо, Ижевсклэн но коньдонэз отчы мынэ. Со сяна, Удмуртилэн шоркараз вуись мед шӧдоз городлэсь удмурт шӧмзэ, мед синмаськоз солэн чылкытэзлы, чеберезлы. Ваньмызлы талы но уксё кулэ. "Удмурт Республикалэн шоркарезлэн статусэз сярысь" Закон та ужпумез но, мукет юанъёсты но радъя. Л. А. Бельских интыысь аскивалтонъя законъёс сярысь но вератэк ӧз кельты. Со пусйиз, муниципальной право Россия понна выль луэ шуыса. Соин ик солэн тырмымтэосыз но уно. Со сяна, муниципальной право интыысь аскивалтонэн герӟаськем ужпумъёсты кык но, куинь но амалэн быдэстыны лэзе. Кылсярысь, Ижевскын городысь Думаен - быръем ёзэн - но администрациен - быдэсъясь ёзэн - кивалтэ одӥг адями. Нош Калугаын интыысь аскивалтонлэн та кык ёзэныз кивалто пӧртэм муртъёс. Сояз но, таяз но учыре аслаз тырмымтэосыз вань. Та выллем ужпумъёсты кенешыса сэрттон-пертчон, муниципальной правоез азинтон понна, Ижевскысь администрацилэн правоя управлениез пыриз Городъёслэн союззылэн правоя секциязы. О. ВАХИТОВА. Конкурс: "Маин дуно мыным Пушкин?" "Александр Пушкин - ас вакытысьтыз быдӟым ӟуч поэт гинэ ӧвӧл, со вань калыкъёслэн но вань дауръёслэн быдӟым поэтсы, Европалэн гениез, быдэс дуннелэн данъяськонэз". В. Г. Белинский. Александр Сергеевич Пушкинлэн вордскемез дырысен туэ 6-тӥ инвожое (июне) тырме 200 ар. Нош югыт дуннеен люкиськемез дырысен луиз ни 162 арлэсь ятыр. Та дыр куспын кӧня калык, поколениос воштӥськизы, улон но чылкак мукет ӧре кожылӥз, нош А. С. Пушкинлэн тылсияськись зарни чуро гожъямъёсыз бездыны, вужмыны уг сётско. Солэн кылыз-бурез дуно котькуд адямилы, котькудӥзлэн сюлэмаз вордскытэ кыӵе ке но малпанъёс. Соин ик газетмылэн редакциез лыдӟисьёсмы пӧлын ялэ конкурс - "Маин дуно мыным Пушкин?". Нырысь ик ми вазиськиськом школаын дышетскисьёслы, студентъёслы: гожтэлэ милемлы, мар понна дунъяськоды та быдӟым кылбурчиез, кыӵеен пуксе со син азяды, кызьы сое герӟаны луэ аслад но калыкедлэн улонэныз. Уже кутыны луоз школаын гожъям сочинениостэс но. Конкурслы йылпумъянъёс лэсьтэмын луозы июнь толэзе, А. С. Пушкинлэсь юбилейзэ пусъён нуналъёсы. Вормисьёсты витё синпель кузьымъёс. Возьмаськом, эшъёс, гожтэтъёстэс. Котыртэм Ленинградысь пияш Тямыстон куинь аресъем Елена Ивановна Драгилева ачиз гинэ тодэ, кӧня секыт кайгу поглыьскиз со вылтӥ. Со интыын куд-огез, оло, куасалскысалзы ни, дыр. Нош со ялан пыд йылаз сылӥз. Вордӥськиз Елена Ивановна 1916-тӥ арын Нева шур дорысь городын. Вуоно араз революция гудыртӥз. Собере граждан ож гомаз. Котьмазэ чидано луиз соку. Кутскиз секыт промышленностез ӝутон. Ужаз со Ленинградысь одӥгаз обороная заводын токарь луыса. Ваньмыз умой мынэ вал кадь: картэз вӧзаз, нылпиосыз вань. Быдэс на анаез но. Но азьланяз улонэз чылкак йырчукин берыктӥськиз. 1941-тӥ арын Е. Драгилева картсэ армие келя. Кӧня ке толэзь ортчыса кутскиз война. Ленинград вылэ шуласа усьыло бомбаос, тылӝу ваньзэ пеньлы пӧрмытэ. Кутскиз сютэм улон. Елена Ивановналэн ньыль пиез. Одӥгезлэсь мукетыз покчигес. Ваньзы сиён куро. Война секытэсь куронъёс пуктӥз городын улӥсьёс азе. Трос дырзэ нылкышно ортчытӥз станок сьӧрын. Сылэ но малпаське: "Быдэс на-а квартираез, улэпесь на-а нылпиосыз?" Нош соос, ӟигарзы ӧвӧлэн, бомбоубежищее но котьку уг ватско вал. Койка улэ пегӟо. Сютэм улыса асьсэос тордылэмын. Елена Ивановна пӧртэм турын-куарлэсь быгатэ вал эмъюмъёс дасяны. Со но ӧз юртты ни сютэм нылпиосызлы. Сютэм улыса, огез бӧрсьы огез улонысь кошко кык пиосыз. Кылё бадӟымез но покчи пиез гинэ. Игорь самой покчиез вал. Уг тоды со ыбылӥськонэз, гомась юртъёсты. Нош сютэм улон али ке но син азяз. Огпол, анаез кӧжы пӧсьтӥз. Ӝукез мед небӟоз шуыса, горшоксэ дӥськутэн шобыртӥз но ӝӧк пуме пуктӥз, ачиз уже кошкиз. Игорьлэн выныныз шудэмез потэ, нош соиз урокъёссэ дася. Лӧптылонъяз витьымтэ шорысь гырпумыныз горшокез донгыны шедьтӥз. Кӧжы выж вылэ пазьгиськиз. Кышкаменызы ӝуксэс ӝогак гинэ бичазы но горшоксэс басмаен бинялтыса интыяз пуктӥзы, асьсэос шобрет улэ ватскизы. Анайзы бертыкуз, соос изё вал ни. Соиз шобретэз сэрпалтӥз но, кӧжыез одӥген-одӥген бырйиз. Уг вунэты Игорь вӧйын луэм учырез но. Одӥг пол анайзы ужысь вӧйын бертӥз, сое ӝӧк вылэ пуктӥз но пиоссэ визьма: "Вӧй борды няньтэк эн кутскылэ". Ачид нянь картошказэ кутӥз но магазинэ кошкиз. Возьмаськон дыр дыг ортче. Нош вӧез веръям потэ. Пиос куспазы кенешо ма карыны. Пурт йылын гинэ ке веръямы, анаймы уз но шӧдылы. Озьы ик каризы. "Веръян" сяменызы ӧз но шӧдылэ банка бушамзэ. Кыкназылы но бӧрысь зол йӧтӥз. Собере Игорьлэсь вынзэ эвакуировать каризы. Со сярысь кема гинэ номыр тодмо ӧй вал - быдэс-а со, кулэмын-а? Ожмаськон йылпумъяськем бере гинэ вуиз. Тазалыкез лябӟемен, ӝоген кулӥз со. Елена Ивановналэн ньыль пиосыз пӧлысь одӥг покчи пиез улэп кылиз. Оло, таиз но кулысал ни, ярам песянаез вал. Берпуметӥ нянь юдэссэ но сётэ вал со внукезлы. Ӝоген со но кошкиз улонысь, вормон нуналэз ӧз пумита ни. Огпол Игорь эшъёсыныз азбарын шудэ вал. Отчы легковой машина пыриз. Кузовез усьтэмын. Отын военнойёс пуко. - Атай! - кеськиз Игорь. Бызьыса машина доры вуиз но одӥгезлэн воргоронлэн чыртыяз ӝабырскиз. Соиз пичи пиез ки вылаз ӝутӥз, вешаз. Со вылэм атаезлэн выныз. Сӧсырмем бераз огдырлы гуртаз лэзиллям. Со ик вераз 1943-тӥ арын Игорьлэсь атайзэ братской шайгуэ ватэмзы сярысь. Озьы Елена Ивановна ожмаськон вылын гинэ вить матысь адямиоссэ ыштӥз. Покчи пиез но ӧжыт гинэ сӧсыртэм кылиз. Пиналъёс со пиналъёс ини. Шедьтӥллям боевой граната. Адӟоно ук кызьы со пуштэ. Пуштытӥзы. Ярам улэп кылизы. Тани Игорь Драгилевлэн но вуиз служить карон дырыз. Военкоматэ со моряк дӥсен мынэ. Соку пияш пичигес пароходын моторист луыса ужаз. Оске вал, бадӟым зарезьёсын уяло шуыса. "Уд! - шуизы солы военкоматын. - Тазалыкты - ляб". Блокада бервылзэ кельтӥз уго. Служить карыны шедиз Ижевске. Куинь ар служить карыса, татчы ик кылиз. Куамын куать ар тыршиз "Ижмаш" заводын. Табере со Почётной ветеран, ужаз мастер, диспетчер луыса. Нош пичи дырыз али ке но син азяз на. А. СТЕПАНОВ. Шӧкыч Кар, кар, кар... Школаысь бертӥсь кык покчи пиос куспазы верасько. Алик, писпу вайын пукись пурысь куакаез адӟыса, эшезлэсь юа: - Коли, нош тынад сьӧд куакаез адӟылэмед вань-а? - Ӧвӧл, но куаразэ радио пыр ӵем кылко. Кар, кар, кар потто соос. Песянаймы шуэ: "Радиомы котыре, оло, сьӧд куакаос каръяськиллям ини, кар-р потто". - Нош милямез песянаймы радиомес кылзыса керӟегъяськыны кутске,- вера Алик.- Толон, черсонзэ ик палэнтыса, берло иворъёсты кылзыны ӧдъяз. Оломаиз ӧз яра, кутскиз ук дикторез пыкылыны: "Иж кар, Камбарка кар, Караганда кар, Сыктывкар кар, сое кар, тае кар, марысь мар ке, марымез марым карыса, марым кар, кар, кар, кар..." Отӥяз, серем потэмен, ма верамзэ ӧм валалэ ни. Берыктон уж Аликен Коля доре сётэм ужъёссэс быдэсъяло. - Нош адями нимез мукет кылэ берыктыны луэ-а? - Малы уг луы, луэ,- шуэ Алик.- Тани асьмеос тонэ Коли шуиськом ке, ӟучъёс - Колька, немецъёс Коль шуо кадь, нош еврейёс - Кольырман. Тӥни озьы. Собере Москваысь Госдумаын пукись депутатъёс, адями нимъёсты гинэ ӧвӧл, фамилиосты но мукет кылэ берыктыло ини. Кылсярысь, депутат Жириновский Макашов депутатлэсь фамилизэ грузин кылэ берыктэм. Озьы Макашов грузин сямен луэм Макашидзе. Вот. - Со гинэ мар,- веранзэ ватса на Алик,- чебер апайёс адями йырез но (пиослэсь, конечно) берыктыны быгато, пе. Милям бускельмы Олёш, вить пиналэн семьязэ куштыса, Онись вылэ пыриз. Калык шуэ: Олёшлэсь йырзэ Онись берыктэм. Н. ТЕБЕТЕЕВ. Гурт улон "Рассветын" нунал сайкыт Игра районысь "Рассвет" колхоз котькыӵе вакытэ - азьмынӥсьёс радын. Солы валэктон одӥг - та палъёсын улэ ужась калык. Туннэ но шуг-секытъёслы уг сётскы: пудо вордонын но, музъем котырын но вормонъёссы вань. Хозяйствоен берло кык арзэ кивалтэ Иван Петрович ЧИРКОВ, татын ик вордскем но будэм воргорон, кыллы но ужлы шаплы адями. - Иван Петрович, та нуналъёсы котькудӥз коллектив кылем арлы йылпумъянъёс лэсьтэ, туэлы выль ужпумъёс чакла. Колхозды сярысь ма верасалды? - Ортчемез ар ми понна сокем ик капчи ӧй вал, но калыкмы умой ужаз. Пайда ваизы етӥн, картофка будэтон. Етӥнлэн барышез, кылсярысь, вуиз 40 процентозь. Нош картофкалэн удалтонлыкезъя республикаын нырысетӥ интые потӥм. Чакламмыя ӧз люкаське тысё культураос гинэ: гектарысьтыз кутсам быдэн 15 центнер, малпам вал 19 центнер басьтыны. Люкетӥз кӧс куазь - ю-нянез дырызлэсь вазь куасьтӥз. Йӧл кыскон сярысь ке верано, Лонки-Ворцы фермая та лыдпус 2800 литр луиз, нош Порвайын скаллы быдэ - 3337 литр. Та нуналъёсы колхозъя 7 литр кыскиськом, кылем арын та вакытэ кык литрлы ичигес вал. - Озьыен, азинсконъёсты вань. Ма бордысь соос пото? - Пудо сиёнмы туэ ӟеч. Соизэ толэз скалъёсмес вуж сисьмем куроен сюдӥм, али - силосэн, куромы но чебер. Тулыслы тырмыт дасямын кушман. Малпаськом колхозъя котькуд скаллэсь 3000 литр кыскыны, солы луонлыкъёс вань. - Иван Петрович, тросэз хозяйствоос, шуге-леке шедёнлэсь кышкаса, берло аръёсы пудозэс кулэстӥзы. Тӥляд кыӵе югдурды? - Жаляса верано, ми но та адӟонлэсь ӧм палэнске, пудо йырмы тросэз быдтэмын. Чакласьком 700-800-озь вуттыны. Та быдӟа уллё колхоз понна туж умой ини, малы ке шуоно, арлы быдэ шугъяськиськом возьман интыос ласянь - музъеммы уг тырмы. Гурт калык но трос пудо вордэ, нош возьёс ӧвӧл. Соин ик скалъёсты гужембыт сямен фермаын возиськом. Йӧл дуно усе, кылем арын асдуныз 2 манетозь вуиз, туэ 1 манет 80 копейкаозь уськытыны чакласьком. Ма чотын, шуоды? Закуп чотын, 1 литр йӧлэз али вузаськом 2 манетэн, миым арен ӵошатоно ке, со кык поллы дуно. Азьланяз югдур дунъёсын ӧз ке воштӥськы, урод ум, дыр, улэ шуыса малпасько. Уждун тырон но али ферма бордысь потэ, аванс толэзьлы быдэ сётыны тыршиськом. Мон чакламъя, гурт хозяйство ыштонъёс но, вормонъёс но басьтэ инкуазь бордысь. Зоръёс ӧз ке луэ яке мултэс трос кисьтӥзы ке, котькӧня тон ӟеч ужа, куазь аслэсьтыз лэсьтоз. Соин ик хозяйство ас понназ пӧртэм удысъёс нуыны кулэ, пӧртэм культураос будэтоно. Кылем арын тысё культураосмы ӧз ке удалтэ, пайда поттӥм картофкалэсь но етӥнлэсь. Мынам газет пыр тау карон кыл вераме потэ школамылэн директорезлы В. А. Ушаковлы, вань дышетӥсьёслы но дышетскись пиналъёслы. Соос юрттэмен, кыкетӥ арзэ пудолы кушман будэтӥськом, етӥнэз но картофкаез дыраз утялтӥськом. 1997-тӥ арын дунъёсъя 220 сюрс манет сётӥм вал, кылем арын - 30 сюрс манет. Ваньмыз со юнматэмын договорен. Туэ но ӵош ужаны чакласьком. Вераме потэ на: колхозникъёслы уждун тырон ласянь ӝегаса ке мынӥськом, пинал юрттӥсьёсмылы Выль арозь ваньзэ сётыны сюлмаським. - Шумпотоно таӵе ӟеч кусыпъёстылы, угось кытын но отын школаез мултэс ныпъет карыны кутскизы ни. - Шонер, ми но пиналъёстэк ужаны быгатысалмы, кужыммы тырмыт. Но мынам та ласянь учконэ мукетгес. Будӥсь муртэ котькыӵе ужлы пичиысен дышетоно, отӥяз секыт луоз ни. Собере, семьялы коньдон мултэс шат? Быгатэмзыя мумы-бубыоссылы мед юрттозы, озьытэк няньлэсь шӧмзэ но валалляса уз вуэ. Колхоз кадръёс басьтэ школаысь, нош милемлы азьтэмъёс кулэ ӧвӧл. Тӥни ужпум ма бордын на. Школаен вераськыса, туэ етӥн бусыосмес паськытатыны малпаськом, кизём 130 гектар вылэ, миым 102 гектар вал. - Иван Петрович, кельше-а тӥледлы гурт улонъя туала политика? - Быдэс Россия сярысь мон вераны уг быгатӥськы, нош Удмуртиез ке басьтоно, Правительство ласянь ӟечгес юрттэт мед луоз вылэм. Басьтом колхозъёсты ик. Кин-о туннэ ушъяськыны быгатоз ӵыжак выль техника басьтэменыз, тырмыт дасям удобрениен но мукетыныз? Милям но 80-90 процентэз тракторъёсмы, машинаосмы списать карыны дась. Таӵе ик югдур музон интыосын но. Кивалтӥсьёсмылы кемалась валаны кулэ кадь кудпала мынэммес. Котьма ке но, оскон вань на: депутатъёсмы, оло, визьмаськозы но кутозы сиён-юон поттӥсьёсты утёнъя закон. Милям депутатмы Софья Эльфатовна Широбокова. Чакламъя районысьтымы Кун Кенеше быръем адямиос пӧлысь со самой зол но чупрес ужасез. Одӥг ужрад но Софья Эльфатовнатэк уг ортчы, быгатэмъяз ялан юрттэ. Мон сямен, солэн кужымез тырмоз вуоно быръёнъёсын но вормыны. Таӵе депутатлы тау гинэ карыны кулэ. Районлэсь, республикалэсь экономиказэ ӝутонын С. Э. Широбокова трос лэсьтӥз ни, эшшо лэсьтоз на шуыса оскисько. - Мукет дано адямиосты ӧвӧл ни-а? - Соос трос. Мылкыдзы ке вань, мед пыриськозы депутатэ кандидатъёс пӧлы но. Макем трос луозы асьме парламентын ужез валась адямиос, сокем ӟечесь луозы законъёсмы. Быръёнъёс - со политика. Нош политика но экономика куспазы люконтэм герӟаськемын. Вераськиз Людмила МЕДВЕДЕВА. Шӧкыч "Мынам телевизоре" Куанеръёс но узыръёс Берло аръёсы адямиос кыклы люкиськизы - куанеръёслы но узыръёслы. Сыӵе аспӧртэмлыкез туж ӟеч адӟиськод, Иж город сьӧры потыса. Тани Пазял гурт вӧзын, биатлонъя комплексэн артэ, йыг-йыг сыло коттеджъёс. Куд-огез зэмос замокъёслы укшало. Сыӵе бадӟымесь дворецъёсты ӝутон огвакытэ модае пыриз вал кадь ини. Но бӧрысь лэсьтӥськон трос интыосын пашмиз - оло узыръёслэн коньдонзы быриз, оло немае лушканы луиз. Сыӵе кузётэм коттеджъёс сыло табере, зол но лымы улын сылмыса. Кӧня семьяос отын улыны быгатысалзы. В. БЕЛОМОРСКИХ. Г. С. Симаковлэн вордскемез дырысен - 80 ар Нылпиослы гожъясь писатель но журналист вордскиз 1919-тӥ арын 10-тӥ тулыспалэ (феврале) Ува ёросысь Штанигуртын (ӟучъёс та гуртэз табере Рябиновка шуо) шоро-куспо крестьян семьяын. Дышетскиз Красное черкогуртысь школаын. Со аръёсы ик ӝужаз, луоз, гожъяськон мылкыдыз но. Нырысетӥ заметкаосыз но веросъёсыз потылӥзы куамынэтӥ аръёсы "Дась лу!" но "Егит большевик! Газетъёсын. Ужаны лыктӥз "Егит большевик" газетэ. Со вакытэ ик кужымзэ но мылкыдзэ шӧдӥз пиналъёслы но егитъёслы гожъян удысын. Но со малпанзэ егит дыръяз ик азьланьтыны ӧз кылды - вуиз армие мынон дырыз. Газетлэн редакциысьтыз ик келязы сое. Службаез, 1939-тӥ арын кутскыса, 1946-тӥ арозь кыстӥськиз. Война кутскон аре солэсь частьсэ Туркменистанысь Иранэ вуттӥзы. Со вал отдельной автотранспортной батальонын шофёр: нырысь пал - рядовой, собере - старшой сержант. Бадӟым улонэз но уно шуг-секытъёсты отын шӧмъяз. Машинаеныз лымшор палась меӵ гурезьёс вискытӥ но туж трос сюресъёс вылтӥ ортчылэм, пртэм тӥрлык нуыса-вайыса, куддыръя, кӧлонэз адӟылытэк, руль сьӧраз пукылэм. Кӧня сюрс иськемъёсты ортчылӥз меда?!. Шедьылэм секыт югдуръёсы но: война бере вордскем Людмила нылыз мадемъя, огпол, гурезьёс вискысь сюбег сюрес вылтӥ ортчыкуз, машинаез ӝужыт гурезь пыдсы ӧжыт гинэ чукинскымтэ, огпал урдэсысьтыз бер питранэз омыре ошиськем ни вылэм - кема кӧлылымтэ шофёрлэн синъёсыз сое шӧдылӥллямтэ. Шуак ятвылтыса, машиназэ шонертэм но ӝегатскытэк азьлань валтэм сое. Соин ик шуо ук: одӥг секунд но быронлэсь утьыны быгатэ куддыр. Иран калыкен пумиськылэмъёсыз, кунгож сьӧрысь улонэз тодыны-валаны тыршемез сое ӧтизы гожъяськон уж борды пыр-поч кутскыны. Малпанъёссэ быдэстӥз война бере - 19960- тӥ арын "Ӟечбур, Родина!" книга поттӥз. Отчы пыризы Иранысь нылпиос сярысь веросъёсыз но "Копет-Даг сьӧрын" пьесаез. Армиысь бертэмез бере, ӝоген ужаны кутскиз "Советской Удмуртия" газетлэн редакцияз. Газет поттон ужез ӟечгес тодон валан понна дышетскиз Свердловскысь партийной школаын. Быдэстӥз сое 1950-тӥ арын. 1952-тӥ арын кык кылын ик выльысь потыны кутскиз "Егит большевик" газет (бӧрысь сое "Удмиуртиысь комсомолец" шуизы). Сокугес дышетскем журналистлы инты ӵапак тупаз. Со вакытэ удмурт егитъёслэсь газетсэс соос Иван Гусевен кыкназы гинэ поттылӥзы. Кутскизы удмурт кылэ берыктӥсь луыса. Григорий Степановичлэн журналистикаысь но литератураысь ужъёсыз ог-огенызы люконтэм-висъянтэм герӟаськемын вал. Аслаз гожъямъёсыныз журналист но писатель узырмытылӥз газетэз, отын потылэм ӟеч произведениосыз люкаськылӥзы книгае. Лыдӟисьёсты бордазы кыскылӥзы литературалы но искусстволы сӥзем бамъёс. Григорий Симаковлэсь редакциосын ужам аръёссэ ӟечен тодазы вайыло трос эшъёсыз. Кылсярысь, "Егит большевикын" соос куке но шаерчиен-историкен Степан Зубаревен ӵош ужаллям. Степан Парфёнович егит дырзы сярысь тазьы гожтыса кельтэм: "Али но адӟисько кадь солэсь туж сюлмысь пальпотэмзэ, мыло-кыдо мадьылэмзэ, маке но выльзэ утчаны тыршемзэ". Ӵош ужам эшъёсыз ӟеч тодо Г. Симаковлэсь инкуазен юн эшъяськемзэ. Верало, со усто чорыгась, пӧйшурась но губиясь вал шуыса. Чорыгамез сярысь туж тунсыко тодаз вайылэ И. И. Гусев. Огпол, коньывуон толэзе ини, Григорий Степанович эшъёссэ Виталий Ложкинэз, Тимофей Шмаковез но Иван Гусевез гуртаз, Штанигуртэ, чорыганы чортэм. Мынӥллям машинаен. Гуртысь бадӟым тыметазы визнанъёссэс чӧлтӥллям. Сӥзьыл куазь сӥялэс ини, чорыгнъёс чик уг ӟыгато, пе. Номыр уг шедьы. Сьӧразы пичи калтонзы вылэм: оло, яралоз шуыса басьтӥллям. "Вае бен утчалом",- шуэм Тимофей Иванович. Дӥсьтӥллям ведь сӥялэс вуэ пырыны. Ӧжытак перцовка (пӧсьтурынэн аракы) юыса. Калтонзэс нырысь чӧлтэмзы бере ик ӝыны ведра мында чорыг поттӥллям. Эшшо огпол пыраллям на вуэ. Табере кӧня ке гинэ на поттӥллям. Но соослэн сомында кутэмзы но, котыр люкыса, чорыг лым сиымон луэм. Доразы ӝутскем мылкыдын бертӥллям. 50-тӥ-60-тӥ аръёсы "Удмуртиысь комсомолец" газетлэн редакцияз уно гожтэтъёс вуылӥллям. Соку паськыт вӧлмем пинал натуралистъёслэн ужзы. Нылпиослэн тросэз гожтэтъёссы, дасясь ӧвӧлэн, газет баме сюрытэк но кема кыллё вылэм. Газетлэн тиражез но огвакытэ вылӥе ӝутскылэм, нош бӧрысь усем. Асьме шаерысь творческой организациос кемалась улӥзы ни вал пиналъёслы войналэсь азьло сямен ик нимысьтыз газет усьтон сярысь малпанэн. Со малпан быдэсмиз 1968-тӥ арын гинэ. Выль ужез нырысетӥ радъясьёс луизы "Удмуртиысь комсомолец" газетысь журналистъёс но писательёс Пётр Чернов но Григорий Симаков. "Дась лу!" газетын нырысетӥез луиз валтӥсь редактор, кыкетӥез - кылкутӥсь секретарь. Выль редакцилэн кивалтӥсьёсыз котыразы огазеязы гожъяськон удысысь кужмо егитъёсты. Отын ужаны кутскизы Герман Ходырев, Вячеслав Михайлов, Виктор Ивашкин, Владимир Романов, Елена Глебова, Николай Бигбашев, Менсадык Гарипов но мукетъёс. Пиналъёслэн газетсы лыдӟисьёссэ ӝог шедьтӥз. Пуштросэз нуналысь нуналэ узырмиз, тусбуйыз чебермиз, яркытгес луиз. Лыдӟисьёсыз ӝог йылӥзы, трос вуылӥзы гожтэтъёс но. Редакциысь "штаблэн кивалтӥсез" котырез люкаськылӥзы газетэ дасям вань материалъёс. Со вал котькуд журналистлэсь мылкыдзэ ӝутӥсь командир, вань ӟеч ужъёсты радъясь мурт. Мон "Дась лу!" газетлэн редакцияз со потыны кутскем дырысен укмыс ар ортчыса вуи. Григорий Степановичлэсь ужын ӟырдыт мылкыд кылдытыны быгатэмзэ ӝог шӧдӥ. Со вакытэ ветеран быдэсак азвесь йырсиё вал ини. Лачмыт, зӥбыт, котькинэ бордаз кыскись адями, куаразэ будэтэмзэ ноку уд кылы. Дунне адями шуо кадь сыӵе муртэ табере. Котькуд ужасьлы небыт вазьыны, солэн сюлмаз усьтон шедьтыны, мылкыдзэ тодыны но ӝутыны быгатэ вал. Ӵукна редакцие со котькинлэсь вазь лыктылӥз. Ми вуытозь, ӵукналы малпам ужъёссэ лэсьтыса вуттэ ни вал, дыр. Собере фойее тамак кыскыны потэ, соку ик луо котыраз люкаськисьёс. Кӧня ке минут куспын шулдыр вераськон ӧръяське. Тужгес но - шутэтскон нуналъёс бере. Тодӥськом угось: Григстеп нош ик кытчы ке но чорыганы яке губияны ветлӥз, маке но тунсыкозэ, маскаразэ адӟиз яке кылӥз. Кутскоз со веранзэ, шуак та выллем юан сётыса: - Я, кудды пӧялоды, шулдыртыны быгатоды?.. Собере ачиз кутске. Сыӵе "вить минут" ӝог ортчылӥз. Табере, кабинетъёсы пырыса, рос-прос ужаны кутсконо. Григорий Степанович ӝӧк сьӧрысьтыз жадьытозяз уз султылы. Тамак кыскыны гинэ вис карылӥз. Тыршиз, нуналлы быдэ маке но выльзэ утчаса, дышетон удысэз ӟеч валаса, дышетскисьёслы юрттыны сюлмаськыса. "Дась лу!"-ын редакторъёс вошъяськылӥзы, нош кылкутӥсь секретарь - ӧз. Г. С. Симаковлы тырмысал ни 80 арес. Юбилейзэ пумитан понна, кык арлэсь гинэ кемагес улысал на ке... Нылпиослэн эшсылэн, усто журналистлэн но писательлэн тазалыкез берло аръёсы гинэ лябӟиз. Быгатэмъяз гожъянзэ азьланьтэ на вал бадӟым арлыдэ вуыса но. Кузь творческой сюресэз ортчиз. Пенсие потыса но редакцие ӵем гинэ вуылӥз, выль чуръёссэ пыртылӥз, юрттӥськылӥз, егит журналистъёслы визь-кенеш сётылӥз. Ӟеч тодӥз литва нылпиослэсь война дыръя Дэбесын доразы кадь улэмзэс, со понна удмурт калыклы бадӟым тау каремзэс. Со учыр Литвае командировкае но вуттылӥз. Удмуртиысь газетъёсын калыкъёслэн эшъяськонзы сярысь тунсыко материалъёс потылӥзы. Тодам возиське пенсие потэм гожъяськисьлэсь бадӟым вераськонъёсы пыриськылэмзэ. 1987-тӥ арын "Дась лу!" газетлэн бамъёсаз трос гожтэтъёс печатласькылӥзы "Малы кулэ удмурт кыл?" рубрика улын. Вераськон пуромиз "Монэ ӧз дышетэ бере..." кылуж (статья) потэм бере. Гожъязы пиналъёс но мӧйыос, гуртъёсысь огшоры ужасьёс но дышетӥсьёс, писательёс, тодосчиос но журналистъёс. Г. С. Симаковлэн бадӟым гожтэтэз тазьы нимаське вал: "Мумы-бубыослы но дышетӥсьёслы шара гожтэт". Удмуртлык понна юн сылӥз. Малпаськись писатель но журналист адӟонтэм карылӥз вылтӥяськон, ас кылдэ, калыктэ, историдэ вунэтон сямъёсты, бюрократъёсты-чиновникъёсты. Ялан вералляз, школаын дышетскисьёслы вордскем шаермылэн историезъя нимысьтыз учебникъ1с поттоно шуыса. Со дырысен ог дасо ар ортчиз ни Нош кыдёке-а вуим ни та удысын? Умоез вань кадь, нош историяя дышетӥсьёс али но ӝожтӥсько шаермес тодонъя ӟеч учебникъёс тырмымтэлы - нылпиослы рос-прос дасямын ӧвӧл на соос (учке ай "Удмуртская правда" газетлэн 1998-тӥ арын 16-тӥ декабре потэм номерысьтыз Шарканысь дышетӥсьлэсь гожтэтсэ). Данъяськисько мон: лякыт но гажано адямиез, усто гожъяськисез, кыштыр гинэ ужаса улэм муртэ ӟеч эшъёсыз уг вунэто, умоен гинэ тодазы вайыло. Сыӵе луо соин одӥг аре вордскем журналист но писатель, Вавож ёросын будэм Василий Смирнов, ӵош ужам эшез Иван Гусев, Свердловскын огвакытэ дышетскем эшез Леонид Данилов но мукетъёсыз. Григорий Степанович ушъямзэс возьмаса ноку ӧз улы. Шуг вераны, адӟылӥзы-а сое вылӥ кивалтӥсьёс? Паймоно соизлы но: сомында книгаос поттыса, Писательёслэн огазеяськоназы но пыртэмын ӧй вал со... Леонид ФЁДОРОВ. Яратӥсь сюлэмъёс, огазеяське Святой Валентинлэн нуналыз - вань яратӥсь сюлэмъёслэн нуналзы. Кемалась-кемалась святой Валентин яратонэн ӟырдам кык сюлэмъёсты огазеям. Та нуналэз буре вайыса, Удмурт Республикаысь Егитъёсын ужанъя кун комитет 12 феврале "Аксион" дворецын ортчытэ шоу - Яратӥсьёслэсь праздниксэс. Ӧтисько азьвыл, туала, вуоно туганъёс. В. КУЛИКОВ. Удмурт Элькунын няньлы дунъёсты радъян сярысь Удмурт Элькунысь Правительстволэн Постановлениез 1999 арын 1 феврале Ижевск город � 157 Чабейлы но нянь пыжонын кутӥськись мукет сырьёлы дунъёс будэмен но няньлэсь дунзэ йылэтонтэм вылысь, Удмурт Элькун Кивалтэт пуктэ: 1. Пайда ваёнлэсь (рентабельность) вылӥ быдӟалазэ пызьлэн асдуныз вӧзы дас процент тупатоно. 2. Пайда ваёнлэсь вылӥ быдӟалазэ дас вить процент тупатоно 1-тӥ сортэн пызьлэсь "Пшеничный", ӟег-чабей пызьлэсь "Дарницкий" но "Украинский новый" няньёслэн асдунзы вӧзы. 3. 1-тӥ сортэн пызьлэсь "Пшеничный", ӟег-чабей пызьлэсь "Дарницкий", "Украинский новый" няньёсын вузкарон надбавкалэсь вылӥ быдӟалазэ кызь сизьым процент тупатоно. 4. Удмурт Элькун Кивалтэтлэн 1998 арын 30 декабре юнматэм "Удмурт Элькунын дунъёсты (тарифъёсты) кун ласянь радъян сярысь" 1244 номеро постановлениезъя пызьлы но 1-тӥ сортэн пызьлэсь "Пшеничный", ӟег-чабей пызьлэсь "Дарницкий новый", "Украинский новый" няньёслы тупатэм дунъёслэсь кужымзэс ыштэмен лыдъяно. 5. Та постановленилэсь быдэсъяськемзэ эскероз Удмурт Элькунысь Гурт хозяйствоя но сиён-юонъя министерство, Удмурт Элькунысь Вузкаронъя но бытъя министерство, Удмурт Элькунысь Дунъёсъя но тарифъёсъя министерство. Удмурт Элькун Кивалтэтлэн Тӧроез П. Н. Вершинин. Гожтӥськон-99 Мото шедьтӥз кузёзэ "Удмурт дунне" газет туэ лыдӟисьёсыз пӧлын лотерея ортчытыны таӵе кузьымъёс ӵектӥз вал: коляскаен мотоцикл, электропила, ош но мукетсэ. Табере пумен тодмо луо ни шудо лыдӟисьёсмылэн нимъёссы. Кызьы ивортылӥм ни вал, мото шедиз Игра районысь Кабачи почта ёзэ. Татын 108 экземпляр газетмес басьто. Почта ёзэ пыро "Ленин сюрес", "Сетпиево" но "Знамя" эштосъёс (крестьян хозяйствоос). Соос но шудонэ пыриськизы, асьсэ ужасьёссы пӧлын лотерея ортчытӥзы, шудоосыз кунянъёс но парсьпиос утӥзы. Нош Кун Кенешлэн депутатэз Софья Широбокова аслаз бырйисьёсызлы кык кузьым (борддоре ошон час) ваем. Кузьымъёсты шудытон-утон ортчиз Кабачиысь культура юртын 4-тӥ феврале. Куазь кезьыт ке но ватсаськиз (педлон 30 градус вал), калык лачак люкаськиз. Интыысь администрацилэн тӧроез Елена Питиримова верамъя, берло дыре, пе, кемалась та мында ӧм люкаськылэ ни. Ӟалын пуко арлыдоосыз но, пиналъёс но. Котькудӥз чидатэк возьма, кинлы сюроз мотоцикл. Сцена вылын пичи Иви лотерея билетъёс но газетлы гожтӥськем карточкаосты кыскаса жадиз ни кадь. Малы ке шуоно, нырысь шудытэмын вал кунянъёс, парсьпиос, часъёс но компьютерен учкон дискета (шаермы сярысь фильм). Нош лотерея шудонэз вис карылӥзы гуртысь но редакциысь артистъёс. Кабачиос та ужрадлы рос-прос дасяськиллям, трос кырӟазы но эктӥзы. Люкаськемъёслы милям но кырӟасьёсмы - Светлана Яковлева но Леонид Прозоров - кельшизы. Я бен, кема возьмам дыр вуиз. Газетлэн редакторез Алексей Шкляев ялэ, али, пе, шудытӥськом коляскаен мотоциклэз. Зал чалмиз. Пичи Иви квитанциез поттэ. Шудонэз ортчытонъя комиссилэн секретарез Вера Чиркова лыдӟе Корепанова Агрепина Андреевна. Зал пуштӥз кадь, люкаськемъёс чабо но чабо. Нош пичи Ивимы сцена вылысь уг васькы, бӧрдыны кутскиз, монэ, пе, пӧязы, мотоцикл кузьмалозы шуыса. Зэм, анаез пияшез ӝог буйгатӥз. Кин бен со сыӵе шудо лыдӟисьмы? Агрепина Андреевна Шоргуртын улэ, пенсиын ни. Кабачие со ӝытэ ӧз лыкты вал, Володя пиез гинэ пукиз. Ӵуказеяз со доры куное ветлӥм, нош художникмы Леонид Прозоров шудо лыдӟисьмес суредаз. Со 1933-тӥ арын Пежвай гуртын вордскем, нош бызем Шор Шадбеговое (калык сое Шоргурт гинэ шуэ), задор мылкыдо, ужез яратӥсь Сергейлы. Агрепина Андреевна пичи дырысеныз секытсэ, курытсэ веръяз. Война бере, туж секыт аръёсы Меньил леспромхозэ ужаны ыстӥзы. Собере дас ар тыршиз Зура леспромхозын, нош берло аръёссэ Шоргуртысь школаын ужаз, техничка вал. - Нюлэсэн ужаме али туж шӧдӥське, котькытӥы висе,- синкылизэ ӵушылыса тодаз вае кышномурт.- Ялан вӧсяськисько инмарлы. Со мыным таӵе бадӟым шуд сётӥз. Бен, Агрепина Андреевналэн улон сюресэз вӧй вылтӥ кадь уг ортчы. Куинь пи но куинь ныл быдэтӥз, дырызлэсь вазь пал кышно кылиз. Кузпалэзлэн двоюродной братэз 1973-тӥ арын ӝуаз, юртэз сутскиз. Сергей нюлэскы кораськыны мынӥз но, шудтэм учыре, кыз улэ сюриз. Со луиз улонэн люкиськонэз. Агрепина Андреевналэн куинез ик пиосыз эштосын ужало, кыкез бордаз улэ. Дуно кунооссэ со ӝӧк сьӧры пуктӥз, ческыт шыдэн, сӥлен, сылалтэм огречен, ӵынатэм кӧен, аслаз пӧзьтэменыз куноятӥз. Пумен бускельёсыз но дораз вуизы. Одӥгез но буш лыктымтэ, удмуртъёс сыӵе ӟеч сямзэс уг вунэто, шумпотэмзэс ӵош возьмато, кайгу ке усе, одно ик котьмаин юртто. Кошкон азямы шудо кышномуртмы шуиз: "Коркамы но тани вуж, кемалась сылэ ни, оло, выльзэ пуктыны быгатом ай. Туж бадӟым тау карисько редакцилы, табыдӟа кузьым ваемды понна". Зэм но, ӧжыт шат удмурт гуртъёсын таӵе улӥсь семьяос. Юртты вал котькудӥзлы таӵе секыт улон вакытамы. Сыӵе оскон вань, государство уз вунэты-кушты азьвыл нюлэс корасьёссэ, нянь будэтӥсьёссэ, сӥль-йӧл поттӥсьёссэ но мукетъёссэ. Г. РОМАНОВ. * Мотолэн кузёез Агрепина КОРЕПАНОВА. МУ ВӦЙ ПОТТОН Малы куашказ "Удмуртнефть"? Туэ 25 январе Удмурт Республикаысь Арбитраж судэ "ХНУТ" огазеяськонлэсь "Удмуртнефть" ОАО-ез банкрот каронъя материалъёс вуизы. Соин валче "Удмуртнефть" тани ма ивортэ. Дуннеын му вӧйлы дун юн синэмен, Россиысь нефть компаниос секыт югдуре шедизы. Со вылэ ватсаськиз на 17-тӥ августэ манетлэн куашкамез. Коньдон кризис нефтяникъёс вылэ зол шуккиз: сураськизы вань лыдъян-чотан ужъёс, будӥзы тыриськонъёс. "Сиданко" компания но палэнэ ӧз кыльы. Солэн улонэз уката уродмиз на кунгож сьӧрысь кредит басьтэменыз. Озьы со лэсьтэмын вал, Россиысь Правительстволэн куремезъя, интыысь ул ёзо (дочерней) предприяиосызлы коньдон сётон вылысь. Нош "Сиданко" ссудазэ дыраз берыктыны ӧз вуы, югдур уката уродмиз. Кыкетӥез, "Сиданкоез" юн лябӟытӥз солэн Ангарскысь нефтехимической комбинатэз. Со нош ик шӧдӥськиз "Удмуртнефть" вылэ но. Тӥни озьы "Сиданко" холдинг интыосысь предприятиоссэ вунэтыны ӧдъяз, нефть вузам понна коньдон тыремысь дугдӥз. Соин "Удмуртнефть" выт (налог) но ужасьёсызлы уждун сётъяны ӧз быгаты ни. Югдурез ӧжыт коть умоятон вылысь, "Удмуртнефтьлэн" одӥг толэзь ӵоже поттэм му вӧез таламын вал. Со чотын пытсамын луозы тыронъёсыз бюджетэ, Пенсия фондэ но кӧняез ке мыноз уждун сётъяны. "Сиданкоын" кылдэм югдурез лыдэ басьтыса, "Удмуртнефть" аслаз кужымезлы оске. Со уз кулэсты му вӧй кысконэз но шуг-секытысь потыны быгатоз. "Удмуртнефтьлэсь" кутэм ужрадъёссэ умоен лыдъязы Удмурт Правительство но "Сиданколэн" валтӥсь акционерез - "Интеррос" ХК. Банкрот луон юрттоз лыдъян-чотан ужез умойгес радъяны, уждунъя но вытъёсъя тыронъёссэ быдтыны но огсыр ужаны. "Удмуртнефть" уг малпа ужан интыоссэ но му вӧй поттонзэ кулэстыны. Озьы бере, со выт тыронзэ быдэсъялоз. Валэктон: Республикаямы "Удмуртнефть" огазеяськон 70 процент нефть поттэ. Валля арын лэсьтэм лыдпусъёсъя, солэн 602,2 миллион тонна кысконо му вӧез вань на. Кылдэмез дырысен со 180 миллион тонна нефть поттӥз, яке арлы быдэ шорлыдын 5,5 миллион тонна усе. Миым кыскиз 5,51 миллион тонна, планзэ 102,2 процентлы тырмытӥз. "Удмуртнефтьлэн" акциосын контрольной пакетэз 1994-тӥ арын сётэмын "Сиданко" компанилы. Озьыен, таиз луэ валтӥсь акционер. Удмуртиысь му вӧй поттӥсьёслэн ужъёссы дуннеысь 22 пумо наградаен пусъемын. Г. РОМАНОВ. Некролог Удмурт Республикаысь Кун Кенеш но Правительство мур куректэмзэс верало Кун Кенешысь Наукая, дышетонъя, культурая но егитъёсын ужан политикая комиссилэн тӧроезлэн воштӥсезлы, депутатлы Новокрещенов Владимир Васильевичлы, Камбарка ёросысь депутатъёслэн Кенешсылэн тӧроезлы Новокрещенов Александр Васильевичлы но матысь ӵыжы-выжыоссылы Новокрещенова Валентина Ивановна улонысь кошкемен валче. "Мылысь-кыдысь" - йӧлвылысь Удмурт газетъёсты лыдӟыса, мылкыд буйга. Радио пыр вераськемез, кырӟанъёсты кылзыса - ӝутске. Нош телевизор пыр ас иськавынъёстэ ке адӟиськод - лӧптэ. Аслад калыкед угось - соин ик матынгес, валамонгес, сюлме пыӵамонгес солэн сюлмаськонэз. Тани тодмо пересь кенаке, вань ужзэ вунэтыса, газет ке вуэ, сое кутсконысеныз пумозяз ас понназ но, шара но лыдӟылэ. Арлыдыз бадӟым бере, нуналэн-нуналэн дораз пукылэ. Соин ик мӧзме, шӧдске. Газетэз ке, пе, лыдӟисько, кинэн ке лулысь-сюлмысь вераськем кадь потӥсько. Телевизорез ке учкисько, куное ветлӥ кадь потӥсько. Талэсь но умой ӟеч кыл вань меда удмурт газетъёс-журналъёс поттӥсьёслы, теле-но радиоверанъёс дасясьёслы? Улон-вылонмылэн конгылямез берло дыре ӟеч шӧдӥськиз Удмурт телевиденилэн ужамаз но. Огвакыт шарак быризы ни вал удмурт передачаос. Иворъёсын "Шаер" программа гинэ тодматъялляз. Нош огвакытэ, вить-куать ар талэсь азьло, передачаос пӧлысь ӝыныез удмурт кылын вал ини. Ваньзэ тае валэктыны выро коньдон ласянь шуг-секытъёс кылдэмен. Озьы но, дыр. Но удмурт калык понна асьмелэн телевиденимы одӥг гинэ ук. Соин ик кивалтӥсьёсмылы та сярысь вунэтыны уг яра вылэм. Лыдэ басьтоно устоесь удмурт передачаосты. Нош соосты учкымон, мур пуштросо карон сярысь ӧд сюлмаськы ке, амалтэк пашмозы. Берло дыре телевидениын шӧдскымон ӟеч ужаны кутскизы журналистъёс Анна Федотова, Татьяна Корнилова но Валерий Сидоров. Та эшъёс, куинь кужымез одӥг ӧретӥ лэзьыса, удмурт калыкен мылысь-кыдысь вераськыны ӧдъязы. Передачазы но угось "Мылысь- кыдысь" нимаське. Тужгес но пусйымон луо та передачае ӧтем муртъёс. Пӧртэм удысъёсын шӧдскымон ӟеч ужаны быгато соос. Артистэз но, огшоры ужасез но, вылӥ кивалтӥсез но чагыр экран азе потыса усьтэ ас мылкыдзэ. Кудӥз кызьы пӧрмытэ - соиз мукет ужпум. Нош тодэ одно ик кыле. Тани, кылсярысь, берлоосаз передачаосын гинэ синмаськымон адямиос вылӥллям шуыса адӟиськизы писатель Егор Загребин, кырӟась Валентина Пудова, Удмурт Элькунлэн Тӧроез Павел Вершинин, гурт эштосэн кивалтӥсь Валерьян Никитин, коньдон-ваньбур лыдъясь-чотась Елена Титова. Мур-мур малпаса, маскаръяськыса вакчияк гинэ сётэм юанъёс адямилэсь сямзэ котыр ласянь возьмато. Тани, шуом, Павел Вершининэз тодӥсьтэмез ӧвӧл. Нош кин солэн кузпалыз, кыӵеесь нылпиосыз, ма карыны яратэ, шутэтскон дырыз ке луэ?.. Ас пельыныд кылыса, тодэм потэ угось. Валентина Пудова паймытӥз ас тазалыкез, веськрес мугорыз сярысь сюлмаськеменыз, Егор Загребин - муш вордон бордын выременыз. Гуртын улӥсь муртлэн сюлмаськонэз яркыт адскиз Валерьян Никитинэн пумиськон дыръя. Выльдӥськон шуон шоры долкаса учкиллямтэ соос "Путь Ильича" колхозазы. Сопала-тапала шонаськыса, ваньбурез тус-тас карыса, фермер но мар кариськыса выриллямтэ - колхозын ик ужано кариськиллям. Та дыре, эсьмаса, пайдаё но ужало, шӧдске, адямиос выльысь солэн колхозаз пырыны курисько бере. "Мылысь-кыдысь" передача адямиосты чеберъяса гинэ возьматыны уг тыршы. Соослэсь мылкыдзэс котькуд ласянь тодыны сюлмасько журналистъёс. Тани Валерьян Никитин ик шуэ: вал, огвакыт кудӟытозь юылон дыръёсы. Нош табере туж юн кариське. Экономист Елена Титова но ческыт сиыны, кемагес изьыны яратэмзэ ӧз ваты. Нош Егор Загребин, валамон ини, артист но вылэм бере, чебер нылъёслы синмаськемзэ но кыре поттӥз. Огкылын вераса, котькуд адямилэн аслаз ӟечез но, сокем ушъянтэмез но вань вылэм. Туж кельышлы пӧрме журналистъёслэн вераськон куспазы ик вакчи, чырмыт юанъёс сётъямзы. Собере устоесь учыръёс дасяны быгатэ вылэм Анна Федотова. Озьы тодӥськомы пӧртэм ёросъёсын улӥсьёс сярысь, пересьёслэсь но пичи пиналъёслэсь туала улон-вылон пумысь малпанъёссэс. "Мылысь-кыдысь" передачаез ас быгатэменызы шулдырто кырӟась артистъёсмы Геннадий Бекманов, Геннадий Ганьков. Пумисько ни пыд йылазы али султӥсьёсыз но. Кызьы бен таӵе мыло-кыдо передача бере тау уд кары Удмурт телевиденилы? Озьы ик мылысь- кыдысь мед сюлмаськозы соос асьмелэсь улон-вылонмес яркыт возьматон сярысь. Таӵе мылкыд сётэм потэ на вылэм: ӧжытак рос-просгес кариськыса, кулэ вылэм шуг- секытъёсмы сярысь но вераськыны. Тани, шуом, Павел Николаевич Вершининлэсь кылэм потэ вал, малы со вылӥ кивалтон удысэ вазьгес лыктыны пумит луиз. Кытысь но отысь кылӥське: сое партилэн Удмурт обкоменыз кивалтӥсь В. К. Марисов ас вакытаз туж ӧте вылэм Ижевске. Трос сюлмаськонэз вал, дыр, Е. М. Титовалэн, "Азвесь" банкен кивалтыкуз. Малы та ужзэ со аналтӥз: ӧз пӧрмы-а яке "донгизы-а"? В. А. Никитин Завьял ёросын тодмо адями: кемалась кивалтэ колхозэн, сое азьмынӥсь радын возе. Пӧрмытысал, дыр, быдэс ёросэн но кивалтыны. Оло уг быръё, оло ачиз шыпак гинэ ас эштосаз пукыны малпа? Нош дыр ортче, арлыд но вуэ, адямилы кын корт куртчон вакытаз бадӟымгес ужез но бергатыны кулэ, дыр. Яке нош ик "удмурт сям" люкетэ-а? Мукетсэ но верам потэ на: дыр ортчемъя, "Мылысь-кыдысь" передачалы дышиськиз ини. Возьмаськод сое, тодӥськод - тани нош ик ӝӧк сьӧрын журналист кинэн ке кенешоз, ма но со возьматозы, собере кунолэсь тусбуйзэ синпельлы курыса гожтӥськытозы книгае. Ваньмыз со умой, но огвыллемгес луэ. Передачаез дасясь режиссёръёс, мукет ужасьёс вань бере, малпасько но вылэм куноосты кызьы ке мукет сяменгес но возьматон сярысь. Туж умой луысал, адямиез ас ужан интыяз, дораз, вордскем гуртаз возьматысалзы ке. Ма, туала телевиденилэн луонлыкез туж уно. Возьмалом. Передачалэсь азьпал сюрессэ азинтоз ачиз улон, нош татчыозь ортчемзэ учкыса шумпотоно: вань ук, вань асьмелэн но удмуртъёс пӧлын тыро-пыдо, йӧно адямиосмы. Вань политика, экономика но мукет пӧртэм удысъёсын тыршись визьнодо воргоронъёсмы, нылкышноосмы. Соос валто калыкмес сьӧразы. Нош вань на уно тодмотэмъёсыз но - кыдёкысь гуртъёсын шыпак, данъяськымон уло-выло соос. Соин ик, "Мылысь-кыдысь" передачаез дасясьёслы ӟеч мылкыдме вераса, таӵе курон но пуктӥсько на: йӧлвылзэ гинэ бичано ӧвӧл - утчано, шедьтоно тунсыко адямиосты. А. ПЕТРОВ. Узырлык кылдыто зарни киос "Тюрагай", "Инвожо", "Ожо-вожо" ансамбльёслэн ужазы-концертъёсазы пыриськыса, трос эшъёс-тодмоос шедьтӥ учкисьёс но мукет коллективъёсысь артистъёс пӧлын. Озьы ик тодматски Борис Боталовен но. Со Удмурт кун университетысь "Чипчирган" ансамбле ветлыку, мон "Тюрагайын" кырӟай-шудӥ. Соосын ӵош концерт сётыкумы адӟи, Борис Евгеньевич сцена вылын ассэ туж йӧно но быгатыса возе, жингрес кырӟа но задор эктэ! Университетэз йылпумъямез бере но, Пероггуртын улӥз ке но, "Чипчирганэ" кема ветлӥз на. Дышетсконзэ быдэстэмез бере, Борис Евгеньевичез Пероггуртысь Юбилейной шор ёзо школае ыстӥзы. Отын со кузпалэныз Надежда Прохоровнаен пиналъёсты удмурт кыллы дышетӥз. Борис Евгеньевич котькытчы вутске. "Удмурт кенеш" огазеяськонлэн татысь ёзэзлэн ужаз мылысь-кыдысь пыриське: ёзлэн кивалтӥсезлэн воштӥсез луэ. Йыг-йыг, нокыӵе ужлэсь палэнскисьтэм дышетӥсез син азязы кемалась возё вал ини Культурая министерствоын ужасьёс. Лудорвай дорысь инбам улысь музей лэсьтонын шуг- секытъёс кылдэм бере, Борис Евгеньевичлы ӵектӥзы та ужен кивалтыны. Удмуртъёслэн вашкала улонэнызы со кемалась тунсыкъяське вал ини. Соин ик, чик кема малпаськытэк, выль удыс борды сюлмысь басьтӥськиз. Музейын ужъёс нырысь араз ик шӧдскымон азьланьскизы. Куинь арскын йылаз-пумаз вуттэмын шор ёросъёсысь удмуртъёслэн корка но корка котырзы, кутскемын лымшор удмуртъёслэсь корказэс лэсьтыны. Табере татчы экскурсиосы ветло, республикаысьтымы сяна, кунгож сьӧрысь но адямиос. Соос паймыса учко кылем дауре пуктэм но али выльдэм ӝик-ӝик юртъер шоры. Миым куамын сизьым ужрад но вашкала удмурт праздник ортчытэмын. Музее сюрс кык сю адями ветлӥз. Соос пӧлысь ог сизьымдонэз - кунгож сьӧрын улӥсьёс. Вашкала удмуртъёслэн улон коркаенызы, соослэн гидкуаенызы но арбериосынызы тодматскизы Финляндиын, Венгриын, Эстониын, Голландиын, Франциын, Германиын, США-ын улӥсь тодосчиос. Музейын озьы ик вал Москваын, Санкт-Петербургын но мукет городъёсын улӥсьёс. Калыкмылэсь данзэ но сое валанэз музей вылэ ӝутэ. Котьмаиз отын синмаськымон. Татын ужасьёс куноосты ческыт удмурт сиёнъёсын утялто, соос котькинлы ярало. Зыретэн табань, перепеч, пӧртэм кутэмнянь веръятэк кин чидалоз? Вылаз ик, кырӟан но арган жингыртон дыръя. Татын котьку кырӟало, куноосты пумитаку, Пероггуртысь артистъёс (соослэн ансамбльзылы туэ дас ар тырме). Нош арганэн шудэ ачиз ик Борис Евгеньевич. Таяз аре но музей дасяське куноосты пумитаны но праздникъёс ортчытъяны. Нырысь ик, берло лымы вылтӥ нискыласа но отын погылляськыса, мильым сиыса, Вӧй праздник луоз. Собере - Дӧдьы куштон, Йӧ келян, Гуждор, Гербер, Выль... Нош куноос туэ уката трос луозы, дыр. Малы ке шуоно, музейлэн данэз будэ, сое пумен тросгес калык тодыны кутске, адӟемез потэ. Музей толалтэ но куноосты пумиталлясал, но уг быгаты: сюресъёс уродэсь. Зэм, тракторен чылкытато, но лымы соку ик пельтэ, букосъёс кылдо. Музейын али но, толалтэ, ужъёс уг дугдыло. Лэсьтӥськисьёс тыршо лымшор удмуртъёслэн корказы бордын. Ужзы ӝегаз вал материал тырмымтэен гинэ. Али ваизы. Липетсэ быдэстэм бере, лэсьтӥськисьёс корка пушкын ужаны кутскозы. Ваньмыз умой мынӥз ке, корка туэ улыны вуоз. Нош нырысь ик ӵошатскон радъямын луоз. Отчы пыриськоз юртъер котырын быгатыса ужась семья. Малы ке шуоно, азбар-гид тыр пӧртэм пудо вордоно, бакчаын котькыӵе будос будэтоно, нош куноосты шулдыр мылкыдын но ческыт сиён-юонэн пумитано. Ваньмыз озьы уг быгато. Борис Боталовлэн эшъёсыз оско: та адямилэн малпанъёсыз быдэсмозы. Музей чебермоз- узырмоз, отчы эшшо трос калык ветлыны кутскоз. Пичи Пурга ёросысь Шоринь Юри гуртын вордскем-будэм воргоронлы татын котьма яра. Уката ик чебер потэ инкуазь - шуръёс, возьёс, лудъёс, гурезь бамалъёс. Вордскем гуртэзлэн котыраз но инкуазь таӵегес ик. Борис Боталов эшъёсыныз татысь инкуазез уката узырмытэ. Берло аръёсы трос чияпу, яблокпу, шупуд, беризь, кызьпу, палэзьпу мерттэмын. Соос ӟеч тэлеӟо. Озьыен, инбам улысь музей уката чебер, синмаськымон луоз. Н. ВОЗИСОВ. Блокнотэ шудо вылэм Со учыр вал 1988-тӥ арын 16-тӥ толшоре Удмурт драмтеатрысь директорлэн Б. Е. Саушкинлэн ужан кабинетаз. Дас-а, дас вить-а кузя вал кадь ми отын. Учкиськомы ог- огмы шоры - тодмотэм адямиос. Нош отчы люкаським, "Комсомолец Удмуртии" газетысь пичильтык гинэ заметкаез адӟыса. Н. В. Симанов гожтэм сое. Кин, пе, удмурт кылэн но удмурт культураен тунсыкъяське, лыктэ Удмурт театре. Сыӵе пумиськонмылы ӟуч газет юрттӥз. Н. В. Симановлэн верамезъя, мукет газетъёс таӵе ялон сётыны "кепыраллям". Палжнысь лыктэм вылӥ кузё П. С. Грищенко выль кутскон шоры умойтэм учкиз. Соин но сое калыкмы ӧз гажа кадь. Соку Ижын "Удмурт клубез" усьтон сярысь асьсэлэсь малпанъёссэс веразы инженеръёс Н. В. Симанов но В. А. Осипов. Соослы дурбасьтыса вераськизы Б. Е. Саушкин, тодосчи Р. Ш. Насибуллин, библиотекаын ужась Н. Н. Бочкарева, "Ижмашысь" огшоры ужасьёс (рабочийёс) С. И. Петров но мон (А. С. Степанов). Вераськонмес йылпумъяса, Н. В. Симанов шуиз: "Асьмеос ке ӧм басьтӥське, кин-о басьтӥськоз на удмуртлыкмес утён борды?" Собере собранилэсь протоколзэ нуись муртлы вазиське: "Гожтэ: туннэ выльысь вордӥськиз "Удмурт клуб". Мон но блокнот вылам гожтӥ "1988-тӥ ар 16-тӥ толшор". Озьы калыкмылы тодмотэм адями, ӟучомыны кутскем удмурт пи Николай Васильевич Симанов выль огазеяськонлы кичӧлтэт сётӥз. Революция бере 1920-тӥ аръёсы ӟуч луисьтэм калыкъёслы кӧня ке эрик сётэмын вал. Ижын ужаз "Удмурт" клуб, Москваын - удмурт калыкмылэн сӥё-дано пиез Куӟебай Герд кичӧлтэмъя - "Бӧляк" огазеяськон. Сталин кивалтон вакытэ ваньзэ пачкатӥзы, пыд улазы лёгазы. 1980-тӥ аръёслэн шор вадесазы выль тӧлъёс пельтыны кутскизы. "Перестройка, демократизация, плюрализм мнений, самосознание, аракы интые сок юон". Кутскизы вылӥысен, калыкен кенешытэк. Кутсконэз умой вал кадь, нош улонмы йырчукин берытскиз. Радио, телевидение, газетъёс гожъязы "плюрализм мнений", нош П. С. Грищенколэн "мнениез" мукетгес вал, ӧжыт гинэ ӧз пуктылы со "Удмурт клублэн" ужаз чӧлтэт. Но зэмлык вормиз, калык валаз, кытын зэмлык, "Удмурт клуб" пыд йылаз султӥз. Семья куспын но самосознаниме юн сэзъязы: "Шедьтэм кытчы ветлыны, оломар карозы ай". Дырыз сыӵе вал угось. Уж дорын но куд-ог удмурт эшъёсы ӧз валаллялэ монэ. "Удмурт клуб" юрттӥз мыным калыкмылэсь зэмос историзэ ӟечгес тодыны. Удмуртъёслэн вашкала дыръя улэм-вылэмзы сярысь книгаосты сэрттыны-пертчыны кутски. Бӧрысь ачим валэктон уж нуыны ӧдъяй. Таин валче мар вераме потэ? Мон, огшоры адями шуыса, сюрес вожын сылон дыр ортчиз. Туннэ, туала улон борды ӝабырсконо. Кырӟам-верам сяна, "политика" шуонэз валано. Сак ке ӧм возе пельмес, уд вала, шуккет но вуоз. Блокнотэ шудо вылэм. Шумпотыса отчы выль лыдпус пуктӥ: "1999-тӥ ар, 30-тӥ толшор толэзь". Та нуналэ Удмурт кун университетын удмурт калыкмылэн сӥё-дано пиез профессор Виктор Васильевич Туганаев "Алнаш" общественно-политической организацилэсь ӧссэ паськыт усьтӥз. Пыралэ! А. СТЕПАНОВ. ГОЖТӤСЬКОН - 99 Кизнеръёслы - ош Газетмес лыдӟисьёс понна куайытэм ош дасяське сюрес вылэ потыны. Кызьы ивортылӥм ни, со вамыштоз Кизнер палъёсы. Ошез утон шудонэ пыриськозы таӵе почта ёзъёсын гожтӥськемъёс: В. Бемыж, В. Тыжма, Балдейка, Синяр-Бодья, Муркозь-Омга, Копки, Короленко, Кизнер посёлок но село. Со сяна, Кизнер ёросысь вань гожтӥськемъёс понна - ваньмыз 339 мурт - шудытэмын луоз на дуно кузьымъёсын нимысьтыз лотерея. Шудон ортчоз 23 феврале 11 часын Кизнер посёлокысь Крезьгурлы дышетон школалэн залаз. Лыдӟисьёсмес возьма на эшшо одӥг кузьым - аслаз кырӟанъёсыныз соосты шулдыртоз Геннадий Бекманов. Пумиськонэ лыктыны быгатозы ёросысь вань мылкыд карисьёс, Вузаськозы аудио но видеокассетаос. Тракторез валэн уд ке но вошты... Техникаез возьыны но ужатыны дуно луэмен, ӟеч кузё туала вакытэ валъёс сярысь тодаз вае. Угось гидъёс пудо сиёнэз валэн пыртылон, бакчаез гырон трослы дунтэмгес усе. Ува ёросын тае кемалась валазы ини "Дружба" эштосын. Али татын 199 йыр валъёссы. Ваньмыз соос ужан кужым интыын гинэ кутӥсько шуыса малпады ке, янгышалоды. Ӟеч выжыысь валъёс, тужгес устоосыз, ёросын, республикаын, мукет улосъёсын ортчись спортивной ӵошатсконъёсы пырисько. Эштосын сиес тӥрлыкез но асьсэос дасяло - дунтэмгес усе, со сяна, воргорон киослы ма карыны вань. Вал кыткон котырзэс басьтыны мукет ёросъёсысь но вуыло. Басьяськисьёс тужгес вылӥ дунъяло спортивной сиес тӥрлыкез. Вал уксёзэс будэтон сярысь сюлмасько Ува ёросысь мукет эштосъёс но - "Свобода", "Нылга", "Авангард" ео мукетъёсыз. Г. ЗЕМЦОВА. Быгато ужаны но, шутэтскыны но 40 ар талэсь азьвыл Ува ёросысь 27 гурт одӥг колхозэ огазеяськиз. Али со "Свобода" эштос шуыса нимаське. 1959-тӥ арын колхозникъёс гектарысь 7-10 центнер ю тысь басьтӥзы, скаллы быдэ 700-800 килограмм йӧл кыскизы. Нош али эштосын тыршисьёс удалтымтэ аръёсы но гектарлы быдэ 20 центнер ю-нянь будэто, скаллэсь 4 сюрс килограмм йӧл кыско. Туала егитъёс, хозяйствоын ужасьёс валало, вань вормонъёслы инъет анай-атайёссы кылдытӥзы шуыса. Соин ик дырзэс но, уксёзэс но ӧз жалялэ, азьвыл ужамъёсты - али пенсие потэмъёсты - сӥлы карон понна. Удугучинысь клубе пенсионеръёс мырдэм тэризы - сомында люкаськизы. Та ӝыт соослы шуныт кылъёсын, ческыт сиёнэн-юонэн, шудыр концертэн, капчи мылкыдэн вунонтэм кылёз. Мукет нуналаз клубе эштослэн ньыль бригадаысьтыз али ужасьёс люкаськизы, ог- огзылы концерт возьматӥзы, шулдыръяськизы. Бадӟым семьяен улыны каньылгес но, шулдыргес но вылэм. Али "Свобода" эштос Ува ёросын огез устоез луэ. Бадӟым хозяйствоос пичи юдэсъёслы люкиськон вакытэ выль тӧлъёс сьӧры уиськымтэенызы, оло? Г. ЗЕМЦОВА. Ӝеганы уг яра - сьӧрамы НАТО Туэ 6 феврале Удмуртие вуылӥз Беларусь Республикалэн Россиысь посолэз Владимир Викторович Григорьев. Таяз арняе ик республикаямы вуыны кулэ Беларусьлэн Президентэз Александр Григорьевич Лукашенко. Соин ик журналистъёслы ортчытэм пресс- конференцияз посол бадӟым инты висъяз та ужпумлы. Александр Лукашенко асьме республикаен выльысь кусыпъёс тупатыны малпа, нырысь ик вузкарон, экономика но оборона удысъёсын, шуиз посол. Соин ик Президент сьӧры вить политик гинэ вуоз, отӥосыз - валтӥсь предприятиослэн директоръёссы, концернъёслэн президентъёссы. Владимир Григорьев пусйиз, Беларусьлэн Президентэз асьме республикаен одӥг гинэ документ гожтоз шуыса. Нош кыӵе документ со луоз, ӧз шарая, ватсаз гинэ, Удмуртилы со туж бадӟым пайда ваёз шуыса. Беларусь но Удмуртия юн кусыпъёс тупатыны кулэ кыкезлэсь ик республикаослэсь обороная производствозэс улӟытон понна. Та удысын, шуиз посол, асьмеос котьку но ӵош ужаськомы вал. Владимир Григорьев верамъя, Беларусь йылаз-пумаз вуттӥз ини армия ласянь реформаоссэ. Табере армилы сётоно выль ож тӥрлык. Ӝеганы уг яра - сьӧрамы НАТО. Асьме доры лыктонзэ Александр Лукашенко кӧня ке пол воштылӥз ини. Маин со герӟаськемын вал? Та юанлы посол тазьы валэктӥз: Россиын 17 августэ ортчем югдур, кык но ӝыны толэзь ортчыса, ми доры но вуиз. Та секыт вакытэ Президент калыксэ ӧз аналты. Югдурез азьпалтыса, юн ужрадъёс кутыны быгатӥм. Кызьы тодӥськоды, Беларусьын, Россиын сярысь, вузъёс трослы дунтэмгес вал. Соин ик усьтэм границаос пыр 17 август бере асьме вузъёсмес палэнэ нуыны кутскизы. Магазинъёс шуак бушазы. Соку ик дунъёс тэтчизы. Та учыр бере малпанэ вуимы вузъёслэсь дунъёссэс Россиын кадьгес ик карыны. Со дыре ик будэтӥськом адямиослэсь уждунзэс. Али ваньмыз радъяське ни кадь. Беларусь зарни пӧлын уг уя ке но, азьпала улонэз шоры оскыса учке. Бюджетмы, Россиын сямен, буш уг луы. Уждунэн ӝеганъёс 1-2 арнялы гурт хозяйствоосын гинэ луыло. Азинскыны турттӥськом, ас кужыммы вылэ пыкъяськыса, вань сиён-юонэз но мукет ваньбурез асьме дорын поттӥськом (90 процентсэ). Но туэ ӧз удалты нянен, фуражез но ю нянез палэнысь басьтытэк уг луы. Озьы ик секыт йӧтэ газэн. Со понна Россилы трос тыронмы люкаськиз. Беларусь валтӥсь эшен лыдъя Россиез, шуиз посол. Курадӟонмы, шумпотонмы дыръяно котьку ӟуч калыкен артэ луиськомы. Кылем арын 25 декабре Россилэн но Беларусьлэн Президентъёссы Декларация гожтӥзы огъя государство кылдытон сярысь. Озьыен, ЪЪИ дауре асьмеос выжыны быгатомы, кык государствоосмес огазе карыса. Но та пумысен ас мылкыдзэ калык вераны кулэ на ай. Со югдурез валалоз, дыр, шуиз посол. Асьме адямиос котьку но эшъяськыса, ӵош ужаса улӥзы. Тани али одӥг гинэ но предприятиез басьтоно ке, Минскысь трактор поттӥсь заводэз, солы ужаны юртто Россиысь 700 предприятиос. Сыӵе дуно эшъёсын ми вузкарыны ум быгатӥське. Беларусьлэн Россиысь посолэз республикаысьтымы куд-ог предприятиосы вуылӥзы. Президент А. Лукашенко Удмуртие 11 феврале вуыны кулэ. Со сярысь лыдӟисьёсмес тодматомы на. Т. БАННИКОВА. Ортчоз Уваын Удмуртиысь баскетболистъёс пӧлын йылпумъяськизы зонаосъя ӵошатсконъёс. Соос ортчизы куинь интыын - Можгаын, Кезын но Уваын. Котькуд зонаын финалэ быръемын быдэн 2 команда. Озьыен, азьланяз нюръяськонэ пыриськозы Можга, Грахово, Яр, Игра, Ува но Воткинск ёросъёс. Ӵошатскон ортчоз туэ 12-14 феврале Ува посёлокын. Сур, чеснок но сугон... Ижысь 16 номеро школае люкаськылӥзы "Ижмашлэн" медсанчастьысьтыз Т. Эшкелетова врачлэн участоказ улӥсь адямиос. Нуназе шорын татчы быдэс зал тыр калык лыктӥз, угось та ужрад пумысен азьло ик районын улӥсьёслы ӧтёнъёс ыстэмын вал. Люкаськемъёслы врач тупен-тупен мадиз асьме доры матэктӥсь пыэдлэн кышкытлыкез сярысь. Та висёнэз туэ "А" нимо грипп вӧлмытэ. Соин нюръяськыны адямилэн лябӟем мугорыз уг быгаты, соин ик кулылон учыръёс но пумиськыло. Озьы ке но, висёнлэсь утиськыны тыршоно. Дуно эмъюмъёсты туэ ваньмыз ик басьтыны уг быгаты. Но уже кутыны луэ пӧртэм турынъёсты. Тужгес но пайда сёто чеснок но сугон. Адямиос паймыса кылзӥзы врачлэсь дэмланъёссэ. Кылсярысь, мугор ӟырдам дыръя умой юрттэ вылэм сур. Эшъёсылэн дэмламзыя, сое пӧсятыса юоно кӧлон азьын но ӵукна. Пумиськон ӟеч мылкыдын ортчиз. Зэмзэ но, берло аръёсы коньдон ӧвӧлэн тазалыкмы шоры киынымы шонтӥськом. Но вань на калыклэн дауръёсын люкам визез, инкуазьысь басьтэм тодон-валанэз. Соин ик врачлэсь Т. Эшкелетовалэсь та уж борды басьтӥськемзэ умоен лыдъяно. Т. МИРОНОВА. Алнаш палась иворъёс Ворттылон - кӧттырон Шумпотӥзы вал алнашъёс вӧзтӥзы ик Казань - Ижевск паськыт сюрес лэсьтэмлы. Табере куд-ог анай-атайёс ӧпкелё ни - я огезлэн нылыз ыше, я мукетызлэн. Мугез нош огшоры но кадь, паймымон но вылэм: егит нылъёс дышиллям бадӟым сюрес кузя кыдёкысь городъёсы кошкись шофёръёсын ӵош ворттылыны. Шофёръёслы мар-о, пуксёд ке, пуксьы, ӵошен сюрес капчигес. Нылъёслы но кельше, лэся: кабинаын шуныт, кӧттыр, дунне паськыт. Секыт уж ӧвӧл ук со... Алнашысь ёрос администрация та ужпумез но мукетъёссэ эскериз дышетӥсьёсын, йӧнатӥсьёсын ӵош. Тазалыксы лябӟем сяна, быдэ вуымтэос кыстӥсько вина юонэ, тамак кысконэ. Наркотик шуонэз но шедьтыны луэ ни, лэся. Алнаш администрация, тае лыдэ басьтыса, быдэ вуымтэосын ужанэз эскерись нимысьтыз ёзэт кылдытоз. Ачид ке ӧд, кин-о сюлмаськоз? Улон-вылон шугомемын бере, туала вакыт тужгес но сюлмаськыны кулэ, дыр, астэ ачид страховать карон пумысен. Кин тодэ, ужтэк но кылёд, висьыны но усёд, кин чаклалоз, больницаосын ужасьёс сяна. Алнашысь валтӥсь врач Колесников Н. И. верамъя, эмъяськонъя страхование туж бадӟым юрттэт сётэ ёросысь больницаын ужасьёслы пайдаё ужаны. Бюджетысь коньдон матаз но ӧй тырмысал эмъюм басьтыны, висисьёсты сюдыны. Эмъяськон ласянь страхование пыр басьтэм коньдон ик юрттӥз на сӥль, кеньыр, картофка дасяны, юртэз тупатыны, техникаез выльдыны. Озьы бере, капчигес луэ ужаны йӧнатӥсьёслы но. Ортчем арын ужаммес эскерыса, шуэ Н. И. Колесников, Алнаш ёросысьтымы администрация ужасьтэмъёсты, нылпиосты, пересьёсты но ӧлексыосты страховать карон сярысь ужрадъёс кутӥз. А. АНДРЕЕВ. Депутатэн кенешон Александр Горошников: "Калыкез гажаськод ке, со тыныд оске" Шаерамы тодмо политикъёс пӧлысь одӥгез луэ Александр Горошников. Тужгес но ӟеч тодо сое Дэбес районын. Удмурт кун университетэз йылпумъямез бере (исторической факультетэз), ялан ужа татын. Дышетӥз историлы, вал завуч, партийной ужась, администрациысь отделлэн кивалтӥсез, нош 1994-тӥ арын луиз районын потӥсь газетлэн редакторез. Александр Горошниковлы миым 40 арес тырмиз. Вордскиз Можга районысь Выль Ӟуч Сюгаил гуртысь дышетӥсьёслэн бадӟым семьяязы. Пичиысен дышиз шуг-секытэзлы, анай- атаезлэн быръем сюрестӥзы мынӥз. Мылысь-кыдысь пыриське общественной уже. Вить ар тыршиз Вылӥ Кенешын, али луэ Кун Кенешлэн депутатэз. Огдыре ужаз но дышетскиз Урал социально-политической институтын, политолог луиз. Тӥни таӵе политикен но депутатэн Александр ГОРОШНИКОВЕН туннэ вераськонмы. - Александр Дмитриевич, ойдолэ, кенешонмес ӧдъялом депутат ужъёсты бордысен. Трос-а, ӧжыт-а, но 9-тӥ арзэ удмурт парламентын тыршиськоды ни. Мар верасалды Вылӥ но Кун Кенеш сярысь? - Валамон, Вылӥ Кенешын тэтэ карись вал. Депутатлэсь ужзэ быдэсъян капчиен уг сётскы, уката ик секыт вал нырысетӥ созыве. Мон понна ваньмыз выль потылӥз. Кун Кенеше бадӟымгес песьтэрен вуи ни. Озьы ке но, Вылӥ Кенешын пайдаёгес ужам, нош таяз созывын трос керетонъёсын, тупамтэосын, вожвылъяськонъёсын депутатъёс кужымзэс быдтылӥзы. Соос юнме шорысь ӧз потылэ. Кин Кун Кенешлэн кивалтӥсьёсыз палан ӧй вал, соослы ик трос йӧтылӥз. Но куддыръя парламентын валамтэос бырылӥзы но кулэ решениос кутылӥм. Кызьы сое уродэн вералод? Бен, кык Кенешъёслэсь ужзэс нокызьы уд ӵошаты, сыӵе мертэтъёс малпамтэ на. Но Вылӥ Кенеш трос умоесь документъёс кутӥз. Соос пӧлысь самой бадӟымез но кулэез - Удмурт Республикалэн Конституциез. Улон азинскемъя, отчы воштонъёс но пыртӥсько ни. Сое уродэн уг вераськы. Кун Кенеш но татчыозь мыло-кыдо ужаны выриз. Туннэ уг вераськы ни интыосын ас коже кивалтонэз пыӵатонлы пумитъяськонэз, Конституцияя Судэ пыриськемез но музонзэ. - Депутатлэсь ужзэ быдэсъян мар сётэ? Трос-а дырдэс но кужымдэс быдтӥськоды? - Общественной уже пыриськиськод ке, дырен лыдъяськыны уг луы ни. Тани кӧня ветлоно луэ Ижевске, арлы быдэ 2-3 толэзь городын улӥсько. Со борды ватсано на вазь ӵукна но бер ӝыт бырйисьёсын пумиськонъёсты. Собере аслэсьтыд уждэ но быдэсъяно. Арняяз кык-куинь нуналлы коть кошкиськод ке, кӧня ужпумъёс люкасько. Умоез со гинэ: сессиос вакытэ вуылӥсько министерствое, кун редакциосы но мукет ужпумъёсты быдэсъяны быгатӥсько. Депутатлэн ужез каньылэн уг мыны. Со тазалык вылын но шӧдӥське. Но калыкен пумиськонъёс мылкыдэз ӝуто, бырйисьёсы данак куронъёсын вазисько. Котькудзэ улонэ пыӵатыны юрттӥсько, инметӥ лобаса уг ветлӥськы. Нош таӵе секыт, суро-пожо улон вакытэ адямиос депутат шоры оскыса учко, солэсь ӟеч лэсьтэмзэ возьмало. Мынам округе али быдэс район, нош Вылӥ Кенешын кык кузя ужам. Но калыкез гажаськод ке, со тыныд котьку оске. Нош калык понна ужаны номыр жаль уг поты, со ватсаса кужым сётэ. Куд-огез вераське депутатлэн привилегиосыз, кыӵе ке льготаосыз но исаны-йӧтылыны луонтэм правоосыз сярысь. Та ласянь вань Россилэн законэз. Но мыным нокыӵе сыӵе правоос кулэ ӧвӧл. Тани кык пичи уждун мында (100 манет) коньдон чыры-пыры ужъёслы гинэ тырме. Депутатлы со туж ичи. Сое-а привилегия шуод? Ижевске дунтэк ветлонэз шат майбыр улонэн лыдъялод, но редакторлэн уждунэныз кемалась штанитэк кыльысал ни. Котькин котькызьы мед малпалоз, но депутатлэн ныпъетэз капчи ӧвӧл. Кин сое ӧз веръя на, одно ик ӵектӥсько оскалтыны. - Александр Дмитриевич, вераськонъёс мыно, парламент шори люкиськыса ужа шуыса. Шонер-а со? Озьы ке, тӥ кыӵе люкетаз? - Кун Кенешлы Тӧро быръем бере ик парламент кыклы люкиськиз: вань Волков пала дурбасьтӥсьёс, солэн адямиосыз, шуыны луоз. Мон отчы уг пыриськы. Но котьку чакласько, кыӵе ужпумез соос ӝуто. Калыклы, бырйисьёслы тупало, интересъёссэс утё ке, мон со ужпумъёс понна куараме сётӥсько. Но оглом вераса, Александр Волков ужа Ельцин пала, солэн буржуазной сюресэз понна. Ми, коммунистъёс, соин оградэ ум султэ, ӵош ум мынэ. - Сессиосын ужамды сярысь вакчияк вералэ вал. - Отчы котьку дасяськыса мынӥсько, эскероно ужпумъёсын пыр-поч тодматскисько но собере гинэ вераськисько. Но сессиосын мыным пӧсь йӧтэ, малы ке шуоно, эшшо быръемын на регламентъя группае. Таизъя но микрофон азе ӵем гинэ потано, Кун Кенешлэсь Тӧрозэ интыяз пуктоно луэ. Куддыръя, югдурез уродмытонтэм вылысь, маскаръяськон (сатира, юмор) амалэз но кутӥсько. Но жаляса верано луэ, куд-огез сое уг вала. Озьы ик уг палэнтӥськы калыклэсь визьмо веранъёссэ но. Со умоен гинэ берытске. Но егит, задор мылкыд, дыртон сям ӟече уг вутто. Соин ик ялан дышетскисько, арлыдо политикъёслэсь адӟем карисько. - Александр Дмитриевич, тӥ историк, политолог, нош мар вуттӥз журналистикае? Вань- а кыӵе ке мугъёсыз? - Районысь потӥсь газетэн кемалась кусыпъёсы вал. Материалъёс гожъяй, тужгес но трос партийной ужын дыръям. Нош редакторе пуксьыны шӧдтэк шорысь ӵектӥзы. Кема малпаськеме бере соглаш луи. Та удысын но тэтэ карись уд шуы. Редакцие лыктӥ 1994-тӥ арын. Тӥни озьы дыр ӝог ортче. Прессае вуттӥз, шуыны луоз, азьвыл гожъяськеме но туала вакыт. - Тӥ кивалтӥськоды калыклы самой матысь газетэн. Прессаез ньылетӥ властен лыдъяськоды-а? - Быдэсак озьы шуыны уг луы. Но прессалэн кужымез бадӟым, тужгес но калыкен ужанын, солэсь йырвизьзэ суран-пожанын. Малы ке-а интыысь администрацилэн газетэз ас кияз воземез потэ, чакланы турттэ. Но со ноку озьы уз луы, редактор ке юн сылӥз, ӧз ке вузаськы. Озьыен, газетэн кивалтӥсь бордысь тросэз потэ. Мон властьлы уг йыбыртъяськы. Асме озьы возьыны юрттэ Кун Кенешлэн депутатэз но Россиысь коммунистической рабочей партилэн адямиез луэме. Соин ик газетэ нокинэн пачкатэмын ӧвӧл. Куд-ог кивалтисьёсты газетын тышкаськыны-куаретыны быгатӥськом, но чыры-пырыос пӧлы ум выиське. - Кызьы учкиськоды журналистъёслэн вузаськемзы шоры? - Оглом, урод. Со чебер сям ӧвӧл. Сыӵе журналист ассэ но пӧя, уно сюрс лыдӟисьёссэ но. Мукет ласянь, кин вузаськыны дышемын, со одно озьы лэсьтоз, номырин уд дугдыты. Сыӵе гожъяськисьёсты одӥг ласянь гинэ валаны луэ: пресса туж секыт зӥбет улэ шедемын. - Александр Дмитриевич, мае улонын уд яратӥське? Мар понна адямиосты гажаськоды? - Высоцкийлэн кырӟанысьтыз кадь уг яратӥськы, ку тыныд мышласянь ватскыса ыбыло. Туж кышкыт сям- вузаськон. Адями азьло ассэ вуза, собере - Родиназэ. Соин ик кин верам кылызлы юн, уг пӧялляськы, ӟеч ужа, сыӵе адямиосты гажасько. - Нош социализмез берыктысалды на-а, солэсь уд мӧзмиське-а? - Уг мӧзмиськы, но юн, сюлмыным оскисько, асьмеос, Россия уз ӝутскы, социализмлэсь умойзэ, ӟечсэ ӧм пыӵатэ, ӧм басьтэ ке. Сое мон нырысь ик герӟасько ваньбур (собственность) сярысь ужпумен. Со вань калыклэн луыны кулэ. Отысен гинэ кутскоз будон-ӝутсконмы. - Улонын мар понна нюръяськиськоды, мар понна ужаськоды, кытчы ке дыртӥськоды-а? Кыӵе улон гожды? - Кызьы верай ини, вордски гуртын. Нош дышетскыны ветлӥ городысь школае. Валамон, гуртысь пиез эшъёсы вӧсь карыны, ултӥяны выро вал. Соку атае шуиз: "Эн кышка, кузязы эн ветлы..." Со кылъёсты ноку уг вунэтӥськы. Озьы ик лэсьтӥ, дыши пунэмзэ но берыктыны. Нош улон гоже таӵе: "Нюръяськоно, утчано, шедьтоно но сётсконо ӧвӧл". Асме дыртӥсь-куалектӥсь сямо ӧй шуысал. Со мыным трос юрттэ. Тамак кыскыны ӧдъяй, 17 арес мыныку, нош кызь аресысен умой-умой пурккетӥсько ни. Ӝуждалае шоро-куспо, 168 сантиметр, секталае мултэсгес. Но август бере кӧня ке восьми, эшшо сыӵе одӥг кризис луиз на ке, секталае мултэс уз луы ни. - Анай-атайдылэсь мар басьтӥды? - Атаелэсь - улонын юн сылон, сётэм кылдэ быдэстон, нош анаелэсь - калыклы ӟеч лэсьтон сям. - Эшшо одӥг юан сёто на. Кыӵе семьяед, Александр Дмитриевич? - Кышноеным 20 ар улӥсько, кык нылпи будэтӥськом. Семьяелы шумпотӥсько, тау карисько, сотэк, оло, адями но ӧй луысал. Соос мыным котыр ласянь трос юртто, валало монэ. Данъяськисько соин но, куке коммунистъёсты вӧсь карыны, зӥбыны, пачкатыны ӧдъязы, мон ӧй кышка, нокинэ, асме но ӧй вуза, озьы ик бырйисьёсме но. Шумпотӥсько, али но калыклэн ӟеч улонэз понна нюръяськисько-тыршисько шуыса. Соин герӟаськемын шудэ но. Вераськиз Геннадий РОМАНОВ. Туспуктӥз Владимир КАМАШЕВ. Вуоно пумиськытозь, Ижевск! Сыӵе мылкыдын йылпумъяськиз толон биатонъя Европалэсь куатетӥ чемпионатсэ сӥё- дано ворсан Операя но балетъя театрын та ӝытэ тросгес чузъяськылӥзы Россилэн, Польшалэн, Германилэн гимнъёссы. Та куинь странаысь спортсменъёслы удалтӥз, шуыны луоз, чемпионатын. Люкаськемъёслы тау карон кылъёсын вазиськиз ӵошатсконъёсты радъянъя комитетлэн председателез, Удмурт Правительстволэн Тӧроез Павел Вершинин. Ӟечкыласа вераськизы Кун Кенешлэн Тӧроез Александр Волков, Ижевсклэн мэрез Анатолий Салтыков. Соос ик вормисьёслы сётӥзы нырысетӥ медальёсты. Чемпионъёсты ӟечкыланэ пыриськизы шаерысьтымы тодмо адямиос Галина Кулакова, Василий Тарасов, Валерий Медведцев, Евгений Одиянков, дуннеысь биатлонистъёслэн огазеяськонысьтызы техникая делегат Михаил Корбит. Со, кылсярысь, пусйиз: "Республикады ӵошатсконъёсты ортчытыны быгатӥз дуннеын тупась куронъёсъя. Сое радъясь вань ёзъёс ужазы туж ӟеч. Одӥг интыысь но шексэ ӧм пумиталэ. Со понна бадӟым тау шуисько вань вылӥ кивалтӥсьёслы, Спортъя кун комитетын ужасьёслы, милицилы, судьяослы, "Строитель" профилакториын тыршисьёслы, шутэтсконэз радъясьёслы. Малпасько, матысь дыре Ижевскын дуннелэн чемпионатэз но ортчоз шуыса. Соин ик кемалы ум люкиське. Вуоно пумиськытозь, Ижевск!" Ӵошатскон но интыос сярысь тодматом газетлэн вуоно номераз. *** Табере гуртъёсысь куасэн бызьылӥсьёслы ивортонмы. "Удмурт дунне" газетлэн кубокез понна ӵошатсконъёс ортчыны кулэ вал 19-21 феврале, ёросъёсысь спортъя комитетъёслэн кивалтӥсьёссылэн куремзыя, ӵошатсконъёслэн дырзы воштэмын. Табере соос ортчозы одӥг арнялы бергес - 26-28 феврале, Шаркан черкогуртын. Н. БАЙТЕРЯКОВ. Ивор медаз кары кер-нор Пӧртэм удысъёс али лэсьто миымлы йылпумъянъёс. Асьсэлэн азинсконъёссы но шуг- секытъёссы вань ивор вӧлмытӥсьёслэн но. "Удмурт дунне" газетлэн юанъёсызлы валэктэ республикаысьтымы печатья но иворъёсъя министр Юрий МЕДВЕДЕВ. - Асьмеос азьланьын весь ӟечезлы оскиськом. Нош ортчемзэ тодэ вайыкумы шуиськом: ярам, улэпесь коть кылим ай. 1998-тӥ ар та ласянь пӧртэмгес-а вал, Юрий Иванович? - Пӧртэм ӧй вал. Паймыса быриськод, ява: калык весь ёрме, нянь юдэс шедьтон сярысь малпаське, нош иворъёслы кулэяськемысь уг дугды. 1999-тӥ ар понна гожтӥськон азьын редакторъёс азе министерствомы таӵе курон пуктӥз: газетъёслэн но журналъёслэн тиражъёссы 1998-тӥ арын мында ик мед кылёзы. Данакез редакциос таӵе ужпумез умой быдэстӥзы, Россиын но Удмуртиын югдур чутрак уродмиз ке но. "Удмурт дуннеды" тиражзэ будэтӥз 2056-лы, "Известия Удмуртской Республики" - 3,5 поллы. "Ӟечбурез" басьтыны кутскизы 1500-лэсь уноез. Тиражъёссэс утизы вань городъёсысь но уно районъёсысь редакциос. Лыдӟисьёссэс будэтӥзы Сюмсиысь "Знамя", Шарканысь "Вестник", Селтаысь "Октябрь" но мукетъёсыз. Озьы ке но, ваньмыз озьы ушъяськыны уг быгато. Кылем арез ӧз "сутылэ" "Удмуртская правда", удмурт журналъёс, Пичи Пургаысь "Маяк". - Мугзэ валэктыны шуг ӧвӧл, дыр. Коньдон тырмымтэен, журналъёс дыраз уг печатласько но лыдӟисьёс доры бер вуо. Мукет аре адями солы уг гожтӥськы ни. Озьы ӧвӧл шат? - Соиз зэм. Тӥни малы редакциос утчаны кулэ коньдон поттон но сое шыръян амалъёс. Соос ичи ӧвӧл. Шуом, ялонъёсты печатланъя кема дырлы чаклам огкыл (договор). Газетъёстэ нуллэмез понна почта укыр бадӟым дун кесе ке, соосты вӧлмыты мукет ёзъёс пыр. Сыӵе сюресэ выжизы Сарапулын, Глазовын, Воткаын. Выль амал утчало Шарканын. Газет поттыны быдтэм коньдон пӧлысь ог ӝынызэ редакциос тыро асьсэ барышсы (доходзы) чотын. Зэм, та удысъя планзэс уг быдэсъяло "Известия Удмуртской Республики", "Пригородные вести" (Завьялово), "Новый путь" (Дэбес). - Юрий Иванович, почтаос музэн ик, милемды кекато полиграфияя комбинат но типографиос. - Абдранэз ӧвӧл. Шуныт, ву, бумага - ваньмыз дуноя. Югдур куре котькуд копейкаез шыръяны. Тачакез газетъёс шергес печатласько. Редакциосын ужасьёс кулэстэмын. Таин ӵош ик редакциос мед валалозы полиграфистъёслэсь сюлмаськонъёссэс. Дунын материал но сырьё, ву но шуныт басьтытэк, газетэз уд потты. "Удмуртская правда", "Известия Удмуртской Республики". "Удмурт дунне" газетъёслэсь редакциоссэс Ижысь полиграфкомбинат пыкылэ, дунзэс дыраз уг сёто шуыса. Шонер пыкыло. Пунэмен тыронэз берыктыны луэ коньдонтэк но, пӧртэм амалъёсын. Таоссэ редакциос уг утчало. Валамон ини, сыӵе югдур понна министерство но янгыш. Тӥляд лыдӟисьёсты шумпотыса тодӥзы газеттэс выль амалэн печатланы кутскем сярысь. Миым но туэ кӧня ке номер дасямын офсет амалэн. Ижысь полиграфкомбинатын ужаны кутске Германиысь ваем "Унисет-60" машина. Выжыкылын кадь чебер газет суреда. Со понна но тыронмы лачак. Таӵе секыт дыръя но ог люкетэз типографиос басьто азинсконъёс. Ваньбур поттонзэс шарканъёс будэтӥзы 3,6 процентлы, пичи пургаос - 3,8-лы, селтаос - 7,8 процентлы, якшур-бодьяос - 28,1-лы, глазовъёс - 75,8 процентлы (вань ёросъёсты мон уг вера ни). - "Удмуртия" издательство таки печатланы уг быгаты республикамылы сӥзем энциклопедизэ. Кӧняез ке тодмо писательёсмы книгаоссэс потто мукет издательствоос пыр. Югдур умоялоз-а? - Веранэз ӧвӧл, югдур секыт. 1998 арын издательство энциклопедиезлы басьтыны кулэ вал 800 сюрс манет. Бюджетын со пусъемын нимаз чурен. Ӧз вуы одӥг манет но. Туж кулэ литературалы чакламын ке ог 700 сюрс манет, висъямын 316 сюрс гинэ. Котьку сямен ик, 1997-тӥ арын но "Удмуртия" поттӥз вал дышетскон литература. Калыкез дышетонъя министерство со понна 256 сюрс манет ӧз тыры. Туннэ но издательствоен министерство ӧз гожтэ туэ сыӵе литература дасян сярысь огкыл. Маин школае мынозы пиналъёс вуоно сӥзьыл? Щуг вераны. Калыклэн но, Культурая министерстволэн но, библиотекаослэн но выль книгаослы коньдонзы ӧвӧл. Тӥни малы издательстволэн кеносъёсаз уно сюрс манет тыр литература басьтытэк кылле. Вылаз ик, Удмурт потребсоюз ворсаз районъёсысь книгаен вузкарон магазинъёссэ. Ваньмыз со "Удмуртилы" люкетӥз арлы планзэ быдэстыны. Ярам коть, Финляндиысь Калыкез дышетонъя министерство но Кастрен огазеяськон (общество) коньдон висъямен печатламын удмурт калыклэн ортчем сюресэз сярысь "Даур куара" книга. - Тӥ ик кыл кутӥськоды телевидение но радио понна... - Россиысь бюджет чотын "Удмуртия" кун телерадиокомпания басьтӥз чакламлэсь ог 97 процентсэ коньдон, асьме республикаысь бюджет чотын - 60,6 процентсэ. Озьы ке но, со быгатӥз кӧня ке пусйымон азинсконъёс басьтыны. Миым июле министерстволэн коллегиез тодматскиз пӧртэм кылъёсын телевозьматонъёсты но радиоверанъёсты радъямен. Отын чузъясько удмурт, ӟуч, бигер, пор кылъёс. Коллегия тае умоен лыдъяса пусйиз тырмымтэосты но. Радъямтэ Татариысь но Мари Республикаысь программаосын вошъяськон. Интыосысь радиоверанъёсты утён вылысь, данак ёросъёсын радио редакциос но газет редакциос огазеямын. Грахысь, Можгалась но Пичи Пургалась радиоредакторъёслэн ужамзы сярысь ужпум озьы ик кылзэмын министерстволэн коллегияз. Ӟечен пусъемын Грахысь радиоверанъёс. Можгалась но Пичи Пургалась редакторъёслы Елена Утехиналы но Михаил Васильевлы дэмламын тросгес дыр висъяны экономикаез но ваньбур поттонэз возьматонлы. Министерство но Журналистъёслэн союззы ӵошен радъязы журналистъёс пӧлын пӧртэм ӵошатсконъёс, пумиськонъёс, адӟытонъёс (выставкаос). - Котьма ке но, азьлане кызьы учкиськоды, Юрий Иванович? - Одӥг кылын уд вера. Трос на йылаз-пумаз вуттымтэ ужпумъёс. Учкелэ асьтэос. Печать удыслы гинэ туэ кулэ 22,2 миллион манет. Коньдон ужпумъёсъя министерство сӥзе 13,3 миллион. Соин валче выльысь кулэстоно луоз интыысь изданиосты печатланэз. Кужым тырмоз районъёсын газетъёсты арняяз огпол поттыны, городъёсын - кык пол. Ушъяськыны ум быгатӥське бумага ласянь. Ар куспын со кулэ 500 тонналэсь ятыр. Соликамскысь комбинат висъяны дась 200 тонна. Шелеп, пе, уг окмы. Нош музон предприятиос бумага понна лекос бадӟым дун куро. Котьма ке но, суй-пыдэз юскыны уг яра. Вераны луэ: газетъёс, журналъёс, книгаос, телевозьматонъёс но радиоверанъёс дыраз вуозы калык доры. - Туэ Ижын ортчоз "Россиысь вань пресса-99" фестиваль. Со но трос кужымез кулэ кароз. - Со гинэ шат? Кутскиз Кун Кенеше быръёнъёслы дасяськон. Депутатэ кандидатъёс вазиськозы ивор вӧлмытон ёзъёсы. Куд-огез тыршозы пресса пыр сьӧдманы музон муртъёсты. Журналистъёс сыӵе "ожмаськонъёсы" медаз пыриське вал. Ваньзэ лэсьтоно законъя. Бен, фестивалез но умой ортчытыны кулэ. Кун Кенешлэн но Правительстволэн ӵош постановленизылы проект дасямын ни. Ми возьмаськом редакциослэсь но юрттэтсэс. Вужез борды берытсконо Кылем арлэн пумаз уно колхозъёслэн председательёссы, гурт удысъя управлениысь специалистъёс Удмурт Республикаысь Вавож районысь Мичурин нимо эштосысь музъем ужасьёслэн но пудо утисьёслэн ужан амалэнызы тодматскыны вуылӥзы. Кильмезьёслэн делегациенызы кивалтӥз ёрос администрацилэн тӧроез Ю. Т. Гулин. Матысь бускельёсмылэсь вань малы дышетскыны. Кылем гужем куазь кӧс ке но улӥз, Мичурин нимо колхозысь музъем ужасьёс, кылсярысь, гектарлы быдэ 25 центнер ӟег но 37 центнер сезьы кутсазы. Та хозяйствоен куамын ар ӵоже ини кивалтэ Валентин Егорович Калинин. Сьӧдчабей гектарысьтыз басьтӥзы 23 центнер, картофказэс гектарысьтыз - 150 центнер. Паймыто Зямбай гуртысь пудо утисьёслэн азинсконъёссы но. Отын скаллы быдэ 4 сюрс кило йӧл кыско вал ини, таза сюро пудозы сутка ӵоже 900 граммлы куае, ошсэс вузало 520 кило секталаен. Колхозын тыршисьёс уждунзэс дыраз басьто, солэн быдӟалаез 700-ысен 900 манетозь вуэ. Но ведь отын музъемзы асьмелэн сярысь но уродгес, дыр. Сизьымдонэтӥ аръёсы гектарлы быдэ 7-ысен 10 центнерозь ю тысь кутсаллязы, нош куролы, асьмелэн куд-ог хозяйствоосмы выллем ик, странамылэн лымшор улосъёсаз ветлоно луиз. Нош табере кыӵе азинсконъёс басьто ни отын! Колхозлэн председателез (вераны кулэ, Удмуртиын со "1998 ар понна устоеныз адямиен" лыдъямын), басьтэм вормонъёсты герӟа хозрасчёт амалэз, ужан дисциплинаез юн чакламен, огшоры колхозник бордысен кутскыса, валтӥсь специалист дорозь тодон-валанзэс ялан будэтыны тыршонэн, котькуд адямилэн ас ужез понна сюлмаськеменыз. Уж понна котькудӥз огкадь кыл кутэ. Удмуртие вуылэмъёслэн мылкыдзы одӥг: асьме хозяйствоосын выльысь берытсконо хозрасчётэз уже кутон амал борды. Ведь 70-тӥ-80-тӥ аръёсы со амал борды басьтӥськизы ни вал, шӧдскылӥз пайдаез но. Соку ик хозрасчётэз пыӵатӥзы Мичурин нимо колхозын но. Но бускельёсмы со амаллэсь куштӥськем гинэ ӧвӧл, сое уката муромытӥзы на, асьсэлы тупамонгес каризы. Табере хозрасчёттэк ужан амалэз син азязы пуктыны уг быгато ни. (Басьтэмын Киров улосысь Кильмезь ёросын потӥсь "Сельская трибуна" газетысь). Кылдэ Алнаш землячество Удмурт университетлэн актовой залаз алигес люкаськылӥзы Алнаш районын вордӥськем адямиос. Соос пӧлын вал калык писатель Пётр Чернов, Россиысь дано артист Геннадий Соловьев но мукетъёсыз. Университетысь профессор Виктор Туганаев люкаськемъёслы ивортӥз ма пумысен лыктэммы сярысь. Валля арын алнашъёс кенешизы вал землячество кылдытон сярысь. Соин ик та люкаськонэ ӧтизы республикаысьтымы трос тодмо адямиосты. Нырысь та огазеяськонэз "Туймы" шуыса ниманы малпало вал. Та чебер шур уго ёросын уйшор палысен лымшор палозь бызе. Удмурт кылбурчиос та шур сярысь трос шулдыресь кылбуръёс гожтӥзы. Но Алнаш районысь депутатъёслэн кенешсылэн кивалтӥсез Н. А. Образцова огазеяськонэз "Алнаш" ниманы ӵектӥз. Нина Андреевна вань люкаськемъёсты тодматӥз ёрослэн улон-вылонэныз. Шуг-секытъёс шоры учкытэк, соос республикаямы миым котькуд гектарысь 12,7 центнер ю тысь люказы. Районысь ӝыныез улӥсьёс али газэн сиён-юон пӧзьто но корказэс шунто ини. Ёросын али коркаос лэсьтэ 874 мурт. Шумпотымон соиз но: Алнаш районысь арлы быдэ трос егитъёс вузъёсы дышетскыны пыро. Алнашъёс али дасясько туэ июль толэзе ёросэз кылдытэм дырысен 70 ар тырмонэз пусйыны. Таин валче книга но потыны кулэ. Зэм но, Алнаш палъёс данъясько та ёросысь усто писательёсын, учёнойёсын, мукет тодмо адямиосын. Кенешын Алнаш бӧляк кылдытонъя уставлэн проектэныз тодматӥзы, ревизионной комиссия но огазеяськонлы совет бырйизы. "Алнаш" землячестволы кивалтӥсе огкылысь бырйизы университетысь профессорез, тодмо тодосчиез В. В. Туганаевез. Кин тодэ, оло нош таӵе пичиесь землячествоос ог-огмылы шуге-леке шедён дыръя юрттозы. В. ЧЕРНОВ. Сюресъёс урдсын ӝутско киросъёс Кылизы атайтэк 31 январь. Калык дасяське пумитаны Выль арез. Кыӵе со луоз, ма ӟечсэ яке уродзэ ваёз?.. Яр урдсысь сюрес кузя лымы пурӟытыса ширтэ чупрес "Нива". Отын пукисьёслэн но мылкыдзы шулдыр, дугдылытэк верасько. Машинаез валтэ "Казаковский" ТОО-лэн валтӥсь инженерез А. В. Демин, соин артэ - татысь администрацилэн тӧроез С. М. Поздеев. Соослэн мышказы интыяськемын на эшшо вить мурт. Куное мынӥсьёс дырто. Ӧтчаме, пе, югытэн вутскыны тыршоно. Тол нуналэд угось укыр вакчи. Вераськон берга ортчисез но вуисез ар, азьланьын ма ужан-лэсьтон котыртӥ. Тани адскиз нимысьтыз возьмаськисьтэк, автоматэн-шлагбаумен радъям, чугун сюрес вамен выжон инты. Шурдыт инты. Кулэезъя ӧд чакласькы-эскериськы - мынондэ витьымтэ шорысь ваментоз олокытысь-маысь вуэм поезд. Ойдо, милемды Инмар утёз ай. Вагон куараос кыдёкын на кадь. Азьпалтом. Озьы ӧз малпалэ меда та дыре "Ниваын" ӟабыльтӥсьёс но?.. ... Корт кесям, сузмытэм куара кезьыт омырын кыдёке шуккиськиз. Кар-р! пазьгиськозы писпуос вылын кынмем пыдзэс ватыса пукись куакаос. Автомобилез отысь мазэ-созэ валаны вуттымтэ адямиосыныз ӵош дасо тонна кыскись локомотив ӝыны иськемлэсь но кыдёке нюж нуиз. Кытын корт, кытын орсмем вирен наштаськем пуконъёс яке питранъёс - номырзэ уд вала ни. Ваньзы "Ниваын" пукисьёс быризы, соос пӧлын - Поздеевлэн анаез но атаез, эмеспиез. Нош Дёминлэн юртаз 3-ысен 16 аресозь вить пиналъёсыз син куспын атайтэк кылизы. Ма со? Шудтэм учыр? Зэм, оло, озьы но шуыны луысал, дыр, таӵе шимес учыръёс республикаын одӥг-кык гинэ луысалзы ке. Соку кин янгыш та понна? Сюрес возись- чакласьёс, автоинспекторъёс яке асьэос транспорт возисьёс? Ӵапак со сярысь туннэ, ГИБДД-лэн миым ужамезлы йылпумъянъёс лэсьтыса, вераськон ӝутэм потэ вылэм. Дыртӥськом. Кытчы меда?.. Миым Удмуртиын сюресъёс вылын шудтэм учыръёс дыръя бырыны шедиз 232 мурт (валля арын - 229), 1935 адями шуккиськиз я сӧсыр кылиз (1997 арын - 1967). Тросэз таос но кытчы ке но "дыртӥзы", мынон интыязы ӝоггес вуыны турттӥзы. Сюреслэсь кыӵезэ лыдэ басьтытэк, знакъёс шоры учкытэк, мукет мынӥсь-ветлӥсьёсты "быгатэменызы" паймытозы малпаса, "корт валзэс" синтэм-пельтэм лобытӥзы. Машинаен лэземлэсь ӝог яке шурдыт интыостӥ чакласькытэк мынэм-ветлэм чотын ар ӵоже 310 шуккиськон учыр луиз. Уката но кышкыт югдур кылдэмын та толэзьёсы. Уноысьтыз городъёсысь но районъёсысь кивалтӥсьёс оскытӥзы вал, туэ толалтэ сюресъёсты ӟеч возён ласянь умойгес ужалозы шуыса. Али адӟиськом ни: сётэм кылзы ӧз быдэсмы. Соосты огласянь валаны но кулэ, дыр, одӥгез но нунал сямен лымы усьытэк, пельскытэк уг ортчы. Нош сюрес возись- чакласьёс таӵе куазьлы тыро-пыдо дасяськиллямтэ. Техниказы кулэезъя уг ужа, тӥяське, уг тырмы эстӥськон. Тросэз водительёс таӵе югдурез лыдэ уг басьто. Кулэ яке ӧвӧл-а сюрес вылэ пото. Та ласянь тужгес но сьӧлыкало руль сьӧрын ӟеч-ӟеч ужаны но тырмымон быгатон-валан люканы вуттымтэ макеос. Ӵапак чоин сэрен сюресъёс вылын кышкытлык декабре но январе шӧдскымон будӥз. Таин валче куд-огезлы эшшо огпол тодазы вайытэм потэ: быгатондылы уд оскиське - машинадэс юнме шорысь эн поттылэ кыре, котьмалэн аслаз дырыз. Иж-Сарапул тракт вылтӥ "Жигулизэс" ог-огзы пумитэ юн дыртытӥзы Чайковскийысь О. А. Пономарев но Сарапулысь С. Ю. Толстопятов. Кыкез ик машинаос тырмемын калыкен. Нырысез аслэсьтыз но тодмоосызлэсь пиналъёссэс нуэ Кам дурысь городын бальной эктонъёсъя пиналъёслэн ӵошатсконазы, кыкетӥез - Сарапул автовокзалын "калтэм" пассажиръёссэ Изе ӝоггес вуттыны тырше. 55-тӥ иськемын секыт тол сюрес вылын водительёс йыг-дун! вуизы ваче кымыс. Вить мурт быриз. Со пӧлын Пономаревлэн укмыс аресъем пиез Дима, тямыс аресъем Даша Абросимова но Толстопятовлэн машинаяз пукись Галя Данилова. Солы туэ вить арес тырмысал. Йырсиез пештырскытӥсь таӵе учыръёс бере юаны кулэ на-а меда, кытчы сокем дырто эсэпсэ тодытэк ворттылыны яратӥсь водительёс... Юид - пыддэ эн лёгы Асьсэлы гинэ ӧвӧл, котырысьтызы калыклы но юн кышкытлык кыдыто руль сьӧрын юыса пукисьёс. Вераны куэ: ГИБДД-ын ужасьёслэн та яралы пумит кужымзэс жалятэк нюръяськемзы шӧдскытэк уг кыльы. Кылем арын сюресъёс вылын сюмык бекыръяны яратӥсьёсын сэрен шуккиськон учыръёс, валля арен ӵошатыса, 7 процентлы ёрос кулэсмизы. Районъёсъя верано ке, отын та лыдпус уката но бадӟым. Озьы ке но, куд-ог улосъёсын юисьёслы пумит нюръяськыны вань луонлыкъёссэс уг куто на, янгыш лэсьтӥсьёслэсь, транспортлэсь ужзэ радъяны-эскерыны оскем адямиослэсь кулэезъя уг юало. Соинтэк-а Грах районын, кылсярысь, котькудӥз 8-9-тӥез шуккиськон кылдӥз кудӟем шофёръёсын сэрен. Шарканын - котькудӥз куатетӥез, Кез районын - витетӥез. Таин валче республика номырин ӵошатонтэм ыштонъёс адӟе: быро, сӧсырмо ужась адямиос, тӥяське яке номырлы ярантэм пазьгиське техника, чаклам интые дыраз уг вуо сиён-юон, лэсьтӥськон арбериос но мукетыз. Нош вань-а югдурлэн матысь дыре воштӥськонэзлы оскон? Али сямен ик ужамы ке, шуг вераны. Берло дыре угось транспортлэн ужаз азьвыл аръёсы кылдытэм ӟечсэ но куашкатӥськом ни. Мукет сямен, пукон ваймес асьме киынымы кораськом. Реформа ортчытэм улсын транспортэн бадӟымесь предприятиосты быдтӥзы. Озьыен, та хозяйствоосты государство ласянь чаклан но ужзэ радъян вунэмын. Тодэ ваёнын гинэ кылемын на сюресъёс вылын утиськонъя службалэн нимысьтыз ёзъёсыз, водительёслэсь рейсэ потыкузы но берытскыкузы тазалыксэс медикъёсын эскерон но мукетыз. Куронъёсты тӥясьёслы пумит азинлыкогес нюръяськыны луонлык уг сёто куд-ог туала законъёс но, постановлениос но. Законын гожтэмын, кылсярысь, руль сьӧры юыса пуксем водителез "яке штраф тырытоно, яке правозэ талано". Макем гылыт верамын. Тросэз штраф тыро но ӵуказеяз ик машинаязы аракы зын пакыса пуксё. Возьытсэс ыштэм, адямиослэн тазалыксылы, улонзылы кышкытлык кылдытӥсьёс понна нокыӵе "яке" луыны кулэ ӧвӧл. Сыӵеосты коньдонэн но уката золгес зуркатоно, руль сьӧры сюрессэс но пытсано. Соку, оло, мукетъёсызлэн но сотэк но буш кисызэс мултэссэ берыкъямзы, ужтэк кылемзы яке яратоно "корт валэнызы" кемалы люкиськемзы уз поты. Юид - машинаед котыре пыддэ эн лёгы. Сотэк но сюресъёс урдсын ӝутскемын ни синвуатӥсь уно киросъёс. Али сямен медаз йылэ соос. Сюлоен уд визьма. ГИБДД-ын ужасьёслэсь калыкен пумиськонъёс дыръя ӵем гинэ юало: кызьы, пе, озьы, берло дыре водительёсты сюресъёс вылысь инспекторъёсын кыл кутытон учыръёс кулэсмыны кутскизы? Яке, шуо, погонэн адямиос сокем ӟечесь, лякыт сюлэмоесь луизы ни? Ужпум со бордын гинэ ӧвӧл. Бен, ГИБДД-ын али пӧлазы кинэ сюрем уг куто, ужасьёссылэсь юн юало. Инспектор дано нимез саптасьёсты кыл кутыто, куддыр судысь скамья вылэ вуыттытозь. Но югдур умой пала воштӥськемлэн нырысь мугез сюрес вылын мынон-ветлонэз чаклась но руль сьӧрын пукись адями ог-огзэс ӟечгес валаны, ог- огзылы юрттон сярысь сюлмаськыны кутскем бордын. Юнме уг шуо ук: адямиез, пе, сюлоен уд визьма. Инспектор туннэ ас азяз пуктэм куронъёс шоры чылкак мукет синмын учке. Чыры-пыры янгышъёс понна но азьвыл сямен шофёр вылэ протокол уз гожты ни, уз тырыты штраф. Юнме шорысь уз тала правозэ. Солы утьыны-чакланы оскем сюресъёс вылын ялан мед кулэсмозы шуккиськон, соизэ яке таизэ куронъёсты тӥян, шуге-леке вуэм водительлы юрттонлэсь палэнскон учыръёс. Тӥни сыӵе ужпум пуктэмын али инспектор азе. Сюрес вылын ог-огеныд эш мылкыдын ужамлэн пайдаез адске ни. Шуккиськон учыръёсты шӧдскымон кулэстыны быгатӥзы Глазов, Завьял, Игра, Каракулино, Кияса, Красногорск, Як.-Бодья, Яр но куд-ог мукет районъёсын. Соин ӵош ик та ласянь саесъёсъёссэс пужалляса ужано на можгаослы, вавожъёслы, грахъёслы, уваослы, шарканъёслы. Вераны кулэ на тани ма сярысь. Толэзь-кык ортчыса, город ульчаос но бусы сюресъёс тымиськозы тол ӵоже "думетын" возем уно сюрс машинаосын. Мынэ ни соосты гужемлы кызьы дасямез (техосмотр) ГИБДД-ын ужасьёсын эскерон. Туэ но кыре медаз потэ вылэм кылем арын шараяськем тырмымтэос. Автопредприятиосты огъя эскеронъёс дыръя шедьтэмын вал ог 4600 машинаослэн сюрес вылын кышкытлык кылдытӥсь шекъёссы. Соин сэрен, нырысь ик, 1 ноябёзь эскерон пыр ортчыны ӧз быгаты республикаысь 18 процентэз транспорт. Кияса районын - 42, Кизнерын - 44 но Селта районын - 45 процентэз. Кызьы верамын ни, транспортэз уже кутон но, сюресъёс вылын мынон-ветлон но туннэ люконтэм герӟаськемын ог-огдэ валанэн, ог-огедлы юрттонэн, янгыш лэсьтэм понна ог- огед азьын кыл кутонэн. Огъя кылын, ваче ки кутскыса ужамен. Соку гинэ асьмеос, мынон интыямы потыса, шудтэм учыре шедёнлэсь ум кышкалэ. В. Афанасьев, Удмурт Республикаысь Югдурез утёнъя министерствоысь Сюрес вылын утиськонъя инспекцилэн управлениезлэсь кивалтӥсьсэ нырысетӥ воштӥсь. Н. Долгов, ГИБДД-ысь журналист. ВЕРАМЕ ПОТЭ ӞЕЧ КЫЛ Сюлэм шунытэз туннэлы но тырме Кыткем валъёс сямен дыртыса вортто аръёс. Оло солэсь кышкаса, оло, ачим арлыдэ пырыса, ӵем но ӵем тодам лыкто ортчем дыръёс. Табере ваньмыз со шоры мукет сямен учкиськод. Тани мон но школае ветлэм аръёсме али чылкак мукет сямен адӟисько, дышетӥсьёслэн тыршемзылы мукет дунъет сётӥсько. 1966-тӥ арын 1-тӥ сентябре нырысетӥ классэ мынэм нуналэ туннэ но син азям. Толон гинэ кадь вал со: чебер дӥсяськем егит дышетӥсе Ангелина Прокопьевна, шумпотӥсь эшъёсы, нырысьсэ чузъяськем гырлы куара. Со нуналысен ми ньыль ар ӵоже матысь эшъяськыса огпыдысь вамыштӥм тодон басьтон шаеретӥ. Нош витетӥ классэ выжыса воштӥськизы дышетӥсьёсмы но. Классмес сётӥзы ӟуч кылъя но литературая дышетӥсьлы Зоя Никитична Корепановалы. Шор Шадбег школаысь мукет дышетӥсьёсты обиде уськытытэк верало - милем туж удалтӥз. Угось ӵапак со, ас дырыныз лыдъяськытэк, вань тодон-валанзэ сётыса, чиданзэ ыштытэк, миленымы ужаз. Ас предметэзъя тодон сётэм сяна, бадӟым улонэ вамыштыны дышетылӥз. Бен, ми соку ӧм валаллялэ, со сётэм визьнодъёсыз туннэ но улонамы яралозы шуыса. Гужем шутэтсконзэ но дышетӥсьмы ас школаез, пиналъёс сярысь малпаськыса ортчытъяз. Мон сое али валасько ни, урокъёсмес син азям пуктыса. Лымшор пала вуылыса, олокыӵе но паймымон арбериос ваёз но милем возьматоз вал. Зоя Никитичналэн киысьтыз ми нырысьсэ адӟимы буёло фотографиосты. Нош кыӵе но пичи шудон машинаосты уг вайы вал уроке - выль темаез ӟечгес мед валалом шуыса. Угось гуртын будэм удмурт пиналлы секыт потылӥз ӟуч кылэз валаны. Уката ик приставкаосты но предлогъёсты ортчыку. Ушъяськытэк верало, З. Н. Корепановалэн тыршеменыз, солэн милемды шонер сюрес вылтӥ нуэменыз, мон ӟуч кылэз ас вордскем удмурт кылме кадь ӟеч тодӥсько но гажасько. Тазьы малпаськыса пукыкум, олокыӵе но учыръёс тодам лыкто. Школаын дышетскон аръёсы магазинъёсын словарьёс ӧз вузаськылэ. Солэсь кулэлыксэ валаса, Зоя Никитична милемды ачиз словарь нуытылӥз. Котькуд урокмы соин кутскылӥз. Кӧня выль ӟуч кылъёс тодӥмы ми сыӵе амалэн. Озьы солэн визьмыз, тодон-валанэз гизьыен-шапыкен милем, дышетоно пиналъёсызлы, нуналмысь выжылӥз. Нош кыӵе задор мылкыдо ортчылӥзы кылбурчиослы, крезьгурчиослы сӥзем ӝытъёсыз. Гуртысьтымы гажано адямиослы сӥзьыса но соосты данъяса ортчылӥзы кӧня пӧртэм пумиськонъёс. Дышетӥсьмылэн мылкыдаз пыӵамын вал мӧйы но пинал калыкез гажан. Нош школаысь пӧртэм ӵошатсконъёсын: дышетсконъя, кырӟан-эктонъя, киужъёсъя - милям Гайдар нимо отрядмы котьку сямен азьпала потылӥз. Солы ӧз но паймылэ, угось классэн кивалтӥсьмылэн сыӵе сямыз вал: мукетъёссэ ултӥятэк, нырысьёсыз пӧлын луыны. Зоя Никитичналэн сюлэмыз но ки пыртӥз потэм пиналъёс, улонын интызэс шедьтыса, туннэ ужало калыкез дышетон, эмъян, лэсьтӥськон но мукет удысъёсын. Мон нош, со шоры учкыса, одно ик дышетӥсь луо шуыса малпалляй. Вожъяськылӥ, кызьы со нуналлы быдэ классамы пырылӥз чебер но котьку ӝикыт дӥсен, кияз тетраден, журналэн. Чиль- сьӧд бабыльскись йырсияз туж йӧтскылэме потылӥз. Но котькуд адямилэн улон сюресэз аслаз вылэм. Мынам но улон питранэ мукет пала шонтӥз - дышетӥсь ӧй луы. Озьы но, берло аръёсме мӧйы калыклы улон-вылонын юрттэт сётон удыслы сӥзьыса, туннэ но дышетӥселэн дэмланъёсызъя тыршисько, котырысь калыкме гажан мылкыды уг сӥя. Бен, ки пыртӥз потэм пиналъёс пӧлын котькыӵеез вал: тыршисез но, азьтэмез но. Нош Зоя Никитичналэсь ньыль ар куспын одӥг пол но, кеськем куаразэ гинэ ӧвӧл, зол ваземзэ но кылэме ӧвӧл. Чиданэз бадӟым вылэм та кышномуртлэн! Али мынам аслам кык пиналъёсы будо. Пичиез тямысэтӥ классын дышетке. Уроксэ куддыръя уг ке вала, дышетӥселэн амалэзъя ачим валэктӥсько. Зэмзэ верасько, пиналы соку ик вала. Сыӵе дыре мон тодам ваисько калыкысь визьмо веранэз: пинал валасьтэм уг луы, валэктыны быгатӥсьтэм дышетӥсь луэ. 1974 арын Игра ёросысь Шор Шадбег школаысь тямысэтӥ классэз йылпумъям пиналъёслэн нимынызы толсур нуналъёсы вордскем дышетӥсьмес Корепанова Зоя Никитичнаез ӟечкылай ке, оскисько - нокин пумит уз луы. Солэсь бадӟым сюлэмзэ та кезьыт нуналъёсы шунтэме потэ дунне вылысь вань ӟеч кылъёсын. Трос иськемъёс пыр но со мед шӧдоз вал азьло кадь ик баблес но пужмераны вуэм йырсизэ маялтэмме. Милитина Лекомцева (Пермякова). Балезино посёлок. Кун Кенешлэн сессияз Веттаськоз бусыед етӥнэн... Удмурт парламентлэн 24-тӥ сессиез ӟеч мылкыд кельтӥз, шуыны луоз. Депутатъёс ог 70 гинэ ке но люкаськизы, азязы пуктэм ужпумъёсты лад-лад, дыртытэк, котыр ласянь рос- прос эскерыса учкизы. Данакез соос февраль толэзьлы выжизы кылем арлэн пумысьтыз. 22-тӥ но 23-тӥ сессиосысь. Ма бордын ужазы депутатъёс таяз заседаниын? Депутат Михаил Кокорин люкаськемъёс азе ӵукна ик потӥз диабет висёнэн курадӟисьёслы юрттон сярысь запросэн. "Диабет" целевой программа республикая кутэмын ке но, со пумозяз уг быдэсъяськы - уг тырмы коньдон. Кокорин дэмла висисьёслы "Буммаш" АО-лэсь профилакторийзэ яке "Строитель" профилакториез висъяны. Депутатлэсь ӵектонзэ умоен лыдъяло городысь тросэз бырйисьёс но депутатъёс. Соослэн куронзы санэ басьтэмын но эскеремын луоз. Кылзэс вераны кулэ предприятиослэн кузёоссы, городлэн администрациез. Сыӵе ик ужпум пуктэмын общежитиос ласянь. Депутатъёс верамъя, али отын олокин но улэ, чакласез йӧскадь ӧвӧл. Тросэзлы улон инты висъянъя юрттэт но сётыны кулэ ни. Сессиын ӝот-ӝот вераськон ӝутскиз "Етӥн" целевой комплексной программая. Соин люкаськемъёсты тодматӥз гурт удысъя но сиён-юонъя министр Василий Жуйков. Вуныны кутскем уй пал буртчин кылем арын ассэ йӧн-йӧн возьматӥз: ыштонъёс ваись культура хозяйствоосмы понна шӧдскымон пайда сётӥз. Со шоры учкон табере чутрак умой пала воштӥськиз. Али вераськон мынэ етӥн муосты паськытатон но ӟеч выжы кидыс кизён сярысь. Сэстэм куро азьвыл аръёсы сямен кужлы гинэ медаз яра, дыр вуэмын ни векчи кузь мертчан шорт черсыны но солэсь чебер басма куыны, пӧртэм пумо вуз поттыны. Етӥнлэн дуныз, Россиысь куд-ог интыосын ӵошатыса, асьме дорын кык поллы будэтэмын. Музъем ужасьлы со туж умой. Чаклам программая етӥн будэтӥсь хозяйствоос гектарезлы быдэ ватсаса коньдон басьтозы на. Сое висъя Правительство. Республикаысь кыказ районын али эскеро Голландиысь етӥн выжыез. Удалтӥз ке, кидысэз кошкоз музон интыосы но. Озьы ик радъямын луоз етӥн вӧй поттон. Али со бордын йӧскадь ужась ӧвӧл на, малы ке шуоно, уг тырмы кидыс. Депутат Николай Чувашов верамъя, Удмуртия понна етӥн Узбекистан понна хлопок кадь, туж кулэ луись культура. Сырьё тырмымтэен, республикаысь етӥн шуккон заводъёс 20 процентозь гинэ ужен тырмытэмын, кылемез тэк сыло. Программаез кылдытӥсьёс депутатъёсты оскытӥзы, уй пал буртчин аслэсьтыз басьтӥсьёссэ Удмуртиын гинэ уз, солэн палэназ но шедьтоз шуыса, малы ке шуоно, СССР-ез быдтэмен, Россия етӥнтэк кылиз. Нош удмуртъёс пыш, етӥн вашкала дырысен валаса будэтылӥзы. Программа умоен лыдъямын, кылиз на улонэ пыӵатыны. Сессиын трос инты басьтӥз выт тыронэн герӟаськем законлэсь инъетсэ эскерон. Огъёсызлы со кулэ коньдон пуйымес узырмытон но со чотын улон-вылонмес ӧжытаклы ке но умоятон понна, мукетъёсыз кышкало, кисыысьтызы мултэс коньдонзэс кыскозы шуыса. Вераськон мынэ Удмурт Республикаын Россия Федерацилэсь "Нимаз удысъёсъя ваньбур поттӥсьёслэсь огкадь выт бичан сярысь" Законэз пыӵатонъя. Огаз сессиын та ужпум эскеремын вал ини, соку ӧз ортчы. Таяз учыре депутатъёс мырдэм но кызьы огкылэ вуизы кадь. Кыкетӥзэ учкем бере гинэ сессия юнматӥз "Удмурт Республикаын государственной стаж сярысь" законлэсь инъетсэ но. Огкутскемен учкемын куд-ог депутатъёслэн куронъёссы, кылсярысь, Александр Горошников кылемаз сессиын кылпум ӝутӥз вал школаын дышетскись пиналъёсты пӧсь сиёнэн сюдон сярысь. Солы валэктон сётӥз Правительстволэн Тӧроезлэн воштӥсез но огдыре калыкез дышетонъя министрлэсь ужзэ быдэсъясь Антонина Лисина. Антонина Михайловна верамъя, нылпиосты сюдыны араз чаклаське висъяны 128 миллион манет. Со пӧлысь ӝынызэ сётыны кулэ федеральной бюджет, ӝынызэ - асьмелэнэз. Но сомында коньдон шедьтэмын ӧвӧл. Таин валче кутэмын решение юрттэт сётыны тужгес но начар улӥсь семьяосысь пиналъёслы. Республикая соос 35,5 сюрс. Гуртысь школаослы луонлык сётэмын асьсэ понна бакча сиён будэтыны, висъямын 13 сюрс гектар музъем. Эскеронъёс возьмато, республикаысь школаосын 60 процентэз гинэ дышетскисьёс столовое ветло, 40 процентэзлэн луонлыкез ӧвӧл. Сыӵеос понна чакламын стакан йӧл но булка сётъяны - ваньмыз 9 миллион манетлы, таяз арлы со бюджетэ пыртэмын ни. Тужгес но секыт югдур городысь школаосъя. Гуртын пиналъёсты дунтэмгес сюдо асьсэ продукцизы чотын. Соин ик парта сьӧрын сютэм пукисез ӧжытгес. Сессие поттэм ужпумъёс пӧлысь та нуналэ учкытэк кылиз электрокужымез но шунытэз кутонъя законлэн инъетэз, Музъемъя кодексэ воштонъёс но ватсанъёс пыртон но куд-ог мукетыз. Удмурт парламент ужзэ азинтоз 24 феврале. Л. МЕДВЕДЕВА. Куноям усточиос дорын Толсур толэзе ми, фольклор коллективенымы Кияса ёросысь Карамас-Пельга гуртэ ветлӥмы. Ӧтизы милемыз элькунысь национальной музейын ужась С. М. Гаврилова но солэн ӵужанаез О. И. Мазитова. Ми трос гинэ кылылыӥм вал та гуртысь усточиос сярысь. Со озьы ик вылэм. Макем чебересь, куэм ковёръёсыз Зоя Алексеевна Мазитовалэн. Концертмы карамас-пельгаослы кельшиз, шӧдске. Туж шуныт пумитазы. Концерт йылпумъяськем бере дораз кунояны ӧтиз Зоя Алексеевна Гаврилова. Корказы пырем бере ик, шӧдӥське татын туж ужась но, капчи мылкыдо, ӟеч сямо адямиос уло шуыса. Корка пушлэн чеберез али ке но син азямы на, борддоръёс куэм ковёръёсын шобыртэмын, выж вылэ ворпо выжлёгет вӧлдэмын. Нош пужыятэм ӵушконъёс бордысь синэз воштыны уг луы. Ӝӧк вылэ пуктэм сиён-юонлы но паймымтэез ик ӧй вал. Туж ческыт утялтӥз милемды Зоя Алексеевна. Пыжем ӟазегез но пельнянез но - котьмаиз вал, ваньзэ вераса уд быдты. Зоя Алексеевналэнбӧлякез, ӵыжы-выжыосыз, ӝӧк котыр султыса, бадӟым куноосты сямен кырӟаса утялтӥзы. Бадӟым тау, Зоя Алексеевналы, солэн кузпалызлы, Коля агайлы, пиналъёсылы вань ӵыжы-выжыосылы, быдэс гурт калыклы удмурт калыклэсь ӟеч сямъёссэс утьыны быгатэмзы понна. Та ӟеч мылкыдды ноку медаз быры. Фольклор коллективлэн нимыныз М. Мельникова. Завьялово ёрос, Пирог гурт. "Вуиз-а мынам газетэ?" Котьмалы дунъёс будэмен, гурт калыклы городэ потаны уката секыт луиз. Соин ик гуртэ тодмо адямиос, кырӟасьёс ке вуо, праздник кадь потэ. Тани 21-тӥ толшоре Алнаш ёросысь кузёбайёслы сыӵе кузьым лэсьтӥзы "Удмурт дунне" газетлэн валтӥсь редакторез А. П. Шкляев но "Катанчи" театр. Кузёбай клубын кык пумиськон ортчиз: нуназе нылпиосын, ӝыт гурт калыкен. Трос паймымонзэ но серемзэ вераз Алексей Петрович школаын дышетскисьёслы. Бӧрысь пӧртэм тунсыко учыръёсты мадизы катанчиос. Нылпиос доразы бертыса но, пе, вожмаськыса верало, кызьы А. Баймурзин соослы обезьянэз возьматэм. Нош ӝыт, 7 часэ, клубын султон интыез ӧй вал ни. Зол гинэ гуртоос чабизы "Катанчилы". Ма, кызьы-о уд чабы та йӧно, синмаськымон удмурт пиослы? Учкыса кӧтыд уз тыр, кыӵе мылкыдзэ сётыса кырӟаз Андрей Ураськин. А. Баймурзинэз веранэз но ӧвӧл, залын пукисьёс синкылиен серекъяса кылзӥзы солэсь серемес веросъёссэ. Егит нылъёс вашкала дырысен синмасько вылэм арганчиослы, соин, лэся, сюлмазы усиз "Катанчиысь" егит артистсы - Андрей Соловьев. Учкисьёс но тэк ӧз пуке, газет пумысен трос гинэ юанъёс сётъязы, асьсэлэсь малпанъёссэс, ӵектонъёссэс дэмлазы. Ваньмызлэн сюлмаз пыриз Мария Сергеевна Шишкиналэн (быдэс улонзэ школаын ужамын) "Удмурт дуннелы" тау каремез. - Нуналлы кӧня ке пол потасько учкыны: вуиз-а, ӧз-а газет? "Удмурт дунне" - со мынам семьяе, мон соин кенешисько, тодӥсько мар луэ улонын, одӥг бамзэ кӧня ке пол лыдӟисько но шумпотӥсько, сыӵе газетмы вань шуыса. Со гурт калыклы тупаса, ог- огедлы юрттыны тыршыса улыны мылкыд кариз. Галина Савина. Кузёбай гурт, Алнаш ёрос. Правительствоысь иворъёс Асьме шаерын мынон-ветлонэз умоятон, чугун сюрес транспортлэсь предприятиоссэ ӟечгес ужатон вылысь, Удмурт Правительстволэн Тӧроез Павел Вершинин но Горький чугун сюреслэн кивалтӥсез Омари Шарадзе туэ арлы огкыл (контракт) гожтӥзы. Документын чакламын выт бичан политикая, экономикая, сюрес вылын кышкытлыклэсь утиськонъя ужпумъёс но. Инкуазез утёнъя ужрадъёслы сётэмын луоз 350 сюрс манет. Горький чугун сюреслэн управлениез 6 миллион манетлэсь ятыр висъялоз, чугун сюрес вылын ужасьёслэсь улон-вылонзэс умоятон, тазалыксэс юнматон но нылпиослэсь лагерьёсын шутэтсконзэс радъян понна. Ува-Кильмезь сюрес вылын грузъёсты нуон-ваён радъямын луоз, та участокысь предприятиослэсь куронъёссэс лыдэ басьтыса. Коньдон сётыны чакламын Люкшудья но Кильмезь вискысь чугун сюресэз тупатонэ. *** Бюджет чотын коньдон басьтӥсьёслы уждун тырон Правительстволэн та вакытэ одӥгез бадӟым сюлмаськонэз луэ. Февральлэн нырысетӥ декадаяз дотациен улӥсь городъёсы но ёросъёсы келямын 8,6 миллион манет, 5 миллион палаез манет вуоз на, толэзь бырытозь. Правительстволэн Президиумезлэн кенешоназ эскеремын, кызьы 1998-тӥ арын Завьялово ёросын быдэсъяськиз бюджет кусыпъёсъя тупанкыл. *** Ивортэмын, кылем арын дас толэзь ӵоже районлэн бюджетаз налогъёсъя тыриськонэ 22,6 миллион манетэз вуттэмын ӧвӧл. Соин ик бюджет чотын тыроно уждунъёс но ӝегатэмын, дас толэзь куспын со луиз 7,5 миллион манет. Озьы ке но, Завьялово администрация 474 сюрс манет бюджетын чакламлэсь ятыргес кутӥз. Со сяна, бюджетлэн йыр йылтӥз гуртъёсысь но посёлокъёсысь администрациосы келямын 10,3 миллион манет. Огъя вераса, та ёросын уждун тырон ужпумъёс палэнэгес кельтэмын. Со сярысь пусйыса, Правительстволэн Тӧроез шуиз: Ува, Можга, Глазов ёрос администрациослэн кивалтӥсьёссы уждун тыронэ келяло басьтэм доходъёслэсь ог 80 процентсэ. *** Удмуртиысь 46 мурт али дышетске кивалтон ужлы - Президентлэн "Россия Федерациысь калык хозяйстволэн организациосызлы кивалтӥсь кадръёс дасян сярысь" Указэзъя. Дасэз соос пӧлысь стажировказэс кунгож сьӧрын ортчизы но вылӥ аттестация басьтӥзы ни. Соин валче туэ Удмуртия понна квота будӥз, тросгес мурт дышетскыны быгатоз та удыслы. Правительстволэн постановлениезъя кунгож сьӧры ыстыны специалистъёс быръёнэз оскемын Наукая, высшой но средней профессиональной образованиея комитетлы. Та дышетскем адямиослэсь кылдытэмын луоз кризислы пумит нюръяськонъя резерв. *** Правительство Кун Кенешлэн Президиумезлы эскерыны ӵектӥз "М. Т. Калашниковлэн вордскемез дырысен 80 ар тырмонзэ пусъён сярысь" постановлениезлэсь проектсэ. Удмурт Республикаысь Правительстволэн Тӧроезлэн секретариатэзлэн пресс-центрез. Яков Майков Кин гожтоз гурзэ? Кылёд сюлэмам, анае Бусы кыръёсын эрико тӧл шудэ но, Солэсь тугаське йырсие... Оло нош, аръёс ортчемъя но, тазьы тон Монэ вешаськод, анае. Тодмо тусбуйдэ син азям пуктӥсько мон, Лыктэ кадь пелям куараед... Нош тон кыдёкын, тон уд ву ни ноку но, Уд лу ни, вордэм анае. Ужлэн ӧй но вал кадь пумыз но, йылыз но, Нунал пырылӥз, дыр, уе... Чебер дуннеез милемлы тон усьтӥд но Утид улонмес, анае. Юнме куректон но тыныд вайылӥ мон, Оло, ӧй но шӧды сое. Туннэ ӝожомон синвудэ ӵушысал но Бере кылиськем, анае. Бакча дурамы льӧмпуос шильырто но Каллен шонало улваен... Улон сюресэ пумозяз вуытозь, тон Кылёд сюлэмам, анае. Йыртэмась вожоос Вожояськон вакыт шулдыръяськыса-маскаръяськыса гинэ уг ортчы вылэм. Киров улосвылысь Кильмезь посёлокысь вожоосты доразы пырыны лэзьымтэ кузёос ӵукна коркасьтызы мырдэм потӥзы. Куатаськем пӧртмаськисьёс ӧсъёссэс бодыосын пыкъяса кельтӥллям. Куд-огезлэн капкаез, почта ящикез ышизы. Со гинэ мар! Огаз корка вожоосты лэзизы ик, но кырӟам-верамзы понна ӧз утялтэ. Юон утчаса ветлӥсь пӧртмаськисьёс йырзы курен корка кузёосты "дышетыны" малпазы. Ульчае потыса, писэн укноязы лэзизы. Пис ӵап корка кузёлэн кымысаз вуиз. Ярам, воргорон туж ӧз шуккиськы. Но табере 33 аресъем "вожолы" йыртэмаськемез понна тыриськоно луоз. Н. ТУРИН. КЕНЕШ БЕРЕ Нимазъяськытэк, тушмонъяськытэк Ваньмыз, оло, огкылысь уз но луэ Удмурт калыкез улӟытон ласянь малпанъёсыным. Котьма ке но, та пумысен ас кӧня ке вераме потӥз. Нош уж борды кутскыны муг сётӥз "Удмурт интеллигенцилэн выжыез азинтонын интыез" кенеш. Номыре ватытэк верано ке, югдур туж сюлэмшугъяськытӥсь. Тодмо тодосчи Игорь Клестов учыртэмъя, удмурт интеллигенция тодыны кулэ удмурт калыклэсь сюлмаськонъёссэ. Таӵе огыр-бугыр дыръя вакытмылэн адямиез мед луоз. Мед быгатоз ас вылаз мукетъёсызлэсь но сюлмаськонъёссэс басьтыны. Ассэ интеллигентэн лыдъясь адями - ас калыкезлэн пиез. Ас вордэм калыксэ но со пиез кадь яратэ. Со вакытэ ик интеллигент - выжыосыз сярысь сюлмаськись "анай- атай", сое шонер улыны дышетӥсь. Интеллигент (котьку сямен, со луэ вылӥ тодон- валанъёсын, гажано адями) мылысь-кыдысь быдэсъя ас ужзэ, ӟеч ласянь возьматэ ас калыксэ мукетъёсыныз артэ. Мынам шӧдэмея, интеллигенция чеберлыкез чаклась луыны кулэ. Медаз лу ачиз сярысь гинэ сюлмаськись, малпаськытэк вераськись. Соин валче ик чебер ӧвӧл, дыр, ымпумъёсыд куалекъяса, кӧттэ маке понна ӝож карыса вераськыны. Интеллигент, кинэ ке кышкатыны турттыса, киосыныз шонаны кулэ ӧвӧл. Аслэсьтыз луонлыкъёссэ лыдэ басьтыса, нырысь ик мед малпаськоз, мар ӟечсэ лэсьтыны быгатоз. Тодосчи нырысь ик азинтыны кулэ наукаез. Ас удысаз но вылӥ тодон- валанъёсын адями мед луоз. Валалэ монэ шонер: таӵе адямиосты мон уг курласькы. Но мон сямен, та выллем вераськонъёс - толло нунал ини. Соос туннэ интыяз ӧвӧл. Малпаськоно мукет сямен. Одӥг кылын вераса, адямиез нырысь ик гажано солэн ӟеч сямъёсыз, адямилыко луэмез понна. Удмурт адями тодыны кулэ: ас выжыостэ выльысь улӟытон вылысь, нырысь ик воштӥськоно аслыд. Асьмелэсь сюлмаськонъёсмес нокин но ас вылаз уз басьты. Удмурт мед луоз гажано, визьмо, ӝикыт, ӟеч адями. Тазьы ик будэтоно нылпиостэ но. Мукет выжыосысь адямиос мед адӟозы тон бордысь усьтэм сюлэмо, тунсыко, юрттыны котьку дась луись адямиез. Удмурт калыкез тазьы улӟытон амал кулэ уг кары экономикаын кыӵе ке ыштонъёсты, удмуртъёс понна кыӵе ке капчиятонъёсты. Таин валче ик, дыр, мукет выжыос ӧжытак чакласькись луо. Нош нимазъяськон, тушмонъяськон, ог-огедлы йыркуръяськыса улон ӟече уз вуттэ. В. КИБАРДИН, Удмурт кун университетын дышетскись. ЭКОНОМИКА НО УЛОН Луоз-а газ, шуныт но тыл? Куазьлэн вошъяськемез котьку шӧдӥське электрокужым, газ но шуныт сётӥсьёслэн ужазы. Юн кезьыт ватсаса сюлмаськонъёс вае газовикъёслы но энергетикъёслы. Соин ик "Удмуртэнерго" огазеяськонлэн валтӥсь кивалтӥсезлэн воштӥсез Николай Скворцов меӵак ивортэ: - Куамын градус кезьыт луиз ке, газовикъёс чакламлэсь вылтӥ "чагыр эстӥськон" сётыны уз быгатэ. Соку амалтэк кутоно луэ кема возьыны кельтэм эстӥськонэз. Тӥни сыӵе югдур. Сое тужгес яркыт возьмато лыдпусъёс. Тани 1996-тӥ арын 136 сюрс тонна эгыр мултэс сутэмын, 1997-тӥ арын - 160, нош миым - 247 сюрс тонна. Ватсаны кулэ, эгыр сётӥсьёс басьяськисьёссылы уката чурытэсь куронъёс пукто: азьло дунзэ тырытэк, одӥг тонна но эстӥськон уг келяло. Собере чугун сюреслэн но тарифъёсыз бадӟымесь. Кызьы бен ужа "Удмуртэнерго"? Кылем арын ноябре-декабре секыт югдуре шедиз. Туж шугомиз газ сётон. Тани басьтом Ижез. Юн кезьыт дыре одӥг часкын городлы ичизэ 240 сюрс кубометр "чагыр эстӥськон" кулэ, нош газ сётӥсь куинь станция самой троссэ 162 сюрс висъяны быгатэ. Малы? Специалистъёс ивортэмъя, городын берло куинь ар ӵоже та удысэн нокин ӧз выры, со асэрказ лэземын. Но толлы газовикъёс но энергетикъёс луонтэмзэ но лэсьтылӥзы. Вераськон мынэ калыклы но предприятиослы шуныт, газ но электрокужым сётон сярысь. Республикаямы, Россиысь музон улосвылъёсын ӵошатыса, умойгес радъямын газ но электрокужым басьтон. Кылсярысь, азьло аръёсы сярысь, миым тросгес кутэмын "чагыр эстӥськон". Туэлы 3 миллиард кубометр пала газ висъяны чакламын. Но туннэ бадӟым юан кылдэ: быгатоз-а Удмуртия ваньзэ сое басьтыны? Мугез тодмо. Предприятиос но организациос эстӥськон басьтэмзы понна дун уг тыро. Тужгес но секыт югдур кылдӥз миым куинетӥ кварталэ. Соин ик газовикъёс, 403 миллион кубометр интые, ваньзэ- ӧвӧлзэ 246 миллион гинэ газ сётӥзы. Озьы предприятиос но тыро-пыдо продукция поттыны ӧз быгатэ, бюджетэ нош ик ичи уксё вуиз. Соин сэрен газэн эстӥськись калык но шуге-леке шеде. Кызьы бен та ужпумез быдэстоно? "Межрегионгаз" кемалась ӵектэ ни калыклы но предприятиослы нимаз газ сётыны. Соку нокыӵе йыр висёнъёс ӧй луысалзы. Озьы ик висъяно газлы дун тыронэз. Адямиос со понна дыраз уксё вутто. Та ужез лэсьтыны луоз районъёсысь расчётно-кассовой центръёс пыр. Али та уж кутскемын ни Воткинскын, Глазовын но Ижевскын. Таӵе ужрадэз ортчытыны куре улон. Тани миым газовикъёс но энергетикъёс трос пол кутылӥзы чурытэсь ужрадъёс, чакламлэсь ӧжытгес сётъязы электрокужым но "чагыр эстӥськон". Озьы ке но, Удмуртиысь "Межрегионгаз" огазеяськонлэн ёзэзлэн тӧроез Виталий Возисов ортчем арез уродэн уг лыдъя. Тани Правительстволэн юрттэмезъя, Россия но республика куспын пунэм тыронъёсты берыктон амалэн газ басьтэм понна 248 миллион коньдон сётэмен лыдъямын. Таӵе амалэн ик 12 миллион манет уксё тыриз Ижысь электромеханической завод, нош "Ижмаш" али документъёс дася 20 миллион манетлы, "Аксион" - 17, Ижысь механической завод - 15, нош Сарапулысь радиозавод - 1,5 миллион манетлы. Малы бен сыӵе амалъёс кутӥсько? Рынокен экономикае выжон но коньдонэн шуг- секытъёс вакытэ, республикалэн, городъёслэн, районъёслэн но предприятиослэн кивалтӥсьёссылы туж шуг луэ газ понна улэп коньдон шедьтыны. Соин ик ог-огедлы пунэм тыронэз взаимозачёт амалэн быдэсто. - Милемды, газовикъёсты, умой вала Удмурт Правительство, - шуэ Виталий Михайлович. - Котьку огкыл шедьтӥськом но ог-огмес валаса ужаськом. Нош кызьы ужало энергетикъёсмы? Николай Скворцов верамъя, умоез трос ик ӧвӧл. "Удмуртэнерго" электрокужым но шуныт сётонъя миымлы планзэ ӧз быдэсты, 96 но 92 процент лэсьтэмын. Кулэсмиз удыслэн пайда басьонэз (рентабельностез). Соин ик электрокужымез шыръяса кутоно. Миым энергетикъёс туж ичи коньдон висъязы лэсьтӥськонэ (пайда уг басьто). Нош федерадьной бюджетэ энергетикъёс улэп коньдонэн гинэ выт тырыны кулэ. Ортчем арын "Удмуртэнерго" банкрот луэ ни вал. Сое озьы карыны чаклано вал газовикъёс. Но энергетикъёс "чагыр эстӥськон" сутэмзы понна 416 миллион коньдон сётӥзы но 186 миллион манетлы пунэм тыронъёссэс взаимозачёт амалэн пытсазы. Озьы со куашкамлэсь утемын. Но тыронъёсыз эшшо 900 миллион манетлэсь трос кылемын на. Кылем ар пумын калыклы сётэм электрокужымлы тарифъёсты будэтон сярысь вераськон юнме шорысь ӧз поты. Миым декабре та ужпумъя Россиысь Правительство постановление кутӥз. Соя одӥг киловатт электрокужымлы дун 22-ысен 45 копейкаозь тупатыны лэземын. Коммунальной услугаосты дунтэмгес карон вылысь, шаерамы пӧртэм амалъёс утчасько. Тани Глазов город теплосетез быдэсак ас вылаз басьтӥз но сое Чепецкой механической заводлы (ЧМЗ-лы) сётӥз. Валамон, городлы шуныт басьтон дунтэмгес усёз. Удмурт Правительство, интыысь ас коже кивалтон ёзъёс но та удысын чупресгес ужаны но калыклэсь кулэяськонзэ ӟечгес утьыны кулэ. Г. РОМАНОВ. А. Г. Лукашенко - Удмуртиын Туннэ нуназе шорын Ижевске вуиз Беларусь Республикалэн Президентэз, Беларусь но Россия Союзлэн Вылӥ Советэзлэн Председателез А. Г. Лукашенко. Удмуртиын со улоз но ужалоз кык нунал ӵоже. Пумиськылоз Удмурт Республикалэн кивалтӥсьёсыныз, Ужез но ожез данъясь монумент доры тугоко поноз, вуылоз "Ижевский электромеханический завод" государственной предприятие, тодматскоз солэн продукциеныз но производствоеныз, пумиськылоз рабочийёсын, военно-промышленной комплекслэн кивалтӥсьёсыныз. Туннэ ик ӝыт пал Александр Григорьевич вуылоз "Ижмаш-авто" ОАО-е. 18 часэ Беларусьлэн Президентэз пумиськоз районъёсысь, предприятиосысь, пӧртэм удысъёсысь кивалтӥсьёсын. Кыкетӥ нуналаз вылӥ куномы вуылоз республикаысь стрелково-спортивной комплексэ. Учкоз оборонной промышленностьлэсь поттэм продукцизэ. Кенешоз предприятиосысь валтӥсь конструкторъёсын. Нуназе котырын тодматскоз Воткинск городысь П. И. Чайковскийлэн музей-усадьбаеныз. Татын ик пумиськылоз журналистъёсын, соослэн юанъёссылы валэктонъёс сётоз. Таин А. Г. Лукашенколэн Удмуртиын ужаны чаклам программаез йылпумъяське. Со сярысь пыр-почгес лыдӟыны быгатоды газетмылэн матысь номеръёсысьтыз. Сялберъёс Сӥзьыл кынтылыны кутскон вакытэ вал со. Лымшор зарезь дурын шутэтскыса, доре вуи капчи но сэзь мылкыдын. "Вот ведь,- малпасько ас поннам,- отын жумбыль-жамбыль пыласько на, нош татын уть ай юг-юг нырысетӥ лымы усем ни". Коркаям пыри гинэ но, оло, монэ пумитаса, лэся, укно улысь палэзьпуэ шур-р-рак! быдэс уллё тылобурдо пуксиз. Вылтуссыя шырчиклэсь кӧнялы ке бадӟымесьгес, йыр вылазы чильтроесь чукъёссы. "Кызьы соосты нимало? Кытысь вуэмын?" Сыӵе юанъёсын фотоаппаратме кутӥ но форточкаез усьтӥ: тусбуйзэс коть синпельлы кельтоно. Бурдоос сокем сакесь вылӥллям - кызьы лэзькизы, озьы ик шур-р-ак! ӝутскизы. Ярам али, кӧняез ке объективам "шедьыса" кылизы ик. Та бурдоос сярысь тунсыкъяськон сямен, кӧня ке соос сярысь тодӥ ведь. "Сялберъёс со,- шуиз пӧйшуорась Лёгор агай,- нош ӟучъёс свиристели шуо". Зэм верам пӧйшурась. Сялберъёс асьме пала лыкто кыдёкысь уй пал сьӧд нюлэсъёсысь. Татын ик соос толъё но. Г. ГОРОДИЛОВ. Туспуктэмез авторлэн. Ӟечкылан Пичи Пурга ёросысь Алганча-Игра гуртысь Захарова Александра Антиповнаез ӟечкыласьком 60 аресэныз. Юн тазалык, шуд но бур, тыро ӝӧк но ваньзэ умойзэ сӥзиськом. Сорокинъёс. Беларусь Республика туннэ: Беларусь Республика интыяськемын Европалэн шунды ӝужан палаз. Сое котырто Россия, Украина, Польша, Литва, Латвия. Беларусьлэн огъя теорриториез 207,6 сюрс искьем. Республика куать областьлы люкемын. Соослэн центръёссы: Минск, Брест, Витебск, Гомель, Гродно, Могилев. Беларусьлэн столицаез Минск. Республикаын пӧртэм калык улэ: белорусъёс - 7 миллион 905 сюрс, ӟучъёс - 1 миллион 342 сюрс, полякъёс - 417 сюрс, украинецъёс - 291 сюрс, еврейёс - 112 сюрс, бигеръёс - 12,5 сюрс, чиганъёс - 10,8 сюрс, литовецъёс - 7,6 сюрс но мукет выжыысь потэмъёс - 20,2 сюрс. Беларусь Республикалэн берло Конституциез кутэмын 1994 арын. Государствоен кивалтэ президент, сое быръё 5 арлы. Беларусьлэн нырысетӥ Президентэз луиз Александр Григорьевич Лукашенко. Со дырозь ужаз колхозлэн председателез луыса. Беларусь экономикаеныз туж чакласькыса кивалтэ. Приватизация татын бадӟым инты уг басьты. Республика ас кужыменыз азинскыны тырше, дуннеысь бадӟым организациослэсь коньдон юрттэт басьтытэк, пунэмаськытэк. СНГ-е пырись государствоос пӧлын Беларусь нырысетӥ инты басьтэ удобрение, комбайн, вуриськон машина поттонъя. "Беларусь" тракторез туннэ дуннеысь 40 странае мынэ. Президент А. Лукашенко берло аръёсы матысь кусыпъёс тупатӥз Россилэн пӧртэм регионъёсыныз, соос пӧлын Удмурт Республикаен но. ГАЗЕТ ГОЖЪЯМ БЕРЕ Шунды берга, пиналъёс дышетско, юанъёс кылё... "Фермер луэме потэ, мед монэ дышетозы..." статьяын (потӥз газетамы 1998-тӥ арын 10-тӥ декабре) вераськон мынӥз Ижевскысь 21 номеро училищеын фермеръёсты дышетон пумысен кылдэм югдур сярысь. Отын куд-ог юанъёс пуктэмын вал Калыкез дышетонъя министерствоысь специалистъёс азе. Статьямес министерствоын лыдӟиллям, вераськыны асьсэос ӧтизы. Со понна тау шуоно. Кенешон паськыт пӧрмиз. Соин ик статьялэн авторез та ужпум борды выльысь берытсконо луиз. Кызьы пусйимы нырысетӥ материалын, училищее вуылыкумы, фермерлы дышетскисьёс ӧз ӝожтӥське вал урод дышетэмзы вылэ но, ӧз куректэ дун тырыса дышетскемзы понна но. Пиналъёс мылкыдзэс ватыса возьыны уг быгато, дышетон ласянь ӝожтӥськонъёссы луысалзы ке, верасалзы, дыр. Собере ми но шӧдысалмы. Но со дыре ик соос туж жаляса веразы ужысь шуак кошкем дышетӥсьсы Л. И. Романова сярысь. Ушъяськизы Ботанической садын практиказы ортчем пумысен. Соин ик палэнысен туж валантэм: малы татын керетонъёс кылдэмын училищелэн администрациез но Ботанической садлэн кивалтӥсез Ю. А. Романов куспын? В. Вахрин, Калыкез дышетонъя министерствоысь отделлэн кивалтӥсез: Фермерлы дышетон 21 номеро училищеын радъямын вал, эксперимент ортчытон вылысь. Сое герӟам Ботанической садлы пайда юрттонэн но. Озьы дышетскисьёсмылы кутскимы ватсаса тодон-валан сётыны, кылсярысь, муш, чорыг вордонъя, нюлэс будэтон ласянь. Но, меӵак верано ке, та эксперимент борды кутскыкумы ик янгыш лэсьтӥмы: лыдэ ӧм басьтэ, Ботанической садлэн та ужъёслы дышетон понна нокыӵе материально-технической инъетэз ӧвӧл шуыса. Министерствоын но коньдонэн югдур туж начар вал. Озьы ке но, 21 номеро училище 140 миллион манет пала (вуж дунын) коньдон шедьтӥз, фермеръёслы кабинетъёс усьтӥз, ужан тӥрлык басьтӥз. Куд-ог предметъёсъя тодон-валан сётон шор ёзо профессилы дышетон куронъёслэсь мургес луэ бере, малпамын вал фермеръёсты дун тырыса дышетыны. Ботанической садлэн кивалтӥсез азе но курон пуктӥм: нылпиосты дышетонэз дунтэмгес карон понна кыӵе ке но луонлыкъёс утчаны дэмлам. Корр.: Мынам валамея, валче ужан огкыл сярысь гожтыку ик училище но Ботанической сад куспын кыӵе ке валамтэос кылдэмын вал? Г. П. Кулишова, 21 номеро училищелэн директорез: Кылем арын гужем училищелэсь ужамзэ эскериз прокуратура. Со ик договорлэсь пуштроссэ умойтэмен лыдъяз, отын, пе, ӧвӧл учкемын котькуд дышетскисьлэн интересъёсыз. Шуом, куд-ог дышетскисьлэн мылкыдыз вань дун тырытэк гинэ дышетскыны, мукет сямен вераса, шор ёзо профессилы чаклам куронъёсъя гинэ дышетскыны. Мукетыз дышетскись училище бере институтэ пырон сярысь но малпаське, соин ик со, мургес тодон-валан басьтон понна, дун тырыса но дышетскыны соглаш. Нош Л. И. Романова, вань дышетскисьёсты огкадь дунъяса, ваньзылы огкадь дышетскон дун тупатӥз. Туэ выль договор дасямын, но солы со пумитъяськыны кутскиз. Азьвыл договоръя котькуд дышетскись толэзьлы быдэ 131 манет тырыны кулэ вал. Но меӵак верано ке, тросэз дышетскисьёс со коньдонэз шугъяськыса тыро. В. Вахрин: Табере выль положениея училище котькуд дышетскисен нимаз договор гожтыны кулэ. Та пумысен ик кылем арлэн пумаз 5 декабре училищеын ортчытэмын вал дышетскисьёсын но анай-атайёсын кенешон. Корр.: Фермеръёсты дышетонэз эскерон юри-а радъямын вал, кыӵе ке ӝожтӥськон-а вуиз? В. Вахрин:: Экспериментлы куинь ар тырмиз ни. Нош Романовъёс нокыӵе йылпумъянъёс ӧз лэсьтэ. Кытын ужало соослэн фермеръёссы, тодмо ӧй вал. Тӥни соин ик малпаськыны кутским: училищеез йылпумъям фермеръёс нокинлы кулэ ӧвӧл ке, оло, та экспериментлы пум пононо? Эскерон ортчытоно кариським. Корр.: Кыӵе тырмымтэос шараямын? Е. Солдатенкова, министерствоысь специалист: Мон азьло но та училищее ик дышетскисьёсты эскерыны поталляй, кылсярысь, лэсьтӥськисьёсты. Но, фермеръёс доры вуыкум, дышетӥсьёс нокыӵе ужан планъёссэс ӧз возьматэ, мон лыктон сярысь тодо ке но вал. Эскеронме куспетӥ карыса, соослы вань документъёссэс дасян понна, дыр тупатӥ. Мукетъят лыктӥ ини В. Вахринэн. Вань эскерон ортчиз училищелэн кивалтӥсьёсыз азьын. Тырмымтэос шараямын журналэ гожъямъёсты кулэезъя тыро-пыдо радъян ласянь. Техникалэсь утиськонъя инструкция но уг чакласькы вылэм. Ярам, коть, пиналъёсын нокыӵе шудтэм учыръёс ӧз луэ. Фермеръёсты дышетонэз чакласа возьыны Л. Романова юнматэмын вал бере, со ик кыл но кутыны кулэ документациез нуон понна. Вань преподавательёслы валэктоно вал, кызьы ужано журналъёсын, уроклы дасяськон планъёс бордын. Корр.: Но таин быдэсак соглаш кариськыны уг луы. Училищеын радъям дышетскон понна кыл куто, дыр, директор но, солэн юрттӥсьёсыз но, методистъёс но? В. Вахрин: Шонер. Со пумысен училищея приказ дасямы. Г. Кулишова: Тӥ юаськоды, кытын вал администрация, малы озьы ужаны лэзиды. Но Романовъёс сокем зол висъяськыса ужаны кутскизы, ас удысазы пыриськыны нокинэ ӧз лэзьылэ. Кыӵе ӟеч луэ, мон сямен, Ботанической национальной сад кылдытон сярысь малпан. Нырысетӥ кык арзэ училищелэн быдэс коллективез та малпанэз уже пыӵатон бордын ужаз. Тупатэм графикъя коллективмы пиналъёсын ӵош садэ ялан ужаны ветлӥз... Корр.: Тӥ верамъя, нырысь ваньмыз умой радъяськись. Мар бордысен бен кутскизы тупамтэос Ботанической садлэн кивалтӥсеныз? Г. Кулишова: Верай ни вал, училище фермеръёсты дышетон понна кӧня ке кабинетъёс висъяз, соослэсь быдэс этажзэс тупатъяз-чеберъяз. Нош мар кариз Ю. Романов? Малпаськоды, тау-а шуиз? Ӧз. Училищелэн кивалтӥсьёсыныз кенешытэк, со мынэ калыкез дышетонъя министерствое фермеръёслы висъям этажез Ботанической садлы курыны, отын, пе, фермеръёслэсь школазэс усьтоно. Югдур уката но лэчытомиз, солэн статьяез "Удмуртская правда" газетэ потэм бере, кытын со ӝожтӥськиз: министерство но Кулишова солы, пе, малпанъёссэ быдэстыны коньдон уг сёто. Корр.: Озьыен, училище Ботанической садэн кусыпъёссэ дугдытӥз. Мар возьма табере фермерлы дышетскисьёсты? Кытын соос быгатозы практиказэс ортчытыны? В. Вахрин: Таосыз группаос дышетсконзэс пумозяз вуттозы. Училище кусыпъёс тупатӥз ини егит натуралистъёслэн станциенызы. Нош азьланяз басьтӥськоз на-а та училище фермеръёсты дышетон борды - вераны шуг. Правительстволэн 637 номеро постановлениезъя, кыӵе ке специальностьлы дышетон понна, нырысь ик кулэ предприятиослэсь, колхозъёслэсь но мукет организациослэсь заявкаос. Со сяна, та ужпумъя огкылэ вуоно районъёслэн но городъёслэн администрациосынызы, угось соос гинэ вераны быгато, кулэ-а, ӧвӧл-а туннэ-ӵуказе соиз яке таиз профессия. Герӟаськытэк уз луы уже кутонъя центръёсын. Тӥни соку гинэ котькуд училище басьтӥськыны быгатэ кыӵе ке специальностьёсты дасян борды. Корр.: Меӵак вераса, училищелэн азьланяз вань-а Ботанической садэн кусыпъёсты выльысь тупатон ласянь кыӵе ке луонлыкъёсыз? Г. Кулишова: Ботанической сад - со быдэс Удмуртилэн узырлыкез. Со понна кулэ луиз ке, ми уй но нунал дунтэк ужаны дасесь, Ю. Романовен но ужаны пумит ӧвӧл но... соку гинэ, ку со ачиз соглаш кариськоз училищелэн куронъёсыныз но ог-огмес валаса но ог-огмылы оскыса ужаны тыршоз. *** Таин статьяез йылпумъяны но луысал ни кадь. Но вераськон урдсы кыле на Ботанической садлэн кивалтӥсез Ю. Романов, кинлэсь нимзэ Калыкез дышетонъя министерствоысь адямиос туж ӵем поттылӥзы. Соин ик соин пумиськытэк но солы куд-ог юанъёсын вазиськытэк, та ужпумез быдэсак сэрттэмен лыдъяны уг на луы. Корр.: Министерствоын лыдъяло, фермеръёсты дышетон понна Ботанической садлэн луонлыкъёсыз ӧвӧл шуыса. Озьы-а со? Ю. Романов: Садлэн вань 350 гектар пала нюлэсэз. Нюлэс будэтон ужлы пиналъёсты дышетэ ас ужзэ ӟеч тодӥсь-валась инженер Э. Протасов. Куать умортоосмы вань. Мушкасьлэн уженыз тодмаськон понна со тырме. Вить тыметын чорыг вордыны малпаськом. Но та ужлы али ик дышетыны быгатӥськом ни, уго артысь Ильинка гуртын чорыго тыметсы вань. Собере умой кусыпъёс тупатӥм "Пихтовка" совхозэн но. Корр.: Туж-а кулэ Ботанической садлы ужась киос, фермерлы дышетскисьёслэн кужымзы? Ю. Романов: Та Ботанической сад кылдытэмын вал, студентъёсты музъем ужъёслы дышетон понна. Соин ик кызьы со возиськоз дышетскисьёслэн киоссытэк?! Вань тодмо ботанической садъёс (Харьковысь, Орёлысь, Копенгагенысь) озьы ужало. 21 номеро училищеысь вуоно фермеръёс асьме садлы туж умой юртто вал. Корр.: Тӥ 21 номеро училищелэн администрациеныз выльысь кусыпъёс тупатыны соглаш луысалды-а? - Луысал. Училищелэн директорез мынэсьтым но куронъёсме лыдэ басьтыны быгатысал ке. Кылсярысь, Г. Кулишова юри сӧрыны ӧй вырысал ке адями кусыпъёсты, кызьы со кариз мынам кузпалэным, Ботанической садлэн научной ужасеныз Л. Романоваен (сое ужысь кошкытыса), ӧй куштӥськысал ке азьвыл кутэм договорлэсь. Мон, Ботанической садлэн кивалтӥсез, училищелэсь трос уг куриськы ук. Мед гинэ со дыраз коньдон тыроз бензинлы но нылпиосты сюдонлы. Озьы ик фермеръёсты дышетон понна азьланяз но мед висъялоз вылэм кабинетъёссэ. Но дышетскись фермеръёс шоры медаз учкы, со понна соос училищелы кыӵе ке пайда вайыны кулэ шуыса. *** Вань верамъёс кылзэмын. Куд-ог лек кылъёс гожтытэк кельтэмын. Собере соосты гожтыны но, дыр, кулэ ӧвӧл, угось та статьяе пыртэм адямиос (министерствоысь но Ботанической садысь) ог-огзы пала вамыш лэсьтыны чутрак пумит уг карисько. Озьы потӥз мыным. Туж умой вераз В. Вахрин. Дышетскись - со, пе, шунды, кудӥз котыртӥ берганы кулэ вань дышетон удыс. Озьы мед луоз вылэм. Нош мар котыртӥ бергаськомы меда асьмеос, арлыдоос, шуак кусыпъёсмес сӧрыса, керетыса, юнме шорысь лулсэръёсмес быдтыса. Та статьяез дасякум, чик но ӧй малпаськы кыӵе ке эскерон ортчытыны - со понна нимаз ёзъёс вань. Кин янгыш, кин ӧвӧл - меӵак вераны уг басьтӥськиськы. Но одӥгзэ валай: котькуд адями ас ужзэ чылкыт но йылаз-пумаз быдэсъясал ке, улонамы керетонъёс ӧжытгес луысалзы. Та учыр пумысен лыдӟисьёсмы куд-ог малпанъёссэс веразы ни, азьланяз но гожтэтъёс луозы на, дыр. Озьы ке но, та югдурлы йылпумъянъёс лэсьтыны кулэ кивалтӥсьёс, кинъёс бордысь потэ дышетскисьёслэн но, Ботанической садлэн но азьпала улонзы. Татьяна Банникова. Быдэ вуымтэослы сӥзьыса Завьял ёросысь Вараксино шор ёзо школаын февраль сӥземын вал быдэ вуымтэослы. Одӥгаз нуналэ пиналъёс азьын вераськизы правоен утён удысын ужасьёс. Отчы ветлӥзы районысь специалистъёс - быдэ вуымтэосын ужанъя инспектор Т. В. Мансурова, "Подросток" центрлэн директорезлэн воштӥсез В. Л. Яковлев. Одӥгез нунал сӥземын вал семьялы. Соку анай-атайёс вуылӥзы классъёсын ортчись кенешъёсы, дышетӥсьёс потазы семьяосы. Тазалыклы сӥзем ужрадын ортчыло пӧртэм ӵошатсконъёс, урод сямъёслэсь куштӥськон сярысь вераськонъёс. Атыкай музъеммес утисьёслэн нуналазы радъямын луоз рыцарьёслэн турнирзы. Интернационалистъёсты буре вайыса, музейын ортчоз азьвыл воинъёсын пумиськон. В. ЛАГУНОВ. Николай Евсеев Паськыт ӧр сётӥз улон Азьланьтӥськомы лыдӟисьёсмес тодмо гожъяськисьлэн Николай Евсеевлэн веросъёсыныз тодматонмес. Таяз учыре журналист маде Удмурт кун пединститутын дышетскем аръёсыз, отын со вакытэ ас вылаз чидам шугадӟонъёсыз сярысь. 1. Ми - ож дырлэн нылпиосыз Ми - со ожмаськон дырлэн вордэм но сюрес вылэ поттэм нылпиосыз... 20-тӥ мае каникулъёс кутско, со нуналэ ик - колхоз уже. Арлыд шоры нокин ӧз учкылы. Ӵукна вить часын синъёс нокызьы уг усьтӥсько ай, нош мамае, пельёстӥ ик кыскаса, валесысь ӝутэ ни. Мар со валес? Улын - куроен тырмытэм валтос, йыр азьын - йыролтэс, нош шобрет интые сукман кушто но - кӧл. Собере, корказе потыса, ӝыны час ёрос вушйылӥськод ӝужась льӧль шунды азьын. Со монэ пумен ӟырдась сиосыныз зӥбе но зӥбе. Синъёс кынисько. Йыр азьлань мыкырске. Уйвӧтын ыжъёс бӧксыны кутско. Умме усемез но шӧдыны уг луы. Со куспын мамае корка пушкысь но гидкуа котырысь ужъёссэ лэсьтыса быдтэм ини. Каллен гинэ пельпумам йӧтскылэ: - Султы, пие: ыжъёслэн сиемзы потэ ни. Озьы вал, дыр, ӵукнаосы Вахрушева Нюралэн но улоназ. Ми соин одӥг классын дышетским. Мамаосмы но Каганович нимо колхозлэн ыж вордон фермаяз ӵош ужазы (вал сыӵе колхоз Шаркан ёросысь Бызин гуртын). Колхоз уллёын кык сю - ньыль сю ыж возьылӥз. Школаын дышетскон ар йылпумъяськем бере, мамаосмес мукет бусы ужъёсы выжтылӥзы: ыжъёсты возьманы, пе, пиналъёсты но быгатозы. Ми, зэмзэ но, быгатӥм, туж тупаса ужам. Ыжъёсмы но ми борды дышизы. Тышкаськись ӧй вал. Малы юнме тышкаськод? Ыжъёс бусыысь тыр берто. Пиоссы таза будо. Мумыоссы котыртӥ соос, ческыт нонэмзы бере, ньыль пыд вылазы ик ӵош тэтчаса шудо. Уллё шутэтскон дыръя ми Нюраен тамак кыскыны дышетскылӥм: куасьмем йӧны куарез пыргытӥськом но, сое тетрадь яке книга бамен бинялтыса, тыл кенжытӥськом. Кезьыт луон азьын мыным, тылскон вылысь, дорын сенькиен тылкорт сётылӥзы, нош тылкизили поттон кӧльы котькытысь шеде вал. Ми понна со макем тунсыко уж вал. Кӧльы вылэ сенькиен зӥбиськод, тылкортэн шуккиськод но - кизилиез сеньки борды дэмӟе. Пелля - кӧня мылыд потэ. Тэлясь тылӝулэн ӵынэзлэсь кызӥськом-кызӥськом но чильыммес выльысь сюпсиськом. Ыжъёсмы мукет интые кошкыны ӧдъяло ке, соос сьӧры дуй-не-стой! бызиськом вал. Мон сюмыслэсь пунэм сюло нуллӥ. Омырез шлач! шуккисько ке, куараез бусы тыр чузъяське. Ыж уллё чорк! дугдэ. Йыръёссэс выллань урдыса, котыр утчасько, пельёсынызы азьлань-берлань вырето. Кылзӥсько вал. Асьсэлэн кузёосынызы лыдъязы, лэся. Оскылӥзы. Ми соосты сюдӥм, люктам но утим ук. Саюлэ шутэтскыны пыртӥськом ке, нуназеяны пуксиськом, нош ыжъёс ми котыре ик выдо но сыскиськыса кыллё. Соос но пичи нуныос кадесь вал. Туж бадӟым кык такаосмы гинэ куспазы нокызьы ӧз тэрылэ. Ыжгонзы туж векчи, юн бабыльске. Сюръёссы кык палтӥз ик пружинка сямен котыръяськыса будо. Пушкысьтызы пельёссы но уг адско. Ӟеч выжы уськытон понна, соос Узбекистанысь ваемын вал, дыр. Чалмытак ул но ул вал кыдёкысь Удмурт шаерын. Ӧйтӧд, мазэс люкыны ӧз быгатылэ. Вань уллё кылле: кудӥз кӧлэ, кудӥз сыскиське, нош таосыз ыжъёс пӧлысь шуак пото но, ог-огзэс урдэсъёсынызы донгаса, палэнэ кошко. Сямзэс но умой тодӥм ни: жугиськыны мыно. Собере ог-огзы дорысь дас-дас вить метр кеме палэнско но кӧня ке сыло. Ваньмыз дась. Дыр вуиз. Эскерыса но уд вуттӥськы - соос, ӧрӟиос сямен, ваче пумит лобо ини. Кымесъёс шуккиськизы - пыд улазы музъем ик зурказ кадь. Собере нош чигнало, нош шуккисько. Кӧня кужымзы тырме, сомында ик ожмасько. Кыксылэн ик йыръёссы ӟуз! вир луэмын. Соку гинэ ог-огзы дорысь шуак палэнско но пӧртэм интыостӥ лать-лать мыно уллё пушкы. Чылкак дуэльын кадь. Куспазы пыриськид ке, интыяд ик виёзы. Ыжъёс сыӵе суредъёслы дышемын вал: нокыӵе кариськытэк учкыса кыллизы. Уллёын мукет такаос но вал, но соос озьы ӧз йӧнтэмъяськылэ. Нош огпол... Огпол мон туж бадӟым янгыш лэсьтӥ. Юг-юг тӧдьы лымы кадь, лӧс-лӧс ошкем кузь гоно така вал уллёямы. Со туж егит вал ай, но мумы ыжъёс сьӧры вис карытэк бызьылӥз. Мугорыз но пичи гинэ. Ваньмыз борды тэбиньылӥз, кылзэ, нюлӥськыны дасяськем сямен, лабыр-лабыр поттылыса. Нуналлы быдэ ӵукна ик колхозникъёслэн ыж уллёязы пегӟылӥз. Котькыӵе бодыен но, сюлоен но дугдытыны выр - одно пегӟоз. Огпол мон со пинал такалэн азьпал пыдысьтыз гозыез сюрозяз кыски. Думетысен пегӟыны ӧдъя ке, гозы йырзэ уллань кыске - така дугдэ. - Табере дышод астэ кызьы возьыны,- шуи синмаз ик. - Паллянэ уд бызьылы ни,- будэтӥз Нюра. Со нуналэ така пегӟыны ик ӧз малпа ни. Сосновка шайвыл бордысь лайыгын ыжъёс урыз- урыз сисько. Арам бервылын ӟеч вож сиён будэмын. Ыжъёс вырӟылытэк сисько кадь, уллё огинтыяз сылэ. Шаркан пала нуись тракт дурын, вырйылын, пиос картофка чуръёсты октон вылысь гыро. Нылкышноос но дышетскись пиналъёс окто: сентябре ми ноку но дышетскыны ӧм кутскылэ уга. Картофка октӥсьёс пӧлысь нырпелесъёсты бичатӥсь ческыт зын лыктэ - картофка пыжо. Нюраен кыкнамы ик соос доры тубим. Пыжем картофказэс оскалтыса вуим-а, ӧм-а, учкисько но - улӥын ыж уллёмы я солань, я талань бызьылыны кутскиз. Ас поннам малпасько: мар луиз соосын? Ыжъёс кинлэсь ке куженак пегало. Вань адӟонме золтыса учки но адӟисько: уллёын кион. Пиослы кесяськисько: - Юске валъёстэс! Кион! Уллёын кион! Со куспын кион думем такаме ӵабыштыса погыртӥз но чыртыяз куртчиськиз. Тыбыр вылаз сэрпалтыны кужмыз ӧз тырмы - нюж кыскыса нуэ. Туж ӝог юскизы валъёссэс. Уиськиськом. Арам бусыетӥ ворттыны валъёслы секыт. Мон кионэз сутӥ ни. Но вал соргетэ - кион вылэ уг мыны. Вырйыл сьӧры вуим ини. Отын кыкетӥез кион возьма вылэм. Кык палтӥз такаез куртчизы но нуо. Нюлэс дурысь Бадӟым пужым доры кыско. Тэле пыризы ке, нокыӵе вал вылын отчы уд пыры. Соку такаеныд люкиськоно луод. Но... Куштӥзы, ява. Такамы пыд вылаз султӥз. Кионъёс, валамон, пегӟизы. Мон вал вылысь васьки. Сьӧлыкез валасьтэм такамес валтыса нуи ни. Гозызэ пертчи. Жаль потӥз. Ӝытозь со ыжъёс сьӧры сиськытэк вамышъяз ни. Чыртыез котырак сямен кесямын вал. "Вот така йыр,- малпасько,- вера вал солы, но уз вала ук". Ӝытазе бертӥм но, вандыны косӥзы. Я, кызьы улэп такаез вандод? Уг, уг... Солы вӧсь луоз, вир потоз. Мыным со жаль потоз. Мон бӧрдо. - Кыӵе ыж возьмась тон? - юаз бригадир Борисова Ольга.- Колхозлэн тӧроез косӥз, Васильев Степан Кузьмич. Сое тодӥськод, луоз. Солэсь куронзэ ӧд быдэсты ке, бырод. - Мон уг быгаты. - Ярам, но ми тонэ дышетом. Мар шуод, ожмаськон аръёсы гуртын но военной дисциплина вал. Одӥгзэ мон ӧй вала, мар луоз табере монэным, нош соку такаез вандыны косӥзы пудо сиён ворттӥсь Миктаез. Со вакытэ кионъёс малы ке туж трос вал. Сибирьысь но, вераллязы, изнэсо кионъёс вуизы. Мынэсьтым но Комик нимо чиль сьӧд пуныме син азям ик (укноетӥ учкыса сылӥ) карысьтыз поттӥзы но азбарын ик сиизы. Огполаз пастухаськом вал Бегбай нюк сьӧрын. Соку ми ыжъёсты куинь кузя возьмаськом вал ини. Мон, Евсеев Николай, Широбоков Аполлон но Зеленина Лидия. Куазь шулдыр. Котыр нюлэс кыстӥське нюклэн кык палтӥз. Дыр нуназе пала кыске ни. Ыжъёс саюлэ карисько, шутэтскыса сыскиськыны выдо. Но али кудӥз сиське, кудӥз кылле, кудӥз палэнэ кошкыны выре на. Адӟисько - нюк валлин куинь кузя ӟичыос лыкто. Пырак ыжъёсмы пала. Соослэсь азьло, пуштрес быжыныз котыръяса, пичи ӟичыпи потӥз. Малпасько, та бадӟымъёсыз но ӟичыос, дыр. Соку мон кузь сюломе кырми но пумитазы вамыштӥ. Шуккисько ке, пырак нюк кузя чузъяське. Ыжъёс огенак карисько. Ӟичыос лыкто но лыкто. Куиньназы артэ султэмын. Меӵак уллёмы шоры. Мон - соос пумитэ. Шлач! шуккисько сюлоеным. - Пшёл! - кесяськисько.- Пшёл татысь! Кусыпмы ог дасо вамыш гинэ кылемын. Мон валай: та ӟичыос ӧвӧл. Кионъёс лыкто ыж уллёмы доры. Шорысез, тужгес бадӟымез, пиньёссэ поттыса, шорам ыргетыны ӧдъяз. Куинь кион! Мар мон соос понна? Кесялозы но - тӥни. Ярам коть, гужем куазен соос сокем сютэмесь вылӥллямтэ - шуныт ыж вир гинэ юэмзы потэм. Берытскыса пегӟоно ке, уиськозы кадь потэ. Чигнано ке, пегӟыны уд вуы. Но сьӧсьёс дугдӥзы. Оло "герой" кадь туж бадӟым уж лэсьтэменым-а, оло кионъёс ыжъёсты жалязы-а - берытскизы но Бегбай нюке васькизы. Учкисько но - Аполлонэ кыз йылэ тубем ни. Лида ыжъёсты улляны выре, нош соослэн вырӟемзы но уг поты. Лида кӧдэктэмын. Кылыз быгыльмемын. Вераськемез но уг луы. Ярам, кионъёс кудместы ке но жалязы кадь: оло монэ, сюлоен пияшез, оло арлыдо кышномуртэз Зеленинаез, оло, штанияз лэземезлэсь азьло, кыз йылэ ӵабъяськыса тубем Аполлонэз?.. Со аръёсы кышкыт вал пастухъёслы. Тужгес шимес учыре сюрыны "шуд усиз" 1946-тӥ арын июле (нуналзэ вунэтӥськем ини). Гужем ыжъёсты кӧлыны пыртылӥм гид азьысь азбаре. Дас кык радэн коръёслэсь котырак забор ӝутэмын. Ӵукна уже лыктӥ, ӟезьыез усьтӥ но - мар тамаша та? Ыжъёс кушетскемын, сэрегъёсы люкен-люкен ӝиптӥськемын. Утчаським. Дас кык вандэм ыжмес шедьтӥм. Чыртыоссы гинэ кесямын. Вирзы юэмын. Гижыосынызы ӵабъямзыя валам: со ӝужда забор вамен пыриллям. Огназ кион ӧй быгатысал сомында пудоез изъянтыны. Мар карод? Кинэ янгыше уськытод? - Ярам, - шуиз бригадир Борисова Ольга.- Таяз учыре но тонэ жалялом. Озьы шуиз ке но, бӧрысь пунэмзэ берыктыны визэ шедьтӥз. Ой, макем секыт йӧтӥз! Нош, нырысь учкыса, со учыр пичи гинэ кадь. х х х Фермаос котыре, пулъёслэсь шуккылыса, пудо сиён пӧзьтыны туж ӝужыт - юрт но уд шуы, балаган но уд нима - одӥг кылын вераса, липет лэсьтӥзы. Отчы куинь адями ӝужда бак пуктӥзы. Улласянь эсто, тыраз ӝоктэм картофкаез пӧзьто. Картофка небӟем бере, со быдӟа бекчеез кышномуртъёс бекырто но, падӟа кузя вылӥе тубыса, куинь-ньыль метр кемысь картофкаез кузь ныдо кобыен омыръяло, асьсэ ведраосы киськало. Одӥгез падӟа вылысь ваське, мукетыз тубе. Нырысез пельпум вылаз ведра-карнанзэ возъя но аслаз фермаез пала вамыштэ. Ми - уг тодӥськы ни, кӧня кузя жули-мали пиналъёс, оло вить, оло куать сютэм пияшъёс, отын радэн черодмес возьмаса сылӥм. Нырултӥмы тыро ведра ортче ке, котькудмы отысь тросгес картофка кыскыны выриськом. Одӥг ведра ортчиз - котыр одӥг картофкалы кисыямы будӥз. Нылкышноос милемды юри ӧз шӧдылэ, ӧз адӟылэ. Тодо ук, макем сютэмесь. Шат тыр кӧтын ми отчы мынысалмы?.. Пудоослэсь сиёнзэс лушкаськом шуыса, нокинлэн тодаз ӧз лыктылы. Соин ик, вылды, котыр ӧм утчаське, ӧм чаклаське. Нош палэнын бригадир Борисова ваньмылэсь нимъёсмес блокнотаз гожъяса сылэм. Ӵуказеяз вить часын ӵукна укное йыг-йыг торккетӥсь луиз. Мамае учкиз но паймиз - отын Лукерья сылэ, колхоз правлениысь возьмаськись. - Клавдия, пидэ правление ысты. Васильев ӧте. Мамае паймиз. Малы меда со кулэ луиз Степан Кузьмичлы? Вылаз ик - таӵе вазь. - Мар дауртӥд, пие? - юаз мамае. - Мон уг тодӥськы. - Ветлы, ветлы, пие. Ӧте бере, маке но вералоз, дыр, предмы,- ыстӥз мамае. Усьтыр-табыр дӥсяськи но кошки. Лобыса кадь вуи конторае. Туннэ арлыдо адямиос гинэ тодо на, со Полекар Петыр кулаклэн коркаез вал шуыса. Туби вылӥ этажаз. Сьӧрам ӧсме ворсай но ӟудӥ. Тыпак дугдӥ ӧс куспы. Коркалэн борддорез, оло, быдэс метр зӧкта. Ёрми киосме кытчы ватыны. Сылӥсько, нош Васильев, пал кыл но вазьытэк, азьчиньыеныз монэ дораз ӧтиз. Мынӥ ӝӧк дораз, нош со, пыльтчем синъёсыныз монэ портыса, минут ӵоже, оло, пукиз. Собере ӝӧк вылаз бадӟым мыжыкеныз сётӥз ук - вань ручкаосыз но чернила возён банкаез (соку авторучкаос ӧй вал на) выллань тэтчизы, нош мон выж пыр нырысетӥ этаже уси кадь... - Мын! Мамадэ ысты. Малы тон татчы лыктӥд? - келяз монэ Васильев. Выль предмы Кыква гуртысь вал. Бызинын солэн коркаез нырысь ӧй вал. Соин, дыр, Катя нимо кышнозэ но ӧз вайы. Улӥз пересь нэнэе дорын, Юбер Стёпанлэн корказ. Мон отчы, улӥ ульчае, ӵем васькасько вал. Ӵапак али, Чаг возён ульча кузя бертон сяменым, тодам лыктӥз соос дорын луэм одӥг учыр. Мамае гур эстӥз но, корка тыр ӵын потӥз. Кын пуэз ӝуатыны вырыса, плита ымтӥ пелляз-пелляз но бӧрысь ворсаны вунэтӥз. Ӵын синъёсты сие. Кызыса кате быриз ни. - Мын ай, пие, нэнэед доры васька,- шуиз, монэ ӵын коркась палэнэ келян понна, дыр. - Ӵын кудызэ кур, ятэ. Мон шумприч тӧлӟи. Соку ай школае ӧй ветлы на. Кышнопалан корт гур тачыртыса ик ӝуа. Вылаз шыд пӧзе. Киосме азьлань золтӥ но шунтыса сылӥсько. Гурысь пуос мултэс тэлямен, шыд уртчыны кутскиз. Мон уг валаськы, кызьы дугдытоно сое. - Ой, нэнэ! Шыд уртче! - кесяськисько. Соку Степан Кузьмич залысь йӧн-йӧн лыктӥз но дыртыса шуиз! - Сялӟы, Коли, сялӟы. Мон соку ик пуртые клёп! гинэ сялӟи. Кӧтсэ посыса серекъяз выль предмы. Буйгатскемез бере шуиз: - Шыдмы зумытгес луоз. Озьы-а? Мон номыр ӧй вазьы. Нэнэе педлось пыриз. Мон курисько: - Нэнэ, ӵын куды тубтыны косӥз мамае. Гурак серектӥзы но, нэнэе, номыр вазьытэк, сумка тыр пыжиськем сиёнъёс тыриз. Ӵын куды, пе, со. Я, мадёнме палэнэ нуи кадь. Берытском. Мамае конторае ветлӥз. Берытскемез бере ӧз йыркуръяськы. Ӧз тышкаськы. Юаз гинэ: - Уг тырмы шат, пие, сиёнмы? Тодысалзы ке туала егитъёс: ми изэм сьӧд потлэсь но клевер кукольлэсь пызен кисаль сиылӥм Атай шаермес утён понна Быдӟым ожмаськон аръёсы но со бере. Соослэсь ик "нянь" колды пыжылӥм. Уг, туала пиналъёс сое син азязы но уг пукто. - Школае мыныкум, мама, едӥньы висе,- шуисько. - Едэ, пие, кужмогес золты. Соку кӧтыд уз висьы. - Малы асьмелэн няньмы но ӧвӧл, картофкамы но тулысозь уг тырмы? - шуак юай мамаелэсь. - Тятяед фронтын, огнам ужасько уга, пие,- валэктыны выриз со мыным. - Кык сузэръёсыд но кулӥзы ини. Санямы туэ школае мынысал,- синпумъёссэ ӵушылӥз мамае.- Лушкаськыны ум быгатӥське. Со - сьӧлыкаськон уж гинэ. Эн дышетскы со блама ужлы. Улонмы тужгес секыт луиз ожмаськонлэн ньылетӥ араз. Чапчара гольык но сютэм кылим. Мынам вордскем нуналам - 1945-тӥ арын 9-тӥ мае - ивортӥзы Быдӟым ожмаськонлэн йылпумъяськемез сярысь. Со нуналэ котырак горд флагъёс лопыръяськизы ке но, ми соку, клевер куколез изыса, нянь пыжим, тулыс лымы улысь октытэк кылем картофкаосты, оген- оген бичаса, корт гур вылын табань пыжыса сиим. Со но кӧт тырымон ӧй вал. Ми гинэ Валя сузэреным картофка табаньёсты куртчылӥм. Мамамылэн бамъёсыз вылтӥ, ми шоры жальмыт учкыса, синвуосыз пызьыразы ке но, милемлы ӧз возьматы шумпотыса виясь шапыкъёссэ. - Сиське, сиське,- шуиз но кышнопал висъет сьӧры кошкиз. Мон уг тодӥськы, кӧня со гур сьӧрын викышъяса сылӥз, но юн валай, мар со сыӵе пыӵал тӥрлыкен ожмаськон. Чаг возён ульчаысьтымы гинэ ог кызь таза но егит воргоронъёс фронтысь ӧз берытске ни. Азьлогес лыдъялляй - со лыдпус быдэс гуртмыя укмыстонлэсь ортчиз. Тулыслэн вуэменыз ӵош улонмы но ӧжытак капчиялляз. Йӧны, колыс, пушнер октылӥм гылатонэ, мукылияны бусые ветлылӥм, нош нянез номырин воштыны уг луы вылэм. Соин ик шуо, дыр: "Нянь - ваньмызлы йыр". Ньыль ар пала пӧсь ожмаськонъёс бере "странамы уката юнмаз" шуылӥзы ке но, калык пыд йылаз султыны туж кема выриз. Гуртъёс тужгес но шальтразы. Вылаз ик, вань вузкарон 1949-тӥ арозь адямилы быдэ карточкаосъя радъямын вал. Озьы ке но, мон кыл сётӥ вань улонме огпол но лушкаськытэк ортчытыны. 2. Ӧй быдэсты сётэм кылме Ӟольгыри вамышъёсын кадь мынӥз улонмы, Быдӟым ожмаськон дугдэм бере. Секыт сыӵе сюрес кузя вамышъяны, но дышетсконмы тунсыко вал. Дасэтӥ классэз 1949-тӥ арын йылпумъяса, УГПИ-лэн (университет интыын соку Удмурт государственной педагогической институт вал) историяя факультетаз пыри. Стипендия тыризы кызь манет. Ярам коть, ож аръёсы кутскем карточкаосын вузкаронэз воштӥзы - институтлэн столовояз дунтэмгес сиськыны кутскимы. Винегрет, кыӵе ке шыд но чай. Кыкетӥзэ басьтыны, инмар мед утёз, ӧм дӥсьтылэ - соосты ваньзэ сӥльлэсь пӧразы ук. Тол сессия дыръя одӥг гинэ экзаменмы вал. Ваньмыз о, кей! Вашкала историяя экзамен сётоно луиз Елена Александровна Милкорлы. Ӵош кемдӥм Бродский Володяен. Дасяськыны пуксим одӥг ӝӧк сьӧры. Солэн - зачёт, мынам - экзамен. Нырысь потӥз Бродский. Сюрем юанэзъя солэсь Елена Александровна номыр ӧз юа. Одӥг гинэ юан сётӥз: - Бродский эш, малы тӥ еврей выжыдэс ватӥськоды? - Мон уг ватӥськы, Елена Александровна,- возьдаськыса кадь вераз Володя.- Вань документъёсам национальносте шонер гожтэмын. - Ярам, ярам. Мон озьы гинэ юай. Кытын зачёткады? Сётӥз. Зачёткаяз преподаватель гожтӥськиз. Собере карта доры мон потӥ. Малы ке но со Володялы Бродский эш шуыса вазиськиз, нош монэ нимыным но атай нимыным вераз: - Кылзӥсько, Николай Николаевич. Мон ог вить минут ӵоже Римской империя сярысь мади но, со монэ дугдытӥз. - Тырмоз, тырмоз! Тӥ туж умой дышетӥллямды мынэсьтым предметме. Вае зачёткадэс, мон тӥледлы "отлично" пукто. Гожтӥз. Мон кабинетысь потӥсько ни. Со мыным: - Евсеев эш, мыным толон пу ваизы. Ӝоктӥзы но кельтӥзы. Мынам анае уг султылы ни. Аслам кужмы уз тырмы коръёсты берыкъяны. - Мыно, Елена Александровна. - Инмар мед утёз: огнады уд ворме. - Соку эшъёсме шедьто. - Мон пунэме уг кыльы. Кыӵе тӥ, пиос, яратоно кадесь. Эшъёсме ӝутӥ. Лыктӥм куинь кузя. Сизьым полэс нюлам вумес пызьыртӥм - чидантэм жадим. Ужмес быдтон азьын Елена Александровна потӥз но шуиз: - Пыре, ява, пиос. Мон тӥледыз утялто. Пырим. Самоварысь чай лэзьяз. Собере, пукон вылэ султыса, шифоньер вылаз сузьтӥськиз. Кыӵе ке керттэт отысь поттӥз. Тани сушкаосы, пе, вань. Учкиськом - сушкаоссэ поттылэ нылкышно рейтузысь. Ми ог-огмы шоры учким, серекъямлэсь чидатским. Чаймес юим, нош со сушкаосмес педло потыса лэзьям азбар шоры. Мынам одӥг гинэ сюлмаськонэ вал. "Вить" пуктӥз. "Озьыен, стипендия сётозы,- малпасько ас поннам.- Нош кызьы улоно кызь манетэн? Яке лушкаськоно, яке, пулъёс вылэ валем векчи матрацед вылэ выдыса, номыр сярысь малпаськытэк, вӧлдэтэ сяласа кыллёно". Табере доре бертоно, нош мынам кисыям одӥг копейкае но ӧвӧл. Мар кароно? Эшъёс ваньзы каникулэ кошкизы ни. Верхний переулокысь (вал сыӵе ульча) коръёслэсь пуктэм кык этажъем куинь корпусъёс чал-чал кылизы. Кытчы мынод, кинлэсь курод? Куинь нунал ӵоже ӧй сиськы ни. Городын соку улӥзы ӵужапае но солэн картэз, Михаил Сергеевич Тронин. Бадӟым адями вал. Ожмаськон аръёсы партилэн Иж горкомезлэн нырысетӥ секретарез вал, собере - УАССР-ысь культурая министр, партилэн Сюмси райкомезлэн нырысетӥ секретарез. Огъя вераса, тодмо адями. Возьыт потӥз соос доры кураськыны мыныны. Общежитиенымы артэ Ленин нимо завод вискын, кызьы шуо, барахолка вал. Нуналлы быдэ отын туннэ сямен ик тӧдьыос но сьӧдъёс, ӵужъёс но куреньёс - кин кызьы быгатэ - адямиосты алдаса лумбыт сылылӥзы. Малпанзы одӥг вал: кин тросгес пӧялоз басьяськисез. Барахолкае потон вылысь, заборысь одӥг пулэз ишкалтэмын вал. Кин ке но быгатэм ӟеч уж лэсьтыны. Студентъёс пӧлысь ик, дыр. Номыр сярысь малпаськытэк дугдӥ со пась азе. Со нуналэ барахолкаын калыкез ӧжыт вал. Потӥ. Вузкарон ӝӧкъёс вӧзтӥ каллен гинэ ортчисько. Бур палан промтоварной магазин, сэрег сьӧрын нянен вузкаро. Нырысяз пыри. Нокинэз ӧвӧл. Вузкарисез но кытчы ке кошкем. Кышномурт пыриз. Вузкарись сое туж ӝог шӧдӥз. Потӥз. Эшез вылэм. Бӧтьырто но бӧтьырто. Мон соин артэ ик сылӥсько но пияла улэ тырем витринаез гырпумъяськыса учкемъяськисько. Кӧтсы тырымон вераськизы кышномуртъёс. Вӧзам сылӥсез йырсын басьтӥз. Витьтон манет сётӥз. Вузкарись солы ньыльдон куать манет берыктӥз но йырсын сётӥз. Таиз коньдонзэ перчаткаяз понӥз, каллен гинэ кисыяз донгиз. Пумыз педлон. Учконъяськон сямен, гырпумъёсме матэ но матэ карисько. Пичиен-пичиен пӧзьзэ кыскисько. Соослэн вераськонзы уг уриськы. Мыным со ик кулэ. "Ура!" - кесяське сюлмы. Мон дыртытэк берытски но ӧс пала вамыштӥ. Потӥ. Ыбем кадь бызи. Пӧзь пушкысь коньдонзэ поттыса, сое зӥртӥ, коньдонзэ кисыям донги. Нырысетӥ этажысь ньыль койкаен комнатаын буш кылемын вал. Фронтысь берытскемез бере, тятяелэн лэсьтэм сьӧд фанера чемоданаз вань котырме кызьы сюрем озьы тыри но педло потӥ. Ӝоггес, ӝоггес. Ӝегад ке - кутозы. Ӝужыт капка мышкам кылиз, мон бызисько трамвай дугдылон пала. Соку со Карл Маркс ульчаысен Колтома пала гинэ котырскыса ветлэ вал. Шок-пуль бызисько. Чемоданэ секыт. Сэргын, адӟисько, нянен вузкарон магазин. Пыри. Ой, инмаре! Бадӟымесь батонъёс вылаз-вылаз кыллё. Кыксэ басьтӥ. Одӥгзэ, быдэс батонэз, магазинысь потэме бере ик, оло, огполскын ньылӥ. Собере трамвай вуттӥз Колтомае. Киме ӝутӥ - машина дугдӥз, ява. Оломар быдӟа. Бӧрысь тодӥ: США-ын, пе, лэсьтэмын. Кабинаез вӧл-вӧл. Моторез урдсаз. Монэ со вылэ пуктӥзы. Пӧсь. Берме чидантэм пыже. Вожой шур дуре дугдӥзы но, кыӵе ке банказэс кутыса, кыре потӥзы. Юизы. Вуэн сураса. Уг тодӥськы, мар вал со банкаязы, но кабинае ӟечыраса берытскизы ни. Соиз али но син азям. Вырйылэ кырыж но мерыж тубизы ик, нош уллане машиназэс ури-бери лэзизы. Рульзэс возьыны ӧз ворме - машиназы "нырыныз" канава сьӧры мырӟиськиз. Мон кымесыным азьпал укнозэс ӧжыт гинэ ӧй сӧры. Ярам. Кызьы но озьы Якшур-Бодьяе вуттӥзы. Пыри автовокзалазы. Отын нырулыса пуке ӵош дышетскем эше Аксенов Синезий. Дас классэз быдтэммы бере, со пыриз Ижысь медицинской институтэ, нош мон - УГПИ-лэн историяя факультетаз. Син азям нош пуксиз ожмаськон аръёсы школаын луэм учыр. Ми доры военной ужлы дышетыны ыстӥзы ожысь бертэм воинэз. Офицер. Военной дӥсен ветлэ. Кутскиз ук милемды фронтын сямен гындыны-костаны. Школае вить минутлы бер вуиськод ке, лымы пыр кӧтпыдэс выламы кык сю метр кеме ысъя вал. Нош огполаз быдэс классмес строе султытӥз но умой-умой тодматсконо кариськиз. - Радэн-радэн лыдъяське! - кеськиз. - Первый, второй, третий,- кылӥськиз. - Фамилиед? Нимыд?.. - Аксенов! - Нимыд? - Синезий! - Кызьы? - Синезий! - Эшшо вера: кызьы? - Синезий! - Мар со селезень? Ми гурак серектӥм. Со учыр школаын дышетскыкумы вал, нош табере ми Сеняен пумиським витьымтэ шорысь но, кызьы тодмо луиз, огкадь адӟонэн. - Мон дышетсконме куштӥ,- шуисько.- Сютэм улыса, кӧты сюрлы бордам бурмон калэ вуиз. - Мон но куштӥ,- шуиз эше.- Сиеме потэ. Кыкетӥ батонме шори люким но сиським, нош дыр уг возьма. Тол куазен музъемез пеймыт вазь шобыртэ. Азьланяз сюрес вылэ пыдын потӥм, нош куазь жоба но жоба. Курадӟыса но букос лымы вылтӥ вамышъяны вырим ик, но сюресмы пумен сюбегаз. Ӟигармы пичиен-пичиен бырыны ӧдъяз. Собере сюресмес чылкак ыштӥм. Пеймыт. Номыре адӟыны уг луы. Бадӟым кыз улэ дугдӥм шутэтскыны. Азьпалан электротылъёс пишто ини. Ми кыз улын инмарлэсь умой куазь сётэмзэ возьмаськом-а, мар-а? Нош куазь уг тупатскы. Кӧня тазьы кыстӥськоз - нокин уг тоды. - Сеня,- юасько,- еэд вань-а? Ойдо пертчылом но, чемоданъёсмес соосын пельпум ваментӥмы думыса, тылъёс шоры меӵак мыном. Тылъёс тӥни адско ук. - Жадём,- шуиз Сеня. - Жадём ке, мар бен? Шутэтском. Кошким, нош куазь жоба но жоба. Озьы но кулэ-а луыны? Сыӵе секыт дыръя тодам лыктӥз со селезень кыл. Сеня али улэп ӧвӧл ни. Пыд азяз уськытскыса йыбырттэме потэ солы но ожмаськон аръёсы улэм но ужам вань адямиослы. Милемды котькыӵе шуг-секытъёсты чиданы дышетӥзы. Ужаны но... Нош сием потэ ук. Тани экзаменъёс ортчизы. Кык этажъем куинь корпусъёс (общежитиос) шал-шал бушесь кылизы. Озьы ми Якшур-Бодьяын пумиським Сеняен. Инмар озьы сётэм-а, мар-а, вылды. Кылдэмезлэсь уд пегӟы, шуо. Историяя факультетэз йылпумъяса, школаын кык ар сяна ӧй ужа. Басьтӥзы "Советской Удмуртия" газетлэн редакцияз. Ыстӥзы дышетскыны. Москваысь Вылӥ партийной школаын кык ар дышетскеме бере, умой-умой пыриськи журналистикае. Пумтэм-йылтэм тодэ ваёнъёс, трос пумиськонъёс сюлме кылемын. Уноез соос туала кивалтӥсьёслэн но, куд-ог лыдӟисьёслэн но сюлэмзыя, оло, уз тупалэ, нош мынам туала туж секыт но уноезлы валантэм югдуре малпанъёсме ватыса воземе уг поты... Журналистъёсын пумиськонъёс Ю. Семенов: "Эрико журналистэз ӧй адӟылы" Малы чакласа возьыны кулэ газетъёсты, телевидениез? Та юанъёс бордысен кутскиз вераськон Кун Кенешысь Кунэз радъянъя, калыкъёс куспын политикая но интыысь аскивалтонъя ялан ужась комиссиысь депутатъёсын Ю. СЕМЕНОВЕН но А. БЕГУНОВЕН. Кун Кенешысь берлояз сессиын та депутатъёслэн ӵектэмзыя эскерыны кулэ вал иворъёсты вӧлмытӥсь ёзъёсты (СМИ) чакланъя огдырлы ужась совет кылдытон сярысь постановленилэсь проектсэ. Но трос ужпумъёс люкаськемен сэрен, сессия та документэз эскерытэк кельтӥз. "Песочная-13" телепередачаын сыӵе совет кылдытонлы пумит луэмзэс лек веразы та передачае ӧтем журналистъёс. Зэмзэ ик, цензура ӧвӧл-а со? - Телевидение мынон азьын со проектэн тодматскыны ми доры коть одӥг журналист мед лыктысал,- шуэ Ю. Семенов. - Кызьы-озьы югдурез тодытэк-валатэк калык азе вераськыны потод?! Со проектын нокыӵе цензура сярысь вераськон уг мыны. Ю. Семенов верамъя, Кун Кенешысь коммунистъёс-депутатъёс СМИ-осты чакланъя совет кылдытыны ӵекто, асьме Конституциын (29-тӥ статья) сётэм правомес утён понна. Отын верамын, котькуд адями ас малпанзэ шара вераны быгатэ шуыса. Но берло дыре куд-ог газетъёсын но телекомпаниосын нимаз адямиос гинэ кузёяськыны кутскизы. Соин ик лыдӟисьёс но телевизор учкисьёс со кузёослы "дурбасьтӥсь" гожъямъёсты но передачаосты гинэ учконо-лыдӟоно луо. Мукет малпанъёсты газетын но, эфирын но вераны шуг луиз. Малы "Известия Удмуртской Республики" газет быдэсак солэн редакторезлэн К. Глуховлэн гинэ луиз? Малы "Удмуртия" телекомпаниын солэн директорезлэн В. Гарновлэн малпанъёсыз мукетъёссэ зӥбо? Глуховлэн газетэз быдэсак Кун Кенешлэн Тӧроезлы дурбасьтэ, нош "Удмуртская правда" - Правительствомылэн тӧроезлы. Нош озьы луыны кулэ ӧвӧл, вера Ю. Семенов. Газет бамын но, телевизор пыр но калыклэсь пӧртэм малпанъёссэ возьматоно. Со понна ваньмы огкадь налогъёс тыриськомы ук. Тӥни со понна ик ивор вӧлмытӥсь ёзъёсты чакласа возёно. Ньыль ар ӵоже депутатын ужатозям, зэмос эрико журналистэз мон ӧй адӟы, шуиз Ю. Семенов. Пумиськонэ лыктэм журналистъёс постановленилэн инъетэныз татын ик тодматскыны быгатӥзы. "Цензура" кылзэ ӧм шедьтэ. Советлэн ужаз пыриськыны но отын ас дэмланъёссэ вераны котькуд журналист быгатэ. Ю. Семенов но А. Бегунов люкаськемъёслы озьы ик ивортӥзы КПРФ-лэн Удмуртиысь организациезлэн алигес ортчем конференциез сярысь. Со быдэсак герӟаськемын вал Кун Кенеше быръёнъёс ортчытонэн. Республикаысьтымы коммунистъёс кандидатэ депутатэ 42 адямизэс ӵектӥллям. Отчы пыртэмын пӧртэм удысын ужасьёс, одӥгез студент но ӵектэмын. Коммунистъёс ас кенешазы таӵе ужпумез но эскериллям: вань-а соос пӧлын республикаенымы кивалтымон адямиос? Вань вылэм. Кун Кенешлы тӧрое коммунистъёс ӵекто Эскерись палаталэсь кивалтӥсьсэ удмурт депутатэз М. Шишкинэз, нош Правительстволы тӧрое - Кун Думаын ужась депутатмес Н. Сапожниковез. Кызьы валамон ини, вуоно быръёнъёсы республикаысь коммунистъёс мукет движениослэсь висъяськыса но огъя кужымзэс огазеяса потыны малпало. Т. БАННИКОВА. Пуштытон шедьтэмын Элькунамы терроризмез палэнтон вылысь Россия Федерациысь ФСБ-лэн Удмурт Республикая управленияз ужасьёс Ижевскын улӥсь адямиез ӝегатӥзы. Солэсь автомобильзэ эскерыку, 260 грамм пуштӥсь "пластит" арбери шедьтэмын. Азьланяз эскеронъёс радъяку, воргоронэн матысь юлтошезлэсь ватсаса шараямын на Англиын лэсьтэм дистанционной управление но электродетонатор. Озьыен, кык эшъёслэн ваньмыз дась вал ини пуштытон арбери дасяны. Малы кулэ луизы соослы та арбериос, тодмо луоз ФСБ-лэн управлениеныз эскерон ортчытэм бере. Россиысь ФСБ-лэн Удмурт Республикая управлениезлэн пресс-службаез. ХОККЕЙ Дас пӧлысь дасэз "Ижсталь" хоккей команда туэ "висисьёссэ" шумпоттэ. Чемпионатлэн нырысетӥ люкетаз со вормсие потӥз. Табере вылӥ лигаысь кужмоосыныз чемпион ним басьтон понна нюръяське. Сергей Абрамов тренерлэн (азьло "Ижстальысь" тодмо хоккеист) командаез азяз пуктэм ужпумзэ быдэстоз шуыса оскон вань. Вить пумиськонын "Ижсталь" очкозэ ӧз ышты на - ваньмаз вормиз. Арня ӝытэ Ленингорскысь "Нефтяникен но шудон возьматӥз: "Ижстальысь" пиос али задор мылкыдын нюръясько. Таяз учыре но соос вормизы - 5:2 лыдын. 18 феврале "Ижсталь" кужымзэ мерталоз Серовысь "Металлурген". М. КУЗЬМИН. ЖУРНАЛИСТЪЁСЫН ПУМИСЬКОНЪЁС Отчы - му вӧй, татчы - комбайнъёс Удмуртие Беларусь Республикалэн Президентэз А. Лукашенко вуон азьын журналистъёсын пумиськылӥз вынлыко страналэн сьӧрлось калыкъёсын кусыпъёсъя министрез Александр Потанцев. Со пусйиз, Беларусь но Удмуртия ас кусыпъёссэс ог-огзылы матэгес карыны кулэ шуыса, тужгес но вузкарон но экономика удысъёсын. Беларусьлы туж кулэ му вӧй, газ, корт, каучук. Ваньзэ сое басьтыны луэ асьме республикаысь. Нош Удмуртилы туж кулэ тракторъёс, комбайнъёс, озьы ик телевизоръёс, холодильникъёс, велосипедъёс - та вузъёсты тырмыт потто Беларусьын. Кылем арын асьме делегация Беларусь Республикае вуылэм бере, кык республикаослэн вузкарон кусыпъёссы ӧжытак азинскыны кутскизы. Озьы ке но, шуиз министр, соосты паськытгес радъяны кулэ. Мукет регионъёс сярысь, Беларусен вузкаронъя Удмуртия 58- тӥ интыын гинэ сылэ. Министр верамъя, кык республикаос ас кусыпъёссэс юнматӥзы ке, нырысь ик со шӧдӥськоз куд-ог предприятиослэн ужанзы вылын. Кылсярысь, Удмуртиысь келям каучук тыро-пыдо ужатоз "Белшин" предприятиез. Тросгес ужез луоз Ижевскысь электромеханической заводлэн, угось Беларусь Республика татын чакла выльдыны ТОР-И но ОСА зенитной установкаосты. А. Лукашенко малпа вуылыны ыбылӥськон комплексэ. Отын со эскероз куд-ог пыӵал тӥрлыклэсь ӟечлыксэс. Беларусь туж вылӥ дунъя асьме конструкторъёслэсь ужамзэс. Президентэн ӵош Удмуртие вуыны кулэ Беларусьысь тазалыкез утёнъя министр. Берло аръёсы "Белбиофарм" концерн туж трос эмъюмъёс поттыны кутскиз, кудъёссэ асьме висисьёс доры но вуттыны луысал. Кылем арын асьме республикаос огкылэ вуизы вал ӵош ужась предприятиос кылдытон сярысь. Учкемын Ижевскын белорусьёслэн вузъёсынызы вузкарон юрт усьтыны, нош Минскын - асьме вузъёсын ужась магазин. Беларусьысь делегация кык нунал куспын эскероз культураен, дышетонэн но наукаен герӟаськем ужпумъёсты но. Т. МИРОНОВА. "Удмурт дунне" газет алигес гинэ пусйиз кылдэмез дырысен тямыстон ар тырмонзэ. Нош ӟечкыланъёс туннэ но вуо на. Со сярысь ивортэ таиз гожтэт но. Вань лыдӟисьёсты но редакциын ужасьёсты сюлмысьтым ӟечкыласько "Удмурт дунне" - "Гудыри" газет кылдэм но Алабго (Елабуга) городын 1918-тӥ арын 31-тӥ октябре солэн нырысетӥ номерез потэм дырысен тямыстон ар тырмемен. Газетлэн кылдытӥсез но нырысетӥ редакторез вал удмурт калыклэн быдӟым пиез - Елабуга уездлэн исполкомезлэн тӧроез, огдыре ик кӧня ке ужез быдэсъясь, эмъясь Трофим Кузьмич Борисов. Кылдэмез бере нырысетӥ нуналъёсаз ик газет югдытыны кутскиз калыкез, удмуртъёсты огазеяз, газет но Удмурт комиссариат борды бинялтӥз вань азьмынӥсь кужымъёсты (зэмзэ верано ке, комиссариатэн кивалтӥз ачиз Трофим Кузьмич Борисов). Газет быгатыса возьматъяз Т. К. Борисов кичӧлтэмъя ортчытъяськись вань ужрадъёсты (конференциосты, ӧтчамъёсты, дышетсконъёсты). Т. К. Борисов но соин одӥг кадь малпаськись адямиос сюлмаськемен, удмурт калыклэн тушмонъёсызлэн (кызьы ке удмуртъёс, озьы ик ӟучъёс пӧлын) пумитъяськемзылы сётскытэк кылдытэмын Удмурт автономия. "Гудыри" газет, Елабуга уездлэн исполкомезлэн валтӥсь ёзэз, соку ик луиз вань удмуртъёслэн яратоно газетсы. Вошъяськизы редакторъёс, вошъяськиз газетлэн нимыз, нош кылдытӥсезлэн но нырысетӥ редакторезлэн мытэм удысэз азинскемысь уг дугды. Газетлэн редакцияз ужасьёсты эшшо огпол ӟечкыласа, удмурт калыклэсь культуразэ ӝутонын но солэсь улон-вылонзэ умоятонын ваньмызлы сӥзисько котькыӵе азинлыкъёс. Иван Николаевич БОРИСОВ, эмъясь - Трофим Кузьмич Борисовлэн вынызлэн пиез. Москва. Александр Григорьевич Лукашенко - Беларусь Республикалэн нырысетӥ Президентэз Вордскиз Витебск областьысь Оршан районысь Кон посёлокын 1954-тӥ арын 30-тӥ августэ. Белорус. Быдтӥз Могилевысь педагогической институтлэсь историяя факультетсэ (1975 ар) но Гурт хозяйствоя академиез (1985 ар). Дышетскемезъя - историк, обществовед, агропромышленной удысысь экономист. Пӧртэм интыосын ужаз. 1975-тӥ-1977-тӥ но 1980-тӥ-1982-тӥ аръёсы служить кариз Советской Армиын. 1977-тӥ- 1978-тӥ аръёсы быръемын калык депутатъёслэн райсоветлэн исполкомаз. 1978-тӥ-1980- тӥ аръёсы ужаз "Знание" огазеяськонлэн кыл кутӥсь секретарез луыса, нош 1982-тӥ арысен - гурт удысын. 1990-тӥ арын А. Лукашенкоез бырйизы Беларусь Республикалэн Вылӥ Кенешаз - парламентэ. Вылӥ Кенешлэн комиссиезлэн тӧроез луыса (1993-тӥ-1994-тӥ аръёс), А. Лукашенко ассэ юн возьматӥз кузьмаськонэн (коррупциен) нюръяськыны но выльдӥськонэз радъяны быгатэмзэ. 1994-тӥ арын 10-тӥ июле со, вить кандидат пӧлысь 80 процент куара люкаса, Беларусь Республикалэн Президентэз луиз. Присяга кутыкуз, со шуиз, демократия - со калыклэн властез. А. Лукашенко кышнояськемын, кышноез - Галина Родионовна, ужа райисполкомын. Кык пиез - Виктор но Дмитрий. А. Г. Лукашенко яратэ спортэз, автомобилен ветлыны, книга лыдӟыны. Ӟеч лу, чемпионат! Котьма шуэ но, Урал со Урал ини. Я куазь 40 градус кезьыт котырын возиське, я со 0-лэсь вылӥе ӝутӥське. Сое ас вылазы шӧдӥзы биатлонъя Европалэн чемпионатаз ветлэмъёс. Инкуазьлэн сыӵе шудэмез туж ик шумпотон ӧз вайы. Шунытгес палъёсын улӥсь спортсменъёс чиньыоссэс, ымнырзэс но кынтылӥзы. Соин ик ӵошатсконъёслэсь дырзэс ӧжытак воштылоно луиз. Шутэтскон нуналъёсы гинэ куазь няськыт кариськиз. Тужгес но зол нюръяськон ортчиз арня нуналэ. Соку ортчизы эстафетаен бызьылонъёс. Шумпоттӥз нылкышноослэн Россиысь огазеям командазы. Со потӥз нырысетӥ интые. Кыкетӥ но куинетӥ интыосын Польшаысь но Норвегиысь спортсменъёс. Егитъёсызгес нылъёсмы, яке юниоркаос, интыосты люкылӥзы тазьы: Польша, Россия но Беларусь. Эстафетаын воргоронъёс пӧлын кужмогес вал Германиысь биатлонистъёс. Соос бӧрсьы мыно Россия но Беларусь. Нош юниоръёс пӧлын вормизы Россиысь, Польшаысь но Украинаысь биатлонистъёс.. Удмуртиысь спортсменъёс пӧлын чемпионатын умоесь азинсконъёс басьтӥзы Максим Максимов но Алексей Кобелев. Ӵошатсконъёс йылпумъяськизы таӵе лыдпусъёсын: Юниоркаос, 12,5 км, нимаз ӵошатскисьёс. 1. М. Гжива (Польша) - 57.55, 2 (4 штрафъя минут). 2. И. Фомина (Россия) - 58.04,1 (5). 3. А. Богалий (Россия) - 58.28,8 (7)... 6. Л. Скороходова (Россия) - 59.54,9 (5)... 8. Т. Рябова (Россия) - 1.01.02,8 (8). Воргоронъёс, 10 км, спринт. 1. А. Вольф (Германия) - 29.02,0 (0 штрафъя кругъёс). 2. Р. Досталь (Чехия) - 29.08,3 (1). 3. Р. Валиулин (Беларусь) - 29.11,2 (2)... 6. А. Кобелев (Россия) - 29.41,5 (3). 6. С. Коновалов (Россия) - 29.41,5 (2). 11. П. Муслимов (Россия) - 30.19,4 (4). 18. В. Бехтерев (Россия) - 31.05,0 (3). Нылкышноос, 7,5 км, спринт. 1. Н. Соколова (Россия) - 27.15,7 (1). 2. Л. Лысенко (Беларусь) - 28.20,6 (3). 3. О. Хвостенко (Украина) - 28.26,0 (1)... 7. С. Черноусова (Россия) - 29.14,3 (4)... 13. Е. Шалина (Россия) - 29.58,9 (5)... 17. О. Козлова (Россия) - 31.10,5 (5). Юниоръёс, 10 км, спринт. 1. В. Гайн (Россия) - 30.40,5 (2). 2. Б. Голец (Польша) - 30.48,2 (2). 3. М. Якеш (Чехия) - 31.10,9 (1)... 5. М. Кочкин (Россия) - 31.17,6 (4). 8. А. Болтенко (Россия) - 31.59,9 (3). 9. С. Вотинов (Россия) - 32.05,2 (4). Юниоркаос, 7,5 км, спринт. 1. М. Гжива (Польша) - 27.37,6 (0). 2. А. Бабик (Польша) - 28.10,4 (2). 3. М. Гвиздон (Польша) - 28.42,6 (3). 4. А. Богалий - 29.11,1 (2). 5. Е. Уточкина - 29.50,0 (3). 6. Т. Рябова - 29.50,9 (3)... 8. А. Очагова (ваньмыз Россия) - 30.16,7 (3). Н. БАЙТЕРЯКОВ. О. СЛЮСАР (фото). Австрие келялозы "Удмуртнефтестрой" акционер огазеяськонлэн деревообрабатыващей цехез "Удмуртнефтьлы" вазен ма гинэ ӧз лэсьтылы: ӧс но укно янакъёс, ӧсъёс но пулэсь мукет арбериос. Соосты асьсэос ик пуктылӥзы ужан интыосазы но выль улон коркаосты ӝутыкузы, отын быдэсъязы столярной но пӧртэм тупатъян-выльдон ужъёсты. Нош табере цех ужан ӧрзэ воштӥз. Отысь самой устоосыз ужасьёс кызьпу коръёслэсь пул пилё но ӟеч интыоссэ гинэ быръё. Малы ке шуоно, предприятие Австриысь одӥгеныз фирмаен огкыл гожтӥз, солы стандартъёсъя чаклам пул келян вылысь. Кылсярысь, пуллэн улъёсыз диаметрезъя кык-куинь миллиметрлэсь ортчыны кулэ ӧвӧл. Кунгож сьӧрысь фирмаен кусып возён "Удмуртнефтестрой" огазеяськонлы шӧдскымон пайда вайыны кулэ - уго, заказзы бадӟым. П. СКОБЕЛЕВ. А. С. ПУШКИНЛЭН ВОРДСКЕМЕЗ ДЫРЫСЕН 200 АР Кин тубоз на солэсь но вылэ? Быдӟым Пушкинэн мон тодматски школае мынэмелэсь азьвыл ик. 1937-тӥ ар, сильтӧлэн бугыръяськись нуналъёс. Корка пушкамы кезьыт, муръёын тӧл вузэ, нош ми, кык сузэръёсы но мон, гур вылын пукиськом. Пукиськом но кылзӥськом, кызьы ми пӧлысь бадӟымезгес, Мария, лыдӟе Александр Пушкинлэсь выжыкылъёссэ. У лукоморья дуб зеленый, Златая цепь на дубе том, И днем, и ночью кот ученый Все ходит по цепи кругом... Мон чидатэк юай, кыӵе сыӵе дышетскем коӵыш сярысь вераськон мынэ. Кызьы, оло, со школае но ветлэ, лыдӟиськыны быгатэ-а? - Нош кин солэн дышетӥсез? - юаз пичиез сузэрмы, Анюта. - Ма, та выжыкыл ук! - шуиз витетӥ классын дышетскись Мария. - Ойдолэ сое наизусть дышетом... Собере мон адӟи сузэрелэсь тетрадьзэ, солэн вылбамаз суредамын тӧдьы изнэсо валэныз люкиськись Олег князь. Нош мукет палаз гожтэмын: Как ныне сбирается вещий Олег Отмстить неразумным хазарам... Та копак мынам мылкыдыя вал: щит, меч, шлем, ньӧлъёс. Ми, пияшъёс, уйвӧтамы но соосты адӟылӥм. Тӥни озьы Пушкин асэрказ кадь вамыштӥз мынам улонам но пыраклы сюлэмам кылиз. Улэмея А. С. Пушкин сярысь мапанъёсы умой пала гинэ воштӥськылӥзы, солэн кылыз- гурез пель сьӧрам шуккиськыса улӥз но улэ, улонме кыӵе ке паймымон куараосын кадь тырмытэ. Гожъяськон "бусыме" но солэн китӥм валтэмезъя "гырылӥ", дыр, кадь потэ. Вань гожъямъёсыз ик, дыр, мыным кельшо - "Руслан и Людмила" бордысен кутскыса "Евгений Онегин" дорозь, "Дубровский" бордысен кутскыса "Капитанская дочка" дорозь. Нош тужгес но монэ паймытэ поэтлэн азьпалан быронзэ шӧдэмез. Ленский пыр со ассэ адӟытэ кадь, нош Онегин пыр - Дантесэз. Кыӵе тупало та адямиослэн улон сюресъёссы. Огъя вераса, мон Александр Сергеевичез пумтэм-йылтэм лыдӟысал. Пушкин одӥг, ӟуч литератураын со сылӥз но сылэ нырысетӥ интыын. Адӟом, мае, кинэ сётоз асьмелы кызь одӥгетӥ даур. Малы ке но оскеме уг поты кадь, Пушкинлэн гениезлэсь вылӥе кин ке тубоз на шуыса. Павел Куляшов, писатель. "Рок-опера" лыктэмын Асьме учкисьёс доры лыктэмын "Рок-опера". Со Санкт-Петербургысь кун театр, кудӥз нырысьсэ асьме странаын та жанр бордын басьтӥськиз. Тросэз тодо на, луоз, "Поющие гитары" вокально-инструментальной ансамблез, ӵапак со бордысен пушйиз та театр. Асьме доры со ваиз куинь спектакльзэ: "Юнона и Авось", "Гадкий утёнок" но "Иисус Христос - супер звезда". Нырысез, опера-мистерия, вера чебер но кужмо яратон сярысь. Кыкетӥез - пиналъёслы но мӧйыослы яркыт выжкыл. Куинетӥезлэн нимыз ик вера ачиз сярысь. Та спектакльёс возьматӥсько Ижевскысь Операя но балетъя кун театрын 15-тӥ февралёзь. Т. НИКОЛАЕВА. Кенешизы экономист но юрист "Удмурт кенеш" огазеяськонлэн политклубез таяз учыре люкаськылӥз куинетӥзэ. Лыктэмъёс азьын пӧртэм ужпумъёсъя вераськизы экономика наукаосъя доктор Удмурт кун университетысь профессор Юрий Перевощиков но юрист Виктор Егоров. Юрий Семенович Перевощиков люкаськемъёсты тодматӥз экономика удысын кылдэм югдурен, отысь выль валанъёсын. Со сяна, нимаз учыръёс вылын возьматӥз соизлэсь яке таизлэсь ужлэсь пайда яке изъян ваемзэ. Юрист Виктор Егоров ивортӥз зэмлыкез тӥяны турттыку кылдылӥсь ог-огдэ интэман учыръёс, пӧртэм амалъёсын пӧяськыны вырон сярысь, алӥз умойтэм ужъёсы шедёнлэсь. Со сяна, лулысь-сюлмысь валэктӥз люкаськемъёслэн данак юанъёссылы. Вуоно политклублэн кенешез луоз туннэ, 18-тӥ феврале. Кутскоз ӝытазе куать часын. Дышетоз но, кивалтоз но Толшор толэзьлэн пумаз ас кенешазы люкаськылӥзы Удмурт шаерысь крезьгурчиос. Соос эскеризы пӧртэм ужпумъёсты. Пӧлысьтызы одӥгез герӟаськемын вал огазеяськонлы тӧро быръёнэн. Крезьгурчиослэн выль кивалтӥсьсы луоз табере Удмурт кун премилэн лауреатэз Александр Корепанов. Талэсь азьло со ужаз крезьгуръя училищеын. Выль удысэ выжемез бере но егитъёсты дышетонэз уз аналты. Е. РОМАШОВА. ШӦКЫЧ Йырдэ эн кока пенсия борды! Мынэсьтым 446 манетъем пенсиме "вӧлдэт" шуо. Сое заводын 45 ар ужаме понна басьтӥсько. Ӟеч тырши, пенсие умойгес мед луоз шуыса. Озьы ке но, толэзьлы бюджетме, Думаын сямен ик, "ньылетӥзэ лыдӟем" бере гинэ кутӥсько. Дефицит шуонэз бадӟым уга. Калыкмы ӟеч визьмын верам: "Коньдон - со ву, тымид ке но - кыриськоз". Мынэсьтым пичи дырме война талаз. Уноез ожгарчиос ӧз берытске ни вордӥськем музъем вылазы. Мон выллем арлыдоос 1955-тӥ аръёсы ужаны кутскизы. Ужмылэн пайдаез адӟиськиз. 1960-тӥ-70-тӥ аръёсы СССР-лэн самой кужмо но дано вакытэз вал. Экономика азьлань вамышъяз, кураськыса ӧз улы, ачиз юрттэт сётылӥз мукет кунъёслы. Заводын станок бордын ужасьёслэн уждунзы шорлыдын 150-160 манет ке вал, стажзэс тырмытыса шутэтскыны потэм муртъёслы 120-132 манет пенсия тыризы. Ас вакытаз, Кремльын пукыкуз, Немцов кӧня ке чеберъяськиз, пенсия, пе, 200 манетлэсь ичилы уз буды. Ватсаськиз 2 копейкалы. Тау, вунэтӥллямтэ! А. СТЕПАНОВ. Аргурезь йылысен... Мар-о меда каром? Сильтӧл азьын Толэзь но ӝыны ортчыса, Удмуртилэн историяз выль вакыт кутскоз. Пучы арня нуналэ куаразэс сётыса, уноез, огшоры нуналэ сямен, кӧлыны выдозы. Нош депутатэ кӧня ке сю кандидатъёс, соослэн дурбасьтӥсьёссы-юрттӥсьёссы, ӵыжы-выжыоссы витёзы ӵукнаез - уго быръёнлы йылпумъянъёс бордысь потоз соослэн азьланьын кызьы улэмзы. Старт сётӥсь пыӵал ыбиз ни. Быръён питран нуналмысь юнгес берганы ӧдъяю Валамон ни, огъя сюлмаськонлэсь палэнскыны уг быгаты "Удмурт кенеш". ВИ ӧтчамысен валля нуналозь котькуд пумиськонын асьме огазеяськонлэн кивалтӥсьёсыз тодэ вайытылӥзы: удмурт калыклэсь улонзэ зэм но капчиятыны тыршиськоды ке, азьло ик малпаське асьме парламентэ шедён сярысь. Ма бен, кыӵе мылкыдын вуизы кенешчиос кандидатъёсты пусъён люкаськонэ? Быръёнэн югдурез эскерон но депутат луыны мылкыд карисьёслы юрттонэз радъян вылысь, "Удмурт кенешлэн" исполкомез Пичи кенещ люкано кариськиз. Правительстволэн юртаз 10 феврале лыктӥзы уноысьтыз ёросъёсысь активистъёс. Ассоциацилэн тӧроез Валентин Тубылов, ужпумъёсты комиссиосын эскерем бере, пыр-поч валэктӥз республикаямы та нуналлы кылдэм югдурез. - Туннэ асьмелы меӵак верано, кинэн "Удмурт кенеш" эшъяське, кинэн сюресмы уг тупа,- шуиз Валентин Кузьмич.- "Удмуртия" блок, нимыз чебер ке но, ассэ возьматӥз. Отчы пырись депутатъёс (нялтас вераса, пӧлазы одӥг удмурт но ӧвӧл) калыкмы понна номыр ӧз лэсьтэ, шаерын улӥсьёслэсь мылкыдзэс ӟырдатӥзы гиинэ. Ижысь депутатъёс уно ужпумъёсъя асьмемыз валаны тыршылӥзы, али но уртче ужаськом. Коммунистъёс, кызьы тодмо, ас кожазы мыно. Соос куд-ог куронъёсмес лыдэ ӧз басьтэ ке но, таосын огкыл шедьтыны луэ, озьыен, артэ вамышъяны кулэ. Ма, собере "Кенешлэн" азьпал радаз мынӥсьёс пӧлын но вань гинэ КПРФ-е пырисьёс. Мед, мон отысь номыр ик уродзэ уг адӟиськы. "Новая сила" но куд-ог мукет выль движениос сярысь верано ке, соос сокем тодмоесь ӧвӧл на. НДР ("Наш дом - Россия") куашкамын, шуыны луоз. Президент нимысьтыз пусйиз тани мае: шоркарлы мэре калыкен быръемын Анатолий Салтыков, сое матысь куинь аре нокин но палэнтыны уг быгаты, озьыен, республикаямы вылӥ кивалтӥсьёс куспын вожвылъяськонэз дугдытон понна, котькуд бырйисьлы умой-умой малпаськоно. Кытысь-о, кин-о? Тодэ ваёно ке 1995-тӥ арын тулыс югдурез, туэ "Удмурт кенеш" шӧдскымон йӧногес адӟиське. Соку кандидатъёсты ӵектон нылпи садын кадь мынӥз: я, мын ай, Васи, ветлы, оло, маке пӧрмоз... Ма, штаблы кимвалтӥсь гинэ но пумиськон дыръя шедиз ни но. Таяз учыре кандидат ӵектон нуналозь трос уж быдэстэмын ни. Ассоциацилэн кивалтӥсьёсыз асьсэос ӧтчаллязы оскымон адямиосты, потазы ёросъёсы, пумиськылӥзы быръён ярдурын сылӥсь мукет юлтошъёсын. Список уно пол выльдӥськылӥз ке но, со вазен ик дась вал ни. Кинъёс бен соос, быръёнэ "Удмурт кенешлэн" флагез улын мыныны мылкыд карисьёс но дась луисьёс? Ог куамын мурт пӧлын выль фамилляос трос ӧвӧл, шуыны луоз. Нина Образцова, Валерьян Никитин, Надежда Золотарева, Игорь Семенов, Любовь Иванова, Петр Люкин - ваньмыз соос уно ар ӵоже возьматӥзы ни калыкмы понна мылысь-кыдысь сюлмаськыны быгатэмзэс. Тодмотэмъёс пӧлысь пусйыны луысал Воткинскысь энергетикез Владимир Перевощиковез, Шарканысь сюрес лэсьтӥсьёслэсь кивалтӥсьсэс Василий Мухлинэз, Кезысь ужбергатӥсез Анатолий Ившинэз но кӧня ке мукетъёссэ. Кылсярысь, селтаос туэ кандидатэ ӵекто азьмынӥсь хозяйстволэсь тӧрозэ Анатолий Мясниковез. Пичи кенешын решение кутэмын Вавожъя но. Татын ӟеч ужъёсыныз но юн мылкыдыныз кемалась висъяське ни "Колос" эштослэн кивалтӥсез Владимир Красильников. Вавожъёс та адямилы оскемзэс 11 апреле возьматозы, дыр. Со сяна, "Удмурт кенеш" мылкыд каре куд-ог эшъёслы ӝуткан ужен юрттыны. Соосты ӵектозы мукет блокъёс но бырйисьёслэн группаоссы. Озьы ке но, кенешчиос сыӵе адямиос уртче ужалозы. Кылсярысь, Киясовоын туж гажало Николай Сычевез, "Удмуртнефтепродукт" огазеяськонлэсь кивалтӥсьсэ. Кун Кенешлэн депутатэз луыса, со трос лэсьтэ ёрос понна, умой вала национальной ужпумъёсты, юрттэ коньдонэн. Малы асьмеос сыӵе муртлэсь палэнскыны яке сое палэнтыны кулэ? Дурбасьтоно адямиос пӧлы озьы ик пыро Николай Сувашов (со мынэ Уваысь округъя), Евгений Галасеев (Ижысь Индустриальной ёросысь военком), Валерий Фридрих (Воткинсклэн мэрез), Виктор Макаров "Удмуртские семена" предприятилэн кивалтӥсез) но эшшо дасо пала мурт. Тӥни сыӵе актив пыриськоз туэ депутат быръёнэ. Валамон, куд-огез уз ортчы, уго нюръяськон туж лек пуроме. Тае шӧдыса, кӧня ке чаклам адями "шудонлэсь" палэнскиз ни (Владимир Байметов, УдГУ-лэн проректорез, Леонид Загребин, ИжГТУ-ысь дышетӥсь, Анатолий Гусев, "Удмуртэнергоысь" специалист). Со дыре ик куд-огез али гинэ сайка ай. Быръён ужрадъёс пачылак ӧръяськемын ни, нош соос берло нуналозь весь тунаса пукиллям, шӧдске. Кин тодэ, оло, вакытлэсь лэчытсэ валанзы уг тырмы. Тон но йӧно, со но йӧно... Нимысьтыз вератэк уг луы куд-ог округъёсъя кылдоно югдур сярысь. Кызьы пусйиз пумиськон дыръя удмурт нылкышноослэн азьветлисьсы Галина Никитина, соослэн правленизы ай май толэзе ик депутатэ кандидатэ ӵектыны луымон муртъёс пӧлы пыртӥз Светлана Смирноваез. Тодӥськоды-а сое? Оскисько, "Удмурт дуннеез" лыдӟисьёс пӧлысь ваньмыз сямен иа шаплы егит удмурт кышномуртэз синйылтӥзы ни шуыса. Эшъёсыз мылкыдзэ буръямен, Светлана Константиновна, кема малпаськемез бере, соглаш луиз кужымзэ эскерыны. Кытчы кариськоно? Валамон ни, вордӥськем палъёсы - Дэбес ёросэ. Но шуак тодмо луэ: Дэбес пала мертаське мукетыз тодмо адями Илья Байметов, "Вордскем кыл" журналлэн валтӥсь редакторез, "Удмурт кенешлэн" Ижысь ёзэзлэн кивалтӥсез. Та сярысь кылыса, нырысь малпай, со юнме супыльтон шуыса. Уго нокызьы но йыре уг тэры: малы кык ӟеч асьме адямиослы ваче кымес йыгаськоно? Вераськон зэма кадь. Мар кароно? Светлана Смитрнова, сюрес вылэ вазьгес потэм мурт, отысь уз кожы ни. Илья Байметов но, юн сямо адями, берлань уз чигна. Со валлян трибуна сьӧрысен шуиз: ойдолэ буйгатском, номыр кышкытэз ӧвӧл, калык ми пӧлысь быръёз устозэ, кин вормоз - со ик мандат басьтоз. Илья Михайловичлэн та кылъёсыныз мон быдэсак соглаш кариськысал, Дэбес округъя кык мурт гинэ мынысал ке. Зэм, соку апреле кудӥз ке но ӟеч адямимы ӝутскем мылкыдын пырысал Кун Кенешлэн залаз. Но... озьы ӧвӧл ук. Туннэ ик тодмо ни: Дэбесын нюръяськонэ пыриськоз туалаез депутат Александр Горошников (солы дурбасьтӥсьёс ёросын ичи ӧвӧл), кужымзэс озьы ик мерталозы зӧк кисыё нефтяникъёс но мукетъёсыз. Юнме шат Пичи кенешын вераськисьёс пӧлысь котькудӥз кыкетӥез пусйиз Дэбес пумысен шугъяськемзэ. Кышкытэз уго со бордын: кык ӟеч удмуртъёс вискытӥ ортчоз куинетӥез. Кин соку пайда басьтоз? Удмурт калык? Чеберъяськытэк верасько: Светлана Смирнова, берло аръёсы син азьын ӝужам мурт. Парламентын ассэ возьматыны быгатоз, со туннэ та ужлы дась ни. Озьы ик Илья Байметов, Вылӥ Советын туж секыт аръёсы кыдами-юнмам воргорон. Берло ньыль арзэ но со политикаын воштӥськонъёсты рос-прос чакласа улэ, пӧртэм ярдуръёсысь кужмо адямиосын кусып возе. Сое тодо, соин лыдъясько. Удмурт калык утысал гинэ, Илья Михайловичлы мандат шедьысал ке. Ай ужпум со бордын но. Дэбесын выллем югдур луыны быгатоз мукет интыосын но, кылсярысь, Пичи Пургаын. Мон малпасько, таӵе дыръя кандидатэ ӵектэмъёс нырысь ик ог- огенызы огкыл шедьтыны кулэ. Бен, решение кутыны капчи ӧвӧл, но ойдолэ малпаськом республикамылэн азьланез сярысь. Озьы ӧз луы ке, пӧрмоз мукет сямен: мандат но уз шедьы, ӟеч адямиосмылэн но кусыпъёссы кемалы таркалозы. Собере лыдэ басьтытэк уг луы созхэ но: нюръяськуонэ амалтэк пыриськоно луозы трос мукет эшъёс. Валлян залын таӵе юан чузъяськиз: нош кин пала кариськыны кулэ Валерий Нуриахметов? Куд-огез серектӥз гинэ. Нош мур малпаськоно ке, серем уг поты. Уго сыӵе ик юан сылэ туннэ удмурт движение пыриськись уно эшъёс азьын. Политика вузкаронлы матын Бен, политика - со ялан огкыл утчан, кызьы шуо, вечный поиск компромисса. Озьыен, та удысэ пыремъёслы котьку дась луоно... вузкаронлы. Та ласянь асьмелэн опытмы уг тырмы на. Сое возьматӥз кылем арын мэр быръён. Соку удмуртъёс гурезь кадь султӥзы А. Салтыков понна. Пумиськонэ люкаськемъёс но мэр ог-огзэс яратэмзэс возьматӥзы. Но быръёнъёс азьын ӝужам сыӵе яратон туж аспӧртэмлыко луэ. Со огшоры вузкарон. Озьы бере, "Удмурт кенешлы", оло, маке со шӧдскымонзэ та "яратон" чотын басьтыны тыршоно вал ук. Меӵак шуоно: вот тазэ-тазэ лэсьтэ, соку юрттом. Мар-о отын чималиен шудонэз на?" - та кылъёс басьтэмын "Удмурт дунне" газетлэн кылем арын 31 мартэ потэм номерысьтыз, удмуртъёслэн А. Салтыковен пумиськемзы бере гожтэм статьяысь. Ар ортчиз. Мар луиз/ Кытын-о шоркар кузёмы? "Кӧня ми бызьылӥм со понна? Кӧня калыкез ӝутӥм? - йырсизэ ишканы дась табере Альберт Разин.- "Ударникын" удмурт центр кылдытонлы юрттом шуизы вал... Отчы али бигеръёс каръясько ни". Ма, Альберт Алексеевич, мар на табере... Валентин Тубылов юн-юн вераз: лэсьтэм янгышъёсты табере тодэ ваёно ӧвӧл ни. Соос вылын дышетсконо. Азьлозэ учконо ке, республикамылы туала кивалтсез мон утӥ вал, озьыен, мон янгыш, шуиз со, но дыр воштӥське, асьмелы азьланез сярысь малпаськоно. Президентлэн кылъёсыз залэз шунтӥзы. Котькуд ёрос кенешлы ӵектэмын кандидатъёсын пумиськон радъяны. Мед соос возьматозы-шараялозы вань мылкыдъёссэс, вераськонэз гожтоно протоколэ, мандат басьтэмъёс бӧрысь медам ни сьӧськыны быгатэ верамзылэсь. Умой ӵектон! Али ӵапак дыр вуэмын та ужез ортчытыны, вуоноезлы кыӵе ке но инъет кылдытыны. Асьмеос кин ке понна куарамес сётӥськом ке, асьмеос ик отӥяз кылзэс юаны кулэ. Газет но парламентэ билет Политикаен вырись лыдӟисьёс но телевизор учкисьёс кемалась шӧдӥзы ни, вылды: отын но, татын но потыло соосыз я таосыз фамилиос, пиштыло чебер ымныръёс, чузъясько небыт куараос. "АиФ Удмуртии" газетэз басьтӥсьёс, кылсярысь, быдэс борддорзэс лякыны быгатозы ни прокурорлэн юрттӥсезлэн Дмитрий Шумковлэн портретэныз. Арлэсь кема ни котькуд номерын сямен печатлаське та адямилэн тусбуез. Малы? Валады? Со турттэ мандат басьтыны. Яке "Удмуртия" ГТРК тани нуналмысь возьматэ селтаослэсь депутатсэс. Отын хор кылдыто - Загайнов "вордэм", школае компьютер басьто - Загайнов "кузьмам", колхозын йӧл кыскон ӝутскем - Загайнов "тыршем". Ма, Селталан ӝоген нылпиос но, кунянъёс но солэн юрттэмезтэк уз вордске ни, кожалод. Кин тодэ, оло, тулыс но уз вуы ни... Малы со озьы лэсьтӥське? Ижын улӥсьёс мэр луыны пычкиськыса турттӥсь адямиез кулэ ӧз каре бере, со кызьы ке но тырше ву вылэ кыльыны. Соин ик коньдонзэ лыдъятэк кисьтэ аслыз ӟеч ымныр (имидж) кылдытонэ. Но озьы тыршемъяз эсэпсэ уг вала ни кадь, сьӧраз ортче. Таиз мултэс зол ужа, нош асьмеос - укыр ляб. Шонерзэ вераса, ивор вӧлмытӥсь ёзъёслэсь кужымзэс чик но ум кутӥське. Визьмо ужаса луэ ни вал туннэ нуналозь унозэ кандидатъёсты шаерамы тодмогес карыны. Бен, луэ вал, но ӧм лэсьтэ. Туала депутатъёсмы но, эфире яке газет баме потыны законэн чаклам правозы вань вылысь, туж ик ӧз сюлмаське асьсэдыз возьматон сярысь. Асьмемыз быдтэ, вылды, дышем сяммы - керпотон. Но улон возьматэ ук, озьы улэмысь дугдоно ни шуыса. Одӥгез воз мында уж лэсьтэ, уен-нуналэн ужа, но солэсь ӟеч тыршемзэ тодӥсь-адӟись ӧвӧл. Мукетыз чиньыеныз вырӟытэ но... быдэс арня ӵоже микрофон азьын маде ни "калык понна пӧсяса ужамез" сярысь. Бен, валасез валалоз, шуо асьмелэн. Но котьку озьы уг луы ук. Газетъёсын, телерадиостудиосын адямиос ужало. Пӧртэм адямиос. Соин ик, малпасько, быръёнэ мынӥсь муртлы соос доры сюрес утчано. Чош гинэ Пичи кенеше люкаськемъёслэн сюлмазы пыӵазы огазеяськонлэн тӧроезлэн таӵе кылъёсыз: "Асьмеос, удмуртъёс, тани мае валаны кулэ. Туэ быръёнын келям ке, азьлань улонмы туж начар адӟиське. Уго Россиын пумен юнмало губернизация но мукет со выллем реформаос пумысен малпанъёс. Госсоветын асьме калыклэн адямиосыз ӧз луэ ке, кин сюлмаськоз республикамес утён сярысь? Мон вазиськисько ваньдылы. Ойдолэ коть та быръён кампания вакытлы дугдоме ог-огмес сьӧдмамысь. Ойдолэ ӵош луоме, ойдолэ мукетъёсызлы возьматоме, асьмеос йыг-йыг ужаны быгатӥськом шуыса. Быръёнъёс бере, кызьы кырӟа Геннадий Бекмановмы, Аргурезь йылысен йырсимес ишкано медам луэ..." Мар бен ватсалод на? Номыр уд. И. ЛЕБЕДЕВ. Шӧкыч Азьтэм адями но луд кеч Одӥг адями азьтэм маке вылэм. Кышнотэк но, мартэк но огназ улыса, кытӥ сиыса, кытӥ сиытэк но, юытэк но калтыртоз вылэм. Бусыостӥ но, тэлетӥ но калтыртоз вылэм. Калтыртонъяз олокытчы но вуоз вылэм. Огполаз тазьы калтыртыкуз, та азьтэм маке сик дурысь луд кечез адӟем. Малпам: "Кечез куто но, кузэ вузаса, курег басьто; куреге пузалоз но, чипы потто; чипы будэтӥ ке, куреге трос-трос луоз; курег пузэ трос-трос люкаськоз но, курегпиосы нош ик трос-трос луозы, курегпиосме вузало но соку ик парсьпи басьто; парсьпие дас кык пиялоз но, будэмзы бере со дас парсьёсы быдэн дас кык пи вордозы но, сомында парсьпиосме вузало но кышно басьто". Адями кыз улвай кутэ. Таиз кузь бере, адями, улвайзэ пыдес шораз куасаса, шальк! чигтэм. Улвай чигемез луд кеч кылэм но пыльк тэтчыса кошкем, адямиез вераськем кожаз кельтэм. "Даур" (Ува ёрос). Вормон Очерк Тол куазь тулыслэсь пыдберзэ лёгыны турттэ ни. Тани-тани ваньмыз улӟоз шундылэн шуныт тылсиосыз улын. Но Тамара понна сьӧд нуналъёс вуизы. Малпамтэ шорысь, син куспын, картэз улонысь кошкиз. Нош кыӵе яратӥзы кузпалъёс ог-огзэс. Тямыс ар ӵош улытозязы одӥг пол но керетэмзы, лек кылын ваземзы ӧй вал. Картэзлэн эшъёсызлэн верамзыя но, Витялэн кыл йылысьтыз ӧз кошкылы кышноезлэн нимыз - Тома но Тома, мукет нокин ӧвӧл ни. Эшъёсыз Тома шоры учкыны ветлӥзы. Нош пиналъёссэ макем яратӥз воргорон. Виктор Копанев йылпумъяз Ижевскысь Гурт удысъя институтэз. Кивалтӥз сельхозвыставкаысь племкоплексэз лэсьтонэн, ӝужытэсь улон юртъёс но ӝутӥзы. Нош берло дыре ужаз Гурт удысъя министерствоысь капитальной лэсьтӥськонъя отделлэн кивалтӥсез луыса. Тамара номыр сярысь сюлмаськытэк улӥз картэзлэн небыт но шуныт бурд улаз. Табере со пал кышно, кияз кылизы кык но куать аресъем пиосыз. Яратоно картсэ ыштыса, нылкышнолэн аслаз но улонэз чигиськиз кадь. Лулсэръёсыз лябӟемен, котыраз лек висён ожалскиз. Кӧт пушказ яра усьтӥськыса, онкологиын но эскеризы. Номыр ӟечсэ возьманэз ӧз кыльы, вылаз ик, сюлэмыз кутӥз на. Мар табере луоз нылпиосыныз, анайтэк но кылизы ке? Тамара шуак сазьтӥськиз кадь. Уг, уг яра висёнлы кидэ сётыны. Мынӥз Зооветснабе - эмъюмлы. Картэз сямен ик, Тамара но йылпумъяз Гурт удысъя институтэз. Ува селоын будэм нылмуртлы пудо котырын берган тодмотэм уж ӧй вал - зоотехнике дышетскиз. Институт бере быръем удысэзъя кӧня ке ужаны но кылдӥз. Тодэ вал, пудолэсь яраен азэм кӧтпушсэ туж зол эмъюмен йӧнатыны луэ, нош адямиос вылын со уг кутӥськы. Лэсьтэмын эмъюм кулэм пудо-животлэсь - шоканы луонтэм зын маке. Улэмед потэ ке, оломае но чидалод вылэм. Эмъюмен ӟенеликсэ полиэтилен клеёнкае бинялтыса, литръем банкаын возиз, нош банказэ кастрюляен интыялляз но. Озьы но урод пакись зынлэсь ватӥськыны уг луы вал. Чаклаз, кызьыгес та эмъюмез ас вылаз кутыны луоз. Ӝыны ар ортчыса, врачъёс доры мынӥз. Соосыз копак паймизы, вал ик-а, пе, яраед, янгышамы, оло? Ярам, одӥгзэ сьӧд пилемез егит нылкышно йыр вадьсытӥз палэнтӥз кадь. Но мукет сюлмаськонъёс шокчыны маза уг сёто. Кызьы начар курегез ваньмыз кокчалтыны туртто, озьы ик луиз соин но. Картэзлэн ӵыжы-выжыосыз кема дырлы висьыны усем кензэс мурт каризы, атайзытэк кылем пиналъёс но асьсэлэн ӧз луэ ни, лэся - Ваньбуренызы кузёяськоно кожазы. Висеменыз сад-бакчаяз ужаны быгатымтэен, ӧжыт гинэ тазэ но ӧз талалэ. Куать сотых огнадлы бадӟым, пе, шори люконо, сыӵе сюлмаськонзэс веразы сад-бакча ужпумъёссэс эскерыны быръем муртъёс. Юрттэт утчаса, кытчы гинэ ӧз вазиськы кышномурт. Таяз учыре ултӥямлы сётӥськемез ӧз поты. Вормиз. Табере дышетсконо карттэк улыны. Оскиськыны нокин вылэ, матысь ӵыжы-выжыосыз ваньмыз палэнын - Ижевскын со огназ. Ярам, картэзлэн данэз, ужаны быгатэмез, ачиз улонысь кошкем бере но, Тамаралы одӥг пол гинэ ӧз юрттэ шуг-секыт дыръёсы. Али но, дас вить ар ортчыса, куд-огез пальышаса пумитало: "А-а, тӥ-а со Виктор Копаневлэн кузпалыз? Картэзлэн шӧлказ улыса, Тамара ӧз тодылы вал, мар со кӧттыр утчан, коньдон поттон. Ортчизы со вакытъёс. Ачиз ке ӧз, кин пиоссэ адямие поттоз? Ужаны интыяськиз Калыкез улон-вылонын утёнъя министерствое, со вал 1992-тӥ арын. Ӵапак та вакытэ интернат юртъёсын подсобной хозяйство возён борды басьтӥськизы. - скал, парсь вордыны кутскизы, бакча сиён, пудо сиён будэтӥзы. Тамара Александровнаез пуктӥзы хозрасчёт ужпумъёсъя отделысь валтӥсь специалистэ. Экономикаын шуг-секытъёс кылдэмен, улон кулэ кариз аслыд уксё поттон удысэз уката но паськытатыны. Интернатъёсын усьтӥськизы на пӧртэм мастерскойёс - лэсьтӥськонъя, вуриськонъя, клеёнка пакетъёс лэсьтонъя. Нянь пыжон борды басьтӥськисьёс но сюризы. Арлыдоос, висисьёс, ӧлексыос понна шаерамы дас ньыль интернат юртъёс усьтэмын, кыкез соос пӧлысь - нылпиос понна. Тамара Александровналы ӵемысь потано луэ вал соослэсь ужзэс эскерыны. Адӟылӥз, ӵошатылӥз, кытын кызьы ужало. Аслаз но йыраз пӧртэм выль малпанъёс кылдылӥзы. Югдур секыт вал Якшур-Бодья районысь Канифольной интернат юртын, кытчы интыямын шаерысьтымы лулсэр висёнъёсын курадӟись но ляб визьем пиналъёс. Нылпиослэсь но интернатын ужасьёслэсь улон югдурзэс умоятон пумысен Тамара Александровна пӧртэм дэмланъёс, ӵектонъёс вералляз. Номыр ӧз воштӥськы, кивалтӥсе юнматӥзы мукет муртэ. Туала вакыт кулэ каре выль сямен кивалтэмез. Таизлэн но ӧз пӧрмы пыдесъяськон калэ вуэм интернатэз пыд йылаз султытыны. Котькуд отчётын кыл йылысь ӧз кошкылы Канифольной. Нош 1996-тӥ арын интернатын кылдэм югдурез прокуратура эскериз. Подсобной хозяйство быдэсакыз сямен куашкатэмын вал, нылпиос пӧлын йылӥзы кулон учыръёс, вал лушкаськон, йыружъёс. Канифольнойысь интернат быдэс республикалы урод паласен тодмо луиз, сое кулэ вал выль киосы сётыны. Соку Якшур-Бодья районысь Маяк посёлокысь интернатэн кивалтӥсь Хазяр Сергеевна Абашева Тамара Александровналы вазиськиз: - Мар возьмаса пукиськод, кут производство удысэз кияд, малпанъёсыд тынад трос. Копанева малпаськонэ усиз: "Мукетъёссэ дышетӥсько, дэмланъёс сётӥсько, зэмзэ ик, малы асме экеронтэм?" Калыкез улон-вылонын утёнъя министрлэн воштӥсез Наталья Федоровна Кузнецова но мылкыдзэ бурдъяз. Ваньмыз ӧз валалэ Тамара Александровналэсь вамышсэ - коньдоно, шуныт интыысь сьӧд коже зымыны малпа. Куд-огез лыдъязы, гогыезлэсь вылӥе тэтчыны турттэ. Мукетъёсыз алӥзы, пыдзэс пуктыны турттӥзы. Но Копанева лябъёс пӧлысь ӧвӧл, мар ке малпаз, пумозяз мыноз, котыръяса уз улы, шонерак вералоз. Зол сямо луыны солы юрттӥз комсомол но. Дышетскыкуз вал институтысь комсомол огазеяськонлэн секретарез, Киясаысь райкомлэн кыкетӥ секретарез луыса но ужаз. Мар возе на сое? Пиосыз? Но соос табере будӥзы ни, бадӟымез дышетске вал Гурт удысъя академиын, нош пичиез бадӟым классъёсы выжиз. Иське, выль удыс ныпъяны луонтэм ӧвӧл. Тамара Александровна аслыз ачиз шуиз: вормо. Пиосты атайтэк будэтыны огназ анайлы капчи ӧвӧл. Яратэмзэс верасьёс но, курасьёс но вал, Тамара Александровна аслэсьтыз нылкышно шудзэ шедьтонлы пумит луиз. Пиосме кышнояй ке, киысь кие сётӥ ке, соку ас сярысьтым но малпаны дыр вуоз, пе. Аслэсьтыз улонзэ сӥзиз пиосызлы. Соослэн но тазалыксы ляб вал, котькуд гужем быдэс семьяен Анапаын эмъяськизы. Атайзы вӧзазы ӧй вал ке но, пиналъёс понна со дышетӥсь интыын улӥз. Анайзы котьку шуоз вал, атайды сыӵе вал, таяз учыре со озьы карысал. Кин ке лыктэ ке, пиослы нош ик атайзы сярысь мадьылӥзы. Йыртэмаса ӧз улэ, бадӟыменыз ке шат одӥг-ог валэктон уж нуоно луылӥз. Нырысетӥ классын дышетскыкуз ай, бускель кышномурт чагиськиз, Денисты, пе, подъездлэн вылӥяз тубыса, ӟенеликъёсты улӥе лэзья. Анай мурт пизэ кутӥз но милицие валтӥз. Милиционерлы синмыныз кырмыштӥз, озьы но озьы, пе, пие йыртэма, гожтэ сое сьӧд книгаяды. Пияшлы со быдэс улытозязлы урок вал. Нош пичиез анаезлэн юбка сӧзыяз возиське, сак кылзэ вераськонэз. Мукет дыръя Денис азбарысь писпу улваез чигтэм. Нош ик китӥзы кутӥз пиоссэ анай. Тарад нюлэскы валтӥз. Писпуэз копалтыса, азбаре мерттӥзы. Бадӟымзэ дышетэ, нош Данилэз, губка музэн, ваньзэ сое йырвизяз пыӵатэ. Школаын анайёслэсь комитетсэс кылдыто, Тамара Александровна нырысь ик кизэ ӝутэ, мон, пе, пумит ӧвӧл юрттыны. Пиосыз но син улын. Ӧз ватылы нылпиосызлэсь сюлмаськонъёссэ, ужаз кылдэм шуг-секытъёссэ, шумпотонъёссэ. Таосыз но анайзылы сюлэмзэс усьтылӥзы. Ужлэсь ӧз палэнскылэ, кылзӥськисесь будӥзы. Тамара Александровна кемалась уг тоды ни выж миськонэз. Пиосыз шоры учкыса, атайзы одно ик данъяськысал таӵе воргоронъёсын. Канифольнойын ужаны мылкыд карыса, Тамара Александровналэн кык пиосыз вӧзы ватсаськиз на 130 нылпи. Гороскопья со Лев-Тигр, нош та пӧйшуръёс анайлыкез туж вылӥе пукто. Озьыен, татын но вормонъёс палэнтӥ ортчыны кулэ ӧвӧл. Тамара Александровна министерствое ужаны лыктыку, Канифольнойысь интернатлэн подсобной хозяйствояз 100 йыр парсь, 15 йыр скал возиськиз. Ачиз кивалтыны кутскиз но, сизьым парсь но, куинь скал кылем на. Отын но татын костасько кулэм шӧйёс. Котькытын кырсь, нылпиослэн улонтӥязы ваньмыз кызь зынэн пыӵамын, валес котыр сьӧдэктэмын, котельной мырдэм века. Кивалтон нуналэзлэн нырысетӥ уяз ик, 1996 арын 20-тӥ ноябре, складэз лушказы. Азьвылэз кивалтӥсь дыръя интернатын кутскемын вал выльдон-тупатъян ужъёс. Россия Федерацилэн "Россиысь нылпиос" программаысьтыз "Инвалид нылпиос" статьяя Канифольнойысь интернатлы лэсьтӥськон ужъёсы трос миллиард манет (азьло коньдонэн) висъяны чакламын вал. Ваньмыз со нылкышно пельпумъёс вылэ усиз. Таӵе куашкам хозяйствоез ки улаз кутыса, Тамара Александровна йыр бордаз кутӥськиз, кытчы, пе, мон кыткиськи. Но чигнаны бер ини. Мар вал ужаны кутскыкуз но али кыӵе югдур интернатын - ӵошатыны луонтэм. Ужасьёс 60 процентэз пала выльдэмын. Адямиос азе чурыт куронъёс пуктытэк, югдур интернатын ӧй воштӥськысал. Табере татчы ужаны курисько мукет гуртъёсын улӥсьёс но. Ужасьёсты Якшур-Бодьяозь нуэ-вае асьсэлэн автобуссы. Нуназезэ тэк сылэтытозь, азьланяз автобуссэс сётыны малпало мынӥсь-ветлӥсьёсты нуллон уже. Усьтӥськизы вуриськонъя но лэсьтӥськонъя мастерскойёс. Небыт диванъёссэс, креслооссэс палэнын но яратыса басьто. Пыжыны кутскизы нянь, со но коньдон поттыны юрттэ. Табере басьтӥськизы пельнянь кутон борды. Сӥзьылысен выль пуктэм гидазы пыртыны малпало ӟеч выжы скалъёсты, озьыен, йӧллы но уз курадӟе ни. Асьсэос парсь вордозы. Вож бакча сиёнэн толалтэ но шумпоттэ выльдэм-тупатъям теплица. Котельнойзы но уг шукыръяськы, кынмыса пальтоосын пуконэз табере ӧвӧл. Бакча сиён но пудо сиён будэтыны асьсэлэн музъемзы вань, сое утялтыны - тракторъёссы. Узырмизы мукет техникаен но. "Йыромыса" ветлӥсьёслэсь утиськон понна, интернат котыртэмын юн борддорен. Ваньмыз со озьы гинэ ӧз сётӥськы. Лэсьтӥськон ужъёслы коньдон министерство пыр висъяськиз ке, вань мукет удысъёсты ӝутонэ Тамара Александровна трос кужымзэ но быгатонзэ сётӥз. Пыдыд чупрес ӧз ке луы, адямиосын сюлмысь вераськыны ӧд ке быгаты, весяк кураськисьын ветлод. Копанева ваньмыныз сямен ик шедьтэ огъя кыл, ваньбуро кивалтӥсьёс солы юрттыны пумит уг луо. Табере Канифольнойысь интернат ачиз мукетъёслы юрттыны быгатэ, районысь но, посёлокысь но вазиськисьёс луо. 1998-тӥ ар понна 100 сюрс манет табыш поттыны быгатӥзы. Азьланезлы малпанъёссы уката но паськытэсь. Бадӟым сюрес вылын ик сыло бере, малы бен мынӥсь-ветлӥсь машинаослы юрттэт сётытэ?. Котырысь нюлэсэз чылкытатон ужзы ӧз йылпумъяськы на. Артысь тыметэз шутэтскон интылы пӧрмытыны малпало. Тамара Александровналэн азяз пуктэм нырысетӥ ужпумез быдэсмиз - интернат пыд йылаз йыг-йыг султӥз. Табере зол-зол басьтӥськоно шуге-леке сюрем нылпиослэсь сюлэмъёссэс шунтон борды. Бен, та ласянь ӧжыт лэсьтэмын ӧвӧл ни. Пиналъёсты йӧнато ас ужзэс тодӥсь-валась врачъёс. Выль сямен ужаны кутскизы санитаркаос. Комнатаосын югыт, чылкыт. Пиналъёсты нуналаз вить пол сюдо. Канифольнойысь интернатын лэсьтӥськон ужъёслэсь мынэмзэс син шораз возиз Удмурт Республикаысь Правительстволэн Тӧроез Павел Николаевич Вершинин. Районысь активлэн кенешаз со вераз: - Кивалтон удысэ пуктыны кулэ нылкышноосты, соос предприятиез кризисысь поттыны быгато. Калыкез улон-вылонын утёнъя министр Николай Михайлович Бессогонов но сояз арлы йылпумъянъёс лэсьтыса, паськытатэм коллегиын пусйиз Т. А. Копаневалэсь азинсконъёссэ. Озьыен, кутскиськод ке, уж вормонтэм ӧвӧл. Л. МАЛЫХ. Туспуктэмез В. Беломорскихлэн. Россиын нырысетӥез Ижысь Металлург городокын ляб адӟисьёсты эмъянъя центр усьтӥськиз. Россиын та выллемез - нырысетӥез. Нуналлы быдэ татын ог 100 адямиез эскерозы. Туннэ шаерамы синъёсын курадӟо 40 процентэз мӧйыос но 20 процентэз нылпиос. Эмъяськон юртэз усьтыны коньдон висъязы Удмурт Республикалэн Правительствоез но медицинаын страхованияя центр. Т. МИРОНОВА. 14 феврале - Святой Валентинлэн нуналэз Вералэ яратэмдэс туннэ Валентинлэсь нуналзэ, яке синмаськемъёслэсь нуналзэс Европаысь странаосын далай пусъё ни. Асьме доры со кемалась ӧз вуы на. Нош тодӥськоды-а тӥ, кытысь со потэмын? Асьме вакытысь ИИИ дауре Римысь император Клавдий ИИ адямиосты кузпалъяськонлэсь алон сярысь указ поттӥз. Со малпалляз, пиосмуртъёс кышнояськыса доразы аналско, семьязы сярысь гинэ сюлмаськыны кутско, вань кужымзэс Рим понна ожмаськонлы сётыны уг быгато ни шуыса. Но егит христиан священник Валентин, императорлэсь кылзӥськытэк, ог-огзэс яратӥсь муртъёсты лушкем венчать карылӥз. Клавдий ИИ со сярысь тодӥз, Валентинэз пытсэт сьӧры келяны, собере йырзэ уретыны косӥз. Мар карыны паймыса, священник тюрьма кузёлэн нылызлы гожтэтъёс ысъяны кутскиз. Озьы соос эшъяськизы, ӝоген ог-огзэс яратэмзы сярысь веразы. Казнить карон азязы, 270-тӥ арын 14-тӥ феврале, со аслаз яратоно нылмуртэзлы берпуметӥ гожтэт ыстӥз. Ӵап та шудтэм нунал пыраклы тодазы кылиз яратӥсь муртъёслэн. Валентинлэсь нуналзэ пусйыны кутскизы мукет странаосын но. Нош та нуналэ ог-огзэс ӟечкылан открыткаосты но запискаосты "валентинкаос" нимало. Верало, нырысьсэ сыӵе открытка келям Чарльз Орлеанский герцог. Умой сямен лыдъяське та нуналэ гажан муртэдлы сяська кузьман. Но тодады возе, котькуд сяськалэн аслаз пуштросэз вань. Шуом, гвоздика - "мон шумпотӥсько, тонэ адӟисько ке", хризантема - "возьмало тонэ улытозям", орхидея - "тон быдэс дунне вылын огнад!", тюльпан - "дунне тыр верасько тонэ яратэмме", горд роза возьматэ зэмос кужмо яратонэз. Та нуналэ яратӥсь муртъёс озьы ик кузьмалляло пичильтык кузьымъёс, шоколад. "Мон тонэ яратӥсько" - таӵе кылъёсын открытка Валентинлэн нуналаз Англиын басьтэ котькудӥз ньылетӥез мурт. Кузьымъёс сярысь веранэз ик ӧвӧл. Куд-ог специалистъёслэн чакламзыя, британецъёс та нуналэ сизьымдон миллион фунт стерлинг пала коньдон быдто. Асьмелэн куддыр сяська басьтыны но коньдонмы уг луы, но тӥ но синмаськемын яке яратӥськоды ке, вералэ со сярысь гажандылы туннэ. х х х Вань-а меда пӧламы али зэмос Валентинъёс? Тупа-а соослэн нимзы сямъёссылы? Таӵе юанэн ми вазиськимы тодмо удмурт Валентинъёслы. Валентин Тубылов, "Удмурт кенеш" огазеяськонлэн тӧроез: Малпасько, зэмос яратон понна нюръяськон котьку но вал: азьло но, али но. Быдэс улон ог-огдэ гажан, яратон вылын возиське уго. Арлыдэ вуыса но тодэ лыкто егит дыръя, армилэсь азьвыл синмаськемъёс. Тупа-а нимы сямъёсылы? Тросэз тупа кадь. Но сое тӥ вераны кулэ. - Юн, кужмо, ужась, семья кусыпъёсты гажась - со сямъёс тӥледлы тупало, но, вождэс эн вае, Валентинъёсты шудтэм но шуо. - Соиныз соглаш ӧвӧл. Адями шудзэ ачиз дуре. Макем трос тыршиз, сокем шудо луоз. Зэм, оло, вань малпанъёс уз но быдэсме, но со бордын ик улонлэн шуг-секытъёсыз, аналскыны уг яра. Валентин Николаев, Удмурт Республикаысь выт бичанъя инспекцилэн кивалтӥсезлэн воштӥсез: - Быгатысалды-а тӥ Святой Валентин музэн яратон понна улондэс сётыны? - Кин тодэ. Кыӵе нылмурт луоз ведь. Но монэ Святой Валентинэн маке герӟасез вань кадь: туж кельше аслым нимы, вордӥськем нуналы но февраль толэзе. Анай-атае со сярысь, конечно, ӧз тодылэ, озьы укшатӥллям. Валентин Белых, суредась: - Пусйиськоды-а тӥ та нуналэз? - Туж шумпотӥсько, асьме дорын но та нуналэз пусйыны кутскизы шуыса, со синмаськем муртъёслы эшшо одӥг праздник. - Нош асьтэос тӥ синмаськись-а? - Туж. Со бордысь ик вань курадӟонъёсы пото. Но синмаськонтэк адямилэн улонэз кӧс, мӧзмыт луэ, соин ик ваньмызлы мылкыд карисько яратонзэс шедьтыны, медам луэ пӧламы пал кышноос но пал воргоронъёс. - Кызьы малпаськоды, вань-а на али пӧламы зэмос Валентинъёс? - Бен. - ? - Мон! З. РЯБИНИНА. Куазез эскерисьёс иворто Удмурт Республикаысь Гидрометеорологияя центр чакламъя, азьвыл аръёсын ӵошатыса, миым ноябре 110-150 процентлы ятыргес лымы усиз, декабре - 120-180, январе - 130- 216 процентлы. Шаерысьтымы бусыосын солэн мурдалаез 31 январе 60-80 сантиметр вал, нормалэсь 20-40 сантиметрлы тросгес. Вуоно арняе ӧжытак пильмаськылоз, тӧл шунды ӝужан но лымшор вискысь секундскын 5- 10 метре пельтоз. Уин - 20, - 25 градус, дырын-дырын - 33, - 35 градус кезьыт луоз, нуназе - -15, - 20 градус. *** 22 январе Кез ёросысь Уди гуртын лымы скал гидлэсь липетсэ зӥбиз. Быриз 27 йыр пудо. Таӵе муген ик изъян адӟизы Можга ёросысь Атасгуртын улӥсьёс. Куашказ 8 квартираен юрт. 1 нылкышно бырыны шедиз. 2 феврале Дэбес ёросысь Четкер гуртын лымылэн секытэзлы ӧз чида школалэн липетэз. Ярам коть, со улэ нокин ӧз шедьы. Нош 8 феврале Старки посёлокын лымы изъянтӥз улон юртэз. Отысь 13 семья (31 мурт) огдырлы мукет интые улыны выжтэмын. *** Секыт югдурез лыдэ басьтыса, Удмурт Республикаысь Кышкыт учыръёслэсь утиськонъя комиссие (кивалтӥсез Ю. С. Питкевич) косэ, трос лымы усемен шугадӟонъёслэсь утиськон, калыкез утён, экономика объектъёсты вис каронъёстэк ужатон понна, тырмыт но кулэ ужрадъёс кутоно. Нимысьтыз сюлмаськоно липет вылысь лымыез утялтон сярысь. Нош али самой тунсыкоез! Валентин но Валентина нимо лыдӟисьёсмес но ваньзэ яратӥсь муртъёсты ӟечкыласа, ялӥськом - тужгес но покчи Валентинлы - одӥг ним нуллӥсь (Валентин но Валентина) кузпалъёслы но туэ кузпалъяськем Валентинлы конкурс! Вань ке тӥ пӧлын сыӵе муртъёс, ивортэ редакциямы февраль толэзь йылпумъяськытозь гожтэт пыр яке таӵе телефонъя: 21-37-14. Тӥледды возьмало синпель кузьымъёс но Святой Валентинлэсь ӟечкылан. Музей усьтэ ас шыкыссэ Кыӵе школа, пе, музейтэк? Бадӟым Уча шор ёзо школаын но со усьтӥськиз 1997-тӥ арын 18-тӥ апреле. Со дырозь ортчем сюрессы сярысь узыр материал люказы ни вал дышетӥсьёс Зоя Алексеевна Величинская, Нина Михайловна Городских, Серапион Петрович Королев но мукетъёсыз. Та гажано адямиос сюлмаськемен, дышетӥсьёс Аркадий Юрьевич Ларионов, Анна Кирилловна Изместьева тыршемен, школалэн директорез Полина Трофимовна Романова но "Россия" колхозлэн тӧроез Аркадий Николаевич Вершинин юрттэмен, музей усьтӥськиз школалы 150 ар тырмон азьын. Солы татысь одӥгзэ бадӟым классэз висъязы. Татчы пырид ке, тӥледыз пумиталоз пиналъёс пӧлысь ик экскурсовод, шаертодонъя кружоке ветлӥсь. Пыр-поч мадьыны быгатоз та палан граждан ожлэн мынэмез, революцилэсь азьло крестьянъёслэн улэмзы сярысь но, колхозъёслэн кылдэмзы, школалэн историез сярысь но. Яке ас поннад, чалмыт гинэ тодматскемед луоз татысь борддоръёс кузя интыяськем стендъёсын, туспуктэмъёсын, папкаосысь материалъёсын. 1959-тӥ арын феврале (ӵапак 40 ар талэсь азьвыл) пӧртэм пичи хозяйствоосыз огазеяса кылдӥз "Россия" колхоз, шаерысьтымы тужгес бадӟымез. Нош 30-тӥ аръёсы та ёросын 50-лэсь уно сельхозартельёс вылӥллям - котькуд гуртын нимаз. Куд-ог кивалтӥсьёслэсь туспуктэмъёссэс адӟыны луэ борддорысь. Син азьын - тодмо тусбуйёс но: Иван Васильевич Горынцев, Мартын Михайлович Выгодчиков, Елизавета Даниловна Смирнова, Семен Ильич Чипеев, Петр Кондратьевич Рябов. (Таиз классэн кивалтӥсьмы, пужмераськыны кутскем сьӧд лусьтро синкашъёсыз улысь мыр-мыр учкоз вал ми шоры, дышетымтэ урокмы понна пыкылыса. Нуклеиновой но аминокислотаос пӧлы йыромем маръёс ке, ми тодыса, валаса но ӧм вуттэ кадь, секыт ож пыр ортчем дышетӥсьмылэн Горд Кизили орденэз но вань шуыса). Зэм, котькудӥз таос пӧлысь - адями-легенда, пӧсь ож тылӝу пыр потэмын, вань улонзэс Бадӟым Учалан ужамын-дышетэмын. Тани егит, чебер тусбуйёс: Валерий Горынцев, афган ожын быриз, Горд Кизили орденэн пусъемын (одӥг урамын шудӥм-бызьылим ми соин). Андрей Петров, батыр пияш, чечен ожмаськонысь ӧз берты... Сергей Крутихин - 1986-тӥ-1987-тӥ аръёсы Чернобыльын шудтэм учырлэсь бервылъёссэ быдтонэ пыриськем ("Чибори" ансамбльлэн туж чырткем кивалтӥсез вераськыкумы та сярысь ӧз поттылы вал). Тӥни озьы, музее пырем мурт котькудӥз ик маке но аслыз выльзэ усьтэ яке тодмоосыныз "пумиське", дыр. Музейлэн "зарни фондэз" но вань. Со Иван Павлович Пушкинлэн сандыкез. Кузёез кулэм бере, сое сизьым ар утьыса возем колхозысь парткомлэн секретарез Виктор Иванович Семакин. Жаль, тужгес дуно арбериоссэ та сандыкысь асэстэм И. П. Пушкинлэн Йошкар-Олаын улӥсь кыӵе ке ӵыжы-выжыез, Семаков. Нош кылем папкаосыз учкыса пырпотӥд ке, та ёросын куке но вылэм учыръёс но, чыры-пырыос но шараяськозы. Тани, кылсярысь, 1890-тӥ арын Бадӟым Учаын ӝуам Шурсьӧр урам (Зарека). Черкогуртэз выль сямен радъяны карта лэсьтӥллям, со син азьын. Иван Павлович, естествознаниен дышетӥсь, война бере школалэн директорез вал, та палан сое чипыен-куреген тодо вылэм. (Тодӥсько на пичи дыръям дорамы пырамзэ, мынам атаелэн кирос аиз вал со). Та дышетӥсьлэн тыршемез, опытъёсыз бордысен кутскизы Бадӟым Уча школалэн музъемен, колхозэн гердъёсыз. И. П. Пушкин умой тодэ вылэм Куӟебай Гердэз. Соин ӵошгес ик дышетскиз Вавожысь кык классъем школаын, собере Кукаркаысь учительской семинариын. Та семинариез ик йылпумъяса, Бадӟым Учаысь кык классъем школаен 1916-тӥ-1918-тӥ аръёсы кивалтэ Кузьма Павлович. Драмкружок кылдытыса пуктӥллям "Шалтра Онтон" нимо нырысетӥ пьесазэ. Учалан ужакуз ик Герд тодматске та палась гуртын, Быдӟымшур-Пельгаын ужась Ашальчи Окиен. (Жаляса верано, та сярысь нокинлэсь гожтытэк, юалляськытэк кылемын. Озьы ик И. П. Пушкинлэсь - К. Герд сярысь). 1975-тӥ аръёсысен кутскыса, Куӟебай Гердлэн 80 аръем юбилеез азьын, школаез "йӧспӧртэм" утчаськонъёсыныз бугыръяса возиз Лидия Трофимовна Шумилова ("странной" шуо вал сое). Та палась Сулвай гуртын будэм ныллэсь анай-атайзэ кулаке поттӥллям вылэм, соос сярысь утчаськон сяменыз со Герд доры вуэм. (Мукет дышетӥсьёслэн соку кылэмзы ик ӧй вал на, кин, ма со сыӵе). Пиналъёсын ӵош Лидия Трофимовна дасяз К. Гердлы сӥзем альбом, бордгазет, экскурсоводзы но вал. Пуктӥзы "Гондыръёс" выжыкылъя инсценировка, гуртъёсын возьматъязы, телевидениысь "Визьмын, кужмын, эшъёсын" передачае пыриськизы. Та кружоке ветлӥсь пиналъёс пудэн (пыдын) ветлӥзы Гердлэн вордскем палъёсаз - Покчивукое но Малиновкае, адӟемзэс, тодэ ваёнъёсыз гожъязы. Нош альбомзэс кузьмазы вал Р. А. Кувшиновалы, Гердлэн племянницаезлы. Киысь кие кӧчылэмез бере, со нош ик вуиз Бадӟым Уча школае, 1998-тӥ арын куартолэзе сое татчы ваиз Гурезь-Пудга школалэн директорез Анатолий Максимович Егоров. Лидия Трофимовна малпа вал юрттӥсьёсыныз Соловкиысь шормуӵъёсы но вуылыны. Ӧз вуы.... "Та вакытэ, али солы улоно вал,- жаляса вера школалэн директорез П. Т. Романова.- Пумозяз вуттымтэ малпанэныз ӝуаса ик кысӥз..." "Музей" шуиськом ке, одно ик син азе пуксё вашкала арбериос. Зэм ик, соос татын вань, огаз сэреге интыямын. - Анайме Бадӟым Сибыысь татчы ваеме бере жаль потӥз тӥрлыкъёссэ нюк улэ сэрпалтыны,- шуэ А. К. Изместьева, музейлэн кивалтӥсез.- Гуртэтӥ но люкаса ветлӥм. Алигес тани Наталья Андреевна Андреева пужъятэмъёссэ ваиз. Бивеньёсыз вуттӥзы Сундо- Учаысь пиос. Аслам кузпалы но, Николай, юрттэ, маке лэсьтоно ке, слесарь-моторист со. Музейлы эскиз лэсьтӥ - учкиз, ма но со дэмлаз. Шаертодонъя кружокеныз дышетӥсь мыло-кыдо ужа. Топонимикая альбом лэсьтӥзы, республикаямы ортчись конкурсэ пыриськизы. Классной часъёс но татын ортчыло, котькудӥз уго та "узыр дуннеын" аслыз тодон-валанъёс басьтыны быгатэ. Музейлэн но кружоклэн туэ бадӟым сюлмаськонэз: 31-тӥ мае 100 ар тырме авиациысь маршаллэн Ф. Я. Фалалеевлэн вордскемез дырысен. Школа уго нуллэ солэсь нимзэ - Федор Яковлевич нырысь ик татын, собере Вавожын Кузьма Чайниковен, Иван Пушкинэн ӵош дышетскиз. Математикалы дышетӥсь Нина Николаевна Фалалеева классной часаз ӧтьылӥз Полянское гуртысь мӧйы адямиосты, кудъёсыз тодо на маршалэз. Со пумиськонэз гожтӥзы видеокассетае. Кылем арын тулыс 11 кузя кружоке ветлӥсьёс вуылӥзы Москвае, пумиськылӥзы Ф. Я. Фалалеевлэн нылыныз Клацетта Федоровнаен но племянникеныз Петр Петровичен. Гожтэт пыр но кусып возё. Клацетта Федоровна гожтэ: куинь внучкаосыным, пе, чидатэк возьмаськом ни атаелэн вордскем гуртаз пумиськон дырез. Маршаллэсь юбилейзэ пусъён вакытэ ик луоз Полянское гуртлэн шулдыръяськон нуналэз. Анна Кирилловна Изместьева (Михайлова), та школаын дышетскымтэ мурт, 15 ар но ӝыны ужатозяз сомында тодыны вуиз Бадӟым Уча ёрос но татысь адямиос сярысь - дасяз но поттӥз "Страницы истории: 150 лет Большеучинской средней школе" книга. 1846-тӥ арысен, кык аръем приходской школа бордысен кутскыса туннэ нуналозь кузь сюрес усьтӥське син азе, книга бамъёсыз лисъяно ке. Котькуд дышетӥсьлы татын вакчияк ке но дунъет сётэмын. Ваньзэ тае утчан, шедьтон, гожъян понна адямилэн луыны кулэ туж юн чидан-тыршон мылкыдыз но бадӟым сюлэмыз. ... Уездысь тужгес но устоез школа, кытын ужаз Кузьма Павлович Чайников (Герд), ӝуаз, тӧдьыослэсь гуртэз мозмытыку, 1918-тӥ арын куарусён толэзьлэн пумаз. Со интые пуктӥзы маслозавод, собере - огшоры улон корка... Озьы ӵушисько историлэн бервылъёсыз. Музейын утиськись ӵужектэм бумагаос, документъёс, туспуктэмъёс гинэ син азе пуктыны юртто на со вылэм учыръёсты но суредъёсты. Зэмзэ ик, кыӵе школа, пе, музейтэк? Т. ПЕТРОВА (ЧЕРНОВА). Валэктэ юрист Сэрегез нуэ адвокат Лилия Шкляева Музъем понна выт Мон кемалась пенсиын ни. Тодэме потэ: музъем понна выт (налог) тыронын мон кадьёслы льготаос вань-а? П. Перевощиков. Игра. Жаляса верано луэ: Перевощиков эш ӧвӧл ивортэм Игра посёлокын яке Игра районын улэмзэ, бакча, сад-бакча яке дача воземзэ. Тӥни малы солэн юанэзлы одӥг кылын валэктон сётыны шуг. "Музъем понна дун сярысь" Россия Федерацилэн Законэз кутэмын 1991-тӥ арын 11-тӥ октябре. Отын номыр верамтэ пенсионеръёслы льготаос сярысь. 1994-тӥ арын 14-тӥ сентябре Удмурт Республикаысь Вылӥ Совет кутӥз тазьы нимам постановление: "Россия Федерацилэсь "Музъем понна дун сярысь" Законзэ Удмурт Республикаын кутон сярысь". Отын пусъемын: интыысь аскивалтонъя ёзъёслэн (органлэн) правозы вань музъем понна вытъя льготаос тупатыны. Вытлэсь быдэсак яке солэн ог люкетэзлэсь кӧня ке дырлы мозмыны яке тыронзэс берло дырлы кельтыны быгато таӵе адямиос: 1) юридической лицоос (организациос) но адямиос инкуазен яке мукет муген сэрен шудтэм учыре шедемзы бере, соос бадӟым изъян адӟемын ке; 2) трос нылпиё, ёрмись но егит семьяос; 3) ӟеч юрттэт сётӥсь (благотворительной) организациос; 4) ӧлексы, ветеранъёслэн, юнме вӧсь карем (репрессие сюрылэм) адямиослэн огазеяськонъёссы (организациоссы) но предприятиоссы. Льгота тупатӥське со быдӟаозь, кӧня люкетэз выт кыле интыысь аскивалтонъя ёзэ. Вытэз кулэстон сярысь куронэн вазиськоно городлэн яке ёрослэн администрацияз. Со понна кулэ таӵе документъёс: семья сярысь справка, семьяысь адямиослэн барышсы (доходзы) сярысь справка, мукет барышъёс ӧвӧл ни шуыса возьматӥсь справка - налогъёсъя инспекциысь. Гожтӥськон - 99 Шумпотон нунал матэктэ Пичи Пурга селоысь библиотекаын 17 феврале 13 часын ортчоз электропилаез лотереяен шудытон. Кызьы ивортылӥм ни, таяз шудонэ пыриськозы ёросысь передвижной почта ёзэ пырись гуртъёсысь (Кечур, Курчум-Норья, Миндэр, Пичи Бодья, Абдульменево, Постол, Вишур) лыдӟисьёсмы, Яган но Пугачёво почта ёзъёсысь эшъёсмы, озьы ик ёрос редакция пыр гожтӥськемъёс. Лыдӟисьёс понна нимысьтыз кузьым дася "Удмурт кенеш" огазеяськонлэн президентэз Валентин Тубылов. Кызьы тодӥськоды та огазеяськон газетамы "Герд" бамез поттэ. Лыдӟисьёсмес шумпоттыны малпа Пичи Пурга ёрос администрация но. Ваньдэс витиськом лотереяез шудытонэ. Л. МАЛЫХ. Улонысь суредъёс Тютюос люкетӥзы Киров улосысь Бураши гуртэ улыны выжеммы бере, гуртоосты ӟазегъёсынымы паймытӥм. Татын та тыолбурдоез вордӥсь вылымтэ. Шур ӧвӧлысь-а, маке мукет муген-а. Но тулыс ӟазегпиосмес учкыны капка азе пичиез но, бадӟымез но вуылӥз. Туж муспотон адӟиське уго пуштрес зарни комокъёслэн тюрр! бызьылэмзы, пичи бурдъёсынызы выретэмзы, соку гинэ потӥсь вож ожоез кысканы турттэмзы. Но ӝоген ӟазегъёсмы бускельёслы акыльтыны кутскизы. Анатольевна нунал пӧрат черекъя вал: - Адӟем уг пот ни со тылобурдоостэс. Нуналлы быдэ бервылзэс утялтоно луэ. Вордӥськоды ке, ӧжыт чаклалэ. Но ма карод? Ӟазегъёс индылэмез уг валало, кунянэз сямен гозыяса уд возьы. Корка вадьсаз колонка сылэ бере, соин ик отчы мыно, вылды. Со понна толалтэ нош ӟечен тодазы вайыны кутскизы. Кудӥзлы кынмамзэ эмъяны ӟазег кӧй кулэ луиз, кудӥзлы сутскемзэ эмъяны. Вуылӥз Анатольевна но. Малпасько, табере гужем уз ӟуры ни. Кытын, пе? Эшшо юнгес керетыны кутскиз. Ӧй чида ни - сӥзьыл вань ӟазегъёсме вандӥ. Кӧня ке улыса, Анатольевна кӧй дуре лыктӥз. - Ма дауртӥд тон, Николай? Мискинь бурдоостэ вандэм, шуо. Гуртмылы тӥляд ӟазегъёсты гинэ шулдыр тус пыртылӥзы ук. Малызэ ӧй вера, со ачиз тодэ уго. Н. Турин. Эктытӥз "Эктон корка" 28-тӥ январе Ижевскысь "Эктон коркан" удмурт но пор фольклорлы сӥзем ӝыт ортчиз. Дасяз но нуиз сое егит этнограф Андрей Николаевич Прокопьев. Солы таӵе ужрадъёсты ортчытонын котьку юртто анаез но атаез Анна Николаевна но Николай Алексеевич (кыксы ик тодмо адямиос). Ӝыт туж шулдыр ортчиз: эктонъёсты воштылӥзы кырӟанъёс, арганчиосты - барабанэн шудӥсьёс. Тэк ӧз пуке учкисьёс но. Соос но сцена вылэ потаса эктӥзы, пӧртэм шудонъёсы пыриськизы. Та ӝытын нош пумиськизы Каракулино ёросысь "Ныргындыш сем", Ижевскысь пор ансамбль, "Шунды" дэменлык. Туж бадӟым тау Андрей Николаевичлы мыло-кыдо ужрадъёс ортчытъямез понна. Солэн кичӧлтэмез улсын ик Ижевскын "Эктон корка" но усьтэмын вал. Азьланяз но ӟеч ужаны мед быгатоз. Р. ТОКМУРЗИН. Каракулино ёрос, Ныргында гурт. Эмъюмез воштэ стадион Висись яке сӧсыр адями ӵемгес эмъюм юыны тырше. Но, огласянь, эмъюмъёс туж дуноесь луизы. Мукет ласянь ке, "химия", юрттэм сяна, тазалыклы изъян но вае - огзэ висёнэз эмъя ке, мукетсэ "сайкатэ". Таен лыдэ басьтыса, Уваысь "Юбилейный" стадионэ берло дыре сӧсыръёс ӵошатсконъёсы пыриськылыны кутскизы. Та нуналъёсы соос куасэн бызьылӥзы, дӧдьыен нискылазы, эстафета ортчытӥзы. Зэм но: чылкыт омырлэсь но ёзвиосты ужатэмлэсь пайдаёезгес номыр ӧвӧл, дыр. П. СКОБЕЛЕВ. Шӧкыч Сюрес вылын вераськонъёс Пумиськизы кык тодмоос: - Лазыр, тон кытын улӥськод? - Иж вӧзын. - Городын ужаськод бере, мынон-ветлонэд дуно усе, дыр. - Озьы, Гирыш. Но утчась мурт амал шедьтэ. Автобус понна кык манет тырыны кулэ, соку билет сёто. Нош малы мыным билет? Мон билет уг куриськы, одӥг манет сётӥсько но - ужез быре, контролёрлы но умой, манет кисыяз пыре. Нош мынам мар уже? Куинь толэзь ни уждун уг тыро... х х х Автобусын: - Зина, кытчы мынӥськод? - Уж утчаса ветлӥсько ай. Со вакыт контролёр матэктэ: - Я, монэн вераськемысь дугды,- вазе Зина тодмоезлы.- Мон пенсионерка карисько ай,- со ымнырзэ кисыртэ, валэктэм каре.- Э-э, пенсионной удостоверениме вунэтӥськем,- утыр бамзэ пӧзеныз ӵокса,- фу-у, кошкиз, лэся, лулэз позыртӥсь, няньлы берпум кык манетме номырин но уг сёты.... х х х Городысь транспорт дугдылонниын: - Педор, мар-о сыӵе дӥсед урод? Бомже кылид ни-а, шай-а? - Врксё ик ӧй на ай, но со калэ вуиськиз ни - т россэ арбериосме вузай, нош патере вань на, ужтэк кылемъёс пӧлы биржаын гожтӥськи - пособизэс уг тыро, тани быдэс сумка буш бутылкаос бичай, приёмной пунктэ нуисько,- бадӟым сумказэ возьматэ со,- бомж карыса билет басьтыны уг косо, огысьтыз тролллейбусысь васькыто ке, мукетаз пуксисько. Сеп школалы - 115 ар Игра районысь Сеп шор ёзо школалы та нуналъёсы 115 ар тырме. Солы сӥзем сӥё-дано ӝыт ортчоз ӵуказе, 13 феврале. Люкаськозы татын ужам дышетӥсьёс но школаез быдтэмъёс. Сеп школаез йылпумъямъёс данак интыосын но пӧртэм удысъёсын тыршо. Али ужась дышетӥсьёс пӧлысь но уноез та школаез ик быдтэмын. Соос пӧлын Никитина Анна Тимофеевна - РСФСР-ысь но УАССР-ысь дано дышетӥсь, Дышетон удысысь отличник ним басьтӥз, Корепанов Василий Васильевич, Малых Римма Степановна, Максимова Людмила Павловна, Ускова Алевтина Вениаминовна но Хохрякова Юлия Александровна. Али школаын 190 мурт дышетске, 21 дышетӥсь ужа. Гажано дышетӥсьёс но дышетскисьёс, школадылы 115 ар тырмонэн ӟечкыласьком, шудбур но тазалык сӥзиськом. Школаяды котьку шунды мед пиштоз, нош ымныръёсады - шумпотон но пальпотон. Г. РОМАНОВ. Шӧкыч Серем пыр Поезд. Купе. Уй. Малпамтэ шорысь йыг-дым! каре. Кышкатскем пассажиръёс юало: - Мар луиз? - Со мынам дэреме озьы усиз,- вера воргорон. - Нош малы сыӵе йыг-дым! кариз? - Ма, дэремысьтым потыса ӧй вуы. х х х Нылкышно терапевтлэн кабинетаз пыре: - Вождэс эн вае, доктор, мон али гинэ тӥ доры бюстгалтерме ӧй-а кельты? - Ӧд, мон доры ӧд кельтэ. - А-а, соку окулист дорын, иське? х х х Мынэ суд. Судья юа: - Кыӵе профессиды? - Акробат. - Сержант, укноосты пытса! х х х - Доктор, зэмзэ но-а ӵуж кушман сии ке, синъёсы тупалозы? - Зэм. Очкиен луд кечез адӟемед ӧвӧл, дыр, ук! х х х Врач висисьлы: - Операция тӥледлы 500 манет тыр усёэ. - Укыр дуно ук! Кулӥ ке, умойгес луоз. - Уг дэмласькы. Тодӥськоды-а, туэ адямиез ватон кӧня тыр усе? х х х Кудӟем воргорон квартираяз пыре. Кышноез сое писэн пумита. - Уждунме юыса быдтӥ, валюталы дунъёс будэмлы пумит луэмме возьматон понна. х х х Милиционер кудӟем шофёрлэсь юа: - Кызьы кудӟыса руль сьӧры пуксьыны быгатӥды? - Эшъёсы юрттӥзы. ШӦКЫЧ Серем пыр Самолёт инбаме ӝутске. Капитан, пассажиръёслы ӟеч сюрес сӥзьыса, салонын ужась радиозэ кысыны вунэтэ. Собере пилотэзлы вазиське. - Я, кофемес юыса быдтом но стюардессаен яратонэн шудом. Стюардесса вожез потыса но кӧдэктыса капитанлэн кабинаез доры дыртэ. Малпамтэ шорысь сое китӥз воргорон кутэ: - Мусое, кытчы соке дыртӥськоды? Соос кофезэс юыса ӧз на вуэ. *** Прапорщик: - Кин мыноз картофка копаны, кык вамышлы азьлань! Кык солдат потэ. Прапорщик: - Мукетъёсыз пыдын мынозы. ��� Милиция йыгаське. Ӧсэз пичи пияш усьтэ. Милиция солэсь юа: - Атаед аракы пӧзьтэ-а? Пияш шуэ: - Уг, сое атае ыльын юэ. *** Кык эшъёс пумисько. Одӥгез мукетызлы шуэ: -Мон кузпалэдлы толон трамвайысен сыӵе анекдот мади - ох, серекъяз ук, ох, серекъяз, ӧжыт гинэ койкаысь ӧз усьы... А. Лукашенко - Удмуртиын Толон Ижевске вуиз Беларусь Республикалэн Президентэз Александр Григорьевич Лукашенко. Соин ӵош вуизы Беларусь Республикалэн Кышкытлыклэсь утиськонъя госсекретарез, вице-премьерлэн нырысетӥ воштӥсез, тазалыкез утёнъя министр, обороная предприятиослэн генеральной директоръёссы но мукет адямиос. Делегация сьӧры вуизы уно журналистъёс. Та нуналэ ик А. Лукашенко вуылӥз Ижевскысь электромеханической "Ижмаш-авто" ОАО акционер предприятие. Шӧкыч Амало Васьлей улонысь учыр Ӟудэм ӵӧж берлань уя, шуо, озьы ик вылэм, ӧкӧ. Заводысьтымы огаз цехын туж амалоесь электрикъёс вылӥллям. Огнуналэ, уждун нерге басьтэм беразы, удмурт висён кутӥллям - макмыр.Ма кароно? Веськатыны коньдон ӧвӧл... Мокей Вася, ужзэ вунэтыса ик, малпаськонэ усиз, эшъёсыз кыштыр гинэ котыраз бергало. Тодо угось - Мокейпи маке со одно ик йӧндыроз. Огшап улыса, Васьлей чорк! гинэ интыысьтыз султӥз, кымесаз шлач! чабкиз: эшез Сандыр уже потымтэ бере... со чотын мар но со лэсьтыны луоно. Ымнырзэ туж ӝож мылкыдо карыса, Мокей Вася эшъёссэ котыраз люказ но ивортӥз: - Эшъёс, Филимонов Сандырмы кулэм ук... - Ма, кызьы озьы кулэм, туннэ ӵукна адӟи вал ук,- кутскем вал одӥгез. Васьлей сое могак! кариз: - Кулэм шуисько бере, кулэм! Валад-а? Мон профсоюзэ кошки... Час ортчыса, цехмы шорын ик ялон кылдӥз, Филимонов Александр Иванович устоез электрик вал. Тусбуйзэ но лякиллям. Мур куректэммес вераськом, пе... Мокей Васялы, эшсэ ватыны юрттон вылысь, коньдон висъяллям. Нуназе котырын электрикъёс кисьтон карыса, кырӟало ни вал. Гульымзы нош ялан бичатэ. Мокей Вася соку ымнырзэ эшшо но ӝож мылкыдо карыса, цех кузя вамыштӥз. Котькудмы доры лыктыса, манетэн-кыкен коньдон бичаса, бумага вылэ гожтӥськытӥз на. Сандырлэн кузпалызлы юрттоно, пе. Кӧня коньдон люкаллям, тодмо ӧвӧл: электрикъёсмы со нуналэ уж дурысь тӧлӟизы. Ӵуказеяз Мокей Васямы уж дурын сяртчы кадь пуке вал. Солы макмыр но, шай но ӧвӧл, лэся. Ма, солы, юэмысь ке дугдэ, арня ортчыса гинэ макмыр йӧтэ угось. Отчыозь кӧт пушказ ас бургыез пӧзьтэ на. Вася мышлань берытскиз но... азяз Сандыр эшез сылэ. - Ӟечбур, Мокеич, кыӵе-мар улэм-вылэм? - Ма... тани... марым..,- могась висён шедьтӥз Васьлей. Час ортчыса, электрикъёсмес уж дурысь туздыризы, нош Мокей Васьлейлы солэсь но бадӟым куректон шедиз: Филимон Сандыр сое кулытозям нуналлы быдэ кисьтон секталод, шуэм. Сектатэк уд лу - Сандырлэн мыжыкез йыр быдӟа угось. Анатолий ПЕТРОВ. Ӟечкылан! Пичи Пурга ёросысь Гожня гуртын улӥсь Наталья Гавриловна Семенова 13 феврале вордӥськем нуналзэ пусйе. Ӟечкыласьком яратоно анаймес но песянаймес, юн тазалык, шудо нуналъёс, оскон сӥзиськом. Ми котьку шумпотыса бертӥськом тон доры, анай. Нылпиосыд, эмеспиосыд но внукъёсыд. Аркадий Малков: "Музъеммы асьмелэн одӥг... Улонмы но". Тани укмысэтӥ арзэ ни Удмуртиысь парламентын кизнер калыклэн нимыныз ужа Аркадий Малков. Пӧртэм удысъёсын ассэ эскерем адями тужгес но яркыт возьматӥз ассэ Вичурка гуртын выль колхозэз ӝутон вакытэ. Вакчи дыр куспын со вунэтэм бригадаез пӧрмытӥз ёросысь валтӥсь хозяйстволы. Отысен ик, шуыны луоз, кутскиз Малковлэн политкае сюресэз. Туннэ со кивалтэ Кун Кенешысь одӥгеныз валтӥсь ёзэн - Агропромышленность удысъя, музъем кусыпъёсъя но мнкуазь узырлыкъёсты кутонъя ялан ужась комиссиен. Туннэ ми дэмласьком тодматскыны Кун Кенешлэн депутатэныз пӧртэм ужпумъёсъя враськонэнымы. - Аркадий Трофимович, ойдолэ тодэ ваём республикаысьтымы Вылӥ Советэз. Шонергес вераса, солэн берло ӧтчамысьтыз депутатъёслэсь ужамзэс. Уго ӵапак соос нырысетӥзэ лёгизы парламентаризме сюрес. Со дырозь асьмелэн быръем власть ньӧмыз понна гинэ вал. Азьло со ужаз обкомлэн но Москвалэн кивалтэмезъя... - Бен, 90-тӥ аръёсозь зэмос удмурт законъёс асьмелэн ӧй вал. Вылӥ Советлэн депутатъёсызлы дышетсконо луиз оломалы но: одӥг ужпумъя пӧртэм мылкыдъёс вераны дӥсьтонлы, огкыл утчанлы, но котьмалэсь пусйымонэз вал, мукетыз бордын - депутатъёс шӧдӥзы, улонлэн кызьы азинскемез соос бордысь потэ шуыса. Вить ар ӵоже ӟырдыт нуналъёс ичи ӧй вал. 1991-тӥ арын август, 1993-тӥ арын октябрь, трос мукетыз - ваньмыз дышетӥз милемыз, парламентэ быръемъёсты, малпаськыны но кыл кутыны. Соин ик мон со ӧтчамлэн депутатъёсыз шоры гажан мылкыдын учкисько. Соослы луыса, республикаямы югдурез огъя умой возьыны быгатӥм. - Соку тӥ "огшоры" депутат вал. Туннэ Президиумезлэн членэз, ялан ужась комиссилэн кивалтӥсез. Ӝоген Кун Кенеше выль депутатъёсты быръёзы, озьыен, дыр вуиз ньыль ар ӵоже ужамлы йылпумъянъёс лэсьтыны. Ма вераны быгатом ужмы сярысь? - Ваньзэ, ма ортчиз комиссимы пыр, вераны кулэез ӧвӧл, дыр. Тужгес но пусйымонъёссэ верано ке, нырысь ик поттылысал Музъем кодекс сярысь. Сое кутӥм куинь ар талэсь азьло. Соку но, азьло но трос вал тазьы верасьёс: кулэ меда дыртыны, ойдолэ витёме Россиын та выллем закон кутэмзэс. Но ми дыртытӥм. Дыр ортчиз Россиын сыӵе кодекс али ке но юнматымтэ? Малы бен кулэ вал шаерамы со закон? Музъем, калыклэн тужгес но бадӟым ваньбурез, таӵе валантэм вакытэ вузлы пӧрмытыны кулэ ӧвӧл. Озьы чакламын асьме Конституциын: асьме кодексын. Вераськон мынэ ке дача, юртъер, гараж котырысь музъем сярысь, татын нокин но пумит кыл вераны кулэ ӧвӧл - мед вузалозы, мед басьтозы. Нош гыроно-кизёно муосты йӧтылыны уг яра. Туала законъёсъя музъемез луэ арендае басьтыны. Гожты огкыл (договор) но ужа - потты аслыд пайда, барыш. Дыр ортче - улон воштӥське. Музъем сярысь кодексъя, кылсярысь, юртъер вӧзы 50 сотка бакча басьтыны луэ. Но мон малпамъя, туала дыре быдэс гектарез но мултэс уз лу. Депутатъёслы тая ватсан- шонертон гинэ сётоно. Нош самой кулэез - музъемен герӟаськем ужпумъёс республикаямы учкемын, солэн инъетэз юнматэмын. Кыкетӥез тужгес кулэ документ, кудзэ милям комиссимы дасяз - со "Агропромышленной производствоез государство ласянь радъянъя" Закон. Верало тани одӥг лыдпусэз гинэ: Та законъя республикалэн бюджетысьтыз 10 процентэз (самой ичиез) коньдон гурт удыслы висъяськыны кулэ. Татарстанэн ӵошатоно ке, та лыдпус бадӟым ӧвӧл (гуртэ отын котькуд витетӥ манетсы кошке). Озьы ке но таӵе юрттэмен но музъем ужась пыд вылаз возиськоз ни. Та огъясь документ, со гурт ужасьлэсь но переработкаен вырисьлэсь кусыпъёссэс радъя, дун тупатонъя, кредит басьтонъя валэктонъёс сётэ. Али ужаськом Россилэсь Нюлэсъя кодекссэ асьме дорын кутонъя ӵектонъёс бордын, ётӥн будэтонэз, чорыг вордонэз азинтонъя программаос бордын но мукет. Гуртысь депутатъёсты, Тӥледыз но озьы ик, пыкыло хозяйствоен, производствоен герӟаськем ужпумъёсы нырдэс чуртнаськоды шуыса... - Комиссия гурт улонъя законъёс дася. Соин ик гурт ужпумъёсты ми тодыны-чакланы кулэ. Вылаз ик уноез депутатъёс - гурт хозяйствоослэн кивалтӥсьёссы. Соин ик созэ яке тазэ ужпумез но кенешыса валче быдэсъяны тыршиськом. Нош ужпумъёс уно. Басьтом техника ласянь югдурез ик. Выль комбайн басьтыны хозяйствоослэн моӵсы уг тырмы. Со 400 сюрс манет но солэсь ятыр сылэ. Йӧллэн дуныз али будэмын ке но, таӵе агрегат понна ичизэ 200 тонна сое келяно ук. Та ужпумез одно ик государство радъяны кулэ. Гуртэз выльдонъя Россиын ӝужам тулкым асьмемыз но пальккиз. Кӧня пӧртэм эштосъёс, огазеяськонъёс кылдӥзы. Нош ма со сётӥз? Куд-ог колхозъёс воксё куашказы- быризы. Кужмоосыз хозяйствоос шуккетлы ӧз сётске, визьмо кивалтӥсьёссы ӝомалэс куазен но сюрессэс ӧз ыштэ. Соиз умой, котькудӥз хозяйство али аслыз кельшымон сюрес бырйыны быгатэ. Озьы ке но, выльдӥськон шуонэз ас эрказ лэзьыны уг яра вал. - Аркадий Трофимович, нош кыӵе мылкыдды фермеръёс пумысен? - "Странаез фермер сюдоз" шуонэн янгышазы. Мон фермеръёслы пумит ӧвӧл. Туж умой, туннэ крестьян адями ас кужымзэ эскерыны быгатэ. Но сыӵеослы, нимаз ужасьёслы гинэ оскиськыса улоно ӧвӧл. Юрттоно, азинтоно пӧртэм ваньбурен ужась хозяйствоосты. Комиссилэн ужъёсаз чакламын фермер хозяйствоослы юрттонъя программа но. Оскон вань, со юнматэмын луоз но улонэ пыӵалоз шуыса. - Вераськонмес йылпумъяса, юам потэ" на вал асьтэ сярысь. Луоз-а тодыны, ку но кытын мылкыдды шутэтске, сюлэмды гань-гань луэ? - Тулыс, инкуазь сайкаку. Соку, писпуос бычыясько, шутэтскем музъем шоканы ӧдъя кадь, выль улон сётыны дасяське. Тодэ лыктэ колхозын ужам вакыт. Сылӥськод бусыын но кылӥськод трактор гурлам куараез. Тӥни ку сюлэм кырӟа, шумпотэмен йыр пороме. - Ачиз улон - бадӟым шуд. Огшоры нуналъёсы сое уд валаськы, уд дунъяськы. Но луылэ сыӵе дыр, ку музъем пыд улысь "гылӟе". Сыӵе адӟонэн ӧд пумиськылэ-а? - Тодэ лыктэ сыӵе учыр. Кемаласьгес ни вал со. Пӧйшуракум янгышай, асме ыбыны шедьтӥ. Бер ӝытазе. Огнам. Шӧдӥсько, улонлэн пумыз вуиз. Асме шайвылысь адӟисько ни. Берпум кужымме люкаса, машинае доры нюжтӥськи. Кызьы руль сьӧры пукси, кызьы больницаозь вуи - уг тодӥськы ни. Со дырысен улонэз мукет мерттэтэн дунъясько. Мукет адӟонэ но вал, колхозэн кивалтыкум ини. Мастерскойын циркулярка пыр пулъёсты лэзьяно кариськи (луэ вал ук куреме но). Пулэн ӵош чиньыосы но вандӥськизы. Тау, ӟеч адямиослы, Казане нуизы. 12 час ортчыса, киы вурылэмын ни вал. Табере баян бирдыос вылтӥ чиньыосы азьвыл кадь шаплы уг бызьыло ни. Озьы ке но, шудыны курыса тодмоосы вазисько на. Зэмзэ но, секыт адӟонъёсты вылӥллям. Тӥ чидаллямды. Нош кызьы семьяды куректонэз вормиз? - Матысь адямиос юрттытэк, та дуннеын улӥсь но ӧй луысал ни, дыр. Семьяямы ог- огмес валаса, тупаса улӥськом. Кузпалы школаын ужа, нылы экономика факультетэз йылпумъяз, пие - студент, вань ини внукъёсы. - Ма дэмласалды лыдӟисьёслы? - Чидан но оскон. Азьпалан ваньмыз умой луоз. Асьмелэн вань на музъеммы, валче улыны но ужаны мылкыдмы кысымтэ на. Асьмеос трос, нош музъеммы одӥг. Улон но сётӥське огпол. ЮАЛЭ - ВАЛЭКТОМ Кӧня дун тыроно? - Алигес нылпи садамы толэзьлы быдэ ватсаса 20 манет октыны кутскизы. Пӧртэм чыры-пырыослы, майталлы кулэ шуыса валэктӥзы. Тыремды ке уг поты, нылпидэс эн нуллэ, пе. Шонер-а соос лэсьто? Таӵе юанэн жингыртӥз редакциямы Ижевскысь 291-тӥ нылпи садэ нылпизэ нуллӥсь анай. Та юанлы валэктон сётӥзы 291 номеро нылпи садлэн кивалтӥсез Р. А. БОРИСОВА но Первомай ёросысь дошкольной отделлэн кивалтӥсез С. А. Перминова. Р. Б. - Нылпи садлэн Попечительской советаз, зэмзэ но, кенешемын вал анай- атайёслэсь ватсаса коньдон бичаны. Мугез валамон - огъя югдур секыт луэмен, нылпи садъёслы, нылпиосты сюдыны но ужасьёслы уждун тырыны сяна, коньдон уг висъяськы. Соин ик нылпи сад шуге-леке сюре пӧртэм ужрадъёс дасян дыръя, уг тырмо майтал- порошок гинэ но. - Мар со Попечительской Совет. Пыро-а отчы анай-атайёс? С. П. - Попечительской Совет кылдытэмын Калыкез дышетон сярысь закон вылэ пыкиськыса. Со чакламын нылпи учрежденилы, котькуд пиналлы юрттон вылысь, анай- атайёслэсь мылкыдзэс юаса. Соос асьсэос ӵекто кӧня дун тырыны. Мар бордысь потэмын та нылпи садын анай-атайёслэн валамтэоссы? Нылпи садлэн кивалтӥсезлы но Попечительской Советлы вань анай-атайёсын огъя кенеш люкаса валэктоно вал: котькудӥз анай-атай дун быгатэмезъя тырыны кулэ (вить манет-а, кызь-а, витьтон-а, толэзьлы быдэ-а, араз 3-4 пол-а). Но озьы дун тырыны мылкыд карисьёс уз луэ шуыса, лэся, котькинлэсь толэзьлы быдэ 20 манет куриллям. Али анай-атайёс пӧлын та учыр выльысь валэктэмын луоз. - Светлана Александровна, сыӵе дун басьто кадь тӥляд ёросысьтыды нылпи садъёсын гинэ. С. П. - Сыӵе ӵектонэн, зэмзэ но, нырысь ми потӥм, малы ке шуоно, азьланяз анай- атайёслэсь пичи ке но дун бичатэк нылпиосты садын возьыны нокыӵе луонлыкъёс уз луэ. Али анай-атайёс толэзяз 43 манет тыро. Со тырме пиналэз ньыль нунал сюдыны. Соин ик нылпиед понна ватсаса кӧня ке манет сётыны жаль потыны кулэ ӧвӧл кадь. Огласянь мон валасько 291-тӥ садэ нылпиоссэс нуллӥсь анай-атайёсты: тросэз заводъёсын ужало, толэзьёсын уждун уг басьяло, тросэз огназы нылпизэс будэто. Оло нош куд-огез малпало, со коньдон кулэезъя уз кутӥськы шуыса. Со озьы вал. Коньдон возиське кассир киын, маке басьтыны завхозлы яке мукет муртлы гожтӥськытыса сётэ, бӧрысь отчёт лэсьтыны косэ. Ваньзэ чакласа возёз Попечительской Совет. Али мукет ёросъёсысь нылпи учреждениосын но та амалэз эскеро. - Огкутскемен вералэ вал, кулэ-а анай-атайёс пиналзэс нылпи садэ нуэмзы бере взнос тырыны яке маке ужаны? С. П. - Милям ёросысьтымы садъёсын коньдонэн взнос уг басьто. Мылкыд карисьёс ке вань, туж умой. Нош тупатъян ужъёс дыръя юрттыны, маке лэсьтыны косӥськом. Сотэк нокызьы уг луы. Ваньмыз со одно ик кулэ шуыса, нокытын гожтэмын ӧвӧл, но малпасько, сыӵе ке но юрттэт сётонлэсь нокин уз аналскы. Александр Лукашенко: "Россиен мон котьку ӵош" Та нуналъёсы республикаямы ужаз Беларусь Республикалэн делегациез. Ижевскысь "Металлург" культура дворецын Беларусьлэн Президентэз А. Лукашенко пумиськылӥз городъёсысь но районъёсысь кивалтӥсьёсын. Пумиськонэ люкаськем адямиос кык час ӵоже тодматскыны быгатӥзы вынлыко республикалэн нырысетӥ Президентэныз. Син азе пуксиз зол кивалтӥсь, визьмо политик но кужмо адями. Залэн вераськонзэ со таӵе учырысен кутскиз: - "Ижевск-экспресс" газетады гожтӥллям, Лукашенко диктатор шуыса. Малы бен соку монэн пумиськыны сомында калык люкаськем? Туала вакытэ диктатор луыны туж секыт ик - котькытын демократъёс... Мынам визьмы тырме ай ас калыкеным зэмос демократиез уже кутыса кивалтыны. Беларусьлэн Конституциез понна 90 процентэз калык куаразэ сётӥз, соин ик мон асме Москваын но, Ижевскын но, Калининградын но кулэтэм адямиен уг лыдъяськы - Россиен мон котьку ӵош. Президент пыр-поч валэктӥз, кызьы туннэ улэ белорус калык. - Тӥ доры вуттэме потэ зэмлыкез гинэ, малы ке шуоно, Москва пыр вуэм иворъёс котьку ик шонересь уг луо, - шуиз А. Лукашенко. Беларусь - со огез республика, кытын ӟуч адями, Россиын сярысь, ассэ умойгес шӧдэ. Маин бен та республика висъяське огъя Россилэсь? Нырысь ик, татын адямиос уло но ужало, ас визьзылы, кужымзылы но Президентсылы оскыса. Уг кылзӥсько кунгож сьӧрысь адямиослэсь (экспертъёслэсь), уг верасько реформаос сярысь, юн утьыса возё ас ваньбурзэс, соин ик приватизация шуон но татын ӧз выжыяськы. - Юнматӥм кун властез но государстволэсь эскерон кужымзэ. Бен, мон диктатор - кузьмаськисьёс но шырмачъёс понна. Соослы Беларусьын инты ӧвӧл! - шуиз А. Лукашенко. - Республикаямы арысь аре золгес ужало предприятиос. Тани МАЗ но БелАЗ заводъёс гинэ али сомында машина потто, кӧня уг потто СНГ-е пырись вань предприятиос. Выль Президент быръёнъёс вуытозь, республика ас экономиказэ 1990 арын басьтэм лыдпусъёс дорозь вуттыны малпа. Ужтэк кылемъёслэн лыдзы 4 процентысен 2 процентозь усиз. Предприятиос ӧз куштӥське нылпи садъёссылэсь, ужало спортъя клубъёс. Туж трос программаос кутӥмы пиналъёслэсь улонзэс умоятонъя, Государствомы сюлмаськемен но, вылды, йылӥз вордӥськем нуныослэн лыдзы. Беларусь Республикаын быдтымтэ колхозъёс но совхозъёс, 3 сюрс пала фермер хозяйство. - Мон лыдъясько, - шуиз А. Лукашенко, - музъемез нимаз кузёослы вузаны уг яра. Соос Беларусез но, Россиез но та дырозь ӧз на сюдэ. Музъемез люкылонлы пумит калык ас мылкыдзэ референдумын вераз. Та уже но пыриськыны медо вал Америкаысь адямиос. Куштэ, пе, бюджетысьтыды гурт хозяйстволы юрттон сярысь статьяез. Крестьянъёслы, пе, Дуннеысь валютая фонд юрттоз. Лек но меӵак шуим: "Тӥляд кыӵе ужды милям улонамы пыриськыны?!" Озьы ик соос куро вал кун предприятиосмес вузаны. Ӧз пӧрмы Республикаысьтымы одӥг предприятиез но коллективлэн мылкыдызтэк вузаны уг луы. Берло кылзэ котьку но вера Президент. Но со дыре ик государствомы уте но утёз кужмо, пайдаё ужась ужбергатӥсез. Президентлэсь троссэ верамъёссэ залын пукисьёс кичабонъёсын пумитазы. Асьме калыклэн малпанъёсыз солэнъёсыныз тупало шуыса пусйиз со: "Кыӵе валась адямиос татын пуко!" Зэм, асьме улӥсьёслы но уг кельшо лушкаськись кивалтӥсьёс, музъем вузан, приватизация шуонъёс. Но асьмеос та ужъёсты курласьком-курласьком но... буйгатскиськом. Белорус калык нюръяськыны быгатэ. Беларусь Россилэсь эшшо одӥг тодматэныз висъяське на. Отын адямиос урамъёсын уг сыло, кивалтӥсьёссэс улляны курыса. Угось районъёслэсь, предприятиослэсь кивалтӥсьёссэс юнматэ Президент, со ик соослэсь кылзэс юа. Озьы лякытгес кивалтыны. Инмар мед утёз сыӵе кивалтӥсьлэсь, кинэ пуктэ калык, но со ик эшшо лушкаськыны дӥсьтэ на, шуиз Александр Григорьевич. Асьме доры кыӵе валтӥсь муген вуэмзэ А. Лукашенко тазьы валэктӥз. - Ойдолэ огъя кариськыса ум лэзе пуромыны выль ожмаськонлы. Выльысь ӝутоно военнопромышленной комплексэз... Куд-ог дыръя кылоно луэ Лукашенколэн урамъёстӥз, пе, фашистъёс ветло. Оскод шат солы? Белоруссиын война вакытэ котькудӥз куинетӥез адями быриз! Беларусь Правительстволэн политикаез быдэсак герӟаськемын луыны кулэ Россиен. Милям рынокмы - тӥ дорын, тӥлядэз - ми дорын. "Россиен огазе!" - тӥни таӵе ӧтёнэ понна ик калык монэ Президентэ бырйиз. Нош мар уд лэсьты, калыкед тыныд оскемзэ вераз ке. Александр Лукашенко таӵе учырез вераз: - 38 аресам Президентэ бырйизы. Егит, троссэ уг валаськы. Адямиос толэзьёсын уждун уг басьто. Мар кароно? Люкай банкиръёсты (8 Март азьын кадь со вал). Шуи: толэзь ӵоже уждунлы коньдон ӧд ке шедьтэ, пытсэт сьӧры пукто. Шедьтӥзы. Со дырысен уждун дыраз пыриськом, пичиен ке но, улыны тырме. Тӥни таӵе учырысь но адӟиське адямилэн кужымез. Пумиськон йылпумъяськон азьын Александр Лукашенко куд-ог юанъёслы валэктонъёс сётӥз. - Уд-а жаляське, Беловежской тупанкыл гожтыку, тӥ гинэ солы пумит луэмдэс верады шуыса? - Уг. Но азьвыл Союзэз берыктыын уз ни луы. - Кызьы учкиськоды аскоже кивалтон (самоуправление) шоры? - Власть зол луыны кулэ. Сыӵе асьме калыклэн менталитетэз. - Мар кароно, быръёнъёс азьын куд-ог кандидатъёс адямиослы кузьымъёс ке ӵекто? - Мае ӵекто, басьтоно. Но куарадэ сётон азьын сюрс пол малпаськы, кытысь меда со кандидатлэн сомында коньдонэз? Куара сётон кабинае пырыса, нимтулзэ ӵуш. Калыкез коньдонэн но, кузьымъёсын но басьтыны уг яра! Атай музъем дуногес сылэ. Залын одӥгез пукись Александр Лукашенколы таӵе кылъёс гожтыса лэзем: "Тӥ кадь адямиос вань на бере - вормомы!" Тӥни сыӵе сайкыт мылкыдын йылпумъяськиз та пумиськон. Беларусь музъем вылысь вуэм адями люкаськем калыкез чылкытгес но кужмогес кадь кариз. Т. БАННИКОВА. Удмурт Республикаысь Кун Кенеше депутаъёсты быръён сярысь Удмурт Республикалэн Законэз 1-тӥ йырет Огъя валатонъёс 1-тӥ ёзэт. Удмурт Республикаысь Кун Кенеше депутатъёсты быръён ортчытыны правоя инъет Удмурт Республикаысь Кун Кенеше (отӥяз - Кун Кенеше) депутатъёсты быръён ортчытӥське Россия Федерацилэн Конституциезъя, "Россия Федерацилэн гражданъёсызлэн быръён правооссылы но референдуме пыриськон правозылы огъя гарантиос сярысь" Федерацилэн Законэзъя, Федерацилэн мукет законъёсызъя, Удмурт Республикалэн Конституциезъя, та Законъя но Удмурт Республикалэн мукет законъёсызъя. 2-тӥ ёзэт. Та Законэз уже макем кутон 1. Та закон тупатэ Кун Кенеше депутатъёсты быръёнэз радъяны но ортчытыны радлык, озьы ик Россия Федерацилэн гражданъёсызлы (отӥяз - гражданъёслы) Кун Кенеше депутатъёсты бырйыны но асьсэос быръемын луыны правозэс Удмурт Республикалэн улосвылаз быдэсъяны гарантиос. 2. Та Закон уже кутӥське меӵак но Удмурт Республикалэн быдэс улосвылаз. 3. Кун Кенеше депутатъёсты быръёнэз радъян но ортчытон вакытэ та Законэ воштонъёс но ватсанъёс пыртэмын луизы ке, соос кужыме пыро быръён йылпумъяськем бере но уже кутӥсько, Кун Кенеше депутатъёсты выль быръён ортчытыку. 4. Та закон "Россия Федерацилэн гражданъёсызлэн быръён правооссылы но референдуме пыриськон правозылы огъя гарантиос сярысь" Федерацилэн Законэзлы, Федерацилэн мукет законъёсызлы пумит луыны кутскиз яке соосын тупатэм валатонъёс отын ӧз луэ ке, уже кутӥсько Федерацилэн законъёсаз чаклам нормаос. Соку уже кутӥське та Законлэн сыӵе люкетэз, кудӥз пумит уг луы Федерацилэн вылӥын верам законъёсызлы. 3-тӥ ёзэт. Та законэ пыртэм огъя нимкылъёс Та Законэ пыртэмын таӵе огъя нимкылъёс: а) быръён - Кун Кенеше депутатъёсты гражданъёсын меӵак быръён, кудӥз ортчытӥське быръёнъёслы Федерацилэн законъёсыныз но та Законэн тупатэм ужрадъёсъя (правилоосъя); б) дырызлэсь вазь быръён - Кун Кенешлэсь полномочиоссэ дырызлэсь вазь дугдытэмен валче, Кун Кенеше депутатъёсты быръён; в) выльысь быръён - Кун Кенеше депутатъёсты быръён, кудӥз ортчытӥське огъя быръёнъёс бере, кудаз ке быръён округын огъя быръён пӧрмымтэен, ярантэмен лыдъямын яке быръем депутат депутатлэн статусэзлы тупасьтэм ужезлэсь ӧз куштӥськы яке быръёнлы йылпумъянъёс сярысь решение суд пыр палэнтэмын луиз ке; г) ватсаса быръён - Кун Кенешлэн депутатэзлэсь ужан правооссэ дырызлэсь вазь дугдытэмен валче быръёнъёсъя со округын быръён ортчытон; д) быръён нунал - календарья шутэтскон нунал. Бырйисьёс со нунал ӵоже пырисько Кун Кенеше депутатъёсты быръёнъя участокын огъя куарасётонэ; е) быръён кампания - Кун Кенеше депутатъёсты быръён ялэм сярысь решениез печатьын поттэм нуналысен кутскыса, быръёнлы йылпумъянъёсты печатьын поттэм нуналозь ужрадъёс ортчытъян вакыт; ж) бырйись - кивалтон ёзъёсы быръён правоен гражданин; з) гражданъёслэн быръён правооссы - гражданъёслэн Кун Кенеше депутатъёсты бырйыны но асьсэос быръемын луыны правозы, со пӧлын - кандидатъёсты ӵектонэ, быръёнъёс азьын валэктон-ӧтёнъёсы, быръёнъёс ортчытэмез, быръёнъёсъя комиссиослэсь ужамзэс чакланэ, соослэсь куарасётэмъёсты лыдъянзэс но быръёнлы йылпумъянъёс лэсьтонзэс но вераса, озьы ик, быръёнъя мукет ужрадъёсы пыриськыны правозы; и) активной быръён право - Удмурт Республикалэн улосвылаз ялан яке тросгес дыр ӵоже улӥсь гражданъёслэн Кун Кенеше депутатъёсты быръён правозы; к) пассивной быръён право - гражданъёслэн Кун Кенеше депутатэ быръем луыны правозы; л) общественной огазеяськон - улосъя (республикая) общестенной огазеяськон яке быдэс Россия, кӧня ке улосъёсъя общественной огазеяськонлэн улосысь (республикаысь) ёзэз, кудӥз кылдытэмын но санэ басьтыса пусъемын "Общественной огазеяськонъёс сярысь" Федерацилэн Законэныз, Федерацилэн мукет законъёсыныз но Удмурт Республикалэн законъёсыныз тупатэм радлыкъя. м) быръёнъя огазеяськон - улосъя (республикая) политической общественной огазеяськон (политической партия, политической организация, политической движение) яке быдэс Россияя, кӧня улосъёсъя политической общественной огазеяськонлэн улосысь (республикаысь) ёзэз, кудӥзлэн уставаз юнматэмын таӵе валтӥсь ужпумъёс: гражданъёслы политика ласянь мылкыдъёс пыӵатыны тыршыса, обществолэн политической улоназ пыриськон, кандидатъёсты ӵектыса но соослэсь быръёнъёс азьын дэмлан- сӥзёнъёссэс вӧлмытонэз радъяса, кун властья органъёсы быръёнъёсы пыриськон, со органъёслэсь ужзэс радъянэ пыриськон. Быръёнъёсъя огазеяськон кылдытэмын но санэ басьтыса пусъемын луыны кулэ Федерацилэн законъёсыныз но Удмурт Республикалэн законъёсыныз тупатэм радлыкъя, нош солэн уставез санэ басьтыса пусъемын мед луоз быръён нуналлэсь ичизэ одӥг ар азьвылгес. н) быръёнъя блок - быръёнъя кык яке ятыргес огазеяськонъёслэн быръёнэ ӵош пыриськон вылысь ас мылкыдзыя огазеяськонзы. Быръёнъя блоклэн быръёнъя огазеяськонлэн кадесь ик правоосыз вань; о) быръёнъя комиссиос - дэмен кенешыса ужась ёъёс, кудъёсыз юртто гражданъёслэсь быръён правооссэс быдэсъяны, радъяло Кун Кенеше депутатъёсты быръёнэз дасян но ортчытон ужъёсты. Соос кылдытӥсько Федерацилэн законъёсыныз но та Законэн тупатэм радлыкъя но дыръёсы; п) быръёнъя участок - Федерацилэн законъёсыныз но та Законэн чакламъя кылдытэм сыӵе улосвыл, кытын ортчытӥсько бырйисьёслэн Кун Кенеше депутат быръёнын куарасётонзы но отчы пыриськемъёслэсь сётэм куараоссэс лыдъян; р) бырйисьёслэн списоксы - быръёнъя соизлэн яке таизлэн участоклэн улосвылаз улӥсь бырйисьёс сярысь гожъямъёс, кудъёсыз лэсьтӥсько, гражданъёслэсь Кун Кенеше депутатъёсты быръёнэ пыриськон правозэс уже кутон, бырйисьёсты асьсэос сярысь гожтэмъёсын тодматон но Кун Кенеше депутатъёсты быръёнын куарасётонэз ортчытон понна; с) быръёнъя округ - Федерацилэн законъёсыныз но та Законэн чакламъя кылдытэм сыӵе огъя улосвыл, кудӥзлэсь гражданъёс меӵак быръё Кун Кенеше депутат; т) кандидатэз ӵектон - бырйисьлэн Кун Кенеше депутатэ кандидатэ ассэ ӵектонэз, бырйисьлэн, кӧня ке бырйисьёслэн, быръёнъя огазеяськонлэн, быръёнъя блоклэн депутатэ кандидатэз пусъёнъя кичӧлтонзы, озьы ик быръёнъя соисьтыз яке таизьтыз округысь бырйисьёслэсь сыӵе кичӧлтонлы дурбастыса гожтӥськемъёссэс та Законэн тупатэм радлыкъя люкан; у) кандидат - быръёнъя пассивной правоен мурт, кудӥз та Законэн тупатэм радлыкъя ӵектэмын Кун Кенеше бырйыны; ф) пусъем кандидат - Федерацилэн законъёсыныз но та Законэн тупатэм радлыкъя округысь быръёнъя комиссиен Кун Кенеше депутатэ кандидат карыса пусъем мурт; х) быръён азьын агитация - гражданъёслэн, пусъем кандидатъёслэн, быръёнъя огазеяськонъёслэн, быръёнъя блокъёслэн, общественной огазеяськонъёслэн бырйисьёслэсь быръёнэ пыриськыны, озьы ик соосыз яке таосыз кандидатъёс понна яке соослы пумит куаразэс сётыны мылкыдзэс бугыртон вылысь яке бугыртӥсь ужъёссы; ц) агитация нуон материалъёс - печатлам, верась-возьматӥсь но мукет материалъёс, кудъёсыз чакламын быръён азьын ӝуткан-ӧтён но тросэн вӧлмытон, калык пӧлы вуттон но быръён кампаниын мукет амалъёсын уже кутон понна; ч) чаклась - пусъем кандидатэн, быръёнъя огазеяськонэн, быръёнъя блокен, общественной огазеяськонэн Кун Кенеше депутатъёсты быръён вакытлы нимысьтыз висъям мурт, кудӥзлы оскемын куарасётонэз, сое лыдъянэз, быръёнлы йылпумъянъёс лэсьтонэз, чакланы быръёнъя комиссилэсь сётэм куараосты шонер лыдъямез но быръёнлы йылпумъянъёс шонер лэсьтэмез эскеронзэ но вераса; ш) мукет странаосысь (калыккуспо организациосысь) чаклась - сьӧрлось странаысь яке калыккуспо организациысь адями, кудӥз Федерацилэн законъёсыныз но та Законэн тупатэм радлыкъя чакла Кун Кенеше депутатъёсты быръёнлы дасяськонэз но сое ортчытонэз. 4-тӥ ёзэт. Кун Кенеше депутатъёсты быръён радлык Кун Кенеше депутатъёсты быръён ортчытӥське ӵошатыса тросгес сётэм куараосты лыдэ басьтон маторитарной амалэн, быръёнъя одӥг мандатэн округъёсъя, кудъёсыз кылдытӥсько Удмурт Республикалэн быдэс улосвылаз, котькудаз бырйисьёслэсь шорлыдзэс тупатыса. 5-тӥ ёзэт. Гражданъёслэн Кун Кенеше депутатъёсты быръёнэ пыриськонзылы огъя принципъёс 1. Гражданъёс Кун Кенеше депутатъёсты быръёнэ пырисько ваньмызлы огкадь но меӵак быръён правоя, куаразэс лушкем сётыса, бырйисьёслэсь асмылкыд возьматонзэс нокызьы но эскерыны луонлык кельтытэк. 2. Гражданъёс быръёнэ пырисько ас мылкыд каремзыя. Нокин но уг быгаты соосты быръёнэ одно пыриськытыны яке палэнскытыны, озьы ик асмылкыдзэс эркын возьматоназы пыриськыны. 3. Кун Кенеше депутатъёсты быръёнэ гражданъёс огкадь пырисько: котькудӥз бырйись огпол гинэ куаразэ сётыны быгатэ. 4. Быръён дыръя гражданъёс кандидатъёс понна яке соослы пумит куаразэс сёто меӵак асьсэос. 6-тӥ ёзэт. Гражданъёслэн быръён правооссы 1. Кун Кенеше депутатъёсты бырйыны, озьы ик быръён вакытэ законэн чаклам но законэн тупатэм амалъёсын ортчытъяськись мукет ужрадъёсы пыриськон правозы вань 18 арессы тырмем гражданъёслэн. 2. Кун Кенеше депутатэ быръемын луыны правозы вань быръён нуналозь 21 арессы тырмем гражданъёслэн. 3. Гражданъёс быгато Кун Кенеше депутатъёсты бырйыны но асьсэос быръемын луыны, пиосмурт яке нылкышно, кыӵе выжы калыкысь луэмзэс, вераськон кылзэс, кыӵе калык ёзысь потэмзэс, макем ваньбуро улэмзэс но ужын кыӵе инты басьтэмзэс, Удмурт Республикалэн улосвылаз кыӵе интыын но кӧня дыр ӵоже улэмзэс, вӧсьлык шоры кызьы учкемзэс, валан-осконъёссэс, общественной огазеяськонъёсы пыриськемзэс но пыриськымтэзэс, озьы ик мукет тодметъёсты чаклатэк. 4. Бырйыны но асьсэос депутатэ быръемын луыны правозы ӧвӧл сыӵе гражданъёслэн, кудъёссэ суд лыдъяз правооссэс быдэсъяны но ас ужъёссы понна кыл кутытыны быгатӥсьтэмен яке судлэн пуктэмезъя возисько эриклэсь люкон интыосын. 7-тӥ ёзэт. Кун Кенешлэн депутатэзлэн статусэныз герӟаны луонтэм должностьёсты возёнлэсь яке ужъёсты быдэсъянлэсь алон 1. Сыӵе муртъёс, кинъёслэн должностьсы, мандатсы яке быдэсъяно ужъёссы пумит луо Кун Кенешлэн депутатэзлэн мандатэзлы, гожтыса кыл сёто, соос депутатэ быръемын луизы ке, сыӵе ужъёссэс быдэсъямысь дугдозы шуыса. Депутатлэн статусэныз герӟаськем алонъёс тупатӥсько Россия Федерацилэн Конституциеныз но Федерацилэн законъёсыныз, Удмурт Республикалэн Конституциеныз но Удмурт Респуликалэн законъёсыныз. 2. Та ёзэтлэн куронъёсыз уг быдэсъясько ке, со муртъёсты депутатэ быръем кужымзэ ыштэмен лыдъяське. 8-тӥ ёзэт. Депутатэ кандидатъёсты ӵектон право Кандидатэ ӵектыны быгато адямиос асьсэды асьсэос, озьы ик бырйись, кӧня ке бырйисьёс, быръёнъя огазеяськон, быръёнъя блок. 9-тӥ ёзэт. Быръён азьын агитация нуыны право 1. Кун властьлэн органъёс но интыын аскивалтонъя органъёс гражданъёслы, общественной огазеяськонъёслы луонлык кылдыто быръён азьын эркын агитация нуыны законэн лэзем котькыӵе сямъёсын но Федерацилэн законъёсыныз, та Законэн но Удмурт Республикалэн мукет законъёсыныз тупатэм амалъёсын. 2. Санэ басьтыса пусъем кандидатъёслы, быръёнъя огазеяськонъёслы но быръёнъя блокъёслы огкадесь сюресъёс усьтӥсько калык пӧлы иворъёс вӧлмытонъя ёзъёсы, быръён азьын агитация нуон понна. 10-тӥ ёзэт. Быръёнлы дасяськонэз но сое ортчытонэз быръёнъя комиссиосын радъян Кун Кенеше депутатъёсты быръёнэз радъяло но ортчыто но гражданъёслэсь быръён правооссэс чакламез эскерыса возё быръёнъя комиссиос. 11-тӥ ёзэт. Быръён ужъёслы коньдон висъян 1. Кун Кенеше депутатъёсты быръёнэз дасянэн но ортчытонэн герӟаськем ужъёсты быдэсъяны быръёнъя комиссиослы коньдон висъяське Удмурт Республикалэн республикая бюджетысьтыз. 2. Кандидатъёс, пусъем кандидатъёс быръён азьын агитация нуыны коньдон кутон вылысь кылдытыны кулэ быръёнъя фондъёс, со понна отчы люканы быгато асьсэлэсь коньдонзэс, быръёнъя огазеяськонъёслэсь но быръёнъя блокъёслэсь коньдонзэс, нимаз адямиослэсь но юридической лицоослэсь ас мылкыдзыя сётэм коньдонзэс. 12-тӥ ёзэт. Быръёнлы дасяськонэз но сое ортчытонэз шара возьматон 1. Кун Кенеше депутатъёсты быръён дасяське но ортчытӥське шара но паськыт возьматыса. 2. Быръёнъя комиссиос, кун органъёс но интыын аскивалтонъя органъёс, общественной огазеяськонъёс, иворъёс вӧлмытонъя ёзъёслы сётъяло быръёнэз радъянэн герӟаськем материалъёсты. Быръёнъя комиссиослэсь, кун органъёслэсь но интыын аскивалтонъя органъёслэсь быръёнлы дасяськон но сое ортчытон гражданъёслэсь быръён правооссэс быдэсъян ужпумъёсъя решениоссэс печатьын поттыны кулэ. 3. Быръёнъя комиссиос бырйисьёслы иворто асьсэлэн составзы, интыяськемзы, телефон номеръёссы сярысь, быръёнъя округъёс, быръёнъя участокъёс кылдытэм но соослэн гожъёссы сярысь, бырйисьёслэн списокъёссы но соосын тодматскон радлык, кандидатъёсты ӵектэм но пусъем, соослэн улон сюрессы но ужамзы сярысь быръёнъя комиссиослэн коньдонэз кытчы кутэмзы, быръёнъя фондъёсы коньдон вуэм но сое уже кутэм сярысь, бырйисьлэн куарасётэмзылы но быръёнлы йылпумъянъёс сярысь, озьы ик быръёнлы дасяськонэн но сое ортчытонэн герӟаськем мукет ужпумъёсъя. 4. Быръёнъя комиссиос луонлык сёто быръёнъя комиссиысь котькуд адямилы, депутатэ кандидатъёслы, соослэн оскем муртъёссылы, быръёнъя огазеяськонъёслэн, быръёнъя блокъёслэн ыстэм муртъёссылы, иворъёс вӧлмытонъя ёзъёсын адямиослы, кудъёсыз юнматэмын быръёнъя комиссиос доры, чакласьёслы, мукет странаосысь (калыккуспо организациосысь) чакласьёслы быръёнъя комиссиослэн куарасётэмъёслы но быръёнлы йылпумъянъёс сярысь протоколъёсынызы тодматскыны, соослэсь копиоссэс басьтыны, юнмато со копиосты. 13-тӥ ёзэт. Иворъёс сётонъя автомат амалэн ужась "Быръёнъёс" кун системаез уже кутон Кун Кенеше депутатъёсты быръён ортчытыку, уже кутӥське иворъёс сётонъя автомат амалэн ужась "Быръёнъёс" кун система ("Быръёнъёс" ГАС) Федерацилэн законъёсыныз но та Законэн, Удмурт Республикалэн мукет законъёсыныз чаклам радлыкъя. 14-тӥ ёзэт. Гражданъёслэсь быръён правооссэс тӥям пумысен ӝожтӥськонъёс сётъян но быръёнэн валче кылдэм ченгешонъёсты сэрттон-пертчон 1. Кун властья органъёслэн но интыын аскивалтонъя органъёслэн, общественной огазеяськонъёслэн, организациослэн но отысь кыл возись ужасьёслэн гражданъёслэсь быръён правооссэс тӥясь решениоссы но ма лэсьтэмзэс (лэсьтэмзы) пумысен ӝожтӥськонэн вазиськыны луэ судэ Федерацилэн законъёсыныз тупатэм радлыкъя. 2. Быръёнъя комиссиослэн но отысь кыл кутӥсь муртъёслэн гражданъёслэсь быръён правооссэс тӥясь решениоссы но ма лэсьтэмзы (лэсьтымтэзы) пумысен ӝожтӥськонэн вазиськыны луэ быръёнъя вылӥысь комиссие яке судэ Федерацилэн законъёсыныз, та Законэн но Удмурт Республикалэн мукет законъёсыныз тупатэм радлыкъя. 15-тӥ ёзэт. Гражданъёслэсь быръён правооссэс но быръёнъёс сярысь законъёсты тӥям понна кыл кутытон Сыӵе муртъёс, кинъёс люкето гражданинлы Кун Кенеше депутат быръён но ачиз быръемын луон правозэ уже кутыны, вӧлмытлъяло кандидатъёс сярысь юри пӧяськонъёсты яке саптало кандидатъёслэсь санлыксэс но данлыксэс, могӟетъёс пуктыло быръёнъя комиссиослэн яке быръёнъя комиссиосысь адямиослэн ужазы, быръён азьын агитация нуонын, кандидатъёслэн оскем муртъёссылы, чакласьёслы, мукет странаосысь (калккуспо организациосысь) чакласьёслы законэн чаклам ужъёссэс быдэсъянын, уг быдэсъяло быръён азьын агитация нуыны тупатэм радлыкез, озьы ик тӥяло гражданъёслэсь быръён правооссэс но быръён сярысь законъёсты, кыл куто Федерацилэн законъёсыныз, та Законэн но Удмурт Республикалэн мукет законъёсыныз тупатэм радлыкъя. 2-тӥ йырет Быръёнэз ялон 16-тӥ ёзэт. Кун Кенешлэн депутатъёсызлэн полномочиоссылы тупатэм дыр но огъя лыдзы 1. Удмурт Республикалэн Конституциезъя Кун Кенеш бырйиське 4 арлы, депутатъёслэн огъя лыдзы тупатӥське "Удмурт Республикаысь Кун Кенеш сярысь" Удмурт Республикалэн Законэныз. 2. Кун Кенешлэсь ужан дырзэ но депутатъёслэсь огъя лыдзэс воштыны (йылэтыны но кулэстыны) уг луы. 3. Кун Кенешлэсь ужан дырзэ но депутатъёслэсь огъя лыдзэс воштон нормаос кужыме пыро ужась Кун Кенешлэн ужан правоосыз быръем бере, нош солэсь ужан правооссэ дырызлэсь вазь дугдытон учыре - со правоосты дугдытэм бере. 17-тӥ ёзэт. Быръёнэз тупатэм дыръёсы ортчытъян Кун Кенеше депутатъёсты быръёнэз одно ортчытъяны кулэ Федерацилэн законъёсыныз, Удмурт республикалэн Конституциеныз, та Законэн но Удмурт Республикалэн мукет законъёсыныз тупатэм дыръёсы но радлыкъя. 18-тӥ ёзэт. Быръёнэз ялон Кун Кенешлэн выль ӧтчамаз депутатъёсты быръёнэз ялэ Кун Кенешлэн али ӧтчамез Кун Кенешлэн депутатъёслэн полномочиоссы дугдэмлэсь ичизэ куинь толэзьлы азьлогес. Быръён нуналэ луэ ализэ Кун Кенешез Конституциен тупатэм кӧнялы быръем дыр ортчем бере нырысетӥез арня нунал. 2. Кун Кенешлэн полномочиосыз дырызлэсь вазь дугдытэмын луизы ке, соку ик яло Кун Кенешлэн выль ӧтчамаз быръён сярысь. Таӵе учыре быръён тупатӥське Кун Кенешлэсь полномочиоссэ дырызлэсь вазь дугдытэм нуналысен куинь толэзь ортчем бере нырысетӥ арня нуналлы. 3. Кун Кенешлэн выль ӧтчамаз депутатъёсты быръён ортчытон сярысь туалаез Кун Кенешлэсь постановленизэ официальной печатьын поттыны кулэ сое кутэм бере вить нуналскын. 4. Куарасётонэз тупатыны луэ календарья шутэтскон нуналэ - арня нуналэ гинэ. Куарасётонэз праздник нуналлы пусйыны уг яра. Быръён ортчытыны чаклам арня нунал праздникен ӵош тупаку, быръён ялӥське вуоноез арня нуналлы. 19-тӥ ёзэт. Быръёнэз дыраз ялыны гарантиос 1. Кун Кенеш ӧз ялы ке Кун Кенеше депутатъёсты та Законлэн 18-тӥ ёзэтаз тупатэм дыръёсы быръён сярысь, Кун Кенеше депутатъёсты быръёнэз ортчытэ Удмурт Республикаысь Быръёнъя комиссия. Быръён тупатӥське Кун Кенешлэн полномочиосыз бырем дырысен толэзь ортчем бере кыкетӥяз арня нуналэ ортчытыны, нош Кун Кенешлэсь полномочиоссэ дырызлэсь вазь дугдытыку - Кун Кенешлэсь полномочиоссэ дырызлэсь вазь дугдытэм бере куинь толэзь бере кыкетӥез арня нуналлы. Удмурт Республикаысь Быръёнъя комиссилэн быръёнэз ялон сярысь решениез печатьын поттӥське быръён нуналлэсь ичизэ 90 нунал азьло. 2. Кун Кенеш яке Удмурт Республикаысь Быръёнъя комиссия ӧз ялэ ке Кун Кенеше депутатъёсты тупатэм дыръёсы быръён ортчытон сярысь, быръёнэз тупатэ, Удмурт Республикаысь Вылӥ Суд бырйисьёслэсь, быръёнъя огазеяськонъёслэсь, быръёнъя блокъёслэсь, кун властья органъёслэсь, Удмурт Республикаысь Прокуроръёслэсь вазиськонъёссэс лыдэ басьтыса. Соку быръёнэз радъя но ортчытэ Удмурт Республикаысь Быръёнъя огдырлы комиссия, кудзэ Федерацилэн законъёсыныз чакламъя кылдытэ Россия Федерациысь Быръёнъя Центральной комиссия, судлэн решениез законъя кужыме пырем бере, 7 нуналскын. Быръён ортчытыны тупатӥське судлэн решениез законъя кужыме пырем нуналысен куинь толэзь ортчем бере вуись толэзьлэн кыкетӥ арня нуналаз. Удмурт Республикаысь Вылӥ Судлэн быръён ялон сярысь сыӵе ик решениез печатьын поттӥське быръён нуналлэсь ичизэ 90 нунал ортчытозь. 3-тӥ йырет Быръёнъя комиссиос 20-тӥ ёзэт. Быръёнъя комиссиос Кун Кенеше депутатъёсты быръёнэз дасяло но ортчыто быръёнъя комиссиос: а) Удмурт республикаысь Быръёнъя комиссия; б) округъёсысь быръёнъя комиссиос; в) улосвылъёсысь быръёнъя комиссиос; г) участокъёсысь быръёнъя комиссиос. 21-тӥ ёзэт. Удмурт Республикаысь Быръёнъя комиссиез кылдытон 1. Удмурт Республикаысь Быръёнъя комиссие пыре решение кутон правоен 12 мурт, соос пӧлысь ӝынызэ юнматэ Кун Кенеш, кыкетӥ люкетсэ - Удмурт Республикаысь Правительство, быръёнъя огазеяськонъёслэсь но быръёнъя блокъёслэсь, общественной огазеяськонъёслэсь, интыын аскивалтонъя быръем органъёслэсь, озьы ик Удмурт Республикаысь Быръёнъя талэсь азьвыл кылдытэм комиссилэсь дэмланъёссэс лыдэ басьтыса. Кун служащийёс комиссилэн вань членъёсыз пӧлын одӥг куиньмослэсь ятыр луыны кулэ ӧвӧл. 2. Удмурт Республикаысь Быръёнъя комиссилэсь ичизэ одӥг куиньмос членъёссэ юнмато кызьы ке Кун Кенеш, озьы ик Удмурт Республикаысь Правительство, быръёнъя сыӵе огазеяськонъёс, быръёнъя блокъёс пӧлысь котькудӥзлэсь, вуэм дэмланъёсты лыдэ басьтыса, кудъёсызлэн депутат фракциоссы вань Россия Федерациысь, Федеральной Собранилэн Кун Думаяз, озьы ик Удмурт Республикаысь Кун Кенешын. Комиссие пыртыны луэ быръёнъя котькуд огазеяськонлэсь, быръёнъя блоклэсь быдэн одӥг муртсэс гинэ. 3. Быръёнъя огазеяськонъёс но быръёнъя блокъёс, кудъёсыз Удмурт Республикаысь Быръёнъя комиссиын юнматӥзы Кун Кенеше депутатэ ӵектэм кандидатъёссылэсь списоксэс, быгато Удмурт Республикаысь Быръёнъя комиссие кенешон правоен быдэн одӥг муртсэс ыстыны. 22-тӥ ёзэт. Улосвылъёсын, округъёсын быръёнъя комиссиосты кылдытон Интыын аскивалтонъя быръем органъёс кылдыто улосвылъёсысь быръёнъя комиссиосты быръён нуналлэсь 70 нуналлы вазьгес, округъёсысь быръёнъя комиссиосты - быръён нуналлэсь 60 нуналлы вазьгес - быдэн 7-15 муртлэсь, быръёнъя огазеяськонъёслэсь но быръёнъя блокъёслэсь, общественной огазеяськонъёслэсь, бырйисьёслэн улон, ужан, служить карон, дышетскон интыосазы ортчытъям кенешъёссылэсь, озьы ик быръёнъя азьвыл ужам комиссиослэсь дэмланъёссэс лыдэ басьтыса. Кун служащийёс но интыын аскивалтонъя органъёсын муниципальной службая должностьёсты быдэсъясьёс улосвылысь, округысь быръёнъя комиссилэн вань членъёсыз пӧлын одӥг куиньмослэсь трос луыны кулэ ӧвӧл. 2. Улосвылысь, округысь быръёнъя комиссилэсь ичизэ куиньмоссэ членъёссэ юнмато, быръёнъя сыӵе котькуд огазеяськонлэсь, быръёнъя блоклэсь дэмланъёссэс лыдэ басьтыса, кудъёсызлэн депутат фракциоссы вань Россия Федерациысь Федеральной Собранилэн Кун Думаяз, озьы ик Удмурт Республикаысь Кун Кенешын, интыын аскивалтонъя быръем органын. Комиссие пыртыны луэ быръёнъя котькуд огазеяськонлэсь, быръёнъя блоклэсь быдэн одӥг муртсэ гинэ. 3. Интыын аскивалтонъя быръем органъёс быгато, Удмурт Республикаысь Быръёнъя комиссиен кенешыса, округъёсысь быръёнъя комиссиослэсь ужан правооссэс со улосвылъёсысь быръёнъя комиссиослы сётыны. Муниципальной ёзъёсын кылдытэмын ке улосвылъёсысь Быръёнъя кӧня ке комиссиос, округъёсысь быръёнъя комиссиослэсь ужзэс сётыны луэ улосвылъёсысь быръёнъя одӥгезлы комиссилы. Быръёнъя округ одӥг ёрослэн улосвылаз ке интыяське, округын быръёнъя комиссия уг кылдытӥськы, нош солэсь ужъёссэ быдэсъя улосвылысь быръёнъя комиссия. 4. Быръёнъя округ кылдытэмын ке кык яке тросгес ёросъёслэн, городъёслэн улосвылъёсазы, сыӵе округысь быръёнъя комиссиез кылдытэ Удмурт Республикаысь Быръёнъя комиссия быръён нуналлэсь 55 нуналлы вазьгес та ёзэтын чаклам радлыкъя. Удмурт Республикаысь быръёнъя комиссия быгатэ округысь быръёнъя комиссилэсь ужъёссэ улосвылъёсысь быръёнъя комиссиос пӧлысь одӥгезлы сётыны. 5. Интыын аскивалтонъя быръем орган улосвылысь, округъёсысь быръёнъя комиссиосы адямиосты та ёзэтлэн 1-тӥ пунктаз тупатэм дыре ӧз юнматы ке, улосвылысь, округъёсысь быръёнъя комиссиосты кылдытэ Удмурт Республикаысь Быръёнъя комиссия быръён нуналлэсь азьло 65 но 50 нуналскын та ёзэтын тупатэм радлыкъя. 6. Быръёнъя огазеяськонъёс, быръёнъя блокъёс, кудъёсыз Кун Кенеше депутатэ ӵектэм кандидатъёссылэсь списоксэз юнматӥзы Удмурт Республикаысь Быръёнъя комиссиын, быгато улосвылъёсысь, округъёсысь быръёнъя комиссиосы кенешон правоен быдэн одӥг муртсэс ыстыны сыӵе ёросъёсын, городъёсын, городлэн ёросъёсаз, быръёнъя округъёсын, кудъёсаз соос ӵектӥзы кандидатъёссэс. Санэ басьтыса пусъем кандидатъёссэс быгато быръёнъя сыӵе округъёсысь быръёнъя комиссиосы кенешон правоен одӥг адямизэс ыстыны, кудъёсаз соос пусъемын. 23-тӥ ёзэт. Участокъёсысь быръёнъя комиссиосты кылдытон 1. Быръёнъя участокъёсысь комиссиосты быдэн 5-15 муртлэсь кылдыто интыосын аскивалтонъя быръем органъёс быръёнъя участокъёсты кылдытэм бере куинь нунал ортчытозь, быръёнъя огазеяськонъёслэсь но быръёнъя блокъёслэсь, общественной огазеяськонъёслэсь, бырйисьёслэн улон, ужан, служить карон, дышетскон интыосазы ортчытъям кенешъёссылэсь дэмланъёссэс лыдэ басьтыса. Кун служащийёс но интыосын аскивалтонъя органъёсын муниципальной службая ужъёсты быдэсъясь муртъёс участокысь быръёнъя комиссилэн вань членъёсыз пӧлын одӥг куиньмослэсь ятыр луыны кулэ ӧвӧл. 2. Быръёнъя участокысь комиссилэн ичизэ одӥг куиньмос членъёсыз юнматӥсько быръёнъя котькуд сыӵе огазеяськонлэсь, быръёнъя блоклэсь вуэм дэмланъёсъя, кудъёсызлэн депутат фракциоссы вань Россия Федерациысь Федеральной Собранилэн Кун Думаяз, озьы ик Удмурт Республикалэн Кун Кенешаз, интыын аскивалтонъя органын. Быръёнъя котькуд огазеяськонлэсь, быръёнъя блоклэсь быдэн одӥг муртсэ гинэ комиссие пыртыны луэ. 3. Интыын аскивалтонъя орган быръёнъя участокъёсысь комиссиен адямиосты та ёзэтлэн 1-тӥ пунктаз тупатэм дыре ӧз юнматы ке, быръёнъя участокъёсысь комиссиосты кылдытэ со улосвылысь быръёнъя комиссия 5 нуналскын та ёзэтын чаклам радлыкъя. 4. Быръёнъя огазеяськонъёс, быръёнъя блокъёс, кудъёсыз Кун Кенеше депутатэ ӵектэм кандидатъёслэсь списоксэс юнматӥзы Удмурт Республикаысь Быръёнъя комиссиын, пусъем кандидатъёс быгато сыӵе участокысь быръёнъя комиссие кенешон правоен быдэн одӥг адямизэс ыстыны, кытын пусъемын со кандидатъёс. 24-тӥ ёзэт. Быръёнъя комиссиослэн статуссы 1. Быръёнъя комиссиос Федерацилэн законъёсыныз, та Законэн но Удмурт Республикалэн мукет законъёсыныз тупатэм полномочиоссыя ужало ас кожазы, кун органъёс но интыосын аскивалтонъя органъёс пыриськытэк. 2. Быръёнъя комиссиослэсь ас компетенцизэ кутэм решениоссэс одно быдэсъяны кулэ кун учреждениос, интыосын аскивалтонъя органъёс, кандидатъёс, быръёнъя огазеяськонъёс, быръёнъя блокъёс, общественной огазеяськонъёс, организациос, кивалтон удысын ужасьёс но бырйисьёс. 3. Быръёнъя вылӥысь комиссилэсь ас компетенциезъя кутэм решениоссэ одно быдэсъяны кулэ быръёнъя улӥысь комиссиос. 4. Удмурт Республикаысь Быръёнъя комиссилы Федерацилэн законъёсызъя но Удмурт Республикалэн законъёсызъя тупатэмын кун органлэн статусэз, кудӥз радъя Удмурт Республикалэн улосвылаз быръёнъёс дасянэз но ортчытъянэз. Удмурт республикаысь Быръёнъя комиссия ужа ялан но луэ юридической лицо. 5. Кун Кенеше депутатъёсты быръёнъя комиссиос Удмурт Республикаысь Быръёнъя комиссилэн улосвылысь быръёнъя комиссилэсь, интыын референдум ортчытонъя комиссилэсь интыын аскивалтонъя быръем органэн кенешыса ыстэм вазиськонзэс лыдэ басьтыса кутэм решениезъя быгато интыосын аскивалтонъя органъёсы быръёнъёсты, интыосын референдумъёсты дасянэз но ортчытонэз ас вылазы басьтыны. 6. Кун органъёс, интыосын аскивалонъя органъёс, общественной огазеяськонъёс, учреждениос, организациос, кун пыриськыса ужась предприятиос, озьы ик отысь кивалтӥсьёс быръёнъя комиссиослы юрттыны кулэ полномочиоссэс быдэсъянын, соослы висъяны юртъёс, транспорт, кусып возён но ужан тӥрлыкъёс, кулэ иворъёс но материалъёс, нош калык пӧлы иворъёс вӧлмытонъя та Законлэн 58-тӥ ёзэтысьтыз 1-тӥ пунктын верам ёзъёс - луонлыкъёс сётыны быръёнъя комиссиослэсь ивортонъёссэс печатьын поттон понна. Быръёнлы дасяськонэн но сое ортчытонэн герӟаськем ужпумъёсъя валэктонъёс сётыны соос кулэ быръёнъя комиссиослы вить нуналскын, быръёнлэсь азьло вить нунал ӵоже но быръён нуналэ вуэм вазиськонъёсъя - ӝегатскытэк. 25-тӥ ёзэт. Удмурт Республикаысь Быръёнъя комиссилэн быдэсъяно ужъёсыз 1. Удмурт Республикаысь Быръёнъя комиссия: а) Удмурт Республикалэн быдэс улосвылаз Эскерыса возе гражданъёслэсь быръён правооссэс быдэсъямез; б) та Законлэн 19-тӥ ёзэтысьтыз 1-тӥ пунктын верам учыре ялэ депутатъёсты быръёнэз; в) эскерыса возе, Кун Кенеше депутатъёсты бырйыку, законъёсты чакламез, та Законэз уже котькытын огкадь шонер кутытэ; г) быгатэ кун властья органъёслэн но интыосын аскивалтонъя органъёслэн решениоссылэсь та Законлы тупатэмзы пумысен йылпумъяса вераны; д) валэктонъёс сётъя та Законэз уже кызьы кутон пумысен, кулэ дыръя вазиське Кун Кенеше, та Законлэн пуштросэзъя официальной валэктонъёс сётыны курыса; е) та Законэн чаклам учыръёсы поттылэ быръёнъёсты радъян ужпумъёсъя инструкциос но мукет нормативной актъёс; ж) кивалтэ улосвылъёсысь, округъёсысь но участокъёсысь быръёнъя комиссиослэн ужъёсынызы, соослы юрттэт сётэ право, методика, ужъёсты радъян удысъёсын, эскере соослэн решениоссы, ужъёссы (номыр лэсьтымтэзы) пумысен вазиськонъёсты но ӝожтӥськонъёсты, кутэ соосъя пыр-поч валэктонъёсын решениос; з) кылзылэ министерствоослэсь но ведомствоослэсь, кун властья быдэсъясь органъёслэсь но интыосын аскивалтонъя органъёслэсь быръёнэз дасянэн но ортчытонэн герӟаськем ужпумъёсъя ивортонъёссэс; и) быръёнъя комиссиос куспын люкылэ быръён ортчытыны Удмурт Республикалэн бюджетысьтыз висъям яке пунэме басьтэм коньдонэз, эскере сое чаклам ужъёсы кутэмез; к) эскерыса возе быръёнъя комиссиослы юртъёс, транспорт, кусып возён тӥрлыкъёс висъямез, быдэсъя быръёнлы кулэ луись материалъёс но техника сётонъя мукет ужпумъёсты; л) тупатэ быръён бюллетеньёслэсь вылтуссэс но соосты дасян радлыкез, бырйисьёслэн списокъёссылэсь, быръёнъя мукет документъёслэсь кыӵе луонзэс, соосты келян но утён радлыкез, юнматэ быръёнъя комиссиослэн печатьёссылы кабъёсты; м) пусъе быръёнъя округъёс кылдытон радлыкез но сое юнматыны сётэ Кун Кенеше; н) тупатэ Удмурт Республикалэн улосвылаз быръёнъя участокъёслэсь радызъя номеръёссэс; о) санэ басьтыса пусъе быръёнъя блокъёсты; р) санэ басьтыса пусъе Кун Кенеше депутатъёсы быръёнъя огазеяськонъёсын но быръёнъя блокъёсын ӵектэм кандидатъёслэсь списокъёссэс; р) радъя пусъем вань кандидатъёслы быръён азьын ужаны правоя огкадесь луонлыкъёс кылдытонэз; с) радъя округъёсысь быръёнъя комиссиослэн куронъёссыя быръён бюллетеньёсты дасянэз но улосвылъёсысь но участокъёсысь быръёнъя комиссиослы сётонэз; т) тупатэ куарасётэмъя лыдпусъёсты лыдъяны-учкыны но быръёнлы йылпумъянъёс лэсьтыны одӥг радлык; у) огъя йылпумъянъёс лэсьтэ Удмурт Республикаын ортчытэм быръёнлы но соосты печатьын поттэ; ф) дася Кун Кенеше депутатъёсы быръем муртъёслэсь списокъёсты, со списокъёсты но кулэ документъёсты сётэ Кун Кенеше; х) радъя быръёнъя сыӵе округъёсын депутатэ выльысь быръён ортчытонэз, кудъёсаз быръён пӧрмымтэен, ярантэмен лыдъямын яке быръем депутат ӧз дугды депутатлэн статусэзлы тупасьтэм ужъёсты быдэсъямысь яке быръёнлы йылпумъянъёс сярысь решение суд пыр палэнтэмын; ц) ялэ кошкем депутатъёс интые Кун Кенеше депутатъёсты ватсаса быръён сярысь но радъя сое ортчытонэз; ч) радъя быръёнэз радъянэн но ортчытонэн герӟаськем документъёсты утёнэз но архиве келянэз; ш) быдэсъя Федерацилэн законъёсыныз, та Законэн но Удмурт Республикалэн законъёсыныз чакламъя мукет ужъёссэ. 2. Удмурт Республикаысь Быръёнъя комиссилэн ужан дырыз тупатӥське ньыль арлы. Комиссилэн полномочиосыз быро Удмурт Республикаысь Быръёнъя выль комиссилэн нырысетӥ заседаниез кутскем нуналысен. 26-тӥ ёзэт. Улосвылъёсысь быръёнъя комиссиослэн быдэсъяно ужъёссы 1. Улосвылысь быръёнъя комиссия: а) эскерыса возе со улосвылын быръёнэз законъя ортчытэмез; б) калыклы ивортэ аслаз интыяськемез но телефон номеръёсыз сярысь, озьы ик участокъёсысь быръёнъя комиссиослэн адресъёссы но телефон номеръёссы, куара сётон интыос, быръёнъя комиссиослэн ужан дыръёссы сярысь; в) герӟа со улосвылысь быръёнъя участокъёсысь комиссиослэсь ужъёссэс, эскере соослэн решениоссы но ужъёссы (номыр лэсьтымтэзы) пумысен вазиськонъёсты но ӝожтӥськонъёсты, кутэ соосъя пыр-поч валэктонъёсын решениос; г) кузёяське Удмурт республикаысь Быръёнъя комиссиен солы висъям коньдонэн но сое люкылэ участокъёсысь быръёнъя комиссиос куспын, эскерыса возе сое чаклам ужъёсы кутэмез; д) быдэсъя участокъёсысь быръёнъя комиссиослы юртъёс, транспорт, кусып возён тӥрлыкъёс, ваньбур но техника висъянэн герӟаськем ужпумъёсты; е) иворъёс люкан-сётъянъя автомат амалэн ужась кун системаез уже кутыса, быръёнъя котькуд участокъя нимаз дася бырйисьёслэсь списокъёссэс; ж) округъёсысь быръёнъя комиссиосын ӵош кылдытэ со улосвылын ваньмызлы пусъем кандидатъёслы быръён азьын ужаны правоя огкадесь луонлыкъёс; з) округъёсысь быръёнъя комиссиосын ӵош печатьын поттэ пусъем кандидатъёслэсь быръёнъя фондъёс кылдытыны кӧня но кытысь коньдон люкамзы но сое уже кутэмзы сярысь отчётъёссэс; и) Удмурт Республикаысь Быръёнъя комиссилэсь басьтэ быръён бюллетеньёс, радъя соосты быръёнъя участокъёсы вуттонэз; к) радъя улосвылысь быръёнъя комиссилэн ужан интыяз дырызлэсь вазь куарасётонэз; л) участокъёсысь быръёнъя комиссиослы юрттэт сётэ быръёнъя участокын куарасётонэз ортчытонын; м) радъя округъёсысь быръёнъя комиссиослэсь быръёнлы йылпумъянъёс сярысь протоколъёссэс но огазеям таблицаосты Удмурт Республикаысь Быръёнъя комиссие вуттонэз; н) калык пӧлы иворъёс вӧлмытонъя ёзъёсы сётэ со улосвылын быръёнлы йылпумъянъёс сярысь лыдпусъёсты; о) кошкем депутатъёс интые Кун Кенеше депутатъёсты бырйыку быдэсъя округысь быръёнъя комиссилэсь ужъёссэ; п) кутэ но утьыса возе быръён бюллетеньёсты, бырйисьёслэсь списокъёссэс, округъёсысь, участокъёсысь быръёнъя комиссиослэн заседаниоссылэсь протоколъёссэс но соослэсь мукет документъёссэс, соосты сётэ архиве но Удмурт Республикаысь Быръёнъя комиссие; р) быдэсъя Федерацилэн законъёсыныз, та Законэн но Удмурт Республикалэн мукет законъёсыныз чакламъя мукет ужъёссэ. 2. Улосвылысь быръёнъя комиссилэн ужан дырыз тупатӥське ньыл арлы. 27-тӥ ёзэт. Округъёсысь быръёнъя комиссиослэн быдэсъяно ужъёссы 1. Кун Кенеше депутат быръёнъя округысь быръёнъя комиссия: а) эскерыса возе быръёнъя округлэн улосвылаз та Законлэсь быдэсъяськемзэ; б) герӟа быръёнъя округлэн улосвылаз участокъёсысь быръёнъя комиссиослэсь ужъёссэс, эскере соослэн решениоссы но ужъёссы (номыр лэсьтымтэзы) пумысен вазиськонъёсты но ӝожтӥськонъёсты, кутэ соосъя пыр-поч валэктонъёсын решениос; в) кузёяське округын быръён ортчытыын быръёнъя комиссилы висъям коньдонэн; г) эскере гожтӥськемъёс люкан листъёсысь бырйисьёслэн кинюртэмъёссылэсь, озьы ик кандидатъёсты пусъён понна сётэм мукет документъёслэсь зэмос луэмзэс; д) пусъе кандидатъёсты, соослэсь оскем муртъёссэс но соослы сётэ удостоверениос; е) улосвылысь быръёнъя комиссиен ӵош чаклам пусъем вань кадидатъёслы быръён азьын ужаны правоя огкадесь луонлыкъёсты та округлэн улосвылаз уже кутэмез; ж) юнматэ быръёнъя округысь быръёнъя бюллетеньлэсь текстсэ, Удмурт Республикаысь Быръёнъя комиссие сётэ сыӵе бюллетеньёс дасяны курон; з) быръёнъя округын ортчем быръёнлы йылпуъянъёс лэсьтэ, быръем депутатъёслы сётэ удостоверениос; и) радъя Кун Кенеше депутат выльысь быръён ортчытонэз, быръёнъя та округын быръён пӧрмымтэен, ярантэмен лыдъямын яке быръем депутат ӧз дугды ке депутатлэн статусэзлы тупасьтэм ужъёсты быдэсъямысь яке быръёнлы йылпумъянъёс сярысь решение суд пыр палэнтэмын ке; к) быръёнэз дасянэн но ортчытонэн документъёсты сётэ улосвылысь быръёнъя комиссие; л) быдэсъя Федерацилэн законъёсыныз, та Законэн но Удмурт Республикалэн мукет законъёсыныз чакламъя мукет ужъёссэ. 2. Округысь быръёнъя комиссилэн ужан дырыз быре, комиссилы бюджетысь висъям коньдонэз уже кутэм сярысь отчётсэ, пусъем кандидатъёслэсь быръёнъя фондъёсысь коньдонэз уже кутэм сярысь отчётъёссэс сётэм, быръёнъя документъёсты улосвылысь быръёнъя комиссие келям бере. Быръёнъя вылӥысь комиссие вуизы ке быръёнъя та комиссилэн куарасётон но куараосты лыдъян, быръёнлы йылпумъянъёс лэсьтон радлыкез тӥянэ вуттэм ужъёсыз (номыр лэсьтымтэез) пумысен ӝожтӥськонъёс но пумит веранъёс яке сыӵе учыръёсъя судын эскеронъёс нуисько ке, озьы ик куарасётэмлы, быръёнлы йылпумъянъёс пумысен ӝожтӥськонъёс но пумит веранъёс луизы ке, округысь быръёнъя комиссия ужамысь дугдэ, вылӥысь комиссия яке суд ӝожтӥськон, пумит веран пумысен берпуметӥ решение кутэм бере. 28-тӥ ёзэт. Участокъёсысь быръёнъя комиссиослэн быдэсъяно ужъёссы 1. Участокысь быръёнъя комиссия: а) эскерыса тупатъя быръёнъя округысь бырйисьёслэсь списоксэс; б) дася бырйисьёслэсь - быръёнъя участоке интыяськем воинской частьысь военнослужащийёслэсь, соослэн семьяосысьтызы адямиослэсь но та воинской частьлэн интыяськем улосвылын улӥсь мукет бырйисьёслэсь списоксэс; в) дася быръён нуналэ санаториосын, профилакториосын, шутэтскон юртъёсын, эмъяськонниосын, эмъяськонъя но висёнъёслэсь алонъя мукет учреждениосын, озьы ик следствие нуон вакытэ но огдырлы ӝегатыса возён интыосын, мукет интыосын огдыр ӵоже улӥсь бырйисьёслэсь списоксэс; г) бырйисьёсты тодматэ бырйисьёслэн списокенызы, кутэ но эскере списокысь янгышъёс но умойтэм гожтэмъёс пумысен вазиськонъёсты но быдэсъя отчы кулэ воштонъёс пыртон сярысь ужпумъёсты; д) калыклы ивортэ участокысь быръёнъя комиссилэн кытчы интыяськемез, телефон номерез, ужан дыръёсыз, куарасётон нунал но инты сярысь; е) эскерыса возё быръён азьын агитацияя материалъёсты быръёнъя участоклэн улосвылаз интыян-возьматъян ласянь Федерацилэн законъёсыныз но та Законэн тупатэм куронъёсты быдэсъямез; ж) дася куарасётон интыосты, быръёнъя ящикъёсты но мукет тӥрлыкъёсты; з) быръёнъя участокын радъя дырызлэсь вазь куарасётонэз, быръён нуналэ куарасётонэз, озьы ик куара сётон интылэсь палэнын куарасётонэз; и) лыдъя сётэм куараосты, лэсьтэ быръёнъя участокын куарасётэмлы йылпумъянъёс, дася но округысь быръёнъя комиссие сётэ куарасётэмлы йылпумъянъёс сярысь протокол; к) эскере та законэз тӥям пумысен вазиськонъёсты но ӝожтӥськонъёсты но кутэ соосъя пыр-поч валэктонъёсын решениос; л) быръёнэз радъянэн но ортчытонэн герӟаськем документъёсты сётэ улосвылысь быръёнъя комиссие; м) быдэсъя Федерацилэн законъёсыныз, та Законэн но Удмурт Республикалэн мукет законъёсыныз чакламъя мукет ужъёссэ. 2. Участокысь быръёнъя комиссилэн ужан правоосыз быро, быръёнлы огъя йылпумъянъёсты печатьын поттэм, коньдон кутэм пумысен аслэсьтыз отчётсэ но быръёнъя документъёсты улосвылысь быръёнъя комиссие сётэмез бере 10 нунал ортчыса. Быръёнъя вылӥысь комиссие вуизы ке быръёнъя та комиссилэн куарасётонъя но сётэм куараосты лыдъян радлыкез тӥянэ вуттэм ужъёсыз (номыр лэсьтымтэез) пумысен ӝожтӥськонъёс но пумит веранъёс яке сыӵе учыръёсъя судын эскерон ке нуиське, озьы ик куарасётэмлы йылпумъянъёсъя ӝожтӥськон но пумит веран учыре участокыс быръёнъя комиссилэн ужан правоосыз быро, вылӥысь комиссия яке суд ӝожтӥськонъя берпуметӥ решение кутэм бере. 29-тӥ ёзэт. Быръёнъя комиссиосысь адямиослэн статьяоссы 1. Быръёнъя комиссиослэн членъёссы луыны быгато активной быръён правоен гражданъёс. 2. Быръёнъя комиссиослэн решениос кутон правоен членъёссы ужаны кутско кун властья орган, интыын аскивалтонъя орган быръёнъя комиссилэсь членъёссэ юнматон сярысь решение кутэмзы дырысен. 3. Быръёнъя комиссиослэн кенешон правоен членъёссы ужаны кутско быръёнъя та комиссия пусъем кандидатлэсь, быръёнъя огазеяськонлэн, быръёнъя блоклэн оскем муртсылэсь быръён комиссие адямизэс членэ юнматон пумысен вазиськонзэс басьтэм бере, отын гожтэмын мед луоз комиссиысь кенешон правоен адямилэн фамилиез, нимыз, атай нимыз, вордскем арез, ужан интыез, быдэсъяно удысэз но улон интыез. 4. Быръёнъя комиссиослэн решениос кутон правоен членъёссы луыны уг быгато депутатъёс, кун властья органъёсысь но интыосын аскивалтонъя органъёсысь быръем кивалтӥсьёс, судьяос, прокуроръёс, кандидатъёс, пусъем кандидатъёс, соослэн оскем муртъёссы быръёнъя огазеяськонъёслэн но быръёнъя блокъёслэн оскем адямиоссы, быръёнъя комиссиослэн кенешон правоен членъёссы, кандидатъёслэн кузпалъёссы но матысь ӵыжы-выжыоссы яке кандидатлэн кивалтон улаз меӵак луись муртъёс. 5. Кивалтон улэ меӵак пыронэн, Федерацилэн законъёсыныз тупатэмъя, та Законын лыдъясько кивалтӥсьлэн но солэн ки улаз ужасьлэн службая кусыпъёссы, ку нырысетӥез правоосыз вань кыкетӥез муртэн кивалтыны-косъяськыны, мукет сямен вераса, со адямиез уже кутыны но ужысь куштыны яке должностезъя быгатэ солы, одно быдэсъян вылысь, приказъёс, косонъёс но индылонъёс сётъяны, дунъян-данъянъя но кыл кутытонъя ужрадъёс кутыны. 6. Быръёнъя комиссилэн членэз уг быгаты огдыре луыны Кун Кенеше депутатъёсты быръёнъя вылӥысь яке улӥысь комиссилэн членэз. 7. Быръёнъя комиссиослэн членъёссылы сётӥсько удостоверениос, соослэсь кыӵе луонзэс тупатэ Удмурт Республикаысь Быръёнъя комиссия. 8. Удмурт Республикаысь Быръёнъя комиссилэн тӧроез, тӧролэн воштӥсез но солэн секретарез, решениос кутон правоен мукет членъёсыз, озьы ик улосвылысь быръёнъя комиссилэн тӧроез яке тӧролэн воштӥсез, яке солэн секретарез, яке решениос кутон правоен членъёсыз пӧлысь одӥгез быгато комиссиын ялан (штатын) ужаны. Быръёнъя комиссиослэсь решениос кутон правоен мукет членъёссэс быръёнэз дасян но ортчытон вакытлы мозмытыны луэ ялан быдэсъяно ужысьтыз, отын басьяно шоро-куспо уждунзэ тырыса. Быръёнъя комиссиын ужакузы, соослы ватсаса уждун тыриське бюджетысь быръён ортчытыны висъям коньдон чотын Удмурт Республикаысь Быръёнъя комиссиен тупатэм мында но радлыкъя. 9. Удмурт Республикаысь Быръёнъя комиссилэн тӧроез, котьку сямен ик, вылӥ юридической образованиен яке право удысын учёной степенен луыны кулэ. 10. Быръёнъя комиссилэсь решениос кутон правоен члензэ администрация (уж сётӥсь) уг быгаты быръён вакытэ сое ужысьтыз ас чакламезъя мозмытыны яке ачиз соглша луытэк мукет уже выжтыны. 11. Быръёнъя комиссилэсь решениос кутон правоен члензэ уг луы быръён вакытэ, Удмурт Республикаысь Прокурор лэзьытэк, уголовной кылкутытонэ кыскыны, суд пыр административной амалэн кылзэ юаны. 12. Быръёнъя комиссиослэн решениос кутон правоен членъёсызлэн полномочиоссы быро быръёнъя со комиссиослэн полномочиоссы дугдэмен ӵош. 13. Быръёнъя комиссилэн решениос кутон правоен членэз быръёнъя комиссилэн членэзлэсь ужъёссэ быдэсъянлэсь полномочиосыз быремлэсь азьло мозмытӥське сое отчы юнматэм органлэн решениезъя таӵе учыръёсы: а) быръёнъя комиссилэн членэз гожтыса сётэ ке аслаз полномочиосызлэсь куштӥськонэз сярысь вазиськон; б) быръёнъя комиссилэн членэз ыштэ ке Россия Федерацилэн гражданинэз луонзэ; в) судлэн быръёнъя комиссилэн члензэ янгыше уськытон сярысь приговорез законъя кужыме пырем бере; г) быръёнъя комиссилэн членэз судлэн законъя кужыме пырем решениеныз лыдъямын ке аслаз ужъёсыз понна кыл возьыны быгатӥсьтэмен, кӧнялы ке сыӵе быгатонлыктэк кылемен, чиптэм-чаптэм ышемен яке кулэмен; д) быръёнъя комиссилэн членэз кулӥз ке; е) быръёнъя со комиссилэн вазиськемезъя судлэн законъя кужыме пырем решениосыныз лыдъямын ке, быръёнъя комиссилэн членэз ас ужъёссэ ӵемысь уг быдэсъя шуыса; ж) та ёзэтлэн 4-тӥ пунктаз верам мугъёс кылдыку. 14. Быръёнъя комиссилэн решениос кутон правоен членэзлэн полномочиосыз дугдо быръёнъя со комиссиез быдтон учыре но. 15. Быръёнъя комиссилы членэ юнматэм орган кошкемез интые быръёнъя комиссилы выль членэз юнматыны кулэ азьвылэз кошкем нуналысен толэзь куспын та Законэн тупатэм радлыкъя. 16. Пусъем кандидатъёс, быръёнъя огазеяськонъёс, быръёнъя блокъёс, кудъёсыз быръёнъя комиссиын кенешон членъёс луыны адямиоссэс ыстӥзы, быръён нуналозь котькыӵе дыре соосты воштыны. 17. Удмурт Республикаысь Быръёнъя комиссилэн, улосвылъёсысь быръёнъя комиссиослэн кенешон правоен членъёссы ужъёссэс быдэсъяло Кун Кенешлэн выль ӧтчамаз депутатъёсты бырйыку кандидатъёсты пусъён йылпумъяськытозь сыӵе учыре, соосты ыстэм быръёнъя огазеяськон, быръёнъя блок яке кандидат депутатъёслэсь мандатъёссэс басьтӥзы ке, Быръёнъя со комиссилэн кенешон правоен мукет членъёссылэн полномочиоссы быро быръёнлы огъя йылпумъянъёсты печатьын поттэм бере 30 нуналскын. 18. Округъёсысь но участокъёсысь быръёнъя комиссиослэн кенешон правоен членъёссылэн полномочиоссы быро быръёнъя со комиссиослэн полномочиоссы дугдэмен ӵош. 30-тӥ ёзэт. Быръёнъя комиссиосысь адямиослэн полномочиоссы 1. Быръёнъя комиссилэн кызьы ке решениос кутон правоен, озьы ик кенешон правоен членъёсыз: а) азьвыл ик тодматэмын луо быръёнъя комиссилэн ку люкаськонъёсныз; б) быгато быръёнъя комиссилэн люкаськоназ эскерон вылысь ӵектонъёс сётъяны; в) быгато быръёнъя комиссилэн люкаськонэз вераськыны, быръёнъя со комиссилэн компетенцияз пырись ужпумъёсъя ӵектонъёс сётъяны но со ужпумъёсъя куарасётон пумысен курон пуктыны: г) быгато быръёнъя комиссилэн люкаськоназ пыриськем мукет муртъёслы эскероно ужпумъёсъя юанъёс сётъяны но соосъя пыр-поч валэктонъёс курыны; д) быгато быръёнъя асьсэ но улӥысь комиссилэн котькыӵе документъёсынызы но материалъёсынызы (бырйисьёслэн списокъёсынызы, быръён бюллетеньёсын но) тодматскыны, машинаос лыдӟыны луонооссэ но вераса, со документъёслэсь но материалъёслэсь (бырйисьёслэн списокъёссылэсь, быръён бюллетеньёслэсь сяна) копиоссэс басьтыны, со копиосты вылэ гожтӥськыса юнматыны; е) быгато быръёнъя комиссилэн ужъёсыз (номыр лэсьтымтэез) пумысен ӝожтӥськонэн быръёнъя вылӥысь комиссие яке судэ вазиськыны; ж) быгато Федерацилэн законъёсыныз, та Законэн но Удмурт Республикалэн мукет законъёсыз чакламъя мукет полномочиоссэс быдэсъяны. Йырдэ берыкто - пыраклы аслым каро Елизавета (нимъёс воштылэмын), тыр улӥсь семьяын быдэ вуиз: муш возизы, юртъерзы но йыг-йыг, коньдонтэк но ӧз улэ. Агафья кенаклэн кузпалыз войнаын бырыны шедиз ке но, нылпиоссэ быдэ вуттыны, пыд йылазы султытыны сюлмаськиз. Чебересь вал солэн куинь нылъёсыз: Матрёна, Нина, Лиза. Озьы ке но, яратон шудбур соослы капчиен ӧз сётскы. Кузпаллы бызьытэк анай кариськизы Матрёна но Нина. Агафья кенаклэн осконэз кылиз на покчиезлы гинэ - Лизалы. Оло, юртазы сюан кырӟанъёс жингыралозы на, пе. Ӟечлы оскыса ик, дыр, анай нылзэ гуртысь келяно кариськиз. Мед, пе, интыяськоз палэнэ, ӟеч адямиез пумитаса, сюан шудыны мед кылдоз. Газетысь ялонэз лыдӟыса, Лиза чемоданаз тыриськиз но Пермь улосэ шонтӥз. Ужаны интыяськиз совхозысь фермае, скалъёсты кыскыны. Татысен ик сюлэмзэ ӵушказы нырысетӥ яратонэзлэн тылсиосыз. Синмаськиз ӟуч пилы - шофёрлы. Нош соиз, нылмуртлэсь секыто луэмзэ валаса, киыныз гинэ шонтӥз. Ма карыны ӟудӥз мискинь нылаш. Визь-кенешен юрттыны матысь эшъёсыз но, матысь адямиосыз но ӧвӧл. Секытэнзэ ӵош ужась эшъёсыз медаз сактэ шуыса, кӧтсэ еэн керттылыса ветлӥз. Ваньзэ шӧдӥз-валаз кадь корка кузёез - Семеновна. Елизавета нылпизэ мунчоын уйшоре вордӥз. Огшап малпаськемез бере дорысьтыз вуттэм чемоданаз понӥз но тӥрен кораз. Ӵукнаяз, "сьӧлыко" чемоданзэ ӝутыса, станцие дыртӥз. Поездысен ик кутӥзы сое милиционеръёс. Семеновна жингыртыны вутскем, шӧдске. Пытсэт сьӧрын вить ар пукыса, Лиза вордскем гуртаз вуиз. Озьы ке но, нылмурт ас шудзэ шедьтонлы оскиз на. Ог нуналэ анаезлэсь куриськиз: - Анай, тон йырберыктыны быгатӥськод, шуо. Юртты ай мыным кузпаллы бызьыны. - Бен, быгатӥсько, - ӧз ваты Агафья кенак. - Апайёсыдлы но кузпалъёс мынам быгатэменым шедьтэмын уго. Синмаськем пизэ, Степанэз, дораз ӧтиз. Кудӟытозяз куноязы пӧзьтэм аракыен, бератаз ни Агафья кенак йырберыктон вузэ удӥз. Степан та нуналысен воксё воштӥськиз: яратоно нылмуртсэ палэнтыса, Лизаез кышнолы ваиз. Кӧня пумитъяськизы талы анай-атаез, аслэсьтыз кариз. Аръёс ортчемъя вордскизы вить нылпиоссы. Но шудоесь ӧвӧл Степан но Лиза. Ӵемысь юон, керетон, жугиськон потаз. Йырез берыктыса, усто семья уд кылдыты, шуо. Солэн кутсконэз ке умой, пумыз - курыт синвуосын пыласькымон. Озьы ик луиз Агафьялэн нылъёсыныз но. Матрёналэн картэз шузимиз, Ниналэн - машинаен бекмыльскыса быриз, Лизалэн - ассэ ачиз быдтӥз. Ыштэмын куинь удмурт воргоронъёс. Ма понна? Шудо-а кариз нылъёссэ Агафья? Мыддорин ӧз-а лу тыршемез? Н. ТУРИН. Ма сярысь маде Виктор Петрович? Быдӟым Вормонлы 55 ар тырмонэз ӟеч ужъёсын пумитаны али ик дасяське ни шаерчи Виктор Петрович Поздеев. Тазэ арез но со пумитаз сюрес вылын. Нырысь ик вуылӥз Юкаменск ёросэ, татысь Пышкет шор ёзо школае, собере Зянкиноысь начальной школае но библиотекае. Отӥяз Красногорскысен пыдын вамыштӥз Малягуртэ, нош татысен, выльысь берытскыса, Васильевское. Та толэзьлэн кутсконаз В. П. Поздеев нош ик вуылӥз Завьял ёросысь Подшивалово гуртэ. Кык нунал куспын со школаысь ваньмаз сямен классъёсын вераськиз, тямыс выступление лэсьтӥз. Мар сярысь вераське Виктор Петрович? "Асьме землякъёсмы Родинамы понна ожмаськонын" темая. Кызьы со асьме шаерын улӥсьёс пӧлысь утчаз Брест крепостез утисьёсты (та утчаськонэзлы туэ 35 ар тырме ни), кызьы утчаз 313 номеро Петрозаводской дивизилэсь ветеранъёссэ (Карелие ветлэмезлы туэ 30 ар луоз). Озьы ик со вера Удмуртиын кылдытэм 357-тӥ стрелковой дивизия, солэн командирез генерал-майор Александр Кроник, соин пумиськылэмъёсыз сярысь. - Тани та туспуктэмысь тӥ адӟиськоды Кроникез но монэ, Ижевскысь 37 номеро школаын 1964-тӥ арын 16-тӥ декабре вераськыкумы,- шуэ Виктор Петрович.- Александр Львович нырысь ик монэ вераськытэ вал, берло, пе, узгес кылзӥське ни. Со, ожъёсы ачиз пыриськем командир, туж яркыт мадьыны быгатэ вал уго. В. П. Поздеев озьы ик умой тодэ Советской Союзлэсь Геройзэ, Вормон Парадэ пыриськем полковникез Георгий Томиловскиез. Со сярысь но тумошо учыръёсыз вань. Соин ик пиналъёс сак кылзӥсько, тодэмзы потыса. Виктор Петрович 1963-тӥ арысен ни "Знание" обществолэн пропагандистэз но агитаторез луэ. (Умой ужамез понна 1969-тӥ арын Геленджике пансионатэ путёвка сётылӥзы). Лыдпусъёсыз туж-туж яратэ ке но, вераны уз быгаты ни, кӧня иськемъёс ортчемын шаермылэн пӧртэм пала кыстӥськись сюресъёсыз кузя. Пелляськись тӧл, кионъёс вузэм шоры учкытэк, пыдын но вамышъя, тырозы-а, уз-а вераськемез понна коньдон - созэ но уг малпа. Малпаське ӵапак дыраз вуон сярысь. Озьы 31-тӥ толсуре со ветлӥз Завьял ёросысь Лудӟийылэ, вераськиз Михаил Антонович Зверевен, ИИИ степенё Трудовой Слава ордено механизаторен. Выльысь лыктыкуз, 31-тӥ толшоре, та героез улэп ӧй вал ни... Нош куддыръя уг лу азьпалтыны... "Франциын огречъёс асьмелэн сярысь бадӟымесь",- шуэмез понна ӵуказеяз ик арестовать каризы Никифор Васильевич Филипповез. 58-тӥ статьяя пуктӥзы, тямыс ар пытсэт сьӧрын вал. Виктор Петровичлэн со вуж тодмоез, 1954-тӥ арын со доры Красногорск ёросысь Тараканово гуртэ вуылэмез вань. 39 ар ортчыса, К. Е. Ломагин В. П. Поздеевлы дэмлаз та адями доры выльысь ветлыны, пыр- почгес гожтыны. Виктор Петрович мынӥз - ӧз вуы ни... Тӥни озьы, туж дано ужез быдэсъя та адями. Жаль, сое асьме вакытэ дунъяны уггес быгато. Т. ПЕТРОВА. * Генерал А. КРОНИК но шаерчи В. ПОЗДЕЕВ 1964-тӥ арын Ижевскысь 37 номеро школаысь пиналъёс дорын. АРЪЁС НО АДЯМИОС Буре ваён книгае шедьымтэ?.. Скобелев Николай Васильевич вал солэн нимтулыз. Быремын Быдӟым Отечественной ожын, нош Буре ваён книгае шедьымтэ. Малы? Ог люкетэз воргоронъёс туж витё кузпалзылэсь, кышнозылэсь пи ваемзэ. Ӵапак сыӵе вал мынам песятае Василий Скобелев. Вордскемын Вавож ёросысь Вуж Ӝуё гуртын 1888-тӥ арын. Отын ик кузпалъяськиз но, Люба нимо песянаеным вить нылпи будэтӥзы. Оло, ичигес вордысалзы, но, нылъёс бере песятае ялан пи возьмам. Инмар быдэстэ солэсь куронзэ, пи сётэ, нимало сое Коля. Малы сокем пи кулэ вал песятаелы? Крестьян адями, музъем ужась, пудо вордӥсь но юрт пуктӥсь вал уга. Соку пи понна гинэ музъем кесэг висъяллязы, нош песятае, вӧзаз юрттӥськись будэтэм сяна, пизэ дышетыны но малпам. Бадӟым гуртын азьтэмъёс трос шуыса, колхоз кылдон аръёсы Вуж Ӝуё гуртысь самой сюлмо ужасьёс палэнэ кошко. Песятаелэн середняке потыны выронэз сокем умой ӧвӧл йылпумъяськем: песятае ку посыны ӧдъям. Чагиськиллям - ку посон соку лэзьымтэ удыс вылэм. Соин Ӝуё починкаысь юртсэ вуза но кошке Выль Алнаш гуртэ, нырысь пичи корка басьтэ, собере улымонзэ пуктэ. Атае Николай Васильевич пумита Выль Алнаш нылэз, таиз Лина Григорьевна Векшиналэн курсъёсаз дышетске но эмъяны кутске Кузьымгуртын. 1940-41 дышетскон аре атае ужа Кузьымгурт школаын, но дышетскон ар пумын сое Алнаш военкомат басьтэ армие. Сӧсырмыны шедемез бере, 1941-тӥ арын ноябре, дораз лэзё. Кузьымгуртын соос анай-атайтэк кылем Анна нылэз бордазы куто но солэн корказ ӵош уло. Но тани атаелы выльысь военкоматэ мыноно 3 декабре ӵукна. Выль Алнаш калык сое коркась корка пыртаса юмшатэ. Куазь кезьыт - порпиос ыбылӥсько. Атае юмшанысь пегӟе секытэн кузпалэныз ӵош уйшорлэсь азьло ик, нош уйшор бере вордскисько мон. Военком вераське, пе, аслаз ужасеныз: - Мар каромы Скобелевен? Оло, ог уйлы берен дораз келялом на? - Малы? - Уин пиез вордскем солэн. Война ведь. Кин тодэ, оло, адями уз берытскы. Нунал отчы, нунал татчы, кинлы мар солэсь, мукетъёсыныз ӵош келялом. - Кельтом на соку ог нуналлы. Озьы атай пиеныз ог уйзэ ӵош кӧлэ... Но уг ни адӟылы бырытозяз. Бертаны уг ни кылды. Дышетӥсьлэн но солдатлэн уно гожтэтъёсыз на синпельлы кылё. Быре ожчи Скобелев Николай Васильевич 1944-тӥ арын 20 (яке 21) июле (яке июне) Литва музъем вылын. Ватӥллям Литваысь Алитус городысь шае. 1974-тӥ яке 1975-тӥ аре мон вуылӥ та шайвылэ. Военкомзы ӟуч вылэм, Рябов. Вазен ик гожтэт ыстӥ вал бере, со монэ пумитаз шуныт мылкыдын, машинаен нуллӥз городэтӥ, ньыль шай гу вылтӥ. Алитусын со вакытэ 60 сюрс гинэ адями улэ ке вал, ватэмын 100 сюрс адямиослэн мугорзы. Рябов соку мыным кылзэ сётӥз: - Атаедлэн нимтулыз гожтэмын луоз тани тазэ пичи памятникез бадӟыменыз воштыкумы, гожтомы ваньзэ соосты, кинлэн ӵыжы-выжыосыз татчы ветло. Нош мукет дыръя ӧз ни кылды отчы вуылыны. Атае умой дышетӥсь вал бере, солэн дышетэм нылпиосыз тау каремзэс мыным уно пол вераллязы. Аръёс ортчо, нылпиос вордско но будо, пыд йылазы султо, мӧйыос улонысь кошко. Тани атаелэн бадӟым апайёсыз кулӥзы ни, Надёж (Надя) сузэрез улэ Ростов областьын, Можга городын - Одоть сузэрез. Бырем вынзэс сузэръёсыз юн яратӥзы но гажазы, соин Маня апаез ас пиезлы сётӥз Коля ним. Коля Скобелев вал художник но комбайнер, шудтэм учыре шедьыса кулэм. ... Нош малы Алнаш райвоенкомат вунэтэм оже бырем дышетӥсез но старшинаез Скобелев Николай Васильевичез быремъёслэн книгаязы пыртыны? Малпасько ватсаса поттоно томе со одно сюроз. ПЁТР СКОБЕЛЕВ. 1999 арын нылпиос понна толэзьлы быдэ кун пособие тырон сярысь Удмурт Элькунысь Правительстволэн ПОСТАНОВЛЕНИЕЗ Ижевск город 1999 арын 1 феврале � 159 Удмурт Элькунысь калыкез улон-вылонын утёнъя министрлэсь Н.М.Бессогоновлэсь Удмурт Элькун Кивалтэтлэсь 1998 арын 30 апреле юнматэм "1998 арын нылпиос понна толэзьлы быдэ кун пособие тырон сярысь" 326 номеро но 1998 арын 20 июле кутэм "Нылпиос понна толэзьлы быдэ кун пособие тырон сярысь" 629 номеро постановлениослэн быдэсъяськемзы сярысь ивортонзэ кылзыса, Удмурт Элькун Кивалтэт пусъе: нылпиослы пособиосты вузъёсын но юрттэтъёсын тырон уж радъямын Калыкез улон-вылонын утёнъя министерствоен но городъёсысь (ёросъёсысь) администрациосын ог-огеныд зачёт амалэн элькун бюджетэ вытъёс (налог) чотын, ӟеч радъямын нылпи пособиосты вузъёсын но юрттэтъёсын тырон, нуиське нылпи пособиосъя пунэм тыронэз эскерон-чаклан, умой пуктэмын толэзьлы быдэ нылпи пособие тыронэз сое басьтӥсьёслэн ужан интыязы выжтон ужпум. 1999 арын 1 январьлы нылпи пособиос 1998 арын 107442 сюрс манет тыремын. Удмурт Элькун Кивалтэт пуктэ: 1. Удмурт Элькунысь калыкез улон-вылонын утёнъя министрлэсь Н.М.Бессогоновлэсь 1998 арын нылпиос понна толэзьлы быдэ кун пособие тырон сярысь ивортонзэ лыдэ басьтоно. 2. Удмурт Элькун Кивалтэтлэсь 1998 арын 30 апреле кутэм " 1998 арын нылпиос понна толэзьлы быдэ кун пособие тырон сярысь" 326 номеро но 1998 арын 20 июле юнматэм "Нылпиос понна толэзьлы быдэ кун пособие тырон сярысь" 629 номеро постановлениоссэ 1999 арын но уже кутоно. 3. Удмурт Элькун Кивалтэтэн 1998 арын 30 апреле юнматэм "1998 арын нылпиос понна толэзьлы быдэ кун пособие тырон сярысь" 326 номеро постановление таӵе воштонъёс пыртоно: 1-тӥ пунктысь 2-тӥ абзацез тазьы лыдӟоно: "гражданъёслы, кудъёсызлэн семьяысь котькуд улйсьлы огъя шоро-куспо доходзы ортчем арлы улыны чаклам коньдонлэн (прожиточный минимум) шоро-куспо быдзалаезлэсь ичи ке". 1-тӥ пунктэ ватсано таӵе пуштросэн абзац: "1999 арын нылпиос понна толэзьлы быдэ кун пособие тыронъя черод тупатон вылысь, 1998 арын котькуд адямилы улыны чаклам коньдонлэсь шоро-куспо быдӟалазэ 450 манет тупатоно". 4. Удмурт Элькунын семьялэсь шоро-куспо доходзэ лыдъян-чотан радлыке но нылпи пособиосты тырон рад сярысь Удмурт Элькун Киватэтэн 1998 арын 30 апреле кутэм "1998 арын нылпиос понна толэзлы быдэ кун пособие тырон сярысь" 326 номеро постановлениен тупатэм положение ватсанъёс но воштонъёс пыртоно, соосты мукет сямен валэктыса. 5. Удмурт Элькунысь городъёслэн но ёросъёслэн администрациоссылэн тӧрооссылы нылпи пособиосты вузъёсын но юрттэтъёсын тыронэз азинтыны ӵектоно. 6. Та постановленилэсь быдэсъяськемзэ эскерыса возёз Удмурт Элькун Кивалтэтлэн аппаратысьтыз Социальной азинсконъя управлениезлэн семья ужпумъёсъя, тазалыкез но калыкез улон-вылонын утёнъя отделэз. Удмурт Элькун Кивалтэтлэн Тӧроез П. Н. ВЕРШИНИН. Пинал шаерчиос-усточиос Алигес Устинов ёросысь "Удмурт кенеш" но "Дэмен" огазеяськонъёсысь мыло-кыдоос люкаськылӥзы 34 номеро школае, суреданъя дышетӥсь Р. В. Кириллова доры. Выль ар азьын гинэ ай Роза Владимировналы музей усьтыны нимаз комната висъязы. Финн-угор калыкъёслэсь вашкала улонзэс но сямъёссэс, киужъёсын возьматыны инты шедиз. Егит дышетӥсь малпаське ни пор, эстон, коми, озьы ик бигер калыкъёслы сӥзем сэрегъёс усьтон сярысь но. Роза Кирилловалы пинал шаерчиосын ужанзэ радъяны юртто ёросысь кибашлы но тодӥсь- валась адямиос. Одӥгез соос пӧлысь - Удмуртиысь калык художник С. Виноградов. Кемалась ик ӧвӧл со пумиськылӥз школаысь бадӟым классъёсын дышетскисьёсын. Али кылдӥсь музее вуылӥзы ни писательёс А. Уваров, В. Кириллов, "Инвожо" но "Кизили" журналъёслэн редакциосазы ужасьёс. Татын экскурсиос но радъямын ни. Лыкто асьсэ но мукет школаосысь, нылпи садъёсысь пиналъёс. Матысь эшъёс луизы ни 21 номеро школаысь шаерчиос. Таосызлэн асьсэлэн музейзы вазенгес кылдытэмын ни, соин кивалтэ удмурт кылъя но литературая дышетӥсь В. С. Шмыкова. Татын тодматскыны луэ элькунмылэн пӧйшуръёсыныз, будосъёсыныз но. Со сяна, та музейёсы люканы малпало Устинов ёросын улӥсь дано удмуртъёс сярысь материалъёс. Кылсярысь, та ёросын уло дасо удмурт писательёс, уно гинэ артистъёс но художникъёс. 21 но 34 номеро школаосын луонлык кылдоз шаертодонъя (краеведениея) урокъёсты шулдыргес, син азе пуктымон ортчытъяны. Удмурт кылэз дышетӥсь пиналъёслы но но капчигес - 21-тӥ школаын таӵе классъёс сизьым ини. Л. ФЁДОРОВ. Кышкыт томат Татарстанысь госсанэпидслужба басьяськисьёслы тае куронэн вазиське. Вузкаронысь палэнтэмын 30 процентъем томат паста, со поттэмын 350 но 500 граммъем но озьы ик 3 но 10 литръем банкаосын. Лэсьтэмын 1998-тӥ арын 8-тӥ августэ.Та вуз санитарной куронъёслы уг тупа. Томат ваемын Азербайджанысь "Сабирабад-консерв" акционер огазеяськонысь. Тазалыклы кышкыт томат вуыны быгатоз Удмурт Республикае но. Эшмес буре вайыса Улонысь кошкиз туж лякыт но гажано адями Иван Иванович Гусев, редакцимылэн ветеранэз. Туэ 3-тӥ сентябре солы 72 арес тырмысал ни. Шаркан ёросысь Кайсыгуртын вордскем пилэн улон сюресэз капчи ӧй вал. Номыр шоры учкытэк, со тыршиз визьнод люканы. Дышетскиз Як.-бодьяысь педучилищеын. Собере куать арзэ сӥзиз Быдӟым ожлэсь яраоссэ йӧнатонлы. 1951-тӥ арысен кутскыса пенсие потытозяз И. И. Гусевлэн улонэз герӟаськемын вад журналистика удысэн. Ужаз "Егит большевик" (собере "Удмуртиысь комсомолец" газетын), Удмурт радиоын, МВД-ын. Дышетскиз Высшой комсомольской но Высшой партийной школаосын. 1980-тӥ арын Иван Гусев выже "Советской Удмуртие" газетлэн редакцияз. Син шоры йӧтымонэсь вал солэн веросъёсыз, юморескаосыз но. 1995-тӥ арын "Удмуртия" издательство поттӥз "Ӟукыртэ, ӝуштэ сюрес" нимо тодэ ваёнъёссэ. Умой журналист но туж капчи, каньыл адями вань малпанъёссэ быдэстыса ӧз вутты. Ми, эшъёсыз, солэсь ӟеч сямъёссэ, сайкыт тусбуйзэ возём сюлэмамы. И. И. Гусевез ватозы туннэ, 18 феврале. Мугорзэ поттозы 13 часэ дорысьтыз таӵе адресъя:: 10 лет Октября ульча, 8 номеро, 29-тӥ квартира. Творчествоя лагере "Шундыкар-99" мыныны мылкыд карисьёслы конкурс сярысь валатон Удмурт егитъёслэн "Шунды" дэменлыксы но Удмурт Республикаысь Егитъёсын ужанъя кун комитет 1999 арын июль толэзе творчествоя лагерь "Шундыкар-99" ортчытэ. Ӧтиськом конкурсамы пыриськыны 5-тӥ-11-тӥ классъёсын дышетскисьёсты, "Шунды" дэменлыке пыремъёсты, "Родники" огазеяськонлэн "Шаер" программаезъя ужасьёсты, удмурт кылэз ӟеч тодӥсь пиналъёсты. Куронъёс: Конкурс ортчытӥське таӵе удысъёсъя: изобразительной искусство, архитектура, литература, крезьгур (калык крезьгур но эстрада), театр, тележурналистика, национальной костюмлы дизайн, калык киужъёс, азьветлӥсьёс, кылтодон. Конкурсэ пыриськыны мылкыд карисьёс кулэ: - фамилидэс но нимдэс, вордӥськем ардэс, кыӵе классын дышетскемдэс, кыӵе дэменлыке (огазеяськонэ) пыриськемдэс, азьвыл "Шундыкар" лагере ветлэмдэс- ветлымтэдэс (ветлэмын ке, кыӵе арын, кыӵе удысъя) гожтыса келяны; - быръем удыстыя таӵе ужъёс быдэстоно: 1. Изобразительной искусство (5-тӥ-8-тӥ класс) - ыстоно "Мусо шаере" темая 3 уж (уже кутыны быгатоды пӧртэм амалъёсты). 2. Архитектура (9-тӥ-11-тӥ класс) - ыстоно "Вань мынам выжыкыл дуннее..." темая 5 уж (уже кутыны быгатоды пӧртэм амалъёсты). 3. Литература (8-тӥ-11-тӥ класс) - ыстоно 10 кылбур яке 1-2 верос, яке 2 легенда, зарисовка, удмурт калыклэн туннэ но ӵуказе улонэзлы сӥзем сочинение. 4. Крезьгур (калык крезьгур - 5-тӥ-8-тӥ класс, эстрада - 9-тӥ-11-тӥ класс) - ыстоно тӥляд кырӟанъёсыныды аудио - яке видеокассета. 5. Театр (7-тӥ-11-тӥ класс) - дасяно кылбур, басня яке спектакльысь сценка, кырӟано яке эктоно. (Кылзӥськонъёс ортчозы Удмурт национальной театрын 9 но 16 мае 12 часын нуназе.) 6. Тележурналистика (9-тӥ-11-тӥ класс) - гожтоно туала удмурт егитъёс сярысь сюлмаськытӥсь телепередачалы сценарий. 7. Калык киужъёс. Горд сюй шудон (5-тӥ-8-тӥ класс) - ыстоно горд сюйлэсь яке пластилинлэсь лэсьтэм ужъёсыныды 5 чибориё фотография (10һ5 сантиметр). Геройёсты сярысь легенда малпано. 8. Национальной костюмлы дизайн (8-тӥ-11-тӥ класс) - ыстоно удмурт шӧмъем деловой костюмлы 5 эскиз (Ә формат - альбом бам). 9. Азьветлӥсьёс (9-тӥ-11-тӥ класс) - ыстоно "Мон - кивалтӥсь" темая сочинение. 10. Кылтодон (5-тӥ-11-тӥ класс) - ыстоно "Малы мынам удмурт кылэз дышетэме потэ" темая сочинение. (Удмурт кылэз ӟеч тодӥсьтэмъёс быгатозы ӟуч кылын гожтыса ыстыны.) Конкурсэ ужъёс кутӥсько 1-тӥ маёзь. Мылкыд каремдыя, ужъёсты берыктэмын луозы 1- тӥ сентябрёзь. Дунъялозы "Шундыкар" лагерьын берло кык арзэ дышетэм специалистъёс. Конкурслы йылпумъянъёс печатламын луозы республикаямы но районъёсын потӥсь газетъёсын июнь толэзе. Гожтэтъёстэс но ужъёстэс ыстэ таӵе адресъя: 426051, Ижевск город, Советской ульча, 1 номеро юрт, "Шунды" дэменлык. Тел.: 51- 07-96. Инмар мед утез сыӵе адӟонлэсь Самараысь югдурез утёнъя управлениын потэм тылпу но отын трос бырем адямиос сярысь ивортон котькудмылэсь сюлэмъёс вырӟытӥз. УВД-лэн куать этажъем юртэз вакчи дыр куспын сутскыса быриз. Малы но кытысь ӝутскиз тылпу, малы сомында адямиос быризы?Бен, та юанлы валэктонъёс луозы на шимес учырлэсь мугъёссэ сэртто-пертчо Россиысь нимысьтыз службаос. Самарае та секыт нуналъёсы вуылӥзы Удмурт Республикаысь Югдурез утёнъя министерстволэн тылпуосын нюръяськонъя управлениезлэн кивалтӥсез М. Г. Камалетдинов но отысь ик эшшо кыкез офицеръёс. Михаил Григорьевич Самараысь вуэмез бере ик журналистъёсын пумиськон ортчытӥз. тани мар со вераз: - Тылпу потэм сярысь ивортон 01 телефонъя басьтэмын 17 час 52 минутэ. Ог ньыль минут ортчыса отчы вуэ ини караул. Солэн кивалтӥсез тылпулэн кышкытлыкезлы 3-тӥ номер сётэ. Ӝоген отчы ог 40 пала пӧртэм техника вуэ, озьы ик Тольяттиысь но. Со дыре тыл быдэс юртъере влмыны кутске ини. Соку тылпуэз кысонын кӧня ке вис луэ но вань кужымез огазеяло адямиосты утёнлы. Этажъёсысь утемын 65 мурт, пагӟаос пыр поттэмын 110 адями. Секыт вал ву сётон ласянь. Секундаз со ог 400 литр кулэ ке вал, сётыны луиз 80-зэ гинэ. Городын вужмемын ини ву сётон система. Соин ик ву кысконо луиз Волгаысь. Югдур сотэк но шимес вал, нош вылаз ик одӥгзэ шлангез (рукав) вандыны шедьтэм трамвай. "Выль ӟучъёс" пӧлысь дӥгез "Джин" автомобиленыз гумыез лёгам на. Тылпуэ ӝегасагес вуиз сюрес вылын шудтэм учыръёсын нюръяськонъя служба (ГИБДД). Тужгес но ӝегаса вуизы (20 минут ортчыса гинэ) ӝог медицинской юрттэт сётӥсьёс. Куд-огез малпа вылэм ини, соос таӵе кӧшкемыт дыре забастовка ялӥллям шуыса. "Горд атасэн" нюръяськонэ пыриськиз 9 сюрс тылпу кысӥсь. Малы тылпу сокем ӝог пуромиз. Яке сое бергес адӟизы, яке тылпу сярысь ивортыны ӧз дыртэ, яке асьсэ кужымзылы оскизы. Котьма ке но, отын ужасьёс асьсэос милиционеръёс. Собере УВД-лэн юртэз но вашкалагес ини, этажъёс вискысь инъетъёс лэсьтэмын пулэсь. Вылаз ик та юртэ пыран-потан чылкак одӥг гинэ, мукетъёсыз ӧсъёс ваньмыз тунгонамын вал. Кызьы пусйиз Михаил Камалетдинов, та кышкыт тылпу трос тырмымтэосты шараяз. Соин ик ӝегатскытэк эскерыны косэмын элькунысьтымы Югдурез утёнъя министерстволэсь, городъёсысь но рынокъёсысь милицилэн отделъёсызлэсь юртъёссэс. Уго уноез соос кемалась пуктэмын ни. Озьы ик эскеремын луозы республикаысьтыым мукет обектъёс но Ижевскын гинэ соос 16 лыдъясько. Пӧлазы: Праивтельстволэн вуж юртэз (Советской ульча, 1) Национальной библиотека, "Дружба" кинотеатр, "Октябрь" культура дворец, сельхозакадемилэн Киров ульчаысь юртэз, удмурт но ӟуч театръёс, уно больницаос но мукет. Тросэз соос пуктэмын ни 30-тӥ-40-тӥ аръёсы. Соин ик конструкцизыя тылпу потон ласянь кышкытлык кылдыто. Нош кызьы юрттоно тылпуэн нюръяськонъя службаослы? Валамон, нырысь ик техника басьтыны висъяно тырмыт коньдон, выльдоно вужзэ. Быдэстоно ужпумъёс туж трос. Самараын луэм учыр малпаськытыын кулэ кадь ваньместы. Вераны кулэ: Москваысь "Россия" гостиница сутскем бере, таӵеез кышкыт тылпу Россиын ӧй на вал. Азьланяз инмар мед утёз ини сыӵе адӟонлэсь. Кунгож сьӧрын поттэм фильмъёсын возьмато, кызьы тылпу кысӥсьёс пагӟаосынызы туж вылӥ этажъёсы вутскыны быгато. Нош шуге-леке вуэм адямиос вылӥысен пырак тэтчало брезент яке батут вылэ. Жаляса верано луэ: Россиысь тылпу кысӥсьёслэн соиз но, таиз но ӧвӧл. Н. БАЙТЕРЯКОВ. Вирсэрлы адями Нянь будэтӥсьлы Н. Ф. Чувашовлы сӥзьыса Кыӵе муэ согылӥське зарни тысед, Ваньмыз-а кеносад пыре вуэм нянед? Ӝӧк выламы пыжем нянь сукыри вӧзы Котьку ик-а пуксёз ӟеч зумыто гылэт? Таӵе юанъёслы ӟеч кыл веран понна, Уен-нунал тырше музъем ужась. Инльӧль ворекъянъёс ӝыт но ӵукна Соин данъяськыны луо, дыр, дась. Кизем ю тысьёсысь ӝутске улон, Шудбур, зэмлык но яратон мылкыд... Азьпал малпанъёсыд нош секытэсь, оло, Малы куддыр мӧзмыт учке синмыд? Зоро пилем мед люкаськоз инмын, Куазьлэсь уз кепыра кизись-арась. Мукет муген висе, пе, сюлэмы: Няньлэсь дунзэ куддыр уг лу валась. Зэмзэ но, дыр, мултэс шырыт сяммы Вордӥськытэ кезьыт сюлэмъёсты. Нош кусыпъёс возён бусыямы Ӧжыт на кизиськом ӟеч сямъёсты. Озьы ке но, мон юн-юн оскисько: Уз сайя сьӧд пилем ӟар шундыез. Лачмыт, мусояса шорылӥсько Батыр ужын кылдэм-ӝужъем нянез. Та кылбурме мон, вань сюлэм мылкыдме поныса, сьӧдкысъем, йӧно воргоронэз син азям пуктыса гожтӥ тямыстонэтӥ аръёсы. Малы ке шуоно, соку вордскем палъёсам колхозэн кивалтыны кутскиз Николай Федорович Чувашов. Доре ӝамдэлы бертылыкум угось мемее но дядяе верамысь ик уг дугдыло вал выль кузёзы сярысь. - Дорамы скал гидэ вуэ ке, ваньмы шоры нимын-тулын, лачмыт, мусояса кадь вазе, - шуылӥз мемее. - Ужмы секыт шуыса, милемыз жаля. Кызьы ке но, маин ке но юрттыны, мылкыдмес ӝутыны турттэ. Сыӵе вирсэрлы муртлы ӟеч гинэ карем потэ. Зэмзэ но, Николай Федорович ужан дыръя азьвыл куашкам "Дружба" колхоз узырмиз, вылӥе ӝутскиз. Котькуд бертэмелы мон адӟисько вал маке но выльзэ, сюлэмез шунтӥсьсэ. Ма, адямиос но пумен воштӥськизы, адӟизы�шӧдӥзы угось гижысь-пиньысь ужамзылэсь пайдазэ. Собере соос понна вань ӟечсэ гинэ лэсьтӥсь кузёзы азьын но возьыт потӥз угось. - Ку со милям кӧлэ, ӧйтӧд, - жаляса, оло, данъяськыса верамзэ кылӥ Василий Федорович Замеров мӧйы комбайнерлэсь. - Бер ӝыт но, вазь ӵукна но ужан интыяз тылыз ӝуа. Аран дыръя нош, оло, бусыысь ик уг кошкылы, лэся. Котькытын сямен ик гурт калык пӧлын но котькыӵеез вань. Куд-огез ӧз валаллялэ Николай Федоровичез, секыт кылын вӧсь карыны но шедьтылӥзы. Кузё ӧз яратылы угось азьтэмъёсыз, юисьёсыз. Соослы маза ӧз сётылы, кылзэс юалляз, кулэ ке, кужмысь эмъяськыны ыстылӥз. Мынам Булай починка гуртам но сыӵегес воргорон вал. Со, пичи мурт сямен, кузёослы ӧчкарыны яратылӥз. Уг тодӥськы, кыӵе эмъюм солы шедьтӥз Николай Федорович, но адями син азьын воштӥськиз, азьмынӥсь комбайнер луиз. Одӥг пол гуртам бертӥсько но дядяе ӝож тусын мыным шуэ: - Николай Федоровичлэн сюлмаз шуккем, больницае нуизы. Мед гинэ эмъясалзы. Ми кадьёслы луыса, адями медаз быры. Ваньмыз понна укыр трос сюлмаське уго. Йӧназ ке, сое татын кема уз возе, со кадь визьмооссэ вылэ басьто. Зэмзэ но, колхоз умой-умой пыд йылаз султэм бере, Николай Федоровичез Увае кивалтыны басьтӥзы, собере - Иже. Озьы ке но, "улӟытэм" колхозэныз Чувашов весяклы, дыр, гогыяськиз. Сое татын гажало, дуно кунозэс кадь витё, шуг-секытъёс кылдыку, куронэн вазисько. Тодо угось: Николай Федорович быгатэмезъя одно юрттоз. Одӥг пумиськонамы Чувашовсюлмыз вӧсь луыса мыным ӝожтӥськиз. - Тани ми пукиськом Кун Кенешын, калыклэсь улон-вылонзэ ӟечгес, байгес картыны сюлмаськиськом кадь. Нош улонмы чылкак мыддорин кошке. Калыклэсь возьыт. Сессиын ӟеч ӵектонэн потӥськод ке, тросэз валамтэ улэ кариське, уг кут сое. Ми кадьёс угось отын ӧжытгес. Соин кытӥяз, ваньзэ куштыса, гуртын ужам потэ. Огшоры адямиосын огшоры ужез быдэсъясал. Тазэ гинэ ватсасал на: Николай Федорович кадь юн сямо адямиос уногес луысалзы ке, оскисько, улонмы ӟечгес луысал. Шуд но тазалык сӥзем потэ гажано адямилы. Гурт калык солэсь тыршемзэ адӟытэк уз кельты. Галина Романова, кылбурчи. 2. Быръёнъя комиссилэн кенешон правоен членъёсызлы тупатэмын комиссиослэн решениос кутон правоен членъёсызлы кадесь ик вань правоос быръёнэз дасян но ортчытон ужъёсын быръён бюллетеньёсты сётъян, быръён бюллетеньёсты люкылонэ но лыдъянэ пыриськон, куарасётэмлы, быръёнлы йылпумъянъёс сярысь протокол гожъян правоез, та комиссилэн компетенцияз пырись ужпумъя решение кутыку куарасётонэ пыриськон правоез но быръён комиссилэн решениез улэ гожтӥськон правоез вератэк. 31-тӥ ёзэт. Быръёнъя комиссилэсь ужзэс радъян 1. Быръёнъя комиссиос ужзэс быдэсъяло, дэмен кенешыса. 2. Быръёнъя комиссия ужез борды кутскыны быгатэ, чакламъя солэн вань членъёсыз пӧлысь ичизэ кык куиньмосэз юнматэмын ке. 3. Улосвылысь, округысь, участокысь быръёнъя комиссия нырысетӥ заседанизэ ортчытэ комиссилэсь членъёссэ юнматэм сярысь решение кутэм бере куинь нунал куспын, Удмурт Республикаысь Быръёнъя комиссия - вить нунал куспын. Быръёнъя комиссилэсь бӧрысь заседаниоссэ люка комиссилэн тӧроез яке солэн косэмезъя - тӧролэн воштӥсез, озьы ик комиссилэн решение кутон правоен членъёсыз пӧлысь ичизэ одӥг куиньмосэз куремъя. 4. Быръёнъя комиссилы тӧроез, тӧролэсь воштӥсьсэ но секретарез комиссилэн членъёсыз пӧлысь комиссилэн нырысетӥ заседанияз лушкем куарасётыса. 5. Удмурт Республикаысь Быръёнъя комиссилэн заседаниез быдэс правоен луэ, отчы люкаськемын ке комиссилэн решение кутон правоен ичизэ кык куиньмосэз членъёсыз. Быръёнъя мукет комиссиослэн заседаниоссы быдэс правоен луо, отчы люкаськемын ке быръёнъя комиссилэн решение кутон правоен членъёсызлэн тупатэм огъя лыдзы пӧлысь ӝыныезлэсь тросэз. 6. Быръёнъя комиссилэн решение кутон правоен членъёсыз кулэ комиссилэн ваньмаз заседаниосаз ветлыны, быръёнъя комиссилэсь решенизэ кутонъя куарасётонэ пыриськыны. 7. Быръёнъя комиссилэн тӧро, тӧролы воштӥсь но секретарь быръён сярысь, быръёнэз дасяны но ортчытыны коньдон кутон, кандидатъёсты пусъён, кандидатъёсты пусъемез быдтон, куарасётонлы яке быръёнлы йылпумъянъёс лэсьтон, быръёнэз пӧрмымтэен яке ярантэмен лыдъян, выльысь быръён ортчытон, быръёнъя улӥысь комиссилэсь решенизэ палэнтон ужпумъёсъя решениосыз кутӥсько быръёнъя комиссилэн заседанияз, быръёнъя комиссилэн решение кутон правоен членъёсызлэн тупатэм огъя лыдзы пӧлысь ӝыныезлэсь ятырез куарасётыса. Мукет ужпумъёсъя решениос кутӥсько, комиссилэн заседанияз лыктэм решение кутон правоен членъёсыз пӧлысь ӝыныезлэсь ятырез куарасётыса. "Понна" но "пумит" сётэм куараос огмында луыку, берпуметӥ кылзэ вера быръёнъя комиссилэн тӧроез. 8. Быръёнъя комиссилэн решениез, протоколэз улэ кинюртэмъёссэс пукто комиссилэн тӧроез но секретарез. 9. Быръёнъя комиссилэн членъёсыз, соглаш уг луо ке комиссиен кутэм решениеныз, быгато гожтыса сётыны асьсэлэсь малпанзэс, та комиссия сое эскерыны кулэ, возьматоно комиссилэн протоколаз, бырттоно со борды, комиссилэн тӧроез со сярысь ивортыны кулэ быръёнъя вылӥысь комиссилы куинь нуналскын, нош быръён нуналэ но ӵуказеяз - ӝегатскытэк. 10. Быръёнъя комиссиослэсь та Законлы, Федерацилэн законъёсызлы но Удмурт Республикалэн законъёсызлы пумит луись яке полномочиоссылэсь ортчыса кутэм решениоссэс палэнтыны кулэ быръёнъя вылӥысь комиссия яке суд, судъян улэ шедёнэз чакласа: Удмурт Республикаысь Быръёнъя комиссилэсь решениоссэ - Удмурт Республикаысь Вылӥ Суд, быръёнъя мукет комиссиослэсь - ёросъёсысь судъёс. Быръёнъя вылӥысь комиссия быгатэ ӝожтӥськон, вазиськон пумысен аскожаз решение кутыны, быръёнъя улӥысь комиссилэсь решенизэ палэнтыса. 11. Удмурт Республикаысь Быръёнъя комиссилэн вань аслаз аппаратэз, солэсь структуразэ но штатсэ тупатэ ачиз комиссия, бюджетысь солы кӧня коньдон висъямез лыдэ басьтыса. Комиссилэн аппаратаз ужасьёс лыдъясько кун служащийёсын. Быръёнъя мукетъёсыз комиссиосыз быгато быръёнэз дасян но ортчытон вакытэ огдырлы аппаратъёссэс кылдытыны, соослэсь структуразэс но штатъёссэс тупато быръёнъя со комиссиос, бюджетысь соослы кӧня коньдон висъямез чакласа. Быръёнъя комиссиос быгато, быръёнэз дасянэн но ортчытонэн герӟаськем ужъёсты быдэсъян вылысь, палэнысь адямиосты ӧтчаны, ужан сярысь кылтупанъёс гожтыса. 12. Удмурт Республикаысь Быръёнъя комиссилы ужаны коньдон висъяське Федерацилэн бюджетысьтыз но Удмурт Республикалэн бюджетысьтыз. Удмурт Республикаысь Быръёнъя комиссилы ужаны коньдон висъян смета нимаз чурен пыртӥське республикая бюджетэ. 32-тӥ ёзэт. Быръёнъёсъя комиссиослэсь ужзэс шара возьматон 1. Быръёнъя комиссиослэн ваньмаз заседаниосазы ветлыны быгато быръёнъя вылӥысь комиссиослэн членъёссы, быръёнъя таиныз яке вылӥысь комиссиен пусъем кандидатъёс яке соослэн оскем муртъёссы, быръёнъя сыӵе огазеяськонъёслэн но быръёнъя блокъёслэн нимысьтыз висъям адямиоссы, кудъёсызлэсь кандидатъёссэс пусйиз быръёнъя таиз яке вылӥысь комиссия, озьы ик калык пӧлы иворъёс вӧлмытонъя ёзъёслэн ыстэм муртъёссы. Заседаниосы со муртъёслы ветлыны лэзись ватсаса кыӵе ке документ кулэ ӧвӧл. Быръёнъя со комиссия сыӵе адямиослы заседаноисы эркын пырыны луонлык сётэ. Быръёнъя комиссиослэн заседаниосазы ӝожтӥськонъёсты эскерыку, отчы лыктыны быгато со ӝожтӥськонъёсын герӟаськемъёслэн ыстэм муртъёссы. 2. Быръёнъя комиссиослэн решениоссы поттӥсько калык пӧлы иворъёс вӧлмытонъя сыӵе ёзъёсын, кудъёссэ кылдытӥзы (мукетъёсын ӵош кылдытӥзы) кун яке интыысь органъёс яке кудъёсызлы коньдон быдэсак яке ог люкетэз висъяське республикая яке интыысь бюджетысь яке кудъёсызлы тупатэмын налогъёсъя но одно тыронъёсъя капчиятонъёс, иворъёс вӧлмытонъя со ёзъёслы бюджетъёсысь висъям коньдон чотын, озьы ик сётӥсько иворъёс вӧлмытонъя мукет ёзъёсы. 3. Быръён нуналэ участокысь быръёнъя комиссия ужаны кутскем дырысен куарасётэмлы йылпумъянъёс сярысь протоколэз, округысь быръёнъя комиссия кутэм сярысь ивор вуытозь, участокъёсысь быръёнъя комиссиосын бырйисьёслэсь куарасётэмъёссэс кыкетӥзэ лыдъяку, озьы ик округъёсысь быръёнъя комиссиосын быръёнлы йылпумъянъёс лэсьтыку но йылпумъянъёс сярысь протоколъёс гожтыку, бырйисьёслэсь куарасётэмъёссэс выльысь лыдъяку, отын луыны быгато та ёзэтлэн 1-тӥ пунктаз верам муртъёс, озьы ик чакласьёс, мукет странаосысь (калыккуспо организациосысь) эскерисьёс. 4. Воинской частьёсын, санаторийёсын, профилакторийёсын, эмъяськонъя но висёнъёслэсь утёнъя ялан ужась мукет учреждениосын, озьы ик следствие нуон вакытэ висъяса но огдырлы ӝегатыса возён интыосын, бырйисьёслэн огдыр ӵоже улон мукет интыосазы кылдытэм быръёнъя участокъёсын отысь быръёнъя комиссилэн ужан интыяз, куарасётон интыосы пыраны лэземын быръёнъя комиссилэн вань членъёсызлы, чакласьёслы, та ёзэтлэн 1-тӥ пунктаз верам муртъёслы. 5. Чакласьёс, иворъёс вӧлмытонъя ёзъёслэн ыстэм муртъёссы, мукет странаосысь (калыккуспо организациосысь) чакласьёс быгато быръёнъя мукет комиссиосы ветлыны, соос быръёнлы йылпумъянъёс лэсьтыку, быръёнлы йылпумъянъёс сярысь протоколъёс гожтыку, озьы ик бырйисьлэсь сётэм куараоссэс выльысь лыдъяку. 6. Чакласьёс, иворъёс вӧлмытонъя ёзъёсысь ыстэм адямиос быгато участокъёсысь быръёнъя комиссиослэн куарасётэмлы йылпумъянъёс сярысь протоколъёсынызы но округъёсысь быръёнъя кмиссиослэн быръёнлы йылпумъянъёс сярысь протоколъёсынызы тодматскыны, сыӵе протоколъёслэсь но соос борды сётӥськись документъёслэсь копиоссэс лэсьтыны яке отысь быръёнъя комиссиос киысь басьтыны. Быръёнъя комиссиослэн протоколъёссылэсь но мукет документъёссылэсь копиоссэс гожтӥськыса юнматэ комиссилэн тӧроез яке секретарез. Соку соос отчы гожто "Копия зэм", кинюртэмзэс но быръёнъя со комиссилэсь печатьсэ пукто. 33-тӥ ёзэт. Быръёнъя комиссиез быдтон 1. Удмурт Республикаысь Быръёнъя комиссия, улосвылысь, округысь, участокысь быръёнъя комиссия тӥяз ке гражданъёслэсь быръён правооссэс, соин сэрен та интыын куарасётэмлы йылпумъянъёс яке быръёнлы йылпумъянъёс ярантэмен лыдъямын ке (судлэн решениезъя но), быръёнъя со комиссиез быдтыны быгатэ суд, судъян улэ шедёнэз чакласа, кудӥз тупатэмын та Законлэн 31-тӥ ёзэтысьтыз 10-тӥ пунктын. 2. Удмурт Республикаысь Быръёнъя комиссиез быдтон пумысен судэ вазиськыны быгато Россия Федерациысь Федеральной Собранилэн Федерацияя Советысьтыз вань членъёс яке Кун Думаысьтыз вань депутатъёс пӧлысь ичизэ одӥг куиньмосэз яке Удмурт Республикаысь Кун Кенешлэн вань депутатъёсыз пӧлысь ичизэ одӥг куиньмосэз, озьы ик Россия Федерациысь Быръёнъя Центральной комиссия. 3. Улосвылысь, округысь, участокысь быръёнъя комиссиез быдтон пумысен судэ вазиськыны быгато Кун Кенешлэн вань депутатъёсыз пӧлысь ичизэ одӥг куиньмосэз яке со интыысь аскивалонъя быръем органлэн вань депутатъёсыз пӧлысь ичизэ одӥг куиньмосэз, озьы ик Россия Федерациысь Быръёнъя Центральной комиссия, Удмурт Республикаысь Быръёнъя комиссия. 4. Быръёнъя комиссиез быдтон пумысен вазиськон эскерыны кутӥське ӝегатскытэк но соя решение кутӥське 14 нунал куспын. Быръёнъя комиссиез быдтон сярысь Федерацилэн законъёсызъя суд эскере, дэмен кенешыса. 5. Кун властья органъёс яке интыосын аскивалтонъя органъёс, кудъёсызлы право сётэмын быръёнъя комиссия кылдытыны, судлэн быръёнъя комиссиез быдтон сярысь решениез кужыме пырем дырысен 14 нунал куспын кылдытыны кулэ быръёнъя сыӵе выль комиссия. 6. Быръёнъя комиссиез быдтэмен валче, комиссилэн кенешон правоен членъёсызлэн полномочиоссы уг дугдытӥсько. 4-тӥ йырет Быръёнъя округъёс но быръёнъя участокъёс. Бырйисьёслэн списокъёссы 34-тӥ ёзэт. Быръёнъя округъёсты кылдытон 1. Кун Кенеше депутатъёсты быръён понна кылдытӥсько одӥг мандатэн (одӥг округ - одӥг депутат) быръёнъя округъёс, соос тупаны кулэ таӵе куронъёслы: а) быръёнъя округъёс бырйисьёслэн лыдзыя огкадесьгес луыны кулэ, бырйисьёслэн тупатэм шорлыдзылэсь троссэ 10 процентлы пӧртэмесьгес карыны лэзьыса; б) быръёнъя округ луэ огъя улосвыл, артэ луисьтэм условылъёсын быръёнъя округъёс кылдытыны лэземын ӧвӧл. 2. Быръёнъя округъёс кылдытон пумысен та ёзэтлэн 1-тӥ пунктаз верам куронъёсты чаклаку лыдэ басьтӥське Удмурт Республикалэсь административной улосвылъёссэ радъян. 3. Одӥг округысь бырйисьёслэн шорлыдзы тупатӥське, Удмурт Республикаысь вань бырйисьёслэсь лыдзэс округъёслэн лыдзылы люкыса. 4. Быръёнъя округъёс кылдытӥсько, сояз яке таяз улосвылын пусъем бырйисьёслэсь лыдзэс но быръёнъя округъёслэсь гожъёссэс чакласа. Сыӵе ивортонъёс Удмурт Республикаысь Быръёнъя комиссие сёто муниципальной ёзъёслэн йыръёссы, ёросъёсысь, городъёсысь администрациослэн йыръёссы быръён ортчытон сярысь ялэм бере 5 нуналскын. 5. Удмурт Республикаысь Быръёнъя комиссия быръён нуналлэсь 70 нунал азьло дася быръён округъёс кылдытон схемаез. Отын возьматӥсько соослэн гожъёссы, быръёнъя котькуд округе пырись гуртъёс, посёлокъёс (ульчаос, улон коркаос), быръёнъя котькуд округлэн номерез, нимыз но центрез, быръёнъя котькуд округысь бырйисьёслэн лыдзы. 6. Кун Кенеш, Удмурт Республикаысь Быръёнъя комиссилэн ӵектэмезъя, законэн юнматэ быръёнъя округъёс кылдытон схемаез но быръён нуналлэсь 60 нуналлы вазьгес печатьын поттэ со схемаез, озьы ик солэсь графикаен суредзэ. 7. Кун Кенешлэсь полномочиоссэ дырызлэсь вазь дугдытон учыре яке быръёнъя округъёслэн схемазы та ёзэтэн дыръёсы юнматэмын ӧз луы ке, быръён ортчытӥське сыӵе быръён округъёсъя, кудъёсызлы схема юнматэмын вал Кун Кенешлэн азьвыл ӧтчамаз депутатъёсты бырйыку. 35-тӥ ёзэт. Быръёнъя участокъёсты кылдытон 1. Быръёнъя участокъёсты кылдыто муниципальной ёзлэн йырыз, ёросысь, городысь администрацилэн йырыз, со улосвылысь быръёнъя комиссиен кенешыса, быръёнъя участоклэн улосвылаз пусъем бырйисьёслэсь лыдзэс чакласа, быръён нуналлэсь 45 нуналлы вазьгес. Быръёнъя котькуд участокын бырйисьёслэн лыдзы 50-лэсь ӧжыт но 300о-лэсь трос медаз луы. 2. Быръёнъя участокъёс кылдытӥсько, Удмурт Республикалэсь административной улосвылыъёссэ радъямез, озьы ик интыосысь аспӧртэмлыкъёсты чакласа, бырйисьёслы куарасётонэ пыриськыны тужгес умоесь луонлыкъёс кылдытон вылысь. Быръёнъя участокъёсты быръёнъя округъёслэн гожъёссы вамен потыса кылдытыны уг яра. 3. Санаторийосын, профилакторийосын, шутэтскон юртъёсын, больницаосын, эмъяськонъя но висёнъёслэсь утёнъя мукет учреждениосын, озьы ик следствие нуон вакытэ висъяса но огдырлы висъяса возён интыосын, бырйисьёслэн огдыр ӵоже улон мукет интыосазы быръёнъя участокъёс кылдытыны луэ та ёзэтын тупатэм радлыкъя но учыръёсы, нош куд-ог нимысьтыз дыръёсы - быръён нуналлэсь азьло вить нунал куспын. 4. Военнослужащийёс куарасётонэ пырисько быръёнъя огъя участокъёсын. Воинской частьёсын быръёнъя участокъёс кылдытыны луэ, соос палэнэ, городъёслэсь, гуртъёслэсь кыдёке интыяськемын ке. Сыӵе учыръёсы быръёнъя участокъёсты со улосвылысь быръёнъя комиссилэн решениезъя кылдыто воинской частьлэн командиръёссы. 5. Быръёнъя участокъёслэсь списокъёссэс соослэсь гожъёссэс но номеръёссэс, участокъёсысь быръёнъя комиссиослэсь интыяськемзэс но куарасётон интыосты вераса, печатьын потто муниципальной ёзлэн йырыз, ёросысь, городысь администрацилэн тӧроез быръён нуналлэсь 25 нуналлы вазьгес. 36-тӥ ёзэт. Бырйисьёсты гожтыса пусъён (лыдэ басьтон) 1. Федерацилэн законъёсыныз тупатэмъя гожтыса пусйыны (лыдэ басьтыны) кулэ активной быръён правоен ваньзэ гражданъёсты. 2. Бырйисьёсты пусъён (лыдэ басьтон) понна тырмыт луэ гражданинлэн со улосвылын ялан яке ӵемгес улэмез, кудзэ зэмен лыдъяло калыкез гожтыса лыдэ басьтонъя органъёс, Федерацилэн законъёсыныз чакламъя. 3. Бырйисьёсты пусъёнэз (лыдэ басьтонэз) радъяло муниципальной ёзлэн йырыз, ёросысь, городысь администрацилэн йырыз, воинской частьлэн командирез, котькуд арлэн 1-тӥ январезлы но 1-тӥ июлезлы учкыса. Соку уже кутӥське иворъёсты люкан- сётъянъя автомат амалэн ужась "Быръёнъёс" кун система. 4. Удмурт Республикаысь кун властьлэн быдэсъясь органъёсыз кулэ юрттэт сётыны интыосын аскивалтонъя органъёслы но быръёнъя комиссиослы, бырйисьёсты пусйыку (лыдэ басьтыку) но пусъем бырйисьёс сярысь гожтэмъёслэсь шонер лумэзэс учкыку. 5. Бырйисьлэн правоез вань ачиз сярысь (нимаз) гожъямъёсын документъёсты учкыны, машина пыр лыдӟонооссэ но вераса, со гожъямъёсты тырмытгес но шонер карон вылысь, озьы ик правоез вань тодыны, кин но ма понна уже кутэ яке кутӥз ини со гожъямъёсты. 37-тӥ ёзэт. Бырйисьёслэн списокъёссы, соосты дасян радлык 1. Бырйисьёслэн списокъёссы дасясько бырйисьёсты пусъёнъя (лыдэ басьтонъя) кун системаез уже кутыса басьтэм иворъёсъя. Пусъем бырйисьёс сярысь иворъёсты дасяло но тупатъяло со ёросысь, городысь администрация, нош воинской частьын улӥсь бырйисьёс- военнослужащийёс, соослэн семьяосысьтызы адямиос но воинской часть интыяськем улосвылын улӥсь мукет бырйисьёс сярысь - воинской частьлэн командирез. Пусъем бырйисьёс сярысь иворъёсты муниципальной ёзъёслэн йыръёссы, ёросъёсысь, городъёсысь, городлэн ёросъёсысьтыз администрациослэн йыръёссы улосвылъёсысь быръёнъя комиссиослы сёто быръён нуналлэсь 45 нуналлы вазьгес. Удмурт Республикаысь Вылӥ суд, ёросъёсысь судъёс Удмурт Республикаысь Быръёнъя комиссие но улосвылъёсысь быръёнъя комиссиосы быръён нуналлэсь 30,15 но 3 нуналлы вазьгес сётыло сыӵе бырйисьёс сярысь иворъёс, кудъёссэ суд лыдъяз ас ужъёссы понна кыл кутыны быгатӥсьтэмен, озьы ик кудъёсыз судлэн приговорезъя возисько эриклэсь люкон интыосын. 2. Бырйисьёслэсь списоксэс быръёнъя котькуд участокъя нимаз дася улосвылысь быръёнъя комиссия, иворъёс люкан-сётъянъя автомат амалэн ужась кун системаез уже кутыса. Воинской частьын улӥсь бырйисьёслэсь-военнослужащийёслэсь, соослэн семьяосысьтызы адямиослэсь но воинской часть интыяськем улосвылын улӥсь мукет бырйисьёслэсь списоксэс дася отысь участокысь быръёнъя комиссия. Воинской частьлэн палэназ улӥсь военнослужащийёс огъя тупатэм амалэн пыртӥсько улон интыя бырйисьёслэн списокъёсазы. 3. Сыӵе бырйисьёслэсь списокъёссэс, кудъёсыз быръён нуналэ луозы санаторийосын, профилакторийосын, шутэтскон юртъёсын, больницаосын, эмъяськонъя но висёнъёслэсь утёнъя ялан ужась мукет учреждениосын, озьы ик следствие нуон вакытэ висъяса но огдырлы висъяса возён интыосын, бырйисьёслэн огдыр ӵоже улон мукет интыосазы, дасяло участокъёсысь быръёнъя комиссиос со учреждениослэн кивалтӥсьёсынызы сётэм иворъёсъя. 4. Бырйисьёслэн списоказы гожтэмын луэ бырйисьлэн фамилиез, нимыз, атай нимыз, вордскем арез (быръён аре 18 арессы тырмем гражданъёслэн - вордскем нуналзы), улон адресэз. Список дасяське алфавитъя но Удмурт Республикаысь Быръёнъя комиссиен тупатэм формая. 5. Бырйисьёслэн списоксы улэ гожтӥсько улосвылысь быръёнъя комиссилэн тӧроез но секретарез, нош со списокез участокысь быръёнъя комиссилы сётэм бере - озьы ик участокысь быръёнъя комиссилэн тӧроез но секретарез. Воинской часть интыяськем улосвылын кылдытэм быръёнъя участокъёсын бырйисьёслэн списоксы улэ гожтӥсько участокысь быръёнъя комиссилэн тӧроез но секретарез. Бырйисьёслэн списоксы юнматӥське со улосвылысь но участокысь быръёнъя комиссиослэн печатьёсынызы. 6. Бырйисьёслэн списокъёссы дасясько быдэн кыкен, Нырыетӥоссэ списокъёсты улосвылысь быръёнъя комиссия актъя сётэ участокъёсысь быръёнъя комиссиослы быръён нуналлэсь 25 нуналлы вазьгес. Кыкетӥосыз списокъёс кылё улосвылысь быръёнъя комиссия кие но кутӥсько улосвылысь быръёнъя комиссилэн ужан интыяз дырызлэсь вазь куарасётонэз ортчытон понна. 38-тӥ ёзэт. Гражданъёсты бырйисьёслэн спискоъёсазы пыртон радлык 1. Бырйисьёслэн списокъёсазы пыртӥсько ваньмыз гражданъёс, кинъёслэн быръён нуналлы вань активной быръён правозы. Гражданинэз быръёнъя участокысь бырйисьёслэн списоказы пыртон понна тырмыт луэ, та улосвылын солэн ялан яке ӵемгес улэмез, кудзэ калыкез гожтыса лыдэ басьтонъя органъёс зэмен лыдъяло Федерацилэн законъёсызъя нош Федерацилэн законъёсыныз чаклам учыръёсы - та участоклэн улосвылаз огдыр ӵоже улэмез, кудӥз зэмен лыдъяське Федерацилэн законъёсызъя. 2. Бырйисьёслэн списоказы бырйисез пыртыны луэ быръёнъя одӥгаз гинэ участокын. 3. Сыӵе гражданъёсты, кудъёсыз быръёнъя участоклэн улосвылаз вуизы бырйисьёслэсь списоксэс ваньмызлы тодматскыны сётэм бере, озьы ик сыӵе муртъёсты, кинъёс бырйисьёслэн списоказы кыӵе ке мукет муген пыртытэк кельтэмын вал, участокысь быръёнъя комиссия ватсаса пыртэ бырйисьёслэн списоказы, со адямиослэсь кин луэмзэс возьматӥсь но быръёнъя та участоклэн улосвылаз улэмзэ валэктӥсь документъёсъя. 4. Участокысь быръёнъя комиссия бырйисьёслэн списокъёссылэсь шонер луэмзэс эскере но отчы тупатонъёс пыртэ, интыын аскивалтонъя органъёсын, бырйисьёсты пусйись (лыдэ басьтӥсь) учреждениосын но организациосын герӟаськыса. 5. Улосвылысь быръёнъя комиссилэн тӧроез но секретарез бырйисьёслэн списоксы улэ гожтӥськем бере, гражданинэз со списокысь куштыны луэ бырйисьёсты пусйись (лыдэ басьтӥсь) органъёслэсь басьтэм валэктонъя гинэ. Соку бырйисьёслэн списоказы гожтӥське гражданинэз отысь куштэм нунал но озьы лэсьтэмлэн мугез. Со гожтэмез кинюртыса юнматэ участокысь быръёнъя комиссилэн тӧроез яке тӧролэн воштӥсез яке секретарез. 39-тӥ ёзэт. Гражданъёсты бырйисьёслэн списокъёсынызы тодматон 1. Участокысь быръёнъя комиссия бырйисьёслэсь списоксэс поттэ, тодматон но отчы ватсаса тупатонъёс пыртон понна, быръён нуналлэсь 20 нуналлы вазьгес. 2. Гражданъёслы луонлыкъёс кылдытӥсько участокысь быръёнъя комиссилэн ужан интыяз бырйисьёслэн списокенызы тодматскыны, ачиз сярысь отчы гожтэмез но солэсь шонер луэмзэ эскерыны. 3. Котькуд гражданинлы право сётэмын участокысь быръёнъя комиссилы вераны сое бырйисьёслэн списоказы пыртытэк кельтэм сярысь, озьы ик списоке шедем котькыӵе янгыш яке умойтэм гожтэм сярысь. Участокысь быръёнъя комиссия кутэ сыӵе вазиськонэз эскерыны но янгышез яке умойтэм гожтэмез палэнтыны 24 час куспын, нош быръён нуналэ - вазиськем бере кык час куспын, но куарасётон йылпумъяськытозь, яке вазиськисьлы куронзэ быдэстыны луонтэмлэсь мугзэ гожтыса валэктон сётыны. 4. Участокысь быръёнъя комиссилэн решениез пумысен ӝожтӥськонэн вазиськыны луэ быръёнъя вылӥысь комиссие яке судэ, таосыз ӝожтӥськонэз (вазиськонэз) эскерыны кулэ куинь нуналскын, нош быръён нуналэ - ӝегатскытэк. Вазиськисьлы дурбасьтон решение кутэмын луиз ке, участокысь быръёнъя комиссия бырйисьёслэн списоказы тупатон пыртэ ӝегатскытэк. 5. Куарасётон йылпумъяськем но бырйисьёслэсь куараоссэс лыдъяны кутскем бере, бырйисьёслэн списоказы нокыӵе воштонъёс пыртыны лэземын ӧвӧл. 5-тӥ йырет Депутатэ кандидатъёсты ӵектон но пусъён 40-тӥ ёзэт. Депутатэ кандидатъёсты ӵектон дыръёс Депутатэ кандидатъёсты ӵектон кутске быръёнъя округъёс кылдытон схемаез печатьын поттэм бере. 41-тӥ ёзэт. Кандидатъёсты бырйисьёсын меӵак ӵектон радлык 1. Кандидатъёсты бырйисьёсын меӵак ӵектон ортчытӥське, соос асьсэды асьсэос дэмласа, озьы ик та кандидат понна куарасётон понна активной быръён правоен бырйисьлэн, кӧня ке бырйисьёслэн кичӧлтэмзыя (кудъёсыз ялан яке ӵемгес уло быръёнъя сыӵе округлэн улосвылаз, кытын бырйыны соглаш луэ кандидат), со сярысь ивортӥське та округысь быръёнъя комиссилы но бӧрысь кутске дэмлам кандидатъёслы дурбасьтонъя гожтӥськемъёс люкан. 2. Кандидатэз бырйисьёсын меӵак ӵектэм сярысь со округысь быръёнъя комиссие гожтыса ивортон сёто кандидатэз ӵектонын кичӧлтӥсьёс яке ачиз кандидат. Ивортонын гожтэмын мед луоз ӵектэм кандидатлэн фамилиез, нимыз, атай нимыз, вордскем арез, ужан интыез, должностез (ужан удысэз) но улон интыез. Ивортон борды сётӥсько кандидатэз ӵектӥсь бырйись (бырйисьёс) сярысь гожтэмъёс - фамилиоссы, нимъёссы, атай нимъёссы, вордскем аръёссы, улон интыоссы, озьы ик мед луоз солэн (соослэн) кинюртэмез (кинюртэмзы). 3. Округысь быръёнъя комиссие ивортонэн ӵош сётӥське ӵектэм кандидатлэн быръёнъя та округъя бырйыны соглаш луэмез сярысь гожтыса вазиськемез но, со быръемын луиз ке, депутатлэн статусэзлы тупасьтэм ужъёсты быдэсъямысь дугдыны кыл сётэмез. Судлэн кандидат пумысен приговорез куштэмын яке кужымысь потэмын ӧвӧл ке, со мукет кунлэн гражданинэз луэ на ке, вазиськонын гожтыны кулэ со сярысь, Россия Федерацилэн Уголовной кодексысьтыз та ужъя ёзэтэз (ёзэтъёсты), сьӧрлось кунлэсь нимзэ вераса. 42-тӥ ёзэт. Быръёнъя огазеяськонъёс но быръёнъя блокъёс 1. Быръёнъя огазеяськонъёс но быръёнъя блокъёс Кун Кенеше депутатъёсты быръёнэ пырисько огкадь, Федерацилэн законъёсыныз, та Законэн но Удмурт Республикалэн мукет законъёсыныз тупатэм радлыкъя. 2. Быръёнъя блокъёсты кылдыто быръёнъя огазеяськонъёслэн правоосынызы ичизэ кык политической общественной огазеяськонъёс. Политической общественной огазеяськон пыре ке быръёнъя блоке, со уг быгаты быръёнъя огазеяськон луыса ас кожаз кариськыны яке быръёнъя мукетаз блоке пырыны. 3. Быръёнъя блоке пырон сярысь решение кутӥське политической огазеяськонлэн съездаз (конференцияз), Кун Кенеше депутатъёсты быръён нунал тупатэм бере. Огдыре ик кутыны луэ быръёнъя блоке пырись быръёнъя огазеяськонъёсысь ыстэм муртъёслэн депутатэ кандидатъёсты ӵектон понна люкано огъя съездазы (конференциязы) делегатъёссэс (ыстоно муртъёссэс) быръем сярысь решение. Быръёнъя огазеяськонъёслэн быръёнъя блок кылдытон сярысь ӵош решенизы улэ гожтӥсько со огазеяськонъёслэн оскем адямиоссы. 4. Быръёнъя блокез санэ басьтыса пусъё Удмурт Республикаысь Быръёнъя комиссия, быръёнъя блоклэн оскем адямиез политической общественной огазеяськонъёслэн съездъёссылэсь (конференциоссылэсь) быръёнъя блоке пыронзы сярысь решениоссэс но политической общественной огазеяськонъёслэн быръёнъя блок кылдытэмзы сярысь ӵош кутэм решенизэс ваем бере куинь нунал куспын. 5. Быръёнъя огазеяськон, быръёнъя блок юнмато оскем муртъёссэс, кудъёсызлы право сётӥське быръёнъя огазеяськонлэн, быръёнъя блоклэн нимыныз Кун Кенеше депутатъёсты быръёнэн герӟаськем вань ужъёсты быдэсъяны, коньдон удысъя но. Быръёнъя огазеяськонлэн, быръёнъя блоклэн сыӵе оскем муртъёсызлы сётӥсько удостоверениос. 43-тӥ ёзэт. Быръёнъя огазеяськонъёсын, быръёнъя блокъёсын кандидатъёсты ӵектон радлык 1. Быръёнъя огазеяськон, быръёнъя блок быгато быръёнъя котькуд округын быдэн одӥг кандидат ӵектыны. Быръёнъя огазеяськон, быръёнъя блок депутатэ кандидатъёсты ӵекто быръёнъя огазеяськонлэн съездаз (конференцияз, кенешаз), быръёнъя блоке пырись быръёнъя огазеяськонъёсысь ыстэм муртъёслэн съездазы (конференциязы), соку верало быръёнъя сыӵе округъёсты, кытын бырйыны соглаш луэ котькудӥз кандидат. Кандидатъёсты ӵектон сярысь решение кутӥське, лушкем куара сётыса. Быръёнъя огазеяськон, быръёнъя блок кандидатъёсы ӵектыны быгато отчы пырем быръёнъя огазеяськонъёслэн членъёссы луисьтэм муртъёсты но. 2. Быръёнъя огазеяськон, быръёнъя блок кандидатъёсты ӵектэмзы сярысь гожтыса иворто Удмурт Республикаысь Быръёнъя комиссие. Ивортонын возьматӥсько быръёнъя огазеяськонлэсь съездзэ (конференцизэ, кенешсэ), быръёнъя блоклэсь съездзэ (конференцизэ) ортчытэм нуналъёс, быръёнъя округъёс, кудъёсаз ӵектэмын кандидатъёс, котькуд кандидатлэн фамилиез, нимыз, атай нимыз, вордскем арез, ужан интыез, должностез (ужан удысэз) но улон интыез. 3. Удмурт республикаысь Быръёнъя комиссие со ивортонэн ӵош сётӥсько вань ӵектэм кандидатъёслэн быръёнъя со округъёсын бырйыны соглаш луэмзы сярысь гожтэм вазиськонъёссы но, быръемын луизы ке, депутатлэн статусэзлы тупасьтэм ужъёсты быдэсъянлэсь куштӥськыны кыл сётэмзы. Судлэн кандидат пумысен приговорез куштэмын ӧвӧл яке кужымысь потэмын ӧвӧл ке, мукет кунлэн гражданинэз луэ на ке, вазиськонын гожтыны кулэ со сярысь, Россия Федерацилэн Уголовной кодексысьтыз та ужъя ёзэтэзз (ёзэтъёсты), сьӧрлось кунлэсь нимзэ вераса. 4. Быръёнъя огазеяськонэн, быръёнъя блокен ӵектэм кандидатъёслэсь списоксэс юнматэм сярысь Удмурт Республикаысь Быръёнъя комиссия ӝегатскытэк ивортэ быръёнъя со округъёсысь комиссиослы. 44-тӥ ёзэт. Бырйисьёслэсь кандидатъёслы дурбасьтонъя гожтӥськемъёссэс люкан 1. Кызьы ке бырйисьёсын меӵак, озьы ик быръёнъя огазеяськонъёсын, быръёнъя блокъёсын ӵектэм кадидатъёсты пусъён понна, быръёнъя та округын пусъем вань бырйисьёслэн кык процентсы мында бырйисьёслэсь гожтӥськемъёссэс люканы кулэ. Кун Кенешысь иворъёс Удмурт Элькунысь Кун Кенешлэн Президиумезлэн 16 феврале ортчем заседанияз юнматэмын удмурт парламентлэн кызь витетӥ сесилэн ужан радлыкез. Сессия ужаны кутскоз 24 феврале. Укмыс эскероно ужпумъёс пӧлы пыртэмын "Удмурт Республикаысь Правительстволэн 1998 аре ужамез сярысь отчёт", Удмурт Республикаысь кун Кенешлэн Тӧроезлэн Александр Волковлэн "Удмурт Республикаын югдур сярысь" докладэз. Депутатъёслы эскерыны ӵектэмын Удмурт Республикалэсь 1999 арын социально-экономической азинсконэзъя программазэ, "Республикалэн 1999 арлы бюджетэз сярысь" Законэзлэсь инъетсэ, озьы ик таяз сессие выжтэмын луозы Кун Кенешлэн кызь ньылетӥ сессияз эскерымтэ ужпумъёс. Заседаниез нуиз Удмурт Республикаысь Кун Кенешлэн тӧроезлэн нырысетӥ воштӥсез Владимир Агашин. *** 16 феврале Удмурт Республикаысь Кун Кенешлэн тӧроез Александр Волков Москвае кошкиз. Отын со пыриськоз Федерацияя Советлэн экономикаын политика ужпумъёсъя комитетэзлэн ужаз но Федеральной Собранилэн вылӥ палатаезлэн ужаз, кудӥз ортчиз толон. Заседанилэн ужан радаз пыртэмын вал 17 ужпум. Со пӧлын: "1999 арлы федеральной бюджет сярысь" Федеральной закон, Федерацияя Советлэсь "Государстволэсь промышленностьын политика нуонын ужзэ кужмоятон, Россия Федерациын экономикаез ӝутонъя луонлыкъёс кылдытон сярысь" но Россиысь вуз поттӥсьёслы кун ласянь юрттонъя ивортон. Озьы ик заседаниын кылдэмын луоз Россия Федерациысь Правительстволэн нылпиё гражданъёслы пособиос тыронын пунэмъёсты берыктон, бюджетысь коньдон басьтӥсьёслы уждун тырон сярысь ивортонэз. Удмурт Республикаысь Кун Кенешлэн пресс-службаез. Быдэсак Ӟуч уз лу-а? Сюмси ёросын кыктой ӵоже мынӥзы удмурт культуралы сӥзем нуналъёс. Та палась удмуртъёс доры вуылӥзы Ижысь но солэн палэнысьтыз данак куноос - "Удмурт кенеш" огазеяськонысь, Удмурт лулчеберлыкъя дэменлыкысь адямиос, Удмурт кун филармониысь эстрада кырӟанъя "Шулдыр ӝыт" ансамбльысь, шаерысьтымы культурая училищеысь "Ингур" фольклор ансамбльысб артистъёс, кырӟась Анна Плотникова, тодмо журналистъёс, кылбурчиос, суредъёс, культура удысысь мукет азьветлсьёс. Пумиськонъёс ортчизы пӧртэм интыосын. Удмурт кун филармониысь "Шулдыр ӝыт" ансамбль мылысь-кыдысь кырӟаз Зон: Гура гуртъёсын суредась Леонид Прозоров, журналист но прозаик Кирилл Ломагин, кылбурчи но кырӟась Владимир Возняков но та гуртъёсты гожтӥсь вуылӥзы Гуртлуд, Лекшур, Марнил палъёсы. Юрист но журналист Николай Кузнецов, удмуртлык пона нюръяськисьёс Семен Ильин, Клавдия Исупова лулысь-сюлмысь кенешизы профтехучилищеын дышетскись егитъёсын, библиотекаын ужасьёсын. Ӝыт пал бадӟым концерт ортчиз Сюмси культура юртын. Ижысь лыктэм куноос мылысь- кыдысь ӧръязы сюлэмшуген но шумпотонэн тырмем малпанъёссэс. Люкаськемъёс кыдёкысь вуэмъёслы сюлмысь чабизы. Удмурт культуралы сӥзем нуналъёсты дасянэ но радъянэ лулысь-сюлмысь пыриськыкузы "Удмурт кенеш" огазеяськонлэн Сюмси ёросысь ёзэз, солэн тӧроез Евдокия Ильиных, ёрос кивалтэтысь адямиос. Одӥгез ӝож: та палась удмуртъёс чылкак ӟучомо ни. Тыпак удмурт нимо гуртъёсын - Гуртлудын, Лекшурын, Маркилын - уло трос ӟучъёс. Соин валче амалтэк туж сюлэмшугъяськытӥсь юан кылдэ: Сюмси ёрос азьланяз быдэсак ӟуч уз лу-а? Е. Ромашова. Огъя кыл шедьтэмын Кыӵе пайда сётоз асьме республикалы Беларусь Президентлэн А. Лукашенколэн вуылэмез? Та юан тужгес но сюлмаськытэ обороная предприятиосын ужасьёсты. Ож тӥрлык поттонэн герӟаськем ужпумез А. Лукашенко но Кун Кенешлэн Тӧроез А. Волков эскеризы вал кылем арын Удмуртиысь делегация Беларусь Республикае вуылон дыръя. Табере огъя кыл шедьтэмын ТОР-И зенитной установкаез Ижысь Электромеханической заводын бичан сярысь. Со сяна, Беларусь асьме дорысь басьтыны быгатоз мукет пыӵал тӥрлык но. Минскын усьтэмын луоз соин вузкаронъя магазин. Асьме предприятиослы Беларусь висъялоз 15 миллион доллар коньдон, солэн бадӟым люкетэз мыноз Удмуртиысь обороная предприятиосы. Улэп коньдон тырмымтэен туннэ Беларусьлы секыт йӧтэ. Соин ик кык республикаос куд-ог вузъёсынызы бартер амалэн но вошъяськылозы. Туннэ белорусъёс трос потто телевизоръёс, часъёс, радиоприёмникъёс. Асьме доры вуыны кулэ туала куронъёсъя выльдэм "Горизонт" телевизоръёс, пылесосъёс, холодильникъёс. Али ик вераськемын ни Удмуртиын поттэм эмъяськон техникаез Минске келяны, нош отысь асьме доры вуозы эмъюмъёс. Кык республикаослэн эшъяськонзы шӧдӥськоз асьме гурт хозяйство вылын но. Вуизы ни кӧня ке комбайнъёс. Беларусьысь техникалы воштос ёзъёс поттозы Сарапулысь огаз заводын. Асьме республика та вакытэ тырмыт поттэ ини йӧл автоматъёс. Табере соосты уже кутыны быгатозы ни кыдёкысь эшъёсмы но. СНГ-е пырись государствоос пӧлын Беларусь нырысетӥ инты басьтэ удобрение поттонъя. Татын ужа ньыль бадӟым предприятие. Оскон кылдэ, Беларусьысь ваем удобрениос асьмелы, оло, дунтэмгес но усёзы шуыса. Вынлыко государствоысь вуылэм куноос мылкыдзэс веразы асьме мотоциклъёсмес басьтон сярысь но. Республикаысьтымы огез бадӟымез "Ижмаш-авто" предприятиез но ужтэк уз сылы. Т. БАННИКОВА. Юрттэ - ужысь поттӥзы Евгения Михайловна Курбатовалэн кабинетаз пыриз егит нылкышно. Мар карыны, кытчы вазиськыны, пе, уг тодӥськы. Колхоззылэн кивалтӥсез сое ужысьтыз поттэм, нокытын кенешытэк, приказэн тодматытэк, алонъёсыз но вылӥллямтэ. Ужзэ кулэезъя уг быдэсъя шуыса, интыяз мукет адямиез пуктэм. Нылкышнолэн уже ветлымтэез дырысен ӝоген толэзь луз. Дорын пукыса, семьязэ маин сюдод? Оло, пе, районысь агропромышленной комплексын ужасьёслэн профсоюззылэн кивалтӥсез маин ке юрттыны быгатоз. Ӧз янгыша. Евгения Михайловна пырем муртэ пыр-поч кылзӥз. Дэмлаз судэ вазиськыны, отӥяз, пе, бер лоуз. Ваэктӥз, кызьы но мар кароно. Профсоюзэн кивалтӥсьлы мон но юанъёсын вазиськоно кариськи. - Евгения Михайловна, туала вакытэ профсоюз огазеяськонъёс куашкан калэ вуэмын. Тӥляд ужды вылын но со шӧдӥськытэк ӧз кыльы, дыр? - Азьло вакытъёсы райкомамы вал бухгалтер но, инструктор но, председатель но, секретарь но. Экономикаын шуг-секытъёс кылдэмен валче, ужасьёсты кулэстоно луим. Вань ужъёсты табере аслым быдэстоно луэ. Кытчы ке потоно ке, машина но ӧвӧл. Ужасько уждун басьтытэк, пофсоюз взносъёс уг тырисько угось. Кытысь бен со луоз, гуртын ужасьёс аръёсын уждунэз уг адӟыло ке яке коньдон интые ю тысен сёто. 1997 ар понна тани мон но уждун ю тысен басьтӥ. Кылем арлы со но ӧй вал. - Профсоюз огазеяськонысь потыны мылкыд каронъёс но уждун басьтымтэ бордысь пото, луоз? - Бен, шуг-секытъёслы сётскыса, адямиос профсоюзысь потоно карисько. Аръёсын люкаськем коньдонзэс огазеяськонъёс басьтыны уг быгато, кулэезъя кутэмзы уг луы сое. Адями уждун ке но уг басьты, шуом, ю тысен сётӥзы, уждунысьтыз 1 процентэз кыле. 35 процентэз огъя взнос вылӥ ёзэ кошке, 65-ез кыле огазеяськонлэн кулэяськонъёсызлы. Кинлы ке юрттэт сёт вал яке кыӵе ке огъя ужрадъёсы кут, но со коньдон документъёс вылын гинэ. Солы луыса ик "Тельман" колхозысь огазеяськон профсоюзысь потон сярысь куриськон гожтӥз. "Гигант" колхозын взносъёс кельтэмысь дугдӥзы, но таосыз нокыӵе куриськон ӧз гожтэ. Со профсоюзлэсь уставзэ тӥян луэ. Суд пыр бен луоз взнос тыртыны. Но милемлы керетон кулэ ӧвӧл, огъя ужез быэсъяськом угось. Ветлечебницаысь ужасьёс профсоюзлэсь куштӥськизы вал, но валазы кадь: та шуг-секыт вакытэ огазеяськонтэк улыны капчи ӧвӧл. - Кыӵе ужпумъёсты быдэсъя туннэ нуналлы профсоюз огазеяськонды? Кыӵе юанъёсын лыкто адямиос? - Профсоюз азьын сылӥсь валтӥсь ужпум - гурт удысысь ужасьёслэсь правооссэс утён. Калыклы мон туннэ юрттэт сётыны быгатӥсько консультациос пыр гинэ. Вазисько пӧртэм юанъёсын, но ӵемгес лыкто ужысьтызы умойтэм куштэм пумысен, мултэс каремын, кенешытэк мукет уже выжтэмен. Сюлэмшугъяськытэ адямиосты улон юртсэс приватизировать карон ужпум, янгышен штраф тырытон учыръёс но луо. Юрист доры сямен, вань юанъёсын мон доры лыкто. Али трос воштӥськонъёс но ватсанъёс пыртэмын законодательствое, утчаськытэк, бугыръяськытэк уг луы. Мае ке валэктыны уг быгатӥськы, вазиськисько районысьтымы юристлы, Ижевскысь организациосы. Озьы ке но, вазиськись муртлы трос ужпумъёсъя мон юрттыны уг быгатӥськы. Уждунэз ӝегатон пумысен ик, шуом. Со уж сярысь законодательствоез тӥян, та понна киватӥсьлэсь кылзэ юаны луысал. Но туннэ нуналлы сое коть дас пол судить кар, югдур уз воштӥськы. Уждун тыремез потыса но, кивалтӥсьлэн али сыӵе луонлыкез ӧвӧл. - Ватонэз ӧвӧл, уж сярысь законэз кивалтӥсьёс котьку дыре уг быдэсъяло, сое тӥян учыръёс но луыло. Мар бордысь со потэ? - Тросаз учыръёсы янгышъёс уг лэсьтӥсько юри законэз тӥян понна, тодымтэ бордысь потэ со. Районысьтымы гурт удысъёсын ужась кивалтӥсьёс али тросэз воштӥськемын, ужан опытсы ӧжыт. Безменшурысь тани жингыртӥзы вал, нылпи ваемез бере кунян сюдӥсез азьло ужаз кутӥллямтэ ни. Жингыртӥсько кивалтӥсьлы, сыӵе-сыӵе законэз тӥяды шуисько. Мон, пе, со сярысь уг тодӥськы вал, янгышмес тупатом. Сыӵе учыръёс ӧжыт ӧвӧл. Соин ик районысьтымы актив - гурт хозяйствоя предприятиослэн, колхозъёслэн но совхозъёслэн, гурт кенешъёслэн кивалтӥсьёссы, Кизнер посёлокысь кивалтӥсьёс - адямиосты дышетон ласянь ужпум пуктӥз. Депутатъёслэн кенешазы толэзьлы огпол ортчоз законодательствоя но мукет пӧртэм ужпумъёсъя дышетскон. Гурт хозяйствоя управлениын но гурт удысъёсысь кивалтӥсьёсты дышетонэз радъямы. Нырысь ик выль лыктэмъёсыныз ужалом, собере ини вань кивалтӥсьёсты сюлэмшугъяськытӥсь ужпумъёсты ӝутом. Чакласьком та уже пӧртэм специалистъёсты ӧтчаны. - Евгения Михайловна, профсоюз уж борды тӥ вань сюлмыныды бурмемын кадь. Нош азьланьзэ кызьы адӟиськоды та удыстылэсь? - Профсоюзын мон 1977 арысен ужасько ни. Пенсие потыса но ньылетӥ арзэ люкиськеме уг луы. Тодӥсько, мон адямиослы кулэ, соин ик кошкыны уг дыртӥськы. Кин бен та интыын уждун басьтытэк ужаны мылкыд кароз? Но мон весь оскисько, милям но урамамы праздник луоз. Кин аслэсьтыз нырызлэсь кыдёкегес адӟыны быгатэ, со профсоюзлэсь уз куштӥськы. Асьмелэн кужыммы огинын возиськеммы бордысь потэ. Л. МАЛЫХ. ШӦКЫЧ Ялонъёс но серекъято вылэм Верос Ксенофонт Ксенофонтовичлэн аспӧртэмлыкогес сямыз вань шуыса заводлэн одӥгаз отделаз куд-ог ужасьёс кемалась тодо ни вал. Со уго тунсыкъяськылӥз ялонъёсын. Кельшисьёссэ блокнотаз но гожъялляз. "Гожтымтэ выль ивор, выль малпан - ышем ваньбур" - шуылоз вал ачиз. - Шедьтэмед ма бордын вырыны, - шуиллям огпол солы эшъёсыз. Нош Ксенофонтовичлэн та выллем вераськонъёсты кылзэмез но ӧз поты. Мае малпаз, сое ик лэсьтоз. Заводын снабженец луыса ужаз бере, солы кыдёкысь каръёсы вуылоно луиз. Куд-ог дыръя арняен, толэзен но ветлылӥз мукет палъёстӥ. Тӥни ӵапак отысен кутскиз чугун сюрес вокзалъёс, автостанциос, гостиницаос, магазинъёс доры ошылэм ялонъёсын тодматскылыны, соос пӧлысь кельшисьёссэ бырйыны. Нош серекъянлэсь, пальпотонлэсь кужымзэ Ксенофонт егит дыръяз ик валаны кутскиз. Техникумын дышетскыкуз со "Паймод, ява!" бордгазетсылэн редколлегияз быръемын вал. Ялонъёсты люкамез сярысь заводаз вераськон ӧз поттылы. Туж серемесъёссэ гинэ куд- ог дыръя кузпалызлы лыдӟылӥз. "Тон мынам нырысь лыдӟисе но, нырысь дунъясе но", - шуылӥз солы. Кышноезлэн ӵектэмезъя, Ксенофонтович кӧня ке ялонъёссэ ӧжытак тупатъяны но выриз. Гожъямъёсыз, пе, кечез но мед серекъятозы: удмуртъёслэн уго вань сыӵе веранзы. Сад-бакчазэ карлы матэгес воштон сярысь ялонэн Ксенофонт Ксенофонтович огнунал интыысь "Югдон" газетлэн редакцияз вуиз. Соку ик гожъяськемез сярысь но кыл поттӥз. Журналистъёс шумпотӥзы таӵе иврлы. Нош витьтонлэсь трос люкам ялонъёссэ редакцие вуттэмез бере, отын воксё паймизы. "Зарни ватос шедьтӥмы", - шуиз редакторзы. Та арняе ик "Шӧкычпи" сэрегамы печатланы кутскомы". Али но газет бамын потало на Ксенофонтовичлэн гожъям ялонъёсыз. Табере со выльёссэ но шедьтӥз. Ваньмон дырыз трос бере, со олокытчы но вуылэ. Ялонъёсты али утчатэк но шедьтод: котькуд магазинлэн, автобусъёслэн дугдылон будказылэн борддоръёссы бумагаосын наштамын. Валамон ни, соос пӧлысь самой кулэзэ шедьтыны пенсионерлы капчи ӧй вал. "Шӧкычпилэн" лыдӟисьёсыз туж шумпото Ксенофонтовичлэн гожъямъёсызлы. Дуно соиз, лыдӟемзы, пальпотэмзы бере, асьсэлэсь малпанъёссэс вераса редакцие гожтэтъёс ыстыло на. Печатлам ялонъёс уго туж пӧртэмесь, олокыӵе но ужпумъёслы сӥземын. "Вокзал котырын бумажнике ышиз, отын поездын ветлон билетэ вал. Шедьтэм муртэз ивортыны курисько". Чугун сюрес вокзалэ пырон дорысь шедьтэм таӵе ялонэз газетэ потэм бере, редакцие ог дасо гожтэтъёс вуизы. Шонер-а, ӧвӧл-а, нош лыдӟисьёс серем пыр билет ышем сярысь гожтэмез вина юонэн герӟаллям. Интыысь милициын ужась тодаз ваем на удмурт поэтлэсь куке но гожтэм таӵе чуръёссэ: "Кытын семья, кытын доре, Тодам ӧвӧл атай-анай... Озьы лёгам монэ вина". "Басьтӥмы лэчыт пероен выль чебересь авторучкаос. Нырысь ик вузаськомы тырмымтэослы пумит газетъёсын лэчыт гожъяськемысь дугдэм муртъёслы". "Канцелярской товаръёс" магазин азьысь адӟем та гожтэмез "Шӧкычпиысь" лыдӟыса, заводлэн одӥг цехысьтыз ужасьёс пырак вераллям "югдонысь" журналистъёслы та авторучкаос басьтыны кулэ шуыса. Малы ке шуод, отын берло дыре ужаны быгатымтэ коллективъёслэн кивалтӥсьёссы сярысь гожъясьёс чик ӧвӧл ни. "Магазинмылы кулэ дворник. Солы озьы ик быдэсъяно луоз сторожлэсь, грузчиклэсь, директорлэн воштӥсезлэсь ужзэ". Хозяйственной магазинысь ваем ялонлы огез лыдӟись тазьы гожтыса газетэ ыстэм: "Отын уг тырмы на директор". "Нелюбин Исаез (оло, Жакез) ӵуказе 12 часын проходнойын пропуск сётъян будка доры потыны курисько. Люкиськыны документ дасясько. Тодыны кулэ шонергес нимзэ, атай нимзэ но арлыдзэ. Арня кузпалъяськыса улӥмы. Нина". "Ышемын кечтака. Тодметъёсыз: возьытэз валасьтэм, лекиськыны яратэ". Таиз ялон редакцие вуттэмын вал туэ гужем интыысь паркысь алея дорысь. "Гужем куазь выльысь берытскоз, нош гожтэмзэ выльысь уд ни тупаты. Котькытын быгатэм кулэ", - тазьы вазиськем газетэ карысь дышетӥсь, ялонлэн кузёезлы вазиськыса. Валамон, "Шӧкычпиысь" трос гожъямлы вазиськисьёс уг луо. Тани, шуомы, мар-о вераны луоз часовой мастерскойлэн юрт вылаз ошем таӵе ялонлы: "Чистополь карысь заводлэсь сьӧд сюбег еэн чассэ шедьтӥды ке, мыным эн берыктэ. Ачим куштӥ". Карлэн ульчаосыз чылкыт мед луозы, отын кулэтэм арбериос, жуг-жаг медаз костаськы шуод, шат? Редакцие вуо Ксенофонт Ксенофонтовичез ассэ ушъясь гожтэтъёс но. Серем пыр верам кылъёсты сюлэме ик пыӵало, пальпотыны юртто", - шуэ огез лыдӟись. "Тау, быдэс семьяен серекъямы ялонъёстэс лыдӟыса",- гожтэ мукетыз. Зэм но, кызьы-о уд ушъя сое, "Шӧкычпилэсь" туннэ матысь юрттӥсьсэ лыдӟисьёслы выль серекъян амал шедьтэмез понна. В. НИКИТИН. "Модаын" уг мӧзмо "Мода" нимо профессиональной лицейын арлы быдэ научно-практической конференция ортчылэ. Сое дасяло дышетӥсьёс, мастеръёс но отын дышетскисьёс. Отын уно докладъёс лыдӟисько. "Александро-Невской соборлы гимн" докладэз дасяны юрттӥз краеведениея дышетӥсь Т. В. Домнина. Соборлэн вылтусызъя ик дӥсьлы мода дасязы. Со вуремын вал, вашкала калыкъёслэсь дӥсьсэс лыдэ басьтыса. Берлоез конференция нимаськиз "Школалы ӧвӧл, улонлы" шуыса. Со сӥземын вал А. С. Пушкинлэн юбилеезлы. Отын верамын, кыӵегес вал Ижевск Пушкин улон вакытэ. Светлана Павлова ужзэ сӥзем котырысь инкуазез утёнлы. В. ЛАГУНОВ. Нош ик наркотик Россия Федерациысь ФСБ-лэн Удмурт Республикая управленияз ужасьёс туэ январе нош ик контрабанда амалэн кужмо наркотик келян сюресэз пытсазы. Удмуртие героин вуэ вылэм Татджикистанысь. Нош наркотикез келян сюрес тодмо - полиэтиленлэсь пакетэн 150 граммъем наркотикез ньыло но сое кунгож вамен потто. Душанбеысь наркотик асьме доры вуэ вылэм Волгоград но Казань пыр. Кышкытлыклэсь утиськонъя органъёсын ужасьёслэн тыршеменызы Ижевскын "вузэнызы" ӝегатэмын кык наркокуръеръёс. ФСБ-лэн Удмурт республикая управлениез та йыружъя следствие нуэ. Россиысь ФСБ-лэн Удмурт Республикая управлениезлэн пресс-службаез. Алексей Красильников Неужто Кылдысинмы нош ик ышоз? Шаерамы кылдэм югдурез ӟечгес валан понна, мон тодам ваисько Кылдысин инмар сярысь вашкала калык веранэз, мукет кылчинъёсын ӵош солэн нимыз весяклы пыриз кошкись "зарни дауре". Музон калыкъёслэн инмаръёссы, пе, кема дыр ӵоже музъем вылын кунояллязы, удмуртъёс гинэ туж кема витиллям асьсэлэсь Кылдысинзэс. Сое доразы кыскон но весяклы пӧлазы кельтон вылысь, вань калыкен кутскыса вӧсяськиллям, шудо- буро улон куриллям. Но инмарзы соос доры ӧз вуы. Адямиос соку берпуметӥ осконзэс ыштӥзы, нош Кылдысин дунне вылысь кытчы ке чиптэм-чаптэм быриз. Тӥни сыӵе вашкала калык веран. Табере - быръёнъёс сярысь. Ӵапак 4 ар талэсь азьло, 1995-тӥ арын март толэзе, Удмурт Республикаысь Кун Кенеше быръёнъёс ортчизы, 1995-тӥ арын декабре - Россиысь Кун Думае, нош 1998-тӥ арын апреле - Ижевск городысь Думае. Галилей верамъя, инкуазьлэн книгаез гожтэмын математика кылын. Галилейлэсь кылъёссэ тазьы но берыктыны луэ: демократия кузёяськон вакытэ политикалэн книгаез гожтэмын быръёнъёслэн кылынызы. Мукет сямен вераса, политикалэн пуштросаз мургес пыриськемды потэ ке, сакгес дышетэ быръёнъёслы йылпумъянъёсты но асьтэ понна анализ лэсьтэ. Удмуртиын кылдэм туала национально-политической югдурез яркыт возьмато 1995-тӥ арын мартэ-декабре но 1998-тӥ арын апреле ортчем быръёнъёс но лыдпусъёс: малы отын одӥг удмурт адями но ӧвӧл? Зэмен но, асьмеос национальной республика ке, малы одӥг удмурт но ӧз шедьы Кун Думае, городысь Думае? Малы асьмеды кивалтон удысысь палэнто? Юанъёслы валэктон шедьтон понна берытсконо луоз, дыр, 1980-тӥ аръёслэн пумазы. Советской Союзын кутскем "выльдӥськон" странаямы улӥсь пӧртэм выжыысь калыкъёслы азинскыны эрик сётӥз, но общество понна со берытскиз мукет палыныз. Удмуртлэн но асваланлыкез, пень пӧлысь ӝутскем музэн, каллен-каллен бычыяны ӧдъяз. Газетъёс, журналъёс, радио но телевидение юрттэмъя, этнополитика странаын валтӥсь интые потӥз. Пӧртэм выжыысь калыкъёслэсь будыны кутскемзэс ушъязы центрын, умоен вераллязы соку гинэ власть доры вуэм демократъёс, тулкым Россия пасьтана вӧлмиз. Самой та вакытэ вордскиз удмурт культурая "Дэмен" огазеяськон, ортчиз вань удмуртъёслэн съездзы, кылдӥз удмурт калыклэн "Удмурт кенеш" ассоциациез, юнмазы финн-угор калыкъёслэн кусыпъёссы, арлы быдэ ортчылӥзы конференциос, съездъёс, слётъёс, конгрессъёс. Пусйыны кулэ Удмуртиысь егитъёслэсь "Шунды" огазеяськонзэс но. Нырысетӥ араз ик со мыло-кыдо пыриськиз Дуннеысь финн-угор калыкъёслэн ассоциацизылэн (МАФУН-лэн) ужаз. Та вакытэ школаосын шӧдскымон инты басьтыны кутско калыкмылэсь историзэ, кылзэ, культуразэ дышетонъя факультативъёс но урокъёс. Городлэн ульчаосаз ӵемгес кылӥськыны ӧдъяз удмурт кыл. 1990-тӥ-1992-тӥ аръёсы, Кылдысин инмарез витем музэн, калыкмы пумен юнгес оскыны ӧдъяз удмуртлыклэн улӟонэзлы, азинсконэзлы. Самой та дыре удмурт учёнойёс калык син шоры потто калыкмылэн историезлы, литератураезлы, культураезлы сӥзем ужъёссэс, со шоры выль сямен учконзэс. Вылӥ Советын - озьы нимаське вал соку республикалэн парламентэз - мыло-кыдо ужаз удмурт депутатъёслэн огазеяськонзы. Соослэн тыршеменызы но сюлмаськеменызы кутэмын кун пусъёсмы - герб, флаг, гимн но выль Конституция, кудӥз юнматӥз, Удмуртиын удмурт но ӟуч кылъёс кыксы но кун кыл луо шуыса. Та аръёсы йылӥз асьме кылын потӥсь радио- но телепередачаослэн лыдзы, национальной пресса цензура улысь потӥз. Соку ик оскон вал ини, Удмуртия, суверенной республика луыса, ӝог азинскыны быгатоз шуыса. Соин ӵош демократия сьӧраз витьымтэ кышкытлык но ваиз. Удмуртлыклэн ӝужаны ӧдъямез ӝог шуккиськиз ӟучъёс пӧлы. Куд-огез соку ик "шовинизм" кылэз бордамы лякиз. Кытын но отын кутскизы огыр-бугыр выронъёс, эчешонъёс, йыркуръяськонъёс. Асьмелэн но азьветлӥсьёсмы, калыклэн культураез понна нюръяськисьёс, кезьыт мылкыдын учкылӥзы, нош куддыръя керетыса но ожалскылӥзы удмурт интеллигенция вылэ, "партократъёс" кушем ним сётыса. Валэктон интые: ХХ дауре удмуртъёслэн будон сюрессы озьы кошкиз ни - тужгес но валась, государствоен но промышленностен кивалтыны пӧрмытӥсь адямиосмы шедизы партийно-государственной аппаратэ, "номенклатурае". Национал-радикалъёсын кутскем коммунистъёслы-кивалтӥсьёслы пумит "ыбылӥськон" меӵак мертчиз, шуыны луоз, соку гинэ вордскыны вырись национально-государственной аппарат шоры. Татарстанын югдур мукетгес вал: КПСС-лэн обкомезлэн нырысетӥ секретарез М. Шаймиев луиз республикалэн президентэз. Азьвыл идеологилэсь чутрак куштӥськон национальной культураез азинтонын но ӟечсэ ӧз вайы. Удмурт культураын уго ӧй вал асьмелэн Пастернакмы, Бродскиймы, Солженицынмы, эмиграцие кошкем тодмо поэтъёсмы но писательёсмы. Социалистической реализмлэн официальной луись колхозно-советской культураез пушкын (каллен но пачкаса ке но) пушйизы калык сямъёс но йылолъёс. Нош али, зэмзэ ке верано, фольклор вылэ кылим. Удмурт национальной движениез азинтон понна нюръяськонын ог-огед куспын 1980- тӥ-1990-тӥ аръёсы потэм тупамтэос, жаляса верано, асьмеды ӧз огазеялэ. Калыклэсь но ужан, ӟечезлы оскон мылкыдзэ ӝутыны ӧм пӧрмытэ. Социальной югдурез уродмытыны юрттӥз на республикаысь экономикалэн куашкамез, солэн 85 процентэз уго ужаз военной промышленность вылэ. Ужазинлык кык поллы усиз. Туж секыт югдуре шедиз гурт удыс. Нош удмуртлэн выжыез ӵапак отын улэ ук - 56,5 процентэз! Ӝог йылэ ужлы ёрмисьёслэн лыдзы, городын гинэ ӧвӧл, гуртын но. Ортчемзэ тодэ вайыса вераны кулэ, демократилэн омыреныз шокан удмурт интеллигенция пӧлын 1995-тӥ арозь лапкомиз, радъёссы шеромизы. Талы мугез но вал: улонлэн котыр ласянь уродмемез, Россилэн губерниос кылдытон бордын бергамез. Данакез удмуртъёс понна шаермес губерниослы люкон сярысь вераськонъёс пӧрмизы лек висёнлы, азьлане сюресмес пытсанлы. Ватсало на: татын но куд-ог "демократъёс" чутрак пумит султӥзы удмуртлыкез ӝутонлы. Мон сямен, асьмелэсь Ижевскысь мэрие но Кун Думае депутатэ шедьымтэмес утчано самой со бордысь - валанлыкмы, шӧдонлыкмы улӥынгес на. "Удмурт кенешен" Кун Кенеше 1995-тӥ арын ортчем быръёнъёсъя 100 округъя дэмламын вал 47 удмурт кандидат - огез но ӧз вормы. Мар шуод на, туж жаль: удмурт бырйисьёс куаразэс мукет политической кужымъёс понна сётӥзы. Вылӥ Кенешын 26 процентэз удмуртъёс вал, туала парламентын - 16. Дас куатез но депутатъёс мандат басьтӥзы, "Удмурт кенешен" герӟаськытэк. Ижевскысь 40 избирательной округъя депутатэ потӥз кык удмурт адями, кыксы но - коммунистъёс. Ижысь Дума сярысь ке верано, 30 депутат пӧлын туннэ одӥг удмурт но ӧвӧл. Эшшо кык лыдпус: Удмуртилэн столицаяз улэ 654,4 сюрс мурт, 17 процентэз - удмуртъёс. Котьма ке но, малы, кыӵе муген асьмеос интымес келяськом? 1995-тӥ ар сярысь ке верано, "Удмурт кенеш" янгышаз эскерымтэ-чакламтэ адямиосты кандидатэ ӵектыса, калык азе поттыса. Бырйисьёс мукетыз понна, политика удысэз ӟечгес валасезлы куаразэс сётӥзы. Тае одно ик санэ басьтоно. Санэ басьтоно мукетсэ но: удмуртлыкез азинтон сярысь сюлмаськон социальной ужпумъёсын ӵош радъяськыны кулэ. 1995-тӥ арын мартэ но 1998-тӥ арын апреле ортчем быръёнъёс яркыт возьматӥзы командалэсь огкылысь кариськыса ужаны быгатэмзэ. Калыклы таӵе амал кельше, эсэпсэ ортчись учыръёс ӧвӧл ке. Удмуртъёслэн огъя кужыме огазеяськонзы ӧз пӧрмы, ӝутскем мылкыдзы пумен сӥяз. Эшшо огзэ пусйыны кулэ на. Россиын демократия вормем бере, быръёнъёсты ортчытонын бадӟым инты басьтыны ӧдъяз коньдонэн шудон. "Удмурт кенеш" та ласянь но келяз - узыр ужбергатӥсьёс удмуртъёс пӧлын ичи, юрттэт сётыны нокинлы. Жаляса верано, азьвыл тырмымтэосты но янгышъёсты "Удмурт кенеш" ӝог вунэтӥз, сое ӟеч возьмато удмурт депутатъёсмес ыштон. (Россия парламентлэн азьвыл созываз ужаз ук удмурт адями - М. А. Васильев). Тӥни озьы, быръёнъёслэн кылынызы гожтэм политикая книгаез лыдӟоно ке, Удмурт шаермылэн югдурез сокем ӟеч мылкыд уг кельты. Дасяськон мынэ ни вуоно быръёнъёслы. Кызьы соос ортчозы, ма сётозы удмурт калыклы - потоз котькудмы бордысь. Монэ шугъяськытэ одӥг гинэ юан: неужто Кылдысинмес таяз учыре но кутыны ум быгатэ? Шӧкыч Луд Кечлэн араз выжыса Шунды ӝужан палась кунъёслэн календарьзыя вуоноез ар - Луд Кечлэн. Калыкын та пӧйшур сярысь уно гинэ пӧллиськонъёс кылдытэмын. Тани кӧняез ке. Обезьян лыктэ зоопарклэн директорез доры: - Мон луд кечен но жирафен артэ улыны уг быгатӥськы ни. - Малы? - Луд кеч быдэс нунал анекдотъёс маде, нош жираф быдэс уйзэ серекъя. х х х Луд кеч нюлэс куше вуэ но адӟе: отын кион кылле. Кузь пель небыт куараен юа: - Мар-о, кион уроме, шутэтскиськод-а? - Уг, кырыж син, капканэ шеди. - У-у, пурысь моклок, кылле, пыд улын костаськыса! х х х Луд кеч пӧйшурасез адӟе но пиналъёсызлы шуэ: - Али ик пельёстэс ӵоксалэ! Ыбыса ӧз ке йӧтты, со али сыӵе жоб кылъёсын кесяськоз! х х х Пересь Мазай быдэс пыж тыр луд кечъёсты утиз но ярдур пала полысаны кутскиз. Одӥгез кузь пель автомат кутэ: - Али ик Америка пала полыса! х х х Луд кеч тэлетӥ мынэ. Малпамтэ шорысь зорыны ӧдъя. Пӧйшур ватске писпу улэ, отысь презерватив шедьтэ. Кема малпаськытэк, сое ас вылаз золтэ но гуртаз вамыштэ. Кузпалзэ сыӵе дӥсен адӟыса, кышноез куашетыны кутске: - Шузи пересь! Пиналъёслы сиён басьтыны ке коньдон ӧвӧл, нош аслыз болонь плащ басьтэм! х х х Луд кеч шонаськыса вамышъя нюлэскытӥ. Я кионлэсь быжзэ кыске, я ӟичылэн берпалаз ӵыже. Кышкаменызы ваньзы пегӟо. Пумитаз гондыр лыктэ. Луд кеч пыдзэ пуктэ. - Тон мар, косой?! - султыса кесяське гондыр. - Мон ведь Топтыгин!.. - Нош мон - Косыгин!.. х х х Кион ӟичыез театре ӧте. Таиз пумит луэ. - Тон укылтэм, урод кылъёсын вераськиськод, театрын ваньмыз азьын возьытэ уськытод. - Ӟичые, кылме сётӥсько, одӥг урод кылме но уд кылы. Сяська нимъёсын гинэ верасько. Ӟичы соглаш луиз. Вуизы театре, нош кионлэн интыяз луд кеч пуке. Пурысьлэн вожез потӥз но кутскиз ук шиетыны: - Эй тон, кечтуш! Ӝогак италмасуй татысь, али пель дӥняд унябейӟытӥ ке, соку ик зынтурынӟод! ГОЖТӤСЬКОН-99 Нылыз шумпоттӥз атайзэ Пичи Пурга ёросысь библиотекалэн залаз калык тырмыт люкаськемын вал. "Удмурт кенеш" огазеяськонлэн президентэз Валентин Тубылов но ёрос администрациысь кивалтӥсьёс гуртъёсысь старостаосын бадӟым кенеш ортчытӥзы. Та ужрад борды ик итӥськиз "Удмурт дунне" газет. Пичи Пурга ёросысь лыдӟисьёс пӧлын ортчытэмын лотереяен шудон. Электробычкы но аслэсьтыз кузёзэ шедьтӥз. Шонерзэ вераса, Кечур гуртысь лыдӟисьмылы Анатолий Петрович Морозовлы витьымтэ шорысь таӵе шуд ваиз аслыз нылыз. Гожтӥськемъёслэсь квитанциоссэс кыскыны ми котьку оскиськом пичи нылпиослы. Таяз учыре калыкен тырмем залын одӥг пинал гинэ адӟиськиз. Солы ик оскемын вал кузьымъёсты люкон. Тупаны но ведь кулэ, 67 квитанция пӧлысь нылаш атаезлэсьсэ кыскиз. Шудпуйы уд шуы-а сое? "Удмурт кенеш" огазеяськонлэн "Герд" бамезлэсь кузьымзэ утӥз Миндэргуртын улӥсь "Маяк" редакция пыр гожтӥськем мурт И. В. Платонова. Валентин Тубылов солы сётӥз тӧдьы сюйлэсь зарнивуам кувшин. Л. МАЛЫХ. ШӦКЫЧ Удмурт Республикаысь гидрометеорологияя центрлэн ивортэмезъя, таяз толалтэ лымы азьвыл аръёсын ӵошатыса унолы трос люкаськиз. Лымы уно гинэ изъян ваиз ни. Косэмын липет вылысь лымыез ӝегатскытэк утялтыны. Тани кылем арня куспын гинэ Алнаш ёросысь "Прогресс" колхозын нырысетӥ нуналаз куашказ ю тысь возён складзылэн липетэз, мукет нуналаз ӧз чида кунян гидлэн липетэз. Ош: - Вылӥсь Инмаре, ворса ни вал со лымы мешоктэ. Тани-тани гидмы куашкалоз, нош кузёосмы милемыз вунэтӥзы ни, тулысэз возьмало. Суредаз Леонид Прозоров. Удмуртиын улӥсьёслы Тӥледлы вазиськиськом шаерысьтымы тазалыкез утён удысын ужасьёслы юрттыны курыса. Туала пиналъёслэн анай-атайёссы уг тодо ни со кышканэз, кудӥз кылдылӥз, полиомиелит вӧлмыку, 40 ар талэсь азьло. Городъёслэн но гуртъёслэн урамъёсазы пумитаны луэ вал та висёнлэн тодметэныз - пери шуккемен - курадӟись мӧйы муртъёсты. Шимес кужымо эпидемиос чигназы, но кышкытлык али ке но вань, полиомиелитлэн вирусэз нылпиос пӧлын дырын-дырын ветлэ. Висёнлы пумит пайдаё но ӟеч вакцина кылдытэмын. Со ӧлексы луэмлэсь быдэс дуннеысь но странаысьтымы уно сю сюрс пиналэз утиз ни. 1996-тӥ арысен Удмуртиын полиомиелитлы пумит Иммунизацияя национальной нуналъёс ортчо. Со дыр ӵоже 3 аресозь 130 сюрс покчилы прививка пуктэмын, нош быдэс Россиын - 11 миллионлэсь ятыр муртлы. Озьы ке но, Россилэн куд-ог улосвылъёсаз висён учыръёс пусйылӥсько на, соин валче кышкытлык вань, инфекция Удмуртие но вуоз шуыса. Соин ик покчи пиналъёс пӧлын ватсаса иммунизация ортчытоно. 1999-тӥ арын март-апрель толэзьёсы 3 аресозь пиналъёс понна нош ик вакцинация радъямын луоз. Лыктэ ми доры, ми тӥ доры лыктом. Дэмен гинэ нылпиосмес кулон ваись вируслэсь утём. Полиомиелитэз выжытэм быдтыны асьмелэн кужыммы вань, сыӵе луонлыкез ыштоно ӧвӧл. Полиомиелиттэк дунне - со нылпиосмылэн, пиналъёсмылэн нылпиоссылэн шудо улонзы. С. ШАДРИН, Удмурт Республикаысь тазалыкез утёнъя министр. Н. ЗАБРОДИН, Удмурт Республикаысь валтӥсь кун санитарной врач. Чурен-чурен усьтӥське Эх, улы вылэм лобаса, Ӧрӟи кадь инмын поръяса. Тулыспал толэзе Национальной библиотекаысь шаерез тодонъя отделын ужа Флор Васильевлэн улэмезлы, гожъямезлы сӥзем адӟытон (выставка). Поэтлэсь творчествозэ яратӥсьёс шумпотыса лыдӟизы, дыр, 1992-тӥ арын потэм "Эхо в лесу" книгаез. Гожтӥз сое кылбурчилэн пиез Сергей Васильев. Та книгаысь гожтэмъёс адӟытонэз радъянын инъет луизы. Чурен-чурен усьтӥсько Флор Ивановичлэн улэм дыръёсыз, верам кылъёсыз... Тунсыко герӟасько улон но кылбур дунне. "Мыным образ кылдытоно, - шуэ Флор пиезлы, кылбур гожъян сярысь валэктыны тыршыкуз. - Кызьы шуыны сое мон уг тодӥськы, - со образ. Мон сое вераны кулэ. Кылбуръёсын. Пумозяз вераны уг луы. Но образлы матэктыны - луэ." Выставка но образэз вераны кулэ. Книгаосын но туспуктэмъёсын. Ваньзэ вераны уг луы. Но образлы матэ кариськыны луэ. Поэтлэн образэзлы. Флорлэн биографиез тодмо. Вордӥськиз 1934-тӥ арын 15-тӥ тулыспалэ Яр ёросысь Бердыш гуртын. Быдӟым ож кутскыку, Флорлы тырмиз 7 арес. Уканысь школаын дышетскыса, пияш Глаз карысь педучилищее пыре. Татын ик кылбуръёс гожъяны кутске, удмурт поэтъёслэн антологиязы печатлаське. 24 аресаз Флор луэ ВЛКСМ-лэн горкомезлэн секретарез. 1959-тӥ арысен со "Красное знамя" газетын редакторлэн воштӥсез луэ. Вордӥське пиез. "Кировысь песянаелэн верамезъя, нырысь ми пединститутлэн общежитияз улӥмы. Улӥмы одӥг комнатаын ньыль кузя, газ но, плита но, гур но ӧй вал. Нош мон, али гинэ вордӥськем маке, котьма аслым кулэ карисько вал. Сиёнэз но вуэз мон понна ӵемысь шуоно луэ вылэм сюсьтыл вылын", - шуэ книгаяз Сергей Флорович. Иже выжемзы бере, Флор Васильев ужаз "Комсомолец Удмуртии", "Советской Удмуртия" газетъёсын, собере - "Молот" журналлэн тӧроез луыса. 1964-тӥ арын СССР- ысь писательёслэн союзазы кутэмын. Та вакытэ улонысь кошке Фаина кузпалыз... 1966-тӥ но 1969-тӥ аръёсы потэм "Тон сярысь" но "Нош ик тон сярысь" кылбур сборникъёсызлы Флор Васильев ачиз ик суредась но луиз. "Атае язычник вал, улӥз мукет малпанъёсын, шӧдонэзлы гинэ оскыса..." (С. В.) 1970-тӥ аръёсы Флор Иванович ыштэ атайзэ, шуак, огвакытэ улонысь кошко трос ӵыжы- выжыосыз. "Гажан дыр", "Черемуха", "Минута", "Единственное" кылбур книгаосыз пото. "1960-тӥ-1970-тӥ аръёсы обществолы тужгес но кулэ вал, дыр, поэтъёс но эмъясьёс- психиатръёс. Атай но эмъяз. Висись калыклэсь асваланзэ". (С. В.) 1978-тӥ арын инвожо толэзе Флор Васильев сюрес вылын шудтэм учыре шеде. Больницаын поэтлэн сюлэмыз инфаркт луыса дугдэ. "Флор Васильевлэн быремез шӧдтэк шорысь ӧй вал. Система быдтылӥз но быдтӥз троссэ. Атай тубе вал гурезе, но со ӝутскон визь понна оскон ӧжыт сётылӥз. Бырйылӥз тазалык, мылкыд, ышылӥз ваньмыз, ма кулэ ужан, оскон понна. Но осконзэ но атайлэсь талазы". (С. В.) 1980-тӥ ар - "Ойдо вераськом" сборник. "... Сизьыметӥ километр шыпыт улэ". (С. В.) 1981- "Дороги". "Кытчы со мынӥз берпуметӥ аръёсаз?" (С. В.) 1983 - "Вкус солнца". "Соку тӥни куазь умме усёз, уй дауръёслы кадь потэ, нокыӵе но кужым уз луы отысь потыны, уго тулысозь ай кема, нош атайлэн шайвылысьтыз узы лымыосын шобыртэмын на". (С. В.) 1984 - "Улытозям мон улонэз кырӟай". "... Атай улӥз Куазьлэн дуннеяз. Сюлэмаз со нуллӥз ваньзэ мукетсэ, сое Бердышозь кыскытыны турттӥз кадь". 1986 - "Родное". "... Ӧвӧл дыр нокыӵе но бадӟымгес парадокс: сабыр, возьдаськись удмурт калык пыӵал тӥрлык лэсьтон комплекслэн медъям адямиез луэ". (С. В.) 1987 - "Тихие строки". "Ваньзэ шедьтыны луэ вал 60-тӥ-70-тӥ аръёсы Иж карысь. Ваньзэ, визьнодзэ сяна. Дунне син азьын визьтэмме вал, нош адямиослэсь ужамзэс гинэ кулэ каризы. Коньдонме, басьты! Заводъёс уксёзэс ӧз жалялэ. Ужа гинэ, ю гинэ, шып гинэ ул!" (С. В.) 1994 - "Кылбуръёс". "Со, мар луиз 1978-тӥ арын пӧсьтолэзе, огшоры ӧвӧл. Флор Васильев шӧдтэк шорысь ӧз быры. Улонысь кошкытэк уг луы вал соку". Тӥни ма сярысь вера библиоткаямы радъям адӟытон. НАДЕЖДА ПЧЕЛОВОДОВА. ШӦКЫЧ Ӵындӥз школа Выль ар азьын Ижысь 72-тӥ школае куректон вуиз. Солэн гулбечаз быдэ вуымтэос "шулдыръяськыны" шӧталлям. Соос кошкем бере ик школа доры вуизы горд машиаос. Гулбечын ӝуаны кутскиллям кулэтэм арбериос. Списать карем макеос. Ярам, тылпуэз ӝог лапкатӥзы. Школалэн директорез Т. В. Плотникова тылпулэсь утиськонъя куронъёсты быдэсъяны уг сюлмаськы, котькытын жуг-жаг лошъяське. Малы сое пусйиськом? Уго кылем тулыс та школаын тылпу поталляз ни. Татьяна Васильевналы номыре ик ӧвӧл кадь. А. Емельянов. Чуръёс, чуръёс... Талазы берпум осконме Улонлэсь секытсэ гинэ адӟыны вордӥськиськем, лэся, мон. Укмыс арес дыръям семьямес раскулачивать каризы. 1929-тӥ арын атаймы кулӥз, тямыс пиналъёс кылим ми анаенымы - коркась корка кураськыса ветлӥськом вал, будэме бӧрсьы заводын ужаны кутски. Огпол 15 минутлы ӝегай, со понна ньыль толэзь колониын ужай. Со бӧрсьы но, пытсэт сьӧры медаз пуктэ шуыса, сикын кор кораса улӥ, бертыны но ӧз лэзьылэ. Озьы но пуктӥзы. Собере Ижевск-Балезино сюрес лэсьтонын ужай. 1942-тӥ арын сӥзьыл бертӥ но соку ик оже ыстӥзы, нош 1945-тӥ арын март толэзе Дальней Востоке келязы Япониен ожмаськонэ. Пудо нуллон вагонын мыныса, зол висьыны ӧдъяй, озьы гинэ госпитале сюри. Эмъямзы бере доре лэзизы. Гуртэ декабрь пумын гинэ вуи. Сыӵе курадӟем бере, пересьмыса ке но, умой ул вылэм. Кытын со! Улон нуналмысь урод луэ. Ужатэк ум улӥське, трос пудо вордыны тыршиськом, но со коньдон вошъянъёссы ваньзэ ӧвӧлтэм карыса быдто, корка но ӝутыны уг луы. Ялан витисько пиналъёс монэ мед сюдозы ни шуыса, но ачим ик сюдоно луисько на. Аслам ветлэме но уг лу ни, мон Отечественной войнаысь инвалид, вылаз ик, пери шуккиз на. Картэ корка лэсьтыны выронъяз, шыр висён кутыса кулӥз. Пудо вордыса коньдон люканы вырим, Сбербанкын коньдонмы быриз. Коркаез куке но быдэстоно, оло, процентъя коньдонмы будоз шуыса, кылем арын Дэбесысь коммерческой банке куинь толэзьлы понӥ вал. 1998-тӥ арын 26-тӥ августэ коньдонме басьтоно ни вал, но табере пумзэ-йылзэ уг шедьтӥськы. Оло, суд пыр быгатысал коньдонме берыктыны? Валэктэ вал, кытчы мыным вазиськоно? Л. ПЕРЕВОЗЧИКОВА. Дэбес ёрос, Уйвай гурт. Редакцилэсь. Тӥледлы вазиськыны кулэ Дэбесысь калык судэ. Инвалид луэмдэс лыдэ басьтыса, исковой заявление гожтэмды понна судын ужасьёс тӥлесьтыд дун ичигес басьтыны кулэ. Флорлы сӥзем нуналъёс "Кӧня иськем Бердышысен Ижозь?" - гожтӥз вал Флор Васильев одӥгаз кылбураз. Бен, та сюресэз собере, пӧртэм аръёсы, "мертазы" асьме гожъясьёс, кырӟасьёс, суредасьёс но, кыдёкысь куноос но: Владимир Семакин, Алексей Смольников, Леонид Шкавро, Николай Старшинов, Андрей Дементьев, Натан Злотников... Кылбурчилэн вордскем гуртаз Флорлы сӥзем нуналъёс ортчытъян ӟеч сямлы пӧрмиз ни вал. Нош туала ёрмон аръёсы тросэз умой кутскем ужъёс пашмыны кутско. Соин ик Яр но Глазов ёрос администрациос туэ, кылбурчилэн вордскемез дырысен 65 ар тырмемен валче, нош ик ортчытыны кариськизы Флорлы сӥзем нуналъёс. Ф. Васильевлэн дор палъёсаз - Яр ёросэ лыдӟисьёсын пумиськыны потэмын калык писатель Петр Чернов, критик, литературовед Алексей Ермолаев, егит кылбурчиос Сергей Матвеев но Алексей Ельцов. Глазов палась гуртъёсы потэмын писательёс Олег Четкарев, Павел Куляшов, Петр Кубашев, егит кылбурчи но тодосчи Виктор Шибанов, озьы ик Флор Ивановичлэн выныз, Россиысь дано педагог Валерий Васильев. Т. НИКОЛАЕВА. Шӧкыч Кавказ кыдёкын... Паймымон ивортон сётӥз Глазын потӥсь "Иднакар" газет. Вераськон мынэ Яр палъёс сярысь. Отын удмурт пияшъёсты чеченъёс узатӥллям армянъёс вылэ. Сыӵе пумиськон ыбылӥськонозь ик вуэм. Кык пияшъёс-грузинъёс асьмелэсь ужбергатӥсьмес сӧсыртытозь жугиллям, коньдонзэ талаллям. Сыӵе учырез суд эскериз. Егит воргоронъёс, Гурам но Лери, пытсэт сьӧрысь потыса, куинь ар талэсь азьло Яре вуиллям. Лэри пукемын ни вылэм кык ар, эшез - дас ар. Яр районын кӧня ке ужамъяськизы, гуртъёстӥ калым утчаса ветлӥзы. Вал пистолетсы но. Син шоразы йӧтӥзы Ярысь кык вынъёс Тугбаевъёс, ужбергатӥсьёс: ас кожазы ужаны выжыса, туж секытэн султӥзы пыд йылазы. Табере вань ни пичигес магазинзы, кык киосксы. Таос вылэ омырскизы лымшор палась ӧтьымтэ куноос. Собере суд вал. Кема но секыт мынӥз. Асьсэды шонере поттон понна пӧртэм амалъёсты кутӥзы йыртэмасьёс. Трос вал асьсэ палъёсысь вуэм дурбасьтӥсьёс. Ӧз пӧрмы. Одӥгез сизьым арлы пуктэмын, мукетыз тямыс арлы. Н. Сергеев. ВАЛЭКТЭ ЮРИСТ Сэрегез нуэ адвокат Лилия Шкляева Кинэ мозмыто армилэсь? Мон вазиськисько таӵе юанэн. Картэ - кыкетӥ группаен инвалид. Соин валче курисько вал пиме армие мынонлэсь мозмытыны. Ветлӥ военкоматэ. Косӥзы кулэ документъёс басьяны. Люкай, нош берло шуизы: армие нуытэк кельтыны ум быгатӥське. Ку но кинэ мозмыто армие мынэмлэсь? Кӧня дырлы сётӥське отсрочка? Ангелина Иванова. Шаркан район. Сыӵе юанъёслы валэктонъёс шедьтоды "Воинской обязанность но военной служба сярысь" Россия Федерацилэн Законысьтыз. Со кутэмын 1998-тӥ арын 28-тӥ мартэ. Отысь 24-тӥ ёзэт (статья) тазьы нимаське: гражданъёсты армие нуонлэсь мозмытон. Сыӵе право сётӥське: а) Федерациын тупатэм законъя но радлыкъя (порядокъя) тазалыксы военной службалы тупасьтэмен лыдъянъёслы - одӥг арозь; б) бубызэс, мумызэс, кышнозэс, вын-агайзэс, сузэр-анайзэс, песятайзэс, песянайзэс яке ас пизы карыса вордӥсьсэс ялан утялтӥсьёслы, таосызлэн ӧвӧл ке законъя чаклам музон утялтӥсьсы, озьы ик соосты быдэсак уг утялты ке кун но тазалыксыя утялтэ мукет мурт, соос луо ке нырысетӥ яке кыкетӥ группаен инвалидъёс, вуизы ке пересьмыса пенсие потон вакытазы яке ӧз тырмытэ ке 18 арессэс. Сыӵе муртъёслы юрттӥсь-чаклась кулэ шуыса, справка лэсьто воинской службае ӧтёно адямилэн улон интыысьтыз эмъянъя кун удыс (служба); в) нылпизэс мумытэк вордӥсь пиослы; г) кык но тросгес пинал вордӥсьёслы; д) куинь аресозь нылпи вордӥсьёслы; е) сыӵе адямиослы, кинъёслэн мумызы (бубызы) огназ вордэ на кык яке тросгес нылпи (тямыс аресозь), пиналысен ӧлексы кылем муртэ; ж) вылӥ но шор профессия басьтыса уже пыремъёслы, соос кун организациосын ужало ке быдэс нунал ӵоже, таӵе организациослэсь переченьзэс тупатэ Россия Федерациысь Правительство - отын ужатозязы; з) кунлэн лыдъяськись, интыысь (муниципальной) яке кунлэн лыдъяськисьтэм, но кун аккредитация пыр потэм дышетон учреждениосын вылӥ профессия басьтыса, Россия Федерациысь югдурез утёнъя, ёзъёсты (органъёсын) ужасьёслы, уголовной ужрадъёсты быдэсъянъя, учреждениосын но ёзъёсын, налогъёсъя полициын но таможняя ёзъёсын ужасьёслы, озьы ик вылӥ верам ёзъёслэн заведениосазы дышетскисьёслы яке соос пӧлысь кудзэ ке йылпумъямъёслы но нимысьтыз званиос басьтэмъёслы службазэс та ёзъёсын ортчытыкузы. Сыӵе ик право басьто: а) кунлэн лыдъяськись, интыысь (муниципальной) яке кунлэн лыдъяськисьтэм, но кун аккредитация пыр потэм дышетон учреждениосын очной амалэн улӥ, шор но вылӥ профессиослы дышетскисьёс - отын дышетскыкузы. Армие мынонлэсь мозмытскыны право сётӥське троссэ кык пол (профессилы дышетскыкузы). Таӵе правозы вань гуртысь дышетон заведениын вылӥ педагогической образованиен ужасьёслэн, гуртын ялан врачын ужасьёслэн, Россия Федерацилэн Президентэзлэн указэзъя сыӵе право басьтэмъёслэн. ФЛОР ВАСИЛЬЕВ Кизем кылъёс-кидысъёсы Калык сюлме мед усёзы... Нимме секыт, пе, вераны, - Туж ӵем мон кылӥсько. Фырол я Фрол - вазё мыным, Вазё но тышкасько: Кытысь, пе, ним таӵе шедьтӥд, Кыӵе шаеръёсысь?! - Нимыд понна кӧня тырид?! - Пальпотыло ваньзы. Бен мар каром, секыт бере, Угось ӧй сёт ачим. Уг ошиськы ведь со сэрен. Аслым яра. Потэ капчи. Нимме секыт ке вераны, - Мон шумпото гинэ, Ним интые ке верады Лэсьтэм ӟеч ужъёсме. 27-28.08.1961 929 Кузебай Гердлы Луд гыремын ке ӟеч, Кизись тырше ке ӟеч, Сюе усе кидыс но ӟеч. Пумен бусы но вожектэ, Ыр тӧл азьын узьым эктэ. Мынам но тыршеме потэ: Кизем кылъёс-кидысъёсы Калык сюлме мед усёзы, Ӝужалозы вож удъёсын! 24.11.1964 1129. АНАЙ Лэсьтэ ке нырысьсэ вамыш пинал, Вамышезлы со шумпотэ далай. Ачиз понна но Нылпиез понна Соку юнгес, дыр, шумпотэ анай. Вераськыны кутске-а нылпиез, Вае-а со "пятёрка" нырысьсэ, Котькуд учыр уг кельты анаез Шумпоттытэк, вае пальпотонзэ. Нош вӧсь каро ке нылпизэ солэсь, Вӧсез Анай сюлме йӧтэ юнгес. Пиез пала лэзем ваньмыз изъёс Анай доры котьку вуо ӝоггес. Сыӵе анай. Быдэс улон ӵоже Со шумпотэ, Пиез ке шумпотэ. Пичи куректонэз но пиезлэн Анай сюлмез туж юн куректытэ. 11.01.1969 1220 Пушкинэз ыбем куара Пель сьӧрын али но кылӥське. Юатэк сюлме пыра, Весь соин, лэся, малпаськиське. Лермонтов но ыбемын, Ведь кысӥз солэн но шундыез. Юг шунды ке инбамын, Кинлы ке но ярантэм на югытэз. Луысал ке, шундыез Со музъем пушкы пачкатысал, Тулыс пал ненег сиез Сьӧд дэри пӧлы но лёгасал. Пушкинэз ыбем куара Пельёсын али но жонгетэ. Шундыез ыбем куара... Со монэ но весь малпаськытэ. Со монэ но весь малпаськытэ. 27.03.1971 1233 Н. Рубцовлы Усто поэтъёс дырызлэсь вазь кошко, Уг жаля улон соосты. Югыт тыл вадьсын сьӧд дары кадь пушто, Чаляк югдыто синъёсты. Кема пиштыло на яркыт гизьыос, Калык сюлэме усьыса. Пишто но, шуныт но сёто на соос, Калык сюлэмын гомаса. 24.06.1971 1249 Визьмоослэн лыдзы ке но йылэ, Визьтэмъёслэн уг кулэсмы лыдзы. Кудаз пельын кема чузъяськылэ Визьтэмъёслэн токма вераськемзы. Сыръясь нюке музэн, Со кылъёсы Выё на куд-огез оскись муртъёс, Кизер ке соослэн малпанъёссы Яке уг малпало ке асьсэос. 25.09.1971 1450 Ньыль ар ӵоже мон ожмаськи, Ӧй жаля кужымме. Мон вормонлы гинэ оски, Вити со нуналме. Мон ожмаськи малпанъёсам, Юрттӥ кадь атайлы. Фронтэ ыстэм гожтэтъёсам Кужым келяй солы. Военной дело урокын Тушмонъёсты тышкай. Нош урокъёс бере лудын, Каргам фашистъёсты музэн, Йӧныосты ишкай. Уйвӧтъёсам но ожмаськи, Ялан юрттӥ фронтлы. Тӧлкыӵ вылэ но ожалски, Сюрес ӧй сёт солы. Мон вормонлы гинэ оски, Вити мон атайме. Пинал сюлмын но мон шӧдӥ Вормонтэм кужыммес. 4.01.1975 Инкуазь суредъёс Кечпие, чебере... Асьме калык фольклорын туж данъямын пӧртэм пӧйшуръёс. Нырысь интыосты ас киязы возё гондыр - нюлэс буба, кион - пурысь сьӧсь, ӟичы - кескич кума... Нош туж ик бере кылиз меда нюлэс эшъёсызлэсь, ас тушмонъёсызлэсь кузь пелё, чырткем луд кеч? Со но азьветлӥсьёслэн радазы. Пичиысен ик трос лыдӟи ушъяськись луд кеч сярысь выжыкылъёсты, тодам на, нырысетӥ классын дышетскыкум, "Кечпие, чебере..." шуыса кырӟан нёжъяме но. Уката ик солэн данэз ӝутскиз "Ну, погоди!" мультсериал кылдэм бере. Асьмеос пичи дыръямы ик луд кечен тодматскыны быгатӥськом. Угось соос котькытын вӧлмемын. Син азьысь лашкинтыса пегӟись лулосэз адӟыса, асьмеос малпаськом: кышкась! Ӧйтӧд, ӧйтӧд! Учке ай, сиён шедьтымтэ дыръязы, адямиослэсь но, пуныослэсь но курдатэк кожо соос сад-бакчаосамы, вуыло фермаосы. Кышкасьлэн сомында дӥсьтонэз луысал-а? Луд кечъёс туж ярато йырйиськыны. Сӥзьыл-тулыс кӧтсэс тыро вож узьымен. Нош гужеме солэсь майбырез ӧвӧл, дыр. Кузь пельлэсь кыӵе сиёнъёсты яратэмзэ радызъя сузьйыса ик маде Куӟебай Герд аслаз "Луд кеч" кылбураз. Нош Пётр Поздеев ни солэсь вылтуссэ, сямзэ но возьматыны тыршем ас мадиськоназ: Лымытэм дыръя Пурысь дӥсяське, Тол дыр вуэмъя, Тӧдьы воштӥське. Пельёсыз кузесь, Чырткем со, кышкась, Синъёссэ возе Изьыкуз но пась. Луд кечлэн тушмонъёсыз лыдтэм трос: кион но ӟичы, пуны но адями, пӧртэм кучыранъёс. Соин ик инкуазь сое чырткем карем, ас пытьыоссэ валантэм "пужъятыны" быгатонлык сётэм. Куддыр пӧйшурасьёс но паймытско, кызьы пӧлэстэм со пыдберъёссэ, кудпаласен лыктэм, кудпала кошкем. Соин ик ӵемысь буш киын дораз берытсконо луылэ. Пинал кечпиослэсь тросэн быремзэс лыдэ басьтыны вунэтымтэ инкуазь но. Луд кеч араз куинь пол пи вордэ, соин ик соослэн лыдзы чутрак уг кулэсмы. Шуо, луд кечъёс кроликъёсын тупало, эшъясько. Вераны уг быгатӥськы, эскереме ӧвӧл. Нош ог аре бускельмы, комбайнэн ӟег аракуз, луд кечпи кутыса вуттӥз вал. Сётӥз милемлы. Тӥляд, пе, кролик четлыкъёсты вань. Толэзь ӵоже сюдӥмы-вордӥмы но, кыре лэзьыны малпай. Бакча берамы поттӥм но турын пӧлы лэзим. Шумпотыса, чырткем тэтчаса кошкиз со. Ӝыны час ортчиз оло ӧз, азбарамы ветлэ ни вал. Берытскем. Куинь пол нюлэс вӧзы нуыса кельтылӥм сое, куинь пол берытскылӥз. Бератаз вордосмы ӧз берытскы ни. Я пуны, я ӟичы шоры ӝимиз, дыр, мискинь лул! Школаын дышетскон аръёсамы асьмеос ваньмы лыдӟим "Мазай песятай но луд кечъёс" кылбурез. Соин ик малпасько вал, кечъёс вулэсь юн кышкало шуыса. Нош кылем гужем паймымон учырез адӟыны кылдӥз. Скалъёсты ӵыпет доры люктаны ваим но, соос кыкнапал ярдуртӥ котырскыса пазьгиськизы. Нош шоразы луд кеч ӝимем. Сопала но, та пала но кошкемез уг луы - сюрес пытсамын. Кузь пель кема малпаськыса ӧз сылы, жомбыляк! вуэ тэтчиз но мукет ярдуре уяны кутскиз. Мон выёз кожай вал. Кытын, пе! Ярдуре уяса потӥз, мугорзэ выретыса ву шапыкъёслэсь курткиськиз но куакъёс пӧлы лашкинтӥз. Озьыен, уяны но усточи вылэм. Уд но малпа, ява! Туэ ар, Шунды ӝужан палась калыкъёслэн календарьзыя Луд кечлэн арез, пе (куд-ог кунъёсын нимало на Кроликлэн яке Коӵышлэн арез). Тигрлэсь эстафетазэ Луд кеч басьтоз 16-тӥ феврале. Али дыре котькудӥз лыдӟись тунсыкъяське гороскопен. Учкоме ай, кыӵеесь луо меда Кечлэн араз вордскемъёс. "Луд кечлэн араз вордскемъёс шудоесь, ӟеч шараяло асьсэ быгатонлыксэс. Ярато эшъяськыны, нош эшъёс быръё туж чакласькыса, со понна быдэс гумырзылы-даурзылы. Соос туж сабырлыесь, юнме шорысь уз пӧсекъялэ..." Табере, лыдӟись эше, малпаськы, син азяд пукты ас тодмоостэ-луд кечъёсты.Соос югыт дуннее вордскемын 1903-тӥ, 1915-тӥ, 1927-тӥ, 1939-тӥ, 1951-тӥ, 1963-тӥ, 1975-тӥ, 1987-тӥ аръёсы. Соос пӧлын И. В. Сталин но. Удмурт литература удысын но вань Кечлэн араз вордскемъёс (юри бугыръяй "Писатели Удмуртии" справочникез). Шудоос пӧлын литературовед, критик но учёной Фома Ермаков, кылбурчи Гай Сабитов, драматург Василий Садовников, нылкышно кылбурчиосмы Степанида Иванова, Лидия Чернова... Н. ТУРИН. Кылбуран - шузияцькон? Та вакытэ уксётэм но укыр шумпотонтэм нуналъёсы, удмурт кылбуретэн тунсыкъяськисьёс ик уз луэ ни, дыр, кожаськод. Но, учконо ке, Национальной библиотекае поэзилы сӥзем ӝытэ калык трос гинэ люкаськиз. Татын, азьвыл Ленин нимо библиотекаын, уно аръёс ӵоже ини ужа удмурт шаермес, историмес, лулчеберлыкмес ӟечгес тодыны тыршисьёслэн огазеяськонзы. Котькуд ӧтчамазы кыӵе ке но тунсыко пумиськон луэ. Таяз аре библиотекаын ужасьёс Удмурт нылкышно кенешен ӵош кылбуретлы сӥзем пумиськонъёс ортчытъяны малпаллям. Мугез но валамон угось: туэ 200 ар тырме дано ӟуч кылбурчилэн А. С. Пушкинлэн вордскемез дырысен. Солэн поэзиез тросэзлэн удмурт кылбурчиосмылэн сюлэмъёсазы но визьёсазы ӧтись кизили, сузьтӥсько но ӟечлык кадь ворекъяса улэ. Тани али, 15-тӥ тулыспалэ, библитекалэн шаертодонъя ёзэз ӵапак та выль ужрадын кутскон сётӥз, "Вакытъёслэн пумиськемзы" ӝыт ортчытыса. Поэзие, шӧдэмын ини, гожъяськисьёс тулкымен-тулкымен лыкто. Пумиськонэз радъясьёс - Удмурт шаерысьтымы дано журналист, кылбурчи Милитина Гаврилова-Решитько, но толло студентка, али библиотекаын ужась, озьы ик кылбуран удысэ вамыштӥсь Надежда Пчеловодова ӧтем кунооссэс-кылбурчиосты кык ӝӧк сьӧры пуктӥзы. Нырысетӥяз интыяськизы 60-тӥ аръёсы куаразэс юнматэмъёс: Семён Перевощиков, Пётр Кубашев но Пётр Поздеев. Кыкетӥез сьӧры 80-тӥ - 90-тӥ аръёсы поэзие лыктэмъёс: Вячеслав Ар- Серги, Илья Пельтемов но Сергей Матвеев. Ӝытлэн огъя валтӥсь малпанэз угось мӧйыгес кылбурчиосты но егитъёссэгес поэзия сярысь ваче вераськонэ ӝутон котыре бинялтэмын вал. Огъя учкыса, вераськон пӧрмиз кадь. Кык ӝӧк сьӧрысь ик кылбурчиос поэзия, кылбуран уж сярысь ас валанзэс усьтыны тыршизы, тодмо луэмъёссэс но алигес кылдэмъёссэ чуръёссэс лыдӟизы. Кылзӥсьёслы тунсыко вал та кык пӧртэм вакытэ лыктэмъёслэсь малпанъёссэс, кылбуръёссэс ваче ӵошатыны но гожъян пӧртэмлыксэс валаны-шӧдыны. Кыӵе бен пӧртэмлыкъёссы шараяськизы та ваче вераськемъёсысь? Мӧйыосызгес гожъяськисьёс пӧлысь Пётр Поздеев, кылсярысь, шуиз: милемыз, пе, ялан пыкылэмзы потэ, кинлэн ке косэмъяз кылбуръёстэс кылдытъяды, азьдэс-бердэс учкыса ужады, соин ик капчигес, пе, улӥды. Капчигес вал одӥг ласянь гинэ: ми, мозмемын книга поттон сярысь сюлмаськонлэсь, туннэ сямен йырмы ӧз висьылы, книга поттоннилэн коньдонэз вань-а бумага басьтыны, авторъёслы гонорар тырыны, озьы ик книгаосты калыке вӧлмытон ласянь. Соку вуоно книгаосмес витьыса гинэ улӥзы, ӟечлыко гожтэмъёссэ туж ӝог поттылӥзы, дунзэ но ушъямон тырылӥзы. Нош кылбуран но книга гожъян сярысь верано ке, котьку ик со секытэн сётӥське. Нокыӵе косон-индылонъёс уз юрттэ. Угось лулчеберетэз кылдытэ ачиз сюлэм гинэ, ачиз косэмъя. Партиез, Ленинэз-Сталинэз данъяса гожтэм чуръёс - со ортчись нуналъёслэн куронъёссылы вазиськон гинэ. Тае но валаны кулэ. Угось кылбурчи - со ас вакытэзлэн нылпиез. Ми сыӵе вакытэ гожъяськыны кутскимы бере, дырлэн вужерез чуръёсам пуксьытэк ӧз кыльы. Петр Кирилловичлэн таӵе малпанэз тупа мукетъёсызлэн но, ас ёзъёсызлэн огъя мылкыдынызы. Егит кылбурчиослэн верамъёссы тунсыко вал тани мар ласянь: соос кылбурало, вакытсы но котырысь кылзӥсьёссы сярысь туж ик малпаськытэк. Кызьы вераз Сергей Матвеев, ӧжытак шузияськон пыр-а, мар-а, пе, асме но, та дуннеез но валаны тыршисько, со манергес ик ас валамме кылбуръёсам кисьтӥське. Кылбурчилэн таӵе верамез пумысь пичияк вожвылъяськон но ӝутӥськиз: куд-огезлы ӧз кельшы кылбуранэз "шузияськонэн" ӵошатон. Кылбурчи, пе, нырысь ик ӟеч адями луыны кулэ. Солы шузияськыны уг яра, малы шуоно, инмарен сётэм быгатонзэ туж валаса но йӧназ берыктыны тыршоно калыкедлы. Иське, кылбуран уж шоры но кыӵе ке дано уж шоры кадь учконо, пе. Нош али егитъёс ӵемысь мар кылбурамзэс но кызьы кылбурамзэс асьсэос но уг валало. С. Матвеевлы дурбасьтӥсьёс но вал: укыр визьмын (визьмояськыса) гожтэмъёссэ чуръёсты, пе, куддыр лыдӟем но уг поты. Поэзия, пе, зэмзэ но, ӧжытак шулдыргес луыны кулэ. Но вань вераськисьёс огкылэ вуизы: "шузияськон пыр" кылбуран интые, пе, та валатонэз ик усьтӥсь мукет кылъёс шедьтоно. Ӝутскем мылкыдын, лӧптэм мылкыдын кылбуран, вань котыр дуннеез вунэтыса кыласа-бураса уйбыртон, ӟучъёс луэмъя - вдохновение. Пӧртэм вакытэ кылбурасьёс котькӧня мед висъяськозы, соос одӥг уж лэсьто: адямилэсь лул-сюлэмзэ усьто, мылкыдъёссэ, мапанъёссэ суредаса кельто. Соин ик мӧйы но егит кылбурчиос котьку ог-огзэс чакласа возё, ог-огзылэсь дышетско, ог-огенызы эчешо. Оглом вераса, кылбурет удыс азинске, шедьтонъёссэ утьыса, йылэтыса но ялан мукетгес палыныз воректылыса. Тазьы пӧртэм аръёсы лыктэм кылбурчиослэн ог-огенызы герӟетъёссы сярысь вераськиз литературовед но критик Алексей Ермолаев. Та пумиськон Флор Васильевлэн вордскемез дырысен 65 ар тырмонлы но сӥземын вал бере, А. Ермолаев бадӟымгес саклык висъяз гажано кылбурчилэн гожъямъёсызлы. Пумиськон кема гинэ кыстӥськиз. Озьыен, таӵе шундытэм нуналъёсы но адями лулчеберлык пала кыстӥське, кылбурчиосызлэсь гожъямъёссэс вите. Нош таосыз, кызьы валамон луиз вераськемзыя, нокыӵе вакыт шоры но учкытэк кылбурало, выль дунлыкъёс кылдыто. Угось зэмос кылбурчи кылбуратэк улыны уг быгаты. Людмила Кутянова. Шӧкыч Кылэм яке лыдӟем визь пырыос Узыръёслэн майбыр улонзы чылкыт - со пылатэмын куанеръёслэн синвуосынызы. х х х Тросэз адямиос узырлыкез адӟонтэм карозы, нош асьсэос туж ӧжытэз сое муртлы сётозы. х х х Узырмон - со шуд, нош узыръёс пӧлысь туж ӧжытэз асьсэды шудоен лыдъяло. х х х Узырлык кыед кадь: трос люкаса возиськод ке, зын потэ, кулэ интые пазяськод ке, музъемез кыедаса, пайда вае. х х х Мултэс узырмем мурт, куанеръёслы юрттонэз уг тоды ке, кельше трос йӧло нонтӥсь, таза кышномуртлы, таиз аслэсьтыз йӧлзэ ачиз нонэ сютэм нунылэн кӧкыез дорын ик. Козьма Прутков. х х х Узырмон - зарезь кадь: сыӵе вуэз юись муртлэн уката юэмез потэ. Шопенгауэр. х х х Узыр мурт ваньбурезлэсь люкетсэ нокинлы уг висъя, аслыз но кулэ дыръя уг куты ке, солэн номыриз ӧвӧл, сыӵе адями мурт ваньбурез возьмась бакча суредлы кельше. х х х Узырлык - ву кадь: лыктэ но чиньы пыртӥ кадь вия. х х х Куанерез бӧрдэ, нош узырез куанэ. х х х Узыр мурт кӧлыны уг быгаты, ворлэсь кышкаса. х х х Начар кисыысь берпуметӥ коньы но кирга. х х х Ёрмон но сютэм улон кезьыт дуннее вутто. х х х Пунэмен басьтыкуз - эш, берыктыкуз - тушмон. х х х х х х Мармы вань - ум дунъяське, ыштӥськом ке - бӧрдӥськом. (Таиз котькинлы тодмо - Л. Ф.) Люказ Л. ФЕДОРОВ. Кыед чотын Мукет ёросъёсын ӵошатоно ке, юкаменскъёс, кык пол ичи уждун басьто. Бен, отысь кивалтӥсьёс но, нянь будэтӥсьёс но, пудо утисьёс но валатэк уг уло, малы лекос пичи уждунзы, малы уродэсь азинсконъёссы. Берло тямыс ар ӵоже бусые кыед но торф поттон данаклы кулэсмиз. Нош нянь будэтытэк пудоез но тыр уд ворды. Тае лыдэ басьтыса, ёрос администрация чакла котькуд хозяйстволы, туэлы музъем понна налог интые, бусыосы кыед поттытыны. Ужез ӟеч радъян понна, кылдытӥське ужан план но нимысьтыз комиссия. Соин кивалтоз сельхозуправлениысь валтӥсь агроном М. Трасина. П. СКОБЕЛЕВ. Гажано но дано ветеранъёсмы но али воинъёсмы, сюлмысьтым ик ӟечкыласько тӥледыз Атыкай музъеммес утисьлэн нуналэныз! Котькуд ар та нуналэ асьме калык пусъе Россиысь солдатлэн Атыкай музъемез утёнын бадӟым вормонъёсыз понна. Тӥляд та праздникты, гажано ветеранъёс, кинъёс чидазы секыт война но война бере вакытъёсыз, озьы ик данэн быдэстӥзы Родинамес утён ужзэс. Бадӟым тау тӥледлы но музъемозь ик йыбырттӥськом! Та нуналэ сӥзиськом тӥледлы юн тазалык, шудбур но ӟеч но кема улыны. Тӥляд вӧзады котьку мед луозы пиналъёсты но пиналъёстылэн пиналъёссы, матысь муртъёсты мед кузьмалозы шунытсэс но шумпотонзэс. Россия Федерациысь Кун Думалэн депутатэз А. В. Солуянов. Кезысь сыр лэсьтӥсь завод данъяське ӟеч продукциеныз. Солэсь сиён-юонзэ яратыса басьто, нуо центре но, Уралэ но. Ваньмыз понна тау карон кылъёс вераны кулэ, дыр, татын ужась коллективлы. Ирина Вихарева алигес гинэ сырзаводэ вуиз ай. Ужа лабораториын, хозяйствоосысь ваем йӧллэсь ӟечлыксэ эскере. Со бордысен кутске сырлэн пӧрмемез, шӧмыз. Йӧл чылкыт но нап ке, озьыен, ваньмыз умой луоз. Лаборатория та ласянь оскымон ужа. Фотоез В. КАМАШЕВЛЭН. 5. Участокысь быръёнъя комиссилэн куарасётэмлы йылпумъянъёс сярысь протоколэзлэсь нырысетӥ экземплярзэ, со улэ участокысь быръёнъя комиссилэн решение кутон правоен отын луись вить членъёссэ гожтӥськем бере, ӝегатскытэк келяны кулэ округысь быръёнъя комиссие, сое участокысь быръёнъя комиссие берыктыны кулэ ӧвӧл. 6. Куарасётэмлы йылпумъянъёс сярысь протокол борды ватсасько участокысь быръёнъя комиссилэн решение кутон правоен членъёсызлэн асьсэлэн нимаз малпанъёсын гожтэмъёссы, Федерацилэсь законъёссэ но та Законэз тӥян учыръёс пумысен участокысь быръёнъя комиссие вуэм ӝожтӥськонъёс (вазиськонъёс), озьы ик соосъя кутэм решениос но участокысь быръёнъя комиссиен гожтэм актъёс. Быръёнъя комиссилэн со документъёсызлэсь но решениосызлэсь участокысь быръёнъя комиссилэн ичизэ кык членъёсыныз юнматэм копиоссэс ватсало протоколлэн кыкетӥ экземплярез борды. 7. Протоколлэсь кыкетӥ экземплярзэ быръён бюллетеньёсын, бырйисьёслэн списокъёсынызы, быръёнъя мукет документъёсын участокысь быръёнъя комиссилэн кенешон правоен членъёсызлэн, бырйисьёслэсь куараоссэс лыдъяны ветлэм чакласьёслэн, мукет странаосысь (калыккуспо организациосысь) чакласьёслэн, иворъёс вӧлмытонъя ёзъёсысь адямиослэн списокъёсынызы ӵош, озьы ик участокысь быръёнъя комиссилэсь печатьсэ комиссия ужамысь дугдытозь утьыса возе участокысь быръёнъя комиссилэн секретарез, соосты бинялтэм-керттылэм вылэ печать пуктыса, чакласа возёно интыын яке соосты утьыны актъя чётэ улосвылысь быръёнъя комиссие. 8. Протоколлэсь куинетӥ экземплярзэ ошо участокысь быръёнъя комиссиен тупатэм интые, участокысь быръёнъя комиссилэн кенешон правоен членъёсызлы, кандидатъёслы но соослэн оскем муртъёссылы, чакласьёслы, иворъёс вӧлмытонъя ёзъёсысь адямиослы тодмасткон но солэсь копизэ лэсьтон понна. 78-тӥ ёзэт. Участокысь быръёнъя комиссиослэн протоколъёссы бордын округысь быръёнъя комиссиын ужан. 1. Участокысь быръёнъя комиссиослэсь куарасётэмлы йылпумъянъёс сярысь протоколъёссылэн нырысетӥ экземпляръёссыя, соосты шонер гожъямез эскерем бере, округысь быръёнъя комиссия, отысь лыдпусъёсты огазеяса, дася быръёнъя округъёсын быръёнлы йылпумъянъёс сярысь огъя таблица, отчы пыртэ быръёнъя округлэн улосвылысьтыз быръёнъя участокъёслэсь лыдзэс, участокъёсысь быръёнъя комиссиослэн вуэм протоколъёссылэсь лыдзэс, озьы ик участокъёсысь быръёнъя комиссиослэн протоколъёсысьтызы нимаз-нимаз чуръёсъя огазеям лыдпусъёсты. 2. Участокъёсысь быръёнъя комиссиослэн протоколъёсысьтызы лыдпусъёсты меӵак асьсэос огазеяло округысь быръёнъя комиссилэн решение кутон правоен членъёсыз, иворъёс люкан-сётъянъя автомат амалэн ужась системаез уже кутыса. 3. Участокъёсысь быръёнъя комиссиослэн вуэм протоколъёсазы янгышъёс шедизы яке соосты шонер дасям пумысен осконтэмъёс кылдӥзы ке, округысь яке вылӥысь мукетыз быръёнъя комиссия быгатэ бюллетеньёсты участокысь яке вылӥысь быръёнъя комиссиен быръёнъя со округын выльысь лыдъян сярысь решение кутыны. 4. Бюллетеньёсты выльысь меӵак лыдъяло асьсэос быръёнъя вылӥысь комиссилэн членъёсыз яке сыӵе участокысь быръёнъя комиссилэн членъёсыз, кудӥз дасяз эскероно протоколэз, быръёнъя вылӥысь комиссилэн решение кутон правоен членъёсыз азьын. 5. Бырйисьёслэсь сётэм куараоссэс выльысь лыдъян ортчытон сярысь иворто со участокысь быръёнъя комиссилэн решение кутон правоен членъёсызлы, чакласьёслы, пусъем кандидатъёслы но соослэн оскем муртъёссылы, иворъёс вӧлмытонъя ёзъёсысь адямиослы, кудъёсызлы лэземын бырйисьёслэсь сётэм куараоссэс выльысь лыдъяку отын луыны. 6. Бырйисьёслэсь сётэм куараоссэс выльысь эскерем быръёнъя комиссия со лыдъямлы йылпумъянъёсъя дася куара сётэмлы йылпумъянъёс сярысь протокол, кытчы гожто "Куараосты выльысь лыдъям" кылъёс. Протоколэз ӝегатскытэк келяло округысь быръёнъя комиссие. 79-тӥ ёзэт. Округъя быръёнлы йылпумъянъёс лэсьтон 1. Округысь быръёнъя комиссия быръён нунал бере кык нуналскын участокъёсысь быръёнъя комиссилэн протоколъёссыя но округын куарасётэмлы йылпумъянъёсты возьматӥсь огазеям таблицая лэсьтэ быръён округын быръёнлы йылпумъянъёс. 2. Кун Кенеше та округъя депутатэ быръемен лыдъяське кандидат, кудӥз, мукет кандидатъёсын ӵошатыса, куарасётонэ пыриськем бырйисьёслэсь тросгес куараоссэс басьтӥзы, но вань кандидатъёслы пумит сётэм куараослэсь ӧжыт ӧвӧл. Сётэм куараос огмында луыку, быръемен лыдъяське кандидат, кудӥз вазьгес пусъемын вал. Куарасётонэ кӧня бырйисьёслэн пыриськемзы тодмо луэ тупатэм формаен бюллетеньёслэн лыдзыя, кудъёсыз поттэмын вал куарасётонъя стационарной но сьӧрын нуллоно ящикъёсысь (участокъёсысь быръёнъя комиссиослэн протоколъёсысьтызы 8-тӥ но 9-тӥ графаосысь огазеям лыдпусъёс). 3. Округысь быръёнъя комиссия округын быръёнэз пӧрмымтэенлыдъя: а) отчы пыриськизы ке быръёнъя округын лыдэ басьтэм бырйисьёс пӧлысь 25 процентлэсь ӧжытэз. Быръёнъя кӧня бырйисьёслэн пыриськемзы тодмо луэ, быръён бюллетеньёс басьтыкузы, бырйисьёслэн списокъёсазы кинюртэмъёслэн лыдзыя но списокъёсы дырызлэсь вазь но куарасётон интылэсь палэнын куарасётэм сярысь пыртэм лыдпусъёсъя (участокъёсысь быръёнъя комиссиослэн протоколъёсысьтызы 3-тӥ, 6-тӥ но 7-тӥ графаосысь огазеям лыдпусъёс); б) бырйисьёслэн кандидат понна самой трос сётэм куараоссы вань кандидатъёслы сётэмъёсызлэсь ӧжытгес луизы. 4. Округысь быръёнъя комиссия округын быръёнэз кужымтэмен лыдъя: а) куарасётон дыръя куронъёсты пумозяз быдэсъямтэен сэрен, бырйисьёслэсь асмылкыдзэс возьматэмзылы йылпумъянъёс рос-прос лэсьтыны уг луы ке; б) кужымтэмен лыдъямын ке быръёнъя ичизэ котькуд ньылетӥяз участокын ортчем быръён; в) судлэн решениезъя. 5. Округысь быръёнъя комиссия гожтэ Кун Кенеше та округъя депутат быръёнлы йылпумъянъёс сярысь протокол. Отчы пыртӥсько быръёнъя та округлэн улосвылысьтыз быръёнъя участокъёслэн лыдзы участокъёсысь быръёнъя комиссиосысь вуэм протоколъёслэн лыдзы, кудъёсызъя дасясько округысь быръёнъя комиссилэн протоколэз, озьы ик участокъёсысь быръёнъя комиссиослэн протоколъёссылэн чуръёсысьтызы огазеям лыдпусъёс но быръёнъя комиссилэн кутэм таӵе решениосыз пӧлысь одӥгез: - кандидатэз быръемен лыдъям сярысь солэсь фамилизэ, нимзэ, атай нимзэ вераса; - быръёнэз кужымтэмен лыдъян сярысь; - быръёнэз пӧрмымтэен лыдъян сряысь. 6. Протоколэз гожтыку, отын луыны быгато пусъем кандидатъёс но соослэн оскем муртъёссы, чакласьёс, мукет странаосысь (калыккуспо организациосысь) чакласьёс, озьы ик иворъёс вӧлмытонъя ёзъёсысь ыстэм адямиос. 7. Округысь быръёнъя комиссилэсь протоколзэ дасяло куинь экземплярен но со улэ гожтӥсько быръёнъя комиссилэн решение кутон правоен ваньмыз отын луись членъёсыз. Протоколлэн котькуд экземплярез борды сётӥське округын куарасётэмлы йылпумъянъёсты возьматӥсь огъя таблица. Быръёнъя комиссилэн членэз, протоколэн быдэсак яке солэн куд-ог люкетъёсыныз соглаш ӧвӧл ке, быгатэ протокол борды аслэсьтыз нимаз малпанзэ сётыны, со сярысь гожто протоколэ. 8. Протоколлэн нырысетӥ экземплярез борды бырттӥсько округысь быръёнъя комиссилэн членъёсызлэн нимаз малпанъёссы, озьы ик Федерацилэсь законъёссэ но та Законэз быдэсъямтэ учыръёс пумысен комиссие вуэм ӝожтӥськонъёс (вазиськонъёс) но соосъя кутэм решениос. Округысь быръёнъя комиссилэн членъёсызлэн нимаз малпанъёссылэн, ӝожтӥськонъёслэн (вазиськонъёслэн) но округысь быръёнъя комиссилэн решениосызлэн копиоссы, округысь быръёнъя комиссилэн ичизэ куинь членъёсыз кинюртэмъёсынызы юнматыса бырттӥсько протоколлэн кыкетӥ экземплярез борды. 9. Протоколлэсь нырысетӥ экземплярзэ но огазеясь таблицалэсь нырысетӥ экземплярзэ учстокъёсысь быръёнъя комиссилэн протоколъёсынызы ӵош ысто Удмурт Республикаысь Быръёнъя комиссие. Со документъёсын ӵош Удмурт Республикаысь Быръёнъя комиссие ваё улосвылысь быръёнъя комиссиын утьыса возем бюллетеньёсты ярантэм карем сярысь актлэсь копизэ. 10. Округысь быръёнъя комиссилэн протоколэзлэсь кыкетӥ экземплярзэ огазеясь таблицалэн кыкетӥ экземпляреныз, округысь быръёнъя комиссилэн кенешон правоен членъёсызлэн, чакласьёслэн, кандидатъёслэн но соослэн оскем муртъёссылэн, мукет странаосысь (калыккуспо организациосысь), чакласьёслэн, иворъёс вӧлмытонъя ёзъёсысь адямиослэн, кудъёсыз вал быръёнлы йылпумъянъёс лэсьтыку но протокол гожъяку, списокъёсынызы, озьы ик та Законэн чаклам мукет документъёсын ӵош, округысь быръёнъя комиссилэсь печатьсэ округысь быръёнъя комиссилэн секретарез комиссия ужамысь дугдытозь утьыса возе, соосты бинялтэм-керттылэм вылэ печать пуктыса, чакласа возёно интыын яке утьыны сётэ улосвылысь быръёнъя комиссие. 11. Протоколлэсь куинетӥ экземплярзэ но огазеясь таблицалэсь куинетӥ экземплярзэ тодматскон но копиос лэсьтон понна сёто округысь быръёнъя комиссилэн кенешон правоен членъёсызлы, чакласьёслы, кандидатъёслы но соослэн оскем муртъёссылы иворъёс вӧлмытонъя ёзъёсысь адямиослы. 12. Округысь быръёнъя комиссия, кудӥз дасяз протоколэз, со улэ гожтӥськемъёс пуктэм бере отысь шекъёсты (умойтэм гожтэм, печатлам интыосты яке участокъёсы быръёнъя комиссиослэн протоколъёсысьтызы огазеяку лэсьтэм янгышез) шедьтӥз ке, озьы ик быръёнъя вылӥысь комиссиос округысь быръёнъя комиссилэн протоколысь янгышъёсты но куронъёсты тӥян учыръёсты шараяз ке яке протоколэз шонер дасян пумысен осконтэмъёс кылдӥзы ке, округысь быръёнъя комиссия аслаз заседанияз эскере протоколэ но (яке) огазеясь таблицае тупатонъёс пыртон сярысь решение. Кутэм решение сярысь комиссия одно ивортыны кулэ комиссилэн кенешон правоен членъёсызлы, чакласьёслы но азьвыл юнматэм протоколэз дасяку отын вылэм ваньзэ адямиослы, озьы ик иворъёс вӧлмытонъя ёзъёсысь ыстэм муртъёслы. Сыӵе учыре быръёнъя комиссия дася быръёнлы йылпумъянъёс сярысь протокол, кытчы гожтэмын луэ "Выльысь дасям" кылъёс. 80-тӥ ёзэт. Быръёнлы огъя йылпумъянъёс лэсьтон 1. Удмурт Республикаосысь Быръёнъя комиссия округъёсысь быръёнъя комиссиослэн сётэм протоколъёссыя соосты басьтэм бере 10 нунал куспын лэсьтэ Кун Кенеше депутатъёсты быръёнлы огъя йылпумъянъёс. Удмурт Республикаысь Быръёнъя комиссия быръёнъя куд-ог округъёсын быръёнэз кужымтэмен лыдъя, валаз ке, округын куарасётон ортчытыку яке куарасётэмлы яке быръёнлы йылпумъянъёс лэсьтыку, куронъёсты тӥям учыръёсын сэрен, уг луы пыр-поч валэктыны бырйисьёслэсь асмылкыдзэс возьматэмзэс. 81-тӥ ёзэт. Кун Кенеше депутатъёсты быръёнлы йылпумъянъёсты печатьын поттон 1. Быронъя котькуд участокъя, быръёнъя котькуд округъя куарасётэмлы йылпумъянъёс котькудӥзлэн быръёнъя со комиссилэн но меӵак улӥысь быръёнъя комиссиослэн протоколъёсазы гожтэм лыдпусъёсын, тодматскон понна, бырйисьёслы, кандидатъёслы но соослэн оскем муртъёссылы чакласьёслы, мукет странаосысь (калыккуспо организациосысь ) чакласьёслы, иворъёс вӧлмытонъя ёзъёсысь адямиослы сётӥсько, соослэн куремзыя. Со иворъёсты сётэ быръёнъя со комиссия. 2. Улосвылъёсысь быръёнъя комиссиос со ёросъёслэн, городъёслэн улосвылъёсазы кылдытэм быръёнъя округъёсын быръёнлы огъя йылпумъянъёсты сёто иворъёс вӧлмытонъя ёзъёсы, быръёнлы округъёсъя йылпумъянъёс лэсьтэм бере одӥг сутка куспын, нош быръён нунал бере 30 нунал ӵоже печатьын потто вань округъёсысь, участокъёсысь быръёнъя комиссиослэн куарасётэмлы но быръёнлы йылпумъянъёс сярысь протоколъёсысьтызы лыдпусъёсты. 3. Кун Кенеше депутатъёсты быръёнлы огъя йылпумъянъёсты, быръем депутатъёс сярысь та Законлэн 45-тӥ статьяысьтыз 8-тӥ пунктын чаклам иворъёсты вераса, официальной амалэн печатьын поттэ Удмурт Республикаысь Быръёнъя комиссия быръён нунал бере 15 нунал ӵоже, нош вань округъёсысь быръёнъя комиссиослэн протоколъёсысьтызы быдэсак ивортонъёсты - быръён нунал бере 30 нунал ӵоже. 82-тӥ ёзэт. Быръем депутатъёсты пусъён 1. Округъёсысь быръёнъя комиссиос быръёнлы йылпумъянъёс сярысь протокол улэ гожтӥськем бере со сярысь иворто Кун Кенеше депутатэ быръем кандидатъёслы. Кун Кенеше депутатэ быръем депутат быръёнлы огъя йылпумъянъёсты официальной амалэн печатьын поттэм бере куинь нунал куспын округысь быръёнъя комиссилы гожтыса ивортэ Кун Кенешлэн депутатэзлэн статусэныз герӟаны луонтэм ужъёсты быдэсъянлэсь куштӥськемез сярысь. 2. Округъёсысь быръёнъя комиссиос, быръёнлы огъя йылпумъянъёсты Удмурт Республикаысь Быръёнъя комиссия официальной амалэн печатьын поттэм бере пусъё Кун Кенеше быръем депутатъёсты но соослы сёто депутатэ быръем сярысь удостоверение, соос быдэстӥзы ке та ёзэтлэн 1-тӥ пунктаз тупатэм куронъёсты. 3. Депутатэ быръем кандидат та ёзэтлэн 1-тӥ пунктаз тупатэм куронэз ӧз быдэсты ке, со депутатлэсь полномочиоссэ уг басьты, нош быръёнъя округын, кудаз пыриськиз вал кандидат, быръёнлы огъя йылпумянъёсты официальной амалэн печатьын поттэм бере куинь нунал ортчыса яло выльысь быръён. 83-тӥ ёзэт. Выльысь быръён 1. Быръёнъя округъёсын, кудъёсаз быръён лыдъямын пӧрмымтэен яке кужымтэмен яке быръем депутатъёс ӧз быдэстэ та Законлэн 82-тӥ ёзэтысьтыз нырысетӥ люкетын тупатэм куронэз, озьы ик быръем депутатэз пусъем сярысь решение суд пыр палэнтэмын ке, Удмурт Республикаысь Быръёнъя комиссия быръёнъя со округын выльысь быръён ялэ. 2. Быръёнэз пӧрмымтэен лыдъяку, выльысь быръён ортчытӥське, нырысетӥ быръён нунал бере куинь толэзь ортчыса, нош быръёнэз кутымтэмен лыдъяку, быръем депутатэз пусъем сярысь решениез суд пыр палэнтыку - быръёнэз кужымтэмен лыдъян сярысь решение кутэм нуналысен куинь толэзь ортчемлэсь азьло. Быръем депутат та Законлэн 82-тӥ ёзэтысьтыз нырысетӥ люкетын тупатэм куронэз ӧз быдэсты ке, выльысь быръён ортчытӥське быръёнлы огъя йылпумъянъёсты официальной амалэн печатьын поттэм бере куинь толэзь куспын. 3. Выльысь быръён ортчытыку, быръёнэн герӟаьскем ужъёсты быдэсъян дырез Удмурт Республикаысь Быръёнъя комиссилэн решениезъя вакчиятыны луэ одӥг куиньмослы, куарасётон нунал азьын 15 нунал ӵоже ортчытъяно ужрадъёсты вератэк. 4. Выльысь быръён дыръя куарасётон ортчытӥське быръёнъя со участокъёсын ик но бырйисьёслэн огъя быръёнлы дасям списокъёссыя. 84-тӥ ёзэт. Ватсаса быръён 1. Кун Кенешлэн депутатэзлэн полномочиосыз дырызлэсь вазь бырыку, Удмурт Республикаысь Быръёнъя комиссия бушам депутат мандат кылдэм бере толэзь куспын ялэ быръёнъя со округын ватсаса быръён. Со ортчытӥське депутатлэн полномочиосыз дырызлэсь бырем нуналысен куинь толэзь ортчем бере толэзьлэн нырысетӥ арня нуналаз, та Законлэсь куронъёссэ чакласа. 2. Кун Кенешлэн полномочиосыз бырытозь одӥг арлэсь ӧжыт кыльыку, ватсаса быръён уг ортчытӥськы. 85-тӥ ёзэт. Иворъёс люкан-сётъянъя автомат амалэн ужась системаез уже кутон 1. Кун Кенеше депутатъёсты быръён ортчытыку, со пӧлын бырйисьёсты пусйыку (лыдэ басьтыку), бырйисьёслэсь списокъёссэс дасяку, быръёнлы йылпумъянъёс лэсьтыку но, иворъёс люкан-сётъянъя автомат амалэн ужась системаез уже кызьы кутэмез эскерыса возён вылысь, Удмурт Республикаысь Быръёнъя комиссия, улосвылъёсысь быръёнъя комиссиос кылдыто комиссиослэн решение кутон правоен но кенешон правоен членъёсыз пӧлысь эскерись группа. 2. Быръёнъя комиссиослэн ваньмызлы членъёсызлы право сётэмын иворъёс люкан- сётъянъя автомат амалэн ужась системае пыртэм но отысь басьтэм котькыӵе иворъёсын тодматскыны. 3. Куарасётон кутскем дырысен куарасётэмлы йылпумъянъёс сярысь протокол улэ гожтӥськытозь, Удмурт Республикаысь Быръёнъя комиссия но улосвылъёсысь быръёнъя комиссиос иворъёс люкан-сётъянъя автомат амалэн ужась кун системаез уже куто, куарасётонлэсь кызьы мынэмзэ но куарасётонлы йылпумъянъёс, быръёнлы йылпумъянъёс лэсьтэмез чаклан понна. 4. Куарасётонлэн кызьы мынэмез но солы йылпумъянъёс, быръёнлы йылпумъянъёс сярысь иворъёс люкан-сётъянъя автомат амалэн ужась басьтэм иворъёс нырысь вуэм иворъёс гинэ луо, соослэн юридической кужымзы ӧвӧл. 5. Быръёнъя комиссилэн протоколэзлэн кыкетӥ экземплярез борды сётэмын мед луоз иворъёс люкан-сётъянъя автомат амалэн ужась системае пыртэм лыдпусъёсын компьютерен печатлам текст. Компьютерен печатлам текстлэсь зэмос луэмзэ кинюртэмъёссэс пуктыса юнмато иворъёс люкан-сётъянъя автоммат амалэн ужась системаез уже кутэмез эскеронъя группалэн членъёсыз но отчы иворъёс пыртэм понна кыл возисьёс. 86-тӥ ёзэт. Быръёнъя документъёсты утьыса возён но архиве сётон 1. Быръёнъя комиссиосын дасям протоколъёслэн но огазеясь таблицаослэн нырысетӥ экземпляръёссы, озьы ик та Законэз быдэсъямтэ пумысен быръёнъя комиссие вуэм ӝожтӥськонъёс (вазиськонъёс) быръёнъя комиссилэн соосъя кутэм решениоссы утьыса возисько Кун Кенеше депутатъёсты вуоно быръён сярысь ялэм нунал бере ичизэ ар ӵоже. Быръёнъя комиссиослэн мукет документъёссы, быръён бюллетеньёсты но вераса, утьыса возисько быръёнлы огъя йылпумъянъёсты официальной амалэн печатьын поттэм нуналысен ичизэ ар ӵоже. 2. Кун Кенеше депутатъёсты быръёнэз дасянэз но ортчытонэн герӟаськем документъёс утьыса возисько но архиве сётӥсько Удмурт Республикаысь Быръёнъя комиссиен тупатэм радлыкъя. Удмурт Республикаысь Правительствоысь Архивъёслэн ужъёссыя комитетэн вераськыса. 11-тӥ йырет Быръён правоосты тӥям пумысен ӝожтӥськонъёс. Быръён сярысь законъёсты тӥям понна кыл кутытон 87-тӥ ёзэт. Гражданъёслэн быръён правооссэс тӥясь решениос но ужъёс (номыр лэсьтымтэ) пумысен ӝожтӥськонъёс 1. Кун властья органъёслэн, интыын аскивалтонъя органъёслэн, общественной огазеяськонъёслэн но кивалтӥсьёслэн решениоссы но ужъёссы (номыр лэсьтымтэзы), озьы ик быръёнъя комиссиослэн но отысь кивалтӥсьёслэн решениоссы но ужъёссы (номыр лэсьтымтэзы) пумысен, кудъёсыз тӥяло гражданъёслэсь быръён правооссэс, ӝожтӥськонъёсын вазиськыны луэ судэ Федерацилэн законъёсыныз тупатэм радлыкъя, нош быръёнъя комиссиослэн но отысь кивалтӥсьёслэн решениоссы но ужъёссы (номыр лэсьтэмзы) пумысен, со сяна, - быръёнъя вылӥысь комиссие но. 2. Удмурт Республикаысь Быръёнъя комиссилэн но отысь кивалтӥсьёслэн решениоссы но ужъёссы (номыр лэсьтымтэзы) пумысен ӝожтӥськонъёсын вазиськыны луэ Россия Федерациысь Быръёнъя Центральной комиссие яке Удмурт Республикаысь Вылӥ Судэ, быръёнъя мукет комиссиослэн но отысь кивалтӥсьёслэн решениоссы но ужъёссы (номыр лэсьтымтэзы) пумысен - быръёнъя вылӥысь комиссиосы но ёросъёсысь судъёсы. 3. Гражданъёслэсь быръён правооссэс тӥясь решениос но ужъёс (номыр лэсьтымтэ) пумысен ӝожтӥськонъёсын судэ вазиськыны быгато бырйисьёс, кандидатъёс но соослэн оскем муртъёссы, быръёнъя огазеяськонъёс, быръёнъя блокъёс но соослэн оскем муртъёссы, мукет общественной огазеяськонъёс, чакласьёс, озьы ик быръёнъя комиссиос. 4. Федерацилэн законъёсыныз, та Законэн но Удмурт Республикалэн мукет законъёсыныз чаклам учыръёсы суд быгатэ быръёнъя соизлэсь яке таизлэсь комиссилэсь куарасётонлы яке быръёнъя йылпумъянъёс сярысь решенизэ яке быръёнлы комиссилэсь мукет решенизэ палэнтыны. 5. Быръёнъя вылӥысь комиссия быгатэ быръёнъя со комиссиослэн но отысь кивалтӥсьёслэн ма лэсьтэмзы (лэсьтымтэзы) пумысен ӝожтӥськонъёссыя решение кутыны. 6. Судэ вазиськон понна одно ик кулэ ӧвӧл быръёнъя вылӥысь комиссие азьвыл вазиськыны. Гражданинлэсь быръёнъя комиссие сётэм ӝожтӥськонэз кадь ик ӝожтӥськонзэ но вазиськонзэ суд эскерыны кутӥз ке, быръёнъя со комиссия ӝожтӥськонэз эскеронзэ дугдытэ, судлэн решениез законъя кужыме пырытозь. Федерацилэн законъёсыныз чакламъя, суд вуэм ӝожтӥськон сярысь ивортыны кулэ быръёнъя комиссилы. 7. Быръён кампания мыныку вуэм ӝожтӥськонъёсъя решениос, Федерацилэн законъёсыныз чакламъя, кутӥсько вить нунал куспын, но куарасётон нунал азьын нуналлэсь бер кыльытэк, нош куарасётон нуналэ яке со бере нуналэ вуэмъёссэ - ӝегатскытэк. Ӝожтӥськонын верам учыръёсты ватсаса эскерыны кулэ ке, соосъя решениос кутӥсько дас нунал куспын. 8. Быръёнъя комиссилэн куарасётэмлы, быръёнлы йылпумъянъёс сярысь решениез пумысен ӝожтӥськонъя решение суд решение кутыны кулэ, Федерацилэн законъёсыныз чакламъя, ӝожтӥськон вуэм нунал бере кык толэзь куспын. Федерацилэн законъёсыныз чакламъя, суд решение кутыны быгатэ, эскероно ужпумен герӟаськмъёс пӧлысь одӥгез ӧз луы (кык пол ӧтьыса ӧз лыкты) ке но. 9. Федерацилэн законъёсыныз чакламъя, судъёс но прокуратуралэн органъёсыз асьсэлэсь ужзэс (шутэтскон нуналъёсы но) озьы радъяны кулэ, ӝожтӥськонъёс дыраз сэрттэмын-пертчемын мед луозы. 88-тӥ ёзэт. Кандидатэз пусъемез палэнтон, быръёнъя комиссиослэсь куарасётэмлы, быръёнлы йылпумъянъёс сярысь решениоссэс палэнтон понна мугъёс 1. Кандидатэз пусъемез округысь быръёнъя комиссия яке суд палэнтыны быгато таӵе учыръёсы: а) кандидатэз ӵектон но пусъён правилоосты тӥяку; б) быръён азьын агитация нуон правилоосты тӥяку; в) быръёнъя ужрадъёслы коньдон висъян правилоосты тӥяку; г) кандидатъёс но соослэн оскем муртъёссы, быръёнъя огазеяськонъёслэн но быръёнъя блокъёслэн кивалтӥсьёссы должностьсыя яке службазыя луонлыкъёссэс быръёнын вормон понна кутыку; д) кандидатъёс, быръёнъя огазеяськонъёс, быръёнъя блокъёс, мукет организациос, кыӵе ке кандидатъёсты быръён понна, бырйисьёсты кузьмаськыса но кызьы ас палазы кыскон учыръёс шараяськыку; е) Федерацилэн законъёсыныз, та но Удмурт Республикалэн мукет законъёсыныз чаклам мугъёсъя. 2. Быръёнъя комиссия куарасётэмлы йылпумъянъёс лэсьтэм яке быръёнлы йылпумъянъёс тупатэм бере, суд тодӥз ке, та ёзэтлэн 1-тӥ пунктаз чаклам учыръёс вал но соосын сэрен бырйисьёслэсь асмылкыдзэс возьматэмлы йылпумъянъёс уг луы ке, со быгатэ быръёнъя комиссилэсь куарасётэмлы, быръёнлы йылпумъянъёс шонер лэсьтыны сярысь решениоссэ палэнтыны. 3. Федерацилэн законъёсыныз чакламъя, ёросысь суд быгатэ быръёнъя комиссилэсь быръёнъя участокын куарасётэмлы йылпумъянъёс сярысь, быръёнъя округын быръёнъя йылпумъянъёс сярысь решениоссэ палэнтыны, бырйисьёслэсь списокъёссэс дасян правилоос, быръёнъя комиссиосты кылдытон радлык, куарасётон но куараосты лыдъян радлык (соосты кызьы ортчытэмез чакланы люкетэмез но вераса), быръёнлы йылпумъянъёс лэсьтон радлык тӥямын вал, быръёнъя законъёсты мукет сямен тӥян учыръёс луылӥзы ке, сыӵе вамышъёс лэсьтэмен (соослы пумит номыр лэсьтымтэен) сэрен, быръёнъёслэсь сомылкыдзэс возьматэмзэс шонер тодыны уг луы ке. 4. Ёросысь суд, округысь быръёнъя комиссия, Удмурт Республикаысь Быръёнъя комиссия быгато быръёнъя улӥысь комиссиослэсь куарасётэмлы йылпумъянъёс сярысь, быръёнлы йылпумъясьёс сярысь решениоссэс палэнтыны Федерацилэн законъёсыныз, та Законэн но Удмурт Республикалэн мукет законъёсыныз чаклам удысъёсы. 89-тӥ ёзэт. Гражданъёслэсь быръён правооссэс тӥям понна кылкутытон Федерацилэн законъёсыныз чакламъя, гражданъёслэсь быръён правооссэс тӥям понна уголовной, административной яке мукет амалэн кыл куто таӵе муртъёс: а) гражданинлы Кун Кенеше депутат бырйыны но ачиз быръемын луыны правозэ быдэстыны кужмысь зӥбыса, пӧяса, кышкатъяса, юри пӧрам макеос кутыса яке музон амалэн люкетӥсьёс; б) должностьсыя яке службазыя бадӟымесь луонлыкъёссэс, асьсэды яке кинэ ке быръён понна уже кутӥсьёс; в) гражданъёсты кандидатлы дурбасьтон понна кужмысь гожтӥськытыны турттӥсьёс яке кинюртэмзэ пуктыны люкетӥсьёс, озьы ик сыӵе кинюртэмъёсты юри лэсьтӥсьёс; г) бырйисьёсты кузьмаськыса но кызьы ке ас палазы кыскисьёс; д) пусъем бырйисьёс сярысь гожъямъёсты (бырйисьёслэсь списокъёссэс) улосвылъёсысь быръёнъя комиссиосы келямлэсь азьло дыраз дасямтэ но эскерыса тупатъямтэ муртъёс; е) кандидатъёс, пусъем кандидатъёс сярысь юри пӧяса иворъёс вӧлмытылӥсь яке кандидатъёслэсь саклыксэс но данлыксэс саптаса мукет маке лэсьтӥсь муртъёс; ж) быръёнъя комиссиослэн членъёсызлэсь, кенешон правоосынъёссылэсь но, чакласьёслэсь, пусъем кандидатъёслэн, быръёнъя огазеяськонъёслэн, быръёнъя блокъёслэн, иворъёс вӧлмытонъя ёзъёслэн оскем муртъёссылэсь правооссэс тӥясьёс, иворъёс но быръёнъя документъёслэсь копииоссэс басьтыны правозэс но вераса, з) быръён азьын агитация нуон правилоосты тӥясьёс, куарасётон нунал азьын нуналэ но быръён нуналэ агитация нуисьёсты но вераса; и) быръёнъя кампанилы коньдон висъян правилоосты тӥясьёс, быръёнъя комиссиослы, кандидатъёслы, пусъем кандидатъёслы коньдон висъянэз ӝегатӥсьёс; к) быръёнъя комиссиослэн ужзылы, комиссиослэн членъёссылы асьсэлэсь ужъёссэс быдэсъяны люкетӥсьёс яке, законлы пумит лэсьтыса, соослэн ужъёсазы чуртнаськисьёс; л) быръёнъя участокъёсын куарасётонлы люкетӥсьёс; м) лушкем куарасётонъя куронъёсты тӥясьёс; н) бырйисьёсты асмылкыдзылы пумит луыса куаразэс сётыны косӥсьёс; о) быръёнъя юри пӧрам документъёсты гуртам, юри пӧяса документъёс дасям но сётэм, сётэм куараосты юри сураса-пожаса лыдъям яке быръёнлы йылпумъянъёс лэсьтэм муртъёс; п) куарасётэмлы йылпумъянъёсты соослы тупатэм куронъёсъя сётымтэ яке печатьын поттымтэ муртъёс; р) гражданъёслэсь бырйисьёслэн списокъёсынызы тодматскыны правозэс тӥясьёс; с) гражданъёслы, мукет муртъёс понна куарасётыны луонлык кылдытыса, быръён бюллетеньёсты сётъясьёс; т) быръёнэз дасяны но ортчытыны бюджетысь висъям коньдонэз уже кутэм сярысь отчётъёсты, кандидатъёслэн быръёнъя фондъёссылэсь коньдон ужпумъёсъя отчётъёссэс сётӥсьтэм яке печатьын поттӥсьтэм муртъёс; у) ужсётӥсьёс, кудъёсыз пумит луо, быръёнэ пыриськем понна, законэн чаклам отпуске лэзьыны. 12-тӥ йырет Йылпумъян люкет 90-тӥ ёзэт. Та Законлэн кужыме пыронэз 1. Та Закон кужыме пыре сое официальной амалэн печатьын поттэм нуналысен. 2. Та Закон кужыме пырем пумысен кужымзэ ыштэмен лыдъяське "Удмурт Республикаысь Кун Кенеше депутатъёсты быръён сярысь" Удмурт Республикалэн 1994-тӥ арын 28-тӥ январе кутэм Законэз 1994-тӥ арын 14-тӥ декабре пыртэм воштонъёсын но ватсанъёсын ӵош. Удмурт Республикаысь Кун Кенешлэн Тӧроез А. А. Волков. Ижевск город, 1999-тӥ арын 28-тӥ январе. � 719-И. 1-тӥ ватсан Удмурт Республикаысь Кун Кенеше депутатэ кандидат быръёнъёсын меӵак ӵектыны дурбасьтонъя гожтӥськемъёсын листлэн тусыз ГОЖТӤСЬКЕМЪЁСЫН ЛИСТ Ми, улӥын гожтӥськемъёс, дурбасьтӥськом Удмурт Республикаысь Кун Кенеше быръёнъя � округъя (быръёнъя округлэн нимыз но номерез) депутатэ кандидатэ ӵектонлы (кандидатлэн фамилиез, нимыз, атай нимыз, вордскем арез но нуналэз, ужан интыез (должностез), ялан улон интыез) �� Фамилия, ним, атай ним Вордскем ар Улон интыя Паспорт яке Кинюртэм (18 аресъемлэн адрес сое воштӥсь но вордскем нуналэз документ сое пуктэм (серия но номер) нунал Гожтӥськемъёсын листэз юнматӥсько: (Гожтӥськемъёсты люкам муртлэн фамилиез, нимыз, атай нимыз, паспортэзлэн яке сое воштӥсь документэзлэн сериез но номерез, улон интыя адресэз) Депутатэ кандидат (кинюртэмез) (фамилиез, инициалъёсыз). 2-тӥ ватсан Удмурт Республикаысь Кун Кенеше депутатэ кандидатэ быръёнъя огазеяськонэн, быръёнъя блокен ӵектонлы дурбасьтонъя гожтӥськемъёсын листлэн тусыз ГОЖТӤСЬКЕМЪЁСЫН ЛИСТ Ми, улӥын гожтӥськемъёс, дурбасьтӥськом Удмурт Республикаысь Кун Кенеше быръёнъя � (быръёнъя округлэн нимыз но номерез) округъя депутатэ (кандидатлэн фамилиез, нимыз, атай нимыз, вордскем арез но нуналыз, ужан интыез (должностез) ялан улон интыя адресэз) (быръёнъя огазеяськонлэн, быръёнъя блоклэн нимыз) быръёнъя огазеяськонлэсь (быръёнъя блоклэсь) кандидатэ ӵектонлы �� Фамилия, ним, Вордскем ар Улон интыя Паспорт яке Кинюртэм атай ним (18 аресъемлэн адресэз сое воштӥсь но сое вордскем нуналэз) документ пуктэм нунал (серия но номер) Гожтӥськемъёсын листэз юнматӥсько: (Гожтӥськемъёсты люкам муртлэн фамилиез, нимыз, атай нимыз, паспортэзлэн яке сое воштӥсь документэзлэн сериез но номерез, улон интыя адресэз) Быръёнъя огазеяськонлэн, быръёнъя блоклэн оскем муртэз (Кинюртэмез) (фамилиез, инициалъёсыз) Выль омыр вуттӥз Анатолий Уваровлэн Сергей пиез ӧз кутскылы рос-прос кылбур яке басня гожъян борды - бырйиз буёлэн гожъянэз-суреданэз. - Пичи дыръяз ми сое крезьгуръя школае сётӥмы вал, - шуэ Анатолий Николаевич. - Нош со ас мылкыд каремезъя искусствоосъя школае выжиз, экзамен сётэмез бере гинэ милемлы вераз. Дыр ортчиз - Сергей Уваров тодмо художник луиз. Асьме лыдӟисьёс сое "Инвожо" журналъя дунъязы ни. Нош али 60 ужъёсыныз бадӟым адӟытон усьтӥськемын Ижевскысь Выставкаос возьматъян залын. Котькуд суредасьлэн аслаз ымнырыз, шуо. Татын но адӟиське, Пензаысь К. Савицкий нимо художественной училищеын дышетскем адями асьме доры маке но выльзэ вуттӥз шуыса. Шуак луоно кадь, солэсь темпераен лэсьтэм ужъёссэ учкыса. Татын дышем сямъя суредан но, авангардизмлэн, постмодернизмлэн тодметъёсыз но. Огазе сураськемын зэмосэз но уйвӧтын адӟемез - кыӵе ке кӧшкемыт выллем, но яркыт буёло, соин бордаз кыскись. Сыӵе луо "Провинциальные сны" сериысь суредъёс. Живопись но графика сяна, син шоры йӧтэ плакат. Та жанрлэн данэз туэ усемын ке но, Сергейлы та удысэз туж яра. Со печатласькиз "Плакат" издательствоын, устоосыз ужъёсыз бырйылэмын бадӟымесь выставкаосы. Сергей Уваровлэн нимыз тодмо луиз ни кунгож сьӧрын но. Пензаын ке но улэ, вордскем дораз возьматӥськон Сергей понна трослы шумпотымонгес. Т. НИКОЛАЕВА. Наталь Выль даур - нырысетӥ нылпи 1999-тӥ ар мукет дауре выжон ӧс выллем. Быдэс дуннеысь туж тросэз кузпалъёс дасясясько 2000-тӥ арын 1 январе нылпи вайыны. Та ласянь телевидениын но, радиоын но, газет-журналъёсын но трос гинэ вераськонъёс нуо, валэкто, кызьы таза, чырткем нылпи ваёно 2000-тӥ арын 1 январе. Шаерысьтымы но тросэзлэн кузпалъёсын бере кылемзы уз поты, луоз. Тодӥсь-валась специалистъёслэн валэктэмзыя, кузпалъёс яратонэн вырыны кулэ 26-тӥ, 27-тӥ, 28-тӥ мартэ. Валче кусып тупатэм бере нылкышннослы ӝыны час пала кулэ, пе, тыбыр вылаз кыльыны, кидыс ас интызэ мед шедьтоз. 1 январе вордӥськем нылпиосты Япониын туж вылӥ данъяны туртто, пересьмытозяз дунтэк сюдозы-дӥсялозы, пе. Нош "Комсомольская правда" газет странаысьтымы 2000- тӥ арлэн нырысетӥез ик нылпиезлы кузьманы ӵектэ автомобиль. Нылпи шедён дыр, та газетын гожтэмъя, 27 мартэ уин. Вуоно даурлы нырысетӥ нылпи кузьмамды потэ ке, малпаське, яратэ огдэс-огды. Н. Яковлев. Москваын пумиськонъёс Кызьы ивортылэмын ни вал, 16-17 феврале Удмурт Республикаысь Кун Кенешлэн Тӧроез Александр Волков Федерацияя Кенешлэн ужаз пыриськиз. Кун Думаен кутэм но Россиысь парламентлэн вылӥ палатаяз эскерыны сётэм документъёс пӧлын вал "Россия Федерация но Украина куспын эшъяськонъя но ог-огеныд ӵош ужанъя огкылэз юнматон сярысь" Закон. Федерацияя Кенеш та документэз кутӥз сое выльысь эскерон дыръя Удмуртиысь Кун Кенешлэн Тӧроез Россия но Украина куспын огкылэз юнматонлы пумит луиз, малы ке шуоно, али та документ быдэсак уг утьы Россилэсь интересъёссэ, кылсярысь, страна бадӟым ыштонъёс адӟе Сьӧд зарезьын. Александр Волков но Россия Федерациысь Правитеььстволэн Тӧроезлэн нырысетӥ воштӥсез Юрий Маслюков вераськизы "Ижмаш-авто-Шкода-Фольксваген" ӵош предприятие кылдытонъя тупанкыллэн быдэсъяськемез сярысь но Ю. Маслюковлэн Японие мынонэз пумысен. РОР-ысь Правительстволэн кивалтӥсезлэн нырысетӥ воштӥсез отчы мыныны малпа мартлэн шорвадесаз, соку Япония ласянь "Ижмаш-авто" акционер огазеяськонлы кредит сётон сярысь кенешыны чакламын. Россия Федерациысь атом энергияя министрен Евгений Адымовен огкыл шедьтэмын Чепецкой механической заводын выльдӥськон ортчытон но предприятиос азьын пунэм тыронъёсты кулэстон сярысь. Озьы заводын ужасьёслы но бюджет чотын коньдон басьтӥсьёслы уждун тырон умояны кулэ. Та пумиськонын озьы ик вал Глазов администрацилэн кивалтӥсез Александр Горяинов но ЧМЗ" акционер огазеяськонлэн генеральной директорезлэн воштӥсез Владимир Рождественский. Удмуртилэн военно-промышленной комплексэзлэсь данзэ страналэн палэназ кужмоятыны тыршон но Беларусь Республикаен военно-технической удысын ӵош ужанэз азинтон сярысь Кун Кенешлэн Тӧроез вераськон нуиз Росвооружениын. Кенешемын, Росвооруженилэн кивалтӥсез Григорий Ропот мартлэн кыкетӥ ӝыныяз Ижевске вуыны кулэ шуыса. Соку Удмурт Республикаысь ВПК-я предприятиослэн кивалтӥсьёсынызы совещание ортчытыны но военной техникаен тодматскыны чакламын. Удмурт Республикалэн национальной политика удысын ужан амалъёсыз вылын асьме дорын регионъёслэсь кенешсэс ортчытыны кенешемын. Со пумысен удмурт парламентлэн кивалтӥсез вераськиз РОР-ысь национальностьёсын ужанъя министрен Рамазан Абдулатиповен. Москвалэн мэреныз Юрий Лужковен Александр Волков кенешиз Удмурт Республика но Москва куспын валче ужан пумысен огкыллэн быдэсъяськемез сярысь. Вераськемын экономика удысын кусыпъёсты уката кужмоятон пумысен. Александр Волков оскемзэ вераз, март толэзе ортчоно пумиськонын ог-огеныд ӵош ужанлы йылпумъянъёс лэсьтэмын луозы шуыса. Таяз учыре но Александр Волков кенешиз Россия Федерациысь Пенсиосъя фондлэн кивалтӥсеныз Василий Борчукен. Вераськон мынӥз пенсия тырон пунэмъёсты азьланяз кулэстон сярысь. *** Удмурт Республикаысь Кун Кенешлэн Тӧроез Александр Волков 18 феврале Ижевске берытскемез бере Москвалэн но быдэс Русьлэн Патриархезлы Алексий ИИ-лы телеграмма ыстӥз. Отын со Святейшой Владыкаез вуоно юбилееныз - вордскемез дырысен 70 ар тырмонэныз ӟечкылаз. Удмурт Республикаысь Кун Кенешлэн пресс-службаез. Лыдӟисьёсмы синйылтӥзы ни, луоз, Римма Шкляевалэсь "Берекет" но "Тулкым" бамъёсын печатласькылэм кырӟанъёссэ. Куд-огез адӟылӥзы, дыр, сое сцена вылысь но. Можга педучилищеын дышетскыкуз, нотаосын тодматскемез дырысен ньыльдон ар ортчиз ке но, крезьгурчи выльысь вордскиз кадь, та дырлы уно кырӟанъёсыз люкаськизы. Римма Ивановна ужа Як.-Бодья ёросысь Мукши школаын. Удмурт ӧрӟи Быдӟым Отечественной войнаын Николай Гастелло капитанлэсь кышкатэк ожмаськыса Советской Союзлэн Героез луэмзэ туж уноез тодо, дыр. Секыт ожъёслэн нырысетӥ нуналъёсазы ик солэн самолётаз зениткалэн снарядэз йӧтӥз но лобась машинаез ӝуаны кутскиз. Соку лётчик "сӧсырмем" самолётсэ меӵак уськытӥз тушмонлэн танкъёсыз, машинаосыз вылэ. Асьме вакытэ но вань Гастелло кадь кышкасьтэм лётчикъёс. Афганистанын, кылсярысь, МИГ-23 реактивной самолётэныз тушмон вылэ "усиз" подполковник Анатолий Левченко. Вал сыӵе учыръёс чечен война дыръя но. Ас улытозям Николай Гастелло кадь кышкасьтэм лётчикъёсты мон 300-лэсь унозэ тодӥ ни. Туннэ вераме потэ удмурт пи сярысь. Туала будӥсь егитъёс понна солэн нимыз вунонтэм мед кыльысал, малы ке шуоно, али асьме Россиын ожмаськон удысын басьтэм вормонъёсмы сярысь туж шер тодазы вайыло. 1996-тӥ арын "Красная звезда" газетын гожтэмын вал: Чечняын кышкатэк ожмаськемзы понна сизьым лётчикъёслы сётэмын Россилэн Героез дано ним. Соос пӧлысь кыкезлы ожын быремзы бере. Штурмовой авиаполкысь Олег Исаев майор сю пол ӝутскылэм инбаме, пуштытэм куинь танкез, дас вить машинаосты. Нош огпол туж ӟеч юрттэм эшезлы, Матвиенко майорлы.СУ- 25 самолётэз ӝуаны кутскем бере, Матвиенко парашютэн тэтчем. Олег Исаев тае адӟыса, снарядъёсын, пулемётэн ыбылыса, юрттэм эшезлы музъем вылэ васькыны. Вадьсаз лобам на мукет эшъёссы вуытозь. Огнуналэ Олег Исаев синйылтэм боевикъёслэсь БТР-ёссэс, машинаоссэс. Нош ик пазям соосты аслаз снарядъёсыныз, пулемётэныз но утем уно асьме солдатъёсты. Со вакытэ майорлэн аслаз самолётаз снаряд шеде но Олег Исаев ӝуась самолётсэ боевикъёс вылэ куштэ. Мон трос юалляськи кин со Олег Исаев, но ӝоген гожтэт басьтӥ Воронеж палась, соку ик тодӥ, со удмурт пи вылэм шуыса. Со бӧрсьыгес ик басьтӥ на Татарстанысь Кушкет удмурт гуртысь атаезлэсь гожтэтсэ. Олег Исаевлэн анай-атаез огшоры крестьянъёс, будэтӥллям вить нылпи. Пичиысен ужаны дышиллям гурт котырын, юрттӥськиллям мӧйыослы, ужын, ӟеч дышетскиллям. Олег эшъёсыз пӧлын тодмо вылэм на усто спортсмен луэменыз, пӧртэм городъёсын ортчись ӵошатсконъёсы вуылэм. Училищеын дышетскыса кӧня ке ужам бераз сое армие басьтӥллям. Сибирьысь городъёсын службазэ йылпумъяса, мылкыд карем лётчике дышетскыны. Таджикистанын. душманъёслы пумит быгатыса ожмаськемез понна пусъемын "За отвагу" медален. Собере - Чечня. Олег Исаев майор кадь кышкасьтэмъёс асьмелэн туж ик трос ӧвӧл ке но, соос мукетъёсызлы уг сёто буйгаса, каньылля гинэ улыны. Солэн дано нимыз котьку но улоз эшъёсызлэн, ӵыжы-выжыосызлэн сюлэмъёсазы. Ф. АБРАМОВ. Удмуртия Бородино ӧвӧл ай Кенеше люкаськемъёс сак кылзӥзы Россия Федерациысь Кун Думалэсь депутатсэ М. П. Кошкинэз (Москвае ужаны мынытозяз, со кивалтӥз республикаысьтымы Гурт удысъя но сиён-юонъя министерствоен). Михаил Петрович вакчияк тодматӥз Россиысь парламентлэн уженыз, вераз, кыӵе законъёс кутӥсько гуртоосты шуг-секытлэсь утён ласянь, ма лэсьтыны быгатӥз гуртысь депутатъёслэн фракцизы. - Алигес мон вуылӥ Москва дорысь "Бородино" колхозэ. Отын кысконо 320 скалзы пӧлысь кельтӥзы на 120 йырзэ. Осконтэм кадь, но табышсы 800 сюрс манетозь вуиз! Ма чотын узырмизы, шуоды? Самой сое тодон вылысь ик куд-ог депутатъёсын ӵош тодматсконо кариським фермалэн ужан амалъёсыныз. Со туж огшоры вылэм: кыскем йӧлзэс скважинаысь кыскем вуэн кизерто но барыш потто. Шумпотӥсько, Удмуртиын "Бородино" кадь хозяйствоос ӧвӧл на шуыса, уз но луэ, малы ке шуоно, Москва мында асьме котырын сиён-юон курисьёс уз луэ. Москва сярысь шонерзэ вераса, туннэ нуналлы областьын гурт удыс быдэсак сямен быремын ни, сыӵегес ик югдур Россилэн шор улосвылъёсаз. Удмуртия возиське, куд-ог удысъя азинсконъёс но басьтэ на. Республика понна со туж умой. Котьма ке но, берло вить арзэ кивалтӥсьёс трос лэсьтӥзы, шаерлэсь экономиказэ утён вылысь. Артысь областьёсысь гуртъёсын югдур кӧшкемыт. 17 август бере кин кызьы, но нянь будэтӥсь, пудо вордӥсь понна воштӥськонъёс умоен берытскизы. Дунъёс куинь поллы будэмен ӵош, асьмелы сюрес усьтӥськиз бадӟым рыноке потыны, продукциенымы ӟеч-ӟеч вузкарыны. Татысь али нуналлы быдэ пумитано сиён-юонлы лыктэм пӧртэм регионъёсысь машинаосты, вань Москваысь но. Мон шумпотыса соос шоры учкисько: кемалась-а ай столицамылэн кивалтӥсьёсыз вань калыксэс сюдыны малпало вал зарезь сьӧрысь поттэм продукциен, асьмелэнэз шоры сялӟыса? Табере ветло Россия улосвылъёстӥ, куашкатэм гуртъёслэсь кылем-мылем сиён-юонзэс октыса- калтыса. Доллар куд-огезлы ӟеч урок возьматӥз, номыр уд шуы. Музъем бордын ужасьёслэн висёнзы трос, нош тужгес но лекез - техникалы ёрмон. Россиысь Правительстволэн сое выльдыны коньдон висъянъя постановлениез вал ке но, со ӧз быдэсмы. Примаковлэн кабинетэз али та ужпум бордын ужа, эскере тыриськонъёсты кулэстон ласянь, но пумаз-йылаз со вуттымтэ на. Бюджетъя но бюджетэ пырисьтэм фондъёсъя гурт удыслы коньдон висъян бордын милям фракцимы зол ужаз, куд- ог азинсконъёс вань. Кылсярысь, будэтэмын льготаосъя кредит висъянлэн быдӟалаез. Вераськемын пестицидъёслы но удобрениослы дунъёсты кулэстон ласянь, теплицаослы но удобрениослы дунъёсты кулэстон ласянь, теплицаос 50 процентлы ӧжытгес дун тырозы шуныт понна. Ӟеч юрттэт чакламын парсь но тылобурдо вордонъя государственной луись комплексъёслы: соос пудо сиён дунтэменгес басьтозы ни. Бюджетэ пырисьтэм фондъёс чотын 2,5-5 миллиард манет висъяське Центробанк пыр, кредитэз берыктоно 1,5-2 ар куспын, азьвыл коньдон арлы гинэ сётӥське вал. Гуртоос понна со шӧдскымон юрттэт луыны кулэ. Нимысьтыз коньдон лизингъя чакламын етӥн, бакча сиён, туг, сахар кушман будэтонлы,сельхозтехника поттонлы. Парламент бадӟым саклык висъя "Россельмашез" азинтонлы. Советской вакытэ араз со 850 сюрс комбайн поттэ ке вал кылем арын ваньмыз-ӧволэз лэсьтэмын 750 комбайн, вузамын 520-эз! Соин ик ужпум пуктӥське асьме заводъёсын импортной техника поттыны. Озьы дунтэмгес усёз. Пудо вордон удысъя мар вылез? Комбикормлы тысь но музон ватсэтъёс Россия басьтоз США-ысь но Европаысь - ваньзэ ог 3-4 миллион тонна. Март толэзе соос вуыны кулэ ни. Валамон, долларен ваем сиёнэн дунтэм йӧл но, сӥль но уд потты, та ласянь интыосын чупресгес ужаны кулэ. Удмуртиын, мон чакламъя, югдур сокем урод луыны кулэ ӧвӧл. Федеральной бюджетын республикамылы юрттонъя ма но со пусъемын. Та бадӟым кенешысен мынам вазиськеме потэ переработка удысысь кивалтӥсьёслы: тырмоз ини асьтэ понна гинэ сюлмаськыны, асьтэды яратыны, кемалась дыр вуэмын гурт калык пала ымнырын берытскыны, солы нуналмысь нуналэ юрттыны. Тунэ нуналозь тӥ пӧлысь тросэз ӧз валалэ на кадь, колхоз ферматэк йӧлвыл но, мороженой но, колбаса но уз луы шуыса. Тӥ соостэк быроды. Соин ик ӵош кутскыса басьтӥськоно ӟеч выжы пудо уськытон борды. Москваысь ужбергатӥсьёс та ласянь умой ужало, азьло сыр но вӧй ваё ке вал кунгож сьӧрысь, али коньдонзэс сёто Россиысь улосвылъёсы. Удмуртиен аналтэмын, шуыны луоз, нимаз хозяйствоослэсь мултэс йӧлзэс, сӥльзэс басьтон. Соин ик туэ сӥзьыл ваньмыз со дунтэм дунын палэнэ кошкиз, асьме переработка ужтэк кылиз. Кадръёс сярысь. Гурт удысын но, котькытын сямен, берло аръёссэ со лябӟиз. Хозяйствоен кивалтон понна ортчоно ӟеч школаез, кинэ сюрем сое бушам интые пуктоно ӧвӧл. Жаляса верано, та муген бадӟым ыштонъёс адӟемын: тодытэк-валатэк пестицидъёс кутэмын, кизёно муос сурамын-изъянтэмын, пудо йыр кулэстэмын. Удыссэ мур валаса нуись председатель хозяйствозэ утиз, калыксэ но ужтэк ӧз кельты. Таӵе примеръёс Удмуртиын вань. 1999 ар Россия понна огез секытэз луоз на, со сярысь верамын вал азьвылгес ик. Соин ик гуртын ужасьёслы вань луонозэ лэсьтоно, асьсэды утён понна, нош Федеральной бюджет быгатэмезъя одно ик юрттоз. ЯЛӤСЬКОМ КОНКУРС Чигымтэ чидан Таӵе нимын конкурс ялыны муг луиз Т. Фроловалэн гожтэтэз. Малпаськом, лыдӟисьёс азьланьтозы та кичӧлтонэз. Адямиез улон жуге, нош со уг сётӥськы шуг-секытъёслы. Семья куспын валамтэос кылдо, нош ик ӝутӥськыны луонлыкъёс усьтӥсько. Ужын чидантэм югдур? Со но вормонтэм ӧвӧл. Яратонды куштӥз? Ма, ӧжыт-а улонын ӵемтылонъёс луо, нош котьма ке но, адями вормисе потэ. Чигтыны луонтэм чидан сярысь ик вераськон ӝутэм потэ вылэм таяз конкурсын. Гожтэтъёстэс лыдӟыса, ӧжыт ке но капчигес мед луоз туннэ шуг-секытэ усем муртлы. Нош кин адямиез вӧсь карыны яратэ, мед малпаськоз, кытчы вуттэ сыӵе вамыш. Конкурсэ пыриськыны ӧтиськом вань мылкыд карисьёсты. Йылпумъянъёс лэсьтом арлэн пумаз. Тужгес но устоосыз ужъёс пусъемын луозы нимысьтыз кузьымъёсын. Конкурслы йылпумъянъёс лэсьтыны юрттозы тӥляд но гожтэтъёсты. Соин ик ваньзэ ужъёсты синйылтыса возе. Л. МАЛЫХ, "Наталь" бамез дасясь. Пӧйшурлы - шуба, ныллы - дӥськут Инкуазь дуннеез туж валаса кылдытэм: пӧйшуръёслы - шуныт шуба, кыйёслы, кенӟалиослы - чиль-дол чилясь пужыё ку. Нош визьмо, кужмо адямиез инмар выл дӥсен ветлыны косэм. Тодымтэ-адӟымтэ адямиосты экранысь гольык адӟыку чидаськод ини. Нош удмурт телепередачаын нылъёслэсь тэтчамзэс адӟыса, выль ар мылкыд копак сӧриськиз. Адӟизы меда мусо нылъёссэс анай-атайёссы? Ӧй вал меда соос понна возьыт? Таӵе юан мынам гинэ ӧз кылды, соосты адӟем калыклэн но. Котьмалэн вань уго интыез, дырыз, эсэпез! Анай-атайёсмы, сьӧраз ортчем адямиез адӟыкузы, "аслэсьтыд шӧйдэ шӧд" шуозы вал. Кытысь адӟод но кылод вал, удмурт нылаш гольыкеныз ушъяськыса мед ветлоз шуыса. Ӟеч тодӥсько на нэнэелэсь айы муртэзлэсь ватӥськыса йыр сынамзэ но пыд кутчамзэ. Соку малы озьы лэсьтэмзэ юаны визьмы ӧзгес тырмы. Али юасал вылэм, но со улонысь кошкиз ини, соин ӵош ыштӥ трос тодон-валанэн тырмытэм песьтэрез. Маин со герӟаськемын вал меда? Ас визьмыным малпасько, со мӧйы калыкез мур гажан мылкыд вылэм, дыр, шуыса. Тодам лыктэ на нэнэелэн одӥг учырлы туж паймемез. Пӧсь гужем, городысь юрттыны лыктэмъёсты лэзизы, пе, турын ӝутыны. Соосын ӵош ик гуртоос но отын вылӥллям. Юрттӥсьёс шунды вылэ тубем бере кылиськиллям, тодмо ини, маин гинэ соос кылизы. Шоразы учкыны возьдаськыса, палэнын, пе, улӥськом. Турнан дыр ке вуэ, вера вал нэнэе (сое мон ачим но туж ӟеч тодӥсько али) сандыкысь куарс-куарс дӥськутмес дӥсяськом вал: ӝуткам чалмаосмес, кашамер дэремъёсмес, дарали буртчин кышетъёсмес, жильк-жильк азвесь уксёен чыртывесьмес. Собере ӵук лысву пӧлтӥ позыръяськыса будэм турынэз жик-жик гинэ ӵош шуккыса турнамы. Нокин но соку пӧсясько шуыса дӥськутсэ ӧз сэрпалля. Турын зуродэз лёгись кышномурт гинэ чидатэк айшетсэ куштылӥз но кышетсэ йыр котыртӥз керттылӥз. Тӥни со чебересь удмурт сямъёс медаз сураське вылэм нокыӵе калыклэн урод сямъёсыныз. Дауръёсын анай-атайёсынымы утем сямъёсмы медаз ыше тӧдьы бус пӧлы. В. ВАСИЛЬЕВА. Пичи Пурга черкогурт. НАТАЛЬ Тодматскон сэрег . Аб. 269. Удмурт нылаш, 18/159, гороскопея Весы, али улӥсько гуртын. Тодматскысал 19-22 аресъем вина юисьтэм но пытсэт сьӧры пукылымтэ пияшен. Гожтэттылы одно ик вазисько. Аб. 270. Удмурт воргорон, 44 арес, кышное висьыса кулӥз. Вить пиналъёсы, кыкез шклаын дышетско на. Дышетскеме средне-технической, уг ужаськы - ИИ группаен инвалид, вина уг юиськы, тамак уг кыскиськы, шудӥсько арганэн, куасэн бызьылонъя нырысетӥ разряд басьтӥ. Вань аслам хозяйствое. Тодматскысал ужез яратӥсь, лякыт сямо нылкышноен. Аб. 271. Удмурт пияш, 31/175, дӥсьтӥсьтэм, лякыт сямо, тамак уг кыскы, юонэн уг эшласькы, ужа механизатор луыса, киыз мынэ лэсьтӥськыны - выль корка пуктыны дасяське. Тодматскысал 26-34 аресъем лякыт сямо удмурт нылашен, ӝуждалаез 160-169 см медло, мед гажалоз пересьёсты. Туж ӟеч луысал, штукатур-маляре дышетскемын ке. Гожтоно таӵе адресъя: 427110, до востребования, 582085. Аб. 272. Удмурт пияш, 22/170, гороскопея Дева-Дракон. Улӥсько гуртын, ужасько колхозын. Армие ветлэмын, тамакен уг эшъяськиськы. Тодматскысал 18-23 аресъем лякыт сямо удмурт нылмуртэн. Возьмало фотографиен гожтэт. Аб. 273. Удмурт пияш, 32 арес, гороскопея Рак, улӥсько гуртын, ИИ группаен инвалид, уг ужаськы, юонэн уг эшъяськисськы. Тодматскысал лякыт сямо удмурт нылмуртэн, 25-35 аресозь. Возьмало фотографиен гожтэм. Аб. 274. Удмурт воргорон, 41/165, гороскопея Близнецы, кышное кулӥз, улӥсько куинь пиналъёсыным, ужасько колхозын, вордӥсько пудо. Тодматскысал 40-50 аресозь удмурт нылкышноен, пумит ӧвӧл одӥг-кык нылпиезлы. Улыны ӧтисько ас дорам. Аб. 275. Удмурт пияш, 23 арес, Гороскопея Козерог, улӥсько но ужасько гуртын, яратӥсько пудо-животэз, корка котырын берганы. Лякыт но небыт сямо, атасъяськыны уг яратӥськы. Тодматскысал 18-20 аресозь лякыт сямо нылмуртэн, пумит ӧвӧл одӥг нылпиезлы. Аб. 276. Удмурт пиосмурт, 34 арес, вина уг юиськы, тамак уг кыскиськы, яратӥсько нылпиосты. Тодматскысал 25-45 аресъем лякыт сямо удмурт нылкышноен, кудӥз дась улон интызэ воштыны. (Ялонэз потаз ни - Аб. 252.). Редакцилэсь: Лыдӟисьёсмылэсь ялонъёссэс тодматскон сэреге сётӥськомы, дун басьтытэк. Нимзэс, кытысь луэмзэс газет пыр ум шараяське, ваньмызлэн адресъёссы редакциын. Ялон сётӥсен тодматскыны мылкыд карисьёслы ивортӥськом: адресъёсты ми нокинлы ум келяське. Абонентлэсь номерзэ пусйыса, редакцие гожтэт ыстэ. Нош кинлы ке сӥзем гожтэттэс маркаен чылкыт конвертэ понэ - ыстомы кулэ адресъя. Шумпотон яке тушмон? Люкаськылӥз Удмурт Республикаысь Правительстволэн палась висёнъёслэсь утиськонъя комиссиез. Сое нуиз комиссилэн тӧроез А. М. Лисина. Эскеремын вал куинь висёнъя - гриппъя, урмонъя но полиомиелитъя - кылдэм югдур. Январьлэн пумаз грипп шаерамы но вуиз. Республикаысьтымы валтӥсь эпидемиолог А. Кощеев ивортӥз, туннэ та висёнъёсын 33 сюрс адями курадӟе ни шуыса. Тужгес но секыт югдур кылдэмын бадӟым городъёсын. Та вакытэ Глазовын пытсамын 3 школа но 1 нылпи сад, Ижевскын - 1 школа, Кезын - 4 школа. Глазовысь больницаосын 133 адями эмъяське, со пӧлысь ньылезлэн тазалыксы туж секыт. Огъя верано ке, Глазовын али лыдэ басьтэмын 7 сюрс пала висись, со пӧлын 39 процентэз нылпиос. Грипп вируслэн кужымез кык арня ӵоже возиське. Соин ик та вакытэ палась висёнъёслэсь тужгес но утиськыны кулэ. Аптекаосын али 80 пӧртэм эмъюм вузаське. Шедьтыны луэ дунтэмъёссэ но, Россиын поттэмъёссэ, кылсярысь, аптекаосын вань дибазол, аспирин, антигриппин. Гриппен карантин дыръя аптекаослы ужаны косэмын 8 часысен 22 часозь, шутэтскон нуналъёсты вераса но ӝог медицинской юрттэт сётӥсь службаослы тырмыт бензин висъямын. Та вакытэ адямиослы шергес вуылоно трос калыко интыосы. Трамвай-троллейбус управление али сюлмаське кондукторъёслы но водительёслы чеснок но витаминъёс висъян, транспорт пушез шуныт но чылкыт возён сярысь. Туннэ нуналлы 50 сюрс адямилы грипплэсь прививка лэсьтэмын. Но со понна 30 манет тыроно. Ваньмызлэн дун тырыса эмъяськыны луонлыксы ӧвӧл бере, паськытгес уже кутоно калык эмъяськон амалъёсты. х х х Мукетыз кышкыт висён - урмон (бешенство). Удмуртиын та чер ӧй ни вал 60-тӥ аръёсысен. Но кылем арын больницаосы 3985 адями вазиськем пуныос но коӵышъёс куртчылэмен, нош туэ январь толэзе гинэ - 205 адями, со пӧлын 55-ез - пиналъёс. Урмон али вӧлмемын ӟичыос но кионъёс пӧлын. Ас висёнзэс соос гурт пудоослы но сётыны быгато, тӥни соин ик адямиослы но кышкытлык кылдэ. Пудоос пӧлын урмон шараямын ни Грах но Кизнер районъёсын. Сыӵе висись пудоосты соку ик быдтыны кулэ. Урмонэн висьыны усем адямиез эмъяны уг ни луы, соин ик пуны, коӵыш яке мукет пудо куртчыку, адямилы ӝегатскытэк больницае вазиськоно. Но республикаямы али секыт югдур кылдэмын вакцинаосын. Ӝоген тани лемтэй но сюлмаськытоз, кылем арын нырысетӥез юрттэт курись адями больницае март толэзе ик вазиськем. Берло дыре городъёсын но гуртъёсын туж трос луизы калгись пуныос но коӵышъёс. 1972-тӥ арын кутэм постановлениея соос понна кыл кутыны кулэ городын коммунальной, гуртын - участковой службаос. Постановленилэн кужымез бырымтэ на. Нош кӧня коӵыш но пуны возьыны кулэ меда котькуд семья? Солы нокыӵе норма тупатымтэ вылэм. Но комиссиысь адямиослы таӵе учыръёс верамын вал: одӥг семьяын, пе, 8 пуны возё, нош мукетаз - 150 коӵыш. Серем-а со? Ӧйтӧд. Но вашкала дауръёсы калгись пудоосын но коӵышъёсын котьку нюръяськылӥзы. Императоръёс соосты быдтон сярысь нимысьтыз указъёс поттылӥзы. Нош феодалъёс одӥг пуныез но доразы возьыны ӧз дӥсьтылэ, пуныос нимаз липет улын но думыса гинэ улон даурзэс ортчытылӥзы. Зэмзэ но, умой-умой малпаськоно, дыр, пуны яке коӵыш - со шумпотон яке тушмон. х х х Россиын 2000-тӥ арозь быдэсак быдтэмын луыны кулэ мукетыз кышкыт висён - полиомиелит. Соин нюръяськон асьме странаын кутскиз 1998-тӥ арысен. Та висёнлэн вирусэз шедьтэмын вал вуысь 1996-тӥ арын. Полиомиелитэн черлам адями вань даурезлы ӧлексы кыле. США-ын висён быдтэмын ни. Но куд-ог странаосын возиське на. Кылсярысь, кылем арын Турциын 12 мурт висьыны усем, Россиын али соин 6 мурт висе, Удмуртиын - ӧвӧл. Висёнэн нюръяськон понна пичи нылпиослы 3 толэзьысен но 3 аресозь одно ик вакцина пуктоно. Туэ асьме республикаын сыӵе ужрад ортчоз 15 мартысен 19 мартозь но 19 апрельысен 24 апрелёзь. Солы анайёс дасесь луыны кулэ. Россиын туннэ 11 миллион нылпилы полиомиелитлэсь вакцинаос пуктылэмын ни. Удмуртиын - 130 сюрс нылпилы. Но жаляса верано, анайёс пӧлын валэктон уж нуон интые, куд-ог врачъёс соосты прививкаослэсь алыны но туртто. Озьы ик пумитъясько инмарлы оскисьёс. Вань на эшшо одӥг могӟет: куд-ог больницаосын ӧвӧл вакциннаез возён интыос. Сое утьыны луэ 0-8 градус кезьытын гинэ. Сыӵе холодильникъёс сокем дуно уг сыло (300 манет), соин ик Правительстволы соосты басьтон понна луонлыкъёс шедьтоно. Т. БАННИКОВА. Вячеслав Ар-Серги Пашка Педор - транзит Верос Пашка Педорлэн, мунчо быдӟа коркаез но висись кышноез сяна, номыриз но ӧй вал. Тол но гужем со ветлӥз буёлзэ ыштэм комбинезонэн, пыдаз - резина сапег, йыраз - я курег пузаны возьдаськытозь картуз, я - куака кар тусо изьы. "Туннэзэ улыны инмар сётӥз ке - ярам, нош ӵуказезэ - нунал возьматоз", - шуылӥз со. Лымы усе ке, сое сузяно: сотэк лапас липетэз пачкатоз. Зорыны кутске ке, вузэ канаваостӥ ӧръяно: сотэк ву гулбече пыроз но, эбекъёс алялозы, уин изьыны уз сётэлэ. Нош инкуазь озьы ӧй ке шукыръяськысал, Пашка Педор мыр-мыр пукысал корказь тубатаз но "Примазэ" пурккетысал. Номыр сярысь малпатэк, нокинэ возьматэк, нокытчы дыртытэк. - Педор, шыд пӧзьтыны картошмы бырем, - шарак карылӥз сое кышномуртлэн куараез. Соку воргорон золскыса султылӥз но вамыштылӥз. Кытчы? Картошлы, дыр. Угось куддыр сием но потэ. Педор возьмаськись луыса ужа вал скал гидъёс котырын. Уинзэ. Ӝыт пал со лать-лать гинэ васькылӥз гуртлэсь кык иськем палэнын сылӥсь гидъёс доры но конюховкалэн корказь тубатаз пуксьыса аратылӥз тамаксэ. Озьы со ӵукнаозь пукылӥз. Толалтэ нош вылаз Палсин Митрейлэсь пунэмам тулупсэ дӥсялляз. Нуналысь нуналэ озьы. Дыр ортчылӥз, чиньы пыртӥ виясь ву кадь - дыртытэк, вӧсь карытэк но пусъёс кельтытэк. ... Со нуналэ но Педор интыяськиз аслаз постаз. Серекъяса вӧзтӥз скал кыскись кышноос кошкизиы. - Педор, кудмес-о уйлы вӧзад кельтлд? Мӧзмыт ук, дыр, оген, - серектӥз огез. Педор номыр но ӧз вазьы, пельыныз но ӧз выреты. Сюрес вылтӥ, тузон поттыса, председательлэн кильтро машинаез ортчиз. Азьло ойдо ворттылэ вал саркмем брезентэн шобыртэм "Газикен". Таиз нош кыӵе ке но кунгож сьӧрысь ваемын, лэся. Эсьмаса, Япониысь ке ӧвӧл. Руль сьӧраз - предлэн ослоп пиез. Синъёсыз пияла кадь чиляло, ымдураз фильтрен тамак лякемын. Кабинаяз капчиям гольык нылъёс. Кесясько, кырӟамъясько. Кам шур дуре шутэтскыны мыно, дыр. Ослоплы атаез гурт вырйылэ али гинэ куинь этажъем корка пуктыса сётӥз. Улон - йӧлвыл. Ужаны косӥсь ӧвӧл. - Педор, вай ай шырпудэ, - пукись воргорон доры Семоныч дугдӥз. Фермаен кивалтӥсь. Ош кадь пиосмурт, ныр улаз мыжык быдӟа сьӧд мыйыкез. - Ме. - Марым, монэ юась луиз ке, шуод - ӧй адӟы. Фермаын ӧвӧл, - шокыштӥз Семоныч но конюховкае пыриз. Отын сое кемалась возьма ни Олён. Горд йырсиё, буйгыт мугоро пал кышно. Нош ик таос быдэс уй ӟукыртозы, ӝуштозы. Олён черектылоз но собере кит-кит серекъялоз. Педор сярысь соослэн малпан ӧвӧл. Педорлэн но соос сярысь малпанэз сьӧд гижы быдӟа но ӧвӧл. Семонлэн кышноез - чиед мугоро, бадӟым ымо Миля - гинэ медам вуы. Сурым гинэ потоз. Мултэс сюлмаськон кылдоз. Нош Педорлэн номыр сярысь малпаськемез уг поты. Лул-сюлэмзэ ик синкабакъёсаз кыскаса, со учке пуксись шундылэн берпум сиосызлэсь кулэмзэс. Бездытэсь но кутонтэмесь со сиос. Мырдэм дэмӟыло на Пенезь гурезь вылын будӥсь начар кызъёслэн мугоръёссы борды, гылӟыса ортчо визылась шурлэн вогыриосыз вылтӥ но - собере ышо. Дунне вылын сай-сайкыт луэ. Кытын ке буйгасьтэм пуныос куаньгето, мотоциклъёс таргето. Нош татын - сайкыт. Дунне пачылме скалъёслэн ангесъёссы мылпоттэк выремен но шуныт шокаменызы. Чыс-пыс, чыс-пыс, чыс-пыс. Тани артысь сикысь уй тылобурдоос но куараоссэс сётӥзы. Жильыр-р! карыло: гульымъёсазы ошмесъёс пӧзё кадь. Чирак кеськиз шыр, уйсылэн ӝабрес гижыосаз шедьыса. Нош Педорлэн пыд улаз, сюен шобырскыса, му зарезь шопыльтэ. Нош пушказ паймымон чорыгъёс уяло, быжъёсынызы жомбыльтыло, осьминогъёс сьӧд чернилэн пазясько. Педор ваньзэ адӟе но бездэм мыйыксэ уг ик вырӟытъя. Акшан. Та дыре, пе, вегинъёс лобаны дасясько. Огзэ Педор адӟиз ни, гурт палась лобисьсэ. Шыр гольык, йырсиосыз чильк-вальк сьӧдэн кисьтасько, синъёсыз вож ӝуало. Нлэскын кӧлӥсь пу корасьёс доры, дыр, лобиз. Соос нош ик пень кадь юозы но ӵукназэ султыса паймозы - нош ик быдэс машина коръёс ышиллям. Уката ик - машинаеныз ӵош. Нош со, валамон ини, Шур сьӧр Матӥлэн азбараз луоз. Акшан. Тамак чиньы пумзэ сутытозь пукиз Педор корказьын. Собере мылпоттэк фермаос котыртӥ ортчиз. Огезлэн мышказ Микит уробояз тыре лушкам шифер листъёсты. - Педор, ӵуказе зороз-а, уз-а? - мар вазьыны могаса юа тӧдьыкысъем Микит, шӧдытэк кияз пуӵ кутэ. - Ӧйтӧд, - Педор шонске но, штан кыретсэ усьтыса, пуж-пуж кызя Микитлэн лушкам шиферез вылэ. - Таизэ поныны вуымтэ на уробояз. Микит пиньыныз гизьыр! каре, Педор пал кыл вератэк кошке. Акшан. Кӧня ке дыр ортчыса, председательлэн ослопез дусымъёсыныз вуэ. - Эй, на посту! Никотинмы воксё быриз, - шенгыль-пенгыль вазе ослоп, - махоркаед коть вань-а? Кылӥськод-а, пересь?! Педор, пал кыл вератэк, "Прима" пачказэ сётэ. Соиз гоно киыныз кырме тамакез. - Тау. Бартер каром! - иномаркалэн ӧсэз усьтӥське но, отысь донгыса лэзем трус коже гинэ нылаш погыльске, - акыльтӥз ини та. Одӥг стаканэн, ява, кисальӟиз. Тожо ява, ? ассэ гетеракожа! Тьфу! Машина зуркак вырӟалскыса кошке. Син куспын ыше, пушкысьтыз урмем магнитофонлэн шукыръяськемез гинэ кылӥськылэ на. - Эй! - кизэ ӝутыны выре на нылаш. Али-али гинэ лобӟыны кутскем гадьёсыз зӥри- дӥри зуркалскыло, - вот ведь, сволочъёс... Буржуй пуны! Педор, пал кыл но вератэк, нылашез ӝутэ но укно улысь паськыт ӟус вылэ интыя. Улаз халат нерге вале, нош вылзэ корказьысь фуфайкаос вайыса шобыръя. Йыр улаз аслэсьтыз картуззэ комокаса понэ. Нылаш соку ик умме усе. - Э-э, мискинь, - пинь висъёстӥз Педор ӟизатэ но вунэтэ со сярысь. Со уг яраты паймылыны. "Эн паймы, - шуэ со котьку, - ато вылад вуоз". Пыдэстэм тём инмын вырӟылытэк чильпась кизилиос пӧлын огез ас сюрессэ инъя. Таиз - самолёт. Отын, чылкытын, пуко адямиос. Коньяк юо, артэ пукись нылкышноослэсь пезьгыт кӧтурдэсъёссэс ӟыгыръяло яке - сор-р! поттыса изё. Педорлэн изем уг поты - нуназезэ лымшор вакытозь кеносаз кӧлӥз. Нош мар ке но кӧтын юмекъяны кутскиз кадь. Педор корказе пуксе но пи кисыысьтыз нянь шорем поттэ, собере штан кисыысьтыз - курег кук. Толоназ апаез вайыса кельтэм вал вандоссэ. Уг пуза, пе. Педор сиське. Солэн лопырес пельёсыз мылпотытэк выро, куажыосыныз чикырто. Кӧлӥсь нылаш вылысь огез фуфайка музэ усем. Педор султэ но буй-буй пельпумъёс вылысь фуфайкаез тупатъя. - Милой, тон но-а? Вай витьтон манеттэ - рае вутто, - нылаш умпумтӥз Педорлэсь кӧс лыо кизэ кырме. - Кайта лыкты, миым понна уждун ке сётӥзы, - йыркуртэк Педор ымпумтӥз куштэ но кошке. Нош ик пуксе но сиськыны выре. Собере киоссэ штан бордаз ӝикытак ӵушылэ. Табере мар ке юоно вал. Конюховкае уд пыры. Иське, фермае мыныса, кранысь юоно луоз. Ӧс борды гинэ Педор кутскиз - кусказ калленак мырӟись луиз. Педор соку ик палэнэ тэтчиз но киоссэ азьлань пуктӥз. Мугор дышем сямез малпаськытэк ачиз быдэстӥз. Нош та мар тамаша? Кунян. Огшоры кунян. Вунэтӥллям гидэ пыртыны. Кытчы ке ышыге вуыса кылиз, дыр. Синъёсыз лыз чиляло. Му-у-у! Зэмос скал кадь, ява, куаразэ поттыны выре. Хм. Тае гидэ пыртоно ук. Кунянъёс доры ик. - Ойдо сьӧрам, - шуиз Педор. Кунян сьӧраз вамыштӥз. - Визьмо, лэся, тон. Кранысь ву лэзьыса, Педор гуч-гуч юиз, кунянэз люктаз. - Я, кӧл, мон татын, - шуиз со. Кунян уг кыльы ведь. - Кӧл ини, шуисько, - ӧсэз ворсаз Педор. Огшап бергаз на ёростӥ, собере нош ик конюховка доры вуиз. Нош ик - татын со кунян сылэ. - Кызьы тон потӥд ай, юлтош? - паймем кариськиз Педор но меӵак пуксиз тубатэ. Кунян ӧз но бӧксы. Дол учке Педор шоры. Мускыт тусо. - Тон уд-а бӧрдӥськы? - шуак луиз воргорон, - кин ке обидиз-а, мар-а? Кунян Педорлэн пыд азяз лыктӥз но каньылак музэ лэзькиз. - Ме ай, куртчы, - нянь вылэ сылал пызьназ Педор. Кунян нянь турижез туж мыло- кыдо сииз. Педорлэн сюбег кипыдсысьтыз пырыоссэ но нюлыса бичаз. Нош ымдуръёсыз сыӵе ненегесь но шунытэсь - вож нылпилэн кадь. Педор сое вешаны, маялляны кутскиз. Соиз синъёссэ ик кыньылыса, кырмышъяса эркияське. - Мар ай тон эшъёсыд доры уд мынӥськы меда? - тамаксэ аратонъяз юаз Педор. - Мар, уд вазиськы, а? Ну и эны! - Тынад синъёсыд Андрейлэн кадесь, - оломарлы шуиз Педор. - А-а, тон уд тодӥськы ук, кин со, Андрей. Ленинградысь пияш вал со, ротаысь эше мынам. Душманъёс сое виизы. Шӧйзэ цинк гробын гуртаз мон нуи. Анаез нош пырак синмам ик сялӟиз. Мар шуод: мон янгыш. Ӧй адӟы из сьӧрысь пуштунлэсь автомат гумызэ. Андрей быриз. Туж бӧрдылӥз институтсэ быдтымтэез пумысен. Кинлы мар ини, шуод-а, мар-а... Ленинград-Кабул-транзит - шайвыл, значитца. Кунян пельёссэ чорк! Гинэ карыса кылзӥз Педорлэсь верамзэ. Валаса кадь, йырыныз мыкыръяз, ымдуръёсыныз шлёпкетӥз. - Уть ай, шунды ӝужан пали льӧльыра ни. Кӧня меда час али?.. - Педор султӥз но конюховкае пыриз. Огшап сылӥз, синъёсыз пеймытлы мед дышозы шуыса. Паськыт ӟус вылын шер-шер кыллё. Олён но Семоныч. Изё. Педор спичказэ ӝуатӥз но Семонычлэсь бур кизэ ӝутӥз: чассэ учке. Олён шуак луиз. - Кин та? - Педор. - Кӧня ни дыр? - Ньыль котырын. - Ох, султоно угкини та. Нош тон мар уд кӧлӥськы? - Уг поты. Олён мылпоттэк киоссэ гольык кӧт улаз тыре. Соос бордысь чырс зын лыктэ, пӧсям вуэн суро. - Я, пот, Педор. Мон дӥсясько ини. Туннэ, пе, скалъёслы нюлон сылал ваёзы. Озьы-а? Гуртэ но нуоно вал. - Ӧй кылы, - Педор пыдчиньыяськыса кошке. - Вот ведь, уй моко. Эшшо кылем арын сямен ошиськыны кутскоз ай, - нукыртэ Олён но ӟус вылысь ӟукыртыса султэ. ... Нырысь атасъёс гульымъёссэс золъяны кутскытозь, Педор пукон интыысьтыз султэ но бертыны дасяське. Собере ӧс дорын сылӥсь Олёнлы вазе: - Та кӧлӥсь нылашез утялты вал. Жадем уй бубылиед. Олён берен пыре. Кӧлӥсь нылашлы маке-со дӥсь утча. Жаль ук адямиез... Педор гурт пала вамыштэ. Нош сьӧраз кунян гонӟыртэ. Кӧня улляны выриз сое воргорон - ӧйлась. Собере шонскиз. - Айда, иське, сьӧрам - в счет зарплаты. Ато татын тон уд толйы - куасалскод куро вылын. Кунян, валаса кадь, Педор доры лыктӥз но шудыса мырӟиз сое кӧтурдэсаз. Собере воргорон малпаз: "Нош Андрейлэн синъёсыз таӵеесь ӧй вал. Мӧзмытэсьгес вал. Нош марлы? Ӧйтӧд". Собере шӧдтэк шорысь шуиз: - Коть зор-а, мар-а вал. Гудыръяса. Оло, выламы ӵашйысал но?... Кык лулъёс, каллен вамышъяса, ӵуквыл бус пӧлы ышизы. Соос ӧй вал но кадь... Удмурт Республикаысь Кун Кенеш, Правительство мур куректэмзэс верало Удмурт Республикаысь промышленностья министрлы Виктор Иванович Долговлы но семьяезлыкема но секыт висемез бере нылзылэн Долгова Ольга Викторовналэн дырызлэсь вазь кулэменыз валче. х х х Удмурт Республикаысь Промышленностья министерстволэн коллективез мур куректэмзэ вера промышленностья министрлы Долгов Виктор Ивановичлы нылызлэн Долгова Ольга Викторовналэн секыт но кема висьыса дырызлэсь вазь кулэменыз валче. Ӧтён Ижысь ожысь но ужысь ветеранъёслэн Кенешсы мылкыд карисьёсты "Ветеран" клублэн ужрадаз ӧте. Со ортчоз 1999-тӥ арын 24-тӥ феврале Кун филармонилэн Бадӟым залаз (Пушкинской ульча, 245-тӥ юрт). Кутсконэз 11 часын. Пумиськонэ ӧтемын Ижысь кардиологияя центрысь валтӥсь врач Е. Г. Одиянков но "Фармация" кун предприятилэн генеральной директорез А. П. Кузнецов. Пумиськон бере концерт ортчоз. Лыктыны быгато вань мылкыд карисьёс. НАТАЛЬ Тӧдьы кызьпу вож куаро но Бусы шорын веськрес кызьпу будэ, огназ. Тулыс вуэ ке, чебер вож дӥсьсэ дӥся, егит нылаш выллем, ненег угыоссэ бырттылэ. Гужемзэ со бызем кышномурт музэн чида ваньзэ ик - зоршапыкъёс шукко-а яке яратӥсь кузпал кадь небыт тӧл-а веша. Нош сӥзьыл со песянай музэн гужа, вань кужымзэ, берпум куаръёссэ ю-нянь удалтонлы сётэ. Тол ке вуэ, тӧдьы шобретэн шобырскыса, вуоно тулысозь умме усе, выльысь улӟон понна. Вӧзаз ӝужало выльёсыз ненег пушъетъёс. Каллен будо, нош ик асьмелэсь дуннемес шулдырто. Паймоно кадь, адямилэн но улон даурез озьы ик кутске но быре, нош нылпиосыз кылё. Мон но куке туж йӧно, веськрес мугоро, мусо нылмурт вал. Бызи тӧлпери кадь воргоронлы, инмар утиз, люкиськи. Кыкетӥез шунды кадь ик чебер вал, толэзь кадь ик югыт, вылаз ик, визьмо, ужась, уг но юы вал мултэссэ, тамак но ӧз кыскылы. Вордӥ мон солы кык пи, нырысетӥ картэлэсь одӥг пие вал на. Созэ но мултэс ӧз кары - ӵош будӥзы. Корка пуктӥм, пудо вордӥм, бакча сиён будэтӥм. Малпаськод ке, мар кулэ на шудо луон понна? Тазалык кулэ вылэм на, мугоры пери шуккем кызьпулэн сямен висьыны кутскиз. Больницае поныса, пыктоссэ вандылӥзы. Палатаын вить кузя кыллимы. Туж секыт вал адӟыны: эшъёсы доры лыкто, ческыт сиён-юон, сяська ваё, верасько, либато, чаляк бурмы но берт шуо. Нош мон бусы шорын сылӥсь кызьпу кадь ик огнам. Кык толэзь ортчыса, гуртам лэзизы. Но мынам "шундые" пиналзэгес "кызьпуэз" синйылтэм, нылпиоссэ сое анай шуыны дышетэм. Монэ корка пырыны ӧз лэзьы ни. Ма кароно, ӟигар ӧвӧл, куазь пӧсь, гужем вал соку. Бусые мынӥ но погылляськыса бӧрдӥсько, нокин медам адӟы шуыса. Кошки вордскем гурт палам. Корка пыри но анаен- атай шуизы: "Ми тыныд корка пуктӥм, марлы бертӥд, мын кошкы!" Нош садэ потӥ но бӧрдӥ. Кызьпуэз но сурсвуэз юыны ӵого ке, весь куасьме но куасьме, мон но озьы ик куасьмыны кутски. Выльысь мынӥ картэ доры. Нылпиос монэ жаляса бӧрдо, нош атайзылэн йырыз поромемын выль яратонэн. Нош ик монэ улляса лэзиз. Асме быдтыны киы ӧз пыры. Коркась корка кураськыса ветлӥ, ӟигармы быре ке, шур дуре выдӥсько но пуны сямен кӧлӥсько. Куазь кезьыт кариськиз, фуфайка, штани ӟеч калык сётӥз. Кин шыдэн сюдэ, кин нянь сётэ, кин ӵыжаса лэзе. Калык пӧлын но котькыӵеез вань. Мон пичи дырысен кырӟаны, маскаръяськыны мыло-кыдо вал. Концертэн Анатолий Ушаков но нуллӥз, радио пыр "Ладилэн азбараз" но вераськемме гожъязы, трос пол серекъятӥзы калыкез. Туж усто, куке уд висиськы, нош табере мынам кырӟан-веран мылкыды тӧлӟиз. Тулыс вуыса, берен вордскем гуртам бертӥ. Интыязы общежитие. Бадӟымез пие туэ армие кошкоз, нош пичиез кулӥз. Шоретӥ пие атаез дорын, мурт кышномуртэ анай шуэ. Вань-а зэмлык, вань-а яратон, вань-а сюлэмыз со воргоронлэн, кудӥзлы мон сётӥ Дас кык ар улонме, тазалыкме? Со кышномурт но куке валалоз али, муртлэн синкылиеныз кӧтыз уг тыры шуыса. Ужтэк кылемъёслэн биржа шуоназы сылӥсько, коньдон уг тыро. Пие дышетске шофёре. Картофка муртлэн бакчаяз будэтӥ но улӥсько. Секыт ӝуткаме ке луысал, фермае ужаны мынысал. Табере буйгай ини, кык ар огнам улӥсько. Нылпиосы быдэсмизы ке, валалозы, дыр, кин янгыш мынам бӧрдэмелы. Малы гожтоно кариськи мон "Удмурт дунне" газетэ? Тросэзлэн али улонэз шулдыр ӧвӧл, котькуд семья ми сямен ик ёрме, дыр, сиён-юонлы, дӥськутлы. Мынэсьтым но урод тазалыкен уло ук, асьсэды уг быдто, мынам но улэме потэ. Куамын тямыс аресме тырмытӥ, нош ымнырс кызьпулэн суэз кадь бызырмиз. Тулысэз возьмасько ни, нош ик турын-куар потоз, маке-маке мерттом, озьы ик каллен улом ай, малпасько. Кырӟаме но, вераме но потоз. Куке но кужым шедьто на, дыр, нош ик калыкез шулдырто. Таӵе секыт дыре Ашальчи Окилэн кылбуръёсыз буйгато: "Шудэд тонэ алдаз ке, Эн чигиськы, эн бӧрды. Секыт нунал лыктӥз ке, Чидатӥськы, оскиськы: Куддыр вапум секыт ке но, Азьпалан ӟеч нуналъёс. Ваньмыз ортчоз, ортчоз, кошкоз - Ортчем вапум мусо потоз". Кыӵе визьмо кылъёс, ӵапак ми кадь куштэм кышноослы гожтэмын, дыр. Инмаре, кылчинэ, уть милемыз вордэм нылпиосмы понна! Шуд но тазалык сӥзисько вань ӟеч удмурт калыклы. Бусы шорысь кызьпу сямен, эн сётске нокыӵе кезьыт сильтӧллы! Т. ФРОЛОВА. Можга районысь Улын Вишур гурт. НАТАЛЬ "Семья ке юн, улон но йӧн" конкурслы йылпумъянъёс Удмурт Республикаысь Правительстволэн семья ужпумъёсъя, калыкез улон-вылонын утёнъя но тазалыкез утёнъя отделэныз ӵош кылем арын март толэзе "Наталь" бамын ялӥмы вал "Семья ке юн, улон но йӧн" конкурс. Гожтоно вал шаерысьтымы куинь но солэсь трос нылпи будэтӥсь адӟем карымон семья сярысь. Кызьы пусйимы вал, конкурсэ пыриськыны быгато вань мылкыд карисьёс. Жаляса верано луэ, конкурсэз ӧжытэз гинэ синйылтэм. Нырысетӥ интые потӥз редакциын ужась Валентина Кутузова ("Улонлэн кужымез - зарни бугоръёс", 28 июнь). Пусъемын 125 манет коньдон премиен. Кыкетӥ интыын Шаркан районысь Зюзино школаысь дышетӥсь Алевтина Никитина ("Бугоре биниськем оскон", 20 октябрь). Пусъемын 100 манет коньдон премиен. Куинетӥ интыын Удмурт кун университетын дышетскись Галина Савина ("Тыпы выжые пуппы уз поты", 20 август). Оскиськом, мукетъёсаз конкурсъёсы лыдӟисьёсмы мыло-кыдо пыриськозы. Геройлэн пытьыезъя Декабрьлэн берпуметӥ нуналаз мон дыртытэк гинэ вуи Вылӥ Лудзя гуртэ. Ӵапак отын 1915-тӥ арын 26 декабре вордскиз Советской Союзлэн Героез Василий Зайцев. Та гурт интыяськемын Лудӟи шур дуре. Шурлэн нимызъя ин тодамы ваиськом тодмо писательлэсь Трофим Архиповлэсь книгазэ. Пумиськи азьвыл трактористэн Михаил Иванович Зайцевен. Умой ужамез понна со пусъемын орденэн. Михаил Иванович тодаз ваиз Василий Петрович Зайцевлэсь анай-атайзэ. - Василий Петрович Зайцевлэн вордскем юртъер интыяз памятник яке мемориальной пул ке но пуктоно вылэм, - шуиз мынам выль тодмое. Малпасько, со ӵектон туэ быдэсмоз шуыса. - Мынам нылы Подшивалово школаын дышетэ. Аслаз дышетскисьёсыныз со вуылӥз Литваысь Каунас городысь геройлэн шайгу вылаз - данъяськыса веранзэ азьланьтэ Михаил Иванович. Со нылыныз Людмила Васильевна Стерховаен пумиськыны ӵектӥз. Шуныт но ӟеч мылкыд кельтӥз Василий Петровичлэн бускельёсыныз пумиськон. Героймы котьмаин но тунсыкъяськыса будӥз, туж шаплы но чупрес вал. Ялан малпалляз Горд Армие мынон сярысь. Малпанэз быдэсмиз Краснознаменной Дальневосточной армиын пограничник луиз. Со армиез граждан ож вакытэ Василий Блюхер маршал кылдытӥз вал. Быдӟым Отечественной война вакытэ Василий Петрович ожмаськиз Н. Крылов генерал-полковниклэн дивизияз. Уноез уг но тодо, дыр, старшой лейтенантлэн Зайцевлэн ротаез Восточной Пруссиен границаез нырысьёсыз пӧлын выжиз шуыса. Историе кылем та подвиглы ик сӥземын Завьял ёросысь Подшивалово школаын стенд. Василий Петрович кышкасьтэм луэмез понна пусъемын Горд Знамя, Александр Невский, Горд Кизили, кыкетӥ степенё Быдӟым Отечественной война орденъёсын. Нош 1945-тӥ арын мартэ быремез бере Удмуртиысь кышкасьтэм капитанлы Советской Союзлэн Героез ним сётэмын. Ачиз В. П. Зайцев сӧсырмемез бере 1944-тӥ арын кулӥз. Герой сярысь материал люканы ӵектӥз вал В. Голубев подполковник. Та уж борды басьтӥськиз Подшиваловоысь дышетӥсь Людмила Стерхова. Со аслаз дышетскисьёсыныз 1975-тӥ арын май праздникъёсы Москваын пумиськылӥзы 5-тӥ Краснознаменной армиысь ветеранъёсын. Нош 1984-тӥ арын, Быдӟым Вормонлы 40 ар тырмон азьын, соос вуылӥзы Каунас городэ. Та городэ вуылыны кылдӥз аслым но. Подшиваловоысь школае вуылӥзы Зайцевен ӵош ожмаськем эшез Советской Союзлэн Героез Георгий Губкин но мукетъёсыз. Та комната интыяськемын историяя кабинетын. Советской Союзлэн Геройёсызлэн Василий Зайцевлэн, Александр Сабуровлэн но Александр Лушниковлэн нимъёссы дышетскисьёслы данъяськон мылкыд пыӵато. Быдӟым Отечественной войнаын Быдӟым Вормонлы туэ тырме 55 ар. Туэ выль арлэн нырысетӥ нуналаз мон вуылӥ Людмила Васильевна Стерхова-Агафонова доры. Со ачиз йылпумъяз Дебессысь педагогической училищеез но Удмурт педагогической институтэз. Дышетӥсь быдэс улонзэ сӥзиз пиналъёсты будэтонлы. Людмила Васильевна уно туспуктэмъёс, альбомъёс, газетъёсысь материалъёс возьматӥз. Соку ик малпай, та узыр материалэз школае нуыса интыысь музей кылдытыны луоно шуыса. Бен, таӵе адямиос шаерамы сокем ик трос ӧвӧл. Соослэн тыршеменызы берытско выль нимъёс. Сыӵе патриотъёс пӧлы пыро Подшиваловоысь Людмила Стерхова, Лудорвайысь Анастасия Евсеева, Шарканысь Лидия Аксенова, Якшур-Бодьяысь Валентина Иванова, Пугачёвоысь Антонина Коробова. Егит дышетскисьёс-шаерчиос но соослэсь адӟем мед карозы вылэм. Вань соослэсь малы дышетскыны. Виктор Поздеев, "Брестысь крепость-герой" мемориал комплекслэн штатэ пыртымтэ научной ужасез. Атыкай музъеммес утисьлэн нуналэныз! Гажано эшъёс! Вань сюлмысьтымы ӟечкыласьком тӥледыз Атыкай музъеммес утисьлэн нуналэныз - праздникен, кудӥз огазея присягалы но Родиналы вань сюлэмез сётон мылкыдэз! 23-тӥ февраль - та праздник соослэн, кин секыт дыръёсы Атыкай музъеммес утиз, кин туннэ но асьмелэсь шаермес уте. Та нунал тодмо Рабоче-крестьянской Горд Армилэн, советской калыклэн фашистъёсыз вормонын кышкасьтэм луон данэн. Со аръёсы Удмуртиын улӥсьёслэн ньыльмос люкетэз, 300 сюрс пала асьме адямиосмы, фашистъёсты вормон понна султӥзы солдат радэ. Соос пӧлысь котькуд кыкетӥез бырыны шедиз. Котькыӵе дыре Удмурт Республикаысь калык йыбырттоз асьме пиосмылэн но нылъёсмылэн лэсьтэм подвигъёссы азьын, кинъёс утизы вордскем шаермылэсь данзэ но эриксэ. Странамес утён - котькыӵе вакытэ секыт но калыкен вылӥ дунъям но гажам уж. Юн оскыса но данъяськыса вераны луэ, туннэ но Атыкай музъеммес утисьёс котькыӵе шуг- секытъёсты чидало но вормо. Вань сюлмысьтымы ӟечкыласьком тӥледыз та праздникен! Йыбырттӥськом но тау кариськом тӥледлы, гажано ветеранъёс, тӥледлы, гажано офицеръёс но солдатъёс, Атыкай музъеммес утемды понна. Удмурт Республикаысь Кун Кенеш Удмурт Республикаысь Правительство Журналистъёсын пумиськонъёс Асьмелэсь начар улэ на Курган Уждун тырон ласянь, зэмен но, Урал котырысь улосвылъёсын Удмуртия но Курган область гинэ беромыса мыно. Озьы шуиз журналистъёсын пумиськон дыръя республикаысьтымы профсоюзъёслэн кивалтӥсьсы Е. Н. Орлов. Бюджет удыс сярысь ке верано, Башкортостанын, Татарстанын, Челябинскын уждунзы 1-тӥ январьысен будэтэмын ни, асьме дорын чаклаське апрель толэзьысен. Солы коньдон шедиз ке. - Туэлы пусъем бюджетын туж трос тырмымтэосыз,- шуиз Евгений Николаевич.- Со бордын ужа на Кун Кенешлэн 24-тӥ сессияз быръем огъя кылэ вуонъя (согласительной) комиссия. Профсоюзъёслэн нимынызы ми сётӥм асьмелэсь ватсанъёсмес но дэмланъёсмес. Бюджетэ пыртымтэ вал нылпиослы коньдонэн юрттонъя компенсация, чакламын больницаосын дун тырыса эмъян, квартира дунъёсты будэтон но мукетыз. Профсоюзъёс депутатъёс азе пото таӵе куронъёсын: ваньмаз больницаосын дун тырытэк эмъяськон, госаппаратэз кулэстон, улон-вылон понна дунъёсты, уждун будэтытозь, азьвыл сямен ик кельтон. Али вераськон мынэ ни электрокужымлы, лифтлы, жуг-жаг куянлы чаклам тарифез 2-3 пол ӝутыны. Огшоры калыклы со - вормонтэм, малы ке шуоно, дыраз уждун ум тыриське. Бюджетэ озьы ик пыртэмын ӧй вал нылпиослэсь гужем шутэтсконзэс радъянъя коньдон, ми дэмласьком кылем арысь лыдпусэз ик юнматыны - 15 миллион манет. Пумозяз ӧз быдэсмы госаппаратэз возёнлы висъям коньдонэз 30 процентозь кулэстыны, кулэстэмын 10 процентлы гинэ. Книга поттон удыслы бюджетысь 38 миллион манет сётыны кулэ. Озьы ик пусъемын школаын дышетскисьёсты дунтэмгес дунын сюдон, эмъюмъёсты азьвыл тупатэм дунъёсъя вузан. Пумиськонын вераськон ӝутскиз гурт удысын ужасьёс сярысь но. Пудо вордӥсьёс, йӧллы но сӥльлы закупочной дунъёсты ӝутэмен валче, капчигес шокчизы ке но шуиськом, переработка тупатэм гожез эшшо но вылэгес ӝутыны выре. "Ижмолоко" АО сӥзьыл пал ас тодэмезъя йӧлэз дуноятъяз, али солэсь адӟем каро можгаос. Иже йӧлзэс ваисьёс али вожмаськыса ширто Можгае: продукцизэс отын дуногес басьто. Но республика понна со номыр ӟечсэ уг сёты, пусйиз Е. Н. Орлов. Можгаын поттэм сыр данакез кошке Татарстанэ. Кин оскытоз, ӵуказе таӵе югдур уз кылды нянь, сӥль ласянь? Дунъёсты юнматонъя но эскеронъя Правительстволэн постановлениез калыкез утёнын ляб ужа. Профсоюзъёс чакламъя, 24-тӥ феврале, Кун Кенешлэн сессиез усьтӥськон нуналэ, ог 500 дышетӥсьёс но медицина удысын ужасьёс пикетэ потозы. Соослэн куронзы одӥг: уждунзэс курон. Депутатъёс бырйисьёссылэсь куаразэс кылыны кулэ. Сотэк выль бюджетэз уд куты, пуж сямен, нош ик пасё кылёз. Л. МЕДВЕДЕВА. "Наталь" дорын куноын "Микаль" Вожан визь бордысь уг поты Майя Кристалинская кырӟа вал: "Мон тонэ ӧжытак вожасько совещаниослы, книгаослы но ужъёслы". Ӧжытак вожан со умой, уката ик кышномуртлы вожан ӧвӧл ке со. Мыным улытозям одӥг пол гинэ ӧз кылды адӟыны вожаменызы визьтэммем нылкышноосты. Ог-огзэс кылъёсын гинэ ӧвӧл, мыжыкъёсын но вӧсь карыны туртто. Ки улазы мар сюрем, ваньмыз кивалтослы мынэ. Но ӵем дыръя йырсиос ишкисько. Ог-огзы борды сыӵе ӝабырско, номырин уд люкы ни кадь. Мар бен со - вожан? А. М. Прохоровалэн энциклопедической словаряз таӵе кылэз ик ӧвӧл. Нош С. И. Ожегов вожан кыллы пӧртэм валатон сётэ. Нырысетӥез: кинлэн ке но яратэмезлы оскытэк керӟегъяськон. Собере тазьы верамын: "Вожанэн йырин семьяын кылдэм секыт югдур". Вожан но секыт югдур (драма) татын но кык люконтэм эшъёс кадь герӟаськемын. Котькуд адямилэн яратон мылкыдыз ас сямен усьтӥське. Но яратон ассэ ачиз яратӥсь маке, мукетыныз мылкыдзэ люкемез уг поты. Нош улонын ӵемысь озьы гинэ уг луы вылэм. Шуом, нылкышно аслэсьтыз яратонзэ кык воргорон куспын люке, яке воргорон кык нылкышноен улэ. Нош мон сямен, зэмос яратон кенже кык сюлэмъёс куспын гинэ. Матысь кусыпъёс тупатытэк яратонэз но мон озьы ик уг валаськы. Татын вераськон мынэ ни гажан сярысь, нош гажан но яратон - со пӧртэм мылкыдъёс. Сюлэм ачиз шедьтыны кулэ аслэсьтыз яратонзэ. Мынам улонам тани вал трос гажано нылкышноосы, яратӥсько шуисьёсыз но. Сюлэмы чалмыт улӥз бере, мынам соосты пӧяме ӧз поты. Шудзэс мукетэныз утчазы ни. Нырысетӥ яратон синтэм-пельтэм луэ вылэм, соин но, дыр, яратӥсьёс ӵем дыръя ӵошен уг кылё. Мон но йыры поромымон яратӥ. Макем зол яратӥ, сокем зол вожай. Нылашелэсь ватыны турттӥ та мылкыдме. Но кызьы ке огпол вераны шедьтӥ солы осконтэмме. Ӝутскиз керетон, ӧжыт гинэ ог-огмылэсь пӧртэм пала ӧм пегӟе. Мукет дыръя вожан сямме пыдло ватӥ. Но яратонмылэн бурдъёсыз ненегесь вылӥллям, ӵош ӧм луэ. Кӧня ке улыса, сюлэмам йыгаськиз выльысез яратон, таяз учыре ини - пыраклы. Аръёс ортчыса визьмаськоно. Табере валасько ни, вожан визь бордысь уг поты. Шуо, нылкышнолэн картсэ пӧяме кельтэмез потӥз ке, сэргы берытскыса но амалзэ шедьтоз. Мукет ласянь, вожан - со адямиез ултӥян, яратоно мурттэ гинэ ӧвӧл, астэ но. Но кин ке со, оло, мыным пумит вералоз. Кырӟа ук Лариса Долина, гажанэз ӧжыт ке но мед вожалоз, дораз бер вуыкуз, кытын вылэмзэ мед юалоз шуыса. Яратоно муртэд ӧжытак вожа ке, сюлэм шуна, лэся? Нылкышноос понна секыт вераны, но мон малы ке но оскисько, вань сюлмысьтызы яратӥзы ке, картсэс соос ноку уз пӧялэ. Мон оскисько аслам лулгажанэлы, оскисько аслам яратонэлы но. В. СОЗОНОВ. Завьялово районысь Первомайский посёлок. Наталь Психологен кенешон Ваменэс ке но - аслад "Малпасько вал, школае мынӥз ке, пиелэн ваменъяськон сямыз ортчоз. Чабкылӥсько но, куаретылӥсько но, нош со, юри ӧчкарем кадь, аслэсьтыз лэсьтэ. Ураме потыны уг лэзиськы ке, адӟымтэ дыръям со дорын ӧвӧл ни, йӧттэмелэсь но уг кышка. Шудонъёссэ утялтыны косӥсько - соос азьло сямен ик корка пасьтана куямын луо. Мар ке кӧтызъя ӧвӧл - уз дӥся, нош малы ке синмаськиз ке, бӧрдыса но куроз. Со бордысь ик пото вань керетонъёсмы". Анайёслэн вераськемысьтызы. Анай-атайёс но нылпиос куспын валамтэос нырысь ик кылдо ваменъяськон бордысь. Кӧня пинал синвуос кисьтэмын, кӧня анай-атай лулсэръёс чигиськемын вормисе потон понна. Мон дорын егит анай вить аресъем пиеныз. Со ӝожтӥськиз нылпиезлэн ваменъяськемез, керӟегъяськемез вылэ - "кулэ - кулэ ӧвӧл", "лэсьто - уг лэсьты", "лэсьтэ озьы - озьы уг яра". Вераськон сяменымы тодмо луиз, анай возьма вылэм нылызлэсь вордӥськемзэ. Ачиз со трос уг вераськы, мукетъёсыз вылэ оскиськыса уг улы, ваменэс пиез кадь ик зол сямо, ас кыл вылаз сылӥсь. Пизэ вормыны турттыса, солэн ваменъяськон сямызлы пумит султӥз. Аслэсьтыз урод мылкыдзэ ӵем дыръя пиналыз вылын буйгатъяз, чабкылыны но ӧз кепыралля. Нылпиез будэтонын зол луыны турттон люкетэ ог-огедлы матэктыны, сюлмысь кусыпъёс тупатыны, пиналлэсь мылкыдзэ, асваланзэ зӥбе. Уката ик, анайлы нылпиезлы тужгес но матын луыны кулэ. Нош со, вань урод но умой сямъёссэ палэнтыса яратэм, валаса дышетэм, индылэм интые, котькуд чыры-пыры понна пыкылыны, кесяськыны кутске. Кизэ йӧттэ яке мукет амал шедьтэ кылзӥськисьтэм нылпизэ интыяз пуктыны. Кызьы бен яратоно ваменъяськись, кылзӥськисьтэм пиналэз? Нырысь ик валаны турттоно: нылпи ваменъяське нылпи луэменыз, со нокызьы но бадӟымъёс кадь луыны уг быгаты, анай-атаез сое али ик сыӵеен адӟемзы потэ ке но. Пинал адӟем каре анай-атаезлэсь, шумпотыса басьтэ выль тодон-валанъёс. Но со сыӵе, кыӵеен вордӥськиз, кыӵе ке механизмез сямен сое выльдыны-тупатыны уз луы. Нылпилы шуо: бызьылыны, тэтчаны уг яра, эн вераськы, тынэсьтыд уг ке юало... Пумтэм индылонъёс. Дышетыны, валэктыны одно ик кулэ, но эсэпсэ тодоно. Шудон сямен дышетон тросгес пайда ваёз, ялан малэсь ке но алытозь. Мылкыдэз но пӧртэм сямен возьматыны луэ, малы одно ик кесяськоно, пыкылоно? Ваньмыз со юрттоз нылпиез керӟегъяськонъёслэсь утьыны. Нылпидылэн ваменъяськон сямыз вань ке, акыльтыса эн возе сое индылонъёсын, уката ик чабкылыны яке мукет сямен алыны эн дыртэ - югдурез со уродмытоз гинэ. Нылпизэс будэтонын анай-атайёслы асьсэлэсь но янгышъёссэс валаны кулэ, утчано огкыл шедьтон выль амалъёс. Ӝегатскытэк палэнтоно мултэс алонъёсты но куронъёсты, тросгес дырдэс висъяно нылпиостылы - ӵошен шудоно, шулдыръяськоно, серекъяно. Куштӥське ваменъяськонэн ожмаськонлэсь, одӥгез но ож дунне вылын кинэ ке вӧсь карытэк ӧз йылпумъяськы на. Е. СМАГА, Ижевскысь "Шугъяськись семья" центрысь психолог. Герд Нунал бӧрсьы нунал Та нуналъёсы "Удмурт кенешлэн" президентэз Валентин Тубылов пумиськиз Башкириысь удмуртъёслэн ыстэм муртъёсынызы. Вераськон мынӥз ваче кусыпъёсты муромытон сярысь. х х х Кылем понедельнике люкаськылӥзы "Удмурт кенешлэн" Ижысь активистъёсыз. Соос вераськизы депутатэ кандидатъёслы юрттонэз радъян сярысь. х х х Таяз субботае Филармонилэн юртаз 16 часын ортчоз Политикая клублэн заседаниез. Люкаськемъёс пумиськозы Кун Кенеше депутатэ ӵектэм адямиосын. "Инву гур" ансамбль концерт возьматоз. "Удмурт кенешлэн" исполкомез та ужрадэ вань мылкыд карисьёсты ӧте. Ӟечкыласьком Вордӥськем нуналэныз "Удмуртская правда" газетлэсь редакторзэ Николай Иванович Нестеренкоез. 50 арес. Кыӵе со ӧжыт адӟиське, ортчись 20-тӥ даурен ӵошатыса. Мар возьма асьмеды матэктӥсь даурын, тодмо ӧвӧл ай. Но али ик меӵак вераны луэ: милям эшмылы, журналистмылы ас улонэзлэсь мукет люкетсэ тыршоно луоз вуоно даурын. Николай Ивановичлы сӥзиськом ваньзэ умойзэ гинэ. Лопыръяськись улонлы сётскытэк, со ноку медаз ышты адямилыко сямъёссэ. Нош "Удмуртская правда" газет котькуд лыдӟись понна али но, азьланяз но оскымон эш медло. *** Республикаысьтымы огезлы тодмо адямилы Афанасий Ильич Тубыловлы тырмиз 70 арес. Пӧртэм удысъёсын ужаны кылдӥз та адямилы - дышетӥз, райисполкомен кивалтӥз, калыкез дышетонъя министр вал, собере - Удмуртиысь Вылӥ Кенешлэн Президиумезлэн тӧроез. Берло аръёсы Афанасий Ильич быгатыса кивалтэ республикаысьтымы Быръёнъёсъя комиссиен. "Удмурт дунне" газетын ужасьёс сюлмысьтызы ӟечкылало тӥледыз, Афанасий Ильич, юбилееныды. Азьпалан бадӟым сюлмаськон - Кун Кенеше быръёнъёс. Тӥляд кивалтэмды улсын та ужрад умой мед ортчоз. Сӥзиськом тазалык но юн кужым. "Удмурт дунне" газетын ужасьёс. Вить кандидат пусъемын Быръёнъёсъя "Россия Федерациысь Коммунистической партилэн Удмурт Республикаысь организациез" огазеяськон Удмурт Республикаысь Кун Кенеше депутатэ 43 кандидат ӵектӥз. Удмурт Республикаысь Быръёнъёсъя комиссия соос пӧлысь витьсэ пусйиз: АНУФРИЕВ Вячеслав Николаевич, "Удмуртпродконтракт" управленилэн генеральной директорез (быръёнъя 26-тӥ номеро Авангардной округ); КРУТЫХ Александр Александрович, "Удмуртнефтегазстрой" акционер огазеяськонысь управленилэн кивалтӥсез (быръёнъя 2-тӥ номеро Чеховской округ); ТРУБАЧЕВ Алексей Владиславович, УрОРАН-лэн прикладной механикая институтэзлэн директорезлэн наукая воштӥсез (быръёнъя 19-тӥ номеро Набережной округ), БОДРОВ Владимир Петрович, Россия Федерациысь Коммунистической партилэн Удмурт рескомезлэн секретарез (быръёнъя 32-тӥ номеро Родниковой округ); САВИЧЕВ Сергей Юрьевич, "Удмуртгражданпроект" институтысь акционер огазеяськонлэн директоръёсызлэн кенешенызы кивалтӥсь (быръёнъя 15-тӥ номеро Северной округ). Кинюртэмъёс люканзэс 20 пала кандидатъёс йылпумъязы ни. 17 февраль понна кандидатъёслы дурбасьтыса, Россия Федерациысь Коммунистической партилэн республиканской организациез 15 сюрс пала кинюртэм люказ. Россия Федерациысь Коммунистической партилэн Удмурт рескомысьтыз пресс-служба. Коммунистъёс огазеясько Удмурт Республикаысь Кун Кенешлэн Эскерон палатаезлэн председателез Михаил Шишкин (сое Удмуртиысь коммунистъёс республикаысьтымы Кун Кенешлы тӧрое ӵекто), но озьы ик Россия Федерациысь Кун Думалэн депутатэз, КПРФ-лэн рескомезлэн нырысетӥ секретарез Николай Сапожников Москваын Удмуртиысь коммунистъёслэн быръён азьын платформазылэн быдэстоно ужпумъёсыз сярысь кенешон ортчытӥзы. Кызьы тодмо, со платформая республикамес ӝутыны но азинтыны чакламын ньыль ар ӵоже. Кун Думалэн, Россия Федерациысь Правительстволэн экспертъёсыз, Москваысь тодмо учёнойёс эскеризы республикаез секыт югдурысь поттонъя программалэсь тужгес но кулэ интыоссэ. Удмуртиысь коммунистъёслэн кивалтӥсьёсынызы пумиськон дыръя КПРФ-лэн Думаысь фракциезлэн кивалтӥсез Г. А. Зюганов пусйиз: парламентысь тросэз адямиос бадӟым юрттэт сётыны быгатозы, рескомлэсь "За власть народа, за возрождение Удмуртии и России" платформазэ быдэстон вылысь. КПРФ-лэн Удмурт рескомезлэн пресс-службаез. Шунды Воректӥсь кизилиос Ваёбыж - Тырмоз! - жалезлы чидатэк, тренер ки улысь нылзэ ишкалтӥз Светлана Евгеньевна.- Ма, кыӵе ке резина-а, мар-а со: то йырыныз сьӧрлань бекмылляськыны, то кыез сямен позыръяськыны косо, кытын суйыз, кытын пыдыз, уд вала. Сӧнзэ золтыса, ӝыны ар тани курадӟе ни. Бадӟым опытэн тренерлы валамон анай-атайёслэн синвуоссы. Буйгатскыны ӧжытак дыр сётыса, Надежда Шепелева шуиз: - Наташалы сыӵе быгатонлык инмарен сётэмын. Тӥледлы уг яра чеберлыко гимнастикаез аналтыны. Ай ӝоген асьтэос адӟоды, кызьы нылды каньылэн вормонъёс октыны кутскоз, соку шумпотон синкылиосты васькозы... Ӵуказеяз Наташа Танаева нош тренировкае мынӥз. Нуналлы быдэ, шутэтскон нуналъёстэк но праздникъёстэк, 4-5 час ӵоже мугорзэ золъя со. Озьы 5 аресысен. 77-тӥ нылпи садысь куинь нылэз синйылтэм тренер. Сооссэ нылашъёсты малы ке анай-атайёссы нуиллямтэ гимнастикае, нош Светлана Евгеньевна но Николай Георгиевич малпазы: эсьма, городын ваньмон дырзэ пайдаен ортчытоз, ульчаетӥ но кыстаськыса уз ветлы, тазалыкез но юнмалоз. Зэм, нылзы ӝоген бадӟым спортэ выжоз но дас аресказ спортъя мастере кандидат луоз шуыса ӧз малпалэ вал. Пумен озьы быдэс семья бадӟым нылзылэн улонэныз улыны кутскиз. Нуналлы быдэ тренировкае келяно-ваёно, нокызьы ваньмытскыны уг ке лу, Казмасысь нэнэзы, тятязы бызьыса лыкто. Наташа кык арнялы сьӧрло ӵошатсконъёсы ке кошке, анаез школае, ӵош дышетскись эшъёсыз доры мынэ, темаез, дорысь ужъёсты юа - бертӥз ке, уйёсы дышетоно луоз. Ӝоген мукет ӵошатсконъёс, выль костюм кулэ вылэм - нош ик 500 манет. Маин вурытом, Ивановое но шубалы люкам уксёме сётыса лэзи. Табере чешкиоссэ гинэ но кышъяно луоз ни-а, мар-а? Анайзылэсь сюлмаськонъёссэ куспетӥ каре пичиез Женя нылзы: - Мама, акыльтӥзы ни емышъёс, Наташа ӧвӧл дыръя пирожки сиысал... Светлана Евгеньевна чупрес пӧраны кутске, ма, кузпалыз но тоӵ-тоӵ макарон сиысал ни, шуэ. Наташалэсь котькуд граммзэ тренеръёс мертаса уло бере, со емышъёс но йогуртъёс вылынгес улэ. Соин ик семьяосыз но нылзы медаз гоча шуыса, "кӧс возьыны" тыршо. Пичияк сьӧлыкамзы соку ик адӟиське. Одӥг пол тятяез Наташазэ ческыт пирожкиен но пичильтык шоколадэн утялтӥз, ӵуказеяз тренер "йӧттӥз" ни. Ма, Светлана Евгеньевна ачиз но нылзэ котькуд ӵошатсконъёсысь тортэн пумита - жаль ук. Нош алигес Ижын ортчем "Юность России" ӵошатсконъёс дыръя мон ачим соосты чакласа улӥ. Наташалэн усто выступлениез бере анаез, сое ӟыгыртыса, тренеръёслэн син азьысьтызы палэнтӥз но, тютюпилы сямен ишкаса, ымаз пушмульыен шербет тырыны кутскиз. Кӧня ке минут ортчыса, Наташаез нош мертаськыны нуизы. - Жаль уг поты-а нылды, пинал дырзэ шӧдытэк кылёз шуыса? - юасько Светлана Евгеньевналэсь. - Туж жаль. Но чигнаны уг яра. Ма, собере ми дышим ни - кыӵе ке мугъя одӥг нунал тренировка уг ке лу, со мар карыны паймыса ветлэ. Наташамылэн улонэз - милям улонмы. Сюлмаськонэз трос, секыт, но нылмылэн вормонъёсыз - ми понна тужгес бадӟым шуд. Пичиез но тани гимнастикае куриське. Ижын ӵошатсконъёс дыръя кузпалыным ӵош "висьыны" ветлӥськом, но туннэ висеменыз лыктыны ӧз быгаты. Наташалэсь юнгес анаез сюлмаськиз кадь потӥз мыным. Тӧдьы кучапиез гадь бордаз ӝиптыса возиз Светлана Евгеньевна. Берло тодӥ, та небыт шудон Наташалэн талисманэз (утисез) вылэм. Огпол ӵошатсконъёсын кучапилэн ныр йылыз усиз. Светлана Евгеньевна куалектӥз. Озьы ик луиз - номер йылпумъяськон азьын ни Наташалэн киысьтыз обручез тэляз. Таяз ӵошатсконъёсын кучапи ассэ туж мусо, лачмыт возиз. Шып! Наташалэсь баллъёссэ верало. 9,1 балл пуктӥллям дунъясьёс. Туннэ сомында нокинлэн ӧй вал на! Тэтчан гозыен но, тупен номеръёсыз понна но вылӥ дунъет басьтыса, Ижевскысь Наташа Танаева аслаз категорияз нырысетӥ интые потӥз. Ма, озьыез учкыку ик тодмо ни вал. Ковёр вылэ потэмез ик Наташалэн аспӧртэм. Татчыозь чабемъёс но чыры-пыры сяна ӧз кылӥськылэ ке, Наташа Танаевалэсь нимзэ кылыса, учкисьёс зол чабыны ӧдъязы. Я со пери кадь позыръяське, собере пал пыдзэ йыр вадьсаз ӝутыса, ньӧл кадь золтӥське, я мугорыз кыйлэн сямен пертчылонтэм гердлы пӧрме, но со вие ик шуак лопырске но ваёбыж сямен омыретӥ лобе... - Наташа, уд шумпотӥськы шат? - юасько нокыӵе кариськытэк сылӥсь пинал гимнасткалэсь. - Перме мынэме уг поты. (Отын Россилэн первенствоез понна чеберлыко гимнастикая ӵошатсконъёс вуоно арняяз ик ортчизы. - З. Р.) Мамаен , папаен тросгес улэме потэ, дышетсконэ но кыле. Зэмзэ но, ялан ӵошатсконъёстӥ ветлыса, трос урокъёсты келляса, нылашлы дышетскон секыт йӧтэ, дыр,- жаляны ӧдъяй ни вал мон Наташаез. Но анаез шуиз: - Гимнастика - кулэ маке. Со - чебер, тазалыкез юнматэ, астэ ачид вормыны дышетэ, но дышетскон аналтэмын луыны кулэ ӧвӧл. Татчыозь Наташа "витьёслы" гинэ дышетске, туж яратэ книга лыдӟыны. Удмуртиын Наташа Танаева - устоез гимнастка. Россиын но дас устоез пӧлы пыре. Та кизили воректӥз тренерезлэн, анай-атаезлэн, аслаз нылашлэн нуналмысь тыршеменызы. Удмуртилы дан вае ке, шумпото, нош юрттӥсез ӧвӧл. Утчалэ спонсоръёс, шуо соослы. Но удмурт сям уг быгаты кураськыса ветлыны, чеберлыкез дунъяны быгатӥсь спонсоръёс нош ӧжытгес, лэся. Наташа Танаева али уг вала на асэныз данъяськыны, йыраз но ӧвӧл ай кыӵе ке Олимпиской шудонъёс. Солэн али туж-туж потэ торт сиемез. Но веръяны сяна уг дӥсьты - чида чеберлык понна. Сыӵе нылаш-а уз палёмыты Олимпез? З. РЯБИНИНА. Туспуктэмез В. БЕЛОМОРСКИХЛЭН. Вузкарон Рауф Каримов: "Ваньзэ лэсьтӥськом гурт калык понна" Шаерамы Каримов вынъёсты тодӥсьтэмез ӧвӧл, дыр. Равиль Мухаметович Коньдон ужпумъёсъя бадӟым спецалист луэ, республикаысьтымы Национальной банкен кивалтэ, нош Рауф Мухаметович быдэс улонзэ сӥзиз гуртын вузкаронлы. Кема аръёс ӵоже ужаз вордскем районаз, Можга райполэн кивалтӥсез вал, али Удмуртпотребсоюзлэн тӧроез луэ. Рауф Мухаметович ас удыссэ вить чиньызэ кадь тодэ. Соин ик, вылды, райпоослэн кивалтӥсьёссы солы юн оско. - Кызьы тодмо, Рауф Мухаметович, туала вакытэ котькинлы секыт йӧтэ. Озьы ке но, тӥ быдэс Россиын котьку нырысетӥ интыосты вазиськоды. Мар юрттэ гуртысь вузкарисьёслы азинлыко ужаны? - Выльдӥськон, рынокен экономикае потыны кутскем бере, одӥг районын но одӥг магазинмес ӧм пытсалэ. Данакез соос туннэ пайда уг ваё, но калыклы нуналмысь кулэ луись вузъёсын вузкаро, басьяськисьёслэсь кулэяськонъёссэс тырмытгес быдэсъяны тыршо. Али ми но коньдонлы ёрмиськом. Но кооператоръёс огинтыязы уг лёгасько, ялан утчасько, ужазы выль амалъёсты куто. Со одӥгез. Нош мукет ласянь ке учконо, вузкарем сяна, ми ялан паськытатӥськом сиён-юон поттонмес но музон услугаосмес. Ум вунэтӥське кыдёкысь гуртъёсты, куд-огез улон интыязы вузкаронэз пыӵатӥськом. Адямиослы сыӵе амалэн ужаммы кельше бере, ми доразы вузкарыны лэзиськом. Озьы ужась калык, пересьёс кӧня дырзэс шыръяло, артысь гуртэ, 2-3 иськеме нянь, сылал, спичка, кеньыр, сахар но мукетсэ басьтыны уг ветло. Оглом вераса, али ми вӧй но шуккиськом, колбаса но лэсьтӥськом, чорыг но ӵынатӥськом, музон сиён-юон но поттӥськом. Тани Селтаысь кооператоръёслэсь, доразы гинэ ӧвӧл, Ижын но калык шумпотыса басьтэ колбасазэс, вӧйзэс, йӧлзэс но мукетсэ. Нош Кезысь вузкарисьёсмы "Зарни корона" пластик карточкаосын ужало ни. Бен, вань ӟечсэ вераса уд быдты. Вузкарисьёсмы лулысь-сюлмысь тыршо калыклэсь куронъёссэ быдэсъяны. Тӥни со бордысь тросэз потэ. Ведь инмысь номыр уг усьы. Ачид ке ӧд сюлмаськы, инмар малы ке номыр уг сёты. - Со бен валамон. Но вакчияк вералэ вал, кызьы йылпумъяды кылем арез, мар вылез туэ? Кыӵе луоз ӵуказе нуналды? - Быдэсак пусъёно ке, миым но умой ужам. Ньылетӥ кварталэ но Россиын кыкетӥ интые потӥм, нош нырысетӥ паларе 1-тӥ инты басьтӥм. Сыӵе вормон юнме шорысь уг лыкты, аръёсын ужаса соос пото. Тани берло дыре усто тыршо Кез, Глазов, Шаркан, Селта, Алнаш но музон районъёсысь кооператоръёс. Нош куд-ог интыосысь ар коже кивалтон ёзъёс гуртысь вузкарисьёслы ляб юртто. Сыӵе югдур кылдэмын, шуыны луоз, Каракулино но Камбарка районъёсын. Соин ик татын вузкарон ляб азинске, калыклэн кулэяськонъёсыз йӧскадь уг быдэсъясько. Но азьланьын умоезлы осконмы вань. 2002 арозь удысэз азитонъя план кутэмын. Соя уката азинскоз гуртын вузкарон, производство но заготовкаос. Кылсярысь, уногес поттом консерваос, колбаса, юзмытӥсь юонъёс, йӧл продуктъёс, тросгес пыжом нянь, пыжиськемъёс, кондитерской изделиос, ӵынатом чорыг но мукетсэ. Азьланьын котькуд магазин пайдаё мед ужалоз шуыса, луонлыкъёсмы вань. Удысамы ужзэс ӟеч тодӥсь-валась адямиос тыршо. Данакез соос нимаз дышетскемын, товароведъёс кивалтӥсьёс но луизы ни. Кооператоръёс тодон-валанзэс будэто курсъёсын. Соос одӥг нуналэн уг уло, ӵуказезэ умой адӟо, планъя ужало. - Россиысь Правительство алигес кутӥз гуртын вузкаронэз уката умоятон, калыклэсь кулэяськонъёссэ ӟечгес быдэсъян сярысь постановление. Со кооператоръёс азе бадӟымесь ужпумъёс пуктӥз. Рауф Мухаметович, со сярысь мар верасалды? - Татын тани мае пусъем потэ. Куке удыс куашканы ӧдъя, соку сое тодазы ваё, кулэ ужрадъёс чаклало. Таяз учыре но озьы ик. Мон со постановленилы чик пумит ӧвӧл, умоен гинэ лыдъясько. Гурт калыклы берло дыре туж секыт луиз. Соин ик кооператоръёс нянь будэтӥсьёслы, пудо утисьёслы уката ӟечгес юрттыны кулэ. Милемлы вань луонлыкъёсты утчано, уже кутоно луоз. Матысь дыре гуртын улӥсьёс пумен тросгес потто сӥль, йӧл, вӧй но мукетсэ. Ми азьын ужпум сылэ, со продуктъёсты басьтонэз радъян. Отчы пыро бакча сиёнъёс но, картофка но. Огъя вераса, гурт калыклы ми тросгес юрттыны, отын вузкаронэз умойгес радъяны кулэ: кызьы ке промышленной вузъёсын, озьы ик лэсьтӥськон материалъёсын. Гуртын но адямиос чебересь коркаос пукто. Ми, соослэн куремзыя, котьмар доразы ваиськом (шифер, холодильник, мисьтаськон машина, мебель но музонзэ). Табере ми пызь но изӥськом ни. Пичи Пургалан вукомы усто ужа. Рауф Мухаметович, постановлениын бадӟым инты висъямын калыклэсь мултэс сиён- юонзэ, картофказэ но музонзэ басьтонлы. Озьы ик вераськон мынэ губи, узы-боры дасян сярысь. Асьмелэн та ласянь кыӵе югдур. - Та ужлэсь ми ноку ӧм куштӥськылэ на. Но берло дыре лябгес мынӥзы заготовкаос. Али крестьян хозяйствоосын, фермеръёсын мултэс сиён-юонзэс басьтонъя огкылъёс гожъяськом. Данак районъёсысь заготовительёс нимаз хозяйствоосын но огкылъёс кутӥзы ни. Отын котьку лыдэ басьтӥськом пайщикъёслэсь куронъёссэс. Вузаны чакламлэсь 40 процент дунзэ вазьгес сётӥськом. Соослы дэмласьком сиён-юонъёс, промышленной вузъёс, лэсьтӥськон арбериос но мукетсэ. Соин ӵош ик гурт калык кооператоръёслэсь куре парсьпиос, пудо сиён (комбикорм). Гуртын улӥсь, кылсярысь, чакла одӥг парсьпи аслыз куайытыны, мукетсэ - райполы. Нош гужем калыклэсь губизэ бичанъя ватсаса 10 пунктъёс усьтом. Озьы ик радъялом узы-боры басьтонэз. - Гуртын али калыклы бытовой юрттэт сётон быдтэмын, шуыны луоз. Тӥ та удысэз ас вылады басьтыны уд малпаське-а? Ведь со сярысь выль постановлениын но верамын. - Кооператоръёс номырлэсь уг палэнско. Ми огкадь ужаськом пайщикъёсын но кин отчы пырымтэ, тоно-моно ум кариське. Но милям вань валтӥсь удысъёсмы: заготовкаос, производство но вузкарон. Кылсярысь, калыклэсь мултэс сӥльзэ басьтыса, ми колбаса лэсьтӥськом. Кутӥськом йӧл но сое заводъёсы сётӥськом. Картофка но бакча сиёнъёсты октон сярысь ке верано, соосты вузанъя милям огкылъёс кутэмын. Туэ чакласьком калыклэсь 5 сюрс тонна сӥль басьтыны, йӧл - 10 сюрс, картофка - 10 сюрс тонна. Ватсаны кулэ, 1994-тӥ арысен Удмуртпотребсоюз но Правительство огкылъя ужаськом но куспамы сётэм кылмес котьку быдэсъяськом. Берло дыре кооператоръёс, зэмзэ но, огсыр умой ужало. Трос ӧвӧл ке но, усьтӥсько выль магазинъёс, парикмахерскойёс, пыдкутчан, дӥсь вурон но тупатъян мастерскойёс. Али адямиосты ватонъя но услугаос сётӥськом. Гурт понна со туж умой. Азьло соин нокин ӧз выры. Озьы ик чакласьком эмъюмъёс вузанъя киоскъёс пуктылыны. - Нош кибашлыослэн арбериосынызы тунсыкъяськтӥськоды-а? - Та ласянь тужгес но ушъямон тырше Воткинскысь райпо. Со кибашлыослы нимысьтыз инты висъяз. Шедьтӥзы "зарни" киё адямиосты. Соослэсь продукцизэс магазинъёсын вузаськом. Адямиослы кельшо пулэсь лэсьтэм арбериос, керттӥськемъёс но музонэз. Таӵе аспӧртэмлыко вузъёс потто зэмос мастеръёс-кибашлыос. Соин ик ужан юртсэс но утчаськонъя корка ним сётӥзы. Но та уж котькытын огкадь умой радъямтэ на. Нош сыӵе адямиос котькуд районын, гуртын вань. Тани Пичи Пурга, Алнаш, Можга но музон районъёсын коркаоссэс кыӵе чеберъяло, устоесь наличникъёс, капкаос-ӟезьыос лэсьто. Котькытын сое адӟем кароно вылэм. - Базаръёс ласянь кыӵе югдур? Мар татын вылез? - Валтӥсь Сенной рыноклы, кызьы калык сое шуэ, туэ 100 ар тырме. Али со син азьын выльдӥське, паськыта. Отын эшшо одӥг шуныт павильон ӝутӥське. Берло дыре туала куронъёслы тупась рынокъёс ужаны кутскизы Игра, Ува посёлокъёсын, Пичи Пургалан но мукет интыосын. Оглом, вань районъёсын выль рынокъёс усьтӥськизы ни. - Рауф Мухаметович, калыкын вераськон мынэ, Сенной базарын колхозникъёс туж ичи вузкаро. Шонер-а со? - Быдэсак озьы шуыны уг яра. Огдыре, зэмзэ но, вал калыклэсь рыноке ваем сӥльзэ басьтӥсьёс. Шуом, адями вань продукцизэ одӥг мурт кие сётэ, но дунтэмгес. Берло сӥльлэн выль кузёосыз сое дуногес вузало ни. Но али сыӵе учыръёс шер пумиськыло. Кылем сӥзьыл нош гуртъёстӥ сыӵе адямиос трос ветлӥзы, уката ик бускель республикаосысь. Татын тани мае пусйыны кулэ. Тодмотэм лыктэм адямиос калыклэсь сӥльзэ, картофказэ, куосты эскерытэк басьто, отчы висись пудо но шедьыны быгатоз. Нош ми ваньзэ чакласа, санитарилэсь куронъёссэ лыдэ басьтыса, сӥль но йӧл кутӥськом. Басьяськисьёсмылы нокыӵе висён ум сётэ, ӟеч продукция гинэ вузаськом. - Огъя вераса, Рауф Мухаметович, кызьы малпаськоды Правительстволэсь постановленизэ улонэ пыӵатыны? - Та нуналъёсы сое пайщикъёслэн кенешазы учком но нимысьтыз ужрадъёс кутом. Райпоослэн, предприятиослэн кивалтӥсьёссы, вузкарисьёс асьсэос вералозы, кызьы соос ужаны малпало. Луозы умоесь ӵектонъёс но малпанъёс. Мон сямен, азьло кадь ньӧмыз понна вераськон уз луы, пайдаё ортчоз но гуртын улӥсьёс сое ӝог шӧдозы. Нош кооператоръёс со понна ик ужало, калыклэсь кулэяськонъёссэ ӟечгес быдэсъяны тыршо. Юанъёс сётъяз Геннадий Романов. Герд "Кужыме музъем бордын..." - Татын мон вордски, татын будӥ, татчы ик ужаны кыли, али но нокытчы ик кошкеме уг поты, уго кужыме мынам вордскем музъем бордын,- тазьы вера ачиз сярысь Селта ёросысь "Свобода" колхозлэн председателез Алексей Мясников. Уг, со озьы уг чеберъяськы. Гуртоосыз кемалась дышизы ни: котькыӵе ӵектон мед луоз, предзы дорысьтызы уз кошкы. Солы дэмлало вал бускель ёросэ но выжыны, газовикъёс но котыртӥз бергазы, мукет азе но ӧтчазы - Алексей Пантелеевич чутрак пумит луиз. "Свобода" колхоз - ёросысь устоез хозяйство. Ю тысь кутсанъя но, картофка октонъя но, сӥль келянъя но татысь ужасьёс азьветлӥсьёс луо. Юнме шат колхозлэн данэз быдэс шаерамы вӧлмемын. Гурт кузёлэсь уно аръёс ӵоже тыршемзэ лыдэ басьтыса, кылем арын Алексей Мясниковлы сётӥзы "Удмурт Республикаысь гурт хозяйствоысь дано ужась" ним. Председателез вордскем гуртэныз, музъеменыз юн герӟа семьяез. Солэн со бадӟым. Валентина Анатольевна кузпалыныз ӵош Алексей Пантелеевич вить нылпи будэтэ. Бадӟымез нылзы анай-атайзэ аслаз пиналыныз но шумпоттӥз ни. Тӥни сыӵе учкымон, йӧно воргорон ужа Селта палъёсын. Аслаз нуналмысь тыршеменыз со ӟечгес карыны выре гурт калыклэсь улон-вылонзэ. И. КРИЧЕВ. * Алексей МЯСНИКОВ. Шунды Вузчи Урамын ӟырт кезьыт. Сюрес вылын пыдъёссэ йыгаса сылэ начар дӥсяськем восьтэт пияш. Лызэктэм гольык кияз мар ке но возе. Матаз вуыса адӟи: автобусэн ветлон билет вылэм. Сергей (озьы шуиз нимзэ) сюлворыса ик косэ монэ билетсэ басьтыны. Нош малы сое вузаськод шуыса юамелы со "сиеме потэ" шуиз. Пияш арня пала сютэм вылэм ини. Та билетэз вузаса, нянь, пе, басьто. Сиёнлэсь шӧмзэ ик вунэтэм ни, мискинь. Атаез, Сергей пичи дыръя ик, кышнозэ но пизэ куштыса, дорысьтызы кошкем, нош анаез ар пала уждун ӧз басья ни. Валамон ни, анаез, ассэ вератэк, мискинь пизэ но сюдыны уг быгаты. Сергей туж восьмемын, чылкак лы но ку кылемын. Пичигес пальтоез но вылаз шонаське гинэ. Золгес тӧл потӥз ке, пияшез пыд йылысьтыз погыртоз, дыр. - Няньлы но уксёды ӧвӧл ке, кытысь билетлы манет шедьтӥд?- юай мон Сергейлэсь. - Классысьтымы узыр пилэсь лушкай. Воже потэ мынам сыӵеослы. Котькуд нунал, азям ушъяськыса, дуно печенняос сиё. Нош асьсэос тодо, уксёмы ӧвӧлэн, нуназеяны но уг ветлӥськы шуыса. - Билетэ вань ни, но няньлы 10 манет сёто, - шуи мон пияшлы.- Нош билеттэ сёт берен, лушкаса уд узырмы. Сергей шуныт синъёсыныз шорам учкиз но нянь дуре бызиз. Билет лушкамез понна пияшез тышкаськыны ӧй дӥсьты. Сиемез узырезлэн но, куанерезлэн но огкадь потэ. Пияш-а янгыш, анаезлы уждунзэ уг сёто шуыса? Государство ачиз лушкаськисьёсты вордэ. Лариса ЯКУНИНА, Удмурт университетын дышетскись. Кык суд пыр ортчыса... Удмурт культурая "Дэмен" огазеяськон али аслэсьтыз ужзэ котыр ласянь умоятыны тырше. Соин валче обществолэн выль удысъёсыз но кылдо. Миым, ар йылпумъяськон азьынгес, кылсярысь, огазеяськонэ вазиськылӥз "Удмуртлестоппром" предприятилэн "ИжПОТ" люкетэныз кивалтӥсьлэн воштӥсез удмурт воргорон Леонид Филиппович Ефремов. Со адӟем-шӧдэм "Удмуртлестоппромлэн" кивалтӥсьёсызлэсь умойтэм ужъёссэс, ваньбурез тус-тас каремзэс. 1992-тӥ арысен кутскыса, директорлэн воштӥсез сьӧд ужъёс сярысь ивортылэм милицие, прокуратурае, Кун Кенешысь депутатъёслы. Кыӵе ке ужрад кутӥзы, кожаськоды, та шекъёс пумысен? 1994-тӥ арын Леонид Ефремовез... ужысьтыз кушто, улляло. Кивалтӥсьёс уг ярато угось коркась жуг-жагез кыре поттылӥсьёсты. Сыӵеос люкето каньыл улыны. Но, соос сяна, вань на ук суд. Ленин районысь суд умойтэмен лыдъяз Ефремовез ужысь куштэмзэс. Тырмымтэосын нюръяськись адями суд бере кыктой но ужаса ӧз вутты ас интыяз - кыӵе ке егит пиос сое туж зол жугиллям, сӧсыртӥллям. Куинь толэзь пала костаськиз больницаын. Берен кабинетаз лыктӥз но сое... ужысьтыз мозмытӥллям. Штатэз, пе, кулэстытэк ӧйлась. - Уг оскиськы,- шуэ Леонид Филиппович,- ма, кызьы-озьы вератэк но ужысь туздыро. - Уд ке оскиськы - тани 42-К номеро приказ,- валэкто воргоронлы. Со вал 1996-тӥ арын. Мар карыны ӟудыса, Л. Ф. Ефремов нош ик мынӥз судэ. Таяз учыре юрттыны, данзэ утьыны курыса вазиськиз редакциосы но, Удмурт телевидение но, "Дэменэ" но. Удмурт культурая "Дэмен" огазеяськон одӥгзэ правление быръем эшсэ обществолэн защитникез чотын судэ ысъяз. Нырысетӥ заседанилэсь кутсконзэ Удмурт телевидение но калыклы вакчияк возьматӥз. Куинь толэзь пала рос-прос эскеризы Октябрь ёросысь судын Ефремовлэсь ужзэ. Судья Александр Сундуков решение кутӥз Леонид Ефремовез азьло ужам интыяз берыктон сярысь. Со сяна, юнме шорысь уллям муртлы, тэк пукытэмзы-ужаны лэзьымтэзы понна, 78,5 сюрс манет уждун тырыны косэмын! К. ЕГОРОВ. Кылем толэзе Воткинск ёросысь Кукуи гуртысь культура юртын ортчиз удмурт кыллы дышетӥсьёслэн ӵошатсконзы. Сизьым школаосысь ужасьёс возьматӥзы усто дышетыны быгатэмзэс.Ваньмызлэсь ӟеч тодон-валанзэ шараяз Кукуи шор ёзо школаысь дышетӥсь Алевтина Николаевна Перевозчикова. Солы сётэмын дуно кузьым. Жюриен кивалтӥз аркадий Иванович Васильев, Светлое школалэн директорез, "Удмурт кенешлэн" ёрос ёзэзлэн тӧроез. * А. ПЕРЕВОЗЧИКОВА. * Воткинск ёросысь дышетӥсьёс С. В. КОЖЕВНИКОВА, Н. Н. БОТАЛОВА, Т. В. ЛЕБЕДЕВА, А. А. ЕГОРОВА. В. БЕЛОМОРСКИХЛЭН туспуктэмъёсыз. Йыртэмасьёсты ӝегатон Экономика удысын лэсьтэм йыружъёс пӧлын тужгес но кышкытъёсыз луо иностранной валютаез пӧяса лэсьтон но сое вӧлмытон. Россия Федерацилэн Уголовной кодексэз, чакла та йыруж понна йыртэмасез, асваньбурзэ басьтыса, 7-12 арлы пытсэт сьӧры келяны. Озьы ке но, таӵе амалэн "шуд" утчасьёс вань на. Алигес Россия Федерациысь ФСБ-лэн Удмурт Республикая управленияз ужасьёс кык йыртэмасез, Армениысь гражданъёсты кырмизы. Соос 3 но ӝыны сюрс "суредам" долларъёсты асьме коньдонэн воштыны туртто вал. Йыртэмасьёсты кырмисьёс пусйизы: пӧяса лэсьтэм долларъёс туж ӟечесь, нырысь-валысь учкыса уд ик шӧды, соос суредамын шуыса. Кытын лэсьтэмын, кӧня вӧлмытэмын - тодмо ӧвӧл на. Пусйыны кулэ мукетсэ но: та йыртэмасьёс пӧлысь одӥгез Пермьын кык адями виемез понна всероссийской розыскын вылэм. Россия Федерацилэн Уголовной кодексысьтыз 186-тӥ ёзэтэзъя уголовной уж ӝутэмын ("Иностранной валютаез пӧяса лэсьтон но сое вӧлмытон"). Россия Федерациысь ФСБ-лэн Удмурт Республикая Управлениез гражданъёслы куронэн вазиське: кин та йырттэмасьёслэсь валюта басьтӥз, ивортэ управленилэн приёмнояз таӵе адресъя: Ижевск город, Пушкинской ульча, 187-тӥ юрт. Россия Федерациысь ФСБ-лэн Удмурт Республикая Управлениезлэн прес-службаез. ЮАЛЭ - ВАЛЭКТОМ Туж тодэме потэ, кытын дышето фотомодельлы. Лена В. Шаркан ёрос. Фотомодельлы юри нокытын уг дышето. Но Ижевскысь куд-ог фотоательеос мылкыд карисьёслы портфолио - нимысьтыз стандартъёсъя но куронъёсъя лэсьтэм фото лэсьто. Одӥгезлэн дуныз - 100 манет. Туспуктэмъёссэс вӧлмытон ужен нылъёс асьсэос ик выро, Интернет яке кыӵе ке рекламной модельной агентствоос пыр ӵектыса. ЛЫМЫ ВЫЛЫСЬ ЧУРЬЁС Святой Валентинлэн нуналаз Бураши гуртысь егитъёс аспӧртэмлыко шулдырьяськон, ӵошатскон ортчытӥзы. Егитъёс куас вылэ султыса нюлэстӥ юмшазы, лымы вылэ гажан муртсылы гожтэт ӵабъязы. Ӝытлань олома мылкыды лӧпшаз. Мон но та "яратонлы сӥзем" сюресэтӥ ортчоно кариськи. Куазь нясь-нясь шуныт ке но куасьёс ӟеч гылӟо. Аспӧртэмлыко шобрет улын ялкаре тол нюлэс. Бадӟым кыз вӧзы вуыса пумитасько лымы вылысь нырысетӥ юан-гожтэтэз: "Ма со яратон? Ку кылдэм дунне вылэ?" Соку ик тодам лыктэ кытысь ке лыдӟем легенда. Азьвыл адями, пе, луэм паймымон лулос: шар выллем питырес, ньыль пыдо но ньыль киё, мыд-мыд пала учкись ымныро, ныль синмо но одӥг йыро. Зевс адями нимаськись лулосэз, кужымтэм кельтон вылысь, кыклы люконо кариськем. Соосты кык пыдо но кык кио кельтэм. Та секыт адӟон бере, кык люкетъёс ог-огзы доры кыстӥськыны, ог-огзэс ӟыгырьяны, чупаны кутскиллям. Озьы кылдэм, шуо, дунне вылэ яратон. Сюресме азинтонъям лыдӟисько юанлы сётэм валэктонэз но. "Яратон ог-огед шоры учкыса сылон ӧвӧл, огпала учкыса ӵошен вамышъян сюрес". Пумиськыло Пушкинлэн чурьёсыныз валэктоньёс но. Гурезь уллане ширтыса пумитасько егит пилэсь кибервылзэ: "Таня плюс Сергей ". Аслэсьтым но куке таӵе чурьес гожьяса йыртинтэмме тодам вайыса мынясько гинэ. Чидатэк утчасько нылмуртлэсь гожтэтсэ. Ма шуоз Сергейлы? Кема утчано уг луы. "Серёжа, мон но тонэ туж яратӥсько!" - кеськон пусэн ик йылпумъям нылаш. Ӧжытак ортчыса ватсам на: "Серёжа! Тонтэк улыны уг быгагатӥськы. Лыкты ӝытазе". Гурт доры берытскыса вуыкум, егиг пилэн берпуметӥ гожтэтэз. "Ӟенелик курытсэ ке басьтӥд, лыкто. Сергей". Тӥни кыӵеесь кыльёсын кутске но кыӵеосынызы йылиумъясько вылэм туала егитъёслэч яратонлы сӥзем гожтэгьёссы. Тунсыко но, ӝож но. Н. ТУРИН. Нимыз - Данъян пул вылын Улон сюресэз огпол лёго 80-тӥ аръёсы Завьялово районысь "Свобода" колхоз висъяськылӥз ӟеч ужаменыз. Ю- няньзы, картофказы удалтылӥз, йӧл кысконъя но азьпал радъёсын вамышъязы. "Удмуртская правда" газетлэн корреспондентэз луыса та хозяйствое трос пол вуылӥ, соин ик югдурез тодӥсько вал. Огпол пыри Ожмосысь пудо вордон фермае, вераськисько скал кыскисьёсын: кыӵе мылкыдзы, кӧня йӧл кыско, тырмыт-а пудо сиёнзы\? Угось предзы алигес воштӥськиз, со интыын мукетыз кивалтэ ни. Малпай вал, азьвыл кивалтӥсьсэс таосыд пож вуэн кисьтаны кутскозы шуыса. Асьмелэн ӵемысь озьы луэ ук: председатель дыръяз синмаз вераны кышкало, кошкемез бере кӧня но сьӧлыкъёссэ уг шедьто! Янгышай. Гараев сярысь номыр но уродзэ ӧй кылы. - Предмы умой вал,- малпанъёсме лыдӟыса кадь вераз огез нылкышно. Ӵош пукись эшъёсыз соин соглаш луизы.- Огпол тол вылтӥ скалэ пияны кутскиз. Кӧня курадӟиз, тӥяськиз - кунянэз уг поты. Ма кароно, кинэ ӧтёно? Ветврачмы ӵапак кошкыны кемлаз. Вуиз председатель. Шубазэ кылиз, скалэз эскериз. Спирт вайытозязы, пиджаксэ, галстуксэ, юг тӧдьы дэремзэ вылысьтыз куштӥз. Киоссэ миськыса, пиясь скаллы юрттыны кутскиз. Кунян вордскиз! Мон соку копак пайми: кин ке мукетыз одно ик ветфельдшер доры машина ыстысал ни, нош Игорь Михайлович секыт уж борды ачиз басьтӥськиз, ысъяськытэк-косытэк. Вераськон мынэ И. М. Гараев сярысь. Самой сое "Свобода" колхозэн кивалтонысь мозмытэмзы берегес пумиськылӥ фермаын ужасьёсын. Уг ваты, сое мон пичиысен тодӥсько, будӥм одӥг гуртын. Скал кыскисьёслы та "секретме" ӧй шарая: тодэме потӥз соослэсь чылкыт мылкыдзэс. Верамзэс кылзыса, гуртое понна шумпотӥ. Будӥз со колхозниклэн семьяяз, Алнаш районысь Татарский Тоймобаш гуртын. Семьязы бадӟым вал. Алнаш школаез йылпумъяса, Ильсур Москваысь ветеринарияя академие дышетскыны пыриз. Москваын улон солэсь гурт шоры учконзэ ӧз вошты, сюлмаз пыдло каръяськиз вордскем палъёссэ яратон. Алнаше вуиз ни, диплом басьтыса. Егит специалистэз соку ик пукто районлы валтӥсь ветвраче. Пичиысен шуг-секытлы дышем мурт улонын ас интызэ ӝог шедьтӥз. Тодон-валан басьтонзэ азинтон вылысь, дышетскем академияз ик заочной амалэн аспирантурае пыре. Со вакытэ ужаны выже Гурт удысъя министерствое, кӧня ке улыса юнмато Завьялово районысь сельхозуправленилы кивалтӥсе. Интыез ӵем вошъян сокем ӟеч ӧвӧл, дыр, но кивалтӥсьлэсь школазэ озьытэк уд ортчы. "Свобода" колхоз улоназ ӟеч урок сётӥз, музон сямен уд вера. Ӟырдыт сямо председатель огкутскемен малпа вал кык пудо возён гид пуктыны. Фондысь материал висъямзэс витьытэк, палэнысь зӧк гумыос басьтыса, сиён возён тусьлы вандылӥзы. Нош со арбериос лушкаса вузамын вылэм. Председателез мозмытӥзы, кӧня ке арзэ ужаз Белгород областьысь парсь вордонъя комплексын. Отысь нош ик берытскиз Завьялово районэ, соку гинэ кылдэм "Восточный" совхозэ. Нырысь-валысь кивалтӥз ветеринарной службаен, 1990-тӥ арысен - директор. Гараевлэн ужан нуналэз вазь кутске. 7 часозь ӵукна со комплексын ни. 7 часэ ортчытэ планёрка хозяйствоысь специалистъёсын, собере пумиське пӧртэм адямиосын. Доразы вуо трос регионъёсысь - басьто поттэм продукцизэс, договор гожто. Ачиз но директор командировкае ӵем пота: Ростове, Краснодаре, Самарае, Оренбурге - утча пудо сиён. 75 сюрс парсез маин ке но сюдоно ведь, нуналаз гинэ 120 тонналэсь ятыр комбикорм кошке. Кылем арын ужамзылы йылпумъянъёсъя "Восточный" совхоз Россиысь 300 устоез предприятие радэ шедиз. Данэз сярысь ке верано, басьтэ 161-тӥ инты. Со туж умой ни. И. М. Гараевлэн тыршемез вылӥ пусъемын: нимыз пыртэмын Удмурт Республикаысь Данъян пул вылэ. Академиын дышетскыкуз ик Игорь Михайлович азяз ужпум пуктӥз пудоослэн палась висёнъёсынызы нюръяськыны. Солы сӥзиз кандидатской диссертацизэ но. Юнме шорысь ӧз, дыр, сётэ "Россия Федерациысь дано ветеринарной врач" ним - ваньмыз лыктэ нуналысь нуналэ тыршем бордысь. Ветеринария наукаосъя кандидатлэн И. М. Гараевлэн сюлмаськонэз туннэ одӥг - тросгес но вылӥ ӟечлыко сиён поттон. Со сярысь вера кылем арын Москваын ортчем выставка. Отысь "Восточный" совхозлэн делегациез берытскиз дипломен. Ю. БАСКОВ. И. М. ГАРАЕВ. Герд Удмурт Элькунын улӥсьёслы Вазиськон Удмурт шаерысь гажано бырйисьёс! Матэктэ асьме понна туж чакласькытӥсь, кыл кутытӥсь нунал - 4 (апрель) южтолэзь - Элькунысь Госсоветэ депутатъёсты быръён. Малпаськыны кык толэзь но дыр кыльымтэ ни. Кин кивалтоз асьмемын, кин сюлмаськоз шаерысь калык сярысь? Оло, уката но начармытозы, калыкез сӧрозы но бырон калэ вуттозы? Эрик но демократия понна ортчытӥськись реформа шуонъёс берло дас ар ӵоже ужась калык понна шугъяськонэн берытскизы: начармонэ, законъёсыз ӵыжанэ, калыклэсь ваньбурзэ тус-тас каронэ вуттӥзы. Шайтан мылкыдо нимаз адямиос кейсъёссэс но чемоданъёссэс уксёен тырмытъяса туртто на асьме ужаммес но, уката ик вазен дырысен асьмеды сюдӥсь-вордӥсьмес - музъеммес - кунгож сьӧрысь арвакъёслы вузаны! Та вераммес юнматом кӧня ке луэм учыръёсын. Кемаласьгес ни вузамын пайда вайыны быгатӥсь "Удмуртнефть", али му вӧйлэсь шаерын улӥсьёс номыр но уг басьто. Дунтэм дунын (тау понна гинэ, шуыны луоз) кыдёкысь шаеръёсы кошке нюлэсмы, выль пӧрмем буржуйёс асьсэлы киулто заводъёсмес но фабрикаосмес, нош асьме ужасьёслы (рабочийёслы, крестьянъёслы но бюджет уксёен ужась интеллигенцилы) яке номыр уг йӧты, яке кураськисьлы мында уждунэз туж кема ӝегатскыса тыро. Тросэз анайёс уг быгато нылпиоссылы юрттэт басьтыны. Дыр вуиз ини сьӧрлось вуэм "гастролёръёсты" серметаны, соослы ӧвӧл сётоно кузёяськыны, ӧвӧл осконо чебер чирдыны быгатӥсьёслы, уксё но ӟенелик понна куараосмес басьтыны вырисьёслы. Кун Кенеше быръёно алдаськисьтэм, ужаны быгатӥсь визьмо адямиосты, кудъёсызлэн туж пыдлон Удмурт шаерын луо выжыоссы, удмуртъёс-а, бигеръёс-а, ӟучъёс-а соос, мед юн яратозы шаермес но татысь калыкез. Вань удмуртъёслэн "Удмурт кенеш" огазеяськонзы котыраз герӟаз мукет общественной огазеяськонъёсты, организациосты но кылдытӥз "Элькун" ("Республика") нимо быръён блок, кытчы пыризы таӵе огазеяськонъёс: 1) "Удмурт кенеш" огазеяськон; 2) Удмурт культурая дэменлык; 3) Бигеръёслэн общественной центрзы (ТОЦ); 4) шаерысьтымы поръёслэн "Одо Мари Ушем" огазеяськонзы; 5) Удмуртиысь Писательёслэн союззы; 6) Культура удысын ужасьёслэн профсоюззы; 7) Удмурт нылкышно кенеш. Ваньзы соос умоен лыдъяло "Элькун" огазеяськонлэсь политической платформазэ но блоклэн кандидатъёсызлы дурбасьтыны дась луо. Кандидатъёс пӧлын, удмуртъёс сяна, вань ӟучъёс, бигеръёс, немецъёс но мукетъёс. Соос ярато но гажало асьме шаермес, ужаны быгатӥсесь, усто организаторъёс но кивалтӥсьёс луо, кылсярысь, соос пӧлын П. Н. Вершинин - Элькунысьтымы Кивалтэтлэн Тӧроез, В. К. Тубылов - "Удмурт кенеш" огазеяськонлэн азьмуртэз, А. Т. Малков - Кун Кенешлэн Гурт ужпумъёсъя комиссиезлэн кивалтӥсез, Н. С. Стрелков - Медициная академилэн ректорез, Н. А. Образцова - Алнаш ёросысь депутатъёслэн Советсылэн тӧроез, В. А. Никитин - Завьял ёросысь "Путь Ильича" колхозлэн тӧроез, Н. И. Семенов - Можга администрацилэн главаез, А. И. Радыгин - милициысь полковник, Р. А. Гарипов - Ижевск хладокомбинатлэн юридической консультантэз, А. П. Мясников - Селта ёросысь "Свобода" колхозлэн кивалтӥсез но мукетъёсыз. "Элькун" огазеяськон мукет блокъёсысь но кӧня ке кандидатъёслы дурбасьтыны дась луэмзэ вера, кылсярысь, таӵеослы: Воткинскысь тӧролы В. Л. Фридрихлы, "Удмуртнефтепродукт" предприятилэн кивалтӥсезлы Н. С. Сычевлы, Ижевсклэн мэрезлы А. И. Салтыковлы, Иж ГТУ-лэн ректорезлы И. В. Абрамовлы но мукетъёсызлы, кинъёс умоен лыдъяло "Элькун" блоклэсь платформазэ но законъёсты устогес карон вылысь ужаны быгато. Гажано бырйисьёс! Ми куриськом тӥледыз "Элькун" блоклэн кандидатъёсыз понна куарадэс сётыны. Угось выльдэм Кун Кенеш ик выльдоно луоз шаерысьтымы Кивалтэтэз (Правительствоез) но. Али ваньмы асьмеос азьланьын кызьы улэммы понна кыл кутӥськом. Мур чаклаське. Вазиськон кутэмын февраль толэзьлэн 10-тӥ нуналаз "Удмурт кенеш" огазеяськонлэн Пичи кенешаз. Шунтоз но югдытоз "Удмуртагроинвест" ООО-лэн Агростроительной фирмаезлэн директорез Р. М. Хасанов республикаысь кудаз ке ёросэ вуылӥз ке, тод ни, газ сётонъя лэсьтӥськон ужъёс отын ӝогомозы. Ортчем толэзе со ветлӥз Грах палъёсы. Гумыетӥ вуись эстӥськонэз татын басьто райцентрын но "Восход" колхозын улӥсьёс гинэ. Та ужез эскерыны люкаськылӥзы районысь администрацилэн лэсьтӥськонъя отделэзлэн кивалтӥсез А. М. Федорова, "Восход", "Мари-Возжай" но "Родина" колхозъёслэн тӧрооссы А. А. Яковлев, В. Е. Чермаков, М. А. Крестьянинов но мукетъёс. Табере чагыр эстӥськонэн гумы вал будэтон завод пала но кыстӥське ни, туэ со вуттэмын луоз "Родина" колхозозь, ортчоз Каменнойысен Мари-Возжай пыр. Али мыно лыдъян-чотан ужъёс, собере кутскозы гумыосты кыскыны. Туэ чагыр эстӥськон вуыны кулэ Каменной гуртысь юртъёсы, музъем улысь гумыос герӟалозы Иж-Бобья гуртэз но. П. СКОБЕЛЕВ. Гурт улон Ваньмызлы кузё - коньдон Туала вакытэ йӧллэсь, няньлэсь дунзэ колхозлэн председателезлэсь ӟечгес кин меда тодэ? Солэн быгатонлыкез но тодон-валанзэз вылын возиське хозяйстволэн экономикаез, ужан дисциплина, коньдон вылэ вуон. Завьялово районысь "Путь Ильича" колхоз- племзавод умойёсыз пӧлы ке но шеде, татын но шуг-секытэз тырме. Валерьян Арсентьевич НИКИТИН, та колхозлэн кивалтӥсез, райсоветлэн депутатэз, асьсэ сярысь гинэ уг, быдэс районъя шугъяськемзэ вера. Гуртын ужасьёслэн нимынызы со меӵак шуэ: таӵе югдурен улыны но азинсконъёс басьтыны туж секыт. Келям продукция понна коньдон беромыса вуэ яке воксё дунтэк кошке, уг юртты судэ вазиськон но. - Музъем бордын ужась адями пумозяз чидатскыны тырше, но солэн улон-вылон векез одӥг гинэ. Юнме шорысь-а кулӥсез вордскисезлэсь пумен тросгес но тросгес луэ? Завьялово районъя кылем арын вордскиз ке 474 мурт, улонысь кошкиз 566-ез. 28 мурт ассэ ачиз быдтӥз, яке толэзьлы быдэ кык мурт ассэ шайгуэ донге. Солэсь мугзэ утчано куашкась экономика бордысь. Председателез юн шугъяськытэ техникалэн, автопарклэн вужмемез, ваньмыз сямен соос шальтрамын ни. Туннэ нуналлы бусые потыны районъя уг тырмы 188 трактор, 75 комбайн. Тысё культураосты утялтонын комбайнлы быдэ нормая чакламын 110 гектар. Озьы вал ӟеч аръёсы. Али та лыдпус "Камскийын" вуиз 292 гектарозь, Холмогоров нимо, "Урал" но "Труженик" эштосъёсын - 200-озь, "Свободаын", "Правдаын" - 320-400 гектарозь. Паймоно: тазьы ужаса, эшшо мар ке но басьтыны, будэтыны быгатӥськом на! Вылӥ азинсконъёс сярысь, валамон ини, кылпум поттылонэз ик ӧвӧл. "Путь Ильича" колхозлэн кылем ар понна рентабельностез 3 процент луиз, дотациосын ӵош - 16. Со люкаськиз йӧл но картофка чотын. Поттэм продукциезлы кузё луон хозяйство понна берытске пайдаен, вераськон мынэ переработкая цех усьтэм пумысен. Районъя ке верано, тазэ толэз тросэз хозяйствоос секытэн ортчо. Пудо сиён чакламлэн ӝыныез гинэ дасямын. Кысконо скалъёслэн рационазы туннэ ӧвӧл ни жалем сиёнъёс, силос, пызь. Маин сюдозы тулыс? Тӥни ма сярысь ӝегатскытэк малпаськыны кулэ районысь гурт удысъя управление но министерство. Хозяйствоослэн гинэ со янгышсы ӧвӧл, пӧсь куазен возь вылын ик турын куасьмыса быриз. - Шугъяськытэ на эшшо одӥг ужпум. Районамы вуиз финн амалэн бакча сиён удэз будэтонъя оборудование,- шуэ В. А. Никитин.- Но со йылаз-пумаз вуттымтэ, 25 процентэз пунэме пыремын. Сое тырыны "Ижевский" совхоз но, район но уз быгатэ. Государство ласянь юрттэт кулэ. Дыраз коньдон ӧм ке тыре, финнъёс сётэм технологизэс берлань талалозы. Таин ӵош вераны кулэ Германиысь басьтэм комбайнъёс сярысь но. Завьялово МТС-э со кык сётэмын. Но дунзэс тырыны район озьы ик уз вормы. Техника ӟеч, номыр уд шуы, но кулэ юрттэт. Шуг-секытъёс шоры учкытэк, оскон вань на ӟеч воштӥськонъёслы. Музъем бордын ужасьлэн данэз ышыны кулэ ӧвӧл. Со понна кадръёсты дасяно. Ми умоен лыдъяськом гурт удысъя Удмурт научно-исследовательской институт кылдытонъя Правительстволэсь кутэм решенизэ. Таӵе центр республикалы кемалась кулэ ни, мед со юрттоз милемлы вылӥ ӟечлыко кидысэн, ӟеч выжы пудоен, тодӥсь-валась специалистъёсын. Районмы табыдӟа городэз котыртэ бере, мукетъёсыныз ӵошатыса, сюлмаськонэз но ятыргес. Туннэ вератэк кельтыны уг луы "Завьяловский" тепличной комбинат сярысь. Будэтэм продукциеныз со быдэс республикаез вис карытэк сюдэ. Кин тодэ, ма луоз азьланяз, шунытлы но электрокужымлы дунъёс тазьы ик кылизы яке эшшо но вылӥе ӝутскизы ке? Теплицаосъя кутэм нимысьтыз федеральной постановлениея шунытлы чаклам дун кулэсмыны кулэ 50 процентозь. Дыр вуэмын асьме дорын но таӵе решение кутыны, комбинатэз шуг-секытэ сюремезлэсь азьвылгес утьыны. Огъя вераса, нунал ке вордске, йыр висён, сюлмаськон-бызьылон тырме. Колхоз ӝыны ар ӵоже вите исправительно-трудовой колониосы картофка келям понна коньдонзэ. Якшуръёс гинэ таӵе югдуре шедемын ӧвӧл, хозяйствоосты кык ар пӧяса возизы, куинетӥяз малпалозы ни: сётоно на-а продукцизэс, ӧвӧл-а. Нош пытсэт сьӧрын пукисьёсты нуналаз куинь пол маин ке но сюдоно, дыр. Кӧня пӧяса возёзы на музъем ужасез? Туж умойтэм югдур кылдэмын газэн. Азьвыл учко вал, кин кызьы дунзэ тырыны быгатэ, кӧнялы ке пунэме пыремъёслы луонлык сётъязы бергес но тыриськыны, али кутско но - счётысь вань уксёез талало. Уг юало: налогъёсыд тыремын-а, калыкедлы уждун сётэмын- а? Малы та ужпумез Правительствомы уг ӝуты Федерацилэн Кенешаз? - Йӧл дунъёсын шудон сярысь. Вылӥысен милемлы ас продукцимес кӧняен вузаны косонэз кулэ ӧвӧл. Басьтӥсь ке ӧз луы, соос асьсэос усёзы. Нош бускель регионъёсын йӧл дуногес ке луиз, продукцимы посредникъёс пыр отчы кошкоз. Соин ик котькыӵе луонлыкъёс утчано, ужась калыкез, гурт удысэз йыг-йыг возён понна. Таӵе мылкыдын но малпанэн улэ, дыр, туннэ котькудӥз гурт удысын ужась, уката но - кивалтӥсь. Уго ваньмыз понна со кыл кутэ. Л. МЕДВЕДЕВА. Бюджет юнматэмын Кылем арня вискын Правительстволэн Тӧроез Павел Вершинин Москваын ужаз. Мукетъёсыныз ӵош со пыриськиз Федерацияя Кенешлэн заседанияз. Сенаторъёс юнматӥзы Россилэсь туэлы бюджетсэ. Регионъёслы таяз аре висъяно коньдонлэн огъя быдӟалаез кулэстэмын ӧвӧл ке но, пусйиз премьер-министр, улосъёсы юрттэт табере мукет амалэн мыноз, лыдэ басьтӥськоз потреблениея индекс, соин ик асьме республикае, кылем арын сярысь, кык пол ичигес (350 миллион манет) уксё висъямын. Валамон, таин ми ум буйгатске, кызьы ке но тыршом уногес трансферт басьтыны. Та ласянь уж нуиське ни. Бюджетын вань выль статья - ватсаса тупатэмын армиез возьыны одӥг процентъем налог. Со чотын асьме республика ог 66 миллион манет люканы кулэ. Табере сюлмаськоно луоз со коньдонэз шаерысьтымы военнойёслы но обороналы ужась предприятиослы кельтон сярысь. Бюджет кварталлы быдэ ӧжытак вошъяськыны быгатоз. Россиысь Правительство улосъёс азе туж чурытэсь куронъёс пуктэ. Ми но ёросъёсын но городъёсын туэ юнгес ужаськом, вераз Павел Вершинин. Толон усьтӥськиз Кун Кенешлэн сессиез. Отын асьме правительство ивортӥ миым но ньыль ар ӵоже ужамез сярысь. Озьы ик эскерыны чакламын республикалэсь бюджетсэ. Умойтэм соиз, пусйиз Павел Вершини, быръёнэз шӧдыса, уноез эшъёс тыршо ас удысъёссэс азьпала поттыны, тросгес коньдон кыскыны. Соин ик бюджетлэн расходной люкетэз пумен нуйтӥське. Сыӵе бюджетэз быдэстыны уз луы. Матэ вуэ депутатъёсты быръён. Правительстволэн кивалтӥсез меӵак шуиз: асьмелэн нырысетӥ ужпуммы - республикаын огсыр улонэз азинтон, Евгений Примаков ласянь потӥсь кичӧлтонъёслы дурбасьтон. Россия сылэ мур гу вӧзын, ӧжытак гинэ сое донгид ке, страна куашкалоз, соин ик али котьмалэсь кулэез герӟаськемын ог-огдэ валаны тыршонэн. Валян Павел Вершинин пумиськиз журналистъёсын. Отысь материал потоз газетлэн вуоно номераз. И. КРИЧЕВ. Быдэс улосмес сайкатӥзы кадь Удмурт культурая "Дэмен" огазеяськонлэн берлосяз кенешаз-конференцияз одӥг писательмы пыртӥ мон асьме инттелигенцимес юн пыкылӥ вал, соос ми кадь ӟучомем ёросъёсы, гуртъёсы туж шер вуыло шуыса. Кыдёкын, пӧй, каро, лэся, Сюмсимес. Ма, туж ик ӵем уг ветло кадь Селта палъёсы но. Гожъяськисьёсмес сямен ик кыдёкысь калык пӧлысь адӟылыны уг луылы суредасьёсты, тодосчиосты, артистъёсты, мукетъёссэ. Кенешонэ люкаськемъёс куризы пыкылоно муртлэсь меӵак нимзэ ивортыны. Верай, со писательмы мукетъёсызлэсь шӧдскымон ӵемгес поталля ке но лыдӟисьёсыз доры. Ӝоже ӧз усьы кадь. "Дэменлэн" выль тӧроез тодосчи Альберт Алексеевич Разин со кенешын ик кыл сётӥз, районысьтымы удмуртлыкез муромытӥсьёслы юрттон вылысь, быдэс правлениенымы дорады поталом шуыса. Шумпотӥ. Та сярысь кивалтӥсьёсмылы но ивортӥ. Тау соослы ваньзылы. Малпанды умой, шуизы. Мед, пе, лыктозы трос кузя. Гуртъёсын но, пе, Сюмсиын но калыкен пумиськонъёс ортчытом. Умойгес сценарий дасяны куризы. Таиз ласянь но дэменчиос ӧз палэнске - асьсэос бадӟым ужрадэз ӟечгес радъян сярысь кенешыны дорамы вуылӥзы. Ми но ветлӥм. Тӥни озьы удмурт интеллигенциен пумиськыны шуд усиз. Меӵак верано ке, туж кышкасько вал, куноос ичи лыктозы шуыса. Али уго мынон-ветлон но туж дуно ини, маин куноятыны но дано адямиосмес паймоно, ёрмоно. Юнме куректӥськем. Жин-жин куноос лыктӥзы дорамы? Бадӟым автобусэн но, машинаосын но. Пӧлазы котькыӵе арлыдоос - мӧйыосызгес но, егитъёс но трос. Огезлэсь чебер мукетыз! Чаен куноятыса, гажано писательёсмес, суредасьёсмес, кырӟасьёсмес, эктӥсьёсмес соку ик калык пӧлы поттӥм. Куд-огез эшъёс куинь-ньыль интыын пумиськылӥзы-кенешизы калыкен. Быдэс ёросмес сайкатӥзы кадь! Нош "Удмуртия" издательствоын ужасьёс асьме писательёсмылэсь книгаоссэс но ваиллям. Сьӧразы басьтӥллям кылбурчиез Анатолий Перевозчиковез. Со нуналэ библиотекаосын, школаосын, клубъёсын ӧз чалмылэ кылбуръёс, кырӟанъёс-эктонъёс. Тужгес но ӟырдыт пумиськонъёс ортчизы Гуртлудын, Дмитрошурын, Сюмси шор ёзо школаын, библиотекаын, СПТУ-ын но районысь культура юртамы. Нырысь ик, туж шумпотӥ ас палысьтымы гажамон адямиосмылэн лыктэмзылы. Тани Клавдия Николаевна Исупова меӵак асьме дорын дышетскемын, быдэ вуэмын. Собере кошкем Ижевске. Удмурт сямен умой-умой уг но вераськы вылэм. Нош анай кыл сюлэмзэ вырӟытэм, али та сэзь кышномурт удмуртлыкмес ӝутӥсьёс пӧлын, "Удмурт кенеш" огазеяськонлэн но, "Дэменлэн" но туж ӟырдыт юрттӥсьсы, А. А. Разинлэн воштӥсез. Озьы ик калыкен пумиськылӥз землякмы кырӟасьмы, вӧсясьмы журналист Николай Романович Возисов. Берло аръёссэ со ужаз "Удмурт дунне" газетлэн редакцияз. Сюмсиос тодматскизы мукетэныз "Удмурт дуннеысь" журналистэн кылбурчиен Елена Виноградоваен но. Егит пиосмылэсь сюлэмзэс но вырӟытӥз, дыр, со. Чебер кырӟанъёсын-эктонъёсын ваньмес шумпоттӥзы Культура училищеысь "Инву- гур" ансамбльысь егитъёс. Ӟуч номеръёссы но, удмуртъёсыз но сюлэмез шунтэм вӧй кадь каро. Кыӵе чебересь, шаплыесь отын дышетскись удмурт нылъёсмы, пиосмы! Соос шоры учкыса, юн оскон пыӵа: уз, уз куасьмы асьмелэн удмыртлыкмы! Сюмси палан но дэменчиослэн, кенешчиослэн радъёссы йылозы. Только асьмелы ваньмылы огинын ужано. Ма, сое, удмурт "сяськаослэсь" йӧн-йӧн будэмзэс-пушъемзэс, возьматӥзы милям асьмелэн но вуоно артистъёсмы. "Рябинушка" нылпи садысь ньыль-вить аресъем мусоосмылы макем зол чабизы культура юртэ люкаськемъёс. Чеберлыкъя школаысьтымы егитъёс но, сюмсиосмес сяна, юн паймытӥзы куноосмес но. Та ӝужась-будӥсь ансамбленымы кивалтэ Л. В. Заколоткина. Люкаськемъёслы туж яразы кылбурчилэн, крезьгурчилэн, Россиысь Писательёслэн огазеяськоназы кутэм ужурналистлэн Владимир Возняковлэн кырӟамез. Гуртъёсын но Сюмсиын шуныт пумиськонъёс ортчытӥзы Россиысь Писательёслэн союззылэн членъёсыз Николай Спиридонович Кузнецов но Кирилл Егорович Ломагин. Соос кыксы но быръемын "Дэменлэн" кивалтэтаз, кӧня ке книгаоссэс но кузьмазы милемлы. Нимысьтыз тау кареме потэ тодмо суредасьлы, усто кырӟасьлы, Удмурт Республикалэн Кун премиезлэн лауреатэзлы Леонид Алексеевич Прозоровлы. Таиз но ужа "Удмурт дунне" газетлэн редакцияз. Та вакытэ ик ёросамы ӵапак ужа вал "Шулдыр ӝыт" ансамбль. Сюмсиысь культура юртын бадӟым пумиськонэз соос но туж юн шулдыртӥзы. Мон данъяськыса учки дано адямиосмы шоры. Кыӵе быгатӥсесь, чебересь соос, вольыт верасько. Зэм. Кылзӥсьёсмы, учкисьёсмы тросэз ӟучомемын ини. Озьы ке но, оскисько: анай кыл соосты бурдъяз выль азинсконъёсы, ваньмызлы выль кужым пыӵатӥз. Сюмси школаямы жин-жин удмурт дӥськутэн, чыртывесен лыктэм "Дэменлэн" правленияз быръем усточи Анна Алексеевна Мазитова. Кияса ёросысь аслаз ӵыжы-выжыосыныз со чебересь киужъёссэс, сюлэме пыӵамон кырӟанъёсмес-эктонъёсмес возьматъяса вуылэмын ини финн-угор дуннеысь кунъёсы но. Та огшоры нылкышно шоры учкыса ик сюлэм тырме данъяськон мылкыдын. Сыӵе ик туж тузӥ, шаплы адскиз "Дэменлэн" кивалтоназ быръем ветеран-инженер, фотограф, удмурт кырӟанъёсыз люкась Семен Андреевич Ильин. Нош мукетыз дэменчи - врач-экстрасенс Поликарп Степанович Князев ваньмызлы калыкмылы таза улон мылкыдзэ юн пыӵатыса кельтӥз. Ӝог йылпумъяськизы пумиськонъёс. Ижысь дуно куноосмы кошкем бере, ёросамы ӧжытак мӧзмытгем но луиз кадь. Но оскисько: азьланяз таӵе пумиськонъёс ӵемгес но ӵемгес луылозы. Ӟучомем палъёсын удмуртлыкез муромытыны, выльысь улӟытыны каньыл ӧвӧл угось. Тау каньмызлы куноосмылы бадӟым юрттэтсы понна! Е. Ильиных, "Удмурт кенеш" но "Дэмен" огазеяськонъёслэн Сюмси ёросысь ёзъёссылэн тӧрозы. Быръёнъёслы дасяськон кутскиз 4-тӥ апреле - Кун Кенеше депутатъёсты быръён нунал. Та пумысен кенешонэ люкаськылӥзы республикаысь журналистъёс но газетъёслэн редакторъёссы. Вераськонэз нуиз печатья но иворъёсъя министр Ю. И. Медведев. Со куриз быръёнъёслы дасяськонэз котыр ласянь шонер возьматыны, эсэпсэ чакланы. Быръёнъёсъя Законэн пыр-поч тодматӥз Удмурт Республикаысь Быръёнъёсъя комиссилэн секретарез Г. С. Пчельников, со ик валэктонъёс сётӥз журналистъёслэн пӧртэм пумо юанъёссылы. Туннэ нуналлы депутатлэн мандатэз понна нюръяськыны дась луэмзэ вераз ни 428 мурт, 59-эз соос пӧлысь - туалаосыз. Удмурт парламентэ чаклам инты - 100. Округъёс люкылэмын, соослэн гожъёссы, бырйисьёслэсь лыдзэс чакласа, туэ воштӥськемын. Кылсярысь, Завьялово районысь Ожмос котырысь гуртъёс шедизы Пичи Пурга районэ, озьыен, депутатсы но табере луоз бускель ёросысь. Депутатэ кандидатэ ӵектонъя берпуметӥез нунал - 4-тӥ март. 9-тӥ мартысен кутске валэктон уж (агитация), йылпумъяське 2 апреле. Котькуд округъя бырйыны кулэ 1 муртэ, нюръяськон мыноз 1 мандат понна. Быръёнъёсты ортчытонэ чакламъя быроз 7,5 миллион манет. Люкаськемъёс азьын вераськиз Кун Кенешлэн Тӧроез А. А. Волков. Со тодматӥз Москвае берло ветлэменыз но ужаменыз, валэктӥз Россия но Украина куспын кылдэм туала югдурез. Л. ДМИТРИЕВА. Журналистъёсын пумиськонъёс Коӵыш кутылэ - шыръёсты Таяз Кун Кенеше быръем депутатъёслы ужаны капчи ӧз йӧты. Быръёнъёс вакытэ, 1995 арын, Россия шедемын ни вал секыт югдуре. Соин ик Кун Кенешлэн законъёс бордын ужамез быдэсак потӥз секыт улонмы бордысь, шуиз журналистъёсын пумиськон дыръя Кун Кенешлэн Тӧроезлэн воштӥсез Владимир Алексеевич Пономарев. Куд-ог журналистъёс вераны туртто, ньыль ар ӵоже Кун Кенеш нокыӵе йӧскадь документъёс кутыны ӧз быгаты шуыса. Но со шонер ӧвӧл. Бадӟым уж нуэмын вал, Россия Федерациысь но Удмурт Республикаысь кун властьлэсь ёзъёссылэсь быдэсъяно удысъёссэс но полномочиоссэс люкон сярысь. Огкыл кутыку, Россиын таӵе документ нырысьсэ юнматэмын вал. Вераськонъёс потӥзы, Удмуртия ас Конституцизэ воштыны малпа шуыса. Но Конституцияя Суд меӵак пусйиз: Россилэн котькуд субъектэз сыӵе огкыл гожтыны быгатэ, уката ик со сярысь федеральной закон ӧвӧл на ке. Та огкыл кутэм бере ик дасямын вал ас коже кивалтон (самоуправление) сярысь закон. Со пумысен республикаямы лек нюръяськон кутскиз. Закон кутытэк кылиз. Но та бордын ужаммылы история бӧрысь шонер дунъет сётоз на, дыр. Озьы ке но, мон али ик меӵак вераны быгатӥсько: мукет регионъёс но та ужпум борды берытсконо луозы на ай, пусйиз кивалтӥсь. Кун властьлы одно ик улӥ властьлэн кужымез кулэ луоз. Та пумысен В. Пономарев журналистъёслы тодазы вайытӥз, кызьы Вылӥ Кенеш ас вакытаз быдтӥз вал ас коже кивалтон ёзъёсты но соин сэрен калыкын кужымзэ ыштӥз. Соин ик Кун Кенешысь депутатъёс нюръяськизы кун властез но ас коже кивалтонэз огкылысь кариськыса ужатон понна. Удмуртиын ас коже кивалтон мыдланьскыса радъяськиз, нимаз кузёос кие сюриз, шуиз Владимир Алексеевич. Сыӵе югдурез одно ик тупатыны кулэ. Кун Кенешлэн ужамезлы йылпумъянъёс лэсьтыса, В. Пономарёв ӟечен пусйиз Эскеронъя кун комитет кылдытон сярысь законэз. Та комитетлэн кулэлыкез сярысь со тазьы шуиз: - Малы адямиос доразы коӵыш возё? Шонер, шыръёсты кутылон понна. Но асьмелэн комакъёсмы но вань ни ук. Журналистъёсын пумиськыкуз, В. Пономарев данак гинэ дыр висъяз вуоно быръёнъёслы. Кызьы валаны луиз, со, туала Кун Кенешысь данакез депутатъёс сямен ик, быръёнъёсы пыриськыны малпа. Т. БАННИКОВА. Пусъемын Калашниковлэн медаленыз Ӵапак 23-тӥ феврале, Атыкай музъеммес утисьёслэн нуналазы, Удмуртиысь устоосыз пӧлысь 16 устоосыз пыӵал тӥрлык лэсьтӥсьёс пусъемын выль правительственной наградаен - М. Т. Калашниковлэн медаленыз. Соосты сётӥзы Кун Кенешлэн Тӧроез А. А. Волков но ачиз быдэс дуннелы тодмо луись конструктор. Награда юнматэмын вал 1997-тӥ арын, АК-47 автоматэз поттыны кутскем дырысен 50 ар тырмонэн валче. - Мон понна со туж бадӟым дан - улэп дыръям ик ужелы сӥзем медаль поттон,- шуиз Михаил Тимофеевич.- Таӵеез дуннеын ӧй вал на. Пыӵал тӥрлык лэсьтӥсьёс понна но со нырысетӥез профессиональной награда. Та аръёс ӵоже гинэ Ижевскысь конструкторъёсын, АК автомат вылэ пыкиськыса, 20-лэсь уно выль модель кылдытэмын. Дуннеысь 55 страна эриксэ уте Калашниковлэн автоматэныз. Выль правительственной наградаен та дырысен пусъемын луозы Россиысь оборона удысысь тодмо конструкторъёс, технологъёс но рабочийёс. Нош нырысетӥ номеро медалез басьтӥз "Ижмашысь" токарь Николай Павлович Белослудцев. Л. МЕДВЕДЕВА. Шунды Мар дуногес: сяська яке "Тефаль"? Мар кузьмано нылашлы 8 Мартэ? Праздник азьын та юан трос пиосты сюлмаськытэ, дыр. Мар бен, оло, та ӵектонъёсмы юрттозы тӥледлы кузьым бырйыны. * Кузьым лэсьто, кусыпъёсты чакласа. Тӥ нылашеныды, гажан муртэныды кемалась тодмо ӧвӧл на ке, кузьмалэ торт, шоколад, шампанской, кыӵе ке парфюмерия. Шарф, яратон сярысь книга, сяська. * Дуно кузьымъёс, коньдон, зарни угыос, зундэсъёс кузьмало матысь кусыпъёсын улӥсь муртъёслы. Валамон, со кузьым пунэмен тау каремез сяна, мукетсэ но куре. Но нылмурт тодматскемды берегес ик сыӵе кузьымъёс куре ке, малпаське, пиос: мар понна со тӥледыз яратэ? * Юрт котырын кутӥськись арбериос, ул дӥсь, валес котыр кузьманы яра кузпалъёслы но ӟеч тодмоослы гинэ. Но вуоно кузпалдылы "Тефаль" таба кузьмады ке, со куатаськыны быгатоз. Малпалоз, тӥ сое пӧрась интыын гинэ адӟиськоды шуыса. * Тӥ кемалась лулӟылыса учкылӥськоды ни мукет классысь нылаш шоры, но мылкыддэс вераны уд дӥсьтӥське. Ыстэ солы ӟечкылан открытка. Соин тӥ нылашез но шумпоттоды, кемалась верано кылъёстэс но шугъяськытэк вералоды. Нош кузьымды нылаштылы ӧз кельшы ке, эн сюлмаське. Табере тӥ тодӥськоды, яратэ-а со тӥледды, уг-а. Зэмзэ ик яратэ ке, котькыӵе кузьымлы шумпотоз. Кузьымез дунызъя уг дунъяло. Ӧтё алнашъёс Тулыспал толэзьлэн кызь сизьыметӥ нуналаз (27-тӥ феврале) Удмурт лулчеберлыкъя дэменлык но "Алнаш" бӧляк ортчыто валче ӝытсэс. Таиз ужрад сӥземын тодмо журналистлы, писательлы Николай Кузнецовлы. Ӝытэ пыриськозы трос тодмо адямиос. Соос пӧлын - Удмурт Элькунысь дано артистъёс Геннадий Ганьков, Геннадий Бекманов, Удмурт Элькунысь калык артист Вячеслав Байков, кылбурчиос Владимир Котков, Александр Белоногов, кырӟась Светлана Смагина, Россиысь дано артистъёс Анатолий Ушаков, Геннадий Соловьев, Россиысь дано артистка Валентина Загуляева, мукет тодмо адямиос. Со сяна, люкаськемъёсты шулдыртозы алнашъёс. Ӝытэз нуозы Анна Сапожникова но Вячеслав Байков. Ортчоз "Октябрь" культура дворецын. Кутскоз ӝытазе куать часын. Е. РОМАШОВА. ГОЖТӤСЬКОН-99 Ош бертӥз дораз Тупаны но кулэ, Кизнер районысь Мичурин нимо колхозысь потэм ош, Пурга районысь "Красная звезда" колхозэ вуыса, ас районаз гинэ берытскем ӧвӧл, бускель колхозысь азбаре пыриз. Айдуан-Чабья но Вылӥ Бемыж гуртъёс одӥг хозяйствое пыро вал, табере соос нимаз колхозъёсын. Нош почта ёззы одӥг. Соин ик та гуртъёсысь лыдӟисьёсмес нимаз ӧм висъялэ ни. Лотереяен шудонэ озьы ик пыриськизы В. Тыжма, Балдейка, Синяр- Бодья, Муркозь-Омга, Копки, Кизнер, Короленко почта ёзъёсын гожтӥськемъёс. Лотереяен шудон ортчиз ке но 23 феврале, воргоронъёсты сӥлы карон нуналэ, ошез утыны шуд усиз Натӥ апайлы - Наталья Ивановна Колесниковалы. Али со пенсиын ни, газетмес кема аръёс ӵоже лыдӟе. Кизнер районысь вань гожтӥськемъёс пӧлын шудытэмын на вал дуно утюг. Тазэ но кузьымез утӥз газетмылэн кемалась эшез Ксения Семеновна Иконникова, Арвазь-Пельга гуртын улӥсь. Лыдӟисьёсмы понна нимысьтыз кузьым ӵектӥз на А. Т. Малков, Удмурт Республикаысь Кун Кенешлэн агропромышленной удысъя, музъем кусыпъёсъя но инкуазь узырлыкъёсты кутонъя ялан ужась комиссиезлэн тӧроез, редакцилэн коллегияз быръем мурт. Таяз учыре шуд усиз Кизнерын улӥсь Валентина Ивановна Семеновалы. Озьы ик газетэнымы кема аръёс ӵоже эшъяське. Л. МАЛЫХ. КУСЫПЪЁС: МОСКВА-УДМУРТИЯ Эшшо одӥг вамыш Россилэн столицаяз ужаны но дышетскыны табере луонлык сётӥськоз Удмурт Республикалэн Кун Кенешысьтыз вань депутатъёслы. Со сярысь огкыл гожтэмын 23 феврале Кун Кенеш но Москваысь мэрия куспын. Документ улэ гожтӥськизы Удмурт парламентлэн кивалтӥсез А. А. Волков но Москва городысь Думалэн председателез В. М. Платонов. Кылем арын экономика ласянь таӵегес ик огкыл гожтыны дорамы ветлӥз столицалэн мэрез Ю. М. Лужков. Мартэ со нош ик Ижевске вуылыны кулэ. Огъя вераса, Удмуртия но центр куспын юнгес шӧдӥське ни ог-огдэ валан, ог-огедлы юрттыны тыршон. В. М. Платонов пыр-поч тодматӥз Москва городысь мэрилэн уженыз. Собыдӟа городлы быръемын 35 депутат, котькудӥз быгатэ 3 муртэ аслыз юрттӥсь возьыны. Озьыен, Думалэн аппаратаз ужа ог 100 адями. Депутатъёс пӧлысь 8-эз - нылкышноос. Кызьы пусйиз Владимир Михайлович, соослы оскемын тужгес но секыт удыс: промышленность но улон юртъёс ӝутон, улон интыос висъян понна кыл кутон. Кылдытэмын 11 комиссия. Фракциос пӧлысь туннэ нуналлы кылемын огез - "Россия", кылемъёсыз люкиськизы ужась группаослы. - Моссовет ог 350-400 депутат пыре вал, сомында калыкен ужаны секыт, - пусйиз Владимир Михайлович. - Сессилэсь ужан нуналзэ гинэ пусйыны часлэсь ятыр дыр бырылӥз. Та янгышъёсты но тырмымтэосты лыдэ басьтыса, Думаез выжтӥм профессионал амалэ, нош сессиосын сэрттоно-пертчоно ужпумъёсты огкутскемен быдэс кварталлы юнматӥськом. Озьы ужан дыр трослы шыръяське. Та дыр ӵоже кутэмын ни ог 200 закон. (Удмурт парламентын - 80). Туэ арлы бюджет сярысь ке верано, Москваын но со йылаз-пумаз вуттымтэ на. Кызьы пусйиз Думалэн кивалтӥсез, кык пол лыдӟыса потэм бере, депутатъёс отчы 90 пала ватсан пыртӥзы. Туннэ-ӵуказе куинетӥ кутскыса кылзозы на. - Бюджетэ 40-50 процентэз коньдон пыре ужбергатӥсьёс пыр, - шуиз В. М. Платонов. - Дефицит шуонэз ми ум тодӥське. Дышетӥсьёс, врачъёс, бюджет удысысь вань ужасьёс коньдон котьку дыраз басьто, соин ик Москваын бугыръяськонъёс ӧвӧл. Пенсиос, пособиос ласянь но югдур сыӵе ик. Самой пичи пенсилэн быдӟалаез али 450 манет, тулыс 500-озь будэтыны малпаськом. Жаль, мӧйыослы кулэезъя юрттыны ум быгатӥське на. Городысь Думалэн решениезъя улӥын возьыны тыршиськом квартира понна дун тыронэз: ичи уждунлэн ӝыныезлэсь со медаз ортчы. Кызьы азинске Москвалэн экономикаез? 1998 арын 3-4 процентлы. Кризисэз лыдэ басьтыса, туала вакытэ со урод ӧвӧл ни. В. М. Платонов нимысьтыз пусйиз улон юртъёсты ӝутонэн герӟаськем ужпумез: - Милемыз тросэз пыкыло мултэс дуно сылӥсь квартираос лэсьтэммы понна. Мон уг ватӥськы: зэмен но, узыр улӥсьёслы пуктэм коркаос ӧжыт ӧвӧл, азьланяз но соосты пуктом. Одӥг квадратной метрез отын сылэ 600 доллар. Басьтӥсь шеде. Буш кыллисез но трос. Но соослэн кузёоссы одно ик луозы. Таин ӵош арлы быдэ дунтэк муниципальной квартираос висъяськом. Огъя вераса, улон интыосты ӝутонъя программа городын азинске. Кызьы уло москвичъёс? Дунъёс столицаын 17 август бере чутрак ӝутскизы, соин ӵош шӧдскымон кулэсмиз импорт, кунгож сьӧрысь ваем продукция. Таин валче Москва ӝегатскытэк вазиськиз Россилэн регионъёсаз, отысь картофка, сӥль но пӧртэм пумо сиён-юон утчаса. Огез жаль - ваньмыз со столицае вуэ посредникъёс пыр, дуно дунын. Городлэн мэриез гурт удыслы нимысьтыз коньдон висъя-келя сыӵе регионъёсы, кытысь пайда басьтыны луэ. Владимир Михайлович Платонов, городысь Думаен кивалтэм сяна, ужа Федерацилэн Советэзлэн председателезлэн воштӥсез луыса. Соин ик пумиськонын бадӟым инты висъяз Украина но Россия куспын договор гожтонлы. Дышетскемезъя - юрист, 8 ар ужамын Москваысь прокуратураын. Таин валче тросгес выре юридической ужпумъёсын. Политик но юрист луыса, со умойтэмен лыдъя Украинаен гожтэм огкылэз, соглаш уг луы Крымез, Севастополез Украиналы сётон ласянь. - Асьмеос кутским но, адямиослэсь юатэк, Крымез кузьмам, Россилэсь люкыса. Табере мар луэ? Украинаын 12 миллион ӟучъёс уло, 50 процентэз отысь калык ассэ ӟучен лыдъя. Нош туннэ нуналлы ӟуч кыл государственной уг лу ни, одӥг вылӥ дышетскон заведениын но ӟуч кылын экзамен уг куто, шӧдскымон кулэстэмын кык кылын ужась школаослэн лыдзы. Жаляса верасько, Федерацилэн Советэз умоен лыдъяз та договорез. Москваысь гордумалэн председателез валэктон сётӥз журналистъёслэн пӧртэм юанъёссылы. Л. МЕДВЕДЕВА. 16-17 мартэ Удмуртие нырысьсэ вуоз Кун Думаысь коммунистъёслэн фракцизылэн кивалтӥсез Г. А. Зюганов. Геннадий Андреевич Ижевскын но Воткинскын пумиськоз республикаысь партийно-хозяйственной активен, егитъёсын но студентъёсын, ож тӥрлык поттон удысын ужасьёсын, ужбергатӥсьёсын, озьы ик вуылоз промышленной предприятиосы но культурая учреждениосы. Шунды Выжыосмы Тодӥськод-а песятайдэ? Кӧня выжыдэс тодӥськоды тӥ? Куиньзэ? Оло нош сизьымзэ? Нош тодӥськоды-а, кин вылэм тӥляд выжыосты: колхоз тӧро, революционер, тодосчи яке ёросысьтыды нырысетӥез врач? Тунсыко, бен-а? Тӥни озьы тунсыкъяськонъяз паймымон выжыез - куать полэс песятаез сярысь тодӥз Марий Элысь Карлыган школаысь 10-тӥ классын дышетскись Володя Андреев. Учкод ке, солэн песятаез нырысетӥ удмурт школаез усьтӥсь вылэм! Кузьма Андреевич Андреев (солэн атаез бордысен кутске фамилизы) вордскем 1857-тӥ арын крестьян семьяын. Эшъёсыз пӧлын лэчыт визьмыныз висъяськылэм. Ӟеч тодэ вылэм бигер, пор, ӟуч кылъёсты. Казань университетысь профессорен Н. И. Ильминскиен тодматскемзы бере малпа ассэ удмурт калыкез дышетонлы сӥзьыны. Озьы со 1883-тӥ арын Карлыганын школа усьтэ. Историкъёслэн верамзыя, та вал нырысетӥез удмурт школа. Татчы кыстӥськизы Вятка, Казань, Уфа, Пермь, Саратов улосвылъёсысь удмуртъёс, дышетскыса асьсэ палъёсы трос тодон-валанэн бертылӥзы. Кузьма Андреевичлэн сюлмаськемез улсын утемын вал татысь удмуртъёслэн кылзы, сямъёссы но йылолъёссы. 1989-тӥ арысен Карлыганысь школаын выльысь дышетыны кутскизы удмурт кылэз. Кузьма Андреевичлэн выжыез пушъе. Солэн куать полэс внукез туж тунсыкъяське удмурт кылэн. Мыло-кыдо эктэ-кырӟа гуртысьтызы "Ӟардон" ансамбльын. Кык гужем шутэтскиз но дышетскиз ини "Шундыкар" лагерьын. Нош семья писпузылэсь Володя укмысэтӥ выжызэ шедьтӥз ни, со Урак бордысен кутскем. Пияш данъяське аслаз песятайёсыныз, ачиз но соослэсь адӟем карыны тырше. З. Рябинина. Тау карон гожтэт Удмурт Республикаысь Тазалыкез утёнъя министерство тау каремзэ вера "Экспресс" ЗАО-лэн кивалтӥсезлы Зоя Трофимовна Чернышевалы, нырысетӥ республиканской больницаысь искусственной гемодиализъя отделениысь аппаратъёслы воштос ёзъёс басьтыны 122 сюрс манет висъямез понна. Ю. БЛОХИН, тазалыкез утёнъя министрлэсь ужзэ быдэсъясь. Шунды Сьӧлыко дуннее - куное Кызьы ке огпол, тодмоеным вераськыса сылыкум, вӧзтӥмы нылаш ортчиз. Тазьы учкыса, номырин уг висъяськы кадь - учкымон, али тросэз сыӵе. Но мукет пала мыныкуз, нылаш пыд йылаз мырдэм сылэ ни вал. Юэмын шуоно ке, ку юыса вуттоз, али гинэ татӥ ортчиз вал, бордысьтыз вина зын но уг лыкты. Паймемме адӟыса, тодмое валэктӥз: - Наркоманка. Тӥни ук, ас дуннеяз выемын - кыӵе ке эмъюм вирсэраз лэзиз, дыр. Аслыз нош 13 аресъёс сяна уз луы ай. Тодмоеным вераськеммы дырысь арня ортчиз-а, ӧз-а, нылаш нош ик син шорам йӧтӥз. Автобус дугдылонтӥын эшеныз ӵош сыло. Доразы пиосмурт матэктӥз. Кисыысьтыз кыӵе ке эмъюм поттыса, нылъёслы мычиз. Соосыз кема лыдӟыны выризы латин кылын гожтэм эмъюм нимез. Но кулэез сюрымтэ, берен сётӥзы. Кӧня таӵе нылашъёс-пияшъёс кыстасько урамъёстӥ. Азьло шуо ке вал, йыртэмасьёс пиртэш семьяосын будо, али тыроосаз, умойёсаз но югдур пӧртэм ӧвӧл. Усыкмытӥсь эмъюмез школа туалетъёсын гинэ но басьтыны луэ ни уго. Нырысь пиналлы алдаса кыӵе ке таблетка сёто. Соиз веръя но - кудӟе. Пиналлы кельше - со кытӥ ке лоба кадь, вань сюлмаськонъёсыз вуно. Кыкетӥяз ӵектыкузы, басьтом-а, ум-а шуыса уг ик малпаськы ни. Нош со виын мугор дыше. Куинетӥзэ ачиз куре ини. Тӥни соку вузкарись шуэ: - Кӧня ми тонэ куноятыны кулэ? Вай коньдондэ. Пинал муртлэн, валамон, нуназеяны сётэм коньдонэз сяна ӧвӧл - сётэ созэ. Выльысяз шыдлы тырмымон коньдон уг окмы ни - тросгес куро. Таблеткаос йырез уг шузимыто ни, мар ке кужмоезгес кулэ. Нош кужмоезлэн дуныз - ой-ой! Тани одӥг грамм кокаин 1000 манет сылэ. Туж дуно "морфий". Сое шедьтыны но шуг, таӵеоссэ милицилэн 4-тӥ отделэз сак чакласа возе уго. Бадӟым городъёсын наркоманъёслэсь радъёссэс будэто шырмачъёс - мурт чотын узырмыны турттӥсьёс. Соос коткуд бай семьяысь пиналэз син азязы возё. Малыез валамон, дыр. Бай пинал коньдонлы уг ёрмы. Гочатыны гинэ быгаты. Вузкарон интыоссэс милиция тодэ. Юри потаса но кутыло. Но огзэ кырмо, со интые кыкез ужаны кутске. Куанер семьяосысь пиналъёс лушкаськыса коньдон потто. Озьы вуо пытсэт сьӧры. Нош куд-огез наркотиклэсь "усыкмыса" кулэ яке ассэ ачиз быдтэ. Тани тодмоелэн одӥг эшез наркотикен кудӟем дыръяз ошиськем, коньдонлы ӧвӧл ёрмылэм, но урод сям ӟече уг вутты. - Тынад аслад но веръяллямед ӧвӧл-а?- дӥсьтытэкгес юай тодмоелэсь. - Вань сыӵе сьӧлыке, - ӧз танӥськы со. - Но тау кузпалылы, со юрттӥз мыным асме вормыны. Ачим но ӧжыт кыӵесэ ӧй пыры, соин ик пиналъёсты но алэме потэ - эн сётэ асьтэдыз алданы. Николай Моряков, Удмурт госуниверситетын дышетскись. Шунды Гуртысь пиос кышкасьтэмесь Атай музъеммес утисьёслэн нуналзы азьын сюресэ Играысь призывной пункт пала кожиз. Отын али 15-16 аресъем пияшъёс воинской учётэ султо. 2-3 ар ортчыса, соос Атай музъеммес утисьёс луозы. Кызьы учко пиос армия шоры, кыӵе соослэн малпанъёссы? Со пумысен вераськиськом 36 номеро училищеысь но Игра школаысь 10-тӥ-11-тӥ классъёсын дышетскись пиосын. Дима В., Костя Е., Дима Т.: - Мылкыдмы номыр ӧвӧл, армие мынонлы ум пумитъяськиське. Сергей Ф., Андрей К.: - Армилэсь ум кышкаське, но солэсь пегасьёсты валаськом, куд-ог интыосын "дедовщина" вань, шӧдске. - Кыӵе войскоосы шедемды потэ? Дима Т.: - Морской пехотае. Миша Л.: - Кунгожез утьысал. Андрей К.: - Милиционеръёсты дасян школае пырем потэ. Мукетъёсыз: - Со сярысь ӧм малпаськылэ на. - Кызьы тӥ учкиськоды армие ветлэм пиосмуртъёс шоры? Юртто-а кадь армиын ортчытэм аръёс азьланяз? - Сыӵе пиосмуртъёс шоры гажаса учкиськом. Соос мукетъёслэсь кужмогес, дӥсьтӥсесьгес, сётэм кылзэс быдэстыны быгато. Сыӵе сямъёс улонын туж кулэ. Но куддыр пиос армиысь сӧсырмыса берто, соиз ини мукет ужпум. Гуртысь пияшъёслэн армия пумысен малпанъёссы, мылкыдъёссы али огкадесьгес ай. Соос уг утчало аналскон амалъёс, асьсэды зэмос пиосмурт луыны дасяло.Тазалыко но кышкасьтэм луэ, пиос! А. КЛЕМЕНТЬЕВ, Удмурт кун университетын дышетскись. "Гуртэ - чагыр эстӥськон" Та кык ужпумлы сӥземын вал Правительстволэн Тӧроезлэн нырысетӥ воштӥсезлэн Юрий Питкевичлэн журналистъёсын пумиськонэз. Али котькинлы тодмо, вань газ умоез но дунтэмез эстӥськон луэ. Кыӵе бен тая югдур? Шаертӥмы кошке 12 бадӟым газ гумы. Республикаысьтымы 17 районын али газ сётонъя 39 станция лэсьтэмын, уно сюрс иськем газ гумыос кыскемын. Озьы арлы быдэ ичизэ 2,7-2,8 миллиард кубометр "чагыр эстӥськон" сутӥськом. Но специалистъёслэн верамзыя, республикалы эшшо 2-3 миллиард кубометр кулэ на. Куд-огез районъёс (Як.-Бодья, Завьялово, Ува, Балезино) кемалась валазы ни та эстӥськонлэсь пайдазэ. Озьы ке но, 7 районэ со вуттымтэ на. Жаляса верано луэ, "Газпром" берло дыре газ кысконлэсь палэнскиз. Соин ик мукет амалъёс утчано луэ. Мугез тодмо. Азьло та ужен республика ляб выриз но трос ыштонъёс адӟиз. Тани валля арын газ гумыос 300 иськемлэсь уно вуттэмын ке вал, миым - 180, 1993-1996-тӥ аръёсы - 200, нош 1990-1991-тӥ аръёсы - 100-115 иськем гинэ. Тӥни озьы асьмеос бускельёсмылэсь нош ик бере кылим. Азьланьын кызьы бен та уж мыноз? Камбаркае газ кыскон ужпум пыртэмын химической ож тӥрлыкез быдтонъя программае. Военнойёс коньдон сётыны чаклало. Сюмсие газ кыскыны басьтӥське "Межрегионгаз" огазяськон. 33 иськем гумыос тыремын ни. Газ туж кулэ Игралы. Татын малпало уксё висъяны бюджетысь, озьы ик юрттыны басьтӥське "УНГС-Город". - Луонлыкъёс утчаськом Юкаменск, Красногорск, Дэбес но Каракулино районъёсы газ кысконъя, - ватсаз Юрий Степанович. - Чакласьком пачкатэм сжиженной газэз паськытгес уже кутыны. Озьы кусып тупатыны быгатом кыдёкысь гуртъёсын. Германиын кемалась озьы ужало ни. Та удысын ас интызэс шедьтыны кулэ "Спецгазавтотранс" огазеяськонысь специалистъёс. Нош коркаосы кызьы газ вуэ? 1995-тӥ арын 6 сюрс квартирае "чагыр эстӥськон" пыртэмын, 1996-тӥ - 8, 1997-тӥ - 7,5, нош миым - 11,3 сюрс. Шуг-секытъёс вань Ижлы газ сётонын. 1 но 2 номеро ТЭЦ-ёс мырдэм ужало. Городэ газ вуэ вуж гумыетӥ, нош сое воштыны вылез уг лэсьтӥськы. Та ужен ӝеганы уг яра. Мукетыз лэчыт ужпум герӟаськемын газэз музъем пушкын возёнэн. Быдэс дунне таӵе амалэз кутэ. Соин ик али Можга районысь Карашур гурт дорын сыӵе газ возён инты лэсьтӥське. Отчы 4 миллиард кубометр пала газ тэрыны кулэ. Сое юн пачкатыса (бадӟым давлениен) музъем пушкы лэзёзы. Отчы сюрес кыскемын но административной юрт ӝутэмын ни. Г. Романов. Шӧкыч подпись Лымы туэ нормаен чаклам сярысь трослы мултэс усиз. Кызьы но ку со шуналоз, уз-а вӧлскы бадӟым тудву? Сыӵе юан сюлэмшугъяськытэ инкуазез эскерисьёсты но огшоры адямиосты. Лымы ӝог шуназ ке, тудву калык хозяйствомылы бадӟым изъян вайыны быгатоз. Вылаз ик, элькунысьтымы уноез тыметъёс вужмемын ни, уно аръёс соос тупатъямтэ- выльдымтэ... (Газетысь). Нылкышно: - Аверьян, мериканецъёс дунтэк сакыр лэзиллям шуыса верасько вал. Сое ӝоктӥськоды- а, мар-а? Воргорон: - Сакырен йырин ӧвл ай, Жагӟи апай, луоен мешокъёсты. Тыметмес тудву медаз нуы шуыса, таосын ке но пыкъяса утчалом. Суредэз Л. ПРОЗОРОВЛЭН. Надежда ГИЛЬМАНШИНА Кузьмад калыкедлы В. Г. Широбоковлы сӥзьыса Ӵемысь гинэ тон вуылӥд гуртэ, Кузё сямен йыгмыт вамыштылӥд. Пичи дыръяд лёгам пытьыосты Ялан тон утьыны кадь тырышлӥд. Верос бӧрсьы верос тон кылдытъяд, Пыртӥд отчы гуртысь геройёстэ. Юрттэт кидэ котьку ик сётъялляд, Паськыт лёгид гожъян сюресъёстэ. Йырад возид, дыр, визылась шурдэ, Сюлмад пыӵаз Мукши сьӧрысь тымет, Тодад ваид Кыкви дышетӥсьтэ - Бусэ кадь ышылӥз изён уммед. Озьы тӥни, книга бӧрсьы книга Кузьмад аслад удмурт лыдӟиседлы. Мукши калык солы шуэ уга: - Гажаз милемды Чекер Васимы. ШӦКЫЧ ЮМОРЕСКА Мон со, Пыльтчей Оконь... - Но мон дас ар кебитын ужай. А дас ар тэкит пӧзьтӥ. Вордскем гуртысьтым, Сьӧдпарсь гуртысь шуисько, мынам кыре потаме ӧвӧл. Валэктӥсько, кытчы ке сьӧрло! Дас нылпи лэсьтӥ шуод ай, сюдӥ-утялтӥ, будэтӥ. Озьы улон дауре кышноеным ваче син Сьӧдпарсь гуртын чиптэм-чаптэм ортчиз. Умой со. Кин кызьы, нош мон озьы малпасько. Но тӥ эн суралэ Сьӧдпарсь гуртэз огшоры сьӧд пасен. А сьӧд пась - сому вӧй кисьтон пась, гумы. Валэктӥсько, скважина. Милям гуртамы кемалась ини, даурысь даруе сьӧд парсьёсты вордо. Соин гуртмес но озьы ик шуо, дыр. Сьӧдпарсь. Шонерак сэрттыны-пертчыны уг тодӥськы. Кин кызьы, нош мон озьы малпасько. Но сьӧд парсьлэн сӥльыз гора-а-аздо ческытгес. А тӧдьы парсьлэн кӧшгес. Мар, мар? Кызьы шонер ӧвӧл? Валэктӥсько кызьы сюдод ведь. Соиз вератэк но валамон, пушнерен- а, нянен-а? Естественно! Милям гуртын кемалась, даурысь дауре сьӧд парсьёсты вордо бере, та сярысь тӥлесьтыд ӟечгес тодо, дыр. Кин кызьы, нош мон озьы малпасько. Но тӥ мыным чылкак эн пайме. А мынам дышетскеме ньыль класс сяна ӧвӧл. Валэктӥсько, начальной образование! Мон кызьы вераськисько, озьы ик гожъяськисько. Сёравно ми бадяр куарен шобыртэмын ӧвӧл. Валаськом, мар со перестройка, мар со массаж но мукет. Сё-таки, дас ар кебитын юнме ӧй ужа, дыр. Кин кызьы, нош мон озьы малпасько. Но ваньмыз со озьы луиз карасин лампаен сэрен. А дас нылпи вордскиз, шуисько. Валэктӥсько, азьло ведь ӧй вал, котьку кылиськы, котькытчы выд! Маскара, конечно. Котьма ке но, тӥ монэ воксё дебил эн каре. Сьӧдпарсь гуртын улӥсьёс но туэ визьматскемын. Пичиен уг лушкасько ни. Пичиен соку ик куто уга. Су-у-менак шупчытӥськод яке патялтӥськод, но юасез-верасез ик ӧвӧл. Кин кызьы, нош мон озьы малпасько. Но мынам нимы но паймытэ, дыр, ай тӥледды. А любой пасьысь пыльтчыны быгатӥсько мон. Валэктӥсько, туж ловкой мон! Соин ик сыӵе шушань ним но лякизы. Пыльтчей Оконь, пе. Ним бордын шат гогы пум. Пушкыд калтра медаз луы. Кин кызьы, нош мон озьы малпасько. Но милям гуртамы берло дыре олошаез но лешакез но вуылыны ӧдъязы. А воксё нерад, акыляк луиськиз ини. Валэктӥсько, то министерствоысь, то ооо-ысь! То амбал, то либерал! То анархист, то монархист! То пеллясь, то маяллясь! Калыкез пӧяны соос кытысь меда сомында коньдон жильдо? Пичиен, видасть, милям гуртын сямен ик, уг лушкасько шуод ай, уг окто. Кин кызьы, нош мон озьы малпасько. Но алигес ми доры кыӵе ке тунась вуылӥз. А астрологичка, пе. Валэктӥсько, психологичка со! А не астрологичка! Ой-ой, ой-ой, ой-ой, пӧя ук, пӧя ук, пӧя ук! Алда!!! Водолей кизили, курегъёс пуксьыку, ӝыны градуслы Орион пала мерцать кариз ке, пе, туэ тулыс лымы вылтӥ ик картофка мерттыны можно. Не может быть, шуыса, зал тыр шара кеськемме ик ӧй шӧдылы. Кин кызьы, нош мон озьы малпасько. Но мынам йыры кур луиз ук! Не можно, а нужно, шуисько, лымы вылтӥ мерттыны. Валэктӥсько, только мар потоз!!! Туэ коть крахмалзэ пызьыртӥськом. Нош вуоно сӥзьыл не маялзэ, не крахмалзэ уд басьты ни. Ну Водолей, ну ву кисьтаны мастак, видать. Кин кызьы, нош мон озьы малпасько. Но ярам, ярам, Водолей ӝыны градуслы Орина пала шуод ай, Орион пала мерцать кароз курегъёс пуксён азьын?.. А кызьы, маин мон мерталом? Ӝыны градусэз, шуисько? Валэктӥсько, ма мон укмыстон куать градус спиртэз но кефирысь уг шӧдылӥськы бере, а?Кин кызьы, нош мон озьы малпасько. Но мынам гинэ астрологичкалы йыры кур ӧз луы. А предмы ориентацизэ ик, ну йырсазьзэ ик ыштэм. Валэктӥсько, со агроном угось. Лымы вылтӥ картофка мерттон сярысь кылылэмез но ӧй вал, дыр. Маскара, конечно. Ымныраз чызйыса, мануальной терапия карыса, предмы мырдэм сайказ но зал тыр кесяскье... Срочно вае, пе, мыным татчы со астрологичкаез! Мон солы одӥг интыяз эшшо одӥг кизили быртто на! А бырттысал, бырттысал! Кышноез Египетэ кошкемын вылэм угось. Кин кызьы, нош мон озьы малпасько. Но мон со астрологичкалэн одӥг кылызлы но ӧй оскы. А кизилиос кыдёкын, нош мон татын. Валэктӥсько, Сьӧдпарсь гуртын улӥсько. Нуналлы быдэ куинь пол сьӧд парсьёсты сюдоно. Собере аслэсьтыд но кӧттэ кышъяно. Уйлы но уж кыле на. То кебит возьмано, то уробо тэкитано. Ужаны кулэ. Кин кызьы, нош мон озьы малпасько. Но кин тодэ азьланез сярысь, предмы сямен, ориентациез, ну йырсазез гинэ ӧвӧл, оло, йырез но киргатод ай. А со астрологичка лекциезлэн пумаз чорыгъёслэн улонзы туэ секыт луоз шуиз. Валэктӥсько, мон чорыг уга!!! Малызэ берло валай. Инбамын но, видать, кыӵе ке революция ортче. Юпитер, пе, Сатурн вылэ тубем. Око-о-о, тубоз ини! Алда!!! Ӧжыт гинэ ӧй оскы? Сандра-а мар-а со вылаз тубаны? Кин кызьы, нош мон озьы малпасько. Но вера ай, малы юнме шорысь Юпитер Сандра вылэ, шуод ай, Сатурн вылэ тубоз? А монэ кабзэ пырак шузи, дурдом кожа, лэся. Валэктӥсько, нош ик, ми но бадяр куарен шобыртэмын ӧвӧл. Ма но со тожо йӧндыриськом. Малы Юпитерлы Сатурн кулэ луоз, куке отӥ ик нагыляк гольык Венера калге, а? Штан но, мар но кылёнэз ӧвӧл. Срочно туба но ужез быриз. Кин кызьы, нош мон озьы малпасько. Но опеть юан кылдэ. А отын но сякой пырултэм меньшинствоос ӧвӧл-тэ? Валэктӥсько, сексуальной, в смысле, чагыръёс? Кин тодэ? Юпитер Сатурн вылэ тэтча ке. Соос отын ог дасо пала бере, Венера уг тырмы, дыр? Кин кызьы, нош мон озьы малпасько. Но тӥни, со психологичкаен, шуод ай, со астрологичкаен сэрен небесной канцелярие но тубиськиз ини. А, видать, улонзы тожо сураськемын-пожаськемын. Валэктӥсько, отын но реструктуризация картэк но фискальной ужрадъёс кутытэк, эмез-юмез уз луы, дыр. Кин кызьы, нош мон озьы малпасько. Но будьто ке, Сьӧдпарсь гуртын ужъёс быризы? А, мын ай! Валэктӥсько, ужъёс тымиськемын. Кин кызьы, нош мон озьы малпасько. Но марым, ведь?.. А, тырмоз!.. Валэктӥсько, пыч-пыч ужаны кулэ, шуисько. Кин кызьы, нош мон озьы малпасько. Пыльтчей оконьлэсь мадемзэ гожтӥз Л. СУРОВЫЙ Лукашенко уг пӧяськы Белоруссилэн Президентэз А. Лукашенко Удмуртиын дыръя, ми дорын ӵапак куноязы солэн бӧлякъёсыз, кыдёкысь шаерысь ӵыжы-выжыосмы. Президентсылэсь вераськемзэ телевизор пыр кылзыса, мон куноосылэсь юасько: туж , пӧй, улондэс ушъя вылӥ кивалтӥсьты, неужто озьы ик вань? Зэм, шуо, уг, пе, пӧяськы президентмы. Кышноелэн апаезлэн эмеспиез ужа металлургической заводын, Гомель областьын. Тӥни отысь андан ӵыжатӥсьёс толэзяз кык аванс басьто, берпуметӥ уждун сярысь вератэк ини. Вылаз ик, ваньзэ тупатэм дыре сётъяло, одӥг нуналлы но ӝегатытэк. Варманай но итӥське нылызлэн мадёнэз борды. - Ми пенсия но котьку дыраз басьтӥськом. Мон тодам уг ваиськы, огпол коть мед ӝегатозы шуыса. Зэм, пенсиос туж ик бадӟымесь ӧвӧл, будэтыны кулэ вылэм. Но ӝикыт, мултэс гольтыръяськытэк улыны тырме. Нош ик юасько ужлы ёрмон сярысь. Кенакъёсылэн верамзыя, соос палан, пе, ужатэк кыллё азьтэмъёс но тордосъёс гинэ. Кинлэн ужамез потэ, со котьку но аслыз инты шедьтоз. Кун предприятиын тыршемед уг ке поты, ас поннад уж мыт, ужбергатӥсь кариськы, нокин уз алы, уз но люкеты. Кема юалляськи на куноосылэсь. Туж тодэм потӥз угось: зэмзэ-а меда вера Лукашенко. Асьмеос тодӥськом ук, кивалтӥсьёс куддыръя ӧвӧлтэмзэ но вань карыны ярато шуыса. Табере оскисько: белорус президент уг пӧяськы вылэм.Г. ТИХОНОВ. ШӦКЫЧ Уммурт Басня Мудрон шакра дунне вылын Кинэз, маиз гинэ ӧвӧл. Визьмын кутскид ке лыдъяны, Сизьым нунуал зӥбыт уд кӧл. Вумурт но вань, дыр, дун вуын, Тэльмурт но вань, дыр, нюлэскын. Ӵужмурт но вань, вань кышномурт, Вань гажан мурт, но вань ук мурт. Я, верай ай мыным, эше, Тодэ меда али кин ке, Эшшо вань на ай одӥг мурт, Нимыз-тулыз солэн - Уммурт. Изён туге со сьӧлтаськем, Соин кин ке Уммурт шуэм. Изе ни со уно аръёс, Оло нош данак вапумъёс. Кутъёс шудо ымныр вылаз, Дыдык но нюлатса кельтэ. Нош со усем, лэся, вактаз, Куддыр мар ке но уйбыртэ. Изе со пыд йылаз но кадь, Уг пыры ӝӧк сьӧрын но кать. Изе мӧзмем кышно вӧзаз, Кенэм коть туй кымес вылаз. Нош котыраз югдытӥсьёс, Уг висё лыдонэн соос. Гожто зӧкесь юн кагазъёс, Уммурт туэ, пе, сайкалоз. Я, кӧл, Уммурт, весяк уммен, Ум каре шарак кӧлондэ. Вӧтын ке но шудэн-бурен, Оло, адӟод тон улондэ. Валад-а, кин сыӵе Уммурт, Валад ке, чал-чал ул, Визьлюк. Яке кыед вылэ гылӟод, Шер-вай усёд, кылдэ куртчод. Ф. СУВОРОВ. Удмурт нылкышно кенеш: "Сюлэмы мынам - азвесь крезь" "Туж яратӥсько кырӟаны но, быгатэмея кырӟан чуръёс но гожъясько". Федосья Тубылова сямен, тазьы ик вераны быгатозы Васса Васильева, Екатерина Антонова, Елена Павлова, Лидия Чернова, Юлия Байсарова, Римма Шкляева, Валентина Широбокова, Фаина Ускова, Надежда Ельцова, Надежда Бочкарева, Любовь Васильева, Августа Васильева (Семенова), Зоя Трухина, Юлия Кузьмина, Светлана Белых... Соос пӧлысь куд-огез кивалто фольклор ансамблен, нылпиосты кырӟаны дышето. Кудӥз-огез поттӥзы яке дасяло ас книгаоссэс-бичетъёссэс. Мукетъёсыз шыпытгес, асьсэ понна кылбурало, тани, шуом, Зоя Лекомцева, Нина Соколова, Людмила Гирбасова, Зинаида Муканова, Галина Баженова, Нина Ефремова (Петухова), Мария Иванова (Кибардина)... Та вылӥ верам нылкышноос кылан-буран, крезьгуран устолыксэс возьматыны ӧтемын Удмурт кун филармоние. Татын 4-тӥ мартэ луоз "Сюлэмы мынам - азвесь крезь" ӝыт. Крезьгурчиосмы лыктозы фольклор ансамбльысь эшъёсынызы. Можга городысь калык театрысь пиос-маскарчиос дасясько нылкышно праздникен ӟечкыланы. Куд-ог эшъёсмы потозы киязы гитараен, арганэн, нош мукетъёсыз - сюлэмазы кылбурен. Нылкышно кылбурчиосмылэсь кырӟанъёссэс сцена вылын быдэстозы Геннадий Бекманов, Геннадий Ганьков, Игорь Перевощиков, Владимир Мальцев, Андрей Ураськин, Николай Уткин, Григорий Собинов но мукетъёсыз. Сцена вылын кылбуралозы Ашальчи Оки нимо премилэн лауреатъёсыз Алла Кузнецова, Галина Романова, Людмила Кутянова, Лидия Нянькина, Флор Васильев нимо премилэн лауреатэз Татьяна Чернова, кылбурчиос Елена Виноградова, Ольга Ведрова, Антонина Ермолина, дышетон удысысь тодосчиос Августа Конюхова но Роза Яшина, озьы ик Петр Захаровлэн кылбуретъя студияз ветлӥсь нылъёс Елена Панфилова, Татьяна Прокопьева, Татьяна Пантелеева, Алена Ионина но мукетъёсыз. Луозы "Пурга кизилиос" огазеяськонысь пиналъёс но. Озьыен, Удмурт кун филармония 4-тӥ мартэ ӧте тӥледыз, гажано эшъёс, удмурт нылкышно кылбурчиослэн но крезьгурчиослэн ӝытазы. Со кутскоз 18 часэ. Т. НИКОЛАЕВА. Узырлыкез - куинь полэс Адямилэсь улонзэ иськемъёсын уд мерта. Одӥг ласянь - со туж кузь, мукет ласянь - туж вакчи, вань быгатонозэ но лэсьтыса уд вуы. Софья Эльфатовна Широбокова алигес тырмытӥз 37-зэ, нылкышно понна котыр ласянь - зарни вакыт. Лэсьтэмын но трос. Басьтӥз кык вылӥ образование: агроном но экономист, семьяязы куинь пиналзы будэ. Ужаз Игра районысь "Чутырский" совхозын валтӥсь специалист луыса. Отысь калык ик та йӧно, чупрес нылкышнолы бадӟым осконзэ вераз, Удмурт Республикаысь Кун Кенеше депутатэ бырйыса. Софья Эльфатовналы Удмурт парламентын оскемын огез бадӟымез но секытэз удыс - со кивалтэ экономика ужпумъёсъя но бюджетъя комиссиен. Воргорон понна но та ныпъет капчи ӧвӧл, нош гуртысь депутат басьтӥськиз кышкатэк, ас кужымезлы, тодон-валанэзлы оскыса. Ньыль ар ӵоже Кун Кенешын ужатозяз, С. Э. Широбокова тросэзлы дышиз, солэсь пӧрмиз ӟеч политик, ачиз та кылэз уг ке но яраты. Арнялы быдэ пумиськылэ Игра палан улӥсь калыкен, бырйисьёсыныз. Таиз ини мукет вераськон. Нош туннэ асьмеос пыралом (ачиз юрттэмъя), депутатмылэн улон-вылон, малпаськон дуннеяз. Мерталом солэсь дунне шоры учконзэ туж огшоры мертэтэн: нырысетӥ классын сямен, ортчом алфавитъя А букваысен Я букваозь. Нош дунъет сётоз лыдӟись. А. Ачим. Школаын дышетскыкум ик улон монэ ас ӧраз кыскиз, азьветлӥсьёс радэ. Та сямы выжиз бадӟымез нылы, Гульнара вылэ. Пичи дыръям эшъёсыным ӵош туж яратылӥм концерт пуктылыны, мон котьку нуисез вал. 4-тӥ-5-тӥ классысен кивалтӥ пионер дружинаен, 7-тӥ классысен - школаысь комсомольской организациен. Институтын нырысетӥ курсысен ик бырйизы профкоме. Мыным сыӵе оскон кельше вал. Пиналъёсме али "3" яке куд-ог дыръя "2" басьтэмзы понна куаретӥсько: "Малы мынам дыры котьмалы тырме вал, малы тӥляд уг тырмы?" 8-тӥ классысен кутски институтэ дасяськыны. Кун Кенешлэн ялан ужась комиссияз но, малпасько, юнме шорысь ӧй шедьы: 10 ар ӵоже ужай "Чутырский" совхозын, со пӧлысь 7-зэ - экономистын. Семьяын асме валтӥсь интыын уг адӟиськы, анае верамъя, гуртын воргорон кузё луыны кулэ. Мон соин быдэсак соглаш. Анае егит дыръяз туж чупрес вылэм, пиослэсь, пе, номыр ласянь ӧз висъяськылы. Солы ним но, тодыса выллем, Шура, Александра, сётӥллям. Нош мынам сямы мукетгес, эшъёсы но нылъёсгес вал. Братъёсы пичи сузэрзэс (ми кык пи но одӥг ныл) жаляса, утьыса будэтӥзы: самой аляк пиос но монэ жугыны, вӧсь карыны кышкаллязы. Но футболэн шудыны яратско вал, киме но чигтылэме вань. Б. Байлык. Огласянь ке верано, мон туж узыр адями, узыр аслам ӵыжы-выжыосыным. Анае ласянь - мон ӟуч, атае ласянь - бигер, нош бызи но улӥсько удмурт семьяын. Вераськисько куинь кылын. Нош узырлык сярысь ке верано, зарни, дуно арбериос, трос коньдон сьӧры уиськон - сямам со пыӵамтэ, табере уз но пыӵа ни шуыса малпасько. Котькӧня уксёед медло - адямилы со ноку уз тырмы. Монэ пичиысен ик муми-буби дышетӥз: муртлэсь номырзэ эн иса, муртэзлэнэн вылын уд узырмы. Мынам малпанэ сыӵе ик, пиналъёсме но та верамъя будэтӥсько. Кузпалэным ми кыкмы но совхозын валтӥсь специалист луыса ужам, пай люкылон вакытэ фермер но, ужбергатӥсь но кариськыны луонлыкмы вал. Сыӵе сюресэз ӧм быръе, со сярысь пичи но ум жаляське. Туала узыръёс ласянь ке верано, адске ук, кин кыӵе амалэн "ужа". Адямилэн котьмалэсь бадӟым узырлыкез, мон сямен, солэн пушлань чеберлыкез, визьмыз, тодон-валанэз, юн тазалыкез. В. Веме. Анае удмурт калык сярысь котьку умоен вералоз вал: соослы, пе, улыны капчигес, вань секыт ужез дэмен кутскыса лэсьто, корка но одӥг нуналскын ӝуто. Нош сюан кызьы ортчыто? Быдэс гуртэн! Бигеръёс но та ласянь умой, ог-огзылы юрттыса уло, уката но адями вордскыку, сюан лэсьтыку, адями ватыку - ог-огзэс уг кушто. Ӟеч сям. Азьланяз но со медаз вуны вал. Пичи Пурга палан тае туннэ утё на. Г. Гырыны. Нырысетӥ профессие мынам - агроном. Музъем гырон, ю-нянь будэтон - со уже, пичиысен быръем улон сюресэ. Борозда ке шуиськом, котькуд адямилэн вань нырысетӥ бороздаез, пӧртэмлыкез со бордын - кин кызьы гыре. Асме мон гырисьёс радэ пыртӥсько, угось вань черновой уж пельпум вылам усе: совхозын - бусы ужъёс, Кун Кенешын - документъёсты, законопроектъёсты дасян. Отын но, татын но мытэм удыстэ пумозяз вуттоно. Праздникъёсы тост веран дыръя мон котьку син азям пуктӥсько музъем ужасез, нянь будэтӥсез. Солы сӥзисько шуныт кылъёсме, азьланезлы осконме. Тодам ваисько одӥг гужемез. Соку нуналлы быдэ ведра дурын кадь зоръёс кисьтӥзы, пудо возён лагерёзь дизелен но мыныны уг луы. Но скалъёс огпол но кыскытэк ӧз кыле. Дояркаос сомында иськемез жаль зор ултӥ, дэриез коласа ветлӥзы - ӝожтӥськыны огезлэн но тодаз ӧз лыкты. Сыӵе асьмелэн калыкмы - гырисьмы. Д. Даур. Котькызьы мед шуозы вапуммы сярысь, мынам поколение дышемын сюлмысь ужаны, странаез понна улыны. Уродэз бордын ӟечез но вань. Мукет даурен ас вакытме ӧй воштысал. Е. Егитлык. Мынам егит дыры шудо ортчиз. Шугъяськытэ туала егитъёслэн азьлань сюрессы. Милемлы пичиысен ӟечезлы оскон пыӵатӥзы, вал пионерия, комсомол, интернационализм, патриотизм. Туннэ соос интые выжы лэзё наркомания, проституция. Нош ик депутат луыны кылдӥз ке, мынам программаям валтӥсь инты басьтоз егитъёс понна нюръяськон. Нылпиосме обществолэн урдэсаз сэрпалтэм поколениен адӟеме уг поты. Ж. Журналист. Та профессиез пыртӥсько тужгес но секытъёсыз радэ, малы ке шуоно, котькуд адямилы сюлэмдэ уд усьты, пушкад ватэм малпанъёстэ уд вера. Журналист - со дипломат, психолог. Валамон, туала вакытэ котькудӥз сярысь озьы шуыны уг луы: куд- огез ужало коньдон вылэ. Соосты мон ӧй пыкылысал, кин тодэ, кызьы улэ солэн семьяез, ачиз. Но огзэ верало: журналист нимзэ саптаны кулэ ӧвӧл. З. Зарни. Мон понна со - государстволэн ваньбурез, узырлыкез. Таӵе ӵошатон сётысал на шаерамы улӥсь калыкмылы. Институтын ӵош дышетскем башкир пи огпол шуиз: диплом басьтӥ ке, Башкирие уг берты, татчы кылё. Адямиос кельшо: небыт, зӥбыт сямоесь. Асьмелэн калыкмы визьмо, ужась, кибашлы. Огкылын вераса - зарни. И. Из. Гуртын будэменым, дыр, дуно яке дунтэм, воршудлы тупась яке тупасьтэм валанъёслэсь мон кыдёкын. Соос борды туж ик уг кыскы кадь. Зэм, алигес шӧдӥ: огаз пумиськонын чыртывесе копак ӟырдаз: только уг тодӥськы - кужым-а со мыным сётӥз яке мынэсьтымзэ-а кыскиз. Из ласянь мынам учконэ музонгес. Тодам ваисько из сюлэмо адямиосты. Соос шер ке но пумиськыло - кыдёкегес палэнскыны тыршисько, малы ке шуоно, мынам меӵак сямы, кин тодэ, кинлэн сюлэмаз кыӵе кидыс пазьгод. Но йыркурме нокин вылэ уг возиськы, куд-ог дыръя уйёсы но озьы гинэ умме усьыны уг ке но быгатӥськы. Мыным секыт соку - уг ке быгатӥськы адямиослэсь куронзэс дыраз быдэстыны. Али тужгес но бадӟым сюлмаськонэ - школа юрт но улон коркаос пуктон. Й. Йыр (кивалтӥсь). Котькыӵе ужлэн пӧрмемез 90 процентлы потэ кивалтӥсь бордысь. Соин ик пичи-а коллектив, бадӟым-а - эскерытэк-чаклатэк адямиез пуктыны уг яра. Камбаркаын луэм учыр тае ӟеч возьматӥз, азьланьын но янгышъёс луозы на, кивалтыны яратӥсьёс уго трос. К. Казна. Зэмзэ верано ке, со туннэ буш. Милям комиссимы, Эскерон палата но Эскерон кун комитет ялан ужаськом солэсь шонер кутӥськемзэ эскерон бордын. Мон малпамъя, асьмелэн пунэмен тыронъёсмы гинэ казна пыдсы кылемын на. Озьы ке но, Россия Федерациысь музон регионъёсын ӵошатыса, сокем урод ум улӥське на. Вань ӟечгес но ужасьёсыз: Свердловск, Татарстан, Башкортостан 1-тӥ январьысен бюджет удыслы уждун будэтӥз ни. Нош ми ялан утчаськом на, кытысь коньдон шедьтыны. Л. Лотерея. Шудо билетъёслы мон уг оскиськы, улон сюресэ шудо-буро ке но. Ваньмыз потэ тыршем бордысь, нош дунтэк сыр сёто, калык верамъя, шырлы пуктэм нальыкын гинэ. Соин ик мон уг валаськы асьмелэсь пӧям вкладчикъёсмес: марлы оскыса берпуметӥ уксёзэс соос пӧртэм банкъёсы, фирмаосы понӥзы? М. Малпан. Самой бадӟым малпанэ - куинезлы ик пиналъёсылы вылӥ образование сётон, соослэсь умой адями пӧрмытон. Улонын ас интызэс мед шедьтозы. Н. Нюлэс. Мон будӥ нюлэсэн артэ, коркамы гурт пумын ик сылэ вал. Тэле вуыса, вань жадеме ортче, выль кужым мугорам пыӵа. Пужым яг, кызьпу арама - самой яратон интые, отын ортчиз мынам пичи дыры. Узыян, губиян, турнан - солэсь ӟеч шутэтскон вань на меда? Кылем сӥзьыл туж трос коньыгуби вал - толбытлы дасям. О. Ожмаськон (нюръяськон). Депутатлэн мандатэз понна нюръяське шуо ке, мыным та кыллэн пуштросэз уг яра. Мон сямен, со - ӵошатскон. Ортчем быръёнъёсын мыным 11 воргоронэз вормыны кылдӥз, пӧлысьтыз огеныз гинэ ог-огмес ӧм валалэ. Котькудӥз уго та уже ас малпанэныз пыриське, келямзэ шӧдэ ке - вань пож мылкыдзэ вормисез вылэ кисьтэ. Мон сыӵеосты уг валаськы, валаны но уг тыршиськы. Ожмаськон кыллэсь мукет значенизэ герӟасько война кылын. Мынам кыкез но песятае ож бусыын быремын. Ӟучез, Степан, куинь война пыр потэм, граждан ож дыръя шедем Будённыйлэн отрядаз. "Мар война та, мар война та..." кырӟанэз кылыкум, амалтэк синъёсы нюромо. Кыӵе зол та кырӟан, кыӵе солэн гурез но кылъёсыз! Сюлэм пыртӥ пото, мылкыдэз бугырто. Мыным туннэ возьыт войнаез ортчем поколение азьын. Ми, егитъёс, утьыны ӧм быгатэ СССР-ез - син азямы куашкатӥзы, нош песятайёсмы улонзэс сётӥзы, фашизм сое медаз быдты шуыса. 15 республикаос пӧлысь, Туркменистан сяна, огез но умойгес улыны ӧз кутскы. Р. Рай. Уг оскиськы, сопал дуннеын улон вань шуэмзылы. Мон та кылэз мукет сямен валасько: чебер улон со - вань ке яратон семьяед, ужед, утялтэм бакчаед, садэд, коркаед. С. Сыръянтӥ (нюр). Котькудӥз адями таӵе интыосты палэнэтӥ мед ортчоз. Юон, наркомания - со сыӵе ик пушказ кыскись нюр. Мынам куд-ог депутатъёсты ӵошатэме потэ та кылын: адями одӥг пол гинэ ассэ ачиз вуза, кыкетӥзэ тон нокинлы кулэ ӧвӧл ни. Т. Толчок (базар). Туннэ улонмы сярысь ке вераськон мынэ, солэн радыз мыным уг кельшы. Калык со понна янгыш ӧвӧл, янгыш государство, собыдӟа странаез базарлы пӧрмытыса. Асьмелэн табере котьмае вузаны-басьтыны луэ, закон сыӵеос палан. Туземецъёс музэн, ваньбурмес пияла пырыослы воштӥськом. У. Удмуртлык. Азьвыл мон ноку но ӧй малпаськы выжыосы сярысь. Анае вордскемын Грахово районысь ӟуч гуртын. Асановое дышетскыны мынытозяз, удмуртъёсын вераськемез но ӧй вал, котыразы поръёс улӥзы. Зоотехниклэсь дипломзэ басьтыса, 1945-тӥ арын сое келяло Вавож районысь удмурт гуртэ. Отын толэзь куспын удмурт луиз. Атае, бигер пи, удмуртэз аслэсьтыз кылзэ кадь вольыт тодэ. Братъёсы эшъяськизы удмурт пиосын, нош мынам эшъёсы - ӟуч нылъёс. Со вакытэ ми улӥм ни ӟучъёс пӧлын, но дышетским ваньмы огазьын, Волипельга школаын. Ноку но ӧм чаклалэ: кин кыӵе выжыысь потэмын, кин кыӵе кылын вераське, кинэн эшъяське. Институтын мон синмаськи удмурт пилы. Вуоно кузпалы спортсмен, Удмуртилэн сборнояз пыртэмын вал. Соин ӵош гуртамы бертылыку, мон ӧй вера, Николай удмурт шуыса. Огпол, телефон пыр жингыртыкум, анае лушкемак гинэ юаз: "Коляед удмурт ӧвл-а?" Удмурт, шуисько. "Туж умой. Удмурт пиос - либыт сямоесь, умоесь". Тӥни озьы мон удмурт семьяе шеди. Шумпотӥсько, мынам сыӵе ӟечесь ӵыжы- выжыосы шуыса: бигеръёс, ӟучъёс, удмуртъёс - ваньзы тупаса, эшъяськыса уло, ог- огзылэсь кылзэс но тодо ни. Мон туж бадӟым тау карисько картэлэн анаезлы. Со монэ котькыӵе ужлы дышетӥз, 19 аресъем кензэ, вордэм нылзэ кадь утиз-вордӥз. Аслэсьтым анайме мон вазь ватӥ. 23 арескын улонысь кошкиз Максим братэ. Куректонлэсь утиз семьяе, кузпалы, ӵыжы-выжыосы. Нылпиосмес но удмурт сямен вераськыны дышетӥськом. Гульнара, песянаеныз улыса, ӝог дышиз. Али со дышетске финн-угор кылъёсъя лицейын. Семьяямы удмурт сямен вераськыны выриськом, пимылы уггес ке но яра. Мыным валантэм: малы меда удмуртъёс пӧлын вань вордскем кылзылэсь кепырась муртъёс? Бигеръёс ведь огез но асьсэлэсь выжызэс уз ватэ. Ф. Фильм. Яратӥсько учкыны ӟуч киноосты, советской аръёсы поттэмъёссэ. Туалаосыз адӟем каремын кунгож сьӧрысь, бордазы соин но уг кыско. Ӵ. Ӵукна. Та кылэз вераку, син шорам пуксе ӝужась шунды, чагыр ин. Шонерзэ вераса, мон яратӥсько бер выдыны но бергес султыны. Но гуртын скал кысконо, соин ик вазь султоно луэ вал. Макем вазь султӥд - сокем ӟеч мылкыдыд. Озьы ке но, умлэсь ческыт номыр ӧвӧл, дыр. Ш. Шаер. Вордскем гуртэ мыным удмурт Венеция кадь потэ. Нылпиосы вордскизы Чутырьын. Волипельгае мынӥськом ке, соос зэмос гуртэ вуэмлы шумпото: ву сяськаос, чылк-чылк шур, валъёсты уйёсы возь вылэ поттон - со ноку уз вуны. Мынам школае странамы понна будэтӥз кык Героез. Кызьы уд данъяськы! Ы. Ыж. Визьмо пудо. Сюдэ но, дӥся но, кутча но. Сямызъя лачмыт, кылзӥськись. Кечез соин уд ӵошаты. Мынам котьку но мылкыды сӧриське, удмуртъёсты удмуртъёс ик ыж уллёен ӵошато ке. Э. Экономист. Тросгес мед луысалзы та удысэз пыр-поч валасьёс, уката ик кивалтӥсьёс пӧлын. Мон уг жаляськы кыкетӥ профессия басьтэмелы, озьы косӥз улон. Ю. Юмок. Серемес учыръёсы мон ӵем шедьылӥсько. Татын ужакум но котькыӵеез вал ни. Лыкто приёме ялан ужась комиссилэн кивалтӥсез С. Э. Широбокова доры, малпало, со таза мугоро, арлыдо, пурысьтам йырсиё кышномурт шуыса. Нош азязы - чиедгес мугоро егит нылкышно. Юало Софья Эльфатовнаез. "Мон кылзӥсько. Пуксе". Шорам оскытэкгес учко. Вераськеммы бере воксё мукет мылкыдын кабинетысь пото. Я. Ялкарон. Сяська будэтон, бакчаын жадьытозь ужан - со мон понна самой устоез шутэтскон. Кунгож сьӧры огпол ветлэме вань, Болгариысь эше доры. Соин кусып тупатӥм вал КИД пыр, школаын дышетскыкум. Дораз ветлӥ, анайме ватэм бере. Юрттӥз Пермьын улӥсь дядяе. Юн куректэмме валаса дэмлаз: "Коньдон сёто, мын ӧжытак шутэтскы, кужым люка". Озьы пиеным Болгарие вуылӥм. Л. МЕДВЕДЕВА. Шонертон Гажано эшъёс! Ми янгышаса ивортӥмы "Октябрь" культура дворецын ортчоно ӝытлэсь дырзэ. Со кутскоз нуназе бере куинь часын. Быдэс дуннелы тодмо Ураллы матын ке но улӥськом, шаермес гурезё шуыны ым уг пыры. Озьы но республикамы будэтӥз гурезьёсты эскеронъя (горной) наукалы синмаськымон специалистэз. Быдэс дуннеын тодо солэсь нимзэ - академик, Социалистической Ужысь Герой Н. В. Мельников (1909-1980). Данакез ужъёсыз сӥземын месторождениосты пуштытыса эскеронлы. Николай Васильевич вордскиз Сарапулын 1909-тӥ арын 28-тӥ феврале. Странаямы шукрес воштӥськонъёс ӧз луысалзы ке, со азинтысал, дыр, выжыосызлэсь мытэм удыссэс - пыдкутчан лэсьтон-тупатъян ужез. Шор ёзо школаез йылпумъяса, 1927-тӥ арын Нижний Тагилысь горнометаллургической техникуме пыре, собере - Свердловскысь горной институтэ. Удыссэ ӟеч тодӥсь-валась, визьмо инженерез синйылтӥзы, нырысь-валысь трестын ужаз, собере - главкын. Бырйизы СССР-ысь Наукаосъя академие академике, Николай Васильевич кивалтӥз Калык хозяйствоя академиен. Наукаын ужъёсыз улонэ мур пыӵазы. Странаямы гинэ ӧвӧл, кунгож сьӧрын но. Данакез соос дышетскон заведениослэн программаосазы пыртэмын. В. РОГАЛЁВ. Жильыртӥсь кыл ошмес "... Крезьгуре мынам! Тонэныд мыным котьку каньыл: ужан дыръя но, празднике но. Куректон, секыт лулскылон дыръёсын но тон кужым сётӥськод. Вашкала дырысен ик со озьы, дыр. Удмуртъёс юнме шорысь уг шуо, вылды: "Киям крезе, сюлэмам кырӟанэ". Кылбурчиослы пумтэм вожъяськыса, чебер, веськрес кыл чуръёссы понна шумпотэмзэ вералляз Василий Григорьевич Широбоков. Туж тросэзлэн писательёслэн егит дырзы ортчиз солэн син азьтӥз, гожтэмъёссы потӥз сюлэм пыртӥз. Табере соос асьсэос - аксакалъёс, куд-огез пӧламы но ӧвӧл ни. Нош тодэ ваёно ке, туж уноезлэсь нырысетӥ гожтэм чуръёссэс волятӥз востэм гинэ, лачмыт, либыт вераськыны быгатӥсь удмуртмы. Василий Григорьевич шуиз ке но - "мон ӧвӧл кылбурчи" - солэн мугез одӥг гинэ вал: ньыль чурен ӧз гожъя, со понна огшоры чуръёсын гожтэмез сюлэмез вырӟытэ, вунонтэм кыле. Сыӵе жильыртӥсь вал солэн кыш ошмесэз, сяська вылысь сяська вылэ лобаса чечы бичась мушлэн кадь кыл узырлыкез. "Ӵок, сюбег ке но та ульча сюресмы. Отӥ вамышъяса, мон бусые потӥсько но бадӟым сюрес вылэ вуисько - котькуд пала мынэме луэ: юосын тулкымъяськись вӧл-вӧлэсь нёжалъёсы но, пудо куараен чузъяськись кыръёсы но, емышо садъёсын воринъяськись лымшоръёсы но, пужейёсын, пӧртэм пӧйшуръёсын узыресь уй палъёсы но, лыдтэм ваньбуро, инме ик йӧтымонэсь гурезьёсы но... Котькытын монэ гажаса пумитало: - Ӟечбур, эше! Чырткем-а, уроме!" Тӥни озьы, артанаысь писъёс кадь лач-лач тыремын писательлэн малпанъёсыз. Нош со малпанъёсыз пичи гинэ Чекер нимо гуртысеныз Мускоозь, быдэс дуннеез адӟымон инйылозь вуттылӥзы. Якшур-Бодья ёрос газетысен кутскыса, берпум шокчон нуналозяз журналист но писатель ялан чакласа возиз кылтӥрлыксэ. Гожъямезлы синмаськылӥзы Михаил Петров но Трофим Архипов, ужамезлэсь адӟем карылӥзы Геннадий Красильников, Семен Самсонов, Флор Васильев, солэсь дышетскизы Генрих Перевощиков, Роман Валишин но трос-трос мукетъёсыз. Озьы ке но... - Оград писательёслэн кыӵе ке бадӟым кенешсы ортчиз вал но, Васяе отысь воксё мылкыдтэк, луткам курег кадь вуиз,- тодаз вае Василий Григорьевичлэн кузпалыз Мария Андреевна. - ? - Пыкылӥллям уга, книгаосыд ӧжыт шуыса. Ма, учконо ке, чылкак аслаз гожтэмъёсыз ӧжыт кадь, - книгаос пӧлын бугыръяськонъяз лулске Мария Андреевна.- Со понна тани кудмында ужам ужез... Пушкыз тырыса, быдэс ӝӧк выл тыр книгаосты вӧлдӥз Мария Андреевна: тодаз ваиз, лэся, война аръёс вылтӥ курадӟыса дышетскемзэс, секыт улэм-вылэмзэс. Огзы будэмын сюратаен, мукетыз - сюранай вӧзын. Собере - Ижевск. Мария - ож тӥрлык поттонын, Василий - редакциын. Соку ик пумиськизы, муртъёс доры квартирае куриськемзы бере: Василий улэ вылэм эшеныз Григорий Симаковен ӵош вылӥяз, нош Мария эшеныз - улӥ этажаз. Оло, ачиз инмар, лэся, герӟаз соосты - сабырлы гинэ улӥзы, ныл но пи вордӥзы. Тӥни озьы, нуналэз нунал воштыса, ортче вылэм улон даур... Котькуд писательлэн аслаз гожъяськон манерез: одӥгез мылкыдзэ ӧръя бадӟымесь романъёсын, мукетыз - кылбурен, поэмаен, нош Василий Широбоков - вакчиесь веросъёсын. Туж сайкыт мылкыдо лирик со. Инкуазь суред-а, ужысь герой яке вордэм нэнӥ-а тодаз лыктэ писательлы,- со сярысь вакчияк гинэ, но чеберак гожтэ. Соин ик, луоз, ас гожъямез трос ӧз люкаськы. Син азе пуксё "Бадӟым сюрес", "Мынам республикае", "Ӟечбур, ӵукна!", "Ошмес жильыртэ ваньмызлы" книгаосыз. Со понна кӧня кужым сётӥз, будӥсь нылпиосмы чылкыт сюлэмо, визьнодо мед луозы шуыса. Бадӟым дышетӥсь луиз покчиослы. Кие кутымонэсь но визьмоесь "Лыдӟон книгаос" дасямын 1-тӥ-4-тӥ классъёсын дышетскисьёслы. Покчиослы поттэмын "Вуюись" хрестоматия. Та книгаосты дасянэ писателез ӝутказы дышетӥсьёс, тодосчиос Р. Ф. Березин, А. С. Семенова, А. Н. Уваров, В. Н. Кузнецова. Нылпиос сярысь малпаса ик Василий Григорьевич берыктӥз тодмо ӟуч педагоглэсь В. А. Сухомлинскийлэсь "Шундышеп" выжыкыл-мадёсъёссэ. Азьвыл аръёсы удмурт кылэ берыктэмъёс пыр тодӥськомы вал ӟуч писательёслэсь гожтэмъёссэс но. Чебер удмурт кылын лыдӟылӥмы И. Тургеневлэсь, Н. Гогольлэсь, М. Горькийлэсь, А. Фадеевлэсь книгаоссэс. Ваньмыз со - В. Широбоковлэн тыршем емышез. Соин ӵош ик вунэтоно ӧвӧл созэ: Василий Григорьевич кызь ар ӵоже "Молот" журналэз поттон бордын тыршиз. Озьы бере, со дыр куспын журналын потэм веросъёс, повестьёс, романъёс пӧлысь ӝыныез солэн сюлэм вирсэртӥз пӧзьыса ортчиз. Ӝыныез шуэмысь паймонэз ӧвӧл: валтӥсь редактор вӧзын кык-куинь юрттӥсьёсыз ке вал, соос пӧлысь одгез, вошъяськисьтэмез - Василий Григорьевич Широбоков. Туннэ кадь ик пель сьӧрам солэн небыт куараез, мылкыд сётыса пырыны ӧтемез. - Я, ойдо, та пала кариськы, пие. Кылбур-а, верос-а ваид та рад? - киоссэ вӧлъяса ик султоз вал ӝӧк сьӧрысь.- Флор Ивановичмы интыяз ӧвӧл, со понна ми татын, ойдо, татчыгес кариськы... Вань сюлэм лякытсэ нылпиос доры вуттыны сюлмаськиз на Василий Григорьевич берпум улон аръёсаз но. Тани, кылсярысь, 1989-тӥ-1992-тӥ аръёс куспын гинэ "Удмуртия" издательствоын поттэмын "Пелё", "Колӟо", "Куинь парсьпиос", "Кытчы дыртэ шур?", "Уродэсь эшъёс", "Шундыпиос" но мукет книгаос-выжыкылъёс. Ӟуч кылысь берыктэмын Н. Носов писательлэн "Телефон", "Фантазёръёс" веросъёсыз. Кыӵе синмаськымонэсь кузьымъёс со нылпиослы! Кин-о бон тазьы быгатоз на меда ӟеч но чебер вераны, визьнод сётыны, писатель сяна? Анатолий ПЕТРОВ. ПОНЕДЕЛЬНИК, 22 марта 06.10 - "Визыл". Иворъёсын программа. 06.35-07.00 - "Денница". Инф. программа. 07.10 - Вести столицы. 07.20 - "Судьба Отечества". 07.35 - Объявления, реклама. 07.45 - 08.00 - "Экономика, политика, бизнес" Корреспонденция. 08.10-09.00 - "Выборы-99" 12.00 - Новости. 12.10 - Реклама. Музыкальная открытка. 12.20 - Иворъёс. 12.30-13.00 - "Тӥляд юанъёсты - милям валэктонъёсмы". 18.00 - "Палитра". 18.20 - "Чагыр, чагыр дыдыке..." 18.30 - Иворъёс. 18.40 - Новости. 18.50 - Реклама. 19.00 - Спортивные новости. 19.10 - "На семи ветрах". Молодежная программа. 19.30-20.10 - "Выборы-99". ВТОРНИК, 23 марта 06.10 - "Визыл". Иворъёсын программа. 06.35 - 07.00 - "Денница". Информационная программа. 07.10 - Вести столицы. 07.20 - "Судьба Отечества". 07.35 - Объявления, реклама. 07.45 - 08.00 - "Экономика, политика, бизнес". Корреспонденция. 08.10=09.00 - "Выборы-99". 12.00 - Новости. 12.10 - Реклама. Музыкальная открытка. 12.20 - Иворъёс 12.30 - 13.00 - "Дунне кизилиос". Финн писатель Мика Валтари но солэн "Синуха", Египетысь эмъясь" романзэ. 18.00 - "Буёлъёс". 18.20 - "Чагыр, чагыр дыдыке..." 18.30 - Иворъёс. 18.40 - Новости. 18.50- Реклама. 19.00 - Спортивные новости. 19.10 - "Волшебные истории". 19.30-20.10 - "Выборы-99". СРЕДА, 24 марта 06.10 - "Визыл". Иворъёсын программа. 06.35-07.00 - "Денница". Инф. Программа. 07.10 - Вести столицы. 07.20 - Новости. 07.35 - Объявления, реклама. 07.45 -08.00 -"Ваши вопросы - наши ответы". 08.10-09.00 - "Выборы-99". 12.00 - Новости. 12.10 - Реклама. Музыкальная открытка. 12.20 - Иворъёс 12.30-13.00 - "Тулпар ". Егитъёслы программа. 18.00 - "Лемира ". Корреспонденция. 18.20 - "Чагыр, чагыр дыдыке..." 18.30 - Иворъёс. 18.40 - Новости. 18.50 - Реклама. 19.00 - Спортивные новости. 19.10 - "Блокнот меломана". 19.30-20.10 - "Выборы-99". ЧЕТВЕРГ, 25 марта 06.10 - "Визыл". Иворъёсын программа. 06.35 - 07.00 - "Денница". Информационная программа. 07.10 - Вести столицы. 07.20 - Новости. 07.35 - Объявления, реклама. 07.40 - "Ижсталь" - марка качества". Корреспонденция. 07.50-08.00 - "Правовой канал". 08.10-09.00 - "Выборы-99". 12.00 - Новости. 12.10 - Реклама. Музыкальная открытка. 12.20 - Иворъёс 12.30-13.00 - "Лулсэрет ". Радиокенешон. 18.00 - "Эрикрад". Радиоверан. 18.20 - "Чагыр, чагыр дыдыке..." 18.30 - Иворъёс. 18.40 - Новости. 19.50 - Реклама. 19.00 - Спортивные новости. 19.10 - "Парафраз". 19.30-20.10 - "Выборы-99" ПЯТНИЦА 26 февраля 06.10 - "Визыл". Иворъёсын программа. 06.35-07.00 - "Районные будни".Инф. программа. 07.10 - Вести столицы. 07.20 - Новости. 07.35 - Объявления, реклама, анонсы передач. 07.45-08.00 - "На завалинке". 08.10-09.00 - "Выборы-99". 12.00 - Новости. 12.10 - Реклама. Музыкальная открытка 12.20 - Иворъёс. 12.30-13.00 - "Кыл дунне ". Радиоальманах. 18.00 - "Очрашу". Радиожурнал. 18.30 - "Чагыр, чагыр дыдыке..." 18.40 - Иворъёс. 18.50 - Новости. 19.00 - Реклама. 19.10 - "Домашние чтения". 19.30-20.10 - "Выборы-99". СУББОТА, 27 марта 07.10 -"Итоги недели ". 07.30 - "Ручеёк". радиожурнал. 08.00 - Радио России. 09.00 - "Алые паруса". Программа для старшеклассников. 09.30 - "Субботний калейдоскоп". 10.00 - Радио России. 10.10 - Иворъёс. 10.50 - "Ладилэн азбараз". 11.00 - "Кырӟаны ми яратском". Нылпиослы концерт. 11.30 - 12.00 - "Ялыке!". Радиожурнал. ВОСКРЕСЕНЬЕ, 28 марта 07.10 - Ӵукна концерт. 7.35 - "Будэмъя юнмало бурдъёс". Педагогика тодосъя кандидат В. М. Ившина сярысь радиоочерк. 08.00 - Радио России. 08.10 - "Кузьыли кар". Радиогазет. 08.30 - "Арня ӵукна". 09.00 - "Между Волгой и Уралом". Радиожурнал. 10.00 - "Листья распускаются не только весной...". Радиоочерк. 10.30-11.00 "Вам песня в подарок!" Концерт. *** Вещание радиостанции "Ингур" (ГТРК "Удмуртия") на УКВ-канале (70,4 Мгц) и третьей программе проводного радиовещания Ежедневно кроме субботы и воскресенья): 8.10-11.00 Информационно-музыкальная программа на рус. языке 13.00-15.00 информационно-музыкальная программа на удм. языке Суббота и воскресенье 13.00- 17.00 Радиостанция "Ингур". Все остальное время с 8 до 01 ночи на этом канале и по проводному вещанию - "Радио России - Ностальжи". КУН КЕНЕШЛЭН СЕССИЯЗ Кызь витетӥез, берпуметӥез Валлян ужзэ азинтӥз Удмурт Республикаысь Кун Кенешлэн нырысетӥ созывезлэн 25-тӥ сессиез. Депутатъёсмы ньыль ар ӵоже ужамзы бере, берпуметӥзэ люкаськизы асьсэлэн кенешазы. Учкыны чакламын дасолэсь ятыр ужпумъёс. Ваньмыз сямен соос герӟаськемын 1998 арлы йылпумъянъёсын но таяз арлы пусъем ужрадъёсын, выль законопроектъёсты кутонэн. Сессилэн нырысетӥ нуналаз депутатъёс кылзӥзы Удмурт Республикалэн 1999 арын социально-экономической азинсконэзлы сӥзем программаез. Соин тодматӥз экономикая министр Е. М. Аверьянов. Докладъя трос юанъёс ӧз кылдэ, малы ке шуоно, со пыр-поч эскеремын вал ини азьвыл кенешонын. Котьку сямен, пӧсьгес йӧтӥз коньдон ужпумъёсъя министрлы В. В. Бельтюковлы. Мугез тодмо: уксёмы номырлы но уг окмы бере, министрлэсь сяна, кинлэсь кылзэ юалозы на? Владимир Васильевич тодматӥз республикалэн бюджетэныз. Соку ик верамын: туалаез но бюджет тырмымтэосын кутӥське. Озьыен, коньдон ласянь ӟеч пала бадӟым воштӥськонъёс туэ но уз луэ на. Правительстволэн миым ужамезлы йылпумъянъёс лэсьтӥз солэн Тӧроез П. Н. Вершинин. Ма шуод, ушъяськымон азинсконъёсмы, лыдпусъёсмы ӧвӧл ке но, Россиысь мукет улосвылъёсын ӵошатыса, Удмуртия экономиказэ утьыны быгатӥз. Заводъёс каллен-каллен улӟо, быгатэмезъя улэ но ужа гурт удыс. Павел Николаевич верамъя, бюджетмы но сокем начар ӧй адскысал, котькудӥз предприятие вытъёссэ дыраз ке тырысал.. "Ижмаш" огназ вань пасьёсты ӵоктаны вормоз. Но ку со нунал вуоз меда? П. Н. Вершинин пыр-поч валэктӥз депутатъёслэн юанъёссылы. Соос герӟаськемын Россилэн политикаеныз, налогъёсын, шуныт но электрокужым понна дун тыронэн. Ас малпанъёссэс веразы депутатъёс Ю. И. Боровик но А. И. Красных. 25-тӥ феврале сессия ужзэ азинтӥз. Люкаськемъёс кылзӥзы Кун Кенешлэн Тӧроезлэсь А. А. Волковлэсь Удмурт Республикаын кылдэм югдур сярысь докладзэ. Та нуналэ ик депутатъёс эскеризы туэ арлы чаклам бюджетэз. Л. МЕДВЕДЕВА. Дас Валентинъёс но Валентинаос Яратӥсь сюлэмъёслэн нуналзы 14-тӥ тулыспалэ Россиын пусйиське ни кемаласен. Ӧз вунэтэ со сярысь асьме шаерын но. Удмурт драмтеатрын сое аспӧртэм пусъёно кариськизы. Малы ке шуоно, асьме тодмо адямиос пӧлын трос гинэ вылэм Валентин нимоосыз. Тани, шуом, вань удмртъёслэн тӧрозы Валентин Тубылов, вашкала удмурт дуннеез суредъёсыз пыр усьтӥсь Валентин Белых. Нош кырӟась-верась нылкышноос кӧня: Валентина Серебренникова, Валентина Загуляева, Валентина Меняйло, Валентина Шабалина, Валентина Моисеева (Чернова)... Та ӝытэ соосты сцена вылэ капчиен, шудыса выллем ӧтьылӥзы-валтылӥз театрысь ик артистка Валентина Бекманова. Шулдыр мылкыд но капчи сэректэм улсын учкисьёс ӧз ик шӧдылэ концертлэсь быремзэ. Но ӝыт таин ӧз йылпумъяськы - фойеын шулдыръяськон кутскиз, артистъёс уката матэ луизы учкисьёссылы. "Учке али бакчамес" но мукет гуръёс котыртэмен шудонэ-эктонэ кыскизы вань мылкыд карисьёсты. Кин ӧз шедьы яратонлы сӥзем та ӝытэ, эн куректэ: азьпалан эшшо быдэс ар, 364 нунал, вань на мусоостылы шуныт кылъёстэс вераны. Юлия Данилова, 44 номеро гуманитарной Ижевскысь лицейын дышетскись. Дунтэк ялон: таӵе чаез эн басьялэ! - Чаез вузан-басьян кызьы радъямын? - Коӵышез мешокын вузам сямен. Лыдӟы, мар гожтэмын пакет яке коробка вылын, со гожтэмлы оскы но басьты. Тани 36 номеро чай умой лыдъяське. Но... та чаез али вузало Ижысь Сенной базарысь пичи ужбергатӥсьёс-вузкарисьёс 9 манетэн. Индийской чай сярысь, кӧнялы ке дунтэмгес. Но, мон сямен, "из отборных сортов" интые гожтоно вылэм, "из отбросных" шуыса. Малы ке шуоно, куиньмосэз чай тузон гинэ, нош зынызъя, шӧмызъя но кужмызъя, та 36 номере грузин чай гинэ шедемын кадь. Огъя вераса, таӵе чаез эн басьялэ... укмыс манетэн... Басьтоды ке басьтоды шат, куинь манетэн ке вузазы... П. Скобелев. 28-тӥ феврале аслэсьтыз юбилейзэ пусъе Башкортостанысь Татышлы ёросысь "Дэмен" колхозлэн кивалтӥсез Ренат Галямшин - Камсьӧр удмуртъёслэн огазеяськонзылэн тӧроезлы ӝыны даур тырме. Уно аръёс ӵоже ни со гурт удысэз валтэ. Сюлмысь тыршемезлы синмаськыса ик, дыр, Татышлы ёросысь калык сое Башкортостан Республикалэн Кун Ӧтчамаз депутатэ бырйылӥз. Шумпотымон соиз но: та адями гажа спортэз. Тужгес ик - куас вылын ветлонэз. Огвакытэ ӵошатскылэм Галина Кулаковаен ӵош, вылэм Россилэн огазеям командаяз. Ренат Биктимировичез ӟечкыланы мынозы "Удмурт Кенеш" огазеяськонлэн тӧроез Валентин Тубылов, Удмурт Кивалтэтысь Нациосын ужанъя комитетлэн кивалтӥсез светлана Смирнова но кырӟанъя но эктонъя "Италмас" ансамбль. Озьы ик лыктыны мылкыд каремзэс веразы ни Башкортостанысь министерствоослэн кивалтӥсьёссы но. Вань ӟечкыланъёс борды ми но, "Удмурт дунне" газетэз дасясьёс, сюлмысь итӥськиськомы. Башкортостанысь удмуртъёслэн огазеяськонзылэн тӧроезлы сӥзиськомы ӟырдыт мылкыд, юн тазалык но выль вормонъёс. Колхоздылэсь нимзэ юнматыса, азинсконъёс басьтон бордын но котьку дэмен мед тыршоды. Ф. МИННИГАРАЕВ. Тӧро Миша, сӥзе ошак "Удмурт дуннеез" лыдӟисьёс газет бамъёсысь трос пол адӟылӥзы гожтӥськонэн герӟаськем лотерея шудон сярысь материалъёсты. Котькуд адями пичи ке но осконэн улӥз, дыр: оло, мыным сюроз кудӥз ке кузьым - куайытэм ош, выль мотоцикл яке бензопила? Ярам, мото ширтӥз Играла, пила - Пичи Пургала. Мар карод, ёросъёсмы - 25, ошакмы - одӥг. Тодмо луиз: таиз сюрес лёге кадь Кизнер пала. Калыкын шуо: "ӟеч лэсьтэм уж ӟечен ик берытске". Та веранлэсь шонерлыксэ ас синмынымы адӟоно луим. 1998-тӥ арын Аркадий Трофимович Малков, газетмылэн редколлегиезлэн членэз, Кун Кенешлэн ялан ужась комиссиезлэн тӧроез, мылкыд кариз вал лотерея шудонлы юрттыны. Со тыршемен, Кизнер ёросысь "Мичурин" нимо колхозлэн тӧроез Виктор Тюнин "Удмурт дуннелы" висъяз оштрак. Таиз сюриз Пичи Пурга ёросысь лыдӟисьлы. Татысь "Красная звезда" колхозлэн кивалтӥсез Василий Окунев озьы ик редакцилы сӥзиз ошсэ. Ӵапак сыӵе кузьымлэсь кузёзэ утчамы Кизнер ёросын. Сьӧрамы кутӥм мукет синпельёс. Кизнер посёлоклэн крезьгуръя школаяз люкаськемъёслэн осконзы ышыны кутскем вылэм. Оло, маскаръяськизы гинэ "удмурт дуннеос"? Ижысен Кизнере сюрес матын ик ӧвӧл, машина но тӥяськыны ӧдъя. Соин лыдӟисьёсын пумиськонэ беромысагес вуимы. Тужгес чидасьёсыз пумозяз возьмаллям. Соос шумпотыса пумитазы Аркадий Малков депутатэз, редакциысь куноосты но Геннадий Бекманов крезьгурчиез. Жаляса верано луэ: самой дуно кузьыммылэсь кузёзэ та пукисьёс пӧлысь ӧм адӟе. Люкаськемъёслэн кӧтсы ӝож медаз луы шуыса, куд-ог кузьымъёсмес шудытӥмы таосыз пӧлын гинэ. Кинъёс, соос - шудпуйыос? Дуно утюг шедиз Возьпум гуртысь кышномуртлы Ксения Семеновна Иконниковалы. Трос аръёс ӵоже та кышномурт газетмес басьтэ ини. Тужгес но солы кельшо веросъёс. - Таӵе кузьым мыным сюроз шуыса ӧй но малпалля, - вераз со. Кема возьмам ошакмылэсь кузёзэ шедьтӥм Вылӥ Бемыж гуртысь. Наталья Ивановна Колесникова чылкак абдраз быдэс ошак утэмезлы. Кужымез лябомыса, кеч гинэ вордэ на вылэм. Ымнырысьтыз мур кисыриосыз возьмато: капчи вылымтэ улон сюресэз. Война аръёсты чидаз. Тылпуын сутскиз юртэз. Ньыль пинал будэтӥз, пересь аръёсаз корказ чылкак огназ кылиз. "Югыт Бемыж" акциосын огазеяськон Наталья Ивановналэсь шумпотонзэ огъя шудбурен лыдъяз. Озьы тупаз на: гурт калык аслыз алигес выль тӧро быръем. Етӥз воргорон Михаил Николаевич Зайцев кыкетӥ нуналзэ ужа. Калык оске: шуге-леке вуэм гурт хозяйство пыд йылаз одно султоз. Озьыен, "Удмурт дуннелэн" ошакез шуд мед ваёз бемыж калыклы но, тӧрозылы но. Михаил Николаевич вераз таӵе мылкыдзэ: ас хозяйствоысьтыз ошаксэ со лыдӟисьёсмылы кузьманы дась луэмез сярысь. - Вуоно арын но лыдӟисьёсты пӧлын шудон радъяды ке, ми но, оло, ош висъяны быгатом. Озьыен, тӧро Миша сӥзе ошак. Лариса Постникова. ЧУРЪЁС, ЧУРЪЁС... Кинлы лы, кинлы... Секыт ик, секыт ик луиз берло дыре та улон ӧрмы... Кин маин пылаське туннэ - кин зарни вуэн, кин - пож вуэн, нош куд-огез, оло, воксё пыласькытэк пото ни... Ӵукъёсы уже вамыштыкум, ӵемысь малпаськисько: вань на меда та дунне выламы визьмо адямиосмы?!. Марлы та экономикамес но радъязы импортной амалэн? Мынам визьмы уг ни тырмы копейкаосме лыдъяны, нош куд-огез сюрсъёссэ но уг чота. Котьку но улонын вал визьтэмъёс но визьпогъёс. Ӟеч улонлы оскыса, ваучеръёсмес кузьмамы. Табере кузёос серекъяса, кӧтсэс мычыса уло-выло ни, дыр. Нош мар улон та, мар закон кузёяське шаерамы! Арлыдыд ньыльдон ареслэсь ке ятыр, нокытчы уже уг басьто! Нош ялан верасько, туж ичи нылпиос вордӥсько, кин, пе, азьланьтоз на улонмес?.. Тамаша ук... Оло, арлыдо адями сиытэк-юытэк улыны кулэ? Ма, арлыдо кышномурт - визьмо, ужась, шыръясь, чакласькись адями кадь. Но ялонъёсын шуэмын: "Кутӥсько 35 аресозь нылкышноос". Озьы тӥни, улод-улод та дунне вылын но, тонэ, кулэтэм арбериез сямен, списать карозы, сюрес урдсы донгозы. Солэсь кышкытэз, возьытэз мар ке вань на меда?.. Бен, улонмы воштӥське - али уго коммерсант гинэ ӟеч улэ. Ой! шуод но йырдэ кутыса кошкод. З. ТРУХИНА, Ижевскын улӥсь. Валэн дунтэмгес Озьы лыдъяло Ува ёросысь "Дружба" эштосын, кизер эстӥськонлэн но вӧйлэн дунзы мултэс будэмен валче. Фермаосы пудо сиён ворттыны, бакчаосты гырыны но мукет чыры- пыры нуон-ваён ужъёсты быдэсъянын вал воштонтэм луэ. Соин татын валъёссылэсь лыдзэс 119 йырозь вуттӥзы ни. Валъёсты выльысь вордонлы озьы ик бадӟым саклык висъяны кутскизы "Свобода", "Авангард", "Нылга" но куд-ог мукет эштосъёс. П. СКОБЕЛЕВ. ВАЛЭКТЭ ЮРИСТ СЭРЕГЕЗ НУЭ АДВОКАТ ЛИЛИЯ ШКЛЯЕВА Нылпи вордон дуно усе Нылпиме картэлэсь бй вайы. Картэ сое аслаз пиналыныз но бз лье^ья. Нылпи пособие сяна, мынам басьтэме луэ-а кунлэсь (государстволэсь? к лче ке юрттэт яке пиналлэн зэмос атаезлэсь алимент? Алимент куронлэсь азьвыл чаклано ай: нылпидылэн атаез сыӵе-сыӵе адями шуыса возьматӥсь документты вань-а. Со воргоронэн куке-соку бракты вал ке, сое атаен лыдъяны луэ брак сярысь документъя (Россия Федерациысь Семья сярысь кодексысь 48- тӥ ёзэт). Бракты ӧй вал ке, атаез возьматӥсь документ лэсьтоно суд пыр (49-тӥ ёзэт). Соку гинэ алимент тырытон пумысен ужпум ӝутыны яра ни. Атаез возьматӥсь документ ӧвӧл ке, мукет сямен вераса, ЗАГСысь документъёсы солэн нимыз тӥ верамъя гожтэмын ке, тӥ лыдъяськиськоды огнады нылпи вордӥсь анай. Пиналдылы 16 арес тырмытозь басьтыны кулэ юрттэт (пособие). Озьы верамын "Нылпи вордӥсь гражданъёслы кун пособиос сярысь" Россия Федерацилэн 1995-тӥ арын 19-тӥ мае кутэм Законысьтыз 17-тӥ ёзэтын. Миым 15-тӥ июне декретэ потӥ, 16-тӥ августэ нуны ваи. Коньдон ӧвӧл шуыса, отпуск понна дун уг тыро. Ма кароно? Надежда Кабанова. Завьял районысь Постол гурт. Сыӵе юанлы валэктон сётэ "Нылпи вордӥсь гражданъёслы кун пособиос сярысь" Законысь 6-тӥ ёзэт. Нуны ваёнэн валче отпуск понна дун басьтыны правозы вань кун ласянь соцстрахен утемъёс но предприятие яке организация быремен валче ужысь мозмытэмъёс. Коньдон висъя Россия Федерациысь соцстрахъя фонд. Ужан интыысь администрация, дун тырыны пумит кариськыса, законэз тӥя. Таӵе учыре вазиськыны кулэ судэ. Лыдӟисьёслы вазиськон Редакцие ӵем вуо газет пыр ӟечкылан сётон пумысен юанъёс. Кылем арын ивортӥм вал: газетмылы гожтӥськем муртъёс араз одӥг дунтэк ӟечкылан сётыны быгато. Но со понна ӟечкылан гожтэт бордын мед луоз почта ёздылэн печатез. Мукетъёсыз понна ӟечкылан дун - 10 манет. "Удмурт дунне" газетлэн редакциезлэн расчётной счётэз 40603810300000010020, "Газпромбанклэн" Ижевскысь ФКБ-ез. К/с 30101810300000000853 БИК 049401853, ОКПО 13051252, ОКОНХ 87100. Уксё тыремды сярысь квитанцидэс ыстэ ӟечкылан гожтэтэныды. "Италмасын" Ижевскысь Воровский нимо ульчаын интыяськемын 275 номеро нылпи сад. "Италмас" нимаське со. Кык арескысен кутскыса, 150 пиналъёс ветло отчы. Котькудаз ик куать группаын нылпиосты тодмато вордскем шаеренызы. Пӧртэм шудонъёс, пособиос, экскурсиос пыр будо пиналъёслэн тодон-валанъёссы. Крезьгуръя занятиосын пич нылъёс но пиос кылзо удмурт крезьгуръёсты, дышето кырӟанъёсты но эктонъёсты, тодматско шаерысьтымы крезьгурчиосын. Суреданъя методист пичи эшъёссэ тодматэ асьме художникъёсын, соослэн ужъёсынызы. Пиналъёс яратыса суредало удмурт пужыосты, чебермало соосын пӧзьёссэс, дэремъёсты. Нимысьтыз ортчытъясько удмурт кылэз дышетонъя занятиос. Уже кутӥсько чебересь калык мадиськонъёс, визькылъёс, вазиськонъёс, пышкылонъёс, лыдъяськонъёс но шудонъёс. Палэнэ уг кылё кылбуръёс-веросъёс но. Пиналъёс шумпотыса дышето удмурт кылэз, собере, бадӟым группае вуыса, асьсэос возьмато ини удмурт кылын выжыкылъёсты. Покчиос туж ярато ветлыны пичи музеязы. Отын соос адӟо вашкала арбериосты. Отын быгато мунёзэс удмурт дӥсен чеберъяны но вашкала тусьтыысь "сюдыны", зэмос кӧкыын "изьтыны". Татын ик учко пӧртэм удмурт книгаосты, шаермылэсь чеберлыксэ возьматӥсь туспуктэмъёсты. "Италмасэ" ветлӥсь пиналъёсын быгатыса ужало педагог Нина Михайловна, Дементьева но методист Елена Петровна Лекомцева. Л. ИВАНОВА. Ижевскысь 275 номеро нылпи садысь пиналъёс музеязы. Южтолэзь Вашкала удмурт календарьын верамъя, март - куака толэзь. Соку угось шундыё нуналъёсы гидкуа азьёсы, жолоб улъёсы куакалы юымон тудву люкаське ни. Март толэзь - арлэн ӵукнаез, со тулысэз усьтэ. Та вакытэ инкуазь сайканы, улӟыны кутске. Ӵукна. Ӟардэ. Котыр дуннее югыт вӧлске. Пеймыт чигна, шымырске но сылме. Уй кизилиос кысо, толэзь ӟаректэ. Ин вискысь пальпотыса шунды ӝужа, музъемез ӟечкыла: "Выль нуналэн!" Инбам, писпу йылъёс льӧлекто. Южсам лымы вылын тылсиос шудо, ворекъяло. Кезьыт омыр чылк-чылк. Пыд улын лымы кежыртэ. Шунды ӝутске но ӝутске. Липет вылын лымы шуна, пичиесь, чырткемесь азвесь колӟоос уллань питырало. Тюккето, шыпырто шапыкъёс. Шунды шорык воректылыса, йӧ ӟузыриос усьыло, шӧдтэк кыльыса куштэм пияла сямен, жинграк сӧриськыло. Нош укно улэ пичи ӧр кылдэм ини. Писпуосын, укно йыразьёсын ӟольгыриос чильыкто. Макем задоресь соос. Кенешон куспазы ӝабыръяськыны но кутскыло та лякыттэмъёс. Каръяськон инты понна пӧсятозязы даллашо. Куддыръя соос доры ӟиллёос вуыло, озьы выремзэс адӟо но палэнско: "Фу, ерпечкаос, акылесъёс!" Уката чырмытгес пиньгето пислэгъёс. Шергес шулало ини шушыос: соос уй пала лобӟыны дасясько. Ӵыжытэсь но ӵужесь кайсыос пи поттӥзы ни, соослэн шумпотонзы уката бадӟымгес. ... Кузь ни нунал. Лудын лымшор тӧл ыртэ, ымнырез веша. Пыроме тэле. Писпуос чалмыт сыло. Лысъёс вылысь лымы люкъёс куашкало, ӵыжинъёс усьыло. Пужым сул борды ӝабырскыса, сизь кокаське. Лӥялъёс но писпу дӥньёс котырын, лымы шунаса, гутёос кылдэмын. Пӧйшуръёс шыпыт интыосы ватскылэмын, шутэтско. Урдо кӧлэмысь сайказ ни, тулысэз пумитаны гутёысьтыз потӥз. Шур дуръёсын, нюкъёс котырын бадьпуос пучыяськизы. Ой, макем мусоесь со небыт пучыос-"тютюос"! Кык-куинь векчи бадь ньӧрез вандыса гуртэ нуиськод но ӟенелике, ву пушкы месӥськод. Арня ортчыса, пичиесь куаръёс усьтӥсько - тынад коркад вазь тулыс пыре. Ӝытлань куазь нош ик кезьыт кариське. Йӧ ӟузыриос, пичи ӧръёс ӟон-ӟон кынмо. Толлэн озьы гинэ сётскемез уг поты, пумитъяське: лымыя но, лек тӧлъёс но вуттылэ. Котьма ке но, тулыс кутскемын ни, со кужым люка. Ӝоген "ожмаськон" кутскоз: йӧос вырӟозы, тудвуос куашетозы, лымшор палась трос-трос тылобурдоос вуозы. Соку луоз зэмос тулыс. В. ШИРОБОКОВ. * Арлы йылпумъянъёс Калык радъя ке улэмед потэ - ужа Кылем арня пумын Завьяловое люкаськылӥзы республикаысьтымы гурт удысысь кивалтӥсьёс. Ӵош пуксьыса, соос пыр-поч эскеризы кылем арын ужамзэс, дунъет сётӥзы котькуд районлы, нимаз хозяйствоослы но предприятиослы. Пусйыны кулэ, таӵе пумиськон ӟеч сямлы пӧрмиз ни. Доклад лэсьтӥз республикаысь гурт удысъя но сиён-юон поттонъя министр В. И. Жуйков. Кенешонэ пыриськизы Кун Кенешлэн Тӧроез А. А. Волков, Правительстволэн Тӧроез П. Н. Вершинин, Россиысь Кун Думалэн депутатэз М. П. Кошкин. Кызьы пусйиз министр, куд-ог улосвылъёсын ӵошатыса, Удмуртия сокем ляб уг адӟиськы. Вань культураос пӧлысь кылем арын удалтӥзы картофка но етӥн, соос чотын гурт калык капчигес шокчиз, тыриськонъёссэ тыриз. Со дыре ик ӝоже уськытӥзы тысё культураос но бакча сиёнъёс. Куазь гинэ татын янгыш ӧвӧл. Тросэз бусыос начармемын ни, тырмыт кыед но минерал сылал адӟылытэк. Миым ваньмыз 1,7 миллион тонна органика поттэмын вал яке гектарлы быдэ - 1,1 тонна. Ӵошатон понна: 1991-тӥ арын поттэмын 8,6 миллион тонна, гектараз - 4,7 тонна. Таӵегес ик югдур минерал сылалъёсын, изваскаен. Валамон, сютэм муослэн ӟеч урожай сётыны кынарзы уз тырмы. Шаермыя ваньмыз ю тысь люкаськиз 526,7 сюрс тонна, 1997-тӥ арын - 970,9 сюрс тонна кутсамын вал. Гектарлы быдэ усиз 10,4 центнер, валля арын - 15,1. Тысё но пуртэсо культураослэсь удантонлыксэс 17 центнерозь вуттӥзы вавожъёс но уваос, Пичи Пурга район - 16 центнерозь. Рекорд пуктӥз Асан совхоз-техникум. Татын кутсамын быдэн 23,9 центнер, Вавож районысь "Колос" - 23,2, Воткинск районысь "Июльское" учхоз - 22,6. Картофка будэтонъя вань хозяйствоосты азьпалтӥз Игра районысь "Рассвет" колхоз - 217 центнер, бакча сиёнъёсъя ӟеч ужаз Можга районысь "Заря" совхоз - 266 центнер. Одӥг кадь условиосын ужаса, инкуазьлэсь пӧртмаськемзэ лыдэ басьтыса, 10 центнерлэсь но улӥын урожайзы люкаськиз Грахово (9,8 ц), Яр (8,5 ц) но Камбарка (6,8 ц) районъёсын. Гужем кӧс сылэмен, турын-куро люканы чебер нуналъёс тырмыт вал кадь. Тросэз хозяйствоос та ужез дыраз быдэстӥзы. Озьы ке но, республикая пудо сиён ӧжыт дасямын, куд-ог хозяйствоосын со тулысэз но ортчытыны уз окмы. Чакламъя 251,3 сюрс тонна интые, турын 190,3 сюрс тонна куасьтэмын, яке планэн пусъемъя - 75,7 процентэз. Миым та лыдпус 264,4 сюрсозь вуиз вал. Турынъя планзэ быдэстӥз Алнаш район гинэ (108,3 процент). Граховоын чакламезлэсь ӝыныез гинэ лэсьтэмын. Сенаж тыронэн югдур умойгес. Пусйыны кулэ Кизнер, Киясово, Яр районъёсысь хозяйствоосты, но со дыре ик одӥг тонна но ӧз дасялэ Сюмси но Ува палъёс. Силосъя планзэ быдэстӥз 3 район гинэ: Алнаш (106), Камбарка (105) но Вавож - 103 процент. Сарапул районысь фермаосын та лыдпус 52 процентозь сяна ӧз вуы. Республикая оглом ке верано, план быдэстэмын 73,2 процентлы, азьвыл арен ӵошатыса, трослы ӧжыт. Ваньзэ лыдъяса-чотаса, пудо йырлы быдэ усе 14,4 кормовой единица, миым тол вылтӥ со 18,7 единица вал. Тужгес но вылӥын со Алнашын (19,1), самой улӥын - Сюмсиын (10,5 единица). Куд-ог хозяйствоослы секыт югдурысь потыны юрттоз кылем арысь кылем запассы, та чотын ик, шорлыдын вераса, одӥг пудо йырлы ог 15,8 единица сиён шедёз. Музъем ужасьлэн сюлмаськонэз ноку но уг бырылы, та нуналъёсы но шутэтскыны дыр ӧвӧл. Мынэ кидыс дасян, техника тупатъян. Бусые потытозь, уго кык толэзьлэсь ӧжытак гинэ ятыргес кыле на. Соин ик шугъяськоно. Ар кутскытозь, валэс культураослы дасямын вал 72 процент кидыс, со пӧлысь И но ИИ классъемез - 39 процент, ӟег - 61 процент, отысь 40 процентэз гинэ - И но ИИ классъем. Чакламлэсь ӧжыт кидыссы кисьтэмын Глазов, Кез, Кизнер, Каракулино, Сарапул но Камбарка районъёсын. Министр верамъя, та хозяйствоослы юрттонъя, пӧртэм луонлыкъёсты уже кутоно, гыроно-кизёно муос буш медам кыле шуыса. Оскон вань кидысэн ужась фирмаослы но ог-огед куспын вошъяськон амаллы. Арысь аре ӟеч тысь кисьто Красногорск, Игра, Якшур-Бодья, Можга районъёсысь колхозъёс но эштосъёс, туэ соослэсь бере ӧз кыле вавожъёс но. Ма веранэз, гуртын улон капчи ӧвӧл. Тае адӟоно отын но татын пашмыны кутскем бусыосъя но. В. И. Жуйков пусйиз, тысё культураос улэ висъям муос кылем арын кулэсмизы 45,1 сюрс гектарлы, мукет сямен ӵошатыса, ыштэмын быдэс шоро-куспо район. Та выллем ик югдур картофка но бакча сиён улэ чаклам музъемен. Етӥн бусыос 1 сюрс гектарлы паськытазы. Синмаськизы гуртоос чабейлы но: 1997-тӥ арын сярысь, миым солэн площадез 4,5 сюрс гектарлы будӥз. Озьы ке но, удалтонлыкез ӧз шумпотты. Техника сярысь. Котькуд хозяйство понна та вакытэ со тужгес но лэчытэз висён. Агропромышленной удысын ортчытэм воштӥськонъёс, жаляса верано, музъем ужасьлы туж трос ыштонъёс ваизы. Республикая 70 процентлэсь ятырез тракторъёс но комбайнъёс кемалась шедьыны кулэ вал ини куштӥськем корт пӧлы, сыӵе ик югдур автомашинаосын. Но соос нуналлы быдэ сюрес вылэ пото, малы ке шуоно, воштыны номырин. 1991-тӥ арен ӵошатоно ке, тракторъёслэн лыдзы оглом кулэсмиз 4,3 сюрслы, ю тысь кутсась комбайнъёс - 1,6 сюрслы, грузовой машинаос - 909-лы, 200-лэсь ятырлы ичиёмиз пудо сиён дасясь техника. Югдурез матысь дыре ӝегатскытэк тупатон вылысь кылдо машинно-технологической станциос. Выль техника басьтон ласянь Удмуртия но Белоруссия куспын гожтэмын огъя кыл. Соя "Удмуртагропромсервис" ТОО пыр лизингъя асьме доры келямын ни нырысетӥез дас кык МТЗ-80 трактор, вуыны кулэ на пудо сиён арась комбайнъёс но жаткаос. Валамон, республика понна та туж ӧжыт, озьы ке но, кутскон сётэмын. Белоруссиен кусыпъёс сярысь ке верано, азьланяз соос эшшо но юнмалозы, политика но экономика удысъёс уго ӵош ужан амалъёслэсь кемалась мӧзмизы ни. Министр умоен пусйиз пудо вордонын басьтэм азинсконъёсты. Зэмен но, 1997-тӥ арен ӵошатыса, миым 19,1 сюрс тонналы йӧл уногес кыскемын, яке - 6 процентлы. Тужгес но ӟеч ужазы Селта, Ува, Камбарка, Можга, Кизнер районъёсысь фермаос. Шӧдскымон бере кылизы Яр, Красногорск, Каракулино но Сарапул палась скал кыскисьёс. Республикая скаллы быдэ 2781 килограмм яке валля арлэсь 301 килограммлы тросгес йӧл басьтэмын. Нош сизьымез районмы 3 сюрсэз ортчиз ни: Можга - 3215, Ува - 3162, Игра - 3207, Завьялово - 3088, Воткинск - 3097, Вавож - 3041, Шаркан - 3006 кг. Кылем арын скал кыскисьёс пӧлын синмаськымон ужазы но нырысетӥ интые потӥзы Воткинск районысь "Пихтовка" совхозысь дояркаос. Соос ортчизы ни 6 сюрсэз. Кыкетӥ интыын - Завьялово районысь "Восточный" совхоз (5073 кг), куинетӥ - Воткинск районысь "Чайковский" совхоз (4828 кг). Сӥль будэтонъя умоен пусъемын Завьялово, Каракулино районъёс. Ляб ужазы Юкаменск но Кез палась хозяйствоос, татын трослы кулэстэмын пудо йырзы, вылаз ик, ӧз быгатэ дасяны ӟечлыко но тырмыт сиён. Сотэк-а привес басьтод? Шаерамы улӥсьёсты курег пузэн но тылобурдо сӥлен вис карытэк сюдӥзы но сюдо тылобурдо вордонъя фабрикаос. Соос асьмелэн 8. Ар ӵоже куреглы быдэ 262,7 курег пуз басьтэмын, "Вараксиноын" - 280. Бройлер чипыосты будэтонын ӟеч азинсконъёсыз "Удмуртская" ОАО-лэн. Оглом вераса, берло ньыль арзэ тылобурдо вордон удыс умой ужаз. 17-тӥ августэ ортчем кризис крестьян калык понна пичияк ке но шумпотон кузьмаз. США-ысь вуттэм курег макесъёс дуноямен, басьтыны кутскизы асьме дорын будэтэм продукциез. Йӧл, сӥль поттон мырдэм-мырдэм асинтызэс, асдунзэс шедьтӥзы, шуыны луоз ни. Но ыштонъёс трос адӟемын. Улӥ закупочной дунъёс, пудо сиёнлы ёрмон ас ужзэс лэсьтӥзы: ортчем ар ӵоже гинэ пудо йыр кулэстэмын 22,3 сюрслы. Уката но трос - Сарапул, Воткинск, Каракулино, Сюмси но Яр районъёсын. Кызьы пусйиз республикаысьтымы гурт удысъя министр В. И. Жуйков, 1998-тӥ арлы лэсьтэм йылпумъянъёсъя пайдаен ужаны быгатӥз 16 хозяйство гинэ, 97-ез пыре "убыточнойёс" радэ. Кенешонын чурыт куронъёс пуктэмын вал йӧл кысконэз будэтон но вузано пудоез вакчи дыр куспын куайытон ласянь. Бере кылись хозяйствоослы нокыӵе юрттэт уз сётӥськы. Огшоры вераськон яке кышкатон со ӧвӧл, миым куд-огез банкротэн ялэмын ни. Соослэсь ваньбурзэс вузалозы ужаны быгатӥсь, амало кузёослы. Ма карод, рыноке потӥм бере - нокытчы уд пегӟы. Кызьы шуиз Правительстволэн Тӧроез П. Н. Вершинин, калык радын ке вамышъямед потэ - ужа, утчаськы, азьмынӥсьёслэсь адӟем кар. Дыр вуэмын ни скаллы быдэ 5 сюрс килограмм йӧл кыскыны, пудоез 600-1000 килограммъем секталаен государстволы вузаны. Кытчы талэсь улӥе васькод на? Таӵе привес фермаос басьязы ни партия кивалтон вакытэ ик. Озьыен, луонлыкъёс вань. Лек вераськон пӧрмиз гуртын будэтэм ваньбурез магазинъёсы посредникъёс пыр вуттон пумысен, соин ӵош йӧллы, вӧйлы, сӥльлы дунъёсты ӝутонъя. Талы пумит ӝегатскытэк ужрадъёс кутэмын луозы, пусйиз Правительстволэн кивалтӥсез. Кылпум потӥз калыклэсь мултэс йӧлзэ басьтон сярысь но. Переработка ужлы ёрмыса сылэ, гуртоос бидонъёсын, банкаосын базаре яке сюрес урдсы йӧлэн вузкарыны пото. Нош малы та ужез азьвыл сямен потребкооперация яке интыысь администрация пыр радъяны уг луы? Солы валэктон Правительство ласянь матысь дыре ик шедёз, дыр, шуыса, оскон вань. Начармыны кутскись муртэ кин гинэ уг пачкаты! Ӵапак таӵе ӵошатонэ вуоно, гуртоосты электрокужымлэсь люкылон учыръёсты лыдэ басьтыса. Нуналъёсын тылтэк кылё фермаос, музон удысъёс. Неужто ог-огдэ валаны сокем секыт? Кызьы оскытӥз П. Н. Вершинин, азьланяз электрокужымен шудонъёс уз луэ ни. Кулэ-а вал та кенешон гурт удысэз нуисьёслы? Одно ик, шуизы совещание лыктэмъёс. Веразы тырмымтэзэ но: арысь аре вераськыны кыл сёто огъёсызлыгес 4-5 муртлы. Мукетъёсыз шып пуко, ас малпанъёссэс, шугъяськонъёссэс берен сьӧразы нуо. Оло, вуоно арын мукетгес амал шедьтоно но бадӟымгес инты висъяно гурт улонлэн тужгес но лек висёнъёсызлы? Огъя кужымен ик соосты бурмытон бордын ужано. Нош азинсконъёс адӟиськытэк уз кыле: ма бордын тырше гурт калык, ма со будэтэ - ваньмыз син шорын. Людмила МЕДВЕДЕВА. Виталий Есипов: "Кулонлы дышыны уг луы" Котькуд адямиез бадӟым улонэ пумита но отысь келя тӧдьы халатэн адями - врач. Тазьы учкыса гинэ но государстволэн огез бадӟым ужез герӟаськемын луыны кулэ кадь тазалыкез утён сярысь сюлмаськонэн. Но Россилэн секыт югдуре шедемез туннэ зол шукке тазалыкез утён удысъя но. Кылем арын республикаямы бӧрсьысь бӧрсьы ортчылӥзы тазалыкез утён удысын ужасьёслэн, ӝог медицинской юрттэт сётонъя станциысь ужасьёслэн пумитъяськон ужрадъёссы. Зэм, асьме Кун Кенеш кутӥз вал тазалыкез утён сярысь нимысьтыз закон. Но со огъя югдурез тупатыны ӧз быгаты. Уждун тыронъя, эмъюмъёсъя, висисьёсты сюдонъя-утялтонъя озьы ик данак ужпумъёс кылемын. Ижевскын та ласянь ӟечгес югдур "Ижмашлэн" медсанчастяз. Соин 15 ар пала кивалтэ ини Виталий Анатольевич Есипов. Кызьы кылдэм шуг-секытъёсты вормыны быгатэ? Та юан котыртӥ бергаз "Ижмаш" МСЧ-лэн валтӥсь враченыз вераськонмы. - Виталий Анатольевич, кылем ар ӵоже тӥляд коллективды эмъяськыны юрттэм 19 сюрс адямилы. Кӧня коньдон, эмъюм кулэ солы?.. - Зэмзэ но, бадӟым хозяйствоез возьыны туж секыт. Учке ай, милям медсанчастьмы туннэ 7 поликлиника но 18 больница возе. Ар ӵоже соос пыр шорлыдын 103 сюрс висись ортче. Вань эмъяськонниосмес ужатон понна, араз 115 миллион манет кулэ, нош вуэ 45 миллионэз гинэ. Та коньдонысь ик ми висъяны кулэ коммунальной юрттэт но висисьёсты сюдон понна. 4-5 толэзьлы сяна, со коньдон уг тырмы. - Озьы ке но, тӥляд ужасьёсты туэ пумитъяськон ужрадъёсы ӧз поталэ... - Сыӵе ужрадъёсы ум пыриськиське. Но ужан условиосмес кызьы но озьы воштыны, умоятыны ялан тыршиськом. "Удмуртская правда" газет пыр шара юрттэт курыса вазиськылӥм городлэн мэрезлы А. Салтыковлы. Али нокыӵе оскон ӧвӧл ӝог медициской юрттэт сётонъя станцилы, бензин ӧвӧлэн, машинаос сыло. Нош висись адями курадӟыны кулэ ӧвӧл ук, соин ик куать машина басьтӥм, висисьёс доры потыны соос котьку дась. Умой юртто "Ижмашлэн" кивалтӥсьёсыз. Собере тросэз герӟаськемын коллективмылэн огазеяськыса ужамез бордысь но. Туж оскисько, сыӵе зол коллективен азьланяз но котькыӵе шуг-секытъёсты вормомы шуыса. Котьма ке но, 70-тӥ-80-тӥ аръёсы басьтэмын вал шӧдскымон азинсконъёс: калыкез дунтэк эмъян, солэсь тазалыксэ ялан эскерыса возён, выль эмъяськон амалъёсты уже пыӵатон. Соосты выльысь берыктысал ке... - Неужто тӥ сыӵе чебер малпанъёсын улӥськоды на? - Улӥсько. Ӵош ужась эшъёсылэн но сыӵе осконзы бырымтэ на. Собере со понна ялан нюръяськытэк но уг луы. Таӵе учыръёсты гинэ верало. Огаз поликлиникаын усьтӥм дугтэмгес эмъюмъёсын вузкарон. Нош тужгес но бадӟым вормонмы - со диабетэн висисьёслы центр усьтон. Республикаямы со нырысетӥез луэ. Али тани ялан грипплэн кышкытлыкез сярысь верасько. Но ми солэсь вӧлмемзэ азьпалтыны быгатӥм - тырмыт эмъюмъёс басьтӥм, коньдонэн юрттӥз автозаводлэн директорез. Грипплэсь утиськонъя калык пӧлын бадӟым валэктон уж нуим, али но нуиськом. - Виталий Анатольевич, берло аръёсы дышимы ни улонмес курланы, ӟечсэ ум но шӧдӥське ни кадь. Нош кызьы улон шоры учке меда врач? - Врачлэн учконэз туж огшоры: вунэтоно котькыӵе йыркурез, яратоно висисез но ыштоно ӧвӧл осконэз. - Нош кызьы учкиськоды туала партиос но огазеяськонъёс шоры? - 1991-тӥ арозь мон вал коммунистъёслэн радазы: шуг вераны - улон косэмъя-а яке атаелэсь адӟем карыса-а. Со огвакыт ужаз Можга райкомлэн нырысетӥ секретарез луыса. Табере тазьы лыдъясько: врачлэн валтӥсь ужез одӥг гинэ луыны кулэ - калыкез эмъян. Малы со понна кыӵе ке партиен герӟаськоно? - Куд-ог дыръя кылоно луэ, врач, пе, кулонлы дышемын ни, мар солы адямилэн куректонэз. - Кулонлы дышыны уг луы. Нокызьы уг луы! Висисез эмъян понна, уката ик секыт висёнэн курадӟисез, врачлы вань быгатонлыксэ, дырзэ, сюлэмзэ сётоно луэ. Нош кышкыт эзель адямиез ворме ке, эмъясь со учыр сярысь кема малпаськыса улэ на... Уйёссэ уг кӧлы. - Мар тӥ сӥзьысалды таяз арын асьтэлы, коллективдылы, лыдӟисьёсмылы? - Тазалык. Со адямилэн валтӥсь узырлыкез. х х х Виталий Анатольевичлэн ӵош ужась эшъёсыз кивалтӥсьсылэсь таӵе ужан амалзэ шараязы: "Тодӥськоды-а, малы со коньдон но, эмъюмъёс но шедьтыны быгатэ? Вань адямиосын ӟеч мылкыдын но пальпотонэн вераське. Котькинлы лякыт кылъёсын вазиське. Кинэн гинэ уз пумиськылы, уз вераськы- ваньзэсты нимын-тулын тодэ". Тӥни озьы ужа но коллективезлы улонын возиськыны юрттэ "Ижмаш" МСЧ-лэн кивалтӥсез но Россиысь дано врач Виталий Анатольевич Есипов. Т. БАННИКОВА. Кубок - играос киын Шаркан черкогуртын ортчизы "Удмурт дунне" газетмылэн кубокез понна куасэн бызьылонъя 47-тӥосыз ӵошатсконъёс. 26-тӥ-28-тӥ феврале кужымзэс мертазы дась ньыль ёросысь спортсменъёс. Жаляса верано луиськом: куд-ог районъёсысь куасэн бызьылӥсьёс таяз учыре нюръяськонъёсы вуыны ӧз быгатэ. Табере вормисьёс но интыос сярысь. Нырысетӥ интые потӥз Игра ёросысь етӥз но кужмо команда. Со 621 очко люказ.Кыкетӥ интыез утӥзы ӵошатсконъёсты радъясьёс - шарканъёс. Соослэн 586 очкозы. Та районысь команда тужгес но шаплы луэмзэ возьматӥз эстафетаын. Нош 546 очкоен куинетӥ луиз Можга ёросысь команда. Озьыен, ми сюлмысьтымы ӟечкыласьком Игра районысь шаплы командаез кубокмес утэменызы валче. Азьланяз но куас сюресъёсты вольытэсь мед луозы! Ӵошатсконъёс сярысь лыдӟыны быгатоды вуоно номерысь. Н. БАЙТЕРЯКОВ. Кылбур но крезьгур - ваче ки Кызьы ивортӥмы ни вал, 4-тӥ мартэ Удмурт кун филармониын луоз удмурт нылкышно кылбурчиослэн но крезьгурчиослэн "Сюлэмы мынам - азвесь крезь" шуыса нимам ӝытсы. Отчы пыриськозы тодмоосыз но, тодмотэмъёсыз но кылбурасьёсмы, кырӟан гожъясьёсмы. Огъя вераса, кылбур но крезьгур та ӝытэ ваче ки вамышъялозы. Ӝытэз ортчытэ Удмурт нылкышно кенеш. Отчы пырыны луоз дунтэк. Кутскоз 18 часэ. НЮЛАМ ВУЭН, КУРЫТ СИНКЫЛИЕН, вирен но миськемын та чугун сюрес 1941 арын 25 декабре Удмурт обкомлэн но правительстволэн Ижевск-Балезино сюресэз лэсьтонэ колхозникъёсты кыскон пумысен постановлениез потӥз. Шаермылэн пӧртэм сэрегысьтыз люкамын вал татчы калык. Ужасьёс та палась гуртъёсын улӥзы. Сундуре но интыяськизы. Тани Катярин апай - Екатерина Емельяновна Касаткина но Вася агай (войнаысь бертымтэ ни) доры Пичи Пурга ёросысь Улын Юри гуртысь лыктэмъёс пыризы... Со дырысен витьтон арлэсь ятыр ортчиз ини. Катярин апай арлыдэн зӥбемын, лябомемын. Тросэз ёзъёсыз югыт дуннеысь кошкизы ни. Калыкын шуо: "Музъем котырес - пумиськом". Озьы луиз милям гуртын но. Толсурлэн нырысетӥ нуналъёсаз Сундурысь удмурт культурая центре гожтэт вуиз. Улын Юри гуртысь Никита Ильич Ильин гожтэм. Со азьвыл электрик вылэм, али шутэтске, гуртэз, калыкез сярысь материал люка. Гожтэтысь чуръёс: "Басьтӥ мон 1 декабре потэм "Маяк" районной газетмес но синь шорам йӧтӥз "Сӥзьыл ортчытъяно йылолъёс" статья... Отысь "Сундур гурт" гожтэмез лыдӟыса, мон нош ик тодам ваи Ижевск- Балезино чугун сюрес лэсьтонэ ветлэмъёслэсь бӧрдыса вераськемзэс... 29 декабре 1941 арын милям колхозысь 6 валэн, вал сиёнлы турын возъёсын, 15 кузя, 3 пиосъёс но 12 кышноос, келямын вылэм сюрес лэсьтонэ. Пиосъёс шуыса, огезлы - 18 арес, кыкез - 60 аресъёс. Нылкышноос пӧлын куинезлы 16 арес но вылымтэ на. Сюрес вылын кык уй кӧлыса, 1 январе 1942 арын вуиллям тӥляд гуртады - Сундуре. Старшойзы вылэм Павлов Кузьма..." Соос ик Никита Ильичен ӵош 22-тӥ толшоре Сундурысь культура юртэн радъям пумиськон ӝытэ вуылӥзы. Трос шуг-секытъёс пыр потоно луиз чугун сюрес лэсьтӥсььёслы. 146 иськем сюрес одӥг ар но кык толэзь куспын быдэстэмын вал. Лыдпусъёслэн верамзыя, сое лэсьтонэ кулэ луиз 27 тонна кортӵог, эшшо 318 тонна кортӵог, 318 тонна корт, 12 сюрс выжлы болтъёс, 300 вагон шпалъёс, 260 вагон рельсаос. Вань уж егитъёслэн ежесь, юнмамтэ пельпумъёссы но кышномуртъёслэн тыбырзы вылэ усиз. Сундурын та вакытэз тодазы ваизы Галина Кузьмовна Антонова, Трифон Дмитриевич Ившин, Лидия Александровна Клементьева, Александра Ильинична Лекомцева, Александр Николаевич Чирков, Татьяна Ильинична Чиркова, Клавдия Петровна Корепанова, Раиса Петровна Лекомцева но Валентина Васильевна Феоктистова. Та песянайёсмы пӧлысь тужгес но пиналэз соку вылэм Г. К. Антонова. Чугун сюрес вылэ сое парта сьӧрысь кыскыса нуиллям. - Пиос валэн ужазы, нылъёс носилкаен сюй нуллӥзы. Туж мур нюкез ӵошкатоно луиз. Толалтэ отын ик улӥм. Нош гужем пегаськом но вал. Гольык пыд, кӧт сюмаса бертӥськом. Куто но куаретыса берен нуо вал, - ӝож куараен тодаз вае Галя апай. Лидя апаез, бригадире дышетскемез бере, Кузьмовырысь нуиллям. Лынгае ыстӥллям. Отысен уродмыса берен гуртаз бертэм. Гужемзэ бригадирын ужаса ортчытэм. Собере нош ик ыстӥллям чугун сюрес вылэ. Валя апай Забирысен кошкем ужаны. Валъёс ӧвӧлэн, порозэн (ошен) мыноно луэм. "Порозъёс ваменско, уг мыно, - шуэ Валентина Васильевна. - Копам сюез откосэ тубытылӥськом вал". Чугун сюрес вылын со гужемзэ гинэ ужаны шедем. Нош Эгралась железнодорожной вокзалэз ӝутонын толзэ но, гужемзэ но ортчытоно луэм. Татьяна Ильиничнаен Александр Николаевич Чирковъёс но вань курадӟонэз, секыт ужез пельпум вылазы поттэмын: валэн ужан, сюй ворттон, нюлэс коран, шпал тырон - номырлэсь но соос ӧвӧл кылемын. Александра Ильинична Кезын но со ёросысь Кузьма гуртын ужам. Ваньмыз сямен, со но кияз ломен но лопатаен, киркан но носилкаен войнаез пыр потэмын. Трос вуос ортчизы со секыт, курадӟон вакыт дырысен. Аръёс ортчемъя, уноез сюрес лэсьтӥсьёс улонысь кошко. Секыт ӝутъяса, кӧт сюманэз чидаса, лымы, зор-кот, мугорез сӥсъясь тӧл шорын ужаса, тросэзлэн тазалыксы лябомемын ини. Тани пумиськон ӝытэ но лыктыны ӧз ни быгатэ Иван Васильевич Белых (Горд Иван), Александра Архиповна Чиркова, Антонина Васильевна Феоктистова, Любовь Никифоровна Белых. Котьма ке но, та адямиослэн номырин мертантэм бадӟым уж лэсьтэмзы ӧвӧл вунэтэмын. Нырысь ик, чугун сюрес лэсьтӥсьёслы Кекоранын усьтэмын памятник. Собере, 1995 арын, Эгра администрация но Ветеранъёслэн кенешсы кичӧлтэм улсын югыт дуннее "Трасса мужества" книга вордӥськиз. Озьы ик К. Емельяновлэн но И. Гусевлэн повестьёсын книгазы потӥз, отын геройёс но югдуръёс зэмос вылэм учыръёсъя суредамын. Та ӝыт но дано калыкмес сӥлы каронлэн ог люкетэзлы пӧрмиз. Ӝӧк сьӧрын пӧсь чай юыса, ортчем аръёсы пумиськылэм адямиослэн кусыпсы выльысь тупатскиз, мылкыдъёссы асьсэос ӧръяськизы. - Мылкыдмы туж умой. Такеме лыктыны быгатыса, кызьы умой уз луы. Вунонтэм ветлӥськиз куное. Тӥ но лыктэ ми доры Юримес адӟыны, - та кылъёсын люкиськизы Пичи Пурга ёросысь апайёс. Поездъёс нуо асьмеды чугун сюресъёс кузя дуннелэн котькуд сэрегаз. Одӥгез но со сюрес лэсьтон капчиен ӧз, дыр, сётӥськы, но Ижевск-Балезино чугун сюресэз лэсьтӥсьёслы оло, эшшо секытгес вал, малы ке шуоно, быдэсмиз та трасса, война мыныку, туж вакчи дыр куспын, нылкышноослэн но пиналъёслэн кужыменызы. Трос нюлам вуэн, курыт синвуэн, оло, вирен но миськемын та чугун сюрес. Мар бен та секыт, геройлыко ужын юрттӥз калыкмылы? Оло, Сталинлэн куэз нярӟытӥсь урысэз, сюлэмтэм кивалтӥсьёслэн секыт сапег ныръёссы? Ӧвӧл, тушмонэз вормонлы бадӟым оскон, котькыӵе ужез гажан но кышкасьтэм ымнырын пумитан, котьмае чиданы дась луон, дыр... Соин ик, ми, туала егитъёс, лэйкась вагонын ворттылыку тодамы возьыны кулэ, кыӵе дунын лэсьтэмын та чугун сюрес. А. Клементьев, Удмурт кун университетын дышетскись, Е. ЧИРКОВА, Сундурысь удмурт культурая центрын ужась. Со 15 адями пӧлысь туннэ нуналъёсы куинез гинэ на улэп - Анастасия Григорьевна Михайлова, Ефросинья Васильевна Ермакова но Анисья Семеновна Филимонова. Статьялэн авторъёсыз таӵе куронзэс верало на: кин ужамын та чугун сюресэз лэсьтонын но улэмын Сундур гуртын, туж куриськом милемлы гожтыны-вазиськыны - Эграос (Игра) ёросысь Сундур гуртысь удмурт культурая центре Ившина Нина Леонидовналы. Март: тодмо нимъёс но нуналъёс 2-31. - 25 ар талэсь азьло (1974) Ижевскын ортчиз боксъя СССР-лэн чемпионатэзлэн финалэз. 5. - 65 арес тырме экономика наукаосъя кандидатлы, Удмуртиысь дано дышетӥсьлы Г. А. Поздеевлы (1934). - вордскемез дырысен 95 ар тырме тодмо удмурт писательлы Г. С. Медведевлы (1904- 1938). 6. - вордскемез дырысен 65 ар тырме история наукаосъя докторлы, профессорлы, Удмуртиысь наука удысын дано ужасьлы А. И. Сухановлы (1934-1989). Вордскиз Кизнер ёросысь Кизнерка гуртын. 7. - 70 ар тырме (1939) Камбарка ёрос кылдэм дырысен. 8. - вордскемез дырысен 75 ар тырме Советской Союзлэн Героезлы В. А. Таначевлы (1924-1943). Вордскиз Сарапулысь Ершовка селоын. 9. - 75 ар тырме кылтодон наукаосъя кандидатлы (лингвист), Удмуртиысь наука удысын дано ужасьлы Т. И. Тепляшиналы (1924). Вордскиз Дэбес ёросысь Пичи Кизня гуртын. 17. - вордскемез дырысен 95 ар тырме удмурт писательлы, кылбурчилы но фольклористлы А. Н. Клабуковлы (Багай Аркаш) (1904-1984). Вордскиз Вавож ёросысь Водзимонье селоын. 19. - 80 ар тырме удмурт писательлы но журналистлы В. Е. Смирновлы (1919). Вордскиз Вавож ёросысь Зяглуд-Какся гуртын; - 45 ар талэсь азьло (1954) выльвылъёсты ӝутыны сӥё-дано келямын Удмуртиысь комсомолецъёслэн нырысетӥ отрядзы (350 мурт). 26. - 60 арес тырме история наукаосъя кандидатлы (этнограф), Удмуртиысь наука удысын дано ужасьлы Л. С. Христолюбовалы (1939). Вордскиз Завьял ёросысь Волково гуртын. 28. - вордскемез дырысен 70 ар тырме удмурт писательлы Т. С. Ивановлы (1929- 1968). Вордскиз Алнаш ёросысь Туймыйыл гуртын. 31. - 80 ар талэсь азьло областьын кылдытэмын "Долой безграмотность" огазеяськон. Со Удмуртиысь быдэ вуэм калык пӧлын бадӟым юрттэт луиз гожтэт тодӥсьтэмъёслы тодон-валан сётонын; - 50 ар талэсь азьло (1949) УАССР-ысь Министръёслэн Советсы гуртъёсын одно ик сизьым классъем тодон-валан сётон сярысь постановление кутӥз; - 40 ар талэсь Азьло (1959) ортчиз Удмуртиысь Спортъя обществоослэсь но организациослэсь Союззэс кылдытонъя конференция. - 50 ар талэсь азьло (1949) Ижевскысь ульчаосын ветлыны кутскизы нырысетӥ кун автомобиль-таксиос. "Мылысь-кыдысь" ужа мылысь-кыдысь Кыӵе гинэ клубъёс но кружокъёс ӧвӧл али Эгра ёросысь Сундур гуртысь удмурт культурая центрын. Нош 1998-тӥ арын, шуркынмон толэзе, выль "Мылысь-кыдысь" клублэн ошмес синмыз усьтӥськиз. Со егитъёсынгес ужан понна кылдытэмын. Ас азяз таӵе быдэстоно ужпумъёс пуктэ: культура удысысь тунсыко адямиосын тодматон, туала егитъёслэсь сюлэмшугъёссэс учкон но соосты сэрттон-пертчон сюресъёс. "Мылысь-кыдысьлэн" нырысетӥ ӝытэз ноябре ортчиз "Комсомол аръёс - шудо аръёс" ним улсын. Дышетскисьёс Сундурысь удмурт культурая центрлэн кивалтӥсеныз Н. Л. Ившинаен пумиськылӥзы. Толсуре клублэн куноез Ольга Макаровна Кожевникова луиз. "Ноку вужмисьтэм уӵы гуръёс" нимо ӝытын арлыдо кышномурт тодэ ваёнъёссэ ивортӥз, сюлэмшугъёссэ усьтӥз но кырӟаз. Толшоре "Дискотека - мынам улонэ" нимо ужрадын дышетскисьёс но егитъёс Дима Лекомцевен тодматскизы. Нош тулыспал толэзе "Мылысь- кыдысь клуб Дунсьӧлыктэм Валентинлэсь нуналзэ пусйиз но дышетскисьёсын ӵош мылысь- кыдысь шутэтскиз. Азьланяз но "Мылысь-кыдысь" выль тунсыко пумиськонъёс ортчытыны чакла. Удмурт телевидениысь бадӟым агаез шоры учкыса, пыд йылаз йыгмыт султэ но азьлань вамышъя. Мар бен, сӥзём солы тунсыко, шулдыр ӝытъёс, паймымон куноос но калыкен тырмем залъёс. А. Клементьев, Удмурт кун университетын дышетскись. Алнашъёс иворто Лыдпусъёс, лыдпусъёс Ёросысь депутатъёслэн Кенешсы бадӟым саклык висъя гурт удысэз азинтонлы. Одӥгаз сессиын сэрттэмын-пертчемын вал берло сизьым аръёсы районысь калыклэн улэм-вылэмез. Ю-нянь будэтон сярысь ке верано, 1991-тӥ-1998-тӥ аръёсы тысё но пуртэсо юос гектарлы быдэ 19 но ӝыны центнер басьтэмын. Но со дыре ик уг шумпотто пудо вордон удысысь лыдпусъёс. Йӧл поттон кулэсмиз 3500 тонналы, сӥль вузан - 50 процентлы. Та дыре алнашъёс скаллы быдэ 6 но ӝыны кило йӧл кыско. Берло сизьым ар ӵоже сюро таза пудолэн лыдыз 7 сюрс йырлы кулэсмиз (30 процентлы), парсьёслэн - 60 но ыжъёслэн - 95 процентлы. Туж вужмемын ни машина-трактор парк. Ужан дырзы быремын 72 процент тракторъёслэн, 70-лэсь уно комбайнъёслэн, 94 процент ю куасьтон комплексъёслэн. Кылем арын район басьтыны быгатӥз 6 трактор но 1 комбайн гинэ. Кызьы возьмато лыдпусъёс, Алнаш районын югдур секыт. Соин ик депутатъёс гурт удысэз ӝутон вылысь нимысьтыз комиссия кылдытӥзы. Пар бусыос Азьвыл аръёсы районысь эштосъёс одӥг гектар гыроно музъем вылэ 2-4 центнер минерал сылал поттылӥзы. Табере та лыдпус 10-15 килоозь усиз. Музъемлэсь удалтонлыксэ ӝутыны юртто пар бусыос. Сыӵе музъемъёссы туэ уно Ильич нимо, "Решительный", "Родина" но "Прогресс" колхозъёсын. Кыед поттон туэ дуно ке но усе, хозяйствоос та ужлэсь уг палэнско. Туннэ нуналлы ёросысь бусыосы ог 140 сюрс тонна пала кыед поттэмын. Юрттэ сапропель "Агропромхимия" огазеяськонысь С. П. Гусев кивалтӥсьлэн сюлмаськонъёсыз уно. Кызьы пусъе директор, солярка дасямын ни тырмыт, узгес тырмы бензин. Нош техниказы отын ӧжыт ӧвӧл. Хозяйствоосысь куронъёс вуымтэен, водительёс толэзь пала ини ужтэк пуко. Югдур секыт дыръя юрттэ Кам пыдсысь удобрение - сапропель. Али машинаосын сое фермеръёслы но нимаз адямиослы вортто. Капчи ӧвӧл кивалтӥсьлы уждун тыронэн. Чакламез сярысь 14-15 процентсэ гинэ "улэп" уксёен сёто. Озьы луэ предприятилы пунэм тыронъёс вуымтэен. Ужамед потэ - дышетскы Ёросын кутэмын "Кадры Алнашского района" программа. Та нуналъёсы интыысь служащейёслэсь, администрациын но солэн ёзъёсаз ужасьёслэсь тодон-валанзэс эскерон кутскиз. Кылдытэмын нимысьтыз аттестация ортчытонъя комиссия. Нырысь ик эскеризы гурт администрациослэсь кивалтӥсьёссэс но секретарьёссэс, собере гурт удысъя управлениысь специалистъёсты. Куасъёс интые - наркотикъёс Ёрос администрацилэн кивалтӥсез В. И. Городилов дорын эскеремын дышетскисьёс пӧлын висёнъёсты алон сярысь ужпум. Ивортон лэсьтӥзы ёрослэн валтӥсь врачез И. Н. Колесников но калыкез дышетонъя отделлэн кивалтӥсез И. М. Ильин. Школаосын бадӟым саклык висъяны кулэ мугорез кыдатонлы. Та ласянь куд-ог школаосын уж умой пуктэмын. Но унояз уг тырмо куасъёс, гимнастикая снарядъёс, тупъёс. Озьы ке но, ваньмыз школаос пырисько ёросын ортчись ӵошатсконъёсы. Сюлэмшугъяськытэ висись пиналъёслэн лыдзылэн будэмез. Али районын 74 пинал визезъя лябен лыдъяське. Паськыт вӧлмемын юон но наркотикъёс. Али шугъяськытэк басьтыны луоно гашишез. Пумен тросгес аля мугорез вузан. Газетлэн призэз понна Ёросын ортчизы "Алнаш колхозник" газетлэн призэз понна куасэн бызьылонъёс. Нырысетӥ интые потӥз Асан техникум школаысь команда. Кыкетӥ но куинетӥ интыосын - Азаматысь но Алнашысь куасэн бызьылӥсьёс. Б. НИКИТИН. Кун Кенешлэн сессияз Уж быриз - зал бушаз Кызьы ивортӥм ни, кылем арня вискын Удмурт Республикаысь Кун Кенешлэн нырысетӥ созывез аслэсьтыз ужзэ йылпумъяз. Депутатъёс берло нуналэ юнматӥзы на республикалэсь туэ арлы чаклам бюджетсэ, кылзӥзы Кун Кенешлэн Тӧроезлэсь А. А. Волковлэсь шаерамы кылдэм югдур сярысь докладзэ, кутэмын на муниципальной службая законлы инъет. 25-тӥ сессилы кельтэм ужпумъёсты залын пукисьёс, финише вуись спортсменъёс сямен, ӝогак- ӝогак гинэ учкизы, малы ке шуоно, соосъя вераськон мынӥз ни азьвыл заседаниосын. Удмуртиын политической югдур сярысь ке верано, экономикаез тупатытэк, умой пала воштӥськонъёс уз луэ. Кызьы шуиз докладчик, оборона удысын асьмеос Россиысь вань регионъёсты азьпалтӥськом - сомында заводъёс пуктэмын шаерамы. Туннэ нуналлы ужа ог 30 процентэз гинэ, сомында вуэ государственной заказ. Тӥни малы уг тыриськы налог, уг узырмы бюджет, коньдонтэк пуко врачъёс, дышетӥсьёс но мукетъёсыз. Таӵе югдурысь потыны амал вань, со понна юнматоно экономической кусыпъёсты. Та ласянь трос адӟем карымонэз Беларусь Республикалэн. Солэн Президентэз А. Г. Лукашенко Удмуртиын улӥсьёслэн сюлэмъёсазы азьланезлы оскон пыӵатыса кельтӥз. Валамон, ваньмыз потоз республикамылэн кивалтӥсьёсыз бордысь, пусйиз Александр Александрович, кин лыктоз власть доры: кин кивалтоз Кун Кенешен, Правительствоен. Кема кыстӥськиз бюджетэз кутон. Соин депутатъёсты тодматӥз ялан ужась комиссилэн кивалтӥсез С. Э. Широбокова. Азьвылаз сессиын, трос тырмымтэоссэ шараяса, республикамылэн коньдон пусйыез юнматытэк кылиз вал. Сое йылаз-пумаз вуттон бордын кӧня ке нунал ӵоже ужаз огкылэ вуонъя (согласительной) комиссия. Пыртэмын данак тупатонъёс но ватсанъёс. Депутатъёс соосты нимаз-нимаз кылзӥзы на. Споръяськонозь таяз учыре ӧз ке но вуэ, куд-ог юанъёс кылдылӥзы ик. Но оглом бюджетлы инъет умоен лыдъямын. Зэмен но, коньдон казнаямы тырмыт ке люкаськысал, бумага вылын сямен, улонын но со пумозяз быдэсмысал. Азьвыл аръёсы бюджет удыс уждунтэк пукиз шат? Пусъем ужпумъёс пӧлысь та нуналэ быдэсмытэк кылиз А. И. Чишковскаялэн арлэн пумаз лэсьтэм запросэз. Депутат кылпум ӝутӥз вал нефтез вузанэн герӟаськем ужпумъя газетын поттэм статья пумысен. Правительство но, Прокуратура но талы валэктон ӧз сётэ. Депутат Н. Н. Нагорных аслэсьтыз пуктэм запроссэ йылаз-пумаз вуттытэк ӧй буйга. "Известия Удмуртской Республики" газетлэсь редакторзэ депутатэз К. А. Глуховез со отчёт лэсьтыны куриз азьвыл ялымтэ 21-тӥ сессилэсь стенограммазэ печатланъя но лыдӟисьёслы газетсэ дунтэк люкылонъя. Вань юанъёслы Глухов пыр-поч валэктон сётӥз. Таин Кун Кенешлэн 25-тӥ сессиез йылпумъяськиз. Солэн Тӧроез А. А. Волков берпуметӥ люкиськон кылаз сӥзиз депутатъёслы ӟеч мылкыд, вуоно быръёнъёсын вормон но Удмурт парламентлэн кыкетӥ созываз шедён. Ньыль ар ӵоже ӵош ужам депутатъёс понна берпуметӥзэ чузъяське гимн. Сессиосты ортчытъян зал буша. Депутатъёс интыоссэс кельто: кудӥз - весяклы, кудӥз - огдырлы. Таиз тодмо луоз ни 4 апреле. Л. МЕДВЕДЕВА. Утча уж, ужед ке но вань Светланаез ужысьтыз кулэстӥзы. Нырысь солы ачиз но ӧз оскы кадь. Вылӥ образованиен егит чебер кышномурт - кызьы? Но чагиськыны, керетыны нокытчы ӧз мыны. Ма карод, бадӟым заводысь 35 сюрс ужасез дас поллы кулэстыны ӧдъяло ке. - Али вераны ик уг валаськы, кыӵе мылкыды вал мынам соку, - шуэ Светлана. - Асме кытчы карыны ӧй валалля. Кузпалы ужа, сиськытэк ум улӥське, но монэ кулэтэм каремзы вандыса куштэм кадь луиз. Мынам туж тунсыко уже - инженер-теплотехник, озьы но... Тодмо югдур, озьы-а? Малпасько, лыдӟисьёсмы пӧлын но трос Светлана кадьёс. Сыӵе муртъёслэн куректэмзы, осконзэс ыштэмзы, коньдонлы ёрмемзы валамон. Угось туннэ ӧжыт ӧвӧл ни та муген психиатрической клиникаосы шедем муртъёс, юон вылэ чӧлскемъёс, пытсэт сьӧры шедемъёс, асьсэды асьсэос быдтӥсьёс. Тӥни сыӵе муртъёслы лулсэр висёнъёсты эмъянъя (психологической) юрттэт сётон понна, 1994-тӥ арын феврале Калыкез уже интыянъя службаен Ижевскын усьтэмын вал Уж утчасьёслэн клубзы. Вить ар ӵоже кӧня сюрс адями ортчиз со пыр, кӧняез клублэн юрттэменыз ыштэм осконзэс берыктыны, уж шедьтыны быгатӥзы! Нырысетӥ нуналысеныз кивалтэ та клубен Елена Филимоновна Каракчеева. Кызьы ке вить ар талэсь азьло, озьы ик туннэ но сюлмаське со клублэсь ужзэ паськытатон, эшшо умойгес ужатон сярысь. - Америкаын та выллем клубъёс 1976 арысен ужало ни, - вера Елена Филимоновна. - Угось отысь учёнойёслэн-социологъёслэн эскеремзыя, ужтэк кылем адями нырысь ик психика ласянь шуккет басьтэ. Адями, осконзэ ыштэ, ассэ дунъямысь дугдэ, собере дунне шоры пурысь буёлъёс пыр учкыны, адямиосты адӟонтэм карыны кутске, висись, керӟег луэ. Валамон, сыӵе дыръя солы психолог кулэ. Соин ик клубмы ужтэк кылем муртлы психологической юрттэт сётонъя программаез тужгес но кулэен лыдъя. Со "Выль старт" шуыса нимаське. Ми доры вазиськем муртъёсын кенеше психолог, соослэсь та вакытэ мылкыдзэс, малпанъёссэс тодон вылысь, тест ортчытэ. Соя тодмо ни, кинэн кызьы ужано, кыӵе тренинг ортчытоно. Уго пӧртэм учыръёс луо. Тани огезлэн аслыз ачиз чик осконэз ӧвӧл - мон уг быгаты, мон уг вала, бухгалтериын ноку ужаме ӧвӧл шуэ, нош мукетыз ассэ инмарен лыдъя. Вал милям балеринамы. Со Пермьын дано балерина, прима вылэм, но кыӵе ке мугъёсъя Иже вуэм, татын уже интыяськемез уг луы. Ми хореографлэсь, художественной кивалтӥсьлэсь ужзэ ӵектӥськом, нош со "тӥ монэ ултӥяськоды, мон тодмо балерина", шуэ. Но адями валаны кулэ кылдэм югдурез, туала улонлэн аслаз куронъёсыз ук! Адями буйгам бере, кутскиськом деловой шудонъёс пыр соослы уж утчаны, кивалтӥсьёсын, уж сётӥсьёсын вераськыны дышетӥськом. Угось уже куриськыку астэ возьыны, вераськыны быгатэм бордысь кылдэ кивалтӥсьлэн тон сярысь малпанэз. Тӥни соку ини кутскиськом уж утчаны (2-тӥ программамы). Вераны кулэ, ми дорын дышетскем муртъёс ӝыны ар ӵоже 90 процентэз уже интыяськыны быгато. Уж сётӥсьёс (кивалтӥсьёс) умоен вазисько соос сярысь, ушъяло. Уж утчаны дышетскись муртъёс ми дорын котыр ласянь тодон-валанзэс будэтыны быгато уго: дышетско компьютерен ужаны (асьсэлы туж усто резюме лэсьтыны дышо), законъёсын но асьсэлэн правоосынызы тодматско, предпринимательствоя визь-кенеш басьто. Уж утчанъя службаын учётын сылӥсьтэм муртъёсты дышетӥськом 3-тӥ программая. Та адямиос, ужзы вань вылысь но, ялан утчасько, ӵуказе нуналзы сярысь сюлмасько. Ӵемгес со огдырлы уже кутэм яке пичи уждунэн, кельшисьтэм интыын ужась муртъёс. Нош куд-огез вазисько кыӵе ке валэктон басьтон понна гинэ. Юаллясько вакансиос, законъёс сярысь. Та программая тужгес но трос муртлы юрттэт сётӥське. Араз 12 сюрс пала вазиськись луэ. Клубамы лыктӥсьёс пӧлын вань туж секыт мылкыдо адямиос. 1-тӥ программая, 10-12 муртэн группа люкаса, татын кык арня ӵоже дышетӥськом ке, таоссэ группаен дышетыны уг луы. Соин ик психолог котькудӥныз нимысьтыз ужа. - Елена Филимоновна, Удмурт Республикаысь Калыкез уже интыянъя департаментлэн кивалтӥсезлэн Ю. М. Брусянскийлэн пресс-конференцияз тӥлесьтыд уждэс туж ушъязы. Тӥ доры вазиськылэм муртъёс но шуныт кылъёс гинэ верало. - Со озьы ик луыны кулэ. Угось ужтэк кылем муртъёслы нырысетӥ юрттэт, оскон ми сётӥськом, шуыны луоз. Милям туж усто специалистъёсмы. Соослы тодмо ужтэк кылем муртлэн мылкыдыз - асьсэос но сыӵе югдурын вал. Ужтэк кылем муртэз валаны быгатыны, гажаны кулэ, уг яра со шоры кулэтэм мурт шоры сямен учкыны. Туннэ сыӵе югдурын котькудмы луыны быгатом. Кызьы шуэ "Технология карьеры" но "Как получить работу в новой России" книгаослэн авторзы, усто интыын ужась мурт но аслыз котькуд нунал эшшо ӟечгес уж утчаны кулэ. Сотэк кема ӧвӧл ураме кыльыны. - Тӥ та книгаосты ӝӧк вылады возиськоды. Тупало-а авторлэн ӵектонъёсыз асьмелэн ужтэк кылемъёсмылы? - Бен, малпасько та книгаосын тодматскыны котькинлы умой луысал. Но берло дыре мынам таӵе малпанэ кылдӥз: Уже интыянъя служба кылдэм дырысен та удысын ужаса, сомында материал люкамын - нимысьтыз Ижевскысь ужтэк кылем муртъёс понна книга-пособие поттыны луысал. Мынам психологияя диссертацие но солы сӥземын. Елена Филимоновнаен вераськеммы бере, мон кӧня ке муртлэсь малпанзэс юай. Уж утчаны дышетскись муртъёс огкылысь кадь верало: - Татын туж умой адямиос ужало. Соос гинэ милемыз валаны быгато. Туэ жаляськом, азьло ик ӧм лыктэ шуыса. Табере ми асьмеды дунъяны быгатӥськом, туннэ ке ужмы ӧвӧл, ӵуказе одно луоз! Нош туннэ нырысьсэ татчы лыктэм муртъёс туж керӟегъяськыса уж ӵектӥсь газетъёсты бугыръяло. Психолог Дмитрий Евгеньевич Зорин доразы кожыса маке вера но, адямиос капчияк лулӟытско, пальто бирдыоссэс пертчо. Ог-огзэс валан понна нырысетӥ вамыш лэсьтэмын. Д. Зорин психологлэн ӵектонъёсыз. 1. Улонын ужтэк кылёнлэсь секытгес шуккетъёс луыло, соин ик буйгатске. 2. Кӧня ке шутэтскыса, кутске уж утчаны. Тодэ, уж шедьтон 80 процентлы тӥ бордысь потэ! Тӥ асьтэос бырйыны кулэ уж сётӥсез. Умой кивалтӥсьлэн одӥг-кык интыез котьку луэ - быгатэ асьтэды ӵектыны. Кивалтӥсьлы кулэ ӟеч ужась, тӥледлы - уж. Малы тӥледлы ог-огдылы юрттонтэм? Быгатэ со сярысь кивалтӥсьлы валэктыны. 3. Тӥ дас интыетӥ уже куриськыса ветлӥды ни, интыськемды уг луы? Эн куректэ, мынэ дас одӥгетӥзэ, дас витетӥзэ... Куке но тӥ ӵап асьтэлы тупась, усто уж шедьтоды. Эн кышкалэ, уз удалты шуыса. 4. Эн аналске дорады, нылпиосты, бакчады вылэ чӧлскыса. Татчыозь котькытчы вутскылӥды ук, вутскоды уж утчаса но. 5. Гажалэ асьтэды асьтэос. Быгатэ ас азяды ужпум пуктыны, сое быдэсъяны. Нош быгатэмды бере - шумпотыны. Кызьы астэ возёно уж сётӥсен? (Ӵекто Уж утчасьёслэн клубазы дышетскем нылкышноос): 1. Уж сётӥсен телефон пыр вераськемлы осконэз ӧвӧл. Вераськемез бере ик со тӥ сярысь вунэтоз - малы солы азьтэм мурт? Уж утчась муртлы дораз мыныны кулэ, ваньмон дырзэ секретарезлэсь тодыса. 2. Кабинетаз выл дӥсьтэк, сынаськыса пыре. Дӥсяське ӝикыт, мултэс эн буяське. 3. Вераське ӝот-ӝот, дӥсьтыса, асьтэды урод эн каре. Эн юалэ "ужды ӧвӧл-а" шуыса, "мынам тӥ дорын ужаме потэ" шуэ. Вазиське шораз быдэс нимтулыныз. Вераське уж, тӥляд быгатонлыкъёсты, азьло ужады вормонъёсты котыр, быгатэ сое оскытыны, тӥ тужгес но тупась ужась луоды шуыса. Эн поттылэ пичи нылпиосты, дырын-дырын висьылэмды сярысь. Нош сыӵе вераськон потӥз ик ке, оскытэ сое, нылпиостэс эскерыны песянайды вань, кык-куинь нуналлы сяна уд кошкылэ, быгатэмдыя ӝытъёсы но шутэтскон нуналъёсы но уждэс быдэсъяны тыршоды шуыса. 4. Нырысь интые эн пуктэ уждун сярысь юанэз. Кивалтӥсь тӥледлы уж сётон сярысь малпаське ке, ачиз вералоз. 5. Уж сётӥсь тӥледлы рос-прос номыр уг вера ке, эн йыркуръяське, визиткадэс сётыса кельтэ. 6. Пинал специалистъёс кышканы кулэ ӧвӧл пичи уждунэн но ужаны кутскыны. Ялонъя 200 манет ӵекто ке, 300-350 одно сётозы. Гуртын тэк пукемлэсь со умойгес, озьы-а? Пумен стажед но опытэд люкаськоз, азьланяз уже интыяськыны каньылгес луоз. Кивалтӥсь вера одӥгзэ, нош малпа... Зэм ик-а кивалтӥсь вера, мар малпа? Яке солэн котькуд кылаз пышкылон ватӥськемын. Сое валаны юрттозы кивалтӥсьёссэс валаны быгатӥсь немецъёс. Висемды бере, тӥ нырысетӥ нуналзэ ужаськоды. Кивалтӥсьты шуэ: "Туж умой, бурмиллямды". Зэмзэ ке, со малпа: "Нош ик аслыз отпуск лэсьтӥз". Тӥ эшеныды коридорын вераськыса сылӥськоды. Со вакыт вӧзтӥды кивалтӥсьты ортче. - Мар ке луиз-а? - сюлмаськыса кадь юа со. Зэмзэ ке, со ас понназ тӥледды уждэс лэсьтытэк зульыса сылэмды понна тышкаське. - Ӵош ужась эшъёсыныды валамтэос кылдӥзы ке, вазиське мыным, - шуэ кивалтӥсьты. Зэмзэ ке, солэн коллективын кылдэм югдур но вераськонъёс сярысь тӥ пыр тодэмез потэ Кивалтӥсьты ушъя тӥледыз сюлмо тыршемды понна. Но ас понназ малпа: "Тонэ мултэс уд ужаты!" Яке уждэс усто быдэсъямды понна ватсаса уждун куремдылэсь кышка, "ӟеч кылын" сюдыны малпа. З. РЯБИНИНА. Вераме потэ ӟеч кыл Югдытӥсьёс 1950-тӥ-1951-тӥ дышетскон аре вал со. Ми 7-тӥ классын дышетскиськом. Дорамы вуизы практикантъёс, Удмурт пединститутын дышетскись студентъёс. Со дырозь, оло, сокем ӧм но шӧдылэ, кыӵе мӧзмыт, пеймыт улӥськомы вылэм ми - удмурт классъёс. Ма, адӟиськомы, валаськомы ик вал, макем бадӟым пӧртэмлыкъёсмы ӟуч пиналъёсын. Соос школаын кузёос, нош ми урокъёс вискын борддор валлин ветлӥськомы. Урокъёс бере но ӟучъёс кыӵе ке кружокъёсы мыно, пионер сборъёсы ветло, концертъёс пукто. Одӥгез учыр уг вуны: актовой заллэн сцена вылаз, туж трос пиналъёс кырӟало. Раиса Александровна Арасланова диржировать каре. Ми дӥсьтытэк гинэ ӧс куспын учкыса сылӥськом. Ой, кыӵе вожъяськи, макем кырӟаме потэ вал. "Малы милемды отчы уг ӧтё? Малы мынэсьтым уг юало, быгатӥсько-а, яратӥсько-а кырӟаны?" - сыӵе малпанъёс бергало йырам. Тӥни озьы улӥмы Якшур-Бодья шор ёзо школаямы соку, нокинлы но ми кулэ ӧй вал, дышетӥсьёс дорамы уроке гинэ ветлӥзы. Соин ик студентъёслэн вуэмзы милемлы шунды ӝужам кадь луиз. Удмурт филологияя группаысь вылӥллям соос. Студентъёсты юнматӥзы школаысь но педучилищеысь удмурт классъёс борды. Бугыр ужазы милемын выль дышетӥсьёсмы. Кылъя но литературая урокъёс ортчытъязы хоре люказы, кылбуръёс дышетыны сётӥзы. Озьы литературно-музыкальной сузьет дасязы. Э, ма быдӟа шумпотон вал со милемлы, кыӵе шудоесь вал соку. Данъяськимы, ми но сцена вылын кырӟаськомы, ми шоры но учкисьёс вань. Вань мылкыдмес кисьтыса кырӟамы Г. Корепановлэсь но Г. Сабитовлэсь "Шудбуро выль улон усьтӥськиз милемлы Октябре" кырӟанзэс, ёзвиосамы кужымъёсмы ик тросгес луизы кадь. Пӧртэм классъёсысь пиналъёс ог-огмес ӟечгес тодӥмы, тупасагес улыны кутским. Гажано практикантъёсмы кылмес но узырмытыса кельтӥзы, тодон-валанъёсмес но будэтӥзы. Соку тодӥмы, кин со студент, ма со литмонтаж. Ай, тодмотэм кырӟан гурез гожтэт пыр лэзьыны, пе, луэ. Быри, быри, ма, кызьы меда кырӟан гурез бумага вылэ гожтод?! Нотаосын, пе, луэ гожтыны. Милесьтым классмес Борис Сидорови Марковлы сётӥзы. Туж йӧно, чебер, интелигентной потӥз со милемлы. Соин ӵош классэнымы фотое пуксимы. Со мынам улонам нырысез туспуктэме, нырысьсэ аслэсьтым тусбуйме адӟи, шуыны луоз. Нош макем чебер кырӟало вал соос. Али ке но пель сьӧрам кылӥське Римма Аркадьевна Шкляевалэн, Люция Васильевна Заякиналэн, Лариса Алексеевна Петровалэн куинь куараен кырӟамзы. Студентъёсын ӵош Апполинария Ивановна Поздеева но Глафира Николаевна Никольская дышетӥсьёссы ветлӥзы. Ӵапак со нуналъёсы быдэс школаен "Тарас Шевченко" киное нуизы. Апполинария Ивановна юа мынэсьтым, мынод-а, пе. Нош кытысь ай мынам коньдонэ. Уг, шуисько, коньдонэ ӧвӧл. Со мыным 1 манет сётӥз. Та вал мынам улонам нырысетӥ киное. Нош кошкыкузы со малы ке монэ вешаса кельтӥз, Глафира Николаевна бамам чупаз. Туж ӝог ортчизы со шудо нуналъёмы. Выль ар азьын кельтӥзы милемды югдытӥсьёсмы. Соку та кылэз но уг тодӥськы вал, сюлмыным гинэ шӧдӥ, улонмы умой-умой югыт луиз шуыса. Бӧрдыса келямы соосты. Нош ик пилемъёс согизы шундымес. Туж кема мӧзмыса улӥмы. Удмурт кылмес котьку но яратылӥ, нош студентъёс вуылэм бере эшшо но золгес пыӵаз со улонам. Удмурт кылъя но литературая дышетӥсь луон мылкыды уката юнмаз. Мылкыдыя соку ик дась вал ини институтэ мыныны, но отчы вуытозь, ой, макем кема дышетсконо на. Укмыс ар ортчыса гинэ быдэсмиз малпанэ. Ветлӥсько коридоретӥ. Эх, адӟо на-а меда кудзэ ке со гажано адямиосты? Адӟи ведь! Апполинария Ивановна куратормы луиз. Кыкетӥ курсысен сое воштӥз Иван Васильевич Тараканов. Соку ик пумитай Люция Васильевна Заякинаез, со табере Тараканова луэм ини. Дышетӥсьёслэсь тодон-валанзэс будэтонъя курсъёсы ветлыку, Мария Ермолаевна Ермолаеваез адӟылӥ. Одӥг пол поездын Лидия Васильевна Осотоваен ӵошамы, тодмай. Кылем арын ветлӥ Удмурт кун университетысь удмурт филология факультетлэн юбилеезлы сӥзем ӝытэ. Выльысь чебересь тодэ ваёнъёсы улӟизы. Со вунонтэм кылем студентъёс - дышетӥсьёсмы Удмурт пединститутлэн кылъя но литературая факультетаз 1947 арын кылдытэм нырысетӥ удмурт группа вылэм. Дырыз дыръя ӟеч кидыс куштыса кельтӥзы лулам-вирам. Трос аръёс ортчыса но сюлмысьтым ик бадӟым тау карисько соослы, улонам кысонтэм тылгизьы ӝуатэмзы понна. В. ШИРОБОКОВА, Якшур-Бодья роноын ужась. Шиоссэ лэзе Россиын, гриппен но СПИД-эн курадӟисьёс сяна, трос ни туберкулёзэн висисьёс, гожтэ "Новая газета - Понедельник" газет. Кылем арын та эзель 100 сюрс муртлы паласькиз. Россиысь тазалыкез утёнъя министр Владимир Стародубов ивортӥз, секыт югдурлэсь утиськон понна, Выльдӥськонъя но азинсконъя дуннеысь банке пунэмен коньдон курыса вазиськоно луоз. Со пумысен кенешонъёс мыно ни. Иворъёсъя национальной служба. Спорт Бере уг кылё гурт школаос но... Ижевскын дышетскисьёс пӧлын шахматэн шудонъя Удмуртилэн нюръяськонэз ортчиз. Ӵошатсконэ 150 шахматист пыриськиз. Соос пӧлысь ӝыныез столицаысь спортсменъёс вал. Нырысетӥ тур бере ик висъяськиз кык команда - 30-тӥ школаысь но Удмуртилэн азьвыл чемпионъёсыз Воткинскысь 5-тӥ школаысь дышетскисьёс. Кыкез ик команда огзылэсь огзы бере ӧз кыле. Но берпуметӥ тураз вормисе потӥз Ижевскысь команда. Со 45 луоноез пӧлысь 33 очко люказ. Воткаос соослэсь 1 очколы гинэ бере кылизы. Куинетӥ но ньылетӥ инты басьтӥзы Ижевскысь 86-тӥ но 93-тӥ школаосысь шахматистъёс. Кыкез ик команда быдэн 26 но ӝыны очко люказ. Ӵошатскись командаос пӧлысь 12-ез гурт школаосысь вал. Кылем арын сямен ик асьсэды тужгес но ӟеч возьматӥзы Воткинск ёросысь Июльское гуртысь шахматистъёс. Соос 45 луоноез пӧлысь 26 но ӝыны очко люказы. Та командалэсь 2 очколы бере кылизы Якшур-Бодья ёросысь Селычка посёлокысь шудӥсьёс но Завьял ёросысь Первомайский но Октябрьский посёлокъёсысь огазеям командаос. Та школаосын шахматэн шудонлы дышето Удмуртилэн чемпионъёсыз Любовь Созонова но Нелли Никитина. Шумпотымон соиз, мукетъёсаз но гурт школаосын бадӟым саклык висъяло шахматэн шудонлы. Соин но, вылды, дышетскисьёслэн шудэмзылэн ӟечлыкез трослы вылӥе ӝутскиз. И. ВЕЛЬТМАНДЕР. Быръёнлы, эше, дась лу! Кызьы толон ивортӥз Быръёнъя комиссилэн тӧроез Афанасий Тубылов, 566 мурт вазиськем ни Кун Кенеше депутатэ кандидат луыны соглаш кариськемез сярысь. 208-эз лыдэ басьтэмын (регистрировать каремын). Ижысь 12-тӥ округъя 13 мурт турттэ кужымзэ мертаны. Пичи Пургалась одӥгаз округын 11 адями малпа мандат понна нюръяськыны. Мылкыд карисьёс трос гинэ Балезиноын, Играын, мукет ёросъёсын. Документъёсты (кинюртэмъёсты) комиссиос 4-тӥ мартэ 24 часозь кутозы на. Регистрация кыстӥськоз 9-тӥ мартозь. Отӥяз - быръёнэ меӵак сюрес. Пусйыны кулэ: туала депутатъёс пӧлысь 70-эз ивортӥзы ни, быръёнэ пыриськозы шуыса. Специалистъёслэн чакламзыя, пӧлысьтызы эшшо дасэз-дас витез эскерозы мандат басьтыны. И. КРИЧЕВ. Правительствоысь иворъёс Пичи ужбергатонлы юрттэт Выль ар азьын Павел Вершинин пумиськылӥз пичи предприятиослэн но общественной организациослэн кивалтӥсьёсынызы. Та пумиськонын ужбергатӥсьёслы азьланяз но государство ласянь юрттэт сётон сярысь огкыл кутэмын вал. Правительстволэн Президиумезлэн заседанияз эскеремын но умоен лыдъямын пичи ужбергатонлы юрттонъя но сое азинтонъя план но Удмурт Республикаысь Правительство но ужбергатӥсьёслэн огазеяськонъёссы куспын 1999-тӥ арлы огкыллэн инъетэз. Россия Федерациысь Правительство кылем арын сентябре пичи ужбергатонлы юрттон сярысь постановление кутӥз вал, кудӥз тросэзлы предприятиослы луонлык сётӥз контрольно-кассовой машинаостэк вузкарыны. Президиумлэн кенешаз эскеремын кыдёкысь интыослэн лыдзы, кытын контрольно-кассовой машинаостэк вузкарыны лэземын. Президиумлэн муртъёсыз паймизы сыӵе кыдёкысь интыос пӧлы куд-огез бадӟым гуртъёс сюремлы. Угось татын сюресъёс ӟечесь. Кылсярысь, Завьял ёросын 104 "кыдёкысь" гуртъёс вылэм - республикаын котькытынлэсь трос. Соин валче постановление выльысь эскерыны ыстэмын. Онкоцентр ӧсъёссэ усьтоз Кемалась ик ӧвӧл Правительстволэн Тӧроез Павел Вершинин ветлӥз онкологической центрлэн али лэсьтӥськись ньылетӥ блоказ. Соку вераськизы, 8-тӥ мартозь блокез лэсьтыса вуттозы шуыса. Но со понна лэсьтӥськисьёс 10 миллион манет коньдон куризы. Соин валче коньдон чакламын висъяны Удмуртиысь страхованиея фондысь. Онкоцентрлы оборудование басьтон понна коньдонлэн ог люкетэз ыстэмын ни. Тазалыкез утёнъя учрежденилы азьланяз но юрттыны чакламын. Шаермылэн узырлыкез Куд-ог месторождениосын му вӧй кыскыны луонлык сётонъя аукцион ортчытон пумысен постановление эскеремын. Аукцион ортчоз, Россиысь Инкуазь узырлыкъёсъя министерство та сярысь решение кутэм бере. Правительстволэн Президиумез озьы ик сэрттӥз-пертчиз нефть но газ поттэм понна дунъёслэсь быдӟалазэс. Чакламын сое кылем арын мында ик кельтыны - кыскем му вӧй но газ дунлэн 9,4 процентэз мында. Но та сярысь постановление юнматэмын луоз "Удмурт Республикалэн 1999 арлы бюджетэз сярысь" Законэз кутэм бере гинэ. Удмурт Республикаысь Правительстволэн Тӧроезлэн секретариатысьтыз пресс-центр. Дунъёс пыд йылысь погырто (Улонысь суредъёс) Базарын огназ улӥсь тодмо песянаен пумиськи. Кыдёкысен адӟисько: со каллен гинэ ӵынатэм чорыген вузкарисьёс котыртӥ берга. Огпол ортчиз сопал сэрегтӥ, кык пол - номыре ӧз басьты. Кӧня ке палэнэтӥ калгемез бере, нош ик татчы лыктӥз, выльысь чорыгъёс дортӥ котырскиз. Дораз вуыса, ӟечъяськеме бере юасько: - Мар-о бон, Педосья апай, тон татысь басьтыны турттӥськод? - Басьтысал но... зынъяса гинэ ветлӥсько. Чорыг сиеме олокӧня ар луиз ини, ӵынатэм чорыглэсь зынзэ но вунэтӥ ни вал. Ужан дыръёсам улэмме тодам ваисько. Басьтыны номырин. Тӥни адӟиськоды, ӵынатэм горбушазы килоез 105 манетэн, пе. Мынам сю граммзэ но басьтэме уг луы. Абдралод но, визьтэммод но, сыӵе дунъёсты адӟыса. х х х Коркамы вадьсысь магазин дорын нуналлы быдэ пызен но сахар песокен вузкаро. Мешокъёсын. Кык ар талэсь азьло 50 килограмм пызьлэн но песоклэн дунзы ог-огзылы матын вал, песок кӧня ке дуногес. Огвакытэ 130 манет луылӥз - кыкез но огкадь. Оскытылӥзы: тросэнгес песок поттыны асьмелэн но быгато, луонлыкъёсмы вань. Кунгож сьӧрысь сокем уно ум басьялэ ни, пе. Ортчизы кӧня ке толэзьёс, сахар песоклэн дуныз нуналысь нуналэ йылӥз, кылем арын 17 август бере сӥзьыл ӵоже выжыкылын кадь ӝог дунояз. Али со 50 килограммез 635 манет сылэ. Ужбергатӥсьёс вуззэс пичи мешокъёсын 10 килограммен потто ни: басьяськисьёс медаз кулэсме. Нош пичи мешок али сылэ бадӟымез мында ик - 130 манет. Паймод, ява! Вуз вить пол дунояз, нош ужась адямиослэн но пенсионеръёслэн кисыоссы ӧз зӧкоме, ялан бушало гинэ. Л. ФЁДОРОВ. Дэмен асьмеос улӟытом Россиез, дэмен асьмеос улӟытом Удмуртиез! Матэкто Удмуртиысь Кун Кенеше депутатэ быръёнъёс, ӝоген Кун Думае быръёнъёс ортчозы. Со пумысен ик малпанъёсыным вазиськисько тӥледлы, кин сюлмаське Атыкай музъеммылэн ӵуказе нуналэз сярысь. Тӥляд кадь ик мынам но сюлмы висе Россилэн, асьме шаермылэн - Удмуртилэн - туала но вуоно улонзы понна. Мон умой валасько, вуоноез шонерак герӟаськемын соин, кин странаен но республикаен кивалтоз, кин законъёс кылдытъялоз, кудъёсызъя асьмеос ваньмы уломы. Озьы бере, ваньмыз герӟаськемын асьмемын - кинлы оском вуоноеныз кивалтонэз. Мон оскисько, Россиез но Удмуртиез ӝутыны быгатозы сыӵе кужымъёс, кудъёсыз пуштроссыя пачылмемын шаермес но быдӟым российской калыкмес яратонэн. Соос гинэ дэмен но жадёнэз валатэк тыршыса тупатыны быгатозы асьсэлы гинэ оскись "реформаторъёслэсь" янгышъёссэс, кудъёсыз странамес та секыт югдуре вуттӥзы. Со понна шаерзэс гажась кужымъёс ки улазы басьтыны кулэ законъёсты кылдытонэз. Асьме дорын сыӵе кужымъёс вань. Но вань мукет кужымъёс но, кудъёсыз быдэсъяло асьсэлэсь сьӧд ужзэс: лушкаськыса но странамес лябӟытыса асьсэды узырмыто. Малпаны ик кышкыт, мар луоз Россиен но, Удмуртиен но, соослы сыӵе луонлык сётӥмы ке. Озьы медаз луы шуыса, патриотической кужымъёс огазеяськыны кулэ. Республикалы азинскон понна, пайдаё ужаны кулэ Кун Кенеш, отысь данакез депутатъёс. Кыӵе ке одӥг патриотической движение огназ та ужпумез быдэстыны уз быгаты. Кулэ луоз блок яке огазеяськон, кудӥз пыкъяськоз огкадь быдэстоно ужпумъёс вылэ. Но огазеяськон власть понна гинэ луыны кулэ ӧвӧл, озьы луиз ке, ӟеч малпанъёс понна нюръяськон пуконъёс понна нюръяськонлы пӧрмоз. Мон уно аръёс ӵоже КПСС-лэн радаз вал. Аслам пуш малпанъёсыным, осконэным. Собере странамы понна секыт вакыт вуиз. Та вакытэ мон вань сюлмысьтым ик оскыны кутски алигес кылдытэм "Отечество" общественно-политической организацилэн быдэстоно ужпумъёсызлы, малпанъёсызлы. Солэн азьветлӥсез луэ Юрий Михайлович Лужков, гажано адями. "Отечестволэн" быдэстоно ужпумъёсыз валамонэсь но огшорыесь: кунлык (государственность), ас шаердэ гажан но сое дунъяны дышетон, экономикаез ӝутон. Таӵе быдэстоно ужпумъёс огкадесь луо на КПРФ-лэн малпанъёсыныз. Ӵектэм амалъёс ӧвӧл ке но одӥг кадесь, со озьы умойлы гинэ - самой озьы, ӟечсэ ӵошатыса но бырйыса, ужпумез быдэстыны амал шедьтыны луэ, оскелэ мынам опытэлы. Шумпоттӥз монэ соиз, Геннадий Андреевич Зюганов ыстӥз ӟечкылан кылъёс "Отечестволэн" учредительной съездэзлы. Нош кемалась ик ӧвӧл со коммунистъёслэн нимынызы вазиськиз, движение пала дурбасьтыса. Оло, ачиз улон валэктэ, кытысь утчано аслыд эшъёс странаез утён понна. Бен, котькудӥзлэн вань правоез аслэсьтыз малпанзэ вераны. Но быдэстоно ужлы осконэз пыӵатыны быгатоз сыӵе партия, кудӥзлэн вань огкадь малпанъёсын матысь эшъёсыз, кин сюлмысьтыз быдэстыны тырше аслэсьтыз малпам ужзэ. Мон курисько Удмуртиысь вань патриотъёсыз малпаськыны та пумысен. Валаны кулэ: шаермылы таӵе секыт вакытэ политика удысын мыдланьяськонъёс ӟече уз вуттэ нокыӵе огазеяськонъёсты, азьветлӥсьсы Чубайс яке Гайдар луиз ке но. Туннэ ожын кадь: яке - яке... Озьы бере, патриотъёс огазе луыны кулэ. Нош ӵошен, мон оскисько, асьмеос Удмуртиез но, Россиез но ӝутом! Михаил КАЛАШНИКОВ. "Фелициез" бичалозы Россиын Миым октябрь толэзе Чехиысь правительство умоен лыдъяз Россиын "Фелиция" автомобильёсты бичанъя планэз. "Шкода-Авто" ӵош предприятие кылдытон сярысь документ "Ижмаш Холдинг" фирмаен выль ар кутскон вакытэ гожтэмын вал. Нырысетӥ араз 10 сюрс пала "легковушкаос" лэсьтэмын луозы, бӧрысь та лыдпус 80 сюрсозь вуоз. "Право" газет чакламъя, "Ижмашлэн" одӥгез тодметэз луэ ӟеч ужась кужым, угось вераськон мынэ пыӵал тӥрлык поттонъя тодмо завод сярысь, нош солэн автомобиль лэсьтонъя ёзэз кемалась ик ӧвӧл араз 150 сюрс "Москвич" поттэ вал. Азьвыл СССР-лэн улосвылаз автомобильёссэ поттонэз радъяны "Шкода" кык пол выриз ини - ӧз пӧрмыты. Таяз учыре проект ӟеч дасямын. Кусып но оскымон фирмаен тупатэмын, пусъе "Право". Пумиськонъёс Компартилэн азьветлӥсез Ижевске лыктоз Россиысь Кун Дума ӧтемъя, Москвае алигес вуылӥзы "Коммунисты Удмуртии" фракцилэн кивалтӥсез Александр Бегунов, Эскерон палаталэн председателез Михаил Шишкин. Вераськон мынӥз туала экономической югдурез тупатонъя интыосын луонлыкъёс утчан но ужрадъёс кутон сярысь. Кылзӥзы, ма дэмлало Удмуртиысь учёнойёс-экономистъёс. Ӵапак талэсь азьло республикаямы ортчиз экономистъёслэн конференцизы, отын соос кылдытӥзы асьсэлэсь огазеяськонзэс. Кивалтӥсе бырйизы экономической наукаосъя докторез, профессорез М. И. Шишкинэз. Михаил Иванович Удмуртиын кылдэм югдуръя шуиз: - Мон ноку но ӧй малпа, республикамылэсь экономиказэ выльысь кутскыса ӝутоно луоз на шуыса. Али со бордын ужа вань экономистъёслэн огазеям кужымзы. Кутэм решенимес Москваын умоен лыдъязы. Геннадий Андреевич Зюганов дорамы вуыны кулэ мартлэн шораз, татын со кык нунал ужалоз. КПРФ-лэн кивалтӥсез Удмуртие нырысьсэ лыктэ, Кун Кенешлэн Тӧроез А. А. Волков кык ар талэсь азьло сое ӧтиз ке но вал ини. Геннадий Андреевич пумиськылоз калыкен, ветлоз "Воткинский завод" кун предприятие. Кызьы пусйизы Москвае ветлэм эшъёсмы, Г. А. Зюганов ичи юрттэт уг сёты выль ракетаосты поттон удысын. Россиысь парламентлэн огеныз бадӟым фракциен кивалтӥсьлэн пыр-поч тодэмез потэ быръёнъёс азьын Удмуртиын кылдэм политической югдурез но. - Коммунистъёс пала агитация со уз луы-а? Та юанлы М. И. Шишкин меӵак шуиз: - Мед луоз озьы но. Калык ачиз валалоз кинлы дурбасьтыны, улон асьмеды трослы дышетӥз ни. Л. ДМИТРИЕВА. * Москваын Г. А. Зюгановен пумиськон дыръя. Син палёме Таӵеоссэ тросгес лэсьтыны луоно вылэм, - киыныз йӧтылыса ик эскериз пу бекчеез воргорон. - Ма, пичигес лэсьтӥськон инты висъяд ке, эгесъёссэ но ӟеч-ӟеч юнматъяны луысал, - будэтӥз мукетыз. - Тросэн лэсьтӥд ке, дунтэмгес но усёз, басьтӥсез но шедьысал, - азинто вераськонзэс кык эшъёс. Якшур-Бодьялан улӥсьёс синмасько туннэ шаерысь усточиослэн киужъёссылы. Тани, кылсярысь, пу бекчеос вӧзын ик куиськемъёс, чильпамъёс, нош одӥгаз сэрегын горд сюйлэсь лэсьтэм тусьтыос, горшокъёс. Таоссэ Якшур-Бодьялан тодмало: лэсьтэ соосты татысь ик усточи Анатолий Поторочин, мыло-кыдо выре со пуосты вӧлон-волятон бордын но. Син азьын огшоры пу кислэт чебер арберилы пӧрме. Шелеп пушкысь адске адями яке пудо-живот тусбуй. Соин артэ тырше Сергей Князев, таиз яратэ бадьпулэсь олокыӵе но кулэ арбериос керттыны: чиньы улаз огшоры ньӧръёс пӧрмо нянь возён тэркылы, сяська пуктонъёслы, ӟенелик возёнъёслы, нылпи шудонъёслы. Усточиослэн нырысетӥ ужъёссы возьматъямын ни пӧртэм ёросъёсын, но соослэн ӧй вал на асьсэлэн "дорзы". Кемалась ик ӧвӧл Якшур-Бодьялась кивалтӥсьёс усточиослы висъязы азьвыл библиотекалэсь юртсэ. Отын вань табере пӧртэм-пӧртэм киужен вырыны висъям интыос. Кивалтӥсез Ольга Перевозчикова киужъёсын вырыны нимысьтыз дышетскемын. Ас котыраз люканы малпа быдэс ёросысь усточиосты. Нош адӟем карон понна, алигес ёросысь культура юртэ ваизы быдэс шаерысьтымы устооссэ киужъёсты. Пичи пургаослэн, киясаослэн пужыятэмъёссы, играослэн пулэсь чеберъям вӧшъёссы, бадьпу ньӧллэсь кертэм пуконъёссы но мукетыз амалтэк сюлэме вожъяськон мылкыд кельто. Ма, зэмзэ ик, кутскид ке киуж борды, одно ик маке кулэзэ лэсьтыны пӧрмытод. Огполаз ӧз пӧрмы ке, мукетаз пӧрмоз. Али дышетскы, учкы, - киужъёсты возьматозы быдэс толэзь ӵоже. Нош бекчеос сярысь ке... таӵеезлы кулэяськисьёс уно: губи но, кубиста-кияр но сылалтыны туж ярамонэсь, мусур пӧзьтӥсьёслы но туж кельышлыесь. Оло, зэмзэ ик, бӧрысь Якшур-Бодьялан усточиослэсь адӟем карыса, пичиесь ужбергатон удысъёс но азинскозы. Анатолий Петров. Вузкарон удысын Син азьын возёно Кызьы йылпумъязы кылем арез вузкарисьёс, калыкез сюдӥсьёс но бытовой юрттэт сётӥсьёс? Оглом лыдпусъёс уродэсь ӧвӧл кадь. Нош мургес учконо ке, сомында тырмымтэос но шекъёс пото, оскыны ик уг луы. Данакез соос герӟаськемын дунъёсты юнме шорысь будэтонэн но калыкез пӧяны выронэн. Со бен ваньмыз вузкарисьёс бордысь гинэ уг поты. Тани "Ижмолоко" ушъяно огазеяськонмы, аслэсьтыз улонзэ умоятыны тыршыса, сиён-юонэзлы дунъёссэ ялан йылэтэ. Со гинэ уг тырмыт Чылкыт пудо вӧй поттэм интые, маргаринэн но мукетыныз сурам бутерброд вӧй лэсьтэ, нош дуныз зэмос вӧйлэсь ӧжыт гинэ пичигес. Кызьы сое калыкез пӧянэн уд лыдъя?! Та сярысь вераськон мынӥз Вузкаронъя но бытовой юрттэт сётонъя министерстволэн коллегиезлэн паськытатэм кенешоназ. "Иж" АООТ-лэн кивалтӥсез Валентина Золотухина министерстволэн ужысьтыз уно шекъёссэ шараяз. Со, пе, уг тоды поставщикъёсты, соосъя нокыӵе валэктон сётыны уг быгаты. Дунъёсты нокин тыро-пыдо уг чакла. Одӥг вузкарись но вераны уг быгаты, малы соизлэн яке таизлэн сиён-юонлэн но вузлэн дуныз 4-5 манетлы йылэтэмын. Дунъёсъя кун комитет но палэнын кадь сылэ, ас интызэ со ӧз шедьты на. Удмурт Правительство вузкаронъя кыӵе ке решение кутэ ке, ӵуказеяз ик магазинэ эскерисьёс вуо ни. Нош асьсэос вузкарисьёс со бумагаез чик ӧз адӟылэ, киязы но ӧз кутылэ на. Контролёръёсмы сыӵе чырмыт амалэн утчасько, ужась муртъёслэсь мылкыдзэс куашкато-быдто, пусйиз Золотухина. Секыт югдур кылдэмын калыкез сюдонын, тужгес но школаосын. Тани "Ижобщепит" огазеяськон бадӟым инты висъя дышетскисьёсты сюдонлы. Куинь арзэ со кызьы но озьы мырдэм ужаз ик. Нош али огазеяськонлэн кивалтӥсезлэн Ираида Нарышкиналэн верамезъя, предприятие кулӥсь динозавр кадь луиз ни. - Сиён-юон басьтыны коньдонмы ӧвӧл,- шуэ Ираида Павловна.- Азьло кредит басьтылӥм, табере сое берыктоно, нош уксёмы ӧвӧл. Правительство но министерство уг юртты уд шуы. Но чиданмы быре ни. Дышетскисьёсты сюдон тужгес но урод радъямын Ленин районын. Татын 20 школаын 17 сюрс нылпи дышетске, нош сюдо одӥг витьмоссэ гинэ. Сое но пунэм тыронъёс чотын лэсьто. 3 сюрсэз нылпиос - куанер улӥсь семьяосысь. Соосты гинэ но сюдыны огазеяськонлэн кужымез ӧвӧл. Таосыз вӧзы ватсано на интернатысь нылпиосты. Нош "Ижмолоко" кабзэ сьӧраз ортчем ни, банке коньдон сётэм сярысь бумагая но сиён- юонзэ уг сёты, уксёды, пе, дорамы вуэм бере гинэ продукцимес басьтоды. Табере кин бен оскоз, та АО-ен Кун Кенешлэн депутатэз Геннадий Красноперов кивалтэ шуыса? Али со нош ик дасяське Кун Кенешлэн кыкетӥ созываз депутат луыны. Аслаз бырйисьёсызлы котькуд праздник азьын дунтэмгес вӧй сётъя, газет дунтэк вӧлдэ. Нош кин чотын? Малы тае тодыса вылысь, чик уг эскеры Быръёнъёсъя комиссия но правоосты утись органъёс? Валантэм. Озьы ик трос на тырмымтэос шаерысьтымы рынокъёслэн ужазы. Соос берло дыре чеберско, умойгес ужаны кутско ке но, интыысь но кун бюджетъёсы выт ичи вуэ на, со тросгес кошке нимаз адямиослэн кисыосазы. Кылсярысь, Ижысь Центральной рынокын (Сенной базар) вузкаронэз умоятонъя ӧжыт уг лэсьтӥськы. Весъёс тырмо, адямиослы санитарной дӥсь сёто, вань эскерон весъёс. Али пукто выль вузкарон павильон, лэсьто автомашинаослы сылон инты но мукет. Рынок дасяське туэ гужем 100 ар тырмонзэ пусйыны. Озьы ке но, шуг-секытъёс вань на. Рынокын уг тырмо холодильникъёс но музон тӥрлык. Собере гурт калык но отын тросгес мед вузкарысал, солэсь сиён-юонзэ дунтэм басьтӥсьёс медаз луэ. Рынок вузкарисьёсты утёнъя служба кылдытӥз ке, со йӧскадь мед ужалоз. Но самой кулэез, рыноклэн ужамез бюджетэз тырмытонын мед шӧдӥськоз, отчы уксё тросгес вуыны кулэ. Со ужез кин радъялоз? Куд-огез ӵектэ котькуд рыноклы выт (налог) бичась пост усьтыны, нош мукетъёсыз шуо, со, пе, номыр уз сёты. Но тунаса, инмысь усемез возьмаса улыны уг яра. Калыклы бытовой юрттэт сётӥсьёслэн но сюлэмвисёнъёссы ичи ӧвӧл. Соос выт тырыны пумит ӧвӧл, но бытовикъёс министерстволэсь, Правительстволэсь юрттэт возьмало. Вузкарисьёс ужазы вуж амалъёсты но кутыны кулэ. Кылсярысь, вуз нуллон азьло умой радъямын вал. Сое выльысь улӟытоно. Ижын улӥсьёс озьы ик куро йӧлын но нӧкыен мертаса вузкаронъя магазинъёс яке отделъёс усьтыны. Котькуд районын, пе, сыӵе 2-3 вузкарон инты мед луысал. Соин ӵош ик сиён-юонъёслы дунъёс тэтчаны кулэ ӧвӧл. Али йӧл, сыр заводъёс пӧртэм дунын сырьё басьто. Озьы продукцизы но сыӵе дунын потэ. Умойтэм со. Дунъёсты инмозь вуттӥм ке, асьме доры нош ик кунгож сьӧрысь дунтэмгес но кӧш сиён- юон вуоз. Пичигес карим ке, бускельёсмы вузъёсмес басьтозы-нуозы, магазинъёсмес бушатозы. Нош кылем сӥзьыл мясокомбинатъёс сӥльлы дунэз йылэтыны ӝегаменызы, продукцимы палэнэ кошкиз, переработка тып-тып пуксиз но али но пыд йылазы султыны уг быгато. Озьы луиз Играысь, Воткинскысь мясокомбинатъёсын. Хозяйствоос но адямиос пудозэс Пермь областе вузазы. Соос дорамы улэп уксёен лыктӥзы но сӥльмес нуизы. Азьланьын таӵе учыръёс медаз луэ ни. Соку югдурез тупатонэн ӝегазы Кун Кенеш но Правительство, кулэ ужрадъёс беромыса лэсьтӥзы. Тӥни ужпум со бордын. Но туннэ одӥгез тодмо: музъем ужась но пудо утись урод ке улыны ӧдъяз, ваньмызлы сыӵе ик луоз, магазинъёс но, рынокъёс но бушалозы, номырин вузкарыны луоз. Сое вунэтыны уг яра. Г. РОМАНОВ. Тӥледыз кылзэ Нина Образцова Газетамы ӵем вазиськыло таӵе юанэн: малы "Удмурт дунне" уг радъя телефон пыр меӵак вераськонъёс? Шонер юан. Лыдӟисьёслэсь куронзэс лыдэ басьтыса, ми тазьы кенешим. Ойдолэ ӧтём куное Нина Образцоваез, Алнашысь депутатъёслэн ёрос Советсылэсь тӧрозэ. Нылкышноослэн нуналзы азьын мед вералоз со ачиз, ёросэз, кышномуртлэн шудэз сярысь. Нина Андреевналы юанъёстэс сётыны быгатоды туннэ 15 часысен 17 часозь. Витиськом 444-100 телефонэн жингыртэмдэс. "Удмурт дунне". Тау каро Ижевскысь Буммаш микрорайонын улӥсьёслы 18-тӥ трестысь лэсьтӥськисьёс бадӟым кузьым сётӥзы. Татын вакчи дыр куспын кык этажъем бадӟым вузкарон павильон лэсьтэмын. Матысь улӥсьёс тодо, кызьы зор-кот, лымы улын, кезьыт тӧллы чидаса, вузкарисьёс вазь ӵукнаысен бер ӝытозь ужазы. Табере соос шуныт юртэ пыризы. Вузкаронниез чалякгес вуттон понна сюлмаськизы городысь Индустриальной администрацилэн кивалтӥсез Владимир Клюкин но солэн вузкаронъя воштӥсез Анатолий Дранков. Юрт быдэсак вуэмын ӧвӧл на ке но, солэн кыкетӥ этажаз вузкарисьёс "калъяськизы" ини. Басьтӥськисьёс татчы сюрес лёгизы ни. Татын кызьлэсь трос люкетэз-висэтэз. Сомында ик укноосыз, гумыостӥ шуныт вуэ бызе. Юртын нырысь вузкарисьёс пӧлын егит нылкышноос Елена Куликова, Раиса Ахметшина, Елена Гатиатуллина, Елена Благиных. Соослы вузаськон интызы туж яра, соин лэсьтӥськисьёслы тау каро, мукетъёсыз вузкарисьёс чидатэк возьмало нырысетӥ этажлэсь усьтӥськемзэ. Н. ВОЗИСОВ. Сыӵе милям тодосчимы Кылем арын тодмо советской художниклэн-баталистлэн П. А. Кривоноговлэн вордскем интыяз, Киясовоын, солы сӥзем музей усьтӥськиз. Отын ик мон тодматски суредасьлэн выныныз Александр Кривоноговен. Александр Александрович уно аръёс ӵоже ини Екатеринбургын улэ. Соин вераськыса валай, макем паймымон адями со вылэм. Ноку ӧз вунэтылы пичи родиназэ. Кызетӥ-куамынэтӥ аръёслы сӥзьыса, со "Киясовские были" книга гожтӥз. Алигес мон Екатеринбурге вуылӥ но художниклэн выныныз выльысь пумиськи. Александр Александровичлы 84 арес ини. Кривоноговъёслэн семьязы бадӟым вал, улӥзы куанер. Атайзэс 1919 арын быдто белочехъёс. Семъя кураськыны кылиз. Мон куке-соку Кияса ёросын потӥсь газетлэн редакцияз ужалляй. Но ӧй тодылы, селоын чебер черксы вылэм шуыса. Сое 30-тӥ аръёсы куашкатӥллям. Александр Кривоногов со храмез ӟеч тодэ на. Табере со интыын ёрос администрацилэн юртэз сылэ. Улон секыт ке но вал, Кривоноговъёс тодон-валан басьтон сярысь сюлмаськылӥзы. Саша но дышетскиз Сарапулысь совхоз-техникумын. 1933 ар. Кыдёкысь Алтай. Отын егит агроном ужан сюрессэ мытэ. Но пияшез ялан дор палъёсыз кыскизы. Бертӥз Киясовояз, армие басьтытозязы тыршиз отын. Служить карыны умой сюлмаськиз. Озьы ке но, Сталинлэн палачъёсыз пачкатӥзы Кривоноговез но. 1937-тӥын дас арлы пытсэт сьӧры келязы. Кутсконысеныз пумозяз пуконо луиз. Екатеринбургын поттэмын "Жертвы и палачи" книга. Отын верамын А. А. Кривоногов сярысь. Александр Александрович ноку уг вунэты Удмуртия, вордскем Кияса палъёсыз сярысь, отысь аспал адямиосыз сярысь. Свердловск областьысь репрессиос улэ сюремъёсын ужанъя ассоциациын тыршыкуз, Кривоногов тодматскиз Мария Степановна Гусеваен (ныл фамилиезъя Глухова). Сое 30-тӥ аръёсы татчы Киясово районысь Кумырса гуртысь келяллям вылэм. Пӧртэм архивъёсын ужаса, Кривоногов Киясовоысь газетэ очерк келяз. Со "Кумырсинская правда" нимын потӥз. Кумырса гурт Ермолаево вӧзы интыяськемын. Автор гожтэмаз мадиз та гурт сярысь, отын нырысетӥ улӥсьёслэн Костромитинъёслэн но Краснопёровъёслэн семьяоссы сярысь мадиз. Кумэр бигер сямен эгыр луэ. Нырысетӥ улӥсьёс татын писпулэсь эгыр сутыса улӥллям. Александр Кривоноговлэн киясаосызлы трос гинэ веранэз вань. Мар но со гожтыса но дасямын ни. Ӝоген выль гожъямъёсыз газетъёсын печатласькозы. Сыӵе со землякмы но шаерчи А. А. Кривоногов. В. ЛАГУНОВ. Кин юрттоз?! Пичи дыръяз адямилэн бадӟым луэмез потэ. Нош пересьмиськод но - вань улон ортчем ини. Берыкты вал сое - уг луы ни. Кылё на малпанъёс гинэ. Нош соос пӧлысь тросэз шедьто меда ас интызэс та улонын, нюръясько меда, асьсэлы умой карон понна? Огпол, троллейбусын мыныкум, син азям усиз пичи гинэ мугоро песянай. Усемезлэсь кышкаса, лэся, пал киыныз юн ӟыгыртӥськем кутӥскьон боды борды, нош мукет кияз пичи гинэ сумка. Пыдъёсыз даураз трос гинэ иськем ортчиллям ни, лэся, лябӟиллям. Куке но сӥльвиро, вольыт мугорзэ пересьмон куасьтэм. Озьы ке но, огшоры дӥсез вылаз чебер кылле - таман гинэ. Бездэм кышетэз лач-лач керттэмын. Ымнырзэ нош кисыриос вистэм- вожтэм гожмаллям ини. Нош синъёсаз - синкылиос... Тӥни со шапыкъёс мынам сюлмам легезь вень кадь бышкалскизы, аслам но синкылиосы потӥзы. Кин тон, мусо песянай? Кыӵе кайгыронэд вань мынад? Кытчы нуэ тонэ та сюрес? Ой, мон со доры ӧй мыны, ӧй буйгаты. Мыным возьыт вал. Но пушкам маиз ке но вырӟиз. Со синкылиос узвесь кадь секытэсь потӥзы мыным. Кызьы асьмеос, пиналъёс, пызьыртыны быгатӥськомы на мӧйы муртлэсь лулзэ. Соос бордын ук асьмелэн улонмы, сос асьмемыз вордӥзы но будэтӥзы. Та улонын соос тырмыт синкыли кисьтӥзы ини. Малы та пересь муртлы нокин но инты ӧз дэмла? Лябӟем пыдъёс жадё ук. Оло, сомында калык пӧлысь ноин но ӧз адӟы курыт синкылиосты? Нош ӵемгес озьы каро егит адямиос. Соос ӧз валалэ на жадёнэз. Анай-атай бурд улын, шуныт интыын сооослы умой. Но пересьмон ваньмыз доры вуэ ук... Туж кема малпаськи мон та учыр сярысь. Бен, вань адямиос одӥг кадь ӧвӧл. Пӧламы вань уродэз но, лекез но, востэмез но, шаплыез но. Нош со пересь мурт пушкы ватськемын ӧвӧл меда асьмеос, удмуртъёс? Сыӵе ик губырмим ни, даурен-даруен секыт ужаса. Возьмаськом кинлэсь ке косэмзэ, кивалтэмзэ, но асьмеос секыт, сьд ужын ужаськом. Малпаськом: кин ке жалялоз, юрттоз. Кин? Ӟуч-а? Бигер-а? Асьмемыз асьмеос гажатэк, нокин но уз юртты. Сыӵеесь ни удмуртъёс - востэмесь, пумит уз вазелэ. Кызьы шуо калыкын удмурт, бускеленыз керетӥзы ке, пумит пал кыл но уз вера. Но соизлэн капкаяз ошиськоз, пунэмзэ берыктон пона. Соин но ӧвӧл меда удмуртъёс пӧлын астэ ачид быдтон сомында учыръёс? Оло, со песяй но удмурт вал? Но синкыли солы инты ӧз сёты, сылэмзэ адӟись но ӧз луы. Озьы ик удмуртъёслы но инты нокин но уз дэмла: ӟуч но, бигер но. Со понна нюръяськыны кулэ - вушйылыса кыллёно ӧвӧл. Бигеръёс понна арлыдо адями одӥгез гажамонэз луэ. Солэн верамез шонерен лыдъяське. Нош асьмеос, удмуртъёс, асьме песятайёсмылэн музъем вылазы улыса но сӥмес-данмес ум валаське... Ирина Конькина, Удмурт кун университетын дышетскись. Удмурт Республикаын югдур сярысь Удмурт Республикаысь Кун Кенешлэн 25-тӥ сессияз Удмурт Республикаысь Кун кенешлэн Тӧроезлэн А. А. Волковлэн докладэз И Экономика: огъя йылпумъянъёс но азьпала сюресъёсты адӟон - 1 - Кун Кенешлэн гажано депутатъёсыз, Правительстволэн гажано членъёсыз, гажано ӧтем эшъёс! Удмурт Республикалэн Конституцияз тупатэмъя сётӥсько республикаын югдур но вылӥ кивалтӥсьлэсь полномочиоссэ аслам кызьы быдэсъяме сярысь арлы быдэ лэсьтоно докладме. Удмурт Республикаын улон-вылон но экономика удысъёсъя югдур трос ласянь герӟаськемын быдэс Россиын 1998 арын мартэ но августэ луэм огъя кризисъёсын. Политика ласянь со кризисъёс пуромизы кунлэн, нырысь ик, быдэсъясь властьлэн оглом лябомеменыз, котькытын ик солы оскон но сое гажан кулэсмемен сэрен. Воштӥськонъёсты радтэм ортчытъян идеология но политика странаез вуттӥз куашкан гож дорозь. Паськыта пумитъяськон. Адямиослэн улон-вылонын пӧртэм сӥослы висъяськемзы сокем муромиз - быдэс обществолы, страналы кышкытлык кылдӥз. Ялан куашка производство. Чутрак сюбегаз асьме странаын рынок. Страналэн сьӧрло тыронъёсыз лыдъяны луонтэм йылӥзы. Кун Кенешлэн ужамезлы йылпумъянъёс лэсьтыса, асьме пӧлысь котькудӥз туннэ малпаське: "Ваньзэ-а лэсьтӥмы асьмеос, странаын кылдэм югдурез тупатон понна? Макем пайдаё вал асьмелэн ужаммы? Та юанъёслы валэктыса, мон шуо: Кун Кенеш шонер сюрестӥ мынӥз, кытӥяз вуонозэ азьпалтыса но. Со сюреслэн валтӥсь ӧръёсыз: кун властьлэсь ёзъёссэ юнматон, законъёсты но право радлыкез юн быдэсъян; асьме ваньбур поттӥсьёслы умоесьгес луонлыкъёс сётон; калык сярысь сюлмаськыса, правоя инъетъёс кылдытон. - 2 - Федерацилэн мукет субъектъёсыз сямен ик Удмуртия но ас вылаз быдэсак чидаз кризислэсь бервылъёссэ. Озьы ке но, ньыль ар куспын асьмеос Россиысь промышленностьлэн ваньбур поттоназ аслюкетмес ӧм кулэстэ, отын асьмелэсь интымес кӧнялы ке юнматӥмы но. Кылем арын быгатӥм промышленностьын ваньбур поттонлэсь синонзэ, оглом Россиын сярысь, ичигес возьыны: Россиын - вить но ӝыны процентлы кулэсмиз ке, асьмелэн - кык процентлы. Экономикаез азинтонъя республикамы 1994-тӥ арын 32-тӥ интыын вал ке, 1996-тӥ арын 26-тӥе потӥз, нош социальной удысъёсын - 45-тӥысен 39-тӥ интые выжиз. Промышленностьлэн куать удысъёсыз 1997-тӥ арын сярысь тросгес ваньбур поттӥзы. Сиён-юон поттонъя али асьмеос Россиын 17-тӥ интыез басьтӥськом, нош Урал котырысь экономикая улосын - нырысетӥ интыез. Данак пайдаё контрактъёс гожтыса йылӥз ож тӥрлык поттон. ВПК-лэн предприятиосаз рос-просгес кутскизы граждан удысъёслы выль пумо продукция поттонэ выжыны. 1994-тӥ арын 9 пумо гинэ выль арбериос кылдытэмын вал ке, 1998-тӥ арын тросэн поттыны кутскемын ни 41 пумооссэ. Та ласянь азьпалан мыно "Воткинский завод", "Ижевский электромеханический завод" кун предприятиос, "Чепецкий механический завод", "Свет", "Буммаш", "Ижнефтемаш", "Инвис", "Сактон" акционеръёслэн огазеяськонъёссы. Воткинскысь завод вакчи дыр куспын лэсьтыны кутскиз но му вӧй но газ поттӥсь компаниослы сётэ сюлэсь ятыр пумо оборудование. "ЧМЗ", "Аксион-холдинг", "Ижсталь", "Ижевский радиозавод" акционеръёслэн огазеяськонъёссылы, "Воткинский завод" кун предприятилы сётэмын предприятилэн ӟечлыкъя системаез дуннеысь стандартъёслы тупам сярысь калык-куспо сертификат, нош Чепец механической заводлы - Россия Федерациысь Правительстволэн ӟечлык понна премиез. Экономика ласянь секыт югдурысь потыны кутске "Ижмаш" АО. Милям бадӟым осконмы вань "Шкода-Фольксваген" фирмаос но асьмелэн автозаводмы куспын тупанкылэз уж вылын быдэстонлы. Азинскизы сьӧрлось кунъёсын экономика удысын кусыпъёсмы. Матысь но кыдёкысь кунъёсы али келяськомы вань поттэм продукцимылэсь ог куиньмос люкетсэ. 1995-тӥ арен ӵошатыса, сьӧрло вузанмы 25 процентлы йылӥз. Соиз но умой: сьӧрлось басьтэм вузъёс пӧлын машинаослэн но оборудованилэн люкетсы 8,2 процентысен 16 процентозь будӥз. Юн басьтӥськыса, асьмеос быгатӥм лэсьтӥськон комплекслэсь кужымзэ утьыны. Республикаямы ньыль ар куспын уже сётэмын оглом 964 километр кузьда газ гумыос, 500 километрлэсь ятыр чурыт шобыртэм автомобиль сюресъёс, 41 школа, 7 больница, 11 поликлиника, покчи нылпиослы 13 учреждение, культурая 8 клуб но юрт. Арлы быдэ тросгес улон коркаос лэсьто адямиос ас коньдонэнызы но кужыменызы, тросгес квартираосы но коркаосы газ пыртэмын. Жаляса верано луэ, туж каллен кылдытӥсько агропромышленной комплекслы рос-прос ужаны луонлыкъёс. Данакез хозяйствоос кекатэмын тырмымтэ коньдон кыӵесэн. Оглом, вань пумо гурт хозяйствоослэн поттэм продукцизы, ӵошатэм дунъёсын лыдъяса, 1998-тӥ арын, валля арын поттэмен ӵошатыса, 93,8 процент гинэ луиз. Озьы ке но, тросгес люкамын картофка (4,3 процентлы), етӥн мертчан (51,9 процентлы), сӥль (5,3 процентлы), йӧл (6,0 процентлы), курег пуз (1,7 процентлы). Ваньмаз ёросъёсын шорлыдын котькуд скаллэсь тросгес йӧл кыскемын, 1997 арен ӵошатыса, со 112 процент вал. Республикаын улӥсь котькуд адямилы шорлыдын кӧня сӥль, йӧл, курег пуз поттэмъя республикамы Россиын нырысетӥ кызь улосъёс пӧлы пыриз, нош Урал котырысь экономикая улосын - нырысетӥосыз пӧлы. Берло куинь аръёсы умоя ни демография ласянь югдур. Ньыль ар куспын калыклэн лыдыз 2,5 поллы ӧжытгес кулэсмиз, нош Россиын оглом - 1,3 поллы. Юнманы ӧдъязы семьяос: котькуд 100 кузпалъяськонлы лыдъяса, люкиськон учыръёс 55-ысен 46-ёзь кулэсмизы. Кун властья но интыын аскивалтонъя органъёс дыраз ужрадъёс кутэмен, кылем арын инфляция, оглом Россиын сярысь, калленгес будӥз (республикаямы - 164 но Россиын - 177 процент). Урал котырысь сизьым улосъёслэн шоркаръёссы пӧлысь Ижевскын 25 пумо сиён-юон пӧлысь дасэзлэн дунъёс кылем арлэн пумаз самой улӥын вал, но калыклы улон- вылонын юрттэт сётон ужъёслы дунъёслэн ӝутсконзы ласянь асьмеос Россия Федерацилэн субъектъёсыз пӧлын 67-тӥ интыын луиськом. - 3 - Кӧня ке умоесь воштӥськонъёсты ӵушыса быдтӥзы августэ пуштэм кризислэн бервылъёсыз. Данакез калык номыр карыны ӧз быгаты сыӵе шугадӟонъёслы пумит, кыӵе луоз уждун, пенсиос, нылпиослы пособиос тыронэз ӝегатон, вузъёслы дунъёсты будэтон. - Шуг-секытъёсты уката муромытӥз, Удмурт шаерлэн ож тӥрлык поттон ласянь Россиын нырысетӥ интыын луэмез. Республикаысь промышленностьлэн 80 процент кужымез - ВПК. Ож тӥрлык поттон промышленность куашкамен сэрен, республикаысь промышленностьлэн кужымез али уже кутӥське 35 процентлы гинэ. Конверсияя программа 1996-тӥ арын быдэстэмын вал 5 процентлы гинэ. 1997-тӥ арысен проектъёс дасянлы коньдон висъян дугдӥз. Пердприятиослэсь но улосъёслэсь коньдонзэс уже кутонлы оскизы. Асьмеос одно ик утьыны кулэ ВПК-лэн асьме дорысь предприяиосызлэсь кужымзэс. Та ужпум нимысьтыз лэчыт луоз вуоно быръем Кун Кенеш, выль Правительство понна но. Ичизэ асьме 6-9 предприятиос пыртыны кулэ странаысь оборонно-промышленной комлекслэн выльдэм шоръёзаз. Ож тӥрлык поттон промышленностез выль сямен радъянъя но конверсия ортчытонъя 1998-2000-тӥ аръёслы юнматэм Федеральной программаын чакламъя, сыӵе шоръёзэ пырозы Россиын али ужась 1700 пӧлысь 680 пала предприятиос но организациос. Россия азьын сылӥсь шугесь ужпумъёс луо: химия ож тӥрлыкен складъёсты быдтон, нош странаысь сыӵе ожтӥрлыклэн куиньмос люкетэз люкамын Удмурт шаере; озьы ик Ижевскысь автомобиль лэсьтон заводэз выльдон; пыӵал тӥрлыкъя федеральной научно-производственной центрлэсь луонлыкъёссэ уже кутон, со кылдытэмын "Ижмаш" акционеръёслэн обществоязы. Кун Кенешлэн вань ужам ньыль аръёсыз ӵоже со ужпумъёс син азьын возиськизы, соосты ялан ӝутылӥмы Москваын но, озьы ик Правительстволэн кивалтӥсьёсынызы асьме республикае ветлыкузы пумиськонъёс дыръя. Асьме дорысь химия ож тӥрлыкез утьыса возён интыос пыртэмын "Россия Федерациын химия ож тӥрлыкез быдтон" нимысьтыз Программае. 1996-тӥ арысен кутскыса, ичи ке но коньдон басьтыны луиз Камбаркаын но Кизнерын калыклэн улон-вылонэныз герӟаськем юртъёс пуктон понна. Ужъёсты быдэсъясьёс гызмыльтэмен, Камбарка но Кизнер пыртэмын вал химия ож тӥрлыкез быдтонъя объектъёс лэсьтыны кыкетӥ черодэ гинэ. Россиысь Правительство 1998-тӥ арын Удмурт Республикаез пыртӥз секыт шугадӟонэ шедем, мукет сямен вераса, валтӥсь удысъёсын куашкам производствоен улосъёс пӧлы. Правительстволэн Программаезъя асьме республика Федерацилэн бюджетысьтыз коньдонэн ватсаса юрттэт басьтыны кулэ. Программаос вань. Соос мед гинэ быдэсъяськозы. Гажано депутатъёс! Ар талэсь азьло асьмеос та залын данакез куаразэ сётыса юнматӥмы социальной удысъёсты но экономикаез азинтонъя 1998-тӥ арлы программаез, решение кутӥмы Правительстволэн ужезлы тужгес бадӟым инты басьтӥсь, лыдпусъя дунъет сётон сярысь, со лыдпусъёс азьвыл арынлэсь улӥын медаз луэ шуыса. Жаляса пусъёно луэ, со дас куинь лыдпусъёс пӧлысь дас одӥгезъя Правительство ас азяз сылӥсь ужпумъёсты быдэстыны ӧз быгаты. Уже кутытэк кылиз Федерацилэн бюджетысьтыз суменак коньдон басьтыны луонлык, кудӥз чакламын республикалэсь социальной удысъёссэ но экономиказэ 1997-тӥ-2000-тӥ аръёсы азинтонъя нимысьтыз Программаын пусъем ужрадъёсты быдэсъян понна. 1997-тӥ арын сярысь кык пол ӧжытгес коньдон басьтэмын трансфертъёсъя но бюджетысь ссудаосъя. Правительстволэсь та ласянь ужамзэ умоен лыдъяны туж шуг. ИИ Республикаын общественно-политической улонэз азинтон ужпумъёс, Кун Кенешлэсь законъя кылдытон но эскерон ужъёссэ кужмоятон. -4- Россия Федерация но Удмурт Республика куспын быдэсъяно удысъёсты но полномочиосты люкылонъя Огкылэз та вакытэ но азьланяз улонэ пыӵатон сярысь верано ке, пусйыны кулэ: со юрттэ федерация кусыпъёсты юнматыны. Но жаляса верано луэ, законъёсын ӵапак та ласянь тӧдьы виштыос трос на. 1993-тӥ арын кутэм Конституция тӥяз властьлэсь вылысен улӥе герӟетъёссэ. Гердъёс чигиськылэмын Президент но губернаторъёс куспын, губернаторъёс но интыосысь властьёс куспын. Сыӵе висъяськонъёсты палэнтон вылысь чакламын Президентлэн Федеральной Собранилы "Властьын юн радлык - странаын юн радлык" Вазиськонэз. Нош унояз улосъёсын кун властья органъёс но интыын аскивалтонъя органъёс куспын тупамтэос-ченгешонъёс уг дугдыло. Со возьматэ, ужпум кыӵе ке кивалтӥсьёслэн ваче кусыпъёссы бордын ӧвӧл, зэмос пыдлось мугъёс бордын шуыса. Нырысь ик - Россилэн законъёсаз тырмымтэос. Мукетыз муг - экономикаын шуг-секытъёс. Кун власть люкылыны кулэ республикалэн казнаяз вуись коньдонэз, пайда сётӥсь "доноръёслэн" табышысьтызы ог люкетсэ юрттэт басьтыны кулэяськись улосъёсы сётон вылысь. Асьме дорын со нырысь ик - гурт хозяйство нуись ёросъёслы. Тӥни озьы вераськонъёс пото, республика городэз зӥбе, интыын аскивалтонэз ӝокатэ шуыса, та ласянь уката зол тырше Ижевск городлэн администрациез. Берло дыре Президентлэн Администрацияз, Россия Федерациысь Правительствоын ӵемгес вераськыло, властьлэсь вылӥысен улӥозь, интыын аскивалтонэз но пыртыса, огъя герӟетъёссэ кылдытыны кулэ шуыса. Валамея, та дырозь нуэм политика шоры выль сямен учкон, малпаськон кутскиз ни. Соин валче мыным - вылӥ кивалтонын ужасьлы но Кун Кенешлэн Тӧроезлы пумит туж чурытэсь янгышатонъёс пуктылӥзы Кун Кенеш, Конституциен чакламъя данак куараос сётыса, "Удмурт республикаын кун властья органъёслэн радлыксы сярысь" Закон кутэм понна. Милемды пыкылӥзы, со Законэз кутыса, пе, Россилэн законъёсызлы сяна, Европалэн интыын аскивалтон сярысь Хартиезлы но пумит султӥмы. Кылем арын май толэзе Европалэсь интыын аскивалтон сярысь Хартизэ асьме дорын юнматыны дасяськыку шараяськиз, со азьвыл ӟуч кылэ умойтэм берыктэмын вылэм шуыса. Официальной амалэн меӵак кылысь кылэ шонер берыктэм текст возьматӥз: Хартиын верамын ӧвӧл интыын ас коже кивалтонэз кун властьлэн огъя радлыкезлэсь висъян сярысь, интыын аскивалтон кун властьлэн огъя радлыкезлэн висъянтэм люкетэз луэ, властьлэн вылӥысь ёзъёсыныз солы сётэм полномочисоты ас кожаз быдэсъянын эрикъёс тупатыса. Со гинэ ӧвӧл, властьлэн вылӥысь органъёсыз быгато интыын аскивалтонъя олрганъёслэсь ужъёссэс котькыӵе административной амалъёсын эскерыса возьыны. Кӧня пол ини улон возьматӥз самой шонер судъясь луэмзэ. Со ик возьматӥз асьмелэсь шонер лэсьтэммес. - 5 - Законъёсын шугесь ужпумъёс пӧлы пыртыны кулэ кун асваньбурен кивалтонэз но. Приватизация ортчытэм данакез предприятиос сюризы сыӵе кузёос кие, кудъёсыз ӧз быгатэ но уз быгатэ соосты секыт югдурысь поттыны, соосты пайдаё ужатыны. Кӧняетӥ аре ини ужпум пуктылӥськиз акционеръёслэн огазеяськонъёсазы кунлэн ыстэм адямиосызлэсь ужзэс кужмоятон пумысен, вис карылытэк но умой ужан, бюджетэ, соин герӟаськымтэ фондъёсы ас дыраз коньдон тыронэз радъян вылысь. Акциосын ужанлы юрттон понна мукет амалъёсмы асьмелэн ӧвӧл на. Соин ик кулэ кун асваньбурен, акционеръёслэн компаниосазы кунлэн акциосыныз пайдатэм кивалтэмзы понна кивалтӥсьёслэсь кылзэс уката юнгес юан радлык тупатыны. Асьмеос пумен умойгес валаськомы, приватизациез кызьы ортчытэмез выльысь сэрттыны-пертчыны, пайдатэм ужась предприятиосты, уката ик сыӵеоссэ, кудъёсыз кӧня ке гинэ талэсь азьло бюджетэ трос коньдон тырылӥзы, выльысь кун асваньбуре берыктыны кулэ шуыса. Сыӵе сюрестӥ мыныны кутско ни Москва городын, Свердловск, Саратов областьёсын, Татарстанын но Красноярск крайын. - 6- Гажано депутатъёс! Ортчем ньыль ар вал Удмурт Республикаын кун ласянь эскерон органъёсты кылдытон но юнматон вакыт. Кун Кенешлэн Эскеронъя палатаез ужаны кутскем дырысеныз ортчытӥз ни 50 эскеронъёс, сэрттэмын-пертчемын бюджетысь коньдонэз, бюджетлэсь палэнын луись фондъёслэсь коньдонзэс но кун асваньбурез чаклам, удысъёсы кутонэн герӟаськем 132 ужпумъёс. Сыӵе эскеронъёслы йылпумъянъёсъя 186 ужъёс ыстэмын пӧртэм инстаннциосы. Эскеронъя палата шараяз бюджетысь коньдонэз палэнэ кутэм, бюджетэ налог тыроно бадӟымесь табышъёсты ватыса возем, пенсиос тыронэз юнме ӝегатылэм данак учыръёсты. Эскеронъя палаталэн одӥгез быдэсъяно удысэз луэ Удмурт Республикалэсь коньдон но кредит ужпумъёсын, бюджетъя политикаен герӟаськем законъёсты дасянэ но соослэсь шонер лумзэс эскеронэ пыриськон. Со дасяз Удмурт Республикалэн законъёсызлы кык проектъёсты, сётӥз тужгес кулэ законъёсъя 100-лэсь ятыр заключениос. Эскеронъя палаталэн ужамезлы кулэезъя дунъет сётэмен ӵош вераны кулэ: со ляб эскере на Удмурт Республикалэсь кун асваньбурзэ уже кызьы кутэмез, эскерон ужъёсы ӧжыт кыске вань ёзъёсысь депутатъёсты, ӵем дыръя кужымзэ юн уг возьматы правоез утёнъя но властья мукет органъёсы ыстэм материалъёссэ эскерыку гызмыльтон учыръёс пумысен. Аслэсьтыз ужзэ кужмоятӥз но быдэсъяно удысъёссэ паськытатӥз Эскеронъя кун комитет. Ужаны кутскемез дырысен со ортчытӥз ни 93 эскеронъёс. Шарямын коньдон но хозяйство нуон радлыкез законъёсты тӥян 74 учыръёс. 30 эскеронъёсъя материалъёс йылозяз-пумозяз сэрттон-пертчон вылысь сётэмын правоез утёнъя органъёсы. Кун Кенеш кутскон сётӥз асьме республикаысь гражданъёсты кышкытлыкъёслэсь утён, правоез но законъёсты юн быдэсъян удысын правоя нормативной актъёслэсь огъя системазэс кылдытонлы. Правоез утёнъя органъёсын дасямын но быдэсъяське ни правоез юн быдэсъянъя но экономикаез кышкытлыкъёслэсь утёнъя 1998-тӥ-2000-тӥ аръёслы Правительствоен юнматэм Программа. Ваньмыз со юрттӥз йыртэманъёсты, 1994-тӥ арен ӵошатыса, оглом кӧнялы ке кулэстыны. Ӧжытгес луизы адямиосты юри чакласа виён, укылтэмъяськон, ортчыт вина юон учыръёс, калык тросгес оскыны кутскиз милицилы. Йыртэманъёсты сэрттон-пертчон 56-ысен 71 процентозь ӝутскиз. Но золгес огазеяськыса-радъяса, уката кескичгес но лек амалъёсын йыртэманъёс ӵемгес кутскизы. Йыртэмасьёс уката мургес но чупресгес пырисько экономика но коньдон удысъёсы, выль ӧръёс-сюресъёс шедьто пыӵал тӥрлыкез но наркотикъёсты законэз тӥяса вӧлмытон понна, шумприч выро политикае но власте чуртнаськыны. - 7 - Гажано депутатъёс! Государство бадӟым инты басьтэ обществоын тупаса но солань- талань шонаськонъёстэк улон кылдытонын. Озьы ке но, туж пайдаё ужась кун машина но огназ уз быдэсты троссэ шугесь ужпумъёсты, Кун властья органъёслы кулэ кужмо юрттӥсьёс, сыӵеесь луыны быгато граждан обществолэн ёзъёсыз - общественной огазеяськонъёс, калык пӧлы иворъёс вӧлмытонъя ёзъёс. 1995-тӥ арын "Общественной огазеяськонъёс сярысь" Федерацилэсь Законзэ кутэм бере, асьме республикаын чутрак йылӥзы общественной организациос. Со Законэз кутэмлэсь азьло, 1991-тӥ арысен, Удмурт Республикаысь Юстицияя министерство санэ басьтыса пусйиз вал 118 огазеяськонъёсты, нош 1995-тӥ-1998-тӥ аръёсы - 359-сэ. Кылем аре республикаысьтымы кӧняез ке общественной огазеяськонъёс кун властья органъёсы вазиськизы общественной огазеяськонъёслэсь нырысетӥ Конгрессэс ортчытон но Удмурт Республикаын огъя кенешон ёз луись Общественной палата кылдытон пумысен ӵектонэн. Кун Кенеш та кичӧлтонлы дурбасьтӥз но 1998-тӥ арын 28-тӥ ноябре сыӵе Конгресс ортчытэмын вал. Кун Кенешлэн Тӧроез отын гожтӥськиз Удмурт Республикаысь кун властья но кивалтонъя органъёс, общественной огазеяськонъёс но калык пӧлы иворъёс вӧлмытонъя ёзъёс куспын валче ужан сярысь "Азинскон понна валче ужан" Тупанкыл улэ, кудӥз Удмурт Республикаын Общественной палата кылдытыны инъет луиз. Со али - сюлэсь уно организациосты огазеясь самой бадӟымез ёз. Жаляса верано луэ, та кичӧлтон пала ӧз кариське быдэсъясь кун органъёс. Удмурт Республикаысь Правительство та нуналозь ӧз гожтӥськы на Тупанкыл улэ. Соин сэрен шӧдскымон сюбега Общественной палаталэн ужан удысэз. Кун кенешлэн Президиумезлэн 1997-тӥ арын 9-тӥ октябре кутэм постановлениеныз Кун Кенешлэн Тӧроез борды кылдытэмын Адямилэн правоосызъя комиссия. Оскон-валанъёслы эрик но вӧсьлыкъя огазеяськонъёс сярысь" Федерацилэсь Законзэ уже кутыса, Удмурт Республикаысь Правительство борды кылдытэмын вӧсьлыкъя огазеяськонъёсын ваче кусыпъёс возёнъя Экспертно-консультативной кенеш. Мон туж оскисько, государство но граждан общество куспын валче ужан азьланяз но паськыталоз, республикаысьтымы вань калыклы умой улыны выль амалъёс но выль инъетъёс кылдозы шуыса. ИИИ Социальной удысъёсын политика - 8 - Кун органъёслэн ужазы туж бадӟым удыс луэ калыкез улон-вылонын шугадӟонъёслэсь утён. Та удысэ кылем арын кутэмын 184 миллион манетлэсь ятыр. Удмурт Республикаысь Кун Кенешлэн но Правительстволэн социальной удысъёсын политиказы чакламын, нырысь ик, куанер улӥсь но ужаны быгатӥсьтэм гражданъёслы нимаз-нимаз юрттэт сётон вылысь. Республикаямы кылдытэмын адямиослы улон-вылонъя юрттэт сётонъя данак нимысьтыз учреждениос. Быдэсъясько улон-вылонын шугадӟонъёсы шедем муртъёсты кун ласянь утёнъя но соослы юрттонъя программаос. Соин ӵош ик калыкез улон-вылонын шугадӟонъёслэсь утёнэз радъянын трос на быдэстымтэ ужпумъёс. Быдэсак уже кутыны уг луы на "Ветеранъёс сярысь", "Россия Федерациын инвалидъёсты улон-вылонын утён сярысь" Законъёсты. Пенсиос сярысь законъёсты йылаз-пумаз вуттымтэен, кун пенсиосты тыронэз ӝегатылэмен сэрен, пенсионеръёс тыро-буро улыны уг быгато. 1998-тӥ арын декабре пенсилэн шоро-куспо быдӟалаез 397 манет вал, нош пенсионерлы улыны толэзяз ичизэ 504 манет кулэ. Бюджет чотын улӥсь организацосын ужасьёслэн, нылпиосын семьяослэн но пенсионеръёслэн доходъёссы бере кылё вузъёслы дунъёслэн будэмзылэсь. Калык 1998-тӥ арын декабре, 1997 арын декабрен ӵошатыса, оглом 26 процентлы тросгес коньдон басьтӥз ке, со дыре ик дунъёс ӝутскизы 64 процентлы. Озьыен, зэмос коньдон доходъёс синӥзы но 1998-тӥ арын декабре, солэсь азьвыл арын декабре сярысь, 67 процент гинэ луизы. Трос на уждун но пособие тыронъя пунэме кылёнъёс. 1999-тӥ арын 1-тӥ феврале соос люкаськемын вал 1,7 миллиард манет, нош 1997-тӥ арын та вакытлы кык пол ичигес вал, пенсиос но дыраз тыриськизы. Со ӧвӧл лыдпусъёсты огшоры веран. Со - асьмелэн висёнмы, республикаысь данакез калык сыӵе адӟонэ вуэмен валче. Асьме пӧлысь котькудӥз умой вала, улон-вылонын пайда сётӥсь политика нуон, нырысь ик, кун экономикаез но коньдон удысэз улӟытон-умоятонэн герӟаськемын шуыса. Та туж секыт югдуре асьмеос вераськоно луиськомы социальной удысын политикалэсь правоя инъетъёссэ чутрак воштон пумысен. Правительство дасяны кулэ кун ласянь юрттэт сётонъя сыӵе мертэтъёс-дунъетъёс но амалъёс, соос адямиос понна зэмзэ ик шонер но валамон мед луозы. Юрттэт мед басьтозы соос гинэ, кинъёслы со одно кулэ. Ужаны быгатӥсьтэм гражданъёслы но трос нылпиё семьяослы улон-вылонын юрттэт сётыны кулэ законэн юнматэм социальной стандартъёсъя. Сыӵе закон кутыны кулэ шуыса ваньмызлы валамон. Ӟырдыт югдур кылдэ уже интыян рынокын. Ужтэк кылемъёслэн пусъем лыдзы, 1994-тӥ арен ӵошатыса, 8800 муртлы йылӥз. Асьме предприятиослэн аспӧртэм удысо луэмзы кунлэн соослэсь продукцизэс басьтонэз кулэстэмез уката шуге-леке вуттысалзы ужлы рынокын, асьмеос 1996-тӥ арысен ик ини рос-прос ӧй кутскысалмы ке калыкез уже интыянъя юн политика нуыны. "Удмурт Республикаын калыкез уже интыян сярысь" Законъя Удмурт Республикаысь Правительстволэн Постановлениеныз тупатэмын улон-вылонын ляб утем гражданъёслы 4122 ужан интыос висъяны квота (уже интыямын 4090 мурт). Нимысьтыз саклык висъяське школаын дышетскисьёсты но быдэ вуымтэ нылпиосты уже интыянлы. - 9 - Удмурт Республикаысь Кун Кенешлэн наука, дышетон, культура удысъёслы юрттонъя политикаез но егитъёс пумысен политикаез быдэсъяськиз кутэм законъёс но постановлениос пыр. Та удысъёсъя кутэмын 4 закон но 6 постановление. Удмурт Республикалэн "Калыкез дышетон сярысь" Законэз асьмелы юрттӥз дышетон удысын реформаослэн секыт бервылъёссылэсь - школаосты, профессиослы дасян училищеосты пытсанлэсь утиськыны. Закон луонлык сётэ 1-тӥ классысен 11-тӥ классозь тодон- валанъёслы кун стандартъя дун тырытэк дышетскыны. Солэн пайдаез - егитъёслэн образование басьтыны мылкыдзы ӝутскиз. Республикаысь вузъёсын дышетскись студентъёслэн лыдзы 4 ар куспын одӥг но ӝыны пол йылӥз. Дышетонлэн макем вылӥын луэмезъя асьме республика Россия Федерацилэн субъектъёсыз пӧлын 29-тӥ интыын луэ. "Удмурт Республикаын егитъёсъя кун политика сярысь", "Физической культура но спорт сярысь" Законъёс юртто егитъёсты уже интыян, соослэсь профессиоссэс ӝутон ужпумъёсты рос-прос быдэсъяны. Коньдон ласянь шуг-секытъёс трос ке но, асьмеос кун юрттэт сётылӥм тужгес бадӟымесь быгатонлыкъёсын дышетскись нылпиослы, егит талантъёслы, озьы ик наука но искусство удысъёсын тужгес усто ужасьёслы. Озьы ке но, социальной удысъёсын югдур секыт на. Ялан трос на уждун но книгаос поттэм но коммунальной ужъёс понна быдэстытэк кылем тыронъёс, вужмо но куашкало дышетон юртъёс но тӥрлыкъёс. Уката лэчыт луэ анай-атайтэк кылем нылпиослы интернатъёсты, нимысьтыз школаосты выльдон но мукет сямен радъян ужпум. - 10 - Коньдон тырмымтэен, уката бадӟымесь шуг-секытъёс кылдӥзы тазалыкез утёнъя учреждениосын. Республикалэн бюджетысьтыз ӝыныез пала коньдон социальной кулэяськонъёсы кутӥське ке но, пумен шуггес луэ калыклэсь дунтэк, ваньмызлы огкадь эмъяськыны правозэ котыр ласянь пумозяз быдэсъяны. Пумен тросгес нылпиос висё но куло. Паськыт вӧлмемын паласькись висёнъёс. Ужаны секыт югдур кылдэм вакытэ но быгатӥмы эмъянниосты, кадръёсты, тырмыт но ӟеч эмъян юрттэт сётонэз утьыны. Матысь дыре пумиталозы нырысетӥоссэ висисьёсты Ижевск городысь висёнъёсты шараян-тодонъя но пыктосъёслэсь эмъянъя туала куронъёслы тупась выль центръёс. Ужрадъёс ортчытъяськизы но ортчытъясько, висись муртъёсты эскеронъя но эмъянъя выль, уката пайдаёгес амалъёсты уже кутон понна. Нырысетӥ интыосы пуктӥсько анайёслэсь но нылпиослэсь тазалыксэс утён, улон-вылонын тужгес шӧдӥськись но паласькись висёнъёс паськыт вӧлмонэз алон, ӝог но ӝегатскытэк одно юрттэт сётон, калыклэсь тазалыксэ утёнын ужасьёслы улон-вылонын юрттон. Лидия Чернова Одӥгнам туннэ Пумитай тонэ Куар усён вакыт. Зарниям дунне Бергаз туж лэйкыт. Шудолэсь шудо Соку вал, дыр, мон! Зэм но, вал бурдо - Аслым паймымон. Та йӧнтэм шудэ Ӝамдэлы вылэм: Пужмерам лудэ Нуэмын тӧлэн. Мон ыштӥ тонэ, Весяклы ыштӥ. Одӥгнам туннэ - Тӧл шорын юздӥ. Зарниям сӥзьыл Пурысьта, бездэ. Писпу куар зыл-зыл Му вылэ выдэ... *** Зоя Трухина Аслаз шӧмлыкез... Пинал дауре Номырин басьтонтэм, Котьмалэсь но Дуно со, дуно со! Соин шат, соин шат Али но эше Улэ сюлэмам - Туж пыдлон со... Ӝыны даурлэн Вань аслаз шӧмлыкез Уно аръёсын Шутэмын со. Пинал йӧлпыдлэн но Аслаз ческытэз, Чырсам шукылэн но Аслаз кужымез... Зоя Лекомцева Уй. Пеймыт. Ӝожомем егит ныл Весь вите яратон туганзэ. Нош соиз куаразэ, дыр, уг кыл - Ныл ялан ӵушылэ синвузэ. Тыр толэзь уяса пеймытын, Буйгатэ нылашлэсь сюлэмзэ. Тодысал ке, кытын туганэз, Тугасал, дыр, али йырсизэ. Кизили, лыз инмысь васькыса, Йӧтскысал нылашлэн гадь бордаз. Бамысьтыз синвузэ ӵушыса, Чупасал льӧль-ӵыжыт ымдураз. ... Пеймыт уй, жаляса нылашез, Туганзэ шедьтыны оскытӥз. Маялтӥз шыпытак йырсизэ, Сипыртӥз но... ышиз. Надежда Гильманшина Уг оскиськы Монэ дышето, нош мон уг валаськы, Мыным валэкто, нош мон уг кылзӥськы, Монэ тышкасько, нош мон уг бӧрдӥськы, Монэ ярато, нош мон уг оскиськы... Верам кылъёстэ пелям уг понӥськы, Ӟырдыт мугордэ бордам уг ӝиптӥськы, Кузьмам сяськадэ киям уг кутӥськы, Ӝутскем мылкыддэ валан уг тыршиськы... Шӧдэ сюлэмы: пӧяськод монэ, Верам кылъёсыд чебер кыл гинэ. "УДМУРТ ДУННЕЛЭН" АЗВЕСЬ КУБОКЕЗ ПОННА Ӧрӟи пиос, бурдо нылъёс Зол-зол бызьылон понна валлэн кадь кужым кулэ, шуо. Кытысь сое шедьтод-люкалод, улонам, ӟеч пушъет пӧлы йӧныен пушнер алям выллем, кудӟытӥсь юонъёс но усыкмытӥсь турынъёс пыӵало ке . Котьма ке но вылэм ай ӧрӟи пиосмы но бурдо нылъёсмы. Шарканын ортчем Ӵошатсконъёсын соос ваньзэс паймытӥзы. Марӟан лымыез бӧрсязы пазяса, пукыӵ ньӧл кадь лобизы. Секыт но кузь сюресэз огшокчемен кадь ортчизы. Кинъёс бен соос? Кыӵе выжыысь? Кыӵе ёросысь? Вае тодматском. Нина Данилова Та нылкышнолэсь нимзэ спортэз яратӥсьёс ӟеч тодо. Дэбес ёросысь Зар.-Медла школаын дышетӥсь тани 20 арзэ ни куас сюресъёс вылын нюръяське. Бен, бен. Огшоры гинэ уг бызьылы. Кужмо нюръяськыса, дораз кыӵе ке медален бертэ. Нылкышнолэсь арессэ уг верало ке но, таизлэсь пусъем потэ. 42 аресъем ветеран шудыса сямен егитъёсты мышказ кельтэ. Та ӵошатсконъёсын но Нинапай нылкышноос пӧлын самой мӧйыез, со дыре ик самой кужмоез, оло, шудоез но вал. Уг ваты, татчы лыктэм со вормон мылкыдын гинэ. - Асме шудоен лыдъясько. Семьяям ваньмыз умой. Картэ уг бызьылы ке но, котыр ласянь мыным юрттэ: ӟеч кылын но, семья, юрт котырын но. 20 аресъем пие, Яр педучилищеез йылпумъяса, школаын ик ужа, физкультурая урокъёсты нуэ. Таиз аслам сюресъёстӥм вамышъя кадь. Нош пичиез, нылы, мукетгес. Таиз кильтыръяськыны яратӥсь. Чебер выросъёсты синйылтэ, кырӟаны-эктыны пишмытэ. Али "Ижевские звёзды" конкурсэ мыныны дасяське. Нош ачим 8 Мартэз поездын пумитало, дыр. Златоустэ Россилэн Кубокез понна ӵошатсконъёсы ӧтемын, Тольяттиын Россиысь ветеранъёс пӧлын 10 но 15 иськемъем сюресъёс вылын азвесь медальёсты утӥ. Кӧня ке ӧй сузьы зарниозь. Оло, Златоустын удалтоз. Коньдонэн юрттӥсь шедьысал ке, дуннелэн чемпионатаз но ветлысал. Екатерина Воронцова Шаркан школаысь дышетӥсь Галина Ивановна Перевозчикова Катяез тол вылтӥ адӟылыны ик уг луы, шуэ, весь кытын ке ӵошатсконын, быдэс Россиез котыръя, пе. - Ӵок ойдо, дышетсконын кизилиос дорозь уг сузьы ке. Спорт удысын кизилиос, оло, азяз усьылозы ай. Дышетскон - секыт уж. Огдыре, кык ныпъетэз вормон - секытлэсь но секыт. Та ненег, ньыкыр-някыр мугоро нылашез уд но малпа, кужмо спортсменка шуыса. Ма бен, 15 аресын спортъя мастере кандидат луыны, Россилэн сборной командаяз шедьыны - таӵеез шер луылэ. Сыӵе шуд усе нуналысь нуналэ, толэзьысь толэзе мугордэ жалятэк ужатыса гинэ. Нош кӧня со дырозь нюлам шапыкъёс васькозы, куддыр курыт синкылиосын сураськыса но. - Бен, луыло мылпотымтэ дыръёс но. Астэ вормыны кулэ. Озьы гинэ бадӟым спортэ вамыштод. Мыным сюрес лёгиз атае. Со ик вал, дыр, нырысетӥ тренере, куас вылэ султытӥсе. Ачим Сюрсовайысь, улӥсько Шарканын, интернатын. Ӝог бызьылыны дышетэ тренере - Олег Орестович. Солэн визь-кенешез юрттэ бызён сюресэз кызьыгес ортчыны: кытыназ тужгес но трос кужым сётоно, кыти ӧжытак шокчыны аслыд сётоно. Мыным удалтӥз, шуыны луоз, старт номерен, бызи Сарапулысь Валентина Новикова бӧрсьы. Огшоры дыръя ми соин эшъёс, нош куас сюрес вылын ог-огмес лёганы тыршиськом. Куддыр вормылэ со, куддыр мон. Туннэ удалтӥз мыным. Николай Батаногов, спортъя мастер Шарканъёс понна Батаногов герой выллем. Сое тодӥсьтэмез ик татын ӧвӧл. Капчи мылкыдо, вазиськись воргоронэз гажало нылпиос но, мӧйыос но. Газетлэн призэз понна ӵошатсконъёсын Николай 4 пол чемпионэ поталляз: 2 пол егит пиос пӧлын, 2 плаз воргоронъёсын нюръяськыса. Табере тани ветеранъёс пӧлын вормиз. Кузьымзэ басьтыкуз (пӧйшуран куасъёс), шудо воргоронлэн чилясь синъёсаз синкыли шапыкъёс быльырскизы. - Ӧй малпалля вормон сярысь. Кужмоосыз пӧлы гинэ шедьыны медӥсько вал. Ма, ӟигары тырмиз бере, тау инмарлы. Собере ачим но юри толалтэ отпуске потӥ, ӵошатсконъёслы дасяськон вылысь. Гуртын улӥсько бере, ваньзэ лэсьтоно луэ. Ужасько водитель луыса. Ужын ик кужым но люкасько. Шутэтсконэ но погылляськыса уг ортчы. Яратӥсько пӧйшураны. Соин ик тӥляд кузьымдылы туж шумпотӥ. (Вералом, кузьым дасямын вал, азьвыл ик Батаноговлэсь лябыт интызэ - пӧйшуран мылкыдзэ - тодыса). Мон яратӥсько гурезё сюресъёсты. Ярын бызьылон интызы ӵошкыт вал - ӧз кельшы. Татын чылкак мукет. Нырысетӥ тубонын ик азям мынӥсь эшме кельтӥ. Соку ини вормон мылкыд каръяськиз. Ӧй янгыша, лэся. - Сиён ласянь уг чакласькиськы, ваньмыз мынэ кадь. Тамак уг кыскиськы. Нош пичияк юон ласянь, уг ваты, жадемме веськатӥсько, но ӵошатсконъёс бере гинэ. Яратӥсько мунчоез. Со но юрттэ. Пӧйшуран юнматэ суй-пыдэз, сюлэмез. Паськыт куас бере султӥськод пластик вылэ но, - тӧл музэн ширтоно, асьсэос нуо кадь. Огазеяськонъёс пртэмесь Берло дыре шаерысьтымы ужаса улӥсьёс, иворъёсты вӧлмытон ёзъёс тунсыкъясько элькунысьтымы "Новая сила" огазеяськонлэн но С. Кириенколэн "Новая Сила" движениезлэн кусыпъёсынызы. Кириенколэсь движенизэ кылдытонъя съезд алигес ортчиз Нижний Новгород городын. Соин валче Удмуртиысь "Новая сила" огазеяськонлэн радъясь комитетэзлэн пресс-службаез таӵе ивортон сётэ. Та вакытэ Удмурт Республикаысь "Новая сила" огазеяськон Кириенколэн "Новая Сила" движениеныз нокыӵе кусып уг возьы. Республикаысьтымы "Новая сила" огазеяськон ужа аслаз гинэ дасям программаезъя. Нош соослэн нимзы огкадь тупаз бере, со уг возьматы на та огазеяськонъёс огинын ужало шуыса. Со дыре ик огазеяськонъёслэн кивалтӥсьёссы азьланяз ӵош ужалозы шуыса оскон вань. "Новая сила" огазеяськонлэн пресс-службаез. ШУНДЫ Дэбесын пиштэ "Тылси" "Шунды" дэменлыклэн тужгес но яркыт сӥез - Дэбесысь "Тылси". Отчы ёросысь егитъёс вить ар талэсь азьвыл огазеяськизы. Арлы быдэ "Тылсие" пырыны мылкыд карисьёслэн лыдзы будэ. Алигес дэбесъёс доры "Шунды" дэменлыкысь азьветлӥсьёс - Мазитова но Прокопьева Татьянаос вуылӥзы. Соос тылсиосты ӟечкылазы но выль малпанъёсынызы, ужъёсынызы тодматӥзы, интыосын ёзъёс кылдытон пумысен валэктонъёс сётӥзы. "Тылсиез" вить ар ӵоже ик пиштытэ мыло-кыдо нылмурт Татьяна Осотова. Ужа со библиотекаын но Егитъёслы уж сётонъя биржаын. Таня татын егитъёслы но, пиналъёслы но адӟем карымон адями, оло, соин ик кыстӥсько соос "Шунды" пала. З. ВАХРУШЕВА. Волковлэн докладэз-2 Кун Кенеш 1998-тӥ арын кутӥз "Россия Федерацилэн гражданъёслэсь тазалыксэс утёнъя законъёсызлэсь инъетъёссэ Удмурт Республикаын уже кутон сярысь" Удмурт Республикалэсь Законзэ, кытын пыр-поч чакламын республикаысь гражданъёслэсь тазалыксэс утёнъя огъя принципъёс. Законэн пусъемын медицина но фармация удысъёсын ужасьёсты улон-вылонын но право ласянь утёнъя ужрадъёс но соослы льготаос. Ортчем дыр ӵоже Удмурт Республикаысь Правительство дасяз но Кун Кенеш юнматӥз "Сакыр диабет", "Вир биопрепаратъёс" республикая нимысьтыз программаосты, юнматыны сётэмын "Вакцинопрофилактика" программа. 1999-тӥ арын бюджетэ пыртэм 12 программаос пӧлысь ньылез луэ тазалыкез утёнъя программа. Чаклам мында эмъян юрттэт сётонъя программа кутэмен валче, тазалыкез утён уже ӝоггес но быдэсак пыӵатоно медициная одно страхованиез, ужасьтэм адямиослы медициная страхованиез но вераса, амбулаториёсын но поликлиникаосын юрттэт сётонэз, кутэм программаын чаклам мында юрттэт сётон гарантиосты быдэстон вылысь. Правительство кулэ эмъян ужъёслы мултэс коньдон быдтонтэм, дунъёсты но тарифъёсты юри будэтыны лэзёнтэм вылысь ужрадъёс кутыны, куд-ог пумо эмъюмъёслы дунъёсты чакласа тупатон радлык дасяны. Республикаын экология ласянь югдур кышкыт на. Али асьмелэн ужало котырысь инкуазьлы кышкытлык кылдытӥсь сюрс кык сюлэсь уно предприятиос. Соин валче одно ик кулэ экологияя туала политика но сое быдэсъян понна пайдаё амалъёс кылдытыны. "Экология удысын правоез тӥям понна административной амалэн кылкутытон сярысь" Удмурт Республикалэсь Законзэ но данак постановлениосты кутон луонлык сётӥзы котырысь инкуазез чакласа возёнъя система кылдытыны. Со законлэн тужгес кулэ люкетэз луэ инкуазез кырсёмытӥсь предприятиосты изъян лэсьтэмзэс берыктытыны праволы тупась амалъёс пусъён. Кун Кенешен умоен лыдъям "Экология-2000" Программаез быдэсъяны 1998-тӥ арын пӧртэм интыосысь вуэм коньдон чотын уже кутэмын 63,5 миллион манет. Коньдон висъямын Ижевскын, Глазовын, Шарканын, Селтаын, Граховоын но мукет интыосын кырсь вуосты чылкытатонъя выль сооружениос пуктыны но азьвылъёссэ выльдыны. Кун Кенешлэн "Экология удысын тодон-валанъёс сётонъя кун политика сярысь", "Химия ож тӥрлыкез быдтон сярысь" Федерацилэсь Законзэ Удмурт Республикаын уже кутонлэн аспӧртэмлыкъёсыз сярысь" 1998-тӥ арын кутэм постановлениосаз пусъемын химия ож тӥрлыкез быдтонъя но соку калыкез кышкытлыкъёслэсь но котырысь инкуазез сӧронлэсь утёнъя ужрадъёс ортчытыны правоя инъетъёс. Социальной удысын шугесь но бадӟымесь ужпумъёс пӧлын одӥгез луэ кулэяськись муртъёслы улон интыос сётон. Коньдон висъян кулэсмемен, 1998-тӥ арын ӧжытгес лэсьтэмын улон коркаос (1997-тӥ арен ӵошатыса, 43 процент гинэ). Республикаысь Правительство бюджетын чаклам мында ӧз сёты калыклы льготаосын кредитъёс, улон коркаос лэсьтон но басьтон понна. Уже быдэсак кутэмын ӧй вал, нимаз адямиослы асьсэос улон коркаос пуктон вылысь, Сбербанкен висъям 50 миллион манет тыр кредитъёс но. Али улон интыоссэс умоятыны кулэясько 70 сюрслэсь уноез семьяос, нош берло ньыль аръёсы республикаямы лэсьтыса вуттэмын 15 сюрс пала гинэ квартираос. Сыӵе югдурез лыдэ басьтыса, Удмурт Республикаысь Кун Кенеш 1998-тӥ арын эскериз но юнматӥз "Улон интыос" 20005-тӥ арозьлы республикая Программаез. Отын чакламын тужгес кулэез - республикаысь калыклы улон интыос сётон, Удмурт Республикалэн улон коркаос лэсьтонэн, жилищно-коммунальной хозяйствоен но улон интыосын рынокен герӟаськем закон кужымен актъёсыныз быдэс система кылдытон. Программа быдэсъяськыны кулэ, та удысэ коньдон висъяны умоесь луонлыкъёс кылдытыса: калыклэсь коньдонзэ но бюджетысь коньдонэз, берыктон но берыктонтэм вылысь чакласа, улон коркаос лэсьтонэ паськыт кутыса (облигациосын заёмъёсты вӧлмытыса, улон интыослы сертификатъёс сётъяса, льготаосын кредитъёс висъяса, со пӧлын ипотекая кредитъёс пыр но). ИВ Удмурт Республикаысь Кун Кенешлэн Тӧроезлэсь полномочиоссэ быдэсъяме сярысь -11- Гажано депутатъёс! Ньыль ар талэсь азьло асьмеос люкаськылӥм асьме парламентлэн нырысетӥ заседанияз. Тырмыт дыр ортчиз ни, асьмелэн умой лэсьтэммы сярысь но, тырмымтэосмы сярысь но туннэ вераськон понна. Тӥледлы ивортӥсько республикаысь вылӥ кивалтӥсьлы Конституциен тупатэм полномочиосты аслам кызьы быдэсъяме сярысь. Вань ортчем ньыль ар ӵоже валтӥсь инты басьтӥз законъёсты дасян но кутон, кудъёсыз чакламын быдэс калык хозяйстволы ужаны луонлыкъёс кылдытон, гражданъёслэсь правооссэс но эрикъёссэс утён, республикамылэн Россия Федерациын тыро-пыдо улонэз понна. Меӵак ачим пыриськыса но мынам кивалтэме улсын ортчытэмын Кун Кенешлэн 24 сессиез. Отын кутэмын 85 закон но 228 постановление. Со сяна, Кун Кенешлэн Президиумезлэн 98 заседанияз кутэмын 626 постановление. Кун Кенешен кутэм вань законъёс но нормативной актъёс пӧлысь 46 процентэз сӥземын экономикаысь ужпумъёсты быдэсъянлы, 39 процентэз - кун властез радъян ужпумъёслы но 15 процентэз - социальной удысъёслэсь ужзэс радъянлы. Со сяна, эскеремын 79 вазиськонъёс, депутатъёслэн курон-юанъёссы но та вакытэ тужгес лэчыт ужпумъёсъя ивортылонъёс. Кун Кенешлэн 24 заседаниез ортчытэмын оглом 102 ужан нуналскын. Котькудаз ужан нуналэ эскеремын но кутэмын шорлыдын 4 документ. Сокем трос лэсьтыны луиз, депутатъёс Кун Кенешлэн заседаниосаз но Кун Кенешлэн аппаратэз законъёслы проектъёс дасян вакытъёсы вань кужымзэс сётыса ужамен. Удмурт Республикалэн Конституциеныз тупатэмъя но республикалэсь кулэяськонъёссэ лыдэ басьтыса, экономика но социальной удысъёсысь ужпумъёсты быдэсъян вылысь, мон ужай сьӧрлось кунъёсын ог-огедлы пайда ваись кусыпъёс тупатон, властьлэн федеральной органъёсыныз но Федерацилэн субъектъёсысьтыз кивалтонъя органъёсын валче ужанэз юнматон бордын. Ваньзэ лэсьтӥ асьме Республикалэн Конституциезъя. Умой йылпумъяськизы Беларусь Республикалэн Президентэныз Александр Лукашенкоен кусыпъёс воземе но ваче вераськонъёсмы. Кылем арын 15-тӥ сентябре Минскын гожтэмын вузкарон но экономика, наука но техника, культура удысъёсын валче ужан сярысь Удмурт Республика но Беларусь Республикаысь Правительство куспын Тупанкыл. Сое улонэ пыӵатыны тыршемез возьматӥзы Беларусьлэн Президентэзлэн бадӟым делегациен асьме республикае ветлэмез но асьме предприятиосын контрактъёс гожтон. Мукет кунъёсысь властья органъёслэн оскем муртъёсыныз но уж-коньдон бергатӥсьёсын вераськонъёс нуыку, мон нырысетӥ интые пуктӥсько асьме предприятиосы коньдон сётӥсьёсты утчанэз, "Ижмашын" автомобильёсты ӵош лэсьтонэз но вераса. Автозаводын кылдэм ужпумъёсты быдэсъян понна гинэ дасямын но кутэмын ни 20-лэсь ятыр решениос самой вылӥын, со пӧлын Россия Федерацилэн Президентэныз но Правительствоен. Собере, Кун Дума кутӥз на "Музъем пушкысь узырлыкъёсты уже кутыны право поттэм продукциез ваче люкылыса сётон сярысь" Федерацилэсь законзэ. Соя право сётӥське, "Нефть- автомобиль" проектэз быдэсъян вылысь, му вӧен узыр 12 интыосты уже кутыны. Кык ар ӵоже рос-прос ужам бере, кылем арын 17-тӥ декабре гожтэмын, "Ижмаш"-"Шкода-Авто", "Фольксваген" концерн пыриськыса, акциосты эркын вузась валче предприятие кылдытон сярысь правительствоос куспын Тупанкыл. Та проектлэсь туж кулэ луэмзэ возьматӥз Россия Федерациысь Правительстволэн Тӧроезлэн нырысетӥ воштӥсезлэн Юрий Маслюковлэн Тупанкыл гожтонэ пыриськемез. Пайдаё ортчизы Италие но Швецие ветлонъёс, отысь уж-коньдон бергатӥсьёсын вузкарон но экономика удысъёсын валче ужан сярысь вераськонъёс. Асьмеос понна тужгес пайдаё луо таӵе удысъёс: улон-вылонын кутӥськись техникаез ӵош поттонэз радъян; химия ож тӥрлыкез быдтон; нюлэс но му вӧй промышленностьын валче ужан. Кутэм тупанкылъёсты азьланяз быдэсъяны луоз, Правительство но со удысъя предприятиос рос-прос но кылкутонзэс валаса ужазы ке. Кун кенешлэн депутатъёсызлэсь косэмъёссэс быдэсъяса, должносте пыреме дырысен ачим азе нырысетӥ ужпум пуктӥ, республикамы азьын сылӥсь ужпумъёсты ӝоггес быдэсъян вылысь, властьлэн федеральной органъёсыныз уртче ужанэз радъяны. Со понна кулэ вал вакчи дыр куспын Федерациысь ёзъёсын кенешонъёс ортчытыны но быдэсъяно удысъёсты но полномочиосты Россия Федерациысь кун властья органъёс но Удмурт Республикаысь кун властья органъёс куспын люкылон сярысь Огкыл, озьы ик нимаз-нимаз удысъёсъя тупанкылъёс гожтыны. Сыӵе Огкыл но тупанкылъёс асьмеос Россилэн улосъёсыз пӧлын нырысетӥосыз луыса гожтӥмы 1995-тӥ арын 17-тӥ октябре. Со документъёс луонлык сётӥзы, Федерацилэн законъёсызъя сярысь, тырмытгес лыдэ басьтыны республикамылэсь аспӧртэмлыкъёссэ. Асьмелэн Огкылмыя Россия Федерациысь Правительство юнматӥз республикамылэсь социальной но экономика удысъёссэ азинтонъя 1997-тӥ-2000-тӥ аръёслы Федерацияя нимысьтыз программаез. Отын чакламын коньдон висъяны. Оглом пусйыны кулэ: со документъёсты улонэ пыӵатыку, асьме республика трос умоезлы дышиз, со опытэз котыр ласянь азинтоно. Со тужгес но кулэ Удмурт Республикаысь Правительстволы кутэм тупанкылъёсты быдэсъян понна. Азьланьтэмын Федерацилэн субъектъёсысьтыз кун властья органъёсын ог-огедлы пайдаё кусыпъёс тупатон бордын ужан. Пайда сёто ни Москваен, Пермь областен, Башкортостанэн, Татарстанэн но Мордовия Республикаен гожтэм тупанкылъёс. Кенешемын Санкт-Петербурген сыӵе тупанкыл гожтон пумысен. Гожтэмын законъёс кылдытон удысын валче ужан сярысь Москва городысь Думаен но Татарстанысь Кун Кенешен тупанкылъёс. Огкылъёс но тупанкылъёс - туала сямъёсъя кариськон ӧвӧл, соос ватсаса кужым сёто асьме экономикаез азинтыны. Правительство со луонлыкъёсты дыраз но юн мылкыдын уже кутыны кулэ. Удмурт Республикалэн Конституциез но, "Удмурт Республикаысь Кун Кенеш сярысь" Закон но тупен-тупен уг пусъё Кун Кенешлэн Тӧроезлэсь хозяйствоя ужпумъёсты быдэсъянын ма лэсьтонзэ. Оло, тырмысал республикалэн нимыныз вераськонъёс нуыны но ужъёсты эскерыса возьыны гинэ. Нош социальной но экономика удысъёсын кылдэм югдур кулэ кариз лэчытэсь, кытӥяз ӝегатыны луонтэм ужпумъёсты быдэсъянэ Тӧролэсь аслэсьтыз меӵак пыриськемзэ. Мыным рос-прос ужано луиз Чепецкой механической заводын кылдэм ужпумъёсты сэрттон- пертчон бордын. Конверсия ортчытэмен валче, та туж бадӟым завод куашканы кутскиз вал ини. Мыным кылдӥз Россия Федерациысь Атом энергетикая министерстволэсь кык заседанизэ Глазове потаса ортчытон пумысен кенешыны. Отчы ветлӥз ачиз министр Виктор Никитович Михайлов. Министерствоын кӧня ке пол кенешонъёс ортчизы, Глазов городысь но Чепецкой механической заводысь кивалтӥсьёс пыриськыса. Собере гожтэмын вал Россия Федерацилэн Президентэзлэн Указэз, юнматэмын цирконий дасян производствоез выльдонъя Программа, сое быдэсъяны государство висъяз ини 63 миллион доллар. Ижевскысь электромеханической заводлэн кивалтӥсьёсыныз ӵош быгатӥм кытчы но кӧня продукция келянэз тупатыны но Россия Федерациысь Обороная министерстволэсь келям продукция понна люкаськем тыронъёссэ басьтыны. Трос тыршоно луиз "Воткинский завод" кун предприятилы выль пумо ракетаослэсь системаос лэсьтыны куронъёс шедьтон понна но Ижевскысь радиозаводлы - спутникъёс пыр кусыпъёс возёнъя системаос дасянъя. Та предприятиосын тужгес вӧсь карись но шугесь вал кадръёсын герӟаськем ужпумъёс. Туннэ вераны быгатӥсько: отчы кивалтӥсьёс шонер быръемын вал. "Росвооружение" кун компаниен ялан кусыпъёс возён юрттӥз асьме предприятиослы кылем арын оглом США-лэн 84 миллион долларез тыр 11 контракт быдэстыны. 1999-тӥ арлы эшшо 10 контракт гожтэмын - оглом США-лэн 200 миллионлэсь ятыр долларез тыр. "Росвооружение" кун компанилэн валтӥсь директорез Григорий Алексеевич Рапота умой вазиськиз мынам туэ мартэ асьме республикае ветлыны ӧтемелы. Пенсиос тырон пумысен республикаямы ӧжыт ӧвӧл кадь сыӵе кун органъёс но кивалтӥсьёс, кудъёсыз кулэ та ужпумез быдэсъяны. Но та ужлэсь туж шуг но шумпотон ваисьтэм луэмзэ валаса, мон та удысэз эскерыса возьыны ачим басьтӥськи. Кылем ар ӵоже толэзьлы быдэ сямен пумиськылӥ Россия Федерациысь Пенсиосъя фондлэн правлениезлэн тӧроеныз Василий Васильевич Барчукен. Трос пол ӝутылӥ та ужпумез гожтыса сётэм вазиськонъёсам но. Тӥни озьы, кылем арын асьме республика басьтӥз 334 миллион манет, со пӧлысь ньылетӥ кварталэ гинэ - 210 миллион манетлэсь ятырзэ. Озьы быгатӥм пенсиос тыронын ӝеганъёсты кык но ӝыны арнялы кулэстыны. Пенсиос тыронъя пунэме кылён быдтэмын ӧвӧл на ке но, республикаямы югдур али, Россилэн данак улосъёсаз сярысь, умойгес. Малпасько, ваньмыз тодазы возё на, макем ӟырдазы вал мылкыдъёс дышетӥсьёслы уждун тырон пумысен, уката ик, Ижевскын но Сарапулын. Россия Федерациысь Правительстволэн Тӧроеныз Евгений Максимович Примаковен мынам пумиськылэме бере, асьме республикае ватсаса выжтэмын вал 20 миллион манет. Тӥни озьы, троссэ секыт ужпумъёсты быдэстыны луиз, властья федеральной органъёслэн кивалтӥсьёсынызы валче пумиськылыса. Мынам соосын ужъя умоесь кусыпъёсы кылдӥзы. Ар ӵоже Москваын вал 100-лэсь трос ужъя пумиськылонъёсы. Асьме республикалы шӧдскымон пайда сётӥзы Россия Федерациысь Правительстволэн Тӧроезлэн нырысетӥ воштӥсезлэн Юрий Маслюковлэн, Россия Федерациысь Центральной банклэн тӧроезлэн республикаямы мынам ӵектэмея ветлэмъёссы. Соку кутэмын вал республикамылэн экономикаяз коньдон висъян но коньдонэн юрттон сярысь тупанкылъёс. -12- Трос тыршоно-сюлмаськоно луиз "Россия Федерацилэн выжы калыкъёс пумысен кун политикаезъя Концепциез быдэсъян амалъёс" Россиын огъя научно-практической конференциез Ижевскын ортчытон понна. Солэн ужаз пыриськизы выжы калыкъёслэн ужпумъёссыя но федерация кусыпъёсъя министр Вячеслав Александрович Михайлов, Федерацияя Кенешысь но Кун Думаысь ыстэм адямиос. Конференция азинтӥз, шуыны луоз, асьме Кун Кенешлэсь но солэн Тӧроезлэсь Удмурт Республикаын выжы калыкъёслэсь кусыпъёссэс радъян политика удысын ужанзэс. Кемалась ик ӧвӧл республикаямы, Удмурт Республикалэн Валтӥсь Законэз - Конституциез сяна, ӧй вал на мукет документъёс, кытын возьматэмын мед луысал выжы калыкъёс пумысен политикаысь ужпумъёс. Табере кутэмын но ужало Республикалэн "Калыкез дышетон сярысь", "Культура сярысь", "Егитъёсъя политика", "Физической культура но спорт сярысь" Законъёсыз. Юнматэмын Удмурт Республикалэн выжы калыкъёс пумысен кун политикаезъя Концепция, кытын тырмыт лыдэ басьтэмын интыысь аспӧртэмлыкъёс. Кун Кенеш дась вал Удмурт Республикаын улӥсь калыкъёслэн кылъёссы сярысь Законэз эскерыны но кутыны. Жаляса верано луэ, Правительство сое эскерыны ӧз сёты. Соин ик законэз кутымтэ понна Кун Кенешлэн Тӧроез янгыш ӧвӧл, кызьы возьматыны туртто общественной организациосысь куд-ог валтӥсь муртъёс. Россия Федерациысь Федеральной Собранилэн Федерацияя Кенешаз ужамме мон лыдъясько асьме республикаысь быръем вылӥ органлэсь косэм ужъёссэ быдэсъянэн но республикамылэсь кулэяськонъёссэ утьыны ватсаса луонлыкен. Соин ик рос-прос пыриськисько Федерацияя Кенешлэн заседаниосаз пуктэм ужпумъёсты эскеронэ но соин ортчытъяськись ужрадъёсы. Мон ӵектӥ вал страналэсь Президентсэ Федерацияя Кенеше ӧтьыны, Россия Федерацилэн Президентэзлэн Вазиськонысьтыз страналэсь экономиказэ 1998-тӥ арын азинтон ужпумъя люкетэз пумысен вераськон-кенешон понна. Та ӵектонэз шонерен лыдъязы Россиысь парламентлэн вылӥ палатаысьтыз эшъёсы. Жаляса верасько, Президент Федерацияя Кенешлэн членъёсыныз пумиськыны дыр ӧз шедьты. Но республикаослэн кивалтӥсьёсынызы кенешон со ортчытӥз. Со кенешонын вераськыкум, мон таӵе куронъёсын вазиськи: Удмурт Республикалы юрттоно "Ижмаш-Фольксваген" проектэз улонэ пыӵатонын, химия ож тӥрлыкез быдтонъя Конвенциез быдэсъянын, Росспецстроез Обороная министерство кие сётэмен валче, лэсьтӥськонъя организациосты ёзнанлэсь- быдтонлэсь утёнын. Со вазиськонъёс пайдатэм ӧз кыле. Мон пыриськи Россиын федерализм ужпумъёсъя но сое азинтонъя Россиын нырысетӥ огъя научно-практической конференцилэн ужаз. Конференцие люкаськемъёс азьын мон верай Россия Кунлэс быдэслыксэ куашкатон кышкытлык вань шуыса асьме Кун Кенешлэсь туж сюлэмшугъяськемзэ. Законъёсын тырмымтэос луэмез пусйыса, мон верай асьме парламентлэсь таӵе малпанзэ: странаямы промышленностез выльысь ӝутыны кулэ, властьлэсь сыӵе радлыксэ тупатоно, кудӥз мед быгатоз социальной но экономика удысъёслэн быдэс инфраструктуразылы тужгес пайдаё ужан понна луонлыкъёс кылдытыны. Со ужпумъёсъя сюлэмшугъяськонъёсмес Федерацияя Кенешлэн мукет членъёсыныз - Свердловск, Пермь но Челябинск областьёслэн кивалтӥсьёсынызы - ӵош верамы Россия Федерацилэн Президентэзлы Б. Н. Ельцинлы меӵак вазиськонамы. Политика, социальной но экономика удысъёсын кылдӥсь югдурез чакласа, кылем арын сентябре мон Россия Федерациысь Федеральной Собранилэн Федерацияя Кенешезлэн но Кун Думаезлэн кивалтӥсьёсызлы таӵе ӵектонъёсын гожтэт ыстӥ: * странаез секыт югдурысь поттонъя Национальной Программа кутоно; * сое кызьы быдэсъян сярысь Россия Федерациысь Правительство ялан но зэм мед ивортылоз; * властьлэн вань вайёсыз куспын политикая Тупанкыл дасяно но кутоно. Со ӵектонъёсты оглом умоен лыдъязы но, соос пыӵало ни Правительстволэн ужаз. Кун Кенешлэн Тӧроез дорын кенешонъёсын эскерылӥм республикаямы улыны-ужаны одно кулэзэ сётонъя бадӟымесь ужпумъёсты. Соку шедьтэмын вал Сарапул городын юртъёсты шунтон но пӧсь ву сётон ласянь туж секыт югдурысь потыны сюресъёс но амалъёс, сэрттэмын- пертчемын вал Балезиноын спиртзавод лэсьтонлы коньдон висъян, кылем арын сентябре манетлэн дуныз чутрак усемен валче, республикаямы тырмыт сиён-юон возён ужпумъёс. -13- Аслам ужам туж кулэен лыдъясько адямиосын синмысь синме вераськонъёсты. Кылем арын гинэ 30 пумиськонъёсы вал промышленной предприятиосысь, дышетон учреждениосысь коллективъёсын, городъёсысь но ёросъёсысь активъёсын. Отын сётэм ӵектонъёсты но верамъёсты лыдъясько мон азе пуктэм куронъёсын но вань луонозэ лэсьтӥсько, соосты быдэстон понна. Республикаын законъёсты юн быдэсъян но юн радлык возён, адямилэсь но быдэс обществолэсь кулэяськонъёссэс утён понна трос лэсьтӥз Удмурт Республикаысь Обществоез кышкытлыкъёслэсь утёнъя кенеш. Сое кылдытыку, трос тэкшеронъёс потӥзы вал, но бӧрысь Россия Федерациысь Безопасностья Кенеш асьмелэсь озьы лэсьтэммес шонерен лыдъяз. Со Кенешлэн люкаськемъёсаз эскеремын республикамы понна туж кулэ актъёс: "Быдэ вуымтэос пӧлын йыртэманъёс но соосты алонъя ужрадъёс сярысь", "Тылпуослэсь утиськон сярысь", "Удмурт Республикалэн улосвылаз пыӵал тӥрлыкъёсты законэн лэзьымтэ амалъёсын вузан-басьтонэз алонъя но дугдытонъя ужрадъёс сярысь" республикалэн законъёсызлы проектъёс. Гражданъёслэсь трос пол вазиськонъёссэс лыдэ басьтыса, мынам ӵектэмея эскеремын вал "Удмурт Республикалэн бюджетаз тросгес коньдон пыртон вылысь, республикаысь сиён-юонэн но арбериосын вузкаронъя рынокъёсын экономика ласянь йыртэманъёслы пумит нюръяськонъя ужрадъёс сярысь" ужпум. Собере потӥз Удмурт Республикаысь Правительстволэн "Удмурт Республикаысь рынокъёсын но вузкарон залъёсын ужез умоятонъя ужрадъёс сярысь" постановлениез. Со кылдытӥз рынокъёсын юн радлык тупатон понна правоя инъет. Рос-просгес кутоно вылэм сыӵе луонлыкез. Республикамы туж бере кыле на экономикаез кышкытлыкъёслэсь утёнъя правовой документъёс дасянын. Законъёс кулэ сиён-юон, иворъёс вӧлмытон, энергетика но мукет удысъёсты кышкытлыкъёслэсь утён ужпумъёсъя. Кун Кенеш ужан вань ньыль ар ӵоже утчамы республикаямы кадръёсъя политикаез умоятон сюресъёс. Кунлыкез азинтон, зэмос туала, шонер рынок кусыпъёс кылдытон герӟаськемын кун но интыосысь органъёсын ужасьёслэн ас удыссэс ӟеч быдэсъяны быгатэменызы но тодэм-валамъёсынызы. Кун Кенешлэн Тӧроез бордысь Кадръёсын ужан политикая кенеш кадръёсъя политикаын тужгес кулэен лыдъяз: азьпала учкыса, кун ласянь радъяно кадръёсты дасянэз, выльысь дышетонэз но квалификацизэс ӝутонэз. Ваньмыз со лыдэ басьтэмын вал Кадръёсын ужан политикая кенешлэн нуналмысь ужаз но. Ми эскеримы таӵе ужпумъёсты: республикаын кадръёсын ужан политикая Концепция сярысь; кун но муниципальной службая Удмурт институт кылдытон сярысь; республикалэн тодон- валанъёслы дышетонъя стандартэз сярысь. Эскеремын должностьёслэн переченьзы, кадръёсты дасянэз, соослэсь квалификацизэс ӝутонэз кызьы радъям, выль резерв дасян сярысь ужпумъёс, кудъёссэ быдэсъяло республикаысь кун властья органъёс. Республикаысь кун службаын вань должностьёсъя кадръёсын ужанэз чот-чот радъяны юрттоз Кун Кенешен кутэм "Удмурт Республикаын кун служба сярысь" Закон. 1998-тӥ ар ӵоже Кун Кенеше вуиз гражданъёслэн 1921 вазиськонзы, со пӧлысь 709 мурт ачиз ветлӥз татчы. Гражданъёслэн данак вазиськонъёсазы верамын асьсэлэн кулэяськонъёсынызы герӟаськем куронъёс. Со возьматэ: улон-вылонын но экономикаын трос на быдэстымтэ ужпумъёс, нош ӵем дыръя интыосын пыр-поч уг эскеро гожтэтъёсты но вазиськонъёсты. Кун Кенеше вазиськыса, адямиос оско, витё, улон-вылонын кылдэм шуг- секытъёсты эскерыку, Кун Кенеш соослы дурбасьтоз шуыса. Данакез вазиськонъёс ӵапак озьы сэрттэмын-пертчемын вал. Республикаысь гражданъёслэсь лулысь-сюлмысь тыршемзэс власть адӟыны но кулэезъя дунъяны кулэ. Соин ик ортчытъяськизы кун наградаосын пусъёнъёс. Шумпотыса пусйыны кулэ: кылем арын 565 асьме гражданлы сётэмын Удмурт Республикалэн дано нимыз. 506 мурт пусъемын Удмурт Республикаысь Кун Кенешлэн Данъян грамотаеныз. Республикамы понна нимысьтыз ӟеч ужъёс лэсьтэмъёслы - искусствоосъя дано ужасьлы Геннадий Алексеевич Корепанов-Камскийлы, "Удмуртнефть" огазеяськонэн кызё арлэсь кема кивалтэм муртлы Валентин Иванович Кудиновлы, Удмуртиысь калык кылбурчилы Олег Алексеевич Поскрёбышевлы сётэмын "Удмурт Республикалэн дано гражданинэз" сӥлы карон дано ним. Али сыӵе нимез нуллэ республикаысьтымы укмыс адями. Россия Федерацилэн Президентэз косэмъя, республикаысьммы 194 адямилы сётэмын Россия Федерацилэн орденъёсыз, медальёсыз но дано нимъёсыз. Тросэз асьме гражданъёс пусъемын "Москвалы тямыс сю витьтон ар тырмемез тодэ ваён" медален. Гажано ӵош ужась эшъёсы! Малпасько, асьмеос пӧлысь котькудӥз ӟеч вала та сессилэсь аспӧртэмлыксэ. Солэн али быдэстоно бадӟым ужез - республикамылэн улоназ тужгес кулэ документъёс кутон: социальной но экономика удысъёсты азинтонъя Программа но Удмурт Республикалэн та арлы бюджетэз сярысь Закон. Но вань на депутатъёслэн та огазеяськемзылэн мукет нимысьтыз тодметэз: асьмеос ортчытӥськом Удмурт Республикаысь Кун Кенешлэн нырысетӥ ӧтчамезлэсь берпуметӥ сессизэ. Мынам малпамея, ужанмес йылпумъян вакытэ асьмеос рос-прос но пайдаё тыршыны кулэ туннэ бадӟым инты басьтӥсь ужпумъёсты быдэстон бордын. Асьме парламентысь группаослэн но фракциослэн политикая валанъёссы-малпанъёссы пӧртэмесь ке но вал, Кун Кенешлэн депутатъёсыз ортчем ньыль ар ӵоже ужазы асьме гражданъёс, асьме калык понна. Ивортон. Лыдӟисьёсмылэн тодазы вайытӥськом: туннэ ӝыт 18 часысен Удмурт филармониын луоз нылкышно кылбурчиослэн но крезьгурчиослэн ӝытсы. Кырӟанъёсты быдэстозы асьсэос гожтсьёс но, тодмо артистъёсмы но. Ӝытэ озьы ик пырисько "катанчиос". ЖУРНАЛИСТЪЁСЫН ПУМИСЬКОНЪЁС Кун Кенешлэн Тӧроезлэн воштӥсез Алексей Геннадьевич Красильников ньыль ар ӵоже син азяз возьыны турттӥз кык комиссиослэсь ужамзэс: огез - Наукая, дышетонъя, культурая но егитъёсын ужан политикая, мукетыз - Улон-вылонэз радъян политикая, ужъя, тазалыкез но инкуазез утёнъя. Та комиссиослэн ужамзылы мон туж умой дунъет сётӥсько, шуиз со. Комиссиослэн ӵектэмзыя, сизьым закон кутэмын. Зэм, малпамын вал тросгес, кызё пала законъёс дасяны. Но кулэлыксыя таосыз но улонамы туж бадӟым инты басьтӥзы. Куд-ог законъёсты Алексей Геннадьевич журналистъёслы выльысь тодаз вайытӥз. Кылсярысь, уже кутон сярысь закон юрттӥз 125 сюрс адямилы уже интыяськыны. Ужтэк кылемъёслы пособилэн быдӟалаез будэтэмын вал вузъёсты йылпумъям но ужтэк пукись егитъёслы но нылпи вайыны дасяськись нылкышноослы. Озьы ик та законъя налогъёсъя льготаос чакламын сыӵе предприятиослы, кудъёсыз уж сётыны быгатозы тэк пукись адямиослы: мумы-бубыостэк кылемъёслы, ӧлексыослы, пытсэт сьӧрысь потэмъёслы. Мукетыз закон герӟаськемын инкуазез кырсёмытэм понна кыл кутытонэн. Куд-огез тазьы малпа: предприятиос йӧскадь уг ужало ни бере, омырмы но чылкытгес луыны кулэ. Но со озьы ӧвӧл, шуиз А. Красильников. 4000 эскерон ортчытэм бере, 6000 пала тырмымтэос шараямын. Штрафъёс чотын бюджетэ 600 сюрс манет коньдон пыртэмын. Таяз созывын ужам депутатъёс школаосты юн утизы нимаз кузёослы вузамлэсь. 1995-тӥ арын сыӵе кышкытлык кылдэмын вал ини. Соин ик туж дыраз кутэмын вал калыкез дышетон сярысь закон. Та законъя но Удмуртилэн Конституциезъя школаын дышетскон дунтэк луыны кулэ. Нош Россия Федерацилэн Конституциезъя дунтэк дышетскон 9 классозь гинэ учкемын вал. - Та законэз кутыса, ми туж шонер лэсьтӥмы, - шуиз А. Красильников. - Кӧня ке дыр ортчыса, Россилэн Конституцияз но ватсанъёс пыртыны быгатӥм. Нылпиос школаын дунтэк дышетскыны кулэ. Мукет регионъёс но милемлы дурбасьтӥзы. Зэм, та ласянь дышетӥсьёсты но, нылпиосты но утимы. Но дышетӥсьёслы уждун тырон ялан висись яраен кыле на. Депутатъёслэн сюлмаськеменызы, ёросъёсысь врачъёслэн шутэтскон дырзы (отпусксы) одӥг арнялы кузьгес каремын вал. Тазалыкез утёнъя законын гуртысь медикъёслы сыӵегес ик льготаос тупатэмын, кыӵеесь со гуртысь дышетӥсьлэн. А. Красильников озьы ик ӟечен пусйиз асьме республикаын вирлэсь биопрепаратъёс поттыны кутскемез. Та уж борды депутатъёс басьтӥськизы вал Кун Кенеше быръемзы бере ик. Зэмзэ ик, Удмуртиын улӥсьёслэн тазалыксылы туж бадӟым кышкытлык ваё лемтэйёс но шыръёс. Висёнъёслэсь утиськон понна одно ик лэсьтоно прививка. Со понна кулэ гаммаглоубулин. Табере республикаямы сое поттон радъямын ни. Выль удысэз кылдытонын трос ужазы Удмурт кун универстет но радиозавод. Т. БАННИКОВА. Умой адямиос Выжыед ке юн... Ува ёросамы адӟем карымон адямиос трос гинэ. Сыӵеос пӧлысь одӥгез, мынам малпамея, Пётр Люкин. Ми палъёсын сое тодӥсьтэмез ӧвӧл, дыр. Дас арлэсь кема ужа ни Пётр Васильевич ёрос газетмылэн редакторез луыса. Маиныз бен кыске бордаз та адями? Люкин потэмын юн выжыысь. Будӥз тодмо дышетӥсьёслэн семьяязы. Анай-атаез али пенсие потыса уло Пислэг гуртын. Соос вань нылпиоссылы пыӵатыны быгатӥзы умой сямъёс. Пӧлысьтызы куинез ужа районамы ик дышетон удысын. Павел Васильевич - Чекан аграрной школалэн директорез. Тодон-валанзэ будэтэ Москваысь аспирантураын. Галина Васильевна кивалтэ Петропавловоысь школаен. Отын ик нылпиосты биологилы дышетэ Елизавета Васильевна. Ваньзы соос - гажано муртъёс. Шонер верало удмуртъёс: кызлэн кускылиез выжыяз ик усе. Инкуазь жалятэк сётэмЛюкинъёслы визьзэ но, чеберзэ но. Лякытэсь, чидасесь, котькинэн огкыл шедьтыны быгатӥсесь соос. Пётр Васильевичлэн матысь эшез - тодмо композитор Пантелей Николаевич Кузнецов, кудӥзлэн нимыныз меӵак герӟаськемын ӟучомыны кутскем ёросамы удмуртлыкез ӝутон. 1992-тӥ арысен Люкин кивалтэ удмурт культурая "Дэмен" обществолэн ёрос ёзэныз. Та ужын кужымзэ жалятэк тыршемзэ адӟыса, ёросысь удмурт калык кыкетӥзэ ини бырйиз Пётр Васильевичез "Удмурт кенешлэн" ёзэзлы тӧрое. Со-а оскон ӧвӧл? Люкинлэн кичӧлтэмезъя ортчытэмын ни трос пӧртэм ужрадъёс. Со ӵем вуылэ хозяйствоосы, школаосы, нылпи садъёсы. Журналист луыса газетын но яркыт возьматэ кылдэм югдурез, ӝутэ секыт ужпумъёсты, сэрттэ-пертче лыдӟисьёслэсь куронъёссэс. П. В. Люкин умой тодэ гурт улонэз. Школаез йылпумъяса, со дышетскиз Ижысь сельхозинститутын. 1976-тӥ арын егит инженерез ыстӥзы вордскем палъёсаз. Ужаз колхозын, "Сельхозтехника" предприятиын. Опыт люказ партилэн райкомаз но. Быгатыса ужась специалистлы ёрос кивалтӥсьёс дэмлазы редакторлэсь ужзэ. Сыӵе адямиослы оскыны луэ. Соос асьмелы туж кулэ. Люция ИВАНОВА, Ува ёросысь Поршур школаысь дышетӥсь. Лул-сюлэм кырӟа ке... Римма Шкляева пинал дырысеныз пӧртэм кырӟан-эктон ансамбльёсы пыриськылӥз, ачиз но соосын кивалтылӥз ке но, ог куать-сизьым ар талэсь азьло юасалзы ке, кырӟан гожъяськод-а шуыса, "мар тӥ, мар тӥ" шуыса пыкиськысал, дыр. Малы ке шуоно, Римма Ивановна быдэс улонзэ сямен тыршиз школаын: огшоры дышетӥсь но, завуч но, директор но вал. Ог ньыльдон аръёс пӧлысь тямыс арзэ гинэ сельсоветлэн кивалтӥсез луыса ужаз. 1994-тӥ арын пенсие потыны арлыдыз вуиз. Вань улонзэ калык пӧлын, кызьы со ачиз шуэ, сурым поттыса ужам-бергам бере, кышномурт чылкак паймиз, могак луиз: табере тазьы гуртын пуконо луоз шат ини, гид, азбар, бакча котырын? Ужась муртлы - уж, визьмо йырлы малпаськон сюре, шуо. Римма Ивановна тазьы вера со вакытэз сярысь: - Як.-Бодья ёросамы соку ӵапак кырӟан гожъясьёслы конкурс ялӥзы. Клубын ужасьмы Михаил Борисович Тронин отын аслэсьтыз кырӟанзэ возьматыны мед юрттом шуыса куриз. Соку мынам но йырам шуккиз: оло, аслэсьтым но кырӟаса утчано. Соку гинэ "Атай оже быриз" нимо кылбур гожтӥ вал. Со сӥземын секыт ыштонэз адӟемелы - анаелэн улонысь кошкемезлы. Анаелы 82 арес вал ини ке но, ваньмыз тодэ лыктӥз: атайтэк будэме, анаелэн 54 ар огназ улэмез. Атаймы оже бырем бере, анае ӧз бызьы ни, милемыз 3 нылпиосыз обидёзы, вӧсь карозы я мар шуыса. Анае шуылоз вал: "Кытын меда тон, Иванэ? Кулэм берам коть пумитало меда тонэ?" Ваньзэ сое сюлэм пыртӥм поттыса, озьы нырысьсэ кылбур гожтӥ, собере крезьгур шедьтӥ. Со кырӟанме возьматӥм ёрос конкурсын, собере - кун конкурсын. Крезьгурез но кылыз мугорез ик, пе, юзыр- кезьыр каре, шуизы. Дыр кема ик ӧз ортчы - Владимир Романовлэн кылбур сборникез ки улам сюриз. Син шорам соку ик йӧтӥзы "Атай" но "Пужъятэм ӵушкон" кылбуръёс. Нош ик атай сярысь, нош ик оже бырем пиос сярысь. Али та кылбурчилэн кылъёсызъя ньыль кырӟанэ вань ни. Ёрос газет бамысь асьме школаысь дышетӥсьлэсь Надежда Гильманшиналэсь Мукшимы сярысь кылбурзэ шедьтӥ. Вордскем гурт, шаер сярысь трос гинэ кырӟанъёс гожтэмын ни. Озьы ке но, малпасько, оло, мыным но гожтыса эскероно? Гожтӥ, возьматӥ - кельшытӥзы, яратӥзы. Табере со милям вордскем дормылы гимн выллем луэ. Ми ёросын пыд улысьтымы нефть потто. Америкаын, пе, ужаны кутскемзылэсь азьвыл со интыысь калыклэсь улон-вылонзэ умоятон сярысь сюлмасько: нянь пыжонъёс, клубъёс, нылпи садъёс пукто. Нош милям озьы ӧй вал. Колхозысь вань егит но шоро-куспо арлыдъем ужасьёсмы нефть поттонэ кошкизы. Куашкан калэ вуим, нош ёсроысь омырмы шокантэм зын луиз. Соин сэрен нефть поттон сярысь лекгес кылбур гожтӥ вал. Кӧня ке улыса, сюлмы небӟиз кадь, "Нефть поттон - данъяськон" шуыса кырӟан гожтӥ. Римма Ивановналэсь кырӟанъёссэ газет-журналъёс поттылыны кутскем бере, кышномуртлэн аслыз, ас быгатонлыкезлы осконэз эшшо но юнмаз. Кырӟанъёсыз трос гинэ люкаськем бере, соосты нимысьтыз книгаен поттыны малпаз. Композитор Николай Шабалин нотаоссэ рос-прос учкыса ортчиз но таӵе дунъет сётӥз: - Крезьгуръёсысьтыз таӵе ик шӧдыны-кылыны луэ удмурт лул-сюлэм жугиськемез. Соос туж матын удмурт калык кырӟанъёслы. Соин ӵош ик висъясько аспӧртэмлыкенызы, уг шӧдӥсько калык кырӟанъёсысь юри басьтыса кутэм гуръёс. Крезьгуръёс кисьтӥськыса кадь кошко, ог-огенызы герӟаськыса, ӟеч кырӟан кылдыто. Зэм верало, адямилэн быгатонлыкез пумтэм, пе. Сое дырыз дыръя шӧдыны, кутыны, азинтыны гинэ кулэ. Шумпотоно Римма Ивановна понна, солы сӥзем потэ: кема-кема аръёс ӵоже мед жингыртозы на крезь сиосыд, калыклы шумпотон но ӟеч мылкыд кузьмаса. Галина Романова. Музъем пашме, торф кылле Балезино ёросысь Карсовай машинно-технологической станция торф поттэ. Но жаляса верано: та туж кулэ органикаез берло аръёсы басьтӥсь уг шедьы. Карсовай вӧзы люкам 3,5 сюрс тонна торфез, вить ар ӵоже юнме кыллем бераз, агрохимикъёс сюрес урдсы киськатӥзы. Сергиноын али но 35 сюрс тонна торфсы гурезьёслы укшась бадӟымесь люкъёсын кылле. Басьтӥсь уг шедьто. Нош отчы понэмын кужым, механизаторъёслы уждун сётэмын. Нокыӵе амал ӧвӧл шат сое вузаны? Луысал ук торфез, пакетъёсы тырыса, Ижевске вайыны но вузаны. Сад-бакча возисьёс помидор уд мерттыны кутско. Соос ик тулыс пал бадӟымесь мешокъёсын басьтысалзы, нош сюрес потэм бере, вузаны луысал быдэс машинаен, сад-бакчаосы вайыса. Бен, Карсовайысь Ижозь матын ӧвӧл, машинаен дуногес ке усёз ворттонэз, утчано чугун сюрес пыр келяса. Озьы Карсовайёслэн юнме кыллись торфсы пайдаё вузлы пӧрмысал, асьсэлы уждун но потысал. Вань ук таӵе мадён: Магомет гурезь доры уг мыны ке, гурезь ачиз лыктэ Магомет доры. П. НИКОЛАЕВ. Удмурт Республикаысь Правительстволэн 1998 арын ужамез но 1999 арлы ужпумъёсыз сярысь (Удмурт Республикаысь Правительстволэн Тӧроезлэн П. Н. Вершининлэн докладэз) Кун Кенешлэн гажано депутатъёсыз! Удмурт Республикаысь Правительстволэн членъёсыз, ӧтем эшъёс! Туала Правительстволэн но депутатъёслэн законэн юнматэм ужан дырзы йылпумъяське. Соин ик туннэ умой луысал ньыль ар ӵоже валче ужаммылы дунъет сётыны, шонер валэктыны, кыӵе кылын - валаса яке валатэк - власть вераське калыкен, быгатэ-а со быдэсъяны выльдӥськонэн но воштӥськонъёсын герӟаськем, экономикаын, коньдон удысын, политикаын секыт югдурен сэрен кылдэм ужпумъёсты. Властьлэн ужаны быгатэмез но адямиослэн кивалтонэ пыриськемзы герӟаськемын кунлыклэн быдэс Федерациын но одӥг улосын азинскеменыз. Ми валаськом, властьлэн пӧртэм ёзъёсыз куспын тэкшеронъёс республикалэсь экономиказэ лябӟыто шуыса. Берло ньыль аръёс капчиесь ӧй вал, малы ке шуоно, республикаын мынӥз властез радъян. Сое ваньмы асьмеос ас выламы шӧдӥмы. Мон али та ужрадлы дунъет сётыны уг малпаськы, но одӥг йылпумъян лэсьто - со ас коже йыре лыктэ. Та ужпум огшоры ӧвӧл, соин ик сое быдэстонын ог-огед азьын кыл кутонъя но ог-огеныд тупанъя, огъя кылэ вуыны кулэ. Асьмеос котькӧня мед йыркуръяськом, калыклы сётэм кылмес быдэстымтэ понна ог-огмес мед пыкылом, тэргаськом, но асьмеос ваньмызлы талы дыраз пум поныны быгатыны кулэ, тупан понна, секыт ужез огъя кужымен быдэсъян понна. Туннэ тросэз законъёс ас дырзэс витё на. Таин валче Удмурт Республикаысь Правительство но интыысь аскивалтонъя ёзъёс берло аръёсы кусыпъёссэс радъяло, бюджетъёс куспын огкылъёс вылэ пыкиськыса. Та огкылъёс пыр республикаысь калык хозяйстволэн удысъёсызлэсь азинскемзэс юн чакланы луонлык кылдэ, вань бюджетъёслэсь доходъёссэс но расходъёссэс эскерыны выль амалъёс шедё, городъёсысь но ёросъёсысь администрациослэн, Правительстволэн кыл кутонзы будэ - нырысь ик уждунэз тыронын но калык хозяйстволэн удысъёсызлы ужаны луонлыкъёс кылдытонын. Бюджетъёслэсь кусыпъёссэс ке басьтоно, Правительство нырысьсэ вань улосъёслы огкадь луонлыкъёс сётӥз, адямилы быдэ быдтэм коньдонлэсь быдӟалазэ лыдэ басьтыса. Та уж азинтэмын луоз. Ми лыдэ басьтӥськом тани мае: республикаын кивалтон уж шоры система шоры кадь учконо. Та вакытэ удысъёсын кивалтон бордысь выжиськом ужъёсын кивалтон борды, кивалтӥсь структураослэсь пайдалыксэс будэтӥськом. Кылсярысь, азьвыл кӧня ке ведомствоос одӥг ужез ик быдэсъяло вал ке, табере котькудӥз ведомстволэн аслаз быдэсъяно удысъёсыз. Таин валче бюджет чотын ужасьёслэн лыдзы 1 сюрс адямилы кулэсмиз. Удмурт Республикалэсь "Удмурт Республикаын кун служба сярысь" Законзэ кутэмен валче, кун службалэсь правоя огъя инъетсэ, кун властьлэсь огъя системазэ кылдытонъя уж мытэмын. Удмурт Республикаысь Правительство кылдытӥз но Кун Кенеше эскерыны келяз "Удмурт Республикаын муниципальной служба сярысь" законлэсь инъетсэ. Оскисько, со али ужась депутатъёсын эскеремын луоз шуыса. Пусйыны кулэ, законъёс йӧскадь луымтэен, уно ёросъёсысь администрациослэн выль быръем кивалтӥсьёссы мукет адямиослэн но асьсэлэн вылтӥяськись сямзылэсь утиськыны ӧз быгатэ. Кылдытоно сыӵе законъёсты, кудъёсыз интыысь властьлы огсыр ужаны луонлык кылдытозы. Жаляса верано луэ, котькудӥз быръён, озьы-а, тазьы-а, но адямиосты люке, нош со шӧдӥське экономикаен кивалтон вылын, куд-ог дыръя ыштӥськом ваньзэ ӟечсэ, вылез сьӧры уиськыса. Асьмеос тодамы возьыны кулэ: объективной мугъёсъя асьмелэн кык яке куинь командалы тырмымон дась кивалтӥсьёсмы ӧвӧл, тужгес но - ёросъёсын. Соин ик туннэ кадръёсты жаляны кулэ. Удмурт Республикаысь Правительстволэн ужаз валтӥсь инты басьтӥз вуз поттӥсьёслы, асваньбурез кызьы кутэмзы шоры учкытэк, ужаны ӟеч луонлыкъёс кылдытон. Правителдьство кылдытӥз но юнматӥз "Удмурт Республикалэн промышленностья системаез но промышленностья политикаез" концепциез, "Удмурт Республикалэн наукая системаез но наукая политикаез солэсь социальной системазэ но экономиказэ выльдон вакытэ" концепция, кутэмын Удмурт Республикалэн "Кунлэн промышленностьын политикаез сярысь" Законэз, кылдытэмын Удмурт Республикалэн экономикаын политикаез сярысь концепция. Юнматэмын Инвестицияя проектъёслэн кун реестрзы сярысь, залогъя фондэз кылдытон сярысь, инвестициосъя проектъёс пумысен конкурс сярысь, займъёсъя но кредитъёсъя гарантиосты сётон сярысь положениос. Юнматэмын му узырлыкъёсты поттонъя куронъёсты эскерон рад, инвестициосын ужанэз ӟечомытыны льготаосты сётон рад. Кунлэн инвестициосын ужан политикаезлэн инъетэз кылдытэмын. Солэн валтӥсь принципъёсыз - кун инвестициосын меӵак кивалтон азинтонъя бюджет пыр, мукет улосъёсысь коньдонэз экономикае кыскыны ӟечесь луонлыкъёс кылдытон, конкурсъёс ортчытъян но курем коньдонэз берыктон. 1996-тӥ арын Правительство, Россиысь но Удмуртиысь Коньдон ужпумъёсъя министерствоос куспын огкыл вылэ пыкиськыса, налогъя инвестиционной кредит басьтыны быгатӥз. Дасямын инвестициосын ужанэз ӟечомытон сярысь, нефть кыскись удыслэн инвестициосъя проектъёсыз сярысь, тужгес кулэ луись объектъёсъя инвестиционной проектъёс сярысь законъёс. Промышленной предприятиослы юрттон понна, ньыль ар ӵоже Россия Федерация висъяз 27 миллион манет, нош Удмурт Республикалэн бюджетэз - 39,4 миллион манет, озьы ик республикалэн бюджетысьтыз кредитъёс но ссудаос висъямын 192,2 миллион манетлы. Берло кык ар ӵоже предприятиос 360 миллион манет тыр кредитъёс басьтӥзы Правительстволэн гарантиосыз улэ. Удмурт Республика пыриськиз 28 федеральной целевой программаез быдэсъянэ. Куинь ар куспын соослы Удмурт Республикалэн но Россия Федерацилэн бюджетъёсысьтызы висъямын 347 миллион манет. Республикалэн коньдонэз чотын куинь ар ӵоже дас вить республиканской программалы 61,68 миллион манет сётэмын. Капчи промышленностьын предприятиослы кредитъёс висъян азьланьтэмын. Республикаысь промышленной предприятиослэн продукцизылэн асдуныз медаз буды шуыса, манетлэн дуныз усён вакытэ но электрокужымлэн дуныз 1996-тӥ арын октябрьысен ӧз вошъяськы, нош 1998-тӥ арын июле солэн дуныз 3 процентлы кулэстэмын вал. Берло аръёсы предприятиослэн 12625 сюрс квадратной метр улон юртъёссы но 471 социально-бытовой объектъёссы сётэмын муниципальной асваньбуре, 1999-тӥ арын гинэ бюджетысь та ужрадлы 572 миллион манет висъямын луоз. Выжтымтэ юртъёсты возёнэ кошкем коньдон арлы быдэ берыктылӥськиз федеральной зачёт пыр. Муниципальной асваньбуре сётымтэ улон юртъёс 3696 квадратной метр кылизы на. Вераны кулэ созэ но: бюджетлэн расходъя люкетаз чакламын жилищно-коммунальной юрттэтъёслэн зэмос дунзы но калыкен соос понна тырем уксё куспын пӧртэмлыксы. Бюджетлэн расходъёсыз пӧлын та пӧртэмлык 30 процент мында люкаське. Татысь пото пособиосты, уждунэз тыронэн герӟаськем шуг-секытъёс. Берло вакытэ экономикалэн кулэяськонъёсыз кун понна кыкетӥ интые потӥзы ке но, Удмуртиысь Правительство обороная промышленностез азинтонъя концепциез кылдытонэ пыриськыны быгатӥз. Му вӧй кыскись удысысь предприятиослы налогъёсъя льготаос сётыса, дугдытэм скважинаосты улӟытыса, быгатӥмы му вӧй кыскемлэсь синэмзэ дугдытыны. Берло аръёсы Удмурт Республикаысь Правительство чурыт куронъёс пуктэ бюджетъёсы налог тыронъя бере кылисьёс азьын, ужа чрезвычайной комиссия. Со вакытэ ик бадӟым уж нуиське пенсиосъя но штрафъёсъя пунэмъёслэсь структуразэс воштон, обороналы быдэстэм заказъёс понна пунэмъёсты берыктон понна. 1998-тӥ арлы йылпумъянъёс лэсьтэмлэсь азьвыл, тодамы ваём, Республикалэсь социальной удыссэ но экономиказэ азинтонъя программа кылдытэмын вал, азьвыл ужаку кылдэм луонлыкъёсмы, Россиысь но Удмуртиысь югдурлэсь азьланяз кызьы азинскыны быгатэмез пумысен малпанъёсты лыдэ басьтыса. Ми валамы, экономикаын кризис эшшо но муромоз шуыса. Но калык хозяйствоез азьланяз кызьы ужатон пумысен малпанъёсмес но Правительстволэсь кризисэн нюръяськонъя программазэ ивортӥмы вить толэзь ӵоже ужамлы йылпумъянъёсъя отчётын но 1998-тӥ арлэн вуоно толэзьёсаз быдэстоно ужпумъёсын. Тӥ тодӥськоды, милям ӵектонъёсмылы Кун Кенеш дурбасьтӥз. Та ужрадъёс юрттӥзы Удмурт Республикалэсь социальной удыссэ но экономиказэ азинтонъя 1998-тӥ арлы программаез куашканлэсь утьыны. Нырысь лыдъямъёсъя, республикаысь промышленность 1998-тӥ арын 17120 миллион манет тыр продукция поттӥз, программаен чакламлэн 99,5 процентэз луэ. Промышленностьын ваньбур поттон 100,1 процентлы йылӥз. Та лыдпусъя асьмеос Урал улосын кыкетӥ инты басьтӥськом. Пияла, эмъюм поттӥсь, пызь, кеньыръёс изӥсь, полиграфической удысъёсын производство арысь аре йылэ. Сиён-юон поттӥсь промышленностьын но республикаысь валтӥсь удысъёсын - машина лэсьтонын но корт арбериос поттонын - производство йылыны кутскиз. Машина лэсьтӥсь но корт арбериос поттӥсь удысъёслы ӟеч ужаны инъет кылдытӥзы "Воткинский завод", "ИЭМЗ" кун предприятиосын ваньбур поттонлэн йылэмез. 1998-тӥ арын быдэс удысын ВПК-е пырись предприятиослэн люкетсы 7 процентлы йылӥз, нош ваньбур поттон - 44 процентлы, 1997-тӥ но 1998-тӥ арын дунъёсты ӵошатоно ке. Тае лыдэ басьтыса, ми быгатӥськом вераны, умой пала воштӥськонъёс вань шуыса, соосты юнматоно но азинтоно. Мукет удысъёсы выжтоно. Валля арынлэсь лябгес ужазы "Ижевский механический завод" кун предприятие, "Редуктор" ОАО, "Завод РТО" ОАО. Азьло сямен ик секыт югдурын "Ижмаш" АО. Предприятилэсь валтӥсь продукцизэ - автомобильёсты но мотоциклъёсты - поттонъя арлы планъёс быдэстэмын 35,6 но 34,9 процентлы. Автомобильёс но мотоциклъёс чакламлэсь куиньмос люкетэз гинэ поттэмын. "Ижмашысь" югдурез ми ялан чакласьком. Кивалтӥсьёслэн туннэ ужамзы оскытэ, предприятие азьланезлы ужпумъёс чаклаз ини шуыса, тужгес но - машина но мотоцикл поттон удысын. Сьӧд металлургиын, эстӥськон поттӥсь промышленностьын, электроэнергетикаын производство котькытынлэсь трослы синӥз. Нош та удысъёс огъя промышленностьын бадӟым инты басьто. Ваньбур поттон синӥз капчи промышленностьын но. Бюджетэн секыт ке но вал, та удысысь предприятиослы юрттон понна, кутэмын республикалэн бюджетысьтыз "Сактон" ЗАО-лы, "Шаркан-трикотаж" АО-лы, "Сарапульский кожкомбинат" АО-лы льготаен кредитъёс висъян сярысь решение. Со сяна, 1998-тӥ арын "Республикалэн бюджетэз сярысь" Законъя Удмурт Республикаысь Правительство промышленной предприятиослы кредитъёсъя поручительствоос пумысен огкыл сярысь постановление кутӥз. Предприятиос 290 миллион манет тыр кредитъёс басьтӥзы Правительстволэн гарантиосыз улэ. Кылем арын Россия Федерациысь Правительство но Удмурт Республикаысь Правительство кунлэн обороная заказэз понна дыраз коньдон тырыны тыршизы. 1997-тӥ арын кун структураослэн пунэмъёссы, огъя производствоен ӵошатыса, 38,6 процент вал. 1998-тӥ арын та лыдпус 26,6 процентозь кулэсмиз. Обороная министерстволэн пунэмъёсыз 59,6 миллион манетлы кулэсмизы, Атомной промышленностья министерстволэн - 43,9 миллион манетлы. Нимысьтыз саклык висъяськиз нефть кыскон удыслы. Кутэмын Удмурт Республикалэн "Удмурт Республикалэн улосвылаз му вӧй кысконъя удыслэсь инвестициосъя проектъёсты быдэсъян сярысь" Законэз, сое азинтыса, Правительстволэн постановлениез юнматӥз му узырлыкъёсты поттонъя куронъёсты эскерон рад. Республикаын 1998-тӥ арын кылдытэмын му вӧй поттонъя кык компания. "Удмуртская нефтяная компания" ОАО вормиз Центральной, Турецкой, Патраковской месторождениосын нефть поттыны право басьтонъя конкурсын, со му вӧй поттӥз ини. Удмурт Республикаысь Правительство, Москваысь Правительство но "Центральная Топливная Компания" ОАО куспын ӵош ужан сярысь огкылъя Правительстволэн постановлениезъя кылдытэмын "Удмуртская национальная нефтяная компания" ОАО. Дугдытэм скважинаосты улӟытон понна, кутэмын аукцион ортчытон сярысь решение. Удмурт Республикаысь Правительстволэн нюлэсъя но пулэсь арбериос лэсьтонъя промышленностьысь предприятиосын ужан политикаез юнматэмын Удмурт Республикалэсь нюлэсъя промышленностезлэсь структуразэ воштонъя 1998-2005 аръёслы программаын, кудӥз кылдытэмын 1998-тӥ арын но та вакытэ Кун Кенеше эскерыны сётэмын. 1996-тӥ арын, Удмурт Республикаын транспорт ӟеч мед ветлоз шуыса, Россия Федерациысь Сюресъёсъя министерстволэн Горький чугун сюресэзлэн управлениез но Удмурт Республикаысь Правительство куспын контракт юнматэмын. Со чаклаз калыкез пригородной поездъёсын нуллыса ваем изъянэз берыктон вылысь коньдон висъяны но Люкшудья но Кильмезь куспын чугун сюресэз тупатъяны. Огъя вераса, 39426,2 миллион манет (выль коньдонэн) висъямын вал. Коньдон тырмыт ӧз висъяськы ке но, со сяна, техника но вужмемын ини ке но, республикаысь ёросъёсын но городъёсын электростанспорт но автомобиль транспорт ужамысь ӧз дугдэ. Республикаын городъёсысь но гуртъёсысь телефон станциосазы 1999-тӥ арын 1-тӥ январьлы 337,9 сюрс номер лыдъяськиз. Калыклы но организациослы пуктэм валтӥсь телефонъёслэн лыдзы 32,4 сюрслы йылӥз. Агропромышленной комплекс Удмурт Республикалэн экономикаяз бадӟым инты басьтэ. Россиын ортчись выльдӥськонлэсь но воштӥськонъёслэсь емышъёссэс асьсэ вылазы тужгес лэчыт шӧдӥзы гурт хозяйствоын тыршисьёс. Государство соослэсь продукцизэс басьтэмысь дугдӥз, таин валче вузкарыны дышетсконо луиз. Та ужпумез данакез хозяйствоос вормизы, будэтэм сиён-юонэз возьыны-утьыны складъёс, вузкарон интыос кылдытэмын. Россиысь улосъёсын кусыпъёс тупатэмын. Та аръёсы бадӟымесь воштӥськонъёс ортчизы сиён-юон поттӥсь но перерабатывающей промышленностьын, гурт продукцилэсь уно пӧртэм сиён-юон лэсьтӥське, конкуренциын солэн вормыны быгатонлыкез будэ. Туннэ ваньмаз сямен городъёсын но ёросъёсын, озьы ик хозяйствоосын сиён-юон поттӥсь комплексъёс ужало ини. Соин ик 1998-тӥ арын ужамлы йылпумъянъёсъя республикаысь сиён-юонъя промышленность Урал улосын валтӥсь инты басьтэ. Музъемлэсь ӟечлыксэ ӝутонъя ужъёсты уретэмен, дырыз дыръя выжемын вал музъем ужъёсты травопольной системая ортчытонэ. Тазьы тыршемлэсь пайдазэ адӟыны луэ Сюмси ёросысь "Нива" хозяйство вылын. Та аръёсы ӟеч кидыс будэтонъя ужрадъёсы коньдон арлы быдэ висъяськылӥз бюджетысь. Правительство бадӟым саклык висъя сое республикаысь хозяйствоосы вӧлмытонлы, кусыпъёс уг лябӟо наукаен но. Кылсярысь, та ласянь адӟем карымон Вавож ёросысь Мичурин нимо хозяйстволэн ужамез. Кидыс будэтонын валтӥсь ужрадъёслы коньдон висъян понна кутэмын гурт хозяйствоысь предприятиосын но "Удмуртпродконтрактлэн" предприятиосыныз ӵош акционер огазеяськонъёс кылдытон сярысь решение, соослэн ужазы кун но пыриськоз. Шумпоттэ мукетыз но: берло аръёсы тросгес саклык висъяське ӟеч выжы пудоез вордонлы. Та ласянь умоен пусйыны кулэ Завьял ёросысь "Путь Ильича" хозяйствоез но "Восточный" совхозэз, Пичи Пурга ёросысь "10 лет УАССР" хозяйствоез, Чакламын Можга ёросысь "Можгинский" совхозлы ӟеч выжы пудоез лизинг амалэн басьтыны. Ас вакытаз та хозяйство ӟеч выжы пудоез мукет хозяйствоослы келя вал. Ӟеч кидыс но ӟеч выжы пудоез будэтонэн герӟаськем ужрадъёслы бюджетысь арлы быдэ коньдон висъяське. Валамон, со тырмыт ӧвӧл. Номырин ӵошатонтэм секыт югдуре гуртоос дышизы ас кужыменызы ортчытъяны тулыс, сӥзьыл ужъёсты. Городын улӥсьёс та ужъёсы уг пырисько ни. Одӥг но ӝыны ар талэсь азьвыл кутэмын Удмурт Республикалэн "Агропромышленной комплексэз кун ласянь радъян сярысь" Закон. Ми понна со - огез валтӥсь правовой документ, со луонлык сётэ гуртын ужасьёслы кун ласянь юрттэт сётонлэсь амалъёссэ но радзэ азинтыны. Азьвыл ми ваньмызлы огкадь коньдон висъяськом вал ке, али котькудӥзлы - нимаз. Со ваньбур поттонэз йылэтэ но экономикалэсь пайдалыксэ будэтэ. Ортче со тазьы: кин ужаны мылкыд каре но ужаны быгатэ - кулэ луись юрттэт басьтэ. Кин ужаны уг быгаты - производстволэсь структуразэ воштон пыр дышетскоз. Тодамы ум возе та пумысен решениослы пумитъяськонъёсты. Соослы дурбасьтӥсь ичи вал, малы ке шуоно, хозяйствоос азьын чурыт куронъёс пуктэмын вал. Нош табере... Сизьым ёросын скаллы быдэ 3 сюрслэсь уно йӧл кыско. Пудозылэсь тырмыт пайда поттымтэенызы, 1998-тӥ арын республикалэн бюджетысьтыз юрттэт басьтӥсьтэм 132 хозяйство пӧлысь 111-ез тросгес йӧл кыскиз но кун ласянь юрттэт басьтӥз. 89 хозяйство кыӵе ужъёслы кӧня коньдон быдтэмзэ лыдъяны ӧдъяз. Со пӧлысь 38-эз йӧллэсь асдунзэ 5 процентысен 46 процентозь кулэстӥз. Азьвыл аръёсы сямен ик ужрадъёс ортчытэмын, гуртын вуз поттӥсьёслы, сиён-юон лэсьтӥсь предприятиослы кун ласянь юрттон понна. Гурт хозяйствоослы техника басьтэмын лизинг амалэн, кылсярысь, Германиысь "КЛААС" фирмалэн 31 комбайнэз МТС- ёсы келямын, хозяйствоосы вуиз пудо сиён дасянъя 19 машина. Эстӥськон но минеральной сылалъёс басьтонлы висъямын 64 миллион манет. Берло аръёсы валтӥсь ужпумен лыдъяськиз промышленной амалэн пудо вордонъя предприятиосты утён. Со быдэстэмын вал. 1997-тӥ арлы йылпумъянъёсъя, 4 сыӵе предприятие пыриз Россиысь гурт хозяйствоысь 300 тужгес ӟеч предприятиос пӧлы. Берло вакытэ йӧллы но сӥльлы закупочной дунъёс будӥзы. Таин валче кӧня ке толэзь ӵоже хозяйствоосы коньдон вуиз, уждунъя пунэмъёс кӧняез ке берыктэмын, тулыс ужъёслы дасяськыны уксё келямын. 1996-тӥ арысен будӥз пудоез но тылобурдоез вордон, улэп секталаен вераса йӧл кыскон, етӥн будэтон, 1995-тӥ-1997-тӥ аръёсы ю тысез октон-калтон 736 сюрс тоннаысен 970,9 сюрс тоннаозь будӥз. Кылем арын гурт продукциез поттонъя Удмуртия Урал улосын нырысетӥ интые потӥз. Агропромышленной комплекс удысын Правительство аслаз ужпумъёсыныз лыдъя, вылӥ верам ужпумъёсты сяна, мукетъёссэ но - финансово-кредитной кооперативъёсты кылдытон, таин валче крестьянъёслэсь асьсэ хозяйствоязы поттэм продукцизэс басьтон, лизинговой компания кылдытон - солэн данакез акциосыз государство киын мед луоз, "Ветеринария сярысь" Законэз быдэсъян. Хозяйствоосты выль сямен радъян ужпумъёс азьло сямен ик котькуд учыре нимаз быдэсъяськозы, жилищно-коммунальной хозяйстволэсь объектъёссэ интыысь властьлэн ёзъёсызлэн бюджетъёсазы выжтонэ тросгес коньдон висъямын луоз. Выль налоговой кодексъя вуоно арын луонлык кылдоз гуртъёсты огъя музъем налоге выжтыны. Со, валамон, юрттоз музъемъёсты пайдаёгес кутыны. Агропромышленной комплексын югдурез тупатон но сое азинтон герӟаськемын ӧвӧл кунлэн республикаысь экономикалэсь кыӵе луэмзэ лыдэ басьтыса юрттэменыз гинэ, юнгес со герӟаськемын котькуд хозяйстволэсь кужымзэ кутэмен. Шоро-куспо классэз кылдытон юрттоз Обществоын политикаен, экономикаен но социальной удысэн герӟаськем югдурез тупатыны. Пичи но шоро-куспо ужбергатонлэн та ласянь бадӟым кужмыз. Республикаын ужа 7071 предприятие, отын тырше вань ужась калык пӧлысь 10 процентэз. 1998-тӥ арын 22 предприятилы сётэмын 3608 сюрс манет кредитъёс - со юрттоз ватсаса 200 ужан инты кылдытыны, та проектъёс улонэ пыӵазы ке, 40 сюрс манет пайда поттэмын луоз. Рынокын асьсэ интызэс шедьтӥзы акционер огазеяськонъёс но оптово-розничной огазеяськонъёс. Соос кылдӥзы бадӟым предприятиослэн инъетъёсазы но уставной капиталъёсты огазеяса. Тани соос - "АСПЭК" вузкарон юрт, "Торговый альянс" АООТ, "Хозторг" АООТ, "Сайгас-Холдинг", "Продторг" но мукетъёсыз. Кылдытӥське пичи ужбергатонлы юрттонъя радлык. Отчы пыро муниципальной предприятиос. 6 ёросын (городын) кылдытэмын пичи ужбергатонлы юрттонъя фондъёс, ужа иворъёсъя но визь-кенеш сётонъя 9 центр. Правительство малпамъя, экономикаын ортчись вань ужрадъёсы чырмыт пырисько егитъёс но. Ужа Егит ужбергатӥсьёслэн клубзы, кылем арын ӵектэмын выль ужан интыос кылдытонъя 47 программалы коньдон висъяны. Радъямын нылпиослэн но егитъёслэн организациоссылэн ужзы, соос 40 сюрслэсь уно адямиосты огазеяло. 1998-тӥ арын республикаысь егитъёсты уже интыянъя биржа 18 сюрс быдэ вуымтэослы уж сётӥз, 1997- тӥ арен ӵошатыса, кык поллы тросгес нылпиослы. Егитъёс сярысь государство нимысьтыз сюлмаське. Кылем арын Удмурт Республикаын приватизация ортчиз нимаз проектъёсъя гинэ, решениос кутэмын вал, экономикалы пайда ваемез чакласа но Удмурт Республикалэн "Удмурт Республикаын приватизацилэн аспӧртэмлыкъёсыз сярысь" Законэзлэсь куронъёссэ лыдэ басьтыса. Асваньбурез нимаз кузёослы люкылыса, соин кузёяськыса но кивалтыса, 9 миллион манет пайда басьтэмын, нош чакламын вал 3 миллион манет. Асваньбуръя кун комитетлэн огез валтӥсь ужпумез - интыязы кыллись объектъёсты лыдъян-чотан, со объектъёс кун асваньбуре пыро но кун учреждениослы оперативной кивалтон правоен юнматэмын. Ваньзэ лыдэ басьтоно ке, интыязы кыллись объектъёсты лыдъян-чотанъя 8,5 сюрс акт дасямын. Ортчем ар вань 90-тӥ аръёс пӧлысь Удмуртилэн мукет кунъёсын кусып возён удысэз понна тужгес секытэз вал. Со герӟаськемын финансовой кризисэн. Мукет кунъёсын ужамез возьматӥсь лыдпусъёс трослы синӥзы, мукет социально-экономической лыдпусъёсты азьланьтыса. Угось та удыс юн герӟаськемын манетлэн дунэныз но кунсьӧры кошкись вузъёслэн: му вӧйлэн, пулэсь арбериослэн, сьӧд кортлэсь арбериослэн - дуннеын дунэнызы. Кунсьӧрен вузкарон 58,4 процентлы кулэсмиз, 1997-тӥ арен ӵошатыса. Му вӧез кунсьӧры вузанлэн кулэсмемез трослы герӟаськемын нефтез мукет кунъёслы ичигес келямен 40 процентлы, дунэныз верано ке. Малы ке шуоно, быдэс дуннеын нефтьлы дунъёс кулэсмизы. Ожгар техникаез кунсьӧры вузан 52,6 процентлы синӥз. Нош 1997-тӥ арын таӵе техника котькулэсь но трос вузамын вал. Августэ коньдон удыс но банкъёс куашказы ке но, республикаысь потребительёслэн рыноксы пыд йылаз юн сылэ, розницаен вузкарись сӧзнэт вузъёслы уг ёрмы. 4-тӥ кварталэ вузкарон удыс валтӥсь сиён-юонъёсын 88 процентлы тырмытэмын, промышленной вузъёсын - 93 процентлы. Республикаысь Правительство ужрадъёс кутӥз, рынокъёслэсь ужамзэс эскерон но басьяськисьёсты алама вузъёслэсь но юрттэтъёслэсь утён пона. Аракы поттонэз кун ласянь радъянъя ужрадъёсмы пайда ваизы. Дас ар ӵоже туэ нырысьсэ аракы поттӥсь заводъёс огсыр ужазы. Аракыез но спирт продукциез розница амалэн вузан радъямын. Калыклы куд-ог вузъёслэсь дунзэс кун радъя, рентабельностьлэсь вылӥ лыдпуссэ юнматыса. Та ужпумъя решениосмы ваньмызлы ӧз кельше. Калык соосты умоен лыдъяз, нош кин соосын сэрен табышлэсь ог люкетсэ ыштӥз, иворъёсты вӧлмытӥсь ёзъёс пыр радъязы пумитъяськон. Верало шонерак: та политикамес ми азьланяз но ортчытом. Улонын нуналмысь кулэ луись сиён-юонлы дунъёс радъямын луыны кулэ. "Улон инты" программая, кудӥз 2005-тӥ арозь чакламын, калыклы кредитъёс сётъясько улон юрт пуктон яке басьтон понна. Та ужрад ортче кык кредитной программая: республикалэн бюджетэз чотын но Россиысь Сбербанклэн Удмурт банкезлэн коньдонэз чотын. Республикаын быдэсъяськиз Президентлэн "Улон интылы кун сертификатъёс" программаез. 1998-тӥ арын запасысь офицеръёслы сётэмын улон интылы 56 сертификат но, со сяна, 28 сертификат пусъемын. Таосыз сертификатъёс сётэмын Ожгар реформаез ортчытыку запасэ келям офицеръёслы. 1998-тӥ арын республикаын 178,5 иськем распределенной газовой сетьёс ужаны кутскизы, 1990-тӥ арен ӵошатыса, кык поллы трос, бюджет чотын лэсьтэмын 56,3 иськемез, 11,3 сюрс квартираосы газ кыскемын. Трос лэсьтэмын машинаен ветлон сюресъёсты лэсьтон, выльдон, тупатъян удысын. Лэсьтэмын 96,3 искеьм автомобильной сюресъёс, кылем арен ӵошатыса, со 15 процентлы уногес. Сюрес лэсьтыны подрядной конкурсъёслэн йылпумъянъёссыя быгатӥм объектъёсты лэсьтонлэсь асдунзэ 28,1 миллион манетлы кулэстыны. "Россия Федерациын люкам химической ож тӥрлыкез быдтон сярысь" федеральной целевой программаез быдэсъян вылысь, 1998-тӥ арын Камбарка ёросын мынӥзы социальной но инженерной инфраструктуралэсь нырысь ик кулэ луись объектъёссэ лэсьтон. Жилищно-коммунальной хозяйствоез выльдонэн герӟаськем ужрадъёс ортчозы куанеръёслы социальной удыс ласянь юрттэт сётыса. Таин валче городъёсын но ёросъёсын, кылдытэмын жилищной компенсациос сётъянъя службаос. Ми валаськом, жилищно-коммунальной хозяйствоез выльдон калыкез вӧсь каре шуыса. Кылсярысь, Курган 1999-тӥ арын кун стандартъёс вылэ быдэсак выжиз, озьыен, отын калык 60 процент тыроз. Нош ми чакласьком, калык 40 процентсэ тыроз шуыса. Калыклэсь тыронъёссэ будэтэм сяна, жилищно-коммунальной юрттэтъёслэсь дунзэс кулэстон бордын ужаськом. Шунтӥсь арбериосты выжтӥськом дунтэмгес эстӥськонъёсын ужанэ, тыл, шуныт сётонэз чотась-лыдъясь но радъясь приборъёс пуктӥськом. Экономика секыт югдуре шедемын ке но, асьмеос калыклы улон-вылонын юрттэт сётыны кулэ. Нылпи пособиосты тыронъя пунэмъёсты кулэстон понна воштэмын вал соосты тырон рад. Табере нылпи пособие тыриське черодъя, черод тупатэмын семьялэн доходэзъя. Пособиосъя пунэмъёс озьы ик берыктэмын вузъёсын но юрттэтъёсын. Озьы калыклы вузъёс но юрттэтъёс 30,2 миллион манетлы сётэмын, 1998-тӥ арын пособиос 107 миллион манетлы сётэмын. Мон курисько предприятиослэсь но администрациослэсь кивалтӥсьёссэс та ужез чырмытгес ортчытыны. Утемын тужгес кулэ луись льготаос, кудъёсыз чакламын "Ветеранъёс сярысь" но "Ӧлексыосты улон-вылонын утён сярысь" Федеральной Законъёсын. Улон-вылонын юрттэт сётонъя стационарной учреждениосын улон ӧз куанермы, отын улӥсьёсты эмъян но бытсэс радъян азьвыллэсь урод уг ортчо. Та учреждениосты тупатъян но оборудование басьтон понна ыстэмын 15 миллион манет. 90 сюрслэсь уно куанер муртлы котькудӥзлы нимаз юрттэт сётэмын. Республикаысь калык понна ортчем ар секыт вал. Дунъёслэн будэменызы, уждунэз, пенсиосты, пособиосты тырымтэен, калыклэн зэмос доходъёсыз 11 толэзь ӵоже 23 процентлы кулэсмизы, 1997-тӥ арлэн та вакытэныз ик ӵошатоно ке. 1998-тӥ арын калыклэн доходъёсыз кулэсмизы, уждунэз тырымтэен. Хозяйствоез нуись куд-ог субъектъёслэн кивалтӥсьёссы уждунэз дыраз тырон сярысь уг сюлмасько. Январьысен декабрёзь уждунъя пунэмъёс 2,1 пол будӥзы. Таӵе югдуре республикаысь Правительство ужрадъёс кутэ, калыклэн доходъёсыз удысын умой пала воштонъёс ортчытон понна. Кылдытэмын Удмурт Республикалэн Удмурт Республикаын ужам понна тыронъёсты тарифъёс пыр радъян сярысь" Законэзлэн инъетэз, уж сётӥсьёс, профсоюзъёс но Правительство куспын огкыл кутэмын, Удмуртиысь Правительстволэн "Удмурт Республикаын бюджет чотын ужась куанер муртъёслы социальной тыронъёс сярысь" постановлениезлы инъет дасямын. Республикаын ужа экономикалэн удысъёсаз уждунэз дыраз тыронэз эскерись межведомственной комиссия. Уждунэз дыраз тырисьтэм 140 организациослэн кивалтӥсьёссы кылзэмын. Удмурт Республикаысь ужъя федеральной инспекция унозэ кивалтӥсьёсты административной кыл кутытон улэ кыскиз, ужъя законодательствоез тӥямзы понна, озьы ик эскериське уждунъя пунэмез берыктонъя графиклэн быдэсъяськемез. Финансовой кризис уродмытӥз республикаысь ужъя рынокын югдурез: предприятиос ужасьёссэс ӵемгес но уноенгес ураме кельто, ужаны быгатӥсь калык ас кужмынызы уж шедьтыны луонлыкъёс сюбегазы. Таин валче Правительство нырысь ик тыршиз ужтэк кылемъёслы юрттэт сётыны. Кылем арлэн кыкетӥ палараз 10 сюрс ужан интыосты кулэстэмлэсь утемын. 1998-тӥ арын январе-декабре уж сётонъя службаосы уж утчаса вазиськиз 100 сюрслэсь уно адями. Ужась кужымлы кулэяськон кулэсмемын, таӵе югдуре гражданъёслы уж сётыны тыршонъёс юрттӥзы 57 сюрс адямилы уж шедьтыны - уж утчаса вазиськемъёс пӧлысь ӝыныезлэсь уноезлы. Ужтэк кылемъёслэн лыдзы пӧртэм интыосын пӧртэм. Тужгес сюлмаськытэ Красногорск, Камбарка но Селта ёросъёсын югдур. Гуртъёсын ужтэк кылемъёслэсь лыдзэс трослы кулэстон понна, Правительство кутӥз "Гуртысь калыклэн ас понназ ужамез сярысь" постановление. Ужъя рынокын ортчытэм ужрадъёсын валче 1998-тӥ арлэн пумаз ужтэк кылемъёслэн лыдзы 50065 адями яке ужаны быгатӥсь калыклэн 5,49 процентэз. Социальной удысэз но экономикаез азинтонъя 1998-тӥ арлы программаен таӵе ик лыдпус чакламын вал. Калыклэсь лыдзэ возьматӥсь лыдпусъёс умоязы. Ньыль ар ӵоже 1000 адямилы быдэ нылпи вордон учыръёс 9,4-ысен 9,9-озь будӥзы, кулон учыръёс 13,7-ысен 11,7-озь кулэсмизы, 1000 вордскем нунылы быдэ кулон учыръёс 19-ысен 16,1-озь синӥзы. Но республикаын улӥсьёслэн лыдзы уг йылы. "Бюджет чотын эмъянлэн" удысъёсызлы ужаны секыт ке но вал, берло дыре ветеранъёс азьын ӧсъёссэ усьтӥз госпиталь, 3 номеро медсанчасть дась ужаны, Ижевскын усьтэмын нылпиослэсь ляб синъёссэс эмъянъя Центр - Россиын со нырысетӥез, Воткинскын ужаны кутскиз туберкулёзэз эмъянъя диспансер, Старые Зятцы гуртын - участковой больница, Ижевскын - нылпи поликлиника, матысь дыре йылпумъяськоз диагностической центрез, онкологической центрлэсь нырысетӥ юртсэ лэсьтон, Можгаын хирургической корпуслэн борддоръёсыз ӝутско, Пичи Пургаын - терапевтической корпуслэн. 1998-тӥ арын 12,2 миллион манетлы басьтэмын эмъяськон оборудование. Со вуэ вань центральной ёрос больницаосы. Республикаын эмъяськыны ӟеч инъет кылдытэмын, туала югдуре каллен выжоно ини стационаръёсын эмъяськонысь дорын но больницае ветлыса медицинской страхованиея фондлэсь коньдонзэ пайдаёгес кутоно, нылпиосты сюдон ужпумъёсты быдэстоно, йӧл кухняосты выльысь улӟытоно, республикае дунтэм эмъюмъёс ваёно. Огъя дышетонъя учреждениос утемын но азинтэмын. Россия Федерацилэн бюджетысьтыз 1,9 миллион манет госкапвложениос уже кутэмын, капитальной ужъёс 17,7 миллион манетлы быдэстэмын, 188 объект тупатъямын. 2120 дышетскон инты лэсьтэмын. Секыт сямо пиналъёслы нимысьтыз школа пуктӥське. Россия Федерациысь огъя но профессиональной дышетонъя министр В. М. Филиппов дунъямъя, асьмеос выль школаосты лэсьтонъя Москва но Санкт-Петербург бере мынӥськом. Удмуртия 9 классэз быдтэм пиналъёсты дышетсконэ кысконъя устоосыз пӧлын. Ватсаса дышетонэз радъяны быгатонлыкъёслы Россия Федерациысь Дышетонъя министрстволэн коллегиеныз умоен лыдъямын. Олимпиадаосын вылӥ вормонъёс басьтэмын: отчы пыриськемъёс пӧлысь 60 процентэз И, ИИ, ИИИ степенё дипломъёс басьтӥз. Дышетӥсьёс быгатӥзы дышетонысь ваньзэ выльзэ улонэ пыӵатыны: дышетонъя законодательстволэн инъетэз кылдытэмын, кунлэн луисьтэм дышетон заведениос вордскизы. Ӝутэм уровенен 26 школа ужа. Мукетъёсызлэсь висъясько Воткинскысь реабилитацияя школа, Ижевскысь 95 номеро школа, 98-тӥ лицей, "Принцессаослэн школазы", Пичи Пурга ёросысь "Пурга кизилиос". Республикаын ужало пӧртэм уровенен дышетонъя 46 школа, ӝыт школаос, нылпиослэсь быгатонлыкъёссэс лыдэ басьтыса. Паськыт вӧлмемын "класс-вуз", "класс-ссуз" система. Гуртъёсысь школаос ужало вуоно кузёос будэтон бордын, со рынок вакытэ улыны но ужаны мед быгатоз шуыса. Национальной школаослэн лыдзы йылэ. 365 школаын удмурт кылэз дышето, 20 школаын - бигер кылэз, 9-аз - пор кылэз. Улон возьматэ: ужамлэн ӟечлыкез асваньбурез кызьы кутэмен гинэ герӟаськемын ӧвӧл, юнгес солэн кусыпез кивалтын быгатонэн. Дышетонъя министерстволэсь аппаратсэ кулэстэмен ӵош ортчо воштӥськонъёс: кылдӥзы воспитательной ужъя, анализ лэсьтонъя отделъёс, юнматэмын правоя, коньдон кутэмез эскеронъя отделъёс. Городэн ӵош ортчытӥсько ужрадъёс, одӥг ужез ик кык-куинь интыын быдэстонэз кулэстон понна. Республиканской учреждениосын но воштӥськонъёсын ортчизы. Наукалэн улонын интыез будӥз. Ижевскысь технической университетын но Удмурт кун университетын кылдытэмын технопаркъёс - вуоно инновационно-технической центръёслы кутскон сётэмын. Вузъёслэн улонын кутоно исследованиоссыя вань научной вормонъёс лыдъямын, чотамын, республиканской реестр кылдытэмын. Тужгес ӟечъёссэ ужъёсты, конкурс пыр потэмъёссэ, федеральной научно-технической программаосы пыртыны дэмламын. Азьланяз улонэ одно ик пыӵалозы биотехнология, боеприпасъёсты быдтон, машина лэсьтон но гурт продукцилэсь сиён-юон поттон удысъёсын герӟаськем проектъёслэн, му вӧй проектъёслэн. Социальной удысын государство нырысь ик юрттэ обществолэсь кулэяськонъёссэ быдэсъяны. Культураез ке басьтоно, со сюлмаське вань калыклы культуралэн вормонъёсыз тодматскон вылысь огкадь луонлыкъёс сётыны, творчествоез азинтыны луонлыкъёс кылдытыны, егит усточиослы юрттыны но кадръёсты дасяны. Огкылъёсъя - контрактъёсъя Россиысь учебной заведениосын 50-лэсь уно мурт театральной искусстволы, калык киужъёслы дышетско. Искусствоосъя школа-интернатлэн юртэз пуктэын, отын дышетско республикалэн ёросъёсысьтыз сюлэсь уно нылпиос. Национальной музейлэн комплексэз ӧсъёссэ усьтӥз, "Арсенал" комплексэз выльдон но тупатъян ужъёс мыно. Валтӥсь удысъёсы тросгес коньдон висъян амал кутӥськиз физической культура но спорт удысын кунлэсь политиказэ ортчытыку но. Нылпи спортивной школаос ӧз пытсаське, нош отчы ветлӥсьёслэн лыдзы йылӥз. Асьме улонэ мур пыӵазы ини гуртысь физкультуралэн сямъёсыз. Профессиональной спортлэн вань удысъёсызлы коньдонэн юрттыны ӧм ке но быгатэ объективной мугъёсъя, ми быгатӥм республикаын паськыт вӧлмем спортивной удысъёслы: биатлонлы, куасэн бызьылонлы, хоккейлы, футболлы - юрттыны. Та ласянь учконо ке, кыкетӥ улон кузьмамы Спортъя йӧ дворецлы, "Зенит" стадионлы, биатлонъя комплекслы. Нош гурт шудонъёслы дасяськыку, ёрос центръёсын кылдытӥське спортэн вырыны выль база. Удмурт Республикалэн улосъёсызлэн пӧртэмлыксы экономической кужым бордын гинэ ӧвӧл - котькуд улосын пӧртэм калыкъёс уло. Татын котькудӥз ёрос, город аспӧртэмлыко. Калыкъёс куспын тупан, ог-огедлы оскон но ӵош ужан - ваньзэ тае ми азинтӥм но юнматӥм. Талы пайда ваизы национаьной политика удысын эскеронъёс, этнополитической югдурез чакласа возён. Национально-культурной огазеяськонъёслы дурбасьтӥмы, методика, юриспруденция ласянь юрттэт сётӥм, коньдон висъяллям. Одӥг кылын вераса, ми кутскимы Удмурт Республикалэсь кун национальной политиказэ быдэсъяны. Городъёсысь но ёросъёсысь администрациосын, Социальной страхованиея фондлэн удмурт ёзэныз, Профессиональной союзъёслэн федерацизылэн кенешеныз но предприятиослэн кивалтӥсьёсынызы ӵош луонлык кыдытэмын нылпиослэсь гужем шутэтсконзэс но ужанзэс радъяны. Нырысь-валысь лыдпусъёсъя 186 сюрс нылпилэн шутэтсконэз радъямын вал, ваньмыз соос тазалыксэс юнматӥзы. Нылпиослэсь гужем шутэтсконзэс радъянэ вань бюджетъёсысь 15,7 миллион манет висъямын, социальной страхованиея фондысь - 14,1 миллион манет. Правительство бадӟым саклык висъя адямиез кышкытлыклэсь утёнъя кун гарантиосты быдэсъянлы. Калыкез кышкытлыклэсь утён понна, уно ужрадъёс ортчытэмын. Криминальной милиция юнматэмын. Соиз умой: йыружъёсты шараян 67,7 процентысен 71,5 процентозь йылӥз. Тазалыклы юн изъян ваён, кужмысь курон (вымогательство), транспортэз лушкан учыръёс кулэсмизы. Но со уг шумпотты. Йыружъёслэн огъя лыдзы йылӥз ог 15 процентлы. Югдурез утёнъя министрмылы трос ужано луоз. Бюджетын кондон тырмымтэен, тужгес лэчыт, улонын нырысь ик кулэ луись ужпумъёс гинэ быдэсъясько. Кризисысь потон вакытэ, куке коньдон уг тырмы, кунлэн пунэмъёсыз будо, налогъёс дыраз уг вуо но тыронъёс уг тырисько, коньдон удысын политика, кудӥз югдурез тупатыны тырше, кун властьлэн ужаз валтӥсь инты басьтэ. 1998-тӥ арын республикалэн бюджетэзлэн доходъёсыз быдэстэмын 1842,7 миллион манетлы, басьтэм трансфертъёсты но федеральной бюджетэн ортчытэм взаимозачётъёсты лыдэ басьтыса. Бюджетэз быдэсъяку, Правительство федеральной бюджетысь ватсаса 457,3 миллион манет трансфертъёс басьтӥз. Со сяна, ог-огеныд расчётъёсъя вуиз на 339,7 миллион манет, со пӧлысь 60,5 миллион манет - шуг улӥсь улосъёслы ватсаса юрттэт чотын, федеральной бюджетэн 278,2 миллион манетлы взаимозачёт ортчытэмын бюджет чотын ужась учреждениослы тыл но газ сётэм понна пунэмъёсты кысон чотын. Республикалы бюджетэзлэсь дефицитсэ кулэстон понна ар куспын федеральной бюджетысь басьтэмын 110 миллион манет бюджетной ссуда, банкъёслэн кредитъёссы 198,1 миллион манетлы дасямын. Берло аръёсы бюджетлэн но налог тырисьёслэн кусыпъёссы капчиесь ӧй вал. 1999-тӥ арын 1-тӥ январьлы налогъёсты тыронъя пунэмъёс вань бюджетъёс азьын 1 миллиард 348 миллион манет люкаськизы. Республикалэн бюджетэз азьын пунэмъёс 7 процентозь вуизы ини яке 98 миллион манетозь, со вакытэ ик трослы йылӥз интыысь бюджетъёсы недоимка. Валэктонэз ӧвӧл, кытчы со вуттэ. Пумитъяськон мылкыдъёс будо, дышетӥсьёс сютэм улэмзы сярысь яло, эмъясьёс забастовкаосы пото, калык кызьы улыны уг вала, государстволы уг оскы - ваньмыз та потэ налогъёслэн вуымтэзы бордысь. Туннэ вазиськисько таӵе югдур понна кыл кутӥсь муртъёслы - ойдолэ лэсьтом ваньзэ, пунэмъёсты пачылгес берыктон понна. Кылсярысь, "Ижмаш" Ижевсклы налогъёссэ тыриз ке, бюджет чотын ужасьёслы уждун тыремын луоз. Азьвылэз но, туннэез но. Уждунэз тырон - политикаен герӟаськем ужпум. Кун Кенешлэн Президиумезлэн гажано муртъёсыз, фракциослэн кивалтӥсьёссы, депутатъёс, Правительстволэн муртъёсыз, ӧтем калык! Тау карисько тӥляд чидамды понна, та аръёсы тӥ чидады ужмылы юрттыны, кичӧлтонъёсмылы дурбасьтыны. Бадӟым тау мон шуисько Правительствоысь ӵош ужась эшъёсылы, оскымон муртъёслы, соосын ми ужамы та секыт ньыль ар ӵоже. Правительство вунэтыса уг кельты улосъёслэсь, предприятиослэсь кивалтӥсьёссэс, соостэк экономика куашкасал, кусыпъёсмы ӧз азинскысалзы. Докладам мон 1998-тӥ арлы йылпумъянъёс лэсьтӥ но Правительстволэн берло 4 ар ӵоже ужамезлэн валтӥсь удысъёсыз сярысь ивортӥ. Та ньыль аръёс капчиесь ӧй вал. Нош валтӥсез йылпумъян таӵе: программной ужпумъёсты быдэсъян пыкъяськиз властьлэн вань ёзъёсызлэн тупамзы но валче ужамзы вылэ. Нош ужпумъёс сярысь - нимысьтыз вераськон. Соосын тодматэмын шоро-куспо дырлы программаын, Правительстволэн 9 толэзьлы йылпумъянъёсъя отчётаз. Туннэ соос пыртэмын республикалэсь социальной удыссэ но экономиказэ азинтонъя 1999-тӥ арлы программае. Ми ужамы, ичигес янгышъёс лэсьтыны тыршыса, югдур секыт ке но вал. Выльзэ кылдытон понна тупан но ог-огдэ валан "кивалтӥзы" асьмелэн кусыпъёсынымы; Асьмелэн котькудмылэн - аслаз песьтэрез но аслаз кыл кутонэз. Котькудӥз ужзэ быдэсъяз быгатэмезъя, валамезъя, кужымезъя. Йылпумъяса пусъеме потэ: Удмуртиын улӥсьёс оскыны кулэ, Правительство, законъёс, конституция вылэ пыкиськыса, ужзэ быръёнъёсты ортчытэмен валче уз уретъя. Ми бюджет чотын ужасьёслы уждунэз тырыны кулэ, дунъёс удысын политикаез азьло сямен ик нуом, республикаез сиён-юонтэк ум кельтэ, калык хозяйстволэн удысъёсызлы ужаны луонлыкъёс кылдытом, калык азьланяз но няньлы, шунытлы но тыллы медаз ёрмы шуыса. Тау кылзэмды понна! Мӧзмыны дырмы ӧвӧл Ми, Кечолысь мӧйыос, туж тупаса улӥськом. Асьмеос пенсиын ке но ини, гужембыт уж шеде: бусые кубиста мерттӥськом, ву кисьтаськом, уриськом, бугыръяськом. Ма, ӧжыт-а утялтэмез кулэ каре будос? Сӥзьыл кубистамы туж чебер быгыльске. Агрономмы но, председательмы но ушъяло милемыз. Ма, ми ӝыт но, уй но бакчамылэсь ум ӵыдӥське - асьмеос ик лушкаськисьёслэсь возьмаса пукиськом. Ӵогем берамы ик сылалтӥськом, ваньмыз туж ческыт шуыса сиё. Тол ӝытъёсы мӧзмыт медаз поты шуыса, огазе люкаськыса черсон веме ортчытъяськом. Кырӟаса-вераса кузь ӝытъёс вакчи пото. Ми ог-огмы шоры али но пинал дыръямы сямен вазиськиськом: Аннушки, Лидук, Насьтӥ, Ленӥ... Огазьын мӧзмонэз но ум валаське. Ӟеч кыл вераммы потэ Рая бригадирмы сярысь. Со ми понна туж сюлмаське, огмес но урод уг кары. Алигес ми сое пенсионеръёслы кивалтӥсе бырйимы. Кечолысь пенсионеръёс. Пичи Пурга ёрос. ШӦКЫЧ Абдрамов паймытэ *** Улонэ рынок пыӵамен валче студентъёслы прикладной экономикая лекциос курс лыдӟизы. - Ну, - вазе доцент. - Мар сокем мур малпаськонэ усиды? - Тодӥськоды-а ма, - пумитаз вазе Абдрамов. - Мон кемалась ӟудыса улӥсько ни, мар меда дунтэмгес усе: - чырты-а, дэрем-а? Чыртыез гылтыны, - ву дуно, дэремез миськыны - майтал дуно. *** Абдрамовлэн мугорыз пичи гинэ. Лыктэ зор ултӥ, дипломатэз копак дэри. - Пичи муртэ котькин ултӥя. - Ма, кин тонэ озьы кариз? - юало солэсь. - Пыдъёсы, - шуэ со. - Пичи муртлэн пуйыез но туж улэтӥ ветлэ уга. *** - Одӥг студент Абдрамов шоры фотоаппаратсэ урдӥз. - Мар тон пытсам объективен бергаськод? - юа Абдрамов. Фотоаппаратэзлэсь пытсам объективзэ адӟыса. - Тон вылын тренировка ортчытӥсько: кызьы кадр утчаны дышетскисько.. - Ярам, - шуэ Абдрамов. Пыӵал басьтӥ ке, мертаськыны тон вылын дышетско. Ӟечкыласьком! Яратоно но мусо анаймес, Адамова Зоя Андреевнаез, Дуннеысь нылкышноослэн нуналэнызы! Та шуныт но югыт праздник нуналэ сӥзиськом тыныд юн тазалык, шудо-буро но кема улыны. Йыбырттӥськом тыныд музъемозь, милемыз вордэмед, яратэмед, валамед, лякыт сямо но небыт сюлэмо луэмед, ваньмыз-ваньмыз понна бадӟым тау. Пиосыд, кенъёсыд. Котьма сярысь Кин кызьы паймытэ Кылсярысь, Тодд Сили мотоциклэн 74,98 метр кузьдалае тэтчиз. Озьы луиз 1988-тӥ арын 28-тӥ феврале США-ысь Флорида штатлэн одӥгаз адӟытоназ. х х х Нош Шерил Батерворс яратэ гольтыръяськыны лобись самолётлэн бурд вылаз. 1990-тӥ арын 4-тӥ мартэ со Новой Зеландиысь Окленд вадьсытӥ 3 час 8 минут ӵоже котыръяз, бурдо машина йылын сылыса. х х х Великобританиысь 37 аресъем Нил Салливан кужмо но чидась луэмзэ возьматӥз, эгыр мешокез нуллыса. 1986-тӥ арын 24-тӥ мае 50,8 килограммъем ныпъетэз со 12 час 45 минут куспын пичи но шутэтскытэк 54.7 иськеме нуиз. х х х ЮАР-ысь Питер ван Логгеренберг аккордеонэн шудӥз 85 час ӵоже инкуазьлы сӥзем одӥгаз праздникын. Со вал 1987-тӥ арын 7-тӥ-10-тӥ июле. х х х Великобританиысь пӧрась Глин Кристиан 1982-тӥ арын 25-тӥ-27-тӥ августэ котькулэсь но бадӟым пирог пыжиз. Улмолэсь 12х7 метръем ческыт сиён 13,66 тонна кыскиз ШӦКЫЧ Визьгердъёс но валэктонъёс Анай-атай зарнилэсь но дуно. (Ужтэк кылем воргоронлэн верамез) *** Буш мешок шонер уг сылы. (Сютэм картлэн ӝожтӥськонэз). *** Ваньбур дорад ачиз уз лыкты. (Лушкаськисьлэн мадиськонэз). *** Гозы пунӥське, нош пумыз вуэ. (Котькӧня ул, куке но чоньдод). *** Данэз кылльыса уг басьто. (Калгись нылкышнолэн кылъёсыз). *** Етӥз мурт кыдёке кошке. (Америкаысь удмуртлэн гожтэтысьтыз). *** Ёркыт корка шуныт луэ. (Коттеджын улӥсьлэн верамез). *** Жадем валлы сезьы сёто. (Нош макмырасьлы вина). *** Ӝук сиёд, кужмо луод. (Сютэм улӥсьлэн вӧтэз). *** Зарни пыр но синкыли вия. (Мултэс лӧптэмен, мар но уг вия). *** Итымын ке вань, ӝӧк вылын но вань. (Чабей нянь, дыр). *** Кин уг ужа, со уг сиы. (Неандерталецъёслэн мадиськонзы). *** Лекаськись скал сюртэм луэ. (Пайдаез но сомында ик). *** Музъемез песьтэре уд поны. (Выль удмуртлэн куректонэз). *** Нылъёс чебересь, кышноос шӧтэмесь. (Сюан бере йылпумъянъёс). *** Одӥг ыж быдэс уллёез сура. (Кивалтӥсьлэн дусымез сярысь). *** Пызь кудыысь - пень кудые. (Нырысетӥ кышноеныз люкиськем воргоронлэн бӧрдонэз). *** Родня - мукет сямен бӧляк, ӵыжы-выжы. (Акыляк муртъёс сярысь веран). *** Сюлэм из ӧвӧл, уз пилиськы. (Ӧйтӧд, ӧйтӧд). *** Тонэн ӝук уд пӧзьты. (Куанер эшъёслэн сюлмаськонзы). *** Умой кышномурт - ӝыны юрт. (Сберкнижкаен мурт сярысь). *** Чильымлэн но йырыз вань. (Нош куд-ог пиосмуртъёслэн ӧвӧл). *** Ӵын тылтэк уг поты. (Тыбырэ учкылы ай). *** Шонерлык кырыжлыкез ворме. (Кулэм бере). *** Ыжгонэз молотэн но уд шонерты. (Кышномуртлэн сямыз сярысь). *** Эрик котьмалэсь дуно. (Варгаз ӟазеглэн кырӟанэз). *** Юись муртлэн юртэз кезьыт. (Со понна мыжыкез пӧсь). *** Яратонтэм улон - со кулон. (Яратыса кулэм муртлэн кылъёсыз). Люказ Л. Александров. Кык Еленаос Сарапулын та кык кышномуртъёсты тодӥсьтэмез ӧвӧл, дыр. Кык Еленаос лулысь-сюлмысь ужало кондитер фабрикалэн нимаз усьтэм магазиназ. Предприятилэн таиз вузкарон интыез фабрикаен артэ сылэ. Ним но туж чебер сётӥллям - "Ческыт" ("Сластёна"). Городын улӥсьёс ярато татчы пыраны. Басьяськисьёсты котьку шуныт мылкыдын пумитало магазинлэн кивалтӥсез Елена Верзякова но Елена Ирина (фамилиез сыӵе). Кык Ленаослы тужгес но пӧсь йӧтэ та вакытэ - нылкышноослэн 8 Март праздниксы азьын. Городысь кондитер фабрикалэн таӵе магазинъёсыз вань Ижын, Сарапулын но мукет городъёсын. Удмуртиын Сарапулысь кондитеръёслэн ческыт сиёнзылэн "Россия" (Самара область) шоколадлэн кадь ик данэз. Сюлмысьтымы ӟечкыласьком Сарапулысь шоколад конфет поттӥсьёсты шулдыр тулыс праздникен - 8 Мартэн, мылкыд кариськом ужады выль азинсконъёс басьтыны, сӥзиськом ваньдылы шудо улон но тазалык. Г. РОМАНОВ. Кызьы нимыд, яратонэ? Яратыны луэ Евлампиез но, Параскаез но. Кызьы шуо, адямиез нимыз чебер уг кары. Но нимъёсты эскерисьёслэн Пьер Ружелэн но Борис Хигирлэн верамзыя, кызьы нимало, озьы ик ярато. Тодады вае ай, малы тӥ егит дыръяды ӵемгес Дашаослы но Машаослы синмаськылӥды, нош Таняен пумиськылыны ӧз кылды. Макем трос, пе, ог-огзэс яратӥсьёслэн нимъёсазы согласной букваосыз, сокем зол соос тупалозы азьланяз но. Тӥ Олег ке, тупалозы Галя, Лена, нош тужгес но Ольга. Уката но юн кусыпъёссы, пе, луо кык Женяослэн, Сашаослэн, Валяослэн. Газетмес лыдӟисьёс пӧлын сыӵе паръёс вань вылэм. Святой Валентинлэн нуналэз азьын ялэм конкурсамы тямыс семья вазиськиз. Со Ижевскысь Валентина Константиновна но Валентин Васильевич Чучкаловъёс, Яр ёросысь Тум гуртысь Валентина Павловна но Валентин Аркадьевич Поздеевъёс, Ува ёросысь Косой гуртысь Валентина Викторовна но Валентин Николаевич Антроповъёс, Пичи Пурга ёросысь Кабыста гуртысь Валентина Ивановна но Валентин Анатольевич Эркешевъёс, Можга ёросысь Лудӟи-Шудӟи гуртысь Валентина Егоровна но Валентин Васильевич Гуртовъёс, Можга ёросысь Пычас гуртысь Фёдоровъёс, Игра ёросысь Лоза гуртысь Валентина Петровна но Валентин Фёдорович Чирковъёс. Ваньзэсты ик соосты редакциын синпель кузьымъёс витё. Нош Ижевскысь Чучкалов кузпалъёсты ми нимысьтыз висъямы. Валентин Васильевич но Валентина Константиновна кылем арын пусйизы 40 ар ӵош улэмзэс. Валя плюс Валя Валентин пинал дырысеныз анайтэк кылиз. Атайзы, пиналъёссэ кельтыса, мукет кышномурт вылэ кошкиз. Армиын дыръяз песянаез но кулӥз. Малпалляз, со понна шуд кылдымтэ шуыса. Но шудэз матын вылэм ни. Матын но кемалы. Армия бере городэ ужаны интыяськиз, нырысь ӵыжы-выжыосыз дорын улӥз. Соос ик огпол Валентинэз Ува ёросысь Чужъеме куное ӧтизы. Туж пыкиськиз ке но, сьӧразы басьтӥзы. Ӝытазе, коркась корка кунояськыса ветлыкуз, муспотон нылашез синйылтӥз. Соиз но егит пи шорысь синзэ ӧз вошъя ни. - Кызьы нимыд? - Валя. - Мон но Валя. Вот тупаз ке тупаз! - Ойдо мон сьӧры городэ,- ӵектӥз пияш. - Ойдо. Нылаш ӵуказеяз ик котырзэ тырыса туганэз сьӧры кошкиз. Тӥни со ик луиз кузпалъяськемзы. Валче улыны кутсконзы капчи ӧй вал, олокӧня квартираостӥ кыстаськыса ветлӥзы. Вордскиз куинь пиналзы. Собере ини, музъем басьтыса, асьсэос корка пуктыны кутскизы. Соку улыно-вылыно корка пуктӥсьёс ик ӧй вал ай, калык паймыса учкылӥз. Выль корказы ини покчи нылзы вордӥськиз. Али таиз но ужа. Кузпалъёс Валентинъёс пенсиын ке но, уж шеде. Ас корказы уло бере, бакчазы но вань, пудо но вордо. Городын улыса но, сӥльзы, вӧйзы, курег пуззы асьсэлэн. Соин ик пенсиез ӝегатэмзы понна тышкаськыса уг уло. Кылем арын Чучкаловъёс рубин сюанзэс пусйизы. Пиналъёссы, внукъёссы песянай- песятайзэс ӟечкыланы лыктӥзы. - Егит дыръямы сюан ӧм ортчытэ, со понна, лэся, али чупаськыто,- серекъя Валентина Константиновна.- Ваньзы маке мында кузьымъёсын лыктӥллям. Улытозям ӟеч шуба нуллытэк ик кылё ни малпасько вал - пиналъёсы кузьмазы. Кенъёсмы, эмеспимы туж умоесь, керетылэммы ӧвӧл, ми сямен ик тупаса мед улозы. - Ма, улытозяды чик керетылэмды ӧвӧл шат? - юасько кузпалъёслэсь. - Чылкак сыӵе дыръёстэк уг луылы, но ӵаш поттыса, вожаса керетылэммы ӧвӧл. Ог- огмес валаны тыршыса, ог-огмылы юрттыса улӥськом. Нимъёсмы но укшаллям бере, кусыпъёсмы но тупазы, дыр. ... Валентинаос Валентинъёссэс, Александраос Александръёссэс укшатыса-а, юри утчаса-а шедьтозы? Нош кинэ утчалозы Светланаос, Татьянаос, Михаилъёс? Кельше-а тӥледлы нимыз, уг-а, вазиське кузпалды шоры небыт, мусо. Ӵапак тӥ сое чебер но ӵошатонтэм карыны быгатоды, малпам ми, Чучкаловъёс дорын чай юыса пукыкумы. З. РЯБИНИНА. 8 мартлы Кызьы кырмыштод, озьы ик пальыштоз Кемалась ӧз пумиськылэ ни вал эшъёс тазьы ваньзы ӵош, одӥг ӝӧк сьӧрын пукыса. Учыр тупаз. Галя улыны выжиз ньыль комнатаен квартирае, нош Лина ӵапак со вакытэ Иже лыктӥз тодон-валанъёссэ будэтыны - со ужа гуртысь школаын. Пӧлысьтызы самой чупресэз бере, ваньзэс пыд йылазы ӝутӥз, тырмоз, пе, тӥледлы ас дуннеяды выйыса улыны, одӥг пол городэ потыку адӟиськытэк кызьы кошкод. Оляез но Ленаез сюлворонэз ӧй вал. Ма, кытчы ке палэнэ мынонэз ӧвӧл ук, кыксы но Ижевскын уло. Собере, нокинлы думыса возьыны - вожасьёссы ӧвӧл. Кыл бӧрсьы кыл, вераськон бугор сэраз. Пумиськемзы понна пичильтык ӟузизы но. Тодазы ваизы студент дыръёссэс, ӵош дышетскем эшъёссэс. Эх, кытчы меда сокем бызьыса-ворттыса кошко аръёс? Мугор но егит дыръя кадь веськрес ӧвӧл ни, кисыриос но ымнырез маялтыны туртто. Вераськон сямен одӥгезлэсь ортчыт мукетызлэн сюлмаськонэз бугыртӥськиз. - Тыныд нош мар ӝожтӥськонэз,- улонзэ курланы турттӥсь Галялы йыркуръяськытэк меӵкытӥз Лина.- Картэд бадӟым ужын берга. Вӧл-вӧл квартира басьтӥды, нылдылэн но пидылэн быдэн комнатаоссы вань. Милемлы со, гуртысь дэриез коласьёслы, синвумес кисьтыны кулэ. Школаысь бертӥськод но, пудо котырын бергано на, бадӟымгес бакча но возьытэк уг луы. - Тынад коть картэд ки улад, вань ужъёсты ас вылаз басьтыны турттэ,- уг сётӥськы кузё кышно, улон югдурез туж секыт кожаса.- Нош мынамез ӵем дыръя доре кӧланы гинэ бертэ, весь уж пӧлаз выемын. Шутэтскон нуналъёсы но маза уг сёто, весь отчы-татчы кыскало. Ваньмызлы со кулэ, милемлы гинэ дырыз уг тырмылы. Нылпиосыз школае ветло ни, нош атайзы трос-а адӟылэ соосты? Аслам но мылкыдъёсы пуксемын ӧвӧл ай,- быг-быг мугорзэ маялтӥз Галя. - Ойдо, вешаськыны дыр шедьтытэк уд улӥське, дыр? - ӧз чида ни вазьытэк Оля.- Милям тани Ленаен валес шунтӥсьмы гинэ но ӧвӧл. Уй вуэ ке, коть миндэрдэ ӟыгыръя. Картэн улонэз кемалы ик веръяны ӧз кылды, нылы но атайзэ тодытэк ик будэ, фотографиосъя гинэ тусбуйзэ адӟыны быгатэ. - Озьы ке но, тон чылкак огнад ӧвӧл,- ӝожтӥськиз Лена.- Тынад нылыд будэ, вань кин сярысь сюлмаськыны, кинэн вераськыны, пал кылид ке но. Нош мон чылкак огнам, та дырозь карт луонме ӧй пумита на. Доре бертӥськод, нокин пумитась ӧвӧл. Телефон, телевизор, магнитофон - тӥни кин мынам юлтошъёсы. Тае кылыса, Лина пыдлось-пыдлось лулӟиз: - Зэмзэ но, Лена, Галяен Оля, асьмемын ӵошатыса, шудпуйыос. Соослэн нылпиоссы будо. Нош мыным тани, картлы бызьыса но, инмар ӧвӧл сётэм анай луон шуд. Коляелэн но кыӵе потэ, вылды, нылпиезлэсь куаразэ кылэмез. Мар карод, висён уг юа мылкыдэз. Кытчы гинэ ӧй ветлы, кызьы гинэ ӧй эмъяськы - нокыӵе пайдаез ӧз луы. Комнатаын огдырлы шыпыт луиз. Котькудӥз аслэсьтыз куректонзэ кӧкыяз, дыр. Но ӝож мылкыдлы эшъёслэн сюлэмъёсазы каръяськыны Лина ӧз сёты: - Эй, нылъёс, мар ай ныръёстэс ошиды, урод шат асьмелэн улонмы? Монэ ик тани басьтэ. Йӧллы уг ёрмиськы, сӥльмы асьмелэн, бакча сиёнмы толбытлы тырме, шокаськом чылкыт омырен. Пиналъёс сярысь ке верано, ӧйтӧд, туала вакытэ нылпиосын яке нылпиостэк капчигес, вылды? Мынам соос школа тыр. Дышетсконзэс йылпумъяса но, анайзылы сямен, тросэз визь-кенешлы мыным вазисько. - Нош мон эрико кышномурт,- Леналэн но ушъяськем потӥз. - Кудӟыса поромем картэлэсь тыш уг сииськы. Кинэ яратэме потӥз, сое ярато. Йыры уг но поромы, семьяме туннэ маин сюдом ай шуыса. Улон интые вань, ужан интые умой, малпай ке, нылпи ваён ласянь но тунаса уг улы. Оля эшезлы дурбасьтӥз: - Шонер вераськод, Лена. Ӧйтӧд, кызьы али улысал, вылды, мон картэным, нош нылме сюратайлы оскеме ӧз поты. Милемлы ӵошен но умой. Ог-огмес котьку валаськом. Нош кезьыт валес сярысь ке верано, пеймыт уй бере выльысь шундыё нунал ӝужа. Галялэн но мылкыдыз небӟиз, лэся, картэз сярысь ӟеч кылъёс дурен кисьтӥськизы: - Со-а монэ ки йылаз уг нуллы, со-а нылпиоссэ уг яраты? Киосыз но Витяелэн зарниесь, дыр гинэ сёт солы ассэ возьматыны... Уд, озьы гинэ уд вала та нылкышноосты. Улон-вылонзылы ӝожтӥськыса, али гинэ синвуоссэс кисьтӥзы. Табере учкиськод но, соослэсь шудоосыз ик ӧвӧл ни кадь. Мар бен со сыӵе нылкышно шуд? Оло, со бурдоё тылобурдо - котыртӥ лоба-поръя, кытчы ке ыше, собере нош ик берытске? Оло нош синучконысь вужер? Кыӵе синмын шораз учкод, озьы ик со но кырмыштоз: бӧрдӥд ке - бӧрдоз, серектӥд ке - серектоз. Соин ик 8 Март нуналэ вань нылъёслы, нылкышноослы сӥзем потэ: шуд тылобурдо котьку мед поръялоз йыр вадьсытӥды, нош синучкон пальышаса гинэ мед учкоз шорады. Вылӥын верам та ньыль эшъёслэн но улон-вылонзы шудо-буро мед луоз. Л. МАЛЫХ. МОЖГАОС ИВОРТО Ӟечлыкез ӝутӥськиз Кызьы тодмо, кылем арлэн берпуметӥ толэзяз Можга районын ортчиз йӧллэсь ӟечлыксэ ӝутонъя месячник. Со ужрадэ кыскемын вал организациосысь но предприятиосысь валтӥсь специалистъёс. Месячник вакытэ соос вуылӥзы хозяйствоосы, эскеризы фермаослэсь чылкытлыксэс, пудоез сюдон рационэз чакламез. Быдэс толэзь ӵоже ужамлы йылпумъянъёсъя районысь укмыс хозяйствоос йӧлзэс нырысетӥ сортэн гинэ келязы. Соос ик устоосыз пӧлы пыртэмын. Быдэсак районъя 92,9 процентэз йӧл нырысетӥ сортэн кутэмын. Районысь хозяйствоослэн фермаосазы трос йӧл кыскон понна нюръяськон нуналмысь пуроме. Та нуналъёсы котькытынлэсь ӟеч йӧлзы потэ "Победа" (10 килограмм), "Трактор" (10,4), "Заря" (10,4) колхозъёсын, "Пычас" агрофирмаын (10,1). Нош улын вишуръёс котькуд скалзылэсь нуналаз 12,7 килограмм йӧл уськыто. Районын нырысьсэ группаысьтыз котькуд скалэзлэсь 5152 килограмм йӧл кыскиз "Можгинское" АООТ-ысь доярка А. Н. Романова. Солэн группаяз вал нырысьсэ кунян ваем скалъёс. Соосыз сак чакласа возизы хозяйствоысь зооветспециалистъёс. Сюдӥзы но та пудоосыз, мукетъёссэ сярысь, ческытгес, сиёнзэс пӧртэм минеральной ватсэтъёсын узырмытыса, утялтӥзы зооветеринарной наукалэн вань куронъёсызъя. Али нырысьсэ кунян ваем скалъёс ваньзы ик ферма уллёе пыртэмын. Ужтэк кылемъёслэн лыдзы али дыре лыдъяське 2970 адями, со пӧлысь ӝыныезлэсь уноез (1512) нылкышноос. Тросэз 30 ареслэсь бадӟым, 45,6 процентэз - 18-ысен 29 аресозь. Огъя басьтыса чаклано ке, ужтэк кылемъёс пӧлын трос лыдъясько 16-ысен 29 аресозь егит адямиос, 1997 арен ӵошатыса, миым соослэн лыдзы 3,7 процентлы йылӥз. Выпускникъёслэн лыдзы будӥз 130-лы, соос пӧлысь котькуд кыкетӥез общеобразовательной школаез йылпумъяз, котькуд куинетӥез - профессионально- технической училищеез. Будэ ужтэк кылем инвалидъёслэн лыдзы но. Егитъёс палэнэ уз кыле. Коньдон ласянь туж шуг луоз ке но, таяз аре егитъёслэн улонэнызы герӟаськем ужпумъёс палэнэ уз кыле шуыса оскытӥз Удмурт Республикаысь Егитъёсын ужанъя госкомитетлэн председателез А. И. Гальцин районысь общественной инструкторъёслэн кенешазы. Кылем арлы йылпумъянъёс лэсьтэмен ӵош люкаськемъёс вылезлы ужпумъёс пусйизы, тодэмын егитъёслэсь форумзэс ортчытон нунал. Со луоз 16 феврале Бадӟым Уча черкогуртын. ШӦКЫЧ Зарни нянь Магазинъёсысь нянь бичасьёс нуналысь нуналэ ӧжыт луо. Туала кышноос, коньдонзэс кӧнялы ке шыръян вылысь, асьсэос нянь пыжыны кутскизы. Пызьлэн няньлэн сямен ик арнялы быдэ йылэ ке но, ас дорын пыжемез дунтэмгес ик усе. Пызь вузан сярысь ялонэз кылыса, 20 январе адямиос салазкиосын, тазъёсын, машинаосын базаре 8 часлы ик люкаськыны кутскизы но КамАЗ машинаысь пызез оп! шуытозь бичаса быдтӥзы. Уноезлы ӧз тырмы, гуртъёсазы буш киосын бертоно луизы. Вылӥ сортъем мешок пызь 170 манетэн вал. Мешок сакыр - 620 манетэн. Кӧня меда луоз пызьлэн дуныз вуоно арняе? А. МЕНЬШИКОВА. Шаркан ёрос. ВАЛЭКТЭ ЮРИСТ СЭРЕГЕЗ НУЭ АДВОКАТ ЛИЛИЯ ШКЛЯЕВА Музъем пай понна - ошпи Мынам семьяелы колхозын музъем пай дэмлало. Нош мон курисько сое ошпиен яке мукет ваньбурен висъяны. Соглаш уг карисько. Курдасько: колхоз кылиз ке пыдйыл (банкрот), соку мар карыны луоз? Кыӵе дэмлан сётоды мыным? Мукет юанэ таӵе: колхозлэн уставез уг ке тупа законэн тупатэм куронъёслы, кызьы шедьтоно зэмлыкез? А. В. Вавож ёрос. Одӥг адямилы пай висъямын ке музъемен, мукетызлы - ваньбурен, соос пайёссэс воштыны быгато. Сыӵе учыръёс вузан-басьтон сярысь огкыл (договор) лэсьтӥське коньдонэн но. Ваньбурен пайлэн кузёез озьы ик быгатэ: - ваньбурзэ кутыны крестьян (фермер) хозяйство кылдытонэ, гурт удысъя организацие но предприятие кылдытонэ; - сое сётыны гурт удысын коммерциен вырись организация (эштос, огазеяськон, кооперация) кылдытонэ; - вузаны кенешем дунын, кузьманы крестьян (фермер) хозяйстволы но музон кузёослы; - воштыны музъем паен; - пӧрмытыны кельтослы (наследстволы); - законэн чаклам мукет ужрадъёсы. Гурт удысын коммерциен вырись организациысь потӥсьлы тыроно паезлэсь дунзэ яке сётоно ваньбур. Таӵе радлык (порядок) сярысь верамын медло организацилэн уставаз. Тӥни сыӵе валэктонъёс сётэ Россия Федерациысь Правительстволэн 1995-тӥ арын 1-тӥ феврале та ужпумъя кутэм 96 номеро постановлениез. Юридической лицо (предприятиос, фирма, колхоз) шуонлэн документъёсыз законлы уг ке тупало, сое кун уг пусйы (регистрацие уг басьты). Колхозлэн уставез сӧре ке законэн тупатэм куронъёсты, ужпумез эскере интыын правоез утись но регистрациен вырись ёз. Озьы лэсьтыны куре Россия Федерацилэн Граждан кодексысьтыз 51-тӥ ёзэт (статья). Гажано нылкышноос, мусо, чебер апайёс! Сюлмысьтым ӟечкыласько тӥледыз вуись тулыс праздникен - Дуннеысь нылкышноослэн нуналэнызы. Сӥзисько тӥледлы юн тазалык, ӟеч мылкыд, улонады но семья куспады ваньзэ умойзэ гинэ. Тулыс шундылэн пӧсь тылсиосыз мед шунтозы тӥледыз пеймыт, кезьыт уйёсы но, ӵуказе нуналлы оскон но кужым сётыса. Гажаса Анатолий МЕИТОВ, Кун Кенешлэн Тӧроезлэн нырысетӥ воштӥсезлэн юрттӥсез. Алла Кузнецова Улӥськом-вылӥськом... Ленинъя вордӥським. Сталинъя ыбиським. Хрущевъя, эсьмаса, кукуруза кизим. Брежневъя тэк пуким, Колбаса сиыса, Пиосмес Афганэ Бырыны келяса. Горбачев ки улын Эркынак эрказмим, Эрикмес талонъя Йырчукин бекмыльтӥм. Ельцинъя улӥськом - Уй-нунал юиськом. Шаермес юдыса, Виро шур кисьтаськом. Азьланяз мар луоз - кин тодэ? Вуоно йыръёсмы басьтозы-а лыдэ? Музъеммес таркаммес, Йыръёсмес ыштэммес?.. Ужтэк кылён - кайгырон Россиын ужтэк кылемъёслэн лыдзы арысь аре будэ. Ужаны быгатӥсь калык пӧлын ужтэк кылемъёслэн лыдзы туэ 12,4 процент люкаськиз, нош кылем арын 11,8 процент вал. Туэ январь толэзе уж утчасьёс пӧлысь 8 миллион 956 сюрсэз котькыӵе уже кутскыны дась. Феврале Россиын ужтэк кылемъёслэн лыдзы 8,3 процентлы будӥз. Ӵошатэ: кылем арын январь толэзе Россиын ужтэк кылемъёслэн лыдзы ужаны быгатӥсь калык пӧлын 11,5 процент вал, 1997 арын - 10,8 процент, 1996 арын - 9,6 процент, 1995 арын - 8,3 процент, 1994 арын - 7 процент. Иворъёсъя национальной служба. Удмурт Республикаын музъем вылысь ву объектъёсты кутэм понна дунлэн быдӟалаез сярысь Удмурт Республикаысь Кун Кенешлэн Постановлениез Россия Федерацилэн Ву кодексэзъя, "Ву объектъёсты кутэм понна дун тырон сярысь" Федеральной законъя, Россия Федерациысь Правительстволэн 1998 арын 22 июле юнматэм "Экономической улосъёсысь но шуръёс, тыос, зарезьёс котырысь ву объектъёсты кутэм понна дунъёслэсь тужгес бадӟым но тужгес пичи быдӟалазэс юнматон сярысь" 818 номеро постановлениезъя, ву объектъёсты кутонъя, утёнъя но тупатъянъя ужез экономика ласянь радъян но та ужлэн коньдон поттыны быгатэмез пумысен принципъёсты улонэ пыӵатон понна, Удмурт Республикаысь Кун Кенеш пуктэ: 1. Юнматоно Удмурт Республикаын музъем вылысь ву объектъёсты кутэм понна дунлэсь быдӟалазэ: - музъем вылысь ву объектъёсысь ву басьтэм понна - одӥг сюрс кубической метрез понна 62 манет; - музъем вылысь ву объектъёсысь вуэз калыклы сётыны басьтэм понна - одӥг сюрс кубической метрез понна 30 манет; - кырсёмытэм вуосты музъем вылысь ву объектъёсы кисьтэм понна - одӥг кубической метрез понна 7,9 манет; - музъем вылысь ву объектъёслэсь интыоссэс кутон - арскын одӥг квадратной метрез понна 2400 манет. 2. Музъем вылысь ву объектъёсты кутэм понна тыронъёс бюджетъёсы кошко таӵе люкетъёсын: 40 поцентэз - федерацилэн бюджетаз, 15 процентэз - республикалэн бюджетаз, 45 процентэз - интыосысь бюджетъёсы. 3. Удмурт Республикаысь Правительстволы юнматоно музъем вылысь ву объектъёсты кутэм понна вуэм тыронъёсты кытчы ыстонъя но кызьы кутонъя радэз. 4. Удмурт Республикаысь Правительстволы но интыысь аскивалтонъя ёзъёслы бюджетъёсты кыдытыку чаклано бюджетъёсы вуись вань тыронъёсты ыстыны ву объектъёсты но инженерной сооружениосты тупатъянэ, утёнэ. 5.Та постановлениез уже кутоно 1999 арын 1 апрельысен. Удмурт Республикаысь Кун Кенешлэн Тӧроез А. А. Волков. Ижевск город, 1999 арын 24 феврале. � 744-И. Ува ёросысь Нылга черкогуртын улӥсь Валерий Евгеньевич АКБАЕВЕЗ 49 арес тырмонэныз ӟечкылало кузпалыз, нылпиосыз, кенэз, ӵыжы-выжыосыз но эшъёсыз. Соос сӥзё шудбур, тазалык, байлык, ужаз но улоназ азинсконъёс. Ӟечкылан Ува ёросысь Косоево гуртын улӥсь анаймес Юлия Ильинична Черепановаез ӟечкыласьком 60 арес тырмеменыз. Сӥзиськом кема аръёс ӵоже юн тазалыко луыны. Сюлэмад ноку медаз каръяськылы куректон, ымнырад котьку мед пиштоз шумпотон но пальпотон. Гажаса нылпиосыд, кенъёсыд, эмеспиосыд, соослэн нылпиоссы. ШӦКЫЧ Чорыглэсь адӟем карыса Калык шуэ: чорыг утча мур инты, адями - узыр инты. Берло дыре улонамы мертэт одӥг: уксё! Нош кытын? Вузкаронын. "Риза" огазеяськонысь вузкарись М. З. Ситдикова ӝажы вылаз пӧртэм пумо колбасаос, сосискаос-сарделькаос, ветчинаос тырем. Бергаз-бергаз огез басьяськись, киыныз шонтӥз но вуз шоры чиньыеныз возьматӥз: мыным тазэ но тазэ мерталэ. Ситдикова лыдъяз-чотаз: - 55 манет но 50 копейка. Эскерисьёс: шуизы: - 52 манет но 80 копейка тыр. Пӧязы 2 манет но 70 копейкалы. Соос 41 килограмм ветчинаез вузаны копак ӧз лэзе, - стандартлы уг тупа шӧмызъя но, зынызъя но, тусызъя но. Поттэ вылэм сое Постолысь "Умко" огазеяськон. Соин ик та предприятилы алон гожтэмын. "Сфинкс" огазеяскьонысь вузкарись М. Н. Шабалина касса аппараттэк вузкаре. Вань вузъёсызлы накладнойёссэ возьматыны ӧз быгаты. Гираосыз клеймоен пусйымтэ. Укылтэм вузкарись штраф тыроно луиз. Одӥгез ужбергатӥсь ужаны кутэм М. Н. Даниловаез. Соин огкыл (договор) гожтымтэ, тазалык сярысь справказэ курымтэ. Нош кышномурт уг дэмла чугун тазъёс - вуза сакыр но кеньыр. Чыры-пырыесь-а меда таӵе куронъёс? Ӧвӧл. Со пичи кескичъяськонъёс - налог тыронлэсь пегӟон амалъёс. П. НИКОЛАЕВ. Быдэс ӝыт Дасэтӥ мартэ Кияса культура юртын ортчоз "Мылысь-кыдысь" ӝыт. Со быдэсак сӥземын луоз тодмо журналистлы, писательлы Кирилл Ломагинлы. Быдэс ӝыт ӵоже учкисьёс тодыны быгатозы та адямилэн ортчем сюресэз, журналистикаын но литератураын азинлыкъёсыз, туала вакытысь сюлэмшугъяськытӥсь малпанъёсыз сярысь. Трос калык люкаськоз та ӝытэ Киясаысь культура юртэ. Ужрадэз шулдыртозы кырӟась- верасьёс. Кутскоз ӝытазе куать часын. Дася но ортчытэ пумиськонэз Удмурт телевидение, отысь журналист Семен Карпов. Е. РОМАШОВА. Пенсиосъя фонд ивортэ Январе пенсиосты тырон Ижевскын 55 процентлы быдэстэмын ни, нош республикаын - 44 процентлы. Озьыен, пенсиез тырыны кутскизы вань городъёсын но ёросъёсын. Сое тыронъя график лэсьтэмын котькуд городын но ёросын, та арын январь-февраль толэзьёсы страховой взносъёсты тыронъя планлэсь быдэсъяськемзэ эскерыса. Январь толэзьлы пенсиез чакламын 18-тӥ мартозь тырыны. Со понна февраль толэзе 125 миллион манет коньдон люканы кулэ вал, нош вуиз 129 миллион. Москваысь возьмам 60 миллион манет интые 35 миллион гинэ вуиз. Пунэмъёсты берыктонъя отдел но агропромышленной комплексысь предприяиос пунэмъёсты тырыны амал утчало. Нырысетӥ мартлы гуртын сиён-юон поттӥсьёсын 90 пала огкыл кутэмын но вань пунэмъёсты 5 ар ӵоже тырыны чакламын. Пунэмъёсты берыктыны тыршо Воткинск, Пичи Пурга, Балезино, Завьял но Глазов ёросъёсын. Татысь даслэсь ятыргес предприятиос тупанкылъёс гожтӥзы ини. Сыӵе ик ужрад нуиське Ува, Кияса, Шаркан но Яр ёросъёсын. Нош Президентлэсь 1647-тӥ Указзэ пунэме кылем предприятиос сокем ик кулэ ӧз каре но 1-тӥ апрелёзь тыронъёссэс тырыны уг дырто. Пунэмъёссэс та дырозь берыктӥзы ке, вань пениоссы кысӥськозы шуыса тодо ке но. Удмурт Республикаысь Пенсиосъя фондлэн пресс-службаез. Дун ошмес кадь "... Кылбур гожъясько пинал дырысеным. Аслэсьтым улонме поэзилы быдэсак сӥзи 1991-тӥ арын тулыспал толэзьысен. 1992-тӥ арын куартолэзе "Удмуртия" книгапоттонни печатлаз "Зеркало" нимо нырысетӥ кылбур бичетме. Отчы пыризы басняос, фельетонъёс, юморескаос. Нош 1993-тӥ арын тулыспал толэзе потӥз лирика чуръёсын тырмем "На пруду Ижевском" книгае..." Та кылъёсты мон лыдӟи Удмуртиысь ӟуч поэтлэн Владимир Тяптинлэн автобиографиысьтыз. Нырысь ик - автор кылбур дуннее вакчи дыр куспын оскымон вамышъёс лэсьтӥз, кӧня ке ар куспын кӧня ке книга поттӥз. Берлоез - "Вздымаются храмы России" - алигес гинэ печатламын. Поэтлэн жингрес чуръёсызъя кырӟан гуръёс кылдытъяло Ижысь но Москваысь композиторъёс. Кырӟанъёсыз сюлэсь ятыр люкаськизы ини. Али кылбурчиен дас ньыль крезьгурчи кусып возе. Вожъяськымон, адӟем карымон ӧвӧл шат со? Владимир Яковлевич Тяптинлэн кылбуръёсыз но кырӟанъёсыз ӵемгес но ӵемгес чузъяськыло ни радио пыр, сцена вылын. Ачиз нош со сюлмысьтыз потэм чуръёссэ быгатыса, ӝутскем мылкыдын, сюлме пырымон лыдӟе. Кылбуръёсыз потыло газетъёсын но журналъёсын. Гожъя туж пӧртэм учыръёс сярысь. Нырысь тодмо луиз серемес чуръёсыныз но басняосыныз, берло - Ижевскез данъяменыз. Трос кылбуръёссэ элькунысьтымы дано адямиослы сӥзиз. Быгатэ калыклэн куремезъя но ӝог гинэ гожтыны. Туала улонысь трос ӟечсэ но, уродзэ но сюлмыз ӝог шӧдэ, солы дунъет сётэ. "Ижевск аслэсьтыз кырӟасьсэ шедьтӥз", - шуиз со сярысь критик, литературовед Анна Зуева. Ваньмыз сярысь тодыны-валаны луиз, ассэ кылбурчиез но соин эшъяськись крезьгурчиосты но кырӟасьёсты сцена вылысен кылзыса. Удмурт кун филармония элькунысьтымы усто ӟуч поэтлэн творчествоезлы быдэс ӝытсэ сӥзиз. Усто пӧрмиз, малпасько, поэзилы но кырӟанлы сӥзем бадӟым праздник. Зал тыр люкаськизы кылбурчилэн уно эшъёсыз, культура но мукет удысъёсын ужасьёс, озьы ик - Москваысь куноос. Поэтлэн кылъёсызъя гожтэм ужъёсты быдэстӥзы пӧртэм усточиос. Удмурт Элькунысь дано артист Виктор Сергиенко кырӟаз элькунысьтымы Культурая министерстволэн но МВД-лэн духовой инструментъёсъя кун оркестрзылэн шудэмез улсын. Учкисьёс котьку сямен ик туж шуныт пумитазы крезьгурчиез Евгения Копысоваез. Со Владимир Тяптинлэсь трос чуръёссэ кужмо кырӟанъёслы пӧрмытӥз. Эшшо но трос кырӟаз матысь эшез крезьгурчи Виктор Шацкий. Поэтлэн куатьтон пала кылбурезлы гур шедьтэм ни со. Сцена вылын ог-огзэс озьы ик воштылӥзы Удмурт Элькунысь калык артист Николай Копысов (солэн но аслаз шедьтэм крезьгурез вал), электромеханикая заводлэн хорез, Вотка ёросысь крезьгурчи Александр Бабкин но мукет кырӟасьёс. Нош вань учкисьёсты паймытӥз Москваысь куно Людмила Лядова. Со аслэсьтыз гуръёссэ кырӟа но, фортепианоен но шудэ, туж юн мылкыдзэ бадӟым шурлэн тудӟемез кадь возьматэ, со вискын ик учкисьёсын сюлмысь вераськыны но вуэ. Кин ке шудыса та адями сярысь тазьы верам: атомноракетной нылкышно со. Пересьмыса но мылкыдыз егит муртлэн кадь. Бурдъя быдэс залэз, улонэз яратыны косӥсь мылкыд кылдытэ. Чузъяськизы "Мон яратӥсько" вальсэз, "Россия - мынам яратонэ" кырӟанэз но мукет произведениосыз. Ӝытэз нуиз шаерысьтымы калык артистка Фаина Будина. Л. ФЕДОРОВ. Сютэм ум кулэ Таяз паларе Америкаысь Огазеям Штатъёслэн Правительствозы но Европейской Союз Россие пӧртэм пумо сиён-юон вуттыны чакла. Правительствомы сое нимаз-нимаз улосъёсы люкылон пумысен постановление кутӥз. Озьы Удмурт Республикае США-ысь вуыны кулэ 6 сюрс тонна чабей, 8 сюрс тонна кукуруза, 6 сюрс тонная соя. Нош рис сётыны вылӥын малы ке пумит кариськиллям. Озьы ик палэнтӥмы ортчем скал но парсь сӥль, бобы но кӧс йӧл. Европейской Союз элькунмылы ӵектэ 35 сюрс тонна чабей, 2 сюрс тонна рис, ӟег уз висъяськы. Сёто на 5 сюрс тонна скал сӥль, 4 сюрс тонна парсь сӥль, 3 сюрс тонна кӧс йӧл. Озьыен, сютэм ум кулэ ай. Америка но Европейской Союз асьмеды туэ ӝыны арзэ сюдыны малпа кадь. Н. Лялин. Алла Кузнецова Тямысэтӥ мартэн Акросонет Тол куазь оштолэзе чигнатскыны уг на дырты, Ялан ымныр шоры лымыеныз пазяськыны ӧдъя. Муэз лымшоръёсы шунтэ ке но шунды, Ыбылӥське уин тол куазь ӟырт-ӟыртэныз огъя. Сюлэмъёсысь тулыс куазез шат сайялоз пилем? Экто шунды сиос улын пичи вуюисьёс. Тыро шудэз витё нылкышноос... Ӥ (чурыт и-эн кутскись кылъёс ӧвӧл вылэм). Мон дыгоми ке но азьланьтыны акрочурез, Азьло сямен шудбур туж витисько. Роза керттэт кышноослы мон кузьмасько. Тазалыкез, яратонэз, узырлыкез Эшъёсылы вань сюлмысьтым мон сӥзисько. Нуныятӥсь кизилиез ӝуатӥсько. Экономика "Тазалык" юом, таза луом Сьӧрлось вуттэм сиёнэн-юонэн ваньмылэн кӧтмы тыриз кадь ини, табере утчаськом асьме дорын поттэмзэ-дасямзэ. Ижевскысь ческыт но минерал вуосты поттӥсь завод ӵапак та дыръёсты витиз кадь: продукцизэ ялан выльдэ, азьвылэныз ӵошатыса, туннэ шӧдскымон ӟечгес улэ. Директорез Николай Тихонович Полянский ортчем арез но умоен пусйиз. Сое адӟоно лыдпусъёсъя но. Валлян арен ӵошатыса, миым 14 процентлы ятыргес сиён-ююон дасямын но басьтӥсь доры вуттэмын. Мукет сямен ке верано, шаерамы улӥсьлы быдэ поттэмын 7,5 бутылка минерал но ческыт ву. Юонъёс пӧлысь 54 процентэз - минерал ву, 38-эз - напитокъёс, 7-10 процентэз - винаос. Калыклы тужгес ярало "Лимонад", "Буратино", "Пчёлка". Ческыт вуосты завод кылем арын кык поллы тросгес поттӥз, озьы Удмуртиысь рынокез 70 процентлы киултӥз. Со бадӟым вормон ни, уго таӵе вузэз асьме доры кытысь гинэ уг вутто! Минерал вуос сярысь ке верано, завод 90 процентсэ рынокез возьыны быгатэ ни. Тужгес но умой мыно "Тазалык" но "Ошмес". Россиысь 100 тужгес но усто вуз пӧлы миым шедиз ӵапак та кык ву. Шуг-секыт вакытэ но Н. Т. Полянский коллективзэ утьыны быгатӥз, ужан интыоссэс паськытатыса но выль продукция поттонэз радъяса. Туннэ 30 пумо напиток потто ке, ар йылпумъяськытозь, та лыдпус 40-озь вуоз. Ижевскын но республикаын улӥсьёс ваньзэ сое одно ик эскерозы, басьтозы. Тросэн келяло палэнэ но, тужгес но минерал вуэз. - 1992-тӥ арын луэм кризис дыръя милемлы пыд выламы султыны юрттӥз Казань,- шуэ Николай Тихонович.- "Тазалыкез" но "Ошмесэз" отын ӟеч басьтӥзы, али но басьто. Озьы ик нуо Перме, трос мукет интыосы, СНГ-е но. Винаосты лэсьтӥськом "Ошмес" вылын. Ма шуод, заводлы 45 ар гинэ ай, самой зол ужан вакытэз. Туэ нош ик усьтоз выль цехсэ, отын ческыт пыжиськемъёс дасялоз. Со сяна, поттозы кык пумо выль "Благодатная" но "Студеный ключ" нимо минерал ву. Лэсьтӥське часовня, арняяз кӧня ке нунал ӵоже отысь вуэз дунтэк басьтыны быгатозы вань мылкыд карисьёс. Заводлэн ӵуказе нуналэз оскымон. Со сярысь верало трос пумо медальёсыз но дипломъёсыз. Ӝоген ужаны потоз 3 сменае, шутэтскон нуналъёсты адӟылытэк. Ма сярысь со вера? Вуэ гужем! Озьыен, пӧсь нуналъёсы асьмеос юз-юз юом дорамы дасям ческыт но тазалыкмы понна кулэ луись вуосты. Л. МЕДВЕДЕВА. Гажано нылкышноос! Тулыс вуэмъя котыр инкуазь улӟе. Озьы ик котькуд адямилэн сюлмаз вордске оскон, вылез тулыс солы ваньзэ ӟечсэ гинэ ваёз, шуныт но шумпотон кузьмалоз шуыса. Соин ик тужгес югыт праздникез - Нылкышноослэсь нуналзэс - быдэс дуннеын пусъё тулыслэн нырысетӥ нуналъёсаз - 8-тӥ Мартэ. Нылкышно, солэн яратонэз, семьязэ утьыны быгатэмез ӝутӥзы но, ӝутозы но бадӟымесь вормонъёсы, астэ жалятэк тыршонэ. Музъем вылын вань югытэз, сюлэмлы дуноез кышномуртлы луыса возисько. Со уте обществолэсь, адямилэсь ӟеч сямъёссэ. Секыт вакытэ улӥськом бере, семьялы но каньыл ӧвӧл. Озьы ке но, нылкышноос шуг- секытъёслы уг сётӥсько. Соос нылпи будэто, юрт котырзэс утё-учко, шуге-леке шедем ӵыжы-выжыоссылы но эшъёссылы юртто. Кун властьлэн ёзъёсыз бадӟым саклык висъяло анайлыкез но нылпилыкез утёнлы, шуге- леке шедемъёслы, трос нылпиё семьяослы юрттонлы. Вунэтэмын ӧвӧл тазалыкез утён, культура, калыкез дышетон удысъёс но. Анайёсмы но кузпалъёсмы, нылъёсмы но апай-сузэръёсмы! Мылысь-кыдысь ӟечкыласьком тӥледыз 8-тӥ Мартэн - Нылкышноослэн нуналэнызы. Сюлэмъёсады медаз кысэ оскон но вылез борды кыстӥськон мылкыд, нош семьяосады яратон но тупан мед кузёяськозы. Шудбур тӥлед, юн тазалык, вань ӟеч малпанъёсты мед быдэсмозы! Удмурт Республикаысь Кун Кенеш Удмурт Республикаысь Правительство Гуртъёсын берло дыре уноез клубъёс ужамысь дугдӥзы, йылӥз ужтэк кылемъёслэн лыдзы. Егитъёс пӧлын вӧлмыны кутскиз аракы юон, наркотикъёсын но мукет усыкмытӥсь ватсэтъёсын "шулдыръяськон"... (Газетъёсысь). Нырысетӥ пияш: - Васька, кылӥд-а ни, бензинлы дунъёс матысь дыре будо, пе? Кыкетӥез пияш: - Эн сюлмаськы, Гирыш, ацетон но, клей но шедёз ай. Только коньдонмы узгес тырмы, дыр. Лушкаськыны пыр вал кытчы ке, но ваньзэ вороватьтӥзы ни кадь... Суредаз Леонид Прозоров. ГРИГОРИЙ МЕДВЕДЕВЛЭН ВОРДСКЕМ ДЫРЫСЕН 90 АР Зэмлыко но "синмальдунне" Григорий Сергеевич Медведев вордскиз 1904 арын 5 (18) мартэ. 33 арес дыръяз сое литература ӧрезлэсь палэнтӥзы. Озьы ке но, вакчи дыр ӵоже писатель устоесь веросъёссэ но "Лӧзя бесмен" трилогизэ кылдытӥз, быгатыса суредаз 30-тӥ аръёсы гуртын ортчись воштӥськонъёсты. Солэн малпам чеберлыко дуннеяз вань зэмлыко но "синэз мальдытӥсь" (утопической) тодметъёсыз. Оло, писатель зэм но оскылӥз матысь вормонъёслы. Оло, социальной заказэз быдэстэменыз вань малпанъёссэ пумозяз вераны ӧз быгаты. Оло, просветитель-романтик луыса, югдытон но дышетон вылысь, "выль" улонэз возьматыны тыршиз... Таин валче Г. Медведев, одӥг ласянь, лэчыт ужпумъёсты ӝутэ, оскымон, улэпесь характеръёсты суреда, нош, мукет ласянь, троссэ шугадӟонъёсты палэнэ кельтэ. Кылсярысь, осконтэм (утопичной) луэ куд-ог геройёсызлэн вакчи дыр куспын ӝотрак воштӥськемзы. Угось адямилы люкам ваньбурезлэсь люкиськыны чидантэм секыт вал, дыр; озьы ик ужез яратӥсьтэм мурт но сокем ӝог уж борды ӝабырскыны ӧз тыршылы, ӧз дышылы, дыр... Но оглом басьтоно ке, Г. Медведевлэн текстэз - со дуно художественной (чеберлыко) документ. Дугдом кӧня ке тунсыко интыосыз вылэ. "Классъя аслаз луись муртэ яратон" книгаын валтӥсь принциплы пӧрме. Верасько Кудашевич но Ӟапык: "Тани, шуом, урӟем синмо мурт тон азьын. Кызьы учкод со шоры?" Ӟапык малы ке шумпотыса, чурыт вераз: "Классово! Котьмар классово учкемез куре". Та кылъёс кышкыт но, мудрон но чузъясько, со дыре ик вакытлэсь огъя шӧмзэ шӧдытӥсь штрих (тодмет) луо. Пылька Сандыр заводысь лыктэмъёсты адӟыса юа: "Чашка сюмыкъёсын оло юрттозы-а?" Солы шуо: "Шефъёс соос. Ужмес азинтон понна, сое шонер пуктон понна лыктэмын. Завод сельской хозяйствоез выльдонэнымы кивалтэ". Сандыр берло малпаськонэ усе: "Мон заводэ ӧй ветлылы, маин шокамзэ уг тодӥськы... Татын бусы уж. Отын мукет. Кызьы соос тодозы крестьян ужез? Ядрона вошь кадь та..." Автор, одӥг ласянь, героез шоры серем пыр учке кадь, но со дыре ик, Пылька Сандырзэ шузи улэ аналскемен суредаса, со туж визьмо малпан вера. Таин герӟаськемын мукетыз суред, писатель отын одӥгезлэсь шефлэсь, Веселовлэсь, бусы ужъёсты нуыны дышетэмзэ возьматэ: "Веселов вуэм бераз ик ӟег культолэсь секытлыксэ утчаз. Собере одӥг ӟег йырез кырымпыдэсаз куадаса, тысьёссэ лыдъяз. Син дораз матэ карыса учкылӥз соосыз. Тыр, юн кисьмам ӟег пӧлын купырмемъёсыз но вань". Веранэз ӧвӧл, та герой мултэс но кулэтэм адске крестьянъёс пӧлын, озьы ке но, зэмлыко: заводысь та выллем ужасьёсыз партия гуртъёсы келялляз, музъем ужез ӟеч тодӥсь но инкуазен тупаса улыны быгатӥсь адямиосты индылон вылысь. Г. Медведев куашкатэм, сэрпалтэм Инмар интые выль "инмаръёслэсь" вордскемзэс но возьматэ. Кылсярысь, геройёсыз чылкак Инмар кемозь вутто... тракторез. Текстын таин герӟаськем примеръёс туж трос. "Тракторез писыръяса витён али ик ӝутоно. Кулэ ке, вӧтын но мед адӟылозы. Со тыныд выль кышно гинэ ӧвӧл! Выль техникалэн гуртэ выжыяськемез!" - шуэ Ӟапык. Тракторез улэпен адӟо. Сандыр малпа: "Трактор машина ӧвӧл кадь. Солэн тэтчась сюлэмыз вань. Улэп, нюръяськонэ ӝутӥсь кужым!" Трактор адямиослэн йырсазязы, улоназы мултэс инты басьтэменыз нуныян, мусоян кыллы пӧрме. Кылсярысь, таӵе диалогын. "Чыртызэ купыртыса, пыд йылаз тэтчиз но Надьказэ, нуныез сямен, кияз басьтӥз Сандыр. "У-ух, тон, трактор" - "Вот пересь! Лэзь", - Надька серекъя. "Ух, трактор... Ӝоген тракторъёс вуозы. Ӝоген аслам но пичи тракторе (нылпие - С. А.) луоз. У-ух... поехала душа в рай!.." Талы матын луэ Ӟапыклэн Клаваеныз вераськемез: "Мон... мон тонэ яратӥсько". - "У-ру-ру... Вератэк но адӟисько мон сое". - "К-ух, трактор! - пачылме, кисьма Ӟапык Клавалэн вешаса кадь учкем улсаз. - Бызьысалыд-а мыным?" Чылкак тупасьтэм дыре но тупасьтэм интыосын "трактор" кыллэн кутӥськемез андан арберилэсь паймымон, синмаськытӥсь, бордаз кыскись (магической) кужымен тырмемзэ пусъе. Эшшо одӥг тунсыко эпизод: Ӟапык сельсоветлэн кивалтӥсез доры лыктэ. "Сельсовет тӧро, нырпелессэ конгыръяса, гожмаса быдтэм ӝӧк сьӧрын пуке вал. Ӟапыклэсь пыремзэ адӟыса, ӝогак мыкырскиз, нырзэ ӝӧк борды йӧттымон". Висъям кылъёс ас кожазы кӧтвеськантэм тусбуй кылдыто ини. Нош соос борды ватсасько на та выллемъёсыз: "трахомаен висись синъёсыз", "нылкышно куараез", "кузялэс ымнырыз быдэсак кисыръяськемын". Автор советской бюрократлэсь туссэ син шоры пуктымон суреда, бумагаос пӧлы выем кышкась адямиез возьматэ, серем карыса сое адӟытэ. Нош кыӵе "синмальдунне" тодметъёс пумисько та трилогиын, тужгес но "Бадӟым нунал" книгаяз? Шуг-секытъёс вакчи дыр куспын геройлыко амалэн вормемын луо, адямиос шудбурен пальккасько ("Клава палэнынгес сылӥсь Люба доры мынӥз но дыдыклэн гулльы каремез музэн вераз: "Улон асьмелы шумпотонлы сётэмын"). Суредам дунне узырлыкен пачылме. Книгалэн ог люкетаз колхозникъёслэн вормонъёссылы сӥзем адӟытон (выставка) суредамын. Лыдӟиськом: "Узыр, тыр, пачыл адско бакча кушманъёс... Пудо ваньбурлы Ондӥ нимаз сэрег висъяз. Отын четлыкъёсы пуктэм курегъёс, атасъёс, ӟазегъёс, ӵӧжъёс, ыжгон, пыгыли, черсӥськемъёс, куос, постромкаос...". Соку ик тодэ лыктэ советской вакытысь ВДНХ - ушъяськон понна кылдытэм, монументальной, зэмос улонлы трос ласянь тупасьтэм адӟытон. Текстын озьы ик пумиське "золотой дождь" сортовой сезьы сярысь вераськон. "Золотой дождь", валамон ини, бусьтыр улонэз возьматӥсь тодмет. Куинетӥ книгаын ӵем пумиське коммунистической мифен- утопиен герӟаськем символика: лозунгъёс, флагъёс, президиумъёс, плакатъёс, обязательствоос, туннэзэ но толлозэ ваче пумит пуктон. Синмальдуннелэн пусйымон тодметэз - "ударно ужан", социалистической ӵошатскон. Та сярысь вераськон кутске книгалэн нырысетӥ люкетъёсаз ик. Тумошо луэ Надькалэн но Пылькинлэн ӵошатскемзы. Эшкабей Ондӥ пайме: "Мар маскара нуналъёс кылдыло та! Картэз кышноеныз ӵошатскыны кутско!" Луэ-а та гротеск яке гипербола? Туннэ нуналысен учкыса, озьы ик вань, дыр. Нош вакытсэ бугыртоно ке, та выллем фантасмагорической суредъёс зэмос улонын трос пумисько вылэм. Зэмлык но выжыкыл висъяны луонтэм герӟаськиллям Г. Медведевлэн произведенияз, вакыт но сыӵе ик вылэм... Светлана Арекеева, кылтодон наукаосъя кандидат. Ӟечкылан Завьялово ёросысь Якшур гуртысь Марина Владимировна Морозоваез ӟечкыласько 60 арес тырмеменыз. Шудо но тупаса улон, тазалык сӥзисько. Можга ёросысь Б. Кибья гуртысь Антонина Постникова. Огез юа, мукетыз вера х х х Яратон, яратон, Кыӵе, мар меда тон: Я шулдыр шумпотон, Я секыт куректон? Шумпотон ке тон, Малы шудо ӧвӧл мон? Куректон ке тон, Сюлмам котьку малы тон? Яратон, яратон, Бен кыӵе меда тон? Оло, сопал ярдурысь льӧль сяська? Оло, инмысь яркыт кизили? Сопал ярдурысь льӧль сяська ке тон, Малы-о дорад выжеме уг лу? Инмысь яркыт кизили ке тон, Малы-о дорад суземе уг лу? Яратон, яратон, Кыӵе, мар меда тон? Пётр ОРЕХОВ, Алнаш ёросысь Кузьыли гурт. х х х Кузьыли нимо гурт вань Алнаш ёросын, Отын вань кылбурчи мылкыдо пияшсы. Гожтэт пыр со юа: мар, пе, со - яратон, Шумпотон гинэ-а я секыт куректон? Яратон, яратон... Зэм ик, мар меда со?.. Вуисько ни ке но сизьымдон аресозь, Та дыре но сое тодыны турттӥсько, Со сярысь меӵ но ӟеч вераны ӟудӥсько. Пётр ПОЗДЕЕВ. Паймисьтэм сярысь - паймымон Литературая экзаменъёс азьын Кыӵе ке произведение сярысь нимысьтыз ноку гожъяме ӧй вал. Со калэ вуттӥз Вячеслав Ар-Сергилэн "Пашка Педор - транзит" веросэз. Ӧй но шӧды гожъяськон ӝӧк сьӧрам пуксемме, киосылэсь куалекъямзэс но бӧрысь гинэ валай. Лыдӟем произведение адямиез сыӵе калэ вуттэ бере, со ичи ӧвӧл ини. "Одно ик лыдӟоно школаын, литературно-творческой кружокам ветлӥсь пиналъёс азьын", - пусйи мон "Удмурт дунне" газетлэн туэ понна 21-тӥ номерезлэн ньылетӥ бамез вылэ. "Собере мултэс уз луы 11-тӥ классын дышетскисьёс пӧлын но эскерыны. Экзаменационной билетъёсын Вячеслав Ар-Сергилэн (Сергеевлэн) фамилиез пумиськылэ", - малпай на ас поннам. Нырысь ик - верослэн нимыз пумысен. Пашка Педор татын юнме шорысь кутэмын ӧвӧл, дыр. Удмурт литератураын сыӵе персонаж пумиськылӥз ини - асьмеос ваньмы тодӥськомы сое. Сояз но, таяз но - улонлэн урдсаз кылем адямиос, валантэм питрась дунне-колёса улэ шедемъёс. И. Т. Дядюковлэсь Пашка Педорзэ положительной герой шуыса тодӥськомы ке вал, али сое чылкак мукет пала берыктӥсьёс но вань: азьтэм, пе, соин ик кенерез но пась. Сюлмо мурт кенерзэ чакласа возёз. Тужгес но - тодэ ке, ма луэ вал со понна азьло аръёсы. Туала Пашка Педор но (Сергеевлэн) сыӵе ик. Корказэ кышъяны но солэн мылкыдыз уг тырмы: сылэ ке - сылэ, пограз ке - ӵок. Воргоронлэн портретэз пыр мон гуртысь трос тодмоосме адӟисько - "буёлзэ ыштэм комбинезон, резинка сапег, курег пузаны возьдаськытозь картуз, куака кар тусо изьы..." Татын авторлэн серекъямез чик но уг шӧдӥськы - жаляса озьы вера. Жаля но, пыкылэ но кадь. Геройзэ уг пыкылы - таӵе валантэм улонмес. Со ук ваньзэ тазьы йырин-чукин берыктӥз, со ук пичи дыръяз котьмалы паймись адямиез, Пашка Педорез, таӵе паймисьтэм кариз. Солы али ваньмыз - трын-трава: колхоз машинаен, "ас ужъёсызъя" ворттылӥсь ослоп но, возьытсэс ыштэм Семонэн Олён но, лушкаськись Микит но, "уй бубыли" но. Таӵе улонмы ик воргоронэз "нюлымтэ кунян" кадь кариз шуыса валаськомы. Нош адямилэн воштӥськонэз кутскиз, луоз, афган сюресъёс вылысен. "Душманъёс сое (Андреез) виизы. Шӧйзэ цинк гробын гуртаз мон нуи. Анаез нош пырак синмам ик сялӟиз". Тӥни озьы, мын но валэкты анайлы, ма понна быриз солэн пиез, кинъёс сое виизы: асьме душманъёс-а, соослэн-а? "Ленинград-Кабул-транзит-шайвыл, значица". Ваньзэ тае адӟыса, Пашка Педор шайвыл кадь чус кариськем. Али со - "нюлымтэ кунян". Соинтэк-а воргоронэз нодтэм кунян но эш каре? Оло, Пашка Педор улонын но ӧй вал, номыр но ӧз кары, номыр но ӧз лэсьты?.. Озьы ик вероссэ но йылпумъя автор. "Кык лулъёс, каллен вамышъяса, ӵуквыл бус пӧлы ышизы. Соос ӧй вал но кадь..." Зэм, афган война ваньзэ тӥяны ӧз вормы. Генрих Перевощиковлэсь "Тӧдьы куака" романысьтыз геройзэ ик учке ай. Иван Ушаков гижысь-пиньысь возиське улон бордын. Кинлы ма сётэмын, вылды. Таяз учыре Пашка Педор мукет колёса улэ но шедемын на - экономической. Ичизэ-а быдтӥз ини со та аръёсы? Тани героймы но ошиськыны кутскылэм ини. Калыкын верало: "Кыӵесэн одӥг пол эшъяськылӥд ке..." Веросэзлэсь пумзэ автор кушаса уг сёты, лыдӟись ачиз мед малпаськоз, ма луоз азьланяз Пашка Педорен. Улоз но улоз, вылды, огсямен, миым уждунзэ кайтаяз бичаса но улонлы осконзэ пумен ичи но ичи кельтыса. Кытын векчи, отын чиге. Кытысен чигоз оскон бугорлэн сӥньысэз - тазэ но автор уг вера: улон возьматоз. "Тӧдьы куакаысь" Иван Ушаков сямен, Пашка Педор эрказмем кивалтӥсьёсын, улонэз сурась-пожасьёсын уг нюръяськы. Суй-пыдъёсыз лэзиськемын. "Эн паймы, - шуэ со котьку, - а то вылад вуоз". Верослэн кылыз туж узыр. Вакчияк вераса, авторлэсь кылъёссэ геройёсызлэн вераськеменызы уд сура: котькуд персонажлэн ымнырыз аслаз. Туж чебер инкуазь суредэз пусъеме потэ на вылэм. "Со (Педор) учке пуксись шундылэн берпум сиосызлэсь кулэмзэс. Бездытэсь но кутонтэмесь со сиос. Мырдэм дэмӟыло на Пенезь гурезь вылын будӥсь начар кызъёслэн мугоръёссы борды, гылӟыса ортчо визылась шурлэн вогыриосыз вылтӥ но - собере ышо". Быдэсак уг гожтӥськы, пумаз таӵе кылъёс: "Чирак кеськиз шыр, уйсылэн ӝабырес гижыосаз шедьыса". Инкуазь суредъёс огшоры гинэ кутэмын ӧвӧл, соос веросын "шудо", малпаськыто, действиез азьланьто. Инкуазен кушласькыса будэм воргорон талы гинэ но уг паймы ни. Автор солэн син азяз донгыса возьматэ кадь инкуазьлэсь чеберзэ: тани со, тани, сазьтӥськы, паймы. Уг, уг паймы. Вактаз усем мурт кадь. Оло, солэн умоезлы осконэз со кулӥсь шунды сиос сямен кысэ ини? Тани-тани, уйсы шырез кутэм сямен, кулон гижыос сое ӝабыртозы но сьӧразы нуозы. Олома но малпаны луэ кылдытэм суред вылысь. Со умой. Урод луысал, номыр сярысь вераськыны-малпаськыны ӧй ке шедьтысалыд. Героез сярысь автор одӥг но ӟеч кыл ӧз ке но вера, туж умой шӧдӥське кылдытэм образзэ яратэмез, со понна сюлэмшугъяськемез. Угось сыӵе адямиос асьме вӧзын - синйылтыны гинэ кулэ. Юрттон понна синйылтыны. Вячеслав Ар-Сергилэсь та вероссэ лыдӟыса, тросэз мон сямен ик малпаськонэ усёзы: "Кыӵе чебер, сюлэме пыӵамон, паймымон гожтыны быгатэмын паймисьтэм адями сярысь!" Ваньмыз та гожтэме автор понна ӧвӧл (Ар-Серги ушъянлы уг кулэяськы ни, пыд йылаз юн-юн сылэ), верамын али кутскись гожъясьёслы, озьы ик вань лыдӟисьёслы - синйылтон-дышетскон понна. Зэм но, Вячеслав Ар-Сергилэн произведениосыз тросэзлы дышето. ВЛАДИМИР КОТКОВ, писатель. Кун Кенешысь иворъёс Москваын пумиськонъёс Кылем арняе Удмурт Республикаысь Кун Кенешлэн Тӧроез Александр Волков Москваын ужаз. Александр Волков пумиськылӥз Россия Федерациысь Пкенсиосъя фондлэн кивалтӥсеныз Василий Барчукен. Та пумиськонын йылпумъянъёс лэсьтэмын берло кык толэзьёсы пенсиосты тыронъя огкыллэн быдэсъяськемезлы но март толэзьлы коньдон висъян сярысь. Удмурт Республикаысь Кун Кенешлэн Тӧроез Россия Федерациысь Пенсиосъя фондлы но солэн тӧроезлы асьме республикамылы ӟеч ужъёсын юрттэмез понна тау каремзэ вераз. Январь толэзе республика пенсиос тырыны Москваысь 60 миллион, нош феврале - 54,8 миллион коньдон басьтӥз. Озьы ик Пенсиосъя фонлдэн огкыл кутэмын Удмуртилы март толэзе 60 миллион манет пала коньдон висъян сярысь. мартэ пенсиос тырыны 15 миллионэз республикаямы келямын ни. Али республикаысьтымы Пенсиосъя фонд со коньдонэз люкылэ ни. Александр Волков шумпотэмзэ вераз, Россия Федерациысь Пенсиосъя фондлэн юрттэмезъя но Удмуртиысь Пенсиосъя фондлэн ужаменыз пенсиосты тырон пунэм каллен кулэсме ни шуыса. Кун Кенешлэн Тӧроез эскерем ужрадъёс пӧлысь тужгес но кулэен лыдъяз экономикаез азинтонъя Евроазиатской банклы - Удмурт Республикаысь Правительстволэн банк- агентэзлы пунэмен коньдон басьтон сярысь ужпумез. Азьланяз та банк асьме улосын бадӟым инты басьтыны кулэ. Александр Волков пусйиз, берло кык-куинь ар ӵоже та удысъя трос ужъёс быдэстэмын ни шуыса. Соин валче куашканы вуэм банк, Россия Федерациысь Центральной банклэн юрттэмезъя, йыг-йыг пыд йылаз султӥз. Центробанклэн кивалтӥсез Ижевске вуылыкуз, та пумысен пусйиз: Россия понна со туж паймымон учыр луэ, банкез уго пумозяз ӧз куашкатэ, ӧз куштэ. Берло аръёсы Россиысь Центральной банклэн кивалтӥсьёсыныз пумиськылыса, банкез ӝутонын трос лэсьтӥз ачиз Кун Кенешлэн Тӧроез. Со уж Правительстволэсь банк-агентсэ утён понна гинэ сюлмаськон ӧй вал, со Удмуртиысь 10 сюрс вкладчикъёслы юрттэт но луиз. Россия Федерациысь Центральной Банклэн кивалтӥсезлэн нырысетӥ воштӥсеныз Татьяна Парамоноваен пумиськон дыръя но трос ужпумъёс эскеремын, кылсярысь, банклы оскымон кредит висъян но коньдон возисьёслэсь осконзэс паськытатон. Пайдаё ортчиз химической ож тӥрлыкез быдтонъя программаез быдэсъянлы мукет странаослэсь но инвестициоссэс кыскон сярысь кенешон. Март толэзьлэн шор вадесаз асьме странае Италилэн Президентэз вуыны кулэ. Александр Волков ивортӥз, Италия дась Кизнер ёрослы 9 миллион пала доллар сётыны. Таяз аре ик ини Удмуртие со пӧлысь 3-тӥ люкетэз висъямын луоз Бемыжын больницаез лэсьтонлы но Кизнер ёросысь мукет улон-вылонъя юрттэт сётонлы. Озьы ик Кун Кенешлэн Тӧроез Александр Волков пумиськылӥз химической ож тӥрлыкез быдтонъя программалэн кивалтӥсьёсыныз но пыриськиз та ужъя документэз дасян бордын ужасьёсын. Озьы ик Кун Кенешлэн Тӧроез Москваын мукет пумиськонъёс но ортчытӥз. Удмурт Республикаысь Кун Кенешлэн пресс-службаез. ТУАЛА ПАРТИОС НО ДВИЖЕНИОС Музъемез ӝутоно дэмен Вань партиос пӧлысь музъем вылын ужасьёс сярысь туннэ зэмос сюлмаське одӥгез гинэ - Россиысь аграрной мартия (АПР). Социологъёслэн лыдъямзыя, та партилэн рейтингез туннэ, КПРФ бӧрсьын, кыкетӥ интыын луэ. Алигес АПР-лэн Удмуртиысь ёзэз конференцизэ ортчытӥз. Люкаськемъёс азьын ортчем арлы йылпумъянъёс лэсьтӥз В. Ф. Благодатских. - Гурт хозяйстволэн куашкан калэ вуэмез син азьын, - шуиз со. - Россиын кылем арын 48 миллион тонна гинэ ю-нянь утялтэмын. Асьме странаын сыӵе урожай басьтэмын вал 1929 арын но 1950-тӥ аръёслэн кутсконазы. Россиын туннэ котькуд куинетӥез хозяйство куашкамын, нош Москва котырын вань хозяйствоос быдтэмын ини. Фермаосын вань секыт ужъёс нош ик киын быдэсъясько. Удмуртиын югдур умойгес ай. Но татын но туннэ ик банкротэн ялыны луэ ни 19 хозяйствоез. Одӥг ласянь шумпотоно: асьме крестьянъёслэсь музъемзэс нокин уг тала на, нош мукет ласянь ке учконо, сое возьыны, утялтыны, нянь будэтыны тросэзлэн хозяйствоослэн кынарзы уг тырмы. Таяз арлы кутэм бюджетын гурт хозяйстволы 9 миллиард манет коньдон висъяны чакламын, озьы ик, кылем арын сярысь, кык поллы тросгес сётэмын луозы минерал ватсэтъёс. - Гурт калыклэн улонэз, оло, капчигес луысал, со сярысь уногес сюлмаськысалзы ке депутатъёс но, - шуиз В. Благодатских. - Но Кун Думаын АПР-лэн адямиосыз али 16 кузя гинэ кылемын, Кун Кенешын но соос кык мурт сяна ӧй вал. Соин ик юнматоно АПР- лэсь радъёссэ. Та ужпумлы конференцие люкаськемъёс бадӟым саклык висъязы. Зэмзэ ик, мукет регионъёсын аграрной партилэн кужмыз зол шӧдӥське, Удмуртиын озьы лыдъяны уг на луы. Кылсярысь, Як.-Бодья, Глазов, Селта, Камбарка, Яр ёросъёсын, АПР-е пыремъёс чик но ӧвӧл. Матэкто Кун Кенеше быръёнъёс. АПР-лэн Удмуртиысь ёзэз быръёнъёсы пыриськыны малпа вал, КПРФ-ен но мукет патриотической кужымъёсын огазеяськыса. Но коммунистъёс быръёнъёсы нимаз мыноно кариськизы. Табере милемлы нюръяськыны секытгес йӧтоз, шуиз В. Благодатских. Но туж оскиском фермеръёслэн, гуртысь егитъёслэн но нылкышноослэн огазеяськонъёссылы. Валерий Филиппович таӵе учырлы паймемзэ вераз. "Удмуртия" телерадиокомпания дырын-дырын гурт улонлы сӥзем передачаос возьматъяляз. Табере сое дасясь журналист ужысьтыз мозмытэмын, сыӵе передачаослы коньдон ӧвӧл шуыса. Но со дыре ик ГТРК-лэн валтӥсь директорез Кун Кенеше депутатэ кандидат луыса гурт округъя мынэ. Быгатоз шат гурт улонэз тодӥсьтэм депутат калык понна мар ке лэсьтыны?! Таӵе учыръёс сярысь гуртын улӥсьёс умойгес мед малпаськозы вылэм. Кенеше люкаськемъёс азьын вераськизы Кун Думаысь депутат Михаил Кошкин но Правительстволэн Тӧроезлэн воштӥсез Владимир Зенин. Т. БАННИКОВА. Лэсьтӥське кужмоез Яр ёросысь "Зюинский" эштосын куинь миллион манетлы бадӟым лэсьтӥськон ужъёс кутскемын. Улын Сада гуртозь кыскемын ни чагыр эстӥськон. Татын, ветылъёсты-ошпиосты сярысь, парсьёсты ӝоггес будэтыны луэ шуыса лыдъяло. Соин ик парсь гидъёссэс выльдо но паськытато, озьы соослэн лыдзы эшшо ог ӝынылы будӥз. Куатетӥ арзэ ни эштос ачиз ик нӧкы вӧй поттэ но вуза. Парсь вордонэ нимаз семьяос но пырисько. Тани Владыкинъёс котькуд мумы парсьсылэсь 13 парсьпи басьтӥзы. Эштослэн кивалтӥсез И. И. Наймушин вань гуртоосызлэсь мылкыдзэс ӝутӥз ни. Озьыен, пудо вордэм чотын бадӟым пайда поттыны луэ. П. СКОБЕЛЕВ. Ирина Конькина Уть пиме верос Шунды ӝужан азьын Анна валесысьтыз каллен гинэ султӥз но дӥсяськыны кутскиз. Уйёссэ изьылытэк, синъёсыз тӧрнамын. Ымныраз мур кайгырон. Кытчы мынэ нылкышно? Сое тодо ачиз Анна но инмар гинэ. Векчи льӧль сяськаё дэремез вылэ Анна керттӥз пужъятэм дуро курень айшетсэ. Кашамер кышет улаз лачмыт пачкатӥз пурысьтаны кутскем йырсизэ. Одӥг гинэ пизэ армие келямез бере, мӧзмон но куректон буязы со йырси нюжаосыз. Нош мусо Ваниезлэсь Чечняысь погмаськем гожтэтсэ басьтыса, ымнырзэ бороздаен-бороздаен гожмазы кисыриос. Ӝыны ар куспын пӧсь синкылиос со бороздаосыз эшшо но муромытӥзы, вож буртчин кадь чилясь синъёссэ бездытӥзы. Йырысь секыт малпанъёс губыртӥзы тыбырзэ, куректон сюпсиз быдэс мугорзэ. Ӝыны ар куспын кызь арлы пересьмиз кадь анай. Каллен вамышъя Анна, нош малпанэз одӥг - мусо но дуно пиез. Мынонъяз дырын-дырын пыктылэм синъёсыныз котырак учкылэ. Чус кӧлэ гурт. Улӥын коркаос вискытӥ адӟиське кӧлӥсь шур. Туж шыпыт. Усем вень но жон-н! вазёз кадь потэ. Анналэн гинэ сюлмаз мынэ шимес нюръяськон. Мар кароно? Мар луоз азьланяз? Нылкышно, вамышезлэсь кышкаса кадь, туж небыт лёгиськыны турттэ. Но кылзӥськисьтэм пыдъёс я канжасько, я пыд улысь турынэн шудо. Шаплы мынэ Анна. Бакчаос бертӥ, лушкаськись кадь. Тани адӟиськиз шур сьӧрысь Калмак нюлэс. Анна, тэль доры вуыса, котырак учкиз но пеймытэ выиз. Та нюлэс шорын кыр инты вань. Шораз ик ошмес. Сьӧдай ошмес нималлям сое вашкалаос. Со кыр интыын вӧсясько вылэм. Пичи гинэ сюрес кузя вуиз Анна отчы. Лябӟем мугорыз коскам. Дэрем улысьтыз гадьыз ӵем гинэ ӝуткаське. Кышет улысьтыз йырсиосыз нюжаен-нюжаен потылӥллям. Ошмес вуэн буйгатскыса, кӧня ке вамыш лэсьтӥз но капчиен уськытскиз пыдес вылаз. Кема сылӥз озьы, ас понназ сипыртыса. Солэсь кылъёссэ кылӥз ачиз Кылчин гинэ. Чирдонъяз бамыз пумен кӧдэктэ, курыт синвуосыз кисыриосыз кузя шапыкен-шапыкен васько но усё музъем вылэ. Анналэн веранэз туж трос. Вань сюлэм висёнзэ усьтэ со. Шудо улон куре, пизэ утьыны сюлворе. Ӧз чидалэ ни пыдессинъёс. Либрак луыса пограз Анна музъем вылэ. Жоб куараен кеськиз нюлэс тыр. Сюлэмзэ позыртыса, куараез шуккиськиз. Виро синвуэн, куараен бӧрдӥз нылкышно. Нош собере чусак дугдӥз. Кудӟем мурт кадь, пыд вылаз мырдэм султӥз. Кышетэз усем. Тугаськем йырсиез ӟугмаськем. Ошмес доры мыныса, шоканы дӥсьтытэк кадь, каллен ву басьтӥз но ымнырзэ пуж-пуж пылатӥз. Соку гинэ Анна сазьтӥськиз кадь... "Кинлэсь юрттэт куром на мон? Кин быгатоз утьыны мынэсьтым пиме? Уть коть тон, Сьӧдай ошмесэ, уть нюлэс, уть толэзе..." - нылкышно мур лулӟиз но гурт пала вамыштӥз. Нош нюлэскысь потыкуз, кытын ке, Анналэн пель дораз ик, нюлэсэз куалектытыса, кикы сильыны кутскиз: ку-ку, ку-ку... Тыпак дугдӥз. Уг тодо, кин понна... Дыр ӝог ортче, дыр кема ик уг кыльы ни Кун Кенеше депутатъёсты быръён дырозь. Али депутатэ кандидатъёсты пусъён мынэ. Февральлэн шорвадесаз та уж борды "Удмурт кенеш" ассоциация но басьтӥськиз. Солэн ёросъёсысь ёзъёсаз ортчыло кенешъёс, кандилатъёсты чакламъёс-эскеронъёс. Тани 19-тӥ феврале "Удмурт кенешлэн" Устинов районысь ёзаз но люкаськылӥзы та ужрадэз ортчытыны. Татысь "Удмурт кенешлэн" ёзэныз кивалтӥсь Евгений Егоров тодматӥз ассоциацилэн быръёнлы дасяськонлэн программаеныз. Матысь дыре асьме кандидатъёсын пумиськон чакламын. Люкаськемъёс ӵектӥзы "Удмурт кенешлэн" политклубезлэсь ужан нуналзэ воштон сярысь но. Солэн дырыз-нуналэз малпатэк чакламын, соин ик та пумиськонэ туж ӧжыт калык люкаське. Ассоциацилэн кивалтӥсьёсыз но тэргамын вал. Соос кема дасяло кандидатъёслэсь списоксэс. Кин понна "Удмурт кенеш" сярысь куаразэ сётыны дэмла - калык уг тоды. Нош сотэк удмуртлыкез, ас калыкез сюлмаськись кандидатэз шуг бырйыны. "Удмурт кенешлэн" Устинов ёросысь ёзэз кандидатэ ӵектэ "Ишмаж" акционер огазеяськонлэн "Автозавод" эмъяськониысьтыз валтӥсь врачез Виталий Есиповез. Н. Возисов. Экономика сярысь малпанъёс Рынок ас кожаз уг радъя Россиез выльдӥсь егит реформаторъёс асьмеды дышетылӥзы, рынок, пе, ваньзэ радъялоз - дунъёсты но мукетсэ. Озьы матын но ӧз луы. Дунъёс инмозь ӝутскизы, куке дунъёсты ас эрказы лэзьыса, страна куашканы кутскиз. Государство ас киысьтыз лэзиз туж кулэ удысъёсты - электрокужым, газ но му вӧй поттонэз. Соос акциосын огазеяськонъёс луизы но дунъёссэс будэтэм чотын нырысь-валысь туж зол узырмизы. Уксёзэс кытчы кисьтыны тодымтэенызы, асьсэлэсь ужан интыоссэс, юртъёссэс шукрес чеберъязы. Но майбыр улонзы кема ӧз кыстӥськы. Му вӧй, газ поттӥсьёс шуге-леке шедизы. Валамон ни, асьме шаерын но берло дыре югдур уродмиз. Мар луиз таӵе узыр, самой ӟеч ужась "Удмуртнефть" огазеяськонэн? Бен, ноку ӧм малпалэ, дыр, нефтяникъёс но куашкалозы шуыса. Но куашказы ук. Малы, кызьы со луиз? Удыслэн бырон сюресэз, кожонэз кутскиз 1994-тӥ арын. Ӵапак соку, Москвалэн косэмезъя, му вӧй поттӥсьёсмы акциосын огазеяськон (АО) кылдытӥзы. Нош Удмурт Правительстволэн (соку Министръёслэн Советсы вал) умойтэм решение кутэменыз, нефтяникъёслэн данакез акциоссы палэнэ кошкизы. Соос шедизы "Сиданко" (Сибирско-Дальневосточной нефтяной компания) кие, нош солэн зэмос кузёез луэ ОНЭКСИМбанк. Таизлэн кивалтӥсьёсыз пӧлын - Россиысь одӥгез узыр миллиардер Владимир Потанин. Тӥни мар луиз асьме му вӧй поттӥсьёсын. Табере асьсэос но уг тодо ни, кин, кытын соослэн зэмос кузёоссы. Ваньмыз со лэсьтэмын но лэсьтӥське Россилэн Президентэзлэн документъёсызъя. Правительствое выль адямиос лыктӥзы ке но, секыт югдурез одӥг нуналскын, арскын уд тупаты. Россия мур кризисэ шедемын. Ортчемзэ эшшо кӧня ке верало на. Нырысь-валысь, "Удмуртнефть", акциосын огазеяськон луэм бере, му вӧй поттӥсьёс майбыр улӥзы, кык ар ӵоже миллионъёсын (вуж коньдонэн) дивидендъёс басьязы. Но таосызлэн но, газовикъёслэн но энергетикъёслэн сямен, ӟеч улонзы ӝог быриз. Запад нефтьлы дунэз, Россиез куашкатон вылысь, юри кулэстӥз, долларлэсь кужымзэ юнме шорысь 3-4 поллы будэтӥз. Мынам малпамея, ваньмыз со, 17-тӥ август но, ортчытэмын МВФ-лэн (Дуннеысь валютной фондлэн), МБРР-лэн (Азинсконъя но выльдӥськонъя дуннеысь банклэн) но мукетъёсызлэн косэмзыя. Премьер-министре юри со понна кадь пуктылэмын вал Сергей Кириенко. Тӥни мар даурто егит реформаторъёс, США-ын дышетскем адямиос. Соос ужало отысь ик специалистъёслэн косэмзыя. Табере мар луиз Удмуртиысь нефтяникъёсын? Соосты банкрот каро, уждун татын толэзьёсын уг басьтыло ни. "Удмуртнефть" АО-ез банкрот карон сярысь ужез али эскере Арбитраж суд. Та уж сярысь туннэ шара вераны уг луы на. Но ужпум герӟаськемын му вӧй поттӥсьёслэсь акциоссэс "Сиданко" киысь басьтонэн. Удмурт Правительство но Кун Кенеш со бордын ужало. Но азьвыл лэсьтэм янгышъёсты тупатыны капчи уз луы. Али кӧня ке вамышъёс лэсьтӥсько ни: Музъем сярысь кодексэ воштонъёс пыртон сярысь дэмлан Кун Кенеше сётэмын, пумиськонъёс вал ни "Сиданколэн" кивалтӥсьёсыныз но музон эшъёсын. Правительство та ужпумез быдэстыны пӧртэм амалъёс утча. Валамон, акциосмес берыктыны быгатысалмы ке, туж умой луысал, интыысь но кун бюджетъёсы дыраз уксё вуысал, кызьы со вал азьло. Собере му вӧй поттӥсьёслы уждун тырон но ӧй ӝегасал. Тӥни кӧня умоез! Россиысь Правительство азьвыл лэсьтэм янгышъёссэ тупатыны выре ни. Государство нош ик ас кияз кутэ аракы, вина поттонэз но вузанэз. Солэн ӟечез син азьын. Лушкем поттэм урод аракы юыса, кылем арын сюрсъёсын адямиос быремын. Табере югдур воштӥське, бюджетэ но ватсаса выт вуэ. Ваньмыз интыяз пуктымтэ на ке но, пайдаез адӟиське ни. Дыр вуэмын озьы ик лэсьтыны мукет ужъёсын но. Мон сямен, государство ас бордаз нош ик басьтыны кулэ газовикъёсты, энергетикъёсты, нефтяникъёсты, ож тӥрлык поттӥсьёсты. Та удысъёсын сэрен быдэс страна пунэм тыронъёсы шедемын. Государство выль коньдон печатла ке но, пайдаез уг адӟиськы. Вылӥ кивалтӥсьёсмы ӝоггес кошко МВФ-е коньдон курыны, нош соослы тыронъёсмы кылын верантэм трос ни. Асьме странаын но тыронъёс туж уно люкаськемын, Правительство улосвылъёслы тырмыт уксё висъяны уг быгаты. Кызьы ке Россиын, озьы ик Удмуртиын экономика туннэ юн лябӟемын. Мугез тодмо. Шаерысьтымы одӥгез но промышленной предприятие, леспромхоз, колхоз но совхоз азьвыл сямен уг ужа. Ваньмыз мырдэм шокало, ог-огзылы пунэм тыронъёсын уло. Таӵе условиосын производствоез ноку уд азинты, пыд йылаз йыг-йыг уд пукты. Соин ик, вылӥысен кутскыса, улӥозь производстволы бадӟым инты висъяно, умой-умой радъяно ваньбур поттонэз, сое вузанэз. Озьы гинэ экономикамы юнмалоз но улонмы умоялоз. Геннадий РОМАНОВ. Экономика Чиге ляб интыетӥ Шаерысьтымы му вӧй поттӥсьёс ноку урод ӧз ужалэ. Выльдӥськон кутскемлэсь азьло соос кун бюджетэ 40 процент пала коньдон пырто вал. Али но бен ужъёссы алама уг мыно. Миым 5,5 миллион тонналэсь уно "сьӧд зарни" кыскизы но заданизэс мултэсэн тырмытӥзы. Туэлы но малпанъёссы сыӵеесь ик. Соку малы бен "Удмуртнефть" огазеяськонэз куашкатыны, банкрот карыны выро? Мугез одӥг: таӵе секыт югдур герӟаськемын ОАО-лэн зэмос кузёеныз, "Сиданко" огазеяськонэн. Со огазея Сибирьысь, Дальней Востокысь но мукет улосвылъёсысь нефть, газ поттӥсь но переработать карись предприятиосты. "Удмуртнефть" солэн ёзэз луэ. Табере асьмелэн поттэм нефтьмы "Сиданко" кие кошке, со вуза но коньдонзэ капыртэ. Капыртэ кыл куд-огезлы, зэмзэ но, оло, уг кельшы. Но тани кылем арын сентябре, 300 миллион манет интые, "Сиданко" асьмелы чылкак 14 миллион манет келяз. Буш кисыен кызьы ужаны но улыны кулэ нефтяникъёсмы? - Но али югдур каллен тупатске ни,- журналистъёсты буйгатӥз "Удмуртнефтьлэн" тӧроез Евгений Богомольный.- Январе Москваысь 200 миллион манет уксё вуиз. Озьы ми вань бюджетъёсы тыронъёсмес келям, декабрь понна уждун сётӥм. Но уждунъя пунэммы ӝыныез гинэ ворсамын ай. Озьы ке но, сётыны кутским премиос но музон социальной пособиос. Али огазеяськон кун бюджетэ 25 процент пала уксё пыртэ. Кылем гужем сярысь, Россиын (дуннеын ӧвӧл), али нефтьлы дун кык пол ёрослы йылӥз. Республикаысьтымы куд-ог районъёслэн бюджетазы огазеяськон 80-90 процентсэ коньдон сётэ. Берло дыре ОАО-лэн портонъя 13 бригадаез ужаны кутскиз, со пӧлысь 4-ез - палэнын (Новосибирск область но Салехард). Но огазеяськонлы секыт йӧтэ ай. Али солэн 800 миллион манет басьтэм кредитэз берыктымтэ. Соин но мукет мугъёсын, вылды, "Удмуртнефтез" банкрот карон пумысен Арбитражной судэ материалъёс сётэмын. Со люкаськоз 26 апреле. Нялтас вераны кулэ, ачиз но "Сиданко" компания банкрот луэ ни. Тӥни озьы со сьӧраз кыске аслэсьтыз ӟеч ужась мукет ёзъёссэ, кылсярысь, "Удмуртнефтез". Али республикаямы 7 предприятие му вӧй поттэ. Со пӧлысь самой кужмоез - "Удмуртнефть". Со шуг-секытысь потыны амалъёс утча. Паськытатэ музъем валлин но урдэстӥз портыса нефть поттон амалъёсты. Та удысын асьмеос кичӧлтӥсьёс кадь луиськом. Дорамы дышетскыны ветло музон интыосысь нефтяникъёс. Озьы огазеяськон ужа Татарстан, Коми Республикаосын, Пермь областьын. Али Сириын ортчись конкурсэ пыриське. Вормыны луонлыкъёсыз вань. Нош шаерамы солэн 6 сюрс скважинаез ужа, 30 процент му вӧйзэ кунгож сьӧрысь странаосы вуза. Та секыт вакытэ но улон коркаос ӝутэ, социальной удыссэ но возе, уг кушты. Г. РОМАНОВ. Чеберлыкез шӧдэ котькин Дас одӥгетӥ тулыспалэ "Буммаш" АО-лэн конференц-залаз та заводын ужась но удмурт калыклэсь искусствозэ, литературазэ но историзэ яратӥсьёс, сое тодэмзы потӥсьёс люкаськылӥзы. Шуныт пумитазы, сак кылзӥзы соос писательлэсь но журналистлэсь Николай Кузнецовлэсь, история наукаосъя докторлэсь Маргарита Гришкиналэсь, философия наукаосъя кандидатлэсь Альберт Разинлэсь, тодмо суредасьёслэсь Леонид Прозоровлэсь но Анатолий Степановлэсь, удмурт калык йылолъёсты утисьлэсь Николай Возисовлэсь вераськемзэс. Тодосчиос Маргарита Владимировна Гришкина но Альберт Алексеевич Разин, писатель Николай Спиридонович Кузнецов тунсыко мадизы калыкмылэн вашкала но туала вакытъёсы улэмез-вылэмез сярысь. Али но соос наукаез азинто, ас удысысьтызы югдурез, улон- вылонэз ӟеч тодо. Суредасьёс Леонид Алексеевич Прозоров но Анатолий Петрович Степанов киужъёссэс возьматӥзы. Николай Романович Возисов вашкала йылолъёсты улӟытэ бере, таяз учыре но вунон калэ вуэм гуръёсты пичияк чирдӥз. Та пумиськонэз ортчытон сярысь трос сюлмаськоно луиз та заводын ужась но "Удмурт кенеш" огазеяськонлэн Индустрия ёросысь ёзэныз кивалтӥсьлы Клавдия Николаевна Исуповалы. Солы зол "пӧсяно" луиз кык нунал талэсь азьло но - Сюмси районын удмурт литературалы сӥзем нуналъёсты радъянын. Сюмси ёросын сямен ик "Буммаше" люкаськем калыкез но культурая училищеысь "Инвугур" ансамбль шулдыртӥз. Валамон ини, та чебересь егит нылъёслэн задор эктэмзы, жингрес кырӟамзы туж зол ӧй пӧрмысал, со сярысь нуналлы быдэ ӧй сюлмаськысалзы ке кивалтӥсьёссы Надежда Полякова, Елена Батурина, баянистъёссы Виталий Семеновых но Михаил Двоеглазов. Концерт мыныку, кутсконысеныз пумозяз шӧдоно-валано: "Инвугурысь" кырӟасьёс лыктэм калыкез гажало, солы вань быгатэмзэц, сюлэмзэс сётыса кырӟало-экто, шудо. Со сярысь мыным асьсэос егит артистъёс но - веськрес бадьпу кадесь Ольга Пислегина, Фаина Гамаева, Светлана Перевозчикова, Лариса Корепанова, кызьпу выллем чебересь-сайкытэсь Ирина Смирнова, Ольга Гершун, Алёна Воробъева веразы. Нош училищеысь вылӥ курсын дышетскисьёс, эктыны но кырӟаны быгатӥсьёс Михаил Леонтьев, Роман Мусакаев, Дмитрий Зянтереков, вынъёс Алексей но Александр Мышкинъёс понна "Инвугуре" ветлӥсьёс ас семьязы кадь луизы ини. Озьыен, татысь артистъёс таӵе пумиськонъёсы азьланяз уката ӵем пыриськылозы. ВОЗИСЬ КОЛЯ. "Байгурезь" тау каре Дэбесысь "Байгурезь" землячество бадӟым тау каремзэ вера "Удмуртторф" производственной огазеяськонлы но солэн генеральной директорезлы Анатолий Владимирович Марченколы но "Удмуртторфлэн" нефть но газ поттонъя управлениезлэн кивалтӥсезлы Владимир Иванович Тернавцевлы милесьтым ужрадмес радъянын коньдонэн юрттэмзы понна. Улонамы секыт вакытэ но тӥляд кивалтоно коллективъёстылы азьланяз но ужады бадӟымесь азинсконъёс сӥзиськом, экономика удысын эшшо но шӧдскымонэсь вормонъёс мед басьтозы. Азьланяз но ӵош ужанмылы оскиськом. Г. М. Корепанов-Камский, Дэбесысь "Байгурезь" землячестволэн огазеяськонэзлэн кивалтӥсез, Удмурт Республикалэн дано гражданинэз. 80 ар вордскем дырысеныз сӥзьыса Павел Егорович Первушин - Дэбес ёросын тодмо адями. Вордскемын со Улысь Тыловай гуртын, трос аръёс ӵоже ужамын Вылысь Четкерын. Атайзэ, калыклэн тушмонэз шуыса, Сибире келязы, ӧз ни вуы отысь. Куинь пи но куинь ныл айытэк кылизы. Шоретӥез пизы Павел, школаез йылпумъямез бере, Дэбес педучилищеын дышетскиз, 25 искьемез кутэн букос но дэри дыръя но ветлӥз, нянь но йӧскадь ӧз шедьылы. Дышетсконзэ быдтэмез бере Шаркан ёросысь Мувыр школаын кема ик дышетыны ӧз вуы, армие басьтӥзы, собере Быдӟым Отечественной война ӝутскиз. Отысь киыз сӧсыр луыса бертӥз. Озьы ке но арганэн но, балалайкаен но шудылӥз. Куиньназы ик вынъёс ожмаськонэ ветлӥзы. Бадӟымез Петя агайзы бырыны шедиз, пичиез Иван агаез сӧсырмыса бертӥз, али Иж карын улэ. Витьтонэтӥ аръёсы Павел Егоровичез Ниншудзялудысь школаен кивалтыны ысто. Дышетскон юрт шулдыр интыын вал, но гуртлэсь палэнын сылӥз. Соин ик Павел Егорович выль школа пуктыны малпаз: лэсьтӥськон мытэмын вал Верх-Четкер гуртысь сэрттэм черк интые. Школа усьтӥськиз 1955 арын. Пенсие потытозяз Павел Егорович отын директор луыса ужаз. Ижысь историяя факультетлэсь заочной люкетсэ йылпумъяса, историез нуиз. Туж умой дышетэ вал, кема ар уроке ветлылӥз кителен но галифеен. Пенсие потон азяз Павел Егорович аслыз даурлы памятник пуктыса кельтӥз, шуыны луоз, - гуртэ кык этажъем кирпич школа пуктӥз. Спортзалэз но бадӟым, столовоез но вань. Зэм, учкыны чебер, нош со понна кӧня сюлэмшугъяськон, тазалык быдтэмын. Ӟечкыласьком тӥледыз, Павел Егорович, 80 ар юбилееныды! Сӥзиськом тӥледлы шудбур, юн тазалык но егит мылкыд. Ю. ШКЛЯЕВ. Сюлэмшугъяськытӥсь ужпум Бурдолы - чагыр инбам, адямилы нош - адями Адямилэн улонэз одӥг гинэ, соин ик со пумтэм дуно. Озьы луыны кулэ, но... Берло дасо аръёс ӵоже, иворъёс паськыт вӧлмемен, тодмо луиз, Россиын, пе, асьсэды быдтӥсь муртъёс, Европаын сярысь, вить пол уно, нош эксэй кивалтон вакытысь Россиен ӵошатоно ке - дас вить пол. Азьвыл Россиын 100 сюрс мурт пӧлысь чылкак куинь мурт гинэ быдтэ вылэм ассэ. Та лыдпусэз валэктыны луоз, дыр, та ласянь гинэ: революция, граждан ож, НЭП, коллективизация, репрессиос, Отечественной война, Сталинлэн режимез сярысь зэмлыкез тодон, Хрущевез сэрпалтон, табере нош выльдӥськон... Ваньмыз со калыкез уно гинэ сэзъяз, солэн осконэз сураськиз-пожаськиз. Вылаз ик, инмарлы оскон сантэмамын вал на. Паймытэ но, уг но мукетыз: асьсэды быдтӥсьёс тужгес но трос луиллям асьме Удмурт шаерамы. Со сярысь верало тодосчиос, адямиез эмъясьёс. Газетъёс, радио, телевидение но пумен ӵемгес поттыло та суицид шуон сярысь. Умой-а, ӧвӧл-а со? Адями лулчеберез эскерись тодосчиос (психологъёс) но астэ быдтон ужпумлэсь мугзэ сэрттыны-пертчыны выро, нош кулэ-а со сярысь мултэс вераськон, таиз сярысь шып уло. Кулэ вылэм ини со пумысен но малпаськыны. Адямилы нуналлы быдэ тон умойтэм мурт вылэмед шуыса улӥд ке, со зэмзэ ик малпаськыны кутске: озьы ӧвӧл ик меда? Табере тани ӵемгес но ӵемгес шуиськомы, асьме шаерамы трос асбыдтӥсьёс. Калыклэн визяз пыӵа ук со. Куд-огез амалтэк малпаське, луоз, мон гинэ ляб мылкыдо вылӥськымтэ, мукетъёс но сыӵеесь ик. Мукетыз пумысен но чакласькыны кулэ, дыр: ӟеч ивор пыдын ветлэ, шуо, уродэз лобыса вуэ. Со сяна, уродэз туж чаляк аля. Тани мынам вордскем гуртам, Можга ёросысь Бадӟым Сибы гуртын, огвакытэ куинез бускельёсы кын корт куртчон вакытазы йырзэс гозые донгизы. Кутсконэзлэн мугез огшоры гинэ кадь: одӥгез бускеле, макмыраськемзэ веськатыны шуыса, кышноезлэсь аракызэ курем, лэся. Соиз сётымтэ. Со понна куинь пиналын огназ кылиз. Озьы бӧрсьысь бӧрсе куинь воргорон туж бадӟым сьӧлыкаса кошкиз та улонысь. Нош кызьы тодмо, ватон азязы ассэ быдтӥсь муртэ черке вӧсяны уг пыртало. Вылаз ик, огъя шайвылын но нимаз интые ватыны косо. Кыӵе визьмо, сӥё-дано кылбурчи вал ӟуч калык пӧлын Марина Цветаева! Секыт война аръёсы со улӥз-вылӥз Елабугаын. Али шонерак уд вера ошиськемезлэсь мугзэ, но сое ватӥллям огъя шайлэсь палэнэ. Туж чебер памятникез вань вылысь, инмарен вунэтэм муртлэн кадь, туж мӧзмыт адске солэн шайгуэз. Тужгес но секыт адӟонэ вуттӥзы калыкез туала "демократъёс". Огсыр улэм-вылэм, аръёсын тыршыса ужась адямиез ураме донгыты ай, амалтэк уноез юон вылэ чӧлскизы. Тужгес но паймымон югдур луиз гуртъёсын: уждунзы сотэк но пичи вал бере, трос-а коньдон басьтод ужтэк кылемъёслэн биржаязы сылыса? Собере мукетыз но вань ай. Дышем ужысь мукетаз выжон капчи уг сётскы адямилы. Ужаса вылысь уждун уг сёто на ке? Тӥни кытын юрттыны-валэктыны кулэ вылэм лулчеберез эскерисьёслы. Нош соос одӥг гуртын но ӧвӧл. Ярам, куд-огаз эштосъёсын-колхозъёсын йӧназ кивалтӥсь ке вань, нош соос чиньыен лыдъямон гинэ. Зэм, туннэ улон, коммунизмлы оскон ӧвӧлэн, инмарлы оскон пала берыктӥське. Сюосын-сюрсъёсын черкъёс выльдэмын, выльысь пуктэмын. Калык отчы кыстӥське, соиз шумпотымон - осконтэк адямилы улыны уг яра. Озьы ке но, ваньмызлэсь лулпушсэс чебертыны капчиен уг лу. Кудӥз-огез черке мынэ ик ке оскыса, тросэз амалтэкгес, калык сьӧркытӥгес мыно. Инмарлы оскон пичи дырысен пыӵатэмын ӧвӧл бере, адями нош ик кытчы пырон инты уг шедьты ни. Тужгес секыт та вакытэ телепередачаосты учкыны: адямилэн сиыны нянез ӧвӧл, нош солы весь ушъяло шоколадъёсты, дуно вузъёсты, юон вуосты, сыскиськонъёсты. Вылаз ик, дурыстэм ӵем иворто кивалтӥсьёслэсь ваче вуэмъёссэс, тэкшеронъёссэс. "Бадӟым" адямиос, кивалтӥсьёс оломар даурто, лушкасько-алдасько, ог-огзэс быдтон сярысь малпало ке, ма кыле на "пичи" муртлы? Лушкаськон? Солы дышетэмын ӧвӧл. Юон? Ваньмыз та вылэ чӧлскыны уг быгато, коньдон ӧвӧл. Амалтэк малпалод, та улонысь ӟечсэ куке адӟод на меда. Улонлы ӟудэм мурт берпум амал борды ӝабырске - улонысь кошконо. Сьӧлык-а, ӧвӧл-а, кинлы кулэ тон? Анайёс, нылпиоссэс кыӵе ке изьвер сямен быдтыса, асьсэос укноысь тэтчо, ошисько. Солэсь но шимес адӟон вань меда? Ӧйтӧд... Вылӥ кивалтӥсьёс, политикаен шудэм-вырем-карем интые, экономикаез ӟеч азинтон сярысь малпаськысалзы ке, ужбергатӥсьёс, коньдон поттон котырын вырисьёс мултэс узырмон сярысь вунэтыса юрттысалзы ке куанермем муртъёслы... "Ке" вань угось, "сал" но люкетэ на. Улон радлыкез валатэк тӥялтон, азинскем интые, куашкатонэ вуттӥз. Та улонамы адямилэн дуныз ӧвӧл ни, шуыны луоз. Вордӥськисезлэсь тросэз кулэ. Мар-о та, кыӵе ке война-а, мар-а? Шуг, туж шуг валаны ваньзэ тае. Оло, кулэез но ӧвӧл? Макем трос малпаське ӟудэм мурт, сокем солы секытгес. Гожтыны кутскыкум верай вал, куд-ог иворъёсты мултэс вӧлмытыны, оло, кулэез ӧвӧл, нош ачим отчы ик кариськисько ни та гожтэменым. Секыт ужпум бере гожтытэк сюлэм уг чида уго. Оло, та вераме кинэ ке буйгатоз, малпаськытоз, кинлэсь ке умойтэм малпанзэ уретоз, кожасько. Бурдолы чагыр инбам Сётылэм вылэм инмар - Отын гинэ солы эркын. Адямилы нош - адями, Мылзэ-кыдзэ вераны, Гажаса нэ улыны. Анатолий ПЕТРОВ. Пайда вайысалзы ке... Кызьы тодмо, шуръёс кылдо ошмесъёслэсь. Пазял но озьы ик, трос ошмесъёслэн вуоссы, одӥг ӧре люкаськыса, шур луэмын. Одӥгзэ пӧзись синзэ, шуысал, мон усьтӥ. Малы ке шуоно, со шилёен согиськемын вал, дораз мыныны пограм писпуос ӧз лэзе. Городлы матын ке но, со дорын адями пытьы ӧй вал. Солы матысь кыралъёсты кызь ар талэсь азьло эшъёсыным асьмелы карим, та пала шутэтскыны ветлӥм, шурысьтыз вуэз юим. Малы ке шуоно, ошмесэз ӧм шедьтэ на вал. Выль "Инвожо" ансамбль кылдытэммы бере, эшъёсыным татысь нюлэс кушъёсты чеберъяны-умоятыны кутским. Нырысь ик ӝӧкъёс, пуконъёс, сэндраос ӟечыранъёс, сцена лэсьтӥм, чияпу, шупу, сливапу мерттӥм. Али соос сяськаясько ини. Дас арлэсь кема ортчиз ини, ошмесэз сузям бере. Табере отын вань дырдыез, вуэз люкаське тусе, дораз скамья пуктэмын, отчы шонер кужен сюрес нуэ. Трос аръёс ӵоже татысь кыралъёсын Гуждор но мукет праздникъёс ортчытъямы, соин та интыез Ижысь удмуртлыкез яратӥсьёс тодо ини, татын сюанъёс но ортчытъясько. Та шулдыр инкуазё интыосты чебергес карыны юрттӥзы мыным Надежда Байманова (али ужа "Вордскем кыл" журналын), Светлана Главатских (ужа Удмурт радиоын), Николай Логинов (ужа выт бичанъя инспекциын), Николай Рябов (ужа милициын), медсестраос Лидия Виноградова, Светлана Макарова но мукетъёсыз. Милям тыршеммы юнме ӧз луы: татын котькуд шутэтскон нуналэ калык вань. Кудӥз эшъёсыныз, мукетыз семьяеныз лыктэ. Сиён-юон пуктыны ӝӧк вань, ӵыдэтскыны сэндрае тубо, нош чылкыт ошмес ву котькинлы яра. Толалтэ шутэтскисьёслы но умой. Кыралъёс дортӥ куасэн бызьылӥсьёслэн сюрессы кошке. Отӥ лыктыса, кудӥз татысь бамалъёстӥ салазкиен, куасэн нискыла. Табере гожто мукетсэ но. Та сяськаё, шундыё возьёс кыстӥсько иськем ёрос. Кӧня ке ар талэсь азьло та интыез синйылтӥллям нокытын ужасьтэмъёс, улон интытэм адямиос, одӥг кылын вераса, бомжъёс. Ӝӧкъёс-пуконъёс сяна, отын угось, зорлэсь пегӟон вылысь, бадӟым липет лэсьтэмын вал - со бомжъёслы тужгес ярам. Кык Коляос но кык Васяос эшъёсынызы отын кык гужем-сӥзьыл улӥзы. Я, улӥськоды ке улэ, сие-юэ вал но - соос лапас дорысь кыралэз туж зол кырсьмытӥзы. Лыктэмзы бере, нырысь нуналъёсаз ик, изён интызэс небыт-шуныт карон понна, уно картон коробка, вужмем дӥськут, ӟустари ваизы. Уката ик урод соиз - сием-юэм интызэс умой ӧз утялтылэ. Нош мар гинэ соос ӧз сиылэ... Пуныез, ӵушъялэз кутыны капчигес. Нош одӥг пол та кушъёс дорысь Койык быдтэм интыез но адӟи. Кин тодэ, оло, та адямиос кутӥзы? Валамон ини, соослы татын курортын кадь вал. Эмезь, губи, узы ныр улын, нош соос та ческыт емышъёсты трос кулэ ӧз карылэ - ӵемгес СУ-13 автобус дугдылон дорысь магазинэ вина понна бызьылӥзы. Мангалэн кыӵе ке сӥль пыжыса, сое сиыкузы тӧдьы винаен гылатылӥзы. Кызьы сое курорт уд шуы? Я, коть буш ӟенеликъёссэс нош ик магазинэ нуылӥзы. Татчы сӧриськемъёсыз гинэ люкаськылӥзы. Но котькыӵе шулдыръяськонлэн пумыз луэ. Кылем-мылемъёссэс умой уг утялто бере, та интыез шӧдӥзы шыръёс но нюлэскын улӥсь мукет лулосъёс. Нырысь гужемаз улонзы шулдыр ортчиз. Кыкетӥяз "эшъёс" тросгес люкаськизы - сизьым кузя вал ини. Ӝыны гужемзэ умой юмшазы, нош пӧсь нуналъёс вуэм бере, трос ик дыр ӧз ортчы - кыкез бомжъёс висьыны кутскизы. Больницае эмъяськыны ӧз мынэлэ - документъёссы ӧвӧл угось. Татын ик пумен йӧназы. Мон но соослы маке-со вайылӥ, нош доразы ӧй пукылы ни. Кин тодэ, висёнзы кыӵе? Оло шыр висён, оло лемтэй мертчиськем, оло куртчаньги кырмиськем, оло туберкулёз? Ярам коть: кӧня ке улыса, соос йӧназы. Ошмес ву но, пуны сӥль но юрттӥзы, дыр. Висён воргоронъёсты ошмес дорысь "улляз". Соос татын улыку, калык но кыралъёсы ветлэмысь дугдӥз вал ни. Нош кошкемзы бере быдэс нунал ӵоже бӧрсязы кельтэм ӟустариоссэс, кагазъёссэс, лапасэз сутӥ, кырал нош ик чылкыт луиз. Табере, кык ар ортчыса, отын вож турын будэ ини, шыръёс но мукет кулэтэм лулосъёс тылын ӵуштаськизы, кудӥз кошкиз. Берло дыре ӵушъялъёсты, луд кечъёсты гинэ адӟылӥ. Инкуазьын шутэтскыны яратӥсьёс азьло сямен ик татчы курдатэк шутэтскыны ветло. Ужтэк, улон инты но кылемъёслэн лыдзы арысь аре будэ. Кызьы тодмо, туэ тюрьмаосысь укмыстон ньыль сюрс адямиез лэзьыны чакламын. Озьыен, бомжъёс- лушкаськисьёс уката трос луозы. Соос уноез, пайда вайытэк, городлэсь, инкуазьлэсь улонзэ сапталозы. Кулэ вылэм таӵе адямиослэсь кужымзэс-быгатэмзэс мукет ӧретӥ лэзьыны, медаз люкетэ соос ужась калыклы гань-гань улыны, асьсэды ке но лушкаськытэк сюдыны мед быгатозы. Мынам "эшъёсылы" куамын-ньыльдон арес гинэ ай - ӝыны улонзы азьпалан. Та пиосмуртъёсты куддыръя адӟылӥсько но юалляськисько улэм-вылэмзы но тазалыксы сярысь. Алигес магазин дорысь пиналзэгес, Коляез, адӟи - быдэс ведра така сӥль ваем. Одӥг килограммзэ дас манетэн гинэ вуза. Пересь кышноос дунтэм сӥлез соку ик ваньзэ басьтӥзы. Малы сыӵе дунтэм? Оло, со пуны сӥль вал? Оскыны шуг: ас будэтэм такадэ сыӵе дунтэм карод шат? Колялэсь юалляськыса тодӥ эшъёсыз сярысь. Одӥгез, Коля, Иже пырись Гондыргуртын пыртос луэм. Пудозы но вань, бакча сиёнзы но тырмыт. Одӥгез эшсы, Вася, азбар ӵужись луэм - солы улыны комната сётӥллям. Тужгес егит эшсы, Вася, чиптэм-чаптэм ышем. Тӥни озьы, ньыль эшъёс пӧлысь кыкез шонер сюрес вылэ султэмын. Мон но соослы пичияк юрттӥ кадь. Быдэс странаямы тазьы луысал ке, ӝыныез тазьы костаськисьёс пайда вайысалзы. Ужамзы бере дыраз сиськыса, шуныт валесын кӧлыса, тазалыксы но ӧй лябомысал, калыклэсь улонзэ но ӧй саптасалзы. Н. ВОЗИСОВ. "Пранаын" пумитало шуныт Та кык егит пиос ческыт сиёнэн вузкаронын ужало. Магазинзылэн нимыз но туж йӧспӧртэм - "Прана". Со "Сарапульская кондитерская фабрика" огазеяськонлэн нимаз вузкарон интыез. "Пранаын" Анатолий Пшеничников но Константин Чигвинцев куатетӥ арзэ вузкаро ни. Городын улӥсьёс соосты ӟеч тодо, угось басьяськисьёсты каньыл, шуныт мылкыдын пумитаны быгато.. Та пичи магазинын котьку ӝикыт. Пиос чырмыт ужало - адямиос, черодын сылыса, юнме дырзэс уг быдто, басьяськисьёсын туж лякыт верасько, вань кулэяськонъёссэс лыдэ басьто. Пичи коллективлэсь ужзэ быгатыса радъя Анатолий Пшеничников. Со ваньзэ валэктэ, визь-кенеш сётэ. * Анатолий ПШЕНИЧНИКОВ но Константин ЧИГВИНЦЕВ. Туспуктэмъёсыз В. БЕЛОМОРСКИХЛЭН. Правительствоысь иворъёс Шуныт луоз Правительстволэн Тӧроезлэн воштӥсез Александр Злобин кылем арняе Москваын ужаз. Со пумиськылӥз "Ростоппромлэн" кивалтӥсьёсыныз. "Ростоппром" но "Удмуртлестоппром" кун предприятие куспын республикаямы тырмыт музъем эгыр висъян сярысь кенешемын. Утчаськон кыстӥськоз Россия Федерациысь но Удмурт Республикаысь Инкуазь узырлыкъёсъя но инкуазез утёнъя министерствоос асьме улосъёсын му вӧез но газэз уже кутон но сое утчан сярысь совещание ортчытӥзы. Куинь нунал ӵоже Татарстанысь, Башкортостанысь, Киров но Пермь улосъёсысь, Удмуртиысь геологъёслэн но му вӧй поттӥсь организациослэн адямиосынызы вераськон мынӥз. Удмурт Республикаысь Правительстволэн секретариатэзлэн пресс-центрез. Журналистъёслы пайдаё Удмурт кун университетлэн кыкетӥ корпусаз радъямын аспӧртэм адӟытон. Татчы нырысьсэ поттэмын университетлэн библиотекаысьтыз журналистика удысэн герӟаськем книгаос. Таӵе ужрад шумпоттӥз журналистэ дышетскись студентъёсыз. Угось тросэзлы со выставкаысь книгаос азьланяз юрттозы курсовой ужъёссэс гожъяны, тодон-валанзэс будэтыны. Журналистэ дышетон университетын кемалась ик радъямын ӧвӧл ай. Соин но, дыр, газет, телевидение но радио удысъёслы сӥзем книгаос ӧжыт. Соосыз уд шедьты книгаен вузкаронниосысь но. Нош та адӟытонэ лыктэм мурт книгаен татын ик пыр-поч тодматскыны, аслыз кулэзэ гожъяны быгатэ. Выставкаын возьматӥсько журналистикалэн историезъя, жанръёсызъя книгаос, озьы ик чебер но шонер вераськыны, гожъямез тупатъяны, рекламаен вырыны дышетӥсь литература. И. КОНЬКИНА. Одӥг нуналэ быризы Ортчо аръёс. Нош удмурт калык ноку уз вунэты аслэсьтыз нырысь геройёссэ. СССР-ысь Верховной Советлэн Президиумезлэн 1940-тӥ арын 21-тӥ южтолэзе поттэм Указэзъя шаерысьтымы кыкезлы пиослы белофиннъёсын ӟырдыт ожмаськемзы понна Советской Союзлэн Героез ним сётэмын вал. Кыксы ик соос танкистъёс. Ува ёросысь Пуштовай гуртысь удмурт пи Виктор Пислегин экипажын вал башенной стрелок, нош Каракулино ёросысь Ижболдино гуртысь Павел Кирьянов - экипажлэн командирез. Озьы луиз: одӥг нуналэ Герой ним басьтэм пиосмылэн улонзы но чигиз секыт ожын одӥг нуналэ - 1941-тӥ арын 24-тӥ пӧсьтолэзе. Пислегин быриз Луга котырысь Югостица гурт дорын, нош Кирьянов - Кандалакша городлэн шунды пуксён палаз, Акмакуртти станцилы матын. Туэ Павел Кирьяновлы 80 арес тырымсал. Со, сизьым классэз быдтыса, Сарапулысь механической техникуме дышетскыны пыриз, комсомолец луиз. Собере 1937-тӥ арын Советской Армие мынӥз. Соку Павел аслэсьтыз вань улонзэ военной ужлы сӥзьыны малпаз. Сое Саратовысь бронетанковой училищее дышетскыны ыстӥзы. Татын ик партие пыриз. Дышетскон аръёс ӝог ортчизы. Училищеез йылпумъямез бере егит лейтенант Кирьянов Ленинградысь военной округысь бронетанковой подразделение сюриз. Финляндиен война кутскемен валче туж трос калыкен ӵош Кирьянов но ожмаськон лудэ вуиз. Огнемётной танкъёслэн взводэнызы кивалтӥз отын. Командирлэсь боевой приказъёссэ танкист котьку ӟеч быдэсъяз. Тани ма гожтӥзы солэн командиръёсыз наградной листаз: "Павел Николаевич Кирьянов 35-тӥ танковой бригадаысь огнемётной танкъёслэн взводзылэн командирзы, белофиннъёсын нюръяськыкуз, ассэ кышкасьтэмен возьматӥз. Вис карытэк ожмаськыкуз, со эшъёсыныз но командиръёсын умой кусып возиз. 1940-тӥ арын 6-тӥ феврале, тушмонлэн пушкаосызлэн ыбылэмзы шоры учкытэк, соослэн траншеязы доры вуыса, ыбылыны кутскиз пулемётэн но огнемётэн. Белофиннъёслэсь кык юнматэм интызэс пазьгыса, Хотинск-Биппури сюрес вылтӥ одӥгаз участокын асьме войскоослы ортчыны луонлык сётӥз". Ожмаськон интыысьтызы берытскемзы бере тодмо луиз: тушмон танксэс тямысэтӥ пасятэм, сузмытӥллям огнемётэз но пулемётэз. Азьланяз но Кирьянов аслаз экипаженыз ӟырдыт ожмаськиз. Тушмонлэсь юн интыяськем Хотинен-Сумской интызэ басьтыны секыт вал мур лымыен сэрен. Собере финнъёс вис карытэк ыбылӥськизы. Озьы ке но, Уралын пӧзьтэм анданлэсь лэсьтэм танкъёс чидазы. Огпол соос тушмонэн басьтэм интые сюризы но моторзы ужамысь дугдӥз. Сьӧсь кионъёс кадь котыртӥзы соосыз финнъёс. Ваизы одӥг трактор, танкез уг вормы, собере ваизы кыкетӥзэ но куинетӥзэ. Мырдэм но кызьы танкистъёс быгатӥзы моторез выльысь ужатыны. Механик-водитель газ сётӥз но берлань чигназ. Озьы, танк интые, тракторъёсыз асьме доры ваизы. Хотинен-Сумской дорын зол ожмаськемез понна командование П. Н. Кирьяновлы Советской Союзлэн Героез ним сётыны куриз. Озьы кышкасьтэм танкист республикаямы нырысьёсыз пӧлын дано ним басьтӥз. Июнь толэзьлэн кутсконаз Кирьяновлы оскизы выль ож тӥрлыкез пумитаны. Часте ваизы дас кык Т-26 танк. Со сяна, соку нырысьсэ вуиз Т-50 ӝог ветлӥсь машина. Ӵапак соку немецъёс атакае ӝутскизы Петрозаводск пала. Вань танкъёс соослы пумит султӥзы. Кирьянов экипаженыз пуксиз часлы 70 иськем ӝоглыкен мыныны быгатӥсь Т-50 машинае. Тушмонлэн басьтэм интыяз тямыс иськем мынэмез бере валаз та ожлэсь быремзэ. Собере ӝог ветлӥсь машинаеныз асьме пала шонтӥз. Н Таӵе учыръёс огпол гинэ ӧй вал. Но 24 июле секыт ожмаськонын танк мур гудэм интые сюриз но пограз. Тушмон сое адӟыса ыбылӥз но танк ӝуаны ӧдъяз. Кӧня ке нунал ортчыса, радио пыр ивортӥзы Павел Кирьяновлэн 24 июле ӝуам танказ быремез сярысь. Ваньзэ 22 ар гинэ улӥз танкист. Геройлэсь Кирьяновлэсь нимзэ али нуллэ Каракулиноысь одӥгез ульча. Родинамы понна нюръяськисьёс сярысь Якутиын 1942 арын поттэм книгаын асьсэ дорын вордӥськемъёсын ӵош вань асьме земляклэн Кирьяновлэн нимыз но тусыз. Каракулино ёросысь "Кама" колхозын Геройлэн нимыз весяклы гожтэмын буре ваён книгае. Одӥгез жаль, Павел Кирьяновлэн анаез, Ижевскын Союзной ульчаысь 47 номеро юртын дас арлэсь кема улытозяз, весь куректӥз пиеныз пумиськытэк кылемез но ватэм шайгузэ адӟымтэез сярысь. Сю аресозяз куинь толэзь тырмытэк, геройлэн анаез Глафира Николаевна кулӥз. Тӥни озьы трос адямиослэсь улонзэс талаз шимес война, но дано геройёслэн нимъёссы калык пӧлын ноку уз вунэ. Владимир Чернов. Скаллэн йӧлыз кыл йылаз Ува ёросысь "Свобода" эштосын али котькуд скаллэсь 8,7 кг. йӧл кыско, миым сярысь со 1,5 килолы уногес. Ӵошатом на берло басьтэм азинсконъёссэс. Валля арын эштос 30947 центнер йӧл кыскиз вал ке, миым - 35230 центнер, нош али азинсконъёссы азьлолэсь но умойгес. П. СКОБЕЛЕВ. Таракан - сое быдтӥсез Берло дыре республикаысь госсанэпинадзоръя центрысь дезинфекция ёзэ но Басьяськисьёслэсь правооссэс утёнъя комитетэ дугдылытэк жингырто "таракан быдтӥсьёсын" алдам адямиос. Коркась корка ветлыса, кыӵе ке адямиос кӧня ке дыр куспын быдэс этажысь, подъездысь акылес но юрӟым тараканъёсты быдтыны ӵекто. Адямиос, валамон, нимтулзэс но, лицензизэс но уг юало, коньдон сёто. Нош кӧня ке дыр ортчыса, тараканъёс яке чик уг быро, яке эшшо золгес аляло. Соку алдам муртъёс коньдонзэс берыктыны курыса жингырто санэпиднадзоре, басьяськисьёсэсь правооссэс утёнъя комитетэ. Тужгес но трос ӝожтӥськонъёс Н. Г. Сысуевлэн, А. Е. Прозоровлэн, С. Р. Уразовлэн ужась муртъёссы вылэ. Бӧрысь тодмо луиз, та адямиослэн тараканъёсты быдтыны лэзем сярысь нокыӵе лицензизы ӧвӧл, ми дорын но пусйиськымтэ. Соин ик ми соосты шедьтыны но коньдондэс берыктыын ум быгатӥське. Нош куке фирмалэн нимыз, лицензиез, кивалтӥсез тӥледлы тодмо ке, пайдатэм ужамзы понна ми соосты косӥськом тараканъёсты выльысь дунтэк быдтыны яке коньдонзэс берыктыны. Азьланяз дунын сыӵе юрттэт ӵектӥзы ке, юалэ кивалтӥсьёссылэсь фамилизэ, собере 75-36-54 телефонъя жингыртыса тодэ, вань-а солэн лицензиез, ӧвӧл-а. Соку гинэ коньдондэс сётэ. Ш. Хайруллин, Республикаысь госсанэпиднадзоръя центрысь дезинфекция ёзэн кивалтӥсь. Комсомол пумита тулысэз 13-тӥ мартэ 14 часын "Ижмаш" культура юртын Россиысь егитъёслэн коммунистической огазеяськонзылэн Удмуртиысь кун комитетэз, Дуннеысь нылкышноослэн нуналзылы сӥзьыса, КВН ортчытэ. Отчы пырисько Ижевскысь (ИжГСХА), Кировысь, Казаньысь, Уфаысь (Сочи городын фестивале пыриськем) командаос. Та ужрад ортчытӥське "Комсомол вамышъя шаертӥ" программая. Шарканысь иворъёс Водительёсты дышето Шарканысь 40 номеро профтехучилищеын таяз дышетскон арын "А", "В", "Е" категориен водительёслэн куинь группазы дышетсконзэ йылпумъяз ни, дышетэмын 78 мурт. Али "Д" категорилы дышетске кыкез группа. Озьыен, ёросын водительёслы кулэяськон пумысен югдур туэ чутрак умоялоз. Коркалы кузё карисько Шаркан ёросын, 1993-тӥ арысен кутскыса, 400 пала квартираос нимаз кузёослы сётэмын ни. Асьсэ киязы басьтыса, адямиос улон интызэс тупатыны-умоятыны тыршо. Висёнэз алон вылысь Ёрос палэнэ ӧз кыльы токсикоманилэсь, наркоманилэсь. Со кышкыт висёнъёсты, озьы ик СПИД-эз алон вылысь, райбольницаысь нарколог, инфекционист, быдэ вуымтэосын ужанъя комиссилэн секретарез, нылпиослэсь правооссэс утёнъя инспектор потало школаосы. Соос нылпиослы лекциос лыдӟо, кенешонъёс ортчытъяло, видеофильмъёс возьматъяло. Специалистъёс нырысь ик вуылӥзы Сосновка, Ляльшур, Быги, Мишкино, Шаркан шор ёзо школаосы. Ужтэк медаз кыле шуыса, школаосын али 22-тӥ мартозьлы ялэмын профориентацияя месячник. Со бордын тыршо егитъёсын ужанъя ёросысь отдел, "Перспектива" центр, уже интыянъя центр но школаослэн кивалтӥсьёссы. Та ужрадлы сӥзьыса, Шарканын ортчытъясько профессиональной конкурсъёс, семинаръёс, выпускникъёсын но ваньбур поттон удысысь кивалтӥсьёсын пумиськонъёс. Нылпиос тужгес но сак кылзо специалистъёсты но азьмынӥсь ужасьёсты, соослэсь дэмланъёссэс пелязы поныны тыршо. П. НИКОЛАЕВ. Адями но солэн ужез Корт но ӟырда "Ижсталь" акционер-огазеяськонлэн 20-тӥ цехаз кысык ужан вакыт. Прокат цехлэн пульт сьӧраз - оператор Валерий Михайлович Николаев. Солэсь ужамзэ адӟыса, умой мылкыд кылдэ. Ог минут куспын гинэ воргоронлэн киосыз кыӵе гинэ ужъёсты уг лэсьто. Тани чиньыос, пульт бирдыос борды йӧтско но, валокъёс доры ӟырдатэм корт гылӟе. Шлак кисьто. Соку ик отысь ӵын, пар потэ. Валокъёс ӟырдатэм кортэз солань-талань нулло. Мыным, палэнысь адямилы, та суред туж паймымон адӟиське, нош Валерий Михайлович солы дышемын ни - 1966 арысен татын ужа. Берло 25 аръёссэ - ялан оператор луыса. Огдыре ик со 20 номеро прокат цехлэн огеныз азьмынӥсь бригадаен кивалтэ. Кылем арын та коллектив, валля арен ӵошатыса, 14 сюрс тонналы тросгес корт нуйтӥз. Со сяна, Николаевлэн бригадаез электрокужымез но, металлэз но шыръяса ужа. Али татын сыӵе маркаен андан потто, кудзэ быдэс Россиын уд пумита. Соин ик татчы заказъёс вуо США-ысь, Франциысь, Германиысь но мукет странаосысь. Бригада ялан выльзэ утча, со понна кызё пала ӵектонъёс сётэмын ини. Ваньмыз со 108 сюрс манет тыр пайда ваиз. Коллективысь котькуд адями кӧня ке ужлы дышетскемын, соин ик кулэ дыръя ог-огзэс воштыны но быгато. Ачиз Валерий Михайлович трос гинэ адямиосты операторлэн ужезлы дышетӥз, куд-огез табере мукет бригадаосын но кивалто ни. Николаевлы сётэмын "Россия Федерациысь сӥё-дано металлург" ним. 1997 арын солэн бригадаез пыртэмын республикамылэн Данъян пул вылаз. М. КОПЫСОВ. Бригадир В. Николаев. Россиез дӥсялоз Сарапул Предприятие куашкан калэ вуэ ке, Арбитражной судэ вазиськон сяна уг кыльы ни. Маин йылпумъяське со? Хозяйствоез молот улысь люкетэн-люкетэн вузанэн? Котьку ик уг. Удмуртиысь троссэ бадӟым предприятиосты утьыны но ужзэс радъяны юрттӥзы палэнысь кивалтӥсьёс - арбитражной управляющийёс. Сыӵеос пӧлы пыре Сарапулысь ку посон комбинат но. Та предприятие кылем толэзе Федерциысь кужымтэк кылем (куашкам) сярысь ужъёсты эскеронъя управленилэн Удмурт Республикая улосвылъя агентствоысьтыз адямиос но комбинатлэн арбитражной управляющиез М. И. Шаршавин. Соос журналистъёсты татысь югдурен тодматӥзы. 203 ар талэсь азьвыл Сарапулысь Смагин но Пешехонов купецъёс ку посыны кутскизы, пичигес завод паськытаз, вузэз быдэс Россиын тодмо луиз. Татын сурон посыны кутскизы. Куэз ӝыны ар ӵоже киын посыны выро ке вал азьвыл, табере 18 часкын вутско. Куоссэс ӟеч басьяны кутскизы москваос, кировъёс, челябинскъёс... Татын посэм куос мыно пыдкутчан, шуба, солдатъёслы но офицеръёслы е но мукет арбериос вурыны. Но 1993-тӥ арын, Гайдарлэн Россилы капчи промышленность кулэ ӧвӧл, калыкез Турция но Китай дӥсялозы шуэмез бере, капчи промышленность мар карыны паймиз. Россие, зэмзэ но, Китайысь урод куосты возэн вайылыны кутскизы. Сарапулысь ку посон комбинат ӟудӥз: куоссэс басьтӥсьёс синӥзы, коньдонзы ӧвӧл, пунэмъёс будо, нош оборудование вужме. Комбинатын ужасьёс пумозяз чидазы: ӧз куре уждунзэс будэтыны, дыраз тырыны. Но уждунлы мынӥсь коньдон нокызьы но ӧз тырмы ни кредиторъёслы 80 миллион пунэмаськемзэс берыктыны. Кивалтӥсь "гуысь" потыны нокыӵе амал ӧз шедьты ни. Озьы 1997-тӥ арын март толэзе Сарапулысь ку посон комбинатэз несостоятельной но банкрот карон пумысен суд ортчиз. Ужпум сылӥз комбинатэз выльысь пыд йылаз султытыны, ваньбурзэ тус-тас карытэк. Кызьы? Пуктӥзы палэнысь кивалтӥсь - арбитражной управляющий, воштӥзы комбинатлэсь кивалтӥсьсэ но. Арбитражной управляющийлэсь ужзэ быдэсъяны ӵектэмын вал Михаил Иванович Шаршавинлы, нош комбинатлы генеральной директоре бырйизы азьвыл кивалтӥсьлэсь воштӥсьсэ Андрей Владимирович Абусовез. Бадӟым кредит сётӥз валтӥсь акционерзы - "КОМБИН" ОАО-лэн генеральной директорез И. Г. Копысов. Со ик луиз "Сарапулысь ку посон комбинат" АО-лэн директоръёссылэн кенешенызы кивалтӥсь. Одӥг но ӝыны ар ортчыса, комбинат выльысь улӟиз. Ужысь кулэстэмын ӧй вал одӥг адями но, радъяськиз уждун тырон (али сое дыраз тыро, шоро- куспо лыдпус - 450 манет), йылпумъяло ни кредиторъёслы пунэм тыронъёссэс. Комбинат меӵак ужа Сарапулысь "Сарабелла" но "Саркоо" АО-осын, Ижысь "Хольстер" фирмаен но Москваысь куд-ог предприятиосын. Али ужало Испаниысь бадӟым фирмаен контракт гожтон бордын. Сарапулысь ку посӥсьёс тыршо ӟеч вуз лэсьтыны. Кылем арын ортчем "Россиысь усто вузъёс" ярмаркаын соослэсь кузэс устоен лыдъязы. Валамон, Китайысь ваемъёсыныз нокызьы уд ӵошаты, но асьме калык ёрмемысьтыз али дунтэмзэгес басьтоно луэ. Но сарапулъёс оско: ӝоген басьяськисьёс дышозы вузэз ӟечлыкезъя дунъяны. Туэ ку посӥсьёс малпало мутон но цигейка поттыны выль оборудование пуктыны. Нош 11-тӥ мартэ Сарапулысь ку посон комбинатэз несостоятельноен лыдъян сярысь суд дугдытэмын луоз. Эшшо одӥг бадӟым предприятие выльысь пыд йылаз султэ. Акционеръёслэн огазеяськонзылэн Кенешез мировой соглашение кутыны ӵектӥз. Арбитражной судэ вазиськон таяз учыре предприятие понна умоен берытскиз. З. РЯБИНИНА. ТУННЭ ГАЗЕТАМЫ ВОЗЬМАТӤСЬКОМ ОГАЗЕЯСЬКОНЛЭСЬ УЖЪЁССЭ. ВОЗЬМАТӤСЬКОМ УСТО ПРЕДПРИЯТИОСТЫ: "ИГРАМОЛОКО" Ӝӧк вылады пуктэ ческыт йӧл-вӧй "Играмолоко" акционер огазеяськон - шаерысьтымы одӥгез огсыр усто ужась предприятие. Соин кема аръёс ӵоже быгатыса кивалтэ ни Александр Васильевич Лазарев. Предприятие арысь аре планъёссэ мултэсэн быдэсъя. Продукцизэ шумпотыса басьто республикамылэн палэназ но. Таӵе предприятиосын котьку валтӥсь инты басьтэ производственно-технологической лаборатория. Соин ик огазеяськонлэн кивалтӥсезлэн Александр Лазаревлэн матысь но оскымон юрттӥсез луэ лабораторилэн тӧроез Людмила Ившина. Ӵапак соин кенешон бордысен мытӥм ОАО-ен тодматсконмес. - Людмила Михайловна, мар верасалды лабораториды сярысь? - Ужъёсмы урод уг мыно. Азямы трос куронъёс сыло, но соос пӧлысь самой бадӟымез но кулэез луэ хозяйствоосысь басьтэм йӧллэсь но поттэм сиён-юонъёсмылэсь ӟечлыксэ эскерон. Ужмы ноку уг дугдылы, нуналлы быдэ ваньзэ учконо ук. Кылсярысь, ваем йӧлэз умой-умой ӧд ке чакла, шудтэм учыръёс но луыны быгатозы. Нош наплыксэ (жирностьсэ) ӧд ке тоды яке сое кулэстӥд ке, йӧл вузасьёсмы ыштонъёс адӟозы. Али тани 3,7-3,8 процент наплык йӧл вуэ, гужем со усе, 3,5-3,6 процент гинэ кыле. Ваньзэ сое син азямы возиськом. Крестьян хозяйствоез, эштосэз одӥг пол коть пӧяд ке, со тыныд ноку уз оскы ни, оло йӧлзэ но ворттэмысь дугдоз. Лабораториямы 6 кузя ужаськом: ньыль лаборант но одӥг микробиолог. Берлоез сярысь нимысьтыз вераме потэ. Ассэ умоен усто специалистэн возьматӥз ни Нина Владыкина. 1989-тӥ арын Ижысь Гурт хозяйствоя институтэз йылпумъяса, со дорамы лыктӥз. Оскем ужзэ ӟеч быдэсъя, микроскопез юмоке уг вуттылы. Тужгес юн сак эскере чырсатэм сиён- юонэз (йӧлпыдлэсь продукциез). Огазеяськонын микробиолог озьы ик чакла вуэз, омырез, йӧл чырсатонэз (закваскаез), оборудованиез, складэз но музонзэ. Бен, Нина Геннадьевналэн ужез син азьын уг адӟиськы, сое номырин уд мерта, уд но лыдъя, но кыл кутонэз туж бадӟым. Сое Нина Владыкина ӟеч вала. Озьы ик ушъяса пусйысал огазеяськонысь йӧл кутӥсез Вера Чумаковаез. Егит кышномурт ваньзэ дыраз лэсьтэ-бергатэ, йӧл ваисьёсын быгатыса вераське. Огазеяськонлэн ёзъёсыз вань на Вуж Зятцаын (сепараторной цех) но Якшур-Бодьяын. Котькудаз отын быдэн одӥг лаборант ужа. - Нош кытысь йӧл басьтӥськоды, поттэм продукцидэс кытчы вузаськоды? - Милемлы йӧл вутто Игра, Як.-Бодья, Балезино но Красногорск районъёсысь хозяйствоос. Нош сиён-юонмы кошке Иж, Пермь, Глазов городъёсы, Игра, Балезино, Красногорск, Дэбес районъёсы. Берло дыре басьяськисьёслэн куронъёссыя гинэ ужаськом. Миым сӥзьыл йӧл дун будӥз, озьы хозяйствоослы юнманы луонлык кылдӥз. Нош мукет ласянь, сиён-юон дун данаклы йылӥз. Куд-огез али вӧй, творог, нӧкы басьтыны уг быгато ни. Огазеяськонамы югдур урод ӧвӧл. Ужасьёсмылы толэзьлы быдэ дыраз уждун вуэ. Коллектив планъёссэ умой быдэсъя. Туэ январе но уно сиён-юон поттӥм. - Нош кызьы йылпумъяды кылем арез? - Урод шуыны уг луы. Сое тужгес яркыт возьмато лыдпусъёс. Тани миым 5170 тонна йӧл продукция поттӥм, нош валля арын со лыдпус 3312 гинэ вал. Мукет сямен вераса, кылем арын, 1997-тӥ арен ӵошатыса, тросгес поттӥм йӧл - 163 тонна, нӧкы - 181, чырсатэм йӧл - 446, шоколад вӧй - 31, шунтэм вӧй - 2, но творог - 152 тонна. Нош вӧй 43 тонналы ичигес шукким. Туэ но арез умой кутским. Январе поттӥм 425 тонна йӧл сиёнъёс, вӧй - 23 тонна, творог - 10 тонна. - Людмила Михайловна, асьтэ сярысь кӧня ке вералэ вал? - Вордскемын Каракулино черкогуртын. 1980-тӥ арын йылпумъяй Ижысь Гурт хозяйствоя институтэз, зооинженер луи. Со дырысен татын ужасько. Ньыль ар вал микробиолог. Кӧня ке ужай директорлэн воштӥсез луыса, нош 1990-тӥ арысен лабораториен кивалтӥсько. Уже туж кельше. Кузпалэным кык ныл будэтӥсько. Огез туэ 11-тӥ классэз йылпумъя, кыкетӥез - 9-тӥ классэз. - Табере выльысь берытском огазеяськонлэн ужъёсыз вылэ. Кызьы сюлмаськиськоды продукцидылэсь ӟечлыксэ ӝутон сярысь? - Вераны кулэ, вань поттоно сиён-юонлы сертификат басьтэмын. Кылем арын ӟечлыкез умоятонлы сӥзем толэзь ортчытӥм. Декабре ветлабораториысь специалистъёсын ӵош районысь вань фермаосы потам, ветеринарно-санитарной югдурез чаклам но котькуд фермалы чылкытлыкъя паспорт сётӥм. Та ужлэн пайдаез шӧдӥське. Ортчем арын январе нырысетӥ сортэн йӧл 86 процент ке вал, туэ со 94 процент луиз. Со хозяйствоослы но умой, кассаязы уногес уксё вуэ. - Тӥляд ужды, зэмзэ но, тунсыко. Нош ужасьёстылэсь тодон-влаанзэс кытын но кызьы будэтӥськоды? - Та ужпумез администрация уг вунэты. Тани кыкез лаборантмы Надежда Перевощикова но Наталья Исакова тодон-валанзэс будэто Кировысь йӧл техникумын. Бӧрысь соос аттестация ортчозы но квалификацизэс будэтозы. Огазеяськон котькудӥзлы дышетскыны быдэн 600 манет коньдон висъяз. Али отын республикаысьтымы 10 мурт дышетске. Огазеяськонамы ужасез 118-120 мурт. Али соос уг вошъясько. Толэзяз шорлыдын одӥг сюрс манет пала уждун лыктэ. Сое дыраз басьтӥськом. - Людмила Михайловна, кышномуртлы секыт-а ваньбур поттонын ужаны? Кызьы тӥ шутэтскиськоды? - Коллективамы, зэмзэ но, тросгес нылкышноос ужало, воргоронъёс - техника котырын гинэ. Котькыӵе ужлэн вань, дыр, умой палыз но, секытэз но. Но куке ужез сюлэмыдъя, котырад тонэ валась адямиос бергало, секытэз но капчиен берытске. Юнме шорысь калык уг шуы ук, кулэ дыръяз адями гурезез но берыктоз. Кама шур дурын вордски, гольык пыдын бызьылӥ ке но, Игра палъёс но кельшо: шуръёс, нюлэсъёс, тэльёс, ошмесъёс. Нош кышномуртлэн трос-а меда луэ шутэтскон дырыз. Ӝыныез улонмы ужын ортче. Гужем яратӥсько тэле ветлыны, узы-боры, эмезь, губи бичаны. Сад-бакчаям музъем уж но кельше. Ваньмон дыръям шумпотыса кылзӥсько крезьгурез. Юанъёс сётъяз Геннадий Романов. Мастер Кин ужан интые ӵукна вазьгес вуэ, кин ӝытазе бергес кошке - шуг вераны. Вӧй шуккисьёс но йӧл сиён поттӥсьёс 8 часэ ужаны кутско, нош Фаина Корепанова 7 часэ ик ужаз вуэ. Ужасьёсыз лыктэмлэсь азьло ваньзэ чакла, заказъёсын тодматске но аппаратъёсты эскере. Сыӵе уго старшой мастерлэн сюлмаськонэз. Фаина Васильевналэн быдэс улонэз йӧл-вӧй поттонэн герӟаськемын. Районысь Селигуртын вордскем удмурт кышномурт 22 ар татын ужа ни. 1977-тӥ арын со йылпумъяз Сарапулысь 3 номеро профессионально-технической училищеез. Собере вуиз Играысь йӧл заводлэн Вуж Зятцаысь люкетаз. Отын йӧл кутылӥз, творог лэсьтылӥз, но чупрес егит ныллэсь тыршемзэ ӝог синйылтӥзы, 1982-тӥ аре мастере пуктӥзы. Оскем ужзэ вить чиньызэ кадь тодэ, мылысь-кыдысь быдэсъя. Фаина Корепановалэн цехаз 24 мурт ужа. Котькудӥз ас удысаз лулысь-сюлмысь тырше, мастерлэсь адӟем каре. Ужзэс бен капчи уд шуы, ваньзэ машинаос бергато ке но, ялан вуэн ужано луэ, куддыръя бус кадь мускыт вӧлске. Резина сапегъёссэс тол но, гужем но уг куяло. - Али мар бен лэсьтӥськоды? - юасько Фаина Васильевналэсь. - Берло дыре вӧй ичигес шуккиськом, йӧл уг тырмы, - шуэ мастер. - Пакетъёсы лэзьяськом нӧкы, кефир, йӧл, йӧлвыл, йӧлву (сыворотка), аръян (пахта), нош ряженка, йогурт - стаканъёсы. Бен, азьлозэ алиеныз уд ӵошаты ни. Йӧл посудаен уг выро ни. Аппаратъёссы огсыр ужало. Планъёсэс но толэзьёсысь толэзе мултэсэн быдэсъяло. Мастерлэн одӥг ужасез сярысь но уродэн верамез уг поты. Солэн самой матысь юрттӥсьёсыз луо сменной мастеръёс Анетта Тетерина, Светлана Холявина но Елена Поздеева. Усто тыршо йӧлъя аппаратчицаос Галина Миронова, Лилия Новгороцева, вӧй шуккись Раиса Перевозчикова но трос мукетъёсыз. Вордскем гуртады бертылӥськоды-а шуыса юаме бере, мастерлэн ымнырыз ик мӧзмыт тусо луиз. Кӧня ке малпаськыса улӥз но мадьыны ӧдъяз: - Селигуртэ быремын ни. Ошмесэз кылемын на, котькуд тулыс озьы ик шулдыр кырӟало уӵыос. Азьло гуртысь кытчы ке потыны сюрес но ӧй вал. Табере му вӧй поттӥсьёс асфальт сюрес лэсьтӥзы. Оло гуртме улӟытӥсьёс сюрозы ай. Осконмы быдэсак бырымтэ на. Улон азинске ук. Играысь йӧл-вӧй поттӥсьёс капчи мылкыдын ужало. Контораязы пыриськод ке, мукет дуннее выллем вуиськод. Сиськон интызы но озьы ик чебер лэсьтэмын. Котыр шӧдӥське администрацилэн сюлмаськемез. Мукет интыосын сямен нокыӵе возьмаськисьёс ӧвӧл, ог- огзылы оско. Уждун но басьто кӧня продукция поттэмзы вылысь. Планзэс быдэсто ке, премия вуэ. Слесарьёслы но озьы ик дун лыктэ: макем уногес йӧл-вӧй потто, сокем умойгес уждун басьто. Озьы котькудӥз сюлмысь тырше. Нош мастеръёс сярысь верано ке, Фаина Корепанова но солэн юрттӥсьёсыз юнэсь кусыпъёс возё лабораториен, сиён- юонлэсь ӟечлыксэ умоятон понна дэмен тыршо. Люкиськон азямы мастер нимысьтыз пусйиз на 4 слесарез. Тани соос - Алексей Погудин, Владимир Семакин, Николай Волков но Александр Исаев. Ньыль эшъёс быгатыса ужато сепараторъёсты, автоматъёсты но музон аппаратъёсты. Г. ВАСИЛЬЕВ. Мастер Фаина Корепанова. Йӧл кутӥсь Вера Чумакова. Кандидатъёс Анатолий Мешков: "Бырйисьёсме уг вунэты" Анатолий Анатольевич уката но тодмо му вӧй поттӥсьёс пӧлын. Сизьым ар ужаз Чутырь но Киенгоп нефть кыскон интыосын, механик-водитель вал. Собере 11 ар тыршиз "Удмуртгеология" огазеяськонлэн Уй пал экспедицияз. Татын со валтӥсь инженерозь будӥз. Нош 1991-тӥ-1997-тӥ аръёсы кивалтӥз торгово-промышленной предприятиен. Анатолий Мешков ассэ тужгес но умоен, улонэз ӟеч тодӥсь-валасен возьматӥз Кун Кенешын. Вакчи дыр куспын валтӥсь специалист луиз. Вань быгатэмзэ, валамзэ со сётӥз выль законъёслы инъетъёс дасянлы. Али нош нюръяське Кун Кенешлэн депутатэз луон понна. Быръён округаз пыро Игра районысь Зура, Сеп, Мазьги, Чутырь, Кабачи палъёс но музон гуртъёс. Кандидатлэсь ужаны быгатэмзэ чакласа осконо, парламентын со трос умойзэ лэсьтоз. - Анатолий Анатольевич, малы депутат луэмды потӥз? Маин со герӟаськемын? - Нырысь ик, Удмуртиын 26 ар улӥсько ни. Кельшиз мыным ошмесо чебер шаер. Табере мукет синмын учкисько, республикаын мар лэсьтӥське. Малы со озьы луэ? Тани Удмуртия узыр нюлэсэн, му вӧен но мукетыныз. Нош кыӵе ӟечесь вал ож тӥрлык поттӥсь предприятиосмы! Озьы ке но, Россиын юрттэт (дотация) басьтӥсь улосвыл луим. Заводъёсты выльдон (конверсия) ӧз пӧрмы, военной заказъёс данаклы кулэсмизы, нош предприятиос калыклы кулэ луись вузъёс поттонэз радъяны ӧз быгатэ. Поттэм ож тӥрлыкез Москва басьтэ, нош дунзэ уг берыкты. Солэн тыронъёсыз туж трос люкаськемын ни. Бадӟымесь промышленной предприятиос мырдэм шокало бере, шаерамы пумен уногес луо ужтэк кылемъёс. Ужасьёсыз но беромыса уждун басьто. Озьыен, кун бюджетэ ичи коньдон вуэ. Нош со люконтэм герӟаськемын дышетӥсьёслы, врачъёслы уждун тыронэн, пенсиос но нылпиос понна пособие сётъянэн. Быдэс бугор луиз. Басьтом нюлэс дасянэз. Арысь аре со начарме. Леспромхозъёс куашкан калэ вуэмын. Тани Менилысь нюлэс корасьёс ужтэк пуко, коньдонзы ӧвӧл. Сыӵе ик югдур Игра леспромхозын но мукетъёсаз. Соин ик ваньмыз понна сюлэм висе, югдурез тупатыны кулэ. Тазьы улыны уг яра, умоесь законъёс кутоно. - Нош гурт удыс сярысь мар верасалды? - Татын но суред пӧртэм ӧвӧл. Гуртоос асьмеды сюдо бере, соосты вунэтыны уг яра. Али нош гуртлэсь тросэз палэнскемын. Нянь будэтӥсьёс, пудо утисьёс туж ичи уждун басьто, сое но улэп коньдонэн аръёсын уг адӟыло. Соин ик данак гуртъёсын ужан но улон условиос чик ӧвӧл, шуыны луоз. Ватонэз ӧвӧл, куд-огаз уг ужало магазинъёс, медпунктъёс но музонэз. Нош отын уло ожысь но ужысь ветеранъёс, пенсионеръёс. Асьмеос соосты но вунэтӥм ни. Али пересь мурт висьыны усе ке, со эмъюм басьтыны уг быгаты, уксёез ӧвӧл (пичи пенсия басьто - Г. Р.). Соин ик выльысь котькытын "Ветеран" магазинъёс усьтоно но нуналмысь кулэ луись вузъёсты дунтэмгес сётъяно. Ветеранъёслы озьы ик вузано эмъюмъёсты. Мон соослы (пенсионеръёслы, куанер улӥсьёслы, трос нылпиё семьяослы) котьку юртто. - Анатолий Анатольевич, нош тазалыкез утёнын кылдэм югдур шоры кызьы учкиськоды? - Шонерзэ вераса, кызьы бен умой учкод. Кылсярысь, больницаосын ӧвӧл, шуыны луоз, эмъюмъёс. Висись ваньзэ ачиз басьтэ, сьӧраз кӧлан валес котыр вае. Кызьы сое чидалод? Зура черкогуртын тани гуньдэмын больница пуктон, нош со кемалась вуттэмын луыны кулэ ни. Больница ӝутонэз азинтон борды ачим басьтӥсько, кыл сётӥсько та ужез йылаз-пумаз вуттыны. Мукетыз лэчыт ужпум - калыкез дышетон удыс. Уноез школаос али вужмемын, ӝоген куашкалозы. Дышетскисьёслы уг тырмо книгаос, тетрадьёс, спортинвентарь, дышетӥсьёслы - методической литература. Сыӵе ик югдур нылпи учреждениосын. Туннэ уг вераськы ни та удысын уждун тырон сярысь. Со беромыса вуэ. Нош Сепын шор ёзо школа лэсьтыны кутсконо луоз. Та ласянь но юртто. Правительство монэ валалоз шуыса оскон вань. Пежвай гуртын пумиськыкум, отын улӥсьёс одӥг куронэн вазиськизы, гуртэтӥ сюрес ӝутонэз радъяны, кӧльы, пе, кисьтоно вал. - Гуртэ али данак егитъёс кылё. Нош соосын ужась вань-а? - Ӧвӧл, конечно. Таин Америкаез уг усьтӥськы. Гуртысь егитъёс аналтэмын, шуыны луоз, соосын нокин уг ужа. Соин ик кӧняез ке егит пиос но нылъёс (визьмоосыз) городэ кошко но выльысь уг берытско ни. Соин ик егит специалистъёслы котыр ласянь юрттоно. Гуртысь егитъёс дышетскыны пырыны мед быгатозы. Умой радъяно шутэтскон дырзэс. Одӥг дискотекаосын гинэ кыдёке уд вамышты. Усьтылоно пӧртэм кружокъёс, кылдытъяно ансамбльёс но музонзэ. - Анатолий Анатольевич, тӥ вал Кун Кенешлэн депутатэзлэн юрттӥсез, собере - валтӥсь специалист. Пуш ласянь адӟиды вуж парламентлэсь ужамзэ. Кызьыгес ужаны кулэ вылез? - Меӵак пусъёно ке, данакез депутатъёс политикаен выризы, нош ваньбур поттонэз радъянлы но экономикаез юнматонлы дырзы ӧз кыльылы ни. Одӥгез со. Мукетыз, ӵем дыръя бырйисьёссэс вунэтылӥзы, чеберъяськон понна гинэ трибуна сьӧрын вераськылӥзы, нош быръён округъёсазы туж шер возьматскылӥзы. Кыкетӥез, вуж парламент трос дырзэ но кужымзэ быдтӥз керетонъёслы, ваче пумит сылонлы но вожвылъяськонъёслы. Со ӟече ӧз вутты. Данакез законъёс палэнтэмын вал. Мыным калык оскиз ке, вылӥ верам шекъёсты палэнтыны тыршо. Мон сямен, депутат нырысь ик хозяйственной ужез ӟеч тодыны-валаны кулэ, собере гинэ политикае выжоно. Кыӵе бен депутат луыны кулэ? Калык солы куаразэ сётӥз ке, со ваньзэ лэсьтыны кулэ бырйисьёсыз, соослэсь улон-вылонзэс умоятон понна. Вылез парламент бадӟым инты висъяны кулэ республика азьын сылӥсь ужпумъёсты улонэ пыӵатонлы. Керетонъёсты быдтыса, законъёслы ӟечесь инъетъёс дасяно. Таӵе югдур ӧй вал азьвылаз парламентын. Сессие туж лябесь законопроектъёсын потылӥзы. - Депутат луиды ке, мар бордысен ужаны кутскоды? Нырысетӥ вамышъёсты кыӵеесь луозы? - Бырйисьёсылэсь куронъёссэс быдэсъян бордысен кутско. Собере округысьтым уногес семьяосы вуыло. Тодо, маин адямиос уло, мар понна сюлэмзы висе, кыӵе сюлмаськонъёссы улонзэс зӥбо но музон. Со мыным юрттоз парламентын пӧртэм ужпумъёсты ӝутыны но быдэсъяны. - Анатолий Анатольевич, нош кызьы учкиськоды депутатлэн привилегиосыз но льготаосыз шоры? - Туж урод. Соос медаз луэ. Тонэ калык бырйиз бере, калыкен оградын луыны кулэ, нокыӵе привилегиос медаз луэ, огшоры калык кадь ик улоно, транспортын но дун тырыса ветлоно. Депутат бырйисьёсызлы котьку мадьыны-вераны кулэ ужамез сярысь, отчётъёс лэсьтылоно. Сое шат меда привилегия шуод? - Адямиослэн кыӵе сямзы яра? - Зэмлыкез гажамзы но дунъямзы, порядочной луэмзы, мукет адями сярысь сюлмаськемзы. - Нош мае уд яратӥське? - Шонаськон, пӧялляськон но вузаськон сямзэс. - Кызьы ваньмон дырдэс ортчытӥськоды, шутэтскиськоды? - Туж яратӥсько чорыганы, сад-бакчаям ужаны-копаськыны, машинаен ветлыны но губияны. - Яратоно сяськады? - Тюльпанъёс. Кезьыт тол бере соос быдэс улонэз вошто, умоято кадь, выль кужым но ӟеч мылкыд сёто. Я бен, быръён нуналозь дыр трос ӧз кыльы ни. Кызьы А. Лукашенко шуиз, кияд бюллетень басьтӥд ке, сюрс пол малпаськы, кин понна куарадэ сётод. Тӥ но, гажано землякъёсы, игра-зура калык, озьы ик лэсьтоды шуыса шорады учкисько. Юанъёс сётъяз Геннадий РОМАНОВ. Туспуктӥз Владимир КАМАШЕВ. Мӧзмон Эшъёсы кема сюлворем бере, мон но луи депутатэ кандидат. Пукси программа шуон гожъяны. Учки монэным нюръяськисьёслэсь сӥзёнъёссэс. Коммунист оскытэ: - Вань демократъёсты пытсэт сьӧры пуктом! Калык соку коммунизмын кадь шудо улоз! Демократ пунэ ас гозызэ: - Вань коммунистъёсты пытсэт сьӧры пуктом! Калык соку райын кадь шудо улоз! Социал-демократ итӥське: - Вань демократъёсты, либералъёсты, коммунистъёсты, сталинецъёсты пытсэт сьӧры пуктом! Калык соку Финляндиын кадь шудо улоз! Нош мыным ма верано? Ваньмыз шуд сӥзё бере, мон но ньыль кылын программа ӵабыштӥ: - Мы желаем счастья вам! Усто пӧрмиз. Закон куремъя, 1-тӥ мартысен потӥ отпуске. Бырйисьёсын пумиськонэ кошкыны дасяськи но - Штанигуртэ сюрес ворсаськем. Букос, пе. Э-э, малпасько, эшъёсы монэ кандидатэ лӧпкытӥзы бере, соос ик мед ужалозы. Пӧрмытӥзы ке - депутат луо, ӧз ке - соосты ик пыжо-сизьдо. Озьы нокинлы вератэк шупчи Варзи-Ятчиысь курортэ. Лекос мӧзмыт вылэм татын. Туган утчаны шӧтай. Акшан дыръя юмшась кышноос пӧлысь егитсэгес бырйи. Туж тунсыкозэ. Ӟуч эксэйлэсь Якшур-Бодьяе ветлэмзэ адӟем на. Соку, та даурмылэн кутсконаз, Палагейлы 18 арес вылэм. Синъёсы лябесьгес бере, мон солы туннэ но сомындагем кожай. - Малы мылкыдыд сокем шимес луиз? - абдра Палагей. - Ужлэсь мӧзмисько. Куинь нуналскын дас килолы восьми но Палагейлэсь пегӟи. Тодмое, воргорон маке, чорыгез юыны дышетӥз. Кабак вина пушкы сур кисьтӥськод но, нокыӵе ёрш кулэ ӧвӧл ни. Ачид нодтэм пересь чукырна выллем долкаськод. - Малы уд шулдыръяськиськы? - пайме Ондрей.- Курортын куртчанги кутӥд ке шат? - Ужлэсь мӧзмисько. Палагей но Ондрей мынам мӧзмонэ сярысь быдэс курортлы ивортӥллям. Ваньмыз монэ жаляло. Сиён нуллӥсь Дуня лулӟылэ: - Эх, малы меда картэ ӟенеликлэсь гинэ мӧзме? Эх, малы меда мон кыкетӥ нылпи ваи на? Анае макем алӥз вал. Малы уд сиськиськы, мусокае? Копак куасьмод ук. Эмъясь Лида визьмо книгазэ лисъя: - Кыӵе диагноз пуктоно тӥледлы? Кышно ӧвӧлум - соин ик мӧзмонум, жуммонум но кулонум. Латынь сямен ке но вераз, шимес учыре сюремме чаляк валай. Сыӵе "ум" мыным ӧз кельшы. Сэрытак быдэтски но Варзи-Ятчиысь кӧчи. Бертон нуналам ик уже мынӥ. Эшъёсы Штанигуртэ ветлэмзы сярысь мадьыны выро. Ымзэс усьтыны уг сётӥськы. Весь кисьтӥсько ас кайгуме. Кык арня куспын ӝӧк вылам тачак газетъёс люкаськиллям. Арня куспын ваньзэ лыдӟоно луи. Отӥяз быдэс нуналме сӥзёно луи выль кылъёслы сӥзем кроссвордлы. Контораямы сое нокин но вормымтэ. Курадӟи ке но, тодӥ, мар со сыӵе ӧри, аслобет, возёс. Ӧри - комиссия. Аслобет - самолёт. Возёс - хозяйство. Али малпаськисько йӧскалык сярысь. Йӧскадь калык-а, езлэсь дурем калык-а, ӧс калык-а? Огкылын вераса, ужелэн ӧраз пыри. Шокчыны неку. Туннэ домино, ӵуказе - забастовкае потон, усьсэ - макмыр веськатон... Депутатэ бырйизы-а? Уг тодскы. Вуоно арня вискын тодмо луоз. Нош али Штанигуртэ но потаны уг ваньмиськы. Алексей ШКЛЯЕВ. Булайёслэн кунооссы Огвакытэ пашмыны кутскем удмуртлыкмы берло аръёсы нош ик ӝужаны, пушйыны кутскиз. Та удысын лулысь-сюлмысь тыршо, трос лэсьто удмурт кылъя дышетӥсьёс. Соос, асьме кылмылэсь чеберзэ, йӧнлыксэ, луонлыкъёссэ усьтэм-возьматэм сяна, нылпиослы пыӵатыны сюлмасько удмурт йылолъёсмес, сямъёсмес. Ува ёрос но огвакытэ чылкак ӟучомыны кутскиз вал ини: пичи удмурт гуртъёс быризы, бадӟымъёсаз лыктылӥзы пӧртэм пумо калыкъёс. Нош али татын сизьымаз школаын дышето ини удмурт кылэз. Тужгес но адӟем карымон тыршо Булай школаын. Алигес отчы люкаськылӥзы Ува ёросысь удмурт кылъя дышетӥсьёс. Булайын кема аръёс ӵоже ини та урокъёсты быгатыса, сюлмысь нуо Маргарита Владимировна Федорова но Анна Петровна Дедюхина. Лыктэм кунооссылы соос та палан вордскем кылбурчиослэн Людмила Кутяновалэн но Галина Романовалэн творчествозыя аспӧртэмлыко урок возьматӥзы. Пумиськонэ ӧтемын вал асьсэос кылбурчиос но. Кылбур бӧрсьы кырӟан, кырӟан бӧрсьы шуныт вераськон, кылбурчиосын ӟечгес тодматскон - ваньмыз ортчиз тунсыко, пайдаё. Вераны кулэ созэ но: Булай палась музъем, нылкышно кылбурчиосты сяна, будэтӥз Геннадий Мадьяров прозаикез но. Нош соослэсь ужзэс азьланьтыны тыршо будӥсь нылпиос но. Куноос шуныт пумитазы Лена Евстафьевалэсь но Наташа Степановалэсь кылбуръёссэс, Леонид Кутяновлэсь вероссэ. * Кылбурчиос Галина РОМАНОВА но Людмила КУТЯНОВА. * Кырӟало Булайысь дышетӥсьёс. Паллян палась нырысетӥез - А. П. ДЕДЮХИНА. Туспуктэмъёсыз Владимир БЕЛОМОРСКИХЛЭН. ТЕАТР Перепечен сюдэм кадь Пьесаезлы йылпумъян точка пуктыса, Вячеслав Ар-Серги вамыштӥз Мунё театрысь актёр Александр Перевозчиков доры. Выль ужез лыдӟыса, соиз кӧня ке дыр ӵоже солань-талань вамышъяз но шуиз: - Пие, мон та пьесаез куамын ар возьмай. Та кылъёс бере писательлэн сюлэмыз ик капчияк луиз: иське, ӧвӧл янгышаськем. Я, лыдӟись азьын тунаса-мар ум улэ ни, вераськон мынэ Ар-Сергилэн одӥг актёрлы гожтэм "Ёк, Макарёк" пьесаез сярысь. Кызьы вераз ачиз пьесалэн авторез: - Кемалась сыӵе шумпотыса ӧй гожъяськы ни вал. Гуртэтӥ ветлыса, адямиосын пумиськылыса, материал тырмемын. Пьесаез гожтӥ одӥг уй куспын, киез кин ке ачиз нуллэ кадь. Котькуд чурез гожтыкум, син азям вал Александр Перевозчиков: кызьы со вырӟоз, кызьы мыноз, кызьы пальыштоз кескич тусо чылкыт ымнырыз. Ярам, актёрен драматург огзэс огзы валазы, одӥг кыл шедьтӥзы. Табере басьтӥськоно пьесаез дасян борды. Спектаклез сцена вылэ поттон понна толэзь пала дыр кулэ луиз. Со вал кык муртлэсь театр - директорез но, режиссёрез но, продюссерез но, драматургез но асьсэос ик. Куара пуктыны но югытэз радъяны юрттӥз на Мунё театрын ужась Александр Тарасов. Нош пьесалы калыке потыны сценазэ висъяз Удмурт кун филармония. Я, ойдо, удмурт калыке, табере выль ужен тодматскыны вамыштом. Спектакле мон мынӥ туж учкеме потыса. Малпасько, мар ай выльзэ пӧрам ни та Ар-Серги. Но тужгес адӟеме потӥз Россиысь дано артистлэсь, Удмуртиысь калык артистлэсь Александр Перевозчиковлэсь шудэмзэ. Концертъёс дыръя серемес сценкаоссэ одӥг пол гинэ адӟеме ӧвӧл. Туж быгатэ маскаръяськыны. Нош таяз учыре мунёосты улӟытӥсь актёр, драматической актёр интыын, быдэс спектаклез огназ валтоз. Залэ пырыса, ӝож луиз вал, буш интыосты адӟыса. Нош спектакль мынон сямен жаляны кутски татчы лыктымтэ адямиосты. Сцена вылысь шокчиз туала гурт улон - пӧсьтурын, но сылало. Ваньмыз со син азе пуксе пьесаысь валтӥсь геройлэн Макарлэн адӟемез пыр. Мае синмыз адӟе, сое ик вера. Гуртаз юыса юмшанысь бертэ но, кышноезлы пыриськыса, час пала олокыӵе но учыръёсты маде. Эктыны но, кырӟаны но, кытӥ-отӥ керетыны но вуэ. Нош Онисез, оло, улэп но ӧй вал ни соку. Воргорон малпа, кышноез йыркуръяськыса нош ик кӧня ке нунал ымтыр но уз вераськы, кышнопалась но потэмез уг поты бере. Ачиз автор выль ужез сярысь вера: - Пьеса яратон сярысь. Лулын гинэ ӧвӧл, мугорынызы валче бурмем адямиослэн яратонзы возьматэмын. Ӧвӧл отын сяськаосын эркиян но, дуно кузьымъёс но. Но пьесая валаны луэ, Макарен Онись ог-огзылы пичиесь кузьымъёс сётъяллям ик: Онисьлы - кышет, Макарлы - гын сапег. Но кузпалъёс понна со зарнилэсь но зарни кузьым. Дуннеын ортчись вань учыръёс шоры но соос ас синмынызы гинэ уг учко - нош мар малпасал та сярысь мынам картэ, кышное? Сыӵе яратон туж вылӥын, малпасько. Юэ ке но, Макар кизэ кышноез вылэ уг ӝутъя. Пӧрме-а, уг-а, юртъерез понна выре. Возьматэмын асьмелэн улонмы. Пьесалэн нимаз но пыртэмын воргоронлэн яратоно кылыз. Зэмзэ но, вань улонмы ёк, макарёк кадь луэмын. Ӟечлы верам кыл ӧвӧл со, сюлэмез ӧръян понна озьы вераса лэзё. Аслам ужам мон номырзэ но йылэтыны, бабыльтыны ӧй выры. Юмор но, сатира но со ӧвӧл, жанрезъя мон калык пьеса шуысал. Калык пӧлысь материал шедьтыса, одӥг бадӟым малпанэ огазеяй. Кинлэн серекъямез потэ - серекъялоз, кинлэн бӧрдэмез потэ - бӧрдоз. Зэмзэ но, Вячеслав Ар-Сергилэсь выль ужзэ синву пыр серекъян, шуыны луоз. Котькуд гуртысь шедьтыны быгатод, дыр, Макар кадь адямиосты. Ай, одӥгзэ гинэ но уд. Али ик кут но сцена вылэ тубыты. Вераськон кылыз но геройлэн калыкысь, со озьы ик яркыт суреда персонажез. Кызьы шуиз Вячеслав Ар-Серги: - Котькуд адямилэн аслаз дӥсез: одӥгезлэн катаез кышъямын, мукетызлэн пальтоез вуж ини, изьыез но сыӵегес. Озьы ик вераськонын но - персонажлы тупась кыл кулэ. Но пьесаын гожтэмез кулэ на сцена вылын возьматыны. Таиз ини Александр Перевозчиковлэн быгатонлыкез бордысь потэ. Шудэмезъя шӧдӥське, геройзэ со туж яратэм, гогыеныз бурмем бордаз. Учкиськод сцена шоры но, син азе пуксё кадь улонысь зэмос суредъёс. Артист лултэм арбериосты но улӟытыны быгатэ: пукон парсьлы пӧрме, кышет - нылкышнолы. Бен, куд-ог волятоно интыосыз шӧдӥсько на. Но та премьера бӧрсьы луозы на мукет возьматонъёс. Уж одӥг интыын уз сылы, калыке со эшшо но воляса потоз. Премьера возьматӥз - учкисьёс пьесаез ӟеч мылкыдын пумитазы. Тани куд-ог веранъёс. К. Куликов: - Та пьеса удмурт драматургиын но удмурт сцена вылын выль вамыш луэ. А. Шкляев: - Учкеме бӧрсьы ик номыр вераны уг быгатӥськы, вань пушкы тыремын материалэн. Мар сярысь вераськонэз вань. Л. Иванова: - Туж шумпотыса учким, артысь вордскем гуртмес адӟим кадь. Н. Танаев. - Шумпотӥ, собыдӟа материалэз вылӥе ӝутэмлы. Та пьеса котыр Шекспир уг ветлы, туж аспӧртэмлыко уж, со уг пыры огъя классикае. В. Шибанов: - Мае вераны выре вал драматург, возьматӥз актёр, нош актёр мар сярысь ӧз малпа вал, сое возьматӥз драматург. Со кылдытӥз паськыт драматургической суред. А. Силин: - Туж кельшиз, нош ик учкеме потэ на. Кытысь адӟыны луоз? Вань спектакльёсаз ветлысал. Калык пӧлысь кин ке шуиз на, пьеса бере перепеч сием кадь, пе, луи. Нош мынам кӧты ӧз тыры одӥг учкемен, эшшо адӟем потэ на. Л. МАЛЫХ. Александр Перевозчиков, со ик Макар. Туспуктэмез В. Камашевлэн. Ӝегай одӥг нуналлы... Кияса ёросысь Вужгуртын мон но Рыбак Лёгор ӵош будӥмы. Школаын дышетскыкумы, мон солы вожъяськисько вал, удмурт кыллы но литературалы "5"-лы дышетскиз. Но удмурт культураен улонзэ одно герӟаны ӧз тыршы, 1950-тӥ аръёсы, Ижысь медициная институтэз йылпумъяса, врачлэсь дипломзэ басьтӥз. Со дырысен, пенсие потытозяз, Ижысь ӝог юрттэт сётонъя станциын врач луыса ужаз, висисьёслы нырысетӥ эмъясь-юрттӥсь луиз. Сюрс но сюрс адямиос доры уй но нунал вуылӥз со. Кӧня мурт тау шуылӥз солы эмъямез понна. Георгий Яковлевич Кузнецов дырозь Вужгуртын нокин но институтын ӧз дышетскылы на вал. Соя ини мукетъёс но вылӥ тодон-валан басьтыны кыстӥськизы. Ачим мон Сибирьын улӥсько. Алигес, Лёгор эшеным пумиськыны шуыса, Иже лыктӥ вал. Но... Ӵап татчы вуон нуналам солэн улонэз кысэм. Одӥг нуналлы ӝеган тӥни кызьы берытске. Георгий Яковлевичлэн ужан ужез дано вал. Сое Утисьсэс музэн возьмаллязы висисьёс. Ӟеч сюлэмо, ас удыссэ ӟеч тодӥсь адямиез котьку тодазы возёзы. Н. ЯКОВЛЕВ. Александр Веретенников Пыдлось ватосъёсы сюрес Дорамы вуэ тулыс. Толбыт кӧлэмез бере, музъем сайканы ӧдъя. Омырын лӧсъясько вуоноезлы оскон ваись, мылкыдэз бугыртӥсь шӧмъёс. Ӵапак таӵе вакытэ юнгес йыггетыны кутске музъем узырлыкъёсты утчасьёслэн - геологъёслэн - сюлэмзы. Соос понна вылез ар али вуэ, шуыны луоз. Юнме шат асьсэлэсь праздниксэс но соос тулыс вылтӥ пусъё? Асьме шаерын му вӧен но мукет ваньбурен интыосты утчан бордын ужа акциосын "Удмуртгеология" огазеяськон. Предприятилэн валтӥсь директорезлэн Владимир Колодкинлэн верамезъя, та огазеяськон, ӝ'ыны даурлэсь кема ужатозяз, Удмуртилэн улосвылысьтыз 600 миллион тонна нефть шедьтӥз ни. Нош ваньмыз со узырлыкмы ог 900 миллион тонна лыдъяське. Кылем арын геологъёс элькунлэн ваньбурез вӧзы ватсазы 2,5 миллион тонна му вӧй. Мукет сямен вераса, нефтеразведкае кутэм котькуд манет 25 тонна шараям ваньбурен берытскиз. Ай собере "Удмуртгеологиын" нефтен гинэ уг выро ук. Татысь специалистъёс быгатыса ужало, кылсярысь, курень эгыр утчан бордын. Со шараямын Алнаш но Сарапул ёросъёсын. Озьы ик азинске чылкыт юон ву но йодэн-бромен узыр ву утчан уж. Со сяна, геологъёс тыршемен шедьтэмын азот газэн интыос. Таиз ваньбур куке но асьмелы трос пайда сётоз. 1998-тӥ арын музъем узырлыкъёсмы доры сюрес лёгисьёс вань ёзъёсысь бюджетэ но бюджетэ пырисьтэм пӧртэм фондъёсы сётӥзы 55,3 миллион манет коньдон. Нош Элькунмылэн Правительствоез (со киын предприятилэн 49 процентэз акциосыз) берло кык ар ӵоже акциос чотын ватсаса 3,7 миллион манет басьтӥз. Россилэн казназэ "Удмуртгеология" 17 миллион манетлы узырмытӥз. Акциосын огазеяськон выт чотын кӧня ке тыронъёссэ му вӧен но солэсь продуктъёсын сётэ. Озьы кылем арын гинэ, кылсярысь, Кизнер но Грахово районъёсы Решетниково месторождениысь 224 сюрс манетлы нефть келямын. Та ласянь Удмуртиысь гурт ёросъёслы геологъёсын ужаны шӧдскымон каньылгес: "Удмуртнефтен" ӵошатыса, "Удмуртгеология" сокем бадӟым предприятие ӧвӧл, соин ик вань ужпумъёсты татын ӝоггес быдэстыны луэ. Но котькудӥз мукетыз предприятие сямен, геологъёслэн но огазеяськонзы али шуг- секытъёстэк улыны уг быгаты. Ужпум тани ма бордын. Берло дырозь асьме специалистъёс быдэсак ужазы Удмуртилэсь минерально-сырьевой инъетсэ умоятон понна люкаськись выт чотын. Но дуннеын нефтьлы дун кык пол кулэсмемен, музъем узырлыкъёсты утчанэ висъяськись коньдон но озьы ик ичигес луиз. Валамон, сыӵе югдурлэн бервылъёсыз юн шӧдӥськизы. Соос предприятилэсь луонлыкъёссэ шӧдскымон сюбегатӥзы. Тужгес но ӟеч аръёсы асьме геологъёс ог 100 сюрс метр музъемез порто вал ке, кылем арын, кылсярысь, та лыдпус ньыль пол ичигес луиз. Тӥни озьы "Удмуртгеология" серметэ шедиз. Солэн техника ласянь данаклы уногес лэсьтыны быгатонлыкез вань ке но, коньдон тырмымтэен, ужан мылкыдзэ лапкатоно луэ. Акциосын та огазеяськон, удысысь мукетъёсыныз ӵошатыса, аспӧртэмлыко луэ: геологъёслэн бригадаоссы ас кожазы ужаны быгато, соослы кулэ ӧвӧл электрокужым сётӥсь линиос (вань асьсэлэн энергия поттӥсь тӥрлыксы), музъем портыны тырмыт соослэн дизель бордысь ужась установкаоссы, сюрестэм интыостӥ ортчыны быгатӥсь техниказы. Но котьмалэсь пусйымонэз мукетыз. "Удмуртгеологиын" та секыт аръёсы но быгатӥзы бадӟым опытэн ужасьёссэс утьыны. Соослэн быгатэмзы предприятилы ватсаса пайда вае. "Удмуртнефтен" ик ӵошатоно ке, татысь эшъёслэн азинсконъёссы 1,5 пол вылынгес. Огъя экономикаын шуг-секытъёс кылдэмен, акциосын огазеяськонлы нефть поттон борды аслыз но кутскытэк ӧйлась. Та вамыш ик юрттӥз предприятилэсь данзэ но кужымзэ утьыны. Туннэ геологъёс му вӧен герӟаськем вань ужъёсты быдэстыны быгато: сое утчан, эскерон, проект дасян бордысен кутскыса, нефтез поттон но вузан дорозь. Музъемысь ас кужыменызы кыскем ваньбур ик юрттӥз шаерысьтымы геологъёслы кылем арез чиданы. Пусйымон соиз: му вӧй поттон 33 процентлы йылӥз (1997-тӥ арын 150 сюрс тонна кыскемын вал ке, миым - 200 сюрс). Но малпан медаз кылды, "Удмуртгеология" вылӥ верам ужъёсын гинэ выре шуыса. Озьы ӧвӧл. Предприятие рос-прос тырше экология ласянь кышкытлыклэсь утиськон бордын - кызьы ке ас кожаз, озьы ик, мукет организациосын огкыл тупатыса. Геологъёслэн лабораторизылы сётэмын экологияя экспертиза ортчытъяны право. Туннэ отын инкуазез котыр ласянь эскерыны тырмыт туала тӥрлыксы вань. Нимысьтыз удысэн лыдъяны луоз пыдлось чылкыт вуосты утён ласянь ужанэз. Пусъёно тазэ: "Удмуртгеология" шаерамы ваньмызлэсь азьло кутскиз 40-тӥ-50-тӥ аръёсы портэм скважинаосты сэрттыны. Та уж шуген сётске, но сотэк уг луы - уго вужмем, сыномем гумыос инкуазез сӧро, вуэз саптало. Геологъёс сюлмаськемен, кышкытлык ваись ог куамын пала сыӵе объектъёс быдтэмын. Озьы ке но, та предприятие понна валтӥсез но тужгес кулэез уж, валамон ни, герӟаськемын музъем узырлыкъёсты утчанэн. Кызьы шуэ Владимир Колодкин, огазеяськон уг малпа государстволэн чыртыяз кырмиськыса улыны. Соин ик "Удмуртгеологиысь" 1900 муртъем коллектив Удмуртилэсь минерально-сырьевой инъетсэ азинтонэн котькыӵе уж борды басьтӥськыны дась. Геологъёс азьланьто пыдло ватэм узырлыкъёсты шараянэз, сыӵе интыосты эскеронэз. Мукет предприятиослэн куремзыя порто музъемез, тупатъяло-выльдо али ужась скважинаосты, быдэсто трос музон куронъёсты. Акциосын огазеяськон пумит уг луы республикалэн палэнысьтыз заказъёслы но - удмурт геологъёсты ӟеч тодо Киров но Тюмень улосъёсын. "Удмуртгеология" табере му вӧй поттытэк улыны уз быгаты ни. Солы, умой-умой азинскон понна, ар ӵоже нефть кысконэз 500 сюрс тоннаозь вуттыны кулэ. Сыӵе секыт ужпумез быдэстон вылысь, предприятие пыриськыны малпа нефть поттыны право сётӥсь вань ӵошатсконъёсы но аукционъёсы. Та пумысен Владимир Колодкин шуэ: конкурс ортчытъян дырез но куронъёсты огшорыгес карыны кулэ, озьы ик уже кутоно ни дас кык месторождениез, кудӥз американецъёслы сётыны чакламын. Валамон, "Удмуртгеологилэн" сюлмаськонъёсыз, быдэстымтэ ужъёсыз трос на. Но со ваньзэ лэсьтыны тырше, ӟеч азинскем предприятиослэн радазы пырон понна. Нефтяникъёс куддыр вераны туртто, геологъёс соослы му вӧй запасъёс пумысен мыдлань, кӧня ке бадӟыматэм лыдпусъёс сёто шуыса. Ужпум со бордын: "Удмуртгеология" выль усьтэм интыосты производственникъёслы сётэ шоро-куспо мертэтъёсъя. Шуом, 10 миллион тонна нефтен месторождениын 13 миллион но луыны быгатэ, но геологъёс оскыто, отысь ичизэ 7 миллион тонна му вӧй одно ик кыскыны луоз шуыса. Улон возьматэ узырлык утчасьёслэсь шонер ужамзэс. Кылсярысь, Архангельское месторождение уже сётэмын вал, отын 8 миллион тонна ваньбур лыдъяське шуыса. Табере, куке татын ужъёс дугдытэмын ни, тодмо: "Удмуртнефть" отысь 12,5 миллион тонна му вӧй поттӥз. Туннэ нуналлы шараям интыос оскон кылдыто: республикамылы нефть ог 20-30 арлы тырмоз на. Сыӵе югдур, Россиысь мукет улосъёсын ӵошатыса, урод ӧвӧл. Валамон ни, татын шӧдӥське "Удмуртгеологилэн" азьпала учкыса ужаны быгатэмез. Специалистъёс огымысь кадь шуо: геологиын нокызьы но уг яра лэсьтэменыз буйгатскыны. Соин ик котыр ласянь сюлмаськоно "Удмуртгеологилэсь" кужымзэ, уно аръёс ӵоже люкам опытсэ, кадръёссэ утён сярысь. Дунъяны луонтэм та ваньбурез ыштӥм ке, бӧрысь сое кылдытыны туж шуг луоз. УЖПУМ Дасесь-а 2000-тӥ аре выжыны? Адямиослэн улоназы одӥг даур ӵоже пыризы электричество, радио, телевизор но... компьютер. Берло аръёсы гинэ компьютер вань удысъёсы вамыштӥз. Табере котькуд пинал но со пыр аслыз кулэ луись тодон-валан яке кыӵе ке ивор басьтыны быгатэ. Уката трос но пӧртэм иворъёс басьтыны луэ, компьютер Интернетэн герӟамын ке. Та ужез асьме республикаын 7-8 ар ӵоже быгатыса нуэ ини "МАРК-ИТТ" компания. Солэн юрттэменыз туннэ 4 сюрслэсь трос адями ас ужаз Интернетэз кутыны быгатэ ни. Та дырозь компанилэн нокыӵе шугъяськонъёсыз ӧз кылдылэ вал. Но 2000-тӥ аре выжон компьютер возисьёс понна уно курадӟонъёс вайыны быгатоз, малы ке шуоно, али ужась компьютеръёслэн программаязы 2000-тӥ ар пыртымтэ на. Соин ик 1999-тӥ ар йылпумъяськем бере компьютеръёс выльысь 1900-тӥ арысен ужаны кутскозы. Озьыен, компьютеръёсты тупатытэк, 2000-тӥ арын 1-тӥ январе визьмо машинаос янгышъёс лэсьтозы. Со туж кышкыт. Банкъёс, министерствоос, вань учреждениос тыро-пыдо ужаны уз быгатэ. Озьы ик шуге-леке сюрозы воксё компьютеръёстэк ужасьтэм организациос но, угось туала вакытэ вань удысъёс ог- огенызы юн герӟаськемын. Атом энергетика удысын ужасьёс али ик вазиськонэн потӥллям ни ас ужзэс дугдытон сярысь - кин тодэ, кытчы вуттоз компьютерлэн пичи ке но лэсьтэм янгышез. Та секыт югдурез специалистъёс "2000-тӥ арлэн ужпумез" шуыса нимазы. Мар кароно, югдурез тупатон понна? Воштоно компьютеръёслэсь прогрммазэс. Та ужез нуон понна али "МАРК-ИТТ" компанилэн гинэ лицензиез вань. Солэн президентэз С. Катаев сюлмаське: быгатоз-а компания вань вазиськисьёслэсь куронъёссэс быдэстыны. Программитъёслэн ужзы али туж трос луоз. Со дыре ик улонамы данак кылдытыны быгатозы асьсэды "программист" шуисьёс. Али но соос вань ини. Сыӵеослы осконо ӧвӧл. "2000-тӥ арлэн ужпумезъя" тыро-пыдо валэктонъёс басьтыны луоз, "МАРК-ИТТ" компание вазиськыса. Т. БАННИКОВА. Обросъёсты берыкто Сарапулысь Шор Прикамьелэн историезлы но культураезлы сӥзем музей кемалась ик ӧвӧл карысь черклы берыктӥз 31 оброс. Соос суредамын вылэм ортчем даурлэн пумаз но та даурлэн кутсконаз. Бен, со обросъёсты выльдоно луоз на. Озьы ке но, шумпотымон соиз: инмарлы оскисьёслэн ваньбурзы берытске ас интыяз. Тӧдьы Кам дурысь городын али йылпумъяське Никольской храмез ӝутон, со сӥземын Святой Николайлы. Музейысь али берыктэм обросъёс пӧлын вань чудотворной "Рождество Христово" оброс. Со выльдэмын луоз черкез усьтонлы. Таин валче лыдӟисьёслы вазиськем потэ: кинлэн мултэс обросъёсыз вань, сётэлэ соосты али усьтӥськись черкъёсы. П. НИКОЛАЕВ. Гома спартакиадалэн тылыз Та нуналъёсы Ижын ортче Россиысь газ кыскон удысын тыршисьёслэн ИИ Тол спартакиадазы. 13 командаысь 900-лэсь уно спортсменъёс ӵошатскозы куасэн бызьылонъя, мини-футболъя, хоккейя, ыбылӥськонъя, туризмъя. Нюръяськонэ нырысь ик пыриськизы футболистъёс. Удмуртилэн командаез понна шудӥзы "Спецгазавтотрансысь" пиос. Жаляса верано, бигер шаерысь спортсменъёслы соос 5:6 лыдын келязы. Асьмелэнъёс пӧлысь устоез шудӥсь Альберт Андреев (со тодмо луэ "Газовикын" шудэмезъя) 2 гол пыртӥз. Нылкышноослэн 5 иськеме бызьылоназы вормисе потӥз Сургутысь Вера Третьякова. Асьмелэн Ирина Баженовамы ньылетӥ интые кылиз. Воргоронъёс 10 иськем сюресэз котыръязы. Ваньмыз малпамъя луиз. Вормиз "Тюменьтрансгаз" командаысь куасэн бызьылӥсь Сергей Крянин. Пусъём на, та спортсмен Воткинскын будэмын, Россилэн сборной командаяз кутэмын. Валлян ӝыт Ижысь Центральной стадионын спортлы сӥзем бадӟым праздник ортчиз. Сое радъясьёс калыкез паймытыны малпаллям ворпо-ворпо чилясь-мальдытӥсь тыл пырыосын, пеймыт инбамысь лэзиськись парашютистъёсын, мотоциклэн могӟетъёс пыр тэтчасьёсын, тодмо но дуно артистъёсын но мукетыныз. Ваньмыз умой но интыяз кадь. Только ческыт ымез чырсатэ одӥг лыдпус - 5 нуналъем ӵошатсконъёслы 26 миллион манет висъямын. Ӟучъёс шуэмъя, сьӧдкыль дыръя юонлы кельше. Озьы ӧвӧл-а? Г. ЮСАЕВ. Соос утёзы Родинамес Россилэн историез узыр атыкай музъеммес утёнын кышкасьтэм но сэзь луэм пиосызлэн нимъёсыныз. Александр Невскийлэн, Суворовлэн, Кутузовлэн, адмирал Нахимовлэн, Быдӟым Отечественной войнаысь полководецъёслэн Жуковлэн но Рокоссовскийлэн, озьы ик трос мукетъёсызлэн нимъёссы пыраклы кылизы Вооружённой Кужымъёслэн дано историязы. Туннэ но, экономикаын кылдэм секыт вакытэ, ужлы ёрмонэн курадӟон дыръя, школаосты но училищеосты йылпумъям, армиысь али гинэ бертэм егитъёс малпасько азьланьын улонзы сярысь. Дунне вылын вань туж дано но кулэ профессия - Родинаез утён. Туэ Россиысь Вооружённой Кужымъёслы офицере дышетскыны луоз 68 дышетскон заведениын. Россия Федерациысь Обороная министерстволэн вань дышетскон заведениосаз кутӥсько армиын служить карымтэ 16-24 аресъем егитъёс но 24 аресозь военнослужащийёс но военнообязаннойёс. Соос тазалыксыя мед тупалозы та заведениослэн куронъёссылы. Пырон экзаменъёс сётӥсько шор ёзо школалэн программаезъя. Со ӟуч кыл (сочинение яке диктант), математика (письменно яке устно), физика (устно). Нош физической культурая таӵе куронъёс тупатӥсько: 100 метре бызьылон (дырыз 14,8 секундлэсь трос медаз луы), перекладинаын ӝуткаськоно ӧжытсэ 7 пол, 3000 метре кросс (дырыз 13 минут 30 секундлэсь уно медаз луы). Школаез йылпумъясь егитъёс, военно-учебной заведениосы дышетскыны пырыны мылкыд каро ке, 1-тӥ маёзь улон интыоссыя ёрос военной комиссариатъёсы куриськон сётыны кулэ. Кандидатъёсты нырысьсэ быръёнэз военкомат ортчытыны кулэ 15-тӥ маёзь. Военной учебной заведениосы пырыны мылкыд карисьёс азе призывной комиссиос вузъёсы пырисьёслы кадь ик огъя куронъёс пукто. Собере ини комиссиез ортчемъёслы кулэ документъёс дасяло. Экзаменэ мынон сярысь военкоматъёс иворто 30-тӥ июнёзь. Дышетскыны пырисьёс отчы но татчы мыно дунтэк, озьы ик соосты дунтэк сюдо но возё. Военно-учебной заведениосы нырысетӥ курсэ кенешон ортчытыса гинэ пырыны быгато граждан вузъёслэсь нырысетӥ яке берпуметӥ курссэ йылпумъямъёс, соослэн дышетскемзы тупа ке военно-учебной заведенилэн куронъёсызлы. Конкурстэк но соослэсь быгатонлыксэс эскерыса дышетскыны пырыны быгато анай- атайтэк кылемъёс, нылпи юртъёсын но школа-интернатъёсын будэмъёс, Вооружённой Кужымъёсын ӧжытсэ 20 ар служить карем анай-атайёслэн нылпиоссы, озьы ик кыдёкысь интыосын службазэс нуисьёслэн нылпиоссы, службазэс нуон дыръя анай-атай пӧлысь одӥгез быре ке, соослэн пиналзы конкурстэк пыре. Озьы ик сыӵе луонлык сётӥське ожъёсы яке ваче пумит луонъёсы пыриськемъёслэн но нырысетӥ группаен инвалидъёслэн нылпиоссылы. Шор ёзо школаез зарни яке азвесь медален йылпумъямъёс, соос мукет куронъёсъя тупало ке, одӥг экзамен гинэ сёто. "Вить" отметка басьтэмъёс азьланяз мукет экзаменъёслэсь мозмытӥсько. Ваньмаз сямен военно-учебной заведениосын дышетсконо 5 ар, военно-медицинской академиын - 7 ар (сое йылпумъямъёслы сётӥське старшой лейтенант звание, мукетъёсаз лейтенант луыса пото). Военно-учебной заведениосы кутэм курсантъёсты дӥсяло, сюдо, коньдон сётӥське дышетскемзэс лыдэ басьтыса - 1-тӥ курсысен 37-70 манет, 2-тӥяз но мукет курсъёсын контракт гожтэм бере - 324-350 манет (1998-тӥ арын 1-тӥ декабрьлы дунъёсъя). Солэн быдӟалаез вошъяськыны быгатоз. Курсантъёслы арлы быдэ 30 нуналъем отпуск но кык арнялы тол каникулъёс сётӥсько. Дышетскон аръёс ӵоже военнослужащийёслы кадь ик льготаос тупатӥсько. Андрей ФУРДЫК, Удмурт Республикаысь военной комиссариатлэн 2-тӥ отделэзлэн кивалтӥсезлэн валтӥсь юрттӥсез. Шӧкыч Та дыре Ижевскын гинэ дуно кортъёсты басьтэ 32 фирма. Ваньзылэн вань лицензиоссы. Нош Удмуртиысь Правительстволэн постановлениезъя, нимысьтыз адямиослэсь корт басьтыны лэземын ӧвӧл. Озьы ке но, та удыс ялан "сяськая". (Газетысь). Нырысетӥез воргорон: - Мартын, мар-о асьмеос чыры-пырыен выриськом ай? Езлэсь но, скамьялэсь но, трансформаторедлэсь но трос пади уд потты. Кыкетӥез воргорон: - Шонер вераськод, Очок, та ракетаед зэмзэ но зарни шыкыс ук. Я бен, зуркатом ке зуркатом! Суредэз Л. ПРОЗОРОВЛЭН. ШӦКЫЧ Кандидат ке но луоно вал (Бырйисьлэн малпанъёсыз) Туэ нылкышноослэн 8-тӥ Март праздниказы куазь ласянь ӧзгес удалты. Малы ке кык нунал ӵоже кужмо тӧласькыса улӥз. Соин ик уноез адямиос гуртазы пуконо луизы. Но со дыре ик удалтӥз но, шуыны луоз, тани ма ласянь. Уно нылкышноослы олокытысь тодмотэм апайёслэсь но агайёслэсь ӟечкылан открыткаос, шуныт кылъёсын ноку адӟылымтэ газетъёс вуизы. Азьланяз таӵе газетъёс уно луозы на, дыр. Уго асьмеды Кун Кенеше депутат быръёнъёс витё. Та вакытэ солы дасяськонлэн самой ӟырдыт вакытэз. Кандидатъёсмы бырйисьсэс ас палазы кыскон понна олокыӵе но амалъёсты кутозы. Депутатэ кандидатъёслы валэктон уж нуыны пӧртэм правоос сётэмын. Уноез со амалъёсты эсэпсэ валаса кутэ. Но ӧжыт уз луэ, дыр, мултэссэ куасалтӥсьёс но. Тани почта ящикъёсысь шедьтыны луэ ни дунтэк газетъёсты, листовкаосты. Бен, соиз но, таиз но кулэ кадь. Но кытысь меда куд-огез газет поттыны сомында коньдон шедьтэ? Ведь туала вакытэ со дуно гинэ усе. Уксё кулэ бумагалы но, типографилы но, авторъёслы но. Но тужгес но паймытэ изданиослэн пуштроссы. Мон праздник нуналъёсы тодматски кыкеныз газетэн. Нимъёссэс поттылэм уг поты, умойтэмен валалозы ай эшшо. Кандидатъёс сярысь лыдӟиськод но паймиськод соослэн котьма лэсьтыны быгатэмзылы. Соос улон инты но шедьтыны быгато, секыт висисьлы но коньдонэн юртто, дунтэк эмъяны но быгато, ужан интыос но шедьто, пенсионеръёслы но дурбасьто... Нош кыӵе удалтэ дано артистъёслы. Вазь ӵукнысен бер уёзь соос дунтэк концертъёсын ужало. Зэм, калык понна гинэ со дунтэк. Кырӟась-верась юнме шорысь коньдонтэк уз ужа, дыр. Одӥгез гинэ паймытэ ай та кампания шуоназы. Кузьмаськисьёс но, коньдон сётӥсьёс сярысь номыр ивор уг кылӥськы. Шӧдске, санэ басьтӥллям Беларусьлэн Президентэзлэсь асьме доры ветлыкуз вераськемзэ. Тазьыгес шуиз вал со: "Водка сётӥзы ке, басьтэ, коньдон сётӥзы ке, эн кепыралэ. Но кабинаын куарадэс сётыкуды малпаське..." Соин ик ялан ӧпкельыса улӥсько. Улонам коть одӥг пол ке но депутатэ кандидат кариськоно вал. Оло узырмысал соку, оло данэ вылӥегес ӝутскысал... Н. Лялин. Вашкалаез улӟе Ньыльдон ар талэсь азьло, 1959-тӥ арын, Ижевскын "Дружба" артель интыын кылдӥз чеберлыко (художественной) вузъёсъя фабрика. Татысь кибашлыос калыклэсь вуныны кутскем узырлыксэ мур-мур эскеро но выльысь улӟыто. Та вакытэ коллектив кык сюлэсь ятыр вуз поттэ. Соос пӧлын - ковёръёс, басмаос, ӵушконъёс, айшетъёс, пӧзьёс, пуньыос но мукет. Шаерамы гинэ ӧвӧл, солэн палэназ но кибашлыослэсь ужъёссэс шумпотыса басьто. В. РОГАЛЁВ. "Удмурт Республикаын интыын ас кивалтонъя представительной органлэн депутатэзлэн статусэз сярысь" Законэ ватсанъёс пыртон сярысь Удмурт Республикалэн Законэз 1-тӥ ёзэт. Удмурт Республикаысь "Удмурт Республикаын кивалтонъя представительной органлэн депутатэзлэн статусэз сярысь" Законлэн 10-тӥ ёзэтаз ватсано таӵе кылъёс: "Депутат одӥг ялан ужась комиссилэн гинэ членэз луыны быгатэ". 2-тӥ ёзэт. Та Закон кужыме пыре сое газетъёсын печатлам бере. Удмурт Республикаысь Кун Кенешлэн Тӧроез А. А. Волков. Ижевск город, 1999 арын 9 феврале � 735-1. Удмурт Республикаысь Кун Кенеше депутатэ кандидатъёслэн телевидение но радио пыр дунтэк вераськон дырзы (пус чӧлтон ортчытэмын 1999-тӥ арын 2-тӥ мартэ) Удмурт радио (вераськон меӵак эфирын мынэ. Кандидатъёслы Радио юртэ передача кутскытозь 30 минутлы вазьгес вуоно). Нунал Округъёс 8 час 10 минутысен 19 час 30 минутысен 10.03 41, 17 63, 76, 95 11.03 18, 30, 1 46, 96, 49 12.03 31, 22, 35 92, 84 15.03 8, 10 61, 50 16.03 5, 7 78, 42, 93, 57 17.03 11, 16 87, 43 18.03 26, 19, 33 67, 64 19.03 13, 36 90, 54, 88, 89, 52, 48 22.03 4, 6 47, 94 23.03 2, 39, 34 99, 86 24.03 28, 21 82, 72, 100 25.03 23, 24 74, 53, 81, 68, 80 26.03 38, 3 56, 85, 70, 75, 60 29.03 32, 15, 29 97, 77, 55, 83 30.03 9, 14 59, 91, 44 31.03 27, 20 45, 65, 98 1.04 25, 40, 37 79, 66, 69, 58, 71 2.04 12 62, 73, 51 Телевидение (плёнка вылэ гожтон мынэ Кун Кенешлэн юртаз 9 час 45 минутысен) Эфире потон нунал Округъёс Гожтоон дыр 10 мартэ 98, 36, 17, 20, 42 9 мартэ 11 мартэ 79, 43, 58, 44, 64 10 мартэ 12 мартэ 16, 48, 47, 34, 39 11 мартэ 15 мартэ 55, 85, 65, 49, 59, 80, 100, 54, 70 12 мартэ 16 мартэ 67, 63, 19, 99, 46 13 мартэ 17 мартэ 3, 53, 87, 94, 27 15 мартэ 18 мартэ 73, 37, 18, 84, 52, 4 16 мартэ 19 мартэ 50, 45, 68, 1, 62, 66, 23 17 мартэ 22 мартэ 56, 38, 8, 12 18 мартэ 23 мартэ 28, 78, 21, 10, 86 19 мартэ 24 мартэ 51, 9, 91, 76, 26, 95 20 мартэ 25 мартэ 6, 22, 24, 33 22 мартэ 26 мартэ 81, 57, 82, 75, 90, 69, 60 23 мартэ 29 мартэ 89, 77, 5, 92, 31, 97 24 мартэ 30 мартэ 15, 11, 13, 2, 29 25 мартэ 31 мартэ 71, 83, 41, 96, 35, 30 26 мартэ 1 апреле 7, 14, 74, 72, 93, 61 27 мартэ 2 апреле 40, 88, 32, 25 28 мартэ Кузпалъёс Басня Улӥз-вылӥз Нерге гуртын Эрик нимо йӧн воргорон. Со уж дурын лумбыт тыршиз, Бакча сиён но тысь кизиз. Даур мӧзмыт солы потӥз, Малпаз кузпал со басьтыны. Артэ гуртысь тодмо дораз Ӝытпал шӧтаз со кожаны. Айбат сое пумитазы, Пӧсь табанен утялтӥзы. Лыктэм мугзэ тодэм бераз, Бускель солы лачмыт вераз: - Милям гуртын нылъёс уно, Ачид быръёд ни кӧтыдъя. Нош шонерзэ ке верано. Асъяд лусал, дыр, Палагъя. Татын сое Палаш шуо, Ужась, чылкыт, ӝикыт сямо. Огъя ке кыл шедьтысалды, Соин тӥ туж тупасалды... Эрик ӧз улы тунаса, Ӵуказеяз кенешыса, Палаш доры тарантасэн, Выль песьтэраз бискылиен Ширтӥз ӟырдыт сюлмаськонэн. Палаш ӧз лу пумит солы, Кылзэ сётӥз со Эриклы. Бадӟым сюан ортчытӥзы, Ӟеч улыны вераськизы... Аръёс ортчо уй-нуналэн, Нылпи будэ оген-кыкен. Эрик, Палаш уло уртче, Корка ванен-бурен уртче. Со дырысен ке лыдъяно, Уно вуос ни бызизы, Уно аръёс но ортчизы... Нош ишанэн токма гинэ Уг лу вылэм мыдӟат луны. Чик витьымтэ шорысь гуртэ Кытысь ке но вуиз Маразм, Улӥсьёслы шуиз: "Азъ емъ!".. Кайгу уг ветлы нош огназ, Маразм ваем сьӧраз Эрказм. Тӥни соку гуртын югдур Гылӟиз ини чылкак палдур. Палагъялы палаз маразм, Нош Эрикез турказ "эрказм" Озьы гуртэд пумен саркмиз, Шуг валаны, шуг вераны, Улон-а та, серем-а та? Нош азьланяз, нош отӥяз Палаш, калтак, копак кыршаз, Эрик тюаз юон ӧраз. "Кышно но карт - одӥг шайтан", - Куддыр шуо на ми палан, Шуэм - со зэм, лэся, шӧдске. Эрик быроз Палашезтэк, Палаш мӧзмоз Эрикезтэк... Нош котьмалэн дунне вылын, Вань кутсконэз но быронэз. Шол, ваньмызлэсь та улонын Дуно мугез но йылолыз. *** Одӥг амал гинэ вань на Та висёнлэсь йӧнан понна. Маял кулэ шӧматыны, Палаш кулэ Эрик понна. Ф. СУВОРОВ. Герд Галямшинлэн ошмесъёсыз И Башкортостанын ог 24 сюрс удмурт улэ. Соос люкрак интыяськемын тямыс ёросысь гуртъёсы но куиняз городэ. 1996-тӥ арысен соослы шоркар выллем луиз Татышлы ёросысь Выль Татышлы яке Выльгурт. Отын улӥсьёс куспазы берлозэ нимез вералляло. Ог куинь ар талэсь азьло татын ортчиз Башкортостанысь удмуртъёслэн нырысетӥ конференцизы. Сю витьтонлэсь трос делегатъёс татын кылдытӥзы Башкортостанысь удмуртъёслэсь элькун национально-культурной центрзэс. Солэн кенешеныз кивалтыны оскизы татысь "Дэмен" колхозлэн тӧроезлы Ренат Галямшинлы. Ренат Биктимировичлы туэ 28-тӥ тулыспалэ 50 арес тырмиз. Россия Федерациысь гурт хозяйствоысь сӥё-дано ужась "Дэмен" колхозэн 81-тӥ арысен кивалтэ. Со дырысен та сабыр воргорон ялан бырйылӥське ёрос Кенеше депутатэ. Нош 1990-тӥ-1995-тӥ аръёсы со вал Башкир Республикаысь Вылӥ Кенешлэн депутатэз. Егит дыръяз Ренат Биктимирович данэ потэмын, куасэн бызьылыса. Солы сётэмын "СССР-ысь спортъя мастер" ним. Миым кӧс арын "Дэмен" колхоз Татышлы ёросысь 13 хозяйство пӧлын нырысетӥ интые потӥз. Районъя но, республикаен ӵошатыса, котькуд гектарысь шорлыдын 8 центнерлэсь уногес ю тысь кутсазы, та колхоз нош ёросъя огъя лыдпусэз 3 центнерлы ортчиз. Синмаськымон ужало татын пудо вордӥсьёссы но. Куинетӥ арзэ ини котькуд скалзылэсь куинь сюрс килограммлэсь уно йӧл кыско. Вылаз ик, солэн асдуныз бадӟым ӧвӧл. Нош скал но парсь сӥльзылэн асдуныз районъяезлэсь кык пол ӧжытгес луэ. Таӵе азинсконъёс Выль Татышлылэн но колхозысь мукет гуртъёслэн вылтусъёссы вылын адӟисько. Верамзыя, Уфа-Пермь автосюрес вылтӥ нырысьсэ ортчисьёс Выльгуртэ райцентре вуим кожаса дугдыло, пе. Озьы малпаны мугез вань угось. Тани спортзало, музеё культура дворецлэн улыно-вылыно кирпич юртэз. Озёлонгес тазьы ик синмез кыске шор ёзо школалэн тузӥ юртэз. Улыно-вылыно из юртъёсы ик интыяськемын колхоз правление но гурт администрация, колхоз столовой, магазин но кунокуа. Ас сяменызы синмаськымонэсь луо клубо, школаё, магазино Уразгильды (Вукогурт), Бальзюга но Майск. Соос шӧдскымон выльдӥськизы "Дэменэн" Ренат Галямшин кивалтон аръёсы. ИИ Тӥни сыӵе адямиез асьсэлы азьветлӥсе бырйизы Башкортостанысь удмуртъёс. Шонерак вералом: соос ӧз янгышалэ. Элькунысьтыз вань удмуртъёсты "Дэменысьтыз" калыксэ сямен ик дэмен уже ӝутон вылысь, Ренат Биктимирович нырысетӥ конференциязы ик кылпум поттӥз огъя газет кылдытон сярысь. - Удмурт кылын потӥсь республиканской газет понна нюръяськон капчиен ӧз мыны,- тодаз вае со али. - Куд-ог адямиос куронмес быдэстыны ӧз дыртэ. Зэмзэ верано ке, та ужез огвакыт дугдытыса но улӥзы. Но ми ялан ветлӥм, гожъям. Малпанмылы республикамылэн президентэз Муртаза Губайдуллович Рахимов дурбасьтӥз. Солэн 1998-тӥ арын толшоре кутэм указэзъя Башкортостанын удмурт республиканской газет поттыны чакламын вал. Кӧня ке дыр ортчыса, Министръёслэн кабинетсы "Ошмес" нимо газет кылдытон сярысь распоряжение поттӥз. Солы редакторе Андрей Васильевич Гильмаевез юнматӥзы. "Ошмес" газетлэн эскерыса поттэм номереныз калыкез тодматон ортчиз Ренат Биктимировичлэсь 50 арессэ пусъён нуналэ. Кинэз но ӧй вал кык полэс луэм праздникын! Башкортостанысь гурт хозяйствоя министрлэн воштӥсез Тимерхан Бикинин, Татышлы ёрос администрацилэн тӧроез Фарид Арманшин, Уфаысь но котыр ёросъёсысь мукет куноос. Та сӥё-дано ужрадэ озьы ик ветлӥзы "Удмурт кенеш" огазеяськонлэн тӧроез Валентин Тубылов, Удмурт Кивалтэтысь Нациосын ужанъя комитетлэн тӧроезлэн воштӥсез Виктор Чулков, "Италмас" ансамбльлэн кивалтӥсез Анатолий Мамонтов. Ренат Биктимировичлэсь ӟеч ужъёссэ пусйыса, Валентин Кузьмич солы сётӥз "Удмурт кенешлэсь" тау карон гожтэтсэ но синпель кузьымзэ. Нош "Ошмес" газет пумысен тазьы шуиз: - Иже бертыса, мон одно ик жингырто Башкортостанлэн президентэзлы Муртаза Губайдулловичлы. Ми соин кемалась тодмо, али но вераськылӥськом, пумиськылӥськом. Та газетэз поттыны юрттэмез понна мон солы вань удмурт калыклэсь тау каремзэ верало. Та учыр возьматэ солэсь республикаысьтыз вань калыкъёс понна сюлмаськемзэ, соослэсь кулэяськонъёссэс лыдэ басьтэмзэ. Нош газетэз вордӥсьёслы но поттӥсьёслы сӥзисько устоесь азинсконъёс. Ойдолэ валче ужаломе, Кам шуренымы висъям калыкмылэсь бӧлякъёссэ куспазы юнгес герӟан понна. "Ошмес" газет сярысь кык президентъёс-эшъёс сюлмасько бере, озьыен, со улоз, юнмалоз. Сое поттыны туэлы Башкортостанлэн кун бюджетысьтыз нимаз чурен 220 сюрс манет висъямын. Редакция интыяськемын Вылӥ Татышлыын - райцентрын. Отын дас адями ужалоз. Газет арнялы одӥг пол бадӟым форматэн потоз. Нош кыӵе луоз пуштросэз? Та юанэлы валэктон сётӥз "Ошмеслэн" валтӥсь редакторез, тодмо удмурт веросчи но журналист Андрей Гильмаев: - "Ошмес" газет гожъялоз Башкортостанысь удмуртъёслэн ужъёссы, улон-вылонзы, историзы, кылзы, культуразы, йылолъёссы, вӧсь воземзы сярысь. Озьы ик гожъялоз ми пӧлын будэм но дано луэм удмуртъёс сярысь. Поттылом нылпиослы сӥзем "Пинал куараос" бам. Дырын-дырын дасялом нимысьтыз номеръёс. Шуом, таӵе: "Ошмес" Калтасы районын", "Анай кылмы сярысь" но мукет. Усьтомы "Башкортостан: нунал бӧрсьы нунал", "Удмурт Республикаысь иворъёс" рубрикаос. Ум вунэтэ бускель ёросъёсысь но Пермь областьысь удмуртъёс сярысь но. Печатлалом Удмуртиысь авторъёсты но. ИИИ "Татышлы" ним, пе, "татчы ыштӥ" шуэмысь потэмын. Марзэ меда ыштӥз вал татчы Кам шурлэн асьме ярдурысьтыз вуэм удмурт? Али со сярысь тодӥсь ӧвӧл ни. Тодмо мукетыз: та музъем отчы выжем удмуртъёслы атыкай но аныкай музъем луиз. Соин ик соос вордскем дорзэс ярато, со сярысь мукет интыосысь удмуртъёслы данъяськыса верало. Бальзюга гуртын ву вылын сценаен тыметсы вань. Отын концертъёс возьматъяло. Ӵыпет вӧзын ик утялтыса возиськись дун вуо ошмес пӧзе. Ренат Биктимировичлэн кичӧлтэмезъя, ӵыпем тымет дурын ортчыло колхоз сабантуйёс, мукет шулдыръяськонъёс. Табере та адями кыкетӥезлы ошмес синлы - "Ошмес" газетлы усьтӥськыны юрттӥз. Таиз но дун вуо мед луоз, трос адямиосты бордаз мед кыскоз! Вячеслав МИХАЙЛОВ. ГЕРД Тани соос асьмелэнъёс! "Удмурт кенеш" огазеяськонлэн Пичи Кенешез туэ феврале ортчем заседанияз юнматӥз. Удмурт Элькунысь Кун Кенеше депутатэ ӵектэм но дербасьтоно кандидатъёслэсь списоксэс. Тани соос, асьме ассоциацилы юрттыны мылкыд карись эшъёс. Бырън округлэн Кандидатлэн нимыз-тулыз Ужан интыез, кин луэмез номерез 88 Тубылов Валентин Кузьмич "Удмурт кенеш" ассоциацилэн тӧроез 89 Вершинин Павел Николаевич Председатель Правительства УР Удмурт Элькунысь Кивалтэтлэн тӧроез 90 Григорьев Михаил Алексеевич Удмурт Элькунысь Кивалтэтлэн Аппаратэныз кивалтӥсь 66 Образцова Нина Андреевна Алнаш ёросысь депутатъёслэн Советсылэн тӧроез 75 Никитин Валерьян Арсентьевич "Путь Ильича" колхозлэн Завьял ёросысь тӧроез 74 Осинцев Иван Петрович Завьял ёросысь администрацилэн гурт хозяйствоя управлениен кивалтӥсез воштӥсь 67 Иванова Лидия Федоровна Балезино ёросысь депутатъёслэн Советсылэсь ужъёссэ радъясь 77 Чирков Василий Семенович Игра ёрос больницаысь врач 79 Чирков Иван Петрович Игра ёросысь "Рассвет" колхозлэн тӧроез 83 Максимов Анатолий Юрьевич "Кезский сырзавод" АО-лэн директорез 84 Малков Аркадий Трофимович Удмурт Элькунысь Кун Кенешысь ялан ужась комиссилэн кивалтӥсез 57 Семенов НиколаевичИгорь Можга городысь аскивалтонлэн тӧроез 93 Мясников Алексей Пантелеевич Селта ёросысь "Свобода" колхозлэн тӧроез 97 Муклин Василий Геннадьевич Шаркан ДРСУ-лэн кивалтӥсез 2 Ковырзина Нина Алексеевна Ижевскысь 69 номеро школаысь завуч 94 Возисов Виталий Михайлович "Межрегионгаз" огазеяськонлэн кивалтӥсез 95 Люкин Петр Васильевич "Увинаская газеталэн" редакторез 91 Якупов Владислав Аксямович "Крезь-Алтай" фирмалэн валтӥсь директорез 49 Золотарева Надежда Константиновна Глазовысь "Иднакар" газетлэн редакторез 52 Бабинцев Сергей Михайлович Глазов Думаысь ялан ужась комиссилэн кивалтӥсез 73 Байметов Илья Михайлович "Вордскем кыл" журналлэн редакторез 82 Ившин Анатолий Васильевич Кезысь "Иван" эштослэн кивалтӥсез 48 Перевозчиков Владимир Михайлович "Воткинские электросети" огазеяськонлэн кивалтӥсез 11 Русских Виктор Ильич "Билайн" огазеяськонлэн кивалтӥсез 87 Москвин Василий Ермолаевич Пичи Пургаысь связья управленилэн кивалтӥсез 87 Ешкеев Анатолий Николаевич Пичи Пургаысь "Мир" колхозлэн тӧроез 73 Смирнова Светлана Константиновна Нациосын ужанъя комитетлэн тӧроез 16 Сурина Светлана Андреевна Ижевскысь 80 омеро школаысь дышетӥсь 9 Гарипов Рафил Ахматнурович Ролан Быковлэн фондысьтыз юридической отделэн кивалтӥсь 72 Радыгин Анатолий Ильич милициысь полковник 8 Галихаметов Раиль Ахсанович УдГУ-ысь институтлэн директорез 43 Кудинов Валентин Иванович "Уральская нефть" огазеяськонлэн кивалтӥсез 10 Салтыков Анатолий Иванович Ижевск городлэн мэрез 27 Одиянков Евгений Германович Ижевскысь кардиоцентрлэн валтӥсь врачез 98 Макаров Виктор Васильевич Удмурт Элькунысь гурт хозяйствоя но сиён-юонъя министрлэн воштӥсез 3 Галасеев Евгений Леонидович Ижевскысь райвоенкоматлэн кивалтӥсез 85 Сычев Николай Семенович "Удмуртнефтепродукт" огазеяськонлэн кивалтӥсез 96 Чувашов Николай Федорович Кун Кенешысь Эскерон палатаын ужась 99 Комлев Валентин Васильевич Як.-Бодья ёросысь гурт хозяйствоя управлениысь валтӥсь агроном 17 Абрамов Иван Васильевич Ижевскысь технической университлэн ректорез 38 Есипов Виталий Анатольевич "Ижмаш" медсанчастьлэн валтӥсь врачез 42 Фридрих Валерий Леонидович Воткинск городлэн мэрез 55 Веретенников Николай Данилович Глазовысь "Авторемзавод" огазеяськонлэн валтӥсь директорез 7 Красных Алексей Иванович "Ижмаш" огазеяськонлэн валтӥсь директорезлэн воштӥсез 68 Соловьев Александр Васильевич "Удмуртавтодор" предприятилэн кивалтӥсез 4 Подопригора Владимир Николаевич Новгород областьысь администрацилэн кивалтӥсезлэн воштӥсез 34 Чишковская Алла Ивановна Ижевскысь 34 номеро школаысь дышетӥсь Соловьев Виталий Александрович Кун Кенешысь ялан ужась комиссилэн кивалтӥсез Та адямиослы быръён нуналэ дурбасьтыны ӧтё "Удмурт кенеш" огазеяськон. Соос вормизы ке, удмурт калык, быдэс республикамы азьын сылӥсь ужпумъёсты быдэсъяны каньылгес луоз. ПОЛИТИКА Кузьмаськон но керетон Мар герӟа нырысетӥ ӟуч эксэез но секретарез? Соос пӧлысь куд-огез яратӥзы кузьмаськыны. Огез Америкалы сётӥз Аляскаез. Ярам коть, дунтэк ӧз. 1954-тӥ арын Никита Хрущев Украиналы кузьмаз Россилэсь ог люкетсэ - Крымез. Валамон ини, дунтэк. Со вакытэ угось Россия но Украина пыро вал одӥг "быдӟым" кунэ - СССР-е. Куспазы эшъясько. Нокин но малпаны ик ӧз дӥсьтылы, Совето Союз куашкалоз но, озьы лэчытэсь ужпумъёс кылдозы шуыса. Ньӧмыз понна гинэ но лэсьтэм кузьымъёсты берыктыны уг лу ни вылэм, шӧдске. Яке политикъёсмы укыр лябесь вылӥллям-а. Соос адӟиллямтэ, кызьы но маин берытскоз ӵуказе нунал. Кемалась ик ӧвӧл Федерацилэн Кенешез юнматӥз Россия но Украина куспын эшъяськон но ӵош ужан сярысь огкылэз (договорез). Ӵапак со улэ 1997-тӥ арын гожтӥськизы вал президентъёс Борис Ельцин но Леонид Кучма. Куд-ог тодосчиослэн дунъямзыя, та документ, шонерзэ вераса, эшъяськон сярысь огкыллы уг ик тупа, со матынгес кунгожъёсты радъян но юнматон сярысь огкыллы. Угось отын пусъемын, Россия но Украина туала гожъёссэс умоен лыдъяло шуыса. Озьыен, Крым, соин ӵош Сьӧд зарезьысь флотлэн инъетэз Севастополь Украиналы кылё. Бускельёсмылы шедизы "Артек" лагерь, Россиысь пӧртэм предприятиослэн но учреждениослэн, санаторийёссы но шутэтскон юртъёссы. Кӧня ке ар талэсь азьло гинэ ай Ижевскысь одӥгез бадӟым предприятие уно коньдонзэ кисьтӥз на Сьӧд зарезь дуре шутэтскон юрт пуктыны. Табере ачиз куашказ. Ужасьёссэ выль шутэтскон юртэ ыстон сярысь малпанэз ик ӧвӧл ни, адямиос уждунзэс но толэзьёсын уг адӟыло. Крымын улӥсьёс пӧлысь 97 процентэз ӟучъёс. Украинаын соос - 22 процент. Кык полэс гражданство пыӵатыны бускель кун пумит. Озьы бере Россилэн палэназ 12 миллион ӟуч адями кыле. Кыӵе луоз улонзы азьланяз - вераны секыт. Кызьы бен Федерацилэн Кенешаз огкылъя куара сётон радъяськиз. Пусйыны кулэ, 105 сенатор документэз умоен лыдъяз. 20 мурт пумит луэмзэ вераз. Азьвыл аръёсы сямен ик Крым пумысен аслэсьтыз чурыт мылкыдзэ усьтӥз Москвалэн мэрез, "Отечество" движенилэн кивалтӥсез Юрий Лужков. Кенешонын со вераськиз Крымез Россилы кельтон понна. Огкыл нырысьсэ закон пыр юнматэ, Севастополь Украинае пыре шуыса. Но соин ӵош Украина Россилэсь мукет музъемъёссэ но курыны кутске ни. Та вакытэ со басьтыны тырше Керчь проливысь Тулза ёросэз. Озьы луиз ке, асьмеос Керчь проливетӥ ветлэммы понна нуналаз 40 сюрс доллар тыроно луом. Азове яке Сьӧд зарезе пырон понна Украина азе пыдесъяськоно луом. Огкылэз юнматонлы дурбасьтӥсьёс оскыто: сое ӧм кутэ ке, Украина НАТО-е куриськоз. Нош югдур чылкак мукет. НАТО-е пырыны соиз яке таиз страна быгатэ улосвылэз (территориез) пумысен вань ужпумъёссэ сэрттэмез-пертчемез бере гинэ. Огкылэз асьмеос умоен лыдъяськом ке, Украиналы НАТО-е сюрес усьтэмын луоз. Юрий Михайловичлэн сыӵе кылъёсыз юнме шорысь верамын ӧвӧл. Миым сӥзьыл Леонид Кучма аслаз указэныз НАТО-ен 2001-тӥ арозь ӵош ужан сярысь Украиналэсь кун программазэ юнматӥз. Со документ ужпум пуктэ: Украиналэсь та военной огазеяськонэн кусыпъёссэ юнматоно но паськытатоно. Огкылэз юнматыны пумит луэмзэ вераз Удмурт Республикаысь Кун Кенешлэн Тӧроез Александр Волков но. Кун Кенешлэн Тӧроез Москваын вераз: "Таяз учыре но мыным валэктыны тыршо, асьмемын кин ке мед эшъяськоз шуыса, одно ик асьмеос мае ке но кузьманы кулэ. Японецъёсын ӟеч кусыпъёс понна, соослы Курил шормуӵъёсты сётоно. Китаецъёсын эшъяськон понна - соослэн куремзыя, границаосмес сюбегатоно, Западэн но Америкаен эшъяськон понна - Дуннеысь валютая фондлэсь кылзоно. Тазьы ужаса, асьмеос ма дауртӥм ни. Адӟиськом ук: быдӟым державаысь Россия куанер страналы пӧрме...". Жаляса вераны кулэ, Крым пумысен кадь мукетъёсыз лэчыт ужпумъёс туннэ-ӵуказе мукет улосвылъёсъя но одно ик кылдозы. Странамы, солэсь быдэслыксэ утён понна кыл кутӥсь политикъёсмы нош ик берлань вамыш уз лэсьтэ-а? Нош туннэ нуналэн гинэ улон ӟече ноку уг вутты, тужгес но политика удысын. "Отечество" сярысь верано ке, солэн азьветлӥсьёсыз, кужымзы ӧжыт ке но вал, нош ик возьматӥзы: соос нырысь ик сюлмасько Атыкай музъеммес утён но кужмоятон сярысь. Ю. АЛЕКСАНДРОВА. Кузьымъёс кузёоссэс шедьтӥзы 26-тӥ тулыспалэ "Ӟечбур!" газетмылэн редакцияз ортчиз лотереяен шудонлэн 2-тӥ люкетэз (1-тӥез 24-тӥ шуркынмонэ вал). Таяз шудонэ пыриськизы "Ӟечбур!" газетлы 1999-тӥ ар понна вань гожтӥськемъёс. Лототронысь шудо нимтулъёсын кагазъёсты поттазы дорамы куное лыктэм нылпиос Витя, Катя но Саша. Паймымон шудоесь вылӥллям-а яке Витялэн киыз сыӵе капчи, но кык кузьым бӧрсьысь бӧрсе кошкиз Завьял ёросысь Юськи черкогуртэ. Одӥгзэ, лагере путёвкаез, утӥз Коля Загребин, нош шудон луд кечпиез - Оля Байсарова. Катя шумпотон ваиз Можга ёросысь Быдӟымсурд гуртысь Петя Зоринлы: со утӥз чай юон сервиз, нош Ижысь 44-тӥ лицейысь Ангелина Решетникова - книгаосын сузьет. Башкортостанысь Татышлы ёросэ пырись Юды гуртысь Арсений Минлиевлы но удалтӥз. Сашалэн юрттэмез улсын со утӥз зонт. Нош "Удмурт дунне" газетлэсь кӧс нуналъёсы потӥсь номерзэ ар ӵоже дунтэк лыдӟыны быгатоз Вавож ёросысь Ӟамбайгуртысь Анна Шмаковалэн семьяез. Тӥни озьы, кузьымъёс кема витем кузёоссэс шедьтӥзы. Ӟечкыласьком тӥледыз! Нылпиос чидатэк витё ни, луоз, газетмылэсь выль номеръёссэ но, нош соос ӧвӧл но ӧвӧл. Мугез тодмо - полиграфкомбинатлы пунэм тыронъёсмы трос люкаськемен, газетмес печатламысь дугдӥзы вал. Нош али югдур тупатске ни кадь. Оскиськом, газетмы лыдӟисьёсмы доры ӝоген вуоз. "Ӟечбур!" газетлэн редакциез. КПРФ-лэн кивалтӥсез - Ижевскын Толон ӝытазе Ижевске вуиз КПРФ-лэн кивалтӥсез Г. А. Зюганов. Дорамы со ужалоз кык нунал ӵоже. Туннэ пыриськоз Ялан ӝуась тыр доры но В. И. Ленинлэн памятникез доры сяська пононэ, пумиськылоз Удмурт кун университетысь студентъёсын. Ӝытазе 18 часын "Металлург" дворецын ортчоз республикаысь кивалтӥсьёсын кенешон. Ӵуказе Геннадий Андреевич ӝыны нуналзэ ужалоз Воткинскын. Ветлоз "Воткинский завод" кун предприятие, тодматскоз П. И. Чайковскийлэн музей-усадьбаеныз. Отысь бертэмез бере, Кун Кенешлэн юртаз журналистъёс понна ортчоз пресс-конференция. Л. МЕДВЕДЕВА. Николай Кузнецовен пумиськон "Октябрь" культура двореце таӵе трос калык кемалась ӧз люкаськылы ни, дыр. Буш интыос воксё ӧвӧл ни кадь, нош адямиос ялан лыкто но лыкто. Куд-огез тани балконысь пуконъёс пала но учкыло ни. Залын но отчы пырон азьын - быдэс шаермылы но Россилы тодмо адямиос: артистъёс, писательёс, тодосчиос, журналистъёс. Пӧлазы тужгес но трос алнаш музъем вылын вордскем, ӝуатскем "кизилос" но дэменчиос. Та бадӟым ужрадэз но ӵапак соос дасязы угось - "Алнаш" бӧляке но Удмурт лулчеберлыкъя дэменлыке огазеяськемъёс. Тросэз соос - улэп сяська керттэтъёсын, пӧртэм кузьымъёсын, пумиськоно муртсылы гажаса сётыны чаклам синпельёсын лыктӥллям. Кин со, Николай Кузнецов - валэктонэз ӧвӧл ни, дыр. Эн суралэ быдэс дуннелы тодмо луэм, улэп легендалы пӧрмем Николай Кузнецов разведчикен. Таизлэн но, асьмелэнэзлэн Кузнецовмылэн, удысэз кема аръёс ӵоже сыӵегем ик вал, но ӧжыт музонгес - палэнысь мерскись тушмонъёсын нюръяськон. Ас ужзэ Николай Спиридонович ӟеч быдэсъяз, подполковникозь будӥз. Но со удмурт калыкезлы мукет вунонтэм дануж (подвиг) лэсьтӥз - кӧшкемыт аръёсы сантэмам, ыбылэм, пытсэтын сисьтэм удмуртъёсты, пеймыт сюе согем азьмынӥсьёсмылэсь нимъёссэс, данзэс, чылкыт сюлэмзэс выльысь кыре поттӥз, асьмеды соослэн секыт адӟонъёсынызы тодматӥз. Ултӥям, пытсэтын курадӟытэм но ыбылэм удмуртъёсмы сярысь со гожтӥз куинь книга. Огезлэсь мукетыз мургес соос. Поттэмын удмурт, ӟуч но англи кылын. Николай Спиридонович музон авторъёслэсь но гожъямъёссэс ӵошатэ архивысь материалъёсын, зэмос документъёсын, ӵемысь соосъя аслэсьтыз валэктонъёссэ, ватсанъёссэ, шонертонъёссэ, дунъетъёссэ сётэ. Ӵапак соин дуно книгаосыз. Отчы пыртэмын трос туспуктэмъёс, юалляськон дыръя гожъямъёсысь люкетъёс, созэ яке тазэ писателез, журналистэз пытсэтэ интыяны косӥсь ордеръёс. Соосты лыдӟыса, кытӥяз йырси пежырске! Николай Кузнецовлэн гожъямъёсаз, шуизы тросэз вераськисьёс, чеберлыко литература гинэ кутэмын ӧвӧл, солэн книгаосыз меӵак герӟаськемын туж трос документъёсты эскеронэн, выльзэ утчанэн, озьыен, зэмос наукаен. Иське, сое шуыны луэ писатель но, тодосчи но. Куӟебай Гердлэн вордскемез дырысен 100 ар тырмонэз Москваын пусйыку, Россиысь Писательёслэн огазеяськонысьтызы секретариатэ быръемъёс вылӥ дунъяллям Николай Кузнецовлэсь книгаоссэ. Соин ик сӥзьыл, октябрь толэзе, усто автор огкылысь кутэмын Россиысь Писательёслэн союзазы. Сюлмысьтымы ӟечкыласьком! Кужмо тыпылэн выжыосыз но туж юнэсь, пасьтана вӧлскемын луо, шуо. Адямиослэн но ӵапак озьы ик. Визьмо, тузӥ муртъёс вӧзын ик уката трос визьмоос, быгатӥсьёс, усточиос, мукет синмаськымон адямиос будо вылэм. Паймытӥз Николай Спиридонович ӵыжы-выжыосыныз! Солэн туж матысь выжыосыз вылӥллям Россиысь дано артист Геннадий Соловьёв, Удмуртиысь калык артист Вячеслав Байков, быдэс шаермылы тодмо кырӟанъёс гожъясь кылбурчимы Россиысь Писательёслэн огазеяськонзылэн членэз Александр Белоногов, усто кырӟасьмы - кылбурчи, Россиысь писатель Владимир Котков, "Удмурт дунне" газетлэн редакцияз ужась журналист, кылбурчи Елена Виноградова но мукетъёсыз. Ӵапак соос усьтӥзы, нуизы но шулдыртӥзы та пумиськонэз. Удмурт лулчеберлыкъя дэменлык ласянь ӝытлэсь кыкетӥ люкетсэ нуыны юрттӥз кылбурчи, дышетӥсь Анна Сапожникова. Писателез Николай Кузнецовез шулдыр кырӟанъёсын данъязы Россиысь дано артист Анатолий Ушаков, удмурт калыклэн яратоно кырӟасез Геннадий Ганьков, чеберайёсмы Анна Плотникова, Юлия Кузьмина. Калык кемалась мӧзмем вылэм ини Владимир Котковлэсь. Туж иназ кылӥськиз солэн Актэмырысь калыклы сӥзем кырӟанэз. Нош Россиысь дано артист Петр Романов лыдӟиз Николай Кузнецовлэсь егит дыръяз гожтэм кылбуръёссэ. Ваньзы соос книгае пыртымон пӧрмемын. Елена Виноградова лыдӟиз туала улонлы сӥзем чуръёссэ. Россиысь гожъяськисьёслэн радазы алигес кутэм писательлы вунонтэм кылёзы Удмурт Республикалэн Кун премиезлэн но Куӟебай Герд нимо премилэн лауреатсылэн, Россиысь писательлэн, профессорлэн Фома Ермаковлэн визьноданъёсыз, ӟечкыланэз. Алнаш ёрос кивалтэтлэн тӧроезлэн воштӥсезлэн Нина Образцовалэн вераськемез сюлэме пыӵамон. Озьы ик туж аспӧртэмлыко куинь книгалэсь авторзэ шуныт ӟечкылазы алнашъёслэн бӧляксылэн тӧроез биология наукаосъя доктор профессор Виктор Туганаев, Удмурт лулчеберлыкъя дэменлыклэн тӧроез, тодосчи Альберт Разин, Удмуртиысь Писательёслэн огазеяськонысьтызы кылкутӥсь секретарь, писатель Анатолий Комаров, акциосын "Сактон" огазеяськонлэн директорез Зоя Степнова. Та ӝытэз радъяны коньдонэн юрттӥз ӵапак Зоя Ивановна. Шумпотӥсько: шаерысьтымы Удмурт лулчеберлыкъя дэменлык но алнашъёслэн огъя бӧляксы туж бадӟым ужрад ортчытӥзы. Пӧрмиз со. Но пумиськон кема кыстӥськемен, лэся, музон ёросъёсысь лыктэмъёсты гажано алнашъёсмы воксё ӝокатӥзы, дасолэсь ятыр ӟечкыласьёслы чылкак куамын секунд гинэ дыр висъязы на. Марке вераны, сюлэмдэ усьтыны вуод меда сыӵе вакчи дыр куспын? Кирилл Ломагин, Удмурт лулчеберлыкъя дэменлыклэн кивалтоназ быръем писатель. Кун Кенеше депутатэ кандидат Ижевск, 30-тӥ Пролетарской округ Мон - Андрес Вальме... Мон, Андрес Карлович Вальме, вордски 1964-тӥ арын 20 январе Германиысь советской войскоослэн Огазеяськонысьтызы 3-тӥ гвардейской армилэн 28573 номеро воинской частяз. Атае - Карл Рудольфович Вальме, офицер, анае - Людмила Анатольевна Вальме (Павлова), врач-хирург. Сузэре, Анника, вордскемын 1966-тӥ арын. 1970-тӥ арын мынӥ 1-тӥ классэ, дышетски Фогельзанг военной городокысь 33 номеро школаын. Со арын ик луи октябрёнок, 1973-тӥ арын - пионер, 1978-тӥ арын - комсомолец. 1979-тӥ арын бырйизы школаысь комсомольской организацилы секретаре. 1981-тӥ арын дышетскыны пыри Таллиннысь вылӥ военно-политической строительной училищее. 1983-тӥ арын луи КПСС-лэн членэз. Училищеез йылпумъяй 1985-тӥ арын, службаме нуи Среднеазиатской Краснознаменной но Приволжско-Уральской военной округъёсын. 1987-тӥ-1988-тӥ аръёсы кивалтӥ частьысь парторганизациен. 1989-тӥ арын бырйизы горсоветэ депутатэ. 1991-тӥ арын 22-тӥ августысен Россиысь Президентлэн Указэныз политорганъёс быдтэмын вал, кутскиз Советской Армиез куашкатон. 1992-тӥ арын 26-тӥ мартэ армиысь кошкон сярысь рапорт гожтӥ. СНГ-ысь Огазеям вооруженной кужымъёслэн кивалтӥсьсылэн приказэзъя шеди кулэстэм офицеръёс радэ. Отӥяз ужай "Красное знамя" газетлэн валтӥсь редакторезлэн воштӥсез луыса. 1992-тӥ арын Владимир Жириновский дэмламъя вуи Удмуртие, ужай "Сокол Жириновского" газетэз поттон бордын. 1993-тӥ-1995-тӥ аръёсы - Кун Думалэн депутатэзлэн юрттӥсез, 1996-тӥ арысен - "Золотая провинция" газетлэн редакторез. Кышнояськемын. Кык пиналы. Телефонэ 52-52-00 (аб. 1611). Мыдланьтыса сётэмын Быръёнъёс азьын республикаысьтымы гурт ёросъёсын "Удмурт кенеш" ассоциация валэктон нуэ, история наукаосъя докторлэсь К. И. Куликовлэсь "Государство и мы" телевизионной передачаезлэсь материалъёссэ уже кутыса. Бырйисьёслы тодазы вайытӥськом: туэ 25 феврале "Удмуртия" ГТРК-лэн 34-тӥ каналэзъя возьматэм "Государство и мы" передачаын "Удмурт Республикаысь Кун Кенеше депутатъёсты быръён сярысь" Удмурт Республикалэсь Законзэ кутэм пумысен К. И. Куликов вераськоназ бадӟымесь янгышъёс лэсьтӥз. Гажано историк, Кун Кенешлэсь 21-тӥ (азьвыл пусйымтэ) сессиезлэсь ортчытон нуналзэ сурам сяна мыдланьтӥз Кун Кенешысь депутатъёслэсь лыдзэс 130 муртозь будэтон сярысь ивортонэз но. Программалэн авторез шуэ: сессиын Кун Кенешлэн Тӧроезлэсь ужзэ быдэсъян сярысь соглаш луэмзэ вераз 46 мурт. Со авторлэн аслаз малпамез луэ. Паймытэ авторлэн вераськон манерез но. Республикаысьтымы вылӥ кивалтӥсь сярысь озьы вераськон адямиез ултӥян но луэ на. Озьы ик мыдланьтыса верамын вал Президентлэн Администрациезлэн кивалтӥсезлэн нырысетӥ воштӥсез О. Н. Сысуев дорын протокол гожтон дыръя пумиськон сярысь. Со шуиз: "Волков, Борзенков, Тубылов Москвае визь тырыны ӧтемын вал но соосты законъя ужатыны"... Гажано историклэсь верамзэ лыдэ басьтоно ке, "Москвае визь тырыны ӧтемын вал" республикаысьтымы прокуратураын ужасьёс но Россия Федерацилэн Президентэзлэн Удмурт Республикаын пуктэм муртэз Балакин. Но куд-ог мугъёсъя телепередачаез нуись малы ке ваньзэ Москвае совещание ветлэмъёсты ӧз вера. Юнме шорысь янгыше уськытыса озьы вераськон история наукаосъя докторлэсь данзэ уг ӝуты. Бырйисьёслы тодазы вайытӥськом: туэ 25 феврале "Государство и мы" телепрограммаын потэм ивор мыдланьтыса сётэмын. Удмурт Республикаысь Кун Кенешлэн пресс-службаез. Журналистъёсын пумиськонъёс Университетлэн ӧсъёсыз усьтэмын Мар вылез туннэ вылӥ образование басьтонын? Кӧнялы дунояз университетын дышетскон? Кыӵе воштӥськонъёс луозы вступительной экзаменъёсын? Таӵе но музон юанъёслы пыр-поч валэктон сётӥз Удмурт госуниверситетысь дышетон ужъя проректор В. А. БАЙМЕТОВ. - Нырысь ик мон пусйысал университетлэсь котыр ласянь азинскемзэ,- шуиз со.- Али ми огдыре дасяськом 50-лэсь ятыр удысъёсъя егит специалистъёсты. Республикаысь вузъёс пӧлын нырысь ик басьтӥм государственной аккредитация. Ужаммылы со вылӥ дунъет. Университетлэн филиалъёсыз усьтӥськизы Комиын, Ямало-Ненецкой автономной округын, Свердловск областьын. Проректор верамъя, вступительной экзаменъёсты сётонын сокем бадӟымесь воштӥськонъёс уз луэ, но куд-ог предметъёсъя, школа программаен ӵошатыса, куронъёс муромытэмын. Со сярысь умойгес тодыны луоз 27-тӥ-28-тӥ мартэ, университет абитуриентъёсын пумиськон нуналъёс ортчытыку. Кенешон кутскоз 10 часэ, И корпуслэн актовой залаз. Бюджет чотын нуназе ужась отделениосы азьвыл аръёсы сямен ик кутыны чакламын 1200 мурт, заочнояз - 400. Приёной комиссилэн уженыз кивалтоз университетлэн ректорез В. А. Журавлев, кыл кутӥсь секретаре юнматэмын И. В. Меньшиков. Комиссие пыртэмын вань факультетъёслэн деканъёссы но институтъёслэн директоръёссы. Дышетскыны пыроно правилоос эскеремын Учёнойёслэн кенешазы. Юанъёсын вазиськоно 78-87-97 телефонъя. Университетын дышетскон, доллар дуноямен валче, пӧртэм факультетъёсъя будӥз 15-35 процентлы, одӥг студентэз ар ӵоже дышетон усёз 8-16 сюрс манетлы. Самой дунтэмез - физикъёсты дасян, тужгес но дуноез - иностранной кылъёсты дышетон. Таин валче пусъёмы: биатлонъя дуннелэн чемпионатэз Ижевскын ортчыку, УдГУ-ысь студентъёс быгатыса воштӥзы переводчикъёсты. Со понна Мукет кунъёсын кусыпъёсъя министерствомы 21 муртлы сертификат сётӥз. Шумпотон ивор гуртысь выпускникъёс понна: соослэсь тодон-валанъёссэс эскеронын чакламын мукетгес мертэт. Вступительной экзаменъёсты сётонын университет пӧртэм амалъёсты уже кутэ. Кылсярысь, берло аръёсы тросэзлы кельшо репетиционной экзаменъёс. Соос ортчо кӧня ке нуналлы азьлогес. Бюджет чотын дышетскыны пырисьёс, таизэ сяна, одно ик сётозы на основнойзэ, нош коньдон тырыса дышетскыны лыктӥсьёслэн правозы вань одӥг пӧртэменыз но буйгатскыны, оценказы умой ке. Репетиция амалэн ортчись экзаменлэн дуныз - 35-70 сюрс манет. Озьыен, университет вите тӥледыз, гажано абитуриентъёс! Л. МЕДВЕДЕВА. Удмурт Элькунысь Правительстволэн Удмурт Элькун Кивалтэтлэн 1998 арын 2 ноябре кутэм "Удмурт Элькунын интыяз кылись ваньбуръя (недвижимое имущество) но сое возён-кутонъя правоосты кун ласянь пусъёнъя (регистрация) Пусъён палата сярысь" 1017 номеро постановленияз воштонъёс пыртон сярысь Постановлениез 1999 ар 1 мартэ Ижевск город Н 243 Удмурт Элькунын интыяз кылись ваньбуръя но сое возён-кутонъя правоосты кун ласянь пусъён радлыкез (система) вакытэн-вакытэн азинтон вылысь, Удмурт Элькун Кивалтэт пуктэ: 1. Удмурт Элькунын Кивалтэтлэн 1998 арын 2 ноябре юнматэм "Удмурт Элькунын интыяз кылись ваньбуръя но сое возёнъя-кутонъя правоосты кун ласянь пусъёнъя (регистрация) Пусъён палата сярысь" 1017 номеро постановленияз таӵе воштонъёс пыртоно: ватсано таӵе пуштросэн 8-тӥ выль пункт: "8. Юнматоно но азинтоно оскем ужез (полномочие) сыӵе ёзъёслы, кудъёсызлы Удмурт Элькун Кивалтэтлэн 1998 арын 26 январе кутэм "Удмурт Элькун улосвылын ''Интыяз кылись ваньбуръя но сое возён-кутонъя правоосты кун ласянь пусъён сярысь" Федеральной законэз улонэ пыӵатон ужрадъёс сярысъ 54 номеро постановлениезъя огдырлы сётэмын нимысьтыз правоос, со ёзъёс (органъёс) ужзэс азинтыны быгато Удмурт Элькунысь Юстицияя министерство "Удмурт Элькунын интыяз кылись ваньбуръя но сое возён-кутонъя правоосты кун ласянь пусъёнъя (регистрация) Пусъён палата" юстицияя учреждениын но солэн филиалъёсаз пусъён (регистрационной) ужъёс кутскем сярысь нимысьтыз ивортоназ (уведомление) пусъем нуналозь. Удмурт Элькунысь Юстицияя министерстволы нимысьтыз ивортонэз печатлано "Удмурт дунне" но "Удмуртская правда" газетъёсын, пусъён ужъёс кутскемлэсь азьло 10 нуналлы! вазьгес. 8-тӥ пунктэз лыдъяно 9-тӥ пунктэн. 2. Удмурт Элькун Кивалтэтэн 1998 арын 2 ноябре 1017 номеро постановлениен юнматэм "Удмурт Элькунын интыяз кылись ваньбуръя но сое возён-кутонъя равоосты кун ласянь пусъёнъя (регистрация) Пусъён палата" юстицияя учреждение сярысь положение таӵе воштонъёс пыртоно: 10-тӥ пунктысь 5-тӥ подпунктэз куштоно; 10-тӥ пунктысь 6, 7, 8 подпунктъёсты лыдъяно 5, 6, 7 подпунктъёсын; 14-тӥ пунктлэн нырысетӥ абзацаз ватсано таӵе кылъёс: "(отӥяз - правоосты пусйисьёс; 14-тӥ пунктысь кыкетӥ абзацез тазьы лыдӟоно: "Правоосты пусйисьёсты (регистраторы) уже юнматэ но мозмытэ Россия Федерациысь Юстицияя министерство, Удмурт Элькун Кивалтэтэн кенешыса"; 20-тӥ пунктлэн 7-тӥ подпунктысьтыз куштоно таӵе кылъёсты: "Удмурт Элькунысь Юстицияя министерствоен ӵош"; 20-тӥ пунктлэн 8-тӥ подпунктысьтыз куштоно таӵе кылъёсты: "Удмурт Элькунысь Юстицияя министерствоен кенешыса"; 25-тӥ пунктысь куштоно таӵе кылъёсты: "огкыл гожтыса"; куштоно 29-тӥ пунктэз; 30, 31, 32, 33, 34, 35 пунктъёсты лыдъяно 29, 30, 31, 32, 33, 34 пунктъёсын; 3. Та постановленилэсь быдэсъяськемзэ эскерыны косоно Удмурт Элькунысь Юстицияя министерствоез. Удмурт Элькун Кивалтэтлэн Тӧроез П. Н. Вершинин. Депутатэ кандидат Узырез куанерзэ уз вала Дульфат Уизамович ГАРИФУЛЛИН, бигер. Вордскемын 1942-тӥ арын 29-тӥ ноябре, вылӥ образованиен. Пенсионер. Ӵектэмын Ижевскысь 38 номеро Трудовой избирательной округъя. Кинэ, кыӵе адямиосты быръём 4-тӥ апреле Кун Кенеше депутатэ, озьы ик матысь 4 аръёссэ улом-вылом. 100 мандат понна нюръяськисез трос гинэ, куд-ог округъя 1 интые 10-лэсь ятыр мылкыд карисез. Кандидатъёслэн азязы пуктэм ужпумзы огвыллемгес: калыклэсь улонзэ умоятон, но со ялан уллане ваське. Мынам бырйисьёсы пӧлын туннэ 90 процентэз - куанеръёс. Россиын ортчем воштӥськонъёс соосты котыр ласянь зӥбизы. Соин ик калыкмы ӵуказе нуналлы осконзэ ыштӥз ни. Уг оско вуоно депутатъёслы но. Соин ик быръёнъёсы пыриськонлэсь палэнско. Мон талы чутрак пумит. Котькудӥз ас понназ гинэ улӥз ке, кин асьмелы улонмес умоятоз, кин тон понна куаразэ сётоз? Коркась корка, подъездысь подъездэ, ульчаысь ульчае ветлоно, вань калыкез ӝутъяса. Дыр вуэмын ӵош султыса асьме понна нюръяськыны, туннэ сямен ёрмыса, кураськыса улэмед ке уг поты. Куд-огез бырйисьёс куаразэс сёто кузьмаськыса ветлӥсьёслы. Соос уг малпасько, кытысь сыӵеос мултэс коньдон шедьто. Узыръёс, чиновникъёс, предприятиослэн, огазеяськонъёслэн, фирмаослэн кивалтӥсьёссы асьмеды кемалась рабъёслы пӧрмытӥзы ни, соос-а калыклы дурбасьтозы? Мандат кулэ, законлэсь та документ сьӧры ватскон вылысь. Быръемзы бере, сессиосы но ветлэмысь дугдо. СПОРТ "Газовик" дасяське Ижысь футболистъёс чемпионатлы дасясько али Сочиын. "Газовик" уно командаосын кужымзэ мертаз ни. Кыкетӥ лигаын шудӥсь Тамбовысь "Спартакез" со 6:2 лыдын вормиз. Озьы ик кужмогес вал Сочиысь "Жемчужиналэсь" но. Таяз учыре 1:0 лыдын утӥз. Футболистъёсмы келязы Ставропольысь "Динамолы" - 0:2, Павлодарысь "Иртышлы" - 1:2. Ярославльысь "Шинникен" шудон нокин вормытэк йылпумъяськиз, лыд - 1:1. Томскысь "Томен" (0:0) но Ульяновскысь "Волгаен" (0:0) пумиськонъёсын вормисьёс ӧй вал. "Канжаськиз" Чемпионатлэн кыкетӥ люкетаз "Ижсталь" ӧз келя на вал. Но Новотроицкын ӧз удалты, татысь "Носталы" 2:4 лыдын келяз. 6 мартэ хоккеистъёсмы шудӥзы Серовын но "Металлургез" 5:3 лыдын вормизы. Азьвыл сямен ик "Ижсталь" мукет командаосты трослы азьпалтыса мынэ. Марафон-99 Кылемаз кӧс нуналэ Ижысь биатлонъя спорткомплекс котырын кужымзэс эскеризы Удмуртиысь куасэн бызьылӥсьёс. Нюръяськонэ пыриськиз 300-лэсь уно адями. Покчиосызлы 15 арес, мӧйыосызлы - 70-лэсь ятыр вал. Воргоронъёс пӧлын 45 иськемез котькинлэсь ӝог ортчиз Игралась Алексей Вахрушев. Нылкышноос пӧлын 30 иськем сюрес вылын котькинлэсь шаплы вал МВД-лэн Ижысь юридической институтаз дышетскись Любовь Ермолаева. Соос но ас арлыдзыя вормисьёс коньдон кузьымъёсын пусъемын. М. КУЗЬМИН. Герд Шумпотон но ӝожомон Кылем пятницае Селталан ортчиз "Удмурт калыкез азинтонын интеллигенцилэн интыез" нимо научно-практической конференция. Огъя вераса, со умой радъяськиз. Ёрос кенешлэн тӧроез Петр Коробов матысь эшъёсыныз ӵош тыршиллям та ужрадэз котыр ласянь малпаса ортчытыны. Докладъёс но ивортонъёс сӥземын вал пӧртэм темаослы. Шумпоттӥзы Выль Моньялась Лидия Шиляева, Уть-Сюмсиысь Нина Катаева но мукет эшъёс. Юмга-Омга гуртлэн старостаез Алевтина Снегирева вераз декабре кылдытэм гурт кенешлэн нырысетӥ вамышъёсыз сярысь. Вакчи дыр куспын татын трос гинэ лэсьтыса вуттӥллям ни. Азьланезлы но уно малпанъёссы. Ёросысь удмуртъёс йырзэс пумен вылэ ӝуто, сюрлызэс шонерто. Соос валазы ни, ас культурадэ тодытэк, сое азинтытэк кыдёке уд вуы шуыса. Шумпотонэн ӵош ӝож мылкыд но кылдӥз. Куд-ог эшъёс конференциез быръён ужъёсын сураны ӧдъязы. Одӥгез ӟеч дышетӥсь Кун Кенешлэн депутатэзлы Валерий Загайновлы вазиськиз книга но мукетсэ шедьтыны куронэн, куриз 4-тӥ апреле но солы дурбасьтыны. Кожалод, депутатлэн ужез маке утчанэн-сётонэн герӟаськемын шуыса. Ачиз но Валерий Федорович вераськонзэ мыдлань мытӥз. Со ӟечкыланы кутскиз залын пукись писателез... Евгений Самсоновез. Эсьма, соиз коросаз но берытскиз, дыр. Уго та дуннеысь гажано адями кемалась кошкиз ни. Нош селтаос доры куное лыктэмын вал мукетыз Самсонов - Никвлад (Владимир Яковлевич). Туж вӧсь луиз солэн сюлэмыз. Тӥни озьы гажало асьмемыз гуртъёсын улӥсь удмуртъёслэсь дурбасьтэмзэс витись бадӟым кивалтӥсьёс. Та учыр уг возьматы шат соослэсь зэмос пуштроссэс?.. И. ЛЕБЕДЕВ. Дэри ёросысь "Завьяловский" тепличной комбинатэ гужем туэ кӧня ке ӝегаса вуиз. Бакча сиён будэтӥсьёслэн верамзыя, туэ толалтэ туж ӧжыт вал шундыё нуналъёс. Кылсярысь, январе со чылкак кык пол гинэ пиштылӥз. Нырысетӥ тоннаосыз огреч бичамын 15 феврале. Озьы ик будэ вож сугон, салат, сельдерей, укроп, петрушка. Хозяйствоын туэ нырысьсэ будэто баклажан. Озьы ик вузало кубиста но помидор удъёс, ческыт пӧсьтурын. Умой азинсконъёс басьто нырысетӥ блокысь бакча сиён будэтӥсьёс Вера Сентемова, Татьяна Сутягина (артэ сыло) но Любовь Широбокова. В. КАМАШЕВЛЭН туспуктэмъёсыз. Гуртын вузкарон Ӝажыос бушамтэ на Кызьы бен туннэ улэ гуртысь вузкарись? Мар солы люкетэ ӟечгес ужаны но калыклэсь кулэяськонъёссэ тырмытгес быдэсъяны? Та кык юанлы одӥг кылын уд валэкты. Со сярысь малпасько Россиысь Центросоюзын но, Удмуртпотребсоюзын но. Соин ик алигес Ижевскын ортчиз шаерысьтымы потребительской обществоослэн союззылэн тямысэтӥ огъя кенешез. Отын трос ужпумъёс сэрттэмын-пертчемын. Я бен, ваньзэ радызъя мадём. Гуртысь вузкаронэ но вуо рынокен герӟаськем кусыпъёс но шуг-секытъёс. Озьы ке но, кооператоръёс, выльдӥськон но рынокен экономикае выжон кутскем бере, одӥг вузкарон интызэс но ӧз пытсалэ. Магазинъёсазы котьку луо нуналмысь кулэ луись вузъёс но мукетыз. Гуртысь вузкарисьёс, азьвыл умой ужан амалъёссэс вунэтытэк, выльёссэ но куто. Озьы адямиос, мултэс сюлмаськытэк, мар кулэ басьтыны быгато. Берло дыре пумен мур пыӵа басьяськисьёслэн куремзыя вузкарон. Кооператоръёс адямиослэн улон интыязы вутто мебель, лэсьтӥськон материал, бытовой техника но мукетсэ. Калык солы шумпотэ. Кызьы бен кооператоръёс миым ужазы? Урод шуыны ым уг пыры. Быдэс Россиын куинь квартал ӵоже нырысетӥ интыын мынӥзы, нош ньылетӥяз кыкетӥе кылизы. Со но бен урод ӧвӧл ук. Меӵак пусйыса, кылем арын будӥз колбаса, чорыг, консерваос, чорыг (сельдь), вӧй, майонез, вина, сур, пызь, мороженой вузан но мукетыз. Магазинъёсысь уг бырылы чулкиос-носкиос, керттэм дӥсь, резина но ужан пыдкутчан, дышетскисьёслы вузъёс но музонэз. Миым уй-нунал ужась магазинъёс усьтӥзы Селта, Воткинск, Ува райпоос. Радъяське кредитэн вузкарон. Отчы пыро дуно видеоаппаратура, мебель но лэсьтӥськон материалъёс. Миым вузъёс 7678 сюрс манетлы кулэсмизы но 24 нунал вузкарыны кылизы, яке вузъёслэн берганзы одӥг нуналлы йылӥз. Огъя вераса, кооператоръёс ар ӵоже адямилы быдэ 1031 манетлы вузкаризы, Каракулино райпоын - 1850, Пичи Пургалан, Игралан - 1590, нош Сюмсиын, Уваын, Юкаменскын - кабзэ 800 манетлы гинэ. Ортчем арын 506,6 миллион манетлы вузкаремын. Потребкооперацилэн розничной товарооборотэз быдэс республикая вузкаронын 6 процент басьтэ, гуртын - 29, нош 10 районын - 40 процентлэсь уно. Алнашын но Дэбесын со лыдпус 53-59 процент луэ. Шӧдскымон ляб ужазы Як.-Бодья, Грах но Киясово райпоос. Татын быдэс районъя кооператоръёс одӥг куиньмос гинэ вузкаро. Каллен азинске калыкез сюдон. Та удыслэн розничной оборотэз миым 44 миллион манет тыр люкаськиз, яке, валля арен ӵошатыса, 13 процентлы кулэсмиз. Нош быдэс розничной товарооборотын калыкез сюдон 8,3 процентысен (1997-тӥ ар) кылем арын 9 процентозь вуиз. Та удыс тужгес но кужмояз Иж, Пичи Пурга, Воткинск, Каракулино райпоосын. Коорепаторъёс миым калыклы дунын 4,3 миллион манетлы услугаос сётӥзы (1997-тӥ арын сярысь, 1,9 поллы тросгес). Со пӧлысь бытовой юрттэт басьтӥз 3,5 миллион манет. Отчы пыро: дӥсь вандон, вурон, парикмахерской, транспортной, ритуальной услугаос но мукетыз. Кооперацилэн предприятиосаз йылэ макаронъёс, печеньяос, пыжиськемъёс, сушкаос, консерваос лэсьтон, чорыг ӵынатон, кудӟытӥсьтэм юонъёс, йӧл поттон но музонэз. Озьы калыклы 122 миллион манетлы вузъёс поттэмын. Со пӧлысь басьто 1275 тонна колбаса, кондитерской изделиос - 1356, макаронъёс - 1206, нянь - 15,7 тонна, юзмытӥсь юонъёс - 219 сюрс декалитр. Куд-огез предприятиос макарон но печенья лэсьтон пресс- автоматъёс басьтӥзы. Ортчем арын заготовительёс 38,6 миллион манет тыр бичаськизы, 1997-тӥ арын сярысь, 8 процентлы ятыргес. Сӥль, картофка октон будымтэ, нош йӧл бичан 3 поллы йылӥз, узы- боры но губи - 6 поллы. Арысь аре паськытало лэсьтӥськон ужъёс. Миым та удысэ 12,3 миллион манет кутэмын, 10,4 миллион манетлы коркаос но юртъёс вуттэмын. Вить райпое газ кыскемын. Со юрттӥз 20-30 процентлы эстӥськонэз шыръяны. Оглом верано ке, 1998-тӥ арын кооператоръёс 10,5 миллион манет тыр пайда басьтӥзы. Ӝыныез со кутэмын потребкооперациез азинтыны. Изъян адӟизы Юкаменск, Сюмси, Ува, Як.-Бодья, Киясово, Шаркан, Камбарка, Грах райпоос, оптово-розничной предприятиос (Сарапулысь ОРП-ез вератэк), Можгаысь но Ижысь автобазаос. Та удысын но быдтымтэ на лушкаськон. Миым 321 учыр вал. Озьы 808 сюрс манетлы изъян лэсьтэмын, со пӧлысь Игра райпоын - 93, Уваын - 73, Завьяловоын - 80, Камбаркаын - 60 сюрс манетлы. 13 пол тылпу поталляз но 17 сюрс манетлы ваньбур сутэмын. Удмуртпотребсоюз туэ но огкыл гожтӥз ни Удмурт Правительствоен. Со юрттэ кооперативной организациослэсь ужзэс умоятыны но азьлане юн оскыны. Туэ 7-тӥ январе Россиысь Правительство потребкооперацилэсь данзэ ӝутон но гуртын вузкаронэз умоятон ласянь нимысьтыз постановление кутӥз. Шаерысьтымы кооператоръёс алигес сое асьсэлэн кенешазы тупен-тупен сэрттӥзы- пертчизы но умоесь ужрадъёс чаклазы. Кылсярысь, Удмуртиысь потребобществоос 1998-тӥ- 2002-тӥ аръёслы пусъем программая ужало. Веранэз ӧвӧл, та постановление гуртын вузкаронэз умоятыны юрттоз, тужгес но паськытатыны заготовкаосты, продукция поттонзэс но мукетсэ. Али республикаысьтымы потребкооперацилэн калыкез сюдонъя 166 предприятиез, ваньбур поттонъя - 105, бакча сиёнъёс - 46 но емышъёс возёнъя - 9 гуэз, 33 холодильник-складэз. Кооператоръёслэн луонлыкъёссы бадӟымесь. Соос быгато уно сиён-юонъёс, бакча сиёнъёс басьтыны но переработать карыны. Постановлениез быдэсъяса, райпоос али калыклэсь сӥль, йӧл но мукет продуктъёс басьтонъя огкылъёс гожтӥзы ни. Соя кооператоръёс 40 процент дунзэ али ик сёто (пызен, сахарен, лэсьтӥськон материалъёсын но музонэныз). Со юрттоз гуртын улӥсьёслы уногес будэтыны сӥль, йӧл, курег пуз, картофка но бакча сиёнъёс. Нош гурт хозяйствоос адямиослы вузаны кулэ кунянъёс, парсьпиос, чипыос, ӟазег но ӵӧжпиос. Райпоос мед юрттозы пудо сиёнэн. Районъёсын ватсаса усьтоно заготовительной пунктъёс. Г. РОМАНОВ. Анайёслэн анайзы Т. И. Тепляшиналы - 75 арес 9-тӥ мартэ 75 арес тырмиз финн-угор дуннеын тодмо луись удмурт нылкышнолы, трос аръёс ӵоже кылтодон бордын ужам тодосчилы, филология наукаосъя кандидатлы, Удмурт шаерысь наука удысысь дано ужасьлы, ожысь но ужысь ветеранлы Тамара Ивановна ТЕПЛЯШИНАЛЫ. Вордскиз Т. И. Тепляшина Дэбес ёросысь Пичи Кизьна (Малая Кизня) гуртысь огшоры крестьян семьяын. Дэбесысь шор ёзо школаез йылпумъяса, 1942-тӥ арлэн толсур толэзёзяз ужаз та ёросысь ик Шурсьӧр Медло (Заречная Медла) гуртысь начальной школаын дышетӥсь луыса. Нош 1942-тӥ арын толсур толэзе дас тямыс аресъем егит нылаш фронтэ кошке. Карелиысь фронтын но Дальний Востокын секыт тылӝуэз потыса, 1945-тӥ арын дораз берытске. 1946-тӥ арлэн кутсконаз ик партилэн Дэбес райкомез сое Ижысь областной партшколае дышетскыны келя. Сое йылпумъямез бере, тодон-валанзэ будэтэ Ленинград университетлэн шунды ӝужан палась кылъёсъя факультетаз. Татысен ик со тунсыкъяськыны кутскиз пӧртэм кылъёсын. Ас улонзэ но герӟаны малпаз та ужен. Озьы егит тодосчи 1950-тӥ арын ужаны кутскиз Удмурт научно-исследовательской институтлэн кылъя сектораз. 1953-тӥ арын сӥзьыл СССР-ысь Наукаосъя Академилэн Кылтодонъя институтэзлэн аспирантураяз пыре. Василий Ильич Лыткинлэн кивалтэмез улсын тодматскыны кутске удмурт вераськетъёсын (диалектъёсын) но соослэн пӧртэмлыкъёсынызы. Ита шур котырысь удмуртъёслэсь вераськемзэс пыр-поч эскерыса, Тамара Ивановна 1955-тӥ арын удмурт кылтодонын �5 Собере улон сое вуттэ Рязань пединститутэ. 1956-тӥ-1959-тӥ аръёсы ужаз отын ӟуч кылъя кафедраын ассистент луыса. 1959-тӥ арын сӥзьыл выльысь вуиз Москвае но СССР-ысь Наукаосъя Академилэн Кылтодонъя институтысьтыз финн-угор кылъёсъя секторын ужаны кутскиз. Отӥяз, пенсие потытозяз, вань ужан сюресэз герӟаськемын та институтэн. Т. И. Тепляшиналэн ужъёсаз удмурт кылтодонысь трос пӧртэм ужпумъёс сэрттӥсько-пертчисько. Тодосчи луыса, ас улонзэ кутскиз со удмурт вераськетъёсты эскерон бордысен. Соосты ӟеч-ӟеч дышетон но тодон понна, кытчы гинэ ӧз вуылы - Удмуртилэн уй пал, лымшор но шор ёросъёсаз, озьы ик - Удмуртилэн палэназ улӥсь удмуртъёс доры но. Трос гинэ ужъёсыз сӥземын та удысэз азинтонлы. Тодмо луо тодосчилэн таӵе ужъёсыз: "Фонетическая характеристика тыловайского говора" (1957), "Из наблюдений над фонетическими особенностями шошминского диалекта удмуртского языка" (1961), "Краткая программа-вопросник по собиранию сведений об удмуртских диалектах" (1966), "Нижнечепецкие говоры северно-удмуртского наречия" (1970), "Заметки по верхнеижским говорам" (1973). "Язык бесермян" книгаез (1970) тужгес но бадӟымез луэ. Отын со нырысьсэ пыр-поч эскере бесерманъёслэсь кылзэс, ӵошатэ сое мукет удмурт вераськетъёсын но тюрк кылъёсын. Ас сяменыз валэктыны тырше бесерманъёслэн вашкала историенызы но кылдэменызы герӟаськем ужпумъёсты. Туж жаляса верано луэ: одӥгез, "Ареальные исследования в восточных финно-угорских языках" ("Удмуртский ареал") нимо бадӟым ужез (со гожтэмын 80-тӥ аръёсы) али но поттытэк кылле. Та книгалы академик Б. А. Серебренников ас дыраз бадӟым дунъет сётӥз вал. Оскомы, удмурт тодосчиос та тырмымтэез матысь дыре палэнтозы но, лыдӟисьёс кие вуоз Т. И. Тепляшиналэн та туж кулэ но тунсыко ужез. Тодосчи озьы ик бадӟым саклык висъя вашкала гожъяськетъёсты (письменной памятникъёсты) эскеронлы. Москваысь, Ленинградысь (али Санкт-Петербург), Кировысь архивъёсын ужаса, со трос гинэ шедьтӥз удмуртъёслэсь ХВИИИ дауре дасям гожъяськетъёссэс. Бӧрысь соосъя кӧня ке статья но "Памятники удмуртской письменности ХВИИИ века" нимо книга (1970) поттӥз. Та книгаяз со пыр-поч валэктӥз дас пумо гожъяськетъёслэсь (кыллюкамъёслэсь, грамматикаослэсь) пуштроссэс но аспӧртэмлыксэс. Т. И. Тепляшиналэн та бадӟым кутскем ужез берло аръёсы эшшо но азьланьтӥськиз туала тодосчиосын. Поттэмын Захарий Кротовлэн кыллюкамез. Тодосчиос но студентъёс кие ӝоген вуоз Михаил Могилинлэн грамматикаез. Таӵе луонлык кылдӥз, Т. И. Тепляшиналэн гожъяськетъёслы копиос лэсьтэмезлы луыса. Соин ик солы асьмеос музъемозь йыбырттыны но бадӟым тау карыны кулэ. 60-тӥ аръёсы быдэс асьме кунын ономастикая (аснимъёсты дышетонъя) пӧртэм ужъёс быдэсъяськыны кутскизы. Тамара Ивановна удмурт тодосчиос пӧлын нырысьсэ мылысь-кыдысь басьтӥськиз та тема борды. Ог ньыльдон пала ужзэ сӥзиз адямиослэсь нимъёссэс, фамилиоссэс, кушемнимъёссэс, озьы ик инты нимъёсты эскеронлы. Огъя вераса, Т. И. Тепляшина кылдытӥз туала удмурт топонимикалэсь (инты нимъёсты дышетӥсь наукалэсь) но инты нимъёсты эскерон амалъёслэсь инъетсэс. Татын пусйыны кулэ таӵе ужъёссэ: "О способах образования топонимов бассейна реки Чепцы" (1967), "Специфика удмуртской топонимии" (1968), "О древнеудмуртских личных именах" (1969), "Двойные имена удмуртов" (1970), "Топонимия, распространенная в районе расселения бесермян" (1975). Нош "Антропонимические модели пермских языков" книгаяз (1978) рос-прос сэрттэ-пертче, удмуртъёслэсь сяна, коми калыкъёслэсь но адями нимъёссэс, валэктэ соослэсь ку но кызьы кылдэмзэс. Палэнэ ӧз кыле бускель калыкъёслэн этнонимъёссы но удмуртъёслэн ӵыжы-выжы нимъёссы. Соос сярысь со гожтӥз "Удмуртские термины родства" (1965), "К вопросу об этнониме пор" (1967), "Термины бесермяне и чуваши в письменных источниках" (1968) статьяосаз. Т. И. Тепляшина озьы ик ӵош кылдытэм монографиос но вузъёслы учебникъёс дасян бордын но сюлмо тыршиз. Кузпалыныз В. И. Лыткинэн ӵош гожтӥз "Грамматика современного удмуртского языка" книгаысь (1962) "Фонетика" люкетсэ, "Основы финно-угорского языкознания" бадӟым ужысь пермь (удмурт, коми-зырян но коми-пермяк) кылъёсъя люкетсэ но мукет со выллем ужъёсты. В. М. Вахрушевен ӵош тыршиз 1983-тӥ арын поттэм удмурт-ӟуч словарез дасян бордын но. Тодосчи котьку ик мылысь-кыдысь пыриськылӥз трос пумо конференциослэн но симпозиумъёслэн, финн-угор калыкъёслэн калык куспо конгрессъёссылэн ужазы. Т. И. Тепляшиналэн нимыз асьме шаерын гинэ тодмо ӧвӧл, сое тодо кунгож сьӧрын но. 1973-тӥ арын луиз Хельсинкиысь Финн-угор огазеяськонлэн кунсьӧр адямиез. Пенсие потыса но Тамара Ивановна тэк пукыны уг чида. Жадёнэз валатэк пыриське пӧртэм ужрадъёсы. Котьку сюлмаське ветеранъёслэн кенешазы ужез умойгес радъян сярысь. Мылысь-кыдысь пыриське "Удмурт кенешлэн" Москваысь ёзэзлэн ужаз. Тамара Ивановна - яратӥсь анай но песянай. Кузпалыныз, быдэс дуннелы тодмо луись учёноен но коми кылбурчиен, ӵош будэтӥзы кык нылзэс. Али соослэн но ньыль пиналзы будэ ини. Тамара Ивановна, вань удмурт калыклэн нимыныз но "Удмурт дунне" газетын ужасьёсын ӵош ӟечкыласько тӥледыз 75 арес тырмемен. Сӥзиськом юн тазалык, бадӟым шуд, задор мылкыд но ужады азинсконъёс. Л. КИРИЛЛОВА, Россиысь Наукаосъя Академилэн Урал ёзэзлэн Кылъя, литературая но историяя Удмурт институтысьтыз кылъя люкетэн кивалтӥсь. Удмурт Элькунысь Правительстволэн Распоряжениез 1999 ар 11 март Ижевск город � 97-р Автомобиль сюресъёты но сюрес дурысь сооружениосты утён сярысь правилоосты лыдэ басьтыса, кудьёсыз юнматэмын Россия Федерациысь Кивалтэтлэн 129 номеро постановлениеныз 1969 арын 5-тӥ мартэ, 1999 арын тулыс сюресьёсты утён вылысь. 1. 1999 арын 5-тӥ апрельысен 45 нунал ӵоже ветлыны уг яра огъя кутӥськись сюресъёс вылтӥ вань транспортлы, огъя секталазы 10 тонналэсь ятыр ке, урод сюресъёстӥ ортчыны быгатӥсь но осьсы вылэ самой троссэ 6 тонна нагрузкаен грузовой автомобильёслы, вань маркаен тракторъёслы. 2. Сюресъёс вылтӥ ветлыны лэзёно автобусъёслы, йӧл, пызь, эстӥськон, пропан, почта нуллӥсь автомобильёслы, аварийной службалэн автомобильёсызлы, ӝог уродмись сиён-юонэз, эмьюмъёсты, комбикормез, кидысэз, минерал удобрениосты, пудоез по тылобурдоез нуись-ваись нимысьтыз автотранспортлы, азот, кислород нуллӥсь автомашинаослы, Удмурт Элькунысь обороная но спортья, техникая, школаослэн но профессиослы дышетонья шор ёзо учреждениослэн руль сьӧрын ветлыны дышетонъя автомобильёссылы, нюлэс мерттонэн герӟаськем автомобильёслы. 3. "Удмурт Элькунысь автомобиль сюресъёсъя управление" унитарной кун предприятилы куд-ог учыръёсы сётъяны лэзёно юнматэм вылтусо (установленного образца) пропускъёсты предприятиослы но организациослы, соосын огкыл гожтыса но асваньбурез кызьы кутэмзы шоры учкытэк, огья секталаен 10 тонналэсь уногес но осез вылэ самой троссэ 6 тонна нагрузкаен транспортлы огья кутӥськись сюресьёс кузя ветлон понна. 4. Сюресъёслэн кыӵе ведомствоосы но предприятиосы пыремзы шюры учкытэк, огъя кутӥськись сюресъёс кузя ветлыны пропуск сётыны уг луы. 5. Асваньбурзэс пӧртэм сямен кутӥсь предприятиослэн но организациослэн огъя секталаен 10 тонналэсь ятыр но осьсы вылэ самой троссэ 6 тонна нагрузаен автомашинаоссы огъя ветлон сюресъёсты 1999 арын 5-тӥ апрельысен 20-тӥ маёзь изъянтӥзы ке, соосты тупатъяны коньдонэз ыстоно улосвылысь сюресъёсъя фондэ яке огкылъя коньдон висъяно. 6. Удмурт Элькунысь городьёслэн но ёросъёслэн администрациоссылэн кивалтӥсьёссылы дэмлано транзит транспортлы городъёс но ёрос центръёс пыр ортчон маршрутъёс чакланы, юнматэм вылтусо пропускен транзит транспортлы городъёс но ёрос центръёс пыр тупатэм муршрутъёсъя ортчыны луонлыкъёс кылдытыны. 7. "Удмурт Элькунысь автомобиль сюресъёсъя управление" унитарной кун предприятилы но "Удмуртнефь" акционер огазеяськонлы Автомобилья кун инспекцилэн ёзъёсыныз ӵош, огкыл шедьтыса, огъя кутӥськись сюресъёс кузя 10 тонналэсь уногес секталаен машинаослы ичигес ветлыны луонлыкъёс кылдытоно, сюрес пусъёсты пуктылонэз но уен-нуналэн дежурствоез радъяно. 8. Удмурт Элькунысь министерствоослэн но ведомствоослэн кивалтӥсьёссылы городъёсысь но ёросъёсысь администрациослэн кивалтӥсьёсынызы ӵош материалъёсты, сырьёез но мукет грузъёсты 1999 арын 5-тӥ апрелёзь тырмыт люкано, промышленной предприятиосты но лэсьтӥськись организациосты дугдылытэк ужатон понна. 9. Та распоряженилэсь быдэсъяськемзэ эскерозы ЖКХ-я управленилэн ЖКХ-я но лэсьтӥськонъя ёзэз, Удмурт Элькун Кивалтэтлэн Аппаратысьтыз лэсьтӥськонъя но производственной инфраструктурая ёз. 10. Та распоряжениез печатлано "Удмурт дунне", "Удмуртская правда", "Известия Удмуртской Республики" газетъёсын. Удмурт Элькун Кивалтэтлэн Тӧроезлэн нырысетӥ воштӥсез А. П. ЗЛОБИН. Висён мед чигналоз Россия Федерациын 2000-тӥ арлы полиомиелит висёнэз быдтон вылысь ужрадъёс ортчытэмен валче, Удмурт Республикаысь Правительстволэн санитарияя но паласькись висёнъёсын нюръяськонъя комиссиез ужпум кутӥз: Туэ 15 мартысен 19 мартозь но 19 апрельысен 24 апрелёзь Удмурт Республикаын 3 толэзьысен 3 аресъем пиналъёс пӧлын полиомиелитлы пумит нюръяськон нуналъёс ортчытоно. Республикаысьтымы город но ёрос администрациослэн кивалтӥсьёссылы полиомиелитлы пумит нюръяськонъя иммунизация ортчытон нуналъёсы ведомствоос куспын комиссиос кылдытоно, соос вылӥ но пайдаё ӟечлыкен мед ужалозы. Та ужрадэз ортчытыны юрттэт мед сётозы элькунысьтымы куд-ог министерствоос но ведомствоос. Коньдон уногес вуоз Кылем арняе Удмурт Республикаысь Правительстволэн кивалтӥсез Павел Вершинин Москваын пумиськылӥз Россия Федерациысь Правительстволэн нырысетӥ вице-премьереныз Вадим Густовен но коньдон ужпумъёсъя министрлэн нырысетӥ воштӥсеныз Виктор Христенкоен. Эскеремын бюджетъя ужпумъёс. Отын кенешемын мартлы но апрельлы уждун тыронлы трансфертъёслэсь быдӟалазэс будэтон сярысь. Вузкаронъя министрен Георгий Габуниен пумиськонын эскеремын "Ижсталь" акционер огазеяськонлэсь вуззэ мукет кунъёсы келян сярысь ужпум. Предприятилэн генеральной директорезлэн Валерий Моисеевлэн верамезъя, та пумиськон дыръя кутэм огкылъёс "Ижстальлы" луонлык сётозы мукет странаосын вузкаронэз паськытатыны. Уждун тырмыт висъямын Элькунмылэн бюджетаз вуэм коньдон мыноз бюджетысь уксё басьтӥсьёслы январь понна уждун тырыны. Матысь дыре 4,2 миллион манет интыосы келямын луоз. Азьланьтӥське мукет толэзьёс понна но уждун тырон. Куинь толэзьлы чаклам планъя республикалэн бюджетысьтыз городъёсы но ёросъёсы вуыны кулэ вал 65 миллион манет. Дасэтӥ мартлы улосъёсы келямын 67 миллион манет, яке 102,7 процент. Жаляса верано луэ, уноез городъёс но районъёс, Каракулино, Кез, Красногорск, Шаркан, Якшур-Бодья ёросъёсты но Воткинскез вератэк, сётэм кылзэс ӧз быдэстэ. Огъя республикая интыысь администрациослэн бюджет удысын ужасьёслы уждун тыронъя пунэмъёссы 95 миллион манетозь вуиз. Чылкак 13 процентлэсь гинэ тыриз Грахово районысь администрация, 17,4 процентсэ, Камбарка, 19 процентсэ - Сюмси ёрос. Завьялово администрацилэн пунэмез кык толэзьскын 3,86 миллион манетозь вуиз. Но со дыре ик республикалэн бюджетысьтыз администрацие нырысетӥ кварталлэн кулэяськонъёсызлэсь уждунлы 110 процент коньдон висъямын ни. Правительстволэн Тӧроезлэн секретариатысьтыз пресс-центр. Удмурт Республикаысь Правительство, Правительстволэн Аппаратэз мур куректэмзэс верало Удмурт Республикаысь Правительстволэн Тӧроезлэн секретариатысьтыз пресс- центрлэн кивалтӥсезлы Иван Иванович Беловлы пиез Владимир кулэмен валче. *** Удмурт Республикаысь Кун Кенешлэн Тӧроез Александр Волков мур куректэмзэ но кайгыремзэ вера Удмурт Республикаысь Правительстволэн секретариатысьтыз пресс- центрлэн кивалтӥсезлы Иван Иванович Беловлы но солэн семьязлы пизылэн Владимирлэн шудтэм учыре сюрыса улонысь дырызлэсь вазь кошкемен валче. *** Удмурт Республикаысь Кун Кенешлэн пресс-службаез мур куректэмзэ вера Удмурт Республикаысь Правительстволэн Тӧроезлэн секретариатысьтыз пресс-центрлэн кивалтӥсезлы Иван Иванович Беловлы, семьяезлы но ӵыжы-выжыосызлы пизылэн Владимир Иванович Беловлэн шудтэм учыре сюрыса дырызлэсь вазь кулэмен валче. Калыкен пумиськылэ депутат Азат Таисович Галеев Ижысь Думалэн депутатэз. Вылаз ик, со Удмурт Республикалэн Кун Кенешаз депутатэ ӵектэмын. Вакчи сьӧд тушо чырмыт пиосмуртлэн выумтэ интыез ик ӧвӧл. Сур поттонъя "Гамбринусъ" огазеяськонлэн генеральной директорез луыса со вутске производствозэ азинтыны но, коньдон поттонзэ чакланы но, "ЪЪИ даур" общественной движенилэн ужаз пыриськыны но. Галеев ӵем пумиськылэ аслаз бырйисьёсыныз, кудъёсыз уло 22-тӥ избирательной округын. Тани 4-тӥ мартэ Галеев доры пыриз шуге-леке шедем адями. - Монэ огдырлы улыны патере кутӥзы тӥляд округады, ӧвӧл пропискае но, уже но, улӥсько чыры-пыры уждунэн. Мар карыны ёрмемын, кыӵе ке но улон инты кулэ вал... Азат Таисович умой кылзӥз дораз пырем адямиез: - Маин ке но юрттом, пырелэ дорам ӵуказе 3 час бере. Улон интыен ке ӧм, коньдонэн ке но юрттом... Ӵуказеяз Галеев пусъем дыраз ик вуиз офисаз. Шуге-леке шедем муртлы коньдон сётӥз. Ӟудэм муртлы со но бадӟым юрттэт луиз. Телепрограммаен печалтаськись "Антенна" газет вылысь адӟыны луэ берло дыре Галеевлэсь тусбуйзэ. Бен, учкыны но - сайкыт синмо: вылӥ верам одӥг пумиськон гинэ но возьматэ: Азат Таисович уз луы кылыныз гинэ супыльтӥсь депутат, со сюлмаськоз калык сярысь. П. Скобелев. 18 мартэ мынам ӟуч анаелэн, Чайникова Анисьялэн, вордскем нуналыз. Ӟечкыласько мон бадӟым праздникеныд. Сӥзисько тыныд бадӟым-бадӟым шуд, андан кадь юн тазалык, кема но шудо улон. Яратыса но гажаса, ваньзэ умойзэ гинэ сӥзьыса кутэм нылыд. Света. Можга район. Кватчи гурт. Ӧрӟи пиос, бурдо нылъёс Азьланьтӥськом газетлэн кузьымъёсыз понна ӵошатсконъёсын вормисьёсын тодматонмес. Наталья Русских Игралась нылпи спортшколалэн тренерез. Йылпумъяз Удмурт кун университетлэсь спортъя факультетсэ. Куасэн бызьылэ 12 ар. Тренерез Владимир Ефимович Никитин. - Умой-умой куас вылэ султӥ ньылетӥ классысен. Пыд вылам йыг-йыг сылыны дышетӥз но бызьылонъя нырысетӥ урокъёс сётӥз Владимир Евсеевич Ившин. Со дырысен куасъёсы - нырысетӥ эше. Одӥг малпанэн улӥсько - дышетэм нылъёсы мынэсьтым золгес мед бызьылозы. Соку асме шудоен лыдъяло. Ӵошатсконъёс азьынгес кӧня ке виси, соин ик вормонлы осконэ ӧжытгес вал. Татысь куас сюресэн тодматскыса буйгай. Вормон мылкыд выльысь ӝужаз. Соин ик ворми, дыр. Василий Григорьев, спортъя мастер Завьялово командаысь таиз спортсмен самой нимо-даноез, дыр. Чаклалэ ай асьтэос. Василий газетлэн кубокез понна тол ӵошатсконъёсын 6 пол вормисе потаз, гужем гурт шудонъёсын со 7 пол чемпион луылӥз. Тужгес но удалтӥз валлян Якшур-Бодьялан ортчем гужем гурт шудонъёсын. Григорьев соку одӥг но ӝыны, куинь, вить иськеме бызьылонын но эстафетаын вормиз. Озьы командаезлы трос очко люкаса, завьяловоосты азьпала поттӥз. - Туэ, малпасько вал, призёръёс пӧлы но уг шедьы. Арлыды вань ини. Шаплыесь егитъёс уно. Стартысь кошки Можгалась Иванов сьӧры. Кужмо спортсмен. Весь сьӧраз уиськи. Финиш азьын кусыпмес вакчиятӥ ик. Мон вормисе потӥ, со кыкетӥ интые кылиз. Александр Веретенников Якшур-бодьяослэн кизилизы сокем яркыт уг ӝуа на, но ӝомалэс куазен адӟиське ни. Саша егитъёс пӧлын Удмуртилэн сборнояз пыре. Мылысь-кыдысь тыршиз ке, Кекоран школаысь 11-тӥ классын дышетскись пияш вылӥегес но ӝутскыны быгатоз. Озьы лыдъя выль чемпионлэн тренерез Эдуард Михайлов. Со шуэ: - Ортчемаз гужем Сашаен ӝот-ӝот вераськоно луи. Тамаканы кутскем. Шуисько, аслэсьтыд но сюрестэ ӵогод, мынэсьтым но ужамме ӝыныё кельтод. Валаз кадь, укылтэмъяськон сямызлэсь куштӥськиз. Солэсь адӟем каре на ук выныз но. Владимир 8- тӥ классын дышетске, агаез сямен ик бызьылонъя секцие ветлэ. Республикаямы ортчылӥсь ӵошатсконъёсы пыриське ни. Ар-кык ортчыса, оло, агайзэ лёгалоз ай. Кин тодэ, Порваысь Веретенниковъёс пӧлысь кудӥз ке, оло, быдэс дуннеез но паймытоз ай. Ма, мед луысал озьы! Удмурт Республикаысь прокуратуралэн вазиськонэз 1999-тӥ арын 4-тӥ апреле республикаямы Кун Кенешлэн кыкетӥ ӧтчамаз (созываз) депутатъёсты быръён ортчоз. Быръён кампанилэн али самой пӧсь вакытэз, котькытын мынэ валэктон-ӵектон уж. Нырысьсэ Удмурт Республикалэн законъёс бордын ужась но эскеронъя органаз быръёнлы дасяськон но сое ортчытон мынэ "Россия Федерацилэн гражданъёсызлэн быръён правооссылы но референдуме пыриськон правозылы огъя гарантиос сярысь" Федерацилэн Законэзъя но республикалэн "Удмурт Республикаысь Кун Кенеше депутатъёсты быръён сярысь" Законэзъя. Со законъёсын гражданъёслэн быръён правооссылы ватсаса гарантиос чакламын, верамын пусъем кандидатъёслэн ужан радзы, соослы огкадь статус сётон пумысен. Быръён ортчытэмын луыны кулэ, законъёсты юн чакласа, нош кин соосты тӥя, соослы пумит вань законъёслэсь кужымзэс кутыса. Нырысь ик, быръёнлы дасяськыку но сое ортчытыку, законлэсь быдэсъяськемзэ эскерыны кулэ интыосысь быръёнъя комиссиос. Соослы бадӟым правоос сётэмын. Соиз яке таиз кандидат законъёсты тӥян учыре, тужгес но быръён азьын валэктон уж нуон дыръя, комиссиос кандидатэз пусъем сярысь решенизэ но воштыны быгато. Прокуратура, законъёслэсь быдэсъяськемзэс эскеронъя кун орган луэ бере, озьы ик палэнэ кыльыны уг быгаты куронъёсты тӥян учыръёсы. Соин ик вань кандидатъёслы но соослэн оскем адямиоссылы быръёнъя блокъёслы но огазеяськонъёслы, иворъёсты вӧлмытонъя ёзъёслэн кивалтӥсьёссылы вазиськиськом: ужалэ законэз юн чакласа гинэ, валэктон ужез но эсэпсэ тодыса радъялэ. Тодады вайытӥськом: быръён правоосты тӥям яке быръёнъя комиссиослы люкетэм понна, озьы ик бырйисьёслы но быръёнъя комиссиын ужасьёслы кузьмаськем понна, озьы ик документъёсты пӧяса яке куараосты юромо урод лыдъям понна чакламын уголовной уж ӝутыны. Законэз уно пол тӥям понна ӝутӥське административной уж, кылсярысь, со лэзьымтэ дыре агитация нуон, кандидат сярысь урод кыл вӧлдон, иворъёсты тросэн вӧлмытонъя ёзъёс пыр агитация нуон сярысь куронъёсты тӥян, мурт нимтулын агитация дасян но вӧмытон, агитация нуон материалъёсты быдтон, изъян ваён но мукет. Ми тужгес но вазиськиськом бырйисьёслы: эн сётске нокыӵе вузаськонъёслы, сыӵе учыръёсты шараяды ке, ӝегатскытэк ивортэ ёросъёсысь, городъёсысь быръёнъя комиссиослы, прокуратурае, югдурез утёнъя органъёсы. Быръёнъёс мед ортчозы зэмылкез лыдэ басьтыса, правоез но законъёсты чакласа. Быръёнъя законъёсты тӥян учыръёс медаз луэ. 1999-тӥ арын 4-тӥ апреле быръён одӥгзэ но кандидатэз шуге-леке медаз вутты. "Правительство сётэм кылзэ быдэсъя" Туннэ быдэсъясь ёзъёслэн но правительстволэн ужамзы шоры укыргес сак учко. Мугез тодмо: Кун Кенеше быръёнъёс азьын олокыӵе но шекъёсты но тырмымтэосты утчало, тужгес но депутатэ кандидатъёс. Но тани Правительстволэн Тӧроез Павел Вершинин журналистъёслы меӵак ивортӥз: - Кивалтэт сётэм кылзэ умой быдэсъя. Вераськон мынэ районъёс но городъёс куспын кутэм тупанкылъёсъя уждунлы коньдон висъян сярысь. Кун бюджетлэн январьлы но февральлы доход люкетэз данаклы мултэсэн быдэстэмын. Озьы шуыны уг луы уноез районъёс но городъёс сярысь. Шонер вера Павел Николаевич. Тани Алнаш район туэ кык толэзь ӵоже - 45 процент гинэ доход люказ. Сыӵегес ик югдур Грах, Завьялово, Глазов, Дэбес но музон районъёсын. Соин ик татын бюджет удысын тыршисьёслы (дышетӥсьёслы, врачъёслы) уждун тырон ӝега. Вершинин алигес пумиськылӥз Россиысь Нырысетӥ вице-премьерен Вадим Густовен но коньдонъя министрлэн нырысетӥ воштӥсеныз Борис Христенкоен. Республикалэн декабрь- январь-февраль толэзьёсы ужамез умоен пусъемын но республикалы ватсаса бюджет ссуда сётыны решение кутэмын. Озьы ик басьтэмын ваньмыз трансфертъёс но интыосы келямын. Котькуд районлы шорлыдын 500-700 сюрс манет усе, нош Сарапул городлы 1200 сюрс манет висъямын. Туэ 1 апрельысен бюджетникъёслы уждун 1,5 поллы йылэ. Соин валче выльысь учконо луоз районъёс но городъёс куспын тупанкылъёсты. Сыӵе ик кусыпъёс тупатӥсько Москваен федеральной но кун бюджетъёс куспын. Но берло дыре куд-огез ивор сётӥсь ёзъёс Правительстволэсь ужзэ юри сьӧдмаса, мыдланьтыса возьмато. Журналистъёсты со уг чеберъя. Павел Николаевич озьы ик ӝутӥз культурая министрен герӟаськем ужпумез. Г. Чайников рынокен экономикае выжон, ог-огедлы пунэм тыронъёсты вузъёсын вошъяськон вакытэ аслэсьтыз полномочиоссэ тросгес кутӥз. Со понна министр нокыӵе бумагаос вылэ гожтӥськыны лэзьымтэ, нош янгышъёссэ эскероз суд но решение кутоз. Кин мар умойтэм лэсьтэ, солэсь кылзэ одно юаны кулэ. Пресс-конференциын журналистъёс азьын озьы ик вераськиз гурт хозяйствоя но сиён- юонъя министр Василий Жуйков. Со бадӟым инты висъяз тулыс кизёнлы дасяськонэн герӟаськем ужпумъёслы. Озьы ик умоен пусйиз йӧл, сӥль поттэмлы юрттэт сётон амалэз. Миым коньдон вуэ вал кин скаллы быдэ 2000 килограмм йӧл кыске, нош туэ со лыдпус 2200 каремын. Миым солэсь ичи йӧл кыскисьёс пӧлы 135 хозяйствоос пыро ке вал, туэ 96 кылемын. Но соослы бюджет ссуда висъямын вал. Туэ но озьы ик басьтозы. Нош сӥлья юрттэт басьтозы сыӵе хозяйствоос но фермаос, кудъёсыз куайыто 200 ошъёс но 800 парсьёс. Оглом вераса, 120 хозяйствоослы коньдон вуоз. Отчы пыро бадӟымесь комплексъёс но тылобурдо вордон фабрикаос. Югдур умойгес ГСМ ласянь. Кылем арын солы 29 миллион манет ке висъямын вал, туэ - 48 миллион. Шӧдскымон умоялоз етӥн будэтон. Та удыслы но уксё сётӥське. Али министерство продукция басьтонъя хозяйствоосын огкылъёс кутэ. Гуртын 17 август бере югдур кӧня ке умоя ке но, уждунъя удыслэн 2,6 миллион манет тыронэз на. Нош миым быдэс шаерамы 26 хозяйствоос гинэ пайдаё ужазы. Соин ик минерал сылалъёс басьтыны, етӥн кидыс, уськытыны но бакча сиёнъёс будэтыны 16 миллион коньдон висъяське. Министр озьы ик мадиз Беларусь Республикаысь тракторъёс басьтэмзы но мукет ужпумъёс сярысь. Кылсярысь, "Ижсталь" сётэ корт, нош гурт хозястволы 35 "Беларусьёс" вуозы. Со 2,9 миллион манетлы луэ. Г. РОМАНОВ. Вуоно пумиськытозь, шарканъёс Ӝоген ӝыны даур тырмоз ни газетмылэн кубокез понна куасэн бызьылонъя ӵошатсконъёсты радъям дырысен. Солы кутскон сётэмын вал 1952-тӥ арын. Нырысетӥез нюръяськон соку ортчем Ижевскын. Со сярысь тодэ ваёнъёссэ милемлы вераз спорт удысысь ветеран Софья Куклина. Ӵапак 47 ар талэсь азьло Софья Васильевна султӥз куас сюрес вылэ. Тӥни со дырысен одӥг арзэ но кельтытэк, "Советской Удмуртия" (али "Удмурт дунне") газет огазе люка быдэс республикаысь спортсменъёсты. Кубокмы шедьылӥз ни уно ёросъёсы. Вал со Можгалан, Шарканын, Завьяловоын... Таяз учыре кубок понна ӵошатсконъёс ортчизы шаркан музъем вылын. Та район ас сяменыз туж аспӧртэмлыко. Отын кыдазы но будӥзы дано спортсменъёс. Кин уг тоды меда дуннелэсь чемпионзэ Владимир Никитинэз ик. Вераны кулэ на: Шаркан музъем туж узыр инкуазеныз но. Сое юнме шорысь Удмуртилэн Швейцариез уг шуо, дыр. Нюлэсо, нюко-гопо, вырйыло интыос куасэн бызьылӥсьёслы туж тупамон. Туэ татын ортчыны кулэ вал гурт спортсменъёслэн тол шудонъёссы. Коньдонэн югдур секыт луэмен соосты таяз учыре ортчытыны ӧз быгатэ. Озьы ке но, элькунысьтымы Спортъя комитет, Шаркан ёрослэн администрациез но газетмылэн редакциез быгатӥзы ик радъяны та ӵошатсконъёсты. Жаляса верано луэ, вань районъёсысь командаос таяз учыре лыктыны ӧз быгатэ, 14 ёросысь гинэ вуизы. Малы ке ӧз лыктэ Балезино, Яр, Глазов, Селта, Красногорск, Кез, Киясово, Грахово, Вавож, Алнаш но Каракулино палъёсысь куасэн бызьылӥсьёс. Озьы ке но, спорт гуртоосты огазеяны быгатӥз. Ӵошатсконъёсты радъясьёс - шарканъёс - ӟеч-ӟеч дасяськиллям кунооссэс пумитаны. Тау карон кылъёс вераны кулэ ёрос администрацилэн кивалтӥсезлы А. А. Прохоровлы. Нюръяськонэ лыктэмъёсты ӟечкыланы вуылӥзы Спортъя кун комитетлэн кивалтӥсез А. М. Касихин, быдэс дуннелы тодмо спортсменкаос Галина Кулакова но Нина Парамонова, куасэн бызьылонъя кун федерацилэн кивалтӥсез Юрий Антонов но мукет дано адямиос. Умой дасямын вал бызьылон сюрес. Пусйыны кулэ судьяослэсь ӟеч ужамзэс. Газетмылэн редактрез А. П. Шкляев ачиз Шаркан палан вордскемын бере, со аспал адямиосызлы бадӟымесь вормонъёс сӥзиз вал. Зэмзэ но, шарканъёс паймытӥзы. Тужгес но вылӥ азинскон соос басьтӥзы эстафета ӵошатсконъёсын. Озьы ке но, 621 очко люкаса, газетмылэсь азвесь кубоксэ нуизы играос. Чылкак 35 очколы гинэ бере кылиз Шарканысь команда. Можгаос таяз учыре 546 очко люказы. Ньылетӥ интыын якшур-бодьяос, витетӥ луизы дэбесъёс, куатетӥ интыез утӥзы пичипургаос. Спортъя кун комитетлэн кивалтӥсез Анатолий Касихин люкаськемъёсты ӟеч иворен шумпоттӥз. Туэ гуртъёсысь спортсменъёслэн гужем шудонъёссы ортчозы июнь толэзьлэн пумаз Завьял черкогуртын. Нош тол шудонъёс кайта толалтэ радъямын луозы нош ик Шаркан селоын. Гоно, соин ик дуно Кизнер райполэн пӧйшур вордӥсьёсыз уно аръёс ӵоже ни умоес азинсконъёс басьто. Тырмымтэос бен луо, кылсярысь, пӧйшуръёс висьыны кутско. Ӵапак озьы луэмен, мумы пӧйшуръёсссэс татын воштоно луизы. Ваизы Можга но Балезино ёросысь тазаоссэ. Кин утча, со шедьтэ, шуг-секытысь потэ но ужзэ выльысь ӟеч радъя. Кизнеръёслэн но пӧрмиз. Миым мумы пӧйшуръёссылэн лыдзы вуиз 4800-озь, валля арын сярысь, со 1200-лы уногес. Кизнеръёс ортчем арын 6368 сюрс манетлы пӧйшур куоссэс вузазы но 1600 сюрс манетлэсь ятырлы пайда поттӥзы. Таӵе азинсконъёс юрттӥзы пунэм тыронъёсты берыктыны, налогъёсты но уждунэз дыраз тырыны, пӧйшуръёсты умойгес сюдыны. Бен, пӧйшурез будэтон дунтэм уг усьы. Сӥлен, чорыген сое сюдоно. Но, пӧйшур куос ӟечесь бере, вузлэн дуныз уз ышы, продукциез басьтӥсь но котьку шедёз. П. НИКОЛАЕВ. Тодматске, малпаське, быръе Быръён нуналозь кык но ӝыны арня сяна уг кыльы ни. Республикаямы пумен кужмоя ӝуткан-валэктон уж. Котькудӥз кандидат бырйисьёсты маин ке но ас бордаз кыскыны, паймытыны выре. Лыдӟисьёсмылэн тодэмзы потэ огъя югдурез. Быдэс списокез (отын ог 600 мурт) ми сётыны ум быгатӥське. Куронъёсты лыдэ басьтыса, тазьы кенешим: печатлано ёросъёсысь округъёсъя ӵектэм кандидатъёслэсь нимъёссэс, уго лыдӟисьёсмы пӧлысь уноез гуртъёсын уло. Лыдӟе, ӵошатэ, малпаське, 4-тӥ апреле асьтэлы кельшымонзэ, тупасьсэ адямиез бырйыны мед быгатоды шуыса. Учке газетлэсь пуш бамъёссэ. Адямилы быдэ 14 литр спирт... Россиысь егитъёс пӧлын аракы юисьёс тросгес но тросгес луо. Вить ар талэсь азьло сыӵеос 100 сюрс адямилы усё вал 17,4, кылем арын со лыдпус 20,8-озь вуиз. Нош вуоно арын 24,4 алкоголик луыны быгатоз. Озьы та вакытэ Россиын вань улӥсьёс пӧлысь 2 процентэз (2,5 миллион адями) алкоголик луо. Кылем арын адямилы быдэ 14 литр спирт усе вал, но татын лушкемен поттэм аракы лыдъямын ӧвӧл. Специалистъёслэн верамзыя, 7 ар ӵоже аракы юон, кыскон но пиналъёслэн ӧжыт вордскемзы Россиын улӥсьёслэсь лыдзэс 2 миллион адямилы (1,3 процентлы) кулэстӥзы. Иворъёсъя национальной служба. Интыос но дыр Егит пиос - 10 км 1. Александр Веретенников (Як.-Бодья) - 27 мин. 17 сек. 2. Александр Мезенцев (Шаркан) - 29 мин. 18 сек. 3.Леонид Виноградов (Як.-Бодья) - 30 мин. 14 сек. 4. Андрей Вахрушев (Шаркан) - 30 мин. 20 сек. 5. Семен Иванов (Можга) - 30 мин. 29 сек. 6. Дмитрий Казаков (Игра) - 31 мин. 15 сек. Воргоронъёс - 10 км. 1. Василий Григорьев (Завьялово) - 29 мин. 14 сек. 2. Евгений Иванов (Можга) - 29 мин. 22 сек. 3. Олег Перевозчиков (Шаркан) - 29 мин. 29 сек. 4. Сергей Шкляев (Игра) - 29 мин. 52 сек. 5. Алексей Вахрушев (Як.-Бодья) - 30 мин. 42 сек. 6. Василь Гильфанов (Сарапул) - 30 мин. 47 сек. Воргоронъёс-ветеранъёс - 5 км. 1. Николай Батаногов (Шаркан) - 15 мин. 58 сек. 2. Вениамин Ефремов (Игра) - 16 мин. 19 сек. 3. Владимир Иванов (Кизнер) - 17 мин. 20 сек. 4. Владимир Корепанов (Можга) - 17 мин. 39 сек. 5. Виталий Чиков (Сарапул) - 17 мин. 40 сек. 6. Александр Перевощиков (Ува) - 18 мин. 32 сек. Егит нылъёс - 5 км 1. Екатерина Воронцова (Шаркан) - 16 мин. 52 сек. 2. Валентина Новикова (Сарапул) - 17 мин. 07 сек. 3. Лиля Кельдибаева (Воткинск) - 18 мин. 26 сек. 4. Наталья Вахрушева (Як.-Бодья) - 18 мин. 29 сек. 5. Яна Романова (Можга) - 18 мин. 50 сек. 6. Гузалия Заляева (Як.-Бодья) - 19 мин. 02 сек. Нылкышноос - 5 км. 1. Наталья Русских (Игра) - 17 мин. 17 сек. 2. Наталья Лялина (Сюмси) - 17 мин. 32 сек. 3. Валентина Чуракова (Игра) - 18 мин. 07 сек. 4. Елена Корепанова (Игра) - 18 мин. 54 сек. 5. Ираида Михайлова (Завьялово) - 19 мин. 21 сек. 6. Светлана Шибанова (Пичи-Пурга) - 19 мин. 25 сек. Нылкышноос-ветеранъёс - 3 км 1. нина Данилова (Дэбес) - 11 мин. 10 сек. 2. Надежда Юшкова (Сарапул) - 12 мин. 17 сек. 3. Фаина Бушмакина (Як.-Бодья) - 12 мин. 36 сек. 4. Надежда Колесникова (Шаркан) - 12 мин. 45 сек. 5. Валентина Чиркова (Игра) - 12 мин. 52 сек. 6. Алевтина Борисова (Можга) - 12 мин. 53 сек. Воргоронъёслэн эстафетазы - (4х5) 1. Шаркан - (Олег Перевозчиков, Владимир Лопатин, Николай Батаногов, Александр Мезенцев) - 59 мин. 47 сек. 2. Игра - (Сергей Шкляев, Михаил Ананин, Вениамин Ефремов, Вадим Казаков) - 60 мин. 17 сек. 3 Можга - (Евгений Иванов, Юрий Бибиков, Владимир Корепанов, Семен Иванов) - 61 мин. 25 сек. Нылкышноослэн эстафетазы - (4х3) 1. Шаркан - (Екатерина Шилохвостова, Ольга Иванова, Надежда Колесникова, Екатерина Воронцова) - 45 мин. 33 сек. 2. Игра - (Наталья Русских, Валентина Чуракова, Валентина Чиркова, Роза Ахмадиева) - 46 мин. 08 сек. 3. Можга - (Ольга Романова, Елена Рыбакова, Алевтина Борисова, Яна Романова) - 47 мин. 44 сек. Азьпала потӥзы: 1. Игра - 621 очко 2. Шаркан - 586 очко 3. Можга - 546 очко. Шарканъёс паймытӥзы Эстафета бызьылонъёс - ӵошатсконъёслэн шорсюлэмзы шуим ке, ум янгышалэ, дыр. Та нюръяськон вень йыл вылын кадь ортче, уно калыкез котыраз кыске. Шарканын тросэз малпазы: вормозы играос, яке можгаос. Куд-огезлэн кыл йылысьтыз усьылӥз ик шарканъёс пала дурбасьтон. Но таӵе шаянъёслэн но дӥсьтонзы ӧз тырмылы, кузёос 2 командаен ик эстафетаез утозы шуыса. Но озьы ик луиз. Нырысетӥ люкетаз Екатерина Воронцова, вань эшъёссэ кыдёке кельтыса, сюрес вылэ арлыдо эшсэ, Надежда Колесниковаез, келя. Таиз но возьытэ ӧз усьы. Лымы сюрес вылын зол ужамез кемлы луиз. Куинетӥ этапе потӥсь эшсэ чабыкуз, стадионын мукетъёсызлэн вужерзы но уг адӟиськы на вал. Играос понна куинетӥ но ньылетӥ этапын бызизы кужмо спортсменкаос Наталья Русских но Валентина Чуракова. Соос азьвыл нуналаз нырысетӥ но куинетӥ интыосты утӥзы. Оло, луонтэмзэ лэсьтозы, сутозы шарканъёсты? Зэм, мукетъёсызлэсь таосыд шаплыгес бызизы. Озьы ке но шудо кизиозь сузьтӥськыны ӧз быгатэ - укыр кыдёке пегӟыны вуттӥллям шарканъёс. Нош куинетӥ инты понна зол нюръяськон пуромиз. Эстафеталэн берпуметӥ люкетаз Можгалась, Якшур-Бодьялась но Завьяловоысь нылъёс ӵош потӥзы. Кӧня ке улыса, Завьяловоысь Овсянникова азьпала потэ, бӧрсьын, кыдёкын ик ӧвӧл - Можгалась Ольга Романова. (Бӧрысь милемлы со тазьы мадиз.) - Мынӥсько бӧрсяз лякиськем кадь. Сутыны но катьы уг тырмы, уг но кылиськы. Сюреслэсь котькуд вырйылзэ, кожонзэ ас поннам йырам бергатӥсько, малпасько, ку меда тае кельтыны луоз. Стадионэ пырон азьынгес сутӥ, ортчыны медӥсько, сюресэз пытса. Озьы турттонъямы перпуметӥ кожонын кыкнамы но кымалским. Вазьгес султӥ мон. Озьы можгаосты куинетӥ интые поттӥ. Та выллем ик вал воргоронъёслэн эстафетазы. Шарканысь егит пи Александр Мезенцев но ветеран Николай Батаногов классика амалэн мукетъёссэ кыдёке кельтӥзы. Нош берпуметӥ этапъёсын Игралась но Можгалась эркын амалэн бызись воргоронъёс сьӧразы уиськыса мынӥзы. Быгатӥзы на виссэс гинэ вакчиятыны. Александр Волков - Москваын Удмурт Республикаысь Кун Кенешлэн Тӧроез Александр Волков Москвае кошкиз. Со Федерацияя Советлэн ужаз пыриськоз. Кенешын эскерыны чакламын Юрий Скуратовез Генеральной прокурорлэн ужысьтыз мозмытон, Федерацияя Советлэн ог дырлы тупатэм комиссилэн йылпумъянъёсыз сярысь, кудӥз эскериз Россиысь Правительстволэсь но Центральной банклэсь кылем арын 17 августэ манет дунлэн шуак усемезлэсь мугъёссэ но таин валче мукет ужрадъёсты. Озьы ик Федеральной Собранилэн вылӥ палатаез эскероз "Кунгож сьӧрын асьмелэн улӥсьёсмы пумысен Россия Федерацилэн кун политикаез сярысь" Федеральной законэз, химической ож тӥрлыкез поттэмысь дугдытон но сое быдтон сярысь конвецилэсь быдэсъяськемзэ, "Россия Федерациын люкаськем ож тӥрлыкез быдтон сярысь" программаез уже пыӵатонэз, Россия Федерациысь Правительствоен но Пенсиосъя фондэн пенсиосты тыронъя но сое будэтонъя чаклам ужпумъёсты. Удмурт Республикаысь Кун Кенешлэн пресс-службаез. Вормиз Удмуртиысь команда Йылпуъяськизы Россиысь газ поттон удысын ужасьёслэн ИИ тол спартакиадазы. Бадӟым вормон басьтӥзы Ижевскысь "Спецгазавтотранс" огазеяськонысь спортсменъёс Огъя зачётын татысь команда нырысетӥ интые потӥз. Кыкетӥ интыын - Сургутысь газ кыскисьёс, куинетӥын - "Тюменьтрансгазысь" спортсменъёс. Удмуртилэн командаезлы тужгес но трос очко ваизы футболистъёс (огзэ пумиськонзэс келязы, мукетъёссэ вормизы). Защитник Игорь Дубровских 9 гол пыртӥз. Усто шудӥзы Альберт Андреев, Эдуард Кобозев. Нош вратарьмы Сергей Шиповский та турнирын устоеныз лыдъямын. Юрттӥзы хоккеистъёсмы но. Берпуметӥ пумиськоназы Тюменьысь командаез 4:2 лыдын вормыса, таосыз но спартакиадалэн чемпионъёсыз луизы. Огъя вормонэ трос кужымзэс сётӥзы куасэн бызьылӥсьёс, туризмъя ӵошатскисьёс. М. КУЗЬМИН. Котькытын шуныт пумитало Ижевске огез бӧрсьы мукетыз тодмо адямиос вуыло. Вунонтэм пытьы кельтӥз шаермылэн улоназ Беларусь Республикалэн президентэз Александр Григорьевич Лукашенко. Табере дорамы вуиз Геннадий Андреевич Зюганов, Россиысь Кун Думалэн депутатэз, КПРФ-лэн кивалтӥсез. Соослэн дорамы ужамзы шӧдӥськоз, дыр, вуоно быръёнъёс вылын но. Геннадий Андреевич кык нунал куспын пӧртэм коллективъёсын, туж трос адямиосын пумиськылӥз. Малпан кылдӥз вал, Лукашенко ветлэм бере Москваысь куномы бездытгес адскоз, дыр, шуыса. Озьы вылымтэ. Коммунистъёс гинэ ӧвӧл, егитъёс но, арлыдоос но туж ӟырдыт мылкыдын, адӟиськемзы потэмен, люкаськылӥзы пӧртэм аудиториосы. Сюлмысь вераськон пӧрмиз Удмурт кун университетын, Кун Кенешын, Правительствоын. Нош "Металлург" двореце калык сомында лыктӥз - пукон интыос ӧз тырме. Г. А. Зюгановез быдэс зал султыса, кужмо кичабонъёсын пумитаз. Таӵеез кемалась, партия кивалтон аръёс дырысен ӧй вал ни, дыр. Геннадий Андреевич пыр-поч вераз Россиын кылдэм туала экономической но политической югдурез, нимын-нимын вераз, кин куашкатӥз странаез. Люкаськемъёс сётӥзы трос пумо юонъёс. Соос герӟаськемын приватизация ортчытонэн, Правительствоез отставкае келянэн Ельцинлэн тазалыкеныз, бизнесэн но мукет. Компартилэн кивалтӥсез одӥг юанлэсь но ӧз палэнскы, котькудӥзлы пыр-поч валэктон сётӥз. Толон Г. А. Зюганов вуылӥз Воткинскысь машина поттӥсьёс доры, пыраз П. И. Чайковскийлэн музей-усадьбаяз. Республикаысь журналистъёс понна пресс-конференция ортчытӥз. Со сярысь верамын луоз газетмылэн вуоно номераз. Л. Медведева. Г. А. Зюганов - Ижевскын, В. И. Ленинлэн памятникез доры сяська понон дыръя. Фотоез В. КАМАШЕВЛЭН. Депутатэ кандидатъёс Анатолий Марченко: "Калыкез уг пӧя, калыклы юртто" Анатолий Марченко - шаерамы тодмоосыз пӧлысь тодмоез кивалтӥсь но политик. Куамын кык ар талэсь азьло, Калининысь политехнической институтэз йылпумъяса, егит инженерез Удмуртие ысто но сое Ижысь торф но брикет поттӥсь заводлы директоре юнмато. Куинь ар ужамез бере басьтӥзы "Ижторф" трестлэн кивалтӥсезлы воштӥсе, нош 1982-тӥ арын бырйизы "Удмуртторф" огазеяськонлы валтӥсь тӧрое. Анатолий Владимирович быдэс улонзэ сӥзиз республикаямы торф поттонэз азинтонлы. Тыршемез пусъемын уно почёт грамотаосын но медальёсын, сётэмын Россия Федерациысь дано экономист но эстӥськон удысысь дано ужась ним, нош Удмуртиысь - дано нефтяник. Анатолий Владимирович ньыль ар ӵоже вал Октябрь райсоветлэн депутатэз. Трос пол пыртылӥзы Удмурт Республикалэн Почёт пул вылаз. Туэ нырысьсэ мылкыд кариз удмурт парламентэ шедьыны, Кун Кенеше быръёнъёсъя депутатэ кандидат луиз. Округаз кыдёкысь Грах район но ӝыныез пала Кизнер гуртъёс пыро. Таӵе адямиос парламентын одно ик луыны кулэ. Сое валалоды, та материалэз лыдӟыса. Нош туннэ Анатолий Владимировичен вераське "Удмурт дунне" газетлэн корреспондентэз, культура удысысь дано ужась Геннадий РОМАНОВ. - Анатолий Владимирович, кыӵе ортчем сюресты? - Алигес гинэ 60 аресме пусйи. Вордски Беларусь Республикаысь Гомель областьысь Ясени гуртын, белорус семьяын. Ноку ӧй малпалля быдэс улонме Удмуртиын ортчытыны. Нош Совето улон вакытэ институтэз быдтӥсьёсты котьку палэнэ ысъяллязы. Мыным но шуд усиз таӵе шулдыр, нюлэсо, торфо но ошмесо шаере вуыны. Вордскем палъёсы сьӧд сюен узыр. Татын но со ичи вылымтэ. Удмурт шаер 1967-тӥ арын монэ туж умой пумитаз. Нырысь-валысь капчи ӧй вал. Калыклэсь дышетски, калыклэсь кылзӥськи но тодон-валанме будэтӥ Удмурт кун университетын. Йылпумъяй экономика но ужен кивалтон люкетсэ, басьтӥ экономистлэсь дипломзэ. Озьы лыдъян-чотанэз умойгес валаны ӧдъяй. Нош кивалтӥсьлы со туж кулэ. - "Удмуртторф" кун предприятиен 17 ар кивалтӥськоды ни. Ортчемзэ кызьы дунъясалды? - Со дыр ӵоже котькыӵеез вал: ӟечез уногес, конечно. Озьы ке но, номыр каньылэн ӧз сётскылы, уката ик бадӟымесь вормонъёс. Ялан утчаським, маке но выльзэ пыӵатылӥм но удысмы ноку огинтыяз сыръяса ӧз улы. Тани котькинлы тодмо, торф поттӥськом вазь тулысысен бер сӥзьылозь гинэ. Нош адямилы толалтэ но ужано, семьязэ сюдоно. Ваньзэ сое лыдэ басьтыса, 1970-тӥ арысен басьтӥським металлообработка борды. Умоесь кусыпъёс тупатӥм бадӟымесь промышленной предприятиосын. Нырысь ик милемды валазы Ижысь механикая завод, "Ижмаш", "Ижсталь", "Нефтемаш" но мукетъёсыз. Озьы торф поттон посёлокъёсын ватсаса выль ужан интыос кылдӥзы. Адямиос кыӵе шумпотӥзы, соослы толалтэ но уж шедиз. - Анатолий Владимирович, нош али кызьы шока "Удмуртторф", рынокен экономикае выжон вылады шӧдӥське-а? - Кызьы бен сотэк. Ми ведь нимаз шормуӵын ум улӥське. Но шуг-секытъёсмес вормыны быгатӥськом, али но огсыр ужаськом. Миым тани, валля арен ӵошатыса, 10 процент ёрослы уногес продукция поттӥм, яке 13 миллион манет тыр. Му вӧй кыским 250 сюрс тонна, 1997-тӥ арын сярысь, 22 процентлы тросгес - 45 сюрс тонналэсь ятыр. Торф поттӥм планын чаклам мында - 183,4 сюрс тонна. Удысмы паськыт. Али 10 торф поттон предприятимы. Соос пӧртэм районъёсы интыяськемын. Котькудаз усьтэмын металлообработкая цехъёс. Нюлэсэн но ужаськом. Кор, пиломатериал дасяськом. Кылем арын 18,6 сюрс кубометр нюлэс дасям, нош пиломатериал - 12,2 сюрс, яке валля арен ӵошатыса, 13 процентлы уногес. - Малы му вӧй поттон борды басьтӥськиды? - Гыбдаса улыны уг яратӥськы. Но главноез со гинэ ӧвӧл. Удмурт Республикалы нефть кулэ вал, нош со ваньмыз сямен палэнэ, Россие кошкылӥз, кӧня ке процентсэ гинэ шаермылы сётылӥзы. Сыӵе квота тупатэмын. Соин ик, республикалы ӟеч лэсьтон вылысь, та выль удыс борды 1984-тӥ арын кутским. Кылдытӥм НГДУ. Табере 3 ни нефть поттон интымы. Туэ 15-тӥ декабре та удысмылы 15 ар тырмоз. Кутским 5 сюрс тоннаысен, табере 50 пол трос му вӧй кыскиськом, нош ваньзэ 1,5 миллион тонна поттӥм ни. - Ужады кыӵе выль амалъёсты кутӥськоды? - Берло дыре трос вылез пыӵа. Тани гурт хозяйствоос азьвыл сямен сьӧд сюймес тырмыт басьтыны уг быгато ни. Соин ик кутским торфен суро удобрение лэсьтыны. Ваньзэ сое пакетъёсы, полиэтилен мешокъёсы тыриськом но вузаськом. Кӧняез ке со кошке палэнэ. Республикаямы но та вузмы уг кылльы, сад-бакча возисьёс пайдазэ шӧдӥзы ни. Али сьӧд сюймес вузаны дасяськом Грецие но Турцие. Удмурт торфлы сюрес усьтӥське. - Анатолий Владимирович, тӥ трос сюлмаськиськоды ужасьёсты сярысь: дыраз сётъяськоды уждун, лэсьтӥськоды улон коркаос, школаос, нылпи садъёс но музон социальной юртъёс. Вань бюджетъёсы выт умой тыриськоды но эшшо пӧртэм организациослы юрттӥськоды. Кытысь со потэ? - Ваньмыз со шонер. Адямилы дун ке ӧд тыры, кыӵе мылкыдын со улоз. Собере котькуд предприятиын умоесь ужан но улон условиос кылдытӥськом. Тани котькуд торфопредприятиын нылпи садъёс пуктӥм, ӝыныяз участковой больницаос ужало. Школа ӝутӥм Чернушка-Вожойкаын (Як.-Бодья) но Орловоын (Сюмси). Котькуд предприятиын нянь пыжиськом, магазинъёсмы ужало. Рябовоын (Ува) теплица пуктӥм. Отын кияр, помидор будэто. Нюрдор-Котьяын али 18 квартираен корка лэсьтӥськом. Миым 600 сюрс манетлэсь унолы юрттэт висъям. Туэ басьтӥм ни медицинской оборудование (нырысетӥ кун клинической больницалы но кардиоцентрлы), санитарной машина, ронолы автобус, юрттӥськом интернатъёслы, пересьёслэн но нылпиослэн юртъёссылы. - Анатолий Владимирович, малы Кун Кенешлэн депутатэз луэмды потӥз? - Кун Кенешлэн нырысетӥ созывезлэсь ужамзэ ялан син азям вози. Со 4 ар ӵоже Удмуртиын улӥсьёслы трос ӟечсэ лэсьтыны ӧз быгаты, куспазы тупатэк, керетыса, вожвылъяськыса ужазы. Со кутыны ӧз быгаты экономикаез юнматонэн, производствоез азинтонэн герӟаськем законъёс. Тӥни ваньзэ сое но музонзэ чакласа, парламентын луыны кулэ сыӵе адямиос, кудъёсыз мед сюлмаськозы огшоры калыклэсь улон-вылонзэ умоятон сярысь. Мыным кулэ ӧвӧл нокыӵе льготаос, исантэм правоос но привилегиос. Мон парламентын ужаны дась калык понна. Одӥгзэ эшшо верало на. Кун Кенеш но Правительство куд-ог умойтэм вамышъёс но лэсьтылӥзы. Кылсярысь, "Сэмсон" фирмаен. Со чакла дорамы нефть поттыны. Нош калыклы улон но ужан условиос кылдытон сярысь малпанэз ик ӧвӧл. Ӝынызэ ваньбурмес США-е нуоз, нош асьмелы мар кылёз? - кырсез. Нефть - со шаерысь вань калыклэн узырлыкез. Сое поттыны но вузаны кулэ асьмеос гинэ. Тӥни соин но парламентын ужаме потэ, азьланьын сыӵе шонаськонъёс медаз луэ шуыса. х х х Авторлэсь. Укмыс ар ӵоже вис карытэк вылӥ быръем ёзын (5 ар Вылӥ Кенешын но 4 ар Кун Кенешын) парламент корреспондент луыса ужаменым, сюлмын шӧдӥ-валай кыӵе адямиосты отчы быръёно. Туннэ меӵак вераны быгатӥсько - сыӵе депутатъёс пӧлы пырысал Анатолий Марченко. Со калык сярысь сюлмаськись, адямиосты гажась-яратӥсь кивалтӥсь. Таӵе секыт вакытэ но удыссэ возьыны быгатэ, арысь аре азинске. Сое валады, дыр, Анатолий Владимировичлэсь юанъёсылы валэктонъёссэ лыдӟыса. Соин ик таӵе визьмо адямиос но усто кивалтӥсьёс удмурт парламентын одно ик луыны кулэ. Соос бордысь потоз азьланьын улонмы. Тӥни соин ик юн оскыса верасько, Грах но Кизнер калык Анатолий Марченко понна куаразэ сётӥз ке, ноку уз янгыша. Со бырйисьёсыз понна дырзэ но кужымзэ жалятэк ужалоз, улон-вылонмес умоятон вылысь, ваньзэ лэсьтоз, уката ик гуртоослэсь. Кызьы бен сыӵе адями понна кидэ уд ӝуты, куарадэ уд сёты! Г. РОМАНОВ. 22 аресъем, бызьымтэ зоотехник утча уж. Мыныны соглаш котькыӵе районэ. Вазиськоно таӵе телефонъя: 44-31-07. Василий Смирнов Вордскем гуртэ Бӧлякъёсылы Куке ко, кемалась аръёсы, Каксяос, куашкамъёс, вавожъёс Ветлӥзы татӥысь тэльёсы - Ӧтизы куное пӧйшуръёс. Нюлэсъёс, лёгымтэ сюресъёс, Кыр инты, Йылтышло, Тутчи шур... Нёжалтӥ ӟильырась ошмесъёс Эшъёслы сётӥзы шулдыр гур. Кин поттӥз кыл-куара, оло, Пронь? Со ке ӧз, Микола шуиз, дыр: "Пуксёме, удалтоз татын нянь, Лыктоме, интыез туж шулдыр. Котырак нюлэсъёс - вож кульчо, Тӧлъёслэсь со утёз лудъёсмес. Гырыны ке ӧз лу, вань кукчо, Кудыысь пазьгомы кидысмес". Кемалась - оло нош дауръёс Ортчизы-кошкизы шӧдытэк. Ӝутскизы Ӟозлудын выль юртъёс, Палэнысь юрттэтэз витьытэк. Вуж ульча, Выль ульча но Нюрсьӧр Луизы вазенгес бускельёс. Жингырто Выль ульча но ӝӧк сьӧр, Шулдырто, кырӟало бӧлякъёс. Родняос но кумъёс табере Вавожъёс, куашкамъёс, каксяос. Улондэс асьтэос эскере, Йыгмытгес вамыштэ, гуртоос. 1993 ар. Кезьыт ошмес Ульча пумысь уйпу улын Пӧзе кезьыт ошмес. Солэн ӧрез кутске татын, Аслыз мытэ сюрес. Бызе, бызе дырдыетӥ Чылкыт, юзмыт вуэз. Нунал пӧрат ветлӥ татӥ - Кельшиз бызись ӧрез. Кытчы бызе, кыӵе шуре - Вож шашыос пӧлтӥ? Мон вуылӥ Тутчи дуре - Аслым сюрес шедьтӥ. Муресь кожъёс, паськыт возьёс - Кыӵе чебер шаер! Ува, Вало - тодмо шуръёс, Музъем ӧвӧл куанер. Татын мынам вордскем палы, Гуртын будэм эшъёс. Татысь потӥ калык пӧлы - Шедьтӥ эркын бурдъёс Кытчы гинэ ӧй вуы мон - Кезьыт ошмес дуно. Вузэ юылӥ кӧттырмон - Соин луи кужмо. *** Туннэ кадь ик тодам лыкто на Вордӥськем ульчаысь эшъёсы. Али ке но сюлэмы бӧрдэ на - Ӧд бертэ тӥ, мынам ёзъёсы. Тыл пыртӥ, ву вамен потыса, Кылиды ожмаськон лудъёсы. Тӥ сярысь уно пол малпаса, Бертыкум ӝожомо синъёсы. Тодӥсько, вордӥськем гуртэлы Капчиен ик ӧз сётӥськы нянь. Гыроно луылӥз ошъёсын, Туж шуген пыжылӥз пӧсь табань. Будӥзы нылъёсты, пиосты, Солдатэз-атайзэс адӟытэк, Сое тӥ воштӥды - киосты Ужало табере жадьытэк. 1984 ар. ВАЛЭКТЭ ЮРИСТ СЭРЕГЕЗ НУЭ АДВОКАТ ЛИЛИЯ ШКЛЯЕВА Ваньбур люкон Александр нимо пие Зина кышноеныз ӵош вордӥзы пи но ныл. Люкиськизы. Зина ас сьӧраз басьтӥз нылзэ но уно ваньбурзэс. Собере бызиз мукет воргоронлы. Сашалы кельтӥз пизэ. Пизэ Саша вордӥз кык ар. Отӥяз пизэ но Зина нуиз ас дораз. Миым 2-тӥ сентябре Саша шуак кулӥз. Зина трос бызьылэ солэсь кылем ваньбурзэ басьтон вылысь. Выль картэныз ӵош соос уг ужало но весь юо, ваньбурзэс вузало. Мар кароно таӵе учыре. В. Мошкина. Татын нырысь ик учконо, вал-а Саша пидылэн завещениез. Ӧй ке, солэсь кылем ваньбурзэ законъя люконо. "Валэктэ юрист" сэрегын та ужпумъя валэктон сётъямын ни. Озьы ке но, тодады вайытом Россия Федерацилэн Граждан кодексысьтыз 532-тӥ ёзэтэз (статьяез). Кулэм муртлэсь ваньбурзэ нырысь ик басьто солэн нылпиосыз (вордыны бастэмъёссэ но вераса), кузпалыз но мумиз-бубиз. Пиды люкиськемын вал бере, ог мында ваньбур басьтыны правозы вань пиезлэн, нылызлэн но тӥляд. Со понна тӥ вазиськыны кулэ пидылэн улон интыысьтыз нотариальной конторае. Ченгешонъёс потыку, ужпумез эскере суд. Россия Федерацилэн Семья сярысь кодексысьтыз 69-тӥ ёзэт валэктэ мумы-бубыослэсь правооссэс талан учыръёсты. Озьы лэсьтӥське таӵе учыръёсы: соос нылпиоссэс вордонлэсь но алимент тыронлэсь палэнско ке; ас нылпизэс нокыӵе мугтэк уг басьто ке роддомысь, эмъянъя, вордонъя, социальной юрттэт сётонъя но мукет учреждениысь; умойтэм куто ке мумы-бубыослэсь правооссэс; вӧсь каро ке пиналъёссэс; висё ке алкоголизмен но наркоманиен; нылпиоссылы яке кузпалзылы пумит юри умойтэм уж (преступление) лэсьтӥзы ке. Мумы-бубыослэсь правооссэс озьы ик таланы кулэ суд пыр. Куинь полэс 19 Кыӵе лыдпус тӥ понна тужгес но шудо? Таӵе юанэн Василий Евсеевич Смирновлы вазиськыса, мон ачим ик шуысал: 19. Бен, ӵапак туннэ, 19-тӥ мартэ, солэн вордскем нуналыз. Нош вордскиз со 1919-тӥ арын. Куинь полэс 19. Оло нош куинь полэс шудэз но? Кин тодэ... Бен ачиз Василий Евсеевич тодэ ик, дыр. Со тодэ улонлэсь дунзэ, шумпотонлэсь буёлъёссэ, кӧтӝожлэсь шӧмзэ но. Со сярысь гожъяз но гожъялоз ай книгаосаз... Вавож палась Ӟозлуд гуртысь востэм гинэ пияш заметкаос гожъяны йӧндыременыз школа бере ик редакцие шедиз: нырысь ужаз Нылгалась, собере Вавожысь ёрос газетъёсын. 1939-тӥ ар. Советской Армия. Дальневосточной фронт... Кыкетӥ Украинской фронт... Румыния, Венгрия, Чехословакия, Австрия, Югославия, Болгария... Горд Кизили, ИИ степенё Отечественной война орденъёс, Будапештэз, Белградэз басьтэм понна но мукет медальёс... 1946-тӥ арын лейтенант берытске вордскем гуртаз, куинь толэзь гинэ отын шутэтске, эмъяське но - Ижевске вуэ... Личной делоысьтыз та вакчияк гинэ гожтэм чуръёс сьӧрын - адямилэн быдэс улонэз, секыт адӟонъёс пыр потыса вормемез. Василий Смирнов солань-талань сэрпаллясь сильтӧлъёслы ӧз сётскы. Со меӵак лёгиз ас сюрессэ. 1947-тӥ арын "Советской Удмуртия" газетэ лыктӥз но - пенсие кошкытозяз - 1982-тӥ арозь татысь эшъёсыныз шори люкылӥз вань шумпотонзэ но, кӧтӝожъёссэ но. Литработник луыса кутскиз... Вылӥ партийной школаын дышетскиз. 1965-тӥ арысен сое пыраклы кадь думизы промышленностья, строительствоя но транспортъя отделэз валтӥсьлэн ӝӧкез борды. Редакциын тужгес но секытэз удыс. Соку журналистъёс юн, чурыт куронъёсъя улӥзы, ужазы. Тани, шуом, оломар сямен таӵе чур потӥз: "вузъёсты кулэстэм сярысь постановление" ("вуз дунъёсты" интые). Дежурной редакторлы но мукетъёсызлы "строгий выговор" ляко. Ымнырдэ ке "саптад", шуг вал миськыны... Василий Евсеевичлэсь так но висись сюлэмзэ коскатъязы, куке соос, Гай Сабитовен но Павел Гребинэн куиньназы, Илья Зорин кылбурчиез но врачез пытсэтлэсь мозмытыны курыса, гожтэтэн вазиськизы партилэн обкомаз. Сэрег-мерегъёсысен весь эскерыса улӥзы, кин пыре-потэ Василий Смирновлэн улон но ужан интыосаз. Татын но партвзысканитэк, строгой выговортэк ӧз ортчы. Но берло юнме янгыше уськытэмзэс валазы... Ма но ӧй вал, редакциын 35 ар ужатозяз... Нош тросгес ик шумпотымонэз. Сотэк кызьы кужым тырмытод нуналысь нуналэ уже вамышъяны? Со вакытэ журналистъёс туж бадӟым уж нуизы калык пӧлын: созэ, тазэ валэктонъя, социалистической ӵошатсконэз радъянъя. Со дыре ик ваньзэ сое газетын быдэс бамен возьматоно, мурт понна но гожъяно. Шуом, Игра ёросэ ветлӥд, профсоюз организациослэн кивалтӥсьёсынызы пумиськонэз радъяд - соку ик сёт полоса. 1977-тӥ ар, 31-тӥ октябрь. Автозаводлэн конвейерысьтыз ваське миллионэтӥез "Москвич". Василий Смирнов отын, кияз блокнотэн. Репортажез дась. Дуннеез чеберлыко адӟись муртлы капчиенгес сётӥсько зарисовкаос. Кӧня соосты гожъяз Василий Евсеевич! Коммунистической ужысь бригадаослэн тыршемзы, нимаз-нимаз адямиос сярысь но. Нош очерк секытэнгес вордске. Таиз верослы матын, адямилэн тусбуйыз, сямыз ӟеч усьтэмын мед луоз. Соиз-а, таиз-а потэ перо улысьтыз - В. Смирновлэсь ужамзэ синйылтылӥзы, уно пол премиосын, благодарностьёсын пусйылӥзы. Зэм, трос лул кужымез, йырвизез "сие" газет уж. Ас творчествоедлы мар гинэ кыле на? Озьы ке но, Василий Евсеевич поттӥз куинь книгазэ: "Яратон ворме", "Будо бадяръёс" но "Таӵе со война". Таиз, куинетӥез, ньыль Василийёслэн (Михайловлэн, Никитинлэн, Беляевлэн но Смирновлэн), ож пыр потэм батыръёслэн, огъя книгазы луэ. Нош Василий Смирновлэн повестез нимаське "Инмысь васькем шуд". Бадяр выжыысь но шуыны луысал Василий Евсеевичез. Тодады вае ай М. Ляминлэн "Шудбур понна" повестьысьтыз Бадяровъёсты... Соиз но, таосыз но утемын-вордэмын вавож музъемен. Вало котырысь кезьыт ошмесъёс кыдатӥзы соослэсь ёзвиоссэс. Василий Евсеевич Смирнов, бадӟым, секыт улонэз ке но ортчиз, тусын (мылкыдзэ ум вералэ ни, кылбурамезъя но адске) - учке ай, копак егит. Сабырлы сямыз но сое уте, дыр. Таӵе ик мед улоз вылэм, 80 арессэ пусйыса но. Т. ЧЕРНОВА. Уй ке чечыё, даур но емышо Егит кузпалъёс, быдэс удмурт дуннелы тодмо луэмды потэ-а? Ма, мар удмурт дуннелы гинэ - быдэс дуннелы? Соку кема тунаса эн улэ, ӝегатскытэк "дуре" вуоно даурлы нырысетӥ нылпи. Туннэ нуналэ пичиосты гинэ но уд пӧя ни, нылпиосты лавкаын вузало шуыса. Пушнер улын но, кубиста пӧлын но соос уа! уг каро, тылобурдо но вайыса уг кушты. Нуны вордӥське яратон кидыслэсь. Иське, кышноос, золгес яратэ картъёстэс, нош картъёс ӟырдытгес ??? ӟыгыръялозы кышнооссэс. Британиысь нылкышно врачъёслэн кенешсылэн лыдъямъёссыя, вуоно дауре выжон нуналэ нылпи вайыны мылкыд карисьёс понна тужгес но емышо луоз, пе, 17 март. Визьмо муртъёс пӧлын мукет нуналъёсты но шудоен лыдъясьёс вань. Газетмылэн одӥгаз номераз ми ивортылӥм ни вал, "Комсомольская правда" газетэз лыдӟисьёс чечыё уйзэс 27 мартэ ортчытыны дасясько шуыса. Кинлэсь кылзӥськоно, кин шонергес вера, соизлы ини асьтэос валэктон утчалэ, ог-огдэс яратыса. Тулыслэн шокчемез, шунды сиослэн шуныт пальыштэмзы одӥг уйлы гинэ медаз тырмы вылэм. Яратыса "пӧрам" нунылы вордӥськытозяз но, собере но кулэ анай-атайлэн небыт, шуныт ваземзы, ог-огзэс валамзы. Соку нылпиды кызь одӥгетӥ дауре йыгмыт вамыштоз - визьмогес но, тазагес но, чебергес но луоз. Кин тодэ, та секыт вакытэ тросэз-а дӥсьтоз кыкетӥ, куинетӥ нылпи вайыны. Но вань али кылдэм но али кылдӥсь егит семьяос. Малпаськом, 17-тӥ мартлы ке ӧвӧл, мукет дырлы но мултэс уз луэ куд-ог пайдаё дэмланъёс. Ваньмызлы тодмо, дыр, юыса но тамак кыскыса, таза нылпи уд ворды. Соин ик, кӧня ке нуналлы ке но кортналэ асьтэды со урод сямъёслэсь. Америкаысь тодосчилэн Ф. Блумомлэн кема дыр ӵоже эскеронъёсыз возьматӥзы: нылпи шедьыны тужгес но тупамон дыр ӝытазе дас часысен уйшорозь. Нош Франциысь врач-диетолог Мари Вивьен егит кузпалъёслы чечыё уйзы азьынгес ик зарезь сиёнъёс вылэ выжыны ӵектэ. Со - зарезь кубиста, крабъёс, кальмаръёс, устрицаос, молюскъёс. Кисыосты буш шуиськоды-а? Эн куректэ, ваньзэ тае воштыны быгатэ, пе, чечыен йӧл. Верало на, матысь кусып тупатэм бере, нылкышнолы ӝыны час пала тыбыр вылаз кыллёно - будоз нылпи шедён луонлык. Специалистъёслэн дэмланъёссыя, анай луыны дасяськись нылкышно ассэ чебер арбериосын котыртыны, чебер крезьгуръёсты кылзыны, инкуазен эшласькыны кулэ. Уг яра мултэс керӟе?ъяськыны - нылпилэн лулсэрыз лябӟоз. Уката ик чакласькыны кулэ нылпи шедем бере нырысетӥ кык-куинь арняяз. Со вакытэ палэнтӥське секыт арбериосты нуллонлэсь, секыт ужъёслэсь, эн пыре пӧсь мунчое, эн керӟегъяське. Вашкала ӵыжы-выжыосмы но пинал ваёнлы саклык висъяло вылэм. Пи ке возьмало, кышноен картэн миндэр улазы пурт яке тӥр понылӥллям. Воргоронлэн йыраз изьыям изьы но юрттыны кулэ, пе. Егит кузпалъёсты нырысетӥ чечы уязы сюдо вылэм ӝукен - тросгес нылпи сӥзьыса. Ю тысь, кеньыр - со трос луэ?ез возьматӥсь маке. Семьязы узыр мед луоз, пе, нылэн пиен, ёрмон но ӧсъёсазы медаз йыгаськы. Пиналъёс шоры учконзэс пӧртэм визькылъёс но верало: ӝыт шулдыръяськемед ке потэ, нылпи вордыны тыршы; нуныостэк куректоно, нуныостэк - кыкполэс; нылпиос - коркаез шулдыртӥсьёс. Ми ум ӧтиське трос нылпи вордыны, яратонтэк но медаз вамыштэ со?с та улонэ. Но 2000-тӥ арын 1-тӥ январе пинал вордыны малпаськоды ик ке, та нуналъёсы ини тросгес ӝук сиёно луоды. Асьтэлы юрттӥсь, кивоштӥсь будэтэм сяна, тӥледлы, но, оло, кыӵе ке дуно кузьымен удалтоз. Быдэс дунне дасяське угось 2000-тӥ арысь нырысетӥ нуныез пумитаны. Пӧртэм странаосысь нылпи сиён поттӥсь бадӟымесь фирмаос мылкыд каро сыӵе дано пиналэз дунтэк сюдыны. Куд-ог кунъёсын нырысетӥ нунылы сӥзё ни пӧртэм юрттэтъёс но кузьымъёс. Кин тодэ, оло, "Удмурт дунне" газетэз лыдӟисьёс пӧлысь но кин ке сыӵе шудпуйы нуныез вордоз. Соин ик милям но бере кылеммы ӧз поты сыӵе ужрадлэсь. 2000-тӥ арын 1-тӥ январе вордӥськем нырысетӥ нунылы "Удмурт дунне" газетлэн редакциез кузьманы дасяське нылпи коляска. Вуоно даурлэн нырысетӥосыз ненег пушъетъёсыз мукет кузьымъёсын но пусъемын луозы. Малпаськом, юрттэт сётыны мылкыд карисьёс, спонсоръёс шедёзы. "Нуны-2000" ужрадэз редакция ортчытэ Удмурт Правительствоысь ЗАГС ужпумъёсъя комитетэн ӵош, кивалтӥсез Лариса Лукинская. Ужрадэ пыриськыны мылкыд карисьёслы куронъёсмы таӵеесь: - 31-тӥ декабрьысен 1-тӥ январе выжон уе, озьы ик 1-тӥ январе уйшорозь вордӥськем нуныос сярысь больницаысь справкаез 20-тӥ январёзь возьматоно интыосысь ЗАГС- отделъёсы. Справкаын одно ик пусъемын мед луоз нылпилэн вордӥськон дырыз - часэн но минутэн. Ужрадэз ортчытӥськом бере газетэз лыдӟисьёс пӧлын, ЗАГС-ын ужасьёслы возьматоно на гожтӥськем квитанциез. Асьтэ вылэ ке ӧвӧл гожтэмын, почтаысь яке сельсоветысь печатен бумага куре - гожтӥськем муртэн тӥ ӵош улӥсь ӵыжы-выжыез луиськоды шуыса. Мар бен, одӥгзэ сӥзём на - чечыё уйёсты ческытэсь мед луозы. Л. МАЛЫХ. Абрамов Иван Васильевич Ректор Ижевского государственного технического университета выдвинут кандидатом в депутаты Госсовета по Университетскому округу � 17. Родился в Удмуртии в 1942 году. Трудовую деятельность начинал рабочим машиностроительного завода. Учился в механическом институте и окончил его с отличием. Работал технологом на заводе "Буммаш". Защитил кандидатскую, а затем и докторскую диссертации. Руководил механико-технологическим факультетом. В 1989 году избран ректором Ижевского механического института. В январе 1999 года вновь избран ректором Технического университета. Возглавляет Совет ректоров вузов Удмуртии. Автор ряда крупных научных разработок и изобретений, применяемых на производстве. Основатель авторитетной научной школы. Заслуженный деятель науки и техники РФ. Абрамов - это крупный ученый! Абрамов - это сильный руководитель" Абрамов - это опытный политик! Из программы депутата. В действие, а не в бумаги Законы "Об образовании", "О молодежи", "О культуре" Сохранить и приумножить научный и педагогический потенциал наших вузов Добротные знания и лучшие социальные условия всем, кто учится Справедливое налогообложение в пользу учителей, врачей, студентов, пенсионеров Средства и богатства края под жесточайший контроль Программы экологии, энерго- и ресурсосбережения на службу населению Консолидация всех здравомыслящих сил на пороге ЪЪИ века. Я выбираю Абрамова! "... Ижевский Технический университет и его ректор Абрамов так же надежны, как и наш автомат АКМ!.." Михаил Тимофеевич Калашников, конструктор стрелкового оружия Я выбираю Абрамова! "... Ректор технического университета Абрамов тот редкий тип руководителя, который соединил в себе неуемную жажду нового с бережным отношением к традициям, сохранив удивительную народность своего духа..." Валентин Кузьмич Тубылов, президент всеудмуртской ассоциации "Удмурт кенеш". Я выбираю Абрамова! "... Как кардиолог знаю, что значит для организма сердце. Как политик знаю, что обществу надо сложить сердцем. Ректор Абрамов - сильный и стоящий политик!.." Евгений Германович Одиянков, главный врач Республиканского кардиологического центра. ШӦКЫЧ Мар эшшо кулэ на? - Мар бен, мусое, сидаломы-а кризисэз? - юай мон ӵукна кышноелэсь, вӧзаз койка вылын кыллыись сьӧд чабеен мешокез топ-топ! Вешаса. Мон ачим кемалась выж вылын кӧласько ни. Нош вӧзам шундыберган вӧен бидон сылэ, мешокъёсын пызь кыле. Ваньзэ сое мон базарын вузкарись бусёнлэсь дунтэм дунын басьтӥ вал ай. - Чидалом, нуныкае, чидалом. Тани только эшшо кӧня ке сакыр песок басьтоно вал. - Нош кытчы интыялом сое? Быдэс квартира сиён-юон тырмытэмын ук ни. - Оло балконамы кытчы ке чуртналом? - Мон толон отчы мырдэм-мырдэм мешок картошка интыяй вал. Собере сӥльлэсь, йӧллэсь но чорыглэсь консерва банкаос кӧня инты басьто ни. - Ваннае лэзёно луоз, - шуиз кышное. - Зэм, отчы тылпоттон но сылал интыямын ни вал. - Соку антресоль вылэ пуктон, - дэмлай мон. - Уз пӧрмы: со рисэн тырмытэмын. Одӥг комнатаен квартираямы буш инты ӧз шедьы ни. Книга возён шкафамы Брежнев кивалтон аръёсы басьтэм майтал интыямын, шифоньере - мисьтаськон порошок. Нош кухняямы банкаен сылалтэм сиёнъёс но варенья тыремын. - Улон интымы чылкак складлы укша ук! - воже потыса вази мон. - Я, ӝоггес малпа, уже дыртӥсько... Э-э, туннэ милям июль понна уждун сётом шуизы. Ӵапак мешок сакырлы тырмоз. Ӝытпал кышное жингыртӥз но шумпотыса ивортӥз: мешоклы инты шедьтӥ, пе. - Сое асьмеос туалетэ пуктом! - тӥни кызьы! - ма отын асьмелэн вермишелен ящикъёсмы кыллё ук... - Нош сое асьмеос унитаз вылэ интыялом. - Вождэ эн вай, мусое, но кызьы улом со "прибортэк"? - Кызьы ке улом. Бускельёсмы доры ӵемгес куное ветлом. Тон умойгес малпаськы ай: та акылес кризисэз чидан понна мар эшшо кулэ на меда? В. Владимиров. Мылкыддэс ӝутоз кырӟан Таяз кӧс нуналэ, 20-тӥ южтолэзе (мартэ), шутэтсконъя но культурая "Ударник" юртын (азьвыл "Ударник" кинотеатрын) ортчоз удмурт кырӟанлы сӥзем ӝыт. Люкаськем калыкез шулдыртозы шаерысьтымы культурая училищеысь "Инвугур", Удмурт кун унивреситетысь "Чипчирган", "Восточный" культура юртысь "Инвожо" ансамбльёс, Ижысь 56-тӥ но 69-тӥ школаосын дышетскись пиналъёс. Огдыре ик луоз Удмурт Элькунысь Кун Кенеш депутатэ ӵектэм адямиен пумиськон. Ужрал кутскоз нуназе бере кык часын. Е. РОМАШОВА. ШӦКЫЧ Шудонэ пыриськод - скал дундэ келялод Ижысь Северной рыноке мон ӵем гинэ пырасько. Мар шуод, кисыед ке зӧк, отысь мар но со басьтыны луоно ик. Дунъёс но магазинъёсын сярысь улӥынгес. Озьы ке но, та базарысь мон котьку ик секыт мылкыдын кошкисько. Мыным чылкак валантэм: малы меда асьме крестьян калыкен будэтэм бакча сиёнэн вузкаро Кавказысь лыктэм адямиос. Вузкарыны быгатэмысь дугдӥм ни шат? Кытӥяз возьыт но луыны кулэ, дыр: палэнысь адями машинаяз пуксе но гуртъёстӥмы ворттылэ, дунтэм дунын бакча сиён, сӥль басьтэ но сое городын кык полэс дунын вуза. Асьмеос нош солэсь вуззэ, черодын сылыса, резь-куаж басьтӥськом. Кавказ палась куномы киоссэ гинэ посэ. Со ачиз (адӟемды вань, дыр) вузкарыса уг пукы, егит нылъёсты медъя. Мон сямен, таӵе югдур асьмеды ултӥя, асьмелэсь пӧрмостэм луэммес возьматэ. Нош рыноклэн дирекциез таӵе югдур шоры чиньы пыртӥз учке, шӧдске. Кылем арня вискын вал со. Рыноке пырон азьын ик зар-зар бӧрдыса сылэ арлыдо кышномурт. - Матушки, - паймыса со котыре люкасько басьяськисьёс, - мар луиз? - Мар луиз? Ма тӥни со нылашлы копак вань пенсиме келяй, - "Спринт" лотереяен вузкарись шоры возьматэ кенак. - Пӧрмостэм тон, малы отчы нырдэ чуртнано вал? - куарето сое кышноос. - Бен, мукетъёсыз трос коньдон уто ук, шудэмзэс учкыса, мынам но трос коньдон утэме потӥз. Билетсы со манет гинэ сылэ. Одӥгзэ басьтӥсько - уг уты, кыктэтӥзэ басьтӥ - нош ик шудтэм билет шеде. Собере келям коньдонме берыктоно шуыса, кисые бушатозь шудэмысь дугдыны ӧй быгаты ни. - Э-э, кенаке, кенаке, асьмеос кыкнамы ик иське шузиесь вылӥськеммы, - вераськонэ пыриське егит воргорон. Тон пенсидэ келямед, нош мон быдэс скал дунме со нылашлы ик келяй ук. - Тамаша тонэныд, - пайме калык, - кышноедлы табере мар шуод ини? Юн куректэмзэ воргорон ватыны тырше. - Скалмы, гондыр быдӟа лусьтро сьӧд пуныез адӟыса, быжзэ урдӥз но был да нет пегӟиз, - шуо. Нош аслаз бӧрдэмез ик потэ. Рынок азьын, зэмзэ но, егит ныл "Спринт" билетъёсын вузкаре. Ог дасо егит пиос но нылъёс сое шакалъёс кадь котыртӥллям. Ваньзы ик соос сю манетъёсын коньдон уто. Соос шоры учкыса, куд-огезлэн зэмзэ но шудонэ пыриськыны мылкыдыз ӝутске. - О-о, тӥ ӧжытак гинэ ӧд утэ, эшшо, но эшшо басьтэ на, одно утоды, - лӧпкытъя билетэн вузкарись мӧйы воргоронэз... Ӵуказеяз мыным нош ик та базаре мыноно луиз. Пайми: лотереяен шудон котыре толлоосыз ик нылъёс но пиос люкаськиллям. Тӥни сыӵе амалэн калыкез шудонэ кыско но пӧяло та егитъёс. Жаляса верано луэ, соослэн четлыказы туж капчиен шедё гуртысь вузкарыны лыктэм воргоронъёс. Соос сокем вожомыса шудыны кутско, скал дунзэс гинэ ӧвӧл, корка яке юртъер котырзэс но келямзэс уз шӧдылэ. Эн оске тӥ таӵе шудонъёслы. Ваньмыз со малпамын огшоры ужась калыклэсь берпуметӥ коньдонзэ кыскон понна. Берло дыре "Спортлото" предприятилэн киоскъёсыз трос пӧртэм лотерейной билетъёсын вузкаро. Калык верамъя, отын дышиллям ни билетъёсты аспӧртэмлыко амалэн эскерыны. Со зэм ке, шудоосыз билетъёс калык кие шедёзы шуыса, оскон чик ӧвӧл. Т. НИКОЛАЕВ. Жилищно-коммунальной удысын ужасьёслы Сюлмысьтымы ӟечкыласьком та удысын ужасьёсты, специалистъёсты но ветеранъёсты профессиональной праздникенызы. Жилищно-коммунальной удыс калык хозяйствоын котьку но бадӟым инты басьтылӥз, со бордысь но потэ экономикалэн кужмо луэмез, калыклэн огсыр улон-вылонэз. Экономикаын шуг-секытъёс шоры учкытэк, удыслы тырмыт коньдон ке но уг висъяськы, пунэм тыронъёс будо ке но, юртъёсы но квартираосты азьло кадь ик лыктэ ву но шуныт, тыл но газ, выльдӥсько улон интыос, вытъёс. чылкыт луо городъёс, будосъёсын шобырско ульчаос но азбаръёс, тупатӥсько сюресъёс. Удмурт республикаысь жилищно-коммунальной хозяйстволэн городъёсысь но ёросъёсысь ёзъёссылэн ӟеч ужамзы сярысь нуналмысь сюлмаське кызь сюрс муртъем коллектив. Тӥляд сюлмысь тыршемды но уждэс яратэмды, вылӥ быгатонлыкъёсты но зэмос кузё луэмды понна мур гажаськом но тау кареммес вераськом. Жилищно-коммунальной хозяйсвоын вань ужасьёслы но семьяоссылы сӥзиськом юн тазалык, шудбур, ӟеч малпанъёсты одно ик мед быдэсмозы. Удмурт Республикаысь Кун Кенеш. Удмурт Республикаысь Правительство. Дорогие друзья! За последние 10 лет количество специальностей в нашем университете удвоилось, появились новые факультеты. Серьезным шагом на пути организации многоуровневой подготовки специалистов стало открытие в 1998 году Институт непрерывного профессионального образования. Назначение его - организация многоуровневого обучения в Иж ГТУ студентов и слушателей на внебюджетной основе. Ведущими учеными университета разработаны оригинальные программы непрерывного обучения студентов по интегрированным учебным планам, позволяющие после окончания курса среднего специального образования продолжительность обучения по избранной специальности, чтобы получить высшее образование в сокращенные сроки. Университет получить в добавление к лицензии Госкомвуза РФ на высшее, послевузовское и дополнительное образование лицензию Министерства народного образования Удмуртской Республики на образовательную деятельность в сфере среднего профессионального образования. Приглашаю вас учиться в Ижевский государственный технический университет. И. В. Абрамов, Ректор - доктор технических наук профессор, академик. Первая ступень на пути к высшему образованию Специальности и специализации среднего профессионального образования (СПО) ИжГТУ (формы и сроки обучения) директор ИНПО Олег Корнилович Шибанов, кандидат филосовских наук, заслуженный журналист УР. Факультет "Менеджмент и маркетинг" экономика бухгалтерский учет и контроль очн. 1г.10мес. заочн. 2г. 10мес. - менеджмент очн. 1г. 10 мес. заочн. 2г. 10 мес. - коммерция очн. 1г. 10мес. заочн. 2г. 10мес. - маркетинг очно. 1 г. 10 мес заочн. 2 г. 10 мес. Робототехнический факультет - экспертиза качества очн. 1г.10 мес. потребительских товаров заочн. 2г. 10мес очн. 2г. 10 мес. - техническое обслуживание заочн. 2г. 10 мес. и ремонт автомобильного транспорта заочн. 3г. 10мес. - дизайн очн. 2 г. 10 мес. Машиностроительный факультет - автомобилестроение очн. 2г.10мес. заочн. Зг. 10мес. - экспертиза и маркетинг очн. 2г. 10мес. Инженерно-строительный факультет - строительство и эксплуатация очн. 2г.10мес. зданий и сооружений Гуманитарный факультет - правоведение заочн. 1г. 10 мес. заочн. 2 г. 10 мес. Приборостроительный факультет - сети связи и системы коммутации очн. 2г. 6 мес. заочн. 2г. 6мес. - технич обслуживание и ремонт очн. 2г. 10мес. радиоэлектронной техники заочн. Зг. 10мес. - технич. обслуживание и ремонт очн. 2 г. 10 мес. охранных систем банков и офисов заочн. 3 г. 10 мес. - автоматизир системы обработки очн. 2г. 10мес. информатика и системы управления заочн. Зг. 10мес. Факультет информатики и вычислительной техники - выч. машины комплексы, системы очн. 2г.10мес. и сети заочн. Зг. 10мес. - программное обеспечение вычислительной очн. 2г.10мес. техники и автоматизированных заочн. Зг. 10мес. систем. Быръёнъёс азьын: малпанме верало Городын улӥсьлы гуртоос кулэ меда? Монэ туж шугъяськытэ городын улӥсьёслэн одно ик районэ, гуртэ депутатэ мерскыны выремзы. Сыӵеос азьвыл быръёнъёс дыръя трос гинэ ортчизы, нош мар-о асьме понна лэсьтӥзы? Тӥни ма сярысь малпаськоно 4-тӥ апрелёзь, кияд бюллетень кутытозь. Удмуртъёс парламентын ялан ӧжыт но ӧжыт кылё. Малы? Асьмеос озьы ужаськом, мукетъёссэ соос интые бырйыса. Россиын али бадӟым уж нуиське губернизация ортчытон пумысен. Странамес 10-12 губернилы люкизы ке, асьмеос губерниын 3-4 процент сяна ум луэ ни. Кин-о соку таӵе ичи лыдъем калыклэсь куаразэ кылоз на? Депутатэ быръёно асьме выжыысь потэм визьмо нылъёсмес, пиосмес. Мед соос ужалозы калыкмы понна, мед ӝутозы гурт хозяйствоез, мед валалозы нянь будэтӥсьлэсь, музъем гырисьлэсь, скал кыскисьлэсь, пудо куайытӥсьлэсь сюлэмшугъяськонзэс. Мон куараме сёто асьме музъем вылын улӥсь но ужась удмурт воргорон понна. А. ЗОРИН, Селта черкогуртын улӥсь. Факультет довузовской подготовки Декан - кандидат технических наук доцент, заслуженный работник народного образования УР Фаил Файзиевич Фаттиев Факультет довузовской подготовки (ФДП) организован в составе ИжГТУ в 1995 году для координации всех видов и форм довузовского образования и осуществления этого образования. На факультете ежегодно проходят подготовку до 1000 человек. В 1996 году в ИжГТУ было зачислено 329 выпускников ФДП, в 1997 г. - 447, в 1998 г. - 343. В состав факультета входят: подготовительное отделение, подготовительные курсы с филиалами в г. Сарапуле, Можге, Вятских Полянах, п. Балезино, п. Ува, центр дистанционного довузовского образования, региональное Представительство Центра Тестирования. ФДП располагает современной технической базой и средствами телекоммуникации (15 персональных компьютеров, объединенных в локальную сеть, выход в Интернет, электронная почта, факс, ксерокс, учебное телевидение). На факультете работают 10 штатных сотрудников и более 50 совместителей, в составе которых преподаватели кафедр физики и математики ИжГТУ и учителя школ г. Ижевска. Постоянно расширяется спектр предоставляемых факультетом дополнительных образовательных услуг (индивидуальные подготовительные курсы, дистанционная довузовская подготовка, планируется с 1999-2000 учебного года довузовская подготовка учащихся 9-х и 10-х классов), повышается уровень учебно-методической работы, внедряются в учебный процесс современные образовательные технологии. Удмурт Республикаысь Правительстволэн Тӧроезлэн Вазиськонэз Гажано эшъёс! Республикамы понна туж бадӟым инты басьтӥсь быръёнъёслэн матэктэменызы валче, Праивтельстволэн Тӧроез луыса вазиськеме потэ депутатэ ӵектэм вань кандидатъёслы, соослэн дурбасьтӥсьёссылы но иворъёсты вӧлмытӥсь ёзъёслы. Быръёнъёс дыръя палэнскыны уг луы ог-огедлы ваче пумит сылонлэсь. Озьы ке но, мон юн оскисько, нюръяськонэз адямиез ултӥятэк но нуыны луэ шуыса. Шуо, политика - кырсь уж. Озьы со ӧвӧл. Политика луэ сыӵе, кызьы лэсьто сое политикъёс. Уно адями бордысь потэ, кытчы вуттозы вуоно быръёнъёс - огкылэ яке ог-огеныд нюръяськонэ. Оскисько, бырйисьёслы кандидатъёс пӧлын керетонъёс чик но кулэ ӧвӧл. Кулэ мукетыз: валано кандидатъёслэсь программаоссэс но шонер быръён лэсьтоно. Депутатэ кандидатъёслы вазиськыса курисько: быръёнъёсъя кампаниез нуоно ог-огдэ ултӥятэк но сьӧдматэк. Огкылэ вуон но ог-огдэ валан гинэ юрттозы республикамес ӝутыны, кудзэ уг яра люкыны "тӥляд" но "милям" округъёсмылы. Вазиськеме потэ журналистъёслы но. Зэмлыко но чылкыт нюръяськон тӥ бордысь потэ, тӥ сое тодӥськоды. Соиз ик профессионализм но югдурез шонер возьматон сярысь вераськонэз мултэсэн лыдъясько. Тӥляд быгатыса ужамдылы мон осконмес ноку ӧй ыштылы, нош улонэз шонер возьматон - со тӥляд гражданской позициды бордысь потэ. Одӥгзэ, мае ялан курисько но котьку куро - законъя улыны. Удмурт Республикалэн Правительствояз котьку но умоен учко республикаямы ортчись ужрадъёслы журналистъёслэн мургес иворъёс сётыны тыршон мылкыдзэс. Сыӵе иворъёслэн кулэлыксы быръёнъёс дыръя уката но будэ. Правительстволэн Тӧроез луыса быръёнъёсы пыриськем муртъёсты юн курисько журналистъёс вылэ нокыӵе зӥбет лэсьтытэк ужаны. Берлоез. Выльысь пусйисько на: уждун тырон, тулыс бусы ужъёслы дасяськон , предприятиосты ужатон ужпумъёсты но республикамылэсь 1999 арын азинскемзэ Правительство ялан эскерыса возе. Удмурт Республикаысь Правительстволэн Тӧроез П. Н. Вершинин. Министерство общего и профессионального образования Российской Федерации ИЖЕВСКИЙ ГОСУДАРСТВЕННЫЙ ТЕХНИЧЕСКИЙ УНИВЕРСИТЕТ Институт непрерывного профессионального образования Лицензия � 16Г 405 Госкомвуза России от 06.03.94 г. Лицензии � 394, 491 МНО УР от 25.03.98 и 25.11.98 г. Уважаемые выпускники 9-х классов! Ижевский государственный технический университет приглашает Вас стать студентами ИжГТУ и параллельно с продолжением обучения в 10-11-х классах получить среднее специальное образование по специальностям и специализациям: � правоведение; � дизайн; � экономика, бухгалтерский учет и контроль; � менеджмент; � маркетинг; � коммерция; � экспертиза качества потребительских товаров; � автомобилестроение; � экспертиза и маркетинг оружия; � техническое обслуживание и ремонт автомобильного транспорта; � сети связи и системы коммутации; � техническое обслуживание и ремонт радиоэлектронной техники; �техническое обслуживание и ремонт охранных систем банков и офисов; � вычислительные машины, комплексы, системы и сети; � информатика и системы управления; �программное обеспечение вычислительной техники и автоматизированных систем; � строительство и эксплуатация зданий и сооружений. После получения диплома о среднем специальном образовании Вы можете за 3-4 года получить в ИжГТУ высшее образование по соответствующей специальности. Профессорско-преподавательский состав университета обеспечивает повышенный уровень подготовки специалистов. Начало занятий - во второй половине августа 1999 года. Подробности по телефону: 59-24-65, корпус 1, комн. 101. Суредаз - зарни тютюос Толэзь ӵоже кыстӥськиз Пичи Пургалась лыдӟон коркан В. П. Кашинлэн суредъёсыныз адӟытон. Можгалась суредасьлэн ужъёсыныз тодматскыны трос калык кожаз татчы. Мае учкыны но вань угось. Гурт инкуазь, ужась калык - ваньмыз мур малпаськонэ уськыто. Мон но кема учки суредъёссэ. Тодэ лыктӥзы пичи дыръёс. Тани огаз ужаз суредась возьматэм зарни комокъёсты - тютюосты. Соос али ик улӟозы но бурдъёсынызы тюр-р! шонаса кошкозы кадь. Мукет суред вылын - Анай. Чебер, таза пиоссэ со сюдэ. - Жаль,- вера В. П. Кашин,- мемее та суредме адӟыса ӧз вутты. Адӟысал ке, синвуосыз пызьырасалзы, дыр. Вунэтымтэ суредась анаезлэсь чибориё кышетсэ но. Лякытак шобыртэ со нылкышнолэсь пельпумъёссэ. Син шорам йӧтэ туж йӧно, веськрес мугоро, пуштрес йырсиё удмурт дэремен дӥсяськем нылкышно. Со кылбурчи Татьяна Чернова. Кашин туж быгатыса суредам кылбурчилэсь туссэ - возьматэм солэсь чеберлыксэ. Кашинлэн суредъёсыз мыным туж матын потӥзы. Шӧдӥське, художник гуртын будэмын шуыса - та тема солэн ужъёсаз валтӥсез луэ. Суредъёсыз азьланяз но калыкез паймытыны мед быгатозы, кунгож сьӧры но мед вуылозы. В. ВАСИЛЬЕВА. Пичи Пурга. ШӦКЫЧ Тылпу но ӟускиос Вордӥськон секыт нунал, шуо калыкын. Марым, макмырен курадӟисьёслы гинэ озьы потэ, дыр со. Нош Ижысь Буммаш микрорайонын улӥсь Зверевъёслы вордӥськонэ выжон уе юонэн йырин ӧй вал. Ольга Матвеевна арня нуналэ ужаз, Григорий Александрович вуж "Москвиченыз" пассажиръёсты нуллӥз. Жадизы. Ӝоген умме усизы. Бер уин пенсионеръёслэсь уйвӧтсэс куспетӥ кариз синмез вандӥсь ӵын. Кышно палазы "горд атас" кузё сямен шаянъяське ни вал. Ӵын коридоре но потыны кутскиз. Кузпалъёс площадкаязы потӥзы, бускельёссылы вазиськизы. Ӝоген тылпу кысӥсьёс вуизы но... ӝуась юрт доры ӝогак гинэ матэктыны ӧз быгатэ. Лымы укыр трос люкаськем. Ярам, кызьы но озьы быгатӥзы ик пагӟазэс сизьыметӥ этажозь ӝутыны. Но со куспын кухня но, лоджия но, отысь ваньбур но пеньлы пӧрмизы. Нош тылпу малэсь потэм меда? Электропроводъёс ваче лякиськиллям. Замыкание шуо сое электрикъёс. Берло кык арзэ ни Зверевъёслэн юртазы тупатъян ужъёс ӧз лэсьтӥське. Липет йылысь зор но шунам лымы куинетӥ этажозь вуо ни вал. Зэм, со электропроводэз но коттылӥз. Та тылпу азьын езъёс ваче йӧтылӥзы вал ини. Электрикъёс сое тупатыса кошкизы ке но, лымы шунамысь ӧз дугдылы. Нош улон юртъёсты возёнъя управлениын ужасьёслы нокыӵе ик уг поты, лэся. Липет йылысь лымы шуна, ваньбурез коттэ. Собере липет пумын кык метр кузьдаесь ӟускиос, йӧ люкъёс ошиськемын. Мотри, чакласькыса ветлэ. А. ЕМЕЛЬЯНОВ. Быръёнъёс азьын: верасько малпанме Егитъёслы чупресгес луоно Синвуосын сямен, шапыкен-шапыкен вия шунась лымы. Матэ вуэ республикамылы выль власть быръён нунал. Кин меда табере кивалтоз Удмуртиен, кинъёс ужалозы законъёсты кылдытон бордын? Та нуналъёсы ӵукнаысен ӝытозь мынэ ни депутат луыны мылкыд карисьёс пӧлын нюръяськон: кудӥз уӵы кадь чирдэ, кудӥз мӧйы ӟичы выллем гожеръяське. Соослэсь вераськемзэс кылзыса, мынам малы ке но тодам лыктэ пичи дыръям адӟем одӥг суред. Эшеным школаысь бертӥськом вал. Шӧдтэк шорысь парсь вордон гид палась шимес кесяськемез кылӥм. Октэм укноетӥ кечырскыса учкиськом, - нош отын! Паймод но шуэрскод: тусе кисьтэм сиён понна комакъёс ог-огзэс йыръё. Куд-ог кандидатъёсмы но мыным ӵапак сыӵегес пото - власть доры вуон понна, кыӵе амал но уг шедьто! Вань пӧлазы ог-огзы вылэ пож ву кисьтасьёс но. Мар-о ватонэз, самой сыӵеосыз ик, "кырсь киын" ужасьёсыз, депутат луыса, соку ик ас котырзэс юнмато, калык азьын сётэм ӵектонъёссэс вунэто. Пыкылэме потэ егитъёсмес но. Тросэз соос быръёнъёсы уг ветло. Нош кин ӟечгес тодэ туала улонэз? Кинлы нюръяськоно асьсэлэн правооссы понна? Мӧйыос вань быгатонозэ лэсьтӥзы ни. Табере - егитъёслэн дырзы. Соослы чупресгес кариськоно. В. ВАСИЛЬЕВА, Пичи Пурга черкогуртын улӥсь. Кизнеръёслы юрттозы геологъёс Шудтэм ик, лэся, асьмелэн элькунмы. Химической ож тӥрлык пӧлысь Удмуртие ог куиньмос люкетэз интыямын. Огъя запасысь 14,2 процентэз Кизнер посёлокын кылле - отын 5680 тонна зарин, зоман, ВХ кышкыт суретъёс. Валамон ни, макем вазьгес мозмытскозы кизнеръёс та кулэтэм ваньбурлэсь, сокем ӝоггес соос каньылак шокчыны быгатозы. Ужпум капчи ӧвӧл. Но сое быдэстыны луоз. Паймоно кадь, но та ужын шӧдскымон инты басьтыны чаклало республикаысьтымы геологъёс. Кӧня ке ар талэсь азьло Кизнер но Грахово ёросъёслэн кивалтӥсьёссы "Удмуртгеология" огазеяськонэ вазиськизы ас кулэяськонъёссылы му вӧй висъяны куронэн. Кылзы тупаз. Но ваче кусыпъёс соин ӧз йылпумъяське. Малпамтэ шорысь потӥз химической ож тӥрлыкез быдтонэ пыриськон луонлыкъёс сярысь кылпум. Кизнерысь ядъёсты кык вакытэн быдтыны чакламын. Нырысез вамыш - гидролиз, кыкетӥез - кылем- мылемъёсты битумен шобыртон. Мукет сямен вераса, та ужын кулэ луоз битум. Тае лыдэ басьтыса, кичӧлтӥсьёслэн огазеяськонзы, кудаз пыриз "Удмуртгеологилэн" валтӥсь директорез Владимир Колодкин но , ӵектӥз та ёросын ик му вӧй поттонэз радъяны но битум лэсьтонъя завод ӝутыны. Удмуртиысь му вӧй поттӥсь вань предприятиос Решетниково месторождениысь нефтез кыскыны пумит луизы, со кыдёке но сюрестэм азе интыяськемен. "Удмуртгеология" гинэ дӥсьтӥз та уж борды басьтӥськыны. Уго татын тазьы лыдъязы: му вӧез кытчы ке палэнэ нуллоно-келяно но кема утёно уз луы бере, месторожденилэн рентабельностез ӧжытак ӝутскоз. Кызьы пусйиз Владимир Колодкин, ужпум ёрос но республика понна туж кулэ луэ, ож тӥрлыкез быдтон шоры "Удмуртгеология" мукет синмын учке, та учырын со аслэсьтыз экономикаын кулэяськонъёссэ но палэнтыны но дась. Но геологъёс уг малпало му вӧй но битум сётонэн гинэ буйгатскыны. Кызьы тодмо, Удмуртилэн кыдёкысь ёросъёсы, пӧлазы Кизнер но, ёрмо электрокужымлы. Соин ик юан кылдэ: кытысь шедьтоно заводэз ужатымон энергия? Геологъёслэн та пумысен но малпанзы вань. Решетниковолы матысь Алнаш районын соос шедьтӥзы азотной газэн узыр инты. (Ай Кизнер 1росын но, оло, со шараямын луоз). Али кылдытэмын сыӵе технология, кудӥзъя музъем пушкысь та газэз электрогенераторъёсты бергатон уже кутыны луоз. Со сяна, "Удмуртгеологиын" малпан вань, огдыре кык кечез кутыны. Электрокужым поттэмен артэ луонлык вань азотной газэз кизермытыны но бӧрысь сое эмъяськон, вузкарон удысъёсын, гурт хозяйствоын кутыны. Озьы та музъем узырлык ёросын улӥсьёслы но шӧдскымон пайда вайысал. Мукет ласянь но геологъёс быгатозы люкам опытсэс ядъёсты быдтон уже кутыны. Уго та удыслы кулэ луись объектъёсты пуктон азьын котыр ласянь эскеронъёс ортчытоно луоз. Пыр-поч учкозы-чаклалозы муосты, музъем сӥосты, соку ини музъемез портылытэк номыр уз пӧрмы. Россия Федерациысь Обороная министерстволэн ыстэм муртъёсыз республикаысьтымы геологъёслы та пумысен вазиськизы ни. Музъем узырлыкъёсты утчасьёсмы быгато тупатэм интыын инкуазез эскеронъя рос-прос экспертиза ортчытыны. Со понна предприятиын вань туала куронъёслы тупась лабораторизы. "Удмуртгеологилэсь" пӧртэм удысъёсын ассэ ӟечен возьматэмзэ адӟыса, амалтэк юан кылдэ: вань меда та огазеяськонэн быдэстыны луонтэм уж? Шонерзэ вераса, ӧвӧл кадь. Удмуртиысь геологъёс котьмалы дась. Д. ВОСТРОКНУТОВ. Кизнерын химической ож тӥрлыкез быдтон ужпумез эскеронлы сӥзем кылзонъёс дыръя. Специалистъёс ялан чакласа возё ядэн цистернаослэсь борддоръёссэс. Р. ХАЙДАР Визьнодан Скетч Шудӥсьёс: Анаез. Нылыз. Зыл-зыл чузъяське корка пушкын шулдыр гур. Анаез керттӥськыса пуке, нылыз - пужыятске. Анаез. Бызёно ни вал тыныд, нылы. Уть, пужыятскемъёсыд ик быдэс сандык люкаськиз ни. Ачид но кемалась усьтӥськем мак сяська выллем кисьмамын. Тазьы пукыса, чебередлэсь тӧлӟемзэ шӧдытэк но кылёд. Нылыз. Туала арын кинлэн чыртыяз озьы гинэ ошиськод ай, анай? Анаез. Тани со изнэс йырсиед ик ӝыны ар дорамы ветлэ ни. Только огпол но сяськаен я саламен лыктэмзэ ӧй адӟы. Татын гинэ сиське но кадь. Солэн коньдонэз ӧвӧл-а, мар- а? Нылыз. Мар тон, анай... Кызьы-озьы уксёез уз луы?! Толон гинэ сю манет сётӥ вал ай мон солы. Анаез.Али ик сильсьӧрад пуксе бере, куз уз луы со тыныд. Нылыз. Ӝыны ар уж утчасько шуэ со. Анаез. Тыныд, нылы, луӵшо Ипполитлы бызьыса умой луоз. Укыр сабырлы адями. Котькытысен учыртэмезлы быдэ вазиське, тон сярысь юалляське. Нылыз. Мар шуыса Ипполитлы бызём мон? Анаез. Малы озьы шуиськод, нылы? Нылыз. Укыр мӧйы ни ук со. Анаез. Мар бен луоз? Тыныд сое пӧзьтыса сиёно ӧвӧл ук. Со понна тыро-буро улод, курадзӧнэз-куректонэз уд тоды. Нылыз.Озьы ке шат... Юстицияя министерство ивортэ Удмурт Республикаысь Юстицияя министерство ивортэ: 1999-тӥ арын 5-тӥ апреле юртъерлы но соин сделкаос ортчытонлы правоосты пусъёнъя ужрадъёс быдэсъяны кутско "Удмурт Республикаысь Юртъерлы но соин сделкаос ортчытонлы правоосты кун ласянь пусъёнъя регистрационной палата" юстицияя учрежденилэн Сарапул но Пичи Пурга управлениосыз. Сарапул управление юртъерен герӟаськем ужрадъёсты быдэсъялоз Сарапул городъя но ёросъя, Каракулино ёросъя, адресэз: Сарапул город, Электрозаводской ульча, 1-тӥ юрт. Пичи Пурга управление юртъерен герӟаськем ужрадъёсты быдэсъялоз Пичи Пурга но Кияса ёросъёсъя, адресэз: Пичи Пурга черкогурт, Пушкин ульча, 23-тӥ юрт. Л. КРИВОПУСТ, Удмурт Республикаысь юстицияя министрлэсь ужзэ быдэсъясь. Кун Кенешысь иворъёс Кылем субботае, 27-тӥ мартэ, Кун Кенешлэн Тӧроез Юкаменск но Красногорск ёросъёсын пумиськылӥз хозяйствоослэн кивалтӥсьёсынызы, дышетӥсьёсын, прессаын ужасьёсын но мукет калыкен. Промышленностез азинтон ужпумъёс сярысь веракуз, Александр Волков пусйиз, гуртын вуз поттӥсьёслэсь данзэс ӝутоно шуыса. Кун Кенешын кутэмын ни етӥн мертчанэз умоятонъя программа. Берло кык ар куспын республикалэн бюджетысьтыз агропромышленной секторе висъям коньдон будӥз сизьымысен дас процентозь. Быръёнъёс пумысен мылкыдзэ Кун Кенешлэн Тӧроез тазьы вераз: "Власть - со сиськон инты но, мудор но ӧвӧл, со ужан тӥрлык. Асьмелэн ӵуказе нуналмы потоз со бордысь, кин кие та кужмо тӥрлык шедёз. Оскисько, Кун Кенеше сюрозы зэмлыкез гажась, асьсэды умой возьыны быгатӥсь адямиос". х х х Удмурт Республикаысь Кун Кенешлэн Тӧроез Александр Волков 29-тӥ мартэ пумиськылӥз республикаысьтымы общественной огазеяськонъёсысь адямиосын. Пумиськонын Александр Волков Кун Кенешлэн ньыль ар ӵоже ужамезлы йылпумъянъёс лэсьтӥз. Со пусйиз: республикаысь вылӥ законодательной органлэн ужаз валтӥсь инты басьтӥз властен оскымон кивалтон, ужед понна кыл кутыса тыршон. Со ик луэ кужмо государство но пайдаё ужась экономика кылдытонлэн инъетэз. Александр Волков бадӟым вормонэн лыдъя Удмурт Республикалэсь ортчем ньыль ар ӵоже экономикаын азинсконъёссэ, со та ласянь Россия Федерациысь улосъёс 26-тӥ интые ӝутскиз. "Озьы ке но, самой пайдаё ужась государство но унозэ ужпумъёсты огназ быдэстыны уз быгаты,- шуиз удмурт парламентлэн кивалтӥсез. - Кунэн кивалтон ёзъёслы кулэ оскымон, кужмо адямиос, общественной организациос". Кун Кенешлэн Тӧроез вераз, государство но общество ӵош ужанзэс паськытатыны кулэ, республикаямы улӥсьёслэсь улонзэс умоятон понна, выль но выль амалъёсты утчаса. х х х Удмурт Республикаысь Кун Кенешлэн Тӧроез Александр Волков 30-тӥ мартэ Москвае кошкиз. Со отын Федерацияя Кенешлэн ужаз пыриське. Кенешын эскерыны чакламын кызьлэсь уно ужпум. Соос пӧлын таӵе Федеральной законъёс: "Нимаз адямиослэн ваньбурзылы налог сярысь", "Акцизъёс сярысь" Законъёсы ватсанъёс но воштонъёс пыртон сярысь". Озьы ик кылзэмын луоз Россия Федерациысь Правительстволэн химической ож тӥрлыкез быдтонъя Конвенцилэн быдэсъяськемез сярысь докладэз, озьы ик парламентарийёс тодматскозы Россия Федерацилэн Президентэзлэн "Химической ож тӥрлыкез быдтон сярысь" программаезлэн уж вылын быдэсъяськеменыз. Валамон ини, соос одно ик эскерозы НАТО-лэн Югославия вылэ урдскемез сярысь югдурез. Та ужпумез Федерацияя Кенешлэн заседанияз эскерыны пыртон сярысь куриз Удмурт Республикаысь Кун Кенешлэн Тӧроез Александр Волков но. Удмурт Республикаысь Кун Кенешлэн пресс-службаез. Депутатэ кандидатъёс Владимир Перевозчиков: "Кутскем ужме котьку быдэстӥсько" Воткинскын Владимир Перевозчиков - одӥгез тодмо егит кивалтӥсь. Солы 35 арес, нош "Коммунальные электрические сети" (МП КЭС) муниципальной предприятиын 7-тӥ арзэ директор луэ ни. Со вал улон юртъёсъя городской управлениын инженер, валтӥсь инженер но тӧро. МП КЭС - татын огсыр усто ужась коллектив. Предприятие котьку дыраз, тырмыт, чик вис карытэк электрокужым но тыл сётэ. Солэн умой ужамез нырысь ик герӟаськемын директорлэн сюлмаськеменыз-быгатэменыз. Нош Владимир Михайлович али луэ Кун Кенеше депутатэ кандидат. Туннэ соин кенешонмы. - Владимир Михайлович, нырысь ик капчи юан сёто. Асьтэ сярысь вералэ. - Вордски 1963-тӥ арын 7-тӥ ноябре Шаркан черкогуртын, бадӟым ужась семьяын. Ми вить кузя вал: кык сузэр но куинь вын. Шор ёзо школаез быдтыса дышетски Ижысь Гурт хозяйствоя институтлэн электрификацияя факультетаз. Ужай студентъёслэн лэсьтӥськон отрядазы, Грах районын электротыл кыским. 1988-тӥ арысен Воткинскын ужасько: улон коркаосъя городской управлениын инженер, валтӥсь инженер но кивалтӥсь вал. Но быръем профессие вуттӥз коммунальной электрической сете. 1992-тӥ арын июне директоре юнматӥзы. Со дырысен татын. Кузпалэ Надежда Анатольевна нылпи поликлиникалэн физиокабинетаз медсестра луэ. Кык пимы, тямысэтӥ но витетӥ классын дышетско. Улӥськом Южной посёлокын огшоры куинь комнатаен квартираын. - Табере ужды сярысь вералэ: кызьы йылпумъяды кылем арез но туэ кыӵе шокаськоды? - Син но медаз усьы, чеберъяськемлы но медаз пӧрмы - ужъёсмы умой мыно. Арез усто потӥм. Предприятиослы, организациослы, учреждениослы но калыклы котьку дыраз но тырмыт электрокужым но тыл сётӥськом. Со милям одӥгез самой бадӟымез сюлмаськонмы, соин герӟаськемын ваньмыз ужъёсмы. Соя ик коллективмес дунъяло. Нош хозяйствое пичи ӧвӧл: 262 иськем кабель, ульчаосты югдытыны омыретӥ 500 иськем езъёс кыскемын, 142 трансформатор подстанциосмы но мукетыз. Йылаз-пумаз вуттэмын тупатъян ужъёс. Али корт ӵыжатӥсьёслы ужан инты пуктӥськом. Миым быдэс ар ӵоже шудтэм учыръёсмы ӧй вал. Милям али городэз, урамъёсты югдыто 3 сюрс пала светильникъёс. Пеймыт ульчаос быдтэмын, вальк-вальк тыл ӝуа. Ужасьёсмы трос ӧвӧл, 144 лыдъяське. Миым 4 выль ужан инты усьтӥм. Туэ но кӧня ке ватсаськыны кулэ. Ваньмыз предприятиос озьы лэсьтысалзы ке, валамон, городын ужасьтэмъёслэн лыдзы шӧдскымон кулэсмысал. Татын кӧня ке валантэмез но вань: котькытын сомында быдэстоно ужъёс, нош адямиос ужлы ёрмыса корказы пуко. Кызьы сое умоен лыдъялод? - Нош депутат луиды ке, та ласянь кыӵе вамышъёс лэсьтоды? - Зэмзэ но, республикаысьтымы мукет интыосын сярысь, Воткинскын ужасьтэмъёс данаклы ичи. Соослэн лыдзы ялан кулэсме. Мон сямен, Кун Кенеш сыӵе законъёс кутыны кулэ, кудъёсыз юрттозы улӟытыны промышленностез, тужгес но лэсьтӥськонэз. Соку кӧня ужась киос кулэ луозы. Ведь одӥг лэсьтӥськись вӧзы 4-5 муртлы ужан инты кылдэ. Соин ӵош ик адямиослы дунтэмгес, ӝоггес но ӟеч улон инты вуттоно. Сотэк улонмы ноку уз умоя, ужаса гинэ ӝӧк вылмы тыр луоз. - Владимир Михайлович, кылем тулыс тӥ гордумалэн депутатэз луиды. Кызьы депутат ужъёсты борды басьтӥськиды? - Бен, калык тыныд оскиз бере, сое умой быдэсъяны вырисько. Округам нимаз коркаосын улӥсьёс шедемын. Нош соослэн кулэяськонъёссы трос. Али бырйисьёсылы газ кыскыны юрттӥсько, соослэн юртъёсазы туэ чагыр эстӥськон вуоз. Соин ӵош музон куронъёссэс уг вунэтӥськы. Тани выльдоно сюресъёсты, ву басьтон колонкаосты, гумыосты но мукетсэ. Нош монэ озьы ик сюлэмшугъяськытэ таӵе ужпум: нимаз коркаосын улӥсьёс газ кыскемзы понна тыро улэп коньдонэн, бюджетысь туж ичи юрттэт вуэ, нош коммунальной юртъёсын улӥсьёслы государство дунтэк газ пыртэ. Умойтэм со. Тае но парламентын учконо луоз. - Тӥляд малпамдыя, кыӵе луыны кулэ депутат? - Депутат луыны кулэ оскымон: ас азяз но мукетъёсыз азе юнэсь куронъёс пуктӥсь, сётэм кылзэ быдэсъясь, калыклы юрттӥсь, адямиосты яратӥсь, ас ужзэ ӟеч тодӥсь-валась но чылкыт сюлэмо адями. Уг яратӥськы нюръяськон кылэз, котькуд ужез йылаз-пумаз вуттыны дышемын. - Кызьы Кун Кенешын ужаны дыр шедьтоды, ас вылады вормымон-а ныпъет басьтӥськоды? - Капчиез ӝӧк вылын, шуо. Секытэз-шугез потоз ас бордысьтыд: кызьы ачид парламентын ужалод, кыӵе ужпумъёсты быдэсъяны басьтӥськод. Нош мон саюлын пукыны дышымтэ. Юрттэме потэ город, республика азьын сылӥсь лэчыт ужпумъёсты быдэсъяны но калыклэсь улон-вылонзэ умоятыны. Тае быдэстон вылысь, нокыӵе шуг-секытъёс шоры учкытэк, уй-нунал ужаны дась, калык оскиз ке, бырйисьёсылэсь куронъёссэс улонэ пыӵатон понна дырме но, кужымме но уг жаля. Тӥни сыӵе ныпъетэ луоз. - Владимир Михайлович, нош кызьы со ужпумъёсты быдэсъяны чакласькоды? - Валамон, одӥгез но со каньылэн уз сётӥськы. Но ми Воткинскысь депутатъёсын одӥг кыл шедьтом, уката ик мэрен Валерий Фридрихен. Собере милемды мукет интыосысь но депутатъёс валалозы, кутскем ужъёсмес быдэстыны юрттозы. Мон озьы валасько: ваньмыз со калык сярысь сюлмаськонэн герӟаськемын. Озьыен, нокин пумит уз луы. Ведь адями депутатэ мынэ калыклы юрттыны, секыт улонмес тупатыны, ӧжыт ке но капчиятыны. - Тӥ вордскемын 7-тӥ ноябре. Со улонады шӧдӥське-а, вал-а партиын? - Улонам уг шӧдӥськы. Со кун праздник, шутэтскон нунал, бадӟым семьяен люкаськыны каньылгес луэ. Общественной уже котьку мылысь-кыдысь пыриськисько. Комсомолын азьветлӥсь вал, собере партбилет басьтӥ. Дырыз сыӵе вал. Али нокыӵе партиын ӧвӧл, коньдонэн герӟаськем группировкаосы уг пыриськы. Но азьвыл улонлэн ӟечез но, уродэз но вал, сое вунэтыны-палэнтыны уг яра. Али кызьы ужаськом, озьы ик улӥськом. Но со огшоры калык бордысь уг поты. Ӝоггес воштоно выльдӥськонлэсь ӧрзэ, калык пала берыктоно. Со понна кутоно ӟечесь законъёс, ваньзэ планъя нуоно. Кулэ котькытын дисциплина но порядок. Сотэк вамышъёсмы уз юнмалэ-кузёме. - Владимир Михайлович, вань-а шутэтскон дырды, кызьы сое ортчытӥськоды? - Вань, конечно. Кызьы сотэк чидалод-ужалод. Сад-бакчае ӧвӧл. Ӵем вуылӥсько анай- атае доры, юрттӥсько бакчаязы картофка, бакча сиёнъёс будэтыны но хозяйствозэс нуыны. Собере соос мултэссэ мыным сёто, юрттэмелэсь тросгес висъяло. Яратӥсько чорыганы. Пукиськод шур дурын визнанэн, ваньзэ вунэтӥськод. Со самой умой мон понна шутэтскон. Йыре бен котькыӵе малпанъёс лыкто ик. Город котырысь вань шуръёсты, тыметъёсты тодӥсько ни. - Кыӵе асьмелэн инкуазьмы? - Сое утьыны кулэ. Прудъёс, шуръёс, ошмесъёс куасьмо, ӵакмо. Сое адӟыса, сюлэм сьӧд вирен кисьтӥське. Татын но депутатъёслэн синзы, сюлмаськемзы кулэ. Воткинск садо город, трос писпуос мерттэмын. Но мон доры адямиос вазиськыло, малы, пе, писпуосты кораськоды. Мугез тодмо. Соос плантэк, кызьы шедем озьы мерттылэмын но табере электроезъёсты сурало. Нош ми кыл кутӥськом, шудтэм учыръёс медаз луэ шуыса. Соин ик куд-огзэ погыръяно луэ. Ужпум со бордын. х х х Пумаз ватсаме но Воткинскысь Владимир Перевозчиковлэн округысьтыз бырйисьёслы вазиськеме потэ: таӵе адямиез удмурт парламентэ бырйиды ке, тӥляд но, милям но улонмы капчигес луоз. Узыр ужбергатӥсьёс 4-тӥ апрель бере ик тӥледды вунэтозы, номыр ӟечсэ уз лэсьтэ. Соослы лушкаськыны мандат гинэ кулэ. Сое мон ачим адӟи но шӧдӥ ни, 9 ар парламентын корреспондентын ужаса. Геннадий РОМАНОВ. Куштӥськем кортлэсь - "зарни" Котыр ӝуась тылсиос пазяса кисьтӥське бадӟым гурысь ӵыжам андан. Матаз сылыны уг луы - пӧсезлэсь (1600 градус) ымныр сутске, ӝуамез синъёсты кыньырскытэ. Пӧзись зарни кисьтӥське, кожалод. Котькуд ньыль часлы быдэ 30 тонна андан ӵыжа одӥг электрогурын. (Данъям мартенъёсты али инкуазез кырсёмытонтэм вылысь ворсалляло ни). Электрогурез ужатыны быдэс Ижевскысь улоно юртъёслы тырмымон электрокужым кулэ. Но "Ижсталь" ОАО-лэн энергетикъёсын ог-огзэсты валантэм учыръёссы уг луыло - тыриськонъёссэс дыраз тыро: куке улэп коньдонэн, куке вексельёсын, куке асьсэлэн продукциенызы. Продукцизы сярысь ке, берло аръёсы гинэ татын немец но америка стандартъёслы тупась выль маркаен 120 пӧртэм андан поттыны кутскизы. Со пӧлын сыномисьтэмез, инструментъёс лэсьтыны мынӥсез но мукет. Али 30 процентэз ӟеч (углеродлэсь чылкытатэм) андан кунгож сьӧры кошке. Сыӵе вуз поттон понна заводысь кивалтӥсьёслы ӟеч тыршоно луиз. Кусып тупатӥзы Италиысь "Даниели" фирмаен. Вакчи дыр ӵоже та фирма вакуумно- кислородной амалэн углеродлэсь чылкытатон агрегат пуктӥз. Кунгож сьӧрысь рынокен кусыпъёс тупатытэк, завод трос мукетъёсыз сямен ик куашкан калэ вуысал. Угось Ижысь андан ӵыжатон завод (али ОАО "Ижсталь") военно- промышленной комплекс понна ужалляз, нош кыӵе югдуре сюриз та комплекс берло аръёсы - тодмо. Соин ик андан ӵыжатӥсьёс продукцизэс басьтӥсь утчаны, выль амалъёсты эскерыны кутскизы. Но со понна кулэ вал выль технологиос, оборудование. Кредитэн юрттӥз Удмурт Правительство. Ӧз алдаськы. Вакчи дыр ӵоже предприятие сое берыктыны быгатӥз, пайдаё ужаны кутскиз - рентабельностьсы 5 процентлэсь вылын (промышленной предприятиосъя тужгес бадӟым лыдпус 7 % луэ). Заводын бадӟым саклык висъяло продукциез усто ӟечлыкен поттонлы. Сое возьмато калык куспо адӟытонъёсын (выставкаосын) басьтэм уно призъёссы но. Али "Ижстальлэн" нимыз быдэс дуннеын тодмо, нош Россиын со валтӥсез андан ӵыжатӥсь завод луэ. Кивалтӥсьёс ушъяло ужасьёссэс. Соос туж оскымонэсь но асьсэлэсь ужзэс ӟеч тодӥсь адямиос. Завод огвакыт ёрмиз вузлэсь ӟечлыксэ эскерон приборъёслы - соос туж дуно сыло. "Ижстальысь" кибашлыос асьсэос югдурысь потӥзы - "Д-р Фёретер" немец фирмалэн эскерон линиез кадь кык линия лэсьтӥзы. Кыӵе уждун басьтэ туннэ андан ӵыжатӥсь? Заводъя шоро-куспо лыдпус - 800 манет. Пӧсь гур дурын ужасьёслэн кык сюрс манетлэсь ятыр луэ. Сётъяло дырыз дыръя. Пусйыны кулэ, уждунэз татын ноку ӧз ӝегатъялэ на. Котькытын ик ужысь кулэсъян вакытэ одӥг ужась но кулэстэмын ӧвӧл, али но луонлык шедьто выльёссэ кутыны. Куинь сменаен, дугдылытэк ужа завод. Дугдылытэк ӵыжа андан. Но кивалтӥсьёслэн одӥг сюлмаськонзы вань - уггес тырмы куштӥськем корт. Азьвыл сое бичаны пичиез но, бадӟымез но юрттэ ке вал, али завод ачиз утчаське. Ужез умоятон понна, Удмурт Правительствоын нимысьтыз программа кутыны чаклало: куштӥськем корт ӵектӥсь организациослы, колхозъёслы нимысьтыз дотациос висъяны чаклало. Соин ик, ваньды потэ куштӥськем корт бичаны! З. РЯБИНИНА. СЮЛЭМШУГЪЯСЬКЫТӤСЬ УЖПУМ Нылпи йыртэма, кыл кутэ анай Асьсэ удыссыя, быдэ вуымтэосын ужась инспекторъёс ӵем гинэ потано луо калык пӧлы. Пумиськонъёс ортчыло асэнызы дышетскись пиналъёсын, школаын ужасьёсын, анай- атайёсын. Таӵе амалэн ужамлэн пайдаез одно ик луыны кулэ, озьы ке но, йыртэман учыръёс быдэ вуымтэос пӧлын арысь аре йыло. Мар бордын ужпум? Калыкын шуо, пушнер выжые пушнер потэ. Нылпиослы ӟеч сямъёс пыӵатон но семья бордысь кутске. Со пумысен аслэсьтыз малпанъёссэ вера Кизнерысь Быдэ вуымтэос пӧлын йыртэманъёсты алонъя группаысь инспектор (ГППН) Елена Копысова. Милемыз туж сюлэмшугъяськыто будӥсь пиналъёс, егитъёс. Туала вакытэ соос тросэз лекесь, адямиез жаляны валасьтэмесь будо. Пиналъёслы ӟеч сямъёс пыӵатонэз дышетӥсьёс вылэ гинэ погыльтыны уг луы, нырысь ик со понна кыл кутыны кулэ асьсэос анай-атайёс. Табере со алонэн, пыкылонэн гинэ уг ортчы ни, закон азьын но кылзэс юало. Калыкез дышетон сярысь законын озьы ик гожтэмын: анай-атайёс кыл куто нылпиоссэс ӟеч будэтон понна, нош школа - кыӵе тодон-валанъёс сётоз. Россия Федерацилэн выль Уголовной кодексысьтыз 156-тӥ статьяезъя нылпизэс будэтонлэсь аналскем анай-атайёсты пытсэт сьӧры келяны луэ кык арозь. Шуом, мед соос туж ӟеч ужалозы, азьпал радъёсын ветлозы, нош нылпиоссэс уг адӟыло ке? Иське, быдэ вуымтэ нылыдлэн яке пиедлэн йыртэмамез понна кыл кут. Закон туннэ нуналэ ужа республикаын но, районын но. Кылсярысь, со статьяя пытсэт сьӧры келямын К. Шашкина. Ачиз но юмшаса ветлӥз, быдэ вуымтэ нылзэ но сьӧраз нуллӥз. Асьсэды умойтэм воземзы, юыса улэмзы понна районысь тросэз анайёс нылпиоссылэсь люкемын. Утчаськоно луэ со пиналъёсты кытчы ке интыян пумысен. Куд-огез милемды пыкылыны но туртто, сюлэмтэмесь, пе, тӥ, нылпиосты анайёссылэсь люкиськоды. Нош соос нуналъёсын сютэм уло ке, котькуд нунал сямен олокыӵе но кырсез адӟо, тыш сиё ке? Кыӵе кивоштӥсьёс будозы сыӵе нылпиослэсь? Соослы одӥг сюрес кыле - йыртэман. Вань милям сыӵеосыз но, нылпиоссы сярысь вунэтыса, возьытсэс ыштэм пинал нылкышноос палэнысь вуэм сиён-юон бичасьёс сьӧры калъясько, арняен арняен гуртазы уг вуыло. Ӵем дыръя пиналъёс кылё висись песянай-песятайёссы вылэ. Жаль учкыны сыӵе нылпиос шоры, йӧназ дӥськутсы но ӧвӧл. Одӥгезлэсь колготкизэ юри киямы басьтӥм, сокем со дӥсяны ярантэм ни. Нош анаезлы нокыӵе ӧвӧл. Юаськом солэсь: - Юыны бен кытысь коньдон шедьтӥськод? - Солы коньдон котьку сюроз, - кӧбератэк вазиз пумитамы. Жаляса верано луэ, сыӵе анайёс тросгес но тросгес луо. 1997-тӥ арын шугъяськытӥсь семьяослэн лыдзы районын 122 вал ке, туэ январь толэзёзь гинэ со лыдпус 169-озь будӥз. Югдурез ӧжыт ке но тазатон понна, нылпиоссэс аналтӥсь анайёс но атайёс шоры учкон калык пӧлын шиёгес луыны кулэ. Мед валалозы, соослэн кузязы нокин но ветлыны уг малпа. Вань со уродэз пыӵа ук быдэ вуымтэослэн виразы но сямъёсазы. Озьы 1989-тӥ арын пиналъёсын 22 йыртэман учыр лэсьтэмын вал. Нош таяз арын январе гинэ быдэ вуымтэос 13 пол йыртэманы вуизы ни. Со пӧртэм лушкаськонъёс, автомобильёсты киултон, йыружъёс. Ваньмыз сямен со лэсьтӥське юэм йырын. Бен, дорамы трос гинэ вутто кудӟыса поромем пиналъёсты, соос пӧлын дас аресъемъёсыз но вань. Юыса пото бадӟымъёслы радъям дискотекаосы. Нош законъя 15 аресозь пиналлы отчы пыдзэ но лёганы уг яра - быдэ вуымтэос понна дискотекаос ортчыло школаын. Эскеронъёсы потаку, сыӵе нылпиосты синйылтӥськом ке, дискотекаысь, кыл кутытӥськом анай-атайзэс. 15 арес тырмымтэ пиналлы озьы ик уг яра уйшор бере ураметӥ ветлыны. Шуом, огназ калгись сыӵе нылаш соку ик син шоразы йӧтэ юэмъёслы но мукет кырсь мылкыдо адямиослы. Отын ик эриктэман, вӧсь карон, ултӥян луыны быгатоз. Сыӵе учыръёс ӧжыт ӧвӧл. 1997 арын районын лэсьтэмын ке вал 233 секыт йыруж, 1998 аре со будӥз 385-ёзь. Вань йыружъёс пӧлысь кылем арын шараямын 90,7 процентэз. Тыршеммылэн пайдаез вань. Азьвылгес лэсьтэм йыртэман учыръёс дыр ортчыса но шараясько на. Озьы, Кизнерысь 1 номеро школаын дышетскись нылашлэсь кулэсь куртказэ, сапегъёссэ, керттэм изьызэ киултӥллям. Таяз арлэн кутсконаз лушкаськись тодмо луиз, дӥськут берыктэмын кузёезлы. Калык юрттытэк, милициын ужасьёслы секыт йӧтысал йыртэман учыръёсты шараяны но палэнтыны. Соин ик, шудо улонмы понна ваньмылы огъя нюръясьскыны кулэ. Дасяз Л. МАЛЫХ. Наталь Улон кожъёс "Аслым ачим син уськытӥ" Кыдёкысь гуртысь нылаш ӧз но вӧталля зарезь дурын улон сярысь. Кызьы ке ваньмыз шуак луиз - ин ӧс усьтӥськем мактал. Пор шаерысь Ондышкаысь ныл школазэ йылпумъяса вуэ Иже. Пыре нырысь сюрем училищее. Вуоно профессиез - электрогазосварщик - нылкышнолы туж тупамон ӧвӧл ке но, мар ке шат? Дышетсконзэ йылпумъяса интыяськиз автозаводэ. Общежитиын комната сётӥзы, уждун ӟеч басьяз. Нош огпол доразы комнатаысьтызы ӵош улӥсь эшезлэн тодмоез пыриз. Военной училищеын, пе, дышетске. Курсант татчы ӵемгес кожаны кутскиз. Нош училищезэ йылпумъямез бере, Саша Дусяез загсэ ӧтиз. Соку ик кошкизы Азербайджанэ. Службаезъя отчы ыстӥзы. Собере Грузие, Бердянске. Бердянскын Дусялы тужгес кельшиз: зарезь, шуныт. Кузпалъёс туж тупаса улӥзы, яратоно муртэз вӧзын мӧзмонэз ӧз тодылы егит кышномурт. Ӟеч квартира сётӥзы, уксёлы ноку ӧз ёрмылэ. Вордӥськиз пизы. Солэсь бадӟым шуд вань на шат? Тямыс ар улыса, нош интызэс воштоно луо. Таяз учыре - Германие. Дуся, Витштае вуэмез бере, кӧня ке зубектыса сылӥз. Мон-а та? Мар понна мыным табыдӟа шуд? Татын улэмзэ кызьы вераны ик уг вала Евдокия Александровна - со, пе, кылын верантэм. Вордӥськиз кыкетӥез пизы. Но зарезьын лыз тулкымъёсын пальккаськыкуз но, шулдыр корказ пырыкуз но куддыр шуак луылӥз со - та мон ӧвӧл! Одӥг адямилы сомында шуд уг сётӥськы. Но Сашаез ӟыгыртыса шуылӥз: "Выжыкыл ӧвӧл та, мусое". Но выжыкыл быриз. Германиысь частьёсмес поттаны кутскизы. Капитан Широбоков, отставкае потыса, кык ар талэсь азьло семьяеныз варманаез доры интыяськиз. Дусялы гуртын ужан инты ӧз сюры. Нош ӝоген анайзы воксё лябӟиз. Сое утялтыса ик дырыз бырылӥз. Кӧня ке улыса, картэзлы Якшур-Бодьялась ивор вуиз: анаед секыт висе, утялтӥсьёсыз ӧвӧл. Мар кароно? Бодьяла ке улыны мыноно, варманаез кинэн кельтод? Татчы ке кылёно, аслад анаед султылытэк кылле. Кузпалъёс кенешизы: Саша анайзэ эскерылы бертылоз, йӧнатозяз отын улоз. Но пересь мурт ноку но уз тупатскы ни, шӧдске. Сое валаса, Саша семьяезлы дор палъёсаз улыны ӧтён гожтэт ыстэ. Но солэн анайзэ аналтэмез ке уг луы, малы Дуся аслэсьтыззэ куштыны кулэ? Пересь муртъёсты отчы-татчы уд кыска, котькудӥзлэн вордӥськем интыяз кулэмез потэ. Дуся кузпалэныз кенешыны Бодьяла кошкиз. Но одӥг кылэ ӧз вуэ. Кӧня уйёс бӧрдыса ортчытэмын, пиосыз, атайзэс юаса, кӧня пол сюлэмзэ чепыллязы - кышномурт ачиз гинэ тодэ. - Табере со атай кадь но ӧвӧл ни,- шуэ Евдокия Александровна.- Юон вылэ чӧлскемын. Пиналъёсыз сярысь юаськыса, нырысь гожъяз ик, но коньдон одӥг пол но ӧз ысты. Кызьы- маин мон соосты сюдӥсько-дӥсясько, ужез но ӧвӧл кадь. Коркамы но тани сисьмемын ни, но маин мон сое огнам тупатъялом? Ярам, али фермаын ужасько, но уждун кӧттырлы кошке ук. Пиме тани армие келяй. Мынам али пиосылы гинэ осконэ вань на. Соос понна гинэ улӥсько. Егит дыръям шуд пӧлын пазяськи уга, аслым ачим син уськытӥ, дыр. - Нош кузпалды али берытскысал ке?.. - Кулэ луысал ке, азьло ик берытскысал. Табере мынам пушкы синкылиен сутскыса быремын ни. Уг быгат ни, дыр, мон сое простить карыны. Туспуктэмъёссэс возьматъякуз, Дуся огзэ басьтӥз но кема-кема пальпотыса учкиз.- Тани ми ваньмы ӵош шудо дыръямы ай. Кузпалыз сярысь веракуз, йыркурез уг шӧдӥськы кышномуртлэн. Гожты, Саша, семьяедлы. Соос тыныд салам вераны косӥзы. З. РЯБИНИНА. Утчасез шедьтэ Сюмсиысь азьвыл "Сельхозтехникалэн" колхозъёсын кусыпъёсыз лябӟемен сэрен, валля арын ик нюлэс дасян но пул пилён борды басьтӥськиз. Озьы миым 2300 кубометр пала нюлэс дасяз но сюрс кубометр пала пул пилиз. Пилем пулзэ вузаны инты шедиз, сое басьтэ "Ижмебель" акционер огазеяськон. Нюлэссэс келяны ӧдъязы ни Венгрие но. Зэм, тракторъёссэс но прицепной техникаез механизаторъёс асьсэ эштосъёсазы ик тупатъяло, нош моторъёссэс вутто РОС-э ик. Коллектив быдэсак ӧз куштӥськы азьло ужезлэсь, соос доры, эштосъёс сяна, нимаз адямиос но вазисько моторъёссэс тупатъяны. Озьы, кык удысэ паськыт пыриськыса, РОС пайдаёгес ужаны ӧдъяз. Парсьпиос чотын Сюмси ёросысь "Труд" крестьян хозяйство интыяськемын Акилово гуртын. Берло дыре со бордаз басьтӥз на "Рассвет" эштосэз но. Ёросын музъемъёс начаресь ке но, татын урожайзы умой. Тырмыт сиён дасяса, эштос пудо вордонэз умоятыны ӧдъяз, кӧжызэс воштӥзы парсьпиосын, мумы парсьёссылэсь лыдзэс будэтӥзы. - Электрокужымлы дун ӧз ке йылы, - пайдаёгес ужаны луоз, - оскыса вера эштослэн кивалтӥсез И. С. Владимиров, - парсьпиос будэтэммы но сӥль поттэмы чотын хозяйствомес ӝутыны быгатом. П. Николаев. Депутатэ кандидат Чуршин Алексей Дмитриевич, Ижевскысь тазалыкез утёнъя управлениысь валтӥсь кардиолог, медицина наукаосъя кандидат доцент Алексей Дмитриевич Чуршин Удмурт Республикаысь Кун Кенеше депутатэ кандидатъёс пӧлын егитъёсыз радын: солы али 35 арес. Туж ӟеч ужан дырыз. Адямиез мур гажась, солэн тазалыкез понна нюръяськись врач-кардиолог луэмез дырысен сюлмысь тырше одӥг интыын - автозаводлэн поликлиникаяз. Бырйисьёсыз но татысь округын уло. Вань ужъёсыз но мылкыдыз, азьпала учконэз нуналысь нуналэ герӟаськемын бырйисьёслэн улонэнызы. Аслэсьтыз кандидатуразэ депутатэ ӵектоно луиз улон сӧриськемен - нырысь ик, эмъяськон но калыкез дышетон удысъёсты чылкак куашкамлэсь утён вылысь. Макем секыт туннэ та удысын ужасьёслы но ужась калыклы, со ӟеч вала. Калыкен ужаны, адямиосын ӟеч кусыпъёс возьыны со пинал дырысеныз дышетске. Тани ма сярысь верало Алексей Чуршинлэн улонысьтыз кӧня ке чуръёсыз гинэ. Вордскиз дышетӥсьёслэн семьяязы Татар Республикаысь Мензелинск ёросысь Дербежка посёлокын 1963-тӥ арын 5-тӥ шуркынмонэ. Будӥз Каракулино черкогуртын. 1980-тӥ арын отличиен быдтӥз отысь шоро-куспо школаез. Одӥг арзэ ужаз нылпи спортивной школаын тренер-дышетӥсь луыса. Собере куать ар дышетскиз Ижысь медициная институтын, мылысь- кыдысь пыриськиз общественной улонэ но: оперотрядлэн комиссарез, институтысь студентъёслэн наукая огазеяськоназы ужасьёс пӧлын вал, терапевтъёслэн тӧрозы (старостазы) луылӥз. Яратӥз наукаез но, спортэз но. Трос пол вормисьёс радэ сюрылӥз капчи атлетикая ӵошатсконъёсын. Туннэ солэн бадӟым удысэз - мӧйыослэсь сюлэм висёнъёссэс эмъян. Со вал диссертациезлэн темаез но - 1993-тӥ арын ужзэ синмаськымон утиз. Вакчи дыр куспын квалификациезъя вылӥ категориен кардиолог луытозь будӥз. Трос висисьёс солэсь юрттэт но визь-кенеш басьто. 1990-тӥ арысен эмъяськон ужен гинэ уг выры, студентъёсты дышетэ на Ижысь медициная кун академилэн поликлиникаысь терапияя кафедраяз. 1994-тӥ арысен - Кун академилэн доцентэз. Ижевскысь калыклэсь тазалыксэ утёнъя управлениын валтӥсь кардиолог луэ. Али дася медицина наукаосъя доктор ним басьтон вылысь диссертацизэ. Дасо ар куспын эмъяськон удысэ тямыс рационализаторской ӵектонъёс пыӵатӥз. Печатлаз ини 120-лэсь ятыр наукая но эмъясьёсты дышетон амалъёсъя ужъёссэ, соос пӧлын сизьым книгаез. Алексей Дмитриевич ачиз ӟуч ке но, ӟеч кусыпъёс возе удмурт калыкен но. Кузпалыз солэн удмурт, будэмын Якшур-Бодья палась гуртын. Будэто нылзэс но пизэс. Алексей Дмитриевич Чуршин депутатэ кандидатэ ӵектэмын Ижевскысь 39-тӥ Школьной округъя. НАТАЛЬ Пал бурдо шумпотон Армиысь бертэм пияш соку ик синйылтӥз чебер но пичи мугоро востэм нылашез. Аннӥлы но кельшиз бускель гуртысь Андриан. Егитъёс кузпалъяськизы, кошкизы городэ улыны, нош ар ортчыса, берен гуртэ ик бертӥзы. Шудзы татын ик вылэм: улӥзы, ужазы, куать нылпи вордӥзы. Улон ӧраз пыриз кадь. Бадӟымез Галязы медучилищеез йылпумъяса ужаны пыриз, нырысь уждунэзлы ик анай-атаезлы кузьым басьтӥз. Макем шумпотэм атаез брюкилы, мыным кадь вуремын, пе. Со кузьыменыз ик воргоронэз ватӥзы. Шӧдтэк шорысь, шудтэм учыре сюрыса, атайзы кулӥз. Аннӥ пал кышно луиз. 47 аресъем кышномурт весяклы ыштӥз яратонзэ но, шумпотонзэ но. Йырын одӥг малпан: кызьы улоно? Нылпиосты будэтоно, пудо утялтоно, уже но вуоно. Ма, гуртын ӧжыт-а уж. Ваньмыз ик ӧз валаллялэ кышномуртлэсь куректонзэ, вӧсь но карылӥзы, чурыт кылъёс но вераллязы. Лушкаськисен кутӥзы, инмар утиз. - Ас сьӧлыкты, асьтэлы медло" шуисько но улӥсько вал, - вера Аннӥ. Озьы ортчизы аръёс. Бадӟымъёсыз юрттӥзы пичиосызлы. Нылпиос умой дышетскизы, анайзэс шумпоттыса. Бырйизы гурт ужъёсты: Света луиз агроном, Коля - шофёр, Сергей - механик, Митя - зоотехник, Валера гинэ улэ но ужа городын. Пиналъёсыз ог-огзылы юрттыса уло. Аннӥ улэ пичи пиеныз Митяен, атаез кулыку, солы укмыс арес гинэ вал. 13 кузя ини внукъёсыз, пичиез - Андриан пизэ нырысетӥ классэ мынӥз. Озьыен, уз быры Зайцевъёслэн выжызы. Со эшшо но золгес пушъёз, мургес выжы лэзёз. Сыӵе ини со улон: шумпотон, бӧрдон но куректон огазьын ветло. Шумпотэ Аннӥ нылпиосызлы, внукъёсызлы, нош ас понназ малпа картэз сярысь, ӧз кылды адӟыны солы внукъёссэ. Кызь ар ӧвӧл ини Андриан, нош Аннӥ понна со котьку сюлэмаз, йырвизьмаз. Синвуэн коттэм миндэрез но кезьыт валесэз гинэ шӧдо, валало солэсь мылкыдзэ.; Сокем эн чигиськы, Аннӥ, нылкышно шудэз кемалы ӧй вал шуыса. Карттэ ыштӥд, нош солэн пытьы кузяз вамышто, уло но ужало нылпиосыз, внукъёсыз. Пич, векчи мугордэ нокыӵе сильтӧл медаз чигты. Ваньмызлы ӧчкарыса кема ул, эн висьы. Пал кышноез валаны пал кышнолы гинэ кылдэм угось. Л. Рябова. Завьял ёрос, Сапарово гурт. НАТАЛЬ Ӝытъёсы тонтэк лултэмесь Яратон сярысь вераськон потэ ке, котькудӥзлэн синъёсыз ик чиляны кутско кадь. Уката ик али, та тулыс нуналъёсы, куке ваньмыз сайка улӟе нуныясь шунды сиос шорын. Уго вылтусмыя гинэ асьмеос одӥг малпанэн улӥськомы - коньдон тросгес мед луысал, нош пушкамы - ненег, яратонлэсь мӧзмем сюлэм. Куд-огез та мылкыдзэ ватыса возьыны тырше, муктыз шараяны уг кышка, нош куиньметӥез лушкем малпанъёссэ нимысьтыз тетраде гожъя... "Вань-а дунне вылын яратон? Луэ-а пыраклы яратыны? Мар со сыӵе? Яке ваньмыз со ог-огедлы дышон гинэ-а?" "Мар со яратон? Витён. Шимес но тырттэм витён. Со уг дырты тон доры лыктыны. Нокыӵе уж уг лэсьтӥськы, ваньмыз киысь куашка. Ӝытъёс но Сотэк тырттэмесь, кулэтэмесь, лултэмесь. Уй - ноку бырыны валантэм. Тон каллен шузимиськод кадь. Яратон.. со пеймытэ, кезьыт тол уе куштэм коӵыш выллем... Нош Со тонэн артэ ке, сюлэмыд быдэс дунне тыр жугиське кадь. Кытчы эн учкы - тынад чидасьтэм, витёнэз валасьтэм, ненег сюлэмыд. Нош со сяна, куалекъясь киос, тылын гомась ымдуръёс... Син азяд Со гинэ. Быгатысал шат Сотэк улыны?! Сотэк - сыӵе бадӟым но муспотон, ненег но серем пыръем яратонтэк тон табере улыны уд быгаты". "Кулэ вал со чебер кылъёсты! Кыӵе сыӵе яратон? Сяськаос, телефон жингыртэмъёс - ваньмыз со синпӧет гинэ! Мон мукетсэ гинэ яратонэз валасько. Тани, шуом, шулдыръяськон ӝытын эшъёсын маскаръяськод, курытсэ юод, нош бӧрысь нылашен кытчы ке ӵошен гинэ ышод... Уката ик со чебер, веськрес мугоро, пумитъяськисьтэм на ке. Мар солэсь умоез вань? Нош ӵуказеяз султод, кошкод но тодад но уд вайылы ни. Тани таӵезэ мон валасько. Нош тӥ..." "Яратон... Туннэ со вань, нош ӵуказе - ӧвӧл. Туннэ тон укно дорысь но уд кошкылӥськы, ортчылӥсь адямиос пӧлысь жадем синъёсын Сое гинэ утчаськод. Витённад кымесыд ик пӧсектэм ни. Ӧтись синъёсыд Со шоры гинэ учко. Шуак Со тон шоры учкиз - сюлэмыд соку ик кытчы ке мур гуэ усиз кадь. Со огназ ӧвӧл?! Кыӵе вӧсь! Сюлэмад кин ке ныж пуртэн бышкалтӥз кадь, быдэс дунне тон понна шимес но тырттэм луиз... Озьы ке но, кезьыт но пеймыт уй ӧз быгатэ яратонэн пачылмем ненег сюлэмез быдэсак кынтыны. Зор. Шуныт зор буйгатӥз, небӟытӥз лек яраез. Пурысь вужеръёс ышизы. Тон нош ик улэп. Ӵуказе кутскоз вылез нунал, тон одно ик пумиталод яратондэ. Со тынад гинэ луоз". "Яратон. Со вань дунне вылын. Озьы ке но, мон уг оскиськы, та мылкыд адямилэн сюлэмаз пыраклы каръяське шуыса. Мынам малпамея, огдыре кык адямиос пӧлысь одӥгезлы одно ик ваньмыз акыляк потоз, вуноз, бездоз. Кин тодэ, оло, мон янгышасько. Оло, вань дунне вылын зэмос, чылкыт но кемалы яратон. Вань ке но, со туж шер пумиськылэ, дыр". Куд-ог вылӥ верам малпанъёсын мынам соглаш луэме уг поты. Яратон вал, вань, азьланяз но луоз. Уго яратон - со улон. Нош яратонтэк улон но ӧвӧл. Мар бен, котькудӥз адями ас сяменыз малпаны быгатэ. Медаз гинэ янгыша вылэм. Пумаз вераме потэ на: эн вунэтылэ эшъёсты, матысь адямиосты сярысь. Эн жалялэ соос понна ӟеч малпанъёстэс, шуныт мылкыдъёстэс, буйгатӥсь кылъёстэс. Оло, соку ичигес лузы ӝож мылкыдоос, сюлэмъёссэс бумага листлы гинэ усьтӥсь адямиос. Н. ГОЛОВКО. Шаркан ёрос. ГОЖТЭТ ӦТИЗ СЮРЕС ВЫЛЭ Оло, куарадэс сётоды, председатель эш? Таяз учыре гожтэт ӧтемъя сюрес вылэ потаммы юнме луиз. Сюресэз но кузь гинэ вал - Алнаш районысь "Кама" колхозэ. Сокеме мыныса вылысь кулэ адямиосты ӧй шедьты. Нош одно ик пумиськыны кулэ вал председателен Михаил Егорович Шкляевен. Со вылэ угось редакцие ӝожтӥськон вуиз. Нош кивалтӥсь та нуналэ яке Иже, яке Можгае кошкем. Интыяз ӧй вал валтӥсь бухгалтер но. Тӥни озьы тупаны но кулэ ук. Эриктэк малпан йыре лыктэ: соос азьвыл ик ӧз тодэ меда корреспондентлэсь лыктонзэ? Вылаз ик, Алнашысь куд-ог кивалтӥсь эшъёс со сярысь тодо вал. Мон одно ик уг турттӥськы вераны, колхоз кивалтӥсьёс юри кошкизы шуыса. Озьы ке но... Мар пумысен бен ӝожтӥськон? Огъя вераса, гожтэтлы осконо ке, колхозын туж сюлэмшугъяськытӥсь югдур кылдэмын. Кивалтӥсьёс чик но уг лыдъясько огшоры калыкен, уката ик пенсионеръёсын. Таосызлы колхоз номыр ласянь но уг юртты, шуом, пудо сиён дасянэн ик. Колхозын алямын лушкаськон, тужгес но - аран вакытэ. Ю-нянез лушкало комбайнёръёс, лушкало шофёръёс, лушкало интымын ужасьёс. Гожтэтын верамын соослэн нимтулъёссы но. Но ӵок ини, соосты ум вералэ ни: кутэмын ӧвӧл бере, лушкаськись ӧвӧл. Ю тысез аракыен вошъяло. Та пумысен тумошо учыр вал монэным Муважи урамын. Пумитам шедиз ог куамын аресъем пиосмурт. Мар но со юалляськоно кариськи: - Тон, бӧляке, колхозник-а? - Колхозник. - Тани кивалтӥсьёсты вылэ ӝожтӥськон вань (верасько, мар отын гожтэмын). Шонер-а со? - Ваньмыз сямен зэм гожтэмын. - Ачид мар ужаськод? - Али - кытчы ыстозы, гужемзэ итымын. - Соку вера ай, эше, ю тысь вузаськоды-а? Эн кышка, мыным нимыд-тулыд но кулэ ӧвӧл. - Ма, луылэ. - Кӧняен коть? - Ньыль мешок чабей понна одӥг черык. Тӥни сыӵе тунсыко пумиськон вал гурт урамын. Табере азьланьто гожтэт сярысь веранме. Кызьы автор гожтэ, кивалтӥсьёс колхоз ваньбур чотын узырмыны туртто. Колхозникъёслы сётъятэк, олокытчы чечыез келязы. Коммерческой магазин пыр колхоз сӥлез вузаса, барыш потто. Автор ӝожтӥське председательлэн бусьтыр улэмезлы. М. Е. Шкляев одӥг гужем куспын кирпичлэсь корка пуктэм. Со аре ик выль автомашина басьтэм. Мон адӟи солэсь юртсэ. Дворец уд ке но шуы, туж ик начар но уг адӟиськы. Паймытэ мукетыз. Колхозникъёс аръёсын уждун уг адӟыло, нош председательзы со дыре ик корка но пуктэ, машина но басьтэ. Трос сыӵе выллем сьӧлыкъёссы сярысь гожтэ ӝожтӥськись мукет кивалтӥсьёссы пумысен но. Зэм-а со ваньмыз, эскерытэк шуг вераны. Но кызьы пусйи вал ини, фактъёсты эскерыны ӧз кылды кивалтӥсьёс ӧвӧлэн. Выльысь ке нимысьтыз мыноно "Кама" колхозэ, дуногес усёз одӥг ужпумъя сокеме кык пол ветлыны. Соин ик мынам бадӟым куронэ вань Михаил Егорович Шкляевлы. Ижевске вуылытэк уд улӥське, луоз, пыралэ вал редакцие, кенешысалмы, ӵош сэрттысалмы-пертчысалмы ӝожтӥськонэз. Яке гожтэтэн валэктон сётэ вал. Нялтас вераса, автор нимзэ воштыса гожтэм. Но мон быгатӥ сое шедьтыны, пумиськи. Юай, малы, пӧй, зэмос нимдэ ӧд гожты. - Тодӥзы ке, сиёзы, - вакчияк валэктэмын вал. Г. КОРЯКОВ. Наталь Мӧзмон уг ветлы котыртӥз Ува ёросысь гурт удысъя "Кокос" кооперативе Лариса Наговицина вуиз ньыль ар талэсь азьло, Ижевскысь Гурт удысъя академиез йылпумъямез бере. Со - валтӥсь зоотехник. - Нырысь-валысь кышкатски вал - нош ӧй ке пӧрмыты? - шуэ Лариса.- Туж тау татын ужасьёслы. Соос мыным дыр сётӥзы вань ужъёсты йылаз-пумаз валаны, висъязы улон инты. Нош ужан удысэз Лариса Васильевналэн пичи ӧвӧл - скалъёс гинэ 170 йыр, вань на валъёс, мукет пудо-живот. Уж трос, котькытчы вутсконо. Но со умойлы гинэ, мӧзмыса пукыны дыр уг кыльы. Туспуктэмез В. БЕЛОМОРСКИХЛЭН. Кун Кенеше депутатэ кандидат Ӧжытгес вераськоно - тросгес ужано Геннадий Васильевич Турбанов вордскиз 1946-тӥ арын 2-тӥ январе Кемерово областьысь Елыкаево черкогуртын. Ӟуч. Йылпумъяз Ижевскысь сельскохозяйственной институтэз, инженер-механик. 25 арлэсь ятыр ужа транспорт удысын. Та дыр ӵоже механикысен кутскыса будӥз генеральной директорозь. 1994-тӥ арын Турбановлы сётэмын "Россиысь сӥё-дано автотранспортник" ним. Депутатэ ӵектэ бырйисьёслэн огазеяськонзы, республикаысь но Ижевскысь автотранспорт удысын ужасьёс. Г. В. Турбановез тодӥсько ужаны быгатэмезъя. Котьма борды мед кутскоз - одно ик пумаз-йылаз вуттоз. Жаляса верано, таӵе адямиос пумен шергес но шергес пумиськыло ни. Н. БАРБОН, "Удмуртавтотранс" объединениысь Старейшинаослэн советсылэн кивалтӥсез. Дуно пимес, вынмес но кузпалмес Владимирез ватонын юрттэмзы но кайгумес шори люкемзы понна бадӟым тау кареммес вераськом Удмурт Республикаысь Правительстволэн Аппаратэзлы, эшъёсмылы, ӵыжы-выжыосмылы, матысь адямиосмылы но тодмоосмылы. Беловъёслэн семьязы. Ӧте "Каргурезь" Кызь куатетӥ южтолэзе (мартэ) Удмурт кун филармонилэн юртаз луоз шаркан ӝыт. Дася но ортчытоз сое шаркан музъем вылын вордӥськем но Ижын улӥсь адямиослэн "Каргурезь" бӧляксы. Ӟырдыт вераськонъёсын но кырӟан-веранэн тырмем ужрадын асьсэлэсь устолыксэс возьматозы ӟечъёсыз пӧлысь ӟечъёсыз. Люкаськем калыклы капчи но задор мылкыд кузьмалозы Кельдышысь, Мувырысь, Пашур-Вишурысь, Пипиёысь, Быгиысь кырӟась-верасьёс. Соосын артэ ик - Балтачысь устокай Маиса Романова. Та нуналэ ик радъямын луоз "Шуд, арганэ!" пумиськон. Отын но кужымзэс мерталозы тужгес шӧртчиосыз. Радъямын луозы на Шаркан ёросын поттэм но дасям сиён-юонлэсь но киужъёслэсь адӟытонъёс (выставкаос). Пумиськон кутскоз ӝытазе куать часын. "Каргурезь" ӧте ужрадэ вань мылкыд карисьёсты. Ӧте "Ветеран" Ижевскысь Ожысь но ужысь ветеранъёслэн кеннешсы "Ветеран" клублэсь выль пумиськонзэ радъя. Со ортчоз 24-тӥ мартэ филармонилэн Бадӟым залаз (Пушкинской урам, 245-тӥ юрт). Кутске 11 часын. Ужрадэ ӧтемын Удмурт Республикаысь Вылӥ судлэн кивалтӥсьёсыз. Пумаз луоз концерт. Александр ВЕШАБУК Осип песятай Верос Быдэсак нимыз-тулыз солэн Осип Осипович Осипанов. Мугорыз - аръёс улэ куасалскем писпу, йырсиез, синкашъёсыз но тушез - лякылэм мамык. Нош синъёсыз чылкытэсь, куараез йыгмыт, визьмыз лэчыт. Осип песятай асьсэ гурт интыязы ик улэ. Отын чылкак куинь гинэ юрт кылемын на. Паллян паласяз коркан - ог витьтон аресъем Илья. Кышноез солэн, Ильялэн дугдылытэк юыса но керетыса улэмезлы чидатэк, райцентре нылыз доры кошкиз вал но али мукет воргоронэн улэ, шуо кадь. Табере Илья ас юртаз, туала кылын вераса, бомж. Осип песятаез чаклам карыса, пунэмен ма но со курыны вуылэ, только вот пунэмзэ ноку но уг берыктылы. Кудӟыса ке лыктэ, бадӟым политика сярысь вераськон мытэ, Госсоветысь но Госдумаысь депутатъёсты миське, нош вераськонэзлэн пумаз, котьку сямен, кышнозэ тодаз вае но мӧзмеменыз-а оло вожаменыз-а - валаны шуг: кион сямен вузыны ӧдъя. Осип песятай табере уг яраты ни мултэс зулисьёсты, соин ик кудӟем Ильяез амалтэк улляно луэ. Осип песятайлэн бур палаз - фермер. Та гуртысь кошкем муртлэсь корказэ выльдӥз но, кык гектар музъем вылын картофка, уно пӧртэм бакча сиёнъёс будэтыса, матысь городысь столовойёсы но ресторанъёсы келя. Со но Осип песятаез чакланы пыра. Городэ мынэ ке, одно ик нянь, кеньыр, сылал, сакыр басьтыса вае. Тодэ уго: пересьлы огназлы улыны секыт. Ӧвӧл, Осип Осипович чылкак огназ кылемын ӧвӧл. Солэн пиез вань, городын улэ, но дырыз чик ӧвӧл, шӧдске: атаез доры шер вуылэ. Осип Осипович Осипанов - берло бадӟым ожез ортчем мурт. Отын бур пыдыз сӧсырмемын вылэм но, со дырысь чутэ. Ог кызь-кызь вить ар талэсь азьло быдэс ёросын нимо-дано адями вал со: ас гуртазы ик колхоззылэн председателез луыса тыршиз. Самой соку туж удалтэм етӥн будэтыны дышизы. Нош со етӥнэз государство дуно дунын басьтэ бере, гуртсы туж узырмиз, колхозникъёс музъем вормонтэм юртъёс пуктылӥзы. Колхоззэ ӝутыны быгатэм председателез Вылӥ Кенеше но бырйылӥзы, гадяз орденъёс, медальёс бырттылӥзы, газетъёсын, журналъёсын солэн нимыз самой дано адямиос пӧлы пыртыса гожъяллямын вал. Ваньмыз сураськиз-пожаськиз огкутскемен. Колхозъёсты бадӟыматон вакытэ Осип Осиповичез районысь кивалтӥсьёс ӧтизы но, вить пичиесь гуртъёсты огазеяса, одӥг колхоз кылдытыны ӵектӥзы. Берло аръёсы мар верамез потэ, сое вераны дышиз вал ини со - аслаз бакчаяз музэн. Тани та ӵектонзы пумысен но Осип Осипович меӵак шуиз: "Та ужрад колхозъёсты куашкатонлэн нырысь вамышез луэ. Милям гурт калыкмы ас кужыменыз узырмиз. Табере артысь куашкамъёсты сюдыны-вордыны кулэ шат?! Маин янгыш ми?! Ваньмыз гылӟоз центральной усадьбае!.. - кекам ньылонысьтыз галстуксэ шуак кыскыса, мур шокчиз но веранзэ йылсаз: - Пичиесь гуртъёс шоры сялӟозы". Партилэн райкомез со нуналэ ик бюро люказ но Осип Осиповичлы, мыдлань вераськемез понна, выговор лякиз. Выль колхозлы председателе ӵектӥзы мукетсэ. Осип Осиповичлэсь нимзэ поттылӥсь ӧйлась ни. Гуртысьтыз колхоззэ парсь вордон бригадалы пӧрмытӥзы. Центральной усадьбае нырысь-валысь кӧчыны ӧдъязы механизаторъёс, отӥяз, начальной школа но медпункт ворсаськемен, я городэ, я райцентре пазяськизы егит семьяос. Осип Осиповичлэн но Ондӥ пиез, городын кышно вылэ пырыса, бадӟым заводэ интыяськиз. Ас вордӥськем гуртысьтыз Осип Осипович палэнэ кыстаськоно ӧз кариськы. Кузпалэныз ӵош пудо вордыса но бакча емыш будэтыса, пиезлэсь семьязэ но тыр возизы, асьсэос но ӟудыса ӧз улэ. Только вот дырын-дырын сюлэмыз чутрак бышкалтэм кадь луылӥз: быдэс даур-гумырзэ калык азьпалан ветлыны дышем муртлы вераны луонтэм секыт вал кичабонъёсын но ушъясь кылъёсын пачылмем улонэзлэсь палэнскыны. Вань секыт мылкыдзэ Вовик внукез буйгатылӥз. Ой, кыӵе мусо пияш вал со! Нырысь вамыш лэсьтэмез но, нырысь верам кылыз но, пальпотэмез, куатаськыса-бӧрдыса погылляськемез но - ваньмыз-ваньмыз Осип песятайлэн син азяз но пель сьӧраз. Кензы но мылкыдзыя ик тупаз - лачмыт, ужлэсь радзэ валась, ӟеч кылын вазиськись. Нош Осип Осипович кадь мӧйы муртлы, ӟечен верам кыл сяна, мар кулэ на!.. Ондӥ пизы сярысь куаретонэз ик ӧвӧл - соиз анаен-атаез борды лулыныз-сюлмыныз бурмемын. Озьы тӥни улӥз та семья Осип Осиповичез ужысьтыз палэнтэмзы но пенсие кошкемез дырысен. Тулыс шунась лымы выллем, син азьын пичи кылиз но кулэсмиз гуртсы, сое "неперспективной" шуыны ӧдъязы. Бӧрысьгес ини парсь вордон фермаын но ужась ӧз ни сюры, али ферма юртлэн кырыжам мугорыз но сисьмем липетэз гинэ мӧзмыт адӟисько на. Куинь ар талэсь азьло Осип Осиповичлэн дыртытэк ӧръяськись улонэз чутрак тыгиськиз, крезьлэн зол кыскем сиез кадь, ӝожмыт куараен жинграк! чигиськиз. Чик кема висьытэк, сюлэмыз путыса кулӥз кышноез, Варвара Петровна. Нылпиезлы ивор сётыны но ӧй быгатысал, дыр, вӧзазы фермер ке ӧй улысал. Машинаяз пуксьыса, городэ лобатӥз... Вот ведь кыӵе вылэм та улон-вылон! Огдышемен со ас радызъя ке мынэ, котькудӥз ас быгатоно ужзэ нуналлы быдэ лэсьтэ - нокинлы вазиськытэк, косъяськытэк. Ма, зэм но, Варвара Петровна сяна, кин ке скал кыскиз шат юртазы? Яке кин бен убоен-убоен жалем емыш будэтылоз вал? Осип песятай убоосты гудылӥз, конечно, только вот соосты радызъя-радызъя кызьы тупатъян, кидысъёсты кызьы улӟытъян, кыед вылын узьымез шунтыса-парыса кызьы будэтон сярысь ӧз но малпалля. Ваньзэ сое туж быгатыса лэсьтылӥз кузпалыз. Нош Осип Осиповичлэн аслаз радъяськем ужез вал: кисыысьтыз ӧз бырылэ кортӵогъёс, кияз котьку луозы вал молот яке тӥр. Юрт котырзэ котьку чылкыт возьылӥз. Табере тани огназ кылиз но абдраса учке: кӧня уж лэсьтэ вылэм нунал ӵоже солэн кузпалыз! Куд-ог чыры-пыры кибервылъёс син шоры уг йӧто бере, соос вань шуыса малпан но ӧз лыктылы йыраз. Одӥг учыр гинэ сое пальпотӥсь каре: валлян тулыс витьымтэ шорысь дасэтӥ классын дышетскись Вовик внукез лыктӥз - каникулъёсме, пе, тон дорын ортчыто. Осип песятаез шумпотэменыз пыдчиньы йылаз ветлӥсь луиз. Ӧчкарем кадь, гуразьысь выж пуллэн ӟукыртэмез куалектытэ, ӧслэн ӟирыез киж-куаж вазе. Азьвыл но бен озьы ик вал, дыр, но, пересь ваньмызлы талы дышемын вылэм ни, шӧдске. Нош али мусо внукезлы изьыны номыр но медам люкеты, малпа. Сыл ай, Варвара Петровнае та куажетӥсез тазьы каре вал кадь шуыса, Осип Осипович тысь вӧйын ӝыны литр банкаез кутӥз но ӟиры вылэ мыкыртӥз. Одӥг шапыкез но ӟирые ӧз сюры - янак кузя выж вылэ гылӟиз! "Э-э, ма... одӥг гинэ тылыен выремзэ адӟеме вал кадь но..." - тодаз ваиз пересь. Собере, ӝажыысь тылы шедьтыса, выж вылэ кисьтӥськем вӧез шапыкен-шапыкен ӟиры вылэ виятӥз. Ӧс ӟукыртэмысь дугдӥз. Сюлмыз буйгаз но, диван вылын изись Вовикез шоры учкыса сылӥз огшап. "Куал-куал мугоро пияш ини, лешой!.. - пальпотӥз. - Кин луэмдэ мед тодом на вылэм... Око-ко... Отчыозь уло на меда?.." Мукетыз учыр тодаз лыктӥз. Кузпалыз кулэм бере, скалзэс кыскыны гидэ потоно луиз. Тодэ вал: нырысь ик скаллэсь веразэ миськоно, собере пичи пукон вылэ пуксёно. Озьы ик лэсьтӥз. Кыскыны ӧдъяз но - йӧл пичиесь шапыкъёсын гинэ ведра пыдэсэ усьылэ. "Мар тамаша та?- малпа Осип Осипович.- Варвара Петровнаелэн та дырозь ӝыны ведра люкаськысал ини, мынам ке - одӥг гучык но уз луы на". Скаллы акыльтӥз, шӧдске, пӧрмостэмлэн сое бичатэмез: кырыжак учкиз но... ӵыжиз ук! Осип песятайлэн ведраез, жинграк! карыса, ӧс янак борды шуккиськиз, нош ачиз юрт кузё, пуконэз вылысь пезьдыса, небыт но шуныт скал табань вылэ зоньтӥськиз. - Мар жугиськиськод?! - кеськиз Осип Осипович. Скал пельзэ но ӧз выреты, сое норись кутъёслэсь утиськыса, быжзэ сэзъя. Самой со вакыт вадестӥзы ортче вал Петрович нимо атассы. Кеськем куараез кылыса, йырзэ амалтэк гид ӧс пала берыктӥз. "Дышетоно, оло, Осип песятайме?" - малпаса, лэся, гидэ тэтчиз но пересьлэсь небыт кыедэн саптаськем кизэ кокчалтӥз. Та Петрович атас сярысь кӧня ке кыл нимаз верано луоз, дыр. Чипы дырысеныз уг яраты со кесяськемез. Варвара Петровна эркияса будэтӥз уго сое. Туж етӥз но чебер атас луэмез бере, Ильялэн курегъёсыз доры ветлыны дышем, таизлэн аслаз атасэз вань ке но. Огпол мынэмаз быжтэк бертоно луиз: Илья вожаменыз, асьмелэн но атасмы вань шуыса, Петровичез кутэм но быжзэ ишкем. Со дырысь Петрович кыре уг ни потылы. Оло, со дырысен, лэся, кесяськисез но кылэмез уг ни луы, туж вожез потэ. Илья туж кужмо кесяськем, шӧдске, Петрович шоры. Осип песятаез кокчалтэмез бере, соиз суралскиз но Петровичез мыжгыны малпа вал, но ӧз сузьы, небыт скал табанен сэрен вольтчыса, гаӵоло усиз. - Ма, мар дауртӥськоды тӥ туннэ?! - Вовик внукезлэн яратоно Коша кучапиез кадь нискетӥсь луиз. Мырдэм но кызьы султыса, азбаре потӥз но, азяз лопыръяськись Петровичлэсь утиськыса, киосыныз суралляськыны ӧдъяз. Корказь ӧсэз ворсамез бере гинэ мур лулӟиз: "М-да, Вара песянайзылэсь мӧзмо кадь соос, вот что..." Корка пырыса, ма борды кутскыны валамтэеныз, диван вылэ выдӥз. Кияз ручка но журнал кутыса, яратоно кроссвордэз борды басьтӥськиз. - Та-а-ак... "Юрт куспын улӥсь пудо-живот йӧл сётэ". А-а-а, тодӥ, тодӥ!.. Кыскыку ӵыжаське но кутъёслэсь быжыныз суралляське шуоно на вылэм. Та-а-ак... Табере учком вылӥысен улӥе: "Юрт куспысь тылобурдо". Ура, таизэ но тодӥ, таиз но ньыль букваен. Таяз но гожтоно на вылэм: "Адями вылэ урдскылӥсь но Ильялэн курегъёсыз доры ветлӥсь", - пальпотӥз пересь. Кроссвордэн вырыса жадемез бере, ӧжытак изьыны малпаса, син пиялазэ кымесаз ӝутӥз но журналзэ но ручказэ вӧзысьтыз пукон вылэ понӥз. Соку ик умме усиз. Но кема уг изьы со: кӧня ке дыр ӵоже гинэ соргетэ но выльмыса султэ. Али но тани сайказ. Сайказ но мур малпаськонэ усиз. - Кызьы бен табере юртме утём ини Варвара Петровнаетэк, огнам?!. Пудо-животэ но мыным пумитъяське ук!.. Око-ко... Я, кайгырыны сётӥськид ке, ваньмыз куашкалоз..." - диван вылысь зӥрак! султыса, ӝажы вылысь тодмо книгазэ басьтӥз но вить пол-а, куать пол-а лыдӟыны кутскем интызэ усьтӥз. Нош ик выдӥз. Лыдӟыны гинэ ӧдъяз но - гожъям чуръёсты уг адӟы. "Э-э, ма-а... син пиялае кытын-о таӵе?.. Ӝӧк вылын ӧвӧл меда? Ӧвӧл... Валес вылэ кельтӥ шат?.." Шобретсэ бугыръяз, гур вылысь утчаськиз, синучкон азьысь пичи ӝӧкез учкиз, жаг кисьтон ведраез эскериз - нокытын ӧвӧл. Кровать улэ учкыны мыкырскиз вал но шӧдӥз: кымесаз маке люкетӥсь вань. Киыныз йӧтылӥз - син пиялаез вылэм! Тӥни сыӵе учыръёсты тодаз вайылэ табере Осип Осипович Осипанов. Кылем гужем пиез, кенэз но Вовик внукез бертылӥзы. Мӧзмись юртаз нош ик шунды пыраз кадь, омыр но сайкыт луылӥз. Кенэз ӝӧк вылэ пӧрам-пӧзьтэм пуктылӥз, пиез чаркаосы курыт аракы лэзьяз. Осип песятай паймиз: пиезлэсь тазьы выремзэ адӟемез ӧй вал на - уг юы со курытсэ, Инмарлы тау. Нош таид сюмыксэ ӝутӥз но шуиз: - Гажано атае, Вовик внукедлэн армие кошкон дырыз вуиз. Вай ӟеч сюрес сӥзём солы. Мусо нылпиосыз шоры учкыса, пересьлэн кӧтыз юытэк но, сиытэк но тыриз. Бератаз кудӟиз, вераськись луиз, внуксэ ӟыгыртэмез потӥз. Соиз ӧз пумитъяськы, ачиз но ӟыгыртӥз песятайзэ, кык пол бамаз чупаз. Люкиськемзы дырысен ар ортчиз-а, ӧз-а, огпол со доры пыре иськавынэз - фермер. Осип Осипович, скалзэ кыскыса, быдэс ведра йӧлын пыре вал. Фермерлэн кияз пичи гинэ кагаз но конверт, нош аслаз тусыз туж мӧзмыт. - Мар луиз? - маке умойтэмзэ шӧдыса куалектӥз Осип Осипович. - Пиед гожтэт ыстӥз... Со ивортэм... Вовик внукед, пе... Осип Осиповичлэн киосыз дырекъяны ӧдъязы, тани-тани ведраез гуждор вылэ усёз. - М-мар, пе?.. Мар В-вовике?.. - витьымтэ шорысь ноку могасьтэм пересь могась луиз. - Вовик внукед... Чечняын... бырыны шедем... Осип Осипович каллен гинэ корказь пагӟа вылэ лэзиськиз. Фермер солэсь йӧлын ведразэ кутӥз но ма карыны ӟудыса сылэ. - К-кин сё-сётӥз тыныд та г-гожтэтэз? - эшшо но юнгес моганы ӧдъяз пересь. - Городэ ветлӥ но пидэ адӟи. Самолётэн Чечня пала лобисько, шуиз. - Ойдо корка пыром, - шуиз Осип Осипович. Нош аслаз пагӟа вылысь султэмез уг луы. Фермер сое кунултӥз ӝутӥз но корка пырыны юрттӥз. - Кельты огнаме, - каллен гинэ вазиз Осип Осипович. - Но... - Гожтэттэ ӝӧк вылэ пон но огнаме кельты... Фермер кошкиз. Осип Осипович валес вылаз выдӥз. Эшшо но эшшо лыдӟе пиезлэсь одӥг гинэ гожтэм чурзэ: "Вовикмы Чечняын бырыны шедем". Чик вырӟылытэк час ёрос кыллемез бере, умме усиз. Уйвӧт адӟе: Вовикеныз ӵош кытчы ке мыно кадь. Мугорын песятаезлэсь унолы ӝужыт, тусын туж чебер. Анекдотъёс мадьыса, песятайзэ кать-кать серекъятэ. Витьымтэ шорысь ыбылӥськем куара кылӥськиз. Йыр вадесазы ик дыбыр! каре. Осип Осипович музъем борды ӝиптӥськиз, нош внукез сылэ но пальпотыса учке яратоно песятаез шоры. Со куспын туж кужмо йыгак! вазиз но, Вовикезлэн мугорыз куасалскиз, гадьысьтыз вир кисьтӥськиз кадь, секыт мугорыныз песятаез вылэ пограз. Осип Осипович кеканы ӧдъяз, шоканэз пытсаськиз. Нош автоматлэн дыбыртэмез эшшо но кужмоя. Собере шарак сайказ. "Вовике, внуке, монэным артэ вал ук! - малпаз. - Уг, уг оскиськы со гожтэтлы, внуке улэп, улэп!!!" Со куспын укно пиялае дыбыр-р! йыгаськись луиз - чылкак автомат куара кадь кылӥське. Куаляк луыса, Осип Осипович интыысьтыз вырӟиз вал но, вӧсь луись сюлэмыз ньылонзэ кекатӥз. - Кин со?.. Кинлы мар кулэ таӵе бер?!. Укно пиялаос нош ик туж кужмо жингыртӥзы. Осип Осипович, мырдэм но кызьы султыса, тылэз ӝуатӥз, укно доры лыктӥз. - Кин отын? - вазиз пеймыт уе. - Мон та... ик!.. Илья... Усьты ай... ик!.. укнодэ... - Мар кулэ? - Ик!.. Мунчоме эстыны турттӥсько но... ик!.., тылпоттонэ ӧвӧл... Осип Осипович борддорысь час шоры учкиз: куинь час ӵукна. Ӝажыысь коробка тылпоттон басьтыса, укнозэ усьтӥз. - Ме, эсты мунчодэ! "Ик! Ик!" каремысь дугдод, оло... Кӧня час, тодӥськод-а? - Ма... ӧйтӧд... ик! - Мын, Илья, мынам тонэн вераськеме уг поты! Внукеным пумиськонэлы люкетӥд! - Внукеныд?!. Хе, фермер киысь пиедлэсь гожтэтсэ мон адӟи ук... Соид ӧвӧл ни, соид - тю-тю!.. - Кош укно улысьтым! Ӧз быры мынам Вовике, ӧз!!! Со татын, монэн артэ, мынам сюлмам!!! Осип Осиповичлэсь таӵе вожпотон дырзэ адӟылэмез ӧй вал ке но, кепыран сямез уг вала уго Илья, пинь пыртӥз сипыртӥз: - Оскид-а, мар-а, тылпоттон кулэ шуыса?.. Йыры висе мынам, вот мар! Макмыр йӧнатондэ курисько... - Ох, Илья!.. - секыт лулӟиз Осип Осипович но, укнозэ пытсаса, тылэз кысӥз. Ӟардытозь умме усемез ӧйлась ни. Шунды сиос корка пырем бере султӥз. Ведраын шапык но вуэз ӧвӧл. Ошмес дуре васькыны ураме потӥз но адӟе: капка вадесысьтыз канаваын Илья гаӵоло кылле но соргетыса изе. Вӧзаз - тылпоттон. *** Пӧсьтолэзьлэн пумаз Осип Осипович Осипановлэн вордӥськем нуналыз. Туннэ но тани со нунал вуиз: солы тырмиз тямыстон вить арес! Азьвыл аръёсы Варвара Петровнаез ӵукна ик султыса пӧраны кутскысал ини. Собере бертысалзы пиез, кенэз но внукез. Быдэс юртаз нош ик шумпотон шунды ворекъясал, коркан но корказьын ческыт пыжиськем шӧм лӧсъяськысал. Око-ко!.. Осип Осипович тодэ: туннэ но одно ик бертозы пиез но кенэз, туннэ но ӝӧк выл тыр пуктӥськоз кенэз. Луоз, ваньмыз луоз туннэ но - ческытэз но, курытэз но... Только вот уз ни луэ соосын ӵош... Нылпиосыз вуытозь, тэк пукод-а, мар-а шуыса, Осип Осипович пичи ведра кутӥз но бакчаяз сутэр бичаны потӥз. Туэ гужем солэн бакчаяз ваньмыз сыръяса кадь будэ: убое кизем-мерттэмез но туж ӟеч удалтэмын, узы-борыез но, емышъёсыз но ог-огзэс ортчон вылысь кисьмало ини. Уть, куинь сутэрпуэз сьӧд буёлэн пазямын, кожалод. Час ортчиз, оло, ӧз, Осип песятай сутэрен тырмытэм ведразэ ӝутӥз но, чутӥсь паллян пыдзэ вӧсь каронтэм вылысь, бур пала кырыжтӥськысагес мынэ. Туж чакласькыса вамышъя ке но, ӧчкарем кадь - самой со пыдыныз ик ӵемтылэ со. Али но озьы ик луиз. Ог вить вамыш лэсьтӥз оло ӧз - канжаськиз но усиз. Улаз сюрем ведраез пилиськиз, нош сутэрез секыт мугорыз улын быдэсак нелькиськиз. Мукет ведралы пыратэк ӧйлась. Ӝыны ведра гинэ бичаны кынарыз тырмиз - жадиз. Шутэтскыны пыриз. Ӵукна гинэ сайказ. Ассэ ачиз пыкылэ: "Око-ко... Таӵе ӝоглыкен ужай ке... Уть, бакчаме жаг турын соге ини..." Кусо кутыса, бакчае потӥз. Куаш! вазе кусоез, куаш! пограло ашкынэм пушнер, пот, люгы... Нош ик туж ӝог жадиз. Мырдэм но кызьы ӝыны ведра сутэр бичаз но шутэтскыны пыриз. Соку ик умме усиз. Адӟиз внуксэ. - Вовике, мусое, малы такема уд бертӥськы? Мон туж мӧзмисько. Мон тыныд сутэр но бичай ини. Али тани варенья пӧзьто. Берт! Ӝоггес берт! Вунэтӥд шат - туннэ мынам вордӥськем нуналы?.. Нош ик сайказ. Шунды ӝыт пала погыльскем ини. Осип Осипович туж жаляз, Вовикеныз пумиськонэз вакчи вал шуыса. Ӝуштыса султӥз но вакчи вамышъёсын корка шортӥ вамышъя: "Бичам сутэре сисьмоз ук: варенья пӧзьтоно шат?.. Мар бордысен кутске вал ай Варае та уж борды?.. А-а, тодӥ, тодӥ!.. Гуре тыл понэ вал нырысь ик. Бен, бен!.. Давай, тылском, иське... Вот..." Гурез кенжем бере, бадӟым таз кутӥз но ведраысьтыз толон но туннэ бичам сутэрезлэсь ӝынызэ кисьтӥз отчы. "Табере мар кароно вал ай?" - малпаса сылэ. Со уго ачиз варенья ноку но ӧз пӧзьтылы, та ужен Варвара Петровна гинэ вырылӥз. Сутэрзэ вуэн согиз но кык стакан сакыр кисьтӥз. Тазэ плита вылэ пуктыса, дӥсь возён шкафысь праздник нуналъёсы дӥсян костюмзэ поттӥз. Бадӟым синучкон азьын дӥсяське, пиджаказ бырттылэм орденъёсыз но медальёсыз жильк! вазё. Йырсизэ сынамез бере, эшшо огпол ас шораз учкиз но, мугорыз ик шонерскиз кадь, ымныраз пальпотон тус пыриз: "Вордскем нуналэныд, ветеран!" Синучкон азьын сылонъяз, плита вылэ пуктэм тазэз сярысь вунэтӥз. "Мар ужаны малпай вал мон?.. Э-э... А-а, тодӥ, тодӥ!.. Ньыль букваен "Куаро писпу" со - "Тыпы"! Егит мурт сямен тэтчыса, кроватез доры дыртӥз но тумбочка вылысь кроссвордэн журналзэ кутӥз. Витьымтэ шорысь кроссвордэз выль но выль кылъёсын тырмыны ӧдъяз. Быгатэмезлы шумпотыса, дуннеез ик вунэтӥз кадь. Со вакыт корка тыр вӧлдӥськиз ческыт зын. "О-ля-ля! - чабкиськиз со. - Варенья пӧзьтӥсько ук мон! Ха- ха!.." Плита дуре лыктӥз но пӧзись вареньязэ пуньыен суралтӥз. Но... мар та?.. Нош ик суралтӥз. "Кизер та малы ке... Кызьы меда Варвара Петровнае вареньязэ нап карыны быгатэ вал?.." Веръяз но мыняк потӥз: "Ма, та туж ческыт компот луэм ук!.. Вовик внукелы туж ярасал. Со котьку ушъялоз вал милесьтым гурт сиён-юонмес". Осип Осипович эшшо огпол синучкон азе султӥз но йырсизэ маялтӥз, медальёсын, орденъёсын шальтыртӥсь пиджаксэ мугоръяз тупатӥз, собере, ӝӧк сьӧры пуксьыса, компотэн куинь стаканэз тырмытӥз. - Таиз, Варвара Петровна, тыныд, таиз - Вовикелы, - ас понназ вераськыса, кыксэ стаканзэ ӝӧк пуме пуктылӥз, огзэ аслыз кельтӥз. Кема пукиз, ас киыныз пӧзьтэм компотсэ юыса. Со вакытэ ымныраз шунды ворекъяз кадь: валаны луэ вал, кузпалэныз но внукеныз кенеше шуыса. Корка пырись луиз. Ас дуннеяз усем Осип Осипович куаляк луиз но ӧс дорын сылӥсь фермерез адӟиз. Соиз паймемын: - Кыӵе праздник лэсьтӥськод, Осип Осипович? - Лык, пуксьы вӧзам, дуно эше. Мынам туннэ мӧзмыт но, шулдыр но нуналэ... Тямыстон вите тырмиз, тодод ке, ява! - Сэре... сэре... малы огнад, Осип Осипович?.. Тазьы кулэ шат ветеран такем дано юбилейзэ пусйыны?! - Со понна ик мон - ветеран... Ми кадьёс котьмалы дышемын. Собере огнам ӧвӧл ведь мон. Тани вераськыса пукиськом вал ай Варвара Петровнаеным но Вовик внукеным... Ӝыт пал лыктозы, дыр, пие но кенэ, соос вордӥськем нуналам ветлытэк уг кылё. Я, лык ӝӧк сьӧрам, компотэным куно каро. - Сыл ай, сыл, Осип Осипович... Маке умойтэм кадь та... Ветеранлы - тямыстон вить... Ожын но ужын данэ потэм мурт!.. Тон монэ вить, ява, мон ӝоген вуо!.. - тӧл кадь лобыса кошкиз фермер Осип Осипович дорысь. - Ӧз но ӟечкыла... Хе!.. Туж пересь каре ни шат?.. - ӝожомиз пересь. - Пияш, ма, ачиз умой кадь но... Кема ик дыр ӧз ортчы - Илья пыриз. Ӧс дорын гор-гор серекъяса сылэ: - Гурсуранэн улляса лэзид-а, мар-а фермерез?.. Молодец, Осип агай, озьы ик кулэ солы, асьме музъем вылын узырмыса медам улы!.. Сыл ай, кыдэд бертыны ӧз кутскы-а ни тынад? Мар муген орден-медальёсыныд кильтыръяськыса пукиськод?.. Хе!.. - Мын, Илья, берен ӧть фермерез... Со тон кадь ашкынэс ӧвӧл, со умой адями... - Мон урод, иське?.. Ну, ну!.. - Малы меда кошкиз, алама кыл ӧй вера кадь но... - Ёрос кивалтӥсьёс доры лобатыса кошкиз. Чагиськыны, дыр. Туж вожомемын вал. Соин ик юасько уго: ӧд-тэ жугиськелэ? Ӧз-а сӧсырты тонэ шуыса, тодыны пыри. - Малы тон озьы, Илья, чик тодытэк-валатэк? А?.. Малы тон сыӵе лек? - Мынам кадь кышноен ке улысалыд, тыэд-мусэд сюромысал, Осип агай... Ы-ы!.. - витьымтэ шорысь куараен бӧрдыны ӧдъяз Илья но пересь вӧзы пуксиз. - Ойдо, ӵок: мед улоз выль картэныз, уже но, быже но ӧвӧл. Мукет куректон сюлэмме йыръе, Осип агай, ой, кыӵе бадӟым куректон!.. Ы-ы!.. - Мар луиз? - Кылӥд-а, Нкрумо Макреез виилям ук! - Кинэ? - Ма, тӥни... Африкаысь туж тодмо адями. Ой, Осип Осипович, нокытын уг чидаськы, сюлэмы ӝуа!.. Сю граммед ӧвӧл-а? Стаканад мар вань - аракы ӧвӧл-а? - Компот та, Илья. - Чурыт куртчым тон, Осип агай! Астэ гинэ тодыса улӥсь!.. Адямилэсь висись сюлэмзэ ӧд но вала, уд но вала ни, синмыд кыниськытозь! - Илья, тон кудӟемын. Берт дорад, а... Со кылъёсыныд монэ но висись карод... - Тонэ-а?!. Тонэ тыл но, му но уз басьты, кӧльы кадь муртэ!.. - Тау ӟеч кылыдлы. - Сёт курытсэ, Осип агай, сюлэмы ӝуа... Мон тыныд тау карысал... - Уг сёты, Илья. Илья интыысьтыз султӥз но ӧс пала шоналскиз. - Ы-ы!.. Нкрумо Макреез вииллям ук, ой-ёй!.. Мар куректон та, мар куректон!.. Нош тон, пересь, чурыт куртчым, номыре валатэк улӥськод! - ӧсэз йыг! ворсаз но ас дор палаз вамыштӥз. - Ӟечкылась но пыраз тани... Уг, вожме уг поттӥськы, гыдыкъёсы, - ас понназ вераське Варвара Петровнаеныз но Вовикеныз. - Тӥ но пеляды эн понэлэ со шузи кылъёсыз... Ӝӧк вылэ кут пуксиз. Бадӟым кут - бурдъёсыз но мугорыз вуюись кадь кисьтасько. - Ма... Укное но, ӧсэ но пытсамын кадь но... Кытысь та шакшы вуиз?.. Э-э, уть ай, Илья ӧсме ӟубис кельтэм ук, отӥ пыриз, луоз... Бадӟым кут ӝӧк вылтӥ ветлӥз, ветлӥз но, кужмо бызгетыса, Осип песятайлэн пельдораз пуксиз. Туж зол чабкиз ассэ ачиз пересь, нош кут - солэн ныр йылаз ини. Суралляськыса акыльтэмез бере, шкафе ошем паськыт е кутӥз. Огпол суралске, кык пол - нош кут, исаса кадь, я укно янаке пуксе, я гур борды дэмӟиське. Собере ӝажыысь сюй горшок вылэ пуксиз. Пыдчиньы йылаз кариськыса ик суралскиз Осип песятай. Таяз радэ ӝажыысь сюй горшок музэ пезьдӥз но чальпара люкетъёслы пӧрмиз, нош кут - вӧлдэтын ини. Пукон вылэ султӥз Осип Осипович. "Уд, уд пегӟы мынэсьтым!" - малпаз. Суралскиз... чут пыдыныз умойтэм лёгиськыса, пукон вылын сылыны ӧз ни быгаты... Усиз... Усьыкуз туж юн шуккиськиз гур сэреге. Султэмез ӧйлась ни. Кулӥз. Нош бадӟым кут ӟубис кельтэм ӧсэтӥ лобиз... *** Ӝытлань фермер ёрос администрациысь но военкоматысь кык адямиез ваиз. Сяськаен но ӟеч кылъёсын лыктӥллям. Кӧня ке улыса, пиез но кенэз бертӥзы... Удмурт Республикаысь "Огъя кужымен - Удмуртиез ӝутонэ" Общественной палаталэн вазиськонэз Гажано эшъёс! Матэктэ Удмурт Республикаысь Кун Кенешлэн кыкетӥ ӧтчамаз быръёнъёслэн нуналзы. Удмурт Республикаысь Общественной палата, общественно-государственной но консультативной ёз луыса, вазиське предприятиослэн, учреждениослэн, организациослэн кивалтӥсьёссылы но интыосын аскивалтонъя ёзъёслы, Удмуртиын политической югдур ӟырдам вакытэ валче ӟеч но пайдаё ужан кусыпъёсты утьыны курыса. Тӥляд дэменлыко луэменыды герӟаськемын республикаысь калык хозяйстволэн огсыр ужамез. Удмуртия секыт югдурысь потыны но ӝутскыны уз быгаты обществолэн но кивалтон ёзъёслэн куспазы ог-огзылы осконтэк. Ми вазиськиськом иворъёсъя ёзъёслы: обществоысь пӧртэм мылкыдъёсты возьматонын эрико луэ. Ми куриськом тӥледды: эн печатлалэ сыӵе материалъёсты, кудъёсыз гражданъёсты сантэмало, общественной мылкыдлы, обществолэн но государстволэн политической, экономической но социальной интересъёсызлы изъян ваё. Тӥледын герӟаськемын тупаса улонэз утён. Ми вазиськиськом Удмурт Республикаысь Кун Кенеше депутатэ кандидатъёслы: быръёнъёс азьын агитацидэс нуэ пӧяськытэк но шара, политической но национальной тодметъёсты лыдэ басьтытэк, пӧртэм группаослэсь но асьтэлэсь мылкыддэс мултэс вылӥе ӝутытэк, эн тӥялэ быръёнъёс сярысь законодательствоез! Гажано эшъёс! Ойдолэ мылкыдъёсынымы дэмен луом! Огъя кужымен - Удмуртиез ӝутонэ! Кутэмын Удмурт Республикаысь Общественной палаталэн Секретариатаз 1999 арын 11 мартэ. Удмурт Республикаысь Общественной палаталэн членъёсыз: Удмурт Республикаысь Писательёслэн огазеяськонзылэн чеберлыко литератураез вӧлмытонъя бюроез - Р. Н. Овчинников; Удмурт Республикаысь Наукаосъя академия - В. П. Ковриго; Россиысь нылкышно ужбергатӥсьёслэн конфедерацизылэн Удмурт ёзэз - О. Ю. Гурина. Гемофилиен но Виллебрандлэн висёнэныз ӧлексыослэн Удмурт региональной общественной организацизы - Т. М. Глухова; "Многоцветье" Удмурт республиканской межнациональной культурно-просветительной центр - Н. Е. Левшина; Тазалыкез утён удысысь шор ёзо специальной тодон-валанэн ужасьёслэн ассоциацизы - Л. К. Бахтина. Творчествоя "ИВАНплюс" общественной огазеяськон - Н. Л. Минеева; Духовно-просветительской миссия - Т. А. Комлева; Удмурт Республикаысь Экологияя общественной огазеяськонъёслэн Координационной кенешсы - Т. Б. Кардаполова; Ижевск городысь Кекусинкай федерация - А. К. Сабуров; Удмурт Республикаысь Нылкышноослэн огазеяськонзы - М. Ф. Жилина. Тӥледын шулдыр (такмакъёс) Ой, нылъёс, мусо нылъёс, Вождэс эн вае мыным. Тӥ понна выль такмакъёс Кырӟало арганэным. Одоть, Оття, Одотья - Куинь-а, мар-а туганэ? Ой, куиньназы ик кӧтъя, Ой, уг лу ни куштэме. Табань гуртэ пырамы но Табань гуртлы паймимы. Табань гуртэз адӟимы но, Пӧсь табань кадь нылъёссы. Ой, та кильтро нылъёсын Ма карыны ёрмисько. Соиныз-а, таиныз-а Сюлэмез веськатоно. Та шоголь но нылъёслы Акыльтӥз йыбыртъяны. Малы сокем дан потто, Пал кышно аслым шедьто. Яратон ӧвӧл шудон, Малы соку калгиськод? Ӝытлы быдэ куиненыз Кушласькыны вуиськод? Та шоголь туганъёсын Мылъёс-кыдъёс тугасько. Ӝытлы быдэ вошъяса, Ӟигартэм ни кылисько. Туганэн улон майбыр, Ӝытлы быдэ чупан дыр. Арганэн улон шулдыр, Котьку лэсьты юон дыр. Та туганэ, туганэ, Весь ятэ, ятэ шуэ. Весь ятэ, ятэ шуэ но Мукетынаез яратэ. Кызьпу йылын тӧл юмша, Кызьпу улын шур чиля. Туганэ чумын кӧла, Мон со вӧзын каньылля. Капка азяд пот ай но, Буртчин кышет кузьмало. Ки йылам тонэ ӝуто, Ӟег пӧлы тонэ нуо. Шуд ай, шуд ай, арганэ, Ӝут ай, ӝут ай мылкыдме, Маке кареме потэ, Ӧжыт ӝут ай юбкадэ. Бусыын но ӵуж куро, Итымын но ӵуж куро! Нылъёс туж куро, куро, Жаль ӧвӧл мыным куро. Куное ӧтиз Оги, Ой, пыжем ческыт шаньги. Кӧт тыриз но, мон кошки, Нош монэ шуиз шаньги. Сьӧд пилем ӧй ке лусал, Зоред но ӧй усьысал. Лул-гажан ӧй ке лусал, Мӧзмонэз ӧй тодысал. Эшшо, эшшо чабкысал но, Эшшо, эшшо эктысал. Эшшо, эшшо сётысал ке, Эшшо, эшшо чупасал. Льӧль сяськаё, льӧль сяськаё, Льӧль сяськаё юбкаед. Юбка улад мар меда, Льӧль сяська ик-а меда? Ой, туганэ, туганэ, Тон эн кушты вал монэ. Нош куштӥд ке тон монэ, Тыныд дась ни пирданэ. Кӧня тӥяй, кӧня тӥяй Лыз сиреньлэсь вайёссэ. Кӧня тӥяй, кӧня тӥяй Гажанъёслэсь сюлэмзэс. Весь шудысал, шудысал, Жадёнэз ӧй ке лусал. Мон тонэн ӧй ветлысал, Чеберзэ ке шедьтысал. Ворпо, ворпо дэреме, Сюрсо, сюрсо ыштанэ, Куӵо, куӵо катае, Уӵыс куко туганэ. Вить ар ини тунасько, Мар-о меда кароно? Оло пыртос пыроно, Оло кышно ваёно? Купанча но сяськаез Малы потэ чигтэме. Тонэ, мусо, адӟисько ке, Потэ ӟырдыт чупаме. Палэзь ческыт вуэмез, Эмезь ческыт кисьмамез. Яратӥ мон Наталез, Ой, мугорыз быгылес. Тон сыӵе ке, мон таӵе, Тон таӵе ке, мон сыӵе. Мон но сямме возьмато, Тулэз тулэн поттыло. Лыз сяська пӧлын ӵужез, Ӵужез пӧлын вань гордэз. Нылъёс пӧлын вань огез, Ой, чигиз ук сюлэмез. Ой, Оги, Оги, Оги, Сюлэмы гизи-гази. Кышноме но куштыса, Оло, туган кутом-а? Ой, шоголь но нылъёсын Олома калэ вуод. Ой, йырез гинэ ӧвӧл, Марымдэ но киргатод. Ми пала но вуиды ке, Пыратэк эн кошкелэ. Быдэнак тугон кутом, Чебер сюан ортчытом. Ой, нылъёс, мусо нылъёс, Вуизы бертон дыръёс. Туж шулдыр вал тӥледын, Вождэс эн вае мыным. Ф. СУВОРОВ. Сьӧд кырныж, эн поръя вож садын Юзмыт омырен шокаса вамыштӥськом писпуо сюрес кузя. Гужем татын улӟоз вож-вож сад, синъёсты шумпоттозы сяськаос. Инкуазьлэн йӧнатӥсь, няськатӥсь та чеберез ожъёс пыр потэм адямиослэсь тазалыксэс юнматыны юрттоз. Ӝыны даур ортчыса но, весь кужекъя, висе Быдӟым Отечественной оже ветлэмъёслэн мугорзы, лулзы. Соос туннэ нуналлы кышкыт ожез тодэ вайытӥсь синучкон кадь. Атай музъеммес утисьёслэсь радъёссэс берло дыре йылэтӥзы на Афганистанын, Чечняын ожмаськемъёс, Чернобыль пыр потэмъёс. Ваньзы соос кулэясько юрттэтлы, адямиослэн шунытсылы. Шаерысьтымы ожысь ветеранъёслэн госпитальзы, выльдон-тупатъян ужъёс ортчытэм бере, февраль толэзе выльысь усьтӥз ӧсъёссэ. Ми но вамыштӥськом чылкыт, югыт юртэ, госпитален тодматскон понна. Коридоръёсын выль диванъёс, креслоос, ваньмыз ик укноос жалюзиосын саюлтэмын сутӥсь шунды сиослэсь. Милемыз пумитаз валтӥсь врачлэн воштӥсез Андрей Григорьев. Ымныраз ӧжытак жадем тус пуксем, уин, пе, дежурить кари. Тодматӥз госпитален: пырамы югытэсь, шунытэсь но выль мебелен палатаосы, пумиськылӥм врачъёсын но висисьёсын. Улон югдурзылы ӝожтӥськисьёс татын ӧвӧл. Висисьёслэн но мылкыдазы шумпотон каръяськем. Тросэзлэн соослэн та госпиталь азьлань улонлы осконзы. Соослы татын шуныт кылын вазисько, утялто. Газет лыдӟемед потэ - лыдӟиськы, телевизор учкысалыд - небыт диван-креслоос котькуд этажын возьмало, шахматэн шудыны яратӥсьёслы но мӧзмыт ӧвӧл. - Секыт вакытэз милемлы чидано луиз, - шуэ Советской Союзлэн Героез, Глазовын улӥсь Артемий Демидович Торопов. - Госпитальлэсь усьтӥськемзэ праздникез сямен возьмам. Атай музъеммес утисьёслэн нуналзылы такем бадӟым кузьым лэсьтӥзы милемлы. Сюлмысьтымы тау карон кылъёсмес верам потэ Удмурт Правительстволы - шуг-секытъёс шоры учкытэк, луонлык шедьтӥзы ожысь ветеранъёслэсь тазалыксэс юнматонлы. Шуныт кылъёс вераме потэ госпитальын ужасьёслы но. Вань сюлэмзэс сётыса тыршо соос, пӧлысьтызы нимысьтыз кинэ ке висъяны ик шугъяськоно. Нош милемын ой-ой! кыӵе секыт йӧтэ. Мон одӥг пол гинэ уг эмъяськиськы ни татын. Лэсьтӥськон ужъёс бере госпиталь копак выльмем, мылкыды ик бурдъяське, ваньмыз со шоры учкыса. Зэмзэ но, трос дыр но кужым кулэ луиз госпиталез пыд йылаз йӧн-йӧн султытон понна. Нырысьсэ со усьтэмын вал 1990 арын феврале. Та дыр куспын басьтэмын пӧртэм оборудование но аппаратура, сыӵеоссэ ваньзэ уд но шедьты шаерысьтымы котькуд больницаосысь. Трос аръёс ӵоже ужатыса но, ожысь ветеранъёс сямен ик, соос но уг дырто улон радысь потыны - возисько. Тросаз больницаосын берло дыре эмъюмъёсын шуг- секытъёс кылдэмын, сюдон ласянь но югдур ушъяськымон ӧвӧл. Нош ожысь ветеранъёслэн госпитальзы та шуг-секытъёслэсь утемын. Сое усьтонлы шуыса, Тазалыкез утёнъя министерство эмъюмъёслы 100 сюрс манет коньдон висъяз, 50 сюрс манет - сиён-юонлы. Госпитальын огдыре йӧнатскыны быгатоз укмыстон адями. Шаерысьтымы ожысь ветеранъёслэсь лыдзэс басьтыса - 1997-тӥ арын 15 сюрс пала вал, 1998-тӥ арын 13 сюрс пала луиз - со трос ик ӧвӧл. Нош эмъяськыны мылкыд карисьёс вань гинэ ӝыны ар-ар пала черодзэс возьмано луо. - Висисьёсты госпитале интыянъя куронъёс табере ӧжытак воштӥськозы, - шуэ Андрей Григорьевич. - Тросгес саклык луоз ёросъёслы. Котькуд толэзе соослы чаклам мында инты висъяськоз. Интыосысь врачъёс асьсэос учкозы ни, кинэ нырысь ик эмъяны кулэ милям центрамы. Палэнэ кельтэмын уз луэ Ижевскын улӥсьёс но. Ожысь ветеранъёс но ожмаськонэ пыриськемъёс татын уло угось куиньмосэз пала. Госпитальын эмъяськозы тужгес но секыт висисьёсыз. Ижевскын улӥсьёслы нимысьтыз интыос висъямын луозы на городысь мукет больницаосын. Быдӟым ожысь ветеранъёс но инвалидъёс сяна, госпитальын али йӧнатӥсько воинъёс- интерналистъёс, Чернобыле ветлэм инвалидъёс, Ленинград блокадаез пыр потэмъёс, концлагерьёсын пукемъёс но сыӵе ик льготаос сётэм мукет категориос. Азьланяз ми дорын йӧнатскозы на Чечняын ожмаськемъёс, мукет сыӵе ожъёсы пыриськемъёс - али дасяське приказ соосты льготаосъя Быдӟым Отечественной оже ветлэмъёсын оградэ пыртыны. Озьыен, сюлмаськонъёсмы эшшо йылозы. Госпитальын ваньмыз ужасьёс сю ньыльдон мурт, со пӧлысь куамын куинез - врачъёс. Ӧжыт ӧвӧл со. Но висисьёс татын аспӧртэмлыкоесьгес, секыт ожъёс пыр потыса, тросэзлэн лулсэръёссы но лябӟемын. Котькудӥзлы нимысьтыз саклык висъяны кулэ. Вань пӧртэм отделениос - терапевтической, неврологической, тазалыкез юнматонъя но реабилитацияя. Татын ик эмъяло пинез, массаж лэсьто, сюен йӧнато но мукет. Маин бен санаторий ӧвӧл та? Озьы ке но, туала егитъёслы, али будӥсь пинал калыклы тазалык утчаса медаз кылды вылэм вамышъяны шыпыт но вож садо та сюресъёстӥ. Л. МАЛЫХ. Туспуктэмъёсыз В. Камашевлэн. Госпиталь интыяськемын шыпыт азе. Валтӥсь врачлэн воштӥсез А. Г. Григорьев. Ожысь ветеран, Россия Федерациысь дано юрист В. Л. Жигалов тау каре госпитальын ужасьёслы. Ветеранъёс люкаськизы шутэтскон интые. Эмъян кабинетын. Вӧлскоз-а туэ тудву? Котькуд тулыс таӵе юан сюлмаськытэ, дыр, котькудмес. Югдур тужгес но валантэм туэ. Уго лымы, нормаен чаклам сярысь, таяз толалтэ тросгес усиз. Табере ваньмыз потоз тулыслэн ортчемез бордысь. Ӵапак со сярысь вераськыны журналистъёсты ас дораз люказ Удмурт Республикаысь Граждан оборона ужпумъёсъя но кышкыт учыръёслэсь утиськонъя комитет. Та пумысен ивортон лэсьтӥз но юанъёслы валэктон сётӥз солэн председателез Тамази Габричидзе. Республикаямы тудвуэн нюръяськонъя комиссия ужа ни февраль толэзьысен. Солэн чакламезъя, март толэзе куазь 1-2 градуслы салкымгес луыны кулэ. Нош инкуазез чакласьёслэн прогноззы шоры учконо ке, солы оскыны луэ 50х50 процентлы. Нош куазь шуак шуныт (20 градусозь) кариськиз ке, уноез гуртъёс ву улэ шедёзы. Тудву 1-3 метрозь ӝутскыны быгатоз. Куазь нуназе 10 градусозь шуныт но уин 1-2 градус кезьыт улӥз ке, ву сокем вӧлскыны кулэ ӧвӧл. Мар дасямын ни туннэ нуналлы? Ёрос администрациослэн, министерствоослэн но ведомствоослэн кивалтӥсьёссылы тудву вӧлскон учырлы кулэ документъёс дасямын, ужало комиссиос, секыт югдурлы дась ваньмыз службаос но техника. Котькуд ар тудвуэн нюръяськонын бадӟым юрттэт сёто "Татнефтегеофизика" акционер огазеяськонлэн "Ижгеосервис" управлениез (кивалтӥсез В. А. Иванов) но "Удмуртгеофизика" акционер огазеяськон (директорез С. Е. Витис). Та предприятиос дасяло пуштытон, висъяло нимысьтыз техника. Вертолётъёссэ котьку сётэ Ижевскысь аэроклуб. Тудвулы дась ОСВОД, тылпу кысӥсь, милиция, медициная служба, вуэз эскеронъя элькунысь комитет, поисково-специальной служба но мукет ёзъёс. Коньдон тырмымтэен, берло аръёсы уноез тыметъёс пумен куашканы кутско. Кылем арын сюрслэсь уно тыметъёс эскеремын. Со пӧлысь 90-эз кышкытэк лыдъямын. Сюлэмшугъяськыто Воткинскысь, Камбаркаысь, Ижевскысь, Яр ёросысь Пудем посёлокысь, Вавож районысь Брызгалово гуртысь тыметъёс. Тыметъёс вылын югдурез эскерон вылысь, Удмуртиын 11 пост кылдытэмын, нимысьтыз 6 пост ужа Иж шур котырын. Ву ӧрысьтыз потыны быгатоз Игра но Балезино посёлокъёсын, Уваын но Кизнерын, Пичи Пурга ёросысь Яган посёлокын, тудву кышкытлык кылдытэ Ижевскысь Первомай но Ленин ёроёсысь улӥсьёслэн юртъёссылы. Туэ тудвуэн нюръяськонлы шуыса республикалы висъямын 480 сюрс манет, Ижевскын 327 сюрс манет. Специалистъёслэн чакламзыя, тудву туэ вӧлскыны кулэ 15-25 апреле. Тӥни со выллемгес югдур нырысь чакламъя. Но со пӧртэм сямен луыны быгатоз. Ваньмыз потоз куазь бордысь. Нош солэсь кыӵе луонозэ инмар гинэ тодэ, дыр. Котьма ке но, шуг-секытъёс туэ палэнтӥмы мед ортчозы вал. Н. БАЙТЕРЯКОВ. Депутатэ кандидатъёс Владимир Красильников: "Гурт калык понна ваньзэ лэсьто" Владимир Красильников - шаерамы одӥгез тодмо но визьмо колхоз председатель. Вавож районысь "Колос" гурт хозяйствоен вис карытэк 20-тӥ арзэ кивалтэ ни. Вормонъёсыз син азьын. Нош берло 5 ар ӵоже эштос арлы быдэ шорлыдын 31 центнер ю тысь кутса но скаллы быдэ 4100 килограмм йӧл кыске. Миым 2000 сюрс манетлэсь уно пайда басьтӥз но рентабельностез 33,8 процент луиз. Озьы со бере кельтӥз "Удмуртия", Мичурин нимо но "Луч" колхозъёсты. "Колос" миым одӥг ужасезлы быдэ 40 сюрс манет ваньбур поттӥз, нош гектар музъемезлы - 2000 манет. Вылӥ верам хозяйствоослэн со лыдпусъёссы 25-26 сюрс но 1500-1600 манет. Выль бияос толэзьлы быдэ дыраз уждун басьто. "Колос" - устоосыз пӧлысь устоез хозяйство. Валля арын выль азинсконъёс басьтэмез понна пыртэмын Данъян пул вылэ, нош 1995-тӥ арын удалтэм ю-нянь будэтэмез пусъемын Удмурт Республикалэн кун премиеныз. Лауреатъёс луизы уноез механизаторъёс но Владимир Красильников. Нош 1993-тӥ арын солы сётэмын шаерысьтмымы гурт удысысь дано ужась. Владимир Анатольевичез 1980-тӥ арысен чик вошъяськытэк гуртоосыз быръё райсоветэ депутатэ. Туэ куинетӥзэ тырше ни удмурт парламентэ шедьыны. Таяз учыре коть вавож калык солы оскемзэ вералоз шуыса вераськонмес мытӥськом. - Владимир Анатольевич, кыӵе ортчем сюресты? - Ижысь гурт хозяйствоя институтэз 1979-тӥ арын йылпумъяме бере, - Водзи вордскем черкогуртам тракторной бригадаез оскизы. Соку мыным 25 арес вал. Со арын ик бускельёсмы, выль бияос доразы ӧтизы, председателе бырйизы но пыр татын ужасько. - Малы Кун Кенешлэн депутатэз луэмды потэ? - Одӥг малпанэн - гурт калыкелы, музъем вылын улӥсьёслы юрттон понна. Гурт удысэз быдэсак ӧз куашкатэ на, сое дугдытоно но пыд йылаз йыг-йыг пуктоно. Сыӵе сюлмаськонэн гинэ депутат луэме потэ. Нош алиез Кун Кенеш 4 ар ӵоже, гуртэз ӝутон вылысь, одӥг вамыш но ӧз лэсьты, шуыны луоз. Кутэм законъёсыз но уг быдэсъясько яке палэнтэмын. Выль парламентэ шеди ке, монэ валась депутаъёс шедёзы шуыса оскисько. Тани Кун Кенешын али но сыӵе сюлмаськонэн ужа Пичи пурга районысь "Мир" колхозлэн председателез Анатолий Николаевич Ешкеев. Солэн но хозяйствоез юн сылэ, депутат сессиосын котьку вераське, крестьян калык сярысь сюлмаськыса. Со но депутатэ кандидат, мед вормысал. Озьы ик шуыны луоз Завьялово но Шаркан районъёсысь азьвыл колхоз тӧроос Иван Осинцев но Юрий Добраков, сярысь. Али соос кыкназы ик кивалто гурт хозяйствоя управлениосын. Иван Петрович выльысь депутатэ кандидат луэ. Тӥни таӵе но мукет депутатъёсын гурт удыслы, нянь будэтӥсьёслы но пудо утисьёслы шӧдскымон юрттэт сётыны быгатысал. Валамон, депутат ӧвӧл на, но малпанэ сыӵе. Ӟеч законъёс но решениос кутыса гинэ, гурт удысэз будэтыны, удалтэм ю-нянь азинтыны, трос сӥль-йӧл поттыны но калыклэсь улонзэ умоятыны луоз. Собере - трос эшъёсы но тодмоосы, гурт калыке сюлмысь куризы депутатэ кандидат луыны. Мон гурт понна ваньзэ лэсьто, ведь парламентын музъем вылысь депутат луи ке, огшоры калык, крестьянъёс сярысь ик тросгес сюлмасько. Нош гурт улӟиз, ӟеч ужаз ке, город калыклы но умойгес, капчигес луоз. Со люконтэм герӟаськемын. - Кыӵе быръён программады, Владимир Анатольевич? - Шаерысьтымы политической югдурез тупатоно. Республикалы кулэ вань калыкен быръем вылӥ Тӧро (Глава). - Музъем сярысь ужпумез йылаз-пумаз вуттоно. - Адямилэн подсобной хозяйствоез сярысь закон кутыса, солы статус сётоно. Со ведь трос сиён-юон сётэ. - Уждунэз радъян сярысь законэз юнматоно. Малы али заводлэн директорез ужасезлэсь 100 пол трос уждун басьтэ. - Зэмос монополистъёслэсь дунъёссэс но тарифъёссэс радъяно, озьы калыклы услугаос (электротыл, газ, телефон, транспорт, улон инты) сётонэз. Соосты герӟано уждунлэн, пенсиослэн быдӟалаенызы, сиён-юонлы но нуналмысь кулэ луись вузъёслэн дунынызы. Тӥни программаелэн та пичи но туж кулэ люкетэз гинэ. Оглом верай ни, районысь но республикаоысь бере кылись хозяйствоосты ӝутоно, вань калыклы уж сётоно но улон- вылонзэ умоятоно. Со понна ваньзэ лэсьтыны тыршо. - Нош вавож калык ялан куаразэ сётэ республикалэн палэнысьтыз лыктэм ӟуч адямилы! Ведь землякты Куӟебай Герд кемалась удмуртъёсты сайканы косэ ни. Кызьы сое валано? - Паймонэз ӧвӧл. Районамы 60 процентэз удмуртъёс уло. Но куд-огез будэм удмуртъёс, соос пӧлын кивалтӥсьёс но вань (туннэ нимъёссэс уг вера), калыксэс вузало, ӟучъёслэн чебер, пӧялляськыса вераськем кылъёссылы оско но асьсэос юн янгышало. Нош городысь лыктэм сыӵе кандидатъёс кузьмаськыны но быгато. Мон соос пӧлы уг пыриськы, политикаен уг шудӥськы, огшоры бырйисьёслэсь интересъёссэс утён вылысь, дырме но кужыме но уг жаля. - Владимир Анатольевич, кызьы тӥ Кубаньын кадь урожай басьтӥськоды? Нош кызь ар талэсь азьло татчы лыктыкуды кыӵе вал колхоз? - Калык юнме уг шуы, нянь - ваньмызлы йыр, нянь ке вань, кырӟан но луоз. Солэсь ӟеч уд вера ни. Соин ик кутским музъем ужанэз умоятон, сое кыедан, таза кидыс уськытон борды. Техникамес выльдӥм, ӟеч пудо выжы уськытӥм. Нош татчы лыктыкум, гектарлы быдэ 11-12 центнер ю-нянь басьто но котькуд скаллэсь 1500-1600 килограмм йӧл кыско вал. Табере со музъем вылын ик 30-35 центнер ю тысь кутсаськом, скаллы быдэ 4000-4200 килограмм йӧл кыскиськом, куд-огез дояркаос 5 сюрс килограммез ортчизы ни. Валамон, ваньмыз со инмысь уг усьы. Отын вань гурт калыклэн тыршемез-сюлмаськемез понэмын. Вакчияк пусъёно ке, выльдӥськон кутскемлэсь азьло туж трос поттӥм кыед но торф, тырмыт вал минерал сылалъёс, зол юрттӥз "Сельхозхимия". Асьмелэн вал торф поттон интыосмы. Табере емышез адӟиське ни. Техникамы тырмыт вал. Али но бен ваемын кык "Клаас" ю тысь кутсан но пудо сиён октон комбайнъёс. Со вакытэ ик трос лэсьтӥським, фермаосмес выльдӥм. Собере вунэтыны уг яра Совето власть дыръя государстволэсь колхозъёслы юрттэмзэ. Али со милемды куштӥз кадь ни. - Кин матысь юрттӥсьёсыд? - Воштӥсе Юрий Дягелев, со ик валтӥсь инженер. Туж визьмо специалист, 13-тӥ арзэ ӵош ужаськом. Нош валтӥсь бухгалтере Ольга Григорьева колхозын 20 арлэсь кема тырше, лыдъян-чотан ужез валаса нуэ. Озьы ик лулысь-сюлмысь ужало валтӥсь зоотехник но агроном Лариса Наговицына но Владимир Митрофанов но мукетъёсыз. Огъя вераса, вань гурт калык юрттэ, монэ вала. Со шумпотымон. - Кызьы шутэтскиськоды? - Яратӥсько спортэз, куасэн бызьылӥсько. "Советской Удмуртия" газеттылэн призэз понна ӵошатсконъёсы трос пол (6-7 ар) пыриськылӥ, Удмуртиын но районын вормисе потылӥ. Шудӥсько волейболэн, футболэн но теннисэн. Районын огнам, дыр, "Советский спорт" газет басьтӥсько. Тол но, гужем но визнанэн чорыгасько. Кизён, пудо сиён дасян но аран вакытэ бусыысь уг потаськы. Механизатор отын ке, мон но лудын луыны кулэ. Сыӵе ужан амалэ. - Кыӵе семьяед? - Кузпалэ Нина Леонидовна колхозын бухгалтер луыса ужа, нылы Елена шор ёзо школаез туэ быдтэ. Тунсыкъяське экономикаен но кивалтон ужпумъёсын. Атаезлэсь адӟем каре, лэся. - Владимир Анатольевич, кызьы уло колхозникъёсыд, юрттӥськод-а ветеранъёслы? - Урод уг уло. Толэзьлы быдэ уждун сётӥськом. Вань социальной ужпумъёсты син азям возисько. Укмыстонэтӥ аръёсы 40 процентэз гурт калыке выль корка пыриз. 1996- тӥ арын 300 интыен культура юрт пуктӥм. Районын самой устоез-чеберез. Миым Выль Биялэсь центрзэ шулдыртыны 80 сюрс манет коньдон кутӥм, школае, садике но медпунктэ шуныт кыскыны - 90 но культура юртэ оборудование басьтыны - 30 сюрс манет. Юрттӥсько бускельёслы. Водзиысь участковой больница лэсьтыны ӝынызэ пала уксё висъям. Та больницалы ик пинь эмъян аппаратура 30 сюрс манет тыр басьтӥм. Кызьы бен ветеранъёсты вунэтод? Соослы арлы быдэ сётӥськом музъемзылы аренда дун тырем чотын кык мешок тӧдьы пызь, 250 килограмм ю тысь но 10 тюк турын, нош дивидендсэс ю-нянен басьто. Районын ми гинэ тазьы ужаськом, ваньмаз озьы юрттоно вылэм. *** Владимир Анатольевичлэн хозяйствоеныз тодматскыса, тӥледын кенешыса, юн оскем потэ, вавож калык тӥледыз валалоз но куаразэ тӥ понна сётоз шуыса. Таӵе визьмо, быгатӥсь, ужез тодӥсь-валась, огшоры калык сярысь сюлмаськись адями удмурт парламентын одно ик луыны кулэ. Вераськиз Геннадий Романов. Туспуктӥз Владимир Беломорских. Ӟечкыласьком! Рауф Каримов - шаерамы тодмо кивалтӥсь. Со быдэс улонзэ сӥзиз гуртын вузкаронлы, кема аръёс ӵоже кивалтэ ни Удмуртпотребсоюзэн. Нош Удмуртиысь кооператоръёслэсь ӟеч ужъёссэс Россиын но тодо, соос котьку валтӥсь интыосы потало. Со вормонъёслы трос кужымзэ сётэ Рауф Каримов но. Россилэн Президентэзлэн Указэныз ужаз бадӟымесь азинсконъёс басьтэмез, калыкъёс куспын эшъяськыса но тупаса улонэз юнматыны юрттэмез понна, Рауф Мухаметович пусъемын Эшъяськонъя орденэн. Сюлмысьтымы ӟечкыласьком бадӟым наградаен! Г. РОМАНОВ. ИВА-99 Туэ Ижевскысь механической завод сизьыметӥзэ пыриське ни пыӵал-тӥрлыкез возьматонъя калык куспо "ИВА" выставкае. Со арлы быдэ ортчылэ Нюрнбергын. Вераны кулэ: со адӟытонын быдэс Россиысь предприятиос пӧлын Ижевсклэн гинэ вань нимысьтыз экспозициез. Та выставкае люкаськыло дуннеысь спортивной но пӧйшуран пыӵал поттӥсьёс но со вӧзы мукет вузъёс лэсьтӥсьёс. Та ужрадлы дасяськонэн валче заводын арлы быдэ бадӟым уж нуиське. Выльысь эскерытэк уг луы ассэ экспозициез, солэсь дизайнзэ. Со бордын ужало 135-тӥ отдел но солы юрттӥсь цехъёс, реклама бордын тыршо 120-тӥ но 135-тӥ цехъёс, серийной продукциез возьматэ 36-тӥ цех, пистолетъёсты - 93-тӥ цех, выль вузъёсты - 28-тӥез. Нюрнбергысь таяз выставкаын возьматэмын луоз туж пӧртэм пыӵал-тӥрлык, со пӧлын выльдэм пыӵалъёс: Иж-18, Иж-27, Иж-43. Но выльдон уж пӧртэм сямен ортче. Тани МР-151, маркаё пыӵал табере самозарядной ни, автоматической. Та пыӵал воштоз Иж-81 "помпаез". Та выль вуз возьматон понна гинэ лэсьтымтэ, тросэн поттыны чакламын ни, сое матысь дыре ик лэсьтыны басьтӥськозы 36 номеро цехын. Маркетинговой исследованиос возьматӥзы: рынокын та выль пыӵал самой адӟем карымонэз луоз - сое кунгож сьӧрын шумпотыса басьтозы. Выставкаын возьматэмын луоз Иж-43К пӧйшуран пыӵал но, солэн вылез - кыр ласянь взводителез вань, азьло таӵеез ӧй на вал. Пыӵаллэн кык гумыез вылысьтыз вылаз интыямын, каналъёсыз овально-винтовой амалэн портэмын, калибрез 20-тӥ, ыбылӥськыны кутӥське Магнум патрон, кудӥз лэсьтэмын, Иж-27 пыӵаллы сямен ик, пуляен ыбылӥськон вылысь. Завод берло дыре вузъёсызлэсь пӧртэмлыксэс будэтон бордын туж паськыт тырше. Основной модельёс сяна, векчи калибрен, 16, 20, 28, 32, 410 калибръёсыныз но возьматыны дасясько. Со сяна, экспонатъёс пӧлын луозы гумые тыриськись насадкаос, юнматӥськись чокъёс, кудъёсыз тупалозы пыӵалъёслэн вань модельёссылы. Учкисьёслы одно кельшыны кулэ МР-514К аспӧртэм дизайнэн выль пневматической винтовка но. Экспортлы озьы ик чакламын "Варяг", "Багира" но МР-446 пистолетъёс. Соослэн рамаоссы пластиклэсь, магазинъёссы бадӟыматэмын, патронзы 9һ9 Парабеллум. Озьы туэ "ИВА" выставкае возьматыны нуэмын луозы 20-лэсь уно выль пыӵал- тӥрлыкъёслэн модельёссы. Соос заводлэн комиссияз пыр-поч эскерыны чакламын вал февраль толэзьлэн кутсконаз ик. П. НИКОЛАЕВ. Снимокъёс вылын: МР-151 но Иж-43 К пыӵалъёс но "Варяг" пистолет. Наталь "Чигымтэ чидан" конкурсэ Кен шуыны ым уз пыры Пересь вакытад пиналъёсыдлэн юрттэмзылы оскиськонэз ӧвӧл вылэм. Кыӵе кен-эмеспи шедёз уго. Сирота кылем пиналъёсты будэтыны выри, ӟеч кен мед шедёз шуыса малпай, но... Магазинын ужакуз, Валя, зын вуэн сектаса, Володялэсь йырзэ ас палаз берыктӥз. Олокӧнязэ озьы выриз ни вал, ӧз быгаты. Володя сётӥськиз, тыриськонъёссэ но Валялэсь ачиз тыриз. Ӧвӧлзэ но вань карыса, сюан лэсьтыны турттӥ. Кузпалъяськизы ке, оло, Валя но рос-прос луоз, малпай. Кытн со? Дорамы лыктэмез бере, аслэсьтым ужам коньдонме ӧй адӟылы ни. Я, ӟеч-ӟеч дӥсяськиз ке, мыным но мылёз ни малпасько. Дуно пальто басьтӥз, шоголляськыны кутскиз. 15 йыр ӟазег вандӥсько вал, вань мамыксэ аслаз валесаз тыриз, быг-быг кариз. Володяез жаляса ӧй куаретылы. Берлогес мынам уксёеным телевизор, шифоньер, мукет котыр басьтӥз. Нош кӧня ке улыса, лек вазиз: - Окты котырдэ мынам шифанерысьтым, мон сое пытсало. Со гинэ мар, сиёнэн пыкылыны кутскиз. Одӥг пол Володялэн Фая сузэрез, ваньмыз сиськем бере, ӝӧк сьӧры пуксиз. Валя корка тыр кесяськыны ӧдъяз: -Ӝог пот ӝӧк сьӧрысь! Азьло ужа, собере, кӧня мылыд потэ, сиськы. Кызьы ке Фаяен Факелэ турын басьтыны мынӥм. Бертӥськом но, корка ӵаж-ӵаж кезьыт. Володяен Валя ӧвӧл. Пересь анае вераз ни, кен, пе, Володяез кытчы ке чортӥз. Маке тыриськизы но кадь, ӧй адӟы,пе ( солэн глаукома вал). Учкисько но, телевизор ӧвӧл. Интыяськиллям Грах ёросэ. Госстрахын ужаны кутскем. Кӧня ке улыса, ужысьтыз уллязы. Валялэн нылыз вордӥськиз. Монэ утиськыны сюлворе ни. Нылыз жаль потыса, пудоме сӥзьыл вандылӥ но мынӥ. Валя ачиз ӧте бере, ассэ умой возёз, кожай. Ӝыт-ӵук санитарка луыса ужай, нуназе кык пинал ути (Фаялэн но пиез вордӥськиз). Ӝоген Валя нылзэ нылпи садэ сётӥз, ми Фаяен нош мултэс луим. Картэзлэсь сузэрзэ донгаса поттӥз, пизэ юри сулепе куштӥз. Монэ но кызьы ке лыктӥд, озьы ик кошкы, шуэ. Ма, марлы мон кулэ на: машина басьтэм пунэмъёссэс тыри, пудо сиыса быриз, нылпиезлы утиськись кулэ ӧвӧл ни, мунчоме лушкем вузам. Чиданэ бырыса, Фаяе сьӧры кошки. Валя кошкыкум анаелэсь ынзэ гинэ но ӧз сёты, вуриськон машинаме соку ик киултӥз. Кӧня ке улыса, нош ӧте, нылы,пе, пыдзэ чигем, утялтӥсь кулэ. Жаль потыса, нош мынӥ. Нылзэс утялтон сямен, Володялэн дӥсяз бирдыос вурисько, носки керттӥсько. Валя шорам кесяське. Мар адӟон та? Володяез гинэ но кышноез обиде. Володя Толя эшеныз Магаданэ ужаны кошкизы. Толялэн семьяез ӧвӧл бере, котырзэ Валя доры кельтӥз. Ну, шукыръяськиз ни таид. Толялэсь палассэ бускельёсыз доры поттэм но, лушказы шуыса, милицие ивортэм. Берло тодӥзы кызьызэ- марзэ. Кӧня ке улыса, Валя но Магаданэ кошкиз. Отын но Володяез озьы ик мыскыл карем. Толяен кушласькем, Володяез куштэм. Толя узыргес вал уго. Кӧня выриз Володя кышнозэ мунёез сямен дӥсяны, санаторийёсы келялляз, тау шуэмез со луиз. Нылзэ но Володялы кельтӥз. Мар мумы со? Нокызьы но йырам уг тэры Валялэн сямыз. Кызьы сыӵе луод меда, кыӵе анай нылзэ сыӵе луыны дышетэ? Мон чидай, Володя чидаз, нош нылыз чидалоз-а? Ю. Данилова. Ижевск. Сюресъёсты утён вылысь Россиысь сюресъёсъя федеральной службаезлэн Волжской федеральной дирекциез Киров, Нижний Новгород, Пермь, Самара, Ульяновск улосъёсысь администрациослы, озьы ик Башкортостан, Марий Эл, Мордовия, Татарстан, Удмурт, Чуваш Республикаосысь министръёслэн кабинетъёссылы вазиське. Тулыс куазен валче Нижний-Новгород-Казань сюрес вылын 8 тонналэсь секыт машинаослы ветлон кулэстэмын луоз. Нош Цивильск- Ульяновск-Сызрань сюрес вылын грузлэн секталаез 7 тонналэсь уно медаз луы. Но нимысьтыз куронъя пропуск басьтон понна вазиськыны луэ Волжской сюресъёсъя федеральной дирекцие. Юанъёсты кылдӥзы ке, Чебоксар городэ жингыртэ (835-2) 621-273 телефонъя. ДЕПУТАТЭ КАНДИДАТЪЁС Людмила Касимова: "Ваньзэ лэсьто калык понна" Шаерысьтымы потребобществоос пӧлысь одӥгез устоез лыдъяське Кезысь райпо. Соин кема аръёс ӵоже быгатыса кивалтэ ни Людмила Касимова. Та удысын со 30 арлэсь трос ужа ни. Лулысь-сюлмысь тыршемез син азьын. Солы сётэмын "Отличник потребкооперации" знак, Удмурт Республикаысь вузкарон удысысь дано ужась ним, нош 1997-тӥ арын мӧляяз бырттӥзы "За заслуги перед Отечеством" ИИ-тӥ степенен орден. Трос пол пусйылэмын Правительстволэн но Удмуртпотребсоюзлэн Почёт грамотаосыныз. 1994-95-тӥ аръёсы райпо Россиысь Центрсоюзын уно пол классной инты басьтылӥз. Людмила Касимова пыртэмын республикалэн Почёт пул вылаз. - Людмила Васильевна, кыӵе тӥляд ортчем сюресты? - Вордски 1949-тӥ арын 11 мае Башкириысь Янаул посёлокын, чугун сюрес вылын ужасьёслэн семьяязы. Ӟуч. 1968-тӥ арын йылпумъяй Сарапулысь кооперативной техникумез. Собере ыстӥзы Кез райполэн нянь пыжон комбинатаз, бухгалтере пуктӥзы. Тӥни со луиз ужаны кутскеме но быдэс улонме герӟай гуртын вузкаронэн. Улон азямы котьку бадӟымесь куронъёс пуктэ. Соин ик огинтыям сыръяса ӧй улы, ужай но дышетски Москваысь кооперативной институтын. Сое быдтӥ 1988-тӥ арын, нош миым тодон-валанме будэтӥ Россиысь Центрсоюзлэн Москваысь институтаз. Со юрттэ - Сюлмаськонъёсты, зэмзэ но, ичи ӧвӧл. Нош Кун Кенешын ужаны дыр шедьтоды-а? Малы удмурт парламентэ шедемды потэ на? - Валасько, капчи уз луы, но монэ нырысь ик сюлэмшугъяськытэ республикаысьтымы вылӥ быръем ёзлэн - парламентлэн лябесь законъёс кутэмез, производствоез улӟытыны, экономикаез юнматыны но калыклэсь улон-вылонзэ умоятыны тыршымтэез. Кыкетӥез, малы Кез районын будэтэм сӥль бускель Пермь областе кошке? Ми сое асьмеос но переработать карыны быгатысалмы. Эскерон уг тырмы. Кун Кенеш но Правительство таӵе югдурез адӟымтэ улэ аналско кадь. Куинетӥез, туннэ кооператоръёслы но секыт йӧтэ. Соин ик парламентын соосты утён ласянь милям адямиосмы отын луыны кулэ. Нош Кун Кенешын ужаны, капчи уз ке но луы, дырме но, кужымме но уг жаля, гурт калык понна ваньзэ лэсьто. Ньылетӥез, парламентын одно ик луыны кулэ кышномуртъёс. Коркан кышномурт вань ке, отын котьку порядок луэ. Кун Кенешын нылкышноос-депутатъёс тросгес луизы ке, парламент умойгес ужалоз, умоесь законопроектъёс дасяны быгатоз. - Людмила Васильевна, быдэс улонды кооперацилы сӥземын. Нош берло дыре кызьы ужаськоды? - Ушъяськеме уг поты, но кооператоръёслэн тыршемзы син азьын. Шуг-секытъёс шоры учкытэк, гурт калыклэсь кулэяськонъёссэ ӟечгес но тырмытгес быдэсъян вылысь трос лэсьтӥськом. Ваньмыз оло уг ке но пӧрмы, рынокен экономикае выжон, реформаос ортчытон дыре районын одӥг магазинмес но ӧм пытсалэ. Калыклэн куремезъя, эшшо 12 выльёссэ усьтӥм на. Мукет райпоос сярысь озьы уд шуы. Удмуртиын но Россиын нырысьёсыз пӧлын улонэ пыӵатӥм "Зарни корона" ("Золотая корона") пластик картаен ужан амалэз. Али райполэн 83 магазинэз ужа. Кыӵе гуртъёсын вузкарон интызы ӧвӧл, отчы нуналмысь кулэ луись вузъёс (нянь, сылал, спичка, чорыг, майтал, дӥськут, пыдкутчан но мукетсэ) автолавкаен нуллӥськом. Калык солы шумпотэ. Берло дыре кутским калыклы бытовой юрттэт сётыны. Усьтӥм парикмахерскойёс, бытовой техникаез тупатъянъя мастерскойёс, сётӥськом транспортной но ритуальной услугаос. - Туннэ улонамы, Людмила Васильевна, тӥледды мар тужгес сюлэмшугъяськытэ, шуом, кышномуртэз-кивалтӥсез? - Монэ туж сюлэмшугъяськытэ уждун, пенсиос, пособиос тырон, дунын дышетскон, эмъяськон но мукетыз . Тани районысь данакез предприятиос адямиослы уждун сётъяло сиён-юонэн, лэсьтӥськон материалъёсын но мукетыныз. Нош соослы улэп уксё кулэ ӧвӧл шат? Районын уждунъя тыронъёс миллионъёсын люкаськемын, нылпиос понна гинэ со 3342 сюрс манет луэ. Улонмы таӵе луэмен но реформаос ортчытон аръёсы воргоронъёслэн улонзы юн кулэсмиз, соос, пенсие потытозь, мырдэм чидало, кышномуртъёсын ӵошатыса, 12 арлы ичигес уло. - Соин-а тӥ уно юрттӥськоды больницаослы, нылпи учреждениослы, куанеръёслы, висисьёслы, трос нылпё семьяослы но музонэзлы? - Коть озьы, коть тазьы шу, но быгатэммыя, ванмызлы юрттӥськом, кредитэн вуз сётӥськом. Тани нылпи пособиос чотын 1468 сюрс манетлы вузъёс сётэмын. Юрттӥськом Чечняын бырем солдатъёслэн анай-атайёссылы, инвалидъёслы, нылпи учреждениослы, больницаослы но мукетызлы. Та уж мыныны кулэ быдэс республикаын, со кун политика луыны кулэ. Семьяослы, анайёслы, нылпиослы юрттонъя нимаз программаос кутоно. Соку нылпиосмы но тросгес вордӥськозы. Калыклэн куремезъя, доразы вуз (мебель, холодильник) нуллӥськом. - Людмила Васильевна, быръён программады маин висъяське? - Нырысь интые пуктӥсько экономикаез, сое юнматытэк ӟеч улонэ ум вуэ. Соин ӵош ик отечественной производствоез улӟытоно. Коррупциен нюръяськоно но калыклэсь улон- вылонзэ умоятоно. Со понна выль ужан интыос усьтоно, дыраз уждун сётъяно, социальной ужпумъёслы, нылпиослы но егитъёслы бадӟым инты висъяно, дышетсконэз но эмъяськонэз дунтэк кароно. Ваньзэ сое мукет депутатъёсын ӵош улонэ пыӵатыны быгатысал ке, асме шудоен лыдъясал но калыклэн оскемез быдэстэмын шуысал. - Кыӵе семьяед? - Кузпалэным кык пи будэтӥськом. Бадӟымезлы 26 арес, программист, райпоын пластик картаез пыӵатыны юрттӥз. Кыкетӥез дышетске Удмурт кун университетын, физико- математической факультетын, куинетӥ курсын. - Людмила Васильевна, тӥ коммунист но политик. Туала политикъёс пӧлысь тужгес кин кельше? - Тросэз - уг. Но тани алигес дорамы ветлӥз Геннадий Зюганов. Соин пумиськыны ветлӥ, ӵош туспуктэме но вань. Озьы ик кельшо Геннадий Селезнев но Евгений Примаков. Яратӥсько учкыны "Парламентский час" телепередачаез. Мыным ярало сыӵе политикъёс, кудъёсыз пӧялляськытэк верасько, сётэм кылзэс котьку быдэсто. Ачим но озьы тыршисько. - Кызьы шутэтскиськоды? - Кышномуртлэн, уката ик кивалтӥсьлэн, ваньмон дырыз юн ичи, шуысал. Озьы ке но туж яратӥсько пӧраськыны, сиён дасяны, уката ик чорыглэсь. Сотэк улэме уг луы. Гужем муш бакчаямы шутэтскиськом, эмъюм турынъёс бичасько. Яратӥсько инкуазез, нюлэсэз, пыласькисько, губи, узы-боры бичасько. Но тужгес яратӥсько эктыны, кылзыны музыкаез (эстраднойзэ но), П. И. Чайковскиез но музон классикъёсты. Лыдӟисько кышномуртъёс, юн тунсыко но умой адямиос сярысь (ЖЗЛ) гожтэм книгаосты, шуом, Майя Плисецкая но музонэз сярысь. Оглом вераса, кельше кышномурт образ. - Вань-а яратоно сяськаед? - Тросэз кельшо, но тужгес розаос. - Кыӵе адямиос кельшо? - Тыныд оскисьёсыз, кудъёсыз тонэ ноку уз вузалэ-пӧялэ. Адями честной мед луоз. - Кыӵеосыз уг ярало? - Туж уг яратӥськы азяд чеберъяськисьёсты, жоб кылын вераськисьёсты, тамак кыскисьёсты, вина юисьёсты. х х х Авторлэсь. Тӥни таӵе асьмелэн Кезысь депутатэ одӥгез кандидатмы - чылкыт сямо кышномурт, райполэн кивалтӥсез. Кулэ-а меда Кун Кенешын таӵе адямиос? Одно ик. Людмила Васильевна кадь адямиосты калык парламентэ бырйиз ке, веранэз ӧвӧл, азьланьын ӧжыт ке но улонмы капчиялоз, умойгес луоз. Кез районысь бырйисьёс но уз янгышалэ. Людмила Касимова понна куаразэс сётозы шуыса малпасько. Сыӵе осконэн гожтонме быдтӥсько. Геннадий РОМАНОВ. Туспуктӥз Владимир КАМАШЕВ. "Калмез" ӧте учкисьёсты 19-тӥ мартэ Ижевскысь краеведческой музейын усьтӥськиз егит финн-угор художникъёслэн "Калмез" выставказы. Отын возьматӥсько этнофутуризмлы сӥзем ужъёс. Радъязы сое удмурт культурая "Дэмен" огазеяськон, "Шунды" дэменлык но "Одома" творческой группа. Сьӧрлось лыктэм суредасьёс вуылӥзы ни дано удмурт художникъёслэн мастерскоязы но удмурт общественной огазеяськонъёсы. Выставка ужалоз кык арня ӵоже. Валлян "Шунды" дэменлыкын куноын вал егит пор кылбурчи но журналист Юрий Григорьев. Со тунсыкъяськиз удмурт егитъёслэн общественной движениосы пыриськеменызы, мадиз асьсэлэн "Увий" дэменлыксы сярысь. Ужа Юрий Йошкар-Олаын "Кугарня" газетлэн редакцияз. Ваньмон дыръяз кылбуръёс, кырӟанъёс гожъя, мыло-кыдо пыриське общественной уже. Пусйыны кулэ созэ но: Юралэн нырысетӥ кылбур сборникез университетын дышетскыкуз ик потӥз. А. АЙМАНОВА. Шунды Ижевскысь Дышетонъя удмурт национальной центрын трос удмурт пиналъёс дышетско. Кивалтӥсез О. К. Шилова но дышетӥсьёс тыршо соослы ӟеч тодон-валан сётыны. Но пинал со пинал: шутэтскемез но потэ, эктэмез-тэтчамез но. Соин ик мон малпай та школаын толэзьлы быдэ шулдыръяськон ӝытъёс ортчытъяны. Та ужам кыски Ижевскысь ӟуч пиналъёсты но - 52-тӥ школаысь Миша Тикуез, Данил Кологинэз но Альберт Минимухамедовез. Соос юртто дискотекаез ортчытыны, нош университетысь ӵош дышетскись эшъёсы - пиналъёс пӧлын шудонъёс, ӵошатсконъёс радъяло. Берлоез ӝытмы сӥземын вал 8-тӥ Мартлы. Нылъёсты ӟечкыласа, ми отын пиналъёсты тодматӥм Любовь Быковалэн но "Высокое напряжение" группалэн кырӟанъёсынызы. Пинал эшъёсынымы азьланяз но ӟеч кусып возьыны малпаськом. А. КЛЕМЕНТЬЕВ, Удмурт кун университетын дышетскись. Усточиен пумиськонысь Кузьымлы - мунёос "Дэменлэн" кивалтоназ быръем эшъёс пӧртэм пумиськонъёс ортчытъяло. Удмурт культурая огазеяськонэ алигес ветлӥз усточи Анатолий Петрович Степанов. Со вордскемын Ува ёросысь Сям-Можга гуртын. Суредась. Йылпумъям Удмурт кун университетлэсь чебер суреданы но устоесь киужъёс лэсьтыны дышетонъя ёззэ- факультетсэ. Йӧн-йӧн, веськыт, ӝужыт, туслы воргорон. Вазиськемезъя, дэмламъёсмес кылзэмезъя, валаны тыршемезъя но туж востэм, сюлэме бинялскымон адями кадь потӥз. Бадӟым "песьтэрысьтыз" турлы шудонъёссэ, мунёоссэ ӝӧк вылэ пуктылонъяз шуиз: - Учке, эскере мынэсьтым киужъёсме. Оло, куд-огез тӥледлы но яралозы? Дэменчиос соку ик котыртӥзы мунёослэсь атайзэс. - Ой, кыӵе-кыӵе пӧртэмесь тӥляд сюйлэсь-пулэсь адямиосты! - кияз кутыса, котыр ласянь эскере огез егит кышномуртмы. - Быгатыны ведь кулэ такем тумошо лэсьтыны! - таиз нош кин - Лӧпшо Педунь яке...? - нош таиз ӟуч песянай-а, удмурт-а? - таиз шулан, лэся... - соиз маин тырмытъямъя песьтэрзэ? - Мыным яра кикӧэн изӥсь... Мунёосын, шудонъёсын тодматскем бере, усточилы котькудӥз вера ас мылкыдзэ. - Киужъёсты, Анатолий Петрович, - шуэ "Дэменлэн" тӧроез тодосчи А. А. Разин, - туж умоесь. Но куд-огез мукетъёслэсь адӟем карысагес лэсьтэмын кадь потэ. Тани Лӧпшо Педунь куд ке ласянь Щукарь песятайлы но кельше. Мон валасько: серемес адямиос но вань. Но мынам мунёосты пӧлысь адӟеме потэ вал анае выллем йӧн-йӧн удмурт кышномуртэ. Тусысьтыз но, мугорысьтыз но, дӥсьысьтыз но со мед адскысал. Гожъямзыя, верамзыя, ог 5-6 сюрс ар талэсь азьло асьме удмурт воргоронъёс но туж тазаесь, синмаськымонэсь вылӥллям. Ма, соос али но трос. Сыӵе муртэ ӧй лэсьтысалды-а? Кудӥзлэн-огезлэн адямиостылэн йырзы малы ке но уллань мыкыртэмын. Чорккесэсьгес муртъёсты адӟем потэ вал. Улонмы секытэн-а, мар-а сыӵе пӧрмиллям мунёос но. Мон соосты уг курласькы, огшоры ас малпанъёсме тӥледлы ивортӥсько. Ӝоже эн усе. Отӥяз Альберт Алексеевич таӵе ӵектон сётӥз. Удмуртъёслэн, шуэ со, выжыкылъёсысь геройёссы вань. Возьматоно вылэм, оло, Вумуртэз, Гидкузёез, Нюлэсмуртэ... Соосты кӧшкемано кадь лэсьтоно ӧвӧл, удмуртъёс соосын уг даллашо, "тупаса" уло вылэм. Тужгес тунсыкооссэ ми, оло, куноосмылы но кузьманы яке пичигес дунын вузаны быгатысалмы... - "Дэменэ", зэм но, мукет кунъёсысь трос куноос вуыло, - вераськонэ пыриське Л. В. Орехова. - Соослэн асьмеды ӟечгес тодэмзы потэ. Кытӥяз утчало тӥляд мунёосты выллем синпель кузьымъёс. Киязы кутымон, чебер, удмуртлыкмес, сяммес тросгес возьматӥсь мунёосты, шудонъёсты одно ик басьтозы. Соку ми тӥлесьтыд киужъёстэс курысалмы... Мон ачим но вакчияк мылкыдме верай куномылы. Вордскем нуналме пусйыкузы, шуисько, дор палысьтым, Пичи Пурга ёросысь Брангурт школаысь, дышетӥсьёс но пиналъёс кузьмазы кӧня ке мунёос. Огзылэсь чебересь мукетыз егит нылъёс. Веськресэсь, шудоесь, жин-жин чыртывесьёсын, чебересь кышетъёсын, дэремъёсын, айшетъёсын пӧрмытскемын! Коть туннэ ик котькудзэ кенлы кура! Оскисько, сыӵеоссэ Эстониысь но, Финляндиысь но, Венгриысь но ӵыжы-выжыосмы басьтозы. Анатолий Петрович "дэменъёслы" тау кариз, кӧня ке мунёоссэ кузьмаса кельтӥз. Озьыен, кусыпмы юнмалоз ай. Лыктэ, эшъёс, дуно куноосты кузьымлы, пыралэ дорамы. Курондэс одно ивортом усточилы. Кирилл Ломагин. 1. Кикӧэн изӥсь. 2. Тюрагай-шулан. А. П. Степановлэн киужъёсыз. Шунды Кыкетӥ дор Пыд улын - коньдон Студентлэн дневникысьтыз 12 сентябрь. Ӵукна. Коньдонэ вить манет гинэ. Кытысь шедьтоно, кинлэсь пунэмано? Ӝыт. Университетэ мыныкум, сюрес вылысь сю манет адӟи. Ас синъёсылы ӧй оскы. Ӝутӥ, шедьтэм интыям куинь пол сялӟи но, инмарлы тау карыса, аудиторие пыри... Урокъёс бере магазинэ мынӥ, кык книга, буёлъёс но ватман басьтӥ. Коньдонэ быриз. Эх, туж чаль быре ук та шедьтэм коньдон. 14 сентябрь. Ӝыт. Котькуд нунал университетэ автобусэн ветлӥськом. Ӵукна уже дыртӥсь калык пӧлы мырдэм тулляськиськом. Куддыр автобус остановкалы 50 метр кеме палэнэ дугдэ. Куке-соку автобусэ пуксиськом ик, но университетэ ӝыны часлы ӝегаськом. Автобус вырӟиз. Шӧдӥсько, кин ке пыд вылтӥм ветлэ. Вӧзысь кышномурт юа: - Кин отын? - Пуны, дыр,- шуисько. Нош "пунымы" адями куараен вазе: - Палэнтэ пыдъёстэс, мон проезднойме уськытӥ. Секыт учыр, адямилы куректон, нош мон, визьтэм, серекъясько: адямиез пуны шу ай. 25 сентябрь. Одӥг нылэн тодматски, со таӵе учыр мадиз. Туннэ, пе, базар пыртӥ бертӥ но одӥг бомжлэсь конфет вузан лавка азьын сылэмзэ адӟи. - Нёжто бомжлэн конфет басьтымон коньдонэз вань, - малпасько, пе. Нош со дуно конфетэн коробкаез умой-умой учке, пе, басьтыны ик ӧдъя, кожалод, кияз бергатэ. Чакласьконо кариськи. Кӧня ке улыса, вузкарись берытскем, со куспын бомж конфетэныз валче пегӟыны кутскем. Вузкарись мазэ-созэ валаса но ӧз вутты, дыр, нош тодмое лушкаськись сьӧры, пе, бызисько. Бомж троллейбусэ, нылаш но отчы. Бомж потэм, ныл сутэм но кышкатӥсько, пе: - Мон вузкарисьлэн юрттӥсез, вай конфетэз, тон сое лушкад. Соиз уг сёты, пичи нылпиосылы нуо, пе. Нылаш милициен курдатыны кутскем, соиз уг сёты. Ма, шузи-а, мар-а? Киысьтыз, пе, ишкалтӥ но кошки. Доре вуытозям, конфетсэ сиыса быдтэм. Осто, мон озьы ӧй быгатысал. Кинэн тодматски мон? 23 ноябрь. Общежитие азьын жуг-жаг куян вышкыос сыло. Жаген тырмемын. Сиён мылесъёсыз вань-а, ӧвӧл-а, бомжъёс ялан бугыръясько. Туннэ вышкыысь пуныез адӟи. Кӧлэ меда вал со, кулэмын ни-а? Света ПЕТРОВА, Удмурт кун университетын дышетскись. Кыл кутозы законъя Иворъёсты тросэн вӧлмытонъя куд-ог ёзъёс листовкаос "Ижевскысь антикриминальной комитет" шуон огазеяськон кӧня ке материалъёс вӧлмытӥз. Та дырозь со комитет нокытын пусъемын ӧвӧл, нош поттэм материалъёс Кун Кенешысь куд-ог депутатъёслэсь данзэс ултӥяло. Материал сётэмын "Волковлэн списокез" ним улсын. Удмурт Республикалэн кивалтонъя вылӥ органаз ужась депутатъёсты ултӥян умойтэм луэ. Озьы ик со пумит луэ Россия Федерацилэн законэзлы но Удмурт Республикалэн "Удмурт Элькунысь Кун Кенеше депутатъёсты быръён сярысь" Законэзлы. Отын верам депутатъёс Удмурт Республикаысь Кун Кенеше быръёнъя кандидатъёс луо бере, соосты ултӥямзы понна со адямиос элькунысьтымы быръёнъя комиссие вазиськизы, умойтэм вераськонъёсты вӧлмытонэз дугдытыны курыса. Депутатъёс вазиськизы Удмурт Ресспубликаысь прокуратурае но Югдурез уттёнъя министерствое. Соос умойтэм кыл вӧлдӥсьёсты законъя кыл кутытыны куро. Удмурт Элькунысь Кун Кенешлэн пресс-службаез. Кызьы валано "Волковлэсь списоксэ"? Макем матэгес вуэ 4-тӥ апрель, сокем золгес шӧдӥське Кун Кенеше депутатэ кандидатъёс пӧлын нюръяськон. Уката но со кужмоя Ижевскын. Асьсэдыз эрико шуись газетъёс, "АиФ Удмуртии", "Ижевск-Москва" но "Золотая провинция" берло нуналъёсы печатлазы "Волковлэсь списоксэ". Та гожтэмлэн авторъёсыз вераны туртто: учке, пе, кинъёс дурбасьто А. Волковлы. Нош мар меда со сярысь малпало асьсэос со списоке пыртэм кандидатъёс? Та пумысен соос юри журналистъёсты люказы но таӵе мылкыдъёссэс веразы: А. Осколков. Со списокез но отысь аслэсьтым нимме адӟыса, туж пайми. Сыӵе кырсь уж адямиосыз уз огазея, люкоз гинэ. А. Красильников. Политика удысын мон 1994-тӥ арысен, соку коммунистъёс монэ ӵектӥзы вал городлэн Думаяз. Ӧй ортчы, но 1995-тӥ арын нош ик коммунистъёс ӵектӥзы монэ Кун Кенеше. А. Волковен артэ пукеме понна-а, мар-а табере монэ но со списоке пыртӥллям? Шонергес, дыр, луысал монэ Н. Сапожниковлэн списоказ пыртыны. Мон туж паймемын. Югдурез валасьтэм лыдӟисьёсты алӥсько: кырсь гожъямъёслы эн оскелэ! Е. Балобанов. Эрико газетъёслэн гожъямъёссылы осконо ке, милемыз А. Волков кыӵе ке кузьымъёсын "басьтэм", соин ик солы дурбасьтӥсьёс пӧлы пыртэм. Но со шонер ӧвӧл ук! Ваньмыз со лэсьтэмын чылкыт кандидатъёсты сьӧдман понна, бырйисьёсты милемлы пумит узатон вылысь. А. Глухих. Вань газетъёс, кудъёсыз печатлазы "Волковлэсь списоксэ", мыдлань сюрес вылэ султэмын. Кандидатъёслэсь данзэс утён понна, со газетъёсты луэ судэ сётыны. Вань эшшо одӥг амал: быръёнъёсъя йылпумъянъёсты умойтэмен лыдъяны. Н. Харина. Статьялэн авторъёсыз монэ туж лек ултӥяллям. Соос монэ янгыше уськыто вань промышленностьлэн куашкамез понна. Кызьы бен меда мон озьы "ужаськем", мон врач, 20 арлэсь ятыр ини адямиослы операциос лэсьтылӥсько. Малпасько, кандидатъёс сярысь бырйисьёс асьсэос шонер валатскозы. А. Бегунов. Кун Кенешын 4 ар ӵоже ужам депутатъёсты журналистъёс олокызьы но люкылыны вырылӥзы, пӧртэм группировкаосы пыртылӥзы. Со милем уг кельшы. Коммунистъёс сярысь ке верано, милям асьмелэн программамы, А. Волковлэн нокыӵе списоказ ум пыриське. Л. Шамсутдинова. "Волковлэн списоказ" пыртэмын городысь кандидатъёс гинэ. Валамон, малы озьы лэсьтэмын. Ми, депутатэ кандидатъёс, городын улӥсь калыкен ӵош нюръяськиськомы городмылэн чылкытлыкез но шунытэз, транспортлэн умой ветлэмез понна, озьыен, А. Салтыковлэн тушмонъёсыз луиськомы. А. Белоусов. Валамон мукетыз но: кин сылэ та газетъёслэн тыбыр сьӧразы - со городлэн администрациез, мукет сямен вераса, Салтыковлэн-Чубайслэн командаез. С. Чикуров. Туж воже потэ "АиФ Удмуртии" газетлы. Солэсь редакторзэ Светловез котьку но гажасько вал юн сямо луэмез понна. Но быръёнъёсын валче коньдон ӵектыку, лулсӧрыз, лэся, чидамтэ. Мынам малпамея, Кун Кенешын ужаны кулэ пӧртэм партиосын но движениосын быръем адямиос. Соин ик уг валаськы, малы Кун Кенешез "Волковлэн" нго "Салтыковлэн" адямиосызлы гинэ люконо. Малы ке куд-ог журналистъёс но югдурез озьы возьмато. Но улон 4-тӥ апрель бере уг быры ук. Кызьы меда ог-огмы шоры учкомы быръёнъёс ортчем бере. Пресс-конференцие люкаськем депутатэ кандидатъёс журналистъёсты ялан пыкылӥзы я Салтыков, я Волков пала кариськылэмзы понна. Ма, соос сяна республикаямы нокыӵе кужмо лидеръёсмы но ӧвӧл ни-а, мар-а? Туж кельшиз С. Чикуровлэн верамез: - Малы мон Кун Кенешлы Тӧро бырйыку куараме одно ик А. Волков понна сётыны кулэ? Ачим но солэсь ляб ӧвӧл. Собере, Тӧро быръёнэ вуимы ке, мон нырысь ик адями шоры уг учкы, тодматско солэн программаеныз. Кельшиз ке, шуом, М. Шишкинлэн программаез, со понна дурбасьто. Нош А. Белоусов меӵак шуиз: - А. Волков понна куараме уг сёты. А. Красильниковлэн мылкыдыз тросэзлы тодмо ини. Татын но со выльысь тодэ вайытӥз: - КПРФ понна туннэ Россиын 33 процентэз калык дурбасьтэ. Республикалы кивалтӥсьёс быръёно луимы ке, адямиосмы учкемын ни - М. Шишкин но Н. Сапожников. Тӥни сыӵеесь соос, "Волковлэн списоказ" юнматэм адямиос. Т. БАННИКОВА. КНИГА ӜАЖЫЯДЫ Кыӵе тон, ныл сюлэм? Ольга Ведровалэсь кылбуръёссэ ӵемысь огпол лыдӟемен гинэ нокызьы буйгатскыны уг луы. Соосыз выльысь но выльысь учкиськод. Йырез пумен сӥсъя таӵе юан: нош таяз кылбураз автор сюлмызлэсь кыӵе сэрегзэ усьтэ на меда? Ваньмыз верамын ини кадь ук. Азьвыл лыдӟемъёстэ амалтэк ӵошатӥськод берлосьёсыныз - огзы но огвыллемесь ӧвӧл. Кылбурчи "Мон утчасько тонэ" книгаысьтыз бамызлы быдэ асьмелы вӧлак-вӧлак пужалтыса сётэ улон сярысь, азьвыл ноку но пумиськылымтэ яратонэз утчамез, матысь дуно эшез сярысь малпанъёссэ. Зэмзэ но, кыӵе бен тон, ныл сюлэм? Кызьы пумитаны дасяськиськод чылкыт, бадӟым шуддэ? Юн оскыса-а? Шурдыса-а? Пӧсь шокчылэмъёсты, кезьыт "йӧ пырыосты" дыраз валалод-а, шонер дунъяны быгатод-а? Пӧяськыны-алдаськыны уд шедьты-а? Нырысетӥ чуръёсаз тани кылбурчи гожтэ: Сылӥсько улонлэн ярдрураз, Кудпала уяны тодытэк. .............................. Таӵе меӵ ярдурын сылӥсько пал пыдын, Пал пыдын сылӥсько - омырын. Тани-тани усёз кадь пыдэстэм гуэ, лобоз яратонэзлэсь палэнтӥ. Но отӥяз пумен валано: аслэсьтыз дунозэ аслыз карон понна, со ваньзэ лэсьтоз. Пӧсь сюлэмзэ но усьтоз, пӧртмалоз-тупатоз но, ведналоз но, оло... Огкылын вераса, зэмлыкен но выжыкылэн сураськем, ялан пӧзись-шукыяськись мылкыдыныз, аслаз паньсаськымтэ чебереныз бордаз кыскоз яратонзэ: Сектало тонэ кудӟытозяд. Юод. Быдтод. Ӟенеликез музэн, Кезьыт вуэ куштод. Юзыр-кезьыр луо. Лыз чорыглы пӧрмо, Огшап чилясь сьӧмъёсыным, синдэ мальдытыса, Мон мынчырес учко шорад: Я, табере луоз-а кырмемед? Кидэ месӥд... Бордам кыски - Куд-огезлэн нылкышно кылбурчиосмылэн нырысетӥ гожъямъёсазы ӵемгес пызьырало вал удалтымтэ яратон, мӧзмон, вожан сярысь чуръёс. Ольга Ведровалэн сыӵеосыз ӧвӧл, шуыны яра. Уз, мукетсэ со вӧсь уз кары, синмаськем пиез шораз ке ӧз учкы. Уз юриськы, соин валче чигиськымон уз ӧпкельы, куинетӥезлы, мултэсэзлы, уродзэ уз сӥзьы. Котькин котькинэ яратыны быгатэ угось. Синмаськонлэсь но нокинэ уд палэнты. Но кылбурчи олокызьы но шӧдытыны турттэ дуно муртсэ: Мон чыртыям бадӟым гырлы ошо, Урам тырос бӧксо, Муры кылем искал сямен. Лыз нюлэскы пегӟо, ышо... Огнам... Уг... Утисеным ӵошен. *** Ольга Ведровалэн книгаяз возьматэм ныллэн сюлэмыз ялан утчаськись, лопыръяськись, витись. Со возьма выжыкылозь ӝутӥськем бадӟым яратонэз. Та ласянь умой кисьмам "Выжыкыло яратон" кылбур: Киосад киме кутыса, Пельпумдэ пельпумам лякыса Изё, кинэ ке вӧтаса. Сюлэмы муртаса выллем Йыгаськоз таман валантэм, Мукетсэ вӧтаса. Сюсьтыл сылме, лымы сямен. Вамыштӥсько уе - картэ вамен - Мукетсэ вӧтаса. Уйвӧт пушкы ышиз уйвӧт: Киме ӧд лэзьы ке но, ӧд - Мон туж-туж кыдёкын. "Мон утчасько тонэ" книгаысь нылмуртэ кысэм яратонэз но ялан лӥятэ на, кылдымтэ яратонэзлэн но сяськаосыз бурдъяло, выль кылбуръёсыз но кужмо ӝуто азьлане. Мукет сямен вераса, солэн сюлэмыз котьку усьтэмын ӟечезлы. Медаз гинэ люкеты уродэз. Тодады вае ай мусо Ашальчимылэсь "лулы мынам" шуылэмзэ. Сыӵегем ик Ольга Ведровалэн но лирической нылмуртэз. Кылбурчилэн трос чуръёсыз пӧлэстӥсько кадь Окилэн гожъямъёсыныз. Мон сое книгазэ выльысь лыдӟемысьтым гинэ озьы уг вераськы. Кылем арын, Завьял ёросысь Постол, Ӵӧж но Женвай гуртъёсысь лыдӟисьёсын пумиськыку, отысь арлыдоослэн огазеяськонзылэн тӧроез, уно аръёс ӵоже татысь библиотекаын ужам но поэзиез мур валась кышномурт Зинаида Александровна Кузнецова шуиз: "Ольга Ведрова - милям Ашальчи Окимы". Люкаськемъёс ӟырдыт кичабонъёсын пумитазы таӵе вылӥ дунъетэз. Зэм но, нылкышно кылбурчиосмы Татьяна Чернова, Людмила Кутянова, Алла Кузнецова, Галина Романова, Любовь Тихонова, Лидия Нянькина но музонъёсыз пӧлын со аслэсьтыз интызэ тып-тып шедьтӥз нырысетӥ книгаеныз ик. Редакторез-кылбурчи, тодосчи Виктор Шибанов но умой дунъя Ольга Ведровалэсь поэзизэ. Возьматэ солы уката будыны выль сюресъёс, дэмла аслэсьтыз ошмес синзэ мургес копаны, отысь дун вузэ золгес ӧръяны. Шаерысьтымы Писательёслэн огазеяськонзылэн кивалтэтаз одӥг пол мыр-мыр вераськон ӝутскылӥз ни Ольга Ведроваез но Любовь Тихоноваез гожъяськисьёсмылэн союзазы кутыны дасян пумысен. О. Ведровалы соку веразы, куд-ог кылбуръёссэ уката юнгес волятоно на вылэм шуыса. Озьы шуэмзы-а, мукетыз-а ӧжытак зӥбломытӥз кадь чебер сюлэмоосмылэсь мылкыдзэс. Мугзэ уг тодӥськы. Но вераськон отӥяз, сюсьтыл музэн, каньылля кысӥз. Мынам малпамея, со гыбдась тылэз выльысь пуромытоно. Чидатэк витисько О. Ведровалэсь выль чуръёссэ. Ольга Анатольевна али Владимир Михайловен ӵош тырше Удмурт радиоын. Кыкназылэн но ужзы юн герӟаськемын асьме литератураен, писательёсын. Кыксы но трос лэсьто поэзимес, прозамес, драматургимес азинтонын, радиокылзӥсьёс пӧлы вӧлмытонын. Писательёслэн радазы кутыса, соос уката юнгес бурдъяськысалзы. Йылпумъяса тани мае вераме потэ на. Удмурт культурая "Дэмен" огазеяськон азьланяз чакла егит кылбурчиослэсь аспӧртэм ӵошатсконзэс-конкурссэс ортчытыны. Отчы одно ик мед пыриськысал Ольга Ведрова но. Кирилл Ломагин, писатель. КПРФ-лэн Удмурт Республикаысь комитетэзлэн вазиськонэз КПРФ-лэн республикаысь организациез Удмуртиын одӥгез валтӥсь политической кужым луэ. Туала кивалтон амалъёс Удмуртиын югдурез эшшо но шугомыто, озьы ик уродме калыклэн улон-вылонэз. Вылӥ кивалтӥсьёсты воштон но сое коммунистъёслы сётон сярысь ӵектонэн вазиськиз КПРФ-лэн организациез. Но куд-ог "выль кузёос" таӵе ӵектонлы пумит луо. Депутатэ потон понна соос дасесь котьма но лэсьтыны: бырйисьёсты кышкатыны но коньдонэн пӧяны, юромо мыдлань ивор вӧлдыны, адямиез саптаны. Та нуналъёсы урод уж нуэмын вал 6-тӥ Халтуринской округъя КПРФ-лэн кадидатэзлы Бегуновлы пумит. "Гуманитарной юрттэт" сётон амалэз кутыса пумиськонэ ӧтёнъёс вӧлмытэмын вал. Пумиськон ӧз ортчы, со уз но луы, коммунистъёс сыӵе амалэн уг нюръясько, шуиз КПРФ-лэн организациез. Сыӵе ужрадъёс адямиез ултӥяло. Соин ик КПРФ-лэн организациез кандидатэз ултӥям понна правоосты утёнъя органъёсты кулэ ужрадъёс кутыны курыса вазиськиз. КПРФ-лэн Удмуртиысь рескомезлэн пресс-службаез. Якшур-Бодьяын пумиськон Удмурт Республикаысь Кун Кенешлэн Тӧроез Александр Волков 22-тӥ мартэ пумиськылӥз Якшур-Бодья ёросысь активен, хозяйствоослэн кивалтӥсьёсынызы но иворъёсты вӧлмытӥсь удысын ужасьёсын. Кун Кенешлэн Тӧроез Госсоветлэн ньыль ар ужамезлы йылпумъянъёс лэсьтӥз. Со пусйиз, туннэ экономикаез ӝутыны луонлыкъёс вань. Умоесь азинсконъёс басьто Глазовысь Чепецкой механической но Воткинскысь машиностроительной заводъёсын. Ижевскысь радиозавод но пайдаё ужа. Удмурт Республика но Беларусь Республика куспын ӵош ужан сярысь тупанкылъя та дыре Ижевскысь электромеханической завод быдэстэ Белоруссиысь вооружённой кужымъёслы нимысьтыз техника лэсьтонъя заказзэ. Кылем арын Беларусь Республикаен ӵош ужан 27 миллион доллар коньдон ваиз. Вуоно арын со кык поллы будоз. Мукет странаосын тупаса ужанлэн со кутсконэз гинэ луэ, шуиз Александр Волков. Трос лэсьтэмын Ижевскысь автозаводэз ӝутон ласянь но. Азьланяз Чехиысь "Шкода" предприятиен чакламын ӵош ужаны. Соку Удмуртие 5 ар куспын 300 миллион доллар коньдон вуыны кулэ. Озьы 13 сюрс ужан инты кылдоз. Со пумысен Кун Кенешлэн Тӧроез пусйиз, кивалтон ёзъёсты улӥысен вылӥозь ӧм ке радъялэ, экономика уз ӝутӥськы шуыса. Республикалэсь берло аръёсы азинскемзэ дунъяса но "выль кузёослэсь" ужам бервылзэс эскерыса, Александр Волков оскемзэ вераз, демократ шуонъёс калык азьын одно ик кыл кутоно луозы. Пенсиос сярысь юанъёслы валэктыса, кивалтӥсь пусйиз: Россия Федерациысь Пенсиосъя фондлэн ӟеч тыршеменыз, Удмуртиын пенсиосты тырон одӥг толэзьлы гинэ бере кыле, нош Россиысь мукет улосвылъёсын со ласянь 3 толэзьлы бере кылё. Удмурт Республикаысь Кун Кенешлэн пресс-службаез. "Кун Кенеш - со ЖЭК но, исполком но ӧвӧл. Кун Кенеш - со калыклэн синучконэз" Ӧвӧл, та кылъёс туннэ малпамын ӧвӧл. Соос басьтэмын архиве пыртэм документысь. Удмурт Республикаысь Кун Кенешлэн нырысетӥ ӧтчамаз депутатэ одӥгезлэн кандидатлэн дурбасьтон листовкаяз озьы верамын вал. Ньыль ар талэсь азьло быръёнлы дасяськон кампания табере историе кылиз. Со сярысь материалъёс возисько Удмурт Элькунлэн Туала вакытысь документацияя центрлэн архивъёсаз. Архивын ужасьёс кӧня ке ар ӵоже ини люкало быръёнъёс азьын валэктон-ӵектонъя материалъёсты. Люкам документъёс туж умой возьмато, кыӵе амалъёсты кутыса ортчиз быръёнлы дасяськон, кыӵе программаосын потӥзы быръёнъя огазеяськонъёс, сётэмын кандидатъёслэн биографиоссы. Туэ 4-тӥ апреле быръён азьын, малпасько, урод ӧй луысал бырйисьёсты тодматыны общественно-политической кужымъёсын, кудъёсыз вылӥ кивалтон ёзэ шедён понна нюръяськизы вал 1995-тӥ арын 26-тӥ мартэ. 1995-тӥ арлэн кутсконаз Удмурт Республикаысь Быръёнъя комиссия депутатэ 695 кандидатэз пусйиз, яке депутатлэн 1 мандатэз (100 инты) понна 6-лэсь уно адями нюръяськиз. Нюръяськонэ пыриськиз 12 блок но общественно-политической огазеяськон. Милям малпаммыя, соку валтӥсь инты басьтӥз "Удмуртия" блок. Со огазеяз эрико профсоюзъёсты, элькунысьтымы Ожысь но ужысь ветеранъёслэсь советсэс, Нылкышноослэсь огазеяськонзэс, интеллигенцилэсь союззэ, Россиысь аграрной партилэсь Удмуртиысь ёззэ, социал-демократической калык партилэсь улосмыя ёззэ. Блоклэсь нимзэ возьматэ "Удмуртия - асьмелэн дормы" ӧтён. Блокен кивалтӥз А. А. Волков, со вал Удмурт Республикаысь Министръёслэн Кенешсылэн Тӧроез. Блоке огазеяськемъёс валэктылӥзы: улонлэн котькуд удысаз югдур уродме, экономика быдэсак сямен куашкамын, тросгес луизы узыръёс но куанеръёс. Блоклэн платформаезъя шуг-секытысь потыны чакламын вал, югдурез котыр ласянь сак эскерыса. Блоклэн программаезъя госаппаратлэсь ужзэ эскерыны кулэ ачиз калык, экономикалэсь ужамзэ ас вылаз басьтоз государство, ваньбурез выль кузёослы вузан ортчоз законэз юн чакласа гинэ, музъем дунтэк сётӥськоз со бордын ужасьёслы гинэ но мукет. Блок депутатэ 73 кандидатсэ ӵектӥз. "Ми соин огазеяським, ас азямы пуктэм ужпумъёсмы ог-огзылы тупало",- шуэмын вал одӥгаз листовкаын. Огазеяськонысь кандидатъёс кыл сётӥзы адями кусыпъёсты шунытгес карыны, пӧртэм социальной группаос куспын ог-огеныд валче ужанэз азинтыны... "Удмуртия" блоклэн быръён азьын программаез матын вал "Удмурт кенеш" огазеяськонлэн платформаезлы. Отчы пыриз 3 национальной организация - элькунысьтымы "Удмурт кенеш" ассоциация, егитъёслэн "Шунды" огазеяськонзы, удмурт культурая "Дэмен" общество. Блок Кун Кенеше депутатэ 47 кандидатсэ ӵектӥз но нюръяськонэ пыриськиз "Ӟеч улонэ - производство пыр" ӧтён улсын. Быръёнэ одӥг блоке огазеяськыса пыриськизы Удмуртиысь ужбергатӥсьёслэн союззы, "Экономикаын эрик" партилэн улосъя ёзэз, "Демократической Россия" движение, Афганистанысь ветеранъёслэн Удмурт Республикаысь союззы. Огазеяськон потӥз "Эрик. Законэз чаклан. Огкылысь луон" ӧтён лозунген. Отчы пыремъёс шуг-секытысь потонъя капчиесь сюресъёс ӧз ӵектэ. Кун Кенеше депутатэ 49 кандидат нырысь интые пуктэ адямилэсь эриксэ но правооссэ юнматонэз. Соослэн чакламзыя, со сярысь сюлмаськыны кулэ государство. Озьы ик блоке пыремъёс кыл сётӥзы республикалэн бюджетысьтыз котькуд манетсэ эскерыса возьыны, му вӧй но нюлэс вузамез чакланы, ваньбур вузанэз дугдытыны, законэз чаклась ужбергатӥсез утьыны, налогъёсты кулэстыны. Нош Россия Федерациысь Коммунистической партилэн элькунысь организациез быръёнъёсы потӥз "Россия. Уж. Калыклэн властез. Социализм" ӧтён улсын. Отын вал 45 кандидат. Коммунистъёс экономикаын югдурез тупатыны кыл сётӥзы, "шоковой терапия" шуон амалэз палэнтыса. Производствоез тупатыны юрттозы государство но планэн ужан. Соос калыкен кивалтонын выльысь кутыны малпало вал советской амалэз. Коммунистъёс пум поныны чаклазы приватизация амалэн калыклэсь ваньбурзэ вузанлы. Соослэн программазы трослы тупа вал "Удмуртия" блоклэн платформаеныз (коммунистъёс нырысь со блокын вал, бӧрысь асьсэ коже кариськизы). Коммунистъёс огазеяськизы Удмуртиысь рабочийёслэн, крестьянъёслэн, специалистъёслэн но служащийёслэн союзэнызы но Кун Кенеше 30 кандидатсэс ӵектӥзы. Соослэн чакламзыя, калыклэсь улон-вылонзэ уродмытон потӥз социалистической строез юромо куашкатэмен. "Ми паллянъёс но ӧвӧл, ми буръёс но ӧвӧл - ми тӥ пӧлын" ӧтёнэн быръён азьын ужаз социально-экологической союз (Россиысь социально-экологической союзлэн ёзэз). Блокысь 19 кандидат секыт югдур понна нырысь ик янгыше уськытӥз вуж номенклатураез. Быръёнын ужаз Удмурт Республикаын ас коже кивалтонлы дурбасьтонъя центр но. Солэн 11 кандидатэз вал. Центр тужгес бадӟым саклык висъяз интыосын аскивалтонэз паськытатонлы, бюджетын выльдӥськонъёс ортчытонлы. Озьы ик быръёнын нюръяськизы Россиысь Нылкышноослэн конфедерацизылэн Удмурт представительствоез, Удмуртиысь тодосчиослэн ассоциацизы, Афган войнаын сӧсырмемъёслэн республикаысьтымы фондзы, "Справедливость" элькун огазеяськон, Удмурт Республикаысь "Союз-Чернобыль" общество. Кун Кенеше асьсэлэсь кандидатъёссэс ӵектӥзы промышленной предприятиосысь ужась коллективъёс, бырйисьёслэн группаоссы. 1995-тӥ арын 26-тӥ мартэ быръён бере Элькунысь Кун Кенеше шедизы: 20 мурт "Удмуртия" блоклэсь, 9 адями коммунистъёслэсь, ас коже кивалтонлы дурбасьтӥсь центрысь 3 мурт, Россиысь коммунистической рабочей партилэн элькун организациысьтыз 3 депутат, "Эрик. Законэз чаклан. Огкылысь луон" блок поттӥз 2 адямизэ, 1 депутат шедиз Россиысь Нылкышноослэн конфедерацизылэн Удмурт представительствоысьтыз. Быръёнъя мукет блокъёсысь нокин депутат ӧз луы. Уноез быръем депутатъёс нокыӵе огазеяськонъёсы пыремын ӧй вал. Елена УШАКОВА, Удмурт Республикалэн туала историезлы сӥзем центрысьтыз отделлэн кивалтӥсез. ОРТЧЕМЗЭ ТОДЭ ВАЙЫСА Ми вал Венгриын... Кытчы гинэ ӧз вуылэ ни асьме ожгарчиос! Эсьмаса, кыдёкысь ӵыжы-выжыосмы доры но, Венгрие, "югдурез тупатыны шуыса", кӧня ке дивизиосты, мукет соединениосты пыртылӥзы. Отысь солдатъёс пӧлын уноез вал асьме шаерысьтымы но пиос. Кызьы уло ни соос та вакытэ? Али, уно аръёс ортчыса, мар малпало солдатъёсмы, ветеранъёсмы асьме войскоосмес вынлыко государствоысь куд-ог кивалтӥсьёслэсь мылкыдзэс сӥятон понна пыртылэмзы пумысен? Армиысь бертыса, ми ваньмы кир-пазь луим. Тросэз ог-огмылэсь кытынмес ум но тодӥське ни. Соин пумиськылыны мылкыд карисьёс кылдӥзы, лэся. Тӥни озьы Венгрие ветлэмъёсты огазеян вылысь кылдытэмын вал шаерамы вить муртлэсь нимысьтыз группа. Эшеным Евгений Васильевич Мозжуевен ми кӧня ке ёросъёсы вуылӥм ни, эшъёсмес-уромъёсмес утчаса, люкаса. Шунытэсь пумиськонъёс ортчизы Вотка, Шаркан, Алнаш, Завьял ёросъёсын. Ӝоген ветломы Можгала. Ижевскын, тодэмея, Дунай дуре ветлэмъёс лыдъясько 152 мурт. Ваньзэс одӥг пол но ӧз люкаллялэ на. Музон интыосын но ӝыны палаез сяна уг люкаськыло. Кытӥяз иворъёс но уг вуо, вылды, котькудӥз доры, вань ини кулэмъёсмы но. Шумпотӥсько: утчаськонмы пумен паськыта. Эшъёсмы огинэ люкаськылыны мылкыд каро. Куд-огезлы угось кыӵе ке но юрттэт но кулэ. Ӧжыт коть тодэ вайылӥсьёс но мед луысалзы. Ярам, алигес милемды, Венгриысь югдурез радъянэ пыриськемъёсты, кутӥзы шаерысьтымы ветеранъёслэн советазы. Оскисько: огазьын каньылгес шулдыргес, луоз, уката ик - Атай музъеммес утисьёслэсь нуналзэс пусйылыку. Венгрие ветлэм эшъёсылы нялтас вазиськем потэ: огнады шып эн пуке, огазе кариське! Ӟечкыласько вуись праздникен! С. Ильин, Удмурт культурая "Дэмен" огазеяськонлэн кивалтонэз быръем ветеран. "Новая Сила" огазеяськонлэн ужъёсыз Кылем арняе "Новая Сила" огазеяськонлэн Координационной Кенешез люкаськылӥз. Отын эскеремын вал огазеяськонлэсь ужзэ радъян сярысь ужпум. Исполкомезлы кивалтӥсе юнматэмын Анатолий Иванович Белоусов - Ижевск городысь Интыысь аскивалтонлы юрттонъя фондлэн правлениезлэн тӧроез. *** Берло дыре тросэз газетъёс печатлазы депутатэ кандидатъёслэсь списоксэс, кудъёсызлы быръёнын юртто пӧртэм политической кужымъёс но соослэн азьветлӥсьёссы. Валантэм учыръёс медаз кылдэ шуыса, "Новая Сила" огазеяськонлэн кивалтӥсез С. В. Чикуров бырйисьёслы вазиськиз: - "Новая Сила" огазеяськонлы дурбасьтӥсь кандидатъёс нокыӵе нимаз списоке пыртэмын ӧвӧл. Та вакытэ сыӵе список эскериське гинэ ай. Матысь дыре ми сое вӧлмытыны чакласьком. Бырйисьёс умой тодыны кулэ, кин понна дурбасьтэ милям огазеяськонмы. "Новая Сила" огазеяськонлэн пресс-службаез. Удмурт Республикаысь Правительство мур куректэмзэ вера акциосын "Элеконд" огазеяськонлэн генеральной директорезлы Хохлов Николай Ивановичлы кузпалыз Хохлова Надежда Андреевна улонысь кошкемен валче. Удмурт Республикаысь Промышленностья министерство мур куректэмзэ вера акциосын "Элеконд" огазеяськонлэн генеральной директорезлы Хохлов Николай ивановичлы кузпалыз Хохлова Надежда Андреевна улонысь кошкемен валче. Яратэ, уг яраты Мар вералоз копейка? Туннэ ми ӵектӥськом тӥледлы туж огшоры тунаськон. Соя тӥ тодыны быгатоды, яратэ-а тӥледды гажан муртты, яке мар кароно на, мед синйылтоз шуыса. Со понна кулэ луоз одӥг копейка но укмыс карта (сое лэсьтэмды луоз асьтэлэн но: картонлэсь укмыс одӥг быдӟаесь карта вандыса, котькудаз одӥгысен укмысозь лыдпус пуктэ). Табере, картаосты сураса, лыдпусэнызы кымин куинь чурен вӧлдэ ӝӧк вылэ. Шорысез карта вадьсы копейкадэс куштэ, тэляса со мукетыз вылэ питыралоз. Кудӥз вылэ усиз, со картаез усьтэ но лыдӟе валэктонэз. Эн вунэтэ копейкалэсь кудпалыныз усемзэ учкыны (решка яке орёл). Валэктонъёс 1 номеро карта Решка. Вуиз зарни вакыт! Котьмар кур яратоно муртэдлэсь, со ваньзэ быдэстыны дась. Ӵапак али тон быгатод кема возьмам малпанъёстэ быдэстыны. Орёл. Эн лэзьы туганэдлы асэныд шудыны - али со тон понна уродэн гинэ берытскоз. Соин ик куронъёссэ быдэстыны эн дырты. 2 номеро карта Решка. Тырмоз ини муртъёслэсь индылэмъёссэс, кенешъёссэс кылзыны. Тыныд али усто луонлык сётэмын - басьты сое, удалтыны кулэ. Орёл. Эн дырты маке малпаськытэк, дыртыса лэсьтыны. Чакласькы "лек кылъёслэсь" - тон сярысь яратонэдлы супыльтӥсьёс шедёзы. 3 номеро карта Решка. Тыныд кельшись пияш татчыозь номыр уг поттылы. Тон уд тодӥськы ма карыны? Нырысь вамыш лэсьты ачид, со но тонэн тунсыкъяське. Орёл. Малы тон вань малпанъёстэ, мылкыдъёстэ эшъёсыдлы вераськод? Сюлэмез быдэсак усьтыны нокинлы уг яра, берло со сярысь ачид ик жалялод. 4 номеро карта Решка. Эн дырты та нуналъёсы кыӵе ке ужпумез быдэстыны яке мылкыддэ чутрак вераны. Соин тон яратоно мурттэ кышкатод гинэ. Орёл. Яратоно муртэдлэсь мылкыдъёссэ эскерыны вазь на. Сёт на дыр кусыпъёстылы юнманы. 5 номеро карта Решка. Ӵапак али тросгес дырдэ висъяны тыршы солы. Орёл. Кин ке тушмонаса тӥледды керетытыны турттэ. Соин ик чакласькы супыльтонъёслэсь. 6 номеро карта Решка. Дыр вуиз шутэтскыны. Буйгатскы, эн малпаськы со сюлмаськонъёсыд сярысь. Тынад ваньмыз умой луоз, уката ик яратоно муртэныд кусыпъёсыд. Орёл. Малпаськы: укыр уд эркияськы-а тон тугандэ? Соя гинэ кариськыны уг яра, тынад аслад но данэд вань ук. 7 номеро карта Решка. Оскиськы шӧдонэдлы. Тодад вай берло вӧтъёстэ, мукет шӧдсконъёстэ, али соос тыныд шонер вералозы азьланяз мар луонозэ. Орёл. Котьмар мед луоз, эн куашкаты мылкыддэ. Тынад урод мылкыдыд сое палэнскытоз гинэ. 8 номеро карта Решка. Тон али туж секыт но шуг ужпумъёсты быдэстыны быгатод. Озьы ик быдэсмозы вань малпанъёсыд. Кемалась тодматскемед потэ ни умой, тунсыко пияшен - тодматскы! Нош яратоно муртэд вань ни, но тынад сое ӧжытак воштэмед потэ - тыршы али. Орёл. Тынад али тужгес но шудо вакытэд. Тыршы сое кемалыгес кыскыны. Али тыныд туж трос синмаськисьёс, малы ке шуоно, тон тыршиськод астэ чебер но синмаськымон карыны. 9 номеро карта Решка. Тон укыр бадӟым куронъёс пуктӥськод яратоно муртэд азе. Эн вунэты, со инмар ӧвӧл, соин ик солэн но аслаз тырмымтэосыз вань. Орёл. Нокинлы но эн лэзьы аслэсьтыд улондэ сураны. Эн кылзы эшъёсыдлэсь со сярысь малпанъёссэс, супылтэмъёссэс. Озьы гинэ тон та яратондэ утьыны быгатод. Леонид Сапожниковез ӟеч тодо Бигер шаерысь Балтаси ёросысь Сэръя вылын. Гуртысь "Тюрагай" нылпи садэн кивалтӥсь лулысь-сюлмысь уте удмуртлыкмес. Сое ӟеч шӧдоно татысь покчиослэн чебер удмурт кылын вераськыны турттэмзы но быгатэмзы вылысь. Со сяна, Леонид Дмитриевич мылысь-кыдысь пыриське "Удмурт кенеш" огазеяськонлэн но Удмурт лулчеберлыкъя дэменлыклэн ужазы. Миым туж ӟеч дасяз но ортчытӥз Куӟебай Гердлэн вордӥськемез дырысен сю ар тырмонлы сӥзем ужрадъёсты. * Леонид САПОЖНИКОВ. Тусбуйзэ пуктӥз Владимир КАМАШЕВ. Удмурт Республикаысь Прокурорлы В. М. Походинлы Уголовной уж ӝутон сярысь заявление 1999-тӥ арын 19-тӥ мартэ Ижевск городын вӧлмытэмын вал Ижевскысь антикриминальной комитетлэн "Волковлэн списокез" листовкаосыз. Отын сётэмын Удмурт Республикаысь Кун Кенешлэн депутатъёсызлэн списоксы, "Александр Волковлэн матысь эшъёсыз но юлтошъёсыз". Листовкаын котькуд депутат сярысь урод кылъёс верамын. Озьы уно адямиос пӧлын зэм луисьтэм но ултӥясь иворъёс вӧлмытэмын. Пӧлысьтымы куд-огез янгыше уськытэмын, секыт йыружъёс лэсьтӥзы шуыса. Та вакытэ ми Удмурт Республикаысь Кун Кенеше депутатэ кандидатъёс луиськом. Озьы бере, листовкаез вӧлмытон - агитация выллем луэ, бырйисьёсты 1999-тӥ арын 4-тӥ апреле кандидатураосмылы пумит луыны ӧте. Листовка бырйисьёслы вазиськонэн йылпумъяське: "Эн сётэ та шайкалы нош ик властез киязы басьтыны!" Ми малпамъя, листовкаез вӧлмытон Рооссия Федерацилэн Уголовной кодексэзлэн 129-тӥ, 130-тӥ статьяосызъя йыруж луэ. Тае лыдэ басьтыса куриськом: 1. Удмурт Республикаысь Кун Кенеше депутатэ "Волковлэн списокез" листовкае пыртэм кандидатъёс сярысь кыл вӧлдон но соосты ултӥян учыръя уголовной уж ӝутыны. Лопатин А. К. Агашин В. И. Глухов К. А. Пономарев В. А. Тарасенко В. Д. Белоголовкин Д. Е. Красноперов Г. Ф. Сударикова Н. А. Чо И. А. 1999 арын 22 мартэ. Шунды "Пинал куараос" Гуртын но вань акробатъёс Али мон Ижысь 56-тӥ гимназиын дышетскисько. Но аслам гуртысьтым школаелэсь туж мӧзмисько, бертэмелы быдэ пырасько. Золотари школа Глаз ёросын тужгес но синмаськымонэз луэ: ӟеч дышетскеменызы но пиналъёслэсь ваньмон дырзэс радъяны быгатэменызы но паймытъяло. Кыӵе но кружокъёс уг ужало татын: драмая, эктонъя-кырӟанъя, калык киужъёсъя, спортъя, радиотехникая, акробатикая... 8-тӥ классысь Ваня Агафонов мыло-кыдо ветлэ радиотехникая кружоке. Дораз кожемме со ӧз но шӧдылы. - Мар бен сокем йӧндыриськод? - юасько ужаз выем пияшлэсь. - "Жингрес возьмаськись" та. Ме, корка ӧс бордад юнматы. Лушкаськисьёс пырыны ӧдъязы ке, жингыртыны кутскоз. - Кызьы-о сыӵе арбери лэсьтыны валатскид? - Алексей Альбертович Лукин возьматӥз. Со милемды олома но лэсьтыны дышетэ, туж яратӥськом та кружоке ветлыны. - Эшшо кудаз ке кружоке вутскиськод на-а? Школаын акробатикая но кружок вань кадь - гуртын сыӵезэ ӵем уд пумита. - Ӵапак отчы ветлӥсько на. Акробатика туж тунсыко вылэм. Со адямилэсь трос чиданзэ, кужымзэ кулэ каре. Ми олокыӵе но номеръёс пуктыны быгатӥськом ни, ӵемысь сцена вылэ потаськом. Залысь калык шорамы шокчыны дӥсьтытэк учке. Гуртысь пиналъёслы, городысьёсызлы сярысь, мӧзмытгес, шуо. Быгатонлыкъёссэс но азинтыны луонлыкъёс ӧвӧл, пе. Золотариысь дышетӥсьёс со ӵошатонэз ӵошкатыны тыршо, нуналлы быдэ пиналъёслэсь улонзэс тунсыкогес но шулдыргес каро. Надя РОМАНОВА, Ижевскысь 56-тӥ гимназиын дышетскись. ШУНДЫ "Шунды" дэменлык толон, туннэ, ӵуказе. Со пумысен малпанъёссэ вера дэменлыклэн правленияз ужась Надежда Уткина "Шундые" кырӟанъёсыным вуи. Со вал 1992 арын. Ӧтизы конференциез шулдыртыны. Но конференцилэн ужаз пыриськыса валай, кырӟан сяна но, дэменлык понна мон мар но со лэсьтыны быгато. Пумен ужаз пыриськи, трос ужрадъёсын кичӧлтӥсь луылӥ. Кык ар ортчыса, дэменлыклэн кивалтӥсез луи. Вань кужымме "Шундылы" сётылӥ, но пушкам лемлет малпанэ улӥз: кылдытоно туала удмурт эстрадая студия. Малпанэ ӧз быдэсмы. Но трос лэсьтӥмы мукет улосвылъёсысь (Татариысь, Марий Элысь, Башкириысь, Кировысь, Пермьысь) егитъёсын кусып тупатон понна. Отын удмурт культурая нуналъёс ортчытъяллямы. Со сяна, туж усто пӧрмиз творчествоя "Шундыкар" лагерь кылдытэммы. Табере со арысь аре ужа отын трос пиналъёс искусствоя но культурая тодон-валанъёс басьто. Али нырысьёсыз пӧлысь тросэз дышетсконзэс институтъёсын азинто. - Пиналъёслэсь быгатонлыкъёссэс азинтон сяна, эшшо кыӵе ужпумъёс пуктэ на азяз огазеяськон? - Дуннеысь культураез но культуралэсь дуннезэ валан. Котькуд адямилэн вань бадӟым малпанэз - Адями луыны. Но котьку ик со уг пӧрмы. Соин ик ми тыршиськом: пинал та улонын медаз йыромы, ас ӧрзэ мед шедьтоз. Собере, туж тросэз ешитъёс асьсэлы пар уг шедьто. Озьы соос аналско, йыртэманы кутско. Нош пумиськон, шулдыръяськон ӝытъёс ортчытъяса, егитъёс ог-огенызы тодматско, семья кылдыто. - Кызьы малпаськоды, быдэсмо-а вань чаклам ужпумъёсты? - Уггес, но со ваньмыз коньдонэн герӟаськемын. Азьло пӧртэм пумиськонъёс, семинаръёс ортчытъяськом вал, али солы коньдон уг висъяськы. Но ми нырмес ум ошиське, мар быгатӥськом, лэсьтӥськом. - Тӥ дэменлыкен кивалтыны, ужъёс умойгес мыно вал кадь. Выльысь кивалтыны мылкыдды ӧвӧл-а? - Мон али тросгес кырӟанэн вырисько, соин ик общественной ужен вырыны дыр ӧжыт кыле. Но азьвыл эшъёсы луысалзы ке, кин тодэ, оло, кивалтысал но. Огез жаль - мон ӧй быгаты зэмос кивоштӥсь кельтыны. Егитъёс но малы ке берло дыре дугдӥзы "Шундыен" тунсыкъяськемысь. Огвакыт мылысь-кыдысь ужаськомы ни вал. "Шундыын" али но вань визьмо выль кужымъёс, малпасько, соос выльысь ӝутозы дэменлыклэсь данзэ. А. КУЗНЕЦОВА, Удмурт университетын дышетскись. Удмурт Элькунысь Правительстволэн "Удмуртэнерго" акционер огазеяськонэ пырисьтэм организациослэн шуныт сётэмзы понна тыронъёс (тарифъёс) сярысь Постановлениез 1999 ар 1 март Ижевск город � 244 1995 арын 14 апреле кутэм "Россия Федерациын электрокужым но шуныт понна тыронъёсты (тарифъёсты) кун ласянь радъян сярысь" 41-Ф3 номеро Федеральной законэз, Россия Федерациысь Кивалтэтлэсь 1997 арын 4 феврале юнматэм "Дунъёсъя, электрокужым но шуныт понна тыронъёсты кун ласянь радъянъя но уже кутонъя инъет сярысь" 121 номеро постановленизэ, Удмурт Элькун Кивалтэтлэн 1998 арын 2 июле юнматэм 581 номеро постановлениеныз Удмурт Элькунысь Тарифъёсъя но дунъёсъя кун комитет сярысь положениез лыдэ басьтыса, шуныт понна тыронъёсты йылэтонтэм вылысь, Удмурт Элькун Кивалтэт пуктэ: 1. Удмурт Элькунысь муниципальной кылдэтъёслэн (образованиос) тӧрооссылы дэмлано: 1. 1. Ялан эскерыса возьыны ведомствоязы пырись улосвылъёсын шуныт сётӥсь организациослэсь тыронъёссэс но, кулэ дыръяз, "Удмуртэнерго" акционер огазеяськонэ пырисьтэм организациослэсь шуныт понна тыронъёссэс лыдъян-чотанъя нимысьтыз ӵектонъёсты лыдэ басьтыса, тупатъянъёс пыртыны но Удмурт Элькунысь Тарифъёсъя но дунъёсъя кун комитетэ ыстыны. 1. 2. 1999 арын 1-тӥ августозь дасяны но Удмурт Элькунысь Тарифъёсъя но дунъёсъя кун комитетэ ыстыны "Удмуртэнерго" акционер огазеяськонэ пырисьтэм организациослэн ар ӵоже кӧня шуныт сётэмзы сярысь ивортонэз (сведение): улон фондысь пӧсь вуя но шунытъя; бюджет удысысь организациослэсь пӧсь вуя но шунытъя. 1. 3. Эскерыса возьыны ведомстовязы пырись улосвылъёсын шуныт сётӥсь организациослэсь дунъёсъя кун дисциплинаез чакламзэс. 2. Удмурт Элькунысь Тарифъёсъя но дунъёсъя кун комитетэз косоно: 2. 1. Лыдэ басьтыса возьыны элькун улосвылын шуныт сётӥсь организациосты. 2.2. Ялан эскерыны шуныт сётӥсь организациослэсь электрокужым но шуныт понна тыронъёссэс кун ласянь радъян ужпумъёсъя норма луись правоя актъёсты чакламзэс. 3. Удмурт Элькун улосвылын шуныт сётӥсь организациослы ивортоно: дунъёсъя кун дисциплинаез тӥям понна экономикая санкциосты кутон Радлыкъя (юнматэмын Россия Федерациысь Дунъёсъя кун комитетлэн 1992 арын 1 декабре 01-17/ 030-23 номеро приказэныз), электрокужым но шуныт понна тыронъёслэн быдӟалазы нимысьтыз комиссиен юнматэм лыдпусъёслэсь вылӥын ке, со луэ дунъёсъя кун дисциплинаез тӥян но янгышам муртъёс со понна кыл куто. 4. Та постановлениез печатлано иворъёсты вӧлмытон ёзъёсын. 5. Та постановленилэсь быдэсъяськемзэ эскерыны косоно Удмурт Элькунысь Тарифъёсъя но дунъёсъя кун комитетэз. Удмурт Элькун Кивалтэтлэн Тӧроез П. Н. Вершинин. Удмурт Республикаысь Быръёнъя комиссиын 17-тӥ мартэ ортчиз Удмуртиысь избиркомлэн заседаниез, отын эскеремын депутатэ кандидатъёслэн но соослэн юрттӥсьёссылэн ӝожтӥськонъёссы. Учкемын Кун Кенеше депутатэ кандидатлэн М. И. Шишкинлэн (Ижевскысь 22 номеро Кировской избирательной округ) вазиськонэз. Вераськон мынэ туэ 11-тӥ мартэ эфире потэм "Наблюдатель" телепередача сярысь. Солэн авторез вылӥ верам кандидатлэсь котыр ласянь данзэ уськытыны выриз. Быръёнъя комиссия, Удмурт Республикаысь быръёнъя законлэн 62-тӥ ёзэтэзлэн 5-тӥ пунктэз вылэ пыкиськыса, "Удмуртия" ГТРК-лы но "Дата" телеагентстволы дэмлаз кандидатлы М. И. Шишкинлы эфире потон понна дыр висъяны но та передача пумысен ас малпанзэ вераны. Комиссие вуэм ӝожтӥськонъёсты эскерыса, Удмурт Республикаысь избирком Ижевскысь городской территориальной избиркомлэсь огзэ постановленизэ воштӥз, кыксэ та выллемгес куронзэ палэнтӥз. Заседаниын учкемын быръёнэн герӟаськем мукет ужпумъёсты но. Удмурт Республикаысь Быръёнъя комиссилэн председателез А. Тубылов. УДМУРТЛЫКЛЭН ВЫЖЫОСЫЗ "Та книгаосме уте весяк..." Туж но туж паймымон милям Никита Ильич Ильинмы. Паймымон но мур гажамон. Та воргоронэн пумиськыкуз, котькудӥз одно ик йыбырттэ, луоз. Со угось кылдытӥз быдэс гуртмылэсь куинь сю ар ӵоже кызьы улэмзэ возьматӥс историмес, тодӥз, кин но ку вордскемын, кыӵе черкын солы кыӵе ним сётэмын, кинлы ку быземын яке кинэн кышнояськемын, кӧня нылпиосыз вылӥллям. Огкылын вераса, гуртоосмылэн юрттэмзыя, Никита Ильич Улӥнь Юримы сярысь быдэс наука кылдытӥз. Одӥгъёсыз сое табере шуо гуртмылэн историкез, тодосчимы, кыкетӥосыз - ваньмылэн огъя киросатаймы, куинетӥосыз - профессормы. Мынам малпамея, ваньмыз та нимъёс солы тупало. Гуртмылэсь историзэ эскеронъяз, утчаськонъяз, никита Ильич олокытчы но вуылӥз-бадӟымесь архивъёсы, библиотекаосы, научно-исследовательской институтъёсы, музейёсын, тодосчиос доры. Кытысь ке мае ке шедьтэ, лыдӟе ке, ваньзэ сюлэмаз пыӵатэ, гожтыса кельтэ. Кылем арын "Удмурт дунне" газетысь одӥгаз "Герд" бамын печатламын вал Кирилл Ломагинлэн статьяез. Отын со мадиз, кызьы шаерысьтымы бигер-удмурт воргорон Гильман Касимов шедьтӥз аслэсьтыз трос пумо ӵыжы-выжыоссэ, уно дауръёс талэсь азьло улэм- вылэмъёссэ но. Никита Ильич та эшъёсты гуртамы ӧтёно кариськиз. Тӧромы Петр Трифонович ачиз ваиз авторъёсты. Историенымы, ӵыжы-выжыосмес утчанэн милям ваньмыз тунсыкъясько угось. Пумиськонамы Гильман Гусманович мур пуштросъем лекция лыдӟиз, кызьы утчаськемез сярысь мадиз. Озьы ик валэктӥз, кытысь вуыса, ку интыяськиллям бигеръёс Балезино ёросысь Кестым гуртэ, кызьы соос трос дауръёс ӵоже удмуртъёсын тупаса уло ини. Шуныт кылъёсын, вылӥ дунъяз удмуртлыкмес. Журналист, шаерчи, кылбурчи люкаськемъёслы возьматӥз Касимов выжыослэсь "Улон тыпызэс", библиотекалы кузьмаз "В глубьвеков" книгазэ. Г. Касимов трос юанъёслы валэктонъёс сётӥз. Аслаз романаз но повестьёсаз удмуртъёсты, ӵыжы-выжыосмес кызьы возьматэмез сярысь вераськиз ас палысьтымы писатель Кирилл Ломагин . пусйыны кулэ: таизлэн но геройёсыз милям юриосмы сямен ик вордскем гуртсэс, яратоно музъемзэс, шаерзэс сюлмазы мур возё. Удмуртъёс туж кибашлы возьматэмын кунгож сьӧрын но, олимпиецъёслэсь городзэс, БАМ-ез лэсьтонын но, мукет интыосын но. Котькытын сосыз гажало. Куноосмы арлыдоосты но бадӟым классъёсын дышетскисьёсты тодматӥзы кырӟанъёсынызы но. Соосты кассетаосы гожтыса ваиллям. Кырӟанъёсазы но жиль-жиль удмуртлыкмы! Школаямы дасямын вал та авторъёслэсь гожъямъёссэс, книгаоссэс возьматон, Нылпосмы лыдӟизы Гильман Касимовлэсь но Кирилл Ломагинлэсь кылбуръёссэс, нош дышетӥсьёс кырӟазы Геннадий Бекманослэсь но Кирилл Ломагинлэсь "Улонлэн вайёсыз" кырӟанзэс. Азьло пумиськонъёсамы сямен ик калыкмес нош паймытӥз, шумпоттӥз шаерчимы Н. И. Ильин. Гуртмылэн историез сярысь гожъямъёсыныз, пӧртэм таблицаосын кылдытэм ньыль книга! Соосты чеберъяны юрттэм ёросысь усто суредасьмы Владимир Баталов. Бадӟым тау! Н. И. Ильин милемлы валэктӥз, кызьы улӥллям вашкала юриос, ку но кытчы куинь даур ӵоже татысь чебересь нылъёс бызиллям, кытысь чеберайёсын кышнояськиллям асьэос Юри пиос. Озьы пӧртэм гуртъёсын кылдӥллям уката кужмоесь ӵыжы-выжыосмы, уно выль семьяос. Ачиз Никита Ильич Назар выжыысь. Та бадӟым семьяысь 1680-тӥ арысен туннэозь 336 муртэ шедьтэм ни ялан утчаськись воргоронмы! Гуртысь музейын лабыр-лабыр адӟиське Назар выжылэн "Улон тыпыез". Н. И. Ильин тупен-тупен валэктӥз, кызьы Улӥнь Юриысь калыклэн улоназ шӧдӥськиллям революция, Быдӟым ожмаськон, сютэм аръёс. Сельсоветысьтымы ожъёсы келяллям 672 муртэ, бертӥллям 306-ез гинэ. Секыт война пиосъёслы сокем юн шуккет сётэм - нылкышноослэн но воргоронъёслэн лыдзы огкадьгес луэм ини... 1986-тӥ арын гинэ. Сое тодыса, синъёс нюромо. Одӥг кылын вераса, Никита Ильичлэн книгаосысьтыз котькыӵе юанлы валэктон шедьтод - вашкалаезъя но, туалаезъя но улонмыя. Номырин мертантэм, дунъянтэм солэн ужез! Шаерчимы утчаськонъёсаз кыскиз дышетӥсьёсты но, школьникъёсты но. Ваньмылы аляз та бадӟым но туж кулэ "висён" Н. И. Ильин та ужупумъёсъя одӥг пол вераськиз ини "Дэменлэн" бадӟым кенешаз но. - Ваньдэсты - мӧйыосты но, али будӥсь нылпиосмес но - туж курисько, - шуиз Н. И. Ильин, книгаоссэ библиотекарьлэн сётыкуз, - уте весяк таосты, эн ыштэ!.. Аслаз куараез ик дыректӥз. Ма, библиотекарьмылэн но киосыз куалектӥзы кадь. Пумиськонэ ветлӥзы Пичи Пургалась ЗАГС-ын ужасьёс но, архивын тыршисьёс но, "Маяк" газетысь журналист но. Оскисько: Н. И. Ильинлэн удмуртлыкмес муромытонъя, ӵыжы-выжыосмес ужъёсыз ёросамы уката паськыталозы, выль пушъетъёс сётозы. Пумиськонмы пайдаё вал мукет ласянь но. Музеймы нош ик узырмиз кӧнялы ке. Музъемъёс радъян удысысь ужасьмы Леонид Иванов бадӟым бумага вылэ суредаса лэсьтэм аизлэсь старшой сержантлэсь Иван Иванович Ивановлэсь Быдӟым тылож вакытэ ожмаськыса ортчем сюрессэ. Паймымон, сюлэме весяк пыӵамон таиз но! Ма, собере Гильман Касимовлэн книгаез но, уката ик - Касимовъёслэсь бадӟым ӵыжы-выжызэс возьматӥсь схема одно ик интыяськоз, дыр, ай музеямы. К. Ломагинлэн "Котьку сюлэмын" романэз но табере весяклы кылёз дорамы. Соосъя дышетскозы, улонэз юнгес дунъялозы будӥсь мусоосмы но. Н. ЕГОРОВА, Пичи Пурга ёросысь Улӥнь Юри школаысь дышетӥсь. Быръём устооссэ гинэ "Дэменлэн" кивалтэтэзлэн берлось кенешаз ӟырдыт вераськон ӝутскиз выляз Кун Кенеше депутатъёсты быръён сярысь. Али угось котькудӥз сюлмаське-малпаське: кинъёс вуоно аръёсы республикаенымы кивалтозы, кыӵе адямиос законъёсмес кутылозы-юнматъялозы? Меӵак вераны кулэ: таяз Кенешын трос вал "жуг-жагез", бырйисьёслы сётэм кылзэс вунэтэмъёс, удмурт калык - выжы калык - понна мыдлань ужасьёс. Таяз учыре сыӵеослы сюресэз чутрак кортнано! Удмуртлы мышкин берытскемъёс, республикамес куашканэ вуттэмъёс власте медаз сюре ни! Быръёнъёсъя округъёс табере юнматэмын ини. Каньылля тодмо луо ини отчы ӵектӥськыны чаклась кандидатъёслэн но нимъёссы. Куд-огез соос, быръёнъёслы дасяськон вакытэ дурбасьтыны курыса, "Дэменлы" но вазиськыло ини. Сое чакласа, нимысьтыз кенешон вал правлениын. Асьсэлэсь малпанъёссэс веразы Н. С. Кузнецов, А. А. Разин, В. А. Осипов, Л. В. Орехова, К. Н. Исупова. Таяз учыре дэменчиос "Удмурт кенешен" уртче нюръяськозы, Кун Кенеше устоосыз пӧлысь устоосыз гинэ кандидатъёсмы депутатэ мед шедёзы шуыса. Кинъёс вылӥ удыс понна вылӥ кивалтӥсьёсы ӵектэм удмуртъёслы пумит куаразэс сётӥзы - сыӵеос ваньзы сямен тодмо, соослы нокыӵе юрттэт сётэмын уз луы. Асьтэлэсь куронъёстэс, ӵектонъёстэс вераса вазиськелэ, эшъёс, 78-06-19 телефон номеръя. Депутатэ кандидатъёс Пластинин Николай Владимирович, "Удмуртгаз" акционер огазеяськонлэн ёрос отделениезлэн генеральной директорез Вордскиз 1960-тӥ арын рабочийёслэн семьяязы. Улон сюресэз огшоры советской адямиослэн выллем ик: школа, техникум, армия, слесарь, Ижевскысь механической институтын дышетскон. Сое йылпумъяз 1987-тӥ арын. Кузпалъяськемын, кык нылпи будэтэ. Семьяезлэн быдэс улонэз юн герӟаськемын Шаркан районэн. Атаез тракторист, ужаз МСО-ын, Шарканэ школа но больница лэсьтонын тыршиз. 1987-тӥ-89-тӥ аръёсы Николай Владимирович ужаз Шарканысь газокомпрессорной станциын. 1990-тӥ-98-тӥ аръёсы вал "Воткинскгаз" огазеяськонлэн директорез, отчы ик пыре Шарканысь газ сётонъя участокез. Аслаз ужаз кандидат нырысь ик чакла таӵе ужъёсты быдэстыны: - Шаркан ёросэ газ кыскон, со ужез кутскыны малпа таяз аре ик; - Шарканысь шор ёзо школа лэсьтонэз йылпумъян; - куанер улӥсьёсты, ветеранъёсты шуг-секытлэсь утён но соослы юрттон; - промышленностез но гурт удысэз азинтон. Тӥляд юрттэменыды но огъя кужымен та ужпумъёсты быдэстэммы луоз. Нош солы осконэ туж бадӟым. Николай Владимирович Пластинин депутатэ кандидатэ ӵектэмын 97-тӥ Шарканской округъя. Промышленность решает все Сегодня всех волнует так называемый структурный кризис, но мало кто вспоминает, как мы до него докатились. А ведь среди множества причин есть главная: разрушение промышленности. Отечественный производитель поставлен в невыносимые условия, буквально загнан в угол: пени, налоги, штрафы, диктат монополий, отсутствие долгосрочных кредитов ... Думаю, вольно или невольно нас подвели к опасной черте те, кто путем сомнительных финансовых спекуляций делали деньги "из воздуха" и обогащались. Те, кому по сути было наплевать на простого труженика, на наши рабочие традиции, на стариков и детей. И теперь они же рвутся к власти, чтобы еще раз обмануть народ, свою алчность и амбиции, прикрывая "заботой" о нем. Потом спишут свою несостоятельность на недобросовестность исполнителей. Неправда. Наши исполнители, а я 27 лет работаю на "Ижстале", поэтому знаю, о чем говорю, - это тысячи честных, трудолюбивых рабочих, инженерно-технических работников, которым есть чем гордиться. Да и не бездумные они исполнители, а творцы, на счету многих из них десятки изобретений и рацпредложений. Пусть сегодня у них небольшая зарплата, зато получают они ее регулярно. А пенсионеры? Разве дадут затоптать в грязь честь предприятия те, для кого "Ижсталь" стал родным домом на долгие годы и кто сейчас находится на заслуженном отдыхе? Нет, в своем доме не сорят. Я глубоко убежден в том, что главной целью всех здоровых сил общества является возрождение экономического и промышленного потенциала страны. Наша Удмуртия имеет развитый промышленный комплекс, исторически сложилось так, что он является становым хребтом экономики республики. А представителей этого комплекса в высшем законодательном органе власти - считанные единицы. Справедливо ли это, разумно ли? Думаю, что нет. Именно поэтому я решил баллотироваться в Государственный Совет. Решил, потому что знаю жизнь изнутри и как экономист-практик, семь лет возглавляющий ОАО "Ижсталь", сумею повлиять на законотворческий процесс так, чтобы обеспечить подъем промышленности и достойный уровень жизни всех жителей республики. В.В. Моисеев, кандидат в депутаты Государственного Совета Удмуртской Республики по Северному избирательному округу � 15. Пусйиськоно-а, ӧвӧл-а? Азьвыл дыръёсы асьмеос ноку но ӧм малпаськылэ гражданствомы сярысь. Ташкентын-а, Кишинёвын-а, Ленинградын-а яке Урюпинск городын улӥськод-а - гражданствомы ваньмылэн одӥг вал - советской. Табере югдур воштӥськиз - табере ваньмыз суверенитет кылдытӥзы. Соин валче кылдӥзы бадӟымесь ужпумъёс, кудъёссэ государстволэн куронъёсызъя ӝегатскытэк быдэстыны кулэ. 1994-тӥ арысен иностранецъёс шуыса лыдъяны кутскизы Прибалтикаын улӥсьёсты гинэ. Та вакытлы соос Россия Федерациын кунгож сьӧрысь вуэм муртэн лыдъясько. Нош Советской Союзлэн азьвыл гражданъёсызлы Россиын нимысьтыз куронъёс тупатӥсько. Республикаямы со радъяське Удмурт Республикалэн "Куд-ог эрикрадъёсты тӥям понна кыл кутытон сярысь" Законлэн 3-тӥ ёзэтэзъя (1994-тӥ ар. Городысь Думалэн постановлениезъя Ижевскын 1994-тӥ арысен ужа азьвыл СССР-ысь гражданъёслы, кудъёсыз Россия Федерацилэн гражданъёсыз уг ке луо но ялан Удмуртилэн палэназ ке уло, Удмуртиын улон сярысь порядок. Озьыен, та дыре азьвыл СССР-ысь гражданъёслы визатэк ветлон рад тупатэмын но соос 3 сутка куспын пусйиськыны кулэ паспортно-визовой службаын яке гостиницаын. Суткаезлы пусйиськон дун усе уждунлэн ичизэ быдӟалаезлэн 10 процентэзлы. Со вӧзы уждунлэн ичи быдӟалаезлэн 1 процентэзлы госпошлина тупатӥське. Сое тырыны луэ котькудаз сберкассаын яке гостиницаын. Люкам коньдонлэн 50 процентэз Ижевскысь Администрацилэн счётаз мынэ, нош 50 процентэз - югдурез утёнъя ёросысь отделэ. Пусйиськон понна кулэ: - кин луэмез возьматӥсь документ - ас киыныд гожтэм заявление - улон интылэн быдӟалаез сярысь справка - пусйиськем понна коньдон тырем сярысь квитанция. Пусйиськыны луэ 45 суткаозь. Собере выльысь пусйиськыны кулэ луоз. Пусйиськем муртлы сётӥське нимысьтыз справка, гостиницаын улӥсьлы - карта. Пусйиськон понна тыриськонлэсь мозмытӥсько матысь ӵыжы-выжы луись муртъёс, быдэ вуымтэос, беженецъёс, 1-тӥ но 2-тӥ группаен инвалидъёс, студентъёс, командировкае лэземъёс но мукет куд-ог адямиос. Пусйыны уг луы таӵе учыръёсы: - адямилэн документъёсыз ке ӧвӧл, - ӧтись муртлэн семьяяз лыктэм муртэ огдырлы интыян сярысь огкыл ке гожтэмын ӧвӧл, - кыӵе ке йыружен ӝегатэм гражданъёс. Пусйиськон правилоосты тӥян понна законъя кыл кутытӥське. Соин ик, пусйиськымтэ гражданъёсты милициын ужасьёс штраф тырытытыны быгато. Штрафлэн быдӟалаез ичизэ одӥг-кык уждунлы тупа. Штраф тырем бере но 3 сутка ӵоже адями уг ке пусйиськы, штрафлэн быдӟалаез будэ ичизэ вить уждунозь яке правоез тӥямез понна сое кужмысь улляны луэ. Пусйиськытэк улыны лэзем кузёослы но штраф тупатӥськыны быгатоз. Штрафлэн быдӟалаез - ичизэ 1-2 уждун, нош законэз выльысь тӥям понна солэн быдӟалаез ичизэ 5 уждунозь будэ. Нош сыӵе гражданъёс, кудъёсызлы пусйиськыны лэземын ӧвӧл, соосты законъя республикаысьтымы 24 час куспын улляны луэ. Любовь Стрелкова, Первомайской РОВД-ысь паспортно-визовой службалэн инспекторез. Одӥг герой - одӥг шудӥсь Удмурт кун филармонилэн сценаез вылын туж паймымон, туж тунсыко спектакль пуктэмын. Авторез - Вячеслав Ар-Серги, трос веросъёслэн, пьесаослэн авторзы, нош шудӥсез - Александр Перевозчиков. Бен, бен, Александр Перевозчиков, Мунё театрысь артист. Одӥгез - гожтӥсь, мукетыз - шудӥсь, нош радъясез - Драмая удмурт кун театрысь режиссёр Александр Вершинин. Нырысетӥез моноспектакль та. Одӥг Макар сяна, нокин но уг ни пота учкисьлэн син азяз. Бен, асьмеос шӧдӥськом: улон азьланьтӥське. Ульчаын куараос кылӥсько, йыгасько но Макарлэн корказ. Но сцена вылэ нокин уг пота. Спектакльлэн быдэс сюжетэз герӟаськемын Макарен гинэ, солэн гур азь пала ватскем кышноеныз. Озьы малпаськом асьмеос нырысь-валысь. Таӵе югдур, валатске учкись, нырысьсэ ӧвӧл ни. Макар юэ ке, котьку но озьы азьланьтӥське югдур. Макар вуӵыртэ, даллаше, копаське, нош кышноез соин арня ӵоже уг вераськы. Но ассэ Макар янгыш уг кары, котьку кышнозэ куаретэ. Улонзылэн аламаезлы но кышноез янгыш. Бен, кудзэ-огзэ вера ик. Тани председательзэс пыкылэ. Со шуэ: "Али инмарлы оско соос ик, кинъёс азьло коммунистъёс вал. Нош улон воштӥське. Гурт калык но, гурт улон но - ваньмыз сямен воштӥське". Тодӥськом солэн бускельёсыз сярысь. Кушемнимъёссы асьсэ сярысь верало кадь. Макар соослэсь куаразэс поттэм карыса вераське. Кудӟемын бере, оломар вылэ но, олокин вылэ но вуэ. Со ик юрттэ учкисьлы ваньзэ тодыны. Спектаклез учкыку, весь возьмаса пукиськод: тани-тани мар ке но луоз. Урамын пуныос вузо. Макар кулон сярысь но тодаз вае. Ӝог юрттэт сётӥсь машина но ульчаязы ветлэм, шуиллям солы. Макар егит дырзэ но тодаз вае. Кышет кутыса, сое нылмурт карыса эктэ но, берга но. Олокытысь но оломар но вера. Насьтаеныз вераське, тышкаське сое. Нош кышнопалась нокин уг вазьы. Одӥг кыл-куара но уг кылӥськы. Макарлэн мылкыдыз секыт. Но номыр карыны уг быгаты со. Нокин сое уг кылы. Нош урамын пуныос вузо. Макар шыпытак изьыны дасяське гинэ но, ӧсэ йыгаськись луэ. Насьтаез, пе, кулэм. Так вот кин доры ветлэм "скорой помощь!". Макарлэн берпум кылъёсыз - малы тон монэ кельтӥд, ӵош кошком шуид вал ук. Но бере кыле воргорон. Малы ӧз пота со кышноезлэн изён палаз?! Кин кутӥз сое? Кышноез азьын данзэ уськытэмез ӧз пот-а? Улонын бен котьку но озьы луэ: тодӥськом шат асьмеос, мар луоз азьланяз. Улӥськом огшоры. Номыр сьӧры ум уиськиське, аламазэ умоеныз воштыны ум тыршиське. Нош собере бере кылиськом. Макар сямен, "ёк-макарёк!" шуыны гинэ кыле на. Усто, усто спектакль. Одӥг адями пыр кӧня вераны быгатэмын! Мукет ласянь Макар но туж алама адями ӧвӧл. Кыӵе вераськыны быгатэ со, кыӵе визьмоесь солэн малпанъёсыз. Янгыш со кышноез азьын, янгыш. Но янгыш-а быдэс улонэз, улонэзлэн озьы берытскемез понна? Тӥни кыӵе малпанэ вуоно, спектаклез учкыса. Галина Владимирова, Удмурт кун университетын дышетскись. "Дэменлэн" куараез Милям кивалтэтмы таӵе малпанэ вуиз: толэзьлы кык пол "Удмурт дуннелэн" бамаз материалъёсмес поттано. "Дэменлэн" аслаз куараез мед чузъяськоз. Та пумысен мон вазиськи Алексей Шкляевлы, валтӥсь редакторлы. Со соглаш луиз. Пумитамы кык курон пуктӥз: калык пӧлы потаку, "Удмурт дуннеез" вӧлдыны юрттоно; "Удмурт кенешлы", "Шундылы" но удмурт нылкышноослэн огазеяськонзылы пумит номыр гожъяно ӧвӧл. Ма, туж шонер вераз редактор. Мынам но малпанэ таӵе ик. Озьыен, гажано лыдӟисьёс, "Удмурт дуннеысь" возьмалэ "Дэмен" нимо выль бамез. Отын одно ик луозы "Дэменлэн" ужамез сярысь ивортонъёс, Маргарита Гришкиналэн но мукет тодосчиослэн удмуртлыкмы но историмы сярысь гожъямъёссы. Альберт Разин, "Дэменлэн" тӧроез. Тулыс крезьгуръёс "Россиысь пинал талантъёс - П. И. Чайковскийлэн вордскем палъёсаз". Тазьы нимаськоз егит музыкантъёслэн 9-тӥ-11-тӥ апреле ортчоно фестивальзы. Концертъёс луозы Можга, Сарапул, Воткинск городъёсын, нош берло нуналаз - Ижевскысь "Металлург" дворецын. Ас быгатэмзэс возьматозы Москва, Казань, Петрозаводск, Урал консерваториосысь но Гнесинъёс нимо академиысь устоосыз дышетскисьёс. Т. НИКОЛАЕВА. Шунды Тулыс уйбыртон Шӧдӥськоды-а тулыслэсь лыктэмзэ? Адямиос, секыт шубаоссэс сэрпалтыса, капчигес дӥсясько, ӵемгес пальпотыны кутско. Нылъёс выльысь дӥсяло вакчи юбкаоссэс, нош пиос ӵемгес лулӟылыны ӧдъяло. "Тулыс уйбыртон" ӝыт радъязы Ижевскысь общественной огазеяськонъёсы ветлӥсь егитъёс. Ӵош шудӥзы-серекъязы удмуртъёс, бигеръёс, поръёс, немецъёс, еврейёс, казахъёс, азербайджанъёс... Таӵе пумиськонъёсын егитъёс тыршо мукет калыкъёсты но асьсэлэн культураенызы, сямъёсынызы, йылолъёсынызы тодматыны. Таяз возьматӥзы сюан йылолэз. Табере бигер пи уз паймы ни, малы пор сюанын выль кенлэсь ымнырзэ уг усьяло, но ас понназ сюлмаськоз, дыр - мукет муртэ кышно уг ваиськы-а? Нош тӥ, удмурт пиос, немец нылэз кураны мынон азяды тодэ, ӧвӧл-а тугандылэн бадӟымезгес бызьымтэ сузэрез. Вань ке, созэ басьтоно луоды. З. РЯБИНИНА. Шунды "Кыкетӥ дор" Амал Марина туганзэ келяса потӥз, но кема улэ ни кадь. "Сьӧраз кошкиз-а, мар-а та, дыр дас кык луэ ни. Ӵогаськид ке, султылэм уз пот",- вуоз дыр ай шуыса, Нина борддор пала берытскиз но шобрет улаз ватӥськиз. Тук-тук-тук! Нина ӧз вырӟы. "Уг вала-а, мар-а ӧсэз донгыны?" Валатскиз ик. Ӧс туж каллен усьтӥськиз. - Выд ни чальгес, ӵуказе 8 часлы экзаменэ мыноно,- вазиз Нина. - Кыс тылэз. Выключатель чик! вазиз но эшез, Нина доры лыктыса, шобретсэ сэрпалтӥз. - Мар тон? - Тон монэ ачид чальгес выдыны косӥд ук,- вазиз гольтрес пиосмурт куара. Кавказ акцентэзъя Нина валаз - "сьӧд!" "Осто, мар та, кызьы со татчы пыриз?" - Кош татысь! Мар тыныд кулэ? - Тон,- "сьӧд" кытӥ-мар гоно кизэ нылашлэн дэрем улаз вуттӥз. Нина мозмытскыны турттӥз. Но солэн ӵабъяськемез, ӵыжаськемез "сьӧдэз" уката пуромытӥз. Нюръяськонлэсь жуммыса, супляк луиз Нина. Собере шуак пуксиськиз но туж шӧтэм горыны кутскиз. Езэ пертчылыны кутскем пиосмурт долказ. - Тон шузи-а, мар-а? - О-о. Ха-ха-ха-ха! - нош горыны ӧдъяз Нина. - Мынам психодиспансерысь справкае но вань. Возьматом-а? - Уг оскиськы. - Сыл, нырысь ӵогасько, а то эше вуоз. Кылиськы, кылиськы. Тылэз ӝуатом-а? Али ик возьмато. - Ӧвӧл кулэ. - Ме, ме, учкы. - Справка. Студентка осмотрена психиатром ... - пумозяз лыдӟытэк ик бумагаез выж вылэ уськытӥз "сьӧд". Нина справказэ ӝутӥз, гадь бордаз ӝиптӥз но нуны веттан гурез нёжъяны кутскиз. Собере, шуак сэзъялскыса, ӧс пала вамыштӥз. - Эн пегӟы, мон тонэ номыр но уг кары,- вазиз али гинэ урмыса ерись "сьӧд". - Кызьы номыр уд кары? Мон ӵогасько гинэ шуи ук. Справкае вань шуыса, табере тон но шузи кариськод-а, мар-а? Мынам ӝыны ар нокинэ ӧй вал ни. Ха-ха-ха-ха!.. - Нина койка вылын пукись "сьӧд" вӧзы тэтчиськиз. Соиз долкамын. - Мон тылэз кысо,- озьы шуыса султӥз но, ӧс курикез чальтчытыса, ури-бери кошкиз. Нина куалекъяса бӧрдыны ӧдъяз. Мариналэсь пыремзэ но ӧвӧл шӧдэм. - Мар луиз? - Ву вай,- ӧжыт буйгамез бере, Ниналэн кылыз сэраз.- Маринка, мон собыдӟа роль шудыны быгатӥ! Асме ути, валаськод-а? - Мар луиз? Вӧтаськод-а, мар-а? - Тодӥськод на-а, психушкаысь выж миськыны ветлыкумы, буш справкаез кутэммес, шудыса аслэсьтым нимме отчы гожтӥ вал. - Тодӥсько. Собере мар? - Сое возьматӥ но, оскиз. Ӧз еры ни. - Кин оскиз? Малы? - "Сьӧд". Монэ "псих" кожаз. - Ма, отын печатез но ӧй вал ук. - Ой, Маринка, со пумозяз ӧз но лыдӟы. Мон кышкаменым сыӵе зол амал шедьтӥ - оскиз. Только выльысь кемалы кошкид на ке, ӵогасько, пырыны но уг лэзьы ни. Кин тодэ, оло, кинлы ке "психъёс" кельшо. И. КАЛИНИНА. ДЕПУТАТЭ КАНДИДАТЪЁС Александр Плотников: "Законэз гажалом - ӟеч но тыро улом" Егит муртлэсь ӟикытлыксэ сюрес вылэ потыса шӧдоно, пе. Зэмзэ но, озьы. Быръёнъя 87 номеро Яган-Докья округъя депутатэ кандидатлэн Александр Плотниковлэн арлыдэз бадӟым ӧвӧл на, но депутат ужлэсь шӧмзэ шӧдэ умой-умой "веръяз" ини. Угось кылем гужем сое Пичи Пургаысь Ёрос кенеше бырйизы. Депутат вань сюлмыныз но мылкыдыныз выиз та уже. Нош со капчи вылымтэ. Ёрослэн улонэз ошмес кадь "пӧзе". Сое кулэезъя ӧд радъя ке, шугадӟонъёс пумтэм шуыны луозы. Калыкен быръем адями ваньзэ син шораз возьыны, ваньзэ тодыны-валаны кулэ. Александр Иванович сярысь ӵапак тазьы луоз. Куамын одӥг аресъем муртлэн улон сюресэз тунсыко но узыр. 1985 арын шор ёзо школаез йылпумъяса дышетскыны пыриз Ижысь гурт хозяйствоя институтэ (али академия). Армиын службазэ ортчытӥз Германиын Советской войскоослэн группаязы, БМП-лэн механик-водителез вал. 1992 арын дышетӥсь луыса ужаны кутскиз Пичи Пурга УПК-ын. Бӧрысь кык ар ӵоже Егитъёсын ужанъя кун комитетлэн Пичи Пурга ёросъя специалистэз вал. Та вакытэ трос выроно луиз быдэ вуымтэослэн но егитъёслэн ужпумъёсынызы. Кылсярысь, со вакытэ гуртын но уж шедьтонэн шуг-секытъёс кылдӥзы ни. Пичи Пургаын алиюгдур эшшо но секыт. Куд-ог предприятиос воксё пытсан калэ вуэмын. Ужасьёссылэсь мозмытскыны тыршо. Дипломен специалистъёс но, уката ик егитъёс, уж уг шедьто. Мар шуод, ортчемзэ ваньзэ ик курланы гинэ уг луы вылэм. Ог кызь ар талэсь азьло таӵе югдур луоз шуыса малпаны ик секыт луысал. 1995 арын А. И. Плотниковлы оско Егитъёсты дышетонъя центрен (ЦОМ) кивалтыны. Та учреждение воксё куашкамын, бырон калэ вуэмын ни вал. Но Александр Иванович сое но отысь коллективез утьыны но юнматыны быгатӥз. Али центр пыд йылаз йыг-йыг сылэ. Удыссэ но шӧдскымон паськытатӥз ни. Дышетскисьёсын гинэ ӧвӧл вань ужаса улӥсьёсын ужа. А. М. Плотников ӵектэмъя, 1995-тӥ арын Пичи Пургаын Восточно-Европейской университетлэн ёзэз кылдытэмын. Нырысетӥ куамын вить студент, тодон-валан люкаса, юристлэсь дипломзэ басьтӥз. Александр Иванович ӟеч кичӧлтӥсь луэмзэ возьматӥз ёросын спортэз (рукопашной бой) азинтон понна сюлмаськеменыз но. Солэн ки пыртӥз сюлэсь ятыр пиос потӥзы ни. Куд- огез ужало ни милициын, дышетско вылӥ заведениосын, Чечня пыр ортчемъёс но вань. Пинал спортсменъёс асьсэды синмаськымон возьмато республикаын ортчылӥсь ӵошатсконъёсын, нош Константин Близнецов Россилэн первенствояз вормисе потӥз. А. И. Плотниковез ёрос конференцие люкаськемъёс выльысь Егитъёслэн кенешсылы тӧрое бырйизы. Эшъёсыз, ёзъёсыз оско солы. Нош ачиз Александр тазьы лыдъя: кивалтон удысэ одно ик егитъёсты кысконо, озьы гинэ шаермы азьланьын ӟеч азинскоз шуыса оскон кылдоз. Александр ассэ ачиз но кияз юн возе. Шӧдэ - дышетскытэк улонлэсь бере кылёд. Озьы тодон-валанзэ будэтэ Кун службая Урал академиын "Кун но интыын аскивалтон" специальностья. Со буйгатскон мылкыдын уг улы кивалтон удысаз но, депутат ужаз но. - Кун Кенеше быръёнъёс азьын тросэз тыршо, дурбасьтӥсь куараос люканы кыл сётыса, тазэ яке созэ ужпумез быдэсто шуыса оскытыса, кузьмаськыса, - шуэ депутатэ кандидат. - Сюрес яке газопровод, пе, лэсьтом - нош кин чотын? Асьсэ кисыысьтызы коньдонзэс уз кисьтэ ук. Ма пумысен гинэ депутатэ кандидатъёс кылзэс уг сёто. Кылзӥськиськод но абдраськод - ваньмыз быдэсмысал ке, асьмеос Америкалэсь урод ӧм улысалмы. ЁРос кенешын кылдытэмын "Законность и правопорядок" группа. Александр Плотников солэн кивалтӥсезлэн воштӥсез луэ. Быръёнъёс азьын программаяз но нимысьтыз пусъем - Кун Кенешын "Законность и правопорядок" группа кылдытон. Депутат сюрес, газопровод лэсьтон понна "пӧсяны" кулэ ӧвӧл ук, со законъёс бордын ужаны но соослэсь быдэсъяськемзэс чакланы кулэ. Депутатэ кандидат лыдъя кун дисциплинаез юнматоно, котькуд кивалтӥсь мед тодоз, маин, кыӵе ужен со вырыны кулэ, кивалтон ёзъёсы ужасьёсты конкурс пыр быръёно, аттестациос ортчытъяно, котькудӥз кивалтӥсь ас удысэз понна кыл кутыны кулэ. Кун Кенеш но Правительство ужам сярысь калыклы ивортылыны ӟеч амал кылдытоно. Ужаса улӥсьёс мед тодозы, маин выро соослэн быръем адямиоссы. Калыкез кивалтонэ кыскон понна интыын аскивалтон ёзъёсты азинтоно, лыдэ басьтоно калык сямъёсты но йылолъёсты, кылсярысь, Пичи Пурга ёросын - гурт кенешъёсты. Депутатэ кандидат ӵектэ нимысьтыз чакланы республикалэн бюджетысьтыз интыосы келям коньдонлэсь кутӥськемзэ. - Районамы бюджет чотын ужасьёслы коньдон тыронэн югдур туж секыт, - шуэ А. И. Плотников. - Нош коньдон отчы-татчы пазяське. Тани ми чаклам, кӧня но кытчы коньдон быдтэ ёрос администрация. Нылпиосты сюдонъя статья 25 процентлы быдэстэмын, нош со дыре ик "Прочие расходы" статья ӝыны ар куспын - 660 процентлы. Юртъер лэсьтыны кредитъёс сётъязы вал. Данаксэ сое кивалтӥсьёс басьтӥзы. А. И. Плотников лыдъя - законъёсты быдэсъяно, соку гинэ улонмы ӟеч но тыро луоз. - Котькудӥз ас ужез понна кыл кутыны кулэ, - вера депутатэ кандидат. - Соку кивалтӥсь но, огшоры ужась но вамыштон азяз малпаськоз, шонер-а ужа, уг-а. А. И. Плотников ӟеч вала, кыӵе ужпумъёсын выроз, сое Кун Кенеше бырйизы ке. Депутат нырысь ик ужаны кулэ калык понна. Ю. МИХАЙЛОВА. Котьку калык пӧлын Анатолий Ешкеев Пичи Пурга районын гинэ ӧвӧл, быдэс республикаямы дано но тодмо адями. Со кема аръёс ӵоже быгатыса кивалтэ ни "Мир" колхозэн. Таӵе секыт вакытэ но хозяйствозэ огсыр возьыны быгатэ. Кечолъёс арысь аре удалтэм ю-нянь будэто, трос сӥль-йӧл потто. Анатолий Николаевич утчаськись кивалтӥсь, трос выльзэ пыӵатэ. Удмурт шаерамы татын гинэ туг будэто. Кечолъёслэн пӧйшур будэтон фермазы но вань. Берло дыре шӧдскымон умояз музъем ужан но пудо вордон. Муосты ӟеч кыедамен ӵош татысь гурт калык таза кидыс уськытэ но пудо выжызэс умоятэ. Кечолэ дышетскыны ветло мукет районъёсысь но хозяйствоослэн кивалтӥсьёссы но специалистъёс. Тани туннэ кызьы уд ушъя Александра Шутоваез. Со шаерысьтымы устоез техник-осеменатор, республикаысь ӵошатсконъёсын арлы быдэ кыкетӥ-куинетӥ интые потэ. Нош Валион фермаысь дояркаос Ольга но Антонида Кузнецоваос 3-4 ар ӵоже араз 5000 килограмм йӧл кыско, нош быдэс колхозъя шорлыдын 4000 килограмм усе, нош музъем ужасьёс гектарлы быдэ 24-27 центнер ю-нянь басьто. Анатолий Николаевич ас азяз но, специалистъёсыз азе юнэсь куронъёс пуктэ. Со гурт калыкез гажа, музъем вылын вордӥськем адями гуртоосыз понна ваньзэ лэсьтыны дась. Кун Кенешлэн али депутатэз ӵем вуылэ фермаосы, дояркаослэн ужъёсынызы тодмастке но котьку юрттэт сётэ. Со понна кечолъёс солы оско, Анатолий Николаевичез гажало. Г. РОМАНОВ. Анатолий Ешкеев Улӥ Кечол фермаысь ужасьёсын Алевтина Алешкина, Валентина Юрговаен (фермалэн кивалтӥсез) но Александра Шутоваен кенеше. Туспуктӥз В. Камашев. Россия Федерацилэн кун наградаосыныз пусъён сярысь Россия федерацилэн Президентэзлэн Указэз Кун азьын вормонъёсыз, ужын бадӟым азинсконъёсыз понна но калыкъёс куспын эшъяськонэз юнматонын трос тыршемез понна Почёт орденэн пусъёно: СТЕПНОВА Зоя Ивановнаез - Удмурт Республикаысь "Сактон" акционер огазеяськонлэсь генеральной директорзэ. Чугун сюрес вылын уно аръёс ӵоже ужамез но сое азинтонын сюлмысь тыршемез понна "Россия Федерациысь транспорт удысысь дано ужась" сӥлы карон ним сётоно: РОГОВЕЦ Клементий Антоновичлы - Горьковской чугун сюреслэн Ижевск отделениезлэн кивалтӥсезлы, Удмурт Республика. Россия Федерацилэн Президентэз Б. Ельцин. Москва, Кремль, 1999 арын 9 мартэ. � 325. ДЕПУТАТЭ КАНДИДАТЪЁС Ванез уд ваты, ӧвӧлзэ уд возьматы Пичи Пурга ёросысь бырйисьёслэн группазы, ёрос Кенешысь депутатъёслэн кичӧлтэмзыя, 88 номеро Уром округъя депутатэ кандидатэ ӵектӥз Ю. М. Никитинэз. Юрий Михайловичез районын ӟеч тодо. Со - адвокат, ёрос Кенешлэн депутатэз, отысь законностья комиссилэн тӧроез. Озьы ик депутатъёслэн "Законность и правопорядок" группаенызы кивалтэ. - Юрий Михайлович, тӥ ёрос Кенешлэн депутатэз. Озьы бере, калыкен ужан опытты вань? - Бен, дас ар пала общественной ужъёсы пыриськисько ни. Та дыр куспын умой валай, законэз гажаса, сое быдэсъяса гинэ ӟеч но тыро улыны кутском. Со огшоры кылъёс гинэ ӧвӧл, со быдэстэм но азьланяз быдэстоно ужъёс. Нош улонмы одӥг пол гинэ ӧз возьматъя ни: олокыӵе но законъёс гожъяны луэ, нош соосты улонэ пыӵатыны кынармы уг тырмы ке, пайдаез ӧвӧл. Кема-а таӵе югдурез чидалом на?! Тани вить ар талэсь азьло кутэмын вал Россия Федерацилэн гуртэз азинтонъя законэз. Но документ уг быдэсъяськы. Кин со понна кыл кутоз? Яке, шуом, уг тыриськы уждун, пособиос, пенсия. Кинэ со понна ало? Тапала но сопала пазяське бюджетысь уксё (озьы бере, калыклэн уксёез). Кин таӵе югдурлы пумит кыл вера? Туж ӧжытэз. Зэм, данакез законъёс уг быдэсъясько. Малы соку соосты кутылонэз? Калык ас пельпум вылаз возьыны кулэ-а пайда ваисьтэм депутатэз? Нош кытчы учко правоез утись ёзъёс? Бен, соос "урамысь" йыртэмасьёсын нюръясько ик, нош "кабинетъёсысь" йыртэмасьёсты адӟымтэ улэ карисько. Соин ик пушъё "кузьмаськон" но коррупция. Нош соосын валче курадӟе калык, висъям коньдон ужаса улӥсьёс доры уг вуы. Таӵе югдур Москваын гинэ ӧвӧл, таӵе югдур гурт ёросъёсын но, кылсярысь, ми дорын. Ванез уд ваты ук, ӧвӧлэз уд возьматы. - Озьы бере, тӥ шуиськоды, законъёслэсь быдэсъяськемзэс сак эскероно, кулэ адямиослэсь кылзэс юано. - Зэм, быдэсъясь (исполнительной) ёзъёслэсь ужзэс чаклан депутатлэн валтӥсь ужез луыны кулэ. Калыкен быръем муртлы концертъёс радъян сярысь гинэ сюлмаськоно ӧвӧл. Нырысь ик со быдэсъясь ёзъёсты косыны кулэ, мед соос законъёсты улонэ пыӵатозы. Со сярысь бырйисьёсыз мед тодозы. Зэм, одӥг-ог дыръя сюрес вылэ гумы ваён понна но депутатлы но бызьылоно луэ, но со ведь солэн валтӥсь ужез ӧвӧл. Жаляса верано, ёросамы но, республикаямы но таӵе учыръёс туж ӵем пумиськыло. Депутат сюрес вылэ гумы вае но, калык сое дунъя ни. Тани мынам округея ик депутатэ одӥг кандидат кылзэ сётэм Алганча-Игра гуртэ лэсьтыны сюрес, Шорын Юри гуртэ чагыр эстӥськон вуттыны. Со Кун Кенешлэн депутатэз вал ини. Нош ма лэсьтӥз? Азяз сылӥсь ужпумъёсты быдэсъясал ке, чакласал ке, кытчы кошке Удмуртиысь нефть, коньдонмы тырмысал Баграш-Биграе - школа, Пичи Пургала больница лэсьтыны, Норьяе чагыр эстӥськон лэзыны но школа ӝутыны. Коньдон сярысь верано ке, рос-прос ум чаклаське, кытчы со мынэ, ма понна кутӥське. Тани милям "Законность и правопорядок" группамы ужпум пуктӥз чакланы, кин но кытчы кутӥз улон юртъерлы висъям кредитъёсты. Льготаен сётӥськись пунэм коньдонэз данаксэ басьтӥзы ёросысь кивалтӥсьёс. Районамы бюджет коньдонэн югдур туж лэчытомемын. Нылпиосты сюдонъя статья 25 процентлы быдэстэмын, нош со дыре ик "Прочие расходы" статья ӝыны ар куспын - 660 процентлы. - Юрий Михайлович, кыӵе амалэн калыкмылэсь улонзэ тупатыны луоно? - Нырысетӥез но тужгес пайдаёез амал - законъёсты быдэсъян но соосты тӥясьёсты кыл кутон улэ кыскон. Йыртэмасьёслэсь, лушкаськисьёслэсь, урод ужасьёслэсь кылзэс ӧм юалэ ке, вань ӟеч малпанъёсмы малпанэн ик кылёзы. Шонер вера Белоруссилэн Президентэз Александр Лукашенко - кивалтӥсьёс ужам ужзы понна кыл кутыны кулэ. Тазьы учконо ке, ёрос администрацимылы уно юанъёс сётэм потэ. Кылсярысь, малы администрациысь кивалтӥсьёслы матысь адямиос но лымшор палась ужбергатӥсьёс, мукетъёсыныз ӵошатыса, юртъер понна аренда дун 3-5 пол ӧжытгес тыро? Малы соослы льготаос тупатэмын? Нош асьмеос бюджетэз "кышъяны" коньдон ум шедьтӥське. Пичи Пургалан ик ужтэк кылемъёс данак. Со дыре ик лэсьтӥськонэн нош ик лымшор палась "куноос" выро. Шат асьмелэн кибашлыосмы быризы ни? Чылкак паймымон. - Тӥляд бырйисьёсты - гуртын улӥсьёс. - Озьы. Гурт сюдэ странамес. Та удысэз возьыны тырмыт коньдон висъяно. Озьытэк кӧтмес тырыны ум быгатэ. Ведь кунгож сьӧрысь фермеръёс асьмеды уз сюдэ. Мон пумит мукет интыосысь сыӵе сиён-юон вайыны, кудзэ асьмеос но поттӥськом. Интыысь ваньбур поттӥсьлы юрттоно, мед со пыд йылаз султоз, мед со юнмалоз. Соку гинэ вань калыкмы тыро улоз. Ю. МИХАЙЛОВА. Шӧкыч Вуоно депутатъёслы Уноез оско: демократия вакытэ калык аслыз ачиз быръе кивалтӥсьёс. Нырысь учкыса, озьы кадь со. Но... Тодады вае ай Кун Кенеше азьлозэ быръёнъёсты. Кыӵе бугыръяськон вал котькуд округын! Ӧз, калык сокем ӧз тулкымъяськы. Тылгизьы пазьгиськымон вожвылъяськон пуромиз депутат луыны вырисьёс куспын. Кыӵе гинэ амалъёсты уже ӧз кутэ! Нуналлы быдэ кӧня но мар гинэ ӧз гожъялэ газетъёс, ӧз вералэ телевидение но радио. Котькуд сэрегын но юбоын вал ӧтёнъёс. Одӥгез гинэ огвыллем вал. Вань кандидатъёс - коть демократ, коть коммунист, коть либерал - ваньзы кыл сётӥзы улонмес чутрак умоятыны ке но ӧвӧл, калык радъя коть тупатыны. Мар пӧрмиз - ваньмы тодӥськомы. Кун Кенеше быръемын вал 100 депутат. Устоосыз пӧлысь устоосыз. Зэм, калыклэсь али юалляськид ке, тросэз огшоры адямиос уг верало ни, кин понна куаразэс сётӥзы вал. Мар каре, кызьы ужа соослэн депутатсы - таиз сярысь веранэз ик ӧвӧл ни. Паймонэз ӧвӧл: "утись-вордӥсьсэс" угось телевизор пыр гинэ адӟыло ке адӟыло. Нош кыӵе улэ, малы курадӟе пӧям калык - калык "медолы" туж ик кулэ ӧвӧл. Со понна пыралэ ай Кун Кенешлэн юртаз сессия нуналэ. Янгышай: уд пыралэ, мылкыд кариды ке но. Тӥледды отчы шуак-дуак гинэ уз лэзе сак милиционеръёс. Ымнырды уз тупа "медоды" доры пырыны. Нялтас пусъём: буржуй Англиысь парламентэ, сӥё-дано лордъёс дӥне, малы ке котькудзэ лэзё. Асьмелэнъёслы кыле мукет амал - пикетэ султон. Матэкто чиль-дол кисьтаськись лимузинъёс, вальк-вальк питырес ымныръёс, синмаськымон костюмъёс но туфлиос. Соос - тӥляд медоосты - уй но нунал, жадёнэз тодытэк, асьсэды жалятэк тӥ вылэ ужаны кыл сётӥзы вал. Ярам, ужамзы сярысь ӧжытак берлогес. Кызьы верай вал ини, соос 100 кузя. Кӧня коньдон басьтэмзы сярысь туж но туж уг ярато вераськыны. Депутатъёс сяна, вань на Кун Кенешлэн Аппаратэз. Со ваньзэ укмыс этажез уг басьты ик, дыр. Но куатез сярысь веранэз ик ӧвӧл. Аппаратчикъёс пӧлысь но пӧсьтэм штаниензэ уд адӟы. Нялтас вераса, соос пӧлысь одӥгез - кемалась тодмое. Соин ик кызьы ке, эшелэсь сямен, керпотытэк юай, кӧня, пӧй, тыро тыныд. - Ма, кык "кусок" пала люкаське,- шуэ.- Отпуске потыкум, оклад вӧзы сомында ик эмъяськыны юрттэт сёто на. - Дыраз сёто-а? - нош выжыятӥсько. - Котьку дыраз вал. Таяз толэзе кыкетӥ арнязэ ӝегато ини,- лулӟиз эше. Со вал кылем тулыс. Гажано вылӥ кивалтӥсьёс ӵапак соку гадязы мыжгазы: одӥг чиновник но, пе, уксёзэ уз басьты, бюджетникъёс ӝегатэм уждунзэс басьтытозь. Юлтоше, мискинь, кык но ӝыны арня ӵоже уждунзэ витем. Бюджетникъёс али но витё на. Кытысь та юртэ коньдон шур ӧръяське, валаськоды, луоз. Ужась калыклэн кисыысьтыз. Кинлэн бен депутат луэмез уз поты, озьы-а? Мон куинезлэсь-а, мар-а, шудыса улсын юай, малы, пӧй, депутат луэмед потӥз. Паймоно кадь но, ваньзы одӥг кадь валэктӥзы: шаерамы улон-вылонэз умоятон вылысь, пе. Но малы ке ваньзы кыӵе ке керпотысагес веразы. Меӵак верало: депутатэ мыно власть понна. Власть - со котьку коньдон, яке ӵемгес узырмыны луонлык. Сое ватыны уд быгаты, котькызьы тыршы но. Ваньзэсты депутатъёсты одӥгтэмак дэриен сураны туж бадӟым сьӧлык луоз, веранэз ӧвӧл. Мон оскисько, одӥг куиньмосэз ке но чылкыт сюлэмо, калык сярысь сюлмаськись, зэмос адямиос шуыса. Но соос, кызьы шуо ӟучъёс, куазез уг тупато. Вылаз ик, вылӥ эшъёссы люкето ке. ... Ӝоген быръёнъёс. Нош ик быръём 100 депутат. Нош малы сокем трос, соиз паймымон. Россиысь Думаын соос 450 кузя ке, озьыен, Удмуртия Россилэн ньыль но ӝыны люкетэз луэ ук. Бадӟым ик, ява, ошмесо шаермы! Волгоград областьын алигес ортчем быръёнъёсазы вылӥ кивалтӥсь ёзазы быръемын вал 32 мурт. Отын нош шоркаразы гинэ вань Удмуртиын мында улӥсез. Сыӵе тӥни арифметика... Я, ӵок-а. мар-а, ини, 100 ке 100. Нош ик кызьы ке сюдом-вордом "медоосмес". Но мед гинэ ужасалзы вылэм ук соос! Таизлы оскон, жаляса верано, туж ичи. Кышкасько, нош ик югдур вуж гожетӥз котырскоз. Вылез луоз со гожетӥ бергасьёс гинэ. Но веднамын шат та гож? Неужто уг луы сое воштыны? Пичи ке но сыӵе луонлык, со вань ик. Малы одно ик асьмеос бырйыны кулэ сыӵе адямиез. Кудӥз бызьытэк кылёнлэсь кышкась нылмурт мактал, депутатэ мерске? Со умойтэм ини, ас йырсазяз адями сокем секыт ныпъетэз тэльмырыса сямен вылаз поныны куре ке. Котьма шуэ но, мон сямен, одӥг гинэ амал вань татын. Ӧвӧл быръёно ассэ ӵектӥсь, ассэ данъясь-ушъясь адямиез, кудӥз мальдытыны турттэ зарнивуэн чилясь выллем программаеныз. Быръе асьтэ пӧлысьсэ. Ӵок, ӧвӧл ке солэн вылӥ дышетскемез, ӵок, ӧвӧл ке со кивалтӥсь, ӵок, ӧвӧл ке со удмурт. Нырысь ик, мед луоз со зэмос адями, кудзэ тӥ тодӥськоды, кинлы тӥ оскиськоды, кин тӥ чотын коштанъяськыса уз ветлы. Йылпумъяса ватсаме потэ. Тодӥсько, гажано депутатъёсмы, та чуръёсты лыдӟыса, воксё визьтэммозы. Тодӥсько созэ но, кыӵегес кылъёсын соос мон вылэ урдскозы: "зырымесь, бумага саптась, политикаын номыре но уг вала, а отчы ик мерске, кызьы сое газетын возё". Соиз зэм, мон асьме сыӵе депутатъёслэсь политиказэс уг валаськы. Уг но вала. Зэм соиз но, газетысь но улляны быгатозы. Но мон туж ӧжыт оскисько, та гожъямме депутатъёс но, тӥ ни, дуно лыдӟисьёсы, адӟоды шуыса. Валтӥсь редактормы уго Кун Кенешен юнматэм адями. Малы ке шуоно, газетмылэн кык кузёосыз пӧлысь одӥгез - Кун Кенеш. Паймоно кадь туала вакытэ, но Кун Кенеш газетмес, чылкак малпаськытэк, ас ваньбуреныз, тӥрлыкеныз лыдъя. Нош газет - со вань калыклэн ук, калык понна но калык чотын улэ. Кылпумысь вераса, Кун Кенеш но. Тани вань веранэ. Гажаса, Геннадий КОРЯКОВ. ШӦКЫЧ Изь, изь, куать часэ Элькунысьтымы кун радио пыр кӧня ке ар ӵоже чузъяське "Чагыр, чагыр дыдыке..." пиналъёслы передача. Котьку сямен эфире со потылӥз нылпиослэн кӧлон азязы - 20 часэ. Берло нуналъёсы покчиос чылкак шуге-леке усемын. Садикысьтызы гинэ бертыса вуо но, радио пыр чузъяське ни кӧлытӥсь гур: "Чагыр, чагыр дыдыке..." Но одӥгез пинал но 18 час 20 минутэ умме усьыны уг быгаты. Радиоын ужасьёс, оло, шуозы сеткамы озьы тупатэмын шуыса. Но ведь сеткаен сеткаен, кӧлон кӧлонэн. Малы меда соку сыӵе передача кулэ? Н. СЕРГЕЕВ. Итэто шобыръёс Кин марлы кибашлы. Уката ик нылкышно ки улын басмаос, сӥньысъёс кылзӥськисесь луо. Куд-огез басма юдэсъёслэсь олома но пӧрмытэ: шобыръёс, панноос... дэремъёс. Ваньмыз со туж чебер адӟиське, синэз кыске. Адӟемды ке потэ, пырамды луоз Ижевскысь Сивков урамысь 173 номеро юртэ - шаерысьтымы кибашлы нылкышноос выставка-конкурсын пӧртэм итэто басма вуремъёссэс учкыны дэмлало. Устоосыз Иваново городын возьматэмын луозы на. Т. НИКОЛАЕВА. Игорь Гараев: "Сюлэмы мынам гурт калыкен" Завьялово районысь депутатэ кандидатъёс пӧлысь одӥгез - Игорь Михайлович Гараев, "Восточный" совхозлэн директорез. Кун Кенешлэн берло созываз со вал ини депутат. Табере тани нош ик мылкыд каре вылӥ органын ужаны. Малы нош ик? Властьлэн шӧмыз туж кельшиз шат? - Ма, кыӵе, властез огшоры депутатлэн! Властез но, бадӟым коньдонэз но ӧвӧл. Дептутат луон - со ватсаса сюлмаськон но йыр висён гинэ. Озьы ке но, малы мон депутатэ мынӥсько? Мынам вань улонэ герӟаськемын гурт хозяйствоен. Кыӵе югдур берло аръёсы та удысын - асьтэос тодӥськоды. Сое тупатыны, валамон, нимаз хозяйстволэн кивалтӥсез нокызьы но уз быгаты. Со понна кулэ ӵошатонтэм бадӟымгес кужым но луонлыкъёс. Депутатъёслэн со ваньмыз вань. Мон шӧдӥсько, та ужез быдэстон понна мынам тодон-валанэ но, мылкыды но тырмоз шуыса. Со сяна, гурт хозяйствоез радъяны специалист ӟечгес быгатоз, дыр, шуом, дышетӥсь яке библиотекарь сярысь, мон соосты туж гажасько ке но. Соин ик мылкыд карисько депутат луыны. - Котькуд кандидатлэн кыӵе ке но платформаез, программаез вань. Тӥляд со кыӵе? - Нырысь ик, сиён-юон поттонэз будэтоно. - Нош али кин уг сёты? Кӧня мылыд потэ, сомында ик потты сӥль но, йӧл но, нянь но. - Дунъёс уг сёто. Ваньзэ басьтӥськом дуно дунын, нош продукцимес, учконо ке, дунтэк сямен сётӥськом. Озьы производствоез паськытатоны, пайда интые, изъян вае. - Берло дыре сиён-юонлы дунъёс трослы будӥзы ук. - Гм, берло дыре гинэ угось. Со но доллар будэмен. Но кемалы-а со? Нокин уг тоды. - Тӥляд ӵектонъёсты та пумысен? - Кулэ дотациос. Быдэс дуннеын гурт хозяйство дотациос чотын возиське. Соос ӧз ке луэ, ми дунъёсмес сокем вылӥые ӝутоно луом, огшоры адями сиён басьтыны уз ни быгаты, сютэм кулонэн кулоз. Дунъёсты эсэпсэ чакласа тупатоно, нош сиён-юон поттӥсьлы дотациос сётъяно. - Ярам, Игорь Михайлович, таиз ужпум бадӟым экономика удысысь, огшоры адямилы кыдёкынгес. Солы матынгес туннэ кулэяськонъёсыз. - Со пумысен мон тазьы малпасько. Котькуд ужась со сярысь сюлмаськемез нуналысь нуналэ мед шӧдоз. Солы ужаны но, улыны но калык радъя условиос кылдытоно. Мон малпамъя, та ужпумез быдэстон понна бюджетысь арлы быдэ 11-13 процентсэ висъяны луысал. - Тани тӥляд совхозады арлы быдэ улон коркаос лэсьто. Но тросэзлэн шат хозяйствоослэн со понна кужымзы вань. Со дыре ик улон интылы кулэяськисьёс тачак. Кызьы та ужпумез быдэстыны луысал? - Котыр ласянь юрттоно нимаз лэсьтӥськисьлы. Тани али нимаз юртъер лэсьтӥсьёслы ссудаос сётъяло. Но туж ӧжытэз кулэяськисьёс сое басьтыны быгато, вылаз ик, тырмонтэм. Паськытатоно та ӟеч ужез. Со сяна, хозяйствоос но юрттыны быгатысалзы, шуом, транспортэн, пилорамаен, столярной мастерскоен но мукетыныз. Озьы хозяйстволы но капчигес йӧтэ, адями но аслаз улон интыезлы кузё луэ. Котьма шуэ но, гуртын улӥсь аслаз юртъераз улыны кулэ. Озьы гинэ солы зэмос кузё мылкыд пыӵалоз. - Лэсьтӥськон пумысен нялтас юан: юрттэт луиз ке, адями аслыз корка пуктоз, нош больница, школа, нылпи сад, клуб кин лэсьтоз? - Али туж ӧжытаз хозяйстоосын ӧвӧл таӵе объектъёс. Мукет ужпум, кызьы соос возисько, кызьы ужало. Ватонэз ӧвӧл, та удыс, ӟуч сямен вераса, инфраструктура, котькинлэсь но юн ёрмыса, векаса, шуыны луоз, улэ. Данакез хозяйствоос сое возьыны уг быгато ни. Валамон, кулэ государстволэсь юрттэт, сотэк югдурез уд тупаты, удыс пашмоз. - Нош ик нялтас юан куриське, ёрмон пумысен. Кызьы асьме пенсионеръёсмы уло, ваньмызлы тодмо. Ярам, соос нылпиоссы бордын ке. Нош огназъёсызлы кыӵе йӧтэ, уката но гуртын. - Милям посёлокамы пересьёс туж ичи ке но, мукет гуртъёсысьтымы адӟисько, макем соос курадӟо. Валамон, быгатэммыя юрттыны тыршиськом соослы. Но огъя югдурез соин уд тупаты, пенсионеръёс милям совхозын гинэ ӧвӧл ук. Мон валамъя, государстволэн пенсиос сётъянъя удысын политикаез умойтэмгес. Одӥгтэм вань пенсиосты будэтыны кулэез ӧвӧл, дыр. Соосты ватсано тужгес но ёрмисьёслы гинэ. Но дас-кык манетлы гинэ ӧвӧл, шӧдскымонгес. - Йылпумъяса, Игорь Михайлович, луоз-а тазьы вераны: тӥ нырысетӥ ужпумдэс адӟиськоды гурт калыклэсь улонзэ умоятонын. - Ӵапак озьы, кызьы сотэк? Нимысьтыз пусйыны кулэ: нимаз гуртын гинэ ӧвӧл, быдэс республикаын. Валамон, быръёнъёс азьын капчи сӥзьыны кыӵе гуртэ газ яке сюрес кыскыны, ву лэзьыны. Но выльысь верасько: огъя югдурез соин уд тупаты. Депутатъёс быдэс республика азьын кыл куто, ваньмыз сярысь сюлмаськыны кулэ. Мон сярысь ке верано, зэм но, мынам сюлэмы, вань мылкыды гурт калыкен. Мон соос пӧлысь, соос пӧлын, соосын артэ улӥсько но ужасько. Г. Коряков. "Баш на баш" Учконо ке, ачим калыклэсь пӧртэм ӧвӧл кадь, соос ке марда сарда шуэм выллем. Однако, пичи дыръям йӧнантэм чер йӧтэм: Пиньтэм Ваняен нунал пӧрат "баш на баш" кариськом вал: кампет-пряник-а шеде, кыӵе ке чача-шудон-а, сюлэм уг чида "баш на баш" карытэк. Соин сэрен ик, однако, дышетскон аръёс син куспын ышизы-быризы. Урокъёс дыръя партаос ултӥ "баш на баш" шуыса, кӧня карандаш, ручка вошъяськиз меда, со понна "тыш" но беда-беда сииськиз. "Кыкъёс" но "колъёс" алямен, дневникме адӟонтэм луи, али но уйвӧтам кытчы ке ваткасько на. Атай ӟезе вал угось: паськыт еэныз тыбыр кузя ка-ак! шобыртоз "кол" басьтэмед понна шуыса, собере эшшо кык час пала "кыкъёс" понна гур азьысь корт лист вылэ пазьгем кӧжы вылын сылэтоз на. Кӧня кӧжы йыриськиз та, однако. Соин ик таӵе зӧк кӧто луи, дыр. А так улон-вылон, конечно, кемлы - середовой, саник ныд кадь. Юртъер вань, кышно - нылпи - пудо - живот да мар тырме. Образованитэк гинэ кылиськиз, однако, сизьым класс. Ярам инь, ойдо, аслым тырме кадь но со "баш на баш" каронэн ёрмиськиз. Маза уг сёты со акылес висёнэн черламе. Толон Пиньтэм Ванька вазь ӵукна ик атас чортэмен ӵош дорам пыриз. Башик-Башик шуэ, ойдо, пе, маке со йӧндыром. Мынам тани, пе, маи ке но вань. Колтрак буш выллем мешоксэ учкыса тунай-тунай, мар меда отчы донгем ни, пӧй, собре ӧй чида, ӟенелике бервуэз лэзьыса поттӥ ик: вазь ӵукна ик "баш на баш" каре бере, валамон ини - макмыр. "Баш на баш" карим, мешоказ учкисько но - зонь-зонь ӟызы курег кылле. Пурӟи ук: ма, таид, однако, чоньдэмын, лэся, ук, шуисько. Нош сои, курегзэ учкытозям, ӟенеликез гульымтӥз ик бушатэм, шакшы. - Ма, ӵукна улэп вал-ай ко, ачим сюры вылысь васькытӥ, шуэ. - Ма тани ук, лызэктэм инь, - ныр улаз мычисько. - Ма, со кема тунаськод бере, лызэктоз но. Собере, аракыед но "нырйыл" вина ӧвӧл, - шуиз проклят, но ай эшшо маке нукыртыса кошкиз на "башказэ секир" карон люкет. Однако, паймиськиз: курегез улэп вылэм на - ай, но марлы кулэ мыным со ӟызы маке? Не сӥльыз, не гонэз, не кокоез... Пилеш Микта доры кошки, со милям сыӵе маке - номыр уз мыльы солэсь. Только укыр башковитой, албасты. Вань улытозяз контораын счётъёсын шальккетыса пукиз. Секыт ужын куссэ ӧз тӥя, нош шильк-шальк каронъяз колхоз ваньбурез лӧдӥз ик, однако. Айда, шуко, Пилеш Микталы мешокме возьматыса, "баш на баш" каром яке, туала сямен вераса, "бартер" лэсьтом. А, мар тынад отын, пе? Мон шуко: куко-гоно, уг гинэ чоръя. Пилеше, вальк-вальк кисьтаськись йыртышсэ маялтыса, кисыысьтыз пичи гинэ шильккетонзэ поттӥз. Шильк-шальк, шильк-шальк лыдъям кариз но, корказ пырыса, пичигес пуйыен потӥз. Пушказ маке вырисез вань, однако. Тунай-тунай, "баш на баш" кароно ик-а, пӧй, писэй яке кучапи ӧз донгы меда? Номыр йыре уг лыкты. А, малпасько, та ӟызы кокрок понна мон зын ву сётӥ бере, ярам ни, ойдо, "баш на баш", пӧй. Воштӥським. Пуйыаз учки но, ӧжыт гинэ синтэк ӧй кыльы, шайтан басьтон - попугай пуке вылэм. - Мыдлань уж та, - шуисько Микталы, - пузась, гон сётӥсь курегез кыӵе ке валантэм бурдоен воштыны уг яра. Мыскыл кариськод, Микта. - Э, Башике-Башике, - шуэ Микта, пилеш йыртышсэ маялтыса, - со туж визьмо маке. Вераське но. Дорад бертыса соин "баш на баш" карыса оскалты ай. Нош мыным акыльтӥз ни, как лобаны кыре лэзиськод, та пилешме кокчаны ӧдъя, паршивой. - Бон четлыкез нош... - Ма созэ ачид яке пиналъёсыд лэсьтозы. Однако укыр сук вылэм ук та ПилешМикта-а, четлыксэ но жаляз. Нош попугаез понна тау карисько. Ӝӧк вылэ бирдыос мар пазьгисько, пичи шудон чачаос понӥсько гинэ, соиз соку ик "баш на баш" шуыса пештырске. Уд ке оскиське, лыктэ: "баш на баш" каром. Алигес юмоке вуттӥз ай, шакшы, ӝӧк кышет улысь облигациез шедьтэм но чача пыры карыса кесям, сотона. Тӥни сыӵе "бартер" карон муг вань, однако. Анатолий Петров. Абитуриент-: ИжГСХА 1) Дорогие селяне, выпускники сельских школ! С наступлением весны нас ожидают две главные проблемы: как успешно провести весенние полевые работы и как обустроить будущее своих детей. 2) Новое время и современное производство предъявляют высокие требования к будущим специалистам. А именно: - широкие и глубокие знания своей специальности и поля деятельности; - умение сориенитроваться в сложной нетрадиционной ситуации, а часто и в чрезвычайной; - умение в управленческой, организационной деятельности; - умение найти себя и работу по своим силам, знаниям и возможностям; - обязательность, последовательность, принципиальность, интуиция и предвидение; - умение разумно рисковать; - способности маркетолога и менеджера; - умение учиться самостоятельно и у своих руководителей и подчиненных; - умение подчиняться, имея собственное мнение и суждение. 3) Ижевская ГСХА готова по мере своих возможностей помочь вам в решении этих проблем. Двери нашей академии всегда открыты для желающих учиться. Ректор академии, профессор, академик В. В. Фокин. Вас приглашают факультеты: Электрификации и автоматизации сельского хозяйства (ФЭАСХ) Декан - доцент Носков Виталий Александрович. Специальность - Электрификация и автоматизация сельского хозяйства. ФЭАСХ - это единственный факультет в Удмуртской Республике, который осуществляет подготовку инженеров-электриков. Первый выпуск был осуществлен в 1980 году. С тех пор проведено 19 выпусков по очной и 16 выпусков по заочной формам обучения. Подготовлено всего 1654 инженера- электрика. Они работают не только в сельском хозяйстве, но и в энергоснабжающих организациях, на промышленных предприятиях, в учебных заведениях и в проектных институтах. Например, в настоящее время на предприятиях ОАО "Удмуртэнерго" трудятся 195 выпускников Ижевской государственной сельскохозяйственной академии, многие из них работают директорами предприятий, главными инженерами, начальниками служб. На электрофаке обучаются те юноши и девушки, которые стремятся познать тайны электричества и электромагнитных явлений, получить квалификацию инженера- электрика и практически использовать свои знания либо на производстве, либо в быту, либо для подготовки специалистов. Ждем тех, кто хотел бы получить квалификацию инженера-электрика. Агрономический Декан - доцент Ленточкин Александр Михайлович. Специальности: - агрономия; - лесное хозяйство. Специальность по диплому - учёный агроном и инженер лесного хозяйства. Факультет существует с 1954 года. Здесь ежегодно обучаются 500 студентов. Кроме 4 учебных корпусов, факультет имеет поля в учхозе Июльское, а также филиалы кафедр в хозяйствах Удмуртии. Всего 20 практик по дисциплинам. 3-й курс проходит 4-х месячную практику, проводя исследовательскую работу на производстве. 4 курс - 4-х месячную практику на производстве на ставке агронома. Некоторые работают даже главными агрономами. Экономический Декан - доцент Акмаров Петр Борисович Подготовка специалистов экономического профиля в ИжГСХА началась в 1982 году, по двум специальностям: - Экономика и управление аграрным производством. Бухгалтерский учет и аудит. За 16 лет работы факультетом выпущено 1257 специалистов с высшим образованием экономического профиля, многие из которых занимают руководящие должности в республике и за ее пределами. На факультете открыта аспирантура. Руководство аспирантами осуществляют доктора наук, профессора, наиболее опытные кандидаты наук, доценты. При факультете действует специализированный совет по защите кандидатских диссертаций. В академии заключен договор по международному обмену студентами по программе экологически чистого земледелия с союзом фермеров в Германии. По этой программе студенты выезжают на 6-месячную практику в Германию Для стажировки в 1999 году отобрано 7 студентов экономического факультета. Налаживаются связи для стажировки студентов в Голландии и во Франции. Также идет подготовка преподавателей для стажировки в других странах. Для чтения лекций по современным проблемам экономики приглашались специалисты из Канады и Голландии, перед студентами и преподавателями с краткими сообщениями выступали специалисты из США. Студенты факультета являются постоянными участниками и победителями конкурсов среди вузов Удмуртии. За активную общественную работу и хорошую учебу 3 студента получают именные стипендии правительства и Госсовета Удмуртии, Государственного комитета по молодежной политике. Механизации переработки сельскохозяйственной продукции (МПСХП) Декан - доцент Максимов Павел Леонидович. Готовит инженеров-механиков по эксплуатации, обслуживанию, ремонту технологического оборудования для переработки сельскохозяйственной продукции. Подготовка специалистов начата в академии в 1993 году на базе факультета механизации сельского хозяйства. В декабре 1996 года рождается новый факультет "Механизация переработки с/х продукции". В июне 1998 года - первый выпуск факультета - 49 человек, 5 красных дипломов, больше 80% выпускников трудоустроены по специальности и в настоящее время трудятся на разных должностях на перерабатывающих предприятиях республики, как в городах, так и в сельской местности. Перспективы развития - подготовка специалистов по переработке молока и мяса, а в дальнейшем", продукции растениеводства и подготовка по этим специализациям технологов. Зооинженерный Декан - доцент Батанов Степан Дмитриевич Зооинженерный факультет основан на базе зоотехнического факультета Московского зоотехнического института коневодства, организованного в 1943 г. в Подмосковье и переведенного в 1954 г. в г. Ижевска, а затем реорганизованного в Ижевский сельскохозяйственный институт. Готовит зооинженеров и ветеринарных врачей. Теоретические положения учебных дисциплин закрепляются на практике в производственных условиях учебного хозяйства "Июльское", ряда других хозяйств и предприятий. В период практики студенты приобретают производственные квалификации технологов-животноводов, навыки организаторской и исследовательской работы, обобщают и анализируют производственный материал, на основе которого выполняют курсовые проекты и дипломные работы. Базой для практики служат, как правило, передовые экономически крепкие фермы и хозяйства в Удмуртской Республике и за ее пределами. Много внимания на факультете уделяется подготоке молодых научных кадров. При зооинженерном факультете создан специализированный Ученый Совет по защите кандидатских диссертаций. Важное место в жизни студентов факультета занимают физкультура и спорт. При институте имеется учебно-опытная конюшня, где работает секция конного спорта. За время ее существования подготовлено 7 мастеров спорта, 14 кандидатов в мастера спорта и более 70 спортсменов-перворазрядников. Активное участие студенты факультета принимают в смотрах художественной самодеятельности, где неоднократно занимали первые места. Механизация сельского хозяйства (ФМСХ) Декан - доцент Сунцов Юрий Иванович Факультет основан в 1955 году. Подготовка специалистов ведется очной и заочной форме обучения. В настоящее время на факультете введены две специализации: Эксплуатация сельскохозяйственной техники. - ксплуатация автотранспортных средств в сельском хозяйстве. Планируется открытие специализации по ремонту и техническому сервису. На факультете работает студенческое конструкторско-исследовательское бюро (СКИБ), возглавляемое доктором технических наук профессором Максимовым Л. М. Бюро участвует в разработке и испытании различных рабочих органов сельскохозяйственных машин, в создании модификаций малогабаритной техники. Большое количество выпускников ФМСХ работают на руководящих должностях сельскохозяйственного производства, а также в других отраслях народного хозяйства. Выпускниками факультета являются Вершинин П. Н. - Председатель Правительства УР, Сычев Н. С. - директор АО "Удмуртнефтепродукт", Благодатских В. Ф. - председатель АО "Удмуртагропромсервис", Перевозчиков И. П. - председатель колхоза "Луч" Вавожского района, Маликов И. И. - генеральный директор АО "Удмуртагроснаб", Павлов С. В. - глава администрации Воткинского района, Жуйков В. И. - министр сельского хозяйства и продовольствия Удмуртской Республики, Соболев П. Л. - заместитель министра сельского хозяйства и продовольствия УР и др. Колледж аграрных технологий, экономики и права Директор Алексей Алексеевич Дедюков предлагает преодолеть первую ступень в высшему образованию, овладев одной из предлагаемых специальностей среднего профессионального образования: Экономика, Бухгалтерский учет и контроль (предлагаются специализации: бухгалтер- экономист, бухгалтер-юрист, бухгалтер-аудитор); Банковское дело; Правоведение (предлагаются специализации: хозяйственное право, таможенное право); Маркетинг. Предусмотрены вечерняя и заочная формы обучения. Гарантируются качество и фундаментальность образования. Обеспечиваются реальные перспективы для продолжения образования в академии. Продолжительность обучения 2,5-3 года. Зачисление проводится по результатам собеседования . Приемная комиссия колледжа работает по адресу: Ижевск, ул. Свердлова, 30, 4-й этаж. Телефон 78-63-79, 78-74-94. Лицензия Б 032472 от 17.12.97 г. выд. МНО УР. Порядок приема в академию С 15 мая по 15 июля в приемную комиссию представляются лично следующие документы: - документ, удостоверяющий личность и гражданство (паспорт); - подлинник документа государственного образца о среднем (полном) общем или среднем профессиональном образовании или его заверенную ксерокопию; - копия трудовой книжки (если таковая имеется); - 6 фотографий 3х4; - медицинская справка по форме �086-У. Другие документы могут быть представлены поступающим, если он претендует на льготы, установленные законодательством Российской Федерации. Вступительные экзамены проводятся с 16 июля по 31 июля. Поступающие сдают следующие экзамены: На специальности агрономия, лесное и лесопарковое хозяйство, ветеринария, зоотехния - биологию (письменно), химию (письменно), русский язык и литература (письменно); на специальности механизация сельского хозяйства, механизация переработки сельскохозяйственной продукции, электрификация и автоматизация сельского хозяйства - математику (письменно), физику (письменно), русский язык и литературу (письменно); на специальности бухгалтерский учет и аудит, экономика и управление аграрным производством - математику (письменно), биологию (письменно), русский язык и литературу (письменно). Все экзамены оцениваются в баллах. Абитуриенты, окончившие школу с золотой, серебряной медалями или имеющие диплом с отличием начального и среднего профессионального образования, принимаются в ИжГСХА по результатам собеседования по профилирующему предмету. Зачисление в ИжГСХА в пределах бюджетного финансирования проводится на конкурсной основе по количеству баллов, набранных поступающими на вступительных экзаменах. Лица, не прошедшие по конкурсу, могут быть зачислены на договорной основе. Прием документов ведется ежедневно, кроме воскресенья с 9.00 до 16.00 часов. На факультете довузовской подготовки в академии с 21 июня по 15 июля работают платные подготовительные курсы. (Декан - Костылев Владимир Николаевич). Консультации проводятся перед экзаменами по всем дисциплинам. Справки по телефонам: 58-99-35 - приемная комиссия. 25-30-44 - факультет довузовской подготовки. Адрес академии: 426069, ул. Студенческая, 11. Факультет заочного обучения Декан - Останин Рудольф Иванович Подготовка специалистов с высшим образования в Ижевском сельскохозяйственном институте началась в 1956 году по трем специальностям: зоотехния, агрономия и механизация процессов сельскохозяйственного производства. В настоящее время на факультете обучается около 1300 студентов. Прием на первый курс составляет 300 человек и обучение ведется на шести специальностях: механизация сельского хозяйства, электрификация и автоматизация сельского хозяйства, агрономия, зоотехния, бухгалтерский учет, контроль и анализ хозяйственной деятельности в сельском хозяйстве, экономика и управление в отраслях агропромышленного комплекса. Институт располагает благоустроенным общежитием для студентов-заочников и развивающейся материальной базой кафедр и др. отделов, что позволяет успешно решать задачи подготовки специалистов сельского хозяйства высшей квалификации без отрыва от производства. х х х Кун Кенешлэн Тӧроез Александр Волков 24-тӥ мартэ Кизнер ёрослэн активеныз пумиськылӥз. Отын со республикаен но удмурт парламентэн ньыль ар ӵоже кивалтэмезлы йылпумъянъёс лэсьтӥз. Александр Волков пусйиз: аслаз ужаз со тужгес бадӟым саклык висъяз, Удмуртия Россиысь мукет улосъёслэсь урод медаз улы шуыса. Солэн пайдаез вань. Ортчем ньыль ар ӵоже Россия Федерациысь улосъёс пӧлын Удмуртия 45-тӥысь 39-тӥ интые потӥз. Удмуртилы кыӵе кивалтон амал умойгес тупа шуыса юанлы, Кун Кенешлэн Тӧроез шуиз: "Власть огсыр ужась мед луоз. Со кыл кутыны но кивалтыны мед быгатоз. Тӥни соку гинэ со дыраз но пайдаё ужалоз". Люкаськемъёслэн уно юанъёссы герӟаськемын вал Кизнер ёросэ интыям химической ож тӥрлыкез возёнэн но сое быдтонэн. Кызьы ивортӥз Александр Волков, ож тӥрлыкез быдтон программаен валче матысь куинь ар ӵоже Кизнерын социальной удысэз азинтыны Италиысь ог 9 миллион доллар вуыны кулэ. Со коньдонэз басьтон понна матысь нуналъёсы кулэ документъёс гожтэмын луозы. Кивалтӥсьлэн чакламезъя, нырысь ик со коньдонэз висъяно Бемыжысь больницаез лэсьтонлы. Удмурт Республикаысь Кун Кенешлэн пресс-службаез. Театрлэн калык куспо нуналэзлы Театрлы сӥзем арня ортче Як.-Бодья ёросын. Татысь пӧртэм гуртъёсы вуылозы Удмурт кун драмтеатрысь артистъёс. Соос возьматозы "Улӥськом-вылӥськом, шу", "Эмезь кисьмаку" но "Анчутка" спектакльёссэс, озьы ик концерт программазэс. Як.-Бодья ёросын будэмын, дышетскемын Россиысь но Удмуртиысь калык артистка Вероника Садаева. Нимысьтыз ик солы сӥзьыса, гурт учкисьёслы дэмламын куд-ог спектакльёсысь люкетъёс, кытын шудэ та актриса. Сыӵе ужъёс пӧлын - "Бызьыны вуэм песяйёс", озьы ик Н. Гогольлэн "Женитьбаез" но А. Сафроновлэн "Стряпухаез" (таиз Ленинградын дышетскем егит артистъёслэн диплом ужзы вал). Со сяна, Вероника Алексеевна ас палъёсызлы лыдӟоз яратоно кылбуръёссэ. Таӵе кузьымен артистъёс пумитало Театрлэсь калык куспо нуналзэ, 27-тӥ мартэз. Т. НИКОЛАЕВА. ГЕОЛОГЪЁСЛЭН НУНАЛЗЫ АЗЬЫН Кырӟан но тыл, тыл но йӧ... 4-тӥ апрель, элькунысь парламентэ депутатъёсты быръён нунал сяна, Геологъёслэн нуналзы луэ на. Юнме шорысь озьы тупамтэ кадь со. Уго талэсь азьлоез Удмуртиын ортчытэм быръён укшаз Космонавтикалэн нуналэныз. Куара сётонлэн праздникен тупамез асьме дорын сямлы пӧрме ни кадь. Я, космонавтъёсмы асьмелэн ӧвӧл. Геологъёс - вань. Музъем пушкысь узырлыкъёсты устчасьёслэн нуналзы азьын ми пумиським акциосын "Удмуртгеология" огазеяськонлэн валтӥсь директореныз Владимир КОЛОДКИНЭН. - Владимир Александрович, кызьы Тӥ вуиды геологие? - Та удысэ мон капчиен ӧй шедьы: нырысь йылпумъяй статистикая техникумез, собере ветлӥ армие, бӧрысь ини дышетскыны пыри Уфаысь нефтяной институтэ, озьы инженер луи. Удмуртие вуи 1970-тӥ арын - Геологияя средневолжской управление ыстӥз Можгае ужаны. Отын кӧня ке ужаммы бере, му вӧй утчанъя экспедицимес выжтӥзы Воткинск городэ. Нош аслэсьтым нырысетӥ скважинаме мастер луыса портӥ Кизнер ёросысь Решетниково месторождениын. Со дырысен геология мон понна туж яратоно удыс луиз. Шуг вакытъёсы но ӧй ик малпалля мукет азе выжон сярысь. Нош секытэз вазен трос вал. 70-тӥ аръёсы объектъёсамы сиськон-шутэтскон интыос но ӧй вал уго. Огшоры будкаосын арняосын улоно луылӥз. Кӧлан интыос тырмымтэен, черодэн изьылӥм. Но шуг-секытъёслы нокин ик ӧз ӝожтӥськылы кадь - бусыын яке нюлэс кушын ужан ваньмылэсь сяммес кыдатӥз. Жаляса верано луэ, туннэ геологлэн ужез шоры учкон воштӥськиз. Егитъёс но та удысэ сокем уг кыстӥсько ни. Соин ик кибашлыослэн лыдзы но пумен кулэсме. Озьы ке но, "Удмуртгеология" огазеяськон ӟечезлы осконзэ уг ышты. Пӧртэм амалъёсын ми тыршиськом кадръёсмес утьыны, выль специалистъёсты дасяны. Соин ик тодӥськом: шаерысьтымы инкуазь узырлыкъёсты шараясьёс азьланьын но чырмыт ужалозы, республикалы юрттыны тыршозы. - Вал, дыр, улонады маин ке но пусйымон луись учыръёс? - Ма, уно аръёс ӵоже олома но луылӥз ни. Тодэ лыктэ 1971-тӥ аре выжон уй. Мон соку гинэ ужаны кутскисько вал ай. Вавож ёросын музъемысь азотной газ потыны ӧдъяз. Син куспын йӧлэсь ог 40 метръем гурезь ӝутскиз, шуыны луоз. Скважинаысь фонтан кыре поттӥз 628 метр гумыосты. Соос километр пасьта котыре пазяськизы. Куинь толэзь ӵоже вырим та шимес учырлэсь бервылъёссэ быдтыны. Уно шуг-секытъёсын пумиськылӥ Тюмень улосын. Кыкез учыр герӟаськемын вал тылпуэн. Али но син азям на 100 метрозь ӝутскись-гомась тыл. Му вӧй поттон корт вышка кӧня ке минут куспын куасалскиз, усиз. Тылпу кысӥсьёслэсь ужамзэс адӟыса, мон валай: та удысын кужмо адямиос гинэ чидалозы. Аслыд осконэд ӧвӧл ке, номыр уз пӧрмы. Мукетъят Сибирьын висъяськизы Удмуртиысь геологъёс. Ву но газ потыса, йӧ гурезьлы пӧрмем вышкаез соос шунтыны быгатӥзы. Специалистъёс уг оско ни вал, сое утьыны луоз на шуыса. Соку тюменьёс паймыса шуизы: "Ну та удмуртъёс!.." - Нош кызьы та секыт вакытэ утиськоды асьтэ предприятиез? - 1991-тӥ арозь ми дорын 5600 адями ужа вал. Али - ог 3000. Ужасьёсты кулэстон берло дыре дугдӥз кадь. Пусйымонэз со бордын: ми быгатӥм бордамы кельтыны тужгес но визьмооссэ, кибашлыоссэ специалистъёсмес. 90-тӥ аръёслэн кутсконазы геолого-разведочной ужъёсы коньдон сётонэз трослы сюбегатэмен валче, РСФСР-ысь Геологияя министерство лэзиз милемлы нефть поттон борды басьтӥськыны но со чотын ӧжыт ке но пайда поттыны. Валамон, та ужез быдэстыны капчи ӧй вал. Уго со понна кулэ нимысьтыз тӥрлык. Югдурысь потӥм, "Удмуртнефть" но "Башнефть" огазеяськонъёсын огкыл шедьтыса. Кыскем нефтез ми соослы сётыны кутским. Музъем узырлыкъёс сярысь законэз юнматэмзы бере (отын пусъемын лицензия сётон рад), "Удмуртгеология" пыриськыны ӧдъяз му вӧй поттонъя конкурсъёсы. Сокугес ик басьтӥським нефть кысконъя скважинаосты асьме кужымен портон борды. Али милям соос 67, интыяськемын Игра, Завьял, Каракулино ёросъёсысь месторождениосын. 1998 арын "Удмуртгеология" ог 200 сюрс тонна му вӧй поттӥз. Со чотын ик луиз шуг-секытъёсты вормыны. Пӧртэм ёзъёсысь бюджетъёсы гинэ ар куспын 5 миллион манет коньдон келям. Россилэн кисыяз дорысьтымы 17 миллион манет кошкиз. Туэ но тыршиськом тупатэм тыронъёсты, соос пӧлын - Пенсиосъя фондэ, дыраз радъяны. Огез гинэ сюлмаськытэ - нефтьлы дун алилэсь улӥе медам лэзиськы вал. Кызьы тодмо, та вакытэ одӥг баррель му вӧй понна тыро 12 доллар. Нефть поттэмен артэ ми тыршиськом музъем узырлыкъёсты утчанэ висъям коньдонэз пайдаё кутыны. Асьмелы мукет но уж малпаны турттӥськом, музон улосъёсын но кыӵе ке заказъёсты быдэстыны дась луиськом. Тани алигес пумиським Киров областьлэн кивалтӥсьёсыныз. Отысь Золотарево местрождениысь скважинаез пыр-поч тупатыны вераським. Та уж мытэмын ни. Табере витиськом бускельёсмылэсь дорамы лыктэмзэс. Ваче кусыпъёсмес паськытатон пумысен кенешыны малпаськом. - Удмуртиысь геологъёс кыдёкысь улосъёсын но огкыл шедьтыса ужало ук... - Озьы со. 70-тӥ аръёслэн пумазы, куке странамылэн уй палаз шараямын вал бадӟым узырлыкъёс, отчы кыстӥськизы пӧртэм интыосысь специалистъёс. Инмын вертолётъёс кутъёс кадь лобазы - отын ужазы Удмуртиысь, Татариысь, Башкириысь, Туркмениысь, Украинаысь, Белоруссиысь лыктэмъёс. Нялтас пусйыны кулэ: "Удмуртгеология" соку басьтӥськиз мукетъёсызлы кельшымтэ местрождениос борды. Но ми вань луонлыкъёсты уже кутыны тыршим, туж трос эскеронъёс ортчытӥм. Озьы асьме геологъёс нефтен узыр 26 инты шедьтӥзы, та сярысь "Главтюменьгеология" предприятилэн кивалтӥсезлэн Армен Салмановлы ивортӥзы. Уно адямиослы тодмо та адями чылкак паймиз. Кытын азьло ужаз "Удмуртгеология", отын табере кылдытэмын "Пурнефтегаз" предприятие. Со арлы быдэ музъемысь 8 миллион тонна нефть поттэ. Тюмень областьын ми али но ужаськом. Отысь коллективмес утён вылысь, ми кылдытоно луим акциосын "Северная экспедиция" огазеяськон, кудаз ог 700 мурт лыдъяське, ваньзы сямен соос - Удмуртиысь потэмъёс. "Удмуртгеология" сое аслаз предприятиеныз лыдъя, соин ик котыр ласянь юрттыны тырше. Шонерзэ вераса: ми котькуд коллективмес утьыны тыршиськом. Уго валам ни, "Удмуртгеология" соку гинэ умой улоз, куке татын ужасьёс огазьын луозы. Сое ми адӟиськом мукет интыосысь эшъёсмылэн янгышъёссы вылысь но. Тани Кировысь экспедиция, "Кадымгазпромлэн" кивалтӥсьёсызлэн чебер кылъёссылы оскыса, акциосын нимаз огазеяськонлы пӧрмиз но... быриз, шуыны луоз. Бадӟым коллективлэсь 85 мурт сяна ӧз кыльы ни, коньдонзы но ӧвӧл, уж но уг шедьто. Тӥни озьы улон берытске, висъяськыса ужаны шӧтаськод ке. - "Удмуртгеология" туж тырше Кизнер ёросэ выжыяськыны. Маин со герӟаськемын? - Зэм, та район милемыз кемаласен бордаз кыске ни. Отысь музъем туж узыр - тодэмея гинэ отчы геологъёс куинь пол вуылӥзы ни. Ачим но 1973-тӥ арын татын портон ужъёсын выри. Табере Решетников местрождениысь нефтез кыскыны лицензия басьтыны тыршиськом. Му вӧй отын трос ӧвӧл - 1,5 миллион тонна. Озьы ке но, туала вакытэ сыӵе интыослэсь но палэнскыны уг яра. Кизнерын вань на ай эскерымтэ интыос но. Решетниково но Татарстанэн граница котырын чакласьком мур но паськыт эскерон ортчытыны. Отын уго, нефть сяна, азотной газ но шедёно кадь. Собере минеральной но йодэн но бромен узыр ву кыскыны луоно. Таиз эмъяськыны ярасал. Кызьы верало отысь медчастьын ужась специалистъёс, сыӵе вуэз куинь арня ӵоже юыса, висисьёс доразы бурмыса берто. "Удмуртгеология" 1985-тӥ арын та палъёсын кӧня ке скважина портӥз ни вал. Соку ик малпан кылдӥз эмъяськонъя бадӟым комплекс кылдытыны. Жаляса верано луэ, пӧртэм мугъёсъя ӟеч план ӧз быдэсмы. Озьы ке но, предприятимы туннэ но дась со скважинаос борды кутскыны, состы выльдыны-тупатыны. - Нош кызьы шӧдӥськыны быгатоз му вӧй потон борды кутскемды ёрослэн бюджетэз вылын? - Интыысь бюджетэ котькуд тонна нефть сётэ 58 манет. Но вань мукет сюрес. "Удмуртгеология", шуом, ёросысь ваньбуръя комитетэн яке мукет организациен ӵош огъя предприятие кылдытыны быгатысал но сое Кизнерын пусйысал ке, районысь казнае шӧдскымон тросгес коньдон люкаськысал. Соку бюджетэ котькуд тоннаысь 98 манет вуысал. Со сяна, отчы ик вуысал подоходной налог, музъем узырлыкъёс, ваньбур понна тыронъёс, милицилы налог но мукетыз. Но ужпумез быдэстон понна, милемлы кулэ му вӧй кыскыны лицензия. Уго узыр адямиос, организациос, кинлы но кытчы ми вазиськиськом коньдон пумысен куронъёсын, нырысь ик юало сыӵе документмес. - Владимир Александрович, ма шунтэ на Тӥлесьтыд сюлэмдэс? - Мынам ымныры котьку сямен шугъяськонъёсын пачылмемын, шуо. Созэ ачим но куддыр шӧдӥсько кадь - вакытэз сыӵе уго. Озьы ке но, сюлэмам ялан кырӟан нуллӥсько. Ӟеч музыка монэ туж шумпоттэ. Школаысен ик кутски хорын но нимаз кырӟаны, трубаен шудыны дыши. Ужен герӟаськем сюлмаськонъёсы выйыса, яратоно удысме палэнтытэк ӧйлась. Но кырӟанэз азьло кадь ик гажасько, трос гуръёсты йырам возисько. Яратӥсько театрез, операя театрлэсь вань постановкаоссэ учкисько- кылзӥсько. Огпол Санкт-Петербургысь валтӥсь дирижёрен Владимир Орловен артэ опера кылзӥм. Юасько солэсь мылкыдзэ. Со малпаськытэк шуиз: "Музыкантъёсты туж золэсь, но инструментъёссэс выльдыны дыр вуэмын ни..." Искусствоын ужасьёслы, зэм но, юрттоно. Озьы лэсьтыны, мон сямен, луоно. Кылсярысь, предприятиослэн республикаысь бюджетэ тыронъёссы чотын. Ми тани, шуом, быгатысалмы Операя но балетъя театлы кӧня ке выль инструмент басьтыны. Кизнерын но театрзы вань. Озьыен, отын но бырымтэ на мылкыдэз бурдъясь ужен вырыны тыршисьёс. Солы паймонэз но ӧвӧл. Кизнер ёрос - Удмуртилэн одӥгез чеберез сэрегез. Отын уло чылкыт сюлэмо, ог-огзэс гажась адямиос. Леонид Шиляев. Депутатэ кандидатъёс Есипов Виталий Анатольевич ӵектэмын Ижевскысь быръёнъёсъя 38 номеро Трудовой округъя. Вордӥськемын 1946-тӥ арын Можга городын. Уваысь шор ёзо школаез йылпумъямез бере дышетскиз Ижевскысь медициная кун институтын. Сое ӟеч тодо Воткинскын - татысь машина поттон заводлэн медсанчастяз врач- невропатолог луыса ужаз, огвакыт Воткинскысь медициная училищеын директор но вал. Собере выльысь берытскиз азьвыл ужан интыяз - Есиповлы оскизы валтӥсь врачлэсь ужзэ. Сое ӟеч тодо Ижевскын но - 1983-тӥ арысен Виталий Анатольевич "Ижмашлэн" медсанчастеныз кивалтэ. Пусъемын "Калыклэсь тазалыксэ утён удысысь отличник" но "Россия Федерацилэн сӥё-дано врачез" наградаосын. Удмуртиысь парламентын ужаны мылкыд кариз нырысьсэ. Азьло аръёсы депутат луон сярысь ӧз но малпаськылы. Нош табере, адямиослэсь ёрмемзэс адӟыса, чидан быре, шуэ Виталий Анатольевич. Адямилэн тазалыкез сярысь сюлмаськон берпуметӥ интые пуктэмын. Сыӵе югдурез, оло, воштыны луысал, чурыт законъёс кутыса. Калыклэсь улонзэ капчиятон понна туннэ Виталий Анатольевич нюръяськыны дась ини. Со тазьы лыдъя: - юрттоно ужась калыклы, пересьёслы но сӧсыръёслы; - дыраз тыроно уждунэз, пенсиосты, пособиосты но стипендиосты; - дугдытоно эмъюмъёслы, сиён-юонлы дунъёслэсь будэмзэс; - утёно республикамылэсь узырлыксэ; - ӝутоно промышленностез но гурт хозяйствоез; - лэзёно ӧвӧл бюджет коньдонэз тус-тас карыны; - нюръяськоно кузьмаськонлы но коррупцилы пумит; - ворсаны лэзёно ӧвӧл нылпи садъёсты, клубъёсты; - юрттоно егит специалистъёслы уже интыяськыны. Ӵош ужась эшъёсыз Виталий Анатольевичлы юн оско: парламентын ужаны, калыклы юрттыны со быгатоз. Мар борды гинэ уг басьтӥськы - ужез пӧрме. Туннэ со кузё луэ Ижевскысь 7 поликлиникалы, больницалы но 18 здравпунктлы. Со сяна, "Ижмашлэн" МСЧ- яз ужа Ижевскысь медициная академилэн 9 кафедраез, усьтэмын эндокринологияя центр. Куд-ог адямиосты уно сюлмаськонъёс погырто, нош куд-огезлы нюръяськыны кужым гинэ сёто. Сыӵеос пӧлы пыртоно Виталий Есиповез но. Лякыт, зӥбыт, востэм. Оскымон эш, умой кузпал. Вань сюлэм висёнъёссэ нырысь дораз кисьтоз. Кузпалыз, Тамара Павловна, математикаен дышетӥсь. Нылыз кылем арын врачлэсь дипломзэ басьтӥз. Будэ пичи внуксы. Котькыӵе шуг-секытъёс мед кылдозы, семьяяз воргорон буйгатске. Нош ӵукна выль кужымен уже потэ. Та вакытэ Виталий Анатольевич трос пумиськылэ калыкен. Сӥзём солы вормон. Юалляськон Кин вормоз? Мартлэн шораз Социальной эскеронъя агентство Удмуртиысь журналистъёс пӧлын юалляськон ортчытӥз. Пыриськиз 19 мурт. Республикаысь валтӥсь политикъёс пӧлын 41 верам кандидатураысь соос пусйизы 18-сэ: 1. А. А. Волков 2. А. И. Салтыков 3. П. Н. Вершинин 4. С. В. Чикуров 5. Е. Г. Одиянков 6. Н. И. Сапожников В. Г. Хорошавцев 8. В. В. Балакин 9. В. К. Тубылов 10. А. В. Солуянов 11. А. Г. Злобин 12. В. В. Жебровский 13. Ю. С. Питкевич 14. В. П. Бондаренко 15. Н. С. Сычев 16. В. В. Бельтюков 17. Ю. В. Шестаков 18. В. И. Агашин Кун Кенешлэн выль созываз кыӵе огазеяськонъёс валтӥсь инты басьтозы? 1. А. Волковлэн "Республиканский" блокез. 2. А. Салтыковлэн, П. Вершининлэн, Е. Одиянковлэн "Городской" блоксы. 3. "Новая сила" (С. Чикуров). 4. КПРФ-лэн республиканской организациез. Кин кивалтоз Кун Кенешен? 1. Волков 2. Одиянков 3. Вершинин 4. Тубылов 5. Фридрих 6. Чикуров 7. Сапожников Кин кивалтоз Правительствоен? 1. Вершинин 2. Чикуров 3. Питкевич 4. Агашин 5. Жебровский 6. Салтыков 7. Гродецкий 8. Сапожников Та верам адямиос пӧлысь, валамон, кин ке но вормоз. Нош кин? Соиз тодмо луоз ни 4- тӥ апрель бере. Л. ДМИТРИЕВА. Коньдон вуоз, пенсия луоз Февраль понна пенсия тырыны республикаын та дырлы висъямын ни 39,5 процентэз коньдон. Вань городъёсын но районъёсын февральлы пенсия сётон усьтэмын. Пенсиосъя фондэ январьлы-февральлы взносъёс вуэмъя кылдытэмын нимысьтыз график. Февраль толэзьлы пенсия сётонэз йылпумъяны чакламын 9-тӥ апреле, нош Ижевскын - 7-тӥ апреле. Взносъёс чотын республикаямы люкаськем 112,4 миллион манет вӧзы мартэ Москваысь келямын 45 миллион манет дотация коньдон, эшшо 30 миллион манетэз вуыны кулэ на. Пунэм тыронъёссэс берыктон амалъёсъя Россиысь Пенсиосъя фондлэн Удмурт Республикаысь ёзэз огкыл гожтонъя уж нуэ агропромышленной комплекс удысысь предприятиосын. 22-тӥ мартлы гожтэмын ни 230 пала сыӵе огкылъёс, пунэм тыронъёсты берыктыны луоз вить ар куспын, ваньмыз коньдон 200 миллион манет люкаське. Пунэм тыронъёссэс берыктон амалъёс утчанъя сюлмо ужало Воткинск, Пичи Пурга, Балезино, Завьялово, Кизнер но Глазов районъёсын. Та районъёсысь тросэз предприятиос Пенсиосъя фондэн огкылъёс гожтӥзы. Со уж борды озьы ик басьтӥськизы ни Ува, Кияса, Шаркан, Як.-Бодья, Яр районъёс. Пенизы 100 процентэз ик куштӥське ке но, шаерысьтымы тросэз бадӟымесь предприятиос пунэм тыронъёссэс 1-тӥ апрелёзь берыктыны уг малпало, шӧдске. Пунэм тыронъёсты берыктыны луонлыкъёс вань, Россиысь Пенсиосъя фондлэсь вексельёссэ басьтыса. Озьы пунэм тыронъёссэс берыктӥзы "Ижсталь" АО, "Воткинскзаводстрой", Можгаысь КПП, Чепецкой механической завод но эшшо кӧня ке организациос. Россиысь Пенсиосъя фондлэн Удмурт ёзысьтыз пресс-служба. Кун Кенешын Та нуналъёсы пӧсь йӧтэ Удмурт Республикалэн кивалтӥсьёсызлы но. Бӧрсьысь бӧрсе ортчыло Кун Кенешлэн но Правительстволэн огазеям Президиумъёссы. Берлояз кенешын эскеремын вал одӥг валтӥсь ужпум: кызьы та секыт вакытэ калыкез утёно. Дунъёсты эскерыса возён сярысь нимысьтыз постановление кутэмын. Со республикаямы уже кутӥськоз сентябрь толэзь ӵоже. Вузкарись предприятиос но организациос быгато сиён-юонъёсты огполскын улэп коньдонэн 50 сюрс манет тыр сётыны. Правоез утись ёзъёслы косэмын юн чакласа возьыны но дугдытыны республикамылэн сьӧраз кошкись сиён-юонэз. Одӥг нунал ӵоже палэнэ кошкемлэсь утемын 50 сюрс манетлы сиён-юон. Со пӧлын 10 тонна скал вӧй. Озьы ик мукет улосвылъёсы келямлэсь дугдытэмын вал кӧс вӧй, пызь, сакыр песок. Дунъёсын югдур ӧз ке тупатскы, постановление уже кутӥськоз мукет толэзьёсы но. 14-15 сентябре Удмуртиысь делегация Александр Волковлэн кивалтэмез улсын ужалоз Белоруссиын. Т. МИРОНОВА. ШӧКЫЧ Вуоно арня нуналэ Удмурт Республикаысь Кун Кенеше депутатъёсты быръён ортчоз. Солэн кыкетӥ ӧтчамаз шедён понна уно кандидатъёс нюръяськозы. Кудӥз кандидат бырйисьсэ ас палаз коньдонэн яке кузьмаськонэн берыктоз, мукетыз бадӟым уждун яке пенсия сӥзёз. Депутатэ кандидат: - Монэ бырйиды ке, луоз колбаса но, сӥль но, уждун но, пенсиос но, пособиос но... Суредэз Л. ПРОЗОРОВЛЭН. Гажано бырйисьёс! Чылкак кӧня ке нунал кылиз на Удмуртиысь Кун Кенеше быръён дырозь. Арня нуналэ быръён ужрадэ пыриськеммы бордысь потоз республикамылэн матысь ньыль ар ӵоже улэм- вылэмез. Шонер сюрес ке бырйимы, со юрттоз секыт социально-политической югдурез тупатыны, ӧм ке, со уката лэчытомоз, улонмы эшшо но уродмоз. Асьмелы янгышаны уг яра. Но янгыш ужаны асьмелы юртто политикаез мыдланьтӥсь адямиос, пӧяськисьёс но кыл вӧлдӥсьёс. Кызьы со лэсьтӥське? Котькудӥз ӟеч тодэ: республикаямы политика удысын валтӥсь адями луэ Кун Кенешлэн Тӧроез Волков Александр Александрович. Ӵапак со адями пумысен ик кылдэ тужгес бадӟым пӧяськон. Кылзэ, сакгес чаклалэ ай: кыӵе гинэ ултӥян уг ляко Александр Александровичлы "демократъёс". Сое яншыге уськыто, политикаын мултэс нюръяськонэ пыре шуыса. Кивалтонэз яратэ шуыса, малпан кылдыто. Янгыше уськыто Россилэсь но Удмуртилэсь законъёссэ тӥямез пумысен, экономикаез куашкатэмез понна. Ойдолэ дыртытэк сэрттом- пертчом асьмелэн Кун Кенешмылэн тӧроезлэсь "сьӧлыкъёссэ". Ултӥяло политикаын мултэс нюръяськонэ пыриськемзэ... Нош луэ шат асьме вакытэ озьы. Куке "реформаторъёслэн" кулэяськонъёссы уг тупало адямиослэн куронъёссылы, кызьы уд нюръяськы "реформаторъёс" понна вань кужыменызы но амалъёсынызы дурбасьтӥсьёсын. Властез яратэ шуыса, малпан кылдыто... Татын кык юанэн валэктон сётыны кулэ. Нырысетӥез: луоз-а туала вакытэ кужмо государственной властьтэк экономикаез ӝутыны, коньдон бергатонын югдурез тупатыны, "лушкам" социальной удысэз воксё куашканлэсь утьыны? Кылдэ кыкетӥез юан но: ма понна но кыӵе властез юнматыны тырше адями? Со аслэсьтыз властьсэ юнматон сярысь уг сюлмаськы, со тырше Удмуртиысь Кун Кенешлэсь ёззэ юнматыны но кылдытыны огазьын, огкылысь ужась, республикамылэсь улон-вылонзэ шонер сюресэтӥ ӧръясь кужым кылдытыны. Законъёсты тӥямез пумысен янгыше уськыто... Но законъёсты тӥяны но соосты палэнтыны уг луы соку, куке соос вазен ини юнматэмын кылдэм нормаосъя, асэныз улонэн юнматэмын. Луэ-а законъёсты тӥяны улон ӝог но трослы воштӥськонъёс ваён дыръя. Ӧвӧл, выльдӥськон вакытэ "ялан ужась законъёс" луыны уг быгато. Реформаос ортчытон дыръя законъёс улонын воштӥськонъёсты лыдэ басьтыса вошъяськыны кулэ. Созэ но валаны кулэ: Волков законъёсты уг тӥя - солэн кивалтэмез улсын Кун Кенеш Удмуртилэсь законъёссэ умоятон бордын тырше. - Мур воштӥськонъёс дыръя со одӥгез визьмоез политика луэ. Экономикалэн куашкамез... Нош ӧз-а ӝутскы Чепецкой механической завод? Озьы ик выль омырен ӧз-а шокче Ижевскысь электромеханической завод, Воткинскысь машиностроительной завод, Ижевскысь радиозавод? "Нош "Ижмашен-Школа- Фольксвагенэн" бадӟым огкыл? Нош Беларусен, Москваен, Татарстанэн, Башкортостанэн, Пермь областен экономика удысын ӵош ужан сярысь бадӟымесь вераськонъёс? Кинлэн визьмыныз, кинлэн уно сюлмаськеменыз, буйганэз тодӥсьтэм мылкыдыныз лэсьтэмын со ваньмыз? Шонер валалэ милемыз. Котькудӥзлы куаразэ сётыны аслыз эрик сётэмын. Но соку куарадэ сётоно котькуд депутатэ кандидатлы кулэезъя дунъет сётыса. Куараез сётоно азьпал улонэз лыдэ басьтыса. Сётсконо ӧвӧл "реформаторъёслэн-чубайсоръёслэн" ӧтёнъёссылы, пӧяськыса кыл сётонъёссылы. Дыр вуиз ни выльзэ кылдытӥсь, Отечествомы понна сюлмынызы висись депутатъёсты бырйыны! В. С. Тарасов, Г. М. Корепанов-Камский, Г. А. Кулакова, О. А. Поскребышев, Н. З. Ульяненко, М. Т. Калашников. Валериан Арсентьевич НИКИТИН, Завьялово районысь 75 номеро Камской избирательной округ Ужась муртэ дан ачиз шедьтэ. В. А. Никитин, "Путь Ильича" колхозлэн председателез, ас хозяйствояз вакчи дыр куспын гажано кивалтӥсь но адями луиз. Якшуръёс ярато предзэс вазиськись сямыз понна, оско, котькыӵе шуг-секытысь поттоз шуыса. Егит ке но, атайзылы сямен, вань куректонзэс-бӧрдонзэс солы верало. Тӥни озьы Балезино районысь Пыбья гуртын вордскем но будэм воргорон али быгатыса кивалтэ республикаысьтымы огез тодмо но ужаны быгатӥсь хозяйствоен - Завьялово районысь "Путь Ильича" колхозэн. Дышетскемезъя - агроном. Йылпумъяз Ижевскысь гурт удысъя институтэз. 1996-тӥ арын В. А. Никитинлы сётэмын "Удмурт Республикаысь гурт удысысь сӥё-дано ужась" ним. Валериан Арсентьевич кузпалэныз ӵош будэтэ кык пизэ. Депутатэ кандидат, мандат понна нюръяськыса, азяз бадӟымесь ужпумъёс пуктэ: арлыдоослы но егитъёслы юрттон, калыклэсь улон-вылонзэ умоятон, уждунэз будэтон, калыкез дунтэк дышетон но эмъян, бюджетысь коньдонэз эсэпласа кутон, экономика но политика удысын шонер политика нуон. Ваньмыз та ужпумъёс быдэстыны луымонэсь, азьвыл аръёсы озьы улӥм ук. Валериан Арсентьевич самой огыр-бугыр вакытэ калыксэ утьыны быгатӥз бере, депутат луыса, со эшшо тросгес лэсьтоз шаерез, районэз, гуртоосыз понна. Кыл вылын чеберъяськытэк, уженыз возьматоз кужымзэ но быгатонлыксэ. Л. ДМИТРИЕВА. * В. А. НИКИТИН. Юрий Александрович ИВАНОВ Ижевскысь 25-тӥ Пушкинской избирательной округ Юрий Александровичез депутатэ кандидатэ дэмласьёс оско, со Кун Кенеше ужаны шедиз ке, нюръяськоз: * дышетонэз, эмъяськонэз, наука, культура удысъёсты калыклы матынгес но дунтэм карон понна. Отын ужасьёс дыраз но улыны тырмымон коньдон мед басьтозы; * куанер улӥсьёслэсь, трос нылпиен семьяослэсь, пенсионеръёслэсь, студентъёслэсь, бюджет удысын ужасьёслэсь югдурзэс умой пала берыктон понна; * бюджетэз узырмытон - котькуд депутатлэн сюлмаськонэз. Но со улонэ пыӵалоз, мандат шедиз ке чылкыт киосы. Югдурез воштыны быгатозы предприятиосты ужатыны вормись адямиос гинэ. Ми оскиськом, Иванов выллем депутатъёс гинэ быгатозы на Удмуртиысь югдурез тупатыны, нылпиосмылэсь улон-вылонзэс шудбуро карыны. Ю. А. Ивановен пумиськыны быгатоды (понедельнике сяна) таӵе адресъёсъя: Советской ульча, 22-тӥ "б" юрт, Нылпи творчествоя юрт. Тел. 78-54-86; Красной ульча, 119-тӥ юрт, Дышетӥсьлэн юртэз. Тел. 78-69-81; В. Сивковлэн ульчаез, Некрасов нимо библиотека. Тел. 78-09-50. Депутатэ кандидатлы жингыртыны луоз нуналлы быдэ 15 часысен 19 часозь, 18-19 часэ - бырйисьёсын пумиськон. Выль комедия Пичи Пурга ёросысь Бобья-Уча гуртысь калык театр учкисьёссэ шумпоттӥз выль уженыз - чылкак алигес гинэ возьматӥз драматурглэн Никвлад Самсоновлэн "Шуняньёс" пьесаезъя комедия. Со сӥземын туала улон-вылонмылы. Бобья-Учалан премьера ортчон нуналэ артистъёсты но пьесалэсь авторзэ сюлмысьтыз ӟечкылаз "Удмурт кенеш" огазеяськонлэн тӧроез Валентин Тубылов. Премьералэсь азьвыл ик ини усточиос потазы ёросысь гуртъёсы - вуылӥзы Вуж Монбяла, Выль Моньяла, Улын Юрие, Пужей-Учала, мукетъёсаз. Выль уженызы тодматылӥзы Можга ёросын улӥсьёсты но - потазы Горняк посёлоке, Вылын Кватчи, Вылын Юри гуртъёсы. Матысь дыре озьы ик вуылыны малпало Алнаш ёросысь Писэйгуртэ. Постановкалэн режиссёрез - калык театрысь актёр Филипп Яковлев. Пусйыны кулэ созэ но: калык театрысь артистъёс азьвылгес дасязы но пуктӥзы ни драматурглэсь "Пиртэш кизилиос" пьесаезъя драмазэ. Таиз кылем арын калык театръёслэн фестивальзы дыръя нырысетӥ интыез утӥз. Н. ЯКОВЛЕВ. Депутатэ кандидатъёс Николай Веретенников Глазовын гинэ ӧвӧл, шаерамы но тодмо адями. Со кивалтэ городысь одӥгеныз огсыр ужась предприятиен, акциосын "Реммаш" огазеяськонэн. АО поттэ гурт хозяйствоослы техника, куронъёсты котьку дыраз быдэсъя. Николай Данилович - Кун Кенешлэн депутатэз, выль ӧтчаме но кандидат луэ. Бырйисьёсызлэсь куронъёссэс быдэсъянлы дырзэ но, кужымзэ но уг жаля. Одӥг сессие но ветлытэк (висьыкуз шат ӧз быгатылы) ӧз кельтылы. Котькыӵе эскероно ужпумъёсъя мылкыдзэ, малпанъёссэ вералляз, шуом, бюджетъя но, промышленностез но гурт удысэз азинтонэн герӟаськем законопроектъёсъя. Солэн ваньмыз понна сюлмыз висе, микрофон азе потэ но умоесь ӵектонъёс сётэ. Озьы ик мылысь-кыдысь пыриськылӥз Промышленностья, соин герӟаськем удысъёсты азинтонъя, вузъёс но услугаос сётонъя комиссилэн ужаз. Николай Данилович Глазовысь Гордумае но быръемын. Таяз кенешын но лулысь-сюлмысь тырше, бырйисьёсызлэсь кулэяськонъёссэс улонэ пыӵатон вылысь, трос лэсьтэ, одӥг куронлэсь но уг палэнскы. Соин ик, мон сямен, таӵе адямиос Кун Кенешын одно ик луыны кулэ. Таӵе депутатъёсын гинэ парламент умоесь законъёс, решениос кутыны но калыклэсь улон-вылонзэ умоятыны быгатоз. Г. РОМАНОВ. Леонид Каплун Кивалтэ "Ижвескгаз" огазеяськонэн. Предприятиослы, организациослы, учреждениослы, Пичи Пурга, Завьялово, Як.-Бодья районъёслы но калыклы вис карытэк тырмыт "чагыр" эстӥськон сётэ, шудтэм учыръёстэк, огсыр, пайдаё ужа. Арысь аре юнма газ хозяйствоез. Али со 223 сюрслэсь уно квартираосы, 11,5 сюрс нимаз коркаосы газ вуттэ. Со понна 1340 иськем гумыосыз кыскемын. Берло куинь ар ӵоже ватсаса 260 выль ужан инты кылдытэмын, нош ваньмыз 520 мурт тырше. Леонид Рувимочлэн тыршемез син азьын. "Ижевскгаз" - Россиын устоез газ сётӥсь предприятие. Со пусъемын "Бирмингемысь тыл" дуннеысь премиен, зарни медален но почёт сертификатэн. Сыӵе дунъет инмысь уг усьы. ОАО-лэн валтӥсь директорез трос сюлмаське газ хозяйствозэ выльдон но азинтон сярысь. Ленин районын вуттэ ни выль базазэ, магазинэз ужа ни. Л. Каплун зэмос хозяйственник но политик, Кун Кенешын трос ӟечсэ лэсьтоз, уката ик законопроектъёс дасянын. Со оскымон депутат луоз. Сётэм кылзэ тӧлъя-буръя уг лэзьы, одно быдэстэ. Г. РОМАНОВ. Леонтьев Николай Васильевич быръёнъёсъя 88 номеро Уромской округ, Пичи Пурга район Мон малпамъя, Кун Кенешын луэмезъя уногес мед луозы вылэм юристъёс. Депутатъёслэн угось нырысетӥ ужпумзы - законъёсты дасян но соосты кутон. Нош кин та удысэз юристъёс кадь ӟеч тодэ? Кылем созывын законъёсты кутонын бадӟымесь янгышъёс лэсьтэмын вал, республика трос ыштонъёс адӟиз. Выльысь озьы медам ни луы. Мон дышетскемея юрист. Ужай судья, следователь, РОВД-лэн кивалтӥсезлэн воштӥсез луыса. Урод-а, умой-а, но законъёсты тодӥсько кадь. Кылем гужем монэ бырйизы райсоветэ депутатэ. Отын ужасько законностья комиссиын. Ми депутат луэммы бере ик гижысь-пиньысь басьтӥським районын законъёсты утён борды. Верало одӥг гинэ учырез. Администрацилэн тӧроез со дыре ик депутат но вал. Нош законъя озьы уг яра. Вазиським прокуратурае, судэ. Кивалтӥсьмы депутатысь кошконо луиз. Мон гуртын быдэсмем но гуртын ик улӥсь адями. Валамон, депутат луыса, тужгес но бадӟым саклык висъяны тыршо гурт калыклэн кулэяськонъёсызлы, удмурт культуралы, егит кадръёсты дасянлы. Нимысьтыз вераме потэ кивалтӥсьёслэн эрказъяськемзы сярысь. Соос ужасьёссылы толэзьёсын, аръёсын уждун уг тыро, нош асьсэос выжыкылын кадь уло, вылаз ик, лушкасько, калык ваньбурез тус-тас каро. Таӵе чидантэм югдурлы ӝегатскытэк пум пононо. Лушкаськись кивалтон креслоын ӧвӧл, тюрьмаын пукыны кулэ. Яке басьтом приватизация шуонэз. Кӧня ваньбур лушкамын, нокин уг тоды. Выльысь пыр-поч эскероно та югдурез, лушкамзэ берыктоно, йыртэмасьёсты кыл кутытоно. Мон сямен, тросэз тырмымтэос но йыртэман учыръёс пото кырсь сямо адямиосты кивалтон ужын воземен. Ӧжыт шат асьмелэн визьмо, ӟеч мылкыдо адямиосмы? Вань соос. Нош вылӥ кивалтӥсьёс кивалтӥсе пукто нырысь ик эшсэс, вынзэс, кудозэс. Быдтоно таӵе югдурез, кадръёсын политика чылкыт луыны кулэ. Куд-огез юалоз но, дыр, мынэсьтым, малы мон депутатэ мынӥсько шуыса. Валэктонэ одӥг: мон уг быгатӥськы ни та улонысь сомында кырсез чиданы. Депутатлэн нош тросгес луонлыкъёсыз улонмес чылкытатон понна. Кивалтӥсе мон уг мерскиськы, мон огшоры адями, сыӵе ик, кыӵе мынам бырйисьёсы. ДЕПУТАТЭ КАНДИДАТЪЁС Мед вормоз! Кун Кенешлэн депутатэз луыны мылкыд карисьёс пӧлын туэ трос егитъёс. Алексей Емельянов быръёнъёсы пыриське нырысьсэ. Солэн быдэстыны чаклам ужпумъёсыз ваньмызлы валамон но матын. Нош валтӥсь малпанэз одӥг: утёно ужась адямиез. Алексей вордӥськиз но будӥз Пермь улосысь Чайковский городын. Чылкак ӟуч калык пӧлын улыса но туж ӟеч вераське удмурт кылын. Солы паймыны кулэ меда? Анаез но, атаез но удмуртъёс, вордӥськемын но, будэмын но удмурт ёросъёсын. Пичи дырысеныз тунсыкъяське Алексей удмурт адямилэн сямъёсыныз, солэн лулпуш дуннееныз. Тужгес но юрттӥз, дыр, ӵужанаез доры - Алнаш ёросысь Усо гуртэ - вуылэмез. Пичиысен ик дышиз со удмурт сямен лыдӟиськыны но, гожъяськыны но. Школазэ йылпумъяса мынӥз Удмурт кун университетэ. Дышетскиз физикая но математикая факультетын. Али ужа "Удмурт дунне" газетлэн редакцияз. Огдыре ик - Удмурт кун университетысь Адямиез эскеронъя институтын. Егит адями мылысь-кыдысь тырше адями кусыпъёсты эскерон удысын. Ӝоген йылпумъялоз со бадӟым ужзэ - луоз наукаосъя кандидат. Алексей Емельянов Кун Кенеше депутатэ ачиз ӵектӥськиз. Зэм, солэн улосвылаз, Ижысь 23-тӥ Май округын (татчы пыро Холмогоров, Май, Пушкин ульчаос) удмуртъёс туж ӧжыт. Таин валче вазиськем потэ шаерысьтымы гуртъёсын улӥсь удмуртъёслы. Гажано эшъёс! Ижысь та ульчаосын улӥсь тодмоосты, эшъёсты, ӵыжы-выжыосты матысь адямиосты вань ке, вазиськелэ соослы одӥг куронэн: 4-тӥ апреле куаразэс мед сётысалзы та чырмыт но визьмо удмурт пияш понна. Быръёнъёс азьын: верасько малпанме Лукашенколы синмаськи Али но уг кошко сюлмысьтым Беларусь Республикалэн президентэзлэн Александр Григорьевич Лукашенколэн верам кылъёсыз. Асьмелэн но кивалтӥсьмы со кадь медло вал, оло, та акылес улонмы мукет пала воштӥськысал. Белоруссиысь вылӥ куно вань сюлэмзэ ик усьтыса асьме азьын вераськиз. Кинэ гинэ уд кылзӥськы, котькудӥз та адямиез ӟечен тодаз вае. Гуртын вордскем мурт, президент луыса но, выжыоссэ уг вунэты. Колхозлэн председателезлы белорус калык кышкатэк оскем аслэсьтыз улон-вылонзэ, ӵуказе нуналзэ. Ужа, зарезь сьӧрысь дядяйёслэсь "индылонъёссэс" кылытэк-адӟытэк, калыкеныз, юрттӥсьёсыныз кенешыса. Нош ма дауртэ Россия? Дунне азьын асьме странамы понна возьыт. Кин гинэ уг кузёяськы, кин гинэ уг кивалты соин! Огезлы но оскыны уг лу ни. Узыр муртъёс юрттэмен, президентмы воштӥськытэк кылиз, табере ужамысь но дугдӥз кадь. Лукашенко туж умой вераса кельтӥз: быръён азьын эшшо огпол малпаське, кин понна куарадэс сётоды. Луозы лӥятӥсьёс но, кышкатӥсьёс но, сыӵеослы сётсконо ӧвӧл. Зэмзэ ке верано, сюлэм али ик бӧрдэ ни, кин меда кивалтонэ вуоз шуыса. Огезлы оскисько: калык туннэ ассэ ачиз пӧяны уз, дыр, сёты ни. Уксё но кузьым - со огдырлы гинэ, нош асьмелы татын улоно-вылоно, пиналъёсмес будэтоно-дышетоно. Тросгес адӟем потэ удмурт депутатъёсты, удмурт кивалтӥсьёсты, гуртын вордскем но али ужась муртъёсты. Крестьян калыкез соослэсь ӟечгес нокин уз вала. А. АБРАМОВА, Пичи Пурга районысь Пугачево посёлокын улӥсь. Удмурт Элькунысь Быръёнъя комиссилэн бырйисьёслы, депутатэ кандидатъёслы, вагьмызлы быръён уже пыриськисьёслы вазиськонэз 1999 арын 4-тӥ апреле Удмурт Республикаын ортчозы Удмурт Элькунлэн Кун Кенешаз быръёнъёс - законъёсты кыдытонъя но соослэсь быдэсъяськемзэс чакланъя вылӥ органаз, Кун Кенешез кылдытон кулэ каре быръёнъёсъя вань комиссиослэсь ӟеч но ваньзэ юн чакласа ужамзэс. Таяз учыре но, законъёслэсь куронъёссэс лыдэ басьтыса, быръён уже пыриськемъёсын огазьын ужаса, соос шара но номыре ватытэк сюлмасько гражданъёслэсь быръён правоосэс быдэстон сярысь. Законлэн куронъёсызъя со ужез быдэстон пумысь сюлмасько кунэн но интыосын кивалтон ёзъёс. Соин ӵош ик быръёнъёс пумысен югдурез умоятыны тыршыса, Удмурт республикаысь Быръёнъя комиссия ивортэ: куд-ог округъёсын кандидатъёс но соослы дурбасьтӥсь адямиос ласянь умойтэм валэктон уж нуиське, бырйисьёсын уж радъямын, умойтэм амалъёсты кутыса. Сюлэмшугъяськытэ бырйисьёсты асьсэ пала коньдонэн кыскон амалъёс. Со шӧдӥськиз кинюртэмъёсты люканын, валэктон нуон материалъёсты вӧлмытонын, та уже газетъёсты кутонын. Бырйисьёслэсь куараоссэс ас палазы карон понна но умойтэм ужъёс нуисько. Бырйисьёслы, депутатэ кандидатъёслы, быръён уже вань пыриськисьёслы вазиськыса, Удмурт Элькунысь Быръёнъя комиссия оскемзэ вера: та быръёнъёс ортчозы, законъёсты тӥятэк, судъёсын ужъёс ӝутытэк, ог-огдэ юн гажаса но валаса. Удмурт Республикаысь Быръёнъя комиссия, гражданъёслэсь быръён правозэс эскерыса, быръёнэз дасянын но сое ортчытонын законъёсты чакласа таӵе куронэн вазиське: - быръёнэз радъясь комиссиослэн членъёсызлы ужано вылӥ кыл кутыса, вань куронъёсты юн быдэсъяса; - депутатэ кандидатъёс, соослэн оскем адямиоссы, быръёнъёсъя огазеяськонъёс валэктон уж мед нуозы шонер но пӧяськытэк, асьсэлэсь оппонетъёссэс но округысь бырйисьёссэс гажаса, законъёсты чакласа, ог-огед сярысь нокыӵе урод вераськонъёс вӧлмытытэк; - иворъёсты вӧлмытӥсь ёзъёслы быръёнъёсъя кампаниез но депутатэ кандидатъёс сярысь валэктон ужез нуоно быръёнъёс сярысь законъёсъя, медаз луэ адямиосты юнме шорысь ултӥясь материалъёс; - республикаысьтымы бырйисьёс та уже мед пыриськозы, граждан луэмзэс валаса, медаз сётӥське юнме супыльтонъёслы но кузьмаськонлы, тодады вайытӥськом: бырйись куаразэ сётэ лушкемен, сое нокин эскерыны уг быгаты. Туэ быръёнэз ортчытонлы висъямын 7 миллион манет. Сое ӟеч ортчытон потоз быръёнъя комиссиослэн, кандидатъёслэн, вань бырйисьёслэн огазеяськонъёссылэн огъя ужамзы бордысь. Оскиськом, быръён нуналэ вань участокъёсын та уж ортчытэмын луоз огсыр, ог-огдэ валаса но гажаса. Умойтэмен лыдъяз Глазовын ужакуз, Удмурт Республикаысь Кун Кенешлэн Тӧроез Александр Волков Федерацияя Советлэн Тӧроезлы Егор Строевлы телеграмма ыстӥз. Отын шуэмын: "США- лэн но НАТО-лэн вооружённой кужымъёссылэн суверенной Югославия государство вылэ урдскемзы Удмуртиын улӥсьёсыз юн сюлэмшугъяськытэ. Республикаямы туала куронъёсъя ож тӥрлык лэсьтӥське бере, ми умой валаськом Балканыын кылдэм югдурез. Соин ик Россия Федерациысь Правительстволэн Председателезлэн Е. М. Примаковлэн США-е ветлонзэ куспетӥ каремез солэсь юн сямзэ возьматон луэ. Сое Удмуртиын улӥсьёс умоен лыдъяло. НАТО-лэн кужымъёсызлэн сыӵе ужзылы дунне вылын кулэезъя дунъет сётоно. Александр Волков, кылдэм югдуръя нимаз вазиськонъёсыз но политика ласянь учконъёсыз радъян пумысен Федерацияя Советлэсь кенешсэ ӝегатскытэк ортчытон сярысь ӵектӥз. Удмурт Республикаысь Кун Кенешлэн пресс-службаез. Сиён-юонэз нимысьтыз кодэн пусъён сярысь Удмурт Элькун Кивалтэтлэн постановлениез 1999 арын 1 феврале Ижевск город � 154 Удмурт Элькун улосвылэ тазалыклы изъян ваись но улӥ ӟечлыкен сиён-юонъёсты палэнысь лушкем ваён-вуттонэз алон, сыӵе вузъёслэсь лыдзэс эскерыса-чакласа возён вылысь но Россия Федерациысь кун властьлэн ёзъёсыз но Удмурт Элькунысь кун властьлэн ёзъёсыз куспын быдэсъяно удысъёсты но полномочиосты люкылон сярысь Огкыллэсь 2-тӥ ёзэтсэ лыдэ басьтыса, Удмурт Элькун Кивалтэт пуктэ: 1. Тупатоно, элькунлэн улосвылаз палэнысь вуттэм минерал вулы но кудӟытӥсьтэм юонъёслы ӵошатон-эскерон (идентификация) ортчытоно 1999 арын 1 апрельысен, нош асьме шаерын поттэмъёсызлы - 1999-тӥ арын 1-тӥ декабрьысен, соосты нимысьтыз штрих-код маркаен пусйыса. 2. Сертификацияя, метрологияя но стандартизацияя Удмурт центрез косоно вылӥ верам вузъёсты идентификацияя нимысьтыз маркаен пусъёнэз радъяны. 3. Удмурт Элькунэ палэнысь вуттэм минерал вуэн но кудӟытӥсьтэм юонъёсын 1999-тӥ арын 1-тӥ апрельысен вузкарыны лэзёно, котькуд вуз борды штрих-кодэн нимысьтыз марка лякемын ке, нош элькунамы поттэмъёсыныз - 1999-тӥ арын 1-тӥ декабрьысен. 4. Юнматоно Удмурт Элькунын вузъёсты ӵошатон-эскеронъя (идентификация) Радлыкез. 5. Удмурт Элькунысь Коньдон ужпумъёсъя министерстволы бюджетэ вуись коньдон пӧлысь висъяно Удмурт Элькунысь Югдурез утёнъя министерстволы - 50 сюрс манет, Вузкаронъя кун инспекцилэн Удмурт Элькунъя управлениезлы - 100 сюрс манет, Элькунысь Госсанэпиднадзоръя центрлы - 100 сюрс манет, Вытъя полицилэн федеральной службаезлэн управлениезлы - 50 сюрс манет, кудӟытӥсь юонъёсты нимысьтыз кодэн пусъён понна кулэ луись арбериос басьтыны. Удмурт Элькун Кивалтэтлэн Тӧроез П. Н. Вершинин. Журналистъёсын пумиськонъёс Лушкем ужез уд ваты Котькинлэн правоез вань улон интылы. Нокинэ но уг яра юнме шорысь улон интытэк кельтыны. Озьы гожтэмын Россилэн Конституцияз. Нош Удмуртилэн Конституцияз (40-тӥ ёзэт) ватсамын на: кун властьлэн органъёсыз но интыосын аскивалтонъя органъёс юртто улон коркаос лэсьтыны, луонлыкъёс кылдыто улон интылы правоез быдэсъян сярысь. Конституциын сётэм право улонын туж умойтэм быдэсъяське, меӵак шуиз журналистъёслы Эскеронъя кун комитетлэн кивалтӥсез Александр Владимирович КУЗНЕЦОВ. Гражданъёслэн ӝожтӥськонъёссыя комитет туэ февраль-март толэзьёсы гинэ данак эскеронъёс ортчытэм. Тани Ижевскысь кык общежитиысь (Песочной, 36 но К. Маркс, 316) улӥсьёсты ураме уллян калэ вуттӥллям. Предприятиослэн кузёоссылы та общежитиос кулэтэм луиллям. Табере та ужпумез прокуратураын эскеро. "Удмуртавтотранс" предприятилы улон юртъёс пуктыны бюджетысь 1992-тӥ-1996-тӥ аръёсы коньдон висъямын вал. Кык юрт пуктэмын. Но, кызьы ивортӥз А. Кузнецов, отысь квартираос люкылэмын, Жилищной кодексэз тӥяса. Тросэз ордеръёс воксё палэнысь адямиослы сётэмын. - Кытын гинэ ум эскериське улон интыосты висъянэз - котькытын законэз тӥян учыръёс шараясько,- шуиз А. Кузнецов.- Квартираос сюро кивалтӥсьёслы, соослэн нылпиоссылы яке внукъёссылы. Сыӵе учыръёсты шараямы Игра, Ува автопредприятиосын. Квартираос туж умойтэм люкылэмын вал ИжГТУ-ын. Прокуратура со пумысен йылпумъянъёс лэсьтӥз ни. Табере обидем адямиослы судэ гинэ вазиськоно. Вылӥ верам организациосын ваньмаз ик быдтымтэ на профсоюз комитетъёссы. Озьы ке но, соос я кужымтэмесь, я кивалтӥсьёс соосты квартира люконлэсь юри палэнто. Адямиос уг тодо черодзэс. Озьы, кылсярысь, вал Игра автопредприятиын. Кивалтӥсьсылэсь квартира басьтэмзэ коллектив тодӥз эскерон мыныку гинэ. Та вакытэ Эскеронъя кун комитет чакла "Фармация" фирмалэсь ужамзэ. Эмъюмъёс басьтыны солы бюджетысь коньдон висъямын вал. Озьы ик комитет эскерыны кутскиз районъёсы келям коньдонэз уже кутӥськемез. Дотациос келямын ке но, адямиос уждун уг басьто. Малы? Та ужпумез комитет эскероз куать районын. Берло толэзьёсы озьы ик чакламын Югдурез утёнъя министерствоын коньдон ужпумъёс. Татын но тырмымтэос шараямын. Куд-ог эскерон ужъёссэ комитет нуэ Россия Федерацилэн Лыдъян палатаеныз ӵош. Таӵе амалэз уже кутыса, апрель-май толэзьёсы со эскерыны малпа Гурт удысъя но сиён-юонъя министерстволэсь 1996-тӥ-1998-тӥ аръёсы АПК-лы дотациосын юрттэмзэ. Т. БАННИКОВА. Быръёнъёс азьын Улонзы ортче вуж юртъёсын Удмурт Республикаысь Кун Кенеше быръёнъёс матэ вуэмен, ялан ортчыло бырйисьёсын пумиськонъёс. Сыӵе пумиськон алигес радъямын вал Ижевскысь Металлургъёслэн городаказы улӥсьёс понна но. Андан ӵыжатон заводысь ужасьёслэн тросэз семьяоссы нырысетӥ лэсьтэм юртъёсын куамын арлэсь кема уло ини. Тыло профессиысь азьвыл мастеръёс жадёнэз валатэк 20-30 ар ӵоже андан пӧзьтӥзы, прокат нуйтӥзы, поковкаос дуризы. Нош соослэсь уен-нуналэн ужамзэс лыдэ ӧз басьтэ кылем арын февраль толэзе, пенсиослэсь лыдзэс эскерыкузы. Одӥгезлы но металлурглы пенсизэс ӧз будэтэ. Тани нош ик пенсия сётонэз выльысь эскерыны медо. Пенсия но пособие сётон удысын ужасьёс валэкто, сое пичи пенсия басьтӥсьёслы гинэ будэтозы, дыр, шуыса. Озьыен, нош ик лыдэ басьтэмзы уг поты пӧсь но секыт цехъёсын ужасьёслэсь, Быдӟым Отечественной войнаын ожмаськемъёслэсь но со бере асьсэдыз жалятэк ужасьёслэсь тыршемзэс. Али вуж юртъёсын улӥсь металлургъёслэн семьяоссы арлы быдэ ӝожтӥсько мурӝолазы ву люкаськем пумысен. Нош вылӥ этажъёсын вуж шиферъёс пилиськылэмен, вӧлдэтъёс пыр ву ваське. Металлург городокысь котельной пӧсь вуэз урод шунтэ, сое квартираосы ӧжыт градусэн сёто. Нош улон инты понна дунэз чик кулэстытэк, дыраз тырыны косо. Табере вераськон мынэ квартира понна тыронэз выльысь будэтон сярысь. Металлург городокын улӥсьёс та вылӥ верам тырмымтэос сярысь вераськон нуизы Кун Кенеше быръёнъя 15 номеро Северной избирательной округъя депутатэ кандидатэн "Ижсталь" огазеяськонлэн генеральной директореныз В. В. Моисеевен "Аврора" кинотеатрын пумиськон дыръя. Выль быръем депутатъёс мед быгатозы вылэм калыклэсь куронъёссэ лыдэ басьтыны. Октябрьской районысь ветеранъёслэн советсылэн председателез Н. Е. Левицкий люкаськемъёслы вераз мӧйыослэн курадӟыса улэмзы сярысь. Пересьёс висё. Нош куд-ог больницаосын 60 ареслэсь арлыдооссэ йӧнатыны уг басьто ни. Кин малпаз, асьмеос та калэ вуом шуыса? Соин ик асьмелы Кун Кенеше депутатэ умойёссэ адямиосты быръёно. В. ЧЕРНОВ, "Ижсталь" огазеяськонлэн ужысь ветеранэз, пенсионер. Республикалэн 1999-тӥ арлы бюджетэз сярысь Удмурт Республикалэн Законэз 1-тӥ ёзэт. Юнматоно республикалэн 1999-тӥ арлы бюджетаз, бюджетэ пырисьтэм фондъёсты но лыдэ басьтыса, коньдон люканэз 2438200 сюрс манет но уже кутонэз 3202229 сюрс манет. Тупатоно: республикалэн 1999-тӥ арлы бюджетаз тырмымтэ коньдон 764029 сюрс манетлэсь яке республикалэн бюджетысьтыз уже кутоно коньдонлэн 23,9 процентэзлэсь медаз ортчы. Тупатоно республикалэн бюджетаз 1999-тӥ арлэн пумаз кассаосын бергатоно коньдонлэсь быдӟалазэ 15 сюрс манет возьыны. Тупатоно: бюджет чотын улӥсь организациосын азьвылаз аре тырон-басьтонъя 1999-тӥ арын 1-тӥ январёзь быдэстытэк кылем ужъёс выляз аре ортчытӥсько 1999-тӥ арлы бюджетын пусъем сметаосъя, озьы ик кредитъёс, заёмъёс но ссудаос пыр ватсаса шедьтэм коньдонэн. 2-тӥ ёзэт. Удмурт Республикаысь Правительстволы лэзёно 1999-тӥ арын республикалэн бюджетысьтыз тырмисьтэм люкетэн висъяны нимысьтыз ужрадъёс ортчытъяса поттэм коньдонэз. 3-тӥ ёзэт. Республикалэн 1999-тӥ арлы бюджетаз пыртоно бюджетысь но солэн палэнысьтыз фондъёслэсь коньдонзэс, сое чаклам ужъёсы кутонэз воштытэк, доходъёсъя но расходъёсъя оглом 895322 сюрс манет. 4-тӥ ёзэт. Тупатоно республикалэн 1999-тӥ арлы бюджетаз коньдон та чотын люканы: Удмурт Республикалэн улосвылаз поттэм (быдэстэм, лэсьтэм) вузъёслы (ужъёслы, услугаослы) ватсам дунъёс понна налог, Россия Федерацилэн дуно металлъёсын но изъёсын кун фондысьтыз сётэм дуно металлъёслы но дуно изъёслы ватсам дунъёс понна налогез вератэк, - та Законэн тупатэм мындаез; предприятиослэн но организациослэн табышысьтызы (доходысьтызы) налог - та Законэн тупатэм мындаез; банкъёслэн но кредитъёсъя но страхованиея мукет организациослэн, биржаослэн, брокеръя контораослэн, уж но коньдон бергатон, вузан-басьтон кусыпъёсы пыриськись предприятиослэн табышысьтызы налог - 30 процент ставкая; нимаз адямиослэн доходъёсысьтызы налог - та Законэн тупатэм мындаез; инкуазь узырлыкъёсты уже кутэм понна тыронъёс - та Законэн тупатэм мындаез; предприятиослэн но организациослэн ваньбурысьтызы налог - та Законэн тупатэм мындаез; Музъем понна налог но городъёслэсь, посёлокъёслэсь музъемъёссэс но гурт ужъёсы кутӥськись музъемъёсты арендае басьтэм понна дун тырон та Законэн тупатэм мындаез; сиён-юонэ мынӥсь сырьёлэсь этил спиртлы, водкалы но ликёр-водка юонъёслы акцизъёс - басьтэм табышлэн 40 процент мындаез; музон вузъёслы (винаослы, сурлы но мукетъёсызлы) акцизъёс, му вӧйлы, газлы, бензинлы но автомобильёслы акцизъёсты вератэк, - басьтэм табышлэн 100 процент мындаез; кун асваньбурын луись узырлыкъёсты нимаз кузёос кие выжтыса но вузаса поттэм коньдон - туала законъёсын тупатэм мындаез; нюлэс понна вытъёс но нюлэсъёсты арендая уже кутэм понна дун тыронъёс - басьтэм табышлэн 60 процент мындаез; кун асваньбуре пырись акциосъя дивидендъёс, озьы ик кун ванбурез арендае сётыса басьтэм табыш - туала законъёсын тупатэм мындаез; сьӧрлось кунъёслэсь коньдонзэс но мукет кунъёслэн валютаосынызы тыриськон документъёсты басьтэм понна налог - поттэм табышлэн 40 процент мындаез; лицензиос сётъяку но санэ басьтыса пусйылыку, Россия Федерацилэн законъёсысьтыз чакламъя басьтэм коньдон; налогъёс басьтыны чакламтэ табышъёс, кудъёссэ туала законёсъя пыртыны кулэ республикалэн бюджетаз; вузкаронысь налог - табышлэн 40 процент мындаез; ву объектъёсты уже кутэм понна дун тырон - табышлэн 15 процент мындаез; мукет пумо налогъёс, коньдон бичанъёс, вытъёс но, туала законъёсын чакламъя, республикалэн бюджетаз пыртоно музон тыронъёс. 5-тӥ ёзэт. 1999-тӥ арын 1-тӥ январьысен Удмурт Республикалэсь кун асваньбурзэ аукционъёсын яке конкурсъя нимаз кузёослы вузаса, озьы ик приватизация ортчытыку кылдытэм акционеръёслэн огазеяськонъёссылэсь акциоссэс вузаса поттэм коньдонэз тазьы люкылоно: республикалэн бюджетаз - 100 процентсэ, со пӧлысь: республикалэн банкъёсы коньдон тырем сётэм муртъёслэсь правооссэс утёнъя общественно-государственной фондаз - 5 процентсэ. 6-тӥ ёзэт. 1999-тӥ арын музъем понна налог но арендая дун тырисьёс со коньдонзэс сёто: городъёсын но посёлокъёсын музъем понна быдэсак Федеральной казначействолэн органъёсаз усьтэм счётъёсы, Россия Федерациысь пӧртэм ёзъёсысь бюджетъёс куспын бӧрысь тазьы люкылон вылысь: федерацилэн бюджетаз - 30 процентсэ; республиклаэн бюджетаз - 20 процентсэ; интыосысь бюджетъёсы - 50 процентсэ; гурт ужъёсы кутӥськись музъемъёс понна - 10 процентсэ республикалэн бюджетаз. Ваньмызлы музъем кутӥсьёслы, нимаз адямиосты но гурт хозяйствоын ваньбур поттӥсьёсты вератэк, музъем понна налог тырыны таӵе дыръёс тупатоно: 15-тӥ март, 15-тӥ июнь, 15-тӥ сентябрь, 15-тӥ ноябрь. 7-тӥ ёзэт. Музъем понна налоглы 1998-тӥ арын тупатэм ставкаос 1999-тӥ арын вань пумо музъемъёс пумысен будэтӥсько кык поллы, гурт ужъёсы кутӥськись музъемъёсты вератэк, кудъёсыз сётэмын гурт хозяйствоя организациослы, крестьян (фермер) хозяйствоослы, озьы ик гражданъёслы, ас доразы хозяйство нуон, сад возён, бакча сиёнъёс будэтон, пудо вордон, турын турнан, пудо возьман вылысь. 8-тӥ ёзэт. Нюлэсъёсты уже кутэм понна писпуосты пыд йылазы вузаны тупатэм ичи дунъёсъя басьтэм коньдон 1999-тӥ арын люкылӥське Россия Федерацилэн законъёсыныз юнматэм нормативъёсъя но законъёсын чакламъя кутӥське нюлэсъёсты выльдыны. 9-тӥ ёзэт. Республикаысь калыклэсь тазалыксэ утён вылысь тупатоно Удмурт Республикалэн улосвылаз ваёно курыт но ляб кудӟытӥсь юонъёслэсь сертификатъёслы тупамзэс эскерем но лушкем гожъёсын пусъёс пуктылэм понна одӥг литрезлы тамында тыронъёс тупатоно: водкалы, ликёр-водка юонъёслы - ичи уждунлэн сизьым процентэз мында; вискилы, брендилы, коньяклы, винаослы, вина юонъёслы - ичи уждунлэн одӥг процентэз мында. Кудӟытӥсь юонъёслэсь сертификатъёслы тупамзэс эскерем но лушкем гожъёсын пусъёс пуктылэм понна басьтэм коньдон мынэ республикалэн бюджетаз. 10-тӥ ёзэт. 1999-тӥ арын предприятиослэн но организациослэн ваньбурысьтызы налог басьтыны тупатоно налог тыроно ваньбурлэн дунызлэсь кык процентсэ мында. 11-тӥ ёзэт. 1999-тӥ арлы кужыме кельтоно Удмурт Республикаысь Кун Кенешлэсь "Удмуртнефть" ОАО-лэсь музъемпуш узырлыкъёсты уже кутэм понна тыронъёссэ кӧнялы ке кулэстон сярысь" 1997-тӥ арын 3-тӥ апреле кутэм 417-И номеро постановленизэ, музъемпуш узырлыкъёс понна дун тырон ставкаез "Удмутнефть" ОАО-лы 9,4 процент тупатыса, со республикалэн но интыослэн 1999-тӥ арлы бюджетъёсазы начар интыосысь ватсаса му вӧй поттэм чотын тыронъёссэ быдэсъяз но ваньзэ алиоссэ скважинаосты ужатӥз ке. 12-тӥ ёзэт. Асэстэм гыроно-кизёно музъемъёс интые выльёссэ уже кутыны шоро-куспо дун 1999-тӥ арын одӥг гектарлы 124 манет тупатоно. Со коньдон мынэ интыосысь бюджетъёсы. 13-тӥ ёзэт. Юнматоно вуись налогъёслэсь но доходъёслэсь кӧня люкетсэс (процентъёсын) Федерацилэн бюджетаз, республикалэн бюджетаз, интыосысь бюджетъёсы сётон нормативъёсты. 14-тӥ ёзэт. Сӧсыръёслэн общественной огазеяськонъёссы но соослэн асваньбуразы пырись организациос понна, кудъёсаз вань ужасьёс пӧлысь ичизэ витьтон процентэз луо сӧсыръёс, автомобиль сюресъёсты уже кутӥсьёслэсь Удмурт Республикалэн сюресъёсъя улосвыл фондаз мынӥсь налоглэсь быдӟалазэ тупатоно одӥг процент мында, со сяна, соосты мозмытоно городъёслэн но посёлокъёслэн музъемъёссы понна налог тыронлэсь, кудӥз мыныны кулэ республикалэн бюджетаз. 15-тӥ ёзэт. Автомобильёс басьтэм понна Удмурт Республикалэн сюресъёсъя улосвыл фондаз мынӥсь налог тыронлэсь мозмытоно: дышетон, культура, тазалыкез утён, ветеринария (нимысьтыз техника басьтон ласянь), калыкез улон-вылонын шугадӟонъёслэсь утён удысъёсысь кун но интыысь учреждениосты; сӧсыръёслэн общественной огазеяськонъёссы киын луись организациосты, кудъёсаз вань ужасьёс пӧлысь ичизэ витьтон процентэз луо сӧсыръёс; Удмурт Республикаысь Калыклэсь тазалыксэ утёнъя министерстволэсь эмъян тӥрлыкъёсты тупатъян-выльдонъя мастерскойзэ; Удмурт Республикаысь Югдурез утёнъя министерстволэсь ёзъёссэ но Удмурт Республикаысь Юстицияя министерстволэсь уголовной ужъёс понна кыл кутытонэз быдэсъясь учреждениоссэ - республикалэн бюджетысьтыз коньдон чотын автотранспорт басьтэм понна. 16-тӥ ёзэт. Улон-вылонын юрттэт басьтыны тужгес кулэяськись гражданъёсты тупатэм мында уже кутӥсь организациосыз мозмытоно табышысь налоглэсь сыӵе люкетсэ тыронлэсь, кудӥз мынэ республикалэн бюджетаз - сомындалы, кӧня коньдон быдтӥз организация со гражданъёсты уже интыяны, кыдытэм котькуд ужан инты понна 100 ичи уждунлэн быдӟалаезлэсь ортчытэк. 17-тӥ ёзэт. Красногорск ёросысь Валамаз посёлокын али ужась но кылдытоно выль предприятиосты но организациосты, кудъёсаз вань ужасьёс пӧлысь ичизэ кык куиньмосэз луо Валамаз посёлокын улӥсьёс, мозмытоно котькыӵе пумо налогъёслэсь сыӵе люкетсэс тыронлэсь, кудӥз мынэ республикалэн бюджетаз, озьы ик сюресъёсъя уловыл фондэ тыронъёслэсь, будэтэм дунъёсысь налогез, спиртлы, водкалы, ликёр-водка юонъёслы но музон со выллем вузъёслы акцизъёсты вератэк, туала законъёсын чакламъя. Красногорск ёросысь депутатъёслэн Кенешсылы дэмлано Валамаз посёлокысь производствоя предприятиосты ёрослэн бюджетаз налогъёс тыронлэсь мозмытыны. 18-тӥ ёзэт. Промышленностьысь правоя котькыӵе амалъёсын радъяськем предприятиосты но организациосты мозмытоно 1999-тӥ арын, ӵошатэм дунъёсын лыдъяса, 1998-тӥ арын сярысь, ватсаса тросгес продукция поттыса басьтэм табышысь налог тыронлэсь, республикалэн бюджетаз мыноно люкетэзлэн 100 процентэзлы. Та льготая люкаськем коньдон кутӥське предприятиослэсь ас производствозэс азинтыны гинэ. 19-тӥ ёзэт. 1999-тӥ арын табышысь налоглэсь республикалэн бюджетаз мынӥсь люкетсэ тыронлэсь мозмытоно: Удмурт Республикаысь Юстицияя министерстволэсь уголовной ужъёс понна кылкутытонэз быдэсъясь учреждениоссэ, кудъёсыз интыяськемын Удмурт Республикалэн улосвылаз; "Спецгазавтотранс" ДОАО огазеяськонэз, озьы шыръям коньдонэз футболэн шудонъя "Газовик-Газпром" командаез возьыны но республикаысь Центральной стадионэз вылдытыны Удмурт Республикаысь Правительствоен кенешыса дасям сметаосъя висъян вылысь. 20-тӥ ёзэт. Республикалэн бюджетысьтыз коньдонэз 1999-тӥ арын нырысь ик таӵе удысъёсы висъяны тупатоно: уждун (коньдон) тырон, социальной страхование но бюджетэ пырисьтэм кун фондъёсы тыронъёсты лыдэ басьтыса; стипендиос тырон; адямиосты сюдон (сиён-юон сётон); эмъюмъёс но бинетъёс басьтон; ляб адӟись гражданъёслы нимысьтыз литература басьтон; опекае (попечительствое) басьтэм нылпиослы коньдон тырон; нылпи юртъёсты но школа-интернатъёсты возьыны коньдон висъян; пудоос но пӧйшуръёс пӧлы паласькись висёнъёс вӧлмонэз алонъя ужрадъёс ортчытъян; нылпиослы кун пособиос тырон. 21-тӥ ёзэт. Бюджет чотын улӥсь организациосын ужасьёслы уждун тыронъя Огъя тарифъёсын сеткалэн нырысетӥ разрядэзлы тарифъя ставкаез (окладэз) 1999-тӥ арын 1- тӥ апрельысен тупатоно толэзяз 110 манет. Удмурт Республикаысь Правительстволы, ёросъёсысь но городъёсысь администрациослэн йыръёссылы та ёзэтэз быдэсъян радлык тупатоно. 22-тӥ ёзэт. Удмурт Республикалэн улосвылъёсызлы коньдонэн юрттэт сётонъя республикалэн фондэз. 1999-тӥ арын кылдытӥське, налогъёс пыр но Россия Федерацилэн субъектъёсызлы коньдонэн юрттэт сётонъя Федерацилэн фондысьтыз республикалэн бюджетаз вуись вань коньдонлэсь 43,8 поцентсэ висъяса. Юнматоно республикалэн коньдонэн юрттэт сётонъя фондысьтыз тамында люкетсэ котькуд улосвыллы висъянэз: Ёросъёс процентъёсын Чаклам коньдон (сюрс манетэн) Алнаш ёрос 4,190 21478 Балезино ёрос 6,570 33675 Вавож ёрос 3,499 17934 Глазов ёрос 3,597 18437 Грахов ёрос 2,791 14304 Дэбес ёрос 3,422 17543 Завьялово ёрос 4,938 25313 Камбарка ёрос 2,621 13433 Кез ёрос 3,828 19623 Кизнер ёрос 4,639 23779 Кияса ёрос 2,780 14250 со пӧлын "Косолаповское" муниципальной ёз - 92,2 Красногорск ёрос 2,619 13426 Пичи Пурга ёрос 4,979 25520 Можга ёрос 3,248 16651 Селта ёрос 3,039 15577 Сюмси ёрос 3,381 17332 Ува ёрос 5,218 26749 Шаркан ёрос 3,308 16958 Юкаменск ёрос 2,820 14453 Яр ёрос 3,582 18363 Сарапул город 14,641 75046 Воткинск город 4,977 25510 Можга город 5,312 27231 23-тӥ ёзэт. Республикалэсь улосвылъёслы коньдонэн юрттэт сётонъя фондзэ толэзьлы быдэ ялан ватсаса тырмытоно чаклам толэзьлэсь азьло отчётъя нуналлы, республикалэн бюджетаз налогъёсъя но трансфертъя коньдон вуэмез лыдэ басьтыса. 24-тӥ ёзэт. Республикалэн улосвылъёслы Коньдонэн юрттонъя фондысьтыз зэмос коньдон висъян кулэстӥськоз сомындалы, кӧня сётӥськозы улосвылъёслэн бюджетъёсазы дотациос, субсидиос, Федерацилэн законъёсыныз, республикалэн законъёсыныз, Россия Федерацилэн Президентэзлэн указъёсыныз, Россия Федерациысь Правительстволэн но Удмурт Республикаысь Правительстволэн решениосынызы тупатэмлэсь вылтӥ ватсаса, налогъёсъя но мукет льготаос. 25-тӥ ёзэт. Республикалэсь бюджетсэ утён но отчы тырмыт коньдон пыртон вылысь, Удмурт Республикаысь Правительство быгатэ, Удмурт Республикалэн куд-ог ёросъёсысьтыз но городъёсысьтыз администрациос республикалэн бюджетаз налогъёсъя но мукет доходъёсъя коньдон тыронъя но кун кулэяськонъёсты быдэсъянэ вузъёс басьтонъя, ужъёс но услугаос понна дун тыронъя Россия Федерацилэн, Удмурт Республикалэн законъёсынызы тупатэм радлыкъёсты тӥязы ке, республикая программаосты но ужрадъёсты со улосвылъёсын быдэсъян понна, республикалэн бюджетысьтыз коньдон висъянэз, озьы ик республикалэн улосвылъёслы коньдонэн юрттонъя фондысьтыз ваче расчётъёсъя, субвенциосъя, бюджетысь ссудаосъя но кредитъёсъя коньдон сётъянэз дугдытыны. 26-тӥ ёзэт. Дышетон удысысь покчи нылпиослы учреждениосын ужасьёсты нуналлы быдэ одӥг пол сюдыны республикалэн бюджетысьтыз ичи уждунлэн куинь процентэз мында коньдон висъяны тупатоно. 27-тӥ ёзэт. Опекае (попечительствое) басьтэм нылпиосты сюдон-будэтон понна, нылпи юртъёсты но школа-интернатъёсты возён понна, льготаосъя эмъюмъёс сётъян понна, ёросъёсысь но городъёсысь администрациосын лыдэ басьтэм семьяосысь пиналъёсты сюдон понна, "Ветеранъёс сярысь" Федерацилэсь законзэ быдэсъян понна, ужасьтэм муртъёслы медициная страхование понна коньдон висъяське интыосысь бюджетъёсысь, озьы ик республикалэн улосвылъёслы коньдонэн юрттэт сётонъя фондысьтыз. 28-тӥ ёзэт. Тупатоно: нылпиосын гражданъёслы пособиос тыронъя 1998-тӥ ар понна пунэме кылемез берыктыны гарантия сётэ Удмурт Республикалэн казнаез, со коньдон тыриськоз 2000-тӥ ар ӵоже, Россиысь Сберегательной банкен берен курытозь понэм коньдонъя со вакытлы тупатэм процентъёс ватсаса. 29-тӥ ёзэт. Воткинск, Игра, Каракулино, Сарапул, Якшур-Бодья ёросъёсысь администрациослы дэмлано Удмурт Республикаысь Правительствоен гожтэм тупанкылъёсъя республикалэн бюджетаз выжтыны басьтэм доходъёслэсь уже кутэм коньдон сярысь тросгес луэм люкетъёссэс - быдэн 8048 сюрс манет, 43479 сюрс манет, 7306 сюрс манет, 1332 сюрс манет, 3916 сюрс манет, - бӧрысь соосты та Законлэн 1-тӥ ёзэтаз чаклам ужъёсы сётон вылысь. 30-тӥ ёзэт. Дышетон ужъёсты быдэсъясь педагогъёслы удыссыя книгаос но газет- журналъёс басьтэм понна коньдон берыктӥське туала законъёсын чакламъя, Федерацилэн бюджетысьтыз коньдон висъяку. 31-тӥ ёзэт. Воткинск, Игра, Каракулино, Якшур-Бодья ёросъёсысь администрациослы дэмлано нылпиосын гражданъёслы кун пособиос тырыны асьсэ коньдонзы чотын, кудӥз чакламын со ёросъёсысь бюджетъёсы налогъёсъя тырон нормативъёсын. 32-тӥ ёзэт. Нылпиосын гражданъёслы кун пособиосты 1999-тӥ арын бӧрсьысь таӵе радъя тырыны тупатоно: сыӵе гражданъёслы, кудъёсызлэн семьязы котькуд муртлы шорлыдын доход басьтэ огшоры улыны одно кулэлэсь ичи; сыӵе гражданъёслы, кудъёсызлэн семьязы котькуд муртлы шорлыдын доход басьтэ огшоры улыны одно кулэ мында яке солэсь одӥг но ӝыны поллы ятыргес; сыӵе гражданъёслы, кудъёсызлэн семьязы котькуд муртлы шорлыдын доход басьтэ огшоры улыны одно кулэлэсь одӥг но ӝыны поллэсь тросгес. 33-тӥ ёзэт. Удмурт Республикаысь Правительстволы лэзёно йылаз-пумаз лэсьтымтэ юртъёсты вузаса басьтэм коньдонэз выль лэсьтӥськонэ кутыны. 34-тӥ ёзэт. Улон коркаосты утялтыса возён но коммунальной юрттэтъёс понна гражданъёслэсь тыронъёссэс 1999-тӥ арын тупатоно улон интыосты утялтыса возем, тупатъям но отын улэм но коммунальной юрттэтъёс понна экономика ласянь шонер лыдъяса кутэм коньдонлэн троссэ 40 процентэз мында. Улон инты но коммунальной юрттэтъёс понна (улон интылы тупатэм социальной нормаез но коммунальной юрттэтъёс басьтыны нормативъёсты чакласа) дун тырон семьялэн огъя доходысьтыз 12 процентлэсь трос луыны кулэ ӧвӧл. 35-тӥ ёзэт. Налог тырисьлэсь республикалэн бюджетаз налогъёсъя но мукет пумо одно тыронъёссэ берлолы (вакытэн-вакытэн быдэсъяны) кельтыны луэ, та арлэн сьӧраз ортчытэк, но куать толэзьлэсь кемалы ӧвӧл, таӵе учыръёсы: республикалэн бюджетысьтыз коньдон висъян яке кун заказъёсты быдэстэм понна дун тырон ӝегатэмын луиз ке - берлолы кельтэм тыронлэсь процентъёс басьтытэк; одӥг пол налог тырыку яке налогъёс но соосъя пеняос тырон пумысен пуктэм куронъёсты быдэсъяку, банкротэн лыдъяны кышкатон учыре - бюджетысь коньдонэз уже кутэм понна Россия Федерациысь Центральной банкен коньдон сётъяны та вакытэ тупатэм ставкалэн ӝыныез мында процентъёс басьтыса; инкуазьын шукыръяськон технология ласянь зуркан-куашканъёс луэмен яке витьымтэ шорысь укыр кышкыт яке та вакытэ тупатыны луонтэм югдур кылдэмен сэрен, бадӟым изъянэ вуон дыръя - бюджетысь коньдонэз уже кутэм понна Россия Федерациысь Центральной банкен коньдон сётъяны та вакытэ тупатэм ставкалэн ӝыныез мында процентъёс басьтыса. 36-тӥ ёзэт. Удмурт Республикаысь Правительстволы право сётоно республикалэсь 1999-тӥ арлы бюджетсэ быдэсъяку воштонъёс-тупатонъёс пыртылыны: удысъёслы республикалэн бюджетысьтыз коньдон висъянэ - нимаз-нимаз учреждениослы, ужрадъёслы яке мукет ужъёслы коньдон висъянъя полномочиосты мукетъёслы сётэмен валче; министерствоослы, ведомствоослы экономика ласянь классификацияя, пусъем статьяосъя но кыӵе ке пумо расходъёсъя уже кутоно коньдонэз люкылонэ - Коньдон удысэз эскеронъя органъёслэн ӵектэмзыя, бюджетысь коньдонлэсь чакламтэ удысъёсы кутэм люкетсэ али висъяно коньдон чотэ пыртэмен валче. 37-тӥ ёзэт. Удмурт Республикаысь Правительство быгатэ, республикалэн бюджетысьтыз ужъёслы классификация лэсьтон люкетъёсызъя (пичи люкетъёсызъя) юнматэм коньдон висъянэз чакласа, берыктон но процентъёс тырон вылысь, 1999-тӥ арын коньдон висъяны: агропромышленной комплексысь предприятиослы ӝог ужъёс вакытэ кредитъёс сётъян понна - одӥг арозьлы, висъям коньдон понна Россиысь Центральной банкен коньдон сётъяны та вакытэ тупатэм ставкалэн ӝыныез мында процентъёс басьтыса; республикалэн сиён-юонэн фондаз гурт хозяйствоысь продукция кулэ мында басьтон понна, кудзэ рынок пыр тырмыт люканы уг луы, - одӥг арозьлы, висъям коньдонэз уже кутэм понна Россиысь Центральной банкен коньдон сётъяны та вакытэ тупатэм ставкалэн ӝыныез мында процентъёс басьтыса; промышленностьлэн удысъёсаз инвестициос лэсьтонъя программаосты, ужан интыос кылдытонъя проектъёсты быдэсъян понна - Удмурт Республикаысь Правительствоен тупатэм радлыкъя но куронъёсъя. Городъёсысь но ёросъёсысь интыын аскивалтонъя органъёслы дэмлано: инвестициосъя проектъёсты быдэсъяны юрттонъя ужрадъёс пусйыны; инвестициосъя проектъёсты быдэсъян, ужан интыос кылдытъян но котырысь инкуазез утён понна пусъем ужрадъёслы коньдон висъяны, со коньдонэз берыктон но процентъёс басьтон вылысь. 38-тӥ ёзэт. Удмурт Республикаысь Правительстволы лэзёно ёросъёсысь но городъёсысь администрациослы финансъя ар ӵоже республикалэн бюджетысьтыз процентъёстэк бюджет ссудаос сётъяны, со интыосысь бюджетъёсы коньдон бергес вуэмен сэрен, кассаын "пась" интыосты быдтон понна. 39-тӥ ёзэт. Удмурт Республикалэн ёросъёсысьтыз но городъёсысьтыз администрациослы дэмлано улосвылъёсысьтызы арлы чакламлэсь тросгес вуэм коньдонзэс выль лэсьтӥськонэ висъяны. 40-тӥ ёзэт. Тупатоно: организациос республикалэн бюджетысьтыз коньдонэз чакламтэ удысъёсы кутэм понна, Россия Федерациысь Центральной банкен коньдон сётъяны та вакытэ тупатэм ставкалэн кык полэсэз мында штраф басьтӥське; республикалэн бюджетысьтыз басьтэм коньдонэз дыраз берыктымтэ но тупатэм процентъёсты но штрафъёсты тырымтэ понна кулэстӥське яке дугдытӥське кун ласянь котькыӵе юрттэт сётон, налогъёсъя тыронъёсты берлолы кельтонэз но вераса; пунэме кылемлэсь бадӟым люкетсэ, озьы ик республикалэн бюджетысьтыз берыктон вылысь сётэм коньдонэз уже кутэм понна процентъёсты дыраз тырымтэ понна котькуд ӝегатэм нуналлы басьтӥське Россия Федерациысь Центральной банкен коньдон сётъяны та вакытлы тупатэм ставкалэн куинь сюмос люкетэз мында штраф; организациослы республикалэн бюджетысьтыз сётэм коньдонэз берыктон, озьы ик со коньдонэз уже кутэм понна тыронъёс, тупатэм штрафъёс лыдъясько республикалэн бюджетаз одно тыронъёсын огкадь. 41-тӥ ёзэт. Удмурт Республикаысь Правительстволэн правоез вань республикалэн бюджетаз вуись огъя доходлэн куамын процентозез мында пунэме коньдон басьтыны. 42-тӥ ёзэт. Удмурт Республикаысь Правительстволы лэзёно, ас вылаз гарантия басьтыса, калыклэсь коньдонзэ огкылъёсъя кутыны, Удмурт Республикалэн ёросъёсысьтыз гуртъёсын но городъёсын газ гумыос кыскон понна. 43-тӥ ёзэт. Удмурт Республикаысь Праивтельство быгатэ кун ласянь гарантия сётыса яке кылкутонэз ас вылаз басьтыса, инвестициосъя проектъёсты быдэсъян понна, республикалэн 1999-тӥ арлы бюджетысьтыз уже кутоно вань коньдонлэн 10 процентозез мында пунэме коньдон но кредитъёс басьтыны. 44-тӥ ёзэт. Пичи ужбергатонлы юрттонъя Удмурт кун фондлы берыктон вылысь 1997- 1998-тӥ аръёсы сётэм коньдонэз, озьы ик сое уже кутэм понна тыронъёсты берыктыны кулэ республикалэн бюджетаз но сое кутоно сыӵе ужъёсы ик. 45-тӥ ёзэт. Республикалэн 1999-тӥ арлы бюджетаз юнматоно Удмурт Республикалэсь Азинсконъя бюджетсэ. Удмурт Республикалэн Азинсконъя бюджетэз кылдытӥське: - Удмурт Республикаысь Правительстволэн кун гарантиосызъя но кылкутонэз ас вылаз басьтэмезъя, пунэме басьтэм коньдон но кредитъёс чотын - республикалэн бюджетысьтыз уже кутоно вань коньдонлэн 5 процентэз мында - 140000 сюрс манет; - республикалэн бюджетысьтыз висъям коньдон чотын - 16000 сюрс манет; со пӧлысь: улон коркаос басьтыны кредитъёс - 15000 сюрс манет; пичи бизнеслы но ужбергатонлы - 1000 сюрс манет; - республикалэн бюджетаз вуись мукет коньдон чотын (кун асваньбурез, кун киын луись акциосты вузаса поттэм коньдонэз, дивидендъёсты, бюджетысь коньдонэз уже кутэм понна процентъёсъя тыронъёсты, пеняосты, штрафъёсты, пунэме кылемъёсты ваньбурен берыктонэз - республикалэн бюджетаз вуоно коньдонлэсь вылтӥ та Законэн чаклам люкетсэ но вераса). Тупатоно: Азинсконъя бюджетысь коньдон уже кутӥське, конкурсъёс ортчытъяса, берыктон вылысь, огдырлы сётъян но процентъёс басьяса, удысъёсты нырысь интыосы пуктонэз лыдэ басьтыса. 1999-тӥ арлы Азинсконъя бюджетлэсь коньдонзэ люкано Удмурт Республикаысь Коньдон ужпумъёсъя министерстволэн субсчётаз. Азинсконъя бюджетысь коньдонэз уже кутон радлыкез тупатэ Удмурт Республикаысь Правительство. 46-тӥ ёзэт. Удмурт Республикаысь Правительствоын лэзёно Удмурт Республикаысь Правительстволэсь пунэме басьтэм коньдонэз берыктонъя кыл сётон бумагаос (сертификатъёс) поттыны, республикалэн бюджетысьтыз коньдон висъян но организациос куспын, организациос но республикалэн бюджетэз куспын ваче пунэме кылемъёсты тырон понна. 47-тӥ ёзэт. Удмурт Республикаысь Котыр инкуазез утёнъя комитетлы лэзёно республикаысь но интыосысь экологияя фондъёслэсь 10 процентозь люкетсэс кутыны, комитетлэн городъёсысь но ёросъёсысь ёзъёсаз уждун тырон понна. 48-тӥ ёзэт. Республикалэн 1999-тӥ арлы бюджетысьтыз ватсаса коньдон кутыны, озьы ик отчы коньдон люкан инъетэз сюбегатыны чаклам правоя нормативной актъёс быдэсъясько республикалэн бюджетаз ватсаса коньдон пыртыны но (яке) республикалэн 1999-тӥ арлы бюджетысьтыз нимаз-нимаз ёзэтъёсъя уже кутоно коньдонэз синэтыны луонлыкъёс кылдыку гинэ. 49-тӥ ёзэт. Выльысь кылдытэм муниципальной ёзъёслы коньдон висъяны луэ интыосысь юнматэм бюджетъёсъя но та Законын чакламъя гинэ. 50-тӥ ёзэт. Удмурт Республикаысь Правительстволы: чаклано финн-угор калыкъёслэн фольклоръя ВИИ ӵош фестивальзылы коньдон висъянэз; 1999-тӥ арлэн нырысетӥ кварталаз ужамлы йылпумъянъёсъя эскероно но Удмурт Республикаысь Кун Кенеше сётоно республикалэн бюджетэзлы проектэ воштонъёс пыртон пумысен кылтупанъя комиссие 1999-тӥ арын 24-тӥ феврале вуэм дэмланъёсыз быдэсъянъя ӵектонъёссэ. 51-тӥ ёзэт. Та закон кужыме пыре сое официальной амалэн печатьын поттэм нуналысен, нош 11-тӥ, 14-тӥ, 15-тӥ, 16-тӥ, 17-тӥ, 18-тӥ, 19-тӥ ёзэтъёс - 1999-тӥ арын 1-тӥ январьысен. Удмурт Республикаысь Кун Кенешлэн Тӧроез А. А. Волков. Ижевск город, 1999-тӥ арын 25-тӥ феврале � 750-И Шудо сюрес вылэм ай ЮМОРЕСКА Кышноеным уртче валес вылын кыллиськом. Озьы, юн тупаса ваче кыллён шорысь кышное тырттэм уробо кадь тыкыр-такыр такыртыны кутске. - Оконь, сиськемысь уд дугдылӥськы, нош пайдаез ӧвӧл. Вань сиемед-юэмед соку ик пыр-р-р вия-а, мар-а? Прочь номырзэ уг валаськы. Уть ай, гырпумъёсыд ӵогъяны дасям майыг пум кадесь. Йылсо! Нош со урдлыосыд, урдлыосыд! Прочь тын кадесь ук! Пырак педло мычиськылэмын. Нош кытӥ кулэ, отӥ малы ке йӧскадь уг мычиськы. Сыӵе кӧтвеськантэм кылъёсты кылэм бере, мынам но йыры беризь кур кадь кур луэ но пунэмзэ вератэк уг чидаськы. - Палагъя, ну в рот малина, ну пытица! Тынад чик-а, мар-а монэ ултӥятэк улэмед уг луы? Ваньмызлы тон кадь уӵыс куко но пычей кадь быгылес луоно шат? Шедьтэм ук! Палагъя сыӵе дыръя уката но пуроме. - Оконь, мон-а пытица, мон-а? Нош тон кин соку? Пицца тон, вот кин! Валад-а? Монэным копаськыса кылльытозь, огпол ке но коть со кенешазы ветлы вал. Тӥни адямиос сюл кадь контора пала кыстӥсько. Мын ай туба, оло мар ке но выльзэ вералозы. Ну пытица, ну в рот малина, кызьы озьы Палагъя кышномурт ке но куддыръя укыр визьмо вераське. Воксё паймисько. Шуныт валесэн йырин луоз на шат сыӵе дыръя. Кышноелы нялтас кариськисько. - Палагъя, а мар-о, ветло, кылзо, эскеро, мар сыӵе луиз контора палан? Оло кин ке но парсьсэ ӵушка? Оло кыӵе ке коммунике вуиз? Туала вакытэ мар но уг луы угось. Сэрытак дӥсяськи, ымам сылалтэм кияр куртчи но "дуй не стой" контора пала лобатӥ. Контораын калыкез тачак вылэм ини. Шок-пуль шокаса, ДВП Митрей вӧзы пукси, кызъем карыса, солэсь юасько... - Кылем сӥзьыл понна уксё сётъялозы, дыр, око-о-о, Митрей? Паймеменыз Митрейлэн ымыз ик куалак пась луиз. Шорам быльк учкиз но ка-а-ак кеськиз ук! - Ымысьтыд киярдэ ньыл ин ай! Гуньдыса чоньдыны шедьтод! Уксё, уксё! Быръёнъёс азьын сяна али калыкез уг люкалляло ни, така йыр! Адямиос кризис шуонысь потыны шудбуро сюрес утчаса шугектӥзы ини. Нош тон кылем сӥзьыл понна уксё, уксё... Тӥни со кандидат-мандат шуон муртъёссылы юанъёс дася ай, тэк пукытозь! Ослоп! Созэ мон туж яратӥсько, калык азьын вераськисьёслы мудрон, тунсыко, пӧртэм юанъёс сётъяны шуисько. Со вие катанчи усьтӥськиз но сцена вылэ Мадера Дарья, председательмылэн секретарь-референт шуонэз потӥз, жингрес куараен ваньмызлы ялӥз... - Гажано сӥё-дано адямиос, али тӥ азьын вераськоз депутатэ кандидат, кун пуш ужъя ёзэтын тыршись, "Тыропуз" огазеяськонлэн азьветлӥсез, Дурдаров господин... Кема вераськиз со. Мар но ӧз вера. Нош огшоры адямиос понна, са-а-амой шумпотымонэз вал со - кризисысь потыны шудбуро сюрес вылэм ай. Фу-у-у, сюлэм ик ка- а-ньылак луиз ява. "Тыропуз" партия понна куараостэс сётӥды ке, улон чутырак мукет нюкетӥ кошкоз, пе. Кин тодэ, кин тодэ. Кун пушын ужась мурт кылзэ юнме шорысь уз жугы но. Нош юанъёс сётъяны кутскемзы бере, мон но, адӟем карыса, юано кожасько... - Дурдаров господин, ми кадь ноголёк муртъёсты валэктэ вал, али кыӵе югдур Килимандтаро пумысен? Укыр тодэм потэ. Депутатэ кандидат соку ик йӧн-йӧн кариськиз, нюлам пияш йырзэ маялтӥз но ӝот-ӝот валэктӥз... - Мон возьмай, мон вити та визьмо юанэз! Кун пушын тыршисьёс та йырвандӥсьёсын али туж кужмо ожмасько. Та банда ӝоген чиптэм-чаптэм быдтэмын луоз. Атаманзэс гинэ ум шедьтӥське на. Швейцарие тузэм, шӧдске. Но шедьтом, кутом, быдтом! Тӥ куараостэс гинэ ми понна эн жалялэ! Азьлань "Тыропуз"! Азьло! Залэз кужмо кичабонъёс зурк-зурк зуркатӥзы. Нош ӝӧк сьӧрын куинь председательмы, ым пушказ маке сволочь шуэм выллем шыпыртӥз но ӝӧкшет ултӥ мыным туж зол мыжыксэ сэзъяз. Собере Мадера Дарья кыл сётӥз "Ческыт сарба" партилэн азьветлӥсезлы, ӟечез-бурез утёнъя ёзэтын тыршисьлы, Клизманов господинлы. Таиз но оратор далай гинэ ӟабыльтӥз. Трос выльзэ вераз. Нош огшоры адямиос понна, са-а-амой вылез вал со - кризисысь потыны шудбуро сюрес кыкетӥез но вылэм на. Со понна ческыт сиыса-юыса улоно, пе. Зэмзэ но, малы ке берло аръёсы гылэт сием потыса улӥське. Тӥни озьы, пе, тазалык луиз ке, улон тупыттэм мукет вирсэръёстӥ бызёз. А шонер вера ведь, шонер. Ӟегез-бурез утёнъя ёзэтын тырше бере, юнме шорысь кылзэ уз нярӟыты ук. Юанъёслы дыр висъям бере, марлы йырез мултэссэ тӥяса улод шуыса, юанме азьлозэ ик сётоно кариськи... - Клизманов господин, ми кадь нодтэм муртъёслы валэктэ вал, али кыӵе югдур Килиманджаро пумысен? Укыр тодэм потэ. Депутатэ кандидат меӵак но могак луиз ке но ӝогак, кыӵак сэзъялскиз, кисыысьтыз пичи бумага поттӥз, отысь уӵерак мар ке лыдӟиз но валэктӥз... - Сюлэм шӧдӥз, шӧдӥз сюлэм, вирсэръёс но алӥзы, таӵе юан кин ке но одно ик сётоз шуыса. Мар бен, чик ватытэк но танӥськытэк пусйыны кулэ, та кышкыт висёнэн али улон но кулон вискын туж кужмо нюръяськон мынэ. Но ми сое вормом! Кӧня ке чидалэ на. Ми понна куараоссэс гинэ эн жалялэ. Азьлань, "Ческыт сарба"! Азьлань! Залэз нош ик кужмо кичабонъёс зурк-зурк зуркатӥзы. Нош ӝӧк сьӧрын пукись председательмы, ым пушказ маке курва шуэм выллем шыпыртӥз но ӝӧкшет ултӥ мыным суйзэ ик позыръяса, туж зол мыжыксэ сэзъя. Берпуметӥ кыл Марфа Дарья сётӥз экономчилы, наукая докторлы, "Нюлэм кунян" партилэн азьветлӥсезлы, уж утчанъя ёзэтын тыршисьлы, обжорин господинлы. Таиз но тодосчи трос лабыртӥз. Данак кылымтэ-адӟымтэзэ мадиз. Ну в рот малина, ну тодосчи, пырак шонерак вераз, кризисысь птон понна пыч-пыч ужаны кулэ, пе. Таӵезэ кылыса, мынам суй-пыд жилькак ӝутскиз. Ну в рот малина, шонер вера ведь, шонер! Нош огшоры адямилы, шонер верам сяна, мар кулэ на? Бусьтыр улон понна ужаны кулэ, ужаны! Валаськоды-а, уд-а, ой кӧты-ы-ы? Контораын пукисьёс пӧлын малы ке но огыр-бугыр луиз, омыр но тыл кадь ӟырдаз, лэся. Ваньмыз адямиос валазы, шӧдске, ужаны кулэ шуыса. Вӧзам пукись ДВП Митрей но кер-кор гинэ шока на, киоссэ ӟикыр-ӟукыр посэ, чиньыоссэ лысыр-лосыр тӥя. Кризисысь потон понна вань ужез али ик быдтыны дась кадь со. Тӥни кытчы вуттэ, макеме ӝутэ адямиез дыраз, шонер, ӟырдыт верам кыл! Паймод ява. Юанъёс сярысь поттылонэз ик ӧвӧл ни. Согизы юанъёсын сое. Дышем сямъя, мон но вужзэ ик юанме сётӥ. Ну в рот малина, пудо ик вань мон, юаса но улӥсько ук. Рос-прос, тупен-тупен, пыр-поч валэктон сётӥз, ява. Экономика, пе, ялан огсыр уг азинскы. Адями но я усе, то ӝутске. Куддыр нош, вал сямен, супыр-сапыр пыра но. Адями но я улэ, то кулэ ук. Сыӵе, пе, экономикалэн сямыз, циклэн-циклэн мынэ! Уката ик отчы Килиманджаро чуртнаське ке. Но Килиманджаро шуонзы али мырдэм гинэ шока на. Ӝоген ми сое выжытэм быдтом но, вить сю нунал ортчыса, котькуд адямилэн, шонерак вераса, феврале "Шевроле" машина басьтэмез луоз. Куараостэс гинэ ми понна эн жалялэ. Азьлань, "Нюлэм кунян!" Азьлань! Контораез нош ик кужмо кичабонъёс зурк-зурк зуркатӥзы. Нош ӝӧк сьӧрын пукись председательмы, ым пушказ шалава шуэм выллем нукыртӥз но мыжыкъёсын ӧз тырмы ни, шӧдске, ка-а-ак ӝӧк улэ ӵыжиз ук! Ӝӧк вылысь вуэн графин ик выж вылэ жин-куан пазьгиськиз. Ӟырдыт верам кыллэн, зэмзэ но, луонлыкъёсыз мертантэм паськыт но батыр луо вылэм. Нош калык со нуналэ кенешысь кыӵе ке но ӝутскем мылкыдын, выль кырӟанэз нёръяса дораз бертӥз. Шудбуро выль улон Асьмеос ми ӝутом. Нош кайта феврале Ми басьтом "Шевроле". Контораысь калык тӧлӟем бере, председательмы монэ дораз ӧтиз но гор-гор серекъяса шуэ: - Кылзы ай, Оконь, тон ноку но комильдо ӧй вал! Ӧвӧл но! Матысь сизьым сю аръёсы уд но луы! Ха-ха-ха! Килиманджаро, пе. Скотина тон! Табере мынам аслам сюлэмы потэ ини. Ну скотина, соиз валамон. Нош мар сыӵе со - комильдо? Уг тодӥськы. Словаре учкытэк, йӧнзэ уд шедьты, дыр. Уске, юмоке усёд. Тулэз тулэн ик палгыто уга. Кенеше ветлӥз Леонид Суровый. ПРАВИТЕЛЬСТВОЫСЬ ИВОРЪЁС Пайдаё пумиськонъёс Кылем арняе Москвае вуылыкуз Правительстволэн Председателез Павел Вершинин пумиськылӥз коньдон ужпумъёсъя министрлэн нырысетӥ воштӥсеныз Виктор Христенкоен. Удмурт Правительстволэн но Россия Федерациысь Правительстволэн кивалтӥсезлэн Евгений Примаковлэн бюджетэз юнматон ласянь азьвыл вераськемзыя эскеремын республика но центр куспын та ласянь огкыллэн быдэсъяськемез. Озьы Удмуртилы бюджетысь проценттэк 25 миллион манет ссуда висъян сярысь соглашение гожтэмын, кудӥз мыноз уждун тырыны. Коньдон вуыны кулэ апрельлэн кутсконаз. Пумиськон ортчиз Президентлэн Администрациезлэн кивалтӥсезлэн нырысетӥ воштӥсеныз Олег Сысуевен. Вераськон мынӥз "Буммаш" акционер огазеяськонлы федеральной бюджетысь взаимозачёт амалэн коньдон висъян, республикаысь предприятиослэсь обороная заказъёс понна пунэм тыронъёссэс пытсан, бюджетысь коньдон басьтӥсьёслы уждун тырон сярысь. Олег Сысуев озьы ик тунсыкъяськиз Удмурт Республикаысь Кун Кенеше быръёнлы дасяськонлэн мынэменыз. *** Удмурт Республикаысь Правительстволэн кивалтӥсез, Федеральной Собранилэн Федерацияя Советаз ужась Павел Вершинин гожтӥськиз дуннеысь странаослэн парламентъёссылы, Межпарламентской Союзлы, Европаысь Советлэн Парламентской ассамблеяезлы, Европаын кышкытлыклэсь утиськонъя но ог-огеныд ӵош ужанъя Организацилэн Парламентской ассамблеяезлы, СНГ-е пырись государствоослэн Межпарламентской Ассамблеезылы Югославия Республикалы пумит НАТО-лэн урдскемез пумысен Федерацияя Советлэн вазиськонэз улэ. Федеральной Собранилэн вылӥ палатаез оскемзэ вера, зэмлык одно ик вормоз шуыса. *** Туэ 26 мартэ асьме доры Москвалэн вице-мэрезлэн, Москваысь Правительстволэн премьерезлэн нырысетӥ воштӥсезлэн Валерий Шанцевлэн кивалтэмез улсын вуыны кулэ вал Москваысь Правительстволэн делегациез. Со пыриськыны чакла вал "Уралысь городъёс" муниципальной огазеяськонъёслэн Ассоциацизылэн ужрадаз но "Россия Федерацилэн ас коже кивалтонын ужпумъёс" улосъёс куспын ортчись конференцилэн ужаз. Со ужрад та нуналэ кутскиз Ижевскын. Озьы ик чакламын вал Удмурт Республикаысь Правительство но Москваысь Правительство куспын ӵош ужамлы йылпумъянъёс лэсьтыны но туэлы ужрадъёс чакланы. Москваысь Правительстволэн улосъёсын кусыпъёс возёнъя комитетэзлэн ивортэмезъя, Ижевскын пумиськон дыр выжтэмын столицалэн мэрезлэн Юрий Лужковлэн кошкеменыз, Балканын кылдэм югдурен сэрен городын шуг-секытъёс лэчытомемен валче. Удмурт Республикаысь Правительстволэн Председателезлэн секретариатэзлэн пресс-центрез. Депутатэ кандидатъёс Оскымон кандидат Анатолий Максимов - Кез районын тодмо адями но кивалтӥсь. Валля арын гужем татысь сыр поттӥсьёс сое огкылысь асьсэлы кивалтӥсе бырйизы. Талэсь азьло районысь ик "Маяк" эштослэн тӧроез вал. Анатолий Юрьевич выль коллективлы ӝог дышиз. Азьвыл директорлэсь Лазарь Федосеевлэсь ужъёссэ, кутсконъёссэ но кичӧлтонъёссэ быгатыса азинтэ. Со понна ик сыр поттӥсьёс кивалтӥсьсэс гажало но Кун Кенеше депутатэ кандидат луыны ӵектӥзы. Егит директорлэн тыршемез син азьын: сырзавод юнма-выльдӥське, алигес вуттэмын компрессорной, вӧй поттонъя цех, пуктэмын бадӟым холодильник, йӧл автоматъёс но мукет туала тӥрлык. Али сыр поттонъя валтӥсь цехсэс выльдо. Анатолий Максимов - сюлмаськись кивалтӥсь, ваньмыз понна кыл кутыны дась. Со оскымон кандидат. Округысьтыз бырйисьёс удмурт адями понна куараоссэс сётӥзы ке, уз янгышалэ: Кун Кенешын со трос ӟечсэ лэсьтыны быгатоз. Анатолий Юрьевичлэн ваньмыз понна сюлмыз висе. Депутат луиз ке, трос лэсьтыны быгатоз гурт калык, район но республика понна. Нош аслаз кивалтоно коллективез сярысь веранэз ик ӧвӧл, шаерамы со устоосыз пӧлысь одӥгез устоез, огсыр ужась предприятие луэ. Пусйыны кулэ, парламентын Анатолий Максимов кадь депутатъёсмы тросгес луизы ке, шаерамы промышленность но, гурт удыс но улӟозы. Озьыен, ӝӧк вылмы но котьку тыр луоз. Со понна куарадэ сёт, кез калык! Г. РОМАНОВ. Война Толон - Багдад, туннэ - Белград, кин ӵуказе? Европаын таӵеез 50 арлэсь ятыр ӧй вал ни, Советской Союз фашистской Германиез пазьгем дырысен. Туннэ уен-нуналэн НАТО пуштытъя Югославиез. Та страна кыкетӥ мировой война вакытэ Гитлерлы пумит нюръяськонын СССР-лэн союзникез вал, кышкыт тушмонлы пумит асьмеос ӵош нюръяським, ӵош пусйим Быдӟым Вормонэз. Малы али США, ООН-лэсь Уставзэ тӥяса, Европалэн шораз война ӝутыны дӥсьтӥз? Куд-ог политикъёс, кылсярысь, В. Жириновский но мукетъёсыз 24-тӥ мартэз лыдъяло ни куинетӥ мировой войналэн кутсконэныз. Уго самой татын, Балканыын, юри пуромытэмын вал нырысетӥ но кыкетӥ мировой войнаослэн лек тылӝузы. Со вӧлмиз быдэс дуннее, миллионъёсын калыкез быдтыса. Туннэ нош ик вир кисьтӥське, куашкатэмын ни Югославилэн валтӥсь заводъёсыз, военной техникаез. Асьме дорын Чечня музэн, Косово - сербъёслэн но албанецъёслэн 1945-тӥ арысен ӵош улон музъемзы - пӧрмиз война ӝутонлы. Кызьы пусъё политикъёс, сербъёслы пумит гинэ со нюръяськон ӧвӧл, татын эскеро Россилэсь но кужымзэ, малы ке шуоно, сербъёслэн самой бадӟым осконзы ӟуч калыклы, славянъёслы. Та югдур дорозь вераськон мынэ вал ни Россия, Белоруссия, Югославия куспын огазеяськон кылдытон сярысь. Та вамыш, оло, НАТО-ез, нырысь ик, США-ез, кӧнялы ке но возьысал. Югославилы пумит ожмаськонэ пыриськиз ни 10 страна. Дуннеысь парламентарийёс матысь дыре ик ӵош пуксьыса огкылэ ӧз ке вуэ, таосыз борды итӥськозы мукет государствоос. Палэнэ уз кыльы Россия но. Дась-а асьмеос солы туннэ? Тӥни ма бордын ужпум. Вооружённой Кужымъёсмылэсь лябӟемзэс туж сюлэмшугъяськыса пусйизы чрезвычайной заседание люкаськылэм Кун Думаысь депутатъёс. Соос огкылэ вуизы армилэсь боеготовностьсэ ӝутонъя ужпумез эскеронын. Тросаз городъёсын кылдо ни ас мылкыдзыя Югославие ожмаськыны мынонъя отрядъёс. Вань соос пӧлын Босниын но Герцеговинаын сербъёс пала дурбасьтыса ожмаськем муртъёс, Афганистанэ, Чечняе ветлэмъёс. 24-тӥ март, дунне шӧдылытэк, историе пыриз сьӧд буёлэн. Но мукет ласянь со возьматӥз: нимад-нимад люкиськылыса улыны уг яра, кужым - огазеяськем государствоос бордын. НАТО пумен матэ но матэ вуэ асьме кунгожъёсмы пала. Солэн радъёсаз огез бӧрсьы мукетыз пыро выль государствоос, азьвыл социалистической луисьёсыз но. Та нуналъёсы гинэ сыӵе куриськонэн вазиськиз Югославилэн ог люкетэз - Македония. Тӥни ма шугъяськытэ туннэ Кун Думаез, Россилэсь Правительствозэ. Соос меӵак верало: туала Президент Россиез бырон калэ нуэ. Ираклы ӧм юрттэ, сербъёслэсь куронзэс ум кылӥське. Шонер, ог 10 ар талэсь азьло США Югославилы пумит мыныны ӧй дӥсьтысал - соку вал на кужмо государство - СССР. Али со быдтэмын. Тӥни малы Европалэн шораз ик НАТО кӧбератэк кузёяське. Германия но нырысьсэ 1945-тӥ ар бере омыре ӝутӥз военной самолётъёссэ. ХХ даурын со куиньметӥзэ кутскыса ожмаське ни Балканыын улӥсьёслы пумит. Югославия огназ ӧвӧл, солы юрттӥсьёс одно ик шедёзы. Со сярысь верало Китай, Корея, Индия... Сербъёс витё Россилэсь кужмо куаразэ, Россилэсь дурбасьтэмзэ. Дась-а асьмелэн странамы та вамышлы? Яке витёмы-а мурт самолётъёслэсь асьме инбаме вуэмзэс? Л. МЕДВЕДЕВА. Депутатэ кандидатъёс Зонова Людмила Ивановна "Мон бырйисько тӥледды" Вордски 1954-тӥ арын, дышетски Ижевскысь 55-тӥ шор ёзо школаын.1975-тӥ арын йылпумъяй Удмурт кун университетэз. 1975-тӥ-1978-тӥ аръёсы ужай Грах ёросысь Вуж Ятчи школаын. 1978-тӥ арысен 1984-тӥ арозь вал инспектор, Ижысь Первомай ёросысь будэ вуымтэосын ужанъя инспекциен кивалтӥ. 1984-тӥ арын оскизы нылпиослэсь тазалыксэс кыдатонъя "Дзержинец" лагеренызы кивалтыны. Калыкез дышетон удысысь дано ужась, милициысь подполковник. Ижысь Октябрь районысь нылкышноослэн кенешенызы кивалтӥсько, ожгар искусствоосъя лицейлэн дано президентэз луисько. Быземын, куинь нылы но кык внуке будэ. Быръён азьын кепыр ваисько кыӵе ке кыл сётыны. Со пӧлысь сюэтӥ люкетэз но быдэсъяськысал ке, асьмеос кемалась ини ог-огмес валаса но эшъяськыса улысалмы ни. Огшоры адямилэн улонэз ялан уродме ке но, быръён азьын кыл сётӥсьёс солэсь уг кепырало. Мон оскисько, та дыре кандидат одӥг кыл гинэ сётыны быгатэ, со - ӟечгес ужан. Чырмыт но нуналлы быдэ ялан ужан. Ас быгатэмедъя калыклэсь куронзэ быдэсъян. Мон оскисько, политика удысын ужпумъёсты быдэстыны юрттоз нылпиослэсь тазалыксэс юнматонъя "Дзержинец" лагерен дас вить ар ӵоже кивалтон опытэ, быдэ вуымтэосын ужанъя инспекциын но мукет пӧртэм общественной организациосын ужаме. Будӥсь пиналъёсты но анайлыкез утёнын государство ласянь юрттэт сётон, мӧйы адямиос сярысь сюлмаськон, трос нылпиё но начар улӥсь семьяос сярысь сюлмаськон гинэ юрттоз шуг-секытысь потыны. Озьы ик ожысь ветеранъёслы но начар улӥсьёслы бюджетысь коньдон висъянэз юн но юн чакласа возьыны кулэ. Со гинэ юрттоз улон-вылонэз умоятыны, йыружъёслэсь лыдзэс кулэстыны. Котькудӥз адями мед улоз ӵуказе нуналлы осконэн. Ми но юн оскиськом, Ижевскысь быръёнъя 8-тӥ Железнодорожной округъя депутатэ кандидат Л. И. Зонова понна калык мыноз шуыса. Депутатэ кандидат Зарни вылын пукыса кураськиськом * Инкуазен сётэм узырлыкмы калыкмы понна мед ужалоз. Рустам Шагиев. Гуртысь дышетӥсьёслэн пизы бырйиз чылкак мукет сюрес: школаез йылпумъяса дышетскыны пыриз му вӧй поттӥсьёсты дасянъя факультетэ. Эскеремез потӥз зэмос воргорон ужлэсь шӧмзэ, нош шонерзэ вераса, бордаз кыскиз музъем пушкы ватскем узырлыклэн адсконтэм кужымез. Егит пи понна со романтика. Рустам ноку но уз вунэты нырысетӥ портэм скважиназэс. Отысь ыбыса кадь потэм нефть ваньзэсты пылатӥз, шапыкен-шапыкен вӧялтыса кошкиз шудбурен пачылам ымныръёсты, быдэс мугорзэс. Нош кыӵе му вӧйлэн зыныз! Сое валалоз сюлмыныз та уж борды бурмем мурт гинэ. ... Самара палан вордскем но будэм егит специалистэз институт бере ысто Удмуртие, Играысь нефтеразведкая экспедицие. Татын ӵапак 70-тӥ аръёсы туж дыртыса азинскыны кутскиз выль удыс. Кулэ луизы ӟеч ужасьёс, дышетскем адямиос. Озьы Рустам Абдуллович Шагиев улон сюрессэ герӟаз удмурт музъемен. Кутскиз огшоры рабочийысен, нош туннэ кивалтэ ни "Удмуртгеологилэн" Завьялово районысь управлениеныз - "Ижгеодобыча" НГДУ-ен. Удмуртиын 25 ар улытозяз, та адями калыкмы понна, республикамылэн экономикаез понна шӧдскымон пайда ваиз ни. Солэн кибервылыз кылемын Чутырьын, Играын, Красногорскын но трос музон интыосын. Дас вить ар Рустам Абдуллович, "Удмуртгеология" ыстэмъя, валтӥсь инженер луыса ужаз Кыдёкысь Уй палан. 50-60 градус кезьытъёслы котькудӥз адями уз, дыр, дышы. Север яратэ ачиз кадь ик жон-жон, юн сямо воргоронъёсты. Озьыен, Шагиев - сыӵеос пӧлысь. Секыт ныпъетлэсь уз кышка, лэсьтоно вамышсэ мукетызлы уз сёты, верам кылзэ пумозяз быдэстоз. Нефть поттон удысэ ведь лябъёсыз уг мыно, кузь коньдон сьӧры уиськисьёс сярысь ке верано, соос кема ик уг чидало - кошко. Р. А. Шагиев кызь вить ар ӵоже огпол но ӧз жаля быръем ужез сярысь, котькыӵе вакытъёсыз луыло ке но. Сое туж шугъяськытэ музъем узырлыкмылэн дунтэмен яке воксё дунтэк республикалэн, странамылэн палэназ кошкемез. Удмуртия, тамында нефтез вылысь, туннэ зарниен-азвесен чильк-вальк пыласькыны кулэ вал ни, нош ветлэ кураськись чотын. Малы? Кин узырме нефтьлэсь поттэм коньдон вылын? Малы "Удмуртнефтез" банкротэн яло? Йырез поромытӥсь юанъёслы валэктон шедьтон вылысь, со нюръяське депутатлэн мандатэз понна. Оло, парламентэ шедьыса, мургес валалоз улонлэсь кудпала бергамзэ, му вӧй чотын быгатоз шаерысь югдурез умой пала воштыны. Нефть - со коньдон, бюджетэз "сюдӥсь-вордӥсь" вирсэр. Озьыен, дышетӥсьёслэн, врачъёслэн, геологъёслэн уждунзы, со ик - пенсиос, пособиос, льготаос но трос мукетыз. Осконтэм кадь, но та дырозь геологъёс пӧлысь одӥг мурт но депутатлэсь мандатсэ ӧз нуллы на. Оло, соин но соос пала дурбасьтӥсез ӧжыт. Завьяловоысь НГДУ чакла ар ӵоже 200 сюрс тонна му вӧй кыскыны. Озьы ужазы нефтяникъёс ӟеч вакытъёсы. Забегаловоысь месторожденилэн "шыкысэз" узыр - трос миллион тонна нефть кылле татысь музъемын. Со чотын НГДУ чакла Гольяны, Докша, Макарово, Дуброво, Забегалово гуртъёсты калык радэ поттыны: сюрес лэсьтыны, хозяйствоосысь котельнойёсы эстӥськон висъяны, телефон езъёсты выльдыны. Ушъяськон понна та кылъёс верамын ӧвӧл, асьмеос адӟиськом - данакез асфальт сюресъёс Удмуртиын лэсьтэмын нефтяникъёсын. Ас вылазы соос басьто гуртъёсы ву кысконэз но скважинаос пуктонэз. Пусъемез одно ик быдэсмоз, асьсэос гинэ пыд вылазы йыг-йыг мед султозы. Нош туннэ шуг-секытсы тырмыт. Озьы ке но, Завьялово районын гинэ шедьтэмын 9 месторождение, со пӧлысь 6-ез ужа. Нефтьлэсь районлэн бюджетаз миым вуыны кулэ вал 10029 сюрс манет. Эшшо одӥг лыдпус: кылем арын "Ижгеодобыча" НГДУ кыскиз 200 сюрс тонна пала му вӧй. Валля арен ӵошатыса, 50 сюрс тонналы ятыргес. Котькыӵе коллективлэн 90 процентэз азинсконэз потэ кивалтӥсь бордысь. Юнме шорысь Шагиевез но ӧз пусъе, дыр, "Отличник разведки недр" знакен но мукет наградаосын. Со понна лёгамын сю, сюрс иськем сюресъёс, му пушкысь поттэмын миллион тоннаосын "сьӧд зарни". Уж сяна, котькуд адямилэн вань ас улонэз: семьяез, тунсыко киужез, эшъёсыз, яратоно сиён-юонэз... Рустам Абдуллович яратэ спортэз, мыло-кыдо чорыга, губия. Ачиз ик сылалтэ. Кышнояськемын. Кузпалыз - врач. Семьяяз будэ кык пиез. Бадӟымез бырйиз анаезлэсь ужзэ, пичиез дышетске Ижевскысь технической университетын. Семьяязы кивалтон удыс оскемын кышномуртлы. "Мыным ужын но тырме",- серекъяса шуэ Шагиев. "Командирзылы" воргоронъёс ӵем-а сяська кузьмало? "Шергес. Праздник нуналъёсы гинэ. Но тупатскыны бер ӧвӧл на". 75 номеро Камской избирательной округъя депутатэ мынэ 5 мурт: В. А. Никитин - "Путь Ильича" колхозлэн председателез, И. М. Гараев - "Восточный" совхозлэн директорез, В. В. Алехин - Афган оже пыриськемъёслэн союззылэн кивалтӥсез, Т. И. Кутявина - райбольницаысь врач но Р. А. Шагиев - "Ижгеодобыча" НГДУ-лэн кивалтӥсез. Ваньзы - гажано, сӥё-дано адямиос. Котькудӥз соос пӧлысь ӟеч депутат луоз, ассэ жалятэк ужалоз бырйисьёсыз понна. Но парламентэ вить мурт пӧлысь шедёз огез. Кин понна меда куаразэ сётысал Шагиев? Та юанлы Рустам Абдуллович кема малпаськытэк шуиз: - Валерьян Арсентьевич Никитинлы. Визьмо, быгатонлыко председатель. Секыт вакытэ но хозяйствозэ возе, таӵеоссэ туэ шер пумиталод. Номыр уродзэ вераме уг поты И. М. Гараев сярысь. Кун Кенешын со депутат вал ини, мар быгатӥз - лэсьтӥз. Но Ильсур Миниахметовичлэн аслаз совхозэз туж бадӟым: Удмуртиез гинэ уг, Россилэсь трос регионъёссэ поттэм продукциеныз сюдэ. Соин ик, мон малпамъя, сюлмаськонэз отын но тырмыт. Калык быръёз оскымон адямизэ. Сыӵе луонлык сётэмын асьмелы котькудмылы. Людмила МЕДВЕДЕВА. * Р. А. ШАГИЕВ Ӟечкылан Завьялово ёросысь Вылӥ Лудзя гуртысь Екатерина Максимовна но Степан Константинович ШАБАРОВЪЁС зарни сюанзэс пусйизы. Шудбуро, кема улыны сӥзё но вордэмзы-будэтэмзы понна тау каро нылпиосты, эмеспиосты но соослэн нылпиоссы. НЫЛКЫШНООС СЯРЫСЬ ВЕРАНЪЁС Азвесь тулкым Бам кузяз васькыса, Валялэн синкылиосыз маке быдӟа шапыкъёсын усизы гитара сиос вылэ. Мар понна солы сыӵе курадӟон? Пичи мугорыз бадӟым гитара сьӧрысь ик уг адӟиськы, сиосты кырӟатон понна чиньыосты но кужмысь золтоно луэ. Ӧз, ӧз вормы Валя бӧрдонэныз анайзэ, атаез но дур ӧз басьты ваменъяськись нылызлы, ачиз туж яратэ вал угось гитараен шудыны. Крезьгурлы нимысьтыз дышетскымтэ, сизьым классэз йылпумъям огшоры гурт кышномуртлэн чиданлыкез тырмиз нылоксэ дышетыны. - Будӥд ке, быдэс улытозяд тау карод, монэ весь тодам ваёд, - шуылӥз со нылызлы. Валя соку дышетске вал ньылетӥ классын. Кӧня аръёс ортчизы со дырысен, анаез но кемалась ӧвӧл ни, нош верам кылъёсыз зэмазы. Анай сюлэм кыдёкысь азьпала адӟыны быгатэ вылэм. Завьялово ёросысь Шаберды гуртын вордӥськем но будэм нылаш Валя Серебрякова улон сюрессэ герӟаны малпаз дышетон удысэн. Тямыс классэз йылпумъяса, Сарапулысь педагогической училищее пыриз. Малы отчы? Ӧз тоды, Можгаын но, Дэбесын но сыӵе училищеос вань шуыса. Удмурт гуртын будэм нылаш, ӟуч пиналъёс пӧлы сураськыса, копак йыромиз кадь. Школаын "ньыльлы" но "витьлы" гинэ дышетске вал ке, татын бордаз "кыкъёс" но лякиськыны кутскизы. Умойтэм вераны шедьтэмезлэсь кышкаса, малпанъёсыз сураськылӥзы, кытчы ке ньылӥськылӥзы. Валя малпаны кутскиз ни вал дышетсконзэ куштон сярысь. Ярам, ӟуч кылъя но литературая дышетӥсьсы дыраз синйылтӥз Серебряковалэсь аспӧртэмлыко малпаськон, гожъяськон манерзэ. Нылашлэн мылкыдыз бурдъяськиз, быгатонлыкъёсыз ӧръяськизы. Ассэ шедьтыны но сюлэмзэ буйгатыны юрттылӥз крезьгуро эшез гитара но. Педучилищеын дышетскыкуз ик Валя валаз - кырӟамез шудэмезлэн гурезлы тупа. Но аслэсьтыз быгатонлыксэ шарае поттыны дӥсьтонэз мургес усьтӥськиз ни Удмурт пединститутын дышетскыкуз, агитбригадаосын потаса. Училище бере кык ар Сюмси ёросысь школаын ужаса, Валентина Серебрякова дышетсконзэ азьланьтыны малпаз. Ужезлэсь куштӥськытэк пыриз Удмурт пединститутысь филологияя факультетлэн удмурт люкетаз. Кияз вал ни студенческой билетэз. Малпаз, ужаны но огдыре муресь тодон-валанъёс басьтыны заочно дышетскыса секыт луоз. Выльысь экзаменъёс сётӥз. Паймытӥз, ма, тон милям студентмы ини ук, пе. Пыриз институтэ, нош диплом басьтӥз университетысь. Валентиналэн ӵош дышетсконо эшъёсыз туж тунсыкоесь вал. Али соос тросэз шаерысьтымы тодмо адямиос: Татьяна Григорьевна Перевозчикова, Александр Федорович Шутов, Алевтина Анатольевна Алашеева, Лидия Николаевна Долганова, Михаил Гаврилович Атаманов - ваньзы ик наука удысысь кандидатъёс. Вань пӧлазы гожъяськисьёс но - Федор Николаевич Березин, Анатолий Андреевич Петров. Педучилище бере пыремъёс дас одӥг мурт вал, соос ик луизы группалэн шорсюлмыз. Студентъёс дышетӥсьёссылэсь верамзэс огшоры кылзыса гинэ ӧз пуке, споръяськизы, юанъёс сётъязы. Дышетӥсьёслэсь тодон- валанзэс будэтонъя институтын ужась Рудольф Федорович Березин студентъёслы удмурт кылын спецкурсъёс нуыкуз синйылтэм гожъяськон правилоос пумысен споръяськыны яратӥсь Валентинаез. Озьы, дышетсконзэ йылпумъямез бере, сое ужаны ӧтизы та институтэ. Но Серебрякова со дырлы фамилизэ воштӥз ни вал Ившиналы. Семья кусыпъёссэ герӟаны юрттӥсь юлтошез татын но луиз гитара. Бадӟым курсъёсын дышетскись нылъёслэсь Валентина Серебрякова одӥг пол гинэ ӧз кылылы Вениамин Ившин сярысь вераськемзэс, нош ик, пе, выль кылбуръёсыз потӥллям. Ӵошатскыса лыдӟо соосты, сэртто-пертчо. Нош Валентиналэсь мылкыдзэ кылбуръёс малы ке но уг бугырто, нырысетӥ курсын дышетскись нылаш кырӟанъёс борды кыстӥське. Ившинэз нырысьсэ со адӟиз сцена вылысь. Йыг-йыг мугоро, синмаськымон тусбуё пияш. Группаязы со одӥгназ гинэ пи. Дышетсконзэс йылпумъянлы сӥзем сценкаын нылъёс соку кызьы гинэ ӧз кылалэ-буралэ Ившинзы сярысь. Валялэн йыраз малпан ик ӧй вал, та кылбурчиен семья кылдытыны луоно шуыса. Кызьы адӟиз, озьы ик вунэтӥз. Мукет дыръя солэсь нимзэ кылӥз Роза Ивановна Яшиналэн лекциысеныз. Группаысьтызы пиос куриськизы "Дась лу!" газетын ужась Ившинэз армие келяны. Кин ке, кин ке доры ӧй, пе лэзьысал, нош Ившинэз ӟеч келяно. Мынэ, ветлэ. Ар ортчиз. Кыкетӥ курслэн пумаз нош ик пиос ышизы, таяз учыре но Роза Ивановналэн лекциез кемдӥз. Кытын пиос. Нош пиос Ившинэз пумитало. Одӥгаз ӝытэ нылъёс Валялы вазиськизы, гитарадэ кутыса лыкты, пе, дорамы, Ившинэз ӧтимы - тон шудод, нош ми частушкаос кырӟалом. Маин вал, тупыр-тапыр поттӥзы. Комнатае трос гинэ нылъёс но пиос люкаськиллям, крезьгур гинэ уг тырмы на. Выль пырем муртэ адӟыса, Ившин пальышаз: - О-о, ӟечбуресь, ортче, матэ кариське. Валялы соку сокем ӧз кельшы солэн вераськемез, кылъёссэ юри дышетэм кадь потӥз - книгаын гожтэм манер, лад-лад гинэ вераса куштэ. Берло ини валаз, солэн вераськон сямыз сыӵе вылэм, одӥг кылзэ но малпатэк, супыр-сапыр уз вера. Нош соку, нылъёс куремъя, Валя одӥгзэ, мукетсэ частушкаез шудӥз. Собере ини, дӥсяскьемезлэсь возьдаськыса кошкиз. Ӵуказеяз лекциос дыръя, пиос Валя шоры учко но пыс-пыс гинэ серекъяса шуо: "Серебрятся волны, "Серебрятся волны". Берлогес ини веразы, кошкем берад, пе, Ившин юаз, кин со, малы мон уг тодӥськы та нылэз. Вераллям, группаысьтымы староста, пе, со - Валентина Серебрякова. Ӵукна Ившин султэм но мычиськон сяменыз ас понназ, пе, шуэ: "Серебрятся волны". Кӧня ке улэ но, нош ик нёртӥз: "Серебрятся волны". Ӝытазеяз ини кылбурчи Валентинаез ӧтиз киное. Со ик луиз тодматскемзы. Куинетӥ курсысен семья кылдытӥзы, нош университетэз йылпумъякуз Валялэн пиез вал ни. Ӵош дышетскем эшъёсынызы, тодмоосынызы огазе люкасько ке, али но нырысетӥ кыл веранзы "азвесясь тулкымъёс" понна. Валентина Михайловна кияз кутэ гитаразэ, нош ик чузъясько тодмо крезьгуръёс, ненег куара тодэ вайытэ егит дырез, вунэтытэ туннэ шуг-сектъёсты. Валентина Михайловна Ившина аслэсьтыз улон тубатъёссэ шедьтӥз. Кӧня ке сюресъёс пӧлысь одӥгзэ быръёно луысал ке, азьло лёгем пытьыостӥз ик вамыштысал. Школа, дышетон удыс, удмурт кыл, удмуртлык солэн улоназ нырысетӥ инты басьтэ. Ужан нунал бырыса дораз бертэ ке, сюлэмшугъяськытӥсь малпанъёс лякиськыса ик сьӧраз калъясько. Ярам, кузпалыз Вениамин Никонорович сое котьку валаны тырше, юрттэ, визьнодъёс сётэ. Дышетӥсьёслэсь тодон-валанзэс будэтонъя институтын учебникъёс, пособиос, програмамос дасянъя кабинетын куать-сизьым ар ужамез бере Валентина Михайловналы луонлык кылдӥз аспирантураын дышетскыны. Ужаны выжиз УдНИИ-ысь удмурт кыллы, литературалы дышетон методикая секторе. Кивалтӥсез Кузьма Иванович Куликов, история наукаосъя доктор профессор, кема пукыны дыр ӧз сёты, дыртытӥз аспирантурае мыныны. Нош ик малпаськон. Заочно ке пыроно, тодон-валанъёс сокем муресь уз луэ, но семьялы капчигес йӧтоз. Вениамин Никонорович валаз кышноезлэсь шугъяськонзэ, ачиз ик дэмлаз ужзэ вис карыса дышетскыны, нош ми понна, пе, эн сюлмаськы, ваньмыз умой луоз. Сюлэмыз кыклы люкиськыса ик дышетскиз ни Валентина Михайловна. Куректӥз, анай шунытсэ пиезлы тырмыт сётыны быгатымтэысь. Луонлык кылдыку, ачиз но семьяез доры лобыса бертылӥз, картэз но пиеныз ӵемысь Москваын кунояллязы. Ившина дышетскиз педагогика наукая доктор профессор Глафира Николаевна Никольская дорын, диссертацизэ защитить кариз. Ижевске вуиз ни педагогика наукаосъя кандидат луыса. Выль тодон-валанъёс, ӵош дышетскем эшъёсызлэн ужан амалъёссы юрттӥзы калыкез дышетонъя министрлэн воштӥсез луыса ужакуз но, али но. Калыкез дышетонъя министерствоысь национальной ужпумъёсъя отделэн кивалтыкуз. Куке Валентина Михайловналы оскизы та удысэз ас вылаз басьтыны, со нырысь-валысь кышкатскиз вал - пӧрмыто-а? Зэмзэ но, капчи уж ӧвӧл со, национальной ужпумъёс котыр ласянь мур-мур эскеремез кулэ каро. Ӵогид но кельтӥд - озьы гинэ уг луы. Ас кужымезлы оскон пыӵатӥз соку калыкез дышетонъя министрын ужась Антонина Михайловна Лисина. Удмурт кыллэсь кулэлыксэ паськытатон понна кулэ вылӥын пукись кивалтӥслэн но валанзы. Собере, ачиз калык мед берытскоз вордскем кылыз пала. Но таиз ласянь югдур шуныта ни кадь. Берло дасо аръёс ӵоже ӧжыт ӧвӧл лэсьтэмын ни удмурт кылэз, - удмуртлыкез ӝутон ласянь. Дышетӥсьёс понна потэ "Вордскем кыл" научно- методической журнал. Городъёсын усьтӥсько удмурт классъёс, Ижевскын ужа "нылпи сад-школа" национальной центр (али уж нуиське солэсь статуссэ воштон ласянь), кылдытэмын Дышетон удысын национальной ужпумъёсты тодон-эскеронъя институт, дышетскись пиналъёслы шаермылэн историезъя учебникъёс поттыны кутскемын. Ваньзэ сое улонын пыӵатонын вань Валентина Михайловналэн но тыршемез. Ужам ужез солэн зарни мактал соку ик син шоры уг йӧты, но аръёс ортчыса азвесь тулкымъёс емыш сётыны кутско. Та вакытлы но малпанъёс ӧжыт ӧвӧл, но ваньмыз пыкиське коньдон вылэ. Озьы ке но, азьланезлы оскон уг кысы. - Табере тросгес саклык висъяно ужъёсты выль сямен ӧръянлы - лыдпусъёс сьӧры уиськытэк, ӟечлыкез ӝутон борды басьтӥськоно, - шуэ Валентина Михайловна. Ившинаез ӵош ужась эшъёсыз дунъяло ас удысэзлы сюлэмзэ сётыса тыршемез понна. - мар ке вылез борды но басьтӥськоно ке, ваньзэ котыр ласянь эскероз, мур-мур малпаськоз, мукетъёсызлэсь юалоз-вералоз, - со понна мон сое туж гаджасько, шуэ Зоя Витальевна Суворова, Дышетон удысын национальной ужпумъёсты тодон-эскерон институтлэн кивалтӥсез. - Вань, соиз но, мултэс трос куронъёс ас азязы пуктэ, мар ке понна гинэ но ассэ "сиыны" кутске. Валентина Михайловна уг но ваты аслэсьтыз ачиз кыл юан сямзэ. Одӥгназ дыръя малпаськонэ усе, та вамышме озьы лэсьоно вылэм, таяз учыре тазьы карыса умой луысал. Куддыръя чурытгес кыл вераны шедьтэ ке кинлы ке. Нош ик асэныз ачиз вераськыны кутске, мыдланьгес ӧй лэсьты меда? Валентина Михайловна ас малпанзэ ватыса уг возьы, шонерак вера, мышкытӥзы сипыртыса уг ветлы. Ваньмызлы со, ло, уг кельшы, но вань тау карисьёсыз но. Ас вакытаз шонер верады, дугдытӥды, пе. Умойтэм вамышелэсь. Ватытэк веран сямыз Ившинаез ассэ но куддыръя секыт югдуре пуктэ но сыӵе ини со адями: тышкаськоно ке - тышкаськоно, ушъяно ке - ушъяно. - Отын но виссэ шедьтыны кулэ, - шуэ со, - дипломат луоно. Таизлы дышетскиськод ини вань улытозяд. Ужаз, яке улоназ шуг-секытъёс кылдо ке, Валентина Михайловна вазиське эшъёсызлы. Соос трос уд шуы, но зэмос эшъёс ни, ньӧмыз понна гинэ ӧвӧл. Кузпалыз лӥятоз, буйгатоз лад-лад сямыныз. Мур-мур малпаськонэ се ке, пӧраське я вуриське. Куддыръя магазинъёст ортче, музейёсы, выставкаосы коже - чеберлыко маръёс ке зьы ик сюлэмзэ буйгатэ. Туж юрттэ гитара. Валентина Михайловналы матнынэсь романсъёс, Толкуновалэн, Сенчиналэн, Анна Германлэн кырӟанъёссы - соос мылкыдэз буйгато. Яратэ удмурт кырӟанъёсты, но таосыныз кӧтыз тыре кылзыса. Валентина Михайловна пумиськонэ туж сюлмаськыса мынӥ вал - вераськонмы кӧсыт уз пӧрмы меда? Кылылэме вал, Ившина, пе, кыллы чурыт адями. Мон озьы ӧй шуысал. Кык час вераськытозямы, мон азьын но, шумпотӥсьёсыныз, сюлмаськонъёсыныз, куроектонъёсыныз нылкышно. Туннэ нуналэ улонысь со возьма одӥгзэ - мед луоз валан ужын но, семьяын но. Лия Малых. Фотоез В. Камашевлэн. Депутатэ кандидатъёс Калык жаль потэ Удмурт Республикаысь Кун Кенеше депутатъёсты быръёнъя Пичи Пурга ёросысь Яган- Докьяысь 87 номеро избирательной округъя одӥгез кандидат - Россия Федерациысь но Удмуртиысь дано врач Ермолай Александрович Чумаков. Милям внештатной корреспондентмы Россиысь Писательёслэн огазеяськонзылэн ёзчиез Кирилл ЛОМАГИН солы кӧня ке юанъёсын вазиськиз. - Ермолай Александрович, вакчияк валэктэ вал, малы, кыӵе мугъёсын сэрен тӥ нюръяськоно кариськиды республикамылэн Кун Кенешезлэн депутатэз луон понна? - Нырысь ик, монэ сюлэмы чигиськымон вӧсь каре коньдонлы ёрмон. Соин сэрен векаса, сютэм уло миллионъёсын адямиос. Россиысь калыклэн лыдыз чутрак кулэсме: арлыдоос дырызлэсь вазь куло, нылпиос чарак ичигес вордско. Ваньбур поттӥсьёс толэзьёсын уждун уг басьтыло, кытӥяз нош - аръёсын. Пенсиос но мукет тыронъёс юн ӝегало. Котькыӵе секыт дыръёсы но мон нырысь ик ужасьёсылы уждун тырыны сюлмаськисько. Сотэк кызьы? Ми 100 адямилы выль ужан инты усьтӥм. - Бен тӥляд малпамдыя, кытчы кошке коньдон? - Тодэмея, коньдон вань Россиын но, асьме шаерамы но. Премьермылэн воштӥсез В. Матвиенко ӵемысь ивортылэ ук: интыосы уксё ыстэмын тырмыт. Пӧртэм чиновникъёс, коммерцияя банкъёс, уно посредник шуонъёс сое таркало, казна чотын зӧк кисыоссэс тырмытъяло. Соин ик, депутат ке луысал, мон нюръяськысал чиновникъёсты чутрак кулэстон но соослэсь ужзэс эскерыса возён сярысь законъёс кутон понна. Озьы ик Россиысь Правительство но интыосысь кивалтэтъёс котькуд кварталэ вань калыклы мед ивортылысалзы коньдонэз кытчы каремзы сярысь. Кин лушказ - сое одно ик пытсэт сьӧры! Тани, Россиысь Лыдъясь палаталэн эскеремезъя, Чечняын югдурез тупатонэ висъям коньдон 6 триллион манетэз тус-тас каремын. Озьыен, капыртӥзы сое. Кинэ ке кыл кутытӥзы-а? Ӧз! - Тазалыкмес утён сярысь мар верасалды, Ермолай Александрович? Берло вакытэ чутрак уродме калыкмылэн тазалыкез. Нош Правительство эмъяськон удыслы коньдон висъямысь дугдӥз, шуыны луэ. Таин валче кӧня висисьёс курадӟо, куло! Мынам малпамея, таӵе йыружез дугдытоно. Адями - дунне вылын самой дуноез. Медициналы, азьло сямен ик, тырмыт коньдон висъяны кулэ. Государство ачиз спонсор мед луоз калыкез дунтэк эмъяны. Озьы ик чик шыръятэк коньдон висъяно гурт хозяйстволы, сиён-юон поттӥсьёслы. Быдэс дуннеын гуртлы юртто. Совхозъёсмес, эштосъёсмес аналтӥм, куашкатӥм ке, уката ик музъемез вузаны кутским ке, бырон калэ вуом, кураськисьёслы пӧрмом. Удмурт Республикаысь Калыкез улон-вылонын утёнъя министерстволэн вазиськонэз Огазеяськем Калыкъёслэн Организацизылэн Генеральной Ассамблеяеныз 1999-тӥ ар Арлыдоослэн калык куспо аренызы ялэмын. Ог-огедлы оскытэк, люкиськыса, лекъяськыса улон та секыт вакытэ нырысь ик шукке арлыдо муртъёсты. Но номыр шоры учкытэк, асьмеос утьыны кулэ ӵуказе нуналлы осконмес, ог-огмылы юрттыса гинэ чидалом-вормом шуг-секытъёсты. Ми вазиськиськом республикаысьтымы вань ужась коллективъёслы, предприятиослы, ужбергатӥсьёслы, музъем ужасьёслы но общественной огазеяськонъёслы: сётэ кидэс ёрмись, висись пересьёслы. Котькудӥз аслаз семьяысьтыз, коркасьтыз одӥг пересьлы ке но тросгес саклык висъясал, сюлмаськонъёссэ тодысал, пичияк юрттысал, соослэн улонзы трослы сайкытгес луысал. Адямилы ӟеч уж лэсьтэмды асьтэлы шумпотонэн берытскоз. Сётӥсь киос уг куанермо. Калыкез улон-вылонын утёнъя министр Н. М. Бессогонов. Нюръясько, вормо Ижевскын шахматэн шудонъя нырысетӥ интые потон понна нюръяськонэ 70 адями люкаськиз. Ӵошатсконэ воргоронъёсын ӵош 7 нылкышно но пыриськиз. Нюръяськонын вормисе потӥз Удмуртилэн таиз ар понна чемпионэз - спортъя школаысь шахматъя отделенилэн тренерез Наталия Брылова. Со 9 луоноез пӧлысь 6,5 очко люказ. Кыкетӥ интые потӥз Удмуртиын кышномуртъёс пӧлысь спортъя мастере одӥг гинэ кандидат, технической университетын дышетскись Елена Кычанова. Со 5,5 очко люказ. Та нуналъёсы со шудонзэ азьланьтэ Москва улосын ортчись всероссийской ӵошатсконын. Воргоронъёс пӧлын вормисе потӥз спортъя "Нефтемаш" комплексысь инструктор, мастере кандидат Ильдар Фархутдинов. Со 9 луоноез пӧлысь 7,5 очко люказ. Вормисьлы 43 арес. Куамынэтӥ арзэ ни пртэм ӵошатсконъёсы пыриське. Нош городлэн чемпионэз куинетӥзэ луиз. Солэсь ӝыны очколы бере кылиз куинь шудӥсь - "Темп" клубысь спортъя мастер Владимир Федосеев; мастере кандидат, тужгес но кема шудӥсь, ожысь но ужысь ветеран ("Металлист" клубысь) Владимир Иванов но электромеханической заводысь инженер Виталий Полетаев. Та ӵошатсконын нюръяськиз 11 дышетскись но. Соос пӧлын асьсэды ӟеч возьматӥзы Евгений Анаховский но Александр Шихов. Алигес соос Россилэн полуфиналаз ветлӥзы. Соос 9 луоноез пӧлысь 5 очко люказы. х х х Ялон 19-тӥ мартэ "Ижпланета" клубын шахматэн шудонъя ӵошатскон ортчоз - Удмуртиысь мӧйыослэн нюръяськонзы. Та ӵошатсконэ пыриськыны быгатозы 55 ареслэсь бадӟымгес воргоронъёс но 50 ареслэсь бадӟымгес нылкышноос. И. ВЕЛЬТМАНДЕР. Россия ачиз быгатоз пыд йылаз султыны Пичи Пурга ёросысь Кечево нефтебазалэсь ("Удмуртнефтепродукт" ОАО) кивалтӥсьсэ Михаил Павлович Тойкинэз тодӥсьтэмез ӧвӧл, дыр. Та нефтебаза, шаерамы азьветлӥсь интыын лыдъяське. Егит кивалтӥсь задор мылкыдо, лякыт сямо, котькыӵе уж борды рос- прос басьтӥськеменыз калыклы гажамон адями луэ. Ачиз но Михаил Павлович гурт калыксэ мур гажа но яратэ, калыкен ужаны быгатон сямыз бинялтэ бордаз пичизэ но, мӧйызэ но. Ижысь гурт удысъя институтын дышетскыкуз ик Михаил Павлович азьпал улонзэ валаса радъялляз. Мар ке малпаз ке - одно ик сое быдэстыны тыршоз. Ас ужзэ ӟеч тодӥсь но калыкен ужаны быгатэмез понна ик оскизы кивалтӥсьлы гуртоос: 1998-тӥ арын Пичи Пурга ёрослэн Кенешаз депутатэ бырйизы. Та выль ужаз но М. П. Тойкин ассэ валась, быгатӥсь адямиен возьматӥз, соку ик солы ӵектӥзы экономикая но бюджетъя комиссиен кивалтыны. Таӵе ӝабыр-ӝабыр, котькыӵе уж борды мыло-кыдо басьтӥськемез понна али но солы оскем потэ, гурт улонэз ӟеч тодӥсь, отын вордскем удмурт адями Кун Кенешын ас калыкезлэсь кулэяськонъёссэ быдэстыны быгатоз шуыса. Нош депутатэ округез Михаил Павловичлэн луэ Пичи Пурга ёросысь ик 87-тӥ номеро Яган-Докъя округъя. Михаил Павлович Тойкинэз ушъяса гинэ верало мукет автозаправкаосысь ужасьёс но. Уждун угось соос котьку дырыз дыръя басьто. "Малы ӝожтӥськод кивалтӥсьлы, пӧрме ке ужез, мед ужалоз", - одӥг ымысь кадь шуо соос. Л. ИВАНОВА. Валентин Кузьмич Тубылов, "Удмурт кенешлэн" тӧроез "Мон ас музъем вылам - мон уг погра",- шуиз ВИ удмурт съездын Валентин Кузьмич Тубылов, Вань удмуртъёслэн "Удмурт кенеш" огазеяськонзылэн тӧроез. Озьы ик улэ со: оскытонъёсыныз вузаськытэк, ас шаерзэ но калыксэ сюлмысьтыз гажаса, солы вань визьзэ, быгатонлыксэ сётыса, юрттыны тыршыса, азьланез сярысь мур малпаськыса. Берло аръёсы, тужгес ик быръёнъёс азьын, удмурт калыкез но солэсь азьветлӥсьсэ ултӥяны тыршыса, пӧртэм кырсь материалъёс пото. Малы меда? Кинлы со кулэ? Валамон, кулэ со удмуртъёслэн тушмонъёсызлы, "Удмурт кенешлэсь" но Тубыловлэсь кышкасьёслы. Эшъёс, дурбасьтом Валентин Кузьмичлы! Оском солы асьмелэсь сюлэмшугъёсмес, азьлань улонмес но пиналъёсмылэсь шудбурзэс. Туннэ валаны кулэ огзэ: В. К. Тубыловез бырйыса, асьмеос дурбасьтомы "Удмурт кенеш" но быдэс удмурт калык понна! Кудӥз книга устогес? Гайдар нимо нылпи библиотекаын ортче пинал лыдӟисьёслы сӥзем арня. Нырысь нуналаз ик ӧс усьтэмын куанер улӥсь но сӧсыр нылпиос понна. Та арня куспын ортчытэмын луозы литературая шудонъёс, пӧртэм арлыдо лыдӟисьёслэн пумиськонъёссы, нош рейтинг- фестиваль дыръя тодмо луоз, кыӵе книгаосты пиналъёс али ярато лыдӟыны. А. Пушкинлы сӥзем ужъёссэс возьматозы школаосысь театръя студиос. 1-тӥ апреле ӝыт Удмурт филармониын, 2-тӥ апреле ӵукна та библиотекаын ик луозы Москваысь крезьгурчиен Г. Гладковен, кылбурчиосын М. Есиновскиен, Л. Яхнинэн пумиськонъёс. Ӵуказе куноос вуылозы на Пичи Пургала. Т. НИКОЛАЕВА. Герд Кыл ӧз сётэ Мукет ёросъёсы сямен ик, ми доры но алигес вуылӥз Кун Кенешлэн кивалтӥсез А. А. Волков. Вераз ужамез сярысь. Нош одӥг бырйисьлы но кыл ӧз сётэ. Соин ик нокин но ӧз быгаты шара дунъяны депутатъёслэсь ньыль ар ӵоже тыршемзэс. Кулэ вал меда таӵе пумиськон? Собере, мынам тодэмея, власть уг быгаты быръёнъёс дыръя ӝуткан уж (агитация) нуыны. Нош республикамылэн кивалтӥсез бырйисьёсты меӵак ӧтиз аслаз адямиосыз понна дурбасьтыны. Шонер шат со? Маин-о Богомольный, Вишневская ӟечгес медам мукетъёсызлэсь? Ма меда малпа та пумысен Быръёнъя комиссилэн тӧроез А. И. Тубылов? А. А. Волков туж тышкаськыса вераськиз Б. Н. Ельцин пумысен но. Ма, паймод ук! Ачиз но куке но со понна гурезь кадь сылӥз вал. В. СТЕПАНОВ, Игра посёлокын улӥсь. Герд Выжыосмес ӧм ке тодэ, быром Мар лэсьтыны быгатэ удмурт интеллигенция, калыкмылэн азьлань мынон сюресэз югытгес но паськытгес мед луоз шуыса? Та юанлы валэктонъёс но ужан амалъёс утчаса, пӧртэм районъёсын али ортчыло научно- практической конференциос. Кылем удмурт арня нуналэ, пятницае, со вал Кияса ёросын но. Удмурт нылкышно кенешлэн нимыныз отчы ветлӥзы тодосчи Галина Лесникова но кылбурчи Галина Романова. "Удмурт кенеш" огазеяськон ыстылӥз исполкомаз быръем муртэ Алексей Андрияновез. Та нод-нод студентэз калык тужгес шуныт пумитаз, малы ке шуоно, со ас пал адямизы, Вуж Салья школаын дышетскемын. Алексей Геннадьевич азьлань мынонмылэсь могӟетъёссэ адӟе трос тодон-валан люканы тыршымтэмысь бордысь. Вылӥ образованиен удмуртъёс, шуэ со, ӟучъёсын но бигеръёсын ӵошатыса, республикаямы кык пол ӧжытгес. Берло дыре "Удмурт кенешлэн" дэмланэныз дышетскыны пырыны луэ, но со понна кулэ на интыысь дунъет-характеристика. Кылем арын Кияса ёросысь 30 кузя Удмурт университетэ куриськон сётэмъёс витез гинэ пыремын, соос пӧлысь ньылез - удмуртъёс. Ёросысь медицина удысэз ке басьтоно, ӝыныез специалистъёс удмуртъёс луо. Озьы ке но, чаклано ке, сьӧд-кырсь, секыт ужъёсын тросгес тырше асьме выжы калык. Тани басьтоно ке "Киясовский" совхозэз, отын ваньмыз сямен механизаторъёс, пудо утисьёс - удмуртъёс. Огъя учкыса, ёросысь ӟучъёс, бигеръёс, поръёс пӧлын удмурт выжыос арысь аре юнмало, соос пӧртэм удысъёсын азьпалан мыно. Таӵе адямиос сярысь нимын-тулын вераса, данъяськон мылкыдзэ вераз ёрос кенешлэн кивалтӥсез Надежда Пахомова. Карамас-Пельга гуртын 50-тӥ аръёсы удмурт кылэз "порыны" кутскизы ни вал. Талы пумит нюръяськыса, ас гуртооссэ удмуртлык сюрес кузя валтӥз кылъя, литературая дышетӥсь Римма Васильевна Мазитова. Табере солэсь ужзэ азьланьтэ нылыз Светлана Викторовна. Кызьы пиналъёсты вашкала удмурт сямъёс вылын дышетоно чеберез валаны- дунъяны - та сярысь мадиз со люкаськемъёслы. Ас ёросэз, уката ик Вуж Салья гуртэз понна тужгес трос лэсьтэ татысь дышетӥсь Семен Сергеевич Вахитов. "Выжыосмес ӧм ке тодэ, быром",- пырак шуиз со. Салья воршуд сярысь туж узыр материал люкамын ни солэн кивалтэмез улсын, дас пол экспедициосы потазы. Шаерез тодонъя урокъёсыз вань классъёсын нуисько аслаз нимысьтыз дасям программаезъя (со печатламын "Вордскем кыл" журналын). Врач Нина Николаевна Иванова сюлэмшуго малпанъёссэ вераз калыклэсь тазалыксэ утён пумысен. Наркоманъёслэн, юисьёслэн, туберкулёзэн висисьёслэн лыдзы будэ. Ёросын кылем аре кулэмъёс тросгес вал, вордскемъёс сярысь, шуиз со. Нош кытчы вуттыны быгатэ "чидан чигымтэ" шуонмы, соиз но тодмо - суицидэ. - Асьмелэн огъя сюлмаськонъёсмы,- пусйиз Кияса ёросысь ӟуч культурая огазеяськонэн кивалтӥсь Алевтина Ивановна Коробейникова но. - Нылпиос, оло, садикысен ик кудӥз кутско ни юыны, тамак кыскыны. Удмурт школаосын кемалась мынэ ни этнопедагогика вылын дышетон. Нош ми бере кылиськом. Милемлы удмурт культурая дэменлыклэсь трос ласянь дышетсконо ай. Дыр вуэмын чеберлыклы дышетонъя центр, арня нуналэ ужась школаос кылдытыны. Кияса селоын но нылпиосты удмурт кыллы дышетон борды басьтӥськоно ни. Таӵе мылкыдзэ вераз ёросысь культурая ёзэн кивалтӥсь Тамара Николаевна Лёвочкина. Огъя вераса, та кенешонын трос гинэ сётэмын вал пӧртэм дэмланъёс. Нош одӥгез калык тулкымез пужалскытӥз, залын огыр-бугыр луиз. Уддядиысь Ӝакы апай (ваньмыз сое озьы тодо) ӧз чида, сцена вылэ потӥз но ӝотрак вераз: - Нокызьы ӧвӧл сётоно удмурт кылэз быдтыны! - Собере нёжтыса лэзиз на: Эн вунэтэ песянайдэс, Эн вунэтэ песяйдэс, Соослэн но данъёсынызы Асьмеос данъяськиськом... Огъя сюлмаськонъёсты сэрттӥсь-пертчись та ужрадэ мукет выжы калыкысь азьветлӥсьёс но пыриськыны мылкыд каризы бере, конференциез нуыны кенешизы вал ӟуч кылын. Зэм, куд-огез "ӧз кылзӥське". Таӵе дыръя пумитъяськон мылкыдъёс кылдо: мурт кылын ке, лулысь-сюлмысь кенешон уггес пӧрмы ни уго. Ярам, ваньзэ интыяз пуктӥз, валэктӥз Кияса администрацилэн тӧроезлэн воштӥсез Тамара Егоровна Васильева. Вал, дыр, конференциын тырмымтэосыз но (котькуд ёросын сямен ик). Оло, ӧй вал югдурез тодосчилэн синмыныз учкыса мур-мур эскерон, сэрттон-пертчон, анализ... Таӵе огыр-бугыр вакытэ сцена вылысь адӟем потэ вал кадь Георгий Грязевез но (со залын пукиз), тодмо тележурналистэз, егит писателез, "Кирень куректон" книгалэсь авторзэ... Но шӧдӥськиз: калыклэн мылкыдыз вӧлскемын, тудӟемын. Со шӧдӥськиз Киясаысь "Ашальчи" ансамбльлэн кырӟам-верамысьтыз но, мукет гуртъёсысь нылкышноослэн чебер пӧрмытскемысьтызы но, пужыё-пужыё киужъёсысь но... Вераны кулэ созэ но: конференция ортчиз Ермолаево шор ёзо школаын. Татчы пырыса, амалтэк синмаськод, кошкемед но уз поты ни - сыӵе со тупыттэм, быдэсак туала куронъёслы тупа. Школазы сярысь вераны кури дышетӥсез Тамара Никитична Петроваез. - Школаямы али 12 класс, 180 дышетскисез,- шуиз со.- Бадӟым спортзалмы, актовой залмы, столовой, пӧртэм станокъёсын мастерской, инфороматикая кабинет, фото но мукет кружокъёс нуыны лабораториос, медициная кабинет, техперсоналлы висъетъёс, душевойёс... Теплица луоз на, бакчамы, садмы узыр... Ма, школаямы та Выль арысен гинэ пыремын ай. Буш интыос но вань на. Кыдёке азьпала учкыса лэсьтэмын та юртмы, тросгес пиналъёслы чакласа. Бадӟым тау колхозлы но, депутатмылы Сычевлы но. Николай Семёнович сётэм кылзэ быдэстӥз, школамес вуттӥз. Г. С. Сычевез но адӟыны луиз та ёрос кенешысь. Сое шулдырак котыртӥллям "ашальчиос". - Ма сярысь вераськиды? - юай берло. - Николай Семенович ушъяз милемыз, удмурт культураез ӝутыны юрттӥськоды, шуиз. Мылкыдмес ӝутӥз: сцена вылэ потыны выль дэремъёсты мед луозы шуыса юртто, пе. 85 номеро Киясово округъя депутатэ кандидатэ ӵектэм адямилы та палан оско: со ас кылызлы кузё. Т. ПЕТРОВА. * Кияса ёрос кенешлэн конференцияз. Депутатэ кандидатэз Н. С. СЫЧЕВЕЗ котыртӥзы "Ашальчи" калык ансамбльысь нылкышноос. Туспуктэмез В. КАМАШЕВЛЭН. Удмурт филармонилэн концерт залаз 30-31 мартэ Кырӟан, серекъян, маскаръяськон ӝыт Тӥледыз шулдыртозы: - "Шудыр ӝыт" ансамбль, - "Катанчи" театр, - Александр Перевозчиков, Анатолий Григорьев, Вячеслав Иванов, Ольга Вахрушева, Алексей шкляев, Равиля Гайфуллина, Раиля Гильмаева, Николай Кибардин, Рома Николаев но мукетъёсыз. Режиссёр - Анатолий Ушаков. Кутсконэз 18 часысен. Касса ужа 14 часысен. Кутӥсько коллективной заявкаос, тел. 23-23-38. "Яратоно сяськае - гладиолус" Котькуд адямилэн ӵуказе нуналлы осконэз медло Александр Русских Мар со улон? Со - азьланезлы оскон. Нуналлы быдэ яратоно ужад ветлон, семья куспад тупан, пиналъёстэ будэтон но дышетон, пересьмон арлыдад ӟеч пенсия басьтон но дун тырытэк тазалыктэ эмъян. Адямилы, зэмен но, трос ик кулэ ӧвӧл. Но малы меда тае но асьме калыкмылы сётыны ум быгатӥське? Малы кутэм законъёс ляб ужало? Малы тӥясько Конституциен юнматэм куронъёс но правоос? Тӥни ма шугъяськытэ депутатэ мыныны мылкыд карем кандидатэз Александр Сергеевич Русскихез. Солэн озьы ик сюлэмыз бӧрдэ наука, культура, спорт понна. Куинез но та удыс туннэ аналтэмын, шуыны луоз. Огезлы но азинскыны государство ласянь тырмыт коньдон уг висъяськы, нош спонсоръёс вылын кыдёке уд вуы. Александр Русских вордскемын удмурт музъем вылын, Кизнер районысь Короленко посёлокын. Нош выжыосыз герӟаськемын Кез палъёсын. Соин ик депутатэ кандидат аслыз ужаны бырйиз Кез районэз. Александр Сергеевич умой тодэ гурт улонэз, пичиысен со дышемын шундылэн нырысетӥ тылсиосыныз сайканы. Атаез, Сергей Матвеевич, колхозлэн председателез, уго вазь султылӥз. Саша но со сьӧры улляськыны выриз. Бубиныз ӵош ветлэ вал скал кыскисьёс, ю кутсасьёс, корка пуктӥсьёс доры. "Предлэн" школаез улоназ пыраклы пытьы кельтӥз: адямиосын быгатыса вераськон, музъемез яратон, оскем ужез йылаз-пумаз вуттон - ваньмыз со сямаз пыӵамын. Анаез но пиез понна туж ӟеч дышетӥсь вал: Луиза Васильевна ужаз Кизнер райкомлэн секретарез луыса. 1958 арын семьязы Ижевске улыны выже. Аатайзы кивалтэ ГПЗ-13, мотозаводысь партийной организациосын, Луиза Васильевна - школалэн директорез. Саша школаез йылпумъяз ни Ижевскын. Армие ветлыса, 9 ар ужаз радиозаводын, пумен дышетскиз Ижевскысь механической институтлэн ӝытазе ужась отделенияз. Дипломезъя со - инженер-системотехник, нош сюлмыныз бурмемын спорт но сяськаос борды. Тужгес но зол яратэ гладиолусъёсты. Соосты, пичи пиналъёсты сямен, уен-нуналэн утялтыны дась. Русскихлэн коллекцияз кӧня пумо сяськаез шуоды? - 300 ёрос гинэ, - пальыша Александр Сергеевич. Гладиолусъёсыз сое одӥг пол гинэ ӧз вуттылэ ни Москвае, ВДНХ-е. Русскихлэн нимыз пыртэмын СССР-ысь дас устоосыз коллекционеръёс радэ. Ижевскез ке верано, огез но выставка сотэк уг ортчы. Нош кӧня сю, сюрс бакчаосын будо ни яратыса, утялтыса будэтэм-вордэм "пиналъёсыз"! Сяськаосты гажась мурт ноку но уродэз пала уз кыстӥськы, солэн сюлэмыз тырме чеберлыкез утёнэн, ог-огедлы ӟеч уж лэсьтонэн. 1991 арысен Александр Сергеевич кивалтӥз "Ирбис" фирмаен, 1996 арысен - "Коминвест" ЗАО-лэн генеральной директорез. Котькуд воргоронлэн сямаз пыӵамын спортэн вырон. Русскихлэн улоназ со сяськаос бере, валтӥсь инты басьтэ. Пиоссэ но люконтэм герӟаз ни, шуыны луоз, мотоспортэн. Бадӟымез, Евгений, 1997 арын мотоциклэн ӵошатсконын Россиысь спортсменъёс пӧлын азвесь призёр луиз. А. С. Русскихлэн дасям командаез кылем арын Бельгиын ортчем гонкаосын 5-тӥ интыез басьтӥз. Дунне вылысь кужмоос пӧлы шедён - туж бадӟым вормон. Александр Сергеевичлэн ужез пусъемын трос дипломъёсын, грамотаосын, сӥё- дано наградаосын. Со Удмурт Республикаысь но Россиысь Мотоспортъя федерацилэн президентэз. Русскихлэн нимыз берло аръёсы тодмо луиз ни быдэс дуннелы. Самой таӵе воргоронъёсын данъяське но юнма асьмелэн шаермы. Эшшо кӧня пиосмес будэтоз на бадӟым опытэн спортсмен но дышетӥсь! Депутат луыса, маин со юрттоз Кезын улӥсьёслы? Программаяз пусъемын: - нюлэсэн ужанъя предприятие пуктон: корлэсь брус дасян, кылем-мылем пулэсь дубильной веществоос, скипидар, эмъюмлы мынӥсь материал поттон. - нылпиос, егитъёс понна мотоспортъя школа усьтон - ульчаосын порядокез радъянъя дружина кылдытон. Озьы ик Русских тупатъяны чакла спортплощадкаосты, лэсьтоз выльёссэ но. Нош гладиолус будэтӥсьёслы туннэ кӧня ке дэмлан сётэ. Нырысь ик, быръёно ӟеч кидыс. Вазьгес сяська поттон понна мерттоно ӝуйы пӧлы: ӝуйы эмъялоз но, будэтоз но. Мерттоно 30 апрелёзь, 5-8 сантиметр мурдалае. Ӝуез вылтӥз ӧжытак гинэ сюен согоно. Будослэн ньылетӥ куарез потэм бере, котыраз сюй ӝутъяно (картофкаез окучить карем музэн). Кузь но шонер модосо сяська будэтон понна дыраз уроно, шер но жаль-жаль ву киськано, подкормка сётоно. Висёнъёслэсь утёзы фундозол но марганец. Нырысетӥзэ подкормка сётоно, нырысетӥ куар поттыкуз - 1 кв.метрлы - 20 грамм мочевина, кыкетӥзэ - 3-4 куаро дыръяз - 20 грамм мочевина но 30 грамм суперфосфат, куинетӥзэ - 7-тӥ куар поттыкуз - 10 грамм суперфосфат но сомында ик калиевой селитра. Ньылетӥзэ - сяськосыз тӧлӟем бере - 30 грамм калиевой селитра. Гладиолусъёсты музъемысь копано кынтытозь, умой-умой куасьтоно. Толйыны интыяно гулбече яке юзмытгес азе, +5+8 градуслэсь шуныт медаз луы. Эшшо одӥг дэмлан. Гладиолус туж яратэ шундыез, выль муэз, азьвыл будэм убо вылаз со уз удалты ни. Та куронъёсты быдэстӥды, чаклады ке, ужды одно ик пӧрмоз. Нош кӧня шумпотон ваёз асьтэлы но семьядылы, тодмоостылы но ӵыжы-выжыостылы! Ас киосыныд будэтэм сяська керттэтлэсь дуноез кузьым вань на меда? Л. Медведева. А. С. Русских, Кезысь 82 номеро избирательной округъя депутатэ кандидат. ГЕРД "Нянен гинэ кӧттэ уд тыр..." Та нуналъёсы калык пӧлын ужало Кун Кенеше депутатэ кандидатъёс. Соос котькудзы верало ма понна сюлмаськемзэс, кызьыгес азьлань ужаны малпамзэс. Котькудӥз турттэ кадь калыклы ӟеч гинэ лэсьтыны. Азьвыл но бырйисьёсын уж озьыгес ик ортчиз, нош улонмы йырчукин кошкиз. Кинлы осконо, кин пала дурбасьтоно? Таӵе сюлэмшугъёсыным вазиськи Михаил Гаврилович АТАМАНОВЛЫ, филология наукаосъя докторлы, Ижысь Успенье черкысь дьяконлы. - Михаил Гаврилович, тӥ мукетгес дуннеын улӥськоды, инмарлы матын. Кызьы учкиськоды та эли-кеби, мыдланес улэммы шоры, тужгес но али, быръёнъёс азьын? - "Адями мае кизе, сое ик ара," - шуэмын Библиын. Мур-мур малпаськоно ке, кин меда янгыш, асьмеос таӵе шимес улонэ вуимы шуыса. Уж ӧвӧл, уждун уг тыро, алямын лушкаськон, юон, калгон, ог-огдэ пӧян, виылон. Кыӵе гинэ йыруж малпаны быгатэ усыкмем адями визь, ваньмыз со али лэсьтӥське Россиын. Быдӟым ож пуромытэмез понна Германия быдэсак куашкатэмын вал, нош али та страна дунне вылын одӥгез кужмоез но узырез. Одӥг немец фермер сюдэ сюлэсь ятыр адямиосты, нош ӟуч воргорон (соин артэ ик вамышъя удмуртэз но) аслэсьтыз семьязэ но тыро-пыдо сюдыны уг ни быгаты. Куашкам колхозъёсын Брежнев вакытысь вуэм комбайнъёсынызы, тракторъёсынызы бусыостӥ поръяса ма но со лэсьтыны даурто ик на, нош соос но ӧз ни ке луэ, маин кизёмы-араломы, кызьы будэтомы нянь, ма чотын поттомы йӧл, сӥль? Америкалэсь, Европалэсь куштӥськем сиён-юонзэс зарни дунын октыса, кӧтмес тыромы-а? Мае луэ вузаны, ваньзэ туала шӧртчиосмы келяло кунгож сьӧры, коньдонзэ ас киязы поно (шонерзэ ке верано, туала миллионеръёс уксёзэс отысь банкъёсы тыро). Сюлэм вӧсь луыса учкисько, кызьы кораса быдто ни удмурт нюлэсмес, тус-тас каро музъем узырлыкъёсмес, заводъёсты. Малы тазьы луэ? Адямиос, уката ик кивалтӥсьёсмы, чик но уг уло инмар законъя, дуннеез кылдытӥсьлэсь курон-косонъёссэ тодазы но уг ваё. Улӥськомы тазьы: инмарлэсь ум курдаське, огмылэсь огмы ум возьдаськиське. Нош улон сётӥсь Инмармы шуэ: "Мон киын пунэм берыктон". Озьы кылдытӥсьмылэсь бакель каронзэ (благословенизэ) басьтытэк улэммы понна улонмылэн азинлыкез, берекетэз чылкак быре ни кадь. Но асьмелэн Кылдытӥсьмы шуэ: "Курелэ, сётэмын луоз". Быръёнъёс азьын зэмзэ но куд-ог кандидатъёс инмарез тодазы ваё, черклы пӧртэм ӵектонъёсын вазисько, юрттэт куро. Но инмарез уд пӧя, со чылкыт сюлэмоосты гинэ яратэ. Кырсь уксёен огдырлы гинэ азинлык басьтӥд ке басьтод! Инмарлэн пиштӥсь данлыкезлэн юртаз ӟеч ужъёсын но осконэн гинэ пырыны луэ. - Газетын "Удмурт кенешлы" дурбасьтӥсь кандидатъёслэн списоксы поттэмын. Соос пӧлысь кудъёсызлэн мылкыдзы, кужымзы тырмоз кадь потэ та секыт улонмес ӟече поттыны, кинъёсты адӟиськоды Удмурт Элькунысьтымы Кивалтэтлэн, Кун Кенешлэн вылӥ ёзъёсысьтызы? - Тодматски со списокен, куд-ог тодмо адямиосты но пумитай. Но соос ӧжыт. Чылкак паймымон, малы кандидатъёс пӧлын ӧвӧл удмурт культураен, литератураен, историен, искусствоен герӟаськем муртъёслэн нимъёссы? Кин Кун Кенешлэн сессиосаз депутатъёсмылы тодазы вайытозы, асьмеос Удмурт Элькунын улӥськомы, удмурт калыклэн но сиён-юон, кӧттырон сярысь сюлмаськонъёсыз сяна, вань на кылзэ, культуразэ утён, азинтон ужпумъёсыз но шуыса. Кӧняезлэн меда депутатлэн программаяз пыртэмын удмуртлыкез утён ужрадъёс? Депутатъёс пӧлы пыризы ке ужбергатӥсьёс но директоръёс гинэ, кин соку сюлмаськоз улонмылэсь лул пуштроссэ, духовностьсэ утёнын? Паймоно кадь, куд-ог ёросъёсын одӥг но удмурт кандидатъёс ӧвӧл. Кылсярысь, Воткинск, Грахово, Камбарка, Каракулино, Красногорск, Якшур-Бодья удмурт ёросын укмыс кандидатъёс, соос пӧлын одӥг гинэ удмуртэз. Шонерзэ ке верано, ваньмыз укмысэз ик кандидатъёс - тодмотэм адямиос. Кытын тӥ, удмуртъёс? Кин сюлмаськоз асьме калыклэсь улон-вылонзэ капчиятыны, шулдыргес, улэм потымонгес карыны? Депутатъёс сярысь ке верано, мон нырысь ик киме ӝутысал П. Н. Вершинин понна. Со мон понна чылкыт сюлэмо адями, ас калыкезлэсь уг палэнскы, ужась крестьян семьяын вордскемын, гурт ужез сяна, тодэ культураен герӟаськем ужпумъёсты но; кусыпез ӟеч Православной Черкен кивалтӥсьёсын но; шумпотыса кылзӥсько удмурт кылын вольыт, чебер вераськемзэ. Удмурт калыклэсь данзэ со уте, куре уз кушты. Туж оскисько, Можга ёросысь Уча вылъёс одно ик огкылысь куаразэс сётозы Павел Николаевич Вершинин понна. Инмар мед юрттоз солы вань кутскем ужъёссэ азинтыны. Шумпотӥсько, та списокысь В. К. Тубыловлэсь, Н. А. Образцовалэсь, А. Т. Малковлэсь, И. Н. Семеновлэсь, В. А. Никитинлэсь, Л. Ф. Ивановалэсь, Н. К. Золотаревалэсь, С. К. Смирновалэсь, А. Ю. Максимовлэсь, А. В. Ившинлэсь, В. Л. Фридрихлэсь, Н. Ф. Чувашовлэсь нимзэс-тулзэс пумитаса. - Мынам вордӥськем палъёсам, Ува ёросысь Булай котырысь округын, сӥлы, калыкен гажамон адями луэ Николай Федорович Чувашов. Со ӟуч адями ке но, туж трос лэсьтӥз та палъёслы. Ма, али но, Кун Кенешысь эскерон палатаын ужакуз, калыклы берыктыны юрттӥз трос миллион манетлы лушкам ваньбурез. Инмар шуэ, Музъем вылын ваньмыз мынам нылпиосы, ог-огзэс валаса, ӟеч улэ. Соин ик, оло, сокем висъяно ӧвӧл, ӟуч-а, бигер-а, удмурт-а со. Малпанэз, ужан манерыз гинэ калыклы пайдаен мед берытскоз. - Мон солы пумит ӧвӧл. Кылдэм югдур туж шугъяськытэ. Тани тӥ "Инвожо" журналын ужаськоды, со туж курадӟыса потэ - кылем арлы номеръёсты али но лыдӟисьёс доры ӧз на вуэ. Векаса уло вань удмурт газетъёс, журналъёс, нош куд-ог ёрос газетъёс ворсаськизы но ни. Уг пото книгаос, Удмурт театрмы та дырозь вашкала юртын улэ, удмурт радиоысь, телевидениысь передачаосты ӝынылы кулэстӥзы ни - удмуртлыкен герӟаськем мукет сюлэм висёнъёс но трос гинэ. Кин соосты нырысь ик валаны быгатоз но сюлмаськоз? Малпасько, ас калыксэс гажась Н. А. Образцова, В. К. Тубылов, П. Н. Вершинин выллем удмурт депутатъёс гинэ. Н. Ф. Чувашов пумысь ке верано, мон солы чик пумит ӧвӧл. Гурт ужез тодӥсь, визьмо кивалтӥсь. Солэн нимыз быдэс кунмылы тодмо. Кызьы колхоз ужен кивалтыны быгатӥз, малпасько, котькудаз солы сокем удысын со сюлэмзэ поныса ужалоз шуыса. Н. Ф. Чувашовез ке верасько, соку ик син азям пуктӥсько вордскем Грах ёросысьтым "Родина" колхозлэсь тӧрозэ М. А. Крестьяниновез. Быдэс Россиын хозяйствоос куашкан вакытэ, милям колхозмы пыд йылаз йыг-йыг сылэ, усьыны уг сётскы. Гуртын ужасьёс дурыныз басьто нянь, турын, уксё. Лэсьтӥсько, пуктӥсько. Татын туж шӧдӥське визьмо, калыкен лякыт вераськыны быгатӥсь колхоз кивалтӥсьлэн кужымез. Котыраз люказ асьме палан вордӥськем удмурт специалистъёсты. Уг луы вал шат та визьмо кивалтӥсез но депутатэ ӵектыны? Солэн али кын корт куртчон дырыз. Медаз малпалэ, удмуртъёс пӧлын визьмо, кивалтыны быгатӥсьёс ӧвӧл шуыса. Трос дыръя дӥсьтонлыкмы уг тырмы, кулэтэм дыръя кепыранмы люкетэ. Соин ик, дыр, кандидатъёслэн списокцсьтызы ӧй пумита М. кепыранмы люкетэ. Соин ик, дыр, кандидатъёслэн списокысьтызы ӧй пумита М. А.Крестьяниновлэсь, Ю. К. Рожинлэсь, М. В. Долговлэсь, А. В. Тарасовалэсь но мукет бӧлякъёсылэсь нимъёссэс. Соостэк Грах ёросын улӥсь удмуртъёслэсь кулэяськонзэс кин меда сюлэмзэ поныса быдэсъялоз? "Нянен гинэ тыр уг луы адями, со тыр луэ инмарлэн ымысьтыз потэм котькуд кылыныз", - шуэмын Библиын. Нош инмарлэн ымысьтыз пото адямиез гажаны, яратыны, со сярысь сюлмаськыны косӥсь кылъёс. Озьыен, депутатэ ӵектэм гажано кандидатъёсмы, сюлмаське калыктэс нянен но, кылын но тыр карон сярысь. Инмарлэн быръем муртъёсыз ке тӥ, вунэтэ кисыдэс зӧкатон ужъёсты; ӝутэ вордскем шаермылэсь куашкам экономиказэ, культуразэ, жадьытэк ужалэ- тырше калыклэсь улон-вылонзэ капчиятон бордын; оскон, оскиськон бордын мед луоз калыклэн кужымез, тӥляд кивалтон сямъёсты. Вераськиз Галина Романова. Ӟечкыланъёс Можга ёросысь Пазялын улӥсь Мария Федровна Ларионовалы 7 апреле 70 арес тырме. Вань сюлмысьтымы ӟечкыласьком яратоно анаймес но песянаймес вордӥськем нуналэныз. Юн тазалык сӥзьыса нылпиосыд. Вордскем нуалэныз ӟечкыласько Татарстанысь Горд Сяська гуртысь Любвоь Валентиновна Назароваез. Тазалык но азьланезлы ӟеч оскон, шудо нуналъёс тыныд, анай. Таня нылыд. Алнаш ёросысь Шудья гуртысь Татьяна Николаевна Орловаез вордскем нуналыныз ӟечкылало нылпиосыз. Тазалык но семья куспын ог-огдэ валаса, тупаса улон сӥзё соос анайзылы. Герд Малпанзэ вера лыдӟись Малы меда сюлэм бӧрдэ? Нокызьы уг чидаськы, быръёнъёс азьын куд-ог малпанъёсме гожтытэк. Ма, учке ай, кызьы адямиос асьмемыз нош ик пӧяны тыршо, власть борды ӝабырско. Кун Кенешлэн нырысетӥ созывысьтыз депутатъёслэсь ужамзэс мон уродэн лыдъясько. Соос ӧз быдэстэ удмурт калыклэсь куронзэ, ӧз кутэ кыл сярысь но, трос мукетъёссэ но кулэ законъёсты. Табере сыӵеос выльысь туртто депутат луыны. Кулэ-а асьмелы выжы калыклэсь кулэяськонъёссэ адӟисьтэм муртъёс?.. Сяме пыӵа соиз но: Ижысь кузёос но музон юлтошъёс сьӧд куакаос сямен лобо ёросъёсы, гуртъёсы. Кин гинэ уг малпа мандат басьтыны? Милям городамы но палэнысь лыктэмъёс адӟисько. Мон озьы шуисько: интыысь ужпумъёсты отын улӥсь муртлэсь ӟеч нокин но уз быдэсты, соин ик куара сётон нуналэ котькуд бырйисьлы сак кариськоно. Учке ай. Ижын сотэк но республикаысьтымы улӥсьёс пӧлысь ӝыныез пала интыяськемын. Юнме шат сюысь ньыльдон одӥгез округ отчы шедемын. Табере ватсалэ на ог 20-30 мандат, кудзэ асьмеос кузьманы быгатом ёросъёсы Ижысь пегӟем адямиослы. Ма кыле на гуртоослэн медооссылы? Ма соос карозы? Кун Кенеш но уз луы ни ук, со кыкетӥ Гордумалы пӧрмоз. Тӥни озьы... Мон малпамъя, кызьы ке но А. А. Волковез лэзёно ӧй вал ни Удмурт Республикаен кивалтыны, туж уно шугъяськон ваиз со калыклы. Вераськон потылэ президент котырын. Мон солы пумит ӧвӧл. Но мед луоз асьме адями, огдыре мед кивалтоз правительствоен. Кин но со шуэ: мар, пе, пӧртэмез, котькин мед кивалтоз. Улыса адӟим ни ук Марисов, Грищенко но мукет муртъёсын. Кудзы-о асьме сярысь сюлмаськизы? Ялан зӥбыны гинэ тыршизы. Кызьы шуо, пӧйшурез котькӧня сюд, со весь тэль пала учке. Нош удмурт адями ас калыкезлэсь палэнскыны уз тыршы. Тӥни сыӵе мылкыдъёс бугыръясько али мынам сюлмам. Ф. КАБИРОВ, "Удмурт кенешлэн" Камбаркаысь ёзэзлэн кивалтӥсез. Мае кизид - сое аралод Г. А. Зюгановен пумиськем бере малпанъёс 16-тӥ-18-тӥ мартэ республикаямы вуылӥз Россия Федерациысь Коммунистической партилэн Центральной Комитетэзлэн председателез, Народно-патриотической Союзлэн кивалтӥсез Геннадий Андреевич Зюганов. Солэн предприятиосысь кивалтӥсьёсын, студентъёсын, ужась коллективъёсын пумиськылэмъёсыз сярысь ивортонъёс печатламын вал ини. Мыным шуд усиз Г. А. Зюгановлэн Ижевскысь "Металлург" культура дворецын городысь но районъёсысь лыктэм адямиосын пумиськоназ ветлыны. Бадӟым залэ калык тыраз люкаськиз, тросэз отчы сюрыны ӧз быгатэ. Сокем уно адямиос мылкыд каризы одӥгезлэн кужмо партилэн кивалтӥсеныз пумиськыны. Соослэн тодэмзы потӥз странаямы югдур, туала вакытэ кылдэм шимес учырысь потыны сюресъёс сярысь шонер валэктонъёсты. Адямиос уго акыльтӥзы ини телевидение но радио пыр, уноысьтыз газетъёсысь улон-вылонмес мыдланес возьматэмзы, нуналлы быдэ пӧяськемзы. Странаямы кылдэм югдур сярысь вераса, Г. А. Зюганов пусйиз: президентлэн но азьвыл правительствоослэн экономикалэсь куашканзэ дугдытон сярысь оскытэмзы номыре ӧз вошты, экономика ялан уллань ваське, наука мырдэм века, калыкез дышетон, тазалыкез утён но мукет удысъёс бырон калэ вуэмын. Соин ӵош ик калык ваньбурез лушкаса но киултыса узырмемъёс, банкиръёс но спекулянтъёс арлы быдэ кунгож сьӧры келяло 25 миллиард доллар ёрос коньдонэз, страналэсь экономиказэ ӝутонэ соослэн копейка но висъямзы уг поты. Озьы правительство ужъюгдурез радъям, асьмелэсь луонлыкъёсмес калык хозяйствоез азинтонэ огазеям интые, кураськыса ветлоно луэ. Кунгож сьӧрысь банкъёслы солэн тыронэз сомында люкаськемын ини, туэ гинэ процентъёсъя 17,5 миллиард манет берыктоно. Нош Международной валютной фонд правительство азе быдэстыны луонтэм куронъёс пуктэ, озьы солэн кыӵесаз ялан пыдлогес но пыдлогес пыриськом. Нош кытчы-о луизы асьмелэн вылӥ технологиен но усто техникаен узыр, ӟеч продукция поттӥсь предприятиосмы? Чубайс приватизация ортчытэм бере, 500 бадӟымесь предприятиосмы вузамын вал зэмос дунзылэн 3 процентэз мында гинэ дунын. Нош бадӟымесь монополиосын, кылсярысь, "Газпромен", энергосистемаен, связен али но кивалто экономикаез куашкатӥсьёс но вузасьёс. Тани алигес радио пыр ивортӥзы, коньдон ужпумъя азьвыл министр Борис Фёдоров, пе, Чубайс доры РАО ЕЭС-э кивалтон уже пырыны малпа, отчы ик, пе, ӧтьыны чаклало Гайдарез, Немцовез, Кириенкоез. Озьыен, соос малпало, татчы каръяськыса, нош ик асьмемын кызьы мылзы потэ, озьы кивалтыны. Ма, Правительстволэн, Федеральной Собранилэн нокыӵе кужымзы ӧвӧл шат таӵе югдурез тупатыны? Яке соослы президент-а уг лэзьы? Тӥни малы таӵе югдуре нырысь быдэстоно ужпум луэ - странаен кивалтонэз выльдон, реформаос ортчытон политикаез калыклэсь улонзэ умоятон сюресэ выжтон. Валамон ни, "демократъёс" сое лэсьтыны уз быгатэ, уз но турттэ, солэсь но ортчыт, котькызьы люкетыны тыршозы. Озьы бере, властез воштоно. Со понна туэ умоесь луонлыкъёс усьтӥсько - ар пумын ортчозы Кун Думае быръёнъёс. Дыр кема на кадь, нош быръёнъёслы дасяськонэ тросэз пырисько ини. "Демократъёс" тыршо "тэшкам тэркызэс" лякылыны, Лужков "Отечество" движенияз люка президент яке Черномырдин палась пегӟисьёсты, Жириновский потӥз ини, кызьы ачиз вераз, бырйисьёсты ас палаз берыктон понна кузь сюрес вылэ, Явлинский та малпанзэ ик быдэстыны турттэ, туала правительство вылэ урод кыл вӧлдыса. Трос пӧртэм партиос но движениос пӧлысь калыклы тужгес но матын но валамон луо Народно-патриотической Союзэ пырисьёс, соослэн программазы. Со сярысь Зюганов люкаськемъёслы пыр-поч валэктӥз. Тани коммунистъёсты пыкыло, тӥляд экономикаез утонъя нокыӵе программады ӧвӧл шуыса. Но, кызьы тодӥськом, та ужпум нимысьтыз эскеремын вал КПРФ-лэн ЦК-езлэн туэ 23-тӥ январе ортчем пленумаз. Солэн материалъёсыз печатламын газетъёсын, кылсярысь, "Советская Россия" газетын. Вакчияк вераса, со программалэн пуштросэз таӵе луэ: калыклы пумит луись властез палэнтоно; кылдытоно улон-вылонмес умоятон, адямиослэсь осконзэс быдэстон понна тыршись кивалтэт, со мед быгатоз экономикаез азинтон, коньдон ужпумъёсты ас кияз басьтыны, производствоез азинтыны, страналэсь бадӟымесь узырлыкъёссэ калык понна уже кутыны, калыкез дышетон, тазалыкез утён, культураез азинтон ужпумъёслы паськыт сюрес усьтыны, социальной юрттэт сётонэз умоятыны. Кинлы матын но дуно луо ужась калыклэн малпанъёсыз но сюлмаськонъёсыз, Родинамылэн эрикез но данэз, соосын народно-патриотической кужымъёс огкылысь ужаны дась луо. Зюганов эш шуиз: ми дась пумиськылыны но вераськыны ваньмыныз, кин луэ выль Россия понна. Но ми ум пумиськылэ Гайдарлэн, Чубайслэн, Черномырдинлэн шӧлказы ветлӥсьёсын но соослы дурбасьтӥсьёсын. Тани тӥляд но мэрды Гайдар пала кариськем. Сыӵеосын ми огкыл ум шедьтэ. Соос уз буйгатске али азьвыл лэсьтэм сьӧд ужъёсынызы, азьланьын но турттозы уськытэм тэльбугозэс ӝутыны. Зюганов эш озьы ик уг адӟы Явлинскиен но Жириновскиен кусып тупатыны, "Наш дом - Россия" движениен ӵош ужаны луонлыкъёсты. Народно-патриотической Союзэ пыро трос огазеяськонъёс но партиос: Аграрной партия, "Народовластие" фракция, "Держава" движение но мукетъёсыз, табере кылдӥз егитъёслэн коммунистической организацизы. Отчы ӧс усьтэмын мукетъёсызлы но, кин улэ калык сярысь сюлмаськонэн. Соос оско, калык туэ быръёнъёсын азьвыл сямен ассэ пӧяны уз сёты ни, валатскоз, кин со понна луэ эш но кин тушмон. Зэм, азьвыл быръёнъёсын сямен ик, туэ но луозы адямиосты пӧян, кӧян-вӧян, кузьымъёсын алдан, быръёнъёс сярысь законэз тӥян, солы йылпумъянъёсты суран-пожан но мыдланьтон учыръёс. Соин ик котькуд избирательной участокын быръёнъёслэсь кызьы ортчемзэс юн эскероно, законэз тӥясьёсты кыл кутытоно. Котькудӥз бырйись ӟеч валаны кулэ: быръёнъёсын вераськон уг мыны кинлэн ке нимаз адямилэн улон-вылонэз сярысь, вераськон мынэ странамылэн азьланьын кыӵе сюрестӥ азинсконэз сярысь. Озьы бере, осконо сыӵе кандидатъёслы, кин чылкыт сюлэменыз, ӟеч малпанъёсыныз тырше калык понна ужаны. Россиысь Кун Думае быръёнъёс луозы ай арлэн пумаз. Нош асьмеос республикаысь Кун Кенеше бырйыны мыномы ини, кӧня ке нунал ортчыса. Соин ик верам потэ: Зюганов эшлэн верамез но дэмланъёсыз медаз ортче вылэм бырйисьёсмылэн пель сьӧртӥзы, малы ке шуоно, асьмелэн но быръёнъёс пумысен сюлэмшугъяськонъёсмы ичи ӧвӧл. Нырысь ик учконо, кинъёс туртто депутат луыны. Мур-мур тодматскыны кулэ котькудӥзлэн программаеныз. Тани али соослэсь радио но телевидение пыр, газетъёсын верамъёссэс кылзӥськод-лыдӟиськод ке, ог-огзылэсь пӧртэм ӧвӧл кадь. Нокин но уз вера, мон калыклэсь улонзэ уродгес карон, экономикаез куашкатон понна тыршо шуыса. Ваньзы оскыто республикаямы, нимаз удысъёсын югдурез тупатон вылысь ужаны мылкыд каремзэс. Соосты ӟеч-ӟеч тодыны луоз ужамзыя. Соин ик депутатэ бырйыны кулэ ас районысьтыд, гуртысьтыд оскымон адямиез. Соку Кун Кенеше уз сюре сьӧрлось тодмотэм муртъёс. Али тани учке ай котькуд округъя кандидатъёсты, кин гинэ ӧвӧл соос пӧлын: палэнысь лыктэмъёс но, азьвыл быръёнъёс дыръя депутатэ шедьымтэос но, улон-вылонмес та калэ вуттэмзы понна янгыш луись "демократъёслы" дурбасьтӥсьёс но, куинетӥзэ ини депутатэ чуртнаськисьёс но. Мон соос понна куараме ӧй сётысал. Нош кин кыкетӥзэ турттэ депутат луыны, меӵак юасал солэсь: мар лэсьтӥд тон депутатын ужатозяд калык понна но ачид понна, кызьы быдэсъяд бырйисьёслэсь куронъёссэс? Собере тани мар сярысь вераме потэ на. 1985-тӥ арын республикаысьтымы Вылӥ Советэ быръем 200 депутат пӧлысь 84-ез удмурт вал, 79-эз - нылкышно, сомында ик рабочийёс, 23-ез - колхозник. СССР-ысь но РСФСР-ысь Вылӥ Советъёсы бырйыку, туж чаклаське вал республикалэн национальной составез, одно ик бырйылӥзы рабочийёс но колхозникъёс пӧлысь устооссэ - ужась калыклэсь нылъёссэ но пиоссэ. Табере сое чаклась ӧвӧл ни. Удмурт Республикаысь Кун Кенешын одӥг удмурт но ӧз ни ке луы, нокинлэн йырыз уз висьы. Тӥни со пумысен но бырйисьёслы малпаськыны кулэ вылэм. Нош уж вылын малы ке сое чаклась ӧвӧл. Тани, кылсярысь, 1995-тӥ арын ортчем быръёнъёс дыръя Селта, Яр, Вавож районъёсын улӥсьёс вылӥ ёзэ ыстыны асьсэ пӧлысь оскымон адямиоссэс шедьтӥллямтэ, бырйиллям сьӧрлосьёсты, ваньзы ик ӟучъёс. Озьы ик Игра, Завьялово удмурт районъёс быдэн куинь депутат бырйизы ке, одӥг удмуртэз но ӧз шедьтэ. Быръёнъёсъя туала законын чакламын ӧвӧл ни, кинэ тон быръёд. Соин ик, эшшо одӥг пол верам потэ: бырйисьёслэн асьсэлэн визьзы но валанзы мед тырмоз кинэ депутатэ ыстыны. Табере югдурез шонер валэктӥсь агитаторъёс ӧвӧл ни, котькуд кандидатлэн аслаз медъям агитаторъёсыз, соос тынэсьтыд йырвизьдэ суралозы ас тодэмзыя. Адямиослы быръён нуналэ шонер вамыш лэсьтыны мед юрттысалзы общественной движениос но партиос, кылсярысь, "Удмурт кенеш", КПРФ-лэн интыосысь организациосыз но мукет. Ма бен, адӟом ини, кинэ быръёмы 4-тӥ апреле республикаысьтымы Кун Кенеше, нош туэ арлэн пумаз - Россия Федерациысь Кун Думае. Одӥгзэ ялан тодамы возьыса уломы: кинэ ыстомы та вылӥ кивалтэтъёсы, со бордын луоз асьмелэн азьланьын улон-вылонмы, кыӵе сюрестӥ вамыштэммы. Огъя вераса, мае кизид - сое аралод. В. МИХАЙЛОВ. Хоккеен шудонъя "Ижсталь" команда таяз чемпионатын берпуметӥзэ ас дораз нюръяськиз. Со пумиськылӥз Подольскысь "Витязен". Вормизы асьмелэн хоккеистъёсмы 7:2 лыдын. Чемпионатэз "Ижсталь" йылпумъя Санкт-Петербургысь "Спартакен" но Заволжьеысь "Моторен" шудонъёсын. В А Л Т Ӥ С Ь Трос дано адямиос вордскизы но будӥзы Кияса ёросысь Карамас-Пельга гуртын. Удмуртъёслэн шудзы понна вань улытозяз нюръяськиз Уддядиысь азьветлӥсь Алексей Мазитов, вольыт шобыръёсыныз быдэс дуннелы тодмо луиз солэн нылыз куиськись Зоя Мазитова, удмурт выжыоссэс вань сюлмысьтызы ярато покчи нылыз Анна Мерзлякова, нылызлэн нылыз Ольга Мазитова, пумтэм трос кайгуэз чидаса, арлыдъёсызлы уг сётскы етӥз апай Елизавета Камашева, калыкез дышетон удысэз кема дыр ӵоже валтӥз йӧно воргорон Иван Тукаев,солэсь ужзэ азинтэ сузэрез - Ижысь медакадемиысь дышетӥсь Лариса Беспалова,ёросысь удмуртъёслы умме усьыны уг сёты тыл кадь пӧсь кышномурт Надежда Пахомова, удмурт кырӟанэз сюлэм пыдсозяз яратэменыз,кылзӥсьёссэ паймытъя Ӝакы апай - Ольга Соловьёва,Удмурт кун университетын удмурт нылъёсты-пиосты визьнода дышетӥсь Роза Кузнецова,укыр чебер кырӟанъёсыныз удмуртъёсты шумпоттылэ крезьгурчи Николай Уткин... Визьмо но йӧно азьветлӥсь, вирсэрлы воргорон Анатолий Ешкеев - Уддядилэн эшшо вылӥ данъяськонэз. Гурт улонэз пичиысен яратыса но пумтэм турлы шугадӟонъёсты пырпотыса, та адями андан кадь кыдаз, тыпы кадь чеберскиз. Вордскем шаерысьтыз палэнэ чик кӧчылытэ но солэн шудбрез но ӵуказе нуналыз сярысь сюлмаськемысь дугдылытэк,та адями туннэ луиз ни тып-тып музъем кузё. Кышноез вазь кулэмен, Миклай агай кыкетӥ кузпал ваиз Вуж Тӥгырмен гуртысь.Ньыльдон сизьым аресказ кышномурт вордӥз пи. Нуныезлы Насьта апай ялӥз: - Шудо луод, пие. Зэм, улон соку сокем ик ӟеч ӧй вал на. Толя будӥз,ческыт нянь юдэс веръятэк, кӧттыро улонэз тодытэк. Шор ёзо школаез йылпумъямез бере,со азе кылдӥзы пӧртэм юанъёс. Кин луоно,кудзэ сюресэз быръёно? Шаерамы улӥсьёс! Асьмеос быдӟым Россилэн гражданъёсыз. Визьмо, адямилыко но вормыны луонтэм калыкмы дауръёсын кыдатӥз солэсь юнлыксэ но кужымзэ. Но берло дас аръёсы асьме Родинамы, асьме семьяосмы возьыттэм ултӥямын вал, асьмелэн данмы дэрие лёгамын. Зӧк кисыё, кӧттырмостэм адямиос, кивалтон удысэ потыса, юри кожизы куашкатон сюрес вылэ - СССР быриз, Чечняын вир кисьтон ӝутскиз, Россия уллане лэзиське. Тужгес но бадӟым шуккет лэсьтэмын Россиез утись кужымлы - армилы но солэсь юнлыксэ возись удыслы. Удмурт шаер дауръёсын поттӥз атай музъеммес утись пыӵал тӥрлык. Республикамес куашкан калэ вуттон понна Чубайс но солэн матысь адямиосыз асьсэлэсь политиказэс вӧлмытыны ӧй быгатысалзы соослы дурбасьтӥсьёстэк - Салтыков но солэн матысь адямиосызтэк. Дас ар гинэ кулэ луиз Гайдарлы, Чубайслы но Кохлы асьмелэсь, нош соос понна "та" странаез куашкатыны. Кытчы вуттӥз стртанамес сыӵе лябӟытон? Ужаса улӥсьёс вуэмын кураськон, куанермон, ултӥян калэ. Шугъяськоно уж шедьтыны, оскон ӧвӧл ӵуказе нуналлы. Югославиез кӧбератэк пуштытъянъёсы. Со туннэ, нош ӵуказе, югдур тазьы ик ӧз ке воштӥськы?! 4-тӥ апреле асьмеос ваньмызлы возьматыны кулэ - асьмеос кыдёке адӟыны быгатӥськом! Песятайёсмы вормизы Быдӟым Отечественной ожын. Атайёсмы ӝутӥзы куашкатэм странамес, пӧрмытӥзы сое кужмо но визьмо Державалы. Асьмеос - соослэн кивоштӥсьёссы но ужъёссэс азьланьтӥсьёссы. Родинамес нокызьы сётыны ӧвӧл кулэ Чубайслы но шаерысьтымы солэн юрттӥсьёсызлы. Удмурт Республикаысь Офицеръёслэн союззы, "Армилы дурбасьтӥсьёслэн движенизы". Пӧяськом, серекъялом Туннэ 1-тӥ апрель. Озьыен, тӥледыз кин но со укна ик пӧяны вуиз ни, дыр. Нош кытысь меда потӥз та серекъян-маскаръяськон нунал? Вазен французъёс 1-тӥ апреле выль арзэс пумитало вылэм. Малпасько, мукет калыкъёс но вуись арзэс соку пусйылӥзы шуыса. Нош куноятозы вылэм зумыто чорыг лымен яке пыжиськемен. Та сям али но кылемын на. Соку йӧно ужбергатӥсьёс тыбыразы ошыса нулло чибориё бумагалэсь лэсьтэм чорыгъёсты. Нош Германиын та нунал шудтэмен лыдъяське. Соку, пе, вирсэртэм Иуда вордӥськем. Сое пӧян вылысь ик немецъёс эрекчасько. Зэмос серекъян нунал вордӥськиз, луоз, Англиын. Ӵапак та нуналэ, 1860-тӥ арын, Лондонын улӥсьёслы вазиськонъёс вуиллям. Отын адямиосты ӧтиллям Таурлэн ӧсъёсыз шоры учкыны, тӧдьы тигръёсты миськемез адӟыны. Тросэз со ӧтёнъёслы оскиллям. Собере лыктӥллям но ог-огзэс серекъяны кутскиллям. Пӧяськон пӧяськонэн. Но та вакытэ куд-ог вузкарисьёс асьмеды нуналлы быдэ сямен эрекчало. Куд-ог кивалтӥсьёс но солэсь уг кепырало. Депутатэ куд-ог кандидатъёсмылы но туннэ оло оскод, оло уд. С. ПЕТРОВА. Россилэн сюресэз аслаз Туж сак кылзӥсько депутатэ кандидатъёслэсь верамъёссэс. Мынам малпамея, соослэн улонэз воштыны турттон малпанъёссы номырин уг висъясько демократъёслэн туала политиказылэсь. Тросэз шуо, Кун Кенешын, пе, профессионалъёс-депутатъёс ужаны кулэ. Сыӵе вераськонъёсты соос юри вӧлмыто, парламентэ рабочийёсты но крестьянъёсты лэзёнтэм понна. Умойгес ӧй-а меда луысал сыӵе профессионалъёсты советникъёс (юрттӥсьёс) интыын гинэ возьыны, нош депутатэ тросгес мед ужась калык сюроз. Калык ӧй лэзьысал куашкатыны странамес. Нош кытчы асьмеды вуттӥзы профессионалъёс Ельцин, Гайдар, Чубайс, Черномырдин, Немцов но мукетъёсыз - тодмо ини. Реформаос ортчытон улсын соос быдтӥзы калыклэсь вань вормонъёссэ, кудъёсыз лэсьтэмын вал революция но Быдӟым Отечественной война бере аръёсы. Куд-ог кандидатъёслэсь кылоно: политика - со кырсь уж. Огласянь шонер, дыр. Кырсь сое каро калыклы пумит ужась политикъёс, асьмеды капитализм сюрестӥ нуисьёс. Выль быръем депутатъёс но дӥсьтозы-а меда асьме узыръёс пумит мыныны. Валано ни вал: Россилэн аслаз сюресэз. Ӧвӧл донгоно сое капитализмлэн сюрестӥз мыныны. Мынам малпамея, туннэ калык пала кариськыса, НПСР но КПРФ гинэ ужало. Быръёнъёс дыръя котькуд адямилы со сярысь умой малпаськоно. С. ВОРОНЦОВ. Алнаш ёрос, Асан совхоз-техникум. Югославия Дунне учке Россия шоры ИНТЕРНЕТ пыр: Евгений Примаков ӝегатскытэк вуиз Югославие. Пумиськиз но вераськиз Югославилэн президентэныз Слободан Милошевичен. Быдэс дунне туннэ учке Россия шоры: быгатоз-а со дугдытыны Европаын ӝутскем вир кисьтонэз, маин йылпумъяськоз премьер- министрмылэн Белградэ ветлэмез но мыноз-а со татысен Германие, Боннэ? Примаков оске военной конфликтэз огкылэ вуыса, матысь дыре дугдытыны. Со дыре: Албание вуиз Италиысь гуманитарной юрттэт. Ватикан люказ НАТО-е пырись но ООН-лэн Кышкытлыклэсь утиськонъя Советаз пырись странаослэсь посолъёссэс, Балканыын кылдэм югдурез эскрон вылысь. НАТО юрттэтсэ ӵектэ Болгарилы, Румынилы, Албанилы но Македонилы, Югославия соосты вӧсь карыны шедьтӥз ке. Великобритания, Косовоысь пегӟемъёсты утён понна, Албанилы висъяз 16,2 миллион доллар. Югославие гуманитарной юрттэт вуиз Норвегиысь, Россиысь. НАТО Югославиын ыштӥз ни 7 самолётсэ но 30 крылатой ракетазэ. Оштолэзь: тодмо нимъёс но нуналъёс 1. - 70 ар талэсь азьло (1929) Сарапулын кылдытэмын "Электробытприбор" завод. 4. - 25 ар талэсь азьло (1974) Ижевскын ортчиз СССР-ысь Наукаосъя академилэн урал центрезъя президиумезлэн кенешез, отын вераськон мынӥз научной учреждениослэсь Удмуртиысь вузъёсын но предприятиосын кусыпъёссэс паськытатон сярысь. 6. - 65 ар талэсь азьло (1934) Сарапулын усьтэмын гурт удысэз механизировать каронъя училище. 8. - 25 ар талэсь азьло (1974) Ижевскын усьтӥськиз странаысьтымы художникъёслэн "СССР - асьмелэн Родинамы" адӟытон. 10. - Вить ар талэсь азьло (1994) Ижевск городлэн историяз нырысьсэ ортчытэмын интыын ас коже кивалтонъя но городысь Думае депутатъёсты но мэр быръён. Мэре быръемын вал А. И. Салтыков. 11. - 65 ар талэсь азьло (1934) Ижевскысь рабочийёслэн, крестьянъёслэн, Горд Армиысь депутатъёслэн городысь Советсы революцилы, искусстволы но культуралы сӥзем памятникъёсты утён сярысь постановление кутӥз. 11-12. - 35 ар талэсь азьло (1964) Глазовын усьтӥськиз калык филармония. 14. - Вордскемез дырысен 100 ар тырме живописецлы, СССР-ысь Художникъёслэн огазеяськоназы кутэм суредасьлы Федор Васильевич Ивановлы (1899-1984). 15. - Вордскемез дырысен 75 ар тырме Советской Союзлэн Героезлы Иван Федорович Степановлы (1924-1943). Вордскемын Шаркан ёросысь Заречный Билиб гуртын. Солы быремез бере дано ним сётэмын, Днепр шурез выжон дыръя кышкасьтэм луэмзэ возьматэмез понна. - 60 ар талэсь азьло (1939) Воткинскысь метеостанцилэн кивалтӥсез С. Н. Юрлов но Балезино ёросысь Кестым гуртысь физикалы дышетӥсь И. В. Ахмаров огдыре выль комета усьтӥзы. 36 час ортчыса гинэ сое шараяз Норвегиысь астроном Хассель. Кометалы Ахмаров-Юрлов ним сётэмын. Со сяна, Юрлов пусъемын калык куспо астрономической союзлэн бадӟым бронза медаленыз. 21. - 30 ар талэсь азьло (1969) Сарапулысь Орджоникидзе нимо радиозаводын потӥз 5 миллионэтӥез приёмник. 26. - 5 ар талэсь азьло (1994) Удмурт Республикаысь Вылӥ Кенешлэн 23-тӥ сессияз Удмурт Республикалэн гербез юнматэмын (художникез Юрий Лобанов). 27. - 70 ар талэсь азьло (1929) Ижевскысь андан поттӥсь завод Союзын нырысьёсыз пӧлын пыриськиз социалистической ӵошатсконэ. 30. - 35 ар талэсь азьло (1964) Балезино посёлокын усьтӥськиз паськыт экранэн "Мир" кинотеатр. - 20 ар талэсь азьло (1979) хоккеен шудонъя "Ижсталь" команда нырысетӥ лигаын нырысетӥ инты басьтӥз но вылӥ лигае шедиз. Е. УШАКОВА, Удмурт Республикалэн туала историезлы сӥзем центрысьтыз отделлэн кивалтӥсез. Гондыр вылэ мынӥськод - дася валес, койык вылэ - пулъёс Та учыр вал кылем сӥзьыл. Сюмсиысь пӧйшуран хозяйствоысь егерен Сергей Мезенцевен потӥм гондыръёслэсь сиськон интыоссэс утчаны. Вал милям лицензимы. Ортчиськом сезьы бусыетӥ. Вуылӥллям ик кӧтсэс тырыны пӧйшуръёс. Табере чакласьком, кытысен пумитаны луоз кырыж кукъёсты, кытчы полать интыяны. Пытьыоссыя учкиськом, кытын сиськем пичиез гондыр, кытын мӧйы пӧйшур сезьыез посэм. Котьку сямен гондыръёс кӧтсэс "кышъяны" потало ӝытазе, ӝомало куазен. Нош ми эскериськыны потӥм нуназе. Губи бичанъямы азьпаласьтымы гондыръёсты нырысь адӟыса но ӧм вуэ вал. Ог 70-100 метр кемын артэ куинь гондыр сылэ: одӥгез бадӟымез мумы пӧйшур, вӧзаз кык аресазы мынӥсь пиосыз. Сылӥськом, кенешиськом ма карыны. Гондырпиез ыбоно ке, пичигес на, ог 80 килоем луоз. Озьы малпаськонъямы адӟиськом, сезьы пӧлысь ньылетӥез кырыж кук пи ӝутскиз. Куинь пиосыныз гондыр анаез ыбыны кимы ӧз ӝутскы. Зэм, гондырпи, бер пыд вылаз султыса, адями ӝужда луэ. Таӵе пумиськон дыръя пӧйшуръёс ӵем дыръя пегӟо. Нош таосыз, кышкытлык ӧвӧлэз шӧдыса кадь, дыртытэк гинэ азьлане лашкинтӥзы. Гондыр котьку сямен одӥг-кык пи вордэ. Улонам куинетӥзэ пумитай куинь пиосыныз пӧйшурез. Собере ми мукет интыосы вуылӥм. Со нуналэ номыр дасяса ӧм вуттэ. Ӵуказеяз лабазъёс лэсьтӥм ке но, гондыр ӧз вуылы. Со сӥзьыл мон эшшо куинь гондырен пумиськылӥ на, одӥгзэ но ыбыны ӧй быгаты: я пеймыт, я ачим ыбыса уг вуиськы. Та пӧйшурез витьыку куалекъятэк но уг луы: гондыр бадӟым, шаплы, нош ыбон понна дораз матэктоно. Кырыж кук адямилэсь кышка, но вань вӧсь карылон учыръёс но. Калыкын таӵе веран вань: "Гондыр вылэ мынӥськод - дася валес, койык вылэ - пулъёс". С. ОВЧИННИКОВ. Сюмси. Апрель Мартэ тулыс ӟардиз, тэтэ карыса вамышъяз, нош апреле со ӝужаз, вӧл-вӧл усьтӥськиз, сайказ. Табере со кепырась выльмурт кадь ӧвӧл ни, кузё сямен ветлэ. Тол мытылэ, лекъяське, сётскемез уг поты на пересьлэн. Уйёсы кынтылэ, ӟабыльтӥсь шуръёсты кортналля, чалмытъя. Дырын-дырын пильмаськылэ но лымыя, уй палась юзмыт тӧлэз вуттылэ, пелляське. Куддыръя лымыен валче кезьыт зор кисьтылэ - музъем вылэ йӧвалег кылдэ. Писпуос кисьтаськись долыт йӧэн шобырско. Кемалы-а бен озьы? Пилемъёс сэрттӥсько, яркыт шунды потэ но, тулыс нош ик серектэ. Шаермы вадьсын шуныт тӧл пельтэ. Шундылы со юрттэ лымыез ӝоггес шунтыны. Кӧня пичиесь но бадӟымесь ӧръёсын бызё, бергаса кошко тудвуос! Шуръёс пачылмо но, ӧрысьтызы потыса, возьёсы вӧлско. Вырӟо, тӥясько йӧос, куашетыса, бергаса, зымылыса кошко. Пинал дырысен тодмо, вунонтэм суред! Маке но шумпотымонэз вань та йӧ кошконын. Сюлэм икак луыса учкиськод сое. "Апрель вуэн узыр, май - турын-куарен", - шуэ калык. Омыр мамык выллем небыт, шуныт, вешаськись. Чылкыт, чагыр инбам шорын вож-вож адске нюлэс. Сайкыт отын. Воринъяськыса лобало ӵуж, курень бубылиос. Улӟизы но пазьыр ветло кузьылиос. Шунам интыосын кенӟалиос сайкало но, лӥял вылэ нюжтӥськыса, шунды шорын шунско. Гуысьтыз гембыр потэ гондыр. Котырак утчаське, чылкыт омырен шока. Пужымъёс, кызъёс ултӥ тулыс вордскем кечпиос бызьыло. Кытын ке со ёросъёсын ик уло, ветло, вылды, соослэн мумыоссы но, табере соослэн гонзы воштӥське ни. Кыдёке шуккиське сизьлэн туккетэмез, вож но сьӧд кыръёслэн такыртэмзы. Ӵукна ӟардон вакытэ тэле вадьсаськиды ке, туръёслэсь, дукъяослэсь шулдыръяськем куараоссэс кылоды. Нюлэс дуннеез паймымон шулдыртэ вашкала чебер дукъя. Бурдъёссэ лэзья, быжзэ котырес шеръя, чыртызэ золтэ но тулыс крезьгурзэ кисьтэ та ӵыжыт синкашо бадӟым тылобурдо. Соку со котырысьтыз номыре но уг кылы ни, уг адӟы ни. Кылзод, кылзод но кошкемед уз поты ни. Али одӥг выль куар но ӧвӧл на. Писпуос вожмыт бус пӧлын уяло кадь. Нырысь ик сяськаяло бадьпуос, пипуос, пашпуос, лулпуос. Льӧльмыт гырлыоссэ усьтэ кионнин. Солэн яркыт сяськаосыз кыдёкысен ик син шоры йӧто. Лымы улысь потэм муос вылын турын-куаръёс бычырало, кечсин, ӵуж сяськаё вукуар ӝужа. Пукетод на, пе, таӵе дыре мушъёсты умортоын! Соос сяськаос вылэ дырто. Апрель - туж жингрес, кырӟась, куашетӥсь толэзь. Кӧня куараосын чирдо, кырӟало, гурлало лымшор палъёсысь вуэм бурдо куноос! Соос гуртазы бертэмзылы шумпотыса кырӟало, асьсэлы кар лэсьто, пи поттыны дасясько. Инмын но, музъем вылын но, писпуосын но соослэн вожмаськыса шулдыръяськемзы кылӥське. Бурдо артистъёслэсь, крезьчиослэсь концертъёссэс кылзӥськод но аслаз мылкыдыд бурдъяське. Син шорын воштӥське, улӟе, чеберске инкуазь. Ваньзэ шуныт тулыс шокам шунтэ. Котыр ваньмыз кырӟа но яратэ. В. ШИРОБОКОВ. Алексей мясников Гажано селтаосы, гажано уваосы! Иськавынъёсылы, бускельёсылы, эшъёсылы вазиськеме потэ аслам кылыным но. Эн сётэ асьтэдыз эрекчаны. Туннэ тӥледлы сӥзёзы оломар но, нош ӵуказе вань верамзэс вунэтозы. Собере утча на соосыз. Нош взысьтыды адями вӧзады ик кылёз - тӥледын ӵош гыроз-кизёз, нылпи будэтоз, ӵуказе нунал сярысь малпаськоз. Ойдолэ ӵош луоме. Тырмоз ни весь кинлы ке оскыса улыны. Тӥляд кандидатты Алексей МЯСНИКОВ. Тау кариськом Ӟечбуресь, "Удмурт дунне" газетын тыршись, гажано эшъёс! Кӧсь но пӧсь саламен (азьвыл дыръя сыӵе салам ыстӥськомы вал гожтэт пыр) тӥ доры дырто пичи пургаос. Та секыт вапуме кин кызьы улэ, нош ми ялан удмуртлыкмес утиськом, сое данъяськом, соин данъяськиськомы. Куд-ог ӝытъёсы урамын 30 градус кезьыт, нош куддыръя липет вылысь ву вия, нош ми автобусамы пуксьыса ширтӥськомы я Алнаш палъёсы, я Можга палъёсы. Тани туэ озьы ветлӥм Пуйкагуртэ, Ӧркагуртэ, Кечгуртэ. Бадӟым тау кареме потэ со гуртъёсысь калыкъёслы шуныт питамзы понна, задор кичабонъёссы понна. Нимысьтыз тау карон кылъёс вераме потэ Кечгуртысь Антонида Ивановна Ивановалы. Со милемлы, сандыкысьтыз поттыса, аслэсьтых куэм вашкала айшетсэ кузьмаз. Гажано Антонида Ивановна, со синпель айшет кузьымдэс весяк тӥледыз тодамы вайыса нулломы, нош сцена вылэ потамысь дугдӥмы ке, мон айшеттэс "Зарни шеплэн" музеяз сёто: мед возьматоз со вань ветлэм сюресмес, нылпиосмы мед адӟозы коллективлэсь ужамзэ, солэсь эшъёссэ. Бадӟым тау тӥледлы сыӵе шырыт, котьмае соку ик синйылтыны быгатэмды понна, пинал дыръяды ужам уждэс сандыкады ӝикыт воземды но, асьме удмурт кырӟан-веранъёсты, йылолъёсты утемды-яратэмды понна. Ф. Тубылова, Пичи Пургаысь "Зарни шеп" ансамбльлэн кивалтӥсез. Астэ гажаськод ке Кема ик ӧз кыль ни Кун Кенеше быръён нуналозь. Таин валче куд-ог малпанъёсме гожтоно кариськи. Кандидатъёс таяз учыре но трос. Кудӥз быгатоз секыт югдурысь потыны радзэ шедьтыны? Кин пала кариськоно? Ойдолэ учком котырак. Улонмы пумен дуногес но дуногес луэ. Адямиосты юри малпаса но дасяськыса виисьёс но луизы ни. Ураме но потыны кышкыт. Нош кивалтӥсьёс но узыръёс асьсэдыз асьсэос туж жаляло - мугор утисьёссы, телохранительёссы, одӥг уйлы но уг кошкыло кадь. Удмурт Республика - асьмелэн улон шаермы вань, татын асьме выжыосмы но. Озьыен, асьме выжыысь потэмъёс котькытын, котькуд кивалтон удысын луыны кулэ кадь, мукет республикаосын сямен (Башкортостан, Татарстан). Но озьы ӧвӧл ук. Паймисько, малы меда калыкмылэсь историзэ, культуразэ, сямъёссэ ӟеч-ӟеч тодӥсьтэмъёс сокем туртто вылӥ кивалтонэ мертчиськыны? Люгы турын музэн кырмисько ук. Ку меда асьмеос валаломы, мукет азьысь лыктэм министръёс, депутатъёс удмуртъёс сярысь туж ик уз сюлмаське шуыса. Сыӵеос тэльмес но вузаса быдто кадь ини. Нош кин кузёяське нефтен - тодмо ӧвӧл. Шонерзэ вераса, созэ гинэ тодӥськом - удмуртъёс асьсэ узырлыкъёссылэсь палэнтэмын. Калыклы весь вераны выро, коньдон соизлы но, таизлы но уг тырмы шуыса. Озьы-а меда? Мар чотын соку ӝутско город вӧзын узыр коттеджъёс? Кыӵе уксёен ветло кивалтӥсьёсмы кунгож сьӧръёстӥ? Асьсэлы шедьто, нош дышетӥсьёслы, врачъёслы, пинало мумыослы, пенсионеръёслы - уг. Мынам малпамея, асьмелы али туж-туж зол огазеяськоно, умой-умой малпаськоно. Вылӥ кивалтон ёзъёсы медаз шеде асьмелы ик пумит ужась адямиос. Куд-ог кандидатъёс бырйисьёсты ас палазы берыктыны тыршозы, олокыӵе но кузьымъёс сётъяса. Тӥ сое басьтэ, эн пыкиське. Кузьым яралоз, но йырдэс эн ыштэ, куарадэс туж умой малпаса сётэ. Та быръён дыръя асьме выжыысь адямиос но луозы. Соослы кызьы ке но юрттыны тыршоно. Мон сямен, нырысетӥ вамыш - быръёнъёсы пыриськоно. Макем трос калык лыктоз быръёнъя участоке, сокем умойгес кандидат шедёз асьме Кун Кенеше. Ваньды огез но кыльытэк сётэ кылдэс оскымон депутат понна. Д. ИВАНОВ, Ижевскысь бырйись, Ожысь но ужысь ветеранъёслэн городысь кенешсылэн адямиез. Виктор Макаров: "Вормом. Ӵош луим ке..." Быръёнъя Юкаменск округъя депутатэ кандидатэ ӵектэм адямиос пӧлын - Виктор Васильевич Макаров, гурт хозяйствоя но сиён-юонъя министрлэн воштӥсез, "Удмуртские семена" кун предприятилэн кивалтӥсез. Тани ма со вера бырйисьёсызлы: - Удмурт парламентэ монэ та дырозь кык пол бырйылӥзы ни. В. К. Тубылов кивалтон вакытэ югдур асьме республикаын огсыр возиськиз, солань-талань шонаськонъёслы ӧм сётске. Нош Кун Кенешлэн Тӧроез ӧдъяз чылкак выль законъёс кутыны но быдэс Россиез азьпалтыны. Ма пӧрмиз - табере ваньмызлы тодмо: асьмемыз вуттӥзы мур кризисэ. Удмуртия шоры али урод синмын учко, асьмелы уг оско ни. Ми, шаермес керетонъёсы кыскись муртъёслы пумит луэм депутатъёс, туннэ шуиськом: асьмелэн янгышаны правомы ӧвӧл ни, республикамылэсь данзэ саптамъёслы, калыкез шори люкыны вырисьёслы власте сюрес сётыны нокызьы но уг яра. Депутатэ быръёно удыссэс ӟеч тодӥсь, ваче пумит луонлэсь палэнскыны быгатӥсь, огкыл шедьтыны турттӥсь адямиосыз. Котькуд округын сыӵеос вань. Туж оскисько, калык бырйиз ке, солы бӧрысь та пумысен жаляно уз луы - мон гурт хозяйство понна ужай, ужасько, ужало. Вань шуг-секытъёсты вормом, ӵош луим ке... Быдӟым Вормонлы - 54 ар Кирос вылэ кирос Мар дауртӥд тон, Насьта? Кӧнялы табере пуктозы тонэ? Конвоир нылашез азьлане донгиз. Коридорлэн кык палаз ик - корт ӧсъёс. Кудаз камерае сое пыртозы? Возьмаськись вазиз: - Дугды. Дыбыртӥсь корт ӧсэз мырдэм кыскиз ас палаз. Камера тыр - гольык ӵышкем йыръёс. - Малы монэ пиос доры?.. Конвоир верамзэ ӧз кылзы. Насьтаез висъет сьӧры донгиз но ӧсэз дыбырак! ворсаз. Нылаш долказ. Пиос сокем ик ӧз пайме. Паймымонэсь асьсэос. Чыртыоссы векчиесь. Пельпумъёссы сюбегесь. Куараоссы ненегесь. Синъёссы бадӟымесь. Пиос-а бен таос? Татын ваньмыз нылъёс вылӥллям. Вожъяськыса учко Насьта Вахрушевалэсь пуштырес йырсизэ: - Малы тонэ ӧз ӵышке? - Нымы-кибыдэ ӧз шедьтэ шат? Нылаш ятвылтӥз: сое чылкыт шуыса жаляллям. А то пукысал та гольык йыръёс музэн ик. Пичи ке но шумпотон. Нош оглом вожъяськыны номырлы. Кызьы тюрьмае вуид тон, огшоры гуртысь огшоры адями? Вить яке тямыс ар улод табере пытсэт сьӧрын? Уин синзэ кыньылӥз оло ӧз. Выльысь бергатӥз ӟольгыри ныр кузьда гинэ улон гожзэ. Шумпотымонэз бен трос ӧй вал. "Горд ужась" колхоз ыстӥз агрономе дышетскыны. Совхоз-техникумын со понна дун басьтыны ӧдъязы но, Вахрушева бертӥз Выль Бияла. Ужаны кутскиз гинэ - пуромиз война. Дас сизьым аресъем комсомолкаез военкомат келяз Иже, пыӵал бичан заводэ. Кузь верстак дорын дас кык час пуконо. Винтовкае инъяно рычаг но пружина, соосты юнматоно шпилькаен. 12 час ӵоже ки пыртӥд кошке 1200 пыӵал. Часкын - сю. Ӝытазе Насьта цехысь потыны дасяськиз. Верстакез вадьсысь пенжаксэ дӥсяз. Дышем сямыныз кисызэ маялтӥз. Мар та? Кытын няньлы карточкаосыз? Оло, кин ке маскаръяськыса ватӥз? Синъёсызлы оскытэк, нылаш кисыоссэ берыкъяз, котькуд вурыссэ кутылӥз. Эшъёсыз шоры жальмаз. Серекъясь тылсиос нокинлэн синмаз уг пишто. Озьыен... Ма, толэзь али гинэ кутскиз ук. Кызьы улод отӥяз? Ӟиз-з! бӧрдыса, Насьта йыгаськиз цехлэн кивалтӥсез доры. Таиз киоссэ вӧлъяз: - Номыр кареме уг луы. Запас карточкаосы ӧвӧл. Ижын улэмед уг ке пӧрмы, гожты ужысь куриськон. Бияла бертыса, нылаш тэль кораны ӧдъяз. Курегозь валэн мыноно, отӥяз - пыдын. Одӥг ӵукна сюрес вылын милицаос возьмазы. Куинь муртэ сьӧразы нуизы. Пӧлазы - Насьтаез но. Мугзэ валаны шуг ӧй вал: заводысь кошкемзы понна. Иже лыктыкузы валэктӥзы законэз. Ичизэ пуктозы, пе, вить арлы, троссэ - тямыслы. Табере Насьта камераын пуке но синвузэ виятэ. Эшъёсыз пӧлын но умме усьымтэос вань: - Допросын шу: берен заводэ мыно. Соку, оло, жалялозы. Следовательлэн юанъёсыз копак мукетэсь: - Малы заводысь кошкид? Пыдын-а бертӥд? Поездэ пуксьылӥд-а? Пыдын ке, кыӵе пыдкутчанэн? Поезд кӧня час мынӥз? Нылаш валатскиз: сое олокызьы но сураны выро. Оло, калыклэн тушмонэз кожало? Война азьын куд-ог адямиос озьы чиптэм-чаптэм ышылӥзы. Бускельёс лушкемен сипыртылӥзы: соос, пе, асьме властьлы пумит лушкем ужаллям. Нош Насьта тушмон шат? Нуназе нылмурт мылысь-кыдысь ужалляз. Сое пуктӥзы дӥсь миськисе. Уин выльысь бугырско шимес малпанъёс. Вылаз ик, пыдыз висьыны ӧдъяз. Судын со ӧз синйылты, кин прокурор, кин адвокат, кин судья. Нош приговорзэ ноку уз вунэты. Кык арлы условно пуктоно, пе. Мар меда со - условно? Эрике лэзём, пе, нош эшшо маке йыртэмад ке... Заводэ берытскыны ӧз косэ кадь. х х х Бусыын уж уг бырылы. Биялан Насьта но, мукет егитъёс но валэн котыръяло лудъёсты. Шутэтскыны ноку. Мумиз кутсаськон машина бордын пыдзэ сӧсыртӥз. Ӧлексы кыльыса, больницаын эмъяське. Нылзэ жаля: - Дядидэ оже нуизы. Тонэ коть медаз басьтэ вал. - Уз, мемей. Мон тонэ сюдо-вордо. Инмар кылымтэ та кылъёсты. 1943-тӥ арын Анастасия Вахрушевалы повестка вуиз. Вавожысь военкомлы нылмурт мазэ-созэ валэктыны выриз. Офицер пурӟиз: - Кошкемед уг луы? Гитлерен вераськы! Ижын нылъёс сюризы зенитчикъёс пӧлы. 37 миллиметръем орудие вӧзын сизьым мурт. Вить снарядэн обоймаез зарадасьёс ваё пушка доры. Рядовой Вахрушева курсэз мерта. Мукет нылмурт гумыез пуктэ вертикалья, куинетӥез - горизонталья. Собере наводчик кеське: - Цель кутэмын! Орудилэн командирез косэ: - Огонь! Наводчик зӥбе педалез... Зэм, пушкаысь огпол но ӧз ыбылэ. Снарядъёсты жалязы. Со понна Насьта юн эшъяськиз пыӵалэн. Аслаз киосыныз но бичаз бере, котьку ёззэ шӧдэ. Мишене кыдёкысен йӧттылэмез понна тусбуйзэ пуктылӥзы фотосуред вылэ. Ӝыны ар дышетыса, нылъёсты пуктӥзы поездэ. Платформа вылын - орудиоссы. Питранъёс йыггето: фронт па-ла, фронт па-ла. 1944-тӥ арез пумитазы Белоруссиын. Зенитчикъёсты инъязы шур дуре. Ньыль пушка - батарея - возьма выжез. Ньыль батарея - дивизион - уте музон выжъёсты. Матынгес мукет расчёт гудэ окопъёс. Соослэн орудизы пичигес. Котыртэме сюрем немецъёс куддыръя меӵак пото выж дуре. Соин ик разведчикъёс пал синмынызы эскеро инбамез, мукетыныз - матысь кыралэз. Асьсэ частьёссэс уйыса, фашистъёс куддыръя лекос лекъясько. Горд басма юдэсъёсын кекатэм кионъёс музэн. Тӥни малы нылъёс уй-нунал сыло постын. Ваньмон дыр но сюрылэ. Соку майор Егоров матэктэ: - Нылъёс, нёжтэлэ ай удмурт кырӟандэс. Насьта, Игра палась Наталь но мукетъёсыз кема сюлворемез уг возьмало. Ноку но Удмурт шаере вуылымтэ офицер, пал кыл но валатэк, амалтэк адӟе кадь ошмесо шаермес, тӧдьы кызьпумес, сьӧд костюмен пияшмес. Нош ӵуказеяз... Выж вадьсы ошиськыло сьӧд киросо самолётъёс. - Омырын - "хейнкельёс"! - черектэ кин ке. Ефрейтон Вахрушева, орудилэн командирезлэн воштӥсез, табере нырысетӥ наводчик. Эшъёсыз курсэз мертазы но ивортӥзы, гумыез выллань урдӥзы. Самолётысь кирос но прицелысь кирос одӥг вадьсы вуизы. - Цель кутэмын! - Огонь! - Тра-та-та! - дырекъя орудие. Вить снаряд вылӥе лобе. Эшшо витез. Эшшо... Самолёт, сьӧд ӵын пазяса, музэ сапкиське. - Йӧттӥм! - шумпото нылъёс. Кудӥз расчёт уськытӥз? Шуг вераны. Котькудӥз малпа: солэнэз. Умой мукетыз: выж утемын, тушмон гуньдытэмын но уллямын. Кема шумпотыны маза ӧвӧл. Пушкаос вылэ сьӧд бомбаос усё. Вахрушевалэн мышказ маке но таш! сётӥз. Пыд йылысьтыз ӧз погырты. Котырак шимес гудыръя, вузэ, зурка. Ку ни, ку пумыз вуоз кулонэн ӟыгыръяськонлэн? Я, инбам пумен чылкытомиз. Артиллеристъёс сюйысь мычисько но курткисько. Насьта борды мырӟиськем бомба пыры. Кема лобыса "жадем" ни - шинелез пасяны вормымтэ. Мукетъёсызлы удалтымтэ. Артысь пичи орудие вылэ меӵак бомба усем. Быдэс расчёт бырем. Озёлосьгес пушкалэн гумы пушказ аслаз снарядэз пуштэм. Малы со выллань лобыса вуттымтэ? Пазьгиськем зенитка понна янгыш каризы техникез. Трибуналэ сётӥзы. Вахрушевалэн висёнэз выльысь улӟиз. Фронтын нокин но тазалыкез вылэ уг ӝожтӥськы. Шуге-леке шедё сӧсырмыса гинэ. Нош Анастасия зэмен ик, пуля шоры ӝимытэк, стро йысь потӥз. Синвуаськыса люкиськиз Натӥен но командиръёсын. Куке-соку адӟиськыны кылдоз на меда? Биялан гинэ нылаш тодӥз дядиезлэсь быремзэ. Та сярысь солы ивортӥллямтэ. Жаляллям, вылды. х х х Ваньзэ сямен даурзэ Анастасия Алексеевна ортчытӥз счетоводын. Бригадире ӧз пуксьы - кышномуртлы вормонтэм, пе, та удыс. Бызиз, вить нылпи будэтӥз. Кыкез, нылыз но пиез, али уло вордскем гуртазы. Картэз егитгес ке но вал, кулӥз ни. Игра дорысь Вылӥ Нязь гуртысь Наталья Перевощиковаен Анастасия Вахрушева (али Пислегина) герӟаськиз гожтэт пыр. Ог-огзэс туж кема ӧтизы куное. Бератаз Анастасия вуиз эшез дӥне. Бӧтьыртӥзы. Кык кузя мырдэм но кызьы вормизы сю граммез. Фронтын "наркомлэн курыт кузьымез" сярысь кылылэмзы но ӧй вал бере, отӥяз но ӧз дыше ни зын ву борды. Черодэз вуиз Натӥлэн куное лыктыны. Таки ӧз лыкты. Глазове мынӥсь ӵыжы-выжыоссэ Пислегина косӥз Вылӥ Нязе пыраны. Эшез ватэмын ни... Берло аръёссэ Анастасия Алексеевна улӥз пиеныз ӵош. Таиз, корка ӝутыса, яна потӥз. Табере песянай вӧзын берга пиезлэн Миша пиез гинэ: - Баба, тыныд секыт ни, мон ачим пу пырто. Баба, висьыса мон эшъёслэсь кыли, урокме дасяны юрттод-а? Тон Вадимлэн бабаез кадь пиналгес медло вал. Бен, аръёс ортчо. Пислегина пусъёз 75 арессэ. Оло, дӥсялоз ай орденэн но медальёсын пенжаксэ. Оло, уз ни. Гуртын азьвыл чарак вал войнае ветлэмъёс. Табере быдэс сельсоветын но чиньыен лыдъямон. Кинлы возьматод наградаостэ? Кинлы мадёд курадӟемъёстэ? Инмарлы ке шат? Солы песянай оске, куддыръя кирос карылэ. Нош юрттэтсэ сокем уг возьма. Зенитчике дышетскыкуз лэсьтэм фотосуред шоры учкыса, баба Насьта туннэ но абдра: макем чаляк лобӟиз улон! Чиньыосыз куалекъяло ке но, туннэ но ас киыныз бичаны быгатоз, дыр, пыӵалэз. Кукъёсыз кужекъяло ке но, зениткалэсь педальзэ вормозы ай. Синъёсыз но ӧз лябоме. Прицелысь векчи киросэз музэн ик "Удмурт дуннеысь" туж векчи пусъёсты но адӟе. Алексей ШКЛЯЕВ. * Анастасия ПИСЛЕГИНА Миша внукеныз. В. БЕЛОМОРСКИХЛЭН туспуктэмез. Югославия Югдур уродме Интернет пыр: Россилэн премьер-министрез Евгений Примаков пумиськылӥз Югославилэн президентэныз Слободан Милошевичен но ФРГ-лэн канцлереныз Герхард Шредерен. Вераськон мынӥз Косово пумысен. НАТО кутскем ужезлэсь уг куштӥськы: та нуналъёсы нош ик бомбаос но ракетаос пуштытъяло Белградлэсь объектъёссэ. Та дырлы: * Югославия поттэмын Мировой лигалэн радъёсысьтыз. * Босниын но Герцеговинаын сылӥсь Россиысь воздушно-десантной бригадаен кивалтэ Генеральной штаблэн представителез. * Чехилэн МИД-эз Косовоын улӥсьёслы юрттон понна висъяз 60 сюрс доллар. * Болгария ожмаськонэ пыриськыны уг малпа. * Россиын улӥсьёс пӧлысь 12 сюрс мурт ас мылкыд каремезъя туннэ ик дась Югославие мыныны но сербъёслы юрттыны. * Матысь дыре Балканэ военной техника лэземлэсь Россия возиськыны кулэ, таӵе решение кутэмын Федеральной Собраниен. * Югославиысь 425 мурт, Россилэн гражданъёсыз, МЧС-лэн самолётъёсыныз Москвае вуттэмын. * Черноморской флотлэн корабльёсыз дась Средиземной морее потыны. * Иворъёсты вӧлмытонъя средствоос гожъямъя, НАТО-лэн авиациез Балканысь уз кошкы, Югославия капитуляция ялытозь, Косовоез быдэсак пазьгытозь но страналэсь люкытозь. * Военно-Морской Флотлэн Главной штабезлэн представителез верамъя, туннэ, 2-тӥ апреле, Черноморской флотлэн разведка нуись кораблез потоз Средиземной зарезе. Босфор но Дарданеллы проливъёс пыр потыса, со мыноз Югославия пала. Приказъя сюрес вылэ дасямын на эшшо 6 корабль. Турцилы ивортон Россилэн Обороная министерствоез ласянь сётэмын. Владимир Котков х х х Туж визьмоез Ассэ визьмо шуоз-а? Нош шузиез Ассэ шузи уз шу. Юисьтэмез Погратозяз юоз-а? Юись нош Чиндысэн гинэ уз ю. Кудзэ быръёд? Ачид ик учкы-тод ни, Кудзэ ачид вылэ тон Уськытод. Кельшымонзэ кандидатэз шедьтыны секыт Ижевскысь Металлургъёслэн городоказы интыяськемын быръёнъя 15 номеро Северной округ. Вить кандидат пӧлысь пумиськылӥ одӥгеныз - Олег Константинович Елмашевен. Со егит воргорон, экономика наукаосъя кандидат, али поттэ "Работа для вас" газет но "Антенна" журнал. Депутатэ кандидат О. К. Елмашев калыкен вераськиз "Аврора" кинотеатрын. Соку со пыр-поч валэктӥз, кыӵе бадӟым инты басьтэ асьме улонын экономика. Шараяз пӧртэм коммерческой банкъёслэсь калыкез пӧяса ужамзэс. Но, мон малпамъя, солы вераны кулэ вал, кызьы со, депутат луиз ке, калыклы юрттоз. Кылсярысь, тросэз металлургъёс куашканы вуэм коркаосын уло. Тани мынам квартираям толэзьлэсь кема ини, лымы шунаку, ву бызе. Мон сямен, та пичи гинэ учыр. Но люкаськем калыклэн таӵе курадӟонъёсыз трос. Милесьтым та юртъёсмес вакчи дыр куспын ӧз тупатъялэ ке, соос ӝоген ӝуаны но куашканы кутскозы. Та сярысь малпаськыны кулэ вуоно депутатъёслы. В. ЧЕРНОВ. Иван Петрович Осинцев Завьялово район ассэ гинэ уг, поттэм сиён-юонэныз сюдэ республикамылэсь столицазэ. Соин ик тысё культураосын ӵош будэтэ карофка но, бакча сиён но, тросгес пудо но вордыны сюлмаське. Районлэн историяз тужгес но вылӥ урожай басьтэмын вал 1997 арын, йӧл кысконъя бадӟым вамыш лэсьтэмын 1998 арын - скаллы быдэ 3000 килограммлэсь ятыр. Та вакытэ гурт удысъя управлениен кивалтӥз Иван Петрович Осинцев. Азинсконъёссы понна со пусъемын Удмурт Республикаысь Кун Кенешлэн Данъян грамотаеныз. Иван Петрович вордскиз но будӥз та районысь ик Якшур гуртын, тыршись сямо крестьян семьяын. Анаез вань улонзэ сӥзиз фермалы, пенсие потытозяз скал кыскиз. Атаез, кибашлы воргорон, ужаз производствоын. Иван пизы ас выжыязы мынӥз, но улонзэ герӟаз бускель "Россия" колхозэн, районлэн шорсюлмыныз. Осинцевлы, егит специалистлы, оскемын вал бадӟым хозяйство. Со 9 ар ӵоже кивалтэм улсын "Россия" шӧдскымон юнмаз, район но республика понна ӟеч кидыс будэтыны кутскиз, фермазы племенной уж борды юн-юн басьтӥськиз. Колхоз юрттэмъя пуктэмын выль посёлок, производственной юртъёс, асфальтэн шобыртэмын сюресъёс, кыскемын газ. Со понна калык тау каре И. П. Осинцевлы. Иван Петрович кузпалэныз ӵош будэтэ куинь пиналъёссэ. Ваньмон дырзэ сӥзе яратоно удысэзлы - куасэн бызьылонлы но книгаослы. Осинцевез депутатэ бырйыны дэмласа, редакциямы вазиськизы "Россия" но "Путь Ильича" колхозъёсысь нянь будэтӥсьёс но пудо утялтӥсьёс. Та удмурт, йыг-йыг сямо воргоронлы соос оско. Л. Медведева. Кузьмаськисьёслы эн оске Ӝоген вуоз бырйыны мынон нунал. Кинэ быръёно? Калыкен быръем депутат калык понна сюлмаськыны кулэ, ассэ узырмытон понна гинэ со медаз ӵектӥськы. Али соос гуртъёстӥ ветло ке, отӥяз нырзэс но уз возьматъялэ ни, нокыӵе иворъёсты но уз вералэ ни, мар луэ удмурт шаерамы. Кылем быръёнъёсы милям округамы вормиз вал Ешкеев Анатолий Николаевич, удмурт пияш, колхозлэн председателез. Гурт улонлэсь секытсэ ваньзэ ас вылаз нуэ. Куд-огез шуэ: мар-о, пе, со умойзэ лэсьтӥз ни. Мынам малпамея, али котькинэ бырйы, нокин но таӵе улон дыръя номыр но лэсьтыны уз быгаты. Нырысь ик тупатыны кулэ страналэсь, республикалэсь улонзэ. Милям округамы 12 мурт ӵектӥське. Кызьы меда калыклы сомында сяська пӧлысь одӥгзэ быръёно? Беларусь Республикалэн Президентэз асьме республикае ветлыкуз, туж умой вераз, кузьымъёсын калыкез "басьтыны" турттӥсьёслы ӧвӧл осконо шуыса. Зэмзэ но, куанер кандидат сётыны но номырзэ уз шедьты. Кытысь-о, марзэ-о шедьтоз сётыны огшоры колхозник яке совхозын ужась, куке олокӧня толэзьёсын улэп уксёез уг адӟыло. Кыӵе нош "умой" вылэм экономикая рынокын улон. Россиен эксэй кивалтыку вылӥллям батракъёс, купецъёс, помещикъёс, табере - "выль ӟучъёс", "выль удмуртъёс", "выль бигеръёс". Ваньзы соос узырмиллям но выльмиллям куанеръёс чотын. Нош хозяйствоос куашкало но куашкало, чида ужась калык. Ужысь ветеранъёслы эмъюмъёс басьтыны нокыӵе дотация ӧвӧл ни, висьыса учётын сылӥсьёсызлы но ваньмызлы юрттыны уг быгато. Нош пичи пенсиен оло сиёд, оло эмъюм басьтод. Сюлэм ик вӧсь луыса кошке, экономикаен рынок, пе, та. Сыӵе кужмо государствоез куашкатӥзы, син куспын быдтӥзы. Азинскем капиталистической странаос но асьмелэсь кышкало ни вал. Гитлерлэн сыӵе кужмо войскоосызлы но ӧм сётске. Кызьы ке ож лудын, озьы ик ож мышкын но калык сюлмаськиз страназэ утён понна. Нош али нокыӵе войнатэк Россимес кутскизы но куашкатӥзы. Телевизор пыр вераськыкуз, Кун Думаысь депутат Жириновский шуиз, коммунистъёс, пе, странаез куашкатыны выро. Мае-о куашкатозы на коммунистъёс, ваньмыз куашкамын ни ук. Бусыосын тракторъёсмы но советскоез сяна ӧвӧл ни. Бырйыны мыныкуды малпаське, эн оске кузьмаськисьёслы, эн оске. Н. АЛЕКСЕЕВ, Пичи Пурга районысь Пуро-Можга гуртысь ужысь ветеран. Ялон Ижевскын туэ 6-тӥ апрельысен 9-тӥ апрелёзь 2-тӥез "Туризм. Отдых. Здоровье" адӟытон-выставка ортчоз. Озьы ик иворъёсты вӧлмытӥсь ёзъёс пӧлын тужгес умой статьялы, телепередачалы, радиоверанлы 3 номинациен "За освещение проблем туристской отрасли" конкурс радъяськоз. Соин ик конкурсэ аудио-, видео-, печатлам материалъёстэс 5-тӥ апрелёзь вуттоно Удмурт Республикаысь Мукет кунъёсын кусыпъёсъя министерствое. Печатлам материалъёс куинь бамозь, одӥг но ӝыны интервалэн, 2 экземплярен мед луозы. Видематериалъёс кассетаын ӧжытсэ 10 минут, аудиоматериалъёс ӧжытсэ 5 минут кыстӥськыны кулэ. Возьмаськом конкурсэ материалъёстэс. Михаил Иванович Шишкин Кин тодэ та адямиез, кин соин артэ ужамын, Афганистанын ожмаськемын, дунъет сётоз одӥг кылын - оскымон эш. Михаил Иванович нокинэ ӧз вуза, куд-огез сямен малпанъёссэ тӧлъёс пельтэмъя ӧз вошъя, со - Коммунистической партилэн членэз. М. И. Шишкин быдэс улонзэ сётӥз кивалтон ужлы но наукалы. Ӟеч тодэ экономикаез. Россиысь учёнойёс пӧлын нырысьёсыз радын басьтӥськиз Китайын ортчем воштӥськонъёсты эскерон-чаклан но асьмелы тупамонзэ улонамы пыӵатонъя ужпум борды. Кун Кенешлэн депутатэз луыса Михаил Иванович быгатыса кивалтӥз Эскеронъя палатаен. Со тыршемен шараямын но калык син шоры поттэмын трос "кырсь" ужъёс, бюджетысь коньдонэз суп-сап карон учыръёс. М. И. Шишкин огдыре ик кивалтэ Ижевскысь гурт удысъя академилэн экономикая кафедраеныз. Улонысьтыз 25 арзэ сӥзиз ни наукалы. Бадӟым опытэн политик, государственной ужась но хозяйствоез тодӥсь-валась адями. Пӧртэм аръёсы кивалтӥз партилэн Дэбес райкоменыз, вал партилэн Удмурт обкомезлэн кыкетӥ секретарез, УАССР- ысь Госпланлэн председателез. Будэмын удмурт крестьян семьяын. Пичиысен адӟемын секыт улонэз. Тодон-валан борды кыстӥськон мылкыдыз будэтӥз сое академикозь. Москвалэн мэрез - Ижын Толон шаерамы вуылӥз Москвалэн мэрез Юрий Лужков. Нунал куспын столицаысь куно ветлӥз Ижысь механической заводэ, тодматскиз та предприятилэн продукциеныз. Кун Кенешын пумиськон дыръя вераськон мынӥз Удмурт Республика но Москва куспын гожтэм огкылэз но тупанкылэз быдэсъям сярысь. Ю. М. Лужков, "Отечество" движенилэн кивалтӥсез, озьы ик пыриськиз огазеяськонлэсь шаерысьтымы ёзэзлэсь общественной приёмнойзэ усьтон ужрадэ. Нош ӝыт "Металлург" культура дворецын пумиськылӥз республикалэн активеныз. Ю. МИХАЙЛОВА. Максим Прокопьевез данъяса Удмурт калыклэн национальной героез Максим Прокопьевич Прокопьев ворДскемын Татарстанысь Кукмор палан Нырья гуртын. Нош ужаз со ми дорын: 1913-тӥ арысен дышетӥз удмурт кылын Бадӟым Гондыр школаын. 1914-тӥ арын кутскиз нырысетӥ мировой война. Отысь 1917-тӥ арын М. Прокопьев прапорщик луыса бертэ Бадӟым Гондыре семьяез доры. Школаын дышетэм сяна, юрттэ интыысь волостьлэсь но ужзэ азинтыны. Максим Прокопьевлэсь калык понна уже мылысь-кыдысь пыриськемзэ адӟыса, сое быръё Оса уездэ депутатэ. Пусйыны кулэ: Оса городын секыт вапумъёс ке но вал, 1918-тӥ арын со поттӥз "Максимлэн гожтэмез" книгазэ. Татысен ик кутскиз Удмурт автономия кылдытонэз азинтон понна нюръяськыны... Куеда ёросысь калык туж буре вае Максим Прокопьевез. Туэ арлэн кутсконаз удмурт дышетӥсьлы, поэтлы но общественной деятельлы вордскемез дырысен 115 ар тырмиз. Та данъяськоно адямимылы сӥзьыса, Бадӟым Гондыр гуртамы радъямын вал спортъя ӵошатсконъёс: нырысь нуналаз шаплыосмы куасэн бызьылӥзы, нош кыкетӥ нуналаз волейболэз яратӥсьёс ӵошатскизы спортъя юртын. Та дыре ик концерт-шулдыръяськон вал культура юртын. Празднике пыриськизы, Бадӟым Гондырысь сяна, Куедаысь, Киргаысь, Б. Усаысь но Федоровскысь мыло-кыдоос. Ш. МЕНШАРАПОВ. Пермь улосысь Куеда ёросысь Б. Гондыр гурт. ВАЛЭКТЭ ЮРИСТ СЭРЕГЕЗ НУЭ АДВОКАТ ЛИЛИЯ ШКЛЯЕВА Малы ӧз буды пенсие? Мон - трос нылпиен анай но куинетӥ группаен инвалид. Ужай "Вараксино" фабрикаын. Пенсие потӥ 1987-тӥ арын, басьтӥсько 423 манет 44 копейка. Ватсаса вить ар ужаме понна сое ӧз ватсалэ. Шонер-а лэсьтӥзы? М. СИМАКОВА. Завьял ёрос. Кун пенсиос сярысь закон кутэмын 1990-тӥ арын 20-тӥ ноябре. Пенсия тупатэм бере ичизэ 24 толэзь ӵоже вылӥгес уждунэн ужамъёслы соос куремъя пенсия выльысь лыдъяське. Эшшо 24 толэзь ужам бере - выльысь. Валантэм учыр кылдэ ке, сое сэрттэ- пертче калыкез шугадӟонлэсь утёнъя вылӥысьгес ёз. Тӥ вазиськыны кулэ республикаысьтымы Калыкез шугадӟонлэсь утёнъя (социальной обеспечениея) министерствое. Адресэз: Иж, Ломоносов ульча, 4. Шӧкыч Гажано иськавынъёс но туклячиос! Ӵуказе улыса, 4 апреле, асьмеос ваньмы ик вазь ӵукна вамыштыны кулэ быръён участокъёсамы. Кыкетӥзэ ни куараосмес сётом Кун Кенеше депутатъёс понна. Куд-огез шуэ, малы, пе, кулэ сыӵе быръёнъёс, улонмы умой пала уз воштӥськы ук. Ӧвӧл, эшъёс, озьы кулэ ӧвӧл. Депутатъёсты со понна янгыш карыны уг яра. Асьмелэсь улонмес сисьтӥзы вылӥысен, Мускоысен. Табере со каргам нюрысь потыны капчи ӧвӧл. Депутатъёсмы быгатэмзыя сюлмаськизы асьме сярысь. Гажано иськавынъёс но туклячиос, тодматскиды ни, луоз, асьтэлэн депутатэ кандидатъёсыныды. Удмурт шаермылэн улон-вылоназ ноку но сомында кандидатъёс ӧй вал на. Соин ик вань кинэ бырйыны, кин понна куарадэс сётыны. Соизэ ини асьтэос тододы. Котькыӵе мылкыдды мед луоз, но быръёнэ вамыштэ ик. Азьланяз мултэс коньдон пазяно медаз луы вылэм. Казнамы уго сотэк но куанер. ШӦКЫЧ. Журналистъёсын пумиськонъёс Улон ялан дуноя Кылем вторнике, 30-тӥ мартэ, Правительстволэн Тӧроезлэн воштӥсез Антонина ЛИСИНА журналистъёсын пумиськиз. Со бадӟым инты висъяз нылпиослэсь гужем шутэтсконзэс радъянлы, социальной удысын тыршисьёслы уждун тыронлы, эмъюмъёс вузанлы но куд-ог музон ужпумъёслы. Берло дыре, зэмзэ но, шаерамы шӧдскымон инты висъяське политикалы. Малы ке шуоно, вань калык кыскемын Кун Кенеше депутатъёсты быръёнъёсы. Со бен кулэ. Но быръёнъёс ортчозы, нош калыклы улоно ук. Тани калыкез дышетон но тазалыкез утён удысъёсысь депутатэ кандидатэ 22 дышетӥсь но 34 врач ӵектэмын. Али секыт вераны, кӧняез ортчоз. Мугез тодмо: узыр кандидатъёс-"выль ӟучъёс" кырсь амалъёсын, быръёнъёс сярысь законъёсты тӥяса ужало, бырйисьёслы кузьмасько. Соин ик, вылды, Антонина Лисина ӧз вазиськы, та удысысь ужасьёс понна куаразэс сётыны. Пресс-конференциын вераськон мынӥз туннэ улон-вылонмы сярысь. Умоез пӧлысь тани пусйыны кулэ пыктос висёнъёсты эмъясь диспансерлэсь нырысетӥ люкетсэ вуттэмез. Туэ со быдэсак вуттэмын луоз. Та ужен дыртоно. Али шаерамы та висёнэн 15 сюрслэсь уно мурт курадӟе. Правительство озьы ик чакла Ижысь Ухтомской ульчаысь нылпи юртэз туэ сентябрьлы, дышетскон ар кутсконлы, вуттыны. Матэ вуэ гужем, нылпиослэн шутэтскон дырзы. Та ужпум ӝоген эскеремын луоз Правительстволэн Президиумезлэн кенешаз. Нылпиосмы шутэтскозы кылем арын мында ик. Но, жаляса верано луэ, шутэтскон ялан дуноя. Туэ одӥг путёвка сылоз 1,5-2,7 сюрс манетозь. Анай-атайёс солэсь 10-20 процентсэ тырозы. Дунтэк путёвкаос басьтозы ӧлексы пиналъёс, сӧсыръёслэн нылпиоссы, анай-атайтэк кылемъёс. Пусйыны кулэ, гужем вакытэ уж сётэмын луоз быдэс вуымтэослы но. Котькинэ сюлэмшугъяськытэ пенсиос, уждун но нылпиослы юрттэт сётон. Али республикаямы февраль понна пенсия тыриське, нош куд-ог районъёсын но городъёсын мартлы сётъяло ни. Азьвыл сямен ик секыт югдур нылпиослы пособие тыронэн. Экономика юнмамтэен, калыклэн улон-вылонэз, умоям интые, ялан уродме. Али тани 173 сюрс семья нылпилы юрттэт возьма. Толэзяз доходзы ваньзэ-ӧвӧлзэ 402 манет усе. Вань пособие басьтӥсьёс пӧлысь таӵе семьяос кык но куиньмосэз луо. Али тани миым нырысетӥ паларлы гинэ пособие сётӥське. Эшшо тыроно на 1997-тӥ ар понна. Туэ сое одно ик быдэстоно. Уг умоя бюджет чотын ужасьёслы уждун тырон. Калыкез дышетон удысын тыршисьёслы уждунлы гинэ 84 миллион манет висъяно, нош тазалыкез утисьёслы - 53 миллион. Тӥни кӧня тыронъёс люкаськемын. Но со ваньмыз кун бюджетысь ӧвӧл. Ӵем дыръя уждун сётон ӝега интыослэн урод ужаменызы. Нош Правительство интыослы котьку юрттэ, тани та нуналъёсы районъёслы но городъёслы 21 миллион манет уксё келямын. Со кутӥськоз дышетӥсьёслы, врачъёслы но мукетъёсызлы уждун тырыны. Пумиськонын озьы ик вераськон мынӥз эмъюм вузан сярысь. Кылсярысь, Ижевскын выльысь ужаны кутскиз юанъёслы телефон, номерез 44-35-35. Соя тодыны луоз, кытын но кыӵе дунэн эмъюм вузаське. Нош инвалидъёслы но ветеранъёслы дунтэмгес эмъюм вузаны Правительство арлы быдэ 2 миллион манет коньдон висъя. Огъя вераса, "Ветеранъёс сярысь" Закон али 70 процентлы гинэ быдэсъяське. Мукет улосвылъёсын ӵошатыса, та лыдпус асьмелэн данаклы вылӥын. Озьы ке но, эмъюмъёслы дунъёсты син азьын возьыны кулэ. Со нянь кадь ик кулэ. Г. РОМАНОВ. Удмуртъёс понна - мед ужалоз! Дышетскисьёслэн мумы-бубыоссылэсь таӵе муген кенешемзэс та дырозь кылзэме ӧй на вал. Таяз ӝытазе Ижысь 49 номеро школалэн актовой залаз люкаськизы удмурт классъёсын дышетскисьёслэн мумы-бубыоссы. Татын сыӵе классъёс тямыс ини, тямыс ар талэсь азьло лыктэмъёс эшшо одӥг арзэ дышетскизы на ке, укмысэтӥ классэз йылпумъялозы. Удмурт кылъя но литературая дышетӥсьёссэс татын гажало, нылпиосын ужало бадӟым опытэн кылчиос Зоя Григорьевна Быкова но Ираида Егоровна Фадеева. Таяз учыре кенеше лыктэмъёсын пумиськиз Кун Кенешлы депутатэ кандидат, Удмурт Элькунысь но Россия Федерациысь школаослэн дано дышетӥсьсы, УР-ысь Кун Кенешлэн Наукая, калыкез дышетонъя, культурая но егитъёслэн политиказыя ялан ужась комиссиезлэн тӧроез Алла Васильевна Еременко. Солэн бырйисьёсыз уло 38 номеро Трудовой округын, Труд ульчаысь 2-22 номеро юртъёсын. Тросэз кандидатсэс, ньыль ар ӵоже ужам депутатэз ӟеч тодо, кулэ дыръяз солы ӵем гинэ вазиськыло, собере Алла Васильевна ачиз но та микрорайонын улэ. Мумы-бубыослэн пумиськоназы вераськон мынӥз, кызьы Ижевскын берло дас аръёс ӵоже азинскиз удмурт кыллы, литературалы но краеведенилы дышетон, калыкмылэсь культуразэ, йылолъёссэ, ӟеч сямъёссэ тодыны но утьыны тыршон. Нырысь-валысь мумы-бубыос нылпиоссэс таӵе школае мылзы потытэк сёто вал, табере пайдазэ, кулэзэ адӟизы, валазы. Удмурт кылъя урокъёс кыӵе ке муген уг луо ке, ӝоже но усьыло. А. В. Еременко удмурт шаерамы национальной политикаез азинтон бордын ужаны кутскиз ни вал калыкез дышетонъя министрын дыръяз, со ужез азьланьтӥз, Кун Кенешын ужакуз. Та аръёсы кутэмын национальной политикая концепция, Калыкез дышетон сярысь Закон, таиз дасямын, асьме республикамылэсь пӧртэмлыкъёссэ лыдэ басьтыса, РФ-лэн законэзлэсь пӧртэмгес луэ. Данак ужъёс лэсьтӥз та удысын Калыкез дышетонъя министерство. Усьтэмын национальной ужпумъёсъя институт. Дышетӥсьлэн О. К. Шиловалэн кичӧлтэмезъя ужа нылпи сад-школа комплекс, кылдӥз удмурт нылпиослы лицей. Удмурт классъёс али усьтэмын ни Ижысь 33 школаын. Эшшо одӥгез усьтӥськоз али лэсьтӥськись 100 номеро школаын. Данаказ школаосын фольклор коллективъёс кылдытэмын... Элькунамы дугдытэмын нылпи садъёсты ворсан, со юртъёсты пӧртэм кузёослы сётон. Калыкез дышетон удысысь юртъёслы приватизация ортчытыны уг луы. Но вань та ужрадъёсты азьланьтон понна элькунамы туж трос лэсьтоно на. Соин ик Кун Кенешын та политикаез ӟеч тодӥсь-валась, ӟырдыт мылкыдо, тыршись но опытэн адями кулэ. Со понна ик бырйисьёслэн пумиськоназы лыктэмъёсты ӧтизы 4-тӥ апреле А. В. Еременко понна куара сётыны. Аслаз ужъёсыз сярысь депутат бырйисьёсыз азьын пыр-поч мадиз. Со пала дурбасьтыны ӧтьыса вераськизы 49-тӥ школалэн но школа-лицейлэн директоръёссы Т. В. Габдрахманова но О. К. Шилова, Калыкез дышетонъя министерствоысь национальной отделысь специалист Ю. А. Фомин но мукетъёс. Кенеше лыктэмъёс учкизы шулдыр концерт но. Валамон ини, программазы быдэсак удмурт вал. Нырысь ик ӟеч мылкыд сётӥзы лицейысь покчи артистъёс Ксюша Пельтемова, Никита Моисеев, Эля Панченко но Снежана Эскандерова, быгато ни соос усто кырӟаны но серемес чуръёс лыдӟыны. Собере шумпоттӥз культурая училищеысь "Инвугур" фольклор ансамбль. Л. ФЁДОРОВ. Вуж Монья Тубылов понна Кызьы тодмо, Валентин Кузьмич Тубылов, "Удмурт кенеш" огазеяськонлэн тӧроез, депутатэ ортчыны малпа аслаз ик Пичи Пурга районысьтыз Уром округъя. Валлян солэн дурбасьтӥсез Леонид Загребин, ИжГТУ-ысь доцент, кӧня ке пумиськонъёс ортчытӥз Вуж Монья гуртын. Со туж ӟырдыт но оскымон вераськиз "Арама" ТОО-ын ужасьёсын но школаысь дышетӥсьёсын. Пумиськонъёсы люкаськемъёс пӧлысь данакез Валентин Кузьмич пала кариськыны мылкыдзэс веразы. Г. ТИХОНОВ. Ӵуказе - Театрлэн нуналэз Драмая удмурт кун театрысь актёръёс турлы шугадӟонъёсын тырмем вакытэ но суйёссэс-пыдъёссэс уг юско: лулысь-сюлмысь ужало выль спектакльёс бордын. Учкись калыклы алигес гинэ возьматӥзы тодмо драматурглэн Анатолий Григорьевлэн "Парсьпи но эмеспи" пьесаезъя комедизэс. Выль уж туж яркыт суреда туала удмурт гуртысь суреда улон-вылонэз. Юон, лушкаськон, вузаськон, пӧяськон - ваньзэ сое адӟыто сцена вылын ортчись учыръёс. Ачиз драматург верамъя, выль ужез бордын тыршиз со арлэсь кема. Пӧсямезлэн ӟечлыкез шӧдӥське: комедиез учкисьёс кужмо кичабонъёсын пумитало, гожтӥсезлы тау каро. Выль спектаклез сцена вылэ вуттон бордын сюлмысь тыршиллям режиссёр Василий Ушаков но, суредась Александр Абрамов но. Спектакльысь суредъёс. Шудо Удмурт Элькунысь калык артисткаос Августа Лазарева, Раиса Нефедова, Ольга Чужанова, Удмурт Элькунысь дано артист Геннадий Бекманов, артист Игорь Люкин. Алиез сярысь но, вуоноез сярысь но весь малпаськоно луэ режиссёрлы Василий Ушаковлы но, драматурглы Анатолий Григорьевлы но. Владимир Камашевлэн туспуктэмъёсыз. Ӟеч кыл Бадяр выжыысь "Удмурт дунне" газетысь Ешкеев Анатолий Николаевичез адӟисько, солэсь гожтэм чуръёссэ лыдӟисько ке, асэныз вераськем кадь потӥсько. Та зарни сюлэмо дунне адямиез мон весь син азям пуктӥсько, малпанъёсам возисько. Туж но туж шумпотыса солы сӥзисько шудо улон но паськыт вольыт сюрес. Та кылъёсме чеберъяськон понна уг вераськы. Мыным, арлыдо кышномуртлы, курадӟыса-бӧрдыса, кураськыса будэм муртлы та чебер, йӧно, визьмо воргорон аслам вордэм пие кадь дуно. Котырад котьку, пие, ӟеч но оскымон эшъёсыд медло. Тау карисько уддяди калыкелы но: Анатолий Николаевичез тӥ будэтӥды, тӥ солы улонэ сюрес усьтӥды, бурдъяды, визьнод сётӥды. Малы гожтоно кариськи та адями сярысь? Соин ӵош ужаны мыным шуд усиз Киясово районысь "Путь к коммунизму" колхозын. Егит муртлэн, солэн соку ик улон шоры учконэз бадӟым вал ини, котькуд верам кылыз сюлэме йӧтылӥз, весь кылзэм но кылзэм потэ вал собраниосын, сессиосын визьмо верамъёссэ. Шораз учкыса, ас поннам весь малпалляй: тӥни кин калыкен ужаны вордскемын. Самой сыӵеос сярысь шуо ук: пуппылэсь, пе, бадяр вордскем. Анатолий Николаевичлэсь атайзэ но, семьязэ но мон тодӥсько. Ӟеч адямиос вал: йӧноесь, кужмоесь, ужасесь. Соин ик уг паймиськы, Толя пизы но калык син шоры йӧтымон будӥз шуыса. Нырысь аръёссэ А. Н. Ешкеев сельсоветын председатель луыса ужаз, нош мынам туж адӟеме потэ вал сое колхоз кузё интыын. Аслыз вераны пырак ӧй дӥсьты. Нош колхозмы пумен куашка но куашка. Азьвылэз предмы Волков Александр Васильевич хозяйствомес туж зол ӝутӥз вал. Ӵапак Ешкеев гинэ озьы ужаны быгатысал на кадь, озьы малпалляй сюлэмам. Анатолий Николаевичез ыстӥзы мукет интые. Кӧтмы ӝож луыса келям сое колхозысьтымы, но оским: котькытын та адями мед ужалоз - калык сое яратоз, валалоз, кылзӥськоз. Таӵе кивалтӥсен гурезез но берыктод. Мон Тигырменын ужаны кутски дас одӥг аресысен. "Путь к коммунизму" колхозын ньыльдон тямыс ар ӵоже котькыӵезэ предэз адӟыны но чиданы кылдӥз. Визьмо луэменыз тодэ ваёнъёсы кылиз Никонов Алексей, Шабала шуо вал сое гуртын. Калыкен кенешытэк, огназ номыр ӧз лэсьтылы. Соин артэ ик пуктысал Ешкеевез, востэм, лачмыт сямо, тып- тып удмурт пимес. Али со ужа Пичи Пурга районысь "Мир" колхозлэн председателез луыса. Тазалык но улон-вылонад бадӟым шуд сӥземе потэ тыныд, Анатолий Николаевич. Вань ӟеч малпанъёсыд мед быдэсмозы. Е. КАМАШЕВА, ужысь ветеран, Завьялово черкогуртын улӥсь. Шедьтозы-а егитъёс уж? 25-тӥ мартэ Егитъёслэн "Редуктор" центразы ортчиз "Карьералэн нуналэз" ужрад. Сое радъяз Ижысь студентъёслэн но егит специалистъёслэн "Айсек-Ижевск" ассоциацизы. Озьы ик юрттӥзы Егитъёсын ужанъя Ижысь ккомитет но Уже интыянъя егитъёслэн биржазы. Отын 4-тӥ-5-тӥ курсъёсысь студентъёс но егит специалистъёс ужбергатӥсьёсын кусыпъёссэс тупатылӥзы. Вераны кулэ, егитъёс трос ветлӥзы. Уж ӵектӥсьёс но трос гинэ вуылӥзы. Соос пӧлын вал "АСПЭК" акционер огазеяськон, "Металлокомплект" предприятие, полиграфкомбинат, "Ижевский радиозавод" акционер огазеяськон, АО "Буммаш", Городысь калык управление, "Нефтемаш", "Ижсталь", Ижевскысь пластмассаос поттонъя заводъёс, "Аксион" но трос мукетъёсыз. Ужбергатӥсьёс егитъёс азе асьсэлэсь трос куронъёссэс пуктӥзы, со ужан стаж, кунгож кылъёсты тодон но компьютерен ужаны быгатон. Та ужрад адямиен вузкарон рынок кадь потӥз мыным, егитъёслэсь ма карыны быгатэмзэс сяна, отын чаклазы дӥсьсэс но ымнырзэс-вылтуссэс, вераськыны, асьсэзыз возьыны быгатэмзэс. С. ПЕТРОВА. "Шудӥськом Моцартэз" Тазьы нимаськись спектакле огазеямын Операя но балетъя театрлэн кык ужез: "Директор театра" (быдэсыз) но "Свадьба Фигаро" операысь люкетъёс - кыкез но соос быдӟым композиторлэн Вольфганг Амадей Моцартлэн вужмисьтэм сочинениосыз. Постановкалэн кивалтӥсез режиссёр Сергей Разенков та произведениосты валчеяса вераны тырше театрлэн асьме улонын кыӵе инты басьтэмез сярысь. Спетакльын шудо-кырӟало Удмуртиысь калык артистка Людмила Минина, дано артистъёс Геннадий Городилов, Любовь Виноградова, Владимир Нефедов, солистъёс Александр Димитров, Дмитрий Шиврин, Светлана Мельникова. В. ЛАГУНОВ. Одӥг пол адӟид ке, синмаськод Нылпи ке вордске, одно ик ним сёто. Киясаослэн выль ансамбльзы кылдӥз. Кызьы нимано? Тодосчилы но кылбурчилы Василий Ванюшевлы вазиськизы. Солэн дэмламез пӧлысь бырйизы огзэ - "Ашальчи". Чебер но мусо кылӥське. Зэм, таӵе нимоез ансамбль вал ни - мединститутын, но кема ӧз возиськы. Со вал дас ар талэсь азьвыл. Удмурт культурая "ужбергатӥсьлэн" Надежда Пахомовалэн йыраз гужламысь уг дугды ни малпан: РДК-ын одӥг удмурт коллектив но ӧвӧл, маке но кароно. Со вие ик жингыртэ дышетӥсь Зинаида Коконова: ойдолэ удмурт ансамбль кылдытом. Кӧня ке кузя люкаськылыны ӧдъязы. Баянистсы одӥг удмурт кырӟанэз но уг тоды. Ӧтизы Уддядиысь Николай Уткинэз. Куриськизы Галина Никитична Бубякина доры ёрос библиотекае.Кырӟан ӧръяськиз. Но нырысь-валысь оскисез ӧй вал на. Автобус сётэмзы ӧз поты. Ижысь комиссия лыктӥз - эскероно, пе, мар быгато... Татариын, Сарсак-Омгаын, нырысьсэ бадӟым концерт сётӥзы. Озьы ӝужаз "Ашальчилэн" кизилиез. Нош сое яркытгес ӝуатыны кылдэм Любовь Овчинниковалы. Шонерзэ вераса, куашканы кутскем, ӟудэм коллективез со выльысь бичаз. Выль культура юртын удмурт кырӟась- эктӥсьёсын ужаны нокинлы вал ни. Выль специалистлэсь диплом ужзэ утизы "ашальчиос". Пичи Пурга ёросысь Ыбдэс гуртысь туж синмаськоно кадь нылмуртэз дано "Италмасэ" но куро вал кыльыны, нош со ачиз синмаськиз "Ашальчилы", люкиськемез ӧз луы ни солэсь. Табере ансамблез та кивалтӥсезтэк син азе пуктыны шуг - солэн аслаз нокинэн сурантэм тусбуез, ас буёлъёсыз, гуръёсыз. 19-тӥ мартэ Киясаысь культура юртын "Ашальчи" пумитаз кунооссэ - дас аръем юбилейзэ пусйыны. Ас ӟыгыртэтаз кадь возиз: асьсэос кутсконаз но пумаз гинэ сцена вылэ потазы, нош со куспын "ашальчиосыз" ӟечкылазы Вуж Сальялась кырӟась пиос, Уддядиысь "инвожоос", Вуж Тӥгырменысь "купанчаос", Кияса культура юртысь "ивушкаос" но "непоседаос". Завьялысь эшъёссы но, "вуюисьёс", быдэс автобусэн вуиллям. "Ми тӥ доры куное лыктӥмы..." - жинграк кисьтӥськиз куаразы. "Ашальчиослэн" вань вылэм ни кивоштӥсьёссы но - Кияса шор ёзо школаысь "Чылкыт ошмес" фольклор ансамбль (кивалтӥсез З. Коконова). "Пичи ашальчиос" шуо соосты. Куд-огезлэн нылпиоссы но татчы ветло ни угось. Тани Н. В. Пахомовалэн Димаез, тужгес пиналэз кырӟась-эктӥсь пияш, 5-тӥ классысен ик басьтӥськиз та борды. Нош ачиз Надежда Викторовна, йӧн тусо, визьмо кышномурт, ансамбльлэн "идейной" кивалтӥсез выллем луэ. Кулэ дыръяз со ачиз ик кырӟан кылъёс но малпа - озьы вал, "Солдатэ келян" композицизэс дасяку... Надежда Викторовна кызьы ке шуиз: мыным, пе, культура удысын ужась луоно вал, дыр. Ӧйтӧд, но Н. Пахомова ӧй ке быгатысал уксёен но маин ужез бергатыны, аслэсьтыззэ, кулэзэ "ӵогыны", шедьтыны - "Ашальчилэн" сюресэз асьсэ палтӥ гинэ котыръясал, дыр. Дышетскемезъя экономист (банкын ужа), но сое психолог-а, мукет сямен-а ниманы луысал на. Тани одӥг учырез вералом. Ижевске фольклор фестивале мынытозь, кык нунал кылиз, нош арганчизэс Юра Митряновез ӵап армие басьтӥзы. Копак мылкыдзы быриз. Ма кароно? - Эн сюлмаське, Юрады но луоз али,- ӝот-ӝот вераз Надежда Викторовна. Зэмзэ ик, Юра сцена вылэ потыны вуиз. Татьяна Тукаева сое военкомат пыр курем. "Ашальчиос" фестивальлэн лауреатэз луизы. - Ой, Надяпай, тынад туно сямыд но вань вылэм,- шуизы соку нылъёс. Залысь калыклы возьмато видеоплёнкаез - кызьы соос 1996-тӥ арын куарусён толэзе ветлӥзы калык куспо фольклор фестивале. "Содружество" нимаськиз со. Татчы ветлӥзы пӧртэм странаосысь усточиос. Самодеятельной шуон коллективъёс кык гинэ вал - Удмуртиысь но Даниысь. Та странаысь артистъёс туж паймыса , кутылыса ик учкизы "ашальчиослэсь" уксё тӥрлыкъёссэс. Витьтон ар ни соос огазьын, эктонъёсынызы паймыто, тужгес мӧйыезлы 82 арес, солэн пиезлы - 50. "Ашальчиос" соос вӧзын ежесь ай (сизьым арес вал соку). Бразилиысь лыктэмъёслэн поръятӥсь крезьгурзы, йырпоромон эктонзы, ворпоё-ворпоё дӥськутсы куалектытӥз "ашальчиосыз". Соос бӧрсьы потоно ук!.. - Ойдолэ ум потэ али,- шуэ Юра Митрянов. Пахомова соку ик юн кырмиз "биньгозыез": асьтэды, пе, кияды кутэ. Котькудӥз калык ас сяменыз чебер. - Тӥляд гинэ зэмос фольклор вал. - Тӥ сыӵе усто быгатӥды Россилэсь данзэ утьыны. Нырысьсэ вераз кыӵе ке нылаш, кыкетӥзэ - Башкортостанысь культурая министрлэн воштӥсез. Соку гинэ "ашальчиос" валазы кадь асьсэлэсь дунзэс. Та вал Удмуртилэн сьӧраз куинетӥзэ потамзы. Со аре ик южтолэзе вуылӥзы ни вал Нефтекамске финн-угор фольклор фестивале, нош нырысьсэ таӵе ик фестивале ветлӥзы Кудымкаре, 1995-тӥ арын, татысь но дипломант луыса бертӥзы. Ӝоген коллектив басьтӥз калык ансамбль нимез. Уксё ӧвӧл шуыса, киостэ ас вылад тырыса уд пукы. Надежда Викторовнаез уката ик уд пукеты. Отчы, татчы мынэ, утчаське. Николай Васильевич Неклюдовлэсь, ужбергатӥсьлэсь, "портӥз" кӧня ке но коньдонзэ. Уг тырмы на. Ма кароно? Ленин нимо совхозлэн директорез Николай Иванович Вдовкин доры мынӥз. Соиз ас эшъёсызлы, колхоз предъёслы, вазиськиз. Уксё люказы. Надежда Викторовна ӟыгыръяны, чупаны ик дась вал юрттӥсьёссэ. Озьы соос соку мыныны быгатӥзы Уфае. Маке шедьтоно ке, оло, бурдъёс кылдо. Николай Постниковлэн Ашальчи Окилэн кылъёсызъя "Даур" кырӟанэзлы куинь пол ветлоно луиз Удмурт радиолэн юртаз. Мар ке шуген сётӥське, сое одно ик вормоно - сыӵе сямыз Надежда Пахомовалэн. - Паймисько Надежда Викторовналы, солэн чидамезлы, кужымезлы,- шуэ ансамбльлэн кивалтӥсез Л. Овчинникова но.- Мар но со уг малпа! Берло кылӥськод ини: созэ, тазэ ортчытэм, нош ик библиотекае кинэ ке ӧтьылэм. Удмурт калык понна со зол висе. Бен, та кышномуртлэсь ӟеч ужъёссэ вераса уд быдты - берытскоме ансамбль вылэ. "Ашальчиос" концертсэс ӵем дыръя кутско Николай Уткинлэн Людмила Кутяновалэн кылъёсызъя "Ашальчи" кырӟанэныз. Дышетыны секытгес вал, но вормим, шуо асьсэос. Тодымтэ кырӟанъёссы ик ӧвӧл, дыр, соослэн. Нош вань сыӵеосыз но, кудъёсыз соослы гинэ ымнырзыя тупало кадь, буёл, дӥськут сямен... Озьы ик быдэс программазы - ас туссэс-буйзэс, лулзэс-сюлэмзэс усьтӥсь. Нош буртчин дэремъёссы вылын пужъятэм тӧдьы азькышетъёссы! Таӵезэ киясаослэсь гинэ адӟод ("ашальчиосын" ӵошатскыса, киужъёссэс пӧртэмъяло вуж сальяос, уддядиос, тӥгырменъёс). Кибашлыесь ке кибашлыесь та нылкышноос. Оло сӥньысъёссы-мулинаоссы-а соослэн пӧртэмесьгес, асьсэос сяськалы пӧрмыса улӟисесь... Со пужыос пӧлын одно ик вань, дыр, ашальчи сяська но. Нош дэремъёссэс, йыркерттэтъёссэс вурон-чеберъян бордын трос тырше РДК-ысь костюмер Галина Николаевна Овчинникова. Ньыльдон адями ветлэ ни та ансамбле. Куд-огзэ одӥг пол адӟид ке, выльысь соку ик тодмалод: та "Ашальчи". Тани, шуом, Пётр Михайлович Николаев, коллективлэн маскарчиез, питыр-питыр гинэ эктыса ортче... Солэн кузпалыз Людмила Владимировна но, сузэрез Зоя но та ансамбльлэсь уг ӵыдо. Соос сяна но татчы семьяен-семьяен ветлӥсьёс вань... "Ашальчилэн" юбилеезлы сӥзем ӝытэ котькудӥзлы пичи ке но кузьым шедиз. Нош Культурая министерствомылэн данъян грамотаосыныз пусъемын Л. А. Овчинникова (кивалтӥсьсы), В. Л. Митрофанова, Н. И. Никифорова, Н. В. Пахомова, Е. Н. Павлова, П. М. Николаев но Е. Л. Черняева. Котькудӥз соос пӧлысь жингыртӥсь крезь кадь, нимаз-нимаз данъямон. Н. Пахомова юнме уг шуы, дыр: "Быгатысал ке, быдэс книга гожтысал ни "Ашальчимы" сярысь". Медсестра, санитарка, кассир, доярка, тракторист, вуриськись, дышетӥсь... Котькин мед луоз, сцена вылын мальдыто, пишто, сюлэм котыре шунытэн бинялтӥсько. Соин ик "Дэменлэн" азьвыл кивалтӥсез Лидия Васильевна Орехова, матысь эшсы, юрттӥсьсы, сцена вылысен шуиз: - Лулгажан киясаосы! Кыӵе мон тӥледыз яратӥсько. Таӵе йӧно, сабырлы, визьмо удмуртъёсты адӟеме ӧвӧл. Соин ӵош та ӝытэ лыктэм финн журналист Пекка Лехтинен но одно ик ас чуръёссэ гожтоз, дыр. Нош мон малпасько, "Ашальчи" нимез бырйиз бере, ансамбль аслэсьтыз данзэ котьку вылын возёз. Татьяна ЧЕРНОВА. * "Ашальчи" калык ансамбльлы - 10 ар. "Удмурт кенеш" огазеяськонлэн нимыныз ӟечкыла ас пал адямизы Алексей АНДРИЯНОВ. * Таӵеесь соос, "ашальчиос". Туспуктэмъёсыз В. КАМАШЕВЛЭН. Шӧкыч Эх, улӥськом-вылӥськом, шу! Эх, улӥськом-вылӥськом, шуэ, иськавынъёс! Уждун, пенсия ум басьтӥське. Нош кӧня юиськом, лушкаськиськом, жугиськиськом. Бастоватьтӥськом! Огкылын вераса, визьтэммиськом, лэся, ни. Лушкаськон выжызэ мур лэзиз ини гуртэ но. Пересьёслэн верамзыя, вазен, пе, юртъёсын тунгон ик ӧз возьылэ. Гуртоос ог-огзылы оскыса улӥзы. Нош табере яблок-огречтэ гинэ уз лушкалэ, ӝыны юртъердэ, машинадэ нуыса кошкозы, ява! Берло дыре туж аляз пудо-животэз кайпалтон. Кызьы шуо, асьме вакытэ со туж ходовой товар. Сӥльдэ живо-два басьтозы. Вылаз ик, дунзэ кӧнялы ке кулэстӥд на ке. Кылем кӧс нуналэ Кияса фермаын малпамтэ шорысь уин парсьпиос визгетыны кутскизы. Отын ик улӥсь кык воргорон ньыль парсьпи поттыны вуиллям вылэм. Кышкатэм нуф- нуфъёсты берен фермае вуттӥзы. Нош Пичи Пурга ёросысь "Красная звезда" колхозлэн фермаысьтыз 16! парсьпизэс маятӥллям. Изъян адӟемын ог 10 сюрс манетлы. Маскаен йырвандӥсьёс гуртъёсы но вуылыны шӧтазы ни. Шаркан ёросысь Сосновка черкогуртлэн фермаяз соос зэмос киноын сямен ик бер уин вуизы. Кык возьмаськисез боевикъёс гозыен керттылӥзы но ньыль кунян тю-тю! луиз. Нош алнашъёс талэсь но ортчиллям. Кыӵе ке тодмотэм воргоронъёс пистолетэн яке солы укшась арбериен Кузёбай фермае пыриллям. Валамон ини, сторожлэн не пыӵалэз, не шуланэз ӧвӧл. Вылаз ик, пистолетэз адӟыса, пыдесъёсыз шальтразы на, луоз. Таизэ но возьмаськисез на всякий случай керттылӥзы. Таяз учыре пыдъяськизы кунян но сизьым парсьпи. Ваньмыз 14 сюрс 300 манетлы. Озьы тӥни, улӥськом-вылӥськом, шу. Н. ЛЯЛИН. ДЕПУТАТЭ КАНДИДАТЪЁС Эшъёсызлы оске Ижысь 69-тӥ школаысь директорлэсь дышетон но валэктон ужъя юрттӥсьсэ Нина Алексеевна Ковырзинаез Кун Кенеше депутатэ ӵектӥзы бырйисьёс. Вордӥськиз но будӥз та адями Дэри (Завьял) ёросысь Выль Казмас гуртын. Тямыс классэз йылпумъяса мынӥз Можга педучилищее. Отын дышетсконзэ быдэстыса, кӧня ке ар ӵоже ужаз Дэри шор ёзо школаын. Собере вуиз Иже. Ужаны кутскиз городысь 69-тӥ школаын. Соку ик дышетскыны пыриз Удмурт кун университетысь кылтодонъя факультетлэн ӟуч кылъя но литературая люкетаз. 1992-тӥ арын луиз директорлэн дышетон но валэктон ужъя юрттӥсез. 1996-тӥ арын Нина Алексеевна Ковырзиналы сётэмын "Калыкез дышетон удысысь азьмынӥсь" дано ним. Удмурт дышетӥсьлэн одӥгез бадӟым сюлмаськонэз - удмурт пиналъёс нырысь ик мед тодозы анай кылзэс. Та ужпумез быдэстон вылысь, школаын ортчыло турлы тунсыко ужрадъёс. Со сяна, та адями мылысь-кыдысь тырше "Удмурт кенеш" огазеяськонлэн Ижысь Индустриальной ёросысь ёзаз. Со кичӧлтэмъя но ортчыло та школаын пӧртэм тунсыко пумиськонъёс. 4-тӥ апреле Нина Алексеевна понна куаразэс сётозы Ижысь 2-тӥ Чехов округысь бырйисьёс. Эшъёсызлы со оске. Шӧкыч - Гажано чорыгасьёс! Ваньдэс ик ми доры матэктыны куриськом. Адӟиськом, жадиллямды ни туннэ. Лыктэ, нясь-нясь кариське, шунтӥське! Суредэз Л. ПРОЗОРОВЛЭН. Гожтӥськон-99 Дунъёс будо, газет дун но йылэ Гажано эшъёс, апрельысен кутске газет-журналъёслы кыкетӥ паларлы гожтӥськон. Улон воштӥське, дунъёс будо, гожтӥськон дун но интыяз уз сылы. Удмурт Республикаысь Почта пыр кусып возёнъя федерация управление 6-тӥ апреле шаерамы ялэ "Гожтӥськисьлэсь нуналзэ". Кин та нуналэ газет-журналъёслы гожтӥськоз 1999-тӥ арлэн кыкетӥ паларезлы, гожтӥськон дунъёс нырысетӥ паларе кадь ик луозы. "Удмурт дуннеез" лыдӟисьёслы но ивортӥськом, кин газетэнымы эшъяськыны малпа июль толэзьысен, 6-тӥ апреле вамыштэ почтаосы. Тодады вайытӥськом, газетлы гожтӥськон дун 1-тӥ январьлы таӵе вал: арнялы быдэ куинь пол потӥсь номерлэн (индексэз - 54400) ӝыны арлы гожтӥськон дуныз - 30 манет; гуртын улӥсьёс, пенсионеръёс, студентъёс куинь потӥсь номерлы (индексэз - 14402) ӝыны арлы гожтӥськыны быгатозы 27 манетэн; Быдӟым Отечественной войнае, Афганистанын но Чечняын ожъёсы пыриськемъёслы, Чернобыльын пуштонлэсь бервылъёссэ утялтонэ ветлэмъёслы, ляб адӟись инвалидъёслы, трос нылпиё анайёслы ӝыны арлы гожтӥськон дун - 21 манет (индексэз 14400); телепрограммаен пятницае потӥсь номерлы (индексэз 54402) ӝыны арлы гожтӥськон дун - 12 манет. 6-тӥ апрель бере та дунъёс воштӥськозы - почта дунъёс будэмен, газетлэн но дуныз йылоз. Соин ик дыртэ, эшъёс, почтае. Гожтӥськон дунъёслэсь воштӥськемзэс матысь дыре ивортом. Л. МАЛЫХ. Шӧкыч Галина Романова Сюлмы пыже, кӧты лыдэ Серемес верос Сюлмы пыжыса кылзӥсько но учкисько радиоысь но чагыр экранысь туала политикъёсыз. Солань-талань эли-кеби ветло, бызьыло, верасько, нош ужзы вень йыр быдӟа но уг азинскы. Эх, шуисько, мон ке политик луысал! Калык вӧй пӧлын уясал, кампет-преник гинэ сиыса улысал, магазинъёсын асьме дорын поттэм арбериос гинэ палёмытысалзы. Дорамы лыктэм кунгожсьӧр куноос паймысалзы, кризисо, инфляцио но безработицаё дор палазы бертэмзы но ӧй потысал ни. А мон соослы пӧлы пум возьматысал но кырӟасал: Шиш тӥледлы кедра мульы, Кӧмзэ музысь бичалэ. Шиш тӥледлы Россей музъем, Асьтэ доры бертэлэ. Ӧвӧл, ӧвӧл, тазьы нюлымтэ кунян кадь улыны уг луы ни! А то азьланяз эшшо но золгес йырчукин васьком, кытчы вуэммес валатэк ик быром. Тани-тани быръёнъёс матэкто, одно отчы пыриськоно. Программае кемалась дась ни. Тодэмды потэ-а, кыӵе сыӵе программа? Кызьы шуо визьмо тодосчиос, музъем вылын, пе, вань ӟечез-умоез огшоры луэ. Мынам но со огшоры но оскымон: аслам шӧдонэ. Бен, бен, шӧдонэ: азьпалан ма луоноез мон кытӥы ке лыдэмея тодӥсько. Тани алигес нырйылы но нырулы лыдӥз. Ну, малпасько, кин ке но кулоз. Озьы ик вань: вазь ӵукна дорамы шок-пуль гинэ Насьта пыре, Мекей Сергей, пе, кулэм, сюлмыз путэм. Путоз угось таӵе улонэн! Нырулы но лыдӥз бере, кисьтонын вина юоно луиз. Политикаын ужакум, та шӧдонме мон радио, чагыр экран пыр верасал. Чаклаське, шуысал, та нуналъёсы ог-огдылы урод кылъёс эн вералэ, тросгес чылкыт омырын юмшаны, одӥг ӝӧк сьӧрын пукыны тырше. Учкиськод ке, нырйылы лыдӥз ке но, бырисез ӧжытгес луысал. Озьы калыклы пӧртэм шимес адӟонъёслэсь но палэнскыны азьвыл ик верасал. Тани мынам паллян пыдпыдэсы лыдэ ке, одно юнме бызьылон луэ, нош бурыз ке - ӟеч сюрес. Кытчы ке ветлонлэсь пайдазэ шӧдон-тодон политикаын туж кулэ. Мар-о кыӵе ке кунэ яке каре сюрсъёсын коньдон куяса ветлонэз. Коньдон шуэм бордысь тазэ но верам потэ: бур кипыдэскы лыдэ ке, тод ни, кытысь ке коньдон вуоз, нош палляныз ке - сётон. Та шӧдон кунмылэсь кӧня коньдонзэ шыръясал!.. Политикаын ужаны малпаменым, лэся, берло вакытэ асьме кунын луоно югдуръёс азьын но шӧдонэ усьтӥськылыны кутскиз. Огпол ӵукна султӥсько но, эх, кымысы лыдэ ук, эх, лыдэ! Кык киыным кормасько. Ну, шуисько кышноелы, бадӟым куректон лыктоз. Кышное шуэрскиз, солань-талань бызьылыны кутскиз: парсьмы, пе. пияны кулэ, оломае татчы адӟод али. Мон но куректонэ уси вал ини но, парсьмы дас одӥг сяртчы кадь быгылес пи поттӥз. Нош радио пыр кылӥсько: кризис, пе, лыктэ, долларлэн дуныз будэ. Отын ик калыкез буйгато: сокем-сокем эн сюлмаське, ваньмыз интыяз пуксёз али. Э-э, шуисько, кымысы сыӵе-сыӵе зол лыдӥз бере, та ӟечлы ӧвӧл. Кризислэн йылыз-пумыз ваньзэ шуккоз. Кутӥ но берпум коньдонэным кыкетӥ скал басьтӥ на, парсьпиосме одӥгзэ но ӧй вуза. Сюдом-утялтом, берло барышез ой-ёй кӧня пол берытскоз. Тазьы азьпалзэ адӟыса-чакласа ужасалзы ке асьмелэн политикъёсмы! Бур синкашы ке лыдэ, одно ик тодмоме адӟисько, палляныз ке - мыным кӧтвеськантэмзэ. Паллян синкашы лыдэм дыръя мон берло вакытэ ӵогаськисько но, сэндрае выдыса, лумбыт кыллисько. Соиз умой: уже ветлонэз ӧвӧл ни - колхозмы туэ банкрот. А ведь мон таӵе луонозэ кемалась шӧдӥ вал ини, предмылы но верай. Юнме, шуисько, туэ ю-нянь трос кизиськод - уз удалты, сутскоз. Картошка но чукиндэр мерттыса умойгес луоз. "Малы?" - юа. "Туэ куазь кӧс луоз". "Кытысь тодӥськод?" Зорон азьын, шуисько, пельы лыдылэ, нош туэ одӥг пол но ӧз лыды на. Предмы киыныз гинэ шонтӥз: тынад шӧдонэныд, пе, ноку но капитализме уд вуы. Тӥни табере банкротэ вуизы. Эх, улон шу! Нуналлы быдэ паймон! Малы ке-а котькуд ӵукна берпалы лыдылэ, собере синмы но бамы кутске. Паймемлэсь тросгес уго бӧрдэм потэ. Гуртамы бадӟым прудмы вань, чорыгез но туж трос гинэ вал, тужгес но карпъёс. Солы луыса, кӧня егит пиос но кын корт куртчон воргоронъёс бырылӥзы ини. Азьвыл кызьы чорыгаськом вал: визнан кутӥськом но лумбытэн-уйбытэн пукиськом. Чорыг кыскамлы пичи мурт кадь шумпотӥськом, визнан курике шедемзэ дуно арбериез кадь маялляса басьтӥськом. Политикъёс адямиез сӧризы. Соослэн но, банкиръёслэн, коммерсантъёслэн, бизнесменъёслэн сямен ик, ваньзэ туннэ, чаляк но тросгес басьтэмзы потэ. Дыртӥсь таракан но вуэ усе, шуо. Озьы милям но пуштытон макеосын чорыг кутылыку, асьсэос но юэм йырынызы я вуэ усё, я асьсэос пушто. Кӧня мон соослы верасько, индылӥсько! Кылзӥсь ӧвӧл. Ма, кин-о кылзӥз ини огшоры адямилэсь. Депутат, политик ке луысал, мон вань шӧдонме ужам кутысал. Шӧдонэ сярысь книга поттысал но котькуд адямилы дунтэк сётысал. Соку кытӥы ке лыдыны кутскысал ке, радио но чагыр экран пыртӥ верасал гинэ на, нош малызэ калык книгая ачиз тодысал ини. Озьы янгыш лэсьтонлэсь утиськысал, азьпала учкыса улыны дышысал. Валады, луоз, программае мынам туж огшоры но пайдаё. Сое улонэ пыӵатон понна, эшъёс, тӥляд голосъёсты гинэ кулэ на. Берло вакытэ ӵемгес но ӵемгес кӧты лыдылэ. Малы меда, малпасько. Собере кӧтме ӵаж- ӵаж кормасько но шумпотыса кырӟасько: Кӧты лыдэ, кӧты лыдэ, Мае меда со шӧдэ? Мон политик одно луо - Сое со озьы шӧдэ. "Аксионлэн" сцена вылаз "Аксион" культура юртын ортчиз "Талантъёсын узыр Урал" фестивальлэн берпум люкетэз. Ас быгатэмзэс возьматӥзы Пермь, Челябинск, Свердловск, Оренбург, Курган улосъёсысь, Башкортостанысь устоосыз кырӟась коллективъёс. Удмуртилэсь данзэ утизы Пичи Пургалась "Зарни шеп" калык ансамбль, Бобья-Учалась нылкышно арганчиос, Можга ёросысь Бадӟым Уча селоысь пиосъёслэн ансамбльзы, озьы ик Воткинскысь, Глазовысь кырӟасьёс. Кылемаз кӧснуналэ но арня нуналэ "Аксионлэн" сцена вылаз потазы эстрадаысь пинал кырӟасьёс но. "Удмуртиысь ӝужась кизилиос" конкурслэн та йылпумъян люкетэз но возьматӥз: шаермы усточиосын узыр. Т. НИКОЛАЕВА. Асьмелы улоно ай... Уродэзтэк ӟечез ӧвӧл, шуо калыкын. Озьы, дыр. Тани тулыс вуиз, шунды пиштэ, пыдлось пуш мылкыдэз бугыртэ... Шумпот вал - уг луы. Уго умоеныз ӵош котырын трос кырсез потэ: сьӧдэктэм лымы улысь мычисько бумага юдэсъёс, тамак пумъёс, сур ӟенеликъёс но мукетыз. Ай ярам, урамын гинэ дэри луысал ке... Кырсь потэ музон интыосысь но: газет бамъёсысь, телевизорысь, радиоысь. Мугез тодмо. Республикамы арня нуналэ быръёз выль парламент. Шорлыдын вераса, одӥг мандат понна куать мурт нюръяське. Валамон ни, котькудӥз ассэ устоез кожа, сыӵе луэмзэ возьматон понна оломар но малпа. Кызьы иворто тодӥсь адямиос, быръёнъя куд-ог комиссиосы нуналскын кызьлэсь но трос ӝожтӥськонъёс вуо. Одӥгез кандидат мӧйыосты чаен, пе, утялтэ, кыкетӥез ӝуткан уже быдэс коллективзэ кыске, куинетӥез супыльтон вӧлмытэ... Ог-огед вылэ кырсь киськан тужгес но кужмояз та арня куспын. Асьсэлэсь кулэяськонъёссэс утён но мандат басьтон понна, шӧртчи адямиос олокыӵе но амал шедьто, Москваысь но мукет интыосысь имиджмейкер шуонъёслэсь индылэмзэс лыдэ басьтыса, йыре тэронтэм вераськонъёс кылдыто. Тани кинлы ке но кулэ луэм Правительстволэсь Тӧрозэ Павел Вершининэз Анатолий Чубайсэн но со выллем мукет адямиосын оградэ пуктыны. Паймод ук. Мукетъёсыз политикаен но власте кылён ужпумъёсын вырыку, со Удмуртилэсь вань сюлмаськонъёссэ (коньдон утчанэз, экономикаын югдурез огсыр возёнэз но мукетъёссэ) ас вылаз басьтӥз ке но, тау карем интые, премьер-министрлэсь данзэ саптаны выро. Мон малпасько, номыр уз пӧрмы. Калык ваньзэ шонер валалоз но куараоссэ ӟеч муртъёс понна сётоз. Ойдолэ валаломы созэ: асьмелы улоно ай 4-тӥ апрель бере но. Ваньмы сямен ик кылёмы ас интыосамы, ваньмы сямен ик ужаломы ас удысъёсамы, нош ик ог-огенымы пумиськоно луомы. Соин ик ойдолэ малпаськоме ӵуказе нунал сярысь. Кырсез ортчоз-быроз. Кызьы ке урамъёсы ӝужалоз вож турын, озьы ик улонамы но ваньмыз радъяськоз. Тудву сьӧраз нуоз дэриез но урод малпанъёсмес. Озьы мед луоз. И. ЛЕБЕДЕВ. Книгаос гинэ ӧвӧл, сюй мунёос но Таяз толэзе, апреле, республикаысьтымы Национальной библотекалэн шаерез тодонъя но финн-угор литературая ёзэзлы 30 ар тырме ни. Нош татын ужась "Удмурт шаер" клублы луоз 15 ар. Соин валче библиотекаын радъямын бадӟым адӟытон. Со сяна, ми дорын али ужа "Пушкин но Удмуртия" выставка. Кызьы герӟаськемын ӟуч классиклэн нимыз удмурт шаеренымы - со сярысь вералозы пӧртэм аръёсы потэм книгаос. Та нуналъёсы библиотекаямы пыриды ке, эшшо одӥг маке паймытоз тӥледыз: горд сюйлэсь лэсьтэм сяськаос но мусо мунё ымныръёс. Соосты лэсьтӥз Светлана Воробьева. Н. ПЧЕЛОВОДОВА, Национальной библиотекаын ужась. Быръёнъёс азьын Кинлы матын калыклэн кулэяськонъёсыз? Татьяна Андреевна Манакова - Удмурт Республикаысь Кун Кенешлэн депутатэз, отысь промышленностья но лэсьтӥськонъя комиссилэн членэз. Миым сӥзьыл сад-бакча возисьёс доры сюлмаськытӥсь ивор вуиз вал: музъем понна выт тырон ньыль поллы йылоз, пе. Татьяна Андреевна Манакова, Кун Кенешлэн депутатэз, соку ик пумит луиз Россиысь Правительстволэн таӵе решениезлы: - Ма, кызьы озьы? Экономикаын кризис муроме, пенсиосты но уждунэз тырон трос толэзьёслы ӝега, данакезлы сад-бакча возисьёслы сад-бакчазы одӥг гинэ сюдӥсь кадь луэ... Улон но ужан опыт люкаське пичиен: дышетскем бордысь но, астэ ачид дышетыны быгатэмысь но, ваньзэ ӵошатыны валамысь но. Татьяна Андреевна 1990-тӥ-95-тӥ аръёсы ик бырйылэмын вал Верховной Советэ депутатэ, 1995-тӥ-99-тӥ аръёсы - Кун Кенеше. - Мон аслам верамъёсы вылын юн сылӥсько,- шуэ со.- Трос калык люкрак медаз улы, кулэ ини нимаз коркаос пуктылон борды басьтӥськыны, вӧзазы мед луоз сад-бакчаоссы. Мар-о со луоз 30-40 иськеме ветлон? Умойтэм со, 3-4 сотка но туж ичи. Музъем висъяно 25 соткаозь. Депутат Манакова сюлэмшугъяськемзэ вера: - Калыкелы медицинской юрттэт сётонэз но ог люкетсэ, начар улӥсьёслы, одно дунтэк кароно. "Ижмаш" али грузовой мотоциклъёс, соослы уробоос, грузовой коляскаос поттэ, но дуноесь соос, соин крестьян калыклы вузано бартерен но (картофка, бакча сиёнъёс, сӥль но мукетсэ сётэмез чотын). Ижлы матын музъемъёс вань на Люлли, Пирогово, Пазелы гуртъёс котырын, соосты тулыс ик люкылоно. Ваньзэ уг луы на чакламъя лэсьтыны, но тырше депутат, чакламез мед пӧрмоз шуыса, со сяна, дораз котькуд вазиськись адямилы со котьку дас ӟеч кылын но ужен юрттыны. Соин со нош ик депутат луыны малпаське, аслаз 12-тӥ округезъя ик. П. СКОБЕЛЕВ. Туспуктэмез М. ЕГОРОВЛЭН. Сергей Николаевич Широбоков - врачъёслэн семьяысьтызы. Атаез Николай Кузьмич трос аръёс ӵоже ини хирург луыса ужа, анаез Любовь Борисовна - нылпи врач. Соин ик пизы но кема малпаськытэк дышетскыны пыриз Ижевскысь медициная кун институтэ. Татын дышетскыкуз уката но зол валаз: сюрессэ шонер бырйиз. Егит хирургез нырысь ужаны ыстӥзы Як.-Бодьяе, собере - Каракулиное. 1995-тӥ арысен Сергей Николаевич автозаводлэн поликлиникаяз ужа. Ӵош ужась эшъёсыз сое гажало лякыт сямъёсыз но ас ужзэ ӟеч тодэмез-валамез понна. Али Сергей Николаевич дышетске аспирантураын. Туспуктэмез В. БЕЛОМОРСКИХЛЭН. Вашкалатэк туалаез ӧвӧл Кылбур... Ма со сыӵе? Малы тросэз кылбуръёсты уг ярато, уг лыдӟо? Оло школаын соосты яратон мылкыд пыӵатыны уг быгато? Прозаен гожтэмъёсты "кушаса" ик эскериськом. Нош макем тунсыкоесь вылӥллям соос, кылбуръёс. Одӥг-кык чур ик куддыръя оломар сярысь но вера. Кылбурлэн паймымон дуннеяз выиськод кадь. Тани ки уламы шедиз Петр Поздеевлэн "Вашкала но Туала" кылбурез. Паймымон маке. Кылбурлэн нимыз ик вера ини пуштроссэ. Отын трос малпаськытӥсез. Кылбур философской лирикалы матын. Котькуд вакыт ас сяменыз аслыз гинэ тупа. Нош котькыӵе дыре вал но луозы анай- атайёс но пиналъёс куспын тэрымтэос, керетонъёс ("отцы и дети"). Вашкала но туала Ваче ки кутско. Со пала но та пала Ог-огзэс кыско. Та чуръёсты лыдӟыку, син азе таӵе суред пуксе: пересез но пиналэз ваче ки ке но, котькудӥзлэн аслаз учконэз кыӵе ке арбери шоры, аслаз малпанэз дунне, улон, яратон, шуд сярысь. Вашкалалэн потэ кадь туалазэ ас дораз нуллэмез, "корказэ" возьматэмез. Озьы ик - Туала ас палаз кыске. Но... Пересез малпа тазьы, пиналэз - воксё мукет. Вашкалалэн аслаз кырӟан-веранэз, выжыкылъёсыз, аслаз лулчеберетэз. Нош пиналэз вордскемын мукет дыре, сое али улон ачизъя кариз. Ӧйтӧд, оло умойлы, оло уродлы. Соин ик котьку пӧрме тазьы: вашкалаез уг оскы туалаезлы, нош туалаез - вашкалаезлы. Таӵе суред: Куддыръя одӥг ымысь Кырӟало крезьгур. Кытӥяз шӧдтэк шорысь Пурӟыто гонтур. Автор риторической юанъёс сётэ: Ма каром мон соосын? Оло, эшъялом? Кыктылэн но сямъёсты Ӟеч шуом оло? Автор ассэ ачиз Вашкалалэн но Туалалэн кузёенызы лыдъя кадь. Юанъёсыныз вера кадь, та образъёсты эшъяськытыны но, люкыны но быгатэ шуыса. Собере ачиз ик судьялэсь рользэ "дуннелэн ӧрезлы" кузьма: Соосты визьмо дунъясь - Дуннелэн ӧрез. Ваньзэ со ас интыяз Ас дыраз тыре. Дуннелэн ӧрез, зэмзэ но, быгатоз дунъяны Вашкалаез но Туалаез. Дыр ортчемъя, алиез вашкала луз, собере - нош но нош. Кудӥз уг кельшы, уг яра вал, пумен улонэ пыре но улонлэн атрибутэз (тодметэз) луэ. Бен, Туалалэн но Вашкалалэн ог-огзытэк улэмзы уз луы, соос юн герӟаськемын, огез мукетызлы инъет луэ. Одӥг ӟуч кырӟанын верамын: "Есть только миг между прошлым и будущим, именно он называется жизнь..." Та кылъёс валэкто кадь быдэс кылбурез, соос возьмато вашкалалэсь но туалалэсь ваче вожвыл луэмзэс. Тани шуом, музыкаын али кылдыло пӧртэм ӧръёс. Вань сыӵе передача, кудаз туала крезьгурчиос "нюръясько" вашкалаосыныз. Со передача нимаське "Музыкальный ринг - новое поколение". Озьы ик литератураын но, шуом, луыло сыӵе вожвылъяськонъёс. Татын вань уродэз но, умоез но. Кылсярысь, туала поэтъёс выль ӧр усьто. Соос тыршо мукет сяменгес асьсэлэсь мылкыдзэс возьматыны, керпотытэк, кышкатэк пырисько улонэ. Ми сямен, сыӵеесь луо С. Матвеев, П. Захаров, но куд-ог мукетъёсыз. Соос гожъяло со сярысь, ма сярысь мукетъёсыз ноку ӧй гожтысалзы. Со бордысь ик пото даллашонъёс. Калыкын верало: азьлозэ ке ӧд тод, ӧд дунъя, ализэ но уд вала. Нош ми та вӧзы будэтысалмы на: ализэ но тодыны, дунъяны кулэ, вашкалаеныз ӵошатон понна. Мария Шихова, Ольга Шихова, Вавож ёросысь Ӟамбай школаысь 11-тӥ классын дышетскисьёс. Удмурт Республикаысь Быръёнъя комиссилэн ивортонэз 1999-тӥ арын 4-тӥ апреле ортчиз Удмурт Ресупбликаысь Кун Кенеше депутатъёсты быръён. Нырысетӥ йылпумъянъёсты отчы пыриськизы 50,5 процентлэсь ятырез бырйисьёс. Быръёнъя вань округъёссы лыктӥзы 25 процентлэсь уно бырйисьёс. Озьыен, котькытын ик быръён ортчемен лыдъямын. Быръёнъя интыосысь комиссиослэн ивортэмзыя, кандидатъёс пӧлысь уноос куараос сётэмын таӵе адямиослы: Ижевск город Индустриальной ёрос Быръёнъя 1 номеро Буммашевской округ - Жебровский Валентин Витальевич. Быръёнъя 2 номеро Чеховской округ - Харина Наталья Алексеевна. Быръёнъя 3 номеро Восточной округ - Кокорин Михаил Константинович. Быръёнъя 4 номеро Строительной округ - Дворцова Жанна Витальевна. Быръёнъя 5 номеро Тимирязевской округ - Лопатин Александр Константинович. Быръёнъя 6 номеро Халтуринской округ - Молчанов Сергей Михайлович. Быръёнъя 7 номеро Индустриальной округ - Авзалов Рустем Альбертович. Ленин ёрос Быръёнъя 8 номеро Железнодорожной округ - Галиахметов Раиль Ахсанович. Быръёнъя 9 номеро Московской округ - Тарасенко Виктор Дмитриевич. Быръёнъя 10 номеро Александровской округ - Салтыков Анатолий Иванович. Быръёнъя 11 номеро Новостроительной округ - Русских Виктор Ильич. Быръёнъя 12 номеро Заречной округ - Шаргаев Сергей Николаевич. Быръёнъя 13 номеро Лесозаводской округ - Забродина Людмила Ивановна. Быръёнъя 14 номеро Чайковской округ - Ходырев Валерий Васильевич. Октябрь ёрос Быръёнъя 15 номеро Северной округ - Моисеев Валерий Васильевич. Быръёнъя 16 номеро Холмогоровской округ - Любимов Виктор Николаевич. Быръёнъя 17 номеро Университетской округ - Городилов Сергей Аркадьевич. Быръёнъя 18 номеро Студенческой округ - Чикуров Сергей Витальевич. Быръёнъя 19 номеро Набережной округ - Шестаков Юрий Владимирович. Быръёнъя 20 номеро Центральной округ - Молчанов Александр Михайлович. Быръёнъя 21 номеро Административной округ - Светлов Сергей Вадимович. Быръёнъя 22 номеро Кировской округ - Галеев Азат Таисович. Быръёнъя 23 номеро Майской округ - Красильников Алексей Геннадьевич. Быръёнъя 24 номеро Республиканской округ - Осколков Андрей Эдуардович. Первомай ёрос Быръёнъя 25 номеро Пушкинской округ - Хорошавцев Виктор Геннадьевич. Быръёнъя 26 номеро Авангардной округ - Ануфриев Вячеслав Николаевич. Быръёнъя 27 номеро Рабочей округ - Кушко Виктор Михайлович. Быръёнъя 28 номеро Школьной округ - Степнова Зоя Ивановна. Быръёнъя 29 номеро Сосновой округ - Одиянков Евгений Германович. Быръёнъя 30 номеро Пролетарской округ - Белоголовкин Данил Ефимович. Быръёнъя 31 номеро Магистральной округ - Кучерявенко Михаил Ильич. Быръёнъя 32 номеро Родниковой округ - Бодров Владимир Петрович. Устинов ёрос Быръёнъя 33 номеро Ворошиловской округ - Суркин Валерий Сергеевич. Быръёнъя 34 номеро Автозаводской округ - Биганишвили Гиви Несторович. Быръёнъя 35 номеро Мирной округ - Преснухин Виктор Константинович. Быръёнъя 36 номеро Дружной округ - Лошкарев Григорий Андронович. Быръёнъя 37 номеро Нефтяной округ - Наумов Игорь Юрьевич. Быръёнъя 38 номеро Трудовой округ - Красноперов Геннадий Филиппович. Быръёнъя 39 номеро Школьной округ - Чуршин Алексей Дмитриевич. Быръёнъя 40 номеро Молодежной округ - Останин Геннадий Михайлович. Быръёнъя 41 номеро Союзной округ - Батанов Александр Сергеевич. Вотка город Быръёнъя 42 номеро Березовской округ - Фридрих Валерий Леонидович. Быръёнъя 43 номеро Пугачевской округ - Кудинов Валентин Иванович. Быръёнъя 44 номеро Центральной округ - Бычков Юрий Федорович. Быръёнъя 45 номеро Привокзальной округ - Жернаков Владимир Иванович. Быръёнъя 46 номеро Школьной округ - Соболев Юрий Борисович. Быръёнъя 47 номеро Южной округ - Дудин Сергей Геннадьевич. Быръёнъя 48 номеро Заречной округ - Кочетков Владислав Анатольевич. Глазов город Быръёнъя 49 номеро Западной округ - Фролов Леонид Кириллович. Быръёнъя 50 номеро Молодежной округ - Перешеин Владимир Юрьевич. Быръёнъя 51 номеро Центральной округ - Сорокин Николай Борисович. Быръёнъя 52 номеро Институтской округ - Першин Александр Васильевич. Быръёнъя 53 номеро Толстовской округ - Ганза Николай Алексеевич. Быръёнъя 54 номеро Левобережной округ - Волков Александр Александрович. Быръёнъя 55 номеро Южной округ - Касимов Кирим Фаттахутдинович. Можга город Быръёнъя 56 номеро Стеклозаводской округ - Мохначев Владимир Александрович. Быръёнъя 57 номеро Короленковской округ - Семенов Игорь Николаевич. Быръёнъя 58 номеро Авторемзаводской округ - Каримов Равиль Мухаметович. Сарапул город Быръёнъя 59 номеро Северной округ - Абросимов Геннадий Егорович. Быръёнъя 60 номеро Прикамской округ - Рыбаков Роберт Юсупович. Быръёнъя 61 номеро Парковой округ - Прасолов Алексей Михайлович. Быръёнъя 62 номеро Набережной округ - Горбунов Виктор Дмитриевич. Быръёнъя 63 номеро Привокзальной округ - Юшков Николай Петрович. Быръёнъя 64 номеро Электрозаводской округ - Сологуб Валерий Макарович. Быръёнъя 65 номеро Гончаровской округ - Малюк Михаил Семенович. Алнаш ёрос Быръёнъя 66 номеро Алнаш ёрос округ - Образцова Нина Андреевна. Балезино ёрос Быръёнъя 67 номеро Балезино поселковой округ - Касимов Энвиль Владимирович. Быръёнъя 68 номеро Балезино гурт округ - Соловьев Александр Васильевич. Вавож ёрос Быръёнъя 69 номеро Вавож ёрос округ - Соловьев Виталий Александрович. Вотка ёрос Быръёнъя 70 номеро Вотка ёрос округ - Варламов Владимир Сергеевич. Глазов ёрос Быръёнъя 71 номеро Глазов ёрос округ - Першин Петр Александрович. Грах ёрос Быръёнъя 72 номеро Грах ёрос округ - Марченко Анатолий Владимирович. Дэбес ёрос Быръёнъя 73 номеро Дэбес ёрос округ - Смирнова Светлана Константиновна. Завьялово ёрос Быръёнъя 74 номеро Завьялово ёрос округ - Дементьева Валентина Владимировна. Быръёнъя 75 номеро Камской округ - Никитин Валериан Арсентьевич. Быръёнъя 76 номеро Лесной округ - Зенин Владимир Николаевич. Игра ёрос Быръёнъя 77 номеро Играысь нырысетӥ поселковой округ - Богомольный Евгений Исаакович. Быръёнъя 78 номеро Играысь кыкетӥ поселковой округ - Шаляпин Александр Павлович. Быръёнъя 79 номеро Зура округ - Широбокова Софья Эльфатовна. Камбарка ёрос Быръёнъя 80 номеро Камбарка ёрос округ - Бузилов Валерий Викторович. Каракулино ёрос Быръёнъя 81 номеро Каракулино ёрос округ - Кузьменко Олег Леонидович. Кез ёрос Быръёнъя 82 номеро Кез округ - Ворончихин Николай Вениаминович. Быръёнъя 83 номеро Кулига округ - Кайгородов Юрий Михайлович. Кизнер ёрос Быръёнъя 84 номеро Кизнер ёрос округ - Малков Аркадий Трофимович. Кияса ёрос Быръёнъя 85 номеро Кияса ёрос округ - Сычев Николай Семенович. Красногорск ёрос Быръёнъя 86 номеро Красногорск ёрос округ - Кудрявцев Владимир Сергеевич. Пичи Пурга ёрос Быръёнъя 87 номеро Яган-Докья округ - Долганов Николай Витальевич. Быръёнъя 88 номеро Уром округ - Тубылов Валентин Кузьмич. Можга ёрос Быръёнъя 89 номеро Бадӟым Уча округ - Вершинин Павел Николаевич. Быръёнъя 90 номеро Пычас округ - Григорьев Михаил Алексеевич. Сарапул ёрос Быръёнъя 91 номеро Сарапул ёрос округ - Агашин Владимир Иванович. Быръёнъя 92 номеро Прикамской округ - Шутов Андрей Васильевич. Селта ёрос Быръёнъя 93 номеро Селта ёрос округ - Загайнов Валерий Федорович. Сюмси ёрос Быръёнъя 94 номеро Сюмси ёрос округ - Возисов Виталий Михайлович. Ува ёрос Быръёнъя 95 номеро Ува северной округ - Роговец Клементий Антонович. Быръёнъя 96 номеро Ува южной округ - Чувашов Николай^Федорович. Шаркан ёрос Быръёнъя 97 номеро Шаркан ёрос округ - Подсевалов Владимир Анатольевич. Юкаменск ёрос Быръёнъя 98 номеро Юкаменск ёрос округ - Питкевич Юрий Степанович. Якшур-Бодья ёрос Быръёнъя 99 номеро Якшур-Бодья ёрос округ - Кацемон Владимир Иванович. Яр ёрос Быръёнъя 100 номеро Яр ёрос округ - Боровик Юрий Иванович. Удмурт Республикаысь Быръёнъя комиссия. Куасэн ӵошатсконъёс Завьял ёросысь Пальники гуртын витетӥзэ ортчизы куасэн бызьылонъя ӵошатсконъёс. Отчы пыриськизы 100 пала дышетскись пиналъёс, ваньмыз 12 школа вал. Ӵошатскисьёс чебер куазез гинэ возьмаса улӥзы. Тани огез бӧрсьы мукетыз ширтӥзы куасэн бызьылӥсьёс. Нылъёс пӧлын вормисе потӥз Пальники школаысь 6-тӥ класс (тренерзы Колпаков В. И.). Кыкетӥ интыын Шабердино гуртысь 7-тӥ классысь нылъёс (тренерзы Н. Ю. Малых). Куинетӥ интые потӥз Юськиысь школа. Нош пиос пӧын вормисе потӥз Якшур школа (тренерзы В. В. Байков). Ӵошатсконэ пыриськемъёсты дунтэк сюдӥзы. Нош призъёс кузьмаз акциосын "Пальниковское" огазеяськон. Ваньмыз таӵе ужрад ортчиз В. Ф. Болтачевлэн тыршемез улсын. Мед тросгес луысалзы со кадь адямиос. ИНКУАЗЬ СУРЕДЪЁС Лобась пӧйшур Аспӧртэмлыко чебер тол нюлэс. Вань писпуос кильтыро сыло: тӧдьы шубаен, чильпам кышетъёсын. Дырын-дырын куспазы маке шыпырто, юмшась тӧллэсь выжыкыл мадёсъёссэ кылзо. Кытын ке улвай тачыртэ, сисьпу ӟукыртэ, кышкатскыса турак лобӟо тылобурдоос. Ӝужыт пужым вӧзысь адӟисько: лыдтэм трос ӵыжин жильдэмын, тысь куадамын. Озьыен, татын коньы кунояськиз. Сюресме азинтонъям кыз йылысь лымы валиськиз пыд азям. Учкисько но - улвай вылын чырткем коньы. Гонэз пурысялэс адске, быжыз пур-пур урдэмын, пельёсыз чорк! сыло. Лэчытэсь синъёсыныз палёмыса учке шорам, пыд вӧзам утыса сылӥсь пуныме. Бератаз кышканэз вормиз ик, лэся, турак мукет вае тэтчиз но, вылӥе ӝутскыса, син азьысь ватскиз. Вашкала песятайёсмы но туж гажаллязы, вылды, та чырткем но муспотон пӧйшурез. Угось со ик сюдылӥз, дӥсялляз соосты. Кыдёкысь вуэм вузчиос вожмаськыса басьтылӥзы дасям коньы куосты. Ма, пӧйшурасьёс пыӵал-тӥрлык, мукет вуз басьтэмзы понна коньы куэн тырылӥзы. Юнме шорысь уксёзэс "коньы" шуыса ӧз нималэ, дыр. Нырысьсэ та пӧйшурез адӟи школаын дышетскон аръёсам. Кин ке синйылтыса черектӥз: "Коньы!" Ми, велосипедъёсмес сюрес вӧзы палэнтыса, ури-бери уиськыны кутским. Нош со туж чырткем, сэзь. Одӥг писпу вай вылысь пуштырес быжзэ выретыса, мукетаз "лобӟе", ява! Паймод но бырод - лобась пӧйшур. Капчи бызьылэ со музъем вылтӥ но, писпу вайёстӥ но. Кутыны ӧм быгатэ. Нош кӧня ке нунал ортчыса, эшъёсы шаплыгем кариськиллям. Вуттӥзы соос та пичи но кышкась пӧйшурез классамы. Улэм-вылэмъяз дышиз кадь адямиослы но. Ӵемысь бызьылоз вал классмес шунтон ву гумыос кузя, пукылӥз шкафъёс йылын. Нош урок ке кутске, коньылы майбыр ни. Укно янак вылэ ваське но сиське. Отчы сиён-юон дасяса юри кельтылӥськом вал. Туж яратылӥз нянь юдэсъёсты, шундыберган тысез но пушмульыез куаданы. Тол каникул нуналъёсы шутэтскыку, ми воксё вунэтӥськеммы асьме вордосмы сярысь. Кык арня ортчыса дышетскыны лыктӥм но... Э-э, куректӥськом. Коньымы чиптэм-чаптэм ышем. Сютэм кулӥз, дыр, малпаськом. Но коньымы улэп вылэм. Буфетысь шкафе чуртнаськыны йӧндырем муспотонмы. Отын кӧттыр тырмыт гинэ: пряник, печенье... Март толэзь пумын капчияк шокче ни коньы: ӝоген сиёнлы майбыр луоз. Соин ик шуба туссэ но воштэ. Выльысь нап-ӵуж гоно кариське. Бырйыны, дасяны кутске сисьмем писпу гыркъёсты. Кельшымонэз ке ӧвӧл - уг кӧбера. Со ачиз но усточи. Силё-сюрноослэсь сыӵе юрт лэсьтоз-ӝутоз - синмаськод! Коркаезлэн вань борддорез но, выжез но, липетэз но. Пичияк кельтоз пыран-потан пась. Нылпиосызлы валес дася ӝуйлэсь, бунлэсь нинэз кесяса, кӧс турын но яра. Отын котьку кӧс, чылкыт луоз. Коньы анай вордэ 4-7 нылпи. Соос вордско синтэмесь, гольыкесь. Арня ортчыса гинэ усьтӥськозы ай синъёссы, вылтырзы шобырскоз ненег гонэн. Яратыса сиё соос соку гинэ бычыям пучыез, кускыли тысез. Гужем эшшо но майбыр: губиен, емышен утялтӥсько. Пиоссэ будэтыса, кызьы улыны дышетыса, визьнодаса, коньы анай ас семьяезлэсь палэнске. Пӧсьтолэзе ик кутско коньыос вуись толлы дасяськыны. Куасьтыса дасяло губи, пушмульы. Нош ёрмон аръёс ке луо, уллёен-уллёен кошко сиён утчаны. Уяса ортчо шуръёсты, трос иськем сюресъёсты пыр пото. Паймымон чебер, чырткем, инкуазьлы но адямилы изъян ваисьтэм пӧйшур та коньы. Жаль, берло аръёсы ӧжытгес йӧто ни соос син шоры. Пӧйшурасьёс сяна но тырмыт уго соослэн тушмонъёссы кыр инкуазьын. Николай Турин. Ма вера 12 лыдпус Вордскем нуналэд бере 12 нуналзэ кызьы ортчытӥд, озьы ик ортчоз быдэс аред но, иворто астрологъёс. Вордскем нунал бере нырысетӥез ӵоша нырысетӥ толэзьлы, кыкетӥез нунал кыкетӥ толэзьлы, озьы ик мукетыз нуналъёс но. Вордскем нунал бере нуналъёсыз одно ик гожъяны кулэ. Собере быгатоды ӵошатыны толэзьёсын. Соин ик вордскем нунал бере, пе, 12 нуналзэ юыны уг яра, сое быдэстӥды ке, быдэс арзэ юытэк ортчытоды. Нош вуоно араз медад висьы шуыса, вордскем нунал азьын ик тазалыкез юнматоно. Вордскем нунал бере 12 нуналэ тросгес дыр висъяно астэ эскеронлы. Та 12 нуналзэ ик шутэтскиды ке, соку ужады но капчигес луоз ужаны. Котьку мед луоз ӟеч мылкыд, тышкаськыны уг яра. Тӥ но вордскем нуналды бере нуналъёстэс гожъяса утчалэ, эскере. Л. ПЕТРОВА. Наркоманъёс - СПИД-эз вӧлмытӥсьёс ВИЧ-инфекция шедемъёслэн но СПИД-эн висисьёслэн лыдзы странаямы пумен тросгес но тросгес луэ. 1999-тӥ арын март тоЛэзьлэн кутсконаз ВИЧ-инфекция паламъёс 11240 мурт вал ни, нош СПИД-эн висисьёс - 345 адями. 1996-тӥ арозь висён вӧлмиз ке, матысь кусыпъёс тупатыса, берло дыре югдур шуак воштӥськиз. Висён ӵемгес паланы ӧдъяз наркоманъёс пӧлын - шприц пыр. Нылкышноослы та кышкыт инфекция шеде ӵош кӧлано эшсылэсь - наркоманлэсь. Йылэ анайёссылэсь висён кутэм нуныослэн лыдзы. ВИЧ-инфекция шараямын 4905 наркоманъёс пӧлын, нош йырсазез шузимытӥсь эмъюмъёсын, чаклам лыдпусъёсъя, странаямы кык миллионлэсь ятырез адями эшъяське. Азьланьзэ учконо ке, ар ортчыса, наркотикъёс пӧлы выемъёслэн лыдзы куинь миллионозь вуыны быгатоз. Тазалыкез утёнъя дуннеысь огазеяськонлэн (ВОЗ) эскеронъёсызъя, туннэ нуналлы 25 процентэз егитъёс йырзэс шузимытӥсь маосын ке эшъясько. ВИЧ-инфекцилэн наркоманъёс пӧлын туж ӝог вӧлмемез республикамылы но кышкытлык кылдытэ. Удмуртиен артысь улосъёсын ВИЧ-инфекция паськытгес вӧлмемын: Татарстанын шараямын 49 учыр; Башкортостанын - 33; Пермь областьын - 54; Киров областьын - 15; Екатеринбург областьын - 102. Асьме шаерын ВИЧ-инфекция паламъёс куать мурт, одӥгез пӧлысьтызы СПИД-эн висе ни. Куинез учыр шараямын Воткинск городын, будэн одӥг Сарапул, Глазов городъёсын но Ува районын. Ваньмыз ик соос 23-42 аресозь воргоронъёс, инфекция палаз, воргоронъёсын матысь кусыпъёс тупатыса. Котькуд учыръя ортчытэмын эпидемиез алон ужрадъёс, эскеремын но эскериське матысь адямиоссылэн но соосын кусып тупатылэмъёслэн тазалыксы. Туннэ нуналлы СПИД-эз йӧнатӥсь эмъюм шедьтымтэ на, соин ик инфекцилэсь утиськонын бадӟым инты басьтэ калык пӧлын валэктон уж нуон, кылдэм югдурез шонер возьматон. Иворез вӧлмытӥсь ёзъёс дырын-дырын калыклы ивортыло СПИД-эз эмъян амал шедьтэм сярысь. Озьы трос вераськонъёс вал Австралиысь каштанлэн экстрактэз, акулалэн уян бурдъёсыз, Китайысь огреч сярысь, нош берло дыре - "Арменикум" пумысен. Сыӵе ивортонъёслы соку ик оскиськыны уг яра, одӥгез но со препаратъёс эмъясь кужымзэс наука ласянь ӧз на возьматэ. Милесьтым ӵем дыръя юало: "Кин утемын СПИД висёнлэсь?" Та юанлы валэктон сётэмлэсь азьло тодады вайытэм потэ: ВИЧ пала куинь амалэн - матысь кусыпъёс возьыса (половой контакт), вир пыр но анай луыны дасяськись кышномуртлэсь нуныезлы. Берло дыре доноръёсын сётэм вир нимысьтыз эскеронъёс пыр ортче, соин ик та амалэн инфекция шедьтыны кышкытлык уг ик кылды. Кулон но улон вискы шедем адямиез ӝог утён понна эскерымтэ вир кутӥськыку ке шат одӥг-ог сыӵе учыр луыны быгатоз, яке вирез эскерыку янгышаны шедьтозы. Анайлэсь нылпилы инфекция шедён кышкытлык озьы ик палэнтэмын - нуны вайыны дасяськись нылкышноосты ВИЧ-инфекцилы эскеро. Озьыен, висён вӧлмыны быгатоз, матысь кусыпъёс возьыса. Соин ик, меӵак вераны луоз, кышкыт висён паламлэсь сю процентлы утемын ноку но матысь кусыпъёс возисьтэмъёс. СПИД-эн озьы ик уз висьы тазалыко улонэз гажась мурт, матысь кусыпъёс ачиз кадь ик оскымон одӥг адямиен возиз ке. Кызьы верай ни вал, 1996-тӥ-1998-тӥ аръёсы Россиын ВИЧ-инфекция вӧлмытӥсьёс пӧлын нырысь радын сыло венен бышкиськись наркоманъёс. Со наркоманъёсын йырин ик ВИЧ паськыт вӧлмиз Краснодар улосын, Калининград, Нижний Новгород, Тверь, Ростов, Саратов, Тюмень, Екатеринбург областьёсын. Асьме республикаын туэ арлэн кутсконаз 759 мурт наркотикъёслэсь эмъяськон учётэ султытэмын - 1996-тӥ арен ӵошатыса, со лыдпус будэмын 3,6 пол. Сое валэктыны луоз троссэ висисьёсты нырысьсэ шараямен. Азьло аръёсы наркоманъёс трос ке вал шаерысьтымы городъёсын улӥсьёс пӧлын, 1997-тӥ арысен кутскыса, наркоманиен висисьёс шараяськизы гуртъёсын но. Ватонэз ӧвӧл, ВИЧ-инфекция нырысь ик вӧлмоз егитъёс пӧлын. Соин ик, кулон ваись сьӧд эзельлэн кышкытлыкез сярысь валэктон уж нырысь ик нуоно соос пӧлын, шараяно ляб интыосты. Котькудӥзлэн тазалыкез но улонэз ас кияз. Вина юон, наркотикъёс но секс сяна, улонын вань мукет но шумпотонъёс. Со ласянь но егитъёс пӧлын валэктон уж нуоно, ваньмон дырзэс тунсыко но пайдаё ортчытон сярысь сюлмаськоно. ВИЧ-инфекцилэн наркоманъёс пӧлы шедёнэзлы пумит огъя кужымен гинэ нюръяськыны луоз. Л. КУЗЕЛИН, СПИД-эн но палась висёнъёсын нюръяськонъя Республиканской центрлэн кивалтӥсез. Гурт улон Михаил Лапшин: Мур малпаськонэ уси Россиысь Аграрной партилэн кивалтӥсез, Кун Думалэн депутатэз Михаил Лапшин дорамы кыкетӥзэ лыктӥз ни. Гурт удысъя но сиён-юонъя минстерствоын со пумиськиз журналистъёсын, специалистъёсын, фермеръёсын но та удысысь кивалтӥсьёсын. Соин ӵош вал Кун Думалэн Удмуртиысь депутатэз Михаил Кошкин. Москваысь куно нырысь ик вакчияк ивортӥз Югославиын югдур сярысь. Михаил Иванович шуиз, Югославилэн, пе, армиез ляб ӧвӧл, НАТО-лы пумит нюръяськыны кужымез вань. Малы бен Европалэн шораз ик жугиськон пуромиз? Югославия кинлы урод лэсьтэ, кин вылэ войнаен мынэ? Нокин вылэ уг урдскылы. Но НАТО но солэн азьветлӥсез США огшоры ужась калык, городъёс вылэ бомбаос куяло. Юнме шорысь вир кисьтӥське. Нош озьы со луиз Россилэн лябӟеменыз. Америка дуннеын огназ кузё кылиз, со нокинлэсь уг кылзӥськы ни. Гурт удыс сярысь верано ке, М. Лапшин шуиз, солы али туж секыт йӧтэ, куашкан калэ вуэмын, шуыны луоз. Малы? Асьмеды кунгож сьӧрысь вень вылэ пуктӥзы, отысь урод но чебер бинялтэм сиён-юонэн вань магазинъёсмес тырмытӥзы, нош дорамы поттэмез кулэ ӧз луы ни. Ӝыны арскын быдтӥзы данаксэ колхозъёсты но совхозъёсты, умойтэм ортчытэмын кун ваньбурез вузан (приватизация). - Алигес тодматски президентлэн Федерацияя Кенеше Ыстонэныз (Посланиеныз). Со 88 лист вылэ гожтэмын, туала югдурлы шонер дунъет сётэмын. Туннэ секыт улонмы понна, пе, янгыш оппозиция, со люкетэ выльдӥськонлы. Нош радикал-реформаторъёс мар дауртӥзы? Со ватэмын. Ыстонын гурт удыс, крестьянъёс сярысь пал кыл но верамтэ. Со монэ мур малпаськонэ вуттӥз. Шат президентлы кулэ ӧвӧл сӥль-йӧл, нянь поттӥсьёс? Кун Дума Президентэз ужысьтыз дырызлэсь вазь уллян (импичмент) сярысь ужпумез апреле яке мае эскерыны чакла. Солэсь 5 ужпумъя кылзэ юалозы, нош куатетӥез луоз гурт удысэз куашкатэмез. Россиысь Аграрной партия 7-тӥ съездзэ орчытӥз ни. Со пумен юнма, улосвылъёсын но ёзъёсыз кылдытъямын но 5 процентлэсь трос ни. Куке шуо, крестьянъёс, пе, политикае пыриськыны кулэ ӧвӧл, со умойтэм малпан. Али тани Кун Думаын 22 депупат - гуртысь. Соос 19 улосвылын уло. Валамон, ӧжыт на со. Музъем вылын ужасьлэсь улонзэ умоятыны умоесь законъёс дасяно но кутоно. Кин бен сое лэсьтоз? Гуртысь депутатъёс гинэ крестьянэз улонэз ӟеч валало. Гуртэз улӟытон вылысь, солы зэмос юрттэт кулэ. Со али уг быгаты ни выль техника басьтыны. Государство та удысэз коньыез кадь нииз, гольык кельтӥз. Тани Рубцовскын АТЗ-400, Липецкын ЛТЗ-40 (усто тракторъёс), Ростовын "Дон" комбайн потто, нош хозяйствоос коньдонзы ӧвӧлэн уг басьто. Со дыре ик миым кунгож сьӧрысь сиён-юонлы 15 миллиард манет пала уксё кисьтэмын. Крестьянэз, гуртын сиён-юон поттӥсез утьыны кулэ. Техникалы, минерал сылалъёслы дунъёс быдӟымен, та удыслы шӧдскымон юрттэт висъяно. Ӧжыт ваёно кунгож сьӧрысь сиён-юон, туж кулэзэ гинэ. Кун Дума али дасяське Музъемъя кодекс кутыны. Сое апреле-мае учкозы. Берло дыре куд-ог интыосын (Калининград, Татарстан, Самара) музъемез вузаны кутско ни. Тани Саратов областьын сьӧд сюё 1 гектар музъем 1 доллар, пе, сылэ. Серемес ук! Музъемез ноку вуз карыны уг яра, пыраклы арендае сётыны луэ. Но туннэ жаляса верано, Россиын буш кылле, аналтэмын ни. Асьме республикаямы но сыӵе бусыосмы вань. Нош Правительство гуртлы электрокужым но газ понна дунэз кулэстыны дасяське. Нош сельхозтехникалы но мукетызлы бадӟымесь дунъёс воземен, удыслы ичизэ 300 триллион манет уксё берыктоно (компенсация со). Озьы ик Кун Дума законъёс дася "СБС-АГРО" банкез кунлы сётон, нимаз подсобной хозяйство сярысь но музонзэ. Г. Романов. Быръёнъёс Быръёнъя 66 номеро Алнаш округъя депутатэ кандидат луон понна нюръяськиз вить мурт. Со Алнаш спиртзаводлэн директорез В. Л. Ганьков, ёросысь Депутатъёслэн кенешсылэн кивалтӥсез Н. А. Образцова, ёросысь связья узеллэн начальникез В. Г. Сентябов, Варзи-Ятчи курортысь валтӥсь врач А. Ф. Федотов но республикаысьтымы Егитъёсын ужанъя кун комитетысь валтӥсь специалист Н. Т. Михайлов. Тани ма ивортӥз милемлы ёросысь быръёнъя комиссиын ужась Иосиф Иванов: - Таиз быръён ортчиз огсыр. Отчы районын улӥсьёс пӧлысь 54 процентэз бырйисьёс пыриськизы. Вераны кулэ соизэ но: туэ куинь администрацие пырись гуртъёс выжтэмын вал Можга районысь 90 номеро Пычас округе. Куараосты лыдъяса-чотаса тодмо луиз: Удмурт Элькунысь Кун Кенеше депутатэ быръемын Нина Андреевна Образцова. Со понна куаразэс сётӥзы 49,5 процентэз бырйисьёс. х х х Удмурт Элькунысь Кун Кенеше 73 номеро Дэбес округъя депутатэ кандидатъёс быръёнын та мында куара люказы: - 42,6 процент - Смирнова С. К., Удмурт Правительствоысь Нациосын ужанъя кун комитетлэн кивалтӥсез; 26,7 - Горошников А. Д., Дэбес ёросысь "Новый путь" газетлэн редакторез; 18,2 - Фокин А. М., акциосын "Удмуртская национальная компания" огазеяськонлэн валтӥсь директорез; 5,2 - Перевозчиков Ю. Г., Шаркан ёрос больницаысь валтӥсь врач; 2,8 - Байметов И. М.,- "Вордскем кыл" журналлэн валтӥсь редакторез. Быръёнэ ваньзэ пыриськиз ёросысь 67 процентэз калык. х х х Пичи Пурга районын депутатлэн кык мандатэз понна нюръяськонэ пыриськиз депутатэ 17 кандидат. Вуоно депутатъёс понна быръёнын куаразэс сётӥзы ёросысь 56,9 процентэз улӥсьёс. 87 номеро Яган-Докья округъя Удмурт Элькунысь Кун Кенеше быръемын "Удмуртавтодор" кун предприятиысь валтӥсь инженер Н. В. Долганов. Со бырйисьёслэсь 21,1 процент куараоссэс люказ. Та округъя нюръяськиз 11 кандидат. 88 номеро Уром округъя депутатэ быръемын "Удмурт кенеш" ассоциацилэн президентэз В. К. Тубылов. Со понна дурбасьтӥзы 41,6 процентэз бырйисьёс. х х х Глазов городын быръёнъя 7 округ кылдытэмын вал. Депутат луон понна нюръяськиз 36 депутат. Нырысь лыдпусъёсъя Кун Кенешлэн депутатэз луизы: 49 номеро Западной округъя - Л. К. Фролов ("Кожильский" СПК), 50 номеро Молодежной округъя - В.Ю.Перешеин (СПАО ЧУС), 51 номеро Центральной округъя - Н. Б. Сорокин ("Глазовский" ЛВЗ, директор), 52 номеро Институтской округъя - А. В. Першин - (ППФ "АРК"), 53 номеро Толстовской округъя - Н. А. Ганза (ОАО "ЧМЗ", генеральной директор), 54 номеро Левобережной округъя - А. А. Волков, Удмурт Республикаысь Кун Кенешлэн Тӧроез, 55 номеро Южной округъя - К. Ф. Касимов - "Металлист" заводлэн директорез. 71 номеро Глазов округъя 60 процентлэсь уноез бырйисьёс пыриськизы та бадӟым ужрадэ. Тужгес трос куара люкаса, депутат луиз П. А. Першин, "Чура" акционер огазеяськонлэн директорез, Глазовысь электрической сетьёсъя директорлэн воштӥсез. х х х 94 номеро Сюмси ёрос округъя быръёнэ ветлӥз 60,7 процентэз калык. Депутатлэсь мандатсэ басьтӥз "Межрегионгаз" огазеяськонлэн Удмурт ёзэзлэн директорез В. М. Возисов. Солэсь 500 куаралы бере кылиз "Удмуртия" ГТРК-лэн генеральной директорез В. Ф. Гарнов. Мукетъёсыз кандидатъёс эшшо но ӧжытгес куараос люказы. Н. БАЙТЕРЯКОВ. СПОРТ Удмуртилэн выль чемпионэз Дас ар талэсь азьло Завьялово ёросысь Хохряки посёлокын физкультурая азьвыл дышетӥсь, али администрацилэн кивалтӥсез Геннадий Юсупов кылдытӥз хоккейя команда. Аръёс ортчыса, уноез егитъёс татын кыдазы, спортъя мастеръёс но мастере кандидатъёс луизы. Берлояз ӵошатсконъёсын Хохрякиысь хоккеистъёс вормисе потӥзы, Удмуртилэн чемпионъёсыз луизы. Гуртысь команда 28 луоноез пӧлысь 25 очко люказ. Кубоке понна нюръяськонын Хохрякиысь "Звезда" пумиськылӥз Киров улосысь "Химик" командаен. 7:0 лыдын вормизы Удмуртиысь спортсменъёс (тренерзы Анатолий Хомутов). Н. Иванов. Чемпионат мытэмын Футболэн шудонъя нырысетӥ лигаысь командаос туэ чемпионатэз усьтӥзы нырысетӥ апреле ик. Та нуналэ Ижысь "Газовик-Газпром" дораз пумиськылӥз Казаньысь "Рубинэн". 1:0 лыдын вормизы кузёос. Валлян асьме футболистъёсмы шудӥзы Нижний Новгородысь "Торпедо-Викториен". Пумиськон нокин вормытэк, 1:1 лыдын, йылпумъяське ни вал. Берпуметӥ минутэ куноослэн капказы пала судья пенальти возьматӥз. Тупез шонер ӵыжиз но командаезлы 3 очко ваиз "Газовиклэн" капитанэз Дубровских. М. КУЗЬМИН. Тылпуэз кысоз... "Калашников" Москвалэн мэрез Юрий Лужков Ижевске вуылыкуз, тодмо конструкторлы Михаил Калашниковлы одӥг куронэн вазиськиз вал. Юрий Лужков Михаил Тимофеевичлы дэмлаз автоматсэ улонлэн мукет удысаз кутыны. Со быдэстэмын. Табере Калашниковлэн автоматэзлэн инъетэз вылын "Ижмаш" акционер огазеяськонысь кибашлыос тылпу кысон установка кылдытӥзы. Соин тодматскыны та нуналъёсы столицаямы вуылӥзы Москваысь тылпу кысонъя гарнизонысь специалистъёс. Соос пӧлын вал гарнизонысь начальниклэн воштӥсез Петр Мельников но Москва городысь Думалэн депутатэз Иван Новицкий. Куноос пусйизы, кык столицаен кусыпъёс ялан паськытало шуыса. Соос вылӥ дунъет сётӥзы элькунысьтымы тылпу кысӥсьёслэн вылӥ азинлыкен ужамзылы. Но тылпуэз кысонлы бюджетысь коньдон арысь аре ӧжытгес висъяське. Вужме техника. Соин ик "горд атасэн" нюръяськисьёс асьсэос кусыпъёс тупато Россиысь предприятиосын. Выль техника дасяны курыса соос вазиськизы Москваысь, Тулаысь, Санкт-Петербургысь но Ижевскысь конструкторъёслы. Асьмелэн кибашлыосмы, одӥг копейка но курытэк, заказэз быдэстӥзы. Ваньмызлы тодмо: ву, тылпуэз кысэм сяна, ваньбурлы бадӟым изъян вае, тужгес но пичи интыосын. Калашниковлэн автоматэзлэн инъетэз вылын установка нош кызьы ужа? Автоматэ пуктӥське вуэн баллон. Ыбем бере кылдэ вулэсь бус. Ӵапак со ик ӝог кысэ пичи тылпуэз. Баллонъёс вошъясько туж ӝог, соос автоматдэн магазиназ интыямын. Полигонын эскеронъёс возьматӥзы: установка ужа ӟеч но оскымон. Бадӟым оскон вань, таӵе автоматэз Москва гинэ уз басьты, сое кулэ карозы быдэс Россиын, оло, кунгож сьӧрын но. Озьыен, бюджетэ ватсаса коньдон но. Н. ЛЯЛИН. Чырткем, удмурт лыдӟисе! Гожтэтэлэн нырысетӥ уръёсаз тыныд вераме потэ, быръён ужмы йылаз-пумаз вуиз шуыса. Ваньмызлэн ик сю депутатъёслэн нимъёссы табере тодмо. Мар бен вераны луоз? Ньыль ар ӵоже Кун Кенешын пукем депутатъёс пӧлысь куиньмослэсь ятырез таяз учыре но мандат басьтӥзы. Огласянь умой кадь. Кун Кенешлы оскон бырымтэ, лэся. Мукет ласянь... Та адямиосын кутэм законъёс пӧлысь куиньмосэз Москваын яке асьме Вылӥ судын умойтэмен лыдъямын. Мукетыз куиньмос люкетэз уг быдэсъяськы. Озьы ке но, калык сыӵе муртъёслы выльысь сётӥз мандат - асьмемын кивалтыны луонлык. Гажано эше, нош тон кин понна куарадэ сётӥд? Кацемон, Питкевич, Боровик, Малюк, Роговец, Долганов, Подсевалов, Загайнов... Таӵе адямиос вадьсы пуктӥд-а киростэ? Туж шонер лэсьтӥд. Соос табере уен-нуналэн уз кӧлэ, тыныд маке коть ӟеч лэсьтон понна. Малы асьмелы кулэ оскымон удмурт пиос, куке та эшъёс азьлогес ик ини шедизы кран дуре но со чотын быгато я газ кыскыны, я тыл сётыны, я чугун сюресэз быронлэсь утьыны?.. Эн, эн паймы, шуом, шарканъёс (отын ог 80 процентэз улӥсьёс удмуртъёс) кӧня ке мурт пӧлысь му вӧй поттӥсез бырйизы шуыса. Шонер ук. Таиз коть маин ке но юрттоз. Нош асьме бюджетэз куке 40 процентлы тырмытӥсь "Удмуртнефть" табере бырыны ӧдъя ни шуыса уз вера. Кин туннэ кивалтэ асьме нефтен? Уд тодӥськы? "ОНЭКСИМ-банк"? Потанин но Чубайс? Кыӵе "Сиданко"? Кыӵе чечен батыр Зиябажаев? Асьме акциос Великобританиысь зӧк кисыос киын шуыса уд тодӥськы шат? Эк-ке-эк... Ма, ӵуказе, оло, асьмеос ум тодэ ни асьме удмурт музъемез капыръясьёслэсь но кытчы интыяськемзэс. Мед, мед бызьылозы удмурт журналистъёс, удмурт артистъёс, удмурт сюрес лэсьтӥсьёс... Соос асьмелы кулэ ӧвӧл ук - асьмелы кулэ газ (туннэ ик), коньдон (тросгес) сӥзем кылъёс (вӧёгес). Нош пиналъёсмы кызьы ке улозы ай... Урал губерниын. Вот умой луоз. Вордскем кылзэс дышетыны уз косэ ни, вордскем музъемзэс гырыны уз лэзе, пукозы уен- нуналэн... сюрес урдсын. Трос веранэ вань на. Туннэлы дугдо. Тынад мылкыдыд умой, кулэ на меда сое лапкатыны? Тыныд ӵуказе уждундэ сётозы, дорад сюрес ӝутозы, сӥзем коньдонзэс вуттозы... Ӧз "вунэтэ" ке. Я, ӟеч лу. Пучы арня нуналэ тон шонер бырйид. Таза лу, ӟечезлы оскы. Туж гажаса - И. ЛЕБЕДЕВ. Одӥг дивизиын - кык вынъёс Военной дӥсен кык ӧрӟипиос артэ сыло. Кырыжак понэм фуражкаос, лэчыт синъёс... Ваче учкыку сямен, пырпотто соос фотография вылысен но. Туж чебер пуксиллям фото вылэ кык вынъёс. Тодӥзы, дыр, вуоз со куке но вордскем гуртазы, анайзы-атайзы кие. Соос нош гадь бордазы ӝиптыса, маялляса возёзы туспуктэмез. Анайзы шоразы учкыса бӧрдоз, Инмарез пиоссэ утьыны куроз, нош атайзы мыжыкъёссэ юнгес кырмоз. Прокопий но Никита Михайловъёс (Сачковъёс) 1916 арын империалистической война дыръя одӥг дивизие шедиллям. Зол ик, шӧдске, ожмаськиллям: Прокопийлэн гадь вылаз Георгиевской крест, нош Никиталэн - кыкез бырттэмын. Берлоез унтерофицер вылэм. - Та мынам песятайёсы, - тодаз вае Василий Прокопьевич Сачков. - Прокоп, действующей армиын тямыс ар служить карыса, сӧсыр бертэм. Война сярысь мадьыны ӧз яратылы. Куазь урод дыръя туж висьылӥзы сӧсырмем бервылъёсыз. Никита берытскем, дас одӥг ар ортчыса. Таиз сярысь нимысьтыз вератэк ӧвӧл. Граждан ож вакыт Аксакшур, Атабай, Аксарино, Яжбахтино пыр я "гордъёс", я "тӧдьыос" ортчылӥзы. Та гуртъёсын улӥсьёс аляк луылӥзы нянь, вал курасьёслэсь. Сётымтэысьтызы таласа кошкылӥзы. Огвакыт та палъёсы "тӧдьыос" каръяськиллям. Штабзы Аскариноын сылэм. "Тӧдьыос" сьӧсьяськыны кутскиллям - "гордъёслы" юрттэм яке соос пала кариськем понна ыбылӥзы. Бӧрысьгес быдэс гуртэз сутыны малпаллям. Никита Михайлов буйгатэм соосты: - Мон аксакъёсын верасько, соос уз бугыръяське. Офицерлы оскиллям. Азинлэн дивизиез Пурга пала матэктӥз. Сое шӧдыса, калык "гордъёс" пала шонскиз. Никита Михайлов но кема ӧз малпаськы. Но сое "тӧдьыос" кутӥзы, пытсэт сьӧры пуктӥзы. Кык ар пукыса, со отысь пегӟыны быгатэ - Тобольскозь уллям со Колчакез. Отысен Сарапул пыр дораз бертэм. Но "тӧдьыослэн" мылесъёссы 1922 арозь сьӧсьяськиллям ай гуртазы. Тодӥллям пегӟем офицер сярысь но. Кин ке чагиськем-а? Гуртэ куать кузя вал вылын пыӵалъёсын лыктыса кутӥллям Михайловез. Шораз винтовкаоссэс урдӥллям ни вылэм, но Никита, урыссэ шуак поттыса, кыксэ ымныр ваментӥзы шачыръям, мукетъёсыз марзэ-созэ валаны выронтӥязы валъёс ултӥ пегӟыса кошкем. Сазьтӥськыса соосыз сьӧраз уиськыны кутскиллям. Ярам, воргорон люкъёсты, сикъёсты ӟеч тодэ вал - куакъёсы, гопъёсы ватскылыса пегӟем. Туж кыдёке, Марко нюке вуэм ни вылэм - синйылтӥллям. Валлэсь уд пегӟы, мар ке но малпано, амал утчано. Бызьыса Байсит арамае ватскем но черекъяны кутскем: - Эшъёс, котыртэ соосты паллян паласен. Тӥ - бур палтӥз! Уиськисьёс, татын зэмен но "гордъёс" вань, кожаса пегӟиллям. Куать муртэ алданы быгатэм офицер. Но та учыр бере, со фамилизэ воштэм, Сачков кариськем. Пересьмытозязы тыршизы колхозын агай-вынъёс. Секытлэсь ӧз кышкаллялэ, азьпал радын ветлӥзы. Аксакшурысь музейын улэ та фотография. Агай-вынъёс шоры учкыса, аслад но кужмогес, дӥсьтӥсьгес луэмед потэ, вордскем гуртэныд данъяськон мылкыд кылдэ. В. Баймурзин.. Пичи Пурга ёрос. 7 апреле быдэс дуннеын пусъё Тазалыкъя нуналэз Осконзэ уг ышты, кулонлэсь но уг кышка СПИД сярысь Сергей одӥг пол гинэ ӧз кылылы. Вылаз адскисьтэм дӥськут возъяса, кӧшкемыт чер мукет кунъёстӥ калге кожаз, лэся. Тодытэк бен ӧз улы, эрказмем висёнлы нокыӵе кунгожъёс уз люкетэ. Но Воткинск со Москва я Петербург ӧвӧл, ку ай солы такеме вуыны. Чакласькон сярысь йыраз малпан ик ӧз лыктылы. Нош висён со вие аслэсьтыз ужзэ лэсьтэ ни вылэм, мугорысьтыз пӧртэм инфекциосын но вирусъёсын нюръяськись кужымзэ сюпсьыса. 1996-тӥ арлэн пумаз Сергейлэн тазалыкез шуак лябомиз. Татчыозь кынман висёнъёс гинэ бордаз лякиськылӥзы вал, нош табере шоканы но малы ке секыт луиз, температураез но ялан возиське. Вазиськиз больницае. Соку номыр ик ӧз шедьтэ. Нош кӧня ке улыса, уката но валантэм воштӥськонъёс луизы мугораз : быгытъёсыз лябӟизы, гижыосыз паласькыса усё, куэз кӧсаны ӧдъяз. Секталаез котьку 73 килограмм котырын ке возиськиз, 12 килограммлы капчигес луэм. Врачъёс мар шуыны ик паймизы. Оло, пе, уждунэн югдур секыт вал бере, тырмыт сиськымтэысьтыз но витаминъёс шедьытэк, та калэ вуиз. Висисез врачъёс котыр ласянь эскеризы. Воткинскысь больницаын одӥг толэзь кыллемез бере келязы Ижевске. Нош ик пӧртэм анализъёс, эскеронъёс пыр потоно луиз. Толэзь ортчыса ини ивортӥзы: висёнэз - СПИД. Кык толэзь ӵоже эмъяськиз на воргорон Ижевскын. Капчигес луиз кадь нимысьтыз йӧнатэмзы бере. Озьы ке но, Сергей табере йӧназ ужась ӧвӧл ни, висёнэзъя солы сётӥзы нырысетӥ группа. Но улонлы осконзэ со уг ышты. Уг кышка кулонэн ваче син пумиськонлэсь но. Пинал ӧвӧл ни со, ӝыны даур пала улытозяз шумпотонэз но, куректонэз но - ваньмыз вал. Дышетскемын, ужын гажано адями. Яратэ кылбуръёсты, уката ик Пушкинэз, Пастернакез, Мандельштамез, ачиз но гожъяны куке-соку йӧндыре вал. Висёнэз сярысь тодэмез бере Сергей ӧз кушетскы. Зэм, висемез нокинлэн уг поты. Но мар карод, озьы луиз бере, астэ сяна, нокинэ янгыше уськытыны: кин косыса бырйиз калыклэсь пӧртэм сюрес. Нош куке но, трос аръёс талэсь азьло, Сергейлэн вал семьяез - яратоно кузпалыз но кык нылпиез. Ӧйтӧд, кыӵе сьӧд коӵыш вискытӥзы потӥз, но ӧз пӧрмы кузпалъёслэн семья улонзы. Кышноез нылпиосыныз мукетыз доры кошкиз. Егит воргорон огназ кылиз, нош выльысь кузпалъяськыны ӧз дырты - оло нылкышноослы осконзэ ыштӥз, оло эрико улон кельшиз. Мылкыд шудэ бере, туганъёстэк но ӧз улы. Озьы одӥг пол ӝимиз "яратон" висён шоры - гонорея шедьтӥз. Нылкышноосты ӟыгыръян мылкыдыз соку ик сӥяз. Ӵапак со вакытъёсы базарысен тодматскиз одӥг егит семьяен. Эшъяськизы, ог- огзы доры куное ветлыны ӧдъязы. Нош одӥг нуналэ выль тодмоез, воргорон, ассэ яратыны ӵектӥз. Пиосмуртэн матысь кусып тупатон сярысь Сергей уйвӧтаз но ӧз малпалля вал, нош соку йырыз берыктӥськиз - нылкышноослэсь номыр ӟечсэ возьманэз ӧвӧл, огнын но мӧзмыт. Собере, кыӵе гинэ фильмъёс уг возьмато, мар гинэ уг гожъяло секс сярысь, нокыӵе серметъёс ӧвӧл ни кадь. Сергейлэн но тодэм потонэз возетлэсь вылӥын вылэм. Кельшиз. Уката ик выль тодмоез - та ужлы кемалась дышем мурт. Пумиськылӥзы арнялы одӥг пол, шутэтскон нуналъёсы. Кышноё воргорон, нылпиосыз вань, Сергей ӧз ик малпаськы кыӵе ке кышкытлык сярысь. Висёнэз сайкам бере ини валаз кыӵе сьӧлтэтэ сюремзэ. Но эшезлы вожзэ уг потты, нокин сое кужмысь ӧз кыскы уго та сюрес вылэ. Сергейлэсь СПИД-эн висемзэ шараям бере, тугаськем бугор сэраны кутскиз. Мукетыз огъя тодмозы кышкыт чер улэ сюрем на. Нош сӥньыс нюжаос кыстӥськизы зарезь пала. Сергейлэн эшез, гужем шутэтскыкуз, отысен матысь кусып тупатэм куке но кунгож сьӧрын ужам воргоронэн. Врачъёс дугдылытэк верало, СПИД-лэсь утиськыны луэ презервативен. Сергейлэн эшезлэн кышноезлы висён паламтэ, нылпиосыз но тазаесь, ачиз но воргорон юн возиське та вие . Но со уг дӥсьты висемез сярысь семьяезлы вераны, кызьы нокинлы уг дӥсьты усьтӥськыны Сергей. Матысь ӵыжы-выжыосыз, нылпиосыз уг тодо солэсь нуналысь нуналэ лул-визьзэ зӥбись кайгузэ, уйёсын валес дораз возьмаськыса пукись эзелез сярысь. Асьме странаын, асьме шаерын та висён выжыяськымтэ на, адямиос сое пумитаны дасесь ӧвӧл. Кин тодэ, кызьы ваньмыз берыктӥськоз, нош улэм потэ, висьыса ке но. Берло дыре трос вераськонъёс мыно "Арменикум" эмъюм сярысь. Сергейлы со берло дыре кыӵе ке но оскон пыӵатэ. Лыдӟе со висёнлы сӥзем пӧртэм литература, телевизор учке. Быгатэмезъя корка котыраз, бакчаяз берга. Уждунзэс быдэс арлы ӝегатэмен, коньдон ласянь шуг-секытъёс кылдӥзы. Ярам, берло дыре пенсия сётыны кутскизы. Но малы гинэ со тырмоз - сиёнлы яке эмъюмлы? Огвакытэ Сергей картофка но нянь вылын гинэ улӥз, со но тазалыксэ трослы лябӟытӥз. Нош кураськыны, кинлэсь ке юрттэт возьманы воргорон дышемын ӧвӧл. Пыд йылаз возиськыны быгатытозяз, ассэ утялтыны кужмыз тырмытозь, со улоз аслаз юртаз. Нош отӥяз? Улэп кылиз ке, оло, инвалидъёслэн юртазы но интыяськоно луоз, пе. Нош али сое, котькуд куинь толэзь ортчыса, Ижевскысь СПИД центрын эмъяло. Кин тодэ, азьланяз кыӵе югдур луоз, котькуд висисез дунтэк эмъяны луонлыкъёс кылёзы-а? Россия Федерацилэн бюджетаз но, республикамылэн бюджетаз но СПИД висёнэн нюръяськыны коньдон висъямын ӧвӧл. Тырмоз-а Сергейлэн эмъюмъёслы одӥг пенсиез гинэ? Нош мар возьма мукет висисьёсты? Газетын ужась тодмотэм муртлы сюлэмзэ усьтыны Сергеез нокин но кужмысь ӧз косы. Секыт адӟонэн пумиськыса, со сюлмаське егитъёс сярысь, кинъёс али гинэ вамышто улонэ - медаз пумиталэ вал соос таӵе эзелез. Яратонлэн мур кожаз йырез ыштыса зымоно ӧвӧл, матысь кусыпъёс тупатоно оскымон адямиен гинэ. Ӧвӧл вунэтоно утиськон амалъёсты но. Та сярысь Сергей котькуд нуналэ вераны дась, кылӥсез гинэ мед луысал. Нош ачиз кинэн ке но матысь кусып тупатон сярысь уг ик малпаськы ни (висьыны усем эшъёсыныз но). Али солы кызьы ке но ӝабыртӥськоно улон борды. Редакцилэсь. Та материалэз дасяны юрттэмзы понна редакция тау каре Ижевскысь СПИД центрын ужасьёслы Леонид Куземинлы но Валерий Кузнецовлы. Висисьлэн нимыз воштэмын. Л. Малых. Улонысь учыр Ыбем куара Та чуръёсты юрист Николай Куликов "Советской Удмуртие" ваиз 1975-тӥ арын. Печатланы дасямы но, вылӥысь кин ке алӥз. Отын верам учыр уг чеберъя, пе, асьме улонэз. Туннэ та гожъямысь номыр умойтэмзэ ум адӟиське. Озьыен, лыдӟись доры вуэ 24 ар талэсь азьло дасям гожтэт. Бышкись езъёс сьӧрын - секыт йыруж лэсьтэм муртъёс. Отын - колония. Котькуд нуналэ азбарысь вышкаосы тубо пыӵалэн адямиос. Чалмыт. Колония улэ аслаз улонэныз, нюлэс сьӧрысь город - аслазэныз. Туж ӝужыт юртъёсын улӥсьёс гинэ дырын-дырын адӟыло бышкись кенеръёс сьӧрысь суредъёсты. Кузесь баракъёс, соос вӧзын пурысь дӥсен воргоронъёс. Со шыпыт "шормуӵ" бугыресь улонлэсь люкемын кадь. - Бух-х! - шуак чузъяськиз нюлэскын. Кин ыбиз? Кытчы? Вышка йылысь солдат кӧтурдэсаз кутскиз. Отчы-татчы шонаськыса кӧня ке сылӥз но пограз. Гадьыз вирен гордмаськиз. Сержант Кузовлев колониез возьмась подразделенилэн командирезлы аслэсьтыз пистолетсэ мыче. - Ма луиз, оло, валэктод, Кузовлев? - юа командирез. - Эх-х, ма карод на, адямиез уд берыкты,- мур лулске сержант. Командир прокурорез ӧтьыны косэ. Прокуратураысь следователь Андрей Яковлевич Дрокин рос-прос кылзӥз Кузовлевлэсь мадемзэ. - Армиын служить карыкум, мемие выль картлы бызем, отпуске бертылыкум, монэ со мултэс кариз. Кыли сверхсрочное. Со шимес нуналэ постъёсты эскерисько, ортчисько вал. Вуи Фёдоровлэн вышкаез вадьсы. - Сержант эш, ӟонгыраса кулӥсько ни,- кесиськиз Фёдоров. Дораз туби. Ог-огмес донгаса шунскыны вырим. Фёдоров ӵектӥз ӵошатскыны: кин, пе, оружизэ ӝоггес зарадалоз. Шӧдтэк кыльыса, пистолетме со шоры урдыны вуттӥ. Нош Фёдоров дыртэменыз, лэся, автоматэныз киям шуккиз. Отӥзэ - асьтэос тодскоды: мон ыбыны шедьтӥ. Следователь юаз на: - Кыӵеесь кусыпъёсты вал Фёдоровен? - Ӧм даллашылэ. - Матын-а сылэ вал Фёдоров, пуля улэ шедьыкуз? - Самой троссэ - одӥг метр кемын... Нош ик потэ следователь колоние, лыктэ Фёдоровлэн бырем интыяз. Тубе вышкае. Отын, зэмзэ но, интыез бадӟым ӧвӧл. Шудтэм учырез син азяз пуктыны тырше следователь. Кин со сыӵе? Бараклэн сэрег сьӧраз ватскыса, следовательлэсь ма каремзэ сак эскере одӥгез заключённой. - "Коммерсант" со,- валэктэ колонилэн начальникез.- Шонерзэ вераса, Рыкалов Афанасий. Колониын но юон но наркотикъёс шедьтылэ, нош кызьы - ум тодӥське. Налим кадь гылыт... Ваньзэ кияз возе. - Режимез тӥян учыръёс но мукет со выллем кырсь ужъёс - ваньмыз "Коммерсант" котыре лякисько,- ватса на колонилэн начальникез. - Пӧяське Кузовлевед,- вера судебно-медицинской эксперт.- Учке ай снимокез: пуляен лэсьтэм пась котыртӥ туж умой адске котырес вишты. - Озьыен, пистолетсэ со шонерак гадь бордаз пуктыса ыбем? - мазэ-созэ валаз следователь. - Бен. Колониын таӵе ивор вӧлмиз: "Коммерсант", пе, юн сюлэмшугъяське Фёдоровез виемзы пумысен, кызьы ке но тырше Кузовлевен герӟаськыны. Та сярысь кылыса, следователь тодматскиз солэн улэм-вылэменыз. Рыкалов Афанасий Николаевич... Кӧня ке ар улыса, пенсие потысал ни. Нош со ваньзэ-ӧвӧлзэ вить но ӝыны ар сяна ӧвӧл ужам на. Егит дыръяз заготовитель вылэм. Куинь ар сяна дышетскыны вуымтэ, нош документъёс "пӧраны" дышем. Война бере леспромхозэн "кивалтэм", кескич амалъёсын лачак коньдон жильдэм. Тросэз сыӵе "кивалтӥсьлэсь" али но кылзӥсько, котькуд косэмзэ кыл вератэк лэсьто. Следовательлэн йыраз таӵе малпан лыктӥз: оло, "Коммерсантлы" Кузовлевен герӟаськыны луонлык сётоно? Ваньмыз пӧрмиз следовательлэн малпамезъя. Колониын та нуналъёсы кыл вӧлдэмын вал, одӥгез заключённой лушкаськем шуыса. Дознавательёс со пумысен уголовной уж ӝутӥзы. "Коммерсант" тодэ: лушкаськисез ӝоген келялозы следственной изоляторе. Солы Рыкалов лушкемак донгиз пичи гожтэт. Бумага юдэс вуиз Дрокинлэн ӝӧк вылаз. Отын гожтэмын: "Кызьы верад вышкаын учыр сярысь? Котырам вуизы ке, мон ваньзэ тодыны кулэ. "Пузырёктэ" палэнтыны вуид-а? Следователь нюке ӵем учкылэ". Кӧня ке пол кутскылыса лыдӟиз следователь та гожтэтэз. Тросэз валантэм. Кыӵе нюк сярысь вераськон мынэ? Фёдоровлэн вышкаез бадӟым вукырем вӧзын сылэ вал уга. Со ӧвӧлтэ? Тани со нюк. Дрокин сак учке. Нюк сокем мур ӧвӧл. Пыдсаз кырсь ву ӟиза. Колониысь потӥсь пож ву гумы кузя ӟизыра. Гумы зӧк ӧвӧл. Нош мар ай таӵе? Матын езъёс кыллё. Гумыез сузяны дасямын, дыр. Андрей Яковлевич юрдыса со езэз кыскиз. Сое маке но кутэ кадь. Малпамтэ шорысь кыӵе ке кырсь арбери дэрие усиз. Ез пуме юнматэмын вылэм резина компресс. Лач-лач пытсамын. Шобретсэ дыртытэк берыктӥз. Омыре аракы зын вӧлмиз. Тӥни кызьы шедьтэ вылэм "Коммерсант" курытсэ но наркотикъёсты. Гумылэн огпал пумыз колониын уга, мукетыз - татын, кот нюкын. Озьыен, та кырсь ужаз со Кузовлевез кыскем. Следователь дасяськиз соин пумиськыны. х х х Кузовлевлэн кема танӥськыны кужымез ӧз тырмы ни. Колониез возьмась уно солдатъёс адӟылӥллям Кузовлевлэсь кыӵе ке компрессэн выремзэ. Бератаз Кузовлев следовательлэсь бумага куриз. Ас киыным, пе, гожто ваньзэ. Тани ма пӧрмиз: "Коммерсант" мон борды кык ар талэсь азьвыл няняськиз. Нырысь мынэсьтым кепыралляз, отӥяз шӧдӥз, лэся, мыным оскыны луоз шуыса. Ӝоген пичи гожтэтэн ивортӥз кусыпъёс тупатон сярысь. Эрикысь вуэм коньдон кошкылӥз мон пыртӥ. Валамон ини: ӝыныезлэсь уноез со мынам кисыям кыльылӥз. "Коммерсант" солы ачиз но пумит ӧй вал. Со нуналэ, котьку сямен ик, аракыен тырмытэм компрессэз нюке ваи. Отчы вуэмме нокин но ӧз адӟы кадь. Компрессме гумые лэзьыкум, вышкаысь кин ке шорам вазиз: - Сержант эш, ма дауртӥськоды отын? Фёдоров вылэм со. Мон ма карыны ёрми. Езъёсме ӝогак гумые донгыса шуи: - Али ик ваньзэ валэкто. Фёдоров монэ кемалась тодэ, соин вышкаяз тубыны лэзиз. Вамышъян куспетӥм малпасько: "Табере "Коммерсантэн" кусыпъёсмы быдэсак шараяськозы, мыным со понна туж юн йӧттозы". Фёдоровен огъя кыл шедьтыны йӧныз ӧвӧл. Озьыен, сое палэнтыны кулэ. Озьы ик лэсьтӥ. Тӥни ваньмыз". Кузовлевез берен нуизы следственной изоляторе. Огназ кыльыса, следователь эшшо но эшшо лыдӟе солэсь гожъямъёссэ. х х х Нюлэс вӧзысь колониын котькуд нуналэ солдатъёс ӝутско вышкаосы. Соос котырак сак эскерисько. Капчи ӧвӧл ужзы. Котькыӵе мылкыдо адямиос вань уга бышкись ез сьӧрын. Фёдоровен луэм учыр возьматӥз, солдат котькыӵе учырлы дась луыны кулэ шуыса. Ӧз, юнме ӧз сёт со улонзэ. Кӧня муртъёсты сьӧд ужъёсы кыскыны вуысал на "Коммерсант", солы азьвыл сямен ик эрик луысал ке. Кӧня муртъёс колониысь потысалзы тупатскытэк. Тӥни со ваньмыз лыдэ басьтэмын вал. Ӧз быры солдат Фёдоров. Котькуд ӵукна колониез возьмась частьын поверка дыръя поттыло солэсь нимзэ. Со весяклы пыртэмын подразделенилэн списоказ. Солэн ужез, вакчи но яркыт улонэз сярысь татын верало выль солдатъёслы нырысь нуналэ ик. Солэн нимтулыз солдатъёсты дышетэ сак улыны. Н. КУЛИКОВ. Эрико бурдъёслы могӟет Ашальчи Оки. 4-тӥ апреле вордскемез дырысен тырмиз ни 101 ар. Эрико бурдъёссэ солэсь куасазы, куаразэ уретӥзы. Но со весяклы кылиз аслаз кысӥсьтэм, вужмонлы сётскисьтэм чуръёсыныз, калыклэсь синзэ усьтэменыз. Нош мар лэсьтӥм ни асьмеос, кылбурчилэсь нимзэ пыраклы ӵушонтэм карон понна? Ашальчи Окилэсь сю аръем юбилейзэ данэн пусъён вылысь, асьме элькун правительство пӧртэм ужрадъёсын бадӟым программа кутӥз вал. Та дырлы тросэз со быдэстэмын. Нырысетӥ удмурт нылкышно кылбурчилы сӥзем ӝытъёс ортчизы Ижевскын, Грахын, Алнашын, Юкаменскын. Национальной библиотекаын вал "Ашальчи Оки но туала поэзия" научно-практическо конференция. Тодосчиослэн та ужъёссы поттыны дасямын нимысьтыз книгаен. "Чыртывесь. Ожерелье" нимо сборник вордскиз. Кылбурчилэн улэмез но творчествоез сярысь туспуктэмъёсын пособие потӥз. Грахъёс сюлмаськемен, пичигес чебер альбом кылдӥз на. Ашальчи Окилэн вордскем корка бервылаз но котыраз, Грах ёросысь Кузёбай гуртын, быдэстыны кутскемын архитектурая но скульптурая ансамбль. Сое кылем арын сю аръем юбилей дыръя усьтӥзы. Планъя чакламын ке вал сквер, барельефен стела гинэ лэсьтыны, коньдон но сомындагес висъязы. Но проектлэн авторез - утчаськись, огшорыен гинэ буйгатскисьтэм адями, Касим Галиханов, чебер малпанъёссэ вӧл-вӧл уж вылын быдэстоно кариськиз - валамон, бадӟым уждун сярысь малпаськытэк. Озьы ик вань: Культурая министерство ужез понна коньдон пичияк люкетсэ тыриз, нош кылемзэ автор кык ар возьма ини. Со гинэ ӧвӧл - "Лит" научно-производственной предприятилэн директорез Виктор Павлович Самуськов но. Нош та адямитэк пӧрмысал меда маке? Солэн предприятиез кисьтӥз кортлэсь скульптураез, кылбурчилэн алнаш шайгу вылысьтыз корт кенерез но лэсьтӥз. Ансамбльысь огъя вань ужъёсыз но татысь бригада ик быдэстӥз. - Ашальчи Окилы сӥзем ансамблез малпакум, мон уже кутоно кариськи татысь инкуазь чеберлыкез,- валэктэ Касим Шарифьянович.- Будӥсь пиналъёс но мед валалозы, кыӵе интыын соос уло. Сяськаё, писпуо, шулдыр инкуазь сэрегзы мед луоз, плиталэсь сюрес вӧлдоно. Калыклы люкаськон, шутэтскон понна, котырес скамьяосын тупатэм инты вань ини. Шурзы вамен выж лэсьтэмын. Та паськыт нёжало бамъёстӥ пичи Оки кӧня меда ву тубытъяз, тютюосты возьмаз, шудӥз-бызьылӥз... Кылбурчилэн пинал дыр дуннеяз пырыны шуыса кадь, кортлэсь капка ӝутэмын. Со "дуннеын" - ӵуж коръёслэсь корка сэрег, атыкай юртъерлэн тодметэз-символэз. Со сяна, кортлэсь дурем скульптура - куинь кыз йылэ пыраклы могӟем тылобурдо. Со нылкышно кылбурчилэн адӟонэз... Архитекторлэн, суредасьлэн малпам ужез одно пумаз-йылаз вуоз. Кылем тол вылтӥ, дыртыса ке но лэсьтэмын, таиз но шумпоттэ ини - кутсконэз вань. Табере та паймоно кадь интые, кылбурчилэсь "кӧкызэ" адӟыны, уногес калык мед вуылоз вылэм. Соин ик чакламын вал, Калыкез дышетонъя министерство Ашальчи Окилэн вордскем но ужам интыосаз экспедициос радъялоз шуыса. Та малпанэз йӧн-йӧн быдэсъяны уг луы на. Огласянь, Грахын вуттымтэ музейзы, кудзэ малпамын культура юрт борды пуктыны (шуген ке но, али со лэсьтӥське ни), мукет ласянь, Алнашын ужъёс дыгомемын. Анатолий Аникинлэн мраморлэсь лэсьтэм бюстэз - Ашальчилы памятник огдырлы пуктэмын Грах РДК- е. Скульпторлэн мукетыз ужез интыямын луыны кулэ Алнашысь искусствоосъя выль школа азе. Ку со усьтӥськоз - ӧйтӧд, лэсьтӥськон уж шуген мынэ. Нош памятникъя договор но, смета но ӧвӧл на бере, художник уг быгаты саесъёссэ пужалляса ужаны. Эскизъёс, гипслэсь фигура, портретдасесь ке но... Ярам коть, Ашальчи Окилэсь музей-юртсэ кӧня ке выльдыны быгатӥзы, шайгузэ чеберъязы. Озьы ке но, школаос юаса ӧз улэ, мар вуттэмын, мар ӧвӧл. Шаермылэн пӧртэм палъёсысьтыз али но вырӟыло астобусъёс Грах но Алнаш музъем вылэ. Туризмъя центръёс но та сярысь уг вунэто. Нырысетӥ нылкышно кылбурчилы, дано врачлы сӥзьыса, школаосын усто сочиненилы, бордгазетлы конкурсъёс вал, олимпиада ортчытэмын. Йылпумъянъёс лэсьтӥзы Ижевскысь 56 номеро школаын, бадӟым праздник вал татын. Нош дышетонлы юрттӥсь фильм, жаляса верано, таки ӧз кылды. Вылӥысь коньдон ӧз сётэлэ, шуизы Калыкез дышетонъя министерствоын. Озьы, соиныз но таиныз вераськыса, созэ но тазэ суредэз син азе пуктыса, амалтэк малпан кылдэ: мар быдэсмымтэ - со коньдон ӧвӧлэн йырин. Иське, ӧй вал кутоно со быдӟа ужрадъёсын программа? Утись анайлы сямен вазиськоно луиз А. М. Лисиналы, та ужрадъёсты ортчытонъя оргкомитетлэн тӧроезлы. - Правительство ласянь коньдон тырмыт сётэмын вал, чаклам мында ик,- шуиз Антонина Михайловна.- Грахе 500 сюрс сётӥм, нош соослэн кулэяськонзы миллионлэсь ятыр луэм. Алнашъёслы но кӧня кулэ висъямы. Кытын ке со коньдонэз, оло, мукет интые кутылӥзы. Выльысь люкаськыса эскероно луоз на тае. Нош суредасьёс, А. Аникин но К. Галиханов, тазьы малпало: - Данъян ӝытъёс ортчытыны, Ижевскын но, Москваын но, сомында коньдон кисьтӥське. Ӝыт тӧлӟиз но быриз. Нош памятник - пыраклы. Малы солы уксё уг шедьто, пичиен-пичиен ке но? Та юанэз сётоно на вылэм Культурая министерстволы.. Нош мон шуысал: йырчукин пуктэм улонмылэн мыддорин палыз со. Шулдыръяськон-ӵашетон вылэгес пуктӥське, нош пумтэм инсьӧре кыстӥськись чалмыт чеберлык пыд улэ лёгамын луэ. Т. ПЕТРОВА. Зарни пиштэ сюйын но Туала улон-вылонмылэн секытэз данаксэ адямиосты куасалтӥз ни. Но зарни пиштэ сюйын но, умой адямиез урод сямъёс уз сӧре. Ма пумысен та вераськон? Уваын алигес кылдытэмын егитъёслэн "Рейд" общественной оргнизацизы. Со феврале республикаысьтымы юстицияя министерствоын юнматэмын. Выль огазеяськонлэн вань аслаз советэз, быръемын кивалтӥсь. Тани ма сюлэмшугъяськытэ татчы ветлӥсь уваосты: калыклэсь ӟеч ужаны но улыны мылкыдзэ ӝутоно, егитъёс пӧлын валэктон уж нуоно, ожын ивортэк быремъёсты утчано, ватэм солдатъёслэсь шайгуоссэс утялтыса возёно но мукет. Та кутскон азьланьтӥськиз ке, со тужгес пайдаё сётоз егитъёслы умоесь сямъёс пыӵатонын. П. Николаев. *** Пудо сиёнэн юртто Скаллэн йӧлыз - кыл йылаз, шуо калыкын. Нимаз адямиослэсь пудо вордэмзэс асьмеос умоен лыдъяськом, сӥль-йӧл базаре тросгес вуэ ке, со дунтэма уго. Но пудоез турынэн но куроен гинэ уд сюды, тужгес но парсьёсты, скал но суралтэттэк пуж-пуж йӧл уз сёты. Умой валало та ужпумез Ува ёросысь "Свобода" эштосын. Отын ю тысь висъяло ужасьёссылы но, пенсионеръёслы но. Со изыса килоез 35 копейкаен вузаське, изымтэез - солэсь но дунтэм. П. Николаев. ЛЫДӞИСЬ ӴЕКТЭ, КУРЕ Адямиос - векчи чорыг-а? Берло дыре шаерамы автобусъёс шӧдскымон урод ветлыны кутскизы, уката ик - ужан нуналъёсы. Кылсярысь, Якшур-Бодьялась Ижевске но Ижевскысь ми доры соос азьвыллэсь кык-куинь пол шер вуыло ни. Мугзэ юаськод - валэктӥсь ӧвӧл. Я автобусъёс шальтрамын, я эстӥськон уг тырмы, шуо. Паймоно сыӵе югдурлы. Билет дунъёс весь будо, коньдонзы олокытчы ыше-быре. Нош ми доры ветлӥсьёс туж трос. Салонын ноку буш уг луылы. Калык юн курадӟе. Рейсъёсты кулэстэмзы бере, котькуд автобусэ калыкез, кызьы шуо, векчи чорыгез сямен, туйнаса пукто. Адямиос керето, тросэз пыд йылазы сылыса ветло. Я, шуом, егитъёс чидалозы таӵе курадӟонэз, нош ми кадь арлыдоос, ожъёсы ветлэмъёс, сӧсырмемъёс? Алигес Чуре ветлоно кариськи. Бадӟым мугез вал. Макем курадӟи! Азьло угось Ижевскысь огез автобус нуналлы быдэ Якшур-Бодьялась Чуре пыраса кошке вал. Кӧня тау карылӥм транспортын ужасьёслы! Со автобусэз, пе, воштӥллям. Тӥни озьы, аслам районысьтым ик Чур посёлоке вуи, эсьмаса, машинаысь машинае куинь пол пуксьылыса. Чур сюрес вылэ кожытозь, нялтас автобусэн мыно шуисько вал. Кытын, пе! Егитъёс, провор муртъёс жег-жег донгизы но кельтӥзы. Нош кӧня дышетскисьёс Бодьяла, Карашуре кылизы. А ведь кырын толалтэ, кезьыт. Эбылялозы но соос. Кин кыл кутоз? Соку, 18-тӥ январе, Чуре мыныкум, сюрес вылын медам ӟонгыра шуыса, выж дорозь пыдын но кӧня ке мынӥ. Отӥяз, куать иськемез, ширтоно луиз... кырын, кузовын. Ой, кынми, улонэлэн пумыз вуэ ни кожасько вал. Бен мар-о, кинъёс кузёясько ини асьме кунамы? Правительствомы, кызьы шуо туала вакытэ, Кивалтэтмы, но ӧвӧл ни-а, мар-а?! Яке автотранспортмы воксё ас эрказ лэземын ни? Ярам коть, автобус выльысь сётӥллям. Малпамея, таӵе югдур кылдӥз, троссэгес автобусъёсты коммерческой амалэн ужатонэз выжтэмен. Котькызьы медло но, адями пудо ӧвӧл ук. Кин ке но сюресчиосты но тодаз возьыны кулэ. Правительствоысь, транспортысь чиновникъёс ке вунэто, вань на ук депутат нергеосмы. Вань "Удмурт кенеш", "Дэмен" выллем огазеяськонъёс но. Ми кадь оген-кыкен ӝожтӥськисьёсыз чинушаос пелязы но уз понэ, нош калык ке, пӧртэм огазеяськонъёс ке куаразэс ӝутӥзы, оло, кыӵе ке ужрад кутозы. Мон ӵектӥсько: урод кивалтӥсьёсмы, депутатъёсмы, ужась адямиез вунэтӥсьёс туала быръёнъёс дыръя огез но медам сюре ни ӝужыт пуконъёсы! Нош сюресъёс вылын югдурез чалякгес тупатон понна, усто луысал, кылсярысь, асьсэды, автомашина возисьёсты, кыӵе ке артеле огазеяны. Мед нуллозы калыкез. Якшур-Бодьялась одӥгез водитель озьы ужа ини кадь. Но мынӥсь- ветлӥсьёслэсь, коньдонлы ёрмисьёслэсь кисызэс медам кесе вал. Соосыз но эскероно, дыр, ук. А. Вахрушев, Якшур-Бодьялан улӥсь, ожысь но ужысь ветеран. Кусыпъёс Ӟеч мылкыдын мытэм уж ӟечен берытске Кызьы ивортӥм ни вал кылем арня вискын Ижевске вуылӥз Москвалэн мэрез Юрий Лужков. Нунал куспын со ветлӥз адӟытонъя "Метеор" центре, тодматскиз механической заводлэн продукциеныз, татын ик пумиськылӥз бадӟымесь предприятиослэн кивалтӥсьёсынызы. "Отечество" движенилэн кивалтӥсез луэ бере, пыриськиз огазеяськонлэн шаерысьтымы ёзэзлэсь Общественной приёмнойзэ усьтон, ужрадэ. Нош ӝытазе столицаысь куно "Металлуг" культура дворецын республикалэн активеныз бадӟым кенешон ортчытӥз. Ужрадэз усьтыса, Кун Кенешлэн Тӧроез Александр Волков пусйиз, шаремылэн Москваен кусыпъёсыз пайдаен берытско шуыса, нырысь ик республикалэн экономикаез понна. Юрий Лужков но ӵапак таӵе мылкыдзэ усьтӥз. Ӵош ужан сярысь нырысетӥ документъёс гожтэмын вал 1997-тӥ арын октябре. Со дырысен Россилэн кык улосвылэз куспын оскон мылкыдъёс юнмазы, шуиз Москвалэн мэрез. Удмуртия - кужмо промышленностен но гурт удысэн республика. Кылсярысь, столица шаерысьтымы бастэ бытовой но медицинской техника, связья, шунытэз эскеронъя аппаратура но мукет. Ваньмыз со республикамы понна но, нимаз адямиос понна но пайда вае. Заказъёс вуо бере, озьыен, заводъёсын уж вань, адямиос тыршо, уждун басьто. Юрий Михайлович пусйиз: товарооборотлэн быдӟалаез будӥз, азьланьын сое эшшо но паськытатоно, угось ваньбур поттонэз кужмоятыса гинэ странамы пыд йылаз йыг-йыг султыны быгатоз, Западлы мултэс оскеммы ӟече уз вуттэ. Ужпумъёсмес быдэстыны палэнысь дорамы нокин но уз лыкты. Странаысьтымы рынокез асьмеос асьме кужыменымы гинэ улӟытом. Гурт удысъя кусыпъёс сярысь верано ке, Ю. М. Лужков вераз, столица шаермылэсь басьтэ мултэссэ гинэ сиён-юонэз, кылсярысь, Москваысь правительство Удмуртиысь 1200 тонна картофка нуиз. Трос-а со, ӧжыт-а? Араз Россилэн шоркарезлы "кыккетӥ нянь" 800 сюрс тонн кулэ, пе. Огвакытэ шаерамы скал вӧен секыт югдур кылдӥз вал. - Одӥгез газетты удмурт вӧез сиись Лужковез суредам, - вераз Юрий Михайлович. - Нош Москваысь правительство Удмуртиысь одӥг килограмм но вӧй ӧз басьты. Соин ик токма кыл вӧлдэмез понна мон пӧяськись издание вылэ судэ сёто. Та выллем ньыльдон ужъёсын ворми ини. Утэм коньдонме Христос Утисьлэсь храмзэ ӝутонэ висъялляй. Москваысь куно кӧня ке пол пусйиз, Удмуртилэн но Москвалэн кусыпъёссы эшшо юнмалозы шуыса. Россилэн столицаяз ужаны шаермылы ӟеч условиос кылдытэмын луоз, кылсярысь, магазинъёс, вузкарон интыос усьтонъя, рекламаез интыянъя. Россиын Москвалэн аспӧртэм интыез сярысь тодӥськом. Социализм вакытэ, быдэс странамы со вылэ ужа вал. Табере югдур воштӥськиз - улосъёслы эрик сётэмын. Нош Москва, мар шуод, али ӟеч улэ. Ужтэк кылемъёслэн лыдзы 1 процентлэсь ичи. Бюджет чотын ужасьёслы уждун, мӧйыослы пенсиос, нылпиё семьяослы пособиос дыраз тырисько. Ма чотысь? Кин чотын? Ю. М . Лужковез кылзыса, умой-умой валаськод, котьма ке но, ваньмыз потэ кивалтӥсь, солэн югдурез валаса ужамез бордысь. Тани столицалэн кивалтӥсьёсыз трос сюлмаськиллям шор но пичи ужбергатонэз кылдытон но азинтон сярысь. Табере та удыс городлэн бюджетаз ӝынызэ коньдонэз вуттэ. Отын 1 миллион 200 мурт тырше. Мукетыз - Москваысь Думалэн юнматэмезъя, промышленной предприятиос понна НДС кык пол кулэстэмын, озьы ваньбур поттон чутрак будӥз. Юрий Лужков ӵектӥз, тӥ понна, пе, адӟем карымонэз вань ке, лыктэ дорамы, учке, дышетске. Ваньмыз ӟечен гинэ берытскоз. Столицалэн мэрез - огдыре ик "Отечество" движенилэн кивалтӥсез. Та огазеяськон сярысь веракуз, Юрий Михайлович шуиз: ёзъёсмы Россилэн 89 улосвылаз кылдытэмын ни. "Отечество" мукет кужымъёсын, политической партиосын кусыпъёссэ радъя, огъя кыл шедьтыны тыршыса. Кылсярысь, ӟечесь кусыпъёсыз Зюгановлэн КПРФ-еныз. Куд-ог ужпумъёсъя соин партнёръёс но луыны быгатӥськом, пусйиз Ю. М. Лужков. Крымез Украиналы "кузьман", Югославиын война - Россиез ултӥян, йыркурзэ ӧз ваты Юрий Михайлович. Солэсь азьвыл сямен уг кылзӥсько ни. Нош мугъёсыз тодмоесь - экономика лябӟемын, странамылэсь кивалтӥсьёссэ дуннеын уг дунъяло, уг гажало. Озьы ке но, Россия - быдӟым страна. Сое возьматэ история но. Ужано, кунмылэсь юнлыксэ но данзэ выльысь ӝутон понна. Ватонэз ӧвӧл, асьмеды та калэ егит реформаторъёс вуттӥзы. Чубайсэн ортчытэм приватизация - йыруж, мукет сямен та ужрадэз нокызьы но уд дунъя, со понна та политикъёс калык азьын кыл кутыны кулэ. Евгений Примаковлэн правительствоез странамес воксё куашкамлэсь утиз ик. Но чурытэсь ужрадъёс ортчытыны дӥсьтонэз уг тырмы. Али но каллен-каллен улӥе гылӟиськом. Матысь дыре ик асьме ваньбур поттӥсьлы ӧм юрттэ ке, зэмзэ но, куашкалом. "Отечество" движение куре правительствоез таӵе ужрадъёс ортчытыны: ваньбур поттӥсез "кыӵесысь" мозмытон понна налогъёсты кулэстоно; предприятиослы 7 процентъем кредитъёс сётъяно, со коньдонлэсь кызьы кутӥськемзэ рос-прос чаклано; воштоно таможняя но тарифъёсъя политикаез - али та пумысен законъёс быдэсак сямен ваньбур поттӥсьёслы пумит ужало. Кенешонлэн пумаз Удмуртия но Москва куспын азьланьын ӵош ужан сярысь выль документъёс кутэмын. Озьыен, кусыпъёс юнмало. Нош ӟеч мылкыдын мытэм уж ӟечен берытске. Ю. Михайлова. Атаезъя - Иваков, гожъяськемезъя - Иванов Иваковъёслэн шыр но чуртнаськонтэм куать сэрего тык-тык бадӟымос юртсы Пичи урамын сылӥз - гурт пумысен кыкетӥез. Корка вӧзысьтызы пасьтана писпу бакчаын (садын) пурӟыса ик будӥзы, жалем емышен гочатъязы грушапу, улмопу, чияпу, сутэрпу... Грушапу быдэс Туймыйыл гуртлы соос гинэ мерттыны шедьтӥллям. Садазы олокыӵе но ческыт макеос озьы исаськыса, синзэс кырмекъяса выллем улӥзы бере, бусы дурысь кенер вамен кечыръяськисьёс, кузь киос но сюрылӥзы. Ачиз но Тимка анай-атаезлэсь лушкемен, улмопузы трос вал бере, эшъёсызлы сузен-сузен яблок потталляз. Алям чияпузы пӧлы, пислэгъёсты кутылон вылысь, нальык но пуктылоно кожалляз. Тазьы дауртэмъёссэ, кипырмес луэмзэ чурт-чурт сямо атаез шӧдысал ке, небыт палзэ еэн кылзэ юаса ик ӟезьысал, дыр. Со уго вера ке вера, косэ ке косэ вал - эн кылзӥськы ай! Тани, шуом, арня нуналъёсы горд тушо, сьӧд йырсиё, горшоклы укшатыса ӵышкиськем провор Семон агай пиналъёссэ но, соослэсь эшъёссэс но ӝӧк котыраз пуктылэ, кияз Библия кутэ но чутрак вазе ни: "Кылзӥське!" Вань тэшкылиос соку ик чусак карисько. 90-тӥ аръёсы, лыдӟемъяз пумен валэктэ со, адямиос сютэм улозы, ог-огзэс туж зол быдтозы. "Левой" но "правой" шуонъёс потозы. 1999-тӥ арын укноетӥ сокем эн утчаськелэ: яке Быдӟым нуналэ, яке Трочин нуналэ кыӵак быроды. Сюлэмдэс поныса ик вӧсяськиды ке, улэп кылёды. Инмарлы оскеменыз ӵош Тимкалэн атаез ужлы бырем адями но вылэм - таӵе кык тодмет солы юрттэ, вылды, бадӟым аресозь но вуттӥськыны. Тодӥсьёс пусъемъя, со весяк уробо но дӧдьы лэсьтылэ. Сюлмо поки (писэй) кадь луэмзэ куать сэрего корка пуктэмез вылысь но тӥни адӟоно. Бадӟым семьяез сяна, отын, патерлы висъям сэрегаз, пинал нылмуртъёс- дышетӥсьёс но уло-выло. Таосыз доры лабыртыны ӵемысь вутскыло гуртысь егит пиос. Быдӟым ож дорозь Иваковъёс вӧл-вӧл уло, отӥяз курадӟонэ уськытэм вань калык сямен ик начармо. Пиналъёссы но, юрттӥсьёссы, вордскем юртысьтызы пумен пазьгисько... Соос Юбералась, Быдӟымсурдысь, Писэйгуртысь вайылэм но улонысь вазь кошкылэм куинь анайлэсь куать кузя ӝужало. Тимка куинетӥезлэсь ини, кузпалъёс арлыдо дыръя, вордӥське. Иваковъёслэн шудзы-а, мар-а сыӵе вылэм шуод - пиналъёссы но, пиналъёссылэн пиналъёссы но югыт дуннеысь кошко: я секыт висьыса, я шудтэм учыре сюрыса, я - асьсэды асьсэос быдтыса. Ивак Тимка но сыӵе адӟонлэсь уг мозмы... Нош дышетскемезлэсь азьло со вань пиналъёс сямен ик шудыны яратэ, урамысьтызы ёзъёсыныз эшъяське. Анай-атаез уже кошкон азязы утьыны шуыса-а, лӧптылыны-а - бордаз бадӟымгес арлыдо эшъёссэ кельтыло. Нош таосыд тэшкылиез шудон интыын адӟыса исаны, чепылляны кутско ук! Одӥгез, артысь коркан улӥсез, Тимкалэсь сизьым ареслы бадӟымгес нылаш, Иваковъёс дорысь ӧз ик берталля, оло. Весь отын сиськыса но улэ. Чиган кышно шуыса, тышкаськыса, сое улляса но лэзьыло. Со ке ӵуказеяз ик, нокыӵе кариськытэк, выльысь вуэ. Сыӵе шудон-лӧптылон суредъёс Иваков Тимофейлэн сюлмаз пыраклы кылё, лэся: Алнаш ёросысь Туймыйыл гуртаз берталлякуз, артысь корка куное пыре но, тонэ адӟеме потэ шуыса, пичи дырысьтыз чепылляськись эшсэ ӟыгыръя ини. Школае мынэмез бере, Тимкалэн дунне шоры учконэз шӧдскымон паськыта, мае ке паймымонзэ, сюлмаз йӧтымонзэ синйылтэ но котырзэ воксё вунэтэ, ас вактаз усе. Одӥг гужем Туймыйылын пионерлагерь ужан дыръя пиналъёсты отрядэн тымет дуре нуо. Пумен тылско. Нош Тимка эшеныз ӵош, ачиз но валатэк, лэся, ӟозъёслэн чикыртэмзы, солань- талань тэтчамзы, кузьылиослэн чырткем ужамзы, бызьылэмзы шоры жальмаменыз, воксё палэнэ кошке, отрядзы сярысь вунэтэ. Собере лыктэм мугзы витьымтэ шорысь тодаз усе но, адӟе: нылъёс-пиос, кошкон вылысь, одӥг чуре кузянак султӥллям ни. Отрядлэн командирез, Тимкалэн агаез, ышем-быремъёсты адӟыса куаретэ, одӥг радэ тупатскемъёс котыртӥ ньыль пол бызьыса ортчыны косэ. Мукетыз учыр потэ Туймыйылэ Быдӟым ож кутскемлэсь азьвыл Удмурт театр вуылэм бордысь. Соку пукто аспалзылэсь Василий Садовниковлэсь "Тыло вӧсь" драмазэ. Отысь геройёс тодмоесь вал - гуртооссы. Тӥни со спектакль Тимкалэсь сюлэмзэ туж юн бугыртэ. Кызьы ке одӥг пол эшеныз кин луонзы сярысь вераськон ӝутске но, кыкназылэн ик писатель кариськыны мылкыдзы пуромемен, малпаськон дуннеязы выйтӥськемен, Туймы кузя вамышъянъязы, гуртсылэсь куинь иськемлы палэнын сылӥсь Тыршисе вуэмзэс валатэк но кылё, ява. Иваков Тимофей отӥяз зэмзэ ик литератор луэ. Нош гожъяськон удысын пыдйылтӥськемезлэсь азьло трос лыдӟиське. Алнаш школаысь 8-тӥ классын дышетскон дыръяз одӥг пол мыныкуз но, бертыкуз но быдэс сюрессэ - ваньзэ-ӧвӧлзэ дас куать иськемез - эшезлы Дон Кихот сярысь лыдӟемзэ маде. Отӥяз, арлыдыз будэмъя, пумен ӟуч кылысь чуръёсты но берыкъяны ӧдъя. Сюсьтыл ӝуам улсын кема гожъяськыса пукылэ. Суредаське но. Вискын-вискын, кенос йылазы пуксьыса, палъёссэ балалайкаеныз эктон гуръёсын шулдыръя. Нош 8-тӥ классын дышетсконзэ со уг йылпумъя: нырысь-валысь ас гуртаз ик колхозын тырше, кӧня ке улыса, Ижысь ӧнер (ремесленной) училищее мынэ. Собере - армия. Отысь бертыса, выльысь Иже кошке. Татын пумита заводын ужась ӟуч нылмуртэ, Марусяез. Ӝоген соос огазеясько. Будэто вить нылпи. 1953-тӥ арын толсуре Тимофей Семёнович Иванов, В. Садовников юрттэмъя, "Советской Удмуртия" газетэ интыяське. Пӧртэм ужкагазъёсын - документъёсын - зэмос фамилиысьтыз к куарапуссэ н-эн янгышаса вошъяменызы ёрмемен, гожъяськон удысаз коть Иванов кушемним басьтэ. Иворъёсъя отделын ужаны ӧдъяса, литератураен выре. Та кабинетын куинь Ивановъёс соку пуко. Семён Перевощиков (али куинь кылбур книгалэн авторез) кызьы ке пыре ини таос доры но ӟырдыт мылкыдын, серем пыр, котьку сяменгес ик огшокчемен вера ини: Ты Иванов (Т. - Тимофей), Вы Иванов (В. - Василий) Мы Иванов (М. - Михаил)! Т. Иванов трос уг вераськылы, ас понназгес, ас вактазгес улэ. Гор-гор серекъяны йылолыз вылымтэ. Огпал ымдурыз гинэ серем пыр кырыж луылэ. Тамак кыскылэ ке но, редакциысь пурккетӥсьёслэн люкаськонъёсазы уг адӟиськылы. Быдэс нунал ужаса вылысь но, журналистъёс кошкем бере, дор палаз уг дырты, ялан гожъяськыса пукылэ. Таяз учыре ини сюлэм мылкыдъёссэ кагаз вылэ кисьтылӥз, луоз. Дораз но быдэс уйёс ӵоже малпанъёссэ ӵемысь бумагалы оскылэ. Ӝӧк сьӧрын озьы пукыкуз, одӥг пол дораз пиез лыктэ. "Мар-о татчы люкетыны вуид ай? Адӟиськод-а, главазэ ыштӥ". Пияш соку ик мемиез доры усьтыр-табыр бызьыса кошке но паймемзэ пумен ивортэ: "Нош папамы йырзэ ыштэм". Н. С. Хрущёв странаенымы кивалтон вакытэ "Советской Удмуртия" газет "Удмуртская правдаысь" ӟуч материалъёсты гинэ печатланы кутскемен, 1959-тӥ арын удмурт редакциысь уно ужасьёсты мозмыто. Палэнтэмъёс пӧлы сюре Тимофей Иванов но. Талэсь азьвыл но, вить ар но ӝыны ёрос удмурт газетын тыршытозяз, матысьёсызлы весь ӝожтӥськылэ дышетскемез ичиысь куд-ог журналистъёслэн нырк каремзы вылэ. Зэмзэ но со, Иже лыктыса, ӝыт ужась шор ёзо школаез гинэ на йылпумъя. Тӥни озьы сокугес гинэ мытэм удысысьтыз выжыеныз ишкалто бере, куамын аресъем литератор азьпал сюрессэ ыштэ, 1960-тӥ-1963-тӥ аръёсы Удмурт телевидениын лул-сюлмызлы буйган шедьтытэк, механикая заводэ фрезеровщике интыяське. Нош рабочийёслэн улон шоры учконзы, визьмын ужасьёслэн (интеллигенцилэн) сярысь, шӧдскымон мукетгес: соос музъем вылысь сюлмаськонъёсы гинэ выемын. Т. Иванов, журналистикаысь донгеменызы но творчество удысын ассэ ачиз шедьтыны луонлыксэ ыштэменыз, ӵемгес но ӵемгес курытэз вылэ чӧлскылэ. Нош одӥг нуналэ этиловой спирт басьтэ, ас понназ кариське но, ӟенеликсэ бушатыса уг вутты - ӵокак луэ. Озьы 1968-тӥ арын, 6-ысь 7-тӥ толшоре потон уе 3 часын 38 аресъем Тимофей Иванов улонысь кошке. Удмурт литературалэн историысьтыз куспетӥ кулэм литераторъёсты, писательёсты тодэ уськытоно ке, яратоно ужысьтызы, гожъяськон удысысь, улляменызы сэрен, киысьтыз вирсэрзэ вандылэ Михаил Воронцов, арлыдо луыса ини тамак кыскыны кутске но, кисло- кусло (рак) тэлеӟыса, сопал дуннее кошке Александр Вотяков. Т. С. Ивановлэн кылкутэтъёсыз (текстъёсыз) ичи ке но, творчествояз пусйымон вадесъёсыз вань, кожасько. Уноез удмурт гожъяськисьёс сямен ик со но удыссэ мытэ огъя липет улысен - "Сюрес вылын" сборнике (1953) куинь вероссэ пырто. 1955-тӥ арын шаерысьтымы мадёсчиосын ӵош, табере ини ӟуч кылынояз, кык веросэз потэ. 1956-ын лыдӟисьёс доры вуэ веросъёсын "Эшъяськон" книгаез. Кулэмез бере ини, 1968-тӥ арын, "Молот" журналлэн 7-тӥ-9-тӥ номеръёсаз печатласько "Шудэд ас кияд" повестьысьтыз люкетъёсыз, собере 1970-ын та произведениез нимысьтыз книгаен кыре-буре вуэ. Рабочийёслы сӥзем та ужзэ - рукописьсэ - улэп дыръяз ай ачиз автор "Удмуртия" издательствое вуттэ. Тимофей Иванов унояз веросъёсаз но повестяз возьматэ ваньбур поттон удысысь егит рабочийёслэсь кусыпъёссэс, таослэсь кивалтӥсьёсынызы, котькудӥзлэн улоназ ялан чуртнаськись, косъяськись, индылӥсь, валэкъяськись коммунистъёсын но комсомолецъёсын вожвылъяськонъёссэс. Мар-о отын шумпотонэз ни, асьсэды олокин кожась, оброс интыын адӟись, пумит кыл веранэз чидасьтэм партийной но комсомол организациос ас вакытаз партие пырымтэосты но огшоры комсомолецъёсты эриктэк, шокчыны маза сётытэк, пачкатыса, интэмаса, пӧяса, ужен но ньӧм понна ортчылӥсь вукпотымон ужрадъёсын пумӟытыса возизы бере? Уллё пӧлысь висъяськытэк, астэ вунэтыса но Родина сярысь уен- нуналэн сюлмаськыса, пӧзись уж пӧлы выйтӥськыса гинэ, шуылӥзы, зэмос адями луод. Тӥни сыӵе вал вылласянь кильтрес адскись но пушласянь асьмеды синазькыль карись коммунистической мораль. Лушкем сямо Т. Иванов рабочийёс пӧлын но, журналистын ужакуз но сюлмаз пыдло пыӵатӥз, луоз, комсомоллэсь но, куке-соку валтӥсь партимылэсь но ӟургетонъёс вылын будэтыны турттэмзэс. Соин, вылды, прозаиклэн геройёсыз ваменэсэсь, эрик пала кыстӥськисесь. Коммунистъёсын кылдытэм улон соосты куасаны выре, ляб лулъёсты, зэмзэ ик, тӥялтэ со. "Сюрес вожын" веросын, кылсярысь, ваче пумит пуктэмын ужаны яратӥсь, зэмлык понна сылӥсь, кивалтӥсьёсызлы кылзэ вераллясь Нюралэн но улон шоры эркын тылобурдо кадь, капчияк, сэзь синъёсын учкись Катялэн кылсуредъёссы (образъёссы). Нюралэн дӥсьтылонэз потылэ ке но, шуг-секытъёсыз вормыны кынарыз уггес тырмы, етӥз нылмуртмы син азьын шымыртӥське. Катя ке умойтэмзэ сюлэмызлы матэ уг кары, котьма шоры серем пыр учке, эктыны, шутэтскыны яратэ. Нош "Ӵошатскон" веросысь Катя нимо нылмурт ик ялкарон нуналэ но уженыз герӟаськем книга лыдӟыса пуке! Тани Нюра комсомолысь куштэменызы синвуаське, нош Катя сое горыны кутске: отысь уллямзы бере, пе, мон ӧй кулы ук, азьвыл сямен ик улӥсько, серекъясько. Учкы ай, пе, мон шоры, али но серекъясько (ха-ха-ха! - А. Л.). Т. С. Иванов, ас вакытысьтыз идеология куремъя, "уродэзлы" шумпотӥсь Катяез палэнтэ, ужысьтыз кошкытэ, нош сюрес вожын сылӥсь Нюралы ӟечак кариськем коммунист-кивалтӥсь комсомолецъёсын ӵош "нюрысь" потыны, эшъёсыз радэ ик выльысь султыны юрттэ. Котьма ке но, нылмуртлэсь лул-сюлэмзэ валаса, Нюралэн нимыныз гожтэм веросын (озьы ик "Ӵошатскон", "Вылыз ялтрак, пушкыз калтрак" веросъёсын но) чуръёс вискысь таӵе ик чильпырало авторлэн пыдло ватэм малпанъёсыз: кивалтӥсь коммунистъёсты но комсомолецъёсты гажамтэез, отрицательной шуон геройёс пӧлы пыртэм "тӧдьы куакаос" пала дурбасьтэмез. Юнме шорысь ултӥям Катя пала кариське Т. Ивановлэн "Эшъяськон" книгаезлы кылдунъет (рецензия) гожтӥсь М. Андрианов но ("Малы янгыш Катя?" - "Удмуртиысь комсомолец" , 1957, 10-тӥ тулыспал). "Шудэд ас кияд" повестьын суредамын гуртысь егит пияшлэн (таӵе ик шӧдӥське аслаз мадисьлэн улон сюресэз но), каре лыктыса, ӧнер училищеын дышетскемез, коммунизм лэсьтӥсь, азьветлӥсь шуон рабочийёс пӧлы сюремез. Егитъёсты шонер сюрес вылтӥ валтыны выро комсомолецъёс. Огшоры ужчиос тыршо, тыршо, нош емышсэ уг адӟо - кивалтӥсьёссылэсь сюлмаськемзэс уг ик шӧдо. Соку мар-о карозы на пырнымы интые кылемъёс? Юозы. Соин валче тӥни повестьын возьматэмын технической спирт юыса кулэмъёс но (прозаикез но со калэ вутто ук!). Оглом вераса, та произведениез печатлало, книгалэн редакторез пусъемъя, рабочий класслы сӥземеныз. Соин сэрен но, ужез гинэ син азямы пуктыны чӧлскемен, повестьлэн чеберлыкез кулэс, уноез геройёс бездытэсь адско, сюлэмзы уг шӧдӥськы, тужгес но - комсомолецъёслэн. Берлояз учыре ини Т. Ивановлэн нокыӵе янгышез ӧвӧл, кожасько. Сюлэмтэм кивалтӥсьёсты чеберъяса возьматон творческой вормонъёсы ноку ӧз на вуттылы. Тимофей Иванов уйёсы ӵемысь гожъяськылэ бере, печатлам рукописьёсыз кулэм бӧрсяз туж трос кылё. Кышноез, Маруся Степановна Ивакова, мадемъя, кузпалыз улонысь кошкем бере ик доразы кыӵе ке нылкышно вуылэ но мар ке мында папкаосын рукописьёсты нуэ. Кытын ужась, кыӵе адями вылэм со - тодыны таки ӧз луы: Маруся Степановна кинзэ-марзэ воксё юамтэ уго. Ма карод, киын кинлы ке сётэмез пыдын утчаса но кытысь-о табере шедьтод на? Вылаз ик, кылем рукописьёсын тыро чемоданэз, квартираысь квартирае вошъяськеменызы, сьӧраз нуллонъяз нылкышно жаде но, патере ньылетӥзэ выжемзы бере, вань гожъямъёсты куштэ. Кыӵе произведениос, мар сярысь сомында гожъям Т. С. Иванов - тодмо ӧвӧл. Тимофей Семеновичез тодӥсьёс огзэ гинэ верало: армие ветлэмез сярысь повестьсэ но поттыны дасям вылэм. Александр ЛАПТЕВ. Туспуктэм вылын (паллянысен буре): прозаик Тимофей ИВАНОВ, кылбурчиос Семён ПЕРЕВОЩИКОВ но Кирилл ЛОМАГИН, журналист Никита СЕМЁНОВ. Инмарлы оскы, но депутатэз ачид бырйы Быръёнъя 93 номеро Селта ёрос округысь 10-тӥ участокын быръёнъёс огсыр мынӥзы. Нырысетӥ бырйись вуиз участок усьтӥськем бере ик - уже мынон сяменыз кожем. 9 час котыр ра йцентрысь ульча улӟиз. Участоке чурен-чурен калык кыстӥськыны кутскиз - кин кунулскыса, кин боды вылэ пыкиськыса, кин азяз нылпи колясказэ донгыса. Тросэз - киосазы пучы ньӧръёсын. Мӧйыгес кышномуртлэсь бюллетеньзэ урнае куштэмез бере, юасько: - Тӥ черке пырпон сямен гинэ ӧд пыре-а? - Ӧй. Сояз но, таяз но одно ик пырало шуыса потӥ. - Кинлы бен юнгес оскиськоды: Инмиарлы-а, быръем кандидаттылы-а? - Инмарез быръёно ӧвӧл уга. Но со ваньмызлы юрттыса уз вутты, депутат, оло, огпол ке но маке сётоз. 18 аресъемъёс нырысьсэ куаразэс сёто ай. Егитъёсты, валамон, сюлмаськытэ школа бере дышетсконзэс азьланьтон, уж шедьтон. Со ласянь юрттэт сётыны быгатоз, малпалдо, Загайнов. Зэмзэ ке, ми мукетъёсыз сярысь рос-прос ӧм но кылылэ, пе. Селта ёросъя но Ува ёросысь Выль Мултан, Удугучин но Поршур-Тукля сельсоветъёсъя ньыль кандидат вал: В. Ф. Загайнов - Удмурт Республикаысь жилищно-коммунальной хозяйствоя территориальной производственной объединенилэн кивалтӥсез, А. П. Мясников - Селта ёросысь "Свобода" колхозлэн тӧроез, В. И. Коковихин - Селта ёросысь электросетьёсын кивалтӥсь но В. К. Мурашов - "Рыбовод" крестьян хозяйстволэн кивалтӥсез. Нюръяськон мынӥз Загайнов но Мясников куспын. Загайнов потоз шуыса, тодмо ни вал. Селтаослэн верамзыя, со ӧжыт коньдон ӧз быдты та ёрослы. Но трослы-а ичи луоз Мясниковлэн куараосыз? Дурбасьтозы-а со понна аслаз бӧлякъёсыз (землякъёсыз)? 10 часын участокъёсын бюллетеньёсты лыдъяны кутскизы. Тодмо луиз: Мясников понна тросгес куаразэс сётэмын колхозникъёс, огшоры ужась калык. Зямайысь 140 куара сётэмъёс пӧлысь 96-ез - Мясников понна. Бырйисьёс бюллетене кызьы пус пуктыны валасалзы ке, 101 луысал.Вить бюллетенез комиссия умойтэмен (изъянтэмен) лыдъяз. Мясников фамилия вадьсы соглаш луэмзы сярысь пус пуктыса, мукетъёсыз вадьсы минус пуктӥллям на. Валамон кадь, бырйись куаразэ Мясников понна сётэ, но законъя бюллетеньын одӥг гинэ пус луыны кулэ. Трос куаразэ Алексей Пантелеевич ыштӥз, куазьлы луыса. Угось солэн бырйисьёсыз - колхозникъйс кыдёкысь гуртъёсын улою Адямиос сюрес уродысь быръёнъёсъя участокъёсы ӧз вуэ. Нош куд-огез гурт Советъёс, сьӧрлось гуртъёсын умой-умой валэктон уо нуымтэен, адямиос куаразэс сётытэк кылизы. Пенсионеръ1с ӧз тодылэ уго, азьло ик комиссие заявление гожтыса, со доры гуртаз урнаен лыктозы шуыса. Соин ик пересьёс ӝожомемын: милесьтым куара сётон правомес но талазы, пе. Шонер верало. Огласянь таӵе но малпан кылдэ: юри озьы ӧз лэсьтэ-а, соизлэн яке таизлэн кандидатлэн куараез кулэсгес миед луоз шуыса? Паймытэ соиз но: Мясниковлэн колхозаз 370 куара сётьэмъёс пӧлысь 233-ез гинэ со понна сётэмын. 12 бюллетень изъянтэмын. Кӧня куара ышиз на озьы. Оглом Мясников 1500 куара басьтӥз.Загайнов, 4 сюрс куара басьтыса, кыкетӥзэ ини та ёросъя депутат луиз. "Возьыт. Шонер гожто газетъёс: асьме районысь адямиосты урод карыса, палэнысьёсыз понна вӧсяськиськом. Валалозы-а соос музъем ужасез?" - вераз малпанзэ Зямайысь одӥгез бырйись. Жугиськем бере уг шонасько ни, быръеменыз мед удалтоз. З. РЯБИНИНА. Вормиз Валериан Никитин 75-тӥ Камской избирательной округ. Татын улӥсьёс азьвыл быръёнъёс дыръя оскемзэс веразы Игорь Михайлович Гараевлы, "Восточный" совхозлэн директорезлы. Кинлы куаразэс сётозы туннэ? Бюллетене пыртэмын 5 мурт - ваньмыз дано адямиос? Кинэ соос пӧлысь быръёно? Юалляськонъя азьвылгес ик толмо ал ини: нюръяськон мыноз кык бускель кивалтӥсьёс куспын: Гараев но "Путь Ильича" колхозлэн председателез Валериан Арсентьевич Никитин куспын. Озьы ик луиз. Казмаскаын, Первомай, Хохряки посёлокъёсын улӥсьёс пӧлысь данакез куаразэс сётӥзы Никитин понна, ог 200 мурт ватсаськиз Италмасысь. Якшур гуртын улӥсьёс сярысь ке верано, вань бырйисьбёс пӧлысь 95 процентэз оскемзэ вераз Валериан Арсентьевичлы. 8 часэ ӵукна избирательной участоке черод кылдӥз. Арлыдо адямиос огдышемъя быръёнъёсы вазь ӵукна ик лыкто. Таяз учыре мылкыдзы уката но ӝутскемын: республикалэн парламентаз ӵектэмын асьсэлэн гажано председательзы. Зэм, якшуръёс понна таӵе сюрес нырысьсэ уг усьтӥськы ни: УАССР-лэн Вылӥ Кенешаз пӧртэм аръёсы депутат луыса ужазы Екатерина Ашпалатова но Татьяна Моторина, азьмынӥсь дояркаос. Нюръяськонын туннэ вормиз Валериан Никитин. Сӥзём солы ӟеч ужан мылкыд, мед улонэ пыӵатоз бырйисьёсызлэсь вань осконзэс. Л. МЕДВЕДЕВА. Возъет Ньылетӥ арзэ ульчае уллямзылэсь кышкаса уло ни Ижевскысь Карл Маркс ульчаысь 316- тӥ но Песочной ульчаысь 55А номеро юртын улӥсьёс. Сыӵе учыръёс вал ни уго. Вакуумно-электронной машинаос поттонъя опытной завод куашканы ӧдъям бере, та огъяулонниос (общежитиос) сётэмын вал городлы. Нош город 316-тӥ юртэз "кузьмам" "Сайгас-холдинг" фирмалы. Со сярысь та юртын улӥсьёс ӝыны ар ортчыса гинэ тодӥзы, куке нырысетӥ этажын уин ужась клуб усьтӥськиз, нош азбаразы автопаркын мында машинаос люкаськылыны кутскизы. Мар ужало сыӵе клубъёс, веранэз ӧвӧл, дыр. Та коркан улӥсьёслэсь алэмзэс санэ понытэк, соос уйбыт ӵаш поттылӥзы, пель урмымон крезьгур лэзьязы. Соин сэрен кык пинал лулсэръёссы лябӟыса висьыны усиз. Мар карыны паймыса, улӥсьёс судэ вазиськизы. Но пайдаез ӧз луы. Югдур уката уродмиз. Пилеш воргоронъёс, "чагиськисьёсты" кышкатъяса, квартираоссэс бушатыны косылӥзы. Шуак будӥз квартира понна дун - комнаталы 480 манет курыны кутскизы. Тужгес дӥсьтӥсьёсыз, инициативной группае люкаськыса, прокуратурае, мэрие, Адямилэсь правооссэ утёнъя комиссие вазиськизы. Улӥсьёс куро соослэсь Конституциен чаклам правооссэс утьыны: общежитилы улоно коркалэсь статуссэ сётыса, татысь семьяослы ордеръёс висъяны, адямиослэсь улонзэс умоятыны - тазалыклы кышкытлык кылдытӥсь югдурез палэнтыны. Кема дыр ӵоже та куронэз палэнтыны муг шедьылӥз: Конституциысь "Улонъя фондэз кузёослы вузан сярысь" 4-тӥ ёзэтаз гожтэмъя, "коммунальной коркаосысь но общежитиосысь улон интыосты кузёослы вузаны уг яра". Но Конституцияя суд та ёзэтэз шонертэм лыдъяз но адямиослы коммунальной квартираосты басьтыны лэзиз. Зэм, отын гожтэмын ӧвӧл общежитиос сярысь. Общежитиын адямиос кӧня ке дыр ӵоже гинэ уло шуыса, лэся, нимысьтыз саклык висъяллямтэ. Но общежитиос котькыӵеез вань. Кылсярысь, та верано юртъёс огшоры улоно корка кадесь ик: котькуд семья нимаз комнатаын улэ, отын вань ваннаез, туалетэз, кухняез - коммунальноен уд ӵошаты. Соку малы уг яра ордер висъяны, та улон интыосты приватизировать карыны? Правительствоысь Законностья, обществоез кышкытлыклэсь утёнъя но адямиослэн правооссыя комиссилэн тӧроез Александр Семёнович Борзенков Эскерон палаталэн юри та югдурез сэрттон-пертчонъя кенешаз шуиз: - Та ужпумез йылаз-пумаз вуттоно ни. Со Конституциез тӥян, адямиез ултӥян луэ. Комиссиен ӵектэмын вал: городысь администрациез та общежитилы улоно коркалэсь статуссэ сётон сярысь ужпумез ӝегатскытэк йылаз-пумаз вуттытоно, та уже Правительствоез но кысконо, нош ужпумлэсь быдэсъяськемзэ чакланы кулэ прокуратура. Озьы ик та ужпум сярысь ивортоно Россия Федерациысь калыклэсь правооссэ утёнъя уполномоченнойлы Мироновлы. ...Песочной ульчаысь юртын югдур каньылгес кадь - отын ӧвӧл уин ужась клуб. Но кема дыр ӵоже соослы шуылӥзы: тӥляд комнатаосады инсоляция уг тырмы (югыт, пе, ӧжыт шеде), соин ик улоно коркалэсь статуссэ сётон пумысен шугъяськонъёс кылдо. Татын улӥсьёслэн малпамзыя, соослэн туж ӟеч инсоляцизы (та кылэз соос висъяса ик верало), но куд-огез юри со югытэз возъяны, таланы турттэ. З. РЯБИНИНА. Юрттӥз люцерна Кизнер ёросысь "Бемыж" эштосын та вакытэ котькуд скалзылэсь быдэн 9 килограмм йӧл кыско. Сое нуналлы быдэ келяло тоннаен ӝыны. Со чотын гинэ соку ик "улэп" уксё басьто. Берло дыре ваньмыз сямен скал кыскисьёс ар ӵоже куинь сюрс килограммлэсь уногес йӧл люкало ни. 1997-тӥ арын 254 тонна гинэ йӧл вузазы ке, миым - 479 тонна. Азьмынӥсьёс радын ветло Людмила Аравицкая, Галина Сержантова, Маруся Маркова но мукетъёсыз. Соос уисько ёросын азьмынӥсь Надежда Чернышова эшсы сьӧры. Со кызь ар ӵоже ни тырше пудо утёнын, миым со котькуд скалэзлэсь кыскиз 3500 килолэсь ятыргес. Бемыжысь скал кыскисьёс ванмзы сямен егитэсь но задоресь. Кивалтӥсьсы Лидия Тихонова юнматӥз ужан дисциплинаез. Бен, умой ужам сяна, ӟеч пудо сиён но шунытэсь гидъёс кулэ. Ужан условиоссы эштосын умоесь, нош пудо сиёнзы ӟеч мед луоз шуыса, татын 800 гектар вылэ люцерна кизизы - солэсь ӟеч пӧрме кӧс турын но, силос но. П. Скобелев. "Каргурезь" люказ эшъёссэ Куинь ар вис бере шарканъёслэн "Каргурезь" огазеяськонзы нош ик огинэ люказ аспал калыксэ. Ижевскын улӥсьёс мӧзмиллям ни вылэм таӵе пумиськонлэсь, кун филармонилэн залаз трос гинэ калык люкаськиз. Шаркан музъемзылэн палэназ улӥсьёс тодматскизы районлэн выль кивалтӥсьёсыныз - администрацилэн тӧроеныз Александр Аркадьевич Прохоровен, райсоветлэн тӧроеныз Александр Николаевич Медведевен. Люкаськемъёсты соос вакчияк тодматӥзы районлэн туала югдуреныз. Собере Шарканысь усточиос возьматӥзы концерт. Куинь ар куспын соос эшшо но йылӥллям кадь, быгатонлыкъёссы но будӥллям. Сцена вылын кузёяськизы фольклор но эстрада кырӟанъёс, эктонъёс но юмор, тодмо но тодмотэм самодеятельной артистъёс, коллективъёс. Синмаськытӥз ужъёсыныз Шарканысь керттӥськон фабрика. Пинал нылъёс сцена вылысен возьматӥзы керттэм дӥськутъёсты - огшоры нуллонооссэ но кыӵе ке ӝытэ яке празднике дӥсянооссэ. Та ӝытын ик радъямын вал керттэм дӥськутэн вузкарон. Пумиськон возьматӥз, калыклы таӵе люкаськонъёс кулэ. Со сярысь вераз "Каргурезь" огазеяськонлэн кивалтӥсез Валерий Яковлевич Митрофанов но. Л. Малых. "Ижсталь" - куинетӥ Йылпумъяськизы хоккеен шудонъя вылӥ лигаысь командаослэн ӵошатсконъёссы. Азьпалан мынӥсь "Ижсталь" берпуметӥ пумиськонъёсаз очкоссэ ыштӥз. Нырысь со Санкт- Петербургын "канжаськиз", собере Заволжьеын "Моторлы" 1:3 лыдын келяз. Озьы Россилэн чемпионэз луиз Новотроицкысь "Носта" (23 очко) "Мотор" но "Ижсталь" быдэн 22 очкоен кыкетӥ но куинетӥ интые потӥзы. М. КУЗЬМИН. Кварсаослэсь адӟем каро Ватка ёросын калыклэсь ваньмон дырзэ шулдыр но пайдаё ортчытъян ласянь умоен лыдъяське Кварса администрацилэн ужамез. Соин кивалтэ Н. Я. Коробейникова. Берло дыре кварсаос мур пыриськыны ӧдъязы пӧртэм культурно-массовой ужрадъёсы но спортъя ӵошатсконъёсы. Соос шудо волейболэн но футболэн. Ортчем толэзе Кварсае семинаре люкаськылӥзы ёросысь вань гурт администрациослэн кивалтӥсьёссы. Вормизы кезъёс Миым республикаысьтымы гуртъёсын вузкарисьёс но сиён пӧрасьёс пӧлын радъямын вал смотр-конкурс. Отчы пыриськизы 200-лэсь ятыр вузкарись предприятиос но общепитъёс. Алигес та ӵошатсконлы йылпумъянъёс лэсьтэмын. Нырысетӥ интые потӥз но диплом басьтӥз Кезысь пищекомбинатлэн "Аромат" магазинэз, директорез Е. Л. Селиверстова. Сиён пӧрасьёс пӧлын но кезъёс ик вормизы. Нырысетӥ интыез басьтӥз Кез райполэн центральной столовоез. Пересьёслы юртто Можга ёросысь Вылын Юри школаысь нылпиос котьку юртто огназы кылем пересьёслы. Туэ тол вылтӥ трос лымы усиз бере, соос пересьёслэсь азбаръёссэс лымылэсь сузяса возизы. Тулыс пал - липетъёссы йылысь лымызэс куязы, али йӧ корало но люкаськись вуэз ӧръяло. Пересьёс пиналъёслы со понна тау каро. Удмурт калыклэн ог-огедлы вемеен юрттон сям вираз пыӵамын. Умой со, Вылын Юри нылпиос но сыӵеесь ик. "Уж бырйы пичи дырысеныд..." Озьы индыло Камбарка ёросысь дышетӥсьёс асьсэлэсь дышетскисьёссэс. Нош верам кылзы ужзылэсь медаз висъяськы шуыса, 15 мартысен 15 апрелёзь Камбарка городын но ёросын ялэмын профориентацилы сӥзем месячник. Отчы пырисько ваньмыз колледжъёс, училищеос но школа-лицейёс. Дышетскисьёсын пумиськыло пӧртэм специалистъёс, ужысь ветеранъёс. Уже интыянъя службаын нуназе бере ортчыло информацилы сӥзем нуналъёс. П. НИКОЛАЕВ. Вузаське Чурын потэм зӧк тӧдьы кирпич, асдунызлэсь дунтэмгес, 3000 пала. Вазиськоно таӵе телфонъя: 444-235, 444-263, 444-100. Выль депутатъёслы вазиськисько Ортчиз быръён нунал. Солы дасяськон котькыӵе амалъёсын мынӥз: кивалтон удыс троссэ бордаз кыске уга. Озьы ке но, калык берло дыре аслаз быръем адямиосызлы оскемысь малы ке но дугдӥз. Мугез улонлэн уродмемез бордын, дыр. Но со ялан таӵе луыны кулэ ӧвӧл. Мон сямен, депутатэ быръем эшъёсмылы умой-умой басьтӥськоно инфляциез дугдытон борды. Дыр вуэмын ни дунъёсты ас интыязы пуктыны. Малы соос нуналлы быдэ тэтчало, государство та ласянь кужымзэ воксё ыштӥз ни шат? Али ваньмызлы тодмо: приватизация ортчиз калык ваньбурен нимаз адямиосты узырмытон понна. Озьыен, ваньзэ сое, выльысь кутскыса, государстволы берыктоно, одӥг копейка но дун тырытэк. Калыклы дунзэ мед берыктозы Чубайслэн юлтошъёсыз. Соос ик кыл кутыны кулэ куашкатэм предприятиосмы но тус-тас карем оборудование понна. Нош ма дауртӥзы гурт удысэн! Музъем ужась нокинлы но кулэ ӧвӧл ни кадь: уд адӟы сое телевизорысь, уд кылы радиоысь. Таосыз быдэсак выемын политикае, калыкедлы пумит ожмаськонэз возьматонэ. Экран тырмытэмын боевикъёсын но мукет кырсь кино ужъёсын. Депутатъёс бордысь тросэз потэ, улонмес чылкытатон но. Адямиос жадемын ни со огпӧртэм рекламалэсь. Кӧня меда кыстӥськоз на йырмес шузимытон, тазалыкмы вылын шудон но коньдон поттон? Верано эмъюмзы сокем ӟеч ке, врач ачиз вералоз, дыр, кинлы ма тупа, кинлы мае басьтоно. Гажано депутатъёсмы, тӥ зэмен но калык понна ужаны Кун Кенеше лыктэмын ке, кылзэ солэсь куаразэ. Вань быгатонозэ лэсьтэ, улонмес капчиятон понна. Эн вунэтэ гуртэз но. Анатолий КРЕМЛЕВ, Можга районысь Пазял гуртын улӥсь. "Кырӟамзэс кылзыса,.. улыны мылкыд ӝутске", - шуиз шулдыръяськонэ люкаськемъёс пӧлыс огез ӝужыт пиосмурт. Вераськон мынысал ке таза адямиос сярысь, номыр паймонэз ӧй луысал. Но ортчем кӧс нуналэ тол келянэ пыриськыса концерт возьмато вылэм синтэмъёслэн огазеяськонысьтызы кырӟаны-вераны быгатӥсь усточиос. Бадӟым концертсы кема кыстӥськиз К. Маркс урамысь 431, 433, 419 коркаос вискын. Арган куарая кырӟан но эктон вискын радъямын вал кужымез мертанъя ӵошатсконъёс, нылпи шудонъёс. Вормисьёслы люкылӥзы кузьымъёс: шоколад, тэркыос но мукетсэ. Куазь кезьытгес ке но вал, шунды сиос ӵап дыраз пиштыны кутскизы, кырӟасьёслэсь ымныръёссэс мальдытыса но, дунтэк чаен бадӟым самоварез чиль-дол ворекъятыса но, угось вузкарон но, куноян но радъямын вал на. - Тау, огазеяськонмылэн кивалтӥсьёсызлы но, госсоветэ депутатэ кандидатмылы Галеевлы но, - шуизы тол келянэ лыктэм адямиос. Нош мыным тужгес но кельшиз ӝужыт пиосмуртлэн верамез: синтэмъёслы макем секыт улыны, озьы ке но соос шулдыръяськыны быгато. П. Скобелев. Милям гуртмы Куке-соку Дэбес ёросысь Тыловай палан куинь Четкеръёс вылэм: Вуж Четкер, Заречной Ита шур сопалась Четкер но Вылӥысь Четкер. Пересьёслэн верамзыя, нырысь кылдэм Вуж Четкер. Отын улэм кык семья - Галичанинъёс но Гуменниковъёс. Галичанинъёслэн трос нылпизы луэмен яна потӥллям. Музъем кулэен соос гурезь йылэ пичи гинэ Ил шур дуре интыяськиллям. Тӥни озьы со семья кылдытэм Горд Яр (Гордшур) гурт но Тупал Четкер гурт ЪИЪ дауре Глазов палась музъем утчаса кык Поздеев вынъёс лыктӥллям. Вылӥсь Четкер шулдыр интые пуксемын: Бадӟым Пурга черке но ветлыны матын, сюрес но ӵошкыт. Музъемзы бадӟым ке но вылэм, удалтӥсьтэм, горд сюй. Соин ик туж куанер улӥллям. Нош Вуж Четкерын улонлы ӝожтӥськыса ӧз улэ. Шур бадӟым, возьёс чебересь, ю-нянь удалтэ. Вӧсяськыны черке калык ӧзгес ветлылы. Вал асьсэлэн куалазы, вӧсяськон тэльзы но. Отчы али ке но кӧберасько пыраны, пичи дыръя матаз но уг лэзё вал. Нэнэ пери, пе, шуккоз шуэ вал. Дыр ортчыса, Вылӥсь Четкере пуктӥллям пу черк. Черкен ӵош ик церковно-приходской школа но усьтӥллям. Гурт но будыны кутскем. Кык ӟуч семья но лыктэм: Шельпяковъёс, Ивонинъёс. Соос ик вӧй шуккон (маслобойка) но лэсьтӥллям. 50-тӥ аръёсы но ужаз на со. Али вакытэ Вылӥсь Четкер тодмантэм воштӥськиз: клуб, школа, магазин, медпункт. Трос ульчаос кылдӥзы. Гуртамы туж данъяськымон адямиосмы но вань: Николай Кардапольцев, Александр Перевозчиков, Алевтина Галичанина но мукетъёсыз. Мед будоз Четкер гуртэ, мед азьланяз но данъяськоз аслаз калыкеныз, мед быръёз 4-тӥ апреле тодмо, дано удмурт адямиез. Ю. ШКЛЯЕВ. Умоезлэсь куштӥськиськом, выльзэ шедьтытэк Куке-соку ужамез лыдъяллязы трудоденен. Бӧрысь со ужазинлыкез ӝегатыны кутскиз. Солэсь куштӥськизы. Тӥни соку азьмынӥсь хозяйствоос коньдон тырыны кутскизы, хозяйственной расчётэз уже кутыса. Ужам понна коньдон тыронэ Шаркан районын нырысь ик выжиз "Идеал" колхоз (соку председателез К. И. Пашков, главной бухгалтер М. П. Кочуров вал). Колхозникъёс толэзьлы быдэ басьтылӥзы аванс (70 процент), нош кылемзэ соослы сётылӥзы арлэн пумаз лэсьтэм йылпумъянъёсъя но колхозын кызьы ужамез чакласа. Таӵе амалэн уждун тырылӥзы ваньмызлы: председательлы но, выж миськисьлы но. Но ӝоген та амалэн тырмымтэосыз но шараяськизы, малы ке шуоно, уждун тырыку шуг луиз лыдэ басьтыны фермаослэсь, бригадаослэсь, нимаз механизаторъёслэсь кызьы ужамзэс, кӧня продукция, кыӵе ӟечлыкен поттэмзэс. Соин ик 1959-тӥ арын хозяйственной расчётэз уже пыӵатоно луизы. "Идеал" колхозысь главной бухгалтер М. П. Кочуров хозрасчётной заданиез котькуд шофёрлы но трактористлы вуттылӥз. Ужъёсты лыдъяллязы автомашиналэн, тракторлэн маркаез вылысь. Лыдэ басьтылӥзы кӧня эстӥськон кутэмын, кӧня гектар музъем гыремын. Механизаторъёслэсь арлы кутэм заданиоссэс кварталъёсъя люкылӥзы, озьы ик лэсьтылӥзы йылпумъянъёс но. Фермаослэн заведующийёссы но специалистъёс котькуд ужасьлэсь толэзьлы заданиослэсь кызьы быдэсъяськемзэс туж эскерыса возизы. "Колхозлэн правлениез азьын отчет лэсьтылӥзы бригадиръёс, механикъёс, специалистъёс но фермаослэн заведующийёссы.Татын соку ик кыре потылӥзы шекъёс, син азьын адӟиськылӥз, кытын ваньбур умойтэм кутӥське, кытын шыръяське. Таӵе хозрасчёт ассэ умоен гинэ возьматӥз, малы ке шуоно, котькудӥз аслэсьтыз ужамзэ чакласа возьыны быгатӥз. Пудо сиёнъёсты, запчастьёсты шыръям но ремонтын ӧжыт сылэм понна ужасьёслы премия тыриськылӥз. Шыръям ваньбурлэсь кызь вить процентсэ сётылӥзы ужез быдэсъясьлы, нош ваньбурез мултэс быдтэм понна янгышам мурт кызь вить процентсэ аслаз кисыысьтыз тыроно луылӥз. Бен таӵе учыръёс ӧжыт вал. Хозрасчёт вань механизаторъёсты, пудо утисьёсты но специалистъёсты лыдъяськыны дышетӥз. Тӥни озьы хозрасчёт дышетӥз ваньбурез утьыны, учётэз но отчётностез тупатыны, дисциплинаез юнматыны, машинаосты но тракторъёсты пайдаё уже кутыны. Механизаторъёс но шор ёзысь кивалтӥсьёс вань ыштонъёссэс пыр-поч лыдъяны кутскизы. Тросгес ужаны кутскизы валэн. Пичи грузъёсты тракторен яке автомашинаен нуллон дуно усьылӥз. Вань колхозникъёслы арлы быдэ тупатъяськылӥз кӧня нунал ужаны потан норма. Ваньмыз со шӧдӥськиз колхозъёслэн улонзы вылын. Тани басьтом азьвыл "Искра" колхозэз (бӧрысьгес со луиз "Сюровайский" совхоз). Азьло витьтонэтӥ аръёсы районын таӵе веран вал: "Кин, пе, Сюрсовайын ӧз улы, со куректонэз ӧз адӟы". Но тани та колхозэ 1963 арын председателе бырйизы Степан Гаврилович Смолинэз. Со рос-прос басьтӥськиз хозрасчётэз пыӵатон борды. Степан Гаврилович специалистъёсыныз ӵош кык-куинь пол арняен-арняен выль ужлы дышетскиз. Та амалэз уже пыӵатыны быгатӥз. Озьы ик кык-куинь ар куспын "Искра" колхоз син азьын юнмаз. Воштӥськонъёс кутскизы сюресъёс лэсьтон бордысен. Сюрсовайысен Шарканозь сӥзьыл-тулыс тракторен но ветлыны туж секыт вал. С. Г. Смолин 1963 арын асьсэ бусыосысьтызы ик шедьтӥз векчи изэн узыр инты. Толалтэ со изэз сюрес дуре ворттӥзы, выжъёсты тупатъяны тырмыт коръёс но мукет лэсьтӥськон материал дасязы. Со сюресэз калык озьы ик нимаз - "Смолинлэн трактэз". Сюрес умоямен валче вырӟиз лэсьтӥськон уж. Пичи гуртъёсысь колхозникъёс пумен улыны но ужаны Сюрсовае выжизы. Нокин но со пичи гуртъёсты ӧз быдты, асьэос колхозникъёс отысь кошкизы. Сюрсовайын совхоз кылдэм бере но ужъёс умой мынӥзы. Экономика ласянь ляб "Звезда" колхозэз совхозэн огазеязы. Степан Гаврилович та сяна но трос выльзэ, умойзэ пыӵатӥз. Берлогес со висеменыз совхоз кивалтэтысь кошкиз, кӧня ке улыса кулӥз. Со кошкем бере совхоз лябомыны кутскиз. Хозрасчётлэн пайдаез сярысь "Идеал" колхозысь азьло шофёр А. Ф. Долганов тазьы вера: - Воткинскысь яке Ижевскысь ми ноку но буш ум кошкиське вал. Райпоысь, заготконтораысь но мукет предприятиосысь утчаллямы нуон яке ваён грузъёс. Нош берло, реформа шуонъёс кутскемен, хозрасчётлэсь палэнскизы 16 грузовой автомобильёсын но грузъёсты нуыны-вайыны ӧз ни вуылэ. Малы бен быриз хозрасчёт? Меӵак ке верано, сое быдтыны юрттӥз административно- бюрократической аппарат. Реформаосты кутскем бере колхозъёсты куашкатӥзы - соосты люкылӥзы пӧртэм акционер обществоослы, товариществоослы, кооператоръёслы. Табере, пе, калыкез сюдоз фермер. Тӥни озьы колхозъёс но совхозъёс син азьын куашказы. Техника вужме, лэсьтӥськон чылкак дугдӥз. Хозрасчёт сярысь но вераськон чалмиз. Берло толэзьёсы районысь выль администрация, озьы ик "Удмурт дунне" газет но вераськон поттылэ хозяйствоосын выльысь хозрасчётэз пыӵатон сярысь. Мон солы шумпотӥсько. А. Вахрушев, Шаркан черкогурт. Ужало, уг ӝожтӥсько Акциосын "Шаркан-трикотаж" огазеяськон миым 2,2 миллион манет тыр ваньбур поттӥз. Предприятилэсь луонлыксэ чакласа, со уно ӧвӧл - ӝыныезлэсь уноез станокъёс али чалмыт сыло. Выльдӥськон тӧлъёс предприятиез зуркато, нош ужась калык уг сётскы - выль амалъёс утча. Кылсярысь, усьтӥзы нянь пыжонни - коньдонэн пичи ке но югдур умояз. Нош татысь керттэм дӥсез вылӥ дунъязы ни Башкириын но Пермь улосын улӥсьёс - кунгож сьӧрысь ваемлэсь умоенгес лыдъяло. Г. ЮСАЕВЛЭН туспуктэмъёсыз. Чорыгасьёс ӵошатскизы нырысьсэ Вавожысь ӵыпет вылын таӵе ӵошатскон ноку ӧй вал на. Татын радъямын вал йӧ улысь чорыгъёсты кутылонъя нюръяськон. Кык час кыстӥськиз со. Котькыӵе ӵошатсконын сямен ик татын но вал судьяос но, кузьымъёс но. Йӧ улысь самой бадӟым чорыгез поттыны шуд усиз Виктор Шаркуновлы, нош самой пичи юшпи шедиз В. М. Максимовлы. Дораз ваньмызлэсь трос чорыг нуиз Ю. Р. Чувашов. Ӵошатсконын нырысетӥ интые потӥз пӧйшурасьёслэн но чорыгасьёслэн огазеяськонзы, кыкетӥ интыын гослесхоз, куинетӥын - ёрос центрысь огазеям команда. П. Николаев. УЛОН-ВЫЛОН Ёрмись пӧлын ёрмись вань Тырме-а тӥляд семьядылы коньдон шуыса, али кинлэсь ке юаны ик уд дӥсьты. Нокинлы но уг тырмы. Августэ луэм кризис бере тросэз ёрмытэк улӥсь семьяос но чутрак куанермизы, нош куанеръёсыз кураськон калэ вуизы уга. Специалистъёслэн лыдъямзыя, Удмуртиын али 30 процент куанер улӥсьёс лыдъясько. Калык шуэ: тросгес. Кызьы бен тодо семьялэсь ёрмемзэ-ёрмымтэзэ? Ёрмон сярысь котькудӥзлэн валанэз пӧртэм ук: кинлэн ке шыдэз кизер, кинлэн ке зарни жильыез вакчигес. Визьмо муртъёс академикез Павловез тодазы ваизы: кулонтэм понна адями сиськыны кулэ. Лыдъязы-чотазы, ичизэ кӧня коньдон кулэ сиськыны, пыдвыл-штани басьтыны, мунчое ветлыны но выт тырыны. Люкаськиз 773 манет (туэ январь-февраль толэзе). Кин кӧня коньдон быдтэ кӧтсэ тырыны, ачиз тодэ: кинлы ке 300 манет но тырме, кинлы ке 3 сюрс манет ӧжыт потэ. Специалистъёслэн чотамзыя, ужась пиосмуртъёс толэзяз - 510 манет, нылкышноос - 452 манет, пенсионеръёс 411 манет сиськыны быдто. Малы пенсионеръёслэн ӧжытгес сиемзы потэ, уг тодӥськы - вылам ӧй шӧды на. Зэм, туала улонъя сомындазэ но соос сиё шуыса, оскыны шуг. Тодады вае ай, ку тӥ берлозэ чорыг басьяды. Нош яблок? Нош тодӥськоды-а, толэзяз кӧня но мар адями сиыны кулэ, мугорзэ сютэм курадӟытонтэм понна? Тани кыӵе "корзина" чакламын адямилы Россиысь Наукаосъя академиын: 1 килограмм чорыг; 2 килограмм сӥль; 11 курег пуз; 800 грамм кӧс вӧй яке маргарин; 2 килограмм сахар песок яке мукет ческыт сиёнъёс; 2 килограмм емыш; 13 килограмм нянь; 10 килограмм картофка; 8 килограмм мукет бакча сиёнъёс; Ӝожтӥськымон ӧвӧл кадь. Но асьмелэн котьма вылын шыръяны дышем кӧтъёсмы ваньзэ сое сиыны уз дӥсьтэ. Ну, картофказэ-няньзэ сиём ке шат. Нош семьяяд ньыль кузя ке, 8 килограмм емыш сиёд-а? Самой дунтэм яблок али 20 манетэн. Иське, кӧня луэ 8 килограммез? Ой, 160 манет - пал каталы тырме ни (кытысь ке висъяно ук пыдкутчанлы но, гольык пыд уд ветлы). Улыны чидамон чаклам коньдонъя (прожиточной минимумъя) дӥськутлы, майталлы- порошоклы, корка котырлы кыле 200-300 манет. Соин ик холодильник ке басьтӥды, 20 ар мед ужалоз, телевизорды - 15. Выл дӥсез воштоно 8 арскын огпол, нош пыдкутчанэз 3 ар нуллоно, дырызлэсь вазь пӧсьтӥз ке, мастерскойын тупатъяны кытысь ке ватсаса коньдон шедьтэ - минимум быриз. 57 манет кылиз на, но со налог тырыны. Арня нуналэ кинэ ке куное ӧтемды потэ вал, маин утялтом, шуиськоды? Паскаозь ӧтчаськытэк чидалэ яке кунодэс кӧс чаен алдалэ. Серекъян серекъянэн. Бӧрдымонэз соиз - 770 манет али тросэз уг басьто ай. Пичиез (минимальной) уждун кризис бере, ӝыны ар ортчыса но, одӥг копейкалы но ӧз буд уго. Кызьы ке вал 83 манет 49 копейка, туннэ но озьы ик. х х х Одӥг муртлы кӧня коньдон усемъя, валаны луэ, кыӵе улэ соиз яке таиз семья. Асьмелэн узырлыкъя вить пӧртэм семьяосты висъяло: - туж ёрмисьёс (Д < ПМ); - куанеръёс (ПМ < Д); - шоро-куспо улӥсьёс (1,8 ПМ < Д < 3,6 ПМ); - умой улӥсьёс (3,6 ПМ < Д < 5,4 ПМ); - узыръёс (Д > 5,4 ПМ). Д - одӥг муртлэн доходэз. ПМ - прожиточной минимум. Лыдпусъёсты учкыса, йыр сураське: шоро-куспо улӥсьёслэн семьяязы одӥг муртлы кык прожиточной минимумлэсь ятыр коньдон (1500 манет пала) усе, нош сюрс гинэ ке, со куанер ни. Асьмелэн валанмыя, соос "узыр" куанеръёс. Удмуртиын сыӵеос кылем арын 2,7 процент вылэм. Ёрмисьёс - 30 процент, узыръёс - 10. Иське, ӝыныез калык умой улэ? Котыр учкыса, озьы уд но шуы кадь, но лыдпусъёс инмысь уг кутӥсько. Мукет ужпум - ӵошатон бордын. Узырмес-куанермес пӧртэм сямен дунъяськом, асьмеос но Запад. Зарезь сьӧрысь социологъёс верамъя, асьме страна - туж куанер. Кылсярысь, Америкаын семья табышысьтыз сиськыны (ресторанъёстӥ ветлэмзэс но лыдэ басьтыса) 16 процентсэ гинэ быдтэ, ӝыныезлэсь трос коньдонзы сиёнлы ке быре, куанер улӥсь лыдъяське ни. Россиысь улон-вылонэз чакласа, соос таӵе малпанэ вуизы: куанеръёс татын но огкадесь ӧвӧл, ёрмись пӧлын ёрмисез вань. Туж ёрмыса уло, пе, 6 процентэз гинэ. Та адямиос, зэмзэ но, уг сиё сӥль-чорыг, емыш, ческыт сиён, уг басьяло дӥськут. Кышкало куноослэсь (номырин утялтыны), асьсэды но ӧтчась ӧвӧл. 13 процентэз куддыр тодо сӥльлэсь шӧмзэ, пӧсьтэмезъя тыршо дӥськут басьтыны. Но книга-газет басьяны, театре, куное ветлыны коньдонзы уг тырмы ни. 25 процентэз шоро-куспо сиське. Пиналъёссылы веръяны емыш, конфет басьяло, арняяз огпол-кык пол ке но сӥльын пӧрасько. Но шугъясько дӥськут, корка котыр (мебель) басьтыны. Мукетызлэн 34 процентэзлэн "мултэс" коньдонэз кылдэ ни. Трос уд шуы, но соос кема малпаськытэк басьто сур яке шоколад, куноостӥ, театръёстӥ ветло. Но уг дырто дуногес телевизор яке пылесос басьтыны, арлы быдэ шубазэс вошъяны. 14 процентэз шер ветло ресторанъёстӥ, но доразы ческыт сисько, пунэмаськытэк уло, ӟеч дӥсясько, но машина яке компьютер басьтыны коньдон люканы шугъясько. 8 процентэз дуно арбериос басьяло, мар мылзы потэ, сое сиё, коньяк юо, шоголь дӥсясько. Но кыӵе ке шормуӵъёсы шутэтскыны мынон азязы лыдъяло-чотало: яке Канары, яке выль иномарка. Ну, таоссэ огпала выжемъёс гинэ, шуом ини. Кыӵе куанер тон, ресторанъёстӥ ветлӥськод ке? Кин туж куанер, со 6 + 13 процентэз. Куанер улон соослэн улон сямазы пыӵа? Кӧтсы тыре ке, умой ни. Нош ма карод? Уж ӧвӧл, лушкаськыны ваньмыз уг быгато. Уже интыянъя службаослэн пыкылэмзы потэ: ёрмись муртъёс, пе, пумит луо пичи уждунэн ужаны. Шонер лэсьто. Ассэ гажась кыӵе мурт 100 манет понна ужалоз? 50 манетсэ ужад мынон понна билетлы сёт, 42-сэ - нылпи сад понна (пиналдэ доре огназэ уд кельты ук), 8 манетэз кыле на столовойын огпол сиськыны. Нош ужаны ветлытэк, билет кулэ ӧвӧл, нылпиед бордад, кӧттэ чаен но алдалод - мучолоен шонаськем бере кадь зол сиемед уз поты. Мукетъёсызлэн пыкылэмзы потэ: юо, соин ик куанер уло. Вань юисьёс, но со 6 процентэз, дыр. Мукетъёсыз тыршо ёрмон гуысь потыны, но уг быгато. Соос пӧлын пенсионеръёс, пал кышноос, висись муртъёс, ужтэк кылемъёс, огкылын вераса, кужымтэм адямиос. Ёрмо ужасьёсыз но. Угось гурт хозяйствоын, культура, искусство, дышетон удысъёсын тыршисьёслэн уждунзы ӝыны прожиточной минимум сяна ӧвӧл. Сое но дыраз уг басьяло. Статистикая управление толэзьлы быдэ калык пӧлын улон-вылонъя юалляськонъёс ортчытъя. Пӧртэм табышен семьяос нуналлы быдэ кытчы коньдон быдтэмзэс гожъяло нимысьтыз журналэ. Нянь, пу, эмъюм басьтыны, выт тырыны яке йыр ӵышкыны гожтэмъёс вӧзын вань таӵеосыз но: одӥг куное вал - сомында тыр утялтӥ; черке ветлӥ - сомында тыр сюсьтыл басьтӥ. Статистъёс али выль юалляськон дасяло: оске-а калык азьланяз улон-вылон тупатсконлы, кызьы секыт югдурысь потоно. Мон дасо муртлэсь гинэ юалляськи. Огез гинэ "оскисько" шуиз. Мукетъёсыз улонлэн уката урод луонэзлэсь кышкало. Но оско асьсэлы асьсэос гинэ. Кызьы шуод ай, милемлы, пе, толэз ортчытыса, тулысэз чидано вал. Отӥяз вож турын мычиськоз, узы-боры кисьмалоз, куазед гинэ медаз пӧртмаськы. З. РЯБИНИНА. ПС. Автор тау каре Удмурт Республикаысь Статистикая кун управленилы, материал дасяны юрттэмез понна. Прожиточной минимумъя басьяськон "корзиная" но семьялэн доходъёсызъя лыдпусъёс дасямын Удмуртиысь Ужъя кун комитетэн, нимысьтыз методикаос вылэ пыкиськыса. Элькунын гурт спортсменъёслэсь ВИИИ гужем но ВИ тол шудонъёссэс ортчытон сярысь Удмурт Элькун Кивалтэтлэн Постановлениез 1999 ар 4 март Ижевск город � 280 Физкультуруая но спортъя ужез азьланяз но ӟеч радъян, "Удмурт дунне" газетлэн призэз понна тол ӵошатсконъёсты но гурт спортсменъёслэсь гужем шудонъёссэс ортчытонъя йылолъёсты утён но паськыт вӧлмытон, гуртъёсын спортъя базаез юнматон вылысь, Удмурт Элькун Кивалтэт пуктэ: 1. Завьялово черкогуртын 1999 арын июнь толэзе ортчытоно ВИИИ гужем шудонъёсты но Шаркан черкогуртын 2000 арын февраль толэзе ВИ тол ӵошатсконъёсты. Юнматоно Завьялово черкогуртын спортъя ВИИИ гужем шудонъёсты дасянлы но ортчытонлы, соцкультбытъя объектъёсты но спортъя базаосты лэсьтон-тупатъянлы чаклам сметаез но Шаркан черкогуртын ВИ тол ӵошатсконъёсты дасянлы но ортчытонлы, соцкультбытъя объектъёсты но спортъя базаосты лэсьтон-тупатъянлы чаклам сметаез. 2. Удмурт Элькунысь Физкультурая но спортъя кун комитетлы (Касихин А. М.), Завьялово но Шаркан ёросъёсысь администрациосын (Баталова Г. В. но Прохоров А. А.), Удмурт Элькунысь Гурт улонъя но сиён-юонъя министерствоен (Жуйков В. И.), Калыкез дышетонъя министерствоен (Лисина А. М.), Культурая министерствоен (Чайников Г. В.), Егитъёсын ужанъя кун комитетэн (Гальцин А. И.), "Удмурт дунне" газетлэн редакциеныз (Шкляев А. П.) ӵош дасяно программа, проектъя но сметая документъёс, радъяно спортъя сооружениосты но соцкультбытъя объектъёсты лэсьтон- тупатъянэз, спортсменъёсты сюдонэз но улон интыос дасянэз. 3. Удмурт Элькунысь Коньдон ужпумъёсъя министерстволы 1999 арын нырысетӥ паларе Удмурт Элькунысь Физкультурая но спортъя кун комитетлы но Завьялово ёросысь администрацилы коньдон висъяно, гурт спортсменъёслэсь ВИИИ гужем шудонъёссэс дасянъя но ортчытонъя, соцкультбытъя объектъёсты но спортъя базаосты лэсьтон- тупатъянъя юнматэм сметаез лыдэ басьтыса, министерствоослэн но ведоствоослэн бюджетазы чаклам коньдон чотын. 1999 арын кыкетӥ но куинетӥ паларъёсы коньдон висъяно Шаркан ёросысь администрацилы соцкультбытъя объектъёсты но спортъя базаосты лэсьтон-тупатъянлы, ВИ тол ӵошатсконъёсты дасянлы но орчытонлы. 4. Та постановленилэсь быдэсъяськемзэ эскероз Удмурт Элькун Кивалтэтлэн Тӧроезлэн воштӥсез А. М. Лисина. Удмурт Элькун Кивалтэтлэн Тӧроез П. Н. Вершинин. Шудон азьланьтӥське Ижевскысь "Ижпланета" клубын шахматэн ӝог шудонъя нюръяськон ортчиз. Одӥг партия 25 минутозь кыстӥськыны кулэ. Отчы пыриськиз 50 шудӥсь, пӧлысьтызы 4-ез спортъя мастер но 11 мастере кандидат вал. Мастере кандидат Александр Абашев кылем толэзе монтажной техникумез йылпумъяз, нош табере аслыз ачиз кузьым дасяз - городлэн чемпионэз луиз. Соин ӵош нырысетӥ но куинетӥ интыосты люкизы Удмуртилэн трос пол чемпионъёсыз спортъя мастер Владимир Гребенкин но мастере кандидат Анатолий Семакин. Соос 9 луоноез пӧлысь 7 очко люказы. Ӝыны очколы бере кылизы мастере кандидат Сергей Лыков но электромеханической заводысь инженер Виталий Полетаев. Воргоронъёс радын ӵошатскизы 6 нылкышноос но. Тужгес но кужмоен ассэ возьматӥз мастере кандидат, технической университетын дышетскись Елена Кычанова. Со 9 луоноез пӧлысь 5,5 очко люказ. Алигес Елена Подмосковьеын ортчем шахматъя ӵошатсконэ пыриськиз. Отын со 9 луоноез пӧлысь 4,5 очко люказ. Дышетскись пиналъёс пӧлын кузьым басьтӥзы Андрей Окулов но Егор Васильев. Соос 9 луоноез пӧлысь 5,5 очко люказы. Нош геолог-ветеранъёс пӧлын вормисе потӥз мастере кандидат шахматэн шудонъя федерацилэн кивалтӥсез Вячеслав Пикулев. И. Вельтмендер. Правительствоысь иворъёс Быръёнлы йылпумъянъёс Правительстволэн аппаратной кенешаз республикаысьтымы Бырхёнъя комиссилэн тӧроез А. Тубылов ивортӥз Кун Кенеше депутатъёсты быръёнлэн йылпумъянъёсыз сярысь. Правительстволэн тӧроез П. Вершинин выль быръем депутатъёслэсь ужаны луонлыкъёссэс но быгатонлыкъёссэс вылӥ дунъяз, соос шаермы азьын сылӥсь ужпумъёсты улонэ пыӵатозы шуыса оскемзэ вераз. Со сяна, пусйиз П. Вершинин, Правительство лыдэ басьтыны кулэ вано куронъёсты, кудъёсыныз бырйисьёс депутатъёслы вазиськизы. Чакламлэсь вылтӥ Удмурт Республикаысь Коньдон ужпумъёсъя Министерство ивортэмъя, нырысетӥ кварталэ республикалэн бюджетаз коньдон чакламлэсь вылтӥ вуиз. План 112 процентлы быдэстэмын. Таӵе вормон басьтэмын, коньдон ужпумъёсын вырись но налог бичась службаос ӟеч ужамен. Тулыс ужъёс азьын Тулыс ужъёсты ортчытыны 6 сюрс тонна эстӥськон висъямын. Кылем арын сентябре гуртъёсын ужасьёс уждунзэс сизьым толэзьлы беромыса басьтӥзы ке, та вакытэ соос уксёзэс кык но ӝыны толэзь возьмало. Ву медаз вайы изъян Правительстволэн Кышкыт югдуръёсъя комитетэз ивортэмъя, туэ шуръёс ӧръяськозы 25- тӥ апреле - 2-тӥ мае. Та вакытэ кышкытлыклэсь утиськон понна, лэсьтӥськон материалъёс, адямиосты вулэсь утён арбериос тырмыт дасямын. Удмуртилэн но Россилэн бюджетъёсысьтызы талы коньдон висъямын. Уждун йылоз Правительстволэн кенешаз эскеремын бюджет чотын ужасьёслы уждунзэс будэтон, нюлэсъёсты тылпуослэсь, висёнъёслэсь утён сярысь ужпумъёс. Правительстволэн Тӧроезлэн секретариатысьтыз пресс-центр. ПОЛИТИКА НО ЭКОНОМИКА Китай сайказ Кылем даурлэн пумаз Наполеон Западлы шуиз вал: "Китаез эн исалэ, кемагес мед кӧлоз. Со сайказ ке - быдэс дунне зуркалоз". Кылъёсыз зэмазы: Китай сайказ, туннэ быдэс дуннеез паймытэ. Рынок амалэ выжыса, шӧдскымон будӥз ваньбур поттонэз. 1996 арын Китай кутэ 2010-тӥ арозь странаез азинтонъя программа. Отын пусъемын: адямилы быдэ ваньбур поттонэз 4 ар куспын, 1980-тӥ арен ӵошатыса, 4 поллы будэтыны, берло 10 арзэ, 2000-тӥ арен ӵошатыса, 2 поллы. Йырез поромытӥсь лыдпусъёс! Но страналэн ужазинлыкез шоры учкыса оскиськод - одно ик быдэсмозы, матысь дыре ик Китай быдэс дуннеын валтӥсь интые потоз. Солэн экономикаез котыр ласянь юнма. Нош асьмелэн? Жаляса верано, рыноке выжон сюрес Россиез берлане кыскиз, азинскем интые, производствоез быдэсак сямен куашказ. Солы кутскон сётӥз 1991 ар. Ас вапумаз Россия нырысьсэ кураськисьёс радэ султӥз. Власть доры вуэм демократъёслы дышетсконо вылэм бускельёсмылэсь, но соос быдэсак оскиськизы Америкалы, Западлы. Малы Китай сярысь ӧжыт гожъяло иворъёсты вӧлмытон удысын ужасьёс? Талэн мугез, мон сямен, трос гинэ. Китай, выльдӥськон сюрестӥ мыныса, ассэ бадӟым социалистической державаен лыдъя. Демократъёсмылы социализм кыл ик ӵемоназы мертче ни. Дунне азьын соос кӧня ушъяськизы, СССР-ен ӵош социализмез но коммунизмез пыраклы сюе согим шуыса. Озьы бере, кызьы Китаез ушъялод на? Соин артэ ик - Вьетнам, таиз но капитализме берытсконлы пумит. Россилэн кивалтӥсьёсызлы валамон ук: рынок амалэн ужась экономикаез кылдытыны луэ социализм вакытэ но. Тӥни малы кышкало калыклы шонерзэ вераны. Чылкак мукет сямен учко Россиын кылдэм югдур шоры КНР-лэн кивалтӥсьёсыз. Меӵак вераса, соослы асьмелэн амалъёсмы уг кельшо. Табере ӵошатом: мар умоез но мар уродэз кык странаослэн быръем сюресазы? Китайын умой-умой басьтӥськизы производствоез выльдон борды, калык ваньбурез нимаз кузёослы люкылытэк. Гурт удыс но пичи ужбергатон быдэсак сямен выт тыронлэсь мозмытэмын вал, приватизация валтӥсь интые ӧз поты. Татын бадӟым саклык висъязы дун пуктонлы но иностранной инвестициосты кысконлы. Оглом пусйыса, рыноке выжон шедиз государстволэн кужмо ки улаз. Тӥни ма бордысен кутскиз трос ваньбур поттон но ӝог азинскон. Рынок котькудзэ узырмон сюресэ уг вутты. Дунне вылысь ог 200 государство пӧлысь 24-ез гинэ юнгес экономикаен кунъёс пӧлы пыре, нош кужмоосыз радэ - 7-ез. Тӥни кытчы кошке "куинетӥ дуннелэн" инкуазен сётэм узырлыкез, ваньбурез. Калык хозяйствоез выльдонын Китай нимысьтыз инты висъя иностранной капиталэз валаса но быгатыса кутонлы. Кунгож сьӧрысь басьтэм коньдон социализмлэсь азинсконзэ уг ӵогы, малы ке шуоно, солэн инъетэз кужмо - ас вылаз капиталистэз но ужатыны быгатэ. Отысь пайда поттэ на. Ма шуод, Китай ас сюрессэ шедьтӥз, йыг-йыг вамышъёсын азьлане мынэ. Бускельмы шоры синмаськыса но вожъяськыса учкисько. Валамон, газет бамын солэсь вань вормонъёссэ уд возьматы, огпол кутскыса, соос сярысь уд вера. Главноез, мон малпамъя, Китай быдэс дуннелы возьматӥз: шунды улын ваньмызлы инты тырме, ог-огеныд нюръяськытэк, ог-огдэ вӧсь карытэк обществоез утьыны луэ. Та бадӟым страна "куинетӥ дуннелы" азьлане мыныны вож тыл ӝуатӥз, соин ӵош вераз - тужгес но ӟечез сюрес - социализм. Капитализмен ӵошатыса, адямилы будыны но улыны со тросгес луонлык сётэ. Веранме йылпумъяса, нош ик берытскеме потэ Россиысь туала реформаторъёсмы пала. Котьма ке но, малы соослэн кутскем ужзы ӧз пишмы? Валэктонэ одӥг: экономикаез ӝутон бордын соос ӧз выре, выризы социализмез выжытэк быдтонэн-лёганэн, идеологиез воксё мукет пала берыктонэн. Туж кышказы, малпанъёссы уз быдэсме шуыса. Соин но, вылды, кырныжъёс музэн, калык ваньбурез дыртыса, ог-огзэс азьпалтыса, ас понназы люкылӥзы. Тӥни озьы мынӥз выльдӥськон быдэс Россиын. Солэсь бервылъёссэ бурмытыны трос аръёс выром на: тырмоз пиналъёсмылэн пиналъёссылы но. Нош реформаторъёсмы кӧчозы банкъёсы тырем коньдонзы сьӧры, асьсэлэн виллаосазы но дворецъёсазы. И. Образцов, история наукаосъя кандидат. Нылпи понна толэзьлы быдэ сётӥськись кун пособиосты 1999 арын тырон сярысь Удмурт Элькун Кивалтэтлэн ПОСТАНОВЛЕНИЕЗ 1999 ар 22 март Ижевск город �322 Удмурт Эдькун Кивалтэт пуктэ: 1. Удмурт Элькунысь Калыкез улон-вылонын утёнъя министерстволы нылпи понна кун пособисты тыронэз радъяны, "Элькунлэн 1999 арлы бюджетэз сярысь" Удмурт Элькунлэн Законэныз чаклам ассигнованиосты лыдэ басьтыса. 2. Удмурт Элькунысь Коньдон ужпуыъёсъя министерстволы аслыэ чаклано-быръёно предприлтиосты но организациосты, нылпилы толэзьлы быдэ сётӥськись кун пособиосты тырем чотын ог-огеныд зачёт дыр элькун бюджетэ выт (налог) тырон амалъёсты. 3. Элькунысь городъёслэн но ёросъёслэн администрациоссылэн тӧрооссылы нылпиос понна кун пособиосты тырыны ӵектоно интыысь бюджет чотын, со понна кутэм коньдонэз бӧрысь элькун бюджетэ пыртыса. 4. Предприятиослэн, учреадениослэн но организациослэн кивалтӥсьёссылы дэмлано та предприлтиосын ужасьёслы нылпизы понна кун пособиез тырыны элъкун бюджетэ выт тырон чотын, доходъя но вузкаронысь вытэз вератэк. 5. Та постановленилэсь быдэсъяськемзэ эскерыса возёз Удмурт Элькун Кивалтэтлэн аппаратысьтыз Социальной азинсконъя управленилэн семья ужпумъёсъя, тазалыкез но калыкез улон-вылонын утёнъя отдел. Удмурт Элькун Кивалтэтлэн Тӧроезлэн нырысетӥ воштӥсез А.Г.Злобин. Данъяськисько 26-тӥ мартэ шаермы пусйиз тодмо удмурт этнографлэсь, история наукаосъя кандидатлэсь, Удмурт Элькунысь наукаосъя дано ужасьлэсь Людмила Степановна ХРИСТОЛЮБОВАЛЭСЬ куатьтон арес тырмонзэ. - Вордӥськи 1939-тӥ арын Ижевск ёросысь (али со Дэри ёрос луэ) Кионгуртын,- кутскиз веранзэ Людмила Степановна.- Бырись гуртъёс пӧлы пыртэмен быдтэмын со. Гуртамы кызь вить - куамын корка вал. Школамы ӧвӧлэн, пичи классъёсын дышетскыкумы ветлӥмы кык иськемын сылӥсь Каравай-Норья гуртэ. 5-тӥ-7-тӥ классъёсын - ньыль иськеме - Юськи черкогуртэ. Дышетскыны туж тунсыко потэ вал. Школаез йылпумъяме бере пыри Ижевск педучилищее (гуртэлы матынгес шуыса). Но татын ар сяна дышетскыны ӧй вуы - педучилищеез пытсазы, нош группамес келязы Дэбесэ. Лымшор палась лыктэм куать муртэ - Можга педучилищее. Можгалан куинь ар дышетски. Шумпотӥсько: малы ке шуоно, кызьы ке пиналъёсты дышетонын, озьы ик удмурт интеллигенциез дасянын туж бадӟым инты басьтэ со. - Малы бырйиды дышетӥсьлэсь сюрессэ? Анай-атайды косэмъя-а? - Соослэн педучилищее лэзён сярысь малпанзы ӧй вал, но дышетэмзы потэ вал. Семьяямы ми вить кузя быдэсмимы. Бадӟымез апае дышетскыны пырем вылэм Ижысь дошкольной педучилищее. Но война кутскемен, анай секыт висемен (тятяе фронтэ кошкемын вал), дышетсконзэ куштоно луиз. Берло йылпумъяз счетоводъёсты но бухгалтеръёсты дасясь курсъёсты. Нырысетӥез агае йылпумъяз Ижысь коммунально-строительной техникумез (али монтажной нимаське). Отын дышетскыкуз ик аэроклубе ветлэ вал но, сое басьтӥзы лётчикъёсты дасясь училищее. Отын дышетскыса, ар но ужаса ӧз вуы - бырыны шедиз. Сузэреным дораз ветлыкумы (агае быриз Крымын) учким шайгузэ. Тодӥм, частьысьтызы кӧня мурт быремын. Кыкетӥез агае Ижысь индустриальной техникумез но механическӧ институтэз йылпумъяз. Ужаз заводын. Али шутэтске ни. Анаелэн но атаелэн мылкыдзы сыӵе вал: дышетоно, дышетоно, дышетоно. Малы ке шуоно, колхозын улон туж секыт. Вань ужез киын лэсьтоно. Мед кошкозы нылпиос гуртысь, татын кыед пушкын быдэс улонзэс медаз бугыръяськелэ. Мукет ласянь - та мылкыдлэн мыдлань палыз но вал, дыр: колхозын но ужаны кулэ ук. Агроном но луыны малпасько вал - нэнӥе ӧз лэзьы. Гуртамы соку ӵапак выль агроном лыктӥз вал. Солэсь ужамзэ адӟыса шуиз: "Эн мыны". Турттӥсько вал дошкольной педучилищее но мыныны. Дышетӥсьёс ӧз лэзе: пиналъёслэсь нырулзэс ӵушылыны дышетскытэк но быгатод, шуизы. Соку мон педучилищее пыри. Уг жаляськы. Малы ке шуоно, Можга педучилище егитъёсты улонлы зол дася. Педучилищеез 1957-тӥ арын йылпумъяса, арзэ ужай Дэри ёросысь Ӟумъя (Старый Сентег) школаын. 1958-тӥ-1963-тӥ аръёсы дышетски Удмурт пединститутлэн историко-филологической факультетаз. Группаысьтымы ӝыныез педучилище, ӝыныез школа бере вал. Шӧдӥськытэк ӧз кыльы: педучилищеез йылпумъямъёс золгес дасяськемын. Соин ик ӟуч кылъя занятиосын милемыз люкизы. Собере шӧдыны кутскимы: группамы люкиськонлы матын кадь. Та тэшканлы пумит луыса, кенешъёс но ортчытъямы, дышетӥсьёслы но верамы, озьы медам лу шуыса. Ог-огенымы али но юн кусып возиськом но ӵем пумиськылӥськом. Кылын ке но юрттыны тыршиськом. Кылем арын куамын вить ар тырмиз пединститутэз йылпумъяммы дырысен. Но эшъяськонмы ӧз кысы. Институтэз йылпумъяме бере, монэ татчы ик ужаны кельтӥзы. Оло, озьы ӧй но луысал, но таӵе югдур кылдӥз: дышетскон программаямы истмат но диамат вал. Истматэз ми ортчимы 4-тӥ курсын, диаматэз - 5-тӥын. Ми институтэз йылпумъян аре соосыз Вылӥ дышетонъя министерстволэн куремезъя выжтӥзы кыкетӥ курсэ. Соин кафедралэн сюлмаськонэз кык поллы йылӥз. Кафедрае выль адямиос кулэ луизы, соин монэ, дышетсконме горд дипломен быдэстэм муртэ, философияя кафедрае кельтӥзы. Егит муртлы сётӥзы витетӥ курсэз. Дышетон уж нырысь нуналаз ик секытэн сётӥськиз: ялан сюлмаськи, студентъёс кыӵе ке "кузьым" дасялозы шуыса. Но урокам могӟонъёсы ӧй вал. Ар ортчыса, кафедрае нош ик адями кулэ луиз. Юамысьтызы ӵектӥ Александр Сергеевич Ворончихинэз (али со философияя кафедраын ужа). Мыным берло вераз: "Вал могӟытӥсь юанъёс сётъяны мылкыд. Юри возьматон понна, тӥ милесьтым трослы визьмогес ӧвӧл на шуыса". Но одӥг воргорон (со мукетъёсызлэсь бадӟымгес вылэм) куаретэм: "Эн дауртэ: кельтӥзы сое - озьыен, кулэ вал. Ас мылкыдызъя ӧз кыльы ук". Но ачим шӧдӥ: мон зэмос философ ӧвӧл. Ньылетӥ курсын дышетскыкум, И. В. Тараканов вазиськиз таӵе ӵектонэн: "Одӥг но этнографмы ӧвӧл элькунамы. Дышетскондэ быдэстӥд ке, этнографияя аспирантурае дасяськы вал..." Мон соку гори. Иван Васильевич, мар вераськоды тӥ, шуисько: институтын ми этнографиез ӧм дышетэлэ. Мон, оло, тӥлесьтыд нырысьсэ тодӥ, сыӵе удыс но дунне вылын вань шуыса. Собере, зэмзэ ик, кӧня ке саклык висъялляй этнографилы. Но со вераськонэз пелям ӧй пон. Философияя кафедраын ужакум, Иван Васильевич нош ик берытскиз та ужпум борды. Озьы каллен кутски этнографиен но тунсыкъяськыны. Москваын вань этнографияя институт. Отчы гожтэт лэзи, программа курыса. Тӥни соя ачим лыдӟиськыны ӧдъяй. Но пединститутлэн библиотекаез туж пичи вал - мон ветлыны кутски УдНИИ-лэн библиотекаяз. Куд-ог книгаос Иван Васильевич но сётылӥз. Философияя кафедраын ньыль ар ужай. 1967-тӥ арын нош ик лэзи этнографияя институтэ гожтэт. Вера Николаевна Белицерлы. Рефератлы тема юаса. И. В. Тараканов ӵектӥз вал удмурт сюан сярысь гожтыны. Белицер сое кулэен лыдъяз. 1967-тӥ арын Ижын ортчись финн-угор конференциысен монэ тодматӥзы этнографияя институтын ужасен. Владимир Владимирович Пименов элькунмы борды юнматэмын вылэм. Ӧтиз монэ экспедицияз пыриськыны. Солы возьматӥ рефератме. Владимир Владимировичлы яраз. Экспедициысь бертыса, рефератме печатлай но келяй институтэ. Дышетскыны пырыкум, этнографияя одӥг гинэ экзамен сётӥ: ньыль ар ужатозям, кунсьӧр кылъя но философияя экзаменэ ни вал. Аспирантураын куинь ар ӵоже ужай удмуртъёслэсь семьяен герӟаськем йылолъёссэс эскерон бордын. Дышетсконэ быриз 1970-тӥ арын толсуре (декабре). Но диссертациме ути 9-тӥ тулыспалэ (феврале) гинэ. Со дырозь тэк ӧм пуке. Ӵапак соку калыкез лыдъян ортчиз но, милемыз, аспирантъёсты, ужаны келязы всесоюзной статуправление. Диссертациме ути но ужаны потӥ 1971-тӥ арын южтолэзе (мартэ). Со дырысен Кылъя, литературая но историяя Удмурт институтын кызь тямыс ар ужасько ини. - Кин со, удмурт адями? Кыӵеесь солэн ӟеч но урод палъёсыз? - Огпол мыным вазиськизы "Мысль" издательствоысь. Отын малпамын вал "СССР-ысь калыкъёс" сериал-многотомник поттыны. Ӵектӥзы удмуртъёс сярысь гожтыны. Ми, В. Е. Владыкинэн огазеяськыса (со диссертацизэ арлы вазьгес утиз), удмуртъёс сярысь очерк гожтӥм. Нош сое уг потто но уг потто. Азьвылэз директорзы воштӥськемен, та книга поттон планазы пырымтэ. Соку ми Владыкинэн "Очерки этнографии удмуртов" рукописьмес асьме дорын поттӥм. Кык поллы бадӟыматӥм: удмуртъёс сярысь нокыӵе пособиос ӧй вал, вашкала изданиос сяна. Эшшо соос но - одӥг экземпляр гинэ. Та очеркъёсмы дышетскон книга выллем луизы. 1968-тӥ арын, адямиосын кенешыку, тросэз веразы: "Удмуртъёслэн урод сямзы вань: соос, дышетско но бадӟым адями луо ке, милемыз, огшоры калыкъёсты, тодмамысь дугдо. Вылтӥяськись луо, ӟуч кылын гинэ на верасько". Мон соку паймыса кылзӥ: ваньмыз со зэм шат? Аръёс ортчемъя валай: зэмзэ но, вань вылэм сыӵе сяммы. Собере соиз но вань: укыр дыг асьмеос. Тросэз ялан ӝожтӥсько: соиз таӵе, таиз сыӵе... Алигес нырысетӥ удмурт газетъёсыз лыдӟи. Кӧня сыӵе ӧтён отын: тэргаськыса эн улэ, ог-огеныды кенешыса, тупаса улэ... Тани Куӟебай Гердэз ик басьтом. Сое ведь пӧртэм чагиськонъёслыса оскыса, удмурт интеллигенция ик быдтӥз. Паймисько мон та адямилы. Куронъёсыз туннэ нуналлы тупало: удмуртъёс, сайкалэ ни, султэ, вырӟе, эшъёсы!.. Со газетъёсын ик тазьы но гожъямын: удмурт дышетӥсьёс, асьсэ кылзэс ватыса, ӟуч сямен верасько. Малы? Мукет ласянь, та калыкез мон туж гажасько. Данъяськисько соин. Педучилищеын дышетскыкум, каникулъёс дыръя, радио пыр кылӥ Эдвард Григлэсь вераськемзэ. Со вал туж дано норвег крезьгурчи. Со шуиз: "Мон данъяськисько норвег луэменым". Шуак луи. Мыным дас тямыс арес. Пайми: малы данъяськоно норвег луэменыд? Милемыз педучилищеын ӧз дышетэлэ ас выжыосыныд данъяськыны. Угось ми малпаськом вал, бадӟым калыкъёсын гинэ данъяськыны кулэ шуыса. Кӧня ке ар ортчыса учки Георгий Димитров сярысь кино. Кыл вӧлдӥзы, со рейхстагез сутӥз шуыса. Отын дасямын вал нимысьтыз ӝуатӥсь адями. Юри озьы лэсьтэмын вал, коммунистъёсты янгыше уськытон понна. Судысен шуизы: "Кыӵе ке болгарин сутӥз немецъёслэсь рейхстагзэс". Нош Георгий Димитров йырзэ ӝутыса вераз: "Бен, мон болгарин. Но туж данъяськисько, та калыклэн пиез шуыса. Нош тӥляд немец аристократъёсты керпотӥзы - вераськизы латынь кылын. Мынам калыке вить сю ар ӵоже турокъёслэн зӥбетсы улын курадӟиз, нош ас выжызэ ӧз вунэты, возиз, утиз ас сямъёссэ, культуразэ". Тае кылыса, тодам ваи Э. Григлэсь данъяськемзэ. Аслым ачим юан пуктӥ: "Нош мон данъяськисько-а удмурт луэменым?" Э. Григлэн соку верамез бере ӧй быгатысал аслым кыӵе ке валэктон сётыны: школаын но, педучилищеын но удмуртъёслэн ортчем сюрессы сярысь номыр ӧз вераллялэ. Одӥг пол, 1967-тӥ арын, финн-угор конференция бере пумиськи Т. А. Крюковаен, Ленинград музейын ужасен. Со ӧз ваты паймемзэ: "Кыӵе вылӥ быгатонлыкез удмурт нылкышнолэн: венен туж усто пужъятскыны быгатэ. Та удысын удмуртэн, порен, чувашен дуннеысь одӥг калык но ӵошатскыны уз быгаты..." Ӟуч кышномурт тазьы вераз, нош мон, дышетскем удмурт, та сярысь уг тодӥськы вал. Удмурт калык вазиськись, дораз пырем муртэ утялтӥсь, лякыт сямо, туж ужась. Семья куспаз керетытэк улыны тыршись. Мон пумиськылӥ пӧртэм интыосын - Татариын, Башкириын - улӥсь удмуртъёсын. Соослэсь киужъёссэс адӟыса, данъяськон мылкыды кылдылӥз. Али керпотытэк верасько: удмурт луэменым данъяськисько. Удмурт калык нокинлы урод ӧз на лэсьты. Пичи дырысеныз ини солэн сямаз ик пыӵамын: эн тэргаськы бускеленыд, вӧзысьтыд калыкеныд, котькинэн тупаса ул. Одӥг тодмо тодосчи удмурт искусствоез гажаса шуиз: "Малы асьмеос одно ик мынӥськомы Францие, Голландие? Удмурт шаерын сыӵе вылӥ искусство... Сыӵе калыкен уд данъяськы шат?!." - Азьланезлы малпанъёсты кыӵеесь? - Поттоно вал удмурт тодосчиослы сӥзем кыкетӥ книга. Таяз тросэз пыртытэк кельтэмын, выльёсыз но кылдӥзы ни. Али ваньмыз куамын одӥг адями люкаськиз ни. Сюозь вуиз ке, книга потымон луоз. Туж дасяме потэ нылкышноос сярысь книга. Угось улонлэн вань секытэз усе кышномурт вылэ. Кызьы чидало, вормо соос шуг-секытъёсты?! Котькыӵе уж борды кышномурт басьтӥське ук. Таӵе малпанэ но вуи ни: кивалтон удысын тросгес нылкышноос луыны кулэ. Сое возьматӥзы ини Норвегия, Швеция, Финляндия. Нош али нылкышно (тужгес но - быръёнъёс азьын) пиос пӧлы сюре ке, сое быдто, саптало. - Кыӵе сямо адями тӥ? Тыршисько тупаса, тэргаськытэк улыны. Ченгешон потэ ке, валасько: татын но, отын но вань янгышмы. Соин ик огкылэ вуыны тыршоно. Керетон ноку нокинэ умое уг вутты. х х х Людмила Степановна Христолюбова этнография удысын сизьымдонлэсь трос уж кылдытӥз. Со пусъемын УАССР-ысь Вылӥ Кенешлэн Президиумезлэн Данъян грамотаеныз но "Ужысь ветеран" медален. Кенешиз Анна КУЗНЕЦОВА, Удмурт кун университетын дышетскись. * Людмила Степановна ХРИСТОЛЮБОВА. Тусбуйзэ пуктӥз Владимир КАМАШЕВ. Дышето шаермес яратыны Кин ке, оло, шуоз, кулэ-а, пе, таӵе секыт вакытэ инкуазьмылэн чылкытэз сярысь сюлмаськыны. Со сяна но государство азьын данак ужпумъёс сыло. Но улонмы пырак тазьы уз кыстӥськы, дыр. Адями улыны кулэ, ческыт вуэз юыса но чылкыт омырен шокаса. Тае валало дышетӥсьёс но. Берло вакытэ тросаз школаосын нылпиосты дышетыны кутскизы выль предметлы - экологилы. Та ужез али нылпи садъёсын но нуо ни. Сарапул районысь Нечкино шор ёзо школаын экологилы сӥзем урокъёс 1-тӥ-11-тӥ классъёсын радъямын. Нош урокъёс бере пиналъёс сузяло кырсёмытэм шуръёсты, ошмесъёсты, утялто жуг-жаг куян интыосты. Тулыс вуэмъя, ужъёс уката но трос люкасько. Дасяно шырчик умортоос, мерттоно писпуос. Нылпиос трос тодон-валан басьто классэн кивалтӥсьлэн-дышетӥсьлэн урокъёсаз но. Кызьы утёно астэ шудтэм учыръёслэсь, кызьы сюлмаськоно тазалыкед сярысь - ваньзэ валэкто урокъёсы ӧтем специалистъёс. Историен дышетӥсь Нина Васильевна Ижболдина кемалась малпаське ини школаязы шаермылэн историезъя музей усьтон сярысь. Мар но со люкамын ини - нылпиос асьсэос школае ваё вашкалаослэсь кылем арбериоссэс, гожъяло пересьёслэсь верамъёссэс. Гуртсылэн арлыдыз 400 арес ини. Вордскем интызылэсь ортчем сюрессэ умойгес тодыны тыршыса, пиналъёслы мургес пыӵа Атай музъеммес яратон мылкыд. В. ЛАГУНОВ. Гурт улон Эрик "Свободаез" быдтӥз Завьялово районысь "Свобода" колхоз республикаысь хозяйствоос пӧлын огез валтӥсез вал. Дас сизьым пичи но бадӟым гуртъёсты ас вакытаз огазеяз, ӟеч урожай басьяз, трос пудо вордӥз. Бадӟым колхозэн быгатыса кивалтӥзы Зайнаков, Лизунов, Гараев... Озьы вал выльдӥськон кутскытозь. Демократия вакытэ "Свобода" эркын шокчиз но - люкам ваньбурзэ, узырлыксэ юдэсэн-юдэсэн люкылыса сётӥз фермеръёслы, гуртлы быдэ сямен кылдэм эштосъёслы. Центральной усадьба, Ожмос бригада, шедиз "Завьяловский МТС" улэ. Куд-ог пичи хозяйствоос, яна потонэз эскеремзы бере, выльысь огазеяськизы. Таӵе малпанэн уло мукетъёсыз но. Азьвыл "Свобода" колхоззэс соос выжыкыл дуннеез кадь тодазы ваё. Зэмен но, кин тодӥз соку, ма луоз азьланяз. Ожмосысь пудо вордон ферма туж умой возьматэ туала югдурез. Скал кыскисьёсын пумиськылӥм нуназе котыр, ӵапак быръёнъёс азьын. Вераськемзыя но, тусбуйзыя но валамон: мылкыдзы сокем ик ӟеч ӧвӧл. Зэмен ик, малы меда шумпотод? Уждун басьто кылем арлы май толэзь понна - 200-300 манет. Малы гинэ со тырмоз: ӝыны куз сапеглы яке ӝыны мешок сахар песоклы ке шат? Кинлы кулэ, тыро натуроплатаен - кунянэн яке нянен. - Туэ арлы февраль понна уждунмес пытсазы ни,- шуэ фермалэн кивалтӥсез Вера Николаевна Лебедева.- Дояркалэн уждунэз толэзяз 180-200 котыр люкаське. Кин тросгес йӧл кыске, 300 манет пала басьтэ. Фермая та нуналъёсы скаллы быдэ 7 килограмм ёрос кыско, районъя - 8,6. Миымлэсь ятыргес, нош ожмосъёс - ӧжытгес. Малы меда? - Пудо сиёнмы туэ уродгес,- шуэ фермалэн кузёез.- Валэс куромы кемалы ик ӧз тырмы, али сюдӥськом ӟег куроен, сое силосэн но кормосмесен суралтыса. Нянь ӧз удалты бере, фураж но тырмыт ӧвӧл. Кылем арын йырлы быдэ 2300 килограмм висъям ке вал, али - 1300. Соин ик йӧлмы кулэсмиз. Кыкетӥ мугез - тросэз скалъёсмы висё. Таин валче муры кылё, кунян уг шедьто. Кысконо скалъёссы туннэ 300 йыр пала, ӟеч аръёсы талэсь ятыр возизы. Тулысэз малпало силос вылын потыны. - Силосмы асьмелэн, тырмыт луыны кулэ кадь. Ӟечлыкезъя номыр шуэм уг поты. Миым кубиста куарен но сюдӥм, картофка но одӥг-ог нуллӥзы вал. Со но юрттӥз. Нош туэ соиз но, таиз но ӧвӧл, кушман но ӧз кизьылэ,- сюлмаськемзэ уг ваты В. Н. Лебедева.- Умоез но вань - туэ пудо сиёнъя цех усьтӥм. Отын сюкась лэсьтӥськом. Сылалэн, дрожжиен, пызен суралтэм шуныт юонэз скалъёс туж юо. Куро вӧзын со ӟеч кошке, йӧл но потэ. Кылем арын ожмосъёс скаллы быдэ 2800 килограмм йӧл кыскизы. Луонлыкъёссэс санэ басьтыса, сомында коть люканы быгатӥзы, шуод ни. Нош районысь азьмынӥсь фермаосын ӵошатыса ӝоже усёно: неужто "Свобода" сокем ӝог уллане питраз? Ведь татын 4 сюрс килограммез ортчем дояркаос но вал ни! - Гараев председательын ужаку, фермамы возиськиз на, пудо сиён ласянь но югдур ӟеч вал,- вераськонэ итӥсько шутэтскыны пырем дояркаос. Соос ик сэртто-пертчо та калэ вуэмзылэсь мугзэ: - Фермере тросэз потӥзы, соос пудоез но нуизы. Дисциплина куашказ. Колхоз быриз. Янгыш каро демократъёсты. - Мон председатель луысал ке, калык ваньбурез тус-тас карыны нокызьы но ӧй сётысал,- сюлмыз вӧсь луыса вера В. Н. Лебедева.- Кык хозяйстволы эшшо люкыны луысал на, но гуртлы быдэ яна потон - со бырон! Центральной усадьбаез неужто бусыостэк, огназ кельтоно вал? Трос музъеммы Чепанихае, Бахилэ кошкиз, возьёс но трос пудо вордыны уз тырме. Пудо вордӥсьёс, скал кыскисьёс секыт малпанъёссэс пушказы пыдлогес ватыны тыршо. Соосты бугыртыса капчигес шат? Огдышемъя нуналлы быдэ вазь ӵукна ик дырто фермае. Сюлмасько тросгес йӧл, сӥль поттыны-будэтыны. Дояркаос пӧлын та вакытэ азьпалан мыно Галина Демьяновна Корепанова, Валентина Семеновна Зайцева, Ольга Геннадьевна Шутова. Кунянъёсты будэтонын умой ужало Людмила Анатольевна Лукиных, Нина Витальевна Чукавина но мукетъёсыз. - Корепанова Галямы валля арын 3000 килограмм кыскиз вал, туэ но сомында ик план басьтӥз,- эшсы понна шумпотэмзэ вера фермалэн кивалтӥсез.- Азьло тросэз та лыдпусэз ортчизы вал ни, туннэ ум вормиське. Соиз умой: ожмосъёслы вань мае тодазы вайыны. Вань осконзы но - "Свобода", кудӟытӥсь эриклэсь поромонзэ вормыса, нош ик ас ӧраз берытскоз но пыд йылаз султоз шуыса. Л. МЕДВЕДЕВА. Фермаосын Азьпалан - уваос, пумаз - яръёс Йӧл кыскон (4-тӥ апрельлы) Районъёс 1 скаллэсь (кг) Калыклэсь Скал йыр ваньмыз (1. 03. 99). 1999 1998 басьтэмын (ц) 1999 1998 1. Ува 10,0 9,4 - 7730 7468 2. Вавож 9,5 9,1 - 5147 5219 3. Игра 9,4 9,2 - 3801 3808 4. Можга 9,0 9,4 1907,0 9273 9191 5. Воткинск 8,9 8,4 - 5274 5628 6. Завьялово 8,6 8,2 - 7744 8279 7. Як.-Бодья 8,0 7,9 - 2300 2361 8. Шаркан 8,0 8,5 - 6119 6006 9. Пичи Пурга 7,8 7,8 21,0 6700 6770 10. Грахово 7,7 7,2 - 3132 3298 11. Глазов 7,4 7,9 18,0 7671 7839 12. Дэбес 7,4 7,3 - 4728 4895 13. Юкаменск 7,3 7,3 - 5081 4997 14. Каракулино 7,3 8,9 - 3503 3712 15. Балезино 6,9 7,6 - 8860 8740 16. Алнаш 6,8 7,6 85,0 6470 6318 17. Кез 6,7 6,2 - 5577 5828 18. Селта 6,7 6,8 - 3744 3508 19. Сюмси 6,6 6,2 - 1644 1907 20. Камбарка 6,6 6,3 - 747 768 21. Кизнер 6,6 6,3 14,0 4129 4261 22. Сарапул 6,5 8,0 - 7222 8065 23. Красногорск 6,0 6,3 - 3731 3907 24. Киясово 5,7 7,2 - 4768 4637 25. Яр 5,6 6,1 3,4 5288 5697 __________________________________________ Республикая 7,6 7,8 2053.4 130383 133107 Тазьы ужало та нуналъёсы скал кыскисьёсмы. Кылем арен ӵошатыса, йӧлъя сокем бадӟым воштӥськонъёс ӧвӧл: миым та вакытэ скаллы быдэ усе ке вал 7,8 килограмм, туэ - 7,6. Синмаськымон ужало уваос. Районъя, шорлыдын вераса, соос суткаяз 10 килограмм йӧл кыско. Ӧжытаклы гинэ бере кыльыса мыно Вавож но Игра районъёсысь фермаос. Сводкалэн пумаз - Яр, Киясово, Красногорск ёросъёс. Республикалэсь улӥын продукция басьто Сарапул, Кизнер, Камбарка, Сюмси, Селта, Алнаш палъёс. Мугез - сиён бордын. Данакез хозяйствоос туэ кылемын турынтэк, валэс куротэк, пызьтэк, жалем сиёнъёстэк. Тулыс вуэмен, куд-огез туннэ кылемын ни пырак кӧс ӟег куро вылэ. Со вӧзы сюкась ке лэсьто, соиз умой ни. Нап юон вылын 5-6 килограмм котыр йӧл люкаське на. Нош ма луоз толэзь пумын? Май но вож гуждоръёсын, возьёсын узгес, дыр, шумпотты - куазь кезьыт сылэ. Озьыен, кытысь ке но, кинлэсь ке но кураськоно, пунэмаськоно луоз. Пудо йыр сярысь. Туэ 1-тӥ мартлы республикая скал уллё кулэсмемын 2724 йырлы, мукет сямен вераса, быдэс районлы. Тужгес но зол со шӧдӥськиз Завьяловоын но Сарапулын. Та дыре ик скалъёссэс будэтӥзы Юкаменск, Балезино, Шаркан, Селта, Алнаш палъёсын. Йӧл вузан гурт хозяйстволы али пайдаен берытске бере, улонэз валась кивалтӥсьёс та удысэз юнматыны тыршо. Л. ДМИТРИЕВА. Киясаысь иворто Азьпалан - вужгуртъёс Пудо вордонын азьпалан мыно "Рассвет" колхозысь кунян сюдӥсьёс. Ортчем аре Вуж Сальялась Алевтина Мизиревалэн звеноез районын нырысь интые потӥз. Нош февраль понна туж синмаськымон ужаз та колхозысь ик Вужгуртысь Нина Александровалэн звеноез: соослэн утялтоно кунянъёссы нуналаз 1418 граммлы чеберскизы. Ошъёсты куайытонын но усто ужазы вужгуртъёс. Озьы ик йӧл кысконъя но та колхоз мукет хозяйствоосты трослы азьпалтыса ужа, татын сюлмасько, йӧлзы вылӥ сортэн мед басьтӥськоз шуыса. "Кырӟа, арганэ!" Кияса палъёс жадизы ини, Геннадий Заволокинлэсь ми пала вуэмзэ возьмаса. Киров, Пермь, Свердловск улосъёсын вал, нош Удмуртие ку меда сюрес шедьтоз? Котьма медло, Ермолаевоын асьсэос "Шуд, арганэ!" нимо туж шулдыр концерт дасязы. Отчы пыриськизы вить гуртысь усточиос. Жингыр гинэ шудӥзы арганъёс Владимир но Сергей Бочкарёвъёс, Николай Макаров, Леонид Андреев, Илья Евсеев, Нэля Бурдина но Мартемьян Тихонов киын. Мылкыд гинэ мед луоз, дыр сюре вылэм. Семьяын - 9 нылпи Алигес Сабанчино гуртысь Матрёна Яковлевна Костенкова 85 арессэ пусйиз. Паймымон- а, ӧвӧл-а, но солэн укмыс быдэ вуэм нылпиез ваньмыз ик ас вордскем районаз улэ! Солэн 20 внукез, сомында ик правнукез ини. Вань пиосыз - шофёр яке механизатор, нош нылъёсыз пудо утён удысын тыршо. Ортчем аре та семьяысь куинез ас юбилейзэс пусйизы, нош туэ ас дораз люказ анайзы. Ӵошен - 65 ар Туэ Вуж Тӥгырмен гуртысь Камашев кузпалъёс 65 ар ӵош улэмзэс пусъёзы. Никита Иосифович Быдӟым ож пыр потэмын, нош кузпалыз, Дарья Алексеевна, азьвыл стахановка, нуналаз ӝыны гектар пала киыныз ю ара вал, солэн нимыз уно пол "Голос ударника" газетлэн данъян пулэз вылэ шедьылӥз. Али но со уг на сётскы, чырмыт бызьылэ, семьяезлы юрттэ. Вашкала калык, зэм ик, кужмо, чидась. Пероды лэчыт мед луоз Кияса калык яратэ пумиськылыны газет-журнал поттон бордын ужасьёсын. Соос но ӧтемлы пумит уг луо, шумпотыса лыкто. Нылкышно праздниклы сӥзьыса, Кияса райбиблиотекаын, озьы ик Лутоха шор ёзо школаын ортчиз кылбурчиосын пумиськон. Татчы ветлӥзы Галина Романова, Татьяна Чернова но егит гожъясь Лидия Нянькина. Нош 10-тӥ мартэ Киясаысь удмурт культурая огазеяськон Кирилл Ломагинлэсь творческой ӝытсэ ортчытӥз. "Пероды лэчыт мед луоз азьланяз но", - шуизы киясаос сӥё-дано журналистлы, поэтлы но прозаиклы. Г. ПАРФЁНОВ, "Знамя труда" газетын ужась. Возьматӥськом усто предприятиосты: Чепецкой механической завод Тазьы со вордскиз Акциосын "Чепецкий механический завод" ("ЧМЗ") огазеяськон Глазовен кемалась люконтэм герӟаськемын. Калык сое город-завод, завод-город шуэ. Предприятие но Глазов ӵош будӥзы, паськытазы но кужмоязы. Туннэ газетамы кутскиськом ЧМЗ сярысь материалъёс печатланы: кызьы предприятие кылдӥз, будӥз, кыӵе продукция поттӥз но поттэ, мар вылез, умоез ужаз пыӵаз но кызьы али но пыд йылаз йыг-йыг сылэ. Завод интыяськемын Удмуртилэн уй палаз, Россилэн шораз, Москвалэсь сюрс иськеме. Глазовез дуннеен герӟа чугун сюрес, соин ик транспорт ласянь шугъяськонъёс ӧвӧл. Бадӟым научно-технической кужым, туала выль технологиос, пайдаё эскерон огазеяськонлы юртто ӟеч продукция поттыны, кыӵеез быдэс дуннеын но ӧвӧл. "Чепецкий механический завод" огазеяськон пыре Россиысь Атом энергетикая министерстволэн "ТВЭЛ" огазеяськоназ. Со дуннеын самой бадӟымез цирконийлэсь сплавъёс, природной но лябӟытэм уран, металлической кальций но солэсь сплавъёс но изделиос поттӥсь предприятие луэ. Завод пуксемын Чупчи шур дуре, соя ик ним сётэмын. Предприятие 50 арлэсь кема продукция поттэ ни. Со кылдытэмын 1946-тӥ арын 19-тӥ декабре металлической уран но музон материалъёс поттыны. Ас вакытаз со туж кулэ вал обороная промышленностьлы. Берло, 60-тӥ-80-тӥ аръёсы атом энергетикалы продукция поттыны ӧдъяз. Азьвыл СССР-ысь уно валтӥсь научно-исследовательской институтъёслэн но предприятиослэн кужыменызы уже кутэмын туж устоесь технологиос но оборудование. Заводэ уно специалистъёс лыктэмен валче но выль производствоос кылдытэмен ӵош, Глазовын паськытаз улон коркаос лэсьтон. Адямиослы кулэ вал квартираос. Озьы 1946-тӥ арысен 1990-тӥ арозь городын улӥсьёслэн лыдзы 5 поллы йылӥз но 100 сюрслэсь трос луиз. 1965-тӥ арын ӝутскизы укмыс этажъем коркаос, 1986-тӥ арын 74 процентэз семьяос нимаз ӟеч квартираосын улӥзы ни. Туннэ Глазов - Удмуртиын одӥгез город. Сое лэсьтыны юрттӥзы Санкт-Петербургысь архитекторъёс. Горолдэз шулдырто 1952-тӥ арын пуктэм "Россия" культура юрт, "Прогресс" йӧ дворец (отчы огдыре 5 сюрс учкись тэре), "Глазов" гостиница, Чупчилэн паллян палысьтыз улон коркаос, егитъёслэн "Родник" центрзы, "Ровесник" клуб, искусствоосъя лицей но трос мукетъёсыз. Завод ӝутӥз усто профилакторий, шутэтскон юрт, город сьӧрын нылпиослы шутэтскон корка, пионерлагерьёс, школаос, культура но шутэтскон парк, скверъёс, сад-бакчаос но музонзэ. Кӧня ке ар талэсь азьло котькудӥз кыкетӥез городын улӥсь ЧМЗ-ын ужаз. Глазовлэн туннэ но ӵуказе нуналыз люконтэм герӟаськемын предприятилэн ужаменыз. Со городлы сётӥз кыкетӥ улон. Завод азинскиз но пыд йылаз султӥз люкетэн-люкетэн. 1948-тӥ ар, ноябрь - нырысьсэ басьтэмын уранлэсь тетрафторид, солэсь озьы ик нырысьсэ кисьтэмын уран слитокъёс. 1956-тӥ ар, август - кутскемын кальций поттон. 1959-тӥ ар - нырысьсэ лэсьтэмын цирконий сплавлэсь слитокъёс. 1973-тӥ ар, ИИ квартал - быдэсак вуттэмын гумы поттон. 1989-тӥ-1995-тӥ аръёс - конверсия, азинскон сюресъёс утчан. 1995-тӥ арысен - производствоез выльдон, дуннеысь куронъёслы тупась ӟеч продукция поттон. Ӝыны даур куспын заводын пыӵатэмын но ужало туж ӟеч технологиос. Кылсярысь, шедьтэмын цирконийлэсь сплавъёс но солэсь изделиос лэсьтон амалъёс. Соос, атомной энергетикаын сяна, кутӥсько ни химической, нефтегазовой, медицинской но сиён-юонъя удысъёсын. Цирконийлэсь сплавъёссэ ӵыжатонэ усто технологиос кутэмын. Соос уг сыномо. ОАО научной но технической кужымзэ та сяна кутэ на шер пумиськылӥсь продукция поттонэ - ниобий, диоксид, цирконийлэсь керамика, кеньыр кадь кальций но мукетсэ. Заводлэсь продукцизэ басьто Россиысь предприятиос но кунгож сьӧрысь фирмаос. Заводын котькуд производствоын бадӟым инты висъяло ӟечлыкъя стандартъёслэсь куронъёссэ быдэсъянлы. Озьы 1997-тӥ арын цирконий поттонлы ӟечлыкъя дуннеысь сертификат сётэмын. Сое басьтыны али дасясько уран но кальций поттӥсьёс. "ЧМЗ" огазеяськонлэсь пӧртэм продукцизэ мукет номеръёсын мургес но паськытгес возьматом. Иван ФАРУШЕВ, бюролэн кивалтӥсез. Россия Федерацилэн кун наградаосыныз пусъён сярысь Россия Федерацилэн Президентэзлэн Указэз Гурт хозяйство удысын вормонъёс басьтэмез но уно аръёс ӵоже сюлмысь ужамез понна "Россия Федерациысь дано ветеринарной врач" сӥлы карон ним сётоно: Бурдов Геннадий Николаевичлы - Удмурт Республикаысь Ветеринарияя валтӥсь управленилэн кивалтӥсезлы. Россия Федерацилэн Президентэз Борис Ельцин. Москва, Кремль 1999 арын 15 мартэ �345. Ваньмызлэсь "секытэз" - Павел Вершинин Быръён ортчиз ке но, со сярысь вераськон кема кыстӥськоз на. Пумен тодмо луо пӧртэм лыдпусъёс. Тани али вераны быгатӥськом ни тужгес но "секыт" мандатлэсь кузёзэ. Правительстволэн Тӧроез понна куаразэс 91,96 процентэз бырйисьёс сётӥллям. Мукет сямен вераса, 7064 мурт. Можгалась "Свет" заводлэн директорез Владимир Мохначев ас палаз берыктыны быгатӥз 78,17 процентсэ бырйисьёсты. "Секыт" мандат шедиз вице-премьерлы Юрий Питкевичлы (5229 мурт) но Правительствоысь Аппаратэн кивалтӥсьлы Михаил Григорьевлы (5099 мурт). Нош кинлэн меда мандатэз тужгес но "капчи"? Воткинскысь Сергей Дудин понна луэм 882 мурт (18,60 процент). Тросэзлы тодмо Александр Лопатинлы куараоссэс сётӥллям 17,09 процентэз бырйисьёс. Но лыдзыя соос уногес - 1165 мурт. Валамон, Кун Кенешын голосовать карыку, вань депутатъёслэн правозы огкадь луоз. Пӧлысьтызы котькудӥз быгатоз мылкыдзэ мукетъёсыныз ӵош возьматыны. "Удмурт дуннеын" ужасьёс понна шумпотымон луэ таиз. Газетлэн редакционной коллегияз быръем эшъёсмы - Михаил Григорьев но Аркадий Малков быгатӥзы секыт нюръяськонын мукет кандидатъёсты вормыны но мандат бсьтыны. Ӟечкыласьком! Оскиськом, шаерамы улӥсьёслы та йыгмыт воргоронъёс трос умойзэ лэсьтыны быгатозы шуыса. И. ЛЕБЕДЕВ. Калык оске Правительстволы Асьме Правительстволэн берло кенешоназ нырысь ик вераськиз республикаысь Быръёнъя комиссилэн тӧроез Афанасий Тубылов. Асьсэ округъёсазы туж трос куараос басьтӥзы Кун Кенеше быръем депутатъёс Александр Волков, Павел Вершинин, Михаил Григорьев, Юрий Питкевич но музонъёс. Депутатъёс пӧлын 12 удмурт, 7 бигер, вань белорусъёс, еврей, грузин но мукетъёсыз. Мандат басьто уно кивалтӥсьёс, ужбергатӥсьёс, ньылез ужало тазалыкез утёнын, быдэн кыкез - дышетонын, вузкаронын, право удысын, огез - ивор вӧлмытонын. Правительстволэн Тӧроез шуныт кылъёс вераз Правительствоысь адямиос-депутатъёс сярысь. Соослы калык оскиз бере, Правительстволэн данэз вань. Павел Николаевич пусйиз: асьмелэн визьмы мед тырмоз нюръяськон дыръя верам-кылэм ӝож кылъёсмес вунэтыны но республика понна ужаны. Кун Кенеше сюремъёс монэ шумпотто, соос - оглом бадӟым опытэн адямиос. Туала югдурен тодматӥзы министръёс Владимир Бельтюков, Василий Жуйков, Николай Бесогонов, Виктор Долгов но мукетъёсыз. Правительстволэн Президиумез юнматӥз кӧня ке постановлениос. Ватсаса 155 сюрс тонна Туэ планлэсь вылтӥ сомында му вӧй поттыны чакла "Удмуртнефть" огазеяськон. Сыӵе луонлык сётэ Кун Кенешлэн но Правительстволэн ОАО-лэсь ӵектонъёссэ умоен лыдъямзы. Кылсярысь, музъем узырлыкъёс понна тыронъёс кулэстэмын вал. Но "Удмуртнефть" му вӧй кысконэз йылэтэм чотын бюджетъёсы тросгес выт (налог) тыре. Выт тыронэз одӥг процентлы кулэстон умоен берытске. Малы ке шуоно, йылэ нефть поттон. Озьыен, бюджетэ уногес коньдон вуэ. Таӵе ужан амал кутӥське ни 1997-тӥ арын 1-тӥ апрельысен. Со дырысен "Удмуртнефть" ватсаса 350 сюрс тонна му вӧй кыскиз но бюджетэ 86 миллион манетлы тросгес выт тыриз. Со юрттӥз электрокужым, газ сутэм, транспорт кутэм понна пунэмъёсты тырыны. Озьы ик коньдон вуиз Пенсиосъя фондэ. Та вакытэ "Удмуртнефть" огазеяськон быдэсак пытсаз ни интыысь, кун бюджетъёсы тыронъёссэ но дыраз сётъя ни уждун. "Удмуртнефть" ОАО-ысь пресс-служба. 22 апреле кылбурчилэн, крезьгурчилэн но кырӟасьлэн Юлия Кузьминалэн "Яратӥсько но викышъясько" концертэз. Выль програмаын удмурт, ӟуч, туала кырӟанъёсын, пӧртэм эктонъёсын, серемес учыръёсын шулдыртозы Кузьминъёслэн семьязы; Светлана Яковлева, Алексей Шкляев, Рашит Хайдаров но мукетъёсыз. Концерт ортчоз Удмурт национальной театрлэн юртаз. Кутсконэз 18 часын. Юанъёс телефонъя: 30-15-28, 78-06-19, 78-45-92. "Кылтэм-ымтэм" арган Япониысь "Ямака" корпорация куаратэм крезьгуро инструментъёс поттыны кутскиз. Котькӧня кыска аргандэ, куараез уз кылӥськы. Табере бускельёс "изьыны сётымтэ" понна чагиськыса ветло ни. Асьсэос шудӥсьёс но соослэн дышетӥсьёссы инструментлэсь куаразэ наушник пыр кыло. Крезьгурен тунсыкъяськисьёс туж шумпотӥзы сыӵе кузьымлы - али Япониын котькудӥз кыкетӥез пианино "кылтэм-ымтэм". Выль дауре - выль календарен Календарез выльдон сярысь адями тыршылӥз вань вакытъёсы вашкала Египетысен кутскыса туннэ нуналозь. 1923-тӥ арын дуннеын кылдытэмын вал календарез выльдонъя нимысьтыз комитет. Со дырысен (берло 40 арзэ ООН-лэн бурдыз улын) та удысын ужъёс мыно. Али 400-лэсь ятыр ӵектонъёс люкаськемын ни. Нош календарез выльдонын азьветлӥсен лыдъяны луоз Ижевскын улӥсез Василий Рогалевез. Со котькинлэсь трос - 15 проект - дасям. Воргоронэз Гиннесслэн Книгаяз пыртыны луоз ни. Рогалевлэн вань ужъёсыз Всемирной календарья ассоциациын пусъемын (США, Орегон штат, Бенд город). Туж ик кулэ-а меда календарез воштыны? Вераны кулэ, Музъемлэн Шунды котыртӥ бергаменыз герӟаськемын арлэн кузьдалаез. Со чылк-чылк 365 сутка ӧвӧл. Вӧзаз ватсаське на куать час но кӧня ке минут. Ӵапак соин ик ньыль арлы огпол луэ "мултэс" нунал - 29-тӥ февраль. Кузь ар пумысен олокыӵе но калык веранъёс вань, со шуг-секытъёс, пе, вае. Василий Рогалёвлэн чакламезъя, котькудӥз 12 толэзь но ар понедельникысен кутско. Февраль, май, август, ноябрь 31 нуналъем луо, кылемъёсыз - 30 нуналъем. Арня нунал радэ пыртоно но шутэтскон нуналэн ялоно 31 лыдпусэн нуналъёсты. Субботаосты (ньыль нунал) шутэтскон нуналэн ялоно-а, ӧвӧл-а - решение куто государствоослэн закон кылдытъясь ёзъёссы. Календарьлэн авторез выль сямен улыны 2001-тӥ арысен ӵектэ. Угось соку выль даур кутске, со сяна, григорианской календарья та ар ӵапак понедельникысен кутске. Пусйыны кулэ, Василий Рогалёв шаерамы календарез выльдонъя "Шунды" ("Солнце") ассоциация кылдытӥз. Миым 17-тӥ августэ огазеяськонлы 4 ар тырмиз. Та нуналэз В. Рогалев Дуннеысь календарьлэн нуналэныз ялыны ӵектэ, нош пусъёно, пе, сое, 1999-тӥ арысен кутскыса. Т. СЕРГЕЕВА. Валэктэ юрист Сэрегез нуэ адвокат Лилия Шкляева Кышномуртэ мозмытӥзы ужысь Якшур-Бодьяын улӥсь нылы уж шедьтытэк сылӥз учётын. Калыкез уже интыянъя служба 1998-тӥ арын декабрь толэзе ыстӥз районысь ужаны администрацилэн столовояз пӧрасе. Ужын книжказэ басьтӥзы, гожтытӥзы уже кутон сярысь курон (заявление). Пичияк уждун тыризы. Таяз арын нылы кускыз висемен кошкиз больничное. Ужаны больничнойысь потӥз 9-тӥ феврале. Столовойлэн кивалтӥсез сое та нуналэ ик ужысь мозмытӥз. Шуиз на: со ӧз адӟылы нылылэсь уже кутыны куронзэ, ӧз кутылы уже. Озьы выремезлэн мугез мукет: кивалтӥсь тодэм, нылы нуны вайыны дасяське шуыса. Табере солэн ужан книжкаяз столовойын ужамез сярысь нокыӵе гожтэмез ӧвӧл, куронэз ӧвӧл, уждун басьтэмез сярысь но ведомостьсы олокытчы луэм. Юан: луэ-а меда секытэн кышномуртэ ужысь улляны, номыре но тырытэк но номыре валэктытэк? Али со огназ будэтэ кык нылпизэ. Картэз улэ мукет кышномуртэн. Н. КУЗЬМИНА. Меӵак вераны кулэ: кивалтӥсь татын тӥяз Россия Федерациысь Уж сярысь кодексэз. Отысь 18-тӥ ёзэт (статья) валэктэ: уже кутон пумысен предприятиысь, учреждениысь, организациысь администрация лэсьтэ приказ (распоряжение), уже кутэм мурт та пумысен сётэ расписка (приказ улэ кизэ нюртэ). Адямилэн ужаны кутскемез лыдъяське ужан огкыл (договор) лэсьтэмен, соку уг учко ни, сыӵе огкылъя документ вань-а, ӧвӧл-а? Вылӥ верам кодекс валэктэ: уже выльысь берыктон сярысь ужпумез эскерыны куронэн судэ вазиськоно ужысь мозмытэм сярысь приказ яке книжка басьтэм бере толэзь куспын. Та дыр ортчыса но суд сыӵе ужпумез эскерыны быгатэ, отчы азьлогес вазиськыны бадӟым муг люкетӥз ке. Тӥляд нылды, Кузьмина эш, судэ мыныны кулэ. Сыӵе дыр ортчемын ке, верано азьвылгес вазиськымтэ мугез. Со сяна, нылды судэ мед вуттоз кык муртэ, таосыз вераны кулэ нылды ужаз шуыса. Суд пыр ответчиклэсь озьы ик куроно уждун тырем сярысь ведомостез. 2-тӥ ёзэт валэктэ: секытэн кышноосты, куинь аресозь нылпиен анайёсты, 14 аресозь пиналэн яке 16 аресозь инвалидэн огназы улӥсь анайёсты администрация кичӧлтэмъя ужысь мозмытыны уг яра. Предприятие яке организация копак бырыку, соосты интыяно музон уже. Югославия Интернет пыр: Сербиысь но Югославиысь правительствоослэн официальной вазиськонзы 6-тӥ апреле 22-тӥ часысен Югославилэн но Сербилэн правительствооссы Косовоын но Метохиын ож нуонэз дугдыто. Таӵе решение кутэмын, Быдӟым нуналэз (пасхаез) пусъёнэн валче. Ваньмыз югославской военнойёс но полицейскойёс интыямын казармаосы. Вазиськонын верамын: вань тупамтэосты одӥг ӝӧк сьӧры пуксьыса эскероно но йылаз- пумаз вуттоно, ӝегатскытэк юрттоно войнаен сэрен улон интыосысьтызы пегӟемъёслы, вань быгатонозэ лэсьтоно албан, серб но мукет выжыысь калыкъёсты ог-огзы вылэ узатонтэм понна, Косовоын но Метохиын ас коже кивалтонъя ёзъёс кылдытоно. Кызьы тодмо, вылӥ верам вазиськонъя НАТО-лэн штаб-квартираяз нокыӵе решение кутэмын ӧвӧл на. Брюссель со сярысь ивор сётоз матысь дыре. Жак Ширак - НАТО палан Францилэн президентэз Жак Ширак - НАТО палан. Таӵе вазиськон со лэсьтӥз, национальной телевидение пыр вераськыкуз. Югославия вылэ макем бадӟым шуккет лэсьтод, сокем ӝоггес Слободан Милошевич визьмаськоз но политиказэ мукет ӧре воштоз, шуиз Францилэн кивалтӥсез. Белградлэсь та нуналъёсы ожъёсты дугдытонъя сётэм кичӧлтонзэ Жак Ширак но, ФРГ-лэн канцлерез Герхард Шредер но тырмыт вамышен уг лыдъяло. Москва - Белград Туннэ нуналозь Россия оске Югославиысь югдур тупатсконлы. МЧС-лэн самолётъёсыз отчы вутто сиён-юон но медикаментъёс. Пыӵал тӥрлыкен юрттон сярысь решение кутэмын ӧвӧл на, Белград та пумысен вазиськиз ке но. Югославие мынӥз Россиысь Кун Думалэн председателез Геннадий Селезнев. Отысь югдурез со ачиз учкыны, эскерыны малпа. Селезнев пумиськылоз Слободан Милошевичен. Вераськон мыноз Косово пумысен. х х х Борис Ельцин чутрак пумит луэмзэ вераз Югославилы пыӵал тӥрлык келян сярысь. Таин со возьыны тырше Россилэсь бадӟым оже пыриськонзэ. Юрий Маслюковлэн но малпанэз президентэн огкадь. Вице-премьер верамъя, Балканын ваче вуонэз тупатыны тыршоно дипломатия амалэн. х х х Адыгея Республикалэн кивалтӥсез Евгений Салов шуиз: дуннеысь огъя политической югдурез лыдэ басьтыса, Россия но СНГ-е пырись государствоослы, санкциос шоры учкытэк, военно-политической союз кылдытоно. Отчы мед пырысалзы Украина, Казахстан, Белоруссия, Узбекистан, Армения но мукет странаос. Краснодарской крайлэн губернаторез Николай Кондратенко Россилэсь туала политиказэ "предательской амалэн" нима. Со верамъя, вынлыко серб калыкез ӟуч государство "вузаз" ни 90-тӥ аръёслэн кутсконазы ик. "Асьмеос НАТО-лэсь чаклам ужрадъёссэ тӥян понна, номыр ӧм лэсьтэ, вылаз ик, пал кыл но ӧм поттылэ Югославилы оружие вузаны лэзёнтэм сярысь кутэм огкыллы (эмбарголы) пумит",- пусйиз Н. Кондратенко. х х х "Кинлы юрттоно? - юа Ярославской областьлэн губернаторез Анатолий Лисицын.- Нырысь ик, нылпиослы. НАТО-е пырись государствоос дурбасьто Косовоысь пегӟем албанецъёслы. Соослы 50 сюрс мала таӵе ик шуге-леке шедем Косовоысь сербъёс кулэ ӧвӧл. Озьыен, асьмелы, Россилы, дыр вуэмын вынъёсмы сярысь сюлмаськыны". Сергей Бабурин, Кун Думалэн председателезлэн воштӥсез: - Югославие кык пумо юрттэт вуыны кулэ: государство ласянь - военно-технической но гуманитарной, калык ласянь - Македоние но Черногорие пегӟем калыклы сиён-юон, дӥськут келян. х х х Кун Думалэн делегациеныз пумиськылон дыръя президент Милошевич кык дэмланзэ вераз. Нырысетӥез герӟаськемын СССР-лэн но Россилэн Югославилы пунэмен тыронъёсынызы. "Ми дась со чотын Россиысь пыӵал тӥрлык басьтыны",- шуиз Милошевич. Кыкетӥез - Слободан Милошевич эшшо огпол пусйиз на Югославия - Россия - Белоруссия огазеяськон кылдытон сярысь малпанзэ. Та пумысен вераськон ӝутскылӥз ни Балканын ож кутскытозь ик. Россия кылзэ ӧз вера на, туала югдурын - уката ик. х х х Западысь газетъёс гожъямъя, Израильлэн мукет кунъёсын кусып возёнъя министрез Ариэль Шарон аслаз вазиськоназ алӥз: Косово независимость басьтӥз ке, та провинция огазеяськыны быгатоз Албаниен. Соку кылдоз бадӟым ислам государство, Европа понна - "гомась вулкан". Та муген ик Израиль возиськиз НАТО-лы дурбасьтэмлэсь. Вань мукет но мугез: "нош одӥг чебер нуналэ НАТО уз пыриськы-а Израилен но Палестинаен кылдэм кусыпъёсты "эмъянэ"? Израиль, Косовоысь пегӟемъёслы юрттон понна, Македоние келяз полевой госпиталь но медицинской ужасьёссэ. х х х Босниысь ООН-лэн кужымъёсыныз кык азьвыл кивалтӥсьёслэн мылкыдзыя НАТО авиациен гинэ Югославиез уз вормы, пыртоз сухопутной войскооссэ. Но НАТО медаз вунэты: СРЮ- лэн кужымез ассэ утьыны тырмоз. ШӦКЫЧ Малы сыӵе ялон? Миым сӥзьыл "Удмуртская правда" газетын сётэмын вал таӵе ялон (рубрикаез "Требуется"): Люди для обработки корреспонденции на дому з/п (зарплата-уждун) высокая, без задержек. А/я 1639 + конверт с о/а (обратным адресом). Ма бен, малпай мон, уж ӵектӥсь вань бере, эскероно. Мырдэм шедьтӥ та абонентской ящиклэсь почтовой индекссэ, 426075 вылэм, ыстӥ отчы гожтэт, конверт келяса. Вити, вити, ответ ӧй басьты. Табере ӵап та ялонэз нош ик адӟи "Удмуртская правда" газетысь ик, со туэ 26 мартэ потэм 46 номераз сётэмын вал. Малы озьы шаянто адямиос, мукет муртэ пӧяса, ним-тулзэс а/я сьӧры ватыса? Куд- огез вера, озьы, пе, соос конверт люкало. Кин тодэ. Но лыдӟисьёслы дэмласал: та выллем ялонъёслы эн оске. П. Петрованов. Ижевск-Удмурт Епархилэн кивалтӥсь Архиереезлэн НИКОЛАЙ Архиепископлэн Православной Черкысь священникъёсты, монахъёсты, осконэн улӥсь калыкез Быдӟымнуналэн ӟечкыланэз ХРИСТОС УЛӞЫСА СУЛТӤЗ! "Христос улӟыса султӥз!" - миро нуллӥсь кышноослы шуизы кылчинъёс. Соос Христослэн улӟыса султэмез сярысь ӟеч иворез веразы Христослэн дышетскисьёсызлы. "Христос улӟыса султӥз!" - шумпотыса огзэс огзы ӟечкылазы апостолъёс Христослэн улӟыса султэмез сярысь ивор быдэс дунне вылэ вӧлмиз. Туннэ Христослэн Черкъёсаз вӧсяськись калык туж бадӟым шумпотонэн, данъяськыса шуэ: "Христос улӟыса султӥз!". Та кылъёс котькуд христиан адямилы шумпотон ваё. Малы меда та кылъёс сокем дуноесь, мусоесь? Соин, гажано агай-вынъёс, сузэръёс: Христос улӟыса ӧй ке султысал, ӧй луысал асьмелэн та святой осконмы, асьмеос луысалмы осконтэк улӥсь шудтэм калык; сьӧлыкъёс пӧлын улыса, адлэн гуаз усьысалмы. Утиськонмылэн Кузёез улӟыса ӧй ке султысал, соку асьмеос кулэмысь улӟыса султонмы сярысь малпаны но ӧй быгатысалмы. Асьмелы утён понна Со улӟыса султӥз но табере асьмеос кулонлэсь ум ни кышкаське. Мар со асьмелэн кулонмы? Вуоз час, куке вань кулэмъёсын ӵош асьмеос но улӟыса султомы: соку христиан калык понна бырисьтэм, шудбуро, выль улон вордӥськоз, кулон уз ни луы, уго ачиз Христос улӟыса султӥз. Тӥни соин ик асьмелэн сюлэммы шумпотэ, таӵе дуно, мусо, ненег кылъёсты кылыса: "Христос улӟыса султӥз! Христос улӟыса султӥз! Христос улӟыса султӥз!" Сӥё-дано атайёс, гажано агай-вынъёс, сузэръёс! Ваньдэс тӥледыз сюлмысьтым ӟечкыласько Быдӟымнуналэн - Христослэн улӟыса султонэныз! Эшшо но эшшо тӥледыз ӟечкыласько апостолъёслэн бырисьтэм-кысӥсьтэм кылъёсынызы. " Христос улӟыса султӥз! Христос улӟыса султӥз! Христос улӟыса султӥз!" Быдӟымнуналлэн шумпотонэз мед шунтоз сюлэмъёстэс, Улӟыса султэм, Улон Сётӥсь Христослэн ӟечлыкез мед улоз вань ужъёсады, малпанъёсады. Ижевск-Удмурт Епархилэн кивалтӥсь Архиереез Архиепископ Николай. Тазалык Чер лушкем аля Пыктосэн висёнлэсь кышкытлыксэ нокинлы валэктонэз ӧвӧл, дыр. Арысь аре сыӵе висисьёслэн лыдзы будэ. Кышномуртъёс ӵемгес курадӟо, гадязы пыктос потыса. 1998-тӥ арын 100 сюрс пӧлысь 36 сыӵе учыр шараямын вал. Гадязы пыктосэн тросгес курадӟо 35 ареслэсь ятыргес кышномуртъёс. Мугез асьсэ бордысь но потэ: нылпи ваемзы бере асьсэды аналто, врач доры туж висьыкузы гинэ мыно. Нош пыктос лушкем аля. Умойтэмзэ шӧдскыса но уг дырто операцие мыныны. Кышкало вӧсьлэсь, гадьтэк кылемзылэсь, уг оско бурмонзылы. Зэм, куддыр операция бере но висён выльысь аля. Нош бурмонлы оскытэк, висён адямиез чутрак погыртэ. Сыӵе секыт адӟонлэсь утиськон понна, кышномурт ассэ ялан чакласа возьыны кулэ. Толэзьлы быдэ, вир кошконды ортчем бере, эскере гадьёстэс - ӧвӧл-а пыктосъёсыз, горд виштыосыз, азэктэмъёсыз, уг-а вия ур выллем маке. Марзэ ке шӧдӥды ке, ӝегатскытэк вазиське врачлы - калык амалъёсын та висёнэз нокин но ӧз бурмыты на. Пыктос пичи дыръяз ик шараямын луиз ке, адямиез йӧнатыны луэ. Ӝыныяз учыръёсы гадь сыӵегес ик кыле: пыктосэн ӵош вандыса басьто котырысьтыз тӧдьы нёредъёсты (лимфатической узелъёсты) гинэ но быгытэз. Пыктосэз выжызэ мур лэземлэсь азьло шараян понна, 1-2 арскын огпол ке но возьматӥське онкологлы яке маммологлы. Милям центрамы тӥледыз умой-умой эскерозы но йӧнатозы усто специалистъёс. Т. КОПОСОВА, Маммологической центрысь валтӥсь врач. Шаермылэн историез - выль книгаын Удмуртиысь Национальной библиотека 12 апреле 17 часын тодматоз дано дышетӥсьлэн, шаерчилэн А. В. Новиковлэн "Золотой ларец" книгаеныз. Та сборник сӥземын Удмуртилэн историезлы. Выль книгалы дунъет сётозы но солэн автореныз тодматозы Удмурт кун университетысь, медициная академиысь учёнойёс, А. В. Новиковлэн дышетскисьёсыз но ӵыжы-выжыосыз. О. МАКСИМОВА. ПРАВИТЕЛЬСТВОЫСЬ ИВОРЪЁС Быдӟым нуналэн Правительстволэн Тӧроез П. Вершинин Ижевскысь но Удмуртиысь Архиепископлы Николайлы телеграмма ыстӥз. Правительстволэн нимыныз со ӟечкылаз Владыкаез, черкын ужасьёсты но вань оскисьёсты Быдӟым нунал праздникен. П. Вершинин Архиепископлы но инмарлы оскисьёслы сӥзиз юн тазалык, кема улон, шудбур но ваньзэ умойзэ гинэ. Правительстволэн премиез понна 1999 арын социальной удысын вормонъёс понна Правительстволэсь премизэ басьтыны ужъёс кутӥсько ини. Со сярысь ялӥз Удмурт Республикаысь Правительстволэн Премиосъя кенешез. Премиез басьтон понна материалъёс кутӥсько туэ 1-тӥ сентябрёзь таӵе адресъя: 426007, Ижевск город, Правительстволэн юртэз, 164-тӥ комната. Юалляськоно 52-49-95 телефонъя. Правительстволэн Тӧроезлэн секретариатысьтыз пресс-центр. Парамон нош Парамон гожъяське йыр пормымон... Тӥ уд тодӥське-а милесьтым собкормес Парамон Ивановез? Бен-бен, ӵапак со. Тып-тып удмурт воргорон: паськыт пельпумо, чагыр синмо, горд йырсиё, серекъяны-пышкылыны яратӥсь... Газетамы кызё ар пала ужатозяз, Селта, Сюмси, Вавож ёросъёсысь кудаз ке гуртэ вуылытэк кылиз меда со? Тросэзлы юрттӥз, уноез сярысь чебер но мур очеркъёс гожтӥз. Туж эшъяськиз "Шӧкычен". Лэчыт кылыныз юрттӥз улонысьтымы тырмымтэосты порыны. Табере Парамон Васильевич пенсиын ни. Но "Удмурт дуннеен" кусыпъёссэ уг ышты, ялан ма но со гожтэ, дорамы вуттэ. Ваньмон дыръяз шашкиен шудыны яратэ бере (Уваын та удысын солэсь кужмоез ӧвӧл), алигес ваиз вашкала шудон сярысь материалъёсын быдэс сузьет. Иванов - ӟеч атай. Кузпалэныз Валентина Тимофеевнаен ӵош куинь пи будэтӥз, ваньзы соос Челябинскысь военной училищеез йылпумъязы. Туннэ Парамон Васильевич юбилейзэ пусъе. Ӵош ужась эшъёсыз ӟечкылало сое вордскем нуналэныз. Таза лу, Василич! Пероед медаз ныжомы, выль гожъямъёсыд нош мед поромытозы лыдӟисьёслэсь йырзэс. И. ЛЕБЕДЕВ. ГОЖТӤСЬКОН-99 Гажано эшъёс, кызьы ивортӥмы ни вал, апрельысен кутске газет-журналъёслы кыкетӥ паларлы гожтӥськон. Кин "Удмурт дунне" газетлы гожтӥськиз вал ӝыны арлы гинэ, июльысен гожтӥськон дунъёс таӵеесь: арнялы быдэ куинь пол потӥсь номер (индексэз - 54400) сылэ 42 манет; гуртын улӥсьёс, пенсионеръёс, студентъёс куинь пол потӥсь номерлы (индексэз - 14402) гожтӥськыны быгатозы 39 манетэн; телепрограммаен пятницае потӥсь номерлэн (индексэз - 54402) дуныз 15 манет (гожтӥськыны луэ ӝыны арлы гинэ, толэзьёслы люкытэк). 14400 индексъя кыкетӥ паларлы гожтӥськон азьланьтэмын ӧвӧл. Гожтӥськон дунъёс йылэмын почта дунъёс будэмен. Пасхаез пусъё котькытын Пасха - языческой праздник луэ. Со герӟаськемын инкуазьлэн тулыс улӟеменыз - лултэм инкуазьлэн лулолы пӧрмеменыз. Таӵе валэктон пыремын христианъёслэн осконазы но: кулэм Христослы лул пыре, со выльысь улӟе, озьы ик, кызьы лултэм кидысъёс, писпуос выльысь улӟо, будыны ӧдъяло. Кам сьӧрысь удмуртъёс ноку но чукындырымтэ вал. Соос пасхаез пусъён вакытэ ортчыто быдӟым нунал праздниксэс. Удмуртиысь но удмуртъёс черке пыртэмлэсь азьло та праздникез ортчытъязы. Соос но сое быдӟым нунал шуо вал. Татарстанысь балтаси но кукмор удмуртъёс доры тулыс вазьгес вуэ. Отын ӵем дыръя вакытэзъя пасха тупа тулыс гырыны потонэн - геры шыд праздникен. Тӥни соин ик соослэн пасха праздниксылэн нимыз герӟаськемын геры шыд праздниклэн акашка чуваш нимыныз. Чуваш кылын ака "геры" шуэмлы тупа, ашка - "шыд". Уй пал удмуртъёс акашка праздникез великтэм шуо. Со - кушъето кыл. Потэмын велик день кыл бордысь: день люкетсэ ӟуч кылэз тодӥсьтэмъёс тэм шуыса валаллям. Валамон, Паска ним потэмын пасха бордысь. Кытын но кызьы нимало Пасхаез, сое умой возьматэ тодосчилэн Риф Насибуллинлэн дасям картаез. "ИЖМАШ" КУЛЬТУРА ДВОРЕЦЫН Ёрослэн 70 ар тырмонэзлы сӥзьыса Пурга ӝыт Тӥледыз шулдыртозы Бобья-Уча гуртысь но Пичи Пургаысь "Зарни шеп" ансамбльёс, Иваново-Самарск, Вуж Монья, Пуро-Можга, Курег, Пичи Пурга но мукет гуртъёсысь кырӟась-эктӥсьёс. Ӧтиськом шутэтскыны но шулдыръяськыны. Тодматскыны быгатоды Вуж Монья гуртысь кибашлыослэн ужъёсынызы. Вузкарозы Пичи Пурга ёросын поттэм сиён-юонъёсын. Гажаса витиськом 14 апреле 19 часлы. Пытьыос пӧрмо сюресъёслы Подъездысь вазь ӵукна потэмелы быдэ синйылтӥсько: кин ке но монэ азьпалтыны вуэм ини. Тани ук - уй ӵоже усем выль лымы вылын пытьыосыз "сӥямтэ" на. Чылкыт суред вылын кадь, син азе яркыт пуксё. Кытчы, кыдёке меда "вамышто" соос, мукетъёсызлы мынӥсьёслы сюрес мытыса? Бадӟымъёсыз, шоро-куспоосыз но пичиосыз пытьыос я бур пала, я паллян пала пазьгисько. Кыдёке меда кыстӥсько? Ӧвӧл вылэм. Азбармы сьӧрын соос борды мукетъёсыз итӥсько. Учке ай, отӥяз соос пыдын ветлон сюресъёслы, ульчаослы, трактъёслы, шоссеослы пӧрмо... Улонамы но ӵапак тазьы ик ук: пыдын ветлон сюрес мытӥсьёс сямен, пӧртэм ужъёслы кутскон сётӥсьёс вань. Витьтонэтӥ аръёсы асьме музъеммы улысь трос дауръёс ӵоже кыллись ваньбуръёсты утчаны вуиз но "Удмуртнефтеразведка" трестлэн валтӥсь геологез луиз Василий Александрович Шеходанов. Тӧлъёс пушкын но шунды тылсиос улын кыдам бамо адями сьӧры уиськыса бызьылоно луиз: вамышъёсыз -сажемъёс. Татчы лыктэмезлэсь азьло со Красноярскысь, Тюменьысь но мукет интыосысь музъемулъёсты эскерыны вуэм ини вылэм. Картографъёсын суредам удмурт кунмылэсь вылтуссэ планшетысьтыз поттыса, Василий Александрович мынэсьтым юаз: адӟиськод-а - макем укша со бер пыдъёсыз вылэ султэм гондырлы. Бен, шуи. Азь пыдъёсыз азьпала мычемын. Пельёсыз сак кылзо, синъёсыз сак учко. Та дырозь нокин умой-умой валэктыны ӧй быгатысал, маке сокем уте нюлэс пӧйшуръёслэн кузёзы. Али вераны но возьматыны луэ ини: солэн пыд улысьтыз, нефть сяна, шедьтэмын газ, музъем эгыр, уран руда но трос мукетыз. Нефтен узыр интыосты пусъён вылысь, карта вылэ вышкыас суредасалмы ке, лыдзыя киысь чиньыос сяна, пыд чиньыос но ватсаса ӧй тырмысалзы. Син азе пуктон вылысь, одӥгез сярысь гинэ татын рос-прос вералом. Вашкала шарканъёс но соослы матын улӥсьёс инмарен вунэтэм интыос сярысь йырси пештырскымон кышкытэсь учыръёс мадьылӥзы. Толалтэосы, пе, отын дауръёс ӵоже будэм но пограм нюлэс пыр нокин но потылыны дӥсьтылымтэ, нош кышкасьтэмъёс, пе, отчы ик кынмыса пограллям. Нош гужемъёсы отчы шӧдтэк шорысь укшам адями берен потыны нюжтӥськыса гинэ быгатылэм. Сыръясь интыосын но пичи муӵъёсын басьтэм нёжал кызьы ке гудыръян дыръя, озьы ик тӧл Пельтэмъя но асэрказ зуркалляз, отчы шедем пӧйшуръёсты но пудоосты гучырак! ньылылэм. Соин ик сыӵе кӧттырмостэм интылы, Кионгоп ним сётӥллям. Ньыльдон ар талэсь азьло ӟырт кезьыт тол нуналэ пыдэсозяз кынмем нёжалэ, Кионгопе, кужмо машинаос но тракторъёс музъем портон станокъёсын вышка ваиллям. Лазег гопез со кык иськем пала муромытэм. Музъем пушкысь кужмо сьӧд фонтан инмозь ик пызъем. Али Кионгоп, Гремихино, Архангельское, Вятское но нефтен узыр трос мукет интыос сярысь кылылымтэ адямиез шедьтод меда?.. Отысь "сьӧд зарни" Урал музъем вылтӥ кошкись андан ёзвиос пыр Россилэн трос пӧртэм интыосаз вуэ, кунгож сьӧры но вузаны шеде... Куке-соку тодмотэм Кионгопе но солэн "бускельёсыз" доры Владимир Александрович Шеходановлэн кивалтэмез улсын нырысь пытьыос понӥзы вал удмурт, башкир но бигер эшъёсыз. Табере отчы паськытэсь сюресъёс нуо но, артэ сюрсъёсын "сьӧд зарни" шуръёс бызё, удмурт кунмылы дан но милемлы узырлык ваё. *** 1939-тӥ арын тулыс уе удмурт музъем вадьсысь пилемтэм инмын, космосын, Андромеда но Касиопея кизилиос вискын, усьтэмын вал дуннеын нокинлы тодмотэм комета. Солы сётэмын вал кык землякъёсмылэн нимъёссы. Со уе Кестым школаысь физикалы но математикалы дышетӥсь Ибрагим Валиуллович Ахмаров гуртоосызлы клубын инкуазь сярысь лекция лыдӟиз вал. Дораз бертыкуз, келясьёсызлы валэктӥз яркыт чилясь кизилиослэсь нимъёссэс. Витьымтэ шорысь синъёсыз паськыт усьтӥськизы, кузь быжо кизилиез адӟыса. Иське, со - комета. Нош та интыын со ноку ӧй вал. Озьыен, со - ӵыжак вылез! Али ик быдэс дуннелы ивортоно! Кытчы? Ибрагим Валиуллович умой тодэ. Юнме шат со Россиысь калык пӧлы тодон-валанъёсты вӧлмытонъя обществолэн членэз кызь арлэсь кема луэ ини? Али ик ивортоно! Кестымысь Балезиное нуись сюрес капчи ӧй вал. Нуназе шунды тылсиос улын шунам лымы вупукылъёс интые кынмем пичи шуръёслы пӧрмем. Нош пыдъёс гылыт интыосты ӧз шӧдылэ - омыретӥ сямен лобизы. Уйшор бере почта юртэ вуэм клиентлы нылкышноос долак паймизы вал, нош Ленинград котырысь Пулковской обсерваторие ыстэм телеграммазэ бадӟым саклыкен лыдӟизы. Кызьы, пе, озьы тон пумтэм уно ворекъясь кизилиос пӧлысь ӵап выльзэ адӟыны быгатӥд? Ми, пе, отысь валэз яке скалэз адӟыса но пырак отын вылӥллям шуыса малпасалмы, дыр... Пулковоысь телеграмма кытӥ-мартӥ Копенгагенысь Международной астрономической обществое вуэм.Отын соку ик выль кометаез усьтӥсьлэн нимыныз ӝӧк вылын возён бадӟым ыргон медаль кисьтӥллям. Кӧня ке дыр ортчыса, Кестыме Даниысь туж тодмо профессорлэсь Олаф Хассельлэсь бадӟым гожтэт вуэ. Космосэз вить чиньызэ сямен ӟеч тодӥсь учёной Ахмаров господинлы долак паймемзэ вера: кызьы, пе, тон, огшоры советской дышетӥсь, нокыӵе телескоптэк ас синмыныд гинэ огшоры гинэ югдӥсь макеез адӟид но солэсь кытын луэмзэ рос-прос валэктыны быгатӥд?.. Мон, пе, со кометаез кужмо приборъёс пыр гинэ шедьтӥ тынэсьтыд быдэс суткалы бергес. Данъясько, пе, тонэ, вожъяськисько тыныд! Олаф Хассельлэсь азьлогес со кометаез ик адӟем удмурт музъем вылысь кыкетӥез адями - Воткинск районысь агроном Сергей Николаевич Юрлов. Соин ик Дуннеысь астрономъёслэн обществозы сое нимам Ахмаровлэн-Юрловлэн кометаез... Куинетӥез ним мултэс луэм. Тани ӵапак куатьтон ар ӵоже ини кузь быжо кизили, землякъёсмылэсь нимъёссэс нуллыса, кытын ке, пумтэм Галактикаын, берга. Музъем азе со берытскыны кулэ сизьым сюрс ар ортчыса гинэ... Кин тодэ, соку мукетъёсыз но, сое нырысь адӟисьёс, луозы, дыр... 1961-тӥ арын 12-тӥ апреле, Юрий Гагаринлэн космосэ лобан нуналаз, Ибрагим Валиуллович Ахмаров выльысь котькинлэсь азьло кужмо бурдо ӟуч ӧрӟиез ӟечкылаз но советской наукалэн туж бадӟым азинсконэныз данъяськемез сярысь вераз. Солэн та кылъёсыз ТАСС пыр быдэс дунне тыр жингыртӥзы. Байконур космодромысь нырысетӥ репортаж сётэм тодмо журналист Александр Романов, дорамы вуылыса, тазьы вераз: паймисько удмурт музъемлэн космослы тужгес матын луэмезлы. Малпалэ ай, пе, асьтэос: 1939-тӥ арын выль кометаез усьтӥсьёс - тӥляд землякъёсты. Юрий Гагаринэз но солэсь матысь эшъёссэ космосэ лобыны дасям адями, дуннелы тодмо физиолог, академик Василий Васильевич Парин - тӥляд землякты. Бен, Василий Васильевич но солэн выныз Борис Васильевич (таиз но академик вал) будӥзы медицина наукаосъя докторлэн, Ижевскысь мединститутэз кылдытӥсьлэн Василий Николаевич Паринлэн семьяяз. Пинал дырзы нош ортчиз Селта ёросысь Кейлуд гуртын. Отысь шурын пыласькыкузы, вынъёс ӵошатскылӥзы, кин вуэ кемалыгес зымылоз. Отысь потэмзы бере, сюлэмъёссылэсь жугиськемзэс эскерылӥзы. Василий Васильевичлэн верамезъя, отысен уго кутскиз солэн физиологиен тунсыкъяськонэз. Институтын дышетскыкуз но лабораториосын ужакуз, со уно опытъёс ортчытӥз, лётчикъёслэсь, шахтёръёслэсь, водолазъёслэсь но мукетъёсызлэсь ужакузы сюлэмжугиськемзэс эскерылӥз. Ваньзэ научной трактатэ люкаса, американецъёслы пумит вераз: адямиез космосэ ӝутъяны луоно! Ӵапак та вакытэ быдэсмиз конструкторлэн Сергей Павлович Королёвлэн вань улытозяз чаклам малпанэз: кылдытэмын вал космосэ лобаны нимысьтыз корабль. Кызьы тодмо, адямилэсь азьло отчы вылӥе ӝутскылӥзы Белка, Стрелка но Чернушка пуныос. Со дырысен уга кутскиз кык бадӟымесь учёнойёслэн люконтэм эшъяськонзы. Одӥгез эскериз, кызьы ужаз андан корабльлэн "сюлэмыз", мукетыз - кызьы чидазы улэп макеослэн сюлэмъёссы... Куамын тямыс ар талэсь азьло вуиз Адямилэн кизилиос доры ӝутскыны черодэз! Пӧртэм палъёсысен кутскем пытьыос инженерез но медикез одӥг сюрес вылэ вуттӥзы. Со сюреслэсь пасьталазэ али номырин мертаны уд быгаты ни. Нырысь пытьыос... Музъем вылын гинэ вылӥллямтэ соос! Выль лымыен яке тузонэн ваньзы ик уг сурасько, кыдёке, азьлане, нуисьёсыз паськытэсь сюресъёслы пӧрмо. Трос сыӵе данъяськымон сюресъёс удмурт музъем вылын. Соослы кутскон сётӥзы Россиын нырысь мотоцикл, нырысь бумага поттон машина, нырысь автомат, нырысь удмурт опера но трос мукетсэ кылдытӥсьёс. Леонид Данилов. ТАЗАЛЫК ЮАЛЭ-ВАЛЭКТОМ Дэйме быдтон вылысь пичи дыръям песянае термометрысь узвесь (ртуть) юыны сётъям. Али верало, со мугорлы туж кышкыт шуыса. Будыса туж ӵем висьылыны кутски, сыӵе эмъянлэн бервылъёсыз ӧвӧл меда со? Лариса Кириллова, 29 арес. Та юанэн ми вазиськылӥм 1-тӥ республиканской больницаысь валтӥсь врачлы- радиологлы Николай Петровлы. - Узвесь, зэмзэ но, организмлы (мугорлы) кышкыт маке. Таӵе эмъян амалъёс сярысь кылылэме ӧй вал на - шимес. Но та кышномуртэз буйгатэме но потэ. Узвесь мугоре шедем бере (юыса гинэ ӧвӧл, паръёсыныз но), соку ик "сьӧд ужзэ" ужаны кутске. Нырысь ик чутрак лябӟо пекляос. Собере вӧлме быдэс мугоре. Али висемдэс соин меӵак герӟаны уг луы, дыр трос гинэ ортчемын ни. Но токсиколог дорын эскериськыны мултэс уз луы. Соос ужало санэпидемстанциосын. Анай-атайёслы но нылпи садъёсын ужасьёслы вераме потэ: медицинской термометрды сӧриськыса, узвесез кисьтӥськиз ке, соку ик ӧте санэпидемстанциысь ужасьёсты - соос дезактивация ортчытозы. Дасяз З. РЯБИНИНА. Тазалык Калык эмъяськон Эмъюм - муш умортоын Мон кема аръёс ӵоже ини муш котырын бергасько. Чечылэн эмез сярысь котькин тодэ, нош удосирлэсь (прополислэсь) пайдазэ ваньмыз уг тодо. Мон ачим но азьло солэсь парос гинэ лэсьтылӥсько вал, кызыкум юылӥ. Кык ар талэсь азьло эскери мазь лэсьтыса. Соин шуккиськем, сутӥськем интыосты, яраосыз, гижлоосыз эмъяны луэ. Нош пыэдэз йӧнатэмзэ уг тодӥськы вал. Кызьы ке огпол бускель кышномуртэз скалэз лекаса вӧсь карем. Шуккиськем интызэ зыраны мазь куриз. Кӧня ке нунал ортчыса, пыэд кутэм на, нырыныз но шокамез уг луы ни, ньылоныз но кужектыса висе, пе. Эмъюмез ӧвӧлэн, удосирен мазез ныр пушказ, ымаз понэм. Кӧня ке дыр ортчыса, кышномурт бурмем. Со верам бере, ас вылам утчано кариськи - мушклейлэсь усто эмъюм вылымтэ. Йыр висьыку, пельдӥньёсам, кымысам зыраса но утчай, ӝыны час ортчыса капчи луиз. А. В. Суворов "Лишь капля мёда" книгаяз вера, прополисэн вань висёнъёслэсь эмъяськыны луэ шуыса. Туала арын, аптекаосын эмъюм туж дуно луэм бере, со йӧнатскыны туж ӟеч амал. Кызьы бичано удосирез, кызьы солэсь мазь лэсьтоно? Удосирез рамка бордысь бичаку, пӧлаз сюсь но, жаг но шеде. Соин ик сое чылкытатыны кулэ. Удосирез чылкыт вуэн посудае пыргытэ, суралэ. Сюсез но жуг-жагез ву вылэ ӝутӥськозы. Озьы кӧня ке пол гылъялэ, собере удосирез чылкыт басма вылэ куасьтыны вӧлдэ. Мазь лэсьтон понна басьтэ 100 грамм шунтэм скал вӧй (яке парсьлэсь шунтэм пуш кӧйзэ) но 20 грамм чылкытатэм удосир. Эмаль посудае поныса лэсьтэ "мунчо" - посудадэс вуэн мукет посудае пуктэ. Озьы 50-60 градусъем пӧсь вуын 20 минут пала суралляса пӧсятэ. Шуныт дыръяз ик, кык полэс марля пыр сӥсъяса, пияла посудае кисьтэ. Сӥякуз но ялан суралляны кулэ, удосир вӧйлэсь медаз висъяськы. Мазьды дась. Таза луэ. В. КУЛИКОВ. Алнаш ёрос, Актэмыр гурт. Юрттэт курыса вазиськон "Тон мынам луод" Университетэ дышетскыны пырыса, Геля Берёзкина нырысь-валысь туж мӧзмиз дорезлэсь, бӧрысь дышиз кадь, озьы ке но, арня пумын сюлмыз гуртаз кыскылӥз. Тани нош ик со дораз бертӥз. Кыӵе шумпотӥзы анаез, атаез но Сашик выныз. Вераськыса кӧтсы тырем бере, котькудӥз аслаз ужаз выиз. Геля выж ӵужыку, доразы Костя пыриз. Со нылашлэн ӵош дышетскем эшез. Бен, эш но шуод-а сое, уд-а? Озьы ке но, улон ӵем гинэ соосыз ваче пумит вуттылӥз. Укмысэтӥ класс бере Геляен Костя эшъяськизы. Нылашлэн мылкыдыз ик инме ӝутӥськылӥз пумиськылыкузы, соку туж синмаськемын вал угось со Костялы. Но аслыз ноку ӧз вералля яратэмез сярысь, шӧдӥз, лэся, люкиськозы шуыса. Озьы ик луиз. Костялэн трос нылъёсыз вал, Геля но мукетъёсыныз тодматскылӥз, но огеныз но матысь кусыпъёс ӧз тупаты. Малпаз, нырысетӥез луоз картэз. Нош тӥни кызьы ваньмыз берытскиз... Азьло бертакуз, клубысен Костя Геляез борддор борды ӝиптыса шуиз: - Тон туннэ мынам луод. Али сьӧрам кыл вератэк мынод, вай кидэ. Нылаш ас пельёсызлы ӧз оскы: - Шузимид-а яке висиськод? Мынам мылкыды ӧвӧл сьӧрад потыны. - Геля, тон ӧд вала кадь, мон уг серекъяськы,- Костя нылашез китӥз кырмиз. Та нырысез учыр ӧй вал ни. Костя Буранов кӧня ке пол Геляез тазьы шымыртылӥз. - Костя, мон тонэн уг выды. Сю пол верано тыныд одӥг мае ке! Кин тодэ ма луысал. Ярам, Гелялэн матысь эшез Сергей вуиз. Со соку ик валаз Костялэсь ныл борды тэбинемзэ, пияшез палэнэ донгыса лэзиз. Геля со куспын бызьыса кошкиз. Тани туннэ но Костя азьло вераськонзэ мытӥз: - Геля, ку асьмелэн кылмы тупалоз ини? Собере тынад мыным тыронэд вань - бутылка. Оло, вунэтӥд? Клубысь выжез миськыкуд ӟыгыръяны шӧтай, нош тон йӧтылымтэе понна бутылка сёто шуид. Мон тонэ ӧй иса соку, нош векчи виятэмзэ ӧй адӟы. Пӧяськемед ӟече уз вутты ведь. - Тон монэ кышкатӥськод? - Уг, мынам тонэ кышкатэме уг поты. Но тон одно ик мынам луод - матысь дыре-а, азьланяз-а, кужмысь-а мон тонэ каро, уг-а, но тыныд дышыны кулэ сыӵе малпанлы. - Костя, дугды, мон одӥгзэ уг валаськы. Тынад туганэд вань, гуртысь но сьӧрлось мукет нылъёс озьы ик бызьыса сьӧрад мынозы, нош тон монэн ёрмиськод. Мынам дасэз пӧлысь одӥгез луэме уг поты. Собере, Ижевскын мынам яратоно туганэ вань. - Нош мынам тонэ яратэме потэ. Кулэ ке, нокинэн уг калгы, соку соглаш луод-а? - Мон уг оскиськы тыныд. - Ну, тон эскерыса утча. Геля малпаз, кызьы ке Костяез со малпанэзлэсь куштӥськытоно, нош дыр ортчиз ке, со ачиз но вунэтоз тэбинемзэ. - Иське, сёт мыным сентябрь толэзёзь малпаськыны. Эн дыртыты, отчыозь эн но тэбиньы бордам. - Яралоз. Но алданы эн ик малпа, вожпотэм дыръям вань секытэз аслыд усёз. Озьы кенешыса, Геля ӧтьымтэ кунозэ келяны потӥз. Нош пияш аслэсьтыз кылзэ малы ке но воштӥз: - Сентябрёзь туж кема возьманы. Геля, кылзы, мынам али тонэ аслам кареме луэ, но соглаш луисько маёзь дыр сётыны. Нош тыныд маке уг кельшы ке, ӧйдо ум ӝегатске, луоз туннэ но пумиськеммы. Озьыен, малпаськы: яке али ик, яке мае. Костя кошкиз, нош Геля мар малпаны паймыса ик кылиз. Ӵуказеяз гинэ ӧжыт буйгаз со, оло, Костя юромо озьы эскериз, пе. Анаезлы юрттыны шуыса, клубе выж миськыны вамыштӥз. Ведра кутыса, вулы потаз. Пырыса гинэ вуттӥз, штора сьӧрысь Костя тэтчиз. Нылаш нырысь куалектӥз, собере бызьыса ӧс доры мынӥз. Но пияш сое азьпалтӥз, ӧсэз ворсаз. Синъёссэ адӟыса ик, нылаш валатскиз, Костя юнме пыремын ӧвӧл. Озьы ке но, курдамзэ возьматэмез ӧз поты. - Умой, Геля,- пальпотӥз Костя, берлань чигнась ныл доры матэктыса. - Умой, ачид ке умой. Мукет номыр вераса ӧз вутты, Костя сое бордаз ӝиптӥз. Геля Бурановез палэнтыны турттэ вал, соиз эшшо золгес ӟыгыртӥз. - Костя, тон мыным маёзь дыр сётӥсько шуид ук,- куалектӥз нылмурт. - Вераны котьма луэ, тон но бутылка пукто шуид но пӧяд. Гелялэн нокызьы мозмытскемез ӧз луы ни, пияш сое выж вылэ выдтӥз. Нылмурт воксё куалектӥз. - Костя, кулэ ке, мон али ик гуртысь вина сёто тыныд. Ӵош луыны но соглаш, но май толэзе. Курисько тонэ, дугды, эн кар монэ кужмысь,- кышкаменыз Геля кыл сётэмзэ но ӧз вала ни, мед гинэ лэзёз сое Костя. Нош Бурановлэн малпан ик ӧвӧл нылаш бордысь палэнскыны. Егитъёс куспын нюръяськон кутскиз. Но кытын, пе, вормод со "шкафез". Соку тӥни Гелялэн бӧрдонэз посьтӥз. Ымнырзэ киосыныз ӵоктаз. Татчыозь ӧй вал на солэн пиос азьын синву кисьтэмез. Кӧня егит пиосын эшъяськиз, керетылӥз, огзы но асьсэды тазьы ӧз возе на вал. - Султы, мон тонэ кужмысь уг кары, витё ини кык толэзьзэ,- лэзиськиз бордысьтыз Костя.- Адӟиськод-а, Геля, мон быгатӥсько вал пӧяськемед понна пунэмзэ берыктыны. Ваньмыз луысал татын, та выж вылын, тон монэ дугдытыны ӧй быгатысалыд. Нош мон жаляй, кыӵе ке калгись нылэн кадь ӧй выры тонэн. Малпасько, та учыр тонэ визьмалоз, быдэстод аслэсьтыз сётэм кылдэ. Бутылка но пуктод, астэ но кузьмалод,- Костя пальпотыса нылмурт шоры учкиз: мыньпотэмез солэн серем карись вал, нош синъёсыз йӧлвыл лушкась коӵышлэн кадь чилязы.- Озьыен, Геля, асьмеос кенешим, пумиськиськом мае. Кызьы мон валай, тон соглаш? Эн кышка. Дырызлэсь вазь мон тонэ уг йӧтылы, сётэм кылме быдэсто. Пеганы мар эн ик малпа, клубе ке но ӧд пота, дорад ке но пукид, мон тонэ шедьто. Озьы-а, тазьы-а - тон мынам луод. Кема ӧз быгаты нылаш буйганы, туннэ со валаз, та огшоры эскерон-кышкатон ӧй вал, Костя шудытэк вераз. Мукет дыръя со уз кылзы, аслэсьтыз малпанзэ быдэстоз. Геля сюлмыныз шӧдӥз: берпуметӥзэ капчиен мозмытскиз Костя ки улысь. х х х Ӝоген вуоз май толэзь. Праздникъёслы шуыса, вань эшъёсыз Гелялэн доразы бертозы. Со но гуртэзлэсь мӧзме, но бертыны кышка. Нылаш уг тоды ма карыны, кызьы потыны капканысь. Бутылка ке пуктӥз, котькуд бертэмезлы быдэ уз куры меда Костя векчи виятэмзэ? Собере, кытысен ке но со одно ик кырмоз, быдэстоз аслэсьтыз малпанзэ. Нылашлэн кужмыз уз тырмы пумитъяськыны, Костя сое пал киыныз сабыны быгатоз. Куд-ог дыръя Геля малпа, оло, пияш солы синмаськемын. Но аслыд кельшись адямиен озьы вырозы меда? Уг луы шат умоен верамез, малы озьы кышкатъяно? Костя пушкын кык адями нюръяське кадь потэ солы кытӥяз - умоез но уродэз. Умоез мӧзме, яратэ, возьма, дыр, гажамез но яратэмез. Нош уродэз кыске берлань - юыны, жугиськыны, нылъёсты ултӥяны. Вормо шуыса ужпум пуктӥз, дыр, аслыз, соин ик котькыӵе амалъёсын но тырше ни Геляез ас палаз берыктыны. Яке солэн мылкыдыз ӝутӥське нылашлэсь кышкамзэ адӟыса, со весь шуылӥз уго: - Тон, Берёзкина, укыр йӧно. Шуге-леке сюрем нылмурт уг тоды ни мар малпаны ик, кытчы вазиськыны. Анай-атаезлы усьтӥськыны со уг дӥсьты. Юан-веранъёс кутскозы, гуртэ оломар вӧлмоз. Котькыӵеез угось вань адямиос пӧлын, ӧвӧлтэмзэ но вань карыса куштозы, ай ассэ янгыше уськытозы. Нош дэмланъёс, пайдаё визь-кенеш солы кулэ. Сыӵе малпанэн ик Геля сюлэмзэ мыным усьтыны дӥсьтӥз, соглаш луиз газетэз лыдӟисьёслы юрттэт курыса вазиськыны: мар малпало соос та учыр сярысь, кызьы асьсэос потысалзы сыӵе югдурысь? Геля Берёзкина матысь нуналъёсы ик ини туж вите тӥлесьтыд гожтэтъёстэс, дэмланъёстэс. Кызьы валаськоды, нимыз солэн газетэ воштыса сётэмын. Галина САВИНА, Удмурт кун университетын дышетскись. Редакцилэсь. Гажано лыдӟисьёс, Гелялы юрттэмды потэ ке, ыстэ гожтэтъёстэс редакцие. Тӥ лэземъя, ми соосты газетэ печатлалом, оло, кинлы ке мукетызлы но сыӵе юрттэт кулэ. Яке сётомы аслыз нылмуртлы. Шӧкыч Тодӥськоды-а тӥ? Тест-йыртӥян Вормисьлы ба-а-адӟым кузьым - дунтэк кунгож сьӧры келялом! 1. Будэ-а Удмуртиын банан? а) Уг. б) Мерттӥд ке, будэ. в) Будэ, но сое асьме палан кешыр шуо. г) Вераны возьдаськисько. 2. Асьме тыметъёсысь крокодилъёсты адӟылэмды вань-а? а) Вань. б) Ӧвӧл. в) Крокодилъёс асьме палан уг уло. г) Сомында уг юиськы. 3. Кытчы интыяськемын Быги гурт? а) Африкае. б) Тибет гурезе. в) Шаркан ёросэ. г) Кытчы кулэ - отчы. 4. Маин Удмуртиысь кеч висъяське Африкаысь кечлэсь? а) Номырин но уг. Кеч - со Африкаын но кеч. б) Африкаысь кеч удмурт сямен бӧксыны уг быгаты. в) Уг тодӥськы. Африкаысь кечез адӟем ӧвӧл. г) Удмуртиысь кеч бӧксэ тазьы: бе-е-е, Африкаысез тазьы: бе-бе-бе. 5. Кӧня литр йӧл сётыны быгатэ скал? а) Скал мында ик. б) Кечлэсь тросгес. в) Кӧня кыскид, сомында. г) Мон йӧл уг юиськы. Табере лыдъялэ баллъёстэс. Котькуд шонер валэктон шедьтэмдылы пуктэ одӥг балл, котькуд шонертэмезлы - озьы ик одӥг балл. Ваньзэ сое огазе каре. Витьлэсь тросгес яке ӧжытгес потӥз ке, микрокалькуляторен лыдъялэ на. Вить луиз ке, озьыен, тӥ вормиды. Ӟечкыласьком! Кызьы кылмес сётӥмы вал - тӥледлы ба-а-адӟым кузьым: тӥ быгатоды дунтэк кунгож сьӧры потыны. Со понна кулэ луоз мел. Султэ ӧс азяды. Лэсьтэ мелэн гож но со вамен вамыштыса потэ. Озьыен, тӥ кунгож сьӧрын ни. Шудо сюрес тӥлед! Дунтэк кунгож сьӧры келяз Федор МИННИГАРАЕВ. ТАЗАЛЫК Капитализмысь пыдйылчиослэн висёнъёссы Трос дауръёс талэсь азьло улэм-вылэм, пе, Сифилис нимо пастух. Кылзӥськымтэез понна сое инмаръёс тодмотэм висёнэн черлатӥллям. Таӵе выжыкылэз маде Возрождение вакытысь кылбурчи но эмъясь Джироламо Фракасторо. Бератаз Сифилислэн нимыз нуналмысь улонэ пыӵа. Нырысь та черлэн 300 пала нимыз вал: Франциын - испан висён, Италиын но Польшаын - француз кыль, Россиын француз висён, Япониын - китай адӟон. Тодосчиос верамъя, сифилисэн курадӟизы вашкала Египетын но Грециын улӥсьёс. Лысьӧмъёссы но тае возьмато. Сократлэн нырызлэсь но аспӧртэмлыксэ герӟало сифилисэн. Эзель сярысь рос-прос тодо 1500-тӥ аръёсы. Соку сифилисэн висьыны ӧдъя Италиысь Неаполь карысь ог 1000 мында адями. Совето власть вакытэ сифилис лыдъяськиз капитализмлэн висёнэныз. Асьме адямиос черлаллязы ке но, янгышез усьылӥз мукет странаос вылэ. СССР-ын сифилис нокызьы пушйыны уз быгаты, шуылӥзы. Нош кыӵе меда югдур али дыре? Кунмы капитализм сюрес вылэ выжиз бере, сифилис кутэмъёслэн лыдзы но будӥз, вылды. Талы валэктон курыса, мон вазиськи Светлана Владимировна Суслоновалы, кожно-венерологической диспансерысь огеныз ёзэтэн кивалтӥсьлы. Бадӟым кышкытлык кылдэмын вал 1995-тӥ-1996-тӥ аръёсы сифилисэн нырысьсэ черламъёс пӧлын 7 сюрс 208 адями лыдъяськиз. Тужгес но трос висисьёс вал Ижын (60 процент). Тужгес бадӟым кышкытлык кылдӥз пиналъёс понна. Нырысетӥез нылпи врачъёс ки улэ шедиз 1991-тӥ арын, нош 1996-тӥын 30 пинал курадӟиз ини та шимес кылен. Соос пӧлысь тямысэз черлазы анайёссы секытэн дыръязы. 1997-тӥ арын курадӟисьёслэн лыдзы кулэсмыны ӧдъяз, кылем арын котькуд сю сюрс адямилы 276,5 висись лыдъяськиз. Быдэ вуымтэос пӧлын ваньмыз 233 адями черлаз. Соос пӧлысь 75,5 поцентэз - нылъёс. Жаляса верано луэ, дас ньыль аресъем дыдыос таӵе еж дыръязы тазалыксэс быдто. Котькуд учыре врач но нылкышно кенешо: ваёно-а солы пинал яке аборт лэсьтыса умойгес луоз. Но тросэз пиналзэс куштыны мылкыд каро. Ӵемгес черлало 19-29 аресъемъёс. Соос пӧлысь уноез - бызьымтэос, озьыен, пинал соослы кулэ но ӧвӧл. 1998-тӥ арын 3 пинал сифилисэн черласа вордӥськиз. Эмъясьёслэн янгышсы ӧвӧл. Кышномуртъёс ӧз сылэ учётын, ӧз вазиськылэ врачъёс доры. Вордсконо пинал сярысь ачиз кышномурт ке ӧз, кин сюлмаськоз на? Кыкез соос пӧлысь калтыртӥсьёс пӧлы пыро. Огез чиган кышно. Мукетыз пукемын. Висемез сярысь тодӥз нылпи ваён юртын гинэ. Али куинез ик пиналъёс тазаесь. Соосты чакласа возё эмъясьёс. Висись кышномуртлэн через вордскымтэ пиналлы тужгес но кышкыт 4-5-тӥ толэзьёсаз. Та дырозь анайлэн кылез пинал борды уг кутскы. 16-17-тӥ арняосаз сифилис, плацента пыр потыса, пиналлэн мугораз сюре. Тужгес но шуккет йӧтэ таосызлы, мусэзлы, йырвиымезлы, лыосызлы. Кышкытлык кылдэмын дорын. Кылем арын 6 пинал озьы висьыны усиз. Ваньзылэн сямен анай-атайёссы юисесь но калгисесь. Пиналъёс ас кожазы куштэмын, кураськыса ветло, кылем-мылем сиён бичало, анай-атайёссылэн посудаысьтызы сисько, одӥг валесын кӧлало. Огкылын вераса, нокыӵе гигиена сярысь вераськыны уг луы. Таӵе адямиос ик уг вазисько диспансеръёсы. Киязы ӧтён басьтыса но, эмъяськонние уг дырто. Трос шуг-секытъёс кылдо кунамы огъя экономикалэн куашкаменыз. Калык пыдйылчиозь вуттэмын. Куд-ог семья уг быгато майтал гинэ но басьтыны. Та бордысь пото ини сю пӧртэм висёнъёс. Уката ик вӧлскемез - лыдон (чесотка). Азьло дыре ёрос администрациос коньдон ласянь юрттыны быгато вал висисьёслы. Туннэ рос-прос юрттэт сярысь вераськыны ум быгатӥське. Мазьёс дуноямын, висись басьтыны уг быгаты. Семьяысь огез эмъяськытэк кыле ке, ваньзэ выльысь кутсконо луэ. Озьыен, лыдон куд- ог семьяосын аръёсын кыстӥське. Кылем арын элькунамы 4539 висись лыдъяськиз. Дыр ортче, нош калыклэн улонэз уг воштӥськы умой пала. Соин ик паймонэз ӧвӧл, та лыдпус азьланяз эшшо но будӥз ке. Л. ПОСТНИКОВА. Ижевское хлебпориемное предприятие � 2 закупает по договорным ценам: Горох продовольственный. Ячмень продовольственный. Зерно гречихи. Семена подсолнечника. Семена льна. Адрес: 426028, г. Ижевск, ул. Пойма, 17 т./ф. (3412) 30-66-50, 30-66-19. Шӧкыч Рашит ХАЙДАР РАЙ (Бӧтьыран) Серекъяны-маскаръяськыны яратӥсь мурт кулытоэяз, пе, улэ. Ма, соиз котькинлы но озьы кылдэмын, вылды. Но куд-огез сопал дуннеын но улыны малпа на. Сяськаосын пыласькись садын юмшамез, дун чылкыт вуын пыласькемез, маялляськись небыт омырен шокамез потэ. Огкылын вераса, райын улон сярысь сюлмаське. Нокинлэн но ассэ тэкит пушкын пӧзьтытэмез уг поты. Соин ик, райын улонэз мед адӟом шуыса, олома но даурто. Тани гуртысьтымы бускеле Тордӥ Семон но ас вакытаз рае вуылэм, шуо. Кышноез ӧвӧл дыръя, ньылоныз куасьмыны кутскем. Быдэс кружка сюкась но кымалтэм. Пайдаез ӧвӧл, пе. Соку ини кышноезлэсь ватоссэ утчаны кутскем. Мурӝолэ васькем но... дурыныз ик быдэс черык векчи виятэмзэ кымалтэм. Оло ӵоксузьыса, оло шай - питыр-питыр бызьылӥсь синъёсыз долкаллям, сӥлё-виро суй-пыдъёсыз коскаллям - выж вылаз вез-вез зоньтӥськем. Ужысь бертэм кышноез, таӵе суредэз адӟыса, чигиськыса чабкиськем гинэ на: "Э-э, Семонэ, Семонэ, та чыртыед ик быдтӥз ук тонэ... Чатран люкет, кемалась чоньдыны кулэ ни вал тон!.." ...Ватыны дасяськизы Туно-пелё но ас понназ лушкемак бӧтьыртэ ни. Семон но кемалась коросын. Кытысь ке ӧвӧл, конгро бодыеныз пыдул азяз ӵуштыртыса, сукыр Тутӥя но вуиз. Берлозэ ке но, Семонэз адӟеме потэ, шуэ. Корос вӧзтӥ ортчыкуз, дэрем сӧзыез шедьыса, пуконъёс вылэ понэм корос дымбыр-йыг! выж вылэ вуиз... Тордӥ Семон синъёссэ таба пасьта усьтӥз: "Тӥ но монэ рае келяны лыктӥды-а?" Ватыны люкаськемъёс, азьзэс-берзэс учкытэк, син куспын тӧлӟизы. Огназ кылем бераз, мазэ-созэ ятвылтыса, Семонлэн йырсиосыз пежыр султӥзы: ёкылымыны... улэпкын вато вылэм ук, чатранъёс. ...Дыр ортчиз. Семонлэн макмырез йыр тышказ кока. Йӧнатскон утчаса, артэ улӥсь пересь Одоть доры потӥз. "Рае пырон капка дорысен берыктӥзы ведь, - вераськон биньгозызэ ас палаз кожытӥз со. - Тазьы ик, мамык киосынызы инмар доры пырто ни вал... Нош тынад Одоть кенак сьӧлыкед вань, ноку но рае уд шедьы". "Малы?" - соизлэн тодэмез потэ. "Инмар нокинлы но вераны ӧз лэзьы". "Вера гинэ, мар курид - созэ сёто". "Йыр быгыльтон шедьтысалыд ке... Нош ачид чидалод меда?" "Чидан чигымтэ..." "Я, чиданэд чигымтэ бере, вералом ик-а, мар-а... Нош ку-о йыр быгальтондэ поттод ни?.." "Мар сюлтӥ кыскыса музэн возиськод? Ойдо, вера ук... кылзӥсько..." "Иське, кылзы. Уйшоре, атас чортэм бере, дас кык пол капка ултӥд пота. Соку вань сьӧлыкъёсыд та музъем вылэ кылёзы... Только та сярысь нокинлы но кылпум эн поттылы. Эмез уз луы..." Семон кобы тыр лэзем аракыез гуӵ-гуӵ юиэ. Со но та пумысь кӧня ке кылзэ пӧськытэмез бере, юэм аракыезлэсь пыдъёсаз васькемзэ шӧдыса, кыре-буре потӥз. Со нуналэ Тордӥ Семонлэн капчиям йырыныз сэмберъяськемез пумысь но ивор вӧлмытӥзы вал. Оло бригадирез, оло колхоз тӧроез тышкам, пе. Нош пересь Одоть сярысь ке... таиз со уе капка улаз ёркаса-пачкаса лулзэ сётэ-чоньдэ ни вылэм. Ярам, ӵукна пал шудон пӧлысь бертӥсь егитъёс синйылтӥллям. Ӵуказезяз ӵукна Одоть, губыр-губыр губырскыса, першал доры мыныкуз, ваче вуиз кык милиционеръёсын. Соос Семонэз кунултыса нуо. Тае адӟыса, пересь Одотья чангес куараеныз шара чабкиськемзэ ик шӧдытэк кылиз: "Вот Семон... Татын но пӧяз ведь монэ... Рае но милича нуэ вылэм ук!?." *** Уг тодӥськы, кудзы меда - Тордӥ Семон-а, пересь Одоть-а - рае шедизы. Огвакытэгес ик сопал дуннее кошкизы вал. Маке огзылэсь но отысь иворзы ӧз вуы... Удмурт Республикаысь Кун Кенешлэн Тӧроезлэн А. А. Волковлэн вазиськонэз Гажано эшъёс! 4-тӥ апрель Удмуртилэн политической улоназ, солэн кунлыкезлэсь демократической инъетъёссэ юнматонын бадӟым инты басьтӥз. Бырйисьёс асьсэ витёнъёссэс но осконъёссэс веразы сыӵе адямиослы, кудъёсыз, бырйисьёс малпамъя, республикалэсь экономиказэ ӝутыны, отьысь котькуд улӥсьлэсь улонзэ капчиятыны быгатозы. Мон мылысь-кыдысь ӟечкыласько ортчем быръёнын калыклэсь мандатсэ басьтэм муртъёсты но кыкетӥзэ ӧтчам Кун Кенешлэн депутатъёсызлы сӥзисько законъёсты кылдытон удысын пайдаё но ӟечлыко ужаны, бырйисьёслэсь куронъёссэс быдэсъяны. Бырйисьёслы тау карисько, Удмурт Республикаысь Кун Кенешлэсь выль муртъёссэ быръёнэ чырмыт пыриськемзы понна. Удмуртиысь кун властьлэн вылӥ ёзэз быръемын. Туннэ депутатъёслэн республикаысь калык понна ужаны мылкыдзы котькулэсь но юнгес луыны кулэ, быгатонлыкъёсмы, тодонъёсмы, кужыммы политика пумысен эшечонъёсын но ӵашетонъёсын юнме медаз кулэсме. Аслэсьтыз валтӥсь ужпумзэ - промышленностьын ваньбур поттонэз будэтон, гурт хозяйствоез ӝутон, республикаысь гражданъёсты улон-вылонын шуг-секытъёслэсь утёнъя радлык кылдытон понна луонлыкъёс шедьтоно - Кун Кенеш быдэстоз, депутатъёс ог- огенызы тупаса, ог-огзэс гажаса но вань шуг-секытъёсты вормыны тыршыса ужазы ке. Удмурт Республикалэсь кунлыксэ юнматон - со нырысь ик экономикаез юнматон. Мон ӵектӥсько Кун Кенеше быръем депутатъёслы огазеяськыны, та ужпумез быдэстон понна. Асьмеос бырйисьёслэсь оскемзэс ужен берыктыны кулэ, шаерамы улӥсьёслэн ӟеч улонзы но трос калыко Удмурт Республикалэн сяськаянэз понна. Удмурт Республикаысь Кун Кенешлэн Тӧроез А. А. Волков. Кык юсьёс кадесь Ижысь машина лэсьтӥсьёслэн культура дворецысьтызы калык театрысь усто артист Виталий Агбаев куамынлэсь ятыр спектакльёсын пӧртэм адямиосты возьматӥз ни. Троссэ рольёсыз со шудэ яратоно кузпалэныз Людмилаен ӵош.Сцена вылын синмаськымонэсь адӟисько, сӥё-дано артистъёс кадесь. Кырӟаны но, мадиськыны но, эктыны но шаплыесь. Алигес та усточиосмы двореце люкаськемъёслы возьматӥзы нырысьсэ ӵош шудэм постановкаысьтызы куинь люкетсэ. Отын кык егитъёс ог-огзылы усьто сюлэмзэс (зэмзэ, асьсэ улонысьтызы басьтэм кадь). Калык ӟырдыт чабиз соослы. Ӝыт сӥземын вал угось Виталий Агбаевлэн 50 арес тырмонэзлы. Виталий Львович удмурт культурамес азинтонлы уно кужымзэ сётэ. Со артист гинэ ӧвӧл, усто писатель но. Лыдӟисьёс туж ярато повестьёссэ, веросъёссэ, юморескаоссэ. Солэн творчествоезлы ӟеч дунъет сёто ни литературоведъёс но. Удмурт кылъя но литературая дышетӥсьёслэн алигес ортчем аттестацизы дыръя Фома Ермаков профессор шуиз: - Тӥляд дунды кулэсмоз, ӧд ке тодэ Виталий Агбаевлэсь гожъямъёссэ, солэсь узыр кылзэ. Озьыен, "Ижмаш" двореце ӝытэ артистэз данъян понна гинэ ӧз лыктэ. Виталий Агбаевез адямиос тодо котьмар ласянь синмаськымон, усточи луэменыз. Соин ик пумтэм вал татын ӟечкыланъёс, шуныт кылъёс, сяськаос, кузьымъёс. Ӝытэз нуиз калык театрлэн кивалтӥсез Анатолий Митрофанов. Тросэзлэн пушкыз тыриз, коллектив кузпалъёслы Агбаевъёслы сӥзьыса кырӟаку: "Кык юсьёс - со парлы пар но, одӥг яратон..." К. ЛОМАГИН. Тӥледыз кылзэ Наталья Кузнецова Пенсиосъя, пособиосъя, калыкез улон-вылонын утён ужпумъёсъя редакцие трос гинэ гожтэтъёс вуо, телефон пыр вазиськисьёс но вань. Лыдӟисьёслэсь мылкыд каронъёссэс лыдэ басьтыса, сояз арня куспын редакция меӵак телефон радъя калыкез улон-вылонын утёнъя министрлэн воштӥсеныз Наталья Федоровна Кузнецоваен. Меӵак телефон ортчытон нуналэз но солэсь дырзэ азьланяз газет бамын ивортом на. Нош кинлэн ке телефонэн вазиськыны луонлыкез ӧвӧл, юан сётыны быгатоды гожтэт пыр, Наталья Федоровналэсь валэктонъёссэ вуттомы газет баме. Юанъёстэс али ик ини сётыны быгатоды таӵе телефонъя но - 21-37-14. "Удмурт дунне". Ветеранъёслы - нимысьтыз аптека Дуннеын 7-тӥ апреле пусйизы тазалыклы сӥзем нуналэз. Ӵапак та нуналлы городлэн администрациез Ижевскысь ветеранъёслы кузьым дасяз. "Фармация" кун предприятие городлэн центраз выль аптека усьтӥз таӵе адресъя: Красноармейской ульча, 140-тӥ юрт. Ужысь но ожысь ветеранъёс отысь дунтэмгес эмъюмъёс басьтыны быгатозы. Л. ПЕТРОВА. Их руки творят красоту Подготовка специалистов-швейников ведется в следующих специализированных училищах. Профессиональное училище � 7 (ПУ � 7) Адрес: 426063, г. Ижевск, ул. Орджоникидзе, 63. Телефон: 75-53-27, 75-32-66. На базе 11 классов Срок обучения 1. Секретарь-машинистка 10 мес. 2. Ковровщица 10 мес. 3. Швея женского легкого платья 10 мес. 4. Швея верхней женской одежды 10 мес. 5. Портной с умением рескроя по лекалам 2 года 6. Портной национальной одежды 2 года 7. Вышивальщица 10 мес. Хозрасчетные группы (*) 1. Портной женской легкой одежды 3-6мес. 2. Портной женской верхней одежды 3-6 мес. 3. Портной мужских и женских брюк 3-6 мес. 4. Портной женской легкой одежды с умением кроить 3-6 мес. 5. Портной мужских и женских брюк с умением кроить 3-6 мес. 6. Закройщик женской одежды 3-6 мес. 7. Вышивальщица (ручная и машинная вышивка) 3-6 мес. 8. Ковровщица (ткач) 3-6 мес. 9. Вязалщица (на бытовых вязальных машинах) 3-6 мес. 10. Швея женской легкой одежды 3-6 мес. 11. Швея женской верхней одежды 3-6 мес. 12. Секретарь-машинистка 3-6 мес. 13. Машинистка И и ИИ категории 3-6 мес. Проезд: трамваи � � 2, 3, 4, 5, 10, троллейбусы � � 2, 4, 8, 10 до ост. "ул. Воровского". Профессиональный лицей "Мода" Адрес: 426009, г. Ижевск, ул. Халтурина, 2 а. Телефон 75-28-01. На базе 9 классов Срок обучения 1. Портной легкой женской одежды, закройщик 4 года 2. Портной женской верхней одежды, закройщик 4 года 3. Портной верхней женской и мужской одежды 4 года На базе 11 классов 1. Скорняк-раскройщик 1 год 6 мес. 2. Парикмахер 5 мес. Общежитие имеется. Проезд: трамваи � � 5, 8, 10, 11 до ост. "Школа-интернат". Профессиональный лицей "Мода" (Пл � 28) Профессиональный лицей "Мода" открыт с 01.09.1976 года для подготовки специалистов сферы бытового обслуживания населения С переходом в статус "лицея" появилась возможность заниматься углубленной подготовкой портных повышенного уровня квалификации и получения второй профессии - закройщика. С 1997 года в лицее открыто среднее профессиональное образование по специальности "техник-конструктор-модельер". Обучение проводится по интегрированному типу. На выпуске учащиеся получают рабочую профессию и специальность техник-конструктор- модельер. Все работы хороши - выбирай на вкус Дорогие выпускники! Система начального профессионального образования Удмуртии - это 48 образовательных учреждений. Из них 18 находятся в городе Ижевске. Заметно вырос авторитет профессиональных лицеев многоуровневой и многопрофильной организацией обучения. В 6-тт профессиональных лицеях, 2 колледжах открыта непрерывная ступенчатая профессиональная подготовка специалистов среднего звена по 15 специальностям: Для повышения социальной защищенности учащихся обучают двум и более специальностям. Первая ступень - начальное профессиональное образование. Вторая ступень - повышенное профессиональное образование. Третья ступень - среднее профессиональное образование. Четвертая ступень - возможность обучения в вузе по профилю профессии. В профессиональных училищах и лицеях республики трудится 1706 инженерно- педагогических работников. Одним из показателей уровня подготовки специалистов являются конкурсы профмастерства, олимпиады, выставки-ярмарки, предметные недели, работа по рационализаторству и изобретательству. Полную информацию об условиях приёма можно получить в приемных комиссиях учебных заведений. В. Н. Обухов, заместитель министра народного образования Удмуртской Республики. Профессии автомобильного профиля Автомобильно-технический лицей Адрес: г. Ижевск, ул. Ворошилова, 113 "А". Телефон приемной 26-05-61. На базе 9 классов Срок обучения 1. Электромонтер 2,5 года 2. Секретарь 3 года 3. Слесарь по ремонту промышленного оборудования 2,5 года 4. Станочник широкого профиля 2,5-3 года 5. Электрогазосварщик 2,5-3 года 6. Автомеханик 2,5-3 года 7. Токарь 2 года. На базе 11 классов 1. Электромонтер 10 мес. Платные группы(*) 1. Техник-технолог по обработке металлов резанием 2. Техник-технолог сварочного производства 3. Техник-механик по ремонту и обслуживанию автомобилей Общежитие имеется. Проезд: троллейбус � 4 до ост. "Учебный центр". Профессиональное училище � 42 Адрес: г. Ижевск, ул. Гагарина, 49 а. Телефон: 30-64-77, 30-64-88, 56-26-61. На базе 11 классов Срок обучения 1. Автомеханик 10 мес. 2. Автомеханик, слесарь по эксплуатации и ремонту газового оборудования 10 мес. 3. Автомеханик, электросварщик 10 мес. 4. Машинист холодильных установок 10 мес. 5. Повар-пекарь 10 мес. 6. Кондитер 10 мес. Училище выплачивает стипендию в размере 70 % минимальной заработной платы. Общежитие имеется. Хозрасчетные группы 1. Водитель автотранспортных средств кат. "А", "В", "С", "Д", "Е" 1-4,5 мес. 2. Электрогазосварщик 4,5 мес. 3. Повар-кондитер 4,5, 7,5 мес. 4. Мастер производственного обучения по вождению автотранспортных средств 50 часов. 5. Тракторист-машинист 1-6 мес. 6. Машинист холодильных установок 4,5 мес. Специальности: 1. Слесарь КИП и А газового хозяйства 2 мес. 2. Слесарь по строительству, эксплуатации и ремонту газопроводных предприятий 2,5 мес 3. Оператор паровых и водогрейных котлов на всех видах топлива 3 мес. 4. Стропальщик 1 мес. Проезд : трамваи � � 1, 3, 9; автобусы � � 1, 21 до ост. "ул. Московская". Профессию "Автомеханик" можно получить также в ПУ-4, ПУ-6, ПУ-31. г. Ижевска и в ПУ-15 г. Воткинска В рекламной полосе "Все работы хороши - выбирай на вкус!" есть некоторые уточнения. Следует читать: Швейному мастерству обучают в ПУ-12 г. Можги, ПУ-18 г. Воткинска, ПУ-20 г. Ижевска, ПУ-5 и ПУ-13 г. Сарапула. Профессию повара можно получить в ПУ-4, ПУ-31, ПУ-42 г. Ижевска, ПУ-12 г. Можги, ПУ-10, ПУ-18 г. Воткинска. Я б в рабочие пошёл... Специалистов металлообрабатывающего профиля готовят: Машиностроительный лицей Адрес: 426057, г. Ижевск, ул. Ленина, 1. Телефон приёмной 78-15-17. На базе 9 классов Срок обучения 1. Станочник широкого профиля 3 года 2. Слесарь-ремонтник 3 года 3. Слесарь-инструментальщик 3 года 4. Электромонтер по обслуживанию и ремонту промышленного оборудования 3 года 5. Наладчик автоматов и полуавтоматов, автоматических линий 3 года На базе 11 классов 1. Электрогазосварщик 1 год 2. Электромонтер по ремонту и обслуживанию промышленного оборудования 1 год 3. Юрист-бухгалтер хозяйственно-плановой деятельности 1 год Общежитие имеется. Проезд: трамваи � � 1, 2, 3, 4, 5, 6, 10, троллейбусы � � 1, 4, 7, 8, автобусы � � 6, 8, 11, 12, 20, 24, 34 до ост. "Центр". Механический лицей Адрес: 426027, г. Ижевск, пер. Ботеневский, 55. Телефон 75-78-74. На базе 9 классов Срок обучения 1. Токарь (токарь-карусельщик, токарь-револьверщик, оператор станков с ЧПУ) 2,5- 3 года 2. Станочник широкого профля 2,5-3 года 3. Слесарь механосборочных работ 2,5-3 года 4. Слесарь-ремонтник 2,5-3 года 5. Слесарь-инструментальщик 2,5-3 года 6. Электромонтер по обслуживанию и ремонту электрооборудования 2,5-3 года 7. Монтажник радиоэлектронной аппаратуры и приборов (контролер) 2,5-3 года 8. Оператор ЭВМ 2,5-3 года 9. Слесарь-сборщик 10 мес. На базе 11 классов 1. Станочник широкого профиля 10 мес. Общежития нет. Проезд: трамваи � � 2, 3, 4, 6, 8, 11, троллейбусы � � 2, 4, 6, 8, 10, автобус � 25 до ост. "ул. Промышленная". Профессиональное училище � 20 Адрес: 426008, г. Ижевск, ул. Кирова, 172. Телефон 64-82-19. На базе 9 классов Срок обучения 1. Токарь 2 года 2. Фрезеровщик 2 года 3. Штукатур-маляр 2 года 4. Швея 2 года 5. Электромонтер по ремонту пром. оборудования 3 года Общежитие имеется. Проезд: трамваи � � 2, 7, 9 троллейбусы � � 2 автобусы � � 12, 14, 24 до ост. "П/о, Редуктор". ГУРТ УДЫС Матэктэ кизён Лудъёсмы сайкатозь, дыр трос ӧз кыльы ни. Ваньмыз-а бен дась ни тулыс бусы ужъёслы? Озьы шуыны уг луы. Туэ кӧня ке паськытало ю тысь, картофка, бакча сиён но етӥн бусыос. Гыроно-кизёно луоз ваньзэ 500 сюрс гектар пала. Со пӧлысь 370 сюрс гектар басьтозы валэс юос. Тулыс гырон муоссы тужгес но уно Воткинск, Завьялово, Ува но куд-ог мукет районъёсын. Кылем сӥзьыл шаерамы 183 сюрс гектар ӟег но тол чабей киземын. Кызьы бен соос пото? Туэ лымы трос вал бере ӟег уд пурысьтаны кутске ни. Агрономъёслэн чакламзыя, 10-12 процентэз яке тросэзгес узьым бырыны шедёз. Озьыен со интые валэс ю кизёно луоз. Та ужлы али дасяськоно, кидыс шедьтоно. Оглом вераса, кидысмы тырмыт, но ӟечлыкез улӥынгес. Соин ик ӟеч кидыс будэтӥсь хозяйствоос 3.100 тонна таза кидыс вузаны дасязы ни. Матысь аръёсын ӵошатыса, туэ кизёнлы дасяськон умойгес мынэ. Гурт удыслы государство миым сярысь 2,5 пол уногес, 5,55 миллион манет уксё висъяз. Али 6,4 сюрс тонна минерал сылалъёс дасямын, яке кылем арын сярысь гектарлы быдэ 1,1 килограммлы ятыргес. Та вакытэ эшшо 16 миллион манетлы тукъёс вуозы на. "Удмуртагрохимия" огазеяськон сое поттыны 16 районъёсын огкыл гожтӥз ни. Кизён вакытлы ичизэ 25 сюрс тонна дизтопливо но 70 сюрс тонна бензин кулэ. Али со 16,5 миллион манетлы басьтэмын ни. Та уж радъямын "Сайгас-спец автоматика" но Удмуртнефтепродукт" огазеяськонъёс пыр. ГСМ-лы эштосъёс но крестьян хозяйствоос уз ёрме, со тырмыт вуоз. Нош гырон-кизён техникаен югдур пумен секытгес луэ. Со вужмемын, выльдон ляб мынэ. Хозяйствоосын кулэсмизы ни 545 трактор, 340 сеялка, уно культиваторъёс, комбайнъёс но музонэз. Туэ но СБС-АГРО банк гурт удыслы льготной кредит висъя. Кизён азелы со 54 миллион ёрос вуоз меӵак Гурт хозяйствоя но сиён-юонъя министерствое. Азьло со лыктэ вал банклэн Удмуртиысь ёзэз пыр. Нош фермеръёс 2,7 миллион манет басьтозы. Гуртысь нянь будэтӥсьёс чидатэк возьмало ни лудъёслэсь сайкамзэс. Г. РОМАНОВ. Луоз-а бадӟым тудву? Куазь пумен шунытгес кариське. Соин валче тыметъёс, шуръёс вуэн тырмо. Куазез чакласьёслэн ивортэмзыя, 25-тӥ апрельысен 2-тӥ маёзь ву кошкоз. Кыӵе со луоз? - туннэ нокин вераны уг быгаты. Малы ке шуоно, лымы трос ке но вал, музъем кынмымтэ но тулыс беромыса лыктэ: я кезьытске, я шунытске. Соин ик туэ бадӟым тудву, оло, уз но луы. Озьы ке но, та ужлы дасяськоно. Али тодмо ни, вылӥ верам дыре ву улэ шедьыны быгатозы 44 объектъёс но 1600 улон коркаос. Соин ик тудвуэз син азьын возёно. Со понна котькуд районын но городын тудвуэн герӟаськем ужъёсты быдэстонэз радъян вылысь комиссиос кылдытъямын. Али 38 тыметъёс эскеремын ни. Соос пӧлысь 21- езлэн кузёоссы ӧвӧл. Сыӵе тыметъёс тужгес но трос Дэбес (6), Яр но Воткинск (быдэн 4), Вавож, Балезино, шаркан (быдэн 1) но музон районъёсын. Ваньзэ соосты чакласа возёно, тупатъяно ву потон ӧръёссэс, дасяно кӧльы, луо, кранъёс но самосвалъёс, бульдозеръёс, висъяно чаклась адямиос. Шугадӟонэн кышкыт учыръёсын нюръяськисьёсты мар бен сюлэмшугъяськытэ? Районъёслэн кусыпъёссы лябесь на. Нош шуръёс ведь 2-3 районъёстӥ бызё. Тани али Балезино но Игра ёросъёсын интыен-интыен йӧ пуштытъямын ни. Та ужез мукет интыосын но радъяло. Тудвуэн нюръяськыны Ижысь администрация 32,5 сюрс манет коньдон висъяз ни. Али тудвуэз эскеронъя 11 постъёс ужало. Лобало кык МИ-2 вертолётъёс, дасямын 14 катеръёс но музон техника. Калыкез мукет интые нуллыны машинаос но чакламын. Г. ВАСИЛЬЕВ. Нужные работники столяры и плотники Строительная профессия! Древнейшие истоки и традиции, новые подходы, технологии и новое видение профессии. Всему этому можно научиться в профессиональном училище � 4. Училище образовалась 23 января 1941 года т воспитало за полувековой период не одно поколение строителей. Единственное в республике училище, где в основу воспитательной программы заложены к службе принципы кадетского движения. Это значит - зрелая подготовка к службе в армии, возможность поступления в военное училище. Занятия с курсантами проводятся в училище инструкторами клуба "Ожгарчи - воин". Профессиональное училище � 4 Адрес: 426039, г. Ижевск, ул. Буммашевская, 15. Телефон: 24-18-84, 24-08-45. На базе 9 классов Срок обучения 1. Мастер отделочных строительных работ 3 года 2. Мастер общестроительных работ 2 года (без получения среднего образования) 3. Машинист башенного и мостового крана 3 года 4. Сварщик 3 года 5. Мастер столярного и мебельного производства 2 года (без получения среднего образования). Зачисление в училище производится по результатам тестирования. Хозрасчетные группы (*) 1. Автомеханик 4-6 мес. 2. Электромонтер по ремонту и обслуживанию электрооборудования 4-6 мес. 3. Сварщик 4-6 мес. 4. Мастер общестроительных работ 4-6 мес. 5. Мастер столярно-плотничных работ 4-6 мес. Общежитие имеется. Проезд: трамваи � � 2, 5, 7, 8, 9 до ост. "Трамвайное кольцо"; автобус � 14, троллейбусы � � 4, 7 до ост. "Техучилище". Профессиональное училище � 6 Адрес: 426031, г. Ижевск, ул. Дзержинского, 95. Телефон: 24-34-42, 24-31-56. На базе 9 классов Срок обучения 1. Мастер общестроительных работ 3 года 2. Мастер отделочных работ 3 года 3. Сварщик 3 года 4. Автомеханик 3 года 5. Слесарь по строительно-монтажным работам 3 года 7. Мастер столярно-плотничных и паркетных работ 3 года 8. Монтажник сантехнических, вентиляционных систем и оборудования 3 года 9. Кровельщик (сталь, рулон, штучные материалы) 1 год 10 Машинист кранов 6 мес. На базе 11 классов 1. Сварщик 10 мес. 2. Автомеханик (слесарь по техническому обслуживанию и ремонту а/т средств, водитель автотранспортных средств) 10 мес. 3. Мастер общестроительных работ 8-10 мес. 4. Изготовитель художественных изделий из дерева 2 года 5. Монтажник сантехнических, вентиляционных систем и оборудования 1 год 6. Машинист кранов 6 мес. 7. Мастер общестроительных работ 1 год Вечернее отделение без отрыва от производства может готовить специалистов (срок обучения 3-6 месяцев) по следующим специальностям: 1. Мастер отделочных строительных работ 2. Мастер столярных и плиточных работ 3. Сварщик 4. Автомеханик. Общежитие имеется. Проезд: троллейбус � � 4, 7, автобус � 14, трамвай � � 2, 5, 7, 8, 9 до конечной ост. "Трамвайное кольцо". Профессиональное училище � 21 (ПУ � 21) Адрес: 426063, г. Ижевск, ул. Орджоникидзе, 23 а. Телефон 75-49-12 На базе 9 классов Срок обучения 1. Мастер отделочных работ (маляр, штукатур) с умением выполнять швейные работы 2 года 2. Мастер общестроительных работ (каменщик, печник) 2 года 3. Мастер сельскохозяйственного производства, растениеводства (фермер, плодоовощевод) 2-3 года 4. Мастер общестроительных, отделочных работ (каменщик, штукатур) 2 года 5. Мастер общестроительных работ (каменщик, сварщик) 2 года 6. Мастер столярно-плотничных общестроительных работ (плотник, каменщик) 3 года 7. Монтажник сантехнического оборудования 2 года На базе 11 классов 1. Мастер растениеводства (цветовод-декоратор) 2 года 2. Мастер отделочных строительных работ (штукатур, маляр), швея 1 год 3. Мастер общестроительных работ (каменщик, печник) 1 год 4. Мастер столярно-плотничных работ (плотник, каменщик) 1 год 5. Водитель городского электротранспорта (начиная с 21 года) 1 год 6. Монтажник сантехнического оборудования 1 год Хозрасчетные группы (*) 1. Служащие банка (на базе 11 классов) 2. Каменщики 3. Сварщики 4. Штукатуры-маляры. Общежитие имеется. Проезд: трамваи � � 2, 3, 4, 8, 11; троллейбусы � � 2, 4, 6, 8; автобусы� 25 до ост. "ул. Промышленная". Удмурт Республикаысь Кун Кенешлэсь нырысетӥ сессизэ люкан сярысь Удмурт Республикаысь Кун Кенешлэн Президиумезлэн Постановлениез Удмурт Республикаысь Кун Кенешлэн Президиумез пуктэ: 1. Удмурт Республикаысь кыкетӥзэ ӧтчам Кун Кенешлэсь нырысетӥ сессизэ люкано 1999 арын 20 апреле Ижевск городын. 2. Кун Кенешлэсь нырысетӥ заседанизэ дасян понна ужась группа кылдытоно Удмурт Республикаысь Кун Кенешлэн таӵе депутатъёсызлэсь: Волков Александр Александрович Вершинин Павел Николаевич Агашин Владимир Иванович Белоголовкин Данил Ефимович Боровик Юрий Иванович Дворцова Жанна Витальевна Загайнов Валерий Федорович Кокорин Михаил Константинович Кудинов Валентин Иванович Салтыков Анатолий Иванович Степнова Зоя Ивановна Тубылов Валентин Кузьмич Ходырев Валерий Васильевич Хорошавцев Виктор Геннадьевич Чикуров Сергей Витальевич Шестаков Юрий Владимирович Юшков Николай Петрович Удмурт Республикаысь Кун Кенешлэн Тӧроез А. А. Волков. Ижевск город, 1999 арын 8 апреле. � 640-И. КУН КЕНЕШЫН НО ПРАВИТЕЛЬСТВОЫН Учкемын трос ужпумъёс Кылем арня пумын Правительствое но Кун Кенеше люкаськылӥзы выль быръем депутатаъёс, районъёсысь, городъёсысь но республикаосысь кивалтӥсьёс. Отын уно ужпумъёс учкемын. Соос пӧлысь самой лэчытэз - уждун тырон, тудвулы но тулыс кизёнлы дасяськон. Кенешын йылпумъянъёс лэсьтэмын 4 апреле ортчытэм быръёнъёслы. Дыр ӝог ортче. Нырысетӥ кварталлы йылпумъянъёс лэсьтыса, удмурт Правительстволэн Тӧроез Павел Вершинин шуиз: - Шаерамы та дыр ӵоже ваньбур поттон кӧнялы ке будӥз ке но югдур оглом секыт на. Тани кун учреждениосын тыршисьёслы март понна уждун сётӥськом ке, данак интыосын со юн ӝегаса вуэ. Быдэс республикая али 2, 3 толэзьлы беромыса коньдон лыктэ, нош уно районъёсын со лыдпус 3 толэзьлэсь бадӟым. Кылсярысь, куинь толэзьлэсь трослы беромыса уждун басьто Балезино, Камбарка, Красногорск, Грахово, Дэбес но музон районъёсын. Котькытын-а бен таӵе югдур? Ӧвӧл. Му вӧй поттӥсь районъёсын (Игра, Каракулино, Якшур-Бодья) дыраз уждун тыро. Но таӵе ёросъёсмы туж ичи на. Соин ик Правительство федеральной бюджетысь кредит курыса, районъёслы но городъёслы юрттэ. Республикалэн али интыослы 2,5 миллион манет тыронэз вань на. Павел Вершинин но коньдонъя министр Владимир Бельтюков алигес Москваын нырысетӥ кварталэ ужаммылы отчёт лэсьтӥзы. Со умоен лыдъямын, но феврале уждун тыронъя графикез ӧм быдэстэ. Озьы ке но, республикалы 25 миллион манет бюджет ссуда висъяське. Та нуналъёсы со вуыны кулэ. Соин ӵош ик тулыс бусы ужъёсты ортчытыны 60 миллионлэсь уно уксё висъямын. Кызьы тодмо, туэ 1 апрельысен бюджет удысын тыршисьёслэн одӥг но ӝыны поллы уждунзы будэ. Со понна республикалы ватсаса 470 миллион манет коньдон кулэ. Озьыен шаерамы промышленной продукция поттонэз 2 поллы будэтоно. Вылаз ик, алигес правоосты утисьёслэн уждунзы 1,6 поллы йылтэмын но эшшо 26 миллион коньдон утчано на. Тӥни кӧня люкаське. Ваньзэ сое чакласа, Правительство нимаз постановление кутӥз. Соя бюджетникъёслэсь уждунзэс йылэтыны уксё шедьтыны кулэ кызьы ке республика, озьы ик интыос. Нош Павел Вершинин ватсаз, апрель-май понна вуж сямен ик коньдон вуоз, нош будэтэмез лыктоз июнь толэзьысен. Премьер-министр озьы ик бадӟым инты висъяз социально-экономической азинсконъя программаез улонэ пыӵатонлы. Ведь соин люконтэм герӟаськемын ӵуказе нуналмы но калыклэсь улон-вылонзэ умоятонэн. Тани зэмзэ но шаерамы шуген мынэ выт (налог) бичан. Та ласянь "азьпал радын" мынэ "Ижмаш" огазеяськон. Солэн тыронъёсыз сю миллион манетлэсь уно лыдъяське ни. Кызьы со отысь потоз? - шуг вераны Туннэ озьы ик. Вераны кулэ, таяз арын ньылетӥ толэзьзэ ужаськом ни, нош данакез районъёслэн али ке но туэлы бюджетъёссы ӧвӧл на. Озьы шуыны луоз Вавож, Игра, Камбарка, Кизнер, Сарапул, Як.-Бодья но мукет районъёс сярысь. Ижевск город но та нуналъёсы гинэ кутӥз ай. Уг умоя нылпос понна пособие тырон. Татын пӧртэм амалъёс кутӥсько: юрттэт сётӥське сиён-юонэн, нуналмысь кулэ луись вузъёсын но коммунальной услугаосын. Озьы 38 миллион манетлы предприятиосын огкылъёс гожтэмын ни. Улэп коньдон уг тырмы бере, таӵе сюрестӥ мыноно луэ. Но жаляса верано луэ, вань районъёсын но городъёсын таӵе уж огкадь умой радъямтэ. Али пособие тыриське кылем ар понна. Нош 1997 ар понна нылпиослы юрттэт висъяны ичизэ 107 миллион манет уксё шедьтоно на. Туэ тае одно ик пытсаны кулэ. Правительство азьын сыӵе ужпум сылэ. Нош кылем арлы 63 пӧлысь 28 миллионэз тыремын ни. Уждун тырон туэ умояз гурт удысын. Азьло 7 толэзь ӝеган ке вал, али со 2,6 толэзь кылемын. Кенешын музон ужпумъёс но ӝутскизы. Кылсярысь, ог-огедлы пунэм тыронъёсты берыктонын вузъёслы дунъёсты 1,5-2 поллы будэто. Кызьы сое умоен лыдъялод. Но туэ нырысетӥ кварталэ вань бюджетъёсы тыронъёс 12 процентлы кулэстэмын. Кун Кенеше депутатъёсты быръёнлы йылпумъянъёс лэсьтӥз Быръёнъёсъя кун комиссилэн тӧроез Афанасий Тубылов. Со ивортӥз, туэ быръёнъёсы 637 сюрс мурт пыриськиз, яке 51,4 процентэз. 1995-тӥ арын со лыдпус 49,8 процент вал. Вань округъёсын быръёнъёс ортчытэмын, 587 кандидатъёс пӧлысь 100 депутаъёс быръемын. Быръёнъёсы тужгес но трос калык пыриськиз Кез, Кизнер, Киясово, Пичи Пурга районъёсын но Ижын. Нырысетӥ созывысь 35-ез выльысь мандат басьтӥз. Таяз созыве тужгес но трос быръемын предприятиослэн но удысъёслэн кивалтӥсьёссы (37), ӧжыт шедемын гуртысь, тазалыкез утёнысь, калыкез дышетонысь но юристъёс. 4 апреле быръёнъёсты сюрс муртлэсь уно эскерисьёс вал. Туннэ озьы ик пусйыны кулэ: Быръёнъёсъя кун комиссие 22 ӝожтӥськонъёс вуэмын кандидатъёслэн законэз тӥяса валэктон уж нуэмзы пумысен. Куд-огезъя уголовной уж ӝутэмын. Тудвулы дасяськонъя ивортон лэсьтӥз Правительствоысь Граждан обороная но кышкыт учыръёслэсь утиськонъя комитетлэн тӧроез Тамаза Габричидзе. Г. РОМАНОВ. Школа но улон Шоргуртлэн герыез уз сыномы Крестьян семьяын вань гожтымтэ закон: пи ке вордске, сое кӧкыын кылльыкуз ик адӟо ни музъем гырисен-кизисен, сюдӥсен-вордӥсен. Зэмен но, быдэ вуэм мурт ӧз ке шӧмъя на герылэсь секталазэ, уг ке вала кудласянь валэз кыткыны-юскыны, огпол но ӧз ке пуксьылы трактор рычаг сьӧры - гуртын улӥсь понна со - "тӧдьы куака". Та воргоронлэн пушказ, арлыдыз ортчемъя но, музъемез гажан "ошмесэз" уз усьтӥськы: шундыез ӝужамезъя валано. Кез районысь Шоргуртын (Сыга-2) будӥсь нылъёс но пиос мумы-бубыоссылы ӟеч кивоштӥсь луозы. Таӵе оскон кылдэ, гуртысь школалэн ужамез шоры учкыса. Берло аръёссэ со умой-умой басьтӥськиз бакча сиён будэтӥсьёсты но механизаторъёсты дасян борды, нимыз но агрошкола луиз. Дышетон программае ватсаськизы выль предметъёс, пиналъёсын ужаны вуизы гурт удысъя специалистъёс. Огез соос пӧлысь - Владимир Петрович Ефремов, "Нива" колхозлэн азьвыл председателез. Али со быдэсак выемын школалэн дуннеяз. Верамезъя ик валано: мылкыдыз ӝутскемын, азьланезлы малпанъёсын но осконэн улэ та адями. - Музъеммы 50 гектар, агрошколалы сое висъяз "Нива" ТОО. Ми, вить воргоронъёс, куспамы кенешыса, арлы быдэ отын тысё культураосты будэтӥськом: чабей, йыды, кӧжы кизиськом на, - шуэ со. - Удалтонлыкезъя колхозынлэсь кык пол ӟечгес. Кылем арын, кылсярысь, гектарезлы быдэ 20-23 центнер ёрос кутсам. Шедьысал ке тырмыт удобрение, урожаймы эшшо но вылӥегес луысал. Шугъяськиськом техникалы, ю тысьмес кытчы интыяны. Гусеничной трактормы, дырыз вуэмен, 5 ар талэсь азьло списать каремын вал ни, нош ми туннэ но соин ужаськом, выльзэ возьманы нокытысь. Роно пыр басьтӥм колёасной трактор, таиз но вуж, но быгатӥсь киосын чида на. Озьы ик сётӥзы вал ГАЗ-66 автомашина. Сисьмем мае ке выльдӥм-тупатӥм - ветлэ. Тани толон но туннэ тысьмес соин элеваторе ворттӥм. Агрошкола миым усто ю-нянь будэтыны быгатӥз бере, пайдаез но шӧдӥськытэк ӧз кыльы. Кык нунал ӵоже Кезысь элеваторе 12 тонна тысь вуттӥзы, соку ик коньдонзэс сётӥзы. Умой ук! Йыдызэс келяло 90 копейкаен, сезьыез - 80-эн. Дунзэ вылэгес но пукты вылэм но... кин басьтоз? Люкаськем уксёзы ваньмыз кошке школалэн кулэяськонъёсызлы, столовое. Котькудӥз пинал нуназеямез понна толэзяз (!) тыре 5-6 манет. Таӵе дунъёсты туннэ, гуртысь сяна, кытысь меда адӟод на? Городысь школаын огпол сиськемад кык поллы ятыргес дун тырод. Сыӵеос асьсэос картофка но бакча сиён будэто, тулыс кутскыса, бер сӥзьылозь бакчаязы, бусыын тыршо. Тӥни малы ӝӧквылазы сомындалы гинэ усе. Агрошколалэн музъем ужен выремез туннэ пайда вае, со мозмытэмын налог тыронлэсь. Дышетӥсьёс-воргоронъёс тол вылтӥ кор дасяло, пуктӥзы ни тыриськон инты. Асьсэ кужымен ик тысь куасьтон ӝутӥзы. Кидыс палэнысь уг басьто - будэтэмез тырме. - Тужгес но трос коньдонмы кошке эстӥськонлы но воштос ёзъёслы. Техника пӧсьтэмын бере, ялан я отӥзэ, я татӥзэ кышъяно луэ, - шуэ В. П. Ефремов. - Тани 6 сюрс 240 манетлы гусеница ваим, сеялкаез тупатъяно, колёсаос басьтоно. Минерал сылалъёсмы но ӧвӧл на. Кизьыны потытозь, ваньзэ дасяса вуттоно. Озьы ке но, тулысэз умой мылкыдын витиськом. Пиналъёсты механизацияя урокъёслы дышетэ Николай Константинович Сычев, "Нива" колхозлэн азьвыл валтӥсь инженерез. 18 ар пала со егит механизаторъёсты дася ни - туала кивоштӥсьёс - ваньмыз Сычевлэн дышетэмъёсыз. Агрошколае выжиз колхозлэн валтӥсь агрономез Михаил Борисович Васильев но. Ефремов сярысь ке верано, "Ниваен" со 15 ар кивалтӥз. - Гурт хозяйствоез юри малпаса куашкатэмзэс мон ӧй чида ни, - тодаз вае 90-тӥ аръёслэсь кутсконзэс Владимир Петрович. = Кӧня меда уйёсты соку ӧй кӧла, кӧня тазалыкме быдтӥ, вылӥ кивалтӥсьёслэсь мар дауртэмзэс валаса? Али уг жаляськы школае лыктэмелы. Татын кыӵе ке но оскон мылкыд вань, лэсьтэм ужед син шоры йӧтэ. Агрошколалы азинскыны бадӟым юрттэт сётэ директормы Галина Николаевна. Сычева визьмо, улонэз валась кивалтӥсь. Колхоз сярысь ке верано, сизьым ар ӵоже витетӥез председатель отын ужа ни. Ватонэз ӧвӧл: секыт туннэ гурт калыклы, кужымед вылын гинэ, правительство ӟеч-ӟеч юрттытэк, кыдёке уд мыны. Агрошколалэн луонлыкез вань паськытаны, музон удыс борды но басьтӥськыны. Туж потэ вылэм соослэн скал но вордэмзы, парсь но воземзы, но пудо утялтӥсьлы ставка чакламтэ. Сое юнматыны кулэ калыкез дышетонъя министерство. Владимир Петровичлэн мукет но малпанэз вань: улмо сад уськытон. Пиналъёс соку нуналлы быдэ утялскозы асьсэ киын будэтэм емышъёсын, чай юозы соослэсь пӧзьтэм варенняосын. Инты но учкемын ни - школа дорысь картофка бервылэ, нош картофказэс бусые мерттозы. Ужась мурт котькытын ассэ шедьтэ. В. П. Ефремов но ӝог пыриз школа улонэ. Но сюлэмыз, сое шӧдоно вераськемезъя, бурмемын колхоз борды. Висись яра сямен, уен- нуналэн чепылля буйгатскыны турттӥсь мылкыдзэ. Кивоштӥсьёсты но дася ук колхозэз, гуртэз понна. ЛЮДМИЛА МЕДВЕДЕВА. В. П. Ефремов. Фотоез Владимир Камашевлэн. Тазьы ӝуатске кизили А. С. Пушкинлэн вордскемез дырысен - 200 ар Бадӟым тунсыкен тодматски мон Б. Томашевскийлэн 1956-тӥ арын поттэм "Пушкин" нимо нырысетӥ книгаеныз. Отын возьматэмын ӟуч поэтлэн 1813-ысен-1824-тӥ арозь улэмез но творческой ужез. Пичи дыръяз Сашаез будэтӥзы французъёс-гувернёръёс. Атаезлэн библиотекаяз француз кылын гинэ гожтэм книгаос вал. Уйёсы атаезлэн кабинетаз книгаос бӧрсьы книгаос лушкем лыдӟылӥз. 11 аресэз тырмыку, дорысьтыз вань книгаослэсь пуштроссэс чик могатэк вераны быгатылӥз. Но Саша француз гувернёръёсты малы ке ӧз яраты. Сямзэ юнматыны но йырвизьзэ будэтыны солы юрттӥзы кылбурчилэн песянаез М. А. Ганнибал но няняез Арина Родионовна. Пушкин ачиз сярысь берло гожтӥз: "Мон 13 аресысен гожъяськыны но та вакытэ ик печатласькыны кутски". Сашалэн нырысетӥ кылбурез, "К другу стихотворцу", печатламын вал 1814-тӥ арын 4- тӥ июле. Пушкинлы тужгес но умой гожъяськыны юрттӥз 1811-тӥ арын 19-тӥ октябре усьтэм Царскосельской лицей. Дано ӟуч югдытӥсь лицейлэн нырысетӥ директорез Василий Федорович Малиновский дышетскыны лыктэмъёсты шуныт мылкыдын пумитаку, Александр соос пӧлын ик вал. Со сярысь тодытэ Екатерининской дворец вӧзысь юрт борды шуккем буре ваён пул. ... Меӵ тубат вуттэ куинетӥяз - дышетскон этаже. Пырон дорын ик - газет комната, физикая но кырӟанъя классъёс, дышетскон кабинетъёс. Нош аркаын (солэн укноостӥз учкыса, лицеистъёс келяллязы Наполеонэн ожмаськыны кошкись полкъёсты) интыяськемын библиотека. Бадӟым залын чалмыт. Татын чузъяськиз Пушкинлэн куараез, экзаменын "Воспоминание о Царском Селе" кылбурзэ лыдӟыкуз. Татысен Гавриил Романович Державин шудо сюрес сӥзиз солы бадӟым поэзие. Лицеез быдтэмез бере, Пушкинэз Петербургын куто кунгож сьӧрын ужанъя коллегие. Соку та городын кылдӥзы лушкем ужась кружокъёс. Александр И эксэй, французъёсыз вормемез бере, Россиын лушкем кылдытэм обществоосыз зӥбыны тыршиз. Секыт улонэз кызьы ке но умоятыны ӝутскизы ӟуч дворянствоысь декабристъёс. Коллегиын ужакуз, Пушкин тодматскиз Александр Сергеевич Грибоедовен, офицеръёсын. Декабристъёс нюръяськизы, крестьянъёсыз крепостной праволэсь мозмытон понна. Пушкин пыриськиз "Арзамас" но "Вож лампа" огазеяськонъёсы. Со Александр И-лы, Аракчеевлы, Голицын министрлы но мукет кивалтӥсьёслы пумит эпиграммаос гожъяны ӧдъяз. Сыӵе кылбуръёсты, киын гожъяса, паськыт вӧлмытӥзы. Пушкинлэн лэчыт кылын гожъямъёсыз Александр И кие сюрем бере, со кылбурчиез 1820-тӥ арын май толэзьлэн кутсконаз лымшор пала Инзов генерал доры служить карыны ыстэ. Александр Сергеевич, Екатеринославе (али - Днепропетровск) вуэмез бере, Днепрын пыласькыса висьыны усиз. Ӵапак соку Крыме аслаз пичи пиеныз но кык нылыныз мынӥз Раевский генерал, дораз пыраз. Пушкин эшъяськемын вал солэн пиеныз, Н. Н. Раевскиен. Соин ик, Раевскийёс куремен, поэтэз Инзов соосын ӵош сьӧразы йӧнатскыны мыныны лэзиз. Александр нырысь ик кык толэзь йӧнатскиз минеральной вуэн Пятигорскын, собере Крымын куинь арня улӥз Гурзуфын. Солы туж яраз выжыкылын кадь чебер Кавказысь но Крымысь инкуазь. Гурзуфын улыкуз, пичиесь кылбуръёс сяна, выльдыса гожтыны ӧдъяз "Кавказский пленниксэ". Сентябрьлэн кутсконаз Пушкин Крымысь кошкиз, сюрес вылтӥ мыныкуз пыраз Бахчисарае. Озьы татысь фонтан сярысь поэма кылдытӥз. Пушкин шутэтскыку, Инзов генералэз Кишиневе келяллям. Татчы кылбурчи вуиз 1820-тӥ арын 21 сентябре. Кишиневын куинь ар улытозяз, театре но балъёсы ветлэменыз ӵош трос лыдӟиз газетъёс но журналъёс, гожъяськиз. Со сяна, пумиськылӥз лушкем ужась политической организациосы ветлӥсьёсын: революционной обществолэн кивалтӥсеныз П. И. Пестелен, майорен, визьмо кылбурчиен Вл. Ф. Раевсикен но мукетъёсын, Кишиневын Пушкин йылпумъяз "Кавказский пленник" но "Братья-разбойники" поэмаоссэ, ужаз "Бахчисарайский фонтан" поэмаез бордын. 1923-тӥ арын май толэзе кутске "Евгений Онегин" бадӟым романзэ гожтыны. 1824-тӥ арын сӥзьыл эксэй Пушкинэз, службаысьтыз куштыса, ссылкае келя анай-атаез доры, Михайловское. "Интыысь властьлэн эскеремез улсын". Интыысь кивалтӥсьёс ӵектӥзы бубизлы, Сергей Львовичлы, аслэсьтыз пизэ эскерыны. Атаезлэн пумит луымтэез кылбурчилэсь мылкыдзэ зӥбиз. Со трос дырзэ ортчытӥз Тригорскоеын П. А. Осиповалэн улон интыяз. Но возьмамтэ шорысь Пушкинлэн семьяез Михайловскоеысь кошкиз. Кылбурчиез эскерыны ӵектӥзы артысь помещиклы но черкысь властьлы. Михайловскоеын Пушкин улӥз кык ар. Татын йылпумъяз "Цыганы" поэмазэ, лымшор палан гожтыны кутскем романзэ, "Евгений Онегинзэ" азинтӥз. Куиньысен куатетӥ главаосаз возьматӥз помещикъёслэсь но калыклэсь улонзэс. ВЛАДИМИР ЧЕРНОВ. Усьтэмын выставка Удмуртилэн Национальной библиотекаысьтыз шаермес тодонъя отделын ужасьёс, писательёслэн вордскем нуналзылы сӥзьыса, тунсыко выставкаос усьтыло. Али татын тодматскыны луэ быдӟым ӟуч кылбурчилэн А. С. Пушкинлэн вордскемез дырысен 200 ар тырмонлы сӥзьыса дасям, солэн Удмуртиен герӟаськем произведениосыз сярысь адӟытонэн (выставкаен). Отын возьматэмын Александр Сергеевичлэн Сарапулын вордскем нылашлы Надежда Дуровалы 1836-тӥ арын 10-тӥ июне ыстэм гожтэтэз. Кылбурчи Наполеонлэн войскоосыныз ожмаськись Надялэсь гожъямзэ "Современник" журналаз печатланы дасямез сярысь ивортэ. 1867-тӥ арын Вяткаын поттӥзы удмурт нылпиослы священникен Николай Блиновен дасям "Лыдӟон" азбука. Татын ик адӟыны луэ филология наукаосъя кандидатлэсь Даниил Яшинлэсь 1987-тӥ арын 28-тӥ феврале "Советской Удмуртия" газетын Пушкинлэн "Цыганы" поэмаысьтыз люкетсэ Блиновлэн азбукаяз удмурт кылын нырысьсэ печатламзы сярысь материалзэ. 1873-тӥ-1892-тӥ аръёсы тодмо тодосчи Григорий Верещагин А. С. Пушкинлэсь "Сказка о рыбаке и рыбке" выжыкылзэ удмурт улон-вылонлы матэ карыса берыктӥз. Асьме даурлэн кутсконаз Казаньысь университетын дышетскись, берло революционер но кылбурчи Максим Прокопьев удмурт кылэ берыктӥз Пушкинлэсь "Сказка о попе и его работнике балде" выжыкылзэ. Сое Казаньын 1919-тӥ арын гинэ печатлазы. Озьы ик выставкаын лад-лад кыллё А. С. Пушкинлэн удмурт кылэ берыктэм "Медный всадник", "Бахчисарайский фонтан", "Руслан и Людмила", "Сказка о Царе Салтане" но мукет книгаосыз. Пусйыны кулэ созэ но: Быдӟым Октябрь революция ортчем бере, библиотекаосын кивалтыны кутскиз Наркомпросысь нимысьтыз отдел. Солэн фондысьтыз 1920-тӥ арын Урал университетэ Царскосельской лицейысь кӧня ке книгаос ыстӥзы. Удмуртиысь государственной библиотекае лицеистъёслэсь сизьым книгазэс келязы. Али та книгаосты библиотекаын синчеберез кадь утё. Туж бадӟым тау карем потэ библиотекаын ужасьёслы. Таӵе улон шоры учкытэк возё но лыдӟисьёслы сётъяло соос туж кулэ книгаос. Со сяна, ваньмон дыр шедьтыкузы быгато на учкымон выставкаос ортчытъяны. Владимир Чернов. Правительствоысь иворъёс Ӟечъёсыз пӧлын - Удмуртиысь предприятиос Россия Федерациысь Лэсьтӥськонъя, архитектурая но улон юртъёс пумысен политикая кун комитет, Россиысь Жилищно-коммунальной хозяйствоын ужасьёслэн союззылэн правлениез, интыысь промышленностьын но Россиысь коммунально-бытовой предприятиосын ужасьёслэн профсоюззылэн кивалтӥсь ёззы ортчытӥзы огъя кенеш. Отын эскеремын Россиысь жилищно-коммунальной хозяйствоысь предприятиос пӧлын ортчытэм конкурслы йылпумъянъёс. Ӵошатсконлэн нырысетӥ люкетаз пыриськиз 896 предприятие Россилэн 68 улосысьтыз, нош конкурслэн берпуметӥ этапаз 300 предприятие но организация потӥз. Конкурсэ пыриськизы шаерысьтымы огазеяськонъёс но. Сяська будэтӥсь но урамъёсысь писпуос, турын-куар сярысь сюлмаськись предприятиос пӧлын Ижевскысь сяська будэтонъя предприятие ИИ степенё дипломен пусъемын, 1998 арын ӟеч ужамез но конкуренциын вормыны быгатэмез понна. 200 тужгес ӟеч ужась предприятиос пӧлы пыртэмын "Ижкомтранс" предприятие Глазовысь улосэз чылкытатонъя, утялтонъя автохозяйство. Урамъёс ӝоген чеберскозы Март толэзе ик Правительство кутӥз республикаын улосъёсты чылкытатон, утялтон но тылпуослэсь утиськон сярысь постановление. Али та ужрадъёслы дасяськон мынэ, нимысьтыз план кылдытэмын. Куазь кезьыт кариськемен, улосъёсты мае чылкытатоно луоз, дыр. Правительстволэн Тӧроезлэн секретариатысьтыз пресс-центр. ТУЭ - ДУННЕЫСЬ АРЛЫДООСЛЭН АРЗЫ Оскон ыше Редакциямы ӵем вуо арлыдоослэн гожтэтъёссы. Ваньмаз сямен - урод улэмзылы, пичи пенсизылы ӝожтӥськон. Ижевскын улӥсь Н. Коровина юрттэт курыса вазиськем. Туж ӝож, шуэ, мон синтэм, пельтэм, диабетэн висисько, нош пенсие эмъюмлы но уг тырмы. Оло, монэ алда утялтӥсе (опекунэ)?.. Та гожтэтэн ми вазиськылӥм Россиысь синтэмъёслэн огазеяськонзылэн Удмуртиысь ёзэзлэн правлениезлэн кивалтӥсезлы Анатолий Иванович Бабурченколы. Анатолий Иванович, пересьёслэн улонзы, зэмзэ но, туж секыт. Нош синтэмъёслэн - кык полэс. Ӵем-а луыло таӵе ӝожтӥськон учыръёс? - Луо. Синтэм муртэ алданы капчигес уго. Утялтӥсьёс нош ваньмыз чылкыт сюлэмо муртъёс ӧвӧл. Кудӥзлэн со нылпиез, ӵыжы-выжыез, кудӥзлэн - огшоры тодмоез, палэнысь адями. Туала арын аслад ӵыжы-выжыед но алда ук. Кемалась ӧвӧл, огзэ синтэм кышномуртэз интернатэ келямы - квартиратэк кылиз. Утялтӥсез дораз племянниксэ пыртэм (прописать карем). Соиз туж чаль кузё кариськем, кышномуртэз ултӥяны ӧдъям. Синтэм мурт сыӵе улонэзлы чидатэк вазиськиз ми доры. Интернатэ келян сяна, мукет амал ӧм шедьтэ ни. Сыӵе учыръёс трос. Вань, дыр, синтэмъёслэс пенсизэс талан учыръёс но. Соосты эскеро ёросъёсысь огазеяськонъёс. Но тросэз синтэм муртъёс юнме но чагисько - уг адӟо бере соосты юри алдало кожало. Пенсия пичи, уг тырмы, мар кыле на пересь муртлы ӝожтӥськон сяна. - Таӵе пересьёслы, коньдонлэсь зол, оло, сюлэмзэс буйгатон, ӟеч кыл кулэ? Ужало-а сыӵе муртъёсын психологъёс? - Нимыстыз психологъёс ужасалзы ке, югдур, оло, зэм но, капчигес луысал. Но коньдон ӧвӧлэн, сыӵе специалистъёсты возьыны ум быгатӥське. - Кытысь кужым шедьтэ на синтэм мурт пеймыт улонзэ ӧжыт ке но сайкытгес, улэм потымонгес карыны? - Сыӵе муртъёс ӵемгес ог-огенызы пумиськылыны, вераськыны кулэ. Куазь умой дыръя ветло милям клубамы. Татын вань библиотека - лыдӟо нимысьтыз шрифтэн книгаосты, пӧртэм ужрадъёс ортчытъяськомы. Котькуд празднике одно ик огазе люкаськом, чай юон радъяськом. Пересь муртлы, оло, печенняен чай но сокем кулэ ӧвӧл, макем дуно потэ пумиськемзы, сюлмысь вераськемзы. - Гуртын улӥсьёсызлы та ласянь секытгес, дыр: соос огназы куштэмын. - Зэм. Азьвыл предприятимы ачиз улон коркаос пуктылэ вал бере, тыршылӥм кулэяськисьёсызлы городэ квартира сётыны - синтэм муртлы юртъер котырысь ужъёсты но быдэсъяны секыт, мӧзмыт но. Али сыӵе луонлыкмы ӧвӧл. Соин ик тӥ, таза адямиос, эн ортче ӧлексы мурт вӧзтӥ - буйгатӥсь кыл вералэ, усьыкуз кидэс мыче. Оло, со пичи юрттэт синтэм муртлэсь улонзэ ӧжыт ке но капчигес кароз. П. С. Ми пумиськылӥм Нина Петровна Коровинаен. Солэн пенсиез, зэмзэ но, 250 манет сяна ӧвӧл. Улэ коммунальной квартираын, огназ. Куинь аресысен мумы-бубытэк кыльыса, шудо улонэз ӧз адӟылы ни со. Ёрмеменыз ӧз быгаты дышетскыны, ӧз удалты семьяен но, пересьмон вакытаз ӧвӧл юрттӥсьёсыз-пиналъёсыз. Апрельысен пенсилэсь быдӟалазэ кӧнялы ке будэтыны туртто, нош тужгес но пичи пенсия майысен эшшо кӧнялы ке йылоз. Оло, со ӧжыт ке но буйгатоз Нина Петровна выллем пересьёсты. З. РЯБИНИНА. Сессия азьын Удмурт Республикаысь Кун Кенешлэн Президиумез выль быръем Кун Кенешлэсь нырысетӥ сессизэ 20 апреле ортчытыны чаклаз. Сое дасян понна кылдытэмын нимысьтыз группа. Со сессиын эскероно ужпумъёсты чаклаз. Люкаськемъёс одӥг малпанэ вуизы - сессилы ӵектоно азьвыл депутатъёслэсь ужан регламентсэс уже кутыны но регламентной группа кылдытыны, отчы Геннадий Абросимов, Сергей Беркутов, Жанна Дворцова депутатъёсты пыртыны. Заседаниез нуиз Кун Кенешлэн Тӧроезлэн нырысетӥ воштӥсез Владимир Агашин. Кун Кенешлэн пресс-службаез. Ӟеч-а мылкыдыд, фермер? Дас ар талэсь азьло, 1989-тӥ арын март толэзе, Россиысь гуртъёсын нырысьсэ палэнтэмын вал политика ласянь зӥбет. Озьы нимысьтыз семьяослы луонлык сётӥз асьсэлэн техникаенызы музъем бордын ужаны. Семьяосын арендае потэм коллективъёс но пичигес кооперативъёс кылдӥзы. Та дыре Россиын 270 сюрс фермер хозяйство лыдъяське, соослы 14 миллион гектар музъем сётэмын. Туэ арлэн кутсконаз Удмуртиын 3 сюрс 366 крестьян (фермер) хозяйство пусъемын вал, соос борды юнматэмын 73 сюрс гектарлэсь уно музъем, озьы ик 64 сюрс гектар гыроно муос. Элькунысьтымы вань музъем пӧлысь со 4 процентэз луэ. Фермеръёслэн ужзы асьме дорын азинскоз шуыса, уноез вылӥ кивалтӥсьёс уг оско вал. Со секыт уж борды нырысь басьтӥськисьёслы капчи ӧз йӧты. Кин уг тоды Селта ёросысь "Рыбовод" крестьян хозяйствоез? Со ялан азинске, та дыре отын быдэс ар ӵоже чорыгпиосты вордонъя цех пуктӥське. Хозяйствоен дас ар ӵоже кивалтӥз Н. П. Останин. Николай Петрович та вакытэ Селта ёрос администрацилэн кивалтӥсез луэ. Озьы ик нырысьёсыз пӧлын вал Сюмси районысь "Лялино" фермер хозяйство (кивалтӥсез В. Р. Рыбаков), Каракулино ёросысь Евгений Перечневлэн коллективез, Играысь "Арго" хозяйство (кивалтӥсез В. К. Усков). Завьял палась И. В. Булдаковлэн "Троицкое" хозяйствоез кылдӥз 1991-тӥ арын. Али солэн 224 гектар муосыз. Фермеръёс арлы быдэ гектарысьтыз 30-35 центнер ю тысь кутсало, 180-210 центнер картофка копало. Озьы ик соос уно йӧл кыско но сӥль басьто. Крестьян хозяйствоос тужгес но трос кылдӥзы 1990-тӥ-94-тӥ аръёсы. Солы уката юрттӥзы выль законъёсты кутон, фермеръёслы коньдонэн юрттон, льготаос сётон но мукет. Нырысь кык аръёсаз фермеръёслы вузаны висъямын вал 200-лэсь уно трактор, 250 пала автомобиль но трос мукет техника. Музъем бордын соку нимазы ужаны мылкыд каризы кызьы ке гуртоос, озьы ик городысь лыктэм адямиос но. Нош 1995-тӥ арысен кутске секыт вакыт. Куашка экономика, секыт югдуре шеде гурт удыс, промышленностьлэн вузъёсызлэн дунзы чутрак вылӥе ӝутске, государство пумен ӧжытгес юрттыны кутске. Сьӧд пилемъёс люкаськизы фермеръёс котыре но. Уноез басьтэм удыссылэсь куштӥськоно луо. Кылё на самой кужмоосыз гинэ. Нырысь ик кошкизы фермер радэ янгышен шедемъёс. Нош куд-огез асьсэлэн кужымзылы мултэс оскиллям. Фермерлэн ужез капчи ӧвӧл. Со ачиз ик кузё но, кивалтӥсь но, банкир но, ужась но. Вань ужъёсты огдыре ӵош быдэсъяны уз но быгаты. Мылкыдыд сяна, мед луозы на тодон-валан, быгатонлык, умой мед луоз тазалыкед но. Укмыстон витетӥ арысен кутскыса, быдэс странаямы фермеръёслэн лыдзы будэмысь дугдӥз. Нош кинъёслэн кутскон сюрессы лякытгес вал, соос уката азинскизы. Уноез пенсионеръёслэсь музъем пайёссэс арендае басьтӥзы. Озьы кылизы самой кужмоосыз но чидасьёсыз музъем кузёос. Фермеръёс тросэн вузало ю тысь, картофка, бакча сиёнъёс, йӧл, сӥль, чечы, чорыг, ыж гон. Верамы ини, крестьян хозяйствоос элькунысьтымы вань музъем пӧлысь 4 процентэныз кузёясько шуыса. Али соос республикаямы вань будэтэм ваньбур пӧлысь потто 4 процентлэсь уно ю тысь, 14 процент картофка но 6,5 процентсэ бакча сиёнъёс. Трос-а, ӧжыт-а со? Татын тани ма сярысь вераны кулэ. Фермеръёслэсь поттэм ваньбурзэс ваньзэ лыдъяны-чотаны луонлык ӧвӧл. Государство выт басьтон политиказэ мыдланьтэмен, фермеръёс ваньзэ ваньбурзэс возьматыны уг тыршо, куд-огез хозяйствоос воксё нокыӵе лыдпус уг сёто. Лыдпусъёс возьмато: 35 процентэз йӧл, 51 процентэз сӥль, 85 процентэз картофка но бакча сиёнъёс поттэмын-будэтэмын нимаз но крестьян (фермер) хозяйствоосын. Нош Камбарка, Юкаменск, Каракулино, Киясово но Грахово ёросъёсын картофка 95-ысен 98 процентэз будэтӥське нимаз хозяйствоосын. Шаркан ёросысь фермеръёс сое эштосъёс сярысь одӥг но ӝыны поллы тросгес вузало. Усто ужам сяна, фермеръёс нимаз хозяйство возисьёслы но трос юрттэт сёто на. Соос музъемез пае басьтэм понна сёто фураж, бакча гырыны, турын ворттыны висъяло техника, эстӥськон, мукет юрттэт сёто. Нош туала гурт трактортэк, комбайнтэк яке машинатэк бырон калэ вуоз. Кылемез ар нокинлы шумпотон ӧз вайы. Куазь дыраз ӧз зоры бере, со гурт удыслы юн шуккет сётӥз. 1997-тӥ арын фермеръёс гектарысьтыз 14,7 центнер ю тысь кутсазы ке, миым чылкак 8 но ӝыны центнер гинэ. Ляб удалтӥзы картофка но бакча сиёнъёс. Озьы ке но, Пичи Пурга, Игра, Шаркан, Якшур-Бодья, Балезино, Юкаменск, Дэбес, Глазов ёросъёсысь фермеръёс гектарлы быдэ 10-12 центнер нянь басьтӥзы. Красногорск, Игра, Якшур-Бодья, Шаркан, Пичи Пурга районъёсын гектарысьтыз 150-200 центнер "кыкетӥ нянь" бичамын. Бакча сиён куиняз ёросын гектарлы быдэ 200-275 центнер люкаськиз. Нош куд-ог крестьян хозяйствоослы куазь но ӧз люкеты, лэся. Кылсярысь, Шаркан районысь Н. И. Собинлэн хозяйствояз гектарысьтыз 19 центнер ю тысь кутсамын, картофка бичамын 302 центнер но бакча сиён - 700 центнер. Бадӟымесь азинсконъёсыз Воткинск ёросысь "Ольга" крестьян хозяйстволэн. Кивалтэ соин Ольга Алексеевна Баскова. Али татын скаллы быдэ 22 кило йӧл кыско. Ужа йӧллэсь сиёнъёс дасян цехсы. Нуналлы быдэ 4 тоннаозь пакетэн йӧл келяло Ижевске, Воткинск но Чайкоский городэ. Озьы ик "Ольга" басьтэ нимаз адямиослэсь но бускель хозяйствоослэсь йӧлзэс. Ар ӵоже ньыль цехын 3 сюрс тонна йӧллэсь сиён поттэмын, фермеръёс 2500 тонна пызь изӥзы, 1200 тонна нянь но булкаос пыжизы, 900 тонна кеньыр поттӥзы, сӥльлэсь 160 тонна колбасаос но мукет сиён дасязы. Нош мар малпало асьсэос фермеръёс ужъёссы пумысен? Вера Юкаменск районысь "Шеп" крестьян хозяйстволэн кивалтӥсез С. Н. Данилов: - Воштӥськонъёс сярысь ке верано, соос син шорын. Соизлы шумпотӥсько: гуртъёсын калык берло дыре ӧжытгес юыны кутскиз. Озьы бере, со уж борды но золгес басьтӥськоз. Ми гуртамы асьме коньдонэнымы медпункт усьтыны чакласьком. Уг тырмо пудо вордон гидъёс. Со понна улэп уксё кулэ, вексельёсын кыдёке уд мыны. Берло дыре бадӟым саклык висъяны кутскизы етӥнлы. Но милемлы 1997-тӥ ар понна но етӥнмылы коньдонзэ ӧз берыктэ на. Крестьян хозяйствоосты азьлогес кылдытоно вылэм ни. Асьмеос со борды туж бер но гольык интыысен кутским. Ведь мукет странаосын фермеръёс дауръёсын ужало ни. Тодон-валанзэс, быгатонлыксэс выжыысь выжые сётыса кельто. Асьмелы но кивоштӥсьёсты дасяны али ик кулэ. Ми, кылсярысь, умой дышетскисьёсмес нимысьтыз кузьымъёсын пусйиськом. Матысь дыре кружокъёс усьтыны чакласьком, ортчылозы нимысьтыз ӝытъёс. Пичи Пурга ёросысь "Буро-Жикья" крестьян хозяйстволэн кивалтӥсез М. А. Леонтьев пусъе: - Асьмелэн расчётной счётэнымы фермеръёс луыса ужаны кутским 1993-тӥ арысен. Со дырозь колхозлэсь 260 гектар музъемзэ арендае басьтыса ужамы вал. Со вакытэ милям районамы но фермеръёсты улляно шуыса вераськисьёс шедьылӥзы. Соку асьмелэн пайёсынымы колхозысь потоно кариським. Но сое "жугиськыса" кадь басьтӥм. Районысь 3 комиссия вуылӥз. Со дыр ӵоже куинь председатель воштӥськыса вуиз. Озьы ке но, ми вормыны быгатӥм. Лыдъяса-чотаса одӥг малпанэ вуим: пайдаё ужан понна милемлы ӧжытсэ 500 гектар музъем кулэ. Дасям нимысьтыз программа. Тодӥськом, ёросын музъем ласянь ӝикыт, буш интыос ӧвӧл. Соин ик сое арендае басьтоно луоз. Кенешимы картофка мерттыны, тысё юос но трос аръем турын будэтыны. Ю тысьлэсь чакламы фураж, пызь поттыны, нянь пыжыны. Толъёсы адямиослы уж висъян вылысь, малпамы пул пилён машина басьтыны но отын гужемлы лэсьтӥськон материал дасяны. Озьы ик азямы ужпум пуктӥмы: котькудӥзлы, кин кулэяське коньдонлы, огъя кассаысь висъяно "Жигули" автомашиналэсь 50 процентсэ. Куать арскын азямы пуктэм ужпуммес быдэстӥм. Озьы арендае 400 гектар музъем но ватсаса кулэ техника но оборудование басьтӥм, пуктӥм 3 лапас, картофка возён гу, вуко, усьтӥм магазин но нянь пыжон цех. Туэ басьтӥм пилорама. Ньыльдон гектар вылын картофка будэтӥськом, туэ солэсь быдӟалазэ 60 гектарозь йылэтом. "Кыкетӥ няньмы" гектарысьтыз 230 центнер усиз. Сю гектар вылэ клевер кизим. Мукет музъемъёс вылын тысё культураос интыямын. Гектарысьтыз 25- 27 центнер ю кутсаськом. Та лыдпус кылем арын ӧжытгес вал - ог 16 центнер. Коньдон сярысь ке верано, огазеяськонмылэн пунэмъёсыз ӧвӧл. Поттэм ваньбурмес вузамы 970 сюрс манет тыр, пайда басьтӥм 242 сюрс манетлы. Хозяйство юн кусып тупатӥз Вуж Монья агрошколаен. Ми пиналъёсты дышетыны кулэ вань музъем ужъёслы, соос пӧртэм техникаен ужаны мед быгатозы. Ортчем арын ваньмыз школаез йылпумъясьёс трактористлэсь правозэ басьтӥзы, уноез шофёр луизы, нылъёслы сётэмын кулинарлэн удостоверениосыз. Дас куинез егитъёсмы вылӥ дышетскон заведение пыризы. Школалэн директорезлэн но калыкез дышетонъя ёрос отделлэн куремзыя, быдэсак воштӥм спортзаллэсь липетсэ, лэсьтӥм сюрес. Туэ школалэсь липетсэ воштыны чакласьком. Азьланяз коньдонмы луиз ке, ошпиосты яке парсьёсты куайытонъя подсобной хозяйство усьтыны малпаськом. Мар кулэ фермеръёслы, хозяйствозэс азинтон понна? Нырысь ик, Голландиын но мукет странаосын сямен, 3-5 процентэн льготаен кредит висъяно. Но сое 6-7 толлэзьскын берыктоно ӧвӧл, сое сётоно кема дырлы. Пайдаёгес мед ужалоз лизинг. Техника дуно сылэ бере, нырысетӥзэ коньдон тыронэз коть 5-10 процентлы ке но кулэстоно вал. Музъемлы мед луоз одӥг налог. Поттэм вузъёсмылы мед вуысал госзаказ. Бен, фермеръёс дас ар ӵоже бадӟым экзамен кутоно луизы. Кужмоосыз, ужасьёсыз вормизы. Лябъёссэ улон ачиз ик палэнэ пезьгытӥз. Улон возьматэ, фермеръёс быгато пайдаё ужаны. Соослы сюрес гинэ сётоно. Но татын но государство ласянь бадӟым юрттэт кулэ на. Соку крестьян хозяйствоос сюдозы но, дӥсялозы но, валюта но поттозы на. Солы оскон вань. Удмурт фермеръёслэн берло ортчем конференциязы соослэн ужзылы вылӥ дунъет сётӥзы Россия Федерациысь Кун Думалэн депутатъёсыз Михаил Кошкин но Владимир Башмачников. Владимир Федорович со сяна луэ на Россиысь крестьян (фермер) хозяйствоослэн но кооперативъёслэн ассоциацизылэн (АККОР) президентэз. Та кенешын ик Удмурт Республикаысь фермеръёслэн огазеяськонзылы выль кивалтӥсь быръемын. Солэн председателез луиз Игра ёросысь фермеръёслэн кузёзы Валерий Кузьмич Усков. Талэсь азьвыл ассоциациен кивалтӥз Рудольф Николаевич Максимов. Али со Якшур- Бодья ёросысь гурт удысъя управленилэн начальникез луэ. Н. БАЙТЕРЯКОВ. Туспуктэмъёс вылын: 1. Москваысь куноос - Михаил КОШКИН но Владимир БАШМАЧНИКОВ; 2. Удмуртиысь фермеръёслэн кивалтӥсьсы Валерий УСКОВ; 3. Фермеръёс - Завьялысь Василий ЧЕРНЫШЕВ но Алнашысь Николай АФАНАСЬЕВ; 4. Пӧртэм пумо картофкаен тодматскон; 5. Юэд ке удалтӥз, луоз нянед но. В. КАМАШЕВЛЭН туспуктэмъёсыз. Атаелэн уйпуосыз Витьтон вить ар талэсь азьвыл чалмизы белорус музъем вылысь Витебск палась Новики гурт дорын ожъёс. Мукет батыръёсын ӵош отын тушмонлы кужмо шуккет сётылӥз етӥз удмурт Филипп Кедров но. Зэм, ваче пумитъяськонын улэп кыльыны ӧз кылды - ӟырдыт ожын роталэн командирез быриз. Атаез сярысь та гожтэтаз ивортэ солэн пиез - тодмо журналист, юрист Юрий Кедров. Ӟырдыт сюлэмын гожтэм чуръёс выльысь но выльысь тодамы вайыто ортчем учыръёсты. 1940-тӥ ар. Чебер куартолэзь. Анаеным ӵошен сылӥськом Максим Горький ульчаын - атаймес возьмаськом. Азьвыл дышем сямызъя Ижевск гарнизон ортчытъя аспӧртэмлыко учконъёс. Йыг-йыг вамышъяса ортчо лётчикъёс, соос бӧрсьы - пехотинецъёс. Тани выльёсыз солдатъёс. Бур палан дурысез - атае. Кыдёкысен тодмасько солэсь ӝикыт, веськыт мугорзэ, мыным дуно тусбуйзэ. Анае монэ ки йылаз ӝутэ но, куашетӥсь карлудэз согыны турттыса кадь, ньылоны тыр кесяськисько: "Атай! Атай!". Буби кылӥз монэ, кизэ ӝутӥз но аслыз гинэ тупась манерен пальпотӥз. Мон, пичи эке, тэк сылыны уг ни быгатӥськы: атае - колонналэн йырыз ук... ... Озьы ик кошкиз со 1941-тӥ арын гужем фронтэ. Ожмаськыса вуиз белорус музъем вылозь. Нош лек адӟонэз вите вылэм Новики гурт дорын - татын 1944-тӥ арын 13-тӥ феврале берпуметӥзэ нуиз со ротазэ тушмонлы пумит. ... Быдӟым тылож вакытэ котькуд гужем вуылӥсько вал Силёе - Алнаш вӧзысь пичи гинэ гуртэ - атаелэн анаез, Анна песянае, доры. Одӥг пол со монэ кык пинал уйпу доры ваиз но шуиз: "Эн вунэты, пие: бур паласьсэ писпуэз мерттӥз атаед, Филипп, нош тазэ - Петыр агаед". Собере ик тодӥ мон солэсь сюлэмез шымыртӥсь учыр сярысь. Одӥг нуналэ агаен вын пинал дырынызы люкиськыку люкиськизы ог-огенызы но: одӥгез вордскем гуртысьтыз кошкиз, кыкетӥез кылиз колхозэ. Атайзэс вазь ыштэмен, соос, покчи юрттӥсьёс, юртъерлы пыкет луизы. Ӟеч эшъёс вал пиос. Люкиськыкузы вордскем юртсы вадьсы кык уйпу мерттыны кенешизы. Писпуос нырысетӥ тулысаз ик куаръяськизы. Нош ӝоген 1941-тӥ арын дурись Петр Кедров но солэн покчи выныз, удмурт кылбурчи Филипп Кедров, вордскем музъеммес каргам сьӧсьлэсь утьыны кошкизы. Пиосыз сярысь уен-нуналэн малпаськыса, покчи нылпиосты музэн утялтӥз уйпуосты Анна песянае. Бадӟымез, Петыр, 1942-тӥ арын нырысетӥ толэзьёсаз ик быриз. Кайгу куасалтӥз песянаймес. Нош покчи пиезлэн улэп кылёнэзлы оскемысь ӧз дугдылы. ... Милям мусо но дуно Анна песянаймы. Солэн сюрмем киосыз ялан ужазы: гур азьын, бакчаын, гидкуа котырын. Нош сӥзьыл ваньмон дыръёсаз черсылӥз. Со вие туж ӝож кырӟалляз. Нош кӧс ымнырзэ коттылӥзы кузьыт синвуосыз. Песянае весь куректылӥз, бадӟым пизэ ыштэмен валче. Со дыре ик весь малпаськылӥз покчиез сярысь. Куддыр, тём пеймыт уйёсы, укное толэзь учкылыку, карасин лампа ӝомыт югдэмъя, милемлы мадьылӥз паймымон выжыкылъёс но учыръёс. Песянаймылэсь верамъёссэ кылзыса, уин ми ӵем дыръя кӧлыны ӧм быгатылэ, со вие ик кылзылӥмы секыт лулӟылэмъёссэ. Весь сюлмаськылӥз покчи пиез, Филипп, сярысь: мудор вадьсы султылӥз но инмарлы вӧсяськылӥз, пиезлэсь улонзэ утьыны курыса. 1942-тӥ арын гужем пӧсь улӥз. Огпол бускель пимы бакчаямы бызьыса пыриз но кеськиз: "Юрка, атаед бертӥз!" Песянае сюлэмыз борды кутскыса лулӟиз. Нош мон жӧломи кадь. Соку песянае мыным вазиз: "Бызь ук, мусое, атаед доры!" Нош ачиз, йырысьтыз кышетсэ куштыса, дэрем сӧзулзэ кутӥз но капка пала сэрпалскиз. Омырез гырпумъёсыным вандылыса, мон бызи гурт урам кузя. Нош солэн мукет пумысьтыз, бодыез вылэ пыкъяськыса но чутыса, ми доры атае дыртэ вал ни. Со монэ ки йылаз ӝутӥз но ӝог вамыштӥз кенер борды пыкъяськыса сылӥсь анаез доры. Соос пумиськизы. Песянае пиезлэн пельпумъёсыз борды ӝиптӥськиз но викышъяса бӧрдыны кутскиз. Шудо пумиськон вал со. Ми юмшамы садэтӥ, тыметын пыласькимы. Атае мадьылӥз котькыӵе учыръёс, серекъялляз. Нош сутскем ымныраз чиляло тӧдьы пиньёсыз. Собере нош ик со сюлмаськись тусо но йӧно луылӥз. Мадьылӥз нокинэ жалясьтэм но вир кисьтонэн пачылмем ож сярысь, малпаськылӥз сое ӝоггес йылпумъян но ческыт зыно алнаш возьвылъёсын выль пумиськон сярысь. Дуно куноез сямен пумиталлязы сое Силё починкаысь вань улӥсьёс. Атае вашкала удмурт сямъя коркась корка пыраса ветлӥз. Котькудаз сое тӧршоры пуктылӥзы. Нылкышноос, атайме котыртыса, пумтэм-йылтэм юанъёс сётъяллязы - соослэн но кузпалъёссы, агай-вынъёссы, пиоссы отын, ожын, ук... Собере атае ваньмыныз ӵош мылысь-кыдысь кырӟалляз сюлэмез вырӟытӥсь удмурт кырӟанъёсты. Госпиталь бере туж ӧжыт шутэтскиз атае. Выльысь кошкиз оже, тылӝуэ. Нош отысь, фронтысь, ми доры вуылӥзы солэн вакчиесь, ивор выллемесь, матысь адямиоссэ шуныт яратонэн но тушмонлы вожпотонэн тырмем куинь сэрго гожтэтъёс. Одӥг пол атае гожтӥз: - Мусоосы мынам! Кыӵе секыт вераны, адямилэн кайгуэз сярысь... Урмем сьӧсь ма но уг лэсьты калыкенымы: ошылэ, вандылэ, виылэ, городъёсты но гуртъёсты куашкатъя! Мон адӟылӥ писпуосын ошиськыса улӥсь курадӟытэм пересьёсты но нылкышноосты... Мед быроз урмем сьӧсь! Сюлэм амалтэк вожпотонэн тырме, киос асьсэос пыӵал борды кырмисько. Ми мозмытом тонэ, дуно шаере!.. "Ӟечбуресь, дуноосы мынам! Мар бордысен кутскыны ик уг тодӥськы. Туннэ сюлэмшугъяськыса пукси ӝӧк сьӧры: нош ик гожтӥсько тӥледлы гожтэт. Гожтӥсько бере, иське, улэп, мусоосы мынам! Котыртэме сюрылӥмы. Вераны ик секыт: кӧня шугадӟимы! Кулон весь гожеръяз ми котыртӥ. Вань та толэзьёс ӵоже партизан отрядын вал. Быгатэммыя весь юрттылӥмы каргам тушмонэз быдтыны: пуштытъямы выжъёсты, сюресъёсты, сузмытъямы ожмаськон тӥрлыксэ. Ноку но ӧм ыштылэ Горд Армилэн вормонэзлы осконмес. Со нуналъёс матын ни: асьмелэн армимы улля сьӧсез вордскем музъеммы вылысь. Тӥ, мусоосы, мон быри кожаськоды ни вал, дыр. Уг, мон уг быры, тушмонэз гинэ тузо вордскем музъеммы вылысь..." "Бур нуналэн, мынам дуноосы! Кыӵе паймымон уйвӧт адӟи туннэ... Яркыт ӵукна но яркыт шунды. Асьмеос куиньнамы мынӥськом С. М. Киров нимо парке. Котькытын ӝужыт турын, сяськаос. Возь вылтӥ бызись пие серекъя. Мон сое киосам ӝутӥсько. Асьмеос ваньмы тымет дуре мынӥськом но серекъяськом, шуныт вуын шопылляськиськом. Сайкай, нош пель сьӧрам ялан чузъяське на пиелэн жингрес серекъямез. Эх, кыӵе шудо улон вал... Нош лек, синазькыль тушмон ваньзэ куашкатӥз. Зэм, ваньмыз понна тыроз со. Вань бырем адямиосмы, яраосмы, сутылэм но куашкатъям городъёсмы но гуртъёсмы понна! Асьмеос вормомы урмем сьӧсез. Улонмы нош чебергес луоз. Ужалом но ужалом - кӧня ӟеч ваньбур люкаськиз ни йырам! Гожъяломы, югыт дуннеез адӟозы ӟеч, зэмос, визьмо книгаос. Ваньдэс сюлмысь чупасько. Филипп". Со нуналъёс сярысь пыр-поч ивортӥз атае писательлы Александр Васильевич Волковлы ыстэм гожтэтаз: - Ӟечбур, ӟечбур, Александр Васильевич! Адӟеме, чидаме сярысь верасал ке, кузь гожтэт пӧрмысал, дыр. Секыт учыръёсы ӝимылӥмы. Горд Армиысь эшъёсмы нош кыдёкын вал ини. Котыртэмысь потыны турттылӥмы котькыӵе амалэн, но ваньмыз юнме луиз. Улэп кылёнмылы ум оскиське ни вал. Одӥг эшеным ог дасо иськем ортчыса сюримы партизан отрядэ. Милям огазеяськонмы ожъёсын тушмонлэсь трос кужымзэ тарказ. Августысен декабрь толэзёзь быдтӥмы куинь сю витьтон фашистэз, пуштытӥмы кык чугун сюрес выжез, сутӥмы сьӧсьлэсь уно машиназэ. Одӥг кылын, пунэмзэ зол гинэ берыктӥмы. Али тодам вайылӥсько со нуналъёсты - гожтыны малпасько "Нюлэс куашетэ" повесть. Маке пӧрмоз, дыр. Котыртэмысь потыкумы, нюрвыл кузя ог дас иськем ортчимы. Луло кыли ке но, тазалыке юн изъянмиз. Али кӧня ке шутэтски. Ӝоген нош ик кошко фронтэ. Чидатэк возьмасько та дырез. Милемлы весь пыд йыламы луыны кулэ. Пӧсь салам быдэс семьядылы, вань эшъёстылы. Филипп". "Пие, чагыр дыдыке мынам, тон сярысь мон туж трос тодӥсько ини, шумпотӥсько. Туж чебер суредаськод ни, кылбур лыдӟиськод, гожъяськыны но дышиськод ни. Атаез данъяське сыӵе пиеныз. Мон но тонэ шумпотто. Тон туж сюлмаськиськод вал, атаед орден мед басьтоз шуыса. Курондэ быдэстӥ - табере уд ни возьдаськы: мыным сётӥзы Горд Кизили орден. Вуоз Вормон нунал - асьмеос пумиськом но вералом ог-огмылы улэм-вылэммы, будэммы, малпанъёсмы сярысь. Нош али ми жугиськом тушмонэз, вормонэз матэктытыса. Нош тон, пие, чагыр дыдыке мынам, котьма мед луоз - кужмо кариськы! Тынад атаед". Дас ар ортчыса, СССР-ысь Кышкытлыклэсь утиськонъя министерстволэн Подольске интыяськем архивъёсысьтыз тодыны луиз со ож сярысь. Со йылпумъяськыку ик Филипп Кедров Горд Кизили орденэн пусйыны чакламын вал. Горд Армиысь эшъёс секыт ожъёсты чидаса мозмытъязы Гжатск, Сычевка, Вязьма городъёсты. Ӟечкылан кагазысь лыдӟиськом: - Ф. Г. Кедров старшой лейтенант шунды пуксён пал фронтын 1941-тӥ арысен. Нокинэ жалясьтэм ожъёсын возьматӥз кышкасьтэм но ӟеч командир луэмзэ. Быгатыса дышетэ эшъёссэ, яратыны косэ вордскем шаерзэс, синазькыль тушмонэз адӟемпотостэм карыны куре. 20-тӥ мартэ Филипп Кедровлэн автоматчикъёсыз тушмон доры шӧдонтэм вылысь гинэ матэктӥзы но быдтӥзы дас укмыс сьӧсез. Князево гуртэ боецъёс пыризы, одӥг эшсэс но ыштытэк. Кедров эшез Горд Кизили орденэн пусйыны чакламын. 1229-тӥ стрелковой полклэн командирез подполковник Бородин". Тани со, атаелэн фронтысь ыстэм берпуметӥ туспуктэмез. Арлыдо муртлэн жадем, начармем, восьмем, курадӟонэн тырмем ымнырыз! Нош татын солы куамын ньыль гинэ ай. Куамын вить тырмоз ни кулэмез бере гинэ. Нош отчыозь со уз улы. Кӧня иськем ортчемын, кӧня чидамын... Ньыль пол сӧсырмылэм атае. Сомында курадӟемез бере, СССР-ысь Писательёслэн огазеяськонзылэн адямиез (писатель луэм сярысь билетэз басьтэмын 1934-тӥ арын, со вылэ гожтӥськем ачиз Алексей Максимович Горький) быгатэ вал, дыр, ни ожъёслэсь палэнскыны. Быгатэ вал, дыр, армия газетлэн корреспондентэз луыны - соку нокыӵе кышкытлык ӧй луысал. Но госпиталь бере ас кияз выльысь кутэ стрелковой ротазэ но выльысь ожмаськыны ӧдъя сомында курадӟем белорус музъем вылын. Татын 1941-тӥ арын июнь толэзе асьме солдатъёслы чидано луиз тушмонлэсь тужгес секыт шуккетсэ. Асьмелэнъёс чигназы соку, нош али мозмытъязы вордскем гуртъёсмес но городъёсмес. Одӥг гожтэтаз атае ивортӥз: - Мусоосы мынам, ноку но ӧй оскылы, тушмон вормоз шуыса. Ми ноку но ӧм дугдылэ Горд Армилэн вормонэзлы оскемысь. Со нуналъёс вуизы - Горд Армия улля сьӧсез вордскем музъеммы вылысь. Танюша, сюлэмы жугиськыку, берпум вир шапыке бырытозь нюръясько каргам тушмонэн... Бырыны кылдэм ке, эн чигиськелэ, дуноосы мынам. Тодэлэ: йырме понӥ Дормы понна. Ути яратоно калыкме, тӥледыз, матысьёсы но гажаноосы... Озьы ке но, оскисько: вормыса берто. Тӥляд Филиппты". Писатель сярысь тодаз вае кузпалыз Татьяна Еремеевна: - Кыӵе возьмалляй фронтысь та иворъёсты... Пиелы ньыль арес, кезьыт, сютэм улон... Но солэн гожтэтъёсыз сыӵе шунтылӥзы, оскытылӥзы. Филипп Григорьевич туж оскымон воргорон, яратӥсь кузпал но атай вал. Ож дырозь ми соин туж ичи улӥмы. Тодматскыкумы мыным дас сизьым арес вал. Дышетски соку педучилищеын. Нош Иже вуи Шаркан палась. Городлы дышыны туж секыт вал. Дӥсе но со порма вал: басмалэсь дэреме но пустоллэсь пиджаке. Нырысь пумиськонъёсы возьдаськеменым ас палась эшеным ӵош ветлылӥ. Куиньнамы юмшаллямы Киров нимо паркетӥ но, Иж тымет дуртӥ но, киное ветлӥмы. Нош огпол Филипп дӥсьтӥз но монэ дораз куноясь анаеныз тодматӥз. Аслыз кузпал луыны ӵектӥз. Олокыӵе бадӟым сюанмы ӧй вал - эшъёсынымы но тодмоосынымы ӵош пукимы. Тодам кылиз Михаил Коноваловлэн арганэн туж йӧно шудэмез. Со вакытэ соос кыкназы но печатласько вал ини. Филипп котькин сярысь туж сюлмаськылӥз. Пимы вордскем бере, монэ ки йылаз нуллыны дась вал. Туж трос ужаз. Котьку сямен - уйёсы "Дась лу!" газетлэн редакторез дыръя газет потон нуналъёсы доре вуылӥз уйшор уин кык часын ()соку нокыӵе транспорт но ӧз ни ветлылы). Кӧлыны ӧз ни выдылы, - ӝӧк сьӧры пуксьылӥз но выльысь гожъяськылӥз, ӵукна выльысь уже кошкылӥз. Котькуд гужем кык-куинь толэзьзэ ортчытъязы военной лагерьёсын, офицеръёслэн люкаськылонъёсазы. Нош 1941-тӥ арын июне Шольялан кылдытэм эшелонэн соос келямын вал Белоруссие, кунгож дуре. Соос татын нырысетӥ нуналъёсаз ик оже пыризы. Собере чигнан, партизан отряд, выльысь фронт, госпиталь, сӧсырмем бере вакчи пумиськон. "Кыӵе дуно ваньбур ваё ож бере", - шуиз со люкиськыкумы. Озьы вераз выль, вуоно книгаосыз сярысь. Одӥг ужзэ келяз 1943-тӥ арын. "Нюлэс куашетэ" повесть аслаз ожмаськем партизан отрядэз сярысь вал. Мон нуи сое Писательёслэн огазеяськоназы, но отын шедьтонтэм вылысь ыштӥзы. Сыӵе трос лэсьтэмез потэ вал, нош кулон ваньзэ тарказ, быдтӥз... СССР-ысь Кышкытлыклэсь утиськонъя министерстволэн архивъёсыз иворто: 1944-тӥ арын 9-тӥ феврале Смоленскысь 215-тӥ дивизия "сюрес вылэ потӥз". Тушмон утиськыны тыршиз азьвыл ик юнматэм интыосаз, асьмелэнъёс шур дуртӥ, вукыремъёс вамен азьлань кошкизы... Филипп Кедровез данъясь кагаз ивортэ: - ... Ф. Г. Кедров капитан, 711-тӥ стрелковой полкысь 215-тӥ стрелковой дивизиысь роталэн командирез, вордӥськиз 1909-тӥ арын. Удмурт ВКП(ю)-е пыремын 1942-тӥ арын. Фронтын 1941-тӥ арысен. Армие басьтэмын Ижысь Пастухов райвоенкоматэн. Быриз 1944-тӥ арын 13-тӥ феврале. Кедров эш кышкасьтэм луэмзэ возьматӥз, Витебск улосысь Новики гуртэз басьтыку. Солэн ротаез, тушмон миномётъёс, пулемётъёс шоры учкытэк, нырысетӥен вуиз немец гуос дорозь. Тушмон трос кужымзэ ыштӥз. Кедров эш сётэм кылзэ пумозяз быдэсъякуз быриз ож бусыын. Филипп Григорьевичез пусъёно И степеньем Отечественной война орденэн. 711-тӥ стрелковой полклэн командирез подполковник Туманов. 1944-тӥ арын 16-тӥ феврале. Атаелэн орденэз... Милям семьяямы со тужгес дуно кузьым сямен утиськиз. 1944-тӥ арын тулыс анае ваиз сое республикамылэн Вылӥ Кенешезлэн Президиумысьтыз. Отысь бертэмез бере, пукон вылэ кужымтэк лэзиськиз но шыпыт гинэ шуиз: "Пие, та - атаедлэн берло орденэз..." "Горд пильысэн шобыртэм пичи гинэ шыкысын утиськиз Отечественной войналэн И степеньем орденэз. Таӵе бадӟым данъет сярысь Витебск палан тушмон пуляен погыртэм атае тодыны ӧз ни быгаты. Со кылиз белорус музъем вылэ, нош солдатъёсыз, эшъёсыз мынӥзы азьлань, шунды пуксён пала, сьӧсьлэн берпуметӥ гуэз дорозь, бырем командир понна пунэмзэ берыктыса. Со нуналъёсы писатель Михаил Петров, Филипп Кедровлэн анаезлы вазиськыса, фронтысен гожъяз: "Нош тӥ, гажано Анна апай, бӧрдыса шуиськоды ни, дыр: та дунне вылэ чылкак огнам кыли пересьмон-уймон вакытам. Нош ми тӥляд нылпиосты ӧвӧл шат? Сюлмаськонмы но, кайгумы но одӥг. Пумтэм-йылтэм сюресъёс вылын, тодмотэм интыосын кезьыт зоро уйёсы ми утчаломы тӥлесьтыд анай синвуостэс. Ми берыктомы яратоно Анна кенак, тӥлесьтыд синвуостэс. Вирен суро синкылиоссэс кисьтозы соос понна сьӧсьёс". Атае литературае лыктӥз журналистикаысь. Котьку быдэсъяз сётэм кылзэ: адямиослы зэмлыкез ивортылӥз школаын дышетскыкуз печатласькылэм гожтэтъёсаз но, быдӟым ожлэн берпуметӥ нуналъёсаз но. Тодмо гожъясьмы Семен Шихарев вералляз: - Йылпумъяськиз 1933-тӥ ар. Выль ар азьын Алнашын ортчиз гуртын улӥсь гожъясьёслэн дышетсконзы. Культура юрт калыкен тырмемын вал. Тани кыл сётӥзы Филипп Кедровлы. Со вылысьтыз шинельзэ куштӥз, кускысьтыз паськыт езэ туж капчиен тупатыса, сцена вылэ тубиз. Уг, уг вуно солэн гуртын улӥсь гожъясьёслы вазиськем кылъёсыз. - Гажано селькор! Асьмелэн киямы тужгес кужмо ож тӥрлык - печать. Котькуд гожтэм ужед нырысь ик мед вуоз ужась калык доры, мед утёз сое. Поэт лыдӟиз со нуналэ выль кылбуръёссэ. Отын со шумпотыса маде гуртын ортчись воштӥськонъёс сярысь. "Филипп Кедров, - гожтэ отӥяз Семен Тарасович, - котькыӵе ужрадэз но ӟеч дасяны но ортчытыны быгатэ вал. Бадӟым Кибья гуртын дышетыкуз, кылсярысь, кылдытӥз литературая но драмая кружокъёс, соосын ачиз ик кивалтӥз, дышетӥсьёсын кенешъёс ортчытъяз. 1934-тӥ арын тулыс Филипп Григорьевич ёросэн кивалтӥсьёс азьын районын пионерлагерь усьтон сярысь вераськон ӝутӥз. Соин кивалтон борды ачиз басьтӥськиз. Гурт калык пӧлын нимыз-данэз бадӟым вал. Дораз гуртоосыз нуналлы быдэ ветлылӥзы но пӧртэм ужпумъёсъя котькыӵе визь-кенеш курылӥзы. Со кылзылӥз но туж валамон валэктылӥз. Литературае соос ӝуждалаез мертась тылобурдоос музэн мертчиськизы. Жадёнэз тодытэк дышетскизы но ужазы, соослы висъям укыр вакчи дырез шӧдыса кадь. Азьвыл ик тодӥзы но, оло: сюрессы вольыт уз луы. Ӟуч но кун сьӧрысь эшъёссылэсь дышетскизы чебер кыллы. Озьы каллен ӝутӥськизы но ӝутӥськизы соос, крестьян пиос. Соослы шуд усем удмурт калыклэсь культуразэ узырмытыны, солэсь литературазэ азинтыны... Макем огкадесь соослэн улон сюресъёссы!.. "Гудыри", "Удмурт коммуна" газетъёсын нырысетӥзэ печатлам ужъёссы, педтехникум, пединститут, журналистлэн нырысетӥ нуналъёсыз, дышетон, армия... Таӵе сюресъёс кузя литературае лыктӥзы соос ваньзы ик - Кузьма Чайников, Григорий Медведев, Михаил Коновалов, Филипп Кедров, Пётр Блинов... Одӥгъёссэ быдӟым ож азьын лагерьёсын но тюрьмаосын быдтӥз ваньзэ сэстӥсь машина, мукетъёсыз, быгатонлыксэс быдэсак усьтыны вуытэк, улонзэс сётӥзы, кунмес тушмонлэсь утьыку. Туспуктэм вылын соос куинь кузя - кыдёкысь Бакуын, Каспийлэн ярдуръёсаз ожмаськыны дышетскем эшъёс. Шораз ик, френчен - нырысетӥ удмурт лётчик Спиридон Николаевич Кузнецов. Ож кутскон азьын йылпумъям со училищеез, академиез. Оже пыриськем нырысетӥ нуналъёсаз ик. Йылпумъям сое Берлинын - вермахтлэсь шоркарзэ киултэм омырысен. Куамын орденэн но медален пусъем адями... Бур палаз - Михаил Лямин, вуоно калык писатель, Удмуртиын кылдытэм 357-тӥ стрелковой дивизилэсь ож сюрессэ гожъясь. Паллян палаз - пиджакез вылын Ворошиловлэн гадьпусэныз - атае. Туспуктэм лэсьтэмын 1932-тӥ арын. Спиридон Кузнецов тодаз вае: - Нош кыӵе куанересь вал ми. Ми Филиппен, дэра дэремен но дэра бинялтонэн дӥсяськем-кутчаськем дас куать аресъем пиос, Алнашысь Можгала пыдын потӥмы. Кутъёс милям одӥг гинэ пыдкукмы вал. Соосыз, пельпуммы сьӧры сэрпалтыса, дуно арбериез сямен нуимы. Утьыны быгатӥмы. Можгала вуыса, Филипп педтехникуме куриськон сётӥз но отчы ик дышетскыны пыриз. Мынам адӟонэ мукет вылэм. Филипп быдэстӥз ас малпанзэ: дышетӥсь но журналист луиз, собере - писатель, нош мон лётчик, офицер. Собере ож вал. Мон но, Филипп но, Михаил Лямин но лек тылӝуэ кошкимы. Нош Вормон бере, валамон ни, ваньмылы адӟиськыны ӧз кылды. Филипп Кедровлы вордскемез дырысен куатьтон ар тырмыку, Михаил Лямин "Молот" журналэ гожъяз: - Тодам лыктэ 1928-тӥ ар. Соку ужай мон Шаркан школаын. Солэн директорез вал тодмо удмурт гожъясь Григорий Медведев. Одӥг пол Григорий Сергеевич Филипп Кедровлэсь "Гудыри" газетысь кылбурзэ лыдӟиз но шуиз: "Кылзы, Михаил Андреевич. Кыӵе ӟеч кылбур! Нош кыӵе кылыз, а? Солэсь одно ик кылбурчи пӧрмоз. Можга педтехникумысь та пияш... Со дырысен мон Филипп Кедровез солэн сюлэмез вырӟытӥсь, вордӥськем шаермес яратонэн пачылмем кылбуръёсызъя тодыны кутски. Нош 1937-тӥ арын ми соин одӥг ротаын вал Бакуын. Кызьы уд паймы но уд шумпоты солы! Туж сюлмо вал милям Филиппмы. Туж яратӥз Горд Армиез. Тани ыбылӥськом ми соин ӵош. Усто ыбылэ милям Кедровмы. Со сярысь газетэ но гожтӥзы. Соку ми данъяськылӥм соин, сьӧраз кыстӥськылӥм. Валамон ни: армиын ӵем ортчыло дышетсконъёс. Со нуналэ Филипплы ӟеч ужез понна ваньмыз азьын тау каризы... ... Нош ваньмон дыръёсаз со кияз лэчыт перозэ кутэ но дугдылытэк гожъяське. Озьы кылдӥзы "Горд Армия", "Часовой", "Горд винтовкаен эшъяськи" кылбуръёсыз. Арня нуналъёсы ми, солэн аспал эшъёсыз, люкаськылӥмы Филипп котыре. Лулысь-сюлмысь лыдӟылӥз со выль кылбуръёссэ. Трос маскаръяськылӥз. Одӥг аръем школаез усто йылпумъяса но офицер луыса, Филипп берытскиз вордскем Алнащаз. Нош со вакытэ писатель Григорий Медведев ужа ни вал "Удмурт коммуна" газетлэн редакцияз. Со ик Кедровез Ижевске вайыны быгатӥз. Филипп ужаны кутскиз УдГИЗ-ын. Кужмо редакторез бырйизы комсомол организацилы секретаре. Быгатэ вал со егитъёслэсь мылкыдзэс ӝутыны. Нуналмысь быдэсъяськись ужъёс вылысь пӧсь сюлэмо кылбурчи адӟылӥз улонмылэсь ӟечгес, шудогес луэмзэ. Соин валче ик писатель сюлмыз вӧсь луыса вера ортчемез сярысь. Кыӵе секыт вал удмурт калыклэн революцилэсь азьло улонэз! Со сярысь Филипп Григорьевич мадиз "Катя" повестяз. Берлогес та книга берыктэмын вал ӟуч кылэ. Нош инъетэз вылын кылдытэмын "Наталь" опералы либретто. Кедров, запасысь офицер, ноку но ӧз вунэтылы Дормес утён сярысь. "Горд знамя" пьесаяз но кӧня ке кылбураз со ивортылӥз тушмонлэн матэктэмез сярысь. Саклыктэ ыштыны ӧз лэзьылы. 1940-тӥ арын солы шуизы: "Армимылы уг тырмо офицеръёс". Та вакчи веранэныз соку ик возьматӥз кылбурчи дась луэмзэ. Быдӟым тылож кутскыку, Кедров лейтенант сылэ ни вал кунгож дурын. Сьӧсьлэсь лыктэмзэ со ас синъёсыныз адӟиз. Секыт ожъёс нуыку чигнано луылӥз. Озьы ке но, со сӥялэс нуналъёсы но кылбурчи оскылӥз вормонмылы. ... Со секыт ожъёсын солэн эшъёсыз котыртэме сюризы. Но тушмонлы ӧз сётске. Брянск нюлэсъёсын партизан отрядэн огазеяськыса, тушмонлэн мышказ нюръяськизы. Нош чигнамысь дугдэмзы бере, Кедровлэн партизан отрядэз валчеяськиз армиен. Кылбурчи шумпотӥз шунды пуксён пала матэктэмзылы... Вакчи со яркыт вал писательлэн улон сюресэз. Быриз со туж вазь - куамын вить аресказ. ... Ӧвӧл ни Силё починка... Солэн улӥсьёсыз пӧлысь куд-огез интыяськизы Алнашысь Филипп Кедров нимо ульчае, куд-огез - Выль Алнаше. Нош гырем лудъёс пӧлын утиськиз уйпу арамаослэсь пичи вож шормуӵ. Ӝужытэсь пересь уйпуос но соослэн пинал пушъетъёссы... Вашкала батыр музэн, паськытэсь улвайёссэ вӧлъяса, али ке но сылэ но котькуд тулыс вож буёлэн шобырскылэ Филипп Кедровен мерттэм мӧйы тыпы. Татын, уйпуос вадьсын, туннэ но ортчыло кырӟанлы но кылбуретлы сӥзем пумиськонъёс. Аспал эшъёсыз ялан буре вайыло кылбурчиез, дышетӥсез, воинэз. Татын ик ог-огзылэсь кужымзэс эскерыло пинал кылбурчиос. Иське, Инмарлы тау, тодэ ваён ноку вунонтэм. Иське, кылбурчилэн кылыз улэп!.. ... Бадӟым Советской Энциклопедилэн дас кыкетӥ томаз вакчияк гинэ ивортэмын удмурт поэт но писатель Филипп Кедров сярысь. Дунне вылын туж ичи ке но улӥз, трос калыкъем литературалэн улоназ уно кужымзэ понӥз атае но. ЮРИЙ КЕДРОВ. Политехнический лицей На базе 9 классов Срок обучения 1. Мастер столярно-плотничных и паркетных работ 3 года 2. Сварщик 3 года 3. Электромонтер 3 года 4. Мастер отделочных работ 3 года 5. Слесарь широкого профиля 1 год 10 мес. На базе 9-11 классов 1. Секретарь 3/1 года Общежитие имеется. Проезд: автобус � 14, троллейбус � � 4, 7, трамваи � � 2, 5, 7, 8, 9 до ост. "Трамвайное кольцо". *** Торгово-финансовый колледж Адрес: г. Ижевск, ул. Ленина, 16. Телефон: 78-15-79. На базе 11 классов 1. Коммерция 2. Маркетинг Специальность Срок обучения 1. Продавец продовольственных и промышленных товаров 10 мес. 2. Бухгалтер-экономист 2 года 3. Коммерсант 2 года 4. Коммерсант (с получением высшего образования в Иж ГТУ) 2 года в ВПУ, 3 года в Иж ГТУ Хозрасчетные группы Дневное обучение 1. Товаровед 2 года 2. Бухгалтер-экономист 2 года Заочное обучение 1. Коммерсант 2 года 2. Бухгалтер-экономист 2 года Специальные курсы (*) 1. Продавец-кассир 4 мес. Проезд: трамвай � � 2, 3, 4, 5, 10 до ост. "Дом обуви". В булочной пахнет тестом и сдобой Специалистов-кулинаров хлебопекарной промышленности, торговли готовят: Профессиональное училище � 25 Адрес: 426061, г. Ижевск, ул. Ворошилова, 22. Телефон 24-01-30. На базе 9 классов Срок обучения 1. Пекарь, прессовщик макаронных полуфабрикатов 3 года 2. Пекарь 3 года 3. Повар, пекарь 3 года 4. Мастер отделочных строительных работ 2 года 5. Бисквитчик 3 года 6. Кондитер 3 года 7. Повар 2 года На базе 11 классов 1. Пекарь, повар 1 год 2. Хозяйка пекарни 6 мес. Общежитие имеется. Проезд: автобусы � � 12, 24 до ост. "Торговый техникум". Лицей кулинарного искусства Адрес: 426076, г. Ижевск, ул. Ленина, 46. Телефон 78-27-38, На базе 9 классов Срок обучения 1. Повар 2 года На базе 11 классов 1. Бармен со знанием английского языка 1 год 6 мес. 2. Бухгалтер с умением выполнять работу на компьютерной технике 10 мес. 3. Повар-официант со знанием английского языка 2 года 4. Повар-кондитер 2 года 5. Повар 10 мес. 6. Кондитер 10 мес. При лицее существуют платные краткосрочные курсы повышения квалификации сроком обучения 2-4 мес. Проезд: трамваи 2, 3, 4, 5, 10, 12 до ост. Банк "Первомайский". Радиотехнические специальности можно получить: Радиотехнический лицей Адрес: 426001, г. Ижевск, ул. Кирова, 108. Телефон 23-90-38. На базе 9 классов Срок обучения 1. Радиотехник по ремонту и обслуживанию бытовой радиоэлектронной аппаратуры 4 года 2. Техник-механик по обработке материалов на станках и автоматических линиях 4 года Поступающие сдают экзамены по физике/математике, русскому языку. После окончания лицея выпускники зачисляются без вступительных экзаменов на 2 курс факультета "Приборостроение", "Робототехника" в Иж ГТУ. Общежития нет. Проезд: трамваи � � 1, 4, 7, троллейбусы � � 6, 9, автобусы 14, 20, 34 до ост. "Монтажный техникум". Филиал радиотехнического лицея Адрес: 426067, г. Ижевск, ул. Свободы, 124. Телефон 78-54-98. На базе 9 классов Срок обучения 1. Портной 1 год 6 мес. 2. Мастер общестроительных работ 1 год На базе 11 классов 1. Секретарь-машинистка 8 мес. 2. Сварщик 8 мес. Общежитие имеется Промышленно-финансовый лицей Адрес: 426037, г. Ижевск, ул. Тельмана, 14. Телефон 76-82-45. На базе 9 классов Срок обучения 1. Монтажник радиоэлектронной аппаратуры и приборов 3 года 2. Слесарь механосборочных работ 3 года 3. Станочник широкого профиля 3 года 4. Оператор ЭВМ 3 года 5. Радиотелемеханик 3 года При лицее на платном экономическом отделении есть курс по специальности "Финансист" на базе среднего образования. Общежития нет. Проезд: автобусы � � 12, 24, троллейбусы � � 2 до ост. "Университет". Разнопрофильное обучение организовано: Ижевский промышленно-экономический колледж Адрес: 426004, г. Ижевск, ул. Ленина, 68. Телефоны 75-52-04, 75-54-89. На базе 9 классов Срок обучения СПО 1. Техник-менеджер 3 года 2. Техник-электрик 3 года 3. Технолог литейного производства 4 года НПО 4. Электрогазосварщик 3 года 5. Электромонтер 3 года 6. Слесарь по ремонту промышленного оборудования 3 года 7. Станочник широкого профиля 3 года 8. Подручный сталевара 3 года Вечернее отделение на базе 11 классов 1. Технолог литейного производства 3 года 6 мес. 2. Техник-электрик 3 года 2 мес. 3. Техник менеджер 4. Юрист Хозрасчетная группа (*) 1. Юрист (*) Приемная комиссия колледжа предоставляет информацию по условиям приема и стоимости обучения хозрасчетных групп. При поступлении на специальности � 1-3 сдаются экзамены: математика (письменно), русский язык (диктант). Зачисление в училище по специальностям � 4-8 проводится по результатам тестирования. Открыты подготовительные курсы. Профессиональное училище � 23 Адрес: 426010, г. Ижевск, ул. Автономная, 81. Телефон 71-49-32, 71-34-43. Дает профессии для АПК: На базе 9 классов Срок обучения 1. Тракторист-машинист 1 год 2. Тракторист-машинист широкого профиля, слесарь-ремонтник, водитель категории "В, С" 3 года 3. Электрогазосварщик, водитель категории "В, С" 3 года 4. Овощевод открытого и защищенного грунта Хозрасчетные группы (*) 1. Тракторист-машинист категории "А, Б, В, Г" 5 мес. 2. Тракторист-машинист категории "Б" 1 мес. 3. Водитель автомобиля категории "В", "В, С" 4 мес. 4. Машинист бульдозера 4 мес. (*) Приемная комиссия училища предоставляет информацию по условиям приема и стоимости обучения хозрасчетных групп. Общежитие имеется. Проезд: трамвай � 6 до ост. "ул. Огнеупорная". Профессиональное училище � 31 Адрес: 426068, г. Ижевск, ул. Сабурова, 23. Телефон 20-44-82. На базе 9 классов Срок обучения 1. Слесарь механосборочных работ 1 год 2. Повар 1 год 3. Автомеханик 3 года На базе 11 классов 1. Оператор по добыче нефти и газа 1 год 2. Слесарь 1 год 3. Мастер отделочных строительных работ, повар 1 год Общежитие имеется. Проезд: автобусы � � 12, 14, 24, 40 до ост. "Автозавод". Городэз миськоно апреле Ижевск городлэн мэрез Анатолий Салтыков но журналистъёсын пумиськылӥз. Мугез таӵе: ӵапак ар талэсь азьло городлэн думаяз быръемын вал выль депутатъёс. Думалэн ужамезлы йылпумъянъёс лэсьтыса, А. Салтыков тодэ вайытӥз: ар ӵоже ялан ужась комиссиослэн 104 кенешсы ортчиз. Кун Кенеше берло быръёнъёс дыръя думаысь 11 депутат сюриз республикамылэн парламентаз. Собере мэр валэктӥз таӵе юанлы: - 1996-тӥ арын Павел Вершинин тӥледыз ужысьтыды мозмытон понна вал. Нош малы тӥ табере ӵошен ик депутатъёслэн "Тупан" группаязы пыриськоды? Кызьы тӥ ваче кыл шедьтоды? - Милемды огазеязы хозяйствоез нуон ужпумъёс. Азьлогес, 1996-тӥ арын Павел Вершининлэн нокыӵе луонлыкез ӧй вал, мон пумысен мукет решение кутыны. "Тупан" нимаське Вершининлэн-Салтыковлэн быръёнъёс бере кылдытэм группазы. Туннэ соослы дурбасьтэ 32 пала депутат. Ачиз А. Салтыков республикаен кивалтонэ пуксьыны уг малпаськы. Городын но ужъёс пумтэм. 6-тӥ апреле туж секытэн кутэмын вал городлэн бюджетэз. Та нуналъёсы Москваысь вуыны кулэ 25 миллион тыр ссуда, со пӧлысь 15 миллионэз уждунлы висъямын луоз. Мукетыз сюлмаськон - городэз чылкытатон. Апрельлэн пумаз ортчытыны чакламын субботник. Т. БАННИКОВА. Кун Кенеше быръем депутатъёс: кин кӧня куара люказ? Ижевск Индустриальной ёрос 1 номеро Буммашевской округ - Жебровский В. В. - 2234; Куприянов С. А. - 831; Маликов Р. Р. - 102; Ульянов А. Л. - 1056. 2 номеро Чеховской округ - Борзенков А. С. - 452; Долгов Д. Г. - 1923; Ковырзина Н. А. - 331; Крутых А. А. - 1229; Плетнева В. Ф. - 241; Харина Н. А. - 2077. 3 номеро Восточной округ - Веретенникова Н. Х. - 364; Галасеев Е. Л. - 325; Евтенко А. И. - 56; Кокорин М. К. - 1547; Кузнецов А. Е. - 1169; Мухачев В. А. - 385; Никулин В. А. - 131; Рубцов И. И. - 339; Саннткова Н. И. - 276; Щелконогов В. П. - 456. 4 номеро Строительной округ - Бунтов С. Д. - 1093; Дворцова Ж. В. - 1546; Подопригора В. Н. - 1366; Рябов С. В. - 169; Чернышева З. Т. - 650. 5 номеро Тимирязевской округ - Евдокимов Б. Н. - 1083; Ерошенко В. Н. - 237 Кулябин С. Н. - 98; Лопатин А. К. - 1165; Макаров А. Н. - 666; Нагорных Н. Н. - 531; Перевозчикова А. Г. - 115; Хлыбова Н. А. - 1122; Чувыгин А. П. - 996. 6 номеро Халтуринской округ - Бегунов А. Г. - 1226; Дейкина Н. В. - 725; Душин В. И. - 553; Журавлева Н. М. - 89; Комиссаров С. И. - 85; Коновалов В. И. - 630; Костенков Е. В. - 308; Молчанов С. М. - 1632; Подъачев В. Ф. - 72; Шкитина Т. В. - 55. 7 номеро Индустриальной округ - Авзалов Р. А. - 2225; Коновалов А. В. - 954; Красных А. И. - 672; Шамсутдинова Л. В. - 1399; Шаталов В. А. - 1929. Ленин ёрос 8 номеро Железнодорожной округ - Ахметов Ф. А. - 206; Галиахметов Р. А. - 2250; Гатина Н. А. - 91; Зонова Л. И. - 342; Кижнерман И. И. - 1291; Кудашев А. Р. - 131; Матушкина Н. В. - 286; Мифтахов Л. Г. - 191. 9 номеро Московской округ - Алтухов В. М. - 841; Багаутдинов В. М. - 745; Гарипов Р. А. - : Каюмов Р. Р. - 667; Коржавин А. В. - 337; Мавлютов Х. И. - 171; Риффель Е. В. - 55; Тарасенко В. Д. - 1147. 10 номеро Александровской округ - Абызов Р. М. - 1071; Порубов А. Б. - 461; Салтыков А. И. - 1933. 11 номеро Новостроительной округ - Андреева С. И. - 950; Андреева Т. С. - 409; Джумашев А. Ш. - 498; Конюхов П. А. - 435; Королева Л. И. - 125; Кочуров А. И. - 556; Русских В. И. - 2200. 12 номеро Заречной округ - Антонов Ю. В. - 382; Бакалдина О. В. - 146; Баранов С. В. - 96; Гарнаева Р. С. - 98; Гогин А. М. - 544; Касимов Ф. К. - 87; Манакова Т. А. - 469; Поварницын А. Н. - 70; Полянский Н. Т. - 995; Сергеев Л. В. - 76; Черных Л. А. - 570; Шаргаев С. Н. - 1580. 13 номеро Лесозаводской округ - Гоголев А. Е. - 704; Забродина Л. И. - 1547; Зубко С. А. - 1353; Кончиц В. В. - 195; Коротков В. П. - 202; Маратканов П. Г. - 268. 14 номеро Чайковской округ - Каплун Л. Р. - 2017; Протозанов С. В - 357; Ходырев В. В - 2583; Шадрин Н. Н. - 298. Октябрь ёрос 15 номеро Северной округ - Елмашев О. К. - 862; Моисеев В. В. - 2392; Муллагареева О. Г. - 627; Плитинь Л. Ф. - 1052; Савичев С. Ю. - 1264. 16 номеро Холмогоровской округ - Воловик Л. С. - 1134; Журавлев С. Р. - 183; Заболотских С. Р. - 226; Калошин С. Н. - 831; Копысов Н. П. - 1014; Любимов В. Н. - 1581; Субаев Ф. Р. - 91; Сурина С. А. - 554; Шатунов С. А. - 57. 17 номеро Университетской округ - Абрамов И. В. - 733; Бирюков Н. Е. - 60; Батаов В. М. - 537; Бухарин В. Л. - 30; Городилов С. А. - 1558; Дюбко С. А. - 79; Левин В. С. - 978; Ординат В. В - 158; Семенова Е. И. - 1126. 18 номеро Студенческой округ - Котов М. И. - 79; Обухов А. В - 424; Скрипченко В. А. - 1470; Чикуров С. В. - 2620; Шульга В. П. - 282. 19 номеро Набережной округ - Захаров Ю. В. - 229; Трубачев А. В. - 1245; Шестаков Ю. В. - 3486. 20 номеро Центральной округ - Демидов А. В. - 921; Молчанов А. М. - 2081; Петрова И. М. - 417; Репина Г. И. - 1201; Тарасов В. Ю. - 80. 21 номеро Административной округ - Глухих А. М. - 434; Кузнецов Е. П. - 670; Мальцева Е. Л. - 859; Орлов Е. Н. - 605; Светлов С. В. - 1171; Селева С. Ю. - 298; Трекин С. А. - 214; Шурыгин В. А. - 594. 22 номеро Кировской округ - Вахитов Н. М. - 624; Вилков А. Ю. - 249; Галеев А. Т. - 1443; Ивайкин А. В. - 132; Пряхин В. В. - 378; Шишкин М. И. - 1297; Щукин С. Г. - 855. 23 номеро Майской округ - Бернотас С. Г. - 1441; Емельянов А. В. - 364; Красильников А. Г. - 1674; Талантов Д. Н. - 815; Шумков Д. В. - 1598. 24 номеро Республиканской округ - Белокрылова И. И. - 844; Заварзина Н. А. - 574; Запольских В. А. - 565; Осколков А. Э. - 1714; Резанова Н. И. - 573; Скрынник В. Н. - 1236; Стяжкина С. Н. - 426. Первомай ёрос 25 номеро Пушкинской округ - Гайнутдинов А. А. - 173; Глухов В. В. - 326; Зварыгин В. Е. - 245; Иванов Ю. А. - 1745; Салахов Д. Л. - 62; Хорошавцев В. Г. - 2202. 26 номеро Авангардной округ - Ануфриев В. Н. - 1504; Ветошкина И. Н. - 930; Жидков В. Г. - 811; Колесников Г. А. - 1002; Копысов В. И. - 227; Крупина О. И. - 65. 27 номеро Рабочей округ - Емшанов А. В. - 55; Кудрявцева Е. В. - 721; Кушко В. М. - 2067; Одиянков Ю. Г. - 1087; Соловьев В. И. - 313. 28 номеро Школьной округ - Белоусов А. И. - 1083; Газизова Э. 3. - 249; Лекторский А. Н. - 317; Парфенов Н. П. - 1351; Семенов Ю. В. - 522; Степнова З. И. - 1391; Титов В. А. - 755. 29 номеро Сосновой округ - Брагин Б. Г. - 143; Гурина О. Ю. - 1449; Майер В. А. - 1853; Одиянков Е. Г. - 2193. 30 номеро Пролетарской округ - Бармин В. Г. - 153; Белоголовкин Д. Е. - 2466; Вальме А. К. - 533; Павлов В. В. - 40; Педин Н. М. - 445; Соловьев В. И. - 72; Турбанов Г. В. - 1040. 31 номеро Магистральной округ - Климентов Г. П. - 601; Кучерявенко М. И. - 2360; Могилев В. М. - 433; Шадрин А. А. - 1618. 32 номеро Родниковой округ - Бодров В. П. - 1438; Глухов К. А. - 896; Данчинов А. Г. - 93; Мерзляков Г. В. - 1092; Шалда С. Б. - 1198. Устинов ёрос 33 номеро Ворошиловской округ - Акмалова Л. Н. - 165; Алферова С. А. - 32; Балобанов Е. В. - 1271; Еромалаев В. А. - 435; Кудрик М. А. - 546; Суркин В. С. - 1650; Урошников А. С. - 491. 34 номеро Автозаводской округ - Биганишвили Г. Н. - 2417; Красноперов О. Г. - 1284; Кузьминых Г. М. - 746; Пестов О. Р. - 356; Чишковская А. И. - 995. 35 номеро Мирной округ - Беркутов С. Г. - 1078; Монич А. В. - 599; Переснухин В. К. - 1052; Чо И. А. - 871; Южаков С. Р. - 729. 36 номеро Дружной округ - Лошкарев Г. А. - 1870; Сушко В. А. - 181; Тумаев В. А. - 1070; Чернятьева З. С. - 584. 37 номеро Нефтяной округ - Граханцев Н. М. - 799; Минаков И. В. - 984; Наумов И. Ю. - 1701; Шумков Г. В. - 950. 38 номеро Трудовой округ - Гарифуллин Д. Н. - 93; Еременко А. В. - 632; Есипов В. А. - 1397; Красноперов Г. Ф. - 2017; Лебедев В. П. - 123; Осипов Е. А. - 478; Ризванов И. У. - 439. 39 номеро Школьной округ - Кутдузов Р. Н. - 1087; Мурзин М. И. - 241; Ощепков С. Ф. - 832; Сидорова В. В. - 784; Трефилов В. А. - 907; Чуршин А. Д. - 1492. 40 номеро Молодежной округ - Дьяков П. М. - 636; Останин Г. М. - 1740; Пушин В. В. - 80; Радионова Н. А. - 1228; Сударикова Н. А. - 1327. 41 номеро Союзной округ - Батанов А. С - 2222; Исупов В. Е. - 605; Кузовков С. Б. - 173; Рябова И. Э. - 395; Сташков Е. Д. - 745; Торгушин А. Б. - 287. Вотка город 42 номеро Березовской округ - Иванова И. В. - 758; Камашев Н. М. - 294; Старцев В. Г. - 370; Фридрих В. Л. - 3422; Шадрин В. Н. - 208. 43 номеро Пугачевской округ - Ажегов А. Е. - 984; Колегов В. М. - 655; Кудинов В. И. - 1494; Суханов А. В. - 557. 44 номеро Центральной округ - Бычков Ю. Ф. - 1668; Костенко А. И. - 566; Кривилева Т. В. - 482; Окладовиков В. Е. - 1080; Хананаев М. Б. - 68. 45 номеро Привокзальной округ - Бусыгина З. С. - 801; Горохов А. И. - 628; Жернаков В. И. - 1007; Колесников М. А. - 135; Лапин А. Н. - 1123; Мочалова Г. В. - 285; Туев Г. А. - 91. 46 номеро Школьной округ - Загуляев Г. С. - 460; Илемков В. А. - 1081; Исупов В. С. - 364; Поздеев И. Д. - 140; Сазанов А. В. - 607; Соболев Ю. Б. - 1279. 47 номеро Южной округ - Дудин С. Г. - 882; Кижватов Г. П. - 175; Мартюшев М. И. - 803; Мусорин В. В. - 344; Никулин В. А. - 560; Самойлова Г. А. - 561; Сидоров В. Л. - 423; Тарасов А. С. - 530. 48 номеро Заречной округ - Бородулин С. Е. - 669; Казанцев И. Г. - 156; Кочетков В. А. - 1280; Куклин Н. Г. - 761; Перевозчиков В. М. - 732; Петров В. Н. - 381; Попов Л. Г. - 105. Глазов город 49 номеро Западной округ - Ехлаков В. А. - 748; Золотарева Н. К. - 600; Касихин С. П. - 740; Прокашев А. И. - 204; Редозубов С. Ю. - 326; Фролов Л. К. - 1291; Худяков А. А. - 444; Чепкасов В. Г. - 1132. 50 номеро Молодежной округ - Агафонов Н. М. - 1136; Бармин С. М. - 397; Едигарев А. Б, - 44; Иванов Ю. Л. - 132; Копысов К. И. - : Максимов А. М. - 554; Перешеин В. Ю. - 2780. 51 номеро Центральной округ - Абашев Ш. М. - 128; Варин В. И. - 549; Касимов Р. М. - 271; Сорокин Н. Б. - 2902. 52 номеро Институтской округ - Бабинцев С. М. - 1332; Веретенников О. Ю. - 460; Першин А. В. - 1770; Стецкая Л. П. - 627. 53 номеро Толстовской округ - Ганза Н. А. - 3013; Корепанов В. С. - 452. 54 номеро Левобережной округ - Волков А. А. - 3994; Лекомцев А. В. - 133; Мерзляков В. А. - 234; Прозоров А. А. - 151. 55 номеро Южной округ - Веретенников Н. Д. - 454; Галимуллин В. Х. - 1139; Дмитриев В. А. - 144; Кадыров Ш. И. - 680; Касаткин П. И. - 496; Касимов К. Ф. - 1304; Королев Л. В. - 148. Можга город 56 номеро Стеклозаводской округ - Мохначев В. А. - 3353; Чернов Н. И. - 361. 57 номеро Короленковской округ - Демшин В. В. - 509; Коноплев А. И. - 125; Семенов И. Н. - 3228. 58 номеро Авторемзаводской округ - Земзюлин В. А. - 575; Каримов Р. М. - 3685. Сарапул город 59 номеро Северной округ - Абросимов Г. Е. - 4042; Вахрушев В. А. - 73; Гусаров И. Л. - 100; Исламгалиев Ф. Ф. - 665. 60 номеро Прикамской округ - Берг Р. Э. - 1059; Меньков В. А. - 696; Новоселова Н. Ю. - 805; Рыбаков Р. Ю. - 1161. 61 номеро Парковой округ - Верховцева Л. Л. - 891; Гагарин С. В. - 863; Козырев И. В. - 338; Кривоносов В. Г. - 418; Кырова В. Н. - 29; Пастухов С. Н. - 138; Пискотин В. С. - 1036; Пономарев В. А. - 872; Попов С. В. - 24; Прасолов А. М. - 1061; Симонов К. Н. - 106; Сусляев А. Г. - 165. 62 номеро Набережной округ - Горбунов В. Д. - 1308; Горбунова С. А. - 131; Михайлов В. Х. - 700; Поздеева Н. А. - 1204; Сполохова Л. С. - 252; Фирулев В. А. - 123; Шафигуллин Х. Ш. - 244. 63 номеро Привокзальной округ - Дульцев А. В. - 189; Моряков В. М. - 1421; Юшков Н. П. - 2542. 64 номеро Электрозаводской округ - Блинов А. Г. - 148; Босых Е. В. - 123; Высоцкий Л. А. - 1431; Галанов С. Г. - 46; Данилов С. С. - 115; Кузьминых В. Н. - 1300; Мельников В. В. - 209; Мосунов В. А. - 466; Сологуб В. М. - 2006; Чепвяков В. Г. - 570; Шадрин В. В. - 133. 65 номеро Гончаровской округ - Малюк М. С. - 3148; Порсев А. В. - 217; Прохоров А. И. - 88; Черницын В. В. - 155; Шушпанов В. В. - 1532. Алнаш ёрос 66 номеро Алнаш ёрос округ - Ганьков В. Л, - 1322; Михайлов Н. Т. - 1238; Образцова Н. А. - 3361; Сентябов В. Г. - 217; Федотов А. Ф. - 233. Балезино ёрос 67 номеро Балезино поселковой округ - Дьяченко И. И. - 1174; Иванова Л. Ф. - 572; Касимов Э. В. - 1577; Корепанов А. П. - 101; Наговицын В. В. - 1106; Стрелков О. Р. - 209; Трапезников С. В. - 156. 68 номеро Балезино гурт округ - Вихарев А. П. - 757; Соловьев А. В. - 6404. Вавож ёрос 69 номеро Вавож ёрос округ - Дубровин Н. Ф. - 18; Красильников В. А. - 2483; Соловьев В. А. - 4717; Обухов В. Н. - 109. Вотка ёрос 70 номеро Вотка ёрос округ - Варламов В. С. - 3684; Воротов А. А. - 852; Меньшиков В. В. - 503; Свинина Л. К. - 1006. Глазов ёрос 71 номеро Глазов ёрос округ - Ворожцова В. И. - 334; Ворончихин А. Б. - 598; Першин П. А. - 5744. Грах ёрос 72 номеро Грах ёрос округ - Колпаков Б. И. - 372; Маркин А. Л. - 614; Марченко А. В. - 3889; Радыгин А. И. - 573; Соловьев А. М. - 2702. Дэбес ёрос 73 номеро Дэбес ёрос округ - Байметов И. М. - 234; Горошников А. Д. - 2247; Перевозчиков Ю. Г. - 437; Смирнова С. К. - 3580; Фокин А. М. - 1526. Завьялово ёрос 74 номеро Завьялово ёрос округ - Абрамов В. В. - 76; Гусев В. В. - 1263; Дементьева В. В. - 2556; Капралов В. В. - 91; Миненков Б. И. - 1863; Осинцев И. П. - 217; Фефилов В. Н. - 126. 75 номеро Камской округ - Алехин В. В. - 494; Гараев И. М. - 1631; Кутявина Т. И. - 644; Никитин В. А. - 2244; Шагиев Р. А. - 458. 76 номеро Лесной округ - Дресвянников В. А. - 458; Ельцов Г. А. - 56; Зенин В. Н. - 3849; Малышев М. Ю. - 557; Набоков А. Ф. - 44; Романов А. И. - 531. Игра ёрос 77 номеро Играысь нырысетӥ поселковой округ - Ажимов Н. Н. - 1252; Богомольный Е. И. - 3089; Чирков В. С. - 1384. 78 номеро Играысь кыкетӥ поселковой округ - Вишневская Г. С. - : Лошаков М. А. - 339; Михальков А. Б. - 416; Никандровский М. Л. - 971; Черняев В. И. - 953 Шаляпин А. П. - 1172; Шилов Н. А. - 821. 79 номеро Зура округ - Клементьев А. М. - 280; Мешков А. А. - 710; Ушаков Г. В. - 89; Чирков И. П. - 507; Широбокова С. Э. - 3483; Щуклин Л. А. - 618. Камбарка ёрос 80 номеро Камбарка ёрос округ - Бузилов В. В. - 3681; Вавилов В. И. - 444; Гурова А. И. - 737; Коняшин В. Я. - 691; Коротков Н. А. - 282; Новокрещенов В. В. - 271; Щекотуров Н. Н. - 169. Каракулино ёрос 81 номеро Каракулино ёрос округ - Благодатских В. Ф. - 2380; Кузьменко О. Л. - 3513; Саетов М. А. - 177. Кез ёрос 82 номеро Кез округ - Ворончихин Н. В. - 1630; Ефремова Т. Ф. - 318; Ившин А. В. - 615; Касимова Л. В. - 1055; Монастырская А. П. - 498; Поздеев Г. А. - 28; Русских А. С. - 376; Щепин А. Г. - 255. 83 номеро Кулига округ - Абашев Р. Б. - 1291; Бузмаков Г. Ф. - 171; Васильев В. 3. - 314; Данилов В. Л. - 55; Кайгородов Ю. М. - 2805; Кайсин С. А. - 50; Максимов А. Ю. - 2572. Кизнер ёрос 84 номеро Кизнер ёрос округ - Егоров Ю. А. - 100; Колодкин В. А. - 822; Малков А. Т. - 4297; Назаров А. К. - 202; Чучков В. М. - 2363. Кияса ёрос 85 номеро Кияса ёрос округ - Емельянов Е. Н. - 139; Занчаров С. А. - 79; Сычев Н. С. - 5713; Шатрова Н. Д. - 406. Красногорск ёрос 86 номеро Красногорск ёрос округ - Гагарин С. М. - 1201; Голышев С. Д. - 99; Кудрявцев В. С. - 2217; Сушенцов В. К. - 2018; Фефилов С. С. - 497; Чежегова А. В. - 546. Пичи Пурга ёрос 87 номеро Яган - Докья округ - Ашхабеков Е. Р. - 1115; Баранов В. Н. - 536; Долганов Н. В. - 1499; Дорошенко Д. И. - 427; Ешкеев А. Н. - 554; Москвин В. Е. - 460; Плотников А. И. - 669; Репин В. В. - 478; Русинов Н. М. - 194; Тойкин М. П. - 200; Чумаков Е. А. - 342; Юминова А. Н. - 97. 88 номеро Уром округ - Леонтьев Н. В. - 447; Никитин Ю. М. - 1388; Пупыдов Г. Н. - 217; Семенов В. Н. - 709; Тубылов В. К. - 2301; Уткин Ю. Я. - 128. Можга ёрос 89 номеро Бадӟым Уча округ - Вершинин П. Н. - 7064; Попова Л. А. - 75; Соловьева И. Ф. - 105. 90 номеро Пычас округ - Баутин Н. П. - 1246; Григорьев М. А. - 5096. Сарапул ёрос 91 номеро Сарапул ёрос округ - Агашин В. И. - 2944; Горбунов А. 0. - 139; Кошелев С. Г. - 191; Лихачев А. П. - 133; Микешкина А. Н. - 479; Якупов В. А. - 392. 92 номеро Прикамской округ - Айдашев Н. Ф. - 543; Брызгалов Н. М. - 261; Кислов Г. В. - 937; Печенкин А. А. - 96; Ташкин Г. М. - 298; Шутов А. В. - 2581. Селта ёрос 93 номеро Селта ёрос округ - Загайнов В. Ф. - 4424; Коковихин В. И. - 320; Мурашов В. К. - 70; Мясников А. П. - 1672. Сюмси ёрос 94 номеро Сюмси ёрос округ - Буланов В. Н. - 91; Возисов В. М. - 2252; Гарнов В. Ф. - 1792; Левахин А. М. - 260; Никифоров В. Н. - 900; Семенов В. И. - 1494. Ува ёрос 95 номеро Ува северной округ - Вафин Л. В. - 181; Вылегжанин Ю. И. - 972; Дедюхин А. И. - 1131; Елкин С. Л. - 432; Логинов П. А. - 389; Люкин П. В. - 285; Роговец К. А. - 1549; Субботин С. П. - 1213. 96 номеро Ува южной округ - Коняров К. А. - 3147; Самарин В. Я. - 123; Чувашов Н. Ф. - 3418. Шаркан ёрос 97 номеро Шаркан ёрос округ - Кондратьева Г. Г. - 658; Муклин В. Г. - 1461; Пластинин Н. В. - 1429; Подсевалов В. А. - 3016. Юкаменск ёрос 98 номеро Юкаменск ёрос округ - Макаров В. В. - 775; Питкевич Ю. С. - 5229; Чубчикова Г. В. - 157. Якшур - Бодья ёрос 99 номеро Якшур - Бодья ёрос округ - Белашов А. Н. - 863; Горбунов С. В. - 130; Груздев В. А. - 50; Давков А. И. - 25; Кацемон В. И. - 2768; Клюкин В. Ф. - 346; Комлев В. В. - 1444; Першин С. Н. - 11; Пудов П. П. - 1154. Яр ёрос 100 номеро Яр ёрос округ - Бирюков А. П. - 297; Боровик Ю. И. - 4880; Поздеев В. Б. - 145; Сунгуров А. С. - 35; Трефилов А. В. - 74; Филиппишин К. В. - 1144. Удмурт Республикаысь Быръёнъя комиссия. Ӝӧк вылзы тыр луоз Завьял ёросысь хозяйствоос котьку сямен ик туэ но бадӟым саклык висъялозы бакча сиён будэтонлы. Таяз аре 580 гектар муос висъямын луозы. Кылем арын сярысь со ог 50 гектарлы уногес. Со пӧлысь 32 гектарзэ басьтыны малпало фермеръёс. Пӧсь вакытсы "Родина" эштосысь бакча сиён будэтӥсьёслэн. Али плёнка улысь теплицаосын бычырало кубиста удъёс. Та культура туэ 142 гектар музъемез басьтоз. Ӵуж кушман кизёзы 25, горд кушман - 8 гектар вылэ. Теплицаоссы кык но ӝыны гектар вылэ интыямын. Соосты шунто газэн. Азьвыл аръёсы эштослэн мукет бригадаосаз но удъёсты будэто вал. Но мукет гуртъёсы газ кыскемын ӧвӧл. Кизер эстӥськонэн теплицаосты шунтон дуно усе. Таин валче соизэ но пусйыны кулэ: та нуналъёсы изгуртъёс выль кузё бырйизы. Табере эштосэн кивалтэ азьвыл фермер Петр Петрович Князев. Гуртоос оско, городын улӥсьёслэн ӝӧк вылъёсазы сӥзьыл тырмыт бакча сиён вуоз шуыса. Та нуналъёсы соос городэ келяло ни редис, ӝоген вуоз салат, укроп, петрушка. Бакча сиён будэтӥсьёс кубиста удъёсты утялто. Бригадир Нина Николаевна Ягодина. В. Камашевлэн туспуктэмъёсыз. Крезьгур кылдэ сюлэмын Алнаш ёросын сизьыметӥзэ ортчиз крезьгурасьёслэн конкурссы. Коньдонэн узыргес вакытъёсы таӵе ужрадэ пыриськылӥзы шаермылэн пӧртэм сэрегъёсысьтыз крезьгурчиос, бӧрысь кырӟазы-веразы алнашъёс гинэ. Нош кутскон сётӥз таӵе ужрадлы ёросысь ик "Прогресс" колхоз. Со сяна, коньдонэн но кузьымъёсын юрттӥзы на Алнашысь "Монтажник" общество (кивалтӥсез Сергей Кириллов) но ас кожаз ужась предприятилэн кузёез Валерий Ильин. Азьвыл аръёсы ужрадэз апрель толэзе радъяло вал, туэ ортчиз Нылкышноослэн праздниксы азьын. Со сяна, сӥземын вал Алнаш ёрослэн кылдэмез дырысен 70 ар тырмонлы. Ярато ик алнашъёс кырӟаны. Ар ӵоже татысь крезьгурчиос куамын сизьым выль кырӟан кылдытӥллям. Пӧлазы - туннэ кутскисьёсыз но, азьвыл конкурсъёсы пыриськылэмъёс но, татын вормисе потэмъёс но. Соин ик крезьгурчиос куинь люкетлы люкемын вал. Туннэ гожъяны кутскисьёс пӧлын вормисе потӥзы Ольга Полякова, Нелли Будрина, Татьяна Емельянова. Капчиен ӧз ортчы нюръяськон конкурсэ талэсь азьло пыриськемъёс пӧлын но. Сизьым крезьгурчи пӧлын вормисьёс луизы Лидия Данилова, Инзир Батыршин, Леонид Белоусов. Эшшо но шулдыр кырӟанъёс чузъяськизы лауреат ним басьтэмъёс пӧлын. Ваньмызлы яраз Николай Постниковлэн крезьгурезъя но Фёдор Суворовлэн кылбурезъя гожтэм "Эх, ма!" кырӟан. Та люкетын ик вормисе потӥзы на Анна Плотникова но Евгения Волкова. Нош вылӥ кузьым - Гран-при - висъямын Россия Федерациысь культура удысысь сӥё- дано ужасьлы Пантелей Кузнецовлы. Пусйыны кулэ: туймыйылъёс асьсэос но (ньыль кузя) мылысь-кыдысь пыриськизы та конкурсэ. Тужгес но покчиез крезьгурчи вал та гуртысь школаын дышетскись Людмила Волкова. Люда 6-тӥ классэ гинэ ветлэ али, нош крезьгуръёс кылдытъя ни 4-тӥ классысен. Алнаш ёрос сярысь тужгес но шулдыр кырӟан кылдытэм Туймыйылысь ик Вячеслав Адаков. Юнме уг шуо, дыр: "Кыл йылын кырӟан уг кылды, кырӟан кылдэ сюлэмын". Таӵе конкурсъёс ортчытъяса узырме асьмелэн кырӟан шыкысмы. В. АНДРЕЕВА. ДЫШЕТӤСЬЁСЛЫ ЮРТТЭТ Выльзэ шедьтозы книгаосысь Кылем арын декабре Дышетӥсьёслэсь тодон-валанзэс будэтонъя институтлы 60 ар тырмиз. Та ужрадлы сӥзьыса институтын ортчиз научно-практической конференция. Со сярысь 50 авторъёслэн материалъёсынызы нимысьтыз сборник потӥз. Институтын туннэ ужало 9 доктор, 23 наукая кандидат но бадӟым опытэн методистъёс. Соослэн тыршеменызы, институт арлы быдэ дышетӥсьёс понна дася но поттэ пӧртэм книгаос но пособиос. Адӟиськод ке, кызьы дышетӥсь берло кылем коньдонэныз, аслыз со книгаосты басьтэ, сюлэм ик шумпотонэн тырме, иське, институт юнме уг ужа. Дышетӥсьёслэн-практикъёслэн поттэм книгаоссы ӝажыос вылын уг костасько. Вить ар куспын 16 дышетӥсь книгаоссэ поттыны быгатӥз. Соос пӧлын М. А. Бочкарёва, Л. И. Храмова, И. К. Саушина (Ижевск, 41-тӥ лицей), К. С. Перцева но Р. А. Владимирова (Пичи Пурга, 2-тӥ школа), Т. А. Хлобыстова (Ижевск, 91-тӥ школа), Г. М. Кибардина но В. Г. Морозов (Завьялово район). Кыӵе юртто соослэн книгаоссы мукет дышетӥсьёслы! Тани Р. А. Владимировалэн Удмуртилэн историезъя планъёсын- конспектъёсын дасям пособиез, дышетӥсьёслэн куремзыя, выльысь поттэмын вал. Дышетӥсьёс котьку но ёрмо культуралы сӥзем книгаослы, уката но али, куке дышетон программаосы этикая но эстетикая урокъёс пыртэмын. Соин ик соос шумпотыса пумитазы профессорлэсь Т. С. Томшичлэсь сыӵе урокъёслы валэктонъёсын дасям пособизэ. Ижевскысь 54-тӥ номеро школаын со пособиез ньылетӥ арзэ ини уже куто. Та школалэн культураез улӟытон бордын ужамез Грант премиен пусъемын, нош 1997 арын солы Россия Федерациысь устоез школа ним сётэмын. Кызьы нылпиосты дышетоно чеберлыкез валаны, кызьы чебер но вольыт вераськоно, кыӵе сямъёслы дышетсконо но кызьы пӧртэм шуг-секытъёсысь потоно - та ужпумъёсъя 5- тӥ-7-тӥ классын дышетскисьёслы дэмланъёс сётэ Т. А. Хлобыстова "Этика и речь" книгаяз. Нош мар кароно, нылпиос пичи дырысенызы ик шонер мед гожъяськозы шуыса? Та ласянь мумы-бубыослы но дышетӥсьёслы юрттыны быгатозы В. А. Анисимовалэн "Чылкыт вераськон" но Л. Г. Мустаевалэн "Методические рекомендации по предупреждению нарушений письменной речи у дошкольников и младших школьников" книгаоссы. Школаен кивалтӥсьёс, уката но егитъёсыз, соку ик синйылтӥзы В. П. Созоновлэсь "Как разработать концепцию обновлённой школы" пособизэ. Авторез пыр-поч возьматэ республикаысьтымы куд-ог школаослэсь ужан опытсэс. Институтын пӧртэм книгаосын вузкарон радъямын. Татын дышетӥсьёс асьсэлы шедьтыны быгатозы котькыӵе предметъёсъя но ужпумъёсъя валэктонъёс: правоя, валеологияя, удмурт фольклоръя, удмурт писательёслэн но поэтъёслэн творчествозыя, естественной наукаослы дышетонъя но мукет. Берло вить ар ӵоже гинэ институтын 119 пумо пособие, но 85 программа дасямын. Удмурт школаос понна туж мыло-кыдо ужало Ф. К. Ермаков, Р. Ф. Березин, Г. А. Ушаков. Таяз арын Дышетӥсьёслэсь тодон-валанзэс будэтонъя институт 20 пумо пособие поттыны чакла, со пӧлысь ӝыныез дышетӥсьёслэн ужан опытысьтызы. Н. МАЛЫХ, Дышетӥсьёслэсь тодон-валанзэс будэтонъя институтлэн книгапоттониеныз кивалтӥсь. Нош ик бомбаос усьыло Берло нуналъёсы НАТО нош ик бомбаос куяз Белград но Приштин, озьы ик Нови Сад городэ интыяськем промышленной предприятиос, солдат казармаос вылэ. Столицалэсь 15 иськеме пуксем Панчевоысь нефтез переработать карись завод вылэ ракета усем бере, бадӟым тылпу ӝутскиз. Бомба усиз калыклэн улон интыосаз но. Самолётъёс куяло листовкаос НАТО-лэн самолётъёсыз, бомбаос сяна, листовкаос но сэрпалляло Югославиын улӥсьёслы. Отын соос валэктыны выро страналэн улосвылаз мерскемзылэсь мугзэ. Иворъёсты вӧлмытонъя средствоос, пе, Югославиын улӥсьёслы странаын югдурез умойтэм возьмато. НАТО кемалась дасяське Музъем вылтӥ ож нуонъя войскооссэ Косовое пыртыны. Со сярысь ивортӥз США-лэн обороная министрез Коуэн, АВС телеканалын вераськыкуз. Озьы ке но, пусйиз со, США та вакытэ уг малпа озьы лэсьтыны. Хакеръёс Интернетэ пырисько Сербиысь хакеръёс НАТО-лэн интернет-системаяз пыриськыны быгатӥзы. Со сярысь ивортӥз НАТО-лэн пресс-секретарез Джейми Ши. Интернетэ пыриськыса, хакеръёс, "почтовой бомбаос" лэзьяса, тыршо солэсь ужзэ куашкатыны. Озьы ик системаысь шедьтэмын макро-вирусъёс. Ши валэктӥз, соос чылкытатӥсько шуыса. Геннадий Селезневен кенешиз Россилэн Президентэз лыдъя, НАТО войскооссэ Балканэ пыртыны уз дӥсьты шуыса. "Сербъёс пумозяз сылозы",- валэктӥз со. "Мылкыдзы соослэн чигтонтэм",- пусйиз Кун Думалэн Тӧроез, Борис Ельцинэн пумиськыкуз. Геннадий Селезнев Россилэн кивалтӥсезлы валэктӥз Белградын ортчытэм вераськонъёсыз сярысь. Слободан Милошевичлэн ож тӥрлыкен юрттэт куремезлы Борис Ельцин нош ик пумит луэмзэ вераз. Югославилэн кивалтӥсезлэсь Россилэн но Белоруссилэн огазеяськонзы борды итӥськыны мылкыдзэ валаны луэ, шуиз Президент. Озьы ке но, та ужпумез ӟеч-ӟеч эскероно на. Лукашенко дурбасьтӥз Россилэн Президентэз Борис Ельцин телефон пыр Белоруссилэн Президентэзлы Александр Лукашенколы вазиськиз. Со Югославилэн та кык государство борды итӥськыны мылкыдыз сярысь ивортӥз. Белоруссилэн Президентэз таӵе куронэз умоен лыдъяз. Со сярысь Кун Думалэн депутатъёсызлы вераз улӥ палаталэн спикерез Геннадий Селезнев. Та куронэз Югославия лыдъя шуг-секытысь потон сюресэн. Иворъёсъя национальной служба. Нуон-ваён уз дуноя Калыкез нуон-ваёнъя дунъёс арлэн пумозяз уз будэ, ивортэ "Независимая газета". Со сярысь валэктӥз чугун сюресъёсъя министр Николай Аксененко, Москваын ортчем тарифной съездын вераськыкуз. Министр озьы ик вераз солэн ведомствоезлэсь билетъёслэсь дунъёссэс кулэстыны чакламез сярысь. Билетлэн дуныз кылдоз сюреслэн кузьдалаез но арлэн вакытэз вылысь, озьы ик лыдэ басьтӥськоз адямилэн арлыдыз но тырыны быгатонлыкез. Та ужпумез быдэстон понна, пусъе газет, чугун сюрес вылын нуллон-ворттон дунъёсты кулэстыны юрттысал государство ласянь дотация сётон. Но правительстволэн сыӵе ужрадлы коньдон шедьтонэзлы оскыны шуг, гожтэ газет. Иворъёсъя национальной служба. Удмурт Республикаысь Кун Кенешлэн кыкетӥ созывезлэн депутатъёсызлы! Республикаысьтымы витьсюлэсь ятырез улӥсьёс пыриськизы 4-тӥ апреле ортчытэм быръёнъёсы. Тужгес но бадӟым люкетэз соос пӧлысь - нылкышноос. Кун Кенеше быръемын бадӟым опытэн, тодӥсь-валась но визьмо адямиос жаляса верано луэ, Кун Кенеше быръёнъёсын шаерысьтымы нылкышноос тросэн ӧз пыриське, депутатъёс пӧлын соос тямыс кузья гинэ. Макем валаса эскериськозы семьяез, нылпиосты, калыкез улон-вылонын утёнъя ужпумъёс, со бордысь потоз республикамылэн азьлань улонэз. Туннэ нуналлы котькулэсь но юнгес огазеяськыны кулэ, шаерысьтымы пӧртэм кужымъёслы экономикаын но калыкез улон-вылонын утён ужпумъёсын кылдэм шуг-секытъёсты вормон понна. Политика ужпумъёсын но шонаськонъёс медаз луэ. Милемды сюлэмшугъяськытэ нылкышноослэн но нылпиослэн тазалыксы, быдэ вуэмтэослэн но егитъёслэн дырзэс пайдатэк ортчытэмзы, ужтэк кылемзы, дышетон ужпумъёс, адямилэсь улонзэ утён но ӟеч сямъёс пыӵатон. Соин ик ми сюлмаськиськом кин кивалтоз республикаысьтымы Кун Кенешен. Милям малпаммыя, со луыны кулэ ас ужзэ котыр ласянь валась адями, демократилэсь палэнскытэк кунэн кивалтонын кылдэм сямъёсты валаса утись. Адями, кудӥз шедьтыны быгатэ ог-огзэ валан но тупан кыл, со дыре ик пыкъяське закон но порядок вылэ. Кун Кенешлэн тӧроез луыны кулэ сыӵе депутат, кудӥз вала экономика ужпумъёсты, сюрес усьтэ социальной удысэз ӝутонлы: общество тазамоз, куштӥськоз урод сямъёслэсь. Нылпиос, мӧйыос, семья сярысь сюлмаськон будоз, кулэяськисьёссыз юрттэттэк уз кыле, утиськозы кылдэм сямъёс, ас шаердэ яратон но калыкез гажан мылкыд пыӵалоз сюлэмъёсы. Тупан но огкыл шедьтон сярысь лозунгъёссын шудыса, асьмеос вунэтӥмы Удмурт Республикаын улэммес. Пӧртэм выжы калыкъёсты гажаса, ми лыдъяськом, республикалэн вылӥ кивалтон удысаз пуксьыны кулэ шаермылэн выжы калыкез пӧлысь быръем мурт, кудӥз будэмын та музъем вылын, асьмелэсь ужпумъёсмес валась но соосты улонэ пыӵатыны юрттӥсь. Сыӵе адямиен ми лыдъяськом Павел Николаевич Вершининэз - туннэ Правительстволэсь Тӧрозэ. Депутатъёслэсь огдырлы кылдэм "Согласие" группазылэсь мылкыд каронъёссэ но веранъёссэ шонерен лыдъяса, Удмурт Республикалы Кун Кенеше Тӧро бырйыкузы, милесьтым малпанъёсмес лыдэ басьтыны куриськом. Удмуртиысь нылкышно кенешлэн правлениезлэн бюроез. Россиысь нылкышно общественно-политической движенилэн Удмурт ёзэзлэн президиумез. Школа но улон Безменшурын улон пӧзе дурын Улон коркаез борддоръёс уг чебермало, чебермало отын улӥсьёс, озьы шуэ ӟуч калыклэн визькылыз. Солэсь зэм луэмзэ ми валамы, Кизнер ёросысь Безменшур школае вуылыса. Кылем арын Кизнер ёросысь удмурт кылъя дышетӥсьёс но Безменшур школаын ужась дышетӥсьёс вуылӥзы Пичи Пургаысь Гожня школае. Тодэмзы, адӟемзы потӥз этнопедагогика амалэн ужан сярысь. Нош туэ ми но мыноно кариським соослэсь ужамзэс учкыны. Кузь сюрес вылэ потыны малпасьёс трос гинэ люкаськизы. Урод куазь мылкыдмес туж сӧриз ни вал, вылаз ик, беромысагес вуим но. Жадим но, куинь но ӝыны час ӵоже сюрес вылын лыктыса. Вуим. Син шорамы соку ик адӟиськиз вужгес гинэ школа. Пушказ пырыса, эшшо но сюлэм шымырскиз. Бадӟымесь, 2-3 этажъем вӧл-вӧл коридорен школаосын дышетэм бере, таӵе пичи школа пушкын ӝоканы кутсконо кадь. Но таӵе мылкыд соку ик сылмиз: школа пушкын нясь-нясь шуныт, трос сяськаос, быгатыса дасямын кабинетъёс, стендъёс. Ваньмыз сямен дышетӥсьёс урок возьматъязы. Кытчы мылкыдыд вань, отчы ик мын. Тани ортчиз нырысетӥ урок. Вазиськисько огез дышетӥсьмылы: - Кытын пукиды? Кызьы урокез ортчиз? - Ой, зол! Мон ӟуч кылъя урокын вал. Егит завучсы дышетэ. Нош мон ачим пуки 10-тӥ классын краеведениея урокын. Дышетӥсьсы пинал, чебер, вылаз ик визьмо но. Группаен дышетон амалэз адӟим, угось темаез но община сярысь вал. Пиналъёс, общинаослы люкиськылыса, трос пӧртэм тунсыко ужъёсты лэсьтӥзы. Уроклы вылӥ дунъет сётэмын вал. Собере ми, удмурт кылъя дышетӥсьёс, ваньмы пукимы 10-тӥ-11-тӥ классъёсын удмурт литературая урокын. Дышетэ та предметэн школалэн директорез В. Н. Кузнецова. Литературая ожмаськон ортчытэмын вал куинь команда куспын: пичи пургаос, кизнеръёс но дышетскисьёс. Басьтэмын вал Г. Даниловлэн "Пиез дорын куноын" 6-тӥ классын дышетоно верос. Зэм, 6-тӥ классын та верос бордын ужаны луэ, но мур гырыса темазэ усьтыны пиналъёс пичиесьгес на. Зол ожмаськоно луиз. Ми, пичи пургаос, гуртэ уж басьтӥм телефон пыр. Со ужмес автобусын сюрес вылын лэсьтӥм. Тунсыко малпам юанъёс, ужъёс, ачиз капчи мылкыдо дышетӥсь, визьмоесь, ас малпанзэс вераны дӥсьтӥсь пиналъёс милемды зэмос литоже кыскизы. Милям командамы "Пурга кенакъёс" вал. Вормим, медальёсын бертӥм. Кельшиз урок, вылӥ дунъет сётӥзы Безменшур школаысь дышетӥсьлы кизнеръёс но, пургаос но, роноысь лыктэм специалистъёс но. Кӧня урок сётэмын, сомында вылӥ дунъет басьтӥзы мукет дышетӥсьёс но. Нош эшшо но паймымонэз но тунсыкоез вылэм на азьпалан. Со вал творческой отчёт. Школаын ужа 18 дышетӥсь, усьтэмын 17 кружок. Котькуд кружок ас быгатэмзэ возьматӥз. Антонида Алексеевна Кузнецова - биолог. Со туж быгатыса нуиз "Колесо истории" телепередачая дасям "Ныл куран" йылолэз. Питран интыын вал пыдын черсон вашкала машиналэн берганэз. Зэм верасько, Л. Якубович отын луысал ке, вожъяськысал но паймысал. Нош малы, шуоды, биолог та ужрадэз нуэ? А. А. Кузнецова 11-тӥ классэн кивалтэ. Солэн пиналъёсыз быгатыса шудӥзы "Ныл куран" сямез. Берло быгатэмзэс возьматӥзы на гитараен, арганэн, баянэн шудӥсьёс, эктӥсьёс, кырӟасьёс, пичи артистъёс, егит кылбурасьёс, каратистъёс. Мон фотоаппаратэн ветлӥ вал, туспуктэм кельто шуыса. Быгатэмзылы паймыса, воксё ымме усьтыса пуконъям вунэтӥськем со сярысь. Кузь сюрес но вунӥз, жадем но быриз, эшшо но эшшо учкем- кылзэм потэ. Безменшур - Удмурт шаерысьтымы одӥгез кыдёкысь сэрег. Отчы артистъёс но, эскерисьёс но шер ветло. Но улон отын пӧзе. Школазы вуж ке но, выль сямен ужа. Кыдёкысь гуртын дышетскем пиналъёс котыр ласянь тодон-валан, быгатонлык басьто. Али туж вӧлмемын таӵе веран, гуртысь пиналъёс городысь пиналъёслэсь быгатонлыксыя но визьзыя лябесьгес, пе. Куд-ог школаосын озьы но, дыр. Но татысь пиналъёс сыӵеесь ӧвӧл, угось соосты дышето зэмос дышетӥсьёс. Бертыкумы кузь сюрес вылын йырам бергаз одӥг малпан: малы меда мон ужбергатӥсь но, депутат но, кивалтӥсь но ӧвӧл. Луысал ке, соку ик Безменшуре выль школа пуктыны кутскысал. Н. ЕРМОКИНА, Пичи Пурга ёросысь удмурт кылъя дышетӥсьёслэн кивалтӥсьсы. Историысь чуръёс Бугырес аръёс 225 ар талэсь азьло Пугачевлэн кивалтэмез улсын Удмуртиын ортчиз ожмаськон. Мон ноку но уг вунэты школаын дышетскыкум Александр Пушкинлэсь "Капитанская дочка" повестьсэ лыдӟемме. Донысь казак Емельян Пугачев, кулэм императорлэсь Петр ИИИ-лэсь нимзэ басьтыса но котыраз адямиосыз люкаса, крепостьёсты басьтылӥз, котькытын узыръёсты быдтылӥз. Собере дышетӥсь милемлы валэктӥз, кызьы 1774-тӥ арын Иж заводэ вуиз Пугачевлэн войскоысьтыз Юска Кудашевлэн отрядэз. Соос мозмытӥзы заводлэн тюрьмаысьтыз адямиосты, сутӥзы предприятиен кивалтӥсьлэсь Венцельлэсь но солэн юрттӥсезлэсь Алымовлэсь коркаоссэс. Пугачевлэн воинъёсыз заводын кема ӧз ӝегалэ. Соос Уфа пала кошкизы. Но Ижевскысь ужасьёслэсь отряд кылдытӥз Андрей Носков, солэн отрядэз асьме палан зол нюръяськиз, Воткинскысь заводэз басьтӥз. Носковен огазеяськиз Ф. Шамотлэн отрядэз. Соос доры лыктӥзы заводын ужась крестьянъёс но. Но ӝоген Полозово гурт дорысь секыт ожын отрядэз вормизы. Кӧня ке нунал ортчыса, Алымов но Венцель заводзэс выльысь ужатыны быгатӥзы. Но Кам дорын улӥсьёслы выльысь ивор вӧлмиз, Пугачевлэн-эксэйлэн бадӟым войскоез калыкез мозмытыны лыктэ шуыса. Выль ожмаськонлэсь вуэмзэ шӧдыса, Венцель Иж заводэз утён понна мастеровойёслы но татчы пыртэм крестьянъёслы пыӵал тӥрлык сётӥз. Венцель аслэсьтыз войскозэ Воткинске ыстӥз ке но, бере кылиз. 24-тӥ июне та завод Емельян Иванович киын вал ини. Мукет нуналаз со Ижевскысь заводэ вуиз. Емельян Ивановичез Александро-Невской черк дорын татын улӥсьёс сӥё-дано пумитазы. Жингыртӥзы гырлыос. Люкаськем адямиослэсь со куриз заводысь кивалтӥсьёсты вайыны. Ужасьёс йыркуръяськемзэс веразы полковник Венцель вылэ. Пугачевлэн косэмезъя, Венцелез но Алымовез соку ик быдтӥзы. Пугачев, асьме дорын кык нунал улыса, заводэ гожтэм крестьянъёсыз 7 арлы тыронлэсь мозмытӥз. Заводэз сутӥз. Татысь тросэз ужасьёс соин ӵош Казане вошкизы. Крестьянъёслэсь кык ар ӵоже кыстӥськем ожзэс зӥбизы. Удмурт калык та ожъёс сярысь выжыысь выжые пӧртэм мадёнъёс вера. Соос пӧлысь одӥгзэ мон но тӥледлы верай. В. ЧЕРНОВ. П. И. ЧАЙКОВСКИЙЛЫ СӤЗЕМ КРЕЗЬГУРО ФЕСТИВАЛЬ Тулысэн ӵош вамыштэ Асьме доры тулысэн ӵош нош ик вамыштэ П. И. Чайковскийлы сӥзем фестиваль. Со туэ 42-тӥез луэ ни. - Азьвыл аръёсы сямен ик, сое ортчытыны коньдон ласянь шугъяськонъёс луизы, - шуэ Удмурт кун филармонилэн чеберлыкъя кивалтӥсез В. Я. Митрофанов. - Оскон весь ӧжытгес кыле. Бюджетын ӧвӧл уго фестивалья чурез. Азьвыл аръёсы "Ижкредобанк", Национальной коммерческой но Уральской трастовой банкъёс юрттӥзы. Туэ коньдон сётэ... Озьыен, 21-тӥ-28-тӥ апреле шаерамы нош жингыртоз фестиваль. Маин со туэ пӧртэмгес? А. С. Пушкинлэн 200 аръем юбилеез матэктэ бере, трос гинэ быдэстэмын луозы солэн драматургиезъя музыкальной произведениос: "Евегиний Онегин", "Каменный гость", "Моцарт и Сальери", "Скупой рыцарь" операос, "Пир во время чумы" драматической сценаос. Вераны кулэ, тросэз соос Удмуртиын нырысьсэ возьматӥсько. Кыӵе коллективъёс лыкто асьме доры? Пермьысь операя но балетъя кун академической театр но А. В. Светников нимо кун академической ӟуч хор (кивалтӥсез Россиысь калык артист профессор Игорь Раевский). Та хор асьме доры ньылетӥзэ лыктэ ни. Программаяз трос гинэ Пушкинлэн кылбуръёсызъя кырӟанъёс но романсъёс. Фортепианоен шудонъя вылӥ быгатонлыксэ возьматоз калык куспо конкурсъёсын трос пол вормисе потылэм музыкант Денис Мацуев. Удмурт филармония уг быгаты ни котькуд аре палэнысь симфонической оркестръёсыз ӧтьыны. Туэ та интыын луз асьмелэн данэ потэм кун симфонической оркестрмы. Фестивале озьы ик пыриськоз республикаысьтымы духовой инструментъёсъя кун оркестр. Ӧтемын Москваысь консерваториын дышетскисьёсмы, Россиын ортчем конкурсъёслэн лауреатъёссы Ольга Дедюхина но Михаил Шиляев. 42-тӥ фестиваль усьтӥське 21-тӥ апреле Воткинскын А. Свешников нимо хорлэн концертэныз. Нош Ижевскын сое нырысьсэ усьтэ Операя но балетъя кун театрмы, со возьматоз "Лебединое озеро" балетсэ. Нош куноосмы дэмлало "Дон-Кихот" но "Бахчисарай фонтан" балетъёссэс. Фестивальлэсь программазэ учкыны быгатозы, Ижевскын сяна, Воткинскын, Глазовын, Сарапулын, Можгаын, Чайковскийын улӥсьёс. Билетлэн дуныз 20 манетысен 100 манетозь (пичи городъёсын - дунтэмгес). Озьыен, эшъёс, дыртэлэ - чеберлыко дунне усьтэ ӧсъёссэ. Т. ПЕТРОВА. Ӟечкыласьком Топливно-энергетической комплексэз азинтонын бадӟым вормонъёс басьтэмез но уно аръёс ӵоже сюлмысь тыршемез понна Россия Федерацилэн Президентэзлэн Указэныз Перевозчиков Геннадий Тимофеевич - "Удмуртнефтегазстрой-Город" акционер огазеяськонлэн "Удмурттрубопроводстрой" огазеяськонысьтыз машинист - пусъемын "За заслуги перед Отечеством" орденлэн ИИ степенё медаленыз. Нош Строканев Виктор Васильевичлы - "Удмуртнефтегазстрой-Город" огазеяськонлэн "Газстрой" огазеяськонэзлэн кивалтӥсезлы - сётэмын "Россия Федерациысь дано лэсьтӥськись" сӥлы карон ним. Журналистъёсын пумиськонъёс "Политика - ӟеч уж, лэсьто ке сое чылкыт киосын" Тазьы шуиз журналистъёсын пумиськон дыръя Кун Кенешлэн Кивалтӥсез А. А. Волков. Иворъёсты вӧлмытонъя средствоосын ужасьёслы со вакчияк ивортӥз кылем пятницае Москвае совещание ветлэмез сярысь. Россилэн Президентэз доры кенеше люкаськылӥзы вань республикаослэн кивалтӥсьёссы. Вераськон мынӥз странаын кылдэм огъя югдур пумысен, Югославилы юрттонъя, Примаковлэн Правительствоезъя но музон тужгес но лэчыт ужпумъёсъя. Кызьы пусйиз Кун Кенешлэн Тӧроез, Удмуртиын ортчем быръёнъёсты центр умоен лыдъя. Политической кужымъёс пӧлысь асьсэды возьматӥзы КПРФ но "Отечество". Озьыен, калык соослы оскемзэ вера. - Президент дорын ортчем кенешонын вераськон ӝутскиз туала Правительствоя. Мон верай ас мылкыдме: Примаковлэн кабинетэзлы котыр ласянь юрттоно но, выль президент бырйытозь, сое воштоно ӧвӧл. Бадӟымгес саклык висъяно промышленностез ӝутонлы. Югославия сярысь. Россиысь данакез политикъёс та страналы военной юрттэт сётонлы пумит луэмзэс верало. Но НАТО солэсь музъемъёссэ киултыса отчы пыриз ке, Россия палэнэ уз кыльы. Али вань быгатонозэ лэсьтоно на, Балканын кенжем тылӝуэз ӝоггес кысон понна. Секыт югдур Северной Кавказын но. Кызьы пусйизы кенеше люкаськемъёс, отын туж юн шӧдӥське Западлэн чуртнаськемез. Дэмлан сётэмын та регионэн ужанъя Президент борды нимысьтыз адями висъяны. Пӧртэм вераськонъёс мыно Россилэн генеральной прокурорез Юрий Скуратов пумысен. Кызьы тодмо, ужысьтыз со мозмытэмын вал Президент косэмъя. Матысь дыре Скуратов валэктон сётыны кулэ Федерацилэн Кенешаз, соку ик решение но кутэмын луоз. А. А. Волков озьы ик пыриськиз "Отечестволэн" политсоветаз. Кун Кенешлэн Тӧроез валэктӥз журналистъёслэн пӧртэм пумо юанъёссылы: - Ельцинлэн мылкыдыз ӧвӧл-а Примаков интые нош ик Черномырдинэз пуктыны? - Кызьы пусйиз Президент, Черномырдинэн пумиськылыкуз, соос куспын таӵе вераськон ӧй вал. Ельцин туала правительствоез воштыны уг малпа. Озьы верамын вал кенешонэ вуэм кивалтӥсьёс азьын. - Сояз созывен кутэм республиканской бюджет ласянь сэрттон-пертчонъёс луозы-а? - Нырысетӥ кварталлы йылпумъянъёсъя бюджет борды одно ик берытскомы на, малы ке шуоно, солэн доходъя люкетэз расходъёсты быдэсак пытсаны уз вормы. Таӵе уж мыноз кварталлы быдэ. - Кызьы дунъяськоды быръёнъёс бере шаерамы кылдэм югдурез? - Ваньмыз интыяз пуксиз. Депутатэ шедизы гажамон, оскымон адямиос. Табере радызъя, ог-огдэ валаса ортчытоно нырысетӥ сессиез. Кинэ ке сьӧдманы, ултӥяны вырон нимаз адямиез гинэ уг шуккы, со йӧтэ быдэс республикалы, вань калыклы. Асьмеос адӟим, кыӵе амалъёсын мандат понна нюръяськизы куд-ог эшъёсмы, уката ик Ижевскын. Мон шуысал, политика - со ӟеч уж, лэсьтӥське ке чылкыт киосын но чылкыт малпанъёсын. Берло 4 ар ӵоже Удмуртие трос гинэ вуылӥзы вылӥ куноос, тодмо кивалтӥсьёс но политикъёс. Кинэн пумиськыны кылдоз на матысь дыре? - Зэмен но, 4 ар куспын республикамы политика удысын шӧдскымон вылӥе ӝутскиз. Дорамы ӧтчам муртъёс ваньмыз ужен ветлӥзы, гожтэмын огкылъёс, тупатэмын политической, экономической, культурной кусыпъёс. Вылӥ куноос пӧлын табере витём Правительстволэсь кивалтӥсьсэ. - Александр Александрович, кызьы тӥ учкиськоды Югославия - Белоруссия - Россия огазеяськон шоры? - Белоруссия но Россия куспын - ваньмыз валамон. Валамон Югославилэн но асьме борды куриськемез: НАТО-лы пумит огъя кужым кулэ. Федерацилэн Кенешаз та ужпум ӝутскиз ке, мон куараме сёто огазеяськон понна. История асьмелы трос пол возьматӥз ини: люкиськыса улон номыр ӟечсэ уз сёты. - Удмуртиысь Журналистъёслэн союззы та вакытэ шуге-леке шедемын. Юрттоз-а Кун Кенеш солы секыт югдурысь потыны? - Юрттыны кулэ. Нырысетӥ организационной сессия бере та ужпумез ас вылам басьто. Л. МЕДВЕДЕВА. Россия Федерацилэн кун наградаеныз пусъён сярысь Россия Федерацилэн Президентэзлэн Указэз Кун азьын вормонъёсыз, калыкъёс куспын эшъяськонэз но ӵош ужанэз азинтонын бадӟымесь азинсконъёсыз но кема аръёс ӵоже пайдаё ужамез понна пусъёно: Эшъяськон орденэн Григорьев Михаил Алексеевичез - Удмурт Республикаысь Правительстволэн Аппаратэныз кивалтӥсез. Россия Федерацилэн Президентэз Б. Ельцин. Москва, Кремль, 1999 арын 1 апреле. � 410 Лифтэд вань - бушаты кисыдэ 5 манет 57 коньы - трос-а со? Городысь улон юртъёсты возёнъя но коммунальной юрттэт сётонъя управленилэн кивалтӥсез Сергей Трухин журналистъёсын пумиськылӥз. Кенешыны мылкыд каремезлэн мугез одӥг: коммунальной юртъёслы дунъёслэн будэмзы. Нырысетӥ апрельысен соос 5 манетлы но 57 коньылы йылӥзы. Табере кезьыт ву понна 1 манет но 35 коньы интые 4 манет но 69 коньы тыроно луоз. Жуг-жагез город сьӧры поттон понна 81 коньы интые 1 манет но 4 коньы. Нош лифт понна тырон 2 поллы будэтэмын. Мукет коммунальной юрттэтъёслы дунъёс озьы ик кылё. Но кивалтӥсь ӧз оскыты, азьланяз дунъёс уз йылэ шуыса. Угось ужан тӥрлыклы, тракторез ужатэмлы гинэ но дунъёс трослы будӥзы. Но коммунальной юрттэтъёслы дунъёс семьялэсь табышсэ но луонлыкъёссэ чаклатэк будэтэмын уз луэ. Соослэн быдӟалазы семьялэн огъя доходаз 12 процентлэсь вылӥын луыны кулэ ӧвӧл. Со вакытэ ик уноез калык коммунальной юрттэтъёс понна тыронъёсты дыраз тырыны уг быгаты. Городысь улон юртъёсты возёнъя управленилы пунэмъёс туннэ нуналлы 19 мллион манетлэсь трос люкаськемын ни. Л. ЮРТЕЕВА. Данё Витьлэн вынмуртэз Лыдӟисьёсмы Леонид Никандрович Даниловез тодо егит дыръяз газетамы ужамез сярысь гожъямъёсызъя, нош тросэз ӧз вунэтэ на, луоз, 1954-1972 аръёсы со Удмуртиын ТАСС- лэн корреспондентэз вал шуыса. Мумиз ӟуч вал, Пермьысь детдомын быдэсмемын. Бубиз, Никандр Ефимович, удмурт, ас дыраз ужаз Кезысь "Колхоз сюрес" газетлэн редакторез луыса. - Мынам улон сюрес возьматӥсе вал бубилэн братэз Виктор - Данё Вить, - шуэ Леонид Никандрович. - Со Удгизэн но, писательёслэн огазеяськонэнызы но кивалтӥз. Кылбуръёсыз газетъёсын печатласькылӥзы. Со ик мыным дэмлаз Урал университетэ журналистикая факультетэ пырыны. "Советской Удмуртия" газетын ужакуз, Прокопий Чайников но Василий Широбоков удмурт кыллы дышетӥзы. Со понна Леонид Никандрович али но тау каре. "Комсомолец Удмуртии" газетэз кылдытоно вал. Отчы ӧтизы Леонид Даниловез но. Казахстан выльвылъёсы ветлыса, со дасо мында газет номерын очеркъёссэ печатлаз. Син шоры йӧтымон журналист луиз. ТАСС-лы корреспондент кулэ вал: мед луоз со нимысьтыз вылӥ образованиен, партилэн членэз, мед тодоз удмурт кылэз. Та интые ӵапак тупаз Леонид Данилов. Огвакыт туж Архангельске ӧтё вал... "Вордскем шаерысьтым мон нокытчы уг кошкы", - шуиз Л. Данилов, собере Удмурт телевидениын валтӥсь редакторын ужаз на. Тазьы ик верано луиз, бадӟымез нылыз Ставрополе улыны ӧтем бере (кузпалыз кулӥз уга). "Кошки ке, мон журналист уг луы ни", - малпаз ас понназ. Бен кӧня ке шугъяськиз ик. "Нош ӧй ке кошкы, кытын мон уло?" Та юанэзлы ньыль тодмо нылкышноос пӧлысь огез (ӵап ӝӧк сьӧры ӵош люкаськемын вал) шуиз: "Коть али ик мон доры мед лыктоз". Со вал Люция Григорьевна Ведерникова. Нап-суд йырсиё-синкашо, сьӧд синмо кышномурт. Ог сизьым ареслы егитгес. Аслыз Леонид Никандровичлы 73 арес вал. - Улонлэн кыкетӥ ӝыныяз но бадӟым яратон луэ на вылэм, - шуиз со берлогес. Нош Люция Григорьевна вераз кузпалэзлы: - Партийной уже монэ тон понна утьыса возем. Машзавдысь огаз цехын со парторганизацилэн секретарез вылэм ке, туж йӧн-йӧн, чурыт куронъёсъя улэмысьтыз, лэся, нокин дӥсьтымтэ бордаз матэктыны. Озьы ик кылем огназ. Соос кык дыдыкъёс кадь тупаса уло. Люция Григорьевнаез Леонид Никандровичлы дуно ӵектонъёс, визь-кенешъёс сётылэ, статьяос, ӟечкыланъёс дасяны юрттэ. - Паймоно кадь, - шуэ Леонид Никандрович, - мынам песятае 52 аресозь гинэ улӥз, бадӟым тушо но, со мыным туж пересь потэ вал. Нош ачим тани ньыль полэс пересь песятай (прадед) ини, озьы ке но, аслым пинал потӥсько на. Та йыгмыт, ӝужыт мугоро воргоронэз урамысен пумитаса, тодӥсь мурт вазе: - О, Никандрыч! Ӟечбур! Нош туннэ та кылъёс вӧзы ватсаны луоз: - Ӟечкыласьком тонэ 75 арес тырмон юбилееныд! Сӥзиськом шуд но бур! Т. Чернова. Удмуртиысь дано журналист Л. Н. ДАНИЛОВ. Суредаз Л. ПРОЗОРОВ. Ог-огед доры, вашкала сямъя Южтолэзе, огаз чебер нуналэ, Можга районысь Пазял гуртэ вуизы та ёросысь ик Выль Бия гуртысь артистъёс. Кырӟазы, веразы, шулдыртӥзы выль клубын. "Табере одно ик ми доры лыктэ", - шуыса кошкизы. Толэзь но ӧз ортчы - Пазялысь автобус вырӟиз Бияла. Отчы сюрес матын ӧвӧл, нош кырӟан машинаез бурдо кадь каре, гопо-вуо сюресэз но шӧдыны уг луы. Выль Бия гуртын клубзы вуж ни, пичи. Но инты ваньмызлы тырмиз. Гурт калык гужак лыктэм пазялъёсын тодматскыны. Куноос ялтрась удмурт дэремъёсын потаса кырӟазы асьсэ пал гуръёссэс - вашкалаоссэ но таос умой тодо на вылэм. Усто возьматӥзы "Турнаны потон" обрядзэс. Пазял гуртысь кылбурчи Лидия Чернова лыдӟиз пиналъёслы но мӧйыослы сӥзем чуръёссэ. Та гуртысь фольклор коллектив выльысь улӟиз, культура юртазы Елена Витвинова, ужаны лыктэм бере. Со оломар сямен кырӟан гур но пӧрмытэ, шуо эшъёсыз. СДК-ын ужасьёс котыре табере кыстӥсько пенсие потэм нылкышноос но, кудъёсыз егит дыръязы уӵы куараенызы паймытъязы, сос пӧлын - Раиса Кузнецова, Зоя Горина, Зоя Кузнецова, Тамара Блинова, Юлия Суворова, Юлия Борисова, Мария Дерягина, Эльвира Кузнецова но мукетъёсыз. Арганчиослэн быдэс ансамбльзы ке но вань, куддыръя ёрмо. Таяз учыре сьӧразы кутӥзы Владимир Волковез, кибашлы дышетӥсез. Олокыӵе но пӧртэм сиён-юонэн тырмытэм кузь ӝӧк сьӧрын куноятӥзы бияос пазялъёсыз. Вашкалаос сямен ог-огмы доры ветлонмес медам вунэтэ, шуизы. Таӵе ужрадэз ортчытыны гурт кенеш но, мукетъёсыз но сокем мыло-кыдо юрттэм бере, ӟеч кичӧлтон, зэм ик но, уз пашмы. Т. НИКОЛАЕВА. Ӟечкыланъёс Дэбес ёросысь Аняшур гуртысь Анастасия Николаевна Андреевалы 70 арес тырмиз. Юн тазалык но шумпотон сӥзе солы вить нылпиосыз, кенъёсыз-эмеспиосыз но нылпиосызлэн нылпиоссы. *** Алнаш ёросысь Варзибаш гуртысь Татьяна Максимовна но Надежда Николаевна Конькинаосты ӟечкыласьком вордскем нуналэнызы! Улоназы ваньзэ умойзэ но ӟеч мылкыд сӥзьыса. Лена но Люда. *** Алнаш ёросысь Ляли гуртысь Алексей Ильич Медведевез вордскем нуналэныз газет пыр ӟечкылало матыс адямиосыз. Котьку таӵе ик чупрес но таза лу. Пересьмонлы сётскытэк, кема-кема ул. Мельниковъёс. *** Алнаш ёросысь Усо гуртысь Степан Евдокимович Семеновлы 60 арес тырмиз. Юн тазалык, байлык но кема улон сӥзе солы. Кузпалыз, нылпиосыз, эмеспиосыз но кенэз. Удмурт Республикаысь Кун Кенешлэн "Согласие" группаысьтыз депутатъёслэн заявленизы Ми, Кун Кенешысь депутатъёс, Удмуртилэн пӧртэм городъёсысьтыз но ёросъёсысьтыз быръемын, улон шоры пӧртэм сямен учкиськом, пӧртэм малпанъёсын улӥськом. Ми ивортӥськом, республикамылэн азьпала улонэз понна депутатъёслэн "Согласие" группаенызы огазеяським шуыса. Алигес ортчем быръён возьматӥз милемлы, Удмуртиын улӥсьёс умой пала воштӥськонъёсты возьмало шуыса. Ми, "Согласие" группаысь депутатъёс, бырйисьёслэсь куремзэс быдэсъяса, ивортӥськом: Туала политической югдуре Кун Кенешлэн Тӧроезлэсь должностьсэ быдэсъяны тужгес ӟеч кандидатура - Павел Николаевич Вершинин, малы ке шуоно, со калыкез огазеяны быгатоз. Ӵош ужакумы тросэзлэн милям П. Н. Вершининэн - Правительстволэн Тӧроеныз кусыпъёсмы куд-ог дыръя лякытэсь ӧй вал. Озьы ке но, Павел Николаевич быгатэ пӧртэм малпанъёсты кылзыны, аслэсьтыз янгышъёссэ валаны но тупатыны. Ми лыдэ басьтӥськом сое но - П. Н. Вершинин законъя ужаны тырше. Правительстволэн Тӧроез луыса тыршыкуз со кылдытӥз республикаысь организациослэн но предприятиослэн, интыысь аскивалтонъя ёзъёслэн, городъёсысь но ёросъёсысь администрациослэн кивалтӥсьёсынызы пайдаё кусып возёнъя радлык, федерация кусыпъёсын политической опыт люказ. Ми ӧтиськом Удмурт Республикаысь кыкетӥзэ ӧтчам Кун Кенешысь депутатъёсты П. Н. Вершининэз Удмурт Республикаысь Кун Кенешлы Тӧрое быръёнъя ӵектонлы дурбасьтыны. Депутатъёслэн "Согласие" группазы косэмъя Одиянков Е. Т., Юшков Н. П., Зенин В.Н., Малков А. Т., Тубылов В. К., Семенов И. Н., Варламов В. С., Никитин В. А., Фридрих В. Л., Марченко А. В., Дементьева В. В., Жебровский В. В. но мукетъёсыз. ЖУРНАЛИСТЪЁСЫН ПУМИСЬКОНЪЁС "Тупан" дэмла тӧрое... Валлян, 12 апреле, журналистъёсын пумиськизы Правительстволэн Тӧроез Павел Вершинин но Кун Кенешлэн депутатэз Евгений диянков. Вераськон мынӥз Кун Кенешлы но Правительстволы Тӧрое адямиосты дэмлан сярысь. Та мында журналистъёс огинэ шер люкаськыло. Евгений Одиянков шуиз: - Депутатъёслэн "Тупан" ("Согласие") группазылэн нимыныз Кун Кенешлы Тӧрое дэмласько Павел Николаевич Вершининэз. Туннэ со самой оскымон кандидатура. Та группа люкаськылӥз кылем субботае но кутӥз вазиськон. Отын шуэмын: "Ми, Удмуртиысь пӧртэм городъёсын но районъёсын быръем депутатъёс, "Тупан" группае пыриським. Ми лыдъяськом Кун Кенешлы Тӧрое устоез кандидатура луэ Павел Николаевич Вершинин. Со вань тупамтэосты, палэнтоз, обществоез огазеялоз но республикалэсь ӵуказеезлы осконзэ будэтоз. П. Н. Вершинин быгатэ кылзӥськыны мукетъёссэ, янгышъёссэ вала но тупатэ. Предприятиосын, организациосын, интыысь администрациосын кусыпъёсыз умоесь. Правительствоын ньыль ар ужатозяз, быдэс Россиын данэз ӝутскиз. Политикаын опытэз йылӥз. Ми вань депутатъёсты ӧтиськом та ӵектонмес умоен лыдъяны но П. Н. Вершининэз Кун Кенешлы Тӧрое бырйыны. Павел Николаевич ватсаз: - Мон, пе, трос малпаськи: быгато-а депутатъёсты огазеяны, вормо-а сыӵе бадӟым ныпъетэз? Со валэктӥз мукет юанъёслы но. - Кин мед луысал, Правительстволэн Тӧроез? Та ужез умой быдэстыны быгатысалзы, мон сямен, Н. А. Ганза (Глазовысь Чепца завод), В. В. Жебровский ("Буммаш"), В. В. Моисеев ("Ижсталь"), В. А. Мохначев (Можгаысь "Свет" завод) но мукетъёсыз. Ваньзы соос усто хозяйственникъёс, бадӟымесь предприятиослэн кивалтӥсьёссы. - Кун Кенешлэн кыкетӥ созываз быръем депутатъёс сярысь мар верасалды? - Парламентэ быръемын трос хозяйственникъёс, визьмо но быгатӥсь адямиос. Умой со. Соос дышемын пайдаё ужаны, дырез шыръяны. Кӧняез ке ялан мед ужалозы Кун Кенешын, законопроектъёс дасялозы. Со Пичи Кенеш выллем луоз. Асьмелэн парламентмы кык палатаен ӧвӧл бере, сыӵе ужан амал урод уз луы. - Кун Кенеше быръёнъёс азьын малы Москвае ветлӥды? - Ӧтемын вал Президентлэн Аппаратаз. Азьло мон отын ӧй вал. Пумиськылӥм Олег Сысуевен, вераським 15-20 минут. Отын тодэмзы потэ республикаысь югдурез. Собере отчёт лэсьтӥ Россиысь Коньдонъя министерствоын. Отын толэзьлы быдэ сыӵе пумиськонъёс луо. - Россилэн кивалтӥсьёсынызы кусыпъёсты кыӵеесь? - Умоесь. Трос пол пумиськылӥ ни Юрий Маслюковен, Вадим Густавен, Геннадий Куликен. Но тужгес трос ужано луэ Коньдонъя министерствоын. Вакытэз сыӵе. Татын бергаськом воштӥсьёсыным но республикаысьтымы коньдонъя министрен Владимир Бельтюковен ӵош. Кусыпъёсмы уродэсь ӧвӧл. - Кыӵе кусыпъёсты Александр Волковен? - Умоесь. Вискытӥмы нокыӵе сьӧд коӵыш ӧз поты. Но берло 1,5 ар ӵоже Кун Кенешын правительстволэсь но солэн Тӧроезлэсь кылзӥськемысь дугдӥзы. Тупатэк кызьы пайдаё ужалод? "Отечествоез" но умоен лыдъясько. Гажасько Юрий Лужковез, визьмо политик но усто хозяйственник луэмез понна. Кун властьлы огкыл шедтоно вань партиосын но общественной огазеяськонъёсын. Нош кин обществоез огазеяны умойгес быгатоз, мон солы нырысь ик ачим киме сёто. ГЕННАДИЙ РОМАНОВ. Зарни сандык Национальной библиотекаын ортчиз А. В. Новиковлэн "Золотой ларец" книгаеныз тодматон. Вералом нырысь ик книгалэн авторез Анатолий Васильевич сярысь. Сое огкадьик, шуыны луоз: дышетӥсь, коллекционер, историк. Дышетӥсь со профессиезъя но, Инмарлэн сётэм быгатонлыкъёсъя но. Трос сӥзиз со нылпиослы будэтон удысын. Нош ваньмон дырзэ сӥзиз вашкала арбериосты люканлы. Анатолий Васильевич Удмуртиысь тужгес тодмо коллекционеръёс пӧлы пыре. Новиковлэн люкам вашкала арбериосыз пыр адӟиське Удмуртилэн историез, Ижевсклэн азинскемез, будэмез. Соослэн пӧртэм (вакытсылы) вакытъёссылы сӥземын "Золотой ларец" книгаез но. Удмурт кун университетысь учёнойёс дэмлазы сое школаын шаермылэсь историзэ дышетонъя книгаез сямен кутыны. Г. ВЛАДИМИРОВА. Выль ним Ӟеч сюрес Улонын туж уно адямиосын ваче сюрес артэ карылэ. Куд-огзэ соку ик вунэтыны тыршиськод, мукетъёсыныз одӥг кыл шедьтӥськод, нош куинетӥеныз пумиськонэз туж дуноен лыдъяськод... Озьы кылдӥз - таосыз пӧлы мон пыртӥсько Николай Мерзляковез но. Ӝужыт мугоро, пальпотӥсь синмо, солы кельшись муртэн лулысь-сюлмысь вераськыны чылкыт, серекъянэз яратӥсь адямиен адӟи мон сое нырысетӥзэ пумиськыкумы ик. Нырысь студент, собере - моряк, агроном но луыса, со ӧз воштылы ӟеч сямъёссэ. Мар ватонэз - Колялы улон капчиен ӧз сётскылы. Нош со нырзэ ошылыса ӧз улы. Яке - пуш кужымез вань вылысь урод мылкыдзэ возьматъяны ӧз выры. Сыӵе дыръёсы Николай али сямен ик кияз кутылӥз матысь эшсэ-гитаразэ но сюлэмзэ кисьтылӥз. Кырӟанъёсаз со вералля вордскем шаермес, ӵыдонтэм инкуазьмес яратэмез, солы синмаськемез сярысь. Нош кыӵе кырӟась уг кырӟа меда ныл но пи куспын кылдӥсь чылкыт яратон сярысь? Кырӟа Николай но. Ас гуреныз, ас куараеныз. Со ик монэ синмаськытэ - кытӥ-отӥ ӵажырес ке но, Николай Мерзляков кырӟа Ас Кырӟанзэ. Ӵемтылыса но, оло - утча Ас Сюрессэ. Мон оскисько: Николай сое шедьтӥз ни. Табере ужано но ужано. Та паймымон адямиез синйылтӥзы ни шаерысьтымы тодмо мастеръёс - композиторъёс Николай Шабалин но Алексей Проскурин. Соослэсь пумиськемзэс адӟылӥсько ке, шӧдӥсько: таослэн творческой кылзы тупа. Дыр вуоз - Николай ас кырӟанъёссэ ачиз ик нотаос вылэ гожъяны кутскоз. Николай ас произведениезлэсь кылъёссэ но, крезьгурзэ но ачиз гожъя. Ачиз ик кырӟа но. Со уката аспӧртэмлыко луэ. Та адямиен монэ тодматӥз эше, Игорь Семенов. Нош со сыӵе адямиос пӧлы пыре - соослэн кылзылы быдэсак оскиськод, данъяськиськод. Угось тодӥськод: секыт дыръя со котьку сётоз оскымон бур кизэ. Пограничник тодэ, мар со эшъяськон. Озьы мыным Игорь эше выль дуннеез усьтӥз - Николай Мерзляковез. Али Николайлэн, тодэмея, ог куамын пала кырӟанэз. Соос матын калык кырӟанлы. Мултэс кильтыръямын ӧвӧл, сюлэм косэмъя гожтэмын. Юасько Николайлэсь: - Вера ай, кин луэ тынад нырысетӥ кылзӥсед, мылкыдзэ верасед? Со соку ик пальпотэ: - Фая кышное но эшъёсы. Тӥни озьы. Ватсало на: улэ но ужа Николай Мерзляков Завьял ёросысь Якшур гуртын. Та гурт эшшо огпол возьматӥз на талантъёсын узыр луэмзэ. Вячеслав Ар-Серги, Удмуртиысь культура удысын сӥё-дано ужась. Тулыс 1. Чагыр инбам, тулыс инбам, Зарни шунды пальпотэ. Мынко дорам туннэ огнам - Вадьсам тюрагай тюргетэ. 2 пол 2. Кыӵе вылэм шулдыр сюрес - Гуждор вылын ӵуж сяськаос. Нош нюлэскын кытын-отын Ортчем толлэн адске на лымыез. 3. Та кырӟанам тулыс дырез Дано карны мон вырисько, Вань малпанъёс шудэн тырмо - Тулыс нимын Яратонме но нимасько. КИЯСА ЁРОСЫН ТУННЭ Лыдӟиськон дуно луиз Киясаысь ёрос библиотекае лыдӟиськыны ветлӥсьёслы выль дунъёс тупатэмын. Киужъёсъя книга басьтӥд ке, сутка ӵоже воземед понна тыр 1,5 манет, дышетскон литература понна - 2 манет. Портретъёс но пластинкаос понна - 0,5 манет, нош библиотекаысь лыдӟиськон залын гинэ пукид ке - 0,5 манет. Ма шуод на? Улон ӧръяське капитализмлэн сюрестӥз. *** Оскымон телефон Ёросын со выльысь ужаны кутскиз алигес гинэ. Телефон пыр кенешыны луоз тодӥсь- валась специалистэн-психологен, жингыртыны луэ вордӥськонэ 15.00-17.30 часъёсы, вир нуналэ - 15.00-17.00 часъёсы, ас дораз лыктыса вераськыны луэ покчи арняе 9 часысен 12 часозь. *** Усьтӥськиз выль драмкружок Туэ со ужаны кутскиз Карамас-Пельгаысь школаын, кивалтэ соин В. А. Тукаева. Кема дасяськемзы бере, нылпиос возьматӥзы спектакльзэс, со дасямын вал С. Широбоковлэн пьесаезъя. Гурт калык люкаськиз быдэс зал тыр. Рольёссэс умой шудӥзы Наташа Габитова, Света Уткина, Люда Утланже, Елена Лебедева но мукетъёсыз. Спектакле пыриськизы школалэн выпускникъёсыз но. *** Пушкинлы сӥзьыса Быдӟым поэтлэн вордӥськем дырысеныз 200 ар тырмонлы сӥзьыса, ёросын ортчыло литературалы сӥзем часъёс. Умой дасямын но пайдаё ортчиз со Лутоха шор ёзо школаын. Кылбурчи сярысь мадизы дышетӥсь Л. Е. Никонова но библиотекарь Р. А. Камашева. Нош асьсэос нылпиос Пушкинлэсь кылбуръёссэ лыдӟизы но инсценировкаос пуктӥзы, огаз поэтлэсь рользэ шудӥз дышетскись Владислав Краснов. П. Петрованов. Ижевский филиал Московского университета Потребительской кооперации Объявляет приём абитуриентов в 1999 году на заочную сокращенную форму обучения по специальностям: * 060400 - "Финансы и кредит" * 060500 - "Бухгалтерский учет и аудит" * 061400 - "Коммерция" Лицензия � 16Г-185 Госкомвуза России от 18. 07. 95 г. "Финансы и кредит" Готовятся специалисты для работы в государственных органах федерального, территориального и муниципального уровня, коммерческих банках, финансовых компаниях, инвестиционных фондах, налоговых службах, организациях системы потребительской кооперации. Обучение идет по дисциплинам: - финансы, деньги, кредит, банки; - финансы предприятий; - финансы потребительской кооперации; - страхование; - налоги и налогообложение; - организация и финансирование инвестиций; - рынок ценных бумаг и биржевое дело; - банковское дело; - учет в банках. "Бухгалтерский учет и аудит" Готовятся специалисты для работы на должностях главных бухгалтеров для организаций и предприятий всех форм собственности, их заместителей по финансам и автоматизации учета, инструкторов по бухгалтерскому учету, аудиторов, преподавателей для кооперативных, средних и высших учебных заведений, экономистов по труду, бухгалтеров банков и руководителей структурных подразделений банков, специалистов налоговых служб. Будущие специалисты изучают: - финансовый и управленческий бухгалтерский учет в основных отраслях хозяйства; - бухгалтерский учет на предприятиях; - внутренний и внешний аудит; - налоги и налогообложение; - автоматизация бухгалтерского учета; - учет и аудит в банках; - бухгалтерский учет на совместных предприятиях; - бухгалтерский учет за рубежом; - финансы и кредит. "Коммерция" Осуществляется подготовка специалистов высшего профессионального образования с присвоением квалификации "Коммерсант". Данные специалисты требуются для работы в фирмах, торговых домах, акционерных обществах, товарных биржах, экспортно-импортных конторах, предприятий и организаций потребительской кооперации и других торгово-коммерческих структурах. Выпускники также могут работать в области рекламоведения и таможенного дела. Специалистам дают глубокие знания по теории и практике коммерческой деятельности, рекламе, биржевому делу, рынку ценных бумаг, психологии и этике бизнеса. Все выпускники получают диплом Московского университета потребительской кооперации государственного образца. * Обучение платное на договорной основе с организациями, учреждениями, частными лицами с полным возмещением затрат на обучение. * Иногородним предоставляется общежитие. Для поступления необходимо предоставить: 1. Диплом государственного образца о среднем профессиональном образовании с выпиской оценок (подлинник). 2. Заявление установленной формы. 3. 6 фотографий 3 х 4 см. 4. Выписку из трудовой книжки (имеющим трудовой стаж). 5. Паспорт (лично). * Зачисление - по результатам собеседования по профилирующей дисциплине, соответствующей избранной специальности. * Документы принимаются только от лиц, имеющих среднее специальное образование (техникум) по родственной специальности. * Срок обучения до 4 лет с учетом итоговой государственной аттестации. Подробности по телефону: 37-19-11, 37-08-11. Абитуриент-99 Кооперативный техникум Удмуртпотребсоюза Каримов Рауф Мухаметович - председатель Совета правления Удмуртпотребсоюза, заслуженный работник торговли Российской Федерации Со дня своего зарождения кооперация заботилась о подготовке кадров, необходимых для многоотраслевого хозяйства, проявляла внимание к росту мастерства работников ведущих профессий. С 1991 года главной базой подготовки, переподготовки и повышения квалификации кадров стал Ижевский кооперативный техникум - правопреемник и продолжатель традиций Сарапульского кооперативного техникума - одного из старейших учебных заведений республики. За 69 лет своего существования Сарапульский, а ныне Ижевский техникум подготовили более 10 тыс. Специалистов и работников массовых профессий. В настоящее время в республике нет ни одного райпо, ни одного предприятия, где бы не работали их выпускники. Техникум оснащен новейшим оборудованием и техническими средствами обучения, здесь имеются все необходимые учебные кабинеты и лаборатории, компьютерные классы, просторные спортивные и актовый залы, библиотека, столовая. Общежитие техникума - одно из лучших в республике. Короткова Светлана Ивановна - директор Ижевского кооперативного техникума 15 лет возглавляет учебное заведение Короткова Светлана Ивановна, заслуженный работник народного образования Удмуртской Республики - принципиальный и требовательный руководитель, опытный преподаватель с 29-летним стажем. Любовь к своему делу, умение щедро поделиться опытом с молодыми коллегами позволили ей за короткий срок сформировать в новых стенах техникума хороший педагогический коллектив, способный осуществлять высокий уровень профессиональной подготовки студентов. Порядок приема в техникум С 1 апреля по 1 августа в приемную комиссию представляются следующие документы: - документ, удостоверяющий личность и гражданство (паспорт, свидетельство о рождении); - подлинник документа государственного образца о среднем (полном) общем или основном общем образовании; - 6 фотографий 3х4; - медицинская справка по форме � 086-У. Вступительные экзамены проводятся с 7 июля по 10 августа Поступающие сдают следующие экзамены: На базе среднего (полного) общего образования - русский язык (диктант) - профильное испытание. На базе основного общего образования - русский язык (диктант) Зачисление в техникум проводится по результатам вступительных испытаний и среднего балла по аттестату, на договорной основе (платное обучение). Прием документов ведется ежедневно, кроме субботы и воскресенья с 8-30 до 16-30. Справки по телефонам: 37-02-88 37-12-88 37-04-00 37-02-00 Адрес техникума: г. Ижевск, ул. Молодежная, 109. 0601 Экономика, бухгалтерский учет и контроль Квалификация выпускника - бухгалтер Бухгалтер может осуществлять следующие виды профессиональной деятельности: экономическую; бухгалтерско-аналитическую; финансово-контрольную. В результате освоения программы по данной специальности бухгалтер будет владеть навыками: - работы с нормативными документами по финансово-хозяйственной деятельности предприятия (фирмы), со справочной литературой и другими информационными источниками, использование их при решении хозяйственных вопросов в рамках своей компетенции; - работы на персональном компьютере для обработки информации; - расчета и анализа основных экономических показателей работы предприятия (фирмы); - составления бухгалтерской и статистической отчетности; - работы по контролю и ревизии финансово-хозяйственных операций. Срок обучения: - на базе среднего (полного) общего образования - 1 год 10 месяцев - на базе основного общего образования - 2 года 10 месяцев. 0602 Менеджмент Квалификация выпускника - менеджер. Менеджер может осуществлять следующие виды профессиональной деятельности: организационно-управленческую; плановую; контрольно-аналитическую. В результате освоения программы по данной специальности менеджер будет владеть навыками: - работы с нормативными законодательными документаи, со справочной литературой и другими информационными источниками; - работы на персональном компьютере для обработки информации; - использования современных информационных технологий в управлении производством; - работы с коллективом по созданию благоприятного морально-психологического климата; - аналитической работы по определению результатов финансово-хозяйственной деятельности предприятия. Срок обучения: - на базе среднего (полного) общего образования - 1 год 10 месяцев, - на базе основного общего образования - 2 года 10 месяцев. 0608 Коммерция Квалификация выпускника - коммерсант Коммерсант может осуществлять следующие виды профессиональной деятельности: коммерческую; организационно-управленческую; технологическую; маркетинговую; внешнеэкономическую. В результате освоения программы по данной специальности коммерсант будет владеть навыками: - анализа конъюнктуры рынка, динамики спроса; - проведения опросов потребителей; - анализа информации о товарах, изготовителях, продавцах; - сбора информации и анализа ассортиментной политики организации; - составления договоров купли-продажи; - закупки и поставки товаров; - создания оптимальных условий хранения товаров; - ведения учета товаров, тары и других материальных ценностей, в том числе с использованием компьютерной техники; - управления персоналом; - работы с нормативными документами. Срок обучения: - на базе среднего (полного) общего образования - 1 год 10 месяцев - на базе основного общего образования - 2 года 10 месяцев. 0612 Товароведение Квалификация выпускника - товаровед Товаровед может осуществлять следующие виды профессиональной деятельности: товароведную; коммерческую; организационно-управленческую; технологическую; маркетинговую В результате освоения программы по данной специальности товаровед будет владеть навыками: - сбора информации и анализа ассортиментной политики организации; - идентификации, оценки и управления качеством товаров; - подготовки и обработки товарной информации; - проведения товарной экспертизы товаров; - ведения технической документации и делопроизводства по обеспечению товародвижения; - ведения учета товаров, тары и других материальных ценностей, в том числе с использованием компьютерной техники; - создания оптимальных условий хранения товаров; - работы с нормативными документами. Срок обучения: - на базе среднего (полного) общего образования - 1 год 10 месяцев - на базе основного общего образования - 2 года 10 месяцев. Заочное отделение Подготовка специалистов ведется на базе среднего (полного) общего образования по специальностям: 0601 "Экономика, бухгалтерский учет и контроль" 0612 "Товароведение" Срок обучения - 2 года 10 месяцев. Оуечение платное. Прием документов с 1 апреля по 15 июля. Экзамены: со 2 июня по 20 июля. Телефон для справок: 37-02-77. Ватос Ватос утчасьёс сярысь тодэмды ке потэ, тодматске "Московская правда" газетэн. Редакцилэн малпамезъя, Москваын трос ватосъёс кельтэмын Наполеон урдскылон вакытэ. Ӟучъёс, Наполеонлэн армиезлэсь пегӟыкузы, дуно арбериоссэс ватылыса кельтӥзы, нош асьсэос мукет интыосы кошкылӥзы. Озьы ик дуно арбериосты ватылӥзы французъёс но. Уго Москваысь ваньзэ поттыны соослы секыт луиз. 1812-тӥ арын Наполеонлэн армиез Смоленскез басьтӥз. Соку Москваын улӥсьёс палэнэ кошкылыны ӧдъязы. Валъёс ваньмызлы ӧз тырме. Соин ик секытэсь дуно арбериосты, книгаосты, картинаосты, мудоръёсты, зарнилэсь, азвесьлэсь лэсьтэм тусьты-пуньыосты но мукет арбериосты - ваньзэ ватоно луизы музъем пушкы, гулбечъёсы согыны. Москваын улӥсьёс сяна, озьы ик дуно арбериоссэс, архивъёссэс ватӥзы учреждениос, черкъёс но монастырьёс. Иворъёсъя национальной служба. Юалэ - валэктом Алигес выль корка пуктӥм. "Сделай сам" журналысь лыдӟим, кызьы аслыд ӟеч буёл лэсьтыны луэ, пызез, сылалэз, охраез, олифаез но корт (железной) купоросэз сураса. Ваньзэ басьтӥм ни, корт купорос гинэ ум шедьтӥське, Ижевскысь но Воткинскысь олокӧня магазинъёстӥ утчам. Оскисько, тӥ юрттыны быгатоды шуыса. В. Григорьева. Шаркан ёрос. Ми жингыръям Ижевскысь кӧня ке хозяйственной магазинъёсы. Корт купоросэз басьтэмды луоз Труд ульчаысь 78 номеро юртэ интыяськем магазинысь. Дуныз - 8 манет. ШӦКЫЧ Серем пыр Водителез инспектор дугдытэ: - Тӥ юэмын! - Ӧвӧл, мар тӥ! Мон сазь! - Я, шокче ай! - трубка мыче. Эскериз. - Паймод! Я, нош ик шокче ай! Прибор нош ик номыр уг возьматы. - Туж паймисько! Тӥяськиз, луоз. Ачиз шокчиз. - Ӧвӧл, ужа. *** Мар со гласность? - Соку ымез усьяны луэ ни, нош ыме понын немае. *** - Малы куреглэн ноныосыз ӧвӧл? - Уго атаслэн киосыз ӧвӧл. *** Кышноез картэзлы: - Тырмоз! Яке мон, яке водка? - Водка кӧня? *** Одӥгез куриськон гожтэ: "Курисько монэ КП-е кутыны". Солы валэкто, "КПСС" гожтоно шуыса. - Ӧвӧл, мон СС-ын вал ини, табере КП-е пырем потэ. *** Гуртысь воргоронъёс Ленин дорын: - Владимир Ильич! Ма кароно?Нокыӵе сиёнмы ӧвӧл ни - куро гинэ кылиз! - Нош тӥ куро сие! - Кызьы озьы, ми бӧксыны кутском ук. - Малы бен? Тани мон ӵукнаосы беризь чечы сиисько, нош уг бызгетӥськы ук. *** Секретарез Ленин доры пыре: - Владимир Ильич, тӥледлы Горд Киросысь посылка. - Ваньзэ нылпиослы сётэ, нылпиослы. - Отын презервативъёс. - Кызьзэ Дзержинскийлы кельтэ, мукетъёссэ пасьялэ но большевикъёслы сётэ. Россиез эмъяно юонлэсь Кыӵе висёнэн курадӟе Россия? Шонергес луоз таӵе юан: дунне вылысь кыӵе кыль ӧз вуы на асьме доры? Наркомания, СПИД, кӧткыль (тиф), малярия, сифилис... Ваньмыз вань. Тодӥсько на таӵе учырез. 1969-тӥ арын Сюмси ёросэ лыктӥз Украинаысь кышномурт. Школаын выж миськыны ӧдъяз. Егит пиослы кузьмаз куртчанги (сифилис). Таӵе учыр шараяськем бере, райком ужысь куштӥз райисполкомлэн тӧроезлэсь (председателезлэсь) воштӥсьсэ, районысь валтӥсь врачез, школалэсь директорзэ но солэсь воштӥсьсэ. Дышетӥсьёс, классъёслэн кивалтӥсьёссы озьы ик кыл кутӥзы. Туннэ куртчанги номырин но пӧртэм ӧвӧл ни кадь огшоры пыэдлэсь. Нылпиос но тодо, мар со сыӵе кенэм, мак, гашиш, героин но мукетыз. Дунне вылысь одӥг висён гинэ дорамы сюрес ӧз шедьты на кадь - эбола. Африкаын вордскем лек кыль вакчи вамышъя, вылды, уй пала. Висён чот ум кариське ни юонэз. Нош мургес малпаськоно ке, со али Россия понна тужгес кӧшкемыт чер. Кунгожъёсты юнматыны кужым шедьтысалмы ке, пумен-пумен кортнасалмы данаксэ кыльёсты. Тордонэз (алкоголизмез) уз дугдыты вож картузэн солдат. Малы ке шуоно, таиз тушмон каръяськемын асьме пушкы. Кунгож кошке котькуд гуртэтӥ, уно семьяостӥ но адямиос пушкытӥ. Кин янгыш аракы пушкы гуньдэммы понна? Чаркаез гажась Борис Ельцин? Анатолий Чубайс? Ас синмыным адӟылӥ президентлы матысь адямиослэсь пыд йылазы мырдэм сылэмзэс. Но Ельцин бордысен ӧз кутскы Россиын юон. Уно дауръёс ӵоже выжыяськем "вож кыез" кортнаны выризы эксэйёс но, большевикъёс но. 1972-тӥ но 1985-тӥ аръёсы "вож кыйлы" пумит ожмаськонъёсы ачим но мылысь-кыдысь пыриськылӥ. Мынам куарае бен чибиньлэн пискетэмезлэсь но векчигес вал. Нош вылӥ кивалтӥсьёс мар дауртӥзы? Ворсазы аракы заводъёсты. Коразы виноград модосъёсты. Юнме-а вал та нюръяськон? Данакез оскыто: бен. Шонер ӧвӧл. Воргоронъёслэн даурзы соку кузёмиз куинь арлы, кышноослэн - кыклы. Кинлы-о урод, котькуд адями 700-1000 нуналлы кемагес улэ ке? 90-тӥ аръёсы ваньмыз воштӥськиз. Егор Гайдар ас эрказ лэзиз аракы поттонэз но вузанэз. Мар но ӧз мычиськы магазинъёсысь ӝажыос но чагыр экранъёс вылэ? Синзэс кырмышъяло "Распутин", "Рояль", "Амаретто"... Аракы шур гылтыса кошкиз ваньзэ - коньдонмес, тазалыкмес, возьытмес, ужан мылкыдмес. Ар куспын 30 процентлы уногес ӟистыны ӧдъямы. Кӧня юэммес шонерак лыдъяны шуг. Тодосчиос (учёнойёс) оскыто: арскын 15 литр. Нуналскын - 80 грамм спирт. Пересьсэ но, вож нунызэ но вераса. Куальккыны нокин но эсэп (норма) уг тупаты. Дуннеысь тазалыкез утёнъя организация лыдъя: адямилы быдэ та лыдпус 8 литрозь ӝутске ке, калык вуэ бырон калэ. Асьмеос сое кык пол ортчимы ни. Ӵошатон вылысь тодады вайытом: 50-тӥ аръёсы асьмеос 2 литр но ӧм юылэ. Мар малпазы реформатор шуонъёс, "вож кыез" эрике лэзьыкузы? Йыре лыктэ кык гинэ валэктон. Нырысетӥез таӵе. Коммунистъёс, пе, ваньзэ йырин-чукин берыктӥзы вал. "Кӧс" законъёс кутон, юонлы пумит нюръяськон - соослэн кичӧлтонзы. Озьы бере, улонэз шонертоно, аракыез шымыртоно ӧвӧл. Рынок котьмае ачиз радъялоз - ваньбур поттонэз, вузанэз: сиськонэз, юонэз. Кыкетӥ валэктон. Гайдарез вормиз (сюлвориз яке кӧяз-вӧяз) спиртэн вузкарись мафия. Нокин но уз вера солэсь кыӵе барыш поттэмзэ. Россиын но, Удмуртиын но уй- нуналъёсын арак зын ву виято мурӝолэ, корка сиге, гараже ватэм "заводъёс". Янгышало демократ шуонъёс. "Вож кыйлы" пумит урдскылонъёсты коммунистъёс ӧз малпалэ. Иван Грозный бордысен кутскыса, данакез эксэйёс юылӥзы асьсэос, сектаны выризы калыкез. Николай ИИ гинэ зын ву шоры мукет сяменгес учкиз. 1914-тӥ арын, дуннеын нырысетӥ ожмаськон пуромем бере, юонэз кортнан вылысь ужрадъёс кутӥз. Городъёсысь думаослы но гуртъёсысь обществоослы право сётӥзы ас улосвылъёсазы (территориосазы) аракыез вузанлэсь алыны. 1916-тӥ-1922-тӥ аръёсы Великобританиен кивалтэм премьер-министр Ллойд Джордж асьме ужрадъёслы сётӥз таӵе дунъет - калыклэн тужгес вылӥ асвапумез. Владимир Ленин Россиын югдурез копак воштӥз. Эксэй вакытысь кельтӥз, дыр, одӥгзэ гинэ - юонэз урод каронэз. Жаляса вераны кулэ: 1925-тӥ арын Иосиф Сталин аракы шурлы выль ӧр усьтӥз. Маин, пе, асьмеос пӧртэмесь азьмынӥсь кунъёслэсь. Пӧртэмесь-а асьмеос? Улон-вылонэз ӵошатыку, ӵемгес тодэ ваё каньыл сямо Швециез. 20-тӥ аръёсы со тужгес тордӥсь кун вал. Кивалтӥсьёс ятвылтӥзы: кема дырлы чаклам ужрадъёстэк кыдёке уд мыны. Кыӵеесь соос? Син азьын возёно аракылэсь лыдзэ ӟечлыксэ, дунзэ, таможня пыр потэмзэ. 50-тӥ аръёсы отын "кӧс" закон ялылӥзы. Али, со воштэмын. Озьы ке но, аракы дасян но вузан ужпумъёсын выре кун гинэ. Юон юрттэ, пе, бюджетэз узырмытыны. Шонер. Шведъёслэн казнаязы со вае 2-3 процент коньдон. Озьыен, соос, сазь улыса, тупыттэм изъян адӟо? Кыӵе изъян сярысь вералод, соос утё ке ас тазалыксэс? Асьмелэн малпаськон манермы мукет. 90-тӥ аръёслэн кутсконазы бюджетлэн 30 процентэз "кудӟем" коньдон вал. Серем ӧвӧл шат? Эмъясьёслы уждун тырон вылысь, калыкмес юри сектаськом но висись кариськом? Швеция асьмелы коммунизм кадь кыдёкын. Учкоме "матысьгес" дуннее - Африкае. Выльысь тодады вайытэме потэ, Египетын аракы шоры кызьы учкемзэс. Милемлы, кунгож сьӧрысь вуэмъёслы, быдэс городысь одӥг гинэ магазинэз возьматӥзы. Музон интыын арак уз вузалэ, пе. Вузкарисьёс возьматыны куро паспортэз. Отчы пукто таӵе пус - АЗ. Алкоголез куинь ӟенелик басьтӥд, пе. Со понна тыроно 60 доллар - 1800 манет котыр. Табере вӧсяськы коть инмарлы, коть аллахлы - нокытысь зын ву уд шедьты. Ресторанын ке шат? Отын - норма: 300 манетлы 30 грамм. Рахмат шуод но кошкод. Юри чаклай барысь егит арабъёсты. Пиос но, нылъёс но коктейль юо. Крезьгур шудыку экто. Мылкыдзы аракытэк но шулдыр-майбыр. Египет - "небытгес" кун. Мукетъёсаз араб шаеръёсын аракы веръяны копак алэмын. Тӥни сыӵеесь соос, "бере кылись" Африка но Азия. Дасо ар жӧлмаса улэмез бере Россия но сайка кадь. Кун выльысь ас кияз басьтӥз аракы поттонэз но вузанэз. Ӝажыос вылысь ышизы зэмос но "алдаськись" "распутинъёс", "горбачёвъёс", "тӧдьы ӧрӟиос". Нош тордон ӧз кулэсмы. 1996-тӥ арын Удмурт шаерын дасямын 1 миллион 300 сюрс декалитр водка, 500 сюрс декалитрез ваемын лушкемен. Миым дорамы поттэмын 2 миллион декалитр водка но 2 миллион 900 сюрс декалитр аракы (вина). Правоез утисьёс но эмъясьёс оскытэмъя, юон ӟечгес луиз. 1996-тӥ арын урод вуэн сэрен 670 мурт быриз ке, миым - 50 "гинэ". Республикаысьтымы аракыез ярато бускельёсмы но. 200-250 сюрс декалитрзэ вузаны чакламын музон республикаосы но улосъёсы (областьёсы). Со сётоз 10-15 миллион манет барыш. Зэм, таӵе ужрадъёс "вож кыез" уз чигнатэ. Юонлэсь йӧнатонэз кун ас эрказ лэзиз. Бурмемед потэ ке - дун тыр. Яке эмъясьлы, яке туно-пеллёлы. Сэреглы быдэ адӟод пӧртэм ялонъёсты. Кудӥзлы бен осконо меда? Тодмоосме гылыт сюреслэсь палэнтон ужен мон вырисько ни кадь арлэсь кема. Ачим ӧй ветлы экстрасенс яке вегин дӥне, ӧй выдылы капельница улэ. Нош эмъяськисьёслэсь рос-прос юалляськыса, маке-маке тодӥсько ни кадь. Инмар мед утёз, но мон шуге-леке шедьысал ке, нырысь ик кутысал турын-куаръёсты. Оломалы соослы осконэ бадӟымгес. Тужгес кельше аслам паньтэме-адаше-"Петрович" нимо чай. Ма умоез? Больницаетӥ ветлоно ӧвӧл. Ку мылыд потӥз, соку ик йӧнатскы. Мытэм йӧнастконэд куашказ - макмыред ортчыса, выльысь кутскы. Кышномуртъёслы лушкем дэмланэ таӵе. Картты яке пиды ассэ тордосэн уг лыдъя ке, "Петрович" куарез тыремды луоз музон чай пушкы но. Огзэ гинэ эн вунэтэ. Та амал пайда сётэ уно толэзьёс ортчыса гинэ. Чай уг юртты ке, куд-огзэ бурмытыны луэ венен, лазерен, магнитэн. Аракы пала кыскись интыос вань синкаш выллапалан но пель пушкын. Дано артистъёс пӧлын юнгес вӧлмемын "торпедо" шуон (зэмос нимыз - "Эспераль"). Солэн кужымез таӵе: юид - кулод. Зэмесь-а сыӵе кылъёс? Зэмесь. Адями ассэ кутыны уг вормы ке, ӵемгес сюре больницае, куддыръя - морге. Огзэ эн вунэтэ: та амал дуно усе коньдон ласянь но, улонэз утён яке ыштон ласянь но. Тужгес паськыт вӧлмемын кодирование (500-1000 манет). Астэ кортнаны быгатӥськод толэзьлы, арлы, кыклы. Одӥг тодмое арлы басьтэ но 2-3 ар чида. Амаллэн одӥг умойтэмез вань. Адями уг бурмы, со, пуктэм мурт сямен, дырлэсь ортчемзэ возьма. Котькудӥзлэн сюресэз аслаз. Нош кун юрттытэк, калыкез таӵе черлэсь утьыны шуг. Кызьы учко та ужпум шоры вылӥ кивалтӥсьёс? Тросэз сярысь ум вералэ. Конституциез ушъясьмы Борис Ельцин лыдъя тазьы: "Аракы котьку вал кунлэн алдаськон арбериез. Кивалтӥсьёс котькытын оскытъязы: юон вае изъян. Но аракы гинэ казналы амал сётылӥз пӧртэм удысъёсты радъяны. Советъёс дыръя бюджетысь одӥг ньыльмос люкетэз коньдон люкаськылӥз алкоголь чотын. Кун ваньзэ мед лэсьтоз, адямиос урод суретъёсын (суррагатъёсын) сэрен шуге-леке медаз шеде шуыса. Соос коньдонзэс аракылы быдто ке, коньдон медаз мыны капыръясьёс кие, мед лыктоз казнае. Ми сое сётом пенсионеръёслы, ожгарчиослы (военнойёслы), эмъясьёслы, дышетӥсьёслы. Коньдонэз висъялом экономикаез ӝутонэ". Кызьы валано тае? Алдаськыса ум улэ ни, пе, аракы изъян вае шуыса. "Кудӟем" коньдонэз уногес люкалом но экономикаез ӝутом. Ум лыдъялэ, кӧня адями быроз, кӧня нылпи ӧлексы вордскоз, кӧняез нылпи юртэ кошкоз. Ваньмыз-а кивалтӥсьёс озьы лыдъяло? Кылизы на-а сазь политикъёс? Вань соос. Белоруссиын - Александр Лукашенко, Россиын - Юрий Лужков. Жаляса верано луэ: "Отечество" движенилэн съездаз но, програмамезлы проектаз но та сярысь номыр верамын ӧвӧл. Малпасько, сыӵе курон мултэс ӧй луысал. Россиез эмъяно юонлэсь. Алексей Шкляев. ШӦКЫЧ Арня кыстӥськиз быдэс толэзь "Электрокужымен ужась арберидэс тупатъялэ ми дорын. Курондэс быдэстом ӝог, ӟеч но дунтэм". Ялонысь Газетысь та чуръёсты аслаз шудтэм йыраз лыдӟыны шедьтӥз Ижысь Соцгородын улӥсь Хуршида Галифзянова апа но. - Палэнысь адямиосты ӧтьытозь, сослы гинэ вазисько ай, - вазиз апа. Апалэн кык камераен "Мир" холодильникез йӧнтэмъяське. Дугдылытэк уен-нуналэн жургетэ, кынтэ но кынтэ. Дыр-р! зурка. Сӥль юдэсъёсты, пельнянез йӧлы пӧрмытэ. Ог- огзылэсь номырин уд висъя ни. Нылкышноез "Ижбыттехника" шуонын кема возьмам муртэ кадь пумитазы. Холодильникез котыр ласянь эскеризы-ужатӥзы. - Эн сюлмаське, - оскытӥзы апаэз. - Кема-а тупатыны выроды? - Ми кыл выламы сылыны быгатӥськом, ӝог ужаськом. Самой троссэ арня чидано луоды. - Маиз тӥяськемын бен? - Нош ик тодэмез потӥз апалэн. - Вань ужез - фреон сётӥсь гумызэ воштон. - Ма, холодильнике мынам кынтэ ук, - паймиз нылкышно. - Ужа гинэ вис карылытэк. - Учком, учком, - мылкыдтэк вазиз мастер. - Шекъёсты шедьтон но палэнтон - милям ужмы. Пумит ма вазёд на? Ортчиз арня. Апа мынӥз холодильниксэ тупатъясьёс доры. - Вазьгес лыктэмед, дась ӧвӧл на, - ивортӥзы соосыз. - Ог кык нунал ортчыса кожалэ дорамы, оло, вуттом. Кыкетӥзэ, куинетӥзэ мынэ апа "Ижбыттехникае" - холодильник котырын бергась ӧвӧл. Нылкышнолэн балкон выжтӥз ӟиза ни шунам сӥль. - Вань сиён-юонме пуныослы куштом-а, мар-а ини?! - йыркурзэ вератэк ӧз чида ни апа. - Эн дыртэ, эн дыртэ, - кизэ ӝутыса, нош ик аслэсьтыз "кырӟанзэ" мытӥз мастер. - Милям ужмы пу пильылон ӧвӧл. Собере, апалэсь ӟуч сямен шенгыль вераськемзэ адӟыса, шӧдске, кема выриз валантэм техника кылын маке валэктыны. Йылпумъяса ивортӥз: - Тӥни соин холодильникад выль двигатель пуктытэк ӧвӧл, сотэк уз ужа. Ватсаса тыр на 1,5 сюрс манет - ваче бур кимес кырмиськом но вань ужез. - Ма, - ангесыз ошиськиз апалэн, - двигатель жур! гинэ ужа вал ук. Асьтэос тӥяды, луоз. - Тон яке ми-а техникаез ӟечгес тодӥськом? - уретӥз мастер. Мар карод, апа ватсаса 1,5 сюрс манет тыриз. Пуктӥзы выль двигатель. - "Мирелэсь" вуж моторзэ мыным берыктэ, нош вылезлэсь паспортсэ киям вае. Сотэк солэн гарантиез уз луы ни. - Ми соизэ но, таизэ но ум сётӥське. Апа мастерскойысь синкылиосыз ӵужыраса кошкиз. Юрттэт курыса вазиськиз кулэм картэзлэн эшезлы. Ӵошен лыктэмъёсты пумитаз ачиз мастеръёслэн бригадирзы Алексей Витальевич Вахрушев. - Холодильникез ми двигательлы паспорттэк но вуж мотортэк ум басьтэ, - чурыт вераз воргорон. - Кин ке пумит шат? - витьымтэ шорысь пальпотӥз бригадир. Кытчы ке кемалы ышылэмез бере вуттӥз вӧйын наштаськем но погмаськем паспорт. - Тани басьтэ, - вазиськиз апалы. - Понедельнике гуртады пуке. Холодильниктэс асьмеос машинаен ваём. Озьы сиён-юон кынтон машинаез, арня интые, толэзь ортчыса гуртаз вуттӥзы. Одӥгезлы шумпотэ нылкышно: - Паспортсэ но сётӥзы, вужзэ двигательзэ но берыктӥзы. Н. ДОЛГОВ. Крезьгур но кылбур - котьку артэ Тулыс вуэмъя, мылкыд юнгес кыстӥське крезьгур борды. Шаерамы улӥсьёс понна таӵе луонлык кылдытӥзы Удмурт кун университет но Ижевскысь П. И. Чайковский нимо муниципальной камерной хор. Соос сюлмаськемен, 13-19 апреле ортче Калык куспо нырысетӥез крезьгуро арня, сӥземын кык быдӟым юбилейёслы: тодмо француз композиторлы Ф. Пуленилы 100 ар но ӟуч поэтлы А. С. Пушкинлы 200 ар тырмонлы. Арняез ортчытонэ пырисько: Бельгиысь Международной хоровой школаысь пофессор Дени Менье, Ижевскысь но Глазовысь муниципальной хоръёс (кивалтӥсьёссы Владимир Михайлов но Борис Маркус), Удмурт кун университетысь искусствоосъя факультетлэн хорез (кивалтӥсез Ольга Слободчикова), Ижевскысь искусствоосъя 1 но 8 номеро школаосысь хоръёс (кивалтӥсьёссы Надежда Горнштейн но Наталья Шраменко). Ижевскын концерт сёто Урал консерваториысь аспирантка Наталия Ермакова. Крезьгурез яратӥсьёс понна дасямын туж ӟеч кузьым: Пушкинлэн чуръёсызъя гожтэм крезьгуро произведениос, 19 апреле чузъяськозы Г. Свиридовлэн "Пушкинский венок" программаез. Бельгиысь куномы кыкетӥзэ вуэ ни Удмуртилэн столицаяз. Дени Менье журналистъёсын пумиськон дыръя шуиз: - Тонэ кыло ке, тон борды кыстӥсько ке - со туж вылӥ дунъет. Россиын улон али сокем капчи ӧвӧл, но оскисько: милям крезьгурмы, концертъёсмы, адямиослэсь мылкыдзэс одно ик ӟеч пала воштозы. Кылем арын ми тодматӥм 16-тӥ даурысь репертуарен, али шудом 20-тӥ даурын кылдытэм произведениосты. Концерт ортчоз "Ижмашлэн" залаз 16 но 19 апреле 19 часын ӝытазе. Л. Дмитриева. Малы, уӵые, тон чирдӥськод? Лымы шунаны кутскыса, писпуос пучызэс усьтыку, асьмеос сокем ум ик но малпаськиське на тулыслэн вуэмез сярысь. Нош тани писпуос вож дӥськутэнызы пӧрмытскыку, быдэс ёросэз улӟытыса жингыраны кутско уӵыос. Та дыре ни амалтэк сак кариськиськод. Сюлэм шумпотонэн пачылатозь кылзӥськод бурдоослэсь чебер куаразэс. Кӧня кылбуръёсын, кырӟанъёсын данъямын меда уӵы?! Юнме шорысь ӧз кылдэ, дыр, "Лобӟы, уӵые мынам", "Уӵы вераз", "Уӵы чирдэм чын меда?", "Малы, уӵы, тон чирдӥськод?", "Ой, уӵые" но трос мукет кырӟанъёс. Сыӵе усто кырӟасез ассэ но туж чебер, ворпо тылыё кожасько вал. Адӟеме потыса, пичи дыръям кема котыръяй шур дуръёсты, тэль кушъёсты. Нош уӵыос туж сакесь, лэся. Доразы матэктыку ик кырӟамысь дугдо, ас пукон вайзэс шараямзы уг поты, вылды. Та бурдоё артист вылтус чебереныз сокем ик синме йӧтымон ӧвӧл вылэм. Пичигес ӟольгыри выллем, шуысал мон. Тылыосыз курень тусо, кӧтулыз гинэ тӧдьыалэс. Ӧвӧл солэн яркыт, шарак синме йӧтымон мукет тодметъёсыз но. Бадӟымесь, кисьмам сутэр выллем синъёсыз гинэ муспотон тус кузьмало. Шуныт палась асьме ёросэ берытско соос апрель толэзьлэн пумаз яке куартолэзьлэн кутсконаз. Калык чакласа пусъем: "Уӵыос вазь ке вуо, гужем шуныт луоз", "Уӵы вазь ӝыт ке чирдэ, куазь воштӥськоз". Вуж карзэс шедьтыса, айыез уӵы крезьгураны басьтӥське. Орнитологъёс эскеремъя, мумы уӵы арнялы ӝегатскыса вуэ. Эх, кутско соос соку сюан крезьгуръёссэс жильдыны, яратонзэс данъяны! Крезьгурамен ӵош уг вунэто кар лэсьтыны но. Ӵемысь быръё лабрес, пуштырес куакъёсты, сутэрпуэз, бадьпуэз. Инты бырйыны тыршо шур дуръёсы, нюр интыос вӧзы. Сыӵе азьын бурдоослы лякытгес луэ кӧттыр шедьтыны. Сиё соос пӧртэм нымы- кибыосты, нумыръёсты, векчи чибиньёсты, кузьыли пузъёсты... Куартолэзьлэн кыкетӥ ӝыныяз мумы уӵы пузъёсыз вылэ интыяське. Соос вожмыт тусоесь, нокыӵе виштыостэк. Айы но мумы бурдо кык арня ӵоже вошъяськыса-вошъяськыса пуко. Пиоссы ӵогисько гольык но синтэм. Уӵы-атай крезьгураменыз ӵош уг вунэты ас ужзэ но: мылысь-кыдысь сиён ворттэ. Флор Васильевлэн вань таӵе чуръёсыз: ... Мар озьы? Кин тодэ? Мар меда люкетэ? Пӧсь толэзь вуыку, Ӵуж уӵы чалмытске. Та чуръёсты лыдӟыса, мур малпаськонэ уси вал. Зэмен но, малы-о чебер гужем уӵы крезьгурамысь дугдэ? Анаелэсь юатэк ӧй чида ни. Арлыдо муртлэн котькуд юанлы валэктонэз дась. Соку ик таӵе мадёс вераз. Пӧсьтолэзе, пе, ас льӧльмыт кашемир сяськаоссэ вӧлъя легезьпу. Солэн мальдытӥсь чеберлыкез шоры учкыса, уӵы малпа: "Дунне вылын вордскиз мынэсьтым но чеберез. Со ик мед шумпоттоз адями синъёсты, котырысь инкуазез". Зэмзэ ке, пӧсьтолэзе карысьтызы лобӟо ни уӵыпиос. Та дыре ик анай-атай уӵыос воштыны кутско вуж тылы-гонзэс. Соин ик шулдыр крезьгурамысь дугдо. Асьме тодосчимы С. В. Соколов "Бурдо крезьчиос" книгаяз пусъе: "Уӵыос асьме палась кошко сентябрьлэн кутсконаз. Кызьы кошкемзы татчыозь умой-умой тодмо ӧвӧл на. Одӥгзэ гинэ вераны луэ: соос уин кошко". Усто кырӟамез понна тросэз уӵыосты доразы возьыны тыршо. Бен, соос дышо адямилы но, четлыклы но. Сюдыны луэ кузьыли пузъёсын, тараканэн, чибинен, нымы-кибыен, пӧзьтэм курег пузэн, йӧлын небӟытэм нянен. Четлыкын бурдо улэ 5-6 ар ӵоже, ӵемысь жингрес, усто кырӟасьлы пӧрмытске. Коркан возьыку, со ӵемысь кырӟаны кутске февраль толэзе ик, шулдыртэ пӧсьтолэзьлэн шор вадесозяз. Бурдоослэсь улон-вылонзэс эскерись тодосчиос верало: "Карысьтыз басьтэм уӵыпи адями борды чаль дыше, но уг кырӟа. Крезьгураны дышетон понна солэн вӧзаз арлыдо уӵы кулэ". Но четлыкысь бурдолэн кырӟан гурез ӝожмыт луэ. Кулэ-а меда сое эриклэсь люкыны? Н. ТУРИН. Ужчи но коньдэтчи Учкисько но - вань тодмоосы депутатэ мерско. Кин - городысь думае, Кин - Кун Кенеше, кин - Кун Думае. Мон маин пӧртэм? Вылтыры шуни-шани ке но, кылы вань ук. Корка ӧсэ бордысь кык ӧтёнэз кеси, огинэ ляки но программа инъяй. Таӵе со пишмиз. Гажано бырйисьёс! Мон тӥледды ноку но ӧй эрекчалля на. Малы? Учыр ӧз тупалля. Куарадэс мон понна мед сётоды шуыса, мон дэмласько: Нырысетӥез. (Кепка дӥсяса.) Политика. Асьмелы кулэ Юрий Лужков кадь юн азьмурт. Азьмурт, азьмурт... (Бумагазэ берыктыса.) Марым, президент кулэ асьмелы. Сотэк элькунамы уз луы зэмос кузё. Кинэ дэмлано президентэ? Тупась мурт асьме пӧлын но вань. Оло, возьматоды сое? Тау. (Кепказэ куштыса.) Малы кулэ президент-азьмурт? Россиез куашкатӥз президент. Асьме элькунэн мед кивалтоз Кун Кенеш. Вань депутатъёс мед эскерозы Кун Кенешлэн тӧроезлэсь ужамзэ. Тӧро сярысь ке верано, тупась мурт вань кадь. Тӥ сое тодскоды-а? Тау. Кыкетӥез. (Кепка дӥсяса.) Экономика. Одӥг мурт но налоглэсь медаз пегӟы. Вань оглыос, задеос, ӟанымъёс но койдымъёс 90 процентсэ барышсэс мед тырозы коньдэтэ. Коньдэт, коньдэт... (Бумагазэ берыктыса.) Марым, бюджет мед тырмоз коньдонэн. Байёсты шымыртыса гинэ улонмы радъяськоз. (Кепказэ куштыса.) Кыӵе налог? Асьмеды сотэк но выт... Выт, выт... (Бумагазэ берыктыса.) Марым, налог асьмеды кекатэ. Вытлэсь мозмытоно вань колхозникъёсты, эмъясьёсты, дышетӥсьёсты, пенсия басьтӥсьёсты, синтэмъёсты, азгынмемъёсты, пельтэмъёсты, бакъёсты, сукыръёсты, сонгроосты но мукетъёссэ. Чубайсэз но Березовскиез вератэк. Улон-вылонмы соку тупыттэм сяськаяськоз. Куинетӥез. (Кепка дӥсяса.) Мерлыко улон. Мерлык, мерлык... (Бумагазэ берыктыса.) Марым, социальной сфера. Кин ваньбур поттэ? Ужчи! Ужчи, ужчи... (Бумагазэ берыктыса). Рабочий, шуко. Нош солы коньдон уг тыро. Мон дэмласько тазьы. Механической заводын уждун сётоно пыӵалэн, "Ижмашын" - автоматэн, минерал ву поттон заводын - аракыен. Моргын - пекляен, мусэн, тыэн. Адями ватонниын - гуэн. 10 гу гуды, укмыссэ вуза, огзэ - аслыд. Усто-а? (Кепказэ куштыса). Макем зӥбемын коньдэтчи-бюджетник! Офицеръёсты, милицаосты но милемды, депутатъёсты, сютэм возид ке, элькунмы пыд йылаз султоз шат? Долой всякой разной бездельникъёсты - рабочийёсты, министръёсты, лётчикъёсты но налётчикъёсты! Ми, коньдэтысь коньдон басьтӥсь коньдэтчиос, коньдоно луим ке, ваньмыз коньдонмыны кулэ. Ньылетӥез. (Кепка дӥсяса.) Улы кусыпъёс. Улы, улы... (Бумагазэ берыктыса). Марым, семья кусыпъёс, пе. Адӟисько, татын воргоронъёс уногем. Депутат луи ке, мон нырысь ик юнмато семья сярысь кодексэз. Асьмеос, пиос, кема ум улӥське - 58 ар гинэ. Отысь 40 арзэ улком шимес пересьмем пӧрасен ӵош. Справедливо шат? Ар талэсь азьло мон Египетын вал. Отын котькуд воргоронлы ньыль кышно возьыны лэземын. Тӥни кытын зэмос рай! Оля акыльтӥз - лык, Наталля! Ӟамиля вормытъяське - чаль, Зинуля! Кин сыӵе закон понна? Кидэс ӝутэлэ! Ваньмыз! Рахмат. (Кепказэ куштыса.) Гажано нылкышноос! Макем тӥ жалесь! Городын тӥледлы карт шедьтыны шуг. Мон кадь ӟеч принцъёс кемалась кульчоямын. Гуртын эмеспиос уно - колхоз понна ньыльдон пимурт. Ваньмыз - тордосъёс. Ма кароно? Мон тӥледды ваньдэс лэзисько карттэк нуны вайыны. Мар-о абдрады? Сюдӥсь сюроз. Бездетность понна налогез вунэтӥды шат? Сое берыктом. Дыды шоры воргорон пальышаз - 10 манет. Гырпумаз йӧтскиз - 20 манет. Пумиськын ӧтиз - 100 манет. И так далее. Нокыӵе адӟись свидетель кулэ ӧвӧл. Кин шоры кышномурт возьматоз - со ик алимент тыроз. Кин сыӵе закон понна? Тау. (Кепка дӥсяса). 2000-тӥ арын озьы вордсконо нырысетӥ нылпилы мон но юрттыны дась. Шуом. 5 яке 10... Доллар? Ӧвӧл - только манет! Юнматоно асьме валютаез! Тӥ ӧд вунэтэ, вылды, ку заказтоно сыӵе нуныез? Ку? Монэ атай кароды? Мон мӧйы ни. Марысь мар ке, тӥледлы юрттыны дась мынам доверенное-дурбасьтӥсе Егор Загребин. Со дась уй но нунал ӵоже. Я, программаме таин йылпумъясько. Оскелэ: мон одно депутат луо. Малы ке шуоно, 101 номеро Кӧртчалгурт округын мон огнам кандидат. Ваньды - быръёнэ! Алексей ШКЛЯЕВ. Шпион ӝегатэмын Кышкытлыклэсь утиськонъя Федеральной службаын ужасьёс Россилэн улосвылаз ӝегатӥзы Турцилэн разведкаяз ужась 62 аресъем Мехмет Бешикез. Со сярысь "Труд" газетлэн корреспондентэзлы ивортӥз ФСБ-лэн общественной кусыпъёс возёнъя центраз ужась Владимир Богомолов. Шпионлэн верамезъя, Мехмет Бешик, Россие вуытозяз, Турецкой армилэн Генштабезлэн разведкая управленияз бадӟым кивалтӥсь вылэм. Турциысь "коммерсант", США-ысь разведкаен ӵош, СССР-лы, берло Россилы но СНГ-ысь странаослы пумит лушкем уж нуиз. 1997-тӥ -1998-тӥ аръёсы Мехмет Бешиклэн нимысьтыз "юрттэменыз", Ближней но Средней Востокын Россилэн политикаез умойтэмен возьматэмын вал. Иворъёсъя национальной служба. Шарканысь кибашлыослэн юртсы куатетӥ арзэ ужа ни. Кивалтэ соин Надежда Федорова. Котькудӥз мастер аслэсьтыз кружоксэ нуэ. Пиналъёс пулэсь арбериос лэсьто, гобелен куо, вурисько, пужъятӥсько. Шарканъёслэн ужъёссы вылӥ дунъямын Ижевскын ортчем возьматонъёсын но. Лариса Гущина, кылсярысь, Удмуртилэн лауреатэз луиз. Шарканысь кибашлыос но соослэн ужъёссы. В. КАМАШЕВЛЭН туспуктэмъёсыз. ВАЛЭКТЭ ЮРИСТ Сэрегез нуэ адвокат Лилия Шкляева Таӵе учыр луиз монэным. Бызи 1973-тӥ арын. Ар но ӧз ортчы, кузпалме виизы. Мон кыли, шуыны луоз, кык нылпиен. Одӥгезлы сизьым толэзь вал. Мукетыз вордскиз та шимес учыр бере, вить толэзь улыса. Сыӵе мынам, вылды, шудэ вал. Кыкетӥзэ пиме вордыны куризы картэлэн сузэрез но солэн кузпалыз. Малы ке шуоно, асьсэлэн нылпизы ӧвӧл. Сизьым ар ӵоже улыса люкиськыны медо ни вал. Соосты жаляса, кык толэзьем пиме вордыны сётӥ. Сое документъёсъя "сирота" каризы, сюдӥсьсэ ыштэмен йырин пособие басьян вылысь. Пиелы али кызь ньыль арес. Кышнояськемын. Аслаз пиез вань. Кусыпъёсмы умоесь, ог-огмес ум вунэтӥське туннэ ке но. Аслым мыным 45 арес. Егит дыръям малпай: уг пересьмы. Табере мӧйымыса мыным визь пыре ни. Улӥсько кыкетӥ кузпалэн. Нылпие ньыль кузя. Витетӥзэ но ас бордам кареме потэ. Соку мыным пенсия басьтыны лякытгес луысал. А. В. Гожтэтъя валаны уг луы: пизылэн мумиз-бубиз кин гожтэмын солэн вордскем сярысь свидетельствояз. Кин сое вордӥз-будэтӥз - тӥ-а, сузэрды-а - соин номыр герӟаськемын ӧвӧл. Вордскем сярысь свидетельствое пидылэн мумиз тӥ ке гожтэмын, 50 аресысен пенсие потэмды луоз. Сузэрды сое аслаз пиез лыдъяса документ лэсьтӥз ке, сыӵе праводы ӧвӧл. ПОНЕДЕЛЬНИК, 19 апреля 06.10 - "Визыл". Иворъёсын программа. 06.35 - 07.00 - "Денница". Инф. программа. 07.10 - Вести столицы. 07.20 - Новости. 07.35 - Объявления, реклама. 07.45 - 08.00 - "Политика, экономика, бизнес". Корреспонденция. 08.10 - Информационно-музыкальная программа. 08.45 - 09.00 - Реклама. 12.00 - Новости. 12.10 - Музыкальная открытка. Объявления. 12.20 - Иворъёс. 12.30 - 13.00 - "Тӥляд юанъёсты - милям валэктонъёсмы". 18.00 - "Палитра". 18.20 - "Чагыр, чагыр дыдыке..." 18.30 - Иворъёс. 18.40 - Новости. 18.50 - 19.00 - Реклама. ВТОРНИК, 20 апреля 06.10 - "Визыл". Иворъёсын программа. 06.35 - 07.00 - "Денница". Информационная программа. 07.10 - Вести столицы. 07.20 - Новости. 07.35 - Объявления, реклама. 07.45 - 08.00 - "О согласии в Отечестве". Диалоги на актуальную тему. 08.10 - Информационно-музыкальная программа. 08.45 - 09.00 - Реклама. 12.00 - Новости. 12.10 - Музыкальная открытка. Объявления. 12.20 - Иворъёс. 12.30 - 13.00 - Радиочтения. А. Большаков - "Проза жизни. Юмористический рассказ. 18.00 - "Буёлъёс". 18.20 - "Чагыр, чагыр дыдыке..." 18.30 - Иворъёс. 18.40 - Новости. 18.50 - Реклама. СРЕДА, 21 апреля 06.10 - "Визыл". Иворъёсын программа. 06.35 - 07.00 - "Денница". Инф. программа. 07.10 - Вести столицы. 07.20 - Новости. 07.35 - Объявления, реклама. 07.45 - 08.00 - "Ваши вопросы - наши ответы". 08.10 - Информационно-музыкальная программа. 08.45 - 09.00 - Реклама. 12.00 - Новости. 12.10 - Музыкальная открытка. Объявления. 12.20 - Иворъёс.. 12.30-13.00 - "Тулпар". Егитъёслы программа. 18.00 - "Лемира". Радиоверан. 18.20 - "Чагыр, чагыр дыдыке..." 18.30 - Иворъёс. 18.40 - Новости. 18.50 - 19.00. - Реклама. ЧЕТВЕРГ, 22 апреля 06.10 - "Визыл". Иворъёсын программа. 06.35 - 07.00 - "Денница". Инф. программа. 07.10 - Вести столицы 07.20 - Новости. 07.35 - Объявление, реклама. 07.45 - 08.00 - "Правовой канал". 08.10 - Информационно-музыкальная программа. 08.45 - 09. 00 - Реклама. 12.00 - Новости. 12.10 - Музыкальная открытка. Объявления. 12.20 - Иворъёс. 12.30 - 13.00 - "Зарни крезь". 18.00 - "Эрикрад". Радиоверан. 18.20 - "Чагыр, чагыр дыдыке..." 18.30 - Иворъёс. 18.40 - Новости. 18.50 - 19.00 - Реклама. ПЯТНИЦА, 23 апреля 06.10 - "Визыл". Иворъёсын программа. 06.35 - 07.00 - "Районные будни". Инф. программа. 07.10 - Вести столицы. 07.20 - Новости. 07.35 - Объявления, реклама, анонсы передач. 07.45 - 08. 00 - "На завалинке". 08.10 - Информационно-музыкальная программа. 08.45 - 09.00 - Реклама. 12.00 - Новости. 12.10 - Музыкальная открытка. Объявления. 12.20 - Иворъёс. 12.30 - 13.00 - "Кыл дунне". Радиоальманах. 18.00 - "Очрашу". Радиожурнал. 18.30 - "Чагыр, чагыр дыдыке..." 18.40 - Иворъёс. 18.50 - Новости. 19.00 - 19.10 - Реклама. СУББОТА, 24 апреля 07.10 - Итоги недели".. 07.30 - "Дивертисмент ". 08.00 - Радио России. 09.00 - Концерт с конкурса "Утренняя звезда Ижевска-99". 09.30 - "Субботний калейдоскоп". 10.00 - Радио России. 10.10 - Иворъёс. 10.20 - "Ладилэн азбараз". 10.50 - "Кылбурет удысын". А. Перевощиков. 11.00 - "Чеберлыкез гажан - уже но улонэ". Удмурт элькунысь культура удысысь дано ужась А. Я. Евсеева сярысь радиоочерк. 11.30 - 12.00 - "Ялыке!" Радиожурнал. ВОСКРЕСЕНЬЕ, 11 апреля 07.10 - Ӵукна концерт. 07.30 - "Выльзэ - утчасьлы". В. П. Шляпин конструктор сярысь радиоверос. 08.00 - Радио России. 08.10 - "Кузьыли кар". Нылпиослы радиогазет. 08.30 - "Арня ӵукна". Радиожурнал. 09.00 - "Между Волгой и Уралом". Радиожурнал. 10.00 - "Вераськомы анай кылын!" ("Поговорим на родном языке!") Для изучающих удмуртский язык. 10.20 - "Вам песня в подарок!" Концерт. 11.00 - 11.35 - "Мечты, как песни, в сердце нашем..." Праздничный концерт для работников Удмуртской торговой инспекции. *** Вещание радиостанции "Ингур" (ГТРК "Удмуртия") на УКВ-канале (70,4 Мгц) и третьей программе проводного радиовещания. Ежедневно (кроме субботы и воскресенья): 8.10-11.00 Информационно-музыкальная программа на рус. языке 13.00-15.00 информационно-музыкальная программа на удм. языке Суббота и воскресенье: 13.00-17.00 Радиостанция "Ингур". Все остальное время с 8 до 01 ночи на этом канале и по проводному вещанию - "Радио России - Ностальжи". "Горд атас" бурдъёссэ уз вӧлъя Ижевскысь Индустриальной ёросысь тылпулэсь утӥськонъя инспектореныз Александр Емельяновен нырысьсэ пумиськи газетмылэн редакцияз. Со аслаз уженыз герӟаськем материалзэ ваем вылэм. Тодматским лякыт сямо, веськрес мугоро офицерен Ужан сюрессэ со мытӥз Ижысь одӥгаз заводын, радиоаппаратурая регулировщик луыса. Армиысь бертэмез бере но ужзэ отын ик азьланьтӥз. Бӧрысьгес солы тылпуэн нюръяськонъя службаын уж ӵектӥзы. Озьы куать ар ини Индустриальной районын тырше. Тылпуос асьмелы трос гинэ изъян ваё. Уно ваньбурмы пеньлы пӧрме. Нош соосты алон сярысь ӧжытгес сюлмаськиськом. Куд-огез кивалтӥсьёс но та ужпум шоры чиньы пыртӥзы учко. Соин ик инспектор ӵем дыръя чурыт кылзэ но верано луэ. Оло соин но Емельяновлэн ужан участоказ берло дыре бадӟымесь тылпуос ӧз потылэ. Тылпуэн нюръяськисьёслэн ужзы бадӟым кышкытлыкен герӟаськемын. Вераны кулэ Удмурт университетлэн одӥгаз корпусаз туэ ортчем тылпу сярысь. Со сярысь уноез тодо ни. Нош кытысь потӥз "горд атас"? Университетлэсь липетсэ тупатъян бордын ужасьёс шутэтскон нуналъёс азьын, электротылэн шунтон арберизэс вунэтыса кельтӥлям. Нырысь учкыса, сыӵе учыръёс ӵемысь пумиськыло кадь. Но отын сыӵе бадӟым тылпу ӝутскиз, сое кысыны быдэс Ижевскысь гарнизонэз ӝутоно луиз. Вань кужымез огазеяса гинэ лапкатыны быгатӥзы кышкытлыкез. Тылпуэн ӝыны нунал нюръяськизы. Сое кысӥсьёсын артэ нырысьёсыз пӧлын вал Александр Емельянов но. Зэм, мукетъёсыныз ӵош со нокыӵе геройлыко луэмзэ ӧз возьматы. Александр Леонидович соку аслэсьтыз огшоры ужзэ быдэстӥз, университетын ужасьёслы ӝуась юртысь потыны юрттӥз. Ярам, соку нокин шуге-леке ӧз шедьы. Вазь ӵукна аудиториосын студентъёс но дышетӥсьёс но ӧй вал. Емельянов ужез сярысь мадьыкуз, ӟечен гинэ вера эшъёсызлэн юрттэмзы пумысен. Соос пӧлын - тылпулэсь утиськонъя 19-тӥ частьлэн начальникез Василий Федорович Дерюшев но нырысетӥ кивалтӥсез но дышетӥсез Александр Николаевич Михалкин. Кыкназы но зэмос специалистъёс, котьку юрттыны дась луись адямиос. Зэм, таӵе кышкыт ужын семьяед но тонэ ӟеч мед валалоз. Ирина Владимировна но Александр Леонидович кык ныл будэто. Юля ветлэ кыкетӥ классэ, Надязы тодон-валан люка ни куатетӥ классын. Ӵуказе Россиысь тылпуэн нюръяськисьёс асьсэлэсь нуналзэс пусъё. Ми ваньзэсты та кышкыт ужын тыршисьёсты ӟечкыласьком. Шаерамы ӧжытгес мед лопыръяськоз "горд атас". Н. ЛЯЛИН. 2"Отечество" огазеяськонлэн Удмуртиысь ёзэзлэн вазиськонэз Удмурт Республикалэн Прокурорезлы В. М. Походинлы Удмурт Республикаысь югдурез утёнъя министрлы В. Ф. Щербаковлы Россия Федерациысь Кышкытлыклэсь утиськонъя федеральной службалэн Удмурт Республикая управлениезлэн начальникезлы Н. Е. Арзамасцевлы "Золотая провинция" газетын 1999-тӥ арын 8-тӥ апреле печатламын Н. Батуевалэн "Волковцы потерпели поражение" статьяез. Удмурт Республикаысь Кун Кенеше быръёнлэсь йылпумъяськемзэ валэктыса, автор вера: "... Кылӥськиз, Волков понна дурбасьтӥсьёс дась луо со понна куара сётӥсь адямилы... 20 сюрс долларозь кузьманы..." Депутатъёсты индылыса, Н. Батуева валэктэ: "Взятка (кузьым) - коньдон, дуно бумагаос, ваньбур яке ваньбурлэсь поттэм барыш, кудӥз басьтэмын кузьым сётӥсь адямилы ӟеч лэсьтон понна". Отӥяз верамын кузьым басьтэм но сётэм понна Россия Федерацилэн Уголовной кодексэзлэн янгыше уськытӥсь ёзэтъёсыз. "Отечество" общероссийской политической общественной огазеяськонлэн Удмуртиысь ёзэз та гожтэмез лыдъя пӧяськонэн но кыл вӧлдонэн, 4-тӥ апреле Кун Кенеше быръем депутатъёсты саптаны тыршонэн. Авторез кыл кутонлэсь уг мозмыты солэн ӧвӧлтэм супыльтонъёсты бичаса ветлэмез. Милям малпаммыя, татын уже кутэмын иворъёсты вӧлмытонын кырсь амал. Адӟиське быръем депутатъёсты сьӧдманы тыршон. Кырсь супыльтонъёсты шуг ӧвӧл эскерыны но зэмзэ вераны. "Отечество" огазеяськонлэн кенешез вазиське Удмурт Республикаысь правоосты утись органъёслы кырсь вераськонъёсты вӧлмытӥсьёсты кыл кутытыны курыса. Вань общественной огазеяськонъёслэсь кивалтӥсьёссэс куриськом милям вазиськонмылы дурбасьтыны. Выль быръем Кун Кенеш нырысетӥ нуналысеныз ик утемын луыны кулэ кыл вӧлдонлэсь но кырсь супыльтонъёслэсь. Кун Кенешлэн нырысетӥ огазеясь сессияз но вылӥ должностен кивалтӥсь быръёнын мед луоз ог-огдэ валан, оскон но пӧяськытэк ужан. "Отечество" огазеяськонлэн Удмуртиысь ёзэзлэн кенешез. А. С. ПУШКИНЛЭН ВОРДСКЕМЕЗ ДЫРЫСЕН - 200 АР Удмурт кылбурен артэ Маин дуно тыныд Пушкин? "Удмурт дунне" газетлэсь лыдӟисьёсызлы тазьы вазиськемзэ шедьтыса, нырысь бадӟым малпаськонэ уси. Зэм но, маин меда та поэт тужгес дуно, тужгес тодмо милемлы, ож пыр ортчем муртъёслы? Тодэме потӥз элькунысьтымы ожысь ветеранъёслэн комитетазы ӵош ужась эшъёсылэсь но та сярысь малпанзэс. - Милемлы тросэзлы, войналэсь азьло будэм, дышетскем егитъёслы, Александр Сергеевичлэн Дормес яратыны ӧтись гожъямъёсыз бурдъяськыны пичи ке но юрттӥзы, дыр, - пырак шуиз запасысь подполковник Н. А. Четвериков. Тазьы визьмо верамезлы нырысь ачим но пайми вал. Нош собере малпай: Николай Афанасьевичлэн улонэз Пушкинлэн творчествоеныз, поэтлэн вуылэм интыосаз ожмаськеменыз герӟаськемын уго. Соин ик ветеранлы Пушкин тужгес но дуно луэм, шӧдске. Красногорск ёросысь школаын дышетскыкуз, Николай Четвериков литератураез аспӧртэм яратӥз. Пушкинлы сӥзем конкурсъёсын вормисе потылӥз. Поэтлэн кунмылы, сое утёнлы сӥзем кылбуръёсызъя реферат нерге но гожъяз. Кин тодэ, оло, соку ик Четвериковлэн кунмес пыӵалэн утись луэмез потӥз? Дас классэз йылпумъямез бере, Камышлов карысь военной училищее пыриз. Нош война кутскем бере, солы ожмаськыны кылдӥз Глазовын кылдытэм 49-тӥ стрелковой бригадаын. Фронтысен та часть 208-тӥ стрелковой дивизие шедиз. Алигес Ижысь 8 номеро школаысь та дивизия сярысь верась музейын А. С. Пушкинлы сӥзем пумиськон ортчиз. Отысен Москва дорысен Кенигсбергозь ортчем та дивизиысь ветеранъёслэн советсылэн тӧроез Н. А. Четвериков пыр-поч мадиз аслаз эшъёсызлэн фронтын поэтлэн тодмо интыаосаз тушмонэн нюръяськемзы сярысь. Отысь воинъёс уго Михайловскоез, Петровскоез мозмытӥзы. Ачиз офицер Псков улосысь Пушкинские горы нимаськись интые пуксем куать гуртэз басьтон понна ожмаськиз. Солэн миномётной ротаез огаз гуртэ пырыку, командир сӧсырмыны шедиз. Соин ик 8 номеро школаысь музейын вераськонзэ Н. А. Четвериков тазьы йылпумъяз: - Кызьы-о мыным поэт дуно, дано уз луы, солэсь лёгаськем интыоссэ, тушмонлэсь мозмытыку, пыдыным ортчи но, отын виры кисьтӥськиз бере? Тазьыгес ик шуыны быгатысалзы, дыр, милям 18-тӥ гвардейской стрелковой дивизиысьтымы фронтовикъёс но, ми фронтын фашистъёсын мукет палан нюръяськимы ке но. - Уин басьтоно Полотняный Завод посёлокез, - тазьы верамын вал 1942-тӥ арын январе командирлэн приказаз. Солдатъёс но офицеръёс азьло ик тодо вал ини: Калуга котырысь та посёлокын вордскемын но улэмын Наталья Гончарова, Пушкинлэн вуоно кышноез. Ачиз поэт татчы кык пол вуылӥз, кӧня ке кылбур но гожтӥз Полотняный Заводын. Ваньзэ ик тае валаса, милям гвардеецъёсмы, сюлэмлы туж дуно интыосыз тушмонлэсь мозмытон понна ожмаськыкузы, кужмо нюръяськизы. Шарканысь удмурт сержант Иван Федулов Полотняный Завод азьын тушмонлэсь лымые ватэм трос пулемётъёссэ шараяны быгатӥз. Озьы гинэ асьме артиллеристёсмы быгатӥзы огневой точкаосты пазьгыны но лыжникъёсмылы посёлоке пырыны сюрес усьтыны. Мозмытэм Калуга котырысь музъем вылэ война бере мыным куинь пол вуылоно луиз на. Отын ортчылӥзы дивизиысьтымы ветеранъёслэн пумиськонъёссы. Огпол Пушкинлэн творчествоезлы сӥзем празднике но пыриськыны быгатӥм. Соос уго татын арлы кык пол ортчыло - поэтлэн вордскем но бырем нуналъёсаз. Нош милям Пушкинлэн поэзиезлы сӥзем пумиськонмы 1989-тӥ арын Вормон нуналэ ортчиз. Татын азьвыл ожмаськем ветеранъёс тодазы ваизы поэтлэсь вуылэм интыоссэ мозмытэмзэс,лыдӟылӥзы солэсь тодмо кылбуръёссэ. Отын чузъяськиз удмурт кылбур но. Азьвыл дивизимылэн политотделэзлэн начальникезлэн генерал-майорлэн М. Д. Холодлэн куремезъя, пумиськонын мон лыдӟи М. П. Петровлэсь Пушкинлы сӥзем кылбурзэ. Яратоно удмурт кылме, быдӟым ӟуч поэтэз, дано писательмес Михаил Петровичез ӧй гажасал ке, "Пушкинлы" кылбурез но Калуга палан тодам ӧй вайысал, дыр. Озьы малпасько туннэ, "Удмурт дуннелэсь" Пушкин пумысен вазиськемзэ лыдӟыса. В. Никитин, ожысь ветеран. Тӥледыз кылзэ Наталья Кузнецова Сояз арня куспын редакция меӵак телефон пыр кенешон радъя калыкез улон-вылонын утёнъя министрлэн воштӥсеныз Наталья Федоровна Кузнецоваен. Нуналзэ но дырзэ азьланяз газет бамын ивортом на. Озьы ке но, али ик ини гожтэт яке телефон пыр (21- 37-14) асьтэлэсь юанъёстэс сётыны быгатоды пенсиос, пособиос, калыкез улон-вылонын утён ужпумъёс пумысен. Наталья Федоровналэсь валэктонъёссэ вуттомы газет баме. "Удмурт дунне". Тау инкуазьлы Шаерысьтымы шуръёс огыр-бугыр, лек сямзэс туэ возьматыны уг малпало, лэся. Кызьы ивортӥз Граждан оборона ужпумъёсъя но кышкыт учыръёсъя комитетысь валтӥсь специалист Эдуард Савельев, туэ тудву бадӟым ӧвӧл, адямиослы но, калык хозяйстволы но со нокыӵе кышкытлык уг вайы. Та понна тау шуоно инкуазьлы: нуназе 10 градуслэсь шуныт уг луы, нош уин кынтэ. Таин валче лымы каллен шуна, вань шунамез музъеме пыӵа. Ӵуказе ик 15-20 градус пӧсь ӧз ке луы, шуръёс ярдурысьтызы уз потэ, оскытӥз валтӥсь специалист. О. Максимова. Туризм паськыта Ижевскын ужаз "Туризм. Шутэтскон. Тазалык-99" кун выставка (адӟытон). Сое радъязы но ортчытӥзы республикаысьтымы Мукет кунъёсын кусыпъёсъя министерство, "Удмуртский экспоцентр" огазеяськон но РАТА-лэн (Россиысь турагентствоосъя огазеяськонлэн) Удмуртиысь ёзэз. Адӟытонэ пыриськизы Удмуртиысь но Пермь областьысь туристической фирмаос, санаторийёс, шутэтскон юртъёс, спортивной туристической дӥськут поттӥсьёс, страховой компаниос но тазалыкез чакланъя центръёс. Шаерамы али туристъёслэн 52 фирмазы. Ваньмыз сямен интыяськемын Ижын, быдэн одӥг ужало Воткинскын, Глазовын но Сарапулын. Тужгес но усто тыршо "Интерсервис" центр, "Турист" ТЭП, "Новый регион" но мукетъёсыз. Министерство али дася республикаямы туризмез азинтонъя кема дырлы чаклам программа, нош тая концепциез вань ни. Г. РОМАНОВ. Гурт шудонъёс - Завьялын Туэ гужем гурт шудонъёс Завьялын ортчозы. Соослы дасяськон али ик кутскемын ини. Кылсярысь, кылем арняе Завьялын оргкомитетлэн кенешез ортчиз. Командаослы, судьяослы дӥськутъёс вурыны "Зангари" фабрика басьтӥськиз. Ёрос центрын ӵошатскон площадкаосты тупатъяло ини. Та гурт шудонъёсыз ортчытыны юрттозы ёросысь администрация, культурая, дышетонъя отделъёс но организациос. Завьялыс спортсменъёс гурт ӵошатсконъёсын котьку но нырысетӥ интые гинэ потыны тыршо. Нош туэ асьсэ музъемазы ортчись шудонъёсты спортсменъёс одно ик вормисьёслэн радазы луыны кулэ, оско завьялъёс. *** Гужемез возьмаса Кылем арняе Завьял ёросысь Италмас посёлокын мини-футболэн шудонъя ӵошатскон ортчиз. Ваньмыз куать команда вал. Нырысетӥ инты басьтӥзы Завьял ёросысь Октябрьский посёлокысь спортсменъёс, 2 интые потӥз "Восточный" совхозысь команда, нош куинетӥ интыын - Завьялысь мини-футболэн шудӥсьёс. Мӧйыос пӧлын быгатэменыз висъяськиз Юрий Викулов, солы нимысьтыз кузьым сётэмын. Та ӵошатсконэз ортчытыны юрттӥз "Ижавтогазсервис" огазеяськон. Н. ИВАНОВ. "Алнаш кизилиос" Адямилэн кыӵе луоноез пичиысен ик адске. Кырӟась-верась-а, киужлы-а чупрес, малпаськись-визьмаськись-а,- ваньзэ лыдэ басьтоно пинал тэтэ карыны кутскыку ик. Сюлмаськоно пиналлэсь быгатонлыксэ азинтон сярысь. Сое лыдэ басьтыса ик Ижевскын усточи но быгатӥсь пиналъёслы усьтэмын вал школа-интернат, отын али сюлэсь уно пиналъёс дышетско. Кырӟаны-вераны шаплы, быгатӥсь луэмзэс соос ортчем арын Венгриын но возьматӥзы вал, отысь туж вылӥ дунъет басьтыса бертӥзы. Пайдаё ужез адӟем карисьёс шедё. Ижын сямен ик, пичи пургаос но огинтые люкаса дышетоно кариськизы усточи пиналъёссэс. "Пурга кизилиосты" табере тодӥсьтэмез ӧвӧл ни кадь, сцена вылысь но соосты адӟод, радио пыр но кылзод. Нош писатель Никвлад Самсонов кичӧлтэмъя, гожъяськыны кутскись пиналъёслэн кылбуръёссы, веросъёссы нимаз книгаен но поттэмын ини. Сюлмысь сюлме пыӵась сюлмаськон вуиз табере Алнаш палъёсы но. Ёрос администрация луонлык шедьтӥз асьсэлэсь визьлюкъёссэс огинэ люкаса дышетыны. Али соос толэзьлы кык пол гинэ пумиськыло ай Алнашын, дышетско я культура юртын, я искусствоосъя школаын. Тодматско киужъёсын, кырӟало-экто, кылбураны йӧндыро. Ваньзэ та ужез ас вылаз басьтӥз Алнашысь егитъёсын ужанъя отделэн кивалтӥсь, артист но кырӟась, маскарчи Владимир Соловьев. - Мылкыдмы туж бадӟым, кутским бере, та ужез йылаз-пумаз одно ик вуттомы. Туж юрттэ та ласянь ёрос администрацимылэн тӧроезлэн воштӥсез Нина Андреевна Образцова,- шуэ Владимир Соловьев.- Осконмы бадӟым, Алнаш ёрос удмурт калыклы сомында визьнодо гожъясьёсты, дано артистъёсты вордӥз бере, будӥсь пиналъёс пӧлын но луозы выль "кизилиос". Та дыре эскериськомы дышетӥсьёсты юнматонэз, соослы уждун тыронэз, отӥяз малпаськытоз мукетыз ужпум - нимысьтыз юрт ӝутоно луоз. Нош пиналъёс сярысь ке верано, соос милям шаплыесь, асьсэос возьматозы ай быгатэмзэс. А. ПЕТРОВ. Россия Федерацилэн кун наградаосыныз пусъён сярысь Россия Федерациысь Президентлэн Указэз Адямиосты утьыку кышкасьтэм, ассэ жалясьтэм луэмез понна "За спасение погибавших" медален пусъёно: СОКОЛОВ Максим Владимировичез - Удмурт Республикаысь Сарапул ёросысь Нечкинской шор ёзо школаын дышетскисез. Чернобыль АЭС-ын шудтэм учырлэсь бервылъёссэ быдтонын кышкасьтэм но асьсэды жалясьтэм луэмзэс возьматэмзы понна Удмурт Республикаысь Ижевск городъя Мужество орденэн пусъёно: ИВАНОВ Геннадий Александровичез, КВАРАЦХЕЛИЙ Владимир Шалвовичез, ОРДИНАТ Валерий Викторовичез. "За спасение погибавших" медален: НИМАТУЛЛИНА Асия Бареевнаез, СОБОЛЕВ Вадим Андреевичез - Удмуртиысь книгаос эштосысь вахтёрез, Суставов Юрий Алексеевичез, Хабиров Енус Марксумовичез. Россия Федерацилэн Президентэз Борис Ельцин. Москва, Кремль, 1999 арын 5 апреле. � 431. Спорт 1999-тӥ арын вормисьёс Та нуналъёсы пиналъёслэн но егитъёслэн Ижевскысь 6 номеро спортивной школазы 25 арес тырмонзэ пусйиз. Котькуд ӵошатсконъёсын сямен вормисе потыло та школаысь пиналъёс. Таяз нюръяськонын но дышетскись пиналъёс пӧлын арлэн чемпионъёсыз луизы 30 номеро школаысь 10-тӥ классын дышетскись Александр Северюхин но 5-тӥ классын дышетскись Аня Банникова. И. ВЕЛЬТМАНДЕР. Владиславлэн кизилиосыз Туж трос лымы усем бере бадӟымесь люкъёс вылтӥ куас вылын мынӥсьёс адӟиськизы. Соос пӧлын мӧйыез но, пичиез но. Азязы куинь пар куаслэсь лэсьтэм "вездеходэныз" сюрес лёгыса мынэ Первома йской шор ёзо школаысь физкультураен дышетӥсь В. Д. Осинцев. Со бӧрсьы сюрес волято кышноез, пиез, нылыз но кӧня ке дышетскисьёс. Озьы соос физкультурая урок но тренировка ортчытыны сюрес дасяло. Владислав вордскиз но будӥз Завьял ёросысь Якшур гуртын. Школаысен ик спортэз яратӥз. Волейбол-а, баскетбол-а, куасэн ӵошатскон-а, капчи атлетика-а яке вакчи но кузь сюресъёсы бызьылонъёс - огезлэсь но ӧз палэнскылы. Азьланяз но улонэз спортэн герӟаськиз. Удмурт кун университетэз йылпумъяз. Егит специалистэз ӧтизы Первомайской шор ёзо школае физкультураез нуыны. Со дырысен 20 ар ортчиз ни. Со дыр ӵоже вал нырысь вормонъёс но, келянъёс но. Но ваньзэ вормиз - аслаз ужезъя мастер луиз. Физкультурая дышетӥсь луыны солы юрттӥзы ужез яратӥсь, чидась, котькыӵе шуг-секытысь потон амал утчась, лякыт сямыз. Владислав Дмитриевич тодэ котькуд дышетскисезлэсь сямзэ, быгатонлыкъёссэ. Солэн ужаз юртто азьвыл спортсмен А. С. Леконцев, вылӥ категориен физкультурая дышетӥсь И. Н. Сунцов. Соос одӥг школаын ужало. Физкультуралы дышетӥсьёслэн И. Н. Сунцовлэн но В. Д. Осинцевлэн школаын ужзы "люкемын". Владимир Григорьевич нылъёслэсь быгатонлыкъёссэс усьтэ но спортын со быгатонзэс волятэ, нош Иван Николаевич - пиослэсь. Ваньмыз умоен мынэ, кылсярысь, кемалась ик ӧвӧл ёросын баскетболъя нюръяськон ортчиз. Первомайской школаысь нылъёс но пиос отын чемпионъёс луизы. Республикаын нылъёс пӧлысь капчи атлетикая "кизилиосыз" но вань. Кылсярысь, Елена Иванова, Алена Хисматуллина но Аня Шатунова. Тросэз дышетскисьёсыз республикаын капчи атлетикая ӵошатсконын кузьымъёс басьтӥзы. Первомайской посёлокысь егит спортсменъёсты адӟытэк ӧз кельтэ Ижевск, Глазов городъёсысь капчи атлетикаая тренеръёс но специалистъёс. ... Бер ӝыт, но школалэн спортъя залаз куаш вазе на вал. В. Д. Осинцевлэн дышетскисьёсыз озьы вуоно ӵошатсконлы дасясько. Тани таосыз бӧрсьы бадӟым классъёсысь дышетскисьёс баскетболэн шудыны тренерзэс возьмало ни. Клуб ӧвӧлэн, спортэз яратӥсьёс кыстӥсько школалэн залаз. Николай ВЯТКИН. ГЕРД Кам дурысь эшъёсмы дорын Лыз инбам кадь чагыр синъёсыз, Яблоклэсьно ӵыжыт бамъёсыз, Эшъёсы юало: "Кин бен со?" Шуисько: "Со - удмурт нылкышно". Уж дурын котьмае бергатэ, Ӝытъёсы гырлыен жингыртэ. Уӵы кадь со гуртэз шулдыртэ, Та мӧзмись сюлэмез буйгатэ. Уйвӧтам со сое адӟисько, Со сярысь котьку но малпасько. Эшъёсы юало: "Кин бен со?" Шуисько: "Со - удмурт нылкышно". Та кылбур-кырӟанэз гожтӥз Каракулиноысь Александр Спиридонович Мельников. Доразы "Удмурт культураез азинтонын интеллигенцилэн интыез" конференция ортчыку, люкаськемъёс азьын кузпалыныз Зоя Максимовнаен ачиз ик шудыса кырӟазы. Кема аръёс ӵоже газет-журналъёсын ужасько бере, тодӥсько, Каракулино палъёсын удмурт изданиосты уг басьто шуыса. Малпалляй, отын удмуртъёс ик ӧвӧл, дыр. Соин ик мон паймыса но шумпотыса кылзӥ кузпалъёсты. Собере тодӥ : Александр Спиридонович татчы Можга палась вуэм, дас куинь ар пала "Прикамская правда" газетэн кивалтэм. Нош кузпалыз дышетӥсьын ужам, Алнаш палась лыктэмын со. Ӟучомем ёросын улыса но кузпалъёс удмурт ымнырзэс ыштӥллямтэ. Александр Спиридонович нош, трос удмурт кырӟанъёс сяна, Каракулино сярысь но ӟуч кылын кырӟан гожтэм. Али со кырӟанэз ёросын пичиез но, бадӟымез но тодэ. Озьы ик татын удмуртлыкмес возьыны-утьыны тыршо палэнысь лыктэмъёс: Вера Холстинина - Можга селоысь, Калмаши клублэн директорез луыса ужа; Зоя Максимовна Коренева - Алнаш палась, Школа-интернатын воспитатель. Ма, вылӥ кивалтонын но удмуртъёс вань гинэ: Эвелина Александровна Трефилова - ёросысь депутатъёслэн ёрос тӧрозы, Фаина Ивановна Потапова - культура отделысь инспектор... Котькуд удысысь шедьтод быгатыса, ӟеч тыршись удмуртъёсты. Та палан тужгес но сӥлы каро, ӟеч кыл верало Александр Борисович Белослудцев сярысь. Солэн Вормонлы 40 ар нимо колхозэз ёросазы устоез. Отын котькинлэсь трос йӧл кыско, ю-нянь будэто. Каракулино палан удмуртъёс ымнырзэс ӝутыны дӥсьтӥзы берло аръёсы гинэ. Та конференция но "Удмурт кенеш" кичӧлтэмъя ортчиз. Каракулиноын "Удмурт кенешлэн" ёрос ёзэныз Любовь Николаевна Мухачева кивалтыны кутскем бере гинэ югдур умойлы воштӥськиз. Ачиз со татчы Сюмси палась вуэмын, нылпи садэн кивалтэ ке но, чырмыт сямыныз котькытчы вуэ, удмурт калыклэсь мылкыдзэ вырӟытыны быгатэ. Конференциын мынам сюлмам мертчиз татысь музейлэн директорезлэн Любвоь Анатольевна Веретенниковалэн вераськемысьтыз таӵе кылъёс: - 200-300 ар талэсь азьло асьме палан удмуртъёс улӥллям. Сое тодыны луэ гурт но со котырын пумиськылӥсь нюлэс, нюк, вырйыл нимъёсъя. Ӟучъёс бадӟым Кам кузя Суздаль, Тверь палъёсысь вуиллям. Нош али удмуртъёс чылкак 700 пала гинэ кылемын на. Соин ик асьмелы удмуртлыкмес утьыны секыт. Чылкак сылмыса медам быре шуыса, таӵе пумиськылонъёс туж кулэ. "Удмурт кенеш" огазеяськонлэн тӧроезлэн воштӥсез Нина Игнатьевна Малых школаосын, нылпи садъёсын удмурт пиналъёсыз асьсэ историенызы, кылынызы, йылолъёсынызы тодматыны, дышетыны ӵектӥз-ӧтиз. Жаляса верано луэ, та ӵектон уз быдэсмы. Малы ке шуоно, Каракулино палан ӧвӧл ни чылкак удмурт гуртъёс. Соос семьяен-семьяен улоно луо ӟучъёсын, бигеръёсын, поръёсын. Удмуртъёслэн сямен ик бигеръёслэн но, поръёслэн но нылпиоссы ӟучомыса будо. Шунды пуксён палась странаосын кемалась шӧдӥзы-валазы ини, нылпиез пичиысен кык но, куинь но, ньыль но кыллы дышетоно шуыса. Асьмеос нош ку вуом меда сыӵе дауре?.. Галина Романова. З. М. Мельникова но З. М. Корепанова. Э. А. Трефилова, Л. Н. Мухачева. Конференцие лыктэмъёс сьӧразы ческыт удмурт сиён пӧраса ваизы. Туспуктэмъёсыз Владимир Беломорскихлэн. Россиысь "Отечество" политической общественной организацилэн Удмуртиысь улосвыл ёзэзлэн 2-тӥ конференциезлэн "Удмурт Республикаысь Кун Кенеше ортчем быръёнлэн йылпумъянъёсыз но организацилэн нырысь ик быдэстоно ужпумъёсыз сярысь" резолюциез Конференция пусъе, Удмурт Республикаысь Кун Кенеше 1999-тӥ арын 4-тӥ апреле ортчем быръёнын "Отечество" огазеяськонлэн 72 кандидатэз пӧлысь 42-ез вормиз. Конференция дэмла организацилы дурбасьтӥсь но солэн программаеныз соглаш луись депутатъёслы Удмурт Республикаысь Кун Кенешын кылдытыны "Отечество" огазеяськон. Конференция умоен лыдъя организацилы дурбасьтӥсь депутатъёслэсь мукет депутат фракциосы но группаосы пыремзэс - "Отечество" организацилэсь ужпумъёссэ быдэсъян понна, малпанъёсэ вӧлмытон но мукет фракциослы но группаослы кылдытыны но ужзэс радъяны юрттон, соослэн радазы ог-огенызы тупан мылкыд кылдытон, Россилэн но Удмурт Республикалэн ӟеч улонзы понна пайдаё ужан вылысь. Конференция огеныз бадӟым ужпуменыз лыдъя республикаысь Кун Кенешлэсь Тӧрозэ быръёнэз. Удмуртилы туннэ кулэ сыӵе азьветлӥсь, кудӥз кун властез юнматыны, кун институтъёсты кужмоятыны, дисциплинаез чутрак ӝутыны, странаен кивалтонэз улӟытыны быгатоз. Республикалэн кивалтӥсез уж вылын мед возьматоз правопорядокез юнматыны тыршемзэ, со понна Атыкай музъемез яратон, асьме историез, ветеранъёсты гажан кылъёс огшоры кылъёсын медаз кыле. Экономикалэн уно дауръёс ӵоже кылдэм структураеныз валче секыт югдуре шедем предприятиос, отын ужасьёс сярысь сюлмаськон "сюлэм висёнэзлы мед пӧрмоз. Со сяна, асьмелы кулэ чылкыт адями, уно аръёс ӵоже ужатозяз данзэ ыштымтэ мурт. Сыӵе кивалтӥсь вань. Конференция дэмла организацилы дурбасьтӥсь депутатъёслы Удмурт Республикаысь Кун Кенешлы Тӧрое ӵектыны "Отечество" органзацилэн Удмурт улосвыл ёзэзлэн кенешезлэсь Тӧрозэ Александр Александрович Волковез. ГЕРД Кужыммы - огазеяськонын 8 Март праздник азьын редакциын радъямын вал Алнаш ёрос администрацилэн тӧроезлэн воштӥсеныз Нина Образцоваен телефон пыр меӵак вераськон. Со вераськонлэсь ог люкетсэ лыдӟисьёсмы доры вуттӥмы ни вал. Нош туннэ тӥледды тодматӥськомы Нина Андреевналэн удмуртлык сярысь малпанъёсыныз. Соин ӵош ӟечкыласьком сое Удмурт Республикаысь Кун Кенеше депутатэ быръеменызы. Л. Федоров: - Удмуртлыкез ӝутоно шуиськом, нош кыӵе ке ужрадъёс ортчытоно ке, удмуртъёсты люканы ум быгатӥське. Кызьы районады трос калыкез люканы быгатӥськоды сыӵе ужрадъёсы? - Районамы улӥсьёс пӧлын удмуртъёс 18 сюрс пала. Котькуд ужрадмес малпаса лэсьтыны турттӥськом. Мон удмурт шуыса гадяд мыжгад ке, удмурт луэмысьтым яраты монэ шуид ке, малпасько, тонэ нокин уз яраты. Удмуртлыклэсь ӟечлыксэ, чеберлыксэ возьматыны кулэ. Ужрадэ лыктӥд ке, медад пукы малы лыктӥ шуыса. Тыршы мае ке но умойзэ аслыд басьтыны, мае ке но адӟыны. Ужрадъёсмес районын ми малпаса ортчытъяны тыршиськом. Оло, трос но ум лэсьтӥське, но ог-огзылэсь пӧртэм медло, аспӧртэмлыкез мед адӟиськоз. Милям но, бен, котькыӵе дыръёс луыло. Но калыкен ужан опыт бадӟым ни. Дас ар роноын ужай, отын но пӧртэм ужрадъёс ортчытъямы. Ёрос администрацилэн тӧроезлэн воштӥсез луэме бере, быдэс район понна кыл кутоно луэ ни. Юн кусып возьыны кутски культура удысын ужасьёсын. Тау кареме потэ ужрадъёслэн режиссёрезлы Вячеслав Булдаковлы. Дышетски солэсь, али но дышетскисько. Ужез адӟем карымон Владимир Соловьевлэн - режиссёре дышетскемын. Тау карысал Николай Постниковлы - ас ужаз профессионал. Ваньмыныз ик культура удысын ужасьёсын юн кусып возьыны турттӥськом, бадӟым ужрадъёсты ортчытыны соослэн юрттэтсытэк нокызьы уг луы. Озьы районамы ортчытӥм "Гербер" праздникез, Голюшурмаысь Оӵ шур дурын - кырӟанлы сӥзем праздник, витетӥ гужем спорт шудонъёс, толалтэ шудонъёс - Асан техникумын. Туэ 15 июле районмылы тырме 70 ар, та бадӟым ужрадэз ортчытыны чакласьком стадионын. - Кичӧлтӥсьёсты, активистъёсты районады трос. Но малы меда куд-ог визьмо адямиос - Алнашысь потэмъёс ик - куспазы кыл уг шедьто? - Культурамы уг тырмы, дыр. Промышленной предприятисолэн, гурт хозяйствоослэн кивалтӥсьёссы, огшоры ужасьёс тэргаськыса уг уло кадь. Культура удысын ужасьёс куспын, интеллигенция пӧлын, озьыгес кошке. Улонын котькыӵе дыръёс луо, озьы ке но, огъя кыл шедьтыны, тупаны тыршоно. Тынад гинэ ужед ӧвӧл ук со - огъя уж, удмурт калык сярысь сюлмаськон. Нош асьмелэн кызьы луэ? Мон ке ӧй луы, со но медаз луы. Бигеръёс кадь улыны ум быгатӥське. - Мон туби ке, мукетсэ эшшо вылэ тубытоно. Ог- огмылы юрттыса улыны кулэ, нош керетыса улон асьмеды чебер уг кары. В. Ивашкин: - Нина Андреевна, кызьы малпаськоды, удмурт радиолэн кужмыз трос-а шаерысьтымы быдэс Россиысь удмуртъёсты огазеяны? Тани Россия Федерациысь Национальностья министерствоен кутэмын "Финноугрия" программа. Угро-финнъёс понна радиоын нимысьтыз канал усьтон шоры, кызьы тӥ учкиськоды? - Удмурт радиоез туж яратӥсько, ӵукна но, ӝыт но ваньзэ сямен передачаостэс сак кылзӥсько. Кужымды трос, кылды чебер, лирической передачаосты умой пӧрмо. Нош мур пуштросъемъёсыз, кыӵе ке лэчыт ужпумъёсъя веранъёсты вылтӥзгес кошко. Асьмеос ум дӥсьтӥське мургес пырыны политика, экономика но мукет удысъёсы. Удмуртъёсты огазеян понна радиолы но, "Удмурт дунне" газетлы но уртче кариськыса ужано, герӟаськоно "Удмурт кенешен" но солэн ёросысь ёзъёсыныз. Нош угрофиннъёс понна нимысьтыз канал усьтон сярысь ке верано, со туж кулэ вылэм. Тани мон туж тунсыко потыса кылзсько "Между Волгой и Уралом" радиоверанэз, лэчыт ужпумъёсыз ӧжыт ке но. В. Михайлов: - Алнаш районын чебересь гуртъёс вань, урамъёссы но чылкытэсь, адямиосыз но мылкыдоесь, тыршыса ужало. Мар бордысь со потэ: кивалтӥсьёс-а мылкыд сёто яке музъем, инкуазь бурдъятэ? - Ваньмыз ӵош, дыр: кивалтӥсьёс бордысь но потэ, калыктэк но уг луы, со ужа, лэсьтэ угось. Удмурт калык туж тыршись, огзылэс огзы адӟем каро. Нылкышноосты ик басьтоно ке, уез-нуналэз изьытэк потозы соос мар ке лэсьтонзы вань дыръя. Воргоронъёс но бере уг кылё, гуртсэс ӝутыны тыршо. Берло дыре 874 корка пуктӥське районамы. Туж трос со. Мукетъёсызлэн но лэсьтӥськемзы потэ, луоз. Калык сярысь кивалтӥсьёс но сюлмаськытэк уг уло. Кулэяськисьёсызлы кредит висъяське, гуртъёсы газ пыртӥськом, сюресъёс но лэсьтӥсько. А. Разин: - Малы ке но куд-ог удмуртъёслэн удмурт луэмзы уг поты. Тӥ сямен, мар кароно удмуртлыкмес, культурамес, анай кылмес утён понна? - Удмурт кылмы государственной луэ шуыса Удмурт Республикалэн Конституцияз пыртэмын ке но, Кыл сярысь закон татчыозь кутымтэ. Кызьы шуо гуртоос, Алнаш сьӧры потӥд ке, удмурт кылын уд вераськы ни, Иже лыктыса, солэн кулэлыкез ӧвӧл ни. Институтэ я университетэ пырыку, кытчы ке уже интяськыку кыл тодэмез кулэ карысалзы ке, озьы ӧй луысал. Кивалтон удысъёсын но ас калыкед мед луысал, ас адямиед ик умойгес валалоз тонэ. Но со понна асьмелы ваньмылы ужано, янгышъёсмы вылын басьтыны сюлмаськоно. Тросгес возьматыны тыршоно удмуртлыклэсь чеберлыксэ, узырлыксэ. Весь верало, удмурт кыл Алнашын но Пургаын возиське, нош кыӵе чебер верасько Яр, Игра, Кез районъёсын, Ижевскын но. Возьматыны но калыке вӧлмытыны гинэ сое быгатоно. "Удмурт кенеш" но "Дэмен" огазеяськонъёс та ласянь зол кужым луыны куэ. В. Ившина: - Удмурт школаослэн азинскемзы шоры кызьы учкиськоды? - Школаосты юнматыны кулэ котыр ласянь. Ӟечгес радъяно нылпиослы тодон-валан сётонэз. Удмурт кылэз но мур-мур дышетоно, ӟучсэ но мед ӟеч тодозы. Удмурт кыллы гинэ тросгес саклык висъяса, палэнэ кошкем нылпиос ӟуч кылэз тодымтэысьтызы возьдасько, асьслэсь малпанзэс вераны уг быгато. Озьы быгатӥсь пиналъёс но ыштӥсько. Отысен ик удмурт луымтэзылэсь возьдаськон кутске, удмуртлыкез гажан мылкыдзы сӥя. Дасяз Л. МАЛЫХ. Кыкетӥез кандидат - Михальков Анатолий Борисович Со куке но соку Игра леспромхозэн кивалтӥз. Ужасьёсыз туж сое гажазы, оскылӥзы, бырйизы вал депутатэ но, нош Анатолий Борисович куронзэс быдэстыны ӧз быгаты, леспромхоз быриз, куашказ. Нош ик пӧяса, сюдыса-сектаса малпаз вал депутатэ чуртнаськыны, но ӧз быгаты, леспромхозын ужасьёс оскымтэзэс чутрак синмаз веразы. Тазьы ик котькуд кандидатлэсь кылзэс юасалзы ке, Кун Кенеше шедьысалзы ӟеч депутатъёс. Быръем адямиосмылы сӥзисько юн тазалык но умой ужан мылкыд. Тӥледды оскыса бырйим бере, вань малпанъёсмы улонэ мед пыӵалозы. Татьяна Сайдакова, Игра посёлокын улӥсь. АЗЬМЫНӤСЬЁС ДОРЫН Ожмос тодмо Кам сьӧрын но 1. Вырйылысь завод Тодмо муртлэсь пӧрам сиён-юонзэ одно ик шӧмъям, дунъям потэ. Ижевскысь магазинъёсысь "Бабиноын лэсьтэмын" шуыса гожтэм колбасаез, ӵынатэм сӥлез адӟыса, нырысь-валысь паймоно вал: неужто гуртоос но дышизы ни шер пумиськылӥсь мае ке дасяны? Озьы ик вылэм. Но удыс мытӥзы городын улӥсьёс, ожмос калык понна соос ик ватсаса ужан инты кылдытӥзы. Табере пудо вордон фермалэн чебересь башняосыныз артэ, соос пуктэмын вал "Свобода" колхозлэн "сяськаяськон" вакытаз, ужа пичигес гинэ завод. Предприятилэн кылдэмез но туннэ нуналэз сярысь вера солэн нырысетӥ директорез, али директорлэн экономикая воштӥсез Валерий Сергеевич БАРАНОВ: - Комбинат пуктонлэн кичӧлтӥсез луыса, нырысь кенеши "Свобода" колхозлэн кивалтӥсеныз. Со малпанме умоен лыдъяз но 1992-тӥ арын июле лэсьтӥськыны ӧдъям. Соку мынам проектной кооперативе вал. Ужам хозяйственной амалэн. Но ӝынызэ но ужъёсты быдэстыса ӧм вуттэ, со арын ик дунъёс инмозь ӝутскизы. Озьы 1993-тӥ арын лэсьтӥськонмы гуньдӥз, нош колхоз куашказ, пичи ёзъёслы люкиськиз. Уноез фирмаос комбинатэз вуттыны мылкыд карылӥзы, но ӧз басьтӥськылэ. 1995-тӥ арын 5 январе пумиським "АСПЭК" огазеяськонлэн (ЗАО-лэн) валтӥсь тӧроеныз Виктор Хорошавцевен но куспамы огкыл кутӥм. Со чурытэсь куронъёс пуктӥз, мясокомбинатэз, пе, ӝыны арскын вуттоно. Сётэм кылмес дыраз быдэстӥм, апреле ужаны кутскыса, 1 октябре кун комиссилы сётӥм, комплексмы вылӥ дунъет басьтӥз. Асьмелэн котельнойёсы, кылем-мылемъёсты ӝикыт утялтӥськом, инкуазез ум саптаське. Тӥни озьы ньыль ар талэсь азьло мясокомбинат ужаны кутскиз. Азьвыл аръёсы вакчи дыр куспын таӵе комплекс пуктыны быгатысалмы-а? Конечно, ӧй. Рынокен экономика выжон юрттӥз, калыклэсь мылкыдзэ ӝутӥз. Адями дыраз но тырмыт уждун басьтэ ке, со мылысь-кыдысь тырше. Али сю пала ужасьёсмы, ӝыныезлэсь тросэз Ожмос (Бабино) черкогуртысь но Шайтан (Саппарово) гуртысь ветло. Озьы ми ватсаса ужан интыос кылдытӥм. Гурт калык солы шумпотэ, уждун толэзьлы быдэ сётӥськом но бюджетэ дыраз выт тыриськом. Комбинатлы ваньмыз оборудование Россиын лэсьтэмын, кунгож сьӧрысь номыре ӧм басьтэ, отысь сӥль но ум кутӥське. Нош Ижысь азьвыл мясокомбинатэ (али "Овен" огазеяськон) ваньмыз кунож сьӧрысь вуттэмын. Ачим но отын ужамын, югдурез тодӥсько. Ми бадӟым инты висъяськом колбаса лэсьтон технологиез быдэсъянлы. Кылсярысь, "Московская" вылӥ сорт колбасае 2 килограмм сӥль мынэ. Со пӧлысь 75 процентэз кунян сӥль мед луоз, 25-ез - парсь кӧй, нош пӧзьтэм колбасае 1,22 килограмм гинэ сӥль кошке. Отчы кӧня ке ватсаське пызь (соялэсь) но крахмал. Сиёнмылэн ӟечлыкез герӟаськемын сӥльлэн ӟечлыкеныз. Соин ик пудоез басьтонлы нимысьтыз саклык висъяськом. Ветврачъёс пудолэсь паспортсэ висёнъёссэ чаклало, тымуссэ, сӥлез юн учко. Ужало дисплеен но микроскопен. Ужмы тазьы радъяськемын: вандэм сӥлез ум кынтӥське, лызэ, сӧнъёссэ люкиськом, но холодильнике интыяськом. Ми огдыре 68 пумо колбаса но мукет чынатэм сиёнъёс лэсьтыны быгатӥськом, но али 30-35 пумо гинэ поттӥськом, басьяськисьёслэсь луонлыкъёссэс лыдэ басьтӥськом. Ӵынатӥськом лулпу но пипу пила пызен. Со ческыт шӧм сётэ. Поттэм сиёнмес 35-40 процентсэ "АСПЭК" басьтэ, кылемзэ Башкортостанэ, Татарстанэ но музон интыосы келяськом (асьсэос лыкто но нуо). Продукцимес басьтӥсьёс вань. Одӥг пол Играысь магазинэ дыраз колбаса нуыны ӧм быгатэ, нош басьяськисьёс сиёнмес 2 час витизы. - Кытысь пудо басьтӥськоды? - Ваё Кияса районысь Ленин нимо колхоз, районысьтымы "Восточный" совхоз, Ува районысь "Туклинский" парсь вордон комплекс но нимаз адямиос. Ужаськом огкылъёсын, кӧнязэ ке дунзэ азьло ик сётӥськом. Но 17 август милемды но зол шуккиз, ужтэк но сылӥм. Али пыд йыламы султӥм ни. Озьы ке но, валлян арын тросгес продукция поттӥм вал. Комбинатлэн 76 процент акциосыз "АСПЭК" киын, 20-зэ колхоз возе, ньылез ас киям. Рентабельностьмы 7 процент. Со трос ӧвӧл, но чидаськом. Ведь магазинъёс 25 процентлы продукция дунзэз будэто. Озьы басьяськисьёслы дуно сиён вуэ. 2. Компрессор - заводлэн сюлэмыз Котькуд мясокомбинатлэн ужаз валтӥсь инты басьтэ компрессорной цех. Со оскемын валтӥсь машинистлы Вячеслав Пермяковлы, Ижысь гурт хозяйствоя институтэз быдтэм инженер-механиклы. Талэсь азьло колхоз мастерскоен кивалтӥз. Вячеслав Егорович комбинатын ньылетӥ арзэ ужа ни. Та дыр ӵоже компрессор цех час кадь огсыр ужа. Солэн 7 холодильной камераез, котькудаз 6 градус кезьытысен 6 градус шуныт возиське. Кык компрессорез пӧлысь одӥгез котьку уг ужа, мукетсэ воштыны (тӥяськиз ке) дась улэ. Сыӵе амалэн но омыр сётэ 4 насос: кыкез шутэтске, кыкез ужа. Таӵе порядок юнме шорысь тупатымтэ. Ваньмыз со герӟаськемын комбинатлэн аспӧртэмлыко ужаменыз но ӟеч сиён поттыны сюлмаськеменыз. Ведь сӥлез утьыны ӧд ке быгаты, со туж ӝог уродмоз но кызьы ӟеч колбаса поттод. Соин но гужем компрессор 8-9 час ужа, нош толалтэ - 5-6 гинэ. Уин автомат чакла. Вячеслав Егоровичлэн юрттӥсьёсыз но чупресэсь Анатолий Бектуганов - азьвыл сварщик, ӵыжатон ужъёсты но быдэсъя. Озьы ик чырткем тырше Виктор Ерохин. Мясокомбинатын шӧдскымон инты басьтэ электрокужымез кутон. Со Трос моторъёсты бергатэ. Та уж оскемын инженер-электриклы Григорий Медведевлы. Усто специалист татын нырысь нуналысен ик тырше. 3. Дисциплина - армиын кадь Ожмосысь та пичигес предприятиез ӝикытлыкезъя ӵошатэм потэ военной городокен. Радлыкезъя но армиысь дисциплиналы матын. Палэнысь мурт но, асьсэ ужасьёс но заборен котыртэм территорие пыро контрольно-пропускной пункт пыр. Котькытын чылкыт. Азбар асфальтэн шобыртэмын. Чуренак будо чагыр кызъёс. Валерий Сергеевич тодматэ калыкеныз: котькудзэ горд пул вылэ дэмланы дась. Зэмен но, огез но татын суп-сап уг ужа, азьтэмъёсты, юисьёсты туала вакытэ ӟеч кивалтӥсь бурд улаз уз возьы. Александр Кадышевез нимысьтыз пусйизы: туж чупрес, кибервылыз - профессионаллэн кадь. Саша вандэм пудоез октэ-калтэ, кузэс ние. Татын, шонер верамын, киыд вольыт мед мыноз, пичияк пасяд ке, кулэн ӟечлыкез быроз, дуныз усёз. Уждунэд вылын но шӧдӥськоз. Ожмосын улӥсьёс пӧлысь 50 муртлы "АСПЭК" ужан инты сётӥз, соос пӧлы шедиз Кадышев но. Колхоззы быремен, тросэз гуртоос, йыромем тури музэн, кытчы мыныны, кызьы семьязэс возьыны ӟудэмын вал. Али но одӥг-огез уж ӧз шедьты на. Александрлы татын кельше: коньдон дыраз тыро. Толло солдатлы, кышнояськемын ӧвӧл ке но ай, пыд вылаз султоно, азьланез сярысь малпаськоно ни. Но сое, трос мукетъёссэ сямен ик, та вакытэ туж шугъяськытэ дуннеысь политической югдур. Вераськонмы но амалтэк выжиз армия вылэ. - Мон 10 толэзь ӵоже "командировкаын" Чечняын вал. Тоцкойысь эшелонэ пуктыса келязы, кытчы мынэммес ӧз вералэ, но ми валам. Удмуртиысь 6 кузя вал: Глазовысь, Ярысь, Балезино районысь Оросово гуртысь удмурт пияш - Русских Владимир. Война - со война. Визьмоез, амал шедьтыса, солэсь палэнскиз, шузиез шедиз. Офицеръёс но, мон сямен, озьыгес мынэмын вал: кинлэн ке семьяез ӧз удалты, кинлэн ке та улонысь кыдёкегес кошкемез потӥз. Чеченъёс сярысь ке верано, калык отын оглом умой. Но пӧлазы, котькытын сямен, вань уродэз но. Кык толэзь ӵоже ми чидам сиёнтэк но, мунчотэк но, тэй но потаз. Асьмеды шуо, кужыммы, пе, ляб, соин ӧд, пе, ворме. Вормисез со палан но, та палан но ӧвӧл. Чечняез огкутскемен музъемен ӵошатыны луысал, но со - асьмелэн музъеммы ук! Асьмелэн калыкмы! Чечня - со политика. Нефтен, газэн узыр республика. Та сяна, номырзы ӧвӧл. - Саша, нош Югославие мыноно луиз ке? - Приказ луиз ке - мыно, кытчы-о пырод. Но та конфликт умоен мед йылпумъяськоз вал, кинлы кулэ юнме шорысь вир кисьтон? Таӵе ик мылкыдыз В. С. Барановлэн. Арлыдызъя со солдат стройын ӧвӧл ни, но сюлмыз висе Балканын кылдэм югдур понна: - Белград вылэ бомбаос но ракетаос куяны кутскизы 24 мартэ. Мон вуоно нуналаз ик 10 часэ почтае мынӥ, Б. Н. Ельцинлы телеграмма ыстӥ. Отын верай ас мылкыдме: "Умойтэмен лыдъясько США-лэсь политиказэ. Вынлыко Югославилы дась ыстыны уждунэлэсь ог люкетсэ". Мон 1943 арын вордскемын, ӟеч тодӥсько война бере сютэм улонэз. Ас вылам шӧдӥ Вьетнамын ожмаськонэз но. Семьямы соку Сибирьын улӥз. США-лэн агрессиез кутскем бере, кӧня ке нунал куспын вань магазинъёс бушазы. Сычеез адӟыны медаз ни кылды. Колбаса поттӥсьёс пӧлын данакез - нылкышноос. Надежда Геннадьевна Камашева колхозын агроном луыса ужаз, табере - колбаса пӧзьтонъя оператор. Со бордысь потэ продукцилэн ӟечлыкез. Колхозэ ке выльысь берытсконо луысал, со бырйысал ни та ужзэ ик. - Агрономлэн сюлмаськонэз тросгес, - шуэ Надя, - котькуд гырисез, кизисез чаклано, дунъяно. Татын ас поннам кыл кутӥсько, быдэстэм уже но соку ик адске. Эшъёсызлэн но малпанзы пӧртэм ӧвӧл. Выль интылы адями дыше ке, озьыен, ваньмыз умой. Мылкыдыз, пыдъёсыз асьсэос кыско яратон удысаз. Кошкон азямы ӵапак пумитамы шедиз предприятилэн выль кивалтӥсез - егит, чупрес воргорон Владимир Васильевич Артемов. Татчы со ӝытпал гинэ вуиз: лумбыт ужано луиз Ижевскын. Мылкыдыз ӟеч. Азьланезлы осконэз бадӟым. Та удыс Владимир Васильевичлы тодмо: кӧня ке арзэ ужаз Ижевскысь мясокомбинатын, валтӥсь инженер луыса. Нош В. С. Баранов солэн кивалтӥсез вал. Али интыенызы воштӥськизы, шуыны луоз: дышетскисез дышетӥсьсэ воштӥз. Егит директорлэн быгатонлыкез но, кужымез но тырмыт предприятизэ азьмынӥсьёс радын возьыны, калыкмес вылӥ ӟечлыко продукциен сюдыны. Сӥзём солы но ужасьёсызлы умой мылкыд но выль азинсконъёс басьтыны. Людмила МЕДВЕДЕВА, Геннадий РОМАНОВ. Туспктэмъёсыз Владимир КАМАШЕВЛЭН. ГЕРД Маин басьтӥзы бырйисез? Адямиосыз ог-огзэс вузаны дышетон политика азинске. Соин валче адямилык пичиен-покчиен весь куашкаса мынэ. Та политикалэн "емышьёсыз" рос-прос шодӥсько городын. Адямиос татын ог-огзылэсь кышкаса кортэн дурем ӧсъёс, укно вадьсы юнматэм корт возъетъёс сьӧры пегӟылэмын. Соос табере четлыке пырем пӧйшуръёслы укшало. Гурт калык сокем сӧриськемын ӧвӧл на - татын возиське на ог-огдэ гажан культура. Умой пала улонлэн воштӥськонэзлы оскон но чиданлык но татын вань на. Жаляса верано луэ, аслыз гурт калыклы аслаз мылкыд каремезъя улонлэсь ӟечлыксэ утьыны луонлыкъёс туж ичи сётэмын. Шонерзэ верано ке, быръёнъёс дырья сяна уг быгаты со аслэсьтыз улонзэ воштонэ пыриськыны. Ньыль арлы огпол быгатӥськом бырйыны асьмелы депутат. Но уно кандидатъёс пӧлысь одӥгзэ бырйыны капчи ӧвӧл, соин ик законъя толэзь ӵоже валэктон уж нуыны чакламын. Данъясь кылъёс верамын вал котькуд кандидат сярысь. Угось соизлэн но, таизлэн но, мукетызлэн но маиз ке умоез вань. Нош маин быгатӥз округлы быдэ одӥгез кандидат мылкыдмес ас палаз берыктаны? Бюллетень вылэ пус пуктыкумы малпаськимы-а асьмеос, мар лэсьтыны кулэ депутат ньыль ар чоже Госсоветын? Ӧм кадь потӥз мыным. Укыргес туннэ (та минутэ) кулэяськонэ выйыса улӥськомы угось асьмеос. Сюрес лэсьтон, корка пушкамы газ пыртон но мукет сюлмаськонъёсын улӥськомы бере вунэтйськомы, та ужпумъёсын Кун Кенешлэн депутатэз уг выры шуыса. Соин вырон понна вань райсовет но солэн депутатъёсыз, вань та уж понна уждун басьтӥсь чиновникъёс. Нош Кун Кенеш законъёс кутонэн выре: адямиез эмъян ужпумез государстволы ас вылаз басьтон пумысен; дунъёс медаз будэ шуыса, сйль, йӧл, ю-тысь поттӥсьёслы дотация чаклан; сиён-юон поттӥсьёслы налог тыронэз кулэстон сярысь... Нош ляб лулъем бырйисьёс куараоссэс коньдонэн яке кудзытӥсь юонэн вузазы. Таӵе учыръёс уноезлы тодмо ини. Та вераме буш супыльтонлы медаз укша шуыса, верало аслэсьтым чакласькемъёсме. Тани мон агитациен выри Яган-Докья округын. Отчы пыризы Пичи Пурга но Завьял ёросъёслэн люкетъёссы. Кандидатъёс татын 12 кузя вал. Соос пӧлысь бырйизы "Удмуртавтодорысь" "монэ ке бырйиды, котькуд гуртэ асфальт сюрес кыско" шуись инженерез. Огласянь валаны луэ бырйисьёсыз. Тани басьтом Миндэргурт участокез. Татчы пыро М. Бодья, Постол но мукет гуртъёс. Сюрессы аламаен, татын туа секыт учыръёсы вуылӥллям ини. Кылсярысь, куд-ог семьяос юртъертэк но кылиллям - тылпуэз кысыны машанаен пыремзы луымтэ. Нош малы "Удмуртавтодорын" ужась кандидат быръёнъёслэсь азьвыл та сюресэз лэсьтымтэ? Депутатлэн мандатэзтэк быгатымтэ шат? Ма, со сюрес лэсьтэмез понна государство солы уждун тыре ук. Тани Миндэргуртын ик вань ёрос советлэн сюрес лэсьтонын ужась депутатэз. Киыз но пыдыз кадь ук сое ужатыны. Та депутатлэсь кылзэ юам интые, солэсь сётэм кылзэ санэ басьто. Та округын вал вить удмурт кандидат. Нош одӥгез но депутатэ ӧз поты. Асьме элькунмылэн тужгес но удмуртлыко ёросаз удмурт адямиез депутат карыны ӧм быгатэ! Огласянь учконо ке, ми удмурт понна агитация нуисьёс. туж тыршим законэз чакласа ужаны. Законъя толэзь азьвыл гинэ кутским ӝуткан борды, но кык нунал азьвыл дугдӥм. Нош куд-огез ар азьвыл кутскиз пӧртэм амалэн ужаны. Тужгес но зол тӥязы законэз быръён нуналэ ньылетӥ апреле. Миндэр гуртын мон наблюдатель шуон вал, соку чылкак пайми эрказмыса вырисьёслы. Одӥг пинал кышномурт кабинаос азьын агитация нуыны. Удмурт адями - удмуртлы пумит! Нош Пурга райсоветлэн одӥгез депутатэз кӧбератэк пыриз бюллетенез пусъён кабинае но избирательлы кутскиз возьматъяны, кыӵе ним вадьсы пус пуктоно. Огвадес мон шӧдӥ наблюдательёслы шуыса дасям пуконъёслэсь бушамзэс. Кытчы луизы-ай таос шуыса ураме потӥ но... абдрай. Урамын калыкед митингын мында. Соос пӧлын - наблюдательёс, таосыд агитаторъёс луиллям но лулысь-сюлмысь валэкъяло, кин понна куараез сётоно. Тазьы абдраса ветлон куспетӥм автобусэн бырйисьёсты вуттӥзы. Соосыз пумитаз Игитханян. Одӥгзэ бырйисез столовое пыртӥз но солы коньдон сётӥз. Соиз, та коньдонэз кутыса, магазинэ пыриз но отысь быдэс ӝутэт ӟенеликъёсыз ӟыгыртыса поттӥз. Урамын сое эшъёсыз возьмало ни вал. Милиционерез ӧтьыны ветлытозям, та Игитханянлэн саламезлы шумпотэмъёслэн пытьызы ышиз. Таӵе югдуре наблюдатель вӧзы уно юрттӥсьёс пуктыны кулэ вылэм. Законэз тӥяны луонлыкъёс вань на, урнаез кутыса, пересьёс но висисьёс дортӥ ветлыку. Тае чакласа, мон куриськи урна кутыса потӥсьёс сьӧры. Вуимы та ужлы шуыса висъям машина доры но, Игитханян керетон ӝутӥз. Одӥг наблюдателез но уг нуы, шуэ. Куаш поттэмзэ кылыса милиционер лыктэм бере гинэ машинаяз пуксемелы ӧз пумитъяськы ни. Монтэк мыныны турттэм мугзэ валаны чик но шуг ӧвӧл. Жаляса верано луэ, та адямилэн висъям автобусаз милям чакласькисьмы ӧй вал. Бырйисьёсыз мукет гуртысь Миндэре вайыкузы, кыӵе кузьым сярысь вераськыса лыктӥзы солэн медъям адямиосыз, валаны луэ. Бырйисьёслэсь мылкыдзэс берыктон кужмыз туж зол вылэм автобуслэн. Сое валаны луэ мукет участокъёсъя но. Кылсярысь, Брангурт котырысь бырйисьёсыз нуллыны автобус висъяз Баранов. Отын но солэн агитаторъёсыз ужамен аслаз ёросаз вормисе ӧз поты меда? Ожмос участокын вормись Дорошенко но избирательёсыз вайылыны автобуссэ висъяз вал. Азьланяз та учыръёсыз лыдэ басьтоно но автобусъёсы чакласькись пуктоно. Удмуртъёс кенешонъёсы люкаську, ӵем дыръя кылоно: "Кырӟаса-вераса гинэ улоно ӧвӧл, политикаен выроно" шуыса супыльтонэз. Депутатэз быръён - со ик вань туж зол политика. Вань кадь асьмелэн политика удысэз радъян понна кылдытэм "Удмурт кенешмы". Нош кызьы со, мар малпаса куд-ог округе чаклаз кык яке уногес удмурт кандидатъесты? Кылсярысь, Яган-Докья округе дэмламын вал котькинлы тодмоесь удмуртъёс А. Ешкеев но В. Москвин. Басьтом на Дэбес ёросэз. Татын май толэае ик депутатэ поттыны чакламын вал рос-прос ужаны быгатӥсь", политикаез мур валась, йӧно удмурт кышномурт С. К. Смирнова. Нош малы отчы чуртнано вал на Илья Байметовез? Удмурт удмуртлы мед люкетоз но ӟуч кандидат Горошников депутатэ мед потоз шуыса-а? Мыным вераны ик возьыт Байметовлэсь "пож вуэн пазяськыса" ветлэмзэ, туж быгатӥсь нылкышно политикмес ултӥяны выремзэ. Ярам ай, Светлана Константиновна йӧнлыксэ ӧз ышты, Байметов сямен аслэсьтыз адямилыксэ ӧз уськыты. Депутат но луиз. Ӟечкыласьком! Нош мукет ёросъёсын усьыса кылизы депутатэ туж зол тупась кандидатъёс. Тани басьтом Вавож ёросэз. Киыз но пыдыз вал колхозлэн кивалтӥсезлы Красильниковлы депутат луыны. Нош та удалтэм удмурт воргоронлы пумит "Удмурт кенеш" пуктӥз политика удысын кыдам ӟуч адямиез Соловьевез. Валамон ини. удмурт кандидатэз "лёгазы". Сое "лёганы" тыршизы Вавожысь кивалтӥсьес. Юромо Ижысь ветлыса, соослы кужымзэ жалятэк юрттӥз "Город кенеше" пырись Алевтина Поткина. Таӵе мыдлань ужасьёсты адӟыса ум ни паймиське кадь. Ма, Вавож ёросын ик вордскем Куӟебай Гердэз быдтӥсьёс пӧлын но удмуртъёс вал ук. Маргарита Гришкиналэн гожъямезъя, узыресь, дӥсьтӥсесь, кужмоесь, быгатӥсесь вашкала удмуртъёсыз ӧй вормысалзы булгаръёс но, бигерьёс но, ӟучъёс но, кивалтӥсьёс, интеллигенция пӧлын асьсэды но калыкмес вузасьёс ӧй луысалзы ке. Грах ёросын "Марий Ушем" огазеяськонлэн Тӧроеныз пор (мари) пиен А. й, Радыгинэн нюръяськиз депутатэ кандидат Марченко. "Удмурт кенеш" солы дурбасьтӥз. Малы? Малы "Удмурт кенеш" люкетӥз "Элькун" блоке пырись политикаез умой валась, законъёсыз ӟеч тодӥсь милициысь полковниклы Радыгинлы депутат луыны? Озьы-а кусыпмес юнматомы асьме вынлыко пор калыкен? Нош удмуртъёс куспын керетон тужгес но зол вал Пурга ёросын, судъёсын но герӟаськытэк ӧйлась. Таяз учыре пож вуэн пылатӥзы Ю. М. Никитинэз. Кивалтӥсьёслы ӧз кельшы, лэся, солэн чутрак пуктэм куронъёсыз. Угось со чиновникъёслэн бадзым уждун возазы премиос басьяса пукемзы пумысен калык пӧлын валэктон уж нуиз. Со таӵе куронъёс пуктэ: "Чиновникъёс пособиосыз. пенсиосыз, уждун тыронэз ӧз радъялэ ке, премия сётоно ӧвӧл. Котькуд депутатлэсь мар лэсьтэмзэ, кызьы ужамзэ нимаз тупатэм стендъёс но газетъёс пыр шараяса возено". Котькуд ёрооэз басьты, асьмелэн, азинсконмылы пумит политика шӧдӥське. Кинэн кенешыса, "Удмурт кенеш" быръёнъёс азьын кандидатъёсын списоказ Иван Абрамов ректорез пыртӥз? Абрамов ноку удмуртъёслы ӧз дурбасьтылы. Ар талэсь азьвыл меӵак шуиз: "Элькун Правительство нимысьтыз коньдон висъяз ке соку гинэ удмурт абитуриентъёсыз квотая студентэ кутомы". Со чик уг куректы ИЖГТУ-е одйг-ог гинэ удмуртъёс пырыны быгато шуыса. Нош мар понна Подопригора господинлы дурбасьтэмын вал? Туж кельшиз-а солэн приватизациез муромытон но гырон музъемен вузкаронэ пыриськон мылкыдыз? Туж бадӟым удыс со - депутатъёсыз быръён. Рентген аппарат кадь возьматэ со адямилэсь пуштроссэ. Котькыӵе чебер кылын вераськы калык азьын, нош удмурт кандидатлы пумит ужад ке, мылкыддэ шараяно луиськод. Ас калыксылы пумит ужасьёс вань котькудаз зӥбет улэ сюрем шаерын. Самой таӵе адямиос ванен калыкъёс ышто азинскон луонлыксэс. Немец филос И. Фихте шуоз вал: "Секыт зӥбет ноку но ӧй возъяськысал калык вадьсы, солы сюрес ке ӧй лёгысалзы йӧндэ ыштон, кышкан но ог-огедлэсь палэнскон". РЕВО РАЗИН, Удмурт университетын ужась тодосчи. "Гердэз" поттӥсь редакционной советлэсь. Ми ум быгатӥське соглаш луыны гажано авторлэн куд-ог малпанъёсыныз. Озьы ке но, материалэз печатлано кариським, уго котькуд адямилэн правоез вань ас мылкыдзэ газет пыр возьматыны. Лыдӟисьёслэн та пумысен малпанъёссы кылдӥзы ке, ми соослы газет бамын инты шедьтом. Вань удмуртъёслэн "Удмурт кенеш" ассоциацизылэн исполкомезлэн Удмурт Республикаысь кыкетӥзэ ӧтчам Кун Кенешысь депутатъёслы вазиськонэз Удмурт Республикаысь нырысетӥзэ ӧтчам Кун Кенешлэн кивалтӥсьёсыз, огазеяськыны но пайдаё ужаны кыл вылын гинэ ӧтьыса, республикаысьтымы экономикаен но политикаен герӟаськем югдурез уродмытӥзы. Солы "юрттӥзы" интыысь аскивалтонъя ёзъёсын эчешонъёс но кун властьлэн быдэсъясь ёзъёсызлэн ужазы кужмысь пыриськон. Соин ик "Удмурт кенеш" ассоциацилэн исполкомез тазьы лыдъя: Кун Кенешлэн азьвыл кивалтӥсьёсыз депутатъёсты, властьлэсь пӧртэм ёзъёссэ но институтъёссэ, общественно-политической кужымъёсты огазеяны уз быгаты, экономикаез секыт югдурысь поттон понна. Социальной удысысь, политикаысь лэчыт ужпумъёсты быдэстон понна, парламентэн мукет адями кивалтыны кулэ. Сое республикаын но, федеральной властьлэн ёзъёсаз но мед гажалозы. Со вакытэ ик солэн хозяйствоен но государствоен кивалтыны, политикаез визь-нодо ортчытыны быгатонлыкъёсыз, аспӧртэмлыко ужан амалъёсыз луыны кулэ. Республикаысь политикъёслэсь ужаны быгатэмзэс но сямъёссэс дунъяса, "Удмурт кенеш" ассоциацилэн исполкомез тазьы малпа: Павел Николаевич Вершинин депутатлэн кандидатураез тужгес но тупа, Удмурт Республикаысь кыкетӥзэ ӧтчам Кун Кенешлы тӧрое быръён понна. Гажано депутатъёс! "Удмурт кенеш" ассоциацилэн исполкомез ӧте тӥледыз Удмурт Республикаысь Кун Кенешлы тӧрое Павел Николаевич Вершининэз бырйыны. Спорт Ӵошатсконъёс йылпумъяськизы Ижевскысь ветеранъёс пӧлын йылпумъяськиз шахматэн шудонъя Удмуртилэн чемпионатэз. Отчы пыриськиз 40 шахматист. Нюръяськонэ озьы ик ветлӥзы Глазов но Можга городъёсысь мӧйыос. Мӧйыос пӧлын Удмуртилэн чемпионэз луиз спортъя мастер Владимир Федосеев. Со 9 луоноез пӧлысь 7,5 очко люказ. Очколы бере кылиз спортъя мастер Иоганн Вельтмандер. Куинетӥ интые потӥз Быдӟым Отечественной войнаысь ветеран, мастере кандидат Владимир Иванов. Со 6 очко люказ. 55-60 аресъем ӵошатскисьёс пӧлын вормисе потӥз акциосын "УНГС-Город" огазеяськонысь инженер, мастере кандидат Юрий Клейменов. Солэсь ӝыны очколы бере кылиз мастере кандидат Вячеслав Пикулев. Куинетӥ инты басьтӥз ТЭЦ-ысь машинист Александр Кузнецов. Шудонэ пыриськиз 4 кышномурт но. 5,5 очко люказ тренер, Удмуртилэн трос пол чемпионкаез Маргарита Комышева. Ӝыныезлы ӵошатскисьёслы кузьымъёс сётэмын вал. Кузьымъёс дасяз Внешторг-банклэн Ижевскысь филиалэзлэн юрттэмез улсын. Озьы ик нимаз призъёс басьтӥзы Глазовысь Михаил Измайлов но Альберт Закиров. И. ШАХОВ. Ма сярысь гожъязы газетъёс 80 ар талэсь азьло 1919 арлэн кутсконаз, ныырсетӥ кварталэ, удмурт калыклэн азьветлӥсьёсыз асьме калык пӧлын бадӟым валэктон уж нуизы. Сое шӧдоно "Гудыри"газетлэн бамъёсысьтыз но. Граждан ож пуромемен валче, Россиысь трос улосвылъёс тӧдьыосын басьтэмын вал, Колчаклэн войскоосыз асьме доры но матэ вуо. Соин ик ожъёс асьме доры вуэмлэсь азьло татысь большевикъёс Совето властез юнматыны , удмурт калыкез сайкатыны дыртӥзы. Национальной ужъёссыя Калык комиссариат кылдэм бере, Удмурт отделэн кивалтыны пуктэмын вал Максим Прокопьевич Прокопьев, политика ласянь одӥгез бадӟым ужась. Со удмурт калыклэн Москвае ужаны ыстэм муртэз луиз. Выль 1919 арлы со бертӥз Малмыже. Татын 14-16 январе ортчиз уездысь удмурт калыкез югдытон вылысь пӧртэм докладъёс лыдӟемын но эскеремын вал. Валтӥсь докладэз - Малмыж уездысь калыкез дышетонъя отделэн кивалтӥсьлэн Ф. Н. Шкляевлэн. Вераськон мынӥз туала вакыт но калыкез дышетонысь лэчыт ужпумъёс сярысь. Озьы ик туж лэчыт докладъёс лыдӟиз, соку Малмыжын ужась К. П. Чайников (Герд). Докладъёс ӟуч кылын лыдӟемын вал, делегатъёс соослэсь пуштроссэс удмурт кылын сётыны ӵектӥзы "Гудыри" газетын но озьы ик пичи книгаен поттыны. Съездлэн делегатъёсызлы К. П. Чайниковлэн "Люгыт сюрес вылэ" пьесаезъя удмурт кылын спектакль пуктӥзы. Герд отын ачиз ик артист но, режиссер но вал, та спектаклез бӧрысьгес мукет интыосын но пуктӥзы, кылсярысь, Цыпья но Выль Мултан черкогуртъёсын. Делегатъёслэсь съезд сярысь малпанъёссэс "Гудыри" вӧлмытӥз 4 но 8 феврале потэм номеръёсаз. "Табере мынам синъёсы усьтськизы, съездэз радъясьёслы бадӟым тау", - та выллем кылъёс газетын трос гинэ вал. Озьы ик нимысьтыз тау каризы спектакль пуктӥсьёслы. Та съездын удмурт калыклэн визьмо пиосыз М. Прокопьев но К. Чайников ог-огенызы рос-прос тодматскизы, куспазы трос кенешизы. ("Гудыри", 1920, 19 июне) собере кыксы но кылбурчиос вал ук, ог-огзэс ӟеч валазы. Малмыж уездысь удмурт дышетӥсьёслэн ӧтчамзы решение кутз вань удмуртъёслэсь ИИ ӧтчамзэс люканы. Сое умлен лыдъязы Война губерниысь пичи калыкъёслэн ӧтчамазы но. Делегатъёс люкаськыны малпало вал Сарапулэ. Но, Колчак матэ вуэмен, тросэз мыныны ӧз быгатэ, ӧтчамлы ужаны туж секыт но кышкыт вал. Съезд ортчиз М. Прокопьевлэн вордскем палъёсаз Нырья гуртын 1919 арын 30 мартысен 4 апрелёзь. Вераськизы удмурт кылын. Эскероно ужпумъёс трос вал: национальной ужпум, Горд Армилы юрттон, культураез, гурт хозяйствоез азинтон, налог бичан, инмарлы оскон ласянь кенешон, удмурт кылэз дышетон но мукетыз. Но валтӥсь ужпум вал - удмурт кун кылдытон. Но съездлэсь решениоссэ соку ик пыр-поч быдэсъяны тушмон ӧз сёты: Совето власть тыл кульчое шедиз. Мар толэзе, Советской республикаын туж бадӟым кышкытлык кылдэмен, М. П. Прокопьев куриськиз фронтэ. 1919 арын июле Кунгур дорын Колчаклэн войскоосзылы пумит лек ожмаськон дыръя Максим Прокопьев бырыны шедиз. Удмуртлыкез утён ласянь со тужгес но кужмоез вал шуыса, "Гудыри" соку но, вуоно аръёсы но трос гожъяз. Али гинэ национальной героймы историкъёслэн тодазы трос уг лыктылы ни кадь. Л. ФЕДОРОВ. Пичи пургаослы но сизьымдон Туэ ми, пичи пургаос, пусйиськомы ёросмы кылдэм дырсен сизьымдон ар тырмонэз. Соин ик тросэз ужрадъёсмы герӟаськемын туннэ та бадӟым но дано лыдпусэн. Районамы удмуртъёсын артэ уло поръёс, ӟучъёс, бигеръёс. Соин ик валтӥсь ужпумъёсмы пӧлысь одӥгез таӵе: юрттоно та калыкъёслэн аспӧртэмлыко сямъёссылы-йылолъёссылы азинскыны. Таин валче та уже тодосчиосты, гожъясьёсты кыскаса чакламын Пичи Пурга ёросын улӥсь калыкъёслы сӥзем научно-практической конференциос ортчытъяны. Удмуртъёслы сӥзем ужрад вал ини. Мукетъёсыз азьланьын луозы на. Гурт интеллигенцилэн адямиез ӟеч сямъёслы дышетонын интыез сярысь вераськон мынӥз алигес ортчем научно- практической конференциын. Арлы быдэ радъялляськом удмурт, бигер, пор но ӟуч культураослы сӥзем шулдыртӥськонъёс. 25-тӥ мартэ ёрос культура юртамы вал фольклор ӝыт. Отчы пыриськизы районысьтымы фольклор коллективъёс но Воткалась удмурт лулчеберлыкъя дэменлыкысь аспӧртэмлыко адямиос. 26-тӥ мартэ Яган посёлоке люкаськылӥзы бигер искусствоез яратӥсьёс - ортчиз татын бигер культуралы сӥзем праздник. Трос лэсьтэмын но лэсьтӥське Пичи Пурга районлэсь ортчем сюрессэ возьматӥсь книга но ёрос музей кылдытон ласянь. Та юртэз усьтыны чакламын инвожо толэзе районлэн кылдэмез дырысен сизьымдон ар тырмонлы сӥзем ужрадын. Райбиблиотекаямы интыяськем удмурт культурая центрын ялан ортчыло ёросамы вордӥськем но будэм дано адямиосын пумиськылонъёс. Туэ, кылсярысь, дорамы вуылӥз аспал эшмы - кылбурчи но журналист С. К. Карпов, ортчытӥмы Пужей-Уча гуртысь библиотекаен кивалтӥсьлы, Удмурт Элькунысь культура удысысь дано ужасьлы Р. К. Евсеевалы сӥзем ӝыт. Туж нимо-дано луо ёросысьтымы ас кожазы ужась суредасьёслэн адӟытонъёссы, озьы ик - Вуж Моньялась киужлы дышетонъя юртысь адямиослэн ужъёссы. Ас кожазы ужась суредасьёс В. Д. Боталов, А. Н. Викулин, со сяна, гуртысь клубъёсы но библиотекаосы ёросамы улӥсьёсын пумиськылонъёсы потало, соосты чеберлыкен тодматъяло. Бадӟым инты висъяськом семьяосын ужанлы - валче тыршиськом ёрос кивалтэтысь семьялэн но егитъёслэн ужпумъёсынызы вырись отделъёсын. Ортчытъяськись ужрадъёс пӧлысь тужгес пусйымонъёсыз - Анайлэн нуналэз, туала кышномуртлы сӥзем ӝытъёс (татын мадьылозы тужгес тунсыко улон сюресъёс сярысь). Азьланяз тодматыны чакласьком ёросэнымы сизьымдон ар ӵоже кивалтэм адямиосын. Куд-ог эштосъёсын ортчизы гуртъёслы сӥзем праздникъёс. Тужгес тунсыкоез вал Бобья- Учалан. "Валче улом быдэс даур" нимаськиз со. Тужгес мыло-кыдо радъяськизы районысьтымы тазалыкез утён удыслы сизьымдон ар тырмонлы но Иваново-Самарск гуртысь культура юртлы куамын ар тырмонлы сӥзем ужрадъёс. А. ЕФРЕМОВА. Доллар бергалоз азьланяз но Россия Федерацилэн улосвылаз кунсьӧр валюталэсь ветлонзэ сюбегатон "пайдаен берытскоз соослы, кин малпа сыӵе амалэн бадӟым барыш поттыны. Одӥгъёсыз валютаез тросэн басьтыны тыршозы, мукетъёсыз - вузаны". Озьы вераз "Эхо Москвы" радиостанцилы Центральной банклэн тӧроез Виктор Геращенко. Нокин но, Дума но, закон сяна, валюталэсь бергамзэ дугдытыны уг быгаты, - шуиз со. "Центральной банкын возиськись зарнилэн быдӟалаез берло куинь толэзь куспын кӧня ке кулэсмиз, - валэктӥз банкир, - государстволэсь пунэм тыронъёссэ берыктытэк уг луы. Тыршиськом долларлэсь дунзэ огсыр возьыны". Иворъёсъя национальной служба. Дауръёс вискысь ымныр Ортчиз министертствоосысь но Правительствое пырись ведомствоосысь кивалтӥсьёсын кенешон. Эскеремын пӧртэм ужпумъёс: Кун Кенешлэн нырысетӥ сессиез мыныку Правительстволэн ужан радлыкез, республикае чабей, эстӥськон, удобрение басьтон, уждун но пенсиос тырон, егитъёсты армие келян, адями но пудо висёнъёсын нюръяськон. Ортчем арняосы вал умойтэм учыръёс но: газэн гумы пуштӥз, Удмурт кун университетлэн юртаз тылпу гомӟиз, электроезъёсты лушказы. Вераськон мынӥз соослэсь бервылъёссэс палэнтон сярысь. Кенешонэз йылпумъяса, Правительстволэн Тӧроез шуиз: - Асьмеос берло аръёсы ӵош вал. Мыным кельшиз тӥледын ӵош ужаны. Югдурез валаськом. Ӝутскыны ӧм кутске, нош куашканэз дугдытӥм. Нырысетӥ кварталэ куд-ог азинсконъёс вал. Мылкыдмы умой. Тӥ мыныны кулэ Кун Кенешлэн сессияз. Отын тодмо луоз дауръёс вискын республикамылэн ымнырыз. Ӧз чалмылы эктон-тыпыртон "Ныргындыш сем" мари ансамбльмылы тырмиз 15 ар. Та дыр куспын со вуылӥз Удмуртие, Татарстанэ, Башкортостанэ, Коми, Марий Эл республикаосы, Киров но Пермь областьёсы, Эстоние. Кытын гинэ ӧй вал, артистъёсмы шоры паймыса учкылӥзы, выльысь доразы ӧтьылӥзы. Нош та юбилеймес пусйыны Ныргында селоямы люкаськизы пиналэз но, мӧйыез но, кин азьвыл кырӟаз-эктӥз ансамблямы. Со сяна, лыктӥзы трос куноос, соос пӧлын - Кун Кенешлэн депутатэз О. Л. Кузьменко, "Одо марий ушем" огазеяськонлэн огез кивалтӥсез А. И. Радыгин, Каракулино ёрос администрациысь кузёос. Ижевскысь вуиз милям пичи сузэрмы - егитъёслэн "Ош пеледыш" ансамбльзы. Ныргындаысь артистъёсмы тросэз пусъемын почёт грамотаосын, кузьымъёсын. Нош кӧня тау каронъёс, ӟечкыланъёс вал та ӝытэ. Пыдпыдэсъёс ӟырдамон тыпыртонъёс, эктэмъя лопыръясь дэремъёс шумпоттӥзы синъёсыз. Оло, ӟардытозь ӧз чалмылэ крезьгуръёс. Нош ваньзэ сое берло адӟыны луиз туспуктэмъёсысь, озьы ик Удмурт но Мари телевидение возьматэмысь. Р. ТОКМУРЗИН. Правительствоысь иворъёс Удмуртиысь Правительстволэн кивалтӥсезлы Павел Вершининлы Россия Федерациысь Огъя но шор профессиослы дышетонъя министерствоысь тау карон гожтэт вуиз. Отын Правительстволы ӟеч кылъёс верамын, вуоно кивалтӥсьёсты будэтонэ мылысь-кыдысь пыриськемез но Россиысь дышетскисьёслэсь олимпиадазылэсь зоная турзэс умой ортчытыны юрттэмез понна. Биологияя но химияя олимпиадаосты быгатыса дасямзылы но ортчытэмзылы вылӥ дунъет сётыса, гожтэ Россия Федерациысь огъя но шор профессиослы дышетонъя министрлэн нырысетӥ воштӥсез Александр Киселёв, мур тау кареммес вераськом Правительстволэн кивалтӥсезлэн воштӥсезлы, калыкез дышетонъя министрлы Антонина Лисиналы, министрлэн нырысетӥ воштӥсезлы Галина Васильевалы, Удмурт кун университетлэн ректорезлы Виталий Журавлевлы, Ижевскысь техникая кун университетлэн ректорезлы Иван Абрамовлы. Удмурт Республикаысь Правительство тау каре олимпиадаез радъясьёслы - ИжГТУ-ысь профессорлы Владимир Кодоловлы, УдГУ-ысь доцентлы Николай Зубцовскийлы но преподавательлы Юрий Тюлькинлы. *** Акциосын "Чепецкий механический завод" огазеяськонын кылем арлы йылпумъянъёс лэсьтонъя комиссия ужаз. Коньдон ужпумъёсъя югдурез тупатонэ но предприятиез азинтонэ пыриськозы акциосын "Твэл" огазеяськон, Россия Федерациысь Атомэнергиез уже кутонъя министерство, Удмурт Республикаысь Правительство. Правительстволэн Тӧроезлэн нырысетӥ воштӥсез Александр Злобин кенешын пусйиз, республика 2-тӥ ТЭЦ-ез но чылкытатӥсь сооружениосты выльдонэ коньдон висъялоз шуыса. *** Удмурт Республикаысь Правительство Удмуртпотребсоюзлэн правлениеныз ӵош дасяз но ёросъёсысь потребительской обществоослы ыстӥз калыклэсь йӧлзэ но сӥльзэ басьтонъя заданиос. Огъя элькунмыя туэ басьтыны чакламын 10 сюрс тонна йӧл но 6 сюрс тонна сӥль. Со сяна, калыкен огкыл гожтэмын луоз картофка басьтонъя но парсьпи будэтонъя. Парсьпиосты басьтыны луоз Удмуртпотребсоюзлэн ёзъёсыз пыр. *** Республикаямы вузкаронэз но калыкез сюдонэз умоятон но та удысэн выль амалъёсты пыӵатон вылысь, туэ со предприятиос пӧлын смотр-конкурс ялон сярысь ужпум кутэмын. Сыӵе ужрад ортчиз кылем арын но. Вузкарон удысын нырысетӥ интыосты басьтӥзы Ижевскысь витез, быдэн кык Воткинскысь но Завьяловоысь магазинъёс. Вормисьёс радэ потӥзы Глазовысь, Сарапулысь, Селта, Кез, Якшур-Бодья, Сюмси, Игра но Каракулино ёросъёсысь быдэн одӥг магазинъёс. Калыкез сюдон предприятиос пӧлын вормисен лыдъямын Ижевскысь "Браво" кафе, Воткинскысь "Дорожное" кафе, "Глазов" ресторан, Кез райполэн шор столовоез но Вавож селоысь столовой. Удмурт Республикаысь Правительстволэн Председателезлэн секретариатысьтыз пресс-центр. Газ пуштӥз Кылем кӧс нуналэ, 17 апреле, нуназе Сарапул ёросысь Яромаска гурт вӧзысь газ сётон трасса вылын шутдэм учыр луиз. Тулыс музъем "шудэмен" гумыысь газ потыны кутскиз но тылпу потӥз. Со интые ӝегатскытэк Удмурт Республикаысь Граждан оборона ужпумъёсъя но кышкыт учыръёслэсь утиськонъя комитетын но Югдурез утёнъя министерствоын ужасьёс вуизы. Сарапул-Нечкино сюрес огдырлы пытсамын вал. Кык задвижкаос куспысь газ бырытозяз ӝуаз ог ньыль час пала. Собере тылпу кысэмын вал. Али трасса вылын тупатъян ужъёс мыно. Шудтэм учырлэн изъянэзлэн быдӟалаез тодмо ӧвӧл на. Н. ЛЯЛИН. Тӥледыз кылзэ Наталья Кузнецова Таяз арня куспын редакция меӵак телефон пыр кенешон радъя калыкез улон-вылонын утёнъя министрлэн воштӥсеныз Наталья Федоровна Кузнецоваен. Пенсиос, пособиос, калыкез улон-вылонын утён ужпумъёс пумысен юанъёстэс сётыны быгатоды 22 апреле 15 часысен 17 часозь 444-100 номеро телефонъя. "Удмурт дунне". ВОЗЬМАТӤСЬКОМ УСТО ПРЕДПРИЯТИОСТЫ Татын будэто ӟазег Шаерамы тылобурдо вордӥсь предприятиос пӧлысь одӥгез устоез, огсыр умой ужасез лыдъяське "Глазовская" фабрика. Удмуртиын со гинэ ӟазег вордэ, но вуза. Калык но хозяйствоос продукцизэ шумпотыса басьто. Татчы бускельёс но лыкто. Фабрикалы туэ январе 25 ар тырмиз. 1971-тӥ арын сое лэсьтыны кутскиз Георгий Александрович Суставов. Со дырысен ик, фабрикаен кивалтэ, вань ужъёсты быгатыса радъя. Ӟазег ферма кык интыын ужа: одӥгез - городын, мукетыз - Каменное Заделье гуртын. Малы бен татын ӟазег вордыны ӧдъязы? Та удыс борды Георгий Суставов басьтӥськиз 1976-тӥ арын. Гурт калык, пе, туж шугъяське ӟазег пи шедьтыны. Озьы выль ужзы пӧрмиз, мур выжы лэзиз. Георгий Александрович нырысь синйылтӥз Балезино районысь Битчимшур куштэм гуртэз. Отысь аналтэм гидэз выльдӥзы-черезизы, собере выльёссэ ӝутӥзы. Зэм, нырысь-валысь капчи ӧй вал, но кутскем ужзылэсь ӧз куштӥське, пумен паськытатӥзы. Озьы фабрика али 10 сюрс ӟазег вордэ. Котькуд мумы ӟазег араз шорлыдын 44 пуз сётэ, нош нырысетӥ аръёсаз 17-23 пуз гинэ басьтылӥзы. Пумен дышизы, опыт люказы, табере нормая 65 процент интые 70 процентлэсь уноез ӟазег пиоссы ӵогисько. Та лыдпус туж умой, мукет интыосын со 45-50 гинэ. Кызьы бен сыӵе азинскон басьто? Ваньмыз потэ ӟазегъёсты ӟеч сюдэм бордысь. Асьсэос арлы быдэ 1200 тонналэсь ятыр витаминъёсын узыр турын пызь изо-дасяло. Со быдэс арлы тырме. Сиён пӧлазы ӵуж кушман но ватсало. Вордо одӥг рейнской выжы ӟазег, соос быдэсак тӧдьыесь, ныръёссы но сыӵеесь ик. Специалистъёслэн верамзыя, сьӧдъёсызлэн, пе, сӥльзы сокем ческыт уг луы, шыд лымез но сьӧдгес потэ. Соин ик фабрикалэсь ӟазег пиоссэ вожмаськыса басьто. Асьсэос нимаз дасям машинаен нулло Иже, мукет районъёсы, нош Киров, Пермь областьёсын, Татарстанын но Башкортостанын улӥсьёс, азьло курон (заявкаос) сётыса, Глазове доразы лыкто. Туэ гинэ 130 сюрслэсь уно ӟазег пи вузазы ни. Одӥгез али 23-27 манетэн кошке, но азьланьын, пе, дуногес луоз. Городысь ӟазег фермаен дас витетӥ арзэ кивалтэ ни Людмила Дитятьева. Нырысь со пудо сиён складын ужаз, ваньзэ 23 ар ни татын. Быдэс фермалэсь ужзэ та вакытэ 10 мурт бергатэ. Тужгес но синмаськымон тырше Зоя Чиркова. Али со ӟазег пиосты сюдэ- утялтэ, нош толалтэ - мумыоссэ. Уже автобусэн нулло, гужем толэзяз 1000 манет уждун дыраз басьто. Фабрикаын усто ужасьёссы трос. Тани Алевтина Кельдышева предприятие усьтӥськем дырысен 25 ар ужа ни. Али ӟазег пиос вуза. Маин бен ӟазег пиосты сюдо? Нырысь курег пуз сёто, собере - комбикорм, пӧлаз ватсало изэм кукуруза но йыды. Татчы ик интыяськемын фабрикалэн инкубаторез. Соин валаса кивалтэ вылӥ образованиен зоотехник Гулия Касимова. Инкубатор арлы быдэ ичизэ 222 сюрс ӟазег пи поттэ. Гулия Сафиулловна 1972-тӥ арын Ижысь гурт хозяйствоя институтэз быдтӥз. Кык ар ужаз Глазов районысь гурт хозяйствоя управлениын, нош 1974-тӥ арын татчы лыктӥз, чипыосты будэтонъя бригадир луиз, 5-тӥ арзэ инкубатор цехлэсь ужзэ радъя ни. - Уже капчи ӧвӧл, - шуэ Гулия Касимова. - Ваньзэ юн чакласа возёно, сотэк уно чипы-ӟазег пи уд басьты. Мыным ӟеч юртто операторъёс Светлана Касимова но Юлия Щепина. Фабрика ӟазег пуз но вуза, одӥгез 15 манет сылэ. Туэ 7,5 сюрс сётӥзы ни. 1200- 1300-зэ нимаз адямиос басьтӥзы. Инкубатор уй но нунал ужа. Операторъёс быдэн 12 час вошъяськыса тыршо. Али бадӟымесь корт шкафъёсы 123 сюрс ӟазег пуз тыремын, виссы 3 нунал. Толэзь ортчыса, озьы ик ӵогисько но. Фабрикалэн 360 сюрс пузась курегез, нош чипыосын ӵош - 600 сюрс. Араз куреглы быдэ 250 курег пуз басьто. Ужасьсы 780 мурт. Курег вордон пайда сётэ. Со чотын ик ӟазег возьыны быгато. Фабрикалэн валтӥсь зоотехникез луыса 14 ар ужа ни Галина Пономарева. Солэсь азьло 10 ар зоотехнической лабораториен кивалтӥз. Татын 24 ар ни. Нош валтӥсь экономистлэн Александр Кропачевлэн вань лыдпусъёс йыраз, ас ужзэ ӟеч тодэ. Производствоез нуэ директорлэн воштӥсез Хамид Щабаев. Геннадий Романов. Ӟазег пиосын Алевтина Кельдышева. Туспуктэмъёсыз Владимир Беломорскихлэн. Ас музъемедлэн шунытэз Оштолэзьлэн нырысетӥ нуналаз Дэбес ёросысь Ниж. Пыхта гуртын ортчиз тодмо журналистлы, кылбурчилы Милитина Гавриловалы сӥзем ӝыт. Та гурт "Урал" колхозлэн центральной усадьбаез луэ. Отчы ик пыре М. Гавриловалэн вордскем гуртэз Роготнево но. Татысь улӥсьёсты Ниж. Пыхтаысь клубе автобусэн ваизы. Та пала уг вуыло, шуыны луоз, писательёс, кылбурчиос, суредасьёс, артистъёс. Соин ик та пумиськон калыклэн улоназ маке но выльзэ ваиз. Гуртазы будэм нылэн адскыны вуизы азьвыл тодмоосыз, эшъёсыз но, тодмотэмъёсыз, егитъёс но. Милитина Васильевна мадиз Удмурт радиоын дикторын ужамез, литературно- драматической редакциын "Арня ӵукна" радиожурналэз лэсьтонын тыршемез, уно адямиосын пумиськылэмез сярысь. Лыдӟиз аслэсьтыз но мукет поэтъёслэсь кылбуръёссэс. Ниж. Пыхтаын вордскемын азьвылэз культурая министрмы А. П. Сидорова, гуртоосызлы со шуныт кылъёссэ вераз. Калык азьын озьы ик вераськиз история наукаосъя доктор К. И. Куликов. Дуно кунооссы понна пыхтаос дасяллям пӧртэм кутэмняньёсын, шаньгиосын, вӧйын пӧзьтэмен, сылалтэм губиен но мукет ческыт сиён-юонэн ӝӧк. Нош Милитина Гаврилова вордэм калыкезлы кузьмаз ас библиотекаысьтыз 140 книгазэ. Дор палъёсыз жалямзэс веразы, ас пал нылзылэн куараез радио пыр ӧжыт-ӧжыт гинэ чузъяське на шуыса. М. В. Гаврилова тау каре Дэбесысь культурая ёзэн кивалтӥсьлы Н. В. Докучаевалы, Ниж. Пыхта администрацилэн тӧроезлы А. И. Роготневлы, ӝытэз нуисьлы Р. Ф. Трониналы, клубын ужасьёслы, кырӟасьёслы, Омелетысь, Коморысь, Н. Пыхтаысь, Дэбесысь улӥсьёслы, кин ветлӥз та ӝытэ. Озьы ик оске выль пумиськонъёслы. А. КОМАРОВА. Инкуазь юрттэмез возьма Котырысь инкуазьлэн кырсёмемез - туала обществолэн ялан висись яраез, бадӟым сюлмаськонэз. Кырсь-пож музъем, омыр, ву адямилэсь тазалыксэ сӧро, пӧйшуръёсты, будосъёсты быдто. Со вакытэ ик асьмеос дышиськом утялтымтэ азбаръёслы, ульчаослы. Нош котырысь вань кырськурез сюлэмъёсамы каръяське, ваньзэ ӟечсэ, ненегзэ йыръе, куашкатэ. Югдурез ӧжыт ке но тупатон понна, быдэс Россиын куатетӥ арзэ ини ортчо Экологической кышкытлыклэсь утиськонъя нуналъёс. Туэ соос 20-тӥ мартысен 5-тӥ июнёзь кыстӥськозы. Удмуртиысь та нуналъёсты радъясь комитет вань калыклы, кивалтӥсь ёзъёслы вазиськиз, котькуд предприятиын, гуртын, городын экологической югдурез умоятонъя ужрадъёс ортчытыны, пиналъёс, егитъёс пӧлын валэктон уж нуыны курыса. Азьпалан асьмеды витё: 22-тӥ апреле - Музъемлэн нуналэз, 26-тӥ апреле - радиационной авариосын быремъёслэн нуналзы, 1-тӥ июне - нылпиосты утён нунал, 5-тӥ июне - котырысь инкуазез утён нунал. Та нуналъёсты быдэс дуннеын пусъё, тодын возён понна: инкуазь юрттэмез кулэ каре шунды ӝужамлы быдэ. О. ВАХИТОВА. КУН КЕНЕШЫН Кинлы оском, кинэ быръём? Туннэ, 20 апреле, усьтӥське Удмурт Республикаысь Кун Кенешлэн кыкетӥ созывезлэн нырысетӥ сессиез. Вис карем бере, сессиосты ортчытъян зал нош ик калыкен тырмиз: вуизы выль быръем депутатъёс. Соос азьвылаз созывын мында - 100 мурт. Эскероно ужпум одӥг: Удмурт Республикалы кивалтӥсь быръён. Ньыль арзэ та секыт удысэз нуиз Кун Кенешлэн Тӧроез Александр Александрович Волков, Правительствоен кивалтӥз Павел Николаевич Вершинин. Кыксы но улонэз валась, ужаны быгатӥсь, калыкез сьӧразы валтыны вормись адямиос. Парламентэ быръемъёслы оскемын бадӟым уж: соослэн сётэм куаразы бордысь потоз Удмуртилэн, котькудмылэн асьмелэн улон-вылонмы. Озьыен, кин матысь ньыль арзэ кивалтоз шаеренымы: Волков, Вершинин яке чылкак выль нимъёс-а? Ум туналэ. Чидалом на туннэ ӝытозь, сессия ужзэ йылпумъятозь. Нош 20 апрель, озьы-а, тазьы-а но шаермылэн историяз весяклы пыриз ни. Л. Медведева. НЮЛЭС БУДЭ Россиын устоез Ошмесо шаерамы арысь аре паськытало нюлэсъёсмы. Со шумпотымон но вормон инмысь уг усьы, кожаз уг лыкты. Азинсконъёс пото республикаысьтымы Нюлэс хозяйствоя министерстволэн но вань лесхозъёслэн тыршемзы бордысь. Тани нюлэс мерттонэн, будэтонэн, утялтонэн но утёнэн герӟаськем ужъёс 70 процентэз механизировать каремын, нош Россиын чылкак 20 процентэз гинэ. Та удыс арлы быдэ мултэсэн быдэсъя нюлэс мерттонъя планзэ. Али шаерамы 253 сюрс гектар кыз но пужым мерттэмын ни. Россиын асьмеос куинетӥ интыын мынӥськом. Шаерамы 28 питомник усьтэмын. Со пӧлысь 7-езлы вылӥ культураен ужась ним сётэмын. Быдэс Россиын 70 сыӵе питомникъёс, озьыен 10 процентэз - асьмелэн. Берло дыре нюлэс хозяйствоос ужазы выль амалъёсты куто, нюлэс коран интыосты аукцион пыр вузало. Озьы соос ватсаса уксё потто. Миым, кылсярысь, 9 миллион манет люкаськиз. Со сяна, 22 тонна губи дасязы, 87 центнер чечы кыскизы, 2 сюрс тонна турын люказы, эмъюм турынъёс октӥзы но мукет. Лесхозъёс берло аръёсы сюрес дуръёстӥ нюлэс мерттыны ӧдъязы. Миым 470 гектар лэсьтӥзы. Республикаямы 19 лесхоз но 109 лесничество ужа. Соос азьын одӥгез бадӟым ужпум - нюлэсэз утён. Кылем арын тани нюлэскын 175 пол тылпу поталляз, 135 гектар тэль ӝуаз. Нюлэскын тылпуэз ӝоггес шедьтон но кысон вылысь, министерство аэроклублэсь вертолётсэ кутылэ. Калык но юрттэ. Малы бен тэльын тыл потэ? Ваньмыз сямен нюлэскы ветлӥсьёсын герӟаськемын (тамак пумзэс кысытэк кушто, тылскемзэс уг кысо но мукет). 1997-тӥ аре Россия нюлэсъя кодекс кутӥз. Но сое улонэ пыӵатон понна, эшшо 25 нормативной актъёс кутоно на, асьмелэн 18-эз юнматэмын ни. Постановление кутэмын пограм писпуэз калыклы дунтэк сётон сярысь. Ожысь но ужысь инвалидъёслы озьы ик дунтэк нюлэс висъяське. Нош кин шудтэм учыре шеде, коркаез ӝуа ке, солы 50 кубометр нюлэс сётӥське, нош юртсэ тупатъяны - 30. Мар бен та удысэз сюлэмшугъяськытэ? Нырысь ик, городлэн нюлэсъёсыз. Соос федеральной ваньбуре пыро, нош выжтоно вылэм муниципальной ваньбуре. Кыкетӥез, сыӵе ик югдур колхоз нюлэсъёсын. Гурт хозяйствоослы кӧня ке нюлэс висъямын вал 1932-тӥ арын. Нош 1965-тӥ арын кылдытэмын вал межколхозной лесхозъёс. Табере соосты уд шедьты ни. Али куд-огез эштосъёс, крестьян хозяйствоос асьсэ нюлэсъёссэс но уг тодо ни. Соослы али лэзьымтэ коммерческой ёзъёслы нюлэс вузаны. Нюлэс хозяйствоя министерство сюлмаське аслыз кадръёс дасян сярысь. Ижысь гурт хозяйствоя академиын кылдытэмын нюлэс но нюлэс паркъя факультет. Али отын 75 мурт нуназе дышетске, нош 120-ез заочно. Берлоосыз пӧлын ваньмыз сямен мастеръёс но лесничийёс. Вуоно арын нырысетӥез выпуск луоз. Екатеринбургын, Йошкар-Олаын дышетскемлэсь, Ижевскын данаклы умойгес. Шаерамы озьы ик паськытало школаосын лесничествоос. Соослы 4 сюрс гектар музъем сётэмын. Соос ӵыжин бичало, нюлэс мерттыны юртто но музон ужъёсты быдэсъяло. Но самой умоез - нылпиос пичиысен нюлэсэз, инкуазез яратыны кутско но та удысэ ужаны лыкто. Али нюлэсчиослэн нянь будэтӥсьёслэн сямен ик кысык дырзы матэктэ - нюлэс мерттон но сое утён. Г. РОМАНОВ. Юрий Трефиловлы - 50 Совето аръёсы газетмылэн трос эшъёсыз но собкоръёсыз пӧлысь одӥгез висъяськисез, тузӥӥез вал Юрий Трефилов. Газет бамъёсын со туж яркыт возьматъяз Яр, Глазов котырын улӥсьёслэсь улэм-ужамзэс. Редакциысь котькуд отделын Юрий Афанасьевичлэсь гожъямъёссэ шумпотыса киязы куто но чик ӝегатскытэк секретариатэ келяло вал. Толэзьлы быдэ ортчылӥсь летучкаосы (кенешъёсы) редакцие вань собкоръёс люкаськылӥзы. Юрий Трефиловлэн песьтэрез ваньмызлэсь "секыт" луэ, котькуд отделэ материал вуттэ вал. Туннэ Юрий Афанасьевич юбилейзэ, 50 арес тырмонзэ, пусъе. Ӵош ужам эшъёсыз но егит журналистъёс ӟечкылало сое вордскем нуналэныз. Мылкыд кариськом ӟечсэ гинэ, таза лу, гожъямъёстэ но возьмаськом. Г. РОМАНОВ. КЕНЕШОНЪЁС Оскиськом: Россия ӝутскоз! Странамы дасяське кык бадӟым политической ужрадлы: парламентэз но Президентэз быръёнлы. Вуоно даурын Россиен кивалтыны мылкыд карисез ӧжыт ӧвӧл: кылдо выль огазеяськонъёс, партиос, движениос. Огез соос пӧлысь - "Отечество". Кивалтӥсез - Москва городлэн мэрез Ю. М. Лужков. Солэн ёзъёсыз ужало ни ваньмаз сямен регионъёсын; Удмуртиын кивалтэ А. А. Волков, воштӥсез - Е. Н. Орлов. Кылем пятницае шаерысьтымы та огазеяськонлэн кыкетӥ конференциез ортчиз. 21 районысь кенешонэ вуэм делегатъёс ӟырдыт вераськизы республикаын но странаын, дуннеын кылдэм туала экономической но политической югдур пумысен. Доклад лэсьтӥз А. А. Волков. - "Отечество" азьын сылӥсь ужпумъёс пӧлысь валтӥсез луэ Россилы Президент быръён, - пусйиз докладчик. - Асьмелы вань быгатонозэ лэсьтоно, туала реформаторъёсты власть бордысь палэнтон понна. Удмуртиын быръёнъёс дыръя выль огазеяськон кужымзэ возьматӥз ини: солэн радъёсаз пыремъёс пӧлысь 42 мурт Кун Кенешлэн депутатэз луиз. Табере огкылысь кутскыса ужано Россилы Кун Дума но Президент быръён бордын. Дыр вуэмын дэмен ӝутскыса, странамес быронлэсь утьыны. Россиысь арлы быдэ 20 миллиард доллар кунгож сьӧры кошке. Промышленностьлэн кужымез ӝыныез но уг кутӥськы: заводъёс пӧлысь 35 процентэз йӧскадь уг ужа. Гурт удыс быдэсак аналтэмын. "Отечество" чакла странаен кивалтонэ визьмо, быгатонлыко адямиосты пуктыны но экономикаез ӝутон борды юн-юн басьтӥськыны. Делегатъёс эскеризы "Отечестволэн" Програмаезлэсь инъетсэ. Конференцие лыктэмъёс пӧлысь ас мылкыдзэ, малпанъёссэ вераз ог дасо делегат. Соос плын "Ижевский механический завод" производственной объединенилэн валтӥсь директорез В. С. Чугуевский: - Асьмеды Россилэн кивалтӥсьёсыз кык пол пӧязы ни, - шуиз со. - Нырысь ик, 1917 арын, кыкетӥзэ - 1991 арын. Большевикъёслэн партизы трос лэсьтӥз страна, ужась калык понна. Урод-а, умой-а, но 70 ар ӵоже СССР азинскиз, асьмеос оглом урод ӧм улэ. Мар ваизы демократъёс? 4 ар ӵоже ваньзэ куашкатӥзы, асьсэос узырмизы, калыкез начармытӥзы. "Отечество" зарни гурезьёс уг ӵекты, со ӵектэ одӥгзэ: ӟечгес ужаны но ӟеч улоно, кураськытэк, тэльмырытэк, лушкаськытэк. Тырмоз Валютая фондлы йыбыртъяны, шунды пуксён палась гуманитарной юрттэт витьыны. Ужаса гинэ Россилэсь ыштэм данзэ берыктом. З. И. Степнова, акцосын ужась "Сактон" огазеяськонлэн валтӥсь директорез: - "Отечестволэн" радъёсаз монэ пырыны косӥз Россиын кылдэм туала югдур. Статистика шимес лыдпусъёс сётэ: вордсконо пиналъёс пӧлысь 97 процентэз пӧртэм висёнэн курадӟе ни, арысь аре йылэ капчи визьем пиналъёслэн лыдзы. Ӝоген пенсионеръёсмес нокинлы сюдыны луоз - калыклэн лыдыз ялан кулэсме. Оскисько, Россия выльысь ас ӧраз берытскоз но умойгес улыны кутскоз шуыса. Нырысь ик тае ас вылазы шӧдозы бюджет удысын ужасьёс. Конференцилэн ужезъя кутэмын кулэ луись документъёс. "Отечестволэн" кыкетӥ общероссийской съездаз быръемын делегатъёс. Со ортчоз Ярославльын. Л. Медведева. Ваньмыз кылёз адямиослы Алигес вуылын кылдӥз паймымон дуннее, кытын ог-огзэс валаны тыршыса уло, дышетско но ужало быдэ вуымтэ нылпиос но мӧйыос. Солэн адресэз: Удмурт Республика, Воткинс район, Кварса черкогурт, 14 номеро профтехучилище. Азьло аръёсы та училище трактористъёсты гинэ дасяллязы. Нош табере татын нылпиосты сомында ужъёслы дышето - ваньзэ лыдъяны чиньыос ик уз тырме. Кылсярысь, фермерлы дышетскись пиослы татын вить специальность сёто, нош "хозяйка усадьбы" профессилы дышескись нылъёсты дас одӥг пумо ужъёслы дышето. Кин тодэ мар луысал та училищеен, татчы 13 ар талэсь азьло ӧй лыктысал ке выль директор Евгений Аркадьевич Печенин. Со вуытозь, татын олокӧня кивалтӥсьёс воштӥськизы ни вал. Выль директор коллективлэн улоназ олокыӵе но малпанъёсты пыӵатыны кутскиз. Зэм, куд-огез солэн кутсконъёслы шумпотӥзы, мукетъёсыз, вашкала борды кырмиськисьёсыз, кышкатскизы. Мар ватонэз, директорлы пумит меӵак нюръяськисьёс но вал. Но Евгений Аркадьевич востэм сямыныз но котькуд ужзэ йылаз-пумаз вуттэменыз коллективез ас палаз берыктыны быгатӥз. Туннэ татын 440 нылпиосын 146 адями ужа, со пӧлын 40 мастер но 18 дышетӥсь. Директорлэн выль ужан амалъёсыз, коллективе пыӵаса, котькуд дышетскись но ужась понна айдаен берытско. Соин но, вылды дышетӥсьёс но мастеръёс творческой мылкыдын ужало, коллектив азе пӧртэм ӵектонъёсын вазиськыло. Директор коткуд ӵектонэз сак кылзоз, йыраз озьы но тазьы бергатоз но... уже кутыны лэжз. Ачиз ик юрттоз но. Озьы шуак кылдӥз водительлы дышетсиксьёслэн методикая кабинетсы. Нош егит мастерлэн Т. Г. Капиналэн сыӵе методикая кабинет усьтон сярысь малпанэз кык арня куспын быдэсмиз. Табере кабинетъёс пӧлысь со тужгес но устоез (кивалтэ З. П. Ложкина) луэ: И-тӥ инты республикаос пӧлын басьтӥз но ИИ-тӥ инты - Россиын. Татчы асьсэлы юрттэт басьтыны тужгес но ӵем вазиськыло мастеръёс. Пӧртэм профессиосъя татын туж узыр материал люкамын бере, татчы ӵем вуыло мукет училищеосысь ужасьёс но. Кварсаысь училищеын киномеханикъёсты уг дасяло. Озьы ке но , та уж котькуд дышетскись пиослы тодмо. Ас ужзэ ӟеч тодӥсь-валась мастер Н. Г. Дубовцев араз 600- 700 киноурокъёс сётэ. Кино возьматъян залын пиналъёс видеофильмъёсты но учкыны быгато. Компьютеръёс трос люкаськемен, нимысьтыз методика кабинет но усьтоно луиз. Училищелэн хозяйствоеныз тодматскон понна трос гинэ дыр кулэ луиз. Вань адӟемемын паймыса кылим. Татын нылпиосты сыӵе киужъёслы дышето, кудъёсыз мукет училищеосын малпанын но ӧвӧл. Кылсярысь, туннэ татын гинэ гур пуктӥсьёсты но пыдкутчан вурисьёсты дасяло, татын гинэ кулэсь дӥськут вурыны йӧндыро. Нош алигес тани куиськон станок но басьтӥллям. Йӧспӧртэм амалъёссы вань "кофе" лэсьтыны, чорыг но сӥль ӵынатыны, нянь пыжыны. Паймытэ училищелэн материально-технической базаез но. Артысь "Калинин нимо" эштослэн сомында техникаез ӧвӧл, шуизы милем татын ужасьёс. Училище возе кызё пала автомашина, сомында ик трактор, куать комбайн. Вань бусы ужъёсты 300 гектар музъем вылын училище ас техникаеныз быдэсъя. Училищелэн вань муш бакчаез. Нош пудо вордон фермязы возё кык скал, ош, мумы парсь, утялто курегъёсты но кроликъёсты. Ӝоген вал но басьтыны малпало. Котькуд дышетон удысъя ужало мастерскойёс но пич лабораторисо. Нылпиос уло кык общежитиосын. Специалистъёс - училищелэн квартираосаз. Ӝыны нунал ӵоже училищелэн улонэныз тодмасткеммы бере, пусйимы училищелэсь таӵе тодметсэ но: нокытын уг кылӥськы пиналъёслэн ӵаш поттэмзы, юнме шорысь солань-талань бызьылэмзы. Малы? Бӧрысь валамы: укылтэмъяськыны пиналъёслэн дырзы ик ӧвӧл, угось котькуд дышетскисез татын быдэн кык специальностьлы дышетыны тыршо. Собере вань тупатъян-лэсьтӥськон ужъёс но татын нылпиослы оскемын. Мукет мугъёс сярысь вераз на директорлэн воспитательной ужъя воштӥсез Александр Викторович Рогозин: - Туж умой ужало классэн кивалтӥсь дышетӥсьёс. Училищелэн улоназ мылысь-кыдысь пыриськись пиналъёсты маин ке но пусйиськом, эшъёссы азьын ушъяськом. Тросэз спортэн эшъясько, кырӟанъя-эктонъя коллективсы но вань. Кылем арын пиналъёс концертэн Ижевске вуылӥзы. Кузьымен бертӥзы. Тодӥм мукетсэ но: республикаямы "Профессиея устоез" ӵошатсконъёс дыръя 14 номеро училищеысь дышетскисьёс котьку но ӟеч ласянь гинэ пусйылӥсько. Вань та азинсконъёс ӧй луысалзы усто кадръёстэк. Та ужез училищелэн директорез мур малпаськыса нуэ. Усто специалистъёс директорлэсь зол кивалтыны быгатэмзэ тодыса, асьсэос сое шедьто, я со ачиз кинэ ке синйылтыса, училищее ужаны ӧте. Со пумысен уно гинэ учыръёс веразы. Директорлэн воштӥсез луыса кыкетӥ арзэ гинэ ай татын ужа Леонид Леонтьевич Гитлейн. Воткинскысь машина поттон заводын инженеръёс мултэс луэмен, воргорон меӵак сюрес лёгиз Кварсаысь училищее. Ӧз янгыша. Ӝоген коллективын данэ потӥз картофка будэтонъя. Вань ужасьёсты бугыртӥз, уйёссэ ӧз кӧла, отпуске ӧз поты но 30 гектар музъем вылын картофка мерттэмын вал. Со аре ик трос картофка будэтэмъя 14 номеро училище пӧлын нырысетӥ интые потӥз. Воткинскысь куашкам калэ вуэм "Башмачок" мастерскойысь татчы ужаны лыктӥз О. Тутынин. Егит воргоронлы татын уж шедиз. Табере 17 нылъёс но пиос пыдкутчан вурисьлэн ужезлы дышетско. Кварса гуртын улӥсьёс но куашкам пыдкутчанъёссэс тупатъяны татчы ваё. Бадӟым опытэн мастеръёсын ӵош училищеын туж трос егитъёс ужало. Уноез соос та училищеез быдтэмъёс. Тани егит мастер, йырӵышкись, Мария Николаевна Чазова. Ижевскысь педучилищеез йылпумъям. Уж шедьтымтэ. - Туж тау карисько Евгений Аркадьевичлы, - шуэ егит дышетӥсь. Со монэ уже кутӥз, оскиз мыным. Со тодэ уго вал, мон школаын дышетскыкум ик йырӵышкыны туж яратӥсько вал шуыса. Егит пиослы, та училищеез йылпумъясьёслы, Иван Васевлы но Олег Шкляевлы директор мушкасьлэсь-мастерлэсь оскем. Тӥни озьы Кварсаысь училищелэн ӧсъёсыз трос |адямиослы ас шудзэс шедьтын сюрес усьтӥзы. Нош директорзылэн вамышъёсызлы ӵош ужась эшъёсыз ялан паймо. Кемалась ӧвӧл Евгений Аркадьевич выль кичӧлтонэн потэм: Калифорниысь ваем нумыръёсты, пе, вордыны кутсконо. Серекъясьёс но вал. Ма, котькуд бакчаын, пе, нумыръёс данак... Но солэн малпанэз пумен нош ик уже пыӵаз. Табере мастер Надежда Михайловна Калинина со нумыръёс сэрен научной уж борды но кутскем. Тросэзлы директор туж валантэм потэ. Тазьы малпасьёс но вань: "Пенсие потытозяз солы ар гинэ кылиз на. Малы кулэ на солы выль профессиос усьтыны?" Сыӵе паймисьёслы Евгений Аркадьевич тазьы шуэ: - Монэным улон уз быры. Ваньзэ, мае быгатӥськод адямиослы кельтоно. ШУНДЫ Маин дуно мыным Пушкин Вань-а пӧламы "Татьянаос"? Кин споръяськоз монэн, Пушкинэз тодӥсьтэм мурт ӧвӧл шуи ке? Асьмеос соин кӧкыын дыръямы ик тодматскиськом уго: анайёсмы-песянайёсмы нунызэс веттан сямен "Чорыг но Чорыгась", "Салтан царь" сярысь выжыкылъёс мадё. Школае мыныса, "Визьмо Коӵыш" сярысь тодӥськом, поэтэн ӟечгес тодматскиськом. 9-тӥ классозь пиналъёс Пушкинэз тодытэк улӥзы ик ке, табере котькудӥз лисъя "Евгений Онегинэз". Пиос куаразы дырекъяса, могаса лыдӟо Онегинлэсь Татьяналы гожтэтсэ, нош нылъёс котькудӥз ассэ Татьяна интые пуктэ: лыдӟыкузы ымнырзы ик воштӥське - шӧдӥське героиняез валаны тыршемзы, жалямзы, солы кельшыны турттэмзы. Час талэсь азьло гинэ школа сьӧрын тамак кыскыса сылэм нылаш син куспын востэмме, нылмуртоме, куараез небыт луэ. Нылкышно данэз валасьтэм туала егитъёс кылем даурысь нылмуртэз валаны туртто! Но роман азинскемъя Татьяна яратытэк мукет муртлы бызе, Онегинлэсь яратонзэ палэнтыны быгатэ. Тани татын туала егитъёс героиняез валамысь дугдо. Малы Татьяна пегӟе аслаз шудэзлэсь? Пиналъёс возьмало, Онегин Татьянаез мед яратоз шуыса. Но умой-а бызем кышномуртэ яратыса? Соку мар со шуд? Сюлмаськонъёсын, курадӟонъёсын, тыро, шулдыр, тунсыко улон... Иське, мед курадӟоз Онегин яратонэн - со ик кулэ. Любви все возрасты покорны... Та чурез асьмеос ваньмы тодӥськом, малпаськытэк вералляськом - кулэ-а, ӧвӧл-а. Но учкод ке, ӵапак та чуръёс романысь тужгес но муръёсыз, трагическойёсыз вылӥллям: ... юным девственным сердцам Ее порывы благородны. ... Но в возраст поздний и бесплодный Печален страсти мертвый след... Мӧйы муртлэн яратонэз шудтэм. Котьку сямен. Пушкин вакытэ но, али но. Мӧйы мурт ӵемысь семья кусыпъёсын герӟамын луэ ни. Тани татын но Онегин эрико ке но, быземын Татьяна. Сое яратэ картэз. Зэм, Татьянаез шудо шуыны уг луы, со картсэ гажаны турттэ ке но. Но Евгений беромиз - азьло ик ӧз адӟы, ӧз яраты аслыз кылдэм муртэ, Татьянаез быземез бере гинэ синйылтӥз. Туала пиналъёс шуо, Татьяналы кошконо вал картэз дорысь. Люкиськыса Онегинэн кусыпъёссэ герӟано. Со, пе, янгыш ӧвӧл - анаез картлы сётӥз. Но пиналъёс вунэто, Пушкинлэн вакытэз бере кык даур пала ортчиз ни шуыса. Алиен ӵошатыса, соку уг луы вал шуак султыса огез дорысь мукетыз доры кошкыны. Татьянаез нокин ӧй валасал - пыкылысалзы. Ма, Татьяна ачиз но озьы карыны ӧй быгатысал, ӧй дӥсьтысал - со чылкыт, сьӧлыктэм адями. Аслаз шудэз понна уг сӧры картэзлэсь шудзэ (со Татьянаез яратэ ук!). Собере, Онегин доры кошкыса но, шедьтоз-а шудзэ? Татьяналы кыле на быдэс улонзэ кӧс улыны. Бен вань ик-а туннэ пӧламы инты Пушкинлэн идеалэзлы? Али нокинэ но эриктэм уг сёто картлы, нылкышнолэн правоосыз трос. Нош люкиськылыны луэ дас пол но, муг гинэ мед шедёз. Тросэз нылъёс табере бызё чакласькыса - лыдъяса-чотаса: быгатоз-а сюдыны- вордыны, чебер-таза нуны кузьманы, нош калыке потыны уд возьдаськы-а, куноосты пумитаны быгатоз-а, выжыез тодмо-а? Тодмо но узыр адями доры пегӟыны умой, дыр. Но малы ке ӧз пегӟы ук Татьяна, ӧз пегӟы Пушкин дорысь Наталья Гончарова но. Иське, ужпум маке мукетыз бордын? 9-тӥ классын дышетскись пияшъёс шуо: "Идеал луыны кулэ ӧвӧл, шонергес ке, со ӧвӧл - котькудӥзлэн аслаз тырмымтэосыз вань". Озьы ке но, ваньмызлы кельшо Татьяна кадь нылъёс, котькудӥз лушкемак ас понназ малпа ӵапак сыӵе нылмуртэ пумитан сярысь. Кин тодэ, оло, куке но шедьтозы ик сыӵезэ - шедьтӥз ук идеалзэ Пушкин! 113-тӥ яратонысьтыз гинэ ке но, шедьтӥз. Малы ке но туннэ нуналозь ӧз дугдэ на ук пиосмуртъёс нылкышно сярысь кырӟаны, солы сӥзьыса кылбуръёс, романъёс гожъямысь. Нош котькудӥз нылаш туннэ но яратымон "принцесса" луыны тырше. Н. Жуйкова, дышетӥсь: Та материал борды итӥськыса, тынэсьтыд но, егит лыдӟисьмы, юам потэ: "Вань-а туннэ "Татьянаос"? Тани кызьы малпало куд-ог юам адямиос: Катя Лютина, 9-тӥ класс: - Шуг вераны. Татьянаосты утчано, дыр, искусствоен герӟаськем муртъёс пӧлысь. Вань, дыр, огшоры семьяосын но. Мон сыӵе ӧвӧл, шудме ӧй лэзьысал. Татьяна но Ольга Ситниковаос, сузэръёс: - Ми семьяямы весь вераськиськом, малы фамилимы Ларинао ӧвӧл шуыса. Туж тупаськомы: Танямы - Татьяналы, мон - Ольгалы. Танямы - вот кин зэмос Татьяна, кинлы ке но удалтоз. - Наталья Валерьевна, дышетӥсь: - Мон малпасько, со сярысь пиосмуртъёслэсь юано. Кызьы асьмеос вераны быгатом, ми - "Татьянаос" шуыса. Чылкак Пушкинлэн кадь Татьянаос ӧвӧл, дыр, но пӧламы ӧжыт ӧвӧл семьязылы, кузпазпазылы шудэз понна асьсэды быдэсак сӥзись муртъёс. Шудоесь-а соос - уг тодӥськы. Марина, суредась: - Мон вожъяськисько Татьяналэн сыӵе луэмезлы. Пумыз, конечно, шудтэм. Ваньмыз умой бырысал ке... Нош картэд вӧзысь кошкись али ке но, Пушкин вакытэ сямен ик, уг гажало - кырыж учко. Та роман, мон малпамъя, пиослы сӥземын. Мед малпаськозы дырыз дыръя: вӧзысьтызы яратӥсь нылмуртэз адӟытэк, олокытӥ ветло, нош берло ярато на, но... Сергей, инженер-программист: - Татьянаос луыны кулэ, но али соос туж ӧжыт. Валэктыны луэ, дыр, вакытлэн воштӥськеменыз - тросэз семьялэсь пуштроссэ валатэк огазеясько, нылъёс синмасько ваньбурлы. Жаль Татьяна яратонтэм пиосмуртэн улоно луэ, Евгений огназ кыле - но со бордын ик романлэн пуштросэз. Николай Никитьевич, журналист: - Сыӵе нылъёс туж ӧжыт, но вань. Али тросгес "Ольгаос", яке воксё эркиям нылъёс. - Пиослы кельшо соосыз но, таосыз но. Ялан лулӟылыса но уд улы ук, куддыр шаянъяськем, сьӧлыкам потэ. Малы кулытозяд яратонтэм муртэныд улод - улон сотэк но вакчи, соин ик яратонзэс утчаса семьяысьтызы мукет пиосмурт доры кошкись нылкышноос шоры нокыӵе кырыж учконъёсы ӧвӧл. ШУНДЫ Конкурс! "Шундыкар-99" вожатойёслы конкурс сярысь валатон Удмурт егитъёслэн "Шунды" дэменлыксы но Удмурт Республикаысь Егитъёсын ужанъя кун комитет туэ июль толэзе "Шундыкар-99" творчествоя лагерь ортчыто. Со сизьым ар ӵоже ужани "Шунды" дэменлыклэн "Лулчеберет" программаезъя. Шутэтсконэз радъям сяна, лагерь чакла гуртын улӥсь удмурт пиналъёслэсь суредаськонъя, архитектурая, литературая, крезьгуръя, театральной искусствоя, тележурналистикая, калык киужъёсъя, национальной дӥсьлэн дизайнэзъя, кылтодонъя но лидерствоя тодон-валанъёссэс будэтыны но быгатонлыксэс будэтыны но быгатонлыксэс азинтыны, азьветлӥсьёсты дасяны. Пиналъёсты яратӥсь, тунсыко, мыло-кыдо, визьмо, удмурт кылын вераськись егитъёсты - университетысь, педагогической училищеосысь дышетскисьёсты, дышетӥсьёсты, воспитательёсты, школаосын ваньмон дырез радъясьёсты - ӧтиськом вожатойёслэн конкурсазы пыриськыны. Куронъёс Конкурсэ пыриськон понна гожтоно лагерьын но отрядын ортчытоно быдэн одӥг сценарий. Со "Шундыкар" сменалы тупамон мед луоз. Удмурт кылын гожтэм сценарийдэс асьтэ сярысь ивортонэн ӵош (нимтулды, вордскем арды, дышетскон яке ужан интыды, тунсыкъяськонъёсты, лагерьёсын ужан опытты, улон интыды) 20-тӥ маёзь ыстэ таӵе адресъя: 426051, Ижевск город, Советской, 1, "Шунды" дэменлыклэн правленияз. Юанъёсын вазиськоно таӵе телефонъя: 51-07-96. Югославия Интернет пыр: Кун Дума дурбасьтэ сербъёслы Россия Федерацилэн Кун Думаез кутӥз Россиен но Белоруссиен огазеяськон борды Югославиез валчеян сярысь Югославилэн Союзной Скупщинаезлэсь куронзэ юнматонъя постановление. "Юнматон" понна луиз 293 депутат, "пумит" - 54, одӥг депутат возиськиз. Парламентлэн улӥ палатаез президентлы но парламентлы дэмлаз ӝегатскытэк калык кусыпъёсъя, политикая, экономикая, эрикрадъёсъя но мукет ужпумъёсты эскерыны. Сюрс пала калык быремын Россиысь военнойёслэн чакламзыя, Югославиез пуштытъямен, сюрс пала адями быремын но кӧня ке сюрсэз сӧсырмемын. Сыӵе лыдпусъёсты ивортӥз Россысь Кунсьӧр но оборонной политикая кенешезлэн президиумезлэн кивалтӥсез Сергей Караганов, Москваын пресс- конференция ортчытыкуз. Нефть возён интыосты пуштытъямен, инкуазь туж зол кырсёме, вераз со. Озьы ке но, бускель кунъёсты, соос пӧлын Германиез но сыӵе югдур уг сюлэмшугъяськыты. Югославиын ожъёсын НАТО, ядерной элементъёсын сяна, шариковой ож тӥрлыкез но кутэ, пусйиз Караганов. Югославилы сяна, вожвылъяськон бускель странаослы но туж бадӟым изъян вае. Болгария, Румыния, Венгрия, Австрия, Италия арняяз кык сю миллион долларлэсь трос ыштонъёс адӟо, вузкарон но нуон-ваён дугдэмен валче. Кин "вузаз" арабъёсты? Косоволэн уй палысьтыз Межа гурт дорын сербъёслэн армизы "Косовоез мозмытонъя армилы" шуисьёслы юрттӥсь "Абуль Аббас" араб отрядэз быдтӥз. Озьы гожтэмын Саудовской Арвиын потӥсь "Аш-Шарк аль Аусат" газетын. Газетлы сыӵе ивортон лэсьтэм "Исламская армия освобождения" огазеяськон. Ас мылкыд каремезъя отряд шейх Мухаммед Аль-Адлиби кивалтэм улсын вуиз вал Сербилэн улосвылаз. Отряд быриз, гожтэ газет, Америкаысь спецслужбаослэн но Албаниысь кивалтӥсьёслэн, ваче вераськыса, батальонэз Албанилэн улосвылаз лэзьымтэзы сэрен. Арабъёслы берытсконо луиз берлань Косовое. Отын соос артиллерия улэ сюризы. Шыпытак киултон Великобританиысь обороная министр Джордж Робертсон США-е мынӥз. Отын со кенешиз Америкаысь эшеныз Уильям Коэнэн Балканын вожвылъяськонъёс пумысен. Британиысь Марчвуд портын мыно ож тӥрлыкъёсты куинь транспортной судное тырон- ӝоктон ужъёс. Соос Грецие кошкозы. Балканэ вуттэмын луозы "Челленджер" танкъёс, бронемашинаос, артиллерия но мукет техника. Кивалтӥсьёс валэктыны выро, Косовоын ожез дугдытонъя калык куспо кужымъёслы "инъет" кылдытӥське шуыса. Озьы ке но, Британиысь военной аналитикъёс чакламъя, отын мынэ серб провинцилэсь улосвылзэ "шыпытак киултонлы" дасяськон. Кыл кутонлэсь кышкаса США-лэн администрациез ивортэ, Югославилэн, пе, химической ож тӥрлыклы веществоосыз вань. Та арбериосты со кутыны быгатоз ож тӥрлык интыын. Президент Клинтон Белградэз алӥз, сыӵе учыре шуккет "ӝог но юн" луоз шуыса. Нош Югославия ноку но сыӵе кышкытлык сярысь кылпум ӧз поттылы. Пентагонын валэктӥзы: химической ож тӥрлыкез кутон сярысь Белградлэсь малпанъёссэ уг тодо, пусъе "Ассошиэйтед Пресс". Озьы ке но, Югославиез пуштытъяку, таӵе интыосты исантэм сярысь верамын вал. Оло, американской президент озьы вераз, валаса, юмоке шедёз шуыса. Соку кылдэм секыт югдур понна кыл кутонэз сербъёс вылэ погыльытын луоз. Кызьы НАТО лэсьтыны турттӥз, пегӟись албанецъёсты ыбылэм бере. Ньыль Хиросима мында? Югославиысь информацияя министр Милан Комненич Япониысь газетлы ивортӥз: вань пуштытэм снарядъёслэн кужымзы тупа Хиросима вылэ куштэм ньыль атомной бомбалэн тылгизьыезлы. НАТО-лэн самолётъёсыз куяло ичиятэм кужымъем (обедненной) уранэн боеприпасъёс но чалепъёсын бомбаос. Соос Женева конвенцияя кутыны лэземын ӧвӧл. Самолётъёс бусыосы пазяло музъемлэсь удалтонлыксэ ичиятӥсь веществоос, вераз Комненич. Калыклэн тазалыкезлы туж бадӟым кышкытлык кылдэмын. НАТО-ен кутскем ож "ООН-эз но, Кышкытлыклэсь утиськонъя кенешез но, калыкъёс куспын улонлэсь принципъёссэ но эрикрадъёссэ" пыд улаз лёгаз, пусйиз информацияя министр. ШУНДЫ Кусыпъёс Вашкалаез герӟа туннэзэ "Шунды" дэменлык кусыпъёс тупатэ кунгож сьӧрысь ӵыжы-выжы калыкъёсын. Озьы дэменлыклэн ӧтемезъя, апрель толэзьлэн кутсконаз Ижевске вуылӥзы Финляндиысь куноос Паси Мякинен - фотограф, Кати Кивимяки - искусствовед, Галлен Каллен музейысь выставкаез дасясь, Хатиа Джинджи-хадзе - берыктӥсь, Хельсинки университетысь искусствоведениея кафедраын ужась. Финляндиысь куноос тодматскизы шаерез тодонъя национальной музейысь "Калмез" финн-угор выставкаен, кудзэ радъязы "Дэмен" культурая огазеяськон, "Шунды" дэменлык но творчествоя "Одома" группа. Выставкаын возьматэмын вал художникъёслэн, дизайнеръёслэн, скульпторъёслэн, крезьгурчиослэн, модельеръёслэн ужъёссы. Со сяна, вуылӥзы куд-ог удмурт суредасьёслэн мастерскойёсазы. Пумиськон ортчиз "Шунды" дэменлыклэн правленияз быръем егитъёсын но. Финляндиысь куноослэн шаерамы лыктон мугзы - Галлен Каллен музейын ортчытоно выставкалы ужъёс быръён. Та пичигес гинэ музей ас азяз пуктэ финн калыклэсь выжыоссэ, йылолъёссэ возьматон ужпумез. Нош 1995 арысен ӵыжы-выжы луись финн-угор калыкъёслэсь туала вакытысь ужъёссэс возьматыны мылкыд кариз. Музейын ужасьёс тросгес саклык висъяло егит художникъёслы, но соослэн ужазы мед луоз вашкалаеныз герӟетэз. Выльысез выставка усьтӥськоз 2000-тӥ арын 9 июне, со сӥземын луоз Хельсинкиез Европалэн культурной столицаеныз ялонлы. Озьы ик сояз арын декабре Финляндилэн шоркараз ортчоз дуннеысь финн-угор калыкъёслэн конгрессы. Та бадӟым ужрадэ вуэм куноослэн син шоразы йӧтоз шаерысьтымы но усточиослэн Галлен Каллен музее интыям ужзы. Нош кинлы сыӵе шуд усёз, созэ ини музейын ужасьёс быръёзы шаерамы вуылэмъёслэн трос адӟем ужъёссы пӧлысь. Л. МАЛЫХ. "Шундылэн" эшъёсыз Паси Мякинен, Кати Кивимяки, Хатиа Джинжихадзе. Туспуктэмъёсыз В. Беломорскихлэн. ШУНДЫ "Кыкетӥ дор" конкурслы йылпумъянёс Сентябрь толэзе егитъёс пӧлын ялӥм вал "Кыкетӥ дор" конкурс. Жаляса верано луэ, вазиськонъёс трос ӧй вал. Вуэм ужъёсын егитъёслэн огъя улонниосын улэмзы палдурес возьматэмын, туж бездытэсь адӟиськизы жанр ласянь но. Конкурслы йылпумъянъёс лэсьтыса, умоен лыдъямын Светлана Петровалэн "Пыд улын - коньдон" (25 март, 33-тӥ номер) но Елена Ильиналэн "Адӟонэ мынам - общага, яке небыт-а улыно-вылыно валес" (22 апрель, 47-тӥ номер) ужъёссы. Соос пусъемын коньдон премиен. Малпаськом, конкурсэ пыриськемъёс азьланяз но милемын кусыпсэс уз ыштэ, мыло-кыдо пыриськылозы гожъяськон удысэ. Усто экспортёръёс Кызьы жильдоно доллар Куд-огез шуэ, асьме предприятиос, пе, ӟеч вуз поттыны уг быгато. Сыӵе малпан шонер ӧвӧл. Удмуртия дуннеысь рыноке потэ ни. Тани данакез вузъёсмы кунгож сьӧрысь странаосы вузамын. Соин ик алигес шаерамы нырысьсэ ортчытэмын мукет кунъёсын вузкарись предприятиос пӧлын конкурс. Отчы пыриськиз 13 огазеяськон, 7-ез вормисе потӥз. Устоез экспортёр но конкурслэн лауреатэз ним басьтӥз "Ижсталь" огазеяськон. Кылем арын со 21 странаысь 22 фирмаен 75 контрактъя ужаз но 32 милион ёрос доллар тыр вузкариз. Кыкетӥ степенё дипломъёс сётэмын "Чепецкий механический завод", "Буммаш" но "Ижмолоко" огазеяськонъёслы. ЧМЗ, кылсярысь, мукет странаосын 46 миллион доллар тыр вузкариз, нош "Буммаш" - 6 миллионлэсь уно. "Ижмолоко" 32 процентсэ продукцизэ кунгож сьӧры келяз, тужгес но трос - казеин. "Выль вузъя устоез экспортёр" ним басьтӥз "Буммаш" огазеяськон. Берло кык ар ӵоже со поттыны кутскиз ву улысь му вӧй кысконъя установкаос. Сое басьто США но Великобритания. Миым таӵе установкаос 1 миллион 141 сюрс долларлы вузаз. Коммерческой предприятиос пӧлысь нырысетӥ степенен диплом басьтӥз "Ижтел". Со луэ "Аксион" огазеяськонлэн тодмо "Сименс" фирмаен ӵош ужась предприятиез. Миым ӝынызэ вуззэ музон странаосы 3,6 миллион долларлы вузаз. Со кусып возе Германиен, Армениен, Узбекистанэн, Грузиен, Туркмениен но мукетъёсыныз. Нош Россиын миым "Ижтел" 600 сюрс телефон номеръёсын АТС-ъёс пуктӥз, яке ваньмыз пӧлысь одӥг ньыльмос люкетсэ. Та удысын лауреат ним озьы ик сётэмын "Уральская нефть" огазеяськонлы (экспортэз 9,6 миллион долларлы) но "Харви-Яр" ӵош ужась предприятилы. Берлоез кылем арын 358 сюрс долларлы пулъёс вузаз, нош США-ысь юрттэт (инвестиция) 171 сюрс доллар басьтӥз. Озьыен, кунгож сьӧрысь фирмаос но ӟеч вузмес адӟо но басьто. Азьланьын та уж уката кужмоялоз. Сыӵе оскон вань. Г. РОМАНОВ. Гурт улон Уз пашмы-а сюдӥсь музъем? Лыдӟи "Удмурт дуннеысь" "Музъем со вуз, иське..." статьяез (5-тӥ февраль 1999- тӥ ар). Соин валче ас малпанъёсме, ӝожъёсме но мылкыдме шараяме потӥз. Секыт югдурын али уло гурт хозяйствоос: мед луоз со коть колхоз, коть фермер хозяйство. Правительство гурт калыклы юрттон сярысь уг ик малпа. Угось трос уждун басьтӥсь чиновникъёслэн ӝӧк вылзы узыр. Нош ма карыны кулэ уждун басьтытэк, пенсизэс лыдъяса улӥсь пересьёс, трос нылпиё семьяос? Туала дыре няньлы ёрмись семьяослэн гинэ но лыдзы будэ ни угось. Огаз телепередачаын дышетӥсь синвуаськыса мадиз кызьы улэм-вылэмез сярысь. Дорамы, пе, сӥль-вӧй сярысь вунэтӥм ни. Трос данъям "Магги" кубикъёсын, пе, шыд лым пӧраськом. Та аръёсы сютэм сямен уло ни пытсэт сьӧрын пукисьёс, соосын оградэ пуктэмын службазэс нуись пиосмы. Алигес пимы шумпотыса ивортэ: "Милям частямы но сӥль вуттӥзы. Сотэк консерва но консерва вал. Воксё акыльтӥз ни кубиста но. Картофка ӧвӧл, ӝук уг сётъяло. Кубиста но кубиста. Али тани одӥгез ужбергатӥсь быдэс "КамАЗ" тыр картофка вуттӥз. Уломы табере, ми но "узырмим". Ӝож таӵе гожтэтъёсты анай-атайлы лыдӟыны. Уката ик, соос гуртын уло ке. Шат асьмеос калыкмылы тырмымон картофка, ӝук пӧзьтымон ю тысь будэтыны ум быгатӥське? Зэм, ватонэз ӧвӧл. Берло аръёсы муос начармизы. Ӧвӧл соосты кыедась, минеральной сылал ватсась. Ваньмыз герӟаськемын коньдонэн. Угось котькуд хозяйствоын "улэп" коньдонлы ёрмыса уло. Тӥяськемын-пазяськемын машина-тракторъёслэн парксы. Нош сое выльысь пыд йылаз султытон, ужазинлыксэс ӝутон понна, ой-ой кыӵе тыршоно луоз. Гурт хозяйстволы техника поттӥсь предприятие-заводъёс но дун ласянь укыр "куасалто". Нош гуртысь поттэм сиён-юонлэсь ӟечлыксэ курыны уг вунэто. Йӧлэд чылкыт, вылӥ сортъем, йӧлвыло медло, сӥлед - тыр но кӧй. Газетэ поттэм статьяын Удмурт Республикаысь дано агроном, сизьым ар ӵоже Гурт хозяйствоя министерствоен кивалтэм мурт Сергей Шартдинович Шартдинов меӵак вера: "Кизёно муосмы умоязы ни вал, 16-18 центнер ю тысь басьтыны дышимы. Араз государстволы 125 тонна сӥль вузаллямы, табере - 40-45 тонна гинэ, йӧл 385 сюрс тонна, али - 300 сюрс". Таӵе чигнанъёс ик Киров улосын но. Малы таӵе чигнан? Меӵак верано ке, со потэ правительстволэн гурт югдурез валантэмез бордысь. Учке ай тӥ Думаысь депутатъёслэсь кенешсэс. Гуртлы юрттон сярысь кылпум ӝутске ке, ваньзы лопырско. Дурбасьтыса вераськисез ик куинь-ньыль депутат гинэ кыле на. "Россиез фермеръёс сюдозы!" - газет бамысен, телеэкранысен лычсузьымон черекъязы вал "ура-реформаторъёс". Табере соос но сабырскизы ни кадь, куаразы сокем зол уг чузъяськы. Яке ушъяськыны мугзы-а ӧвӧл ни? Ӧвӧл, выжыкылын музэн сюдӥсь-вордӥсь ковёр фермеръёс куыны но ӧз быгатэ. Ӝоген Москваын ортчоз фермеръёслэн съездзы. Отын чурыт вераськон ӝутыны мугъёс тырмыт гинэ. Угось гурт хозяйство олокӧня арлы берлань сэрпалтэмын, азьвыллэсь но ӧжыт сиён-юон потыны кутскиз. Ӧз юртты правительство "выль" крестьянъёслы. Тодады на, дыр, гурт хозяйствоез азинтон сярысь правительстволэн кутэм программаез. 1996-тӥ- 2000-тӥ аръёсы быдэстыны чаклам ужрадъёс бумага вылэ кылизы. Россиысь Счётной палата алигес ивортӥз: "Бюджетысь фермеръёслы юрттыны висъям коньдон кузёосыз доры лыктыса ӧз вуы. Сое ас кисыосазы капыртзӥы коммерциен вырись ужбергатӥсьёс, вылӥысь чиновникъёс". Табере кӧня ке лыдпусъёс вераме потэ. Соос басьтэмын Киров улосысь, Кильмезь ёросысь. Кин-о калыкез сюдон понна ӟечгес тырше: правительствоен курлам колхозъёс яке соосын ик ушъям фермеръёс-а? "Выль" крестьянъёс гектарысь басьтӥзы-люказы 7,5 центнер ю тысь, колхозъёс - 8,7 центнер. Йӧл поттӥзы (одӥг скаллы) 1960 кг, со дыре ик колхозысь куд-ог скал кыскисьёс 3000-3500 лыдпусозь вуизы. Ыж гон ӵышкизы - 73 кг. Одӥг ыжлы - одӥг килоен потэ. Кин-о гуртын улӥсь ас дораз сыӵе ыжез возёз? Зэм, куд-ог фермеръёс но продукция трос поттӥзы. Нош соос, пӧртэм налогъёслэсь палэнскон понна, вань лыдпусъёсты шонер уг возьмато. Налогъя инспекциез пӧяны выро - барыштэк, пе, ужамы. Нош пайдатэк ужасьлэсь кыӵе дунзэ курод, басьтод на? Нош барышед ӧвӧл бере, озьыен, ужам стажед но ӧвӧл. Тани нош ик огез сьӧлтэт. Угось тросэз фермеръёс Пенсиосъя фондэ коньдон уг тыро. Озьы соос асьсэлэсь пуконо вайзэс шӧдонтэм улсын корало ук! Ма карозы меда, мискиньёс, шутэтскыны кошкон азязы? Ёросысьтымы кивалтӥсьёс, специалистъёс кылем арын декабрь толэзе Вавож ёросысь Мичурин нимо колхозэ вуылӥзы. Эх, кутскизы ук отысь азинсконъёсты котькуд кенешын, районамы потӥсь "Сельская трибуна" газетлэн бамъёсаз мадьыны-гожъяны! Соослэн азинсконзы, пе, хозрасчёт амалэз уже кутэм бордысь потэ. Нош со асьме дорын вал ук ни. Озьыен, вунэтэмез, куке уже кутэмез ик ӟеч луыса потэ?! Паймод но йыртыштэ амалтэк кормыштод. Азьпалан ӟечлы осконмес ӧвӧл ыштоно. Гуртын ужась но музъем даурысь дауре котьку но калыкез сюдозы. Солы юрттыны гинэ медаз вунэтэ вылэм. Николай ТУРИН. Приглашает Кварсинское ПУ � 14 Профессиональное училище � 14 объявляет прием учащихся на 1999/2000 учебный год по следующим профессиям: На базе 9 кл. Срок обучения 3 года 1. Мастер сельскохозяйственного производстства - арендатор (фермер): 1.1. Слесарь-ремонтник; 1.2. Тракторист-машинист широкого профиля; 1.3. Механизатор животноводческих комплексов и метанизированных ферм; 1.4. Рыбовод прудового хозяйства; 1.5. Водитель автомобиля категории "В", "С". 2. Хозяйка усадьбы: 2.1. Оператор машинного доения; 2.2. Плодоовощевод; 2.3. Цветовод; 2.4. Секретарь-машинистка; 2.5. Умение кройки и шитья; 2.6. Повар, пекарь; 2.7. Водитель автомобиля категории "В" (по желанию). 3. Автомеханик: 3.1. Водитель автомобиля категории "В", "С"; 3.2. Слесарь по ремонту автомобилей; 3.3. Контролер технического состояния автотранспортных средств. 4. Мастер общестроительных работ: 4.1. Штукатур-маляр; 4.2. Каменщик; 4.3. Столяр; 4.4. Водитель автомобиля категории "В", "С". На базе 9 кл. Срок обучения 1 год с 16,5 лет 4. Тракторист-машинист широкого профиля. На базе 11 кл. Срок обучения 1 год 5. Хозяйка усадьбы: 5.1. Плодоовощевод; 5.2. Продавец продовольственных товаров; 5.3. Продавец непродовольственных товаров, 5.4. Домашний парикмахер. На базе вспомогательной школы. Срок обучения 2 года 6. Каменщик, печник, плодоовощевод, садовод. Для поступления в училище необходимо представить следующие документы: 1. Направление или договор от организации, учреждения, фермерского хозяйства с гарантией трудоустройства после выпуска из училища. 2. Заявление. 3. Документы об образовании. 4. Медицинскую справку по форме � 086/у. 5. Справку с места жительства. 6. Характеристику с места учебы или работы. 7. Фото 3,5х4,5 - 6 штук. 8. Справку о прививках. 9. Паспорт (для предъявления). Платное обучение Центр образовательных услуг при пу � 14 производит платное обучение ФЕРМЕРОВ, ПЧЕЛОВОДОВ, ВОДИТЕЛЕЙ АВТОТРАНСПОРТА (по умеренной цене), СЕКРЕТАРЕЙ-МАШИНИСТОК и других профессий, обучаемых в училище. Платное обучение проводится по очно-заочной системе, индивидуальное и групповое. Адрес училища: 427411, Удмуртская Республика, Воткинский район, дер. Кварса. ПУ � 14, телефон 93-1-24. Проезд поездом Ижевск-Воткинск до ст. Кварса. Автобусом Воткинск-Перевозное до станции дер. Кварса. Фотоос: ? Методикая кабинетэн кивалтӥсьёс Т. Г. КАПИНА но З. П. ЛОЖКИНА. ? Егит мастеръёс: И. Н. РАДОСТЕВ, О. В. ШИЛЯЕВ, И. В. ЯРКО, Н. В. КУНУХ, М. Н. ЧАЗОВА. ? "Витьлы" дышетскись Мария Малахова. ? Кварсаысь 14 номеро училищелэн директорез Евгений Аркадьевич ПЕЧЕНИН. ? Пудо вордон фермаын. ? Пыдкутчан вурисьёс. ШУНДЫ Мынэ "Шундыкар-99" конкурс Город уз луы пурысь Кызьы ивортылӥмы ни вал, "Шундыкар" лагере шедён понна ялэмын конкурс. Пиналъёсты отысь удысъёсын ӟечгес тодматон вылысь (тросэз шугъясько асьсэлы кыӵе удыс бырйыны), туннэ вераськиськом "Шундыкар" лагерьын архитектуралы дышетӥсен, "Кузьыликар" студилэн кивалтӥсеныз Касим ГАЛИХАНОВЕН. - Касим Галиханович, малы дышетско пиналъёс тӥляд студияды? Учкиськод но: вистэм- вожтэм гожмам суредъёс, номырзэ валаны уг луы. Архитектура - геометрилы матынгес кадь: квадрат, трапеция - корка пӧрмиз... - Зэм, пиналъёслэн но сыӵегес ик малпанзы. Но зэмос архитектор луон понна, абстрактной валанэз ужатыны, азинтыны кулэ. Соин ик ми пӧртэм-пӧртэм суредъёс кылдытъяськом. Архитектура - со выль дунне. Кылдытоно маке но выльзэ, кудӥз та дырозь ӧй вал на. Вераны кулэ, котькудӥз пинал сое ас сяменыз адӟе. - Пиналъёстылэн ужъёссы но студиды Россиысь Архитекторъёслэн союзэнызы ортчытъяськись "Зодчество" конкурсын кык ар бӧрсьысь бӧрсе И но ИИ степенё Дипломъёсын пусъемын, нош студиды кемалась уг ужа на. Кызьы луэ сыӵе ӝог азинсконъёс басьтыны? - Ваньмыз потэ пиналлэн н дышетӥсьлэн ог-огзэс валамзы бордысь. Собере гуртысь пиналъёс тыршисесь. Вӧзаз кыӵе ке быгатонлыксы, валанзы вань на ке, усто уж пӧрме. Пусйымонэсь ужъёссы Вотка ёросысь Саша Поздеевлэн, Кизнер ёросысь Оля Кузнецовалэн, Завьял ёросысь Бабино гуртысь Наташа Дородовалэн но мукетъёсызлэн. Соослы бадӟым оскон вань. - Но школазэс быдтыса быръё-а пиналъёс та удысэз, уг ышы-а тыршемды юнме? - Наташа али Ижысь монтажной техникумын дизайнерлы дышетске. Дышетскыны пырыкуз, экзаменъёсын со гинэ "5" басьтэм - шумпотоно сыӵе дышетскисьёс понна. Вань Удмурт университетысь искусствоосъя факультетын дышетскисьёс. Малпасько, соос усто специалистъёс луозы - дунне шоры выль синмын учкыса, та пурысь городмес выжыкыл дуннелы пӧрмытын быгатозы. З. РЯБИНИНА. Кун Кенешлэн сессияз Депутатъёс оскизы Волковлы Кун Кенешлэн выль ӧтчамезлэн нырысетӥ сессияз ужазы газетлэн корреспондентъёсыз. Тодмасткыны дэмласьком соослэн малпанъёсынызы. 20-тӥ апрель - Удмуртилэн политической улоназ выль вамыш, шаермылы кивалтӥсь быръён. Кинлы шуд усиз яке усёз республикамылэсь биньгозызэ ЪЪ даурлэн пумаз но выль даурлэн кутсконаз возьыны? Талы юан сётӥз Кун Кенешлэн кыкетӥ ӧтчамезлэн нырысетӥ заседанияз. Сессиосты ортчытъян зал быдэсак калыкен тырмемын. Тамында журналистъёс но ӧтем куноос ньыль ар талэсь азьвыл гинэ люкаськылӥзы, дыр. Кенешонэз нуэ Удмурт Республикаысь быръёнъя комиссилэн кивалтӥсез Афанасий Тубылов. Чузъяське Удмуртилэн гимнэз. Выль парламентлэн ужезлы кутскон сётэмын! Эскероно ужпум одӥг: Кун Кенешлы Тӧро быръён. Дыр 10 час 20 минут. Завьялово районысь Думалэн кивалтӥсез депутат Валентина Дементьева "Согласие" огазеяськонлэн нимыныз дэмлан сётэ та интые бырйыны Павел Вершининэз. Мукетыз депутат, электромеханической заводлэн генеральной директорез Юрий Шестаков потэ Александр Волковлэн кандидатураеныз. Мукет ӵектонъёс ӧвӧл. Озьыен, 100 депутат пӧлысь огъёсыз куаразэс сётозы Павел Николаевич понна, кыкетӥосыз - Александр Александрович понна. Быръемын залын лыдъясьёс, лыдъясь комиссия. Электронной табло туннэ шутэтске. 10 час 55 мнут. Кыкезлы но кандидатъёслы программаенызы тодматон понна сётӥське быдэн 15 минут. Алфавитлэн радызъя нырысь ик трибуна сьӧры потэ Павел Вершинин. Солэн программаез - тупаса, огкылысь кариськыса ужан, республикамылэсь экономиказэ ӝутон, бюджет кутонын радлыкез тупатон. Регламентъя котькуд кандидатлы висъяське 30 минут, юанъёслы валэктонъёс сётон понна. Правительстволэн Тӧроезлы пӧртэм пумо юанъёсын вазисько депутатъёс Александр Лопатин, Николай Чувашов, Геннадий Абросимов, сергей Беркутов, Алексей Чуршин но мукетъёсыз. Николай ЧУВАШОВ, кылсярысь, юаз: - Павел Николаевич, огаз сессиын тӥ дэмлады вал Александр Александровичен ӵош отставкае кошкыны. Кыӵе вал солэн мугез? - Ог-огед куспын валан быре ке, озьыен, уж уз мыны. Берло дыре, жаляса верано, югдур та ласянь уродмиз. Алексей ЧУРШИН: - Кун Кенешлы Тӧрое тӥледыз ӧз ке бырье, мар кароды? - Огзэ верало: оппозицие мон уг поты. Вань быгатонозэ лэсьто, куспамы огкыл шедьтон понна. Со кулэ асьме калыклы, асьме республикалы. 12 час 00 минут. Ӧжытак вис карем бере, кыл сётӥське Александр Волковлы. Солэн программаяз валтӥсь инты басьтэ республикаез шуг-секытысь поттонъя ужрадъёс, законодательство бордын ужан, лэсьтэм янгышъёсты тупатон, гурт удысэз юнматон, нефтьлэсь поттэм уксёез калыкмы вылэ ужатон, СНГ-е пырись странаосын кусыпъёсты паськытатон. 30 минут - юанъёслы валэктон. Николай СЫЧЕВ: - Александр Александрович, ас вакытаз тӥ пыриськиды "Наш дом - Россия" огазеяськонэ, али - "Отечествое", кусып тупатыны выриськоды Зюгановен но. Кызьы тӥ сокем ӝог мылкыддэс воштӥськоды? - "Наш дом - Россия" огазеяськонын мон ноку но ӧй вал, нош "Удмуртия" блок али но вань, со пыремын "Отечествое". Асме мон лыдъясько патриотэн. Соин ик Лужковен но, Зюгановен но огкыл шедьтыны тыршисько. - Кун Кенешлы Тӧрое бырйизы ке, "Отечестволэн" ёзэныз кивалтонлэсь куштӥськиды-а? - Законъя лэземын кудаз ке огазеяськонэ пырыны. Но, депутатъёс куризы ке, мон дась та интыме мозмытыны. Кутске прениосын вераськон. Солы висъям 90 минут депутатъёслы ӧз тырмы, ватсамын на эшшо 30 минут. Кылзэм программаосъя но ӵектэм кандидатъёсъя ас мылкыдзэ вераз 18 депутат. Талэсь азьвыл соос кенешизы асьсэлэн огазеяськонъёсазы. Павел Вершинин пала дурбасьтыса вераськизы В. Дементьева, А. Салтыков, Е. Одиянков, В. Фридрих но куд-ог мукетъёсыз. Александр Волков пала - В. Хорошавцев, Ю. Боровик, Ю. Шестаков, В. Тарасенко, А. Лопатин но мукетъёсыз. Мылкыдъёс огкадесь люкиськизы. Кин азьпала потоз? Таизэ возьматоз лушкем куара сётон. Озьыен, бюллетене пыртэмын кык мурт П. Н. Вершинин но А. А. Волков. Бюллетень понна котькудӥз депутат гожтӥське, ортче кабина пыр. Эскерисьёс чаклам улсын, бюллетеньзэ урное куштэ. Ваньмыз - син азьын. 19.00. Лыдъясь комиссия ялэ вормисьлэсь нимзэ. Со - Александр Волков. Озьы Кун Кенешлы Тӧрое ньыль арлы нош ик быръемын солэн азьвыл кивалтӥсез. Данакез депутатъёс, 55 мурт, А. А. Волковлы куаразэ сётӥзы бере, адямилы оско, республикамес шонер сюрестӥ нуыны быгатоз шуыса. Людмила Медведева. Янгышмы - асьме бордын Павел Вершининлэн келямезлы паймонэз ӧвӧл. Ӟеч луонлыкъёсмес ыштон кутскиз Кун Кенешлэн берло ортчем сессиосаз. Нырысетӥ ӧтчамысь депутатъёс ӧз быгатэ Кун Кенеше депутатъёслэсь лыдзэс будэтыны но Удмурт Республикалы кивалтӥсез вань калыкен быръён пумысен Конституцие воштонъёс пыртыны. Со одӥг мугез. Кыкетӥез, самой герӟаськемын кыӵе депутатъёсты быръёнэн. Асьмеос туж бадӟым ыштон адӟим, сокем будэм, быгатӥсь эшмес, удмурт калыклэсь оскымон, визьмо кивалтӥсьсэ Кун Кенешлы Тӧрое бырйымтэенымы. Нырысь-валысь, соизлы но, таизлы но (Вершининлы но Волковлы) огкадь оскон вал. Уноез депутатъёс, политикъёс шуылӥзы, огмында куараос люкалозы. Но матын но озьы ӧз луы. Павел Николаевич 13 куаралы ичигес басьтӥз. Малы? Со валамон кадь, Кун Кенешлэн нырысетӥ ӧтчамаз 16 удмурт депутат вал ке, таяз чылкак 11 гинэ быръемын. Тӥни со бордысь но тросэз потэ. Я бен, ужпумез мургес учком. Асьмеос ноку ум ворме, быръёнъёсты туэ кадь ортчытъям ке. Тани пичи пургаос, селтаос, шарканъёс, играос, кезъёс, балезиноос, юкаменскъёс быръё ӟуч, еврей, белорус но мукет выжыысь потэмъёсты. Соос весь оско, сыӵеос улонмес ӟечгес карыны сюлмаськозы шуыса. Озьы ке луысал... Но осконмы быдэсак бырымтэ на. Удмурт Республика вылӥ кивалтӥсез (сое котькызьы нима - президент яке глава) бырйыны кулэ вань калыкен. Со понна нимысьтыз закон кутоно, Конституцие воштон пыртоно. Но солэсь азьло калыклэсь юалляськон (референдум) ортчытыны Кун Кенешлы решение юнматоно. Таиз но ужпум депутатъёс бордысь потэ. Асьме адямиослэсь юаськод ке, кин понна куаразэ сётӥз, со вера сюрес лэсьтыны, газ кыскыны тыршись мурт пала, пе, кариськи шуыса. Шат асьме выжыысь потэм мурт со ужъёсты ик радъяны ӧй быгатысал? Быгатысал. Вылаз ик, быдэс шаеренымы но удмурт адямиос кивалтысалзы. Соос ик асьмелы тросгес юрттысалзы, сюлэм шугъяськонъёсмес валасалзы. Геннадий Романов. Ту-ту-у... Дыр сизьымлы матэктэ ни, нош Кун Кенешлэн сессиос ортчытъян залаз буш интыос ӧвӧл на. Солэсь но ортчыт - ог витьтон мурт пуке ватсаса ваем пуконъёс вылын. Ваньмыз витё. Ваньмыз оско. Сцена вылэ, президиумлэн ӝӧкъёсыз сьӧры пуктэм кабина пыр ортче сю депутат. Тани берпуметӥез понэ урнае бюллетеньзэ. Лыдъясь комиссия пыртэмъёс (19 мурт, котькудӥз витетӥез депутат, шуыны луоз) калык азьын ик чотаны кутско соизлы яке таизлы кандидатлы дурбасьтэмез возьматӥсь документъёсты. Чиданмы быремен, ми, "Удмурт дуннеысь" журналистъёс, комиссия пала ыстӥм фотокормес. Соиз ӝог гинэ берытскиз: валаны уг луы, пе, кыкна палаз ик бюллетеньёс огмындагес люкаськемын. Дунне питранлэсь кудпала берытскемзэ ӝоген валаны луиз комиссие быръем куд-ог депутатъёслэн ымныръёссыя. Н. Сычев, В. Фридрих йыг-йыг возисько, мыньпотэмзы уг адӟиськы. Нош А. Лопатинлэн ымдурыз пель дораз вуыны ӧдъя ни. Тани со вамыштэ залэ, пальпотыса кизэ мыче В. Загайновлы. Валамон... Мар бен, келяны но быгатон кулэ, дыр. П. Вершинин понна луиз 42 депутат. Ичи кужым ӧвӧл со. Таиз 20-тӥ апрель Павел Николаевичлэн улоназ одӥгез шуг нунал вал, дыр. Сессиын огыр-бугыр луэм сяна, кызьы веразы солы матысь адямиос, вторнике кузпалызлы операция лэсьтӥллям, соиз реанимациын, пе, вал. Калыклэн гажанэз, яратонэз мед юрттоз вылэм Вершининлы вань шуг-секытъёсты чиданы но вормыны. Нош ма луоз азьланьын? Мон асме оптимистъёс пӧлы пыртӥсько. Озьы ке но, таяз учыре мылкыд туж секыт. Та дырозь кык вылӥ кивалтӥсьёс пӧлысь огез коть асьме калыклэсь потэм мурт вал. Табере... Кин кивалтоз табере Правительствоен? Ганза? Гродецкий? Питкевич? Нокыӵе оскон ӧвӧл, туннэ-ӵуказе Кун Кенеш но Ижевсклэн администрациез огинын ужаны кутскозы шуыса. А. Салтыковез ньыль арлы мэре бырйизы городын улӥсьёс. Одӥг ар ортчиз. Мукет интые сое выжтыны али нокин но уз быгаты - Волков но, Ельцин но, Клинтон но. Озьыен, ичизэ куинь ар ӵоже пӧртэм ёзъёсысь властьёс куспазы вожвылъяськозы на, калыклы кулэлыксэс ог-огзы азьын возьматыны вырыса. Вань-а кыӵе ке амал югдурез ӧжыт ке но коть сӥятыны? Мон сямен, одӥг гинэ. А. Волков зэм ик тырше ке выль парламентлэсь кужымзэ пайдаё уже ӧръяны, туннэ солы сессилэн кыкетӥ заседанияз премьер-министре ӵектыны кулэ... Павел Вершининэз.Бен- бен, соку гинэ Кун Кенеш кык-куинь пилетлы люкиськонлэсь утиськыны быгатоз. А. Волков возьматӥз бере кужмогес луэмзэ, кельше-а со кинлы ке, уг-а, матысь дыре та адямиен уртче ужано луиськом. П. Вершининэз но валтӥсь ужысь палэнтыны кулэ ӧвӧл. Солэн но тыбыр сьӧраз - уно сюрс адямиос, соослэн азьланезлы осконзы. Ту-ту-у... Сэзь шултыса, поезд кошкиз Агрыз пала. Валлян куать час ӝытозь отчы пуксьыны луэ на вал. Эскером на-а сое кызьы ке сутыны но интыяськыны?.. Яке витём выль поездлэсь вуэмзэ?.. Иван Лебедев. ТАЗАЛЫК Сюлмысь лэсьтэм уж берекето Алигес Пургаысь тазалыкез утисьё аспӧртэм юбилейзэс пусйизы. Ёросын та удыс кылдэм но азинскыны кутскем дырысен 70 ар тырмиз. Сӥё-дано ужрадэ люкаськылӥз уно калык: пӧртэм дыре тыршемъёс, туала вакытэ ужасьёс, эмъяськем муртъёс, куноос. Милям корреспондентмы пумиськылӥз ёрос больницаысь валтӥсь врачен Н. М. Зямаеваен. - Наталья Михайловна, юбилей - со вакытъёслэн воштӥськемзы кадь, одно ик маке но выльзэ, ӟечсэ возьмано. Пичи Пурга больница, отысь ужасьёс понна, мон малпасько, котьмалэсь дуно кузьым луысал, дыр, выль юртэ пырон. - Ми осконмес ум ыштӥське, больницалэн выль корпусэз ӝоген дась луоз шуыса. Та юртмы дасо ар пала лэсьтӥське ни. Берло ньыль-вить арзэ ужъёс воксё могазы. Зор-кот улын юртлэн кирпич бугроез супырӟыны кутскиз. Та дыре лэсьтӥськон нош ик вырӟиз. Табере корпус липет улын ни. Но коньдонлэн ӧвӧлэз ялан шӧдӥське. Ёрос МСО-ысь лэсьтӥськисьёс пунэмен тыршо, шуыны луоз. Быдэстэм ужъёссы понна дун ӝегаса басьто. Озьы ке но, осконмес ум ыштӥське. Выль юрт сярысь сюлмаськеммес умой валаа ёрос администрацилэн кивалтӥсез. Республикаысьтымы Тазалыкез утёнъя министерство но та лэсьтӥськонэз мукет эмъяськон учреждениосты, кылсярысь, онкодиспансерез ӝутонэн артэ пуктэ ни. Зэмзэ но, выль юрт милемлы туж но туж кулэ. Та вакытэ отделениосмы пӧртэм юртъёсын интыяськемын. Соин валче ужасьёсмы кӧня шуг-секытъёс адӟо, кӧня мултэс уж быдэсъяно луо. Курадӟо висисьёсмы но. Вуж юртъёсын угось ӟеч условиос кылдытыны секыт. Осконмы вань Кун Кенеше быръем выль депутатъёслы. Малпаськом, соос лэсьтӥськон ужъёсты йылпумъяны юрттозы. Асьмеос но утчаськиськом. Дасьсэ витьыса пуконлэн пайдаез ӧвӧл ук. - Тӥ асьтэос но ёрос кенешлэн депутатэз луиськоды. Та уж тӥледлы маин ке юрттэ-а, оло нош люкетэ? - Люкетэ шуыны уг быгатӥськы. Пайда ваемзэ но ӧй шӧды на. Кенешмы та дырозь рос- прос ужаса ӧз вутты, ялан организационной ужпумъёсын вырылӥм. - Та секыт вакытэ юбилейлы сӥзем ужрадэз радъяны огшоры ӧвӧл. - Ми кема малпаським, ортчытоно яке ортчытоно ӧвӧл та ужрадмес. Кӧня ке аръёс ӵоже архивъёсын бугыръяським, утчаськыса, ёросамы тазалыкез утён удыслэсь азинскемзэ чакласа. Коллективен кенешыса, огкылэ вуим - ортчытоно. Сизьымдон ар, котьма ке но, бадӟым, пусйымон лыдпус, со коллективлэн азинскон сюресэз, историез. Тае валаны ӧм быгатэ ке, ваньзэ вунэтом. - Вакчияк вералэ вал коллективды сярысь. - Ужасьёсмы сярысь ӟеч кыл гинэ верам потэ. Коллективмес арлыдо уд шуы, дыр. Данакез врачъёсмы но, медсестраосмы но егитэсь. Кадръёс ласянь ке, нокыӵе шуг- секытъёс уг шӧдӥсько. Укыр бадӟым кулэяськонмы ӧвӧл ке но, та вакытэ кутысалмы быдэн одӥг акушер-гинеколог, хирург но анестезиолог. Уж сярысь юалляськисьёс данак. Ми котькудзэ ум быгатӥське. Чакласьком, эскериськом, бырйиськом. 2000-тӥ арлы выль корпусмы вуиз ке, малпасько, кадръёсын ужпум кылдоз ик. - Маин ке ог-огзылэсь висъясько-а гуртысь но городысь больницаос? - Мон тазьы шуысал: гуртын, городын сярысь, чылкак мукет адямиос тыршо. Ӵошатыны быгатӥсько, угось кӧня ке ар ӵоже городысь больницаын ужаны кылдӥз. Соку кыӵе ке секыт учыръя юрттэт курыны быгатӥсько вал медакадемилэн кафедраысьтыз тодосчиослэсь. Гуртысь врач ваньмыз понна ачиз кыл кутэ. Яке мукетсэ пусъём. Городын ӝог медицинской юрттэт сётонъя бригадаын одно ик врач ужа, нош гуртын - фельдшер. Адӟиськоды-а, кыӵе пӧртэмлыкез. Малы таӵе югдур, шуоды? Штатъя сыӵе расписание юнматэмын. Врачъёсмы уйёсы, праздник нуналъёсы быдэс больницая дежурствое потано луо, вань отделениосысь висисьёсты чаклало. Сюбег удысъя специалист таӵе ужез быдэстыны уз быгаты. Нош милям врачъёсмы быгато. Номыр уд шуы, секыт йӧтэ, но соос ваньмызлы дась. - Нош висёнъёсъя аспӧртэмлыкъёс шӧдӥсько-а? - Мон ӧй верасал, соос вань шуыса. Быдэс республикаын сямен ик, трос мурт курадӟе шокан но ты висёнъёсын (ОРЗ, грипп, бронхит но мукет). Кыкетӥ интыын - шуккиськон учыръёс но отравлениос. Куинетӥ инты басьто нервной системаен герӟаськем черъёс (остеохондроз, радикулит но мукет). Кулон учыръёсъя чаклано ке, тужгес кышкыт луо сюлэм висёнъёс, собере мыно шуккиськонъёс, куинетӥ интыын - пыктосъёс (онкология). Таӵе югдур быдэс шаерамы, соин ик кыӵе ке пусйымон аспӧртэмлыкъёсты вераны шуг. Но ёросъя учконо ке, куд-ог тодметъёсты чакланы луэ. Тани, шуом, одӥг гуртысь лыкто. Артысь гуртын ик сыӵе висисьёс ӧвӧл. Озьы бере, таӵе дыръя лыдэ басьтоно, дыр, экологиез, шуом, юон вуэз ик. Ваньзэ тае эскероно вылэм, но милям, врачъёслэн, кужыммы но, дырмы но уз тырмы. - Юбилей вакытэ котьку ик вераськон мынэ азинсконъёс, вормонъёс сярысь. Кыӵе отделенидэс, ужасьтэс нимысьтыз пусйысалды? - Ӟеч кылъёс вераме потэ педиатрияя, терапияя, нуны ваёнъя отделениосын ужасьёс сярысь. Тани терапевтъёсын кивалтэ врач Галина Григорьевна Поторочина. Миым со вылӥ категория басьтӥз. Ёросамы таӵе специалист чылкак одӥг гинэ. Вылӥ категориен медсестрамы но вань. Тамара Яковлевна Юшкова - зарни киё" специалист. Ужа отын, кытын кулэ, шуысал со сярысь. Ӟеч кылъёс гинэ вераме потэ валтӥсь медсестра Любовь Григорьевна Охотникова сярысь. Со кыл кутэ кадръёс понна. Туж сюлмо кышномурт, ужзэ рос-прос быдэсъя. Валамон, троссэ пусйыны луысал, дыр. Коллективмы бадӟым, 400 мурт пала. Гуртъёсысь больницаос пӧлысь нимысьтыз висъясал Бурановоысь больницаез. Ю. МИХАЙЛОВА. "Кенеш" журналлэн выль номерез Серекъятоз но, малпаськытоз но... Журналлы редакция пыр гожтӥськисьёслэсь мылкыд каронъёссэс лыдэ басьтыса, котькуд выль номермы сярысь ивортонъёсты табере "Удмурт дунне" газетэ сётылоно кариським. Кызьы тодмо, соос пӧлын та изданиез лыдӟисьёс но ӧжыт ӧвӧл. Нош кылемъёсыз доры почта, малпаськом, "Кенешез" вуттӥз ни. Маин узыр таиз номермы? Кӧня ке кылын солэн пуштросэныз тодматыны кулэ, дыр. Прозаез яратӥсьёс чидатэк витё ни, луоз, арлэн кутсконысеныз печатласькись кык бадӟымесь произведениослэсь азьланьскемзэс. Нырысетӥ номеръёсамы сямен ик алияз но бадӟым инты басьтэ егит прозаиклэн Вячеслав Ар-Сергилэн "Уй вадьсын - тӧдьы бурдъёс" мадёсэз (романэз). "Улонын мар но уг луы" - озьы нимам аслэсьтыз повестьсэ шаерысьтымы тодмо тодосчи, Россиысь Наукаосъя Академилэн Урал ёзысьтыз Историяя, кылъя но литературая удмурт институтлэн кивалтӥсез Кузьма Куликов. Тодэ ваёнъёсыз вылын гожтэм произведениезлэн кутсконэз печатласькиз ни 1997-тӥ но 1998-тӥ аръёсы. Нош туэ повестьлэсь азьланьтонзэ арлэн кутсконысеныз сётӥськом. Та кык бадӟымесь ужъёс сярысь трос верасько лыдӟисьёс. Со мылкыдъёссэс отӥяз журналамы ивортыломы на. Южтолэзе потэм номерамы бадӟым инты висъямын озьы ик поэзилы. Кылбурчи Алла Кузнецова выль чуръёсыныз тодматэ. Пӧртэм арлыдо лыдӟисьёсты бордазы кыско. "Оло зэм, оло даур" сэрегысь серемес материалъёс. Таяз серемес веросъёсыныз тодматэ Фёдор Миннигараев. Номерысь озьы ик бордазы кыскись трос мукет гожтэмъёсты шедьтоды. Нош табере куронмес верасалмы. Туэ, гужем толэзьёсы, журналмылэсь одӥг номерзэ кырӟанъёслы сӥзёно кариським. Соин валче вазиськиськом ваньмызлы кырӟан гожъясьёслы: выль ужъёстэс "Кенеш" журналлэн редакцияз ӝоггес вуттыны тыршелэ. Туннэ В. И. Ленинлэн вордскем нуналыз Туннэ В. И. Ленинлэн вордӥськем нуналыз. Таин валче тодэ лыкто солэн национальной ужпумлы сӥзем малпанъёсыз. Тани кызьы со ӟуч кыл сярысь малпанъёссэ гожтылӥз. Кавказысь большевиклы С. Г. Шаумянлы. "Тӥ шуиськоды: "Россиын ӟуч кыл государственной луыны кулэ. Солэн кулэлыкез туж бадӟым". Сыӵе малпандылы мон чутрак пумит. Бен, ӟуч кыл туж кулэ вал пичи калыкъёсты пеймытысь поттон понна. Но неужто Тӥ уд валаське ӟуч кыллэн данэз уката но вылӥынгес луысал, сое калыкъёслы кужмысь ӧй пыӵатысалзы ке?" (Гожтэмын 1913 арын 6 декабре). Ленинлэн национальной ужпумъёсъя куд-ог янгышъёсыз но вал. Кылсярысь, со нырысь пумит вал государствоез федерация амалэн кылдытонлы. Но бӧрысьгес, Совето власть кылдэм бере, со государство лэсьтонын федерациез тужгес но умой вамышен лыдъяз. Озьы ке но, Владимир Ленин ноку солань-талань ӧз шонаськылы ичи лыдъем калыкъёслэсь кылзэс ӟуч кылэн оградэ пуктон пумысен. Туж жаль, та ласянь асьмеос, Удмурт Республикаын улӥсьёс, али но бере кылиськом. Кун Кенешлэн азьвыл ӧтчамаз ужам депутатъёс но кылъя законэз юнматыны ӧз быгатэ. Выль быръем депутатъёслы но оскон ӧвӧл. Ма, таяз парламентын удмурт депутатъёс но ӧжыт, дышетӥсьёс но ӧвӧл. Т. БАННИКОВА. ШУНДЫ "Тулыс-99" Шаерысьтымы егит суредасьёс пӧлын ортчиз "Тулыс-99" выставка. Радъязы сое Удмуртиысь Художникъёслэн союззы но Егитъёсын ужанъя кун комитет. Устоез уж понна аслэсьтыз кузьымзэ ӵектӥз "Шунды" дэменлык но - егит скульптор Александр Суворов мыноз этнофутуризмъя куинетӥ калыккуспо конференцие. Со ортчоз Эстониысь Тарту городын. Л. КИМОВА. ШУНДЫ Адӟонэ мынам - общага, яке небыт-а улыно-вылыно валес? - Вералэ вал общежитиын улэм-вылэмды сярысь. Тусьты-пуньы миськон дорам олокытысь егит нылэн пи кылдӥзы. - Ми - газетысь журналистъёс, общагаын алама улон сярысь гожтэммы потэ. Абдраса учко ву виямен сэрен ӵужектэм вӧлдэтъёс но борддоръёс шоры. Паймем синъёссыя ик валай: таос нырысьсэ пыриллям общагае (удмурт сямен - огъяулонние). - Осто! Ма, кызьы татын улыны луоно?! - олокӧня пол ини чабкиськиз пияш. Тодмотэм куараосты кылыса, котьку сямен (тунсыко ук: кин доры кин но ма муген лыктэм) артэ ӧсысь бускель ныллэн йырыз мычиськиз. Ваньзэ тодэмез бере, киыныз гинэ шонтӥз: - Тӥляд гожтэмды уз пӧрмы! Общага сярысь рос-прос мадьыны быгатоз татын кема улэм мурт гинэ. Со тодэ таӵе юртысь ваньзэ гожтымтэ законъёсты. Тодам лыктӥз мукетыз учыр. Дорам вуиз городын улӥсь эше: - Анае монэ общагаос котыртӥ ветлыны ик уг лэзьы. Отын, пе, уло тордосъёс но эрказмем нылъёс гинэ. Палэнысен учкыса, озьы потэ, вылды... Нош ма кылемын на милемлы, сьӧрлось лыктэмъёслы? Адӟонмы сыӵе - общага... Валамон: луэ на нимаз квартирае каръяськыны. Кисыяд тӧл уг шула ке... Юнме уг пусъё, вылды: кин кӧня ке арзэ общагаын ортчытэмын ӧвӧл, со уг тоды зэмос студентлэсь улонзэ. Нырысьсэ та юртэ пырыса, мон но дэйми вал. Усьыны дасяськем ӵужектэм обойёс. Соос вылын - урбо виылэм виштыос. Сэрегъёсын - чонари вотэсъёс. Отӥ но татӥ, кузёос сямен, тараканъёс бызьыло. Пайми вал улыно-вылыно кроватьёслы. Ярам ай, пелез урмытымон ӟукыртысалзы гинэ ке. Ёзъёссы ог-огзы борды рос-прос юнматэмын ӧвӧл. Эскериськытэк выдӥд ке, валесэныд валче музэ сапкиськод, ява. Но... Котькыӵе урод ке но, та - аслам улон сэреге. Донгизы монэ куинетӥ курсысь нылъёс доры. Татын, куинь адямилы улыны чаклам комнатаын, мон - ньылетӥез, пе. Малпасько ни: мар луоз? Ӧс дорысен ик кылӥськод ни лек куараен ӟургемез: - Милемлы татчы ньылетӥез кулэ ӧвӧл. Эшшо ке нырысетӥ курс. Ма карод? Кык амал вань. Яке соку ик утчаськод мукет комната. Яке, ачид шаплыгес ке, отчы туйнаськиськод. Табере тонэ возьма нуналысь нуналэ ог-огдэ йырйыса, пуныос сямен ыргетыса улон. Мыным удалтӥз. Нылъёсын огъя кыл шедьтӥ. Этаж тыр лӧсъяське нырез чатыртӥсь, ӧскем потонэз бугыртӥсь зын. Кинлэн ке но сиёнэз уртчем. Кин ке но жаг куянэ маке кисьтэм. Вылаз ик, ваньмыз та сураськемын на тамак кыскон интыысь потӥсь лыз ӵынэн. Общагае нырысьсэ пыреме бере пайми вал кыскись нылъёслы. Гуртысь адями нуналлы быдэ уг адӟы таӵе суредэз: борддор кузя чурен пуко нылъёс, ваньзылэн ымазы - тамак пумъёс. - Ми дышетскыны кутскыку, нылъёс пӧлын пурккетон модаын вал. Озьы ик дышим,- валэктӥзы соос.- Али сыӵе мода ортче ини кадь. Нош милям тамаклэсь люкиськеммы уг луы ни. Мода ортче-а, уг-а - кыскись нылъёс али но ӧжыт ӧвӧл. Тамак сюпсьытэк, татын номыр карыны. Телевизор ӧвӧл, радио чалмыт. Ялан книга лыдӟон но акыльтэ. - Соин ик кыскыны но юыны кутсконо,- валэкто огъёсыз. Мукетъёсызлэн эшъёссылэсь висъяськемзы потымтэ. Куинетӥосызлэн... Ма, котькинлэн аслаз мугез. Пиосмы трос ӧвӧл. Улоннимес юнме "нылкышно монастырь" уг шуо, дыр. Пиос котьку син азьын. Тужгес но син азьын - нырысетӥ курсысь "букварьёс". Бадӟым батыръёс соосты кыткыса возё. Аракы уг окмы - мын ай, салага. Бызьылы. Сыӵе эшлыко курон куддыръя йылпумъяське жугиськонэн. Пиналъёслы тужгес чидано нырысетӥ толэзьёсы. Кужмыд тырмиз ке, татчы кылёд. Ӧз ке, квартира утчано луоз. Еж пиосты ултӥяку, ченгешонэ пырисько нылъёс но. Соос сайяло "букварьёсты". Бускельёссы ук - жалесь. Талы паймонэз ик ӧвӧл. Туала нылкышно трос удысъёсын пиосмуртлэсь кужмогес. Аракы сярысь вераськон потӥз бере... Огъя улоннилы сӥзем бумагаосын пусъемын: кудӟем йырын ветлыны уг яра. Кин меда сыӵе алонэз санэ басьтӥз ни? Студент юиз, студент юэ, студент юоз. Ӟенелик гинэ мед шедёз, муг котьку но сюроз! Выль ар, эшен пумиськон, вордскем нунал, сётэм экзамен, сётымтэ зачёт... Одӥг тодмое, азьвыл студент, общагае вуыса чабкиськиз: - Студентъёс юо на шат? Дунъёс кӧшкемытэсь ук! Лулысь-сюлмысь ик серекъямы: - Эх, тон! Вунэтэмед ни дышетскем аръёстэ. Тодад вай али: уксётэм дыръёсады, чыртыды бичатыку, тӥ но ӟенелик шедьтӥськоды вал ук. Али но озьы ик. Тросэз дэймизы, дыр, ини. Буйгатэме потэ: куасьмылытэк, нуналысь нуналэ юись комнатаос трос ӧвӧл. Одӥг-ог гинэ. Пӧртэм уллёос пӧртэм сямен юо. Куд-огъёсызлэн сыӵе куронъёссы шыпыт ортчо. Егитъёс капчиям мылкыдзэс ӧс сьӧры уг потто. Мукетъёсыз ӟисто шер, но паськыт. Чузъяське пырак комендант дорозь. Вань ялан тордӥсьёс, этажъёсты шулдыртӥсьёсыз, кивалтӥсьёсты кылэм-адӟем карисьтэмъёс. Таӵе сурымын улон-вылон вуттэ пӧртэм югдуре. Огъёсызлы сессия бере бурд будэ но, соос университетысь лобӟо. Кыкетӥосыз юонын но бере уг кылё, ӟеч дышетскисьёслэн радазы но возисько. Ваньмыз-а нылъёс общагаын капчи выросо? Ачид бордысь потэ, яке - юлтошъёсыд бордысь. Гуртысь лыктэмъёс шӧдо эрикез. Но соин ма карыны валатэк, куд-огез эрказмо: юо, кыско, пиосын калтырто, лымшор палась вуэм воргоронъёсын кушласько. Та ласянь шулдыр улон луэ нырысетӥ курсъёсын: пинал мылкыд - юмал йӧлпыд. Но, дыр ортчемъя, таӵе шулдыр улонлэсь но акыльтоно. Тросэз нылъёс книгаосты йыръё но визь люкало. Таӵеосыз яке ас малпанъёсазы кылдытэм казакпизэс, яке армие келям пияшсэс, яке ыштэм яратонзы сярысь лулӟыло. Мылкыдзы урод дыръя бӧрдо но эшъёссылэсь лӥятӥсь кылъёссэс возьмало. Общагаын, пичи гуртын сямен, номыре ватыны уг луы. Ваньмыз ог-огзы сярысь тодо: кин кинэн ветлэ, кин кинэн кӧла, кин кинэн люкиськем. Ваньмыз туж тунсыко. Озьы ке но... Нырысетӥ курсъёсын паймоно: кызьы общага улонэз мӧзмыт шуод? Татын сомында эшъёс! Татын улон пӧзе! 3-4 ар улыса, со акыльтэ. Куд-огезлэн гинэ "Общага - кыкетӥ дор" шуыны ымзы пыроз, дыр. Уго татын ялан кышкаса улӥськод, уката ик - каникулъёс дыръя: ӧстэ тӥялозы, кельтэм арбериостэ лушкалозы. Дор - со дор ини, со тынад, отын тон ялан курдаса уд улӥськы. Общага - аспӧртэм дышетӥсь. Тросэз нылъёс татын нырысьсэ аракы веръяло, нырысьсэ тамак кыско, нырысьсэ пиосмуртэн улонэз шӧмъяло. Бен, общага трос урод сямъёслы дышетэ. Мукет ласянь учконо ке, тросэз егитъёс шедьто татысь зэмос эшъёс. Соос доры котькыӵе дыре пырыны но "сиеме потэ" шуыны луэ. Уз уллялэ - сюдозы-секталозы. Кырӟамед яке лулысь-сюлмысь кесяськемед потӥз ке (кужымдэ нокытчы карон вакытъёсы), тонэ уз алэ, тонэн ӵош ньылонъёссэс кесялозы. Бӧрдонэд пӧсьтыку уз пыкылэ, малы ке шуоно, соослэн но сыӵе дыръёссы луыло. Соослэн но тынад кадь ик ӧжыт уг тырмы... Е. ИЛЬИНА. Ӟечкылан Можга ёросысь Вылын Юри гуртысь Калинникова Зоя Анфионовналы 2 мае тырме 70 арес. Ми солэн 5 нылпиосыз, сюлмысьтымы ик ӟечкыласьком мусо но дуно анаймес вордскем нуналэныз. Тазалык но шудбур тыныд! Капчи мылкыдыд ноку но пересьмонэз медаз тоды. "Анаймы, тон милям - нуныясь шундымы, Маин тау карыны быгатом? Улонын - яратон пыӵатӥсь сяськамы, Ми котьку ик тонэн данъяськом." Вольыт, чылкыт но чебер "Буммаш" заводлэсь бумага но картон поттӥсь бадӟымесь машинаоссэ тодӥсьтэмез ӧвӧл, дыр. Завод табере линолеум поттон линиос но лэсьтэ. Бен, луэ кадь улыны, линолеумен вӧлдымтэ выжъёс вылтӥ ветлыса но. Озьы ке но... Туж кулэ луись лэсьтӥськон материал со, вӧлдыны луэ стругамтэ выж вылэ но, соин выж вылын пыдъёслы шунытгес, миськыны ӝог но капчигес - чылкытлыкез возён капчиен сётске. Дасэтӥ арзэ ни заводын потто вольыт, чылкыт но чебер линолеумзэс. Заводлэн директорез В. Жебровский та удысын тыршисьёсты нимаз производствое выжтӥз 1993-тӥ арын. Егит но етӥз кивалтӥсьсы М. Н. Иванус со дырысен уката бурдъяськиз, котыраз люказ устоесь инженеръёсты, пумен юисьёсты но азьтэмъёсты воштӥзы ужез гажась рабочийёс. Озьы луонлык кылдӥз туннэлы тросгес но ӟечгес линолеум поттыны. 1994-тӥ арысен арлы быдэ 3 млн.кв.м. линолеум поттэмын, миым - уногес, 3,1 млн.кв.м., яке толэзяз 250-300 кв.м. Асьме дорын поттэм линолеум Россиын умоеныз лыдъяське. Лыдӟисьлэн юанэз кылдоз, нош быгатозы-а асьмелэн усточиосмы кык метръем но солэсь паськытгес но, кунгож сьӧрын сямен, ковёрез кадь пӧртэм буёлэн суредаса поттыны со линолеумзэс? Бен, инженеръёс малпасько со сярысь. Но валамон, таиз вуззы дуногес луоз. Соин сюбегез линолеум азьло сямен ик тросэн потоз, котькудӥз мылкыд карись сое басьтыны мед быгатоз шуыса. Али но вуззы складазы люкаськыса уг кылльы. П. НИКОЛАЕВ. Кун Кенешын Толон ужзэ азинтӥз Удмурт Республикаысь Кун Кенешлэн кыкетӥ ӧтчамезлэн нырысетӥ сессиез. Отын эскериськиз Правительстволы Тӧро быръёнъя ужпум. Пусйыны кулэ, та вераськон сессия дырозь ик ӝутскиз депутатъёслэн огазеяськонъёсазы, "Удмурт кенешын". Бырйисьёсмы но веразы вал асмылкыдзэс: данакез куризы кык кивалтӥсьёсмес - А. А. Волковез но П. Н. Вершининэз - интыязы ик кельтыны но куспазы тупаса, ог- огзылы юрттыса ужаны, республикаез шуг-секытысь ӵошен кутскыса поттыны. Огзэ кивалтӥсьмес сессилэн нырысетӥ нуналаз верам ни: А. А. Волков эшшо 4 арзэ нуоз на аслэсьтыз удыссэ. Нош Правительстволэн Тӧроез ласянь пӧртэм мылкыдъёс шӧдӥсько. Павел Николаевич Вершининлэсь ужамзэ нокин но курласа уг вера, шаерамы со - туж гажамон адями, визьмо, оскымон кивалтӥсь. Но, ватонэз ӧвӧл, кык тӧроос куспазы одӥг кылэ ӧз ке вуэ, кинэ нягыш каронод на... Сессилэсь ужзэ пыр-поч возьматом газетмылэн вуоно номераз. Л. МЕДВЕДЕВА. ВУОНО ДАУР ВОРДӤСЬКЕ ТУННЭ Январёзь кыдёкын ке но... Матэктӥсь 2000-тӥ ар вуоно дауре выжон ӧс выллем луэ. Со аре вордӥськем нылпиос мукет вапумлэн емышъёсыз луозы ни, анай-атайёссы соослы улон кузьмазы ке но туэ ик. Газетмылэн 19-тӥ мартэ потэм номераз ми гожъям ни вал редакциен но Удмурт Правительствоысь ЗАГС ужпумъёсъя комитетэн "Нуны-2000" ужрад ялэм сярысь ("Уй ке чечыё, даур но емышо"). 2000-тӥ арын 1-тӥ январе вордӥськем нырысетӥ нылпиез быдэс дунне данъяны малпа, пӧртэм юрттэтъёс, дуно кузьымъёс дася. Милям но бере кылеммы ӧз поты. Ӵектэм кузьыммес кыӵе ке дуно автомобилен яке квартираен уд ӵошаты, но нылпи коляскалэн озьы ик ньыль питранэз вань, шуныт но югыт азьын нуны ныс-ныс изьыны быгатоз. Кин тодэ, кичӧлтонмес умоен лыдъяса, ёрос администрациослэн кивалтӥсьёссы но асьсэ дорын вордӥськем нырысетӥ нунылы бадӟым саклык висъялозы. Но соиныз али ум дыртэ, анай мугорын кылдэм гердлы будыны но будыны кулэ, вордӥськытозяз кӧня толэзь азьпалан на. Ум малпаське, анай-атайёс нылпизэс кузьым понна гинэ возьмало шуыса. 1-тӥ январь бере вань 2-тӥ январь, май, июль, декабрь, мукетыз январь... Нылпиос вордӥсько бере, иське, адямиослэн азьлань улонлы осконзы уг быры. Кунмы но будӥсь пушъетъёсыз сярысь ӟечгес сюлмаськыны кулэ. Но мед луозы вылэм со пушъетъёс тазаесь, вуоно дауре ӟеч емыш бичаммы потэ ке. Куасьмоз-а выжы писпумы? Мар возьма Россиез вуоно дауре? Та ужпум сюлэмшугъяськытэ демография ужпумъёсын вырись специалистъёсты, учёнойёсты. Туж ик шумпотымон суред син азе уг пуксьы. Сьӧд буёл пыр адӟись демографъёс верало, Россиысь калык быронэ вамыштэ. Сыӵе малпанэ соос вуо нылпиос арысь аре ӧжыт вордӥськемысь, нош кулон учыръёс, соин ӵошатыса, вылӥе ӝутско. Сыӵе югдур Россиын кылдыны кутскиз ини 60-тӥ аръёслэн пумазы. Нош странаямы экономика, политика, калыкез улон-вылонын утён удысын берло дыре трос валамтэос но шуг- секытъёс кылдэмен, югдур уката лэчытомиз. Нылпиос ӧжыт вордӥськем гинэ ӧвӧл, трослы лябӟиз тазалыксы нуны ваёно нылкышноослэн но пиналъёслэн. Висись анайлэн нылпиез но висись вордӥськоз, озьы адямилэн выжы писпуэз пумен куасьмоз. Сьӧд очки пыр учкись демографъёс нош ик лыдъяськыны кутско. Туннэ нуналлы Россиын котькуд 100 вордӥськем нылпи пӧлысь 15-17-ез вордӥське ляб визьем. Со лыдпус 19-озь будӥз ке, странаысьтымы калыкез возьма визьмызъя улӥе лэзиськон. Но ваньмыз учёнойёс Россилэсь азьланьзэ сокем-сокем уродэн уг адӟо. Экономика ласянь югдур странаямы умояз ке, нылкышноослэн но тросгес нылпи вордыны луонлыкъёссы кылдозы, висись пиналъёс но ӧжытгес луозы. Нош мар меда малпало Россиын улӥсьёс туала шуг-секытъёс вакытэ нылпи ваён пумысен? "Комсомольская правда" газет интернет пыр юалляськонъёс ортчытӥз (27 март, 1999 ар). Юамъёс пӧлысь 66 процентэз лыдъязы, нылпи ваёнэз берлолы кельтоно ӧвӧл. Мукетыз юан: возьма-а Россиысь калыкез демография ласянь кӧшкемыт адӟон? 62 процентэз юамъёс сыӵе кышкытлык вань шуизы. Лыдпусъёс малпаськытӥсесь. "Нуны-2000" ужрад ялӥськом, нош мар возьма шаерысьтымы со аре но со бере вордӥськем нылпиосты? Та пумысен аслэсьтыз малпанъёссэ вераны куримы Удмурт Правительствоысь семья ужпумъёсъя, калыкез улон-вылонын утёнъя но тазалыкез утёнъя отделлэсь кивалтӥсьсэ Ирина Владимировна Галинаез. Висись анайлэн нылпиез но висись - Россия Федерациын 1994 арысен ини кулон учыръёс нылпи вордӥськемлэсь тросгес луо. Учёнойёс, нош ӵемгес политикъёс, укыр мултэс куасалтыса вераны туртто нацимылэн бырон калэ вуэмез сярысь, демография ласянь кризисэн кышкато. Бен, странамылэн экономикаез шуг-секытэ шедемын, политикаын трос валамтэос кылдэмын, нош со шукке семьялэн улонэз вылэ, нылпиос ӧжыт вордӥсько, калыклэн тазалыкез лябӟе - висись анай висись нылпи вордэ. Азьло сямен ик семьялэн шоро-куспо лыдыз республикаямы 3,5 адями луэ. Тросэз семья будэтэ одӥг яке кык нылпи, куинетӥосыз туж ӧжыт вордӥсько ни. Соин валче вань сизьым но, дас но пинал будэтӥсьёс. Йылэ огназы нылпи будэтӥсь анайёслэн лыдзы. Но тужгес сюлэмшугъяскытэ 15-16 аресъем нылъёслэн анай луыны дыртэмзы. Озьы ик трос нылпиё анайёслэн карттэк пинал ваемзы, ваньзэс секыт семья пӧлы пыртыны уг ке но луы. Нош шугъяськытӥсь семьяос, зэмзэ но, туннэ нуналэ асьмелэн туж трос, со - куанер улӥсьёс но огназы нылпи будэтӥсь анайёс яке атайёс. Озьы ке но, кылдэм шуг-секытъёс шоры учкытэк, нылкышноос уг кышкало нылпи вайыны, уката ик егитъёс. Республикаямы берло куинь аръёсы нылпи ваён йылӥз. Кемалась ӧвӧл, 20 сюрс пала нуны вордӥське вал, собере со лыдпус пумен улӥе лэзиськиз - 13 сюрс пала луиз. Нош 1998 арын шаерамы вордӥськиз 16 сюрс 268 нылпи, 1997-тӥ арен ӵошатыса, 600-лы ятыр. Странамес демографияя кризис возьма шуыса, кулэ-а бен тросгес нылпи вордыны курыса золос кесяськыны? Мон малпасько, со шонер ӧвӧл. Сю ар ӵоже ини нылпиос ӧжыт но ӧжыт вордӥсько, сыӵе югдур асьме странаын гинэ ӧвӧл. Кылсярысь, Швециын, Даниын, Германиын нылпиос кемалась ӧжыт вордӥсько ни, но соос та пумысен йырсизэс уг кыскало ук. Соос трос лыдпусъёс сьӧры уг уисько, нырысь ик учко ӟечлык шоры, адямилэн улон- вылонэз но тазалыкез шоры. Тӥни мар сярысь дугдылытэк вераны кулэ демографъёслы. Асьмеос вань луонозэ лэсьтыны кулэ, нылпиосмы таза мед вордӥськозы шуыса, утёно нылъёслэсь но нылкышноослэсь тазалыксэс. Со 16 сюрс пала вордӥськем нылпиосмес зарниез сямен утьыны кулэ. Кулон учыръёс сярысь ке верано, Россия Федерациен ӵошатыса со шаерамы 1998-тӥ арозь ӧжытгес вал. Но 17-тӥ август бере югдур секытомиз - эмъюмъёс, нылпи сиёнъёс, витаминъёс трослы дуноязы. Анай луыны дасяськись нылкышнолы маин тазалыксэ юнматоно? Со но юрттэ 1 аресозь вож нуныослы улонысь кошкыны, яке соос вордӥсько дырызлэсь вазь, ляб тазалыко но ляб визьем. Егит нылъёс но нылкышноос пӧлын вӧлмемын наркомания, вина юон. Валэктонэз ӧвӧл, дыр, кытчы таиз но вуттэ. Шаерысьтымы тросэз нылпиос курадӟо шокан ёзвиоссы висемен, шудтэм учыръёсы шедё. 14 аресозь пиналъёс пӧлын шудтэм учыръёслэсь бырон нырысетӥ интыын сылэ. Соин ик анай-атайёслы нылпиоссэс сакгес эскероно, дышетоно соосты асьсэды утён амалъёслы. Вож нуныос пӧлын кулон учыръёс тросгес районъёсын, уката ик Ярын, Балезиноын, Камбаркаын, Кизнерын, Красногорскын. 2000-тӥ арысь нунылэн тазалыкез сярысь сюлмаськоно ини туэ, со понна асьсэлы анай луыны дасяськись нылкышноослы тазалыксы сярысь сюлмаськоно, тырмыт но ӟечлыко сиськоно. Бен, шуг-секытъёс трос: коньдон ӧвӧл, сиён уг тырмы. Озьы ке но, вордӥськоно нуныослэн тазалыксы сярысь малпаськоно ёрос администрациослы но. Тани Селта, Можга но Яр районъёсын анай луыны дасяськисьёслы бюджетысь коньдон висъяны чакламын. Нылпиос сярысь сюлмаськыса, Тазалыкез утёнъя министерствоын но пӧртэм ужрадъёс кутӥсько, со пӧлы ик пыртыны луоз иммунопрофилактикая программаез. Варзи-Ятчи санаторийын быдэс ар ӵоже толэзьлы быдэ эмъяло 150 ӵем висьылӥсь но инвалид пиналъёсты. Вераськон мынэ "радиозаводлэсь "Уральские зори" шутэтскон базазэ Тазалыкез утёнъя министерстволы сётыны. Отын тазалыксэс юнматыны чаклало пиналъёслэсь но нылпи ваёно анайёслэсь. Берло дыре укыр трос уродзэ вераны, возьматыны кутскизы. Нош кулэ вылэм шедьтыны югыт виштыосты но. Мар умоез вань асьмелэн - сое азинтоно. Висись, ляб визьем пиналъёс азьло но вордӥсько вал, но сое ватылӥзы. Ӧжыт-а али асьмелэн усточи, котьмалы быгатӥсь пиналъёсмы? Азьло аръёсын ӵошатыса, школаын дышетон программа но трослы секытгес. Шаерысьтымы тросэз пиналъёс вормисе потыло Россиын но дуннеысь калыкъёс пӧлын ортчылӥсь олимпиадаосын. Нацилэн быронэз сярысь шат со возьматэ? Асьмеос урод улыны кутскимы, со бордысь ик ваньмыз потэ. Но со югдур тупатонтэм ӧвӧл. Туннэ мон вераны уг быгатӥськы: гажано нылкышноос, тросгес нылпи вордэ, ӵуказе ваньмыз умой луоз. Уз, ӵуказе умой уз луы. Соин ик нылкышноосты, пинал нылъёсты солы дасяны кулэ. Пичиысен ик мед малпаськозы анай луыны, мед утёзы асьсэлэсь тазалыксэс но лулпушсэс. Мар луэ асьмелэн туала егитъёсынымы? Пинал дырысь висёнъёссы борды ватсаське асьсэды укыр эрико возён, нош со вуттэ мукет висёнъёсы. Солэсь-а бен возьмалод таза нылпи вордэмзэ? Ӟеч улыны кутскыса но, государство ваньзэ семьяез пыд йылазы ӝутыны уз вормы. Соин ик котькудӥз ас азяз юан пуктыны кулэ: кӧня нылпиез ӝутыны вормомы, соос таза но кӧттыро мед будозы шуыса. Нылпиосыд азьын, ас азяд, государство азьын кыӵе ке но кыл кутон луыны кулэ, малпасько. Соку гинэ вуоно дауре вамышъёсмы йыгмытэсь луозы. Л. МАЛЫХ. Тулыс сюлмаськонъёс Лымы гурезъёс шунаса бырозы шуыса, оскон но ӧй вал кадь. Нош со, мултэс тудвутэк, шукыръяськытэк лушкемак гинэ музъеме пыӵаз. Озьыен, вуоно урожайлы будыны муослэн мускытсы тырмыт луоз. Шобретлэсь мозмем бусыосы арня-кык ортчыса потозы гырисьёс- кизисьёс. Шаераммы кузёяське тулыс! Нош бакча сиён будэтӥсьёс куазез трослы азьпалто. Нырысетӥ шырчик вуытозь, тюрагай куара чузъяськытозь, ссослэн убо вылазы сяськаясько, куаръясько ни огреч но кубиста, помидор но пӧсьтурын. Завьялово районысь "Ижевский" эштос ёросысь хозяйствоос понна кубиста уд будэтэ. "Россия", "Родина", "Правда", "Юськи" арлы быдэ ӟеч урожай басьто Пироггуртысь нылкышноослэн сюлмаськеменызы. Кивалтэ та бригадаен агроном Нина Вячеславовна Емельянова. Йылпумъяз Ижевскысь гурт удысъя институтэз. Ужаз Марий Элын. Отысь бертыса интыяськиз город вӧзысь хозяйствое. Плёнка улысь убоос вылын вож-вож адско ненег будосъёс. Вазь вуись выжыосыз 4-5 куаръемесь, таосыз гужем шорын базаре вуозы ни. Бер сӥзьыл утялтоноосыз али бычыяны выро. - "Амагерез" туннэ гинэ кизиськом ай. Мерттӥськом "Июньское", "1 номеро", "Колобок" но музон выжыосты, - шуэ Нина Вячеславовна. - Бер вуисьёсыз пӧлысь мыным тужгес но кельше "Колобок": со тулысозь гуын кылле, уг шуя, ӟечлыксэ кема возе. Шӧмзэ но уг ышты. Озьы ик синмаськисько "Московская поздняя" сортлы. Таиз но сисьмыны, бырыны уг сётскы. Кубиста бере та убоосы мерттозы огреч. Помидорен, сяськаосын берло аръёсы выремысь дугдӥзы, малы ке шуоно, тыл но шуныт сётон туж дуно луизы. Лябӟм хозяйство понна со - вормонтэм. Плёнка ласянь но шуг-секытъ кылдэ. Асьме дорын лэсьтэмез одӥг гужемлы сяна уг чида, тулыслы быдэ сое выльдоно луэ. Дуно усе, нош пияла - эшшо но дуногес. Городэн артэ сылӥсь хозяйстволы та удыс чотын туж майбыр улоно кадь, сяська, вож сиёнъёс будэты, уксёдэ дугдылытэк жильды. 70-тӥ аръёсы со озьыгес ик вал. "Ижевский" совхоз Ижевскез умой сюдӥз. Алиен ӵошатыса, 4 поллы бадӟымгес теплицаосысь тоннаосын бакча сиён вузаллязы. Калык туннэ но ӟечен тодаз вае азьвыл директоръёсэс Ю. С. Зайнаковез, А. М. Болдыревез. Совхозэн кивалтон вакытазы соос та удысэз юнматӥзы. Берло дыре бакча сиён будэтон куашкам калэ вуэмын. Уждунэн но секыт, арен ӝыныен ӝегало. Огез шумпоттэ: Финляндиын поттэм кизён но ву киськан техника басьтыны быгатӥзы. Кӧня киосты со воштӥз! Тулыс вуэмен, адямилэн ӝож мылкыдыз сылме. Пироггуртысь бакча сиён будэтӥсьёс но шумпото чебер ӝужам удъёслы, уж шедемлы. Ӝыны ар пала соос уго гуртазы пукизы. Нош али ӵукналы быдэ дырто теплицаос пала: Завьялово районлэн кубистаез калыкмес сюдыны толбытлы тырмыны кулэ. Л. МЕДВЕДЕВА. Н.В. Емельянова - бакча сиён будэтӥсьёслэн бригадирзы. Пичияк шутэтскон дыръя. Фотоосыз В. КАМАШЕВЛЭН. Выжыосмылы сӥзьыса Кык нунал ӵоже Удмурт кун университетын ужаз перм калыкъёслэн литературазылы, фольклорзылы, кылъёссылы, удмуртъёслы ӵыжы-выжы луись калыкъёслэн культуразылэн Европаысь огъя культураын интыезлы сӥзем нырысетӥез симпозиум. Ижевскысь, Сыктывкарысь, Москваысь, Йошкар-Олаысь, Пермьысь но мукет интыосысь учёнойёс огазе люкаськизы перм калыкъёслэсь культуразэс эскеронын выль тодон-валанъёсын узырмон, та удысысь ужпумъёсты огъя кужымен быдэстон, азязы выль ужпумъёс пуктон понна. Удмурт кун университетлы та ужрадэз радъяны юрттӥзы Удмуртиысь Калыкез дышетонъя министерство. Правительстволэн Нациосын ужанъя комитетэз, "Удмурт кенеш" огазеяськон. О. МАКСИМОВА. Кытын? Ма? Украинаысь одӥгаз городысь больницае вуттӥзы 12 аресъем гуртысь Стасик нимо пиез. Пияш мадиз, толэзь талэсь азьло солэн синмаз пичи гинэ жаг пырем. Кема висьыса улэменыз, синмыз берло воксё но тӧрнам. Больницаын син эмъясь пияшлэн синмысьтыз жагез капчиен поттӥз. Но сое учкыны больницаысь вань ужасьёс ветлӥзы. Уд но оске, Стасиклэн синмаз укроплэн тысез шедем вылэм. Озьы со синмын кылльыса тордэм но куар потыны кутскем. *** Уфаысь 72 аресъем кышномурт аспӧртэмлыко рекорд пуктӥз. Со кезьыт люкмесын 57 минут но 27 секунд пыласькиз. Со дыр куспын "морж" сюрс куать сю метрез ортчиз. Сулейманова улон даурезлэсь ӝынызэ люкмесын уя ни. Со толалтэ ортчись кезьыт вуын уянъя ӵошатсконэ но пыриськиз, кудӥз нырысьсэ Татарстан Республикаын ортчиз. Соку Асия Сулейманова ас аресъем нылкышноос пӧлын вормисе потӥз. *** Пермь улосысь Чусовое гуртын улӥсь Прянчикова Прасковьялы 105 арес тырмиз ни. Гуртын, со сяна, нокин сомында аресэныз ушъяськыны уг быгаты. Вордӥськем нуналзэ пусйыны ветлӥзы улослэн администрациез, ветеранъёслэн кенешсы, улон-вылонын юрттонъя управление но мукетъёсыз. Нош юртъёсты возёнъя управление 105 аресъем кышномуртэз квартира дун тыронлэсь мозмытӥз. Со дыре ик песянай пусйиз, уд, пе, кышкаське-а трос коньдон быдтоды шуыса. Мон ведь, кема улыны малпасько на. Зэмзэ но, Прасковья аслаз аресъем пересьёслэсь пиналгес адӟиське. Али но солэн тӧдь-тӧдь пиньёсыз ай, одӥг пурысьтам йырсиез но ӧвӧл. Бускельёсызлэн верамзыя, кышномурт туж лякыт сямо, котьку вазиськись но азьланезлы оскись. Вутске на бакчаяз но ужаны, нюлэскын губияны но дыр шедьтэ. ИМА-пресс. Нюлэс уг ваты пӧйшурез Туэ асьме шаерысь нюлэскысь пӧйшуръёс туж секытэн толйизы. Лымы трос усемен кыр парсьёслэн но койыкъёслэн сиськон интыоссы сюбегазы. Нош мур лымыетӥ кӧттыр утчаса ветлӥсь пӧйшурлэн кужымез но трос быре. Лябӟем пӧйшур лякытэн шеде браконьеръёслэн ки улазы. Пӧйшуран хозяйствоя управленилэн кивалтӥсез Виталий Леготкин ивортэмъя, туэ законэз тӥяса койыкез кутон 40 учыръёс пала пусъемын вал. Кылем арен ӵошатыса та лыдпус одӥг но ӝыны поллы йылэмын. Шаерысьтымы куд-ог ёросъёсын законэз тӥяса пӧйшурасьёс нимаз группаос но кылдытъязы. Соос, киязы тӥр но пуӵ кутыса, лябӟем пӧйшурез капчиен кутылӥзы. Вакчи дыр куспын вить-куать койыкез вандыса сӥль дасяллязы. Йыртэмасьёсты уг кышкаты нокыӵе штраф но, кыл кутытон ужрадъёс но. Туэ 1-тӥ январьлы койыкъёслэн лыдзы 8300 йыр вал. Та лыдпус шӧдскымон кулэсмиз ке, вуоно арын койыкъёсты туэлэсь ичигес кутыны лэземын луоз. Л. ЮРТЕЕВА. ТАЗАЛЫК Юалэ - валэктом Мар со чупырга? Нуные вож дыръяз туж керӟег вал: ялан посӥськыса улӥз, уин урод кӧлаз. Пересьёс чупыргазэ поттыны косӥзы. Собере, зэмзэ но, нылпи буйгаз - малы врачъёс уг валэкто со сярысь? И. СТЕПАНОВА, егит анай. Та юанэн ми вазиськылӥм республикаысьтымы нылпи больницаысь педиатрлы Елена Константиновна Ягуровалы. - Чупырга - со ку улысь векчи небыт гон (йырси). Луэ ваньмызлэн вож нуныослэн, ӵемысь - тыбыразы. Медицинаын сое сальной ихтиоз шуо. Чупырга висён ӧвӧл, соин ик сое нимысьтыз уг эмъяло. Пересьёслэсь кылзыса, егит анайёс чупыргаез одно поттыны тыршо, йӧлын, чечыен, чырс ыльнянен зыраса. Нунылэн куэз векчи, небыт бере, со озьы каньылэн потэ. Но сыӵе эмъяськон нунылэн тазалыкезлы кышкытлык кылдытэ: куддыр, инфекция сюрыса, ку азыны, висьыны кутске. Нылпиез чылкыт, утялтыса возид ке, чупырга сое уз керӟегъяськыты. Нош бӧрдэмезлэн мугез мукет но луыны быгатоз, соин ик пиналэз врачлы возьматыны кулэ. Дасяз З. ВАХРУШЕВА. ВАЛЭКТЭ ЮРИСТ СЭРЕГЕЗ НУЭ АДВОКАТ ЛИЛИЯ ШКЛЯЕВА Музъемез ваньбурен воштон Атае завещание гожтӥз, ваньбурзэ мыным кельтэ шуыса. Мон соку кыкетӥ группаен инвалид вал, нокытын ӧй ужа. Кулэмез бере мыным кылиз 7 гектар музъемез но ваньбурез. Тазалыке уродэн мон музъем вылын ужаны уг быгатӥськы. Соин ик колхозлэсь кури ю тысен, пилорамаен, тракторен, машинаен, валэн юрттэт, со понна колхозникъёслы быдӟа ик дун тупатыны. Тодэме потэ: колхоз быгатоз-а озьы юрттыны? Михаил Никитин. Балезино районысь Турецкое гурт. "Гражданъёслэсь музъемлы Конституциен сётэм правооссэс быдэсъян сярысь". Озьы нимаське Россия Федерацилэн Президентэзлэн 1996-тӥ арын 7-тӥ мартэ юнматэм Указэз. Музъем люкетлэн кузёез мукетъёсызлэсь музъем возисьёслэсь юатэк музъем люкетсэ быгатэ: - кинлы ке кельтосэ (наследствое) выжтыны; - кутскем (фермер) хозяйство кылдытонэ кутыны; - вузаны; - кузьманы; - ваньбурен но мукет музъемен воштыны; - крестьян (фермер) хозяйствоослы арендае сётыны; - рента огкылъя (договоръя) но улытозь утялтон вылысь сётыны; - гурт хозяйствоя организацилэн фондаз пай чотын сётыны; - Закон лэзе музъемез ваньбурен воштыны. Со понна кык палъёс ик соглаш мед луозы. Колхоз быгатэ тӥленыды сыӵе воштӥськон лэсьтыны, но сое нокин но озьы кужмысь карыны уг косы. Мон но картэ ветлӥмы Германиен ожмаськонэ. Картэ кулӥз ни. Мыным 75 арес. Будэтӥ аслэсьтым но ӵыжы-выжыосылэсь нылпиоссэс. 1997-тӥ арын ми сутскимы. Тортым администрацие но Кез районысь администрацие вазиськи, нюлэс но ӝыны дунын пу курыса, музон льготаосме юаса. Отысь номыр но курылэме ӧвӧл ке но, мыным ӧз юрттэ. Оло, милемлы нокыӵе льготаос ӧвӧл ни? 1942-тӥ-1945-тӥ аръёсы мон госпитальын басьяй 325 манет. Табере кӧня луыны кулэ пенсие? Елизавета Мосова. Кез районысь. Тортым черкогурт. Удмурт Республикаысь Правительство 1996-тӥ арын 18-тӥ мартэ кутӥз "Ожысь но ужысь ветеранъёслы льготаосты пумен (этапен) пыӵатон сярысь" Закон. Со дасямын Россия Федерацилэн "Ветеранъёс сярысь" Законэзъя. Отын чакламын оже ветлэмъёслы эстӥськонэз вузаны но вайыны ӝыны дунын. Законысь куронъёсъя тупатэм льготаосты нокин ӧз быдты. Но соосты сётон урод радъямын, интыысь бюджетъёсын коньдон окмымтэен. ТАЗАЛЫК Лушкем ке но, шара Та висёнъёсты "выль" черъёс пӧлы пыртыны луоз - Россиын, озьы ик Удмуртиын, соосты 1994 арын гинэ шараяны но эмъяны кутскизы. Тӥни соку кыре потӥз уноезлэн нылкышно но воргорон висёнъёслэн, кышномуртъёслэн нылпи вайыны быгатымтэзылэн мугъёссы. Вераськон мынэ хламидиоз но уреоплазмоз сярысь. Соос сярысь вераны куримы республикаысьтымы кожно-венерологической диспансерысь врачез Светлана Владимировна Суслоноваез. Хламидиоз - матысь кусыпъёс возьыку паласькись (венерической висёнъёс) пӧлысь тужгес паськыт вӧлмем чер. Кылем арын Удмуртиын 3478 мурт соин висиз. Котькуд 100 сюрс адями пӧлысь 212-ез хламидиозэн черламын. Ӵемгес висё 20-29 аресъемъёс. Угось та вакыт - яратонлэн, синмаськонлэн сяськаян вакытсы. Со сяна, егит нылкышноос анай луо, гинекологъёс доры вазисько но тросэзлэн висёнзы та вакытэ шараяське. Хламидиоз - лушкем висён, со адямиез пушкысеныз йыръе, нош висись мурт черзэ ӵемысь уг но шӧдылы. Нылкышноос пинал вайыны уг быгато - соослы яке нылпи уг сюры, яке нылпизы усе. Секытэн вакытазы плацента пыр яке вордыкузы нылпизылы хламидиос (висёнлэн микробъёсыз) шедё ке, пиналзы кулыса вордӥське яке менингитэн, пневмониен висьыны кутске. Нылкышно мугорын микробъёс сперматозоидъёслы пумит "ожмасько". Кышномуртлы ӵемысь воспаление луэ. Хламидиозлэн висись пиосмуртъёс простатитэн (10-40 процентэз), уретритэн висё, ёзвиоссы лябӟо. Уреоплазмозэн, микоплазмозэн висисьёс шаерамы кылем арын 5165 мурт пусъемын вал. 1997 арен ӵошатыса, та лыдпус трослы йылӥз. Котькуд 100 сюрс адямилы быдэ 315-ез черламын. Микоплазмозлэн ог 100 пӧртэм микробъёсыз тодмо. Куинез гинэ соос пӧлысь кышкытлык ваё. Но адямилэн иммунитетэз шуак лябӟе ке, шуом, секыт висьыкуз, кышномуртлэн - секытэн дыръяз, нылпизэ куштэмез бере, сыӵе микробъёс вазер пиньёссэс возьмато. Уреоплазмоз, микоплазмоз сьӧразы эшшо но тросгес висёнъёс ваё, хламидиоз сярысь. Вераны луоз, соос кӧтулысь вань ёзъёсы вӧлмо шуыса. Пекляосы, кызьпуйыэ кӧльыос кылдо, воспаление луэ. Пиосмуртъёслэн уретрит, простатит аля. Уреоплазмозлэн микробъёсыз сперматозоидъёслэсь быжзэс вандыло. Кышномуртъёс нылпи вайыны уг быгато, быгато ке но, пиналъёссы ӵемысь висисесь вордско. Та "выль" висёнъёсын черламъёс пӧлын ог 80 процентэз - кышномуртъёс. Озьы возьмато лыдпусъёс. Шонерзэ верано ке, пиосмуртъёс нылкышноослэсь та ласянь бере уг кылё. Но соос врачъёслы уг вазисько, эскеронъёс пыр уг ортчо. Ӵемысь кышномурт та висёнъёслэсь огназ йӧнатске, нош картэз яке туганэз огпол гинэ дораз "куное ветлэ" но, солэн вань черъёсыз берлань берытско. Кузпалъёслы, туганъёслы эскериськоно, эмъяськоно огдыре, та вакытэ матысь кусыпъёс возёно ӧвӧл. 2-3 арня ӵоже эмъяськемзы бере, кыкназылы (озьы ик кузпалъёслы туганъёссылы) нош ик эскериськоно. Анализъёсты сётыны луэ Воткинскысь, Сарапулысь, Глазовысь, Можгаысь, Ижевскысь кожно-венерологической диспансеръёсын. Матысь кусыпъёс возьыку, паласькись вань висёнъёсты (сифилис, гонорея, микоплазмоз, хламидиоз но мукет) Ижевскысь диспансерын 15 минутскын шараяны луэ. Вань висёнъёслэсь кадь ик, та черъёслэсь но капчигес утиськыны, висьытозь. Со понна котькудӥз адями матысь кусыпъёс одӥг муртэн гинэ мед возёз, нылъёс ас данзэс бызьытозязы мед утёзы. Вань венерической висёнъёслэсь (сифилислэсь сяна) 100 процентлы уте презерватив гинэ. Нырысьсэ Ижевскысь Октябрь ёросын, озьы ик быдэс городын но, нырысьсэ ортчиз удмурт кырӟанлы сӥзем фестиваль. Отчы пыриськизы нылпиослэн но озьы ик мӧйыослэн коллективъёссы. 83 номеро школаысь хоре, кылсярысь, 36 кузя пиналъёс люкаськиллям. Нагорное посёлокысь но Игерман гуртысь фольклор коллективъёс чеберак пиштӥзы сцена вылын. Нош тужгес паймытӥзы синтэмъёслэн огазеяськонысьтызы "Лейся, песня" но "Ивушка" ансамбльёс. Пусйыны кулэ: таиз коллектив алигес Новосибирскын ортчем калык куспо фестивальлэн лауреатэз луиз. Т. НИКОЛАЕВА. Удмурт драмтеатрын - тулыс Таӵе дэри, кот куазь ваньмызлы акыльтӥз ни, дыр. Соин ик 13-тӥ южтолэзе (апреле) Удмурт драмтеатрын Андрей Анкудиновлэн театр-студиез но "Мылысь-кыдысь" телеверан турлы-турлы буёло тулысэз возьматӥзы. 19 часлы татчы люкаськылӥзы удмурт эстрадаысь кырӟасьёс но соосты яратӥсьёс. Тани операторъёс выж вылэ тӧдьы кагаз поныса эскеризы камеразэс но, ужзы пӧзьыны ӧдъяз: угось кутскиз шулдыръяськон. Учкисьёслэсь чабыны но шуланы быгатэмзэс эскериз Владимир Соловьев. Со ик ӝытэз но нуиз. Пиналъёслы но, мӧйыослы но тужгес яразы Михаил Ворончихин, Геннадий Бекманов, Алевтина Корепанова, Ольга Зорина, Иван Григорьевых, "Айкай" театрысь Светлана Смагина, Анна Плотникова но мукетъёс. Сцена вылын соослы юрттӥз "Декаденс" шоу-балет. Куинь час куинь минут кадь ортчиз. Чебер "сяськаос" васькизы сцена вылысь. Нош бадӟым люстра вылын чонари вотэс дырекъяз. Чонари кошкеммес возьмаз, дыр. Таӵе ӝытъёс ӵемгес луизы ке, сое татчы билеттэк уз лэзе ни ук. Зоя КУЗНЕЦОВА, Удмурт кун университетын дышетскись. Удмурт Республикаысь Кун Кенешлы Тӧро быръён сярысь Удмурт Республикаысь Кун Кенешлэн Постановлениез Удмурт республикаысь кун Кенеш пуктэ: Удмурт Республикаысь Кун Кенешлы Тӧрое быръёно Александр Александрович Волковез, Глазов городысь быръёнъя 54 номеро Левобережной округъя депутатэз. Удмурт Республикаысь Кун Кенешлэн Тӧроез А. А. ВОЛКОВ. Ижевск город, 1999 арын 20 апреле. � 3-ИИ. Шӧкыч Уг тодӥськы ни Куамынэтӥ аръёсы быдэс политбюро Владимир Киршонлэн пьесаезъя "Хлеб" спектаклез учкыны тетаре ветлэм. Авторез сое правительстволэн пукон интыяз ӧтёзы шуыса витем. Но сое отчы ӧтиллямтэ. Арня ортчыса, Сталин ветлэм Горький доры. Солэн куноосыз пӧлын вылэм Киршон но. Вань калыкъёслэн атайзы доры мынэм но юам: - Сталин эш! Яраз-а Тӥледлы "Хлеб" спектакль? Мон - солэн авторез, соин ик туж тодэме потэ вал малпандэс. - Уг тодӥськы ни, - шуэм Сталин. - Дас куинь арес дыръям учки Шиллерлэсь "Ковраство и любовь" пьесазэ. Сое тодӥсько на. Нош "Хлеб" спектаклез уг тодӥськы ни. *** Куинетӥ класс Ураметӥ веськрес мугоро туж чебер нылмурт вамшыъя. Дораз таксист дугдэ но вазиське: - Чебер апай, тӥелдлы нуоно ӧвӧл-а? - Нуоно вылэм но, только кыӵе тӥляд водительской классты? - Нырысетӥ. - Мын ас сюрестӥд! Водитель выльысь берытскиз но нылаш доры дугдӥз. - Тӥледды нуоно ӧвӧл-а? - Нош кыӵе тӥляд классты? - Кыкетӥ! Водитель нош ик берытскиз нылмурт доры. Соиз выльысь юа: - Кыӵе тӥляд классты? - Куинетӥ. - Соку мынӥм! Ныллэн коркаез доры вуизы. Нош такисит юатэк ӧз чида: - Ӧй вала серем каремдэс, малы тӥледлы одно ик кулэ вал куинетӥ класс? - Туж огшоры. Нырысетӥ но кыкетӥ классъем водительёс, соос вӧзы пуксиськод ке, одӥг киынызы руль борды кырмисько, нош мукетсэ юбка улэ донго. Нош куинетӥ классъем шофёр кыкеныз ик киыныз руль борды кырмиське. *** Нимзэ вунэтӥ Воргорон доры куное лыктӥз кемалась дырысен эшез. Ӝӧк сьӧрын пукыкузы, кышноез шоры картэз ялан вазиськылэ: - Мусое, салатэд вань на-а? - Шудэ мынам, селёдка вай на вал. - Шундые мынам, заливноед туж ческыт. Вай на милемлы ӧжытак. Эшез ӧз чида ни юатэк: - Тӥ кызь ар ини ӵош улӥськоды, нош али ке но весь яратонэ шуиськоды? Кызьы тӥ быгатӥды сыӵе мылкыддэс утьыны? - Куать ар ӵоже ини солэсь нимзэ тодам вайыны уг быгатӥськы. *** Павловез (со премьер дыръя) допросэ ӧтё. Следователь юа: - Кытын партилэн зарниез? Павлов валэктӥз: - Со коммерческой тайна. *** Аракыен вузкарон магазин дорын бадӟым черод. Ураметӥ атаеныз мынӥсь пияш юа: - Атай, кинъёс озьы черодын сыло? - Соос, пие, азьтэмъёс, асьсэлэн аракы пӧзьтэмзы уг поты. Г. Вахрушев. ШӦКЫЧ Шыръялод, ширъялод Визьмо адямиос верало: "Автомашина ке басьтӥськод, сое возьыны сомында ик коньдонэд мед луоз". Зэм со. Асьмелэн дынгыр-дангыр сюресъёс выламы машина гинэ ӧвӧл, танк но шальтралоз. Нош кӧня усе "корт валэз" тупатъян та дыре? Тани кызьы дунъязы сое "ЭКСО-Ижевск" фирмаын ужасьёс. Кызьы возьмато лыдпусъёс, тӥяськем машинаосты тупатъян-выльдон ужъёс ялан будо. Сюрес вылын шудтэм учыръёс но толэзен-толэзен огкадь уг луыло. Тужгес трос соос пумисьскыло февраль, июль но ноябрь толэзьёсы. Маин со герӟаськемын? Толлэн берпуметӥ толэзяз куазь ӵемысь пельске, ульчаосты урод сузяло, ӵем луэ йӧвалег. Июле сюрес вылэ тросгес пото сад-бакча возисьёс. Толзэ шутэтскемзы бере, руль сьӧрын соос кышкасагес возисько. Нош ноябре усе нырысетӥ лымы, кылдэ йӧвалег, уноез ворттыло гужем резинаен. Озьыен, тодады вайытӥськом: ортчем арын феврале автомашинаез тупатъян сылэ вал 5548 манет, туэ - 8620 манет. Дунъёс нош ялан будо но будо. Чаклаське, сюрес вылын эн дыртэ, коньдондэс шыръялэ. Соку ӝоггес ширъялоды. Б. НИКИТИН. Бӧлякъёс кадь матын луизы - Вуоно пумиськонмес 24-тӥ апреле ортчытом. Автозавод пуктон понна Удмурт Карлуд гуртэз быдтэм дырысен куамын ар тырме ни. "Чайка" клубамы ӧтиськом соосты, кин улэ вал та гуртын но табере пӧртэм палъёсы пазьгиськемын... Пилем сьӧрысь потэм шунды кадь пальпотонэн пыриз но таӵе ивор вуттӥз Галина Александровна Вахрушева. Удмурт Карлуд гуртысь 45 корка пӧлысь огез соослэн вал. Тросэз семьяос сямен ик, таослы но Ижевске интыяськоно луиз, ачиз со 29 ар мотозаводын ужаз. Ас бускельёсыз кадь матысь луизы "Чайка" клубысь эшъёсыз. "Чайка". Ижевскысь Ворошилов ульчаысь 93-тӥ юртын ужась нылпи клуб. Городын удӥсь удмуртъёс сое туж ӟеч тодо, уката ик - та палан улӥсьёсыз. Ог выжыос, бӧлякъёс кадь шулдыръясько, егитъёс кадь шудо-серекъяло, экто, соос, огазе ке вуо. Тужгес но эшъяськытэ соосты кырӟан. Тани Анна Герасимовна Евсееваез басьтоно ке. Быдэс лулыз - кырӟан пушкын. "Бӧрдыса тырмытытэк, та кырӟанэз ӧй дышы", - шуэ. Озьы вера "Капи-кап" кырӟан сярысь. Алигес солэсь такмакъёс куриллям но, 100-зэ тодаз вайыса гожтэм. Нош тани кузпалъёс Пестовъёс. Семен Николаевич, автопаркысь водитель, арганэныз уг люкиськылы. Ваньмон дыръяз со "Октябрь" дворецысь "Родник" ансамбле но ветлэ. Шудыны ке кутске, вӧзаз соку ик итӥське Антонида Васильевна. Кыӵе но кырӟанэз со уг тоды. Соин ик та кузпалъёс котькытын дуно витем куноос луо. "Чайка" клубе ветлӥсьёсты огазея кивоштӥсьёссы сярысь сюлмаськон но. Тросэзлэн нылпиоссы дышетско 7 номеро школаын удмурт классын. - Начальной классъёсын 16 кузя пиналъёсмес дышетӥз вал Татьяна Николаевна Кожевникова. Удмурт сямъёс, кырӟанъёс-эктонъёс вылын дышетӥз. 5-тӥ классысен нылпиосмы но кинлы кулэ ӧз луэ ни. - таӵе ӝожтӥськонзэс веразы Мария Горшенина, Валентина Волкова но Римма Баранова. Татын тыршо нылпиосын валче ужрадъёс ортчытъяны. "Кизили" журналлэн редакцияз ужасьёсты ӧтьылӥзы. Эшъясько Кирилл Ломагинэн, Альберт Разинэн, Василий Осиповен, Лидия Ореховаен. Таяз пасха нуналэ доразы куное ӧтьылӥзы калык суредасез Семен Виноградовез но кылбурчиез Татьяна Черноваез. "Чайкаослэн" вань муш мумы кадь котыраз люкась кивалтӥсьсы Вера Федотовна Красильникова. 1974-тӥ арысен со татын ужа ни, нырысь педагог-организатор вал. Ольга Сергеевна Красноваен но мукет юрттӥсьёсыныз ӵош нылпиосыз пӧртэм киужъёслы дышето. Со дыре ик анай-атайёсын ужало. Сотэк кызьы? - Бурдъёс лэзькем дыръя тышкаськись но кулэ, - шуэ Вера Федотовна. - Эшъёсы- юрттӥсьёсы уг сёто мылкыдэз сӥятыны. Одӥг пол кезьыт синмын учкод, мукет дыръя - озьы ик ужез куашкатыны кема ӧвӧл. Огдэ огед яратон, вылэ пуктон - тужгес кулэез. Т. ПЕТРОВА. Шулдыртозы ижъёс но, сьӧръёс но... Вуоно арня нуналэ, 25-тӥ апреле, "Аксион" культура дворецын ортчоз фольклор ӝыт. Со сӥземын луоз арлэн дыръёсызлы. Ужрадэ пыриськозы Юкаменск ёросысь Шамардан гуртысь бесерманъёс, Вавожысь "Гуждор", Можга ёросысь Бадӟым Сибы гуртысь "Марӟан", Сарапулысь "Радуница" но "Отрада" ансамбльёсысь кырӟась-верасьёс. Со сяна, вань люкаськемъёслы капчи мылкыд кузьмалозы Завьял ёросысь Постол гуртысь "Пинал даур", Ижысь культурая училищеысь "Зарни крезь" фольклор ансамбльёс. Пусйыны кулэ созэ: таиз концерт быдэс ар ӵоже ортчем ужрадъёслы йылпумъян луоз. Кырӟалозы алнашъёс Удмурт кун филармония таяз учыре ас дораз люкалоз алнашъёсты - 29-тӥ апреле татын ортчоз алнаш ӝыт. Со быдэсак сӥземын луоз алнаш музъем вылын вордскем но будэм крезьгурчиослы. Люкаськемъёсты шулдыртозы Пётр Кубашев, Пантелей Кузнецов, Николай Постников, Михаил Оськин, Геннадий Ганьков, Вячеслав Адаков, Анна Плотникова, мукетъёсыз. Асьсэлэсь крезьгуръёссэс-кырӟанъёссэс сӥзё соос вордскем шаермылы, яратонлы, вань чеберезлы. Ӝыт кутскоз дас тямыс часын. Тазалык Шыръёс - висён нуллӥсьёс Туэ тулыс шаерамы шыр висёнэн черламъёс трос гинэ луозы, иворто эпидемиологъёс. Тол шуныт, лымыё вал. Таин валче бусыысь шыръёс трослы йылӥзы. Кызьы тодмо, соос кышкыт висёнлэсь вируссэ нулло. Республикаысь санэпидемнадзорлэн врачез Василий Санников верамъя, Удмуртиысь куд- огаз ёросъёсын нимысьтыз эскерон ортчытэмын вал. Озьы тодмо луиз, шыръёслэн лыдзы шоро-куспо лыдпусъёслэсь кык но ӝыны поллы тросгес шуыса. Та выллем югдур 1997-тӥ арын кылдӥз вал. Соку больницаос шыр висёнэн черламъёсын тырмемын вал, дас кыкезлы висисьлы врачъёс номырин юрттыны ӧз быгатэ. Россиын та висёнлы пумит вакцина ӧвӧл, соин ик котькудӥз тазалыкез сярысь ачиз сюлмаськыны кулэ. Сад-бакчаосады эн вунэтэ юрт пуштэс кот мучолоен ӵушылыны. Тузонэз исьнерен ӵужыны уг яра, малы ке шуоно, тузонэн ӵош мугорады вирус пырыны быгатоз. Сиёндэс пӧсятыса сие, нюлэскын эн кӧлалэ. Л. АДАМОВА. Шӧкыч Пӧйшурасьёс но йыртэмасьёс Узыр ик асьмелэн шаермы инкуазь узырлыкеныз. Нюлэс гинэ кӧня инты басьтэ. Нош со тэльёсын кӧня тылобурдоез, кӧня пӧйшурез! Зэмзэ но, улэп зарниен ӵошатыны луэ сое. Соинтэк-а куд-огез со чотын узырмыны но тырше. Туала вакытэ уго сӥльлэн дуныз вылӥын гинэ. Ма, пыӵалэд ке луиз, пӧйшур ачиз азяд потоз. Сюдэмын но со, вордэмын но. Бен, уг кӧло "кык пыдо кионъёс", уен-нуналэн тэльёстӥ поръяло. Тани туэ гинэ Яр ёросысь одӥгаз гуртын улӥсь воргоронъёс одӥг мумы кыр парсез но куать пизэ сачкытӥллям. Пытьыоссэс ватыса ӧзгес вуэ - кырмизы. Нош Якшур- Бодьяысь лушкемен пӧйшурасьёслэн кизы ньыль койык вылэ урдскем. Сӥльзэ сиыса но, вузаса но ӧз вуэ. Таосыз но шедьизы. Пыӵалъёссы таламын. Бадӟым тыриськон сётӥзы. Уждунысьтызы коньдонзэс кема гинэ казна банке келляно луозы табере. Туэ гинэ, законэз тӥяса, 33 койык ыбемын. Миым сярысь ке верано, шараямын 482 умойтэм учыр, со пӧлысь 47-ез - госзаказникъёсын. Суд улэ кыскемын 37 йыртэмась. Озьы виемын вал 33 койык, 6 кыр парсь но 3 гондыр. Котькудӥз пӧйшурась умой тодэ, тэлетӥ кышкатэк ветлон понна сётӥське дунын лицензия. Озьы кылем арын таӵе кагазэн кутэмын 644 койык, 219 кабан но 53 "кырыж кук". Пӧйшурасьёс ортчем арын 89 кионэз сачкытӥзы. Туэ нырысетӥ кварталэ гинэ кырмемын ни 77 кион. Кион кутылӥсьёс пӧлын азьпалан мыно Красногорскысь Н. В. Веретенниковлэн (13 кион), Балезиноысь И. М. Коньковлэн (9 кион), Селтаысь А. О. Головизнинлэн (7 кион) бригадаоссы. Зэм, асьме пӧлын но вань зэмос пӧйшурасьёс, котырысьтымы инкуазез утӥсьёс. Тани ӵуказе шаерамы усьтӥське тулыс пӧйшуран. Ыбыны луоз айы дукъяез, айы кыр ӵӧжез, кузьнырез (вальдшнеп), куд-ог ёросъёсын лэземын кыр ӟазегез кутыны. Туэ туръёслы но мукет тылобурдоослы пӧйшуран усьтэмын ӧвӧл. Соин ик, гажано пӧйшурасьёс, чаклаське, эн изъянтэ инкуазез! Инспекторен пумиськонлэсь инмар мед утёз тӥледыз. Н. ЛЯЛИН. ШӦКЫЧ Удмурт Республикаысь Кун Кенеше калыклэсь уно ӝожтӥськонъёс вуо, телефонъёсты но электрокужымез тужгес кулэ луись интыосын дугдытъян пумысен. Та радэ пыро больницаос, газокомпрессор станциос, котельнойёс, ТЭЦ-ёс, улонлы кышкытлык ваись суретъёсты возён складъёс. Соин валче Кун Кенеш тодады вайытэ: со объектъёсын шудтэм учыръёс кылдыку, кивалтӥсьёс кыл кутозы законъя... Суредэз Л. ПРОЗОРОВЛЭН. Шӧкыч Алла Кузнецова Жоб кыллэсь зэмлык уг курда ... Лжи - свет правды ненавистен. А. А. Жемчужников. Кен кышно поттэ газет. (Мед шорам урдскоз бен, мед.) Быгатэ ке - быгатэ: Тузонэз юн пурӟытэ! Ыргетэ, утэ токма... Ӧвӧл соиз алама. Умойтэм выросъёсыз, Кырын, марым, ноныосыз. Возьматэ со интызэ. (Егит кожа мугорзэ). Котькин шоры урдӥське. Кизер с...н пазяське. Эн ай урмыл, Кен кышно,- Тон кадез вал туж уно, "Зэм шуисько" кожасез, Палаш йылын эктӥсез. Жоб кылэз ке поттӥськод - Астэ ачид саптаськод. Валаськод-а бен тон, уд-а: Жоб кыллэсь зэмлык уг курда. Дышетозы Германиын Туэ сӥзьыл "Русско-немецкой обмен" огазеяськон Россиысь журналистъёслэсь тодон- валанзэс муромытон вылысь одӥг толэзьлы Германие ыстоз. Со конкурсэ пыриськыны быгатозы Белгород, Геленджик, Таганрог, Ижевск но Тольятти городъёсысь иворъёсты вӧлмытон удысын ужасьёс. Но соослэн асьсэлэн удысазы ужам дырзы арлэсь ӧжыт медаз луы. Коньдонэн герӟаськем ужпумъёсты, Россиын мынон-ветлонлы коньдонэз вератэк, Германиысь Печатья федеральной ведомтсво ас вылаз басьтоз. Конкурсэ пыриськон понна одно ик немец кылэз тодыны кулэ. М. Арифулин. Эркын шокан понна Берло аръёсы Ижевскын омыр ӧжыт чылкытаз. Инкуазез утёнъя комитет ивортэмъя, 4 ар ӵоже промышленной предприятиос омырез кырсёмытӥсь кылем-мылемъёссэс 19 процентлы кулэстӥзы. Промышленностьлэн куашкаменыз гинэ со герӟаськемын ӧвӧл. Шӧдӥськиз предприятиослэн газэн эстӥськонэ выжемзы. Кылсярысь, электромеханической заводлэн огез котельноез, мазутлэсь но кокслэсь куштӥськыса, инкуазь газэз кутыны кутскиз. Завод котырын улӥсьёс таин валче капчиенгес шокалозы, кислотной зоръёс но ичигес усёзы. Ачиз предприятие но уксёзэ ширъялоз: инкуазез кырсёмытэмез понна тыронъёс 15 пол кулэсмозы, со сяна, газ мазутлэсь трослы дунтэмгес. Электромеханической заводлэсь котельнойзэ выльдонлы 1 миллион 245 сюрс манет кошкиз. Одӥг куиньмос люкетсэ тыриз Ижевскысь Экологияя фонд. О. МАКСИМОВА. Тазалык Тулыс шундылэн кузьымез Ӝыны ар асьмеос, Удмуртиын улӥсьёс, шундыез ум адӟиське. Соин ик тулыс вуэмъя ымнырмес, киосмес шунды тылсиос улын шунтӥськом. Мугормы шӧдэ угось: ультрафиолетовой сиос тырмымтэен, иммунитет лябӟе, висёнъёс аляло, сиён-юонысь витаминъёс (тужгес Д витамин) мугоре уг кылё, пайда вайытэк кошко. Асьмеос шунды улын гужемзэ ортчытӥськом. Нош та вакытэ солэн сиосыз укыр кужмоесь, соин ик соос, пайда интые, изъян вайыны быгато. Тужгес но туала вакытэ, куке Музъем котырысь омыр пасё-пасё кылемын, со пасьёс пыр ультрафиолетовой сиос кужымзэс ыштытэк ортчо. Соин ик шунды улын пыжыны апреле, мае тужгес но пайдаё. Кутсконо 5-10 минутысен, вуттоно 20 минутозь. Та толэзьёсы кезьыт на бере, шундыез кутоно, ымнырдэс, киостэс, чыртыдэс солы пуктыса. Со сяна, таӵе но амал вань: усьтэм укно яке форточка азьын дэремтэк сылоно. Эшшо но умойгес луоз, нуналлы быдэ ураметӥ бызьылӥды ке, вылады ичигес дӥсь дӥсяса. Тужгес дуно синпель Ӝыны даур талэсь азьло 1949-тӥ арын А. С. Пушкинлэн вордскемез дырысен 150 ар тырмиз. Та юбилейлы сӥзьыса, Удмурт пединститутлэн кылъя но литературая факультетэз егит литераторъёсызлэн ужъёссыя нимысьтыз конкурс ортчытӥз. Конкурслы йылпумъянъёс лэсьтыны тупатэмын вал вуоно араз - нырысетӥ семестр пумын. УГПИ-е дышетскыны ӵапак вуоно араз пыри вал бере, отчы пыриськыны умой ӧз йӧты мыным. Ма, бен гожъяськыны но ай мон соку гинэ кутскисько вал. Туж ӟеч валасько вал: йӧн-йӧн печатласькись кружокчиосын - Евгений Самсоновен, Семён Перевощиковен, Георгий Архиповен, Даниил Яшинэн но мукетъёсыныз - "кужымме мертаны" шуыса, артэ кариськыны ик возьыт мыным. Нош кружокмылэн кивалтӥсез Евгений Самсонов маза ӧз сёты, общежитиысенымы ачиз, комнатаямы лыктыса, жюриын эскерыны вылысь, кык кылбурме нуиз. Огез кылбуре Лозо шурмы вылэ гидроэлектростанция лэсьтэм сярысь вал, кыкетӥез - США- лэн Уй пал Кореяын ож нуэмезлы пумит луэме сярысь. Та кылбуръёсме кызьы ке но пусъёзы шуыса уг оскиськы вал. Озьы малпаме зэм вылымтэ. Мукетъёс пӧлын жюри монэ но сӥлы кариз. Солэн мылкыдызъя мыным сётӥзы А. С. Пушкинлэсь "Ӟуч луисьтэм школаосысь библиотекаослы" сериын поттэм "Избранные произведения" книгазэ. Печатлаллям сое 1949-тӥ арын Нылпи литературая кун издательство но РСФСР-ысь Калыкез дышетонъя министерство. Отчы пыртэмын А. С. Пушкинлэн поэзиез но, прозаез но. Книгалы бадӟым но туж визьмо азькыл гожтэм тодмо ӟуч писатель Александр Слонимский. Книгае пыртэм котькуд произведениын ивортэмын авторезлэн сое ку но ма пумысен гожтэмез. Та книга витьтон ар улэ ини мынам киям. Мон понна со али ке но - нырысетӥез, тужгес дуноез синпеле, нуналлы быдэ лулысь-сюлмысь яратонэ. П. ПОЗДЕЕВ, писатель. Тазалык Сэзь луод - кема улод Ма кузьда улон даур кузьмам инмар адямилы? Укмыстон ар? Сю? Вашкала грекъёс шуылозы вылэм: 70 арескын улонысь кошкон - со вож нуны вакытысен ик кулон. Соос ини валаллям: макем адями тросгес бызьылэ, ёзвиоссэ ужатэ, сокем со кема улэ. Бызьло пересьёс, егитомон понна, бызьло егитъёс, мӧйымыса висёнтэм понна. Ёзвиос ужаку, кылсярысь бызьылыку, эндорфин гормон кылдэ, со мугорез егитомытэ, улыны кужым сётэ. Врачъёс лыдъямъя, ёзвиосты, сӥль-быгытъёсты ужатон давлениез умоятэ, вирысь холестеринэз кулэстэ, вирез чальгес ветлытэ. Озьы вирсэръёс чылкытало, паськытало. Пыдын бызьылӥсьёс пӧлын сюлэмзы путыса кулӥсьёслэн лыдзы куинь поллы ичигес, спортэн вырисьёслэн тызы, ӝушул нёредзы (поджелудочной железа) висемысь дугдо, мултэс кӧйзы уг люкаськы. Нош телевизор азьын пукыны яратӥсьёслэн сюлэмзы 20 процентлы ӵемгес жугиське. Озьыен, со мултэссэ ужа но вазьгес пересьме. Висёнъёс медаз ворме шуыса, туала адямилы нуналлы быдэ пыдын 7-8 иськем ортчыно. Но таӵе кылъёсты йыраз возьыны кулэ: эн кыльы, пукемед луэ ке; эн пукы, сылемед луэ ке; эн сылы, ветлэмед луэ ке. Валамон, бызьылыны, физкультураен вырыны дыр нокызьы уг шедьы. Но, кызьы шуо врачъёс, тубатъёс кузя тубон гинэ но пайда вае. Котькудӥз тубатлёгет ньыль секунд улон кузьма, пе. Нош тужгес бадӟым пайда ваё: нырысь ик - пыдын но куасэн бызьылон, собере - вуын уян но велосипедэн ворттылон. Кылсярысь, кык толэзьскын куамын нунал ӵоже куасэн бызьылӥды ке, нокыӵе сюлэм висёнъёс тӥлед кышкыт ӧвӧл. Бызьылыны кутскыкуды эн вунэтэ: чальгес, вылэгес, кужмогес - со спортсменъёс понна гинэ. Котькуд адямилэн аслыз гинэ тупамон ӝоглыкез, бызылон дырыз. Асьтэды асьтэос кужмысь эн каре. Ог арнязэ физкультураен вырыса, тӥ асьтэос шӧдоды, ку но кӧня бызьылоно, мылкыдды но каньыл мед луоз, тазалыкты но мед юнмалоз шуыса. Н. ДРУГОВА, эмъясь физкультурая врач. Александр Александрович ВОЛКОВ Вордскиз 1951-тӥ арын 25-тӥ декабре Брянск городын. Ӟуч. Образованиез вылӥ. Экономика наукаосъя кандидат. Йылпумъяз Пермьысь политехнической институтэз, 1996-тӥ арын - Кунсьӧрен вузкаронъя Россиысь академилэсь Москваысь Ужбергатонъя институтсэ. Ужан удысэзъя инженер-строитель но кунсьӧрен ужбергатонъя экономист. Удмурт Республикакаысь нырысетӥзэ ӧтчам Кун Кенешлэн депутатэз вал. 1996-тӥ арысен - Россия Федерациысь Федеральной Собранилэн Федерацияя Кенешаз. Пусъемын Эшъяськон орденэн. Ужаны кутскиз 1970-тӥ арын Глазов городысь Чепецкой механической заводлэн Лэсьтӥськонъя управленияз мастерын,1972-тӥ - 1975-тӥ аръёсы - инженерын,1975-тӥ - 1978-тӥ аръёсы - Удмурт АССР-ысь Глазов городысь Чепецкой механической заводлэн Лэсьтӥськонъя управленилэн 1 номеро участоказ валтӥсь инженерын, 1978-тӥ - 1982-тӥ аръёсы - Чепецкой механической заводлэн Лэсьтӥськонъя управлениезлэн лэсьтӥськонъя 2 номеро управленияз валтӥсь инженерын, 1982-тӥ - 1986-тӥ аръёсы - Лэсьтӥськонъя Чепецкой управленилэн лэсьтӥськонъя 2 номеро управленияз валтӥсь инженерын, 1986-тӥ - 1987-тӥ аръёсы - Лэсьтӥськонъя Чепецкой управленилэн лэсьтӥськонъя 2 номеро управлениезлэн кивалтӥсез луыса. 1987-тӥ - 1989-тӥ аръёсы - Удмурт АССР-ысь Глазов городысь Калык депутатъёслэн кенешсылэн быдэсъясь комитетэзлэн тӧроез. 1989-тӥ - 1990-тӥ аръёсы - Удмурт АССР-ысь Кун планъя комитетлэн тӧроезлэн нырысетӥ воштӥсез. 1990-тӥ - 1993-тӥ аръёсы - Удмурт Республикаысь Министръёслэн кенешсылэн Тӧроезлэн воштӥсез, Удмурт Республикаысь Архитектурая но лэсьтӥськонъя кун комитетлэн тӧроез. 1993-тӥ - 1995-тӥ аръёсы - Удмурт Республикаысь Министеръёслэн кенешсылэн Тӧроез. 1995-тӥ - 1999-тӥ аръёсы - Удмурт Республикаысь Кун Кенешлэн Тӧроез. Тазалык Киез миськоно, вуэз быректоно... Ижевскын кӧткылен висисьёс йыло. Кылем арня ӵоже поликлиникаосы сю но ӝыны адями вазиськиз. Со шоро-куспо лыдпусъёслэсь 25 процентлы тросгес. Кӧткыль паськыт вӧлмемын дышетскись пиналъёс пӧлын. Санэпидемнадзор ӧз на шарая висёнлэсь мугзэ. Нырысь-вылысь кожазы вал йӧллэсь шуыса. Но йӧллэсь лэсьтэм сиён-юонъёс магазинъёсы эскерытэк уг вуо. Али эпидемиологъёс малпало, кранэтӥ бызись вуэ урамъёсысь шунам лымы ву шеде шуыса. Но та малпанлы водоканаллэн кивалтӥсез Владимир Лебедев валэктӥз, гумыос котыр ласянь пытсамын шуыса. Гумы пасяськиз ке но, пе, отчы лымы ву шедьыны уз быгаты - гумыысь ву ачиз кыре бызёз. Котьма ке но, эпидемиологъёс чакласькыны косо: киостэс майталэн миське, ву яке йӧл быректэмзэ гинэ юэ. Л. ЮРТЕЕВА. Шӧкыч Киргам гуртэ, эшелы Гожтэт Ваньки, кылзы ай, мон тыныд гожтэт гожтоно кариськи. Тодэмед, вылды: мон - Олёш Кадыманов. Телефон пыр, пӧй, герӟасько ай, но, тодӥськод ук, со милям ноку но йӧскадь ӧз ужалля на. Гожтэтме почта пыр ке лэзёно, конверт ӧвӧл. Басьтэмед потӥз ке но, сизьым пуныен утчаса уд шедьты. Ай пуныос но ӧвӧл ни, сюдыны немаин. Почтальонъёс но уг ветло, нош почтае куинь километре вамышъяны пыдъёс казённой ӧвӧл. Ма, кисыын но тӧл шула, "5 рублей" гожтэм выль корт коньдонэ вань но, конвертлы тырмоз-а, уз-а - уг тодӥськы. Соку, оло, бутылкалы ке тырмоз? Толон бускель нылашмы пыраз. Натӥ ӵуказе, пе, редакцие семинаре мынӥсько. Веранме со сьӧры газетэ лэзьыны малпай. Озьы дунтэк но вуоз, гонорар но сётозы ай. Асьмеос люконтэм эшъёс шуыса но тодӥсьёс луозы. Сотэк ку шедёмы газетэ? Вить со корреспондент шуонъёслэсь асьме сярысь гожтэмзэс. Натӥ редакциын вань ужасьёсты нимын-тулын тодэ. Етӥз нылаш. Оломае но вала. Только бадӟым, пе, эн гожты. Бадӟым материалъёс нечитабельноесь. Кирпич кадь секыт каро газетэз. Собере ним но асьтэос ик малпасалды ке, умойгес луысал. Йырез тӥяно луиз... Ваньки, усыкмем йырыныд газет дорозь ӧд ке вуы, ма, уд но басьтӥськы, дыр, маин-о басьтод, ӝыны ар ини коньдон уг сётъяло бере. Киргам гуртады дас корка пӧлысь кин ке но басьтэ, дыр. Пенсионеръёс ке но, оло. Соослы коть кулыны уг сёто на. Ма, сокем веранме тодэмед потӥз ке, ульча вожады ящикъёсы газетъёсты тыро ук, адӟись ӧвӧл дыръя огзэ басьты. Кинэ ке огпол газеттэк кельтӥд ке, номыр уз луы. Бутылка этикеткаосты но тамак пачкаосты лыдӟыса, Киргам гуртэдлэсь кыдёке уд вуы. Так, значит, эше, дорам вуылы. Одӥг иськемез вамышъяса уд жадьы: макмыред, эсьма, коть веськалоз. Ӧз ке ортчы, одӥг тӧдьы йыроез вань мынам. Закусь но шедёз. Ваньмыз "полный порядок". Запасэ Евроазиатской банклэсь но оскымон интыын. Мунчо гурын. Кышно мунчоен уг выры. Кылкод-а? Ужысь бертыкуд ик Уллань нюкетӥ васькы. Кылем арын усем гопмес адӟытэк эн кельты. Нош ик рюмкае учкись нырдэ тӥяны шедьтод. Кузь ныр пиосмуртлэсь данзэ ӝутэ, шуо, эн ышты сое. Вобщем, озьы, эше, мон коньдон жильдыны малпай. Бодьялась одӥг ужбергатӥсь ассэ нуллыны ӧтиз. Так што колхоз тракторме тыныд сётӥсько. "Жигулелы" но синмаськид вал, жаль ӧвӧл, ворттылы. Ку коньдонзэ сётод, соку ик сётод. Сӥзьыл можешь Чекер бусыысь ю тысен яке Питырес бусыысь картошен тырыны. Пырак дорам вортты. Оло, гаражысь кыӵе ке машинаез кылёд? Тодӥськод, кытын ма кылле. Дышетонэз ӧвӧл. Джинсэ шоры вожъяськыса учкылӥд. Табере со мыным кулэ ӧвӧл, выль модельзэ басьто. Нош джинсме, шуисько, "Жигуле" пушкысь шедьтод. Педорлы четверть кумышкалы сётыны ӧдъясько вал, ӧз пӧрмы. Веркиезлэн кумышкаез ӵуштаськем. А мон шузи-а, мар-а "Адидасэз" несортовой юонэн воштыны? Озьы, друг, жаль ӧвӧл, нуллы. Только кисыоссэ вурылы. Кышнолэсь вораса поттэм шпиксэ уйлы отчы ик кельтӥськем, шыръёс на полную катушку ужаллям. Кышное Валюшедлы бургы вышкызэ, гумызэ, вобщем, вань кумышка пӧзьтон котырзэ, пе, кельто. Йырвизьдэ бергаты: кык аппаратэн зол ужалод. Аслым ик вузаны вайылы, коньдон жильдыны юртто. Нош ачим на широкую ногу улыны ӧдъясько. Никаких выпивон, пыд йылэ султоно. Ваньки, я, бумагае быре ин, Натӥ но бадӟым гожтыны ӧз лэзьы. Пумиським ке, лад-лад вераськом. 1-тӥ апрель. Куштэм гуртысь Олёш эшед. Гожтӥз Эмма ЗАГРЕБИНА. ТӤЛЯД КУРЕМДЫЯ - КЫРӞАН Гажано редакция! Радио пыр ӵем кылыны луэ Н. Постниковлэсь Ашальчи Окилэн кылъёсызъя "Даур" кырӟанзэ. Гурзэ дышим ини, нош кылъёссэ ум тодӥське на. Куриськом печатланы сое газетады. Т. БЛИНОВА, Можга ёросысь Пазял гуртысь фольклор коллективе ветлӥсь. Даур Амалы ке луысал, Кыдёке кошкысал - Дуннеез котыртысал, Ас шудме шедьтысал. Кутыса берыктысал Мон пинал даурме, Кутскыса воштысал Та пересь бамъёсме. Пурысьтам йырсиме Нош ик сьӧд карысал, Шуг улӥсь сюлэмме Мон шудӥсь карысал. Ой, ӧвӧл амалы Нош пинал луыны, Ӧвӧл ук кужымы Даурез вормыны. Толалтэ сяськаез Чик уг лу поттыны, Ортчылэм даурез Уг лу берыктыны. 1919 Удмурт Республикаысь Правительстволэн полномочиосызлэсь куштӥськемез сярысь Удмурт Республикаысь Кун Кенешлэн Постановлениез Удмурт Республикаысь Правительстволэн полномочиосызлэн дырзы ортчемен валче но Удмурт Республикалэн Конституциысьтыз 89-тӥ ёзэтэн кивалтӥськыса, Удмурт Республикаысь Кун Кенеш пуктэ: 1. Лыдэ басьтоно Удмурт Республикаысь Правительстволэсь полномочиосызлэсь куштӥськемез сярысь ивортэмзэ. 2. Удмурт Республикаысь Правительстволы ӵектоно Удмурт Республикаысь выль Правительство кылдытытозь аслэсьтыз ужъёссэ быдэсъяны. Удмурт Республикаысь Кун Кенешлэн Тӧроез А. А. Волков. Ижевск город, 1999 арын 22 апреле. � 4-11. Вершинин П. Н. Гажано депутатъёс, Правительствоын ужасьёс, ӧтем адямиос! Чузъяськиз республикамылэн гимнэз. Кун Кенешлэн нырысетӥ ӧтчамаз быръем депутатъёс асьсэлэсь ужзэс йылпумъязы. Табере асьмелы шонер вамыш лэсьтоно - быръёно элькунмылэсь вылӥ кивалтӥсьсэ, Кун Кенешлэсь Тӧрозэ. Нош малы меда залын уноезлэн пукисьёслэн мылкыдъёссы сӥялскемын но кунэрскемын? Ваньмыз адӟизы: команда ужаз, аслаз нырысетӥ вамышъёсысеныз ик со сюрес усьтӥз федеральной ёзъёсы, Россиен Огкыл гожтӥз, мур пыриськиз промышленносте, гурт удысэ, калык хозяйстволэн тужгес кулэ удысъёсаз, дугдытӥз производстволэсь куашканзэ. Ваньмыз со потӥз Кун Кенешлэн но Правительстволэн Президиумъёссылэн быгатыса но пайдаё ужамзы бордысь. Одӥгъёсыз тыршизы законъёс бордын, мукетъёсыз ужазы хозяйствоез нуонын. Но законъёсты кутӥсь но соосты быдэсъясь органъёслэн кусыпъёссы пумен тэшканы кутскизы. Тужгес кулэ ужпумъёсъя, озьы ик кун ужъёсъя но, Правительстволэсь но солэн Председателезлэсь ӵектонъёссэ кылэм-адӟем каремысь дугдӥзы. Кутыны кутскизы законъёслы чутрак пумит сылӥсь ужпумъёс, озьы ик коньдон ужпумъёсъя, банкъёсъя, хозяйствоез нуонъя. Правительстволэн экономика ужпумъёсъя Кун Кенешлы эскерыны сётэм ӵектонъёсыз пумен бӧрысьлы кыльылӥзы. Вань эскероно ужпумъёс герӟаськыны ӧдъязы политикаен, со шоры мыддорин учкылӥзы, ваче пумитъяськонъёс ӝутскылӥзы. Кун Кенешлэсь косонъёссэ лыдэ басьтыса, Правительство интыысь аскивалтонлэн ёзъёсыныз пумен ваче пумит сылыны кутскиз: обществоын пуромиз керӟегъяськон. Тодмо ук: вылӥын ке жугисько, улӥын но тулкымъясько. Туэ быръёнэ уноез кандидатъёс мынӥзы одӥг малпанэн: ваче пумит сылонлы пум пононо но республикаямы югдурез умой пала воштоно. Воштоно луоз унозэ. Но нырысь ик - умоятоно республикамылэсь кун радлыксэ. Быдэстоно луоз Конституцилэсь властьёс куспын ужанъя куронъёссэ, законъёсты кутӥсь но соосты быдэсъясь властьёс одӥг ужез мед нуозы экономикаын но, калыклэсь улон-вылонзэ умоятонын но. Воштонъёс пыртыны кулэ республикаысьтымы Кун Кенеш но Правительство сярысь законъёсы. Правительство кунэн кивалтонъя огъя законъёсты быдэсъясь ёзэтэ пыре (со сярысь асьмеос пусйыны кулэ), соку солэн ужез радъяськыны кулэ Россилэн но Удмуртилэн законъёсыз вылэ пыкиськыса. Республикаын уж вылын быдэсъяськыны кулэ судьяослэн эриксы, соосты зӥбисьёс медаз луэ, сотэк властьлы оскон уз луы. Ас кивалтоно органъёсын ваче пумит луонъёс кылдо быдэсъяно ужъёсъя тупамтэос, коньдонэз висъянын тырмымтэос бордысь. Правительство Удмурт Республикаысь Кун Кенеше эскерыны сётӥз вал "Ас интыосын кивалтонъя органъёслы кун ласянь полномочиос сётон сярысь" законлэсь инъетсэ. Отын полномочос сярысь гинэ вераськон ӧз мыны, пусъемын вал та удыслы коньдон висъян ласянь но, озьыен, соку луысал эскерон но, соку кыл кутысалзы интыысь кивалтон органъёс но. Та законэз кутон юрттысал азьвыл янгышъёслэсь палэнскыны, ужез огъя радъяны, экономика удысын пайдаёгес, ыштонъёстэк ӟечгес ужаны. Парлманетлэн нырысетӥ ужез луэ улон-вылонын радлыкез утён-возён. Со нырысь ик потоз Кун Кенешлэн тӧроезлэн ужан амалъёсыз бордысь. Кивалтӥсь луонлыкъёс мед кылдытоз депутатъёслэсь куронъёссэс улонэ пыӵатыны, республикаысьтымы социально-экономической политика удысын котькуд депутатлэсь куронъёссэ лыдэ басьтыны, со герӟаськемын ке промышленностез но гурт удысэз ӝутонэн, ужбергатонлэн котькуд удысэныз. Ваньзэ сое лэсьтыны луоз ӝог но бадӟым ыштонъёстэк, малы ке шуоно, выль быръем депутатъёс валало республикаын чутрак выль воштӥськонъёс кулэ шуыса, со мед юрттоз кивалтон амалъёсты тупатыны, экономикаез ӝутыны. Соин ик мон Удмурт Республикаысь Кун Кенешлэн Тӧроез луон понна нюръяськонэ пыриськыны мылкыд кари. Ӟеч тодӥсько, парламентлэн нырысетӥ сессиысеныз ик лэзёно ӧвӧл ваче пумит луонэз. Асьмелы одӥг мажес вылэ кык пол лёгиськыны уг яра ни. Огкыл шедьтыны кулэ асьмелы. Со понна ог-огенымы уртче ужано. Соиз умой, Кун Кенешлэн ужаны кутскытозяз ик депутатъёс огазеяськыны ӧдъязы ни. Фракциосын озьы валче ужан парламентлэсь пайдалыксэ ӝутыын кулэ. Соин ик лыдъясько, депутатъёслэн котькуд огазеяськонзылы ужаны луонлык кылдытоно. Фракциослэн кивалтӥсьёссылэсь полномочиоссэс данаклы воштоно, нош Кун Кенешлэн Президиумаз быръем адямиослы комиссиослэн кивалтӥсьёссылы кадь ик кужым сётоно. Со понна чылкак, воштоно асэсьтыз парламентлэсь но солэн аппаратэзлэсь ужан радлыксэ. Верало на, монэ бырйиды ке, нокыӵе партиосы но огазеяськонъёсы уг пыры, соосын кивалтон сярысь уг вераськы ни. Кун Кенеш уго огазея пӧртэм сямен малпаськись адямиосты. Властез зӥбон уз луы, со сярысь мон нош ик пусйисько. Котькудӥзлэн депутатлэн, кыӵе ке партие пыремзэ вератэк, лыдэ басьтӥськоз солэн аслаз мылкыдыз. Ма кароно со понна? Валэктыны луэ озьы - котькуд эскероно ужпумъя азьвыл ик кенешон ортчытоно. Мон та нуналъёсы депутатъёсын вераськи но сыӵе малпанэ вуи: Кун Кенешлэн ужаз нырысетӥ инты мед басьтоз ваньбур поттӥсьёслы юрттон вылысь законъёсты кутон. Правительство али ик ини дась депутатъёслы экономика ласянь эскероно законъёсты ӵектыны. Та дырлы дасямын Удмурт Республикалэн законодательно- нормативной инъетэзъя ӵектонэз, со огазея кунэн кивалтонъя тужгес кулэ ёзъёсты. Право ласянь Удмурт Республика таӵе законъёсты кулэ каре: "Кун экономикаын политика сярысь", "Шугадӟонъёсъя политикаын кун ласянь юрттэт сётон сярысь", "Удмурт Республикаын улӥсьёслы улон-вылонын юрттэт сётон сярысь". Соос ик экономикаез но калыклэсь улон-вылонзэ умоятонын законъёсты кутыку котьку валтӥсь инты басьтыны кулэ. Со уж чыры-пыры документъёсты кутонлы медаз пӧрмы. Кылсярысь, Удмурт Республикалэсь кун ласянь экономикаын политика нуон сярысь законзэ юнматоно на эшшо кӧня ке законъёсын: "Промышленностьын кун политика сярысь", "Мукет кунъёсын кусыпъёс возён политика сярысь", "Ваньбурен кивалтонъя кун политика сярысь" но мукетъёсыз. Кылдэм шуг-секытъёсты Кун Кенеш ачиз ке тупатыны уг быгаты, соку со пыкиськыны но ужаны кулэ федеральной законъёсты лыдэ басьтыса. Малпасько, шонер луысал федеральной законъёсты кутыку, огвыллем ужпумъёслэсь палэнтӥськыса, уго со документъёс Удмуртиын но сыӵегес кужымен ужало. Кун Кенешлэн нырысетӥ быдэстоно ужез луыны кулэ бюджетэз быгатыса радъян. Коньдэтэз котькуд удысын кылдытоно вань луонлыкъёсты гинэ лыдэ басьтыса. Казнаын кондон тырмыт ӧвӧл ке, малпаськытэк шуак-дуак законъёсты кутыны уг яра. Социальной удыслэн котькуд ёзаз лыдэ басьтыны кулэ ни тупатэм правоосты. Уждунлы но мукет кулэяськонъёслы висъям коньдонэз кутоно кулэезъя гинэ. Со понна куд-ог тупатонъёс пыртоно законъёсы но, коньдон палэнэ медаз кирга, со меӵак вуыны кулэ адями доры. Азьланьтоно бюджетысь коньдонэз ӝикыт кутонъя но сое тус-тас каронлэсь палэтонъя ужез. Нырысь ик, кулэстоно кивалтон органъёслы коньдон висъянэз. Со дыре ик тыршоно азинсконъя бюджетэз быдэстон сярысь. Бюджетэз узырмытыны но шуг-секытысь потыны юрттоз палэнысь коньдонэн промышленностез выльдыса ужан. Кытысь сое шедьтоно? Нырысь ик, коньдон шедьтон понна кылдытоно нимысьтыз фонд, но со законэн юнматэмын мед луоз. Со фондэ пыртыны луоз инкуазь узырлыкъёсмес. Дыр вуиз ни, солы луонлыкъёс но вань, нефть поттонъя компаниосын кун ласянь кивалтонэз умойгес радъяны. Татын уже кутыын кулэ музъемез кузёослы сётон-вузан радлыкез, му вӧй поттӥсь предприятиос со понна коньдонзэс висъяны кулэ кузёослы. Удмурт Республикаысь Правительство сыӵе законлэсь инъетсэ эскерыны Кун Кенеше сётӥз ни. Республикамылы коньдон сётӥсьёсты кыскон понна соосты огдырлы налог тыронъёслэсь но мозмытоно. Удмурт Республикаысь кун властьлэн органъёсыз та вакытэ нырысь ик таӵе ужпумъёсты сэрттыны-пертчыны кулэ: кылдытоно нимысьтыз банкъёс, кудъёсызлэн луыны кулэ асьсэлэн коньдон тырон-басьтонъя центръёссы, палэнысь вуэм коньдонэн ужанъя банкъёссы, улон интыосты лэсьтоно люкетэн-люкетэн коньдон висъяса, выльдоно улон инты понна коньдон тыронэз, татын лыдэ басьтоно калыклэн уждунэзлэсь быдӟалазэ, ӟечгес радъяно куштӥськем но дуно корт басьтонэз, дунъёс тупатоно сиён- юонлы но эмъюмъёслы, выжоно музъемлы огъя дун тупатон амал вылэ. Законъёсты азинтон бордын ужан, озьы ик ачиз улон но кулэ каре республикамылэн Конституцияз воштонъёсты пыртэмез. Сое мур-мур эскерыны кулэ Кун Кенеш. Дыр вуиз ни элькунмылэн кивалтӥсез сярысь ужпумез но соя республикамылэн Конституцияз воштонъёс пыртыны. Нош та дыре элькунмылэн кивалтӥсез властья федеральной органъёсын кужымзэ умой-умой кутыны уг на быгаты. Удмуртиын социально-экономической азинсконъя 1995-тӥ арын кутэм Огкыл но программа, та ласянь уно могӟетъёс кылдытэ. Гажано депутатъёс, Удмурт Республикаысь Кун Кенеше быръем выль адямиослы ужано луоз государстволэн улоназ муресь воштӥськонъёс ортчытон вакытэ. Вуж даур кошкон вакытэ но выль дауре выжон азьын трос юанъёслы валэктонъёс шедьтоно луоз. Ӵапак та вакытэ ик республикамылы интыысьтыз вырӟыны кулэ. Сое лэсьтыны быгатозы ужась адямиос гинэ. Нош адями котьку малпаське азьланез сярысь, со ялан малпаське ӵуказеез сярысь, котькуд вамышсэ мерта вуоноеныз ӵошатыса, - со капчиен уг сётӥськы. Асьмеос выль сямен малпаськыны кутскиськом, озьы ик выль сюресъёс утчаськом, кивалтыны но, ог-огенымы кенешыны но выль сямен ӧдъяськом. Оскисько, таиз Кун Кенеш политика удысын но, ог-огдэ валан ласянь но шонересь вамышъёс лэсьтоз, Удмурт Республикаысь калыкъёс ог-огенызы котькуд удысын валче но тупаса улозы шуыса.. Кун Кенешысь репортаж Вершининэз воштӥз Ганза Удмурт парламентлэн та кенешонэз бере данакез депутатъёс уйзэс ӧз, дыр, кӧлэ: огъёсыз - шумпотэменызы, кыкетӥосыз - келямзэс валаменызы. Зэмен но, шаермы понна политика удысын табыдӟа ыштон ӧйвал на - удмурт адями Правительствоен кивалтонлэсь палэнтэмын. Удмурт интые удмурт ӧз шедьы. Тӥни кыӵе калэ вуим асьмеос ЪЪ даурлэн пумаз. Ум валалэ, кызьы Удмуртия но быроз, кыӵе ке губеринлэн ог люкетэз луыса. Правительстволы кивалтӥсь быръёнын удмурт депутатъёс зол выризы, соослы дурбасьтӥзы мукетъёсыз но - ваньмыз 38 мурт, но куараоссы ӧз тырме. Кенешон ӟырдыт мынӥз. Ульчаын 20 градусозь ке омыр ӟырдаз, сессиосты ортчытон залын кык поллы пӧсьгес йӧтӥз. Вералом ваньзэ радызъя. 22 апрель, В. И. Ленинлэн вордскем нуналаз, шаермы понна таяз учыре бадӟым шумпотон ӧз вайы. Депутатъёс пал кылын но буре ӧз вае ужаса улӥсьёслы дурбасьтӥсь вождьмылэсь нимзэ. Соослэн сюлмаськонзы мукет: кин вормоз - Ганза яке Вершинин? Кун Кенешлэн Тӧроез сессия кутскытозь пумиськылӥз депутат огазеяськонъёсын, дэмлаз одӥг гинэ кандидатураез - Николай Алексеевич Ганзаез, Глазовысь Чепецкой механической заводлэсь генеральной директорзэ. Удмуртие вуэмын 1994 арын, 5 ар куспын куашканы кутскем предприятиез выльысь ӝутӥз. Глазовлэн бюджетэз ог 70 процентэз тырме та завод чотын. Волков оске: Н. А. Ганза республикалэсь экономиказэ но вакчи дыр куспын улӟытыны быгатоз. Кыл сётӥське Правительстволы Тӧрое ӵектэм муртлы. Николай Алексеевич тодматӥз ужано программаеныз. Валтӥсь инты отын басьтэ промышленной удысэз азитонлы, электрокужымез, эстӥськонэз пайдаё кутонлы, му вӧйлэсь поттэм коньдонэз республикае берыктонлы. Ӧжытгес саклык висъямын музъем ужасьлы, гурт удыслы. Соиз валамон, Н. А. Ганзалэн вань улонэз герӟаськемын городэн, гырон-кизёнэз шӧмъяны ӧз кылдылы. Правительство кылдытон бордын мынам одӥг принципе: котькуд адямиез дунъяно быгатонлыкезъя. Вань огазеяськонъёсын ӧй пумиськылы на, но мон вераськонлы дась. Кадръёсты быръёнын кенешо Волковен но Вершининэн. Дэмлам кандидатъёсты учко лэсьтэм ужзыя. Н. А. Ганзалы депутатъёс пӧртэм юанъёсын вазиськизы. Котькудӥзъя со валэктон ӧз сёты, меӵак шуиз: мон талы дась ӧвӧл, ӵош пуксьыса эскером-чаклалом. Ганзалэсь кандидатуразэ юнматыны курыса, залын пукисьёслы вазиськизы депутатъёс Боровик, Белоголовкин, Хорошавцев, Жебровский, Моисеев, Степнова, Кузьмина, Шкуров. Ваньмыз соос пусйизы вуоно премьер-министрлэсь ужаны быгатэмзэ, ӟеч кивалтӥсь луэмзэ, республикаез шуг-секытысь поттыны быгатэмезлы оскемзэс. Вераськон чылкак мукет пала выжиз, Тубылов трибуна сьӧры потэм бере. Огпӧртэм ушъяськон кыъёслэсь нырулыны кутскем залэз Валентин Кузьмичлэн верам кылъёсыз бугыртӥзы, сазьтӥськытӥзы. - Асьмеос ваньмы улӥськомы Удмурт Республикаын, - пусйиз со. - Туннэ нуналозь республикалэн кык кивалтӥсез пӧлысь огез котьку но удмурт адями вал. Николай Алексеевичез уж ласянь мон уг курласькы. Но ойдолэ шаерамы кылдэм радлыкез ум тӥялэ. Со сярысь куро районъёслэн кивалтӥсьёссы но, П. Н. Вершининэз ик бырйыны косыса. Ойдолэ огпол кутскыса, эшшо умой-умой малпаськом на. Али лэсьтэм янгышмы удмурт нациез медаз шуккы вылэм. Тубыловлы дурбасьтыса вераскьизы депутатъёс Ходырев, Салтыков, Чувашов. Виталий Соловьев дэмлан сётӥз П. Н. Вершининэз Кун Кенешлэн Тӧроезлы нырысетӥ воштӥсе пуктыны. Александр Волков та ӵектонлы пумит луиз. 13 часын 15-20 минутлы вис ялӥське. Со бере ог 30 депутат залэ ӧз пыры ни. Озьы возьматӥзы Вершинин пала луэмзэс. Кылемез депутатъёс ужазы, но решение кутыны куаразы ӧз тырмы. Таин валче, 16 часын нош ик вис ялэмын вал. Депутатъёс огазеяськонъёссыя люкиськизы. Александр Волков но куд-ог эшъёс мынӥзы Тубыловлэн кенешоназ. "Тупан" группаысь депутатъёс кылзэс зол веразы. Соос огкылысь кариськыса, сессиысь кошкизы но ас куронзэс меӵак, кышкатэк веразы, Павел Вершининэз Кун Кенешлэн Тӧроезлы нырысетӥ воштӥсе уд ке дэмлаське, ми, пе, Николай Ганза понна куараосмес ум сётэ. Озьы сессия ас ужзэ азинтыны ӧз быгаты, депутатъёс ӧз тырме (кворум ӧй вал). Кӧня ке витьыса пукемзы бере, А. Волковлы но куд-ог депутатъёслы "Тупан" группаен пумиськыны ӵектӥзы. Куатетӥ этажын сыӵе пумиськон ортчиз. Отын аспӧртэмлыко вераськон вал. Кун Кенешлэн Тӧроез группаез пыкылӥз, ужаны, пе, люкетӥськоды но Конституциен сётэм правоме быдэстыны луонлык уд сётӥське. Нош депутатъёс ас кыл вылазы юн сылӥзы. А. Волковлы синмаз ик шуэмын вал, тӥ, пе, Удмурт Республикаын улэмдэс вунэтӥськоды. Нош Валентин Кудинов дэмлаз Волковлы но Вершининлы кизэс кырмыны, ог-огзылы азьло сямен ик матэ кариськыны. Сое куре туннэ улон, республикаын тупаса улон но уж. Тӥни мар сярысь сюлмаськыны кулэ. Депутатъёслэн лэчытэсь кылъёссы но визьмо верамъёссы Кун Кенешлэн Тӧроезлэн сюлмаз йӧтӥзы, шӧдске. Александр Волков соглаш луиз Павел Вершининлэн кандидатураеныз нырысетӥ воштӥсе быръён вылысь сессие потыны. Коммунистъёслэн"Единство" но мукет депутат фракциос П. Вершинин понна куаразэс сётыны мылкыд каризы. 18 часэ вань депутатъёс ужан интыязы берытскизы. Соослэн нимынызы трибуна сьӧры потӥз Сергей Беркутов. Со вань огазеяськонъёсын кутэм огкылэз вераз: депутатъёс Н. А. Ганза понна куаразэс сётозы соку гинэ, П. Н. Вершинин Кун Кенешлэн Тӧроезлы нырысетӥ воштӥсе дэмламын луиз ке. А. А. Волков, кема пумитъяськемез бере, соглаш луэмзэ вераз. 18 час 35 минутэ кутске куара сётон. 98 депутат пӧлысь 85-ез куаразэ сётӥз Ганза понна, 10-эз - пумит. Озьыен, Удмурт Республикаысь Правительствоен кивалтон оскемын Николай Алексеевич Ганзалы. 10 маёзь со аслэсьтыз командазэ быръёз. 12 мае Кун Кенешлэн сессиез юнматоз выль министръёсты но тӧроослы воштӥсьёсты. Туннэ ик тодмо: верськон капчиен уз ортчы, нюръяськон зол гинэ мыноз. Депутатъёсты али ик шугъяськытэ П. Н. Вершининлэн азьпал нуналэз. Кызьы ассэ возьматоз таяз учыре Кун Кенешлэн кивалтӥсез? Огзэ вералом: Павел Николаевич та ужлы дась, ас мылкыдзэ вераз ини. Ужпум мукетыз бордын: гылӟытыса лэзисьёс шедьыны быгатозы. Куд-огез ӵектэ ни солы Россия Федерациысь Кун Думае депутат но луыны. Веранэз ӧвӧл, калыкмы Вершинин понна шумпотыса куаразэ сётоз. Но, Москвае ужаны кошкыса, Удмуртиен весяклы люкиськон уз лу меда? Тӥни малэсь кышкало удмурт депутатъёс. Гурт калыклы али политикаен йырин ӧвӧл: уен-нуналэн мыно ни бусы ужъёс. Соин но тросэз кылэм-адӟем уг кары, ма лэсьтӥське Ижевскын. Туж ӧжыт адями люкаськылӥз Кун Кенешлэн юртэз азе, Правительстволы выль Тӧроез быръён нуналэ но. Таӵе учырын амалтэк тодэ ваёд бускель республикаын улӥсь нациез. Соос асьсэды чылкак мукет сямен возьматысалзы уга. Нош асьмеос гань-гань кӧлиськом на, ческыт вӧтъёсты адӟыса... Людмила Медведева. Геннадий Романов. Туспуктэмъёсыз Владимир Камашевлэн. КЫТЫН? МА? Кый улӟиз Киров улосысь Кикнур посёлокын одӥгаз театр-студиын кулэмысь улӟиз кый (удав). Та палъёсы кемалась ик ӧвӧл Пензаысь цирк вуылӥз вал. Сюрес вылысен автобуссы тӥяськемен, автобус пушкын кезьыт луиз. Нош со вискын кыйзы кынмыны шедем: уг но шока, уг но выры. Артистъёслы кыйзэс куштыны жаль потӥз но сое чучело лэсьтонъя театр-студие сётӥзы. Отын котырскем кыез батарея вӧзы интыяллям. Кӧня ке дыр ортчыса кый сайказ. Зэмзэ ке верано, артистъёслэн автобусазы кезьыт луэмен кынмыса кый умме усем вылэм. Нош шуныт батарея вӧзын со сайказ. "Кулэмысь" улӟем кыез театр-студия кузёосызлы ик берыктӥз. ИМА-ПРЕСС. Пунэмъёс но "суто" Башкириын 30 аресъем кышномурт интыысь банке пунэмъёсыз трос люкаськемен, вылаз бензин пазьгыса, ассэ ачиз ӝуатӥз. Та нылкышно аслаз улон коркаезлы пунэмен кредит басьтӥз. Но ужтэк кылеменыз пунэмъёссэ дыраз берыктыны ӧз быгаты. Со понна банкиръёс трос пол алылӥзы, юртсэ но вузаны косӥзы. Мар карыны паймеменыз кышномурт ассэ ачиз быдтыны малпаз. Кулэмлэсь утизы дыраз лыктэм бускельёсыз. Кышномуртлэн ӝыны мугорыз сутскиз. Ӝуам бервылэз эмъян но кузэ воштон понна нылкышнолэн пунэмъёсыз эшшо но будӥзы. Сыӵе шудтэм учыре шедемзэ тодыса банкысь кивалтӥсьёс кышномуртэз эмъян понна коньдон но тыризы, пунэмъёссэ но вунэтӥзы. ИМА-ПРЕСС. Америкаын улоз Урал улосысь анай-атайтэк кылем Оля Америкалэн гражданкаез луоз. Пичи нылэз кылем арын шедьтӥзы Рудничный посёлокысь ӝуг-ӝаг куян интыысь. Какалмем нуныез врачъёс улӟытӥзы но нылпи юртэ сётӥзы. Отын пичи ныллы ним но, фамилия но шедьтӥзы. Нош мумизэ ӧз шедьтэ ни. Али Америкаысь одӥгез семья нылашез ас вылаз гожтоз. Николай Алексеевич ГАНЗА Вордскиз 1946-тӥ арын 27-тӥ октябре Казахстан ССР-ысь Восточно-Казахстанской областьысь Шемонаиха районысь Шемонаиха селоын. Ӟуч. Образованиез вылӥ. 1971-тӥ йылпумъяз Томскысь политехнической институтэз. Ужан удысэзъя изотопъёсты кутон. 1999-тӥ арын апреле Удмурт Республикаысь Кун Кенешлэн кыкетӥ ӧтчамаз дэпутатэ быръемын. Пусъемын "За трудовую доблесть" медален. Ужаны кутскиз Узбек ССР-ысь Навои областьысь Заравшан городысь Навои горно- металлугрической кмобинатлэн Центральной рудоуправлениезлэн 2 номеро гидрометаллургической заводаз, вал отделенилэн технологез, отделенилэн начальникез, инженер-технолог, цехлэн начальникез. 1982-тӥ - 1986-тӥ аръёсы - Навои областьысь Учкудук городысь горно- металлургической комбинатлэн Северной рудоуправленизэ лэсьтонъя валтӥсь инженер, директорлэн воштӥсез. 1986-тӥ - 1994-тӥ аръёсы - Днепропетровск областьысь Желтые Воды городысь Восточной горно-обогатительной комбинатлэн валтӥсь инженерлэн воштӥсез, директорлэн лэсьтӥськонъя воштӥсез, солэн директорез. 1994-тӥ - 1999-тӥ аръёсы Удмурт Республикаысь Глазов городысь "Чепецкий механический завод" производственной огазеяськонлэн (1996-тӥ акционер огазеяськон) генеральной директорез. Москваын кылдӥз, нош асьмелэн? Ӵапак Космонавтикалэн нуналаз Россия Федерациысь Юстицияя министерство пусйиз "Водительёслэсь правооссэс утёнъя огазеяськонлэсь" ("Общество защиты прав водителей") кылдэмзэ. Таин валче солэн нырысетӥ конференциез ортчиз, ивортӥз "Труд" газет. Огазеяськон юрттыны кулэ машинаен ворттылӥсьёслэсь эрикрадзэс утьыны, куд-ог кун органъёслэсь законэз тӥяса зӥбонзылэсь мозмытыны. Но та огазеяськон сюрес вылын кышкытлыклэсь утиськонъя кун инспекциен огкылысь ужаны малпа. Со сюрес вылын умойтэм учыръёс сярысь инспекцие ивортылыны кулэ. Ватонэз ӧвӧл, гожтэ газет, сюресъёс вылын умойтэм учыръёс ӧжыт уг пумиськыло, куд-огез асьсэлэсь ужан интыосазы со чотын кисызэс но зӧкомыто. Огазеяськон нырысь ик тыршоз шуге-леке шедем водительёслэн юанъёссыя но кулэяськонъёссыя юрттэт сётыны. Палэнэ уз кыле автомобилез тупатъян, уже кутон, страховать карон сярысь ужпумъёс но. Оло, Удмуртиысь водительёслы но огазеяськоно ни? Нылкышно тугоко "Сомында калык азьын, сцена вылысен, ноку вераськеме ӧй вал, соин ик пыдъёс куалекъяло, кылъёс могӟыло. Юнме асме возьытэ вуттыса, "чебер тусбуйме" возьматӥ, шуисько. Туж бадӟым тау карисько М. Журавлёвез кырӟанме кырӟаны поттэмды понна. Ӧй но малпа вал, сыӵе пумиськон луоз шуыса... Вазиськиз шорам Римма Шкляева, асэным огъёз маке, кык кылбурелы кырӟан гур, пе, гожтӥ. Адӟиськыса вуи Лидия Черноваен но... Ваньмызлэсь сюлэмам шуныт кельтӥ. Сыӵе ӟеч адямиосын пумиськыса, аслыд улыны кужым шедьтӥськод. Таӵе ӝытъёс-пумиськонъёс туж кулэ. Бер вуимы бере, туж потэ вал пумозяз пукеммы, но ӧз пӧрмы. Туж жалясько, но мар карод на. Тӥляд небыт куараеныды гинэ З. Титоваен мылкыдмес буйгатыны вырим...". Тазьы гожтэм Пичи Пургалась Васса Васильева Милитина Гавриловалы, "Сюлэмы мынам - азвесь крезь" ӝытэз нуисьлы. Удмурт кун филармониын нылкышно кылбурчиослэн но крезьгурчиослэн та ӝытсы далайгес, оштолэзьлэн ньылетӥ нуналаз ортчиз ни, нош тросэзлэн отчы пыриськемъёслэн сюлэмазы бугырскем мылкыд ӧз пуксьы на, луоз. Вассапайлэн шугъяськемез валамон: со дыртӥд-вуттӥд ветлоно луиз. Озьы ке но, сцена вылэ потыны тупатэм кадь дыраз вуиз. Кызьы ке гожъяське, озьы ик зыл-зыл ӧръяськиз вераськемез но, кылбур лыдӟемез но (юнме гинэ ассэ кур каре). Кылбур но кырӟан одӥг тугокое пӧлэстэмын вал та ӝытэ. Адямилэн сюлэмыз ке кырӟа, кылъёсыз но асьсэос лыкто уго - со ик кылбурчи, со ик крезьгурчи но луэ. Эшшо ик - фольклор коллективен кивалтэ на. Озьы шуыны луоз Бадӟым Сибы гуртысь Елена Васильевна Павлова сярысь. Залын шып гинэ пукыны малпам вылэм - висисько, куарае ӧвӧл шуыса пыкиськиз ке но вал, сцена вылэ потыса, уӵыпи кадь лопырскиз, чылкыт векчи куараеныз паймытӥз. Кузпалзэ но, Геннадий Павлов крезьгурчиез, пушкыз тырыса ик буре ваиз. Ма, кызьы, пе, уд - солэн Можга педучилищеын дышетэм нылыз, "Кӧня меда" кырӟанэзлэсь кылъёссэ гожтӥсь Нина Петухова-Ефремова но та ӝытэ лыктэм. Огназ гинэ ӧвӧл ай - Вавож ёросысь Выль Бия школаысь нылкышно ансамбленызы. Горд пильыс дэремен дышетӥсьёсыз мак сяськаен ӵошатыны луысал - сокем чебересь адскизы. Директорзы Н. М. Ефремова но, эшъёсыз но огкылысь шуизы: та ӝытысь оломар мында кужым басьтыса бертӥськом. Озьыен, Нина Максимовналэн кылбуран визылэз уз куасьмы. Юлия Байсарова баянэныз но дышетскись мусо нылъёсыныз нош ик ӝутскем мылкыд кузьмазы. Кытысь потэ Ожмосысь (Бабиноысь) дышетӥсьлэн сомында ӟырдытлыкез, кужмыз? Эмъясь но, пеллясь но со. Нылпиосын жадёнэз валатэк ужа, дышетон удысысь отличник. Дышетӥсьёс радысь ик, сыӵе ик паймоно кадь, но воксё аспӧртэм Фаина Ускова. Сайкыт, визьмо тусбуезъя но, ас дуннеяз выем шунытэсь синъёсызъя но валано: та огшоры адями ӧвӧл. "Туж чупрес, спортсменка но, пӧртэм турынэн эмъясь, кылбуръёс, крезьгур гожъясь - дышетэ кутаськыны, чильпаны, пужыятскыны... Со ик - "Удмурт кенешлэн" Игралась ёзэныз кивалтӥсь". Тазьы ивортӥзы ӝытэз нуисьёс тужгес уй пал куномы сярысь. Ньыльдон ар сюлэм кӧкыяз веттаськем гуръёсыз шуак огдыре бурдъяськыны ӧдъязы Римма Шкляевалэн, Як.-Бодья ёросысь Мукшиысь дышетӥсьлэн. Тылобурдоос сямен кыре курисько соос, куамын котыре вуозы ни. Кырӟан кылъёсыз аслаз но, татысь ик дышетӥсьлэн Надежда Гильманшиналэн но - асьсэ гурт палъёссэс, анай-атайёссэс данъяло, вӧл-вӧл кисьтӥсько сцена вылысен. Нош Римма Ивановналэн 4-тӥ мартэ ӵапак 60 арес тырмон юбилеез тупаз, соин ик тужгес шуныт ӟечкыланъёс солы вал. Семья кык полэс шудо, кырӟанэн ке эшъяське. Вуж Салья школаысь дышетӥсьёс Надежда но Владимир Бочкарёвъёс огшоры "парлы пар" гинэ ӧвӧл: ӵош кырӟан малпало, ӵошен быдэсто. Школаязы "Кубо" фольклор ансамблен но соос кивалто. Учконо ке, дышетӥсьёс тросгес ик вылӥллям та ӝытэ. Мӧйыез гинэ ӧвӧл - егитэз но. Гожня школаысь Екатерина Макарова - аслаз чильпырась мылкыдыныз, Кечол школаысь Любовь Васильева - ас югыт тусбуеныз, жильыртӥсь крезьгуреныз. Эсьмаса, дышетӥсьёслэн дышетӥсьёссы но "ӧз чидалэ", сцена вылэ тубытэк. Литература удысъя доктор Анна Зуева туж интыяз вераз нылкышно поэзия сярысь. Ӟырдыт мылкыдзэ кисьтӥз Роза Яшина, кылтодон наукаосъя кандидат, наука удысысь дано ужась. 87 арес ни Августа Конюховалы, нош кыӵе со али но сэзь, веськыт - калыкез дышетонысь отличник, 16 пол потылэм "Удмурт кыл" учебниклэн авторез, "Шудтэм шуд" книгаез гожтӥсь... Огзэ но вератэк кельтэм уг поты. Дышетӥсьёс гинэ шат? Алнаш администрациын ужась Нина Соколова усьтӥз "лемлет италмас" дуннеез, сое ас мылкыдыныз зэматӥз та ёросысь ик Азамат школаысь пӧрась Людмила Гирбасова. Тымиськем сюлэмзэ ӧръяз Пазял гуртысь азьвыл библиотекарь Лидия Чернова. Нош Федосья Тубылова, Пичи Пурга райгазетлэн редакцияз ужам нылкышно, "Зарни шеп" калык ансамбленыз кыланы-бураны быгатонзэ копак вуюись кадь воректытӥз. Та нылкышноос, ӝытэ ветлэмъёс, удмурт калык кылбуретлэсь азвесь гинэ ӧвӧл, зарни шыкыссэ усьтӥсьёс, узырмытӥсьёс, мон шуысал. Таосын артэ ик пуктыны луоз Карамас- Пельга гуртысь Ольга Соловьеваез, сузэр-апайёсыз Мазитоваосыз, Бадӟым Уча черкогуртысь Евдокия Антоноваез... Кыӵе гуртын ӧвӧл меда кыло уӵыоссы? Ваньзэ поттоно ке, уй но, нунал но, арня но, толэзь но уз тырмы. "Гуртысь клубын кадь вал ӝытты" шуисез но вал. Зэм, соос гуртысь, но самой "йӧлвылэз", - соос уг тыршо асьсэды артист кадь пуктыны, маке но синмаськымонзэ учкись азе усьтыны. Мар потӥз кыл йылысьтызы - ваньмыз со сюлмысь, пуш дуннезылэн мурдалаеныз мертамын. Ӝытэ ӧтемез тодыса, та нылкышноос ӧз малпалэ асьсэлы дун пуктон, кыӵе ке уксё яке командировочной курон сярысь. "Лулысь-сюлмысь" нимасал мон та пумиськонэз. Кыл йылын вераса пӧсьтӥсьтэм со, пуштросэз но шунытгес, мургес... Уйшорозь но, дыр, кыстӥськысал та ӝыт - вань ӧтемъёс лыктыны ӧз быгатэ. Со понна ик режиссёр - азьвыл ик ваньзэ радъяны, чакланы. Но со шуак кошконо луиз но - программа кивалтӥсьтэк кылиз. Таӵе дыръя нокызьы шекъёстэк ӧйлась. Звукорежиссёр, валамон, ки улысь потӥз, кулэзэ фонограммаез ӝегатылӥз, микрофонъёсыз умой пуктыны "вунэтӥз" - оло, малпаз: гуртысь лыктэмъёслы яралоз... Миля апай - Милитина Гаврилова но Лади - Владимир Михайлов (таос но кылбурчиос) ӝытаз лад-лад, могатэк нуэмен, со "чыры-пырыосты" учкись ӧз шӧды. Филармониын та ӝытэ буфет ӧз ужа (санэпидемстанция, пе, ворсам). Соин ик кыдёкысь лыктэмъёс ӝожтӥськизы но... Нош кыӵе ке гуртэ Ижысь куноос быдэс "уллёен", автобусэн-маин вуо ке, ку соосты утялтытэк келязы ни? Ярам коть, ӝытэ пыриськем адямиосмес Удмурт нылкышно кенеш самоварысь чаен, пыжиськемъёсын куноятӥз. Котькудӥзлы быдэн сяська ке но кузьмамын вал. Коньдонэн кӧня быгатӥз юрттӥз "Удмурт кенешлэн" кивалтӥсез В. К. Тубылов. Тау нылкышно кенешлы, Г. А. Никитиналы но З. В. Суворовалы, нылкышно кылбурчиослэсь но крезьгурчиослэсь ӝытсэс ортчытонэз ас бурд улазы басьтэмзы понна. Нош соос но нырысь-валысь валаса ӧз вуттэ, ӝыт такем паськыт вӧлскоз шуыса. Спонсоръёс ласянь малпаськоно на вылэм. Вить ар талэсь азьло, 26-тӥ феврале, та выллем ӝыт Удмурт филармониын ик вал ни. Со пичигес, капчигес ортчытӥськиз. Нош таиз... оло, ньыль час кыстӥськиз ке но, ӝыныё кошкисез, "акыльтӥм, жадим" шуисез туж ӧжыт, дыр, вал. Чарс сюлэмъёс люкаськиллямтэ залэ, поэзилэсь мӧзмон но вань на вылэм. Та ӝытэ малпамын вал тросгес кыскыны гурт ёросъёсын улӥсь кыло-буро нылкышноосыз. Соосты верамы ни. Соослы бадӟым тау карыны кулэ. Нош соос сяна, сцена вылэ потазы Ижевскын улӥсьёсыз кылбурчиосмы, кудъёсызлэн нимъёссы ӵемгес кыл йыл йылын бергало: Зоя Трухина, Елена Виноградова, Татьяна Чернова, Алла Кузнецова, Галина Романова. Залын пукизы, но сцена вылэ ӧз тубалэ Людмила Хрулева, Любовь Тихонова, Лидия Нянькина, Серафима Пушина-Благинина, ӧй вал Людмила Кутянова, Люза Бадретдинова, Ольга Ведрова, Елена Панфилова... Нош шулдыртӥзы, сценаез воректытӥзы кырӟасьёс-крезьгурчиос Светлана Яковлева, Юлия Кузьмина, Анна Плотникова, Надежда Уткина. Адӟем потэ на вылэм Наталья Матвееваез но Светлана Белыхез, Екатерина Антоноваез но Надежда Ельцоваез... Жаль, та ӝытэ лыктыны ӧз быгатэ Удмурт театрысь артисткаосмы Ольга Зорина но Алефтина Корепанова, Валентина Моисеева но Людмила Егорова, Валентина Бекманова. Кожаськоды, пиос ӧз ӟечкылалэ нылкышноосмес та жингрес тулыс ӝытэ? Эшлыко чуръёссэ лыдӟиз Александр Шкляев. Кырӟазы-эктӥзы Николай Уткинэн Григорий Собинов, Геннадий Бекманов, Андрей Ураськин но мукет "катанчиос". Таос ас вылазы басьтӥзы ӝытэз усьтонэз но, йылпумъянэз но. Ай эшшо вунэтӥмы. Кызьы, пе, будӥсь пушъетъёстэк? "Пурга кизилиос" пӧлысь огез, Жанна Рыбакова лыдӟиз юморесказэ. Кылбуръёссэс веразы Удмурт кун университетын дышетскисьёс Татьяна Пантелеева, Алена Ионина, Ольга Самигулова но Татьяна Быкова. Выль кизили сузьет ӝужа, дыр, инбамамы. Тӥни ваньмыз. Инмар понна, коть кутскы но, кыкетӥзэ, куинетӥзэ таӵе ӝыт ортчыты на ("Мылысь-кыдысь" сямен). Шекъёсмес палэнтыны тыршыса. Коть кыӵе ке гуртысь пичигес клубын. Дан поттон ӧвӧл та. Кырӟась-верась нылкышноосмы лыдтэм. Нош кинлэсь нимзэ вераны ӧй шедьты, вождэс эн вае. Эшшо вераны кулэ. Тае гожтыкум, мон ужпум ӧй пукты кырӟанлэсь-кылбурлэсь ӟечлыксэ эскерон ласянь. Со мукет вераськон. Нош тугокомы пӧрмиз, шуыны луэ. Кытын ке кылиз на, дыр, адӟымтэ буёлэн пиштӥсез но... Татьяна Чернова. Башкортостанысь Песьтэр (Барабановка) гуртысь та кышномуртъёслэн пельпум вылазы усизы секытэсь вакытъёс: война, сютэм аръёс. Мае но ӧз адӟе соос, кыӵе но тӧлпериос котыразы ӧз бергалэ. Ваньзэ чидазы, вормизы - ӧз чигтӥське. Лул-сюлэмзы но ӧз лекомы, кырӟанъёсазы гинэ ӝожмыт гуръёс тросгес чузъясько. Песьтэрысь кышномуртъёс. Кырӟа Мелфия Алегдинова. Туспуктэмъёсыз Владимир Беломорских. Пазьгиськем чигвесьёс Вераськыны дышетскон Улонамы нуналлы быдэ сямен пыро кунгож сьӧрысь лыктӥсь выль но выль кылъёс. Та мудрон кылъёсты асьмеос туж ӵем кылӥськом-лыдӟиськом ке но, зэмос пуштроссэс кематэк ай валаны ум кутскиське. Со гинэ шат - соосты куддыр ымпушкын бергатэммы но соку ик уг пӧрмы. Быдэс кунысьтымы калык али - соку гинэ вераськыны дышетскись пинал выллем. Но - макем мӧйыгес ни адями, сокем секытэн сётске солы вераськыны дышетсконэз. Мар бен, трос кылэз тодэм - со урод ӧвӧл. Но аслад вераськемысьтыд туж унозэ кылъёсты сьӧр кылъёсын воштон - со ини умойтэмлэсь но умойтэм. Со - ас анай кылдэ пичиен-пичиен, кесэген-кесэген вузан. Вылаз ик - ачид дуно дун тырыса. Ас кылзэ чылкыт утьыны быгатымтэ калык - куанер калык. Со - сыӵе ик ляльчи. Макем улынгес шунды... Макем улынгес шунды - сокем кузьгес вужеръёс. Та ваньмызлы тодмо ке но, со - теория гинэ на. Азьвыл аръёсы, солэсь зэм луэмзэ уж вылын возьматон понна, трос гинэ малпаськоно-тыршоно луылоз вал. Нош туннэ солэн вань тодметъёсыз вамышлы быдэ кадь пумиськыло. Шуом, кунмылэн кивалтэтэз. Со туж ӵем вошъяське: али гинэ ӝужаны кутскись шунды вал на, нош учкиськод но, со ини - пуксись шунды. Озьы огез "шунды" воштэ мукетсэ, огез но инбаме рос-прос ӝутскыны вуытэк. Нош сьӧд вужеръёслы таӵе югдурын - майбырлэсь но майбыр. Соос пичи но кӧбератэк лэсьто асьсэлэсь сьӧд ужзэс. Угось тодо: кӧбераны мугъёс ай кематэк уз вуэ - пуксись шунды бере луоз на уй, нош ӵуказеяз ӵукна вордскем шунды кематэк гинэ инме уз ӝутскы на. Соиз но ӝутскыса вуиз ик ке... Ас вирдэ адӟыса... Литератураез эскерон бордын ужась муртъёс пӧлысь куд-огез вань гожтэм произведениосты сэртто-пертчо трос аръёс талэсь азьло кылдытэм сямъя: пусъё отысь ритмиказэ но рифмаоссэ, сюжет гожъёссэ но кылтӥрлык радзэ, отын возьматэм адямиослэсь вылтуссэс, выросъёссэс но манеръёссэс. Но со бордын шат тужгес кулэез? Нырысь ик - лыдӟисьлэсь лул-сюлэмзэ ӵабыштон, отысь пичи ке но вирзэ поттон. Ас вирзэ адӟыса гинэ, адями быгатэ улон шоры зэмос вӧсь луыса учкыны. Сотэк - инмарен сётэм вапумдэ огсыр ортчытон гинэ. Иосиф ИВАНОВ. П. И. Чайковскийлы сӥзем 42-тӥ крезьгуро фестиваль Паськыт но эркын визылась Хорен кырӟан - лул-мылкыдлэн тужгес вылӥ бурдъяськонэз, со адямиосты шудогес каре, огазея. Таӵе малпанэн кылдытӥз аслэсьтыз хорзэ Александр Свешников, собере 40 арлэсь кема кивалтӥз соин. А. В. Свешников нимо кун академической ӟуч хор таӵе коллективъёс пӧлын тужгес тодмоез луэ. Кивалтэ соин Россиысь калык артист, профессор Игорь Раевский. Асьме доры та хор ньылетӥзэ лыктӥз ни. Воткинскын но Сарапулын сяна, концертъёссэ возьматӥз Ижевскысь "Металлург" культура дворецын. Хорлы тупатэм крезьгуро произведениосысь - кунгожсьӧр классика-а со яке ӟуч калык кырӟан - адӟиське коллективлэн но солэн валтӥсь дирижёрезлэн вылӥ устолыксы. Луло кырӟам куара гинэ быгатэ сюлэм крезьгурлэсь тужгес векчи сиоссэ дырекъятыны но жин-жин пезьгыт карыны. Д. Вердилэн "Набукко" операысьтыз хор, В. Моцартлэн "Реквиемысьтыз" Лакримода люкетэз Г. Гендельлэн "Аллелуияез" - та произведениос чузъяськемысь куаралэн кужымез, чеберлыкез адӟиське ке, ӟуч композитроъёслэн крезьгуръёсысьтызы шӧдӥськом ӟуч адямилэн эркын мылкыдызлэсь чылкыт ӧръяськемзэ, паськыт вӧлскемзэ. Сыӵеесь луо Иоанн Златоустлэн литургиысьтыз люкетъёс (П. Чайковский), сыӵеесь луо кырӟанъёс, романсъёс но: "Не пой, красавица, при мне" (М. Глинка), "Я вас любил" (Б. Шереметьев), "Буря мглою небо кроет" (А. Даргомыжский), "Зимняя дорога" (В. Шебалин), "Тиха украинская ночь" (Р. Щедрин), "К Наташе" (Г. Свиридов). А. Пушкинлэн кылбуръёсыныз одӥг визылэ шедьыса, та произведениос ву вылын кадь эркынласа нуо учкисьлэсь (кылзӥсьлэсь) сюлэмзэ ас сьӧразы. Ӟуч гырлыослэн бом-бом жонгетэмзы кыдёке пасьтана вӧлскем кадь огӵош шуккисько куараос, соос пӧлын - бас-профундо, одӥг октавалы улынгес кырӟамзы... - ваньмыз со эшшо огпол возьматэ макем зол быгатэ ӟуч калык кырӟан пыр усьтыны аслэсьтыз бадӟым кужымзэ. Концертлэн кыкетӥ люкетаз И. Гаевскийлэн быгатонлыкез уката ӟеч усьтӥськиз хорлы тупатъям ӟуч калык кырӟанъёсысь "Степь да степь кругом", "Однозвучно гремит колокольчик" кырӟанъёс бере Россиысь дано артистэз Николай Машатовез кужмо кичабонъёсын согизы. Нош С. Рахманиновлэсь "Итальянской польказэ", Г. Свиридовлэсь "Зорю бьют" кырӟанзэ кылзыса ӵошатэм потэ асьме академической камерной хорен, кудӥныз кивалтэ А. Щербаков. Мон шуысал, асьмелэн коллективмы но сыӵе ик кужмо но вылӥ быгатонлыкъёссэ усьтӥз ини. Кылӟисьёс понна витьымтэ шорысь шумпотон луиз П. Чайкоскийлэн "Лебединое озеро" балетысьтыз ньыль юсьёслэсь эктон гурзэс быдэстон. Таин А. В. Свешников нимо хор йылпумъяз ас концертсэ. Леонид Прозоров. Народ не должен чувствовать себя изгоем на родине Открытое письмо Н. А. Ганзе Николай Алексеевич! В конце драматичного ЪИЪ века русский царизм поставил на одну чашу весов всю свою политическую, судебную и интеллектуальную мощь, чтобы обвинить малоизвестный удмуртский народ в каннибализме. Вдруг к этим весам подошел гонимый властями человек с украинизированной фамилией Короленко. Решительно встал на другую чашу. И победил! С тех пор в России прошли годы и десятилетия, менялись идеалы и режимы. А Владимир Галактионович не забыт. Никому в голову не приходит мысль о переименовании Русского драмтеатра в Ижевске, пединститута в Глазове и поселка в Кизнерском районе. Душу каждого удмурта веками будет согревать имя Короленко, подобное сердцу Данко. Сто лет спустя в Удмуртию приехал другой человек с украинизированной фамилией Грищенко. И также решительно вмешался в судьбу народа. В первую очередь - путем смещения удмуртских кадров. Совершенно справедливо Грищенко вскоре был снят со своего поста. А новые руководители в суматохе "забыли" избрать в секретариат рескома компартии представителя коренного народа. Пока опомнились и искали подходящую кандидатуру, партия вполне закономерно развалилась. Она потеряла авторитет и власть вследствие многих причин, среди которых не последнюю роль сыграла близорукая национальная политика. Петр Грищенко и теперь живет среди нас. Но его фамилию удмурты, да не только они, вспоминают лишь в негативных красках. Почему? Посеянные им в политическую почву семена продолжают давать ядовитые плоды. Некоторые его "начинания" находят поддержку и в настоящее время. А тревожные вопросы титульной нации остаются гласом вопиющего в пустыне. Нам, удмуртам, хотелось поговорить о своих болевых точках открыто, не таясь, на своем языке с министрами здравохранения, социальной защиты, народного образования, печати и информаци, культуры и других отраслей, с руководителями правоохранительных органов, служб, комитетов, управлений. Нам хотелось, чтобы в вузах, расположенных на нашей земле, число студентов- удмуртов было не 14 процентов, как сейчас, а значительно больше. Нам советуют: готовьтесь и поступайте хоть в удмуртские, хоть столичные, хоть эстонские институты. Но ведь не удмурты виноваты в том, что сельские школы забыты и даже заброшены. Что говорить о компьютеризированных лицеях и гимназиях, когда, по меткому выражению одного остроумного педагога, мел раздают, как патроны перед последним боем. А в Комитете по науке, высшему и среднему профессиональному образованию до последнего времени не было ни одного удмурта. Худо ли, хорошо ли, но учили меня уму-разуму в Дебесах удмурты, в Казани татары, в Свердловске русские. Я в течение многих лет сравниваю свой народ с другими, знаю его плюсы и минусы, не идеализирую свою нацию. В минуты дискомфорта удмурт вряд ли выйдет на баррикады. По менталитету он направит своё недовольство внутрь себя. Не потому, что его мозги устроены не так и ему так предначертано судьбой, а потому, что он хотя и кинут на последнюю ступеньку социальной лестницы, терпение его безгранично. Национальная политика - вещь тонкая. При перекосе в одну сторону появляются жириновские, при перекосе в другую - дудаевы. Понимаю, что государственные посты не вымаливают - их добиваются в борьбе характеров и интеллектов. Вы избраны главой Правительства конституционным путем, подавляющим большинством депутатов. В Совете Федерации России будете представлять 1,5-миллионный народ Удмуртии и символически - 750-тысячный удмуртский народ. От Вас зависит, чтобы название республики не было декоративно-формальным и не сводилась к статусу безликих губерний. От Вас зависит, чтобы удмурт не чувствовал себя на исторической родине и в собственном доме чужаком и изгоем. От вас зависит, кем Вы будете потом в памяти народа - Данко, Короленко или Грищенко. ТОДЭ ВАЁНЪЁС Юрттӥз "тушмон" кыл Макем трос кылэз тодод, сомында полэслы узырмод. Та калык веран юнме шорысь ӧз вордскы, дыр. Тодам лыктэ двоюродной братэным, Данилов Роман Аркадьевичен луэм куд- ог учыръёс. Вордскиз со 1921 арын, улӥзы Сибирьын. Бубиз - удмурт, военной, мумиз - немец выжыысь, дышетӥсь. Кыксэ но кылэз семьяязы утьыса возизы, пизэс но солы дышетӥзы. - Буби монэным удмурт сямен гинэ вераськылӥз, анае - немец сямен. Одӥг пол корка шоры султӥ но куараме юн-юн карыса шуисько: "Нош ку мон ӟуч кыллы дышетско?" "Азбарын, эшъёсыд пӧлын дышод", - вазизы пумитам. Буби монэ ӵукнаосы вазь сайкатэ вал, лысву вылтӥ гольык пыд бызьылыны косылӥз. Соин но, вылды, пичи дыръям но, фронтын но кынмаса висьылэме ӧй вал. Буби туж яратылӥз пӧсь мунчоын веникен пырыны, собере, отысь потыса, тыметысь кезьыт вуэ зумыны. Монэ но озьы ик дышетӥз. Анае но трос ӟеч сямъёс пыӵатӥз. Пичи дыръям ик со вералляз, кызьы астэ ӝӧк сьӧрын возёно, салфеткаез кутоно, киостэ чылк-чылк миськоно. Со выросъёсыным сэрен школаысен ӵем дыръя монэ сереме но уськытъязы. Армие мынон дыры ӵапак тупаз война кутскон арен. Новосибирскын курсъёсты ортчыса, фронтэ келязы. Окопын кылльыны уин туж кезьыт. Немецъёс палась дугдылытэк кылӥське: "Ӟуч солдатъёс! Тӥ юнме милемлы пумит ожмаськиськоды, сыӵе техникаен ноку уд ворме. Быремдылэсь азьло ми пала выже. Кинлэн дышетскемез вань, соку ик звание сётом". Одӥг мурт но тушмон доры ӧз мыны. Мукет нуналаз юало "Пӧлысьтыды кин немец сямен вала?" Нокин уг вазьылы. Эше косэмъя, кыкетӥзэ юамез бере, мон шуи: "Ӧжытак тодӥсько кадь". Соку ик сьӧраз блиндаже, отын пукись генерал доры нуиз. Генерал пленноез вайыны косӥз. Озьы мон нырысьсэ переводчик луи. Кыӵе жоб кылъёсын гинэ шорам ӧз кесяськы пленэ шедем мурт! Мон, пе, тонэ, предателез, ас киосыным кекатысал, вирдэ шапыкен-шапыкен виятысал. Верамъёссэ берыктэмысь дугдӥ. Соку генерал, мазэ-созэ валатэк, шорам зуркак вазиз: "Малы чалмид?! Оло, ӵош пегӟыны малпаськоды?" Мон верай немецлэсь тышкаськон кылъёссэ. Генерал шорам оскытэкгес учке: "Нош шуид вал, соослэсь кылзэс йӧскадь уд тодӥськы. Озьыен, пӧяны малпад?" Соку ик йырам чилектӥз бубилэн верамез: "Немец кылдэ ненокин азьын но эн поттылы, пленэ ке сюрид, пегӟыны выр". Та учыр бере генерал монэ аслыз адъютантэ басьтӥз. Озьы соин артэ быдэс войнаез ортчи. Но монэ ялан чакласа возиз. Озьы ик, оло, пумозяз ӧз оскы, мон Германилэн шпионэз ӧвӧл шуыса. Мукет часте вуыса, таӵе суредэз адӟыны кылдӥз. Асьме палась солдат немец сямен маке но тушмонъёс шоры кесяське. Вераськемез мыным малы ке умойтэмгес потӥз. Со сярысь генераллы верай. Ми кошким азьпала, генерал со переводчикез сьӧрамы басьтӥз. Вуим штабе. Дорамы лыктӥзыавтоматэн солдатъёс, пыртӥзы командир доры. Нырысь ик вераськизы со переводчикен, бӧрысьгес - монэн. Юазы, кыӵе семьяын вордскемын, кытын дыши немец кыллы. Мон ваньзэ верай. Кӧня ке улыса, генерал пыриз. Солы азям ик шуизы: "Генерал эш, эн сюлэмшугъяське. Адъютантты - оскымон адями. Тросгес мед луозы вал таӵе пиосмы". Эшшо одӥг учырез вераме потэ на. Сибирьысь военной городокамы командирлэн нылпиосыз туж быгатыса роялен шудылӥзы. Кыӵе мон соослы вожъяськылӥ! Бубилэсь лушкемен доразы ветлылӥ. Та семьяын монэ дышетӥзы музыкалы, чебер эктыны но кырӟаны, нюръяськон амалъёслы. Буби рояль сьӧрын пуконлы чутрак пумит вал: со, пе, воргорон уж ӧвӧл. Шулдыръяськемед ке потэ, ветлы солдатъёс доры, отын эктыны-кырӟаны дышетозы. Мон сояз но, таяз но вуисько вал. Малпалляй, школаез быдтӥ ке, одно ик музыкальной училищее пыро шуыса. Одӥг пол шутэтскыкумы, генерал юаз: - Война бере ма карыны малпаськод? - Университетэ пыро, дыр. - Военной луэмед уг-а поты? - Уг. Мынам буби - военной. Гуртын ӵемысь даллашо вал, уин бер бертэ шуыса. Соин ик та профессиез басьтэме уг поты. - Нош мон тонэ приказэн институтэ пырыны косӥ ке? - Пегӟо, кужмысь уг дышетскы. Шутэтскон дыр шедьыку, солдатъёс пӧлысь кин ке но одно ик арганэн шудоз вал. Чебер крезьгурез кылыса, мынам сюлэмы отчы лобыны дась ни. Огпол нуназе шорын ялкарыны дугдӥм. Мон учкисько сюрес вӧзын шутэтскись солдатъёс шоры. Кин эктэ, кин кырӟа. Эх, пӧлазы потыса шулдыръяськы вал! Кема сылӥ, шоразы учкыса. "Эй, адъютант! Эктэмед ке потэ, экты! Мае тыныд шудоно?" "Котьмае шудэ", - шуисько. Нош пыдъёсы асьсэос нуо ни эктон круге. Мылкыдме лулысь-сюлмысь лэзи, пӧсятозям эктӥ ке эктӥ ни. Солдатъёс юало: тон артист ӧвӧл-а? "Ӧвӧл, - шуисько. - Нокытчы дышетскыса ӧй вутты, война люкетӥз. Ож сюрес кытчы гинэ уг вутты, кинэн но уг пумиськыты. Одӥг пол удмурт сямен вераськемез кылӥ. Доразы шумпотыса вамыштӥ: - Ӟечбуресь, землякъёс! Огез мон шоры учкиз но юа: - Кыӵе тынад званиед? Малы ке таӵе погонъёсты ми ӧм адӟылэ на. - Мон переводчик. - Неужто фашистъёслэсь кылзэс дышетӥд? Нош ачид кытысь? - Сибирьысь. Вераськыса ӧм вуттэ, азьлане вырӟыны приказ сётӥзы. Выль интые вуэммы бере шутэтскыны косӥзы. Пӧсь сиёнэн сюдӥзы, кӧлыны выдтӥзы. Валесэ выдон азямы генералэ юа: - Пие, вера ай, кин тон? Кышкаменым ма вазьыны ик ӟудӥ. Нош со юан вылэ юан сётэ. - Кӧня кылэз тодӥськод? Ӟуч но немец сямен вераськемед тодмо, нош обозэн мынӥсьёсын кыӵе кылын бӧтьыртӥд? - Удмурт сямен. Буби мынам Удмуртиысь. Ижевск город сярысь кылэмды вань-а? Тӥни самой отын уло мынам ӵыжы-выжыосы. Ог-огмес валам кадь. Со мыным оскиз. Германиын война мынэ на вал. Милемыз кӧлыны интыязы немец генераллэн усадьбаяз. Ӝытсэ сиськыса, генераллэсь юасько: луоз-а корка пушез учкылыны? Лэзиз. Корка трос висъетъёслы люкылэмын. Учкисько - огаз рояль сылэ. Рядовой солдат со сьӧры пуксьыса, гур пуктыны выре. Кема сылӥ шудэмзэ кылзыса. "Быгатӥськод ке, ойдо 4 киын шудом", - дэмлаз со мыным. Быдэс концерт сётӥм та ӝытэ. Пытсэт улэ но шеди. Огзэ крезьгурез шудыкумы, солдатлы шуисько: "Тон умойтэм нотаосты басьтӥськод". Солэн вожез потӥз: "Мар монэ дышетӥськод, консерваториез-а, мар-а быдтӥд, генераллэн холуез!" Ултӥян кылъёссэ чидатэк, мон сое мыжги. Жугиськеммес кылыса, солдатъёс но капитан вуизы. Милемыз люкизы. - Роман, ма карид? - генерал шорам лек учке. Номыр уг вераськы. Кыкмылэсь но кускын нуллон емес басьтыса, милемыз одӥг комнатае пытсаз. Пуктӥз возьмасьёсты. Та учыр бере мон малпай вал, Штрафной ротае ыстозы, дыр, шуыса. Ӧй куректы, мынам кемалась потэ вал ини зэмос ожъёсы пыриськеме. Ялан малпалляй: татчыозь одӥг медале но ӧвӧл на, бертӥ ке, дезертир уз шуэ-а? Но генералжаляз. Война йылпумъяськытозь, бордаз возиз. Берлинэз басьтэммы бере, рапорт сётӥ, армилэсь мозмытыны курыса. Генерал куриськонме кутӥз, соин ӵош асме но пыртӥз кабинетэ. - Военной луэмед уг-а поты? Нош разведчик? - Уг, шуисько. Туж зол гуртэ бертэме потэ. Соку шуиз: - Ярам. Мынод дышетскыны дипломатъёсты дасянъя международной институтэ. Тон куинь кылэз тодӥськод, бордаз эшшо кӧнязэ ке дышетод на. Тон визьмо пи. Берлинысь монэ соку ик Москвае келязы. Общежитиын нимаз комната висъязы. Озьы кыл тодэме юрттӥз дипломат луыны. Вынылэсь, Роман Аркадьевич Даниловлэсь, тодэ ваёнъёссэ гожъяса верало на: кема аръёс ӵоже со ужаз Германиын. Зинаида Кожевникова, Ижевск. Огречлэсь лосьон, одеколон - ваньмыз юон? Тазалыкез утёнъя министерство парфюмериын, косметологиын спиртэн лэсьтӥськись вузъёсты поттонэз кулэстыны чаклаз. Та ужрадлэн мугез одӥг: Россиысь юисьёс котькыӵе спиртэз юыны дась. Мед луоз со огречлэсь лосьон, яке "Тройной" одеколон, яке "Розовая вода" - ваньмыз соос спирт вылын лэсьтэмын, посудаоссы бадӟымесь. Юисьёслы со гинэ кулэ. Нош кӧня адями кулэмын ни, соосты юыса. Тазалыкез утёнъя министерстволэн лыдъямезъя, 24 сюрс пала адями быремын, озьы 10 ар ӵоже Россиын вить поллы йылӥз аракыен шузимисьёслэн лыдзы. Одеколон, лосьон поттӥсьёс табере вылӥ куронъёсъя ужалозы. Кылсярысь, дасям суретъёсын спирт кутӥськись спиртэз 15 процентлэсь уно медаз луы, посудаез 100 граммлэсь бадӟым луыны кулэ ӧвӧл. Санэпидемнадзорлэн кивалтӥсез Геннадий Онищенко оскемзэ вера, лосьонлэсь, одеколонлэсь посудаоссэс пичиятыса, юыны яратӥсьёслэн лыдзэс кулэстыны луоз шуыса. Иворъёсъя национальной служба. Дышетӥсьёслэн анайзы Ужась, сюлмаськись, котькинлы юрттыны дась луись - тазьы вакчияк вераны луэ Алевтина Николаевна Журавлёва сярысь. Солэн нимыз туж ӟеч тодмо покчи классъёсын ужась удмурт дышетӥсьёс пӧлын. Дас одӥг ар ӵоже Дышетӥсьёслэсь тодон-валанзэс будэтонъя институтын методист луыса ужатозяз Алевтина Николаевна сюрслэсь трос дышетӥсьёсын кусыпъёс тупатӥз, котькудзэ нимын-нимын тодӥз, котькудӥзлэн ужамысьтыз одно ик умойзэ шедьтыны турттӥз, ӟеч кылъёссэ ӧз жалялля. Соин ик дышетӥсьёс Алевтина Николаевнаез яратӥзы, дунъязы. Выль ужан интыяз выжыса но Алевтина Николаевна дышетӥсьёсын кусыпъёссэ ӧз ышты. Табере со кивалтэ Дышетонысь йӧскалык ужпумъёсъя институтлэн удмурт филиалэныз. Берло дас аръёссэ Алевтина Николаевна наукаен герӟаз. Ӟучомем нылпиосты удмурт кыллы дышетон книгаослэн но методикая пособиослэн авторзы луиз. Со книгаос чебер но мусо "Анай кыл" нимын потӥзы. 1-тӥ класслы гожтэмез пиналъёслэсь кылтӥрлыксэс узырмытыны но вераськон кылзэс радъяны юрттэ, 2-тӥ класслы поттэмез удмурт куараосын но букваосын тодматэ, вольыт лыдӟыны дышетэ, 3-тӥ класслы дасямез (таиз воксё пӧсь на, Удмурт издательствоысь али потэ) покчи пиналъёслэсь вераськыны но лыдӟиськыны быгатмэзэс азинтэ, нош 4-тӥ класслы гожтэмез нылпиосты удмурт кылын янгышъёстэк гожъяськыны дышетэ. Оскиськомы, Алевтина Николаевналэн та книгаез но школаосы ӝоген вуоз но дышетӥсьёслэсь ужзэс данаклы капчиятоз шуыса. А. Н. Журавлева дышетон удысын нырысетӥез, кин кышкатэк басьтӥськиз ӟучомем пиналъёсты дышетонын кылдэм ужпумъёсты сэрттыны-пертчыны. Басьтӥськиз но быдэстӥз. Табере та авторлэн книгаосызъя вань удмурт классъёсын вордскем кылзэс тодӥсьтэм удмурт нылпиосты анай кылзылы дышето. Ваньзэ сое лыдэ басьтыса, сӥё-дано дышетӥсьлы А. Н. Журавлевалы Удмурт Республикаысь Государственной премилэн лауреатэз ним сётӥзы. Кутскем ужзэ Алевтина Николаевна азьланяз но азинтыны малпа. Институтысь ужасьёсыныз ӵош со мылкыд кариз шор ёзо классъёсысь пиналъёслы учебникъёс гожтыны. Оскиськом, та малпанъёссэ но Алевтина Николаевна одно ик пумозяз вуттоз. 26 оштолэзе Алевтина Николаевналэн юбилеез. Соин валче ми гажано дышетӥсьмылы тазалыко, бадӟымесь азинсконъёсын шудо-буро улон сӥзиськомы. Туж шумпотӥськомы но данъяськиськомы, милемын артэ сокем йӧно, шырыт сямо, котьку но ӟеч мылкыдо, туж тунсыко адями ужа шуыса. Оскиськомы, Алевтина Николаевна милемыз кема аръёс ӵоже шумпоттоз на аслаз ужъёсыныз, задор мылкыдыныз. Ю. Байтерякова. Удмурт Элькунысь дышетон удысын национальной ужпумъёсты тодон-эскеронъя институтын ужась. УЛОН ГЕРДЪЁС Тон сярысь та, мусое Мон кылӥсько куарадэ, шӧдӥсько пӧсь шокамдэ, капчи но ӟырдам чиньыеныд йӧтскемдэ, ӵыжыт ымдурыныд чупамдэ. Йырме поромытэ ческыт, кудӟытӥсь одеколон зын. Мон шудо, ишкалски кадь дуннелэсь. Яратон, тӥни мар каре со адямиен. Ӧвӧл нокин но дорамы, кытысь ке каллен гинэ чузъяське ӝожмыт кырӟан. Но ӧвӧл, ӧвӧл со зэмзэ, со - уйвӧт. Синъёсыз мусо, каллен усьтыса валано ӵукна сярысь. Уг, чик уг поты мынам сайкаме, сазьтӥськеме. Нош луысалзы ке мынам бурдъёсы, лобысал пырак дорад. Вешасал чиль сьӧд йырсидэ, вольыт, батыр мугордэ. Син азям возьысал шунытэсь, куренесь синъёстэ... Тодӥськод на-а пеймыт горд роза кузьмамдэ. Мон соку туж шумпотӥ, соку ик, лэся, сюлэмам каръяськиз бадӟым, кужмо, чебер, зэмос яратон. Тани али но со сяськаед азям. Со мынам осконэ, байлыке, зарние, сюлэмы. Со сяська монэ валтэ азьлань, со сётэ мыным кужым улыны. Нош тодӥськод на меда со уйёсты? Куке инмын лэйка вал бадӟым толэзь. Со сэзь синмын учкиз асьме шоры. Со кенжытӥз асьме куспын тылӝу, нош асьмеос пумен сое аратӥм. Тау инмарлы но, тыныд но со ӝытъёс понна. Мон туж шудо. Светлана Яковлева. Пичи пурга ёрос, Вуж Монья школа. Удмурт Республикаысь Правительстволы Тӧро юнматон сярысь Удмурт Республикаысь Кун Кенешлэн Постановлениез Удмурт Республикаысь Кун Кенеш пуктэ: 1. Удмурт Республикаысь Правительстволы Тӧрое юнматоно Ганза Николай Алексеевичез. 2. Удмурт Республикаысь Правительстволэн Тӧроезлы Н. А. Ганзалы 1999 арын 10 маёзь Удмурт Республикаысь Кун Кенешлы ӵектонъёс сётоно Удмурт Республикаысь Правительствое но Правительстволэн Тӧроезлэсь воштӥсьёссэ но коньдон ужпумъёсъя министре юнматоно муртъёс сярысь. Удмурт Республикаысь Кун Кенешлэн Тӧроез А. А. Волков. Ижевск город, 1999 арын 22 апреле. � 5-ИИ. Улон быртыкъёс "Тау кариз" Школаын дышетскыкум, удмурт литератураез туж яратӥсько вал. 6-тӥ классын тодматски Иван Дядюковлэн "Пашка Педор" книгаеныз. Туж яраз со мыным, олокӧня пол кутскыса лыдӟи. Огпол ӝыт дорамы Миквор Олексан потӥз. Ма, со ӵем гинэ поталля вал: я гожтэт лыдӟытоз, я газет учкоз. Со вакыт мон корт гур дурын "Пашка Педорме" лыдӟыса пукисько вал. - Лыдӟы ай шара, мон но кылзо,- шуэ Олексан. Кема лыдӟисько ни, дырез чакласа ӧй улы. Корт гур вылын картошме но пыжыса быдтӥ. Книга бырытозь 3-4 бам гинэ кылиз на, соку Олексан ал вылаз чабкыса султӥз: - Бертоно. Та книгадэ корт гурад сэрпалты, пие. Ой, йыры кур луиз! Кызьы ымыз пыре озьы шуыны? - Азьтэм со Педоред. Пудо но уг ворды, кенер но рос-прос тупатэмез уг луы, суп-сап ужа, эшшо умой улэмез потэ. Ӧй вала мон соку бускельмес. Али "зэм верам" шуисько. Кузьым Сизьымдон арес тырмон нуналам Парасе бинет мыче. Мар кузьым меда, малпасько. Газетсэ сэрттӥ но сумка усиз. Огшоры клеёнкалэсь пельпумтӥ ошон калэн. - Ма, мар сыӵе сумка вурид, ӧжыт-а, мар-а костасько соос дорын? - Сумкаосмы трос, Педоре, но пельпумтӥ ошоноез ӧвӧл. Кин тодэ, оло, кураськыны потоно луод ай. Ярам, капчи шӧмыным номыр ӧй куарет, но ту-уж ӝож потӥз. В. МОШКИН. Завьял ёрос, Постол станция. Тулыс вуэ Крезьгурез Пантелей Кузнецовлэн Кылъёсыз Куӟебай Гердлэн Лымы шуна, шунды пиштэ, Нунал ялан кузьгес луэ. Бадьпу йылэ пучы потэ, Тулыс вуэ, тулыс вуэ! Гидын бӧксэ куӵо ыжпи, Кунян шунды шоры учке. "Вить! вить!" - шуса, дас вить ӵӧжпи Зарни бугор кадь питырске. Кырӟа шырчик, уӵы чирдэ, Шурдур бадьпу учке вуэ. Писпу ӵын пыр кадь вожектэ. Тулыс вуэ! Тулыс вуэ! А. А. Волков, 54 номеро округ. Кун Кенешлэн гажано депутатъёсыз, гажано ӧтем эшъёс! Ньыль ар талэсь азьвыл апреле, таӵе ик шундыё нуналэ, та залын люкаськизы нырысетӥзэ ӧтчам Кун Кенешлэн депутатъёсыз. Соку асьмеос бырйисьёслэсь куронъёссэс быдэстон понна вань кужмысьтымы тыршом шуыса малпамы. Туннэ ваньмы сыӵе ик малпанэн пачылмемын. Мон вань сюлмысьтым сӥзисько тӥлед, гажано эшъёс: озьы ужаны мылкыд тӥляд валтӥсь юрттӥсьты мед луоз, Удмуртилэн улонэзлы матэ луыны тыршон та залысь медаз кошкылы. Калык асьмелы оскиз властез но азьпалан ӟеч улонлы осконзэ. Асьмелэн быдэстоно ужпумъёсмы укыр трос: законъёсын инъет али гинэ кылдэ ай. Россиысь общество зэмос демократической мед луоз шуыса, федерациын кӧня ке сюрс, нош шаерамы кӧня ке сю законъёс кутоно на. Федеральной Собрание 600 пала закон юнматӥз, нош Удмурт Республикаын 136 закон кутэмын. Нырысетӥзэ ӧтчам Кун Кенешлэн ужамез сярысь отчёт тӥ киын вань ке но, солэн ужамезлы куд-ог йылпумъянъёс лэсьтэм потэ. Мон малпасько, туннэ тодын возёно, Удмуртилэн историяз Кун Кенеш нырысьсэ ужаз парламентской республика вакытэ. Нырысетӥосызлэн сюрессы котьку но шакырес луэ. Олокыӵе шуг- секытъёс но тупамтэос пумиськизы ке но, та сюресэз асьмеос вормим, асьмелэсь азьвыл ужасьёс - Вылӥ Кенеш - Удмурт Республикалэсь кунлыксэ ӝутыны инъет дасязы, солэсь Валтӥсь Законзэ кутӥзы. Кун Кенешысь депутатъёс тыршозы законъёсты кутон бордын, Конституцилэсь куронъёссэ быдэсъяны луонлыкъёс кылдытон понна. Та ужын асьмелэн нырысетӥез огъя вормонмы луиз Россия Федерациысь но Удмурт Республикаысь кун властьлэн ёзъёсыз куспын быдэсъяно удысъёсты но полномочиосты люкон сярысь огкылэз но экономикалэн пӧртэм удысъёсызлэсь азинскон сюрессэс юнматӥсь укмыс огкылэз кутон. Россия Федерациысь улосъёс пӧлын ми нырысетӥосыныз ӵош юнматӥм та выллем документъёсты. Малпасько, вылез Кун Кенеш огкыл бордын ужанзэ азинтыны кулэ, Удмурт Республикалэсь полномочиоссэ паськытатон понна. 30 мартэ Россия Федерацилэн Президентэз дорын республикаосысь кивалтӥсьёсын кенешын мон со сярысь вераськи, та ӵектонлы кенеш дурбасьтӥз. Республикаын законъёсъя инъет тырмыт ӧвӧл на ке но, туннэ ик ини со юрттэ республикалэсь Россилэн экономикаяз но социальной удысаз интызэ юнматыны. 4 ар ӵоже Удмурт Республика экономикаез но социальной удысэз азинтонъя 6 интылы вылэ тубиз но туннэ Россия Федерациысь 89 улос пӧлын басьтэ 26-тӥ инты экономикаез азинтонъя но 30-тӥ инты социальной удысэз азитонъя. Оскисько, вуоно 4 ар ӵоже асьмеос быгатомы эшшо но вылэгес ӝутскыны. Республикалэн вузъёсты кун сьӧры вузаны луонлыкъёсыз будӥзы. Туэ вузъёс мукет кунъёсы 500 миллион доллар тыр вузамын луозы, кылем арын та лыдпус 400 миллион доллар вал. Республика ожгар техника удысын кусып возёнъя басьтэ валтӥсь инты Россия Федерациысь улосъёс пӧлын. Кун Кенеш, республикалэн кивалтӥсьёсыз юрттэм улсын пыд йылазы ӝутско Ижевскысь электромеханической завод, Чепецкой механической завод, Воткинскысь машзавод, "Буммаш", "Аксион-холдинг", соос али 1994 арынлэсь ӟечгес ужало. Социальной удысэз утьыны быгатӥм. Республикаын лэсьтэмын улон юртъёс, школаос, больницаос, культурая юртъёс, сюресъёс, кыскемын газ. Жаляса верано, ваньзэ чакламзэ быдэстыны ӧйлась, солэн мугез - бюджетэз тырмытӥсь удысъёслэн ляб луэмзы, производство куашкамен валче, федеральной законъёслэн тырмыт луымтэзы, Россиын кунлыклэн лябӟемез. Кун властьлэн радлыкез сярысь законэз кутон герӟаськемын вал одӥг мылкыдын: луэмезъя чальгес быдэстоно экономикаез кризиысь поттон ужпумез. Нош со уз быдэсмы, властьлэн пыд йылаз юн сылӥсь радлыкез кылдытэмын ӧз луы ке. Ужпум шонер пуктэмын вал, сое возьмато Россия Федерациысь кун властьлэн вань сӥосыз. Нош сое быдэстонын янгышъёс вал, малы ке шуоно, федерациын та пумысен закон вал. Таин валче ми пумиськимы законъёслэн ог-огзылы тупамтэосын. Ваньмыз со вуттӥз тэргаськонъёсы, Кун Кенешын эчешонъёс пурӟизы. Тае азьланяз лыдэ басьтыны кулэ. Мон валай - законъёсты кылдытоно, котыр ласянь чакласькыса, котькуд вамышез эскерыса, шонер решение кутэмед потэ ке. Оскисько, туалаез Кун Кенеш эшшо но пайдаёгес ужалоз шуыса, малы ке шуоно, парламент выльдӥськиз, хозяйствоен кема кивалтӥсьёсты быръемен валче. Депутатъёс пӧлысь 37-ез кыкетӥзэ быръемын. Со возьматэ, республикаысь бырйисьёс нырысетӥзэ ӧтчам Кун Кенешлэсь ужамзэ умоен дунъяло шуыса. Та юрттоз туала депутатъёслы азьвыл люкам опытэз пайдаё кутыны. Кудзэ сюресэз бырйыны но кыӵе ужпумъёс бордын ужаны кулэ азьланяз Кун Кенеш, мон малпамъя. Асьмеос огазеяскьемын огъя малпанэн - адями сярысь сюлмаськись кунэз кылдытон, сыӵе кун чырмыт пыриськыны кулэ экономикаын кусыпъёсты радъянэ, калыклы но адямилы эркын азинскыны луонлыкъёс кылдытон понна кыл кутыны кулэ. Ма кароно, озьы мед луоз шуыса? Нырысь ик, Кун Кенеш кылдытыны кулэ ужаны быгатӥсь, валась Правительствоез, солы ужан понна законъёсын инъет, ӝутыны кулэ Россия Федерациысь Правительствоен но Федеральной Собраниен кусыпъёсызлэсь пайдалыксэс. Промышленностьын но гурт хозяйствоын политикаез чырмыт ортчытса гинэ быгатомы экономикаез секыт югдурысь поттыны. Та удысын нырысь ик быдэстоно ужпумъёс сярысь ке верано, азьло ик топливно- энергетической комплексэз азинтоно, малы ке шуоно, со бюджетлэсь тужгес бадӟым люкетсэ тырмытэ. Со герӟаськемын туала югдурен но. Кызьы? Быдэсъяно удысъёсты но полномочиосты люкон сярысь огкылъя Удмуртилы нырысетӥосыз пӧлын сётэмын право му вӧйлэсь кун люкетсэ республикалэн кулэяськонъёсызъя кутыны. Вераськон мынэ Удмурт Республикалэн асваньбураз сётэм 36 месторждение сярысь. Со сяна, ми тыршемъя Кун Дума подукциез люкон сярысь законъя кыкетӥзэ лыдӟем бере кутӥз му вӧй поттон интыосын переченез, отчы пыриз асьмелэн 12 местрожденимы но. Отысь му вӧез поттон герӟаськемын "Нефть- автомобиль" проектэн. Асьме азьын сылэ таӵе ужпум - республикаын улӥсьёслы пайда вайыны быгатӥсь программаослы коньдон висъяны луонлыкез пайдаё кутоно. Малпасько, кутоно "Удмурт Республикаын нефть но газ сярысь" Законэз, озьы ик закон пыр сётоно льготаос, улӥ дебетной скважинаосын нефть поттонэз но выль амалъёсын нефть поттонэз будэтон понна. Мукет сямен вераса, законъёсын юнматоно му вӧй кыскись комплексэз азьланяз азинтонъя луонлыкъёсты, со юрттоз республикалэсь бюджетсэ ӟечгес тырмытыны. Озьы ик умой луысал эскерыны Правительстволэсь лыдзэ будэтытэк Топливоя но энергетикая министерствоез кылдытон сярысь ужпумез. Огез валтӥсь ужпум - автомобиль но мотоцикл поттонэз азинтон. Ижевскысь автозаводэз улӟытыны эшъёсты-юрттӥсьёсты 5 ӵоже утчан пайдатэм ӧз луы, инвестор шедьтэмын. Выль классэн автомобильёсты поттонъя огъя предприятиез кылдытон, выльдэм "Орбитаез" уногес поттон юрттозы ужтэк кылемъёслэсь лыдзэс кулэстыны, республикаысь бюджетлэсь доходъя люкетсэ юнматыны но коньдонэз келяны калыкез улон-вылонын утёнъя программаосты быдэсъянэ. Улӟе ужбергатон. Тросэз ужбергатӥсьёс дасесь Россиысь экономикаын Удмуртилэсь данзэ юн конкуренциын утьыны. Шоро-куспо но пичи ужбергатон вузъёсъя но юрттэтъёсъя рынокез трослы тырмыто. Туннэ вузъёслэн но юрттэтъёслэн огъя лыдазы соослэн люкетсы 16 процент басьтэ. Озьыен, будэ республикалэн но интыослэн бюджетъёсазы соослэн налог тыремзы. Ужбергатонлы коньдонэн юрттэт кулэ, налог басьтыку льготаос тупатоно. Республикалэн агропромышленной удысаз нырысь ик музъемлэсь ӟечлыксэ будэтон, пудо сиён дасянэз азинтон, сиён-юон поттӥсь промышленностьысь предприятиосты юнматон но азинтон бордын тыршоно. Бюджетэз тырмытозы Балезиноысь но Алнашысь спиртзаводъёс, соосты лэсьтыса быдэстоно туэ но вуоно арын. Нимысьтыз саклык висъяно етӥн будэтонэз азинтонъя республиканской программаез быдэсъянлы. Етӥн будэтон республикалы котьку но пайда вайылӥз, соин ик сое выльысь улӟытоно. Республикаысь гурт хозяйство понна лизинговой фонд кыдытыны но солэсь ужзэ радъяны законъёс кыдытоно, фонд юрттоз гурт хозяйствоослы техниказэс выльдыны но выльзэ басьтыны. Социальной политикамылэн валтӥсь ужпумез - калыклы ӟечгес улыны луонлыкъёс кылдытон. Сое быдэстон понна, ӵектӥсько "Тужгес пичиесь социальной стандартъёс", "Улон-вылонын юрттонэз нимаз-нимаз сётон сярысь" законъёсты кылдытыны но, кутыны но республикаын социальной стандартъёсты быдэсъянэз кун ласянь юн чакланы. Шоро-куспо образованиез дунтэк басьтыны гарантиосты утёно, вылӥ быгатонлыкъёсын студентъёслы, культураын но искусствоын ужасьёслы кун ласянь юрттэт сётонэз но медицинской учреждениосын республикаысь вань гражданъёсты дунтэк эмъянэз утёно. Кун чакланы кулэ эмъюм дунъёсты, калык эмъюмез басьтыны мед быгатоз шуыса. Удмурт Республикаын газ кысконъя но сюрес лэсьтонъя программаос бордын ужанэз матысь дыре йылпумъяно но соосты юнматоно. Инвестиционной политикаын система луыны кулэ. Со понна кылдытоно нимысьтыз рад, кудӥз юрттоз инвестированиея объектъёсты конкурс пыр бырйыны, но та ужрадэн кивалтонъя структура радъяно. Федеральной ёзъёслы инвестиционной проектъёсъя ӵектонъёсмес ӝот-ӝотгес дасяно. Матысь дыре быдэстоно ужпум - калыклэсь коньдонзэ уже кутон, тужгес но улон юртъёсты пуктонын. Али уно сюрс семьяос, нырысь ик - егит семьяос, улон интызэс умоятыны сюлмасько. Котькуд депутат полномочиосыз быдэсъяськон вакытэ ас азяз ужпум пуктыны кулэ - Кун Кенешен кутэм "2005 арысь улон юрт" республиканской программаез быдэсъян бордын ужано. Нимазы корка пуктӥсьёслы сётӥсько кема дырлы ссудаос, бюджетысь талы висъяськись коньдонлэсь быдӟалаез арысь аре будэтыны кулэ. Химической ож тӥрлыкез быдтонъя программалы федеральной бюджетысь уногес коньдон мед висъяськоз шуыса тыршыны кулэ. Коньдон нырысь ик мыноз социальной удысысь объектъёсты - школаосты, больницаосты, инкуазез утёнъя объектъёсты, улон юртъёсты но коммуникациосты лэсьтонэ. Кунсьӧрысь инвесторъёсты та программаез быдэсъянэ кысконо, Италиен кусыпъёсты лыдэ басьтыса. Национальной политикалэн ужпумъёсызлы котьку но бадӟым саклык висъялляй, озьы луоз азьланяз но. Кемалась ик ӧвӧл республикаын национальной плитикалэн ужпумъёсыз докуентъёсын возьматэмын ӧй вал, Валтӥсь Законын - Конституциын сяна. Туннэ кутэмын ини Удмурт Республикаын кун национальной политикаезлэн концепциез, кутэмын но ужало "Калыкез дышетон сярысь", "Култура сярысь", "Егитъёсын ужан политика сярысь" республиканской законъёс, соос тырмыт гинэ лыдэ басьто калыкъёслэсь аспӧртэмлыкъёссэс. Соинтэк-а Удмуртиын ортчиз "Россия Федерацилэсь кун национальной политикаезлэсь концепцизэ быдэсъян амалъёс" всероссийской научно-практической конференция, солэн ужаз пыриськизы федеральной структураослэн валтӥсь кивалтӥсьёссы. Беларусь Республикаен пайда ваись кусыпъёс азинтэмын луозы. Сыӵе ик пайда вайыны быгатозы Украинаен, Казахстанэн, СНГ-ысь мукет кунъёсын вузкарон, экономикаын кусыпъёс. Россия Федерациысь улосъёсын но кусыпъёс азинскозы. Соос юрттозы ог-огедлы пайда ваись кооперациез азинтыны но улосъёсын поттэм вузъёсын вузкарыны. Москваен, мукет республикаосын но областьёсын кутэм огкылъёс, тупанкылъёс пайда ваё ини. Москваен 6 ар ужаса, страналэн кивалтӥсьёсыныз, правительстволэн структураосыныз, Федеральной Собраниысь фракциослэн но комитетъёслэн кивалтӥсьёсынызы кусыпъёс тупатэмын. Мыным со сётэ луонлык Россия Федерацилэсь кунлыксэ азинтонэ но ӟечомытонэ чырмыт пыриськыны, асьме Правительствоысь муртъёслы, предприятиослэн но организациослэн кивалтӥсьёссылы котыр ласянь юрттыны, федерациын ужпумъёсты быдэсъян понна. Котьма ке но , самой ӟечез кун машина но огназ уз быгаты туала ужпумъёсты сэрттыны-пертчыны. Кун ёзъёслы, власть котырысь политикъёслы кужмо эшъёс-юрттӥсьёс кулэ, сыӵе юрттӥсьёсын луыны быгатозы гражданской обществолэн институтъёсыз - общественной огазеяськонъёс, иворъёсты вӧлмытӥсь ёзъёс, калык аскивалтонлэн ёзъёсыз. Соос адямиосты обществолэн улоназ пыриськыны ӝуткало, соослэсь кужымзэс обществолэсь но нимаз муртлэсь ужпумъёссэс быдэсъян ӧре выжто. Та удысын нырысетӥ емышъёс но вань ини. Кылем арын ноябре кун властьлэн ёзъёсыз но калык огазеяськонъёс, иворъёсты вӧлмытӥсь ёзъёс куспын кутэмын "Азинскон понна ӵош ужан" огкыл, кылдытэмын Удмурт Республикалэн общественной палатаез - визь-кенеш сётӥсь общественно- государственной ёз. Гажано эшъёс! Аслэсьтыз валтӥсь ужпумзэ - промышленностьын ваньбур поттонэз ӝутон, гурт хозяйствоез азинтыны луонлыкъёс кылдытон, республикаын улӥсьёсты улон-вылонын утёнъя оскымон радлык кылдытон - Кун Кенеш быдэстыны быгатоз, отын нырысетӥ нуналысен ик ог-огдэ валан, гажан мылкыд, вань ужпумъёсты быдэстыны тыршон кузёяськизы ке. Мон вань депутатъёсын ӵош, огкылысь ужаны дась, ужмес быдэстон понна. Асьме азьын сылэ туж секыт, туж бадӟым ужпум. Сое быдэстон кулэ каре кужымез, тодон-валанъёсты, быгатонлыкъёсты, вань ӟеч сямъёсты огазеянэз. Асьмеды жалятэк тыршом, сыӵе бадӟым ужпумез быдэстом. Тау кылзэмды понна. Петр Скобелев Ӟег нянь кадь Очерк Владимир Ипполитович Камашев алигес пенсие потӥз. Ижевскын но быдэс республикаямы со тодмо вал, ДОСААФ-лэн председателезлэн воштӥсез луыса ужакуз. Та ужын со 25 арлэсь уногес тыршиз но подполковникозь будӥз, нош вань ужам стажез - 40 арлэсь трос. Пичи Пурга ёросысь Выль Монья гуртын вордскем но будэм пияш меӵ гурезё улон сюресъёсты ас кужмыныз гинэ вормыны но умой ортчыны быгатӥз.. 1. "Коть гольык ветлы, но пиез дышеты" Володялэн атаез, Глазовысь техникумез йылпумъяса, Выль Монья гуртаз колхозэн кивалтэ ни вылэм. Гуртын нырысьсэ басьтэм велосипед. Ожмаськыны келякузы, кузпалэзлы шуэм: "Коть гольык ветлы, коть сютэм ул, но Володяез дышеты". Та верам кылъёс Володялэн пеляз пыриллям пичи дырысеныз, - анаезлэн верамысьтыз, атайзэ со уг ни тоды, похоронной басьтэмзэс сяна. Атаезлэн фронтысь кызь гожтэтэз али ке но возиське на синпельлы. Огаз гожтэмын: Володяез дышетон понна, кузпалыз велосипедзэ но мед вузалоз. Гуртын ньыль классозь гинэ дышетскыны луоно. Куинь арзэ пияш ветлэ Улын Юрие, эшшо куинь арзэ - Учала (Ильинске), шор ёзо школаез йылпумъя 1957-тӥ арын, гужем ужа колхозын. Собере Ижевскысь технической училищее пыре. Огзэ тодэ со: дышетсконо. Слесарь-сборщик Володя машзаводын ужа. Огпол цехын бичаны ӧдъязы кунгож сьӧры келяны чаклам станокъёсты. Егит карыса, Володяез бригадае ӧз кутэ. "Мар-о, мон кыкетӥ сортъем адями шат?" - малпаз со. Нокинэн ӧз кенешы, мынӥз заводлэн дворецезлэн библиотекаяз но кутскиз тодон-валанзэ будэтыны. Но библиотекаын книгаос туж трос, тамында усто книгаосты солэн ноку но нокытысь адӟылэмез ӧй вал. Ӧз ӵыды со художественной книгаослэсь, нош техническойёсыз пумен вунӥзы. Со ик луиз дышетскыны азьланьтон сярысь малпанзэ чутрак воштэмез. Озьы со 1959-тӥ арын Удмурт пединститутысь студент луиз, дышетскиз литературая факультетын. Кынмисьтэм студент Вазен студентъёсты одно ик кужмысь демонстрацие потто вал. Дӥсьты ай гуртад бертыны - стипендитэк кельтозы. Соку кызьы дышетскод? Быдэс группаын кык пилэн гинэ атайзы улэп - Ванялэн но Славалэн. Мукетъёсыз юрттэт витён сярысь уг ик малпасько. 1959-тӥ аре сӥзьыл юн кынтӥз, пединститут сылӥз, демонстрацие ас черодзэ возьмаса, Иж ӵыпетлы матын. Транспарантъёсты возьыса, соос уката чонгыразы ни. - Ма, мар тӥ кынмиськоды? - паймытске Володя. Со - спортсмен, ӝог бызьылӥз, куасэн ветлӥз, эктыны мыло-кыдо, задор кырӟа. Озьы ортчытэ вань улонзэ - брюки улаз ноку но ӧз дӥсялля трико, уг басьялля проездной, кык-куинь иськем ке, городэтӥ пыдын ветлэ. Со ноку но ӧз висьылы, больницаын ӧз кылльы, таблеткаос ӧз юылы. Али вера ай егитъёслы, Буммаш улон микрорайонын азьло нюлэс вал шуыса, уз оске. Володя 1961-тӥ арын та сикез кораз каникулъёсыз дыръя гужем, улон коркаос пуктыны музъем сайкыса. Кӧня меда вагонъёсты ӝоктӥз студент Камашев чугун сюрес станциосын, стипендиез вӧзы коньдон ватсан вылысь? Дышетӥсь Диплом кисыын: со - удмурт но ӟуч кылъёслы но литератураослы дышетӥсь. Азьпалан уж - Дэри ёросысь Лудорвай шор ёзо школааын. Солы кивалтыны сёто 9 "б" классэз, кудзэ нокин но уг басьты - уг оско дышетӥсьёс ас кужымзылы. "Кылем-мылемъёс" гинэ, пе, отчы люкамын. Егит дышетӥсь озьы ӧз малпа. Кутскиз соосын волейболэн, футболэн шудыны, ӵош куасэн бызьлыны. Класс тупатскиз. Уно аръёс ортчыса но классысь дасо мында дышетскисьёс дышетӥсенызы кусып возизы, гожтэтъёс гожъязы, тачакез вузъёсты йылпумъязы. Кыкетӥ дышетскон араз ӧтизы КГБ-е. Озьы дышетӥсь люкиськоно луиз школаен. Тушмонэн ваче син Туала арын солэн верамез луэ ни отын ужамез сярысь. Тани кӧня ке учыръёс - маде Владимир Ипполитович ачиз: - Вавож районысь школаын дышетэ немец кылэз усто тодӥсь адями, вуэм асьме пала лымшор палась. Тодыны быгатӥ: та адями улэм Грузиысь гурезьёсы интыяськем Ткибули пичи городын, отын ӵош ужам немец пленнойёсын, шаермес вузанэ пыриськылэм. Тушмонлы пӧрмем адямиез шараяй но сётӥ юристъёс-следовательёс кие. -Та вакытгес ик Вавож ёросэ ик берытскем ожын ивортэк бырем адями. Ассэ адӟи, вераськи. Шуэ: йыруж лэсьтӥ вал, соин кема пегай но мукет нимтулын улӥ, табере анае доры берытски. Трос аръёс ортчемын бере, куд-ог гуртоосыз верало: со но кадь, ӧвӧл но кадь. Нош сузэръёсыз шуизы, агаймы ӧвӧл со, азьло улэм-вылэммы сярысь троссэ шонер вера ке но. Малпасько: та разведкаысь ке, вань документъёссэ сьӧраз нуллэ, луоз. Озьы ик вылэм. Таиз но - шпион. Шараяй но кырмим сое. - Вавож ёросысь нюлэскы бадӟым парашют лэзькем. Калык адӟем сое. "Газике" пуксьыса но пыӵал тӥрлык кутыса, кык часын уин потӥм ми тодыны, кыӵе тушмон лэзькем асьме музъем вылэ, нюлэсэз котыртӥм. Парашют ми азьын ни, бордаз бадӟым грузэз вань, тылыз ӝуа-кысэ. Кин малпалоз, со парашют адямитэм шуыса. Эскеримы - пуштоно ӧвӧл кадь, басьтӥм бӧрсямы. Собере ини тодмо луиз: ыстэм вылэм сое Дальней Востокысь асьмелэн военной разведка, асьме палъёслэсь саклыкмес чаклан понна. Но парашютэнызы разведчикъёс кусыпсэс ыштӥллям. Ми юрттӥмы сое шедьтыны. Милемлы лекциос лыдӟылӥз тодмо советской разведчик Александр,Абель но. Соин мон пумиськылӥ. Фотозэ кузьмаз, али но альбомам. ДОСААФ-ОСТО Подполковниклэн погонъёсыныз китель ӵыж-выль, ошиськыса улэ шкапаз. Сое Камашев дӥсялля праздникъёс дыръя яке сӥё-дано ӝытъёсы гинэ. Нош огшоры ужан нуналъёсы Владимир Ипполитовичез котьку адӟыны луэ вал костюмен, одно ик галстукен. Ортчем арлэн пумаз 25 ар тырмиз солэн ДОСААФ-е вуэмезлы. - Демократия дыръя ни, - вера В. И. Камашев, - вавожъёс пумит луыны ӧдъязы милям ужмылы, ДОСААФ (али ОСТО) номыр, пе, уг сёты. Ярысь администрацилэн кивалтӥсез но ёросысь ваньбурмес пазятэм. Егит пиоссы юыны но жугиськыса ветлыны кутскем бере гинэ валаллям ас янгышсэс. Пиосты армие дасянлы дуно инъет кулэ луэ. Тани курсантэз водителе дышетон али кунмылы усе 5 сюрс манет, дышетскись тыре 1,5 сюрссэ гинэ. Егит пиослэн автошколаосын дышетскемзы потэ. Тае валаса ӧз лябӟытэ, уката кужмоятӥзы дышетон ужзэс, кылсярысь, Якшур-Бодьяын, Пичи Пургаын но Алнашын. - Вертолёт омырын одӥг час мед лобалоз шуыса, 800 манет коньдон быдтоно. Ижысь авиацентрын лётчикъёсты, вертолётчикъёсты но парашютистъёсты-десантникъёсты армилы дасян данаклы дунтэм усе вал, нош табере отчы но коньдон висъямысь дугдӥзы. Туж умойтэм со, - сюлэмшугъяськыса вераське В. И. Камашев. Зэм но: малы пичи дырысенызы патриотъёс луыса будо немецъёс яке американецъёс? Отын ӧвӧл ук ДОСААФ-ёссы. Но отын пичиысен яратон пыӵато кун символикалы: гимнлы, кункышетлы. Вал ук асьмелэн но озьы: шуом, Кипрысь яке Сириысь асьме доры дышетскыны лыкто но паймо, кызьы, пе, тӥляд вордӥсько Олег Кошевой кадь геройёс? Нош соос ӧз кыдалэ шат ДОСААФ но комсомол пыр? Сюлмаськонъёс вань бере - улон азьланьске. Йыг-йыг, ӟег нянь кадь пиосмуртлэн Владимир Ипполитович Камашевлэн выжыосыз будо. Туспуктэм вылын: В. И. Камашев. ТУЛКЫМ Визьмо гожъясьлы - визьмо лыдӟись Туэ арлэн кутсконазгес удмурт кылбуръёслы но кылбурчиослы сӥзем тунсыко ӝытъёс ортчизы. Одӥгез радъямын вал филармонилэн юртаз дуннеысь нылкышноослэн огазеяськон нуналзы - 8-тӥ Март азьын. Отчы асьсэлэсь кылбуръёссэс лыдӟыны, кырӟанъёсынызы тодматыны ветлӥзы уно ёросъёсысь устолыко нылкышноос. Со пумиськонэз ортчытон ласянь тужгес сюлмаськизы Удмурт нылкышно кенеш но Татьяна Чернова. Ӝыт кемагес ке но кыстӥськиз, тырмымтэосыз ке но вал, умой мылкыд кельтӥз. Нылкышноослэсь гожъяськыны тыршонзэс юнматӥз. Кыкез ӝытъёс ортчизы Национальной библиотекалэн финн-угор литературая но шаерез тодонъя люкетаз (кивалтӥсез Н. П. Лимонова). Соосты радъязы озьы ик Удмурт нылкышно кенеш но библиотекаын ужасьёс, нимысьтыз ик Надежда Пчеловодова. Та пумиськонъёс малпамын "Кылбурет корка" выллем. Соосты ӟечгес ортчытъян вылысь, пӧртэм амалъёс утчаськом. Кыкез но та ужрад пайдатэм ӧз кыльы. Нырысяз, со вал 23-тӥ февраль-тулыспал азьын, пӧртэм аръёсы гожъясь пиосмурт кылбурчиос ваче ӝӧк сьӧрын пукизы. Вераськон вал соос куспын герӟетъёс но аспӧртэмлыкъёс сярысь. Кыкетӥез пумиськон сӥземын вал егит нылкышно гожъясьлы, кылем ар понна Ашальчи Оки нимо премилэн лауреатэзлы Лидия Нянькиналы. Кыӵе со ачиз? Кыӵе кылбуръёсыз? Ма сярысь гожъя? Маин со пӧртэмгес мукет нылкышно кылбурчиослэсь? Та пумиськон-тодматскон вал. Люкаськемъёс кылзӥзы кылбуръёсты, соосты ачиз Лидия Нянькина лыдӟиз; учкизы Удмурт телевидениын дасям пичияк киносюжетэз (сценариез В. Пантелеевалэн, режиссёрез Л. Вахитов). Сценарист ӟеч тодэ Л. Нянькиналэсь гожъямзэ, сямъёссэ, быгатонлыксэ. Сое чакласа ик режиссёр быръем суредъёс. Лымы. Пельскон. Сьӧд коӵыш. Луд. Отын огназ кылбурчи. Со лыдӟе кылбуръёссэ. Сое учкыса, аспӧртэмлыко тус кылдэ. Талант. Огназ нылкышно. Со... коӵыш, Киплингъя ке, ас сюрестӥз ветлӥсь, мукет авторъя ке, липет вылтӥ калгись... Коӵыш. Сьӧд. Йырсиез сынамын кымесаз. Йырсиез лӧсъяське тыбыраз, Пальпотон но мӧзмон - синъёсаз, Нефертитилэн тусыз - ымныраз. Шурдытэсь малпанъёс - йырвизьмаз. Улонлэн тулкымез - мугораз. Принцесса, Гетера, шуд адями, Удмурт ныл, кылбурчи... Сыӵеен мон сое адӟи Москваын литераторъёслэн юртазы, ульчаысен, "Инвожо" журналлэн редакцияз, библиотекаын. Кылбуръёсысьтыз, веросъёсысьтыз, повестьысьтыз, интервьюосысьтыз. Аспӧртэмлыко учкон, малпаськон но сое аспӧртэм амалъёсын веран. Петр Захаровлэн студиысьтыз нылъёс, сыӵе чебересь но коштанэсь, трос юанъёс дасяллям Лидия Нянькиналы. - Мыным туж яра "Мармелад шӧмо мылкыды" кылбур. Туж тунсыко, дыр, со мылкыд. Кытысь шедиз сыӵе веран? - Сое гожтэмелэсь азьло ог вить аръёс мон кылбуръёс ӧй гожъя, веросъёс бордын ужай. Нош одӥг пол шӧдӥсько: чуръёс лыктыын кутскизы. Нылъёсын ӝӧк сьӧрын пукиськом вал. Мынам чай но юэме ӧз луы ни. Пукси но гожтӥ та кылбурез: Мармелад шӧмо мылкыды, Тон кошкид одӥг пол пыраклы. Тон вылэм возьыттэм пӧечи, - Табере мон луи кылбурчи. Кылбурчилэн верамезъя, гожъямъёсыз мӧзмытэсьгес, куддыръя, калык пӧлын лыдӟон понна, кемагес ик быръёно луэ. Соин валче печатланы но троссэ соосты уг сётъя. Зэм ик, та ӝытлы дасяськон понна, мон удмурт журналъёсты берыкъяй но, ичизэ шедьтӥ. "Инвожо" журналын гинэ кык сузьет. Соосты лыдӟыса но та ӝытэ кылбурчиез кылзыса, тунсыкоесь гинэ потӥзы гожъямъёсыз. Мӧзмытэсь-а, ӧвӧл-а, но та верасьлэн зол мылкыдыз, со визьмо адями, шуг-секытъёслы сётскыса, куатаськыса улӥсьтэм. Шуккетлы быдэ со юнма но юнма, пальпотон мылкыдын учкыны кужым шедьтэ. Дорысьтым палэнскид нюпышак, Но малы мон потско паьышак? Ай вуод, вуод! Мусое мынам! Сюлэмдэ уз буйгаты нокыӵе мадам!" Тунсыкоесь пото витьымтэ шорысь пумиськись кылъёс, ӵошатонъёс, ваче пумит пуктылонъёс, калыклэсь мудрон кылъёссэ ас сяменыз кутон... Литература бордын ужасьёс тае ӟечгес эскерозы но валэктозы, нош мон вераны ӧдъясько, егит кылбурчи юнме шорысь Ашальчи Оки нимо премилэн лауреатэз ӧз луы, дыр, шуыса. Ашальчи Оки бордысь кутскиз, дыр, кылбуранэз, ӟуч нылкышно кылбурчиос, аслаз верамезъя, нырысь ик М. Цветаева, юрттӥзы, дыр, малпанъёссэ муромытыны, паськытатыны, эркын вӧлъяны. - Солэн кылбуръёсыз инме кыстӥсько, веросъёсыз но повестез - музъем вылын, - шуиз тодосчи Любовь Федорова. Со туж шонер, дыр, малы ке шуоно, кылбур лыдӟемзэ кылзоно, кылзоно... чик акылес ӧвӧл. Л. Нянькина соосты учкытэк вера - соиз но ушъямон на. Сое кылзыса, мынам тодам лыктӥз С. Наровчатовлэн Б. Ахмадулина сярысь гожтэмез: ужасьёс доры лыктыса, тыраз аудиториын поэтесса быдэс час ӵоже кылбуръёссэ кагазэ учкытэк, кылзӥсьёслы юанъёс сётыны дыр кельытэк лыдӟиз но лыдӟиз... Национальной библиотекаысь "Кылбурет коркан" суред мукет вал. Лыктэмын ог-огзылы тодмо адямиос. Котыр пуктэм пуконъёс кылдыто шуныт мылкыд. Лыдӟы, кылзы, кырӟа, юанъёс сётъя. Лидия Нянькиналэн туж визьмо нырысетӥ кылзӥсез вань. Со - Вера Пантелеева, Москваысь литинститутын ӵош дышетскем эшез, Удмурт университетысь дышетӥсь. Зэм, визьмо кылзӥсь визьмо гожъясез кулэ каре. Нош визьмо гожъясьлы кулэ визьмо лыдӟись. Милитина Гаврилова. Юн но сэзь мылкыдын Дас ньылетӥ арзэ тырше ини Завьялово ёросысь Октябрьский посёлокысь спортъя школаын дышетӥсь Ирина СЕДЫХ. Районысь администрацилэн физкультурая но спортъя ёзаз ужасьёслэн верамзыя, со тренер-педагоглэсь удыссэ ӟеч тодэ но умой быдэсъя. Ирина Николаевналэсь вань сюлэмзэ сётыса тыршемзэ синйылтытэк уг кельто мумы-бубыос но, нылпиос но. Пиналъёс Ирина Николаевна борды кыстӥсько, лякыт сюлмыз но ӟеч ужаны быгатэмез понна. Зэмос тренер но педагог, нылпиос азе вылӥ куронъёс пуктэм сяна, ачиз но спорт удысын адӟем карымон луэ бадӟымесь азинсконъёсыныз. Бӧрсьысь куинетӥ арзэ ини Седых гуртысь спортсменъёслэн тол шудонъёсазы полиатлонъя (куасэн бызьылон, гимнастика но ыбылӥськон) чемпион луиз. Со - куасэн бызьылонъя спортъя мастере кандидат. Милям корреспондентмылы Ирина Николаевна аслаз ужамез сярысь тазьы вераз: - Удмурт кун университетлы физвоспитаниея факультетэз йылпумъяме бере, тренер луыса ужай Ижевскысь 2 номеро ДЮСШ-ын. Со дыре ик ӧтизы спортъя "Урожай" огазеяськонлэн Октябрьский посёлокысь биатлонъя школаяз. Кельшиз мыным та школа, татчы ик интыяськи. Усто тренерен но та удыслы трос кужымзэ но дырзэ сётӥсь педагоген Александр Павлович Князевен ӵош пиосты но нылъёсты дышетыны кутским куасэн бызьылыны но ыбылӥськыны. Усто пӧрме вал кадь ужмы. Асьмелэн егит кизилиосмы но пиштыны ӧдъязы вал ини. Но... школаез ворсазы. "Урожай" огазеяськонлэсь ёззэ быдтӥзы. Ужтэк ӧй кыльы, малы ке шуоно, посёлокын усьтӥзы Завьяловоысь спортъя школалэсь ёззэ. Мар веранэз, та вакытэ ужаны капчи ӧвӧл. Уг тырмо спортинвентарь, куасъёс, катаос. Трос дыр быре соосты тупатъяны. Берло вить арзэ ужасько тренерен Владимир Кириллович Медведевен. Ужез яратӥсь, калыкен огкыл шедьтыны быгатӥсь адямиен каньыл ужаны. Пиналъёсты нюръяськонъёслы дасян сяна, милям пельпум выламы усе ӵошатсконъёсты радъян но ортчытон. Нырысьёсыз пӧлын шаерысь егитъёс куспын Нина Парамоновалэн призэз понна ӵошатскон ортчытӥм. Та нюръяськонэ пыриськизы Якшур-Бодьяысь, Шарканысь, Ижевскысь "Металлист" но "Локомотив" спортъя школаосысь командаос. Ас азямы ми пиналъёслэсь тазалыксэс юнматонъя ужпум пуктӥськом школаямы сизьымдон пала ветлӥсь нылъёс но пиос, оскисько, тазалыксы вылэ уг ӝожтӥсько. Соос пӧлысь ик утчаськом вуоно кулаковаосты но кобелевъёсты. Милям нылъёсмы Елена Вострокнутова, Елена Сыропятова, Наташа Емельянова, Лариса Тумыгина ёрослэн огазеям (сборной) командаяз пыро. Таӵе секыт вакытэ но милемлы азинскыны юрттэ Ижевскысь тылобурдо вордонъя фабрика. Пиналъёслэсь ваньмон дырзэс пайдаё ортчытон понна, коньдонэн но мукетыныз трос юртто фабрикалэн директорез Борис Иванович Миненков, солэн воштӥсез Владимир Иванович Сумликин, профкомлэн тӧроез Сергей Евгеньевич Фитилев, посёлокысь администрацилэн тӧроез Александр Ильич Конорюков. Соослэн сюлмаськеменызы, школаямы ӵем ортчыло пӧртэм шудонъёс но ӵошатсконъёс. Ми но, тренеръёс, ваньзэ лэсьтыны тыршиськом, пиналъёслэсь зэмос спортсменъёс мед пӧрмозы шуыса. Асме мон мукет удысын уг адӟиськы. Тол быриз, куасэн бызьылон дыр ортчиз. Пиналъёсмы пӧлын спортзалын ортчытӥськом спартакиадаос. Спартакиадалэн трос удысъёсыз: баскетбол, волейбол, ӝӧк выл теннис, дартс (пичи пукыӵен ыбылӥськон), пневматической винтовкаысь ыбылӥськон, бызьылон. Нылпиослы шаплы но сэзь луыны юртто та удысъёс. Котькуд гужем школаысьтымы пиналъёс асьсэлы коньдон потто: соос юртто тылобурдо фабрикалы пудо сиён дасян, тупатъян, тырон-ӝоктон но мукет ужъёсын. Уждунзы лыктэ пырак школае но нылпиослы сиськыны, экскурсиос ортчытъяны, сборъёсы ветлыны кутӥське. Таӵе пичияк уж шедьтыны соослы юрттэ Владимир Кириллович Медведев. Туэ Завьялвоын ортчоно гуртысь спортсменъёслэн гужем шудонъёсазы но Владимир Кириллович кужымзэ эскерыны чакла. Котькуд ар со спортлэн триатлон (велосипедэн ворттылон, уян, бызьылон) удысаз пыриське, пиналъёслы адӟем карымон интыосты утэ. Сӥземе потэ Владимир Кирилловичлы но пиналъёслы азьланяз бадӟымесь азинсконъёс но ӟеч тазалык! Николай Иванов. Завьял черкогурт. ТАЗАЛЫКЕЗ УТЁН Кин утёз висисез? Арысь аре секытгес луэ тазалыкез утён удыслы. Уг тырмо эмъюмъёс, медоборудование но мукетыз. Соку амалтэк юан кылдэ, кызьы ужа Удмуртиысь медицинской страхованиея фонд? Татчы угось котькуд ужась уждунысьтыз 3,6 процент тыре, страхователь луэ. Тани со нормая миым фондэ вуыны кулэ вал 186 миллион манет, нош пыртэмын 160,7 миллион гинэ. Туэ но югдур уг воштӥськы. Талэсь но урод мынэ ужасьтэмъёс понна уксё тырон. Сое туж яркыт возьмато лыдпусъёс. Кылем арын быдэсъясь (исполнительной) ёзъёс ужасьтэм муртъёслы 83 миллион манет висъяны кулэ вал, ваньзэ-ӧволзэ 4 миллион сётэмын. Адямилы быдэ со 102,6 манет усиз, нош Россиысь законъёсъя та лыдпус араз ичизэ 360 манет луыны кулэ. Озьыен, ужасьтэм калык кызьы улыны кулэ? Туэ но умоез уг адӟиськы. Ньыль-вить район гинэ взносъёс тыриз ни. Мукетъёсыз уг но малпасько, шӧдске. Азьло калыкез дунтэм эмъяськом вал. Но тазалыкез утён туж дуно удыс луэ. Тани Медицинской страхованиея фонд эмъяськонлы быдтэм уксё пӧлысь одӥг витьмоссэ (21 процентсэ гинэ) коньдон бича. Фонд миым медучреждениослы 392 сюрс висись понна гинэ коньдон висъяз. Со пӧлысь кык сюрслэсь уноез республикалэн палэназ эмъяськизы. Со понна эшшо тросгес уксё кошке. Та вакытэ фондэ 1,2 миллионлэсь уно адями пыре. Отчы шедьымтэ ужтэк кылемъёс но пиналъёс. Со сяна, шаерамы ужа на 8 страховой компания. Фонд соосын юнэсь кусыпъёс возе. Но котькуд адямилы тодыны кулэ, компаниын 200 сюрс ичи мурт ке лыдъяське, солэн умой ужамезлы оскыны уг луы. Быдэс дуннеын сыӵе курон пуктӥське. Г. ВАСИЛЬЕВ. ЖУРНАЛИСТЪЁСЫН ПУМИСЬКОНЪЁС Кин уг ужа, со уг сиы?.. Кылем вторнике, 27 апреле, Правительствоын журналистъёсын пумиськиз республикаысьтымы Калыкез уже интыянъя департаментлэн кивалтӥсез Юрий БРУСЯНСКИЙ. Со мадиз туала югдур но удыс азьын сылӥсь ужпумъёс сярысь. Шаермы ужтэк кылемъёсъя Россиын но Уралын ваньмызлэсь "азьпал" радын мынэ. Асьмелэн сыӵе адямиосмылэн лыдзы кык пол трос. Но берло дыре югдур кӧня ке умояз. Озьы ке но, республикаямы али ужасьтэм калык - 44 сюрс мурт. Со пӧлысь 93 процентэз пособие басьтэ. Туэ уж курыса вазиськем 3 сюрс адями пӧлысь ӝыныезлы уж сётэмын. Данакез соос кошкизы пичи ужбергатонэ но нимазы ужанэ. Кылем арын нырысетӥ кварталэ огдырлы уж сётэмын вал 1300 муртлы, нош туэ со дыре ик - 3000 адямилы. Соин ӵош ик йыло уж сётон интыос. Миым одӥг интые 23 адями куриське вал, туэ - 18. Кинэ бен ужасьтэмен лыдъяно? Шуом, адями уж курыса вазиськемез бере 10 нунал ортчыса, ужаны уг кутскы, соку со ужасьтэмен лыдъяське ни. Кылсярысь, миым нырысетӥ кварталэ дас нунал ӵоже 900 муртлы уж шедьтэмын, нош туэ - 1800-лы яке кык пол трос. Республикаямы тужгес но секыт югдур кылдэмын ужасьтэмъёслы пособие тыронэн. Предприятиос одӥг куиньмоссэ но взносъёссэс уг сёто на. Департаментлэн 122 миллион манет тыронъёсыз люкаськемын. Москва но ляб юрттэ. Кылем арын ваньзэ-ӧвӧлзэ дас процент гинэ висъяз. Туж ичи со. Соин ик республикаямы пособие сётӥське 1997-тӥ арын июль-август понна, нош Ижын - октябрь понна. Калыкез уже интыянъя фондэ тужгес бадӟымесь тыронъёссы Горьковской чугун сюреслэн Иж отделениезлэн - 6,7 миллион манет, "Ижевский механический завод" ГП-лэн - 2,6, "Чепецкий механический завод" АО-лэн - 2,6 "Ижмаш-автолэн" - 1,0, "Аксион" АООТ-лэн - 0,8 миллион манет, нош вань бюджетъёс фондлы ичизэ 6 миллион манет сётыны кулэ. Югдурез чакласа, Калыкез уже интыянъя фонд пӧртэм амалъёс утча. Ужасьтэмъёслы пособие вуттэ вузъёсын но услугаосын. Миым соос 29 миллион манет тыр висъямын вал, нош туэ - 8,2 миллион манет тыр. Туннэ озьы ик пусйыны кулэ тани мае. Данакез предприятиос но фирмаос - ужан интыоссэс департаментлэсь ватыса возё, ваньзэ-ӧвӧлзэ 40 процентсэ гинэ возьмато. Туж умойтэм со. Департаментэз сюлэмшугъяськытэ музонэз ужпум. Вань сыӵе адямиос, кудъёсыз ужало но, пособие но басьто (кык ужан книжка возе). Миым 750 мурт шараямын, куд-огезъя уголовной уж ӝутэмын. Та ужын правоосты утись органъёс но налог инспекциос. Соин ик департамент но шаерысьтымы кун налог инспекция ваче ужан вылысь куспазы тупанкыл гожтӥзы. Берло дыре уксё тырмымтэен департамент дугдӥз адямиослы дырызлэсь вазь пенсия тупатъяны. Малы ке шуоно, со калыкез уже интыянъя фонд чотын тыриське. Нош куд-огез ужасьтэмъёс али толэзяз 800-850 манет пособие басьто. Со самой бадӟымез. Департаментлэн кылем арын 81 миллион манет коньдонэз вал. Со пӧлысь 40 процентэз - улэп коньдон, 60 процентэз - вузъёс но услугаос. 20 миллион манет Россиысь вуиз на. Ӧжыт со. Мугез тодмо. Асьмелэн 5-6 процент ужасьтэмъёсмы, нош бускель Пермь областьын - 1,5, Оренбург областьын - 0,8 процент гинэ. Туэ ужасьёссэс тросэн куштыны чаклало Ижысь механической завод, 17-18 номеро Лэсьтӥськон управлениос, "Ижмаш" (пыӵал тӥрлык поттон ёзэз) но мукетъёсыз. Озьыен югдур уг тупатскы. Г. РОМАНОВ. ФЕРМАОСЫН Кӧня йӧл кыскиськом (26 апрельлы) Скаллы быдэ (кг) Ваньзэ кыскемын (ц) Келямын (ц) Районъёс 1999 1998 1999 1998 1999 1998 1. Ува 10,5 10,1 812 755 628 570 2. Вавож 9,9 9,8 510 516 408 429 3. Игра 9,8 9,8 373 374 325 270 4. Можга 9,2 10,0 854 910 648 671 5. Вотка 9,2 9,0 492 508 395 405 6. Як.-Бодья 8,3 8,6 189 201 137 147 7. Шаркан 8,3 9,7 514 584 379 418 8. Завьялово 8,3 8,1 595 615 515 459 9. Юкаменск 8,2 8,4 419 422 308 276 10. Грах 8,2 8,1 257 263 205 206 11. Пичи Пурга 7,8 8,3 522 557 424 458 12. Сарапул 7,7 8,9 561 720 395 568 13. Глазов 7,6 8,8 584 691 446 547 14. Дэбес 7,5 8,0 355 390 268 293 15. Алнаш 7,4 8,0 479 500 380 372 16. Каракулино 7,3 9,7 261 364 168 249 17. Кез 7,2 6,9 400 393 315 187 18. Красногорск 7,1 7,0 263 278 177 190 19. Балезино 6,9 8,0 612 698 457 511 20. Селта 6,9 7,3 259 257 191 173 21. Сюмси 6,9 6,8 112 128 92 115 22. Кизнер 6,8 6,8 282 287 219 212 23. Кияса 6,7 7,7 312 358 222 266 24. Камбарка 6,7 7,4 50 51 42 40 25. Яр 6,1 7,0 325 393 177 246 Республикая 8,0 8,5 10467 11288 7977 8336 Апрельлэн пумаз гужем кадь шуныт сылэ. Кизем турын, возьёс син шорын вожекто. Озьыен, пудоос ӝоген выль сиён вылэ потозы. Кыӵе югдур фермаосын туннэ? Кылем арын та вакытэн ӵошатыса, ваньмаз сямен йӧл кыскон кулэсмиз. Уваос но вавожъёс гинэ улӥе васькыны ӧз сётске. Красногорск палан но Играын мимала лыдпуссы вылын возисько на. Пудо сиён быремен, трослы йӧлзы синӥз Каракулино, Сарапул, Кияса, Яр но куд-ог мукет районъёсысь хозяйствоосын. Республикая ке верано, скаллы быдэ ӝыны литрлы ӧжытгес продукция басьтӥськом. Со шӧдӥське йӧл вузан вылын но. Молокозаводъёсы туэ шӧдскымон ӧжыт келямын. Но со понна дуныз ӝутскиз. Табере йӧллэсь дасям сиёнэз котькудӥз семья басьтыны уз вормы ни, уката но пенсионеръёс, ужтэк кылемъёс, бюджет чотын тыршисьёс. Ялан кулэсме скал уллёлэн лыдыз. Кылем арын 1 апрельлы кысконо скалъёсмы республикая 132 сюрс 615 йыр ке вал, туэ та лыдпус усиз 130 сюрс 556-ёзь. Озьыен, ыштэмын 2 сюрслэсь ятырез, мукет сямен вераса, быдэс район. Ӧжытаклы йылӥз пудозы Юкаменск, Балезино, Игра, Шаркан, Селта, Ува палъёсын. Соослэсь адӟем мед карозы вылэм яръёс, глазъёс, кезъёс... Туала дунъёсъя данакез хозяйствоос уго ӝутско но возисько йӧл но сӥль вылын. Л. МЕДВЕДЕВА. Ита пала - шутэтскыны Шарканысь Сосновкае нуись сюрес вылын сылэ кыз. Чеберез, лабрес луэмез понна, татын улӥсьёс сое Чебер кыз шуо. Ёросысь администрацилэн постановлениезъя, со инкуазьлэн памятникеныз ялэмын. Нош быдэс ёросын та выллем синпелетъёс дас кык. Шаркан музъемлэсь аспӧртэмлыко луэмзэ, узырлыкъёссэ вылӥ дунъязы Удмурт кун университетысь учёнойёс но. Соос малпамъя, татын тол но, гужем но шутэтскыны луонлыкъёс вань. Соин ик соос дэмлазы Шаркан ёросысь тэльёсты национальной паркен ялыны. Но талы пумит луизы Удмуртиысь Нюлэс хозяйствоя министерство но Шарканысь пӧйшурасьёслэн но чорыгасьёслэн обществозы. Малы? Тэльёсты национальной паркен ялоно ке, отын пу гинэ но кораны уг яра. Нош кызьы тодмо, Шаркан гуртъёсы газ кыскемын ӧвӧл ай. Таин валче 1995 арын дэмламын вал "Шаркан" парк кылдытыны, солы, национальной статус сётытэк. Таӵе паркын пу но кораны, пӧйшураны но, мукет ужъёсты но ортчытыны яра, инкуазьлы луэмезъя пичигес изъян вайыны тыршыса. "Шаркан" парк та ёрослэсь ог одӥг дас ньыльмос люкетсэ басьтэ, со интыяськемын Ита шурлэн паллян ярдураз. Кылем гужемзэ татын ужазы Удмурт кун университетысь учёнойёс но студентъёс, наука ласянь эскеронъёс ортчытӥзы. Та ужрадлы коньдон висъяз шаерысьтымы Инкуазез утёнъя комитет. О. ВАХИТОВА. Куашетозы пинал тэльёс Тэль - асьмелэн тужгес дуно узырлыкмы. Кыӵе гинэ писпу уг буды удмурт музъемамы!.. Солэн ог 45 процентэз тэлен шобырскемын. Тужгес ӵем кутӥсько уже лысо нюлэсъёс. Куаро писпуос пӧлысь тросгес будо кызьпу, пипу но беризь. Лысо писпуос дуногес бере, соослы нюлэс бордын ужасьёс тросгес саклык висъяло. Уката - город котырын. Нагорной лесничестволы Иж котырысь ог дас сюрс гектар нюлэс оскемын. Татысь ужен кызь арлэсь кема ини быгатыса кивалтэ Анатолий Алексеевич Тимофеев. Солэн верамезъя, татын котькуд аре мертто пужым, кыз, лыстэм пужым. Соослэн кидыссы вить арлы тырмымон дасямын. Азьло аръёсы кутскылӥзы кедрапуэз но будэтылыны. Нош али солэсь кидыссэ шедьтыны шуг. Та будослэн тысез но дуногес: малы ке но ваёно но луэ сое кыдёкысь шаеръёсысь. Ижын кидысэз мерттыны дасянъя питомник кылдытэмын. Столицамылэн котырысьтыз тэльёсын ӝутскылэ тылпу, писпуосты погыртыло сильтӧлъёс. Тросэз куасьмыло, урод ӵынэн ӝокаса но пересьмыса. Соин ик бушам интыосы котькуд аре ог дас гектар вылэ пинал писпу мерттоно луэ. Нош выль тэльёслы чаклам интыосын али пинал писпуос куашето ини. Нюлэс будэтӥсьёслэн ужзы толалтэ но тырме. Соос писпуосты нуналлы быдэ чаклало-утё йыртэмасьёслэсь, корало висись, пересьмем но кырыж-мерыж писпуосты, куто соосты кулэ ужъёсы. Апрельлэн пумаз но май толэзе тэльын ужъёс йыло - кутске писпу мерттон. Туэ но та понна азьло ик котьма дась. Озьыен, удмурт шаерамы нош но нош ӝужалозы, калыкмес шумпоттылыса, выль нюлэсъёс. Н. ВОЗИСОВ. Наталь "ЧИГЫМТЭ ЧИДАН" КОНКУРСЭ Кудпала бергаськод, улон питран Якшур-Бодья ёросысь Утор починкысь Загребинъёслэн вордӥськиз нылзы. Анай-атаез шумпотӥзы - семьязы йылӥз. Анаезлы юрттӥсь будоз. Нылзылы Маша ним понӥзы. Адямилы тодыны кылдымтэ, кыӵе кизили улын со вордӥськемын - шудо пиштоз-а со яке кысоз-а? Маша школае мынэм бере кутске война, вуэ куинь агай-вынъёсызлы похоронка. Собере дышетскон но дышетон аръёс, семья кылдытон - со ини Мария Сергеевна Шишкина. 1972 арын "Калыкез дышетон удысысь дано ужась" ним сёто. Ваньмыз умой вал кадь. Нош улон солы бӧрсьысь бӧрсе шуккетъёс дасям. х х х Мария Сергеевналэсь юртсэ бадӟым уд шуы, пулэсь пичи корка. Ӧвӧл отын дуно выжлёгетъёс, буёло телевизор... Но чылкытэз но ӝикытлыкез синме соку ик йӧтэ. Одӥг серегез аспӧртэмлыко музейлы укша. Отын Саша пиезлэн синпель кузьымъёсыз, пӧртэм куальымъёс, зарезь кизилиос, рамаын туспуктэмъёс, суредъёс, вӧзаз пиезлэн моряк дӥськутэз ошемын - Саша Балтийской флотын службазэ ортчытӥз, 1974 арын адӟиськыны бертылӥз, - веранзэ кутскиз Мария Сергеевна. - Соку вал ай папаез но, анае но. Нош 1975 арын январе кулӥз анае, мае - картэ Герасим Николаевич, со но дышетӥсь вал. Саша кыкетӥзэ отпуске бертӥз, папаез моргын дыръя. Пие трос гинэ кунгож сьӧръёстӥ уяз, пӧртэм кунъёсы вуылӥз. Нош 1991-тӥ арын Ленинградысь ивор вуиз, Саша быриз шуыса. Вань меда аслэсьтыд нылпидэ ватонлэсь бадӟым кайгу анай сюлэм понна. Тон сое вордӥськод, будэтӥськод, котькуд вамышсэ чакласькод. Тани со нырысьсэ "анай" шуиз, школае мынӥз, нырысьсэ выж миськиз, нырысьсэ клубе потӥз, нырысьсэ диплом басьтӥз, нырысьсэ уждун сётӥзы. Улытозяз кӧня вал со нырысьсэ шуонъёс? Но шӧдтэк шорысь герӟаськем нюжа чиге. Кысо сайкыт, егит синъёс, ыше-чалме тодмо куара. Визьмын тодӥськод, со уз берытскы, уз вазьы тыныд, кошкемын пыраклы. Но сюлэм уг оскы, со возьма тодмо тусбуйлэсь ӧсэтӥ пыремзэ, уйвӧтын ке но адӟиськемзэ. Секыт, ӝож, вӧсь ке но вал, Мария Сергеевна чидаз, юнматскыны тыршиз. Оло шайтан каргаське, оло инмар озьы гожтэ, кышомуртлэн пельпум вылаз нош ик куректон усе. Сыӵе ик секыт но быдӟым. Югыт дунне вылысь кошке Эмма нылыз, со Сашаен одӥг классын ик дышетскиз, бӧрсьысь аре вордскемын. - Вить нылпиос пӧлысь Эмма Сашаен одӥг кадьгес вал, шаплыесь, дыртӥсесь. Калыкын шуо, адями кулон азяз дыртэ. Ӧйтӧд, кылем сӥзьыл картофка октыку но ужысь нуназеяны шуыса бертэ но бакчае потэ вал. Возьма, шуисько, кӧс нуналэ Люсяос бертозы (Люся нылы Алнашын улэ), секыт йӧтэ ук тазьы, асьтэлэн но бичаса ӧвӧл быдтэмын, - тодаз вае кышномурт. - Нош со - отчы вуттӥськоно, тае лэсьтоно. Нылыз сярысь вераку, Мария Сергеевна ӧз чида, синъёсыз бусаськизы. Бурмисьтэм яраез мон но ӵабыштыны шедьтӥ, Эммапай сярысь юаме бере. Кыкнамы но чалмим. Пукиськом ми ӝӧк сьӧрын, мон - али улонэ вамыштӥсь егит ныл, нош со - улонэз адӟем, кезьытсэ но, пӧсьсэ но чидам кышномурт. Эммапай, озьы шуиськом вал ми Мария Сергеевналэсь нылзэ. Чебер, йӧно кышномурт гуртын фельдшер луыса ужаз. Тол-а, гужем-а, уй-а, йӧзор-а, кин юрттэт курылӥз, ваньмыз доры мынӥз. Алнаш ёросысь кузёбайёслэн врачсы интыын вал со. Ӝӧк вылэ быдэс улонэз интыяськем кадь. Татын ик М. С. Шишкинаез ушъяса гожъям газет материалъёс, татын ик нылпиосызлэн но школаысь дышетӥсьёслэн туспуктэмъёссы. Тани одӥгаз - Шишкинъёслэн быдэс семьязы, со ӵужектэм ини. Мукетаз - Эмма Ленинградын, таяз нылпиоссылэн асьсэлэн ини нылъёссы бадӟымесь. Татын ик гожтэт но вань. - Сое Эммалэн эшез лэзиз, - веранзэ азинтэ Мария Сергеевна, - соос Можгаын медучилищеын ӵош дышетскизы. Маня юам вылэм, нылы пумиськон ӝытазы мыноз-а, уз-а. Котькуд ар ӵош люкасько вал уго. Мон пумитаз гожтӥ: Эмма кулӥз, нокыӵе пумиськонъёс ноку уз луэ ни со понна. Больницаын кылльыкуз, Эмма уйвӧтаз Сашаез адӟем. Сьӧраз, пе, ӧте. Уллясько, пе, вазь ай мыным тон сьӧры мыныны шуисько, нош Саша ӧс дорын сылэ, уг кошкы. Собере операция вал, больницае нуэмзы бере ик ке лэсьтысалзы, оло, быгатысалзы нылме утьыны. Кыкетӥзэ операция Ижын лэсьтӥзы, ивортӥзы, сыӵе-сыӵе эмъюм но вир кулэ луоз шуыса. Витя, нылылэн картэз, Эмма сьӧры ик мынӥз вал. Ӵыжы-выжыосмылы вераз, вирзэс мед сётозы шуыса. Но со кулэ луымтэ ни, ӵуказеяз Эмма кулӥз. Мария Сергеевналэсь нылзэ ватыны быдэс гурт люкаськиз. Эммапаез берпуметӥ сюрес вылэ келяны сьӧр гуртъёсысь но, Алнашысь но лыктӥзы, коркасьтыз оркестр шудэм улсын поттӥзы. Кык нылъёсыз кылизы. Леналэн, бадӟымезлэн, аслаз семьяез ини. Нош Оля школаын дышетске ай. - Нянь пыжыны шуыса, нылылэн дораз потӥ. Олялы кызьы ныркыны валэктӥ вал, но со, мон мынытозь, формае тырем вылэм ини. Соку пыжем нянез чаен ӝӧк пуме пуктӥм, Эммалы шуыса. Вот ведь, шуисько, Эмма, пичи нылыд ачиз нянь пыже ини, адӟысалыд ке кыӵе, шумпотысалыд, - Мария Сергеевналэн куараез дыректэ. - Али нылылэн нылыз (соос Воткинскын уло) гожтэт гожтэм. Радио пыр кырӟан сётыны медо вылэм мыным. Кыӵезэ сётыны паймиллям. Шулдырзэ ке - мылкыд шулдыръяськоно кадь ӧвӧл, ӝожзэ ке - сотэк но весь бӧрдӥсько, нокыӵе крезьгурез кылэме уг луы. Мар бен шуод сыӵе дыръя? Лӥятон кылъёс гинэ уз буйгатэ, уз берыктэ солэсь ыштонъёссэ. Мар кыле на адямилы, чидан сяна. Мария Сергеевна ачиз но шуэ: - Улон шоры учкыса, кырӟанысь чуръёс тодам лыкто: "Из но, му но пилиське но, адямилы чидано". Синъёс - лулчеберлэн, пушулонлэн синучконэз, шуо. Озьы ик вань, дыр, Мария Сергеевналэн синъёсыз возьмато солэсь паймымон улон сюрессэ, куректонъёссэ но ыштонъёссэ, визьнодзэ но мылкыдзэ, чиданзэ. Галина САВИНА. Вылӥ дунъямын Кемалась ӧвӧл Ижевскысь пыӵал-тӥрлык поттӥсьёслы сётъямын Россия федерацилэн экономикая министерствоезлэн "Стрелковой оружилэн конструкторез М. Т. Калашников" ним данъян медальёсыз. Наградаос басьтэмъёс пӧлысь одӥгез механической заводысь инженер-конструктор Георгий Романов. Ижевскысь механической институтэз йылпумъямез бере, 158-тӥ отделын дас ар ӵоже ужатозяз со ассэ туж усто специалистэн возьматӥз. Солэн укмыс изобретениосыз трос пол вормисе потылӥз технической разработкаослы сӥзем конкурсъёсын. Георгий Александрович валтӥсь разработчик луэ Иж-60 пневматической винтовкаез кылдытонын. Та выль модель, азьло поттэм пневматической винтовкаос сярысь, воксё пӧртэм луэ: со пичи, ог интые ыбылэ, сое уже кутыны луэ боевой оружие чотэ но, ужатыны кык пол ичи кужым кутӥське. Та винтовкая гинэ пыӵал-тӥрлык кылдытӥсьлы куать патент сётэмын - изобретениосызъя, огез - винтовкаосты поттон вылысь. Выль модель поттӥське ни шаерысьтымы кыказ заводъёсын, сое шумпотыса басьто асьме дорын но, кунгож сьӧрын но. Конструктор басьтэм азинсконъёсыныз уг буйгатскы, ог интыяз уг сылы, кылдытӥз на Иж-61 пневматической винтовка, таиз автоматической, огдыре вить пуля понӥське. Тазьы ик ыбылӥське солэн МР-651К газобалонной пистолетэз, кулэ дыръяз таиз борды синучконэн приклад юнматӥське. Таӵе пистолетъёс кунгож сьӧрын но вузамын луозы, соосты поттон радъяське ни. П. НИКОЛАЕВ. Кызьы бырйим нырысетӥ мэрез Вить ар талэсь азьло, 1994-тӥ арын 10-тӥ апреле, Ижевск городлэн улоназ нырысетӥзэ интыын кивалтонъя органлы кузё но городысь Думае депутатъёсты быръён ортчиз. Табере со ужрад историе кылиз, шуыны луоз. Кызьы со ортчиз, мар отын тунсыкоез вал? Со сярысь материалъёс кылемын Удмурт Республикалэн туала историезлы сӥзем центрлэн архивъёсаз. "Гажано эшъёс! Быръён нуналэ эн янгышалэ! Ижевсклэсь кулэяськонъёссэ быдэстыны быгатоз тодӥсь-валась, кужмо но кылзэ уж вылын быдэсъясь адями. Соку гинэ городын порядок луоз. Малпасько, та ужез тужгес но умой быдэстоз Анатолий Иванович Салтыков..." - шуэмын одӥгаз ӧтён-ӝуткан листовкаын. Мэр луон понна соку нюръяськиз 6 мурт. Анатолий Салтыковез (со вакытэ городлэсь кузёзэ) мэрлы кандидатэ ӵектӥз "Интыосын кивалтонлы дурбасьтонъя центр" огазеяськон. Салтыков нюръяськонэ пыриськиз "Чылкыт сюлэмын, политикаын но экономикаын югдурез воштон понна!" ӧтён улсын. Программаяз тужгес валтӥсь инты басьтӥзы таӵе куронъёс: - интыосын кивалтон органъёсы огазеяно тодӥсь-валась, ас ужзэс ӟеч тодӥсь адямиосты; - интыысь бюджет удысын тужгес бадӟым саклык висъяно федеральной налогъёсын быгатыса ужанлы: - соосты ӝикыт кутон, военной продукцилы госзаказ утчан, городысь предприятиослэсь вуззэс интыян: - музъем понна тыронъёсты радъян; - городлэсь экономиказэ юнматонъя программазэ быдэстон; - ужбергатӥсьёслы налог тыронын льготаос сётон, кадръёсты дасян но мукет. "Ижевскысь котькудӥзлэн улӥсьлэн ӵуказе нуналлы осконэз мед кылдоз, котькуд семьялэн улон-вылонэз мед умоялоз,- вераз аслаз ӧтёназ мэре мукетыз кандидат Василий Шишкин, Октябрь ёросысь налогъёсъя инспекцилэн кивалтӥсез: ваньмы - удмуртъёс, ӟучъёс, бигеръёс, мукет калыкъёс, кыӵе инмарлы оскемзы шоры учкытэк, кыӵе партиын ужамзэс лыдэ басьтытэк - нылпиосмылы но соослэн пиналъёссылы мед кельтозы "чылкыт город". "Советской Удмуртия" огазеяськонысь кандидатлэн Шишкинлэн малпамезъя, вуоноез мэр но депутатъёс нырысь ик мед сюлмаськозы производствоез ӝутон сярысь, калыклы луонлык сётоно ужаны но дыраз уждун но пенсиос басьтыны. Быръён уже пыриськиз "Мон яратӥсько Ижевскез" огазеяськон но солэн кандидатэз, тодмо художник-авангардист Энвиль Касимов. "Со быгатоз но юрттоз Ижевскез ӟечгес карон сярысь!" Со - "тӥ пӧлын одӥг гинэ сыӵе адями, кудӥз герӟаськемын ӧвӧл политикаен но бюрократической аппаратэн", "со тӥ кадь яратэ Ижевсксэ!" - ивортылӥзы со понна дурбасьтӥсьёслэн листовкаоссы. "Ижевсклэн луонлыкъёсыз шедёзы отын улӥсьёслэсь улон-вылонзэс умоятон понна, дыр вуиз соосты уже кутыны",- вазиськиз мэре мукетыз кандидат Сергей Чикуров, "Чикуров и К" огазеяськонлэн кивалтӥсез. Со бырйисьёсызлы кыл сётӥз улон-вылонэз умоятыны, улон интыос лэсьтонэз ӝогомытыны, предприятиослы юрттыны, йыружъёсты кулэстыны, городлэн хозяйствояз ужъёсты умоятыны но мукет. 1994-тӥ арын мэр луон понна озьы ик нюръяськизы В. Ф. Николаев, Удмурт Республикаысь Верховной Советлэн правоосты утёнъя но йыружъёсын нюръяськонъя комиссилэн кивалтӥсез но А. Д. Денисов, Верховной Советлэн депутатэз, ЛДПР-лэн членэз, "Декарт" эштослэн директорез. 1994-тӥ арын 10-тӥ апреле быръёнэ пыриськизы 34,4 процентэз городын улӥсьёс. Кызьы тодмо, Ижевсклэн мэрез луиз Анатолий Салтыков. Со понна куаразэс сётӥзы 47,7 процентэз бырйисьёс. 31,6 процент куара люказ Чикуров, Шишкин понна дурбасьтӥзы 6,5 процентэз, Николаев понна - 3,7, Касимов понна - 1,7 но Денисов понна - 1,3 процентэз бырйисьёс. Е. УШАКОВА, Удмурт Республикалэн туала историезлы сӥзем центрын ужась. Наталь Наська Малпамтэ мадёс Школаын дышетскыкум, "Дась лу!" газетэ гожъяны кутскеме бере, нуналлы быдэ сямен Удмуртиысь, Башкириысь, Киров, Пермь улосъёсысь нылъёслэсь но пиослэсь гожтэтъёссэс басьяны ӧдъяй. Выль адресэн гожтэт ке вуэ, кенешисько вал артэ партаын пукись нылашен. Гожтом-а, ум-а таизлы? Кыӵе дышетске? Чебер, чылкыт гожъяське-а? Огпол гожтэт вуиз Селта ёросысь Настялэсь. Милям огъёзмы. Кибервылыз чылкыт, чебер. Гожтэтаз янгышъёсыз но уг пумиськыло. Ӵок ни, ӟуч кылын ке гожтэмын. Ачиз удмурт, пе. Но... милемлы ӧз кельшы нимыз (гуртамы визьмыз сураськем Насьта нимо кышномурт вал). Гожтоно ӧй кариськы. Арня ортчыса вуиз солэсь кыкетӥез гожтэт, куинетӥез... Гожтытэк амалы ӧй вал ни. Берло та нылмурт туж йӧно, ӟеч мылкыдо адями луиз. Кема аръёс ӵоже гожтэтъёс пыр кусып возим. Осконмы но вань вал: куке но одно ик пумиськом, ваче син учкыса вераськом. Наська, школаез йылпумъяса, Ижысь медучилищее дышетскыны пыриз. Ог аре, Нырысетӥ май демонстрация дыръя, улон сюресъёсмы ваче пумиськытӥзы ик милемды. Озьы ог- огенымы матынгес тодматскыны, сюлмысь вераськыны муг кылдӥз. Бӧрысь ни ӵош киное, концертъёсы трос пол ветлӥм. Службае кошкыса но кусыпмес герӟась нюжамес ӧм чигтэ. Бертон азям ни синвуо гожтэт вуиз. "Николай, монэн пумиськыны муг эн утча. Сьӧлыко адями мон. Ваньзэ тынэсьтыд ватыса вози вал. Яратэм пие эрекчаса кельтӥз монэ. Ӝоген анай карисько ни. Вождэ эн вай. Улонад ваньзэ умойзэ гинэ сӥзисько. Наськаед. 1974- тӥ ар, октябрь толэзь". Ӧжытак сюлэмы ӝожомиз ке но, туж ӧй куректы - кельшись нылъёс тырмыт гинэ вал. Егит дырме чик жалятэк кузпалъяськи мон. Бӧрысь ни куинь нылпилэн атайзы луи. Вунэмын ни вал кадь азьвыл чупам мукет нылъёс но, Наська но. Нош ог нуналэ солэсь чик возьмамтэ гожтэтсэ басьтӥ. Фотокарточказэ но келям. Нош адрессэ пусйымтэ. "Анастасия", грек кылысь берыктыса, выльысь улӟем, лулъяськем шуэмез, пе, валэктэ. Наськаен но озьы ик луиз кадь. Мынам улон сюрес вылам кыкетӥзэ "вордскиз" со. Али но кык арлы огпол праздниклы ӟечкылан открытка келя, адрессэ уг шарая. Конверт вылысь штемпелья тодмо: Ижын улэ. Утчано ке кариськысал, адресъёсын бюро пыр шедьтыны шуг ӧй луысал, дыр. Нош малы-о лыдӟем книгаез выльысь бугыръянэз на? Огез гинэ паймытэ но малпаськытэ: малы-о ассэ вунэтыны уг лэзьы Наська? Н. НИКИФОРОВ. Ненег турын-куар интые - жуг-жаг Тулыс вуэмен, шунась лымы улысь мае гинэ но уд адӟы, кӧня жуг-жагез отын. - Ваньмыз со адямилэн кибервылыз. Кытысь сомында кырсь? Ижевск чылкытэсь ульчаосыныз ноку но ӧз висъяськылы. Специалистъёслэн верамзыя, азьвыл но урамъёсты сузяны-утялтыны коньдон уг тырмы вал. Нош али со чик но ӧвӧл. Но кырсь урод утялтӥськымтэ бордысь гинэ уг поты. Тодӥськоды, дыр, лэчыт веранэз - чылкыт отын, кытын уг жагтӥсько. Али уноез городын улӥсь кер уг поты трамвайын, яке автобусын шундыберган тысь куаданы яке тамаклэсь коробказэ сюрес вылэ зӥртыны. Нош со дыре ик жуг-жаг интыян корзина син азьын ик сылэ. Ваньмыз потэ урод утялтӥськем но асьмелэн жагтӥськеммы бордысь. Сое возьмато Ижевскысь урамъёс. Мукетыз но сюлмаськытэ городэз - со жуг-жаге куян интыос. Ӝыныез свалкаос город пушкысь нимаз юртъёс но сад-бакчаос котырын. Татысь жуг-жагез поттон воксё но радъямын ӧвӧл. Куд-огез улӥсьёс асьсэос сюлмасько жуг-жагзэс быдтыны: маиз ӝуа - суто, кудӥз сисьме - музъеме сого, нош кылем-мылемъёссэ нуо жуг-жаг куян интые. Вань сыӵеос но, кудъёсыз чыры-пырыосын асьсэды уг сюлмаськыто, жуг-жагзэс яке сюрес дуре кымалто, яке матысь бусые. Сюлмаськытэ школа азбаръёсын кыллись жуг-жагъёс но. Школалэн дирекциез уг быгаты машинаез уже кутэмез понна дун тырыны, соин ик жуг-жаг уг поттӥськы. Нош кӧня меда жуг-жаг куян интыос городын? Одӥг районэз гинэ басьтыса, ог сю пала, дыр, пусйиз Ленин ёросысь санэпидстанцилэн валтӥсь врачез Ирина Спивак. Та кылдэм югдурен кызьы ке но нюръяськоно. Россия Федерациысь Инкуазез утёнъя министерстволэн инструкциезъя, чакламтэ интые жуг-жаг куям понна бадӟым штраф тырытӥське. Со чакламын элькунмылэн законъёсызъя но. Но со куронъёс асьме дорын туж урод быдэсъясько. Жуг-жагез чакламтэ интые куштӥсь адямиез китӥз кутыса но солэсь штраф басьтыны капчи ӧвӧл: я солэн коньдонэз ӧвӧл, я уждун уг сёто. Судэ вазиськы вал сыӵе дыръя, но одӥгез валамон - пайдаез уз луы, дырдэ гинэ юнме быдтод. Л. ПЕТРОВА. 02 ИВОРТЭ Апрель толэзе кык арня куспын республикаямы 1063 йыруж лэсьтэмын. Со пӧлысь милициын ужасьёс 842-сэ шараязы. 15 адями виён учыр пӧлысь 13-ез, 50 ваньбур талан пӧлысь 33-ез, 431 лушкаськон пӧлысь 244-ез шедьтэмын но 13 эриктэман учыр шараямын. Удмурт Республикаын Тулыслэсь но Ужлэсь праздниксэс ортчытон сярысь решение Ужась калыкез сӥлы карыса, Россия Федерациысь Конституцилэн 104-тӥ ёзэтэзъя но 84- тӥ ёзэтэзлэн "г" люкетэзъя, 1-тӥ-2-тӥ мае Удмурт Республикаысь городъёсын но ёросъёсын ортчытоно Тулысэз но Ужез данъясь кун ужрадъёсты. Праздникен валче дэмлано общественной огазеяськонъёслэн но ужась коллективъёслэн культураен герӟаськем, трос калыко ужрадъёсты ортчытон сярысь кичӧлтонзылы дурбасьтыны. Праздникез ортчытыку, ужысь ветеранъёсты ӟечкылано; иворъёсты вӧлмытӥсь ёзъёс пыр производствоысь ӟеч ужасьёсын тодматоно; гуртъёсты, городъёсты утялтонъя но праздниклы дасянъя ужрадъёсты орчытоно; шествиосты, демонстрациосты, митингъёсты но трос калыко мукет ужрадъёсты ортчытыку порядокез утёно. Калык огазеяськонъёслэн но Ижевскысь администрацилэн 1-тӥ-2-тӥ мае Удмурт Республикалэн шоркараз шутэтскон ужрадъёсты, азьвыл ик чаклам митингъёсты, Тупаса улонлы сӥзем но кемаласен ӟеч сямлы пӧрмем велосипедэн ӵошатсконъёсты, ярмаркаосты ортчытыны, выль шутэтскон интыосты усьтыны дэмланэнызы соглаш кариськоно. Тулысэз но Ужез данъясь ужрадъёсы коньдон висъяськоз ёросъёсысь но городъёсысь бюджетъёс, бюджетэ пырисьтэм уксё, нимаз адямиослэн но организациослэн ас мылкыд каремзыя уксё сётэмзы чотын. Удмурт Республикаысь Кун Кенеш. Удмурт Республикаысь Правительство. Удмурт Республикаысь Профсоюзъёслэн федерацизы. Ижевск городысь администрация. НАТАЛЬ Ултӥясь - лулэз эмъясь? Дас ар талэсь азьло ки улам врачъёслэн ужазы лэсьтэм "сьӧлыкъёс" сярысь статья шедиз вал. Валамон, вераськон мынӥз кунгож сьӧрысь эмъясьёс сярысь. Психотерапевт яке сексопатолог доразы лыктэм кышномуртэзасьсэлы дусым карылӥллям, ӵемысь - эриктэмаса. Котькудӥз дас кыкетӥез кышномурт со пыр ортчылэм. Адями аслэсьтыз сюлмаськонъёссэ вераны лыктэ лулпушез эмъясь (!) врач доры, нылпи музэн усьтэ солы сюлэмзэ, оске юрттэмезлы, нош со интые ултӥяме шеде, куддыр тыш но сие. Огез врач (кызьы берло тодмо луиз - садомазохист) дораз лыктэм кельышлы кышномуртэз, гипнозэн ас палаз берыктыса, валес вылэ вуттэм, тышкаса, керттылыса эриктэмам. Та статья выльысь тодам лыктӥз, огезлэн тодмоелэн психотерапевт доры ветлыны кутскемез бере. Со шуак воштӥськиз. Немец кышноосын ӵошатыса, лыз-вож ымнырын ӧз ветлы. Психотерапевтэн кусыпъёсыз сярысь нырысь ӝутскем мылкыдын вералляз. Усто массаж лэсьтыны, валаны быгатэменыз ушъяськылӥз. Мон, пе, солы котьмаме-котьмаме верасько, матысь эшелы но, кузпалэлы но ӧй верасал. Дыр ортчыса, солэсь нимзэ поттылэмысь дугдӥз. - Мар луиз? - юасько, куинь-а, ньыль-а толэзь ортчыса. - Тодӥськод-а, мон туннэ ӧжыт гинэ психушкае ӧй сюры. - Малы?! - Со монэ ӧжыт гинэ отчы ӧз келя. Ужез бере ӧтиз квартираяз. Нырысь ваньмыз умой вал кадь - винаен, емышен утялтӥз. Кӧня ке шулдыръяськеммы бере, оломар луиз - быдэс куалекъяны кутскиз, синъёсыз ӝуало, ачиз весь серекъя. Мынам, пе, "психен" кӧлэме потэ, ойдо учком, кыӵе тон "буйгатон дэремен" (смирительной рубашкаен) адӟиськод. Мон уг но тодӥськы, мар со сыӵе. Кускозям кот простыньёсын бинялтӥз, вырӟеме но уг лу ни. Мар монэн дауртӥз, уг вера, ачид валаськод, но со простыньёс кӧсаны ӧдъяса, мугорме кекатӥзы, лулы потӥське вал, мозмытскеме нокызьы уг луы. Кесяськыны кутски но, ымме пытса, чалмыт ул, психушкае келяло шуэ. Олокӧня час ортчыса буйгаз, монэ но мозмытӥз. - Малы бен дораз мынӥськод? - Ӧй ке мын, ачиз лыктоз, нош мынам картэ вань. - Соку кинлы ке чагиськы. - Чагиськид ке, соку ик "психушкае" келяло шуиз, мынам, пе, отын тодмоосы вань, соос тыныд сыӵе диагноз пуктозы - туннэ ик ужысьтыд лобӟытозы. - Ма табере весь озьы улод-а? - Уг. Кинэ ке мукетсэ синйылтоз ук куке но. Солы горд йырсиё, чебер, чиед нылъёс кельшо. - Но малы соин кусыпъёс тупатоно вал, тон врач доры мынӥд ук, туган утчаны ӧд. - Нырысьсэ дораз мыныкум, со мынэсьтым оломар сярысь но юалляськиз, мон ваньзэ верай. Тыныд, пе, мон сяна юрттыны нокин уз быгаты. Тӥни озьы... - Нош картэныд кусыпъёсыд тупатскизы-а, тон со пумысен мынӥд вал ук. - Уродгес луизы. Пӧртэм странаосысь эскерисьёслэн чакламзыя, 6 процентэз врачъёс-психотерапевтъёс висисьёсынызы лушкем кусып тупато. Кӧняез ке асьсэос лулпуш висёнэн курадӟо. Соос пӧлысь огез вал, дыр, тодмоелэн эмъясез. Сыӵеос доры мыныны муг медаз сюры. З. РЯБИНИНА. НАТАЛЬ Утчаськом песянай Милям ньыль нылпимы. Бадӟымез быземын ни, нош покчиезлы 1,5 арес. Картэным куспамы вераськыса малпамы нылпимес утялтӥсь кутыны - кузпалылэн анаез кулэмын ни, асламез покчи выны дорын улэ. Районамы но вазиськылӥмы ни, пересь удмурт нылкышно-утялтӥсь утчаса. Ӧм шедьтэ. Оло, кинлэн ке мылкыдыз вань, дорамы лыктыны, вазиське. Ми сое асьмелэн песяенымы лыдъясалмы, кулытозяз возьысалмы. Л. Аверкиева. Таплёгурт, Шаркан ёрос. Устоесь нылкышноослы - Ашальчи Оки нимо ёрос премия Куатетӥ арзэ ини 4-тӥ апреле, нырысетӥ удмурт нылкышно кылбурчилэн вордскем нуналаз, ёросысьтымы тужгес усто ужась, общественной улонэ пыриськись, ӟеч анай но кузпал луись нылкышноослы Ашальчи Оки нимо премия сётӥське. Тани туэ но ӧтемын вал "Прогресс" колхозысь скал кыскись Надежда Ивановна Барбакова, Юмьяшурысь медпунктлэн кивалтӥсез Ираида Николаевна Переплетова но Кузёбайысь удмурт кылъя но литературая дышетӥсь Лидия Ивановна Прокопьева. Премиез сётонъя комиссия трос усто нылкышноос пӧлысь бырйиз таоссэ. Н. И. Барбакова 17 ар ужа ни пудо вордон удысын, 7 ар ӵоже 3000 литрлэсь трос йӧл басьтэ ини сюдоно скалэзлэсь. Кылем арын со котькуд скалэзлэсь кыскиз 3603 килограмм йӧл. Надежда Ивановна кузпалыныз Владимир Александровичен будэто вить нылпи. Шубино гуртын но быдэс колхозын та семьяез гажало, умоен гинэ верало школаын дышетскись нылпиоссы сярысь но. 34 ар ӵоже йӧнатэ ини гурт калыкез И. Н. Переплетова. Можга медучилищеез 1964-тӥ арын йылпумъя но, сое Юмьяшуре ужаны лэзё, трудовой книжкаяз но солэн одӥг гинэ гожтэмез. Гуртын та нылкышнолы оско, гажало: шӧдо уго солэсь вань сюлэмзэ сётыса ужамзэ. Котьку дась со висисьёслы юрттыны. Пӧртэм ужъёсы но мылысь-кыдысь пыриське. Кузпалэныз Егор Петровичен куинь пи будэтӥзы. Со-а шумпотон ӧвӧл! Нош Л. И. Прокопьева 1975-т арысен ужа ини школаын, кӧня нылпиос тау каро солы умой тодонлыкъёс сётэмез понна. Ёросысь дышетӥсьёс но сое гажало: со понна ик бырйизы удмурт кылъя но литературая дышетӥсьёслэн ёрос секцизылы кивалтӥсе. Лидия Ивановна озьы ик киватэ "Удмурт кенешлэн" гуртысь ёзэныз, трос ужа вашкала удмурт сямъёсыз, йылолъёсыз утён но выльдон бордын. Лидия Ивановна - дышетӥсьлэн нылыз, кузпалыз но, Аркадий Николаевич, дышетӥсь. Кык нылъёссы - огез дышетӥсь, мукетыз журналист луыны дасяське, кыксы ик кылбуръёс но гожъяло. Николай пизы туэ школаез быдтэ ини. Тӥни таӵе йӧно но визьмо нылкышноосты ӟечкылаз, диплом но премия сёӥз ёрос администрацилэн тӧроез Виталий Иванович Городилов "Тулысэз пумитан" празднике люкаськем калык азьын. Собере лиуреатъёсыз ӧтизы кылбурчилэн музей-юртаз пӧсь чай юыны. Татын соосыз ӟечкыласа вераськиз Л. В. Лермонтова, нылкышноосын но семьяен ужанъя ёзлэн кивалтӥсез. Котькуд аре азьветлӥсь нылкышноосыз ӟечкыланы но шулдыртыны музее лыктэ Николай Елисеевич Потсников. Со вера, маин кыско крезьгурчилэсь сюлэмзэ Ашальчилэн гожтэм чуръёсыз. Н. М. Фадеева вакчияк вераз Л. Г. Векшинаен ӵош ужамзы сярысь. Та нуналэ тодматӥмы музейысь выль экспонатъёсын но. Лауреатъёсмы дуно кузьымъёсынызы ӵош туж шумпотыса но тау карыса басьтӥзы "Ашальчи" журналэз. Людмила Посадова, Алнаш ёросысь Ашальчи Оки нимо премилэн лауреатэз. П. И. ЧАЙКОВСКИЙЛЫ СӤЗЕМ 42-ТӤ КРЕЗЬГУРО ФЕСТИВАЛЬ Дуннеысь тужгес ӟечез Толон гинэ йылпумъяськиз быдӟым ӟуч крезьгурчилэн аспал эшмылэн Пётр Ильич Чайковскийлэн вордӥськемез дырысен 159 ар тырмонлы сӥзем ньыльдон кыкетӥез крезьгуро фестиваль. Сьӧрлось ветлэм куноос пӧлын вал А. В. Свешников нимо ӟуч академической хор но. Солэн валтӥсь дирижёрез но чеберлыкъя кивалтӥсез Игорь Раевский Удмурт кун филармоние люкаськылэм журналистъёслы, соослэн юанъёссылы валэктэм сяна, мадиз татысь адямиослэн толон, туннэ но ӵуказе нуналзы сярысь. - Туннэ кыӵе со, хорлэн ымнырыз? Солэн репертуарез... - Нырысетӥез сюлмаськонмы - ӟуч калык кырӟан. Зэм, хорысь куараос чылкак аспӧртэмесь. Соос кылдӥзы но юнмазы ай ачиз Александр Васильевич Свешников луло дыръя. Соин ик милемыз мукетъёсыныз нокызьы уд сура. Москваын азьвылтыны турттӥсьёс ӧвӧл: котькудӥзлэн удысэз - аслаз. Ужаськомы консерваторилэн юртаз но П. И. Чайковский нимо концерт залын. Удысамы кутыны тыршиськомы пӧртэм амалъёсты: кырӟаськом асьме коже но, кинэн ке валчеяськыса но. - Тӥледыз туннэ но тужгес зол дунъяло арлыдоос. Тросэз тодо на Александр Васильевичез Свешниковез. Кыӵеесь соос, та адямиен кельтэм куронъёс? - Хорамы куд-огез ужало ини ог куамын-куамын вить ар - соосты утьыны тыршиськом. Зэм, выльдӥськытэк но уг луы - дорамы лыкто трос егитъёс. Озьы ке но, вунэтыны уг яра одӥгзэ: Александр Васильевич Свешниковен кылдытэм крезьгур дуннеез утёно но утёно. - Туэ тросэзлы дуно калык кырӟан. Зэм, куд огез сое чылкак сӧризы ни. Кызьы тӥ ваче герӟаны быгатӥськоды вылӥ академи амалэн но ӟуч калык амалэн кырӟанэз? - Тӥ ваньды туж ӟеч тодӥськоды Надежда Бабкиналэсь ансамбльзэ. Али соослэн инмарзы - попса. Нош мыным тужгес ярало зэмос калык кырӟанъёс. Ми кырӟаськомы ӟуч куараосын. Сюлмаськиськомы ӟуч кырӟанлэсь небыт сюлэмзэ но зэмос чеберлыксэ утён сярысь. Зэм, мон, аслэсьтым выль амалъёсме кутыса, кырӟанэ кыӵе ке воштонъёс пыртыны турттӥсько ик. Но со чик но уг луы син пушкын огдырлы кылдылӥсь дыж выллем маке. - Мӧйыос кошко - соос интые лыкто егитъёс... - Соиз котьку озьы. Но пиналъёсты али кырӟаны туж ик уд косы ни. Куд-ог етӥз эшъёсмы, возьытсэс ыштыса, дас-дас кык адямиез люкало но, кунгож сьӧры потыса, асьме искусствомы вылэ пож ву киськало. Соос дуно уг сыло, ыштонъёссы но бадӟымесь ӧвӧл. Нош ньыльдон вить-куатьтон адямиез кун сьӧры уд потты. Зэм, куд-ог дыръя, пиньёстэ ваче куртчыса, огкылысь кариськоно луэ ни. Артистъёсмылэн уждунзы но туж пичи - ньыль сю, вить сю, куать сю манет. Таӵе векчи кисыен Москваын туж ик уд чида дыр - уж дуре гинэ лыктыны кулэ куинь сю манет. Озьы ке но егитъёсты утьыны тыршиськом - соос ми доры лыкто. Солы туж юрттэ, дыр, ас ужад вылӥ усточи луон но. - Тӥляд хорады профундо куараен кырӟась туж ӟечесь басъёсты вань... - Милям соос куинь кузя. Одӥгез - Россиысь дано артист. Ӟуч басъёс котьку дунъяськылӥзы. Нош кунгож сьӧрын, кылсярысь, Америкаын ӧвӧл асьмелэн выллем хоръёс. Но котькуд шор ёзо школаын бадӟым инты висъяло оркестрлы, хорлы, эктонлы. Котькуд школалэн аслаз оркестрез вань. Соин ик татысь кылзӥсьёс тон доры азьвыл ик дасяськыса лыкто ини. Нош асьмелэн кырӟанлы сӥзем урокъёс котьку синазькылесь вал. Али соос воксё ӧвӧл ни. - Куд ог хормейстеръёс али вералляло: шунды пуксён палан кылдӥз ини аспӧртэмлыко куара - со герӟаськемын Сяськаян но Барокко вакытэн. Кызьы тӥ валчеяны быгатӥськоды огъя европа но ӟуч сямъёсты? - Ваньмыз герӟаськемын крезьгурчилэн сояз яке таяз кунын вордӥськеменыз, солэн анай кылыныз. Валамон ни: Иоганн Бетховенлэсь гуръёссэ ми ноку но ум чузъяськытэлэ немецъёс кадь. Таосыз Игорьлэсь кырӟанъёссэ асьмелэнъёс сямен кырӟаны уз быгатэлэ. Немец куара сюбег но кӧс. Котькуд калыклэн крезьгурез аслаз. Асьмелэн хормы соослэнлэсь золгес кырӟа, оло. Но немецъёс, озьы ке но, шуозы: "Милямез устогес". - Кӧня кырӟась хорады? - Ваньмыз - сизьымдон кык. Иже лыктӥз куатьтонэз. Александр Васильевич Свешников куке но шуылӥз: - Бадӟым куараен кырӟаны котькудӥз быгатэ, шыпыт - одӥгез, кыкез. Хорын кесяськонтэм вылысь кырӟано пианиссимо куараен. - Таӵе аспӧртэмлыко дуннеын тӥ огнады яке..? - Кунгож сьӧры вуэммы бере, милесьтым паймыса юало: "Кызьы сыӵе усто пӧрмытӥськоды? Милям озьы уг луы". Таӵе вазиськонэз кылыса, туж данъяськиськомы. Одӥг япон газет ми сярысь шуиз: "Дуннеысь тужгес устоез хор". Таӵе вылӥ дунъет милемыз алэ котькыӵе янгышлэсь. Е. РОМАШОВА. А. В. Свешников нимо ӟуч академической хорлэн валтӥсь дирижёрез но чеберлыкъя кивалтӥсез Игорь Раевский. Тубуйзэ пуктӥз Владимир КАМАШЕВ. ЮГОСЛАВИЯ Черномырдинлэн Белградын вераськонъёсыз Россилэн Президентэзлэн Югославиын вожвылъяськонэз дугдытонъя юнматэм адямиез Виктор Черномырдин телефон пыр Борис Ельцинлы ивортӥз Слободан Милошевичен Белградын ортчем вераськонъёсыз сярысь. Белградысь "Сурчин" аэропортысен Виктор Черномырдин пусйиз, дипломатъёс "тупен- тупен вераськонын" одӥг кылэ вуизы шуыса. Соос эскеризы Россиен ӵектэм ужрадъёсты - пегӟем муртъёсты улон интыосазы кышкатэк берыктон, гуманитарной юрттэт сётон, Косовоын автономия кылдытонъя вераськонъёсты азьланьтон. Со сяна, чакламын Югославилэсь Косовоысь ожгар кужымъёссэ кулэстыны, НАТО-лэсь республикалэн кунгожъёсыз доры интыям частьёссэ поттэмен ӵош. Эскеремын калык куспо кужымъёслэн, озьы ик Россилэн но, Косовоын югдурез чакланэ пыриськыны мылкыд каремзы сярысь ужпум. Виктор Черномырдинлэн пусъемезъя, таиз пумысен вераськон тужгес но секытэз вал. ООН-лэн кужымъёсызлы пумит ӧвӧл Югославилэн Президентэз Слободан Милошевич Россилэн Президентэзлэн юнматэм муртэныз Виктор Черномырдинэн Белградын вераськонъёс нуыкуз, соглаш луиз Косовое НАТО-лэн вожвылъяськонэ пыриськымтэ кунъёсысьтыз кужымъёссэ пыртыны. Со сярысь "Новости" агентстволы телефон пыр ивортӥзы Россилэн Белградысь посольствояз ужасьёс. Соослэн верамзыя, СНГ-ысь кужымъёсты пыртон сярысь но юан-веран вал. Нош Милошевич пусйиз, ужрад ООН-лэн кивалтэмез улсын мед ортчоз шуыса. Посольствоын ужасьёс ивортӥзы: Белградысь кивалтӥсьёс асьсэлэсь малпанъёссэс мукет палагес берыктӥзы но Косовое ОБСЕ-лэсь пыӵал тӥрлыктэм адямиоссэ гинэ лэзён сярысь куронъёссылэсь куштӥськизы. Таин валче Виктор Черномырдинлэсь вераськонъёссэ пайдаё ортчемен лыдъяны луэ. Озьы ке но, дипломатъёс верамъя, Балканын югдур азинскоз озьы, кызьы НАТО Белградлэн выль ӵектонъёсыз шоры учкоз. НАТО оске вормонлы "Черномырдинлэн ӵектонъёсыз" НАТО-лэсь Югославиез вормыны осконзэ уз быдтэ. Озьы шуиз Великобританилэн премьер-министрез Тони Блэр Чикагоысь (США) Би-Би-Си-4 радиостанцилы. "Ми азьланьтыны кулэ та ожез, сербъёц куронъёсмес санэ басьтытозь, - валэктӥз Блэр. - Мон вераськи президентэн Ельцинэн, Черномырдин господинэн но кусыпъёс возём. Ми котьку но турттылӥмы югдурез кенешонъёс пыр тупатыны. Но соос НАТО-лэсь куронъёссэ лыдэ басьтыса ортчыны кулэ". Милошевичлэсь кунсьӧр кужымъёсты ООН-лэн кивалтэмез улсын Косовое пыртыны дась луэмзэ премьер-министр валэктӥз, татын тросэз валантэм луэ шуыса. "Милошевич малпанъёссэ воштэ, дыр. Но ми ум тодӥське ӵектонлэсь пуштроссэ", - ивортӥз Блэр. НАТО-лэн куронъёсыз тодмо, соос быдэстэмын луыны кулэ, пусйиз Британиысь премьер. Милошевич поттыны кулэ Косовоысь войскооссэ но пыӵал тӥрлыкен адямиоссэ, пегӟемъёслы лэзёно ас коркаосазы, гуртъёсазы, каръёсазы берытскыны. Соослэсь улонзэс утёзы калык куспо кужымъёс, шуиз премьер-министр. Телестудия пазьгемын Уин бомбаос пуштылэмен, Сербиысь радиолэн но телевиденилэн (РТС) юртсы куашказ. Белградлэн шораз интыяськем юртысь 19 сӧсыртэм мурт вуттэмын эмъяськон учреждениосы. Одӥгез соос пӧлысь кулӥз, ивортӥз Югославиысь "Танюг" кун агентство. Ӵукна РТС кӧня ке дырлы аслэсьтыз ужзэ азьланьтӥз мукет телестанциын. Азьланяз но вакчиесь ивортонъёс татысен сётъялоз. Мукет ивортонъёсъя, телевиденилэн юрт улаз 15-ысен 20-ёзь адями быремын. Но кун властьёс сыӵе лыдпусэз уг верало. Бомбаос пуштылыку, студиын ог сю адями вылэм. Ӟуч православной черклэн борддоръёсыз но ӧжыт ӧз куашкалэ. РТС-лэн юртэзлы матын интыяськемын со. Басьтэмын Интернет пыр. НАТАЛЬ Шудоез семья - тӥляд Семья пушкысь Шундыё куазь кадь Номыр ӧвӧл ни дуноез. Вань Тон но Мон! Янгышъёсты нош Тупатыны луоз каллен. Зэм но, вань-а семья понна яратонлэсь но ог-огдэ валанлэсь бадӟымгес дунъет? Ӧвӧл. Азьло тросэз семьяос лушкем кусыпъёссы тупамтэен люкисько шуо ке вал, туннэ психологъёс пусъё: семья ӵемгес куашка кузпалъёслэн куспазы кыл шедьтымтэенызы, ваньмон дырзэс ӟеч радъяны быгатымтэенызы: огез уй но нунал уксё сьӧры уиське, мукетыз гур азьысь уг кошкылы, нош пиналзы ульчатӥ кыстаське. Сыӵеослы адӟем кароно вылэм республикаысьтымы егит семьяослэн куатетӥ конкурсазы люкаськемъёслы. Конкурс ортчиз Ижевскын 24-25 апреле. Дасязы но ортчытӥзы сое Удмуртиысь Егитъёсын ужанъя кун комитет но республикаысьтымы "Егит семья" Центр 19 тужгес но усто егит семьяос пыриськизы "киноын шудон понна эскеронъёсы" (сыӵе сценарий малпам режиссёр): тодматӥзы асэнызы, возьматӥзы быгатонлыкъёссэс, палёмытӥзы чебер, шуныт кусыпъёсынызы. Улонысьтызы одӥг нуналзэс гинэ возьматӥзы соос учкисьёслы, но отын адӟиськиз ваньмыз: сюлмаськонъёссы но, шумпотонзы но. Кызьы тырмытоно ялан ӝегась пичи уждунэз: сакыр-а ӧжытгес басьтоно, пыдвылъёсты-а кышъяса ветлоно? Ӵужмуртлэн вордскем нуналыз но вуэ ни... Куспазы кенешыса, таӵе малпанэ вуиллям Алнашысь Плотников кузпалъёс: сур юэмысь дугдӥськом, тамак ӧжытгес кыскиськом, нош ӵужмуртмылы крезьгуро салам дасялом - сыӵе кырӟаса лэзём, Пудовазэ ик вунэтоз. Воткинскысь Ложкинъёслэн пичи нунызы вань. Соос учкисьёслы возьматӥзы, кызьы сое нылпи юртысь ваизы, нырысетӥ нуналзэ ортчытӥзы. Егит кузпалъёс ченгешо, кинлы нылпиез веттано, кинлы кутэт миськоно, но одӥг кылэ вуо ик: ваньзэ уртче лэсьто - эктыны но дырзы кыле на. Со понна, ваньмыз умой... Поздеевъёслэн семьяязы. Соос ноку но уг вунэто семьязылэсь вордскем нуналзэ - 16 августэз. Сергей кышноезлы чебер сяська кузьма, нош Ольга картэзлы самой ческыт сиён пӧра, Сергейзэ сюсьтылъёсын возьма. Кыкетӥ нуналаз семьяосын ужаз психолог. Гуртысь семьяосын нылпи утёнын сюлмаськонъёссы ӧжытгес кадь: ужлы но асьсэос дышо, анай-атайзылы но туж уг мытыло. Но озьы вылымтэ. Гуртысь кузпалъёслэн но куспазы валамтэос ӵем кылдо. Психолог вазиськисьёсын нимысьтыз ужаз, визь-кенеш сётӥз. Улонэз каньылгес карыны котькудӥз ачиз тыршиз ке, керетонъёс шергес луозы. Нокыӵе сюлмаськонэз но куректонэн лыдъяны кулэ ӧвӧл, ваньмыз шоры капчи, серем пыр учконо. Психолог семьяослы нимысьтыз ужъёс но дасям: кызьы потоно соиз яке таиз учырысь, ог-огдэ вӧсь карытэк. Конкурс кык нунал кыстӥськиз. Праздник, шуысал мон сое. Кык нунал ӵоже егит семьяос мылысь-кыдысь шутэтскизы дорзылэсь (со но куддыр акыльтэ ук), гуртпӧрлэсь, трос выль эшъёс шедьтӥзы, кужым люказы. - Табере ми нокыӵе секыт ужлэсь гужембыт ум жаде ни, - шуо Шаркан ёросысь Лопатинъёс. Жюрилэн дунъямезъя, шаерысьтымы тужгес но усто егит семья - Воткинскысь Ложкинъёс, Сюмсиысь Ивановъёс но Алнашысь Плотниковъёс. Но кызьы шуиз республикаысьтымы Егитъёсын ужанъя кун комитетлэн кивалтӥсез А. И. Гальцин, праздникез йылпумъяку: "Котькудӥзлэн семьяез ас понназ умой, соин ик данъяське соин, лыдъялэ асьтэды самой синмаськымон но шудо семьяен". З. РЯБИНИНА. ГУРТ УЛОН Одӥг нунал быдэс арез сюдэ Шаерамы нош ик вуиз тулыс - кутскизы ӟырдыт бусы ужъёс. Лудъёс вадьсын вазь ӵукнаысен кырӟало тюрагайёс, нош нянь будэтӥсьёс мускытэз утё: усыяло узьымез, трос аръем турынъёсты, сӥзьыл гырем муэз, пумен минерал сылалъёсын подкормка сёто но муосты гыро. Куазь ӝог шуныт луэмен, лымшор районъёсысь хозяйствоос валэс юос кизё. Механизаторъёс лудэ потыса ӧз вуэ, сеялкаос сьӧры тузон пурӟе ни. Кӧнялы ке ӝегад ке, ыштонъёс адӟод. Юнме шуиллямтэ ук: одӥг нунал быдэс арез сюдэ. Гурт хозяйствоос, эштосъёс, крестьян кооперативъёс туэ тулыс бусы ужъёслы умойгес дасяськизы. Кылем арен ӵошатыса, тросгес басьтӥзы минерал сылалъёс. Котькуд гектаре со 7,4 килограмм шедёз, миым 5,2 вал. Озьы ик дыраз басьтӥзы эстӥськон (ГСМ), воштос ёзъёс но мукетсэ. Гурт калыклы тулыс 560 сюрс гектар пала валэс юос кизёно, ортчем арын сярысь 7,3 сюрс гектарлы уногес. Туэ озьы ик паськытало етӥн, картофка но бакча сиён бусыос. Нянь будэтӥсьёслы умой юртто переработчикъёс, тужгес но Кезысь сырзавод. Со басьтэм пайдазэ хозяйствоослы сётэ тулыс бусы ужъёсты ортчытыны. Директорез Анатолий Максимов (колхозлэн азьвыл председателез) гурт хозяйствоосты ӟеч вала. Гурт удыслы туэ государство, зэмзэ но, шӧдскымон юрттэ. Тросгес коньдон висъяз тукъёс (минерал сылалъёс), таза кидыс, воштос ёзъёс басьтыны. Пумен йылэ машинно- технологической станциослэн (МТС) лыдзы. Вуо пудо сиён октон машинаос но тракторъёс. СБС-АГРО банк республикалы 54 миллион манет пала льготаен кредит висъяз. Со мыноз техникаез но выльдыны. Азинске пудо вордон. Миым 135-яз хозяйствоосын скаллы быдэ араз кык сюрс килограммлэсь ичи йӧл люкало ке вал, туэ 88-аз со лыдпусэз ортчизы. Озьы 47-езлы бюджет ссуда сётӥське, нош скаллы быдэ 2200 килограмм йӧл кыскись хозяйствоос юрттэт (дотация) басьто. Туэ ӝыныез пала хозяйствоос пайдаё ужаны кутскизы, озьы гурт калыклы уждун тырон данаклы умояз. Со юрттэ хозяйствоослы племенной ужзэс но пудо выжызэс умоятыны. Г. Романов. Жин-жин шуд, арган Алигес Ижын татысь Первомай ёрослэн кивалтӥсьёсыз но культура удысын тыршисьёс кичӧлтэмъя ортчиз "Шуд, арган" праздник - "Ижмаш" культура дворецлэн бадӟым залаз трос калык люкаськылӥз. Празднике лыктэмъёслы быгатэмзэс даслэсь трос коллективъёс но кызь пала нимаз шудӥсь арганчиос возьматӥзы. Нырысь ик ас быгатэмзэс возьматӥзы "Родник" но "Добры молодцы" ансамбльёс. Та коллективъёсты кылдытӥз но соос сярысь дырзэ, кужымзэ жалятэк сюлмаськиз культура удысысь дано ужась Мария Зайцева. Со ачиз но арганэн шаплы шудэ. Мария Григорьевна та праздникъёсты нырысьсэ радъяз ньыль ар талэсь азьло. Озьыен, 2000-тӥ арын вить аръем юбилей луоз. Мон понна бадӟым шумпотон луиз "Родник" коллективе арганчилэн Семён Пестовлэн - Зинаида Кудияровалэн, солэн пиезлэн, Сергейлэн, ветлыны кутскемзы. Соос азьло "Инвожо" ансамбльлэн концертъёсаз пыриськылӥзы. "Родниклэн" концертъёсаз нош удмурт шӧм пырто. Чебер гуръёсын но задор эктонъёсын сцена вылэ потазы 32-тӥ нылпи садысь, 53-тӥ, 57-тӥ, 59-тӥ, 74-тӥ школаосысь пиналъёс. Калык синмаськиз синтэмъёслэн "Ивушка" ансамбльзылы (кивалтӥсез - Удмурт Республикаысь культура удысысь дано ужась Николай Литвинов). Алигес соос Новосибирск городын быгатэмзэс возьматӥзы но Данъян грамота басьтӥзы. Котьку сямен, Первомай ёросысь поръёс калыкез паймытӥзы аспӧртэмлыко гуръёсынызы но задор эктонъёсынызы. Александр Медведевлэн группаысьтыз Валентина Самохинаез но Тамара Топороваез, "Кык юсьёс" удмурт кырӟанэз быдэстэмзы бере, калык сцена вылысь кема ӧз лэзь. Мӧйы удмурт арганчиез Аркадий Михайлович Петровез шаерамы тодӥсьтэмез ӧвӧл, дыр. Арлыдыз шоры учкытэк, со ӵем пыриськылэ пӧртэм концертъёсы, пота республикаысьтымы гуртъёсы. Шаерамы одӥгназ шудыны быгатэ "Русский строй" арганэн. Арганэзлы аслыз сямен ик сизьымдон ар пала ни. Вань калык Аркадий Михайловичлэн шудэмезлы синмаськиз. Александр Николаевич Спирин но - республикаысьтымы культура удысысь дано ужась, шаерысьтымы тужгес зол арганчи. Одӥг кылын - виртуоз. Со но сюлмысьтыз шудӥз пӧртэм удмурт гуръёсты. Ӟырдыт кичабонъёсын пумитамын вал Киров улосысь Уржум карысь "Семь пятниц" ансамбль (кивалтӥсез - Александр Зорин). Сцена вылын Ватка шур палась ӟучъёслэн гуръёссы жингыртӥзы. Удмурт гуръёсты быгатыса шудӥз удмуртлыкез сюлмысь утись Людмила Овчинникова. Вератэк уз луы "Ижмаш" культура дворецысь мӧйыослэн хорзы, арганчиос Юрий Лебедев, Александр Семёнов, балалайкаен шудӥсь Пётр Александров, огназ кырӟась Нина Копылова сярысь но. Концертэз йылпумъяз республикаысьтымы тужгес дано Пичи Пурга ёросысь Бобья-Уча гуртысь "Арганчи" ансамбль. Та коллективысь артистъёслы Россиысь но Удмуртиысь гинэ ӧвӧл, кунгож сьӧрысь трос странаосын улӥсьёс синмаськемын. Соослэн кивалтӥсьсы Екатерина Леонидовна Антонова, Россия Федерациысь культура удысысь дано ужась, ялан тырше арганчиослэсь быгатонлыксэс ӝутыны, шудыны дышетэ трос пиналъёсты но. Алигес Пичи Пурга ёросын вордскемъёслэн, ужамъёслэн ӝытазы Гужношур гуртысь усточиосты но вайылӥз. Соос туж чебер адскизы сцена вылын. Тӥни озьы - концертэз усьтӥзы кык синмаськымон ӟуч "Родник" но удмурт "Арганчи" ансамбльёс. Оскон кылдэ: таӵе праздникъёс уз быре, арганчиослэн быгатонлыксы будоз, калыкмес соос котьку шумпоттылозы. Н. ВОЗИСОВ. Владимир КАМАШЕВЛЭН туспуктэмъёсыз. БЫДӞЫМ ВОРМОНЛЫ - 54 АР Порваысь ӧрӟи Беларусь Республикалэн Президентэз Александр Лукашенко асьме доры вуылыкуз вераз Брест крепостез утисьёс сярысь. Соос пӧлын вал асьме палъёсын вордскем адямиос но - Якшур-Бодья ёросысь Кыква гуртысь Николай Широбоков, Дэбес ёросысь Урдумошур гуртысь Александр Осотов, Завьял ёросысь Мужвай станциысь Василий Щенин, Ижевскысь Федор Версальский но Шаркан ёросысь Гущино гуртысь Аркадий Чурин. Белоруссилэн самой шунды пуксён палысьтыз Брестэз утись солдатъёсмы- землякъёсмы одӥгез но улэп ӧвӧл ни. Соос сярысь "Они защищали Бресткую крепость" но "По следам подвига" книгаосаз гожъяз Виктор ПОЗДЕЕВ. Таиз веранмы Николай Широбоков сярысь. Брестской крепостез геройлыко утисьёс пӧлын вал удмурт пи Николай Антипович Широбоков но. Кин со, кытысь? Та сярысь номыр но тодмо ӧй вал. Кутскизы утчан ужъёс. Татын мыным юрттӥз партилэн Якшур-Бодья райкомитетаз ужась П. И. Вахрушев. Солэсь тодӥ, Николай Широбоков Якшур-Бодья районысь Порва гуртын вордӥськемын шуыса, солэн анаез Анна Федоровна улэ Улысь Пислеглудын. Анаеныз ӵош улэ нылыз Феодора Антиповна. Анна Федоровнаен вераськыса, ӟырдыт воинлэн улэмез - вылэмез сярысь тросэз тодмо луиз. 1941 арын 2 мае Николай Брестысь гожтэ: "Ӟечбуресь, атай но анай! Толон ми нырысетӥ Майлы сӥзем парадын вал. Ӝыны толэзь ӵоже маршировать карыны дышетским. Али шутэтскиськом. Улӥськом ми городлэсь палэнынгес, крепостьын. Со котыртэмын куамын метр ӝуждалаем музъем вырен но кык метр пасьталаем канаваен. Татын военнойёс гинэ уло. Крепость пыр шур кошке. Солэн пасьталаез ог витьтон метр пала. Праздник азьын милемлы выль дӥськут сётӥзы. Лымы толэзь талэсь азьло шуназ ни, но куазь зорыса улэ шундыё нуналъес ӧжыт. Пока ӟеч луэ. Улӥсько умой. " Анна Федоровна вераз, пиез, пе, Николай, школаын ассэ умой возиз, ӟеч дышетскиз Якшур-Бодьялан педтехникумын, нош собере - Удмурт институтын. Сое йылпумъямез сярысь Николай Широбоковлэн дипломез но вань. Тодон-валанэз 24 предметъя витьлы дунъямын. Анай тодаз вае. - Николай трос лыдӟиськиз. Солэн яратоно героез Павел Корчагин вал. Пие ӵем дыръя шуылӥз: "Анай, мон Павел Корчагин кадь луыны тыршо. Ожмаськыны мар кьлдӥз ке, берпум шокчонэ кысытозь жугисько. " Дышетскемысь бертылыкуз, Коля мыным вералляз кышкасьтэм челюскинъёс, геройлыко Валерий Чкалов сярысь. Николай Широбоковез туж ушъяса, шуныт маде гуртын ӵош будэм эшез В. М. Вахрушев. Али со Удмурт научно-исследовательской институтын ужась, филология наукаосъя кандидат. - Гурто калык Николаез туж яратӥз. Шулдыр мылкыдо, тунсыко вераськись вал шуыса тодазы вае сое. Мылысь-кыдысь кылзылӥм солэсь кизилиос, пӧртэм инкуазь югдур сярысь вераллямзэ. Николайлэн котьмалы киыз мынэ вал. Педтехникумын дышетскыкуз ик, радиоприёмник но фотоаппарат лэсьтӥз. Нош Удмурт институтысь комсомоллэн комитетэзлэн азьло секретарез, али журналист П. М. Яшин Николай Широбоков сярысь тазьы вера: - Со вал чырткем, котьмае тодыны-валаны тыршись, дышетскыны мыло-кыдо егит пи. Туж ӝог пыриз студентъёслэн огъя семьяязы но гажано, яратоно адями луиз. Дышетскиз витьлы гинэ, соин ик бадӟыматэм стипендия басьяз. Котьмаин тунсыкъяськылӥз. Трос пол сое бырйылӥзы комсомоллэн бюрояз. Якшур-Бодья районысь Ванькагуртысь Быдӟым Отечественной войнае ветлэм мурт, али география наукаосъя кандидат, Удмурт институтлэн географияя кафедраеныз кивалтӥсь С. И. Широбоков но Николай сярысь трос ӟечсэ мадиз. - Широбоков аспирантурае дышетскыны пырыны медэ вал. Оскыса верасько, солэсь туж визьмо учёной пӧрмысал. Со - котыр ласянь тодӥсь-валась, котьма быгатӥсь адями вал. 1940 арозь Николай Антипович Удмурт институтлэн естествознаниея кафедраяз ужаз. Быдӟым Отечественной войналэн нырысетӥ нуналъёсаз, Тамбовысь госпитальын дыръям, Николай Широбоковлэсь гожтэтсэ басьтӥ. Гожтэм Брестын секытэсь, виркисьтӥськись ожмаськонъёс сярысь. Трос нуналъёс ӵоже тушмонлэсь пумтэм атакаоссэ пазьгонын вылэм. Тросэз эшъёсы бырыны шедизы шуыса гожтэм. Со, пе, кӧня ке боецъёсын окружениысь потыны быгатӥ. Николай Антиповичлэн "Выль улон" колхозлэн председателезлы Максим Агафонович Загребинлы ыстэм гожтэтэз но кылем: - Ӟечбуресь, Максим Агафонович! Мынэсьтым салам вань семьядылы. Сюлмыным шӧдӥсько, 1941 арын 10 июле аслам мумы-атайёсылы ыстэм гожтэтме Тӥ лыдӟиды. Ивортӥсько, ожӝуэз нырысь ыбемысен ик адӟыны кылдӥз шуыса. Со ӵукна мон Брестын часовойын сыли. " Николай гожъям городэз утён ожъёсын вылэмез сярысь. Тушмонлэн кужымез, соослэн сярысь, трослы бадӟым вылэм, соин ик дас кык нунал ӵоже котькуд вамыш музъем понна секыт жугиськыса чигнано луиллям. Овруч городын выль обмундирование басьтӥллям но нош ик оборонае султӥллям. Со нуналъёсы Николай Широбоков но Брестын ик служить карыны кутскем 25 боецъёс десантной частьлэн пулемётчикъёсыз луиллям. Кекоран школа, педагогической техникум, Удмурт пединститут, отӥяз Брест крепостез утись герой, нош собере воздушно-десантной частьысь пулемётчик - таӵе вакчи но синмаськымон улон сюресэз 22 аресъем землякмылэн, Советской Родинамес тушмонъёслэсь утён понна 1942 арын октябре бырыны шедем Николай Широбоковлэн. В. ПОЗДЕЕВ. Чорыганы уг яра Удмурт Республикаысь Чорыгъёсты утёнъя кун инспекция ивортэ: шаерысьтымы вань шуръёсын, ӵыпетъёсын чорыгъёс мызь лэзён вакытэ 1-тӥ майысен 10-тӥ июнёзь чорыганы уг яра. Вань гражданъёс чорыганы быгато ярдурысен (чорыгъёс отын мызь уг ке лэзё) визнанэн гинэ, курикъёслэн огъя лыдзы куиньлэсь трос медаз луы. НАТАЛЬ Котьма сярысь Дуннеын улӥсьёслэн лыдзы нуналлы быдэ 270 сюрс адямилы йылэ (минутаз 200 адями) Котькытынлэсь вазь кузпалъясько Индиын. Воргоронъёс, шорлыдын вераса, 20 аресысен кышно ваё, нош нылъёслэн бызён дырзы - 14,5 арес. Ирландиын пиос 26,8 арескысен паръясько, нылъёс - 24,7 аресысен. ЪИВ дауре Англиын нырысьсэ бызён дэрем мерталлязы 26,7 аресын. Китайын воргоронъёслы кузпалъяськыны ӵекто 28 арес бере, нош 25 аресъем нылъёслы бызьыны дэмлало. Рекордъёсъя Гиннес книгаысь. Огкылысь ужано Кылем арын 17-тӥ августэ манетлэн дунтэмамез бере Россиысь 40 миллион пала адями пыдйылчие кылиз, ивортӥз Правительстволэн кенешаз вице-премьер Валентина Матвиенко. Вице-премьер пусйиз, кризис бере йылӥз ужтэк кылемъёслэн лыдзы. Дунъёслэн будэмзы тужгес но шӧдӥськиз пенсионеръёс вылын. Зэм но, али пенсилэн быдӟалаез улыны тырмымон коньдонлэн 60 процентэз мында но уг луы. Соин валче нырысь ик бюджет чотын улӥсьёслы пунэмъёссэс но уждунзэс дыраз тырыны кулэ. Та ужпумез быдэстон понна Россиысь Правительстволы но улосъёслы огкылысь ужано. Иворъёсъя национальной служба. "Титанике" сямен Удмурт театре ветлӥсьёс, оло, нырысьсэ адӟизы туала вакытлы тупатыса пуктэм спектаклез. Туала крезьгуръёс, эктонъёс, шудӥсьёслэн дӥсяськемзы-выремъёссы но туала манер. Спектакль бере но учкисъёс кошкыны ӧз дыртэ, ас мылкыд каремзыя шулдыръяськизы. Нырысетӥ этажын вал дискотека, кыкетӥяз - арган гуръёсъя тапыртӥзы. Эктонъёсын но шудонъёсын асьсэды усто возьматӥсьёслы синпель кузьымъёс сётэмын. Учкисьёслэсь мылкыдзэс тодон понна, кӧняезлы ке юанэн вазиськи. Тросэзлы кельшем. Задоргес, пе, луимы. Нош одӥг нылаш воксё паймытӥз: со, пе, ньыль пол ветлӥ ни, эшшо мынысал на. "Титаник" фильме но, пе, сомында ӧй ветлы вал, туж кельшиз ке но. А. КУЗНЕЦОВА, студентка. Наталь Тодматскон сэрег Аб. 277. Удмурт пияш, 21 арес, гороскопея Водолей, улӥсько гуртын. Тодматскысал 18-22 аресозь лякыт сямо удмурт нылашен. Возьмало фотографиен гожтэт. Аб. 278. Удмурт нылаш, 19/160, гороскопея Лев, дышетскеме средне-специальной, урод сямъёсы ӧвӧл. Тодмасткысал 19-24 аресъем удмурт пияшен. Вина юисез но пытсэт сьӧрын пукылэмез медаз вазиськы. Возьмало фотографиен гожтэт. Аб. 279. Чагыр синмо но суд йырсиё удмурт нылаш, 17/165/55, гороскопея Рак. Улӥсько но ужасько гуртын. Йылпумъяй шор ёзо школаез, урод сямъёсы ӧвӧл. Тодматскысал 18-24 аресъем пияшен, мед луысал лякыт сямо, ужаны яратӥсь, улон интылы но коньдонлы ёрмисьтэм. Винаен эшъяськисез но пытсэт сьӧрын пукылэмез медаз вазиськы. Возьмало фотографиен гожтэт. Аб. 280. Удмурт пияш, 27 арес, сьӧд йырсиё, гороскопея Овен, улӥсько но ужасько гуртын, тамак кыскисько, юонэн уг эшъяськиськы, лякыт сямо. Тодматскысал 23-26 аресъем удмурт нылашен. Аб. 281. Удмурт пияш, 25/160/60, гороскопея Весы, улӥсько но ужасько гуртын. Тодматскысал 28 аресозь нылмуртэн, пумит ӧвӧл одӥг нылпиезлы. Аб. 282. Удмурт нылаш, 19/154, кыкетӥ группаен инвалид, нокытын уг ужаськы, улӥсько гуртын, хозяйствое вань. Тодматскысал кыкетӥ группаен 20-23 аресъем пияшен, вина юисез но пытсэт сьӧрын пукылэмез медаз вазиськы. Улон интыме воштыны соглаш. Аб. 283. Удмурт нылкышно, 24/162, гороскопея Стрелец-Тигр. Улӥсько но ужасько гуртын, будо 2 но 4 аресъем пиосы, картэ кулэмын. Семья кылдытон понна тодматскысал ужез гажась, нылпиосме но монэ валаны быгатӥсь лякыт сямо, 24-30 аресъем пиосмуртэн. Возьмало фотографиен гожтэт. Аб. 284. Удмурт пиосмурт, 35 арес, улӥсько но ужасько Татарстанысь удмурт гуртын, кышнояськылымтэ, дышетскеме 10 класс. Лякыт сямо, ужез яратӥсь, улӥсько анаен, апаен ӵош, вордӥськом пудо-живот. Тодмасткысал ас ёзо нылкышноен, пумит ӧвӧл одӥг нылпиезлы. Аб. 285. Удмурт нылкышно, 43/160, чиед мугоро, будэ 12 аресъем нылы, вань квартирае, умой уже. Тодматскысал Иж ёросын улӥсь 50 аресозь пиосмуртэн, мед яратысал со инкуазез, спортэз, книгаосыз. Редакцилэсь: Лыдӟисьёсмылэсь ялонъёссэс тодматскон сэреге сётӥськомы, дун басьтытэк. Нимзэс, кытысь луэмзэс газет пыр ум шараяське, ваньмызлэн адресъёссы редакциын. Ялон сётӥсен тодматскыны мылкыд карисьёслы ивортӥськом: адресъёсты ми нокинлы ум келяське. Абонентлэсь номерзэ пусйыса, редакцие гожтэт ыстэ. Нош кинлы ке сӥзем гожтэттэс маркаен чылкыт конвертэ понэ - ыстомы кулэ адресъя. Возьматӥськом усто предприятиосты: Чепецкой механической завод 2. Тазьы кутскиз уран поттон Кызьы верам ни, Чепца механикая завод (ЧМЗ) кылдытэмын вал 1946-тӥ арын декабре уран поттонэз радъяны. Нош металлической уранлы кулэяськизы обороная промышленностьысь предприятиос но СССР-ысь ядерной энергетика. Выль производство усьтӥськиз 544 номеро патрон завод интые. Война вакытэ со дуриз "ЛИМ" патрон гильзаос но 1908-тӥ арын кылдытэм винтовкалы капчи пуляос. 1947-тӥ арын июне заводэз выльдонъя проект вуттэмын но ЧМЗ-лэсь промышленной корпусъёссэ лэсьтон кутскиз. Нырысь ик уже кутэмын опытной цех. 1948-тӥ арын ноябре уран концентратысь нырысьсэ басьтэмын 24 килограмм секталаен сьӧд уранлэсь слиток, нош 1949-тӥ арын феврале вуттэмын нырысетӥ 4 партия уран сердечникъёс -уран-графитэн ужась редукторъёслы эстӥськон. Со арын ик сӥзьыл ужаны кутскизы таӵе цехъёс: уран концентратэз химической амалэн переработкая, тетрафторид уран поттонъя, кылем-мылемъёсты переработкая, уранлэсь сьӧд слитокъёссэ дасянъя но уран сердечникъёсты поттонъя металлургической цех. Производстволы сырьё сётонъя лэсьтэмын но уже кутэмын цехъёс: 1951-тӥ арын 16-тӥ сентябре - уран рудаез узырмытонъя механической, 1951-тӥ арын 30-тӥ сентябре - рудаез переработать каронъя, 1952-тӥ арын 24-тӥ августэ - "начар" рудаез химической амалэн переработать каронъя. Заводын ялан выльдӥзы технологиез, ӝутскизы выль производственной корпусъёс, паськытаз пӧртэм пумо продукция поттон. 1952-тӥ арысен кутскизы уранысь котькыӵе тусо турлы изделиос лэсьтыны. 1956-тӥ арын ӧдъязы уранэз концентрировать каронъя сорбционной амалэз кутыны. 1964-тӥ арын мае пуктэмын но уже лэземын концентратэз но химико-металлургической производстволэсь кылем-мылемъёссэ переработать каронъя выль удыс. Собере уранлэсь двуокисьсэ басьтонъя ужаны кутскизы ӵыжатон пӧсь гуръёс. Соин ӵош нош ик выльдэмын технологиос. Производствоез азинтэмен валче, огдыре ужазы уранэз ӟечгес кутон, утчазы чурыт но кизер кылем-мылемъёсы металлэз келянтэм вылысь амалъёс. Соин ик заводысь физической лаборатория радиоактивной компонентъёсты чакланъя сюрес шедьтӥз. Озьы уж нуиськиз технологиез быдэсъянын, цехъёсын, промышленной площадкаын но завод котырысь омырын. Эскеремын вал растворъёсысь активированной эгыр пыр сорбционной амалэн уранэз тросгес басьтон амал. Витьтонэтӥ аръёслэн шоразы азотной кислота интые сернойзэ кутыны ӧдъязы. Озьы шуръёсы ӧжытгес кошкыны кутскизы нитратъёс, нош чурыт кылем- мылемъёсы радиез ичигес кылиз. Собере куяськемъёсты изваскаен пазяны ӧдъязы, нош ионообменной технология юрттӥз уранэз тросгес басьтыны но выльысь уже лэзьыны. Ваньмыз та бадӟымесь ужъёс выльдӥськемез кулэ каризы, но со туж пайдаё вал. Вуонояз материалын мадём кальций поттон сярысь. Иван ФАРУШЕВ, ЧМЗ-ысь бюролэн кивалтӥсез. Секытэз азьпалан ай Май толэзь манет понна секытлэсь но секыт луоз - кунсьӧрысь басьтэм пунэмъёсты берыктон дыр вуэ. Та сярысь гожтэ "Век" газет. Россиысь Правительстволэн МВФ-ен но мукет пунэм сётӥсьёсын кусыпъёсыз экономикалэн кызьы азинскемез кадь ик коньдонъя рынок вылын зол шӧдӥсько. Таин герӟаськемын манетлэн азьпал сюресэз, малпа газет. Озьы ке но, тазьы но манет дунтэмалоз. Но кунсьӧрысь пунэм сётӥсьёсын кенешонъёс умой ортчизы ке, манет каллен "куашкалоз". Нош ог-огдэ валан ӧз ке луы, манетлэн дуныз шуак ичиёмоз. Апрельлэн нырысетӥ ӝыныяз долларлэн дуныз 3 процентлы будӥз, манетлэн зэмос дунтэмамезлэсь со бадӟымгес. Центробанклэн валютая рынокез эскерыса возьыны турттонъёсыз пайда ваизы. Москваысь Валютая биржалэн нимысьтыз сессияз валютаез вузаны ӵектӥсьёс уногес вал, сое басьтыны мылкыд карисьёслэсь. Манет капчияк "шокчиз". Тулыс лемтэй сютэм Апреле лемтэй сайказ, "пӧйшураны" потӥз. Эпидемиологъёс пусйизы ни лемтэен куртчем адямиосты. Санэпидемнадзорлэн лабораторияз дас куинь адями вазиськиз ини лемтэез эскерыны курыса. Но тазалыкез утисьёслэн чакламзыя, куртчемъёслэн лыдзы тросгес. Пиналъёслы иммуноглобулин дунтэк сётӥське. Нош мӧйыослы лемтэез эскерон понна 50 манет тыроно луоз.Висён нуллӥсь лемтэй шараяськиз ке, соку ини 450 манет пала коньдон кулэ, иммуноглобулин басьтон понна. Быдэ вуымтэослы лемтэй черлы пумит прививка пуктозы дунтэк улон интызыя Ижевскысь 1, 2, 4 номеро больницаосын, автозаводлэн поликлиникаяз но 7 номеро медсанчастьын. Иворъёсъя национальной служба. КЕЗ ПАЛАН ТУННЭ Азьпалан гулейшуръёс Ёросысь скал кыскисьёс пӧлын азьпалан мыно гулейшуръёс. Соос али нуналы быдэ котькуд скалзылэсь 13,5 килограмм йӧл кыско. Малы уж уг шедьто? Кезын ужтэк кылемъёс пӧлын тужгес но уно егитъёс. Уж утчанъя профконсультантлэн С. Басовалэн эскеремезъя, самой трос ужтэмъёс профессиональной училищеосты йылпумъямъёс пӧлын: пӧрасьёс, пыжиськисьёс, кондитеръёс, вуриськисьёс, штукатур-маляръёс, трактористъёс. Ӵап таӵе ужасьёс али ялан кулэ луо, но егит специалитьёс уг быгато на асьсэлэсь быгатэмзэс возьматыны, ляб быдэсъяло ужан дисциплинаез. Озьы ик уж инты шуген шедьто автослесарьёс, электросварщикъёс, бухгалтеръёс, секретарьёс. Глазовысь технической колледжез, Дэбес педучилищеез йылпумямъёс. Уже кутӥсьёслы соос уг тупало ужан опытсы ӧвӧлэн. Пичи ужбергатӥсьёс Туэ соос кезъёс пӧлын ог сюрс мында луозы, ваньбур поттонын ужасьёсты лыдэ бастоно ке, со луэ 9 процентэз. Та мында предпринимательёс но фермеръёс ог миллион манет мында бюджетэ налог тырыны кулэ, фермеръёс ог 950 сюрс манетлы ваньбур поттозы - со луоз ог 350 тонна картофка, 30 тонна бакча сиёнъёс, 420 тонна турын. Кезысь сырзавод 100 тонналэсь ятыр йӧл вузалоз. Пудо вордӥсьёс 20 тонна силь, 200 тонна йӧл, сю кило ыж гон но тонна чечы. Сю коркаос ӝутскозы Ёросын туэ но паськыт радъяськоз нимаз улон коркаос ӝутон. Сюлэсь уно семьяос коркаоссэс выльдыны, выльёссэ пуктыны малпало. Эштосъёс соослы пӧртэм юрттэт сётозы, тужгес но транспортэн. Выль ӝутэм коркаоссылэн улон интызы луоз ог 8000 квадратной метр. Эштосъёсын ӝутэмын луозы парсь но скал гидъёс, складъёс, гаражъёс. Сюрес вуттоз Кулигае Азьланьтӥське Кулигае выль сюрес лэсьтон. Вуттыны кулэ 8,5 иськем асфальтэн шобыртэм сюресэз, шур вамен ӝутӥськоз бадӟым, юн, но чебер выж. Ужъёсты быдэстозы Кезысь сюрес лэсьтӥсьёс но 1395 номеро управление. Тупатъямын но выльдэмын луоз Дэбес - Кез сюрес. Экспортэн но выро ни 0,6 млн. доллар тыр поттэм продукцизэс кунгож сьӧры вузалозы туэ кезъёс. Пилем пулзэс келялозы Италие но Израиле, казеинзэс - Францие. Экономистъёслэн чакламзыя, та вузкарон районлы бадӟым пайда сётыны кулэ. П. СКОБЕЛЕВ. Николай Никифоров Лушкем кенеш Юмореска "Эротика" но "секс" кылъёслэсь пуштроссэс йырсиям гӧр усем бере гинэ валатски. Ма, Окыленым кызь ар ӵоже улытозямы, ваче син пуксьыса та сярысь огпол но ӧм вераськылэ. Инмаред мед утёз: арлыдоос, нылпиос ке кылӥзы, ымныр пыжон ук! Коть ымнырад сурон кертты соку. Нош туннэ чиданэ чигтӥз. Пирсэкъясь мылкыдам, телеэкран пыр, ӝуась эгыр куштыны йӧндыризы. Дырын-дырын борддорысь час шоры учкылӥсько. Ӝоген Окыле фермаысь берытскыны кулэ ни. Мынам но ваньмыз дась: мунчо эстэмын, сиён-юон дасямын. Сюлмысь вераськыны но люкетӥсьёс уз луэ: пимы - службаын, нылмы Иж карын дышетсконзэ азинтэ. Кухняе ветлыса огез бӧрсьы мукетсэ ог дасо ыль курег пуз юи, ог кружка йӧлвылэз тяпалтӥ на. Кылэме вань: та сиёнъёс, пе, пиосмурт кужымез будэто, лычсузён вакытэ кужмогес каро. Мунчоысь потэм Окыле муспотымон адске. Азьвыл ноку но таӵе сӥсъяса шораз ӧй учкылы вал. Бам чокчоросаз "шушыос пуксемын", синъёсыз интые кык кизилиос ӝуатскемын. Буртчин пуш дэремез пыр, лызалэс чильтэр ноны пусйыосыз синмез гочато. Фермаын тырше ке но, кук-макесъёсыз сюсьлэсь кисьтэмын кожалод. Кӧлан комнатае пырыса, Окыле воксё адбыраз. Синъёсыз ик кымесаз кӧчизы кадь. Ма вазьыны ёрмеменыз, ярдуре поттэм чорыг музэн ымзэ усья ке но, кыл вераны уг йӧндыры. Бакомод но шол! Мон но нинлэсь керттэм лулпыжет ӧвӧл. Ваньзэ книгаосысь лыдӟемъям, киноысь адӟемъям лэсьтӥ. Небыт валес но аспӧртэмлыко дасямын: миндэр пуйыос вылэ капрон чильтэр вали, тузӥ шобыртэт. Ӝӧк вылын сюсьтыл ӝуатэмын, вазаын - льӧльмыт тюльпанъёс, вӧзаз шампань вина. (Таӵе дыре кумышкаен шат дарманьтод? Вылаз ик, туннэ ӝыны ар ӝегатэм уждунмес сётъязы на). - Ма-а, Митрей, кыӵе ке юон дыр, оло? - бакомемез ортче ни, лэся, Окыльлэн. - Вордӥськем нуналъёсмы но ӧвӧл кадь. - Э-э, усыкмем куака,- дасям чебер кылъёсы тӧлӟыны вутскиллям.- Ку-о мон тынад вордскем нуналад таӵе валес, ӝӧк выл дасялляй? А-а? - Улонам нырысьсэ адӟисько. Мар-о луиз тонэн? Уд-а висиськы? Яке, дунне бырон матэктэмез кылӥд? - Вот, паскуда! - янгышен лобӟиз яратоно кылы.- Котьку маке-маке шек утчаны тыршиськод. - Уг валаськы, мае пумитаны дасяськид? Азвесь сюанмы но кыдёкын на. - Лушкем яратон сярысь вераськеме-кенешеме потэ. - Мар-р? - Бадьпу куар! Валад-а, мунчо кузё! Вожпотэмен ог стакан шампань винаез лэзи но гулькак юи. Ымдуръёсы ик кырыжмизы: "Ма, малы басьтӥ та сюкасез? Эсьма, курытсэ басьтоно вылэм". Окыль сётэм шампань винаме ушъяса-ушъяса юиз. Шорам учкыса, валантэм пальпотӥз но валес вылэ ланьыраз. Валатски: ӝеганэз ӧвӧл, лушкем кенешез усьтоно. - Окыль, асьмелы ог нылпи инъяно на вал.Туэ пӧсьтолэзе мед вордскоз вылэм... - Шузимид-а, мар-а? Ньыльдон арес ни уго асьмелы, нылпиосмы быдэ вуэмын. - Соос бурдъяськыса лобӟемын ни. Асьсэ коже мед улозы. - Азьвылгес ма малпад? Кӧня пол больницаосы ветлӥ секытэлэсь люкиськыны, кӧня тазалыкме ыштӥ соин сэрен? - Ортчемез сярысь куректонэз ӧвӧл ни. Али асьмелы нылпи кулэ. Пӧсьтолэзе мед вордскоз. И, главное,- азьчиньыме ӝутыса ик валэктӥсько,- пи нуны мед вордскоз. - Кыӵе пыӵ курптчиз тонэ? - Туннэ телевизор пыр астролог Тамара Глоба ивортӥз: "Туэ пӧсьтолэзе вордскем пи нуны, пе, славян калыклэн азьветлӥсез луоз". Нош асьмелэн вордскем пимы Удмурт кунлэн нырысетӥ президентэз ке луиз? А-а? Вот улысалмы-вылысалмы пересьмон даурамы. Вань калык вожъяськысал, дыр. - Осто-козма! - гадяз кирос тыриз Окыль. Вераськон-кенешмы ӧз пишмы. Сюсьтылэз кысыса валес вылэ выдӥ. - Окыль, куя дӥськуттэ. Мусояськом... - Шузи ик вань тон, Митрей. Вань малпанэд айы пунылэн кадь. Кӧттырон но гольык мугорез мусоян медло. - Секыт уж шат? - Секытлэсь но секыт. Нылкышно мылкыд - лулпуш комбайн выллем бадӟым агрегат. Сое ужатон понна мусоян но кулэ, шунытэсь-чебересь кылъёс но мултэс ӧй луысалзы. Жади мон туннэ. Вуоно "президентэд" понна быдэс "комбайнме" ужатэме уг поты ни. Собере беромим но асьмеос. Нылпиез укмыс толэзь нулло шуыса вунэтӥд, оло? - Монэ анай сизьым толэзьскын вордэм. - Уг, уг. Эн лӧпша, эн матэкты вӧзам. Жадьыса быдэс ёзвиосы шальтрамын. - Эх! - секытак лулски мон. Ваче тыбыр кариськыса мур малпаськонэ уси. Нош умме усем Окыле ныр куараеныз вань чебер малпанъёсме кир-пызь тугаз. Ӟечкыланъёс Удмурт Республикалэн вылӥ должностяз - Кун Кенешлы Тӧрое - Александр Волковез кыкетӥзэ быръемен валче, солы ӟечкылан телеграммаос вуо. "Тӥледлы оскон возьматэ. Удмурт Республикаысь властьлэсь быръем ёззэ юнматонын Тӥляд вормонъёсты вань шуыса, та ёз. улосын улӥсьёслы ӟеч лэсьтыны тыршыса, законъёс кылдытон удысын пайдаё ужа шуыса", - гожтэмын Россия Федерациысь Кун Думалэн тӧроезлэн Геннадий Селезнёвлэн телеграммаяз. Федеральной Собранилэн Федерацияя Кенешезлэн тӧроез Егор Строев ӟечкыланаз оскемзэ вераз, пайдаё кусыпъёс азинскозы шуыса, Россия Федерациез юнматон, обществоын тупаса улон понна. Александр Волковлы ӟечкыланзэ ыстӥз Беларусьлэн Россиын посолэз Владимир Григорьев. Со гожтэ: "Вань сюлмыным оскисько, Беларусь Республикалэн но Удмурт Республикалэн кусыпъёссылы, Беларусьлэн но Россилэн Союззы сьӧры потытэк, выль кужым пыӵалоз шуыса, со кусыпъёс Тӥляд ужады валтӥсь инты мед басьтозы". Ӟечкылан телеграммаос озьы ик вуизы Россия Федерациысь министръёслэсь, республикаосын кивалтӥсьёслэсь но областьёсысь губернаторъёслэсь, властьлэн быръем но быдэсъясь ёзъёсыныз кивалтӥсьёслэсь, национальной огазеяськонъёслэсь, калык организациослэсь, ужась коллективъёслэсь но нимаз адямиослэсь. Кун Кенешлэн Тӧроез Александр Волков иворъёсты вӧлмытӥсь ёзъёслы таӵе гожтэтэн вазиськиз: "Лулысь-сюлмысь тау карисько Удмурт Республикаысь Кун Кенешлы Тӧрое монэ кыкетӥзэ быръемен валче вуэм ӟечкыланъёсты но сӥзёнъёсты понна. Соосты мон Кун Кенешлэн республикалэсь экономиказэ азинтонъя, Удмуртиысь калыклы ӟеч улыны луонлыкъёс кылдытонъя ужезлы дурбасьтэмен, мыным оскемен лыдъясько. Оскисько, Кун Кенешлэн депутатъёсыз огазеяськозы шуыса, выльзэ кылдытыны ӵош, пайдаё ужан понна". Кун Кенешлэн пресс-службаез. Инсьӧръёсты усьтыса Та паймымон учыр пусъемын дуннеысь тросаз энциклопедиосын но справочникъёсын. Куатьтон ар талэсь азьло 1939 арын 15 апреле Балезино ёросысь Кестым гуртысь физикаен егит дышетӥсь И. В. Ахмаров инбамез чаклакуз синйылтӥз аспӧртэм кизилиез. Ма, та выль комета ук, валаз со. "Инсьӧр лулос" сярысь телеграмма пыр ӝегатскытэк ивортӥз Ленинградысь астрономияя Пулково обсерваторие. Нош 30 минут ортчыса, выль кометаез Вотка городысь метеоролог С. Н. Юрлов шедьтӥз. Ивор басьтэмзы бере обсерваториын ужасьёс соку ик эскерон ужъёс борды басьтӥськизы. Кӧня ке нунал ортчыса, кометаез дуннеысь ваньмыз сямен обсерваториос чаклазы ни. Гуртысь огшоры дышетӥсез Ибрагим Ахмаровез тодӥзы уно странаосын. Тихоокеанской обсерватория (США, Сан-Франциско) воргоронлы нимысьтыз медаль кузьмаз. Вылаз английской кылын гожтэмын: "Та медаль кылдытэмын 1892 арын, сётӥське Ахмаров И. В.-лы 1939 арын 15 апреле выль комета усьтэмез понна". И. В. Ахмаров вордскиз Кестымын 1912 арын 17 апреле. 1957 арын со "Удмурт АССР- ысь дано дышетӥсь" ним басьтӥз. Дышетӥсь, директор, солэн воштӥсез луыса ужаз пенсие 1972 арын потытозяз. Бӧрысь улӥз Глазовын. Кулӥз 1987 арын 11 декабре. Кестымысь одӥгез ульча нимзэ нуллэ, нош школаын музей усьтэмын. В. РОГАЛЁВ. Вазиськон Сюлэмшугъяськытӥсь югдур кылдэмен ми вазиськиськом Удмурт Республикалэн но Прокуратуралэн кивалтӥсьёсызлы. Ёросысь администрацилы оппозицие пырись депутатъёсын "нюръяськон" кутскиз. 1999 арын 28 апреле пытсэт сьӧры келямын ёрос Кенешлэн депутатэз Юрий Михайлович Никитин. Нош законъя сое арест улэ кыскыны уг луы. Со понна ёрос Кенешлэн решениез кулэ. Нош ми, депутатъёс, сыӵе документ ӧм кутылэ. Пичи Пурга ёрос Кенешлэн депутатъёсыз Логов В. Г., Леонтьев Н. В., Леонтьев С. В., Русинов Н. М., Плотников А. И., Чушъялов П. В. Кутсконэз вань. Кызьы азьланьтӥськоз? Тулысэз витим ке но, лымылэн шӧдтэк шорысь быремезлы паймим ик. Гуртын улӥсь доры кысык вакыт вазьгес вуиз. Шуо ук: тулыс мае кизид, сое ик аралод. Шундылэн пыжись тылсиосыз но музъем ужасез дыртыны косо кадь. Кидысэз мускыт муэ ӝоггес согыны тыршоно, нош трос аръем турынъёс но сӥзьыл кизем юос вылэ будыны кужым сётӥсь минерал сылалъёс пазяно. Лымы сӥзьыл кынтымтэ музъем вылэ усиз но ӧз шуна ни. Соин сэрен тросэз узьымъёс сисьмизы, пурысьтазы. Табере со муосты выльысь кизёно луэ. Соин ӵош ик мускытэз ӝегатоно, муэз небӟытоно, гыроно-кизёно. Республикалэн лымшор ёросысьтыз хозяйствоос музъем ужъёссэс вазенгес мытӥзы ни. Городлы матысь Завьялово ёросысь ваньмыз сямен хозяйствоос но музъем ужъёссэс кутскизы ни. Сӥзьыл кизем узьымъёс но трос аръем турынъёс небӟытэмын ни 2648 но 6528 гектар вылын, валэс юос киземын - 150, мускыт ӝегатэмын 7462 гектарын. Бырем узьымъёс интые 191 гектарез выльысь киземын. Минерал сылалъёсын "сюдэмын" 2467 гектар узьымъёс но 2509 гектар трос аръем турынъёс. Ёросысь гурт удысъя управлениысь специалистъёс верамъя, музъем ужасьёс нокыӵе шуг- секытъёс шоры учкытэк, ас азязы сылӥсь ужпумъёсты быдэсъяло. Тросэз эштосъёс мерттыны кутскизы кубиста. Удъёс туэ чебересь будӥзы. Куд-ог хозяйствоос кизизы ни ӵуж кушманзэс но. Бакча сиёнъёсты гужем ву киськан понна дасяны кулэ ни агрегатъёсты. Но солы коньдон ӧвӧл. Бакча емышъёсыз мерттоно минерал сылалъёсын узырмытэм муэ. Удмурт Правительство тукъёс (минерал сылалъёс) басьтыны коньдон висъян вылысь нимысьтыз постановление но кутӥз вал. Но со ёросъя чик но уг быдэсъяськы. Узьымъёс лымы улысь лябӟыса пото. Соослы но "сиён" кулэ. Тулыс асьмелэсь гызмыльтэммес уз возьма, дыр ортчоз. Тулыс нуналэз номырин но уд берыкты ни. Асьмелы асьмеос азьвыл ик изъян адӟон дасяськом. Тани "Родина" эштосын ик одӥг гектар узьымзы но, трос аръем турынъёссы но минерал сылалъёсын "сюдэмын" ӧвӧл на. Мукетъёсыз музъем ужъёс эштосын умойгес радъяськизы. Небӟытэмын 190 гектар узьым но трос аръем турынъёс, мускыт ӝегатэмын 450 гектар вылын, 25 гектар ӵуж кушман киземын. Бырем узьымъёс пӧлысь 70 гектарез выльысь киземын. Лыдпусъёс сьӧрын - механизаторъёслэн чырмыт ужаны тыршемзы. Ужъёсты ӝегато на эстӥськон витьыса сылонъёс. Дыртоно вылэм. Е. ПАХОМОВА. ТЕАТР Выль синмын учкемын Удмурт кун национальной театрын пуктэмын калык поэтлэн Степан Широбоковлэн "Ой, чебер нылъёс" комедиезъя кык ёзэн крезьгуро спектакль. Театр сое сцена вылэ кыкетӥзэ поттэ ни. Нырысьсэ пуктэмын вал 1969-тӥ арын. Спектакльлэн пуштросэз али но тупа туннэ нуналлы. Агроном Гирой туж бырйиськыса утча кышно. Одӥгез но чебер ныл вылэ дугдыны уг быгаты. Анаез, Епифановна кышнояськыны сюлворемен гинэ, со Соняез басьтыны ӧдъя. Но ӵапак со вакытэ, дышетсконзэ йылпумъяса, гуртэ инженер Тоня вуэ. Гирой, чик ӝегатскытэк солы но синмаське. Табере ини сое кышно кураны медэ. Тоняен Соня, куспазы вераськыса, кыксы но солы бызьыны "кыл сёто" но сюанлы "дась" луэмзы сярысь верало. Туж шулдыр сюанысь Гирой пегӟоно луэ... Комедилэн нимыз, пуштросэз кылиз ке но, улонлэн куремезъя, ма но со воштиськиз. Азьлозэ спектаклез учкисьёс туж яратыса пумитазы. Сое пуктӥз вал Россиысь искусство удысын сиё-дано ужась режиссер Г. Веретенников, крезьгурзэ гожтӥз Н. Шкляев, суредаз Г. Векшин. Со спектакльысь кылемын на кык нимъёс: калык кылбурчи С. Широбоков но Удмурт АССР-ысь искусство удысын сӥё-дано ужась, Удмуртиысь комсомоллэн премиезлэн лауреатэз Н. Шкляев. "Ой, чебер нылъёс" спектакль жанрезъя крезьгуро комедия луэ. Сое сыӵеен возьматон вылысь туж сюлмаськиллям РФ-ысь искусство удысын дано ужась режиссёр Л. Романов, суредась В. Белых, крезьгурчиос Г. Бекманов но И. Григорьевых. Спектакльын трос эктонъёс, соосты пуктэм балетмейстер И. Якупов. Спектакль удмурт калык сямъёсты чакласа но улонысь выльзэ басьтыса пуктэмын. Та ласянь выль шӧм сётӥзы 28-тӥ лицейысь "Мода" театр но эктонъя "Венец" ансамбль. Та нылъёслэн потэмзы учкисьёслы витёнтэм шорысь луэ, но со понна выль тӧл ырос кадь пельтэ. Спектакль учкисьёсты нырысь ик сайкытэныз паймытэ. Удмурт сцена вылын пурысь буёл кытӥ акылес но вал ни. Татын тӧдьыен тырмемын быдэс сценография. Сценалэн выжез но, подиум но, ӟус но кызьпуос но - югытэсь. Сайкыт буёлъёсын лэсьтэмын гуртлэсь туссэ возьматӥсь пичи коркаос. Вӧлдэт тӧдьы, горд, вож кесэгъёсын чеберъямын. Со шоры учкыса, мылкыд шулдыр луэ. Со мылкыдэз утьыса ик дӥсямын геройёс но. Тӧдьы, ӵуж, вож, лемлет, лыз дэремъёсын учкись азе пото Пирогов, Гирой, Палагей, Тоня, Соня но мукетъёсыз. Митрейлэн пыдвылъёсыз гинэ но лызо-гордо. Ваньмыз со синъёсыз палёмытэ, учкисьёсты но ӵош шудыны ӧте, чабыны косэ... Сыӵе куронъёсты ик лыдэ басьтыса ужало сӥё-даноосыз но, егитъёсыз но артистъёс. Соосыз но, таосыз но мылысь-кыдысь шудо, соосыз но таосыз но тулкымъясько, малы ке шуоно, кылбурлэсь но, спектакльлэсь но ритмзэ, кутэм гурзэ уськытыны уг яра. Ритм нош туж ӟырдыт сётэмын вал. Со витьымтэ шорысь паймытӥз. Удмурт Дон Жуанэн - Гироен (артист - В. Мадзеков) тодматскон усто гинэ пӧрмиз, но куд-ог выросъёсты - чебер-а со, ӧвӧл-а чаклано ик вылэм. Одӥг образ бордын ик пӧртэм артистъёс ужало: В. Мадзеков, Э. Шиляев (Гирой), Г. Владыкина, В. Загуляева (Епифановна), В. Стрелков, А. Ложкин (Дорогой)... Котькудӥз соос ма ке но выльзэ утчаса шудӥзы, туж лякытэн ветлӥзы, бекмылляськизы, эктизы. Котькудзылэн асьсэлэн кыӵе ке но, пичильтык ке но вормонзы вал. Шуом, В. Стрелков ымнырзэ сыӵе пуктӥз - номыр вератэк но зал серектиз; яке Л. Бабуриналэн Тоняез чебереныз но паймытӥз, визьмо, кескич луэмзэ но возьматӥз... Спектакль али гинэ улонэ пыре ай, котькудӥзлэн героез яке героиняез юнмалоз на. Уноез яркытэз эшшо тросгес луоз, тырмымтэез шелепаськоз но палдоз. Учконо ке, режисёрлэн но, суредасьлэн но ужъёсазы волятонэз вань на - озьы потӥз мыным. Шуом, туж яркыт вал кутсконэз, соин, дыр, бездытгес адӟиськиз пумыз. Сюанэз возьматыку, мултэс ӧй луысал, дыр, тросгес егитъёсты уже кутыны, соку "Мода" театр но "Венец" ансамбль спектакльлэн кутсконаз лякем кадь ӧй но адскысалзы. Лякиё-лякиё дэрем вӧзын сыӵе ик дӥсен адӟем потэ вылэм Епифановнаез но. Тонялы но, оло, со выллем дӥсен пыроно вал... Соку дӥсь ласянь стиль спектаклен огкадьгес возиськысал но геройёсты огазеяны юрттысал. М. ГАВРИЛОВА. Расул Гамзатов Лушкаськисьёс Кыре кельтэмзэ Ӵемысь лушкало... Туж соос мылкыдо Сыӵе ужъёслы Югыт нуналэ но Пеймыт уйёсы. Каллен, пичиен Лушкало, киулто Я бер макесэз, Я быдэс вандэтэз. Огез лушкалоз - Кунулаз со нуоз, Мукетыз - уробо тыр Ваньбур капыртоз. Лушкало ке таос - Лушкасьёс со ӧвӧл, Мукетсэ нош одно Суд улэ кыскало. Пӧзись ӝуксэ Коӵо суралля, Тазьы ваньмызлы Вуӵыртыса вералля: "Чырмыт ужасьёс вал Дас вын-агайёс. Лушканы возьматӥсь - Кык азьчиньыос. Шоръёсыз - лушказы, Пӧлыос - сиизы, Адӟисе - кык нимтэм Чиньыос сюризы. Созэ но тазэ Исатэк кельтӥзы - Кыкез чӧльыос Тюрьмае пуксизы". Кыре кельтэмзэ Ӵемысь лушкало... Лушкало ӵошен но Асьсэ понназы, Лушкало ыж уллё, Я кылбур чуръёсты. Лушкаськыса - улӥзы, Лушкаськыса - будӥзы. Лушкаськыса улыса ик Вылэ ӝутскизы. Капыръяса Возьытсэс ыштӥзы, Муртлэн валесаз Выдылӥзы... Пӧзись ӝуксэ Коӵо суралля, Тазьы ваньмызлы Вуӵыртыса вералля: "Чырмыт ужасьёс вал Дас вын-агайёс. Лушканы возьматӥсь - Кык азьчиньыос. Шоръёсыз - лушказы, Пӧлыос - сиизы, Адӟисе - кык нимтэм Чиньыос сюризы. Созэ но тазэ Исатэк кельтӥзы Кыкез чӧльыос Тюрьмае пуксизы". Котькытчы ик учкы - Котыр лушкаськись... Эрекчи ӟичыос Тросэзлы кельшогес, Ужзэс лэсьтыло ук, Пытьы кельтытэк. Пӧртэм интыын - Пӧртэм лушкаськон. Ашкынэм муртъёслы Сялӟон со - закон. Ыж уллё лушкало - Ушъяло-данъяло, Курегез ке нуо - Янгыше уськыто. Пӧзись ӝуксэ Коӵо суралля, Тазьы ваньмызлы Вуӵыртыса вералля: "Чырмыт ужасьёс вал - Дас вын-агайёс. Лушканы возьматӥсь - Кык азьчиньыос. Шоръёсыз - лушказы, Пӧлыос - сиизы, Адӟисе - кык нимтэм Чиньыос сюризы. Созэ но тазэ Исатэк кельтӥзы. Кыкез чӧльыос Тюрьмае пуксизы". Ӟуч кылысь берыктӥз Евгений Егоров. П. И. Чайковскийлы сӥзем 42-тӥ крезьгуро фестиваль Чеберлык дуно усе П. И. Чайковскийлэн вордскемез дырысен 159 ар тырмонлы сӥзем крезьгуро фестиваль йылпумъяськон азьын журналистъёс пумиськылӥзы Пермьысь Операя но балетъя кун академической театрлэн директореныз Анатолий ПИЧКАЛЕВЕН, татысь солисткаен Юлия МАШКИНАЕН но Удмурт кун филармонилэн чеберлыкъя кивалтӥсеныз Валерий МИТРОФАНОВЕН. - Анатолий Андреевич, тӥляд коллективды аслаз ужъёсыныз данъя быдӟым Пушкинэз. Ми дорын возьматӥды солэн "Пичи трагедиосызъя" пуктэм вакчиесь операостэс... - Милям театрмылы 125 ар ини. Россиысь одӥгез мӧйыез, даноез но, шуыны луоз. Пушкинъя кылдытэм музыкальной произведениос ваньмыз ик кадь улонэз адӟизы ни сцена выламы. "Борис Годунов" но "Евгений Онегин" операос али но репертуарамы. Ижевске ваим Борис Асафьевлэсь "Бахчисарайский фонтан" балетсэ. - Данъяськымон спектакльёсты вань, дыр, Чайковскийлэн произведениосызъя но? - Вань, но соосты ӧм вае. Тӥ дорын но умой пуктэмын "Евгений Онегин", "Иоланта", "Лебединое озеро". Та фестиваль дыръя соосты возьматӥзы. Милям ушъямон балетмы "Спящая красавица". Но кема но трос пуктылыса, декорациос, дӥсьёс сокем вужмизы ни - учкись но матысен шӧдэ, дыр. Опера но балет - дуно искусство, кивалтӥсьлы коньдон шедьтон ласянь трос утчаськытэк уг луы. - Кыӵе амалъёс тӥ шедьтӥськоды? - Спектаклез (операез, балетэз) тужгес яркыт кароно ке, со 800 сюрс - 1 миллион манетлы вуэ. "Пичи трагедиосъя" проектмес уж вылын быдэстыны юрттӥзы Джордж Сорослэн Россиысь фондэз но премияя фондъёс, кудъёсыз кылдытэмын, культурая но искусствоя тужгес кулэ луись произведениосты утён вылысь, со Россия Федерациысь Президентлэн Грандэз но "Открытое общество" институтлэн Грандэз. - Нош кызьы ужаськоды спонсоръёсын? - Нуналмысь, лякытэн гинэ вазиськыса, соос милемды мед валалозы, искусство понна мед висёзы шуыса осконэн. Милям мылкыдмы пыӵаз ни кадь нефтяникъёслы, энергетикъёслы, тужгес юрттэ "Лукойл" компанилэн интыысь огазеяськонэз. Нош тужгес бадӟымез "спонсормы" луэ, валамон, государство, налог тырисьёс. - Кызьы тырмытӥськоды залдэс, трос-а ветло учкисьёс? - Балет ке, ог 80 %-эз зал тырмемын луэ, опера ке - 30-40 процентэз. Шуом, кытчы ке уг мыны учкись, вуттыны быгатӥськом аншлаг дорозь. Туж юртто милемлы иворъёсты вӧлмытонъя ёзъёс - юнэсь кусыпъёс тупатӥм соосын, кин ӟечгес юрттыны быгатоз, шуом, телевиденилэн городысь каналъёсыз... Котькуд артистмы, солэн ужез син азе пуксе вакчияк аннотациосын прайс-листысь. Огъя вераса, тросэз потэ реклама бордысь. - Театрды, шуиськоды, вуж ни. Нош ку луоз вылез? - Со пуктӥське каллен. Сценаез сыӵе ик луоз - синучконъёс. Асьме улосмылы но городлы гинэ оскиськом. Странамылэн бюджетаз кык пол пыртылӥзы, но коньдон ӧз сётэ. Пичиен вуж театр юртмес но тупатъяськом. Тӥляд Операя но балетъя театреныды ӵошатоно ке, милемлы возьыт потэ ни: тани-тани борддормы но кадь куашкалоз. Тӥ дорын мон палёмыса ветлӥ: чылкыт, югыт, эркын, душъёсыз устоесь. - Нош кызьы пумитазы тӥледыз удмурт музъем выламы? Мар верасалды фестивалез радъям пумысен? - Юри копаськыса но фестивальлэсь шексэ шедьтыны ӧй быгатысал, дыр. Пумитазы, киоссэс вӧлъяса. "Нефтяник" профилакторие интыязы - татын туж умой шутэтскыны, сюдӥсь-утялтӥсь апайёс котырамы бергало... Паймоно кадь, татчы милям театрмы кыкетӥзэ гинэ вуиз ай. Вуоно арын одно ик бадӟым гастролен потом дорады. Нылъёсмы но мӧзмо, дыр, ньылез эктӥсьёсмы-балеринаос Удмуртиысь: Ольга Павлова, Наталья Решетова, Анастасия Вострикова но тани, Юлия Машкина. Россиысь калык артисткамы но, Елена Кулагина, Глазовысь. - Юлия, тӥ кемалась-а ӧй вал Ижевскын? - 12 ар. Пинал дыры татын но, Глазовын но ортчиз. "Дон-Кихот" балетын эктэмме учкыны "Металлург" двореце ветлӥз атае но. Ваньмыз мыным татын дуно - пичи дырысьтым Репин урам, трамвай сюрес, Киров нимо парк... Кыкетӥ шоканэ усьтӥське кадь. - Гастрольёс мар сёто тӥледлы, эркын мылкыд сяна? - Азьвыл одӥг ньыльмос яке куиньмос люкетэз коньдонмы вал гастроле потаммы чотын. Али сюрес дуно луиз. Туэ июнь толэзе Кирове "узырмыны" потомы - та городлэсь юбилейзэ пусъён программае пыриськом. Екатеринбурге ветлыны яратӥськом, нош соос - ми доры: Пермьын музыкальной комедияя театр ӧвӧл уга. Азьпала пусъемын вал Китае, Францие, Испание гастрольёс. Но таӵе улон дыръя... кин тодэ. - Озьыен, Валерий Яковлевич, тӥледлы - йылпумъян кыл. Кызьы тодӥськом, котькуд аре тӥ фестивальлэсь секыт ныпъетсэ ас вылады басьтӥськоды... - Соиз озьы, филармония вылэ усе та уж. Трос аръёс ӵоже дышимы ни кадь, ужлэсь ӧрзэ шедьтӥмы. Мертэтмес весь вылэгес ӝутӥмы бере, сое уськытытэк тыршиськом. Учкисьмы будэмын, вылӥ куронъёс пуктэ. Сое шӧдӥзы куноосмы но, тужгес ик операос дыръя. Спонсоръёсын ужаны но кӧня ке дышим, Урал траст банк ньылетӥ арзэ юрттэ. Куке-соку, тодӥсько на, учкисьлы ёрмемен, пырак ураме потыса, мынӥсь-ветлӥсьёслы "йыбырттӥськом" вал: ойдолэ, милям фестиваль... Табере учкисьмы тодэ, кытчы мынэ. Жаляса верано, лул узырлыко адямиос понна билет дунъёс куртчылӥсесь, лыдъялэ - уждунзылэн со 30-40 процентэз луэ. Ӵошатэ: азьвыл, 250 манет уждун дыръя, самой дуноез билет 3 манет но 50 копейка вал... Мар бен, П. И. Чайковскийлы сӥзем фестиваль туэ но данзэ ӧз уськыты. "Русская зима", "Московские звезды", "Белые ночи" но мукет фестивальёсын артэ со чик вужере уг кыльы, кытӥяз яркытгес но адске. Пермьысь 220 мурт, Москваысь 65 адями - эктӥсьёс но кырӟасьёс, озьы ик Денис Мацуев умой пумитамын-келямын. Нош ар ортчыса, П. И. Чайковскийлэн вордскемез дырысен луоз ни 160 ар... Т. ПЕТРОВА. "Удмурт кенеш" вера чурыт кылзэ Валлян Ижын ортчиз "Удмур кенеш" огазеяськонлэн исполкомезлэн паськытатэм кенешонэз. Отчы ӧтемын вал ёрос ёзъёслэн тӧрооссы, депутатъёс, тодосчиос, журналистъёс. Удмурт калыклэн азьветлӥсьёсыныз пумиськиз Правительстволэн Тӧроез Николай Ганза. Вераськон огъя пӧрмиз кадь. Выль кивалтӥсь оскытӥз, "Удмурт кенешлэсь" куронъёссэ лыдэ басьтыны тыршоз шуыса. Люкаськемъёс умоен лыдъязы исполкомлэсь Кун Кенешлэн депутатъёсызлы но шаерамы улӥсьёслы вазиськонъёссэ. Решение кутэмын 11-тӥ мае Пичи кенешез люканы, нош 12-тӥ мае, сессия усьтӥськон нуналэ, дэмен Кун Кенешлэн юртэз азе потыны. Депутатъёслы валан сётоно, калыклэсь кулэяськонъёссэ вунэтыны уг яра шуыса. И. КРИЧЕВ. Удмурт Республикаысь Югдурез утёнъя министерстволэн, культура но искусство удысын тыршисьёслэн Удмуртиысь творчество бордын ужасъёслы ВАЗИСЬКОНЗЫ Удмуртиысь Югдурез утёнъя министерство, искусство но культура удысын тыршисьёс творчество бордын вань ужасъёслы вазисько правоосты утёнын органъёслы шефской юрттэт сётонэз выльдыны но азинтыны курыса. Та вакытэ правоосты утён органъёс но творчество удысын тыршись адямиос котькудӥз но огазеяськыны кулэ. Обществомес асьмеос ас киосынымы лэсьтӥськомы. Асьмеос ке ӧм, кин утёз но возёз на, ӵыжы-выжыосмылэсь кельтэм пытьыоссэс, улонэ пыӵам сямъёсмес. Ас-астэ гажан, чылкыт сямо но мур малпаськыса улон гинэ калыкмылэсь вылысь улӟон сюрессэ усьтоз. Творчество удысын но правоосты утёнын тыршисьёслэсь кужымъёссэс огазеяса ужаны ӵектӥськом. Котькудӥз вала, соос ог-огзытэк улонысь тырмымтэосты палэнтыны уз быгатэ. Огазеяське! Туала адямиос пӧлын трос на чеберез, чылкытэз дунъясьёс. Самой со адямиос ик асьсэлэн усто но батыр ужъёсынызы луо асьмелэн одӥгез бадӟымез узырлыкмы. Русь музъем вылын вашкала дырысен ини правоосмес утисъёслы котьку юрттылӥзы культура но искусство удысын тыршисьёс, соос асьсэлэн быгатонлыкенызы но талантэнызы ӝутылӥзы йыружъёсын норъяськонэ. Правоосты утёнын ужасьёслы, зэмлыклы, законъёслы оскон гинэ юрттоз калыклы секыт адӟонлэсь палэнскыны. Кышкаэз тодӥсьтэм но зэмлык понна нюръяськись адямиослы сюрес усьтоно. Соин но творчество удысын ужасьёс саклык висъяло югдурез утёнын тыршисьёслы, соос уго трос секытсэ ас вылазы басьтоно луо. Соос мукетъёсызлэсь номырин ик уг висъясько, соин ик асьмелы сыӵе адямиосты адӟыны кулэ. Ми суредасьёслы, крезьгурчиослы, писательёслы, журналистъёслы, общественной деятельёслы, творчество удысын вань ужасьёслы вазиськиськом, югдурез утёнъя органъёсын тыршисъёслы сӥзем усто произведениосъя Россиын ортчись конкурсэ пырыськыны ӧтьыса. Удмурт Республикаысь Югдурез утёнъя министерствоын ужасьёс, культура но искусство удысын тыршисьёс ӵош огкыл гожтыса пусъё: адямилэн лулчеберез, культура но правоез утён ог-огенызы юн герӟаськемын, соосты огазеяса гинэ вераськыны, луоз туж бадӟым пуштросо закон - сярысь. В. ЩЕРБАКОВ, Удмурт Республикаысь югдурез утёнъя министр, А. ХРИСТОФОРОВ, Удмурт Республикаысь культурая министрлэн воштӥсез, А. КОРЕПАНОВ, Удмурт Республикаысь Композиторъёслэн огазеяськонзылэн тӧроез, О. ЧЕТКАРЁВ, Удмурт Республикаысь Писательёслэн огазеяськонзылэн тӧроез, П. ЁЛКИН, Удмурт Республикаысь Художникъёслэн огазеяськозылэн тӧроез, Н. АГЕЕНКО, Удмурт Республикаысь Национальной музейлэн генеральной директорез, Н. СОБИНА, Удмурт Республикаысь Национальной библиотекалэн директорез. Россия Федерацилэн Президентэзлэн Б. Ельцинлэн ӟечкыланэз Гажано Александр Александрович! Сюлмысьтым ӟечкыласько тӥледыз, Удмурт Республикаысь Кун Кенешлы Тӧрое кыкетӥзэ быръемен валче. Тӥледлы та ужез оскон возьматэ Удмуртиын калыкез улон-вылонын утён удысэз но экономикаез азинтыку секыт ужпумъёсты быдэсъяны быгатэмдэс. Вылӥ тодон- валанъёсты, быгатонлыкъёсты, малпандэс быдэстыны тыршемды, югдурез чакласа, котькуд вамыштэс эскерыса ужамды понна гажало тӥледыз шаерады. Оскисько, азьланяз но тӥ вань кужымдэс сётыса тыршоды, шаердылэн дэлетэз понна, республикаяды гражданъёс куспын тупанэз но нациос куспын огкылысь улонэз утён понна. Сӥзисько тӥлед, гажано Александр Александрович, юн тазалык, шудбур но выль вормонъёс Россилэн ӟеч улонэз понна. СПОРТ Шахматэн - гожтэт пыр Алигес йылпумъяськиз кышномуртъёслэн шахматэн гожтэт пыр шудонъя Дуннеысь ньылетӥез олимпиадазы. Нюръяськонэ пыриськизы дас странаысь шахматисткаос. Россиысь спортсменъёс 2-тӥ интые потӥзы. Усто шудӥсьёс пӧлын висъяськиз Ижевскысь механической заводлэн инженерез, мастере кандидат Светлана Хлусевич. Со 9 луоноез пӧлысь 6,5 очко люказ. Удмуртилэн чемпионатэз Та нуналъёсы ортчиз Удмуртилэн шахматэн ӝог шудонъя чемпионатэз. Таӵе шудонъёсын шахматистлы малпаськыны но вормыны 25 минут сётӥське. Чемпионатэ пыриськиз 90 пала адями. Вормисе потӥз технической университетысь дышетскись, мастере кандидат Максим Озолин. Со 11 луоноез пӧлысь 9,5 очко люказ. Солэсь ӝыны очколы бере кылизы Анатолий Семакин но Александр Абашев. Тросэз шудӥсьёс 7,5 очко люказы. Соос пӧлын спортъя мастеръёс Александр Филипенко но Владимир Гребенкин, мастере кандидат Николай Шуклин. Нылкышноос пӧлын усто нюръяськиз Елена Кычанова. Гуртысь шудӥсьёс пӧлын асьсэды возьматӥзы Якшур-Бодьяысь Сергей Горбунов но Шарканысь Михаил Бехтерев. Та ӵошатскон азьвыл Красногорскын уй пал ёросъёсысь шахматистъёс пумиськизы. Игра но Яр ёросъёсысь шудӥсьёс кельтыса шарканъёс вормисе потӥзы. И. ВЕЛЬТМАНДЕР. "Пичи трагедиос" - Ижевскын Россиысь тросэзлэн театръёслэн репертуарзы туэ герӟаськемын А. С. Пушкинлэн нимыныз. Палэнэ ӧз кыльы Пермьысь операя но балетъя кун академической театр но. "Евгений Онегин" но "Борис Годунов" Операос азьвыл ик пуктэмын ни вал ке, туэлы, поэтлэн 200 аръем юбилеезлы, соос дасязы А. Пушкинлэсь "Пичи трагедиоссэ": "Пир во время чумы", "Каменный гость", "Моцарт и Сальери", "Скупой рыцарь" одӥг актъем операоссэ. - "Скупой рыцарь" Россиысь нокыӵе мукет театрын уг мыны, - шуэ Пермьысь театрлэн директорез Анатолий Андреевич Пичкалев. - Тодӥськом, та пичи операос театрмылы трос коньдон люканы уз юрттэ. Озьы ке но, соосыз басьтӥм: возьматэммы потӥз, маин соос пӧртэмгес, Пушкинлэн быдӟалаез уго нокыӵе дыр эгесъёсы уг тэры, со уно дауръёсы кыстӥське. Та ужъёсмес ми Россилэн туэ ар понна кун премиезлы ӵектӥськом. "Оперной пушкинианаез" фестиваль нуналъёсы адӟыны быгатӥзы асьме учкисьёс но. Пӧртэм композиторъёслэн ужъёссы - Цезарь Кюилэн "Пир во время чумы", Александр Даргомыжскийлэн "Каменный гость", Николай Римский-Корсаковлэн "Моцарт и Сальери", Сергей Рахманиновлэн "Скупой рыцарь" - одӥг валтӥсь малпанэн герӟаськемын: сюлэм чылкытлыктэ ыштон, нравственность ласянь законъёслэсь палэнскон адямиез вуттэ сӧриськонэ, ымныртэм-дантэм луонэ. Шуом, власть борды кырмиськон "вие" жалянэз, яратонэз. Сьӧд вожъяськон но астэ инмарез кадь вылэ пуктон вордскытэ убирез. Пушкинлэсь философия ласянь малпанъёссэ учкись доры вутто та спектакльёсыз пуктӥсьёс: крезьгуръя кивалтӥсь но дирижёр, Россиысь дано артист Вадим Мюнстер, режиссёр Георгий Исаакян, суредась Россиысь искусство удысын дано ужась Игорь Гриневич, хормейстер Россиысь калык артист Владимир Васильев но мукетъёсыз. Т. НИКОЛАЕВА. ШӦКЫЧ Шыръясь Мон городын улӥсько. Иж карын. Табере туж бадӟым ни со, сюресъёс кузесь. Тазьы малпаськыса улӥ-улӥ, лыдъяй-чотай но - проездной басьтӥ. Троллейбуслы. Азьло кызьы ветлӥ? Оло, шайтанэз вылэ но пуксёно луэ вал: я автобусэ, я трамвае, я троллейбусэ. Пуксиськод - корт манеттэ кияд кутӥськод но сылыса чакласькиськод: кызьы ке контролёр медаз лыкты вал дорам, оло, дунтэк ортчысал тазэ сюресме. Сюлэм, манетэз жаляса, луд кечлэн сямен, пыдтышке вуылӥз. Яке мыноно интые но мынытэк кыльылӥськиз, трос тыроно луоз шуыса. Э, была-не была, пӧй, ветло ай гань-гань, улытозям огпол ке но, проездной басьтыса. Басьтӥ, 50 манет тырыса. Мар бен? Пуксиськод но мынӥськод гань-гань. Сюлэм, оло, ӟазег кӧен вӧямын, сокем нясь-нясь. Озьы вал вить нунал ӵоже, уже ветлытозям. Но тани вуиз кӧс нунал. Нокытчы но мыныны кулэ ӧвӧл. Но проездное юнме кыллёз-а? Сомында уксё тырем вылысь? Кутӥ но, нуназезэ сиськыса, потӥ троллейбусэн ворттылыны. Одӥгаз ворттылӥсько, мукетаз пуксисько, быдэс городэз, вань сюресъёстӥ ортчи. Ӝытсэ сиеме потыны кутскем бере гинэ тодам лыктӥз, доре бертоно ни шуыса. Бертӥсько но: ӧсам записка. Гуртысь выны вуылэм, сӥль но картофка вайылэм. Но, дорам ӧвӧлысь, берен нуэм. П. СКОБЕЛЕВ. А. С. Пушкинлэн вордскемез дырысен - 200 ар Ма сярысь верало та чуръёс? Моцарт но Сальери (А. С. Пушкинъя) Тылгизьы синмысьтым тэтчытозь, Пӧсям ву дэремез коттытозь, Мон тырши, Мон бӧрдӥ но возьмай. Ӵабъяськи мон, ӵемтӥ но уси, Гульымме саесэз кадь кеси. Весь тырши, Весь бӧрдӥ но ужай. Сюлэмы йыггетэ гадьы тыр Сю иськем, сюрс иськем - ӝӧк котыр. Курадӟи - Акшанэз ӵук шунды Мон кожай. ... Удалтӥз нош тыныд. Улӟиз сяськаед кысонтэм. Назарет... палъёсад... Киськай мон сое синвуэн. Озьы тодмо луи - Сальери. Таӵе кылбурме мон поттӥ вал "Таяз ярдурын..." нимо сборникам 1997-тӥ арын. Солэсь азьло лыдӟисьлэн син азяз йӧтӥз "Удмурт дуннелэн" бамаз. Собере огаз творческой пумиськонын мыным таӵе юан сётӥзы: "Моцарт но Сальери" кылбурады мар малпаса пыртэмын вал "Улӟиз сяськаед кысонтэм... Назарет... палъёсад..." чур? Назарет Австриын - та композиторъёслэн пумиськон интыязы - воксё но ӧвӧл ук? Гажаса Г. И. студентка. Зэмзэ вераса, мон туж шумпотӥ та юанлы. Угось со огшоры омырысь басьтэмын ӧвӧл. Шӧдске: юась мурт тодэ мынэсьтым гожъямъёсме. Вылаз ик, со адями жингрес рифма гинэ утчаса уг лыдӟы кылбурез. Одӥг чур гинэ солы малпаськон-сюлмаськон сётэм. Нырысь ик мон кутско Пушкинлэн со произведениез бордысен - гур бордысен эктоно шуыса, дыр. "Пичи трагедиоссэ"Александр Сергеевич Пушкин йылпумъяз 1830-тӥ арын сӥзьыл. Аслаз зарни "Болдино" вакытаз. "Моцарт и Сальери" нимо пичи трагедилэн берпуметӥ точкаез пуктэмын вылэм 26-тӥ октябре. Валтӥсь геройёсыз пӧлысь одӥгез - Моцарт Вольфганг Амадей (1756-1791) - дуннеысь быдӟым композитор, Венаысь классической школалэн мастерез. Уно музыкальной произведениослэн авторзы, историе кылемын новатор луэменыз но инмарен утем талантэныз. Карьеразэ кутскиз вундеркинд нылпилэн сюресэз вылысен, йылпумъяз куанер, вунэм музыкант луыса. Ватэмын нимтэк, куанеръёслэн шайвылазы. Мукетыз - Сальери Антонио (1750-1825) - Италиысь композитор но музыкая педагог, тросгес улӥз Венаын. Австриысь императорлы матын вал, кивалтӥз Венаысь итальян операен. Пушкинлэн гожтэмез пыкиське кылем даурысь 20-тӥ аръёсы ветлӥсь вераськонъёс, кылпӧртманъёс вылэ - кулон азяз, пе, священниклы Сальери верам Моцартэз ядэн виемез сярысь. Берло эскеронъёс таӵе супыльтонъёсты выжыеныз ишкалтӥзы, быдтӥзы, шуыны луоз. Сальери чылкыт сюлэмо, кужмо музыкант вылэм. Иське, Пушкин "сьӧлыказ" чылкыт адями вылэ. Озьы но, дыр. Нош та учыре генийлэн йырвизьмыз малпаськиз азяз ялан сылӥсь ужпум сярысь - "гений но йыруж лэсьтон". Со асьмелэсь но, ЪЪИ дауре пырисьёслэсь, йырвизьмес али но туга но, сэра но. Огъя вераса, та кык композиторъёс басьтэмын образъёс чотын. Вылаз ик, Пушкин но - со вакытэ улӥсь - со вераськонъёслы оске но,вал, дыр. Кызьы, пе, уд? Шуом, туннэ нуналозь но пӧртэм вераськонъёс-пӧртманъёс ветло Микеланджело сярысь но. Ватиканысь Сикстин капеллаез но Святой Петрлэсь соборзэ (соосты лэсьтонэн кивалтӥз Микеланджело) тодӥсьтэмез ӧвӧл. Ветлэ сыӵе мадёс: кулӥсь Христослэсь туссэ возьматӥсь натурщикез художник, пе, виыны косэм. Натурщиклэн тусыз дунне вылэ солэн киужаз гинэ мед кылёз, шуыса. Кин тодэ - кытын зэмез, кытын алдамез. Калык яратэ ук быдӟым генийёс сярысь кыл вӧлдыны. Соосты, сьӧлыко карыса, оло, аслыз-а матэгес карыны турттэ?.. Ӧйтӧд. Сальери ас вакытаз тодмо адями вал. Узыр но. Нош Моцарт берло нуналъёссэ -аръёссэ секыт курадӟонысь ӧз пота, солэн произведениосыз тросэз "ӝӧке" гожтылэмын вал. Али тодӥсь муртъёс шуо: соос сокем ик тодмоесь но вылӥллямтэ. Луэ-а кыӵе ке малпан понна вӧзысь мастерлэсь улонзэ но уретыны? Пушкин малпаське, та югдур шоры Сальерилэн синмыныз но учкыса. Сальери малпа но, лэсьтэ но - луэ. Со гинэ ӧвӧл - кулэ. "Поверить алгеброй гармонию"... Нош марлы мынам кылбурам сыӵе чур пыриз? Асьмеос тодӥськом: Галилеяысь Назарет кар луэ Иисуслэн вордскем палыз. "Иисус Христос из Назарета". Куамын тетрадрахмаос (зарни коньдонъёс) понна Иуда вуза сое Римысь легионеръёслы. Озьы Иисус мугор пумзэ кирос вылын пумита. Нош марлы озьы каре Иуда? Яратэменыз. Кӧшкемыт малпаны ик - но Иуда Искариот вуза аслэсьтыз Дышетӥсьсэ Яратэменыз. Угось вань дуннелэн шонер радыз солэн син азяз куашканы кутске, со азьын Иисус аспӧртэмлыко революционер тусо адске. Таиз вань йылолъёсты ас сяменыз воштэ, ассэ эксэен лыдъя. Та сярысь ӟеч но аспӧртэмлыко гожтэмын Леонид Андреевлэн "Иуда Искариот" повестяз но. Нош Христос тодэ ни вал, сое вузалозы шуыса. "Тайная вечеря" картинаын со ӟеч адске: Дышетӥсь мыр-мыр учке вань вуоно апостолъёслэн синъёсазы, лул пыдсазы. Со вала: та дуннеын солы инты ӧвӧл ни. Оло нош, со дырызлэсь вазь вуиз? "Ӧз", - шуэ Инмар-атай, сое дунне вылэ вордыса. Валамон ини: Александр Пушкин туж ӟеч тодэ вал Библиысь сюжетъёсты. Царскосельской лицейын, кытын со дышетскиз, теологилы бадӟым саклык висъяллязы. Огъя вераса, Пушкин вакытэ Библиез дышетон школаын валтӥсь предмет луэ вал. Нош Иудалэн ас Дышетӥсьсэ вузамез котьку улэ вал хрестоматийной сюжет чотын. Соин сэрен ик ас кылбурам мон тырши аспӧртэмлыко параллельёс кылдытыны: Иисус но Моцарт, Сальери но Иуда. Нош вузаськонлэн одӥг философской выжыез адӟиське - коралты чиньыдэ, быдэс мугор медаз пашмы шуыса. Адямиос кӧня улозы та Дуннеын, сомында ик, мон сямен, Иудалэн образэз ужалоз одӥг малпанлы: аслэсьтыд чылкытгес, быгатӥсьгес адямиез вузан. Яратыса ке но. Нош шӧмыз солэн таӵе луоз: чечы вышкые одӥг пуньы тэкит суралтэт. Воксё сиыны ик луонтэм маке. Моцарт, гений луэменыз, Сальерилэсь вань валанъёссэ йырчукин каре, мыддоринтэ - соин со номырин тупатонтэм изъян вае вань калыклы. Озьы малпа Сальери. Уг, со, оло, уг но вожъяськы солы. Ведь со ӧз вожъяськылы быдӟым композиторъёслы Глюклы но, Пуччинилы но, Гайднлы но. Угось соос паськытатӥзы гинэ солэсь улон шоры радъям учконзэ, нош ӧрзэ ӧз тӥялэ. Табере "сьӧд адями" сярысь, кудӥз Моцартлы реквием гожтыны дэмлаз. Кин со? Мар со? Сьӧд адямилэсь, тодӥськом, образзэ пезьгыт но шимес возьматӥз асьмелы Сергей Есенин но "Черный человек" поэмаяз. Сьӧд кужым, сьӧд лул... Ӧй вал-а меда со лэземын асэныз Дьяволэн? Та юан валэктонтэк кыле. Нош тани "пичи трагедиын" Моцарт кулыны кошке, со вие шумпотэ-а Сальери? Уг. Со вала - йыруж лэсьтыса, со аслэсьтыз но лулзэ дунтэм дунын вузаз со Сьӧд кужымлы. Берпум шокчытозяз со малпан йырвиымзэ йӧӟектытоз. Сальери вала - ӟеч уж понна лэсьтэм кырсь ужез солы пайда ӧз сёты. Со валанэз ик солы луэ шимес кылкутон кадь. Нош Моцартлэсь музыказэ урамъёсын кураськисьёс но шудо. Музыкаез улэ, Иисуслэн чебер но яркыт тусбуез сямен ик. Быдӟым ӟуч поэт Александр Пушкин аслаз "пичи трагедияз", гырлые сямен, котькуд сюлэме жуге: "гений и злодейство - две вещи несовместимые". Нош туала улонмы шоры учкыса, таӵе малпан кылдэ: "злодейство" пӧлын улыса, асьмеос, оло, ум но адӟиське ни сое, малпаськом, озьы ик кулэ но, дыр, шуыса. Кивалтӥсь Иудаос ортчыто сьӧдкыль вакытэ юондыр. Нош марлы? Оло нош, гений кыл улонысьтымы кошкемен-а?.. Яке сое асьмеос ыштэмен-а?.. Дантес Пушкинэн дуэль бӧрсьы кошкиз кунгож сьӧры. Собере со Россиысь лыктэмъёсын трос пол пумиськылэм на. Котьку вераллям Пушкинэз сюлмысьтыз гажамез сярысь но. Огъя вераса, валан кылдэ - Пушкин ачиз Дантеслы мукет сюрес, дуэль ортчытон сяна, сётымтэ ини, шуыса. Оло, со озьы ик вал но, дыр. Но Дантес кадьёслэн, мон сямен, "Назаретазы ӧз улӟе сяськаос"... Уз но улӟе - кыйбодыос сяна. Тӥни озьы мон валэктыны выри со пумиськонын студенткалэн юанэзлы. Зэмзэ вераса, ачим но валаны тырши кадь. Угось "Пушкин" нимо ошмесын синкыли кадь чылкыт вуэз дауръёслы тырмоз. ВЯЧЕСЛАВ АР-СЕРГИ. ШӦКЫЧ Депутатъёслы туспуктэмъёсын вазиськон Гажано депутатъёсмы! Быръёнъёсын валче тӥ малы ке ульчаосмес сузян-утялтон сярысь вунэтӥды, шӧдске. Тани Ижевскысь Ленин ёросысь Азин ульча но Инструментальной переулок вожын тулыслы быдэ жуг-жаглэсь гурезьёс кылдо (снимок вылын). Сое утялтыны техникамы асьмелэн ӧвӧл, кужыммы но уггес тырмы. Оло сайкыт май праздникъёс азьын югдур воштӥськоз? Милям ёросамы быръем депутатъёсмы пӧлын гажамон но оскымон адямиос. Со Раиль Галиахметов, Виктор Тарасенко, Анатолий Салтыков, Виктор Русских, Сергей Шаргаев, Людмила Забродина но Валерий Ходырев. Ленин ёросэн тодматскизы Н. Лялин но В. Камашев. ТУЭ - ДУННЕЫСЬ АРЛЫДООСЛЭН АРЗЫ Эх, улон-вылон, шу! Кызьы ивортылӥм ни вал, гажано эшъёс, сояз арня вискын редакциын меӵак телефон пыр юан-веран радъямы республикаысьтымы калыкез улон-вылонын утёнъя министрлэн воштӥсеныз Наталья Федоровна КУЗНЕЦОВАЕН. Со сӥземын дуннеысь арлыдоослэн арзылы. Гожтэтъёс пыр, озьы ик телефонэн пӧртэм юанъёс сётэмын вал. Кинлы нимысьтыз юрттэт кулэ, кинлы валэктон сётоно улонамы кутӥськись законъёсъя. Туннэ номерын сётӥськом куд-ог юанъёслы валэктонъёс, вераськонмес азьланьтом на мукет номерын. - Кинлы сётӥське военной пенсия? Пыро-а соос пӧлы Дальний Востокын служить каремъёс? Ижевскын улӥсь. - Военной пенсия басьто Быдӟым Отечественной войнаын ожмаськемъёс, вань ке соослэн военкоматэн сётӥськись нимысьтыз удостоверенизы. Сыӵе луонлыкъёссы вань одӥг нунал ожмаськемъёслэн но, озьы ик Венгриын ортчем ужрадъёсы пыриськемъёслэн, Быдӟым Отечественной война дыръя Дальний Востокын ожмаськемъёслэн, нош огшоры служить каремъёс военной пенсия уг басьто. - Мон ужысь ветеран, вань Данъян грамотае, Вормонлы 30 ар но 50 ар тырмонэн валче сётэм медальёсы. Кыӵе ке но льготаос сётӥськыны кулэ-а мыным? Е. Николаева. Алнаш ёрос. - Вань ке тӥляд Россия Федерациысь Ужысь ветеранлэн удостоверениез (сыӵе удостоверение басьтыны луонлык сётэ азьвыл СССР-ысь Ужысь ветеранлэн медалез но), улон интылы но коммунальной юрттэтлы ӝыны дун тырыны быгатӥськоды - 50 процентсэ. Гуртын улӥсьёслы сыӵе льготалэн кулэлыкез ӧвӧл. - Малы инвалидъёслы уг висъяськы автотранспорт? Эстӥськон (бензин) понна компенсация сётом шуизы, со но та дырозь ӧвӧл. П. Иванов. Шаркан ёрос. - Быдӟым Отечественной войнаын ожмаськемъёслы но инвалидъёцлы автотранспорт берлозэ висъяськиз 1993-тӥ арын ноябре-декабре. Туннэ нуналлы шаерамы сюрслэсь ятыр адями черодын сылэ, нош коньдон ӧвӧл автотранспорт висъяны. Азьланяз ужпум ӝутэмын луоз - кельтоно яке ӧвӧл сыӵе льгота. Оже пыриськемъёслы но инвалидъёслы озьы ик чакламын эстӥськон понна компенсация сётыны. Та дырозь со тыремын 1998- тӥ арлэн нырысетӥ паларезлы. 1999-тӥ ар понна компенсацилы чаклам дун пыртэмын шаермылэн бюджетаз. Коньдон луиз ке, компенсация тыриськыны кутскоз. Но вылӥ кивалтӥсьёс нырысь быдэстоно ужпумен лыдъяло нылпи пособиез но уждун тыронэз. - Ёросысьтымы калыкез улон-вылонын утён отделын ужасьёслы пенсия пумысен валэктон курыны пыри вал, нош соослэн номыр верамзы уг поты. Ай кышкатӥзы на, тросгес ветлӥд ке, пе, пенсидэ кулэстом. А. Байкова. Завьялово ёрос. - Министерствое сыӵе ӝожтӥськонъёс туж трос вуо Ижевскысь но, мукет ёросъёсысь но. Калыкез улон-вылонын утён удысын ужасьёсты со понна шонере поттэме уг поты. Та нуналъёсы ортчем кенешын но ёрос ёзъёслэн кивалтӥсьёссылы со пумысен верамын вал. Асьсэос уждун уг ке но басьто, уж пӧлы выемын ке но, доразы вазиськисьёсты ужасьёс валаны кулэ. Нош адямиосты урод мылкыдын пумитамзылэн мугез со бордын но, дыр, укыр трос уж вылазы усиз. Кылем арен ӵошатыса, кык поллы йылӥз пенсия но пособие басьтӥсьёслэн лыдзы - ужасьёс сомында ик кылизы. - Пимылы 16 арес, нырысетӥ группаен инвалид, ачиз номыр лэсьтыны уг быгаты. таяз арын анаез опекун интыын луиз, но малы ке но номыр уг сётӥськы солы. Шонер-а со? И. Павлова. Ижевск город. - Та пумысен адямиослэн ӵем дыръя валамтэоссы кылдо. Юало, кыӵе льготаос опекунлы сётӥсько. Нокыӵе но уг. Инвалид луэмысьтыз пияшлы пенсия сётӥське, нош басьтэ сое опекун луэм анаез. Со ик пизэ утялтыны, чакланы кулэ, мукет нокыӵе право опекунлы уг сётӥськы. - Нылпи пособие понна вуз сёто одӥг магазинын гинэ, но ваньмыз отын дуноен вузаське. Нырысетӥ категорие пырись анай. Як.-Бодья ёрос. - Коньдон ӧвӧлэн, нылпи пособиез воштэ вуз яке кыӵе ке юрттэт. Со лэсьтӥське взаимозачёт амалэн, соин ик вузъёс дуногес луо. Но соосты чакла республикаысьтымы Дунъёсъя но тарифъёсъя кун комитет. Отын ужасьёс гожтӥськытэк, ӵектэм вузъёсты ми ум басьтӥське. - Кыӵе льготаос сётӥсько нырысетӥ группаысь инвалид нылпиослэн анай-атайёссылы? Г. Иванов. Ижевск город. - Нырысетӥ группаен инвалид нылпиослэн быдэс семьязы улон инты но коммунальной юрттэт понна ӝыны дун тыре - 50 процент; городэтӥ но город котыретӥ мынӥсь-ветлӥсь транспортын инвалид нылпиез келяса мынӥсь дун уг тыры; санаторие эмъяськыны мынӥсь нылпи но сое келясь транспортын дун уг тыро; телефон понна ӝыны дун тыриське, семьяысь котькин вылэ ке но со гожтэмын; улон интызэс умоятон пумысен нимаз черодэ султыто; дунтэк сётӥське кресло яке коляска; администрация лэземъя, анай яке атай арняяз ньыль нунал ужаны быгато - ужамен лыдъяське вить нунал; анайлэн яке атайлэн доходысьтыз налог ӧжытгес басьтӥське. - Луэ-а пенсие потыны 59 арескын? Ужам стаже мынам 40 ар ни, 3 ар служить кари армиын - пыро-а со аръёс стаже? В. Веденеев. Завьялово ёрос. - Калыкез уже интыян сярысь законъя, пенсие потыны луэ кык арлы вазьгес: воргоронъёслы 58 арескын, нош нылкышноослы - 53 арескын. Но сыӵе луонлыкъёс сётӥсько ужтэк кылемъёслы, кудъёссэ ужысьтызы дырызлэсь вазь поттӥзы. Пенсие потыны луэ уже интыянъя службалэн дэмламезъя. Дырызлэсь вазь пенсие потон ужпумъёсты эскере Калыкез улон-вылонын утёнъя министерство, нош коньдон висъя калыкез уже интыянъя служба. Но коньдонэз солэн ӧвӧл. 1999-тӥ арын январьысен дырызлэсь вазь пенсие потон учыръёсты соос кулэстӥзы. Нош куриськонъёс трос вуо милям министерствоямы но. Та нуналэ со туж сюлэмшугъяськытӥсь югдур. Вань сыӵе учыръёс но: картэз но кышноез уг ужало, нылпиоссы озьы ик ужтэк пуко. Кызьы улоно соослы? Та ужпумез сэрттыны-пертчыны кулэ. Пенсие дырызлэсь вазь пото на, адями висеменыз йырин инвалид луэ ке. Но со понна ортчоно МСЭК-ез (медико-санитарной экспертной комиссиез - ВТЭК интые). Отчы ыстэ эмъясь учреждение. Нош армиын служить карем аръёс сярысь ке верано, туннэ нуналы уже кутӥське пенсиосъя кык закон. Армиын служить карем аръёс кыкезъя ик стаже пыро. Вуж законъя пенсие потӥсьёслэн служить карем аръёссы кык поллы ке йыло, выль законъя одӥг ар одӥген ик кыле. Дасяз Л. МАЛЫХ. Куартолэзь: тодмо нимъёс но нуналъёс 1. - Тулыслэн но Ужлэн нуналыз. - 85 ар талэсь азьло (1914) Ижевскысь но Воткинскысь заводъёсысь но фабрикаосысь ужасьёс кык нунал ӵоже пумитъяськон ужрад ортчытӥзы. Соос куризы 8 часъем ужан нунал тупатыны но пӧртэм политической эрикъёс сётыны. 5. - Вордскемез дырысен 145 ар тырме Воткинск заводысь инженерлы, электросварка амалэз кылдытӥсьлы Н. Г. Славяновлы (1854-1877). - Вордскемез дырысен 70 ар тырме удмурт драматурглы, режиссёрлы И. М. Даниловлы (1929). 6. - 41 ар талэсь азьло (1958) Ижевскын П. И. Чайковскийлы сӥзем нырысетӥез фестиваль ортчиз. 7. - Радиолэн нуналыз. 9. - 54 ар талэсь азьло СССР-ысь Верховной Советлэн Президиумезлэн Указэныз 9 май ялэмын Вормон нуналэн. 11. - Вордскемез дырысен 80 ар тырме Советской Союзлэн Героезлы, Камбарка ёросысь Ведрец гуртын вордскем К. Н. Тарасовлы (1919-1945). Дано ним сётӥзы солы быремез бере, 1945-тӥ арын 6-тӥ мартэ тушмонлы пумит огаз лек ожын кышкасьтэм но кужмо луэмез понна. 14. - 35 ар талэсь азьло (1964) чузъяськиз нырысетӥез удмурт симфония, солэн композиторез Г. А. Корепанов. 15. - Вордскемез дырысен 105 ар тырме педагогика наукаосъя докторлы, профессорлы, РСФСР-ысь Педагогика наукаосъя академилэн член-корреспондентэзлы Б. П. Есиповлы (1894-1967). 20. - Вордскемез дырысен 70 ар тырме удмурт кылбурчилы но берыктӥсьлы, кылчилы (лингвист), шаерчилы, Пичи Пурга ёросысь Улын Юри гуртын вордскем Г. А. Архиповлы (1929). Солэн 30 пала научной статьяез, "Вай бур кидэ" кылбуръёсын бичетэз потӥз. - 65 ар талэсь азьло (1934) Ижевскын мебель лэсьтонъя фабрика ужаны кутскиз. 23. - 30 ар талэсь азьло (1969) Ижевскысь автозаводын 25 сюрсэтӥез машина лэсьтэмын. 24. - Вордскемез дырысен 60 ар тырме инкуазез суредасьлы, УАССР-ысь Кун президиумезлэн лауреатэзлы Б. А. Постниковлы (1939). 25. - Вордскемез дырысен 65 ар тырме УАССР-ысь сӥё-дано артисткалы М. И. Галасеевалы (1934). - Вордскемез дырысен 65 ар тырме удмурт писательлы, Якшур-Бодья ёросысь Пислеглуд гуртын вордскем Б. Д. Вахрушевлы (1934-1985). Б. Вахрушев тодмо луэ лул-пушез возьматӥсь веросъёсыныз но серемпыр гожтэмъёсыныз. - 20 ар талэсь азьло (1979) Ижевскын усьтӥськиз сюлэм висёнъёсты эмъянъя комплекс. 26. - 100 ар талэсь азьло (1899) Ижевскысь заводын огшоры калык понна нырысетӥез библиотека усьтӥськиз. 28. - Вордскемез дырысен 90 ар тырме удмурт кылбурчилы, Можга ёросысь Почешур- Какся гуртын вордскем И. Е. Еремеевлы (1909-1932). - 70 ар талэсь азьло (1929) ворсамын вал Воткинскысь Благовещенской черк. ШӦКЫЧ Секытэн ке но, шаерамы тулыс бусы ужъёс пумен ӧръясько. Кызьы ивортӥзы Гурт удысъя но сиён-юон поттонъя Министерствоын, хозяйствоослэн ог 75 процентэз техниказы ужаны ярантэм луэмын ни. Туэ лизингъя (кондонэз бӧрысь тырыса) одӥг трактор но, одӥг сеялка но басьтэмын ӧвӧл. Кизьыны бен кизёзы ик, нош аран-кутсан ужъёс борды кутскозы меда? Газетъёсысь. Суредэз Леонид Прозоровлэн. Тулыслэн но Ужлэн праздникеныз! Тупаса улон. Уж. Май. таӵе ӧтёнъёсын пиштыло асьме городъёслэн ульчаоссы но карлудъёссы (площадьёссы) та праздник нуналъёсы. Та кылъёс котьку но тулыслэн вуэмезлы но выльдӥськонлэн, Атай музъеммы понна пайдаё ужлэн тодметэз луо вал. Шуг-секытысь потон понна вань таза кужымъёсты огазеян, ужаса улӥсьёслы умой улыны луонлыкъёс кылдытон - сыӵе куронъёс пуктэ асьме азе туала вакыт. Удмурт Республикаысь Кун Кенешлэн но Правительстволэн кивалтӥсьёссы ӟеч валало, огазеяськыса, ог-огдэ гажаса но пайдалыко ужаса гинэ асьмеос быгатом промышленностьлэсь но гурт удыслэсь азьвыл басьтэм данзэс улӟытыны, калыкез улон- вылонын утён удысэз азинтыны, Удмуртилэсь экономиказэ кужмоятыны. Промышленностьлэн нырысетӥ кварталэ ужамезлэн йылпумъянъёс сыӵе тулыс бусы ужъёслы дасяськон но. Тулыслэн но Ужлэн праздникеныз - Нырысетӥ Маен, Удмуртиысь гажано улӥсьёс! Юн тазалык тӥледлы, чылкыт чагыр инбам, шудо-буро улон но байлык, азинлыко ужан, вань ӟеч малпанъёсты мед быдэсмозы. Удмурт Республикаысь Удмурт Республикаысь Кун Кенешлэн Тӧроез Правительстволэн Тӧроез А. А. Волков. Н. А. Ганза. Тыл - шудон ӧвӧл Тылпулэсь утиськонын ужасьёс кылем арын пусйизы 80 ар тырмонзэс. Но алигес тодмо луиз: Россиын эксэй кивалтон вакытэ ик кылдытэмын вылэм ини тылпу кысон дружинаос. Соослы сӥзем нырысетӥ документ потэмын 1649-тӥ арын 30 апреле. Озьыен, со дырысен ортчиз ни 350 ар. Таин валче республикаысьтымы Югдурез утёнъя министерстволэн Тылпуослэсь утиськонъя управлениезлэн кивалтӥсез Михаил Камалетдинов журналистъёсын пумиськон ортчытӥз. Кызьы со пусйиз, Удмуртиысь тылпу кысӥсьёс Россиын умойёсыз радын ветло. Берло дыре шаерамы сокем бадӟым тылпуос ӧй вал. Тылпу кысӥсьёсмы котькыӵе секыт учырлы дась. Озьы ке но, та кулэ удыс но шуге-леке вуэмын. Тырмыт коньдон висъямтэен уг лу басьтыны техника. Кылем арын Удмуртие чылкак одӥг гинэ "Урал" автомобиль вуиз. Со но - пунэмен. Удысын ужасьёслэсь лыдзэс кулэстоно луиз. Юбилей юбилеен, пусйиз Камалетдинов, но ми понна вуизы кысык нуналъёс. Куазь кӧс улэмен валче будӥзы тылпу потон учыръёс. Соос ӝутско нюолэсъёсын, юртъеръёс но пудо вордон гидъёс котырын. Кышкыт югдуре вуттэ жуг-жагез чакласькытэк сутон. Тани кылем арня куспын гинэ соин валче ньыль пол тылпу ӝутскиз. Ялан трос на пиналъёс пӧлын тылын шудон учыръёс. Соин ик, пусйиз кивалтӥсь, тросгес валэктон уж нуэлэ: тылпуэз алон, сое кысон сярысь, дунтэмгес усе. Тылпу кысӥсьёслэн нуналзылы сӥзем сӥё-дано ужрад ортчиз толон. Ижевскысь "Металлург" культура дворецын вылӥ наградаосын пусъемын уно мурт. Н. ЛЯЛИН. Песьтэрез буш ӧвӧл ни, иське... Та нуналъёсы Арбитраж суд дугдытӥз "Удмуртнефть" огазеяськонэз банкрот карон пумысен ужзэ. Сыӵе решение кутэмын кредиторъёслэн куремзыя. Ар кутскыку, огазеяськонын секыт югдур вал. Али предприятие отысь потэ ни. Вань бюджетъёсы выт тыре. Туэ ньыль толэзь ӵоже 500 миллион манет висъяз ни. Со пӧлысь ӝыныез коньдон Удмуртие кылиз. Озьы ик быдтэмын уждунъя тыронъёсыз. "Удмуртнефть" ОАО туэ чакла вань тыронъёссэ пытсаны (отчы пыро пени но штрафъёс), дыраз уждун сётъяны но выт тырыны. Г. ВАСИЛЬЕВ. ВАЛЭКТЭ ЮРИСТ Сэрегез нуэ адвокат Лилия Шкляева Алимент тыронлэсь пегаськод ке... Картэным Михаил Кочинэн ӵош ум улӥське ини кык но ӝыны ар. Милям соин кык нылпимы. Сашалы 15 арес, Леналы - 10. Та вакытэ соос уло мон бордын. 1997-тӥ арын январе Пичи Пургала судэ сётӥ курон: картэ алимент мед тыроз шуыса. Феврале телеграма вуиз: Михаил Кочин ивортэк ышемын. Милиция сое утчаз 1998-тӥ арын июль толэзёзь. Сомында ватскыса улӥз уксё тырытэк. Нокытчы но ӧз ышылы. Эшъёсыз мыным вераллязы: азьло картэ улэ но ужа азьвыл интыяз ик, Ямало-Ненец округын. 1998-тӥ арын шедемез бере, ми нылпиосыным шумпотӥмы, коньдон вуылоз ини шуыса. Выль 1999-тӥ арозь возьмам - ӧз вуы. Судын валэктӥзы: документъёс келямын Кочинлэн ужан интыяз. Нылпиослы но 18 арес тырмоз ини, ноку уксё уг басьты, дыр, атайзылэсь. Ачим ужтэк кыли, гуртын пукисько, улӥськом аслам атаелэн пенсиез вылын. Кочин матын улысал ке, ачим но ужан интыяз ветлысал, но Тюмень областе уд мыны ук. Кинлы вазиськом на. Сое алимент тырыны мед косозы шуыса? Зинаида Кочина. Пичи Пурга районысь УАССР-лы 10 ар нимо совхоз. Тӥ шонер лэсьтӥллямды, судэ вазиськыса. Михаил Кочинлэн ужан интыысьтыз администрация табере алимент тыроно муртлэн уждунысьтыз оглюкетсэ одно ик келяны кулэ, тӥледлы, уждун тырем бере куинь нуналскын. Судлэсь решенизэ быдэсъясьлы (судисполнительлы) озьы ик куинь нуналскын мед ивортоз алимент тырисьлэн вуж ужысь кошкемез сярысь, нош тодыкуз - выль ужан но улон интыез сярысь. Та пумысен судисполнительлы озьы ик ивор сётыны кулэ ачиз алимент тырись. нокыӵе мугтэк ивор сётӥсьтэмъёс кыл куто законъя - Россия Федерацилэн Семья сярысь кодексысьтыз 111-тӥ ёзэтъя (статьяя). Алимент но со чотын люкаськем пунэм тырон басьтӥське уждунысь но мукет доходысь, нош соос тырмымтэ дыръя, банке но кредитъя музон учреждениосы понэм коньдонысь. Тазьы но уг окмы ке, алиментлы пӧрме сое тырисьлэн асваньбурез (собственностез). Алимент сётӥсьлэн пунэмен тыронэз лыдъяське басьтэм уждунэзъя, нош ужамтэ вакытаз - Россия Федерациысь шоро-куспо уждунъя. Мумы-бубыос шедьымтэ дыръя нылпи пособие будэ 50 процентлы. Пунэмен тырон люкаськем понна янгыш ке алимент тырись, со котькуд ӝегатэм нунал понна неустойка. Жингырто тулыс буёлъёс Алигес Глазовын Быдӟым нуналлы сӥзем адӟытон усьтӥськиз. отчы пыриськизы Глазовысь но Ижевскысь суредасьёс. Живописья, графикая, скульптурая сю пала уж возьматэмын вал. Туж тунсыко суредъёсыз Глазовысь С. Лузиналэн - татын солэн кык триптихез адӟытэмын. Соос сӥземын Адямилы, Инбамлы, Визьлы. Азьвыл вал Кыллы, Инмарлы сӥземъёсыз. Адӟытонэ пыриськизы Ижысь ньыль суредась но кык скульптор. Тунсыко Ю. Наговицынлэн гравюраосыз. Лыктэмъёсты паймытӥзы солэн чылкыт, пыдлось кужымен лэсьтэм ужъёсыз. Висъяськизы инкуазез суредасьёс но. Соос пӧлын - А. Ложкин, Р. Батыршин, В. Семакин, Н. Петров, В. Тратканов. Вылӥ дунъязы З. Бушковалэсь но В. Борискинлэсь скульптурая ужъёссэс. Выставкаез усьтӥз но вӧсяз Дмитрий баӵко. Адӟытонлы шуыса дасям зал туж эркын но бадӟым. Нимаз ужъёс но отын валаса радъямын. Ужрадэз ортчытыны юрттӥз адӟытон заллэн кивалтӥсез В. Кельм. Туж шуныт пумитазы куноосты. Л. ПРОЗОРОВ, Удмурт Элькунысь искусство удысысь дано ужась но выставкае пыриськем мурт. ЮКАМЕНСК ЁРОСЫН ТУННЭ Скалъёс бӧксо Али уноез скалъёс кунян ваё, озьыен йӧл потыны кулэ, нош "Борец" эштосын котькуд скалзылэсь 4-5 килограмм гинэ йӧл кыско. Малы? Мугез одӥг - быре ни пудо сиёнзы, соин ӝикытаса гинэ сюдо. Зэм, выль кивалтӥсьсы В. Невоструев шуг-секытысь потон амалъёс утча, силос ворттыны ӧдъяз Глазов ёросысь но. Шуг-секытъёслэн кылдэмзы - колхозлы юрттэт сётымтэ бордысь но потэ, пудо утисьёслы толэзьёсын уждун уг тыриськы, ужан дисциплиназы ляб. Озьыен, ёрос кивалтӥсьёс ӝоггес мед берыктӥськозы пудо утисьёссы пала ымнырынызы но ӟеч мылкыдынызы. Пересьёсты уг вунэто "Большевик" эштосын бадӟым саклык висъяське пенсионеръёслы юрттон ласянь, ю тысь соослы вузаське дунтэм дунын, турнан возьёс сёто, пу вайыны транспорт но грузчикъёс висъяло, машина сёто висисьёсты райбольницае яке Ижевскысь республиканскояз ветлыны, коркаоссэс тупатъяло. Етӥн киземысь уз дугдэ Юкаменск. туэ ёросын 412 гектар музъем вылэ етӥн кизьыны чаклало, яке, кылем арен ӵошатыса, 141 гектарлы ятыргес. Тани "Ежовское" эштос гинэ, 30 интые, 100 гектар кизёз. Выльысь етӥн кизьыны кутскоз "Рассвет" эштос, отын вылэм на льнокомбайнзы но. Юан кылдэ: малы етӥнэз вунэтӥзы вал но кызьы нодзы тырмиз выльысь со борды басьтӥськыны? Хлопок кылиз кунгож сьӧры, СНГ-е, соин етӥн мертчанлэн дуныз чутрак будӥз. Эштосъёслэн кивалтӥсьёсынызы но агрономъёсын та ласянь бадӟым валэктон уж нуиз Юкаменскысь льнозаводлэн директорез В. Городилов. Пайдаез луиз. Нош гужемзэ ӟеч тыршизы ке, юкаменскъёс етӥнысьтызы трос коньдон потыны кулэ. Дун тыро кубистаен Юкаменск. Райцентрысь "Ладушки" нылпи садэ ветлӥсьёслэн лыдзы кызьлы кулэсмиз ни. Ляб улэменызы, анай-атайёс коньдон тырыны уг шедьто. Табере коньдон интые, отын бакча сиёнэн но басьто. Анай-атайёс дун чотын ваё картофка, кубиста но мукетсэ. Жаляса верано луэ: ваньмызлэн таӵе луонлыкъёссы но ӧвӧл. П. ПЕТРОВАНОВ. Астафьевлы - 75 Нырысетӥ мае бадӟым ӟуч писательлы Социалистической Ужысь Геройлы Виктор Петрович Астафьевлы 75 арес тырмиз. Россилэн Президентэз Борис Ельцин юбилярез ӟечкылаз 75 арес тырмеменыз, шуд но тазалык сӥзиз но бадӟым вормонъёсыз понна "За заслуги перед Отечеством" орденлэн ИИ степенё медаленыз пусйиз. Виктор Петрович 1942-тӥ арын йылпумъяз ФЗО-я Железнодорожной школаез но кӧня ке толэзь чугун сюрес вылын ужамез бере, ас мылкыд каремзъя кошкиз фронтэ. Батыр ожмаськемез понна пусъемын Горд Кизили орденэн но "За отвагу" медален. 1945-тӥ арын госпитальын йӧнатскемез бере кышнояське но улыны интыяське Пермь областьысь Чусовой городэ. Удмуртилы кыдёкын ӧвӧл бере, малпасько, асьме шаере но вуылэмез вань, дыр. Астафьев лыдӟисьёслы тодмо трос произведениосыныз: "Последний поклон". "Царь-рыба", "Стародуб", "Звездопад" но мукетъёсыныз. 1979-тӥ арын "Царь-рыба" книгаез понна СССР-лэн Кун премиезлэн лауреатэз луиз. 1989-тӥ арын бадӟым писательлы Социалистической Ужысь Герой ним сётэмын. Виктор Астафьев мылысь-кыдысь пыриське общественной улонэ. 1989-тӥ - 1991-тӥ аръёсы вал СССР-ысь калык депутат. Луэ Игарка но Красноярск городъёслэн дано гражданинзы. Али улэ Красноярск городын. Виктор Петровичлэн семьяез но туж тунсыко. Солэн кузпалыз - гожъяськись Корякина Мария Семёновна. Ож пыртӥ ортчем кышномурт луэ 12 книгалэн авторез. Соос пӧлысь тужгес тодмоосыз: "Отец", "Пешком с войны", "Липа вековая" но мукетыз. Тросэз-а литераторъёс сыӵе югдурен данъяськыны быгатозы? Уз, дыр. Е. КУЧУМОВА. КИЛЬМЕЗЬ ПАЛАСЬ ИВОРЪЁС Экономикаез дышето Колхозъёсысь кивалтӥсьёсын но специалистъёсын, ёросъёсысь но предприятиосысь кивалтӥсьёсын ортчытэмын хозрасчёт амалэз уже пыӵатон сярысь экономикая занятие. Люкаськемъёс азьын вераськиз Ижевскысь сельхозакадемиысь экономической наукая кандидат, доцент А. П. Кучерин но Удмурт Республикаысь гурт ужъёсъя дано ужась, Вавож ёросын Мичурин нимо колхозысь валтӥсь экономист Н. Н. Елышева. Казеин поттозы Кильмезьысь вӧй поттӥсь завод узырмыны быгатоз, казеин поттыны кутскыса. Май- июнь толэзьёсы со уж радъяськоз ни. Казеинэз юасьёс трос гинэ, тужгес но сое кулэ каро кунгож сьӧрын. Заводлэн кивалтӥсез В. И. Перевозчиков пусйиз, казеин поттон ӝегатске оборудование ӧвӧлысь. Сое басьтыны кулэ луоз 150 сюрс манет коньдон. Кильмезьысь промышленникъёс оско, та удысын ужась мукет заводъёс юрттозы шуыса. Тани одӥгез завод сушилка ӵектэ, нош мукетыз ванна. Казеинэз лэсьтонын обратэз кутозы. Нош обратлэсь кылемзэ - сывороткаез - мукет уже кутыны луэ. Тунсыко праздник Кемалась ик ӧвӧл Кильмезьысь "Солнышко" нылпи садын туж тунсыко праздник ортчиз. Отчы, нылпиос сяна, ёросысь куноос но ветлӥзы. Соос дӥсяськемын вал пор, бигер, удмурт но ӟуч дӥсьёсын. Та калыкъёслэсь дӥськутъёссэс тросэз пиналъёс книгаосысь гинэ адӟылӥзы. Нош та праздникын соос матысьгес тодматскизы котькуд калыкен. Удмурт культураез возьматӥз Паскино культурая юртысь ансамбль. Тылтэк кылизы Кильмезьын улӥсьёс нош ик ульчаосазы тылъёстэк кылизы. Азьвыл тылэз кысыло вал гужем матэктыку гинэ. Нош туэ энергетикъёс ӧз возьмалэ гужем вуэмез. Мартлэн кутсконаз ик урамъёсысь электротылэз кысӥзы. Таӵе югдур кылдӥз коньдон ӧвӧлэн. Туннэ нуналлы администрация электрикъёслы уждунлы 40 сюрс манет тырыны кулэ, нош электрокужым кутэм понна тыронъёс дас поллы тросгес. Юисьёс йыло Быдэ вуымтэосын ужанъя ёросысь комиссилэн кенешаз вераськон мынӥз юисьёс сярысь. Быдэ вуымтэос пӧлын юон, наркомания но токсикомания вӧлмонэз дугдытон бордын ужамез сярысь йылпумъянъёс лэсьтӥз ёросысь югдурез утёнъя отдел. Озьы ик та нуналэ ортчытэмын вал эскерон ужрад. Тодмо луиз: егитъёс тросгес юо огазе люкаськыса. Соослэн лыдзы йылэ но йылэ. Али милициын токсикоманиен выремзы понна учётын 2 быдэ вуымтэос сыло. Нош 24-ез юэмзы понна. Юисьёслэсь лыдзэс кулэстон милицилэн гинэ ужез ӧвӧл. Соин ваньмыз ӵош нюръяськыны кулэ. Соин валче улосысь администрация юнматӥз быдэ вуымтэосын но егитъёсын ужанъя программа. Кин тросгес кионэз ыбоз? Алям кионъёслэсь лыдзэс кулэстон борды рос-прос басьтӥськиз Киров улосысь пӧйшуръёсты утёнъя, соослэсь лыдзэс эскеронъя управление. Туэ со кионъёсты ыбылонъя конкурс ялӥз. Отчы пыриськыны быгато кызьы ке нимаз пӧйшурасьёс, озьы ик соослэн бригадаоссы. Конкурсын нырысетӥ вормисьлы 5 сюрс манет коньдон премия но лосез ыбыны дунтэк лицензия сётӥськоз. Кыкетӥ но куинетӥ интые потэмъёс басьтозы быдэн 3 но 2 сюрс манет коньдон но кыр парсез но гондырез ыбыны дунтэк лицензия. Н. ТУРИН. Киров улос, Кильмезь ёрос. БЫДӞЫМ ВОРМОНЛЫ - 54 Котьмалэн пумыз вань Чебер, шулдыр нуналэ быдэс дуннее вӧлмиз секытэсь ожъёслэн дугдэмзы сярысь ивор. Шумпотонэн пачылмись синвуосты нокин ӧз ӵушылы, адямиос ӧз возьдаське. Соос уго ньыль ар витизы та нуналэз. Бен, шумпотон гинэ ӧй вал, атайзэс, вынзэс, сузэрзэс, картсэс ыштэм пиналъёс, нылкышноос кӧтӝожзэс вормытэк синвуаськизы. Фашистъёсын аратэм война трос калыкез быдтӥз. Городъёс куашказы, гуртъёс сутскизы. Кӧня пиос но нылъёс ӧлексы кылизы! Аръёс ортчизы ке но войналэн бервылыз али но шӧдӥське на. Тани пурысьтам пересь, боды вылэ пыкъяськыса, ульчаетӥ каллен вамышъя. Война басьтӥз солэсь одӥг пыдзэ. Солэсь гинэ-а? Мукетызлэсь суйзэ но, пыдзэ но талаз. Трос, туж трос асьме музъем вылын войнаен сэрен вань улытозязы курадӟыса улыны кылем адямиос. Котьмар ке но войналэн дугдон нуналэз вал. Милям частьмы со вакытэ Словакиысь одӥгаз гуртын сылэ вал, Братислава городлы ог куамын иськемын. Тушмонэз ас караз зӥбломытэм бере, вырӟим Болгарие. Нош мыноно Венгрия, но Югославия пыр. Ож мыныку ми та странаосын вал ини. Адӟим Будапештлэсь но куашкамзэ, Белградлэсь но зуркамзэ. Табере выльысь соос пыр потоно. Син азьын Дунай вамен ёзнам выжъёс. Кык ярдуръёсты герӟа понтонной выж гинэ. Немец фашистъёслы кыӵе ке-а муртлэн ваньбурез. Выж усёз-а, корка куашкалоз-а - юась уз луы. Асьме солдатъёсты ӝегатон понна сьӧсь сямен тӥязы выжъёсты. Уй но нунал бомбаос пуштылӥзы Дунай вадьсын. Бадӟым город пыр потыку, сюлэм вӧсь луылӥз. Адями киосын, визьмын ӝутэмын вал ук Дунай дурысь чебер город. Зэм, мадьяръёслэн кузёоссы но янгыш вал таӵе адӟонэ вуэмзы понна. Соос ук йыбыртъязы Гитлер азьын. Нош калык курадӟонэ вуиз. Ожъёс мыныку, оло, ваньзэ дунъяны-жаляны ӧз луы. Табере война дугдэм бере, куашкам юртъёс шоры учкыса, сюлэм позырске. Ваньзэ выльысь лэсьтоно-ӝутоно ук. Кӧня кужым кулэ солы. Сыӵе малпанэн люкиським ми мадьяр музъемен. Азьпалан Югославия, славянъёслэн трос дауръем музъемзы. Татын уло сербъёс, хорватъёс, черногорецъёс но мукетъёсыз - эрикез яратӥсь калыкъёс. Татчы но Гитлер войскооссэ ыстӥз. Соосыз тузон понна асьме солдатъёсын артэ ожмаськизы партизанъёс. Югославиысь калык ӟеч тодэ тушмонлэсь сьӧсяськемзэ. Война куанермытӥз быдэс странаез. Тодэ лыктэ на Нови-Сад городын одӥг кышномуртэн пумиськеммы. Чылкыт ӟуч кылын вераське. Вылаз сурыкмем дӥсь, кышет улысьтыз мычкем йырсиез пурысьтамын ни, ӧжыт губырскемын. - Милые сыночки, - вазе со, - тӥ пӧлын ӧвӧл-а Харьковысь эшты. - Малы со кулэ луиз? - юаськом кышномуртлэсь. - Землякме ке но адӟеме потэ, кӧня ке бӧтьыртысалмы, оло сьӧраз басьтысал. - Ми, военнойёс, сьӧрамы басьтыны ум быгатӥське, нош землякед, зэмзэ но, вань. Но бергес вуоз со, машина ӝега сюрес вылын. Кызьы та мӧйы кышномурт Югославие шедем? Со сярысь ачиз но мадиз. Граждан ож дыръя, пе, тӧл татчы пельтӥз. Нош малы солэн землякез сьӧры калъяськемез потэ вал? "Секыт улонэз" вылэ ӝожтӥськиз. Туннэ, шуэ, пинь пулсам понымон но няне ӧвӧл, ӵуказелы но оскыны уг луы. Сьӧрамы куриськисьёс вал Белградэ вуытозь но. Куанер улонзылэсь пегӟон амал вал со. Ми валатэк ӧм кыле. Кыдёкын ӧвӧл ни Белград, Югославилэн шор карез. тани солэн ульчаосыз кутско ини. Городлэн пумаз бадӟымесь юртъёс ӧвӧл, котькудӥз аслаз корказ улэ. Шулдыр, шуныт нуналэ коркан пукод шат. Юрт доры, укно улэ пуктэм ӝӧк сьӧрын кенешо мӧйыос но егитъёс. Кин ке сур юэ, вазь вуэм емышъёсты куртче. Калык шутэтске, ульчаосын войналэн лек тулкымез уг ӵашеты ни. Милемлы шонало городын улӥсьёс. Колоннамы доры тэшкыли быдӟа ныл лыктӥз но черешнязэ мыче. Сие, пе, солдатъёс, со сяна кузьыммы ӧвӧл. Югославилы ожлэсь яраоссэ бурмытоно вал ай. Йыгмытгес султоно ӝутскон сюрес вылэ. Суботица, Нова-Сад, Белград, Ниш городъёс вискысь сюресъёс вылтӥ ортчытозь, войналэн бервылыз мылкыдэз сураз. Соиз, Гитлерен но солэн гыжкалъёсыныз ӝутэм война вал. Нош туннэ вир кисьтӥське НАТО-ен но США-лэн кивалтӥсьёсыныз пуромытэм ожмаськонын. Я Ирак гочатӥз соосты, я Югославия "уг кылзӥськы". "Мытылӥськод ке, тани тыныд", - шуизы соос бомбаосын тырмытэм самолётъёссэс эрикез тупаса улонэз яратӥсь страна вылэ келяса. Муг шедьтӥзы, Косов вылэ чӧлскизы. Бен, киосыз лыдӥсь муртлы жугиськон понна муг гинэ кулэ. Америкаысь ожгарчиослэн трос вир пызьыраз Кореяын, Вьетнамын, туннэ - Югославиысь городъёсын. Кыдёкын мон али Югославилэсь, сюрс иськемъёсын татысен Дунай шурлэн ярдуръёсыз. Но син азям пуктӥсько быдӟым Отечественной война дыръя вуылэм городъёсты но гуртъёсты. Соосты куашкато но суто НАТО-лэн но США-лэн бомбаоссы, ракетаоссы. Нокыӵе янгыштэм, сьӧлыктэм калык быре, кӧняез сӧсырме. Соин уг тырмы ай США-лэн президентэзлы, войнаез паськытатон вылысь правительствозылэсь трос коньдон куре на. Клинтон но солэн дурбасьтӥсьёсыз сербъёслэсь, черногорецъёслэсь музъемзэс "гольык" кельтыны малпало, вылды, собере вормеменызы ушъяськозы. Озьы Америкаысь калык азьын данзэ ӝутоз. Котьмалэн кутсконэз но, пумыз но луэ. Дыр вуоз, Югославия вадьсын инбам чылкыталоз. Нош куашкам городъёс, сутскем заводъёс понна кинлы ке но кыл кутоно луоз. Гитлер со сярысь ӧз малпа, шӧдске, ваньзэ вормыны, зӥбыны турттӥз. Нош калык суд азе султонэ шӧдӥз но ассэ быдтӥз. Уз, нокыӵе борддоръёс уз уте туала гитлеръёсты но калык судлэсь. В. СМИРНОВ, ожысь но ужысь втееран. ЮГОСЛАВИЯ Россия но война Россилэн туала историяз таӵеез ноку но ӧй вал на, дыр. Алигес гинэ "Общественное мнение" фондлэн ортчытэм юалляськонэз возьматӥз: 92 процентэз адямиос НАТО-лэн Югославия вылэ урдскемезлы пумит луо, 2 процентэз гинэ соослы дурбасьто. Россиысь тодмо политикъёс пӧлысь куинез та войнаез умоен лыдъяло - Новодворская, Боровой но Козырев. Амалтэк юан кылдэ: кыӵе мугез огкылысь пумит луонмылэн? Малпаськом, котькуд адямилэн та юанлы аслаз валэктонэз вань. Политикаын югдурез валасьёсты нырысь ик сюлмаськытэ асьсэды демократической страна шуисьёслэн калык куспо правоез тӥлмзы. Эрико государство вылэ урдскон кулэ луиз яке асьсэды утьыны, яке ООН-лэн Кышкытлыклэсь утиськонъя Кенешезлэн чакламезъя. НАТО-лэн Югославилы пумит война нуонэз дуннелэсь радзэ сураз-пожаз. Туэ мартлэн кутсконысеныз Музъем вылын кутскиз нокыӵе куронъёсыз санэ басьтытэк бадӟым "шудон". Политикаен вырисьтэм адямиос но валазы - вуиз куректон. Ожмаськон ялан паськытаз ке, азьланяз со уз муромы шуыса, оскон ӧвӧл. Косовоын пуромем граждан ожын бырем адямиос, НАТО-лэн пуштытъям бервылыныз ӵошатыса, куректонлэн пичи люкетэз гинэ луэ. Югославиез пуштытъямен ожгарчиос но огшоры калык пӧлын бырыны шедиз ни котькуд дасэтӥез пӧлысь одӥгез. Быремъёслэн лыдзы сюрсъёсын лыдъяське. Россиысь политикъёс та войнаез умойтэмен лыдъяло, соос дэмен ужан сярысь огкылэ вуизы. Но та веран кыл вылын гинэ быдэсме. Ваньмыз мукет сямен луыса кошке: кин ке буре, кин ке паллянэ. Югославилы ож тӥрлык келян пумысен Россия аспӧртэм "четлыке" шеде. Зэм, Югославилэн вань правоез юрттэт басьтыны, озьы ик ож тӥрлык ласянь но. Но Белградэ ож тӥрлык келяны лезёнтэм вылысь Кышкытлыклэсь утиськонъя Кенеш огкыл кутӥз. Таӵе ужрадлы Россия но дурбасьтӥз. Соин ик та документэз санэ ӧм басьтэ ке, асьмеос калык куспо правоез тӥялом но урдскылӥсьёсын огкылысь луом. Югославиен артэ интыяськем бускель государствоос уз лэзе отчы ож тӥрлык келяны. Нош кужмысь мерскон - со Россилэн аслаз войнае пыриськемез луоз. Россия гинэ быгатоз Балканын войнаез дугдытыны. Со понна асьмелы кулэ калык куспо правоез чакласа-эскерыса ужаны. Соин ик власьлэн ёзъёсыз огкылысь луыны кулэ. Та дырозь вань потэм ожъёс тупанэн кысылӥзы. Дуннеысь куинетӥез ожмаськон кутскиз ке, адями сое дугдытыны уз быгаты ни. Басьтэмын Интернет пыр. БЫДӞЫМ ВОРМОНЛЫ - 54 Кызьы улӥськоды, ветеранъёс? Кемалась малпам пумиськонэ быдэсмиз алигес гинэ. Тодмо героен лётчикен Нина Захаровна Ульяненкоен кыкетӥзэ вераськыса гинэ пумиськыны кылдӥз. Эн, эн малпалэ сокем дано муртлэн монэным, огшоры адямиен, пумиськемез уг поты вал шуыса. Мугез чылкак мукет: Нина Захаровна туж востэм, кепырась адями, асэныз данъяськыны уг яраты. Со доры сюлмаськыса мынӥ. Ма, война вакытэ та кышномурт кӧня фашистъёсты кышкатыса возьылӥз. Зэмзэ но, война ӵоже Ульяненколэн уин лобась бомбардировщикез 918 пол инбаме ӝутскылӥз. Пумиськи. Тани со "кышкыт" кышномурт син азям сылэ: шоро-куспо мугоро, чиед, муспотон. Нина Захаровнаен пумиськеме потӥз архивысьтым "Удмуртская правда" газетлэсь 1945 арын 3 январе потэм номерзэ шедьтэме бере. Отысь синйылтӥ егит нылашлэсь тусбуйзэ. тани мар гожтэмын вал газетын со сярысь: "Быдӟым Отечественной войналэн фронтъёсаз Горд Армилэн батыр воинъёсыныз артэ ожмасько асьме егит нылъёс но - Атай музъеммылэн оскымон нылъёсыз... Фашист тушмонъёсын кышкатэк нюръяське данъяськымон адямимы, гвардиысь лейтенант, лётчик Нина Захаровна Ульяненко. Солэн самолётэз ожмаськыны 780 пол лобӟылӥз ни. Командованилэсь куронъёссэ усто быдэсъямез понна Ульяненко куинь орденэн но медален пусъемын. Войналэсь азьло Н. Ульяненко дышетскиз Воткинскысь шор ёзо школаын". - Зэмзэ но, мон номырлэсь уг кышкаськы вал, - шуэ Нина Захаровна, - война бырытозь ялан лобай. Соин ӵош учкиськомы альбомысь туспуктэмъёсты, войнаен герӟаськемъёсыз 1942 арысен кутско. Тросаз снимокъёс вылын егит нылъёс - Нина Ульяненколэн ӵош ожмаськем эшъёсыз. Улэпесь на меда соос? Кызьы радъяськиз соослэн улон-вылонзы? - Али кадь ик соосты ваньзэсты син азям адӟисько, - маде кышномурт. - Тросэз улонысь туж вазь кошкизы. Матысь кусыпъёс возисько Руфина Гашеваен, Советской Союзлэн Героеныз. Улэ Москваын. Мон доры куное кык пол вуылӥз ни. Нош кызьы улэ Советской Союзлэн Героез Нина Ульяненко? Та юанэлы кышномурт кӧня ке могамез бере вераз: - Бен, мон но куке-соку туж тодмо адями вал, данъяллязы, табере - огнам. Улонме пайдаёгес карон понна, ӵыжы-выжыосылы, тодмоосылы тани пыдвылъёс керттӥсько... Шумпотонэз сокем ик уг адӟиськы. Сюлэмме туж вӧсь кариз СССР-лэн куашкамез, али тани туж куректӥсько Балканын ожмаськон кутскем сэрен. Кызьы озьы Европалэн шораз "тылпуэз" ӝуатыны лэзимы?! Вынлыко Югославия пумит шара ожмаськон мынэ. Мыным туж секыт ваньзэ сое кылыны - ведь кӧня славянъёс быдтэмын вал ортчемаз войнаын. Пумиськонмес йылпумъяса, Нина Захаровна газет пыр Быдӟым Вормон нуналэн ӟечкыланы куриз ожысь ветеранъёсты но фронт мышкын тыршемъёсты. Сӥзиз сослы тазалык, чылкыт инбам но шуд. Аслыз Н. З. Ульяненколы но сӥзиськом кема улон но ваньзэ умойзэ гинэ. В. ЛОГИНОВ, шаерчи, ужысь ветеран. Кунгож сьӧрысь сакыр песок Россиысь гурт удысъя но сиён-юонъя министрлэн нырысетӥ воштӥсез Владимир Щербак ивортӥз, сахарлы но сахар поттон сырьёлы таможня пыр поттэм дун будоз шуыса. Табере сахар пызьлы пошлина 30 процентозь йылоз, нош сахар поттон сырьёлы - вить процентозь. Со сяна, нырысетӥ августысен (кушманэз утялтон дыр) чакламын кунгож сьӧрысь ваем сахарлы пошлинаез 45 процентозь будэтыны, озьы ик ватсаны сахар поттон сырьёлы но. Правительстволэн малпамезъя, пошлина будэтон асьме дорын заводъёслы пайдаё ужаны юрттоз. Куд-ог улосвылъёсын, кылсярысь, Краснодарын, Пензаын, Курскын но Воронежын, музъем кузёос али ик дасясько ини сахар пызь поттыны. Соос оско, соку вуззылэн дуныз будоз шуыса. Озьы ке но, энергетикъёслэн лыдъямзыя, кунгож сьӧрысь поттэм сахарлы дунэз будэтӥд ке но, асьме дорын кушман кизись хозяйствоослы со пайда уз вайы. Та вакытэ Россиын одӥг тонна сахар пызьлэн дуныз 300-ысен 280 долларозь усиз. Кылем арын вузатэк кылемын одӥг но ӝыны миллион тонна сахар. Матысь дыре эшшо 300-500 сюрс тонна сахар песок лэсьтыны сырьё кунгож сьӧрысь вуттозы. Тӥни озьы, кунамы сахар пызь 80 процентэз кунгож сьӧрысь вуттэмын, нош 20-25 процентэз гинэ асьме дорын поттэмын. Озьыен, Правительстволэн пошлинаез будэтон сярысь кичӧлтонэз музъем кузёослы уз юртты ни. Иворъёсъя национальной служба. Вузкарисьёслы ӟечкылан Удмурт Республикаысь Правительстволэн кивалтӥсез Николай Ганза ӟечкылан телеграмма ыстӥз шаерысьтымы потребительской кооперация удысын ужасьёслы. Туэ нырысетӥ куинь толэзьлы йылпумъянъёсъя Россия Федерациысь Центросоюз. Удмуртпотребсоюзлы кыкетӥ инты сётӥз. Телеграмаын тужгес но ӟечен пусъемын Кизнер но Пичи Пурга райпоослэн ужамзы, соослы нырысетӥ интыос сётэмын. Удыссэс пайдаё радъяло Красногорскысь, Селталась но Воткаысь райпоос. Николай Ганза потребительской кооперациын ужасьёслы сӥзиз юн тазалык, ужын выль азинсконъёс. Удмурт Республикаысь Правительстволэн Председателезлэн секретариатысьтыз пресс-центр. Кылдӥз выль удмурт ансамбль Куд-ог культурая юртъёсын но дворецъёсын кылдыло удмурт коллективъёс, нош кӧня ке ар улыса быре. Трос аръёс ӵоже ини "Ижмаш" культура дворецын ужало удмурт калык театр но "Тюрагай" Удмурт калык хор. Соосын быгатыса кивалто Анатолий Андреевич Митрофанов но Валерий Яковлевич Митрофанов. Дас арлэсь кема ини ужало "Инвожо", "Чипчирган" но "Зангари" ансамбльёс. Дас арлэсь ӧжытгес кырӟаз-эктӥз "Октябрь" культура дворецысь "Бӧляк" ансамбль. Собере со быриз но, татын кӧня ке ар ӧз ни чузъяськылэ удмурт гуръёс. Али татын нош ик кылдытэмын удмурт коллектив. "Бускель" ансамбле арлэсь кема ини ветло удмуртлыкез яратӥсьёс. Ог кызь пала кызьпу кадь веськрес апайёсты но тыпы кадь таза пиосты люказ Федор Захаров. Культурая училищеез йылпумъяса, со кӧня ке ар "Италмас" ансамбльын ужаз. "Инвожоен" но кивалтылӥз. Бӧрысь ас мылкыдызъя коллектив кылдытэмез потӥз. Шаплы шудэ баянэн, арганэн, балалайкаен, соин но, дыр, солы малпанзэ быдэстыны туж секыт ӧй вал. Табере ансамбле быдэс семьяен ветло. Отын кырӟало-экто кузпалыз но кык нылыз. Алигес ог сизьым пол концерт возьматӥзы ини. Нырысь шаерысьтымы гуртъёсы потазы, нош берлогес, апрельлэн пумаз, бадӟым концертсы вал "Октябрь" культура дворецын. Калык зал тыр люкаськиз, унозэ кырӟанъёссэс лыктэмъёс кык пол быдэстыны курылӥзы. Час но ӝыны мынэм концерт калыклы яраз. Озьыен, кылдӥз ӟеч удмурт ансамбль. Я, "Бускель", сюресэд яркыт мед луоз. Н. ВОЗИСОВ. КЫСЫК ВАКЫТ Кызьпу гурыяське - мертты картофкадэ Музъем ужасьлы озьы кылдэмын ни: тулысысен бер сӥзьылозь вань праздникъёсты бусыын пумита. Тани майлэн кутсконэз но вадьсаськиз кысык вакытэн. Завьялово районысь "Путь Ильича" колхозын луоё муос котьку но вазьгес вуо. Одӥг- кык нуналлы беромид ке, кӧс песок вылэ кизёд-мерттод. Вырйыло-вырйыло музъемысь мускытэз сӥс пыр кадь кошке, вылаз ик, дугдылытэк пельтӥсь тӧл бераз ваньзэ куасьтыса кельтэ. Тӥни малы котькуд минуттэ, частэ туж эсэпаса кутоно. Нош ужъёс тымиськемын. Вань ни ыштонъёс но. Музъем йӧскадь кынмымтэен, пурысьтаны, сисьмыны шедиз ӟег уд. Ӝынызэ пала выльысь кизёно луиз. Дыртыто валэс юос но. Соос туэ 400 гектарлэсь ятыр чакламын. Татын нуналлы быдэ ужа ньыль агрегат. Праздникъёс вылтӥ ог 300 гектарзэ кизизы ни. Та удысэз нуо Эдуард Стрелков, Василий Шкляев, Дмитрий Александров, Павел Байкузин. Механизаторъёс котьку ог-огзэс воштыны дась: кинлэн техникаез тӥяське яке мукет муген сылоно ке луэ, интыяз соку ик ужась ысто. Огдыре мынэ бусыосы кыед ворттон. Тужгес но со кулэ картофка улэ. Туннэ нуналлы 400 тонна ёрос муос вылэ поттэмын ни. Та ужез чупрес быдэсъяло шофёръёс Анатолий Бочкарёв, Леонид Минеев, Леонид Моторин но мукетъёсыз. Котькуд рейсэз чаклало, мертало, озьыен, тодмо луэ: кыӵе бусые кӧня тонна органика шедиз, кӧня урожай отысь басьтыны луоно. Солэсь радзэ эскере Фаина Тимофеева. Якшуръёс арлы быдэ бадӟым саклык висъяло картофка будэтонлы. "Кыкетӥ няньзы" котькыӵе арын но удалтэ, шуыны луоз. Сое быгатыса доразы ик толйыто, асьсэос вузкаро. Берло кык-куинь арзэ пырак колхозэ басьтӥсьёс вуо ни. Асьсэ машинаосын лыктыса нуо Москва, Ленинград, лымшор пала. Туэ но картофкалы осконзы бадӟым. Праздник нуналъёсы татын ужаз кык агрегат. Нырысь потэмен ик 12 гектар мерттӥзы. Отӥяз, соосты кизёнэз йылпумъяса, бушам техника быдэсак выжоз картофка вылэ. Нош али котькудӥз машина, котькудӥз трактор лыдэ басьтэмын. Огез муосты гыре, мукетыз усыя. Дыр вуэ силос культураосты кизьыны, турынъёсты утялтыны. Огъя вераса, гуртын али кысык вакыт: шутэтскыны ноку. Колхозникъёс, 1 майысен кутскыса, бакчаосазы но картофка мертто ни. Гурт бадӟым бере, валлы, герылы черод тупатэмын, дун пуктэмын. Тулыс ужъёс понна котькуд семья тыре 60 манет, сӥзьыл гыремлы - 15. Мылкыд карисьёсызлы хозяйство кыедэн но юрттэ. Тулыс дыртытэ. Со понна толзэ гань-гань шутэтским. Табере ас азяд но, калык азьын но экзамен сётоно. Озьы - арлы быдэ. Л. МЕДВЕДЕВА. Нянь будэтэ - уждун уг тыро Кияса ёросысь"Рассвет" эштосын 26 ар ӵоже ни механизатор луыса ужа Александр Леонидович Королев. - Котькыӵе дыр вал ни, - маде со. - Гырон-кизён но ю-нянез утялтон вакытэ нуналаз 12 часэн ужалляй, нош муосты согытэк но ю тысез октытэк ӧй кельтылы, нянь бордысен кутске угось вань узырлыкмы, сотэк пудо но уд ворды, пайда но уд потты. Александр Леонидовичлы техникаен али оскемын МТЗ-82 трактор, но сое тулыс кизёнлы ӟеч дасяны шугъяське, малы ке шуоно, колхозын уксёзы ӧвӧлэн тырмыт воштос ёзъёс басьтыны уг быгато. Но мӧйы механизатор витьыса гинэ уг улы, ачиз тырше вуж детальёсты тупатъяны. Паймымон соиз но: ар но ӝыны ни Королев уждун басьтытэк ужа, семьяеныз улэ бакча воземез но пудо-живот вордэмез чотын. Чидатске адями, озьы но ӟеч тырше, азьланезлы оскыса. П. НИКОЛАЕВ. Туспуктэмез В. Беломорскихлэн. ГАЗЕТМЫЛЭН ЭШЪЁСЫЗ 15 сюрс пӧлысь - огез Милемыз тодо но чидатэк витё 15 сюрс семьяын - сомында лыдӟисез "Удмурт дунне" газетлэн та вакытэ. Ми понна котькуд адямиен пумиськон - туж матысь ӵыжы-выжыеныз адскон кадь. Тани алигес гинэ вуылӥм Игра вӧзысь пичигес гинэ Лоза гуртэ. Татын улӥсь Лекомцевъёс тодмо луизы "Валентин но Валентина" конкурсамы, пыриськыса. Нуназе шорын кузпалъёс кыксы но уже кемлазы, но гуртазы корке утисьсы-возисьсы кылемын. Нэнэйзы, Клавдия Григорьевна, черсэм ужен пумен улэм-вылэмзэс но вераз, калыклэн сюлмаськонъёсыныз но тодматӥз. Сюрес вылэ потон азямы пӧсь чаен, пельнянен, ческыт кубистаен но утялтӥз. Гуртын сыӵе ини сямзы: сьӧрлось вуэм муртэ ӝӧк сьӧры пуктылытэк уз лэзе. Утялтыны но маин вань уго. - Ачим кемалась пенсиын ни, гурт котырысь ужез кызьы пӧрмытӥсько нуисько, - вераськонзэ мытӥз Клава апай. - Вордски та районын ик, Ыжнюк гуртын. Улытозям олокытын но ужаны кылдӥз: колхозын но лэсьтӥськонын но, почта но нуллӥ. Газет соку собыдӟа сумкае уг тэры вал - тӥни кӧня калык лыдӟиськиз! Ми палан тужгес но трос басьтизы "Советской Удмуртиез" но "Светлый путь" райгазетэз. Одӥг семья но гожътӥськытэк уг кыльы вал. Черс бергамъя, пумен ушъяськыны вуиз: - Та кубоме Удмурт Лозаысь эмеспимы, Макаров Семен Игнатьевич лэсьтӥз. Олома но пӧрмытэ - киыз котьмалы мынэ. Кроватьмы но солэн кузьмамез, шкафъёс, стенкаос но лэсьтэ. Нош тазэ дӥсь возёнэз Сергеймы пӧрмытӥз ни. Армиысь бертэм Сергей внукеныз тодматэ но данъяське Клавдия Григорьевна. Асанын дышетскись Катя нылзы но одӥг-кык нуналлы адскыны бертэм. Песянай понна со зэмос праздник! Улон капчи ӧвӧл ке но, гурт калык ӝожтӥськыны дышымтэ. Ма быгато-будэто, сиёнлы- юонлы уг ёрмо. - Пенсие - 388 манет, мартэ январь понна сётъязы. Мынам ёзъёсы, 1932-тӥ арын вордскемъёс, льгота улэ шедьизы, монэ, арлэн пумаз вордскемын шуыса, отчы ӧз пыртэ ни. Таиз понна Клава апайлэн кӧтыз бӧрдэ ик. Законэз малпасьёс кутӥзы но, ас тодэмзыя-валамзыя, ӵош будэм-ужамъёсты чутрак вандӥзы. - Умойтэм со, калыкез валатэк вӧсь карон: неужто гужем шорын вордскем мурт толалтэ вордскем эшезлэсь ятыргес ужаны вуиз? Лекомцевъёслэн семьязы калыклэсь куанер но, калыклэсь узыр но уг улы. Пудо вордо, бакча утялто, валзы но асьсэлэн. Картофка мерттон дыр ке вуэ, гуртооссы доразы черод каро ни - одӥг муртлы но алэмзы ӧвӧл. Валэз гинэ медаз вӧсь каре-шукке. Калыклэн нимыныз Клавдия Григорьевна туж куриз на гуртазы радио кыскон ласянь юрттыны: - Юбоосты октябре октӥзы но - ӧз пуктэ ни. Быдэс гурт табере радиотэк кылиз, пеймыт гуын кадь улӥськом. Езлы, пе, коньдон ӧвӧл. Район, оло, ми сярысь вунэтӥз ни. Туж оскиськом депутатмылы Софья Эльфатовна Широбоковалы, со одно ик юрттоз шуыса. Тӥни сыӵе сюлмаськонэн-малпанэн улэ Лоза гуртысь лыдӟисьмы. Ми но шумпотысалмы, "Удмурт дуннеен" ӵош корказы выльысь улӟысал ке ивор вуттӥсь радио куара. Л. МЕДВЕДЕВА, Г. РОМАНОВ, В. КАМАШЕВ (фото). Берга, берга черсэл бине тодэ ваёнъёсты... Семьялэн осконэз. Маршаллы - 100 арес Вятка губерниысь Бадӟым Уча волостьысь пичигес гинэ Полянское гуртын 100 ар талэсь азьло вордскиз авиациысь маршал В. Я. Фалалеев. Владимир Яковлевичлэн нимыз тодмо луиз Быдӟым Отечественной война вакытэ. Чагыр инбаме сюрессэ со мытӥз 1932-тӥ арысен. Дано военачальник быгатыса кивалтӥз Москваез но Сталинградэз, Украинаез но Прибалтикаез тушмонлэсь мозмытонъя ожъёсын. Владимир Фалалеевез та нуналъёсы тодазы ваизы ожысь но ужысь ветеранъёслэн Ижевскысь клубазы люкаськемъёс. Таиз пумиськон сӥземын вал В. Я. Фалалеевлэн вордскемез дырысен 100 ар тырмонэзлы дасяськонлы. Маршаллэн улэм-вылэмез сярысь веразы Вооружённой Кужымъёслэн ветеранзы, азьвыл лётчик Ю. С. Вилков, Владимир Яковлевичлэн племянникез, инженер П. А. Мезрин. Писатель но журналист, элькунысьтымы ветеранъёслэн советазы ужась Л. П. Емельянов тодматӥз дано землякмылэн сю ар тырмонэныз валче ортчытоно ужрадъёсын, вераз Фалалеевлы сӥзем книгаез бордын ужамез сярысь. Ветеранъёс тодматскизы ог-огзылэн военнопатриотической уж нуон амалъёсынызы. Ижысь 71 номеро школаын кемалась ужа ни ожысь батыръёслы сӥзем музей. Отын бадӟым инты висъямын В. Я. Фалалеевлы но. Пумиськонэ ветлэмъёс азьын вераськиз музейлэн кивалтӥсез Р. М. Сонина. Первомай ёросысь пинал лётчикъёслэн школазылэн ужаменыз тодматӥз Т. Н. Торохова. Нош кыӵе но пайдаё ужрадъёс ортчытъя вылэм 62 номеро школаысь авиацилы но космонавтикалы сӥзем музей. Азьланяз пиналъёслы но егитъёслы Родинадэ гажан мылкыд сётонэз уката муромытон сярысь малпанъёссэс усьтӥзы элькунысьтымы военной комиссарлэн воштӥсез Ф. З. Хузин но Ижевскысь ветеранъёслэн советсылэн кивалтӥсез Б. Г. Аминов. Пумиськонын чузъяськизы маршаллы сӥзем выль кылбур чуръёс. Лыктэмъёсты тужгес но шумпоттӥз тодмо крезьгурчи Г. М. Корепанов-Камский. Дано землякмы сярысь со аспӧртэмлыко кырӟан кылдытэм, кылъёсыз но, крезьгурез но аслаз ик. Фалалеевлэн юбилеезлы сӥзем ужрадъёс вуоно толэзе ортчозы Ижын, Можгаын, Бадӟым Уча но Вавож черкогуртъёсын, Полянское вордскем гуртаз. Асьме доры Москваысь лыктозы маршаллэн ӵыжы-выжыосыз, ӵош дышетскем но ожмаськем эшъёсыз. В. НИКИТИН, ожысь но ожысь ветеранъёслэн элькун комитетысьтызы тӧролэн воштӥсез. МОЖГАЛАСЬ ИВОРЪЁС Эмъя секыт висисьёсты Берло дыре тодмо луиз Москваысь А. И. Бобырь докторлэн сюрлыез эмъян амалъёсыз. Со дорын дышетскиз Можгаысь невропатолог О. Б. Байкузин но. Остеохондрозэн дораз эмъяськем адямиос ваньзы бадӟым тау каремзес верало. Азьло кутӥськись амалъёс кемалы пе, уг юртто вал, та эмъясьлэн гинэ киосыз бордысьтызы вань висёнзэс палэнто. Висисьёслы нимысьтыз кинофильм но возьматӥське, со нимаське "мон берыкто тӥледлы тазалыктэс". Лекция лыдӟон уг вуны "Знание" обществолэн лекторской группаез - ужзэ азьланьтэ. Ортчем арня нуналэ "Спутник" клубын лыдӟемын Можгалэн калдэмезлы сизем лекция. Вишуръёс шумпотто Можга. Ёросысь нимысьтыз комиссия та дыре тулыс гырон-кизён ужлы кызьы дасяськемез эскере. Тани вишуръёс возьматыны дасяллям 19 тракторзэс - соос ӵыж выль кадь буямын, резина поглянъёссы вошъямын. Экзаменэз огучкемен ик ортчизы 15-ез тракторъёс, ньыльзэ эшшо кӧня ке тупатъялозы на. Гостехнадзорлэн начальникез тужгес но пусйиз механизаторъёслэсь Д. Конышевлэсь, И. Федоровлэсь, В. Петровлэсь, В. Трефиловлэсь но В. Овчинниковлэсь сюлмысь тыршемзэс. Соослэн техниказы ӟеч ужа. Вишуръёс озьы ик тырмыт ворттыса дасяллям ни кизер эстӥськон но вӧй. Ваньмыз со оскон кылдытэ, бусы ужъёссэс соос ӝегатскытэк но вылӥ ӟечлыкен гинэ ортчытозы шуыса. Кидыссы тырмыт но ӟеч Ёросын ортчытэмын ни кидыс дасянэз эскерон. Валэсо культураослы кидыс мултэсэз но дасямын, ватсаса висъямын 240 тонна вылӥ ӟечлыкен кидыс. Трос аръем турынъёслы кидыс дасямын 150 тонна. Бакча емышъёслы кидысъёсын туэ вузкаро ужбергатӥсьёс Н. Загуменова но Е. Шишлева. Эскерыса тодмо луиз: соослэн но кидысъёссы ӟеч удало. Кидыс эскеронъя инспекцилэн кивалтӥсез Н. Молчанова шумпотэ: умой кидыслэсь гинэ умой урожай басьтод. Олимпиада - тодон-валанэз возьматон Озьы малпало Можга ёросысь дышетӥсьёс но дышетскисьёс. Нылпиос арлы быдэ даслэсь уно предметъёсъя ӵошатсконъёсы пырисько. Тодон-валанъёссыя учконо ке, туэ азьпалан мыно Бадӟым Учаысь дышетскисьёс, соос сьӧры уисько можгаос но пычасъёс. Дас кыкез вормисьёс республикаын ортчем олимпиадаосы ветлӥзы ни, куд-огез - Москвае но. П. Скобелев. Ултӥяны уг яра Калык вера, кулэм муртэ ултӥяны уг яра шуыса. Озьы ке но, куд-ог газетъёс урод кылъёсын мыскылляса гожъяло азьвыл вождьмы В. И. Ленин сярысь. Соин валче Владимир Ильичлэн вордскемез дырысен 129 ар тырмонлы сӥзем ӝытэ Ижевскысь Кун филармонилэн Бадӟым залаз люкаськем калык юн йыркурзэ вераз таӵе гожъясьёслы. "АиФ Удмуртии" газетын Ленинэз Гитлерен артэ пуктӥллям, "Геноциды ХХ века" шуыса гожтӥллям. Озьы туж янгыш лэсьтэмын. Ленинэз ваньмыз сямен ожысь но ужысь ветеранъёс гажало. Вунэтоно ӧвӧл, Ильичлэн визьмо верам кылъёсыз но дышетэмез али ке но улонэ пыӵатыны ярамонэсь. В. ЧЕРНОВ. ТЫЛОБУРДО ВОРДӤСЬЁС ДОРЫН Ӵӧжпилы - Можгала Котьмалэн - аслаз дырыз, чипы-курег басьтон-вордонлэн но. Бадьпу пучы усьтӥськиз ке, озьыен, чипы, ӵӧжпи уськытон дыр вуиз: Птицефабрикаын та нуналъёсы кысык вакыт. Сюлмаськонзы тодмо - макем чупрес али ужалод, сокем трос пайда поттод. Гужем вылтӥ чипы-курег уго уз басьтэ ни. Можга городысь инкубаторе азьвыл аръёсы уйшор бере ик черод куто вал, продукцизэс пӧртэм палъёсы вожмаськыса нуллӥзы. Али сомында калык уг люкаськы ни: басьтыны но, вордыны но, сюрес дун но дуно. Но можгаос та югдурысь потыны амал шедьтӥзы. Алнаш, Кизнер, Можга палась хозяйствоосын ӵош ужан сярысь огкыл гожтэмын. Соя вуоно урожай чотын гуртъёсы тылобурдо келяло, отысь гужем пумын ю тысь ваёзы. Нош чипы-курегез калыклы люкыло уждун интые. Умой ук: сюрес вылэ коньдондэ но уд кушты, дырыд но уз быры, черодын но сылонэз ӧвӧл - пырак гуртад ваёзы. Тылобуро удыс сярысь оглом ке верано, со берло кык-куинь аръёссэ бурдъяське ни. Шӧдоно тае можгаосъя но. Николай Алексеевич Григорьев, птицефабрикалэн кивалтӥсез, куатетӥ арзэ директор луыса ужа. Со дыръя тросэз воштӥськиз, умой пала берытскиз. Музон интыосын калыксэс кулэсто ке, татын ог 20 муртэ ватсаса кутӥзы, малы ке шуоно, удыссы ялан паськыта. Сизьым корпусын туннэ 21 сюрс пузась курег возё, чипыосты, ӵӧжпиосты вератэк. Инкубаторлы кутскон сётэмын вал 1932 арын. Солэн вужмем пу юртэз али но сылэ на, ортчемзэ тодэ вайытыса сямен. Кык ар талэсь азьло птицефабрикаос радэ пыртӥзы. Валтӥсь удыс луиз пузась курегъёсты вордон но курег пузэн вузкарон. - Тазьы ужанлэн пайдаез вань, - шуэ Николай Алексеевич, - мукетъёсыныз ӵошатыса, курег йырмы ӧжытгес ке но. Курег пузэз калык басьтэ, куинь нуналлэсь ятыр магазинъёсын уг кылльы. Тылобурдо фабрикалэн экономикаез, кылем арен ӵошатыса, туэ И квартал ӵоже шӧдскымон азинскиз. Со сярысь верало улӥын сётэм лыдпусъёс. Пузась курег уллё йылӥз 6 сюрслэсь ятырлы. Валлян арын куинь толэзь ӵоже ваньзэ 370 сюрс курег пуз басьтэмын ке вал, туэ та дыр куспын ик - 830 сюрслэсь ятыр. Таяз арын вузаны но кык поллы ятыргес шедиз. Продукцилэн асдуныз ӧжытаклы кулэсмиз: 6 манет но 76 копейкаысь усиз 6 манет 58 копейкаозь. 17 августэ чутрак воштӥськон ӧй ке луысал, валамон, курег пуз трослы дунтэмгес сылысал. Тылобурдо вордонлэн пайдаез (рентабельностез) нырысетӥ квартал ӵоже вуиз 210 процентозь, миым арен ӵошатыса, куинь поллы йылӥз. Можгаослэн мылкыдзы вань вылэм тылобурдо лыдзэс но будэтыны - уг тырмо гидъёссы. Нош выльёссэ пуктыны коньдонзы ӧвӧл ай. Вань поттэм уксёзы кошке пудо сиёнлы, минерал ватсэтъёслы, шуныт, югыт понна тыронлы, уждунлы. Таяз арын птицефабрика улэ ни пунэме пырытэк, уждун но дыраз тыро. Шорлыдын толэзь ӵоже со 780 манет луэ, озьы пусъемын огъя кутэм договоръя. Уксё интые басьто сиён-юонэн, тылобурдоен но. Та вакытэ арня ӵоже дас сюрс чипы потто. Ваньзэ вузало. Умой басьто 14-15 сутка улэмъёссэ, пузась курегъёсты. Республикаысь птицефабрикаос пӧлын Можгаын гинэ выро на ӵӧжпи будэтонэн. Но али трос уг вордо: районзы поннагес гинэ. Ӵӧж пуз ваё Башкириысь "Благоварская" птицефабрикаысь. - Туэ поттэмъёсыз пӧлысь кӧня ке йырзэ толйытом, - шуэ Н. А. Григорьев. - Бордазы мумы ӵӧжъёсты Башкириысь басьтом на. Тулыс соос пи поттозы ни. Озьыен, гурт калык вуоно арын тросгес ӵӧж уллё уськытоз. Можгаос солы туннэ ик дасясько ни. Чипы поттыны асьсэлэн борды ватсаса курег но курег пуз ваё Уваысь. Николай Алексеевич верамъя, курегъёссы отын ӟечгес пузало, умой пуктэмын ветеринарной службалэн ужез. Туэ нырысьсэ ай отысь басьтӥзы 11 сюрс будэтэм чипыосты. Курег сярысь, дунтэмгес усё. - Ми шоры но государство берло дыре учкыны ӧдъяз кадь: сётӥзы план, юрттэтэн но оскыто. Озьыен, тылобурдо вордон удысэз уз аналтэ, продукцимы кулэ бере. Можгаосты Вараксиноен но, Ижевской птицефабрикаен но артэ туннэ уд султыты: соосыз бадӟымесь, курег сӥль, курег пуз быдэс шаермес сюдымон потто, сыӵе ик быгатонлыксы Глазовысьёсызлэн. Соос ик рынокын дун но пуктыны быгато. Пичиезлэн кужымез ӧжытгес бере, таосызъя кариськоно луэ. Йӧллы сӥльлы дунъёс будэмен ӵош, дунояз курег пуз но. Со чотын ик тылобурдо удыс капчиенгес шокчиз: пунэмаськемъёссэс тыризы, коньдон вылэ вуизы. Озьытэк чорыг но лы пызь тырмыт басьтыны ӧй быгатысалзы. Ваньмыз ог-огеныз герӟаськемын. Ар ӵоже курег сиёнлы кулэ ог 700 сюрс манет. Троссэ ватсэтъёсты басьто республикамылэн палэнысьтыз. Минерал суралтэт понна, кылсярысь, ветло Йошкар-Олае. Одӥг пол ваемез гинэ 34 сюрс манет усе. Ӟеч курег пуз басьтон понна будос вай но, мукетыз но кулэ. Гуртын ведь асьмеос дышемын тылобурдолы ю тысь но картофка кисьтыны, татын сюдо, рационэз чакласа. Соин ик ваньмыз сямен курегъёссы, тол вылтӥ но нуналлы быдэ пузало. - Удысмес паськытатыса но басьяськисьлы ум ёрме, - азьланезлы оскыса вера тылобурдо фабрикалэн директорез. - Предприятимылэн интыез туж умой - бадӟым сюрес вӧзын. Соин ик дорамы вуо пӧртэм регинонъёсысь машинаос: кулэ вуз но ваё, милесьтымзэ но нуо. Ӝоггес выль корпусъёс ӝутоно на вал, соку эшшо но луонлыкъёсмы будысалзы. Николай Алексеевичлэн со - тужгес но бадӟым сюлмаськонэз. Директорлэн гинэ-а? Быдэс коллективлэн. Адямиос ас вылазы шӧдӥзы ни ужзылэсь пайдазэ: макем трос лэсьтод - сокем ӟеч улод. Доразы тани чагыр эстӥськон но вуиз ини. Шунытсы тырмоз. Гурт удысъя министерство ӵӧж вордыны нимысьтыз коньдон висъяз. Дыраз гинэ со мед вуоз вылэм. Сыӵе югдур Можгаысь тылобурдо вордон фабрикаын. Гурт калык понна сюлмаськемез та предприятие понна ӟечен ик мед берытскоз. Соку магазин ӝажыосы вуылэм зарезь сьӧрысь курег, курка но ӵӧж макесъёс урод уйвӧтысь адӟем суред кадь гинэ улонамы кыльысалзы на. Шонерзэ ке верано, соослэсь интызэс али басьтозы ини асьме дорын будэтэмъёсыз. Огез жаль: дунъёссы кисыосмылы уггес тупало, коньдон коньдон сьӧры уиськыса уг вуы. Людмила МЕДВЕДЕВА. Фотоосыз Владимир КАМАШЕВЛЭН. Николай ГРИГОРЬЕВ - "Можгинская" птицефабрикалэн кивалтӥсез. Ветеринарной врач Галина САФИНА. Чипыосты утялтэ Алевтина НЕСТЕРОВА. Атас уллё, пузась курегъёс оскемын Ираида ГРИГОРЬЕВАЛЫ. Ӵӧжпиосын выре Нина БЕРЕЗКИНА. ЖУРНАЛИСТЪЁСЫН ПУМИСЬКОНЪЁС Быръёнъёс ортчизы - нюръяськон мыноз на Нырысетӥ май азьын трос ужпумъёсъя малпанъёссэ журналистъёслы усьтӥз Кун Думалэн депутатэз Андрей Владимирович СОЛУЯНОВ. Со вераськонзэ кутскиз пӧсь ужпум бордысен: республикамылэн Кун Кенешаз быръёнъёс пумысен. - Быръёнъёс туж секытэн мынӥзы. Уго кык бадӟым политической группалэн нюръяьсконзы республикаямы азинске на. Быръёнъёс ортчыса но, нюръяськон мыноз. Куд- ог округъёсын быръёнъёслэн умойтэм радъяськемзы пумысен судэ вазиськонъёс вань. Кылсярысь, бырйисьёслэсь куаразэс коньдонэн басьтон учыръёс шараямын 33 номеро Ворошилов округын. Депутатэ ортчем кандидат А. Галеев нокинлэсь кепыратэк тазьы шуэ: "Вормон понна вань амалъёс тупало. Кинлэн ужез, кызьы мон ворми". Сыӵе учконэзлы мон чутрак пумит. Матэкто Кун Думае быръёнъёс. Мар луоз, котькуд узыр кандидат коньдонэн куараос бичаны кутскиз ке. Жаляса верано, Галеев сямен малпаськисьёс туала депутатъёс пӧлын но вань. Соинтэк-а Кун Думаын но "ужало" 2-3 пол суд улэ кыскылэм, пытсэт сьӧрын пукылэм депутатъёс. Сыӵе учыръёслы пум понон вылысь юнматоно быръёнъёс сярысь законэз. Законэз тӥяса, Кун Кенеше ортчем депутатъёс пумысен ми, Кун Думаысь "Россиысь регионъёс" группае пырись депутатъёс, нимысьтыз вазиським Удмурт Республикаысь Прокурорлы В. Походинлы. Кун Кенешлы но Правительстволы кивалтӥсьёс быръемын. Мар малпа со пумысен Москваын ужась депутатмы? - Кинэ быръёзы Кун Кенешлы Тӧрое, азьпала ик вераны луэ, дыр, вал. Вормиз со, мар асьмелы али тужгес но кулэ: ваньбур поттонэз ӝутон. Соин ик промышленной предприятиослэн кивалтӥсьёссылэн но ужбергатӥсьёслэн фракцизы Кун Кенешын тужгес но бадӟымез луиз. А. Волков ньыль ар куспын трос янгышъёс лэсьтӥз, но со куспын кыдаз но. Малпасько, кадръёсъя ужпумъёсты со шонер йылаз-пумаз вуттӥз ке, данэз луоз. Н. Ганзаез тодӥсько, туж чурыт адями шуыса. Соин ик оскисько, сыӵе адями Кун Кенешлэн кияз шудонлы уз пӧрмы. Зэмзэ но Чепецкой механической завод солэн кивалтэмез улсын ӝутскиз. Туннэ дуннеын кык завод гинэ цирконий поттэ. П. Вершинин сярысь тазьы шуысал: сыӵе визьмо но бадӟым опытэн адями ужтэк уз кыльы. Тӥни сыӵе вакчияк дунъет сётӥз асьме азьветлӥсьёслы А. Солуянов. Калык кусыпъёсын герӟаськем ужпумъёсъя юанъёслэсь со палэнскыныгес выриз. Шуиз гинэ, монэ но, пе, соос сюлэмшугъяськыто, кышное удмурт, тросэз эшъёсы - бигеръёс. Ноку ӧй лыдъялля, адямиосыз нациосъя люкылыны кулэ шуыса. Быръёнъёсын сэрен калыкмы огдырлы палэнэгес кылиз Россиын но дуннеын кылдэм югдурлэсь: президентлы импичмент ялонлэсь, Скуратовен кылдэм югдурлэсь, Югославилэсь. Со дыре ик Кун Думаысь депутатъёс та ужпумъёсъя ялан но ялан кенешылоно луо. - Мон лыдъясько котькыӵе власть ас ужъёсыз понна калык азьын кыл кутыны кулэ, - шуиз А. Солуянов. - Соин ик Президентлэсь кылзэ юан понна импичмент ортчытоно. Но со дыре ик адямиослы кулэ: та амалэн Президентэз ужысьтыз куштыны соку ик уз луы, со понна туж кузь сюрес ортчоно, нимысьтыз законъёс кутоно. Ю. Скуратовлэн нимыз котырын уно вераськонъёс мыно. Мар сярысь вера Россилэн Генеральной прокурорезъя кылдэм уж? - Куд-ог кужымъёс Скуратов вылэ уж ӝутыса туртто Кремль пумит шара нюръяськон кутскыны. Озьыен, со учыр возьматэ, Президентлэн "командаез" сокем кужмо ӧвӧл ни шуыса. Ляб луэмзэс возьматӥзы Пркуратуралэн ёзъёсыз но. Страналэсь законъёссэ утись-валтӥсь адямиез кышкатыны но кулэ вылэм. Озьы-а, тазьы-а, но сыӵе кылдэм югдурын Скуратов умой ужаны уз ни быгаты", ас ведомствояз со вылэ уголовной уж ӝутэмын. Югославиын мынӥсь ожмаськонъя "Россиысь регионъёс" фракцие пырись депутатъёс таӵе малпанэ вуиллям: вакчи дыр куспын НАТО ӧз ке дугды бомбаос куямысь, Россия одно ик Югославилы техника но ож тӥрлык ласянь кужмо юрттэт сётыны кулэ. Но пумит луоно асьме войскоосмес Югославие келянлы. Бадӟым саклык висъяно, шуиз А. Солуянов, Удмуртиын "ТОР-МИ" зенитной комплексъёс поттонлы. НАТО возьмаса гинэ улэ, ку Россия янгышъёс лэсьтоз, соин ик дугдытоно ни вераськонъёсты Югославиез Россилэн но Беларусьлэн Союззы борды огазеян сярысь. Со умойтэм малпан. Россия али ик Югославилы военной юрттэт ӧз ке сёты, НАТО-лэн войскоосыз Россилэн кунгожез доры но вуозы. Украиналэн президентэз ас музъемзэ НАТО-лэн ракетаосызлы сётыны дась ини. Журналистъёслы А. Солуянов мукет малпанъёссэ но усьтӥз, кылсярысь, со вераз малы пумит кариськиз депутатлэн-режиссёрлэн С. Говорухинлэн телевидениын нравственностез утёнъя кенеш кылдытонлы. Президент быръёнъёс азьын сыӵе ёз цензуралы пӧрмыны быгатоз, шуиз со. Т. БАННИКОВА. ВАВОЖЫСЬ ИВОРЪЁС Дасяськиллям пӧртэм сямен Кема ик дыр уз ортчы - бусыосты шулдыртозы тракторъёслэн гуретэм куараоссы, кутскозы кысык ужъёс. Ёросысь эштосъёсын трос лэсьтэмын удалтэм ю нянь будэтон понна. Тужгес но "Авангард", "Мир", Калинин нимо, "Правда", "Волипельга", "Рассвет", "Восход" хозяйствооысын. Нош кыказ хозяйствоосын ужъюгдур воксё паймымон: "Яголудын" но Киров нимо эштосын уг тырмо тракторъёссы. Данаказ хозяйствоосын дась ӧвӧл на сеялкаоссы, культиваторъёссы. Кизер эстӥськонъёслы но вӧйёслы бюджетысь коньдон висъямын, но со тырмымон ӧвӧл. Ӝуатскиз выль "кизили" Алигес Ижевскысь "Аксион" культура дворецын ортчиз республикаысьтымы егит кырӟасьёслэн конкурссы. Отын умой кырӟаны быгатэмзэ возьматӥз Вавож шор ёзо школаысь 11-тӥ классысь Маша Борисова. Эстрадаысь егит "кизили" дораз берытскиз дипломен но дуно кузьымен. Анай кыллы пичиысен дышето Шуо калыкез дышетонъя отделын ужасьёс. Но со понна трос ужано луоз на. Ёросын 24 школа, отын 3,5 сюрслэсь ятыргес нылпиос дышетско. Нош национальной школаос дас гинэ. Дасаз ик асьсэ кылзэс дышето факультатив амалэн, Какможын удмурт кылъя дышетӥсьсы нылетӥ арзэ ужа. Али удмурт кылэз воксё уг дышето Зядлудын, Гуляевоын но Южной Какможын. Табере данаказ нылпи садикъёсын нылпиос дышето анай кылзэс. Огъя югдур умояз ни ке но, лэсьтоноез торс на - кадръёс кулэ. Лушкаськисьёс уг кулэсмо Кемалась ик ӧвӧл Водзимоньяысь "Гарант" магазинэ пыраллям, курытсэ но сиён- юонъёсты лушкаллям. Но таӵе урод иворъёс адямиосты уг ни паймыто. Я торфопредприятиысь мотодетальёсты лушкало, я леспромхозысь электродвигательёсты, я фермаосысь пудо сиёнэз, я эштослэн гуысьтыз картофкаез. Нокытын уг ни лошъясько корт арбериос, соосын ӵош пудо сюдон тусьёсты но куштӥськэм кортлы вутто. Валэктонэз одӥг: адямиослы маке но чотын кӧтсэс тыртоно. П. НИКОЛАЕВ. ОБРАЩЕНИЕ исполкома Всеудмуртской ассоциации "Удмурт кенеш" к общественности Удмуртской Республики Уважаемые сограждане! В течение первого полугодия 1999 года в общественно-политической жизни Удмуртской Республики произошли события, которые могут привести к серьезным негативньш последствиям. Речь идет об итогах выборов в Государственный Совет УР второго созыва и формировании структуры органов представительной власти. В демократическом правовом государстве высшей ценностью является человек, его права и свободы. Это положение закреплено во Всеобщей декларации прав человека, принятой Генеральной ассамблеей ООН в декабре 1948 года и продублированной в Конституциях РФ и УР. Статья 2 Конституцил УР гласит: "Человек, его права и свободы являются высшей ценностью. Признание, соблюдение и защита прав человека и гражданина обязанность государства". Но не могут в полной мере соблюдаться права и свободы каждого конкретного человека, если не будут соблюдаться права и интересы народа, нации. К сожалению, в последние годы в Удмуртской Республике происходит интенсивный процесс отлучения удмуртского народа от органов государственного управления. Представительство удмуртов в Высшем органе государственной власти ( в Верховном Совете , а затем и Государственном Совете) за последние 10 лет сократилось с 43 до 11 процентов. В результате может получиться так, что принципиальные вопросы, касающиеся судеб удмуртского народа, и этим составом Госсовета не могут быть решены. Это тревожное предположение уже получило практическую реализацию при выборах главных должностных лиц Удмуртии. исторически в республике всегда соблюдался принцип: одна из ключевых фигур государственной власти замещалась представителем титульной нации. Ныне этот принцип нарушен. Продолжается процесс сокращения представителей удмуртской национальности на ключевых позициях в министерствах и ведомствах республики. По существу в Удмуртии начался активный процесс ликвидации государственности удмуртского народа, ее губернизация. Эго очень опасное явление. Необходимо иметь в виду, что события и в Чечне, и в Югославии начались именно с того, что в обих случаях нарушались права народов на самоопределение. Уважаемые сограждане! Надо сделать все для того, чтобы в Удмуртии сохранились спокойствие и стабильность. Это нужно каждому человеку, проживающему в республике, каждому этносу, представляющему народ республики. Но для этого нужно, чтобы соблюдалось полюические, социально-экономические, культурологические и другие права каждого народа республики и в первую очередь удмуртского народа, как носителя государственности в Удмуртской Республике. Особенно это зависит от первых лиц республики: Председателя Госсовета и председателя Правительства Республики. Прежде всего, на них лежит личная ответственность в этом вопросе. Мы обращаемся ко всей общественности Удмуртии поддержать усилия ассоциации "Удмурт кенеш" по сохранению стабильности и спокойствия в Удуртской Республике. Мы обращаем внимание депутатов Госсовета Удмуртской Республики на необходимость внимательного подхода при решении кадровых, социально-экономических и культурных проблем. Здесь нужна большая взвешенность и осторожность, учет интересов всех народов республики. Мы надеемся на то, что это обращение найдет широкий отклик в среде русской интеллигенции Удмуртии, как это было уже не раз в истории, когда появлялась необходимость в защите прав малочисленных народов. Принято на исполкоме ассоциации 28.04.99 г. ОБРАЩЕНИЕ исполкома Всеудмуртской ассоциации "Удмурт кенеш" к депутатам Государственного Совета Удмуртской Республики Уважаемые депутаты! Избиратели Удмуртии 4-го апреля оказали вам доверие представлять их интересы в высшем законодательном органе республики. И теперь именно от вас зависит сегодяшний день и будущее полутора миллионов человек. К нашему великому огорчению, первые шаги нового парламента оказались не самыми конструктивными. Из-за чего в республике сохраняется и углубляется политический кризис, наблюдается раскол общества. 06 этом говорят сотни писем, обращений граждан и коллективов, поступающих сейчас в органы власти, общественные организации и средства массовой информации. Впервые за историю Удмуртской государственности в высшем законодательном органе страны нет представителя нашего семисоттысячиого народа. Удмуртия. все больше утрачивает национальные признаки. Количество руководителей-удмуртов с каждым годом сокращается. При подборе кадров особениости субъекта не учитываются. На словах призывая к согласию и созиданию, руководство Государственного Совета на деле осложняет обстановку в республике. Вместо проведения разумной национальной политики отдельные личности всячески пытаются принизить роль Всеудмурт 12 мая вам вновь предстоит припять важные решения. Если действительно стремитесь к благополучию людей и согласию в обществе, для этого вы должны сделать все возможное. Призываем вас поддержать кандидатуру Павла Вершинина на должность первого заместптеля Председателя Госсоыета. Просим учесть мнение исполкома и при утверждении заместителей Председателя Правительства. Напоминаем вам, уважаемые депутаты, о решепии Съезда удмуртов, касающегося всенародно избранного главы Удмуртской Республики. В целях экономии бюджетных средств считаем возможным проведс-ние выборов главы республики одновременно с выборами депутатов Государсч венной Думы Российской Федерации уже в декабре т.г. Обращаем.особое внимание депутатов от сельских округов. Возмущенные звонки избирателей свидетельствуют о том, что некоторые из вас забыли предвыборные обещания и при принятии важнейших решенин поступают вопреки их наказам. Исполком ассоциации "Удмурт кенеш" надеется на ваше благоразумие. Только услышав и поняв друг друга, мы сможем обеспечить мир и взаимоуважение в нашей республике и уберечь ее от дальнейшего углубления политического кризиса. Принято 28 апреля 1999 года. 200 килограммъем зарни жильы Дуннеын тужгес но кузь зарни жильы дуризы Огазеям Араб Эмиратъёсысь кибашлыос. Солэн кузьдалаез 4 иськем но 100 метр, секталаез 200 килограмм. Зэм, таӵе секыт жильыез ош чырты но уз вормы. Жильылэн куинь иськемез дуремын вал Араб Эмиратысь улӥсьёслэн куремзыя. Нош одӥг иськемез пӧртэм странаосысь лыктэмъёслы вузамын вал. Со пӧлысь ӝыны иськемез Россиысь туристъёслы кошкиз. *** Дуннеысь эскеронъёс Америкаысь социологъёс чакламъя, дуннеын тужгес но вӧлмэм ним Мухаммед луэ. Дуннеын вордскем нуналэз одӥг вакытэ пусъе укмыс миллион адями. Нош ишакъёс лекаськыса но ӵыжаськыса арлы быдэ укыр трос адямиез вӧсь каро - авиакатастрофаосын но сомында уг быро. *** Улон даур вакчи шуо Дуннеысь Тазалыкез утёнъя организация эскериз адями даурлэсь кыстӥськемзэ. Шорлдын вераса, 1950-тӥ арын кышномуртъёс 47,8 ар улӥллям, воргоронъёс - 45,1 ар. вуоно арын та лыдпусъёс йылозы, нылкышноос - 67,8 ар улозы, пиосмуртъёс - 63,7 ар. 2050-тӥ арын адями эшшо но кемагес улоз. Озьы ке но, пиосмуртъёс улӥзы, уло но улозы кышномуртъёслэсь ӧжытгес. Статистика чакламъя, азинскем странаосын пиосмуртлэн но кышномуртлэн улон даурзылэн кусыпсы 6-8 ар луэ. Россиын со 12 ар. Вань одӥг гинэ страна, кытын пиосмурт кышномуртлэсь тросгес улэ, - со Кувейт. Таӵе аспӧртэм югдурлы та дырозь валэктон шедьтэмын ӧвӧл на. *** Райка быдэс республикалы тодмо Башкириын Иштиряково гуртын одӥг кузёлэн Райка нимо скалэз куиньмо кунян ваиз. Ветеринаръёс верамъя, кыкто кунян ваён учыръёс но туж шер пумисько. Нош пересьёс азьвыл куиньмо кунян ваён учырез воксё но уг тодо. Райка скал быдэс республикалы тодмо луиз. Кузёез пусйиз, гужемзэ скалмы, пе, уллёен ӵош ик ветлӥз, бускель ош доры но ӧз кожа. Али вордскем кунянъёс тазаесь но чырткемесь будо. Иворъёсъя национальной служба. Сёт сюлэм шуныттэ Мукет интыосын сямен ик Дэбесын но улонмы секыт ке но, калыклэн син шораз йӧтымонэз вань ни. Тани киужъёсъя центр егит ай. Озьы ке но, тэтэ карон дырыз ӝог ортчиз. Татысь специалистъёс асьсэлэсь быдэстэм ужъёссэс возьматыны быгато ни республикамылэн палэназ но. Тол но, гужем но татчы пырасьёслэн лыдзы уг бырылы. Одӥгезлэн тодматскемез потэ специалистъёслэн киужъёсынызы, мукетыз, аслыз яке нылпиезлы, синпельлы шуыса, сувенир басьтэ. - Кутсконэз капчи ӧй вал, трос бызьылоно, утчаськоно луиз, - вера центрлэн директорез Михаил Петрович Николаев. - Нырысь усьтӥмы пуэз чильпанъя, керттӥськонъя цехъёс. Бӧрысь шӧдӥмы ни: луонлыкъёсмы вань куиськонъя, кызьпу туен но куроен ужанъя мастерскойёс кылдытыны. Быгатӥзы татын котыразы куд-ог усто мастеръёсты огазеяны. Тӥни со ик юрттӥз ужез интыысьтыз вырӟытыны. Доразы лыктӥзы сыӵеосыз но - таосыз нырысь-валысь номыр лэсьтыны уг пӧрмыто вал. Соосты ӧс сьӧры ӧз поттэ, дышетӥзы. - Тужгес но синмаськымон тырше Валентина Калашникова, - веранзэ азинтэ Николаев. - Мукетъёсыз но солэсь табере адӟем каро ни. ... Кык ар талэсь азьло вал со. Ужан интыысьтыз нырысьсэ бертыса, Валя со нуналэ умме уйшор бертэк усьыны ӧз быгаты. Пӧртэм сюлмаськонъёс бергало йыраз: "Быгато меда выль удысын асме возьматыны? Ӧй ке пишмыты, уже кытчы интыяськод на?" - тазьы малпаса, небыт валесаз берга. - Я, сокем эн куректы, шӧдӥ ведь сюлэм висёндэ, - ӵукна султыса, небыт вазиз кузпалыз Алексей Петрович. - Калыкын юнме уг шуо: "Син кышка, ки лэсьтэ". Тынад ваньмыз азьпалан ай, сёт ужедлы сюлэм шуныттэ гинэ. Мастерское пырыку, Калашникова ужан ӝӧк сьӧрысьтыз султӥз но азьло ик дасям пӧсь утюген кызьпу туез небӟытыны ӧдъяз. Солы юрттэ егит эшез. Небӟем туез бӧрысь, ӝӧк вылаз поныса, вандоно интытӥз карандашен гож лэсьтӥз. Дышем киосыныз сапег вурисьлэн кадь лэчыт пуртэн ортчиз отӥ. Ачиз вераське, нош киосыз ас ужзэс быдэсъяло. Дасо минут но ӧз ортчы - туйлэсь кык пичиесь кружкаос син куспын пӧрмизы. Кылиз на азьло ик дасям векчи пулэсь пыдэс но кикутон гинэ интыяз лякыны. - Нуналаз сое кӧня лэсьтыны вуиськоды? - юасько Валентина Леонидовналэсь. - Ми нырысь нуналаз материал дасяськомы. Кызьпу туй но одӥг кадь уг луы. Одӥгез небӟытыса но уг сётскы, пилиськыны шеде, сое сӥен-сӥен волятоно луэ, - вера Калашникова. - Соин ик гужем, кызьпу туй усьыку, сое асьмеос дасяськомы. Быгатоно валаса бырйыны. Нош уже кутэмлэсь азьло пыр-поч сузяно, вуштоно, чылкытатоно. Сюлмысь ке тыршиськод, нуналаз ньыль но, вить но лэсьтыны вуоно. Мукет интыын бадӟым ӝӧк вылын радэн-радэн тыремын быдэстэм ужъёссы. Кыӵе гинэ арбериос син шоры уг йӧто: кружкаос, чайникъёс, бадӟым но пичи лянэсъёс. Самовар гинэ но лэсьтыны быгатӥллям. Нош кӧня меда дыр быдтэмын солы - асьсэос но лад-лад вераны уз быгатэ. Котькудзэ отчы нырысь ву лэзьыса возё. Озьы специалистъёс тодо быдэстэм ужзылэсь ӟечлыксэ. Куд-огез вия но - сыӵеоссэ выльысь тупато. Огпол Валентина Леонидовна шутэтске вал. Дырызлэсь вазь ужаны ӧтизы. Мугез но вань угось: кызьпу туйлэсь лэсьтэм арбериоссэс тросэн басьто кунгож сьӧрысь лыктэмъёс. Тани Ижын ортчозы биатлонъя ӵошатсконъёс. Отчы лыктозы пӧртэм странаосысь спортсменъёс. Соин ик мастеръёс дырзэс чаклатэк ужало. Отчы вузаны нуозы трос пӧртэм киужъёссэс. Валамон, Калашниковалэн, татчы лыктыса, ваньмыз пӧрмиз, ӧръяськиз, кожалод. Нырысь трос курадӟоно луиз: я туйзэ мултэс вандыны шедьтэ, я материалэз пыр-поч дасямын уг луы, я лэчыт пуртэн чиньызэ кырыны шедьтэ. Ярам ай: бордаз вань усто специалист Николай Рафаилович Перевозчиков. Таиз куатетӥ арзэ татын ужа ни. Киыз котьмалы мынэ. Соин ик пӧртэм юанъёсын солы вазиськыло кивалтӥсьёс но. Егит нылэз но со дырзэ жалятэк дышетӥз. Уг ке пӧрмы, вӧзаз султыса, ачиз лэсьтэ. Тӥни озьы Валя нуналэн арняен дышиз выль ужезлы. Татчы лыктэмезлы чик но уг куректы - шедьтӥз сюлмызъя удыс. - Кельше-а бен ужед? - юасько солэсь. - Секыт ке но, шумпотымон та удыс, - пальпотыса шуэ Валентина Леонидовна. - Лянэс- а лэсьтӥськод, чайник-а пӧрмытӥськод - каньыл сюлмын доре вамыштӥськод. Малпаськод: нуналыд юнме ӧз ортчы. Калашникова йылпумъяз Дэбес педучилищеысь художественно-графической отделениез. Быгатэ суреданы. Суредъёсыз сокем чебересь уг ке но луо, аслыз ярало. Педучилищеын дышетскыкуз ик куд-ог киужъёсты лэсьтылыны пӧрмытылӥз. Тӥни со но юрттӥз, вылды, выль интыын быдэстоно ужзэ ӝог азинтыны. - Валентина кадь нылкышноосты шер пумиталод, - вера Николай Рафаилович. - Солэсь азьло вӧзам одӥг егит ныл толэзь пала курадӟиз. Бӧрысь валатскиз: солэсь мастер уз пӧрмы. Ми пумит вал солэн ужысь кошконэзлы. Ма бен карод, та удыс сюлмызъя ӧвӧл бере. Кылем арын Ижын ортчиз киужъёсты возьматонъя адӟытон. Мукет ёросъёсысь усточиосын ӵош Валентина Леонидовна но отын вормисе потӥз. Дораз бертӥз дуно кузьымен. Егит ныллэн улоназ со нырысетӥ вормон. Нош азьпалан соос огпол гинэ уз луэ ай, дыр. Ужан нунал йылпумъяськиз. Калашникова толон сямен ик туннэ но эшъёсыныз ӵош дораз капчи мылкыдын вамыштӥз. Туннэ вань малпамзэ нунал куспын быдэстӥз. М. МОСОВ. Туннэ ӧм шедьтэ ке огкыл... Кызьы ивортылӥм ни, 28-тӥ апреле люкаськылӥзы "Удмурт кенешлэн" исполкомаз быръемъёс. Трос вал ӧтемъёс но. Кенешонэ ветлӥз правительстволэн выль кивалтӥсез Николай Ганза. Пумиськонын ас мылкыдзэс шараязы удмурт калыклэн азьветлӥсьёсыз - Валентин Тубылов, Маргарита Гришкина, Кузьма Куликов, Михаил Атаманов, Карл Пономарев, Роза Яшина, Василий Ванюшев, Валентина Ившина но мукетъёсыз. Ми дэмласьком, тодматскыны кенешонын Удмурт университетысь проректорлэн Владимир БАЙМЕТОВЛЭН вераменыз. Печатласьком кӧня ке вакчиятыса. Мар монэ сюлэмшугъяськытэ? Ужпум сояз яке таяз газтын печатласькись кыӵе ке материалъёс бордын гинэ ӧвӧл. Котьмалэсь уродэз - асьмеос ум кылӥське вылӥ кивалтӥсьёслэсь калыкмылы пумит луись сыӵе гожъямъёс пумысен маке коть верамзэс. Одӥг ке но уголовной уж ӝутэмын ни-а соосъя? Ӧвӧл. Тани алигес гинэ умойтэм учыр луиз Роза Ивановна Яшинаен. Мӧйы кышномуртэз милиционеръёс валтыса нуизы. Та адямиез удмуртъёс пӧлын тодӥсьтэмез ӧвӧл. Сое гажало, солэсь верамзэ санэ басьто. Нош асьме МВД-ысь югдурез утёнъя отделлэн кивалтӥсез Баласанян Яшинаез уг но тодма. Кызьы-о тае валано? Та выллем учыръёс удмуртлэсь сюлэмзэ вӧсь каро. Адӟиды, вылды, "Новый регион" пыр возьматэм интервьюосты, куке гажано адями Юрий Иванович Боровик, кудӥзлэн бырйисьёсыз пӧлысь уноез удмуртъёс, тазьы шуэ: "Республикалы кивалтӥсь бырйыку, адямилэн кыӵе выжыысь потэмез бордын ужпум ӧвӧл..." Яке депутат Роговец. Таиз тазьы вера: "Мар, пе, пӧртэмез. Коть ӟуч, коть удмурт, коть еврей..." Со но удмурт районын быръемын. Та уг возьматы шат депутатъёслэсь асьмемыз гажамтэзэс? Бен, сыӵе муртъёсты бырйим бере, асьмеос но янгышесь, дыр. Малпаськоно вал азьло ик. Удмуртиын ноку но ӧз кылдылэ калыкъёс куспын бадӟым валамтэос. Нокин но демонстрацие уг поты, уг куашеты, шара уг йыркуръяськы. Озьы ке но, национальной ужпум вань. Калык улытозь, со весь луоз. Берло нуналъёсы ортчем ужрадъёс ужпумез лэчытомытӥзы. Кин ке шуэ, ойдолэ, пе, удмуртъёслы квотаос тупатом. Мон сямен, кулэ ӧвӧл. Пӧламы тырмыт гинэ визьмо адямиос, кин быгатысал калыклэсь кулэяськонъёссэ Кун Кенешын но, Правительствоын но утьыны. Тыршоно вал уногес эшъёсмес быръёнэ кыскыны. Соос, оло, соку ик ӧй но вормысалзы но, азьланезлы коть опыт люкасалзы. Берло дыре ӵем кылӥське Удмуртилэсь данзэ ӝутон сярысь веран. Кызьы ке но тыршоно, шуо, кунгож сьӧрысь капиталэз асьме экономикае кыскыны. Меӵак пусйыны кулэ: республикаямы та ласянь ушъяськыны уг быгаты. Нош асьме тупамтэос пумысен вераськон Эстониын, Венгриын, мукет странаосын, ООН-ын но со выллем музон огазеяъськонъёсын ӝутскизы ке? Кин лыктоз асьме доры асьме экономикаез улӟытыны? Дуннеын ваньмыз ог- огенызы герӟаськемын. Малпан медам кылды вылэм, удмурт культураез азинтон бордысь экономикалэн кыӵе луэмез уг поты шуыса. Калыклэсь мылкыдзэ али лыдэ басьтымтэмы куке но асьмемыз ик туж юн шуккыны быгатоз. Туннэ ӧм шедьтэ ке огкыл, ӵуказе бӧрдон калэ вуом. Ас музъем вылаз удмурт ассэ кузё кадь возьыны кулэ. Та дырозь со уг шӧдӥськы на. Асьме понна мукетъёсыз малпасько, маке но лэсьто, калык валаса но уг вутты кадь. Кузё мылкыд пыӵатӥм ке, югдур умой пала воштӥськоз. Вылласянь учконо ке, Удмуртиын ваньмыз умой кадь. Таӵе синпӧетлэсь мозмытсконо. Удмуртлэн но чиданэз быроз. Йыркурзэ, жадемзэ со весь ас пушказ возьыны уз быгаты ни. Та сярысь нкоу но медам вунэтылэ вылӥ кивалтӥсьёс. АРЪЁС НО АДЯМИОС Туймыйылысь герой Туэ, 9 мае, вордскемез дырысен 75 арес тырме Алнаш районысь Туймыйыл гуртын будэм воргоронлы, Социалистической Ужысь Геройлы Иосиф Ефимович Семеновлы. Солэн улон но ужан сюресэз туж огшоры кадь, но - данъяськымон. Вылӥ награда басьтон понна трос гинэ нюлам вудэ поттоно вал, партия уго котыр ласянь адямиез чакласа-эскерыса возиз. 7 классэз йылпумъяса, Иосиф "Социализме" колхозэ кыле. Пияшлэсь чебер гожъяськемзэ лыдэ басьтыса, председатель сое учётчике пуктэ. Кӧня ке улыса, Семеновлы оско ни счетоводлэсь интызэ, собере - валтӥсь бухгалтерлэсь. 1942 арын август нуналъёсы басьто Горд Армие, соку ик дышетскыны ысто военно- пехотной училищее, Воткинск городэ. Война вакытэ тросэз вуоно командиръёс татын тодон-валан люказы. Тямыс толэзьем курсъёсты йылпумъяса, Иосиф Семенов младший лейтенант звание басьтэ но фронтын взводэн кивалтэ. Но кема ожмаськыны ӧз кылды: секыт сӧсырмем муртэ эмъяло госпитальын, 1944 арын апрель толэзе вордскем палъёсаз лэзё. Гурт калык фронтовикез шумпотыса пумитаз, артысь "Кизили" колхозэ бухгалтере ужаны кутӥзы. Иосиф Ефимовичлэн соку шӧдӥськиз ни гуртоосын кусып тупатыны быгатэмез, адямиослэсь мылкыдзэс бурдъямез. Та арын ик Семеновез партие пырто, нош сӥзьыл пал Удмурт Тоймобаш сельсоветлы председателе пукто. Выль ужаз но Иосиф Ефимович ассэ умоен возьматӥз. Одӥг муртэ но вӧсь ӧз кары, фронтовикъёслэсь семьяоссэс тужгес но утьыны сюлмаськылӥз. Вакытэз соку ой! кыӵе вал: выт тыроно- октоно, калык пӧлын валэктон уж нуоно: райком азьын нуналлы быдэ кыл кутоно. Ожысь вуэм командирлы, гуртын радлык возьыны, фронтын сярысь трослы секытгес вал. Отын - боецъёс, татын - арлыдо пересьёс, нылкышноос но быдэ вуымтэос. Но Семенов оскем биньгозыез кияз юн возиз. 1949 арын сое дэмлало заготовкая уполномоченнойлы юрттӥсе. Мылкыдыд вань-а, ӧвӧл- а, партилэн кылыз - закон: кытчы ысто, отчы ик мын. Озьыен, тыныд оско. Витьтонэтӥ аръёсы КПСС но Советской правительство юн-юн басьтӥсько пичи колхозъёсты огазеян борды. Та программа асьме дорын туж ӝог улонэ пыӵаз. Огкутскемен быдтэмын вал пичи гуртъёс но хозяйствоос. Семеновез ысто "Социализме" колхозын кенеш ортчытыны. Татчы ик люкаськизы "Трактор", "Малая Тойма", "Тыршись" колхозъёсын ужасьёс. Соос асьсэлы председателе быръё И. Е. Семеновез. Сӥзьыл бордазы огазеяськизы на эшшо кӧня ке гурт. Иосиф Ефимович 30 ар ӵоже кивалтӥз бадӟым хозяйствоен - "Прогресс" колхозэн. Вань азинсконъёсыз, ӝутскемез-выльдӥськемез люконтэм герӟаськемын та синмаськымон адямиен, быгатонлыко кивалтӥсен, гурт удысысь героен. Кутскыса, кутскыса тодаз вайылэ со аръёсты азьвыл председатель: - Секытэз тырмиз, ӝутыны вормонтэмзэ калык ӝутӥз. Сӥзьылзэ воксё ёрмим пудоез кытчы пыртыны - гидъёс супрак куашкамын, ю тырон кеносъёслэн липетсы пуж кадь пасяськемын - котырак зор вия. Дисциплина ӧвӧл. Буш трудодень понна кинлэн ужамез потоз? Пудо йырыз понна гинэ вордо, вылӥысь косэмъя. Фермаос котырын лачак кыед люкаськемын, нош бусыосы уг потто, минерал сылал но уг шедьы. Тазьы-а урожай басьтод? Малпанъёс йыре уг тэро, уйёсы умме усьыны уг сёто. Но выль кузё кема йыромыса ӧз ветлы. Котыраз люказ оскымон колхозникъёсты, трос кенешиз гуртоосыныз, ветлӥз мукет хозяйствоосы. Потаз Киров областьысь азьмынӥсьёс доры, - "Красный Октябрь" колхозэ. Таос соку быдэс страналы тодмо вал. Кӧня ке ар ортчыса, гуртэ вуизы егит специалистъёс: агроном В. Майшев, зоотехник В. Вершинин, берлогес сое воштӥзы И. Беляев, Л. Сараматов. Та адямиос районын гинэ ӧвӧл, быдэс республикаын тодмо луизы. Оскымон юрттӥсьёсын колхоз син шорын вылӥе ӝутскиз, юн экономикаен хозяйствоос радэ султӥз. "Прогресс" висъяськылӥз ни ю-нянь будэтэменыз, пудо вордэменыз, умой-умой басьтӥськиз картофка, етӥн, кушман борды. Паськыт вӧлмиз семьяен, звеноен, бригадаен ужан амал. Самой та вакытэ трос пуктэмын производствоя юртъёс, клубъёс, школаос но мукетыз. Нош кӧня выль техника басьтэмын! 1964-1965 аръёсы колхозлэн счётаз 350-500 сюрс манет коньдонэз люкаськылӥз, солы 100 ю тысь кутсан комбайн, 150 дизельной трактор басьтынылуэ вал. Эшшо тани мае вераме потэ на. Колхозмы 1961 арын районын котькинлэсь азьло уждун коньдонэн тырыны кутскиз. Со-а умой ӧвӧл! Семенов улонэз ог дасо арлы азьпала адӟиз. Чагыр эстӥськонлы проект дасямын вал ини 1975 арын, колхозэ со вуиз 1989 арын. Та арын ик кыскемын асфальт сюрес. Хозяйство йыг-йыг пыд вылаз султӥз. Солэн председателез И. Е. Семенов 1966 арын март толэзе басьтӥз вылӥ награда - Социалистической Ужысь Герой ним, гадяз быртто Ленин орден но Зарни медаль. 80-тӥ аръёслэн кутсконазы Иосиф Ефимовичез гуртоосыз нош ик быръё сельсоветлы председателе. Та удыссэ нуиз, пенсие потытозяз. Туннэ но та адями гуртаз пукыны уг чида. Сюлэмыз ялан кыстӥське калык пӧлы, ас колхозаз. Кызьы-о сотэк? Егитъёслы туж кулэ дыраз сётэм визь-кенеш, юрттэт. Нош Семеновлэн ужан мылкыдыз сӥямтэ на. Та бадӟым юбилеез азьын Иосиф Ефимовичлы сӥзем потэ юн тазалык, туннэ кадь ик чупрес луыны но йыг-йыг возиськыны. Со одно ик вылаз дӥсялоз, дыр, орденъёсын но медальёсын тырмытэм пиджаксэ. Котькуд награда басьтэмын ужаса, ӟеч улон понна ожмаськыса, курыт пӧсь вуэн но вирен пылатыса. Улон сюресэз пусъемын дано нимъёсын, бырйылӥзы УАССР-ысь Вылӥ Советэ депутатэ но. Семенов кузпалъёс ньыль пинал будэтӥзы, ваньзылы вылӥ образование сётӥзы. Туэ февраль толэзе Иосиф Ефимович но Анна Андреевна кузпалъяськемзы дырысен 54 ар тырмонзэс пусйизы. Тӥни сыӵе синмаськымон семья улэ Туймыйылын. Улонэз яратӥсь, калык понна сюлмаськись, ужлы провор воргоронэз вордэм но будэтэм та чылк-чылк удмурт гурт. Михаил Соловьев. Алнаш районысь Туймыйыл гурт. ЭКОНОМИКА Чебер вузлэн дуныз но чебер Рынокен экономика улонэ пыӵамен валче, чутрак воштӥськизы басьяськисьёс ласянь пуктэм куронъёс. Суп-сап лэсьтэм вуз понна нокинлэн но дун тыремез уг поты, нош дуно техника понна - уката ик. Америкаысь "ЕАА" фирма уно аръёс ӵоже ни Ижевскысь механической заводлэсь спортивной но пӧйшуран оружизэ басья. Фирмалэн президентэз Кейт Бернкрант продукцилы асьме столицае ачиз ветлэ но пыр-поч эскере котькуд вузэз. Та ужлы со дышемын пичи дырысеныз, песятаез но, атаез но США-ысь пӧйшурасьёслы пыӵал тӥрлыкен вузкарон бизнесэн кӧтсэс тыриллям но узыр улӥллям угось. Соин Бернкрант ӟеч тодэ, ма кулэ басьяськисьёсызлы. Кылсярысь, курокен пыӵалъёс вужмизы ни кадь, нош Штатъёсын соосты гажало, пе, пӧйшурасьёс-ковбойёс. Но таосызлы кулэ на вылэм вакчигес гумыё пыӵалъёс. Озьы кылдэ Иж-43К пыӵал. Асьмелэн кема дыр ӵоже потто вал 12 калибрен пыӵалъёсты, кулэ луизы пичиесь калибръёсыз. Озьы кылдӥзы пӧртэм калибръёс: 16, 20, 28, 32, 410. Бен таӵе пӧртэмлыко пыӵалъёсын тунсыкъясько табере европеецъёс но, асьмелэн пӧйшурасьёсмы но. Тӥни вань та вуз поттонэз, инспектор музэн, алигес эскериз-чаклаз 36-тӥ цехын Америкаысь басьяськись Кейт Бернкрант. Ӵапак отын быдэсъяське солэн ваньмыз сямен заказъёсыз. Зарезьёс сьӧрысь куно возьматӥз аслэсьтыз ӟеч тодон-валанъёссэ, пыӵал поттӥсьёс азе юнэсь куронъёс пуктыны быгатэмзэ. Асьмелэн но усточиосмы вуззы понна ӵыжектоно ӧз луэ. Зэм, басьяськись вераз, пыӵалъёсмес чебергес, нырысь учкыку ик синмаськымон поттоно шуыса. Вераськон мынэ пыӵаллэн прикладэзлэн пулэсь лэсьэм люкетэз сярысь. Солы мынэ пушмульы пу, кудӥз асьмелэн, Турциын но Франциын сярысь, аламагес. Но ужпум со бордын гинэ вылымтэ, ужпум герӟаськемын со писпуэз дасянэн. Бернкрант юри ыстэм кыксэ сыӵе дасям пуосты Италие, отысь соосты берыктӥллям пыӵал прикладлы сокем чебер дасяса - уд но тодма ни. Озьы басьяськись асьмеды дышетэ, кызьы вузэз чебергес поттоно но дуногес вузаны луоно. Нош али асьмелэн пыӵалъёсмы дунтэмесьгес. Бен, дунтэмысьтыз но тросгес басьто. Озьыке но, пыӵалъёсты чебергес поттон сярысь азьланяз одно сюлмаськоно. Яке тани таӵе ужпум: асьмеос ыбылӥськиськом узвесь дробен. Со векчи ке но, инкуазез кӧнялы ке но кырсёмытэ. Соин верськон мынэ ни, дробь но пуляос анданлэсь лэсьтэмын мед луозы шуыса. Но таиз ужпум вордэ мукетсэ: дробь сярысь андан капчигес бере, патронъёсты бадӟыматоно. Али эскерисько ни сталь дробьлы бадӟымесьгес патронъёсты поттыса. Улон возьматоз, кызьы умойгес луоз. Басьяськисьлэн пыӵал лэсьтӥсьёс доры ветлэмез мукет ласянь но пайдаё луэ. Татчы ветлыны дыр но трос коньдон кулэ. Озьыен, тросгес вуз басьтэ адями. Нош тросгес басьтэ бере, ас Штатъёсаз тросгес интыосын вуза, тросгес ушъя асьме вузэз. Кызьы ушъяно. Со, та удысын усточи бере, ачиз тодэ. Озьыкусыпъёс юнмало, завод ужзэ азьланьтэ. Но республикалэн бюджетаз коньдон висъяны быгатэ, рабочийёс уждун басьто - ваньмыз пуксе ас интыяз: заводысь коллектив юрттэ Удмурт Республикамылэсь данзэ ӝутыны но узырлыксэ будэтыны. П. НИКОЛАЕВ. Ӟечкылан Алнаш ёросысь Чумали гуртын улӥсь Валентина Васильевна Семёноваез но Зинаида Васильевна Перминоваез ӟечкыласьком вордскем нуналъёсынызы. Тазалык, шудбур но семья куспады тупаса улон сӥзе агайды, кенакты но соослэн нылпиоссы. Можга ёросысь Лудӟи-Шудӟи гуртысь Феодосья Егоровна Ермаковалы тэк мае 60 арес тырме. Яратоно эшме вордскем нуналэныз ӟечкыласа сӥзисько шуд но бур, тазалык, ымнырад котьку ик пальпотон тылсиос мед шудозы. Яратыса но гажаса - Кватчиысь Ольга Васильева. берлин вадьсын гудыръя Тросэз пиос пичи дыръязы ярато ожмаськыса шудыны. Кышкасьтэм, геройлыко луэмзы потэ, вылды. Нош Балезино районысь Старый Кемп гуртысь (али со гурт ӧвӧл ни) огшоры крестьян семьяысь пияшлы Артемий Тороповлы аслэсьтыз геройлыко луэмзэ лек ож тылӝуын возьматоно луиз. Со вал лётчик, Быдӟым Вормон нуналэз дуриз Германиысь инбам вадьсын. - Война кутскыку, Геринг оскытӥз вал, одӥг бомба но уз усьы Германилэн музъем вылаз. Нош ми Берлин вылэ бомбаос куям ни 1942-тӥ арын, - тодаз вае Артемий Демидович. - Лобонъёс туж секытэсь вал: 13 час ӵоже инбамын возиськыса, кислород уг тырмы, нырысьсэ Берлинэ вуыкумы, город быдэсак юг тылын пиштӥз. Немецъёс нырысь- валысь ӧз оске асьмелэн авиацимылэн бомбаос куямезлы, англичанъёс вылэ малпазы. Сталинград город понна лек ожъёс мыныку но асьмелэн кышкасьтэм лётчикъёсмы Германилэсь инбам бусыоссэ гыроно луизы. Вань кужымез куштыны кулэ кадь Сталинградэз утёнлы, нош милемлы шуо: "Пуштытъяно Берлинэз". Но командованилэн аслаз адӟонъёсыз вал. Зэмзэ но, милям лобанъёсмы возьматӥзы, Советской Союзлэн авиациез улэп гинэ ӧвӧл, со Германилэн музъем вылаз но кужмо шуккетъёс лэсьтыны быгатэ 1943-тӥ аръёсы, Берлинэ сяна, бомбаос куямы ни Данцинг, Кёнигсберг, Штейнцинг городъёсы. Нош 1943-тӥ -1944-тӥ аръёсы лобанъёсмы эркынгес луизы, пуштытъямы Германиысь промышленной предприятиосты. Артемий Тороповлы кышкатэк ожмаськем понна сёто Советской Союзлэн Героез дано ним. Быдӟым Вормон бере но, ас шаераз вуыса, лётчик уг люкиськы авиациен. Кызь кык ар ӵоже со кыдёкысь инбамъёсты котыръяз. Улэ Глазов городын. Ожысь ветеранлэн сюлэмыз висе будӥсь пиналъёс понна. Вань быгатэмзэ но мылкыдзэ сётэ соос пӧлын военно- патриотической уж нуонлы. Балезино районысь Ново-Волково школаын, кытын дышетскиз, пиналъёс пӧлын котькуд аре ортчо Артемий Демидович Тороповлэн призэз понна спорт ӵошатсконъёс. Л. МАЛЫХ. Туспуктэмез В. КАМАШЕВЛЭН. БЫДӞЫМ ВОРМОНЛЫ - 54 АР Вамышъясько на солдат сюресъёстӥм Быдӟым Отечественной война историямы кылиз ни. Ньыль ар кыстӥськем тылӝу аръёс сярысь тодамы ваиськомы Вормон нуналэз пусйыкумы гинэ. Тодӥськом: котькудаз гуртын тылӝу пыр потэм азьвыл солдатъёсмы арлы быдэ ӧжыт но ӧжыт кылё ини. Мынам огъёзъёсылы, школаысь парта сьӧрысь султыса кошкем пиослы, ӧжытэзлы гинэ кылдӥз улэп кыльыны. Ожмаськон ужлы тыро-пыдо дышетскыны дырмы но ӧй вал уго, пырак пыриським тылӝуэ. Война сярысь трос гожъямын ни, верамын но тодмо луизы уноезлэн батыр подвиг лэсьтэмъёслэн нимъёссы. Нош мон эшшо но эшшо утчасько на тодмотэмъёсызлэсь нимъёссэс. х х х Кылем арын бадӟым ужме мытӥ. Малпай асьме шаерысьтымы солдатъёс сярысь, соосыз войналэн ортчем аръёсызъя но бадӟым ожъёсъя нимаз-нимаз радъяса, очеркъёс гожтыны. Нырысетӥзэ люкетсэ, ньыльдон одӥгетӥ арысь солдатъёсмы сярысь гожъямъёсме, йылпумъян калэ вуттӥ кадь вал ини. Но туэ архивын документъёсын ужаны кутски но выльысь со ар борды ик берытсконо луи. Таа ар тодмо кылёз Москва дорын ожмаськонъёсын. Со секыт нуналъёсы Бородино бусыетӥ ортчись Можайск оборонительной рубежез утьыны косэмын вал Дальней Востокысь вуэм 32-тӥ стрелковой дивизилы. Лек ожъёс мынӥзы уй но нунал но. Одӥгаз нуналэ тушмон асьме войскоосты пачкатыны ӧдъяз. Югдурез тупатон вылысь, отчы ыстэмын вал эшелонысь соку гинэ вуэм разведчикъёслэн батальонзы. Батальонлэн командирез Корепанов майор кивалтэм улсын боецъёс фашистъёсыз дугдытыны быгатӥзы но кельтэм гуртэз выльысь берыктӥзы. 16-тӥ октябре ӵукна тушмон выль кужымзэ люкаса нош ик азьлань мерскиз. Нуназе пала разведчикъёслэн позициосазы югдур эшшо но лэчытомиз. Соку майор Корепанов батальонзэ атакае ӝутӥз. Кияз гранатаен со ачиз но тушмон вылэ урдскиз. Гитлеровецъёс синйылтӥзы кышкасьтэм командирез, шораз ыбылыны кутскизы. Снайперлэн пуляез майорлэн гранатаяз йӧтӥз... Та учыр сярысь мон кемалась тодӥсько ини вал. Кышкасьтэм комбат шаерысьтымы яке солэн палэназ улӥсьёс пӧлысь луыны кулэ шуыса малпай. Туэ выльысь архивын ужасьёслы вазиськи. Отын мыным сётӥзы Корепановъёслэсь-офицеръёслэсь картотекаоссэс но шуизы: "Татын ваньзы ик Корепановъёс - Удмуртиысь". Но соос пӧлын разведчикъёслэн командирзылэн нимтулыз ӧй вал. Выльысь утчано луиз 32-тӥ дивизиысь ветеранъёсты. Соослэн юрттэменызы, мыным выльысь пумиськоно луиз Бородино бусыын ожъёс сярысь кык книгаосылэн авторенызы, дивизилэн война вакытэ потӥсь "Ворошиловец" газетлэн редактореныз А. М. Вахрушевен. Солэн юрттэмезъя, архивысь ик шедьтӥзы Василий Павлович Корепановлэсь картотеказэ но. Мынам малпанэ зэмаз. Корепанов вордскемын вылэм Кам сьӧрысь Верещагино гуртын, отысен ик армие кошкем. Хасан ты дорын ожмаськемез понна, солы сётэмын Горд Знамя орден. Со нуналэ ик мыным тодматскыны кылдӥз 32-тӥ дивизия понна дуно луэм эшшо одӥгеныз документэн. Бородино бусыын ожмаськем солдатъёслэн списокенызы. "Таӵе ик список вань Бородиноысь музейын но, - шуиз мыным Вахрушев. - Учкелэ сое. Асьтэ палась солдатъёсыз но, оло, отысь шедьтоды. Мон умой тодӥсько: дивизиямы удмурт вал." Тямыстон куать аресъем ветеранлэн кылъёсыз зэмазы. Списокысь шедьтӥ дас ньыльзэ асьме палась солдатъёсмес. Тани соос пӧлысь кӧняез ке гинэ: Петров Василий Семенович, стрелок. Шаркан ёросысь Вашур гурт. Ермолаев Василий Романович, минометной расчётлэн командирез. Юкаменск ёросысь Елово гурт. Ложкин Михаил Сергеевич, миномётчик. Ува ёрос. Максимов Иван Гурьянович, пулемётчик. Игра ёросысь Бакаево гурт. Леконцев Михаил Николаевич, стрелковой отделенилэн командирез. Игра ёрос, Бочкарской сельсовет. Та берлоосыз кыкез, оло, одӥг гуртысь но луо, гурт нимъёс тросаз документъёсын янгышаса гожъяллямын. Ваньзы ик солдатъёс огъёзъёс, вордскемын 1917 арын, армие басьтэмын 1939 арын. Сӥзьыл соослэн гуртазы бертонзы вуэ вал ини, нош пыриськоно луиз бадӟым войнае. Соослэн адӟонзы сярысь вераны уг быгатӥськы: кылдӥз-а меда кудзылы ке гуртазы берытскыны? Вахрушевлэн верамезъя, та пичи гинэ списокысь боецъёс (нош отчы пыртэмын быдэс полкысь одӥг батальон мында кылемъёсыз гинэ), ваньзы ик зэмос батыръёс кадь ожмаськизы. х х х Озьы но луыны кулэ ук, санаторийын шутэтскыкум В. Успенскийлэсь "Тайный советник вождя" книгазэ лыдӟисько вал. Син шорам усизы таӵе чуръёс: "79-тӥ стрелковой корпуслы азьлане мынон сюрес вылаз Берлинэ ваньмызлэсь азьло пырыны луонлык кылдӥз. Сое быдэстон понна кулэ танкъёс. Но Переверткин генераллэн сыӵе частез отын ӧй вал на. Поттоно луиз 86-тӥ артиллерийской бригадаез. Гусеничной тягачъёсын артиллеристъёс потӥзы азьпала. 21-тӥ апреле потон уе артиллеристъёс бадӟым ӝоглыкен вуизы Берлинэ нуись сюрес дорозь. Озьы соос Берлинэ пыризы но городлэн шораз нырысетӥ снарядъёс тушмон вылэ ыстӥзы." Уйшор бере артиллеристъёс азьлань вырӟизы. Азьпалазы мынӥз А. Костоусов старшой сержантлэн орудиез. Солэн тягачез вылэ интыяськемын вал Н. Волынец старшой сержантлэн разведчикъёсыз но В. Грачёв сержантлэн радистъёсыз. Колоннаез сутӥз на асьмелэн одӥгез танкмы. Немецъёслы матэ вуыса, боецъёсмы соосты ыбылыны кутскизы. Пумитазы гитлеровецъёс но автоматъёсын ыбыло, кӧняез ке орудиоссы но ыбизы. Но уй пеймытэн шонер ыбылӥськыны ӧз луы. Асьмелэн ыштонъёсмы ӧй вал. Артиллеристъёс вуизы автострада доры. Азязы танк но Костоусовлэн орудиез, соос бӧрсьы ик мукетъёсыз но 3- тӥ дивизионысь орудиос пыризы Берлинэ. Офицеръёс но, солдатъёс но шумпото - малпанзы быдэсмиз. Соос Берлинэ ваньмызлэсь азьло пыризы. А. Костоусов старшой сержантлэн расчётаз со нуналъёсы асьсэлэсь быгатонлыксэс но кышкасьтэм луэмзэс возьматӥзы удмурт Василий Чигнашин, бигер Магадеев, казах Сыздыков, азербайджанецъёс Салахов но Ширинов, башкир Янгариев. Сыӵе вал со - Берлинэ ваньзылэсь азьло пырем артиллерийской расчёт. Архивысь Чигнашинэз шедьтыны ӧз быгатэ. Сое утчано луиз 86-тӥ артиллерийской бригадалэн документъёсыз пӧлысь. Отын, зэмзэ но, вань сыӵе солдат сярысь бумага, но В. Чигнашин удмурт вылымтэ, Волга дурысь, азьвыл Ульяновск областьысь Кузоватово гуртын вордскемын. Малы сое батареялэн азьвыл командирез Л. Дурсенев аслаз донесенияз удмурт шуэм, солы валэктон ӧй шедьты. Но мон шедьтӥ на Берлинэ ваньмызлэсь азьло вуэм но рейхстаг понна ожмаськонэ пыриськем солдатъёсмылэсь но нимтулъёссэс. Санников Василий Игнатьевич, азьвыл Б. Уча ёросысь Пазял гуртысь. Ефрейтор - батареяысь разведчик. Пусъемын Горд Кизили но куинетӥ степенё Слава орденъёсын. Суслопаров Александр Архипович, старшой сержант. Ува ёросысь Лопухи гуртысь. Пусъемын куинетӥ степенё Слава орденэн но "За боевые заслуги" медален. Широбоков Николай Кузьмич, старшой сержант. Якшур-Бодья ёросысь Чекерово гуртысь. Пусъемын Горд Кизили орденэн но "За отвагу" медален. Лекомцев Борис Степанович, медицина службаысь старшой лейтенант, врач. Балезино ёросысь Ягошур гуртысь. Горд Кизили орденэн пусъемын. Шехарев Дмитрий Федорович, сержант, радистъёслэн отделенизылэн командирез. Улэмын Ижевскын. Сётэмын куинетӥ степенё Слава но Горд Кизили орденъёс. Котькудӥз та солдат сярысь нимысьтыз но пыр-поч гожтыны луысал. Берлинын кышкатэк ожмаськемзы сярысь умой верамын наградалы ӵектон бумагаосын. х х х Днепр понна ожмаськемъёс пӧлысь асьме палась солдатъёсмылэсь нимъёссэс мыным лыдӟыны кылдӥз 6-тӥ армилэн "Боевая тревога" газетэзлэн 1943 аре 5-тӥ декабре потэм номерысьтыз. "Ожмаськизы ньыль эшъёс" статьяын вань таӵе чуръёс: "Украинец Федоренко студент вал, ӟуч пи Коростелев Казахстанын шофёр луыса ужаз, нюлэсо шаерын улӥз тракторист удмурт пи Щепин, син сузёнтэм степьёсын ужаз тракторной бригадалэн бригадирез Хисматулин, башкир. Ваньзылэн ик соослэн улонысьтызы малппанъёссы быдэсмемын ни вал. Но войналэн лек гудыръямъёсыз кылӥськизы Удмуртиысь нюлэсъёсын но, Казахстанлэн гурезьёсаз но, Башкирилэн степьёсаз но. Ӝутскиз странамы. Озьы луиз: гвардиысь младшой лейтенант Федоренко, гвардиысь старшой сержант Коростелев, гвардиысь сержант Щепин но гвардиысь сержант Хисматулин кылдытӥзы "Брусилов" танклэсь экипажзэ..." Гужем уй вакчи. Со ӝог ортчиз. Ньыль эшъёс машинаязы пуксизы. Танк ӵук бус пыр ӟардонэ вырӟиз. Командованимылэн приказэз валамон: "Тушмонлэсь обороназэ тӥяно но солэн мышказ потоно." Пулемёт каръёсыз пазьгыса, танк отчиз тушмонлэн траншеяез вамен но мышказ потӥз. Ӝужаз шунды. Тушмон тягач фронт пала зениткаез кыске вал. Пумитаз нюлэскысь асьмелэн танкмы потӥз. Пушкаез гусеницаосыныз лёгаз, тягачез но йӧттӥз. Со вакытэ ик танклэн командирез нюлэс дурысь чурен сылӥсь орудиосыз адӟиз но танксэ соос шоры берыктыны косӥз. Пулемётэнызы пегӟись немецъёс шоры ыбыло, гусеницаосынызы но лёгало. Нош мышказы чузъяське ни вал гвардеецъёслэн кужмо кесяськемзы. Та ож понна Федоренколы, Коростелевлы но Щепинлы Горд Кизили орден сётэмын вал, нош Хисматулинлы "За отвагу" медаль. Таосыз чуръёс 1-тӥ Украинской фронтын потэм газетысь "За честь Родины" газетлэн 1943 арын 3-тӥ ноябре потэм номераз гожтэмын: "Советской Союзлэн Героез Кинжаев старшой сержантлэн расчётаз Украинаез мозмытон понна, батыръёс сямен ожмасько куать национальностен боецъёс: наводчик Самойлов - ӟуч, заряжающей Протозанов - украинец, орудийной номеръёс Кечаев - мордвин, Тимофеев - мариец, Чирков - удмурт, нош ачиз Кинжаев таджик калыклэн пиез." Днепрез но Украинаез фашистъёс киулысь мозмытон понна, ожъёсын данэ потэм артиллеристлэн Кинжаевлэн расчётэз быдэс фронтын ик тодмо луиз ни вал Курск музъем вылын ожмаськон дыръя. Гитлеровецъёс соку Курск пала ожалскизы вал асьме частьёсмес котыртэме басьтыны но быдтыны шуыса. Кык нунал но кык уй артиллеристъёс тушмон танкъёсын секыт ожъёс нуизы. Асьме палась та кыкез солдатъёсмы, танкист Щепин но артиллерист Чирков сярысь, али номыр ик выльзэ вераны уг быгатӥськы. Оло, кин ке та гожтэмме лыдӟыса вазиськыны быгатоз. х х х Верай ини, маин но кыӵе сюлмаськонъёсын улӥсько мон, пурга пи, Москваын. Гажано лыдӟисьёсы, тодматӥ тӥледыз аслам сюлэмвисёнъёсыным. Дасо аръёс ӵоже ини асьме палась солдатъёсмылэн ожмаськон сюресъёссы кузя вамышъясько но соос сярысь гожъясько. Табере куд-ог ӵектӥсьёс но вань: оло, тырмоз, пе, ни тыныд весь солдат сюресъёстӥ вамышъяны? Кылзыны но кулэ-а, мар-а ини?.. Берло аръёсы быдэстэм ужъёсы, гожтэмъёсы, аслам ӝӧкам кыллё ук, соосыз лыдӟисьёсы доры, удмурт калыке доры вуттэме уг луы. Соин валче ик мынам али вазиськеме но потэ. Оло, вордскем шаерам мынэсьтым куараме кылӥсьёс луозы. Быдэстэм ужъёсы (кигожтэмъёсы) пӧлысь кыкез сярысь гинэ верало. "Вунонтэм нимъёс" сборнике пыртэмын Матросов сямен подвиг лэсьтэм воинъёсмы но Гастелло сямен гомась самолётэнызы тушмонъёсты вылэ ыстэм лечикъёсмы сярысь очеркъёс но документальной повестъёс. Мукетаз кигожтэмам мон верай аслам Кавказ гурезьёсысен Молдавиысь Прут шур дорозь, кунгожмы дорозь, ожмаськыса ортчем сюресме, минаос пуктылэм бусыос вамен сюрес сузяса вамышъямъёсме. Нимай сое "Огъёзъёслэн адӟонзы - мынам адӟонэ". Сӥзи сое кызь куинь арын вордскем солдатъёслы, быремъёсызлы но, война пыр ортчыса улэп кылемъёсызлы но. Туж потэ на вылэм таоссэ кигожтэмъёсме лыдӟисьёс доры но вуттэм. В. ГОЛУБЕВ, отставкаысь полковник. БАДӞЫМ ВОРМОНЛЫ - 54 АР Вамышъясько на солдат сюресъёстӥ Бадӟым Отечественной война историямы ньыль ар кыстӥськем тылӝу аръёс сярысь тодамы ваиськомы Вормон нуналэ пусйыкумы гинэ. Тодӥськом: котькудаз гуртын тылӝу пыр потэм азьвыл солдатъёсмы арлы быдэ ӧжыт кылё ини. Секыт ожъёс пыр ортчем ожгарчиослэсь улонзэс вакчиято на сӧсырмем бервылъёссы но. Мынам огъёзъёсылы, школаысь парта сьӧрысь султыса кошкем пиосты, ӧжытэзлы гинэ кылдӥз улэп кыльыны. Ожмаськон ужлы йыро-пыдо дышетскыны дырмы но ӧй вал уго, пырак пыриським тылӝуэ. Мынам шудэ вылэм на, дыр, луло кыли. Вормон нуналъёсы мон тодам ваисько бырем эшъёсме. Соку кылӥсько кадь соослэсь куараоссэс: "Ми понна но тон ваньзэ вера. Вера ваньзэ, вера зэмзэ. Тонке ӧд, кин вералоз на егитъёсмылы война сярысь, "Тӥни сыӵе мынам улон-вылонэ - али но вамышъясько на солдат сюресъёстӥм. Война сярысь тросгожъямын ни, верамын но тодмо луизы уноелэн батыр подвиг лэсьтэмъёслэн нимъёссы. Нош мон эшшо но эшшо утчасько на тодмотэмъёсызлэсь нимъёссэс. Кема кыстӥськем но секыт войнаын вормонмы котькудӥзлэн солдатмылэн бадӟым подвигез луэ. Соин ик котькудӥзлэн солдатлэн нимыз тодмо мед луозы вал, медаз кыле тодмотэм солдатъёсмы. х х х Кылем арын мон бадӟым ужме мытӥ. Малпай асьме шаерысьтымы солдатъёс сярысь, соосыз войналэн ортчем аръёсызъя но бадӟым ожъёсызъя нимаз-нимаз радъяса, очеркъёс гожтыны. Нырысетӥзэ люкетсэ, ньыльдон одӥгетӥ арысь солдатъёсмы сярысь гожъямъёсме, йылпумъян калэ вуи кадь вал ини. Но туэ архивын документъёсын ужаны кутски но выльысь со ар борды ик берытсконо луи. Ньыльдон одӥгетӥ ар тодмо кылёз Москва дорын ожмаськонъёсын. Со секыт нуналъёсы Бородино бусыетӥ ортчись Можайской оборонительной рубез утьыны косэмын вал Дальней Востокысь вуэм 32-тӥ стрелковой дивизилы. Лек ожъёс мынӥзы уй но нунал но. Одӥгаз нуналэ тушмон асьме войскоосты пачкатыны ӧдъяз. Югдурез тупатон вылысь отчы ыстэмын вал эшелонысь али гинэ васькем разведчикъёслэн батальонзы. Батальонлэн командирезлэн Корепанов майорлэн кивалтэм улсын боецёс фашистъёсыз дугдытыны быгатӥзы но выльысь берыктӥзы кельтэм гуртэз. 16-тӥ октябре ӵукна тушмон выль кужым люкаса выльысь наступленизэ кутскиз. Нуназе пала разведчикъёслэн позициосазы югдур эшшо но лэчытомиз. Соку майор Корепанов батальонзэ атакае ӝутиз. Кияз гранатаен со ачиз но тушмон вылэ урдсскиз. Гитлеровецъёс синйылтӥзы кышкасьтэм командирез шораз ыбылыны кутскизы. Снайперлэн пуляез майорлэн гранатаяз йӧтӥз... Та учыр сярысь мон кемалась тодӥсько ини вал. Кышкасьтэм комбат шаерысьтымы яке солэн палэназ улӥсьёс пӧлысь луыны кулэ шуса малпай. Туэ выльысь архивын ужасьёслы вазиськи. Отын мыным сётӥзы Корепановъёслэсь-офицеръёслэсь картотекаоссэс но шуизы: "Татын ваньзы ик Корепановъёс Удмуртиысь". Но соос пӧлын разведчикъёслэн командирзылэн нимтулыз ӧй вал. Выльысь утчано луиз 32-тӥ дивизиысь ветеранъёсты. Соослэн юрттэменызы мыным выльысь пумиськоно луиз Бородино бусыын ожъёс сярысь кык книгаосылэн авторенызы, дивизилэн война вакытэ потӥсь "Ворошиловец" газетлэн азьвыл редактореныз А. М. Вахрушевен. Солэн юрттэмезъя архивысь шедьтӥзы Василий Павлович Корепановлэсь картотекаез но. Мынам малпанэ зэмаз. Корепанов вордскемын вылэм Кам сьӧрысь Верещагино гуртын, отысен ик армие кошкем. Хасан ты дорын ожмаськемез понна солы сётэмын Горд Знамя орден. Со нуналэ ик мыны тодматскыны кылдӥз 32 дивизилы дуно эшшо одӥгеныз документэн. Бородино бусыын ожмаськем солдатъёслэн списокенызы. "Таӵе ик список вань Бородиноысь музейын но, - шуиз мыным Вахрушев. - Учкелэ сое. Асьтэ палась солдатъёсыз но, оло, отысь шедьтоды. Мон умой тодӥсько: дивизиямы удмурт вал." Тямыстон куать аресъем ветеранлэн кылъёсыз зэмазы. Списокысь шедьтӥ дас ньыльзэ асьме палась солдатъёсмес. Тани соос пӧлысь кӧня ке гинэ: Петров Василий Семенович, стрелок. Шаркан ёросысь Вашур гурт. Ермолаев Василий Романович, миинометной расчётлэн командирез. Юкаменск ёросысь Ялово гурт. Ложкин Михаил Сергеевич, миномётчик. Ува ёрос. Максимов Иван Гуръянович, пулемётчик. Игра ёросысь Бакаево гурт. Леконцев Михаил Николаевич, стрелковой отделенилэн командирез. Игра ёрос, Бочкасой сельсовет. Та берлоосыз кыкез, оло, одӥг гуртысь но луо, гуртъёс сярысь тросаз документъёсын янгышаса гожъяллямын. Ваньзы ик солдатъёс огъёзъёс, вордскемын 1917 арын, армие басьтэмын 1939 арын. Сӥзьыл соослэн гуртазы бертон вуэ вал ини, нош пыриськоно луиз бадӟым войнае. Соослэн адӟонзы сярысь вераны уг быгатӥськы: кылдӥз-а меда кудзылы ке гуртазы берытскыны? Вахрушевлэн верамезъя, та пичи гинэ списокысь боецъёс (нош отчы пыртэмын быдэс полкысь одӥг батальон мында кылемъёсыз гинэ), ваньзы ик зэмос батыръёс кадь ожмаськизы. х х х Озьы но луыны кулэ ук, санаторийын шутэтскыкум В. Успенскийлэсь "Тайный советник вождя" книгазэ лыддӟисько вал. Син шорам усизы таӵе чуръёс: "79-тӥ стрелковой корпуслы азьлане мынон сюрес вылаз Берлинэ ваньмызлэсь азьло пырыны луонлык кылдӥз. Сое быдэстон понна кулэ танкъёс. Но Переверткин генераллэн сыӵе частез отын ӧй вал на. Поттоно луиз 86-тӥ артиллерийской бригадаез. Гусеничной тягачъёсын артиллеристъёс потӥзы азьпала. 21-тӥ апреле потон уе артиллеристъёс бадӟым ӝоглыкен вуизы Берлинэ нуись сбрес дорозь. Озьы соос Берлинэ пыризы но городлэн шораз нырысетӥ снарядъёс тушмон вылэ ыстӥзы." Уйшор бере артиллеристъёс азьлань вырӟизы. Азьпалазы мынӥз А. Костоусов старшой сержантлэн орудиез. Солэн тягачез вылэ интыяськемын вал Н. Волынец старшой сержантлэн разведчикъёсыз но В. Грачёв сержантлэн радистъёсыз. Колоннаез сутӥз на асьмелэн одӥгез танкмы. Немецъёслы матэ вуыса боецъёсмы соосты ыбылыны кутскизы. Пумитазы гитлеровецъёс но автоматъёсын ыбыло, кӧняез ке орудиоссы но ыбизы. Но уй пеймытэн шонер ыбӥськыны ӧз луы. Асьмелн ыштонъёсмы ӧй вал. Артиллеристъёс вуизы автострада доры. Азязы танк но Косоусовлэн орудиез, соос бӧрсьы ик мукетъёсыз но 3- тӥ дивизионысь орудиос пыризы Берлинэ. Офицеръёс но, солдатъёс но шумпото - малпанзы быдэсмиз. Соос Берлинэ ваньмызлэсь азьло пыризы. А. Косоусов старшой сержантлэн расчётаз со нуналъёсы асьсэлэсь быгатонлыксэс но кышкасьтэм луэмзэс возьматӥзы удмурт Василий Чигнашин, бигер Магадеев, казах Сыздыков, азербайджанецъёс Салахов но Ширинов, башкир Янгариев. Сыӵе вал со Берлинэ ваньзылэсь азьло пырем артиллерийской расчёт. Архивысь Чигнашинлэн шедьтыны ӧз быгатэ. Сое утчано луиз 86-тӥ артиллерийской бригадалэн документъёсыз пӧлысь. Отын зэмзэ но вань сыӵе солдат сярысь бумага, но В. Чигнашин удмурт вылымтэ, Волга дурысь, азьвыл Ульяновской областьысь Кузоватово гуртын вордскемын. Малы сое батареялэн азьвыл командирез Л. Дурсенев аслаз донесенияз удмурт шуэм, солы валэктон ӧй шедьты. Но мон шедьты на 79-тӥ стрелковой корпуслэн Берлинэ ваньмызлэсь азьло пырем но Рейхстаг понна ожмаськонэ но пыриськем солдатъёсмылэсь но нимтулъёссэс. Санников Василий Игнатьевич, азьвыл Б. Уча ёросысь Пазял гуртысь. Ефрейтор - батареяысь разведчик. Пусъемын Горд Кизили но куинетӥ степенё Слава орденъёсын. Суслопаров Александр Архипович, старшой сержант. Ува ёросысь Лопухи гуртысь. Пусъемын куинетӥ степенё Слава орденэн но "За боевые заслуги" медален. Широбоков Николай Кузьмич, старшой сержант. Якшур-Бодья ёросысь Чекеово гуртысь. Пусъем каремын Горд Кизили орденэн но "За отвагу" медален. Лекомцев Борис Степанович, медицина службаысь старшой лейтенант, врач. Балезино ёросысь Ягошур гуртысь. Горд Кизили орденэн наградить каремын. Шехарев Дмитрий Федорович, сержант, радистъёслэн отделенизылэн командирез. Ижевскысь, сётэмын куинетӥ степенё Слава но Горд Кизили орденъёс. Котькудӥз та солдат сярысь нимысьтыз но пыр-поч гожтыны луысал Берлинын кышкатэк ожмаськемзы сярысь умой верамын наградалы чектон бумагаосын. х х х Днепр понна ожмаськемъёс пӧлысь асьме палась солдатъёсмылэсь нимъёссэс мыным лыдӟыны кылдӥз 6-тӥ армилэн "Боевая тревога" газетэзлэн 5 декабре 1943 аре потэм номерысьтыз. "Ожмаськизы ньыль эшъёс" статьяын вань таӵе чуръёс: "Украинец Федоренко студент вал, ӟуч пи Коростелев Казахстанын шофёр луыса ужаз, нюлэсо шаерын улиз тракторист удмурт пи Щепин, син сузёнтэм степъёсын ужаз тракторной бригадалэн бригадирез Хисматулин, башкир. Ваньзылэн ик соослэн улонысьтызы малппанъёссы быдэсмемын ни вал. Но войналэн лек гудыръямъёсыз кылӥськизы Удмуртиысь нюлэсъёсын но, Казахстанлэн гурезьёсаз но, Башкирилэн степьёсаз но. Ӝутскиз странамы. Озьы луиз: гвардиысь младшой лейтинант Федоренко, гвардиысь старшой сержант Коростелев, гвардиысь сержант Щепин но гвардиысь сержант Хисматулин, кылдытӥзы "Брусилов" танклэсь экипажзэ..." Гужем вакчи уй ӝог ортчиз. Ньыль эшъёс машинаязы пуксизы. Танк ӵук пыр ӟардонэ вырӟиз. Командованимылэн прикказэз валамон: "Тушмонлэсь обороназэ тӥяно но солэсь мышказ потоно." Пулемёт каръёсыз пазьгыса танк тушмонлэн транщеяез вамен ортчиз но мышказ потӥз. Ӝужаз шунды. Тушмон тягач фронт пала зениткаез кыске вал. Пумитаз нюлэскысь асьмелэн танкмы потӥз. Пушкаез гусеницаосыныз лёгаз, тягачез но йӧттӥз. Со вакытэ ик танклэн командирез нюлэс дурысь чурен сылӥсь орудиосыз адӟиз но танксэ соос шоры берыктыны косиз. Пулеметэнызы пегӟись немецъёс шоры ыбыло, гусеницаосынызы но лёгало. Нош мышказы чузъяське ни вал гвардеецъёслэн кужмо кесяськемзы. Та ож понна Федоренколы, Коростелевлы но Щепинлы Горд Кизили орден сётэмын вал, нош Хисаматулинлы "За отвагу" медаль. Таосыз чуръёс 1 Украинской фронтын потэм газетысь, "За честь Родины" газетлэн 3- тӥ ноябре 1943 арын потэм номераз гожтэмын: "Советской Союзлэн Героез Кинжаев старшой сержантлэн расчётаз Украинаез мозмытон понна батыръёс сямен ожмасько куать национальностен боецъёс: наводчик Самойлов - ӟуч, заряжающий Протозанов - украинец, орудийной номеръёс Кечаев - мордвин, Тимофеев - мариец, Чирков - удмурт, нош ачиз Кинжаев таджик калыклэн пиез." Днепрез но Украинаез фашистъёс киулысь мозмытон понна ожъёсын данэ потэм артиллеристлэн Кинжаевлэн расчетэз быдэс фронтын ик тодмо луиз ни вал Курск музъем вылын ожмаськон дыръя. Гитлеровецъёс соку Курск пала ожалскизы вал асьме частьёсмес котыртэме басьтыны но быдтыны туртыны шуыса. Кык нунал но кык уй артиллеристъёс тушмон танкъёсын секыт ожъёс нуизы. Асьме палась та кыкез солдатъёсмы, танкист Щепин но артиллерист Чирков сярысь, али номыр ик выльзэ вераны уг быгатӥськы. Оло кин ке та гожтэмме лыдӟыса вазиськыны быгатоз. х х х Верай ини, маин но кыӵе сюлмаськонъёсын улӥсько мон, пурга пи, Москваын. Гажано лыдӟисьёсы, тодматӥ тӥледыз аслам сюлэм "висёнъёсыным". Дасо аръёс ӵоже ини асьме палась солдатъёсмылэн ожмаськон сбресъёссы кузя вамышъясько но соос сярысь гожъясько. Табере куд-ог чектӥсьёс но вань: оло тырмоз, пе. ни тыныд весь солдат сюресъёсти вамышъяны? Кылзыны но кулэ-а, мар-а ини?.. Берло аръёсы быдэстэм ужъёсы, гожтэмъёсы, аслам ӝокам кылле ук, соосыз лыдӟисьёсы доры, удмурт калыке доры вуттэме уг луы. Соин валче ик мыным али вазиськеме но потэ. Оло вордскем шаерам мынэсьтым куараме кылисьёс луозы. Быдэстэм ужъёсы (кигожтэмъёсы) пӧлысь кыкез сярысь гинэ верало. "Вунотэм нимъёс" сборнике пыртэмын Матросов сямен подвиг лэсьтэм воинъёсмы но Гастэло сямен гомась самолётэнызы тушмонъёсты вылэ быдтэм лечикъёсмы сярысь очеркъёс но документальной повестъёс. Мукетаз кигожтэмам мон верай аслам Кавказ гурезьёсысен Молдавиысь Прут шур дорозь, кунгожмы дорозь, ожмаськыса ортчем сюресме, минаос пуктылэм бусыос вамен сюрес сузяса вамышъямъёсме. Нимай сое "Огъезъёслэн адӟонзы - мынам адӟонэ". Сӥзи сое кызь куинь арын вордскем солдатъёслы, быремъёсызлы но, война пыр ортчыса улэп кылемъёсызлы но. Туж потэ на вылэм таоссэ кигожтэмъёсме лыдӟысьёс доры но вуттэм. В. ГОЛУБЕВ, отставкаысь полковник. БЫДӞЫМ ВОРМОНЛЫ - 54 АР Вамышъясько на солдат сюресъёстӥм Быдӟым Отечественной война историямы кылиз ни. Ньыль ар кыстӥськем тылӝу аръёс сярысь тодамы ваиськомы Вормон нуналэз пусйыкумы гинэ. Тодӥськом: котькудаз гуртын тылӝу пыр потэм азьвыл солдатъёсмы арлы быдэ ӧжыт но ӧжыт кылё ини. Мынам огъёзъёсылы, школаысь парта сьӧрысь султыса кошкем пиослы, ӧжытэзлы гинэ кылдӥз улэп кыльыны. Ожмаськон ужлы тыро-пыдо дышетскыны дырмы но ӧй вал уго, пырак пыриським тылӝуэ. Война сярысь трос гожъямын ни, верамын но тодмо луизы уноезлэн батыр подвиг лэсьтэмъёслэн нимъёссы. Нош мон эшшо но эшшо утчасько на тодмотэмъёсызлэсь нимъёссэс. х х х Кылем арын бадӟым ужме мытӥ. Малпай асьме шаерысьтымы солдатъёс сярысь, соосыз войналэн ортчем аръёсызъя но бадӟым ожъёсъя нимаз-нимаз радъяса, очеркъёс гожтыны. Нырысетӥзэ люкетсэ, ньыльдон одӥгетӥ арысь солдатъёсмы сярысь гожъямъёсме, йылпумъян калэ вуттӥ кадь вал ини. Но туэ архивын документъёсын ужаны кутски но выльысь со ар борды ик берытсконо луи. Таа ар тодмо кылёз Москва дорын ожмаськонъёсын. Со секыт нуналъёсы Бородино бусыетӥ ортчись Можайск оборонительной рубежез утьыны косэмын вал Дальней Востокысь вуэм 32-тӥ стрелковой дивизилы. Лек ожъёс мынӥзы уй но нунал но. Одӥгаз нуналэ тушмон асьме войскоосты пачкатыны ӧдъяз. Югдурез тупатон вылысь, отчы ыстэмын вал эшелонысь соку гинэ вуэм разведчикъёслэн батальонзы. Батальонлэн командирез Корепанов майор кивалтэм улсын боецъёс фашистъёсыз дугдытыны быгатӥзы но кельтэм гуртэз выльысь берыктӥзы. 16-тӥ октябре ӵукна тушмон выль кужымзэ люкаса нош ик азьлань мерскиз. Нуназе пала разведчикъёслэн позициосазы югдур эшшо но лэчытомиз. Соку майор Корепанов батальонзэ атакае ӝутӥз. Кияз гранатаен со ачиз но тушмон вылэ урдскиз. Гитлеровецъёс синйылтӥзы кышкасьтэм командирез, шораз ыбылыны кутскизы. Снайперлэн пуляез майорлэн гранатаяз йӧтӥз... Та учыр сярысь мон кемалась тодӥсько ини вал. Кышкасьтэм комбат шаерысьтымы яке солэн палэназ улӥсьёс пӧлысь луыны кулэ шуыса малпай. Туэ выльысь архивын ужасьёслы вазиськи. Отын мыным сётӥзы Корепановъёслэсь-офицеръёслэсь картотекаоссэс но шуизы: "Татын ваньзы ик Корепановъёс - Удмуртиысь". Но соос пӧлын разведчикъёслэн командирзылэн нимтулыз ӧй вал. Выльысь утчано луиз 32-тӥ дивизиысь ветеранъёсты. Соослэн юрттэменызы, мыным выльысь пумиськоно луиз Бородино бусыын ожъёс сярысь кык книгаосылэн авторенызы, дивизилэн война вакытэ потӥсь "Ворошиловец" газетлэн редактореныз А. М. Вахрушевен. Солэн юрттэмезъя, архивысь ик шедьтӥзы Василий Павлович Корепановлэсь картотеказэ но. Мынам малпанэ зэмаз. Корепанов вордскемын вылэм Кам сьӧрысь Верещагино гуртын, отысен ик армие кошкем. Хасан ты дорын ожмаськемез понна, солы сётэмын Горд Знамя орден. Со нуналэ ик мыным тодматскыны кылдӥз 32-тӥ дивизия понна дуно луэм эшшо одӥгеныз документэн. Бородино бусыын ожмаськем солдатъёслэн списокенызы. "Таӵе ик список вань Бородиноысь музейын но, - шуиз мыным Вахрушев. - Учкелэ сое. Асьтэ палась солдатъёсыз но, оло, отысь шедьтоды. Мон умой тодӥсько: дивизиямы удмурт вал." Тямыстон куать аресъем ветеранлэн кылъёсыз зэмазы. Списокысь шедьтӥ дас ньыльзэ асьме палась солдатъёсмес. Тани соос пӧлысь кӧняез ке гинэ: Петров Василий Семенович, стрелок. Шаркан ёросысь Вашур гурт. Ермолаев Василий Романович, минометной расчётлэн командирез. Юкаменск ёросысь Елово гурт. Ложкин Михаил Сергеевич, миномётчик. Ува ёрос. Максимов Иван Гурьянович, пулемётчик. Игра ёросысь Бакаево гурт. Леконцев Михаил Николаевич, стрелковой отделенилэн командирез. Игра ёрос, Бочкарской сельсовет. Та берлоосыз кыкез, оло, одӥг гуртысь но луо, гурт нимъёс тросаз документъёсын янгышаса гожъяллямын. Ваньзы ик солдатъёс огъёзъёс, вордскемын 1917 арын, армие басьтэмын 1939 арын. Сӥзьыл соослэн гуртазы бертонзы вуэ вал ини, нош пыриськоно луиз бадӟым войнае. Соослэн адӟонзы сярысь вераны уг быгатӥськы: кылдӥз-а меда кудзылы ке гуртазы берытскыны? Вахрушевлэн верамезъя, та пичи гинэ списокысь боецъёс (нош отчы пыртэмын быдэс полкысь одӥг батальон мында кылемъёсыз гинэ), ваньзы ик зэмос батыръёс кадь ожмаськизы. х х х Озьы но луыны кулэ ук, санаторийын шутэтскыкум В. Успенскийлэсь "Тайный советник вождя" книгазэ лыдӟисько вал. Син шорам усизы таӵе чуръёс: "79-тӥ стрелковой корпуслы азьлане мынон сюрес вылаз Берлинэ ваньмызлэсь азьло пырыны луонлык кылдӥз. Сое быдэстон понна кулэ танкъёс. Но Переверткин генераллэн сыӵе частез отын ӧй вал на. Поттоно луиз 86-тӥ артиллерийской бригадаез. Гусеничной тягачъёсын артиллеристъёс потӥзы азьпала. 21-тӥ апреле потон уе артиллеристъёс бадӟым ӝоглыкен вуизы Берлинэ нуись сюрес дорозь. Озьы соос Берлинэ пыризы но городлэн шораз нырысетӥ снарядъёс тушмон вылэ ыстӥзы." Уйшор бере артиллеристъёс азьлань вырӟизы. Азьпалазы мынӥз А. Костоусов старшой сержантлэн орудиез. Солэн тягачез вылэ интыяськемын вал Н. Волынец старшой сержантлэн разведчикъёсыз но В. Грачёв сержантлэн радистъёсыз. Колоннаез сутӥз на асьмелэн одӥгез танкмы. Немецъёслы матэ вуыса, боецъёсмы соосты ыбылыны кутскизы. Пумитазы гитлеровецъёс но автоматъёсын ыбыло, кӧняез ке орудиоссы но ыбизы. Но уй пеймытэн шонер ыбылӥськыны ӧз луы. Асьмелэн ыштонъёсмы ӧй вал. Артиллеристъёс вуизы автострада доры. Азязы танк но Костоусовлэн орудиез, соос бӧрсьы ик мукетъёсыз но 3- тӥ дивизионысь орудиос пыризы Берлинэ. Офицеръёс но, солдатъёс но шумпото - малпанзы быдэсмиз. Соос Берлинэ ваньмызлэсь азьло пыризы. А. Костоусов старшой сержантлэн расчётаз со нуналъёсы асьсэлэсь быгатонлыксэс но кышкасьтэм луэмзэс возьматӥзы удмурт Василий Чигнашин, бигер Магадеев, казах Сыздыков, азербайджанецъёс Салахов но Ширинов, башкир Янгариев. Сыӵе вал со - Берлинэ ваньзылэсь азьло пырем артиллерийской расчёт. Архивысь Чигнашинэз шедьтыны ӧз быгатэ. Сое утчано луиз 86-тӥ артиллерийской бригадалэн документъёсыз пӧлысь. Отын, зэмзэ но, вань сыӵе солдат сярысь бумага, но В. Чигнашин удмурт вылымтэ, Волга дурысь, азьвыл Ульяновск областьысь Кузоватово гуртын вордскемын. Малы сое батареялэн азьвыл командирез Л. Дурсенев аслаз донесенияз удмурт шуэм, солы валэктон ӧй шедьты. Но мон шедьтӥ на Берлинэ ваньмызлэсь азьло вуэм но рейхстаг понна ожмаськонэ пыриськем солдатъёсмылэсь но нимтулъёссэс. Санников Василий Игнатьевич, азьвыл Б. Уча ёросысь Пазял гуртысь. Ефрейтор - батареяысь разведчик. Пусъемын Горд Кизили но куинетӥ степенё Слава орденъёсын. Суслопаров Александр Архипович, старшой сержант. Ува ёросысь Лопухи гуртысь. Пусъемын куинетӥ степенё Слава орденэн но "За боевые заслуги" медален. Широбоков Николай Кузьмич, старшой сержант. Якшур-Бодья ёросысь Чекерово гуртысь. Пусъемын Горд Кизили орденэн но "За отвагу" медален. Лекомцев Борис Степанович, медицина службаысь старшой лейтенант, врач. Балезино ёросысь Ягошур гуртысь. Горд Кизили орденэн наградить каремын. Шехарев Дмитрий Федорович, сержант, радистъёслэн отделенизылэн командирез. Ижевскысь, сётэмын куинетӥ степенё Слава но Горд Кизили орденъёс. Котькудӥз та солдат сярысь нимысьтыз но пыр-поч гожтыны луысал. Берлинын кышкатэк ожмаськемзы сярысь умой верамын наградалы ӵектон бумагаосын. х х х Днепр понна ожмаськемъёс пӧлысь асьме палась солдатъёсмылэсь нимъёссэс мыным лыдӟыны кылдӥз 6-тӥ армилэн "Боевая тревога" газетэзлэн 5 декабре 1943 аре потэм номерысьтыз. "Ожмаськизы ньыль эшъёс" статьяын вань таӵе чуръёс: "Украинец Федоренко студент вал, ӟуч пи Коростелев Казахстанын шофёр луыса ужаз, нюлэсо шаерын улӥз тракторист удмурт пи Щепин, син сузёнтэм степьёсын ужаз тракторной бригадалэн бригадирез Хисматулин, башкир. Ваньзылэн ик соослэн улонысьтызы малппанъёссы быдэсмемын ни вал. Но войналэн лек гудыръямъёсыз кылӥськизы Удмуртиысь нюлэсъёсын но, Казахстанлэн гурезьёсаз но, Башкирилэн степьёсаз но. Ӝутскиз странамы. Озьы луиз: гвардиысь младшой лейтенант Федоренко, гвардиысь старшой сержант Коростелев, гвардиысь сержант Щепин но гвардиысь сержант Хисматулин, кылдытӥзы "Брусилов" танклэсь экипажзэ..." Гужем вакчи уй ӝог ортчиз. Ньыль эшъёс машинаязы пуксизы. Танк ӵук бус пыр ӟардонэ вырӟиз. Командованимылэн приказэз валамон: "Тушмонлэсь обороназэ тӥяно но солэн мышказ потоно." Пулемёт каръёсыз пазьгыса, танк отчиз тушмонлэн траншеяез вамен но мышказ потӥз. Ӝужаз шунды. Тушмон тягач фронт пала зениткаез кыске вал. Пумитаз нюлэскысь асьмелэн танкмы потӥз. Пушкаез гусеницаосыныз лёгаз, тягачез но йӧттӥз. Со вакытэ ик танклэн командирез нюлэс дурысь чурен сылӥсь орудиосыз адӟиз но танксэ соос шоры берыктыны косӥз. Пулемётэнызы пегӟись немецъёс шоры ыбыло, гусеницаосынызы но лёгало. Нош мышказы чузъяське ни вал гвардеецъёслэн кужмо кесяськемзы. Та ож понна Федоренколы, Коростелевлы но Щепинлы Горд Кизили орден сётэмын вал, нош Хисматулинлы "За отвагу" медаль. Таосыз чуръёс 1-тӥ Украинской фронтын потэм газетысь, "За честь Родины" газетлэн 3-тӥ ноябре 1943 арын потэм номераз гожтэмын: "Советской Союзлэн Героез Кинжаев старшой сержантлэн расчётаз Украинаез мозмытон понна, батыръёс сямен ожмасько куать национальностен боецъёс: наводчик Самойлов - ӟуч, заряжающий Протозанов - украинец, орудийной номеръёс Кечаев - мордвин, Тимофеев - мариец, Чирков - удмурт, нош ачиз Кинжаев таджик калыклэн пиез." Днепрез но Украинаез фашистъёс киулысь мозмытон понна, ожъёсын данэ потэм артиллеристлэн Кинжаевлэн расчётэз быдэс фронтын ик тодмо луиз ни вал Курск музъем вылын ожмаськон дыръя. Гитлеровецъёс соку Курск пала ожалскизы вал асьме частьёсмес котыртэме басьтыны но быдтыны шуыса. Кык нунал но кык уй артиллеристъёс тушмон танкъёсын секыт ожъёс нуизы. Асьме палась та кыкез солдатъёсмы, танкист Щепин но артиллерист Чирков сярысь, али номыр ик выльзэ вераны уг быгатӥськы. Оло, кин ке та гожтэмме лыдӟыса вазиськыны быгатоз. х х х Верай ини, маин но кыӵе сюлмаськонъёсын улӥсько мон, пурга пи, Москваын. Гажано лыдӟисьёсы, тодматӥ тӥледыз аслам сюлэм "висёнъёсыным". Дасо аръёс ӵоже ини асьме палась солдатъёсмылэн ожмаськон сюресъёссы кузя вамышъясько но соос сярысь гожъясько. Табере куд-ог ӵектӥсьёс но вань: оло, тырмоз, пе, ни тыныд весь солдат сюресъёстӥ вамышъяны? Кылзыны но кулэ-а, мар-а ини?.. Берло аръёсы быдэстэм ужъёсы, гожтэмъёсы, аслам ӝӧкам кыллё ук, соосыз лыдӟисьёсы доры, удмурт калыке доры вуттэме уг луы. Соин валче ик мынам али вазиськеме но потэ. Оло, вордскем шаерам мынэсьтым куараме кылӥсьёс луозы. Быдэстэм ужъёсы (кигожтэмъёсы) пӧлысь кыкез сярысь гинэ верало. "Вунонтэм нимъёс" сборнике пыртэмын Матросов сямен подвиг лэсьтэм воинъёсмы но Гастэлло сямен гомась самолётэнызы тушмонъёсты вылэ быдтэм лечикъёсмы сярысь очеркъёс но документальной повестъёс. Мукетаз кигожтэмам мон верай аслам Кавказ гурезьёсысен Молдавиысь Прут шур дорозь, кунгожмы дорозь, ожмаськыса ортчем сюресме, минаос пуктылэм бусыос вамен сюрес сузяса вамышъямъёсме. Нимай сое "Огъёзъёслэн адӟонзы - мынам адӟонэ". Сӥзи сое кызь куинь арын вордскем солдатъёслы, быремъёсызлы но, война пыр ортчыса улэп кылемъёсызлы но. Туж потэ на вылэм таоссэ кигожтэмъёсме лыдӟисьёс доры но вуттэм. В. ГОЛУБЕВ, отставкаысь полковник. ИВОРЪЁС Кут кияд аппараттэ Ижевсклэн администрациез, Фотографъёслэн огазеяськонзы но "Русская легенда" фонд- студия вуоно пятницае ортчыто "Ижевск вадьсын - дыдык" нимо ужрад. Фотографиез кылдытэм дырысен 160 ар тырмонлы сӥзьыса, акциез радъясьёс дэмлало фотоаппаратэн эшъяськисьёслы быдэн нунал ӵоже адӟыны-чакланы шоркармылэн улонысьтыз пӧртэм суредъёсты но соосты вуоно поколениослы туспуктэмъёсын кельтыны. Устоосыз ужъёс возьматэмын луозы Городлэн нуналаз нимысьтыз адӟытонын. Вормисьёсты витё ӟеч кузьымъёс. Озьыен, эше, 14-тӥ мае кут кияд аппараттэ! И. КРИЧЕВ. ШӦКЫЧ Кутчаз ке кутчаз Алигес мынам тодмое гаишникъёсты кутчаз ке кутчаз. Пыриз вал со мон доры, огшоры кенешыны шуыса. Вераськонъя, кызьы шуо, кыл бӧрсьы кыл, куро улысь шыр потэм мактал. Ӧжытак ӟузёно но луиськиз. Шонерзэ вераса, эше воксё кисальӟиз, машинаезлэсь ӧссэ но мырдэм усьтӥз. Укмысэтӥ моделё "Жигули" вырӟиз. Ӟоскыт азбарамы но нокытчы ӧз мырӟиськы, ява. Одӥгаз урамысен сое документъёссэ эскерыны дугдыто. Валамон ини, милиционеръёс шӧдӥзы шофёр кудӟемын шуыса. "Али ми тонэ анализъёстэ басьтыны келялом, собере правоеныд люкиськоно луоз", - шуо соос. Ӵапак со дыре "БМВ" электроюбо шоры мырӟиськиз. Милиционеръёс отчы лобатӥзы, эшелы шуизы: "Татын сыл. Возьма". Борис возьмаз-возьмаз, кынмыны но кутскиз. "Малы мон соосты возьманы кулэ", - малпаз со. "Жигулияз" пуксиз, усьтонзэ интыяз, машиназэ лэзиз но азьлань ширтӥз. Машиназэ гаражаз пуктӥз но умой-умой йырсазьтэк гуртаз вуиз. Кышнозэ юн-юн алӥз: "Погонэн адямиос лыктӥзы ке, шуод, мон быдэс нунал гуртын вал шуыса, висе шуод на". Кык час улыса, ӵапак со гаишникъёс ик вуо. - Сыӵе-сыӵе госномерен машиналэн кузёез татын-а улэ? - Ма, тӥни температураен кылле, куинетӥ нуналзэ ульчае уг пота ни. - Нош машинаез кытын? - Кытын луыны кулэ, гаражын, - валэктэ кышноез. - Ойдолэ учком. Борислэн кышноез гаражез усьтэ но ӧжыт гинэ кулыса уг усьы. Отын ментъёслэн мигалкаен укмысэтӥ моделё "Жигулизы" сылэ. Борис ӝегатэм интыысьтызы соослэн машинаенызы кошкем, нош аслэсьтыззэ отчы кельтэм. Милиционеръёслэн сокем ик вожзы ӧз поты, ӧжытак серекъязы но, кӧлӥсь водительлэсь правозэ но ӧз басьтэ ни. Зэм. Аслэсьтыз машиназэ Борис вуттӥз ини штраф тырон интыысь. Та учыр бере ми Борисэн кыл сётӥмы: котьма ке но, ичигес юыны кулэ. Арнязэ возиськиськом ни... Н. ЕФРЕМОВ. Выж вылын возё ке но... Шаерамы таӵе тылобурдо вордон фабрикаос ӧвӧл ни, шуыны луоз. Можгаос тылобурдооссэс выж вылын, огъя уллёын возё. Тани одӥг гидын Люман-Брау немец выжыысь 440-450 гордэсь курегъёс интыямын. Мукет фабрикаосын сямен татын клеткаос ӧвӧл. Соин ик троссэ ужъёсты киын быдэсъяло. Озьы ке но, адямиос шуг- секытъёс шоры уг учко. Кылсярысь, Ираида Григорьева татын 28 ар тырше ни. Кыӵе-мар ужаськоды, юамелы валэктӥз: - Мылкыдмы умой, али дыраз коньдон басьтӥськом. Ужмы бен капчи ӧвӧл. Сиён киын сётъяськом. Шугез шоры учкытэк, фабрикаын уно аръёс ӵоже мылысь-кыдысь тыршо курег сюдӥсьёс Мунира Исхакова, Любовь Филиппова, Александра Соловьева но мукетъёсыз. Инкубаторын синмаськымон, быгатыса ужало операторъёс Валентина Лесникова но Галина Лаврентьева. Соос уно чипы потто. Азьло уго татын инкубатор гинэ вал, табере со тылобурдо вордон фабрика луиз но арысь аре паськыта но кужмоя. Али эшшо одӥг курег гид ӝуто на. Борддорез но липетэз вань ни. Берло дыре можгаос ӵӧжпиос поттыны ӧдъязы. Пинал тылобурдоез калык шумпотыса басьтэ. Нош соосты валаса сюдэ-утялтэ Нина Березкина. Со та удысаз 12 ар ужа ни. Нина Николаевна фабрикаысь мукет уже кошкылӥз, но туэ выльысь яратоно, ӵуж-ӵуж зарни комокъёсыз доры берытскиз. Тани фабрика туэ 4 сюрс ӵӧжпи поттӥз но ваньмыз сямен вузамын ни. Кылемын на 400 пала, али соосты одӥгзэ 1 манетэн вузало. Фабрикаын тужгес но пӧсь йӧтэ, дыр, Алевтина Нестеровалы. Солэн али 15 сюрс чипыосыз. Алевтина Ивановналэн 6 номеро гидэз ваньмызлэсь висъяське. Та корпусын туж шуныт, котыр чылкыт, выж вылэ вӧлдэмын выль пул пызь. Ӵуж-ӵуж мусоесь чипыосыз арлыдзыя висъетъёсы люкылэмын. Вузы ӵӧжпиослы сямен ик куинь литръем банкаос улэ тыремын. Озьы соос уг котло. Фабрикаын та вакытэ ньыль сюрслэсь уно пузась курегъёссы. Соослэсь нуналлы быдэ шорлыдын 3600-3700 курег пуз басьто. Берло дыре продукцизы одӥг но ӝыны поллы йылӥз. Нош курегъёссэс 1-1,5 ар гинэ пузато, собере сӥльлы вандыло. Фабрикалэн ужъёсыныз тодматскыса, син шоры йӧтэ гидъёлэн чылкытлыксы. Татын санитарияя куронъёсты умой быдэсъяло. Та ласянь чурытэсь куронъёс пуктэ предприятиысь валтӥсь ветеринарной врач Галина Сафина. Со уго ӟеч тодэ, тылобурдоосты висёнъёслэсь юн утёно, уката ик чипыосты но ӵӧжпиосты. Врачлэсь куронъёссэ тылобурдо утӥсьёс ӟеч быдэсъяло, ваньзэ умой чаклало. Г. РОМАНОВ. Кыӵе тазалыкты? Удмурт лулчеберлыкъя "Дэмен" огазеяськонлэн ужаз мылысь-кыдысь пырисько эмъясьёс но. Соос нюръясько тазалыкмес утён понна. Тодосчиос но врачъёс ӵем вуыло городъёсы, кыдёкысь гуртъёсы, больницаосы, школаосы. Кылем толэзе, кылсярысь, медакадемиысь профессоръёс В. Н. Савельев, Я. М. Вахрушев, А. А. Петраков, доцент А. З. Бобров но психиатр В. Т. Лекомцев Ижысь 16 номеро шор ёзо школае - комплексэ ветлӥзы, отын ортчытӥзы сюрлы висёнъёсыз но кынманэз ӟеч эмъян пумысен кенешон. Висисьёслы татын ик юрттэт сётэмын вал. Егит суредасьёслэн ужъёссы Чеберлыкез яратӥсьёслэн куремзыя, тулыс толэзьёсы "Дэмен" куинь интыын возьматӥз шаерысьтымы егит суредасьёслэсь ужъёссэс. Куамын пала суред огазеямын вал нимысьтыз выставкае-адӟытонэ. Соосын трос адямиос тодматскизы Операя но балетъя кун театрын, Воткалась музейын но Арсеналын. Кылдытэмын выль ёзэз Берло вакытэ "Удмурт кенеш" огазеяськонлэн Октябрь ёросысь ёзэз аслэсьтыз ужзэ котыр ласянь кужмоятэ. Отысь кивалтэтэ быръем эшъёс пӧртэм пумиськонъёс, фестивальёс, кенешъёс ортчытъяло. Шуген адӟисьёслэн обществозылэн "Спутник" клубаз алигес трос удмуртъёс люкаськылӥзы. Соос доразы ӧтчазы "Удмурт кенеш" огазеяськонлэсь районысь ёзэн кивалтӥсьсэ З. Б. Петроваез но правление быръем муртъёсыз С. А. Ильинэз, Е. А. Ботниковаез, А. И. Поткинаез но "Дэменысь" куд-ог эшъёсты. Клубе люкаськемъёс кенешизы удмурт калыклэсь улонзэ умоятон сярысь сюлэмшугъяськытӥсь ужпумъёсъя, огкылысь пусйизы, таяз быръёнъёсы выжы калыклэн нылпиосыз пӧлысь туж ичиез Удмурт Республикаысь Кун Кенеше депутатэ быръемын вал шуыса. "Асьмелы ваньмылы огазеяськыны кулэ ", - ӵектӥзы "Спутнике" лыктэмъёс. Отын ик соос бырйизы кенешчиослэн огазеяськонзылэн выль ёзэзлы кивалтэт. Вуоно пумиськонын правленилы тӧро бырйыны кенешемын. Озьыен, "Удмурт кенешлэн" кужымез, ӧжытлы ке но, эшшо ватсаськоз на. К. ЛОМАГИН. ШӦКЫЧ Серекъяме потэ Ужысь бертӥсь кузпалме пумитаса пальпотытэк уг чидаськы ни. - Ма, мар-ось такем ӝегатскиськод уж дурад? Скалъёсыд вӧзысь кошкемед уг поты шат? Уть ай, кытчы-о кесид берпуметӥ дэремдэ? Оло, кыӵе ке шакшыез эриктэманы турттэ вал? - Кошкы ай вӧзысьтым, азьтэм коӵыш! - чирак кеськиз кузпалэ. Синучкон азе лыктыса утчалляськиз но вожпотэмзэ ӧз ваты ни. - Эшшо ке монэ серекъяськод. Гуртысь бомж! Ужтэк кылемъёслэн биржаысьтызы сётэм коньдонэныд коть одӥг дэрем кузьма вал. - Нина, - матэктӥсько вӧзаз. - Серекъян-маскаръяськон нуналэз буре вайыса озьы вераны шедьтӥ вал. Малпай ӵошен гором. - Шулдыръяськемед тынад! Кый яд кадь ӵушка, пыд йылысь ик погыртымон. Астэ синучконэтӥ учкы но серекъя. Ужатэк пукыса синкотыръёстэ кӧй нюртэм ни. Ӧз, ӧз пӧрмы серекъян-маскаръяськонэ. Мылкыд бурдъёсы сӧсырмизы. Магнитофонэз "улӟытытэк" амалы ӧз луы. "Ах, ты, бедная овечка..." - чузъяськиз жингрес кырӟан. Нош мынам син азям пуксиз кӧшкемыт суред. Синвуэн бычырам синъёс, куриськись, тэльмырись бӧксэм куара. Таяз арняе берпуметӥ ыжмес сӥльлы вандӥ вал. Жальлыкме ӧй вормы ни, синвуосы бычыразы. Магнитофонэз палэнтыса, телевизор азе интыяськи. Ӵапак "Смехопонарама" кутске. Осконэ ӧз кысы на: "Оло, Петросян юрттоз, серем пыры кузьмалоз". Ӧвӧл, туннэ яратоно артистэ но кужымтэм кариськиз. Чагыр экранысь рекламаосты курласа-ӵушкаса вераське. Соос мынам синмам но жаг пыры музэн мертчиськемын ни. Бурдо памперсъёсын сэрен вуж телевизормы омыре но ӝутскоз ай. Йыркурен. Кӧттыро уд луы "Магги" кубикъёсын но, гурт улӥсьлы уз юртты Битнерлэн пукетэм вуэз но. Ӧй чида ни, буш ведраосты кутыса, колонка доры вулы потӥ. Отын но мон кадь ик мӧзмылэс тусо бускельёсы сыло. Ымнырзы чырс палэзь куртчем бере кадь. Серекъятыны, шумпоттыны малпай. - Ох, шулдыръяськозы ини туннэ гуртоосмы. Ох, юондыръёс жингыралозы, - мытӥ мадёсме. - Ма муген-о шулдыръяськыны косӥськод? - лекак юаз Глаша кенак. - Сютэмен вузыны косӥськод, оло? - Остэ-э, - чабкиськисько ачим. - Улон вирсэрлэсь тэтчамзэ уд шӧдӥськы ни шат? Колхозын но бюджетысь коньдон басьтӥсьёслы но уждун сётъяло уго. Почтае пенсия но вуттӥллям шуо... Маке-маке ватсаса ӧй вутты ни: бускельёсме кужмо тӧлпери ӝутыса ас сьӧраз нуыса кошкиз кадь. Ваньзы, ведраоссэс куштыса, уждунлы бызизы. Тыро ведраосме ӝутыса, мон но дорам дыртӥ. Ураме потыны уг яра туннэ. Эрекчаськеме понна лушкаськись коӵышез музэн тышкалозы, ява! Уг, уг пӧрмы серекъян- шулдыръяськон. Нош кыӵе потэ вал гореме! Почта ящикысь газетъёсты пыртыса, выль иворъёсын тодматскыны кутски. Нырысетӥ бамын ик печатламын Коньдон ужпумъя министерстволэн ивортонэз: "М манет выльысь ас кужымзэ шедьтӥз. Долларез но евро-манетэз бӧрсяз кельтыса, вылӥысь лёгетэ ӝутӥськиз. Соин валче быдтэмын вань налогъёс, кулэстэмын вузъёслэн дунзы, 200 процентлы будэтэмын уждун, пенсия, стипендия..." Валасько: эрекчало, возьыттэмъёс. Озьы ке но мылкыды шулдырме, ымдуръёсам пальпотон кенжытскыны курадӟе ни. Кыкетӥ бамын матынъяськись быръёнъёс сярысь статья. "Улмочиослэн" фракцизы ӵектэ котькуд муртлы Адамлэсь улмозэ. Владимир Вольфовичлэн партиез котькуд куаразэ сётэм муртлы кузьмасько, пе, Гавай шормуӵысь музъем. Одӥг квадратной метр. Ой, сыӵе капчи луиз мылкыды. Мон сюлмысь горыны кутскисько. Кыӵе шулдыр но чебер ик асьмелэн улон-вылонмы! Телевизор пыр жингыра кырӟан: "Я люблю, тебя жизнь..." Кыӵе умой мыным, кыӵе шулдыр! Н. Никифоров. Ӵуказе - Радиолэн нуналэз Кызьы тодмо, радиоез кылдытӥз ӟуч адями - Александр Попов. Удмуртия Москваысь нырысетӥ радиотулкымъёсты кутӥз 1923-тӥ арын. Вуоно араз кибашлыос Н. И. Кудряшов но И. И. Козлов Ижевскын нырысьсэ лэсьтӥзы пичи кужымен ужась радиотранслятор. Солэн куараез 25-30 коркан гинэ чузъяськиз. 1927-тӥ арын радио вуиз 250 семьяе. Соку ик сётыны ӧдъязы интыосысь передачаосты. Нуназе вакытэ заводъёсысь репродукторъёс пыр чузъяськизы "Ижевская правда" газетысь иворъёс. 1930-тӥ арын Главполитпросвет Удмурт автономной областьын радиостанция усьтонэз ӝогомытон сярысь ужпум кутӥз. Нош 1932-тӥ арын 5 ноябре 363,6 метр радиотулкымен ужась выль радиостанция усьтӥськиз. Соку ик чузъяськиз удмурт кылын нырысетӥез передача. Та нунал ик лыдъяське Удмурт радиолэн вордскеменыз. Али шаерамы ужа 46 радиокомпания. Ёросъёсын но городъёсын вань нимысьтыз радиостанциос, куд-огезлэн вань нимаз кузёоссы. Радио телевидениен юн герӟаськемын бере, вераны кулэ "чагыр экранын" ужасьёс сярысь но. Али Удмуртиын 35 телекомпания ужа. Шаерамы улӥсьёс шумпотыса кылзо "Авторадио" станцилэсь радиоверанъёссэ. Солэн передачаез нырысьсэ чузъяськиз 1995 арын 18-тӥ феврале. Ми радиоын вань ужасьёсты ӟечкыласьком та дано нуналэнызы. Ужады азинсконъёс тӥледлы! Туспуктэмъёс вылын: "Авторадио" компаниын ужасьёс: жингрес куараеныз котьку мылкыдэз ӝутэ "Собеседник" передачаез нуись Любовь Чижова; эфирын ужась операторъёс Алексей Курбатов но Андрей Грис; передачалы крезьгур быръё режиссёръёс Игорь Кузнецов но Владимир Столбов. Н. Байтеряков. В. Камашев (фото). Шӧкыч Чылкак валантэм луиз та улонэд. Ожысь но ужысь ветеранъёс воксё паймо: Ижевскысь куашкан калэ вуэм цирк азьын егит воргоронъёс басьто орденъёсты, медальёсты, кепыр уг ваё мудоръёслэсь-обросъёслэсь но. Соиз но валантэм: малы меда милиция вӧзтӥзы чик кӧбератэк ортче? Странамылэн самой вылӥ наградаосыныз луэ шат вузкарыны? (Ветеранъёслэн гожтэтысьтызы.) Вузкарись: - Дедуш, президентмы али гинэ выль медаль сярысь Указ поттӥз. Басьты, тынад таӵеез ӧвӧл на... Суредэз Л. ПРОЗОРОВЛЭН. Правительствоын Удмурт Республикаысь Правительство Кун Кенешлы эскерыны ӵектӥз Удмурт Республикалэсь Акциосын ужась куд-ог огазеяськонъёсын кивалтонэ пыриськонъя Удмурт Республикалэн нимысьтыз правоез ("зарни акция") сярысь законэзлэсь инъетсэ. Нимысьтыз право ("зарни акция"), шуэмын документын, кутӥськыны быгатоз калыкез экономикаын, улон-вылонын шугадӟонъёслэсь утён ласянь, со юрттоз Удмурт Республикалэсь экономиказэ кышкытлыклэсь утьыны. Нимысьтыз правоез кутон сярысь ужпумез юнматыны быгатоз Правительство гинэ. Законлэн инъетэзъя постановление вылэ гожтӥськыса, Правительстволэн Председателез Николай Ганза министерствоослэсь но ведомствоослэсь кивалтӥсьёссэс нормаосын документъёс дасяны косӥз. Соос эскерыны сётэмын луыны кулэ Удмурт Республикалэн Кун Кенешаз. Удмурт Республикаысь Правительстволэн Председателезлэн секретариатысьтыз пресс-центр. БУСЫ УЖЪЁС 26 майлы (процентэн вераса) киземын мерттэмын Районъёс Валэс юос Валэс но пуртэс Картофка Бакча сиёнъёс культураос Алнаш 96,8 100,8 6,3 200 Вавож 94,1 98,4 42,5 0 Грах 92,0 98,5 0 0 Можга 90,5 94,6 3,1 42,3 Шаркан 90,1 96,8 14,8 90,0 Яр 89 ,5 89,5 8,9 - Ува 88,8 96,3 40,6 0 Кизнер 87,1 96,7 28,9 - Як.-Бодья 86,3 90,7 16,2 - Селта 85,4 87,3 11,2 100 Красногорск 84,8 90,1 0 - Сюмси 84,5 89,6 0 0 Юкаменск 83,4 88,9 0 - Каракулино 79,2 83,4 23,7 - Пичи Пурга 76,8 97,9 4,5 45,8 Вотка 72,9 88,1 21,7 36,9 Глазов 71,7 77,9 7,8 44,4 Игра 70,9 77,7 0 0 Сарапул 67,8 76,7 0 28,6 Камбарка 66,2 86,8 0 - Завьялово 61,5 100,1 32,1 30,2 Кияса 61,1 77,4 0 - Балезино 54,5 57,4 0 0 Дэбес 44,9 54,2 0 0 Кез 33,8 34,5 0 - Республикая 76,1 85,1 22,3 35,6 БУСЫОСЫН Ӝеганъёс ӧвӧл Грахово. Азьвыл аръёсын ӵошатыса, тулыс ужъёс туэ мултэс ӝеганъёстэк, сылонъёстэк мыно. Та ласянь ушъяны кулэ "Мари-Возжай", "Родина" эштосъёсты, "Конезаводэз". Соос троссэ хозяйствоосты азьпалто. Районъя ке верано, 5 майлы валэс юос киземын 47 процентэз, 1446 гектар вылын, вань муос пӧлысь дась ӝыныезлэсь ятырез. Кызьы шуиз гурт удысъя управленилэн кивалтӥсез Геннадий Андреевич Петров, кидыс но эстӥськон ласянь шугъяськонъёс уз луэ. Кукуруза, шундыберган тысен юрттэт вуыны кулэ "Россемена" пыр. Но со понна коньдонэд медло. Л. ДМИТРИЕВА. Кун Кенешысь депутатъёслы, Правительстволэн выль Тӧроезлы, калыкез дышетон удысын ужасьёслы ВАЗИСЬКОН Гажано эшъёс! Тӥледлы вазисько Вавож районысь 10 школаысь дышетӥсьёс асьсэлэн, дышетскисьёслэн но мумы-бубыослэн нимынызы. Оскиськом, та куарамес кылоды но милемыз валаны тыршоды шуыса. Ми пумит луэммес вераськом Россия Федерацилэн интыын аскивалтонъя Законэзлы. Кызьы сое шонерен лыдъялод, дышетӥсь самой улӥ тубатозь вуттэмын ке? Валантэм юанъёс туж трос. Кылсярысь, малы районысьтымы дышетӥсьёс берло кык арзэ толэзьем уждунзэс я 12, я 30 процентэн гинэ 3-4 толэзь ӵоже басьтыны курадӟо? Милемлы шуо: районды дотация чотын улэ. Республика ас люкетсэ висъяз, озьы ик федерация но. Со дыре ик Ува, Можга, Каракулино районъёсын югдур чылкак мукет: отын уждунзэс дыраз басьто. Нош Вавожысь пиналъёс маин меда янгыш? Гажано депутатъёс, выль быръем кивалтӥсьёс, малпаське ай: кыӵе луоз азьлань улонмы крезьгурчиостэк но кырӟасьёстэк, кылбурчиостэк но артистъёстэк? Соослы быгатонлык ачиз инкуазь сётэ, дышетӥсьлы сямен ик. Нош дышетӥсь школатэк, нылпиостэк улыны уз быгаты. Уждун сярысь. Егит специалист, 1 сентябре ужан удыссэ мытыса, коньдонзэ басьтэ 3-4 толэзь ортчыса гинэ, созэ но быдэсак уг. Малы шумпотоз со яке мумы-бубыосыз, пизы дышетӥсь луиз шуыса? Районысь кивалтӥсьёсын пумиськылон дыръя тросэз ми пӧлысь веразы урод улэмзы сярысь: ум быгатӥське выль телевизор басьтыны яке сӧриськемзэ тупатъяны, радио кысэмын, газетлы гожтӥськыны номырин, сӥльлы, сахарлы, чайлы, няньлы коньдон уг тырмы. Номырин тырыны тыл, пу, транспорт понна. Тӥни кыӵе калэ вуттэмын тодон- валанъёс сётӥсь. Дышетӥсь туннэ калык син шорысь палэнтэмын: солы номыр вераны странамы, будӥсь поколение сярысь. Озьы ке но, ми вань быгатонозэ лэсьтӥськом, дышетон удысэз утён но азинтон понна, сюлмаськиськом пиналъёслэн тазалыксы сярысь, кизиськом вань ӟечсэ, умойзэ гинэ. Кужыммы тырмоз "выль Гагаринъёсты", "выль Калашниковъёсты", "выль Куӟебай Гердъёсты" но будэтыны. Но милям осконмы быре. Инмар уз юртты. Аслыд гинэ оскон кылемын на. Соин ик вань ултӥям дышетӥсьёсты ми куриськом огазеяськыны, огкылысь султыса, правоосмы понна нюръяськыны. Удмурт Республикаысь Кун Кенеш азе пуктӥськом таӵе куронъёс: 1. Уж вылын быдэстоно Удмурт Республикалэсь "Калыкез дышетон сярысь" Законзэ. 2. Калыкез дышетон удысын ужасьёслы Удмуртиын уждун огкадь тыроно. 3. Январь-февраль толэзь понна уждунэз туэ 9 маёзь тыроно. 4. Йылпумъяно Тыловыл-Пельга средней но Зядлуд-Какся неполной средней школаосты ӝутонэз. Дышетӥсьёс озьы ик куро книга, журнал, нылпи пособиос понна тыронъёсты, коммунальной услугаосты 1999 ар йылпумъяськытозь берыктыны, отпуск понна коньдон тыронлэсь радлыксэ валэктыны но мукет. Вазиськон улэ гожтӥськемын Гурезь-Пудга, Большое-Волково, Волипельга, Новая Бия, Зямбай, Какмож, Нюрдор-Котья, Водзимонье, Тыловыл-Пельга, Большая Можга но Каменный Ключ школаосысь коллективъёс. МИХАИЛ ФЕДОТОВЕЗ БУРЕ ВАЙЫСА Ах, кылбурчи, ах, ӵуж уӵы!.. Ньыль ар талэсь азьло, витетӥ мае, мыным жингыртӥз эше тодмо бесерман кылбурчи Михаил Иванович Федотов: - Лыкты. Вераськон вань, - дышем сямыныз вакчияк куштӥз со. Сьӧраз ик - телефон трубкаез но. Мон соку ас улонтӥям тупатъян-выльдон ужъёсын вырисько вал. Уж бервылме октэм- калтэм кари но лать гинэ вамыштӥ дораз. Нош куазь кыӵе чебер сылӥз со вие! Нырысетӥ балаз потэм Наташа Ростова кадь ик чебер но мусо эктӥз. Пушйизы ини емышо писпуос, мылкыдзэс тӧдьы шукыен пазяса. Мон Михаил доры вуи, йыгаськи ӧсаз. Усьтӥсь ӧз луы. Паймымон: таӵеез дас куать ар куспын ноку ӧз луылы. Ӧте - нош ачиз ӧвӧл. Сюлмын шияк луиз. Угось та вырос зэмос эшлэн выросэзлы уг тупа. Огшап сылӥ на ӧс дораз. Но мар карод - кошки. Урамысен но отчы-татчы учкылӥ. Кызьы шуылэ Егор Загребин, адямиез ӧвӧлы. Нош ӵуказеяз Михаил Федотовлэн сюлмыз жугиськемысь пыраклы дугдӥз. Уин кышноез "скороен" больницае нуоно луэм сое. Табере йырын малпан вожомем чибинь кадь берга-поръя... Туннэ нуналозь. Собереосызлы но... Мар верамез потэ вал Михаиллэн мыным? Ӧйтӧд. Кадръёс кадь ортчо тодэ ваёнъёс... ...Михаилэн ми, зэмзэ вераса, кыкнамы ик писательёс луыса, туж шер вераськылӥм литература сярысь. Мар вераськонэз? Сантехникъёс но куспазы кранэз ялан тодазы вайылозы-а? Мон солэсь кылбуръёссэ валасько, со но мынэсьтым гожтэмъёсме, мон сямен, вала вал. Тодам ваисько: кузьмай вал солы "Тулкымъёс вылын - пыжед" книгаме. Арня ортчыса жингыртӥз но вакчияк вераз: - Салам, Славутич (куддыр озьы вазиськылэ вал со ӟеч мылкыдыныз). Лыдӟи книгадэ. Умой! Вераськонзэ йылпумъяз. Валамон ини: мастерлэн одӥг верам кылыз гинэ но сюлэмез шунтэ. Угось литератураез Михаил, кыр пӧйшур сямен, куэныз ик шӧдэ вал. Сюлэмыз - мугорыз ик солэн кылбур ритмъя йыгаське вал, дыр. Кӧня тодылӥ Михаилэз - со ноку ӧз ӝожтӥськылы. Ваньзэ пушказ возьылӥз. Бӧрдонзэ но, курадӟонзэ но. Огпол гинэ, кулонэзлэсь куинь-ньыль ар азьлогес, Яр ёросысь Ворца гуртысь шайвылын сылыкумы, со мыным атаез вӧзысь инты шоры чиньыеныз возьматӥз но шуиз: - Тон монэ татчы ват, ява. - Да ну тонэ! - шонски мон. Нош ик та дышем сямыныз маскаръяське кожай. Нош со озьы вылымтэ. Угось туж яратэ вал серекъяны - былекъяны. Маке тумошозэ вера яке кылэ ке - эх! горыса лэзёз вал ук. Соин ик соин артэ капчи вал. Куддыр мылкыд йырдэ кокамон урод луэ, нош Михаил серем пыр маке меӵкытэ но, сюлэм нош ик небӟе. Одӥг кылын вераса, муртъёс пӧлын со шер но аспӧртэмлыко адями вал. Уката ик солэн керетон, вожвылъяськон сямыз ӧй вал - удмурт сямыз. Ноку но, мон тодэмъя, нокинлы пумит кисыяз сьӧд изъёс ӧз нуллы, шӧдтэк улсын соосын лэзьяськон понна. Куд-ог адямиосты ултӥя ик вал солэн сямыз - адями уг ке вала мае ке. Сыӵе муртъёсын Михаил споръяськыса ӧз улылы, киыныз гинэ шонтылӥз: уд валаськы ке, озьы ик шу. Тодам ваисько: ог тулысэ университетысь профессор Владимир Владыкин аудиториямы шунды кадь пальпотыса пыриз. Со милемлы этнографияя лекциос лыдӟе вал. Владимир Емельянович шуиз: - Али диплом утёнысь вуисько. Кылзӥ Михаил Федотовлэсь ужзэ. Паймод но бырод - солэн дипломез чылкак кандидат диссертация кадь ни. Молодец! Зэм, Владимир Владыкин быгатэ муртъёслэн ӟеч ужамзылы синмаськыны, сое дунъяны но данъяны. Огпол мон эшелэсь серем улсын юай: - Миша, тон Мэрилин Монроен, шуом, кӧлысал-а? Со малпаськыса шуиз: - Хм. Наверное, кӧлысал. Но собере ик гуртэ бертысал. Тӥни озьы. Мон малпамъя, Михаил пальпотыса ке но шӧдэ вал ини удмурт литератураын аслэсьтыз йыгмыт но вӧлмыт интызэ. Огпол куспамы вераськон потӥз алнаш гожъяськисьёс сярысь. Миша шуиз: - Бен. Соос ӟечокъёс. Но соос басьто лыдынызы, нош ми, уйпалъёс - ӟечлыкен. - Кызьы озьы? - Уд валаськы-а, мар-а? Флор но мон! Собере кит-кит серекъяз. Алнаш палъёсы ми ветлыны яратском вал. Угось отын уло ӟеч поэтъёс но синмаськымон адямиос - Иосиф Иванов но Иосиф Бобров. Миша туж тупа вал соосын. Угось та эшъёсыз кылдӥзы туж вылӥ рекомендациен - Владимир Романов кылбурчилэн "по наследству" кельтэменыз. Ӧвӧл, гажано лыдӟись эше, медам кылды вал Михаил сярысь святой адями сярысь кадь гожъяны вырисько шуыса малпанэд. Ӧй, со святой ӧй вал. Святойёс мыным мӧзмытэсьгес пото: лопыръяло кытӥ ке, инбаметӥ. Ойдо мед: соослэн со - ужзы. Нош Михаил улӥз асьме пӧлын. Сьӧлыко удмурт музъем вылтӥ вамышъяз. Кытӥ-отӥ, валамон ини, юн ӵемтылӥз но, кымысаз лодӥгаос но пуктылӥз. Но со туж но туж яратылӥз адямиосты. Зэм, ассэ ӵемысь алдаллязы. Угось поэт сюлэм котькуд адями шоры солэсь ӟечсэ утчаса учкыны тырше. Нош сыӵе ӟеч макеез ӵемысь адӟыны уг луылы. "Тучка не ночевала", - шуо сыӵе дыръя ӟучъёс. Монэ весь паймытэ огез. Шуом, кивалтӥсь шуонъёсмы калыкмылэсь вань котырзэ кокчаса быдтозы. Нош калыклэн соослы вожез но уг поты, оло. Оло, озьы ик кулэ кожало. Нош искусство удысысь адямиез мычиськымтэен, капчигес мылкыдоенгес адӟиз ке - вожалоз. Ах, тон кыӵе вылэмед! Тыныд - "нет прощения!" Ӧвӧл, тӥ лыктэ вал соку поэт доры, юалэ - мар гожтӥз со толон, мар бордын ужа? Сыӵе суредэз мон ноку ӧй адӟы, уг но адӟы, дыр. Озьы пӧрме ни - кыӵе калык, сыӵе ик кивалтӥсьёсыз но. Мон ватсало на: кыӵе ачиз калык, сыӵеесь ик солэн кылбурчиосыз но. Со сярысь асьмеос ум малпаськиське. Угось поэтэз начальникен уд ӵошаты, сое ултӥяны но уно поллы капчигес. Вылаз ик, кыл но кутоно уз луы. Тӥни озьы. Михаил сярысь пӧртэм супыльтонъёс ветло - уд ваты. Соос кылдо поэтлэсь трагедизэ, солэсь улон дуннезэ валамтэысь. Вылаз ик, со поэт ас дуннеяз мертчиськыны нокинэ уг лэзьы ке? Вылаз ик, ваньмыз понна со ачиз дунзэ сётӥз ни ке... Асьмеос ӧм дунъялэ на Михаил Федотовлэсь асьмелы кузьмаса кельтэм жингырес чуръёсыныз шыкыссэ. Мелэ! шуыса кельтӥз со асьмелы, нуналбыт кӧттыр сярысь гинэ сюлмаськисьёслы. Кутэн ветлыкуд, галстук сярысь уд малпаськы. Нош маин кужмо котькуд калык? Аслаз лулчебереныз, яратыны быгатэменыз. Солы дышето ук асьмедыз поэтъёс, калыкмылэсь Юртсэ арматураен кадь юнматыны тыршыса. Нош асьмеос со Юртэ урод куноосты пыртаськом, соослы йыбыртъяськом. Мӧзмыт суред. Туж мӧзмыт. Озьы куашка асьмелэн Юртмы. Кулон азязгес Михаил ужа вал "Кенеш" журналын. Сое отын шуныт пумитазы. Огпол Печать Юртысь апрель котырын ӵош бертӥськом. - Слушай, - шуэ Миша, - туэ ведь асьмеос пушнерен шыд ӧм сие на. Непорядок. Нюлэс дуре пырим но бичам ми со пинал пушнерез. Вуим гуртаз. Шыд пӧзьтӥм. - Ох! Ӟеч та, - шуисько, - так. Потты йӧлвылдэ. - Марым. Ӧвӧл ведь йӧлвылмы. Давай тазьы лэсьтом - котькуд пуньы ӟуземмы азьын йӧлвыл шуом. Оло, шӧмыз шӧдӥськоз, потоз ик. Озьы ик быдэн тусьты сиим ми, котькуд пуньы ӝутон азьын йӧлвыл кылэз вераса, висказ горыса. Али мыным потэ: со шыдэз ми Михаилэн зэмос йӧлвылэн ик сиим кадь. Сыӵе оске вал со верам кыллы, мукетъёссэ но, эсьмаса, оскытыны быгатэ вал. Кыл бурдъёс вылын бусъёс пӧлы лобӟись тылобурдо... Нош та гожтэмме йылпумъяме потэ Владимир Романовлэн чуръёсыз. Соос самой иназ кадь татын. Владимир Васильевич соосты гожтӥз вал, Флор Иванович Васильевез буре вайыса. Талэсь визьмо уд гожты ни, дыр. Чуръёс чылкак тупало Михаил Иванович Федотовлэн, быдӟым бесерман но удмурт кылбурчилэн, сайкыт тусызлы: - Ах, кылбурчи, ах, ӵуж уӵы! - Куддыр калык шуэ. Сяська пӧлын, пе, кылбурчи Кайгырытэк улэ. Огзэ уг тодо: сюлэмыз Кыӵе тылын ӝуа. Соин ик но паймо: пумыз Шуак вуэ, шуак... Вячеслав АР-СЕРГИ, писатель. БЫРЪЁНЪЁС БЕРЕ МАЛПАНЪЁС кКыӵе кивалтӥсь кулэ шаермылы? Калык ялан оске на быръёнъёслы. Вите выль депутатъёслэсь ваньбур поттонэз радъямзэс но улон-вылонмес умоятэмзэс. Котьку-а бен озьы луэ? Адямиос быръёнэ мур малпаськытэк мыно но ӵем дыръя янгышало. Куд-ог округъёсын удмуртъёс уг адӟо асьсэлэсь оскымон адямиоссэс. Кызьы солы сюлэм сьӧд вирен уз кисьтӥськы? Малы асьмеос ялан усыкмем йырын улӥськом? Озьы пумен уллань гылӟиськом но сётэмзэ басьтыны ум быгатӥське. Асьмеос туж ӝог вунэтӥм Беларусьлэн Президентэзлэсь визьмо верамзэ Александр Лукашенколэсь: бюллетенез кияды кутэлэ но сюрс пол малпаськелэ. Тодады вайыто 1990-тӥ арез. Выль тӧл ӟырдыт пельтӥз. Вылӥ Советамы 200 депутат бырйим. Шаерысьтымы вылӥ ёзлы тӧрое асьме адями - Валентин Тубылов сюриз. Трос-а , ӧжыт-а со лэсьтӥз калыкмы понна, туннэ ум вералэ. Но Валентин Кузьмич 5 ар ӵоже кивалтӥз республикаен. Вылӥ Кенешын 25 процентэз удмуртъёс вал. Кун Кенеше 1995-тӥ арын 100 пӧлысь 16 удмурт депутат быръемын, али - 11 гинэ. Тӥни озьы укмыс ар ӵоже кӧня ыштон адӟим. Но туннэ сое нокинлэн валамез уг поты. Малы? Депутатэ кандидатъёс бырйисьёссылы мар но ӧз сӥзе. Кызьы но ӧз чеберъяське. Верамзэс быдэстозы но, вылды. Нош мукет ласянь... Балезино районысь удмуртъёс куаразэс сёто "Удмуртавтодор" огазеяськонлэн тӧроез Александр Соловьев понна". Пичи Пурга но Завьялово районъёсысь бырйисьёс - та огазеяськонысь ик валтӥсь инженер Николай Долганов понна. Амалтэк юан кылдэ: соос парламентэ ӧй ке шедьысалзы, шаерамы одӥг иськем но сюрес ӧй вуысал шат? Таӵегес ик югдур Вавож но Селта районъёсын. Кун Кенеше кыкетӥзэ ӝуто ни палэнысь Виталий Соловьевез но Валерий Загайновез. Таосыз оглом уродэсь ӧвӧл, вылды, но ас бырйисьёссы пӧлын уг уло ук. Депутатлэн мандатэз но соослы ӧз юртты. Жумме заводъёсмес но улон-вылон хозяйствомес улӟытыны. Тужгес валаны уг луы Шаркан но Игра калыкез. Шарканъёс куараоссэс сёто "Удмуртнефть" огазеяськонлэн тӧроезлэн воштӥсезлы Владимир Подсеваловлы, играос - та президентлэн ик кивалтӥсезлы Евгений Богомольныйлы. Пӧртэм ӧвӧл югдур Якшур-Бодья но Яр районъёсын. Нырысетӥосыз быръё "Уральская нефть" огазеяськонлэсь валтӥсь кивалтӥсьсэ Владимир Кацемонэз, яръёс - "Удмуртэнерго" огазеяськонлэсь тӧрозэ Юрий Боровикез. Ваньзэ бен уд но вера, оло кулэез но ӧвӧл. Но туннэ одӥгез тодмо: гурт удысысь чылкак куать депутат шедемын Кун Кенеше. Кызьы бен соос нянь будэтӥсез но пудо утисез утьыны быгатозы меда? Парламентын озьы ик ичи сюризы юристъёс, дышетӥсьёс, эмъясьёс, журналистъёс но мукетыз. Кызьы верай ни, парламентэ 11 удмурт быръемын, 7 - бигер, 5 - белорус. Табере отӥзэ асьтэос малпалэ. Кун Кенеше быръёнъёслы дасяськон азьын трос вераськонъёс вал вуоно кивалтӥсьёс сярысь. Павел Вершинин понна 91 процентлэсь уноез бырйисьёсыз куаразэс сётӥзы. Удмурт кивалтӥсьёс пӧлысь со одӥгез гажаноез адями. Берло ньыль ар ӵоже Правительствоен кивалтыны быгатэмзэ возьматӥз. Москваын но сое ӟеч тодо. Но туж жаляса верано луэ, Павел Николаевич Кун Кенешлы Тӧрое ӧз ортчы, вормиз Александр Волков. Югдурез котькызьы бергаты, нош удмурт калыклы номыр уг кыльы ни таӵе веран сяна: парламентэ кинэ бырйим, соос ик республикаен но асьмемын кивалтозы. Табере, поезд кошкем бере, эк-ке-эк - шуом но паллян киынымы йыр бермес кормалом. Кызьы бырйиськом, озьы ик улом ни. 4-тӥ апреле удмурт калык ас кылзэ вераз но соин сэрен (парламентэ удмуртъёс ичи шедемен) Кун Кенешлы но Правительстволы Тӧрое ӟуч адямиос быръемын. Нош Павел Вершинин Кун Кенешлэн Тӧроезлы нырысетӥ воштӥсе быръемын луоз-а, уз-а? - туннэ нокин уз вера. ГЕННАДИЙ РОМАНОВ. ФЕРМАОСЫН Йӧл кыскон (5 майлы) Скаллы быдэ (кг) Вузамын (ц) Районъёс туэ кылем арын туэ кылем арын 1. Ува 10,3 10,4 638 541 2. Игра 10,0 10,2 313 278 3. Вавож 9,9 9,6 418 365 4. Вотка 9,4 9,2 381 419 5. Можга 9,3 10,2 693 547 6. Шаркан 8,6 9,9 392 429 7. Завьялово 8,6 8,4 457 482 8. Юкаменск 8,4 8,6 317 285 9. Як.-Бодья 8,4 8,7 136 153 10. Грах 8,2 8,2 207 211 11. Пичи Пурга 8,0 8,3 444 468 12. Глазов 7,6 9,0 441 568 13. Дэбес 7,5 8,4 275 313 14. Сарапул 7,5 9,4 396 603 15. Алнаш 7,5 8,1 382 372 16. Каракулино 7,3 9,2 171 244 17. Селта 7,2 7,3 196 172 18. Кез 7,1 7,0 318 306 19. Красногорск 7,0 7,1 179 194 20. Сюмси 7,0 6,8 89 63 21. Балезино 6,8 7,9 449 500 22. Кияса 6,8 8,0 226 277 23. Кизнер 6,7 6,9 214 216 24. Камбарка 6,4 7,4 39 41 25. Яр 6,0 7,4 187 255 Республикая 8,1 8,7 8004 8360 Вожась атас Серемес верос Ванькаеным улэме ог куамын аръёс луэ ни. Ӵош улӥм, яратӥм но, дыр, ог-огмес, куддыр ченгешиськомы но вал, кимы но ог-огмы борды вуылӥз. Ченгешон кутске вал, дыр, оло нош со бордысен: мынӥсько урам кузя, нош пиосъёс берзэс учко. Ох, вожа ведь, вожа вал Ванькае. Нош ог кызь аръёс ортчыса, мукет кышномуртъёс картэлы синмаськыны кутскизы. Колодча доры вулы потӥсько но кышноослэсь супыльтэмзэс кылзӥсько. - Эх, Олён, Олён, етӥз на Ванькаед. Пырак казак пи кадь. Ветлэмез но, ассэ воземез но синмаськымон. Воксё пересьмыны уг сётӥськы, пинал дыръяз кадь ик ӝужыт, таза. Тушез но Ильинск черкысь батюшкалэн порма, чиль-чиль сьӧд, бадӟым. аслам картэным, тордос Петыреным, уд но ӵошаты, синмаськыса бырисько но, ява. Ой, йыры кур луэ, вожасько. Нош кышноос азьын мылкыдме уг возьматӥськы, сюлмысьтым серекъяса шуисько: - Синмаське, синмаське. Нош пинал дыръяз адӟем но уд кариське вал. Конглё, пуклё кадь шуиллямды. Али гырпумдэс куртчыны бер ини. Нош таяз гужеме таӵе учыр луиз. Туэ тулыс басьтӥ туж тузӥ, чебер тылыё-бурдо атас. Таиз нырысетӥез ӧвӧл ини. Арлы быдэ сямен атасэн уг удалты. Одӥгез уг чоръя, мукетыз курегъёс шоры уг учкы, я эшшо маке шеде. Нош таизлы курегъёсы ик синмаськизы, ява. Кызьы Ванькаелы кышноос маза уг сёто, атасэным но сыӵе ик югдур луиз. Нош со, ӧчкарем сямен, курегъёс шоры уг но учкы, мон сьӧры бызьылэ. Огшоры гинэ ке сьӧрам ветлысал - ӵабъяны, кокчаны турттэ. Оло дэреме уг кельшы солы, оло, картэлэн верамезъя, быг-быг мугорме етӥз нуллэмме уг яраты. Атасэлэсь кышкаса, азбаретӥ бодыен гинэ ветлӥсько на. Егорыче шуэ: вожась атас, пе. - Эх, Олён, Олён! Арлы быдэ атас вошъяса калы быриз ини. Табере, оло, астэ воштоно? АЛЁНА ИОНИНА. Гожня гурт. Вормон нуналэн! 9 Май нунал вань вакытъёслы тужгес но югыт праздникен кылёз. Сое быдэс дуннеысь калык пусъе. Асьмелы, Россиын улӥсьёслы, та нунал пӧрмиз астэ ачид гажан но данъяськон праздниклы, буре ваён нуналлы но лек тушмонъёслэсь шаермылэсь эриксэ утисьёслэн бадӟым вормонзылы йыбырттонлы. Та нуналъёсы йыбырттон мылкыдын но ӟеч кылъёсын, вамыштӥськом памятникъёс но обелискъёс доры, тау кариськом ожысь но ужысь ветеранъёслы. Ӵапак та адямиос ик юнматӥзы асьмелэсь кунмес, ӝутӥзы солэсь лулпуш узырлыксэ но байлыксэ, утизы дуннеысь тупаса улонэз. Вормон нунал - нырысь ик Тупаса улонлэн праздникез. Та нуналэ музъемозь ик йыбырттӥськом Тӥледлы, гажано но дуно ветеранъёс! Туннэ нуналэ азьвыл сярысь мургес валаськом, Тӥ азьын пунэмо луэммес но оскиськом, Россия но, Югославия но, быдэс дунне вылын мед луоз чылкыт тулыс иинбам. 9 Май Удмурт Республикаысь пӧртэм нациё калыклэн тупаса улон нуналыз луэ. Со вань кужымзэ сётӥз фашистъёсты вормон понна. Праздникен тӥледыз, дуно эшъёсмы! Сӥзиськом тӥледлы юн тазалык, ӟырдыт мылкыд, шудбур, котькуд юртын, котькуд семьяын тупаса улон но ваньзэ умойзэ гинэ. Удмурт Республикаысь Кун Кенешлэн Тӧроез А. А. ВОЛКОВ. Удмурт Республикаысь Правительстволэн Тӧроез Н. А. ГАНЗА. Космосысь - ву пыдсы Америкаысь утчаськись Керт Ньюпорт аслаз командаеныз Атлантической океанысь шедьтӥз 38 ар талэсь азьло космосэ лобам кыкетӥ космической корабльлэсь васькон аппаратсэ. Астронавт Гас Гриссом орбитаын лобаз 15 минут но капчиен пуксиз Атлантикаысь Багам шормуӵъёс пала. Вертолёт астронавтэн капсулаез ӝутыку, шӧдтэк шорысь авария вакытлы чаклам люк усьтӥськиз. Гриссомез вертолёт ӝутыны быгатӥз ик, нош васькось аппарат вуэ выиз. Ву ултӥ ветлӥсь вездеход шедьтӥз капсулаез вить иськем мурдалаысь, видеокамераен эскерыса. "Титаниклэсь" но мур интые выем арбериез шедьтӥм, - шуэ Ньюпорт, - быдӟалаезъя солэсь туж пичи ке но". Урод куазен сэрен васькон аппаратэз ӝутыны ӧз луы. Ньюпорт дасяське выль экспедицие. Иворъёсъя национальной служба. Вань крезьгуръёс - ветеранъёслы Вормон нунал котькудмы понна бадӟым праздник. Котьку сямен ик, Ижевскысь Ялан ӝуась тыл доры ӵукна сяська керттэтъёс понозы республикамылэн кивалтӥсьёсыз, ожысь но ужысь ветеранъёс, дано адямиос. 9 часысен шулдыръяськон кутскоз Киров нимо паркын. Нуназе котыр 9 Майлы сӥзем ужрад кутскоз М. Горький нимо садын. 11 часысен семьяос шулдыръяськозы "Железнодорожник" культура юртын. Ӝытазе 19 час 30 минутэ "Россия" кинотеатрын концерт сётоз нылпиослэн "Улыбка" хорзы. Ветеранъёс понна нимысьтыз киносеансъёс ортчозы "Октябрь" но "Аврора" кинотеатръёсын. Ӝытазе 18 часысен Ялан ӝуась тыл дорын крезьгуръёсты шудоз пиналъёслэн духовой оркестрзы. 11 часысен нуназе Ижысь Шор площадьын кутскоз Тупаса улонлы сӥзем эстафета. Туэ со ортчоз ни 50-тӥзэ. Тодады вайытӥськом: кылем арын эстафетаын вормисе потӥз вал Удмурт кун университетлэн командаез. Кин вормоз туэ - возьматоз ӵошатскон. Б. НИКИТИН. Лымы шуна, сюан шудэ дукъя Пӧйшурасьёс ӵемысь ӝожтӥсько: туж кема, пе, утчаны выроно дукъяослэсь сюан шудон интызэс, пумитаса но ӵемысь доре буш киын бертоно. Зэм но, дукъяез матысен адӟыны уггес кылды. Гужем, нюлэскытӥ ветлыку но пыд азьысь ик турак! лобӟыса кошке. Бурдъёссэ шонамъя но бадӟым вужерзэ синйылтыса гинэ валатскиськод: дукъя! Кылем аре автобусэн Кильмезь посёлоке ширтӥськомы вал. Шофёрлэн радиоприёмникысьтыз шулдыр крезьгур жингыра. Мон азьпалась интые пуксемын бере, сак учкыса мынӥсько сюресэз. Тулыс сюрес куӵо-маӵо кариськемын ни: лымы шунаса, луоё шальы интыен-интыен кыре потэмын. Ӵапак соку азьпалась вить-куать бурдоосты синйылтӥ. Шофёр, ог витьтон вамыш доразы вуытэк, автобуссэ ик дугдытӥз. Дукъяос! Паймыса учкиськом дукъяослэсь сюан шулдыръяськонзэс. Тросэз сюресчиос, интыысьтызы султыса, азьпалась укно вӧзы сётскизы. Сюрес вылэ люкаськиллям вить атас-дукъяос но одӥг курег. Атасъёслэн чыртызы пеймыт-пурысь тусо, тыбырысьтызы тылыоссы мыт- пурысесь, быдэсак сьӧдо-сьӧдо виштыосын пужъятэмын кадь. Чыртыысьтызы лёгзы вожмыт- сьӧд гоно. Пурак вӧлъям быж тылыосазы тӧдьы но пурысь пусъёсыз тырмыт гинэ. Аспӧртэмлыко чебер адске син котырысьтызы кисыръяськыса люкаськем горд тусо ку - синкаш выллем. Зоологъёс верамъя, трос вир лыктэмен, сюан шудон дыръязы со, пе, эшшо но ӵыж-горд кариське. Дукъя куреглэсь дӥськутсэ сокем ик тузӥ уд шуы. Ӵужмыт-пурысялэс тылыосыз тӧдьы но сьӧд вишты-пужыосын чебермамын. Озьы кӧня ке дыр ӵоже учкыса сылӥмы. Бератаз шофёр ӧз чида ни, куара сётыса, машиназэ интыысьтыз вырӟытӥз. Мылпотытэк сямен ӝутскизы бурдоос но нюлэс пала лобӟизы. Дукъяос сярысь трос тунсыкозэ лыдӟеме вал ни инкуазез но будосъёсты эскерись учёнойлэн Модест Николаевич Богдановлэн гожъямъёсысьтыз. Отысь ик тодӥ, тулыс сюан крезьгур-котканзэс, пе, нырысь мыто арлыдо, кужмо атасъёс. Соос ик ас мылкыд каремзыя быръё шулдыръяськон интызэс но. Пӧйшурасьёслэн верамзыя, дукъя атас секталаезъя 3,7 килограммозь, пе, кыске, нош курегъёс - кык-куинь поллы капчигес. Шулдыръяськонзы кыстӥське толэзен ӝыныен. Семья кылдытон вылысь, дукъя-выль кен кузлы быръе сэзь, чебер, кужмо атас-эмеспиосты гинэ. Таӵе нюръяськонъёсын ӵемысь вормисе пото арлыдо атасъёс. Дукъяос гажало арлыдо писпуосын лысо нюлэсъёсты. Вӧзазы ик медло нюр инты но, сайкос-куш но. Толалтэ соос кӧтсэс тыро лысо ваен но ненег будосэн. Лымы шунаса, турын-куар вожектыны ке кутске, дукъя-курегъёс утчаны кутско кельшымон инты. Шыпыт, сиён-юон шедьтымон интыез быръё соос. Гоп шедьтыса, отчы кӧс турын нулло но 5-12 пуз вылэ пуксё. Куинь арняскын пузъёссы ӵогисько ни. Мумы чипыоссэ сюдэ нымы-кибыен, кузьыли пузэн. Нош ӧжытак будэмзы бере, эшшо но майбыргес луэ - кисьма узы, сӥзьыл пал вуэ ягмульы, нюрмульы. Бер сӥзьыл, сиёнлы ёрмыкузы, дукъяос вуыло сьӧдчабей вылэ, сезьы бусые. Атасъёс-атайёс ас нылпизэс будэтон сярысь уг сюлмасько. Сюан бере ик ватско ӝокыт азе. Та дыре вошто соос тылызэс. Газетъёс гожъямъя, кунгож сьӧрын та бурдоос туж ӧжыт кылемын ни. Соин ик асьме нюлэсъёсы но вуылыны кутскизы отысь пӧйшурасьёс. Дукъяослэн быронзылы кышкытлык вань асьме палан но. Берло аръёсы трос погыръяськомы, вузаськомы лысо нюлэсэз. Пӧйшурасьёс но дукъя сӥлез веръяны ярато. Медаз ыше вылэм асьме нюлэсъёсысь та чебер бурдоос. Н. ТУРИН. Кинэн ужалоз Александр Волков? Туннэ, 12 мае, ужзэ азинтэ Удмурт Республикаысь Кун Кенешлэн нырысетӥ сессиез. Со герӟаськемын организационной ужпумъёсын. Депутатъёс юнматозы Кун Кенешлэн Тӧроезлы воштӥсьёсты но ялан ужась комиссиослэсь кивалтӥсьёссэс. Кинэ аслыз воштӥсе басьтоз Александр Волков, кыӵе командаен ужалоз таяз созывын - тодмо луоз туннэ ӝытазе. Нош ӵукна, сессия кутскемлэсь азьло, Кун Кенешлэн юртэз азе трос калык люкаськылӥз. Пикетэ потэмъёслэн сюлэм висёнзы одӥг: удмуртъёслэн кивалтон удысын пумен ӧжыт но ӧжыт кылемзы. Сессилэн ужез сярысь пыр-почгес лыдӟоды газетмылэн вуоно номерысьтыз. Л. МЕДВЕДЕВА. "Кизилиослэн" аллеязы Москвалэн мэрез Юрий Лужковлэн кичӧлтэмез улсын "Отечестволэн кизилиосыз" фонд "2000-тӥ арлы - 2000 писпу" ӧтёнэн вазиськиз. Тропарёвое, дас сизьыметӥ даур ӝутэм черк доры, нырысетӥзэ витьтон писпу мерттэмын ни, - гожтэ "Комсомольская правда" газет. Быдэн писпу мерттыны шуд усиз тодмо нылкышноослы - кырӟасьлы Людмила Рюминалы но актрисалы Любовь Соколовалы. Киязы лопата кутӥзы кырӟан гожъясь кылбурчи Алексей Мажуков, артистка, асьмелэн землячкамы Маргарита Суворова, армреслингъя чемпион Сергей Рубэн, артысь педагогической универститетысь студентъёс. Международный Восточно-Европейский университет Колледж искусств (Лицензия МНО � 470) Дополнительное образование Для детей от 4 до 15 лет, взрослых от 16 лет: Живопись, рисунок, композиция, компьютерная графика, история искусств, мастерские, керамика, батик (росьпись по ткани), ткачество. ОСНОВЫ ДИЗАЙНА: цветоделение, макетирование. Обучение ведется по программам лауреата первого фестиваля инновационных проектов и программ 1994 года. Срок обучения: от 2 до 5 лет. По окончании выдается свидетельство установленного образца. Занятия для души! Только для вас Колледж искусств Разработал спецкурсы: "Живопись в традициях русской реалистической школы", "Авангард", "Иконопись". Срок обучения - от 1 до 4 лет. Удобное время занятий. По окончании выдается свидетельство установленного образца. Наш адрес: г. Ижевск, ул. Пушкинская, 268. Тел. 22-48-54, 23-34-43. Международный Восточно-Европейский университет Колледж искусств (Лицензия МНО � 102) Приглашает получить Среднее профессионального художественное образование по специальности: "ДИЗАЙН" (специализации: дизайн среды, графический дизайн, дизайн промышленных изделий, дизай прически, дизайн одежды). Срок обучения - 3 года на базе 11 классов. Форма обучения - очно-заочная. По окончании выдается государственного образца Дополнительное образование Для детей от 4 до 15 лет, взрослых от 16 лет: Живопись, рисунок, композиция, компьютерная графика, история искусств, мастерские, керамика, батик (росьпись по ткани), ткачество. Курсы керамика для детей и взрослых Сроки обучения - от 1 месяца до 1 года. По окончании выдается свидетельство установленного образца. Наш адрес: г. Ижевск, ул. Пушкинская, 268. Тел. 22-48-54, 23-34-43. Вожвылъяськонэн сэрен Вазенгес ини вераськон мынэ УЕФА-лэн Кубокез понна футболэн шудонъя Москваын 12-тӥ мае ортчоно берпуметӥ (финальной) шудонэз мукет городэ выжтон сярысь. Сыӵе учыр луыны быгатысал, финалэ Италиысь кык клуб ке потысал. Табере матчез Россиын ортчытыны пумит луонлэн мугез шуак политикаен герӟаськиз. "Олимпик" (Марсель) француз клублэн президентэз Жан-Мишель Руссье меӵак ивортӥз, пумиськонэз мукет интые выжтон сярысь тыршон Косовоын ортчись вожвылъяськонъёслы Россилэн кызьы учкеменыз герӟаськемын шуыса. Со сярысь гожтэ "Труд" газет. "Матч ортчысал ке чакламлэсь азьло, пумиськонэз учкыны малпась Францилэн но Италилэн правительствооссылэн кивалтӥсьёссы, шуг вераны, лыктысалзы меда Москвае", - шуиз клублэн кивалтӥсез. Керӟегъяськытӥсь югдурез УЕФА-лэн исполкомез эскероз Тель-Авивын. Газет ивортэмъя, УЕФА-лэн нимысьтыз комиссиосыз пусйылӥзы: Лужникиысь стадион пумиськонэз ортчытыны дась. Вылаз ик, Европаысь куд-ог странаосын та пумиськонэ билетъёс вузасько ини. Умой луысал, шуэ газет, бадӟым футболэз бадӟым политикаен ӧй ке сурасалзы. Иворъёсъя национальной служба. Вормон сяськаос но синвуос Быдӟым Вормонлы тырмиз 54 ар. Ӝыны даурлэсь ятыр ортчиз ни со дырысен. Вуоно арын пусъём юбилеез - ож йылпумъяськем дырысен тырмоз 55 ар. Зэм, аръёс ортчо но ортчо. Нош 9-тӥ май котьку сямен бугыртэ сюлэмъёсмес. Со уго тырмемын курыт синвуэн но, шумпотон мылкыдын но. Вормон капчиен ӧз сётскы уго нокинлы. Соин но, лэся, та нуналэз быдэс дунне вылын паськыт пумитало. Котьку сямен 9-тӥ мае Ижевскысь Ялан ӝуась тыл доры ветеранъёсын ӵош лыкто егитъёс но, мӧйыос но. Туэ но, быръемъёсты буре вайыса, отчы сяська керттэтъёс тыризы Удмурт Республикаысь Кун Кенешлэн Тӧроез Александр Волков но Правительстволэн Тӧроез Николай Ганза, ожысь но ужысь ветеранъёс, дано адямиос, ёросъёсысь вуэм куноос. Собере ик ортчизы ожын но ужын данэ потэм адямиосын сӥё-дано пумиськон. Зэм, война пыр ортчем адямиослэн синкылиоссы ялан шыпырало на. Соос уката но паймо туала улонлы. Со нуналэ ик Ижысь шор площадьын ортчиз тупаса улонмлы сӥзем эстафета. Туэ со вал ини 50-тӥез. Отын вормисе потӥз Удмурт кун унвиерситетысь огазеям команда. Туспуктэмъёс вылын: таӵе вал туэ 9-тӥ май. Фотооссы А.Нелюбинлэн но А. Горбуновлэн. Кӧттыремен веръям огкадь Улонын оломар но луэ: тылпу но потэ, адямиен машина но бекмыльске. Усён интыяд валес вӧлдыса дася вал, нош кин тодэ, кытчы усёд. Шудтэм учыре шедем муртлы юрттон вылысь, куать ар талэсь азьло Игра ёросысь нефть но газ поттӥсьёс (соку кивалтӥсьсы О. И. Попов вал) кылдытӥзы "Дар" нимаськись благотворительной фонд. Висъям коньдон кутэмын улон интыосты тупатъяны, дӥськут басьяны, Выль арлы нылпиослы кузьымъёс басьяны но мукет уж. Фондын ужась В. Н. Михеева калыкен вераськиз, юрттӥсьёс шедизы: кин нылпиоссылэсь пичи кылем дӥськутсэс ваиз, кин пыдкутчанзэс вуттӥз. Озьы ватсаса луонлык кылдӥз трос нылпиё но куанер семьяослы тросгес юрттыны. Бен, берло дыре "Дар" ужамысь дугдӥз вал, но калык вазиськоно луиз Кун Кенеше депутатэ кандидатъёсызлы. Озьы фонд али выльысь ужаны кутскиз. Шуге-леке шедемъёс пичи юрттэмлы но бадӟым тау каро. Калыкын юнме уг шуо: кӧттыремен веръям огкадь. П. ПЕТРОВ. Кезьыт куазь лемтэез но куртче Шаерамы улӥсьёслэн тазалыксылы берло аръёсы бадӟым кышкытлык ваё висись лемтэйёс. Лемтэй куртчемен, та аре 30-тӥ апрельлы больницаосы вазиськиз ни вал 1270 адями, 7 муртэ урод лемтэй куртчем. Югдур сюлэмшугъяськытӥсь. Лемтэйёслэсь утиськон понна 1960-тӥ аръёсы нюлэсъёсты самолётъёсысен пазяло вал дустэн, берло дасо аръёссэ та нымы-кибыосты номырин уг быдто. Озьы, 1965-тӥ арысен 1975-тӥ арозь висисьёслэн лыдзы трослы ичиёмиз ке, 1976-тӥ арысен кутскыса, лемтэйёс азьло мында ик йылӥзы. Соин валче 1990-тӥ аръёсы висён учыръёс трослы будӥзы. Удмурт Правительство но калыклэсь тазалыксэ утёнъя министерство адямиослэсь тазалыксэс утёнъя нимысьтыз ужрадъёс куто, луонлыкъёс утчало эмъюмъёслы коньдон шедьтыны. Лемтэйёслэсь утиськон ласянь валэктон уж нуыны кулэ калык пӧлын но. Сое лыдэ басьтыса, Удмуртиысь Журналистъёслэн союззы пресс- конференция ортчытӥз Ижевскысь инфекционной клинической больницаысь валтӥсьврачен Владимир Михайловен но Межбанковской региональной страховой компанилэн директореныз Елизавета Семеноваен. Кызьы вераз Владимир Борисович, чакламъёсъя шырлэсь висён (геморрогической лихорадка) но лемтэйлэсь висён котькуд кык ар бере вошъясько. Кылсярысь, 1997-тӥ арын шаерамы трос вӧлмемын вал шыр висён, 1999-тӥ арлы со ичиёмоз. Озьыен, 2000-тӥ ар нош ик та висёнэн узырмоз. Со эскеронъёсъя ик лемтэйёс тужгес шукыръяськыны кулэ таяз аре. Висись нымы-кибыос тужгес но трос Игра, Дэбес, Балезино, Ува районъёсын, ӧжытгес - Глазов, Можга, Сарапул районъёсын. Лемтэйёслэсь но шыръёслэсь, палась висёнъёслэсь, утиськон понна, котькуд аре бюджетысь висъяны кулэ 10-12 миллион манет нош висъяське 1,5-2 миллионэз гинэ. Прививка ортчытыны уг тырмы вакцина, эмъюмъёс ӧжыт. Кылсярысь, эмъюмъёс басьтон понна гинэ туннэ нуналлы кулэ 4 миллион манет, нош та лыдпус вань кулэяськонъёс пӧлысь 12 процентэз луэ. Лемтэй куртчем бере туннэ нуналлы нылпиослы но быдэ вуымтэослы гинэ дунтэк прививка лэсьтыны луонлык вань. Нош пуктыны кулэ куинь укол. Асьтэос лыдъялэ, гаммаглобулинэн одӥг ампула сылэ 90 манет. Лемтэй куртчем адямиез больницаын эмъян туннэ нуналлы 10 сюрс манет тыр усе, со пӧлысь эмъюмлы быре 929 манетэз. Ярам ай, шуге-леке вуэм адямиосты эмъятэк уг кельто. Нюлэсо шаерын улэммес лыдэ басьтыса, котькуд адями аслэсьтыз улонзэ страховать карыны быгатоз лемтэйёслэсь но шыръёслэсь палась висёнъёслэсь, озьы ик бактериальной менингитлэсь, сепсислэсь но вирусной гепатитлэсь. Палась висёнъёслы пумит нимысьтыз сыӵе программа кутӥз шаерысьтымы Межбанковской региональной страховой компания. Мукет страховой компаниосын ӵошатыса, солэн вань пӧртэмлыкъёсыз. Шуом, кинлэн кияз вань та компанилэн полисэз, лемтэй куртчем бере врачъёс сое соку ик эскерозы, лемтэйзэ басьтозы, гаммаглобулинэн куинь укол пуктозы. Одӥг полис утьыны быгатоз быдэс семьяез. 50 манет тырыса, семья 10 сюрс манетлы страховать каремын луоз быдэс арлы. Мылкыд каремъя, со дун бадӟымгес но луыны быгатоз. Берло дыре кезьытскиз. Но Владимир Михайловлэн верамезъя, со умойлы - лемтэй куртчемъёс ӧжытгес луозы. Шунытэн улӟем лемтэйёсты кезьыт куазь куртчылэ вылэм, соос бырыны шедё. Л. Малых. Кечтака интыын - автозавод Паськыт, бадӟым дунне, Кытын меда сюлмыз? Кема малпай, тодӥ туннэ, Вордскем доры - сюлмыз. Мон нырысьсэ отын Адӟи чагыр инэз. Чебер тулыс льӧмпу садын Валай яратонэз. Паськыт лудъёс вылын Кужмы кылдӥз-кыдаз. Гуртысь ӟеч калыкъёс пӧлын Сюлмы улӟиз-юнмаз. Сюрес вордскем дорысь Сӥньыс кадь кыстӥське. Бадӟым дунне сэрегъёсысь Ӧте нылпиоссэ. Тӥялтыны, чигтыны луонтэм кыӵе сӥньыс меда герӟаса, думыса возе адямиез вордскем палэныз, интыеныз, гуртэныз, юртэныз? Макем тросгес аръёс ортчо, сокем кузьгес луэ со сӥньыс. Кузьгес, зӧкгес. Бугоре биниськыса, тонэ со улон сюрес вылтӥ валтэ, нюко-гопо, мур гуо интыостӥ потыны юрттэ. Кечтака (Удмурт-Карлуд) гуртын улӥсьёсты но со сӥньыс юн герӟаса, думыса возе. Дунне вылын кык но ӝыны даур улэм гуртсэс куамын ар талэсь азьло быдтӥзы. Со интые автозавод пуктӥзы. Но мӧзмись сюлэмез кытчы карод, кызьы сое буйгатод? Азьвыл гуртсы дорынгес ик али сылэ укмыс этажъем юрт. Отын интыяськемын нылпиослэн "Чайка" клубзы. Солэн кивалтӥсез Вера Федотовна Красильникова Кечтака гуртын улэмъёсты клубазы пумиськылыны ӧтиз. Чырмыт, чырткем сямыныз Галина Александровна Вахрушева гуртооссэ городысь татчы люканы быгатӥз. Пумен тросгес люкаськылыны ӧдъязы. Ог- огзылэсь тодыса, "Чайкае" кыстӥськизы шоро-куспо но мӧйы арлыдо гуртоос. Соос гинэ тодо на угось ньыльдон вить юртъем, уллапало но выллапало садо урамъёсты, ошмесо гуртсэс. - Праздникъёс дыръя быдэс гуртэн люкаськиськом вал Майор ошмесмы доры, - шуэ 75 аресъем Тамара Андреевна Пантелеева. - Кыӵе шулдыр вал отын! Котырак вож писпуос, сяськаос, пӧзьыса потэ но жильыртыса кошке юзмыт, ческыт ошмес. Кырӟаськом, эктӥськом, сюмес юзматӥськом... Со ошмесмес весяклы асфальтэн ӵоктазы, табере, пе, со интыын Автозаводлэн полигонэз. Кечтака гуртын ваньмыз сямен ӵыжы-выжыос вылӥллям. Ӝыныезлэсь тросэзлэн Макаров но Пантелеев фамилиоссы, пе, вал. Гуртоос пумиськонэ ваиллям вуж фотооссэс, Егор Макаровлэсь (Альмекейлэсь) выжызэ возьматӥсь суредэз. Тодэ ваёнъёс, асьсэ пал егит дыр кырӟанъёс, синкылиос... - ваньмыз со Кечтакаысь гуртоосты эшшо но юнгес сӥньысэн герӟаз. Пумиськонысь кошкыкузы бадӟым тау каризы "Чайка" клублэн кивалтӥсезлы В. Ф. Красильниковалы но гурт нылзылы Г. А. Вахрушевалы. Нош урамысен соосыз бадӟым изо- корто корпусъёсыныз-цехъёсыныз, ӵын поттӥсь ӝужыт трубаосыныз данъяськыса келяз автозавод. Галина Романова. "Чайка" клублэн кивалтӥсез Вера Федотовна Красильникова (паллянысез) но Кечтака гуртысь потэм Тамара Андреевна Пантелеевнаен Галина Александровна Вахрушева. Валентина Васильевна Макарова-Соколова улон корказы дорын пуксем вуж фотоен. Туспуктэмъёсыз Владимир Беломорскихлэн. БЫРЪЁНЪЁС БЕРЕ СЕКЫТ МАЛПАНЪЁС Кун Кенешлэн Тӧроезлы шара гожтэт Совето аръёсы удмурт шаерын нырысетӥ секретарь луыса кивалтӥзы трос пӧртэм кивалтӥсьёс. Нош таӵеез историямы ӧй вал на кадь. Тӥ Удмурт Правительстволы кивалтӥсе ӧд чектэ удмурт адямиез. Асьмеос национальной республикаын улӥськомы ук. Отӥяз Ю. Лужков, оло, губернилы но пӧрмытоз, солэн сыӵе мылкыдыз вань. Тӥляд та вамышлы луэ губерние нырысетӥ вамышез. Совето власть сётӥз вал милемлы пичи ке но государственность, кудӥз юрттӥз вал удмурт калыкез быронлэсь утьыны, кӧня ке кено культураез, кылэз азинтыны. Губерниын удмуртъёс но трос мукет калыкъёс кемалась быремын луысалзы ини. Таӵе вамыш лэсьтэменыды калык кусыпъёсты Тӥ уродмытӥськоды. Марлы со сярысь уд малпаське? Тӥ пуктэ асьтэды ми интые, соку ваньмыз валамон луоз. Мар медам шуысалды, Россиен кивалтысалзы ке ӟуч кылэз тодӥсьтэм немецъёс яке англичанъёс. Валамон, калык соосты адӟонтэм карысал, ӟуч калыкез ултӥямен лыдъясал. Нош маин ми пӧртэмесь? Соин ик ми куриськом та ужпумез выльысь эскерыны. Озьы ӧд лэсьтэ ке, Тӥ удмурт калыклэн историяз ас сярысьтыды урод малпан кельтоды. В. БЕЛОСЛУДЦЕВ, Кез районын улӥсь. Чус улӥмы ке, изъёс черектӥськозы! Гажано агай-вынъёс, сузэръёс! Мон - ӟуч православной черкын ужась. Нош туннэ вазиськисько вордэм удмурт калыкелэн нимыныз. Та секыт нуналъёсы уг быгатӥськы шып улыны но Удмурт шаерысь Удмурт Кивалтэтысь удмуртъёсты сьӧсь амалъёсын уллянэн огкылысь кариськыны. Нош соосты Волковен но солэн эшъёсыныз - банкиръёсын, заводчикъёсын - ӵош куто выль кивалтӥсьёс. Мон политик ӧвӧл. Нокыӵе но партие уг пыриськы. Нош та нуналъёсы мон но мон выллемъёс шып улӥмы ке, Библиын кызьы шуэмын, изъёс черектӥськозы! Нырысь ик, кӧня ке вераме потэ быръёнъёс сярысь. Туалаосыз быръёнъёс - юмок. Калык ӧз бырйы тӥледыз, Волков господин, бырйиз уксё - миллион, миллиард манетъёс. Соин ик Тӥляд эшъёсты луизы банкиръёс но заводчикъёс. Соос асьсэлэн миллиардъёсынызы вуттӥзы Тӥледыз власть дуре. Нош Тӥ табере соослы люкылоды министръёслэсь пуконъёссэс. Та адямиос азьвыл ик шӧдӥзы азьпалась ужъюгдурез. Тодӥзы, пыдэстэм кисыосты кин пыр возьдаськытэк пульдытъяны луоно удмурт му вӧез, нюлэсэз, гуртын дасям сиён-юонэз, пыӵал тӥрлыкез вузаса поттэм коньдонэн. Малы палэнэ кылиз ӝикыт, лякыт сюлэмо, пӧяськыны быгатӥсьтэм удмурт Павел Вершинин? Таӵе адямиос туннэ угось - ньылонэ кугӟась комок выллем. Таӵе муртъёсын валче туннэ аслыд Кипрын чебер юрт уд пукты. Гажано агай-вынъёс, сузэръёс! Туннэ асьмелы возьыт быдэс Россиысь, дуннеысь вань калык азьын. Кыӵе азьмынӥсь кунэн уг кивалты ас калыкезлэн адямиез? Малы Америкаен, Англиен, Франциен уг кузёясько ӟуч яке китай? Малы Израильлэн йырыз япон ӧвӧл - еврей, Испанилэн - испан, Якутилэн - якут, Татарстанлэн - бигер? Малы ми, шаерлэн удмуртъёс, Урал но Волга котырын кемалась дырысен улӥсьёс, чылкак палэнтэмын ас шаеренымы кивалтонлэсь? Нош кузёясько милемын кытысь ке вуэм адямиос! Малы татчыозь кутэмын ӧвӧл Кылъёс сярысь закон? Малы удмуртъёсты-министръёсты улляло кивалтон удысысь? Со уг вера шат калыкмес выжытэм быдтыны чаклам кырсь уж сярысь?! Тӥ малпаськоды, удмуртъёс уг быгато асьсэ музъемзылы кузё луыны? Нош тӥ - туж быдӟым кивалтӥсьёс? Озьы ке, соку малы сыӵе бадӟым, узыр Россия копак куашкамын?! Миллионэз сютэм улэ, тюрьмаос тырмемын йырвандӥсьёсын, сюрсэз быре йыруж лэсьтӥсьёслэсь, уксё качасьёслэсь, адямиос пегӟо кунгож сьӧры... Нош кӧняез ассэ быдтэ!.. Тӥ кивалтыку, Волков эш, шаермы, вылӥе ӝутскем интые, мур гуэ гылӟыны кутскиз. Тӥ дыръя сюрсэзлы аслыз сиён-юон утчаны кутсконо луиз жуг-жаг куян интыосысь, улыны ӧдъяно луиз куяськем интыосын... Со вакытэ ик чылкак ужасьтэм заводъёслэн директоръёссы басьто сю сюрс манетъем уждун, нош банкиръёс, коммерсантъёс... Вылад сьӧлык басьтытозь, шып улод... Тӥляд нылпиосты уло но дышетско кунгож сьӧрын, нош огшоры ужчиослэн (рабочийёслэн), крестьянъёслэн пиналъёссы сютэм уло. Тросэз дышетскон сярысь ик чылкак вунэтӥзы ни, дыр... Ваньмыз быре али: коньдон ӧвӧлэн ворсасько удмурт кылын потӥсь ёрос газетъёс, уг поттӥсько удмурт школаос понна дышетскон книгаос, уг печатласько удмурт писательёслэн, поэтъёслэн книгаоссы, Драмая удмурт кун театр туннэ ке но - мурӝолын! Уг дасясько вылӥ тодон-валанэн удмурт экономистъёс, юристъёс, инженеръёс... Дышетскем понна дун тыроно угось. Нош тросэзлэн удмурт ужчиослэн (рабочийёслэн), крестьянъёслэн, озьы ик - интеллигенцилэн - уксёез ӵем дыръя юдэс няньлы но уг тырмы. Ас музъемез вылын таӵе курадӟыса улэ меда туннэ дунне вылысь коть одӥгез калык? Кызьы шуиз одӥг тодмо француз тодосчи, Ижевск удмурт калык понна - зэмос Голгофа! Милям вашкала выжыосмы - Кам но Волга котырын улэмъёс - кык сюрс вить сю ар талэсь азьло ай кылдытӥзы асьсэлэсь ананьин культуразэс. Таиз ӵошатскыны ӧз быгатылы Европаысь но Азиысь нокыӵе мукет культураен. Асьме вапум кутскыку, вашкала удмуртъёс вузкарылӥзы, лулчеберлык удысын кусыпъёс тупатылӥзы Матысь Шунды Ӝужанэн, Кавказэн но Крымен, Шор Азиен но Иранэн, Сибирен, Скандинавиен, скифъёсын но сарматъёсын, Египетысен, Сириысен, Италиысен кутскыса, кыдёкысь Индиысь но Китайысь калыкъёсын. Азиысь но Сибирьысь кӧчылӥсь муртъёс вуэмен сэрен гинэ калыкъёс огинтыысь мукет интые быдӟым выжон вакытэ удмуртъёс уллямын вал уй пала. Озьы ке но, татын но соос быгатӥзы туж яркыт, туж аспӧртэмлыко культураос - полом но чупчи культура - кылдытыны. Камлэн уллапалаз - Арча, шонерзэ вераса, Удмурт Эль. Ужез яратӥсь, сюлмо, чидась калыклэн киосыныз Россилэн огаз нюлэсо шаераз кылдытӥськиз аспӧртэмлыко дунне. Зэм, монголъёс, бигеръёс но ӟучъёс быдтӥзы удмуртъёслэсь аспӧртэмлыко культуразэс: лыдзыя соос тросгес вал уго. Эксэй кивалтыку, укмыстон укмыс процентэз удмуртъёс (тросаз улосъёсын - ваньмыз сю процентэз) удмурт кылзэс анай кылынызы лыдъяллязы. Коммунистъёс дыръя та лыдпус усиз сизьымдон процентозь,. Литературамы но, искусствомы но огсыр азинскылӥзы. Кыл бырон пумысь но олокыӵе кышкан ӧй вал... Ми, удмуртъёс, керетӥсьтэм калык. Милям музъеммы вылысен одӥг пол но нокыӵе но ож ӧз на ӝутскылы. Вань калыкъёсты ми огкадь яратӥськом, соос но милемыз ми сямен ик гажало, ярато ке. Нош кызьы меда яратод пичи гинэ Удмурт шаермес пыӵал тӥрлыкез пуштытъям бервылысь кылем-мылемъёслэн шыкыссылы пӧрмытӥсьёсты?! Татын кылдытэмын вал али бырись туж бадӟым ВПК, милям музъеммы вылын - хими ож тӥрлыкен кык тодмо склад, сӧремын инкуазь, быдтӥсько нюлэсъёс, жаг турынэн шобыртӥсько бусыос, му вӧез пумтэм порто, качало. Нош асьмелы маиз кыле? Шор дауръёсысь Араб эмигратъёс асьсэлэн му вӧенызы ЪИИ даурысь выжизы ЪЪИ дауре. Таин валче сю арлы азьвылтӥзы Россиысь калыкъёсты. Асьмелэн сюлмо, ужез яратӥсь адямиосмы нош ужтэк быро ни. Дуннеысь вань шугадӟонъёс лыкто туннэ асьме доры. Чылкак аналтэмын туэ Россиысь ӟуч улосъёс но губерниос но. Псков, Кострома, Вологда улосъёсысь бусыосын кузёясько сьӧд нюлэс но сьӧд пот, гурт удыс куашкатэмын, вуз поттон мырдэм гинэ на века. Нош тӥ сыӵе ӟеч, быдӟым кивалтӥсьёс ке, малы улон-вылонэз та калозь вуттӥды?! Табере милемыз куашкатыны турттӥськоды?! Тодэлэ огзэ: милемын огкылысь, тупаса улыны но милемыз яратыны малпасьёсты ми пумитаськомы нянен-вӧйын, нош пӧяськисьёсты синазькыль кариськом. Шонерзэ вераса, Удмурт шаерысь туала кивалтӥсьёс пичи но уг гажало аслаз музъемез вылын улӥсь выжы калыкмес. Валамон ни: соос пӧлын трос огдырлы кылдэмъёсыз - туннэ соос Удмурт шаерын, ӵуказе - Кыдёкысь Шунды Ӝужан палан - чылкак выжытэм, юрттэм-ертэм, мае ке ялан яратӥсьтэм адямиос... Малпаськоды, соосты сюлэмшугъяськыто асьмелэн кайгуосмы? Пичи но уг. Соослы кулэ асьмелэн му вӧй понна долларъёсмы. Соос быгато чебер пальпотыны, зарни гурезьёс сӥзё, быръёнъёс дыръя калыклэсь куаразэ басьто, кабак аракы, одӥг килограмм дунтэм сакыр песок дэмласа. Ма понна но уз вузаськы сютэм калык? Адямиосты лултэм макеослы пӧрмытӥзы ни: мар кареме потэ, сое ик лэсьтӥсько... Волков эш но Тӥляд эшъёсты! Инмарлэн нимыныз курисько: дугдэлэ удмурт калыкез, солэсь кылзэ но культуразэ ултӥямысь! Тӥ ӟуч но Инмарлы оскись ке, лэсьтэлэ озьы ик - яратэлэ матысь адямидэс (Инмар азьын ваньмы - матысьёс). Тодэлэ: мукет калыкез ултӥясь калык ноку но шудо уг луы. Инмар азьын ваньмыз одӥг кадь: ӧвӧл нокыӵе эллин но, еврей но, славян но, нокыӵе быдӟымъёс но, нокыӵе пичиос но куд урод кылмы понна Инмар азьын котькудмылы кыл кутоно луоз. Нош таиз туж ик чебер уж ӧвӧл. Кинлы трос сётэмын, солэсь трос куриське но. Ӟеч кивалтӥсьлэн нимыз дауръёсын улэ, пӧяськисезлэн - кулэ. Озьы шуэмын Библиын. Йылпумъяса верало ас малпанме но. Волков эш, Тӥляд сюлмады ӟеч мылкыд утиське на ке, сётэлэ асьтэлэсь интыдэс Павел Вершининлы. Со понна куаразэс сётӥзы солэн улосвылысьтыз укмыстон процентлэсь уноез бырйисьёс. Со понна гурезь кадь сыло туннэ эшшо уно сюрс ятыр удмуртъёс, огшоры удысъёсын ужась но Инмарлэсь ӟеч кылзэ витись ӟучъёс, бигеръёс, чувашъёс, поръёс, мукет выжыосысь адямиос. Кыкетӥез куронэ таӵе. Калыкез дышетонъя, культурая, юстицияя, югдурез утёнъя, печатья, гурт удысъя министръёс мед луозы удмуртъёс. Удмурт шаерысь Кивалтэтын удмуртъёслэн но ӟучъёслэн лыдзы одӥг кадь мед луоз. Мед юрттоз Тӥледлы Инмар. Михаил Атаманов, черкын ужась, кылтодон наукаосъя доктор. Москваын уло бусьтыр Быдӟым Родинамылэн шоркараз палэнысь вуэм муртлы мукет дуннеын кадь уло потоз. Внуковоысь таксиен нуыны ӵектӥсьёс "витьтон" куро, манет ӧвӧл, доллар. Шоркарын улӥсьёслэсь улон интылэсь дунзэ юаку, соос верало квартираослэн дунтэмамзы сярысь. Озьы ик санэ басьто долларлы берыктэм дунэз. Манежной площаде интыяськем пиццериын пирожноез тортэн нимало но со понна 63 манет куро, нош сосискаен булкалэн дуныз ульчаосысь лотокын 30 манетозь вуэ. ГУМ-лэн куинетӥ этажысьтыз турист компания Тенерифын шутэтскыны ӧте, кылем арын августэ нокыӵе шуг-секытъёс кылдылэмтэ кадь. Белорус вокзалын, нырысь учкыса, ваньмыз азьло кадь ик. Кунгож сьӧры кошкись туристъёс, люкрак огазеяськыса, маке кенешо. Озьы ке но, вераськыса тодмо луиз: дас сизьым август бере "бугор" сьӧры потӥсьёслэн лыдзы чутрак кулэсмиз. Иворъёсъя национальной служба. Ултӥян ӧвӧл-а со? 22 апреле, депутатъёслэн сессизы кутскон азьын, Кун Кенешлэн юртэз азе калык люкаськиз, Удмурт кун университетысь филологияя факультетысь дышетӥсьёс но студентъёс лыктӥллям. Малы? Студент А. Шубанов тазьы шуэ: - Ми сюлэм висёнмес вераны лыктӥмы. Нокин ӧз косы. Та нунал удмуртъёс понна огшоры ӧвӧл: сессиын премьер-министрез быръёзы. Со удмурт ке ӧз луы, неномыртэм ӝож луоз. "Удмурт кенешлэн" азьвыл кивалтӥсез удмурт тодосчи Р. И. Яшина урамын Н. Ганзаен вераськиз (та депутатэз Александр Волков Правительстволы Тӧрое ӵектыны малпа). Роза Ивановна сое куриз кандидатураезлэсь куштӥськыны. Соку ик мӧйы кышномуртэз кык милиционеръёс палэнтӥзы. Сессие дыртӥсь депутатъёс та учырез адӟымтэ улэ кельтӥзы. Малы погонэн адямиослы сокем ултӥяло вал Роза Ивановнаез. Ужрадэ лыктэмъёс пӧлысь ӟырдыт вераськизы УдГУ-ысь преподавательёс Т. Г. Пантелеева, А. Ф. Шутов. Милиционеръёс калыкез Кун Кенешлэн юртэз азьысь улляны вырыса лекъяськиз, законэз тӥяса, пе, татчы люкаськиды. Нош кыӵе закон меда кулэ Удмурт Республикаенымы кивалтонэ асьме удмурт адямиез пуктон понна? Сыӵе законэз азьвылъёсыз депутатъёс ӧз кутэ, соин ик удмурт калыклы кылемын ураме потыса гинэ ас мылкыдзэ вераны. Но татын но, шӧдске, калыкез ас правоез понна нюръяськыны уг лэзё. А. Степанов. Удмуртлыкез утёнын выль уж Удмуртъёс - Европаысь одӥгез вашкалаез но аспӧртэмлыкоез калык. Азилы матын луэменыз, удмуртлэн сямъёсаз, кылан-буранъёсаз, тусбуйаз, кылаз шӧдӥське Сибирьысь, Кыдёкысь Востокысь калыкъёслэн тодметсы; вашкала аръёсы удмурт выжыос вузкарыса улӥзы Кавказысь, Шор но Матысь Азиысь, Индиысь, Египетысь калыкъёсын, кыр дуннеетӥ кӧчылыса ветлӥсь тюрк, иран выжыосын, финн-угор ӵыжы-выжыосмес вератэк ини; бӧрысь муресь кусыпъёс кылдытӥзы славян калыкъёсын. Сюрс арлэсь кема ини соослэн котыразы уло мусульманъёс но христианъёс, нош удмуртъёс пӧлын туннэ нуналозь кылизы на язычникъёс. ЪВИИИ даурлэн шор вадесаз гинэ соос Христос Инмарлэн черказ пыризы бере, татын языческой сямъёс та дырозь зол возиськизы. Вашкала даурысь улон- вылонэн, сямъёсын, осконэн, кырӟан-веранэн тунсыкъяськись муртъёслы татын ӝутыны вормонтэм, йыромымон, зарезьысь луо мында материал. Кам но Ватка шуръёс котырысь бадӟымесь нюлэсъёсын интызэ вошъятэк улӥсь калык возиз трос вашкала языческой сямъёссэ. Но соос дуннеысь азьмынӥсь калыкъёсын оградын мыныны люкетӥзы. Удмурт калык дуннелы тодмо луиз, оло нош, ӵапак та палыныз - языческой сямъёсыныз. Таӵе малпанэ вуиськод, тросэзлэсь тодосчиослэсь ужъёссэс лыдӟыса, калык йылолъёсын тодматскыса. Мынам ӝӧк вылам кылле ӵыж выль книга. Со сӥземын удмурт калыклэсь кырӟан-веранзэ (фольклорзэ) эскеронлы. Соин артэ интыяськемын та выллем ик нимо автореферат - "Удмуртский фольклор: синкретизм и функциональная специфика жанров" (М., 1999). Соослэн авторзы луэ Т. Г. Перевозчикова-Владыкина, элькунысьтымы одӥгез тодмоез но сюлмо ужась-тыршисез фольклорист, трос книгаослэн, статьяослэн авторзы. Т. Г. Перевозчикова-Владыкиналэн нимыз кемалась тодмо ини кылан-буранэз эскерись финн-угор учёнойёс пӧлын: угось со трос пол мур пуштросъем докладъёсыныз вераськылӥз 70-тӥ-90- тӥ аръёсы ортчем конференциосын, конгрессъёсын, кылсярысь, Сыктывкарын (1985-тӥ ар), Тартуын (Эстония - 1990-тӥ ар), Йоэнсууын (Финляндия - 1994-тӥ ар), Ювяскюляын (Финляндия - 1995-тӥ ар), Сегедын (Венгрия - 1996-тӥ ар) но мукет интыосын. Таяз арын Татьяна Григорьевна удмурт кылан-буранлэн пӧртэм жанръёсызлэсь аспӧртэмлыксэс, улон, азинскон сюрессэс эскерыса, наукаосъя докторе потон диссертацизэ Мускоысь нимо-дано тодосчиос азьын утиз. Солэн авторефератэзлы асьме кунысь гинэ ӧвӧл, кунгож сьӧрысь тодосчиослэсь но вылӥ дунъет сётӥсь гожтэтъёс вуизы. Дунъет сётоно книгамы сярысь верано ке, нырысь ик пусъем потэ солэсь мур пуштросъем научной уж луэмзэ. Автор паськыт кутэ фольклор, этнография удысъёсысь терминъёсты, кылыз но - мур, научной. Нош удмурт кылын рецензия гожтон капчи уж вылымтэ. Удмурт кун университетын но, Эстониысь Тарту университетлэн аспирантураяз ӵош дышетскем, УдНИИ-ын дас ар ӵоже ӵош ужам эшме сюлмысьтым ӟечкыласько та бадӟым, мур пуштросъем научной уженыз, наукаысь докторъёс радэ потэменыз (туж оскисько, та дано ним солы одно ик сётэмын луоз шуыса). Шумпотӥсько книгалэн потэмезлы, нош мукет ласянь чылкак паймисько таӵе пичи тиражен печатласькемезлы - чылкак 500 экземпляр гинэ. Кин доры вуоз та дуно-дано книга? Таӵе ик югдур мукет учёнойёслэн но монографиосынызы. Собере паймиськомы: калыкмы уг тоды, уг гажа ас калыкезлэсь историзэ, кылзэ, культуразэ. Удмурт фольклорлэсь пӧртэм люкетъёссэ эскеронлэсь историзэ со пыр-поч сэрттэ- пертче, пӧртэм вакытъёслы люкылэ. Вылӥ дунъет сётэ Куӟебай Гердлэн, Д. Яшинлэн, В. Кельмаковлэн, кунгож сьӧрысь учёнойёслэн ужъёссылы. Но малы ке автор пал кыл но верамтэ 80-тӥ аръёсы пӧртэм палъёсын улӥсь удмуртъёслэсь гожтэм текстъёсын поттэм кык сборник пумысен (учкы: "Материалы по удмуртской диалектологии", Ижевск, 1981 но "Образцы удмуртской речи удмуртского языка", Ижевск, 1982). Та сборникъёсын сётэмын туннэ нуналозь возиськем лымшор, уй пал, калмез удмуртъёслэн, Уралын, Сибирьын улӥсь удмуртъёслэн, бесерманъёслэн кылан-буранъёссы, мадьёссы. Малпасько: азьланяз ас ужъёсаз та сборникъёс вылэ но Татьяна Григорьевна пыкъяськоз, татысь узыр материалэз паськыт кутоз аслаз эскерон-чакланъёсаз. Книгаезлэн кыкетӥ люкетаз автор валаса, котыр ласянь эскере удмурт кылан- буранлэсь жанръёссэ. Калык сямъёсын герӟаса, кылъёслэсь-терминъёслэсь этимологизэс, азинскем сюрессэс сэрттэ-пертче: мадь, крезь, сюан гур, пӧртмаськон, шудон но мукет. Паськыт кутэ ӵошатон материалэз. Куинетӥ люкетэз сӥземын кыллэсь сямъёсын кутӥськемзэ, солэсь кужымзэ возьматонлы. Та люкетэн тодматскыку, тодэ лыкто Библиын кыл сярысь верам чуръёс: "... кыл - мугорлэн пичи гинэ люкетэз, нош трос ужъёс лэсьтэ. Учкы, пичи гинэ тыл, нош макем бадӟым нюлэсэз сутэ: кыл - со тыл, шонертэм улонлэн чеберлыкез. Мугор люкетъёсмы пушкы интыяськыса, со быдэс мугормес сапта. Ачиз, геенна тылын ӝуаса, улон азьмес ӵушка. Уго котькуд пӧйшурез но тылобурдоез, нюж кыстӥськыса ветлӥсьёсты но зарезьын улӥсь макеосты адями зӥбломытыны быгатэ. Зӥбломытӥз но ини. Нош кылэз зӥбломытыны нокин но уг быгаты: со - кутыса возьыны луонтэм урод маке. Со пачылмемын кулон ваись ядэн. Кылынымы Инмарез, Атаез данъяськомы, соин ик Инмарлы укшатыса кылдытэм адямиос вылэ юриськиськомы. Одӥг ымысь ик пото ушъян-данъян но, юриськон но" (Иаков 3:5 - 10). Зэм но, та шонерлэсь но шонер Иаков апостоллэсь верам кылъёссэ быдэсак герӟаны луэ удмурт калыклэн кылан-буран сямъёсыныз. Чебересь, сюлме пырымонэсь солэн Вылысь Инмарез данъян кылъёсыз, сюлворыса, тэльмырыса аслыз музъем выл узырлык-байлык, тазалык, татулыко улон курон кылъёсыз, нош кыӵе кышкытэсь, синазькылесь каргаськон- юриськон, йыр берыктон, адями сӧрон, тунаськон-пелляськон, серекъян-веран кылъёсыз. Язычникъёс уг тодо вал уго, кыл понна Инмар азьын кыл кутоно луоз шуыса, соин ик, дыр, удмурт фольклорын гинэ ӧвӧл, калык пӧлын, кыӵе ке кулэ маке кадь, та дырозь возисько на каргаськон, тышкаськон, пелляськон кылъёс. Автор гажаса, сюлэмзэ поныса гожтэ та люкетысь чуръёссэ, кызьы лэсьто учёнойёс. Тодосчиосмылы, уката ик гуманитарной наука удысын тыршисьёслы, мылкыд кареме потэ ӵемгес улон книгае - Библие - учкылыны. Отысь шонер валэктон шедьтыны луэ вань юанъёслы. Нимысьтыз люкетъёсын эскере автор удмурт калык сямъёсты (уката ик - сюанэз) но со йылолъёсты герӟаськем кылан-буранъёсты, кырӟанъёсты, лэчытэсь веранъёсты, тодметъёсты (тазэ со нимысьтыз главаосын эскере). Бадӟым инты басьто калыкмы пӧлын кылдэм мадёнъёсты-легендаосты, преданиосты сэрттон-пертчон, соосты пӧртэм пумо группаослы люкылон. Т. Г. Перевозчиков- Владыкина быгатэм книгазэ трос иллюстративной материал пыртыса чеберъяны, лыдӟем потымон карыны. Маиз гинэ ӧвӧл татын - выжыкыл но, мадиськон но, лэчыт веран но, гуртлэсь кылдэмзэ мадён но, нош кӧня кырӟанэз?! Синмаськымон. Кыл удысын ужась вал бере, одӥг ӵектонме вераме потэ. ЪИЪ дауре кунгож сьӧрысь тодосчиослэсь, нош озьы ик та аръёсы удмурт кылчиослэсь транскрипциен гожъян традицизылэсь туала удмурт фольклористъёс малы ке но палэнско. Соослэн гожъямысьтызы уд шедьты палэн-палэн вераськонлэсь (диалектлэсь) тодметсэ. Кылсярысь, - ы куаралэсь сьӧр радысь шоро-куспо ӝутскем вариантсэ нимысьтыз пусэн-букваен (ъ) ӧд ке гожты, уд вала висъяны, Кукморын-а, Шушмо котырын-а, Пониноын-а, Кез ёросын-а, бесерманъёс пӧлын-а, Бадӟым Вожойын-а, Вуж Эгралан-а гожтэмын та кырӟан-веран. Мукет фонемаосты но туж чакласа гожъяно. Мынам ӵектонэ таӵе: фольклористъёс печатлано текстъёссэс куинь столбикен мед сётозы вал - нырысяз: транскрипциен сётэм текст, кыкетӥяз: литературной вариантэз, кызьы али сое печатлало (но лексиказэ, морфологизэ чик воштытэк сётоно); куинетӥяз столбике сётоно берыктонзэ (ӟуч яке мукет кылын). Соку та текстъёслэн дунлыксы огшоры лыдӟисьёс понна гинэ ӧвӧл, наука понна но будоз. Текстъёссэ автор туж быгатыса, чебер берыктэм ӟуч кылэ. Син шоры йӧтэ Инмар кылэз я ӟуч "Бог" кылын сётэмез, я удмурт вариантсэ ик кельтэмез (учкы 105-тӥ но 109-тӥ страницаосты, мукет азьысь но). Туж узыр уже кутэм литературалэн списокез. Вань верам шекъёс, ӵектонъёсы книгалэсь дунлыксэ чик уг кулэсто. Пумаз эшшо одӥг пол вераме потэ на та книгалэн вылӥ научной уж луэмез сярысь. Удмуртлыкез утёнын, эскероынын Т. Г. Владыкиналэн ужез зэмос бадӟым учыр луэ. Пыд йылаз йыг-йыг сылӥсь учёноймылэсь трос выль книгаоссэ возьмалом. Михаил Атаманов, кылтодон наукаосъя доктор. СЮЛЭМШУГЪЯСЬКЫТӤСЬ ЮГДУР Утёз-а картон корка ӟырт кезьытлэсь? Куке но мон дышетскисько вал университетын, нош табере базарын вузаськыса сылӥсько. Кызьы вуи таӵе улонэ? Семьямы бадӟым. Мемилэн вить нылпиез. Ужа атаймы гинэ. Пудо ке но вордӥськом, йылзэ-пумзэ нокызьы но ваче вуттыны ум быгатӥське. Малпай академической отпуске потыса, кӧня ке уксё поттыны, дӥсяськыны. Базаре басьяськыны потӥськод ке, ваньмыз каньыл кадь: вузаськисьёс узыресь, ваньмыз соослы инмысь усе. Нош зэмос югдур копак мукет вылэм. Уж борды огнам кутскыны кышкай, пумиськи мон сямен ик вузаськыны малпась кык пиосын. Та вал мынам туж бадӟым янгыше. Уксё котырын ог-огедлы нокыӵе оскон вылымтэ. Котькудӥз турттэ пыжемлэсь бадӟым но ческыт палзэ куртчыны. Валай, уж борды басьтӥськоно яке оген, яке кышноен картлы. Вылаз ик, эшъёсы азьтэмесь вылӥллям, ӧжыт гинэ ужаса, трос уксё басьтыны малпаллям. Ваньмыз ас вылам усиз. Ӵыжы-выжыосылэсь пунэмен кык сюрс манет уксё бичай. Вузкарыны кутским тулыс, Ижысен сю кызь километр иськем гуртын. Ваим вуз, эшъёсыным огмында коньдон поныса. Огдырлы интыяським квартирае, ачим улӥ ӵыжы-выжыосы дорын. Арня ӵоже ужаса, пиосы жадизы, пегӟизы городэ. Кыли огнам. Котькуд ӵукна потай базаре. Куать сюрс манет тыр сиён-юонэз ас вылад уд нуллы ук, кутӥ машинаен шофёр. Вузкарыны поттэмез понна нуналлы быдэ дас манет тырылӥ, сомында ик -бензин понна. Эшъёсы арнялы быдэ, вуз вайылӥзы, таин соослэн ужзы быриз. Нош мон бухгалтер но, вузкарись но, мукет йырсэран ужъёсты быдэсъясь но. Гужем куазен базарын шундылэсь кытчы пырыны уг тодӥськы. Доре бертыса, валес вылэ усисько, пыдъёсме но киосме выретыны кужым уг тырмы ни. Ӝыт султыса, вузэз чотасько, вуись нуналлы дасяськисько, документъёсты чакласько - одӥг сертификатлэн но дырыз ортчемын медаз лу. Эшъёсылы йыры курен но жадемен малпай вузкарись кутыны. Ваньзэ ӵошен лыдъяса - вузаськон инты, вузаськыны лэзён, шофёр, вузкарись понна - нуналлы быдэ быре куатьтон вить манет. Та вӧзы йылтоно на Ижысен гуртозь вуз вайыны бензинлы бырем уксёез. Сиён-юонэн ужаку, дунэз куамын процентлэсь трос уд йылэты. Мукетъёслэсь тросгес карид ке, кин тынэсьтыд вуздэ басьтоз? Озьы вань ужмы ассэ сииз. Ёрмыса малпай город пиослэсь люкиськыны. Соку таосы атаенызы вуизы. Ужамзы понна но вуз басьтыны понэм уксёзэс курыны кутскизы. "Ужады-а бен тӥ", - юасько соослэсь. Кутскизы ук куиньназы монэ курдатъяны. Ми, пе, тон вылэ "крутойёсты" узатом. Уксё, пе, вал, но тон сое ваньзэ аслыд карид. "Бен малы, ваньзэ чаклан понна, асьтэос вузкарыса ӧд сылэ", - нош ик юасько соослэсь. Озьы но тазьы керетэммы бере вераським ваньзэ ас интыяз берыктыны. Вузэз куиньлы люкыса, быдэн сюрс сизьым сю манет тыр луиз. Атайзы верамъя, кылем куать сю манетсэ тыроно луо, ӧй ке тыры, налоговой полициын ужась апайзы пыр ужаны, пе, ум сётэ. Толэзь куспын вить пол вуылӥзы, ӧжытэн-ӧжытэн уксё сётъяй. Бергамъя тыронэ быриз, вузэ но ичиёмиз - уксёе кие вуэмлэсь тросгес быре. Малпай вань сиён-юонме ӵыжы-выжыосылы сётыны, пунэмен коньдон куреме понна. Озьы но тыронэ таосызлы кылиз. Берло гинэ, ар ортчыса, тыро-пыдо чотаським. Семьяямы югдур ӧз воштӥськы, шуг-секытъёс озьы ик зӥбо. Нош мон доры вуиз на яратон. Малпам ӵошен улыны. Шедьтӥм уксё тырыса улон инты. Кыкнамылэн но анай- атайёсмы милям огазеяськонмылы пумит луизы, тӥ, пе, катаен калоша кадь паръёс. Юрттӥсь ӧз сюры, нош яратонэн гинэ кӧттэ уд тыры, уж инты ӧвӧл. Выльысь базаре вуим. Тодматским Москвае но Китае ветлӥсь вузкарисьёсын. Соос, пунэмен вузан понна, шудонъёс, пыдкутчанъёс, дӥськутъёс, мукет вузъёс сётӥзы. Сӥзьыл вуэмъя ужаны секыт луиз. Пыртӥ потӥсь тӧл, зор, лымы. Ураме огдырлы потыку, куазьлэн шоккетэмез уг но шӧдӥськы, нош быдэс нуналзэ огинтыын сылыку - чидантэм. Киос дырекъяло, пиньёс ог- огзы борды йыгасько. Чалякгес бертыса, пыдъёсты пӧсь вуэ донгы вылэм, пӧсь чай ю. Малпаськод, оло нош, эшшо мае ке вузало на, ӧжыт сылоно ке шат? Вузкарон дыр бырытозь, таӵе мылкыдэн сылӥськод. Нош толалтэзэ, дорын мар шунытэз вань, ваньзэ вылад дӥсяськод, пыдад бадӟымгес ыж гон сапег кутчаса потӥськод. Гужем вуытозь, кызэмысь дугдоно ӧвӧл. Тросэз вузаськисьёс уг чидало таӵе улонлы, тазалык дуногес шуо. Озьы ке но, пичиен-пичиен уксё люкаса, асьмеос вуз ваим, пунэмен вузаськемлэсь но ӧм куштӥське. Ӝӧкмы вылысь сиён табере ӧз бырылы. Семьяосмылы но маин ке соин юрттылӥм. Тазьы вал дас сизьыметӥ августозь - кризис дорозь. Табере адями ичигес басьяське, коньдонэз ӧвӧл. Шуом, уждунэз будэто кык поллы, нош дунъёс куинь-ньыль пол тэтчо. Тазьы ке но, рынок кыле. Татын сяна, нокытын но туннэ нуналлы ми ум быгатэ сюдыны семьямес, пичи нылмес. Дышетскыны потон дыры но вуэ ини (али мон нылпи утён отпускын), нош ик шугъяськон. Куинь ар куспын кызьы ми улом? Кызьы будэтом пичимес? Общежитиын, нош картэ - вузкаронын? Кызьы ваньмыз отын берытскоз ай? Дышетӥсьёслы, врачъёслы, бюджет чотын мукет ужасьёслы тыро шат уксё? Яке трослы бере кыльыса, яке уж уретъянъёс бере сёто уждунзылэсь кӧня ке процентсэ. Дышетсконме быдтӥ ке но, тӥни мар возьма монэ азьланьын, ай уж шедьтыны уд быгаты на. Тодмоосы пӧлын вань вылӥ дышетскон заведениосты йылпумъяса фермаын ужасьёс, "комокын" пукисьёс, уж шедьтытэк доразы улӥсьёс, базарын вузкарисьёс. Картонлэсь коркан мон ӧжытгес кынмо, дыр, вузаськон интыям. О. КОЖАНОВА. Кин городын кузё? Толэзь талэсь азьло Ижевскын усьтӥськиз выль служба - администрацияя но техникая инспекция. Со эскере-чакла городысь чылкытлыкез. Май праздникъёс азьын та ёзлэн кивалтӥсез Сергей ШУМКОВ пумиськылӥз журналистъёсын. Таӵе службаос туннэ нуналлы вань ини Россиысь тросаз городъёсын. Сергей Шумков ивортэмъя, Москва, Нижний Новгород, Казань, Набережные Челны городъёсын ульчаос чылкытэсь ӵапак сыӵе выль службалэн тыршемез улсын. Инспекцилэн кивалтӥсез оскытӥз, Ижевск но одно ик чылкыт луоз шуыса. Кылдытэм дырысен - толэзь ӵоже служба возьматӥз аслэсьтыз кужымзэ. Со вуылӥз 300 пала объектэ, сю пала алон гожтӥз. Со сяна, куд-ог кивалтӥсьёсты штраф но тырытӥз. Пусйыны кулэ: алэм муртъёс пӧлы шедизы юртъёсты возёнъя управлениысь кивалтӥсьёс но. Пресс-конференцие люкаськемъёс пуныосты но коӵышъёсты возён сярысь но ужпумез ӝутӥзы. Сергей Шумков юанлы валэктӥз: инспекция калгись пуныос понна кыл уг куты, со ужа нимаз адямиосын гинэ. Та вакытэ городысь администрация эскере Ижевскын инкуазез утёнъя милиция кылдытыны. Та службалэн ужасьёсыз погонъёсын но киязы ож тӥрлыкен луозы. Соку ини эрказмем пуныослэн но коӵышъёслэн кузёоссы, оло, кӧня ке но кышкалозы. Л. ЮРТЕЕВА. Чидан но чиге Кызьы ивортылӥм ни, апрель пумын люкаськылӥзы "Удмурт кенешлэн" исполкомаз быръем эшъёс, ёрос ёзъёслэн кивалтӥсьёссы, политикъёс, тодосчиос, журналистъёс. Азьло пусйымтэ кенешон герӟаськемын вал республикаямы кивалтӥсь ёзъёс кылдытонын кылдэм югдурен. Тодмо учёнойёсмы пумиськонэ ӧтем Николай Ганзалы валэктыны тыршизы, республикаямы выжы калыкез ултӥяны выро шуыса. Люкаськемъёс кутӥзы Удмуртиын улӥсьёслы но Кун Кенешлэн депутатъёсызлы вазиськонъёс. Соос печатламын кылемаз "Герд" бамын. Кылдэм югдур пумысен гожтэтъёс тросэн вуо редакцие но. Лыдӟисьёс вазисько Кун Кенешлэн Тӧроезлы Александр Волковлы. Куд-ог гожтэтъёсын тодматскыны дэмласьком. Исколкомлэн заседанияз лыктэм эшъёс эскеро пумен ӟырдась югдурез. Туспуктемъёсыз В. КАМАШЕВЛЭН. Паймод но бырод Нош но нош сыӵе малпанэ вуисько Кун Кенеше быръем депутатъёсты син азям пуктыса. Ым уг усьтӥськы али быръем парламентэз калыклэн представительной органэз шуыны. Обществомылэсь социальной, национальной но партийной тодметъёссэ таиз Кун Кенеш уг возьматы. Мон сямен, со капитализмлэн кырыж синучконэз луэ. Зэмзэ но, капиталистъёслэн обществоенызы котьку но кивалто коньдоно муртъёс. Асьмелэн но табере озьы луиз: Кун Кенеше сюризы данак ужбергатӥсьёс но предприятиосын кивалтӥсьёс. Бырйисьёсты соос капчиен пӧязы, троссэ кузьымъёсын но басьтыны быгатӥзы. Бен, курадӟонэ вуэм калыклэсь йырвизьзэ берыктыны секыт ӧвӧл. Юнме уг верало ук, выись адями куро нюжа борды но возиськыны турттэ шуыса. Тӥни та муген сэрен, дыр, огшоры калык куаразэ сётӥз кивалтӥсьёс но узыр адямиос понна. Сюлэм вӧсь луэ: малы асьме бырйисьёс туннэ нуналэн гинэ уло, чик но уг малпасько вуоно улонмы сярысь. Ми, арлыдоос, туж умой тодӥськомы на, кыӵе секыт улонмы вал война аръёсы. Калыклэн дышетскемез но, культураез валанэз но ӧжытгес, лябгес вал. Озьы ке но, ми азьпала улонэз юн шӧдыса улӥмы, югдурез валаськомы вал. Туж оскиськомы вал ӟеч улонлы, социализмлы. Малы табере асьме калык сокем йыромыса улэ? Мон сямен, соин но, дыр: адямиос пӧлын али нокин валэктон уж уг нуы. Дышетӥсьёслэн, интеллигенцилэн куаразы туж ляб кылӥське. Иворъёсты вӧлмытӥсь ёзъёс но ӵем дыръя югдурез я палдурес возьмато, я меӵак пӧясько. Кызьы бен оскод узыр депутатъёслы, соос калык понна сюлмаськозы шуыса?! Ноку озьы ӧй вал ук! Узыр уката но узырме, нош начар мурт эшшо куанерме. Бен, нырысь-валысь выль депутатъёс бырйисьёс понна мар но со лэсьтозы ик вылды: тупатъялозы сюресъёсты, улон юртъёсты, но огъя улон уз воштӥськы ук. Мынам малпамея, Удмурт Республикалэн Кун Кенешез таяз учыре пумозяз быдтыны выроз социализмлэсь кылем бервылъёссэ но тупатоз выль буржуазилэсь улонзэ. Мон туж шумпотысал, сыӵе малпанъёсы ӧй быдэсмысалзы ке. С. Воронцов, Алнаш ёросын улӥсь. Председателю Госсовета Удмуртской Республики Волкову А. А. Мы, жители удмуртской национальности г. Воткинска, глубоко возмущены Вашими действиями. Вы не можете не знать, что национальные вопросы - это тонкая, ранимая сфера. А, может, именно зная об этом, Вы так решаете этот вопрос? Умело убираете с дороги всех руководителей удмуртской национальности. Думается, это для того, как мы понимаем, чтоб легче было разорять природные богатства республики. Почему развалены заводы, распродана нефть, леса? С Вашего согласия нас уже обокрали, довели до нищеты. Посмотрите, какая высокая заболеваемость населения раком! А какие рождаются дети? Это все говорит о том, что экология нарушена. Вы позволяете ради сиюминутной выгоды уничтожать леса! По-варварски выкачиваете нефть, губя саму землю. Таким образом уничтожаете и природу, и людей, родившихся на этой земле. Нам, удмуртам, бежать некуда, здесь могилы наших предков. Ранимые, не умеющие сгибаться под жизненными тяжестями, люди ломаются, отсюда и суицид. Мы не думаем, что приятно все это слышать. Но, согласитесь, что это правда, а не эмоция. Взываем к трезвому рассудку и напоминаем, что Республика наша Удмуртская. В эшелонах власти должны быть люди коренной национальности. Достойные кадры есть! В конце обращения хочется написать стихи Ю. Байсаровой, они сейчас очень кстати. Ӵок Ӟучомем ке но, ма ӵок. Ӟуч вормиз ке но, ма ӵок. Гуртъёсмы быро ке но, ма ӵок. Ыштӥськом ӵок шуыса Асьмелэсь анай кылмес, Ыштӥськом ӵок шуыса Асьмелэсь данмес. Туж бадӟым ыштонъёсмы, Туж пичи шедьтонъёсмы, Мар шуом анаймылы, Мар кельтом выжымылы. Письмо подписали 132 человека. 02 ИВОРТЭ Ортчем толэзе Удмуртиын 2354 йыруж но йыртэман учыр пусъемын, кылем арен ӵошатыса 547-лы тросгес. Толэзь ӵоже 1850 йыруж шараямын. 25 адями виён учыр пӧлысь куинез шараямтэ на, 24 машина лушкамын, дасэз шараямын. Апрель толэзь мукетъёсыныз ӵошатыса трос ик ӧз висъяськы. Но одӥгез учыр быдэс шаермес сэзъялтӥз, шуыны луоз. 20 апреле акциосын "Ижмаш" огазеяськонлэн башняысьтыз 5 бадӟым гырлы лушкамын вал. Зэм но, паймымон соиз, воразы элькунмылэсь данъяськон гырлыоссэ. Луысал ке со кыӵе ке пичи арбери, нош лушкамын кылем дарлэн 30-тӥ аръёсаз кисьтэм бадӟымесь гырлыос. Ма каро вал меда возьмаськисьёс, куке нокыӵе документтэк кык адями эркынак предприятилэн территорияз пыре но секытэсь гырлыосты дыртытэк нуэ? Тау каром милициын ужасьёслы. Соослэн ӟеч тыршеменызы 5 нунал куспын гырлыос шедьтэмын, озьы ик ворасьёс но кырмемын. Витез ик гырлы буёло корт басьтон интые вуттэмын вылэм. Отысь ик шедьтӥзы Хохряки шайвылысь куинь шайгу вылысь лушкам барельефъёсты. Ю. БАЙБЕКОВ. Синвуос ӵужырак васько... Кыӵе гинэ адямиос уг уло асьмемын артэ!.. Куддыръя соосын нуналаз олокӧня пол пумиськылӥськом, артэ вамышъяськом, вераськиськом. Собере одӥг чебер нуналэ со адямимес шуак адӟиськом мукет ласянь. Бен, бен, чылкак тодыны но уг луы вылэм вӧзысьтыд муртэ. Озьы шуыны, кылсярысь, мон быгатысал Глазкарын улӥсь Леонид Васильевич Лихачёв сярысь. Тросэз тодо сое, кивалтон удысын ужамезъя. Берло вакытэ тыршиз калыкез шугадӟонлэсь утён удысын. Нош али ассэ быдэсак сӥзиз творчестволы. Ас вакытаз Леонид Васильевич йылпумъяз Удмурт кун университетлэсь художественно- графической факультетсэ. Соин ик со туж усто суреда. Ӟеч туспуктэмъёс лэсьтэ. Ужъёссэ ӵем гинэ адӟоно ёросамы потӥсь "Иднакар" газетысь. Туспуктэмъёсын адӟытонъёсыз но Глазкарын трос пол луыло. Пичи дыръяз пияш синмаське вылэм крезьгуро инструментъёсын шудӥсьёслы. Ачиз но оскалтыны малпам. Ярам солы мандолина. Со дырысен ноку но люкиськылымтэ ни та инструментэн. Школаямы кемалась пумиськыны чакласьком ни вал Леонид Васильевичен, но нокызьы ӧз пӧрмылы. Зэм, вуиз со нунал. Кемалась ик ӧвӧл та ужрадамы люкаськылыны быгатӥм. Сыӵе паймымон адямиен пумиськыны шуд усиз 10-тӥ классын дышетскисьёслы: нимысьтыз урок дасямын вал угось. Урокмылэн кутсконаз куномы вакчияк гинэ вераз ачиз сярысь. Собере лэсьтӥмы пичильтык экзамен. Пӧртэм юанъёслы валэктоно вал Леонид Васильевичлы. Чузъяськизы таӵеосыз: кыӵе удмурт писательёсты тужгес но вылӥ дунъяськоды, крезьгур кылдытыкуды, кыӵе малпанъёс бергало йырады, улонысьтыды тужгес шудо нунал, мар верасалды егит кылбурчиослэн но крезьгурчиослэн творчествозы сярысь? Вал на мукет но юанъёс. Ваньмызлы Леонид Васильевич валэктонъёс мылысь-кыдысь, пыр-поч сётъяз. Собере серекъяса шуэ ни "экзаменмы" вискын: "Уф, перемена-а, мар-а коть мед луоз ни вал ӝоггес". Пиналъёс но пальпото. "Дышетскисьмылы" кызьы бен "5" уд пукты валэктонъёсыз понна? Леонид Васильевичлы усто валэктонъёс сётыны юрттӥз на мандолина. Поэтъёслэн кылбуръёссыя кылдытэм турлы крезьгуръёс вӧлмизы та нуналэ котырак. Со кылбуръёс - Любовь Тихоновалэн, аспал эшезлэн, Яр ёросын будэм Алексей Ельцовлэн, школаысьтымы удмурт кыллы но литературалы дышетӥсьлэн Р. И. Резеновалэн но мукетъёсызлэн чуръёссы. Леонид Васильевич вылӥ дунъет сётӥз Ашальчи Окилэн но Флор Васильевлэн кылбуретсылы. Верамъёсысьтыз но шӧдӥське, удмурт кылэз но литератураез туж гажа шуыса. Чузъяськем крезьгуръёс тросэзлэсь сюлэмъёссэс вырӟытӥзы, дыр, шуыса малпасько. Пумиськонмы йылпумъяськыку, одӥгез дышетӥсьмы меӵак шуиз: "Одӥгзэ кырӟандэс быдэстыку, синвуосме возьыны ӧй быгаты ни". Та кылъёс уг луо шат Леонид Васильевич Лихачёвлэн ужъёсызлы тужгес вылӥ дунъет?! Р. РЕЗЕНОВА, Глаз ёросысь Люм шор ёзо школаысь удмурт кыллы но литературалы дышетӥсь. Эктонэн, кырӟанэн ӵош Кузесь сӥзьыл-тол ӝытъёсы киужъёсын одӥг корка люкаськыса пукылыкуз, гурт калык, кырӟам сяна, эктэ но вал. Котькыӵе ужлы дышем адями угось ӝытбыт одӥг интыын пукыны ӧз чидалля, задор мылкыдзэ возьматэмез потылӥз. Соку кылдылӥзы пӧртэм эктонъёс но. Андрей Прокопьев эктон ӝытъёссэ юнме ӧз нима Эктон корка. Кыкетӥ арзэ ини чупырес удмурт нылъёс но пиос люкаськыло Егитъёслэн культура юртазы. Котькудаз эктонэ ӧтиськыло пӧртэм районъёсысь усточиос. Шаерамы, удмуртъёс сяна, ӟучъёс, поръёс, бигеръёс уло бере, соос но палэнэ кельтэмын ӧвӧл - эктонъёсын татчы вуылӥзы ини. Нош апрельлэн пумаз асьсэлэсь эктонъёссэс-кырӟанъёссэс возьматӥзы Татарстанысь Балтась районын вордӥськемъёс-будэмъёс. Тросэз соос Ижын уло, огинэ люкаськыло ини дас арлэсь кемагес. Ансамбльзылы "Ципья зоутъёс" ним сётӥзы. Угось та усточиос пӧлысь данакез будэмын бадӟым удмурт Чабъя (Ципья) черкогурт палан. Коллективысь калыкез огазеязы Пётр Кубашев, кузпалъёс Федосья но Виктор Апаковъёс, Александр Овчинников но мукетъёсыз. "Ципья зоутъёс" ас быгатэмзэс возьматэм бере, котьку сямен, ӵош эктонъёс вал. Со сяна, Владимир Куликовлэн но Александр Овчинниковлэн арганъёсын шудэмзы улсын Андрей Прокопьев, кык Оляос - Маркова но Васильева - лыктэмъёсты эшъёсынызы ӵош дышетӥзы вашкала удмурт эктонъёслы. Соос котькуд люкаськон дыръя калыкен сюлмысь ужало. Озьы адӟоно пӧртэм ёросъёсысь эктонъёсты, нош мылкыд карисьёс соосты дышето но. Эктон коркае ветлӥсьёслэн лыдзы будэ. Калык но куре отчы ӵемгес люкаськылыны. Нош али со луылэ котькуд толэзьлэн берпуметӥ нуналъёсаз. Табере эктӥсьёс татчы ик, Егитъёслэн культура юртазы, 27-тӥ мае сизьым часлы люкаськозы. Туж секыт аръёсы но удмуртлыкез яратӥсьёс тодыны тыршо вашкала йылолъёсты, кырӟанъёсты, эктонъёсты, шудонъёсты. Озьыен, ум куасалске, ужалом но улом эктонэн-кырӟанэн ӵош. Н. ВОЗИСОВ. ВОРМОНЛЫ - 54 Та еж пельпумъёсмы вылэ... 1943-тӥ арын Ижевскысь Селтала каникулэ бертыса, огназ улӥсь песятае доры улыны кыли. Озьы кутскиз мынам, 15 арес пияшлэн, ужан сюресэ. Гурт ужъёсты быдэсъяй Ворошилов нимо колхозын, берло лыдӟиськон коркаен (изба-читательня) кивалтӥ. Нош школаын дышетсконэ аналмиз. Быдӟым ожлэн пӧсь тулкымез монэ, гурт ужлы дышымтэ пияшез, ӵушказ. Гуртысь вань секыт ужъёсты быдэсъясь егит пиослы, нылъёслы но капчи ӧз йӧты. Нош мон городын будэмын. Озьы ке но, уж тужгес но ӟеч дышетӥсь луиз. Ваньзэ валаны но быдэсъяны дыши. Кӧня ке дыр ортчыса мыным оскизы егит нылъёслэсь но пиослэсь комсомол ячейка кылдытыны. Бӧрысьгес гуртысь егитъёсты огазеяно луиз государстволы нянь келянъя комсомольско-молодёжной бригадае. Монэ бырйизы соин кивалтыны. Пиналъёслэн но егитъёслэн ож вылтӥ тыршемзы сярысь трос гожъямын ке но, мынам вераме потэ эшъёсылэн асьсэды жалятэк ужамзы сярысь. Секыт ныпъетэз еж пельпумъёсмы вылэ басьтэммы сярысь мон война вылтӥ ик дневникам гожтыса кельтӥ. Со аспӧртэм книгалы пӧрмиз. Заводъёсысь но фабрикаосысь фронт мышкын тыршись бригадаос сямен ик, милям но транспортъя (озьы шуыны секыт, со интыын - лябӟем вал яке ош, ӵем дыръя - скал но) бригадамы уй но нунал ужаз. Тыршим одӥг курон улсын - "Ваньмыз фронт понна, ваньмыз вормон понна!" Кужыммес ӧм жалялэ. Районысь "Ударник" газет но милесьтым тыршеммес адӟытэк кельтымтэ. Тӥни мар гожтэмын вал огаз номерын: "Валентин Логиновлэн кивалтэмез улсын ужась бригада быдэн кык рейс со пала но тапала лэсьтэ, 20-30 центнер кидыс ӝоктэ. 50-60 килограммъем мешокъёс ӝытозь уката но секытэсь луо кадь. Кыӵе кужым но тазалыко луыны кулэ секыт мешокъёсты ньыль пол - бусыысь кеносэ, кеноысь уробое, уробоысь кун кеносэ - вуттон понна. Эшшо но шуггес складлэн вӧлдэтозяз кидысэн тырмытэм мешокъёсты, аслад тыбырад ӝутыны, тубат кузя тубыны но ю-нянез ӝоктыны..." Озьы гожтэмез лыдӟыса, син азе соку ик пуксе кинофильмъёсысь Борис Андреев артист выллем таза но сӥльвиро воргорон. Нош улонын та ужез быдэсъязы йӧназ сиён шедьылымтэ но кужым люкамтэ 13-15 аресъем быдэ вуымтэос. Зэм, вормыны луонтэм секытэз соос вормизы, но еж мугорзы тӥялскиз, тазалыксы лябомиз. Озьы ужазы ож аръёс вылтӥ будэм нылъёс но пиос. Милям бригадамы шаерын одӥгез гинэ вал. Но солэн ужамез вылысь адӟыны луэ мукетъёссэ но. Районысь берлань берытскыкумы ваиськомы вал тракторъёслы но ю шертон-кутсан агрегатъёслы эстӥськон но воштос ёзъёс. Уробо нош ик буш ӧвӧл, гань-гань пуксьыса шутэтскыны уг луы. Нош ик 7 иськемзэ вамышъяськод валэныд яке ошеныд артэ. Нош пыдъёслэн кылзӥськемзы уг поты, жадем киослы биньгозыез но возьыны секыт. Озьы лэсьтылӥм кык рейс. Ӝытозь ӟигартэм луэм пиналъёс дась вал ини валес вылэ выдыны. Нош кысык вакытэ 3-4 час сяна кӧлыны ӧз кылдылы. Нуллон-ӝоктон ужъёс сяна, валъёс котырын но ужез вал. Ачид ик эскериськод- тупатъяськод сиес тӥрлыкез, тэкитаськод уробоез, сюдӥськод валэз... Нош сюрес вылын котьма луэ: тӥяське уроболэн поглянэз, кесиське кӧтулкыскетэз. Я сютэм валлэн вамышъямез уг поты. Нош ми горд обозэнымы тыршылӥмы кенос доры нырысьёсыз пӧлын вутскыны. Ведь ваньмыз со лэсьтӥськиз Вормон понна. Вормон нунал азьын тау кареме потэ бригадаямы ужам эшъёсылы - Ижевскын улӥсьёслы: Сергей Егоровлы, Анна Чушкаловалы, Виктор Логиновлы, Сергей Фалиныхлы, Александр Якимовлы, Федосия Дудыревалы. Ӟеч тазалык но ваньзэ умойзэ гинэ тӥледлы, эшъёс. Вераме потэ на тани мае. Милесьтым ужаммес адӟытэк ӧз кельтэ. Бригадамы пусъемын вал комсомоллэн Удмурт обкомезлэн Данъян грамотаеныз, нош бригадаын тыршемъёс - "За доблестный труд" медален. Валентин Логинов, ож вакытысь бригадаен кивалтэм мурт. Тубатлэн лёгетэз трос. Кудаз султод? Сюлэмме вӧсь каризы Кун Кенешлэн берло ортчем сессиез но, со бере шаерамы кылдэм югдур пумысен "Удмурт кенешлэн" кенешонэз. Ма шуод, Удмурт парламентын но, Правительствоын но асьмеос интымес ыштӥм. Озьы пумита удмурт калык ЪЪИ даурез. Малы кылим сюрес урдсы, малы асьмеды ялан кыдёке но кыдёке палэнто? Та юанъёслы валэктон шедьтон вылысь, нош но нош кутскыса эскерисько удмурт огазеяськонъёслэсь ужзэс. Вуисько одӥг малпанэ: ӧвӧл пӧламы кышкасьтэм, туж провор ужась адямимы, ӝутӥсьмы, кужыммес огинэ радъясьмы. Депутатъёсты быръёнэз но кулэ вал "Удмурт кенеш" пыр зол-зол кутскыса нуыны. Нош калык пӧлын валэктон ужез вылазы басьтӥзы чылкак мукетъёсыз. Соос ик вормизы. "Удмурт кенеш" вутскысал ке котькуд удмурт кивалтӥсь доры, бригадирысен кутскыса председатель дорозь, люкасал ке почта ёзъёслэсь начальникъёссэс, интеллигенциез, ожысь но ужысь ветеранъёсты, удмуртъёслы юрттыны мылкыд карисьёсты, соку асьмеос туннэ кадь югдуре ӧй сюрысалмы. Куара вӧзы куара люкаськысал. Малы бырёнъёс азьын кужымзэ возьматыны ӧз быгаты нылкышноослэн огазеяськонзы? Малы радызъя ӧз ужа "Шунды"? Яке соос тросгес сюлмаськизы-а музонъёсыз понна? "Удмурт кенешлэн" одно ик луыны кулэ удмурт кадръёсты дасянъя планэз, чаклам адямиосыз, азьло сямен вераса, номенклатураен списокез. Уг оскиськы, со вань шуыса, малы ке шуоно, ӧтчамъёсы но пумиськонъёсы ялан лыкто огъёсыз ик адямиос. Нош кытын выль кужым? Кытын выль малпанъёс но дэмланъёс? "Удмурт кенешлэн" апрельлэн пумаз ортчем кенешоназ мон мынӥ ас мылкыд каремея. Малпай вал, сессия бере удмуртъёс муш палэп кадь огазе биниськозы шуыса. Нош асьмелэн люкаськыны но нокытчы: ӝиптӥським филармонилэн огаз ӝокыт, ӟоскыт висъетаз. Меӵак вераса, сюлэме ӧз йӧтэ В. К. Тубыловлэн но кылъёсыз. Дасяськытэк, малпаськытэк ортчиз та пумиськон. Оло, мыным гинэ озьы потӥз-а? Куд-ог эшъёслы малпамъёссэс шара вераны дыр но тырмыт ӧз висъялэ. Мукетыз ужпум. Районъёсын удмурт культурая обществолэн ёзъёсыныз кивалтӥсьёс пӧлын вань асьсэлэсь мар дауртэмзэс валасьтэмъёс но. Быръёнъёс дыръя самой сыӵеос ужало ӟуч кандидат понна, асьсэлы пайда поттон вылысь. Соосты мон туннэ нимын уг вера, калык вералоз: кин кинлы кӧня сюрсэн вузаськиз. Асьмеос ялан выриськом эктонэн но кырӟанэн, шулдыр, майбыр улӥськом. Нош кин нюръяськоз удмурт классъёс, школаос усьтон понна? Кин дасялоз визьмо удмурт кивалтӥсез? Оло, дыр вуэмын асьмелэсь партимес но кылдытыны? Та дырозь нокызьы но улонэ уг пыӵа кылъёсъя закон. Удмурт кыл ялэмын ке но кун кылын, уж вылын со уг адӟиськы, уг шӧдӥськы. Телевидение чутрак кулэстӥз удмурт передачаоссэ. Сое-а шонерен лыдъялод? Ульчаосын данакез гожтэмъёс, реклама но мукетыз - ӟуч кылын, удмуртсэ адӟод административной юртъёс борды официальной кылын сётэмзэ гинэ. Национальной республикаын, мон валамъя, ваньзэ кык кылын сётыны кулэ, дыр. Туннэ ужзэ азьланьтэ Кун Кенешлэн сессиез. Депутатъёс быръёзы но юнматозы А. А. Волковлэсь воштӥсьёссэ. Татчы дэмламын П. Н. Вершинин но. Тросэз уг оско, та кык адямиос ӵош ужаны быгатозы шуыса. Сессия возьматоз, кин пала дурбасьтоз парламент. Нош асьмеос та ласянь но бере кылим. Нырысетӥ сессия бере ик пӧсь дыръяз кулэ вал Удмуртъёслэсь бадӟым ӧтчамзэс люканы, умой-умой кенешоно вал. Табере дыр ыштэмын. Соку малы меда асьмеос "Удмурт кенеш" бырйим, кӧня куашетӥм, солы кивалтӥсь юнматыку? Кулэ-а со туннэ удмурт калыклы, пайдаез быръёнъёсын уг шӧдӥськы ке? Маин выре на со, шулдыръяськонъёсты, юондыръёсты вератэк? Мон меӵак шуисько: асьмеос келяськом, та огазеяськонлэн зэмос кужымез ӧвӧлэн но ӵуказе нуналэз адӟыны быгатымтэеныз. Александр ШУДЕГОВ, дышетӥсь. Губерния нам не нужна Мы, учителя удмуртского языка, поддерживаем главного редактора газеты "Удмурт дунне" Шкляева А. П., который выступил с открытыми письмами к Волкову А. А. "Национальный признак государства сводится к нулю" ("УД" от 23.04.99 г.) и к Ганзе Н. А. "Народ не должен чувствовать себя изгоем на родине" ("УД" от 27.04.99 г.) Учителя-удмуртоведы призваны сохранять обычаи, традиции, язык народа, воспитывать любовь к родному краю, земле, где живем веками. Потому нам понятна боль, выраженная в письмах. Учителя, как никто другой, чувствуют настроение своего народа, его переживания и в то же время - затаенность и несмелость в выражении своих мыслей, чаяний, движений души. Александр Александрович и Николай Алексеевич! Считаем, что от вас зависит, будет ли жить полноценной, незаивисмой жизнью наш народ. Мы присоединяемся к словам Шкляева: "От вас зависит, чтобы название республики не было декоративно-формальным и не сводилось к статусу безликих губерний, чтобы удмурт не чувствовал себя на исторической родине и в собственном доме чужаком и изгоем". Мы просим ускорить выпуск учебников, методических пособий для учителей и учащихся, изучающих удмуртский язык. Требуем скорейшего принятия "Закона о языке". Подписи: 1. Вахрушева Г. Г. (г. Ижевск) 2. Кадрова Р. Т. (г. Ижевск) 3. Зиятова В. Н. (г. Ижевск) 4. Соловьева С. А. (г. Ижевск) 5. Анисимова А. А. (г. Ижевск) 6. Лекомцева Г. А. (п. Игра) 7. Семакина Л. И. (п. Кизнер) 8. Рябова Л. Н. (Вавожский район) 9. Прозорова З. М. (с. Вавож) 10. Рудина А. В. (Як.-Бодьинский район) 11. Бушкова З. И. (с. Селты) 12. Байкузина Л. Л. (Як.-Бодьинский район) 13. Шишкина А. М. (Як.-Бодьинский район) 14. Перевощикова Т. С. (Як.-Бодьинский район) 15. Тарасова Л. Ф. (г. Ижевск) 16. Гулящих В. П. (г. Ижевск) 17. (Квакина О. В. (с. Сюмси, Вылынгурт школа) 18. Пушина С. В. (Увинский район) 19. Константинова О. А. (Завьяловский район) 20. Рахимова С. М. (г. Ижевск) 21. Чигвинцева Т. Т. (г. Ижевск) 22. Замятина С. А. (г. Ижевск) 23. Петрова Н. В. (Як.-Бодьинский район) 24. Шмыкова В. С. (г. Ижевск) 25. Загребина Т. К. (г. Ижевск) 26. Макарова Л. В. (г. Ижевск) 27. Стрелкова С. А. (г. Ижевск) 28. Шиврина Н. А. (г. Ижевск) 29. Евдокимова В. С. (г. Ижевск) 30. Фадеева И. Е. (г. Ижевск) 31. Прокопьева Т. М. (г. Ижевск) 32. Иванова О. Н. (Завьяловский район) 33. Яганова Е. Е. (г. Ижевск). ӞЕЧКЫЛАН Дэбес ёросысь Котегуртын улӥсь Римма Леонидовна Чирковаез сюлмысьтымы ӟечкыласьком вордӥськем нуналэныз! Шудбур но тазалык, тросгес шундыё нуналъёс тыныд дуно адямимы! Кузпалыд но нылпиосыд. Кин лыдӟе, кин гожъя... Быдӟым Пушкин. Солэн нимыз бордысь али тужгес но шуныт тулкым лыктэ кадь. Солы сӥзьыса, отын но татын ортчыло литературной шудонъёс, ӵошатсконъёс, адӟытонъёс... А. С. Пушкинъя бадӟым ужрад ортчиз Кияса ёросын но. Апрельлэн шораз райцентрысь культура юртэ, нылпи библиотекае люкаськылӥзы дас школаосысь пиналъёс, асьсэ дорын вормисе потэмъёс. Тросэз ваиллям рефератъёссэс. Отын эскеро А. Пушкинлэсь литератураын но искусствоын интызэ, та пиналъёс бадӟым поэтлэсь творчествозэ тужгес ӟеч тодӥсьёс, шуыны луоз. Кудӥз тырше кылбуръёсыз чебер, вольыт лыдӟыны, кудӥз аслэсьтыз гожъямъёссэ но кылзыны дэмла ни. Нош мукетъёсыз Пушкинлэн гожъямъёсызъя киужъёс пӧрмыто, геройёссэ син азе пуктыны выро соослэн адӟытонзы усто вал. Пӧртэм секциосын ужанэз радъян понна трос сюлмаськиз ёросысь ӟуч культурая обществолэн кивалтӥсез Первомайский посёлокысь дышетӥсь Алевтина Ивановна Коробейникова. Секция ужа. Конкурсъёсын вормисьёс Юлия Ажимова но Динара Тимазова. "Куинь нылъёс укно улын...". Туспуктэмъёсыз В. Камашевлэн. Тӧдьы сяська "Ош пеледыш" - "Тӧдьы сяська" - таӵе чебер нимыз кык но ӝыны ар кырӟась-эктӥсь пор ансамбльлэн. Та коллектив люказ Ижын улӥсь асьмелы матысь калыкез. Соин кивалтэ Алнаш районын вордӥськем воргорон Николай Иванович Ямаков, удмурт кылэз ас кылзэ кадь ик тодӥсь адями. Кылдэмез дырысен "Ош пеледыш" кызь вить концерт сётӥз ини. Соосты ӟырдыт пумитало каръёсын но, гуртъёсын но. Паймымон соиз: коллективлы эктон пуктыны юрттэ Геннадий Николаевич Наговицын, удмурт пи. Ас вакытаз эктонъёслы быгатыса дышетӥз со "Инвожо" ансамбле ветлӥсьёсты но. Етӥз пор пиос но нылъёс арнялы быдэ люкаськыло Дзержинский нимо культура юртэ. Нош та толэзьлэн пумаз, 24-тӥ апреле, "Ош пеледыш" доры куное ветлӥз Сарапулысь "Чолман шудыр" ансамбль. Учкисьёс но ӧжыт ӧй вал. Концерт кутскон азьын Ижын улӥсь поръёсын вераськизы Удмурт шаерысь та калыклэн культурая огазеяськонэзлэн кивалтӥсьёссы Анатолий Ильич Радыгин но Аркадий Исакович Исхаков. Удмуртиын мукет интыосын но Кам шур палан улӥсь поръёс туэ гырон-кизёнлы сӥзем "Семык" праздниксэс Кизнер районысь Пор Сарамак гуртын ортчытыны малпало. "Ош пеледыш" отын вань быгатонлыксэ возьматоз но кичӧлтӥсь луоз пӧртэм ужрадъёсын. Н. ВОЗИСОВ. Выжыезъя пушъетэз Алигес шуныт тулыс нуналэ, Удмурт театрын кылбурчилэн, крезьгурчилэн но кырӟасьлэн Юлия Кузьминалэн но солэн семьяезлэн "Яратӥсько но викышъясько" концертэз учкисьёс понна зэмос праздниклы пӧрмиз. Выль кырӟанъёс сюлэмез бугыртӥзы. Кырӟась но эктӥсь семьяез учкыса, пуш тырме, синкылиос васько... Юлиялэн котькуд кырӟанэз улон вакытэз усьтэ. Кылем арын Кузьминъёс семья ансамбльзылы дас ар тырмонэн валче ӝыт ортчытӥзы. Соослы учкисьёс султыса ик чабизы. Туэ но озьы ик вал. Дано нимъёссы ке но ӧвӧл, соос профессиональной артистъёс сямен кырӟало. Инкуазь сётэм, вылды, сыӵе быгатонлык. Туэ ансамбль эшшо но зол будэм. Юлия туж быгатыса гожтэ концертъёсызлы сценарийёссэ. Огшокчемен сямен ортчиз ӝыт. Кузьминъёс кырӟазы ӵошен-ӵошен, нимаз но. Пӧртэм эктонъёс узырмытӥзы концертэз. Туж быгатыса кырӟазы но эктӥзы нылъёссы Света но Люба. Пичи нылзы А. С. Пушкинлэн 200 аръем юбилеезлы сӥзем фестивальын нылпи садэ ветлӥсьёс пӧлын лауреат луэм анаезлэн кырӟанэныз. Света нылзы зэмос бадӟым мурт кадь чебер пуктэм куараен кырӟа, эктэ, пианиноен шудэ. Юлиялэн сузэрез Светлана Яковлева но учкисьёсты шумпоттӥз гитараен кырӟаменыз. Виталий кузпалызлэн жингыртӥсь чебер куараез быдэс залэз зуркатэ. Нош ачиз со ненег кырӟаменыз сюлэмез вырӟытэ но, буйгатэ но. Небытэсь, капчиесь эстрада кырӟанъёсыз чебертӥзы программаез. Паймымон яркыт дӥсьёс та нылкышно ачиз ик вуре. Со возьматӥз на ассэ суредась но модельер луэменыз. Одӥг гинэ, дыр, таӵе семья ансамбль, кудӥз аслаз коньдонэныз, быгатонлыкеныз ортчытъя таӵе бадӟым ужрадъёс. Люка быдэс зал учкисьёссэ. Со ини бадӟым вормон. Кытчы меда учке Культурая министерство? Малы меда али но та семьялы кулэезъя дунъет сётэмын ӧвӧл? Кузьминъёслэн ӝытазы учкисьёслы "серем пырыос" кузьмазы Алексей Шкляев но Рашид Хайдаров. Оглом вераса, та концерт - учкисьёслы зэмос тулыс кузьым. Туж бадӟым тау тӥледлы, Кузьминъёс. Азьланяз но чагыр инбам кадь, пушйись сяська кадь мед луоз улонды. Ю. КОРОБЕЙНИКОВА. Можга ёрос. ЮГОСЛАВИЯ Лек тыллэн бервылъёсыз НАТО-лэн Югославиын пуштытъямъёсыз 100 миллиард доллар тыр ыштонъёс ваизы ни, иворто Югославиысь но Сербиысь профсоюзъёслэн огазеяськонъёссылэн кивалтӥсьёссы. Туж трос предприятиос куашкатэмын, 500 сюрс адями ужтэк кылиз. Та выллем югдур возьма на кык миллион адямиез. Озьы ик куашкатэмын 20 пала больницаос, улосъёсысь 15 пала но ёросъёсысь 18 пала медициная центръёс, 200 нылпи сад но школа. Пуштытэмын 50 пала выжъёс, сюресъёс, кӧня ке вокзал, 5 аэропорт. Кышкытлык вань инкуазь кырсёмон ласянь, угось НАТО-лэн бомбаосыз усьылӥзы ни химияя но му вӧез уже кутонъя бадӟымесь предприятиос вылэ. Басьтэмын Интернет пыр. Куанер муртлэн но улэмез потэ "Ижсталь" огазеяськонын ӵош ужам эше алигес мадиз республикаысьтымы кардеологияя центрын йӧнатскемез сярысь. Эмъюмлы но одӥг пол укол пуктон шприцъёслы табере коньдон тыроно. Озьы, палатаысьтызы гуртысь лыктэм воргорон сьӧраз басьтэм вань коньдонзэ йӧнатскыны быдтэм но, дораз бертыны одӥг манет но кисыяз кыльымтэ ни. Сое жаляса, одӥгез кышномурт нянь басьтыны тырмымон коньдон сётэм. Нош автобусэ пуксьымон коньдон шедьтыны ӧз быгаты. Тӥни озьы, йӧнатскыны Ижевскысь больницае лыктӥды ке, нырысь ик сьӧрады тырмыт коньдон басьтэ. Социализм дыръя кадь тӥледыз дунтэк уз йӧнатэ ни. Тани али врачъёс утиськыны косо урод лемтэйёслэсь но шыръёслэсь. Куртчиськем лемтэез эскерыны Ленин ульчае интыяськем лабораторие ваем понна туэ 50 манет коньдон тыроно. Ӧжыт пенсия но уждун басьтӥсьёс табере отчы сюресэз ик вунэтозы. Озьы секыт висисьёслэн лыдзы уката йылоз. Войнатэк оже пыриськем кадь луэ ини улонмы. Нош Россиысь радио пыр алигес веразы, артысь Башкортостанын лемтэез эскеро но солэсь йӧнато коньдонтэк. Выль быръем кивалтӥсьёсмылы та ужпум сярысь но малпаськыны кулэ. Котькызьы ке но, ваньмызлэсь дуно адямилэн улонэз. Кивалтӥсь-а, огшоры адями- а, нокинлэн но сопал дуннее дырызлэсь вазь кошкемез уг поты. В. ЧЕРНОВ. Удмуртъёс люкаськозы Ӧтчаме Валлян Ижын ортчиз "Удмурт кенеш" огазеяськонлэн Пичи кенешезлэн заседаниез. Национальной собрание быръемъёс но ӧтем куноос пыр-поч эскеризы шаерамы кылдэм югдурез. Уноез вераськисьёс пусйизы, берло дыре республикаямы выжы калыклэсь кулэяськонъёссэ лыдэ басьтэмысь дугдӥзы шуыса. Югдурез чакласа, решение кутэмын туэ 19-тӥ июне люканы удмуртъёслэсь азьло пусйымтэ чрезвычайной ӧтчамзэс. Отчыозь дыр трос кылемын ӧвӧл. Соин ик азьланьтэмын ВИ Ӧтчамлэн делегатъёсызлэн полномочиоссы. Ёросъёсын конференциос но мукет ужрадъёс уз ортче. Съездын эскерыны чакламын Кун Кенеше депутатъёсты быръем бере кылдэм югдур. Удмурт Элькунлэсь кивалтӥсьсэ вань калыкен быръён пумысен юалляськон ортчытон, ассоциацилэн уставаз воштонъёс пыртон сярысь ужпумъёсты. Ӧтчамез дасян вылысь кылдытэмын нимысьтыз радъясь комитет. Пичи кенешын озьы ик учкемын асьме республикаын финн-угор калыкъёслэсь фольклор фестивальзэс ортчытонэн герӟаськем шуг-секытъёс. Та пумысен кутэмын вазиськон. Тодосчи Леонид Загребин люкаськемъёсты тодматӥз "Удмурт Кенешлэн" уставаз пыртоно воштонъёслы дэмланъёсын. Пичи кенешлэн ужаз пыриськиз Кун Кенешлэн Тӧроез Александр Волков. И. ЛЕБЕДЕВ. Бӧдьяпуроосты возьма гуртсы Кезьыт улэмен, Пичи Пурга ёросысь Бӧдья-Пуро гуртын улӥсьёс ожъёсын быремъёссэс но кулэм ӵыжы-выжыоссэс дэмен буре вайыны туэ 9 мае ӧз люкаськылэ. Соослы огазьын йыбырттозы 15 мае. Бертэлэ, эшъёс, ваньды. Мусо гуртты, ӵыжы-выжыосты туж мӧзмо тӥлесьтыд, вордскем дордылэсь палэнын улӥсьёс! Люкаськиськом 11-00 часлы школа дорын. Тӥледлы возьматом миым йыбырттэммы сярысь кино. Данъяськыса но синкыли пыр тодамы ваём ваньзэ матысь адямиосмес. КИРИЛЛ ЛОМАГИН. Шуныт вазисько, усто эмъяло Шаерамы таӵе эмъяськон учрежэдениос трос ӧвӧл. 2 номеро республиканской психиатрической больница интыяськемын Балезино районысь Заречной посёлоке. татын эмъясько уйпалась дас ёросысь висисьёс. Татчы озьы ик юнматэмын Селта но Сюмси районъёс. Больницаын кыллё секыт висисьёс, йыр но лулсэр черъёсын курадӟисьёс. Коллектив ваньзэ лэсьтэ, адямиослы котыр ласянь юрттон вылысь. Али эмъюмъёссы тырмыт. Больница бадӟым ӧвӧл, 165 мурт ужасез. Со пӧлын 7 фрач но 45 медсестра. Данакезлы сётэмын эмъяськон сертификат но категория. Коллективен кивалтэ нырысетӥ категориен врач Владимир Сергеевич Главатских. Валтӥсь врачлэн но ужасьёслэн сюлмаскьеменызы, эмъяськисьёслы умоесь условиос кылдытэмын. Медсестраос но врачъёс висисьёслы капчи вазисько, усто эмъяло. Нош шуныт кыл ваньмызлэсь дуно, уката ик лулсэр висёнъёсын курадӟисьёслы. Зэм, больницаын мылысь-кыдысь ужасьёссы трос. Соос пӧлысь одӥгез - медсестра Галина Князева. Выль Кен гуртын вордӥськем чырткем кышномурт. калыкез эмъян удысын 35 ар тырше ни. Галина Николаевналэн отделенияз али 55 нылкышно эмъяське. Со ваньмыз доры вуэ, котькудӥзлы ӟеч кыл вера но мылкыдзэ ӝутэ. Али медсестра больницае ужаны ветлэ Балезиноысь, нуналлы быдэ кызь пала иськемез ортче. Тол но гужем, тулыс но сӥзьыл, - котькуӵе куазен висисьёсыз Галина Николаевнаез возьмало, юрттэмзэ витё. Таӵе ужасьёс вылын возиське ольница. Соослы капч уг ке но йӧты, шуг-секытэзлы уг сётско. Больницазы но вуж ни, пу коркаосын интыяськемын. Дыр вуэмын ни кирпичлэсь выль стационар пуктыны. Тазалыкез утисьёс умоезлы оско, больницазы но выльдӥськоз ай. Г. РОМАНОВ. медсестра Галина Князева. Суредаз Л. Прозоров. Пияла дуногес ке но Одӥг пол гинэ кутӥськись посуда, кылсярысь, сур, сок, напиток банкаос, пластмассалэсь посудаос, стаканъёс инкуазьлы туж бадӟым изъян ваё, ивортэ "Монитор" газет. Та пумысен ик кемалась ӧвӧл Нижний Новгородысь огез кивалтӥсь доры вуылӥз аспӧртэм делегация. Лыктэмъёс дӥськутсы борды ошиллям одӥг пол кутӥськись посудаез. Ужрадлэн мугез: таӵе посудаез трос кутэмен йылэ пластмассалэсь жуг-жаг. Кунгож сьӧрын та югдурен азьвылгес ик пумиськизы ини. Кылсярысь, Америкаысь Вермонт но Мэн штатъёсын пластмассалэсь посудаез кутыны лэземын ӧвӧл. 1977-тӥ арын Даниын ческыт юонъёсты одӥг пол кутӥськись ӟенеликъёсы тыремысь дугдӥзы, нош 1981- тӥ арын - сурез но. Али отын 99 процент учыръёсы пияла ӟенеликъёс кутӥсько ни. Иворъёсъя национальной служба. Примаков шутэтскоз, Вершинин ужалоз Толон асьме улонын луэм учыръёс пӧлысь кыкез тужгес но пусйымонэз герӟаськемын Евгений Примаковен но Павел Вершининэн. Кызьы тодмо луиз нуназе котыр, Борис Ельцин Россия Федерациысь Правительствоез отставкае келяз. Тӧролэсь ужзэ али быдэсъя вице-премьер Сергей Степашин. Солы нырысетӥ воштӥсе юнматэмын чугун сюресъя министрез Николай Аксёненко. Тӥни озьы. Обществоын огкылэ туж шуген вуон кема ик ӧз возиськы, Кремльысь кузё котырын бергасьёслы нош ик зуркан кулэ луиз. Кинлы пайдаен берытскоз таӵе воштӥськон? Шуг вераны. Тодмо огез: странамылэсь данзэ та валантэм вамыш уз ӝуты. Озьыен, улонмес но уз умояты. Кыкетӥез коть ивор мылкыдэз буйгатэ. Депутатъёс кылӥзы удмурт калыклэсь шугъяськемзэ. Соос пӧлысь тросэз соглаш луизы Павел Вершининэз Кун Кенешлэн Тӧроезлы нырысетӥ воштӥсе бырйыны. Оло, Александр Волков но валаз, керетыса улон ӟече уз вутты шуыса? Котьма ке но, Павел Вершинин трибуна сьӧрын вераськыкуз пусйиз: бырйисьёс асьмелы тужгес но бадӟым таӵе куронэн вазиськизы - ваньзэ лэсьтоно, шаерамы улонэз ӟечгес радъян понна. Сое лыдэ басьтыса, асьмелы та секыт вакытэ ӵош ужано. Кун Кенешлэн Тӧроезлы воштӥсе озьы ик быръемын Владимир Агашин но Светлана Смирнова. И. КРИЧЕВ. А. С. ПУШКИНЛЭН ВОРДСКЕМЕЗ ДЫРЫСЕН - 200 АР "Мон яратӥ тонэ..." А. С. Пушкинлэн удмурт кылэ берыктэм ужъёсыз сярысь Ачиз со - дунне адями но, дунне поэт но. Кемаласенгес ини мон амалтэк ӵошатылӥсько А. С. Пушкинэз трос гинэ уродос гожъясьёсын, кудъёсыз, эксэйёс азьын пыриськыса выллем, вылтӥяськыса гожъязы ичи лыдъем калыкъёс сярысь. Сыӵе вал А. П. Сумароков. Огпол таӵе чуръёсыз син азям пуксизы: Кинлы кулэ меда таӵе кылъёс, Кудӥныз верасько мордва но вотякъёс? Вот те на! Сьӧд сюлэмо, бадӟым вылтӥяськонэн адями гинэ тазьы вералля ук! Со дырысен со сярысь кылэме но, лыдӟеме но уг поты. Нош зэмос кылбурчи, кудзэ гажа но кудӥныз данъяське вань дунне, вылтӥяськытэк гинэ шонер верам: Мынам кылбуранэ быдэс Русьтӥ ортчоз, Ваньмыныз кылъёсын монэ вералозы: Суоми но али кычгес тунгус, Но степьёслэн эшсы - калмык. А. С. Пушкинлэн та верамез зэмаз: солэсь гожъямъёссэ вань калыкъёс асьсэ кылын лыдӟо, соос пӧлын - удмуртъёс но. Татын аслаз творчествоезлы вылӥ дунъет гинэ ӧвӧл, та веранэз возьматэ вань кылъёслэн вылӥ луонлыкъёссылы оскемзэ но. Революцилэсь азьло потэм книгаосысь фольклор текстъёсты утчакуз, тодмо удмурт кылбурчи но тодосчи Д. А. Яшин пумиськем таӵе учырен. 1867-тӥ арын потэм пичигес гинэ книгаысь ("Лыдӟонъ. Удмурт нылпиослы азбука", Н. Блинов священник дасям но Вяткаын поттэм) тодосчи синйылтэм таӵе чуръёсты: Инмарлэн папаез уг тод Куректонэз но, ужез но... Соку тодаз лыктӥллям Пушкинлэн чуръёсыз: Птичка божия не знает Ни заботы, ни труда... Тылобурдо сярысь дас куать чуръем кылбурзэ ӟуч писатель пыртэм "Цыганы" поэмаяз. Со юрттэ номыр сярысь сюлмаськытэк, калтыртыса гинэ улӥсь, ваньбуро Алекоез мургес возьматыны. Удмурт кылын книгае та кылбур пыртэмын нимаз текст выллем, поэмаен герӟатэк, авторзэ пусйытэк. Священник Н. Блинов лыдэ басьтӥз, луоз, текстын "инмар" кыллэсь пумиськемзэ. Со дыре ик та пичи люкет пиналъёсты дышетоз тылобурдоослэсь выросъёссэс, сямъёссэс эскерыны, соос пыр инкуазез ӟечгес валаны но яратыны. Кылбурлы "Папа" ним сётэмын. Табере ӵошатом ӟучсэ но удмурт кылэ берыктэмзэ: Птичка божия не знает Инмарлэн папаез уг тод Ни заботы, ни труда, Куректонэз но, ужез но, Хлопотливо не свивает Турцкыса уг бинь Долговечного гнезда, Кема улон пузкарзэ. В долгу ночь на ветке дремлет; Кузь уе ньӧр вылын нырылэ; Солнце красное взойдет, Шулдыр шунды ӝужаз - Птичка гласу бога внемлет, Папа инмарлэн кылызлы кылцке, Встрепенется и поет. Сэрак кариськыса кырӟа, За весной, красой природы, Шулдыр тулыс бере Лето знойное пройдет - Пӧсь гужем ортчоз - И туман, и непогоды Бер сӥзьыл ваёз. Осень поздняя несет: Людям скучно, людям горе; Калыклы курыт, калыклы мӧзмыт, Птичка в дальние страны, Папа мукет пала, шуныт пала - В теплый край, за сине море Лыз зарезь сьӧры лобе тулысозь. Улетает до весны. Н. Блиновлэн учебниказ кылбур проза манерен печатламын ке но, сое чуръёслы капчиен люкылыны луиз. Книгае пыртэм ӟуч кылынзэ но дышетӥсь ӵошатыны мед быгатоз шуыса, дыр. Чуръёслэн авторзы но, берыктӥсез но пусйымтэ. Со Н. Блиновлэн янгышез ӧвӧл. Со вакытэ дышетскон пособиосы пыртылэм произведениослэсь, чуръёслэсь авторъёссэс уг гожтыло вал. Текстъёсты уже кутылӥзы, пӧртэм упражнениос ортчытъян понна. Таӵе амалэн ик нылпиосты дышетон книгаос дасяллязы мукет авторъёс но. Озьыен, А. С. Пушкинлэн "Птичка" кылбурез луэ,асьмелы тодмо луись удмурт кылэ берыктэм нырысетӥ произведениез. Удмурт кылэ берыктэм кыкетӥез текст луэ "Чорыгась но чорыг сярысь выжыкыл". Сое ЪИЪ даурлэн пумаз удмурт кылэ берыктэм Г. Е. Верещагин но "Зарни чорыг" ним сётэм. Г. Е. Верещагин нырысетӥ югдытӥсьёс пӧлысь одӥгез вал. Ачиз но кылбуръёс, поэмаос гожъяз, Пушкинэз но берыктӥз. Г. Верещагин умой утем Пушкинлэн выжыкылэзлэсь сюжетсэ. Сыӵеен ик адӟытэм кык пересьёсты. Нош метрической но образной структуразэ удмурт лыдӟисьлы матэктытэм, воштэм. Нырысь ик со геройёслы нимъёс сётэм: Баймет но Пельга - вашкала нимъёс. Нош Пушкин "старик со старухой" шуэм. Персонажъёслэсь мар ужамзэс но озьы ик возьматэм, но пыртэм таӵе чуръёс - Баймет зарни чорыгез ву нылмурт кожа, адями сямен вераськемысьтыз. Пушкинлэн та выжыкылаз "русалка" шуонэз ӧвӧл. Пересь Пельга удмурт манеръя даллаше кузпалэныз: гырдым, дунне пожась, сӥтьгуби кадь сисьмись, шузи но визьтэм шуэ. Тае оригиналэзлы юри матэктытэм: угось удмуртъёс картъёссэс озьы ӧз тышкаськылэ, сьӧлыкен лыдъяллязы (карттэ шузи шуид ке, аслад пиналыд шузи вордӥськоз, шуылӥзы). А. С. Пушкинлэн выжыкылэз куинь стопаем дактилен гожтэмын ке, Г. Е. Верещагин сое кык стопаен анапестэн берыктэм. Солэн размерез сыӵе ик, кыӵе луэ "Батыр дӥсь" выжыкыл-поэмаезлэн. А. С. Пушкинъя одӥг кылбур гожтэм нырысетӥсез удмурт нылкышно кылбурчи Ашальчи Оки. "Гажан эше" нимам сое. А. С. Пушкин кылбурезлы ним сётымтэ, со тодмо луэ нырысь чурезъя гинэ: Если жизнь тебя обманет, Шудэд тонэ алдаз ке, Не печалься, не сердись! Эн чигиськы, эн бӧрды, В день уныния смирись: Секыт нунал лыктӥз ке, День веселья, верь, настанет. Чидатӥськы. Оскиськы: Сердце в будущем живёт; Куддыр вапум секыт ке но, Настоящее уныло: Азьлапалан ӟеч нуналъёс. Всё мгновенно, все пройдет; Ваньмыз ортчоз, ортчоз, кошкоз - Что пройдет, то будет мло. Ортчем вапум мусо потоз. Адӟиськом: Ашальчи огъя тональностьсэ, формазэ но утьыны тыршем. Озьы ке но, Пушкинлэнэз ышемын, ватсаськемын нылкышнолэсь мылкыдзэ золгес возьматон. Кыказ ик кылемын мур философской пуштросэз. ЪЪ даурлэн кутскон вакытаз ик М. П. Прокопьев удмурт кылэ берыктэ "Поп но солэн Балда ляльчиез сярысь выжыкылзэ". Таиз формаезъя лябытгес ке но, пуштросэз оригиналэзлы матэ каремын. 30-тӥ аръёсы А. Н. Клабуков выльысь берыктэ та выжыкылэз. Формаез ласянь со вольытгес, литературной кылынгес гожтэмын. Собере Игнатий Гаврилов берыктэ "Чорыгась но чорыг сярысь выжыкылзэ". Удмурт кылын потэ "Салтан эксэй сярысь выжыкыл" (берыктӥсез верамтэ). Нош 30-тӥ аръёслэн пумазы ваньмыз вылӥ верам выжыкылъёс огинэ люкаса поттэмын вал. Отӥяз А. С. Пушкин удмурт кылын ӵемгес но ӵемгес печатласькыны кутске: 1937-тӥ арын П. М. Усков "Капитанская дочка" повестьсэ берыктыса поттэ, кӧня ке улыса, нимаз пичи книгаен печатлаське "Станционный смотритель" (берыктӥз И. Гаврилов). Собере потэ трос гинэ кылбуръёсыныз сборник (берыктӥзы А. Багай (Клабуков), И. Гаврилов, В. Тронин, П. Чайников но мукетъёсыз). Ӝожомыса верано луэ: та книгаосты асьме палась шедьтыны уг лу ни, соослэн кыӵезы сярысь вераны но шуг. 1949-тӥ арын потӥз "Повестьёс" сборник. Удмурт кылэ берыктыса, отчы пыртэмын вал "Повести Белкина" (берыктӥзы И. Дядюков, В. Вахрушев, И. Гаврилов) но "Дубровский" повесть ( берыктӥз Т. Архипов). 1950-тӥ арын Гай Сабитов удмурт лыдӟисьёсты тодматӥз Пушкинлэн "Бахчисарайский фонтан" поэмаеныз. 1954-тӥ арын И. Гаврилов удмурт кылын поттэ "Борис Годунов" трагедизэ, "Руслан и Людмила", "Полтава" (1955) но "Медный всадник" (1956) поэмаоссэ. Удмурт писательёс тужгес яратыса берыктылӥзы А. С. Пушкинлэсь кылбуръёссэ 30-тӥ аръёсы но. Берлогес но та удысын тыршизы А. Лужанин, М. Петров, И. Гаврилов. Вылӥ дунъямын вал А. Лужанинлэн "Анчар" но "Кавказ" кылбуръёссэ удмурт кылэ берыктэмез. Со угось быгатӥз оригиналэзлэсь образъёссэ но, ритмической структуразэ но, огъя тональностьсэ но утьыны. Ӵошатом "Анчар" кылбурлэсь кык строфазэ: В пустыне чахлой и скупой, Ӵакмем, чурыт кӧс кыр шорын, На почве, зноем раскалённой, Пӧсен ӵушкам мулэн вылаз, Анчар, как грозный часовой, Сак часовой сямен, шыпыт Стоит - один во всей вселенной. Анчар сылэ чылкак огназ. Природа жаждущих степей Сюэз куасьмем кырлэн куазез Его в день гнева породила Сое йыркур дыръяз вордӥз, И зелень мёртвую ветвей Вайёсызлэсь кулэм вожзэс И корни ядом напоила. Но выжызэс ядэн удӥз. Оригиналэзлы тужгес но тупало Лужанинлэн "Кавказ" но "Толалтэ сюрес" кылбуръёсыз. Кыкетӥзэ озьы ик кырӟаны луэ, метрикаез утемын бере. М. П. Петров Удмурт Элькунысь писательёслэн кыкетӥ конференциязы тазьы шуиз: "Берыктон уж - бадӟым творческой школа. Тодэмды потэ ке - университет. Отын туж усто профессоръёс луо А. С. Пушкин, М. Ю. Лермонтов, Л. Н. Толстой, Н. А. Некрасов, А. М. Горький, В. В. Маяковский но ӟуч литературалэн мукет корифейёсыз". Удмурт кылэ берыктон литературамес узырмытонын одӥг палыз гинэ луэ. Вань на мукет палыз - Пушкинлэн произведениосыз удмурт писательёслы инъет сётылӥзы выль произведениос кылдытыны. Кылсярысь, "Капитан ныл" юрттӥз М. Коноваловлы "Гаян" романэз борды кутскыны, "Руслан но Людмила" поэма И. Гавриловез лӧпкытӥз "Котьку егит" поэма гожтыны (отын, Руслан сямен, Мардан юрттэ яратоно нылызлы, Айнолы, Уйперилэсь мозмытскыны). Тросэз удмурт кылбурчиос, Пушкинлы вазиськыса выллем, солы кылбуръёссэс сӥзизы. П. Чайников гожтэ "Пушкинлы" нимо кылбур - меӵак вера, ӟуч генийлэн малпанъёсыз но мылкыдъёсыз быдэсмизы шуыса. Сыӵегес ик луэ А. Лужанинлэн "Пушкинлы" кылбурез - таиз тодамы уськытэ быдӟым поэтлэсь "К Чаадаеву" но "Вакхическая песня" кылбуръёссэ. Улэп адямиен вераськон-кенешон кадь кылӥсько озьы ик М. Петровлэн "Пушкинлы" но "Ӟардон вуиз" кылбуръёсыз. Михаил Покчи-Петров Пушкинлэсь нимзэ герӟаз быдӟым ӟуч кыллэн кужмо чузъяськеменыз, яратоно кыллы пӧрмеменыз: Кин Пушкинэз, кин Горькиез уг тоды? Нош ӟуч кыл луэ вордскем кылзы. "Болдино. Пушкинлэн юртэз" кылбураз В. Романов вера дуно интыостӥ ветлэмез, соослэн ӵыдонтэм луэмзы сярысь: Со чуръёссэ ми ӟуч кылын но, Удмурт кылын но яратӥм. Камдор палась татчы солы ми Бадӟым тау каронмес вуттӥм... Паркысь пичи тымет вадьсын ми Эшшо минут коть сыломы. Быдӟым кылбурчимес татын ми Выль сяменгес валаломы. Пушкинлэсь кылбуръёссэ выльысь но выльысь лыдӟыкум, мон туж визьмо верамзэ шедьтӥ но сое удмурт кылэ берыктоно кариськи: Воды глубокие Туж мур вуосыд Плавно текут. Каньыл кошкыло. Люди премудрые Визьбуро муртъёсыд Тихо живут. Шыпыт улыло. Собере берыктыса оскалтӥ на яратоно кылбурзэ - соя романсэз туж яратӥсько: Я вас любил: любовь еще, быть может, Мон яратӥ тонэ: оло нош, яратон В душе моей угасла не совсем. Ӧз кысы на вичак сюлэм пыдсын? Но пусть она вас больше не тревожит, Шугъяськонэ медад ни вуы тон, Я не хочу печалить вас ничем. Мӧзмыт пилем медаз ул тон вадьсын. Я вас любил безмолвно, безнадежно, Мон яратӥ тонэ вазьылытэк но осконтэк, То робостью, то нежностью томим. Курадӟыса дӥсьтонтэмен но вожанэн. Я вас любил так искренно, так нежно, Мон яратӥ туж зэмлыко, пӧяськонтэк, Как, дай вам бог, любимой быть другим. Озьы ик мукетыз мед гажалоз тонэ. Мон али но сыӵе визьбуретэн улӥсько: кужмо поэтъёсмы огазеяськыса Пушкинлэсь вань гожъямъёссэ удмурт кылэ мед берыктысалзы но сочинениосыныз люкам книгаос мед поттысалзы. Пушкин угось вань кылъёсын тырмыт чузъяськыны кулэ, солэн поэзиез, шунды кадь, ваньзэ шунтыны быгатэ, со гажа вал дуннеысь вань калыкъёсыз. Р. ЯШИНА, Удмурт Элькунысь наука удысысь сӥё-дано ужась, кылтодон наукаосъя кандидат. Дыраз ӧм быръе. Табере куректӥськом... Толон 12 мае, сессия усьтӥськон азьын Кун Кенешлэн юртэз доры калык люкаськылӥз. Тросэз лыктӥллям. "Удмурт кенеш" огазеяськонлэсь вазиськонзэ кылыса. Ижевскысь сяна, татчы вуэмын вал мукет районъёсысь но адямиос, кылсярысь, кыдёкысь Кизнер районысь, Воткинск городысь. Малпасько вал, татын трос можгаос луозы шуыса, угось П. Вершининлы дурбасьтон понна соос татчы быдэс районэнызы лыктыны дась кадь вал. Но со палась адямиосты татысь адӟыны ӧйлась. "Правительствое - удмуртъёсты" - таӵе ӧтёнэн сылэ вал Кизнер районысь делегация. Ас мылкыдзэ вера С. Петрова, Кармыж шор ёзо школалэн директорез: - Сюлмы бӧрдэ. Удмуртэз туннэ ултӥяло. П. Вершини мон понна идеал вал. А. Лисинаен но ваче ужаськомы вал, ма гурт школаен кивалтӥсьлэн котьку но юанъёсыз трос луыло ук, Антонина Михайловна котьку но визь-кенеш сётылӥз. Кинлэсь сюрессэс меда выжиллям та визьмо удмуртъёсмы? Кинлы люкето? Сыӵе вожъяськыса учкылӥ мон Павел Вершинин но Антонина Михайловна шоры! - Кызьы тӥ малпаськоды, удмурт бырйисьёслэн янгышсы ӧвӧл меда удмурт кивалтӥсьёсмес ыштэм понна? - Быръёнъёс дыръя мон ужай А. Т. Малков понна, со дыре ик Марченколы но дурбасьтӥ. Мукет калыкъёс пӧлын но, ӟучъёс, бигеръёс, белорусъёс пӧлын, вань визьмо адямиос, кинъёс вордӥськемын асьме шаерын, вань улонзэс сётэмын удмурт шаермылы, ӟеч тодо татын улӥсь калыкъёслэсь культуразэс, сямъёссэс. Малы бен сыӵеослы пумит луод? Кивалтонысь сыӵе визьмо адямиосты палэнтыны уг яра. Йыгмыт, визьмо удмурт воргорон П. Вершинин понна сюлэм висеменыз Тӧдьы юрт азе дурбасьтыны лыктэм Воткинск городысь пенсионер Леонид Тимофеевич Тихонов но. - Кун Кенешен кивалтонэ ке со ӧз сюры, коть Правительствое ик ужаны мед кельтысалзы, - шуэ пересь воргорон. Визьмо удмуртэз Правительствое но, Кун Кенешлы Тӧрое но ӧз быръе. Малы? Таӵе югдурлы туж паймемын Удмурт кун университетысь удмурт факультетын дышетскись студентъёс Ирина Иванова но Дмитрий Платонов. - Малы вылӥ дожностьёсын пуко ӟучъёс? - кӧтӝожзэ вера Дмитрий. Солы шуэм потэ: "Асваланмы, дыр, асьмелэн, удмуртъёслэн сыӵе". "Поделитесь властью с удмуртами!" ӧтёнэн сылӥсь воргоронлэн асваланэз ӵапак тросэзлэсь удмуртъёслэсь сямзэс возьматэ ук. "Я, ӧм ни ворме бере, коть пичильтык ке но удмуртъёсты кивалтонэ лэзелэ", - озьы валано ук со гожтэмез. Мон сямен та ӧтёнэз чылкак мукет сямен гожтоно вал. Ижевскысь удмурт школаын дышетскись нылпиослэн анайёссылэсь мылкыдзэс вераз Разина Людмила Яновна: - Удмурт калык политикаез, республикаямы кылдэм югдурез туж ляб вала. Та дырозь удмурт нылпиосты усточиослэн но, удмурт школаын дышетскисьёслэн но йӧскадь юртсы ӧвӧл. Кыӵе умой луысал та нылпиосты одӥг бадӟым юртэ огазеяса дышетыны. Кыӵе шумпотыса возьмай, ку меда пиналы Ольга Константиновна Шиловалэн удмурт школаяз мыноз. Дыр вуэмезъя пиналме та школае сётӥ. Но табере сюлмы вӧсь луэ: куд-ог анайёс пиналъёссэс отысь берлань басьто. Осконзы ӧвӧл, со азьланяз азинскоз шуыса. Ортчем быръёнъёс бере анайёслэн мылкыдзы уката но секыт. Кин сюлмаськоз соослэн дышетон нылпиоссы сярысь, культура, но мукет удысъёсын удмурт кивалтӥсьёс ке ӧз луэ. Вань таӵе визькыл: "Народ заслуживает то правительство, которое заслуживает". Зэмзэ ик, асмье калыклы оло озьы ик кулэ? Быръёнъёс дыръя ӟеч удмуртъёслы ӧм дурбасьтэ, асваланмы ӧз тырмы. Табере Кун Кенешлэн юртэз азьын куректыса сылӥськомы. Асьмеды ултӥяса. Одӥгез буйгатэ: лэсьтэм янгышъёсмес валаса, оло азьланяз асьмеос визьмаськомы. Т. БАННИКОВА. Туспуктэмъёсыз В. КАМАШЕВЛЭН. Самолёт лобиз Софие Югославилы гуманитарной юрттэтэн Россиысь МЧС-лэн самолётэз лобиз Софие. АН-124 самолётэ интыямын кӧня ке автомобиль но 33 тонна гуманитарной юрттэт: одеялъёс, шуныт дӥськут но сиён-юон. Но самолёт одӥг суткалы ӝегатэмын вал. болгаръёс нырысь сое лэзьыны пумит луизы вал. Озьы веразы МЧС-лэн пресс-службаяз ужасьёс. Россия Федерациысь МЧС-лэн министрезлэн Сергей Шойгулэн ивортэмезъя, Россия, Швейцария но Греция кык арня куспын Косоволы юрттонъя резерв кылдытыны чаклало. Солэн верамезъя, вакчи дыр куспын эшшо кӧняез ке странаос, соос пӧлын Канада но Бельгия, малпало та программае пыриськыны. Швейцариысь властьёс НАТО-ен вераськон вераськонъёс нуо Балканэ нуись "гуманитарный коридор" возён сярысь. Иворъёся национальной служба. Ӟучомем удмурт нылпиослы Някырес, губырес кызэз уд шонерты ни шуо ке но, озьы верамзы туж ик зэм ӧвӧл. Еж дыръяз, будыкуз ик юрттӥд ке, со писпуэд одно шонерскоз, тупатскоз. Ыльыс, веськыт кызъёсты, чебер бадяръёсты шонеръясьёс-будэтӥсьёс нимасал мон ӟучомем пиналъёсмес асьсэ анай кылзылы выльысь дышетӥсьёсты. Мар веранэз, вордскем кыллэсь кулэлыксэ санэ тырмыт басьтымтэен, Россилэн улосъёсаз туж трос сыӵе някыресъёс. Соос асьсэ сямен вераськыны но уг пӧрмыто ни, асьсэ кылын потӥсь книгаосты, журналъёсты, газетъёсты лыдӟыны но уг быгато. Озьыен, иське, калыксылэсь но каньылля люкисько. Ярам коть, берло вакытэ югдур кӧнялы ке воштӥськиз кадь. Шаерамы кылъёс сярысь Закон татчыозь кутымтэ на ке но, нырысетӥосызлэн дэменчиослэн кичӧлтэмзыя, ӟучомем нылпиосмес выльысь ас пӧламы кыскон ласянь ма но со лэсьтӥське ни. Алигес тани Устинов ёросысь 16 номеро шор ёзо школае люкаськылӥзы районысь данакез дышетӥсьёс. Соос кенешизы ӟучомем нылпиослы тодон-валанъёс сётонэз умоятон пумысен, та удысэ аслэсьтыз районлэсь но школаослэсь аспӧртэмлыкъёссэс, луонлыкъёссэс, устоосызлэсь дышетӥсьёслэсь опытсэс ӟечгес пыӵатон сярысь. Вераны кулэ: Устинов ёросын, та ужез ӟечгес радъян понна, кык ар талэсь азьло огдырлы кылдытэмын вал наукалэсь дэмланъёссэ но азьмынӥсь амалъёсты люканъя- эскеронъя нимысьтыз группа. Отчы пыре вить мурт. Тодосчиос, дышетонысь азьмынӥсьёс эшъёссылы ивортӥзы ма лэсьтэмзы сярысь. Нош солэсь азьло туж тунсыкоесь, устоесь лекциос лыдӟизы люкаськемъёслы Дышетӥсьёслэсь тодон-валанъёссэс муромытонъя институтысь профессоръёс К. А. Пономарёв но Ф. К. Ермаков. Собере ӟучомемъёслэн сюлэмазы удмурт кылэз пыӵатӥсьёс кенешизы асьсэ коже. Татын трос устоесь дэмланъёс сётӥзы К. А. Пономарёв но Дышетонысь национальной ужпумъёсъя институтын ужась, Кун премилэн лауреатэз А. Н. Журавлёва. - Мон, урокысь уроке ветлыса, пиналъёсме чакласа, анай-атайёсын, тодосчиосын но мукетъёсыныз кенешыса, каньылля дасяй вал 2-тӥ классын "Анай кылэз" нуыны методикая юрттэт, - шуэ дышетӥсь М. Т. Загибалова. - Оло, кинлы ке но кулэ луоз та уже... Зэм но, А. Н. Журавлёваен ӵош соос туж тунсыко юрттэт лэсьтӥллям. Педагогикалэсь радзэ, ӟучомемъёсмылэсь шуг-секытъёссэс чакласа лэсьтэмын со. Валамон, урокысь уроке тросгес "кеньыр" пыӵатыны юрттэ. Устоесь пӧрмиллям удмурт букваосъя урокъёс. Тани, кылсярысь, мае но уг тодо пиналъёс "Ӟ" буква куное лыктӥз" урокын. Тетраде люкамын чебересь выжыкылъёс, мадиськонъёс, пичиесь веросъёс, инкуазьысь валанъёс, пӧртэм емышъёсъя, тылобурдоосъя вераськонъёс, вакчиесь кылбуръёс. Ёросысь удмурт кылъя но шаермес тодонъя дышетӥсьёс пӧлын бадӟым уж нуэ "Дэменлэн" ӟырдыт юрттӥсез Валентина Николаевна Зиятова. Узыр опыт люказ ини. Со но пыртэмын огдырлы кылдытэм группае. Огъя кыткетысь кужмо вал сямен, со зол кыске, азинтэ удмуртлыкмес. - Тани таиз - Валентина Николаевнамылэн узырлыкез, - люкаськемъёс возьматӥзы солэсь кык зӧк тетрадьзэ. - Оскиськом: музон ёросъёсысь дышетӥсьёслы но юрттозы солэн люкам валэктонъёсыз... Дэменчи, азьмынӥсь педагог 5-тӥ-6-тӥ классъёсын дышетскисьёслы "Удмурт калык выжыкылъёс" темая ӟеч-ӟеч методика дасям. Сое нимысьтыз книгаен но поттыны луысал. Коньдон ӧвӧлэн, сю ёрос гинэ печатламын. Котыр ласянь узыр, паськыт юрттэтэз. Выжыкылъёс быръемын туж чакласькыса, соос нылпиослы юртто дуннеез ӟечгес тодыны, инкуазез, ужез яратон мылкыд пыӵато. Кызьы, шуом, Музъем кылдӥз, кызьы Ин Музъемлэсь люкиськем но мукет. Будӥсь муртлэсь визьбурзэ трослы муромытоз таиз выжыкыл: "Малы мушлэн чечыез трос - майсылэн ӧжыт, нош дуринчилэн воксё ӧвӧл". Туж шонер но малпаськытӥсь пӧрмиллям шудонъёс, кроссвордъёс, чайнвордъёс, пичиесь викторинаос, гуртын быдэстыны дэмлам ужъёс. Мыным тужгес но узыр потӥз кыкетӥез тетрадь. Таяз пыртэмын ни пӧртэм-пӧртэм адямиос но, Лӧпшо Педунь но. Эскерем ужпумъёсъя лэсьтэмын кыллюкамъёс, дэмен малпаськыны ӧтёнъёс, урокын шуак театр но кылдэ, литературая шудонъёс но ӟырдало, вордскем музъеммес данъяны сценарий но лэсьтэмын. Пиналъёслы шутэтскон, тодонъёстэ эскеронъя, Ижмылэн историезъя, дано адямиосын тодматсконъя шулдыресь урокъёс чакламын. Озьы ик учкемын нылпиосты удмуртъёслэн ӝыт пуконъёсынызы тодматыны. Огкылын вераса, Устинов ёросысь устоосызлэн дышетӥсьёслэн выль ужъёссы юртто пиналъёсмылы анай кылмес мур яратыны, соослэн сюлэмазы удмуртлыкмылэсь пушъетъёссэ гомӟытыны. Люкиськон азязы дышетӥсьёс, ог-огзылэн ӟеч ужъёссылы вожмаськыса музэн, пӧсь изъёс вылэ ву пазям мактал, пужак-пужак усьтӥзы сюлэмвисёнъёссэс. Вераськон потӥз "Анай кылэз", пӧртэм программаосты, удмурт, ӟуч, англи кылын словарез но мукетсэ чальгес но ваньмызлы классъёслы тырмымон поттон сярысь. Нош али Калыкез дышетонъя министерстволэн но, "Удмуртия" издательстволэн но коньдонзы ӧвӧл. Озьы ке но, удмурт кылъя дышетӥсьёс, кызьы адӟиды, амал шедьто асьсэлэсь выль ужъёссэс пичиен коть йылэтыны. Тау со понна, нылпиосмес югдытӥсьёс! К. СУНДУКОВ. Фестиваль бере малпанъёс Суро-пожо мылкыд Жингыртыса ортчизы П. И. Чайковскийлы сӥзем фестиваль нуналъёс. Нимо-дано адямиос вуылӥзы республикаямы, пурысь улонмес ӧжыт ке но шулдыртыны тыршизы. Данъяськоно сыӵе бадӟым адямиосын, асьмемыз но асьмелэсь музыкая гениймес гажаемынызы. Шумпотоно, фестивалез радъясьёс тыршемен, шаерысьтымы калык нош ик чебер крезьгуро дуннее "выйылӥз". Сыӵе вылӥ усточиослэн концертъёссылэн дунъёссы но, асьмелэсь векчи кисымес тодыса кадь, ӧвӧлтэмлэсь гинэ тупатэмын. Тау со понна. Тау радъёсьёслы но, юрттӥсь (спонсор) шедьтыны быгатэмзы понна. Фестивальлэн одӥгез нуналэз сӥземын вал камерной крезьгурлы. Та ӝытэ пыриськизы егит музыкантъёс: флейтаен шудӥсь Ольга Дедюхина но пианист Михаил Шиляев. Москваын дышетскись егит усточиосты асьме республикаын тодо ни, соос татын вордскемын. Гнесинъёс нимо академиын дышетскись Ольга Дедюхина пу инструментъёсын шудӥсьёслэн Россиын конкурссылэн дипломантэз луиз. Консерваториын дышетскись Михаил Шиляев луэ финн-угор калыкъёслэн егит крезьгурчиоссылэн конкурсазы вормем мурт. Ар но ӝыны талэсь азьвыл татын ик, филармонилэн залаз, сослэн бадӟым концертсы вал. Шумпотӥм: егит музыкантъёс со дырысен бадӟым вамыш лэсьтыны вуиллям. Огшокчемен кадь быдэстӥзы Чайковскийлэсь, Рахманиновлэсь, Гайднлэсь, Шубертлэсь, Бахлэсь но мукет классикъёслэсь произведениоссэс. Жильыртыса кадь кисьтӥськись крезьгур залын пукисьёсты чылкак бурдъяськытӥз. Кылзӥсьёс тыршемзэс шонер дунъязы. Ӟырдыт кичабонъёс ӧз чалмылэ залын. Крезьгурлы шумпотэмзэс мукет сямен возьматыны ӧз быгатэ, вылды. Сяська кузьмасьёс ик ӧй вал кадь. Люкаськемъёс пӧлын тросгес пукизы крезьгуръя школаосын но училищеын дышетскисьёс. Нош кытын Культурая министерстовысь, Егитъёсын ужанъя комитетысь адямиос? Малы-о егит усточиосты пусйыны ӧз тырмы сюлэм шунытсы но, ӟеч кылзы но, сяська керттэтсы но? Кытын вал гажано фестивалез радъясьёсмы? Валаны луэ, дыр, жадемез но, дыртонэз но, мукетсэ но. Уг луы валаны бырйиськыса, таиз егит ай, вуоз, нош таиз бадӟым мастер ини, ӟечкылано шуыса уж шоры учкемез. Котькуд адямилы шуныт вазиськем дуно. Таяз учыре сыӵе сюлмаськон ӧз шӧдӥськы но секыт мылкыдэ вуттӥз. Дышетсконзэс йылпумъямзы бере егит усточиосмы асьме доры берытскозы-а? Е. ПАХОМОВА. Евграфыч Кемалась ик ӧвӧл акциосын "Буммаш" огазеяськонысь полиграфистъёс пусйизы типографизылы 30 ар тырмонэз. Нош солэн директорез Рудольф Евграфович Садовников та нуналъёсы пусъе 60 арессэ. Типографиез кылдытӥсьёс пӧлысь со одӥгез луэ. "Буммаш" огазеяськонын та адямиез тодӥсьтэмез ик ӧвӧл, дыр. Котьма понна весь сюлмаськись муртэ татын гажаса но яратыса Евграфыч гинэ шуо. Мон соин тодматски, полиграфистъёслэн юбилейзылы сӥзем номерез дасяку. Ньыль (!) час ӵоже вераськытозямы, ваньзэ тодаз ваиз Рудольф Евграфович. Одӥг интыын куамын ар ужатозяз, котькыӵе дыръёс но вал, пӧртэм адямиосын но пумиськылӥз. Солэн улоназ уж котьку туж бадӟым инты басьтэ. Озьы луэ, дыр, со понна трос кужымдэ но сюлэмедлэсь ог люкетсэ сётӥськод ке. 1939-тӥ арын вордскем пияшлы жингрес но шер пумиськылӥсь ним сётӥзы - Рудольф. Ньыль арес но ӧй вал пиёклы, куке солэн мумиз картэз доры фронтэ кошкиз но ӧз берытскы ни. Кӧня ке вуизы на гожтэтъёс, берло соос но дугдӥзы. Рудик будӥз песянаез дорын. Сиён шедьымтэ дыръя сютэм улӥз, кезьыт дыръя кынмиз. Ваньмыз озьы улӥзы. Ож аръёс капчиесь ӧй вал уга. Ӧжытак бадӟымгес луыса валаз ини пияш песянаезлэсь жалясь синъёсын учкылэмзэ. Оло, арлыдо кышномурт сюлмаськылӥз внукезлэн азьпал улонэз сярысь но инмарлэсь кузьгес улон сюрес курыса вӧсяськылӥз? Ож бере Садовниковъёс берытскизы вордскем гуртазы - Пычас ёросысь Бадӟым Кибья черкогуртэ. Азьло но, али но отысь удмурт калык возьыны тыршиз аслэсьтыз сямъёссэ но йылолъёссэ. Вань гурт ужъёсты дэмен быдэсъяны дышем адямиос али но корказэс ӝуто вемеен... Гурт шорын сылӥсь школае велӥзы 13 гуртысь пиналъёс. Дышетскиз отын Рудик Садовников но. Етӥз но чырткем пияш ассэ обидьыны уг сёты вал. Гуртысь нылпиос ужлы пичиысен дышо. Нош асьмелэн героймылы ачиз инмар косэм сое вазь шӧмъяны. Ӧз, кӧтсэ тырон понна ӧз пота со колхоз уже. Песятаезлэн, ӟеч мед улоз сопал дуннеяз, зарни вал киосыз. Быдэс гуртлы юрттӥз выль коркаос ӝутыны. Бадӟым Кибьялан солэн киосыныз пуктэм чайной али ке но сылэ на. Рудикез сюдыны но, дӥсяны но моӵсы сузе на вал пересьёслэн. Кызьы бен песятаез одӥг гинэ внуксэ уз дышеты ужаны? Котьма борды мылысь-кыдысь кыстӥськыны тыршись пияшлы тужгес но яра вал уин валъёсты возьманы. Укмыс арескысен куать ар ӵоже улосысь одӥг вырйыл но эскерытэк кельтэмын ӧй вал, дыр... Озьы ик гырон-кизён, кидыс ворттон ужъёсы пыриськылӥз. Татысен ик уг кутскы меда солэн книга борды кыстӥськемез, котырысь дуннеез тодыны- адӟыны тыршемез? Классазы котьку но книга лыдӟонъя ялымтэ ӵошатскон мынэ вал. Тямысэтӥ классын азьмынӥсь радын ӵемысь ветлӥзы Рудик Садовников, Володя Трушков но Саша Петров. Школаысь книгаос тырмытэк, вуылыны кутскиз гуртысьтызы библиотекае. Удмуртиын книгаосын со кадь узырез ик ӧй вал. Библиотекаын ужасьёс Рудиклы сётыло вал журналъёсысь но газетъёсысь вандылыса нимысьтыз дасям сузьетъёс. Лыдӟиськон мылкыдыз ӧз сӥя, арлыдо луыса но. Пичи сузьетъёс бордысен кутскыса, книгаяез яратон мылкыд вуттӥз Рудольф Евграфовичез бадӟым литератураез гажанэ но валанэ. Типографие сюресэз но герӟаськемын вылэм книгаен. Дас вить аресъем пияшез киномеханик луыса ужась кыдёкысь ӵыжы-выжыез ӧтиз мотористлы юрттыны. Гуртын кино возьматӥсьлэн ужез соку гажамон но вожъяськымон вал. Кельшиз Рудиклы кино "бергатон", собере шонтӥз Куйбышеве дышетскыны. Дышетскон висказ Куйбышевысь филармониын киномеханикын тыршиз. Со вакытэ ик эстрадаысь троссэ "кизилиосты" улэпкын адӟыны кылдӥз - Утёсовез, Беловез, Познерез... Армие мынытозяз кино возьматъяз Пычас но Сарапул ёросъёсын, Свердловскын. Вордскем районысьтыз котькуд гуртэ сямен вуылӥз "передвижкаеныз". Сарапулысь "Востокын", шонергес вераса, кинотеатр дорын пумитаз аслэсьтыз шудзэ - Зоя Дмитриевнаез. Тулыс но яратон мылкыд пачылмизы егитъёслэн сюлэмазы. Сӥзьыл пал кузпалъяськизы. загсэ мынон азьын гинэ тодӥз Рудик яратоно нылызлэсь ачиз сямен ик дунне вылын бубы- мумытэк будэмзэ. Озьы огазеяськизы "кык ӝыныос". Вань улытозязы ӵош луыны кыл сётӥзы. Нокинлы уд вера, макем трос шуг-секытъёс пумиськыло егит семьяос азьын. Оло, кулэ но ӧвӧл? Садовниковъёс ортчизы соосты, юнгес кыдаз яратонзы. Ар ортчыса вордскиз пизы. Кӧня ке улыса егит атаез басьтӥзы армие. Ӵош служить карись эшъёсыз нырысьсэ вазиськизы солы: Евграфыч. Армиын но ӧз люкиськы Садовников книгаен. Трос лыдӟиськиз, куддыръя уин но. Со ик юрттӥз азьпал улонзэ бырйыны. Армиысь бертэмез бере пыриз ужаны Сарапулысь типографие, бӧрысь йылпумъяз Львовысь полиграфической техникумез, сое ыстӥзы республикаысь Печатья управление. Котькытын мед ужалоз, вордӥськем музъемезлэсь ӧз палэнскы. Учыр тупаку вуылӥз гажано адямиосыз - песяйёсыз, ӵыжы-выжыосыз, эшъёсыз доры. Трос соос Рудольф Евграфовичлэн. Ваньзэс адӟемез потэ вылэм праздник ӝӧк сьӧрын. Но... огъёсыз кыдёкын, мукетъёсыз ӧвӧл ни. Ӧз улэ внуксылэн табыдӟа шумпотон аресозяз песянаез но песятаез. Арлы кык пол вуылэ соослэн шайвылазы Рудольф Евграфович. Тямыстонлэсь трос вал песянаезлы, улонысь кошкыкуз. Инмар кылэм солэсь куронъёссэ, сётэм кузь улон но правнукезлэн чагыр синъёсыныз мусояськон дыр... Удмуртилэн шоркараз вуэм полиграфистэз умой пумитазы. Лякыт адями сярысь солэн азьпалаз ик ӟеч кыл вӧлдӥське. Озьы ик Ижын ӵош ужано эшъёсыз тодо ни вал со сярысь, ӟеч специалист но ужаны быгатӥсь мурт шуыса. Куамын арес но ӧй вал на Садовниковлы, "Буммаш" заводлэн типографияз начальнике юнматыкузы. Нимыз но гольык борддоръёсыз сяна номыриз ӧй вал. Соин кулэ луиз туж трос кужым но ужез ӟеч радъяны быгатэм. Котькуд вамыш сётӥськиз секытэн, но берлань чигнаны со дышемын ӧвӧл. 1968-тӥ арын 23-тӥ ноябре потӥз нырысетӥ типографской оттиск. Заводлы кулэ вал пӧртэм бланкъёсты, накладнойёсты, технической паспортъёсты печатланы быгатӥсьёс. Садовников тыршемен-бызьылэмен, сыӵе группа люкамын но куинь толэзь куспын ваньмыз печатланы дасямын вал. Али типография туала техникаен тырмытэмын: компьютеръёс, сканеръёс, лазерной но струйной принтеръёс... Со юрттӥз ужез но капчиятыны, полиграфистъёслэсь творчествозэс но паськытатыны. Аспӧртэм библиотека кылдэмын соослэн поттэм продукциенызы: ӟуч, удмурт но бигер кылын книгаос, брошюраос, сборникъёс но мукетыз. Ваньмыз со пӧрмемын Рудольф Евграфовичлэн сюлмаськеменыз но тыршеменыз. "Буммашын" куамын ар ужатозяз, Садовниковлэн "берганы" быгатэмез нимаз цехлы, производстволы, заводлы планзэс быдэсъяны юрттӥз. Рудольф Евграфовичлэн кивалтэмез улсын профилакториез лэсьтонын ужазы типографиысь нылъёс но. Спортзалэз но бассейнэз ӝутон но огвакытэгес мынӥз. Ваньзэ вуттоно дыраз. Нош лэсьтӥськон дугдэмын цемент ӧвӧлэн. Лэсьтӥськон материаллы ыстэм адямиос но буш киын берытскизы. - Евграфич, - жингыртэ заводлэн директорез Глеб Самсонович Акубов, - оло, ворттылод цементлы? Евграфыч ворттылӥз. Аслэсьтыз азьвыл цементэн куинь вагон вуиз. Кызьы озьы быгатӥз? Цемент поттӥсь заводлэн аслаз шуг-секытъёсыз вылэм. Гурезь породаосты пыргытӥсь барабанзы ӝыны арлы сяна уг чида, пе. Садовников басьтӥськиз юрттыны. Жингыртӥз "Буммаше", вераськиз ужасьёсын. Туала арын сое бартерен нимасалзы: тӥ милемлы - барабан, ми тӥледлы - цемент. Со вакытъёсы вал кун заказ. Озьы быдэс заводэз секыт югдурысь поттӥз. Ужзэс ӟеч тодӥсь но солы вань сюлэмзэс сётӥсь муртъёс дунне вылын ӧжыт ӧвӧл. Тунсыкоез со бордын: полиграфист Садовников вордскемын 5-тӥ мае - Печатьлэн нуналаз (кӧня ке ар талэсь азьло сое выжтӥзы 13-тӥ январьлы но Россиысь прессалэн нуналэз шуизы). Со понна солы кушем ним но лякизы - Типографыч. Улоназ пӧртэм профессиос басьтыса но, Рудольф Евграфович шедьтӥз аслыз кылдэмзэ, вордскем нуналэныз нимамзэ. Ым уг берытскы сое ветеран шуыны. Йырсиез, мыйыкез тӧдьыектэмын ке но, мылкыдыз азьло кадь ик сэзь но сайкыт. Уг дугды улонлы шумпотэмысь. Егит пи сямен вите вордскем палъёсыныз, сое тодӥсь адямиосын пумиськонзэ. Т. КАРАВАЕВА. Зэмос Натали Кин уг тоды дано, яратоно ӟуч кылбурчимес Александр Сергеевич Пушкинэз... Солэн вордскемез дырысен туэ ӵапак 200 ар тырме. Александр Сергеевичез буре вайыса, быдэс странаямы пӧртэм ужрадъёс ортчыло. Тани алигес Пичи Пургала ас ужен бертылыкум учырай "Натали" конкурсэ. Со сӥземын вал Александр Сергеевичлы но солэн яратоно кузпалэзлы Наталия Гончаровалы. Дыры ӧвӧлэн, кемалы ӧй пыры вал. Но пуки бырытозяз ик - кошкыны ӧй ӵыды ни. Та конкурсэ пыриськизы котькуд школаысь 9-тӥ-11-тӥ классъёсын дышетскись нылъёс. Дас куать кузя люкаськизы соос. Тани сцена вылэ потӥзы. Чылкак Пушкин дыръёсысь балэ вуиськод кадь: сюсьтылъёс ӝуало, каллен гинэ чузъяське вальс. Тани конкурс кутскиз. Со ньыль люкетлы люкемын вал. Нырысетӥяз нылъёс адӟытӥзы асьсэлэсь котьмае лэсьтыны быгатэмзэс. Кин кырӟаз, кин эктӥз, кин киужъёссэ ваем. Собере кунсьӧр кылын кылбур лыдӟизы - Пушкинлэн кышноез англи сямен вераське вылэм. Конкурслэн куинетӥ люкетаз Александр Сергеевичлэн гожъямъёсыз пумысь юанъёс вал. Берпуметӥ люкетаз вить кузя гинэ кылизы на. Котькудӥзлы нимаз этикетъя юан сётӥзы. Тужгес трос балл люказ но вормисе потӥз Баграш-Бигра школаысь Оля Москвина. Мон туж шумпотӥ Оли понна. Пель сьӧрам али но кылӥське на солэн "Титаник" кинофильмысь кырӟанэз кырӟамез. Син азям пуксе дас тямысэтӥ даурысь туж пинал нылаш. Солэн йырсиезлы но дэремезлы со вакытысь вань кильтро нылъёс вожъяськысалзы. Туж мусо, чебер, йӧно адскид, Оли. Возьматыны быгатӥд зэмос Наталиез. Лу таӵе ик чебер, тазалыко но яратоно. Тани сюсьтылъёс кысӥзы ни... Кичабонъёс но чалмизы... Нош пель сьӧрын ялан кылӥське на тодмо вальслэн гурез, Олилэн кырӟамез... Елена Ботникова, Удмурт кун университетын дышетскись. Очерк Кин тон, Лёня?.. Солэн ваньмыз вань ни кадь. Нимзэ, тросэз меӵак ассэ но, ӟеч тодо республикаямы. Тужгес но - "Удмурт дунне" газетэз басьтӥсьёс но лыдӟисьёс. Нуллэ дано ним. Луиз лауреат. Гажало эшъёсыз. Ужъёссэ, Ижын сяна, возьматыло Кам улосмылэн сьӧраз но. Ма кулэ на кадь? Нош со валъёссэ юскыны уг дырты на, ялан сюрес вылын. Выльзэ, кыдёкын пиштӥсь кизилиез утчан но шедьтон сюрес вылын. Бам вылтӥз пӧсям ву шапыкъёс васькытозь азьланьтэ "гырон удыссэ"... Нырысетӥез пумиськон МУКЕТ адями сярысь гожъяку, нырысь чуръёстэ ик "мон" каронэн мытыны умой ӧвӧл, дыр. Но таяз учыре сотэк уз пӧрмы, шӧдске. Со дыре ужасько вал ай Удмурт радиоын. Гожтӥ "Огназ льӧмпу" новелла. Сое кылзӥсьёс доры микрофон пыр вуттыны ӧти республикаысьтымы дано артистэз Иван Кудрявцевез. Плёнка вылэ гожтэмлэсь азьло со новеллаез ог кык пол лыдӟиз но шуэ: - Коли, егитъёслэсь возь вылын шулдыръяськемзэс пыдлон чузъяськись кырӟан вылын возьматыны умойгес ӧй луысал меда? - Шонер, мон но озьы малпасько, - куаразэ сётӥз драмая но литературая редактор тодмо кылбурчи Гай Сабитов. Вазиськиз режиссёрлы: - Но со медаз луы вал ваньмызлы тодмо кырӟасьлэн куараез. Режиссёрен ӵошен вазиськиськом Удмурт телевиденилэн но радиолэн хоренызы со вакытэ кивалтӥсьлы Розита Анкудиновалы. - Луоз тӥледлы сыӵе кырӟась, - кема малпаськытэк оскытӥз Розита Андриановна. Ӵуказеяз со вуттэ йыг-йыг мугоро, суд йырсиё пиез. Тодматске, шуэ. - Леонид... - сьӧдалэс синмыныз чилектыса, кизэ дӥсьтытэк мычиз пи. Собере, милесьтым юалляськеммес азьпалтыса, театрын кема шудэм артистлэн кадь рос-прос пуктэм боз-боз куараен шуиз. - Бен, мон тодӥсько пумиськонмылэсь мугзэ. Но, кышкасько, пӧрмоз меда мынам. Хорын кемалась уг кырӟаськы на. Лёняез Бадӟым студиысен плёнка вылэ гожтон нуналэ Радиолэн юртаз лыктӥзы мединститутысь нылъёс. Аппаратнойысь укно пыр адӟизы микрофон азьын кырӟасез. - Учке-а, учке, макем мусо пи... - кытынзэс вунэтыса но пыдъёссэс чалмытак вошъяса, куспазы шыпырто студенткаос. - Кытысь кин меда со, о-о... Лёнялэн куараез я кыдёкысь нюлэскын шуккиськыса кадь дыртытэк визыла, я нош ик пытсэтысь мозмытскем сямен гадь тыр вӧл-вӧл ӧръяське. - Куараез бен кыӵе! - нош ик уг чидало нылъёс. - Малы азьвыл нокытысь ӧз адскылы меда, о-о... - Филармоние я театре али вуэм маке, луоз, - тодӥсьяськыны выре кин ке. - Ялонэз адӟим ке, концертаз одно ветломе, ява, - эшъёсызлы вазиське мукетыз... Тодӥзы шат соку нылъёс, Лёня соос кадь ик студент шуыса. Дышетске Удмурт пединститутлэн худграфаз. Ваньмон дыръяз кырӟа факультетысьтызы хорын но пиослэн ансамблязы. Тросэзлэн та нылъёслэн сямен ик, Лёнялэн но кисыяз котьку сямен тӧл шула. Студентъёслэн столовойысьтызы ӝуклы коть тырмымон коньдон поттон понна, дыр шедьтэ на телевиденилэн но радиолэн хоразы ветлыны. Лёнялэн кырӟамез новеллалэн люкетаз туж лякыт пуксиз. Актёръёслэн верамзы-шудэмзы уката валамонгес, сюлме йӧтымонгес луиз. Тӥни озьы мон нырысьсэ пумиськи Селталась пияшен, Удмурт пединститутысь студентэн. Ӧй но малпалля соку, та тодматскон юн кусып тупатонлэн, эшъяськонлэн гердэз луоз шуыса... Кыкетӥез пумиськон Ортчиз ог 6-7 ар. Улонлэн шакрес сюресэз вуттӥз монэ "Советской Удмуртие", озьы нимаське вал со аръёсы "Удмурт дунне" газет. Выль уж, выль адямиос но куронъёс. Нырысез ик командировкаысь вуттэм но гожтэм материалэ фотоосын потыны кулэ вал. - Сёт художниклы, - снимокъёсты учкемез бере шуиз кыл кутӥсь секретарь Степан Машков. - Шеко интыоссэ мед тупатъялоз. - Ма шекъёссэ?- уг валаськы. - Фотоос ӟечесь кадь ук. - Художник ачиз валалоз, - гожъяськон сяменыз йырзэ ӝутылытэк вазиз Степан Григорьевич. - Удыссэ со ӟеч тодэ. Мар бен, ӧжытак ӵыжектоно луиз. Пырисько пичигес кабинетэ. Одӥг гинэ ужан ӝӧк вылын, борддоръёс кузя ӝажыосын олокыӵе но посудаосын, коробкаосын пӧртэм пумо буёлъёс, карандашъёс, фломастеръёс, кисточкаос, адӟылымтэ пероосын ручкаос. Журналъёс, книгаос, вурем газетъёс, мукет инты ӧвӧлэн, тыремын пуконъёс вылэ. - Тани уж ваи, - вазисько. Кабинетлэн кузёез, маке суреданзэ палэнтыса, тушо йырзэ ӝутӥз но, монэ адӟылытэк кадь, снимокъёсты кияз кутӥз. - Ӝог вуттоно-а? - юа. - Номере сётом, шуизы, - йыбырттӥсько. Художник матаз кыскиз ӝӧк пумын сылӥсь стаканзэ. Басьтӥз хирургъёсын яра вандылон пуртсэ. Снимокъёсты вуштыны кутскиз. - Ма кариськоды? - ӧй чида. - Ӧжытак ӵабъялом, мултэс пеймыт интыоссэ сайкытатом - газет бамын чебергес адскоз. Учкиз шорам. Пуртсэ интыяз понӥз. - Нош асьмеос кемалась тодмо, - чылкак паймытӥз художник. Кызьы, ку?.. Куараезъя, пальпотэмезъя мырдэм валай, куке но новеллаям кырӟасе азьын сылӥсько шуыса. Ма, тодма на сое - ӝыны ымныраз туш. Сыӵе ини угось сям кылдэмын: суредасьёслэн-профессионалъёслэн нырысь тодметсы-пусъетсы - туш. Таиз пумиськонмы милемды уно аръёс ӵожелы огазеяз-эшъяськытӥз. Газетэ Лёня, культпросветучилищеын ар ӵоже дышетэмез бере, мынэсьтым ог куать толэзь гинэ азьло вуэм. Ӵапак татын суредасьлэн быгатонлыкез, ӝужась шундылэн сиосыз сямен, ялан яркытгес пиштыны кутскиз. Ӵапак газетын ужамез сое улонлэн ӧраз ву берган кадь пыдло кыскиз. Даурлэн ньыльмос люкетэзлэсь но трос аръёс ӵоже ужаса, художниклэн суредъёсыныз чебертыса-шулдыртыса поттэмын городлы но гуртлы, отын улӥсь но тыршись адямиослы сӥзем уно веран-мадёнъёс. Одӥгез но сямен "Шӧкыч" бам уг поты, Лёнялэн киосыз пыриськытэк. Пединститутлэн худграфысьтыз дано художникъёслэн-дышетӥсьёслэн Алексей Холмогоровлэн, Рем Тагировлэн оскемзы-сюлмаськемзы юнме ӧз луы. Асьсэлы ӟеч кивоштӥсь будэтӥзы. Лёня книгаосын, журналъёсын, газетъёсын потылэм трос дасо суредъёссэ, портретъёссэ, нош озьы ик нимысьтыз дасям трос графика ужъёссэ возьматъяз "Моё Нечерноземье" (Тула), "Большая Волга" (Казань), "Уральская триеннале" (Уфа) выставкаосын. Удмуртиын ортчылэмъёсыз сярысь ум вералэ ни. Ужъёсызлы котькытын но бадӟым дунъет сётылӥзы. Нош кӧня на соос азьпалан... Кырыкмас дурын КЫЗЬЫ ке тыметысь йӧ вылын чорыгаса пукиськом. Чиньы кузьда юшпиос гинэ одӥг-кык кыскало. - Нош тынад, морж, кыӵе ини? - вазиське одӥгез эшмы Лёнялы. - Тожо мӧзмыт-а? Шедьтэмед мор-ржез, - Лёнялэсь кылъёссэ быгыльмем ымдурыз шенгыль кариз. - Сапег кадь тёнграй ни. - Морж ик вань, толалтэ нырез чепыллясь куазен но нуналлы быдэ лымы вылын кезьыт вуэн пылатскиськод ке, - уг сётскы эшмы. - Эшшо тол но гужем корка дорысьтыды пужым ягын зарядка ортчытылыны, бызьылыны уд вунэтӥсьскы. Возьыт, возьыт тыныд кынмыны. Милемлы, чильпырась тӧл шоры нырысьсэ шедьыкумы ик кизьнылыны кутскисьёслы, ярам. - Эх, пук вылэм одӥг чебер гужем нуналэ Кырыкмас дурын, - ӟабыльтӥз Лёня. - Вот отысь мон чорыгтэк ӧй бертысал. Валай, таиз ни мон вылтӥ верамын. Кемалась ни угось эшме оскытыса возисько: нулло-ай, пӧй, огпол тонэ вордскем Кырыкмасам. Головня, юш, чабак потталом. Табере учырзэ шедьтэ гинэ, монэ пыкылэ. Вуиз ик огпол сыӵе нунал. Кияса ёросэ командировкае мынӥськом. Бордамы визнанъёс кутӥм. Гужем уйёс, пе, вакчиесь, шур дурын кӧлом. Нуназезэ суч-суч ужамы. Лёня ёросысь кӧня ке азьмынӥсьёслэсь тусбуйзэс блокнотаз пуктӥз. Калык гуртаз бертэм бере, Кырыкмас пала ширтӥм. Нунал ӵоже чидантэм пыжем шунды пумен улӥе лэзиське. Кытысь ке ыркыт тӧл бурдъяськыны кутскиз. Озьы ке но, ӝужыт яро нюлэс шур вылын одӥг тулкымез но ӧвӧл. Визнанъёсмес кутыса, кин кытчы - пукись ву котыре, шашыё яке силёё интыосы пазьгиським. Кӧня ке ортчыса, кутэм чорыгенымы ушъяськиськом ни. Котькинлэсь шумпотэ Лёня. - Курикме шашыос вискытӥ визылась ву кузя лэзисько. Ог ӝыны метр мынэ но пукы шуак зыме. Кыскисько. Оты-ын. Омырын ӵогыр гинэ лопыръяське азвесь сьӧмо чабак. Собере ваньмылы вазиське: - Тӥ чорыг сузяськоды, картофка паласькоды, но мон лым пӧзьтӥсько. - Ми нош маин пӧртэмесь? - ньӧмыз понна юаськом. - Э-э, таизэ ини мон, - Лёня кизэ ӝутэ, - муртлы уг сёты. Гуртын кышноелы но уг оскиськы, пӧраськон - мынам яратон уже, хоббие, шуод-а, мар-а. Картофка кутыса пуксисько тылскем вадьсысь сисьмем кыпы вылэ. Тач-тач! чабкылӥсько я тыбырам, я саурам. - Тӥляд вирды мукет-а, мар-а? - юасько эшъёсылэсь, шонаськытэк ужамзы шоры учкыса. - Чибиньёс ёртӥзы ни. - Кыӵе чибиньёс?! - горыны кутскизы соос, гольык пыдъёсы шоры возьматыса. - Учкы ай ӟечгес. Остэ инмаре! Макес кузям уллёен тубо куртчылӥськись горд кузьылиос. Карзы вылэ пуксьыны шедьтӥськем. Со куспын яр улын, вуэ кин ке бадӟым из куштэм кадь, пуж-ж! вазиз. Кема ик дыр ӧз ортчы - бр-р! карись луиз. Петя Сергеев, газетысь гожтэтъёсъя отделын ужась, ву коже вуэм ни. - Чале, чале! - кесяське. - Уф, макем юзмыт, мугоре выль кужым ӧръяське кадь. Пыласькем бере чорыг лым уката но ческыт мынӥз. Нунал куспын вань жадем быриз. Вылӥын куспазы ӵаштыр верасько беризь но кызьпу куаръёс. Улӥын я отын, я татын шлёп! вазе векчиосыз сьӧры уиськись сьӧсь чорыгъёслэн тэтчылэмзы. Йырдэ кудпала гинэ уд берыктӥськы - котькытын чузъяське кӧлыны валасьтэм тылобурдоослэн чирдэмзы. - Нош ми бен пӧртэмесь?! - интыысьтыз ӝутске Лёня. Самовардэ пукты али, ой, уроме, Самовардэ пукты али, ой, уроме, Али гинэ пуктысал но, Кӧс эгыре чик ӧвӧл... Шур ӧре тэрытэк, шулдыр кырӟан кыдёке нюлэс кузя шуккиськиз. Сое кылзыны огдырлы тылобурдоос но чалмизы кадь. - Лёня, - вазиськисько, - малы аслыд кырӟасьлэсь сюрессэ ӧд бырйы. Дась артист ук тон... - Кема вераны со сярысь, - Лёня лулскиз но мукет кырӟан мытӥз. Чигиськиз уӵылэн кырӟан ваез - Кӧня асме тодӥсько, кырӟанэн мон, суреданэн сямен ик, ӧй люкиськылы, - маде Лёня. - Мынӥсько губияны, борыяны, вуисько сад-бакчаям - сьӧрам котьку кырӟан. Кылдӥз вуылыны бакчаяз мыным но. Йыг-йыг корка, сыӵе ик мунчо, сюлмаськыса, мазэ- созэ валаса радъям емыш убоос, вожекто улмопуос, вишняос... татын котькуд кортӵог шуккемын, котькудӥз пул ӵошкытатэмын-волятэмын Лёнялэн киосыныз. - Тон учкы, учкы, макем мусоесь соос, - писпуосты нуныосты сямен киыныз маялля, - тани вуоз сӥзьыл, жалем емыш сётозы. - О-о, Лёня вуэм! - ӵуштыр вазизы бускель бакчаысь эмез пудъёс, адскиз йыраз кышетэн нылкышно. - Озьыен, туннэ нош ик шулдыр ужалом. - Ужалом, нэнӥе, ужалом, - нялтас кариське Лёня. - Номыр юрттыны кулэ ӧвӧл-а? - Со понна гинэ дорады пырасько кожаськод-а? - киыныз шона нылкышно. - Сотэк но трос юрттӥськод. Кырӟамдэ кылэме потэ. Кытын меда сокем дышетскиды... Лёня али но жаля: ӧз кылды солы кырӟаны нимысьтыз дышетскыны. Со сюрес вылэ трос пол кожылӥз ке но. ... Институтын дышетскыкуз ай сое эшъёсыныз ӵош ыстӥзы Дэбесэ практикае. Ог нуналэ гажан нылыныз, бӧрысь соос кузпалъёс луизы, мукетъёсызлэсь палэнскыса, мольбертэнызы Чупчи яр дуре интыяськизы. Куазь чидантэм пӧсь. Инмысь одӥг пилем но уг адскы. Мылкыд суредаськонлэсь кыдёкын пылэнын. Пыдъёс асьсэос кыско кадь юзмыт шуре, шау карыса пыласькисьёс пӧлы. Тани одӥгез потӥз вуысь. Ӝужыт таза мугоро воргорон. Пельпум вылаз понӥз ӵушкон. Бур чӧльызэ пеляз донгыса пал пыд йылазы кӧня ке тэтчаз. - Э-э-э, о-о-о... э-э-э... - витьымтэ шорысь чузъяськиз зӧк куара. - Лёни, - ныл кырмиськиз пилэн пельпумаз. - Титов ук со, Григорий Иванович Титов. - Бен, со, - тусын ик воштӥськиз Лёня. - Ачиз инмар сое дорамы ыстэм, шӧдске. Лёня султӥз. - Кытчы тон? - дугдытӥз ныл. - Матаз мыно, тодматско. Кин тодэ, пелям уз чабкы ук, оло, куараме куке-соку кылзыны соглаш луоз. - Ну, сётӥськод... - кит-кит серектӥз ныл. - Учке-ай кыӵе со, консерваторие тодмо пыр сюрес лёгыны турттэ. Да тодӥськод-а тон, куанер Робертино, сыӵе кырӟасьёс котырын тон кадьёс уллёен бергало. Лёня уськытӥкиз интыяз. Йыг мыжгиз пӧсьын ӵужектэм гуждор вылэ. Зэм но, кин со Титов понна? Шуоз, кылзо, одно кылзо. Собере нимзэ но, тусбуйзэ но вунэтоз. Мукетыз, оло, та учыр бере консерватория сярысь ӧй но поттылысал ни. Но Лёнялэн пеляз кин ке но ялан шыпыртэ кадь: тон суредась но, кырӟась но луыны кулэ. Озьы ик кин ке валтыса кадь, ньылетӥ курсын дышетскыкуз ай Ленинградэ ветлыкуз вуиз Римский-Корсаков нимо консерваторие. Нырысьсэ черке пырем муртлэн музэн сюлэмыз бырк-бырк тэтча. Котыр чылк-чылк, адско быдэс дуннелы тодмо вашкала музыкантъёслэн портретъёссы. Кинлы вазиськоно, ма шуоно? Ог сэргын сыло чыртыязы синмез мальдытӥсь тӧдьы воротник дэремъёссы вылын "бубыли бурдъёсын", синучкон кадь пиштӥсь пыдкутчанэн егитъёс. - Тӥ кинэ ке утчаськоды, шӧдске? - Лёнялы ошмес син кадь чылк-чылк куараен вазиськиз огез. - Мон... Ы-ы, марым, нокинэ уг утчаськы, - мынясь пиослэсь ӝоггес палэнскиз Лёня. Ульчае кызьы вуэмзэ ӧз вала. Юнме уг шуо, шӧдске: удмурт сям - возьдаськись сям. Та муген ик, Сверловскын службазэ ортчытыкуз, Мусоргский нимо консерваторие нимысьтыз пырыса вылысь, нокинлы вызиськыны ӧз дӥсьты. Иже Москваысь Чайковский нимо консерваториысь профессор Павел Лисициан ветлыку, быдэс концертэз одӥг малпанэн пукиз: сцена вылысь тылъёс кысэм бере одно мыно дораз, вазисько куараме кылзыны куронэн. Концерт быриз - Лёня мукет кылзӥсьёсын ӵош ураме вуиз. Вазиськиз мукетызлы, асьмелэнэзлы со дыре туж тодмо кырӟасьмылы. Россиысь дано артист пумит ӧз луы, кылзӥз. - Бен, Лёни, Инмар тыныд куара сётэм. Тазэ тынэсьтыд уд тала. Но ведь нота грамота тон понна - пеймыт нюлэс. Музыкая школаез коть куке но быдты вылэм ук. Ӧвӧл, консерваторие пырыны кылдэмын ӧвӧл тон, - пилэн ымныраз салем кадь вераз дано артист. Лёнялы куаразэ пуктыны юрттӥзы музыкая училищеысь тодмо педагог Мария Лившиц, Операя но балетъя театрын кырӟась Маргарита Галасеева. Нош сцена вылысь дырызлэсь вазь кошкем Тамара Фанталова меӵак шуиз вал: - Гажано Лёняе, мон кык толэзьскын дасяло тонэ консерваторие пырыны... Пилэн пель сьӧраз нош ик кылӥськиз дано артистлэн сюлэмез бышкалтӥсь куараез: "Консерваторие пырыны кылдэмын ӧвӧл тон..." Озьы тӥни, возьдаськонэн сэрен гинэ ӧвӧл, мурт юрттыса но чигиськиз уӵылэн чирдон ваез. Ма со, художниклэн ужез? ШУНДЫ пуксён азьын зор пилемъёс тӧлӟизы. Машинае ватскемысь потыса, яр дурысь ышыг интые тылским. Ӵукна кутэм чорыгмес сузяськом, лым пӧзьтыны дасяськом. Олокытысь нош ик потӥзы чарланъёс (чайкаос). Чир-р! карыса лобало Кам вадьсын. Ву вылэ шлач! уськытско но ымазы векчи чорыген пукыӵ ньӧл музэн ӝутско вылӥе. Вадьсамы ву шупыльтэм кылӥськиз. Резина пыжысь потӥзы макесозязы кузь кунчиё сапеген, пельпумазы пыӵалэн кык воргоронъёс. - Ӵӧжасьёс, луоз, - вазиз эше. Озьы ик вылэм. Кам сьӧрысь тыосын ӵӧжъёс лыдъянтэм. Вамыштӥзы ми пала. Зор бере, пе, кӧсатскыны лэзёды-а? Тодматским. Одӥгез художник, мукетыз - инженер. Кыл бӧрсьы кыл - вераськон пуромиз. Ма сярысез валамон ни: кинлы золгес удалтэ, чорыгасьлы яке ӵӧжась-пӧйшурасьлы-а. Одӥг пол сажень кузьда чипей кутэммы, нош мукетъят ӟазег быдӟа ӵӧж ыбеммы сярысь мадиськонмылэсь жадьыса вуим котькудмылэн ма но кызьы ужаммы вылэ. - Ог куинь нунал талэсь азьло дорам корреспондент вуылӥз, - гомась сэрегпумъёсты бодыен бугыръяз художник. - Редакция, пе, косӥз газет баме тӥ сярысь очерк гожтыны. - Корреспондентлы шуисько, - мынам кадь профессиен адямилэн ужез сярысь огъя кылъёсын нокызьы но уд гожты, уката но - редактор косэмъя. Нырысь пыр-поч тодматсконо солэн ужъёсыныз-суредъёсыныз, гравюраосыныз... Адӟоно но сюлмыныд валано, ма сярысь вераны турттэ вал художник, созэ яке тазэ суредзэ кылдытыса. Шӧдоно, кыӵе но ма мылкыд сое ӝутӥз кисточкаез я ручкаез кияз кутыны. - Инметӥ лобаны кутскиськом, шӧдске, - эшез шоры нош ик кырыж учкиз инженер. - Зэмос художник ноку но интыяз уг сылы, ялан выльзэ утчаны, азьлане вамыштыны турттоз. - Кылымтэ кадь азьланьтэ художник. - Возь вылысь сяськалэн даурез вакчи ке, художник ялан пиштыны, мылкыдыныз вань улытозяз егит луыны кулэ. Художник - со кылбурась музэн дунне шоры чылкак мукет синмын учкись адями. Сотэк со дырызлэсь вазь пересьмоз, юнме гыбдась гыбет сямен огшоры ӵындыса улоз. Суредъёсыз артэ усем ву шапыкъёс сямен ог-огзылэсь номырин уз висъяське, эгызоослы пӧрмозы. - Зэм но, чарланъёслэсь вылӥетӥ лобиськом ни, лэся, - нош ик куаразэ поттӥз инженер. - Тон кылзы, кылзы... Бен, вадьсамы лобась тылобурдолэн но вань жадён дырыз. Бурдъёссэ ӝутъяны кынарыз бырыса, со ваське музъем вылэ. Выль кужым люканы. Соку нош ик омырске пилемъёс дорозь. Улонлэсь чеберзэ, шулдырзэ отысен адӟон понна. Со тылобурдо кадь ик творчество борды вань лулыныз, сюлмыныз бурмем адями но. Йыраз вуэм но син азяз пуксем малпанзэ йылаз-пумаз вуттон понна со ӵем дыре уйёсты кӧлытэк потэ. Но кужым быронтэм ӧвӧл. Тӥни соку адями огдырлы вунэтскон, чыртыяз ошем сӥесэзлэсь мозмытскон калэ вуэ. Но ортче дыр, нош ик ваньмыз ӧраз пыре - ужез борды эшшо но ӟырдыт басьтӥське... Художниклэсь верамзэ кылзӥсько но малпасько: татын мед луоз вылэм Лёня но. Тылскем доры витьымтэ шорысь вуэм адямилэн кылъёсысьтыз со одно адӟысал ассэ. Ӵапак со но - ог интыяз лёгаськыны чидасьтэм, дыго-мого мынӥсь ужез понна пурӟытскись но уката ӟырдатскись, огшоры яке графика суредзэ, уката яркытгес но учкисьлы матынгес-валамонгес карон понна, дас, солэсь но трос пол выльдыны-тупатъяны дась адями. Кызьы верай ни, Лёня уно аръёс ӵоже ни "Шӧкыч" бамез лэчытгес, шулдыргес карыны юрттэ. - Лёня, вай малпалом валтӥсь суредлы тема, - вазиськисько солы. - Татчыам вуиз ни, - кизэ чырты вадьсаз вуттэ Лёня куддыр. - Огпол коть монтэк поттэ "Шӧкычез"... Ӵукна уже вуиськод - художник ӝӧк вылэ понэ ни суред. - Тазьы яралоз-а? Валамон, гуртаз Лёня нош ик бер уёзь пукиз. Шедьтӥз тема но, сое бумага вылын возьматыны амал но... *** ТАБЕРЕ валады, луоз, малы мон эшелы "Кин тон, Лёня? шуыса вазиськи. Кырӟась яке лэсьтӥськись, чорыгась яке... Соиз но, таиз но, дыр. Но одӥгзэ гинэ та адямиен герӟаськем валанэз бадӟым букваен кутскыса гожтыны кулэ - Художник. Нимыз солэн - Леонид Алексеевич Прозоров, республикаысьтымы Художникъёслэн огазеяськемзылэн членэз, УР-лэн искусствоосъя дано деятелез, Удмуртилэн кун премиезлэн лауреатэз. Н. ДОЛГОВ, журналист, культура удысысь дано ужась. ЮГОСЛАВИЯ Китайын пумиськонъёс Югославиын кылдэм югдурез дугдытон понна вань одӥг гинэ сюрес - политика, Пекинысь Москвае лобӟон азяз вераз Россия Федерацилэн Президентэзлэн Югославияя оскем муртэз Виктор Черномырдин. Журналистъёсын пумиськылыкуз В. Черномырдин ивортӥз, Косовоын кылдэм югдурез эскеронэ пыриськизы КНР-лэн кивалтӥсез Цзянь Цзэминь, КНР-ысь Кун Кенешлэн вице- премьерез Цянь Цичень. Черномырдин пусйиз, Югославия вылэ урдскем адямиос кунъёслы ӝегатскытэк дугдытоно пуштытъянъёсты. Собере гинэ мукет ужпумъёсты эскеронэ выжоно. Возьматӥськом усто предприятиосты: "Играмолоко" огазеяськон Шаерысьтымы сиён-юон поттӥсь предприятиос пӧлысь одӥгез устоез, огсыр тыршисез луэ "Играмолоко". Акциосын огазеяськонэн вис карытэк 26 ар ӵоже кивалтэ ни Александр Васильевич Лазарев. Солы сётэмын Удмурт Республикаысь промышленность удысысь дано ужась ним. Туннэ Александр ЛАЗАРЕВЕН кенеше газетлэн корреспондентэз Геннадий Романов. - Александр Васильевич, кызьы тӥ Удмуртие вуиды? Ведь вордӥськемын Ульяновскын. - Шонер. Республикае вуи йӧл промышленностья техникумез йылпумъяме бере 1964-тӥ арын. 35 ар татын улӥсько ни. Кельшизы калык, шулдыр, чебер инкуазь, ошмесъёс, шуръёс но нюлэсъёс. Играе лыктӥ 1973-тӥ арын. Коллективмы ӟеч, ужась, кулэ дыръяз, кызьы шуо, гурезез но берыктоз. Соин ик ужъёсмы умой мыно, арысь аре планъёсмес быдэсъяськом, адямиослы ческыт сиён поттӥськом. Апрельлэн кутсконаз дорамы кенешон ортчиз. Со сӥземын вал сертификатъёсын ужанлы но продукцилэсь ӟечлыксэ ӝутонлы. Кенеше ветлӥзы республикаысьтымы йӧл заводъёсысь валтӥсь инженеръёс, лабораториослэн кивалтӥсьёссы но Гурт удысъя министерствоысь специалистъёс. Огазеяськонмы юнме шорысь бырйымтэ, дыр, вал. Ушъяськемлы медаз пӧрмы, но коллектив лулысь-сюлмысь тырше. Со бордысь ик ваньмыз потэ. Шуг-секытъёсмы бен ӧвӧл, уд шуы, соослэсь ум кышкаське, ӟеч ужан амалъёс ялан утчаськом. - Кызьы тодмо, ортчем арез умой йылпумъяды, нош туэ кызьы ужаськоды? 17 август сярысь мар верасалды? - Рынокен экономикае выжон нокинлы каньылэн уг сётӥськы. Милемлы но озьы ик. Августэ, зэмзэ но, дунъёс зол гинэ будӥзы. Гурт хозяйствоослэсь йӧлзэс кык пол дунын басьтыны ӧдъям бере, продукцимы (вӧй, йӧл сиёнъёс) дунояз. Нош мукет ласянь, калыклэн уждунэз, пенсиез, пособиез ӧз буды. Со табере ичигес басьтэ вӧй но йӧл. Озьы миым куинетӥ но ньылетӥ кварталэ но туэ ӧжытгес вӧй шуккиськом, нош йӧл сиёнъёмес басьтӥсь вань. Верало нырысетӥ кварталэ ужаммы сярысь. Кылем арын та дыре 2410 тонна йӧл кутӥм ке вал, туэ со 2714 тонна люкаськиз. Ваньзэ 10036 сюрс манетлы продукция поттӥм, нош миым та дыре 4440 сюрс манет вал. Туэ, кылем арын нырысетӥ кварталэн ӵошатыса, 17 тонналы ичигес вӧй шукким, нош йӧл сиёнъёсмы 483 тонналы ятыргес луизы, яке планмес 141 процентлы быдэстӥм. Но уката тросгес поттӥм стаканъёсын 20 процент напен йӧлвыл (250 процент), "Адыгейский" сыр (кык пол трос), технической казеин (161 процент), 5 процент напен творог (158 поцент), ваньзэ йӧлвыл (152 процент), аръян (164 процент) но мукетсэ. Ваньзэ сямен сиён-юонмес бинялтыса магазинъёсы келяськом. Басьяськисьёслы но, вузкарисьёслы но со кельше. Ӝутскиз ужан культура. Алигес тани Кун Кенеше быръёнъёс ортчизы. Директоръёсмылэн кенешсылэн адямиез, "Старозятцинское" эштослэн кивалтӥсез Александр Шаляпин Играысь быръён округъя депутат луиз. Со возьматэ калыклэсь гурт удыслы но переработкалы оскемзэ. - Александр Васильевич, тӥледлы сырьё вутто гурт хозяйствоос, эштосъёс, фермеръёс. Соосын кыӵе кусыпъёсты? - Самой матысесь но юнэсь. Огазеяськон соослы азьло ик коньдон но висъя. Юрттӥськом эстӥськон (ГСМ), воштос ёзъёс, минерал сылалъёс но музонзэ басьтыны. Тани СБС-АГРО банклэн нимаз фондысьтыз льготаен 2 миллион манет ссуда (14 процентэн) вуиз. Ваньзэ сое гурт хозяйствоослы кредит сётӥм. Процентсэ ас выламы басьтӥм. Тулыс бусы ужъёсты ортчытоно ук. Озьы ке но, милемлы коньдон сётыны) кулэ 1070 сюрс манет, нош ми - 170 сюрс гинэ. Вань бюджетъёсы но фондъёсы выт сётӥськом. Уждун но дыраз, толэзьлы быдэ тыриськом. Соин калыкмы мылысь-кыдысь тырше. Ужасьёсмы но йыло, миым ватсаса кӧня ке выль ужан инты усьтӥм. Адямиос дорамы шумпотыса лыкто. Али но куриськисьёс вань. Продукцимы данак интыосы кошке. Басьто Иж, Глазов городъёс, Красногорск, Игра, Балезино, Дэбес, Якшур-Бодья районъёс. Дорамы вуо Пермь областьысь но. - Александр Васильевич, 26 ар огазеяськонэн кивалтӥськоды ни. Кин тӥляд матысь юрттӥсьёсты? - Валтӥсь инженер Галина Тронина но бухгалтер Надежда Шуравина. Кыкназы быдэн 25 ар татын ужало ни. Галина Викторовна чакласа возе вӧй, йӧл сиёнъёс поттон технологиез. Надежда Федоровна азьло 15 ар экономист луыса ужаз. Лыдъян-чотанэз вить чиньызэ кадь тодэ. Производствоен быгатыса кивалтэ. Фаина Васильевна Корепанова нош лабораториен - Людмила Михайловна Ившина. Таос матысь юрттӥсьёсы луо. Но мон шуысал, директорлы быдэс коллектив юрттэ, ачим но соослэсь ужамзэс адӟытэк уг улӥськы. Кивалтӥсь котькуд ужасез син азяз возьыны кулэ, кызьы улэмзэ но одно ик тодыны. - Сиён-юон поттӥсь котькуд предприятиын нимысьтыз инты басьтэ производственно- технологической лаборатория. Тӥляд со кызьы ужа? - Кызьы верай ни, лабораториын ваньзэ усто бергатэ Людмила Ившина. Со азьын уно куронъёс сыло, тужгес бадӟымез но кулэез луэ хозяйствоосысь басьтэм йӧллэсь но поттэм сиён-юонъёсмылэсь ӟечлыксэс эскерон. Ужмы уг дугдылы. Тани ваем йӧлэз умой- умой ӧд ке чакла, шудтэм учыръёс но луыны быгатозы. Нош напсэ ӧд ке тоды яке сое кулэстӥд ке, йӧл вузасьёсмы ыштонъёс адӟозы. Крестьян хозяйствоез, эштосэз, кооперативез одӥг пол коть пӧяд ке, со тыныд ноку уз оскы ни, оло йӧлзэ но ворттэмысь дугдоз. Лабораториямы тужгес но чырткем, быгатыса ужа микробиолог Нина Владыкина. Усто специалист дорамы лыктӥз, Ижысь гурт удысъя институтэз йылпумъямез бере. Оскем ужзэ ӟеч быдэсъя, уката ик юн эскере чырсатэм сиён-юонэз. Микробиолог озьы ик чакла вуэз, омырез, йӧл чырсатонэз (Ӟатчалан), обрудованиез, складэз но мукетсэ. Ёзъёсмы вань на Вуж (сепараторной цех) но Якшур-Бодьяын. Котькудаз отын быдэн одӥг лаборант ужа. Кыкназы ужзэс усто быдэсъяло. Огъя вераса, огазеяськонлэн азьланезлы осконэз бадӟым. Арысь аре юнмало йӧл сётӥсь хозяйствоосын кусыпъёсыз, умоя продукцилэн ӟечлыкез, сое калык шумпотыса басьтэ. Нош калыкмы юнме верамтэ: вӧй ке сиемед потэ, тросгес сюйын погылляськы. Туспуктӥз Владимир Беломорских. Удмурт Элькунысь Правительстволэн Распоряжениез Ижевск город, 29 апрель 1999 ар � 157-р. Вуын улӥсь макеосты утён, йылэтон но пайдаё кутон вылысь но "Пӧйшур дунне сярысь" Федеральной законэз лыдэ басьтыса: 1. Камуралрыбвод управленилэн 1999 арын 19 апреле кутэм 16-П номеро приказэзъя шаерысьтымы вуосын чорыгъёс мызь лэзён вакытэ чорыганэз алоно 1999 арын 1-тӥ майысен 10-тӥ июнёзь. 2. Камуралрыбводлэн Научно-промысловой кенешезлэн векчи чорыгъёсты мызь лэзён вакытазы дырез но нормаосты чакласа нимысьтыз кутылыны лэзён сярысь 1999 арын 7-тӥ апреле юнматэм решениеныз соглаш луоно. 3. Чорыгъёслэн мызь лэзён вакытазы уг яра: чорыганы вань ӵыпетъёсын, кинлэн асваньбурзы луэм шоры учкытэк; уяны подвесной но стационарной моторъёсын судноосты, Удмурт Элькунысь Чорыгъёсты утёнъя кун инспекцилэсь, Удмурт Элькунысь МВД-лэсь, Удмурт Элькун Кивалтэтысь Пӧйшуран хозяйствоя управленилэсь, Элькунысь пӧйшурасьёслэн но чорыгасьёслэн огазеяськонзылэсь уян средствооссэс но Удмурт Элькунысь Чорыгъёсты утёнъя кун инспекцилэсь нимысьтыз кагаз басьтэм нимаз адямиосты вератэк; вузаны мызь лэзён вакытэ нимаз адямиосын но чорыгась бригадаосын кутэм дуно но утиськись чорыгъёсты. 4. Навигация вакытэ уг яра: уяны нокыӵе пыжъёсын Сива шуретӥ - солэн вожысеныз чугун сюрес выж дорозь (инкуазьлы памятник); уяны подвесной моторъёсын судноослы Иж шур вылтӥ - Воложка гуртысь выжлы вылӥысен Заря посёлоке бетон сюрес вылысь выж дорозь (Бобр заказник); уяны шаерысьтымы вань шуръёсын но ӵыпетъёсын подвесной но стационарной моторъёсын пичи судноослы уин 24 часысен 4 часозь. 5. Удмурт Элькунысь Чорыгъёсты утёнъя кун инспекциен кенешыса огкылэ вуоно но Удмурткомприродаын чорыг будэтонъя но экологияя эскерон (экспертиза) ортчытоно: чорыг будэтон тыметъёслэн ярдуръёсазы но вуосты утён интыосын промышленной, сельскохозяйственной, гражданской, военной но мукет объектъёсты лэсьтон, выльдон но паськытатон ужпумъёсъя; чорыгъёслы, вуын улӥсь мукет пӧйшуръёслы но турын-куаръёслы изъян ваись минерал удобрениосты но мукет веществоосты чорыг будэтон тыослы но вуосты утён интыослы матын возён-интыян ужпумъёсъя; гравий но луо суретъёсты, мукет лэсьтӥськон материалъёсты ярдуръёсын но вуосты утён иинтыосын возёнъя; чорыгъёс мызь лэзён вакытэ вуосты чылкытатон сооружениосты планэн чаклам тупатъян- выльдон ужъёсъя. 6. Вань мылкыд карисьёслы чорыганы лэзёно ярдурысен визнанэн гинэ (курикъёслэн огъя лыдзы куиньлэсь ятыр медаз луы) чорыг мызь лэзёнтэм интыосын: курико визнанэн лицензияя чорыгаку - лицензиен тупатэмъя. 7. Предприятиослэн, организациослэн, учреждениослэн кивалтӥсьёссылы, нимаз ужбергатӥсьёслы, кудъёсызлэн вань вуосты утён интыосын но ӵыпетъёслэн ярдуръёсазы ву басьтон сооружениоссы, озьы ик чорыг будэтон тыосын пӧртэм ужъёс радъясьёслы ӵектоно; чорыг будэтонъя но экологияя экспертиза ортчытыны но соя кагазъёсты Удмурт Элькунысь Чорыгъёсты утёнъя кун инспекцие сётыны; чорыгъёсты ву басьтон сооружениосы шедемлэсь утёнъя ужрадъёсын нимысьтыз график дасяны, чорыгъёсты утёнъя ёзъёсын тупатэм дырез чакласа. 8. Вуосты утён интыосын но ярдурлы матын огдырлы сооружениос лэсьтонэз, чорыгасьёслэсь бригадаоссэс интыянэз радъяно чорыгъёсты утёнъя ёзъёслэн лэземзыя. 9. Удмурт Элькунысь Чорыгъёсты утёнъя кун инспекцилы, Удмурт Элькунысь МВД-лы, Удмурт Элькун Кивалтэтысь Пӧйшуран хозяйствоя управленилы, Удмурткомприродалы асьсэлэсь ужзэс радъяно, шаерысьтымы шуръёсын но ӵыпетъёсын чорыгъёслэсь лыдзэс йылэтонъя, вуосты кырсёмемлэсь утёнъя но лэзьымтэ азьын лушкем чорыгасьёсын нюръяськонъя нимысьтыз ужрадъёсын планэз чакласа. 10. Удмурт Элькунысь город но ёрос администрациослэн тӧрооссылы, Удмурт Элькунысь МВД-лы, чорыг кутылонъя предприятиослэн кивалтӥсьёссылы, нимаз адямиослы ӵектоно чорыгъёсты утёнъя ёзъёслы транспортэн юрттыны но шаерысьтымы шуръёсысь но ӵыпетъёсысь чорыгъёсты утёнъя ужрадъёс ортчытыны. 11. Та распоряженилэсь быдэсъяськемзэ эскерыса возёз Удмурт Элькунысь Чорыгъёсты утёнъя кун инспекция, Удмурт Элькунысь Госторгинспекция, Удмурт Элькунысь МВД. 12. Та распоряжениез печатлано "Известия Удмуртской Республики", "Удмуртская правда", "Удмурт дунне" газетъёсын. Удмурт Элькун Кивалтэтлэн Тӧроез Н. А. Ганза. 15 мае - Дуннеысь семьялэн нуналэз Тонтэк мон гожтымтэ кырӟан - Наташа, тонэ уд но тодма, ява. Чеберскем, синъёсад тылгизьыос пишто, пальышамдэ но кемалась адӟем вал. Учкиськод ке, шуд пӧлын пыласькиськод кадь. Вера, мар луиз тонэныд? - вазиськиз ачиз кадь ик шорлыдо аресъем эшезлы монэн артэ сылӥсь нылкышно. - Тодӥськод ук, макем уг пот вал палтури кылеме. Вӧзысьтым котьку но адӟеме потылӥз кужмо, визьмо но мон сярысь сюлмаськись пиосмуртэ, - капчияк мынектӥз пумитаз Наташа. - Малпасько ни вал, сыӵе мурт мон понна вордӥськымтэ. Нылы ке но будэ, мӧзмись сюлэмме со шунтыны уг быгаты. Семьямы пилиськем тусь выллем, нош шудо луэм потэ. Эше верамъя, куинь толэзь талэсь азьло вазиськи районысьтымы тодматскон службае. Ноку уг оскиськы вал та выллем удысъёслы, нош таяз учыре кин ке валтӥз кадь. Уд но оскы, шедьтӥ аслэсьтым йыромем шудме, кузпалъяськон сярысь куриськон но гожтӥмы ни. Тодысалыд ке макем мон шудо! Нылкышноослэсь та вераськемзэс амалтэк кылзыса, малпаськонэ уси: зэмзэ но, вӧзысьтымы кӧня мурт ас палзэ шедьтытэк улэ. Тодматскон службалэн уженыз матэгес тодматсконо кариськи. Семья кылдытонлы оскон татын тымиськемын вылэм. Огназы улӥсьёслэн но ӝыныё семьяослэн лыдзы арысь аре йылэ. Со лыдпус будэ кузпалъёслэн люкиськеменызы но, озьы ик семья кылдытыны мылкыд карисьёс ӧжыт луэмен. Соин валче, тодмасткон службае трос гинэ юрттэт курыса вазиськисьёс. Котькуд гожтэтын адямилэн улонэз, куректонэз, осконэз. Юкаменск районысь "Я+Я" тодматскон служба одӥг ар ӵоже ужатозяз гинэ картотекаяз пусйиз сюрс пала вазиськисьёсты. Юрттэт курем сяна, тау карон гожтэтъёс но вуылыны кутскизы. Одӥгаз шуэмын: "Уг оскиськы вал, аслэсьтым яратонме сокем ӝог шедьтонэлы, нош пиелы - атай. Тау сюлмаськемдылы. Вожъяськыса учкылӥ нылкышноос шоры, удалтэм шудпуйыослы. Табере мед вожъяськозы мыным. Эн куштӥське ӟеч уждылэсь, азьланяз но кизе ӟечлык". Киям кутӥсько мукет гожтэтъёсты. "Туж бадӟым тау адресъёсын гожтэт келямдылы. Нош ик асме шедьтӥ улонын". "Йыбырттӥсько сюлмаськемды, вазиськемды, семья кылдытыны юрттэмды понна. Котькуд адямиен нимаз ужаськоды, куронъёссэс но сюлмаськонъёссэс лыдэ басьтыса. Тау ас палме шедьтыны юрттэмды понна". "Тау, огнын улонлэсь мозмытӥды. Ужды тӥляд паймымон: кык ӝыныосты огазеяса, одӥг семья кылдытӥськоды. Улон ик чебер буёлъёсын шобырскиз кадь - мон вӧзын яратоно муртэ. Ми туж шудоесь". Юкаменскысь тодматскон службае вазисько 16 аресысен 75 аресозь адямиос. Республикаысьтымы пӧртэм районъёсысь но городъёсысь сяна, гожтэтъёс вуо Россиысь сю пала городъёсын, озьы ик Украинаын, Белоруссиын, Узбекистанын, Эстониын, Казахстанын улӥсь нылкышноослэсь но воргоронъёслэсь. Кусыпъёс тупатэмын та выллем трос мукет службаосын, республикаысьтымы но Россиысь газетъёслэн редакциосынызы. Служба юрттэт сётэ дунтэк, вазиськыны луоз гожтэтэн яке нимысьтыз лыктыса. Котькуд абонентлы картотека усьтӥське. Семья кылдытыны оскондэс ӧд ыштэ на ке, гожтэ таӵе адресъя: 427630, Удмурт Республика, Юкаменское село, а/я 10 "СЗ". Гожтэтады понэ асьтэлэн адресэныды маркаосын конверт - сотэк ивор басьтыны уд быгатэ. Пытсэт сьӧрын пукисьёслэн куронъёссы уг кутӥсько. Семьялэн калык куспо нуналэныз ӟечкыласа, шаерысьтымы вань семьяослы сӥзем потэ шудо улон но ог-огдэс валан. Нош кыӵе ке валамтэос кылдӥзы ке, эн дыртэ ас ӝыныдэс палэнтыны. Кин ӧз шедьты на ас палзэ, оскондэс эн ыштэ - яратон арлыдъёсты уг лыдъя, тӥляд кырӟанды азьпалан. С. СИДОРОВА. Юкаменск село. Шӧкыч Карт утчасько Чик шӧдттэк шорысь оген кылиськиз. Кык нылъёсы вал - бызизы. Картэ ӟистылыны яратэ вал, огпол мултэс макмырам дыръяз аракы ӧй сёты но - чоньдӥз. Оген улон шимес вылэм. Табере кузпалэным азьло кызьы улэммес малпасько но, чик тодам уг лыкто ни урод сямъёсыз но, выросъёсыз но. Но мар карод на: гырпум матын ке но, куртчыны сузёно ӧвӧл, коросэн музъеме ватэм адямиез уд ни улӟыты. Нош улэп муртлы улоно. Бен, оген улон туж шимес вылэм. Соин ик карт утчаны кутски. Тулыс вуэмъя, мылкыд бурдъяське, нош борддоре уд тэтча ук. Мон сокем пересь ӧвӧл на, 55 арес тырмиз но, али гинэ пенсие потӥ. Ужам шуизы: шутэтскы, егитъёс пӧлысь уж курисьёс трос. Ма, малпай мон, пенсие сокем трос ӧвӧл ке но, огнамлы вить сю манет тырмоз. Тани огпол басьтӥ ни вить сю манетме. Но табере ӵукна нокытчы дыртыны, эше мынам - телевизор гинэ, сад-бакчаям ветлӥсько, нош кияр парникме тупатыны гинэ но огнам чик кынары уг тырмы. Картэ уж бераз ӟистылэ ке но вал, ваньзэ ачиз лэсьтылӥз. Паймисько ни мар карыны. Ӟудэменым карт утчасько шуыса газет бамын ялон печатлай. Ӧй но малпа вал, почтае сомында гожтэт вуоз шуыса. Куинь нуналскын кызьлэсь унозэ басьтӥ. Ну, пуки быдэс ӝыт соосты лыдӟыса но сётэм телефонъёсыя жингыртылыса. Нырысь-валысь мон троссэ вуэм гожтэтъёсты кесяса куялляй: огез горд пештал вылэм, мукетыз - пилеш, куинетӥез туж ӝужыт мугоро, ньылетӥез - туж зӧк, витетӥезлэн туала арын но воксё дышетскемез ӧвӧл, куатетӥез - доцент, немалы мыным сокем трос дышетскем адями, ачим мон техникумез гинэ йылпумъяй но дӥсь керттон цехен гинэ кивалтӥ бере. Гожтэтъёсты келяны мукет мугъёс но шедизы: кыкез пиосмуртъёс ӧз танӥське, вина юыны ярато шуыса, огез улон интые понна гинэ кышнояськысал, пе, мукетыз соглаш пумиськылыны гинэ, ачиз кышноен улэ - таӵеез мыным воксё кулэ ӧвӧл, но кызьлэсь уно пиосмуртъёс пӧлысь пумиськыны бырйи ик витьсэ. Тулыс шунды шунтэмъя кутски пумиськонъёсы ветлыны. Огеныз сад-бакчаям пумиським, но киосыз мыркесь вылэм - улляй. Кыкетӥез дораз ӧтиз, вина басьтэм, огчарка юэммы бере, соку ик ӟыгыръяськыны кутскиз - таиз дорысь ачим пегӟи. Куинетӥез тюрьмаын пукем, таизлэсь кышкай, берло пумиськом на шуыса пӧяй но ӧй ни пумиськылы. Ньылетӥез аслэсьтым егитгес вылэм, таизлы бызьысал, но куттоз, малпай. Берпуметӥез востэм пиосмурт шедиз, шуэ: кут монэ патере, ӧвӧл мынам улон интые, тон мыным кельшиськод, мон кельши ке - вералод, соку адӟом, луомы-а ӵошен? Мон соглаш луи. Нош ачиз малы ке уг но жингырты, уг но лыкты. Малы меда? Мон витисько сое, огнам мыным мӧзмыт. Нимыз солэн Камаш вал - шер вашкала удмурт ним, кин сое тодэ, вералэ, мед жингыртоз мыным яке мед лыктоз дорам. Нимы мынам... Огаш. Лучшие выпускники техникума получают рекомендацию и зачисляются на 1 курс ИжГТУ на факультеты "Промышленно-гражданское строительство" и факультет "Робототехники" по специальности "Сварка в строительстве". Выпускники Ижевского монтажного техникума по специальности "Строительство зданий и сооружений" получают диплом техника-строителя; - по специальности "Монтаж внутренних санитарно-технических систем" и "Монтаж систем вентиляции и кондиционирования воздуха" получают диплом техника- технолога; - по специальности "Эксплуатация подъемно-транспортных и строительных машин" - техника-механика; - по специальности "Архитектура жилых и общественных зданий" - техника- архитектора; - по специальности "Бухгалтерский учет, контроль и анализ хозяйственной деятельности в строительстве - бухгалтера (1-я ступень обучения) и бухгалтера- юриста (2-я ступень обучения); - по специальности "Строительство и оценка технического состояния промышленных и гражданских зданий" - получают диплом техника-строителя-оценщика; - по специальности "Монтаж и наладка электрооборудования предприятий и гражданских зданий" - техника-электрика. Студенты монтажного техникума в процессе обучения имеют возможность получить рабочую профессию сварщика, бетонщика, отделочника, плотника, кровельщика. Кроме этого, техникум предоставляет возможность за дополнительную плату получить удостоверение по обучающим модулям "Менеджмент", "Предприниматель малого бизнеса", "Коммерсант", "Бухгалтер", "Оператор ЭВМ", "Секретарь-референт". Учеба В техникуме, начиная с 1 курса, параллельно с общеобразовательными и общетехническими предметами изучаются специальные предметы В целях более глубокого изучения материала по многим предметам занятия проводятся по подгруппам (черчение, рисование, лабораторные работы, иностранный язык, производственное обучение) За время обучения студенты изучают теоретический материал, выполняют лабораторные работы, курсовые проекты, геодезическую практику, учебную и технологическую, преддипломную Преподавательский коллектив техникума с педагогическим высшим или высшим техническим образованием По окончании курса обучения студенты выполняют и защищают дипломный проект Традиции Студенты техникума в процессе обучения выполняют общественные поручения, приобретают организаторские навыки, готовят доклады, сообщения, проводят общегрупповые и общетехникумовские мероприятия В техникуме есть свои традиции вечер посвящения первокурсников, встречи со знатными людьми города, последний звонок, день открытых дверей, торжественное вручение дипломов и т. д. В техникуме работают технические кружки, где студенты углубляют свои знания, делают макеты, приспособления для оборудования кабинетов Физкультура и спорт Значительная часть студентов является активными спортсменами В техникуме развиты такие виды спорта, как волейбол, баскетбол, лыжи, легкая атлетика, н/теннис Спортсмены техникума завоевали в городских, республиканских соревнования много кубков и вымпелов Ежегодно в техникуме проводятся спортивные недели, по результатам которых награждаются лучшие спортсмены и активисты Спорт в нашем техникуме является массовым. ПОДАВАЙТЕ ЗАЯВЛЕНИЯ В НАШ ТЕХНИКУМ! ДОБРО ПОЖАЛОВАТЬ! Наш адрес 426000, г Ижевск, ул Кирова, 110 Телефон (3412) 43-08-61, факс (3412)23-90-58 Е-маил ростмастег@имт.удм.ру ЖУРНАЛИСТЪЁСЫН ПУМИСЬКОНЪЁС Шоркарез котыртыса Асьме республикаын сюресъёс арысь аре чеберско. Озьы шуэ "Удмуртавтодор" предприятилэн тӧроез Кун Кенешлэн депутатэз Александр Соловьев. Кызьы бен солы уд оскы? Тани Ижевск, Сарапул, Глазов но Воткинск городъёсысь сюресъёсты нокызьы уд ӵошаты соосты герӟасьёсыныз. Город сьӧры потӥськод гинэ, мукет дуннее вуиськод кадь. Сюрес дуръёс чылк-чылк утялтэмын, корт кенеръёсыз сьӧдэн-тӧдьыен буямын, куд-огез соос уин тылъёсын ӝуало. Выжъёс но озьы ик умой герӟамын. Со лэсьтӥське, сюрес вылын шудтэм, шуккиськон учыръёс медаз луэ шуыса. Огъя вераса, ваньмыз со умой. Но сюрес лэсьтӥсьёслы-утялтӥсьёслы но капчи уг йӧты. Александр Васильевичлэн ивортэмезъя, азьло аръёсы предприятилэн тыронъёсыз ӧй вал. Табере югдур воштӥськиз, "Автодорлэн" 114 миллион манет тыронъёсыз люкаськемын. Сюрес лэсьтӥсьёс дыраз уждун уг басьто ни. Али март понна сёто. Озьы ке но, предприятие пумен юнматэ материально-технической инъетсэ, татын пыӵато выль амалъёсты, усто техника басьто, сюрес лэсьтонъя конкурсъёс радъяло. Удмуртиысь сюрес лэсьтӥсьёслы кӧня ке юрттэ Россия но. Кылем арын сюресъёсъя федеральной фондысь 54 миллион манет коньдон висъямын. Туэ но юрттэт вуоз. Асьмелэн фондысь но Москваысь уксёен миым 93 иськем выль сюресъёс вуттэмын, туэ но сомында ик лэсьтыны чаклало. Со сяна, туэ 25 выль выжъёс ӝутскозы, 10-сэ тупатъялозы. Федеральной фондысь 72 миллион манет вуыны кулэ. Нош сюресъёсмес выльдыны гинэ ичизэ 200 миллион манетлэсь уно уксё кулэ луоз. Берло дыре сюрес лэсьтон уката дуноя. Али одӥг иськемзэ вуттыны шорлыдын 4 миллион манет кулэ. Нош кӧня ке ар талэсь азьло со ньыль пол дунтэмгес вал. Мар лэсьтӥське, Ижвеске грузовой автотранспорт медаз пыра, сьӧртӥз мед ортчоз шуыса? "Удмуртавтодор" та ужпумез син азяз возе. Кык интыетӥ котыртыса кошконо сюрес лэсьтӥське. Одӥгез, Иж тымет сьӧртӥ Шаберды но Нылга-Ува сюрес вылэ потоз. 4,5 миллион манетлы проектэз дась ни. Кузьдалаез 34 иськем. Со туж зол луыны кулэ - И категориен, таӵеез республикаямы ӧвӧл на. Та уже ичизэ 300 миллион манет коньдон висъяны чакламын. Сое учкемын федеральной бюджет чотын лэсьтыны. Кыкетӥез, Можгала сюресэз Завьялово, аэропорт пыр герӟалоз Воткинске нуись трактэн. Солы али проект дасяло ни. Та сюресэз вуттыны ӧжытсэ 45 миллион манет коньдон кулэ. Тӥни озьы шаерамы сюресъёс арысь аре чеберско. Ваньмыз ик предприятиос сюресъёсъя территориальной фондэ коньдон дыраз тырысалзы на ке, югдур эшшо но умойгес луысал. Г. РОМАНОВ. ШӦКЫЧ Шальтрам ке но... коммерческой Нокинэн кенешытэк, нокинлэсь юатэк кылем арын 20 июле Удмурт Правительстволэн борддоръёсыз сьӧрын "вордскиз" 649 номеро документ. Со постановленилэн нимыз но туж мудрон, пуштросэз но валантэм. Вакчияк вераса, со герӟаськемын республикаямы коммерческой шуон автобусъёсты кутонэн. Мар со сыӵе? Со сыӵе ик шальтрам автобусъёс. Ветло соос асьсэ маршрутъёстӥ ик. Но тупатэм постановлениея отын одӥг ноез вань. Автобуслэн азьпалаз гожтэмын кык кыл гинэ: "Льготы недействительны". Озьыен, тынад со автобусэ коньдонтэк пыремед уг луы ни. Коть тон пенсионер лу, коть ветеран, коть депутат - номыр уз пӧрмы. Проездной билетъёс гинэ но уг юртто, ява. Шонер-а кутэмын меда 649 номеро постановление? Со ужез алигес сэрттӥзы-пертчизы Ижевскысь Октябрь ёросысь судын. Ӵапак со документ ик умойтэмен лыдъямын но постановлениез воштыны косэмын. Оло, вылез правительство маке ӟечсэ малпалоз ик? Н. НИКИТИН. КУН КЕНЕШЛЭН СЕССИЯЗ "Портфельёс" люкылэмын. Табере - уж борды Ужзэ азинтэ Кун Кенешлэн кыкетӥ созывезлэн нырысетӥ организационной сессиез. Та нуналъёсы депутатъёслы эскероно-пертчоно луоз тямыс пумо ужпумез. Соос пӧлын ялан ужась комиссиосты юнматон но кивалтӥсьёсты быръён, Кун Кенешлэн Тӧроезлы воштӥсьёсты юнматон. Таосыз ужпумъёс учкемын вал 12 мае. Ватонэз ӧвӧл: сессилэсь кенешонзэ депутатъёс витизы кыӵе ке бадӟым нуналэз кадь. Котькудӥзлэн тодэмез потэ, кинэ аслыз воштӥсе дэмлалоз Александр Волков? Кин шедёз ялан ужась комиссиосы, Кун Кенешлэн Президиумаз, Правительствое? Огъя вераса, кызьы мыноз кивалтон удысэз люкылон. Кенешон кутскиз юбилярез ӟечкылан бордысен. Та нуналэ ӵапак 50 арес тырмонзэ пусйиз Кез районной больницаысь валтӥсь врач депутат Николай Ворончихин. Сяська керттэтэн ӵош Кун Кенешлэн Тӧроез солэн гадь вылаз бырттэ калыкез эмъян удысын сӥё- дано ним сётэм сярысь пус. Нуназе шорозь депутатъёс ужазы ялан ужась комиссиосты эскерон бордын. Таяз учырын воштӥськон пыртэмын экономической политикая но бюджетъя комиссие. Со кыклы люкемын. Нырысетӥез выроз бюджетэн, налогъёсын но коньдон ужпумъёсын, кыкетӥез - инвестициосын но ваньбурен. Кивалтӥсе юнматэмын депутатъёс Софья Широбокова но Раиль Галиахметов. Социальной политикая удысэз нуоз депутат Наталья Харина. Регламентъя но Кун Кенешлэсь ужзэ радъянъя комиссия куинетӥзэ оскемын Сарапул городысь депутатлы Геннадий Абросимовлы. Озьы огкутскемен ньылез но кивалтӥсьёс ӵемтылытэк, могатэк ортчизы, шуыны луоз. Мукетъёсыз юнматэмын луозы сессилэн кыкетӥ нуналаз. Вералом на: Кун Кенешлэн ялан ужась комиссиез таяз созывын 9 луоз (сояз 8 вал). Кызьы радъяськиз Александр Волковлы воштӥсьёсты быръён? Та котырын трос ке но бугыръяськонъёс, пӧсекъянъёс вал, парламантлэн залаз та нуналэ со ӧз шӧдӥськы ни. Тулкымъяськонлэн кужымез ӧръяськиз калык пӧлы. Самой со вуттӥз удмуртлыкмес утён сярысь сюлмаськись-бызьылӥсь адямиосты Кун Кенешлэн юртэз азе. Кезьыт куазь, сӥсъясь тӧл, зор но соосты ӧз кышкаты. Кун Кенешлэн Тӧроезлы быръёнъя но выльдӥськон ортчиз. Табере Александр Волковлэн кык нырысетӥ воштӥсез - Владимир Агашин но Павел Вершинин. Агашин понна куаразэ сётӥз 61 депутат, Вершинин понна - 53, Светлана Смирнова люказ 63 куара. Пусйыны кулэ: Кун Кенешлы Тӧрое Удмурт парламентлэн но Вылӥ Советлэн историязы нырысьсэ юнматэмын кышномурт. Сое умоен пусйыны кулэ, дыр. Сессилэн нырысетӥ нуналэз таин йылпумъяськиз. Ӝытазе депутатъёс люкаськылӥзы асьсэлэн фракциосазы, выльысь кутскыса эскеризы на музон интыосы ӵектэм адямиослэсь кандидатураоссэс. Сессилэн кыкетӥ нуналаз ужан "портфельзэс" басьтозы на эшшо 5 ялан ужась комиссиослэн кивалтӥсьёссы. Выль Правительствое аслэсьтыз кандидатъёссэ вералоз солэн Тӧроез Николай Ганза. Нырысетӥ сессия ужзэ азинтэ. Л. МЕДВЕДЕВА. Поступающие сдают экзамены по программам, утвержденным Министерством образования Российской федерации. На базе 9 и 11 классов по русскому языку - диктант, по математике - письменно в форме тестирования. Без вступительных экзаменов зачисляются лица награжденные похвальной грамотой по окончании девятилетней школы и золотой или серебряной медалью после окончания средней школы. Без экзаменов зачисляются офицеры, прапорщики, мичманы Вооруженных Сил России, уволенные с военной службы в запас по состоянию здоровья, возрасту или сокращению штатов (в течение 2-х лет после увольнения). Основанием для зачисления офицеров, прапорщиков и мичманов, уволенных в запас, является удостоверение установленного образца за подписью командира (начальник) военной части на право получения льгот и преимуществ, установленных постановлением ЦК КПСС и Совета Министров СССР от 20.01.60 г. за Н 74. Лица, имеющие в аттестате "4" и "5", зачисляются на специальности "Монтаж внутренних санитарно-технических систем" и "Монтаж систем вентиляции и кондиционирования воздуха" без вступительных экзаменов. Заявление о приеме подается в приемную комиссию на имя директора с указанием вида обучения, специальности и курса, с приложением: 1. Документ о девятилетнем или среднем образовании (в подлиннике). 2. Медицинская справка (форма Н 086-у). 3. 4 фотокарточки (снимки без головного убора, размером 3х4). 4. Характеристика из школы. Заявления принимаются на дневное отделение: на базе 9 классов с 1 июня по 30 июня; на базе 11 классов с 1 июня по 14 августа. на заочное отделение с 5 мая по 15 августа. Вступительные экзамены на дневном отделении: на базе 9 классов с 1 июля по 15 июля; на базе 11 классов с 15 августа по 25 августа. На заочном отделении вступительные экзамены в форме собеседования. Дополнительные телефоны для справок: Учебная часть: 43-07-34, заместитель по учебной работе: 23-15-51 - Онуфрий, асьмелэн сотовой телефонмы ӧвӧл бере, вашкала амалэн вераськоно луоз. Али ик бригадирлы вера, соляркамы быриз шу! Кизён ато ӝега. Суредэз Л. Прозоровлэн. Думаез уллялозы? Кун Думаез уллян, КПРФ-ез но Президентлы пумит сылӥсь мукет ёзъёсты ужаны лэзёнтэм сярысь Кремльын указъёс дасямын. Со сярысь ивортӥз "Эхо Москвы" радиостанцилы Кун Думаысь Кышкытлыклэсь утиськонъя комитетлэн кивалтӥсез Виктор Илюхин. Со указъёс кӧня ке нуналъёс куспын улонэ пыӵалозы, шуиз Кун Думалэн депутатэз. Выль вице-премьер Борис Ельцин Правительстволы нырысетӥ вице-премьере Николай Аксененкоез юнматӥз. Со сярысь ивортӥзы "Новости" агенстволы Россилэн Президенэзлэн пресс-службаяз ужасьёс. Примаковлэн правительствояз Аксененко чугун сюресъёсъя министр вал. Гондыр пиньлэсь шулан но вылэм Национальной музейын усьтӥськиз выль адӟытон - "Чузъяськись коллекция". Со экспедициосын шедьтэм, люкам, пӧртэм дауръёсысь асьме доры вуэм крезьгуро инструментъёс. Котькудӥз - аслыз гинэ кельшись, аспӧртэм куара сётӥсь. Учкисьёсмы адӟыны быгатозы, кыӵе инструментъёсын шудӥллям вашкала удмуртъёс, соос пӧлын - крезь, узьыгумы, тутэктон, чипчирган, шулан, кубыз, гумыос но мукетыз. Озьы ик тододы, ку, кыӵе вакытысен адямиос шудыны дышиллям мандолинаен, гитараен, домраен, арганэн, баянэн. Сюрс арлэсь кема музъемын кыллем гондыр пиньлэсь шулан. Со шедьтэмын Чеганда шайысь. Полом культураысь арбериос пӧлын - варган. Со удмуртъёслы тодмо ВИИ даурысен. Та инструмент бадӟым ик ӧвӧл - лэсьтэмын туй (бронза) пластинкалэсь, кузьдалаез дас сантиметр, пичи гинэ вандэм кылыз вань. Тодӥсьтэм муртлы тунсыко потоз сяла чипсон но... Нош тодӥськоды-а, мар со сыӵе пианола? ЪВИ даурысен тодмо вылэм ни та выллем маке. Нош кылдытӥз со 1895-тӥ арын Америкаысь инженер Вотей. Крезьгур грамотаез тодӥсьтэм мурт но быгатэ вылэм та арбериез шудытыны: педалез гинэ зӥбыса, перфолентае гожтэм гурез поттӥськод. Музейлэн коллекцияз сюрем пианола - со Михаил Тарасов усточилэн 1913-тӥ арын Макарьяысь (Ниж. Новгород ярмаркаысь) ваем инструментэз. Выль усьтэм выставкаысь адӟыны быгатоды граммофонэз, патефонэз, крезьгуро шкатулкаосыз но трос мукет тунсыкозэ. Лыктэлэ учкыны. Е. КУДРЯВЦЕВА. Сюлэмъёссы ӧз изме на Шумпотоно котькуд ӟеч ужлы, ку огез адями дась луэ мукетызлы юрттыны. Тани Селта ёросын одӥгаз семьяын нылпиоссы секыт висьыны усизы, соосты эмъяны ӝегатскытэк уксё тыроно вал. Анай-атайёс ёросысь калыклы вазиськизы. Арняскын гинэ Уть-Сюмси селоысь дас одӥг мурт юрттӥз. Та бадӟым уже пыриськизы райгазетлэн редакцияз, гослесхозын, райфинотделын, 1 но 5 номеро но Выль Моньяысь детсадын, райбиблиотекаын ужасьёс, Селта, Выль Монья, Валамаз школаысь дышетӥсьёс но дышетскисьёс. Бен, куанер улон вакытэ коньдон тросэн ӧз сётъялэ, но соиз шумпотымон: адямиослэн сюлэмъёссы измымтэ, муртлэн куректонэз вӧзтӥ соос уг ортчо, кӧня ке сюрс манет уксё бичанэ сюлэсь но уно адями пыриськиз. П. СКОБЕЛЕВ. Аслаз пуконэз Примаковлэсь дуногес 12 мае Россилэн Президентэз Евгений Примаковлэсь Правительствозэ отставкае келяз. Калык понна со туж валантэм, угось адямиос Россилэн премьер-министрезлы туж зол оско вал. Тямыс толэзь ӵоже Правительствоен киватыса, Примаков ассэ нокыӵе урод ужъёсын ӧз сьӧдма кадь. Озьы лыдъя калык. Но Примаковлэсь "янгышъёссэ", оло, юри калыклэсь та дырозь ватыса возизы? Мар малпа та пумысен Кун Думаын ужась депутат А. Солуянов? - 12 мае югдур ури-бери азинскиз. Нуназе котыр, 11 часэ, депутатъёслы тодмо луиз, Президент Е. Примаковез отставкае келям но со интые С. Степашинэз ӵектэм шуыса. Депутатъёсты та ивор абдратӥз, угось кӧня ке нунал талэсь азьло гинэ Думаысь фракциослэн лидеръёсынызы пумиськылыкуз, Примаков вераз, азьланяз но Президентэн огкылысь кариськыса ужалоз шуыса. Аслэсьтыз вамышсэ Б. Ельцин тазьы валэктэ: Примаков, пе, экономикаез ӝутон борды та дырозь дӥсьтыса ӧз басьтӥськы. Но, мынам малпамея, ужпум чик но со бордын ӧвӧл. Импичментлэсь кышкаса, Президент амалъёс утча Кун Думаез лэзьыны. Ас азяз пуктэм ужпумзэ быдэстон понна, Президент табере Кун Дума азе куинь пол потыны кулэ юри ляб быръем кандидатураосын. Премьер-министрлы ӵектэм муртъёсты депутатъёс куинь полаз ик умойтэмен лыдъязы ке, соку Президент Думаез уллян сярысь решение кутоз. Тӥни озьы Б. Ельцин возиськыны турттоз Президентлэн пукон вылаз. - Кыӵе фракциос умоен лыдъяло Президентлэсь вамышъёссэ? - Тросэз депутатъёс туж урод дунъяло. Али Б. Ельцинлэн указэзлы меӵак дурбасьто Жириновскийлэн демократъёсыз гинэ. - Зэмзэ ик-а С. Степашин премьер-министр луыны быгатоз? - Мон уг оскиськы солэн луонлыкъёсызлы. Примаков но экономикаез ӝутыны ӧз быгаты бере, пӧрмоз шат ужез та удысэз воксё но тодӥсьтэм адямилэн. - Кыӵе ужпумъёс бордысен кутскоз ужан нуналзэ Кун Дума 13 мае? - Чакламын импичмент бордысен. Примаковез юнме шорысь отставкае келяменыз, Президент та ужпумлэсь палэнскыны табере уз быгаты. Т. МИРОНОВА. В техникуме обучают по специальностям: На базе неполной средней школы - 9 классов На бюджетной основе: Срок обучения 1. "Строительство зданий и сооружений" 3 г. 10 мес. 2. "Монтаж внутренних санитарно-технических систем" 3 г. 10 мес. 3. "Монтаж систем вентиляции и кондиционирования воздуха" 3 г. 6 мес. 4. "Эксплуатация подъемно-транспортных и строительных машин" 3 г. 6 мес. На платной основе: 1. "Экономика, бухгалтерский учет, контроль и анализ хозяйственной деятельности в строительстве 2 г. 10 мес. 2. "Архитектура зданий" З г. 10 мес. 3. "Правоведение" 2 г. 10 мес. Стоимость обучения за год 3800 р., внесение платы за обучение по семестрам На базе полной средней школы -11 классов на бюджетной основе: 1. "Строительство зданий и сооружений" 2 г. 10 мес. 2. "Строительство автомобильных дорог и аэродромов" 2 г. 10 мес. 3. "Монтаж и наладка электрооборудования предприятий и гражданских зданий". 2 г. 10 мес. На платной основе: 1. "Экономика, бухгалтерский учет, контроль и анализ хозяйственной деятельности" 2 г. 10 мес. 2. "Монтаж и эксплуатация оборудования и систем газоснабжения" 2 г. 10 мес. На базе среднего образования �"Строительство зданий и сооружений" 1 г. 10 �"Техническая эксплуатация зданий и сооружений" 2 г. 10 мес. �"Строительство автомобильных дорог и аэродромов" 2 г. 10 мес. �"Водоснабжение и водоотведение" 2 г. 10 мес. �"Монтаж и эксплуатация внутренних сантехнических устройств" 2 г. 10 мес. �"Монтаж и эксплуатация оборудования и систем газоснабжения 2 г. 10 мес. �"Хозяйственное право" 2 г. 10 мес. �"Монтаж и наладка электрооборудования" 2 г. 10 мес. �"Экономика, бухгалтерский учет, контроль и анализ хозяйственной деятельности" 2 г. 10 мес. �"Эксплуатация и ремонт подъемно-транспортных, строительно-дорожных машин и механизмов" 2 г. 10 мес. Стоимость обучения по специальностям: "Хозяйственное право" и "Экономика, бухгалтерский учет, контроль и анализ хозяйственной деятельности" - 2500 р. за год. По всем остальным специальностям заочного отделения стоимость обучения 2200 р. за год. Рабочие профессии: - электросварщик - автослесарь - оператор котельных установок - каменщик-печник - плиточник-облицовщик - штукатур-маляр - водитель категории "В" - бухгалтер - пользователь ПЭВМ - геодезист - художник-оформитель - стропальщик - слесарь-сантехник Планируется подготавка по следующим специальностям: - кровельщик по металлическим кровлям - жестянщик - слесарь КИПиА - ответственный за эксплуатацию газового хозяйства - слесарь по эксплуатации и ремонту подземных газопроводов - машинист башенных кранов - машинист мостовых и козловых кранов - инженерно-технический работник, ответственный за содержание грузоподъемных машин в исправном состоянии - повышение квалификации мастеров, бригадиров � индивидуальные заказы на сварочные работы � разрезы элементов строительных машин и механизмов � проекты индивидуального строительства (архитектура, дизайн) � косметический ремонт жилых и общественных помещений, облицовочные работы � макеты (действующие) по производству строительно-монтажных работ Мария Кибардина Кисаль гуртэ Анатолий Григорьевлэсь адӟем карыса Кисаль гуртэ уг лоба самолёт, Уг ветлы поезд но такси. Мар веранэз, уг лоба вертолёт, Трамвай но чик уг вуылы татчы. Гужем тузон пӧлтӥ, нош толалтэ лымыетӥ Вамышъяло гуртоосы ураметӥ. Сӥзьыл вуэ ке, я кема возьмам тулыс, Гурт калыклэн вые ини нап дэрие пыдыз. Мар со балет яке кордебалет, Уг тодо чик мынам гуртоосы, Озьы ке но, пичи но со понна Уг висьылы йырзы. Янгышаса кадь вуылэм артистъёслэсь Кема тодэ ваё на шудэмзэс, Скамья вылын ог дас кузя пуко, Волятыса кылзэс. Чебер, яркыт синмальдытӥсь улон Лобӟе, кошке |вӧзтӥ, инвис сьӧртӥ, Кыӵе ужъёс мыно дунне вылын - Кисаль учке, пе, телевизортӥ. Шуныт зарезь пала, курортъёсы, Уг ветло малы ке гуртоосы, Дыртон-дӥсьтон, шурдыт мылкыд, гадь тыр шокчон Тодмо ӧвӧл, лэся, Кисалелы. Озьы ке но, уг пукы тэк Мынам гуртэ ноку, Кужмо пӧзись ошмес сямен, Тырше котьку. Йӧл-вӧй поттэ, ю-нянь но будэтэ, Я ныл сётэ, я кен басьтэ, Котькуд аре улон азьлань дыртэ. ... Кисаль гуртэ уг лоба самолёт. Медаз лоба. Адӟем уг пот. Йӧллэсь - спирт Озьы луыны быгатэ-а? Быгатэ вылэм. Сыр поттэм бере кыле йӧл ву - сыворотка. Отчы будэтоно шӧм (дрожжи), куиньмой пукето но быректо. Озьы спирт пӧрме. Водка интые со уггес мыны но технической ужъёслы яра. Дунтэм кылем-мылемез ваньбурлы пӧрмытыны одъязы Кез сырзаводын. Черкеслэн сюдонниез Глаз карын пичи гинэ куртчон инты усьтӥськиз. Солэн кузёез черкес Далхат Ижаев. Фамилиез но асьме столицаен герӟаськемын, кожалод. Далхат пыже черкес пирожки, нимаське со хычын шуыса. Басьяськисьёслы кельше выль сиён. Угось Далхат атай музъем вылаз сюанчиослы сиён пӧраса ужам. Тани та пӧраськемез сӥльлэсь но картошкалэсь, но аспӧртэм, соин ик та капчи мылкыдо черкес глазъёслы кельше. "Металлист" висъя улон инты Кивалтӥсь бордысь тросэз потэ. "Металлист" Глазовысь заводэн К. Ф. Касимов кузёяськыны кутскем бере, берло укмыс аръёсы соослэн котькудӥз сизьыметӥез ужасьлы выль улон инты басьтӥз. Малы ке шуоно, завод пуктӥз 115 квартираос. Отын уждунзэс но ас дыраз сётъяло, ялан сюлмасько выль вузъёс поттон сярысь. Кылсярысь, алигес поттыны кутскизы водопроводной но канализационной системаослы задвижкаос. Выльысь усьтэмын вал художественной вузъёс поттонъя цех, швейно- трикотажной фабрикаез ас бордазы кутӥзы, яке отын ик потто чебермам самоваръёсты. Вузъёссы кошко Югославие, Грецие, Финляндие, Австрие, Италие, Египетэ, Южной Кореяе, Японие, Тайландэ. Со бордысь потэ улон инты висъян но, уждунэз дыраз тырон но. П. ПЕТРОВ. Вордскем нуналзэ та нуналъёсы пусъе Кун Кенешлэн аппаратаз ужась Людмила Павловна Порцева. Солы ыстэмын таӵе ӟечкылан. Гажано Людмила Павловна! Вань сюлмысьтымы ӟечкыласьком тӥледыз вордскем нуналэныды, сое тӥ пусйиськоды ужась эшъёсыныды, тодмоосыныды но тӥледыз мур гажась муртъёсын ӵош! Тӥляд тодон-валанъёсты паськытэсь, тӥ быгатӥськоды улонлэсь выль куронъёссэ шӧдыны, секыт учыре, ваньзэ лыдэ басьтыса, котыр ласянь чакласькыса, решение кутыны. Кун службаын тыршем аръёсты возьмато: тӥледыз гажало но тау каро ӵош ужась эшъёсты; одӥг мылкыдын, огкадь малпанъёсын улӥсь адямиосты коллективе люканы, соосты пуктэм ужпумъёсты быдэстонэ ӝутканы но быдэстэм ужлэсь емышъёссэ кулэезъя дунъяны быгатэмды понна. Гажано Людмила Павловна! Адямиосын одӥг кыл шедьтыны, асьтэды пӧртэм учыръёсы шонер возьыны, капчи мылкыдо луыны быгатэмдылы синмаськыса, та сӥё-дано нуналады вань сюлмысьтымы сӥзиськом тӥлед, ӵыжы-выжыостылы но матысь муртъёстылы юн тазалык, семья куспын шудбур но выль азинсконъёс Удмурт Республикалэн сяськаянэз понна. Ӵош ужась эшъёсты. "Удмурт дунне" итӥське та ӟечкылан борды. Ижевский монтажный техникум, организованный в 1932 году, является одним из старейших учебных заведений Удмуртской Республики. В настоящее время техникум имеет два отделения: дневное и заочное. Возможно обучение рабочим специальностям, выполнение различных видов работ Техникум располагает двумя учебными корпусами, общежитием, спортивными залами. Учебные аудитории, компьютерные залы и лаборатории оснащаются современным оборудованием. В техникуме созданы все условия для успешной творческой работы, нормального быта, культурного и спортивного досуга студентов На дневном отделении подготовка техников ведется по специальности: СЗС - Строительство зданий и сооружений СТ - Монтаж внутренних санитарно-технических систем ПВ - Монтаж систем вентиляции и кондиционирования воздуха ЭММ - Эксплуатация подъемно-транспортных и строительных машин АЗ - Архитектура жилых и общественных зданий БУ - Бухгалтерский учет, контроль и анализ хозяйственной деятельности в строительстве (на платной основе) Удмурт Республикаысь Кун Кенешлэн Экономикаын политикая, асваньбурен герӟаськем ужпумъёсъя но инвестициосъя ялан ужась комиссиезлы тӧро юнматон сярысь Удмурт Ресупбликаысь Кун Кенешлэн Постановлениез Удмурт Ресупбликаысь Кун Кенеш пуктэ: Удмурт Республикаысь Кун Кенешлэн Экономикаын политикая, асваньбурен герӟаськем ужпумъёсъя но инвестициосъя ялан ужась комиссиезлы тӧрое юнматоно Галиахметов Раиль Ахсановичез. Удмурт Республикаысь Кун Кенешлэн Тӧроез А. А. Волков. Ижевск город, 1999 арын 12 мае. � 12-ИИ. Удмурт Республикаысь Кун Кенешлэн Тӧроезлы Нырысетӥ воштӥсь юнматон сярысь Удмурт Республикаысь Кун Кенешлэн ПОСТАНОВЛЕНИЕЗ Удмурт Республикаысь Кун Кенеш пуктэ: Удмурт Республикаысь Кун Кенешлэн Тӧроезлы Нырысетӥ воштӥсе юнматоно ВЕРШИНИН Павел Николаевичез. Удмурт Республикаысь Кун Кенешлэн Тӧроез А. А. ВОЛКОВ. Ижевск город, 1999 арын 12 мае. � 9-ИИ. Вершинин Павел Николаевич Вордскиз 1949-тӥ арын 3-тӥ ноябре Можга ёросысь Березовка гуртын. Удмурт. Дышетскемез вылӥ. 1971-тӥ арын йылпумъяз Ижевскысь гурт удысъя институтэз гурт хозяйствое механизациез пыӵатон специальностья. 1995-тӥ арысен - Россия Федерациысь Федеральной Собранилэн Федерацияя Кенешаз быръем мурт. Пусъемын "Знак Почета", Эшъяськон орденъёсын, Россиысь МЧС-лэн "За заслуги" знакеныз но кык медален. Ужаны кутскиз 1971-тӥ арын Можга ёросысь "Россия" колхозын гурт хозяйствоысь машинаосъя инженер луыса. 1971-тӥ-1972-тӥ аръёсы - службазэ ортчытӥз Советской Армиын. 1972-тӥ-1974-тӥ аръёсы - Можга ёросысь "Россия" колхозысь механик, техникаез тупатъянъя мастерскойёслэн кивалтӥсьсы. 1974-тӥ-1980-тӥ аръёсы - Можга ёросысь "Россия" колхозысь валтӥсь инженер. 1980-тӥ-1990-тӥ аръёсы - Можга ёросысь "Ленинский путь" колхозлэн тӧроез. 1990-тӥ-1991-тӥ аръёсы - УАССР-ысь Министръёслэн Кенешсылэн Тӧроезлэн воштӥсез, Ижевск город. 1991-тӥ-1993-тӥ аръёсы - УАССР-ысь Министръёслэн Кенешсылэн Тӧроезлэн воштӥсез, УАССР-ысь гурт удысъя но сиён-юонъя министр, Ижевск город. 1993-тӥ-1994-тӥ аръёсы - Удмурт Республикаысь Министръёслэн Кенешсылэн Тӧроезлэн воштӥсез, Ижевск город. 1994-тӥ-1995-тӥ аръёсы - Удмурт Республикаысь Министръёслэн Кенешсылэн Тӧроезлэн Нырысетӥ воштӥсезлэсь ужзэ быдэсъясь, Ижевск город. 1995-тӥ-1999-тӥ аръёсы - Удмурт Республикаысь Правительстволэн Тӧроез, Ижевск город. Удмурт Республикаысь Кун Кенешлэн Бюджетъя, вытъёсъя но коньдон ужпумъёсъя ялан ужась комиссиезлы тӧро юнматон сярысь Удмурт Республикаысь Кун Кенешлэн Постановлениез Удмурт Республикаысь Кун Кенеш пуктэ: Удмурт Республикаысь Кун Кенешлэн Бюджетъя, вытъёсъя но коньдон ужпумъёсъя ялан ужась комиссиезлы юнматоно тӧрое Широбокова Софья Эльфатовнаез. Удмурт Республикаысь Кун Кенешлэн Тӧроез А. А. Волков. Ижевск город, 1999 арын 12 мае � 11-ИИ. Юалэ - валэктозы Удмурт Республикаысь Загс ужпумъёсъя комитет 18-тӥ мае 10.00 часысен 12.00 часозь телефон пыр меӵак вераськон ортчытэ нылпиосты пусъён ужпумъёсъя, кузпалъяськонъя, нимез воштонъя, атай луонэз тодонъя, усыновить каронъя, регистрация ортчытэм сярысь выльысьэ документъёс сётонъя. Юанъёслы валэктоз Загс ужпумъёсъя комитетлэн кивалтӥсез Лариса Викторовна Лукинская. Юанъёсын вазиськыны быгатоды 51-56-44 номеро телефонъя. Загслэсь ужзэ умоятон пумысен ӵектонъёстэс но дэмланъёстэс комитетын ужасьёс туж умоен пумиталозы. Удмурт Республикаысь Правительстволэн Председателезлэн секретариатысьтыз пресс-центр. ГАЛИАХМЕТОВ Раиль Ахсанович Вордскиз 1959-тӥ арын 28-тӥ феврале ТАССР-ысь Калинин ёросысь Байсарово черкогуртын. Бигер. Дышетскемез вылӥ. 1981-тӥ арын йылпумъяз Удмурт кун университетэз. Специальностезъя - экономист. Пусъемын "За заслуги перед Отечеством" орденлэн ИИ степенё медаленыз, "Удмурт Республикаысь наука удысысь дано ужась" знакен. 1981-тӥ арын - УдГУ-ысь НИС-лэн инженерэз. 1981-тӥ -1982-тӥ аръёсы - стажёр-исследователь, Ленинградысь Н. А. Вознисенский нимо финансово-экономический институтысь аспирант. 1982-тӥ -1984-тӥ аръёсы - Советской Армиын. 1984-тӥ -1987-тӥ аръёсы - ЛФЭИ-ысь экономикая но ужъя кафедраысь аспирант институтысь аспирант. 1987-тӥ -1999-тӥ аръёсы - политэкономикая кафедраысь валтӥсь преподаватель, экономикая факультетысь декан, ВКУПП-лэн президентэз, экономикая но ужъя социология кафедралэн кивалтӥсезлэсь ужзэ быдэсъясь, академической ужъпумъёсъя нырысетӥ проректорез, УдГУ-лэн Экономикая но управленияя институтэзлэн кивалтӥсез. Сюресъёсмы пӧртэмесь Россия но США куспын кылдоно вожвылъяськонъёс сярысь нырысьсэ верамын вал 1991-тӥ арын, гожтэ "Московская правда" газет. Со тодэ вайытэ тазьы гожтэмез: "США-лэн но асьме страналэн азинскон сюрессы сыӵе: ог-огмы куспын тупамтэос кылдыны быгатозы ини 1997-тӥ-1998-тӥ аръёсы. Оскомы: эчешонъёс уз вуттэ секыт учыре но дуннеын кылдэм югдурлы пумит уз луэ. Европаен кусыпъёс ог вакытэ ӟечесь луозы, нош Шунды ӝужан палась шаеръёсын - туж умоесь. Валамон, озьы луоз, сазь политика нуимы ке". Азьланьтэмын: "Макем бадӟымгес луозы выль властьлэн вормонъёсыз, сокем секытэсь луозы США-ен кусыпъёс, 1992-тӥ ар сое уз ке но возьматы ай". Шонер чакламын, лыдэ басьтоно ке, та кылъёс 1991-тӥ арын августэ ортчем учыръёс азьын кӧня ке нунал азьвыл гинэ верамын шуыса. Советской Союз но Америка куспын "яратонлэсь" йыр поромонъёс со аръёсы трос вал. Пунэмен кондон басьтонъёс, Нобельлэн Тупаса улонъя премиез, "жучокъёсты" октон, лушкем малпанъёсты шараян но мукет. Кусыпъёслэн азьланьын уродмонзы сярысь малпаны соку шуг вал. А. С. Пушкинлэн вордскемез дырысен - 200 ар Сяська керттэтъёс Пукисько пасьтана вӧлскем площадьысь лапча вылын. Гозыен кыскем кадь, мыд-мыд пала калык ортче. Кин ке метрое дыртэ, вылды, мукетыз - магазинэ. Бен, котькудӥзлэн мугез аслаз. Аръёслы сётскыса пурысьтам кышномурт гинэ нокытчы уг дырты, шӧдске: вамышъёссэ лыдъяса сямен, площадьысь памятник выжые сяська керттэт понӥз. Кӧня ке сылӥз но мон вӧзы пуксиз. Пумен лушкемгес кылбура: Я памятник себе воздвиг нерукотворный, К нему не зарастёт народная тропа... - Эн пайме, - шуиз со, мон пала берытскыса. - Ньыльдон ар дышетӥсьын ужай, арлы быдэ пиналъёслы та кылбурез учкытэк вераны сётӥсько вал. Котькуд чурез сярысь малпаськыны дэмлалляй. Соосын ӵош ачим но малпаськылӥ. Эскере ай асьтэос: кыдёке, азьлане учкыса гожтэм Пушкин: "К нему не зарастёт народная тропа". Татчы, памятник выжые, нуналлы быдэ сяська вай Москваын но кыдёкысь городъёсын, гуртъёсын улӥсьёс. Кышномурт чалмытскиз: веранэз быриз-а, оло, тодмотэм муртэн уно кенешемез ӧз пот? Ӵап тодмо эшез вуиз, лэся - со но сяська керттэтэн лыктэм. Мон ӧй пыриськы вераськонзы куспы. Ӝоген соос метро пала вамыштӥзы, кытчы ке дыртӥсь калык пӧлы ышизы. Куазь шуныт, писпуос куаръяськон-сяськаян вакыт. Мон пукисько, памятник выжые сяська ваисьёсты учкыса. Александр Сергеевич Пушкинэз гажасьёс, сое пӧсь сюлмысь дунъясьёс соос. Пушкин оскиз, сое котькытын яратозы, со сярысь веран быдэс Россие вӧлмоз шуыса. Бен Россие гинэ-а? Туж визьмо поэтлэсь жингыртӥсь кылбур чуръёссэ лыдӟо Китайын, кыдёкысь Австралиын, Латынь Америкаын - быдэс дуннеын. Озьы луонзэ тодыса кадь, Александр Сергеевич гожтӥз: Слух обо мне пройдет по всей Руси великой, И назовет меня всяк сущий в ней язык, И гордый внук славян, и финн, и ныне дикий Тунгус, и друг степей калмык... Та чуръёсы удмурт калык ӧз шедьы ке но, Пушкинэз гажан, солэсь произведениоссэ дунъян чик кулэс ӧвӧл, финнъёс, калмыкъёс сямен ик ӟуч кылын но, удмурт кылын но лыдӟиськом. Площадь вамен мынӥсь-ветлӥсь чик уг кулэсмы. Мыным пыроно П. И. Чайковский нимо концерт залэ. Туннэ татын Удмуртиысь кырӟанъя но эктонъя "Италмас" ансамбль концерт сётоз. Лапча вылысь султыса, памятниклы матэ кариськи. Солэн постаментэз вылысь аслымгес кылымон гинэ лыдӟисько: Я памятник себе воздвиг нерукотворный... ... Со дырысен уно аръёс ортчизы ини. Москвае ветлыны муг усе ке, татчы, Александр Сергеевичлы сӥзем памятник доры, вуылытэк уг кылиськы, нош но нош быдӟым поэтлэсь чуръёссэ лыдӟисько... Берлозэ ветлыкум но кема пуки чагыр буёлэн чеберъям скамья вылын. Азьвылаз сямен ик москвичъёс, бадӟым городлэн куноосыз пумтэм-йылтэм мыно-ветло. Куд-огез памятник доры дугдэ но тодмо чуръёсты я шара, я лушкем лыдӟе. Вань сяська ваисьёс но. Тани арлыдо кышномурт ӧжытак губырскемын ни - сое егит ныл кунултэм. Кыкназы но сяська керттэт ваиллям. Памятник выжые поныса, скамья вылэ пуксизы. Мыным кышномурт малы ке тодмо потӥз. Ӧй, вазьыны ӧй дӥсьты: аръёс ортчемын ни. Ӧжыт-а табыдӟа городын ог-огзылы кельшись адямиос? Москвае выльысь мыныны муг усиз ке, нош ик Пушкин площаде кожыло. Поэтлэн вордскемез дырысен 200 ар тырме ке но, татын, солы сӥзем памятник дорын, Александр Сергеевичен ваче син учкыса вераськем кадь луэ. Ортчозы дауръёс, вордскозы асьмелы тодмотэм нылъёс но пиос. Пушкин солы оскыса гожтӥз: "Здравствуй, племя младое, незнакомое..." Тодэ лыкто война аръёс... Милям частьмы сылэ вал Румыниысь Арад городлы матын. Тушмон татысь уллямын ни, но кыдёке чигнамтэ. Пыд улысьтызы музъем гылӟемен, лэся, фашистъёс ӝытлы быдэ город вылэ бомбаос куяло. Асьмелэн зенитчикъёсмы югдытэм инэ ыбыло, одӥг самолётэз но уг уськыто. Бомбаос усьыло милемлы матэ но. Таӵе вакытэ но солдат аслаз малпанэныз, сюлмаськонэныз улэ. "Война дугдӥз ке,- шуэ со, - институтэ дышетскыны пыро". Нош мукетыз аспирантура сярысь малпа ини. Ӵапак сыӵе мылкыдын ожмаськиз солдат Соколов (нимзэ вунэтӥ: трос аръёс ортчемын). Со ӧз люкиськылы кык книгаен: огез вылӥ математикая вал, мукетыз - А. С. Пушкинлэн кылбур сборникез. Ваньмон дыр тупа ке, Соколов книгазэ усьтэ ини. Я Пушкинлэсь кылбуръёссэ лыдӟе, я математикая учебникысь задачаосты сэрттэ-пертче. "Вуноз,- шуэ вал со,- вуноз, азьпалан аспирантура ай. Пушкинэз но, Гоголез но тодоно. Математикаез уг вераськы ни: сое вить чиньыез кадь тодоно. Сотэк институтлэн коридоретӥз ортчем кадь гинэ луоз..." Ӵем дыръя Соколов котыраз солдатъёсты люкалляз. Кутске но сборникысь кылбуръёсты лыдӟе. Тани тазэ асьтэос но тодӥськоды: Во глубине сибирских руд Храните гордое терпенье, Не пропадет ваш скорбный труд И дум высокое стремленье... Тросэз солдатъёс эшсы сьӧры тодмо чуръёсты шара верало: школаын уго та кылбурен тодматскемын. Солдатъёс пӧлын вал ай трос дышетскыны вуымтэосыз но. Соос ӧз тодэлэ, кызьы кылдӥз Сибире ыстэм кылбур. Соколов нош ик тупен-тупен мадиз 1825-тӥ арын Петербургысь Сенат площадьын ӝутэм восстание сярысь. Сибире келям декабристъёслы Пушкин вазиськиз уго кылбур чуръёсын. Ожмаськон аръёс туж секытэсь вал ке но, солдатъёс ӧз люкиськылэ асьсэ музъемен, солэн узыр культураеныз, Россилы но быдэс дуннелы тодмо геройёсыныз, тодосчиосыныз, писательёсыныз. Соос пӧлын ик - Александр Сергеевич Пушкинэн. Война дугдэм бере, Соколов но дораз бертӥз. Пыриз-а со аспирантурае - тодыны ӧй быгаты: сюресъёсмы люкиськизы. Оскисько: Пушкинлэсь творчествозэ но математикаез со али но сюлэмаз нуллэ. Оло, мон сямен ик Москвае вуылэмезлы быдэ Пушкин площаде ветлэ? Йыбырттэ, дыр, быдӟым поэтлы, тау карыса. Усьтылэ на-а со кылбур сборниклэсь бамъёссэ, оло, учкытэк но вераны быгатэ? Жингырто ук, жингырто поэтлэн сюлмысьтыз потэм чуръёс... Василий СМИРНОВ. Удмурт Республикаысь Кун Кенешлэн Тӧроезлэн воштӥсьёсыз сярысь Удмурт Республикаысь Кун Кенешлэн ПОСТАНОВЛЕНИЕЗ Удмурт Республикалэн "Удмурт Республикаысь Кун Кенеш сярысь" Законэзлэн 12-тӥ ёзэтэныз кивалтӥськыса, Удмурт Республикаысь Кун Кенеш пуктэ: 1. Удмурт Республикаысь Кун Кенешын быръёно Кун Кенешлэн Тӧроезлы куинь воштӥсь, со пӧлын кык нырысетӥ воштӥсь. 2. Удмурт Республикаысь Кун Кенешлэсь 1995-тӥ арын 11-тӥ мае кутэм "Удмурт Республикаысь Кун Кенешлэн Тӧроезлэн воштӥсьёсыз сярысь" 16-И номеро постановленизэ кужымзэ ыштэмен лыдъяно. Удмурт Республикаысь Кун Кенешлэн Тӧроез А. А. ВОЛКОВ. Ижевск город, 1999 арын 12 мае. � 7-ИИ. Красильников Алексей Геннадьевич Вордскиз 1954-тӥ арын 13-тӥ октябре Алнаш черкогуртын. Удмурт. Дышетскемез вылӥ. 1976-тӥ арын йылпумъяз Удмурт кун университетэз. 1980-тӥ арын - Ленинградысь кун университетлэсь аспирантуразэ. Филология наукаосъя кандидат. Пусъемын Удмурт Республикаысь Кун Кенешлэн Данъян грамотаеныз. 1981-тӥ-1982-тӥ аръёсы - УдГУ-ысь кунсьӧр литературая кафедраысь ассистент, 1982- тӥ-1984-тӥ аръёсы валтӥсь преподаватель. 1984-тӥ-1986-тӥ аръёсы - УдГУ-ысь филологияя факультетлэн деканэзлэн воштӥсез. 1986-тӥ-1989-тӥ - УдГУ-ысь кунсьӧр литературая кафедраысь доцент. 1989-тӥ-1995-тӥ аръёсы - УдГУ-ысь огъя гуманитарной дасяськонъя но культуралэн историезъя факультетлэн кивалтӥсез. 1995-тӥ-1999-тӥ аръёсы - Удмурт Республикаысь Кун Кенешлэн Тӧроезлэн воштӥсез. Адӟизы "Российская газета" толэзьлы быдэ странаысьтымы кызяз бадӟымъёсаз городъёсын ортчытъя юалляськон: кыӵе газет тужгес но пусйымон вал берло дыре? Лыдэ басьтӥське ӝутэм ужпум, материаллэн жанрез, авторлэн нимыз. Апрельлы лэсьтэм йылпумъянъёсъя Россиысь прессалэн рейтингаз пусъемын "Удмурт дунне". Газетлэн валтӥсь редакторезлэсь Алексей Шкляевлэн "Национальный признак государственности сводится к нулю" но "Народ не должен чувствовать себя изгоем на родине" шара гожтэтъёссэ синйылтӥллям уно лыдӟисьёс. Ма шуод, шумпотымон. Публицистлэн малпанъёсыз эшшо быдэсмысалзы на ке улонын... И. КРИЧЕВ. БЫДӞЫМ ВОРМОНЛЫ - 54 Аспал эшъёсмы пӧлын Вузэ кезьыт тӧл. Танкысь снарядлэн туй гильзаосыз мӧзмыт жингырто. Одӥг минут шып сылӥськом. Ачиз инкуазь но кайгыре кадь. Ненег куаръёсын шобырскем беризьёс но кызьпуос лэзьяллям вайёссэс. Сюлэмын курыт но сайкыт. Бырем танкистъёслы сӥзем мемориал гажаса кылдытэмын ожгарчиосын. Татчы Вормон нунал азьын пумиськонэ землякъёс-ветеранъёс ӧтемын. Таяз учыре соос трос ӧй вал. Дыр нокинэ уг жаля. Ар куспын кин ке улонысь кошкиз, мукетъёсызлэн тазалыксы ляб, кезьыт нунал но праздник мылкыдэз нырысь-валысь сӥятӥз. Озьы ке но, шулдыръяськон удалтӥз. Пумиськон инты быръемын вал умой-умой малпаськыса. Кубинка посёлок дорысь (Подмосковье) вить иськемын ортчиз ужрад. Асьме Родинамылэн шорсюлэмыз доры Москвае кыстӥськись тушмон дугдытэмын вал ӵапак татын. Ужрадэз радъяз генерал-полковник Сергей Александрович Маев - Валтӥсь автомобильно- бронетанковой управленилэн кивалтӥсез. Трос ужъёсыз вань вылысь, пумиськонэ лыктэмъёсын быдэс нуналзэ ортчытӥз. Сергей Александрович - "Удмурт землячестволэн" правленияз быръем мурт. Вормон аре вордскем, шоро-куспо мугоро но сӥсъясь синмо, лякыт но ваньзэ валась воргорон тодэ армиын эшъяськонлэсь зэмос дунзэ. Куке землячестволэн правленияз юан кылдӥз, кинлы кивалтоно военнослужащийёслэн секциенызы, котьку сямен ик кыл вератэк басьтӥськиз та уж борды. Солэн кичӧлтэмез улсын военно-исторической музейлэн улосвылаз ӝутэмын вал тодмо мемориал. С. А. Маев пумиськонэ лыктэм муртъёсты ӧтиз тодматскыны музейлэн тунсыко экспозициеныз, ож вакытэ дано луэм Т-34 танкен. Музейын люкамын трос кунъёсысь, пӧртэм аръёсысь бронетанковой техника. Жаляса верано, та ӟеч музей пӧртэм мугъёсъя кунооссэ пумитаны уг быгаты, уката ик быдэ вуымтэосты. Ортчем история вылын егитъёсты дышетон узыр емышъёссэ сётэ вордскем шаердэ яратон мылкыд пыӵатонын. Нош Быдӟым Вормон луэ историлэн тужгес но дано люкетэз. С. А. Маевлэн кивалтоно ожгар подразделениосаз егит воинъёс пӧлын дугдылытэк нуиське военно-патриотической уж. Соос ялан утчасько, Калуга областьлэн улосвылаз бырем солдатъёслэсь лысьӧмзэс ватон ужъёсы пырисько. Подмосковьеысь вынлыко шайгуосты утялто. Военнослужащийёс асьсэ киынызы Святой Дмитрий Донскойлы сӥзем чебер православной часовня ӝутӥзы. Малпало мемориальной мечеть пуктыны. Ваньмыз со лэсьтэмын одӥг воинской частьын гинэ. Валамон, номыр но уг лэсьтӥськы буш интыын. Ужез радъясьёс, зэмос патриотъёс кулэ. Ӧй луысал шат асьме Ижевскын яке Удмуртиысь мукет городын часовня но мечеть ӝутыны. Борддоръёсазы асьме шаерын кылдэм ожгар подразделениослэсь, солдатъёслэсь но офицеръёслэсь нимъёссэс гожтыны луысал. Быдӟым ожын сяна, асьме егит пиосмы "пӧсь интыосын" но быро. Таӵе синпелет (памятник) пуктыны луысал киын кылдытэм Слава курганэ. Курган ӝутскысал бырем воинъёслэн ватэм интыосысьтызы ваем музъем вылын. Оло, Удмуртиысь выль Правительство быгатысал таӵе малпанэз улонэ пыӵатыны. Отчы быгатӥсь ужбрегатӥсьёс но хозяйственникъёс пыро ук. Бадӟым кузьым луысал со Вормонлы 55 ар тырмонлы. Выльысь берытском пумиськонэ. Мемориалэн тодматскемзы бере, фронтэ ветлэмъёсты ӧтизы "тыл доры". Нош отын - сюлмысь вераськонъёс, шуныт ӟечкыланъёс, ожгар сюресъёсты тодэ ваёнъёс. Воинской частьысь самодеятельной ансамбль война аръёсысь вунонтэм кырӟанъёсты кырӟаз. Пумиськонэ люкаськемъёс пӧлын вал нылкышноос но. Нырысез ик чарка ӝутэмын соослэн кышкасьтэм но ӟырдыт сямзы понна. Йыръёссы соослэн пужмерскемын, кисыриоссы егит уг каро, но азьло аръёсы кадь ик чебер но небыт кылизы синъёссы - адямилэсь синучкон лулзэ-сюлэмзэ усьтӥсь. Ваньзылы, кин та нылкышноосты Удмурт музъем вылын тодэ но яратэ, соос Вормон нуналэн сюлмысь ӟечкыланъёс ысто: Любовь Ивановна Агапова (Камбарка город) зенитно-артиллерийской полкысь орудилэн наводчикез; Клавдия Аввакумовна Балашова (Игра ёросысь Новосёлово гурт) - зенитно- артиллерийской полкысь приборист; Мария Степановна Кольцова (Камбарка ёросысь Шолья гурт) - снайпер; Тамара Ивановна Тепляшина (Дэбес ёросысь Малая Кизня гурт) - приборист... Кема но тазалыко улон соослы! Советской Союзлэн кык пол героез Михаил Петрович Одинцов, Удмуртиысь Комсомол нимо артдивизионысь боец Валентин Иванович Буяков, сапёръёслэн ротазылэн кивалтӥсез Владимир Васильевич Голубев тодазы ваизы ортчем сюресъёссэс, НАТО-лэсь дуннеен кивалтонъя политиказэ умойтэмен лыдъязы. Соос оскемзэс веразы: Быдӟым ож аръёсы шуг-секытъёс пыр ортчем калык туала секыт адӟонъёсты но вормыны кужым шедьтоз. Ӟырдыт вераськон мынӥз фронтэ ветлэмъёслэсь, военнослужащийёслэсь, хозяйственникъёслэсь но интеллигенцилэсь Россиез выльдонын тыршонъёссэс огазеян сярысь. Озьы ик кенешизы асьме быдӟым землякъёсмылэсь юбилейёссэс пусъён сярысь - авиациысь маршаллэн Ф. Я. Фалалеевлэн вордскемез дырысен сю ар тырмиз, М. Т. Калашниковлы - 80 арес. Тросэз ветеранъёс - Москваын улӥсьёс. Удмуртиысь школаосын эшъясько, музейёслы юртто. Озьы ке но, со уж нимаз нуиське. Мон малпамъя, республикаысь Ветеранъёслэн кенешсы, городъёсысь но предприятиосысь ветеранъёслэн кенешъёссы но "Удмурт землячество" дэмен ужаны кулэ. "Удмурт землячествоысь" ветеранъёслэн секцизылэн кивалтӥсез Владимир Юрьевич Танаев сюлмысь тау кариз пумиськонэ лыктэмъёслы но ужрадэз ортчытӥсьёслы, Быдӟым Вормонлы 55 ар тырмонэз пусйыны дасяськемзы сярысь малпанъёссэ вераз. Кыкетӥ арзэ ини Владимир Юрьевич Москваын но Подмосковьеын улӥсь ветеранъёссэ-землякъёссэ утча. Туннэ нуналлы 50 адями шедьтэмын. Котькудӥзлы соос пӧлысь юрттэт но вазиськем кулэ. "Медам возьдаське сюлэмъёсмы кыршектэм понна, будӥсь кивалтӥсьёсмы пыкылоно медаз луэ асьмелэн ляб но тодыны тыршонтэм сяммы понна", - пусъе В. Ю. Танаев. Солэн вераменыз соглаш кариське ветеранъёсын пумиськонэз радъям ужбергатӥсь Юрий Борисович Малых, кудӥз быгатэмезъя юрттэ землячестволы коньдонэн. Озьы мед луоз, аспал эшъёс! Нош мон малпай: асьмелэн уг поты ке но, вуоз сыӵе дыр, куке пумиськонэ лыктозы туж ӧжыт ветеранъёс. Ортчозы аръёс, соос сярысь гожтозы выль книгаос. Озьы ке но, визьмысь ноку но уз ышы малпан: та адямиос утизы Родинаез, кузьмазы асьмелы Улон... Асьмеос сылӥськом куинетӥ сюрс аре выжонын. Азьпалан трос тодмотэмез. Озьы ке но, вуоз тулыс, будоз ю-нянь, вордскозы нылпиос. Нош тодэ ваён котьку луыны кулэ, сотэк азьлане мынон ӧвӧл. В. Стерхов, Россия Федерацилэн Президентэзлэн Удмурт Республикая Постпредствоысьтыз отделлэн кивалтӥсез. Удмурт Республикаысь Кун Кенешлэн Тӧроезлы воштӥсь юнматон сярысь Удмурт Республикаысь Кун Кенешлэн ПОСТАНОВЛЕНИЕЗ Удмурт Республикаысь Кун Кенеш пуктэ: Удмурт Республикаысь Кун Кенешлэн Тӧроезлы воштӥсе юнматоно СМИРНОВА Светлана Константиновнаез. Удмурт Республикаысь Кун Кенешлэн Тӧроез А. А. ВОЛКОВ. Ижевск город, 1999 арын 12 мае. � 10-ИИ. Смирнова Светлана Константиновна Вордскиз 1962-тӥ арын 4-тӥ декабре Удмурт АССР-ысь Дэбес ёросысь Зар.-Медла. гуртын. Удмурт. Дышетскемез вылӥ. Гурт удыс наукаосъя кандидат. 1985-тӥ арын йылпумъяз Ижевскысь гурт удысъя институтэз, 1994-тӥ арын - Россия Федерациысь Правительстволэсь Калык хозяйствоя академизэ. 1997-тӥ арысен - Россилэн Президентэзлэн Россиысь Кун службая академиезлэн слушателез. Ужан удысэзъя - агроном, кунэн кивалтонъя магистр. Пусъемын Удмурт АССР-ысь Вылӥ Кенешлэн Президумезлэн но Удмурт Республикаысь Правительстволэн Данъян грамотаосынызы. 1985-тӥ-1991-тӥ аръёсы - Удмурт АССР-ысь Ижевскысь гурт удысъя институтысь комсомол комитетлэн секретарез. 1991-тӥ арын - Удмурт Республикаысь Ижевскысь гурт удысъя институтысь будосъёсъя кафедраысь ассистент. 1991-тӥ-1994-тӥ аръёсы - Удмурт Республикаысь Егитъёсын ужанъя кун комитетлэн тӧроезлэн воштӥсез. 1994-тӥ-1999-тӥ аръёсы - Удмурт Республикаысь Правительстволэн Нациосын ужанъя комитетэзлэн тӧроез. Аслыз но калыклы кузё Александр Борисович Белослудцев - Каракулино ёросысь "Вормонлы - 40 ар" нимо азьмынӥсь колхозлэн кузёез. Ужын басьтэм вормонъёсыныз колъхозэз ёроссылэсь данзэ ог вить-куать ар уте ини. Нош ачиз Александр Борисович туж спортэз яратэ, соин быдэс ёрос данъяське. 1996-1997 аръёсы ортчем тол ӵошатсконъёсын со нырысетӥ интыос басьтылӥз. Туэ ньылетӥе кылиз ке но, осконэз ӧз быры. Ӟечгес дасяськоно, шуэ со, ас азяд тросгес но золгес куронъёс пуктыны быгатоно. Таӵе сямыз ик юрттэ Александр Борисовичлы колхозэн кивалтыны. Александр Борисович удмурт воргорон, Дэбес палась, нош колхозаз тыршо ӟучъёс, удмуртъёс, бигеръёс. Кыӵе калыкен ужаны капчигес шуыса юамлы, кузё вераз: - Удмуртъёс сярысь, ӟучъёс азьтэмъяськыныгес ярато, но огкыл шедьтӥськод ке, соослэсь умой ужась ӧвӧл. Собере будэтэ: - Кытын кызьы, дыр, мон ваньмыз понна вераны уг быгатӥськы... - Тӥледыз, Александр Борисович, калык гажа, дунъя. Быръёнъёсы пыриськыны мылкыдды ӧй-а вал? - Ӧйтӧд, ӧйтӧд. Мон ведь чебер вераськыны уг быгатӥськы. Нош палэнысь лыктэм кандидатъёс уӵы кадь чирдо. Ма, бер ӧвӧл на, ваньмыз азьпалан. Александр Борисовичлы ваньзэ умойзэ гинэ сӥзем потэ. Калыклэн осконэз мед юрттоз солы шуг-секытъёсты вормыны. Галина Романова. Туспуктэмез Владимир Беломорскихлэн. Зэмзэ ик лӧпкытӥзы Умой произведение ноку но кужымзэ уг ышты. Нош ик паймытӥз "Ой, чебер нылъёс" комедия. Ми, Вуж Монья школаысь кӧня ке дышетӥсьёс но пиналъёс, алигес вуылӥмы Удмурт драмтеатре. Зэмзэ ке верано, городэ вуытозь, йырын юан поръяз. Тунсыко потоз на меда? Ма, трос пол та произведениез лыдӟемын ни, трос пол сцена вылысь учкемын. Кыӵе быгатыса соку шудӥзы артистъёс! Соос кадь быгатӥсьёсыз но уз луэ ни, дыр, малпалляй. Но... янгышаськем. "Ой, чебер нылъёс" туж кельшиз. Театре пырыса, сюлэм ик бурдъяськиз. Мӧзмонэн тырмем мылкыд ӧръяськиз. Ӵем ветлыны луонлык ӧвӧл ни уго. Эсьма, театре нырысьсэ вуэм пиналъёсмылэн ымныразы шумпотон шудэ. Мальдытӥсь люстраос, калык, борддорын артистъёслэн тусбуйёссы... Осконтэм, выжыкылын кадь потэ. Жаляса верано, таӵе ветлон туж дуно усе. Вуылы вал, шуом, ӵемгес театре, музейёсы, выставкаосы... Ӧжытгес, оло, луысалзы школазэс йылпумъяса йыромем тури кадь ветлӥсьёс, вина юисьёс... Гуртын будӥсь пиналъёслы шуо кадь политикъёс: "Пуке асьтэлэн гуртады, вылӥ культураё адями ке но ӧд луэ, тӥледлы яралоз, бугыръяське музъемын, соин но тырмоз". Музъемын, пудо-живот котырын вырисьёслы но кулэ визь, тодонлык, одӥг кылын вераса, вылӥ культураё луон. Соиз сярысь чылкак вунэто. Пумтэм сюлэмшугъяськонъёсмы сярысь та ӝытэ ке но вунэтӥмы. Улон кужым кузьмазы, оскон пыӵатӥзы спектаклез пуктӥсьёс... Бертыкумы автобусын но кема гинэ вераськимы. Быгатыса шудо артистъёс, туннэ нуналлэсь куронъёссэ чакламын, малпаса пуктэмын. - Мыным ваньмыз кельшиз, - кылӥське пиналъёс пӧлын. - Мыным - эктонъёссы, кырӟанъёссы, - итӥське мукетыз. - Декорациез но чебер вал, сцена дурысь коркаосыз гинэ пичиесьгес потӥзы, - вазе нылаш. - Нош Тонялэсь рользэ асьме ёросысь Ильинскысь Бабурина шудӥз, - тодэмзэ вера пияш. Ваньзылы сямен кельшем Тимок. Соиз валамон. Солэсь рользэ уго шудӥз гуртысьтымы пи Игорь Моисеев. Макем данъяськыса учкизы со шоры гуртоосыз. Анай-атайезлы, Зинаида Ивановна но Аполос Николаевич Моисеевъёслы, сыӵе пи будэтэмзы понна котькудӥз тау каризы, дыр. Семьяысьтызы ваньзы уго паймымонэсь, ог-огзэс валаса, тупаса но яратыса уло, мукетъёсызлэсь но мылкыдзэс ӝуто. Соос ялан сцена вылын: арганэн, гитараен шудозы, спектакле пыриськозы, кылбур но, крезьгур но малпалозы. Тӥни озьы "Ой, чебер нылъёс" спектакльысь туж капчи мылкыдын бертӥмы. Зэмзэ но шутэтскимы, нош гуртын улӥсьёслы макем со кулэ. Куамын вить пиналъёс но бурдъяськемын вал. М. НИКИТИНА. Пичи Пурга ёросысь Вуж Монья гурт. АБРОИМОВ Геннадий Егорович Вордскиз 1939-тӥ арын 15-тӥ марте УАССР-ысь Камбарка ёросысь Мазунино черкогуртын. Ӟуч. Дышетскемез вылӥ. 1974-тӥ арын йылпумъяз Ижевскысь механической институтэз экономикая но машина лэсьтон промышленностез радъянъя специальностъя. "Машина лэсьтон промышленностьысь сиё-дано ужась". Пусъемын Удмурт Республикаысь Кун Кенешлэн Данъян грамотаеныз, Почёт орденэн. 1953-тӥ -1955-тӥ аръёсы - Сарапулысь 5 номеро ремесленной училищеын дышетскись. 1957-тӥ -1959-тӥ аръёсы - Сарапулысь горпромкомбинатын 5-тӥ разрадэн столяр. 1960-тӥ -1963-тӥ аръёсы - му поттонъя Удмурт контораысь фрезеровщик. 1963-тӥ -1983-тӥ аръёсы - Сарапулысь синтэмъёслэн огазеяськонисьтызы (УПП ВОС) Сарапулысь УПП ВОС-ысь инженер-технолог, производствоя директорез воштӥсь, директор. 1983-тӥ -1984-тӥ аръёсы - "Радиотехника" огазеяськонлэн валтӥсь директорез. 1984-тӥ -1985-тӥ аръёсы - Сарапул городысь быдэсъясь комитетлэн кивалтӥсез. 1985-тӥ -1999-тӥ аръёсы - "Радиотехника" ВОС-лэн Сарапулысь УПП-езлэн валтӥсь директорез. Инмарлэн кылыз куинь Алнаш ёросысь Кузёбай гуртэ выль школа пуктон пумысен вераськонъёс кемалась мыно ни вал. Малы ке шуоно, али дышетсконо юртлы сю арлэсь трос ини. Котькуд гужем школаез тупатъяло-"кышъяло", буяло, озьы ке но, пайдаез - ӧжыт: одӥг сэрегзэ пыкъяськод, мукетыз сисьмыны кутске. Нош та шор ёзо школае тодон-валан люканы ветло куинь гуртысь: Кузёбайысь, Варзийылысь но Бакырзаводысь (Варзино-Алексеевоысь) пиналъёс. Трос аръёс ӵоже ни школаен кивалтӥсьёс выль юрт пуктон пумысен отчы но, татчы но вазиськылӥзы. Югдур нош ӧз тупатскылы: я коньдонзы ӧвӧл, я проектсы уг тупа, я туж дуно со... Сизьыметӥ куартолэзе клуб азбарын сюй донгамзэс адӟыса, малпаськонэ усим. Паймонэз вылымтэ: куинетӥ проектъя ӵапак татчы пуксьыны кулэ выль школалэн юртэз (нырысетӥ проект сётэмын ёросысь ик мукет гуртэ, кыкетӥезъя пуктыны кулэ вал этнографической школа-комплекс - тазэ шаерысьтымы вылӥ кивалтэт но туж дуноен лыдъяз). Кутскем ужзы ӟеч мед йылпумъяськоз шуыса, пересь вӧсясьёс, така вандыса, ӝук пӧзьтӥзы. Нырысь йыбырттӥзы, выль школа мед пуксёз, лэсьтӥськисьёслэн тазалыксы мед луоз шуыса. Бӧрысь куяськизы кулэмъёслы, номыр сыӵе-таӵе уродэз медаз луы, сопал дуннеязы ӟеч мед улозы но быгатэмзыя асьмелы мед юрттозы шуыса. Ческыт ӝук сиёнэ трос гинэ люкаськизы дышетӥсьёс, нылпиос. Алнашын пӧртэм удысъёсын ужасьёс, озьы ик - колхозлэн тӧроез В. А. Степанов. - Кузёбай быдӟа гуртэ школа одно ик кулэ. Ми но быгатэммыя юрттыны тыршом - азьланяз бадӟым выль юртын мед дышетскозы асьмелэн но нылпиосмы. Кутскем ужез гинэ дугдытоно ӧвӧл, - шуиз со. Аслэсьтыз мылкыдзэ А. Н. Прокопьев, школалэн директорез но вераз. Со шуиз, - Та туж бадӟым уж - солэсь кутсконзэ туннэ адӟиськом ини. Оскем потэ: трос ик дыр уз ортчы - нылпиослы шумпотыса усьтозы выль школалэсь ӧсъёссэ. Вератэк кельтоно ӧвӧл созэ но. Дышетӥсьёс, нылпиос сяна, анай-атайёс но чидатэк витё выль дышетскон юрт пуктэмзэс. Малы ке шуоно, инты тырмымтэен, нылпиос дышетсконо луо куинь интыын: туала школаыан, солэн вӧзысьтыз кезьыт юртын. Нош пичи классъёсын дышетскисьёс ветло нылпи садлэн юртаз. Алнашысь лэсьтӥськисьёс мылкыд каризы, выль школа пуксем бере, таӵе ик ческыт сӥльын ӝук сиыны. Оскем потэ вылэм: шаерысьтымы вылӥ кивалтӥсьёс уз куштэлэ гурт калыкез. Кема аръёс ӵоже сюлэмшугъяськытэм ужпум быдэстэмын луоз. Калыкын таӵе веран вань: инмарлэн кылыз куинь. Та кылъёс мед луозы вылэм Кузёбай но отысь калык понна. Галина САВИНА, Надежда ПРОКОПЬЕВА, Удмурт кун университетын дышетскисьёс. Кокорин Михаил Константинович Вордскиз 1946-тӥ арын 21-тӥ ноябре Удмурт АССР-ысь Селта ёросысь Андреевцы гуртын. Ӟуч. Дышетскемез вылӥ. 1970-тӥ арын йылпумъяз Свердловскысь юридической институтэз правоведение специальностья. Ужан сюрессэ кутскиз Свердлов областьысь Тавда городысь строительно-монтажной поездысь рабочий, собере - милициысь участковой уполномоченной луыса. Институтэз йылпумъямез бере ужа, УАССР-ысь Завьялово ёросысь прокурорлэн юрттӥсез покуратураысь следователь луыса. 1972-тӥ-1973-тӥ аръёсы - Советской Армиын. 1973-тӥ-1985-тӥ аръёсы -, УАССР-ысь прокуратуралэн следствиосъя управлениезлэн валтӥсь следователез тӧроезлэн воштӥсез. 1985-тӥ-1993-тӥ аръёсы - Сарапул городлэн, Ижевск городысь Индустриальной ёрослэн прокурорзы. 1993-тӥ-1995-тӥ аръёсы - Ижевск городысь Ленин ёрослэн прокуратураысьтыз следователь. 1995-тӥ-1999-тӥ аръёсы - Удмурт Республикаысь адвокатъёслэн коллегиысьтызы адвокат. 18 МАЕ МУЗЕЙЁСЛЭН НУНАЛЗЫ Вашкалаосмылэсь пытьыоссэс утчась Владимир Федорович Генинглэн нимыз археология удысын бадӟым инты басьтэ. Солы ужано луиз странамылэн данак улосъёсаз. Тодосчи син азямы выльысь пуктӥз кадь ортчем сюресмес, историмес. Наука удысын В. Ф. Генинг тужгес бадӟым саклык висъя вашкала Кам дурысь (озьы ик Удмуртиысь но) улӥсьёслэсь историзэс эскеронлы. Туэ В. Ф. Генинглы тырмысал 75 арес. Вордскиз со Алтай крайысь Славгород городын дышетӥсьлэн семьяяз. Наука борды басьтӥськиз 1947-тӥ-1948-тӥ аръёсы, шор ёзо школаын дышетӥсь луыса ужакуз. Соку со дышетӥз Пермь улосысь Вепс посёлокын но Красновишерск городын. Со вакытэ аслаз дышетскисьёсыныз выльысь тодосчи Вишер шур котырысь изъёс вылысь суредъёсты шараяз. Перьмысь кун университетлэсь куинетӥ курссэ йылпумъямез бере со археологияя экспедицилэн кивалтӥсез луэ. Дышетсконзэ йылпумъяса, Пермь областьысь школаосын историлы дышетэ. 1954-тӥ арын Генинг Удмурт шаерысь музее ужаны лыктэ. Со дырысен ик тодосчи бадӟым эскерон ужъёс борды басьтӥське. Удмурт Республикаысь музей научно-исследовательской институтэн ӵош Кам котырысь ёросъёсын археологияя экспедиция радъя. Та уже пыриськиз Владимир Генинг но. Экспедиция эскерыны кулэ вал вашкала удмурт калыклэсь историзэ, культуразэ, улэм-вылэмзэ. Дасямын вал нимысьтыз картаос, планъёс, лыдэ басьтэмын котькудӥз памятник. Эскеронъёс мынӥзы Кама, Сива но Иж шуръёс котырын. Озьы асьме вакытозь В-ЪИИ дауръёс сярысь сюрсъёсын материал люкамын. Вуоно араз музей но институт Вятка шур котырын ужазы. Экспедициен кивалтӥз В. Ф. Генинг. Отын ик ужазы Киров областьысь краеведениея музей но Москваысь кун университетлэн антропологияя экспедициез. Удмуртиысь краеведениея музейын тыршыкуз В. Ф. Генинг 4 научной уж гожтӥз, Удмуртилэн вашкала историезъя экскурсия дасяз, адӟытонъёс радъяз, уно лекциос лыдӟиз. Музейын соку Генинг археологияя кружок но усьтылӥз. 1955-тӥ арын сентябре тодосчи пыре СССР-ысь наукаосъя академилэн Казаньысь ёзаз, аспирантурае. 1959-тӥ арын со "Шор Камысь Пьяный Борлэн культураез" нимо кандидат ужзэ уте. Аспирантураын дышетскыкуз со уно экспедициосы пота. Куинь арскын эскеремын но шедьтэмын 75 памятник. Озьы В. Ф. Генинглэн тыршеменыз трос выльзэ тодыны луиз Удмуртилэн лымшор но шунды ӝужан пал ёросъёсыз сярысь. 1974-тӥ арын Владимир Федорович - наукая доктор. Вань улытозяз учёной Урал, Удмурт шаер сярысь трос выльзэ усьтӥз, озьы со трос тодосчиосты дасяны юрттӥз, кивоштӥсьёс будэтӥз. В. Ф. Генинг улонысь кошкиз 1993-тӥ арын. Елена ИЛЬИНА, аспирантка. Туспуктэм вылын: В. Ф. Генинг Пермысь кун университетын дышетскыкуз (1949 ар). А. С. ПУШКИНЛЭН ВОРДСКЕМЕЗ ДЫРЫСЕН - 200 АР Ваче син Та быдӟым адямиен мон ноку ӧй пумиськылы. Озьы ке но, ӵемысь ваче син вераськисько, кенешисько, солэсь визь-кенеш курисько. али но паймисько: кызьы-о меда школае мынытозям ик киям шедиз ӟуч кылбурчилэн А. С. Пушкинлэн книгаез? Лад-лад, анай кылыным мадиз со мыным зарни чорыг сярысь выжыкылзэ. Озьы эшшо но тросгес лыдӟиськыны ӵектӥз кадь. Нош шудо пумиськон бервылтэм уг луы, сюлэмез лушкем "чепыльтыны" быгатэм авторлэсь мукет книгаоссэ но утчаны, лыдӟыны тыршиськод. Сюлэм сэректыку, пирсэкъяку, киям ӵемысь басьтӥсько Пушкинлэсь томиксэ. Тодмо учыръёсты лыдӟыса ик мылкыд сабырске кадь, йырвизь чылкыта. Улонысь вань пожзэ-кырсьсэ вунэтыса, азьпалась ӟечезлы оскыны кутскиськод, улонэн пичияк гинэ палгытэм шумпотонэз тодад ваиськод. Чуръёс вискысь ачиз автор но потылэ. Кепыратэк вераны луоз, дыр: произведениысь лирической герой но поэт огазе вуо, одӥг адямилы пӧрмо кадь. Умой шӧдӥське авторлэн лыдӟисезлы оскемез. Нош ог-огдэ валаса, ог-огедлы оскыса вераськон котьку дуно луэ. Троссэ кылбуръёсты сӥсъя-быръе даур-вапум. Куд-ог чуръёссэ поэт вань сюлэмзэ поныса гожтэ кадь, но соос ышо-вуно. Куд-ог малпанъёс туж огшоры гинэ гожтэмын, но, дыр ортчемъя, отын выль тылсиос-инӟыос улӟо-воректо - кылбурын поэт интые малпаськыны кутске ачиз Вапум. Оло, ачиз инсьӧр кузё?.. А. С. Пушкинлэн вунэтымон кылбуръёсыз ик ӧвӧл кадь. Отысь шедьтод яратон мылкыдэз бурдъясь чуръёсты но, эшлыкез данъясь, улонлэн азьпалась ӟечезлы оскыны косӥсь чуръёсты но. Быдӟым кылбурчилэн вордскемез дырысен 200 ар тырме ке но, со улэп на, кожалод. Асьмемын огазьын кыла-бура но кадь. Та нуналъёсы гинэ син шорам выльысь йӧтӥз "Деревня" кылбурез. Гожтэмын но ни со кемалась-кемалась - 1819-тӥ арын. Нош малпаськи но - амалтэк пусъёно кариськи: "Ма, туала гуртысь югдур возьматэмын ук! Ӵапак туннэ гожтэм чуръёс кожалод". Амалтэк лыдӟисьёслы но ӵектоно кариськи. Син азяды пуктэ: Пушкин лыктӥз тӥляд гуртады. Улон- вылонэныды тодматскыса кылдытӥз таӵе чуръёс: ...Но мысль ужасная здесь душу омрачает: Среди цветущих нив и гор Друг человечества печально замечает Везде невежества убийственный позор. Не видя слёз, не внемля стона, На пагубу людей избранное судьбой, Здесь барство дикое, без чувства, без закона, Присвоило себе насильственной лозой И труд, и собственность, и время земледельца. Пушкинлы сӥзьыса, солэсь адӟем карыса, трос гожъязы асьме кылбурчиосмы но. Котькудӥз понна вал кадь со Дышетӥсь. Ас анайме малпаса, Пушкинлэсь нянязэ, Арина Родионовнаез, син азям пуктыса, мон кылбур гожтӥ вал. Кема малпаськеме бере ыстыны дӥсьтӥ ик Ижысь редакцие. Ӧз печатлалэ сое. Нош В. Романов мыным келям "Шудо ныпъет" шара гожтэтаз пусъе: ("Советской Удмуртия", 1989-тӥ ар): "...Таиз ини А. С. Пушкинлэн - "То, как путник запоздалый, к нам в окошко постучит..." Пушкин - быдӟым кылбурчи, но солэсь дышетсконмы меӵак лушкаськон кадьгес медаз луы вылэм". Аслэсьтым книгаме печате дасякум ни редакторлы Михаил Федотовлы та чуръёёс сярысь поттылӥ вал. Нош Миша, нокыӵе кариськытэк, сое книгаям пыртӥз. Озьы, "Выжыос - сяськаос" кылбур бичетэ таӵе чуръёсы но шедизы: Укно сьӧрын тӧл жиетэ, вузэ, Бышкись лымы йыга укноосы. Со беромем ӝыт сюресчи музэн Кариськылэ шуныт коркаосы. Таӵе дыре кӧня сюресчиез Дораз витё, сюлмысь ик жаляса? Котькудӥзлэн но вань ук витисез, Пумиталоз одно ӟыгыртыса. ...Нош син азям пуксе мусо пересь, Со Пушкинэз вите чидатскыса. Витён дыръя минут кузьгес арлэсь. Черс погылян берга жургетыса. Тани пыроз ӧстӥ , пальышалоз Но чупалоз нэнэезлэсь кизэ Шуныт дӥсьсэ ӵоге со ошылоз, Кылзоз пересезлэсь выжыкылзэ. Йылпумъяса сое гинэ вераме потэ: юрттэ мыным улонам Александр Сергеевичлэн поэзиез. Котькуд кылбурзэ лыдӟем бере ик чылкыт ошмесысь гучык ву юиськод кадь. Соин ик тау каронме но шара вераме потӥз. Монэн огкылысь кариськозы, дыр, тросэз лыдӟисьёсмы но. Николай НИКИФОРОВ. Куинь полэс тау! Удмурт драмтеатрамы концертэ мынонме тодыса, огез бускеле, уй пал ёросысь арлыдо кышномурт, мынэсьтым юалляське: - Кыӵегес бен со, Кузьминъёслэн семьязы? - Туж синмаськымон адямиос, - валэктӥсько солы. - Концертъёсы мон шер ветлӥсько, соин артистъёсмес урод тодӥсько. - Таосыз зэмос артистъёс кадесь ик ини ваньзы, - шуисько бускелелы. - Телевизорысь рекламазэс пӧчи гинэ адӟи... Яразы. Кӧня кузя бен соос? Кыӵе районысь? - Алнаш палась. Туж шаплыесь. Кивалтӥсьсы - ачиз Юлия Кузьмина. Картэз, Виталий, инженер. Механикая заводын ужа. Нылъёссы Света но Люба. Кырӟаны но, эктыны но зол быгато. Сузэрзы, Светлана, туж бадӟым газетлэн, "Удмурт дуннелэн", редакцияз тырше. Корректор. Ваньзы соос кылбурало, кырӟан гожъяло, асьсэос ик шудо крезен, пианиноен. Экто... Концерт туж шулдыр луыны кулэ. Ойдо, лыкты театре. Билетъёс вань на. Дорад пукыса, трос чебер ӝытъёсыз адӟытэк кылёд... Театре тыраз калык люкаськиз. Учкылӥсько бускельме. Лыктэм ведь со но. Мон ужысьтым кожи театре. Огез тодмое сюлмаське вал: кыӵе, пӧй, ортчоз ни Кузьминъёслэн таиз концертсы. Толалтэ но асьсэлэсь быгатэмзэс возьматӥзы вал ини татын соос. Азьвыл концертсы бере дыр сокем ик ятыр ӧз ортчы ай. Зэм, туж шуныт вылэм пумиськон ӝыт. Таяз учыре но драмтеатре учкисьёс люкаськизы гурак, вожмаськыса музэн. Кузьминъёс ог- кык номерзэс возьматэм бере, калык дэмен чабыны ӧдъяз. Нырысетӥ минутъёсы сцена вылысен яркытак адӟиськизы ог-огзэс яратӥсь кузпалъёс - Юлия но Виталий. Куараоссы но сюлэме пырымон, быгатонзы но вольыт. Я нимазы, я ӵошен шулдырто театрез, калыкез. Татӥяз потӥзы ньыль кузя - кык нылынызы. Шоканэз пытсаса кадь кылзӥськод чебер, тузӥ ансамблез, синмаськымон семяез. Кырӟанэз воштэ эктон, эктонэз - кылбур, серемес мадёс. Света сузэренызы потакузы, оло, уката пасьтана вӧлскиз концерт. Зэм, Светланазы огназ но кырӟаз, шыпытакгес гинэ куараен мылкыдзэ усьтыса. Быдэс ӝытлэсь пуштроссэ усьтыны мыным секыт: ас малпанме газетэ нырысьсэ гожтӥсько. Но концертсэс Кузьминъёс туж малпаськыса, быгатыса дасяллям. Отын тырмыт шумпоттӥсез но, малпаськытӥсез но, чеберлыкез но. Паймоно нылъёссылэн быгатэмзылы. Ма, кыксы ик артистъёс кадесь ук ини. Со тэшкылизы, Любазы, А. С. Пушкинлэн вуоно юбилеезлы сӥзем конкурсын - ӵошатсконын, эсьмаса, лауреат но луыны вуэм ук! Со сярысь ивортэмзы бере, зал кичабемъёслэсь пуштӥз кадь. Кузьминъёслэн нылъёссы, артэ пуксьыса, йӧн-йӧн шудо роялен но. Сыӵе ӟеч семьяос сокем ик трос ӧвӧл шаерамы. Тау анай-атайзылы, нылпиоссэс усто будэтэмзы понна! Юлия Кузьминалэн тросэз кылбуръёсыз, крезьгуръёсыз яразы. Мылкыдэз бугырто, сюлэме пыӵало. Анайлы, вордскем гуртсылы, музъемзылы, яратонлы сӥземъёсыз уката ӟечгем пӧрмиллям, шуысал. Серемес пуштросоосыз но улонысь, егит дырысь басьтэмын. "Яратӥсько но викышъясько" шуыса нимам концертсэс Ю. Кузьмина. Яратон, зэмзэ но, та ӝытэ ӝутымон адӟиськиз. Нош концертысь викышъянзэ туж ик ӧй шӧды. Калык зол пумитаз артистъёсыз, соин валче шат Юлия Кузьминалэн синъёсыз шумпотон шапыкъёсын ӧжытак нюромизы? Ӝытэз умой радъяз но нуиз кылбурчи, дышетӥсь, Удмурт культурая "Дэмен" огазеяськонлэн кивалтэтаз быръем егит нылкышно Анна Сапожникова. Кузьминъёс но "Дэменэ" быръемын. Котькуд кырӟан яке эктон азьын А. Сапожникова туж мур мылкыдын лыдӟиз Кузьминалэсь кылбур чуръёссэ. Оло, со но шӧдскымон ӝутӥз учкисьёслэсь мылкыдзэс? Артистъёслы соос уно сяськаос кузьмазы, "Усто!", "Бис!" кесясько. Куд- ог кырӟанъёс быдэстэмын вал залын пукисьёслэн куремзыя но. Та пумиськонэз шӧдскымон шулдыртӥзы серемес вераськисьёс-сатирикъёс - драматург "Удмурт дунне" газетлэн валтӥсь редакторез Алексей Шкляев но журналист "Вордскем кыл" журналлэн редакторезлэн воштӥсез Рашит Хайдаров. А. Шкляев зол вераськиз туала югдурлы но Кун Кенеше депутатъёсты быръёнлы сӥзем ужпумъёсъя. Мадёнъёсыз мур пуштросъемесь, отчы политика шӧм но пыӵамын. Оглом вераса, концерт яраз. Учкисьёс артистъёслы сылыса чабизы, кематэк ӧз лэзе соосыз сцена вылысь. Людмила ГРИШКИНА, Ижысь банкын ужась. Куашканэ уг вуы-а? "Труд" газет азьланьтэ СНГ-е пырись кунъёслэн улонзы сярысь вераськонэз. "Океан сьӧрын СНГ-ез ватон" статьялэн авторезлэн Андраник Мигранянлэн пусъемезъя, азьвыл совето республикаослэн Вашингтонын НАТО-лэн юбилеезлы сӥзем ужрадэ пыриськемзы вера, СНГ ӝоген Россилэсь люкиськыны, США-лэсь но НАТО-лэсь кылзӥськись но соослы пыриськись кунлы пӧрмыны быгатоз шуыса. НАТО-лэн шулдыръяськоназ СНГ-я эшъёсмылэн ветлэмзы Россилэн азьвыл союзной республикаосын кусыпъёсызлэсь кызьы азинскемзэс возьматэ. Автор жаляса вера: чутрак выльдэм инъетэн союз кылдытон, котьма ке но, ӧз пӧрмы. Пусйыны кулэ: Совето Союзэз выльысь огазеяны тужгес но зол люкетӥзы шунды пуксён палась кунъёс. Та дыр ӵоже Западысь странаос 1993-тӥ-1994-тӥ аръёсы -Збигнев Бжезинскиен верам малпанэн кивалтӥськыса улӥзы. Соос Россилэн азьвыл совето кунъёсты ас котыраз огазеяны тыршонъёсызлы пумит луо. Озьы ке но, азьвыл Совето Союзысь кунъёсын ӟеч кусыпъёс тупатыны Россилэн луонлыкъёсыз вань. Кивалтонэз огазеяса, ог- огеныд йырйиськонэз дугдытыса но калыкъёс куспын тупанэз юнматыса гинэ азьвыл совето республикаос пумысен сазь политика нуыны луоз, йылпумъя автор. Иворъёсъя национальной служба. КУШКО Виктор Михайлович Вордскиз 1964-тӥ арын 5-тӥ апреле Тюмень областьысь Кондинск ёросысь Усть-Аха посёлокын. Украинец. Дышетскемез вылӥ. 1987-тӥ арын йылпумъяз Ижевскысь механической институтэз инженер-механик специальностья. 1987-тӥ -1990-тӥ аръёсы - Ижевскысь механической заводлэн 76 номеро цехысьтыз экономист, мастер. 1990-тӥ -1995-тӥ аръёсы - Ижевскысь механической заводлэн 31 номеро цехысьтыз техникая кивалтӥсьсэ воштӥсь. 1996-тӥ -1997-тӥ аръёсы - "Ижевскысь механической завод" кун предприятиысь профсоюз комитетлэсь Тӧрозэ воштӥсь. 1997-тӥ -1999-тӥ аръёсы - "Ижевскысь механической завод" кун предприятиысь профсоюз комитетлэн Тӧроез. Удмурт Республикаысь Кун Кенешлэн Ренгламентъя но Кун Кенешлэсь ужзэ радъянъя ялан ужась комиссиезлы тӧро юнматон сярысь Удмурт Республикаысь Кун Кенешлэн ПОСТАНОВЛЕНИЕЗ Удмурт Республикаысь Кун Кенеш пуктэ: Удмурт Республикаысь Кун Кенешлэн Ренгламентъя но Кун Кенешлэсь ужзэ радъянъя ялан ужась комиссиезлы тӧрое юнматоно АБРОСИМОВ Геннадий Егоровичез. Удмурт Республикаысь Кун Кенешлэн Тӧроез А. А. ВОЛКОВ. Ижевск город, 1999 арын 13 мае. � 14-ИИ. Кыӵе луоз таиз гужем? Миым гужем туж пӧсь улӥз. Музъем вылын сю ар ӵоже ӧй вал ни, ивортэ "Ассошиэйтед Пресс" агентство. Кунгож сьӧрысь учёнойёслэн пусъемзыя, омырлэн шоро-куспо температураез июль толэзе 16,5 градус возиськиз. Азьвыл арен ӵошатыса 0,7 лыдпуслы тросгес. Куазьлэн вошъяськемез возьматэ музъемлэсь шунамзэ. Таин валче Америкаысь но Япониысь учёнойёс огкыл кутӥзы. Соя чакламын 2010-тӥ арлы инкуазез кырсёмытӥсь газъёсты 5 процентлы кулэстон сярысь. Ӵапак та газъёсын сэрен Музъем вылын куазь арлы быдэ кырсёме но пӧсь луэ. Иворъёсъя национальной служба. КОТЬМА СЫРЫСЬ Америкаысь Космос эскеронъя НАСА агентство ивортэ, Гренландиын йӧ туж зол шунаны кутскемын шуыса. Арлы быдэ со одӥг метрозь кулэсме. Озьыен, Гренландия быдӟалаезъя арысь аре сюбега. х х х Социологъёс верамъя, шунды ӝужан палась немецъёс шунды пуксёнысь юлтошъёсынызы ӵошатыса кык поллы тросгес аракы юо. х х х Юрт ӝутонъя дуннеын выль рекорд пуктэмын. Выль Зеландиын 3 час но 44 минут куспын 150 ужась вить комнатаен юрт ӝутӥз. Азьвыл рекордлэсь со быдэс часлы ичигес. х х х Япониын улӥсьёс чыры-пыры ужъёссэс гинэ но компьютерен герӟало. Али соос малпаллям "япон сямен шутэтскон". Одӥгаз выставкаын адӟытэмын вал пластиклэсь лэсьтэм шутэтскон кӧкы (капсула). Ческыт зыно но лэйкатӥсь интыын адями ичи дырлы тупатэм ческыт уммен кӧлоз. Та выллем кӧкыын нырысетӥ кӧлӥсьёс луозы выставкае пыриськем ужбергатӥсьёс. 25 минут ческыт кӧлэм понна 50 марка тыроно луозы. ИМА-пресс. Удмурт Республикаысь Кун Кенешлэн ялан ужась комиссиосы сярысь Удмурт Республикаысь Кун Кенешлэн Постановлениез Удмурт Республикаысь Кун Кенеш пуктэ: Удмурт Республикаысь Кун Кенешлы ялан ужась комиссиос кылдытоно: экономикаын политикая, асваньбурен герӟаськем ужпумъёсъя но инвестициосъя; бюджетъя, вытъёсъя но коньдон ужпумъёсъя; промышленностья, инфраструктураез азинтонъя, вузъёсын но юрттэтъёсын рынокез кылдытонъя; агропромышленной удысъя, музъем кусыпъёсъя но инкуазь узырлыкъёсты утёнъя но уже кутонъя; наукая, дышетонъя, культурая но егитъёсын ужан политикая; улон-вылонэз радъян политикая; кунэз радъянъя, калыкъёс куспын политикая но интыысь аскивалтонъя; законъёсты быдэсъямез чакланъя, калыкез кышкытлыклэсь утёнъя но гражданъёслэн правооссыя; Регламентъя но Кун Кенешлэсь ужзэ радъянъя. Удмурт Кенешлэн Тӧроез А. А. Волков. Ижевск город, 1999 арын 12 мае. � 6-ИИ. КУН КЕНЕШЫН Министръёслэн интызы буш на Кызьы гожъямы ни, кылем арня пумын ужзэ азинтӥз Кун Кенешысь кыкетӥ ӧтчамезлэн нырысетӥ организационной сессиез. Куинь нунал ӵоже эскеремын куать ужпум, кыкез выжтэмын 25 майлы. Депутатъёс соку нош ик люкаськозы асьсэлэн кенешазы. Сессилэн кыкетӥ нуналаз парламентарийёс йылаз-пумаз вуттӥзы Кун Кенешысь ялан ужась комиссиослы кивалтӥсьёсты быръёнэз. Юнматэмын на эшшо 5 мурт. Кыӵе депутатъёс отчы шедизы? Михаил Кокорин. Со кивалтоз Законностья, обществоез кышкытлыклэсь утёнъя но адямиослэн правооссыя комиссиен. Азьвылаз созывын та удысэз нуиз Александр Борзенков. Михаил Константинович понна 94 депутат пӧлысь куаразэ сётӥз 54-ез, солы пумит - 36-ез. Кемагес мынӥз Агропромышленной удысъя, музъем кусыпъёсъя но инкуазь узырлыкъёсты кутонъя комиссилэн тӧроез луон понна нюръяськон. Татын ньыль ар ужаз Кизнерысь удмурт депутат Аркадий Малков, гурт удысэз умой тодӥсь-валась специалист. Депутат Валерьян Никитин ( быръёнъя 75-тӥ округ) ӵектӥз Аркадий Трофимовичез кыкетӥ созывын но та интые ик кельтыны. Депутат Валерий Ходырев (14-тӥ быръёнъя округ) вылӥ верам комиссилы кивалтӥсе дэмлаз Вячеслав Ануфриевлэсь кандидатуразэ. Нош Глазовысь депутат Петр Бершин потӥз асьсэ районысь ик депутатэн: ӵектӥз бырйыны Леонид Фроловез, "Кожильский" СПК-лэсь председательзэ. Озьы лушкем куара сётонъя бюллетене пыртэмын вал 3 фамилия: Малков, Ануфриев, Фролов. Вормиз Леонид Фролов, Башкириын вордскем бигер воргорон. Со понна куаразэ сётӥз 50-лэсь ятыр депутат. Таӵегес ик югдур кылдӥз музон комиссиослы тӧроос инматонъя. Промышленностья, соин герӟаськем удысъёсты азинтонъя, вузъёс но услугаос сётонъя комиссилэн азьвыл тӧроез Виталий Соловьев интызэ келяз егит депутатлы Виктор Кушколы, "Ижевский механический завод" государственной предприятиысь профкомлэн председателезлы. Наукая, дышетонъя, культурая но егитъёсын ужанъя комиссилы тӧрое дэмламын вал кык кандидат: Алексей Красильников но Энвиль Касимов (67-тӥ избирательный округ). 51 куара люкаса вормиз Алексей Геннадьевич. Залын пукисьёс пӧлысь тросэз понна шӧдтэк шорысь луиз та созывысь самой егит депутатлэн Жанна Дворцовалэн куара люканы быгатэмез. Солы 29 арес, юрист, Кун Кенешын со нуоз Кун ужез радъянъя, нациос куспын политикая но интыын ас коже кивалтонъя комиссиез (азьвыл тӧроез - Юрий Семенов). Та интые дэмламын вал ньыль мурт: депутатъёс Михаил Григорьев, Сергей Беркутов, Валерий Суркин но Жанна Дворцова. Озьыен, Кун Кенешлэн шорсюлмыз быръемын. Кылиз на депутатъёслэсь фракциоссэс юнматыны. Туннэ нуналлы куинез огазеяськонъёс асьсэлы кивалтӥсь бырйизы ни. Юрий Шестаков ужалоз промышленность но ужбергатон удысысь депутатъёсын, Виктор Хорошавцев луиз "Единство" фракцилэн кивалтӥсез, гурт удысысь но городысь депутатъёс асьсэлы тӧрое дэмлазы Евгений Одиянковез. Куинетӥ нуналаз парламент лумбыт ужаз Правительстволэн Тӧроезлы воштӥсьёсты юнматон бордын. Котькудзэ соос пӧлысь дэмлаз Николай Ганза. Тӧролэн нырысетӥ воштӥсез Юрий Питкевич кылиз ас интыяз ик. Со понна куаразэ сётӥз 63 депутат, пумит - 21. Озьыен, Юрий Степановичлы эшшо ньыль ар оскемын бадӟым но секыт удыс. Н. А. Ганза аслыз воштӥсе дэмлаз таӵе адямиосты: Сергей Чикуров, Валерий Загайнов, Николай Хохлов, Сергей Касихин, Виктор Шудегов, Михаил Назаров. Ваньмыз куать кандидат. Соку ик вералом, пӧлысьтызы кыкез - Касихин но Загайнов, тырмыт куара ӧз люкалэ. Сергей Касихин понна голосовать кариз 44 депутат, 38-эз - пумит. Валерий Загайновлы оскемзэ веразы 47-ез, пумит - 34-ез. Таин валче 25 мае нош ик быръёнъёс ортчозы. Загайновлэн кандидатураез выльысь поттэмын луоз, дыр, нош Касихин интые Правительстволэн Тӧроез ӵектоз мукетсэ. Сергей Павловичлы, Ваньбуръя кун комитетлэн тӧроезлы, республикаямы приватизация ортчытонъя кыл кутӥсьлы оскымтэзэс веразы Кун Кенешын ужась депутатъёс Софья Широбокова, Владимир Агашин но куд-ог мукет эшъёс. Сергей Чикуров понна куара сётӥз 51 мурт, пумит - 35. Правительствоын со нуоз экономикая ужпумъёсты. Николай Хохлов люказ 66 куара. Правительствоын солы оскемын промышленностья удыс. Виктор Шудегов быръемын социальной ужпумъёсъя воштӥсе, со понна куаразэ сётӥз 59 депутат. Гурт улонъя удыс оскемын Пичи Пурга районысь депутатлы Михаил Назаровлы. Солы оскемзэ вераз 65 мурт. Та нуналъёсы Правительствоын мынэ министръёсты воштонъя но юнматонъя уж. 25 мае Кун Кенешлэн сессияз соос тодмо луозы ни. Туннэ нуналлы быръемын огез - коньдонъя министр. Депутатъёс та интые кыкетӥзэ кельтӥзы Владимир Бельтюковез. Людмила Медведева. КОТЬМА СЯРЫСЬ Ма герӟа адямиез маймылэн Адями но маймыл выжыос: шимпанзе, орангутан, горилла но карлик выжыысь шимпанзе приматъёслэн отрядазы пыро. Али учёнойёс соос пушкысь шедьтӥзы огкадь луись нейрон. Та нейрон интыяськемын йыр кобыын. Эскере со вирлэсь давленизэ, сюлэмлэсь, ӝушлэсь но мукет пуш тӥрлыклэсь ужамзэ. Кылсярысь, куараен вераськонэз чакла. Та шедьтэм нейрон адямилэн но шимпанзелэн одӥг мында. Нош интыяськемезъя бонобанэн ог выллем. Учёнойёс та эскеронын чаклазы 28 пумо млекопитающийёсты. Отын маймылъёс гинэ ӧй вал. Иворъёсъя национальной служба. "КЕНЕШ" ЖУРНАЛЛЭН ВЫЛЬ НОМЕРЕЗ Мадёсэн артэ - суредъёс "...Ӵук город вадьсын удмурт бубылиос лобало-лопыръясько. Соос Байгурезь котырын но экто. Тынад сюлэмыд котыртӥ но... Соослэн инбамзы югыт. Вашкала кужымзы но югыт. Мон соос пӧлын", - тазьы йылпумъя прозаик Вячеслав Ар-Серги "Уй вадьсын - тӧдьы бурдъёс" мадёссэ (романзэ). Произведениезлэн нырысетӥ люкетъёсыз потӥзы журналмылэн толшор, тулыспал но южтолэзь номеръёсаз. Франциын вордскем Ева Тулуз тодосчиен пумиськылэмез но соин пӧртэм ужпумъёсъя вераськемез сярысь тупен-тупен гожтэм кылбурчи Анатолий Уваров. Та статьяез лыдӟыса тододы, малы авторез сое "Удмуртъёс доры сюрес" шуыса нимам. "Искусство удысысь" сэрегамы тодматылӥськом шаерысьтымы суредасьёсын, артистъёсын. Оштолэзь понна дасям номерысьтымы но сыӵе материалэз шедьтоды. Со сӥземын Игорь Безносовлы. Журналын сётэмын графика амалэн дасям суредъёсыз. Та суредась тодмо луэ озьы ик кортлэсь лэсьтэм бадӟымесь ужъёсыныз. Кызьы малпаськоды, мар выльзэ ӵектэ лыдӟисьёслы та люкетаз Кузьма Куликов? Солэсь пуштроссэ вераны кулэез ӧвӧл, дыр. Тӥ угось повестьсэ кутсконысеныз пумозяз пыр-поч лыдӟиськоды. Соин ик выль номерлэсь вуэмзэ но чидатэк витиськоды ни. Поэзиез яратӥсьёс тодматскыны быгатозы кылбурчиослэн Вениамин Ившинлэн но Анатолий Волковлэн выль ужъёсынызы. Трос выльзэ но паймымонзэ шедьтоды суредасьлэн Семён Виноградовлэн "Быдӟым кылбурчи но удмуртъёс" статьяысьтыз. Отын вераськон мынэ ӟуч калыклэн быдӟым кылбурчиезлэн А. С. Пушкинлэн удмуртъёсын туж тунсыкъяськемез сярысь. Писатель, крезьгуръёсты ӟеч тодӥсь но князь В. Ф. Одоевский пыр юалляськыны кутскемез бере, таиз ӝегатскытэк герӟаське асьме шаерез ӟеч тодӥсь эшеныз писателен-журналистэн А. И. Емичевен. Кызьы но мар бордын ужазы, кыӵе ивор вуттӥзы соос Пушкинлы калыкмы сярысь - тододы ини, материалэз лыдӟыса. Котьку сямен ик лыдӟисьёссэс бордазы кыскозы "Оло зэм, оло даур" сэрегысь серемес учыръёс. Мар сярысь гожъяз газет 50 ар талэсь азьло? 1949-тӥ арлэн кутсконаз тол каникул бере вал со учыр. Мон соку дышетски Лудорвай школаысь 6-тӥ классын. Учительской вӧзысь одӥгез классмы пӧрмытэмын вал пионер комнаталы. Отчы урокъёс бере люкаськылӥм. Мон дыры вань ке, одно ик "Пионерская правда" газетэз лыдӟыны пыралляй. Огпол старшой пионервожатоймы Нина Ивановна Шутова отчы активистъёсты люказ но ивортӥз, милемын, пе, "Советской Удмуртия" газетлэн корреспондентэз вераськыны медэ. Дорамы пыриз шоро-куспо арлыдо, ожысь бертэм воргорон, созэ дӥсезъя адӟим. Кияз фотоаппаратэз. Ӟечбуръяськемез бере тодӥм: со Тимофей Иванович Шмаков, нимзэ кылылӥм ни вал удмурт кылъя но литературая дышетӥсьмылэсь Анастасия Еремеевна Евсеевалэсь. Адӟим "Мынам пыӵалэ" книгазэ но. Корреспондент милемын кӧня ке вераськиз но школамылэн улонысьтыз иворъёс сярысь газетэ гожтыны дэмлаз. Ма сярысь гожтыны вераськиз котькуд пионерен нимаз, вожатоенымы Нина Ивановнаен но дышетӥсьёсынымы кенешыса. Ортчизы нуналъёс. 6-тӥ феврале "Советской Удмуртия" газетлэн куинетӥ бамаз потӥз "Пионер страница". Кутскиз со вазиськонэн, газет кылын вераса, авантекстэн: "Дышетӥсь эшъёс, пионеръёс но школьникъёс! Туннэ кутскиськом газетамы "Пионер страница" сётъяны. Сое пиналъёслы лыдӟымон но тӥледлы, дышетӥсь эшъёс, юрттэт сётӥсь карон понна та страница сярысь асьтэ малпанъёстэс но ӵектонъёстэс редакцие ысъялэ, отчы гожъялэ нылпиослы сӥзем пӧртэм статьяос, очеркъёс, веросъёс, фельетонъёс но мукетсэ..." Собере гожтэтъёслы огъя йыръян сётэмын вал: "Зоя Космодемьянская нимо дружинаын. Иж районысь Лудорвай семилеткаысь гожтэтъёс". Нырысезлэн авторез - Н. Шутова, старшой пионервожатоймы. "Пионеръёс-азьмынӥсьёс" шуыса нимамын. "Дружинамы ялан нюръяське дышетсконлэсь ӟечлыксэ ӝутон понна, - гожтэ со. - Соин ик пионеръёс ваньзы сямен дышетсконын азьмынӥсьёс луо". Кыкетӥ гожтэтлэн авторез - Римма Шутова, дружиналэн советэзлэн председателез, старшой вожатоймылэн сузэрез. "Главноез - дышетскон", - шуэ со. Гожтонзэ тазьы кутске: "Милям школаямы усто тупатъям пионерской комнатамы вань. Сое ми туж яратӥськом. Татын ужало пӧртэм кружокъёс, ортчыло пионер сборъёс, пӧртэм шудонъёс". Нош пумазгес таӵе кылъёсыз: "Ми котькуд пионерлы солэсь быгатэмзэ но кужымзэ чакласа, кыӵезэ ке одӥгзэ гинэ общественной уж сётӥськом... Соин ик милям дырмы тырме дышетскыны но мукет общественной ужъёсты быдэсъяны но". Ватсаны кулэ, аръёс ортчыса, Шутовъёслэн семьяязы ваньзы дышетӥсьёс луизы. Удмурт шаерамы тодмо дышетӥсьёс вал анайзы но атайзы, сузэръёс пӧлысь нырысь ик Иж педучилище бере дышетӥсь луиз, Нина Ивановна, ужаз пионервожатой, собере комсомоллэн Иж райкомезлэн секретарез луыса, собере, вордскем Б. Венья гуртаз кема ужаса, УАССР-ысь школалэн сӥё-дано дышетӥсез ним басьтӥз. Солэн сюрестӥз мынӥз Римма Шутова но, отӥяз - братсы Владимир. Усто дышетскись Коля Зайков газетэ гожтӥз аслаз урокъёслы дасяськон амалъёсыз но трос книга лыдӟыны яратэмез сярысь. Аръёс ортчыса, Николай Ильич физкультурая, собере георграфияя дышетӥсь луиз. Шутэтскыны потытозяз ик ужаз аслаз Лудорвай школаяз... Покчи пионеръёс пӧлын ужамез, пионер отрядэз валтэмез сярысь мадиз 7-тӥ классын дышетскись Тамара Старкова. Тани, кылсярысь, ма гожтӥз со: "Ми, страшеклассникъёс, переменаос дыръя пичиос пӧлын кыӵе ке но шудонъёс ортчытъяськом, соослы шулдыр шутэтскыны юрттӥськом. Озьы ик соосын выль кырӟанъёслы но эктонъёслы дышетскиськом". Дышескисьёслэн колхозлы юрттэмзы сярысь газетын мадиз 5-тӥ классысь Алёша Сергеев. Арня нуналъёсы соос пень но тылобурдо кыед люкало вал. Нош устоез спортсменкамы, куасэн пиослэсь но ӝог бызьылӥсь Лида Матвеева, дружинаысь физкультурая секторлэн тӧроез, мадиз дружиналэн чемпионэз Саша Дмитриев сярысь. Лидалэн улонэз тазьы егит дыръяз кошкиз: Иже лыктыса, 40 ар пала машина лэсьтон заводын тыршиз, мотоцикл поттонын будӥз. Ужысь ветеран луытозяз ик тыршемез трос пол пусйылэмын. Солы куинетӥ степенё Трудовая Слава орден сётэмын вал. Али пенсиын, Ижын улэ. Мӧйыослэн газетазы, нырысетӥяз пионер страницае, корреспондент мынэсьтым но тусбуйме пуктӥз, умой дышетскеме понна шуизы. Педучилищеын дышетскыкум, эшеным Альфред Артамановен ӵош редакцие пырыса, ми пумиським Тимофей Ивановичен. Соку ик тодмаз. Сьӧраз, кабинетаз, ӧтиз но, ӝӧкысьтыз поттыса синпельлы шуыса, утем снимоксэ сётӥз. Лыдӟисьёс тодо, нылпиослы "Дась лу!" газет 1941-тӥ арысен кема ӧз потылы, выльысь потыны кутскиз 1968-тӥ арын гинэ. Озьыен, куд-огез малпало, дыр, будӥсь кивоштӥсьёс понна со дырозь номыр но нимысьтыз ӧз потылы шуыса. Но югдур сыӵе ӧй вал, дышетон удыслы юрттом, пиналъёсты визьнодан сярысь сюлмаськонъёсын улӥзы но ужазы тросэз журналистъёс но писательёс. Тужгес но фронтъёс пыр ортчемъёсыз, войналэсь азьло "Дась луын!" ужамъёс. Сыӵеос пӧлысь вал Тимофей Иванович Шмаков, нылпиослы гожъясь журналист но кылбурчи. Нош кӧня шуныт кылъёссэс верало яке гожтыса кельтӥзы солэн творчествое кыстӥськись егитъёслы юрттэмез пумысен (Г. Ходырев, А. Вотяков, Н. Васильев но мукетъёсыз). Кӧня ке аръёс ортчыса, 50-тӥ-60- тӥ аръёсы, та верам эшъёс ик, "Советской Удмуртиын" ужаса, "Пинал куараос" бамъёс поттылӥзы. Собере 50-тӥ аръёсы нылпиослы сӥзем материалъёссэс поттылӥзы, "Советской Удмуртия" сяна, "Удмуртиысь комсомолец" газетын ужасьёс но пиналъёслэсь гожтэтъёссэс огазеяллязы "Дась лу!" огъя йыръян улэ. Леонид Фёдоров. Харина Наталья Алексеевна Вордскиз 1949-тӥ арын 7-тӥ апреле УАССР-ысь Якшур-Бодья ёросысь Старые Зятцы черкогуртын. Ӟуч. Дышетскемез вылӥ. 1972-тӥ арын йылпумъяз Ижевскысь медициная кун институтэз эмъян специальностья. 1998-тӥ арын "Россия Федерациысь сӥё-дано врач" данъян ним сётэмын. Удмурт Республикаысь Кун премилэн лауреатэз. 1966-тӥ-1972-тӥ аръёсы - Ижевскысь медициная кун институтын дышетскись. 1972-тӥ-1975-тӥ аръёсы - клиникая ординатура, ИГМИ. 1975-тӥ-1979-тӥ аръёсы - 5-тӥ роддомысь акушер-гинеколог. 1979-тӥ-1999-тӥ аръёсы - И РКБ-ысь гинекологияя отделениезлэн кивалтӥсез, акушерствоя но гинекологияя валтӥсь врачлэн воштӥсез. ШИРОБОКОВА Софья Эльфатовна Вордскиз 1961-тӥ арын 30-тӥ ноябре УАССР-ысь Вавож ёросысь Волипельга черкогуртын. Ӟуч. Дышетскемез вылӥ. 1984-тӥ арын йылпумъяз Ижевскысь гурт удысъя институтэз. 1989-тӥ арын ортчиз Пермысь гурт удысъя институтысь тодон-валанъёсты будэтонъя курсъёсты. Специальностезъя учёной агроном; гурт удысъя предприятиысь экономикаез радъясь. Пусъемын Удмурт Республикаысь Кун Кенешлэн Данъян грамотаеныз. Ужаны кутскиз 1984-тӥ арын Игра ёросысь "Чутырский" совхозын старшой экономист луыса. 1989-тӥ -1995-тӥ аръёсы - Чутырысь гурт эштослэн валтӥсь экономистэз. 1995-тӥ -1998-тӥ аръёсы - Кун Кенешлэн Экономикаын политикая но бюджетъя ялан ужась комиссиезлэн кивалтӥсезлэн воштӥсез. 1998-тӥ -1999-тӥ аръёсы - Кун Кенешлэн Экономикаын политикая но бюджетъя ялан ужась комиссиезлэн кивалтӥсезлэсь ужъёссэ быдэсъясь. Журналистъёсын пумиськонъёс Примаков Президентэз ӝоже уськытэм Россиысь Кун Думаын Президентлы Б. Ельцинлы импичментъя ужрад ортчем бере ик, депутат А. Солуянов, Москваысь вуыса, журналистъёсын пумиськиз. Странаенымы кивалтэ висись Президент, соин ик солэсь азьпала вамышъёссэ чакланы шуг, озьы кутскиз вераськонзэ депутат. - Али тросэз тодыны выро, кинлэсь куронзэ быдэстыны тыршиз Б. Ельцин, Е. Примаковез отставкае келяса. Но солэн мугез туж огшоры: кӧтӝож. Примаков Президентэз ӝоже уськытэм импичмент пумит зол кылзэ верамтэеныз. Нош Премьер- министрез ужысьтыз мозмытыса, Б. Ельцин аслыз капчиятыны выриз Кун Думаез уллянэз. Президентлэн "шудонъёсыз" нырысь ик шӧдӥсько калыклэн улонэз вылын. Та нуналъёсы ӝутскиз доллар, будӥзы дунъёс, дунтэмазы акциос. Импичмент ӧз ортчы. Озьы ке но, со пыраклы кылёз Россилэн историяз. Та ужрадлэсь пайдазэ А. Солуянов тазьы адӟе: - Вань калык азьын шара верамын вал Президентлэн янгышъёсыз. Президент пыриськиз СССР-ез, армиез куашкатонэ. Со меӵак дурбасьтӥз Тӧдьы юртэз ыбылӥсьёслы, пыртӥз асьме войскоосты Чечняе. Президентлэн тямыс ар ӵоже кивалтэмез улсын синӥз калыклэн лыдыз. Чечныен герӟаськем ужпумъя куара сётон мон понна огез валтӥсез ужпум вал. Та война понна Б. Ельцинэз 283 депутат янгыше уськытӥз. Импичмент дыръя куара сётонэ ӧз пыриське ЛДПР-лэн депутатъёсыз, Президентэз янгыше уськытонлы пумит луизы (вань вить пунктъёсъя ик) НДР-лэн депутатъёсыз. "Россиысь регионъёс" фракцилэн кивалтӥсез О. Морозов телевидение пыр оскыса шуиз вал, Чечня ужпумъя та фракцие пырись депутатъёс, огкылысь кариськыса, мылкыдзэс вералозы шуыса. Но озьы ӧз луы, 15 депутат гинэ (со пӧлын А. Солуянов но) Президентэз курлаз Чечняын война понна. Малы куд-ог депутатъёс малпанъёссэс озьы чутрак воштӥзы? - Мугъёс пӧртэмесь. Куд-огез, зэмзэ ик, кышкало, Б. Ельцин Думаез уллялоз шуыса. Соку тросэзлы ыштоно луоз шуныт интыоссэс. Ас депутатъёссэс зӥбыса возизы регионъёслэн кивалтӥсьёссы. Ми, Удмуртиысь депутатъёс, со ласянь эрикоесь вал. Мар понна Дума кыл кутытыны турттӥз Президентэз, со понна ик кылзэс юаны но калык азьын янгыше уськытыны кулэ, дыр, депутатъёсты но? Та пумысен Андрей Владимирович тазьы шуз: - Зэмзэ но, мон Думаын ужасько 1996-тӥ арысен. Соин ик со понна, мар лэсьтӥське странаын та дырысен, мон но кыл кутӥсько. Нош Президентлы али тазьы шуэм потэ: - "Кошкы ни - калык куре ук!" Т. БАННИКОВА. Удмурт Республикаысь Кун Кенешлэн Наукая, дышетонъя, культурая но егитъёсын ужан политикая ялан ужась комиссиезлы тӧро юнматон сярысь Удмурт Республикаысь Кун Кенешлэн ПОСТАНОВЛЕНИЕЗ Удмурт Республикаысь Кун Кенеш пуктэ: Удмурт Республикаысь Кун Кенешлэн Наукая, дышетонъя, культурая но егитъёсын ужан политикая ялан ужась комиссиезлы тӧрое юнматоно КРАСИЛЬНИКОВ Алексей Геннадьевичез. Удмурт Республикаысь Кун Кенешлэн Тӧроез А. А. ВОЛКОВ. Ижевск город, 1999 арын 13 мае. � 18-ИИ. Пыӵаллы - 400 ар Со вылӥ ӟечлыко дамаск анданлэсь кисьтэмын, тямыс сэрего гумыез зарни букваосын чеберъямын. Вашкала араб кылын верамын, пыӵал, пе, 1595 арын вордскем нуналаз Бухараысь ханлы кузьмамын. Витьтон ар талэсь азьло со Глазовын улӥсь кие вуиз. Пусйыны кулэ, та пыӵал шаерамы тужгес но вашкалаез луэ. В. ВАСИЛЬЕВ. Оло, ожмаськон дугдоз? Кун Дума Президентлы импичмент ялонэз лулысь-сюлмысь эскерон вакытэ, ачиз Ельцин но солэн юрттӥсьёсыз Югославиын вожвылъяськонэз дугдытонъя ужпумъёсын выризы. Россия Федерацилэн Президентэз Борис Ельцин, солэн Югославияя оскем муртэз Виктор Черномырдин но ММД-эн кивалтӥсез Игорь Иванов Францилэн Президентэныз Жак Ширакен но США-лэн госсекретарезлэн воштӥсеныз Строуб Тэлботтэн Югославиын вир кисьтонэз дугдытон сярысь вераськонъёс нуизы. Озьы гожтэ "Коммерсантъ" газет, огъя кылэ вуытозь кема ӧвӧл ни. Озьы ке но, самой секытэз азьланьын на. Россия но Запад огъя ужпумъёсъя вераськонын одӥг кылэ вуизы: Югославиын пуштытъянэз дугдытоно, Косовоысь серб ожгарчиосты поттоно, пегӟемъёсты берыктоно улон интыосазы, отчы калык куспо кужымъёсты интыяно. Ужпум кылиз: ку но кызьы со ужез быдэстоно. Со шоры пӧртэм сямен учконъёс соку ик шӧдӥськизы. Югдурез эскерыны ӵектэмын Кунъёслэн МИД-ёсазы ужасьёслы. Таӵе ужпумъёсын ик выризы Виктор Черномырдин но Строуб Тэлботт. Соос чаклазы Белградлы ӵектонъёс сётыны. Ӵектонъёсын Югославия соглаш луиз ке, НАТО кужымзэ кутэмысь дугдоз. Озьы ке но, пӧртэм сямен малпанъёс кылизы. Газетлэн пусъемезъя, Россия но Запад огъя кыл уг шедьто Югославия вылэ бомбаос куян пумысен. НАТО кылзэ сётэ пуштытъянъёс дугдозы соку гинэ, куке Косовоысь серб войскоос поттэмын но отын калык куспо (НАТО-лэсь но вераса) кужымъёс интыямын луозы. Со пумысен соглаш луэмзэ вераны кулэ Милошевич. Али ӧвӧл соиз но, таиз но. Россилэн малпамезъя, Косовоысь ожгарчиосты поттыны кутскем бере ик, Югославилы пумит шуккет сётонъёс дугдытэмын луыны кулэ. Со азьланяз кенешонъёс нуыны луонлык сётысал, чакла "Коммерсантъ". Иворъёсъя национальной служба. ДВОРЦОВА Жанна Витальевна Вордскиз 1969-тӥ арын 8-тӥ июле УАССР-ысь Шаркан ёросысь Шаркан черкогуртын. Ӟуч. Дышетскемез вылӥ. 1995-тӥ арын йылпумъяз Удмурт кун университетэз юриспруденция специальностья. 1994-тӥ -1995-тӥ аръёсы - Удмурт Республикаысь Адвокатъёслэн нимысьтыз коллегизылэн "ИжЮрИнформ" юридической агентствоысьтыз юрист. 1995-тӥ -1998-тӥ аръёсы - Удмурт Республикаысь Адвокатъёслэн нимысьтыз коллегизылэн "ИжЮрИнформ" юридической агентствоысьтыз адвокат. 1998-тӥ -1999-тӥ аръёсы - Удмурт Республикаысь Адвокатъёслэн коллегизылэн "Республика" юридической агентствоезлэн кивалтӥсез, Удмурт Республикаысь Адвокатъёслэн коллегизылэн адвокатэз. Удмурт Республикаысь Кун Кенешлэн Промышленностья, инфраструктураез азинтонъя, вузъёсын но юрттэтъёсын рынокез кылдытонъя ялан ужась комиссиезлы тӧро юнматон сярысь Удмурт Республикаысь Кун Кенешлэн ПОСТАНОВЛЕНИЕЗ Удмурт Республикаысь Кун Кенеш пуктэ: Удмурт Республикаысь Кун Кенешлэн Промышленностья, инфраструктураез азинтонъя, вузъёсын но юрттэтъёсын рынокез кылдытонъя ялан ужась комиссиезлы тӧрое юнматоно КУШКО Виктор Михайловичез. Удмурт Республикаысь Кун Кенешлэн Тӧроез А. А. ВОЛКОВ. Ижевск город, 1999 арын 13 мае. � 16-ИИ. Удмурт Республикаысь Кун Кенешлэн Тӧроезлы Нырысетӥ воштӥсь юнматон сярысь Удмурт Республикаысь Кун Кенешлэн ПОСТАНОВЛЕНИЕЗ Удмурт Республикаысь Кун Кенеш пуктэ: Удмурт Республикаысь Кун Кенешлэн Тӧроезлы Нырысетӥ воштӥсе юнматоно АГАШИН Владимир Ивановичез. Удмурт Республикаысь Кун Кенешлэн Тӧроез А. А. ВОЛКОВ. Ижевск город, 1999 арын 12 мае. � 8-ИИ. Агашин Владимир Иванович Вордскиз 1949-тӥ арын 20-тӥ июле ТАССР-ысь Ланшевской ёросысь Мысовский посёлокын. Ӟуч. Дышетскемез вылӥ. 1972-тӥ арын йылпумъяз Пермьысь Д. Прянишников нимо гурт хозяйствоя институтэз гурт хозяйствоын бухгалтер лыдъянэз радъян специальностья. Удмурт Республикаысь Вылӥ Кенешлэн но нырысетӥзэ ӧтчам Кун Кенешлэн депутатсы вал. "Удмурт Республикаысь дано экономист" сӥё-дано нимын пусъемын. Ужаны кутскиз 1967-тӥ арын Удмуртиысь "Сельхозтехника" огазеяськонлэн Сарапулысь ёрос ёзаз вузкаронъя бухгалтер луыса, 1973-тӥ-1976-тӥ аръёсы валтӥсь бухгалтер вал. 1976-тӥ-1981-тӥ аръёсы - "Сельхозхимия" огазеяськонлэн Сарапул ёзэзлэн кивалтӥсез. 1981-тӥ арын - Сарапулысь автотранспортъя "Трансельхозтехника" предприятилэн тӧроез. 1981-тӥ-1987-тӥ аръёсы - Сарапулысь техникаез тупатъянъя предприятилэн тӧроез. 1987-тӥ-1990-тӥ аръёсы - Сарапул ёросысь гурт удысъя огазеяськонлэн кивалтӥсез. 1990-тӥ арын - Сарапул ёросысь калык депутатъёслэн кенешсылэн быдэсъясь комитетэзлэн сиён-юонъя но басьтонъя (закупкаосъя) управлениезлэн тӧроез. 1990-тӥ-1993-тӥ аръёсы - Сарапул ёросысь калык депутатъёслэн быдэсъясь комитетэзлэн тӧроез. 1993-тӥ-1995-тӥ аръёсы - Удмурт Республикаысь коньдон ужпумъёсъя министр. 1995-тӥ-1999-тӥ аръёсы - Удмурт Республикаысь Кун Кенешлэн Тӧроезлэн Нырысетӥ воштӥсез. Удмурт Республикаысь Кун Кенешлэн Законъёсты быдэсъямез чакланъя, калыкез кышкытлыклэсь утёнъя но гражданъёслэн правоосыя ялан ужась комиссиезлы Тӧро юнматон сярысь Удмурт Республикаысь Кун Кенешлэн ПОСТАНОВЛЕНИЕЗ Удмурт Республикаысь Кун Кенеш пуктэ: Удмурт Республикаысь Кун Кенешлэн Законъёсты быдэсъямез чакланъя, калыкез кышкытлыклэсь утёнъя но гражданъёслэн правоосыя ялан ужась комиссиезлы Тӧрое юнматоно КОКОРИН Михаил Константиновичез. Удмурт Республикаысь Кун Кенешлэн Тӧроез А. А. ВОЛКОВ. Ижевск город, 1999 арын 13 мае. � 15-ИИ. Удмурт Республикаысь Кун Кенешлэн Улон-вылонэз радъян политикая ялан ужась комисиезлы тӧро юнматон сярысь Удмурт Республикаысь Кун Кенешлэн Постановлениез Удмурт Республикаысь Кун Кенеш пуктэ: Удмурт Республикаысь Кун Кенешлэн Улон-вылонэз радъян политикая ялан ужась комиссиезлы тӧрое юнматоно Харина Наталья Алексеевнаез. Удмурт Республикаысь Кун Кенешлэн Тӧроез А. А. Волков. Ижевск город, 1999 арын 12 мае. � 13-ИИ. Удмурт Республикаысь Кун Кенешлэн Кунэз радъянъя, калыкъёс куспын политикая но интыысь аскивалтонъя ялан ужась комиссиезлы тӧро юнматон сярысь Удмурт Республикаысь Кун Кенешлэн ПОСТАНОВЛЕНИЕЗ Удмурт Республикаысь Кун Кенеш пуктэ: Удмурт Республикаысь Кун Кенешлэн Кунэз радъянъя, калыкъёс куспын политикая но интыысь аскивалтонъя ялан ужась комиссиезлы тӧрое юнматоно ДВОРЦОВА Жанна Витальевнаез. Удмурт Республикаысь Кун Кенешлэн Тӧроез А. А. ВОЛКОВ. Ижевск город, 1999 арын 13 мае. � 20-ИИ. Югдур косэ кенешыны Кызьы ивортылӥм ни, 19-тӥ июне Ижын ортчоз Удмуртъёслэн азьло пусйымтэ чрезвычайной съездзы. Малы кулэ луиз ӧтчам люканы? Ужпум шаерамы кылдэм югдур бордын. Калыкмылэн устоосыз адямиосыз пыр-поч эскерыны кулэ политикаын, экономикаын, огъя улонын берло вакытэ луэм учыръёсты, котыр ласянь учкыын чакламын "Удмурт кенеш" огазеяськон азьын сылӥсь ужпумъёсты. Валлян люкаськылӥзы съездэз дасянъя комитетэ быръем эшъёс. "Удмурт кенешлэн" тӧроез Валентин Тубылов, профессор Карл Пономарев, Можга райсоветлэн тӧроез Иван Окулов, Пичи Пургаысь связистъёслэн кивалтӥсьсы Василий Москвин но мукетъёсыз тодматӥзы кенешон пумысен малпанъёсынызы. Вераськемын котькуд понедельнике пумиськылыны но, съездэз ӟеч радъян вылысь, вань луонозэ лэсьтыны. "Удмурт дунне" газетын ӧтчамлы сӥзем нимысьтыз сэрег усьтыны дэмламын. И. КРИЧЕВ. Ивортон Шаркан районысь Вортча починка гуртын вордӥськемъёсты 22 мае 16-00 часын пумиськонэ ӧтё гуртыоссы. Наталь Пётр СКОБЕЛЕВ Кыр сяська пушъе понназ Ирина Борисовна ГУСЕВА (ПЕРЦЕВА) ӝыны даур ӵоже калыкез эмъян удысын тыршиз. Миым гинэ шутэтскыны кутскиз. Со ужаз, республикаысьтымы нылпиослэсь нырзэс-пельзэс- ньылонзэс эмъянъя валтӥсь специалист луыса. Туэ 16-тӥ куартолэзе солы 74 арес тырмиз. Кузь но секыт улонэз ортчиз кышномурт. Ӵапак кыр сяська выллем - нокин но уг данъя кадь, нош ваньмыз синмасько солы. "Сяськаез" убое ӧз мерттэ Нылга ёрос вазен нимаз вал. Нюлэсъёс но бусыос вискы интыяськем вашкала Выль Кыйлуд гурт жильыртӥсь ошмесъёсын котыртэмын, урамъёс вож пильыс гуждорен шобыртэмын. Нырысь вамышъёссэ пичи Ирина со урамъёстӥ гольык пыдын лэсьтӥз. Но ӧз сётэ нылашлы вордскем музъем вылтӥз йыгмыт лёгаськыны. Бугырес куамынэтӥ аръёс нокинэ ӧз жалялэ. Кулак карыса, Перцевъёсты Архангельск шаере келязы. Песянаеныз но сузэреныз ӵош отчы шеде вить аресъем Ирина но. Атайзы 1928-тӥ арын кошкиз вал Мурманске, соку гинэ кылдытэм семьяезлы ваньбур поттон вылысь. Дораз бертэ но - пумитась сое ӧвӧл. Утчаса семьязэ шедьтэ кыдёкысь Архангельск шаерысь, берен асьме шаеръёсы вае. Ссылкае келям Перцевъёсты соку пегӟемен лыдъязы. Тӥни озьы, калыклы югыт сюрес возьматӥсь совето власть Ириналы пичи дырысеныз ик пыдзэ пуктӥз. Кытын, пе, будӥсь сяськаез убое мерттон, возь вылэ потэмзэ но лёгаса ортчиллям. Паймоно адямилэн юн луэмезлы, уката сыӵе секыт улон нылмурт пельпум вылэ усе ке. Вань со ортчемез сярысь йыркуртэк вераны быгатэм кулэ на. - Ирина Борисовна, кызьы дышетскыны быгатӥды сыӵе секыт аръёсы? Таӵе юанэлы Ирина Борисовна серекъяса вераз: - Мон егит дыръя сиён ӧй вал, дӥськут ӧй вал, бызьыны туган ӧй вал. Мар кыле на? Дышетскон гинэ. Соин ик дышетски. Ирина Борисовна ачиз гинэ ӧз дышетскы, сьӧраз валтӥз аслэсьтыз сузэръёссэ но. Соос озьы ик институтъёсты йылпумъязы - одӥгез дышетӥсь луиз, мукетыз - учёной-агроном. Тӥни озьы, возь вылын сяськаос но ас понназы будо вылэм, ву киськатэк но. Мар сярысь верало лыдпусъёс? 1931-тӥ ар - куать арескысен Ирина Ижевскысь школаын дышетскыны кутске. 1944-тӥ-45-тӥ аръёс - Калинин областьысь эвакогоспитальын фармацевт луыса ужа. 1947-тӥ-52-тӥ аръёс - Ирина Ижевскысь мединститутысь студентка, со дыре ик ужа. 1952-тӥ-55-тӥ аръёс - нырез, пелез, ньылонэз эмъянъя ординатура. 1955-тӥ-57-тӥ аръёс - поликлиника, лор-врач. 1957-тӥ-94-тӥ аръёс - Ижевскысь 4-тӥ городской больница, врач-оториноларинголог, республикаысьтымы нылпиосты эмъясь валтӥсь оториноларинголог, отделенилэн кивалтӥсез. 1980-тӥ-98-тӥ аръёс - нылпиослэсь нырзэс-пельзэс-ньылонзэс эмъянъя вань отделениосъя консультант, дышетэ республикаысь ваньзэ врачъёсты. Лыдпусъёс сьӧрын - эмъясьлэн кема но ас ужзэ ӟеч тодыса тыршемез. - Тодам ваисько профессорен Александра Ивановна Перевозчиковаен кема но туж тупаса ужаммес, - вера Ирина Борисовна. - Со вӧзын мон дышетски ӟечгес ужаны. Сьӧраз обходэ ветлыса, докладъёс дасялляй, оскылӥз секытэсь операциосты ортчытъяны. Картэныз профессорен Петр Николаевичен соос вал удмурт калыклэн пиштӥсь кизилиосыз, сыӵе адямиосын артэ уг луы уродгес ужаны. Милям больницаямы вутто вал быдэс республикаысь висись нылпиосты, со понна нош висъямын 35 койка. Мон сое 45-ёзь будэтӥ, ватсаса уждун ӧз ке но тырылэ. Бен, ӟучъёс пӧлын "националистка" шуисьёсыз но вал, гуртысь удмурт нылпиосты тросгес но умойгес эмъяны тыршеме понна. Улон секытгес дыръя вал со. Нылпиос тэйӟемын, лыдонэсь вал, кудӥз лы вылын ку гинэ кылемын. Эмъям бере питырскем ымныро нылпиоссэс анай-атайёссы куддыръя ик ӧз тодмаллялэ. Нош огез атай кема споръяськиз, мукет пиналэз солы сётӥськом шуыса. Нылпиеныз пумиськыса ини аслаз но серемез потӥз. Эшшо одӥг лыдпус: Гусевъёслэн кык эгызо нылъёссы анай-атайзэс тямыс внукъёсын шумпоттӥзы, соос пӧлысь одӥгез гинэ пи. Та пумысен Ирина Борисовна шуэ: - Атае пи возьма вылэм, нош вордӥськиськем мон. Малы ныл кулэ вал, пӧсекъям со соку. Огъёзъёсмес фронтэ келямзы бере шуэм ни, ярам, пе, ныл вордскем. Эмъясь луод, сюлмыд ке ӟеч Озьы лыдъя Ирина Борисовна. Шонер малпан. - Мынам ноку но нокин вылэ пичильтык но чагиськеме яке ӝожтӥськеме ӧвӧл, - шуэ со. Адями котькыӵе ужын мед ужалоз, но со нырысь ик ӟеч сямо луыны кулэ. Эмъян ужын та курон тодон-валанлэсь но вылӥын, дыр. Котьма медло, но Ирина Борисовна врач азе нырысь ик сыӵе курон пуктэ. Со пуктэм куронзэ ачиз но быдэсъяз ӝыны даур ӵоже, ас киыныз кӧня сюрс операция лэсьтӥз, арлы быдэ - ог 300. Табере со куронъёссэ быдэсъяло эгызо нылъёсыз: соос кыксы но мынӥзы анайзылэн мытэм сюрестӥз, йылпумъязы Ижевскысь мединститутэз. Вера ужа Челябинск городын, окулист луыса, нош Надя - Марий Эл Республикаысь Козьмодемьянск городын, со лор-врач. Ирина Борисовна али улэ Вероника внучкаеныз. Куинь толэзь талэсь азьло гинэ со ватӥз аслэсьтыз кузпалзэ Иван Ивановичез, 45 ар ӵош улэм матысь адямизэ. - Малы кулӥд тон, Вание? Малы улонысь вазь кошкид? - мӧзмись сюлэмыз дугдылытэк вазиське кузпалэзлы. Одӥг ке но писпу мертты... Гуртын вордӥськем но будэм адями уг быгаты музъемлэсь люкиськыны. 1954-тӥ арын Гусевъёс Ижысь сад-бакча басьтӥзы, табере со город шоры кылиз, отчы трамваен ветло. Ирина Борисовналэн но Иван Ивановичлэн мерттӥськемзы - быдэс сад. Ӝужытэсь улмопуоссы пӧлын - грушапу, со тополь ӝужда но тополь зӧкта будэм - сад-бакча возисьёслы адӟем карымон. Сяськаяське со бер тулыс, нош сӥзьыл туж уно емыш вае. Писпу но тырмыт будэтӥзы Гусевъёс, корка но пуктӥзы, патерзы но вӧл-вӧл, будо трос внукъёссы. Мар кулэ на улонын? Кузпалэныз ог-огзэс соос котьку валаса улӥзы. Нылпиоссэс дышетӥзы чеберлыкез валаны. Патераз али но сылэ пианино. Нылъёссы крезьгуръя школаын дышетскизы, нош табере со пианиноен шудозы внукъёсыз. Ирина Борисовналэн лул-сюлэмаз пыӵамын удмуртлыкез гажан но. Оло, кин ке малпалоз, Иван Иванович удмурт журналист вал бере, солэсь ик палам таӵе мылкыд. Нош мынам малпамея, огкадь малпаськись адямиослэн ог-огзэс пумитамзы бордысь потэ со, Ирина Борисовналэн удмуртлыкез вираз пыӵамын. - Ой, кыӵе мусоесь пото та удмурт журналистъёс, - шуэ со. Кыр сяськаез музэн сяна, ассэ будэтыны ӧз быгатэ атаез, но анаез но, Ирина Борисовна ас визьмыныз но ужез яратэменыз сад-бакчаысьтыз куать сотка быдӟа музъем вылысьтыз убоосын будэтэ чебересь сяськаос, улонэ пыртэ дышетэм нылпиоссэ но внукъёссэ. Пӧртэмесь соос, но ваньзы кыстӥсько югыт шунды пала. Со шундылэн шунытэз мед тырмоз Ирина Борисовналэн нылъёсызлы но соослэн нылпиоссылы. Будӥсь пушъетъёслэн улонзы медаз чигиськы. ? И. Б. Гусева сад-бакчаяз. Удмурт Республикаысь Правительстволэн Тӧроезлы воштӥсь юнматон сярысь Удмурт Республикаысь Кун Кенешлэн Постановлениез Удмурт Республикаысь Кун Кенеш пуктэ: Удмурт Республикаысь Правительстволэн Тӧроезлэн воштӥсе юнматоно Назаров Михаил Ивановичез. Удмурт Республикаысь Кун Кенешлэн Тӧроез А. А. Волков. Ижевск город, 1999 арын 14 мае. � 28 - ИИ. Назаров Михаил Иванович Вордскиз 1949-тӥ арын 10-тӥ январе Удмурт АССР-ысь Пичи Пурга ёросысь Миндерово гуртын. Удмурт. Дышетскемез вылӥ. 1971-тӥ арын йылпумъяз Ижевскысь гурт удысъя институтэз гурт хозяйствое механизациез пыӵатон специальностья, 1990-тӥ арын - Удмурт кун университетэз экономист-менеджер специальностья. Пусъемын "Удмурт Республикаысь гурт удысысь дано ужась" "Россия Федерациысь гурт удысысь дано ужась" нимын, Удмурт Республикаысь Вылӥ Кенешлэн Президиумезлэн Данъян грамотаез сётэмын. 1971-тӥ арын - Удмурт Республикаысь Пичи Пурга ёросысь "Юж-Пурга" колхозысь техникаез тупатъянъя мастерскоен кивалтӥсь. 1971-тӥ-1972-тӥ аръёсы - Советской Армиын. 1972-тӥ-1976-тӥ аръёсы Пичи Пурга ёросысь "Юж-Пудга" колхозысь техникаез тупатъянъя мастерскоен кивалтӥсь. 1976-тӥ-1982-тӥ аръёсы - валтӥсь инженер. 1982-тӥ-1986-тӥ аръёсы - Пичи Пурга ёросысь "Малопургинский" совхозлэн директорез. 1986-тӥ-1994-тӥ аръёсы - Пичи Пурга ёросысь калык депутатъёслэн быдэсъясь комитетэзлэн тӧроез. 1994-тӥ-1998-тӥ аръёсы - Пичи Пурга ёрослэн интыысь аскивалтонъя тӧроез. 1998-тӥ-1999-тӥ аръёсы - Пичи Пурга ёрослэн администрациезлэн тӧроез. Наталь "ЧИГЫМТЭ ЧИДАН" КОНКУРСЭ Нуналлэн кыӵеез шунды ӝужаку ик тодмо "Чигымтэ чидан" конкурсэ гожтоно кариськи пинал дыръям ӵош шудэм но будэм эше сярысь. Кӧня ке аръёс талэсь азьло со улонысь кошкиз ке но, эше мыным али но туж жаль потэ. Семьяязы куректон вуэ ке, Люба шуоз вал, нуналлэн кыӵеез шунды ӝужаку ик, пе, тодмо. Та кылъёс али но пель сьӧрам чузъясько кадь. Анайзы ньыль нылпи вордӥз. Агайёсыз Любалэсь трослы арлыдоесь вал, анаез уго сое, кема аръёс ортчыса, мукет пиосмуртлэсь вордэм на. Эшелэн агайёсызлы шудо улонэз адӟыны ӧз кылды. Бадӟымез кыдёке Сибире улыны кошкиз. Ваня агаез армиысь бертыса кышнояськиз. Сюан нуналазы, толалтэ, куазь туж жобаськиз. Мӧйыос шуо, та, пе, умойлы ӧвӧл. Озьы ик луиз. Гужемаз Ваня бырыны шедиз. Азьло ю-нянез тракторен погырто вал. Шудтэм учыр луыса, Ваня агайзэ кусокен-кусокен бичаса ватӥзы. Кышноез пинал но вордыса ӧз вуы, берен анай юртаз бертоно луиз. Ӧз удалты Коля агаезлы но. Солэн туж мыло-кыдо кышноез вал, ракен висьыса ӝог кулӥз. Вить кузя пиналъёс анайтэк кылизы. Коля агай кошкиз вал кышно вылэ. Но кема улыны ӧз кылды солы, поезд улэ шедьыса быриз. Анай-атайтэк кылем пиналъёс нылпи юртын будӥзы ни. Нош Люба анаеныз со вакытэ кошкемын вал кыдёкысь шаеръёсы улыны. Улляз сое отчы шудтэм яратонэз. Гуртамы вал арганчи Вася. Васяен Люба туж зол яратӥзы ог-огзэс, люкиськозы шуыса малпась ик ӧй вал. Люба Васялэсь армиысь бертэмзэ возьмаз, пумитаз, сюан ортчытыны малпасько ни вал. Нош Васялэн анай-атайёсыз асьсэды ӟеч улӥсьёсын лыдъязы, лэся. Ӧз поты Любаез асьсэлы кен каремзы. Тодмо нылзэс-а, мар-а сьӧрлось кен шедьтӥзы, яке кин ке дэмлаз. Озьы одӥгаз шулдыр гужем уе пизылы кышно ваизы. Кен кураны мынон азязы Вася кӧня ке дырлы Любаез доры пегӟем. Эше пужъятӥськыса, пе, пукисько вал. Пырем выль костюмен, галстукен, выль ботинкаосын. Люба малпам, кышнояськыны дасям дӥськутсэ возьматыны лыктэм. Вася сое ӝип-ӝип ӟыгыртэм, вылысьтыз вылаз чупаса, ӟеч лу шуыса кошкем. Бам вылаз, пе, синвуосыз жальыр! потӥзы. Люба соку малпам, анай- атаеныз керетӥзы, дыр, кышнояськыны уг лэзё шуыса. Тӥни озьы Васяез кышноязы яратымтэ нылын. Нош Любалы кошконо луиз анаеныз ӵошен кыдёкысь шаеръёсы - аслаз яратонэзлэсь пегӟиз. Солы секыт вал Васязэ мукетыныз адӟыны. Кыдёке ке кошки, синмы ке ӧз адӟы, пельы ке ӧз кылы, оло, ӝоггес вунэто, пе, яратонме. Нош мар бен Вася? Кен ваемзы бере малы ке но шуд ӧз пыры со коркае. Егит кузпалъёс ӝоген кошкизы нылмуртлэн анаез доры. Васялэн анаез кема ик ӧз улы - кулӥз, атаез синтэм луиз. Тулыс кизьыкуз Вася нюлэскы пырем но ошиськем. Тӥни озьы куашказ та егит семья. Палэнэ кошкыса, Люба, бызиз. Ӝоген кузпалыз юэменыз киоссэ кынтыса чиньыостэк кылем. Пудо-живот котыраз но аслыз ик выроно вал, дыр, куанер нылкышнолы. Гидаз потыса, гольык кылем электроез борды кутскыса бырыны шедем. Табере со кылле кыдёкысь музъемын, вордӥськем музъемезлэсь палэнын. Л. НИКИТИНА. Ижевск город. Журналистъёсын пумиськонъёс Лыдпусъёс, лыдпусъёс... Шаерысьтымы Статистикая кун комитетлэн кивалтӥсез Геннадий Дойников та нуналъёсы Правительствоын журналистъёсын пумиськиз. Люкаськемъёслы со мадиз удыслэн ужамез но выльдӥськемез сярысь. Та комитетэ уно лыдпусъёс люкасько. Вуо быдэс республикаысь, вань удысъёсысь, предприятиосысь, акциосын огазеяськонъёсысь но музон интыосысь. Кун комитет Москвае лыдпусъёс келя быдэс шаермыя, нош асьме республикаысь кивалтӥсь ёзъёслы - нимаз удысъёсъя, районъёсъя но городъёсъя. Статистика огинтыяз уг сылы. Сое выльдонъя федеральной программа кутэмын 1997-тӥ арын нош асьмелэн - миым сентябре. Программа Юнматэмын Кун Кенешлэн сессияз. Со быдэсъяськоз 2000-тӥ арозь. Мар чакламын вал, али ӝыныез улонэ пыӵатэмын ни. Отын озьы ик учкемын интыысь (муниципальной) ёзъёс кылдытъяны. Но шаерамы ас коже кивалтон курадӟыса вордӥське бере, та уж но ялан палэнэн кыле. Республикаямы 24 сюрс хозяйственной ёзъёс (субъектъёс) лыдъясько. Ваньзэ соосты син азяз возе статистикая кун комитет. Отын ваньзэ-ӧвӧлзэ 303 мурт ужа. Татчы ик пыро городъёсысь но районъёсысь люкетъёсыз. Котькудаз отын 2-3 адями тырше. Комитет федеральноез луэ, ужасьёслы уждун Москваысь дыраз вуэ. Берло дыре комитет 90 муртлы кулэсмиз. Отын ужасьёс кун (государственной) служащийёс луо. Геннадий Порфирьевич журналистъёслы озьы ик ивортӥз туннэ улон-вылонмы сярысь. Дунъёс будэмен, улонмы уката секытгес луэ. Тани адямилы улыны миым январь толэзяз 773 манет коньдон кулэ вал, туэ нырысетӥ кварталэ - 804, нош апреле лыдпус 862 манетозь вуиз. Нош шоро-куспо пенсия шаерамы 400 манет луэ. Кызьы со коньдонэн адями улыны кулэ. Уждун но чечы пуньыен кадь йылэ, туэ. нырысетӥ кварталэ 15 процентлы гинэ будӥз. Тужгес но ичи уждун басьто гурт удысын тыршисьёс, шорлыдын 373 манет, нош культура удысын - 580 манет. Шаерамы туэ нырысетӥ кварталэ шоро-куспо уждун 906 манет усиз, Россиен ӵошатыса, со ичигес, нош бускель Пермь областен ӵошатыса, 500 манетлы ӧжытгес. Урал улосвылын асьмелэсь Курган область гинэ бере кыле на. Удмуртиын уждунъя 1 миллиард 51 сюрс манет тырон люкаськемын, со пӧлысь ваньбур поттӥсьёслы - 794, нош бюджет чотын ужасьёслы - 257 миллион манет. Огъя вераса, шаерамы куанер улӥсьёслэн лыдзы арысь аре йылэ. Тани 1994-тӥ арын 403 сюрс мурт ке вал (24 процент), миым 530 сюрс луиз (32 процент), туэ нырысетӥ кварталэ - 911 сюрс (57 процент). Кин киын бен ваньбур, коньдон? Вань ужасьёсты 5 группалы люкыны луэ. Нырысетӥяз пыро пичи уждун басьтӥсьёс. Соос ваньзэ-ӧвӧлзэ 9 процент коньдонэз киязы возё, нош бадӟым уждунэн пукисьёс (20 процентэз) - 37 процент. Мукет группаослэн 13, 18 но 23 процент усе. Тӥни сыӵе югдур. Миым сентябре (17 август бере) калыклэн доходэз 37 процентлы кулэсмиз. Ку луоз калыкез лыдъян (перепись)? Та ужрад чакламын вал туэ. Но Россиын югдур уродмемен, со ортчытэмын луоз 2001-тӥ арын 1 сентябре. Г. РОМАНОВ. Удмурт Республикаысь Правительстволэн Тӧроезлы воштӥсь юнматон сярысь Удмурт Республикаысь Кун Кенешлэн Постановлениез Удмурт Республикаысь Кун Кенеш пуктэ: Удмурт Республикаысь Правительстволэн Тӧроезлы воштӥсе юнматоно Хохлов Николай Ивановичез. Удмурт Республикаысь Кун Кенешлэн Тӧроез А. А. Волков. Ижевск город, 1999 арын 14 мае. �24 - ИИ. Хохлов Николай Иванович Вордскиз 1947-тӥ арын 14 сентябре Мордва АССР-ысь Ельниковской ёросысь Краснофлотец черкогуртын. Ӟуч. Дышетскемез вылӥ. 1971-тӥ арын йылпумъяз Мордва кун университетэз автоматикая но электроникая специальностья; электронной техникая инженер. Пусъемын "Удмурт Республикаысь машина лэсьтонысь дано ужась", "Россия Федерациысь электронной промышленностьысь дано ужась" нимъёсын. 1971-тӥ арын - мертан инструментъёс лэсьтонъя Челябинскысь заводлэн электроникая участокысьтыз инженер-технолог. 1971-тӥ - 1972-тӥ аръёсы - Советской Армиын. 1973-тӥ - 1974-тӥ аръёсы - Саранскысь "Центролит" литейной заводын КИПиА-ез уже кутонъя мастер. 1974-тӥ - 1975-тӥ аръёсы - Сарапул городысь "Элеконд" заводысь инженер. 1975-тӥ - 1980-тӥ аръёсы - "Элеконд" заводысь валтӥсь инженер, СКБ-лэн бюроезлэн кивалтӥсез. 1980-тӥ - 1986-тӥ аръёсы - "Элеконд" заводысь валтӥсь энергетик. 1986-тӥ - 1988-тӥ аръёсы - "Элеконд" заводысь валтӥсь инженерлэн воштӥсез, валтӥсь инженер. 1988-тӥ арын - "Элеконд" огазеяськонысь валтӥсь инженер. 1988-тӥ - 1993-тӥ аръёсы - "Элеконд" огазеяськонлэн валтӥсь директорез. 1993-тӥ - 1999-тӥ аръёсы - акциосын "Элеконд" огазеяськонлэн валтӥсь директорез. Удмурт Республикалэн Правительствоез сярысь Удмурт Республикаысь Кун Кенешлэн Постановлениез Удмурт Республикалэн "Удмурт Республикаысь Правительство сярысь" Законэзлэн 7-тӥ ёзэтэзъя, Удмурт Республикаысь Кун Кенеш пуктэ: 1. Юнматоно Удмурт Республикаысь Правительстволэсь таӵе должностьёссэ: Удмурт Республикаысь Правительстволэн Тӧроез; Удмурт Республикаысь Правительстволэн Тӧроезлэн нырысетӥ воштӥсез; Удмурт Республикаысь Правительстволэн Тӧроезлэн воштӥсез - 5 должность; Удмурт Республикаысь Правительстволэн Тӧроезлэн воштӥсез - Удмурт Республикаысь Асваньбуръя кун комитетлэн тӧроез; Удмурт Республикаысь Правительстволэн Тӧроезлэн воштӥсез - Россия Федерацилэн Президентэз бордын Удмурт Республикалэн ялан ужась ёзаз кивалтӥсез. Удмурт Республикаысь Правительстволэн Аппаратэныз кивалтӥсь; Удмурт Республикаысь югдурез утёнъя министр; Удмурт Республикаысь тазалыкез утёнъя министр; Удмурт Республикаысь культурая министр; Удмурт Республикаысь сьӧрлось калыкъёсын кусыпъёсъя министр; Удмурт Республикаысь калыкез дышетонъя министр; Удмурт Республикаысь национальной политикая министр; Удмурт Республикаысь печатья но иворъёсъя министр; Удмурт Республикаысь инкуазь узырлыкъёсъя но инкуазез утёнъя министр; Удмурт Республикаысь эстӥськонъя, энергетикая но связья министр; Удмурт Республикаысь промышленностья но транспортъя министр; Удмурт Республикаысь гурт удысъя но сиён-юонъя министр; Удмурт Республикаысь калыкез улон-вылонын утёнъя министр; Удмурт Республикаысь вузкаронъя но улон-вылонын юрттэт сётонъя министр; Удмурт Республикаысь коньдон ужпумъёсъя министр; Удмурт Республикаысь экономикая министр; Удмурт Республикаысь юстицияя министр; Удмурт Республикаысь Архитектурая но лэстӥськонъя кун комитетлэн тӧроез; Удмурт Республикаысь Егитъёсын ужанъя кун комитетлэн тӧроез; Удмурт Республикаысь Тарифъёсъя но дунъёсъя кун комитетлэн тӧроез; Удмурт Республикаысь Ужъя кун комитетлэн тӧроез; Удмурт Республикаысь Мугорез юнматонъя культурая но спортъя кун комитетлэн тӧроез; Удмурт Республикаысь Музъем узырлыкъёсъя но му кутонэз радъянъя кун комитетлэн тӧроез - Удмурт Республикаысь министр; Удмурт Республикаысь нюлэсъя управленилэн кивалтӥсез - Удмурт Республикаысь министр; Россия Федерациысь ФСБ-лэн Удмурт Республикая управлениезлэн кивалтӥсез - Удмурт Республикаысь министр; Удмурт Республикаысь Пудоез эмъянъя валтӥсь управленилэн кивалтӥсез - Удмурт Республикаысь министр; 2. Удмурт Республикаысь Правительстволы: дасяно но Удмурт Республикаысь Кун Кенешлэн вуоно сессияз эскерыны сётоно Удмурт Республикалэн "Удмурт Республикаысь Правительство сярысь" Законаз воштонъёс но ватсанъёс пыртон сярысь; федерациысь быдэсъясь властьлэн ёзъёсыныз улосвыл ёзъёссылэн кивлтӥсьёссы Удмурт Республикаысь Правительствое пырон пумысен кенешемъёсты Удмурт Республикаысь Кун Кенешлы сётоно. Удмурт Республикаысь Кун Кенешлэн Тӧроез А. А. Волков. Ижевск город, 1999 арын 13 мае. �19 - ИИ. Удмурт Республикаысь Правительстволэн Тӧроезлы воштӥсез юнматон сярысь Удмурт Республикаысь Кун Кенешлэн Постановлениез Удмурт Республикаысь Кун Кенеш пуктэ: Удмурт Республикаысь Правительстволэн Тӧроезлы воштӥсе юнматоно Чикуров Сергей Витальевичез. Удмурт Республикаысь Кун Кенешлэн Тӧроез А. А. Волков. Ижевск город, 1999 арын 14 мае. �23 - ИИ. Чикуров Сергей Витальевич Вордскиз 1965-тӥ арын 20-тӥ октябре Удмурт АССР-ысь Сарапул городын. Ӟуч. Дышетскемез вылӥ. 1995-тӥ арын йылпумъяз Удмурт кун университетэз правоведение специальностья; экономика наукаосъя кандидат. 1983-тӥ - 1985-тӥ аръёсы - Советской Армиын. 1985-тӥ - 1989-тӥ аръёсы - Югдурез утёнъя министерстволэн ёзъёсаз ужан. 1989-тӥ арын - Ижевск городысь егитъёслэн "Темп" центразы инженер. 1989-тӥ - 1990-тӥ аръёсы - НТО-лэн кивалтӥсез. 1990-тӥ - 1991-тӥ аръёсы - вузкаронъя но вузъёс поттонъя "Темп" фирмалэн кивалтӥсез, Ижевск город. 1991-тӥ - 1992-тӥ аръёсы - вузкаронъя "Темп" компанилэн валтӥсь директорез (тӧроез). 1992-тӥ - 1993-тӥ аръёсы - Вузкаронъя "Чикуров и К" юртлэн валтӥсь директорез, Ижевск город. 1993-тӥ - 1994-тӥ аръёсы - акциосын "Чикуров и К" огазеяськонлэн президентэз. 1994-тӥ - 1995-тӥ аръёсы - акциосын ФСК "Город" огазеяськонлэн директоръёссылэн кенешезлэн тӧроез, Ижевск город. 1995-тӥ - 1996-тӥ аръёсы - акциосын ФСК "Город" огазеяськонзылэн президентэз. 1996-тӥ - 1998-тӥ аръёсы - акциосын ФСК "Город" огазеяськонлэн валтӥсь директорез. 1998-тӥ - 1999-тӥ аръёсы - акциосын "УНГС" "Город" огазеяськонлэн валтӥсь директорез, Ижевск город. Ӵош ужан пайдаё луоз Кызьы ивортылӥмы ни, Удмурт Республикаысь Кун Кенешлэн Президиумез Кун Кенешлэсь Тӧрозэ Александр Волковез Чехие ыстон сярысь решение кутӥз. Отын со "Фольксваген- Шкода-Авто-Ижмаш" проектъя ужпумъёсты эскеронэ пыриськоз. Кунгож сьӧры кошкон азяз Александр Волков пумиськылӥз Россия Федерациысь Правительстволэн Тӧроезлэсь ужзэ быдэсъясен Сергей Степашинэн. Пумиськонын чаклам проектэз быдэстон вылысь Федеральной Правительство ласянь юрттэт сётыны чакламын. Сергей Степашин Россия Федерациысь Экономикая министерствоысь но Таможня кун комитетысь кивалтӥсъёсты косӥз Правительстволэсь Чехиен азьвыл юнматэм Тупанкылзэ уже пыӵатон сярысь постановлениезлы инъет дасяны. Со сяна, эскеремын мукет ужпумъёс но. Кылсярысь, вераськемын Удмурт Республикаысь бюджет удысын ужасьёслы уждунлы коньдон бюджетысь ссуда чотын висъян сярысь. Александр Волков оскемзэ вераз, Сергей Степашинэн азьланяз ӵош ужан уката но пайдаё луоз шуыса. Пумиськонэ озьы ик пыриськиз Удмурт Республикаысь Правительстволэн Тӧроез Николай Ганза. Удмурт Республикаысь Кун Кенешлэн пресс-службаез. Ӵектонъёс пайда сёто Ижевскысь механической заводын азьло аръёсы сямен ик уже выльзэ пыӵатонъя ӵошатскон ялэмын. Солы йылпумъянъёс лэсьтӥсько куинь толэзьлы быдэ. Нырысетӥ кварталэ уже кутэмын 120 рационализаторской ӵектонъёс но 2 изобретениос, со заводлы 1248,3 сюрс манетлы пайда ваиз. Выль ужрадъёс юрттӥзы 56 тонна кортэз но 697 сюрс киловольт электрокужымез шыръяны. Миым ар понна вить муртлы "Устоез новатор" дано ним сётэмын, Дано рационализатор ним басьтӥзы А. В. Хохряков (39 цех), А. А. Тимофеев (54 цех), О. И. Бесогонова (79 цех), К. А. Посаженников (166 отдел), Н. В. Казаков (111 отдел). Кыкетӥ кварталэ выльзэ пыӵатонъя уже пыриськемын ньыльдоно пала подразделениос. Вормисьёс тросгес уждун но премиос басьто, ӵошатскон уг сӥя, уката кужмоя. Со луонлык сётэ планъёсты быдэсъяны но уждунзэс дыраз тырыны. П. НИКОЛАЕВ. НАТАЛЬ Тодматскон сэрег Аб. 286. Удмурт пиосмурт, 34/168/60, улӥсько гуртын, дышетскеме средне- специальной, ужасько культура удысын, яратӥсько арганэн шудыны, тамак уг кыскиськы, вина уг юиськы, улон интые вань. Тодматскысал 35 аресозь ужез яратӥсь, лякыт сямо, вазиськись нылмуртэн. Аб. 287. Удмурт пиосмурт, 35 арес, лякыт сямо, вина уг юиськы, яратӥсько нылпиосты. Тодматскысал лякыт сямо, вазиськись удмурт нылкышноен. Улон интыме воштыны соглаш. (Ялонэз потаз ни - Аб. 207.) Аб. 288. Удмурт пияш, гороскопея Овен, сьӧд йырсиё, ӝуждалае 180 см, дышетскеме - средне-специальной. Ужасько гуртын, коньдонлы уг ёрмиськы, урод сямъёсы ӧвӧл. Тодматскысал 20-28 аресъем удмуртт нылмуртэн, лякыт сямо, ужаны яратӥсь медло. Пумит уг луы 3 аресозь одӥг нылпиезлы. Возьмало фотографиен гожтэт. Аб. 289. Огшоры удмурт пияш, 21/182, улӥсько гуртын, гороскопея Стрелец. Яратӥсько суреданы но чорыганы, лякыт сямо, кысконэн но юонэн уг эшъяськиськы. Семья кылдытон понна тодматскысал 15-25 аресъем, лякыт сямо удмуртт нылашен. Возьмало фотографиен гожтэт. Аб. 290. Удмурт пияш, 31/175, лякыт сямо, тамак уг кыскы, юонэн уг эшъяськы, ужа механизатор луыса. Яратэ лэсьтӥськыны, улон интылы уг ёрмы. Тодматскысал 26-34 аресъем лякыт сямо удмурт нылмуртэн. Аб. 291. Удмурт нылкышно, 34 арес, улӥсько гуртын, люкиськемын, будэ 3 аресъем нылы. Тодматскысал 33-40 аресъем пиосмуртэн, улон интыме воштыны пумит. Аб. 292. Удмурт нылкышно, 31/166/54, улӥсько гуртын, картэным люкиськемын, пиосылы 7 но 13 арес. Тодматскысал 33-40 аресъем ӝужыт мугоро пиосмуртэн, капчи сямо, кыскисьтэм, юонэн мултэс эшъяськисьтэм, ужез гажась медло. Аб. 293. Удмурт воргорон, улӥсько но ужасько гуртын, люкиськемын (кышное эшъяськиз эрказмем нылкышноосын), нылпиосы анаенызы ӵош уло. Куинь ар улӥсько ни огнам, вань аслам хозяйствое, улон юртэ. Тодматскысал 40 арес пала нылкышноен, пумит ӧвӧл нылпиезлы, пиналъёсты мон яратӥсько. Аб. 294. Удмурт нылкышно, 29 арес, дышетскемея вузкарись, люкиськемын, пиелы 7 арес, улӥсько анай-атаеным ӵош. Тодматскысал лякыт сямо, ужез яратӥсь, вина юисьтэм, тамак кыскисьтэм, нылпиосты яратӥсь 35 аресозь пиосмуртэн. Аб. 295. Удмурт нылаш, 21/160. Тодматскысал 22-32 аресъем пиосмуртэн - мед луоз машинаез. Аб. 296. Удмурт нылаш, 26/165, гороскопея Телец. Улӥсько гуртын, ужасько нылпи садын, воспитатель луыса. Тодматскысал 25-32 аресъем ужез гажась, винаен эшъяськымтэ, коньдонлы ёрмисьтэм оскымон пиосмуртэн. Редакцилэсь... Ма туннэ сюлмаськытэ Бензинэз-а сутом, дунъёсты-а сутом? Кылем субботае республикаысьтымы водительёс шуге-леке вуизы: бакчае, гуртэ дыртӥсь муртъёсты паймытӥз бензинлы дун. Пятницае ӝыт сое кык но ӝыны манетэн басьтыны луэ на вал ке, ӵуказеяз солэн дуныз 3 манет но 10 копейкаозь вуиз. Малы кылдӥз таӵе югдур? Та юанлы валэктон сётӥз толон "Удмуртнефетпродукт" предприятилэн кивалтӥсез Николай Сычев. Тани ма со вераз: - Мугъёс трос. Нырысетӥез герӟаськемын Россиысь нефтьлы дунлэн ог 20-25 процентлы йылэменыз. Кыкетӥез потэ АИ-76 бензинэз но дизельной эстӥськонэз тросэн Западэ келяны кутскеммы бордысь. Асьме странаысь та вузъёсты басьтыса, кунгож сьӧрын сое чылкытато но бадӟым дунын вузало. Нефтеперегонной заводъёслы озьы ужаны кельше, асьме калыклэн кулэяськонъёсыз соосты уг сюлмаськыто. Куинетӥез муг герӟаськемын МВФ-лэн (Валютая калык куспо фонд) куронъёсыныз. Предприятимес монополист шуо ке но, озьы со ӧвӧл. Вань эстӥськон пӧлысь ми пыр ортче ньыльмос люкетэз. Кылемзэ вузало "АСПЭК", "Сайгас" но мукет фирмаос. Соин ик "Удмуртнефтепродукт" дунъёсты йылэтӥз шуыса верам шонер уг луы. Солэсь но ортчыт, ми трос лэсьтӥм, эстӥськонлы дунъёсты кемагес дыр ӵоже кортнаса возён понна. Тани Татариын, Башкириын (отын асьсэлэн ньыль заводзы вань ке но, Киров улосын толэзь пала ини АИ-92 бензинэз шорлыдын 3, 3 манетэн вузало ни. АИ-76 кошке 2, 6 манетэн. Запасъёсмы чотын ми возиським ик. Но одӥг странаын улӥськом бере, висъяськеммы уг луы. Уго дорысьтымы эстӥськонэз бускельёсмы тросэн басьтыны ӧдъязы. Берло толэзе, огшоры вакытъёсын ӵошатыса, эстӥськон вузан 1, 5 пол йылӥз. Бен, дунъёс будӥзы. Но соос асьмелэн али но сокем бадӟымесь ӧвӧл - вӧзысьтымы улосъёсын ӵошатыса, 20-30 копейкалы ичигес. Йылозна-а бензин дун матысь дыре? Та арнялэн кутсконаз вуылӥ Перме (отысь но эстӥськон басьтӥськом). Тодмо луиз, ӝоген соос асьсэлэсь продукцизэс дуноятозы шуыса. Валамон ни, ми но соосъя кариськоно луом. Куддыр кылоно луэ, "Удмуртнефтепродукт" эстӥськонлы дунэз, заводысь басьтэменыз ӵошатыса, кык пол будэтэ шуыса. Озьы матын но ӧвӧл. Транспортлы но мукет кулэяськонъёслы ыштонъёсты лыдэ басьтыса, дунъёсты 13-25 процентлы гинэ йылэтӥськом. Совето вакытэ, кылсярысь, куке предприятимы быдэсак государство киын вал, лэзьылӥзы 35 процентозь будэтыны. Николай Семенович озьы ик вераз шаерамы эстӥськонэн вузкаронэз азинтон сярысь. Али солэн огазеяськонэз укмыстон АЗС возе. Азьланьын соослэн лыдзы сокем ик уз йылы - соин предприятие золгес ужаны турттэ али ужасьёсыныз. Трос коньдон висъя выльдон-тупатъян удыслы. Жаль, пусйиз Николай Сычев, государство, асьме правительство палэнске эстӥськонэн вузкаронэз радъянлэсь. Отын но татын кылдо пӧртэм заправкаос, собере кытын ке соос вамышлы быдэ луо, мукет интыын чик но уг усьтӥсько. Соглаш кариськытэк уг луы кивалтӥсен. Ас вылам но сое шӧдӥсько. Улон интыысеным бакчаозям (9 Январь урам - Хохряки посёлок) ог вить ар талэсь азьло одӥг АЗС но ӧй вал. Табере вить интыын бензин басьтыны луэ - кык километрлы быдэ. Умой кадь, но Ижевсклэн мукет районъёсаз озьы ӧвӧл ук. Солэн шораз, шуом, эстӥськонэз быриз ке, шуге-леке вуод гинэ. АЗС-ёс азьланьын уката паськыталозы. Бензин басьтон сяна, тросаз станциосын али ик луэ ни чыры-пыры вуз, сиён-юон, воштос ёзъёс но мукетсэ шедьтыны. Куд-огъёсаз сиськыны но луонлык вань ини. "Удмуртнефтепродуктлэн" тужгес но бадӟымез заправкаез табере луоз Воткинск шоссеын (транспортлэн "Школьной" дугдылон интыяз). Уно колонкаос сяна, татын ӝоген ужаны кутскоз машина тупатъян мастерской, усьтозы автоосты миськыны кык инты, кафетерий, магазин. Татчы вуыса, котькудӥз шофер мед быгатоз кулэ ужзэ быдэстыны но ӧжыт ке но шутэтскыны. Кулэ-а Удмуртилы му вӧез чылкытатонъя нимаз завод? Та юанлы валэктыса, Николай Семенович пусйиз: республикалы со кулэ, завод чотын эркынгес улысалмы, выт но люкаськысал, нош быдэс Россия ласянь учконо ке, сыӵе предприятиос кулэ ӧвӧл, малы ке шуоно, вӧзысьтымы улосъёсысь но та выллем предприятиос рос-прос уг ужало. Я нефть уг огмы, я мукет мугъёс люкето. Николай Сычев - Кун Кенешлэн депутатэз. Со тодмо луэ, республикалэн туала кивалтӥсьёсызлэн ужаменызы котьку сямен соглаш кариськымтэеныз. Кызьы шуо, Николай Семенович оппозицие пыре. Люкетэ- а солэн сыӵе луэмез предприятилэн ужезлы? Валамон ни, шӧдӥське, вераз депутат, ми дорын потатэк сямен ялан ог куамын эскерисьёс ужало, весь маке но утчало. Мон пумит ӧвӧл - мед бугыръяськозы. Уго ми ваньзэ законъя лэсьтӥськом. Туннэ предприятимылэн бюджетэ но, фондъёсы но копейка но тыронэз ӧвӧл. Республикалэн бюджетаз выт ар пумозь келямын ни. ...Пресс-конференция кутскон азьын Николай Семенович велосипед сярысь мадиськиз. Быдэс дуннеын визьмо малпам арберилэсь куштӥськыны уг дырто, пе. Мон малпасько, серекъяса гинэ поттылӥз, дыр, со велосипед сярысь. Бензин дуно ке но, сотэк асьме улонэз син азе пуктыны уг луы ни. И. Лебедев. ГУРТ УЛОН Беромем тулыс Шаерысьтымы музъем ужасьёс ӟеч кусып возё гурт удысъя Удмурт кун научно- исследовательской институтэн. Татысь учёнойёс асьме палъёслы тупась, ӟеч удалтӥсь трос пумо картофка уськытыны быгато. "Кыкетӥ нянь" биотехнология амалэн нырысь вордске пробиркаосын. Одӥг пробиркаысь куинь-ньыль толэзьскын 20 сюрс будос поттыны луэ. Бӧрысь ненег будосъёсты выжто теплицае. Отын ини кылдэ висисьтэм, чылк-чылк картофка кидыс. Татысь тодосчиослэн коллекциязы али ог 70 пумо картофказы. Удмуртие паськыт вӧлмытӥське 15 пумоез. Со пӧлын "невский", "луговской", "ранний жёлтый", "свитанок", "весна", "италмас" но мукетъёсыз. Милемын кенешиз лабораторилэн кивалтӥсез, гурт удыс наукаосъя кандидат Ирина Донец. Тодэммы потӥз: бер тулыс уз-а люкеты картофкалэн удалтонлыкезлы, туэ трос-а луозы колорад бӧчыос. Ирина Леонидовна вераз: - Картофкаез мерттон уз ӝега. Музъемын мускытэз тырмыт. Дыртыны уг яра. Кидысэз согоно шуныт муэ. Колорад бӧчыос сярысь ке верано, табере соос кышкыт ӧвӧл ни. Соослы пумит кужмо эмъюмъёс уно гинэ. Вералом на: учёнойёс алигес гинэ выль уж борды но басьтӥськизы. Пробиркаосын сад- бакча возисьёс понна будэтыны кутскизы сьӧд эмезь (ежевика). Та дыре соос ужало "Дарроу" но "Агавам" пумо будосъёс бордын. Соос ваемын Англиысь но Америкаысь. Валамон ини, институт лабораториосыныз гинэ уг данъяськы. Солэн хозяйствояз озьы ик будэто ю-нянь, бакча сиёнъёс, умой радъямын пудо вордон. Учёнойёсын артэ сюлмысь тыршо огшоры музъем ужасьёс но, пудо утисьёс но. Зэм, туэ тулыс беромыса вуиз. Озьы ке но та нуналлы вань бусы ужъёс быдэстэмын ни. Кылиз на кукурузаез но силослы мынӥсь мукет будосъёсты кизён. Хозяйствоын кутскизы "кыкетӥ няньзэс" но мерттыны. Н. Байтеряков. Тодосчи Ирина Донец. Лаборантъёс Ольга Панькова, Елена Андреева но Любовь Корепанова. В. КАМАШЕВЛЭН туспуктэмъёсыз. Удмурт Республикаысь Правительстволэн Тӧроезлы нырысетӥ воштӥсь юнматон сярысь Удмурт Республикаысь Кун Кенешлэн Постановлениез Удмурт Республикаысь Кун Кенеш пуктэ: Удмурт Республикаысь Правительстволэн Тӧроезлы нырысетӥ воштӥсе юнматоно Питкевич Юрий Степановичез. Удмурт Республикаысь Кун Кенешлэн Тӧроез А. А. Волков. Ижевск город, 1999 арын 14 мае. � 21 - ИИ. Питкевич Юрий Стапанович Вордскиз 1951-тӥ арын 2-тӥ мае Беларусь ССР-ысь Гомель областьысь Жлобин городын. Белорус. Дышетскемез вылӥ. 1978-тӥ арын йылпумъяз Пермьысь политехнической институтэз промышленной но гражданской лэсьтӥськон, инженер-строитель специальностья. Пусъемын "Россиысь транспорт удысысь дано ужась" знакен, сётэмын "Удмурт Республикаысь дано лэсьтӥськись" ним. Ужаны кутскиз 1971-тӥ арын Глазовысь Чепецкой механической заводлэн цехысьтыз мастер, участоклэн кивалтӥсез луыса. 1978-тӥ-1979-тӥ аръёсы - Глазовысь Чепецкой механической заводлэн Лэсьтӥськонъя управлениысьтыз участоклэн кивалтӥсез. 1979-тӥ-1987-тӥ аръёсы - Глазовысь лэсьтӥськонъя Чепецкой управленилэн лэсьтӥськонъя 3 номеро управлениезлэн кивалтӥсез. 1987-тӥ-1988-тӥ аръёсы - Глазовысь лэсьтӥськонъя Чепецкой управленилэн парткомезлэн секретарез. 1988-тӥ-1989-тӥ аръёсы - Глазовысь "Чепецкий механический завод" огазеяськонлэн парткомезлэн секретарез. 1989-тӥ-1993-тӥ аръёсы - Удмурт Республикаысь Глазовысь Калык депутатъёслэн кенешсылэн быдэсъясь комитетэзлэн тӧроез. 1993-тӥ арын - Ижевскысь Калык депутатъёслэн кенешсылэн быдэсъясь комитетэзлэн тӧроезлэн нырысетӥ воштӥсез. 1993-тӥ-1995-тӥ аръёсы - Удмурт Республикаысь Министръёслэн Кенешсылэн Тӧроезлэн воштӥсез. 1995-тӥ-1999-тӥ аръёсы - Удмурт Республикаысь Правительстволэн Тӧроезлэн нырысетӥ воштӥсез. Пӧсь гужем - "ӟырдыт" сюлмаськонъёс Туэ пиналъёслэсь гужем шутэтсконзэс радъяны городлэн бюджетысьтыз но социальной страхованияя фондысь тямыс миллион манет коньдон висъяськоз. Ижевскысь 14 сюрс пинал тазалыксэ юнматыны мыноз санаторийёсы но лагерьёсы. Озьы вань дышетскись пиналъёс пӧлысь ӝынызэ гужем вакытэ чакласа возёзы калыкез дышетонъя управление но улон- вылонын утёнъя ёзъёс. Л. ЮРТЕЕВА. Палэнтӥ ортчод, эзельлы сюрес усьтод 1999-тӥ арын 16 мае ортчиз 16-тӥез ВИЧ-инфекцилэсь но СПИД-лэсь кулэмъёсты буре ваёнъя калык куспо нунал. "Адямиосты СПИД-лэсь утён понна, кужыммес огазеялом ултӥянлы пумит" - сыӵе ӧтён улсын ортчиз со туэ. 60 странаысь 400-лэсь уно городъёсын та нуналэ радъямын вал пӧртэм ужрадъёс. Люкаськемъёс буре ваизы СПИД-лэсь кулэмъёсты, ВИЧ-инфекциез нуллӥсьёслы но СПИД-эн висисьёслы дурбасьтон мылкыдзэс веразы. Кулэмъёсты буре ваён таӵе нунал ортчиз Америкаысь Сан Франциско городын 1983 арын. СПИД-эн висён муг соку тодмо ӧй вал на, нош висёнлэсь кулэмъёс кӧня ке сюрс мурт вал ни. Нош 1998-тӥ арлэн кутсконэзлы Огазеям Нациослэн Организацизылэн но Тазалыкез утёнъя калык куспо организацизылэн Огазеям программазылэн эскеронъёсызъя, 30 миллионлэсь ятыр адямиослы паламын вал ВИЧ-инфекция, СПИД-лэсь кулӥзы 11,7 миллион мурт. Калык быремъя буре ваён нуналлэн кулэлыкез но пумен будӥз. Пичи городъёсын но бадӟым городъёсын улӥсьёс сайкаллязы, шуге-леке усемъёслы юрттыны мылкыд каронзэс вераллязы. Со вал кышкыт висёнлы пумит султон но алон. Озьы ке но, ВИЧ-инфекция быдэс дуннеетӥ юмша. Кышкыт висёнэз вӧлмытӥьёслэн лыдзы котькуд нунал 16000 муртлы йылэ. Туннэлы котькуд сю адями пӧлысь (15-49 аресъемъёсты лыдэ басьтыса) одӥгезлы ВИЧ паламын, но 10 процентэз гинэ тодо мугоразы инфекция шедем сярысь. Кема аръёс ӵоже вирус мугоразы кӧлыса сямен улэ, соин ик висёнэз соку ик шӧдыны уг луы. Туннэ нуналлы Россиын ВИЧ-инфекциез нуллӥсьёс 13049 лыдъясько, соос пӧлысь 364-ез СПИД-эн висё. Шараямын ВИЧ-инфекциез нуллӥсь 10439 наркоманъёс, Россилэн куд-ог улосъёсаз сыӵе висисьёс 90 процент пала лыдъясько. Асьме республикаын ВИЧ-инфекция паламын 8 муртлы, одӥгез соос пӧлысь висе СПИД-эн. Пӧртэм эскеронъёсъя тодмо: туннэ нуналлы 3-7 процентэз Россиын улӥсьёс наркотикъёслэсь уг палэнтӥсько. 70-90 процентэз наркоманъёс - егитъёс. Сюлэмшугъяськытэ наркоманилэн республикаямы но паськыт вӧлмемез. 1996 арен ӵошатыса, та кышкыт висён шаерамы ньыль поллы йылӥз - 100 сюрс адямилы 20,1 висись. Нош быдэ вуымтэос пӧлын та дыр куспын ик наркотикен эшъяськисьёс куать пол йылӥзы. ВИЧ-инфекцилэсь но СПИД-лэсь кулэмъёсты буре ваён со шуге-леке усемъёслы дурбасьтон. Солэн куонъёсыз таӵеесь: - дунне вылысь нокыӵе выжы калык но, СПИД-эн висьыны ӧвӧл кулэ. Матысь кусыпъёс возён понна, гомосексуалистъёсты, наркоманъёсты кыл кутон уг луы со; - СПИД-эн висисьёслэн вань гражданъёсын одӥг кадь правооссы - соос пӧлын - ужлы, улон интылы, эркын ветлонлы; - вань адямиос тодыны кулэ СПИД-лэсь утиськон аамалъёсты; - Правительство луонлык сётыны кулэ ВИЧ-инфекциез нуллӥсь гражданъёсты эмъян ласянь. Буре ваён нунал тужгес но паськыт пусйиське США-ын, Европаын. Нош куд-ог странаосын со висисьёс пӧлынгес ортче, куддыр 20 мурт гинэ люкаське та ужрадэ. Озьы ке но, со юрттэ адямиослы ог-огзылы матэгес луыны - огнын адямиез кайгу ӝоггес зӥбе. Со сяна, Буре ваён нунал СПИД-эн висисьтэмъёслы алон выллем луэ. Нокин но киыныз шонтыса ортчыны ӧвӧл кулэ та кышкыт черлэсь, озьы тон астэ утёнлэсь но палэнскиськод. Вань кужымез огазеяно эпидемиен нюръяськонэ, дунне вылысь одӥг адямилы но со кышкытлык вайыны медаз быгаты. Л. КУЗЕЛИН, СПИД-эн но палась висёнъёсын нюръяськонъя центрын ужась. Георгий Архиповлэн вордскемез дырысен 70 ар. Дипломтэм тодосчи Георгий Архиповез мон тодӥсько вал 1950-тӥ арысен, ку пыри Удмурт пединститутэ дышетскыны. Ог-огмес валанъёсмы но эшлыко кусыпъёсмы со дырысен ноку но вожвыл ӧз луылэ. Тарту университетын аспирант дыръяз УдНИИ-лэн фольклор люканъя экспедициеныз ӵош быдэсаксэ сямен удмурт шаерез - Чупчи вылысен Киров областьысь Лобань шур дорозь ортчимы. Соку мон шум но потӥ, пайми но солэн калык вераськон кылэз сокем ӟеч тодыны, адямиослэн сюлэмазы ик пырыса валаны тыршемезлы. Меӵак вераса, экспедициын дыръямы мон оскисько вал солэн Эстониысь наукаосъя кандидат луыса бертонэзлы. Но отӥяз ужпум мукет палагес берыктӥськиз. Георгий Архипович Удмуртие диссертацизэ утьытэк бертӥз. Мугзэ аслэсьтыз юаны умой ӧз поты. Сое валай ини 1970-тӥ арын Таллиннысен, Пауль Аристэ академикен вераськыса, Быдэс дуннеысь финн-угор тодосчиослэн ИИИ конгрессы ужан дыръя. - Георгий Архиповез тӥ ӟеч-а тодӥськоды? - шорам меӵ-меӵ учкыса юаз со мынэсьтым. - Тодӥсько, - вази мон, - Удмурт пединститутын дышетскеммы дырысен. Ог-огмес валамтэ учырмы ноку но ӧй вал кадь. - Озьы бере, - веранзэ азьланьтэ Пауль Аристэ, - тӥледды мон курисько соин тани ма пумысь кенешыны. Та дырозь мынам одӥг аспирантэ но диссертацизэ утьытэк дышетсконзэ ӧз йылпумъя на вал. Георгий Архипович огназ сыӵе медаз луы вылэм. Мед йылаз-пумаз вуттоз со диссертацизэ. Ужез со бордын гинэ: быдӟалазэ 900 бамысь 300 баме вуттоно, вакчиятоно гинэ сое. Озьы курэ ВАК - Вылӥ аттестационной комиссия. Сотэк диссертациез Учёной советэ поттыны уг луы. Вакчиятыны дыр толэзьлэсь трос кулэ уз луы, малпасько. Материалэз туж узыр, теория ласянь но ӟеч лэсьтэмын ни со. Пауль Аристэлэсь та куронзэ мон Ижевске бертэме бере ик быдэстӥ. Георгий Архипович шумпотыса но, мур лулӟылыса но шуиз: - Аристэлы мон сярысь озьы малпамез но мыным сокем оскемез понна, конечно, туж бадӟым тау, но ведь татысьёс мыным одно ик люкетыны тыршозы - диссертациме утьыны сёровно уз сётэ. Ути ке но, диссертациме ВАК пыр кекатозы. Монэ ведь соос националистъёс радэ пыртӥзы. Асьме дорын Удмурт университет кылдытоно, Удмурт филармонилы, Удмурт театрлы асьсэ понна юртъёс сётоно, Удмуртилы национальной кадръёс дасянэз нимысьтыз радъяно шуыса газетэ гожтэменым йырин сыӵее вуттӥзы монэ. Пичи Пургалась партактивын, пе, таӵе мылкыдъёсын лэчыт нюръяськыны кулэ шуыса вераськем ачиз Евстафий Петрович Никитин, обкомлэн кыкетӥ секретарез. - Печатламтэ гожтэтлэсь пуштроссэ озьы шараяны Конституцияя уг яра ук, - шуисько. - Судэ сёт. Свидетельды вань - ёросысь быдэсакез партактив... - Уг выры ини мон со ужен, - ӝож тусын учкиз Георгий Архипович. - Соосты уд вормы. Озьы вырыны кутскид ке, кин тодэ, мае эшшо адӟоно луод на. - Но ведь тон - озьы ке но, тазьы ке но - вылӥ квалификациен специалист, ӧнерчи, ини. Диплом басьтонэд гинэ кылемын на. Вань даурдэ тодосчи дипломтэк ортчытыны малпаськод-а оло? - Мед луоз озьы, - вераськонмес йылпумъяса лулӟиз Георгий Архипович. - Аристэез, конечно, мон туж ӝоже уськытӥ. Но мар карод, мынам мукет луэме табере уг поты ни. Нош быгатэмея ужало - наукаын но, поэзиын но. Ужасько ке, мон вань кайгуосме огдырлы ке но вунэтӥсько. Асме кытӥяз туж шудо адямиен но лыдъясько. Пётр ПОЗДЕЕВ, писатель. ЁРОСЪЁСЫСЬ ИВОРЪЁС Дунъя но данъя Семьялэсь нуналзэ сӥё-дано пусъён асьме шаерамы но пыӵаз ни. Та нуналэ республикамылэн пӧртэм сэрегъёсаз семьялы сӥзем ужрадъёс ортчылӥзы. Селта ёросысь ваньмаз сямен сельсоветъёсын Семьялэсь нуналзэ ас сяменызы пумитазы. Котькуд улосъя бырйизы та арысь тужгес усто семьяез, чай юонъёс, шулдыръяськонъёс ортчытӥзы. Озьы ик радъямын вал семьяен ужанъя тужгес но устоезлы сельсоветлы смотр- конкурс. Ёрос администрациысь семья ужпумъёсъя отдел ёрмыса улӥсь семьяослы коньдонэн юрттэт сётӥз, таӵе уж быдэс ар ӵоже нуиськиз. х х х Як.-Бодья ёросын Семьялэсь нуналзэ пумитазы, трос нылпиё семьяосты данъяса. Тодазы ваизы кема аръёс ӵоже ӵош улэм кузпалъёсты но - азвесь сюанзэс пусъемъёсты люкаллязы ёрос культура юртэ. Нош май пумын асьсэлэсь быгатонлыкёсэс возьматозы спортэн эшъяськись семьяос. х х х Семьялэсь нуналзэ котькуд аре паськыт пусъё Кияса ёросысь сельсоветъёсын но. Кин марлы усто: одӥгаз семьяос асьсэлэсь быгатонлыкъёссэс возьматӥзы, мукетаз вераськон ӝутскиз нылпиосты будэтон ужпумъёсъя, куинетӥяз пумиськизы дышетӥсьёслэн семьяоссы. Нош Киясаысь культура юртын шутэтскизы ёрмыса улӥсь семьяос. Чай юон ортчытыны яке кыӵе ке мукет ужрадлы ёрос администрациысь семья ужпумъёсъя отдел котькуд сельсоветлы кӧня ке коньдон висъяз. Л. КИМОВА. ФРОЛОВ Леонид Кириллович Вордскиз 1953-тӥ арын 30-тӥ октябре БАССР-ысь Макалинской ёросысь Верхнетроицк гуртын. 1980-тӥ арын йылпумъяз Башкириысь гурт удысъя институтэз пудо-животэз эмъян специальностья, 1987-тӥ арын - Удмурт кун университетэз, коньдон ужпумъёсъя специальность басьтӥз. Ужаны кутскиз БАССР-ысь "Красная звезда" колхозын. 1972-тӥ -1974-тӥ аръёсы Советской Армиын. 1975-тӥ -1980-тӥ аръёсы - Башкириысь гурт удысъя институтлэн дышетскисез. 1980-тӥ -1986-тӥ аръёсы - УАССР-ысь Глазов ёросысь "Кожильский" совхозын пудо- животэз эмъянъя валтӥсь врач. 1986-тӥ -1999-тӥ аръёсы - Удмурт Республикаысь Глазов ёросысь "Кожильский" совхозлэн директорез. Удмурт Республикаысь Правительстволэн Тӧроезлы воштӥсь - Россия Федерацилэн Прездентэз бордын Удмурт Республикалэн ялан ужась ёзаз кивалтӥсь юнматон сярысь Удмурт Республикаысь Кун Кенешлэн Постановлениез Удмурт Республикаысь Кун Кенеш пуктэ: Удмурт Республикаысь Правительстволэн Тӧроезлы воштӥсе - Россия Федерацилэн Прездентэз бордын Удмурт Республикалэн ялан ужась ёзаз кивалтӥсе юнматоно Сакович Андрей Владимировичез. Удмурт Республикаысь Кун Кенешлэн Тӧроез А. А. Волков. Ижевск город, 1999 арын 14 мае. �25 - ИИ. Сакович Андрей Владимирович Вордскиз 1961-тӥ арын 9-тӥ сентябре Москваын. Ӟуч. Дышетскемез вылӥ. 1984-тӥ арын йылпумъяз Бауман нимо МВТУ-ез радиоинженер специальностья. Ужаны кутскиз 1984-тӥ арын Москваысь Кыдёкысь связья НИИ-ын инженер луыса. 1988-тӥ - 1993-тӥ аръёсы - СССР-ысь МИД-ын, Россиысь МИД-ын, ЮНЕСКО бордын Беларусьлэн Постпредствояз (куинетӥ секретарез), Москва, Париж. 1993-тӥ - 1995-тӥ аръёсы - Россия Федерацилэн Президентэз бордын Удмурт Республикалэн ялан ужась ёзаз валтӥсь специалист. 1996-тӥ - 1997-тӥ аръёсы - Россия Федерациысь Федеральной Собранилэн Федерацияя Кенешаз быръем муртлэн юрттӥсез. 1997-тӥ - 1999-тӥ аръёсы - Москваысь Акциосын "Евразия" банклэн вице-президентэз. "Семья - вӧсь каронлы пумит" Семьяез ӵошатыны луоз государствоысь пичи государствоен. Отын но луо пӧртэм тулкымъяськонъёс, кризисъёс, валамтэос. Россиысь, озьы ик шаерысьтымы семья туннэ нуналэ синучконын сямен возьматэ странаямы кылдэм югдурез. Одӥгез семья сиён-юон пӧлын пылаське, мукетызлэн ӝӧк вылаз пуктыны картофкаез гинэ но ӧвӧл. Коньдонлы ёрмон, ужтэк кылён, экономикаын но политикаын валамтэос - ваньмыз со семьяез секыт зӥбетэ вуттэ. Отысь ик пото йыртэман учыръёс, ог-огдэ ултӥян, вӧсь карон. Семьялэн нуналэзлы сӥзьыса, та ужпумъёслы бадӟым саклык висъямын вал "Семья - вӧсь каронлы пумит" "котырес ӝӧк" сьӧрын вераськонын. Радъяз сое Удмурт Правительствоысь семья ужпумъёсъя, калыкез улон-вылонын утёнъя но тазалыкез утёнъя отдел. Отделлэн кивалтӥсезлэн Ирина Галиналэн верамезъя, та пумиськон луыны кулэ бадӟым ужлэн кутсконэз. "Котырес ӝӧк" сьӧры ӧтемын вал семья ужпумъёсын, нылпиосын герӟаськем пӧртэм министерствоосысь но ведомствоосысь специалистъёс, иворез вӧлмытон удысын ужасьёс. Пусйымон соиз: пумиськон ортчиз Ижевскысь Карлутская Набережная урамысь Быдэ вуымтэосты огдырлы интыян центрын. Анай-атайёсынызы аналтэм, жугонлэсь но ултӥянлэсь пегӟем нылпиос татын ӧжыт ке но соос сярысь сюлмаськемез шӧдо. Пиналъёсты кӧттырымон сюдо, эмъяло, воспитательёс соосын занятиос ортчыто, психологъёс юрттэт сёто. Пӧлысьтызы куд-огез школае ветлонэз но уг тодо, букваосын нырысьсэ татын тодматско. Центр чакламын шаермылэн пӧртэм сэрегъёсысьтыз 40-50 нылпиослы, но ӵем дыръя юрттэтлы кулэяськисьёс солэсь но тросгес луо. Пиналъёс татын ортчыто вить нуналысен кык толэзёзь. Собере нош берытско семьяосазы яке урамъёстӥ костаськыса ветло. Доразы соосты нош ик возьмало юэм анай-атайёссы яке соослэн юлтошъёссы. Ӵем дыръя улон интытэк но кылё - квартиразы вузамын луэ. Куд-огез анай-атайёс, коньдон поттон вылэ чӧлскыса, нылпиоссэс но уг адӟо ни. Вань сыӵеосыз но, пиналъёссэс кураськыны ысто, вораськыны дышето. Вылаз ик, нылпиосты жалятэк жуго. Берло ньыль толэзь ӵоже гинэ нылпиосты жугон учыръёсъя та центре 29 ивортон вуиз. Котькуд учыръя эскерон мынэ, янгыш муртъёс кыл куто. Тужгес но сьӧсьясько сюратайёс, асьсэлэн атайёссы но бере уг кылё. Эскеронъёс возьмато, 30-40 процентэз секыт йыружъёс лэсьтӥсько семьяын. Туннэ нуналлы шаерамы 1800 шугъяськытӥсь семья лыдъяське. Сояз арын сазьтӥськон интыосы вуттэмын 1744 нылкышно, Ижевскын - 988-эз. Йыртэмамзы понна учётэ пуктэмын 4700 быдэ вуымтэос, 600-эз - нылъёс. Туэ ньыль толэзь куспын гинэ соос пӧлын 916 йыртэман учыръёс вал ни, кылем арын та дырысен со лыдпус 660 вал. Нылпиослэн йыртэманъёссыя нырысетӥ кварталэ Удмуртия Россиын нырысетӥ интые потӥз. Секыт йыружъёсъя но йыртэманъёсъя шаерамы югдур уката но секыт Ижевскын, Воткинскын, Завьяловоын, Камбаркаын, Пичи Пурга но Як.-Бодья районъёсын. Ваньмыз со семьяез шукке. Тужгес но трос йӧтэ нылпиослы, нылкышноослы, мӧйыослы. Но "котырес ӝӧк" сьӧрын вераськонын валтӥсь ужпум вал - нылпиосты утён но соослы юрттон. Чакламын нимысьтыз ужрадъёс кутыны но куронэн вазиськыны Удмурт Республикаысь Кун Кенеше но Правительствое. Кылсярысь, люкаськемъёсты шугъяськытэ ёросъёсысь ултӥям но вӧсь карем нылпиосты огдырлы кытчы ке но интыян. 3-4 ке но инты висъяно яке больницаосын, яке калыкез улон-вылонын утёнъя центръёсын. Озьы ик малпаськыны кулэ нылпиоссэс аналтэм анайёсты кыл кутытон сярысь. Пиналъёссэс таласа яке огдырлы кытчы ке интыяса, соослы нокыӵе сюлмаськонъёстэк шутэтскон дыр сётӥське. Тросгес верано но возьматоно усто семьяосты. Та ласянь пусйыны луысал республикаысьтымы "Егит семья" центрын ужасьёсьёслэсь ӟеч ужамзэс. Озьы ик, семья ужпумъёсын кылдэм секыт югдурез сэрттон-пертчон понна, республикаысьтымы пӧртэм ведомствоос но министерствоос ужзэс огазеяны но ӵош эскерыны кулэ. "Котырес ӝӧк" сьӧры люкаськемъёс кенешизы, азязы пуктэм ужпумъёслэсь быдэсъяськемзэс выльысяз огъя кенешазы эскерыны. Л. МАЛЫХ. Ялӥськом конкурс "Егит семья - туннэ но ӵуказе" Удмурт Республикаысь Егитъёсын ужанъя кун комитетысь "Егит семья" центр но "Удмурт дунне" газет яло конкурс: "Егит семья - туннэ но ӵуказе". Гожтоно шаерысьтымы усто семьяослэн улэм-вылэмзы, шуг-секытъёсты вормыны быгатэмзы, шутэтскемзы, ог-огзэс валамзы сярысь. Йылпумъянъёс лэсьтэмын луозы ар пумын. Вормисьёсты возьмало синпель кузьымъёс. Конкурсэ пыриськыны быгато вань мылкыд карисьёс. Сёт чорыгдэ, Ита анае Гужем гурт калык ужпӧрен вуёме кадь. Отчы но вутсконо, татчы но. Но шур дурын пукытэк гужемлэсь шӧмзэ уд вала. Ӝыт ужмес быдэстэммы бере, дасяськиськом Ита шур дуре. Сюрес вылэ потыны трос дыр кулэ ӧвӧл. Кузпалы визнанъёс дася ни, Серги выны пушнер вылысь нумыръёсты октэ. Дасяськеммес синйылтыса, Тёпка пунымы но куриськыны кутске: жильыеныз шальтыртэ, мусояськыса-куриськыса нискетэ. Амалтэк думетысь лэзиськод сое. Ита шурмес тӧдьы Камен уд ӵошаты. Но со милемлы, туж мусо потэ: шур кузя, вань куакъёсты синдэ кыньыса но шедьтод, вань визнан, пыласькон интыоссэ тодӥськод. Бызись шур пиналзэ но, мӧйызэ но бордаз валантэм кужымен кыске. Каньылля визылась ву шоры учкыса жадемед ик сылме. Мылкыд буйгатозь пыласькеммы бере, шур уллане васькыса чорыганы ӧдъяськом. Мон Серги выны вӧзысь ӝогак палэнскисько. Артэ сылӥськом, со чорыг поттылэ но поттылэ, нош мынам пукые нырулыса уя. Сереме медаз уськыты шуыса, ярдурысь лабрес бадьпуос вӧзы дугдӥсько. Кузпалэ малы ке шур берытскон вӧзы интыяське. Вашкалаос, пе, визнанзэс чӧлтон азьын одно ик шурлы, Инмарлы вазиськиллям. Тае лыдэ басьтыса, мон но шыпыртӥсько: - Ита анае, вождэ эн вай! Чорыганы лыктӥ. Вумуртэ, тыныд нянь шорем куштӥсько, бадӟымзэ чорыгдэ сёт. Кыдёкысь мур кожъёсысь чорыгъёсты ярдуре улля, мыным матэ вай. Выжыкылын сямен мынам курикам пичиез но, бадӟымез но чорыгъёс мед кутскозы. Вувыл синучкон сямен чилекъя. Кема учкыса сылыку, синъёс ик вӧсь луыны кутско. Нырулыса веттаськись пукые шорысь синъёсме воштыны ик курдасько. Ӵап соку пукые тюак! выиз, визнан ньӧры зурак кариськиз. Шумпотэменым-а, курдаменым-а, кузпалэ пала учкыса черекъяны кутски: - Витя-а! Витя-а, юрт-ты! - Ма луиз? - шокпотыса вӧзам вуиз со. Бадӟымос гордбурдэз ярдуре поттӥм, ява. Нош солэн сётскемез уг поты, быжзэ выретыса шонаськонъяз курикысь мозмытскыны шедьтӥз. Таяз учыре мон но кӧлэм куака сямен ӧй нырулы. Чорыгась гондыр музэн омырски калтосэ вылэ. Вераса уд оске, ява! Килолэсь ятыр луоз секталаез. Кузпалэ пальпотыса шорам учке: - Пӧрмостэм муртлы ик инмар юрттэ, лэся. Уть, кыӵе зумыт чорыг лым пӧрмоз. - Мон но зэмос чорыгась луи ни, - ватыны уг быгатӥськы шумпотонме. Огпол Урдумошур гурт вӧзысь выж уллапалан чорыгакум, мон вӧзы тодмотэм воргорон дугдӥз. Чорыгъёсты поттылэме шоры дэймыса учкемез бере пальпотӥз: - Визнанэн чорыган - кышномурт уж. Уть ай, кыӵе пӧрмытӥськод! - Шудыса эн вераське, - пальпотӥсько пумитаз. Нош кемалась ӧвӧл чагыр экран пыр кылӥсько, кылем арын, пе, визнанэн чорыгаса ӵошатсконын нырысетӥ интыез кышномурт басьтӥз. Иське, чорыган чик но пиосмурт уж ӧвӧл! Табере мон чидатэк гужемез возьмасько ни. Соку мон нош Ита анайлы вазисько, чорыгзэ куро. С. Федулова. Ижевск. Адями улыны вордске... Ар талэсь азьло ӵапак вордӥськем нуналаз улонысь кошкиз шаерысьтымы тодмо журналист Николай Евсеев. Ӵошкыт ӧй вал солэн будон но кыдан сюресэз. Нокыӵе шуг- секытлы ӧз сётскы юн сюлэмо воргорон. Вань улытозяз нюръяськиз зэмлык понна, чеберлык понна. Со сярысь ик ивортэ лыдӟисьёслы радиожурналист Милитина Гаврилова. Солэсь гожтэтсэ лыдӟыса тододы ӟеч сюлэмо но лэчыт визьмо адями сярысь но. "Адями улыны огпол гинэ вордске та югыт дунне вылэ. Кыкетӥзэ уг вордскы ни. Озьы ке но, ум быгатӥське адямиез утьыны", - гожтӥз Н. Н. Евсеев "Пеймыт уй гинэ вералоз" повестяз отысь одӥгез героез, Г. П. Котельников, сярысь. Зэмзэ вераса, со сярысь гинэ ӧз, дыр. Малы ке шуоно, соос, книгаысь геройёс, ваньзы сямен улонысь туж вазь кошкизы. Шонергес ке, соосты кошкытӥзы. Кошкытӥзы кужмысь, дышем интыысьтызы кыдёке келяса, курадӟытыса, ыбыса... 30-тӥ, 40-тӥ аръёсы, 50-тӥ аръёслэн кутсконазы - кунэнымы Иосиф Сталин кивалтон вакытэ Удмуртиын репрессиос улэ шедем адямиослы сӥземын журналистлэн Николай Евсеевлэн ачиз улэп дыръя потэм одӥг гинэ книгаез. Лыдӟыны секыт сое. Гожтыны эшшо но секыт йӧтӥз, луоз. Вань очеркъёссэ но повестьсэ со кылдытӥз азьло КГБ-лэн архивъёсаз кылем документъёсъя, соосты сюлэм пыртӥз поттыса, аслэсьтыз улонзэ соослэн улонэнызы герӟаса, ӵошатыса. Улонэз нош вольыт ӧй вал. 1931-тӥ арын вордскем пилы но уж борды вазь басьтӥськоно луиз. Тужгес но - война кутскем но, атайзы фронтэ кошкем бере. Усыяз но, гыриз но. Туж секыт потылӥз геры. Соку сютэм пияшъёслы воргорон ужез оскылӥзы ук. Школаын Коля ӟеч дышетскиз. Классысь классэ ушъян кагазэн потаз. Дышетскыкуз ик гожъян мылкыдыз лӧптӥз. Гожъямъёссэ трос пол гинэ "Пионерская правда" газетэ ысъялляз. Унозэ ӧз но печатлаллялэ, но валэктон котьку келяллязы. Али вераны шуг, кин луон сярысь малпалляз Н. Н. Евсеев. Одӥгзэ валаны луэ: 30-тӥ аръёсы вордскемъёс, война вылтӥ будэмъёс, шуг-секытэз еж пельпумзы вылын поттэмъёс, одно ик дышетскыны тыршылӥзы. Николай но ас азяз сыӵе ужпум пуктӥз: дышетсконо. Солы школаын луонлыкъёс вал. Сосновка школа золъёсыз пӧлы пырылӥз. Отын со вакытэ туж визьмо биолог ужаз - Социалистической Ужысь Герой И. К. Зеленин. Предметсэ ӟеч тодэмен валче, со котькуд мукет уж борды но мылысь-кыдысь басьтӥськылӥз. Сизьым класс бере школаысь тросэз кошкылӥзы. Николай ӧз ӵыды. Солы туж яралляз история. Синмаськытэк учкыны ӧз быгатылы егит, чебер, предметсэ ӟеч тодӥсь дышетӥсь Лидия Георгиевна шоры. История Николай Николаевич Евсеев понна луиз улытозяз яратоно но сюлэмзэ бугыръясь уж. Дас классэз йылпумъямез бере, дышетсконзэ азьланьтэ Удмурт пединститутын, отысь историяя факультетын. Со вал 1949-тӥ арын. Дышетсконэз ӟеч ке но мынӥз, институтысь кошконо луиз. Вербовкая вуиз Челябинск улосысь одӥгаз городэ. Отысь одӥгаз заводын пӧртэм ужъёсты быдэсъяз. Малпаз коньдон поттыны. Но ужез со выллемгес мынӥз. Улонэз но шуг, уксёез но ичи, анаез но ялан дораз ӧте. Ар ортчыса, Сосновкае бертӥз. Клубын ужан солэсь мылкыдзэ нокызьы но ӧз буйгаты. Сюлмаськиз ке но, йыраз одӥг малпан улӥз: дышетсконо. 1952-тӥ арын нош ик (кыкетӥзэ ни!) Удмурт пединститутысь историяя факультетэ дышетскыны пыре. Со вакытэ туж ӟеч тодэ но вала ни вал: гуртысь нокин уз юртты, стипендия вылын гинэ улыны секыт луоз. Фотоаппарат басьтэ, тус пуктыны дышетске. Тус пуктон луиз солэн дышетскыкуз юрттӥсез. Соку ик гожъяны кутске "Комсомолец Удмуртии" но "Советской Удмуртия" газетъёсы. Эшъяськыны ӧдъя гожъяськыны кутскись ачиз кадь пиен Анатолий Волковен. Таиз бӧрысь кылбурчи луиз. 1956-тӥ арын оштолэзе соос кышнояськизы. Ува ёросысь Нылга черкогуртын кутскиз улонзы. Городын будэм Аня Перевощиковалы секыт йӧтӥз: гур но эстоно, нянь но пыжоно... Юрттӥз кузпалыз, дырыз туж ичи ке но вал. Нуназе школаын со - историк, ӝыт ужась школаын - директор. Егит коммунистлы оскизы сыӵе ужез. Со дыре ик "Советской Удмуртия" газетэ гуртын ужъёс, школа сярысь корреспонденциос ысъяз на. Мынысал, дыр, ужзы, но кышноез висьыны кутскиз. Солы дэмлазы выльысь городэ кошкыны. Кӧня ке нимазы улыса, Н. Н. Евсеев П. М. Яшинлэсь, газетлэн валтӥсь редакторезлэсь, гожтэт пыр юаз: интыды уз-а сюры? Инты шедиз. 1958-тӥ арысен Н. Н. Евсеев улонзэ герӟа "Советской Удмуртия"-"Удмурт дунне" газетэн. Ӟечгес ужан вылысь дышетсконо луиз на вылӥ партшколалэн журналистъёсты дасясь ёзаз. Газетын Н. Н. Евсеев литературая ужась но, отделэн кивалтӥсь но, редакторлэн воштӥсез но вал. Сюлэмыз ӧз люкиськылы, кун телерадиокомпанилы директоре басьякузы но: 1977-тӥ арын сое отчы кужмысьгес но пуктӥзы. Удмурт газетлэн редакциез но кун телерадиокомпания туж пӧртэмесь. Кыкетӥяз кык кылын ужано. Соин ик ужасьёсыз но, удмуртъёс сяна, мукет кылын но вераськисьёс. Н. Н. Евсеевлы отын капчи ӧз йӧты. Тужгес - нырысь-валысь. Тросэз ӧз но валаллялэ нимысьтыз сценарийя ужаны куремзэ. Ним но понылӥзы. Котьма ке но, со ужаку, телевидение выжиз буёлъёсын ужась аппаратура вылэ, Пушкин урамысь - Песочной ульчае. Тыршиз, удмурт кылын веранъёс тросгес мед луозы шуыса. Удмурт иворъёс вӧзын тросгес адӟиськылӥзы литературалы сӥзем веранъёс. Удмурт театрысь спектакльёсты гожъязы. Телеспектакльёс бордын ужазы. Ачиз но гожъяз телеспектакльёслы сценарийёс. Тужгес адскымонэз вал "Сюреслэн пумыз ӧвӧл". Со сӥземын С. П. Барышниковлы. Спектакльын трос удмурт артистъёс шудӥзы. Ужъёс ӟеч мынӥзы кадь. Но шӧдӥз секытсэ, аслыз пумитъяськисьсэ, сюлэмызлы ярасьтэмзэ. Соин ик, лэся, висёнъёс аляны кутскизы, шӧдӥз та ужаз жадемзэ но. Выльысь куриськиз ас газетаз, яратоно ужаз. Татын со ас дораз вал: яратӥз калыкен пумиськылыны, соин вераськыны, кенешыны, быгатэмезъя юрттыны... Учкисько Удмурт радиолэн фондаз возиськись веранъёсъя одӥгзэ книгаез. Син азям Д-890 номерен пусъем верос. Н. Евсеев - "Коммунистъёс уг чигнало". Одӥг ним улын кык веран: И. Д. Пастухов но А. К. Кириллова. Сӥземын КПСС-лы 60 ар тырмонлы. Котькудӥзлэн аслаз улонэз. Ӟеч улон понна нюръяськемез. Соосты тодэ вайыса, газетысь гожъямъёссэ син азе пуктыса (соос кулэмез бере но печатласькизы на), "Пеймыт уй гинэ вералоз" книгазэ выльысь но выльысь лыдӟыса, адӟыны луэ: Н. Н. Евсеев ноку но капчи ужпумъёс борды ӧз кутскылы. Гожъяз нош пыр-поч, гожтоно ужез сярысь азьвыл ик ӟеч-ӟеч тодыса, котькуд чурзэ эскерыса, малпаськыса, валэктыса, лыдпусъёсын, документъёсын юнматыса. Котькудаз шӧдӥсько лякыт сюлэмыз но юн сямыз. Тодам ваисько мыным витьтон арес тырмыку вераськемзэ, пушкыз тырыса, ӟеч кылъёс шедьтэмзэ... Гожтӥсько но малпасько: шудо-а меда вал Николай Николаевич? Шудо ик, дыр. Малпаз историк луыны - луиз. Дышетӥз но солы, гожъяз но со сярысь. Кузпал но ачизъя сюриз. Чылкыт сюлэмо, зэмлыкез яратӥсь, улонлы синмаськись адями. Анна Яковлевналэн но Николай Николаевичлэн улон шоры учконзы одӥг кадь вал. Со - шуд. Кык ӟеч нылпи будэтӥзы. Со но - шуд. Юн эшъяськизы Нина Бакишевалэн но Василий Перевощиковлэн семьяенызы. Ӵош шутэтскылӥзы, гужем ӵош чорыгаллязы, пиналъёсынызы шудылӥзы. Шудтэм дыръёс но вал, дыр. Сюлэмыз чигиськылӥз, луоз, сое валасьтэмъёс шедьыку, малпанзэ быдэстыны луонлык ӧвӧл дыръя, висёнэз палэнтыны быгатымтэ дыръя. Ичи шат котькудмылэн улонамы сыӵе учыръёсмы? Адями улыны огпол гинэ вордске та югыт дунне вылэ. Н. Н. Евсеев вордскиз но, кулӥз но одӥг нуналэ - 9-тӥ мае. Кузпалызлэн, Анна Яковлевналэн, верамезъя, со шуэм: уло на 9-тӥ куартолэзёзь. Озьы ик луэм. Туэ ар тырме кулэмез дырысен. Музъемез мамык кадь небыт мед луоз. Эн лекаты ни милемды, улыны кылемъёсты... Милитина Гаврилова. Николай Николаевич Евсеев "Советской Удмуртия" газетын сизьымдонэтӥ аръёсы ужан вакытаз. Ӟечкыласько Можга ёросысь Тутайгуртысь Елена Макароваез вордскем нуналэныз. Егит ымнырысьтыд ноку медаз ышы чебер пальышонэд, кужмыд мед тырмоз шуг-секытъёсты воормыны. Яратыса Валентина сузэред. 17.05.99. НАТАЛЬ Кин кужмо, со ик семьялы кузё "Кышнолэн кузёяськемезлэсь урод номыр ӧвӧл ни. Коркан йыр луыны кулэ пиосмурт, нош кышномурт солэсь косэмъёссэ мед быдэсъялоз, соку гинэ со юртын шуд луоз", - озьы верам визьмо Августин. Нош "Деловая женщина" газетэз кылдытӥсь Ирина Корчагина мукет сямен малпа: "Лек улон югдур кышномуртэз пичи дырысеныз ик кыдатӥз, ачиз понна сюлмаськыны дышетӥз. Нылпи ваем кышномурт Россиын котьку но туж вылӥ дунъяськиз, али но со озьы ик. Анай луэмысьтыз солы кузёяськыны луонлык сётӥське, соин со картэныз но нылпиеныз сямен косъяськыны кутске, но ассэ зэмос кузё шуэмез уг поты..." Кин шонер та споръяськонын? Котькуд адямилэн со пумысен аслаз малпанэз, улон югдур но аслэсьтыз куронъёссэ пуктэ. Нош мар меда малпало туала удмурт егитъёс нылкышноос но пиосмуртъёс сярысь, кыӵеен адӟо соосты туннэ нуналэ? Инна Владимирова: - Кышномурт картэныз кивалтыны мед быгатоз. Шуо ук: картэз - йыр, кышноез - чырты, кытчы чырты, отчы ик йыр. Нош вылӥ кивалтӥсь посмурт ик мед луоз. Пиосмурт, мон сямен, нырысь ик луыны кулэ визьмо. Собере, одӥг пол шорам учкемысьтыз ик мед валалоз мылкыдме, малпанме - монэным соглаш уз ке но луы. Но туала пиослы вань оскон быремын ни. Надежда Пчеловодова: - Кышномуртлэн одно ик нылпиез медло. Весь кинэ ке но яратӥсь - анай-атайзэ, пиналъёссэ, пиосмуртэ. Нош пиосмурт луыны кулэ кужмо, чидась, трос уксёё. Али солэн бурдъёсыз пачкамын. Семьяез понна сюлмаське ке но, кужмо луэмез потэ ке но, уг пӧрмы солэн одӥг нылпизэ сюдыны-вордыны, семьяезлы из борддор луыны. Алла Митрофанова: - Кышномурт семьяез котырын гинэ медаз берга. Мед луоз кивалтӥсь, калыкъёслы тодмо, дано, визьмо адями, нырысетӥ интые общественной ужез мед пуктоз, бизнесэн вырись, аслаз коркаез, автомобилез, дачаез мед луоз. Тамак но мед кыскоз. Огкылын вераса - крутой кышномурт. Нош али со сюлмаськонъёсын зӥбемын - нырысетӥ интыын семьязэ сюдон-дӥсян сярысь малпанъёс. Соин нылкышноос вазь пересьмо, асьсэды уг чаклало, чеберзэс уг утё. Егит нылъёс вазь бызё но пинал ваё. Нош воргоронъёс туала арын нырысь ик вылӥ образованиен луыны кулэ. Уж дораз но, семьяяз но вань ужез лэсьтыны быгатӥсь. Гань-гань, аслыз ачиз оскись, котькытчы вуись, кыллы кисыяз пырисьтэм, адямиосын вераськыны быгатӥсь, из но ву пыртӥ потӥсь. Али соос кыклы люкиськемын - бизнесменъёс но "пурысьёс". Кыкетӥосыз юо, огшоры калыклэсь уг висъясько. Надежда Гуменникова: - Кышномурт чебер, визьмо, шаплы, муспотон луыны кулэ. Шораз учкыса, пиосмуртъёс мед синмаськозы, мед яратозы - яратонлэсь нылкышно эшшо но чбеергес луэ. Аслыз синмаськытыны мед быгатоз. Со бордын кышномуртлэн кужымез, пиосмуртлэн но. Картъёс кышнооссылы ӵемгес мед шуылозы - яратӥсько, но кыл вылын гинэ медаз возьматэ сое. Пиосмурт мед дунъяны быгатоз ассэ, улонзэ, ужзэ, семьязэ. Туэ шер сыӵеосты пумиталод. Визьтэммем кадь жугисько, эсэпсэ валатэк юо, нылкышноосты уг гажало. Но вань умойёсыз но. Вадим Данилов: - Нылкышноос луыны кулэ "Жестокий ангел" киноысь Эстелла кадь. Картэз мукетыз доры медаз кошкы шуыса, пӧртэм амалъёс малпа. Нылкышно сюлмаськыны кулэ нылпиос сярысь, юморез мед луоз. Яратон сярысь книгаос лыдӟыса, мон азе таӵе нылкышно-идеал пуксиз: чагыр синмо, юг-тӧдьы йырсиё, тамак кыске. Кельшо жоб кылын вераськись нылъёс. Уксёез трос мед луысал на. Сыӵе дыръя визьтэм шуыса но ӧй учкысал, кышно басьтысал. Уксё понна сюлмаськонэз уз луы, паллянэ но кожаны амал шедьтысал. Собере, одӥг муртэн улыса жадёд, солэн но, мынам но дусымъёсмы мед луозы. Сергей Иванов: Уг кельшо тамак кыскись нылъёс, нош юыны праздник дыръя пичильтык яра. Кылзӥськись медло, лякыт мылкыдо, веськрес мугоро, ненег куо - гольык дыръяз учкымон. Мукетъёсыныз медам калгы - кушто. Яратыса мед бызёз. Али тросэз лыдъяса-чотаса карт утчало, собере люкисько. Сиён пӧраны уг быгато, анай-атайёссылы уг юртто, юо, пиослэсь тросгес жоб кылын верасько. Пиосты но бен ушъям уг поты. Психиказы вырӟемын, шуод-а, мар-а - кӧня ке уг тырмы йыразы. Пичи дырысенызы ик тросэн вина юо. Пиосмуртъёс яратыны мед дышетскысалзы, матысь кусыпъёс (секс) сярысь умой мед тодозы - нылъёслы шумпотон ваён понна. Яратоназы чеберез, романтикаез уг тырмы: шампанской, сяськаос, сюсьтыл... Василий Логинов: - Кышномурт - нырысь ик со анай, нылпиез сярысь сюлмаськись. Нуны ваён понна солы тазалыксэ утёно. Нош пиосмуртъёс мед яратозы шуыса, синмаськымон, муспотон, чебер луыны кулэ. Тамак кыскисьёсыз, сяласькисьёсыз, жоб кылын вераськисьёсыз мыным уг кельшо. Бызем бераз нылкышно ассэ туж ик эрико медам ни возьы. Сиён пӧран, магазинъёстӥ ветлон озьы ик солэн ужез. Туала нылъёс туж эрикоесь луэмын - тросэз асьсэос коньдон потто, ужбергатон удысын бергало. Наркотикен шудӥсьёсыз трос луизы. Пиосмурт сярысь ке верано, со обезьянлэсь кӧня ке чебергес мед луоз. Ассэ мукетъёсызлы обидьыны медаз сёты. Коньдон лэсьтӥсь, визьмо, кужмо, малы ке шуоно, со кунэн кивалтыны, политикаен вырын кулэ. Нылъёслэсь йырзэс берыктон понна, чебер вераськыны мед быгатоз на. Нош кышнояськем пиосмурт семьяез сярысь сюлмаськыны кулэ. Игорь Лекомцев: - Чебер, учкымон нылкышно вӧзын пиосмуртлэн но данэз ӝутӥське, востэм кышно вӧзын карт но калгись луэ. Соин ик, нылкышно луыны кулэ шаплы, капчи мылкыдо, визьмо. Ӧвӧл возьматоно, вӧзысьтыз пиосмуртлэн тодон-валанэз, быгатонлыкез солэнлэсь улӥын шуыса. Быземын ни ке, быжыныз шонаса медам ветлы, йыг-йыг возёно астэ. Пиосмурт луыны кулэ кужмо, серекъяны быгатӥсь, йырзэ вылэ ӝутыса нуллӥсь. Семьяын со мед луоз борддор, но измымтэ борддор. Али учкиськод ке, котырак алкашъёс, тамак ӵын пушкы выемъёс, азьланезлы осконзэс ыштэмъёс. Кужымзэс возьматон понна соку ик жугиськыны мерско. Кин тодэ, дыр ортчыса, пиослэн но нылъёслэн та малпанъёссы, оло, воштӥськозы. Асьсэос семья кылдытозы, нылпиоссы луоз. Нош газет лыдӟисьёслы соослэн верамъёссы пумысен, оло, малпаськон муг луоз. С. ПЕТРОВА. "Куное" вуылӥз "горд атас" Туэ 11-тӥ мае 14 час 39 минутэ "01" телефонъя жингыртӥсь луиз: "Свердлов ульчаысь 30 номеро юрт ӝуа!" Ижевскысь гурт удысъя академилэн юртэз интыяськемын отчы. Ньыль этажъем корпус ӝутэмын ни 1904-тӥ арын. Куинь минут ортчыса, тылпу кысӥсьёс шукыръяськись юрт дорын вал ини. Вашкала дыръёсы пуктэм юртэтӥ тыл зол гинэ кузёяськыны вуэм. Тужгес но бадӟым кышкытлык кылдӥз академилэн вуоно студентъёсты дасянъя колледжезлэн липет вылаз. Ӝогак гинэ ортчытэмын юртысь ужасьёсты утён. 22 фирмалэсь ваньбурзэ утёнэн йырин ӧй вал ни. Нырысь ик утёно адямиосты, отын соос 177 кузя. "Горд атасэн" нюръяськонэ пыриськисз 22 пӧртэм техника. Ӵапак кысык вакытэ ву сётон системаын секыт югдур кылдӥз. Ву ляб пызйыны кутскиз. Соку гумыосты ватсаса кысконо луиз Иж пруд доры. Ярам, тымет ӝуась юртлы кыдёкын ӧвӧл. Юрт вуж бере, отын уно пулэсь лэсьтэм арбериосыз. Тыл соос кузя кый кадь позыръяськиз. Я отын, я татын потэ кадь тыл. 15 час 53 минутэ тылпу лапкатэмын, 17 час 10 минутэ со быдэсак кысэмын ни вал. Нюръяськонэ пыриськиз 112 тылпу кысӥсь. Кытысь вуиз шудтэм учыр? Кыӵе мугез? Та юанъёслы валэктыны котьку но секыт луэ. Капчи ӧвӧл солэсь мугзэ шедьтыны. Тылпу уго пытьыоссэ ноку но уг кельты. Но куд-ог мугъёсыз тодмо ни. Нырысь ик, юртысь корка сиге пырон инты пытсамын ӧй вал, отчы котькиинлы сюрес пырак усьтэмын вылэм. Со сяна, нокытын ӧвӧл тылпулэсь утиськонъя сигнализация. Умой-умой радъямтэ возьмаськон. Нош тылпу уин ке ӝутскысал? Соку юрт но, ваньбур но быдэсак пеньлы пӧрмысал. Нырысь чакламъя, изъян адӟемын ог 150 сюрс манетлы. "Горд атас" котькудмы доры куное вуылыны быгатоз. Соин ик котькудӥз кивалтӥсь, котькудӥз адями ӟеч тодыны кулэ - тылпу нокинэ уг чакла, нокинэ уг жаля. Чаклаське, бӧрысь бер медаз луы вал. Н. Байтеряков. Туспуктэмъёсыз В. КАМАШЕВЛЭН. Таӵе пытьыоссэ кельтӥз тылпу. Телефон ӵошалоз сӥль дунлы Телефон понна толэзьлы дун котькуд семьялы 30-35 манетозь будоз. "Удмурт Телеком" огазеяськонлэн генеральной директорезлэн Сергей Фомичевлэн верамезъя, связь удысын юрттэт сётонлэн дуныз котьку но ӵоша вал одӥг кило сӥльлэн дунызлы. Кык толэзь ортчыса, Глазовысь, "Удмурт Телекомлэн" Сарапулысь, Можгаысь, Ижевскысь но Пичи Пургаысь вераськон пунктъёсыз дуннеысь 16 странаен но Россиысь 20 улосэн видеотелефон пыр вераськыны быгатозы. Зэм, 3 минут вераськем понна 10 доллар тыроно луоз. Иворъёсъя национальной служба. ШӦКЫЧ Мокояськись Моко (басня) Сьӧд нюлэскын улӥз Гондыр... Улэм-вылэм солэн майбыр, Сюлмаськонэз арбыт ӧжыт, Сикын угось емыш тырмыт... Чече нюлоз, дун ву юоз, Турын пӧлын погылляськоз, Кикур пасьта кӧй люкаса, Гуньдымоназ вушйылыса, Гуаз толлы кыштыр выдоз... Нош Моколэн та вакытэ, Сюлмыз мар ке но кежектэ... Ческыт вӧтъёс уг ни вӧта, Уг яра со, уг кельшы та... Вылаз ик, тупаны кулэ, Со лёгиськиз кӧс чаг вылэ... Уӵыс кунед соку вырӟиз, Йырзэ педло сэзьмыт мычиз, Нош куазь соку юн жобаськиз, Пужым вайысь кисьма ӵыжин Солэн ныраз ӵапак усиз... Гондыредлэн сэпез пӧзьтӥз Нюлэс тыр со шимес бурсӥз: - Тырмоз монэ нуатъяны, Тае уг лу ни чиданы, Гуын кӧс чаг пыдэ мертче, Кырын ӵыжин нырез шырӟе, Тырмоз, окмоз ултӥяны!.. Со Кионэн кенешыны, Та пумысен сурым ӝутны, Малпаз ӧтчам ӝог люканы... Пуштырскизы вань пӧйшуръёс - Кион, Балян, Комак но мый, Ӟичы, Чайы но Сёр, но Кый - Огъя сикысь вань гижлоос... Азьвалтэтын Кион пукиз, Шугадӟемлы со кыл сётӥз... - Усьсэ, - вузӥз Мискинь Гондыр, - Мынам нырам шытыр-шатыр Урдо куштӥз пужым ӵыжин. Сӥзьыл нош со кӧтам ӵыжиз, Али ке но потэ ӵужинь. Со сьӧсь гожмо Урдо сэрен Уг поты ни сикын улэм. Лулчеберлык пумен куашка, Тани вуоз нош Акашка, Кыӵе пузэз ми буялом? Курег пузэз быдтэ Урдо, Я мар, я мар со курег пуз, Быдтэ ни со ми кадьёсты! Али быжме ӵогны сёто - Ваньмыз понна янгыш Урдо. Уг малпа со ӧпкельыны, Сигысь кулэ пурӟытыны, Сотэк шедём ми ӵакмыны, Моко сямдэ но вунэтод, Урдо музэн сюрсо луод. *** Кион берло вераз пумкыл, Кылиз на нюртыны огкыл. Отын пуке бере Кион, Сыӵе ини потэ адӟон. Федор Суворов. Мӧйыос вунэтэмын ӧвӧл Таиз ар дуннеысь мӧйы, арлыдо муртъёслы юрттонлы, саклык висъянлы сӥземын. Удмурт Республикаысь ветеранъёслэн огазеяськонзы котькуд ар зол сюлмаське соос сярысь. Мӧйыос понна дунтэмгес вузъёс висъясько, пӧртэм пумиськонъёс, концертъёс ортчытъясько. Валамон ини, 1999-тӥ арын соослы саклык будэмын. Туэ Ижын гинэ укмыс ужрад вал. Городмылэн котькуд ёросаз кырӟало-экто мӧйыос, кылдытэмын ветеранъёслэн хоръёссы. Соос мӧйыослэн пумиськылонъёссы дыръя возьматъяло шулдыр концертъёс. Сыӵе ужрадъёсы егитъёслэн ансамбльёссы но пыриськыло. Алигес шулдыр ӝыт вал Ижысь Индустрия ёросысь 43-тӥ школаын. Калык зал тыр люкаськылӥз. Пумиськон кутскон дорозь ик люкаськись калыкез шулдыр удмурт но ӟуч гуръёсын пумитаз арганчи Удмурт Республикаысь культура удысысь дано ужась Алексей Николаевич Спирин. Ветеранъёс понна синмаськымон концерт возьматӥз "Октябрь" культура дворецысь "Русский сувенир" ансамбль. Солэн кивалтӥсез Татьяна Моисеева зол сюлмаське артистъёсызлэсь быгатонлыксэс ӝутон сярысь. Соин ик котькуд концертъёс ӟырдыт кичабонъёсын ортчо. Таяз но озьы ик вал. Н. Возисов. Шӧкыч Мынам телевизоре Мар меда шуысалзы Карлъёс? Асьмелэн шоркармы, Ижевск, нуналмысь нуналэ паськыта, вылӥе ӝутске, чеберске. Бен, городмы егит ӧвӧл ни, туэ солы тырмоз 239 ар. Таяз гужем нош ик ортчоз городлэн нуналэз. Праздниклы дасясько ни. Столицаямы уно гинэ пӧртэм ульчаос. Одӥгъёсыз чылкак егитэсь на, мукетъёсыз мӧйымыны но вуизы. Городлэсь центрзэ лымшорысен уй палозь вандыса кадь ортче Карл Маркс ульча. Ӵапак со ураметӥ трамвайёс ветло чугун сюрес вокзалэ, кыказ ик автостанциосы. Палэнысь лыктэм куноос чылкак паймо, луоз, та ульчаысь кырыжмем пу коркаосты адӟыса. Куд-ог юртъёслэн сэрегъёссы копак музъеме ик выемын ни. Ойдолэ ортчоме Короленко нимо ӟуч театрысен Карл Либкнехт трамвай дугдылон дорозь. Одӥг остановка гинэ. Ӵапак театрлы ваче пумит 145 номеро юрт бордысь таӵе гожъямъёсты синйылтӥм. Асьтэос тодматске соин (1-тӥ фотосуред). Со гожтэмлы осконо ке, отын улӥсьёс корка кесямзэс ӝыны даурлэсь кема витё ни. Ӧжытак улӥегес васькыса сутскем юртъерез адӟод (2-тӥ фотосуред). Милям тодэммыя сьӧд моко кадь ӝуам корка ог дасо ар озьы сылэ ни. Кема шат сое кесяса куштыны но пу карыны? Нош жуг-жаг куян интыос сярысь веранэз ик ӧвӧл ни (3-тӥ фотосуред). Быдэс жаг гурезьёсын тырмытэмын та ульча. Отын ик улвайёс но, бумага но, мукетыз но. Тамак пум усиз ке, тылпу потытозь но кема ӧвӧл. Мар меда шуысалзы та пумысен Карл Маркс но Карл Либкнехт? Шӧкычен ӵош ульчаетӥ поръязы Н. БАЙТЕРЯКОВ но В. КАМАШЕВ. Лемтэй кезьытлэсь уг кышка Удмуртиын лемтэй куртчылэмъёслэн лыдзы ялан йылэ. Шаерысьтымы санэпиднадзорлэн ивортэмезъя, та дырлы 2500 учыр пусъемын. Та лыдпус, кылем арен ӵошатыса, кык но ӝыны поллы тросгес. Куазь кезьыт улӥз ке но, лемтэйёс куртчылӥськемысь ӧз дугдылэ. 1-10 мае эпидемиологъёс доры сюрс пала адями вазиськиз. Со пӧлысь 29-эзлэсь лемтэй черен висён вируссэ шедьтӥзы. Ӝыныез висисьёс - пиналъёс. Соин ик писпуо интыостӥ, кылсярысь, Ижевскысь Киров нимо но Космонавтъёслэн паркъёстӥзы ортчыкуды, "Дружба" кинотеатр вӧзысь скверын пукыкуды сак луэ, чаклаське. Нош нюлэскы ветлыкуды ӝикытгес дӥсяське. Иворъёсъя национальной служба. Валэктэ юрист Сэрегез нуэ адвокат Лилия Шкляева Нылпилы юрттэт Декретэ потӥ 15-тӥ июне. Нуны ваи 16-тӥ августэ. Нош коньдон уг тыро: ӧвӧл, пе. Ма кароно? Надежда Кабанова. Завьялово ёросысь, Постол гурт. Нылпи ваем понна пособие но нуны вайыны отпуск понна коньдон тыриське соцстрахысь. Ужан интыысь бухгалетрия сыӵе куронэз уг быдэсъя ке, меӵак вазиськоно соцстрахлэн Удмурт Республикаысь фондаз: Иж, Ухтомский ульча, 24. Телефон: 36-09-88. Нылпилы толэзьлы быдэ юрттэт (пособие) сётӥське тужгес пичи уждунлэн 70 процентэз мында интыысь бюджет чотын. Сыӵе куронэн мумы, бубы, сюрмумы, сюрбубы, опекун, попечитель вазиське калыкез шугадӟонлэсь утёнъя (социальной защитая) ёзэ. Озьы валэктэ "Нылпиен гражданъёслы кун юрттэт сётон сярысь" Закон. Кутэмын 1995- тӥ арын 19-тӥ мае. *** Ужасько Ижын, улӥсько вал больницалэн общежитияз. Али огнам вордӥсько нылпиме, пукисько Алнаш ёросысь Актэмыр гуртын анай-атае дорын. Общежитиын уг улӥськы юере, одӥг ар но ӝыны арлы монэ ӧй мозмытысалзы меда со понна дун тыронлэсь? Кыӵе документъёс кулэ со понна? Л. Мясникова. Улон инты понна дун тазьы кылдэ. Нырысетӥ тырон - отысь огъя интыосты возем но тупатъян понна, кыкетӥез - ву, тыл, шуныт басьтэм понна, куинетӥез - улон интыез басьтэм (наём) понна. Озьы верамын Россия Федерациысь Правительстволэн 1996-тӥ арын 18-тӥ июне кутэм 707 номеро постановленияз. Со нимаське тазьы: "Улон инты но коммунальной юрттэт понна дун тыронэз радъян сярысь". Одӥг толэзьлэсь кемалы кошкем адямилэсь коммунальной юрттэт понна дун уг басьто. Со понна тӥледлы пусйиськоно (регистрациез ортчоно) огдырлы кошкем интыяды. Отысь басьтэм справкаез возьматоно общежитиысь комендантлы. Лыдӟы-эскериськы Укмыс ар талэсь азьло шаерамы усьтэмын СПИД-эн но паласькись висёнъёсын нюръяськонъя но соосты алонъя (профилактикая) центр. Азьвыл аръёсы но потылӥзы вал ини врачъёслы, фельдшеръёслы но калыклы чаклам дэмланъёс, брошюраос, тодэ вайытӥсь бамъёс, суредъёс но мукетыз. Нош кемалась ӧвӧл Ижевскысь полиграфкомбинатлэн цехысьтыз потӥз выль брошюра - "СПИД. Кызетӥ даурысь чер". Сузьет дасямын центрысь валтӥсь врачен Евгений Кузьминэн но отысь ик вылӥ категориен эмъясен Леонид Кузелинэн. Таиз ужлэн пӧртэмлыкез со бордын - нырысьсэ печатламын удмурт но ӟуч кылын, бадӟым юрттэт сётоз гуртъёсысь но городъёсысь врачъёслы, дышетӥсьёслы, анай-атайёслы, егитъёслы. "ВИЧ но СПИД. Таӵе кылъёсты удмурт адями ноку ӧз тодылы. Асьме вераськонэ та кылъёс пыӵазы дасо ар талэсь азьвыл гинэ. Озьы ке но, висёнлэсь кышкытлыксэ нокинлы но нимысьтыз валэктоно ӧвӧл ни. Солэн сьӧд вужерез быдэс музъем вылэ возъяськиз кадь", - озьы гожтэ брошюралэн азькылаз Удмурт Республикаысь Тазалыкез утёнъя министерствоысь паласькись висёнъёсъя валтӥсь врач, Ижысь кун академиысь доцент Геннадий Кустарников. Авторъёс валамон но огшоры кылъёсын, юан но валэктонъёс пыр тодмато иммунодефицит шуонэн, со пумысен дунне вылын но Россиын кылдэм югдурен. Брошюралэн пуштросэз усьтэ кышкыт висёнлэн азинскемез но тэлеӟемез сярысь, маин йӧнатскыны луэ, кытын эскериськыны, кызьы алӥськыны но трос мукет юанъёслы валэктэ. Котькуд сямен валэктонлы сётэмын чебер буёло суред яке туспуктэм. Соос но бордазы кыскозы асьсэлэн йӧспӧртэм луэменызы. Эмъясьёслэн ужзы юн алэ: СПИД - со синпӧет ӧвӧл, со - эзель. Сыӵе кышкытлык ӧсамы йыгаське ни. Е. КУЧУМОВА. ВАЛЭКТЭ ЮРИСТ Сэрегез нуэ адвокат Лилия Шкляева Ужысь мӧзмытӥзы инвалидэз Мон ужай почтаын укмыс ар ӵоже. Вал куинетӥ группаен инвалид. 1997-тӥ арын сюлмам операция лэсьтӥзы но сётӥзы кыкетӥ группа. Кивалтӥсьмы монэ ужысь мозмытӥз, ужан книжкаме но мукет документъёсме сётӥз. Ар гуртын пукеме бере, выльысь куинетӥ группае выжтӥзы. Нош ужам ӧз кутэ ни. Кивалтӥсь быгатэ-а вал монэ ужысь мозмытыны кыкетӥ группа сётэмзы бере? Амал вань-а мыным азьло интыям берытскыны? Н. А. Шаркан районысь Мукабан гурт. Сыӵе юанъёслы валэктон сётэ Россия Федерацилэн Уж сярысь законъёсын кодексысьтыз 33-тӥ ёзэт (статья) - отысь 5-тӥ пункт. Ужан сярысь дырез вератэк гожтэм огкылэз (договорез), нош озьы ик дырез вераса гожтэм огкылэз (контрактэз) предприятиысь, учреждениысь, организациысь администрация дугдытыны быгатэ пӧртэм учыръёсы. Одӥгез муг таӵе. Адями, шуом, ньыль толэзьлэсь кемагес ужаны ӧз пота висеменыз сэрен (отчы уг пыры секытэн дыръя басьям отпуск). Закон куддыръя чакла та дырез кузёмытыны но. Адями висьыны усе ке ужын шуккиськыса яке ужен герӟаськем мугъя, солы ужан интызэ возё бурмытозяз яке инвалидэ потытозяз. Туберкулёзэн курадӟисьёслы, кылсярысь, ужан интызэс кельто одӥг арозь. Сыӵе муртэ администрация мозмытыны быгатэ висьыкуз но инвалид каремзы бере. Куддыръя соосты кошкытыны выро бурмемзы бере. Со шонер ӧвӧл. Адямиез мозмытоно, висёнэз укыр кема кыстӥське ке, адями ӧвӧлэн удыс шуге-леке шеде ке. КЗоТ-ысь 33-тӥ ёзэтъя ужысь мозмытон - администрацилэн правоез - но одно быдэстоно ужрадэз (обязанностез) ӧвӧл. Адями висемен йырин уж туж уг ӝега ке, солы ужан интызэ кельтыны туртто. Югдурез соку рос-прос сэрттыны-пертчыны кулэ профком. Гожтэтлэсь авторзэ ужысь мозмытонын закон тӥямын ӧвӧл кадь. Со судэ вазиськиз ке, азьло интыяз берыктозы шуыса, оскон ӧжыт. Уфае дасясько Операя но балетъя кун театр но ӧсъёссэ та нуналъёсы ворса. Ортчем дыр ӵоже вал Удмурт Элькунысь дано артисткалы Л. Нефёдовалы сӥзем ӝыт, егит кырӟасьлэн Дмитрий Шивринлэн аслаз концертэз. Театр мылысь-кыдысь пыриськиз аспал эшмылы быдӟым ӟуч крезьгурчилы П. И. Чайковскийлы сӥзем фестивалез ортчытонэ. Возьматэмын ньыль спектакль: "Евгений Онегин", Иоланта" операос, "Лебединое озеро" балет, крезьгурчилэн ужъёсызъя - кылдытэм "Мон гожтӥсько Тӥледлы..." нимо ӝыт. Отчы пыриськизы Москваысь, Казаньысь но асьме театрысь артистъёс. 27-тӥ мае театр возьматоз на Дж. Россини крезьгурчилэсь "Севильский цирюльник" операзэ. Нош али солистъёс дасясько выль ужан вакытлы. Со дыре ик ужало П. И. Чайковскийлэн "Пиковая дама" операез бордын. Дышето нимысьтыз вокал партиоссэ. Операез пуктыны ӧтемын Мариинской театрысь режиссёр А. Степанюк, но Москваысь дирижёр Владимир Рылов (тазэ туж ӟеч тодо ни крезьгурез яратӥсьёс). Таиз спектакль возьматэмын луоз, выль ужан вакыт кутскыку. Театр азьланьтэ "Собор Парижской богоматери" опера бордын ужанзэ. Дась ини костюмъёс но. Шедиз ӟеч балетмейстер. Пӧсьтолэзь пумын артистъёс потозы Уфае - гастрольёссы кыстӥськозы арня ӵоже. Возьматэмын луозы тужгес ӟечъёсыз ужъёс - "Алеко", "Иоланта", "Фиалка Монмартра", "Дамских дел мастер" операос, "Анюта" балет. В. ЛАГУНОВ. 20 мартэ-5 июне - Инкуазез утёнлы сӥзем нуналъёс Усёз-а сьӧд лымы... Инкуазьын номыр мултэсэз ӧвӧл, котькудӥз улэп маке мукетыныз герӟаськемын. Адями гинэ, ассэ инкуазьлэн нылпиез шуэм интые, "визьлэн" емышез кожаса но ассэ инкуазьлэсь вылэ пуктыса, инкуазь герӟетъёсты туга но отысь аслэсьтыз зэмос интызэ ыштэ, аслыз ачиз висёнъёс, курадӟонъёс шедьтэ. Кызьы сое дунъя туала наука? Та юанлы валэктэ Николай Геннадьевич Ильминских - Удмурт кун университетысь огъя экологияя кафедраен кивалтӥсь, биология наукаосъя доктор. - Кемалась-а адями валаз, инкуазез кырсёмытыса, цивилизацилэн сюрестӥз азьлань вамышъяса, ассэ ачиз быдтэ шуыса? - Та ужпум Музъем вылын улӥсьёслэн огъя ужпуменызы нырысьсэ ялэмын Стокгольмын 1972 арын инкуазез утёнъя конференциын. Соку инкуазез ултӥямлэн кышкытлыкез термоядерной войналэн кужыменыз оградэ пуктэмын вал. Адями котыр улосэз пӧртэм амалъёсын кырсёмытэ. Туала наука куинь сыӵе амалэз висъя но паськыт вӧлмемезъя нырысетӥ интые пуктэ химической арбериосын пожамез. Инкуазьын одӥг улэп макелэн кылем-мылемъёсыз чотын мукет организм улэ. Шуом, нюлэс пӧйшурлэсь кылем-мылемъёссэ асьсэ пыр потто бӧчыос, таослэн бервылазы вуо векчи лулоос - бактериос, микроорганизмъёс. Мукет кылын вераса, музъемын, озьы ик омырын, но номыр мултэсэз ӧвӧл. Нош адями, химилэсь вормонъёссэ кутыса, олокыӵе но арбериос поттыны кутскиз. Тужгес тодмоосыз - полиэтилен, кудӥзлэсь пакетъёс потто, но пластмасса. Соос городъёс котыре гурезьёсын-гурезьёсын люкасько. Инкуазьлы со выль арбериос тодмотэмесь, кызьы соосын нюръяськоно, уг тоды. Одӥг улэп маке но соосты, шуом сиыны, кызьы ке мукет сямен быдтыны дышемын ӧвӧл. Та ласянь гурт улон, городысь улон-вылэмен ӵошатыса, инкуазьлы ичигес изъян вае. Гуртоос, музъемлы, вань улэпезлы, матын луэменызы, соослэсь адӟем каро но жуг-жагез яке суто, яке юрт котыразы кутыны тыршо. Адями инкуазез физической амалъёсын но кырсёмытэ. Тани, кылсярысь, укно сьӧрын Удмуртской ульча. Татӥ нуналскын сюрсъёсын машинаос ортчо. Соослэн гуретэмзы мугорез арысь аре сюпсе. Кылпумысь вераса, шӧтэм кылъёсын вераськон, тышкаськон озьы ик инкуазез кырсёмыто. Машинаос, ӵашетэм сяна, музъемез зуркато, соин ӵош зуркало юртъёс. Асьмеос сое ум но шӧдылӥське кадь. Но собере паймиськом, малы остеохондрозэн висиськом... Музъем зуркамлэсь кышкытлыксэ чакланы луэ будосъёс вылын: сюресъёс дурын будӥсьёсызлэн выжызы лябӟе, чигиське, нош чугун сюресъёс кузя будыны чида туж шерез. Адями берло дыре инкуазез радиоактивной арбериосын но кырсёмытыны "дышиз" ини. Ярам ай, со сыӵе ик паськыт вӧлмемын ӧвӧл. Соин ик выжом магнитной бусыослэн кышкытлыксы борды. Со бусыос электроприборъёс котырын кылдо. Асьмеос я огезлы, я мукетызлы матын бергаськом, магнит бусыосты вошъяськом - тазалыклы таиз тужгес кышкыт. Уг яра улыны трос вольтъем линиос улын (соосын шаермы чонари вотэсэн сямен шобыртэмын). Кылсярысь, Завьял ёросысь Хохряки гурт дорысь езъёс улын магнит бусыос сокем золэсь, Ижевскысь но сыӵеез уд пумита. Санитарной нормаосъя сыӵе езъёслэсь 10- 50 метр кемын улыны лэземын. Инкуазез кырсёмытӥсь куинетӥез амал биологической шуыса нимаське, куке улосэ мукет шаеръёсысь, континентъёсысь мурт будосъёс, пӧйшуръёс, нымы-кибыос, векчи лулоос вуо. Кызьы? Адями "тыршем" чотын. Даурысь дауре, странамылэн мукет улосъёсын кусыпъёсыз юнмало. Асьмеос пӧртэм шаеръёсысь олокыӵе но сиён-юон ваиськом, шуом, ю тысез ик Америкаысь, Канадаысь, Австралиысь басьтӥськом. Соин ӵош вуо отысь будосъёслэн кидысъёссы. Со гинэ ӧвӧл! Газетъёс алигес гожъязы, Санкт-Петербургысь портэ тылобурдоосты сиись чонари вуэм шуыса. Валамон, лымшор палъёсысь вуэм будосъёслы но пӧйшуръёслы асьме музъеме выжыяськыны шуг. Озьы ке но, кудъёсызлы вакчи гужем но, кезьыт тол но кышкыт ӧвӧл. Кылсярысь, Америкаысь Удмуртие вуиз амброзия турын. Лымшор ёросъёсын со вамышлы быдэ пумиське ини. Озьы ик асьме палъёсы кӧчизы ӵушъялмульы, курыт потлэн кӧня ке видъёсыз. Соослэн сюрел пызьзылэсь (пыльца) шаерамы улӥсьёслэн туж зол аллергия луэ. Нош асьме будосъёс шерзэ кизьнылыто-кызыто. Мукетъёсыз мурт будосъёс асьмелэнъёсызлы будыны люкето яке соосты чылкак вормо. Шуом, американской бадяр кемалась ик ӧз вуы, нош котькытчы вӧлмиз ини. Та писпулэн вужераз одӥг будос но уг улӟы, бадярлэн ядъёсыз улын пашме. Нош басьтэ ай колысэз (борщевикез). Вуэмын со Кавказ гурезьёсысь. Будэ адямилэсь ӝужыт, ядэз туж кужмо. Ува ёросысь Удугучинэ нуись сюрес кузя колыслэсь нюлэсъёс кӧня ке иськем кыстӥсько. Нюръяськыны соин туж шуг. Як.-Бодья ёросысь Старые Зятцы гуртын таӵе амал шедьтӥллям: коралто модоссэ, выжыяз сылалэн сурам пӧсь ву кисьто. Пӧйшуръёс сярысь ке верано, нырысь ик тодэ лыкто юрт котырын улӥсьёсыз, кылсярысь, комак. Со лыктӥз адями сьӧры лымшор палъёсысь. Нырысетӥ мировой война вакытэ Восточной Пруссиысь (Германия) немец солдатъёс ваизы горд тараканэз. Асьмеос али ке но сое "пруссак" шуиськом. Со вуэмлэсь азьвыл Россиын сьӧд тараканэз гинэ тодӥзы. Вераны кулэ, та "сьӧсьёс" сьӧдэз но гордэз ӵош уг уло, огез мукетсэ одно ик ворме, юртысь улля. Городысь трос этажъем коркаосы каръяське фараонлэн кузьымез. Та лушкаськисьлэн нимыз ик вера ини, со Африкаысь вуэмын шуыса, озьы бере, шунытэз яратэ. Толзэ батареяосын шунтӥськись коркаосын со син азьын йылэ. Дас укмысэтӥ даурын быдэс Америкае вӧлскиз колорадской жук - Колорадо штатын "вордскем" бӧчы. Европае вуиз вузъёсын ӵош. Та бӧчыен татысь кунъёсын зол гинэ нюръяськизы. Но кыкетӥ мировой война кутскем бере соин йырин ӧй вал ни. Нош бӧчы ӧз нырулы - Украинае вуиз. Удмуртиын улӥсьёс сое нырысьсэ адӟизы ог 25 ар талэсь азьвыл. 80-тӥ аръёсы шаерамы пудоез сюдыны куро ӧз тырмы. Колхозъёс, совхозъёс сое шуныт палъёсысь ваизы. Куроен ӵош лыктӥз картофка куаръёсты, модосъёсты сиыны яратӥсь "куро" - колорадской бӧчы. Огласянь, мурт будосъёс, пӧйшуръёс, асьме музъеме выжыяськыса, инкуазьмес узырмыто. Но ӵемгес соос я аслыз адямилы, я котыр улослы изъян ваё. - Адямилы кышкыт висён кузьмась лемтэйёслэн лыдзы арысь аре будэ. Инкуазез кырсёмытэмлэн бервылыз ӧвӧл-а со? - Висись лемтэйёс котьку но вал. Соосын нюръяськыса, азьвыл вакытъёсы нюлэсъёсты ядэн пызьналлязы. Али та амаллэсь куштӥськизы, тэльёс изъянмо шуыса. Но... ядъёс лемтэйёсын ӵош быдтӥзы солэсь тэчкызэ (личинка) сиись вирусъёсты, векчи губиосты. Со вакытэ ик, тылобурдоослэн, сёр, юрмег выллем пӧйшуръёслэн лыдзы кулэсмемен, шыръёс йылӥзы. Нош кызьы тодмо, соос борды мертчиськыса будо лемтэйлэн тэчкыосыз. Тӥни озьы, адями аслаз киосыныз лемтэйёслы ӟечгес улыны, йылыны луонлык кыдытӥз. О. ВАХИТОВА. Чусовой вите куноосты Ижевск администрациысь Калык куспо но улосвыл кусыпъёсъя управленилэн кивалтӥсез Анатолий Бельцев пумиськылӥз журналистъёсын. Отын со вераськиз городысь предприятиослэсь поттэм продукцизэс вузанэз паськытатон но ӵош ужаны выль эшъёс утчан сярысь. Та ласянь нырысетӥ вамышъёс лэсьтэмын луозы Пермь областьысь Чусовой городын. Отын 21-23 мае ортчоз Ижысь предприятиосын поттэм вузъёсын адӟытон (выставка). Куноос понна ортчозы бадӟым концерт, футболэн но баскетболэн шудонъёс но мукет ужрадъёс. Л. Юртеева. Удмурт Республикаысь Кун Кенеш но Правительство кайгыро Калыкез уже интыянъя федеральной службалэн департаментысьтыз Сарапул городысь но Сарапул ёросысь отделлэн кивалтӥсезлэн воштӥсез Стыран Дмитрий Антонович улонысь дырызлэсь вазь кошкемен валче но ӵыжы-выжыосызлы но матысь адямиосызлы мур куректэмзэс верало. "Буммаш" шырыт ӟечкылаз Озьы шуыны луоз быдӟым вормонэз "Буммаш" акционер огазеяськонын пумитамзы сярысь. Предприятиын али ожысь ветеран 59 лыдъяське, 308 мурт ож нуналъёсы фронт мышкын тыршиз. Дано праздник азьын соосты ваньзэсты заводэ ӧтьылӥзы. Ветеранъёсты ӟечкылазы заводлэн алиез но азьлоез директоръёс В. В. Жебровский но Л. С. Акубов, удысъёсъя директоръёс Ю. А. Карагезов но М. С. Ворожцов. мукет кивалтӥсъёс. - Кема но ӟеч дасяськимы, та ужрадмес ортчытӥмы, одӥгез но ветеран медаз ӝожтӥськы, - шуэ заводысь ветеранъёслэн советсылэн кивалтӥсез Аркадий Венедиктович Пицков. Нош тани ма вераз ужысь ветеран удмурт нылкышно Екатерина Васильевна Бегишева: - Мон вордски 1925-тӥ арын Пичи Пурга районысь Чутожмон гуртын, пичиысен анай- атайтэк кыли, - вера со, ортчем аръёссэ синвуосын тодаз вайыса. - Ож кутскиз но, туж пиналысен нюлэс корай, скалъёсын но ошъёсын гыри-кизи, 1950-тӥ арысен Ижысь нянь пыжонъя 2 номеро заводын 15 ар пала ужай, утялтӥськон бордысен нянь пыжонын котькыӵе удысаз ужай. Одӥг комнатаен квартира сётӥзы. "Буммаш" устьтӥськем бере, выль заводэ лыктӥ но 14 ар пала столовойын посуда миськисьын ужай, татын улон интыме паськытатӥзы. Умой ужасько вал бере, котькытын гажаллязы, тау, уг вунэто, тани али но праздник ӝӧк сьӧразы ӧтизы. Дышем сямъёс азьланьско. Умой со. Нош мӧйыослэн ортчем сюрессы, улон опытсы вылын буммашъёс егитъёссэс дышето. П. СКОБЕЛЕВ. ? Ветеранъёс нош ик огазьын. Быдӟым композиторлэн сюресъёсыз Чайковскийёслэн семьязы 1848-тӥ арын 26-тӥ сентябре Ваоткинскысь Москвае кошке, собере - Петербурге. Но Россилэн кык шоркаръёсаз кема улыны ӧз кылды. 1849-тӥ арын май толэзе Чайковскийёс улыны выжо Алапаевске: Илья Петровичлы городысь заводъёсын кивалтонэз оскизы. Ӵапак татысь 1850-тӥ арын август толэзьлэн шораз егит Петр Чайковский Петербурге дышетскыны кошке. Воткинскын сямен ик Алапаевскын композиторлы сӥзьыса музей-юрт усьтэмын. В. Рогалев. Пенсия интые - водка Таӵеез но луэ вылэм... Камбаркаын. Пенсизылы лыкто, нош соослы связья отделенилэн магазинысьтыз водка сёто. Маиз татын сюлэмшугъяськытэ на? Водказэ озьы вуза А. Щербаков, вузкарись - предприниматель, со быръемын райсоветэ депутатэ, экономикая но коньдон ужпумъёсъя комиссилэн членэз луэ. Депутат шат калыкез винаен сектаны кулэ уката ик пичи пенсия басьтӥсьёс чотын-а солы пайда поттоно? Нюлэс. Кинлэн со? Тус-тас каро шуыса, Камбарка ёросысь 2900 гектар нюлэс пӧлысь 280 гектарзэ гинэ каклык кие кельтӥзы, кылемзэ федеральной ваньбурен лыдъязы. Колхозникъёслэн но пенсионеръёслэн соослы сётэм нюлэссэс ыштэмзы уг поты, соос пумит луо тазьы кузёяськисьёслы, асьсэлэн кема кыстӥськем огъя кенешазы "Правда" эштослэн уставаз воштон пыртыны дэмлазы. Нюлэсэн, пе, музъеменыз валче, турнано возеныз сямен ик крестьян калыкен кузёяськоно. Маин быроз ни тупамтэоссы? Премьер-министр юнматэмын Россиысь Кун Думалэн кенешаз эскеремын Сергей Степашинэз премьер-министре юнматон сярысь ужпум. Заседание лыктэмын вал 395 депутат. Выль кивалтӥсез юнматон понна 226- лэсь трос куара луыны кулэ вал. Со понна дурбасьтэмзэс веразы пӧртэм фракциос: НДР - 60 депутат, "Российские регионы" - 45, ЛДПР - 50. "Яблоколэн" кивалтӥсезлэн Григорий Явлинскийлэн верамезъя, фракциысь тросэз депутатъёс (ваньмыз 46 мурт) со понна луозы. КПРФ, "Народовластие" но аграрийёс (211 куара) пусйылӥзы, ас малпанзэс вералозы, С. Степашин палатаын вераськем бере гинэ. Премьер-министре кандидатэз кылзэм бере, быръён ортчиз. Сергей Степашин понна 293 мурт куаразэ сётӥз, пумит - 55, 44-ез - возиськиз. Премьер-министр юнматэмын. Выль премьерез юнматон вӧт вылтӥ кадь ортчиз, шуыны луоз, оло, солэн вольыт вераськемезлы луыса? Асьтэос дунъялэ, озьы-а со. "Туннэ та трибуна сьӧры потыса, мон шӧдӥсько но валасько, макем секыт ныпъет усёз пельпум вылам. Ӟеч валасько, мон но командаям пыроно адямиос азе бадӟым курон пуктӥське - югдурез огсыр гинэ возён но ӧвӧл. Асьмелэн валтӥсь ужпуммы - экономикаын чутрак выль сямен ужан, одӥг гинэ шонер ужпум кутон, со мед быгатоз калыклэсь улонзэ умоятыны но Россилэсь кужымзэ улӟытыны..." Улыса адӟом ини, та чебер кылъёс кылъёсын гинэ кылёзы-а, улонэ пыӵалозы-а. Е. Пахомова. "Пурга кизилиос" "Пурга кизилиос" - чеберлыклы дышетонъя центр. Пичи Пурга ёросын сое тодӥсьтэмез ик ӧвӧл, дыр. Дас ар талэсь азьло кылдытэм огазеяськонын дышето музыкалы, сцена вылын шудыны, суредаськыны, кылбур но верос гожъяны. Валамон, аслад быгатонэд, сюлэмад тылгизьыед ӧвӧл ке, чеберлык кылдытыны уд быгаты. Вӧзаз ик тыршем кулэ на. Сыӵе пиналъёс-усточиос Пурга ёросын 64 кузя люкаськизы. Соос Баграш-Бигра, Гожня, Бобья-Уча, Ильинск, Вуж Монья, Иваново-Самарск, Байситово, Кечево, Пугачево, Норья, Курчум-Норья но Пичи Пурга школаосысь. Та чеберлыклы дышетонъя центрын пиналъёсын ужало шаермылы тодмо адямиос, кибашлыос: суредасьёс В. Д. Баталов, Е. Е. Скобелев, крезьгурчиос Е. Л. Антонова, Н. М. Шабалин, режиссёр В. С. Ушаков, артистка Р. Г. Нефедова. Школаен кивалтэ усто педагог Г. Г. Пушкарева. Лыдӟисьёсмылы туннэ ӵектӥськом гожъяны кутскисьёсмылэсь выль "пӧрамъёссэс". Тулыс уйвӧт Зарезь. Лэйкась тулкымъёс чиль-дол уло шунды шорын. Нырысь кисьтӥсько тӧдьы, собере лызалэс, нош ик тӧдьы. Ярдурын арфаен шудыса кылле вуныл. Чагыр-вож синъёсыз кыско бордазы, либыт, небыт куараез йырез поромытэ. Вӧзаз пуке лэйкась кресло вылын воргорон. Оло солэсь но вуныл йырзэ берыктӥз? Ма та Александр Сергеевич Пушкин кадь ук? Ма тани вӧзаз сьӧд коӵыш поръя, зарни жильыен думемын тыпы борды. Визьмо коӵыш котыръяськыса ветлэ пыд дортӥз, маде тунсыко учыр. Нош Пушкин тылыеныз мар ке но гожъя. Оло выль роман, яке выжыкыл? Нош мар та? Ненег тӧдьы пилемъёсты палэнтэ сьӧд секыт возъет. Шунды ышиз. Котырак пеймыт. Чагыр-лыз зарезе оло сьӧд буёл кисьтӥзы. Ӝутскиз сильтӧл. Инбаме кытысь ке но потӥзы кык вужеръёс. Мае ке но люкиллямтэ, жугисько. Син куспам чилектӥз лэчыт сабля. Батыр мугоро воргорон шоналскиз но куаӵак ӵогиз пересьлэсь кузь тушсэ. Син куспын кыксы ик ярдуре усизы. Кыдёкын ик ӧвӧл, сюлэмшугъяськыса сылэ чебер ныл. Кузь чагыр дэремез макем мусо адӟиське вылаз. Тани воргорон лыктӥз дораз, нылашез китӥз кутӥз но кошкизы матын сылӥсь двореце. Ма та Руслан но Людмила ӧй вал меда? Нош пересь? Ӵок бен, пегӟиз ке ни - вань кужымез быриз, со уз быгаты ини Людмилаез лушканы. Инкуазь берытскиз азьло вылтусаз. Нош Александр Сергеевич пуке. Ма номыре но ӧз адӟы шат? Шат ӧз кылы зарезьлэсь бугыръяськемзэ, оло со пельтэм? Тани Пушкин султӥз. Кагазъёссэ кресло вылаз поныса вамыштӥз ярдур кузя. Дугдӥз. Сылонъяз сое кин ке саестӥз кыскись луиз. Александр Сергеевич берытскиз. Азяз сылэ шушмара боко кадь сьӧд шайтан. Мар ке но вераны турттэ. Собере нош саестӥз кыскиз, кытчы ке но нуыны медэ. - Шайтан? Нош мон пегӟид шуыса малпай вал ини. Ойдо, асьмеос вераським ук, али ӵошатском шуыса... Со вискын зарезьысь тулкым ярдуре сэрпалтӥз кыӵе ке но чорыгез. Александр Сергеевич, номыр куаретытэк, со доры лыктӥз. Нош чорыг адями куараен вазе: - кКушты монэ зарезе, со понна мон быдэсто малпандэ. Александр Сергеевич чорыгез зарезе куштӥз, бератаз шара шуиз: - Мед син азьысьтым ышоз шайтан, мед шедьтоз ассэ Балдаез, а то мон борды люгы кадь лякиськиз ини. Одӥг минут но ӧз ортчы, син азьысь Александр Сергеевич Пушкин но. Малы меда? Таня Бектышева. Норья школа, 9-тӥ класс. Ненег сюлмысь потэм чуръёс Джуська Тодмоелэн гуртаз вань мусо коӵышез. Сыӵе ик коӵыш кадь, мукетъёсызлэсь номырин уг висъяськы. Куд-ог дыръя гинэ адӟылӥсько солэсь йӧспӧртэм луэмзэ. Я солэн мыйыкъёсыз сутылэмын, я пуштрес гонэз шер-тур гинэ кылемын. Соин ик мон но серекъясько вал тодмоме, Джуськадэ разведкае-а мар-а лэзьяськод шуыса. Нош со -номыр но ӧз куаретылы, вераськонэз мукет ӧре выжтыны тыршылӥз. Вал на тодмоелэн агаез, кемалась ик ӧвӧл солы тырмиз 18 арес. Но куд-ог выросъёсыз чылкак пичи муртлэн кадь потылӥзы. Адӟылэме вань, кызьы со пичиосын шудэ, я аслыз кыӵе ке шудон лэсьтэ. Нош одӥг пол син шорам йӧтӥз таӵе дауртэмез. - Джуська, кытчы пегӟиськод! А ну-ка, чаль ай мон доры. Кс-кс... Визьмо коӵыш. Я бен, туннэ таӵе эксперимент лэсьтом: яралоз-а тыныд десантлэн профессиез? Тани парашют тыбырад ошом. Ваньмыз дась. Роман корка йылэ тубиз экспериментсэ ортчытыны. Коӵыш таӵак усиз музъем вылэ. Парашютэз усьтӥськыны ӧз вуы. Та учыр бере Джуська кема ветлӥз шонаськыса. Таин гинэ ке бырысалзы экспериментъёс... Матэктӥзы тол праздникъёс. Котькуд пияш сямен ик, Роман пуштытъян шудонъёс басьтӥз. Ӝытъёсы кӧттырымоназ шузияськиз, пуштытъянъёссэ нылъёслэн пыд азязы куяса. Но соин гинэ кӧтыз ӧз тыры. Самой секытэз йӧтӥз "янгышам" Джуськалы. Роман "нодъяськиз" пуштытъянэз быж бордаз думыны. Кылӥськиз сюлэмез вандӥсь мяугетэм. Тӧдьы лымы вылэ кылизы вир виштыос. Кӧс нунал. Куазь неномыртэм ӟырт кезьыт кариськиз. Озьы ке но, Романлэн семьяез мунчо эстӥз. Азьло сямен ик, нырысь мынӥзы Роман атаеныз. Пӧсьлы чидатэк, Роман мунчо азе потӥз. Отын сыло берыктэм ведраос. Гозы борды ошылэмын миськем дӥськут. Ӝамдэ сылонъяз, Романлэн йыртышказ ӵаштыртӥсь маке усиз. Кӧс вениклэсь кышкаса, мар дауртэмзэ валатэк, роман пуксиз берыктэм ведра вылэ. Кынмем ведра бордаз лякиз шуныт мугорез. Романлэн визьмыз ик сураськиз кадь, кылыз уг берытскы ни юрттэт курыны. Нош мунчо сигысь серекъяса учко Джуськалэн чилясь синъёсыз. Таня Бектышева. Норья школа, 9-тӥ класс. УЛОНЫСЬ УЧЫР Возьыт луиз Укно сьӧрын жаль гинэ зоре. Куазь пильмо. Мӧзмыт. Таӵе куазь кадь секыт мылкыдын пуке Оля но. Висъетын пеймыт, шим-шим. Ӝӧк вылын сылэ буш бутылка. Ныллэн ныраз пыре аракы зын. Нош кровать вылын кылле Олялэн анаез: ымнырыз тӧрнамын, суйёсыз лыз-вож. Котькуд уй со гуртаз таӵе тусын бертэ кытысь ке. Я асьсэ дорын берозь гольтыръяськыса пуке ачиз кадь йӧнтэм пиосын. Нылыз сое пыкылӥз ини ке но, солы номыр кадь ик уг поты. Нош Олялы пӧсь сиён гинэ но уг сюрылы. Сюре ке но, туж шер. Школаысь Оля бертэ ке, анаез сое уксёлы ыстэ ни. Урамысь адямиослэсь кураськыны косэ. Сиён басьтыны шуэ, нош ӝӧк вылын номыр но уг адӟиськы, аракы бутылка сяна. Ма школаын но Оля рос-прос уг дышетскы ни. Бускельёсыз жаляса учкыло куанер пинал шоры. Куддыръя сиськыны но доразы ӧтьыло. Олялэн атаез анаеныз люкиськемын. Со кузпалъяськиз мукетыныз. Городысь кошкыса, кыӵе ке гуртын улэ, лэся. Нылаш сое рос-прос уг но тоды ни. Пуконъяз тодаз лыктӥз: пунэмам уксёзэс берыктоно. Нина апай, анаезлэн азьло эшез, куриз вал. Но нунал бӧрсьы нунал ортче. Пичи ныллэн кытысь-о уксёез луоз? Нош анаезлы номыр ик кулэ ӧвӧл кадь... Мылыз потытэк, секыт мылкыдын нылаш потӥз зор улэ. Нина - рос-прос кышномурт. Нылпиосыз солэн ӧвӧл. Улэ огназ. Лякыт сямыз понна, дыр, Олялы со кельше. Сюрес кузя мынонъяз, Оля пумиськиз пичи пиналъёсын. Зор дугдэмын. Пиналъёс малы ке шумпотыса, серекъяса кытчы ке мыно. Оля дугдӥз но, туж кема мышказы учкыса сылӥз. "Кыӵе умой али соослы. Соос сярысь сюлмасько, соосты гуртазы возьмало", - малпаз но дыртытэк азьланьтӥз сюрессэ. Укмыс аресъем ныллэн йыраз лыкто пӧртэм малпанъёс. Кин тодэ, кыӵеесь соос. Куанер нылэз соос шум но потто, секыт изэн но кытӥяз ӟибо кадь. Оля вуиз Нина апаез доры. Со гуртаз вал. Нылашлэн ымнырызъя ик кышномурт валаз, уксё ӧз вайы шуыса. Оля синъёссэ ватэ. - Оли, кӧня пол мон тонэ чортылӥ дорам улыны. Малы уд лыктӥськы? - Уг быгатӥськы Нина апай. Монэ анае утялтыны али уг быгаты ке но, монэ со вордӥз, татчыозь будэтӥз. Мон сое огназэ куштыны уг быгатӥськы, - шуиз Оля. Нина туж жалясь тусын учкиз со шоры. Сыӵе люконтэм кужым вылэм нылпи но анай куспын: чидан. Куддыр анай нылпизэ чида, куддыр пинал - анайзэ. Собере соос доры кыӵе ке инмарен ыстэм утись лыктэ но юрттэ соослы, синзэс усьтэ кадь. Та нунал бере Нина Оляос доры туж ӵем ветлыны кутскиз. Нош одӥг нуналэ со та патере кияз чемоданэн лыктӥз. Чемоданзэ пуктӥз но, Олялэн анаез доры мыныса шуиз: - Эх, Лена, кытчы вуттӥд тон астэ ачид? Ма малпаса улӥськод тон тазьы? Та кылъёс бере Леналы нылыз азьын но, эшез азьын но малы ке туж возьыт луиз. Нина сое пуктӥз кадь нылыныз но зэмлыкен ваче син. Пыдло выем синъёсыныз учкиз со нылыз шоры но аслыз ачиз туж мур гуын кадь потӥз. Со улытозяз нырысьсэ валаз кадь янгышсэ. Таня Семенова. Вуж Монья школа. Серемес чуръёс Урокын дышетӥсь лыдӟем веросэз валэктэ.Дима сое уг кылзӥськы, укное учке. Дышетӥсь соеалӥз: - Дима, куакаосты эн лыдъя. - Ольга Васильевна, мон ӟольгыриосты лыдъясько. Мынэ историяя урок. Дышетӥсь класс азе Таняез поттӥз но гуртэ сётэм ужзэ вераны косӥз. Таня кӧня ке сылэмез бере шуиз: - Кавалеръёс мынӥзы атакае. Надя Имполитова. Вуж Монья школа *** Олёнлэн анаез Юля, нош атаез - Юра. Олёнлэсь юало: - Кызьы анаедлэн нимыз? - Юя... - Атаедлэн? - Юя... Вероника Кириллова, Гожня школа. *** Пичи Маши шуэ: - Анай, вур мынам дэремам пась, а то бирдыме бирдыяме уг луы. *** Машилэн пиньыз висе, со песянаезлы вера: - Мынам но тынад кадь ик пиньёсы медло вал. Висьыны кутскысалзы ке, мон соосты басьтысал, нош висьымтэ дыръязы понысал. Лена Игнатьева. Брангурт. *** Анаез 1-тӥ классэ ветлӥсь Алешиклэсь юа: - Пие, ӟуч кылэз дышетыса, малы ке дышид-а ини? - Дыши... - Монэ ас дорад ӟуч сямен ӧть ай. Алёшик нод-нод вераз: - Анай, чаль мон доры ӟуч сямен. Лена Гагарина. Вуж Монья школа. Городысь кенаке - Мон толон городысь сыӵе шуш, лыз-вож синмо, горд-горд йырсиё, шер-тур пинё кышномуртэз адӟи. Дӥсяськемез шоры учкыса, ӧжыт ӧй погра - паймемзэ вера Оли. - Со милям кенакмы, - алданы турттыса, пумитаз вазиз Вали. - Кызьы кенакты? - шуэрскиз эшез. - Ма, городын сыӵеос ӧжыт шат? - Ӧвӧл, милям кенакмы вал со, мон тодӥсько, зэм верасько, - чик мыньпотытэк, нош ик алдаз Вали. Оли куалектӥз. Яратоно эшезлэсь кенаксэ шуш шуиз ук. - Нош соды кӧй но лапег-а? - синзэ кыньыртыса юаз на. - Озьы, пырак сыӵе, - вераз Вали. - Нош мон чиедзэ но ӝужытсэ адӟыл.; Жанна Рыбакова. Куреггурт. Кылбурась мылкыд Гуртэ сярысь Писпу куаръёс шыпыртыку, Куке шунды золгес шунтэ, Туж юн яратӥсько соку Тонэ, вордскем Гожня гуртэ. Шурмы ялан азьлань дыртэ, Отын шудо шунды сиос. Шур дурамы бадьпу будэ, Шур выл солы нош синучкон. Сюлэмылы луэ эркын, Ку поръясько мон нюлэскын. Сюлэмыя ваньмыз татын, Та вордӥськем Гожня гуртын. Люда Чернова. Гожня школа. А. С. Пушкинлы сӥзьыса Кӧня лыдӟисьёстэ тон паймытӥд Аслад чебер гожъяменыд, поэт. Секыт лёгетъёстӥ вылэ тубид, Лыдӟисьёслы кузьмаса выль пушъет. Ӧвӧл тонэ нокин данъясьтэмез, Ӧвӧл гожъямъёстэ лыдӟисьтэмез. Тонэ тодо, поэт, кунгож сьӧрын. Ужам ужед улэ калык пӧлын! Таня Семенова. Вуж Монья школа. Беризь Сылэ беризь огназ Гурезь йылын чол-чол. Кузёяське вадьсаз Шимес кышкыт сильтӧл. Тани со куасалтоз Сюсьтыл кадь мугорзэ. Пумен нош ишкалтоз Солэсь чебер дӥсьсэ. Ум сётэ беризьлы Огназ курадӟыны, Вӧзаз удъёс солы Кутском ми мерттыны. Лена Гагарина. Вуж Монья школа. Ялан гӧртэ Туннэ нунал. Вал-а? Ӧй вал. Толло нунал. Бен ку со вал? Туннэ. толон я ӵуказе Сураськизы, бусаськизы. Туннэ - со вад кадь валлянэз, Вуоноез - со толлоез. Тулыс вуэ. Шунды шунтэ. Нош сюлэмын Ялан гӧртэ. Вероника Кириллова. Гожня школа. Уйвӧтын гинэ Тулыс тудву бызе, вӧлме, Сьӧраз нуэ малпанъёсме. Малпанъёсме ӧвӧл - эшме, Пичи пыжын лул-гажанме. Туж зол мон бызисько сьӧраз, Кужмысь кесяськисько бӧрсяз: "Тудву, тон дугды быземысь, Яратонме эн ну татысь!" ... Ӧвӧл, со уйвӧтын гинэ, Ӧвӧл мынам яратонэ. Надя Яковлева. Вуж Монья школа. Леленчи тӧл Та пумтэм лыз инбам сюрестӥ Леленчи тӧл ветлэ котькытӥ. Котькытчы киоссэ со вуттэ, Ӵукъёсы шундыез сайкатэ. Со лушкем вутскылэ кыръёсы, Шур дуре, гуртъёсы, тэльёсы. Шунытэсь киосын нош куддыр Вешаське кызьпуэн со майбыр. Тӧл монэ но веша, эркия, Ымнырме небытак маялля. Нош куддыр , шыпытак лыктыса, Чепылля пельёсме шудыса. Надя Имполитова. Вуж Монья школа. Нэнӥелы Нэнӥелы, мусо нэнэ, Ӟечкыласько мон тонэ. Туннэ вордскем нуналыд - Эшшо ватсаське арлыд. Со арлыд будэ ке но, Ымнырад гожъёс ке но, Котьку тон мед пальпотод, Визьмо, йӧно мед луод. Сюлэмдэ мед шунтозы Небыт ӟечкылан кылъёс. Вунонтэм мед кылёзы Шудэн тырмем нуналъёс. Таня Семенова. Вуж Монья школа. Серга но Марпа Гурт палаз вуэ Серга: "Ӟеч но бур, Пичи Пурга!" Ас понназ маке малпа: "Мар шуоз ини Марпа? Оло нош ик уллялоз, Донгаса берен поттоз. Оло али жалялоз, Пырыны корка лэзёз?" Бертыса ӧз ву дораз - Эшсэ чакланы малпаз. Бер ӝытозь лабыртӥзы, Кӧня ке ӟамыртӥзы... Сюлмыз пирса Марпалэн: "Мар луиз та Сергаен?" Снежана Волкова. Гожня школа. "Пушкин: дауръёс пыр учкон" Удмурт Республикаысь Национальной библиотека 20-тӥ майысен 6-тӥ июнёзь ваньдэс ӧте "Пушкин: дауръёс пыр учкон" книга адӟытонэ. "Ужъёс но нуналъёс" люкетэз тодматэ поэтлэн улэменыз. Со сярысь верало Пушкин вакытэ улэмъёс но берло дауръёсысь пушкинистъёс. Произведениосыз радъямын, кылдэм дырзыя поэтлэн улоназ луэм учыръёсты возьматыса. "Наследие" люкетаз А. С. Пушкинлэн печатлам произведениосыз возьматэмын ЪИЪ даурысен туннэ нуналозь. Татын ик нимаз висъяське пичи книгаосын поттэм пушкиниана. Адӟытонлэн тужгес бадӟым люкетэз нимаське "Предметом став суждений". Улэп дыръяз но Пушкин сярысь пӧртэм веранъёс вӧлмылӥзы. Нош кулэм бераз сое кин ке косэмъя гожъясь поэт шуыны турттӥсьёс но вал. Революционеръёс-демократъёс солэсь "пайда" поттон утчазы. Футуристъёс поэтэз валантэмен лыдъяллязы, "гиероглифъёс кадь", пе. Туннэ дырозь ке но ачиз Пушкин, озьы ик солэн произведениосыз ог-огзылы пумит луись пӧртэм малпанъёс кылдыто. Адӟытонлэн берпум люкетэз сӥземын ӟуч писательёслэн, художникъёслэн, музыкантъёслэн Пушкинлэсь улонзэ, произведениоссэ ас сямен адӟемзылы, котькудӥз соос пӧлысь кылдытӥз "аслэсьтыз Пушкинзэ". Адӟытонын возьматэмын луозы В. Н. Ардашевалэн, З. С. Солопаевалэн, В. И. Чулковлэн, А. И. Яковлевалэн асьсэлэн коллекциосысьтызы арбериос. Вузъёсысь но Ижевск городысь преподавательёс пыриськозы "Пушкин но туала вакыт" "котырес ӝӧк" сьӧрын вераськонэ. Удмурт Республикаысь Национальной библиотекалэн пресс-службаез. Шӧкыч Инкуазез утем интые Вазен адямиос котырысь инкуазез синчеберзэс кадь утёзы вылэм. Уго нюлэс но, возь но, шур но со сюдӥсь-вордӥсь интыын вал. Нош берло дыре калык воксё ашкынӥз, ява, азьзэ-берзэ уг учкылы ни - нюлэсэз пумтэм кора, вуысь чорыгез пуштытъя, пӧйшуръёсты ыбылэ, музъемез нефтен нашта. Соин ик инкуазез кырсёмытӥсьёсын нюръяськон вылысь кылдытэмын вал нимысьтыз прокуратура. Котырысь инкуазез утён вылысь, ёросъёслы но городъёслы государство котькуд ар бюджетэ пырисьтэм коньдон висъя. Но со уксё малы ке палэнэ тӧлӟе вылэм. Тани Воткинскысь ёрос администрацилэн кивалтӥсез В. С. Варламов но Сарапулысь инкуазез утёнъя территориальной комитетлэн председателез Г. Ф. Галиев висъям коньдонэз быдтӥллям асьсэ удысын ужасьёслы премия тырыны. Завьял ёрослэн тӧроез Г. В. Баталова эшшо кескичгес вылэм. Инкуазь утёнлы чаклам коньдонэз со сётыны косэм ёросысь улон интыосты возён удысын ужасьёслы дышетскыны но документъёс дасяны. Аслаз мылкыдызъя коньдонэз пазяз Кезысь комитетлэн кузёез Н. Р. Касимова но. Ижевскысь нюлэс хозяйстволэн кивалтӥсез В. Л. Соловьев но азьзэ-берзэ учкылытэк вузкариз "вож зарниен". Нюлэс лушкасьёслы юн кыл кутыны косэмын. Законъя нюлэс огъя калыклэн ваньбурез луэ. Сое кораны луэ лесхозлэн лэземезъя гинэ. Нош Камбарка районысь куд-ог фермеръёс, висъян музъеменызы сяна, нюлэсэн но кузёяськыны шӧталлям. Удмурт Республикаысь арбитражъя судын та пумысен нимысьтыз уж ӝутэмын. Фермеръёслы изъянзэ берыктоно луоз. Иж шур котыре интыяськемын "ФПТИ" шуон ООО. Кыӵе огазеяськон со, букваосъя озьы гинэ уд вала, ява. Ӵапак со ООО ик Оӵ шур дуре автомашинаосты тупатъянъя но эскеронъя ёз усьтэм. Валамон ни, вӧй но, бензин но, кырсь ву но Иже кошкыса улӥз. Арбитражъя суд "ФПТИ"-ез интыысьтыз уллян сярысь ужпум ӝутӥз. Инкуазез утёнъя республикаысьтымы прокуратура министерствоослы, ведомствоослы, интыосын аскивалтонъя органъёслы пумит уно ужъёс ӝутӥз. Соос кунмылы 43 сюрс манетлэсь унолы изъян ваизы. Нюръяськон азьланьтӥське, нюръяськон кужмоя. О. БОГАТЫРЕВА, Удмуртиысь инкуазез утёнъя межрайонной прокурорлэн юрттӥсез. Консул вуылӥз Кылем арнялэн пумаз Удмуртие вакчи дырлы вуылӥз США-лэн Екатеринбургысь генеральной консулэз Дениел Рассел. Консуллэн эскероно округаз пыро Урал но Сибирьлэн Шунды пуксён пал люкетэз. Пресс-конференциын вераськыкуз, со ивортӥз республикаямы вуэмезлэн мугез сярысь. Дипломат шаерысьтымы но городысь кивалтӥсьёсын политика но экономика удысын кылдэм югдур сярысь кенешиз. Вераськемын вузкаронэз паськытатон, инвестициосты кутыса, уногес ваньбур поттон сярысь. Консул вуылӥз асьмелэн Америкаен юн кусып возись предприятиосамы. Е. Пахомова. Вордӥськем музъемлы - матэгес Грах ёросысь администрация, Инкуазез утёнлы сӥзем нуналъёсты ортчытон вылысь, ужрадъёсын, нимысьтыз план дасяз но оргкомитет кылдытӥз. Солэн ужаз пырисько ёросысь санэпидемстанцилэн, лесхозлэн, Инкуазез утёнъя комитетлэн, калыкез дышетонъя, культурая ёзъёслэн кивалтӥсьёссы. Инкуазез, вордскем музъемез гажаны пичи дырысен ик дышетоно. Тае лыдэ басьтыса, ёросысь нылпи садъёсын ужасьёс понна ортчытэмын семинар. Граховоысь, Зареченск посёлокысь нылпи садъёсын, Благодатное гуртысь школаын котыр улосэн ог-огдэ улыны кемалась дырысен уно саклык висъяло ини. Россиын алигес ортчиз экологилы дышетонъя конкурс. Благодатноеысь школа солэн дипломантэз луиз. Ёросысь экологияя фондэ вуись кондонлэсь 2 процентсэ инкуазез утён амалъёсын тодматонэ висъяны яра. Инкуазез утёнъя комитет та уксёен вань нылпи садъёсты "Филя", "Свирелька" выллем журналъёслы гожтыны решение кутӥз. Матысь нуналъёсы куяськон интыос, шуръёс, ӵыпетъёс, инкуазь памятникъёс - нюлэсъёс, ошмесъёс - котыре пуктылэмын луозы кылем-мылемъёсты, жуг-жагез люканы, машина миськыны алӥсь пулъёс. Апрельлэн пумаз вань гуртъёсын, предприятиосын улосэз чылкытатонъя субботникъёс ортчизы. Соос ушъямон радъямын вал. Кылсярысь, ёрос центрын трослы югытгес эркынгес луиз. Гужемлы чакламын пичи шуръёсты чылкытатыны. Та уж оскемын бадӟым классъёсын дышетскисьёслы, нош покчиосыз нылпиос "Кузьыли кар" операциез ортчытыны дасясько. 5 июне, Инкуазез утён нуналъёслы йылпумъянъёс лэсьтыса, ёрос центрын ортчоз конференция. Отын предприятиослэн, гурт администрациослэн инкуазез гажаны дышетонъя ужамзылы дунъет сётэмын, та темалы сӥзем суредъёсын, плакатъёсын адӟытон радъямын луоз. Н. Дударева. *** Ува ёросысь администрация инкуазез утён ужрадъёслы уно саклык висъя. Соос сюлмаськемен, ёросысь библиотекаосын радъямын адӟытонъёс, викторинаос, кудъёсыз тодмато инкуазьлэн чебереныз, узырлыкъёсыныз. Школаосын нылпиосты вордскем палъёссэс яратыны дышетыса, инкуазьлэсь но тазалыклэсь юн герӟаськемзэс валэктыса ортчыло лекциос, нимысьтыз урокъёс, мукет ужрадъёс. Тани Рябово шор ёзо школаын школьникъёс пӧлын тамак кысконэн нюръяськон ужрад ортчиз. "Чылкыт инбам" нимаськиз со. 26 апреле, радиационной авариосын быремъёсты буре вайыса, линейка ортчиз. Булай школаын дышетскисьёс писпу мерттӥзы. Чеканысь школаын экологилы сӥзем конкурс ортчиз. Удугучин пиналъёс ошмесъёсты сузязы, уморто лэсьтӥзы. Верало депутатъёс Вамышлы азьлань яке вамышлы берлань? Удмурт Республика нырысетӥ толэзьзэ улэ но ужа выль быръем кивалтӥсьёсын. Кун Кенешын но, Правительствоын но ортчизы шӧдскымон воштӥськонъёс. Сояз но, таяз но лыктӥзы трос выль адямиос. Удмурт парламент котькудӥзлы оскемзэ вераз, куаразэ сётӥз ӵектэм кандидатъёс понна. Валамон, 100 депутат пӧлын вань котькыӵеез; мылкыдзыя, малпанъёссыя, республикаын кылдэм политической югдурлы дунъет сётонъя соосты нокызьы но оградэ уд пукты. Тае шӧдоно веранъёссыя но. Валерий Леонидович Фридрих, Воткинск городлэн мэрез (быръёнъёсъя 42-тӥ округ): - Азьвыл созывен ӵошатыса, таосыз депутатъёс сокем ӟеч мылкыд уг кылдыто. Мон сямен, парламентэн кивалтонэ шедизы та удыслы тупасьтэм куд-ог адямиос. Сое валано сётэм юанъёслы йӧскадь валэктон сётыны быгатымтэенызы но ляб дасям программаоссыя. Ватонэз ӧвӧл: ыштӥм ӟеч ужасьёсмес. Соос пӧлын депутатъёс Аркадий Трофимович Малков, Виталий Александрович Соловьев. Ялан ужась комиссиосын кивалтонэ шедизы егитъёс, вань нуоно удыссэс умой-умой валасьтэм специалистъёс но. Та ласянь, мон меӵак пусйисько, республика одӥг вамышлы берлань чигназ. Выль быръем эшъёслы одӥг-кык ар дышетсконо луоз ай, собере гинэ ӧраз пырозы. Нош отӥяз парламентлэн ужез но йылпумъяськоз. Огъя вераса, Кун Кенешлэн Президиумаз таяз учыре сюризы кылзӥськись, пумит вераны дӥсьтӥсьтэм депутатъёс. Мыным со уг кельшы. Али ик тодмо: таяз созывын парламентарийёслэн ужзы, законъёсты эскерон но юнматон лябгес мыноз. Малы? Депутатъёс пӧлы трос шедемын бадӟым предпрятиослэн кивалтӥсьёссы. Законъёслы инъет дасян бордын пукыны соослэн дырзы уз тырмы, та бордысь нош ик потозы янгышъёс но судъёстӥ кыстаськонъёс. Юанъёс кылдо Правительствоя но. Николай Алексеевич Ганза, веранэз ӧвӧл, ӟеч, визьмо специалист, умой кивалтӥсь. Но, Тӧрое пуксьыса, нырысь-валысь шуге-леке вуиз кадь: аслыз команда косэмзыя люка, ачиз уг утча. Туала Правительствоын кылдытэмын выль удысъёс. Соос туж-а кулэ меда? Кылсярысь, гражданской обороная но жиилищно- комунальной хозяйствоя министерствоос. Министерствоосты оглом кутскыса чаклано ке, отын кӧня луозы ужлы ёрмыса пукись министръёс! Соослэсь ужзэс огдышемъя нуозы интыысь кивалтӥсьёс. Мон сямен, национальной ужпумъёсъя министерство но кылдытэмын луоз ньӧмыз понна гинэ, со пӧрмоз политической шудонлы, калыклэсь мылкыдзэ лапкомытонлы. Малпаськытэ Кун Кенеше но Правительствое куд-ог тодмо ужбергатӥсьёслэн шедемзы но. Самой соос туннэ киулазы возё му вӧй гумыосты, переработкаез. Зэм, сыӵеосты али пырто умой кивалтӥсьёс радэ. Нош улон возьматэ чылкак мукет, кышкыт учыръёсты, республикамы понна бадӟым ыштонъёсты. Тӥни кинъёс пыро кивалтонэ! Жаляса верано, Правительствоысь палэнтэмын ужаны быгатӥсь Тӧролэн воштӥсьёсыз, куд-ог министръёс. Мон ӟечен гинэ пусйысал Злобин Александр Григорьевичез, Зенин Владимир Николаевичез, Бессогонов Николай Михайловичез. Та адямиос трос ӟечсэ лэсьтӥзы калыкмы понна, эшшо но ужасалзы на. Но ма шуод, асьмелэн нырысетӥ интыын сылэ политика, уж - кыкетӥ интыын. Озьы ик улӥськом- векаськом. Анатолий Николаевич Лапин, запасысь полковник (быръёнъёсъя Воткинск городысь 45-тӥ округ): - Депутатлэсь мандатсэ мон нырысьсэ басьтӥ, соин ик выль синмын учкисько ваньмыз шоры. Фридрихлэн вераменыз быдэсак сямен соглаш. Монэ озьы ик шугъяськытэ Кун Кенеше шедем кивалтӥсьёслэн лыдзы. Туж ӧжыт дышетӥсьёс, врачъёс, законъёсты дасян бордын ужаны быгатӥсь адямиос. Бадӟым заводлэн директорезлэн ас коллективаз но сюлмаськонэз тырмыт. Кызьы со ваньмаз сессиосын пукоз, пайдаё тыршыны быгатоз на? Мон али ик шӧдӥсько: азьвылъёсыз сямен, таосыз но депутатъёс туж ӧжыт саклык висъялозы инкуазез утёнэн герӟаськем ужпумъёслы. Та удысъя комиссия кылдытонъя дэмлан лыдэ басьтытэк кылиз. Правительстволэн выль Тӧроезлы мон мылкыд карысал котыраз визьмо адямиосты люканы, татын со медаз янгыша вылэм. Нош солы мугъёс вань ини. Кылсярысь, Пичи Пурга районын улӥсьёслэсь вуиз вазиськон, Назаров пумысен. Та депутатэз мон уг тодӥськы на, но адямиос юнме шорысь ужпум уз ӝутэ. Сыӵе ик вазиськон вуиз Катков, Гуров но куд-ог адямиос интые мукетъёссэ юнматыны курыса. Мон сямен, одно ик улонэ пыӵаны кулэ дырызлэсь вазь депутатысь поттонъя закон. Софья Эльфатовна Широбокова Кун Кун Кенешысь ялан ужась комиссилэн кивалтӥсез (быръёнъёсъя Зуринский 79-тӥ округ): - Мон малпамъя, Кун Кенеше лыктӥзы ужаны мылкыд карись адямиос. Оглом, таиз созыв умой, но шугъяськыто депутатъёс-кивалтӥсьёс: ас уженызы, командировкаосын сэрен соос уз вутске Кун Кенешлэн сессиосаз, ялан ужась комиссиослэн заседаниосазы. Таӵе учыръёс пумиськылӥзы сояз но созывын. Мынам туннэ сюлэмы шуг гуртысь депутатъёс понна. Соос туж ӧжыт. Ваньзэ но утьыны ӧм быгатэ. Озьыен, гурт удысэн герӟаськем ужпумъёсты эскерон секытэн мыноз, но татын асьсэды возьматыны кулэ городын улӥсь депутатъёс. Соос, кинлы мандат сётэмын гурт калык чотын. Туж жаль, ялан ужась комиссиен кивалтонэ ӧз шедьы А. Т. Малков. Соин ми 4 арзэ ӵош, ог-огмылы юрттыса ужам вал. Кылем созывысь кыли на мон гинэ, ваньмыз воштӥськизы. Мынам комиссие али люкемын кыклы. Со умой, малы ке шуоно, экономика ужпумъёс но бюджет борды ватсаськизы на налогъёс, инвестициос. Дыр тырмымтэен, ми туж ӧжыт ужам страхование, бюджетэ пырисьтэм фондъёс бордын. Табере котькуд ужпумез мургес эскерыны луоз. Комиссие пыртэмын экономика удысысь вуэм специалистъёс. Правительство сярысь. Тӧролы воштӥсе ӵектэмъёс пӧлысь мон чутрак пумит Касихинлэн кандидатураезлы. Ужаны со быгатэ, номыр уд шуы. Но трос юанъёсъя та адямиен ми огкылэ ӧм вуэ, тужгес но приватизация пумысен. Калык ваньбурез люкылонын али ке но йыпумъянъёс лэсьтымтэ. Н. А. Ганзалы аслыз воштӥсьёсты юнматонын сакгес ужаны кулэ. Валерий Васильевич Ходырев, депутатъёслэн-коммунистъёслэн огазаеяськонзылэн кивалтӥсез(Ижевскысь 14-тӥ округ): - Кун Кенешлэн ужаз валтӥсь интыез нырысетӥ сессиын ик басьтӥзы промышленникъёслэн но ужбергатӥсьёслэн фракцизы но "Единство". Коммунистъёс 15 мурт гинэ, ӧжыт удмуртъёс но гуртысь депутатъёс. Соин ик ми голосование дыръя келяськом. Милемыз пыкыло, коммунистъёс я соиз, я таиз кандидат понна куаразэс ӧз сётэ шуыса. Павел Николаевич Вершинин понна ваньмы голосовать карим. Нюръяським огзэ коть эшмес Президиуме кельтон вылысь. Правительство ласянь ке верано, отчы ми дэмламы вал Михаил Иванович Шишкинэз. Но списоке со малы ке но ӧз пыры. Куспамы кенешыса, решение кутӥм,котькудмы ас мылкыд кареммыя голосовать каром шуыса. Мон малпамъя, В. В. Бельтюковез но Ю. С. Питкевичез интыязы кельтыса, умой лэсьтӥм. Оскон вань Н. А. Ганзалы но. Валериан Арсентьевич Никитин Завьялово районысь "Путь Ильича" колхозлэн председателез (быръёнъёсъя 75-тӥ округ): - Кивалтӥсьёсты быръён секытэн сётске. Татын котькудӥзлэн аслаз позициез луыны кулэ, малпаськытэк куарадэ сётыны уг яра. Удмуртъёс ведь юнме шорысь пикетэ ӧз потэ. Веразы, возьматӥзы: удмуртъёсты ас шаеразы кивалтон удысысь медаз палэнтэ. Асьмелэн визьмо адямиосмы гуртын но, городын но тырмыт, соосын ужаны кулэ. Малы валтӥсь интыосы одно ик палэнын вордскемъёс пуксё? Нош удмуртъёс понна мон шумпотӥсько. Тросэз кык-куинь кылын верасько. Ӟучъёс, 20-30 ар татын улыса, кылмес уг валало, валамзы но уг поты. Удмуртъёслы та ласянь но малпаськоно, ог-огмес ултӥяны, серекъяны сётоно ӧвӧл. Николай Борисович Сорокин, "Глазовский" ликеро-водочный заводлэн директорез (быръёнъёсъя 51-тӥ округ): - Кивалтӥсьёсты быръён, мон чакламъя, радызъя мынэ. Кинэ дэмлам - ваньмыз сямен ортчизы. Огъя вераса, промышленникъёслэн но предпринимательёслэн огазеяськонзы программазэ быдэстӥз. Юрий Питкевич но Владимир Бельтюков кыльыны кулэ вал ас интыязы. Озьы ик луиз. Соос ужзэс ӟеч тодо, уката но коньдон ужпумъёсъя. Кельше мыным Сергей Чикуров но, Правительствоын егит кужымъёс кулэ. Со 51 куара гинэ люказ, озьыен, депутатъёс уггес оско на. Мукет кандидатъёсъя дунъет сётыны шуг, адӟом улыса-вылыса, кызьы асьсэды ужын возьматозы. Людмила Медведева. ШӦКЫЧ Пумиськон сценка Дарьёк. Пырыны яра-а? Марьёк. Пыр-пыр, матэгес кариськы. Дарьёк. Елевизормы возьматэмысь дугдӥз ай, дорады пукыны лыктӥ. Марьёк. Милям бен, возьматыны возьматэ ик, но кенмы куажгато шуыса кышкатэ. Дарьёк. Осто, шу! Марьёк. Коть шу, коть эн, пиеным нерад луимы ни ай. Как со елевизорез учке - кенмылы маза уг сёты: буль-буль лэсьты, шуэ. Дарьёк. Мар, бон, со сыӵе? Марьёк. Ма тӥни ук, шыд пӧзьтонзэс возьмато. Адӟид, дыр. Марьёк. Со гинэ маро ай! Оломар со кофе шуонзэс уен-нуналэн юэ ук. Пелям юисько шуэ кадь, воксё паймод но бырод, ява. Даръёк. - Валамтэед тон сое: кофезэс озьы Пеле шуо. Марьёк. Пеле-а, ныре-а, кенмы жаль потэ. Огпол, ява, дауре уин пие кенмес сайкатэм но, плитае эстӥськытэм. Ачиз картошка паласа пуке. Марось озьы дауртӥськод ай шуыса вазем вал но кылэм-адӟем но ӧз кары. Кенмы гинэ лушкем валэктыны выриз ик, кыӵе ке чипсы шуонзэс, пе, лэсьтыны косэ. Дарьёк. Ма, огшоры гинэ векчи-векчи вандыса куасьтэм картошки ук со! Марьёк. Озьы-озьы, картошки лэсьтэм быдэс уй! Кенмы жаль потыса мар карыны ик уг тодӥськы. Ма, азьвыл, пие, юылэгес вал бере, сиён-юон утчаськыса ӧз улы. Стаканзэ кымалтэ но сур-сур изе. Таре, ява, юэмысь но чылкак дугдӥз ни. Весь сиське, сиське, парсь кадь куайиз ни. Одӥг штанэз но вылаз уг тупа. Кенмы, ява, уд но оскы, коть, пе, выльысь юыны мед кутскысал, шуэ. Акыляк потэм ини пӧраськыса. Дарьёк. Эн но вера, валасько, валасько. Со елевизорын верамезъя, ваньзэ пӧраны кутскид ке, пумаз-йылаз ноку но уд ву. Ай мон ачим но туж сюлэм шуген учкисько со реклама шуонзэс. Ойдо ай, со елевизордэ лэзь но учком инь, мар возьмато. Марьёк. Ма, мар-о луоз, нош ик со йырсиоссэс сэзъялозы инь. Тэй потыса нерад луэмын-а, мар-а воксё, весь олмаин но миськоно шуо ук. Мон, бон, тани огшоры шырбыж яке пушнер вуэн, чырс сюкасен миськисько но яра, ойдо. Пинал дыръям кадь ик зӧк та йырси пунэтэ. Дарьёк. Со рекламаоссэс учкыса аслым но пинал визь пыре кадь ини. Весь со сыскисьёсёссэс возьматэмысь сыскиськем потыса улӥ--улӥ но, толон Петька пиме нюлэскы ветлытӥ. Сир ӵыжатыны, пӧй. Туж, пе, пайдаё маке шуо ук. Пиньёс но, пе, юнмало, кӧт пушез но сузя, мылкыдэз но, пе, ява, лӧпкытэ. Марьёк. Осто-о, Марья кума, оломар но шедьтӥськод вераны! Дарьёк. Ма, ме ай, тани, сыскыса утча. Пие та сирез мыжык быдӟа ӵыжатэм ук... П. АНДРЕЕВ. Вуылозы гуртъёсы Сарапулысь драмтеатр но дасяське быдӟым ӟуч кылбурчилэн А. С. Пушкинлэн вордскемез дырысен 200 ар тырмонлы. Солэн сценаез вылын ортчиз городысь фестиваль. Отчы пыриськизы "Заря" культура юртысь, Мазунино культура юртысь но школаосысь калык коллективъёс. Сарапулысь артистъёс асьсэлэсь быгатэмзэс возьматӥзы нылпи садъёсын. Та ужан вакыт ӵоже театр возьматӥз данак спектакльёс. Мӧйыос понна - "Пигмалион", "Без вины виноватые", "Аз и Ферт", "Петербургский немец". Пиналъёс понна - "Приключения Кота Макмурра", "Гонза и волшебные яблоки". Кемалась ик ӧвӧл покчиос понна пуктэмын "Финист - ясный сокол" выжыкыл. Сое дасяз Россиысь культура удысысь дано ужась Олег Никитин. Премьера возьматэмын луоз, выль ужан вакыт кутскыку. 16-тӥ мае театр ожысь ветеранъёс но сӧсырмемъёс понна возьматӥз "Аз и Ферт" спектакльзэ. Соос шер луыло таӵе ужрадъёсын. Спектакль нош туж яраз - арлыдоос артистъёслы уно сяськаос кузьмазы. 15-тӥ майысен театр потаны кутскиз шаерысьтымы ёросъёсы. Гурт учкись адӟыны быгатоз "Петербургский немец", "Аз и Ферт", "Финист - ясный сокол" спектакльёсты. Огвакытэ ик дасясько выль постановкаос. Гастрольёс кыстӥськозы август толэзёзь. Выль ужан вакыт котьку сямен кутскоз 29-тӥ октябре. В. ЛАГУНОВ. Куара сётонэ ӧз пыриське ООН-лэн Кышкытлыклэсь утиськонъя Кенешез Косоволы юрттонъя "гуманитарной" резолюция кутӥз. Отчы пырисьёс Косовоын кылдэм секыт югдурен валче сюлэмшугъяськемзэс веразы. Документын пусъемын: улон интыосысьтызы пегӟемъёслэсь курадӟонъёссэс капчиятон вылысь, юрттӥсьёслы ужез ог-огенызы вераськыса радъяно. Соин сэрен Кенеш Югославиысь властьёслы вазиське "ООН-лэн адямиосыз" кунлэн улосвылаз котькудӥз юрттэтлы кулэяськись доры вуттӥськыны мед быгатозы шуыса. ООН- лэн Кышкытлыклэсь утиськонъя Кенешез ООН-э пырись кунъёслэн, ООН-лэн улон интыосысьтызы пегӟемъёслэн ужъёссыя Вылӥ комиссарлэн управлениезлэн Косовоысь калыклы юрттэмезлы бадӟым дунъет сётӥз. Озьы ке но, резолюциын эшшо огпол верамын "Улон интыосысьтызы пегӟемъёслэсь но интызэс воштэмъёслэсь асьсэ юртъёсазы берытскыны правозы вань шуыса". "Гуманитраной югдур уаата уродоз, шуэмын документын, вераськонъёс шуыса, вожвылъяськонэз дугдытон ӧз луы ке". Документ понна куара сётон азьын Россиысь но Китайысь ООН-ын ужасьёс пусйизы, кутоно ужпумын НАТО-лэсь Югославилы пумит нуиськись ожгар шуккетъёссэ дугдытыны косон ӧвӧл шуыса. "НАТО-лэсь правоез тӥясь ужрадъёссэ дугдытытэк, уз луы политикаын но калыклы юрттэт сётонын шуг-секытысь потыны", - шуиз Россия Федерацилэн ООН-ын ялан ужась ёзэзлэн кивалтӥсезлэн воштӥсез Андрей Грановский. Соин сэрен Россиысь но Китайысь делегациос куара сётонэ ӧз пыриське. Иворъёсъя национальной служба. Таламын наркотикъёс Правоез утись органъёс берло аръёсы бадӟым саклык висъяло наркобизнесэн нюръяськонлы. Та ужпумез ялан син азязы возё РФ-ысь ФСБ-лэн Удмурт Республикая Управлениысьтыз ужасьёс. Кылсярысь, алигес соос пытсазы Таджикистанысь вуись наркотикъёслы "сюресэз". Отысь усыкмытӥсь "турынэз" ваё вал Казахстан но Поволжье пыр, автомашинаослэн лушкем интыосазы ватыса. Ижевскын одӥгысьтыз машинаысь шедьтэмын вал 1,3 килограмм героин. Нош 17 мае ортчытэм операция дыръя чекистъёс солэсь но бадӟым "ватос" шараязы. Соос талазы 6,3 килограмм героинэз. Нош ик машинаосысь. Нялтас вераса, та суретлэн одӥг граммез сюрс манет пала сылэ. Наркотикен кырмем кык адямилы пумит уголовной уж ӝутэмын. Кыкназы ик соос - Таджикистанлэн гражданъёсыз. РФ-ысь ФСБ-лэн Удмурт Республикая Управлениезлэн пресс службаез. Кам дурысь пызь изӥсьёс дорын Сарапулысь нянь продуктъёсъя комбинатэз (СКХП-ез) данак улосвылъёсын тодо. Солэн пызез но мукет продукциез кошке Архангельске, Костромае, Саратове, Самарае, Оренбурге, Казахстанэ, Татарстанэ, Башкортостанэ но музон интыосы. Комбинатлы алигес 5 ар тырмиз. Удмуртиын таӵе предприятиос пӧлысь со одӥгез бадӟымез луэ, нош Россиын - куинетӥ инты басьтэ. Комбинат вылӥ ӟечлыкен продукция поттэ. Россия Федерациысь ӟечлыкен герӟаськем ужпумъёсъя академия чабей пызьзэ 1997- тӥ арын Почёт дипломен пусйиз, нош миым Удмуртиысь стандартизацияя но метрологияя центр но вылӥ верам академилэн шаерысьтымы ёзэз манной кеньырезлы озьы ик Почёт диплом сётӥз. Пызь но кеньыр тупало туала ГОСТ-лэн куронъёсызлы. Татын вань ужъёсты машинаос бергато. Ваньмыз со асьме дорын поттэмын-бичамын, одӥгез но кунгож сьӧрысь басьтымтэ. Элеваторе 48 сюрс тонна ю тысь тэре, вукоын сутка ӵоже 500 тонна пызь изо, нош толэзяз - 10 сюрс. Солы висъямын нимысьтыз тепловоз, вань 7 иськем чугун сюресэз, теплицаез но мукетыз. Предприятие арысь аре юнма, паськыта. Йыло ужасьёсыз. али пуктэ спирт завод. Туннэ газет бамамы комбинатлэсь будэмзэ но ужъёссэ возьматӥськом. РОЗА ЯШИНА Вазиськон Эх, удмурт калыке... Валаськод но кадь тон зэмлыкез, Нош астэ сётӥськод лёганы Палэнысь ашкынэм муртъёслы. Дунтэмен вузаськод куарадэ, Оскиськод туж чаляк пӧянлы, Сӧриськод аслэсьтыд улондэ, Сётскиськод пичильтык вӧямлы. Ку йырмес вылэгес ӝутомы?! Ку удмурт эшмылы юрттомы?! Нош ик ведь вуозы быръёнъёс - Нош ик, нош урмозы куд-огез. Ойдолэ ӝутскоме вылэгес - Быръёме асьмелы удмурт Йыр! Пӧяськон кылъёслы оскытэк Кутскомы ужаны ни быдтыр! Тодӥськом, кин понна ужалом - Ми Вершининлы юн оскиськом! Азьмынӥсьёс дорын Вуко ас ужзэ тодэ - Мон Сарапул пызен гинэ нянь котӥсько, туж умой ӝутске, - ушъяське пӧрамъёсыныз редакцие пырем кышномурт. - Коть табань, коть юача пыж, самой ӟеч куноосты но утялтыны возьыт ӧвӧл. Лэсьтэм ужедлы сокем вылӥ дунъет сёто бере, озьыен, эшшо но умойгес ужано, дандэ утён сярысь сюлмаськоно. Сарапул городысь хлебопродуктъёсъя комбинатлы тае кемалась валазы ни, берло кык-куинь арзэ - уката но. Республикаысьтымы огез азьмынӥсь предприятие сярысь "Удмурт дунне" газет гожъяз ӵапак кык ар талэсь азьло, май толэзьлэн шораз. Туннэ нош ик берытскиськом та коллектив борды, соин ӵош возьматӥськом выль директорлэсь ортчем дыр куспын быдэстыны вуэм ужъёссэ, комбинатлэсь азинскемзэ. Вакчияк пусъём: трос лэсьтэмын но лэсьтӥське производствоез но культураез ӝутонын, ужась адямиез шуг-секытэ шедёнлэсь утёнын. *** Комбинатэ пырыку ик син шоры йӧтэ рекламая но маркетингъя отдел. Со пыр мынэ вузкарон, выль кусып тупатон, дась продукциез пӧртэм интыосы келян. Рынок амал татчы ӝог пыӵаз. Со кык ар куспын паськытаз, бурдъяськиз, аслэсьтыз ӧрзэ шедьтӥз. Виктор Юрьевич Дробыш директорлэн маркетингъя воштӥсез луыса ужаз, али - компьютеръёсъя валтӥсь инженер. Со ик тодматэ предприятилэн туннэ нуналэныз. Воштӥськонъёс бадӟымесь, шумпотымонэсь. Быдэсак выльдэмын ужан интыос, басьтэмын компьютерной техника, вуколэн пушкыз но чильк-вальк кисьтаське. Котькытын - чылк- чылк. Ми, журналистъёс, котькытчы вуылӥськом, котьмае адӟиськом ке но, комбинат паймытӥз вакчи дыр куспын собыдӟа воштӥськонъёсыныз, тужгес но культура ласянь. Асьсэос верамъя, производство удыссэс утялтонын адӟем каро немецъёслэсь. Ужан дӥсь но - чагыр-лыз комбинезонъёс - вуризы соослэн кадь. Пайдаё ӵошатскон! Россиысь пызь-кенььыр изӥсьёс пӧлын Сарапулысь хлебопродуктъёсъя комбинат мынэ куинетӥ интыын, Удмуртиын - нырысь радын. Продукцизы пусъемын федеральной дипломъёсын но грамотаосын. Кызьы комбинат сокем ӝог шуг-секытысь потыны быгатӥз но пыд вылаз йӧн-йӧн султӥз? Та юанлы валэктон шедьтон понна вазиськи пӧртэм адямиослы. Валэктонзы одӥг: югдур умой пала воштӥськиз Михаил Семенович Малюк кивалтыны кутскем бере но рекламаез, маркетингез туала куронъёсъя радъяса. Отын ик предприятилэн вань "секретэз". *** Тани цо - пызен тырмытэм гурезь! Юг-юг тӧдьы мешокъёс радэн-радэн вӧлдэтозь люкамын. Но "гурезьлы" кема кылльыны маза ӧвӧл, 600-800 тонна пала люкаськем пызь син азямы кулэсме. Огез бӧрсьы мукетыз вуэм машинаос черодын сыло. Продукцизэс басьтӥсь вань гинэ: кин маншинаен, кин чугун сюрес кузя нуэ. Сарапуллы та ласянь удалтӥз - Кам шур вылтӥ но груззэс келяло. Туала купецъёслы вашкала ӵыжы- выжыоссылэсь ужан амалъёссэс кутоно луэ ни. Пызь возён складэн кивалтэ Сергей Борисович Башмаков, кыллы но, ужлы но чупрес воргорон. Коллективзэ, ас семьязэ кадь, умоен гинэ пусъе. Вукозы уен-нуналэн изэ бере, склад но кык сменаен ужзэ радъя. Мешокъёсты татын киын уг ӝуткало, ваньзэ техника лэсьтэ. Но грузчикъёс вань, соос мешокъёсты машинаосы интыяло. - Ми быдэсак герӟаськемын ю-нянь будэтӥсьёсын, гурт удысэн, соин ик, отын сямен, ужмы я чалме, я выльысь ӧръяське. Россилэн тросаз регионъёсаз кылем арын урожай ӧз удалты, соин ик милемлы но ноябрьысен секытгес йӧтӥз: ю тысь кулэсмемен валче, выжим одӥг сменае, усиз уждунмы но. Кивалтӥсьёсмы рынокамалэз дунъяло, ялан утчасько. Соин ик оскиськом, кылдэм шуг-секытъёс огдырлы гинэ шуыса. Тани та нуналъёсы гинэ Европаысь вуиз гуманитарной юрттэт - чабей. Со трос. Озьыен, нош ик ужалом суткаосын, вис карытэк. Туннэ гинэ 60 вагон вуиз - быдэс толэзь ужамон. Кыӵе луоз пызьлэн ӟечлыкез, вераны вазь на. Сергей Борисовичлы складэз чылкыт, радызъя возьыны юртто мастеръёс Галина Васильевна Фадеева но Римма Александровна Елтышева. Соос сюлмаськемен, татысь уд адӟы одӥг пыры но кисьтӥськем пызь-кеньырез, пась мешокез. Ваньмыз ӝикыт, уждэ яратыса лэсьтэмын. Ю тысь сярысь ке верано, тросэн сое басьтӥзы Сибирьысь, Казахстанысь. - Али асьмелэн нимысьтыз пызь ворттон машинамы вань ини, - данъяськыса шуиз С. Б. Башмаков. - Табере котькытчы нуыны луэ, мешокъёсы тырытэк. Вералом на: мешок азьвыл басьто ке вал Турциысь, али ваё бускель Татарстанысь. Дунтэмгес усе. *** Сарапулын изэм пызез шаерамы тодӥсьтэмез ӧвӧл ни, нош вуколэсь кузёзэ, Фарит Фахретдиновез, та городын улӥсьёс пӧлысь но тросэз ик уг тодо, дыр. Тусбуйзэ газетэ поттэмлэсь кепыра: "Мон чебер ӧвӧл, ужасьёсмес пуктэ". Ӟеч специалистэз шедьтӥзы Ташкентысь. Ӧтизы Сарапулэ. Удмуртия Фарит Хозлахметовичлы кельшиз, тямыс ар татын улэ ни. Узбекистанысь кошкемез сярысь уг жаля. - Адямиос умоесь, ужмы мынэ, - шуэ со. - Сарапул огез чеберез но шулдырез город мед луоз, интыос та палан ӵыдонтэм узыресь шурен но, ошмесъёсын но, нюлэсэн но. Мон вукоын ужаны кутски 1984 арысен, профессиме мукетэныз ноку но уг вошты. Маин сокем бордаз кыске? Туннэ но паймисько, шумпотыса учкисько, кызьы тысь пызьлы пӧрме. Нош отчыозь ма кузьда сюресэз ортче! Ф. Х. Фахретдиновлэсь ужам ужзэ мертано ке, трос сюрс тоннаем пызь гурезь инбамозь ӝутскысал ни. Сутка ӵоже изэмзы гинэ 350 тонна пала люкаське. Нош толэзьёс, аръёс ӵоже кӧня изӥз ни меда та чупрес сямо, ужаны вордскем кибашлы воргорон?! 7 этажъем вукоетӥ со лобаса сямен ветлэ: бызьыса мыныса озьы гинэ уд сут. Татын солэн "дуннеез". Комбинатэз пуктыку, нуналъёсын ӧз бертылы, ваньзэ ас киосыныз интыямез- радъямез потӥз. Нош пызь изонэз адӟылымтэос понна вералом: ӝӧк вылэ ческыт пыжиськемы пӧрмон понна, чабей вукоын ортче на сизьым полэс сюресэз. Нырысь ик кӧльыоссэ, жуг-жагзэ пужно, собере ваннаосын чылк-чылк мисько, гылъяло, мукет цехын куасьто, кӧмзэ палало. Отысен шеде кӧос улэ - пӧрме таза кеньырлы, кӧня ке ортчыса - манкалы, собере гинэ - мамык кадь небыт юг-юг тӧдьы пызьлы. Пужъёс улын лэйкась пызь мешокъёсы ӝоктӥське, автомат соосты вурыса лэзе но радэн-радэн интыя. Автомат ик 2 килограммъем бумага пакетъёсы фасовать каре. Машиназы выль, дугдылытэк кык сменаен ужа, суткаяз 30 тоннаозь продукция дася но магазинъёсы келя. - Гурт калык мешокен басьтыны тырше, нош городын улӥсьёс, уката но пенсионеръёс, пичиен-пичиен басьяло, сыӵеос понна 2 килограммъем пакетъёсын поттӥськом, - шуэ В. Ю. Дробыш, фасовать каронъя цехен тодматыса. - Тани бадӟым опытэн мастермы - Ольга Михайловна Субботина. Солы котькыӵе ужез оскы - котьмалы ӝог дышоз, одно ик пумаз- йылаз вуттоз. Мыло-кыдо пыриське комбинатлэн общественной улоназ, одӥг минут но тэк пукыны уг чида. Ӵош ужась эшъёссэ но ӟечен гинэ пусйыны кулэ. Син шоры котькытын йӧтэ ӝикытлык, чылкытлык. Вань цехъёсты, 7 этажез ортчыса, нокытысь но уд адӟы суп-сап ужам бервылэз, пол вылэ пужнӥськыны, пазьгиськыны шедьтэм пызез, кеньырез. Уд адӟы адямиосты но - ваньзэ бергатэ автомат. Вуколэсь "шокамзэ" сак эскере пульт сьӧрын пукись апаратчик. Ветлон нуналамы та ужез быдэсъя вал Пультэн кивалтонъя тодон-валан басьто Москва дорысь Раменское городысь учебной комбинатын. Ог 50 мурт отын дышетскемын. Берло дыре асьсэ дорын но тодон-валан басьтон радъямын. *** Сарапулысь хлебопродуктъёсъя комбинат пусйиз 5 ар тырмонзэ, нош ӝутскыны выриз дас арлэсь ятыр. Дырыз но уга тупаз странаез куашкатон вакытэн. Кивалтӥсьёсыз сярысь ке верано, М. С. Малюк - ньылетӥез директор. Таиз ӵапак интыяз тупаз кадь. Комбинатэз эшшо одӥг ласянь пусъем потэ на: татын азьвыл аръёсы сямен ик сюлмасько ужась калык сярысь. Нуо-ваё асьсэ автобусэн (ваньмыз сямен нуназеяны но гуртазы бертыло). Уждунзэс котьку дыраз тыро. Вань асьсэлэн теплицазы, отын сяська но вож сиёнъёс будэто. Шумпото котельноязы чагыр эстӥськон вуэмлы. Шуг-секытъёсты пыд улазы лёгаса, каллен-каллен ӝутско выль юртъёс. Туэ быдэстыны чаклало тазалыкез юнматонъя центрзэс. Со татын ик, комбинатлэн азбараз. Таиныз ӵош пӧрмытыны сюлмасько спирт поттонъя заводзэс. Дугдылытэк выльдо продукцизэс. Хозяйствоос вожмаськыса басьто гранулаосын дасям отрубез. Сое кылем арын гинэ поттыны кутскизы, рынокын ас интызэ ӝог шедьтӥз: машинае, вагонэ тырыку уг пурӟы, уг пазьгиськы, "тӧдьы нызьылиослы" инты но ӧжытгес кулэ. Вуэ котэм гранулаос ӝог небӟо, пудо сюдыны ӟеч ватсэт луо. Басьтыны мылкыд карисьёс вуо ни Ленинградысь но бускельёсмес вератэк. Продукция мынэ бере, уж берга, вуко кӧос ӵошатскыса выллем жургето. Удмуртиын таӵе бадӟым комбинат одӥг, кужымез тырме быдэс республикамес сюдыны. Со выллем ик пуктэмын Челябинскын. Кык коллективъёс ог-огзы доры дышетскыны ветло, ог- огзылэсь амалъёссэс производствое пыӵато. Сарапулысь хлебокомбинатэз городын улӥсьёс ӟеч тодо "Нива" магазинъя но. Со ньылетӥ арзэ ужа, вузкаре комбинатлэн продукциеныз но бартер амалэн ваем сиён- юонъёсын. Калык мыло-кыдо басьяське. - Тужгес но умой мынэ выль продукция - пачкатэм чабей (хлопья) но удатыса изэм чабей. Врачъёс верамъя, та сиёнъёс адямилэн мугорызлы туж кулэ, соос юртто тазалыкез утьыны но юнматыны, утё пересьмонлэсь, - шуэ магазинлэн кивалтӥсез Людмила Викторовна Зыкина. - Озьы ик туж умой кошке нимысьтыз рецептъя пыжем нянь. Нуназе бере магазин ӝажыысь сое уд адӟы ни. "Нива" ужа басьяськись понна. Огшоры верам кылъёс со ӧвӧл, зэмен но, вузкарисьёс дась быдэстыны котькуд куронэз. Висисьёс, арлыдоос телефон пыр гинэ вазисько. Магазин сыӵеос доры ачиз кулэ сиён-юон вуттэ. Комбинатын ужасьёслы луонлык сётэмын уждунзы чотын басьяськыны. - Ми арлы быдэ потаськом Ижевскын ортчылӥсь ярмаркаосы, вузмес юасьёс трос гинэ, - шумпотонзэ уг ваты Л. В. Зыкина. Мукет городъёсын магазинзы ӧвӧл на, но продукцизэс басьтыны мылкыд карисез вань. Озьыен, "Нива" паськыталоз, комбинатлы эшшо ватсаса коньдон ваёз на. *** Йылпумъян лэсьтыса, огзэ вералом: куинь ар талэсь азьло Сарапулысь хлебопродуктъёсъя комбинат кельше ке вал куашетӥсь зарезьын тулкымъёслы пумит уясь пыжлы, туннэ пӧрмиз зэмос бадӟым пароходлы. Пичиесь тулкымъёс солы кышкыт ӧвӧл ни. Бусыосын ю-нянь гинэ мед удалтоз, гуманитарной юрттэт вылын уго кыдёке уд вуы. Нош басьяськись трос пумо продукция пӧлысь мед быръёз вылӥ ӟечлыкозэ - Сарапулын изэмзэ. Людмила Медведева. Туспуктэмъёсыз Владимир Камашевлэн. Маркетолог Ирина Евгеньевна Миронова но компьютеръёсъя валтӥсь инженер Виктор Юрьевич Дробыш. Аппаратчик Андрей Шелемов. Фасовкая цехысь мастер Ольга Михайловна Субботина. Сергей Борисович Башмаков, пызь-кеньыр складлэн кивалтӥсез. Автоматика вӧзы грузчикъёс но кулэ на. Лаборантъёс Элиза Шайхуловна Габдрахманова но Елена Владимировна Мерзлякова. "Нива" магазинэн кивалтэ Людмила Викторовна Зыкина. Рамиль Шайхетдинов - сменалэн мастерез. Выль букварь Можга педучилищеын ортчиз удмурт букварьлы сӥзем ужрад. Гожтэм та книгаез удмурт калыкмылэн визьмо нылыз Римма Ивановна Данилова, нош чеберъям суредась Ирина Анатольевна Леонтьева. Презентация дыръя та ужлы вылӥ дунъет сётэмын вал: букварь кылдытэмын угось, туала наукалэсь но методикалэсь куронъёссэс лыдэ басьтыса. Таӵе секыт вакытэ удмурт пиналъёс доры вуоз выль букварь. Удмурт калыклэн тодон-валан басьтон удысаз азьлане туж бадӟым вамыш со. Книгаез оген поттыны уг луы. Соин ик вуоно дышетскисьёслэн, анай-атайёслэн но дышетӥсьёслэн нимынызы газет пыр тау карон кылъёс вераме потэ та букварез поттон бордын вань ужасьёслы, сюлэм шунытсэс но быгатонлыксэс жалямтэослы. Дышетскись нылпилы букварь кылдытон - туж секыт уж. Лулысь-сюлмысь кутскем Римма Ивановна та ужез борды. Тыршем, сюлэмыз косэмъя, трос но пайдаё. Шумпотыса учконо букварьлэсь бамъёссэ. Та книгая дышетскыса, удмурт нылпи уката но гажаны кутскоз вордскем кылзэ. Букваре пыртэмын ӝог веранъёс, удмурт писательёслэн кылбуръёссы, ребусъёс, серемес суредъёс но пӧртэм малпаськытӥсь ужъёс. Пиналъёслы со шудон, нош шудон пыр дышетӥсь быдэстоз туж кулэ ужъёсты: нылпиосты дышетоз кылысь котькуд куараез шедьтыны но сое чылкыт вераны, кылъёсты слоглы люкылыны, букваослэсь но слогъёслэсь, интыенызы вошъяса, выль кылъёс пӧрмытъяны. Озьы дышетскисьлэн йыраз таӵе малпан кылдоз: лыдӟиськыку но гожъяськыку сак луоно. Кыл - зарни кадь ик дуно узырлык. Соин ик, вылды, Римма Ивановна, кылтӥрлыкез волятон понна, пӧртэм ужъёс ӵектэ. Кыллэсь узырлыксэ вераськонын валаса но кулэезъя кутыны тыршон мылкыд пыӵатэ. Книгае пыртэм кылбуръёс нылпиослы умой мылкыд, ӟеч малпан сёто. Будӥсь нылпимы визьмо мед луоз, вӧзысьтыз анайзэ-атайзэ, агайзэ-апайзэ, сузэрзэ-вынзэ, эшъёссэ мед адӟоз. Соосын вераськыса, эшъяськыса улыны мед быгатоз. Шуд но тазалык тӥледлы, Римма Ивановна но Ирина Анатольевна! Екатерина ИЛЬИНА, Можга ёросысь Бадӟым Кибья школаысь дышетӥсь. Удмуртъёс вужерын ӧвӧл! 12-тӥ май. Вазь ӵукна. Жаль-жаль зоре. Ма кароно? Кулэ на меда? Ма карыны быгатомы на асьмеос?.. Тӥни таӵе малпанъёсын сюрес вылэ вазь ӵукна ик потӥзы Кизнер ёросысь Безменшур, Вуж Бодья, Кармыж школаосысь дышетӥсьёс. Иже мынӥськом удмуртлыкмес утьыны. Ширтӥськом Нынек палтӥ. Малпаськом, нынекъёс сюрес вылын, дыр, ини шуыса. Иже вуыса гинэ валамы, можгаос но грахъёс, алнашъёс но пургаос ческыт умзэс ӝыныё карыны дӥсьтӥллямтэ. Нош мон малы ке малпасько вал: та ёросъёсын зэмос удмуртъёс уло! Калыкез янгыш кареме уг поты: ӝутӥсез ӧй вал, дыр. Вуим Кун Кенеш доры. Сылэ ог сю адями... Люкаськемъёс каллен тросгес луо. Витиськом на вал мукет районъёсысь но Ижысь удмуртъёсты. - Юнме. Вотка (Воткинск) районэн артэ сылӥмы. Шумпотӥ татчы лыктэм куд-ог мукет районъёслы. Нош куазь, милесьтым мылкыдмес валаса выллем, лекъяське, зоре, пелляське. Кынмим но, котмим но. Чай юыны мынӥм кафее. Одӥг ӝӧк сьӧрын воргоронъёс вить кузя пуко но маке сярысь зол-зол верасько. Сюлмы шӧдӥз соослэсь шугъяськемзэс. Пукси вӧзазы - Можга ёросысь Пазял гуртысь вылӥллям. Соос но ми сямен ик пуко вылэм, куректонзэс буйгатыса. Павел Николаевич но Антонина Михайловна валазы, дыр, кин вал соос вӧзын та секыт вакытэ. Нош тӥледыз гажась зэмос удмурт калык ӧз быгаты, кабинетады лыктыса, сяська кузьманы, уӵы сямен чирдыны. Но соос туннэ вал Кун Кенеш азьын. Сяська кузьмасьёс кабинетъёсысьтызы ӧз потэ, небыт валесысьтызы ӧз султэ. Гурт калык туннэ, зэмзэ но, бӧрдэ. Но уг луы солэн юрттэмез: Иже потыны гинэ но уксёез ӧвӧл ук. Мон "Удмурт кенеш" огазеяськонлэн котькуд ӧтчамаз ветлӥсько, съездъёслэн ужазы пыриськылӥ но пыриськисько, трос визьмо удмурт калыкен тодматскылӥ. Но та быръёнъёс бере тросэз сярысь малпанэ воштӥськиз. Валай: удмурт калыкез туннэ уз куштэлэ Р. И. Яшина, В. К. Тубылов, В. Я. Митрофанов, М. В. Гришкина, Е. П. Никонова, Ю. Н. Лобанов но мукетъёсыз. Нош кытын меда Удмурт нылкышноослэн огазеяськонзы, удмурт Кивалтэтысь, Нациослэн ужъёссыя комитет, Калыкез дышетонъя министерство, удмурт егитъёслэн "Шунды" огазеяськонзы?! Соос калыкез ӝутыны кулэ ӧй вал шат?! Малы туннэ соос удмурт калыкен артэ уг сыло?! Кӧня юан кылдэ котькуд нунал... Вань оскон ыше, быре... Милемлы весь шуиськоды: удмурт кылэз дышетоно, утёно, яратоно... Ми быгатэммыя ужаськом, удмурт кылмылэсь данлыксэ ӝутыны турттӥськом. Нош тӥ яратӥськоды-а, гажаськоды-а удмурт кылэз?! Удмурт калык тросэзлы кулэ власть дуре сузьтӥськыны, небыт пукон басьтыны... Собере выжыосмы шоры учкыны но возьдаськиськом... Озьы ӧвӧл-а?! Таӵе югдурез, удмуртъёслэсь куспазы портфель понна кыстаськемзэс адӟеме бере, уг поты ни национальной школа но луэме, этнопедагогикаез но дышетэме, уг поты ни вераськеме куд-ог тодосчиосын но. Книгаос потто, ним басьто... Малы шуоды? Портфель понна. Кӧня ӟечсэ, умойзэ лэсьто удмурт калык понна Л. Христолюбова, В. Владыкин, М. Гришкина, М. Атаманов! Соос ноку нокинэ вӧсь ӧз на каре - асьсэзыз гинэ ӵем дыръя вӧсь каро. Кыле сыӵеесь ик - ми тӥледыз яратӥськом, тӥляд книгаосты вылын нылпиосты дышетӥськом, тӥледын данъяськиськом. Монэ но Кизнерын курдатъясьёс вань: сотэк уг луы. Малпасько: гуртлэсь кыдёке уз лэзе ни, дыр. Сюлэмы бӧрдэ: малы удмуртъёс уг сайкало?! Дыр ортчоз, ваньмыз интыяз пуксёз. Но медам вунэтэлэ вылэм юаны, малы меда ӧй вал та нуналэ Завьял ёрос (Мария Ишматова - удмурт дэремзэ дӥсяса), Глаз ёрос (Надежда Золотарёва - аслаз тар-тар куараеныз), Можга ёрос (Анатолий Комаров)?! Та шулдыръяськон ӧвӧл уга, трибуна сьӧрын уӵы выллем чирдон но ӧвӧл. Политической нюръяськонэ ваньмыз пыриськыны уг дӥсьто: "быжзы" музын ке, лёгыны шедьтозы. Татчы люкаськылӥзы ӟучъёс но, бигеръёс но. Соослэн но сюлэмзы бӧрдэ, шӧдске. Ӟуч калыклы воже уг поты: соос уг тодо ук асьмемыз, уг валало йырвисёнмес. Удмурт калыклы воже потэ: тодыса вылысь, валаса вылысь вузасько, ас калыксылы пумит ужало. "Кык ымныро" луэменыз ик удмурт калык лябӟе, аслыз инты уг шедьты, мур гуэ усе. Нош отысь потыны "вылӥын" пукисьёс но, мукет калыкъёс но уз юрттэлэ. Адями тустэс ыштыны уг яра! Удмурт калык вужерын улыны уг быгаты! Серафима ПЕТРОВА, "Удмурт кенеш" огазеяськонлэн Кизнер ёросысь ёзэзлэн тӧроез, Кармыж школалэн директорез. Журналистъёсын пумиськонъёс "Шкода", тон Иже вуод-а? Кун Кенешлэн Тӧроез А. А. Волков быръёнъёс ортчем бере нырысьсэ пумиськылӥз журналистъёсын. Со вакчияк тодматӥз кылем арня куспын Москваын ужаменыз но Чехие ветлэменыз. - Ортчем арня пайдаё вал котьма ласянь, - шуиз со. - Арня нуналэ Н. А. Ганзаен ӵош пумиськылӥм Россилэн премьер-министрезлэсь ужзэ быдэсъясен Сергей Вадимович Степашинэн. Кенешим автозаводын выль машина поттыны кутскон пумысен кутэм огкылъя. Озьы ик вераськон мынӥз коньдон ужпумъёсъя: бюджет удысын ужасьёслы ссуда висъян, пенсиосты но отпуске потӥсьёслы уждун дыраз тырон ласянь. С. В. Степашин Россия улосвылъёсысь кивалтӥсьёсын кенешон ортчытӥз, вакчияк тодматӥз матысь дырлы ужан программаеныз. Отын бадӟым инты басьтозы кивалтонлэсь радлыксэ юнматон, предприятиосты ужатон, кивалтӥсьёсты кыл кутытон. Озьы гинэ страналэн бюджетэз тырмоз, пусйиз со. Обороная промышленность но палэнэ уз кыльы. Дуннеын кылдэм военно-политической югдурез лыдэ басьтыса, С. В. Степашин дэмлаз Обороная кун комитет кылдытыны. Кенеше люкаськемъёс тае умоен лыдъязы. Соос озьы ик соглаш луэмзэс веразы кивалтон удысэз юнматонлы но чурыт куронъёсъя радъянлы. Вераськисьёс пӧлын кыл сётэмын вал А. А. Волковлы но. Понедельнике ортчиз Федерацияя Кенешлэн азьвыл чакламтэ заседаниез. Отын умоен пусъемын С. В. Степашинэз Правительстволы кивалтӥсе юнматонъя Президентлэн Указэз. Ваньмыз лэсьтэмын, Конституцилэсь куронъёссэ лыдэ басьтыса, соин ик вераськисьёс пӧлын мултэс пӧсянъёс ӧй вал. Вторнике но средае Кун Кенешлэн Тӧроез ужаз Чехиын. Кызьы тодмо, кылем арлэн пумаз, декабрь толэзе, Удмуртия но Чехия куспын ӵош машина поттон сярысь огкыл гожтэмын вал. Та документлэн кужымез, автозавод ӧз ке ужа, 31 мае быроз. Федеральной Правительство Ижевскысь автомашина поттӥсьёслы но "Фольксваген-Шкода- Авто-Ижмаш" проектлы юрттыны дась. Та решениен ик А. А. Волков но "Ижмашлэн" генеральной директорез В. П. Гродецкий кык нуналлы ветлӥзы Чехие. Машина поттон удысэн ӵош тодматскизы "Ява" мотоциклъёсты лэсьтӥсь заводэн. Вераськон мынӥз кык пумозэ но производствоез Ижевскын азинтон ласянь. Кызьы пусйиз А. А. Волков, "Шкода-Фольксваген" умой ужа, Чехия та завод чотын 20 процентлы бюджетсэ тырмытэ. Ижевскын нырысетӥез машина потыны кутскоз, вить толэзь ортчыса. Сомында дыр кулэ выль оборудование пуктонлы, солы дасянлы. Чакламъя, воштос ёзъёс пӧлысь ӝынызэ поттозы асьме дорысь предприятиос: механической завод, радиозавод но мотозавод. Июне "Шкода-Авто-Удмуртия" кылдэм выль предприятие регистрация пыр ортчоз ни. Кызьы шуиз Кун Кенешлэн Тӧроез, автозаводын али лэсьтоно "Орбита" машина но озьы ик потоз, оло, ӟечгес луоз на. Дунызъя со асьме басьтӥсьлы тупа. "Шкодалэн" продукциез сылоз ог 120 сюрс манет, дунтэматыны луиз ке таможня пыр ваем вузэз. Кӧня коньдонэз кылёз Удмуртие, кӧняез кошкоз кунгож сьӧры? - "Фольксваген" "Шкодалэсь" басьтэ 70 процентсэ, "Шкода" "Ижмашлэсь" самой ӧжытсэ басьтоз 51 процентсэ, - вераз А. А. Волков. - Та лыдпус будыны быгатоз 75- ёзь. Но солэсь кышкано ӧвӧл. Россиысь экономикая министрен ваньмыз сярысь умой-умой кенешемын. Мон оскисько, "Шкода" аслэсьтыз басьтӥсьёссэ Удмуртиын но, Россиын но шедьтоз шуыса, малы ке шуоно, кунгож сьӧрысь арлы быдэ трос сюрс машина асьме рыноке вуэ. "Шкодалэн" машинаосыз висъясько буёл ласянь но. Сизьым полэс ӟеч буёлэн шобыртэм корт 10 ар ӵоже сыномыны уг сётскы. Та амалэз кутыны тыршом Ижын но. Со понна азинтоно Япониысь кредит басьтонъя кенешонмес. Кун Кенешлэн Тӧроезлы журналистъёс вазиськизы пӧртэм юанъёсын. Соос герӟаськемын машина поттонэн но Удмурт Республикаын ортчем воштӥськонъёсын. - Ваньмыз чакламъя мынэ,- шуиз Александр Александрович. - Таяз арня куспын тодмо луозы вань министръёс но выль кивалтӥсьёс. Л. Медведева. Шапыкысен - бадӟым шурозь Чупчи шурлэн меӵ ярдуръёсаз вашкала дырысен трос удмурт каръёс-гуртъёс пуксемын. Одӥгъёсыз туннэ ӧвӧл ни, нош мукетъёсыз уката юнмазы, паськытгес, чебергес луизы. Сыӵе гуртъёс пӧлы пыртыны луысал Яр ёросысь Озёркаез но. Интыяськемын со Чупчи шурлэн бур палаз, паськыт возьёс сьӧры, ӝужыт-ӝужыт гурезь йылэ. Со гуртысен котырысь вань улос кипыдэс вылын кадь ик адӟиське: дасо иськемъёсы пуксем Пудем но, Яр но, Дизьмино посёлок но. Та гуртлэн кылдэмез дырысен 320 ар тырмиз ни. Бадӟым лыдпусэз пусйыны люкаськылӥзы трос сюосын озёркаос. Татысь потэмъёс угось, Россиын гинэ ӧвӧл, солэн палэназ но тыршо. Ужало заводъёсын, гурт эштосъёсын, тазалыкез утёнын, дышетонын но мукет удысъёсын. Озёрка но Оброко гуртъёс "Новый труд" колхозэ пыро. Соин трос аръёс ӵоже ини быгатыса кивалтэ асьсэ гуртозы Б. А. Артемьев. Арлыдоос котьку но сюлмасько асьсэлы кивоштӥсьёс будэтон сярысь. Колхоз контораын но, фермаосын но, лудъёсын, итымъёсын но ваньмыз сямен ужасьёс та палъёсысь луо. 9 классъем школаысьтызы дышетӥсьёссы но асьсэ гуртысь ик. Юнме шат соос юн гажало дорзэс, анай кылзэс? Берло аръёсы тросэз пиналъёс кылбур, верос, выжыкыл гожъяло, суредало. Ёрос газетэ сяна, ужъёссэс "Кизили" журналэ но поттылӥзы ини. Печатлало бере, уката бурдъясько. Кылем арлэн пумаз соос школаязы нимысьтыз кружоке огазеяськизы. Кивалтэ соин кылбур гожъясь Т. Н. Зворыгина. Со ачиз ӟуч кылын гожъя. Нош удмурт кылын ужъёсты син азяз возе В. Е. Наумова. Школалэн кивалтӥсез В. Г. Семакина но, завуч А. А. Дряхлова но дышетӥсьёслэсь пиналъёсын тазьы ужамзэс туж кулэен лыдъяло. Зэм но, улон сярысь пинал ачиз малпаськыны кутске но со малпанзэ чеберъяса бумага вылэ кисьтыны быгатэ ке, аслыз но, покчи муртлы, школалы но, мумы-бубыослы но со туж данъяськымон луэ. Кружоке ветӥсьёс асьсэ коже гинэ уг ужало. Доразы пӧртэм куноосты ӧтчало. Кылем арын "Кизили" журналлы но "Ӟечбур!" газетлы сӥзьыса, нимысьтыз праздникъёс но ортчытӥзы. Та чуръёслэсь авторзэс но кӧня ке пол куное ӧтчаллязы ини. Оскем потэ: Озёрка гуртысь "Лысву шапык" ("Росинка") нимо кружоке ветлӥсьёс трос гинэ выль ужъёсынызы шумпоттылозы на. Пичи шапыкъёс бадӟым шур мед кылдытозы. Озьыен, тодматскелэ озёркаослэн чуръёсынызы. Алексей Ельцов, писатель но журналист. Шаерамы кузёяське сӥзьыл Шаерамы кузёяське сӥзьыл. Шунды яркыт уг ни пишты. Инбам лыз-пурысь. Пельтэ сайкыт тӧл. Та тӧлъя инкуазьын ваньмыз эктэ кадь, сӥзьылэз пумита. Тӧл куаръёсты ӝутэ но каллен гинэ васькытэ. Пужыятэм ковёр пӧрмытыса, сое музъем но шур вылэ вале. Сӥзьыл пазьгиз буёлъёсты нюлэскысь писпуос пӧлы. Нюлэс чебер ныл кадь. Горд ӟускиосын пишто палэзьпуос. Кыдёкын, нюлэс сьӧрын, синэз шумпоттэ вож узьым. Юн шер шедё ини сяськаос. Кезьыт сӥзьыл уйёсы вань шаер шутэтске. "Сӥзьыл нунал - сизьым пӧртэм", - шуэ удмурт калык. Одӥг нуналскын шунды но потоз, зор но музъемез коттоз, лымы но васькоз. Тӥни сыӵе сӥзьыл вамышъя шаертӥмы. Наташа Наумова. Яратоно Озёркае Озёрка гуртэ, Яратско тонэ. Тон одӥг мынам, Вунонтэм сюлмам. Куинь сю кызь ке но, Тон чебер, йӧно, Тыныд йыбыртско, Сяська кузьмасько. *** Мон вордски гуртын, Чупчилы матын. Инкуазез отын Туж кельшиз мыным. Озёрка котыр Италмас будэ. Со сяська ик, дыр, Гуртме шулдыртэ. Нюлэскысь шедьтод Тон узы-боры. Сое оскалтод, Бичалод доры. Лена Семакина. Кызьпу Тӧдьы кызьпу, Егит кызьпу, Чебер котьку но сылӥськод. Тол но гужем, сӥзьыл, тулыс Монэ ялан шумпоттӥськод. Таня Дряхлова. Тол вуиз - Анай, валэкты мыным, Мар луэм ай урамын? Нӧд ву синучкон выллем, Музъемез мамык валем. Анае мыным вера: - Тол куазед вуиз дорам. Вань музъемез югдытӥз, Уй куспын шуба вуриз. Настя Каркина. Россиысь библиотекаослэн нуналзы азьын Шаермес гажаса Аръёс ортчо но ортчо. Алигес гинэ кадь, асьме пединститутысь удмурт кылъя но литературая факультетэз йылпумъяме бере, монэ Культурая министерство ӧтиз вал шаерысьтымы Ленин нимо библиотекае ужаны. Мынӥ шумпотыса. Со 1958-тӥ арын. Юри пуктэм выль библиотекалэн ӧсэз соку гинэ усьтӥськиз вал лыдӟисьёс понна. Шумпотыса, вожъяськыса учкылӥм ми, студентъёс, та юрт шоры. Соку республикамы пусйиз Удмуртилэсь Россиен огазеяськемез дырысен 400 ар тырмон нуналзэ. Нош ми соку госэкзаменъёс сётӥськом на вал. Дышетски мон умой - бадӟыматэм стипендия басьтылӥ. Витьтонэтӥ аръёслэн пумазы быдэс странаямы кутскизы библиотекаосын шаер тодонъя ужез радъяны. Ленин нимо библиотекаямы но одӥг ужась - выль штатной единица сётӥллям, озьы мон старшой библиограф-краевед луи. Ужай справочно-библиографической отделын, шаермы сярысь книгаосты люкаса, каталог-картотека кылдытыса, озьы ик шаермы сярысь библиографической обзоръёс гожъялляй, пӧртэм интыосын соосты лыдӟылӥ. Удмуртиысь комсомоллэн историез сярысь обзорме лыдӟыны призывной пунктэ гинэ вить-куать пол машинаен лыктыса нуылӥзы. Удмуртиын потэм книгаосъя обзоръёсмес республикаысь библиотекаосы но ысъяллямы. Районъёсысь библиотекаосы поталляй шаермыя уж радъямзэс эскерыны, юрттыны. Ма, соку Москваысь но та удысъя пӧртэм методической материалъёс ысъяллязы, ӵем гинэ толэзьем курсъёсы, семинаръёсы ӧтчаллязы-люкаллязы. Шаерез тодонъя ужрад ялан паськытаз. Москваысь вуиз выль схема, соя шаермы сярысь каталогез выльысь радъяно луиз (озьы вал быдэс странаын). Пӧртэм указательёс но лэсьтоно, тодмо датаосъя "Календарь" арлы быдэ дасяно, печатласа издательствоын поттоно. Нырысь-валысь та ужез быдэсъямы архивъёсын валче - госархивын но партархивын ужасьёс датаосты, документъёсыз шонергес шедьтылӥзы. Та бордын ужазы архивъёслэн директоръёссы И. А. Боброва но А. И. Коробейникова. Собере, 1960-тӥ арысен отделмы, Книжной палата сямен, "Печатья летопись" поттыны шӧтаз. Та уж но котькудаз библиотекаын радъямын вал, юри дышетыны толэзьем курсэ ӧтчазы. Со дырысен шаертодонъя отделамы вуэ вань издание, мар гинэ республикаямы печатьысь потэ - сигнальной экземплярез. Соин ик отделмы пыр шедьтыны луоз котькыӵе газетъёсты, журналъёсты, плакатъёсты гинэ но. Книгаос сярысь веранэз ик ӧвӧл - тужгес но 1960-тӥ арысен потэмъёссэ. 1969-тӥ арын монэ нимаз, бадӟыматыса кылдытэм отделэ кивалтӥсе юнматӥзы. Туэ отделмылы 30 ар тырмиз. Табереяз ужаны кутским Урал зоная. 1970-тӥ арын кылдӥз Урал зоная совет, отчы пыризы Свердловскысь, Пермьысь, Челябинскысь, Курганысь, Оренбургысь улос (областной) библиотекаос но Башкириысь но Удмуртиысь элькун библиотекаос. Огазеяськем кужымен потылӥзы Урал зоная пӧртэм указательёс - "Урал", "Урал в годы Великой Отечественной войны", "Периодика Урала", инкуазь узырлыкъёс сярысь нимаз- нимаз указательёс, Уралысь тодмо датаосъя календарьёс. Арлы быдэ люкаськылӥм пӧртэм-пӧртэм городъёсы зоная советлэн ӧтчамъёсаз - план юнматылӥм, быдэстэм ужъёсмес эскерылӥм, городъёсын тодматскылӥм. Кировысь улос библиотекаен но туж валче ужамы. (Ма, сотэк кызьы-о, асьмеос ведь революцилэсь азьло одӥг Вятка губерние пыриськом вал.) Отын кема ужаз туж лякыт кышномурт Галина Федоровна Чудова. Ма гинэ шедьтэ шаермы сярысь, ваньзэ ыстэ вал милемлы. "Удмурт шаер" клубмы но кылдӥз 1984-тӥ арын, соослэсь адӟем карыса. Туэ солы но 15 ар тырмиз ни. Нырысь люкаськонмес уг вунэтӥськы. Ортчытӥм 26-тӥ январе, сӥземын вал Максим Прокопьевлэн вордскемез дырысен 100 ар тырмонлы. История наукаосъя доктор Никифор Павлов со сярысь книга поттӥз, со ик нуиз занятимес но. Нош писатель Петр Поздеев вераз М. Прокопьевлэн творчествоез сярысь. Мукетыз писатель Евгений Самсонов та семьяез тодэ вылэм. Шуиз вал, гожто, пе, туж тунсыко роман, но ӧз вутты. Пумиськонъёсмы ортчылӥзы толэзьлы быдэ. Пичи залын пуксён инты но уг тырмы вал. Клубамы мӧйы краеведъёсын ӵош ветлылӥзы егитъёсыз но - школаын шаерзэс эскерись пиналъёс дышетӥсьёсынызы ӵош. 69 номеро школаысь нылпиос вуылӥзы Анна Ефимовна Орешковаен ӵош. Завьял ёросысь Якшур школаысь Григорий Карпович Перевозчиков но аслаз пинал краеведъёсыныз ӵем вуылӥзы. Бен, аръёс ортчо, улон воштӥське. Нош шаеренымы тунсыкъяськон табере кыдёке выжызэ лэзе ни, отделмы но табере нимаське ни шаерез тодонъя но финн-угор литературая ёз (отдел) шуыса. Мон шумпотӥсько: кутскем уже муроме, паськыта, выльдӥське. Пенсие потӥ 1987-тӥ арын. Ужай та удысын 30 ар. Та аръёсы одӥг нунал кадь ортчизы. Асме шудтэмен уг лыдъяськы. Уже мынылӥ котьку капчи мылкыдын. Клубме кельтӥ, Надежда Бочкаревалы юн оскыса. Ӧй янгыша. Табере та уж борды басьтӥське мукетыз, пиналэзгес, Надежда Пчеловодова. Нимъёссы но таослэн оскыто, ужзы пӧрмоз. Россиысь библиотекаослэн нуналэнызы но юбилейёсынымы валче, ваньмызлы шаермес гажаса ужась эшъёсылы сӥзисько юн тазалык, азьланяз эшшо но бадӟым азинсконъёс. М. САМСОНОВА, Ижевскысь Национальной библиотекаысь шаертодонъя отделлэн азьвыл кивалтӥсез. Одӥг кыткетын Калмияр - Башкортостанысь одӥгез йыг-йыг удмурт гурт. Котыраз бигер гуртъёс вань ке но, со аслэсьтыз сямъёссэ-йылолъёссэ чылкыт возе. Татын тужгес адскымон, йӧно, сабырлы воргорон луэ Аркадий Нуртдинович Миниахметов. Вылысь Татышлы ёросысь куать сюрс удмуртъёс пӧлысь одӥгез. Но солы бадӟым "возэз" нуыны оскемын. Дасо аръёссэ ни гурт администрацилэн тӧроез луэ. Сюлмаськонэз одӥг гурт понна гинэ ӧвӧл: Калмияр (120 корка), Петропавловка (80 корка) удмурт гуртъёс но Савкияз, Асавды, Манагаз ьигер гуртъё. Озьы бере, удмуртсэ сяна, сыӵе ик ӟеч тодэ бигер кылэз. Мар шуэм со, Калмияр? Кин ке лыдъя, Камлы яр шуыса. Но та куара тупамъя кыл пӧрмытон, калык этимология луэ, дыр. Шонергес, оло, таӵе веранзы. Та интые, вуоссэ ӝог нуыса Агиделе дыртӥсь Танын дуре, интыяськем куинь агай-вынъёс (Шункар, Деслан но Калмияр) пӧлысь одӥгез. Нош удмуртъёс пусъемые 1670 арын. Со дырысен татысь удмуртъёс ас выжызэс чылкыт возизы, берло аръёсы гинэ кӧня ке семьяе палэнысь выль кенъёс ваемын. 1996 арысен А. Н. Миниахметовлэн инвисъёсыз трослы паськытазы. Сое бырйизы Башкортостанысь удмуртъёслэн национально-культурной центрзылэн азьветлӥсезлы воштӥсе. Та центр "Удумрт кенеш" ассоциациен юн кусып возе бере, Аркадий Нуртдиновичлы киыз но пыдыз луиз: со удмурт улосэз умой тодэ, дышетскемын Можга педучилищеын, собере ог арзэ - Удмурт университетын (дышетсконзэ Уфа университетын йылпумъяз, физматэз быдтӥз). Аркадий Миниахметов удмуртъёслэн кыказ берлоосыз бадӟым ӧтчамъёсазы ветлӥз. Национально-культурной центрзылэн советэзлэн кивалтӥсеныз Ренат Галямшинэн, та советэ ик пырись Юрис Саитовен, Светлана Сабанчинаен но мукетъёсыныз ӵош соос асьсэлэсь дэмланъёссэс веразы, Удмуртиысь эшъёсынызы кусыпъёссэс юнматон вылысь. Та центрлэн ужаз трос адӟем карымонэз ни. Вакчи дыр куспын Камсьӧр удмуртъёс асьсэды ӝутӥзы бигер эшъёссылэн син азязы. Кызьы тӥ сыӵе быгатӥды? - паймисез но вал. Зэмзэ но, 1998 арлыт кӧня пусъем ужрадъёссы вал, ваньмыз ик, шуыны луоз, быдэстэмын. Тани, шуом, калык сямъёсыз утёнъя, Сабантуй сяна, Янаул районын ортчытэмын Буӟӟиннал, В. Татышлы ёросысь гуртъёсын Вӧй сэбет, озьы ик Мӧр (бадӟым) вӧсь. Кырӟанъя-эктонъя коллективъёс ог-огзы доры куное вуыло. Ог-огеныд эсшъяськон юнма, нылпиос пӧлын но. Тулыс каникулъёс дыръя отличникъёс люкаськылӥзы следовательно,ётэ. Ношт Калтасы школа люказ 13 удмурт школаосысь пиналъёсты - визез сынанъя, шулдыръяськонъя но споръя бадӟым программа вал татын. Кемалась ик ӧвӧл тросэз уг тодо на вал К. Гердлэсь нимзэ. Солэсь вылӥ данзэ пыӵатонын зол юрттӥзы школаосын, районъёсын радъям научно-практической конференциос. Кивоштӥсьёссы оскымон мед луозы, ас сюрессэс мед азьланьтозы шуыса, асьсэ пал нылпиоссэс тросгес тыршо ыстылыны Удмуртие но. Тани Аркадий Нуртдиновичлэн бадӟымез нылыз, 16 аресъем Лена, малпа Ижысь медакадемие пырыны ("Шундыкар" лагере но со ветлӥз). Нош со сяна, Миниахметовъёслэн семьяязы будо 10 аресъем Оля но ньыль аресъем Лёня... Т. Петрова. Эмъюмтэк юнмалом Выльдӥськон кутскемлэсь азьло эмъюмъёс дунтэмесь вал. Нош больницаын кыллисьёс со понна дун но ӧз тыре. Берло аръёсы югдур чылкак воштӥськиз. Тросэз эмъюмъёс ӝажыосысь ышизы, нош кылемъёсыз уно поллы дуноязы. Куанермем калыклэн эмъюм басьтыны уксёез али уг тырмы, соос висьыса уло но сопал дуннее вазь ик кошко. Таӵе югдур сюлмаськытэ "Удмурт кенеш" но "Дэмен" огазеяськонъёслэсь азьветлӥсьёссэс но. Алигес "Удмурт кенешлэн" Ижысь Индустрия ёросысь ёзэныз кивалтӥсьёс - Альберт Разин но Клавдия Исупова - та палась улӥсьёсты "Ударник" культурая центре люкаллязы дунтэк эмъяськон амалъёсын тодматыны. Калыкен кенешыны ӧтемын вал та удысэз ӟеч тодӥсь муртъёс но. Ижысь медициная академиысь дышетӥсь врач Эмилия Смирнова люкаськемъёсты тодматӥз остеохондрозлэсь утиськонэн. Со возьматӥз пӧртэм амалъёс - соос та висёнэз палэнто. Толалтэ люкмесъёсын пыласькись Римма Дерендяева рос-прос вераз, кызьы уте адямиез кезьыт вуын пыласькон кынманлэсь но пыэдлэсь. Мугорез эмъюмтэк кыдатон ласянь трос визь-кенеш сётӥзы врач Поликарп Князев но тодосчи Альберт Разин. Кызьы тодмо, али асьме кунысь пиосмуртъёс улонысь кошко, витьтон куать арес тырмыса, нылкышноос ӧжытлы гинэ уногес уло. Азьло улӥзы сизьымдон аресозь. Тӥни кытчы вуттӥзы калыкмес "демократъёслэн" реформаоссы. Таӵе пумиськон ортчем арын но вал. Со калык понна пайдаё луэ. Азьланяз соос котькуд аре луылозы, пӧртэм тодосчиос ӧтиськылозы. Н. ВОЗИСОВ. Сарапул сюдэ но, эмъя но Нянь продуктъёсъя комбинатэн кивалтэ Кун Кенешлэн депутатэз Михаил Семенович Малюк. Со тырше ас кожаз ужаны, ялан паськытатэ производствояз, ватсаса выль ужан интыос кылдытэ, умоятэ пызь изон амалъёсты, умоесь кусыпъёс возе ю тысь сётӥсь предприятиосын но улосвылъёсын. Туннэ татысь директорен Михаил МАЛЮКЕН кенешонмы. - Михаил Семенович, ойдолэ, вераськонмес мытом городды бордысен. Ведь Сарапулэз "Удмур Суздаль" шуо. Шонер-а со? Собере малы республикаямы таӵе бадӟым нянь комбинат дорады пуктэмын? Сарапул интыяськемын Кама шурлэн бур палаз но шор вадесаз. Со купецъёслэн вашкала карзы. кам дуре пуксем городъёс пӧлысь со одӥгез чеберез но шулдырез. Соин ик сое юнме шорысь "Удмурт Суздален" уг нимало. Город пуксемын ЪВИ даурлэн шораз, Иван Грозный Казанез басьтэм бере. Сое шуо вал Вознесенское черкогурт. Сарапул кемалась данъяське ни кибашлыосыныз - нянь пыжисьёсыныз, сур пӧзьтӥсьёсыныз, пыдкутчан вурисьёсыныз, ку посӥсьёсыныз но музон мстерскойёсыныз. Соослэн киужъёссы быдэс Россие вӧлмо вал. Нош купецъёс царьлэн ӝӧк вылаз вуттылӥзы "ӵуж чорыг" - стерлядь. Городлэн нимыз но отысь ик потэмын. Сарапул тужгес данэ потэмын вузкарыны быгатэменыз. Сое лыдъяло вал Шоро-куспо Кам улослэн шоркареныз (столицаеныз). Татчы интыяскьемын вал трос нимаз предприятиос но пӧртэм контораос. Али Сарапул луэ шаерамы кыкетӥез (Иж бере) бадым промышленной но культурной город. отӥ кошке Казань-Екатеринбург чугун сюрес, кам дурын бадӟым порт лэсьтэмын, Ижен но Удмуртиысь мукет городъёсын герӟа чебер вольыт асфальт сюрес. Городын лэсьто магнтолаос но "Урал" приёмникъёс, электрооборудование но электроинструмент, му вӧй поттон оборудование но электротокарьёс, мебель, дӥсь но пудкутчан, кондитер изделиос но уно музонзэ. Каракулино, Завьялово , Киясово, Пичи пурга ёросъёсын юоссы удалто. Сое лыдэ басьтыса, совето власть дыръя решение кутэмын вал Сарапулэ таӵе бадӟым нянь комбинат пуктын. Ватонэз ӧвӧл, сое кема ӝутыны выризы, лэсьтськон капчиен ӧз сётскы. Озьы ке но, 1993-тӥ арын декабре комбинат ужаны кутскиз. - Зэмзэ но, нянь комбинат Удмуртиын одӥгез таӵе бадӟым но ӟеч предприятие луэ. Али кызьы ужъёсты мыно? Ведь миым Россиын но республикаямы кӧс гужем вал, шуыны луоз. - Бен, капчи уг йӧты, но возиськоиськом ай. Толалтэ мырдэм ужам, кӧня ке сылӥм но. Берло дыре югдур воштӥське-умоя. Дорамы вуиз кунгож сьӧрысь чабей. Али чое изӥськом, кыӵе пызез пӧрмоз? - тодмо ӧвӧл на. Но урод уз луы шуыса малпаськом. Соин ӵош ик мукет интыосысь но ю тысь басьтӥськом. Кӧня ке верало матысь кык ар ужаммы сярысь. Валля арен ӵошатыса, миым пызь ичигес изӥм, но вылӥ сортэнзэ 3,3 сюрс тонналэсь уно поттӥм, нош манной кеньыр - 125 тонна. Озьы ик данаклы будӥз кыкетӥ сортэн пызь изон (50 процентлы). Предприятие ялан паськыта. Кылем арын 26 выль ужан интыос усьтӥм, 5,5 процентлы ужасьёсмы йылӥзы. Городын ужасьтэмъёслэн лыдзы пумен будэ, дорамы трос куриськисьёс, но жаляса верано луэ, ваньзэ кутыны ум быгатӥське. Уждун тырон но йыэ (9,1 поцентлы). Коньдонэн вераса, со сю манет луэ, нош быдэс комбинатын миым шоро-куспо уждун 1200 манет усиз. - Михаил Семенович кытысь ю тысь басьтӥськоды но кытчы пызьдэс, кеньырдэс но мукетсэ вузаськоды? - Милям элеватормы 48 сюрс тонна ю тысь тэре. Вукомы суткаяз 500 тонна пызь изэ. Валамон, азьло республикаысь уно ю тысь вуэ вал, берло дыре ичигес. Мугез тодмо: куазь урод вал. Милемлы ю тысь ваё Краснодар, Ставрополь, Оренбург, Омск областьёс, Казахстанысь Петропалвловск но Акмалы но мукет интыос. Комбинатлэн вань аслаз тепловозэз но 7 иськем чсугун сюресэз. Юэз элеваторе ӝото механизмъёс. Отын со улэ вукое келятозь. Ю тысез пӧсектэмлэсь но сутскемлэсь утён вылысь, шуныт-кезьытэз юн чакласа возиськом. Ю тысез вукое лэземлэсь азьло БИС-100 сепараторъёсын чылкытатӥськом-шертӥськом, нош векчизэ БСФ-50 сепараторъёсы7 висъяськом. ваньмыз со ужъёс быдэсъясько элеваторлэн валтӥсь пультэз пыр. Продукцимы складын уг кылльы. Пызьмес, кеньырмес но мукетсэ яратыса басьто шаерысьтымы Ижевск, Воткинск, Глазов, Можга, Сарапул городъёс, Удмуртпотребсоюзлэн 17 райпоосыз, бускель Татарстан, Башкортостан республикаос но Пермь область. Продукцимы озьы ик кошке Архангельске, Костромае, Саратове, Самарске, Оренбурге, Кокчетаве но музон интыосы. Комбинатады, мон сямен, валтӥсь инты басьтэ пызь изон - вуко. Кызьы со ужа, вералэ вал? - Шонер юан. Вукоямы пуктэмыг туала ӟеч ужась асьме оборудование. Отын кутӥське чабеез изонъя усто технология. Озьы вылӥ ӟечлыкен продукция поттӥськом. Пызь изэмлэсь азьло ю тысез ӟеч дасяно. Нырысь висъяно жуг-жагзэ, собере - кӧмзэ, висёнъёслэсь обработать кароно, векчи но капчи тысез люконо. Ваньзэ та ужез машинаос быдэсъяло. тужгес но юн чаклано, ю тысь пӧлы корт арбериос медаз шеде шуыса. Изэм пызь вуэ фасовать карон но мешокъёсы тырон люкетэ. Отчы 360 тонна пызь тэре. Котькуд мешоке 50 килограмм пызь поно, нош А5-АФЛ аппаратэн 2 килограммъем пакетъёсы бинялто. Ваньмыз со вуэ складэ, отысь басьяськисьёс кие. Милям озьы ик вань пызь нуллон машинаосмы. Пызь келяськом автотранспортэн но чугун сюрес кузя вагонъёсын. Вань ю тысез, пызь изонэз но келянэз син азяз возе производственно-технической лаборатория. Специалистъёс юн чаклало пызь изон технологиез, сабейлэсь но дась продукцилэсь ӟечлыксэ. Ӝожтӥськонъёс ӧй на вал. - Берло дыре мар выльзэ пыӵатӥды? - Специалистъёсмы но технологъёсмы ялан утчасько. нимысьтыз пусъеме потэ удатэм чабей пызез. Сое "зародышевые хлопья" шуо, эмъюм интыын но кутӥське. Со тужгес узыр пӧртэм витаминъёсын. Кык чечы пуньы (15-20 грамм) адямилы быдэс нуналлы тырмымн витаминъёс сётэ. Та пызез сиыны луэ кӧсын, вуэн коттыса, йӧлэн сураса, шыдэ ватсаса, пыжиськемъёсы но нылпиослэн сиён пӧлазы поныса. Со адямиез егитомытэ, пересьмыны уг сёты. Таӵе ӟеч эмъюм ми вузаськом асьмелэн "Нива" магазинамы, Сарапулысь ваньмаз кун аптекаосын но комбинатлэн мукет вузкарон интыосаз. Калык шумпотыса басьтэ. - Михаил Семенович, тӥ бадӟым предприятиен кивалтӥськоды. малы Кун Кееншын ужаны, депутат луыны мылкыд кариды? - Номыр ватонэз ӧвӧл. Миым монэ гордумае депутатэ бырйизы, бюджетъя комиссиын ужасько. Нош туэ ужасьёсмы ӵектӥзы Кун Кенеше, Округамы 5 мурт вал. Бырйисьёсмы мыным оскизы. Тӥни озьы эшшо Кун Кенешлэн депутатэз луи на, сюлмаськонъёс ватсаськизы. - Шутэтскыны дырды кыле на-а? Мар кариськоды ваньмон дыръяды? - Оло оскоды, оло уд, но шур дурын вордски, чебер Кам шур дурын улӥсько бере, тол но, гужем но чорыганы туж яратӥсько. Ваньмон дырен бен нокинлы капчи ӧвӧл, дыр, озьы ке но, арнялы быдэ визнанме кутылӥсько, сюлэм шур дуре кыске, йыр но шутэтске. Улӥсько город сьӧрын, аслам коркам. семьялы но юрттоно, музъем копано но мукетсэ лэсьтоно. Котьку сямен но, кышноелы секытгес йӧтэ. Вераськиз Геннадий РОМАНОВ. ОАО Страховая фирма "Ижевск-Фермер-Поддержка" Адрес: 426004, г.Ижевск, ул. Ломоносова 9-а, тел. (3412) 76-81-11. Лицензия Росстрахнадзора � 1562 от 22 февраля 1994 г. Баланс по состоянию на 1 января 1999 года ФИНАНСОВЫЕ РЕЗУЛЬТАТЫ ЗА 1998 ГОД АКТИВ Ня. 01. 98 (тыс. руб) На 1. 01. 99 (тыс. руб) ПАССИВ Ня. 01. 98(тыс. руб). Ня. 01. 99 (тыс. руб ) Наименование показателя За отчетный год За предыдущий год И. НЕМАТЕРИАЛЬНЫЕ АКТИВЫ Лицензии знаки обслуживания иные права и активы 2 1 Итого по разделу 1 2 1 ИИ. ИНВЕСТИЦИИ Здания и сооружения 10 9 Незавершенное строительство 5 0 Инвестиции в другие организации 43 408 Облигации и другие долговые обязатен 48 0 Депозиты в банках 810 0 Прочие финансовые вложения 0 641 Итого по разделу ИИ 916 1058 ИВ. ДЕБИТОРЫ Дебиторская задолженность по операциям перестрахования 1 0 Прочие дебиторы 26 138 Итого по разделу ИВ 27 138 В. ПРОЧИЕ АКТИВЫ Основные средства, кроме земли и здан 27 42 Материальные ценности и затраты 15 15 Денежные средства: касса 1 2 расчетные счета 8 14 Итого по разделу В 51 73 ВИ. УБЫТКИ Непокрытые убытки прошлых лет 90 57 Непокрытый убыток отчетного года 16 Итого по разделу ВИ 90 73 БАЛАНС 1086 1343 ВИИ. КАПИТАЛ И РЕЗЕРВЫ Уставной капитал 1009 1009 Добавочный капитал 34 269 Фонды накопления 19 19 Итого по разделу ВИИ 1062 1297 ВИИИ. СТРАХОВЫЕ РЕЗЕРВЫ Резерв незаработанной прем 2 20 Резервы убытков и технические резервы 0 3 Резерв предупредительных мероприятий 2 4 Итого по разделу ВИИИ 4 27 Х. КРЕДИТОРЫ Заемные средства 1 0 Кредиторская задолженность по оплате труда 2 3 по социальному страхованию и обеспечению 3 2 задолженность перед бюджетом 3 1 прочие кредиторы 11 0 Итого по разделу Х 20 6 ЪИ. ПРОЧИЕ ПАССИВЫ Доходы будущих периодов 0 13 Итого по разделу ЪИ 0 13 БАЛАНС 1086 1343 ИИ. Страхование иное, чем страхование жизни Страховые взносы 42 6 Изменение резерва незаработанной премии 18 2 Страховые выплаты 19 0 Изменение резервов убытков 3 0 Состоявшие убытки нетто перестрахование 22 0 Отчисление в резерв предупредительных мероприятий 2 0 Затраты по заключению договоров страхования 5 2 Операционные расходы 5 2 Результат от операций по видам страхования иным, чем страхование жизни 5 2 ИИИ. Прочив доходы и расходы не отнесенные в разделы 1 и 2 Доходы по инвестициям 187 79 Расходы на ведение дела 178 134 Прочие доходы 20 0 Прочие расходы 24 0 Прибыль (убыток) от страховой и финансовой деятельности 0 53 Прочие расходы 1 39 Прибыль (убыток) отчетного периода 1 92 Отвлеченные средства 15 0 Нераспределенная прибыль (убытки) отчетного периода 16 92 Примечание: Данные по этим строкам в валюту баланса не входят. Строки не имеющие показателей не публикуются. Аудиторская проверка проведена аудитором Евсеевым Ю. И. (лицензия на проведение аудита страховых организаций �012634 выдана решением Центральной аттестационно-лицензионной аудиторской комиссией Министретсва Финансов РФ от 18 марта 1998 года). Бухгалтерская отчетность достоверна, подготовлена в соостветствии с планом счетов бухгалтерского учета, положения об учетной политике и положения о бухгалтерском учете в отчетности в страховых организациях. Герд Тушмон-а тон? Кемалась турттӥсько ни вал та пумысен гожтыны, ялан ӧй дӥсьтылы, кышкай, вылды, асме но калыклэн тушмонъёсыз пӧлы пыртозы шуыса. Вераськон мынэ ӵапак соос сярысь. Я, радызъя... Уг валаськы, нокызьы но уг валаськы, кыӵе вакытысен возиське меда асьме пӧлын вӧзысьтымы тушмон утчан сям. Вашкала дырысен? Куамынэтӥ аръёсысен? Яке со ӝужаны ӧдъяз демократия шуон азинскон вакытэ? Учке ай кызьы луыса кошке. Люкасько визьмо удмуртъёс, соиз-таиз сярысь кенешо но... пӧлысьтызы тушмонъёсты утчаны кутско. Огазеяськонмылы тӧрое йӧн-йӧн воргоронэз быръеммы бере малпай ни вал: сё, табере куспамы керетонъёс дугдозы, движение котыре огазеяськем муртъёс зӥбломозы но вань кужымзэс-быгатонзэс пайдаё уже ӧръялозы. Та лаянь кӧня ке ӟеч воштӥськонъёс луизы ик. Удмурт огазеяськонъёс ог-огенызы коть керетэмысь дугдӥзы кадь. Азьветлӥсьёс соглаш кариськизы, ваньзэ ик организациосты "Удмурт кенешлэн" бурд улаз кысконо шуыса. Нырысетӥ араз люкаськонъёсын, зэм но, нокин ик ӧз выры ни кадь тушмон утчанэн. Но мур алям висёнлэсь быдэсак мозмытскыны ӧм быгатэ. Пыдло ватӥськем пыктос ассэ выльысь возьматыны ӧдъяз туэ быръёнлы дасяськон вакытэ. Ойдолэ тодамы ваём Пичи кенешлэсь февральлэн кутсконаз ортчем заседанизэ. Югдурез рос-прос эскерем интые, асьмеос вераськонэз воксё мыдланьтӥм. А-а-а, Н окргуъя депутатэ кандидат луыны малпа, шуом, Иванов умойтэм адями, ойдолэ отчы солы пумит асьме эшез ӵектом - таӵе ужан амал дэмлазы пӧсь йыръёс. Чаклалэ: "понна" ӧвӧл, "пумит". Политикае сыӵе мылкыдын мерскиськод ке, пайдаез луоз-а? Валамон ни, уз. Уго кандидат кариськыны турттӥськод ке, тон со секыт, трос сюлэм кужымез но коньдонэз кулэ карись ужлы ичизэ ар-кык солэсь азьло дасяськыны кулэ ук! Нош куке асьмеос быръён нуналозь толэзь-толэзь но ӝыны дыр кылем бере вуберганэ вамыштӥськом... Солэсь но ортчыт - чик но малпаськытэк, шуак-дуак гомам мылкыдъёслы сётскыса, кинэ ке но сюрес вылысь донгыны турттыса. Кенешонэ ветлэмъёс тодазы кема возёзы на, вылды, кызьы кык кенакъёсмы лопырскизы вал Глазовысь одӥгаз округын кужымзэс мертаны. Ярам коть, кин ке дугдытӥсь шедиз, лэся. Уго таосыд но мандат басьтон но калыклы юрттон понна ӧвӧл, "гажано" адямилы пумит ужан вылысь ӝутскизы вал. Дэбес ужпум сярысь ми гожъям ни. Мандат, кызьы азьло ик шӧдӥськиз, шедиз оскымон кие. Светлана Смирнова огъя нюръяськонэ пыриськем юлтошъёссэ трослы азьпалтӥз. Озьы со возьматӥз югдурлэсь азинскемзэ адӟыны-валаны быгатэмзэ но, аслэсьтыз политикаын зэм ик кужмо луэмзэ но. Шумпот вал. Кытын, пе. Данъяськем интые, куд-ог эшъёс чылкак пурӟизы: ма, кызьы озьы палэнысь лыктэм кивалтӥсьёслы дурбасьтӥсь адями вормиз? Одӥгез весь судъёстӥ бызьылэ на, Смирноваез выйтыны турттыса. Мукетыз котькуд кенешын-пумиськонын пусйыны выре: асьмелэн шуг-секытъёсмы вузаськем нылъёсмы-пиосмы бордысь пото. Сыӵе тушмонъёсты, пе, шараяно, сюрес вылысь кызьы ке но палэнтоно. Тӥни озьы... Монэ огпол калык азьын пыкылӥзы ни, Смирновалэсь коньдон басьтӥсько но соин солы весь дурбасьтыны вырисько. Таин валче тодэ лыктэ одӥгаз газетын гожтэм учыр. Егор Загребинлэн журналэзлы, пе, коньдон Кузьма Куликов сётэ, соин ик редактор та учёнойлы котьку дурбасьтэ. Паймод, ява! Копейка но басьтэме ӧвӧл ке но, мед шуозы. Тазьы гинэ валэкто: Светлана Константиновналы мынэсьтым но, кинлэсь ке мукетызлэсь но юрттэт кулэ ӧвӧл. Аслыз сюрес со ачиз согиз, туннэ вань удмуртъёс солэсь берытскизы ке но, Смирнова уз быры, одно ик азьлань вамыштоз. Ойдолэ малпаськом. Я, шуом, кинлэсь ке кырсь дӥськутсэ сэзъяны яратӥсь эшъёслэн малпанзы быдэсмоз: Светлана Константиновналэсь мандатсэ талалозы. Кин-о утоз? Кин-о вузоз? Одӥгезлэсь визьмо удмурт нылкышнолэсь сюрессэ пытсалом, со интые кыӵе ке мукет муртэ быръём. Вылӥ кивалтӥсьёс пӧлысь выжыысьтымы адямиез ишкалтом, быдэс страна тыр ӵаш поттом. Вот соку лӧптыса чабозы... удмурт калыкез, солэсь азьветлӥсьёссэ зэм ик синазькыль карисьёс. Сыӵеос серекъяса шуозы: я, мед йырйиськозы ай та во... удмуртъёс ог-огенызы, нош ми асьме ужен выром, татын кузё луом. Кулэ-а со асьмелы? Кулэ-а таӵе югдур калыклы? Туннэ нуналлы Кун Кенешын мукет но "тушмон" вань на. Сояз ӧтчамын тӧроез воштӥсь Алексей Красильников. Али кивалтэ ялан ужась комиссиен. Коммунист луэмез понна но, йырзэ вылын воземез понна но тышкаськыны луэ, вылды, сое, котькуд адямиез сямен ик. Озьы ке но, со возьматӥз ук кужмо луэмзэ! Городын, кытын удмуртъёслы пумит мылкыдъёс тужгес но зол шӧдӥсько, вормыны капчи ӧвӧл. Со понна юн малпаськыса но чакласькыса ужано вал. Алексей Геннадьевич озьы лэсьтыны быгатӥз. Зӧк кисыё но кескич мукет кандидатъёсты сюрес урдсы палдытӥз. Со-а вормон ӧвӧл? Нош ик данъяськы вал... Ум быгатӥське, оло вожъяськон мылкыдмы люкетэ, оло маке но мукетыз бичатэ. Малы асьмеос ӧм дурбасьтэ Красильников депутатлы? Малпамы, та адями кивалтӥсезлы укыр матын но солэн политикаын улонэз йылпумъяськиз ни шуыса? Озьы ӧвӧл-а? Бен, "Кенешлэн" флагез солы кулэ но ӧй вал - Ижевскын со бырйисьёсты кышкатэ гинэ. Нош кинлы но малы кулэ луиз "тушмонмылы" пумит ужаны? Шедизы ук "визьмо" муртъёс! Городысь ӝыныезлэсь тросаз округъёсын удмурт кандидатъёс чик но ӧй вал ке но, 23-тӥ округе соос донгизы егит удмурт программистэз: мед, пе, "вылтӥяськись" муртлэсь куараоссэ ӧжыт ке но качалоз. Ойдолэ табере лыдъялом. А. Красильников люказ 1674 куара. Со бӧрсьы вамыштӥсь прокурор Д. Шумков - 1598. Кусыпсы - 76 куара. Программист А. Емельянов понна кариськиз 364 бырйись. "Визьмо" муртъёсмы азязы пуктэм ужпумез ӧжыт гинэ ӧз быдэстэ ук! Кӧня ке гинэ золтӥськысалзы на ке, мандат мукет кие шедьысал. Нош ик азьло юан кылдэ: кин соку шумпотысал? Эк-эк-эк... Красильниковлы пумит ужазы удмурт интеллигенцилэн та округын улӥсь дано нылпиосыз - писательёс, суредасьёс, тодосчиос. Ваньзы сямен - наукая кандидатъёс но докторъёс. Кызьы меда соос табере кыӵе ке ужпумъя кенешыны мынозы Кун Кенешысь Наукая, Дышетонъя, Культурая но Егитъёсын ужан политикая ялан комиссилэн тӧроез доры?.. Ма, уд но паймы, дыр, синзэс кыньыса лыктозы но солэсь ик уксё яке мукетсэ курозы. Сыӵе уго валанмы. "Тушмон" радэ пуктыны выро ни кадь социальной ужпумъёсъя выль вице-премьерез но. Ай солэн фамилиез но шараямын ӧй вал на, газетамы потӥз вынызлэн статьяез, кудаз автормы ас мылкыдзэ вераз кылдэм югдур пумысен. Табере тазьы шуо: уть, пе, кызьы таосыд ужало. Тӧдьы юртысь кузёослэсь куронъёссэс быдэсъяса. "Удмурт кенешез" паньсало. Тӥни озьы, ява, куддыр уд но вала, йыртышкад кытысь кӧльы вуоз. Шӧдӥсько ни, та гожтэмез но куд-ог эшъёс "заказ" шуыны турттозы. Оске, пожалуйста, нокин но монэ яке редакциез ӧз косы туннэ вылӥе ӝутскем адямиослы дурбасьтыны. Сыӵе ужпум ӧвӧл. Пыриськыны но мугез ӧвӧл кадь. Сюлэм соиз понна гинэ висе: дугдоно ни вал тушмон утчанэн выремысь. Удмурт калыклэн историысьтыз та секыт вакытаз кызьы ке но тыршоно вылэм сыӵе мылкыдъёслэсь палэнскыны но зэмос кулэяськонъёсмес быдэстон борды уртче басьтӥськыны. Озьы мед луоз. И. Лебедев, "Удмурт кенешлэн" исполкомаз быръем мурт. БУСКЕЛЬЁСМЫ ДОРЫН Сьӧдэн тӧдьыен куӵооссы "1986 арысен кутскыса, татын котькуд скаллэсь 3000 килограммлэсь трос йӧл кыско, куддыръя толалтэ но гужем мында продукция басьто. Минзифа Гильмияроваен но Сайфутдин Нуриахметовен кивалтоно кыкез но скал вордон фермаос районысь сыӵе 24 фермаос пӧлын котьку азьпал радын. Бере уг кылё парсь, кунян утисьёс, пудо куайытӥсьёс но". (Башкортостанысь удмуртъёслэн "Ошмес" газетысьтызы). Вылысь Татышлы районысь "Дэмен" колхозэ ньыль удмурт гурт пыре. Котькудӥз ик пудо вордон удысын азинсконъёсыныз данъяськыны быгатэ. Тросэз со потэ колхоз тӧролэн Ренат Биктимирович Галямшинлэн паськыт шоналскыса ужаны быгатэмез бордысь. Вуыломе Бальзюга гуртысь скал кыскисьёс доры. Котькытын сямен ик, татын но жадёнэз валатэк кадь тыршо халатэн нылкышноос. Чиед пельпум вылазы секыт мешокез но, ведра- карнанэз но вормо. Кылем арын йӧл кысконъя та ферма районын кыкетӥ интые потӥз: скаллы быдэ 3800 килограмм басьтӥзы. Нош тужгес но висъяськизы кема ужась дояркаос Асия Суюшева, Сабира Саяпова, Ираида Шакриева но Феодосия Шайдуллина. Соослэн лыдпуссы 4000-лэсь но ортчиз. Та нуналъёсы йӧл скаллы быдэ 11 килограммен усе. Сьӧдэн тӧдьыен куӵо скалъёссы племенной луо, кунянъёсты вордыса-будэтыса но вузаса, колхоз трос пайда поттыны быгатэ. 1984-тӥ арысен ни Бальзюга фермаен кивалтэ Минзифа Гильмиярова. 1957-тӥ арысен, 21 аресысен, со колхоз пудо котырын. Нош кивалтӥсе юнме уг пукто. Маиз ке но бордаз кыскисез вань та нылкышнолэн. Пенсие потыса, куатетӥ арзэ ужа ни, аресызлэсь егит адске, синъёсыз шуныт тылсиясько. Нош соос куке вожпотонэн но чилектылӥзы, дыр, курыт синвуосын но пыласькылӥзы. Верамезъя, улонэз капчи ӧй вал Минзифа апайлэн. - Куать нылпиос, ми атайтэк быдэсмим. Со фронтысь бертэмез бере кулӥз... Нылы куинь арес но кык толэзь, пие ньыль толэзь дыръязы, картэ кулӥз. Одӥг пол шудэ луымтэ бере, утчаса уг ветлы ни, шуи. 31 арес тырмемез бере пиме ыштӥ на... Сыӵе ыштон-адӟонъёслы ӧз сётӥськы Минзифа Гарифановна, ассэ юн кутӥз, азьмынӥсьёс радын ветлӥз. Скалъёс мукет вал ай соку: напгес, но ӧжытгес йӧл сётӥсесь. Шуиз аслыз: 3000 килограмм кыско - озьы ик луиз, сётэм кылзэ быдэстӥз... Зэм, та кышномурт ӝутэм ныпъетсэ пельпум вылысьтыз куштыны уг дырты. Секытлы со дышемын. Т. ПЕТРОВА. Минзифа ГИЛЬМИЯРОВА - Бальзюга фермалэн кивалтӥсез. Дояркаосыз шулдыртэ зоотехник Ильдус ШАМТИЕВ. Кыдёке-а вуод таӵе дэриен-нӧдэн... Туспуктӥз В. БЕЛОМОРСКИХ. Политика Ӟечгес дасяськоно вуоно быръёнъёслы Тазьы дунъяло Кун Кенеше но Правительствое кивалтӥсьёсты быръем бере кылдэм югдурез данакез удмуртъёс. Газетлэн корреспондентэз Людмила Медведева пумиськылӥз Завьялово районысь улӥсьёсын. Ог дасо адямиосын вераськыса адӟоно: соослэн сюлэмзы висе национальной кадръёсты дасянэз лябомытон, палэнысь кивалтӥсьёсты ваем понна. Со тужгес но яркт шӧдӥськиз ортчем быръёнъёсын. "Удмурт кенеш" дасяське калык пӧлын юалляськон ортчытыны, удмуртъёслэсь бадӟым кенешсэс люканы. Ма малпало кылдэмюгдур пумысен Завьялово районын улӥсьёс но ужасьёс? Татьяна Васильевна Терехова, ёрос больницаысь врач: - Мынам малпанэ одӥг - республикаен кивалтыны кулэ удмурт адями. Сыӵе мылкыдэз районамы улӥсь калыклэн но. Кун Кенеше быръёнъёслы дасяськон дыръя мылысь-кыдысь пыриськи политической улонэ, депутатэ кандидатлэн Т. М. Кутявиналэн оскем адямиез вал. Толэзь ӵоже нуналлы быдэ пумиськылыны кылдӥз пӧртэм коллективъёсын. Бырйисьёсмылы мон тау карисько районысьтымы гажано председательмес удмурт парламентэ быръемзы понна. Оскисько, Валериан Арсентьевич Никитин отын но ас удыссэ йыг-йыг нуоз шуыса. Уг ваты: мынам сюлмы туж шуг Правительстволэсь Тӧрозэ воштэмлы. Павел Николаевич Вершинин ас интыяз вал. Калыклэн мылкыдызъя но со шӧдӥськиз. Нош Н. А. Ганзаез гуртъёсын кин тодэ? Пыкылэме потэ "Удмурт кенешез", кивалтӥсьсэ В. К. Тубыловез. Малы районъёсы адямиосты пикетэ поттыса сярысь нокыӵе ивор ӧз вуы? Малы ми гинэ но, городэн артэ луыса, со сярысь берло гинэ тодӥм? Ижевскын ма но со лэсьтыны выриськоды ик, нош районъёс бабо, гуртысь калык воксё палэнтэмын. Озьы ужаса, асьмеос ноку но огъя кылэ, огъя малпанэ ум вуэ. Интыосы тросгес потано, уен-нуналэн ужано. Дмитрий Аркадьевич Казаков, Азин нимо эштосысь коммунальной службалэн кивалтӥсез: - Гуртын улӥсьлэн сюлмаськонэз политикае пыриськытэк но али тырмыт: бусыосын азинско гырон-кизён ужъёс, картофка мерттӥськом. Озьы ке но, сюлме йӧтэ - кин кивалтоз матысь ньыль арзэ асьме республикаен. Со асьме дорын вордскем мурт мед луоз вылэм. Оскон вал, Кун Кенешен кивалтонэ П. Н. Вершинин пуксёз, дыр, шуыса. Но озьы ӧз луы. Конечно, мыным гуртын улӥсьлы, секытгес валаны политикаен герӟаськем шудонъёсты. Быръёнъёс дыръя куараме сётӥ "Путь Ильича" колхозлэн председателез понна, соин ӵош оскемме верай, В. А. Никитин гуртоосты утьыны тыршоз шуыса. Кызьы со ассэ возьматоз, вераны вазь на. Мар воштӥськоз гуртын, выль кивалтӥсьёс вуыса? Номыр ик уз, дыр. Ми али гинэ Казмаскае газ кыскыны кутским вал, вераським, Правительство но быгатэмезъя коньдонэн юрттоз шуыса. Табере отын ваньмыз воштӥськиз бере, выльысь кутскыса кабинетысь кабинетэ ветлоно луоз ни. Николай Васильевич Тебетеев, "Ижевская птицефабрика" АО-лэн директорезлэн воштӥсез: - Экономика но политика куспазы люконтэм герӟаськемын, соин ик республикаын кылдэм политической югдурлэсь нокызьы уд палэнскы. Гурт удыс, тылобрудо вордӥсьёс парламент но Правительство ласянь нырысь ик витё коньдонэн юрттэмзэс но бадӟымгес саклык висъямзэс. Берло аръёссэ, жаляса верано, милемыз ӵектонъёсын гинэ буйгатыса возё. Кун Кенеше али вуизы бадӟым предприятиослэн кивалтӥсьёссы. Асьсэ понна сюлмаськонэн ӵош, соос медаз вунэтэ вылэм музъем ужасез, пудо вордӥсез но. Министръёсты воштонъя малпанэ таӵе: выльёсыз пӧлы кельтоно вал куд-огзэ али ужамъёссэ но. П. Н. Вершининлэн но кошкон дырыз вуэмын ӧй вал на. Табере выль премьерлы но кабинетэзлы нырысь нуналысен ик ӟеч-ӟеч удыссы борды басьтӥськоно, республика огинтыяз медаз сылы. Асьмеос Удмуртиын улӥськом бере, мон малпамъя, кыкез но кивалтӥсьёс татын вордскем но будэмъёс луыны кулэ. Туала кылдэм югдур, быръёнъёс оглом шӧдтэк шорысь луизы, уката но удмуртъёс понна. "Удмурт кенеш", пусйыны кулэ, калыкен интыосы потаса уг ужа. Соин ик районъёсысь депутатъёслэсь Кун Кенешын интызэс басьтӥзы городысь чиновникъёс. Калык пӧлын юалляськон ортчытонэз но удмуртъёслэсь съездзэс люканэз умоен лыдъясько: таоссэ быръёнъёсты келям, нош вуоноезлы дасяськыны бер ӧвӧл на. УДМУРТ РЕСПУБЛИКАЫСЬ ПРАВИТЕЛЬСТВОЫН Кинлэн вузэз ӟечгес? 20-тӥ мае предприятиослэсь "Россиысь 100 ӟеч вуз" Всероссийской конкурсэ вузъёссэс быръёнъя улосвыл комиссилэн кенешез ортчиз. Тодады вайытом: кылем арын та конкурслэн лауреатэз луиз акциосын "Сарапульский электрогенераторный завод" огазеяськонлэн тӥрлыкъёсын "Универсал" наборез. Тросэз вузъёс дипломъёсын пусъемын вал. Жаляса верано, ӵошатсконэ пыриськемъёслэн лыдзы трос ӧй вал. Озьы ке но, комиссиын ужасьёс эшшо огпол валазы: Удмуртиын вань вылӥ быгатонлыкен, выльзэ утчась, ӟеч кибашлыос. Соослэн вузъёссы дуннеын поттӥськись умой продукцилэсь бере уг кылё. Комиссия "Россиысь 100 ӟеч вуз" конкурслэсь лауреатэзлэсь нимзэ сётыны дэмла акциосын "Ижевский оружейный завод" огазеяськонлэн пӧйшурасьёслы чаклам "Сайга" карабинэзлы но акциосын "Ижевский мотозавод "Аксион-Холдинг" огазеяськонлэн электроен "Бриз" сӥль коранэз. Вераны кулэ: алигес бичаны кутскем сӥль коран дуннеын поттӥськисьёсызлэсь тусызъя но, ӟечлыкезъя но бере уг кыльы. Со сяна, конкурсэ мукетъёсыз но тазалыкез утёнын но юрт котырын кутӥськись арбериос ваемын вал. Соос пӧлын ик - дефибриллятор (сюлэм дугдыку кужмысь ужатон) - дуннеын тодмоосызлэсь ӟечгес но дунтэмгес. Всероссийской конкурслэн дипломъёсыныз акциосын "Сарапульская кондитерская фабрика", "Сарапульский радиозавод - Урал Авто", "Сактон", "Можгасыр", "Ижмаш", "Хлебозавод �1", "Ижмебель", "Сарапульский электрогенераторный завод", огазеяськонъёслэсь, Можга ёросысь "Россия" гурт эштослэсь но Можга городысь акциосын "Красная звезда" огазеяськонлэсь вузъёссэс пусйыны ӵектэмын. Удмурт Республикаысь Правительствоысь пресс-центр. Кизилиос ӝуатско ... нуназе но Шӧдылэмды вань, дыр, макем лыз-лыз чылкыт луэ тулыс инбам! Кин ке сое юромо миське, чеберъя кадь. Собере, ӝытомемъя ин шобретмы вылэ югыр-югыр ӝуатско тазаесь, кужмоесь кизилиос. Инме ке учкиськод, синъёс ик отчы кылё, йыромо. Сыӵе паймымон суред! Уй тылъёс огзэс-огзы гомӟыто, кенжыто кадь. Тулыс дуннеез ӵошатскыса выллем югдыто. Алигес, ӵапак та выллем суредэз адӟизы "Удмуртия" кинотеатре люкаськем адямиос. Ижевскысь Октябрь ёросысь администрация но "Удмурт кенеш" огазеяськонлэн ёросысь ёзэз татын ортчытӥзы угось асьме кырӟанъёслы сӥзем бадӟым фестиваль. Чаклам дырлы залэ сокем трос куноос но артистъёс люкаськизы - дӥсьёсты ошылыны ӵогъёс но уг тырмо ни вал. Шумпотоно: фестивале мылысь-кыдысь лыктӥллям пиналъёс. Италмас, инвожо сяськаос выллем чебересь соос. Азьпаламы пукись арлыдо кышномурт кузпалэзлы сипыртэ: - Вот кӧня асьмелэн ӝужась кизилиосмы! Пӧлазы кӧня, дыр, усточиос! Фестивалез усьтэмен ялыса, театре лыктэмъёсты кырӟан праздникен ӟечкылазы Октябрь ёросысь тӧролэн воштӥсез Н. В. Цыгвинцева но "Удмурт кенеш" огазеяськонлэн татысь тӧроез З. Б. Петрова. Собере ик сцена вылэ тэронтэм трос пото покчиос. 112 номеро нылпи садысь пиналъёс туж быгатыса, йӧно, чупрес кырӟазы "Ми - пичи пиналъёс" кырӟанзэ. Ӧжытак эктыса но вуттӥзы. Соос шулдыръяськыку, зал, зэмзэ но, шӧдскымон югытгес, чебергес луиз кадь. Оло, зэм но, инмысь пичи кизилиос васькиллям дорамы! 112 номеро садысь "тэшкылиосты"-усточиосты вошто анай кылын дышетонъя нылпи садысь-школаысь артистъёс. Школалэн кивалтӥсез О. К. Шилова, быдэс шаермылы ӟеч тодмо дышетӥсь. Татӥяз мӧйыос но курисько ни сцена вылэ. Кыл сётӥзы Нагорный посёлокысь арлыдо нылкышноослэн ансамбльзылы. - Мыным 74 арес тырмиз ни, - тулкымъяськыса вазиське огез артистка. - Сцена вылысен, такем трос калык азьысен, нырысьсэ кырӟасько. Ӧм ке пӧрмытэ, эн серекъялэ, ява... Пӧрмытӥзы! Сыӵе вольыт кырӟало, куараоссы сцена вылэ ӵем потаса "сӧриськемын" ӧвӧл ай. Грамота но сётӥзы, торт но. Огшоры шулдыръяськон гинэ ӧй вал та, ог-огедлэсь дышетскон, удмурт кырӟанлэсь мур пуштроссэ усьтон. Тӥни со ласянь юн шӧдӥськиз фестивальлэн кужымез. Татын ик возьматӥзы егитъёслы нуллыны удмурт дӥсьёсты. Пумиськон мукет ласянь но пайдаё вал, шуыны луоз. Татын адӟиськиз нимазы кырӟасьёслэн - солистъёслэн но будэмзы. Дэмен нёжъяны каньылгес ик, дыр, нош огнад быдэс зал азьын астэ возьматыны... Ӧз, ӧз кышка творчествоя школаысь пичи нылаш Таня Чикова, зыл-зыл кырӟаса лэзиз чылкыт куараеныз "Ой, эсьмаса, эсьмаса" кырӟанэз! Бадӟым тортэн куноятӥзы сое. Мукетъёсыныз ӵошатыса, шӧдскымон яркыт адӟиськиз лымшор пал удмуртъёслэн эктонзы. Жюрилэн кивалтӥсез ваньмызлы тодмо артист Г. С. Корепанов тазьы вакчияк йылпумъяз фестивалез: - Милемлы но, учкисьёслы но тужгес яразы 112 номер нылпи садысь, О. К. Шиловалэн школаысьтыз-нылпи садысь, 11 но 70 номеро школаосысь усточиос, Игерманысь но Нагорный посёлокъёсысь ансамбльёс, синтэмъёслэн "Спутник" клубысьтызы артистъёс, "Черепашка" клубысь удмурт дӥсьёсты возьматӥсьёс но мукетъёсыз. Татын пусъем троссэ коллективъёсты, быгатонзэс ӧжытак волятыса коть туннэ ик лэзьыны луоз ини мукет кунъёсын ортчылӥсь калык куспо фестивальёсы но. Шудо сюрес, выль азинсконъёс тӥледлы!.. Пумиськонын кенешемын табере ёросын арлы быдэ таӵе фестиваль ортчытъяны. Люкаськемъёс азьын кырӟазы куное ӧтемъёс - "Инвожо" калык ансамбльысь усточиос, Драмая удмурт кун театрысь артистъёс Ольга Зорина но Алефтина Корепанова. Фестивале озьы ик ӧтемын вал Удмурт культурая "Дэмен" огазеяськонысь эшъёс. Та бадӟым ужрадэз дасяны, артистъёсты люканы мылысь-кыдысь юрттӥзы "Семья" центрын тыршисьёс, дэменчиос Семен Ильин, Людмила Михайлова, Елена Ботина но мукетъёсыз. Нуиз концертэз Удмурт Республикаысь культура удысысь дано ужась, кылбурчи, мон шуыса зэмос артистка, Милитина Решитько. Маргарита Кузьмина, "Дэменлэн" кивалтоназ быръем кышномурт. ЖУРНАЛИСТЪЁСЫН ПУМИСЬКОНЪЁС Висьыны возьыт - трос но дунтэм эмъюм поттоно Берло аръёсы Россиын но, Удмуртиын но висисьёслэн лыдзы йылэ. Со вакытэ ик эмъюмъёслы дунъёс "пульдӥзы", начармем калык берпум осконзэ, тазалыксэ юнматыны луонлыксэ ыштэ. Кыӵе ужрадъёс чакламын та югдурысь потон вылысь? Со сярысь журналистъёслы мадиз Удмурт Республикаысь Правительство бордын Аптекая управленилэн кивалтӥсез Николай Александрович КАЗЮЛЬКИН. - Удмуртиын туннэ нуналлы эмъюм вузанъя 400-лэсь уно пӧртэм предприятиос но организациос кылдэмын. Со пӧлысь 22-ез - нимаз кузёослэн. Миым август толэзёзь Россиын 1500 пала пӧртэм пумо эмъюмъёсты вузало ке вал, коньдонъя югдур уродмемен, та лыдпус шуак кулэсмиз. Странаямы поттэ эмъюмъёс 2 пол дуноязы, нош сьӧрлось ваемъёсыз 3-4 пол. Со сяна, мукет кунъёсысь фирмаос нырысь коньдон курыны кутскизы (август толэзёзь 70 процент ваем эмъюмъёслэсь 70 процентэзлы коньдон берло тырылӥзы). Озьы асьмеос "пилиськем тусь доры кылим - палэнысь эмъюм вайыны дуно, асьмелэнъёсыз ӧвӧл. Таӵе югдур шунды пуксён пала учкисьёсты сазёмытӥз: пыдесъяськыса улоно ӧвӧл, асьме дорын эмъюм дасяно. Кылсярысь, турын куар бичаны-куасьтыны но солэсь эмъюм дасяны луоно Удмуртиын но. Басьтом Красногорск ёросэз ик. Со котырысь инкуазь чылкыт на, ужлы ёрмись но уно. Москва палась ваемезлэсь асьмелэн эмъюммы кык поллы дунтэмгес усёз. Югдур со бордын но ай: эмъюм висись доры вуытозь, со трос ки пыр ортче, ваись-вуттӥсь котькуд ёз, аслыз барыш поттон понна, дунзэ будэтэ. Табере Россие вуись вань эмъюмъёс пусйисько. Москваын но, Ижын но одӥг эмъюмлэн дуныз трослы уз висъяськы. Дунъёсты ми эскерыса возиськом, - пусйиз Николай Казюлькин. - Сюлмаськытэ больницаосын югдур. Отысь кивалтӥсьёс эмъюм асьсэос басьто, пичи люкетэн, кин кытысь шедьтэ, быгатэ. Ӟечлыкез эскерисьёссы ӧвӧл. Та ласянь малпаськиськом. Дунтэмгес усьысал, бадӟым партиен басьтыса, сое люкылыын. та ужез государство ласянь радъяно. Соку ваньмыз адӟиськоз, кытчы кӧня кондон кошке, урод эмъюмлы но сюрес пытсаськоз. Мукетыз ужпум. Али котькуд ньылетӥ адямилэн дунтэмен эмъюм басьтыны правоез вань. Самой ичизэ вераса, та льготаос понна 300 миллион манет кулэ. Нош бюджетлэн вань ёзъёсаз туэ 50 миллион манет гинэ чакламын. Соин ик таӵе юрттэт нырысь ик сётоно самой куанеръёсызлы, кинлэн эмъюмтэк улэмез уг луы (сахарной диабет, туберкулёз, гемофилия, рак, куд-ог сюлэм висёнъёсын курадӟисьёс но мукет). Берло аръёсы эмъюмъёслэн ӟечлыксы лябӟе, кызьы вераз Казюлькин, шаерысь аптекаосын тыршисьёс араз 6 сюрслэсь уно анализъёс лэсьто. 1995-тӥ арын ӟечлыкезлы ӧз тупа ке 0,65 процентэз эмъюм, кылем арын та лыдпус 1,46 процентозь вуиз. Болгариысь, Польшаысь но Россиысь куд-ог фирмаос лушкем эмъюм дасяло, урод вуз Китайысь но вуэ. Асьмелэн эмъюммы Франциысь яке США-ысь ваемезлэсь улӥын ӧвӧл (куронъёс отын но, татын но огкадесь - чурытэсь), нош дунызъя кытӥяз 10 пол но дунтэм. Соин ик палэнысь дядяйлы трос оскиськоно ӧвӧл, асладэз сярысь нырысь ик аслыд сюлмаськоно. Вань эмъюмъёс пӧлысь 63 процентсэ али Россия ачиз поттэ. Кызьы ивортӥз аптекаослэн кивалтӥсьсы, льготаосъя юрттэт, туэ нырысетӥ 3 толэзь ӵоже миым декабрен ӵошатыса, 3 поллы йылӥз. Озьы ке но, со туж ичи. Тросэз висё, курадӟо, эмъюм басьтыны коньдонзы ӧвӧл. Ӵошатэ асьтэос. Россиын адямилы быдэ 12 доллар тыр эмъюм мынэ, США-ын - 187, Япониын - 245 доллар тыр. Верано на созэ но: асьмелэн висёнэз эмъяло, нош соос висёнлы сётсконтэм понна эмъясько, витаминъёс, пӧртэм минералъёсын узыр ватсэтъёс басьяло. Угось висьыны отын возьыт, висьыса ыштод уж интыдэ но, оло, шуддэ-бурдэ но. Мед пыӵасал асьмелы но таӵе сям. Г. ЮСАЕВ. 30 ар ӵоже 1969-тӥ арын республикаысьтымы В. И. Ленин нимо библиотекаын кылдытэмын вал шаерез тодонъя ёз. 1997-тӥ арысен шаерез эскерон удысын ужало кык ёзъёс: шаерез тодонъя но финн-угор литературая, йӧскалык но кун библиографияя. Та ёзъёслэн фондазы туннэ 50 сюрс экземпляр книгаос. Татчы люкасько элькунамы потӥсь ваньмыз документъёс, удмурт авторъёслэн пӧртэм интыосын но пӧртэм кылын печатласькем ужъёссы. Бичаны кутскемын Венгрилэн, Финляндилэн, Эстонилэн ортчем сюрессы, культуразы сярысь книгаос. Революцилэсь азьвыл потэм книгаос библиотека понна туж дуно луо. Соослэн лыдзы 1000 пала вуэмын. Шаерез тодон ёзэ ик люкасько ваньмыз Удмуртиын потэм газет-журналъёс. Нимысьтыз фонд кылдыто картографияя изданиос, тодмо тодосчиослэн книга люкамъёссы, Удмуртиысь крезьгурчиослэн нотаосынызы архив, автографъёсын книгаос. Аудио-визуальной фондэз кылдыто грампластинкаос, аудио, видеокассетаос, микрофильмъёс но слайдъёс. 1995-тӥ арын кылдытэмын инттелектуальной собственностез утёнъя фонд. Лыдӟисьёслы кулэ иворез но книгаос утчаны юрттэ каталог. Татчы пыртэмын пӧртэм лыдӟиськоннниослэн, музейёслэн фондъёссы. Электрон каталог кылдытэмын 1993-тӥ арын. 1960-тӥ арысен потэ "Удмурт Республикаысь печатьлы летопись", 1961-тӥ арысен - тодмо нуналъёсъя календарь. 30 ар ӵоже потӥзы 50-лэсь трос пӧртэм пумо библиографияя указательёс. 1998-тӥ арын дасямын "Удмурт национальной библиография" электрон сборник, отчы пыризы библиографияя таӵе ужъёс: "Ашальчи Оки" (люказы Л. И. Егорова, Л. Г. Кондратьева), "Мултан уж" (А. В. Захарова), "Удмуртия сярысь картографияя изданиос" (Л. Г. Кондратьева), "Удмурт кылтодон" (Л. И. Егорова, Ф. Н. Тамбовцева, М. В. Богомолова). Туннэ шаерез тодонъя но финн-угор литературая, кун библиографияя ёзъёс ужало "Память Удмуртии" (Удмурт Республикаын печать удысысь памятникъёслэсь огъя национальной фондзэс кылдытон но утён) программая. Шаерез тодон, со сярысь иворъёсты вӧлмытон - ёзъёслэн ужазы одӥгез кулэ луись ӧр. 15 ар ӵоже библиотекаын ужа "Удмурт шаер" клуб. 30 ар - со милям ужасьёсмы понна гинэ шумпотон ӧвӧл, со быдэс шаермылэн данъяськонэз. Н. Пчеловодова, Национальной библиотекаын ужась. ПОЛИТИКА Кин кулэгес бырйисьлы? Кун Кенеше депутат быръеммы дырысен кык толэзь луоз ни ке но, та сярысь вераськон весь азьланьтӥське на. Адямиос озьы но, тазьы но эскеро йылпумъянъёсты, отысь маке но законлы тупасьсэ утчало, паймоно учыръёсты сэрттыны-пертчыны выро. Зэм но, малпаськыны мугез вань. Ойдолэ учком Восточной округъя (отчы пыро Ижысь 9-тӥ Январь урамысь юртъёс). Мон сямен, со ог ласянь аспӧртэмлыко луэ, мукет ласянь - музонъёсызлэсь сокем ик уг висъяськы. Мандат понна татын дас мурт нюръяськиз. Кинъёс бен соос? Пӧлазы котькинэз вал - бырйы кельшисьсэ: егитъёслэн азьветлӥсьсы (бигер нылаш), военком (удмурт), автомобильёслы воштос ёзъёсын вузкарись магазинъёслэн кузёзы (Удмуртской урамысь "Эльдорадо" фирма вадьсысь пуктэм бадӟым щитысь мыньпотӥсь егит пиез адӟылэмды вань-а?), "Буммаш" заводлэн кивалтӥсьёсыз пӧлысь одӥгез, воинской частьысь квартираосын вырись начальниклэн воштӥсез, Инженерной академилэн ректорез (профессор), Культурая училищелэн директорез, Кун Кенешлэн депутатэз (адвокат), городысь юртъёсы шуныт сётӥсь предприятилэн кивалтӥсез но Правительствоысь улон коркаос лэсьтонъя фондлэн директорез. Тӥни сыӵе тугоко. Тужгес егитэзлы - куамын кык арес, мӧйыэзлы - витьтон кык. Промышленность, ужбергатон, кивалтон, культура, общественной огазеяськон - ваньмыз сямен удысъёс вань. Кандидатъёс ужазы быгатэмзыя. Кин ке квартираостӥ ветлӥз, кин ке арнялы быдэ сямен почта ящикъёсы ӧтёнъёсын но ӟечкыланъёсын открыткаос, газетъёс тыризы, кин ке быръён кампания кутскемлэсь данаклы азьло адямиосты врачъёс доры черодэ пуктӥз... Тужгес шаплыосыз кӧязы-вӧязы округе пырись школалэсь директорзэ - уго со бордысь потэ анай-атайёслэн кудпала кариськемзы. Март пумын ваньмаз сямен классъёсын собрание ортчытӥзы, отын депутатэ кыкез-куинез кандидатъёс тодматӥзы программаосынызы. Школалэн кивалтӥсьёсызлы, валамон ни, дуногес потӥз шуныт сётӥсь мурт - уго соос арлы быдэ курадӟо, корт гумыос пасяськылэмен, соин сэрен дышетонэз но уретылоно луэ. Кыӵе пӧрмизы йылпумъянъёс? Депутатлэсь мандатсэ ас кияз кельтӥз адвокат Михаил Кокорин (Ӟуч культурая обществолэн кивалтӥсез, данэ потэмын асьме калыкез "яратэменыз".) Табере сое бырйизы Кун Кенешысь ялан ужась комиссилы тӧрое. Маин бен бордаз кыскиз бырйисьёсты та адями? Мон малпасько, калыкен вис карытэк ужаменыз но прессаын ялан возьматскылэменыз. Асьмелэн кыӵе-о тырмымтэмы? Лэсьтэмзэ возьматыны ум быгатӥське. Шараяны луонозэ но ватыса возиськом, ойдо адямиос сотэк но адӟозы-синйылтозы ай, кожаськом. Нош мукетъёсыз копейка тыр маке лэсьто но манет тыр возьмато. Озьы дауртэмзы соослы пайдаен берытске - бырйисьёслы сыӵе адямиос тодмогес луо уго. Калык оскиз бере, Михаил Кокорин бырйисьёсызлэсь куронъёссэс уз вунэты шуыса малпалом ни. Мед ужалоз. Кыкетӥ луиз "выль ӟуч" - Александр Кузнецов, ужбергатӥсь. Кылемъёссэ куараосты куспазы быдэн 300-ен-400-ен люкизы мукетъёсыз кандидатъёс. Удмурт полковник понна 325 мурт луиз. Буммашысь "хрущёвка" шуон юртъёсын асьме выжыос ичи ӧвӧл ке но, тросэз оло тодымтэенызы, оло мукет муген военкомлы дурбасьтыны ӧз дыртэ. Учёноез но культура удысысь ужасез бырйымтэзы возьматэ, творческой интеллигенцилэн данэз калык пӧлын туж куашкамын шуыса. Малы ке но малпасько вал, шуныт ву сётӥсь предприятилэн кивалтӥсез вормоз шуыса - уго ваньмы ик асьмеос ёрмиськом шунытлы. Озьы ӧз луы. Щелконогов эш (нялтас вераса, учкымон, йӧн-йӧн воргорон), вормисен ӵошатыса, куинь пол ичи куара люказ. Азьланьын ми куд-ог мукет округъёсъя но югдурез чаклалом на. Кулэ, дыр, та ужез азинтыны - уго уд но шӧды, быръён вакыт нош вуоз. И. ЛЕБЕДЕВ. Шунды Кивалтӥсьёс егитъёсты уг палэнто 28 мае Дуннеысь егитъёс пусъё асьсэлэсь нуналзэс. Кызьы пумитало сое шаерысьтымы егитъёс? Вань-а улоназы умой пала воштӥськонъёс? Со сярысь вераськиськом Удмурт Республикаысь Егитъёсын ужанъя кун комитетлэн тӧроезлэн воштӥсеныз Галина Александровна Юсуповаен. - Берло 3-4 арзэ шаерамы егитъёсын югдур тупатскиз, шуысал мон. Егитъёсъёслэсь сюлмаськонъёссэс валало ини ёрос администрациос - соос али егитъёсын ужанъя отделъёсын огкылысь ужало, бюджетазы нимысьтыз чаклало егитъёслэсь программаоссэс азинтонлы коньдон висъяны. - Умоен шӧдӥське, дыр, Егитъёс сярысь законэз кутэм но. Вань-а луонлык сое быдэсъяны? - Бен. Ӟечгес ужаськом общественной огазеяськонъёслы юрттэт сётон но "Удмуртиысь егитъёс" программаез улонэ пыӵатон бордын. Та программа вылэ пыкиськыса но ёросысь егитъёслэсь сюлмаськонъёссэс лыдэ басьтыса, котькудаз ёросын асьсэос программа дасяло. Малы со кулэ? Егитъёс но быдэ вуымтэос бадӟым улонэ выжыкузы медаз йыроме, медаз сӧриське шуыса. Туала улон уго котькинэ куаса, соин ик пинал дырысен ас визьмыныд улыны дышетсконо. Егитъёс но быдэ вуымтэос туж кулэясько врачъёслэн, психологъёслэн но юристъёслэн юрттэтсылы, шугъясько школа бере дышетсконзэс азьланьтыны, уже интыяськыны, ваньмон дырзэс радъяны, нош егит кузпалъёс - улон интылы но мукет. Тӥни сыӵе ужпумъёс бордын нырысь ик ужало ёросъёсысь отделъёс. - Вань ик шат али егит семьяослы улон инты басьтыны яке корка пуктыны льготая ссудаос висъясьёс? - Вань. Умой югдур Вотка, Балезино но куд-ог мукет ёросъёсын. Сыӵе юрттэт сётон чаклаське программая. Тани Яр ёросын егитъёс пӧлын юалляськон ортчытыса тодмо луиз: тужгес но секыт югдуре шедемын егит кузпалъёс. Соин ик со ужпумез программазылэн нырысетӥ люкетаз пыртӥзы. Балезиноын берло аръёссэ шуак йылӥзы быдэ вуымтэос но егитъёс пӧлын асьсэды быдтон учыръёс. Соин ик татын быдӟымгес саклык висъяло психологен ужанлы. Куд-огаз ёросъёсын кылдытэмын нимысьтыз центръёс. Отчы вазиськыса, егитъёс юрттэт курыны быгато врачъёслэсь, юристъёслэсь, уже интыянъя службалэн кивалтӥсезлэсь но мукет. - Центре ӵемгес вазисько, луоз, райцентрын улӥсьёс, нош кыдёкысь гуртъёсысь егитъёс озьы ик палэнэ кылё? - Центрын ужасьёс калыклэн куремезъя потаны быгато кыдёкысь гуртъёсы но. Мукетыз ужпум - пичи гуртъёсысь егитъёслэн ас вакытазы улэмзы. Кулэ вылэм соосты огазеясь, ӝуткась. Ёросысь отдел котькуд гуртэ, котькуд егит мурт доры уз вутскы, соин ик умой луысал, гуртысь администрацилы быдэ егитъёсын ужанъя инструктор пуктысалзы ке. Мед луоз со зэмос азьветлӥсь, егитъёсын ужаны быгатӥсь, адӟем карымон адями. Но солы сётыны кулэ пичи ке но уждун - соку ужез шоры чиньы пыр уз учкы. Тани Алнаш, Можга, Шаркан, Пичи Пурга, Яр но Глазов ёросъёсын шедьтӥзы сыӵе луонлык. Ужзылэн пайдаез син азьын: кулэсмо йыртэман но йыруж лэсьтон учыръёс, егитъёс тунсыко но пайдаё ортчыто ваньмон дырзэс, дӥсьтысагес вазисько ини пӧртэм специалистъёс доры. - Праздник азьын нимысьтыз пусъемды уг поты-а егитъёсын тужгес но мыло-кыдо ужасьёстэс? - Котькуд ёросын туж умой но тунсыко ужало. Ялан маке но выльзэ утчало, вань кужымзэс сётыса тыршо Андрей Иванов (Яр ёрос), Владимир Соловьев (Алнаш ёрос), Игорь Краснов (Сарапул ёрос), Николай Трегубов (Глазов ёрос), Инна Зотина (Глазов город) но мукетъёсыз. Егитъёслэн нуналэнызы ӟечкыласько ваньзэс: егитъёсты но, егитъёсын ужасьёсты но. З. Рябинина. Журналистъёсын пумиськонъёс Визь сузьтӥськоз гур вылозь но Удмурт кун университетын 1998-тӥ арын май толэзе кылдытэмын вал Дистанционной дышетонъя институт (ИДО). Туэ солы ар тырмиз. Та дыр куспын кыӵе азинсконъёс лэсьтӥз институт? Кинъёс отын дышетско но малы? Та но мукет трос пӧртэм юанъёслы журналистъёслы валэктонъёс сётӥзы Удмуртиысь Журналистъёслэн сюзазы радъям пресс- конференциын институтлэн директорез Ильгизар Зинурович Юсупов но солэн воштӥсез Валерий Васильевич Дынин. Олокыӵе но йӧспӧртэм институтъёс ми понна ӧвӧл шуыны эн дыртэ, гажано гуртоос. Ӵапак Ижевсклэн палэназ улӥсьёслы тупамон татын пӧртэм специальностьёсъя вылӥ тодон- валанъёс басьтыны. Ужзылэсь вис карытэк дышетскисьёс толэзьлы сессие кошкыкузы сюлмаськыса пуко: кызьы ай гуртын уло мынам семьяосы, кин пудо котырын берга? Нош улон инты понна, сюрес дунлы кӧня коньдон кошке? Ваньзэ сое лыдэ басьтоно ке, выль амалэн дышетскон пайдаен гинэ берытскоз. Нош очно амалэн дышетскон туала вакытэ дунтэм шат? Ярам, котькудаз ик вузъёсын коньдонэн уг дышето на. Но ваньмыз-а быгато сыӵе азьёсы пырыны, уката ик гуртъёсысь пиналъёс? Палэнэ кошкем нылдэ-пидэ дӥсян, сюдон, улыны интыян, уен-нуналэн сюлмаськон - ваньзэ сое маин мерталод? Со ласянь учконо ке, Дистанционной дышетонъя институт палэнын улӥсьёс понна дорын пукыса вылӥ тодон-валан басьтон луэ. Эсьма, пытсэт сьӧрын пукыса но вылӥ тодон-валанэн специалист луыны быгатоз. Мар бен со сыӵе? Институтын дышетскыны мылкыд карись студент нимаз-нимаз предметъёсъя тодон- валанъёс басьтэ электронной амалэн гожтэм учебникъёсысь но дышетскон пособиосысь - компьютер пыр. Студент ачиз чакла кытын солы дышетскыны: дораз аслаз компьютереныз яке районъёсысь нимысьтыз кылдытэм дышетскон центръёсын. Озьы ик котькудӥз аслаз быгатонлыкъёсызъя чакла, кӧня ар дышетсконэз кыстӥськоз. Шуом, шор ёзо школаез йылпумъямъёслы, вылӥ образование басьтон понна, 50 предметэз ортчоно, котькуд аре - 10 предмет. Кин куинь ар куспын дышетсконзэ йылпумъялоз, нош кудӥз вить арлэсь но ятыр дышетскоз. Адями висьыны усиз яке коньдонэн шуг-секытъёсыз кылдӥзы - уллясь сое уз луы. Одӥг предметэз дышетон понна туннэ нуналлы араз тыроно 476 манет. Районъёсысь дышетон центръёсысен ке институтэн кусып тупатӥське, со понна коньдон уг басьтӥськы. Нош нимаз компьютер возисьёс ватсаса коньдон тыроно луо электронной почта понна. Туннэ нуналлы Вис карытэк дышетон центръёс (Центры непрерывного образования) кылдытэмын ни Вавожын, Дэбесын, ӝоген усьтӥськозы Сарапулын но Глазовын. ИДО-ысь кивалтӥсьёслэн верамзыя, азьланяз сыӵе центръёс шаерысьтымы вань районъёсын усьтӥськозы. Нош, шуом, шарканъёслэн али ик ини дышетскыны мылкыдзы вань. Соос дышетскон программае пырыны быгатозы гуртысьтызы, районысьтызы кыӵе ке но компьютер пыр. Туннэ нуналлы ИДО-ын дышетске ни 600 студент, 400-эз соос пӧлысь - гуртъёсысь. Институтын тодон-валанъёс басьтыны луэ таӵе специальностьёсъя: "Менеджмент", "Финансъёс но кредит", "Бухгалтерской учет но аудит", "Юриспруденция", "Мировой экономика", "Экономика но ужлэн социологиез", "Государственной но муниципальной кивалтон", "Коммерция". Азьланяз дышетон радъямын луоз педагогикая, психологияя, дизайнъя, кунгож кылъёсъя. Кинлэн вылӥ образованиез вань ни, кыӵе ке выль специальность басьтон понна, ӧжытгес предметъёсты дышетоно луоз. Электронной амалэн дышетсконлэн ӟечлыкез со бордын но. Учебникъёсы тупатонъёс пыртыны луэ туала куронъёсъя, студентъёслы тодон-валанъёс сётозы странаысьтымы но шаерысьтымы валтӥсь специалистъёс, учёнойёс. ИДО кусып тупатӥз ни Экономикая, статистикая но информатикая Москваысь кун университетэн (МЭСИ), озьы ик странаысьтымы мукет валтӥсь вузъёсын. Выль сямен дышетскон амал искемъёсын висъя студентэз но преподавателез, озьы ке но, ог-огзэс адӟытэк соос уг уло. Преподавательёс асьсэос потало районъёсысь дышетскон центръёсы. Кызьы вераз Ильгизар Зинурович: "ИДО-ын дышетскись студент котькыӵе мукет вузъёслэн дасям учебникъёссыя тодон-валанъёс мед басьтоз, но кыл соос понна кутӥськом ми, дышетскем сярысь диплом но милесьтым басьто." Котькудӥз студент экзаменъёс сётыны ветлэ аслаз преподавателез доры. Но экзамен азьын соиз яке таиз предметъя аслэсьтыз тодон-валанъёссэ эскере нимысьтыз дасям тестъя. Умоен пыр потэ ке сое, экзамен сётыны луоз. Нош янгышанъёсыз ке вань, выльысь бугыръяське на электронной учебникъёсын. Дистанционной амалэн дышетскон понна компьютерен ужанэз нимысьтыз тодэм кулэ ӧвӧл, пе, со понна тырмыт кӧня ке кнопкаез тодэм. Та институтын дышетскыны мылкыд карисьёс куриськон гожтыны быгатозы быдэс ар ӵоже, экзамен чот нимысьтыз тест пыр ортчоно. Тӥни озьы, тодон-валан дуннелэн паймымон тодметъёсыз гуртоос пала но сузьтӥськыны туртто. Ӟуч калык выжыкылысь Емелялэн чорыглы вазиськемез музэн, тодон-валан борды кыстӥськисьёс шуыны быгатозы: "Чипейлэн косэмезъя, мынам малпамея, шуныт гур вылам пукыса но, экономист мед луо вал". Нош кинлэн ке ужбергатӥсь яке юрист луэмез потоз. Л.Малых. Шунды Конкурс "Вож тулкым" Удмурт егитъёслэн "Шунды" дэменлыксы 8-тӥ-11-тӥ классъёсын дышетскись пиналъёс понна "Вож тулкым" лагерь ортчытэ. Отчы люкасько инкуазен эшъяськись пиналъёс. Лагерьын тӥ быгатоды трос выль тодон-валан басьтыны: тодматскоды инкуазез эскерон амалъёсын, адӟоды шаермылэсь чебер интыоссэ. Удмурт кун университетысь дышетӥсьёсын ӵош ветлоды пӧртэм экскурсиосы, быдэсъялоды научной ужъёс, тодматскоды выль эшъёсын. Лагере мынон понна, таӵе юанъёслы валэктон сётоно: 1. Мар тӥ тодӥськоды удмуртъёслэн вӧсяськон сикъёссы, сямъёссы сярысь? Вань-а сыӵе сикъёс тӥляд гуртты котырын? 2. Кыӵе пайда вае лобась шыр? Кыӵе лобась шыръёс пумиськыло асьме шаерын? Уло-а тӥ котырын лобась шыръёс? 3. Мар тӥ возьмаськоды экологической лагерьлэсь? Фамилидэс но нимтулдэс, кыӵе классын, школаын дышетскемдэс, кыӵе огазеяськонэ пыриськемдэс, озьы ик "Вож тулкым" лагерьын кыӵе арын шутэтскемдэс пусйыса (вань ке шутэтскемды), гожтэттэс 20-тӥ июнёзь ыстэ таӵе адресъя: 426051, Ижевск город, Советской урам, 1. "Шунды" дэменлык. Юалляськоно таӵе телефонъя: 51-07-96. "Шунды" дэменлыклэн правлениез. Россия Федерацилэн кун наградаосыз пусъён сярысь Россия Федерацилэн Президентэзлэн Указэз Кун азьын вормонъёссы, ваньбур поттон удысын ӟеч тыршемзы но калыкъёс куспын эшъяськонэз но ӵош ужанэз юнматонын бадӟымесь азинсконъёссы понна пусъёно: Почёт орденэн Медведев Борис Александровичез - Удмурт Республикаысь Ижевск городысь акциосын "Агрохолодмаш" огазеяськонлэсь валтӥсь директорзэ, Суставов Георгий Александровичез - Удмурт Республикаысь "Глазовская" тылобурдо вордон фабрикалэсь директорзэ, Эшъяськон орденэн Варламов Владимир Сергеевичез - Удмурт Республикаысь Вотка ёрослэсь интыысь аскивалтонъя тӧрозэ. Россия Федерацилэн Президентэз Б. Ельцин. Москва, Кремль, 1999 арын 18 апреле. � 505. Вашкала городлы - вашкала ним Россиысь Кун Дума воштӥз Новгородлэсь нимзэ. Табере сое Великий Новгород, пе, шуоно. Сыӵе ужпумез Дума 356 куараен юнматӥз. Пумит луиз 2 адями, 2 мурт возиськиз. Бомбаос - йӧ вылэ Россиысь ВВС-лэн ож вакытэ кутӥськыны чаклам авиациез Лена но Вилюй шуръёсын бадӟым йӧослэсь ӵыпет вылэ бомбаос куялоз. Сыӵе ивортон лэсьтӥз ИТАР-ТАСС-лэн корреспондентэзлы ВВС-лэн пресс-службаяз ужась полковник Александр Дробышевский. Со понна кӧня ке СУ-24 самолёт интыямын Якутск городлэн аэродромаз. 150-250 килограммъем бомбаосты вуттӥз бадӟым ИЛ-76 самолёт. Ассэ быдтэмез ӧз луы Алигес Москваысь Красной площадьысь Мавзолей дорын ӝегатэмын "Волга" автомобиль. Машинаез котыртӥзы ГИБДД-ын ужасьёс. Кияз бензинэн арбери возьыса, водитель правоез утисьёслэсь куриз иворъёсты вӧлмытонъя ёзъёсын ужасьёсты ӧтьыны. Со журналистъёслы секыт улонэз сярысь ивортыны малпа вал. Интервью ӧз ке, пе, пӧрмы, асме ачим суто. Правоез утёнъя ёзысь одӥгез ужась ассэ журналист шуэмен, шофёрез машинаысь поттыны луиз. Йыруж лэсьтӥсез кырмыку, со бензинэн канистраез ӝуатыны вуттӥз. Спецслужбаын ужасьёс тылэз чаляк кысӥзы. Ӝегатэм адями Краснодарын улӥсь, нокытын ужасьтэм мурт вылэм. Али со Склифосовский нимо институтлэн эмъян интыяз кылле. Иворъёсъя национальной служба. Пӧйшурасьёс понна Кемалась ик ӧвӧл печатьысь потӥз "Магнум" журналлэн нырысетӥ номерез (Москва). Выль издание маде Россиын но кунгож сьӧрын пыӵал тӥрлык поттон удыслэн азинскон сюресэз но туннэ нуналыз сярысь. Нырысетӥ номерын ик бадӟым инты висъямын Ижевскысь кибашлыослы. Кылсярысь, рос-прос верамын "Ижмаш" огазеяськонын пӧйшурасьёслы "Медведь" карабинэз выльысь поттыны кутскем сярысь. "Вунэтэм пыӵал тӥрлык" люкет сӥземын Ижысь механической заводлэн продукциезлы, одӥг гумыё Иж-5 пыӵаллы. Ижевск пыӵал тӥрлык поттонъя Россиын азьветлӥсьёс пӧлын, озьыен, малпасько, предприятиосмылэсь продукцизэ вузанын но вӧлмытонын "Магнум" шӧдскымон инты басьтыны кулэ. В. Васильев. Шунды Йырад кеньырез вань ке... Вавож шор ёзо школаын бадӟым классъёсын дышетскись пиос технологияя проектъёссэс утизы. Со понна егитъёс бырйизы технологилэсь пу арбериос лэсьтонъя люкетсэ. Кибашлы луэмзэс, тодон-валанъёссэс шараяса соос дасяллям книга ӝажыос, шкафъёс, ошетъёс... Но дась арбериез возьматыны - со ичи. Лыдэ басьтӥськиз пиослэн тӥрлыкен ужаны пӧрмытэмзы но, арберизылэсь кызьы но ку кутӥськемзэ валамзы но, солэсь асдунзэ но вузан дунзэ пуктыны быгатэмзы но. Таӵе ужрад Вавож ёросын нырысьсэ ортчиз. Радъяз сое ужъя егит дышетӥсь С. В. Банников. Пусйымон соиз но: ёросын ужъя дышетӥсьёс пӧлын со кадь вылӥ образованиен, нырысетӥ категориен дышетӥсьёс чиньыен лыдъямон. Трудовикъёс быгатэмзыя тыршо пиналъёслы улонын нуналмысь кулэ луись тодон- валанъёсты сётыны, профессиослы дасяны. Тани ёросысь таӵе дышетӥсъёслэн методобъединенизылэн планэзъя кыкетӥ арзэ ини ортчиз тракторез нуллыны быгатонъя олимпиада. Туэ отчы пыриськизы 8 школаосысь быдэн 2 пиос. Ушъямон тодон-валанъёссы но быгатонлыкъёссы Тыловылысь, Волипельгаысь, Вавожысь школаосын дышетскисьёслэн. Нош устоосыз пӧлысь устоез луиз Тыловыл школаысь Алексей Скобелев. В. БОГАТЫРЕВА. Шунды Кытын? Ку? Ма? ? Егитъёслэн нуналзылы сӥзьыса шаерамы пӧртэм ужрадъёс ортчозы. Егитъёс люкаськылозы кенешъёсы, пыриськозы турслётъёсы но спорт ӵошатсконъёсы. ? Ярын ортчоз мотопробег, куспазы ӵошатскозы агитбригадаос. ? Глазовын дасясько рок-марафонлы. Со сяна, радъямын луоз юристэн, наркологен, егитъёсын ужанъя биржалэн кивалтӥсеныз меӵак телефон. ёросысь азьветлӥсь егитъёсты ас дораз ӟечкылалоз администрацилэн тӧроез. ? Алнашъёс туэ ёроссылы 70 ар тырмонэз пусъё. Солы сӥзьыса, егитъёс пӧлын КВН ортчылӥз. Егитъёслэн нуналазы тужгес но кужмо командаос йылпумъясь шудонэ пыриськозы. ? Дэбесысь егит семьяос асьсэлэн фестивалязы люкаськозы. Нош Можга ёросысь егитъёс кырын шутэтскыны малпало. Егитъёслэн нуналазы соос палаткаослэсь городок лэсьтозы, отын пӧртэм ӵошатсконъёс но шулдыръяськонъёс ортчытозы. Йыг-йыг сыло Фермеръёслэн лыдзыя Завьял ёрос республикаямы одӥгез бадӟымез луэ. Гурт удысэз нимаз амалэн нуонлэн пайдаез шӧдӥськытэк ӧз кыльы. Тужгес но умоесь азинсконъёс басьтэмын ю-нянь но бакча сиён будэтонын. Кылсярысь, кылем арын крестьян (фермер) хозяйствоос, эштосъёс но акционер огазеяськонъёс сярысь бакча сиён но картофка шӧдскымон тросгес басьтӥзы. Районын та вакытэ 374 фермер хозяйство лыдъяське, соослэн 6082 гектар гыроно музъемзы. Со пӧлысь ю тысьлы, картофкалы но бакча сиёнъёслы висъяське ог вить сюрс гектарез. Нош бадӟым-а инты басьто крестьян хозяйствоос огъя ваньбур поттонын? Ёросъя соос ог куать процентсэ сёто. Экономика ласянь югдур туэ но ушъяськымон ӧй вал. Но тулыс бусы ужъёслы фермеръёс умой дасяськизы. Шӧдӥськиз государстволэн минерал сылалъёсын но эстӥськонэн юрттэмзы. Кулэяськонлэн со одӥг куиньмос люкетэз гинэ луэ ке но, шӧдӥськытэк ӧз кыльы. Ньыльдон вить дизельёс пӧлысь тупатэмын 35-ез, 98-эз колёсаен трактор пӧлысь бусые потӥз 70-эз, 76 автомобиль пӧлысь ужаны дась вал 57-ез. Таин ӵош вераны кулэ тани ма сярысь но. Уноезлэн фермеръёслэн техниказы вуж ини. Сое хозяйствоосысь потыкузы пай интые сётӥзы вал. Соин ик ваньзэ сямен техникаез выльдоно-тупатъяно луиз. Солы трос коньдон быдтэмын. Нош выль машинаос сярысь вераськонэз ик ӧвӧл. Лизингъя (коньдонзэс бӧрысь тырыса) но выль техника басьтыны луонлык ӧвӧл, дунъёс бадӟымесь. Кизёнлы уг тырмы вал 75 тонна кидыс. Но фермеръёс дасьсэ возьмаса ӧз пуке. Сое палэнысь басьтӥзы яке маин ке воштӥзы. Кизёнзэс нырысьёсыз пӧлын йылпумъязы Бабино гурт администрациысь музъем ужасьёс. Отысь фермеръёс уноез али огазеяськыса ужало. Озьы ик уртче ужазы Подшивалово гурт администрациысь крестьян хозяйствоос. Бере ӧз кыле "Троицкое" огазеяськонын но. Огкылын вераса, ужез гажась фермер пыд йылаз йыг-йыг сылэ, хозяйствозэ ялан азинтэ. Нош капчиезлы оскись фермеръёс уноез "ӝуазы" ни вакытлы. Н. Иванов. ЛЫДӞИСЬЁС ГОЖТО Сюлэмвисён вунэ... Можга ёросысь Вуж Юбера гуртэ ветлӥзы ми пала ноку вуылымтэ артистъёс - Пичи Пурга ёросысь Эдэйгуртысь "Арганчи" ансамбльысь усточиос. Ваньзы нылкышноос-арганчиос. Одӥг кырӟан бере мукетыз чузъяськылӥз. Огезлэсь мукетыз шулдыр. Трос концерт адӟи вал ини, нош таиз кадез ноку ӧй вал на. Ваньзы сыӵе усто быгато кырӟаны но, арганэн но шудыны. Нош кивалтӥсьсы кыӵе быгатэ залысь калыкен ваче кусып возьыны - Екатерина Леонидовна Антоноваез ассэ гинэ но адӟиськод ке, сюлэм бурдъяське ини. Ансамбльысь вань артистъёслы туж-туж бадӟым тау кареме потэ, сыӵе шулдыр ӝыт кузьмамзы понна. Залэ трос калык ӧз люкаськылы ке но, мылкыдзы ӧз куашка. Аслам сюлэмы ик шымыраз, адями ӧжыт шуыса. Концерт дыръя мылкыд сыӵе вал: сьӧразы коть ачид арган кутыса поръя. Азьланяз но таӵеесь ик мед кылёды! Паськыт сюрес, капчи мылкыд, тазалык тӥледлы, йыр вадьсады - чагыр инбам. Калыклэсь сюлэмвисёнзэ вунэтыны юрттэмды понна, асьтэлэн сюлэмвисёнды ноку медаз луы. Малпасько, сюрестэ ми пала одӥг лёгиды бере, уд вунэтэ ни. Нош ми али ик малпаськом выль пумиськон сярысь. Тамара АЛЕКСЕЕВА. Можга ёросысь Вуж Юбера гурт. Маин соос пӧртэмесь асьмелэсь? Россимы понна вуиз секыт вакыт. Экономикаын но политикаын урод югдур зӥбе котькудмес, уксё ӧвӧлтэмен гинэ уг ултӥя, номырлы ярантэм арберилы, нымы-кибылы пӧрмытэменыз, адямилэсь лул-сюлэмзэ но асдунзэ валанзэ пачкатэ. Сыӵегес ик югдуре шеди мон но аслам ужпумъёсыным котыртэмысь потыны нокыӵе сюресэз уг ни адӟиськы вал. Кунэрес но секыт мылкыды дыръя ик пумиськи соин, Рон Рудэн. Америкаысь та миссионер сярысь одӥг пол гинэ ӧз гожъялэ ни газетъёс. Нош пумиськыны кылдӥз нырысьсэ. Паймоно кадь, мукет шаерысь лыктэм адями монэ валаз. Кызьы вала но юрттыны тырше тросэзлы асьме странаын улӥсьёслы. Кызьы озьы быгатэ? Оло, со вегин? Маин со пӧртэм асьмелэсь? Со но мукетыз сярысь мон тодӥ, профессорен вераськыса. - Мон вуи Ижевске 1993-тӥ арын. Россие мынам талэсь азьвыл ик вуэме потэ ни вал, - кутскиз веранзэ Рон Руд. - Мон малпасько, ӟучен но американецен бадӟым пӧртэмлыксы ӧвӧл. Америкаын улӥсьёс ӵемгес пальпото, серекъяло, асьсэдыз буйгатскемгес мылкыдын возё. Ӟучъёс соослэн капчи мылкыдзылы уг оско. Нош ӟучъёс пӧлысь (ӟучъёсын мон нимасько Россиын вань улӥсь калыкъёсты) мон адӟисько пиналъёс шоры туж кезьыт мылкыдын учкемез. Соослэн уг тырмы нылпиез будэтонын чиданзы но яратэмзы. Вина юон туж бадӟым инты басьтэ. Со бордысь пото семьяын ог-огдэ валамтэос. Ваньмыз со шӧдӥське нылпиослэн но мумы-бубыослэн кусыпсы вылын. Уката ик курадӟо быдэ вуымтэос. - Куатетӥ арзэ татын улытозям, азинтэ со веранзэ, мон трос лыдӟи артэ улӥсь адямиослы лекциос, ортчытылӥ семинаръёс. Юртыны тыршисько адямиослы мукет сямен малпаськыны. Сыӵе малпаськон шуиське позитивной, - яке - пайдаё луись малпаськон. Та малпаськон пӧртэм мугъёсын сэрен губырскем адямилы чатырскыны юрттэ. Со понна кулэ астэ ачид валаны тыршон. Улонын кылдӥсь шуг-секытъёс шоры бадӟым гурезь борды мырӟиськеме кадь учкемысь дугдоно. Дышоно астэ ачид дунъяны но яратыны. Тыршоно шумпотонэн улыны. Нырысь ик коть одӥг час, берло одӥг нунал, одӥг арня... Котырысьтымы улон воштӥськоз умой пала, астэ ачид воштӥд ке ӟеч пала. Тӥни озьы, та визьмо но лякыт адямиен кенешыса, мынам но тросэз кылдэм ужпумъёсы сэрттонтэм-пертчонтэмесь ӧз потэ ни. Ас азяд возъяськем пилемез палэнтыны гинэ быгатоно. Профессор Р. Руд гинэ тазьы уг малпаськы вылэм. Солэн вань солы огмылкыдл луись эшъёсыз. Асьме шаерамы, Ижевскын, 30-тӥ майысен 6-тӥ июнёзь "Берёзовая роща" гужем лагерьын ортчоз выль сямен малпаськонлы - позитивной мышленилы - сӥзем конференция. Куное лыктозы Америкаысь тодосчиос Б. Гребовски, Р. Джонсон, Б. Леджер, К. Беннет, Р. Руд. Мылкыд карисьёс быгатозы лыктыны семьяен. Одӥг муртлы путёвка сылэ 500 манет. Юанъёс сётъяны луэ 51-50-56 номеро телефонъя. Т. ДМИТРИЕВА. Марихуанаен ӝегатӥзы Алтайысь таможняын ужасьёс Россие 570 кило марихуана поттӥсьёсты ӝегатӥзы. Кун таможняя комитетлэн ивортэмезъя, марихуанаен 10 пуйы шедьтэмын вал Казахстанысь лыктэм "КамАЗ"-ысь. Наркотик нуллӥсьёсты но ӝегатӥзы. Иворъёсъя национальной служба. Нылпиос понна ӟечсэ лэсьты Толэзь талэсь азьло Пичи Пурга ёрослэн администрациез Нылпиосты утён нуналлы сӥзем "Нылпиос понна ӟечсэ лэсьты" сюлмаськон акция ялӥз вал. Предприятисолэн но оранизациослэн кивалтӥсьёссылы, ужбергатӥсьёслы, ёросын улӥсьёслы со вазиськиз ёрмись нылпиослы, трос пиналъёсын семьяослы, шуге-леке шедем оген улӥсь пересьёслы но сӧсыръёслы ӟеч лэсьтон вылысь коньдонэн, пӧртэм вузъёсын, сиён-юонэн но мукет арбериосын юрттэт сётыны курыса. Со сярысь гожъяз ёоосысь "Маяк" газет. Котькуд номерын сямен газет ивортэ ӟеч ужъёс сярысь. Нош со ужрадлы кутскон сётэм асьмелэн дано кырӟасьмы Валентина Пудова, райцентрын концерт воз ьматыкуз. Коньдон висъязы ни Удмурт Республликаысь Нациосын ужанъя кун комитет но ёросысь санэпидемстанциысь врач Ф. П. Покоева. Нуллон дӥськут ваиз Кечево посёлокын улӥсь О. П, Абрамова. Одӥг пол гинэ уг юртты ни со ёрмисьёслы. Та но ӟеч уж лэсьтыны мукет тыршисьёсын дано асьме калыкмы. Сюлмаськон ужрад азьланьтӥське на. Акция 1-тӥ июне йылпумъяськоз ёросысь культурая юртын. Тон но дырты ӟеч лэсьтыны. Е. Пахомова. "Удмурт дуннелэн" покчи сузэрез "Ас кылзэс тужгес но юн утё Башкортостанысь удмуртъёс. Соос пӧлысь 90 процентэз удмурт кылэз вордскем кыл шуизы... Удмуртиын - 75,6 процентэз гинэ" (Л. Христолюбова). Та кылъёслэсь зэм луэмзэс нош ик валамы, камсьӧр удмуртъёс доры та нуналъёсы вуылыса. "Ӟечбур" газетлэн редакторез, кылбурчи но крезьгурчи Владимир Возняков, татысь ик фотокорреспондент Владимир Беломорских, "Инвожо" журналын ужась, кылбурчи Галина Романова но мон, та чуръёсыз гожтӥсь, Татышлы ёросысь удмурт гуртъёстӥ ветлон куспын Янаулэ но Бурай ёросысь Алтау гуртэ вуылӥллям мукет эшъёсмы но: та гуртын вордскем, будэм писатель, "Кизили" журналлэн валтӥсь редакторез Ульфат Бадретдинов но "Инвожо" редакцилэн тӧроез, тодмо прозаик, драматург Егор Загребин. Куазь куинь нуналзэ ик кезьыт, зоро улӥз. Таӵе дыръя шуныт пумитамзы уката дуно. Удмуртиысь вуэм журналистъёс, писательёс одно ик вуттӥськыны тыршо Татышлы ёрос газетлэн редакцияз. Татын уго соосты ас ӵыжы-выжызэ кадь пумита (озьы ик милемыз но пумитаз) Андрей Васильевич Гильмаев, райгазетын валтӥсь редакторлэн воштӥсез луыса кема аръёссэ ужам адями, Башкортостанысь культура удысысь дано ужась. Удмурт лыдӟисьёсмы сое тодо газетъёсын-журналъёсын печатласькись вакчиесь веросъёсызъя, озьы ик "Кема пиштӥсь укноос", "Улонлэн пушъетъёсыз" но "Вакытъёслэн гердзы" книгаосызъя. Тодӥськом вал ини, туэ арысен Башкортостанысь удмуртъёс понна "Ошмес" общественно-политической газет потыны кутске шуыса. Одӥг номерзэ печатласа эскеризы но. Со котыре бинялскизы табере Андрей Васильевичлэн сюлмаськонъёсыз. Кылем арын 15- тӥ ноябре Башкортостанысь Министръёслэн кабинетсы юнматэм бере, со газетлэн валтӥсь редакторез луиз. Арняяз огпол потӥсь газетлэн редакцияз дас мурт ужалоз. Янаул, Нефтекамск, Бурай но Калтасы районъёсъя кык-куинь собкоръёс луозы. Гильмаев оске Вуж Кызылъярысь библиотекарьлы, кылбурчилы Татьяна Харисовалы, вӧзаз ӟеч юрттӥсь луоз шуыса. Гожъяськыны мылкыд карисьёс вань гинэ. Со адӟиське "пробной" шуон номерысьтызы но. Шумпотон мылкыдзэс гожтэтэн гинэ ӧвӧл, кылбурен кисьтӥллям Байшадыысь Рафит Миннекузин, Бадӟым Качакысь Сакина Суфиярова, Янаулысь Фируза Миниахметова, Бигинейысь Анджела Манапова. Кызьы ке поръёс, чувашъёс, озьы ик Башкортостанысь 25 сюрс удмуртъёс но табере асьсэ газетсэс лыдӟыны быгатозы. Республикалэн президентэныз огъя кыл шедьтыса, та ужез вырӟытӥз "Дэмен" колхозлэн председателез, та палась удмуртъёслэн азьветлӥсьсы Р. Б. Галямшин (со сярысь газетамы алигес гожъямын ни вал). Та нуналъёсы лыдӟисьёс кие вуыны кулэ "Ошмеслэн" нырысетӥ номерез. Газетлэн ӝыны ар понна дуныз 17 манет. Но газетэз пыд йылаз пуктыку, сюлмаськонлэн пумыз-йылыз уг адскы. Кылсярысь, шуом, редакциын уг тырмы печатлан машина. Соин ик Андрей Васильевичлэн дӥсьтыса но дӥсьтытэк вазиськемез потэ Удмуртиысь эшъёсызлы - текстъёс дэмлам сяна, оло, эшшо маин ке соин юрттыны быгатозы. Ошмес син, зэмзэ но, усьтӥськиз. Ноку кылбур гожъямтэ адями, дышетӥсь Сакина Суфиярова "чын-чын шумпотонзэ" таӵе кылъёсын ӧръям: Та бадӟым дуннелэн одӥг пал сэрегаз Усьтӥськиз выль пичи ошмес син. Трос турлы сяськалэсь тугоко, пе, йыраз, Чылкытэсь синъёсаз - чагыр ин... Тон, пичи ошмесэ, аслэсьтыд дун вудэ Жалятэк уды весь котькинлы. Жадисьлы сёты тон мыныны выль кужым, Луы тон пӧсь гужем - кынмисьлы. Тон - "Удмурт дуннелэн" покчиез сузэрез, "Ӟечбурен" но кылды тупалоз. Бадӟымгес, чебергес кары тон шаермес, Улонмы тыр шепо мед луоз... Мар бен, "Ошмеслэн" сюресэз паськыт ӧръяськыса мед кошкоз, Башкортостанысь удмуртъёсыз огазеянын зэмос кужымзэ мед возьматоз, выль но выль лыдӟисьёсын, авторъёсын кусыпъёсыз арысь аре мед юнмалозы. Татьяна Чернова. "Ошмес" газетлэн валтӥсь редакторез Андрей Гильмаев. "Ошмеслэн" йыръянэз. Журналистъёсын пумиськонъёс Базарын чигем вень но дуно Вузкаронъя Удмуртия Россиын 45-тӥ инты басьтэ, нош выт тыронъя - 28-тӥ-30-тӥ. Сыӵе лыдпусъёс вераз журналистъёслэн пумиськоназы республикаысьтымы вузкаронъя но калыклы бытовой юрттэт сётонъя министр Петр Пономарев. Татын зэмзэ но валантэмез вань: ӧжытгес вузкарыса, кызьы озьы бюджетъёсы уногес коньдон пыре? Ваньмыз со герӟаськемын аракы вузанэз но со понна акцизъёс тыронэз умой радъямен. Табере аракы поттӥсьёс но вузасьёс одно ик выт тыро, акциз дун курыт юонъёслэн дуназы пыре. Шаерамы аракы вузанэз умоятон но сое чаклан вылысь, нимысьтыз комиссия кылдытэмын. Соин кивалтэ югдурез утёнъя министр Владимир Щербаков. Кылсярысь, комиссия 1500 акт гожтӥз но, янгыш муртъёс 440 сюрс манетлы кисыоссэс бушатӥзы ни. Сыӵе ужрадъёслэн пайдазы син азьын. Эшшо кӧня ке лыдпусъёс вералом на. Шаерамы котькуд адями ар ӵоже 15-17 литр аракы юэ. Быдэс Россиын но сыӵегес ик югдур, но азьло республикаямы ӝыныезлы акциз дун ӧз тырылы, палэнскылӥзы. Табере со ӧвӧл ни. Ӵапак соку лушкемен но улӥ ӟечлыкен трос водка потто-вузало вал. Соин сэрен уно адями быремын. Тани 1996-тӥ арын сыӵе муген 612 мурт югыт дуннеысь кошкиз, миым - 48 адями, нош Россиын - 23 сюрс. Республикаямы басьяськисьёслэн лыдзы уг буды. Туэ нырысетӥ кварталэ 3,7 миллиард манетлы вузкаремын, план 200 миллион манетлы тырмытымтэ. Огкадь мынэ йӧл, сӥль, сиён-юон поттон. Али ваньмыз со палэнэ уг кошкы. Гужем вӧй вузан кулэсмоз, кӧня ке палэнэ келяно но тол азелы дасяно луоз. Дасяське дунъёс сярысь законлы инъет. Соя няньлы, вӧйлы но йӧллы дунъёсты асэрказы лэзьыны чакламтэ, Правительство сое син азяз возёз. Вузкаремлы выт бичан каллен ке но умоя. Тани туэ нырысетӥ кварталэ 15 миллион манет октэмын но со пӧлысь 5 миллионэз кун бюджетэ пыртэмын ке, одӥг апрель толэзе гинэ сомында лэсьтэмын. Озьы ке но, рынокъёслэн ужазы тырмымтэос трос на. Кылсярысь, огъя товарооборотын рынокъёсын вузкарон миым 14 процент басьтӥз, туэ - 18, нош бускельёсмы 25-29 поцент лэсьто. Та удысын асьмеос бере кылиськом. Нош пайда поттыны луонлыкъёс данак, отын лыдэ басьтымтэ трос коньдон берга, юнме уг шуо ук, базарын чигем вень но дуно. Соин ик рынокъёслэсь ужзэс ӝегатскытэк умоятыны кулэ. Министерство но Удмурт потребсоюз азьын сыӵе ужпум сылэ. Туэ Москвае 35 сюрс декалитр водка келямын, нош ваньзэ 150-200 сюрс декалитр палэнэ вузаны чакламын. Августэ ужаны кутскоз Балезиноысь спиртзавод. Со пуктӥське Глазовысь ликёро-водочной завод чотын, солэн пайда басьтэмез отчы кошке. Спирт пӧзьтыны ӧдъям ке, кун бюджетэ уксё но уногес вуоз. Нош водкалэн дуныз синоз шуыса малпанэз ик ӧвӧл. Министрлэн ивортэмезъя, солэн дуныз 30 манетозь вуоз. Оглом вераса, республикаямы кун вузкарон бадӟым инты уг басьты, Удмуртпотребсоюз - 7-8 процент. Озьыгес ик шуыны луоз калыклы бытовой юрттэт сётон но калыкез сюдон сярысь. Та ёзъёс огкадьгес возисько. Калыкез сюдон миым 1997-тӥ арын мында ик вал, нош бытовой юрттэт сётон 10 процентлы йылӥз. Вузкаронын котькудӥз кыкетӥез магазин изъянэн ужа. Министерство ярмаркаос, пӧртэм кенешъёс ортчытъя ке но, пайдаез ичи на. Бытовой юрттэт сётонын сертификатъёс сётъян мынэ. Йырси ӵышкисьёс аттестация ортчо. Но туж ичи лэсьтэмын ай, сюрс пӧлысь 72-ез гинэ учкемын. Вузкаронъя правилоос но закон кема дасясько, Кун Думаын кыллё. Озьы ик али нимысьтыз закон дасяське вузкаронын, калыклы бытовой юрттэт сётонын но калыкез сюдонын сертификатъёсын ужанэз пыӵатонъя. Г. РОМАНОВ. Футбол Шумпоттӥзы Ижысь "Динамое" люкамын егит футболистъёс. Мукет командаосын огкадь нюръяськыны кытӥяз пиосмылэн кужымзы уггес тырмы на. Соин "Динамо" турнирлэн берпуметӥ чуръёсаз интыяськемын. Но берлоез, Тобольскысь "Иртышен", пумиськон возьматӥз - "Динамолэн" азьлане будон сюресэз вань. Асьме пиос 4:0 лыдын вормизы. Шумпоттӥз Ижысь "Газовик-Газпром" но. Куноын со вормиз Красноярскысь "Металлургез" 2:1 лыдын. Голъёсты пыртӥз Андрей Иванов. Талэсь азьло "Газовик" келяз вал Читаын "Локомотивлы" 0:2 лыдын. М. Кузьмин. Шунды Усточиос "Шудытон шудонлэсь секытгес" Школаысь сцена вылын выжыкыл возьмато. Гондыр но, Кион но, Ӟичы но куаразэс вошъятэк верасько, кепыр потэменызы юбо сямен сыло... Тодмо суред, озьы-а? Угось тросаз школаосын асьсэос но дышетӥсьёс, актёрлэсь, режиссёрлэсь ужзэ матысь но тодытэк, со уж борды басьтӥсько. Солы чидатэк, Можга педучилищеысь дышетӥсь Елена Ивановна Шумилова ӵектӥз вуоно дышетӥсьёсты школаысь театрен кивалтӥсь специальностьлы ватсаса дышетыны. Нырысетӥосыз туэ та удысъя кун экзамен сётӥзы ни. Тулыс 4-тӥ курсысь нылъёс Наташа Большенко но Оля Архипова Д. Т. Ленскийлэн "Умой но, урод но, визьмо но, шузи но" пьесаезъя пуктэм водевиль возьматӥзы. Оля ачиз ик валтӥсь ролез - Наденькаез - шудӥз. Та шумприч чебер нылаш сцена вылын ассэ зэмос артистка сямен возе: героезлэн улоназ вые, кылем даурысь зэмос барышнялы пӧрме. Быгатэ пичи мурт сямен шузияськыны но, йӧно, синмаськымон луыны но. Нош кыӵе чылкыт, чебер кырӟа со романс! Спектакльын вераськон мынэ Наденькаез бызьытон сярысь. Аслыз вератэк, со доры узыр курась ӧтё. Анай-атаез ӧвӧлтэмзэ но вань карыса ушъясько со азьын, нылзэс ӵекто. Нош нылзылы сыӵе "шудон" чик уг кельшы, курасез азьын ассэ юри йӧнтэм возьыны кутске. Валамон, нокыӵе визьмо, йӧно воргорон ассэ ултӥяса сыӵе нылмуртэ кышно уз басьты. Но шуак кыкетӥзэ пумиськыкузы (Надялы мукет курась утчало ни вал), соос ог-огзылы синмасько. Таиз ӧй вал уго кинэн ке "дасям" спектакль. Час но ӝыны ӵоже дугдылытэк шудӥзы егит артистъёс. Час но ӝыны ӵоже котькуд пичильтык шонертэм вырос, янгыш понна сцена урдсын куалекъяса сылӥз пинал режиссёр (со ик куарая режиссёр) - 4-тӥ курсысь Наташа Большенко. Та спектакль солэн но Олялэн нырысетӥез рос-прос ужзы уго. Уката ик туннэ залын комиссия пуке. Но нылъёс юнме куалекъяллям - ужзэс "5"-лы дунъязы. Катанчи ворсаськем бере кожи нылъёс доры. Но соос нокызьы но буйгатскыны уг быгато - ог-огзэс ӟечкыласа ӟыгыръясько, чупасько, отын ик спектакльысь кылъёссэс тодазы ваё. Газетысь корреспондент луэмме тодыса, Оля тэтчыса ик чабыны кутскиз - пырак али шудэм рольысьтыз героиня кадь. Нылъёслы кӧня ке юанъёсын вазиськи. - Оля, тон ачид ик туннэ режиссёр но, валтӥсь ролез шудӥсь но. Секыт ӧвӧл-а? - Секыт ке но, туж тунсыко. Мон туннэ туж шудо адями. - Нош мар вал ужады самой секытэз? - Ог-огзэс йылтылыса нылъёёс валэктӥзы: шудӥсьёсты утчан, соосты актёрлы пӧрмытон (режиссёрлэн ужез актёрлэнлэсь секытгес вылэм), спектакльлы тупась крезьгур утчан, декорация малпан... Дасяським кема, ӝытлы быдэ сямен, малы ке шуоно, та валтӥсь удысмы ӧвӧл бере, нуназе ужаны дыр уг шедьы. Но милемлы туж юрттӥз дышетӥсьмы. Дышетӥсьсы шумпотэ нылъёс понна, ушъя тыршемзэс. Ачиз со Екатеринбургысь театръя училищеез но институтэз йылпумъямын, ужамын пӧртэм театръёсын. Но улон кузёяськиз озьы - со гуртэ бертоно луиз. Творчествоен пачылась мурт татын но ӧз буйга, кужымзэ, визьзэ но быгатонлыксэ пиналъёс пӧлы ӧръяз. Ас удыссэ ӟеч тодӥсь мурт вала: та зэмос театр ӧвӧл ай. Дышетскисьёссэ зол "шачыръя" театральной школалэн куронъёсызъя. - Зэмос актёр яке режиссёр луон сярысь малпаськисьёсыз ӧвӧл на-а? - юасько Елена Ивановналэсь. - Ва-ань. Кылем арын ньыльзэ Екатеринбургысь театре кылзӥськыны ӧтизы вал, но коньдонзы ӧвӧлэн, мыныны ӧз быгатэ. Туэ одӥгез пияше мыныны малпа.Оскисько, со но, мукетъёсыз но дышетэм пиналъёсы быдэстозы мынэсьтым чебер малпанме - улӟытозы эшшо кӧня ке лулъёсты. З. РЯБИНИНА. Туспуктэмез В. КАМАШЕВЛЭН. "ШУНДЫ" Быдэ вуон, яке быронлэсь утёз этнофутуризм Улӥллям-вылӥллям финн-угоръёс. Шунды пуксён паласьёсыз - ӟечгес, шунды ӝужан паласьёсыз - начаргес. Но ваньзы вашкала ӵыжы-выжыоссылэсь сямъёссэс-йылолъёссэс утьыны быгатӥллям. Ымысь ыме выжыкылъёс мадьылӥллям, калык кырӟанъёсты кырӟаллям, куд-ог дыръя дэра дэремъёссэс дӥсяляллям. Бӧрысьгес вольыт, адямиез дышетыны вырись книгаос но гожъяны дышиллям. Но малы ке ӧвӧл дыртылӥллям пересь ӵыжы-выжыосмы культуразэс выльдыны, туала шӧмо карыны. ЪЪ даурлэн пумаз ни эстон Каупсиослы, удмурт Захаровъёслы, Уткинаослы, Нянькинаослы акыльтэм со ваньмыз. Кутскиллям бугыръяськыны вашкалаоссылэн сандыказы. Трос узырлыкез, пе, но вужмемын ни. Огез кутскем дэра дэремез выльдыны, шоголляны, мукетыз кырӟанъёсы выль кужым пыӵатыны, куинетӥез - идеологиен пыӵам романъёс интые, туала висёнъёсты возьматыны, эшшо ке пӧсьтурын пызьнаса яке голькыт ватсэт йылэтыса. Жамдэ улыса, ужъёссы шоры учкиллям но паймиллям: ма та этнофутуризм ук! Вашкала ӵыжы-выжыосмылэн культуразф выль, туала амалъёсын герӟаса возьматэмын. Эстониын но Удмуртиын этнофутуристъёс вань бере, луыны кулэ, дыр, мукет финн-угор республикаосын но. Соин ог-огенызы тодматскон, выль тулкым сярысь кенешон понна 1994-тӥ арын Эстониын нырысьсэ пумиськизы этнофутуристъёс. Нош туэ отын ик, Тарту городын, егит финн-угор этнофутуристъёслэн куинетӥ конференцизы ортчиз (кыкетӥез кылем арын Ижевскын вал). Асьмелэн отчы ветлӥзы этнофутуристъёсмы Петр Захаров, Надежда Уткина, Юрий Лобанов, Любовь Четкарева но Татьяна Прокопьева. Вераны кулэ, удмурт этнофутуристъёсты отын тужгес но гажало. Петр Захаровлэн удмурт литературалэн быдэ вуон вакытэз Возрождение сярысь докладэз та конференциын валтӥсез луиз. Нош Надежда Уткина ӵап татын шедьтӥз аслэсьтыз кылзӥсьёссэ. Удмурт кылэз уг ке но валало, шокчыны дӥсьтытэк кылзӥзы. Тужгес но сюлмазы пыӵам П. Захаровлэн "Мон кошкисько" кылбурезъя гожтэм кырӟанэз. Трос суредъёссэ нуллӥз Юрий Лобанов. Соос но туж вылӥ дунъямын вал. Юра отын озьы ик аслэсьтыз моноспектакльзэ возьматӥз. Люба Четкарева ветлӥз эккотуризмен тодматскыны. Мар со сыӵе, шуиськоды? Кунгож сьӧрысь куноос удмуртъёс доры лыкто но, асьмеос соосты Кузёбае нуиськом. Возьматӥськом, мае асьмеос кулэен лыдъяськом. Со инты тодматэ калыклэн сямъёсыныз, йылолъёсыныз, культураеныз, улон интыеныз. Тӥни со нимаське эккотуризмен. Эстонъёс та удысэн кемаласьгес выро ни, отысь трос коньдон поттыны быгато. Учконо ке, асьмелэн но эккотуризммы вань, кыле на коньдон поттыны дышетскон. Татьяна Прокопьева пыриськиз МАФУН-лэн кенешезлэн ужаз. Отын сэрттӥзы-пертчизы пӧртэм финн-угор республикаосысь егитъёслэн общественной огазеяськонъёссылэсь ужпумъёссэс, сюлмаськонъёссэс. - Кыӵе ке инты басьтэ-а финн-угор егитъёслэн движениязы "Шунды" дэменлыкмы? - юай мон Татьяналэсь. - Мон верало МАФУН-лэн тӧроезлэсь Яак Прозеслэсь кылъёссэ: "Финн-угор егитъёслы адӟем карыны кулэ удмурт шундыослэсь. Та дэменлык тужгес но юнэз, вуоно арын дас арессэ пусъёз ни. Мукет республиаосын трос чыры-пыры огазеяськонъёс, но соос огез но кема уг уло, ас азязы пуктэм ужпумъёссэс быдэстыса уг вутто". Туж шумпотымон дунъет, шуысал мон. Вераны кулэ, этнофутуризм пумысен но эстонъёслэн али сыӵегес малпанъёссы. Соос шуо: "Ми этнофутуризмез сайкатӥм, кыре поттӥм, нош шунды ӝужан палась финно-угоръёс сое азинтыны кулэ. Запад со Запад, соин ик та ӧр отын кема, оло, уз но улы, али со модалы пӧрмемын. Со адӟиське эстонъёслэн асьсэды кызьы воземзы но, ужъёссыя но. Куинетӥзэ огазе люкаськыса кенешизы ни финн-угор этнофутуристъёс. Воштӥське ик-а маке этнофутуризмын та аръёс ӵоже? Кыӵе ужпумъёс пуктэ со ас азяз, паськыта-а, пыӵа-а со калыке? Та сярысь вераськиськом валтӥсь удмурт этнофутуристэн Петр Захаровен. - Этнофутуризм, зэмзэ но, та аръёс ӵоже азьпала вамыш лэсьтӥз. Со азинске. Кылсярысь, литература сярысь верано ке, азьвыл со идеология вылын лэсьтӥське вал, огкылын вераса - утопия. Туала егит гожъяськисьёс ваньмыз шоры выль синмын учко: геройзэс юри уг ӝуто яке юри уг выйто - возьмато сыӵеен, кыӵе со вань. Таӵе тулкымез удмурт литературае ваизы 80-тӥ аръёсы Романовлэн дышетскисьёсыз: М. Федотов, В. Шибанов, С. Матвеев... Мургес ке учконо, этнофутуризм шӧдӥське ни Флор Васильев, Владимир Романов бордысен. Фольклор сураське абсурдэн ("Куарусён толэзе", "Йырберыктон турын") Удмурт литератураын али этнофутуризм кыклы люкиське. Нырысетӥез - валатэк лэсьтӥськись (наивной). Сое кылдыто мӧйы писательёс. Идеология куашкам бере, соос ... асьсэды кытчы карыны валатэк, этнофутуризме пегӟыны малпазы, но сое постмодернизмен суразы. Этнофутуризмын, постмодернизмын сярысь, произведение кыӵе ке нимысьтыз формая, техникая уг лэсьтӥськы. Нош соос формаез гинэ ӧвӧл, темаез но, нимъёсты, метафораосты но лушканы кутскизы. Тани потӥз Л. Нянькиналэн "Ау-ау, яке инбамысь гожъёс" повестез, со берегес ик кылдо Ӧб-ӧб-ӧб, Ыш-ыш, Хи-хи нимъёсын (междометиосын) книгаос. Яке мон гожтӥ "Эбга" пьеса. бӧрсяз ик мукет драматургъёс но тодазы ваизы вашкала удмурт легендаосты. Валатэк яке юри лэсьтӥськись этнофутуризме сюро на гожъяны кутскисьёс. Соослэн ӧвӧл Романов кадь дышетӥсьсы. Кыкетӥосызлэн вань этнофутуризм сярысь интеллектуальной валанзы. Соос та ӧрын рос-прос ужало. - Докладады тӥ шуиськоды, этнофутуризм финн-угор калыкъёсты быронлэсь утёз шуыса. - Бен, ӵапак та ӧр усьтэ выль инвисъёс. Литература понна - быдэ вуон вакыт (Возрождение). Али отын выльвыл - ужа но ужа. Нош литература - со улонлэн синучконэз. Малы асьмелэн адямимы туж чаль чигиське? Кызьы утёно, улӟытоно сое, медам ышы-быры шуыса. Тӥни кыӵе ужпумъёс пуктэ ас азяз этнофутуризм. З. РЯБИНИНА. Гурт улон Жалем сиён... суданкалэсь Озьы но тупаны кулэ: Пичи Пурга ёросысь гурт удысъя управленилэн валтӥсь агрономеныз С. Г. Михайловен пумиськыны учыраз, ӵапак ар ортчыса. Серафим Григорьевичен миым пумиськылэммы сярысь "Секыт тулыс" нимын заметка потӥз 28-тӥ мае. Пургаос кылем арын но ю кизёнзэс нырысьёсыз пӧлын йылпумъязы вал. Бен, соку но куазь тулыс бусы ужъёсты ӝегатӥз. Ӧжыт висъяськиз эстӥськон, минерал сылалъёс, ӝегаллязы уждун тырон. Ортчиз ар, нош гуртоослэн улоназы маиз ке умой пала воштӥськиз меда? Ум, куазь сярысь ум вералэ ни. Соиз вератэк но валамон. Но таиз вераськонмы милям ӧжытак мукет ӧретӥгес кошкиз. - Алигес кидыс утчаса Волгоград палъёсы вуылӥ, - веранзэ мытӥз валтӥсь агроном. - Пайми, со палан гуртъёс быдэсак куашкатэмын. Отын музъемъёс умоесь ке но, буш кылемын. Учкыны ик жаль. Ярам, асьмелэн кивалтӥсьёсмы бырыны уг сёто. Йыбырттыны кулэ соослы со понна. Секытэн ке но улӥськом, ужаськом ай. Кизёнмы но тани йылпумъяське ни, шуыны луоз. Валэс юос ӧжытак кылизы на. Кизёно пудо сюдон кушман, кукуруза, мерттоно кубиста, картофка. Тани алигес суданка кидыс ваим... - Мар бен со сыӵе? - юатэк ӧй чида ни мон. Озьы Серафим Григорьевичлэсь нырысьсэ кылӥ выль будос - суданка сярысь. Агороном сое вазен нырысьсэ адӟем, Краснодар крае куро утчаны ветлыкуз. Суданка (родинаез Судан) - со кукуруза выллем пудо сиёнлы мынӥсь будос. Початокъёсыз ӧвӧл. Укша шашылы но тростниклы. Ӝуждалаез 2,5-3 метр. Гектарысьтыз 250-400 центнер жалем сиён люкаське. Зэмзэ но, агроном умой будосэз синйылтэм. Дуныз но солэн бадӟым ӧвӧл, килоез кидыс 5 манет гинэ сылэ. Гектарлы мынэ 25 килоез. Шундыберганлэн дуныз али 12 манет. Ёросын сюрс гектарлы тырмымон суданка ваемын ни. Со умойгес будэ кӧс интыынгес. Будосэз утялто августлэн шор вадесозяз. - Та будосэз милям ваньмаз сямен хозяйствоосын яратӥзы ни, - вера Серафим Григорьевич. - Дасямын сое будэтонъя нимысьтыз агротехника. Мылкыды вань на гуртъёсы лекциосын потаны. Быдэс республикаямы вӧлмытоно вылэм суданкаез. Малы ке асьмеос вунэтӥм тариез. Ведь кыӵе зол солэн куроез, вылӥын ӟечлыкез но. Кидыс но гектараз 20-25 кило гинэ кулэ. Умой сиён сётэ козлятник будос но. - Серафим Григорьевич, туэ тулыс куазь зорыса улэ. Уз-а шедьы бырыны кизем кидыс? - Зэм, таӵе куазьлэсь номыр ӟечсэ витёнэз ӧвӧл. Тани валлян арын но миым уно чабей быриз. Нош кин кидыссэ фундазолэн сураз вал, соослэн будоссы быдэс кылиз. Пичи Пурга ёросын пумен паськыт вӧлмыны кутско выль пумо культураос. Со "галоп" сезьы, "вереск" йыды. - Уноез хозяйствоос берло дыре пайда басьтыса ужаны кутскизы ни вал, - веранзэ азьланьтэ С. Г. Михайлов - Правительство соослы маин ке но юрттэт мед сётысал вылэм. Тани берло дыре нош ик эстӥськонлы дунъёс будӥзы. Сое нырысь ик ас вылаз огшоры басьяськись шӧдоз. Ӵап со вакытэ валтӥсь агрономлэн кабинетаз воргорон пыриз. "Дружба" эштосысь электрик вылэм. - Ваньмызлэсь уждунзэс 100 проценлы будэтӥзы, милесьтым ӧз. Ма кароно? - ӝожтӥське воргорон. - Тонэ нокин уз утьы - либытак вазиз С. Г. Михайлов. - Али ик берт но калыкез люка. Профсоюз кылдытэ. Огазеяське. Асьтэос сюлмаське. Шедьтэ кельшымон адями. Огъя огкыл кутэ. Тӥляд кивалтӥсьты быръем ук... Агроном дорын час ӵоже пукытозям уно пырасьёс вал на. Пӧртэм юанъёсын, пӧртэм сюлмаськонъёсын пыро со доры. Со пумысен луысал, дыр, телефон пыр но кенешыны. Но гурт удысъя ёрос управлениын телефонъёс дугдытэмын. Коньдон, пе, уд тыриське. Озьы тӥни. Музъем ужасьёслэн валтӥсь штабазы чалмыт... Йылпумъяса кӧня ке лыдпусъёс. Укмыстонэтӥ аръёсы котькуд гектар музъемлы 100-110 кило минеральной сылалъёс сёто вал. Туэ со усиз 75 килоен гинэ. Толло нуналлы Пичи Пурга ёросын бусы ужъёс тазьы быдэстэмын вал. Валэс юос киземын 78 процентэз, ӵуж но горд кушман муэ согемын быдэн 83 но 65 процент, кубиста мерттэмын 27 процентэз, картофка мерттэмын ай 5 процентэз гинэ. Озьыен, тулыс йылпумъяське ни ке но, бусы ужъёс азьланьтӥсько. Оло инмар жалялоз ай музъем ужасьёсты. Синоптикъёслэн чакламзыя, куазь пумен тупатскыны кулэ. Н. БАЙТЕРЯКОВ. КИВАЛТОН НО АДЯМИ Павел ВЕРШИНИН: "Ужась калыкен мыным капчигес" Нырысь ик вал Вормон. Туэ Кун Кенеше ортчем быръёнъёсын Правительстволэн азьвыл кивалтӥсез П. Вершинин ваньмызлэсь трос 7.064 (91,96 процент) куара люказ. Со-а ӧй вал шумпотон! Огаз округын но мукет кандидатъёс сомында куара ӧз бичалэ. Бӧрысьгес югдур чылкак мукет луиз. Выль депутатъёслэн малпанъёссы калыклэн мылкыдызлы ӧз тупа: Павел Николаевич Кун Кенешлы тӧрое но, Правительствоен кивалтонэ но быръемын-юнматэмын ӧй вал. Макем бадӟым нырысь шумпотон (калык понна), бӧрысь сокем ик бадӟым луиз паймон-куректон. Удмурт кивалтӥсь ыштӥз бадӟым интызэ. Витьымтэ шорысь-а со озьы луиз яке со кинлэн юри чакласа лэсьтэм ужез-а? Маин кивалтӥськизы Тӧро бырйыку тросэз депутатъёс, калыклэн (бырйисьёссылэн) мылкыдзылы пумит мыныса? Яке калык-а янгышаз, быръёнъёс дыръя П. Вершшининлы куаразэ сётыку? Зэм, дуннелэн историяз калыклэн но янгышъёсыз луыло. 1922 арын Италиын Муссолини понна тужгес но зол дурбасьтӥзы начар крестьянъёс, рабочийёс но векчи буржуазия. Озьы ик луиз 1932 арын Германиын - Рейхстаге быръёнъёс дыръя Гитлер 13,7 миллион куара люказ. Калык юрттӥз ӝутскыны выль диктаторъёслы. Бен, сыӵе учыръёс, жаляса верано, улонын луыло. Павел Николаевичен пумиськыны мыныкум, быръёнъёс пумысен йырам олокыӵе но юанъёс бергазы. Но та секыт ужпумлэсь палэнскыны выри. Гажано адямиез ас юанъёсыным мултэс вӧсь кареме ӧз поты. Мар луиз, луиз ини. Табере Павел Николаевич выль ужан интыын - со Кун Кенешлэн Тӧроезлэн нырысетӥ воштӥсез. Али кылдытэмын ни выль парламент, ӝоген быдэсак юнматэмын луоз министръёслэн кабинетсы. Котькуд депутатлэн, министрлэн визьмыз, дышетскемез, культураез бордысь табере потоз ни Кун Кенешлэн но Правительстволэн огъя ужамзы. Вань йыркурез, вожпотонэз вунэтоно. Кин кинэ вормиз, кин ӧз - малпаськоно ӧвӧл ни. Нырысь инты - уж. Сое ик возьма калык но. - Павел Николаевич, малы властьлэн нюръяськемез берло аръёсы сокем зол шӧдскымон луиз? Азьло аръёсы калык со сярысь номыр но ӧз тодылы. Табере вылӥ кивалтӥсьёслэн янгышъёссы калыке пото. Умой-а со? - Законъёсты кутӥсь но законъёсты быдэсъясь властьёслэн керетонъёссы луыны быгато. Солы паймонэз ӧвӧл - ченгешонтэк уг вордӥськы зэмлык. Но туж умойтэм, куке зэмлыкез утчан пӧрме ог-огдэ ултӥянлы, адӟемпотостэм каронлы но, тужгес но уродэз, калыке вӧлме. Калыкез властьлэн кусыпъёсазы кыскыны уг яра. Азьло аръёсы вань политика ужъёсты ас вылаз басьтылӥз партия. Вылӥ Совет но, правительство но со борды думемын вал. Янгышъёсты партия калыклэсь юн утьыса возьылӥз. Озьы ке но, сыӵе радлыкез берыктонлы мон пумит. Умойгес, куке правительствоез парламент юнматэ. - Кулэ-а Удмуртилэн Конституцияз воштонъёс пыртыны республикалы кивалтӥсь быръён пумысен? - Со сярысь али номыр ӧй верасал. Ужаны кулэ. - Матэкто Кун Думае быръёнъёс. Со быръёнъёсы пыриськыны малпаськоды-а? - Сыӵе юан мыным тросэз сётъяло. Нош номыр вераны, уг быгатӥськы, али мон солы чылкак дась ӧвӧл. Мур малпаськоно на. Правительствоын ужакум, семьяе, нылпиосы сярысь вунэтылӥ, соослы дыры ӧз тырмылы. Али, быръёнъёс ортчем бере ини, дыр кемдӥз аслам улонэлы дунъет сётыны. Бен, мынам улонам котьку но нырысь интыын уж вал. Но мар меда мон сётыны быгатӥ семьяелы? Та юан мон азе уката но лэчыт султӥз 20 апреле, Кун Кенешлы Тӧро быръён нуналэ. Трибуна доры мыныкум, верано кылъёсы сярысь ӧй малпаськы... Ӵапак со вакытэ кузпалы операция лэсьтон ӝӧк вылын кылле вал. Валасько кадь воргоронлэсь куректон мылкыдзэ. Та секыт вакытэ со ӧз быгаты яратоно муртэныз артэ луыны. Нош кышноез котьку но со сьӧры мынылӥз ук. Капчи вал шат солы, городын будэм муртлы, кызё ар пала гуртын улыны? Павел Николаевич Можга ёросысь колхозъёсын ужаку кузпалыз гурт нылпиосты физикалы дышетылӥз. Капчи ӧз йӧты пиналъёссылы но. Бӧрысь, атайзэс мукет уже выжтэмзы бере, Ижевске улыны мыноно луиз. Городысь школаын дышетскон нырысь-валысь ас куронъёсыныз туж кышкатылӥз, но нылпос пумен дышизы, татын кузпалыз пиналъёсызлы нырысь юрттӥсь луиз. Вань шуг-секытъёсты вормыны кышномуртлы юрттылӥз яратон, нош воргоронэз вормылӥзы ужъёс. - Монтэк будӥзы пиналъёсы, - жаляса сямен шуэ Павел Николаевич. - Соос понна тау кузпалэлы. Бадӟымез пие йылпумъяз Ижевскысь технической университетэз, али дышетске на юристлы, аслаз семьяез вань ини. Кыкетӥез пимы дышетске Удмурт кун университетын. Нылмылы 11 арес гинэ ай. Ялан нылме пичиен лыдъясько на вал, но 20 апреле, со секыт нуналэ дорам бертыса абдрайгес: сиён пӧрамын, утялскемын. Со нуналэ вань нылпиосы огазьын вал. - Павел Николаевич, тыршиськоды-а тӥ утьыны семьядэс политика сярысь вераськонъёслэсь, куд-ог гожъямъёслэсь? - Юри одӥг газетлы но уг гожтӥськиськы, дорын бадӟым политикалэсь шутэтскем потэ. Но озьы утиськод шат? Мае ке тодэмзы потэ ке, газетъёсты киоскысь басьто. Соин ик гожъямъёсысь зэмлыкез чуръёс вискысь утчаны дышетӥсько. Зэм, куд-ог дыръя валэктонъёс сётытэк но уг луы. Тани быръёнъёс азьын огаз газетын гожтӥллям, мон, пе, Чубайслы дурбасьтӥсько. Бадӟыменыз пиеным со пумысен юн вераськон вал. - Психологъёс дышето: семьяяд бертыку воштоно, пе, ымнырез, куштӥськоно урод мылкыдлэсь. Тӥляд озьы пӧрме-а? - Уг. Уж сярысь малпаськон котьку йырын. Солэсь мозмытскыны уг луы, ӝӧк сьӧрын пукыку но. - Нош чылкак огнады луылон дыръя мар сярысь малпаськоды? - Котьма сярысь. - Пинал, егит дырысьтыды кыӵе суредъёс ӵемгес син азяды пуксьыло? - Вордӥськем гуртэ, Берёзовка. Мон понна со пыраклы кылёз самой умой, самой чебер интыен. Со гурт табере ӧвӧл ни. Но туж секыт, мӧзмыт мылкыд дыръя гуртэ ялан дораз ӧте. Ӵем тодам лыктыло анай-атае. Атае улонысь вазь кошкиз. Кыксылэн ик быдэн ньыль класс гинэ дышетскемзы люкаськиз. Но калык пӧлын котьку но азьветлӥсьёс вал. Ялан тодон-валан басьтыны кыстӥськизы. Атаелы тани огпол гинэ возьматӥ, кызьы ужано логарифм линейкаен - дышиз арня куспын. Яке мукетыз суред: атае пересьёслы шара лыдӟе "Вуж Мултан" книгаез. Тӥни озьы пичи дырысен ик милемлы соос таӵе валан пыӵатӥзы: визьмо, дышетскем муртэз калык котьку гажалоз. Меӵак верано ке, гуртын азьло шулдыргес улӥзы. Тани гуртамы кык семья нырысьсэ радио басьтӥз. Нуналлы быдэ соос доры адямиос люкаськылӥзы - вина юыны ӧз, радио кылзыны. - Павел Николаевич, тӥляд синъёсты котьку но ӝуало. Кылем арын Шарканын дышетӥсьёсын пумиськонды дыръя вӧзам пукись ӟуч дышетӥсь шуиз: "О, кыӵе солэн синъёсыз чилясесь". Сыӵе синъёс сюлмысь вераськыку гинэ, дыр, луо? - Тодӥськоды-а мар сярысь мон жалясько: властьлэн ёзъёсаз ноку луыны уз быгатэ сюлмысь потэм кусыпъёс. Мылкыдзэс шара усьтыса уло огшоры ужасьёс гинэ: лек кылъёс ке верало - верало, экто ке - экто, кырӟало ке - кырӟало. Зэм, кивалтӥсьёс пӧлын но кырӟало-экто, но мылкыдзэс вӧлак уг усьто. Кинъёс пӧлын али мон бергасько, отын мылкыдъёс ватэмын луо. Тӥни соин ик туж мӧзмисько шара усьтэм сюлэмъёслэсь. Огшоры калык пӧлын мыным капчигес. - Калык сярысь ке верано, кызьы тӥ учкиськоды удмуртъёслэн алигес ортчытэм пикетсы шоры? Озьы соос тӥледлы дурбасьтэмзэс возьматыны тыршизы. Туж сюлмаськизы, быръёзы- а, уз-а тӥледыз Кун Кенешлэн Тӧроезлы воштӥсе. Но можгаос отын ӧй вал. Малы? - Пикет ортчон нуналлэсь азьло мыным жингыртӥз Можга администрацилэн кивалтӥсез. Мар, пе, кароно, адямиос кӧня ке автобусъёсын Ижевске потыны малпало. Лыктыны ӧй лэзьы. Озьы ик жингыръязы Ныша школаысь ӟуч дышетӥсьёс. Соослы шуи: "Кыӵе ке куронъёсты вань ке, гожтыса келялэ Кун Кенеше". Пикетъёслэн пайдазы али ӧжыт ни, тодады вае шахтёръёсты ик, Россилэн кивалтӥсьёсыз сыӵе нюръяськон амал шоры уг ни учко. Утчано мукет нюръяськон амалъёс. Ӝутоно огъя культурамес, муромытоно тодон-валанмес. Соку политика ужпумъёсы ум йыроме. Быръёнъёс дыръя но йыромыса улэммы шӧдӥськиз. Мон тазьы малпасько: Вершининэз бырйысалзы ке (Тӧрое), со удмурт калыклэн бадӟым вормонэз луысал, ӧз быръе - удмуртъёслэсь асваланзэс ӝутон понна, со озьы ик умой. "Удмурт кенеш" сярысь ке верано, со нюръяськон амалъёсызъя нылпи дырысьтыз потӥз, кужмогес кариськиз. Кемалась ӧвӧл "День" газетын гожтӥллям, Павел Вершинин вашкала философъёслэсь Конфуцийлэсь но Макиавеллилэсь книгаоссэс басьтэм шуыса. Тодӥсько мукет политикъёс но та философъёсын лекос тунсыкъяскыны кутскизы. Маин соос бордазы кыско? Кинэ маин, вылды, но Макиавеллилэн таӵе веранъёсыз но вань: политической нюръяськонын котькыӵе амалъёс тупало, обществоын тупатэм законъёсты но тӥяны луэ. Нош Конфуций шуылӥз: адямилэн адӟонэз "инбамен" тупатэмын, соин ик нокин воштыны уз быгаты адямиослэсь узыръёслы но начаръёслы люкиськемзэс. - Зэм, мыным тодмо та философъёслэн гожъямъёссы. Но мон соослэн улон шоры учконъёсынызы быдэсак соглаш кариськныы уг быгатӥськы, - шуэ Павел Николаевич. Макиавеллилэн куд-ог дэмланъёсызлы чутрак пумит мынӥсько. Мукет политикъёс сярысь вераны уг быгатӥськы. Кин ке, оло, соослэсь ӵектонъёссэс уже но кутэ. Огъя вераса, философъёслэн книгаосысьтызы кинлэн мае шедьтэмез потэ, сое ик, вылды, шедьтэ. - Берло дыре властьлы калык оскемысь дугдӥз кадь. Сыӵе югдур быдэс Россиын. Мар кароно адямиослэсь гажамзэс берыктон понна? - Калыклэн осконэз берыктэмын луоз! Со сярысь али мон чик но уг шугъяськиськы. Мар кароно? Ужано. Кивалтон ёзъёслы но огкылысь кариськыса ужано. Туж оскисько, республикамылэсь экономиказэ ӝутыны луоз шуыса. Продукция поттон ласянь туэ, кылем арын сярысь, азьпалагес вамыштӥм. Кун Кенешлэн кыкетӥ ӧтчамез ужаны кутскем дыръя "Удмурт дунне" газетлэн редакцияз туж трос адямиос вуылӥзы, жингыръязы но, гожтэтъёс но вуттылӥзы. Соослэн сюлмаськонзы одӥг вал: "Кызьы озьы Вершининэз республикаенымы кивалтонэ ӧз быръе?", "Мар кароно? Кызьы юрттоно солы?" Синкылиосын зар-зар бӧрдӥсьёсты но адӟоно луиз. Озьыен, вылӥ кивалтӥсьёс пӧлын сыӵе гажамон адямиосмы вань на бере, зэмзэ ик, оло властьлэсь данзэ луоз берыктыны? Нош газетмес лыдӟисьёслы, ваньмызлы, кин быръёнъёс дыръя солы юрттӥз, Павел Николаевич сюлмысьтыз тау каре. Цыӵе калык кужымен, пе, екйыфвс вормонъёс йлый бр луозы. Татьяна БАННИКОВА. Сюресъёс, гастрольёс, выль ужъёс Туэ Удмурт национальной театр 68-тӥ ужан сезонзэ йылпумъяз С. Широбоковлэн но Н. Шкляевлэн "Ой, чебер нылъёс" комедиенызы. Табере артистъёс сюрес вылэ потӥзы. Азьпалан - гастрольёс. Туэ театр ужалоз, кӧня ке труппаослы люкиськыса. Озьыен уногес учкисьёс тодматскыны быгатозы выль спектакльёсын. Кылемаз пятницае нырысетӥез труппа потӥз лымшор ёросъёсы. Театр ужалоз Алнаш, Кияса, Камбарка, Каракулино, Сарапул, Воткинск ёросъёсын. Со озьы ик вуылоз Татарстанысь Менделеевск, Елабуга, Альметьевск городъёсы, Башкортостанысь Янаул районэ. Ваньзэ сётэмын луоз ог 50 спектакль. Артистъёс ӟуч но удмурт кылын возьматозы Василий Гавриловлэн но Леонид Романовлэн пьесазыя "Любовь не стареет" ("Яратон уг пересьмы") комедия. Кызь сизьыметӥ мае Вавож, Игра, Дэбес, Балезино но Кез палъёсы Анатолий Григорьевлэн "Парсьпи но эмеспи" комедиеныз кошке кыкетӥез труппа. Соин кивалтоз тодмо артист но кырӟась, крезьгурчи Геннадий Бекманов. Артистъёс озьы ик возьматозы концертъёс. Та комедиез ик адӟыны быгатозы Яр, Глазов, Красногорье, Юкаменск но Шаркан ёросъёсын улӥсьёс. Кылемъёсыз артистъёс ужалозы Ижевскысь школа лагерьёсын, нылпи садъёсын. Пиналъёслы возьматэмын луозы "Тайны лесного царства" но "Жили-были две лисички" выжыкылъёс. Со дыре ик театр ужалоз выль спектакль дасян бордын. Артистъёс пуктозы Тамара Ардашевалэсь но Егор Загребинлэсь "Тӧдьы льӧмпу улын " пьесазэ. Учкисьёс доры со вуыны кулэ июнь толэзьлэн шораз. Нош спектаклез пуктэ Россиысь но Удмуртиысь калык артистка Вероника Садаева. Солэн та режиссер луыса нырысетӥ ужез луоз. Крезьгуръёс гожтон бордын ужаз Геннадий Бекманов. Геннадий Корепанов, театрысь директорлэн воштӥсез. Кун Кенешын Пенсия дыраз тырозы Ужзэ азинтэ Удмурт Республикаысь Кун Кенешлэн нырысетӥ сессиез. 25 мае ортчем заседанияз парламент пумаз-йылаз вуттӥз Правительствоез но Кун Кенешлэсь Президиумзэ быръёнэз. Учукемын Эскерон палатаез быдтонъя закон, юнматэм Кун Кенешлэн Аппаратэзъя положение. Нимысьтыз ужпум ӝутэмын вал уждун, пособиос но пенсия тырон пумысен. Кызьы шуиз Правительстволэн Тӧроез Николай Ганза, туннэ нуналлы татын вань "портфельёс" люкылэмын. Тӧролэн огезлэн воштӥсезлэн интыез буш кельтэмын. Быдэсак быръемын но юнматэмын Кун Кенешлэн Президиумез. Отчы пыризы ялан ужась комиссиослэн кивалтӥсьёссы. Таяз заседаниын соос борды ватсаськиз на эшшо куинь мурт: депутатъёс Анатолий Салтыков, Евгений Богомольный но Равиль Каримов. Дэмламын на вал депутатъёс Валентин Кудинов но Валентин Тубылов. Соос кыксы но тырмыт куара люканы ӧз быгатэ. Правительствое быръемен валче депутатлэсь ужзэ быдэсъямысь дугдон сярысь куриськон вуиз Юрий Питкевичлэсь но Сергей Чикуровлэсь. Сессия соослэсь куронзэс быдэстӥз. Ӝот-ӝот вераськон ӝутскиз Кун Кенешлэн созывысьтыз депутатъёсын кылдытэм Эскерон палатаез быдтон ласянь. Та ужпумез эскеронлы куд-ог эшъёс пумит луизы, куризы мукет сессие выжтыны но отын решение кутыны. Юнматэмын ялан ужась комиссиос. Регламентъя но Кун Кенешысь ужез радъянъя комиссия сяна, ваньмыз соос пумаз-йылаз вуттэмын. Сессиын нимысьтыз ужпум ӝутэмын вал уждун, пособиос но пенсия тыронъя. Вераськиз республикаысь коньдонъя министр Владимир Бельтюков. Со шуиз: - Калыкез дышетон удысын ужасьёслы отпуск понна коньдон сётон кутскемын ни. Нырысьёсыз радын сое басьтозы дотация чотын улӥсь районъёс. Уждун ласянь тужгес но секыт югдур Балезиноын, Завьяловоын, Глазовын, Дэбесын, Кизнерын, Киясовоын, Пичи Пургаын, Селтаын, Сюмсиын, Ярын, Ижевскын. Верам районъёс пӧлысь куд-огез 2-4 толэзьлы пунэме пыремын ни. Соос шуге-леке вуэмын интыосын бюджетсы бушен, 40 процентэз коньдон тыриськыны кулэ асьсэ поттэм коньдон пӧлысь. Пенсиосъя, Россиысь музон улосвылъёсын ӵошатыса, республикаямы югдур умой, шуыны луоз. Апрель понна тырымтэ коньдон пичиен-пичиен берыктӥське. 1 августозь вань пунэмаськонъёс ӵошканы кулэ. Трос-а кулэ пенсилы коньдон? Толэзяз 181 миллион манет. Та лыдпус сокем бадӟым ӧй, дыр, адскысал, ужасалзы ке вань предприятиос. Данакез заводъёс калыклы коньдон тырыны уг быгато, таин сэрен уг быдэсмы Пенсиосъя фонд. Секытгес югдур нылпи пособиосты тыронэн. Куд-ог интыосын 1996 арысен пунэмаськонъёс кыстӥсько ни. Кытын быгато, берыкто сое коммунальной услугаос чотын но вузъёсын. Таин сессилэн заседаниез йылпумъяськиз. Депутатъёс ужзэс азинтозы 28 мае. Вераськон мыноз выт тыронэн герӟаськем ужпумъёсъя. Л. Медведева. Туспуктэмез В. Камашевлэн. Герӟа-огазея Пичи Пурга ёрос библиотекалэн юртаз ужасьёс ялан сюлмасько шаермес ӟечгес тодон сярысь - люкало районлэн, Пичи Пургалэн, гуртъёслэн но черкогуртъёслэн ортчем сюрессы сярысь материал. 1994-тӥ арын библиотекалы сётэмын удмурт культураез вӧлмытонъя центр дано ним. Аспӧртэмлыко та юрт - татын вань синпель сэрег но (музей), татын луыло шаерысьтымы суредасьёслэн ужъёсынызы адӟытонъёс но, татын луэ шутэтскыны но. Татын ик ортчыло ёросысь но шаерысьтымы тодмо адямиосын, удмурт писательёсын, поэтъёсын пумиськылонъёс. Соосты дася но радъя удмурт культурая клуб. 1996-тӥ арын ёрос библиотекаын ужасьёс пусъемын Удмурт Элькунысь Кун Кенешлэн данъян грамотаеныз. Библиотекалэн данэз вылӥын возиське. Ёросысь пӧртэм удысъёсын ужасьёс асьсэос сюлмасько та юртэн ӟеч кусыпъёс тупатон сярысь. Библиотека одӥг кыл шедьтыны турттэ калыкез дышетон удысын ужасьёсын, семья кылдытыны юрттӥсьёсын, пиналъёслэсь шутэтскон дырзэс радъясьёсын, егитъёсын, инкуазез утён удысын ужасьёсын, уже интыяськыны юрттӥсьёсын. Библиотекаын ужало аспӧртэмлыко адямиос. Куамын ар пала ини татын вис карытэк тыршо Е. П. Шалаева, Л. А. Шибанова, Г. П. Тубылова. Галина Петровна Тубылова мылысь-кыдысь кырӟа быдэс шаермылы туж тодмо "Зарни шеп" ансамбльын. Библиотека ужез азинтонэ уно кужымзэ понэ директор Удмурт Элькунысь культура удысысь сӥё-дано ужась Е. А. Лебедева. Улосысьтымы лыдӟисьёс понна вань сюлэмзэс сётӥзы но сёто Удмурт Элькунысь культура удысысь сӥё-дано ужасьёс Г. И. Маслова (дас вить ар ёрос кивалтӥз ёрос библиотекаен), А. Н. Шибанова, Р. К. Евсеева (Пужей-Уча библиотека), А. Ф. Николаева (Баграш-Бигра библиотека), суредась В. Д. Баталов. Нош усьтӥськизы выль библиотекалэн ӧсъёсыз 1989-тӥ арын апреле. Нуналлы быдэ пыра татчы туж уно калык. Соос пӧлын - лыдӟисьёс, пӧртэм ужрадъёсы пыриськылӥсьёс, турлы адӟытонъёсын тунсыкъяськылӥсьёс, аспал эшмылэн улонысь дырызлэсь вазь кошкем тодмо писательлэн Семен Самсоновлэн музеяз вуылӥсьёс. Гажано куноосмы пӧлын - кунгож сьӧрысь адямиос но. Выль библиотекалы туэ тырмиз дас ар. Нош нырысетӥ лыдӟиськон коркаос кылдӥзы ай тямыстон ар талэсь азьло - 1919-тӥ арын. Пичи Пурга ёрос библиотекаын ужасьёс. Владимир Камашевлэн туспуктэмез. Шунды Тугаськем кенеш Мар со - туала удмурт журналистика? Кыӵе луыны кулэ туннэ нуналлы тупась журналист, мар сярысь гожъяло егитъёс? Цыӵе юанъёсты сэрттыны-пертчыны "Шунды" дэменлык 19 мае "котырес ӝӧк" сьӧры егит журналистъёсты люканы малпаз вал. Но кенеше люкаськизы шальтрак редакторъёс гинэ. Ог-огзэс нуналлы быдэ адӟисьёс, журналистикаысь сюлмаськонъёсты тужгес но матын тодӥсь муртъёс ог-огзылы со сярысь вераса пукизы. Ужрад чакламын вылэм, Удмурт университетысь журналистика люкетэз туэ йылпумъясьёслэн куремзыя. Озьы, зэмзэ но, умой луысал - та ӝӧк сьӧрын ваче вераськыны быгатысалзы уж утчась (студент) но уж сётӥсь (валтӥсь редактор). Но, жаляса верано луэ, асьсэос студентъёс но, дышетӥсьёссы но кенешонэ ӧз вуэ. Кызьы шуиз "Удмурт дунне" газетлэн валтӥсь редакторез А. П. Шкляев амалтэк юан кылдэ: яке соослэн "Шунды" шоры сыӵегес учконзы, яке журналистика шоры. Вераме потэ, журналист луыны дасяськисьёс но валтӥсь журналистъёс сяна вань асьмелэн егит журналистъёсмы. Но малы ке таӵе вераськонэ соос ӧтемын ӧй вал. З. Рябинина. Правительствоысь иворъёс Пушкинлэн юбилеезлы Удмурт Республикаысь Правительстволэн Тӧроезлэн воштӥсез Виктор Шудегов А. С. Пушкинлэн вордскемез дырысен 200 ар тырмонлы сӥзем сӥё-дано ужрадэз дасясь группаен пумиськиз. Праздникез 4-тӥ июне Операя но балетъя театрын ортчытыны чаклало. Быдӟым кылбурчилэсь юбилейзэ пусъёнэ ӧтемын луозы творчество удысын ужасьёс, А. С. Пушкинлы сӥзем олимпиадаослэн но конкурсъёслэн вормисьёссы. Республикаысь Правительствоын али мынэ Пушкинлы сӥзьыса Россия Федерацилэн Президентэзлэн Указэзъя нимысьтыз кылдытэм медаленыз нырысьёссэ пусъёно адямиосты быръён. Кылбурчилэсь нимзэ куд-ог дышетон учреждениослы сётыны чакламын. Удмурт Республикаысь Правительстволэн пресс-центрез. Ӟечкыласьком Та нуналъёсы шаерамы шумпотымон ивор вуиз. Россия Федерацилэн Президентэзлэн 1999- тӥ арын 21 тӥ мае кутэм Указэзъя В. С. Осиповлы сётэмын генерал-майор звание. Вячеслав Сергеевич Осипов вордскиз 1956-тӥ арын УАССР-ысь Можга ёросысь Удмурт Вишур гуртын. Дышетскемез вылӥ. Йылпумъяз Пермьысь кун университетлэсь юридической факультетсэ. Ужаны кутскиз 1976-тӥ арын армиысь бертэмез бере УАССР-ысь Югдурез утёнъя министерстволэн Можга городысь ГОВД-аз оперативной связья инженер луыса. Можга ГОВД-ысь уголовной розыскъя отделениын, БСХСС-ын валтӥсь эксперт, инспектор луыса. 1986-тӥ арозь Можга ГОВД-ысь оперативной ужъёсъя кивалтӥсьлэн воштӥсез луыса ужаз. Собере ачиз кивалтӥз со ёзэн. 1992-тӥ арын Вячеслав Сергеевич юнматэмын Удмурт Республикаысь МВД-лэн криминальной милицияя службалэн кивалтӥсезлы воштӥсе, нош 1994-тӥ арысен - югдурез утёнъя министрлэн нырысетӥ воштӥсез, криминальной милицияя службалэн кивалтӥсез. Азьпалан - Африка Франциысь Нант городын ортчиз 100 иськеме бызыьлонъя дуннелэн чемпионатэз. Россиысь куать спортсмен ветлӥз отчы. Командаын вал Балезино ёросысь Пулыб гуртын вордӥськем удмурт пияш, кылем арын Япониын ортчем дуннелэн чемпионатаз командаен ӵош вормисе потэм спортсмен Анатолий Корепанов. Россилэн командаысьтыз спортсменъёс пӧлын со, ваньмызлэсь шаплы бызьыса, 4-тӥ инты басьтӥз. Саратовысь Дмитрий Радиченко вал 8 кужмоосыз пӧлын. Нош Москваысь Александр Моторин 12-тӥ инты басьтӥз. Озьы Россилэсь командазэ, 30 секундлы гинэ кельтыса, нырысетӥ интыез Франциысь бызьылӥсьёс басьтӥзы. Куинетӥ интыын Англиысь бызьылӥсьёс сю иськемез ваньмызлэсь шаплы ортчиз но дуннелэн чемпионэз луиз Англиысь спортсмен. Кыкетӥ но куинетӥ интыосын Франциысь но Япониысь бызьылӥсьёс. Россиысь командалэн тренерез вал Ижысь Владислав Сулима. Анатолий Корепановлы туэ 40 арес тырмиз. Со арлыдызъя ветеран ни. Дуннелэн чемпионатаз солы ветеранъёс пӧлын нырысетӥ инты басьтэмез понна кубок кузьмазы, Франциысь бертэмез бере ик тодмо спортсмен кутскиз дасяськыны дуннелэн кубокез понна ӵошатсконъёслы. Со ортчоз туэ 16 июне Южно-Африканской Республикаын. Иван Михайлов. Туспуктэм вылын: Анатолий Корепанов кубокъёсыныз но медальёсыныз. Туспуктэмез В. Беломорскихлэн. Азьвыл шпионлэн ивортонэз Великобританиысь кунсьӧрын разведкая МИ-6 служба чакла вал Югославилэсь президентсэ Слободан Милошевичез быдтыны. Сьӧд уж лэсьтыны куинь амал чакламын вал. Со сярысь ивортӥз Би-Би-Си компанилы телеинтервьюаз британ разведкалэн Россиысь но Ближней Востокысь азьвыл резидентэз Ричард Томлинсон. Дунэн ветлон сюрес Подмосковьелэн губернаторез Анатолий Тяжлов алигес областьысь администрациен но Америкаысь "Бид Холдингз ЛТД" компаниен Россиын нырысетӥзэ дунэн ветлон сюрес лэсьтон сярысь огкыл вылэ гожтӥськиз. Дуно сюрес 318 иськем кыстӥськоз но 1,2 миллиард доллар сылоз. Со кошкоз Клин но Солнечногорск городъёслэсь палэнэтӥ, ас бордаз кыскоз Егорьевской сюреслэсь 42 иськемзэ но Санкт-Петербурге нуись сюреслэсь 110 иськемъем люкетсэ. Шуг-секыт учырлэсь утёз Кольской атом электростанциын ТАСИС-лэн программаезъя чаклам проектэз уже кутыны дасясько. Со понна станцие интыямын трос ужъёсты быдэсъясь тренажёр. Мудрон арбери станциын ужасьёслы луонлык сётоз котькыӵе шуг-секыт учыръёсы ужзэс умой радъяны но шонер амалъёс кутыны. Иворъёсъя национальной служба. Юрттоз-а Удмуртилы ассамблея? Туэ апреле Москваын ортчиз Россиысь огъя движениэн - Россиысь калыкъёслэн ассамблеязылэн - нырысетӥ съездэз. Огазеяськон кылдэмын азьвыл Совето Союз куашкам бере солэн улосвылаз улӥсь калыкъёсты огазеян понна. Съездэн кивалтӥз Россия Федерациысь национальной политикая министр Рамазан Абдулатипов. СНГ-лэн 85 улосысьтыз люкаськем 342 делегат пӧлын вал асьме шаерысь ыстэм адямиос но: Россиысь калыкъёслэн ассамблеязылэн Удмуртиысь ёзэзлэн кивалтӥсез Юрий Семенов, "Удмурт кенеш" огазеяськонлэн вице-президентэз Нина Малых но Удмурт Республикаысь Нациосын ужанъя комитетлэн кивалтӥсезлэн воштӥсез Виктор Чулков. Съездын огазеяськонлэн уставезлэн инъетаз воштонъёс пыртэмын, юнматэмын пусэз (символикаез). Эскерисьёс пусъё: ассамблея бадӟым уж лэсьтӥз Россия Федерацилэн Президентэзлы но Правительстволы, озьы ик Россиысь калыкъёслы, общественной огазеяськонъёслы но движениослы ог-огзэс валаны курон но вань кужымзэс ӟеч ужъёс лэсьтонэ кыскон сярысь вазиськон кутыса. Съездын вераськемъёс тросэз пусйизы, калыкъёс куспын ог-огдэ валан мылкыд мед луоз шуыса. Со гинэ герӟа но огазея Россия Федерациез. Та дыре со герӟась сӥньысэз чигтон ласянь бадӟым кышкытлык вань. Асьме республикамы понна бадӟым ужпум кылдӥз финн-угор калыкъёслэн азинсконзы сярысь федеральной программа кутэмен валче. Сое быдэстоно луоз 2000-тӥ-2002-тӥ аръёсы. Программая Россиысь финн-угор калыкъёсты дышетонлы но культуразэс азинтонлы федеральной бюджетысь 30 миллион манет висъяны чакламын. Но Россия Федерациысь Национальной политикая министерстволэн висъям коньдонэз программалэн ог люкетэз гинэ луэ. Калыкъёслэсь культуразэс азинтон сярысь сюлмаськыны кулэ асьмелэн Правительствомы но. Огъя висъям коньдонэн гинэ луоз финн- угор калыкъёслэсь кылзэс, культуразэс но дышетонэз азинтыны. Игнатьев. Милициез но эскерисьёс вань "Я, мар со милицаос сярысь вераськонэз? Порядокез утиськом, шуо, нош асьсэос юо, лушкасько, укылтэмъясько". Тодмо кылъёс, озьы-а? Куд-ог дыръя калык пӧлын кылоно луэ сыӵе вераськонъёсты, вераськисез уката но туж ик уг эшъяськы ке законэн. Зэм, кытӥяз милициез пыкылыны но мугез вань. Нош сыӵе мугъёс ӧжытгес яке воксё медам луэ шуыса, Югдурез утёнъя министерствоын ужа пуш ласянь утиськонъя (собственной безопасностья) отдел. Со кылдытэмын 3 ар талэсь азьло. Малы кулэ луиз министерствоын выль ёз? Та юанлы но мукетъёсызлы валэктон сётэ та отделлэн кивалтӥсез милициысь полковник Михаил ВОРОБЬЁВ: - Милициын порядокез но дисциплинаез азьло эскерыса возе вал личной составъя инспекция. Нялтас вераса, мон ачим но отын ужаса вуи. Табере тани выль служба кылдӥз. Зэм но, малы со кулэ луиз? Ватонэз ӧвӧл, милициын ужасьёс но, ӧжыт ке но, йыртэманъёс, йыружъёс лэсьтыло, мукет сямен, законэз тӥяло. Кызьы ӟучъёс шуо, семьяын укылтэмезтэк уг луы. Милицие угось ужаны лыкто калык пӧлын быдэсмем, улэм адямиос, соосты пияла улын, теплицаын, нимысьтыз уг будэто. Озьыен, соослэн уродэз но, ӟечез но ваньмызлэн кадь ик. Милям кадровикъёсмы МВД-е ужаны лыктӥсьёсты котыр ласянь эскеро ке но, адямилэн лулаз-сюлмаз уд пыры ук. Мукет ласянь, улонын, обществоын воштӥськонъёс милям радъёсамы но югдурез лэчытомыто. Данакез милиционеръёс калык сямен ик ёрмысагес уло, соослы уждун уг тыро. Со дыре ик ужзы законлы тупасьтэм амалъёсын узырмыны тачак луонлыкъёс сётэ. Дорад сютэм семьяед пукыку, со луонлыкъёс туж гочато, вылаз ик, тынад "клиентъёсыд" вӧй пӧлын сыр выллем уло ке. - Озьыен, милиционеръёс пӧлын но вань преступление лэсьтӥсьёс? - Вань, кин бен ватэ сое. Азьланяз но луозы, мар юнме ушъяськонэз. Малызэ верай ини. - Кинъёс но кыӵе преступлениос лэсьто? Луэ-а оградзэ шараяны? - Кыл кутонлэсь палэнскыны турттӥсьёс кузьым, коньдон мычыны туртто следовательёслы яке ГИБДД-ын ужасьёслы. Сюро басьтӥсьёсыз но. Собере асьсэос шедё. Уголовной розыскын, патрульно-постовой службаын ужасьёс но участковойёс, кин меӵак калыкен ужа, мукет ласянь сьӧлыкало. Таосыз ӝегатэм адямиослэсь провооссэс тӥяло, вӧсь но карыны шедьто. - Шуом, кудӟемъёслэсь вытрезвительын коньдонзэс капырто... - Озьы но луылэ. Кылем арын Октябрьской РОВД-лэн вытрезвителяз одӥг адямилэсь 50 манетсэ талалллям. Ми та учырез эскеримы, янгыш лэсьтэм милиционеръёс кыл кутӥзы. - Михаил Васильевич, сыӵе учыръёс туж ӧжыт, дыр, куке милициен ӝоже уськытэм адями аслэсьтыз правооссэ, данзэ утьыны быгатэ. Мон тодэмъя, ӵемгес мукет сямен луыса кошке. Шуом, адямиез вытрезвителе басьто, нош ӵукнаяз солы талам коньдонзэ уг берыкто: номырид ӧй вал, пе, тынад, ваньзэ юыса быдтэмед яке ыштӥд, луоз. Яке мукетыз учыр. Ульчаын ӝегатэм адями уг но пумитъяськы, кылын гинэ милиционеръёслы мытэ, нош солэсь киоссэ позыръяло, суйпосъёссэ кортнало, резинка бодыен тыбыр кузяз маялто. Маке пумит вера ай - аслыд ик уродгес лэсьтод. - Югдурез шонер суредаськоды, ас вылады сое тодӥды шуыса малпалод. Но серекъятэк верано ке, вань сыӵе "сьӧлыксы" милям куд-ог мултэс сэзь ужасьёсмылэн, уката но сержантъёс но рядовойёс пӧлын. Соос милемлы бадӟым изъян ваё, данмес саптало, калыклэсь милицилы осконзэ быдто. - Я, таиз огъя кылъёс ини, Михаил Васильевич, вождэс эн вае. Нош мар тӥ лэсьтӥськоды сыӵе учыръёсты палэнтон, алон понна? - Милиция адямилэсь правооссэ тӥяз ке, со ӝегатскытэк вазиськыны кулэ прокуратурае яке милям службаямы. Ми одӥг вазиськонэз но эскерытэк ум кельтӥське. Жаляса верано луэ, куд-огез гражданъёс соосты ӝоже уськытэмез шарае уг потто. - Нош мар пайдаез вазиськыса но? Вытрезвительын уксёдэ талазы ке, нокызьы но уд быгаты ни ас кыл вылад сылыны, тынад со вал шуыса. Патрульнойёсты вӧсь каремзы понна янгыше уськытыны уд быгаты, адӟись ӧй вал ке. Мугорад лызэз-вожез но луиз ке, милиционеръёс шуозы: азьвыл ик озьы вал. Яке воксё астэ ик янгыш карозы милицилы пумитъяськемед понна, статья улэ вуттозы. Ӧжыт шат сыӵе учыръёс? - Верамады вань трос шонерез но. Зэм, шуг законэз тӥям милиционерез янгыше уськытыны. Соин ик ми шарае поттэм йыртэмасьёсты чик ум жаляське, кылзэс туж чурыт юаськом. Закон ӧжыт коть тӥямын ке, мултэс вераськытэк, соку ик МВД-ысь улляськом. Преступникъёс сярысь веранэз ик ӧвӧл, соосты прокуратуралы сётӥськом. Ваньмызлы визьнод мед луоз, мед тодозы мар луоз соосын, ужзэс уг ке дунъяло, законэз уг ке гажало. Дисциплинаез кышкан вылын возьыны туж ик умой ӧвӧл ке но, дыр, мар карод, мукетыз ӟечгес амал ӧвӧл на шедьтэмын бере. - Тани тӥ верады гражданъёслэн вазиськонъёссы сярысь. Соосъя гинэ-а тодӥськоды радъёсады законэз тӥям учыр сярысь? Яке тӥляд со понна мукет амалъёсты но вань? - Ӝыныез пала иворъёс вуо чагиськонъёсын. Мукетсэ асьме амалъёсын утчаськом но шедьтӥськом. Милям службамы угось оперативно-розыскной ужен но выре, со понна нимысьтыз отделенимы вань. Та удысысь нимысьтыз амалъёсты уже кутӥськом. - Милициын ужасьёс пӧлысь куд-огез тӥ сярысь сокем шуныт кылъёс уг верало. - Сьӧлыктэм адямилэн милесьтым кышканы мугез ӧвӧл. Соиз но зэм, милям ужмы тау карымон ӧвӧл. Мар бен умоез, артэ ужась эшъёстэ ялан эскерыса возиськод бере. Нош мукет ласянь учконо ке, кинлы ке но кулэ ук милям радъёсмылэн чылкытлыксы сярысь малпаськыны. Котьма ке но, одӥг ужез лэсьтӥськом. Милемлы эшшо секытгес йӧтэ ай: милиция погонэн преступникез огшорызэ сярысь трослы шуггес шараяны. - Бен тӥляд пӧрме-а? - Ма, няньмес воксё юнме ум кадь сииське. Туэ тани вить уголовной ужъёсты прокуратурае сётӥмы, 50-лэсь ятыр служебной эскерон ортчытӥм. - Тӥляд кужымды сержантъёс-лейтенантъёслы гинэ тырме-а яке бадӟымгес но "тылобурдоосты" эскерыны быгатӥськоды? Кыӵе "вӧлдэтэз" властьтылэн? - Быгатӥськом гинэ ӧвӧл, эскериськом но. Тани министрлэсь кыксэ воштсьёссэ но эскероно луимы. Дорамы ивор вуэ бере, ми сое одно ик эскерыны кулэ, должностъёс но званиос шоры учкытэк. Милемын меӵак кивалтэ угось министр гинэ. Г. ТИХОНОВ. Калыкъёсты огазеяса Удмурт Республикаысь Правительстволэн Нациосын ужанъя комитетэзлэн берло ортчем коллегияз эскеремын Кез, Юкаменск но Шаркан районысь администрациослэн калык культураез улӟытон бордын ужамзы. Тужгес умоен пусъемын Юкаменск ёросысь администрацилэн ужамез. Солэсь ужан амалзэ шаерысьтымы городъёсын но ёросъёсын паськыт вӧлмытыны ӵектэмын. Ёросын кылдытэмын удмурт, бесерман, бигер культурая центръёс. Пышкетын усьтэмын бесерман культуралы сӥзем музей. Отчы куное вуылӥзы ни Венгриысь, Финляндиысь, Эстониысь но Австриысь куноос. Районысь радио пыр чузъясько удмурт но бигер кылъёсын передачаос, ортчытэмын "Арлэн дышетӥсез" конкурс. Таиз конкурс нимысьтыз радъямын вал удмурт кылъя дышетӥсьёс понна гинэ. Кемаласен вераськонъёс мыно ни ыштэм бесерман письменностез утён пумысен. Но тодосчиос та ласянь туннэ но одӥг малпанэ ӧз вуэ на - вань ик-а нимысьтыз бесерман кыл яке со удмурт кыллэн диалектэз гинэ-а? Та юанэз йылаз-пумаз вуттон понна, туэ бесерманъёс доры выль материал люканы этнографической экспедиция потоз. Нациосын ужанъя кун комитетлэн тӧроезлэн нырысетӥ воштӥсез Виктор Чулков озьы ик тодматӥз кивалтоно удысэзлэн туэ нырысетӥ кварталэ лэсьтэм ужъёсыныз. Кылсярысь, быдэстэмын кылъёс сярысь законэ тупатъянъёс бордын ужан. Комитет трос лэсьтэ финн- угор калыкъёслэсь культуразэс азинтонъя федеральной программаез улӟытонын, Шаркан ёросысь Быги гуртын удмурт культурая центр усьтэмын, комитет огкылысь ужа удмурт егитъёслэн "Шунды" дэменлыкенызы, немец но еврей культурая огазеяськонъёсын. Со, юрттӥз Удмуртиысь башкиръёслэсь 1-тӥ Курултайзэс ортчытыны. А. Игнатьев. ВАЛЭКТЭ ЮРИСТ СЭРЕГЕЗ НУЭ АДВОКАТ ЛИЛИЯ ШКЛЯЕВА Музъем огдырлы сётэмын колхозлы Мынам мемеелы висъямын колхозысь 4,5 гектар музъем. Со колхозын ужамын пичи дырысеныз. Али мемеелы 80 арес. Музъемез утялтыны асьмелэн кужыммы ӧвӧл, мон - кыкетӥ группаен инвалид. Соин ик музъеммы колхозлы ик арендае сётэмын. Кулэ-а колхоз со понна милемлы маке сётыны? Музъем понна милям свидетельствомы вань. Сое колхоз кутӥз 1997-тӥ-1998-тӥ аръёсы. Евгений Глебов. Пичи Пурга. Музъемен кузёяське солэн кузёез. Озьы валэктэ Россия Федерацилэн Граждан кодексысьтыз 608-тӥ ёзэт (статья). Кузё, ас пайзэ арлэсь кемалы арендае сётыкуз, огкыл (договор) лэсьтэ гожтыса. Арендае басьтӥсь (вылӥ верам гожтэтын - колхоз) асваньбурез кутэмез понна тыре кенешемъя дун. Огкылын таиз пусйымтэ ке, дун тупатӥське та выллем ваньбурез кутыку мындагес. Огкылын мукет учыръёс верамтэ ке, аренда понна дунэз вошъяны луэ одӥг кылэ вуэмъя. Но араз огполлэсь ӵемгес озьы лэсьтыны уг яра. ШӦКЫЧ Мынам телевизоре Ижысь Карлуд шур узыр дун ошмесъёсыныз. Соин но, дыр, вазен со котыре гуртъёс интыяськиллям. Собере татын кылдӥз город, пуксизы заводъёс. Карлуд шур пумен жуг- жаг куян интылы пӧрмиз. Кӧня нюръяськизы ни инкуазез утисьёс йыртэмасьёслы пумит - пайдаез ӧвӧл. Пиналъёс сузяло, нош дядяйёс но апайёс бӧрсязы ик кырсёмыто. Шур кузя фотокамераеныз ветлӥз В. КАМАШЕВ. Лыдпусъёс верало Можга ёросын кылем аре 307 пинал вордскиз. 1997-тӥ арын сярысь, 34-лы ӧжытгес. Улонлэн арысь аре шуггес луэмез калык вылын шӧдӥськытэк уг кыльы. Туала вакытэ аслыд гинэ оскиськоно шуо бере, уг дӥсьто ни, лэся, пинал вордыны. Соинтэк маин валэктод сыӵе лыдпусэз. Озьыен, гуртысь унояз коркаосын чалмытгес луоз, уз шумпоттэ нылпи серекъям куараос. Кулэмъёс, азьло сямен ик, вордӥськем пиналъёс сярысь, трослы уно. Миым улонысь кошкизы 417 адямиос, 1997-тӥ арын - 409. Сыӵеос пӧлын тросгес 60 ареслэсь бадӟым нылкышноос. Вань дырызлэсь вазь кулэмъёс но. Кулон мугъёс пӧртэмесь, но трос учыръёсы адямиос быризы сюлэм висёнэн. Соин ӵош шумпотыса вераны кулэ, асьсэсыз асьсэос быдтӥсьёс кулэсмизы шуыса. 1997-тӥ арын 28 мурт ке вал, 1998-тӥ арын - 18 (16 пиосмурт, 2 нылкышно.) Озьыен, адямиос улонзэс дунъяны кутскизы, урод мылкыдзылы сётскыса, улонэн ӧз люкиське. Котькызьы ке но, улон азьланьтӥське. Яратӥсь адямиос выль семьяос кылдыто. 1998- тӥ арын 178 сюан вал, 1997-тӥ арын - 211. Куазьлэн котькыӵе дырыз вань шуэм сямен, семья пӧлын но ог-огдэ валантэм учыръёс кылдо. Соин кузпалъёслэн кусыпъёссы тэшкало. Огъёсыз быгато на тупатыны, мукетъёсыз уг. Пусйыны кулэ, люкиськонъёс тросгес вал 30-ысен 40 аресозь кузпалъёс пӧлын. Озьы 1997-тӥ арын 53 семья куашказ ке, 1998-тӥ арын - 40. Таӵе улонын шуг- секытъёсыз вормыны ӵошен капчигес. Соин но, дыр, уноез кузпалъёс малпаськытэк шуак-дуак вамыш ӧз лэсьтэ. ТАЗАЛЫК Чебер - чылкыт синчебер Синъёс - сюлэмлэн синучконэз. Та веранэн быдэсак соглаш луэ вуоно син эмъясь врач Надежда Семеновна Беликова. Анаез син эмъян больницаын медсестра луыса ужаз бере, Надялы нимысьтыз валэктонэз ӧй вал, малы дугдылытэк книга лыдӟыны, матысен телевизор учкыны уг яра. Ачиз но куддыр тодэмъёссэ возьматон вылысь эшъёссэ алылӥз, синчеберзэс утьыны дышетылӥз. Школаез йылпумъяса, программистэ мыныны малпа вал, но сюлэмыз визьзэ вормиз - медициная академие пыриз. Ньылетӥ курсысен син эмъян больницаын нырысь санитарка, операционной сестра луыса ужалляз. Травматологияя отделенилэн кивалтӥсез А. Н. Лялин синйылтӥз визьмо, уж борды мыло-кыдо басьтӥськись студенткаез, юалляськиз малпанъёсыз, тунсыкъяськонъёсыз сярысь. Надежда вераз компьютерен ужаны яратэмзэ но. Анатолий Николаевич шуиз: - Туж умой, син эмъянэз компьютерен герӟа но - дипломлы туж кулэ но пайдаё тема дась. Институтын дышетскон, медсестра луыса ужан сямен, Надежда ортчытъяз эскеронъёс: кыӵе изъян вае компьютер программистъёслэн синъёссылы. Ватонэз ӧвӧл, шӧдскымон. Уката ик очкиен ветлӥсь муртъёслы. Кызьы бен со изъянэз кулэстоно? Сое рос-прос эскерон понна, интернатура бере кык арлы клинической ординатурае кылиз на. 1997 арын докладэныз Вологдаын, 1998-ын Москваын Россиысь син эмъясьёслэн конференциосазы вераськиз. Алигес бертӥз Самараысь. Беликовалэсь ужзэ умоен дунъязы. Та ужпумъя берпуметӥез монография (со но врачлэн ӧвӧл) потэм вылэм 1986 арын. Али Надежда Семеновна кивалтӥсез юрттэмъя кӧня ке висисьёсты эмъя-чакла. - Кызьы бен синъёсты компьютерлэсь утёно, ӝоген соос котькытын луозы ни ук? - Компьютерен ужасьёслы котькуд ӝыны час бере 10-15 минут ӵоже синъёссэс ӵыдэтоно, комнатазэс ӵемгес кот мучолоен ӵушылоно, тӧлатъяно. Нуны возьмась кышномуртъёслы но сизьым аресозь пиналъёслы компьютерен ужаны чик уг яра. Телевизор но луэмезъя ӧжытгес учконо. Пиналзылы компьютер басьтыса, анай-атайёс малпало, ӟеч уж лэсьтӥм, асьмеды но пиналын выронлэсь мозмытӥм шуыса. Но соос туж янгышало - пиналлэн синадӟонэз йылаз-пумаз вуымтэ ай, соин ик сое сӧрыны уг яра. - Надежда Семеновна, зэм-а адямилэн пуштросэз синъёсыз пыр адӟиське. - Зэм. Сое нимысьтыз эскерись наука но вань - иридология. Аппарат пыр учкыса, адӟиське, кыӵе висёнъёсыз вань адямилэн, нош мылкыдзэ аппараттэк но котькудӥз вала, дыр, - соку ик адӟиське ук: синъёс бездытэсь, пожесь яке лекесь луо. - Тӥ ужаськоды травматология отделениын. Ӵемысь-а шудтэм учыр бере адямиос синтэм кылё, кызьы дасяськоды соосты сыӵе шуккетэз чиданы? - Сыӵе учыръёс луо. Висисьлы соку ик ум вераське, каньылля дасяськом, куддыр алдаськоно но луэ. Туж куректо кышномуртъёс. Шудтэм учыр ӵемысь луэ чакласькымтэысьтымы, эн вунэтэ со сярысь. Адямилэн чеберез синъёс бордын, нош синчеберез утён - адями киын. З. РЯБИНИНА. Шаерысьтымы киужъёсъя юртын усьтӥськиз выль адӟытон - асьсэлэсь устолыксэс таяз учыре нош ик возьмато Пичи Пурга ёросысь Вуж Монья гуртысь усточиос. Таяз радэ но узыр соослэн шыкыссы: Иже гуртысь кибашлыос ваиллям данак выль киужъёссэс. Соос пӧлын - куролэсь мунёос, кызьпулэсь сарбаос, лянэсъёс, пӧртэм пумо чибор ӵушконъёс, шобретъёс, ныпъетъёс, мукет арбериос. Киужъёсъя юртэн кӧня ке ар ӵоже ини сюлмысь кивалтэ Николай Тарасов. Солэн но мукетъёсызлэн верамзыя, вуж моньяослэн устолыксы сярысь тодо ни Москваын но, солэн сьӧраз но. Усточиослэн ужъёссы. Владимир Камашевлэн туспуктэмъёсыз. Бухгалтерский баланс страховой организации ОАО МСФ на 1.01.1999 (тыс. руб.) 426039, Ижевск, ул. В. Шоссе, 92-а. Тел. 44-22-25. Лицензии, знаки обслуживания, иные аналогичные с перечисленными права и активы... 112 9 13 Итого по разделу И (04,05) 114 9 13 Платежи, по которой ожидаются в течение 12 месяцев после отчетной даты 200 93 1 прочие дебиторы 203 93 1 Итого по разделу ИВ 205 93 1 В. Прочие активы 1.Основные средства, кроме земли и зданий (01, 02, 03) 210 127 148 2. Материальные ценности и затраты 220 13 13 в том числе: материалы и другие аналогичные ценности (10) 221 12 10 расходы будущих периодов (31) 227 1 3 4. Денежные средства 250 34 57 в том числе: касса (50) 251 1 1 расчетные счета (51) 252 33 56 Итого по разделу В 290 174 218 ВИ. Убытки Непокрытые убытки прошлых лет (88) 310 36 36 Непокрытый убыток отчетного года 320 Ъ 8 Итого по разделу ВИ 390 36 44 Баланс (сумма строк 114+160+173+205+290+390) 399 312 276 ВИИ. Капитал и резервы Уставный капитал (85) 410 200 200 Добавочный капитал (87) 420 9 9 Резервный капитал (86) 430 3 в том числе: резервные фонды, образованные в соответствии с законодательством 431 3 Нераспределенная прибыль отчетного года 480 Ъ Итого по разделу ВИИ 490 212 209 4. Кредиторская задолженность (кроме операций страхования сострахования и перестрахования) 620 100 67 в том числе: по оплате труда (70) 623 38 36 по социальному страхованию и обеспечению (69) 624 18 8 задолженность перед бюджетом (68) 626 2 прочие кредиторы 628 44 21 Итого по разделу Ъ 629 100 67 Баланс (сумма строк 490+497+500+629+690) 699 312 276 утверждена министерством финансов Российской Федерации для бухгалтерской отчетности. Отчет о прибылях и убытках страховой медицинской организации по обязательному медицинскому страхованию на 1.01.1999 Форма � 2а - страховщик по ОКУД Дата (год, месяц, число) 99 1 1 Страховая организация по ОКПО ОАО МСФ "Удмуртия" Отрасль (вид деятельности) об яз. мед. страх 24 по ОКОНХ 96210 Организационно-правовая форма ОАО по КОПФ Орган управления государственным имуществом по ОКПО Единица измерения тыс. руб. по СОЕИ 00000372 Контрольная сумма Прочие доходы, связанные с операциями по обязательному медицинскому страхованию 080 1029 951 Прочие расходы, связанные с операциями по обязательному медицинскому страхованию 085 1037 905 Результат от операции по обязательному медицинскому страхованию (строки (010+020- 030+040+050-060-070+080-085)) (+ или -) 090 -8 46 Прибыль (убыток) от страховой и финансово-хозяйственной деятельности (строки (090+120+130-140+150-160)) (+ или -) 170 -8 46 Прибыль (убыток) отчетного периода (строки (170+171-172)) (+ или -) 180 -8 46 Проверенная годовая бухгалтерская отчетность во всех существенных аспектах подготовлена в соостветствии с законодательством РФ и нормативными актами. Достоверность данного баланса подтверждена аудитором Кузнецовой Ларисой Александровной, свидетелсьвто госуд. регистрации � 4/1159, лицензия � 012689, выданная 20,03. 1998 года ЦАЛАК МФ РФ. Шӧкыч Телетайплэн ивортэмезъя Писательёс но мыйыко кузёос Шаерысьтымы писательёслэн огазеяськонзылэсь чалмыт но огсыр улонзэ ӧжытак бугыртӥз учыр. Со, оло, кин ке понна тумошо, кин ке понна туж ик ӧвӧл но, дыр. Одӥгаз кабинетын воксё вукылак луиллям вылэм тараканъёсын но шыръёсын. Веранэз ӧвӧл, ӧтьымтэ "куноос", патер понна дун тырем интые, писательёслы ваньмызлы сямен ик изъян ваё, вылаз ик, юрдытэсь но. Соин ик кабинетлэн кузёез со гыжкалъёслы ож ялоно кариськем. Ож тӥрлык - Выль ар кызэ шудон - "хлопушка" выллем арбери басьтэм базарысь. Кабинетын огназ дыръя шнурзэ кыскем. Ӝоген кивалтӥсьлэн оскымон юрттӥсез- утисез, секретарез, ӵынэз шӧдыса, ӧсэз усьтэ но чылкак абдра, кабинет секыт зын ӵынэн пачылмемын, укное мычиськем кузёез ик уг адскы. Чупрес нылкышно шуге-леке вуымтэ, тылпу кысӥсьёслы но "скорое" жингыртэм. Ӝоген Советской ульчаысь 1 номеро юртэ вуо куинь машинаен тылпу кысӥсьёс но медикъёс. Соосызлы но, таосызлы но уж ӧз шедьы. Зэм, куинетӥ этаже интыяськем учреждениосын пукисьёс ужзэс куспетӥ кароно луизы. Со понна ик кабинетлэн кузёез 40 манет штраф тыроно луиз. "Мыйыкооссэ" улляны удалтӥз-а, ӧз-а - информагентствоос уг иворто. Ф. Сюртуков, 7-тӥ разрядэн телетайпист. ШӦКЫЧ Николай Никифоров Паймисько Монолог Шигай Сарапион пересь арлыдаз чоркак огназ кылиз. Кузпалэз дас кык ар талэсь азьло кошкиз мукет дуннее, нылпиосыз быдэ вуыса городэ выжизы. Мӧзмыт луиз оген. Соин ик ӵемысь ас понназ лабыртэ. Тани али но капка азьысьтыз, тополь вӧзысь пуксёнэ интыяськыса, тамаксэ аратӥз но сюлэмвисёнзэ ӧръяны кутскиз. Вылаз дӥсям костюмез быгатыса-быгатытэк кышъямын, пыдъёсаз - гын сапегъёс. Ӵынзэ пур-пур пеллянъяз, лябӟем синъёссэ кырмышъяса лабыртэ. - Паймисько. Ма кудлань берга та улон питыран? Кык толэзь пенсиме ӧз вуттэ ни, тяфыръёс. Кин-о янгыш меда? Поштаын ужась Нина меда яке вылӥын пукись тӧроос? Оло, уксё печатлан кагаззы быриз ке шат? Америкаысь мед курозы, иське. Клинтон сётоз, со котьмаин юрттэ, шуо. Ма, куке но ваче пумит жугиськем немецъёс но юрттысалзы, дыр. Калыксылэсь кылем-мылем дӥськутсэс люкаса, асьме кунысь арлдыоослы келяло, шуо. Мед юрттозы ойдо. Ас сьӧлыксэс валало, дыр (кысэм тамаксэ аратыса). Эк-кой, дунне шу! Ма, мон гинэ тазьы уг курадӟиськы луоз. Тани алигес чагыр экран пыр ивортӥзы: "Кылем арен ӵошатыса, пе, асьме президентмылэн уждунэз дас поллы ичиёмиз". Остэ быри! Кызьы улэ-вылэ меда, мискинь? Солы чебер дӥськут но кулэ, висьыса улэ бере, эмъюмъёс но трос кулэ, вылды. Уката ик нунал пӧрат кунгож сьӧрысь куноосыз лыктыса уло. Маин сюдыны-утялтыны кулэ? Туала арын воргоронъёс ош кадь юо ук. Курытэз но трос Кулэ, дыр. (Кимышыныз синдуръёссэ ӵушылыса). Э-э, ачиз лябыт сямо, шунянь кадь. Нокызьы кунамы радлык пыртыны-тупатыны уг йӧндыры. Кылсярысь, уг лу шат Указ гожтыны: "Иисус Христослы лулъяськоно сыӵе-сыӵе толэзе, сыӵе-сыӵе числое. Инмаре, вождэ эн вай! (Гадьзэ кироса). А то ма луыса потэ? То апреле, то мае кутэ но лулъяське, синъёссэ усьтэ. Вылаз ик, пӧртэм числоосы. То 27-тӥ апреле, то 19-аз, тани Акашкаез 11-тӥ апреле пусйим. Таӵе ужъёсты, валантэмлыкъёсты нырысь-валысь пумаз вуттоно вал, дыр. Сотэк улон рад черодзэ шедьтоз шат? (шуэ выльысь тамак бинялтыса). Паймисько. Кутӥз но кулӥз айы коӵыше. Пинал вал ай, улымон. Пудо першаллы верай но, юа: "Маин, пе, сюдӥд?" Тодмо ни маин. Ачим картошка сиисько, сое но соин ик куноясько вал. Оло шонерзэ вераз, оло серемпыр. Ялан картош сиись пудо, пе, кӧткыль йӧтыса кулэ. Нош мон чидасько ук! Пудо вордымтэе бере, кытысь-о шедьтом мон солы сӥль-вӧй? Ачим но ымдуръёсме нюлыса сиысал, дыр. Шыръёсты кутылоно вал солы, пӧрмостэмлы. (Йыртышсэ кормыштыса). Оло, юртъерам шыръёс но ӧвӧл ни, бускелям кӧчизы? Озьы луоз. Мон дорын кӧттыр шедьтозы шат? (Кыдёке учкыса пукемез бере). Паймисько. Мозамбикаысь кышномурт куатьтон арес тырмем бераз, пе, нылпи вордэм. От, герой! Кӧня арес меда картэзлы? От, таиз сярысь газетчиос гожтымтэзы. Оло мыным но шур сьӧрысь Огопья доры ветлыса утчано ни? (Интыысьтыз султыса, ульча кузя вамыштэ). Юрттэ кынмем будостылы Ноку вылымтэ бадӟым куректон ваиз туэ куартолэзь сад-бакча возисьёслы. Луоз на-а утьыны кынмыны шедем будосъёсты? Тани кыӵе дэмланъёс сёто со пумысен агрономъёс. Кинлэн шунтоно теплицаез ӧвӧл, помидор, ческыт пӧсьтурын но мукет будосъёссэс музъеме мерттыны ӧз дыртэ, луоз. Шуныт азьын сылыса, бакча сиён удъёс "кузь кук" луыса вуизы, лябӟизы. Но сыӵе удъёсты утьыны луоз. Начар будэм помидорлэсь йылзэ чигтыны кулэ, отӥяз будос кужмоялоз, урдэс пушъетаз (пасынок) выжы лэзьыса. Вань мукетыз но амал - томатэз мерттон азьын улӥысьтыз кык-ньыль куарзэ вандоно, музъеме мерттоно. Будосэз интыяно кырыжтыса. Озьы помидорды тросгес выжы лэзёз но ӟеч пушъёз. Нош кынмем горд но ӵуж кушманэз, кабачокез но огречез одно ик выльдоно. Но мерттыны тыршоно вазь но шоро-куспо вуись будосъёсты гинэ. Тодады вайытӥськом: горд кушман яратэ мур гудэм, ӟеч небӟытэм музъемез. Горд кушманэз мерттон азяды убояды пень тыре, будос музъемысь мычиськем бере, одӥг пол ляб дасям сылал вуэн киськалэ. Одӥг ведра вулы бадӟым пуньы сылал кулэ. Огречлы но кабачоклы кельше "шуныт" убо. Мерттон азьын кидыссэ кот ӟустариен шобыртыса возёно. Шуныт "миндэрлы" кыед сяна мынэ кылем жуг-жаг турын. Но сое нырысь ик куасьтоно, мочевина суретэн пазяно. Кынмем картофка пудъёсты музъем дортӥз ик лэчыт пуртэн вандыса утчалэ. Кезьыт музъем емышты дорозь ӧз ке вуы, со выльысь будыны кутскоз. Озьы вандэм пуд интые кык-куинь модос кылдоз. ТАЗАЛЫК Юалэ - валэктом Пыктослы - эмъюм Гажано редакция! Куке но тӥ гожъяды вал калык эмъясьлэн пыктосэз (ракез) йӧнатыны быгатэмез сярысь. Йӧнатӥсьлэн фамилиез Тихонов вал кадь. Мон со гожтэмдэс вандыса кельтӥ, но пичиосмы кесяллям. Ӧй быгатысалды-а со амалъёс сярысь газетады выльысь гожтыны? Мукет лыдӟисьёслы но со юрттоз, дыр - берло дыре та кышкыт черлэсь милям гуртамы ик ньыль мурт кулӥз. В. Гришкин. Алнаш ёрос. Пыктос висёнэз эмъян сярысь гожъяз "Для Вас" газет 1991 арын 31-тӥ номераз. Та материал вакчиятыса печатламын вал "Удмурт дуннеез" лыдӟисьёс понна но. Соослэн куремзыя, выльысь поттэмын 1995 арын 19 мае. Сомында ар ортчыса, лыдӟисьмы нош куре со амал сярысь гожтыны. Быдэстӥськом солэсь куронзэ. Пумен паськыт вӧлме, тодмогес луэ Симферопольысь эмъясьлэн Валерий Викторович Тихоновлэн нимыз. - Вакчияк вераса, мон огазеясько Библиысь гожтэмез, материаловедениез, астрофизикаез но турынъёсын эмъянэз, - шуэ со. - Мыным кылдӥз усьтыны выль законэз. Аслам чакламъёсыя шедьтыны быгатӥ висись клеткаосты быдтӥсь пӧртэм ядъёс. Нош тазаосыз клеткаос ядъёслы пумит иммунитет кылдыто, мукет сямен вераса, клеткаос асьсэос та ядъёсын нюръяськыны кутско. Со ик вормыны юрттэ пыктосэз. Вань пыктос висёнъёс, мон сямен, кутско сюлэмлэн, вирсэръёслэн урод ужамзы бордысь. Соин ик нырысь эмъяны кулэ соосты. Вирсэръёс умой ужало ке, отын рак ӧвӧл. Табере усьто аслэсьтым эмъян амалме. Вить бадӟым пуньы векчиятэм кыз лысэз но сомында ик пужым лысэз (туалазэ) сурасько ӝыны литр вуэн. 10 минут пӧзьтӥсько но уй ӵоже ӵоксаса пукетӥсько на. Сӥсъяса огшоры ву интые юыны дэмласько висисезлы но, висисьтэмезлы но. Парос шуныт мед луоз. Лыс парос мугорысь клеткаосты сузя. Сое юыны яра ваньмызлы. Со юрттэ озьы ик гангренаез, эндартеритэз, сюлэм но вирсэр висёнъёсты йӧнатыны. Кышкатэк верасько, тазьы лэсьтэм эмъюмен бурмытыны луоз ог 80 процентсэ висёнъёсты. - Нош адями ракен висе ни ке? - Йырвисён ӵушнилэн (пятнистой болиголовок) сяськаосызлэсь соксэ сурано водкаен яке кизертэм спиртэн. Вераны кулэ, та турынын трос ядэз. Чаклаське! Лэсьтэм суретэн бурмытыны луэ ӝушысь, гульым выжыысь, ньылонысь, ноны нёредысь ракез, висён ньылетӥ стадияз ке но вуэмын ини. Сокез басьтоно туж ӧжыт гинэ (шапык-кык). Шӧкыч Омыр уг вузаськы Ма но уг малпало туала дыре визьмо тодосчиосыд! Кыӵе гинэ механизмъёс но машинаос уг ужало котырамы. Компьютеръёс но Интернет сярысь веранэз ик ӧвӧл ни. Ваньмыз адями понна лэсьтэмын кадь. Но со дыре ик уноез адямилы пумит ужа. Тани басьтом омырез ик. Тодӥськоды-а маин шокаськом асьмеос? Инкуазез утёнъя специалистъёс ар ӵоже омырлэсь чылкытлыксэ эскерыса улӥзы. Государственной шуон автотранспорт гинэ арскын йыр выламы 105 тонна пӧртэм хими суретъёс кымалтӥз. Татын нимаз транспорт возисьёс лыдэ басьтэмтэ на ай. Зэм, туала дыре машинатэк улонэз син азе пуктыны шуг. Велосипедэн нош туж ик кыдёке уд вуы. Автомашинаослэсь омыре кырсь ӵын поттэмзэс эскерон вылысь нимысьтыз ёзъёс ужало. Бен, ужаны ужало, но республикаямы та ласянь закон кутэмын ӧвӧл на. Тани тӥяськымтэ одӥг автомобиль гинэ 100 иськемез ортчытозяз сомында кислородэз сутэ, со адямилы шоканы быдэс арнялы тырмысал! Нош тӥяськем машина кӧня изъян вае меда? Адями со ветлӥсь фильтр выллем. Асьме пушкын сю литръёсын омыр берга. Вань кырсез мугорамы кыле. Со бордысь ик пото пӧртэм висёнъёс но. Вулэн ӟечлыкез сярысь ке верано, шаерамы со ушъямон ӧвӧл. Но со понна магазинысь вуэз чылкытатон фильтр басьтыны луэ. Нош магазинысь чылкыт омырез зарниен но уд басьты. Нырысетӥ июньысен 15-тӥ июлёзь Россиын нош ик ортчоз "Чылкыт омыр" ужрад. Толэзь но ӝынызэ ке но, оло, гань-гань шокалом ини. Со нуналъёсы элькунысьтымы котырысь инкуазез утёнъя комитет сюресъёс вылын шудтэм учыръёсын нюръяськонъя кун инспекциен (ГИБДД) ӵош эскеронъёс ортчытозы. Соин ик ӵын потон гумыостэс ӟечгес сузялэ. Ю. Жаркова. Осконзы турынлы Алнаш ёросын трос аръем турынъёс пӧлысь тужгес но дунъяло клеверез но люцернаез. Та турынъёслэн выжыосазы уго азот люкаське. Соин ик клевер но люцерна бӧрсьы кизем юос кӧня ке ар ӵоже синмаськымон удалто. Эштосъёсын вылӥысен кивалтэмысь дугдэмзы бере, гурт калык табере ачиз чакла, кӧня но мар кизёно. Куд-ог колхозъёсын трос аръем турын муос куиньмослэсь но ятыр музъемзэс басьто ни. Туэ но ёросын турын кизьыны ӟеч дасяськизы. Кидысъёссы эскеремын, ваньмыз со тупа куронъёслы. Кеносъёсы кисьтэмын вал 983 центнер кидыс, валлян арен ӵошатоно ке, со куиньмослы тросгес луэ. Гужемлы ӟечгес дасяськизы "Большевик", "Прогресс" но "Молодая гвардия" колхозъёс. П. НИКОЛАЕВ. Тазалык Йӧнатэм... Моцарт Вашкалаосмы оскылӥллям: крезьгур огазея инбамлэсь но музъемлэсь кужымзэс, соин ик со адямиез эмъяны но уродэ но вуттыны быгатэ. Шубертлэн, Шуманлэн, Чайковскийлэн, Шопенлэн, Листлэн вӧлмыт, нялмыт крезьгуръёссы юртто секыт малпанъёсты вунэтыны, йырез шутэтскытыны. Джаз, блюз но Африкаысь вуэм мукет крезьгуръёс мылкыдэз ӝуто, кужым сёто. Элвис Преслилэн, "Роллинг Стоуз" группалэн, Майкл Джексонлэн кырӟамзы выллем рок-музыка (вакчи дыр ӵоже кылзоно ке) быгатэ нерваосты буйгатыны, секыт ужам бере кужым пыртэ. Инмарлы вӧсяськон крезьгур буйгатэ, вӧсь луэмез анальгин выллем быдтэ. Но тужгес вылӥ дунъясько Моцартлэн крезьгуръёсыз. Соос туж чалесь но, туж калленэсь но, туж золэсь но, туж шыпытэсь но ӧвӧл, соос огшорыесь - та бордын соослэн кужымзы. Кылсярысь, тодмо актёр Жерар Депардье могамлэсь эмъяськем, Моцартлэсь произведениоссэ кык арня ӵоже нуналлы быдэ кык час кылзыса. Канадаысь городъёслэн ульчаосазы та композиторлэн крезьгуръёсыз чузъясько - озьы машинаос шергес секыт учыре сюро. Японецъёс шӧдӥллям: Моцартлэн крезьгуръёсыз улсын котэм нянь гинэ но 10 поллы чальгес вуэ, пе. Крезьгур - туж ӟеч психотерапевт. Ненег гур улсын умме усем адями чебересь уйвӧтъёс адӟыса кӧлэ. Дышетскисьёс дышетӥсьсэс ӟечгес кылзо но выль материалэз чальгес валало. Тазалык Юртты аслыд ачид Кынмаса висьыны кутскиды ке, вань усто эмъяськон сурет - киренен кофе. Дасяно сое тазьы: киренез вуштоно, нош кофе пызез таба вылын ӵыжатоно. Басьтоно: 2 чечы пуньы кирень, 3 чечы пуньы ӵыжатэм сьӧд кофе но кык стакан ву. Ваньзэ сураса пуктоно тыл вылэ. Быректэм бераз 20 минут пӧзьтоно, собере сӥсъяно, кӧня ке сӥятоно. Юоно пӧсьын. Огпол юэмлы - ӝыны стакан. Нуналаз 2-3 пол юоно сиськемлэсь 10-20 минутлы вазьгес 3-5-7 нунал ӵоже. Таӵе эмъяськон амал висисез син куспын пыд йылаз султытэ. Малы ке шуоно, кофе юнматэ лулсӥосты (нерваосты), кыдатэ мугорлэсь висёнъёсын нюръяськон кужымзэ. Сюлэмез чырмытгес ужатэ. Сайкытгес каре визез, быдтэ жадемез, ӝутэ мылкыдэз. Нош кирень мугоре каръяськем микробъёсын нюръяське, ӝушлы, сюлъёслы ӟечгес ужаны юрттэ. Чаклаське! Киренен кофеез уг яра юыны сюлэм висёнъёсын, гипертониен курадӟись адямиослы. Басьтэмын "Лекарства из ничего" книгаысь. Дасяз С. ЯКОВЛЕВА. Туэ - Дуннеысь арлыдоослэн арзы Лыдӟисьёслэн юанъёссылы валэктэ калыкез улон-вылонын утёнъя министрлэн воштӥсез Наталья Кузнецова 1-тӥ майысен Россия Федерациын пенсилэн быдӟалаез 12 процентлы будэтэмын. Верало, ваньмызлэн, пе, со одӥг кадь уз буды. Пыр-поч валэктэ вал кинлы кызьы сётӥське выль будэтэм пенсия. М. КОРОЛЕВА. Ижевск город. Оло шумпотод, оло бӧрдод - Россия Федерациысь Президентлэн указъёсыныз но Россиысь Правительстволэн постановлениеныз арлыдоослы калыкез улон-вылонын утён ёзъёс пыр сётӥськись вань пенсиослэн быдӟалазы будэ. Но котькуд пенсионерлэн со пӧртэм луыны быгатоз. Пенсионеръёсты туннэ кыклы люкыны луоз. Одӥгъёсыз пенсия басьто вуж законъя - лыдэ басьтӥське ужам стаж, басьтоно уждун, надбавкаос но мукет йылэтонъёс, (компенсация). Кыкетӥосызлэн (соос трос ӧвӧл, вань пенсионеръёс пӧлысь ог 30 процентэз) пенсизылэн быдӟалаез лыдъяське ужам стажлэсь, Россиысь шоро-куспо уждунлэн быдӟалаеныз ӵошатэм, уждунысь, озьы ик Россиын туннэ нуналэ сётӥськись шоро-куспо уждунэз лыдэ басьтыса. Таяз учыре компенсация уг йылтӥськы ни. Нош 1-тӥ майысен бадӟыматэм пенсия басьто соосыз но, таосыз но. Кин пенсия басьтэ вуж законъя, 12 процентлы будӥз солэн пенсиезлэн быдӟалаез (надбавкаосты но лыдэ басьтыса), компенсация азьло мында ик кылиз. Шуом, тӥ басьтӥськоды 390 манет пенсия. 97 но 75 копейкаез отысь - компенсация. Огъя басьтоно пенсидылэн быдӟалаысьтыз куштэ компенсацилэсь лыдзэ, собере будэтэ сое 12 процентлы. Со потэм лыдпус вылэ йылтэ ни компенсацилэсь быдӟалазэ. Со ик луоз огъя басьтоно пенсидылэн лыдыз. Нош выль законъя пенсия басьтӥсьёслэн 12 процентлы будэ огъя басьтоно пенсизы. 12 процентлы будэтыса но пенсидылэн быдӟалаез луиз ке 349 манет но 93 копейкалэсь улӥ, соку тӥ басьтоды на ватсам компенсация 12 процент. Шуом, кудӥзлэн луиз 300, 305, 310 манет. Ваньзы соос 1-тӥ майысен пенсия басьтозы 349 манет но 93 копейка. Кинлэн пенсиезлэн быдӟалаез вал 349 манет 93 копейкалэсь улӥ, нош 12 процентлы будэтыса та лыдпуслэсь бадӟым луиз, яке пенсидылэн быдӟалаез вал ни 349 манет 93 копейкалэсь трос, соку пенсидылэн выль быдӟалаез будэ 12 процентлы гинэ, компенсация со пенсионеръёслы уг сётӥськы. Пенсионеръёслэн юанъёссы кылдо на мартэ сётэм 69 манет компенсация пумысен. Со чакламын вал вань пенсионеръёслы одӥг толэзь понна гинэ сётыны. Май толэзьысен куд-ог пенсионеръёслы пайдаёгес луиз вуж законъя яке вылезъя пенсия басьтыны. Калыкез улон-вылонын утён удысын ужасьёс, ваньзэ сое лыдэ басьто. Котькуд пенсионеръя нимысьтыз лыдъянъёс ортчытэмын, адями ачиз ӧз ке но вазиськы. Кудӥз законъя пенсилэн быдӟалаез тросгес луэ, соя ик сётӥське будэтэм пенсия. Гажано эшъёс! 28 мартэ 2 часын "гужем" дыр тупатӥське. Соин валче часъёслэсь стрелкаоссэс 1 часлы азьпала выжтоно. Сюдоз школа бакча Сарапул ёросысь Нечкино шор ёзо школаын нырысетӥ июньысен 1-тӥ - 10-тӥ классъёсын дышетскисьёс понна усьтӥськоз гужем ужась лагерь. Отын экологияя, спортъя, шаерез тодонъя но бакча сиён будэтонъя звеноос ужалозы. Пиналъёслэсь ужан но шутэтскон дырзэс радъян сярысь сюлмасько дышетӥсьёс. Нылпиос толалтэлы столовойзылы бакча сиён будэтозы. Озьы сиськон дунтэмгес усёз. Кылем арын школа бакчаын укмыс тонналэсь уно бакча сиён но картофка будэтӥзы. Со быдэс дышетскон ар бырытозь сиён пӧраны тырмиз. Школалы бакча сиён будэтыны 0,8 гектар но картофка мерттыны одӥг гектар музъем висъямын. Бадӟым классъёсын дышетскисьёс гужем ӵоже "Нечкинский" эштосын комбайнёрлэн юрттӥсез луыса ужалозы, пудо возьмалозы. В. Лагунов. Тудӟем бере - сяськаяськон Яке воксё пӧртэмесь ӝытъёс сярысь Таиз тулыс, зэмзэ но, туж крезьгуро вал: фольклор ӝытъёс бордысен кутскыса, П. И. Чайковскийлы сӥзем фестиваль дорозь тудӟиз. Эсьма, Удмурт театрмы но выльысь пуктэмын крезьгуро комедия - "Ой, чебер нылъёс". Ас быгатонзэс воректытӥзы Галина Платонова, Юлия Кузьмина, Любовь Быкова. Концертъёссэс сётӥзы "Италмас" но "Айкай", "Шулдыр ӝыт" но "Катанчи", "Танок" но "Инвугуръёс".. Ижевскын крезьгуро, кыло-буро ӝытъёссэс ортчытӥзы удмуртлыкмес тужгес юн возись ёросъёс - Шаркан, Пичи Пурга но Алнаш. Чакласькод ке, одӥг адямиос ик пӧртэм концертъёсы уг ветло. Котькуд артистлэн, кырӟасьлэн - аслаз учкисез. Озьы ик - Юлия Кузьминалэн. Ар талэсь азьвыл творческой ӝытаз ветлэмъёс нош ик лыктӥзы, та чебер, котыр ласянь быгатӥсь кузпалъёслы синмаськыса, мусо нылъёссэс адӟемзы потыса. "Будэммес возьматэммы потэ", - шуиз вал Юлия. Зэм, уката ик со пиналъёс вылысь адске. Тани Светазы пинал усточиослэн школаязы 6-тӥ классэз йылпумъя. Фортепианоен умой шудэ ни, ачиз но гуръёс гожтыны йӧндыре, кырӟа но. Люба, пичи ке но ай, куать арес гинэ, сцена вылын вуын ӵӧж кадь эркын ассэ возе, туж шӧдэ крезьгурлэсь ритмзэ, ас кожаз (шонерзэ - анаез юрттэмен) эктыны дышем. Нош дэремъёссы та нылъёслэн котьку ик лӧб-лӧб, выжыкылысь кадь чебересь (анайзы ик вуре). Мусоям но ӟыгыръям потэ таӵе нуныкайёсты. Соин ик концерт бере кин ке лулӟыса шуиз: "Эх, ваньмыз удмурт семьяос нылпиоссэс тазьы чеберлыклы дышетысалзы ке..." Юлия Кузьмина, дышетскемезъя дирижёр-хоровик но кунгожсьӧр (немец) кыллы дышетӥсь, кырӟасьёсын-профессионалъёсын ӵошатскыса ужа. Дасо мында кырӟанъёсыз тодмо луизы ни калык пӧлын, тужгес но "Анаелы" кырӟанзэ ӵем гинэ радио пыр сётыны куро. Гожтӥз со "Дор" спектакльлы кырӟанъёс но. Одӥг бичетэ люкаса поттӥз "Вордӥськи мон кырӟанэн" сборниксэ. Та ненег гинэ, чиед-веськрес нылкышно кужмо пельпум борды пыкъяськыны быгатэ. Кузпалыз Виталий - Ижысь механикая заводысь инженер. Кытчы ке концертэн ке потоно, котьку ӵош. Йӧн кузпал вӧзын нылкышно сяськаяське... Нош творчество - со сыӵе маке: мур поръясь уг луы, кожъёсыз ке отын ӧвӧл. Каньылля ке визыла, со лазег. Бугыръяськытӥсь кужым кулэ, кулэ, кудӥз азьлань мед нуысал творческой мылкыдэз. Берло дыре Юлия Кузьминалэн со шӧдӥське ни. Кылбуран ласянь но юнмазгес - соин ик, кырӟанзэ-эктэмзэ гинэ ӧвӧл, кылбур лыдӟемзэ но кылэм потэ вал со ӝытэ. Дас-дас вить аръёс гинэ талэсь азьло асьмелэн ӧй вал на чувашъёслэн Светлана Азамат, поръёслэн Светлана Эсаулова кадь кылбур но, кырӟан но гожтӥсь, асьсэос ик сое гитараен яке мукет инструментэн шудыса быдэстӥсь нылкышноосмы. Табере вань асьмелэн Светланамы но, Юлиямы но, Надеждамы но, Аннамы но... соосыз тодӥськоды. Тросэз потэ асьсэ бордысь - ас кужымзы, тыршемзы, югытэ-вылӥе кыстӥськемзы бордысь. Нош котыраз сайясез, утисез ӧвӧл ке, сяська но куасьме. Юлия Кузьминалы ӝытсэ-концертсэ дасяны но ортчытыны юрттӥзы, кузпалыз сяна, матысь эшъёсыз, спонсоръёсыз. *** Любовь Быкова. Висъянтэм герӟаськемын ни таиз но нимтул (ним но фамилия). Сое верало ке, соку ик син азе пуксе тэтчась буётылъёсын, синэз кыскись туала ритмъёсын "зуркатӥсь" сцена. Техномузыка. Отысь залысь, куд-огез пельзэ ӵоксаса кошкоз - йыры, пе, жон-жон луэ, нош мукетыз, поромытӥсь берганэ сюрыса, ачиз но уз вала, кызьы эктыны потоз, тэтчалоз, ӟыгыръялоз... Тросэз со егитъёс, студентъёс, озьы ик арлыдогес муртъёс, кин ӟырдатӥсь крезьгурез яратэ. Кудӥз шуоз: кылъёссы гинэ удмурт та кырӟанъёслэн. Ӧйтод... Оло нош, тазьы шуыны луоз: кырӟан, удмурт кылын ке со, удмурт сямен малпаськытэ, озьыен, отчы удмурт шӧм пыӵа, удмурт лул пыре. Юнме шорысь-а асьме егитъёс, тросэз, сокем ярато та кырӟасез. Куд-ог гуръёсыз - пырак блюз яке мукет, со выллем ке но... Нош мукетъёсыз - ӟуч крезьгурчиослэн. Кӧня ке кырӟанзэ гожтӥз ни Любовь Быковалэн продюсерез Александр Козырев: "Мерседес", "Тук-тук-тук", "Синкыли". Куддыръя крезьгурчи кариськылэ яке кылбураны кутскылэ ачиз но Люба. Нош ӵемгес соос вазиськыло удмурт кыл бурчиосмылы, кылсярысь, берло дыре эшъяськизы Алексей Ельцовен. Любаез сцена вылэ кык пол тубаса ик ӟыгыръяны-чупаны дась пилэсь юай: малы сокем яратӥськоды та кырӟасез? Со шуиз: таӵеез ӧй вал на. Кык лул шоканъёс огазеясько ке, пӧрме яратон. Удмурт ныллэн но ӟуч (яке англи, немец) пилэн яратонзы. Татын но озьы, дыр. Залын вӧзам пукисе шуиз: "Вот, пе, Быковаез удмурт Мадонна шуо вал, - ӧвӧл, со удмурт Пугачева." Мукетыз шуоз: "Распутина яке эшшо кин ке..." Таӵе ӵошатонъёс, оло, аслыз кырӟасьлы уз кельше (котькуд сяськалэн гинэ но аслаз нимыз), нош огез туж умой адӟиське: Любовь Быкова аслаз ӟырдытлыкеныз (темпераментэныз) быгатэ учкисьсэ вырӟытыны, тулкымъяськытыны, ас котыретаз бергатыны. Солы таяз учыре юрттӥзы "Вылӥ электрокужым" группа, солистэз Александр Катков, но модая театръёс - "Зангари", "Шарм". Кӧня ке ватсалом: А. Катков - Л. Быковалэн дышетскисьёсыз пӧлысь (со школаын ужа на), нош группазэс кылдытӥз А. Козырев ик. Тани ма вера ачиз продюсер: - Кырӟан утчан, гожтон бордын ужаку, ми шугзэгес басьтӥськом, Западысь. Соин огазеяськыса, маке но пӧрме (ӟучъёсыз лябесьгес на). Лариса Долинаез учкемъёс милемыз ӧз курлалэ. Нош Орбакайтелэн концертаз кин ветлӥз, ми сярысь ушъясагес веразы. Зэмзэ ик, таӵеез ӧвӧл Татарстанын, Башкортостанын но. Любалэсь концертсэ та ӝытэ ӟучъёс тросгес учкизы кадь. Ӧтё Москвае но - ум дыртӥське, татын чидантэм ӧвӧл на. Тӥни озьы, иське, зол юрттӥсед-сюлмаськисед, продюсеред но студиед вань ке, шултыса ик луэ азьлань мыныны. Адӟом ини, кытчы вуттоз поездэз удмурт попс кизилимес Любовь Быковаез... *** Крезьгур, поръятӥсь крезьгур каръяськемын удмуртлэн лул пушказ. Кытын ке кырӟан-эктон, концерт, отчы тачак люкаське калыкмы. Нош люкаське ке, ачиз но быгатэ шулдыртыны. Таиз ӝыт - филармониын тырмытэмын вал алнаш бӧлякъёсын. Синмы сузён интые, Киосы ке сузьысал, Тӥ, яратон туганъёсме, Огазе ӟыгыртысал. - калык кырӟанысь таӵе кылъёсты тодэ вайытӥз алнашъёслэн данъямон нылзы Кун Кенешлэн депутатэз Нина Андреевна Образцова. Со вераз, кызьы удмурт кырӟан устолыкез ӝутыны юрттӥзы аспал крезьгурчиоссы: "Ой, тӥ, чебер нылъёс" кырӟанэз бордысен кутскыса - Петр Кубашев, "Ӝуткам дэремме дӥсяса..." - Пантелей Кузнецов, "Сюрес дурын" - Николай Постников, "Вамыштомы артэ" - Михаил Оськин, "Вай, ошмесэ" - Геннадий Ганьков... Зэмзэ ик, алнаш музъемлэн зумытэз отысь сӥос-визылъёс-а меда сомында крезьгурчиосыз вордскыто? Алнаш крезьгурчиослэн ӝытазы та малпан сюлэмысь потытэк улӥз. Тодмо нимъёс тыршизы маке но выльзэ кузьманы. Н. Постников Ашальчи Окилэн кылъёсызъя нош ик гожтэм выль кырӟан - "Одӥг пол но..." Нош Ф. Суворовлэн кылъёсызъя - "Эх, шу!" (та кылзӥсьёслы туж кельшиз). А. Леонтьевлэн "Сюлэм бӧрдыку" кылбурезъя дырекъятӥсь крезьгур пӧрмытэм Г. Ганьков. Аслаз кырӟан ошмесэз П. Кузнецовлэн, И. Бобровлэн кылъёсызъя гинэ 15 кырӟанэз луоз, нош ваньзэ вераса солэн гожтэм гуръёсыз 200 пала люкаськизы ни. Пантелей Николаевичлэсь кырӟанъёссэ вӧлмытыны юрттэ аслаз кивалтоно "Купанча" ансамблез, ас буёлэныз тылсияса кисьтэ со гуръёссэ. Нош П. Кубашевлэсь Ф. Васильевлэн кылъёсызъя выль кырӟанъёссэ калык доры вуттӥзы Г. Платонова но В. Зубков. Заллэн эркиямез улсын нош ик шудӥз-кырӟаз Анна Плотникова. Алнаш учкисьёс мӧзмиллям вылэм ни кузёбай пизылэсь Николай Карповлэсь. Нош уката ик - Владимир Котковлэсь, со али Шаркан ёросын улэ. Озьы ик вордскем палызлэсь палэнын, Чурын улэ но ужа врач Гавриил Григорьев. Л. Тихоновалэн "Удмурт нылкышно" кылбурезлы со малпам выль чебер крезьгур. Алнаш районын, пе, кылем арын гинэ 37 выль кырӟан кылдытӥллям. Со крезьгурчиос пӧлын - Евгений Ганьков, Сергей Кириллов, Вячеслав Адаков, Лидия Данилова, Евгения Волкова... Куд-огез соос культура удысын уг ке но ужало, шуом, С. Кириллов "Монтажник" огазеяськонэн кивалтэ, асьсэлэн быдэсак крезьгуре выем мылкыдынызы паймыто. Кӧня сыӵеос та Алнаш ёросын гинэ! Удмурт калыклы сётысал ке, шуом, эрик, со кырӟаса, шулдыръяськыса гинэ улысал, дыр. Озьы уго калыкмы вормыны быгатэ пельпум вылысьтыз зӥбетэз, мозмытске сьӧлтаса возись малпанъёсызлэсь. Озьы ик солы юрттэ серекъян-шудон, мактаськон. Соин ик, кырӟан ваче ки ветлэ шулдыресь мадёнъёсын, такмакъёсын. Та ӝытэ но, валамон ни, вал "кыл вылазы нӧкы вӧй шуккисьёс": Владимир Соловьев, Вячеслав Булдаков, Вячеслав Иванов но ачиз Очей Толя - Анатолий Ушаков. Тӥни озьы, пумыз но, йылыз но ӧй вал кадь та жингыртӥсь ӧрлэн, пуштылӥсь серекъянлэн. Котькудӥз вылэ дугдылы вылэм, но "кадрез" ӵем вошъяно луиз - со понна алнашъёс вожзэс уз вае, дыр. *** Симфония крезьгурез кылзыны, шуом, шӧдонмы-валанмы уг тырмы, визьмо спектакльёсыз учкыны - йырез зол ужатэммы, висьытэммы уг поты. Мускоысь но кытысь "кизилиосыз" ке учконо - кисымы буш. Кыле на асьмелы фольклор ӝытъёсы, капчиесь спектакльёсы, шулдыресь концертъёсы, кулэен лыдъяммыя - творческой ӝытъёсы ветлыны. Бен, кулэен лыдъяммыя... Тани, кылсярысь, Пичи Пургалан возьматыны дэмлам "Ёк-макарёк" спектакле одӥг мурт но лыктымтэ. Нимыз-а ӧз кыскы, билет-а дуно потӥз, бакча ужъёс-а люкетӥзы... Котькудӥз уз мыны, шуом, Юлия Кузьминалэн концертаз, яке шоккетонэн лыдъялоз Любовь Быковалэсь шоу-программазэ. Мукетъёсыз шуозы: нош ик самодеятельностез учкем уг пот... Одӥгезлы кельше ӝук, мукетызлы макарон... Нош бырйыны луэ бере, со ини туж умой. Трос пӧлысь дыр ортчемъя нош висъяськозы выль "кизилиос", соос пумен тросгес луозы, яркытгес пиштозы, оло нош, асьме шаерысь но потозы Валерий Леонтьев яке Надежда Кадышева кадь туж тодмо кырӟасьёс. Дас вить-кызь аръёс талэсь азьло гинэ ай ӧй вал асьмелэн эстрада коллективъёс, "Шулдыр ӝыт" сянаез. Ӧй вал выль аранжировкаен кырӟанъёс, сцена вылын асьсэды эркын возьыны быгатӥсь, дӥсьтӥсь артистъёс. Ӧй вал тамында - лыдъяса уд быдты - крезьгурчиос. Ӧз печатласькылэ соослэн кырӟанъёссы - со понна уго нимысьтыз худсовет пыр потоно вал. Пумен-пумен йӧ вырӟиз. Солы нырысь ик юрттӥз, дыр, Удмурт радиоын Р. Куликовалэн радъям "Жингырты, удмурт кырӟан" конкурсэз. Тудӟем мылкыд пасьтана вӧлскиз. Нош со бере вуиз ини сяськаяськон но. Татьяна Чернова. Алганча - Игра гуртын вордӥськемъёс! Ӧтиськом тӥледыз Эгра гуртлэн нуналаз 5-тӥ июне 10.00 часлы. Возьмаськом ваньдэс семьяосыныды. Ӟечлыкед урод - тыр коньдон Тазалыклы бадӟым изъян ваись тамак понна коньдон кысконо. Сое тазалыкез утёнъя ёзъёслы юрттэт чотын сётоно, лыдъя Юрий Лужков. Солэн верамезъя, ватсаса коньдон тыронъёс сомында луыны кулэ, кудмында никотинэз но урод суретъёсыз тамаклэн. Таӵе амалэз быдэс странае но вӧлмытыны луысал, шуиз Москвалэн мэрез. Иворъёсъя национальной служба. Ӟечкыласько Можга ёросысь Карашур гуртысь Корнев Василий Матвеевичез вордӥськем нуналэныз. Сӥзисько юн тазалык, шудо-буро улон, азинлык. Шуг-секытлы эн сётӥськы. Яратыса Нина сузэрез. Серп гуртлы - 70 Вуоно кӧс нуналэ, 5 июне, Алнаш районысь Серп гуртын улӥсьёс пусъё 70 ар тырмон юбилейзэс. Празднике ӧтиськом ваньзэ, кин вордскиз но будӥз та пичигес гинэ ӵыдонтэм шулдыр удмурт гуртын. Кун Кенешын Нырысетӥ сессия ужзэ йылпумъяз Удмурт Республикаысь Кун Кенешлэн кыкетӥ созывезлэн нырысетӥ сессиез кылем пятницае ужзэ йылпумъяз. Со толэзьлэсь ятыр мынӥз, учкиз трос пумо ужпумъёсты. Тужгес но бадӟым инты басьтӥз Кун Кенешез но Правительствоез быръён, ялан ужась комиссиосты, Президиумез, министръёсты юнматон. Туннэ нуналлы республикалэн кивалтон удысэз быдэсак сямен радъямын. Министртэк кылемын на Гурт удысъя но сиён-юонъя, Экономикая, Юстицияя, Музъем узырлыкъёсъя но му кутонэз радъянъя министерствоос, Физкультурая но спортъя кун комитет. Тросэз министръёс воштӥськизы. Культурая министре юнматэмын Николай Михайлович Бесогонов, калыкез дышетонъя удысэз нуоз Любовь Григорьевна Захарова. Кылдытэмын калык кусыпъёсъя выль министерство, соин кивалтоз Николай Николаевич Мусалимов. Сергей Флорович Васильевлы оскемын Печатья но иворъёсъя министерство, Александр Владимирович Кулагин кивалтоз Инкуазь узырлыкъя но инкуазез утёнъя министерствоен, эстӥськонъя, электрокужымез кутонъя но связья министре юнматэмын Виктор Алексеевич Савельев, Светлана Ивановна Андреева - калыкез шугадӟонлэсь утёнъя министр. Воштӥськонъёс ортчизы куд-ог музон удысъёсъя но. Берпуметӥ заседаниын дупатъёс эскеризы "Удмурт Республикаын вузкаронын но услугаос сётонын тупатэм выт тыронъя федеральной законэз пыӵатонъя" Законэ ватсанъёс пыртонэз. Герӟаськемын со ужбергатонэн, рынокын вузкаронэн. Кызьы пусийиз ялан ужась комиссилэн кивалтӥсез Софья Широбокова, закон улонэ капчиен уз пыӵа, но со юрттоз пичи ужбергатӥсьлы шуг-секытысь потыны, палэнысь зӥбонъёслэсь палэнскыны. Закон ужаны кутскоз 1 июльысен. Поттэм коньдон быдэсак мыноз интыысь бюджетэ. Озьыен, асьме понна котькуд манетэз пайдаен берытскыны кулэ. Но озьы луоз меда? Депутатъёсты шугъяськытэ оптовой амалэн вузкаронэз киязы возись узыр кузёос. Депутат Валерий Фридрих верамъя, самой сыӵеос авансэн выт тыронлэсь туж ӝог гылӟозы, вуззэс начар вузчиос кие люкылыса. Вань мукетыз но: али гинэ пыд йылазы султыны вырисьёсыз вытэз уз ворме - ужзылэсь куштӥськозы. Рынокен пичиен-пичиен бушалоз. Выт бичамын но пумиськыло пӧртэм тупамтэос. Налогъёсъя полицилэн федерациысь службаезлэн Удмурт Республикаяя управлениезлэн киватӥсез Владимир Орехов верамъя, гурт калыклэсь рынокын бичам уксё ваньмыз кошке Удмуртилэн палэназ. Малы? Ӧвӧл кутэмын закон, ум шедьтӥське кулэ ужрадъёс. Кинлэн кисыяз со кошке но кызьы, кыӵе амалъёс пыр республикалэн бюджетаз берыктоно? Тӥни ма бордын ужано матысь дыре. Депутатъёс верамъя, котькуд выт кин ке понна одно ик барышен берытске, но самой секытэз усе огшоры басьяскись вылэ. Валамон ук: огез но вузчи кисыысьтыз мултэс коньдонзэ уз потты, люкалоз дунъёсты ӝутыса. Депутат Геннадий Красноперов дэмлаз йӧлъя но нянья нимаз коэффициент пуктыны. Куд- ог эшъёс таин соглаш ӧз луэ. Ӝутэм ужпум эскериськоз на комиссиын. Оглом законлэн инъетэз умоен лыдъямын. Данакез депутатъёс куаразэс сётозы Кун Кенешлэн Эскерон палатаезлэсь ужзэ дугдытон сярысь. Та уж быдэсак оскемын Эскерон комитетлы. Пумаз-йылаз вуттэмын Регламентъя, Кун Кенешлэсь ужзэ радъянъя ялан ужась комиссия. Соин кивалтэ депутат Геннадий Абросимов. Эскеремын на эшшо одӥг организационной ужпум: депутат Аркадий Малков келямын ужаны агропромышленной удысъя, музъем кусыпъёсъя но инкуазь узырлыкъёсты кутонъя комиссие. Азьвыл созывын Аркадий Трофимович солэн кивалтӥсез вал. Л. Медведева. 1-тӥ июне - Нылпиосты утён нунал Ӟечбур-а, мемие! Кылӥськод-а монэ? Мон али туж-туж пичи ай, врачъёс эмбрион шуыса нимало. Мыным, анай, тынад сюлэм улад туж шуныт но умой, ӝоген будыны кутско, соин ик, мон медам ёрка шуыса, тынад кӧтыд бадӟым луоз. Но тон эн куректы, сыӵе нылкышноос туж чебер но йӧно адӟисько. Соос Анай луыны дасясько! Нош тодӥськоды-а тӥ, 4 арняысен мынам мугоры кылдэ ни шуыса? 8 арняысен сюлэмы жугиськыны ӧдъя. 7-тӥ арняяз мон вырисько, тон пушкын уясько ни, но тон сое уд на шӧдӥськы. 4 толэзьысен "ӵыжаськыны" ӧдъяй ке, соку ини паймод. Мон тӥ сямен ик шокасько, кылӥсько тынэсьтыд, анай, сюлэмыдлэсь жугиськемзэ, вирыдлэсь ветлэмзэ. Нош 6 толэзьысен кыло атаелэсь куаразэ но! Тодӥськоды-а, анай но атай, мон шӧдӥсько маялямдэс, макем шумпотӥсько, тӥ монэ яратӥськоды шуыса. Чиньыме сюпсьыса малпасько: эшшо кӧня ке мед вешасалзы на. Кӧня ке гинэ толэзь ортчоз но мон вордӥсько. Тон юрттод-а мыным вордскыны, анай? Со понна кылзӥськы врачъёслэсь. Нош вордскеме бере ӝипты монэ гадь бордад. Тынад йӧлыд мыным кужым сётоз, трос висёнъёслэсь утёз. М-м, кыӵе ческыт, дыр, со. Тон монэ кема-кема нонтод, бен-а? Сыӵе нуныос туж кужмо но визьмо будо, пе. Но со понна тон ӟеч сиськыны кулэ. Сӥль йӧл, вӧй, курег пуз, бакча сиёнъёс но емыш нуналлы быдэ сиы, тросгес ю йӧл, емыш вуос. Но... вунэты курыт сиёнъёс, вина, кужмо чай но кофе сярысь. Мон понна со туж-туж кышкыт. Нош эмъюм врачлэсь юаса гинэ ю. Атай, нош тон дугды тамак кыскемысь: мынам солэсь йыры висе. Утялты анайме, яраты сое. Эн лэзьы секыт ужаны, висись муртъёс дортӥ ветлыны, лек адямиосын пумиськылыны. Ой, анайлэн вож улмо сиемез потэ! Кылӥськод-а, атай? Иське, ӟеч! Пумиськытозямы. Тӥляд нуныды. Удмуртия пиоссэ келя Асьмеос дышимы ини тулыслэн эшшо но одӥг тодметэзлы - егитъёсты армие келянлы. Та вакытэ котькуд гуртын, посёлокын но городын солдат келян гуръёс чузъясько. Кызьы ивортӥзы республикаысь военкоматлэн сборной пунктаз, шаерысьтымы куиньмосэз призывникъёс частьёсазы кошкизы ини. Армие мыноноос пӧлысь 95 процентэз комиссиез ортчизы ни. Жаляса верано луэ, сос пӧлысь котькуд ньылетӥзэ тазалыксэ ватсаса эскерыны ыстоно луиз. Мукетыз но лыдпус уг шумпотты: 86 адями ӧз лыкты призывной комиссие. Соосты учтало военкоматын ужасьёс но милиция. Кык призывник службазэ армилэсь палэнын (альтернативной амалэн) ортчытын мылкыд кариз. Вань-а соослэн сыӵе правозы - сое вераны быгатозы нимысьтыз комиссия но суд. Азьвыл аръёсы анай-атайёс туж сюлэмшугъясько вал пиоссы стройбатэ шедён пумысен. Мед буйгатскозы: туэ та "дано войскоосы" одӥг адямиез но уг келяло. Зэм, вань разнарядка чугун сюрес вылэ. Но отчы шедёзы кык процентэз гинэ призывникъёс. Республикаысь военкомлэн воштӥсез полковник Владимир Сыроватский ӟеч мылкыдзэ уг ваты. Со верамъя, одӥгез но призыв такем огсыр ӧз ортчы на вал, пе. Интыысь но, Россиысь но властьёс дыраз но тырмыт висъяллям та ужрадлы коньдон. Нялтас вераса, туэ сборной пунктлэсь юртсэ выльдыны-тупатъяны удалтӥз. Призывникъёсты татын нуналаз куинь пол пӧсь сиёнэн сюдо. Зэм, соос татын кемалы ик уг ӝегало, военкомат келян графикез котыр ласянь чакласа радъяз. Бускель республикаосын ӵошатоно ке, Удмуртиын туэ котькытынлэсь ӟеч радъямын призыв. Сыӵе дунъет сётэ округлэн командованиез. Нырысь ик, ӧвӧл службалы чутрак пумит луисьёс. Со гинэ ӧвӧл, данакез пияшъёс ӝутскем мылкыдын мыно армие. (Кин тодэм, соос, оло, оско та шукрес улонэз огсыргес службаен воштыны. Но соиз ини мукет вераськон.) Служить карозы пиосмы котьку сямен сыӵе войскоосын, кудъёсаз басьто тужгес но оскымонъёссэ, - флотын, граница дурын, ракетноёсын но мукетаз. Вань ФАПСИ-лэн (Федеральное агентство правительственной связи и информации) гинэ но частьёсаз шедисьёс Котькуд ар сямен ик, Удмуртиысь пиос вуозы шаермылэн кемалась эшъёссы доры - Черноморской флотысь "Михаил Кутузов" крейсере но Забайкальской пограничной округе. Г. ТИХОНОВ. Уваысь йӧл-вӧй поттӥсьёс дорын "Ува-молоко" - йӧл, вӧй но сыр поттӥсь предприятиос пӧлысь одӥгез устоез огазеяськон. Со шаерамы вашкалаез предприятие луэ, кылдэмын 1936-тӥ арын. Нырысь ик Ува шорын интыяськемын вал, нош 1966-тӥ арын Селтае мынон сюрес дуре, посёлок сьӧрысь кыр интые, чебер, бадӟым, туала ӟеч оборудованиен йӧл завод ӝутскиз. Вань аслаз котельноез, усто теплицаез, компрессорноез, автопаркез но мукетыз. Акциосын огазеяськон али но выльдӥське, кужмоя. Предприятие огсыр усто ужа, арысь аре планъёссэ мултэсэн быдэсъя. Миым тани, валля арен ӵошатыса, 2,5 сюрс тонналы уногес йӧл басьтӥз, 200 тонна пала (153 процентлы) тросгес вӧй шуккиз, нош казеин поттонзэ 3 поллы будэтӥз. Магазинъёсы заданилэсь вылтӥ данаклы ятыр келямын творог, сыр но йӧллэсь мукет сиёнъёс. Туэ но уваослэн ужъёссы умой мыно. Предприятие ялан умоятэ поттэм продукциезлэсь ӟечлыксэ. Соин ик сое шумпотыса басьто республикаысьтымы палэназ но. Туннэ "Удмурт дунне" газет возьматэ огазеяськонлэсь ужъёссэ. Бамез дасязы Геннадий Романов. Туспуктэмез Владимир Камашевлэн. Усточиос, азьлань! Республикаысьтымы инвалидъёслэн огазеяськонзы берлояз президиумаз эскериз инвалид нылпиос пӧлын творчествоя кыкетӥ фестиваль ортчытон сярысь. Республикаысьтымы Культурая, министерстволы но Калыкез улон-вылонын утёнъя министерствоен ӵош, фестивалез радъялозы ляб кылӥсьёслэн, синтэмъёслэн но инвалидъёслэн огазеяськонъёссы. 3-тӥ декабре шуге-леке сюрем нылпиос пӧлысь тужгес но устоосыз асьсэлэсь быгатонлыкъёссэс возьматозы Ижевскын. Со концертэ пыриськозы районъёсысь вормисе потэм дас куать аресозь нылъёс но пиос. Тужгес но быгатӥсьёсызлы шуд усёз 2000-тӥ арын Россиысь инвалид нылпиослэн творчествоя фестивалязы пыриськыны. Л. КИМОВА. Училище � 37 приглашает 427250, Удмуртская Республика, Адрес: п. Ува, ул. М. Горького, 95, проезд до остановки "СПТУ" Профессиональное училище � 37 объявляет приём учащихся на 1999/2000 учебный год по следующим профессиям: На базе 9 кл. Срок обучения 3 года И. Мастер сельскохозяйственного производства: 1. Тракторист-машинист 2. Слесарь-ремонтник 3. Автоводитель категорий "В", "С" ИИ. Мастер общестроительных работ: 1. Каменщик 2. Монтажник железобетонных конструкций 3. Электросварщик ИИИ. Мастер отделочно-строительных работ 1. Штукатур 2. Маляр 3. Плиточник-облицовщик. ИВ. Хозяйка усадьбы 1. Овощевод 2. Повар 3.Водитель 4. Хозяин сельского производсвта На базе 9 классов. Срок обучения 2 года Тракторист-машинист, слесарь-ремонтник, автоводитель категорий "В", "С", плотник-столяр (1 год) На базе 11 классов. Срок обучения 1 год Изготовитель хлебо-булочных изделий: 1. Пекарь 2. Кондитер. Условия приема Необходимо предоставить следующие документы: 1. Документ об образовании (в подлиннике). 2. Медицинскую справку по форме � 086/у. 3. Фото 3х4 - 6 штук. 4. Свидетельство о рождении, паспорт. 5. Справку о привках. 6. Характеристику. Документы принимаются до 20 июня 1999 г. Для лиц, поступающих учиться, собеседование по графику на основе тестирования, контрольной работы по математике и характеристики. Телефон приёмной комиссии 5-23-55. Общежитие имеется. ГУРТ УЛОН Дэмен капчигес Иж вӧзысь Ягул черкогуртэз республикаямы умой тодо. Татысь Холмогоров нимо колхоз трос аръёс ӵоже данъяськылӥз удалтэм картофкаеныз но уно йӧл сётӥсь скалъёсынызы. Нош берло аръёсы малпаськытэк ортчытэм выльдӥськонъёс хозяйствоез но зол "куасалтӥзы": сюбегазы картофка лудъёс, ичиёмизы скал уллёос. Соос пайда сётэмысь дугдӥзы. Таӵе югдур зол сюлмаськытӥз калыкез но, кивалтӥсьёсты но. Колхоз городэн артэ бере, Ягулысь музъем вылын рос-прос ужаса луысал угось коньдон но поттыны. Тулыспал толэзьлэн берпуметӥ нуналъёсаз Ижысь "Промстройкомплект" ЗАО колхозысь кивалтӥсьёслы асьсэлэн предприятиенызы огазеяськыны ӵектӥз. Алигес Яглулын кенеш ортчиз, отчы трос калык люкаськылӥз. Ӵош эштос кылдӥз. Отысь 49 процентсэ ваньбурез колхоз басьтэ, нош 51 процентсэ - "Простройкомплект". ТОО-лы кивалтӥсе быръемын огазеяськонын ужась Николай Усков. Со будэмын Балезино районын, гурт ужъёсты умой тодэ. Гуртын улӥсьёслэн сюлмаськонъёссы али трос, нырысь ик, кидыс, эстӥськон но техника ласянь. Луд ужъёс мыно бере, ӝегатсконъёс медаз луэ. Агрономлэн Юрий Фокинлэн сюлмаськонэз тужгес бадӟым - кидыс дасяно. Со тырмымон кадь, но сезьы тысь уродгес. Соин ик 70 тонназэ воштоно луоз. Ӟеч выжыысь сезьыез ваёно мукет азьысь. Холмогоров нимо Эштослэн выль сюресэз мед удалтоз. Городысь вуэм кивалтӥсьёс юрттозы, дыр, татын дисциплинаез, экономикаез ӝутыны - калык оске соослы. Нош колхозлэн азьвыл кивалтӥсьёсыз ужлэсь палэнскыны уг ӧдъяло. Дэмен котьма капчигес лэсьтӥське. Н. Возисов. "Чайковскиысь но доразы лыкто" Алигес, апрельлэн пумаз, "Ува-молоко" огазеяськонлэн (ОАО-лэн) акционеръёсызлэн кенешсы ортчиз. Отын предприятилы валтӥсь директоре быръемын Нина Ивановна Мамаева, нош дирекорторъёслэн кенешсылы кивалтӥсе - республикаысьтымы тодмо адями, Селта районысь "Свобода" гурт кооперативлэн тӧроез Алексей Пантелеевич Мясников. Нина Ивановна огазеяськонын выль адями ӧвӧл. Со татчы ужаны лыктӥз 25 ар талэсь азьло. Нырысь кивалтӥз лабораториен, собере кема аръёс ӵоже (20 ар) вал валтӥсь инженер. Табере нылкышнолы быдэс огазеяськонлэсь ужъёссэ радъяны оскизы. Юнме шорысь ӧз, со йӧл сиён поттонэз вить чиньызэ кадь тодэ. Нина Мамаеваен туннэ кенеше газетлэн корреспондентэз Геннадий Романов. - Нина Ивановна, кызьы йылпумъяды ортчем арез, туэ ужъёсты кыӵе мыно? - Урод шуыны ым уг усьтӥськы, ушъяськеме но уг поты. Но оглом ужъёсмы умой мыно, син гинэ медаз усьы. Сое лыдпусъёс яркыт возьмато. Кылсярысь, валля арын сярысь, миым дас кык процентлы уногес йӧл басьтӥм, яке 2,5 сюрс тонналэсь ятыр. Тужгес но трос поттӥм вӧй. Соя планмес одӥг но ӝыны поллы мултэсэн тырмытӥм. Заданилэсь вылтӥ озьы ик лэсьтэмын йӧл, сиёнъёс, творог, сыр, нош технической казеин поттонмес 3 поллы йылэтӥм. Та праздникмес 60 тонназэ кунгож сьӧрысь кунъёсы но вузам, 43 тонназэ шаерамы басьтӥсьёс шедизы. Туэ но огсыр умой ужаськом. Кылем арын, нырысетӥ кварталэн ӵошатыса, та дыр ӵоже 20 процентлы уногес йӧл куштӥм, яке одӥг сюрс тонна ёрос. Вӧй поттон планмес 160 процентлы тырмытӥм (54 тонналы ятыргес). Йӧл сиёнъёс - миым кадь ик, творогез вератэк. Сое 37 процентлы тросгес лэсьтӥм (13 тонналы). Нош пайда ичигес басьтӥм. Миым рентабельность куинь толэзь ӵоже 3,0 процент ке вал, туэ та дыре ик 1,9 процент гинэ усиз. Сое валэктыны луэ, продукцимылэсь вузан дунзэ будэтымтэенымы. Ведь гурт хозяйствоослэсь одӥг килограмм йӧлзэс 2,7 манетэн басьтӥськом. Но гужем пайдамы тросгес луоз. Тани валля арын 7,3 процент пайда басьтӥм, нош миым - 8 процент. Туэ но со лыдпусэ вуыны кулэ. - Переработкая котькуд предприятилэн ужез люконтэм герӟаськемын гурт хозяйствоосы. Та ласянь тӥляд кыӵе югдур? Кытысь но кин дорады тросгес йӧл вуттэ, кыӵе ӟечлыкен? - Нимысьтыз ушъяме потэ Вавож районысь "Удмуртия" (миым 3300 тонна йӧл сётӥз), "Колос" но "Луч" (быдэн 2000 тонна) но Мичурин нимо (1600 тонна)гурт хозяйствоосты. Нош Селта районысь "Свобода" кооператив но Ленин нимо эштос быдэн сюрс тонналэсь уно вуттӥзы, Уваысь "Поршур" эштос - 800 тонна. Милемлы кӧня ке йӧл ваё Можга районысь но бускель Киров (Кильмезь район) областьысь. Огъя вераса, кылем арын огазеяськонлы вавожъёс 13 сюрс тонна йӧл вузазы (52 процент), селтаос - 6,2 сюрс (25 процент), нош уваос - 5 сюрс тонна (20 процент). Вераны кулэ, гурт хозяйствоос туж чакласа возё йӧл вузан дунэз. Тани Можгаысь сырзавод огдыре йӧл дунзэ чутрак йылэтӥз. Соку вавожъёс отчы шонскыны ӧдъязы. Собере ми но йӧл дунэз будэтӥм. Поставщикъёсты валаны луэ, котькудӥз поттэм продукцизэ дуногес вузамез потэ. Ватонэз ӧвӧл, пудо вордон, йӧл кыскон котьку секытэн сётске. Поттэм продукцимылэн ческыт шӧмыз, ӟечлыкез герӟаськемын кыӵе йӧл вуттэмен. Миым тани 60 процентэз нырысетӥ сортэн басьтэмын, вавожъёслэн - 67, уваослэн - 62, нош селтаослэн - 43 процент. Нокыӵе сортэ пырисьтэмез 2-2,5 процент гинэ люкаське, селтаослэн 6 процент луиз. Чырсэзъя (кислотностезъя) ваньзэ-ӧвӧлзэ сю тонна хозяйствоослы йӧл берыктэмын. Районъёсъя со тазьы усе: Ува - 21, Вавож - 30 но Селта - 47 тонна. - Нина Ивановна, продукцидэс басьтӥсьёс шедё-а? Кытчы со тӥляд кошке, уката ик вӧйды, ведь сое трос поттӥськоды? - Ужаськом азьвыл сётэм куронъёсъя (заявкаосъя). Сое куто сменаослэн мастеръёссы. Продукцимес басьтӥсьёслэн лыдзы 100-лэсь трос ни. Вань поттэм сиён-юон пӧлысь одӥг куиньмос палаез кошке Ува, Вавож, Селта но Сюмси районъёсы. Ижевске йӧл-вӧй асьмеос нуллӥськом. Продукцимылы озьы ик лыкто Можга, Сарапул городъёсысь, Пермь, Киров областьёсысь, Татарстанысь но музон интыосысь. Кемалась юнэсь кусыпъёсмы ни Чайковский городэн. Паймоно кадь, со Воткинскен артэ, отын йӧл завод вань, нош дорамы Увае лыкто кык йӧл предприятиос ("Воткинск-молоко" но "Ижмолоко") дортӥ. Ижысен гинэ мултэссэ 100 иськем ёрос сюрес лёгало, кӧня бензин суто, дырзэс быдто, озьы но милесьтым продукцимес басьто-нуо. Валамон, йӧл сиёнъёсмы, вӧй, сыр кельшо соослы. Милям но, кыдёкын ке но, кусыпъёсмес ыштэммы уг поты. Миым ваньзэ 3,4 сюрс тонна йӧл но 24 сюрс тонна йӧл продуктъёс (кефир, биокефир, йогурт, йӧлвыл, творог, сырокъёс) вузам. Со пӧлысь тросэз Иже келямын. Огазеяськонлэн ёзъёсыз вань на Вавожын но Селтаын. Нырысяз казеин но фермер (пачкес) сыр лэсьто, нош кыкетӥяз йӧл гинэ куто. Селтаын вань ужъёсты огназ бергатэ (кивалтӥсь но мастер луэ) Серафима Александрова. Туннэ улонмес син азе шуг пуктыны. Ми, переработчикъёс гурт хозяйствоос понна главснаб кадь луим ни. Йӧл вузасьёслы, улэп коньдон сяна, огазеяськон мар но уг сёты. Миым тани хозяйствоос йӧл сётэмзы чотын предприятимылэсь 1680 тонна дизель эстӥськон басьтӥзы, бензин - 444, вӧйёс - 100, минерал сылалъёс - 910 тонна но музонзэ. Туэ но тазьы ик ужаськом. Али йӧл вузаммылэсь азьло ик коньдон, эстӥськон но мукетсэ сётӥськом ни. Таӵе ужан амалмы ваньмызлы кельше, кусыпъёсмы уката юнмало. Поставщикъёс оскыны кулэ, соку соос но милемлы шумпотыса йӧлзэс ваёзы. - Берло дыре кыӵе выль продукция поттыны ӧдъяды. Та вакытэ мар тужгес сюлэмшугъяськытэ? Азьланезлы кыӵе малпанъёсты? - Огинтыямы лёгаськыса ум улӥське, утчаськыны, маке но выльзэ пыӵатӥськом. Кызьы бен сотэк улод. Меӵак пусъёно ке, кылем арын кык пумо творог сырок лэсьтыны ӧдъям: одӥгез изюмен ческыт, мукетыз изюмтэк. Таӵе сиён 1,7 тонна вузам. Со сяна, дасяны кутским выль сыр "Угличская плетенка" шуыса нимаське. Тазэ но 1,5 тонна поттӥм. Нош туэ адыгейской сырмес ӵынатыны ӧдъям. Басьяськисьёслы со яра. Туэ йӧл сиёнъёсмес пичиесь бумага стаканъёсы лэзянъя автомат басьтом. Сюлэмшугъяськытӥсь ужпумъёсмы ӧвӧл, уд шуы. Ужан интыосмы ӟоскытэсь луо, сюбегало ни. Соин ик йӧл поттон цехмес выльдыны кутским. Басьтыны малпаськом выль молокозавод. Алигес холодильникъёсмес но вентиляциез выльдӥм. Инкуазез утёнэ миым 70 сюрс манет коньдон кутӥм. Ӵуказеез сярысь но сюлмаськиськом. Артысь племптицсовхозэн но сӥль заводэн огазе кариськыса, чакласьком корт банкаос лэсьтонъя цех пуктыны. Соку ми сгущенка поттыны ӧдъялом, нош бускельёсмы - пӧртэм сӥль консерваос. Калыклы таӵе сиён кулэ. - Нина Ивановна, тӥ верады вал, главной кадь луиськоды. Сое валэктэ вал? - Азьло йӧл, сӥль заводъёс таӵе ужен, зэмзэ но, ӧз выре. Рынокен экономикае выжемен валче, улон но, югдур но воштӥськиз. Снабъёс кӧня ке кылемын ке но, Табере ужзэс али но быдэсъяськом. Тани куд-ог лыдпусъёс сёто. Кылем арын гурт хозяйствоослы - йӧл вузасьёслы 6 миллион 106 сюрс манет коньдон счётъёсазы ыстэмын (20 процент), улэп уксёен сётэмын 3 миллион 710 сюрс манет (12 процент), продукцимес басьтӥзы 8 миллион манет ёрослы (26 процент), воштос ёзъёс. ГСМ, бензин, удобрение сётӥм 9 миллион 460 сюрс манетлы (31 процент) но электрокужымлы но кредит процентлы 3 миллион 390 сюрс манет (11 процент) тырим. Тӥни озьы ваньзэ 30 миллион манет тыр сётэмын. - Коллективды сярысь вакчияк вералэ вал. Егитомиськоды-а, пересьмиськода-а? - Конечно, коллективмы егитоме, но 20-25 ар ужасьёсыз но вань. Тужгес но шуныт кылъёс вераме потэ Зинаида Павлова Пудова сярысь. Сарапулысь гурт удысъя техникумез 1959-тӥ арын (нырысетӥ выпуск вал соку - Г. Р. ) йылпумъяса, дорамы 39-тӥ арзэ ужа ни. Бухгалтер но вал, кемалась тырше ни валтӥсь экономистын. Предприятиез, ужез но адямиосты вить чиньызэ кадь тодэ. Адӟе огазеяськонлэсь азинскон сюрессэ. Зэмос но оскымон юрттӥсе луэ. Озьы ик шуыны луысал лабораторилэн но производстволэн кивалтӥсьёссы Евгения Гаврилова но Римма Поздеева, валтӥсь бухгалтер Людмила Пислегина сярысь. Оглом, ужасьёсты, мастеръёсты, слесарьёсты, операторъёсты но мукетъёссэ ачим валасько, соос но мыным оско, юртто но монэ валаны тыршо. Коллективмы бадӟым ӧвӧл, кык сю пала ужасьмы. Кылем арын 43 миллион манетлэсь унолы продукция поттӥм, яке котькуд ужасьлы быдэн - 210 сюрс манет, нош шоро-куспо уждун одӥг сюрс манет пала усе. Валля арын со лыдпус 875 манет вал. - Нош теплицады сярысь мар верасалды? - Бен, та удысмы но пайда сётэ. Отын будэтӥськом помидор удъёс, огреч, перец, уно сяськаос. Али розаос вузаськом, ӝоген вуозы гвоздикаос. Кузёез Алина Арафанлова вань ужъёсты валаса нуэ. Анаезлы нылыз но юрттэ. - Нина Ивановна, кыӵе тужгес яратоно ужды, кудӥзтэк улыны секыт луысал. Кызьы шутэтскиськоды? - Яратӥсько музыкаез, яратӥсько эктыны, нюлэскы ветлыны, губияны, узы-боры, эмезь бичаны. Ӵем ветлӥськом Чебоксары городэ. Анае отын улэ. Быдэс улонзэ руль сьӧрын ортчытӥз, шофёр луыса ужаз. Огез устоез училище Шундыё адямилэн шунытэз улсын Шундыё адями - озьы шуыны луэ та адями сярысь. Кӧня солэн кужымез кыӵе зол сямыз но лякыт мылкыдыз! Ужан кабинетаз мынытозяз ик со ваньмызлы ӟеч кужым, бурдъясь мылкыд сётыны вуттэ: кинэн ке шулдыр ӟечбуръяськоз, кинлы ке соку ик кыӵе ке уж сётоз, кинлэсь ке мар ке юалоз. Тӥни озьы ваньмыз та юртын берганы кутске: училищелэн борддоръёсыз но интыысьтызы вырӟыны кадь кутско. Сыӵе луэ Уваысь 37 номеро училищелэн директорез Галина Александровна Мельчакова. Директорлэн ужаз котьку но нырысь интыын - нылпиос. Галина Александровна тырше, татын соослы умойгес, шунытгес мед луоз шуыса. Мар ватонэз, дышетскисьёс пӧлысь куиньмос люкетэз - шуг нылпиос. Вань нылпи юртъёсысь лыктэмъёс но. Но котькуд аре нырысетӥ сентябре директор выль дышетскисьёслы тазьы вазиське: "Туннэ нуналысен тӥляд выль улонды кутске. Эн сапталэ сое, улондэс тӧдьы бумага вылэ сямен выльысь гожтыны турттэ". Сыӵе бадӟым осконэз секыт сямо нылпиос но ӟечен берыктыны туртто. Училищеез йылпумъяса но, пиналъёс дышетӥсьёсын, мастеръёсын кусыпъёссэс уг ышто. Директорлы шуныт гожтэтъёс вуыло армие кошкем пиослэсь но. Тани мурт нылпи директорлы анаезлы сямен гожтэ: "Галина Александровна! Уте тазалыктэс. Юнме сюлэмдэс эн чигтэ. Нош ик, дыр, асьтэдыз уд жаляське". Училищеын нылпиосты ужлы дышето. Зэм, кельшымон ужтэк аслыд но, обществолы но пайда уд вайы. Но пӧртэм ужъёслы дышетон сяна, татын нылпиослы вылӥ валанъёс но сёто: мар со сыӵе адямиез, улонэз яратон? Мар понна адями улэ? Мыным тодмо ӧвӧл, кызьы та валанъёсты ас сюлэм пушказ бергатылӥз, вылды, татын дышетскем пияш Алёша Вечайкин. Солэн улонэз 1996 арын Чечняын кысӥз. Бӧрысь солэн ожмаськемез "За мужество" орденэн пусъемын вал. Училищее вуылон нуналэ пӧраса дышетскисьёс ас быгатонлыкъёссэс возьматыны дасясько вал. Нылпиос ӵуштыр гинэ ужало, нош мастер-технолог Евдокия Ивановна Шадрина кыӵе ке но ӵектонъёс сётэ на. - Таосыз дышетскисьёс туж умоесь вал, люкиськыны ик жаль, - шуэ со. - Сиён пӧзьтэм сяна, ваньзы ик 24 нылпиос машинаен ворттылыны быгатозы. Та группаысь нылпиослы ӵектэмын вылӥ разряд сётыны. Ачиз Евдокия Ивановна училищеын 14 ар ини, дышетон удысысь отличник. Эскерим пиналъёслэсь ческыт пӧрамъёссэс. Котлетъёслэн нимъёссы йыре ӧз кыльы, но шӧмзы али но ым пушкын. Котькудӥз дышетӥсь, мастер пиналъёсты маин ке но бордазы кыскыны быгато. Мар пайдаез ужамедлэн, пиналъёслы тодон-валан но, эш но луыны уд быгатӥськы ке. Быдэ вуымтэ нылпиослэн сюлмазы кемалась пыриз ни Владимир Серафимович Фокин, "комбайнъёсъя" дышетӥсь. Солы, нылпиослэсь лул-сюлэмзэс ляктыгес валаны. Дышетӥсьлэн нимыз быдэс районлы тодмо. Со - гиряосты ӝутканъя нырысетӥ разрядэн спортсмен. Надежда Федоровна Зубарева, математикая кабинетаз компьютеръёс пуктылэм бере, кактусъёсын вырыны кутскиз. Кызё пала выжы уськытэмын ни. Табере солэн "хобби" шуонэз нылпиослы гинэ ӧз, Уваысь тросаз семьяосы но выжиз. Со сяна, нылкышно трос кырӟаны яратэ - сое училищелэн уӵыез шуо. Егит дышетӥсьёс но училищеын асьсэлэсь интызэс шедьтӥзы. Светлана Анатольевна Иванова - покчи классъёсты дышетӥсь. Но татын со чеберлыкъя но шаерлэн историезъя дышетӥсь луиз. - Огпол директормы таӵе малпанэн потӥз: ум-а, пе, быгатэ шаерез тодонъя музей кылдтыны, - маде Светлана Анатольевна. Табере тани музеймы вань. Нылпиос гуртъёсысьтызы олокыӵе но вашкала арбериослы татчы вайыло. Песяйёсмылэн лэсьтэм киужъёссыя пиналъёс та кабинетын ик табере сыӵеесь ик ӵушконъёс пужыятыны дышетско. Мукетыз егит дышетӥсь Нурия Мирзяновна Залетдинова, ӟуч кыллы но литературалы дышетон сяна, пиналъёсты дышетэ адями но семья кусыпъёсты валаны. Таиз ар со понна секыт но, шумпотымон но вал - со горд дипломен йылпумъяз Ленинградысь психология наукаосъя академиез. Солэсь диплом ужзэ ӵектӥллям журналын но печатланы. Уваысь училищелэн кабинетъёсыз паймыто аспӧртэм тусбуйёсынызы но котькуд уроклы дасям узыр материалъёсынызы. Физикая дышетӥсьлэсь Сапарова Нина Павловналэсь ужан интызэ учкыса малпаськод, со пыраклы лэсьтэмын шуыса. Кызьы пӧрмытэ коллектив сыӵе зол кабинетъёс но лабораториёс возьыны? Валэктэ директор Галина Александровна: - Толэзьлы быдэ кабинетъёслэн кивалтӥсьёссы верало, кыӵе луоз соослэн кабинетсы матысь дыре, мар луоз вылез. Араз кык пол кабинетъёслы дунъет сётӥськом. Бен, огласянь со секыт. Нош мукет ласянь ужасьёсмылэсь та бордын ужанзэс котьку но маин ке пусйиськом. Адямиослэсь кусыпъёссэс юнматонын бадӟым уж нуэ профсоюзлэн комитетэз. Огвакыт профсоюзысь тросэз потылӥзы, шуэ профсоюз комитетлэн егит кивалтӥсез Сергей Вениаминович Иванов. Но кӧня ке улыса шӧдӥзы - улонзы лекос мӧзмыт луиз. Табере ваньзы огазьын. - Зэмзэ но, адямиослэн огдыре мылкыдзы вал нимазгес улыны, - итӥське Галина Александровна. - Но профсоюзысь потыны ӧй лэзьы. Уг яра ваньзэ умойзэ куашкатыны. Тодыны уг луы кыӵе учыръёсын пумиськоно луоз. Кин соку ужасез утёз? Али но, кыӵе ке валамтэос яке юанъёс кылдыку, нырысь ик профкомен кенешисько. Мыным но озьы капчигес кивалтыны. Трос ужъёсты профком пыр бергатыны луэ. Училищелэн бадӟым коллективез (130 ужасез но 595 дышетскисез) мозмонэз уг тоды. Ӟеч сямлы пӧрмемын ни дышетӥсьёс но нылпиос пӧлын КВН-эн шудонъёс, спортъя ӵошатсконъёс. Районын училищелэн командаез спортъя ялан нырысетӥ интыос басьтылэ. Ортчыло тазалыклы сӥзем нуналъёс. Ужасьёс тодо: ар ӵоже утьыны быгатӥд ке тазалыктэ - отпуск вӧзы ватсаса нуналъёс сётэмын луозы. Нылпиос пӧлын туэ ньыль мурт дышетсконзэ горд дипломен йылпумъя. Тани соослэн нимъёссы: Наташа Большакова, Дима Мельчаков, Саша Смирнов, Света Потапова. Соос пӧлысь огез - Галина Александровналэн пиез. Нылкышно тазьы лыдъя: аслад пиналыд быръе ке трос дышетскон интыос пӧлысь "анаезлэсь", со мар ке но вера ини. Директорлэн кыкто пиосыз но татын ик дышетско. Гурт училищеос сярысь гожъяны кутскемлэсь азьло Калыкез дышетонъя министерствое жингыртоно кариським. Юамы: "Вань-а устоосыз?!" Куинь училищеосты веразы: огез со пӧлын Уваысь 37 номеро училище. Ватсазы на: кивалтэ кышномурт. Мар паймонэз кадь, трос школаосын, городысь училищеосын, техникумъёсын нылкышноос кивалто ук. Но, кызьы бӧрысь тодмо луиз, гурт училищеосын воргоронъёс кивалто вылэм. - Нырысь мыным туж секыт йӧтӥз, - шуэ директор. - Ӵапак 1990-тӥ арын та училищеез мукетыныз, 27 номеро училищеен, огазеязы. Ярам, али ваньмыз ортчемын ни: кык коллективысь одӥг огъя коллектив пӧрмиз. Уж огазеяз. Соку ик выль профессиослы дышетонэз радъямы: вуриськись, столяр-плотник но усадьбалэн кузёез. "Сое туж гажаськом", - шуизы директорзы сярысь татын ужасьёс. Соин ик оскыса вераны луэ, уж сяна, татысь коллективез юн герӟа на ачиз директор Галина Александровна Мельчакова. Зэмзэ ик, бордаз кыскись шундыё адями. Журналистъёсын пумиськон "Полиция ужа сокем, макем тырме кужымез" Кылем средае Выт люканъя полицилэн Федеральной службаезлэн Удмурт Элькунъя управленияз ортчиз пресс-конференция. Журналистъёсын пумиськылӥзы управленилэн кивалтӥсезлэн воштӥсез Андрей Синильщиков но куд-ог отделъёслэн кивалтӥсьёссы. Вераськон мынӥз миым арлы но туэ нырысетӥ кварталлы йылпумъянъёс но куд-ог мукет ужпумъёс сярысь. Жаляса верано луэ, Андрей Алексеевич люкаськемъёслы туж ик трос тунсыкозэ ӧз иворты. Кин тодэ, оло, солэн учреждениез туж "пытсамен" (секретной) лыдъяське, оло, отын ужасьёслэн азьвыл люкам опытсы мултэс вераськыны уг сёты (полициын тачак тыршо госбезопасностьысь азьвыл офицеръёс). Вераськон бергаз лыдпусъёс котыртӥгес. 1998 арын шараямын вал вытъёсъя законодательствоез 100 пол тӥян учыр яке 1997 арын сярысь 24-лы тросгес. Соос шарятэк кыльысалзы ке, государство 43,2 миллион манет тыр ыштон адӟысал. Таиз но лыдпус, азьвыл арен ӵошатыса бадӟымгес - 7,3 миллион манетлы. Бюджетэ таламын 45 миллион манет коньдон, 1997 арын - 39 миллион манет. Озьыен, полицейскойёс миым ӟечгес ужазы. Ӝутэмын вал 104 уголовной уж, 18 адями суд азьын кыл кутӥз. Кызьы нимысьтыз пусйиз А. Синильщиков, полиция уг туртты янгыше уськытэмъёсты одно ик пытсэт сьӧры келяны. Адями янгышсэ дыраз тупатэ ке, солэсь уголовной ужзэ дугдыто. Но кивалтӥсьлэн малпамезъя, судъёс озьы но мултэс небыт ужало налогъёслэсь пегасьёсын. Тани "Орбита плюс" ТОО-лэн кивалтӥсез, документъёс "пӧраса", 182 миллион манет пайда поттэмзэ налогъёслэсь ватэм. Та "сьӧлыксэ" солэсь шараязы но ассэ пытсэт сьӧры изоляторе пуктӥзы, ялан улон интыез ӧвӧл шуыса. Нош суд ӝоген сое мозмытӥз. Ярам коть, Е. Никитин ӧз ватскы, ӧз пегӟы. Собере солы 2 ар условной дыр сётӥзы. Нялтас вераса, налогъёсъя законэз тӥясьёсты ноку но пытсэт сьӧры уг келяло, шуыны луоз. Кытӥяз со, оло, умойтэм но. Нырысь учкыса, налогъёслэсь палэнскон 100 шараям учыръёс - со трос ик ӧвӧл кадь. Но мукет ласянь ке, та правоез тӥян учыръёсты озьы гинэ уд шарая: соосты одно ик лушкемен, ватскыса, самой кескич амалъёсын лэсьто. Коньдонэн герӟаськем ужъёсты сэрттон-пертчон понна, нимысьтыз тодон-валан кулэ. Соин ик полицейскойёслэсь ужамзэс возьматӥсь бадӟым лыдпусъёсты ватыны уг луы. Кызьы шуиз А. Синильщиков, соос вань луонлыкъёссэс уже куто, ужало сомында, мамында быгато. Полицилэн кыкетӥез бадӟым удысэз - вытъёсты тыронъя пунэме кылемъёслэсь ваньбурзэс арестовать карон но вузан. Кылем арын со "кортнамын" вал 825 миллион манет тыр, 165 миллион манет тыр вузамын. Валамон, та ужрадэ полицейскойёс ас тодэмзыя уг куто, налоговой инспекцилэн куремезъя гинэ. Ӟечен пусйыны кулэ мукетсэ но. Полиция выт тырисьёсты, номырин лыдъяськытэк, одно ик вӧсь карыны уг туртты, кыл кутытон понна гинэ. Солэн нырысетӥ ужпумез - государствоез ыштонъёслэсь утён. Полицейскойёс шуге-леке вуэм ваньбур кузёослы ӵем дыръя ӟеч визь-кенешен юртто, валэкто, кызьы соисьтыз яке таисьтыз югдурысь потыны. Шуом, предприятие вытъёссэ тырыны уг быгаты, солы аслыз пунэмен тыронъёсты басьтымтэеныз сэрен. Соку полицейскойёс солы юртто продукцизэ басьтӥсьёсын огъя кыл шедьтыны. Кулэ дыръяз та уже Пунэм тыронъя (Долговой) центрез но кыско. Озьы миым казнае вуттэмын вал 879 миллион манет ӝегам вытъёс. Кинлэн тужгес но бадӟым бюджетэ пунэмен кылёнэз шуыса юанлы А. Синильщиков вакчияк валэктӥз: - Чаклалэ асьтэос. Кытын уждунэн тужгес но ӝегало, отын ик трос тырымтэ вытъёс но. Журналистъёс пӧлысь одӥгез юаз: - Тӥляд управлениды, верамдылы осконо ке, умой кадь ужа. Нош малы бен соку вытъёс тырон тыро-пыдо уг люкаськы? Андрей Алексеевич таӵе валэктон сётӥз: - Ми асьмеос вытъёсты меӵак ум бичаське, соин выро налоговой инспекциос. Милям удысмы - правоез, законэз утён. Вакчияк вераса, быдэсъяськомы куинь ужпумез - выт тыронъя законэз тӥян учыръёсты шараян, соосты быдтон но бюджетлэсь ыштонъёссэ берыктон. Оскытӥсько, та ужез ми эшшо но ӟечгес нуомы, кулэ луиз ке, чурытгес но. Г. ТИХОНОВ. Асьмелэнэз дунтэмгес луоз Удмурт шаерын будӥсь эмъюм турынъёсты туэ бичаны чаклаське Красногорск ёросын - республикаысь чылкыт интыын. Турын-куар октонэ пыриськозы ужтэк кылемъёс но. Бичам но чылкытатэм продукцилэн дуныз, палэнысь ваемзылэсь сярысь, 1,5-2 поллы ичигес луоз. Озьы ке но, Удмуртиын улӥсьёслэсь эмъюм турынъёслы кулэяськонъёссэс быдэстыны со уз тырмы. Тужгес кулэез ужпум луэ - чылкытатон оборудование басьтон. Иворъёсъя национальной служба. Пайдаё пумиськон Ортчем арня вискын Ижевскын ортчиз Кун Кенешлэн Президиумаз но Правительствое быръем адямиосын, Удмурт Республикаысь Городъёслэн но ёросъёслэн администрациослэн кивалтӥсьёсынызы, Депутатъёслэн Кенешъёссылэн тӧроосынызы но мукет эшъёсын кенешон. Пумиськон дыръя вераськон мынӥз республикаысь властьлэн вань ёзъёсыз куспын ужез радъян сярысь. Кенешонын трос дыр висъямын вал Удмурт Республикаын кылдэм югдурлы но нырысь быдэстоно ужпумъёслы. Пумиськонэз усьтӥз Кун Кенешлэн Тӧроез Александр Волков. Люкаськемъёслы со тупатӥз Кун Кенешлэн Президиумез быръем муртъёсын. Правительстволэн Тӧроез Николай Ганза шараяз министръёслэсь но Кун комитетъёслэн тӧрооссылэсь нимъёссэс. Совещание лыктэмъёс кылзӥзы Кун Кенешлэн Тӧроезлэсь Александр Волковлэсь нырысетӥ кварталын республикалэн социально-экономической азинскемез но кивалтон ёзъёсын нырысь быдэстоно ужпумъёс сярысь докладзэ. Правительстволэн Тӧроез Николай Ганза кенеше лыктэмъёслы валэктӥз кивалтонъя ӟеч ёзъёс кылдытонлэсь кулэлыксэ. Бюджетъя законэз быдэстон но республикаын коньдонэн югдур сярысь ивортӥз коньдон ужпумъёсъя министр Владимир Бельтюков. Чурыт но ватытэк вераськон ортчиз вань ёзъёсысь кивалтӥсьёслэн социально- экономической азинсконъя планъёсты быдэстон понна, кыл кутэмзы сярысь. Та выллем пумиськон котькуд кварталэ ортчытъяны чакламын. Удмурт Республикаысь Кун Кенешлэн пресс-службаез. Журналистъёсын пумиськонъёс Кагаз "уг сутскы" Кун Думалэн депутатэз Н. И. Сапожников кылем арня вискын журналистъёсын пумиськылӥз. Депутат ас малпанъёссэ вераз Россиын, Удмуртиын но Югославиын кылдэм югдур сярысь. Алигес ортчем импичмент пумысен со шуиз: - Президентлэн кивалтэмезлы дунъет сётэмын. Со умой. Туж трос бумагаос люкамын. Сыӵе документъёс "уг сутско", оскисько: данак аръёс ортчыса но соос уже кутэмын луозы. Тани Чилиын, 27 ар пала путч ортчем бере выльысь, Пиночетлэн сьӧд ужъёсыз доры берытскизы. Озьы ик лымшор Кореялэн кыкез ик берлоосыз президентъёсыз али суд азе султозы. Возьыт КПРФ-лэн фракциысьтыз куд-ог коммунистъёс понна, шуиз Н. Сапожников. Куара сётон нуналэ 17 мурт импичментлы пумит луизы. Кыӵе мылкыдзэс веразы депутатъёс импичмент пумысен, нимын-нимын гожтэмын "Советская Россия" газетын (27-тӥ мае потэм номераз). Удмуртиын ортчем быръёнъёслы Москваысь депутатмы таӵе дунъет сётӥз: - Капиталистъёс ас вормонзэс быръёнъёсын юнматӥзы. Алигес Правительствомылэн выль Тӧроез Н. Ганза вераз, кун ваньбурлэсь 45 процентсэ нимаз кузёослы сётоно шуыса. Мар малпало та пумысен коммунистъёс? - Улон шоры учкон воштӥськыны быгатэ, - шуиз Николай Иванович. - Азьло аръёсы сямен, ваньбурез нимаз кузёослы сётонлы пумит кариськыны уг яра. Ми тазьы лыдъяськом: улонын пӧртэм пумо ваньбур возён амалъёс луыны быгато. Вуоно быръёнъёсы КПРФ ас кужыменыз гинэ мыныны малпа, "Отечествоен" нокыӵе огазеясь кусыпъёсмы ӧвӧл, шуиз депутат. Т. Банникова. Выль Правительство - выль адямиос Россия Федерацилэн Президентэз азьланьтэ Правительстволэсь членъёссэ юнматонэз. Россиысь Правительстволэн Тӧроезлэн воштӥсез луиз Валентина Матвиенко. Евгений Примаков кивалтон дыръя калыкез улон-вылонын утён ужпумъёсын выриз. Премьерлэн мукет воштӥсез луоз но гурт удысъя но сиён-юон поттонъя министрлэсь ужзэ быдэсъялоз Владимир Щербаков. Азьвыл правительствоын со ужез нуиз вал Виктор Семенов. Сергей Франк транспортъя министре ик кылиз. Президентлэн Указэзъя эстӥськонъя но энергетикая министр луиз Виктор Калюжный. Та ужын воштӥз Сергей Генераловез. Отчыозь вал министрлэн воштӥсез. Вузкаронъя министр луиз Михаил Фрадков. Со воштӥз Георгий Габуниез. Александр Починок юнматэмын вытъёсъя но коньдон бичанъя министре. Со воштоз Георгий Боосэз. Вячеслав Михайлов - Федерацилэн но Россия Федерациысь калыкъёсын ужанъя министр. Леонид Драчевский - содружестволэн ужъёсызъя министр. Азьвыл кунсьӧр ужъёсъя министрлэн воштӥсез луыса ужаз. Рамазан Абдулатипов - Россия Федерациысь министр юнматэмын. Президентлэн указэзъя Андрей Черненко Правительстволэн Аппаратэзлы кивалтӥсе - Россия Федерациысь министр. Сергей Адамов - Россия Федерациысь атом энерогияя министр. Фарит Газизуллин - кун асваньбуръя министр. Михаил Кирпичников - наукая но технологиосъя министр. Владимир Филиппов - калыкез дышетонъя министр. Культурая министр - Владимир Егоров. Сергей Калашников - ужъя но калыкез улон-вылонын азинтонъя министр. Виктор Орлов - инкуазь узырлыкъёсъя министр. Иворъёсъя национальной служба. Выльысь бырйизы Алигес Можга ёросысь "Пычас" агрофирма акционер огазеяськонын огъя кенеш ортчиз. Со возьматӥз: берло дыре хозяйствоын кивалтон удыс лябӟиз, нош тулыс бусы ужъёс мыныку йыг-йыг кивалтӥсьтэк нокызьы но луоно ӧвӧл. "Пычасский" совхозлэн азьвыл директорез Николай Иванович Тарасов дас ар пала ини пенсиын шутэтске. Кенеше люкаськемъёс сое выльысь куризы кивалтон ныпъетэз ас вылаз басьтыны. Николай Иванович соглаш луиз хозяйстволэн генеральной директорез луыны. П. Николаев. Моторъёс гурето, йӧл бызе Огазеяськонын быдэс производство оскемын Галина Филипповна Поздеевалы. Солэн самой трос, 74 ужасьёсыз. Отчы пыро мастеръёс, йӧл кутӥсьёс, огшоры ужасьёс, слесарьёс, операторъёс но мукетыз. Соос потто йӧл, чырсатэм йӧл сиёнъёс, творог, вӧй, кӧс йӧл но музонзэ. Ужзы огсыр умой радъямын. Котькуд производствоын гурето моторъёс, автоматъёс. Оборудованиез ӟеч ужато воргоронъёс, ваньзэ син азязы возё. Мастеръёс пӧлысь мылысь-кыдысь тыршо Галина Вечтомова, Екатерина Фирстова, Людмила Лямина, вӧй цехын одӥг мастер - Антонида Рычина. Озьы ик усто ужало Наталья Пислегина, Ольга Лесникова но мукетъёсыз. Ачиз Галина Филипповна йӧл заводэ 1974-тӥ арын ужаны лыктӥз. Собере кӧнялы ке музон интые кошкылӥз, нош 1986-тӥ арын выльысь берытскиз. - Ми калыклы ӟеч сиён-юон поттыны кулэ, - валэктэ Галина Поздеева. - Соин производство азе бадӟымесь куронъёс пуктэмын. Цехъёсмы пумен ӟоскытэсь луо. Озьы али кефир лэзьян цех лэсьтӥськом, одӥг но ӝыны-кык толэзьскын вуттыны чакласьком. Кӧс йӧл поттонын Чехиысь оборудование инъямын, усто ужа. Йӧл огазеяськонын ужасьёслы капчи ӧвӧл. Котыр техника, машинаос бергало ке но, адмиослы вуэн трос ужано луэ. Котькуд ужан интыын чылкыт мед луоз. Тани сыр поттонын юн шаплы тырше Светлана Капачинских. Сутка ӵоже со 300-400 килограмм адыгей сыр лэсьтэ. Ас удысаз 5 ар тырше ни. Егит кышномуртлы ужез кельше. Нош йӧлэз пакетъёсы лэзьян автоматъёсты валаса ужатэ слесарь-наладчик Олег Сергеевич Лимонов. Солэн сменаяз пакетъёсы мултэс йӧл уг кошкы, нормая лэзья. Оборудованиез дугдылытэк огсыр усто ужа, сылон учыръёсыз уг луыло. Творог лэсьтонын ассэ шедьтӥз ни Светлана Мовилэ. Со Молдовиысь лыктэмын, ньылетӥ арзэ ческыт сиён - творог лэсьтэ ни. Галина Филиповналэн верамезъя, Светлана туж чырткем адями, ужзэ юн ӟеч тодэ. Смена ӵоже 500-600 килограмм творог дася. Кык нунал ужа но шутэтске. Сыӵе график лэсьтэмын. Мастеръёс пӧлысь уката ик ушъяло Галина Дмитриевна Вечтомоваез. Татын со 15 ар ужа ни. Дас ар бухгалтериын вал. Али заявкаосын (куронъёсын) ужа. Соос тросгес луо ке, огазеяськонлы но умой. Тани куронъёс вуо Самара городысь но Чайковскиысь доразы арняяз 2-3 пол ветло. Басьто вӧй, кӧс йӧл но чырсатэм йӧл сиён, но тросгес нуо йӧл. Галина Вечтомова - усто анай. Пиез витьлы гинэ дышетске Самараысь связья институын, куинетӥ курсын ни. Туэ заводэ уногес йӧл вузаны кутскизы Ува районысь хозяйствоос. Со шумпотымон. Сиён-юонзэс басьтӥсьёс но вань. Азьланьын но озьы ик мед луоз. Г. Васильев. Лабораториям - огазеяськонлэн сюлмыз Ми калыклы сиёнъёс поттӥськом бере, предприятиын валтӥсь инты басьтэ производственно-технологической лаборатория. Соин ик азямы трос куронъёс сыло, но соос пӧлысь самой бадӟымез но кулэез луэ хозяйствоосысь басьтэм йӧллэсь но поттэм сиён=юонмылэсь ӟечлыксэс эскерон. Ужмы ноку уг дугдылы, нуналлы быдэ - ваньзэ учконо ук. Тани ваем йӧлэз умой-умой ӧд ке чакла, шудтэм учыръёс но луыны быгатозы. Нош напсэ (жирностьсэ) ӧд ке тоды яке сое кулэстӥд ке, йӧл вузасьёсмы ыштонъёс адӟозы. Тӧл вылтӥ, кылсярысь, 3,7-3,8 процент напен йӧл вуэ, гужем со усе, 3,5-3,6 процент гинэ кыле. Ваньзэ сое син азямы возиськом крестьян хозяйствоез, гурт кооперативез, эштосэз одӥг пол коть пӧяд ке, со тыныд ноку уз оскы ни, оло, йӧлзэ но ворттэмысь дугдоз. Лабораторимы пичи ӧвӧл, 13 кузя ужаськом: дас одӥг лаборант, одӥг микробиолог но ачим . Лаборантъёс пӧлысь синмаськымон тыршо Нелли Анисимова, Надежда Ветошкина, усто маял (закваска) лэсьто Вера Измайлова, Алевтина Ложкина но мукетъёсыз. Оскем ужзэ ӟеч быдэсъя микробиолог Татьяна Чаузова, микроскопез юмоке уг вуттылы. Тужгес сак эскере чырсатэм сиён-юонэз (йӧлпыдлэсь продукциез). Огазеяськонын микробиолог озьы ик чакла вуэз, омырез, йӧл чырсатонэз, оборудованиез, складэз но музонзэ. Лаборантъёс озьы ик учко хозяйствоосысь кыӵе ке йӧл вуттэмез: сӥятыса яке сӥятытэк но кыӵе сортэн. Угось сӥятэм но нырысетӥ сортэн йӧл ваемзы понна огазеяськон хозяйствоослы ватсаса дун тыре. Лабораторимылэн ужез син азьын уг адӟиськы, сое номырин уд мерта, уд но лыдъя но кыл кутонэз туж бадӟым. Сое лаборантъёсмы ӟеч валало. Тани Вавожысь цехын кык кузя ужало - Любовь Акмарова но Елена Ладыгина, нош Селтаын - Галина Федотова. Ум вунэтӥське ужасьёсмылэсь тодон-валанзэс будэтон сярысь. Алигес тани лаборантъёсмы дышетскизы Кировысь йӧл техникумын. Ачим тодон-валанме будэтӥсько Москваын. Ӧтьыло Волгоградэ но Кирове. Арлы быдэ сямен ветлӥсько. Та удысэ кызьы лыктэмме но ӧй шӧдылы. Малпасько вал медсестрае дышетскыны, нош Сарапулысь профессионально-технической училищеез горд дипломен быдтэме бере, азьвыл директормы Валентина Баталина 1976-тӥ арын Нылгае уже кутӥз. Отысь лабораториын 5 ар ужай, микробиолог но вал. Татчы 1981-тӥ арын лыктӥ. 16 ар (1983-тӥ арысен) лабораториен кивалтӥсько ни. Коллективе умой, туж кылзӥськисесь. Нылгаын ужакум ик Дмитроградысь механико-технологической техникуме пыри но заочно дышетски. Техник- технолог мылысь-кыдысь пыриськылӥ общественной улонэ. Вал райсоветлэн депутатэз, комсомольской партийной организацилэн секретарез. Кык пи будэтӥсько, лицей классын дышетско. Евгения Гаврилова, лабораторилэн кивалтӥсез. Россия Федерацилэн кун наградаосыныз пусъён сярысь Россия Федерацилэн Президентэзлэн Указэз Нылпиослы ӟеч сямъёс пыӵатонын но Семьялэн нуналэныз валче пусъёно: Почёт орденэн Кадрова Татьяна Николаевнаез - Удмурт Республикаысь Можга ёросысь Пычас шор ёзо школаысь кузёмытэм нуналэн ужась группалэсь воспитательзэ. Россия Федерацилэн Президентэз Б. Ельцин. Москва, Кремль, 1999 арын 13 мае. � 585. 1-тӥ июне - Нылпиосты утён нунал Котькуд нылпилэн улыны правоез вань. Нылпилэн правоосыз сярысь Конвенция, 6-тӥ ёзэт. Котькуд нылпилэн анай-атаезлэн со сярысь сюлмаськонзылы правоез вань. Нылпилэн правоосыз сярысь Конвенция, 7-тӥ ёзэт. 1-тӥ июне - Нылпиосты утён нунал Анай сярысь ӧвӧл та Пазелы гуртысь 25 аресъем Елена Е. дораз нылпи вае но сое оранжерейной комплекс сьӧры сэрпалтэ. Нунылэсь шӧйзэ ӵукна шедьто. Аслаз бакчаяз куштэ соку ваем нунызэ Селта ёросысь Колесур гуртысь 20 аресъем Люба С. (МВД-лэн сводкаысьтыз. "Удмурт дунне", 23 май, 1998 ар). Таӵе иворъёсты лыдӟыку, йырсиос пежырско. Кызьы кизы пыре егит анайёслэн асьсэлэсь нунызэс кулэтэм арбериез сямен сэрпалтыны? Со нуны али гинэ тынад гадь улад жугиськиз, югыт дуннее куриськиз ук! Но сое бус пыр сяна адӟыса ӧз вутты. Юнме кесяськиз куанер анаезлэсь гадьзэ утчаса, из сюлэмо кышномурт ӧз ӝипты сое бордаз, ӧз бинялты шуныт кутэтэ, аслаз капчиямезлы гинэ шумпотӥз. Мусо улэп пыры ӧз быгаты солэсь сюлэмзэ вырӟытыны. Анай луытыны. ... Гуртысьтыз Нина висьыса вуиз: ымнырыз кӧсэктэмын, пыдъёссэ мырдэм ӝутъя. Институтэ ӧз мыны. Ӝыт пал, эшъёсыз дышетсконтӥысь бертыкузы, со вир пӧлын уя ни вал. "Скороен" больницае келязы. Нылкышно врач соку ик юаз: "Кытын нуныед? Нина валамтэ улсы кариськиз, сеськыны выриз. Больницаысь ивортӥзы милицие... Нырысь юан кылдэ кадь: мар шоры учкыса улӥллям нылкышно консультациын ужасьёс? Соос секытэн нылкышноосты роддоме келятоззы син азязы возьыны кулэ ук! Но Нина одӥг консультацие но возьматъяськымтэ. Иське, сыӵе малпанэн со секытомемзэ тодэмез дырысен улӥз! Малы ӧз мыны абортэ (со бадӟым сьӧлык ке но, вордскем нуныез виён шимесгес ик, дыр). Ӧз синйылты шат нылызлэсь зӧкамзэ анаез? Нош нуны ваемзэ? Нина ваиз уго дораз, кезьыт мунчоын. Кӧня курадӟиз со отын? Кекатыны кема ӧвӧл, дыр, но кӧня дыр ортчиз на нунызэ согыны? Со дыр ӵоже умой анай шӧдскытэк ӧй кыльысал. Ачиз Нина та шимес югдурез тазьы валэктӥз: - Секытэн луэмме шӧдыса, туганэлы верай. Со шум ӧз поты, но куштыны но ӧз косы. - Кузпалъяськоно луоз", - шуиз. Мон оски. Но кӧты будыны кутскем бере, со бордысьтым палэнскыны ӧдъяз, бӧрысь воксё пыкиськыны кутскиз: "Мон гуртын, тон - городын, кин тодэ, кинлэсь шедьтӥд". Эшъёсылы но, анаелы но вераны ӧй дӥсьты, куректонме пушкам нуллӥ. Абортэ мыныны бер вал ни, отчы ветлэм эше вералляз, 12 арняозь гинэ кушто шуыса. Малпай, вайытозям больницае чик уг ветлы, нош вордскиз ке, роддоме кельто, нокин уз тодылы. Кӧты бадӟым ӧй вал, паськыт кофтаен ӧз ик адӟиськылы. Гуртам ӵем ӧй бертылы, но соку копак уксёлы ӟудӥ. Отысен тӥни, малпамтэ шорысь кӧты золъяны кутскиз... Али визьмыным нокызьы но озьы ӧй лэсьтысал, но соку, вӧсь, вожпотон но кышкан, мар карыны паймон - огазе сураськыса, лэся, ӧй вала ни. Ӝамдэ шузимем кадь улӥ, жалянэз но ӧй вала. Сазьтӥськи берлогес - гадьёсы йӧлын тырем бере. - Нош таӵе йыруж понна законъя кыл кутыто шуыса тодӥд-а? - Ӧй, кылылэме но ӧй вал. Шӧдскизы ик ке, кулӥз шуо, малпай. Нина - шимес йыруж лэсьтӥсь. Со понна со кыл кутӥз - куинь арлы пытсэт сьӧры келязы. Но огназ-а со янгыш? Ӧвӧл. Янгыш анаез, туганэз, эшъёсыз... ваньмы. Дырыз дыръя та нылашлы валэктысалзы ке юмшанлэн бервылъёсызлэсь утиськон сярысь, секытомемез бере нош валтысалзы ке врач доры яке шуныт кылын ке но буйгатысалзы, али Нина ӵуклы быдэ чупаса сайкатысал мусо нылзэ яке пизэ, куспазы ӟабыльтыса мынысалзы соос нылпи садэ... Туж жаль, таӵе учыръёс ӧжыт ӧвӧл. Кылем арын шаерамы сизьым анайёс асьсэлэсь вож нуныоссэс виизы. Кыкез соос пӧлысь быдэ вуымтэ нылъёс, ньылез сыӵе йыруж лэсьтӥллям ёрмемысьтызы. Ваньзы сямен суд азьын кыл кутӥзы ни. Но соос пукозы но бертозы. Сьӧлыксы понна улытозязы ӧпкелизы ке, умой. Но будо пӧламы мукет егитъёс. Тросэз озьы ик ёрмо, соин ик лек, жалясьтэм луо. Лек, жалясьтэм асьмеос, пиналзэс огназы будэтӥсь пал кышноос шоры кырыж учкисьёс. Ӵапак асьмелэн сыӵе супыльтонъёсмылэсь возьдаськиз, кышказ ук Нина. З. РЯБИНИНА. Юнме курадӟытэмъёс юрттэт витё Май толэзьлэн пумаз политикая репрессиосын курадӟытэм но шонере поттэмъёслэн ассоциацизылэн (АЖПР) пленумез ортчиз Ижевскын. Бадӟым вераськон вал ыштонэз берыктон сярысь ужпумъя. 30-тӥ аръёсы талам ваньбур понна компенсациос берло кык арзэ кун уг ни тыры. Соин ӵош ик 1991-тӥ арын кутэм "Политикая репрессиосын курадӟытэм но шонере поттэм муртъёслэсь чылкыт нимзэс берыктон сярысь" Россия Федерацилэсь законзэ нокин но ӧз вошты ук. Немец кылын фестиваль Берло ортчытэм гожтонъя (перепись), Удмуртиын кык но ӝыны сюрслэсь трос немецъёс уло. Ӧжыт ке но соос, асьсэлэсь культуразэс, кылзэс но йылолъёссэс утьыны тыршо. Со сярысь вера кылем арня вискын Удмурт филармонилэн залаз ортчем немец культуралы сӥзем куинетӥез фестиваль. Люкаськемъёс шумпотыса кылзӥзы самодеятельной артистъёслэсь шулдыр кырӟанъёссэс но эктонъёссэс. Иворъёсъя национальной служба. 5 инвожое Можга ёросысь Кватчи гуртысь яратоно но мусо анае Васильева Анналэн вордскем нуналыз. Сӥзисько тыныд анай, ӝутыны вормонтэм шуд, юн тазалык но ваньзэ умойзэ гинэ. Света нылыз. Маин дуно мыным Пушкин? Зэмос яратон - 113-тӥез Александр Пушкин "Евгений Онегин" романзэ пиналъёслы ӧз гожты - сое валаны быгатоз трос пумо мылкыдъёсты ас вылаз шӧдылэм мурт гинэ. Но роман пыртэмын школаын дышетон программае. Валало-а, уг-а та романэз пумозяз, 9-тӥ классын дышетскись но тунсыко потыса лыдӟе, ас понназ маке но выльзэ усьтэ. Нылъёс юало: - Нош Татьяна = со Гончарова ӧвӧл-а? Мон соослы тазьы валэктӥсько: - Зэм, озьы шуыны луоз, дыр, Пушкин романзэ Наталья Гончароваен пумиськытозяз гожъяны кутскиз ке но. Йылпумъяз сое 1830-тӥ арын - 18 аресъем Натальяез курамез бере ни. Романысь Татьяна Ларина но Пушкинлэн кузпалыз Наталья Гончарова тупало ог- огзылы туссыя-выросъёссыя но "адӟонзыя" но. Гончарова вал Пушкинлэн 113-тӥез яратонэз. Кызьы адӟиськом, Пушкин идеалзэ огвакыт ик утча романаз но, улонын но. Со яратӥз аслэсьтыз Татьяназэ - сьӧлыктэм, востэм нылашез, бӧрысьгес - чебер, йӧно дамаез. Со иедал тодмо: Она была нетороплива, Не холодна, не говорлива, Без взора наглого для всех, Без притязаний на успех... Все тихо, просто в ней... Аслэсьтыз кышнозэ но Пушкин мусо но лачмыт аристократка луэмез понна гажалляз, кема дыр ӵоже сьӧраз кышнолы курыса ветлӥз. "Мадонна" кылбураз со аслэсьтыз кузпалзэ Богородицаен ӵошатӥз: "Творец тебя мне ниспослал, тебя моя Мадонна, чистейшей прелести чистейший образец". Огаз гожтэтаз Пушкин гожтэ: "Учкылӥд-а тон синучкон пыр аслэсьтыд чебердэ, со номырин ӵошатонтэм. Но сюлэмдэ мон яратӥсько эшшо золгес". Соин, вылды, поэт Татьяназэ но сыӵегес кариз: ымнырыныз туж тузӥ ӧй вал, но сюлэм чылкытэз понна ваньмызлэн со азьын йыбырттэмез луысал. Яратытэк ке но бызиз, огпол но ӧз ӝожтӥськы, ӧз уськытскы Онегин азе, пумозяз ик картэзлы оскымон кылиз. Наталья Николаевна но, Пушкинлы бызьыкуз, пӧсь яратонэн ӧз ӝуа. Картэзлэсь 13 ареслы пиналгес, узыр ӧй вал, но висъяськылӥз ассэ возьыны быгатэменыз, чебер но йӧно манеръёсыныз. Пушкинэз но Гончаровлы усто пар шуыны ӧй луысал. Лапег мугоро, чебер но, узыр но ӧвӧл. 18 аресъем Натали соглаш луиз лек но косъяськись анаез дорысь чальгес кошкон поннагес. Татьяналэн но адӟонэз шимес луыны быгатысал: улысал кыӵе ке куштӥськем гуртын, куке но, аслэсьтыз юатэк, кыӵе ке Скотининлы картлы сётсалзы. Яке возьмаса пукысал, ку сое Москвае "ныл учконъёсы" нуозы. Озьы ик луиз. Но тани Татьяна картэныз ӵош балэ шеде. Солэн картэз "ваньмызлэсь вылын", - со, чинэныз но кизилиосыныз данъяськон интые, данъяське яратоно нылкышноеныз. Пушкинлы бызьыса, Наталья Николаевна умой кузпал луыны быгатӥз. Со вал Пушкинлэн идеалэз. Александр Сергеевич понна дуно вал семья, дор. Кузпалзэ умой кузё кышноен адӟемез потылӥз. Со ӧз малпалля, кыӵе йӧтоз Москваысь барышнялы, самой чебер егит нылкышнолы кузё кышно кариськыны: ялан ёрмыса, пунэмаськыса, висись пиналъёсын... Татьянаен ӵошатыса Наталья Николаевна данъяськылӥз чебереныз: солы синмаськиз ачиз царь! Но Пушкин ӧз вожалля кышнозэ - со ноку но ӧз дугдылы солы оскемысь, эксэй сяна но лулӟылӥсьёс трос вал ке но. Куд-огез юри выризы Пушкинлэсь идеалзэ куашкатыны - Наталья Николаевна сярысь кыл вӧлдылӥзы. Но Пушкин пумозяз оскиз кузпалызлы - дуэльын кулыкуз но шуиз: "Тон янгыш ӧвӧл". Н. Пельтемова, дышетӥсь. Йӧл кулэсмиз. Езъёс вандэмын Секытэн ортчиз туэ пудоез толйытон Сарапул ёросысь "Нечкинский" эштосын. Кылем арын сярысь скаллы быдэ йӧл 200 килограммлы ӧжытгес усиз. куке-соку та хозяйство районын одӥгез азьмынӥсез вал. Пудоез возь вылэ поттон но уг шумпотты. Куазь кезьыт улэмен турын ӧз ӝужйы. Сиён пумен быре, куро трос ӧз кыльы ни. Али скаллы быдэ 10 килограммлы силос сёто. Валамон, таӵе сюдон шӧдӥськытэк уг кыльы продукция поттон вылын но. Нуналаз 1300 скалъёс 6 тонна йӧл сёто, яке котькуд йырлы быдэ 4,8 килограмм усе. Пудоез возь вылэ поттыны уг луы на электрокужым ӧвӧлэн но. Тямыс гужем лагерьёсын 144 юбо вискын езъёс вандылэмын. Йыртэмасьёс ужаллям толалтэ. Соосты кутыны ӧз луы. Кӧня изъян ваемын соин сэрен хозяйстволы. Та вакытэ одӥгаз лагерьын тупатъян ужъёс мыно. Скалъёссэс поттӥзы ни Лагуново но Юриха отделениосын. Пудоосты толйытон секытэн сётскиз тырмыт сиён дасямтэен сэрен. Туэ трос аръем турынъёсты уногес кизьыны чакламын. Соос 600 гектар музъем вылэ интыямын, 200 гектарез ватсаса киземын. Кидыс басьтыны луонлык кылдӥзы, йӧллы дунэз будэтыса. Озьы 100 гектар кӧжы, 150 гектар сьӧдчабей киземын. Хозяйство басьтӥз на выль пумо йыды но чабей кидыс. Гуртоос оско, вуоно толлы ю-нянь но, пудо сиён но тырмыт луоз шуыса. В. ЛАГУНОВ. Котьма сярысь Уй пал полюсэ - нырысьсэ Китайлэн историяз таӵееез ӧй вал на. Нырысьсэ отысь специалистъёс чаклало Уй пал полюсэ вуылыны. ИТАР-ТАСС-лэн ивортэмезъя, "Сюелун" ("Лымы дракон") ледокол Арктикае вуттоз 50 тодосчиез но 20 журналистэз. Океанъёсты эскеронъя КНР-ысь кун управлениын ужасьлэн верамезъя , Уй пал полюсэ кошкись судно сюрессэ мытоз 1-тӥ июле Шанхай портысен. Сыскиськы - уксёед ке вань Вуоно толэзе Санкт-Петербургын сыськиськон поттонъя "Ригли" фабрика усьтӥськоз. "Интерфакс" агентство ивортэмъя, лэсьтӥськонэ сизьымдон миллион долларлэсь трос коньдон сётэмын ни. Специалистъёс верамъя, Питерысь сыськиськон Россиысь но матысь кунсьӧрын улӥсьёслы но тырмоз. Кин мар понна куректэ Корольлэсь данзэ ӝуто котырысьтыз адямиос. Луылэ, королез ускё но данъя. Савва Морозовлэн нимыз паськыт вӧлмемын. Ӟуч фабрикант, наукалы но искусстволы юрттӥсь Савва Тимовеевич. Коньдонзэ висъя вылэм на кинлы шуоды... революционеръёслы. Сокем юрттӥз, 1905-тӥ арын визьзэ ыштыса, ассэ быдтӥз. Савва Морозов ӧй вал, кызьы али шуо, спонсор гинэ, со вала вал искусствоез. Морозов жаляса вералляз: "Инмар ӧвӧл сётэм мыным куара, а то кыӵе кырӟасал!" Куректылӥз, капиталэз сяна, номыриз ӧвӧл шуыса. Иворъёсъя национальной служба. ИСТОРИЫСЬ ЧУРЪЁС Вал сыӵе коммуна Данёгуртын улэ Анатолий Александрович Хохряков. Солы сизьымдон ареслэсь ятыр ни. Пенсие потытозяз тыршиз колхозын. Кема арьёс кивалтӥз коммунистъёслэн огазеяськонэнызы, ужаз правленилэн председателез луыса. Ӵем пумиськылисько мон та лякыт сямо адямиен. Огпол вераськон сяменымы кылпум поттылӥ Нимошур гуртын коммуналэн ужаме сярысь. - Озьыен,солэсь историзэ тодэмды потӥз, - юанэлы вазиськиз со. - Ачим но мон вордскемын но быдэ вуэмык со гуртын, - кутскиз мадьыны Анатолий Александрович. - Коммуна сярысь атае но, бускельёсы но трос вераллязы. Нимошур гурт 1860-тӥ арьёсы кылдэмын. Шулдыр интылы санмаськыса, татчы пӧртэм улосъёсысь воргоронъёс лыкталлям. Ньыль-вить ар куспын ог кызё хоаяйствоос кылдӥллям. Сӥзьыл бусы ужьёссэс быдастыса, куд-ог воргоронъёс уждун понна пӧртэм интыосы лэсьтӥськонэ кошкыло вылэм. Нылкышноослэн толалтэ одӥг ужзы: пудоосты утялтон, черсон но дэра куон. Асьме даурлэн 20-тӥ - 30-тӥ аръёсаз куанеръёслэн улонзы капчи ӧй вал. Кулак выжыос но узырьёс крестьянъёсты юн зибыса возизы. Тол но гужем ас понназы ужатылӥзы. Ӟеч муземъёс но, турыно возьёс но соос киулын вал. Нош куанеръёслэн сиыны няньзы толшорозь но ӧз тырмылы. Соин ик чиданзы но быриз. Огазе люкаськыса вераськизы: музъемен ӵош ужанъя артель кылдытыны. Соку узыр выжыос пурзизы, пӧртэм амалъёсын соосты кышкатъязы. 1920-тӥ арын вить куанер улӥсь кресятьян хозяйствоос ӵош огазеяськизы. Соин кивалтӥз Н. И. Ложкин. Артельзы куинь ар сяна ӧз чида. Куд-огез отысь потэмен со куашказ. Ӧй вал угось, соослэн азьланезлы осконзы. Тросэз бускельёссы соос шоры кырыж синмын учкылизы. Нощ аръёс ортчыса, Николай Иосифович Ложкин выль ужезлэсь ӧз куштӥськы. Дышетскемез кык класс сяна ӧй ке но вал, музъем ужанэз туж ӟеч тодэ вылэм. 1928 арын солэн кивалтэмезъя ик кылдэ коммуна. Огъя кенешазы сое нимало "Красная колония". Кӧня ке дыр ортчыса, янгышсэс тупато: колония, пе, чебер уг кылиськы. Гожто: колонна. Озьы ёросын кутскиз коллективизация. Мукет араз кутӥзы Устав. Отчы гожтӥськизы ваньмыз сямен 52 ъозяиствоос. Нош гуртын улисьёсыз куинь сюлэсь ятыр вылэм. Гыроно муоссы 417 гектар. Крестьянъёс гидъёсы вальёссэс но скалъёосэс пыртӥзы. Коммунаын ужъёссы ӝог азинскыны кутскизы. Тысё юосты будэтонэз выль сямен радъяса, 1930-тӥ арын государстволы быгатӥзы ни 12 сюрс пуд нянь вузаны. Со понна "Красной колонналы" сётӥзы Фордзон трактор. Сое гуртэ вуттӥз атае Александр Федорович Хохряков. Эшез вал Александр Анисимович Ложкин. Таиз механтатор луыса куамын арлэсь ятыр ужаз. Нош бубилы ӧз кылды музъемез кема гырыны но кизьыны. Быдӟым Отечественной войнае кошкыса, Смоленск областьын бырыны шедиз. Ожмаськон сюрес вылэ потыкуз тятяе мыным вераса кельтӥз: "Йыг- йыг кариськы пие, тыныд табере дас кык арес ни. Капчи сюрес утчаса эн ветлы. Секыт сюрес тонэ кыдатоз, одно ик бадӟымез вылэ поттоз. Юн эшъяськы гурт улонэн, музъем ужанэн". Ӧй вунэты бубилесь ӟеч кылъёссэ. Вань улонме герӟай колхоз ужен. Кӧня ке ар ортчыса, коммуна ёросын одӥгез азьмынӥсез луиз. Нырысьсэ гуртэ трактор вуыса, вань калык ураме люкаськиз. Огез но мукетыз корт "валэз" киосынызы маялляло. Нош нырысетӥ борозда лэсьтон пӧрмиз бадӟым праздниклы. Сое учкыны трос гуртъёсысь но калык вуылиз. Узыр выжыос гинэ пож ву киськаса, пӧртэм шуш кылъёсын калыкез сантэмаллязы. Возьыттэк кесяськылизы: "Пась кӧтъёслэн, гольык пыдын ветлӥсьёслэн ваньмыз куашкалоз ай, кема ик уз чидалэ." Нош соос лушкем сьӧд ужъёссэс лэсьтылӥзы. Тӥяллязы аран но кутсаськон машинаосты, кизем юос пӧлы куяллязы корт арбериосты. Гурт калык сюлмо тыршемен, коммуна пӧртэм машинаос басьтыны быгатӥз лэсьтиськон ужъёс ӧръяськизы. Ар куспын кутыса вуттӥзы скал но парсь вордон гидъёсты. Нимшурысь коммуналэн улэмезлы синмаськыса, соос борды ужаны куриськизы артысь Дзилья гуртысь крестьянъёс но. Озьы кизёно муоссы паськытазы, - ужась кужым но трослы будӥз. Сюлмо тыршемзэс адӟытэк ӧв кельтэ. 1931-тӥ арын тулыспал толэзьлэн шораз государстволы вань тыронъёссэ дырызлэсь вазь но мултэсэн быдастэмез, куанеръёс пӧлын ужез умой радъямез понна коммуналы Автономной Областьлэсь киысь кие вошъяськись Горд Знамязы сётэмын вал. Калык полын ужез усто радъяны юрттиз коммунистъёс но. Соос татын куать мурт вылэм. Бӧрысь кылдӥз кустовой партийной ячейка. Отчы пыризы Сюрногуртысь но Данёгуртысь коммунистъёс. Соосын быгатыса кивалтӥз Д. Ф. Хохряков. Валэс юосты кизён но аран вакыръёсы бригадаос куспын паськыт вӧлмемын вал ӵошатскыса ужан. Азьмынисьёсты гожтылизы горд пул вылэ, нош азьтэмъёс шедьылизы сьӧд пулэ. Кыкетӥзэ тракторзэ коммуна ваиз Чепца станциысь. Кужо машиналэн вань ёзъёсыз ящикъёсы тыремын вылэм. Соосты гуртэ вальёсын кык-куинь нунал ворттӥлям. Атае эшеныз А. А. Ложкинэн пыд вылаз толэзь пала султытыны курадӟиллям. Тулыс кизьыны потытозь тракторъёс бичаллям. Озьы луонлык ккылдзӥз вань бусыосты тракторъёсын гырыны но кизьыны. Уж интыяз ӧз сылы. Кивалтӥсьёс малпаны кутскизы азьланез сярысь но. Правленилэн одӥгез кенешаз вераськон ӝутизы секыт ужъёсты капчиятон сярысь. Басьтизы локомотив но двигатель. ӟеч специалистъёс луымтэен, ар ортчыса гинэ сое уже кутыны быттӥзы. Кӧня шумпптонэз вал соку гурт калыклэн. Электричествоен ужаны кутскизы кык вукоос, табере пул пильыны, кутсаськон но тӧлӥськон машинаосты бергатыны электрокужымен ӧдъязы. Малпалэ ай войналась азьло аръёсы адӟылимы-а асьмеос коркаосты югдытӥсь тылэз. Нош Нимошур но Дзилья гуртъёсын коркаосын электр лампочкаос ӝуаны кутскизы. Вераны луонтэм бадӟым вормон вал со. Озьы ке но, югыт азьын куинь ар сяна пукыны ӧз кылды. Кужмо машинаен пыр-поч ужаны быгатӥсь адями луымтэен но трос пу сутэмен, солэсь куштӥськизы. Озьы ке но, гурт калык азьланезлы осконэн ужаз. Вакчи дыр куспын лэсьтыса вуттэмын вылэм сизьым классъем школа, клуб, столовой, тазалыкез умоятонъя юрт, вӧй поттон завод но мукетъёссэ. Ӝутӥзы кык этажен кӧня ке юртъёс но. Коммунаын улӥсъёс ноку уз вунэтэ 1937-тӥ арез. Соку котькуд поттэм трудоденьлы быдэ тямыс килограмм нянь люкизы. Куд-огез пумит но вал сое басьтыны, возён интызы ӧз тырмылы. Бӧрысь кыӵе ке но муген Дзилья гуртын улӥсьёс огъя кенеше коммуналэсь люкиськон сярысь кураськон гожтӥзы. Кин соосты узатэм, малы кусыпеы ӧвӧл тупам, нокин со сярысь пыр-поч валактон сётыны ӧз быгаты. Озьы соос палэнскизы но куд-ог юртъёсты пайлы шуыса сэрттӥзы но асьсэ гуртэ ворттӥзы. Тӥни со бордысен ик кутскиз коммуналэн куашканэз но. Вакчи дыр куспын ёросысь кивалтӥсьёслэн зибеменызы сыӵе чебересь коркаосты пӧртэм интыосы пазязы. Сизьым классъем школаез нуизы Шуралуд гуртэ, мукетъёссэ - районэ. Табере коммунаез кылдытӥсьёс но отын ужасьёс одӥгез но ӧвӧл ни. Фашизмлы пумит ожаськон лудэ та гуртысь гинэ 52 егит воргоронъёс кошкизы. Отысь 35 мурс дораз ӧз берты ни. "Красная колонна" сярысь туж тросэз али улӥсь пенсионеръёс но уг тодо, кылэмзы но ӧвӧл. Аръёс ортчыса, гурт историмес но вунэтиськомы. Ӧвӧл ни Нимошур гурт но. Отын азьло улӥсьёсыз кин кыдчы быгатэм пазьгиськизы. Озьы ке но, берло аръёсы отысь кошкемъёс огазе люкаськыса тодазы ваё, солэсь праздниксе пусъё. М. МОСОВ, Дэбес село. ЖУРНАЛИСТЪЁСЫН ПУМИСЬКОНЪЁС Казна шальк! мед вазёз Котькыӵе государстволэн валтӥсь узырлыкез - коньдон. Казнаед шальтрак буш кылиз ке, бырод ачид но. Сыӵе ини улонлэн законэз: кин узыргес, со ик дуннелэн кузёез. Кыӵе югдур та ласянь асьмелэн шаерамы? Со пумысен журналистъёслы валэктон сётӥз Федерациысь казначействолэн Удмурт Республикая управлениезлэн кивалтӥсез Валерий Колесников: - Управление дорамы кылдэмын но ужа 1995-тӥ арысен. Та дыр куспын умой-умой юнмаз. Зэм, бускель республикаосын ӵошатыса, кык но ӝыны арлы берегес кылим. Со шӧдӥськиз компьютер техника басьтонын но кадръёсты дасянын, - пусйиз Валерий Тимофеевич. 1991-тӥ арозь Россиысь коньдон ужпумъёсын кузёяськиз РСФСР-ысь Правительство но Центральной банк. Рынок амалэн улыны-вылыны кутскеммы бере, государственной банкъёс огез бӧрсьы мукетыз куашказы, соосты воштӥзы коммерческойёсыз. Таосыз туннэ но я кылдо, я быро. Центральной банк ас вылаз басьтӥз кредит сётъянэз но коммерческой банкъёсты эскерон-чакланэз. Трос-а коньдон вуиз соку федеральной бюджетэ? В. Т. Колесников верамъя, туж ӧжыт. Таин валче Россилэн Президентэзлэн 1991-тӥ арын потэм Указэныз кылдытӥське Федеральной казначейство. - Ми ужаськом Национальной банкен но выт бичанъя ёзъёсын ӵош, - шуиз В. Колесников. - Нуналлы быдэ эскериськом бюджетэ вуись коньдонэз, солэсь шонер кутӥськемзэ, бюджетэ пырисьтэм фондъёсты. Малпаськом ас выламы басьтыны таможняез но. 1997-тӥ арын казначейство пыр федеральной бюджетэ келямын 815 миллион манет. Миым та лыдпус вуиз 1 миллиард 95 миллионозь, яке 26,6 процентлы ятыргес. Туэ 4 толэзь ӵоже люкаськиз 581 миллион. Тросэз шуо, Удмуртиысь вань уксё, пе, Москвае кошке. Со шонер ӧвӧл. Центре ыстэм 1 миллиард 556 миллион манетысь республикае берытскиз 63 процентэз. Юан вылэ юан вуэ дышетӥсьёслы уждун тыронъя: малы Москва юрттэмысь дугдӥз? Ужпум со бордын - одӥг школа но та вакытэ федеральной бюджетысь коньдон уг басьты, ваньмыз юнматэмын интыысь бюджет борды. Но кылем арын отпуск понна коньдон басьтэмын ссуда амалэн центрысь ик. Туэ но дышетӥсьёсъя сыӵе решение кутэмын но огкыл шедьтэмын ни. Тулыс гырон-кизёнэз дыраз ортчытон вылысь, казна пыр гурт удыслы висъямын 38 миллион манет. Солэсь шонер кутӥськемзэ казначейство матысь дыре эскероз. Пусъём на, казна чотын улонэ пыӵа 27 пумо федеральной программа. Колесников верамъя, Федерациысь казначейство берло кык арзэ бадӟым саклык висъя Обороная министерстволы, коньдонэн юрттэ Приволжской военной округлы но Балтийской флотлы. Огъя верано ке, Федерацилэн бюджетысьтыз оборона удысэ 25 процентэз коньдон мынэ. Казна пыр уксё сётэмын республикаысьтымы 25 предприятилы: конверсиен герӟаськемъёслы но капчи промышленностьлы. Кӧня ке дыр ортчыса, со интыяз берытскыны кулэ. - Управление сак эскере висъям коньдонлэсь шонер кутӥськемзэ, - шуиз Валерий Тимофеевич, вераськонэз йылпумъяса. - Контрольно-ревизионной управлениен ӵош трос тырмымтэос шараямын Ижевскысь технической кун университетын. Бюджетысь коньдонэн "шудэмзы" понна, кыл кутытон улэ кыскемын 8 преподаватель. Валтӥсь бухгалтерзы интыысьтыз мозмытэмын. Али мыно на эскерон-чаклан ужъёс, пыриське отчы Россия Федерациысь Лыдъясь (Счетной) палата но. В. Т. Колесниковлы журналистъёс сётӥзы пӧртэм юанъёс. Кылсярысь, кыӵе ыштонъёс адӟиз казначейство 17 августэн сэрен? - Милям вань счётъёсмы мыно Центральной банк пыр, соин ик нокыӵе ыштонъёс ӧз луэ. Нош 20 августэ вуиз приказ та нуналъёсы кызьы ужан сярысь. - Россиысь басьтэм пунэмаськонъёслэсь кутӥськемзэс тӥ пумозяз-а чакласькоды- эскериськоды-а? - Коньдонъя министерствоозь. - Бюджет чотын уждун басьтӥсьёслы тыронъёс трос-а люкаськемын? - Федеральной бюджетъя ке верано, пунэме пыремъёс ӧвӧл: организациослы, учреждениослы коньдон май понна тыриське ни. - Коммерческой банкъёслы оскон вань на-а? - Одӥг пол пӧяськись муртлы оскыны секыт. Вань ук мукет банкъёс. Л. МЕДВЕДЕВА. ӦТЧАМ АЗЬЫН "Кенеш" турттэ кенешыны Кызьы тодмо, 19-тӥ июне Ижысь Операя но балетъя театрлэн юртаз ортчоз Вань удмуртъёслэн азьло пусйымтэ ӧтчамзы. Сое люкан мугъёсты валэктон вылысь, валлян журналистъёсын пумиськиз "Удмурт кенеш" огазеяськонлэн тӧроез Валентин Тубылов. Пресс-конференция ортчиз Кун Кенешлэн Президиумезлэн залаз. - Улон ӝог воштӥське, - шуиз Валентин Кузьмич. - Вуоно съездозь ар но ӝыны кылемын на. Республикаямы кылдэм югдурез но ассоциация азьын сылӥсь ужпумъёсты эскерон понна, ми решение кутӥм съезд люканы. Отын номыр но законлы тупасьтэмез ӧвӧл. Учке ай, отын но татын ортчо пӧртэм движениослэн, партиослэн ӧтчамъёссы. Кун Думае быръён азьын ваньмыз тыршо кужымзэс мертаны, азьланьзэ адӟыны. Ми малпаськом Кун Кенеше быръёнлы йылпумъянъёс лэсьтыны, политикае пыриськон ласянь, ватытэк вераны кулэ, опытмы ичи на - весь дышетскиськом. Озьы ик малпаськом уставамы воштонъёс пыртыны. Кылсярысь, кызьы ке пусъёно черодъя ортчем съездлэн делегатъёсызлэсь полномочиоссэс вуоно сыӵе ик ӧтчамозь утён сярысь. Ассоциацилэсь статуссэ но ӝутыны кулэ. Уго "Удмурт кенеш" - огшоры огазеяськон ӧвӧл. Солэн ёзъёсыз вань бускель улосъёсын но. Нош ик вераськон ӝутскоз Кылъёс сярысь закон пумысен. Солы уно проект дасямын ни, но депутатъёс ужпумез эскерыны уг дырто. Музъемъя но, шонергес вераса, сое вузанъя но мылкыдмес возьматыны тыршом. Кема кенешиськом ни иворвӧлмытӥсь ёзъёс кылдытон сярысь. Дыр вуэмын удмурт телестудия усьтыны. Со понна нимысьтыз канал висъяно. соку удмурт но ӟуч кылын передачаослэн кӧня час-минут мынэмзы пумысен вераськон уз луы ни. Удмуртсэ адӟемед потэ - учкы, ӟучсэ - пожалуйста. "Удмурт кенешлы" кулэ ни газет но. Сое поттоно кык кылын. Удмуртиын сяна, вӧлмытоно мукет республикаосы, областьёсы. Удмуртъёс тодыны кулэ ог-огзылэсь кызьы улэмзы сярысь. Юанъёс вань Куӟебай Гердлэсь нимзэ пыраклы тодэ кельтонъя ужрадъёс пумысен но. Дано удмурт пилэсь юбилейзэ пусйим, нош тросэз пусъем малпанъёс та дырозь быдэстымтэ на. Урамлы но солэн нимыз сётымтэ, памятниклы но инты чакламын ӧвӧл на. Нимысьтыз вераськом республикамылы тӧро вань калыкен быръён сярысь. Кулэ луоз, вылды, юалляськон ортчытыны. Кин та ласянь кичӧлтон сётоз - Кун Кенеш яке "Удмурт кенеш"? Со сярысь вераськом съездын. Валентин Тубылов валэктӥз жуналистъёслэн уно юанъёссылы. - Кызьы дунъяськоды выль Правительствоез? Лыдэ басьтӥз-а премьер-министр "Кенешлэсь" министръёсъя ӵектонъёссэ? - Правительствое пыризы тодӥсь-валась адямиос. Н. Ганзаен мон кык пол нимысьтыз пумиськылӥ, дэмланъёсме верай. Куд-ог ӵектонъёсты со санэ басьтӥз. Но тани, шуом, калыкез дышетонъя министре удмурт кылэз тодӥсьтэм муртэ пуктӥз. Озьы лэсьтыны уг яра вал. - Азьло тӥ ялан парламентской республика понна луиськоды вал, табере малпанды чутрак воштӥськиз... - Озьы верамды сокем шонер ӧвӧл. Кызьы тодӥськоды, 1994-тӥ арын Вылӥ Кенеш юнматӥз вал президент сярысь закон. Но соку калык тӧро бырйыны пумит луэмзэ возьматӥз. Табере дыр ортчиз, малпасько, асьмеос ваньмы ик валаськом ни, сыӵе кивалтӥсь кулэ шуыса. Ми тазьы ӵектӥськом: калыкен быръем тӧро огдыре кивалтыны кулэ правительствоен, главалы нимаз структура кылдытыны кулэ ӧвӧл. - Удмуртъёс республикаын ичи бере, удмуртэз тӧрое быръёзы шуыса, оскон бадӟым ӧвӧл. Тӥ нош ик бӧрысь уд вералэ-а, быръён мыдлань радъямын вал шуыса? - Ми ум но шуиське: тӧро одно ик удмурт мед луоз. Котьмалэсь кулэез со бордын: адями асьме музъемен гогыеныз герӟаськемын медло. Татын вордскем-будэм адями. Сыӵе мурт югдурез умоятыны быгатоз. Тӧро сярысь законэ ми, валамон ни, куд-ог ӵектонъёс пыртыны тыршом. Малы Германилэн Конституцияз гожтэмын, канцлер одно ик немец луыны кулэ шуыса? Яке США-ын тани Америкаын вордскымтэ муртэз ноку но президентэ уз быръе, коть со вордскемез бере ӵуказеяз ик отчы улыны мед вуоз. Нокин уг пумитъяськы сыӵе куронъёслы. Нош асьмелэн югдурез валаны уг тыршо. - Республикаын югдур, тӥ сямен, зэмен ик туж лэчыт-а? - Шуг-секытъёс трос. Кун Кенеше быръем депутатъёс калыклэсь мылкыдзэ уг возьмато. Быръён дыръя законэз тӥян трос учыръёс вал - созэ уноез тодо. Котькудӥз кандидат агитацилы тямыс сюрс манет быдтыны быгатэ вал ке, уноез эшъёс данаклы тросгес кутӥзы. Кин но со компьютеръёс, мукет тӥрлык кузьмаз, озьы ватсаса куара басьтӥз. Яке тани та юртэ интыяськем "Республика" фондэз басьтом. Кытысь коньдон отчы люкаське? Кыӵе кулэяськонъёслы со кутӥське? Огъя вераса, милемлы кенешыны мугъёс вань. Оскисько, съезд уно юанлы валэктон сётоз шуыса. И. ЛЕБЕДЕВ. Юалэ валэктом Кытын басьто ньылпу сирез? "Вань-а республикаямы ньылпу сирез бичан пунктъёс?" Таӵе юанэн редакцие вазиськиз Шаркан ёросысь Николаев эш. Юанлы валэктон сётон понна ми герӟаським Удмурт Республикаысь Нюлэс хозяйствоя министерствоен. Кызьы ивортӥзы отын ужасьёс, шаерамы ньыльпу сирез бичан уж радъямтэ, матысь дыре сыӵе пунктъёс кылдытыны озьы ик чакламын ӧвӧл. Нормадэ быдэстод - кубиста басьтод Куазьлэн пӧртмаськемез туэ ваньмес шуге-леке вуттӥз ни. Гужеммы кузёяське ке но, тросаз хозяйствоосын бусы ужъёс пумаз-йылаз вуттымтэ на. Завьял ёросысь "Родина" СПК-ын ваньмыз ушъяськымон ӧвӧл. Валтӥсь агроном Галина Ефимовна Четкарёва верамъя, кылемын на кубиста мерттон. Гужемлэн нырысетӥ нунлаэзлы со мерттэмын 65 гектар. - Шутэтскиськомы али, - огымысь кадь вазизы кубиста мерттӥсьёс. - Тазьы улыса, туннэ нуналлы планмы но уз быдэсмы, дыр. - Нош малы уд ужаське? - Азьвыл аръёсы, кенешыса выллем, дэмен ужаллямы, - веранзэс азьланьто нылкышноос. - 8 часын ик ӵукна сиён вутто вал. Нош туэ ӵемысь ужлэсь мӧзмысагес пукылӥськом. Кылсярысь, 1 июне но, 6 часын ужаны потэмъёслы 9 часын гинэ уд ваизы. Кыкетӥ сменае потэмъёс но шунды шорын ӵыжатсконо луо. Кубиста мерттон музъеммы дась ӧвӧл, фреза тӥяськемын. "Корт" вал но ялан уг ужа. Одӥг интызэ тупатӥськод, мукетыз сӧриське. Бусыын ужасьёслэн верамысьтызы валамы на мукетсэ но. Азьвыл аръёсы ужзэс ӝегатскытэк но шаплы быдэсъяло вылэм, нош туэ? Ужлэн дыг мынэмез кивалтӥсьёс пӧлысь но потэ луоз. Сотэк кызьы валалод таӵе верамез: "Котькытын йыр луыны кулэ", бусыез бухгалтеръёс саженен мертаса ветло". Озьы ке но, Изгуртысь кубиста мерттӥсьёс быдэстоно ужзылы юн оско. Туннэ мерттэм кубистазы удалтӥз ке, асьсэлэн но мылкыдзы капчигес луоз. Но уждун интые котькуд быдэстэм планзы понна 15 кило кубиста сётозы, пе. Кубиста бусыын. Дас тямысэтӥ арзэ та удысын сюлмо тырше ини Надежда Наумова. В. Кутузова. Туспуктэмъёсыз В. Камашевлэн. некролог "Удмурт дунне" газетын ужасьёс мур куректэмзэс верало эшъёссылы Лия Малыхлы но Людмила Хрулёвалы, соослэн анайзы Елена Наумовна Широбокова кулэмен валче. Гажано бӧлякъёс, гуртоос! Алнаш ёросысь Юмьяшур (Ӟунняшур) гуртлэн кылдэмез дырысен туэ тырме куинь сю ар. Вань мылкыд карисьёсты куное ӧтиськом дас кыкетӥ июне нуназе бере кык часлы. Лу Пушкинэн артэ А. С. Пушкинлы сӥзем бадӟым праздникез адӟемды потэ ке, таяз арня нуналэ, 6-тӥ июне, лыктыны быгатоды Национальной музеямы. Со луоз пырак музейлэн азбараз, чагыр инбам улын, кыстӥськоз лумбыт. Нырысь ик, 10-ысен 13 часозь возьматэмын луоз пиналъёслы сӥзем люкетэз. Шулдыртозы 69 номеро школаысь "Серпантин", Октябрь ёросысь творчествоя юртысь "Джем" эктонъя ансамбльёс, 63 номеро школаысь театръя студия но 29 номеро лицейысь "Ой, ладушки" фольклор ансамбль. Собере пиналъёс учкыны быгатозы Пушкинлы сӥзем выставкаез: "Сюрес вылысь паймымон адӟылэмъёс яке, кызьы Александр Сергеевич Вятка музъем вылтӥ ветлӥз". Татын луоз ЪИЪ-ЪЪ дауръёсысь пушкиниана но - нимаз адямиос киысь люкам книгаос. Озьы ик возьматыны дасямын "Болдино" но "Михайловское" - Пушкинлы сӥзем музей- заповденикъёс сярысь видеофильм. Со сяна, ортчытэмын луозы Пушкинлэн выжыкылъёсызъя викторина, пӧртэм шудонъёс. Та шулдыръяськонлэн кыкетӥ люкетэз кутскоз 14 часэ, удмурт кылын: "Ӧвӧл на мон вунэтэмын" ("Есть память обо мне"). Пушкинэз яратэмзэс возьматоы Ижевскысь школаосысь но нылпи садъёсысь удмурт кылэз дышетӥсь пиналъёс. Шулдыр мылкыд кылдытоз на Сергей Кунгуровлэн крезьгуро инструментъёсын оркестрез. Крезьгуръёс но кылбуръёс уз чалмелэ ӝыт но, 17 часысен 20 часозь. Праздниклэн та люкетаз быгатэмзэс возьматозы 22, 44 номеро лицейёсысь творческой скрипачъёслэн ансамбльзы. Та ӝытэ ик пыриськозы "Душа" ансамбль, "Шесть стран", "Колесо" клубъёс но мукетыз. Эше, та нуналэз вунонтэм каремед потэ ке, лу Пушкинэн артэ. Е. Кудрявцева, Национальной музейын ужась. А. С. Пушкинлэн вордскемез дырысен - 200 ар Котькудӥзлэн Пушкинэз - аслаз Мынам улонам Пушкин нырысь ик пыриз выжыкылъёсыныз. Школае уг ветлӥськы на вал, Салтан эксэй сярысь выжыкылзэ аслам удмурт кылыным лыдӟыны ӧдъяй куать-сизьым арескам, собере поп но Балда, чорыгась но чорыг сярысь выжыкылъёсыныз тодматским. Ӧжытак тодам на книгаослэн вылтусъёссы но. Тӥни ку ини, война кутскон азьын ик, удмурт кылбурчиос сюлмаськиллям мон кадьёс сярысь. Пушкинлэсь визь но кужым басьто, асьсэлэсь произведениоссэс кылдытъяны дышетско вылэм. Соку мыным ваньзэ валаны вазь на вал, дыр. Но Пушкинлэн чуръёсыз одно ик пыро вал покчиослы лыдӟон книгаосы ӟуч кылын но, вордскем кылын но. Дышетон удысын ужасьёс кулэен лыдъяло вал, дыр, тазэ: кылъёсты ӵошатыса тодоно- валано сӥзьыл яке тулыс, тол сюрес но тол ӝыт сярысь кылбур чуръёсты учкытэк лыдӟыны дышетскылӥм. Тужгес но вунонтэм кылизы 5-тӥ-7-тӥ классъёсын дышетэм чуръёс. Соку милемыз ӟуч кыллы но литературалы дышетӥз Елена Васильевна Помосова. ЪИЪ даурысь классической литератураез со туж яратэ вал. Соку школалэн программаяз пыро вал А. С. Пушкинлэн данак произведениосыз. Учкытэк вераны дышетӥм "Полтава" поэмаысьтыз ожмаськон сярысь люкетсэ, "Песнь о вещем Олеге" балладаез, мукет кылбуръёсты. Удмурт литературалы Пушкинлэн поэзиезлэсь бадӟым юрттэт сётэмзэ ӟеч валаса дышетӥз, луоз, Анастасия Еремеевна Евсеева но, егит дыръяз, война аръёсы, редакциосын ужам мурт. Солэн ӵектэмезъя ик ми лыдӟылӥм Михаил Петровлэсь но Игнатий Гавриловлэсь берыктэмъёссэс но. Соин мон али мӧйымыса ини уг паймиськы А. С. Пушкинлэсь туж троссэ произведениос дуннеысь котькыӵе кылэ, озьы ик удмурт кылэ но берыктэмлы. Сыӵе югдур кылдоз шуыса оскемзэ быдӟым кылбурчи ачиз ик вераз вал ук "Памятник" кылбураз. "Быдӟым поэтъёс ӝужыт гурезьёс сямен ик трос полэс чузъясько. Соослэсь куаразэс- кырӟанзэс котькыӵе кылъёсы берыктыса кырӟало, малы ке шуоно, нимзэс котькин тодэ, сӥё-дано каре", - та кылъёсты куке но гожтэм быдӟым француз гожъясь Виктор Гюго (1802-1885). Та верам кылъёс туж зол тупало А. С. Пушкинлы - ӟуч поэзилэн шундыезлы. Нош шыкысысьтыз зарни чуръёссэ удмуртъёслы асьсэлэн кылынызы вераса кузьманы тыршиллям трос гинэ кылбурчиос. Нырысез соос пӧлысь - удмурт литературалэн песятаез Г. Е. Верещагин. "Чорыгась но чорыг сярысь выжыкыл" вылэ пыкъяськыса, со кылдытэм "Зарни чорыг" выжыкыл. "Поп но солэн Балда ляльчиез сярысь выжыкылэз" кызетӥ даурлэн кутсконаз ик берыктэм Максим Прокопьев. Пушкинлэсь чуръёссэ удмурт кылэ берыктыны тыршиллям Кузёбай Герд но Ашальчи Оки, И. Гаврилов но М. Петров, А. Клабуков но А. Лужанин, П. Чайников но Е. Самсонов, С. Перевощиков но трос мукет кылбурчиос. А. С. Пушкинлэн творчествоезлэн удмуртъёс понна тужгес дуно луэмез сярысь пыр-поч вера но гожъя асьме вакытысь удмурт писатель-критик но литературовед Ф. К. Ермаков. Со ужаз кылъя но литературая дышетӥсьёс понна нимысьтыз юрттэт- пособие бордын. Кӧня ке ар талэсь азьло аслэсьтыз ужъёссэ поттӥз со таӵе книгаен: "Удмурт но ӟуч литератураослэн кусыпъёссы". Мон малпамъя, критик школа понна туж кулэ уж лэсьтӥз. Валамон ни: туж кулэ инты висъяз А. С. Пушкинлы но. Жаляса верано луисько одӥгзэ гинэ: уг тодӥськы, туала школаын трос-а меда удмурт но ӟуч литератураосыз куспазы юн герӟаса но валаса дышетӥсьёс? Валамон, сыӵе дышетӥсьёс вань, соос тыршо кыксэ ик кылэз но литератураез куспазы герӟаны. Туала учебникъёсысь А. С. Пушкинлэсь удмурт кылэ берыктэм чуръёссэ мон ӧй адӟылы. Нош тодэм потэ вылэм: дышетон удысысь туалаос уже кызьы меда куто А. С. Пушкинлэсь улэм-вылэмзэ, творчествозэ, кызьы дышето ас шаердэ, атай музъемдэ, калыктэ, аслэсьтыд выжыдэ гажаны. "Удмуртия" издательстволэн валтӥсь редакторезлэн В. Н. Ившинлэн верамезъя тодӥсько: книга поттӥсьёс малпало вылэм, А. С. Пушкинлэн вордскемез дырысен 200 ар тырмонлы сӥзьыса, солэн тужгес умой кылбуръёсыныз удмурт кылын бичет поттылыны. Макем ӟеч со малпан - мон вераны кыл но уг шедьтӥськы. Нош издательство поттыны быгатэм юбилейлы сӥзем одӥг гинэ выжыкыл - нылпиослы книга. Вань ӟечесь малпанъёс куашкало соосты быдэсъяны коньдон ӧвӧлэн. Куке но луозы-а та улонамы воштӥськонъёс, 50-тӥ - 60-тӥ аръёсы сямен ик потылозы-а классикъёслэн книгаоссы? Яке ӝокатозы-а ини лыдӟисьёсты кунгож сьӧрысь писательёслэн боевикъёсынызы, порнографиен но мукет книгаосын? Соос адямиез адӟемпотостэм карыны дышето, егитъёслы тужгес уродэсь сямъёс пыӵатыны юртто ук! Котьма ласянь дуно асьмелы быдӟым поэт. Нош тужгес кужмо со зэмлыкез кышкатэк вераны быгатэменыз. Котькуд калыклэн вань, дыр, аслаз Пушкинэз - литератураын кужмо азьветлӥсез. Нош али вань на-а сыӵе адямиосмы? Сьӧд кужымъёслэн сыӵеосты чидамзы уг поты. Озьы луиз Пушкинэн, озьы луиз быдӟым удмуртэн Куӟебай Гердэн но. Пушкин шиё чуръёссэ гожъяз калык тушмонъёслы пумит. Калык тушмонъёс, эксэйяськыса улыны турттӥсьёс ӧжыт ӧвӧл туала вакытэ но. Соос быдэс Россилэсь азинлыко улонзэ куашкатӥзы. Со тушмонъёсты каргась чуръёсты но дырын-дырын шедьтылод вылэм. Вань соос, кылсярысь, аварлэн Расул Гамзатовлэн, чувашлэн Мишши Юхмалэн но мукетъёслэн ужъёсазы. Расул Гамзатовлэн но Мишши Юхмалэн вань одӥг кадь ним сётэм кылбуръёссы - "Карган" "Проклятие". Та чуръёс мыным тодэ вайыто А. С. Пушкинлэсь егит дыръяз гожтэм лэчыт чуръёссэ. Соос пӧлын лыдӟисьлы туж тодмо "Вольность" одаысь чуръёс но. Леонид ФЕДОРОВ. ЛЫДӞИСЬЛЭН МАЛПАНЭЗ Кытчы нискылтэ вайыжтэм дӧдьы? Улон, улон... Кыӵе тон бугрес, кӧня синвузэ кисьтоз на куанер калык? Нош вайыжтэм дӧдьымы весь уллань но уллань нискылтэ. Нокин сое уг куты, кутыны но уг сюлмаськы. Вылӥын пукись чиновникъёс солань-талань шонасько, огзы вылэ огзы пож ву киськало, асьсэлэсь "ужаны" быгатэмзэс возьмато. Уноез заводъёс но фабрикаос мырдэм шокало ни. Тырмыт уж луымтэен, рабочийёсты ураме потто. Со дыре ик кунгож сьӧрысь дуно дунын комбайнъёс басьтӥськомы. Сӧриськиз ке, отчы-а кулэ деталь понна мыномы? Кун Кенешын но Правительствоын кӧня чиновникъёс пуко. Соос уждун тросэн но дырыз дыръя басьто. Кыӵе гинэ комитетъёс но огазеяськонъёс ӧвӧл кылдытэмын. Котькудӥзлэн аслаз программаез: улонэз умоятон сярысь. Нош со ӟукыртӥсь уробо сямен куашка но куашка. Реформа шуон аръёсы кӧня законъёс кутэмын, указъёс гожтэмын. Ӝыныез но соос уж вылын уг быдэсъясько. Тани басьтом "Ветеранъёс сярысь" Законэз ик. Отын пусъемын эмъюмъёсты дунтэк сётыны. Кӧня ке ар висъяллязы, табере нош ик дугдӥзы. Чӧлскизы экономикалэн лябезлы. Советъёс ужан вакытэ бадӟымесь азинсконъёс басьтэмын. Табере лэсьтэмзэ но быдтӥськом, выльзэ но туж ичи адӟиськом. Кунгож сьӧрысь бадӟым кивалтӥсьёслэсь дэмланъёссэс санэ басьтэмен ик таӵе улонэ ӧм-а вуэ асьмеос? Калыкез сюдон но дӥсян понна кӧня отысь ю тысь, пӧртэм сиён-юон но дӥськут ворттӥськомы. Нош соослэн ӟечлыксы адямиослэн тазалыксылы уг тупало. Асьмелэн Россимы узыр ук. Быгатӥськомы ӟеч ю тысь но мукет культураос будэтыны. Нош колхозъёс, совхозъёс, фермеръёс будэтэмзэ но вузаны уг быгато. Кивалтӥсьёс калыклы возьыттэк валэкто: кунгож сьӧрысь ваемез, пе, дунтэм усе. Оло озьы но. Али городъёсын гинэ ӧвӧл, ёросъёсын но арнялы огпол базар люкаськылэ. Гурт калык-а отчы аслэсьтыз мултэс ваньбурзэ поттэ? Уг. Челнокъёсын берытскон инты ӧвӧл. Соос кыӵе гинэ вузъёс тыныд уз ӵектэ. Нош дунъёссы... Куанер калыклэсь берпум копейказэ кыскыны дасесь. Магазинэ алигес пыраса кылӥ пересь кышномуртлэсь вузкарисьлы вазиськемзэ: "Мерта ай, гыдыке, пичи нылылы вить карамельдэ, маин ке но буйгатоно ук". Табере килограммен конфет басьтӥсьёсты шер пумиталод. Адями сюлмаське мукет сиён- юонлы уксёзэ шыръяны. Тӥни озьы ик улӥськом. Уллань но уллань гылӟиськом. М. МОСОВ. Дэбес село. Удмурт Республикаысь Кун Кенешлэн 1999-тӥ арын 13-тӥ мае кутэм "Удмурт Республикаысь Правительство сярысь" 19-ИИ номеро постановленияз воштонъёс но ватсанъёс пыртон сярысь Удмурт Республикаысь Кун Кенешлэн Постановлениез Удмурт Республикаысь Кун Кенеш пуктэ: 1. Пыртоно Удмурт Республикаысь Кун Кенешлэн 1999-тӥ арын 13-тӥ мае кутэм "Удмурт Республикаысь Правительство сярысь" 19-ИИ номеро постановление таӵе воштонъёс но ватсанъёс: та кылъёсты куштоно: "Удмурт Республикаысь Правительстволэн Тӧроезлэн воштӥсез - Удмурт Республикаысь Асваньбуръя кун комитетлэн тӧроез"; "Удмурт Республикаысь Архитектурая но лэсьтӥськонъя кун комитетлэн тӧроез"; "Удмурт Республикаысь инкуазь узырлыкъёсъя но инкуазез утёнъя министр" кылъёс бере гожтоно "лэсьтӥськонъя, архитектурая но улон инты политикая министр" кылъёс; "Удмурт Республикаысь Егитъёсын ужанъя кун комитетлэн тӧроез" кылъёс бере гожтоно "Удмурт Республикаысь Асваньбуръя кун комитетлэн тӧроез" кылъёс. 2. Та постановление кужыме пыре сое печатлам нуналысен. Удмурт Республикаысь Кун Кенешлэн Тӧроез А. А. Волков. Ижевск город, 1999 арын 25 мае. �29-ИИ. Удмурт Республикаысь Кун Кенешын депутат фракциосты пусъён сярысь Удмурт Республикаысь Кун Кенешлэн Постановлениез Удмурт Республикаысь Кун Кенешлэн Регламентэзлэн 50-тӥ, 51-тӥ, 52-тӥ ёзэтъёсыныз кивалтӥськыса, Удмурт Республикаысь Кун Кенеш пуктэ: Удмурт Республикаысь Кун Кенешын пусъёно: "Промышленникъёс но ужбергатӥсьёс" депутат фракциез - 34 депутат (фракцилэн кивалтӥсез Шестаков Юрий Владимирович); "Единство" депутат фракциез - 23 депутат (фракцилэн кивалтӥсез Хорошавцев Виктор Геннадьевич); аграрийёсты но городын улӥсь депутатъёсты огазеясь фракция (фракцилэн кивалтӥсез Одиянков Евгений Германович). Удмурт Республикаысь Кун Кенешлэн Тӧроез А. А. Волков. Ижевск город, 1999 арын 14 мае. � 26-ИИ. Удмурт Республикаысь Кун Кенеш но Правительство мур куректэмзэс верало Удмурт Республикаысь Правительстволэн Тӧроезлэн воштӥсезлы Чикуров Сергей Витальевичлы но кайгыро аиз Чикуров Виталий Петрович кулэмен валче. ЗАКОН КУРЕМЪЯ Шорлыдын, котькудӥз вииз куинь адямиез Та банда но солэн шимес ужъёсыз быдэс Россилы тодмо луизы. Новокузнецкысь йыруж лэсьтӥсьёсты кырмемзы сярысь телевизор пыр ас дыраз ивортылӥзы странаысь Генеральной прокурор но солэн воштӥсез. Сьӧсьёс уллёе соос огазеяськизы 1994 арын, тямыс кузя. Одӥгез но куамын арессэс соку ӧз ортче ай. Соос пӧлын вал одӥг нылкышно но. Бандае люкаськизы Новокузнецкысь но Ижевскын улӥсьёс. Сое кылдытӥсьёс но кивалтӥсьёс луизы Новокузнецкысь Клейстер но Ижевскысь Красноперов. Эшъяськыны кутски соос "зонаын" ӵош пукыкузы. Соку ик малпазы банда кылдытыны. Убиръёслэн одӥг гинэ сюлмаськонзы, ужпумзы вал - ужатэк коньдон поттон. Со понна соос лушкаськзы, адямиосты кышкатыса, жугыса но виыса ваньбурзэс но коньдонзэс талаллязы. Адями вион соослы дышем ужлы пӧрмиз. Нош кутыны кескич сьӧсьёсты соку ик ӧз удалты. малы ке шуоно, Новокузнецкын йыруж лэсьто но Ижевске вуо. татын йыртэмало но Москвае кошко, табере чотын вир кисьто. Москваын соос, валюта воштон пунктэз "басьтыкузы", кассирез виё. Ижевскысь "Ижкредобанкын" виё кассирез но сӧсырто возьмаськисез. Новокузнецкын магазинэз "зуркатыкузы", 9 янгыштэм басьяськисьёсты, выж вылэ выдтыса йырберазы ыбыло, адӟись медам кыльы шуыса. Огъя вераса, бандалэн чотаз 24 адями виён но 3 адямиез виыны турттон. Ижевскын гинэ бандитъёс 9 адямилэсь улонзэс быдтӥзы. Соос пӧлын пиосъёс но нылкышноос, мӧйыос но пиналъёс. Сьӧсьёслэн киоссы гырпумозязы адями вир пӧлын. Кин тодэм, кӧня калыкез быдтысалзы на соос. 1997 арын Генеральной прокурорлэн воштсез косэмъя, Ижевскын кылдытжмын вал оперативно-следовательной группа. отчы пыртӥзы республикалэн прокуратураысьтыз следовательёсты но уголовной розыскын ужасьёсты. Группаен кивалтыны косӥзы Владимир Никишкинэз, прокуратураысь тужгес но кышкыт ужъёсъя отделлэсь кивалтӥсьсэ. Владимир Анатольевич тодаз вае. - 1997 арын милям син азямы шедиз Клейстер. эскерыны кутским солэсь кусыпъёссэ, мар каремзэ. Ӵапак со вискын сое эшъёсыныз ӵош ӝегато но машинаысьтызы пистолетъёс шедьто, глушительёсын. Валамон ини, нош ик йыруж лэсьтыны дасяськемын. Соос ваньмызлэсь танӥсько, пыӵал тӥрлык воземзэс гинэ ас вылазы басьто. Ваньмызлэсь чиньы суредъёссэс эскеримы но шараямы: Клейстерлэн чиньы суредъёсыз тупазы Киров областьын кельтэм пытьыосын. Озьы следовательёс кие вуиз тугаськем бугорлэн синьыс пумыз. Кык ар ӵоже сое сэрттӥзы-пертчизы. Кин лыдъялоз-мерталоз пумтэм сюресъёсты, изьымтэ уйёсты, керӟег нуналъёсты, секыт нюръяськонлы укшась допросъёсты. Вылаз ик, Новокузнецкысь но Москваысь право утисьёс тыро-пыдо ӧз юрттэ. Ижевскысь эшъёссылы. Ярам коть, дунъяны луонэм юрттӥзы соослы асьме милициын ужасьёс. соослы али но тау каремзэ вера Владимир Никешкиин. Кык ар куспын следователь1с йыруж лэсьтӥсьёсты огпол Москвае но кык пол Новокузнецке нуллӥзы, отын но татын 300 адямилы допрос лэсьтӥзы, 229 экспертиза но 34 следственной эксперимент ортчытӥзы. Бандитъёслэсь йыружъёссэс огшоры лыдъян-чотан гинэ кык том (котькудӥз ог куинь килограмм пала кыскоз) басьтӥз. Судэ келямын 45 том следственной материалъёс. Озьы йылпумъяськиз сьӧсь ужъёсты кык ар ӵоже сэрттон-пертчон. Со куспын Генеральной прокурор но солэн воштӥсез быдэс страналы телевизор пыр ивортылӥзы: ми, пе, ужаськомы Новокузнецкысь туж кышкыт бандалэн йыружъёсыз бордын. Огзы но ӧз вералэ, "ми" - со Удмуртиысь следовательёс шуыса. Республикалэн прокурорез Виктор Походин кибашлы следовательёсызлы нимысьтыз приказа тау каремзэ вераз но соосты дуно кузьымъёсын пусйыны косӥз. Дуно кузьымъёслэн дунзы - быдэн 250 манет. - Ми дан сьӧры ӧм улляське, шуэ Владимир Никешкин. - Ужаммес калык кулэезъя дунъялоз. Ми понна тужгес но дуноез - адямиос мед шӧдозы, мед валалозы вылэм: та валантэм, огыр-бугыр вакытэ но соосты утись вань, вир кисьтӥсьёс, йыруж лэсьтӥсьёс кыл кутонлэсь уз палэнске, закон котьку вормоз. Али бандитъёсты судить каре Удмуртиысь Вылӥ судлэн уголовной ужъёсъя судебной коллегиез. Суд Правосудилэн дворецаз уг мыны, МВД-лэн нимаз батальонэзлэн юртаз, кудзэ оскымон возьмало. Отчы пырыку, куинь корт ӧсэз ортчиськод, кортэз шараясь устройстов пыр потӥськод, котырдэ но астэ милиционер эскере, дышетэм пуны зынъяське. Котькуд тубатын но коридорын ОМОН-ысь боецъёс сыло. мар бен, бандитъёс кышкытэсь, марысь мар ке, ыштыны соослы номыре, соин ик котькыӵе витьымтэ учырлэсь утиськыны кулэ. Тани соос пуко судлэн залаз, корт клеткаосын. Чылкыт, егит ымныръёсын нокыӵе сьӧсь сямзы уг шӧдӥськы. Огшоры тусъёс, огшоры пиос кадь. Мукет интыын, мукет дыръя озьы ик кожалод, ӧд ке тоды, соослэн мышказы 24 виемъёс, 60 адями жугемъёс, сӧсыртэмъёс, кышкатэмъёс, ултӥямъёс, пумтэм куректон но бӧрдон. Заседание дыръя одӥгезлэн бандитлэн азьвыл кышноез судлы вера: - Володя - сюлмо адями, небыт сямо, вазиськись, котьку юрттыны дась. Кинлы меда? Ватсан: Судьялэн Владимир Кулябинлэн (со нуэ процессэз) верамезъя, суд, оло, куать толэзь ӵоже кыстӥськоз. Угось туж трос материалэз эскероно, тачак свидетельёсты кылзоно. Газет аслаз лыдӟисьёсызлы мадьыны тыршоз процесслэн мынэмез сярысь, нош солы йылпумъянъёс сярысь одно ик ивортоз. Г. ТИХОНОВ. "Шундыкар-99" Усточи нылпиос понна "Удмурт дунне" но "Ӟечбур" газетъёсын ялэмын вал "Шундыкар-99" конкурс. Вакчи дыр ӵоже пиналъёслэн трос гинэ ужъёссы вуизы. Бадӟым тау кариськомы ваньмызлы, кин пыриськиз конкурсэ. "Шундыкар" лагерез ортчытон сяммы пӧрмиз ини. Арысь аре лагерямы шутэтско выльёсыз пиналъёс, нош куд-огез кыкетӥзэ но, куинетӥзэ но вуо. Шутэтскем сяна, лагерьын пиналъёс ас быръем удыссыя тодон-валанзэс муромытозы. Удысъёсын кивалтозы ӟеч тодӥсь-валась специалистъёс. Н. Э. Уткина (эстрада), В. Н. Морозов (суредасьёс), А. П. Степанов (ДПИ-керамика), К. Ш. Галиханов (архитектура), В. С. Ушаков (театр), В. М. Сидоров (тележурналистика), Н. С. Полякова (фольклор), П. М. Захаров (литераторъёс), Т. В. Мазтова (азьветлӥсьёс), Л. А. Молчанова (удмурт костюмлэн дизайнэз). Жаляса верало, лингвистика отрядэ келям ужъёс уг тупало конкурслэн куронъёсызлы. Соин ик, та отрядэ нылпиосты ум кутӥське. Конкурсын вормисе потӥзы таӵе пиналъёс: Эстрада кырӟасьёслэн отрядзы Специалистэз Н. Э.Уткина Меньшикова Надя, 9 кл., Шаркан ёрос, Кыква гурт, Богданова Катя Дэбес ёрос, тыловай гурт, Култышева Таня 8 кл., Пичи Пурга ёрос Рябинина Оля Ува ёрос, Узей-Тукля гурт, Громова Люба 9 кл., Пичи пурга ёрос, Алганча-Игра гурт, Сидорова Света 8 кл., с. Алнаш черкогурт, Кириллова Вероника 9 кл., Пичи Пурга ёрос, Гожня гурт, Александрова Таня 9 кл., Пичи Пурга ёрос, Гожня гурт, Капачинских Александр Селта ёрос, Уть-Сюмси гурт, Сабанчин Валера 10 кл., Башкирия, Татышлы ёрос,Бальзюга гурт, Камашева Альбина Селта ёрос, Выль Монья гурт, Демина Оля 8 кл., Яр ёрос, Тум гурт, Прохорова Снежана Завьял ёрос, Подшивалово гурт, Маркитонов Володя Агрыз ёрос, Сарсак-Омга гурт, Камашев Андрей Селта ёрос, Выль Монья гурт, Фольклористъёслэн отрядзы Специалистэз Н. С.Поляков Марков Ваня 7 кл., Воткинск город, Смагин Андрей Пичи пурга ёрос, Ив.-Самарское гурт, Зеленцов Николай 7 кл., Сюмси ёрос, Гура школа, Никитина Юля 5 кл., Сюмси ёрос, В. Четкер гурт, Березина Аня 5 кл., Дэбес ёрос, Б. Зетым гурт, Васильева Регина 6 кл., Пичи Пурга ёрос, Гожня гурт, Михайлова Ирина 6 кл., Пичи Пурга ёрос, Гожня гурт, Волкова Снежана 6 кл., Пичи пурга ёрос, Куреггурт, Петрова Маша 6 кл., Марий Эл, Карлыган черкогурт, Павлова Лариса 7 кл., Марий Эл, Карлыган черкогурт, Ахмадуллина Влас 7 кл., Башкирия, Татышлы ёрос, Улын Балтась гурт, Култышева Надя Селта ёрос, Выль Монья гурт, Кельмаков Андрей Селта ёрос, Выль Монья гурт, Керамикаен вырисьёслэн отрядзы Специалистэз А. Н. Степанов Ефремова Аля Татария, Кукмор ёрос, Вуж Юмья гурт, Спиридонова Алена Алнаш, Михайлова Наташа Алнаш ёрос, Кузебай гурт, Миронова Надя Балезино ёрос, Люк черкогурт, Корепанова Света Балезино ёрос, Воёгурт, Корепанова Оля Балезино ёрос, Воёгурт, Степанова Вера Ижевск город, Степанов Гриша Ижевск город, Вахрушева Валерия Як.-Бодья ёрос, Мукши гурт, Поздеева Марина Дэбес ёрос, Уйвай гурт, Тронина Катя Дэбес ёрос, Уйвай гурт, Красильникова Света Алнаш ёрос, Варзибаш гурт, Караваева Татьяна 8 кл., Селта ёрос, Сюромошур гурт. Тележурналистъёслэн отрядзы Специалистэз В. М.Сидоров Митрофанова Люба Вавож ёрос, Зямбай гурт, Калугина Света Селта ёрос, Выль Монья, Прусакова Наташа Можга ёрос, Чемошур-Уча гурт, Федорова Ирина Ижевск город, Сысоева Катя Игра ёрос, Исак гурт, Пименова Надя Пичи Пурга ёрос, Гожня гурт, Арасланова Света Селта ёрос, Гопгурт, Минлебаева Алена Башкирия, Татышлы ёрос, Улын Балтась гурт, Рязанцева Татьяна 10 кл. Алнаш ёрос, Азамат гурт, Нуриахметов Руслан Дэбес Кудрявцева Катя Алнаш ёрос, Варзибаш гурт, Литераторъёслэн отрядзы Специалистэз П. М. Захаров Устинова Ольга, Кибардин Юрий Алнаш ёрос, Варзи-Ятчи черкогурт, Максимова Татьяна Кез ёрос, Гыя гурт, Шихова Маша 7 кл., Вавож ёрос, Зямбай гурт, Мышкина Елена Ува ёрос, Михайлова Света 9 кл., Алнаш ёрос, Муважи гурт, Рыбакова Жанна Пичи Пурга ёрос, Куреггурт Коткова Елена Алнаш ёрос, Актэмыр гурт, Чернова Люда П. Пурга ёрос, Гожня гурт, Родионова Алена Вавож ёрос, Выль Бия гурт, Ишматов Николай Алнаш черкогурт, Галактионова Елена П. Пурга ёрос, Б. Уча гурт, Азьветлӥсьёслэн отрядзы Шапеева Надя 8 кл. Кияса ёрос, Дубровск гурт, Ильина Лена 9 кл Алнаш ёрос, Сырьез гурт, Новгородцев Павел 9 кл Алнаш черкогурт, Савельева Надя 10 кл Алнаш черкогурт, Протопопова Ольга 10 кл. Шаркан ёрос, Пислегово гурт, Игнатьева Оля 10 кл. Алнаш ёрос, Кузебай гурт, Камашев Сергей 10 кл. Кияса ёрос, Дубровск гурт, Лаврентьев Женя Алнаш ёрос, Кузебай гурт, Овсянникова Лена 9 кл. Алнаш ёрос, Кузебай гурт, Васильев Сергей П. Пурга ёрос, Улын Юри гурт, Дизайнеръёслэн отрядзы Специалистэз Л. А. Молчанова Гильманшина Оксана Як.-Бодья ёрос, Мукши гурт, Серегина Света Кизнер ёрос, Вуж Бодья гурт, Ермакова Оля 6 кл. Алнаш ёрос, Чем-Куюк гурт, Лекомцева Настя 8 кл. Кез ёрос, Юски гурт, Иванова Оксана 8 кл. Шаркан ёрос, Зюзино гурт, Чушъялова Настя 6 кл. П. Пурга ёрос, Яган-Докъя гурт, Зорина Надя 9 кл. Селта ёрос, Югдон посёлок, Феоктистова Оля Игра ёрос, Зянтемошур гурт, Щепина Оля 10 кл Глаз ёрос, Люм гурт, Бекчурина Ангелина 9 кл. Ува ёрос, Узей-Тукля гурт, Худякова Елена 8 кл. Кез ёрос, Юски гурт, Мазитова Ирина 7 кл. Каракулино ёрос, Ныргында гурт, Чиркова Ирина 10 кл. Як.-Бодья ёрос, Мукши гурт, Михайлова Таня П. Пурга, 2 номеро школа Суредасьёслэн отрядзы Специалистэз В. Н. Морозов Бабинцева Настя 13 арес Ижевск Петрова Алена Ижевск Иванова Надя 11 арес Шаркан ёрос, Сурон гурт, Коткова Лена 11 арес Алнаш ёрос, Вуж Утчан гурт, Загребина Ирина 12 арес Якшур-Бодья черкогурт, Бусыгина Оля 12 арес Алнаш ёрос, Вуж Утчан гурт, Михайлова Оля 12 арес Можга ёрос, Карашур гурт, Сидоров Женя 14 арес Сюмси ёрос, Лялино гурт, Иванов Владимир 14 арес Шаркан ёрос, Сурон школа, Соловьев Алеша 13 арес Алнаш черкогурт, Голубева Марина 13 арес Селта ёрос, Колесур школа, Вотинцева Таня Шаркан ёрос, Кыква гурт, Меньшикова Альбина Шаркан ёрос, Кыква гурт, Архитекторъёслэн отрядзы Специалистэз К. Ш. Галиханов Кузнецова Оля 9 кл. Грах ёрос, Безменшур гурт, Мартынова Наташа 10 кл. Можга ёрос, Б. Кибья гурт, Соколова Света 9 кл. Грах ёрос, Вылын Игра гурт, Долгов Женя 4 кл. Ижевск, Галиханов Анатолий 7 кл. Ижевск, Морозов Рома 6 кл. Ижевск, Перевозчикова Ваня 5 кл. Шаркан ёрос, Сурон школа, Кузнецова Оля 5 кл. Алнаш ёрос, Вуж Утчан гурт, Михайлов Павел 8 кл. П. Пурга ёрос, Ив.-Самарск школа, Поздеева Наташа 8 кл. Балезино ёрос, Эркешево гурт, Степанова Надя 8 кл. Алнаш ёрос, Колхозной посёлок, Ижевских Надя 7 кл. Алнаш ёрос, Тоймобаш гурт, Каракулов Ваня 6 кл. П. Пурга ёрос, Юськи гурт, Кудряшова Таня Ижевск, Театралъёслэн отрядзы Специалистэз В. С. Ушакова Петров Николай, Захарова Аня 9 кл. Завьялово ёрос, Лудорвай гурт, Малых Николай, Матвеева Дина, Москвина Оля 9 кл. П. Пурга ёрос, Б. -Бигра гурт, Черыгова Вероника 7 кл. П. Пурга ёрос, Кечол школа, Федорова Альбина 6 кл. П. Пурга ёрос, Байситово гурт, Осипов Николай 5 кл. Можга ёрос, Александрово школа, Андриянова Надя, Теплякова Катя, Васильев Леня 7 кл. П. Пурга ёрос, Вуж Монья гурт, Лопатин Рома, Гаврилов Саша 7 кл. Шаркан ёрос, Шаркан школа, Смена ортчоз 28-тӥ июньысен 8-тӥ июлёзь "Прометей" нылпи лагерьын (Як.-Бодья тракт кузя 35-тӥ километрын). Котькуд нылпи сьӧраз вайыны кулэ: Медицинской справка (СЭС-ысь прививкаос сярысь. Справка юнматэмын луыны кулэ педиатрен). Шуныт но спортэн вырыны, пыласькыны дӥськут, пинь миськон щётка, паста, майтал, шампунь, тапочки; Тетрадь, ручка. Одно кулэ луоз удмурт костюм. Суредасьёслы, архитекторъёслы, керамикая, дизайнъя отрядэ мынӥсь пиналъёслы сьӧразы басьтоно 250 манет, мукет отрядэ мынӥсь пиналъёслы - 200 манет. Тележурналистъёслы, луонлыксы ке вань, диктофон яке пичи ке но магнитофон ваёно. Фольклор но эстрада удысэ мынӥсь пиналъёслы - гитара, баян яке мукет крезьгуро инструмент (маин шудыны быгатӥськоды). Ижевске вуон понна вазиськоно ёросъёсысь егитъёсын ужанъя отделъёсы. Кин лыктыны уз быгаты "Шундыкар-99" лагерямы, соку ик ивортэ, интыды буш медаз кыльы шуыса. Юанъёсын вазиськыны быгатоды таӵе адресъя: 426051 Ижевск, Советской урам, 1 номеро юрт, УМОО "Шунды". Жингыртыны быгатоды таӵе телефонъя: 51-07-96. Шудзэ гуртысь шедьтӥз Завьял ёросысь "Подшиваловское" акционер огазеяськонын та нылкышноез котькудӥз тодэ. Кинлэсь гинэ эн юа - ваньзы ик со сярысь ӟечен но гажаса вазиськозы. Кылсярысь, кивалтӥсьсы М. В. Скоробогатов пусйиз: Т. В. Тетериналэсь адӟем карыны кулэ. Туж йӧно кышномурт. Кин бен со сыӵе? Татьяна Тетерина вордскиз Починок Садяковский нимо гуртын, Вылӥ Лудӟилы со кыдёкын ик ӧвӧл. Будӥз ӟуч семьяын. Школаын дышетскыкуз, туж тунсыкъяськиз удмурт кылэн. Нырысетӥ классын ик дышиз текстъёсты ӟучысь удмуртэ берыктыны. Нош 2-3 ар ортчыса воксё но ӟеч вераськыны кутскиз. Азьланяз ужаз но, семьяяз но Татьяна Викторовна удмуртъёс пӧлын вал. Школазэ йылпумъямез бере Татьяна кошкиз Ижевске. Ужаны интыяськиз фабрикае. Тыршиз ӟеч, котьку быдэсъяз аслэсьтыз нормаоссэ. Но кӧня ке улыса со валаз: городын улон солэн сюлэмезъя ӧвӧл. Ар ужаса, со толэзьлы шутэтскыны бертӥз вордскем гуртаз. Вылӥ Лудӟиын Татьянаез шӧдтэк шорысь пудо вордон удысысь бригадир М. А. Баталов синйылтӥз. Вераськемзы бере, Баталов быгатӥз Тетеринаез гуртэ кельтыны. Оскытӥз пудо вордон удысъя кыӵе ке специальностьлы дышетыны. Кӧня ке улыса Татьянаез лэзизы дышетскыны. Озьы со пудо уллёлэсь лыдзэ будэтонъя оператор луыса потӥз. Ужаны кутӥзы Вылӥ Лудӟиысь фермае. Со дырысен 22 ар ортчиз ни. Татын тыршонъяз Тетерина одӥг ужез гинэ ӧз быдэсъя: скал кыскись но, кунян сюдӥсь но вал. Котьку но сюлмысьтыз ужаз. Солэн тыршемезъя 100 скаллэсь 96 кунян басьтӥзы. Со трос лыдпус ни. Татьяна Викторовна умоен лыдъя пудо вордон удысын ужасьёс куспын ӵошатскон радъянэз. Кылем арын операторъёс пӧлын ӵошатсконын со вормисе потӥз. Нош республикаысь конкурсын со куать золъёсыз пӧлы шедиз. Т. В. Тетерина паймыса ик вераз, ӵошатсконэ пыриськемъёс ваньмыз ик, пе, вылӥ образованиен ужасьёс вал. Таӵе ӵошатсконъёс туж юртто милемлы, шуэ Татьяна Тетерина. Кышномурт огназ уг ужа. Солэн юрттӥсьёсыз луо валтӥсь зоотехник З. В. Леонтьева, ветеринар Л. П. Байкузина, пудо вордонъя бригадир Г. М. Медведева но мукет специалистъёс. Татьяна Викторовна усто кузпал но шунытэз утись анай. Тетерина, кузпалъёс ныл но пи будэто. Пизы дышетске сварщиклы, нош нылзы 10-тӥ классын. Кузпалыз Петр Петрович но фермаын ик ужа. Т. В. Тетерина сӥё-дано ужась, ёрослэн зэмос данъяськымон адямиез. Н. ИВАНОВ. Юалэ - валэктом Кудӟыса эн ворттылы Картме ГАИ-ын ужасьёс тракторен кутӥзы. Солэн правоез ӧвӧл, вылаз ик кудӟемез вылэм. Сое косо 850 манет штраф тырыны. Гуртын улӥсь понна со туж ук трос. Оло, мултэссэ куро милесьтым? Данилова, Якшур-Бодья районысь Сюровай гурт. Валэктон сётэ МВД-лэн сюрес вылын мынон-ветлонэз эскерись полкысьтыз административной ужпумъёсъя инспектор милициысь лейтенант Георгий Востров: - Мултэссэ уг куро, Данилова эш. Кызьы гожтэмын РСФСР-лэн административной правонарушениосъя Кодексэзлэн 120-тӥ статьяяз, кудӟыса но правотэк транспортэн ветлэм понна штраф чакламын 10-15 ичиез уждун мында. Озьыен, тӥляд кузпалдылы самой пичизэ штраф сётӥллям. Штрафез тыроно со сярысь решениен тодматскем бере 15 нунал куспын. Дыраз со тыремын ӧз ке луы, югдурез эскероз районысь суд. Со сярысь гожтэмын вылӥ верам Кодекслэн 285-тӥ статьяяз. Ӝоген - гурт шудонъёс Завьяловоын улӥсьёс та вакытэ элькунысьтымы гурт спортсменъёслэн гужем шудонъёссылы дасясько. Туэ соос отын ортчозы. Ӵошатсконъёсы шедён понна нюръяськонъёс кутскизы ни. Алигес Первомайской посёлоке ёросысь школаосын дышетскисьёс но гурт администрациослэн улосвылъёсысьтызы егитъёс капчи атлетикая ӵошатсконъёсы люкаськылӥзы. Нюръяськонлэн программаез узыр вал: кузьдалае тэтчан, вакчи (100 метр), шоро-куспо (400 метр) но кузь (нылъёслэн 800 метр но пиослэн 3000 метр) сюрес вылын бызьылон, 4һ00 метре эстафетаен ӵошатскон. Дышетскисьёс пӧлын нырысетӥ интыез утӥзы Первомайской школаын дышетскисьёс, кыкетӥ интые потӥзы Завьялово школа-колледжысь пиналъёс, куинетӥ луизы Италмасысь пинал спортсменъёс. Дышетскисьёс бере нюръяськонэз азьланьтӥзы егитъёс. Нырысетӥ луизы Завьяловоысь капчи атлетикаен эшъяськисьёс. Кыкетӥ интыын - Италмас посёлокын улӥсьёс. Куинетӥ интые кылизы Пироговоысь спортсменъёс. Нимаз (личной) зачётын асьсэлэн быгатонлыкенызы шумпоттӥзы спортъя Первомайской школаысь (тренерзы Владислав Осинцев) нылъёс. Дасэтӥ классын дышетскись Вероника Русских районлэн куинь пол чемпионэз луиз: 400 метре бызьылонын, кузьдалае тэтчанын но эстафетаын. Наташа Новикова 800 метре бызьылонын нырысетӥ интые потӥз. Вероникалэн эшъёсыз Алёна Хисматуллина, Олеся Глазырина но Надежда Лукина эстафетаын но вормизы. Соослэн кужмо нюръяськемзы ик Первомайской школаын дышетскисьёслы азьпала потыны юрттӥз. Шор Постол школаысь 13 аресъем пияш Костя Васильев бадӟым пиналъёслэн дистанциязы - 3000 метре - бызьылӥз но нырысетӥ луиз. Сыӵе дистанциын ик пиосъёс пӧлын Костялэн гуртысьтыз Василий Малых но нырысетӥ интыез утӥз. Арлыдоосызгес ӵошатскисьёс пӧлын эстафетаын нырысь луизы Якшурысь пиосъёс. Нылкышноослэн но пиосъёслэн огазеям командаоссы куспын эстафетаын азьпала потӥзы завьяловоос. Гуртысь спортсменъёслэн гужем шудонъёссы кутскытозь, кема дыр ӧз кыльы ни. Малпаськом, ёросысь спортэз яратӥсьёс туэ но отын бадӟымесь вормонъёс басьтозы шуыса. Н. ИВАНОВ. "02" ивортэ "Погранецъёс" эсэпсэ чаклазы Май толэзьлэн берпуметӥ шутэтскон нуналъёсаз республикаямы 161 пол законэз тӥян учыръёс вал - 140-эз со пӧлысь шараямын. Порядокез утисьёс витё вал, пятницае трос укылтэмъяськон, жугиськонъёс потозы шуыса. Соин ик соослэн радъёссы ульчаосын но мукет калыко интыосын йылэтэмын вал. 28 мае угось асьсэлэсь нуналзэс пусйизы азьвыл пограничникъёс. Но, кызьы шуо сыӵе дыръя, инмар утиз, лэся. Вож фуражкаен "батыръёс" номыр но пусйымонзэ ӧз дауртэ. Юыны юизы ик, ваньзэ ӧвӧл уд шуы. Соос чотын ик, луоз, сазьтӥськонниосын куноямъёслэн лыдзы чутрак будӥз - 476 адями. Та нуналлэн мукетыз тодметэз - рынокъёсын тыро-пыдо ӧй вал вузкарисьёс, уката но сьӧд тусоосызгес. Зэм но, малы юнме исалод дуринчиез. Но огъя югдур ушъямон ӧй вал, законэз гажасьтэм адямиос котьку сямен тырмыт вал. Ижевск вӧзысь Пазелы гурт дорысен ӝегатэмын 35 аресъем Вячеслав У., 50 аресъем Владимир Ш. но 40 аресъем Алексей П. пӧръям документъёсын вузкаремзы понна. Соослэсь шедьтэмын пӧртэм организациослэн печатьёссылы 6 клише, эстӥськонлы 300 чекъёс, 2 сюрслэсь уно гожъямтэ счёт-фактураос, гостиницаослэн но автостоянкаослэн счётъёссы, пӧртэм накладнойёс но кассае коньдон тырем сярысь ордеръёс. Ваньзэ та "ваньбурез" пыр-поч эскеро ОБЭП-ын экономикаын йыруж лэсьтӥсьёслы пумит ужасьёс. Французъёслэн верамзыя, котькуд ваче пумит вуоноысь утчано, пе, нылкышнолэсь пытьызэ. Игра районысь Зура черкогуртысь С. Валентинлэн но Ч. Александрен ӵош юонзы вуттӥз вожаса керетонэ. Валентин эшсэ пуртэн бышкалтэ но, соиз больницаысен кулэ. Йыртэмамез бере 45 минут ортчыса кырмемын Ижевскын улӥсь 18 аресъем Константин К. Со 15 аресъем пияшлэсь кышкатыса талам 500 манет сылӥсь зарни жильызэ. Ӵапак озьы ик кутэмын Воткинскысь 22 аресъем Николай Е., азьвыл судить карем маке. Таиз шӧртчи пияш нылкышнолэсь 200 манетэн сумказэ киысьтыз ишкалтэм. Сергей Б. но Владимир У. ӝегатэмын гараже липетсэ сэрттыса пыремзы но отысь 650 манет тыр автомашиналы воштос ёзэтъёс поттэмзы понна. Шӧдске, ӧжытгес ик визь сёто пиналъёслы Ижевскысь 73 номеро школаын. Татысь 9 классын дышетскись Руфат С. одӥгысьтыз кабинетысь 3400 манет лушкам. Пинал йыртэмасьлы ӵогам ӧс но люкетымтэ. Будӥсь муртлэн сием потэ. Оло, соин, лэся, 17 номеро столовойысь сиён-юон лушкаллям 17 аресъем Николай Б., 15 аресъем Кирилл Т. но 13 аресъем Сергей Т. Куиньназы йыртэмасьёс ӝегатэмын. Гужем вуэмъя, киоссы лыдыны кутско вашкала чиганъёслэсь удыссэс азьланьтӥсьёслэн. Завьялово районысь Ӟуч Вожой фермаысь возьмаськисез жугыса нуэмын 2 вал. Одӥгез "кавалерист", та гуртын ик улӥсь Дмитрий П. кутэмын. Солэсь эшъёссэ утчало. Кык часэ уин Ижевскысь Степан Разин нимо ульчаысен автопатрулен кырмемын мурт квартираосты сузясьёс. Куинез соос пӧлысь тодмо ини пытсэтэн. Лушкам ваньбурзы таламын. Сарапулын Азин нимо ульчаысен йыртэмасьёс урдскиллям сад-бакча возись кооперативысь кассир, 60 аресъем Анна Б. но солэн 69 аресъем сюресчиез вылэ. Мӧйыосты йыразы тӥрен шуккыса, 2 сюрс манет коньдонзэс таланы туртто вылэм. Ярам коть, дыраз вуэм милиционеръёс кырмизы кӧня ке пол судить карем Ч. Александрез но Б. Анналэн ик кооперативысьтыз возьмаськись 23 аресъем П. Александрез. УР-ысь МВД-лэн ивортонэзъя гожтӥз Г. Тихонов. Пумен куашкало Ижевскысь улон юртъёс пӧлысь тросэз кулэ каро ни йыг-йыг тупатъямез. Городысь улон юртъёсты возёнъя управлениын ужасьёслэн верамзыя, солэн мугез кык . Нырысь ик, улон коркаос пӧлысь уноез пуктэмын 50-тӥ - 80-тӥ аръёсы. Соку уго асьме дорын улон юртъёсты тросэн лэсьтылӥзы. Кыӵе ке праздниклы коркаез быдэстыны тыршон ас бервылъёссэ кельтылӥз. Сыӵе дыртонъёсын сэрен улон интылэн ӟечлыкез улӥын вал. Собере коркаосты ӟеч тупатъяны кулэез сярысь ӧжыт коньдон висъяськылӥз. Ар но ӝыны талэсь азьвыл корка кузёослэсь юртлэн огъя кутӥськись интыосыз понна коньдон басьтыны кутскизы. ГЖУ-ын ужасьёслэн верамзыя, со туж ӧжыт. Калыклэсь бичам уксё туэ люкаськыны кулэ 22 миллион манет. Планъя озьы луыны кулэ, нош луоз солэсь ичи, малы ке шуоно, квартира понна дыраз коньдон тырыны тросэз уг быгаты. Бюджет сётоз на 30 миллион манет. Нош улон юртъёсты ӟеч-ӟеч тупатъян понна кулэ 400,5 миллион манетлэсь трос. Та лыдпус но кык ар талэсь азьло лыдъямын-чотамын вал. Иворъёсъя национальной служба. Пушкинлы памятник дорын Котькуд кылбурчи понна Александр Пушкин вылӥ югдытӥсь луэ. Удмурт гожъясьёсмы пӧлысь но кин меда ӧз утча солэсь кылбурзэ яке прозазэ берыктыса. Семен Перевощиков ке Пушкинлэсь чуръёссэ гожмано но луиз. Шонергес вераса, "Советской Удмуртия" газетын ужакуз, со редактор пероеныз тупатъяз Игнатий Гавриловлэсь "Полтава" поэмаез берыктэмзэ. Нош ачиз Семен Андреевич, радио куремъя, кырӟанлы шуыса удмурт кылэ берыктӥз А. Пушкинлэсь "Пытсэтын пукись" ("Узник") кылбурзэ. Семен Перевощиковлэн нимыз историе пыриз, Москва городлы 850 ар тырмемен валче но. Та юбилейлы шуыса, нимысьтыз дасям сборникын печатламын солэн "Евгений Онегин" романысь Москва сярысь люкетсэ берыктэмез. Нош тазэ кылбурзэ Семен Андреевич гожтэм али гинэ, 48 ар талэсь азьло туспуктэмез учкыса. Удмурт пединститут (али УдГУ-лэн кыкетӥ корпусэз) азьын соку вылэм А. Пушкинлы памятник. 1951-тӥ арын со дорын кылъя но литературая факультетысь студент Семен Перевощиков (паллянысез) пуксем эшъёсыныз - историяя факультетын дышетскисьёсын Валентин Бабайловен но Анатолий Крапивинэн. Т. Николаева. Семен Перевощиков Шунды ӧтиз Поэт доры Кыре ӧтиз тулыс шунды, Валай: адӟиськемез потэ. Шуныт азьын гурла дыдык, Кыр ӟольгыри кырӟа-эктэ. Студентъёслэн ӧвӧл, эке, Шулан, кырӟан, берган дырзы: Мырдэм гинэ на возиське Пельпум вылын визьмо йырзы. Экзаменъёс бере - ура! Ӝог капчия мылкыд, мугор. Бигер нылэз кышно кура Суд йырсиё финно-угор. Эшъёс но, шудоос но, дыр, Институтлэн пото сквераз. "Ӟеч, тодмотэм но егит дыр!" - Юн куараен кин ке вераз. Дугдӥм ми памятник доры, Поэт кизэ выллань ӝутэм. Бурдъясь кылъёс быдэс дуры Юри кадь ми понна гожтэм. Кытысь шуак потӥз дӥсьтон? Утыр ни пыд азяз вуим. О, Александр Сергеич, тон Быдӟым инмар но херувим. ...Асьме куспын ни - кык даур, Вань ортчемез, шуо, быре, Лулын-сюлмын вордскем кылчур Уз кыс, ваёз тонэ буре. Куартолэзь, 1999 ар. Дас нуналскын Можга ёросысь "Красный Октябрь" эштос валэс юосты кизёнзэ туэ дас нуналскын йылпумъяз, соку ик басьтӥськиз кукуруза но мукет силос культураосты кизён борды. Но гурт калыклэн бусы ужъёсыз озьы гинэ уг йылпумъясько. Собере кутске картофка но бакча сиёнъёсты мерттон но утялтон. Тулыс кизён вакытэ азьмынӥсьёслы уксё премиос сётъяны чакламын вал, соин но адямиос ӵошатскыса ужало. Синмаськымон тыршо та кысык вакытэ Н. А. Чукарев, И. С. Тетерев, М. П. Зайцев, И. К. Тетерев, А. С. Зайцев но мукетъёсыз. Ассэ умоен возьматӥз егит тракторист Олег Плицев, кизёнэ со туэ нырысьсэ пыриське. П. Николаев. Дэмен ужаны капчи Озьы шуиз дышетскисьёслы военно-патриотической мылкыд пыӵатон удысын ужамзы сярысь вераськон поттэммы бере Ижысь Ленин ёросысь ожысь ветеранъёслэн секцизылэн кивалтӥсез М. Г. Ишметов. Зэм но, кин юрттӥз школаосысь ожмаськонлы сӥзем 9 музейлэсь ужзэ умой радъяны? Бен, ёросысь фронтовикъёслэн нимысьтыз кылдытэм комиссизы. Со нырысь дышетӥз следопытъёсты музей экспонатъёсты узырмытыны, экскурсиос ортчытъяны. Школаосын табере туж пайдаё ужрадъёс ортчыло. Озьы ёросысь музейёслэн тыршемзы алигес пусъемын элькунысьтымы Ожысь ветеранъёслэн комитетэныз но Калыкез дышетонъя министрствоен. Нош 51-тӥ школаысь Советской Союзлэн Героезлэн В. М. Михайловлэн батыр ужъёсызлы сӥзем музеез Москваын но ушъязы, отысь дуно кузьым ыстӥзы, коньдон но висъязы. Ёросысь следопытъёслы дэмен юрттыны быгатӥсь комиссие пыро ожын данэ потэм, музейёслэн ужзэс умой тодӥсь адямиос. Пиналъёслы визьмо амалъёс пыӵатыны быгатэ ожысь ветеран, историлы дышетӥсь Ильяс Мавлетдинов. Дышетскисьёсын ужан опытсы бадӟым та комиссиысь ик С. З. Гафуровлэн, И. И. Кононовлэн, З. Х. Файзулинлэн. Соослэн юрттэменызы, сюлмо ужаменызы та ёросысь школаосысь музейёс, Ижын гинэ ӧвӧл, элькунамы но устооосыз пӧлы пыро. Алигес ожысь ветеранъёслэн комитетсы И. Мавлетдиновлэн комиссиеныз тодматскиз. Пӧртэм-пӧртэм кулэ ужрадъёс ортчытъяло Ленин ёросысь школа музейёсын. Тани берло гинэ татын ожысь ветеранъёслэн, ужась егитъёслэн но дышетскись пиналъёслэн ӵош кенешонъёссы вал. "Вуылом шаерамы вордскемъёслэн война вакытэ ожмаськем интыосазы" - тазьы нимаськиз дышетскисьёслэн шудон экскурсизы. Муса Джалиль нимо музейысь следопытъёслэн но Азин нимо ульчаысь ветеранъёслэн ӵектэмзыя, тодэ ваён аллея кылдытэмын. Музейын тыршисьёс, ветеранъёслы сӥзьыса, 12 кинофильм кылдытӥзы. Ма юрттэ таӵе пайдаё ужрадъёс ортчытъяны? Нырысь ик, музейысь кивалтӥсьёсын ёросын дышетскон радъямын. Музейын ужан амалъёсын тодматскыны соос 14 номеро школае люкаськыло. Татын 40 ар ини Удмуртиысь комсомол нимо фронтын бадӟым сюресэз ортчем артиллерийской дивизионлэн музеез ужа. Фронтовикъёслэн слётъёссы гинэ 16 пол ортчылӥзы ини. Следопытъёс дивизионлэн ожмаськем интыосаз но вуылӥзы, отысь дуно документъёс ваизы. Табере соосты урокъёсын возьматъяло, вань пиналъёслы лыдӟыло. Ожысь ветеранъёслэн музейёслы юрттонъя комиссизы эскеронъёс но ортчытъя. Конкурсын вормисе потылӥзы ни батырлы-поэтлы Муса Джалильлы, 313-тӥ стрелковой дивизилы, удмурт писательёсмылы но поэтъёсмылы сӥзем музейёс. Вераны кулэ, удмурт писательёсмылы но кылбурчиосмылы сӥзем музее мукет ёросъёсысь но дышетскисьёс вуыло. Тани Вормон нунал азьын соос тодматскизы Михаил Петровлэн, Михаил Ляминлэн, Тимофей Шмаковлэн фронтын ортчем сюресэнызы, соослэн война сярысь гожъямъёсынызы. Татын удмурт книгаослы сӥзем нимаз пумиськонъёс но ортчыло. Али но музейын тодазы ваё на Герман Ходыревлэсь вуылэмзэ. Валамон, музейын ортчылӥсь ужрадъёс дышетскисьёслы юртто удмурт писательёсмы сярысь тросгес но умойгес тодыны. Музейысь ужасьёслэн таӵе ӵектонзы вань. Гуртысь дышетскисьёс но 20 номеро школае ӵемгес мед вуысалзы вылэм. Зэм, Якшур-Бодья, Пичи Пурга, Завьялово ёросъёсысь дышетӥсьёслэн кивалтэмзы улсын пиналъёс Иже вуылыны быгатысалзы. Музейысь экспонатъёс пичи ке но юрттысалзы удмурт литератураен тодматскыны. В. Никитин, Элькунысьтымы ожысь ветеранъёслэн комитетсылэн тӧроезлэн воштӥсез. Сюресъёсты выльдо Берло аръёсы бюджетэ коньдон ичигес вуэмен, Ижевскысь сюресъёсты тупатъян-выльдон уж секытэн сётске. Но "Дормострой" кун предприятилы (директорез Александр Иванович Головко) туэ 13 миллион манет висъязы. Куазь тупатскем бере, предприятие сюресъёсты тупатъян борды гижысь-пиньысь басьтӥськиз (туспуктэм вылын адӟиське Ленин урамысь Карлутка шурлэн нюк ваментӥз ортчись сюресэз тупатъян). Отделлэн начальникез Наталья Петровна Леонтьева вера: - Туэ вуиз кужмо техника. Со вуж сюресэз ваменак вандыса басьтэ быгатэ но тупатъян уж данаклы ӝогоме. Озьы али ужъёс радъямын Воровской урамын. Милям коллективмы ужез яратэ, специалистъёсмы устоесь, но ми ум быгатӥське государстволы вань налогъёсмес дыраз тырыны. Бюджетысь коньдон тросэнгес висъясалзы ке, ужъёсмес ӝог но ӟеч быдэсъясалмы. Котьма ке но, сюресъёсты тупатъян борды басьтӥськем но возьматэ ни: улонмы каллен- каллен ке но, ӟечез пала пумен азинскыны кутскиз. П. СКОБЕЛЕВ. Туспуктэмез В.Камашевлэн. Тау ваньзылы Мынам мамае, Як-Бодья ёросысь Выжоил гуртысь Мария Исаковна Кузнецова, кузь но туж секыт сюресэз ортчиз. Вить арескысеныз кылем маматэк-тятэк. Сютэм ветлэм. Ярам коть, одӥгаз семьяе пыртӥллям сое. Чебер веськыт будэм. Узыр муртлы бызем. Тыр уло вылэм ни. Но шимес аръёсы, чик юнме шорысь кулак карыса, мамаме номыртэк кельто. Татӥяз кутскиз война, картэз Яко быриз ожъёсын. Милемды, уен-нуналэн колхозын буш трудоденен ужаса, пот нянен но маин будэтӥз. Тятяе интыын но ялан визьмалляз со монэ. Берлось аръёссэ бордам вози ини. Садамы-бакчаямы но кыштыр гинэ ужаз, юрттӥз. Алигес, 91-тӥ араз мыныкуз, мамае кулӥз. Будэтэм нылпиосыз ваньмыз Москваысь но, Тулаысь но, Ижысь но йыбырттыны бертылӥзы. Выжоилысь калыклы, ӵыжы-выжыосылы, тодмоосылы, сюлмысьтым тау карисько, огшоры нылкышноез туж данъяса, сӥлы ватэмзы понна. Маргарита Ардашева, Ижкарын улӥсь. БУСКЕЛЬЁСМЫ ДОРЫН Телефон - куректон Башкортостан Республикаысь городъёсы но гуртъёсы телефон пыртон мынэ. "Башинформ" агентстволэн пусъемезъя, 1992-тӥ арын республикаысь связья управление акциосын огазеяськонлы пӧрмытозь, 100 семья пӧлысь 26,5-яз телефон пыртэмын вал. 1998-тӥ арын та лыдпус будӥз 41,4-озь. Городъёсысь 100 семья пӧлысь телефонзы вань 53-яз, нош гуртъёсын - 20,5-яз гинэ. "Башинформсвязь" огазеяськонын жаляса верало, республикаысь 192 сюрс адями телефон пуктыны куре шуыса, соос пӧлын 65 сюрсэз - Уфаын улӥсьёс. Огазеяськонлэн кивалтӥсьёсыз лыдъяло, связьын юрттэт сётонэз паськытатон но ӟечгес карон вылысь тарифъёсты ӝутоно луоз шуыса. Калык туннэ телефон понна дунлэсь 65 процентсэ гинэ тыре. Нош сое пуктонлы асдунызлэсь куинь поллы ичигес уксё басьтӥське. Кунлы берыктэмын Якутиысь шедьтэм алмазъёс но соослэсь лэсьтэм арбериос куинь миллион доллар тыр берыктэмын кунлы, ивортэ "Башинформ" агентство. Таӵе луиз Россиысь МВД-лэн следственной комитетэзлэн но Башкириысь нимысьтыз ужъёсъя отделлэн ӵош ужамзылэн емышез. Москваысь арбитражной судлэн решениеныз ӝегатэм алмазъёс пумысен ужлы пум понэмын. Москваысь арбитражной суд алмазъёс но кредитъёс сярысь кутэм огкылэз умойтэмен лыдъяз. Огкылэз кутӥсьёслэн дуно изъёсын ужаны лэзись документсы ӧвӧлэн, кутӥськись законодательстволэн куд-ог ёзъёсыз тӥямын вал. Кунлы берыктэмын 895,11 карат кыскись 6153 алмазъёс. Якутиысь алмазъёс ӝоген Россилэн Гохраназ келямын луозы. Иворъёсъя национальной служба. Трос адями быриз Валлян Белоруссиын ялэмын вал шудтэм учырын быремъёсын люкиськон нунал. 30-тӥ мае 53 адями кулӥз Минскысь метролэн "Немига" станцияз музъем ултӥ потонын. Школаосын экзаменъёс кулэмъёсты буре ваёнысен кутскизы. Со школаосын, кытын дышетскисьёс бырыны шедизы, экзаменъёс воксё воштэмын вал. Сильтӧл асьме дорын гинэ ӧвӧл Арнялэн кутсконаз бадӟым сильтӧл зорен но гудыриен ӵош Нижегород, Иваново, Владимир но Рязань областьёстӥ ортчиз. Соин сэрен Нижний Новгородын кык адями быриз, 7-ез сӧсырмемын. МЧС-ын ужасьёс тупатъян но октон-калтон ужъёсы пырисько. Тӧлпери ӟеч радъяськем экономикаен кунъёсты но адӟытэк уг кельты вылэм. Со сярысь вера Париж вадьсытӥ ортчем сильтӧл. Соку 3 адями быриз, 11-ез секыт сӧсырмизы. Куинь сюрс корка кылиз электротылтэк. Парижлэн мэрез Жан Тибери кун властьёслы вазиськиз. инкуазьлэн шукыръяськеменыз валче городэз кышкытлыклэсь утиськонъя интыен лыдъяны курыса. Со сюлмаське, ваньмыз шуге-леке шедемъёс коньдонэн юрттэт мед басьтозы шуыса. Иворъёсъя национальной служба. Котьма сярысь Амал шедьто Банкъёсты оген муртъёс уг лушкало, компьютер технологиосты кутыса, сыӵе йыружъёс лэсьтӥсько ӟеч-ӟеч дасяськем адямиосын. Со сярысь журналистъёслы ивортӥз Москваысь ГУВД-лэн следствиосъя управлениезлэн кивалтӥсез Андрей Степанцев. Солэн верамезъя, хакеръёс кылем арын компьютерен утиськись 15 коммерческой банклы 6,3 миллиард манет тыр изъян лэсьтӥзы. Степанцев озьы ик пусйиз: куд-ог дыръя "куашкась" банкъёс уксёзэс кунсьӧры интыяськем компаниослэн счётъёсазы выжто но сое хакеръёс вылэ погыльто. Вакчи дыр куспын ӝутэмын Москваысь Христос Спасительлэсь храмзэ дуннеысь культура удысын бадӟым инты басьтӥсь памятникъёс пӧлы пыртыны ЮНЕСКО ӧз на чакла. Со сярысь ЮНЕСКО-лэн генеральной директорез Федерико Майор вераз столицае ветлыкуз. Озьы ке но, Федерико Майор паймемзэ но вераз: ньыль ар куспын Москваысь кивалтӥсьёс быгатӥллям бассейн интые чебер храм ӝутыны. Иворъёсъя национальной служба. Алнашлы - 70 Ёрос кылдэм дырысен 70 ар тырмонэз вань алнашъёс пусйыны дасясько. Солы сӥземын луоз егитъёс пӧлын ортчытоно КВН. Радъяськоз со 2 турен: интыосын но Алнашын, коть кудаз пыриськоз 14-30 аресъем адями, ваньмыз 10 мурт. Егитъёс возьматъяны кулэ ёроссылэсь историзэ, басьтэм вормонъёссэс но азьланезлы осконзэс. Гондырлэсь кужмо Макар Кизнер ёросысь удмурт но ӟуч Кусо, Гозношур гуртъёс котырын потаны луонтэм пеймыт тэлё вал, али тросэз корамын ни. Татын уло вал гондыръёс, нардӥос, койыкъёс но мукет пӧйшуръёс. Та палъёсын улӥсь калык яратылӥз, нюлэсканы, мушканы. Одӥг таӵе учырез тодам ваисько. Гуртамы улэ вал таза мугоро воргорон - Макар агай. Со туж яратылӥз нюлэсканы. Одӥг пол Макар агай тэле потэм, пужыме ӝуткам муш умортооссэ чакланы. Одӥгаз умортоысьтысь синйылтэм пырась-потась мушъёсты. Отчы тубыны кариськем, эскерем, нош пужымысь васькыкуз адӟем - писпу выжыын гондыр, пе, сылэ. Васькем но гондыр соку ик дораз ымзэ усьтыса лыктыны кутскем. Кема малпаськытэк паллян кизэ пӧйшурлэн ымаз гульым выжыозяз ик донгем.Гондыр суйзэ сыскыны турттэ вылэм, но пыдло донгем суйыз люкетэм сьӧсьлэсь урод ужзэ лэсьтыны. Озьы выронъязы кыксы ик пограллям, нош Макар агай кизэ гондыр ымысь уг, пе, потты. Со куспын бур киыныз пуртсэ поттэм но гондырлэн кӧт урдсаз бышкалтэм. Озьы вырыса- вырыса Макар агай гондырез вормем. Суйаз гондырлэн пинь бервылыз кылемын ик вал, гуртамы ваньмыз гондыр Макар агай шуозы вал, та ним солы вань улытозяз ик кылиз. В. ЛЕБЕДЕВ. Иж карын улӥсь. Абитуриент-99 Визьмыд ке вань, коньдон кулэ уз луы Россия Федерацилэн Юстицияя министерствоез лыдэ басьтӥз Россия Федерациысь огъя но профессиональной дышетонъя министрлэсь В. М. Филипповлэсь вузъёсы пыронъя тупатэм радлыке воштонъёс но ватсанъёс пыртон сярысь приказзэ. Мар вылез бен возьма туала абитуриентъёсты? Дышетскыны пырисьёслы огкадь луонлыкъёс кылдытон но регионъёслэсь кадръёсты дасянъя куронъёссэс быдэстон вылысь, котькуд вузын нимысьтыз возёно кӧня ке дунтэк дышетскон интыос. Со понна коньдон висъяськыны кулэ федеральной бюджетысь. Азьвыл СССР-е пырись республикаосын улӥсьёс озьы ик быгато Россиысь вузъёслэн бюджетэн чаклам интыосазы кутӥськыны. Со понна вузлэн приёмной комиссиез документъёс кутэмлэсь азьло ик чакланы кулэ кӧня дунтэк дышетскон инты висъяськоз палэнысь адямиослы но кыӵе дыр куспын басьтоно соослэсь документъёссэс. Вузъёсын асьсэос быръё кыӵе предметъёсъя экзаменъёс тупатоно. Но быръёно таӵе предметъёс пӧлысь: ӟуч кыл, литература, математика, физика, химия, биология, география, Россилэн историез, обществоведение, кунсьӧр кылъёс. Уг яра экзаменъёс тупатыны обществоведенилэн нимаз люкетъёсызъя. Нырысетӥ курсэ пырисьёслэсь тодон-валанзэс эскероно Россиысь дышетонъя министерствоен учкем программаосъя гинэ (искусствоя но физической культурая факультетъёсты вератэк). Абитуриентлы луонлык сётӥське мылкыд каремезъя вылӥ верам предметъёс пӧлысь одӥгзэ информатикая предметэн воштыны. Министрлэн приказаз нимысьтыз пусъемын бюджет чотын висъям интыосы тужгес но визьмо егитъёсты кутыны тыршон сярысь. Сыӵе факультетъёсын, кытын тужгес но бадӟым конкурс, собеседование амаллэсь куштӥськоно. Экзамен сётэмен лыдъяны ӧвӧл лэземын пӧртэм курсъёсын дунэн дышетскыса (школаосын, вузъёсын) басьтэм отметкаосты. Озьы ик выль куронъёс пуктэмын "Школа-вуз" амалъя дышетскисьёс азе, кинъёслэн школаын сётэм кун экзамензы огдыре ик вузэ сётэм экзаменэн лыдъяськылӥз. Табере соослэн аттестатазы пуктэм кун отметкаослэн вузэ пырон кужымзы луэ соку гинэ, ку "школа-вуз" амалъя дышетон мумы-бубыослэсь коньдонзэс басьтытэк гинэ радъямын ке вал. Экзаменъёс сётытэк вузэ кутӥсько: Россия Федерацилэн огъя командаысьтыз адямиос; калык куспо олимпиадаослэн (математикая, физикая, химияя, биологияя, географияя, информатикая) вормисьёссы. Ас учкемезъя экзаменъёстэк кутыны быгатэ вуз озьы ик Россиын ортчем олимпиадаосын вормисе потэмъёсты. Туала абитуриентъёсты возьма на таӵе "шумпотон": "кык" басьтэм мурт уг быгаты та вузэ ик мукет потокен выльысь экзаменъёсы пыриськыны. Вань абитуриентъёсын огкадь экзаменъёс сёто сирота но мумы-бубыосынызы аналтэм нылпиос, И но ИИ группае пыртэм инвалидъёс. Экзаменъёс ӟеч сётэмзы бере, та нылпиос вузэ конкурстэк кутӥсько. Дасяз Т. БАННИКОВА. Басьтэмын "Российской газетысь." 1999 ар, 7 май. Серем пыр Висись врачлы вазиське: - Доктор, берло дыре вӧтъёсам футболэн шудӥсь комакъёсты адӟисько. - Туннэ изьыны выдон азяд тани та эмъюмез юы. - Ӵуказе юи ке уз яра-а? Туннэ комакъёслэн финальной пумиськонзы луэ. Шудэмзэс пумозяз адӟоно вал. х х х Сара, комнатаысь комнатае ветлыса, картсэ утча. - Абрам, Абрам, кытын тон? Собере балконэ потыса учке. Нош бускельзылэн балконаз одӥг нылкышно шунды бамын мугорзэ пыже. - Абрам тон дорын ӧвӧл-а? - юа Сара. - Малы мон дорын луоз со,- паймыса кадь вера бускель кышномурт. - Шайтан басьтон сифилитик, кытчы бен кошкиз меда со? "Сифилитик" кылэз кылэмез бере, бускель кышномуртлэн йырсиосыз ик пештырско, мар карыны уг тоды. Со дыре балконын лазьырмем Абрамлэн йырыз адске. - Онгро, кӧня пол верай ини тыныд, мон сифилитик ӧвӧл, филателист мон. х х х Воргоронэз котыр ласянь эскерыса, доктор вазиське солэн кышноезлы: - Асьме куспын вераса, картты мыным малы ке уг кельшы. - Мыным но, доктор. Но нылпиосмы сое юн ярато. х х х Чапаев военной академие пырон понна экзаменъёс сётыса бертэ. - Василий Иваныч, ваньзэ сётыны быгатӥды-а? - Ӧй, ваньзэ ӧй сёты, Петька. Вирме сётӥ, кизьме сётӥ, нош математикаез сётыны ӧй быгаты. х х х Гордъёс но тӧдьыос артэ гуртъёсы интыяськиллям. Тӧдьыос дортӥ кыткем вал ортче. Уробояз крестьян ныл пуке. Тӧдьыос соосты дугдыто. Ныл бускель гуртэ мынӥсько шуыса валэктэ. Сое лэзё. Кыткем вал гордъёслэн штабзы доры дугдэ. Пумитаны Фурманов потэ, крестьян нылэз ӟыгыртыса басьтэ. - Ну, Петька, усто но ини тон, быгатӥд тӧдьыосты алданы! - Мон мар,- шуэ Петька, вал шоры возьматыса,- тӥ ӝоггес Василий Иванычез юске. х х х - Ӧз кутэ монэ университетэ, Василий Иваныч, историен экзамен сётыны ӧй быгаты. Кин со Цезарь шуэмзы бере, мон кема малпаськыса ӧй улы, милям витетӥ эскадронысьтымы ужпи, шуи. - Мон янгыш, Петька, тон ӧвӧл дыръя мон со валэз сизьыметӥ эскадронлы сётӥ. х х х Петька мунчоын Чапаевлэсь тыбырзэ зыра. - Василий Иваныч, майка адскыны кутскиз! х х х Дышетскись пияш атаезлэсь юа: - Атай, филиал кыл мар шуэмез валэктэ? - Пичи дыръяд пуконо горшоктэ тодӥськод на-а? - Тодӥсько. - Озьы ке, тӥни со горшок асьмелэн туалетмылэн филиалэз луэ. х х х Бускель кышноос верасько: - Нобелев премия басьтон понна картэд Стокгольме кошкем шуыса кылӥськем вал. - Дорысь ужлэсь пегӟон понна шайтан доры но мыныны дась со. х х х - Ӟечбуресь, та Айдар Валиевлэн анаез жингыртэ тӥледлы. Туннэ мынам пие школае уз мыны. - Малы? - Малы ке шуоно, туннэ солы 40 арес тырме. х х х Марат анаезлы вера: - Мон туннэ кык атай но куинь анай кутъёсты вии. Анаез - паймыса: - Нош тон кутлэсь атай яке анай луэмзэ кызьы тодӥськод? - Кыкез пиво юон кружка дуре, куинез синучкон борды лякиськемын вал. х х х - Мон куинь кышноме воштӥ ини. Табере тодӥсько, мар соослы кулэ. Мар? - Ӟеч карт. х х х Туала ужбергатӥсь - докторлы: - Тодӥськоды на-а, доктор, ужлэсь шутэтскон понна, тӥ мыным дэмлады вал чебер апайёс котырын кӧня ке гожеръяны. - Бен, ӧй вунэты. - Вералэ соку, кызьы мыным выльысь ужам берытсконо. х х х Чидасьтэм воргорон нылпи вордон юртын: - Вань улытозяз ӝегатске. Шуиз: укмыс толэзь ортчыса. Укмыс толэзь ортчиз. Табере кык час мултэссэ возьмасько ни. х х х Одӥг кышномурт пунызэ бер пыд вылаз сылыны дышетэ. Сое адӟыса, картэз шуэ: - Юнме гинэ курадӟиськод. Кылзӥськытыны уд быгаты тон сое. - Озьы эн шу. Нырысьгес тон но уд кылзӥськиськы вал. Табере тани табаысь вӧй кадь луид. х х х Автобусын одӥг мӧйы нылкышно султыса сылэ. Со урдсын ик дышетскись пияш пуксьыса мынэ. - Мар, песяй, пыдъёсыд висё-а? - Висё, пие, туж висё. - Пинал дыръяд султыса сылӥсь мӧйыослы инты сётӥськод вал-а? - Сётӥсько вал, пие, сётӥсько вал. - Пыдъёсты соин ик висё тӥляд. х х х Медицинской комиссиын окулист прапорщиклэсь синъёссэ эскере. - Паллян синдэс ӵоксалэ. Та кыӵе буква? Прапорщик уг вазьы. - Табере бур синдэс ӵоксалэ. Та кыӵе буква? Прапорщик ялан уг вазьы. - Мар, тӥ чылкак уд адӟиське шат? - Адӟисько, только мон со букваосты кызьы шуыны уг тодӥськы. Калыклы вузъёс "Воткинский завод" - кун огазеяськонлэн вань "Машиностроитель" цехез. Отын потто калыклы вузъёс: мисьтаськон машинаос, центрифугаос али вылысь поттыны кутско "Иж" Москвичлы гуръёс но радиаторъёс. Азьланьтӥське 30 литръем ву пӧсятӥсь котёлъёсты поттон, соос шунтӥсько электрокужымен. Басьяськисьёс тужгес но тунсыкъясько пичиесь мисьтаськон машинаосын. Али дасяське выль машина, выльдэмын луоз центрифуга поттон но. Толэзяз татын 10000 пала мисьтаськон машина но ог 800 центрифуга дасяло. П. НИКОЛАЕВ. КОТЬМА СЯРЫСЬ Изъян ваись кышномурт Огнуналэ Япониысь Вакаяма городысь суд азе ог вить сюрс пала адями люкаськиз. Татын "тазалыклы изъян ваись кышномурт" сярысь ужпумез эскерон ортчиз. Ӵапак озьы нимазы интыысь иворъёс вӧлмытонъя ёзъёс 37 аресъем Масуми Хаям нылкышноез. Миым 25- тӥ июле со калык праздниклы дасям сиён-юонэ мышъяк тыриз. Соин сэрен городын улӥсьёс пӧлысь ньылез бырыны шедиз, нош 63-ез больницае. Иворъёсъя национальной служба. ВАЛЭКТЭ ЮРИСТ Сэрегез нуэ адвокат Лилия Шкляева Кызьы коньдонзэ берыктоз "Финно-Угрия"? Вить ар пала талэсь азьло "Финно-Угрия" страховой компаниен мон гожтӥ огкыл (договор). Отын верамъя, люкаськем коньдонэз берыктон дыр вуэ туэ августэ. Страховой тыронъёсты агентъёс нырысь бичаллязы, адямиослэн улон интыосазы потаса. Берло ветлэмысь дугдӥзы, нош компанилэн филиалэз ворсаськиз. Огкыллэсь куронъёссэ мон быдэстысал, но ӧй шедьты взносъёсты тырон инты. Отын верам дыр матэ вуэ. Кызьы милемлы коньдонмес берыктоз "Финно-Угрия" компанилэн филиалэз? А. Вахрушев. Шаркан черкогурт. Тӥляд юандылы ӟеч-ӟеч валэктон сётыны луоз, сторонаослэн правоосынызы но одно быдэстоно ужрадъёсынызы (обязанностьёсынызы), тодматскыса гинэ. Нош огъя валэктонъёс таӵеесь. Финно-Угрия" страховой компания но тӥ одно быдэстоно ужрадъёсын кусыпъёс тупатӥды бере, соос табере радъясько Россия Федерацилэн граждан кодексэныз. Отысь 30-тӥ ёзэтэзъя (статьяя) одно быдэстоно ужрадъёс лэсьтӥськыны кулэ, закон но мукет правовой актъёс куремъя. Нош сыӵе куронъёс но ӵектонъёс юнматэмын ӧвӧл ке - нуналмысь ужын кутӥськись радлыкъя. Гожтэм огкылэз одӥг сторона ласянь гинэ быдэсъямысь дугдыны яке куронъёссэ огласянь гинэ воштыны уг яра, законэн чаклам учыръёсы сяна (РФ-ысь Граждан Кодекслэн 310-тӥ ёзэтэз). Договорлэсь куронъёссэ мукет сторона ласянь быдэсъямтэен, тӥляд праводы вань кутэм огкылэз дырызлэсь вазь дугдытон сярысь куронэн вазиськыны (РФ-ысь Граждан кодекслэн 450-тӥ ёзэтэз). Соку суд огкылэз дугдытонлэсь бервылъёссэ чаклалоз, котькуд стороналэн куремезъя. Тӥляд учырады огкылэз дырызлэсь вазь дугдытон сярысь ужпумен судэ вазиськонлэн пайдаез уз луы, дыр. Малы ке шуоно, 1999-тӥ арын августэ огкыллэн йылпумъяськон дырыз вуэ. Соин ик тӥледлы дэмласько тупатэм дыр вуэм бере, 1999-тӥ арын августэ, коньдондэс компаниез тырытон пумысен судэ вазиськыны. Сыӵе дыръя искез лэзьыны луэ почта пыр но. Кулэ документъёс борды ватсано югдурез тӥтэк эскерыны курон, солэсь мугъёссэ документъёс пыр валэктыса. Кыӵеен мон сое адӟисько... "Пушкин - со быдэс дуннелэн тужгес дуно адямиез. Нош котькуд адямилэн вань на аслаз Пушкинэз". Таӵе кылъёсын усьтӥз нылкышно федерацилэсь берло ӧтчамзэ солэн кивалтӥсез З. А. Богомолова. Таяз учыре, 27-тӥ мае, со сӥземын вал А. С. Пушкинлэн вордскемез дырысен 200 ар тырмонлы. Соин ик та люкаськонэз малпамзы конференция выллем ортчытыны. Зэмзэ ик, котькудӥз федерацие пересь нылкышно Пушкинэз адӟем ас сяменыз, дасям со сярысь пичи ке но доклад. Тани, кылсярысь, Милитина Васильевна Гаврилова басьтэм таӵе темаез: "Пушкин Удмурт радиоын". Фаина Михайловна Агафонова быдӟым поэтмылэн творчествоысьтыз шедьтэм улон-вылон, экономика ласянь ужпумъёсыз. Со ивортӥз: "Фридрих Энгельс нырысь ик лыдӟиз но немец кылэ берыктӥз "Евгений Онегинэз". Со шуиз: та романын туж паськыт возьматэмын Россилэн со вакытысь социально- экономической улонэз". "Евгений Онегин!" пумысен ас малпанъёссэс веразы тодосчиос Виктор Иванович Чулков, Василий Иванович Петровский, Елена Георгиевна Красновская но. Е. Г. Красновскаялэн эскеремезъя, кылбурен гожтэм роман быдэсак пыӵамын крезьгурен. Пушкин уго поэтэз кырӟась, певец нималляз. Ачиз со туж гажаз но йыбырттыны дась вал Моцартлы. Нош кызьы, макем дунъязы А. Пушкинэз П. Флоренский но К. Герд - та сярысь мадиз Юрий Андреевич Чайников. Кыӵеен адӟизы но син азе пуктӥзы ӟуч литературалэсь генийзэ суредасьёс-живописецъёс но скульпторъёс - тазэ ивортӥз но картинаос вылысь адӟытӥз Георгий Андреевич Решитько. Одӥгез но портрет, шуиз со, Пушкинлэсь тусбуйзэ зэмос уг возьматы, дыр. Малы ке шуоно, тужгес устоез, О. Кипренскийлэн суредэз сярысь но ачиз поэт шуиз: "Себя как в зеркале я вижу, но это зеркало мне льстит..." Тодмотэм крепостной художник пуктэм Пушкинлэсь кык-куинь аресъем дырзэ, солы анаезлы кузьмам. 1960 арын гинэ та корт вылэ вӧен суредам портрет шедиз кун музее. Нош тани озьы ик тодмотэм суредасьлэн И. Линёвлэн туспуктэмез. Малпамзыя, та портретэз со лэсьтэм, кайгуо Пушкинэз берло нуналъёсаз яке гробын кылльыкуз адӟемысьтыз гинэ. Эшъёсызлы адӟытыны Зоя Алексеевна ваем трос книгаоссэ, кудӥз герӟаськемын та дуно нимен, соос пӧлын - "Венок Пушкину", "Разговоры Пушкина", "Донжуанский список Пушкина", "Наталья Николаевна Пушкина-Ланская" но мукетыз. Озьы ик со возьматӥз поэтлэн ВИИ даурысен, Рюрикъёс бордысен кутскем выжыезлэсь "писпузэ". Татын ик вал Пушкинлэн правнукезлэн Владимир Ивановичлэн автографен туспуктэмъёсыз. Т. Николаева. 1. Александр Пушкин. Гравюра. О. Кипренскийлэн суредэзъя лэсьтӥз Н. Уткин. Пушкин кык-куинь арес дыръяз. Тодмотэм художниклэн суредэз. Летний сад. Та интыостӥ ветлӥз Поэт. ВАЛЭКТЭ ЮРИСТ Сэрегез нуэ адвокат Лилия Шкляева Нылпи ваем понна пособие Мон ужай кык интыын, кык ставка басьтыса. Вал няня (воспитательлэн юрттӥсез). Кызьы тыриськыны кулэ мыным нылпи ваем понна пособие - кык полэс уждунъя-а, одӥгезъя-а? А. Л. Кез посёлок. Та пумысен Россия Федерацилэн законэз кутэмын 1995-тӥ арын 19-тӥ мае. Нимаське тазьы: "Нылпиен гражданъёслы кун юрттэт сётон сярысь". Отысь 8-тӥ ёзэт (статья) валэктэ: нылпи ваем понна пособие тыриськыны кулэ огъя доходысь толэзьлы быдэ шоро- куспо уждунэз лыдэ басьтыса, адями государство пыр соцстрахен герӟаськемын ке. Нылпи витемен но ваемен валче пособие тыриськыны кулэ пинал вордскытозь сизьымдон (кык яке солэсь тросгес пинал вордскыку - тямыстон ньыль) нунал понна но пинал вордскем бере сизьымдон (тазалыклы кышкытлык кылдыку - тямыстон куать, кык яке тросгес пинал вордскыку - сю дас) нунал понна. Нылпи ваем понна отпуск огъя лыдъяське-чотаське но сётӥське быдэсак, пинал вайытозь, кӧня нунал ортчемез лыдэ басьтытэк. Вань мукет учыръёсы коньдон тыриське, шоро-куспо уждунэз лыдэ басьтыса. ШӦКЫЧ Лыдӟод - пальпотод Берло дыре котькуд газет бамъёсын ялонъёс печатласько. Укыр тунсыкоесь соос. Лыдӟиськод но, ымдуръёс пальпотонэн сэрало. Кӧнязэ ке ӵектоно кариськи "Шӧкычлы" но. Кузпалэ командировкаын Картэ командировкае кошкемен (толэзьтэк уз берытскы, дыр), пайдатэк кыллё чорыган но пӧйшуран тӥрлыкъёсыз. Мылкыд карисьёслы вазиськыны ӵектӥсько таӵе адресъя. (Адрессэ уг сётӥськы ни, кузпалэз берытскиз, луоз). Тодматскысал таза, юисьтэм воргоронъёсын. Кӧлан валес но кӧттыр сярысь сюлмаськонэз уз луы. Уж утчасьёслы Колхоз гужемлы ужасьёсты кутэ. Уждун тырон ласянь уг оскытӥськы. Нош нуналаз кык пол одно ик сюдом, халат но резина сапегъёс висъялом. Председатель. Усточи Берыкто мукет кышномурт доры кӧчем кузпалдэс. Дышето йырберыктыны. Эмъяло СПИД черлэсь. Адӟемпотостэм адямидылы син уськыто, вегнало. Узыр воргоронъёслы ӟырдыт мылкыдме кузьмало. Юрттэмелы дун трос уг басьтӥськы. А/я 13, Фрося. Ӝоггес! Школаосын матэкто экзаменъёс. Азьвыл ик лушкемен ивортыны быгато гожтоно сочинениостылэсь темазэс. Дун - вераськемъя. Школалэн директорез. Утчаськом эмчи Ог уй куспын эмъялэ вал пимес. Сопал дуннее кошконэн курдатэ. Черъёсыз: тамак кыскон, аракы юон, наркотикъёсын паньсаськон, жугиськон-керетон. Дуныз понна ум кыстаське, долларъёсын тыром. Анай-атаез. Шедьтос Толон кинотеатр вӧзысь бумажник шедьтӥ. Узырлыкез: кӧня ке сю манет кунгож сьӧр коньдон, бриллиант кашо зундэс. Кузёезлы берыкто, мыным уж но улон сэрег висъяды ке. Бомж. Ӵектон Вуоно арняе мынам юбилее - вордскеме дырысен 120 ар тырме. Тодӥсько, ӟечкыланы тросэз кузьымъёсын лыктозы. Дӥськутъёс, сиён-юонъёс эн вае, аслам тырмыт. Телеэкранын данъям арбериосты гинэ возьмало. Шумпото Битнерлэн бальзамезлы, "Дося" дӥсь миськон порошоклы, "Олдэйз" памперслы, "Магги" кубикъёслы. Онись песянайды. Выль вузъёс Базае вуизы выль вузъёс. Кам шурысь кутэм камбала чорыг но креветкаос, Завьял ёросын дасям "Бушлэн кукъёсыз", Селтаын лэсьтэм чипсыос, Эгралан будэтэм бананъёс. Кунгож сьӧрысь вуттэменыз ӵошатыса, дунъёссы трослы улӥын. База � 01. Ялонъёсты лыдӟиз Николай Туров. ИНКУАЗЬ НО АДЯМИ Улосэз "шулдыртӥсьёс" Бакча берамы вань туж усто возь. Азьло отын пужым но кызьпу сыло вал, нош али уг ни... Пересь кышноос, кыдёке ветлыны мылзы потытэк, кызьпу вайёсыз Гужем юон вакыт вениклы тӥяллязы. Асьсэос ик берло ӧпкелизы: "Эх, сыӵе-сыӵе ӟеч куаро кызьпуэз уд ни шедьты". Но со жаляса верам кылъёссы гужем возь вадьсытӥ лобась чибор бубылиос сямен тӧлӟизы. Нош мон малпасько, пужым но кызьпу та возь вылын кышноен карт кадь адско вал, но соос семья кылдытыса ӧз вуттэ... Гужем али со возь вылын ыжъёсты возё. Пудо возьмасьёс сьӧразы сиёнтэк уг ветло бере, та возь вылын котьмаиз луылэ: кытӥ-отӥ курег пуз кӧмъёс, кесяськем-погъяськем газет бамъёс... Тани кин ке пичияк жагзэ гопе куштыны валам... Нош возь шорын, кытын азьло сыло вал кызьпу но пужым, али... кыллё бушам консерва банка но кесяськем клёнка (целлофан) пуйы. Соос та интыын кык арлэсь кема уло ни, шуом, кузёос ини. Ку адями татчы таосты понӥз, соос вылесь вал ай. Банкалэн паки пуртэн вандэм бере кылем пиньёсыз шунды шорын чильк-вальк адскылӥзы, котыртӥз бинялтэм кагаз вылын чорыгъёс улэпесь кадь вал. Синмаськыса учкылӥз та шоры клёнка пуйы. Аслаз но соку кын корт куртчон дырыз вал ай. Солэн чильпырась, капчи бурдъёсыз, тӧл пельтэмъя, выллань лопырскылӥзы. Соку кельшылӥз бурдыз чигем но лобыны быгатӥсьтэм пинал тӧдьы юсьлы. Клёнка пуйылэн уго одӥг сэрегез сюй комокен зӥбиськем. Нош банкалы со ик кулэ вал: мар со татын одӥгназ карысал. Буш консерва банкалы но кесяськем клёнка пуйылы ӵошен шулдыр вал, но озьы ке но соос куддыръя малпаллязы бадӟым жаг куян интыос сярысь. Уйвӧтазы адӟылӥзы бадӟым городъёс вӧзысь жаг куян интыосты, кытын трос эшъёс, клёнка син азяз пуктылӥз со кадьгес ик, но чебер суредо клёнка пуйыосты. Эк, кыӵе потэ вылэм солэн ворпо буёло луэмез... Нуналъёс но толэзьёс ӝог ортчо. Номыр но дунне вылын вужмытэк уг кыльы. Ӧжыт улыса, клёнка луиз пурысялэс, нош банкалэн, зоръёс бере небӟыса, кагазэз муз вылэ усьылӥз, шунды азьын но азьло кадь кильтро ӧз ни адскылы... ... Но адямиос малпало кадь, таос зэм но улосэз шулдырто шуыса, озьы бере мед кузёяськозы возьёсмы вылын таӵе бушам банкаос но кесяськем пуйыос! Люда Чернова. Гожня гурт. Арсений Загребин Ӵуж сяськаос Тулыс усьтӥз чеберзэ, Дӥсяз вож буртчин дӥсьсэ. Пӧртэм сяська ӝуатӥз, Ӵуженыз укыр пиштӥз. Урамын, сюрес бордын, Ӵуж-вож ковёр кыстӥське, Унябей сяськаосын Со чебер пужыятскем. Со ковер вылын ӵужесь Бубылиос поръяло, Шумпотыса сяськалэсь Чимыоссэ чупало... Лудын будэм симаос* но Котрес йыръёсынызы, Ӵужесь бамъёсынызы Шунды сьӧры бергало... Дуннеын кӧня меда Пӧртэмесь ӵуж сяськаос... Медам гинэ луэ вал Ӵужектонъёс-висёнъёс. * Сима - шундыберган. Шӧкыч Сюрес вылэ... юыса Калыкын юнме уг верало: "Тулыс нунал арез сюдэ". Бен, мае кизид, сое ик аралод. Но, кызьы возьмато лыдпусъёс, куд-огез механизаторъёс "вож кыен" но эшъяськыны уг кепырало вылэм. Шӧкычлэн куремезъя, Завьял ёросын ужаз милям внештатной корреспондентмы Николай Иванов. Со вераськиз районысь югдурез утёнъя отделысь ГИБДД-лэн валтӥсь инспектореныз В. А. Коробейниковаен. - Вера Александровна, трос-а пумиськыло юэм йырын ужась механизаторъёс? - Юыса руль сьӧры пуксем понна 700-1200 манет тыриськон тупатэмын ке но, туэ тулыс бусы ужъёс дыръя гинэ вань эштосъёсысь сямен ог куамын трактористъёс но шофёръёс ӝегатэмын. Гаишникъёс ки улэ тросгес шедё "Россия" эштосысь механизаторъёс. Соос чик кепыратэк Завьялысь ульчаостӥ но ворттыло. Тани Нырысетӥ маез зол гинэ пусъем Т-16 тракторлэн кузёез Александр Липин. Милиционеръёс сое Гольянэ нуись тракт вылысен ӝегатӥзы. Сизьыметӥ мае Башур гуртысь ульчаос сюбег луиллям "Россия" эштосысь ик бадӟым КамАЗ-лэн водителезлы Владимир Мартыновлы. Кудӟем шофёрлы электроюбо люкетэм. Гурт кӧня ке час ӵоже тылтэк пуконо луиз. Вормон нуналэз умой гинэ "пусйиз" нош ик та эштосысь ик К-700 тракторлэн кузёез Анатолий Королев. Курытсэ шӧмъяса ӝегатэмын Бабиноысь Юрий Белов, Завьял МТС-ысь Михаил Темников, "Ижевское" огазеяськонысь Петр Бегишев, "Труженик" эштосысь Петр Рогожников. Ваньзылэсь шаплы луэмзэ возьматӥз тракторист Николай Семенович Тукташев. Колёсаен тракторез акылес потэм но колхозысьтыз ГАЗ-53 автомашинаез лушкам. Кудӟем "героез" Пирогово гурт дорысен кырмизы. Зэм, ваньмыз сярысь озьы уд вера. Собере ваньзэ водительёсты но эскерыны уг луы. Унояз эштосъёсын механизаторъёсты сюрес вылэ потон азязы уг эскерыло. ПРАВИТЕЛЬСТВОЫН Бюджет - 2: уж кутскиз Правительстволэн Президиумезлэн кенешаз 31-тӥ мае учкемын республикалэн социально- экономической азинсконэзъя но 2000-тӥ арлы бюджетэз дасян сярысь ужпум. Та бордын ужаны кутскизы Экономикая но Коньдон ужпумъёсъя министерствоос. Туж кулэосаз гинэ "Удмурт Республикалэн улосвылаз туж кулэ луись объектъёсы инвестициосъя проектъёсты пыӵатон сярысь" Законэзъя Удмурт Правительстволэн Президиумез та проектъёсты эскеронъя Положение кутӥз. Проектъёсты чакланлэн нырысетӥ люкетэз ортчоз конкурсъёсъя комиссиосын. Собере Экономикая министерство проектлэсь экономика ласянь пайдаё луэмзэ эскере. Комиссия йылпумъянъёс лэсьтэ, республикаысь но интыосысь бюджетъёсы тыронъёсты чакласа. Собере проектъя материалъёсты эскеро Правительствоын но интосысь аскивалтонъя ёзъёсын. Умоен лыдъям бере, сое учкоз на Кун Кенеш. К. И. Шибановлы - 90 Корнил Ильич Шибановлы, история наукаосъя кандидатлы, профессорлы вордскемез дырысен тырмиз 90 ар. Ачиз со улонысь кошкемын ни, нош нимыз весяклы кылемын удмур калыкез пӧлы. Ӵош ужам эшъёсыз, пиосыз вордскем нуналаз, 2 июне, Корнил Ильичез буре вайыса люкаськылӥзы Ижевскысь гурт академие. Кӧня сюлмысь потэм шуныт кылъёс верамын вал та пумиськонын! Тодмо учёной но педагог улонысьтыз ог 30 арзэ уго сӥзиз гурт удыслы ӟеч специалистъёсты будэтонлы. Со ужаз, удмурт гуртэз азинтон, музъеммес пайдаёгес кутон понна. Вал меда Корнил Ильичлэсь умойгес шаермес тодӥсь-валась мурт? Та ласянь ӵош ужам эшъёсыз туннэ но Шибановез "улэп энциклопедия" шуо. Ортчем аръёс, тодэ ваёнъёс... Кӧня сооос адями сюлэмын! Вячеслав Павлович Ковриго, Ижевскысь гурт удысъя институтлэн азьвыл ректорез, 25 ар пала ужаз К. И. Шибановен артэ. Со туж вылӥ дунъет сётэ Корнил Ильичлы. - Бадӟым букваен учёный, адями, кузпал но атай. Озьы мон шуысал юбилярмы сярысь.Солэн ноку но, нокинэ но ултӥямез, вӧсь каремез ӧвӧл. Шибановъёсын ми одӥг коркан, артысь квартираосын улӥм. Кыӵе соослэн семьязы, кыӵе тупаса, огкылысь улӥзы, данъяськымон, калык син шоры йӧтымон пиналъёс будэтӥзы. Гурт удысъя академиысь учёнойёслэн советсы кичӧлтонэн потӥз арлы быдэ К. И. Шибановлы сӥзем пумиськонъёс ортчытъяны. Сое мон умоен лыдъясько. Юбилярез буре ваён нуналэ солэн пиез, Олег Корнилович Шибанов, атаезлы сӥзем фильмзэ возьматӥз, чузъяськиз отын Корнил Ильичлэн улэп куараез но. К. И. Шибановлэн улэм-вылэмез, ужамез сярысь тросгес лыдӟыны быгатоды газетмылэн вуоно номерысьтыз. Л. МЕДВЕДЕВА. Шӧкыч Шелеплэсь "шелеп" Адями вашкала дыръёсысен ини нюлэсэз вузкарон-басьтон интылы пӧрмытӥз. Нюлэсэн вузкарыса, трос коньдон бергатыны луэ. "Вож зарнимы" кошке кунгож сьӧры но, сое тросэн келяло Кавказ палъёсы но. Ваньбур тус-тас медаз луы шуыса ик 1997-тӥ арын Россия Федерациын нюлэс кодекс кутэмын вал. Нош кызьы возьмато эскеронъёс, респубикаямы та закон ляб ужа. Тани кылем арын ӵошатыса кӧня ке пол йылӥз нюлэс тылпуослэн лыдзы. "Горд атас" ӝутскылӥз 175 пол, изъянтӥз 136 гектар нюлэсэз. Миым тямыс сюрс эскерон ортчытэмын вал. Но со туж ичи пайда сётэ. Законэз тӥяса, 2612 кубометр нюлэс корамын, изъян адӟемын 580 сюрс манетлы. Нош берыктыны луиз ӝынызэ гинэ. Кыл кутӥз 164 мурт. Калыкын шуо: "Нюлэс кораське - шелепез пезьдылэ". Кытын но отын кагазлэсь коньдонэз шелепен ӵошато. Но асьме нюлэсъёсысь "шелеп" малы ке кун казнае уг шедьы кадь? Н. Лесников. Шундызэ ӧз сайялэ Тонэ, нырысь яратонзэ кадь, Россилэн сюлэмыз уз вунэты ноку!.. Ф. И. Тютчев. "Визьмын Россиез уд вала, огъя аршин солы уг тупа", - Ф. Тютчевлэн та веранэзлы оскыса, зэмзэ ик, эшшо огпол шуиськод: аслаз Отечествояз пророкъёссэ, азьпала учкыны быгатӥсьёссэ со, Россия, кулэ уг кары. "Глаголэн (кылын) сюлэмъёсыз сутӥсь(ӝуатӥсь)" ӟуч генийлэн но адӟонэз сыӵе ик вал. Пушкинлэн нырысетӥ иинквизиторез луиз ЪИЪ даурысь тодмо публицист но литературной критик Д. И, Писарев. Со Пушкинэз нимаз кулэтэм, номырлы ярантэм адямиен. Паймытэ соиз: аслэсьтыз эстетика ласянь учконъёссэ Писарев чуртнаны быгатӥз ӵапак Пушкинлэн ик "Современник" журналаз. Со вал нырысетӥез А. Пушкинлэсь шундызэ кысыны вырон. Бен, Д. Писарев ӧз быгаты адӟыны ас Отечествоысьтыз пророкез, ӧз вала мукетызлэсь туж тодмо критиклэсь В. Г. Белинскийлэсь кыдёкегес адӟемзэ, кудӥз шӧдӥськиз та изданиын ик Пушкинлы сӥзьыса печатлам дас одӥг эссеосысьтыз. Быдӟым гений шоры азьпалан но урдскылонъёс луозы на шуыса шӧдӥз "Азвесь даурлэн" кылбурчиез Владсилав Ходасевич. Академик Дмитрий Лихачев солэсь, "пыртӥ потымон визьмо Ходасевичлэсь", "Колеблемый треножник" статьязэ одно ик вуттыны дэмла асьме туала лыдӟись доры. Тани кылсярысь, отысь чуръёс: "Пушкинэз адӟисьтэм адямиос - отын но татын вань ини асьме пӧлын. Соос уг кыло Пушкинэз, малы ке шуоно, берло куать арзэ гудыръямлэсь пельтэм луизы". Статья гожтэмын вал 1921 арын. Россия вир пӧлы выемын: Нырысетӥ мировой, собере Граждан ожын кисьтэм вир пӧлы. Общество сураськемын, номырлы уг оскы. Ваньмыз пӧлысь соку висъяськиз Владимир Маяковскийлэн черекъясь куараез 1918 арын та "агитатор, горлан но главарь" "Шумпотыны вазь на" кылбураз ӧте Пушкин шоры пушкаен ыбылыны. Бен, со пумозяз мылпамтэ, трос чаклатэк ӵогем бордысь но потэ. Пролетариатъя кариськем бордысь: вуж дуннеез пумозяз куашкатоно, нош собере... Гениез пьедесталысьтыз куштон - йыре тэрисьтэм малпан. Александр Пушкин шуиз ке но - "Мон памятник аслым ӝутӥ киын лэсьтонтэмзэ", - со ӧз малпа аслаз быронтэм луонэз сярысь, малы ке шуоно, калыклэн ас поэтсэ яратонэз ӧй вал на "алямын". Малпаз аслаз калыкезлы "кема" дыр ӵоже яран сярысь гинэ... "Ӟуч литература кутскиз Пушкин бордысен? Ӧвӧл, - шуылӥзы куд-огез, - соин со йылпумъяськиз". Нош Анна Ахматова "изъян ваемзэ" адӟиз: "Кыл узырлык ваньмыз киултэмын вал Пушкинэн. Нош кызьы мукет поэтъёс, кудъёсыз ужаны кулэ Пушкин бӧрсьы?". 20-тӥ аръёслэн кутсконазы пролеткультовецъёслэсь но лефовецъёслэсь "Пушкинэз туала пароходысь куштоно" шуыса выллем ӧтён-черекъянъёссэс ӵошатоно ке со вакытысь ик национальной литератураосысь азьветлӥсьёслэн малпанъёсынызы, соос чылкак пӧртэмесь. Тодмо луэ Куӟебай Гердлэн таӵе верамез: "Ӟуч литература понна Пушкинлэн произведениосыз - классической кылбурлэн сыӵе ик вылӥ ӝутсконэз, кыӵе луо музыкаын Моцарт но живописьын Рафаэль". Удмуртъёс яратӥзы но ярато Пушкинэз. Ачиз но та гений со вакытысь уноез бадӟым адямиос сямен ӧз вылтӥяськылы, ичи лыдъем калыкъёс шоры ӧз учкылы вылӥ державаысь шовинистлэн синмыныз. Тани басьтоно ке азьвылгес, классицизм дыръя улэм писателез Александр Сумароковез, со шуэ: "Не так важны такие языки, какими говорят мордва и вотяки" (ӧвӧл, пе, пайдаё сыӵе кылъёс, кызьы вераськыло мордва но вотякъёс). Берлогес, Пушкин улон вакытэ ини, бадӟым поэт Афанасий Фет но тазьы вераз: "У чукчей нет Анакреона, к зырянам Тютчев не придет" ("Чукчаослэн - Анакреонзы, зырянъёслэн нош Тютчевзы уз лу"). Кызьы тодмо, 1836 арын Пушкинлэн кивалтоно журналаз, "Современникын", потӥз "О верованиях вотяков и черемис" статья. Со вакытэ ик печатламын Сарапулысь дворян ныллэн Надежда Дуровалэн "Записки кавалерист-девицы" повестез. Та кык учыр вера А. Пушкинлэн удмурт кылосэн кусыпъёсыз сярысь. Александр Пушкинлэн кылыз-бурез ас бордаз кыскиз нырысь ик просветительёсты. Библиез но мукет христиан книгаосыз вератэк ини, 1867 арын, кылсярысь, потӥз Николай Блинов священниклэн "Азбукаез". Отчы пыртэмын "Цыганы" поэмаысь таӵе верамез: "Птичка божия не знает ни заботы, ни труда..." Собере ини, Григорий Верещагин бордысен кутскыса, Александр Пушкин борды басьтӥськылӥзы туж уноез удмурт писательёс... Лев Тарасов, журналист. Пичи кузьымлэсь - бадӟым шумпотон Дэбес ёросысь больницалэн нылпи консультацияз алигес куатетӥ классын дышетскисьёс шудонъёс ваиллям. Соосын ӵош вал классэнызы кивалтӥсь Надежда Павловна Кузнецова, ӟуч кылъя но литературая дышетӥсь. Ма паймонэз кадь та пичи кузьымлы? Шуг-секытъёс пото бюджет организациослэн начармемзы бордысь. Висись нылпиослы уг ни окто шудонъёс. Шумпотно: уг измо нылпиослэн сюлэмъёссы, асьсэлэсь дорысьтызы вайыса сётӥзы соос шудонъёссэс висись нылпиослы. П. Кузнецов. Шӧкыч Мынам телевизоре Динтем но палъёсын Берло дыре ма но уг малпало визьмо адямиос. Малпамтэ шорысь колхозъёсты эштос, акционер огазеяськон, кооператив шуыса ниманы кутскизы. Завьял ёросын но куке-соку вал "Родина" колхоз. Собере сое совхозлы пӧрмытӥзы, табере кооператив кылдытӥзы. Та хозяйство районын одӥгез кужмоез вал. Со но выльдӥськон аръёсы куашканы-бырыны кутскиз. Куке но совхоз дас гуртъёсын огазеяськыса ужаз. Табере куд-огез нимаз люкиськиз. Динтем Бодьяе пудо вордӥсьёс сярысь материал гожтыны шуыса потӥм вал. Ӧз пӧрмы. Вань пудозэс сӥльлы келяллям. Вань гидъёс шал-шал бушесь. Куд-огез сэрттэмын-качамын ни. Ар-кык ортчыса, одӥг кирпичез но уз кыльы ни, дыр. Гуртын уж ӧвӧл. Соин но, лэся, уноез воргоронъёс юон вылэ чӧлскемын. Динтемын кылемын на чылкак кык валзы гинэ. Али картофка мерттон вакыт. Уд но оске, ява, гуртоос бакчазэс, вал интые, асьсэос кыткиськыса гыро. Динтемъёс Удмурт Правительстволэсь юрттэт курыны медо ни. Ёрослы гурт кулэ ӧвӧл, лэся. Б. Никитин. Туспуктэмъёсыз В. Камашевлэн. Эн ишка сяськаез... Эколог-биологической центре ветлӥсь юннатъёс адӟытонзэс "Первоцветы" ("Валгырлыос") нималлям. Асьсэ бакчаысь сяна, соос ваиллям нюлэс сяськаосты но. Кин адӟытонэ вуэ, солы котькуд будослэн пӧртэмлыкез сярысь иворто. Куноос гинэ уг шедьто татысь тунсыкозэ. Эколого-биологической центрын "Валгырлыослэн арнязы" ортче. Котькуд кружокын пиналъёслы валэкто тулыс лымы улысь нырысь ик бычыясь сяськаос - ӟускиёсяська (хохлатка), крокусъёс, вукуар (мать-и-мачеха) сярысь. Куд-ог будосъёс эмъюмлы тупало, кудӥз ядо но луо. Бадӟымгес саклык висъяське Горд книгае пусъемъёсызлы. Вазь тулыс сяськаясь будосъёслы саклык юнме шорысь уг висъяськы. Май толэзьлэн кутсконаз ик городысь ульчаосын вузало ини кечсинъёсты-подснежник шуонъёсты. Лымы улысь потӥсь сяськаослы бадӟым изъян ваё - бичало ӟыгыртэтэн. Удмуртиын 8 интыын гинэ будэ на кечсин сяська. Кыказ соос ӧвӧл ни - Сарапул но Ижевск котырын. Тодосчиослэн малпамзыя, республикаын та будосэз тужгес ӟеч утён инты кылдытоно Сарапул ёросын. Котькуд ар пиналъёс экологилы сӥзем "Первоцвет" но "Подснежник" акциосы пырисько. Соос радъясько Нылпи творчествоя центръёсын но школаосын ужасьёсын но республикаын экологи кышкытлыклэсь утиськонъя нуналъёслы сӥзем ужрадъёслэн планазы пыртэмын. Тодады вайытон понна. Трос валгырлыос (первоцвет) пыртэмын Горд книгае но флораысь но фаунаысь пӧртэм пумо шер пумиськылӥсь макеосын вузкаронъя калык куспо конвенциен утисько. Россиын но палэназ ортчись "Первоцвет" кампания - со вазь тулыс сяськаясь будосъёсты изъянтонлэсь утён, калык пӧлын валэктон уж нуон, шер пумиськылӥсь турынъёсты бичанлэсь алон но мукет. Та ужрадэз 22 ар ӵоже радъяло но огазеяло Инкуазез утёнъя дружинаослэн движенизы, Егитъёслэн инкуазез утёнъя организацизы. Огазеяськонэ пыро егитъёслэн Россиысь, Украинаысь, Беларусьысь, Литваысь, Таджикистанысь но Казахстанысь 50-лэсь трос группаоссы. Н. Щеголева. Журналистъёсын пумиськонъёс Эмъюм но вузало Кылем вторнике, 1-тӥ июне, Правительствоын журналистъёсын пумиськылӥз Удмуртиысь кооператоръёслэн тӧрозы Рауф Каримов. Люкаськемъёслы со мадиз удыслэн азинскемез, солэн азьпал сюресэз но куд-ог мукет ужпумъёс сярысь. Гуртысь вузкарисьёс туннэ улонамы бадӟым инты басьто. Выльдӥськон, рынокен экономикае выжон вакытэ Удмурт потребсоюз одӥг магазинзэ но ӧз пытса, эшшо ай выльёссэ но усьтылӥз. Одӥг гуртэз но: пичи-а, бадӟым-а со, син азьысьтыз ӧз ышты. Нош мукет ласянь, гуртысь котькуд куинетӥез магазин изъян вае, пайда уг сёты. Озьы ке но, кооператоръёс гурт калыклэсь кулэяськонъёссэ нокин вылэ ӧз погыльтэ, солы уката матынгес луизы. Холодильникъёсты но мукетсэ кредитэн вузало, бытовикъёслэсь но ужзэс ас валзы басьто ни. Усьто дӥсь, пыдкутчан вурон-тупатъян мастерскойёс, парикмахерскойёс, фотоательеос, ритуальной салонъёс но мукетсэ. Туэ котькуд райцентрын ужаны кутскозы кооперацилэн аптекаосыз. Ваньмыз со лэсьтӥське калыклэн куремезъя, гуртын улӥсьёс сярысь сюлмаськыса. Удмуртиысь кооператоръёслэн ӟеч ужъёссы быдэс Россиын тодмо. Соос берло дыре одӥг кварталэ но классной инты басьтытэк уг кылё. Со юнме шорысь ӧвӧл. Удмурт кооператоръёс вамышъёссэс арысь аре кузёмыто, гуртын вузкаронэз умоято, асьсэ производствозэс кужмоято, калыкез сюдонлы уката бадӟым инты висъяло. Удыслэн холодильникъёсаз гинэ 6 сюрс тонна сиён-юон тэре, емышъёс возён гуосыз но тырмыт, пӧйшур вордон фермаез кык, 14 базарез, усто ужало консерва дасян, нянь пыжон заводъёсыз, колбаса лэсьтон, вӧй шуккон цехъёсыз но мукетыз. Кооператоръёс гурт калык понна ужало. Соос 400 сюрслэсь уно адямиослы сиён-юон, промышленной, хозяйственной вузъёс вутто. Кыдёкысь но пичиесь гуртъёсын нокинлэн вузкаремез уг поты, нош кооператоръёс котькудаз вуо, дуно ке но усе. Соин ик миым "Удмуртпотребсоюз" гуртын вузкаронлэсь 3,6 миллион манет тыр изъян адӟиз. Кӧня ке лыдпусъёс. Кылем арын кооператоръёс 15 сюрс тонна нянь вузазы, пызь - 5 тонна, сакыр - 3 тонна, кеньыр, макарон - 3,2 сюрс тонна, нош кӧс вӧй - 700 тонна. Озьы быдэс товарообротын сиён-юон 80 процент басьтэ, нош промышленной вузъёс - 20 процент. Татын нимысьтыз пусйыны кулэ, кооператоръёс 40 процентсэ сиён-юонэз асьсэос потто. Туэ тани ньыль толэзьскын 5 сюрс тонна нянь пыжизы, 250 тонна колбаса, 1 миллион банка консерваос поттӥзы. Огъя вераса, 152 пумо сиён-ююон дасяло. Гуртын али вань вузкарон пӧлысь 40-60 процентсэ кооператоръёс басьто. Кылсярысь, Алнаш, Вавож районъёсын со лыдпус 60 процент. Удмуртпотребсоюз утиз гуртын калыкез сюдон удысэз. Али 160 столовоез ужа. Асьсэос пумен тросгес продукция потто. Пыжиськемъёссы котькуд магазинын вузасько. Та удыслы, кооператоръёслы тужгес секыт йӧтӥз 1993-тӥ - 1994-тӥ аръёсы. Но кризисысь пырпотӥзы. Ялан паськытато асьсэ производствозэс. Пумен тросгес усьтыло чорыг, сӥль ӵынатон, кондитерской, колбаса лэсьтон, вӧй шуккон цехъёс но музонзэ. Соин ӵош ик берло 4 ар ӵоже сюрс ужасьсэс кулэстӥзы. Озьы ик зол ужало расходъёссэс синэтон ласянь. Ас интызэс шедьтӥзы ни Глазовысь но Алнашысь пищекомбинатъёс, Воткинскысь консерва завод но музонэз. Удмуртпотребсоюз бадӟым инты висъя котельнойёссэ куд-ог магазинъёссэ газэн эстӥськонэ выжтонлы. Чурыт эстӥськонлэсь со 30 процентлы дунтэмгес усе но, продукцилэн асдуныз кулэсме. Газэн эстонэ выжтэмын ни. Можгалэсь консерва завод, нянь пыжонъя 12 завод. Али та уж уката паськыта. Удысын умояло коньдон ужпумъёс. Ӧвӧл солэн кун но интыысь бюджетъёсы тыронъёсыз. Кооператоръёс дыраз уждун басьто. Туэ вузаськемлэсь 9,7 миллион манет выт люказы ни. Берло дыре шӧдскымон саклык висъяське кадръёсын ужанлы. 27-ез пӧлысь 16 райполэн кивалтӥсез воштэмын. 15 райпоен кышномуртъёс кивалто. Данакез соос пусъемын Удмуртиысь но Россиысь дано нимъёсын. Миым, 17-тӥ август бере, та удысын куд-ог воштӥськонъёс луизы. Бакча сиёнлэсь консерваоссэс районъёсъя гинэ люкылыса вузало вал азьвыл, нош собере со туж умой кошкыны ӧдъяз. Соин ӵош ик Удмуртпотребсоюз вис карытэк сюлмаське кадръёс будэтон сярысь. Но татын кӧня ке янгышъёс но лэсьтэмын. Кылсярысь, Камбарка но Кияса райпоослы палэнысь кивалтӥсьёс пуктылэмын. Зэм, жаляса верано луэ, соос оскемез ӧз быдэстэлэ. Кооператоръёс туэ пусъёзы Сенной базарлы 100 ар тырмонэз. Солы быдэс даур луоз 7- тӥ декабре. Со дырлы отын вузкаронъя выль шуныт павильон усьтӥськоз. Вузкарон интыез 2000 квадаратной метр луоз. Озьы вузкарисьёс но басьяськисьёс понна уката умоесь условиос кылдозы. Г. Романов. ШӦКЫЧ Эстӥськонлы - уробоен Бензинлы дун будоз шуыса вераськонъёс зэмазы, лэся. Нырысь ик солэсь шуккетсэ шӧдӥзы Санкт-Петербургын улӥсьёс. Собере солэн тулкымез быдэс Россие вуиз. Палэнэ ӧз кыльы асьмелэн улосмы но. Кылсярысь, А-92 бензин литрез куинь манетозь вуиз ни. Нош А-76 бензинлы дунъёс пӧртэм сямен тэтчало. Кытын ке со 2 манет но 80 коньы сылэ, куд-ог интыосын 2 но 40-эн но басьтыны луоно. Редакциысь водителенымы олокӧня заправкаостӥортчим. Дунтэм бензин шедьтӥм Ижевскысь Вормонлы 40 ар нимо ульчаысь гинэ. Котьма шуэ но, эстӥськонлы дунъёс куртчылӥсько ик. Нош со уз шӧдӥськы меда мукет вузъёслэн дунъёссы вылын но? Ваньмыз уго ог-огенызы юн герӟаськемын. Дунъёслэсь будэмзэс ӝоггес шӧдозы, дыр, гуртоос. Куд-ог вераськонъёсъя, соослы льготаос уз сётӥське ни, пе... Ӧйтӧд, ӧйтӧд. Оло, автомашинаосмес ӝоген уробоен вошто луоз ни. Городэтӥ бензин утчаса ветлӥзы Н. ЛЯЛИН но В. КАМАШЕВ. "Ягдорез" витё куное Завьял ёросысь Ягул гуртысь "Ягдор" ансамблез республикаямы тодӥсьтэмез ӧжыт, дыр. Татысь кырӟась-эктӥсь чебер апайёс шаерысьтымы уно ёросъёсы вуылӥзы ини. Нина Богатырёва, Евгения Набоких, Алевтина Фалина, Валентина Ильина, Зинаида Корепанова жингрескуараенызы котькинэ паймыто. Маргарита Набоких, Валентина Максимова, Мария Егорова, Фризаида Широбокова, кырӟам сяна, задор экто но. Егит нылъёс Лариса Корепанова но Ольга Гершун Ижын, культурая училищеын дышетско, "Ягдорлэн" концертъёсаз но сюлмысь пырисько. Отын соос оген но, ӵошен но кырӟало. Культура юртлэн кивалтӥсез Любовь Пенькина, баянист Вячеслав Галичанин, ансамбльлэн кивалтӥсез Валентина Максимова ялан сюлмасько артистъёссылэсь быгатонлыксэс ӝутон но концертъёсты радъян сярысь. Транспорт ласянь шуг ке но, артистъёс ас ёросысьтызы гуртъёсы ӵем потало. Казмасын, Дэриын, Якшурын, Вожойын, Тямаын соосты вань калык тодэ ини. Алигес "Ягдор" ансамбль Тяма гуртэ потаз, концерт шулдыр ортчиз, учкисьёс усточиосты нош ик лыктыны куризы. Н. ВОЗИСОВ. А. С. Пушкинлэн вордскемез дырысен - 200 ар "Тӥляд кылбуръёсты шыркун кадь жингырто..." Ӟуч калыклэн быдӟым гожъясез асьме кунэ пырись вань калыкъёслэн культураязы шӧдскымон пытьы кельтӥз, солэсь адӟем карыса гожъяны кутскизы тросэз писательёс, дышетскизы улонэз, зэм возьматэм сяна, яркыт кылын, син шоры пуктымон суреданы (удмурт писательёс пӧлысь Г. Е. Верещагинэз нырысь ик бордаз кыскиз ӟуч классик). Сыӵе луэ А. С. Пушкинлэн "Сказка о рыбаке и рыбке" туж тодмо луэм но революцилэсь азьло ик школаосын дышетэм произведениез. Солэсь адӟем карыса, Г. Е. Верещагин кылдытэ "Зарни чорыг" поэмазэ. Отын со озьы ик кельтэ ӟуч произведенилэсь сюжетсэ но чеберъян амалъёссэ, нош соин ӵош ик пыртылэ удмурт калыклы матын луись тодметъёсты но учыръёсты. Ӟуч оригиналын вераськон мынэ сорыгасьлэн калтонэз зарезе куинь пол куштэмез но куинетӥяз учыре зарни чорыглэн потэмез но адями сямен вераськыны кутскемез сярысь, нош Г. Верещагинлэн поэмаез сю куать чурлэсь пӧрмем но, отын кык пересьёслэн улэм-вылэмзы сярысь тросгес вераське. Со чорыглэн тусыз но асьме палась шуръёсын улӥсь чорыглы кельше: Маке юш кадь чорыг, Юш быдӟа, туж чебер... Кисьтаське зарни кадь. Чорыгась туж абдрам. Сыӵе вераськись чорыгез шедьтыса, пересь Баймет чылкак пайме но вазиське: Пельгае ке мынам - Луысал монэным, Мар лэсьтомы соин Кенешысалмы татын. Озьы удмурт писатель умой возьматэ удмурт улонэз: тросэзлэн этнографъёслэн мадемзыя, удмурт пиосмурт одӥг бадӟым ужзэ но кышноеныз кенешытэк уг лэсьты вал, соин ик удмуртъёс вылӥ дунъяло вал нылкышноез, со сярысь верало тросэз визькылъёс, лэчыт кылъёс. Озьы ик революцилэсь азьло берыктэмын вал А. С. Пушкинлэн "Сказка о попе и о работнике его Балде" произведениез. Сое удмурт кылын озьы ик кӧня ке воштонъёс но ватсанъёс пыртыса печатлаз ини Максим Прокопьев революция бере, 1918-тӥ арын. Ӟуч оригиналын Балдаез чёртъёс доры оброклы (вытлы) ысто ке, татын М. Прокопьев геройзэ, поплэн косэмезъя, уин ыстэ нюлэскы пу вайыны. Поп малпа вал ини, Балдаез кионъёс таркалозы шуыса, нош кескич ужась адями поплэсь валзэ кионъёслы сюдэ, нош со интые, дӧдьые кионэз кыткыса, быдэс воз пу вае но паймем поплы вазиське: Озьы ик кион но Валлэсь но ӟечгес. Туж ӟеч ветлоно Только сиыны Солэн ворттэмез Мар сётом солы? Берло чуръёс возьмато поплэсь "ӵуж юртэ" сюремзэ. Революцилэсь азьло психиатрической больницаосты ӵуж буяло вал. Таяз учыре но М. Прокопьев ӟуч произведениез удмурт лыдӟисьлы матэ карыса но валамон мед луоз шуыса пыртылэ куд-ог тодметъёс но учыръёс. Куӟебай Гердлэн но "Гондыръёс" поэмаез куд-ог тодметъёсыныз матын луоз А. С. Пушкинлэн "Сказка о рыбаке и рыбке" произведениезлы. Но со гожтэмын удмурт калык выжыкылъя. Со сяна, татын паймымон чорыг интыын - паймымон беризь. Со ик быдэстэ пересь кышнолэсь вань куронъёссэ. Берло ини, кузьмам зарнизэс медам лушкалэ шуыса, пересь кышно куре: соос доры нокыӵе адями но, пӧйшур но кышкаменызы медам пыралэ. Соку пересез но кышнозэ кӧшкемыт бадӟым гондыръёслы пӧрмытэ, соин вань калык, соослэсь кышкаса, гуртысь кошке. 20-тӥ аръёсы куд-ог архиреволюционной гожъясьёс черекъяны кутскизы, Пушкин выль вакытлы уг тупа шуыса. Нош соку ик Куӟебай Герд туж гажаса но вылӥ дунъяса гожтӥз: "Для русской литературы произведения А. С. Пушкина - такая же вершинная точка классического стиха, как Моцарта в музыке и Рафаэлл в живописи. Стихотворения и поэмы Пушкина являются идеальной организацией устной речи. Звучание речи образует со смыслом согласованное целое. Смысловое ударение всегда совпадает с ритмическим ударением стиха, а ритмическое членение - с синтаксическим". Куӟебай Гердлэсь тазьы верамъёссэ пусйыса, академик А. С. Бушмин, "Пушкинский дом" нимаськись Ӟуч литературая институтлэн директорез, шуиз: "Мон А. С. Пушкинлэн творчествоез сярысь туж трос верамъёсты тодӥсько, нош таӵе мур но туж шонер дунъетэн нырысьсэ пумиськисько". Кыӵе шунытэсь кылъёс вера ӟуч академик удмурт писательлэн дунъетэз сярысь! Революция бере нош ик А. С. Пушкинлэн творчествоез бордаз кыскиз удмурт писательёсты. Озьы Ашальчи Оки, калык творчестволэсь адӟем карыса гожъям сяна, 1918- тӥ арын "Гажан эше" кылбурзэ, кӧня ке тупатъяса, А. С. Пушкинлэн "Если жизнь тебя обманет" произведениезъя пӧрмытэ. Советской власть кылдон вакытэ ик Д. Майоров 1920-тӥ арын печатлаз "Удмурт комиссариат" кылбурзэ. Со сӥземын вал Трофим Борисовлы. Нош та произведение гожтэмын, А. С. Пушкинлэн "Медный всадник" поэмаезлэсь адӟем карыса: Тӧдьы Камлэн ярез дурын Лекос малпаськыса сылэ, Котыр учке... Солэн азяз Камед чиля, Отын вужмем лодка уя, Тӧдьы Камлэн ярез дурын Отын-татын юртъёс сыло. Со юртъёсын удмурт улэ, Шунды солы ӧжыт йӧтэ. Кам шуредлэн ярез ӝужыт, Татын кезьыт, татын пеймыт. Со малпаське: "Татын ми югыт поттом, Сое утчало удмуртъёсмы. Комиссариат пуктон инты Татын ӟеч луоз милемлы, Удмуртъёслы укно усьтом, Соос пӧлы югыт пыртом..." Та чуръёс туж умой возьмато, кызьы удмурт поэт, ӟуч классической произведениосты басьтыса, ас вакытэзлы тупась мылкыдэз но учырез возьматэ, сое удмурт калыклэн улэменыз герӟаса суреда. Нош куамынэтӥ аръёсы, А. С. Пушкинлэн быремез дырысен 100 ар тырмемез пусйыса, быдэс СССР-ын нимысьтыз ик данъямон ужъёс ортчизы. Соку ӟуч классиклэн произведениосыз котькуд калыклэн кылыныз печатламын вал. Озьы 1936-тӥ арын потӥзы А. С. Пушкинлэн "Сказкаос" книгаез. Отчы пыремын "Сказка о рыбаке и рыбке", "Сказка о Царе Салтане" (берыктӥз А. Эрик), "Сказка о попе и о работнике его Балде" (берыктӥз А. Багай). 1937-тӥ арын П. Усков берыктӥз "Капитанская дочка" повестьсэ. Нош "Станционный смотритель" берыктэмын вал 1938-тӥ арын. Война бере, 1949-тӥ арын, нош ик А. С. Пушкинлы сӥзем юбилей дыръя печатламын "Дубровский" повестез (берыктӥз Т. Архипов), со вакытэ ик удмурт кылын потӥзы поэмаосыз - "Бахчисарайский фонтан" (берыктӥз Г. Сабитов), "Руслан и Людмила", "Медный всадник" но "Борис Годунов" трагедиез (берыктӥз И. Гаврилов). Уката умой пӧрмемын М. Петровен берыктэм кылбуръёсыз - "Зимнее утро", "Зимний вечер", "Зимняя дорога" пыризы учебникъёсы. Со сяна, удмурт поэтъёс, асьсэлэсь малпанъёссэс но А. С. Пушкинлэсь быдӟым ужзэ данъяса, ӟуч классиклы сӥзьыса, тунсыко кылбуръёс гожъяны кутскизы ини 30-тӥ аръёсы ик. Озьы М. Петров "Пушкинлы" кылбураз гожтӥз: ... Монэ куке уно пӧртэм кылын Вералозы, шуид вал кылбурад. Вуиз со дыр. Тонэ пӧртэм калык Вордэм пизэ кадь гажаса вера. Ӟуч поэтлы сӥзьыса, таӵе выллемесь ик чуръёс гожтӥзы П. Чайников ("Пушкинлы - дан"), И. Дядюков ("Эрикез кырӟасьлы"), А. Лужанин ("Пушкинлы"), М. Покчи-Петров ("Пушкинлэн памятникез дорын"). Мукет сяменгес но ӟуч классиклэсь лэсьтэм ужзэ вылӥ данъяса вазиське Ф. Васильев "А. С. Пушкинлы" кылбураз: Тӥляд кылбуръёсты - Инмысь ошмес вуос, Тӥляд кылбуръёсты - Тулыс шунды сиос. Куректыку соос Монэ но буйгато. Шумпотыку соос Шыркун кадь жингырто. А. С. Пушкинлы сӥзьыса, тунсыко кылбуръёс печатлаз В. Романов. Тодмо луизы солэн "Пушкинлэн кылбуръёсыз" но "Болдино. Пушкинлэн юртэз" нимо произведениосыз. Озьы тӥни ӟуч классиклэн творчествоез юрттӥз удмурт писательёслы умоесь произведениос гожтыны, солэсь кылбуръёссэ, поэмаоссэ берыктыса, удмурт поэтъёс но дышизы тунсыко ужъёс кылдытъяны. Ф. К. ЕРМАКОВ, профессор. А. С. Пушкин. Тол сюрес Зимняя дорога. Берыктӥз М. Петров Тулкымо инмын уйшор пал Тыр толэзь каллен уя, Мӧзмытэсь лудэ со чал-чал Югытсэ кисьтэ уе, Луд вылтӥ сюрес кузя нош Тройка ӝог азьлань ворттэ, Уй куспын гырлы куара но Акылес кадь жингыртэ. Ой, мӧзмыт, чалмыт уйшор дыр, Нош лудын ямщик кырӟа. Со кырӟа капчи юмшан гур Я мӧзмон гуръёс кырӟа. Чик ӧвӧл тылъёс, юртъёс но... Кыр инты, пумтэм лымы... Сьӧд гожмоесь юбоос но Ӧжыт шедьыло мыным. Чузъяськон Эхо. Берыктӥз А. Лужанин Вузэ-а сьӧсь пеймыт сикын, Я гудыръя, шудэ гумы, Я ныл кырӟа вырйыл сьӧрын - Ваньмыз шоры Тон вазиськод чус омырын Шӧдтэк шорысь. Тон валаськод гудыръямез, Сильтӧл но ву куашетэмез, Гуртысь пастухъёслэсь кылзэс - Но вазиськод: Пумитад вазись ӧвӧл... Поэт ӵапак Сыӵе ик тон. Пилем Туча. Берыктӥз Е. Самсонов Пазям сильтӧллэн тон берпум пилемез! Огнад тон чагыр инбамтӥ ортчиськод, Огнад мӧзмытэсь вужеръёс сётӥськод, Огнад тон ӝожмыт кариськод нуналэз. Инэз кемалась ик ӧвӧл шобыртӥд, Кышкыт котыръяз вылтырдэ чилекъян, Соку вӧлмытъяз тодмотэм гудыръян, Зорен тырмостэм музъемез пылатӥд. Я, ватскы, тырмоз табере. Дыр ортчиз, Музъем сайкиськиз, тӧлпери но кошкиз. Сэзь тӧл, вешаса куаръёссэ писпулэсь, Улля ни тонэ чалмытскем инбамысь. Тонэ мон яратӥ... Я вас любил.... Берыктӥз В. Будин Тонэ мон яратӥ, яратонэ Оло, чылкак ӧз кыс али сюлмам; Но со медаз иса ини тонэ; Уг пот ӝожомытэме тонэ мынам. Я дӥсьтытэк, муртэн-а вожаса, Мон яратӥ чалмыт но оскытэк. Макем мон яратӥ мусояса, Вылез мед яратоз вунэтытэк. Михаил Петров Пушкинлы Лек аръёсы яркыт пиштӥсь тылын Тон югдылӥд шимес пеймыт уез, Сюлме оскон пыртӥсь ӟырдыт кылын Шудбур сярысь кырӟад тон калыклы, Югыт сюрес вылэ ӧтид сое. Шуд вуонлы оскись сэзь куараед, Зарни крезен шудэм кырӟанъёсыд Удмурт гуртэ вуылӥзы, поэт. Сьӧд тэльёсын ми кылзылӥм сое. Кылбуръёстэ лыдӟим чагтылъёсын. Гожъяд вал тон: ӟардоз шудо ӵукна. Ӟардӥз ни со, ӝужаз яркыт шунды. Тулыс выллем вуиз со ми понна, Вуиз кема витем, малпам шудмы. Монэ куке уно пӧртэм кылын Вералозы, шуид вал кылбурад. Вуиз со дыр. Тонэ пӧртэм калык Вордэм пизэ кадь гажаса вера. Михаил Покчи-Петров Пушкинлэн памятникез дорын Трос дауръёс пыртӥ вамышъянъяд, Татчы тон дугдэмед кадь огдырлы, Адӟон понна, кызьы ӟуч музъемад Мукет дыре улэ быдӟым калык. Тон адӟиськод-а, Пушкин, вуэмын Шудбур ваись чебер выль ӟардонэд. Тон ӧтьылӥд сое аръёс вамен, Сое туж юн потэ вал адӟемед. Калык ачиз ваиз со ӟардонэз, Басьтӥз со визьмыныз, ас кужмыныз, Со тодмантэм выльдӥз ӟуч музъемез, Нош ӟардонзэ нима со - коммунизм. Тон тодӥськод, поэт, со калыкез. Ачид ӧвӧл ке но соин артэ, Тынад нимыд - солэн данъяськонэз, Уждэ, верамъёстэ со яратэ, Тани шорад пионеръёс учко, Огез азяд сяська букет кельтӥз. Выльысь кадь соослы тон вазиськод: "Ӟечбур, шудо дыре улӥсь нылпи!" Соос, тыныд кизэс шоналляса, Кырӟанъёсын пото выль улонэ, Таӵе чебер дырзэс азьпалтыса, Егит сюлэмазы нуо тонэ. Флор Васильев Пушкинлэсь улэп дыръяз суредам берло портретсэ учкыса Жадем Пушкин, лачмыт пуксьыса, Ас понназ маке мур малпаське. Солэн меӵ но паськыт кымысаз Берпумез кисыри ватсаське. Со адӟе, дыр, бырон нуналзэ, Тушмонэз, дыр, понназ мыскылля. Со уг жаля вакчи улонзэ, Нош ваньзэ туж умой со вала. Кезьытгес карисько нуналъёс, Шунды си но пыра дыртыса. Весь шергес вуыло гожтэтъёс, Эшъёсыз но ӧвӧл ни вӧзаз. Эксэйлэн дыртӥсьтэм валъёсыз Коркаез азетӥ ортчыло, Эксэйлэн чидасьтэм синъёсыз Усьтымтэ укноез ӵабъяло. Пилемъёс но лэзько улэгес, Сьӧд инвис но юнгес эгеса, Адӟиське ни берпум нуналэз, Ваньзэ Пушкин учке валаса. Ӝажыысь яратон книгаос, Натали шундыез гинэ, дыр, Ӟеч шунто на солэсь сюлэмзэ, Кынарзэ но ӝуто на, вылды. Жадем Пушкин, вӧзам пуксьыса, Мае ке вераны кадь медэ. Кыдёке азьпала адӟыса, Аръёс пыр вераськон кадь мытэ. Ижевск, 8.03.78. Тодо быдэс шаерамы Ижысь суредасьлэн Аркадий Иванович Яковлевлэн (вордӥськемын 1929-тӥ арын) ужъёсаз валтӥсь инты басьто А. С. Пушкин но П. И. Чайковский. Ижысь механической заводысь пинал гравёръёслэн школаязы, Удмурт кун университетысь художественно-графической факультетын дышетскыса, вуоно суредась ужаз автозаводын, автомашинаосты чеберъянъя бюроын. Со сяна, РСФСР-ысь Чеберлыкъя фондлэн, акциосын "Аксион" огазеяськонлэн мастерскойёсазы. Аркадий Иванович Яковлев - котыр ласянь кыдам усточи. Быгатонлыксэ эскере чеберлыклэн пӧртэм удысъёсаз. Сюлэмвисёнъёсыз - живопись, графика, экслибрис, гравировка, скульптура но мукетыз. А. И. Яковлевлэн ужъёсыз интыямын шаерысьтымы данак музейёсы. Аслэсьтыз устолыксэ озьы ик возьматъя пӧртэм адӟытонъёсын. В. РОГАЛЁВ. Ӟечкылан Та нуналъёсы 60 арес тырмиз Завьялово ёросысь Пальники гуртын улӥсьлы, подсобной хозяйствоысь экономистлы Павел Серафимович Боталевлы. Быдӟым юбилееныд ӟечкыласа, сӥзисько ваньзэ умойзэ, тазалык но шудбур. Юн гажаса эшед Валентина Елганова. Таза луод - калыкедлы пайда ваёд Тазьы нимамын вал Кияса ёросысь Вуж Салья гуртын, ортчытэм ужрад. Сое быгатыса радъяз гуртысь нылкышно кенешлэн кивалтӥсез М. И. Морякова. Ужрадэз дасяны озьы ик юрттӥзы ёросысь нылкышно кенешлэн кивалтӥсез И. Н. Шихова, ёрос администрациын ужась Т. Ег. Васильева но Гурт кенешлэн страостаез А. Н. Григорьев. Куное ӧтизы Бурановоысь гурт кенешез, угось трос гинэ соослэн ог-огзылэсь адӟем карымонэз. Пумиськон ортчиз школаын. Отчы пыриськизы дышетскись пиналъёс, дышетӥсьёс но гуртын улӥсьёс. Люкаськемъёс тодматскизы пиналъёслэн пуллэсь лэсьтэм киужъёсынызы. Трос тунсыкозэ тодӥзы эмъюм турынъёс сярысь. Ёрос больницаысь нылпиосты эмъясь врач пыр-поч тодматӥз, кызьы эмъяськоно соиныз яке таиныз эмъюм турынэн. Ортчытӥз викторина, нош вормисьёсты возьмазы кузьымъёс. Т. Е. Васильева туж тунсыко вераз, кызьы астэ возёно калыкын, аслэсьтыд янгышъёстэ валэктыны тыршон сярысь но мукет. М. И. Моряково гуртысь библиотекарен В. А. Зыковаен дасяллям "Тодматске: эмъюм турынъёс" нимо адӟытон. Пӧртэм турынъёслэсь чай паремын вал. Учкисьёс пӧлын но эмъюм турынъёсъя конкурс выллем ортчиз - кырӟанъёсъя но пӧртэм юанъёсъя. Вормисьёслы сётӥзы эмъюм турын кидысъёс. Пумиськонын вераськон ӝутскиз экология ужпумъёсъя но, озьы ик пыд уламы будӥсь эмъюм турынъёсты быгатыса но валаса уже кутон сярысь. Асьсэлэн ужъёсынызы тодматӥзы куноос но - Буранысь гурт кенешлэн старостаез, калыкез дышетон удысысь отличник Г. Н. Конева, сельсоветлэн тӧроез Н. А. Титов но мукетъёс. Таӵе пумиськонъёслэн пайдазы син азьын. Бурангуртъёслэсь адӟем карыса, сальяослэн но гурт кенешсы ужзэ азьланьтэ. Н. ПАХОМОВА, "Удмурт кенешлэн" Кияса ёросысь ёзэзлэн кивалтӥсез. Закон куремъя Дэриысь "аныкай" вадьсын - пилемъёс Завьялово районлэн администрациезлэн тӧроезлэн Галина Баталовалэн куд-ог ингышъёсыз сярысь газетъёс гожъязы ини. Но соос правоосты утись но мукет эскерись ёзъёс вылэ ӧз чӧлскылэ. Со пумысен нокыӵе документъёс но ӧй вал. Ӟучъёс сыӵе дыръя шуо: лушкаськись кутэмын ӧвӧл бере, со лушкаськись но ӧвӧл. Зэм, калык пӧлын кемалась верасько ини районлэн "аныкаезлэн" ("матушка" шуыса Г. Баталоваез оло яратыса-гажаса, оло серем пыр нимало интыосысь кивалтӥсьёс) сьӧлыкамез сярысь. Но верам - со верам гинэ, уж ӧвӧл ай. Шонергес пусйыса, туэ тулысозь ӧй вал на. Табере тани луиз со уж. Уголовной. Районысь Думалэсь вазиськонзэ лыдэ басьтыса, сое ӝутӥз республикаысь прокуратура, отысь экономика удысын но кивалтонэн герӟаськем йыружъёсты сэрттон-пертчонъя отдел. Кызьы шуиз одӥг дано адями, процесс интыысьтыз вырӟиз. Мар тодмо луиз солэн, процесслэн, нырысетӥ вамышъёсысьтыз? Галина Баталовалэн Дэри (Завьялово) черкогуртысь музъем участоказ 1996 арысен лэсьто юрт. Нош кинлэн со луоз - та дырозь валантэм. Огласянь учконо ке, музъемлэн (32 сотка, шулдыр ульчаын) кузёез Галина Васильевна. Мукет ласянь, со коттедж лэсьтӥсь районысь бюджет чотын. Валэктон кык пӧртэм: яке тӧро аслаз районэзлы музъемзэ сётыны малпа, яке районлэн кужыменыз пуктэм юртэз аслыз карыны медэ. 1997 арын (эн вунэтэ, коттедж со дыре лэсьтӥське ини) Г. Баталова улыны пыре Ижевскысь Холмогоров ульчаысь ньыль комнатаен (164) квадрат метр быдӟалаез) квартирае. Со понна дун тыре нош ик район. Нош аслаз балансаз та дырозь ӧз басьты на. Юан кылдэ: кызьы, малы район кузьма квартира аслаз тӧроезлы? Оло, "аныкай" луэмез понна гинэ? Нялтас вераса, таӵе юан солы сётэмын вал ар талэсь азьло, районысь Думалэн организационной сессияз, кудаз туж лэчытомиз Баталоваез тӧрое кельтон пумысен югдур. Соку Галина Васильевна номыр вераны ӧз быгаты: дась, пе, ӧвӧл валэктон сётыны. Со понна туж етӥз куаразэ сётӥз районысь прокурор А. Перевощиков. Ӝот-ӝот, шара лыдӟиз Г. В. Баталовалэн семьяез улон интызэ умоятонлы кулэяське шуыса справказэ. Зэм но, кулэяське но, дыр. Вылаз ик, верамзыя, солэн семьяез пичи ӧвӧл. Но со гинэ шат кулэяське улон интылы? Собере, малы одно ик городысь квартира басьтоно вал? Мон нимысьтыз ӧй тыршы ӵошатыны Холмогоров ульчаысь но Дэриысь квартира дунъёсты, но, малпасько, Дэриын соос шӧдскымон пичигес шуыса. Одӥгез лыдпус тодмо ик: Баталовалэн городысь квартираез понна бюджетысь тыремын 524 миллион манет. Нялтас вераса, Галина Васильевналэн 1997 арын но вал, али но вань Дэриысь Механизаторъёслэн посёлоказы вань куронъёслы тупась улон интыез. Вамыштом азьлань "процесслэн" ӧретӥз. Республикаямы тужгес но кулэяськисьёсызлы улон инты лэсьтыны яке басьтыны льготной кредитъёс сётъяло. Тужгес но кулэяськисьёсызлы гинэ, коньдон угось уг тырмы. 1993 арын Г. Баталовалы 15 миллион манет кредит висъяло. 1997 арын "аныкай" кинлэсь ке висъямзэ уг витьы ни. Аслыз 30 миллион манет кредит сётон сярысь косон ачиз гожтэ. Кызьы верамы вал ини, солэн со дырлы вал Дэриын улон интыез, Холмогоров ульчаын квартираез но участоказ лэсьтӥськись коттедж, кудзэ туннэ-ӵуказе вуттозы ини. Та кык улон интыос понна коньдон тырисез - бюджет. Озьыен, берлозэ кредит басьтыкуз, Г. Баталова, улон интылы но, сое лэсьтыны яке басьтыны коньдонлы но уг ёрмы вал. Кытчы бен кутӥз со коньдонзэ? Мон тодэмъя, висъям кредитъёсты кулэезъя (улон интылы гинэ) кутонэз эскерыса возе Правительстволэн одӥгез ёзэз - Архитектурая но лэсьтӥськонъя кун комитет. Уг уг ке янгышаськы, коньдонлэн кузёез но - Сбербанк. Мар бен луыса кошке? Та гажано учреждениосысь эшъёс ваньзэсты заёмщикъёсты огкадь эскеро-а, мар- а? Кредитъёс пумысен тунсыко бумагаен тодматскыны удалтӥз. 1998 арын 1 апрелёзь ӝыны ар куспын кредитъёс висъямын: Завьялово районлы - 1 миллион 177,2 сюрс манет, Индустриальной районлы - 368,5 сюрс манет, Устиновской районлы - 418,7 сюрс манет. Тӥни сыӵе лыдпусъёс. Нош ик коньдон сярысь. 1996 арын Г. В. Баталова районлэн бюджетысьтыз Киясово районлы 40 миллион но Можга районлы 300 миллион манет сётон сярысь косон гожтэ. Пунэмен, куать толэзьлы. Пунэмасьёс тыриськонзэс берыкто 1998 арын гинэ, сое но ваньзэ коньдонэн уг, сиён-юонэн но мукет вузъёсын. Со дыре нош Завьялово районысь дышетӥсьёс забастовкаос ортчыто, сютэм улон яло. Прокуратураын ужасьёслэн малпамзыя, Баталовалэн вылӥ верам сьӧлыкъёсыз ваньмыз пӧлысь ог люкетэз гинэ. Тросэз соос шараяськыны быгатозы Коньдон ужпумъёсъя министерстволэн контрольно-ревизионной управлениезлэн эскеронэз бере, кудӥз матысь дыре йылпумъяськыны кулэ. Соку ини прокуратура саесъёссэ пужалляса басьтӥськоз сэрттон-пертчон борды. Бадӟым кужымъёс солэсь киоссэ ӧз сьӧлталэ ке, кызьы шуиз отысь одӥгез кивалтӥсь. Нош сыӵе кышкытлык вань. Котьма шу но, умой ик вылэм районлэн "аныкаез" луыны. Уката но - йыр вадьсад люкаськись пилемъёслы огинэ кариськыны вылӥын пукись оскымон эшъёс уг сёто ке... Кема меда витём на гудыриез? Г. КОРЯКОВ. Инкуазез эскерисьёс иворто Туэ 8-тӥ-11-тӥ июне Екатеринбургын "Урал-экология-Техноген-99" калык куспо адӟытон но научно-практической конференция ортчоз. Ужрад сӥземын котырысь инкуазез утён ужпумъёслы. Вераськон мыноз инкуазь узырлыкъёсты валаса кутон, улон-вылонысь кылем-мылемъёсты чылкытатон, омырез кырсёмытонлэсь утён, котырысь инкуазез чакласа возён но адямилэн ужаменыз валче солэсь чылкытлыксэ эскерон (мониторинг) сярысь но мукет. Инкуазез утён удыслы сӥзем конференцие берло дыре котьку пырисько шаерысьтымы бадӟым промышленной предприятиысь инкуазез утён понна кыл кутӥсь специалистъёс, инкуазез утёнъя улосвылъёсысь комитетъёсын ужасьёс, научно-исследовательской институтъёсысь тодосчиос. Таӵе адӟытонъёсын учёнойёс но специалистъёс тодмато выль технологиосын, шуом, заводъёсын уже кутэм вуэз чылкытатонъя выль амалэн. Кылсярысь, Ижевскысь радиозаводын ужасьёс 90-тӥ аръёслэн кутсконазы вуылӥзы техникаез возьматонъя Ригаын ортчись одӥгаз адӟытонэ. Отысь соос асьсэ дорын выль технологиез пыӵатыны юрттӥсь оборудование басьтӥзы. Со амал кылем-мылем суретысь ыргонэз порошок карыса поттыны юрттэ. Установка али ке но ужа на. Ыргонэз радиозавод уже кутэ, нош адямилэн тазалыкезлы кышкытлык ваись суретъёс заводысь васькись вуэ туж ичи люкасько ни. *** Удмурт Республикаысь Инкуазез утёнъя кун комитет "Экологический бюллетень" нормативно-правовой сборниклэсь куинь номерзэ поттӥз ни. Сузьетъёсысь асьсэ ужан удыссыя пайдаёзэ шедьтозы промышленной предприятиосын, инкуазез утён удысын ужасьёс но тодосчиос. Сборнике сётэмын кылем-мылемъёсты люкан, утялтон но быдтон сярысь нормативъя документъёс, калыкез но улосвылъёсты кышкыт учыръёслэсь утён но мукетыз. Кылем-мылемъёсты утялтон, омырез но вуэз кырсёмытонлэсь утён ужпум Удмуртия понна бадӟым инты басьтэ. Россия Федерацилэн "Производствоысь но улон-вылонысь кылем- мылемъёс сярысь" Федеральной законэз печатлам сяна, сборниклэн огаз номераз интыямын кылем-мылемъёсыз тупен-тупен радъян сярысь валэктон. Асьсэлы кулэ тодонъёс татысь синйылтозы пуны но коӵыш возисьёс. Тросэз-а меда тодо, соослэн ньыль пыдо эшсы кулэм бере одӥг сутка дыр куспын со сярысь ветеринарлы ивортыны кулэ шуыса. Со гинэ вералоз, кызьы но кытчы ватыны луоз мискиньлэсь шӧйзэ. Промышленной предприятиосысь инкуазез эскерыса возись специалистъёс тодматскозы инкуазез кырсёмытэм но мукет урод ужъёс понна штраф тыронлэн радэныз. Инкуазьлы но калыклэн тазалыкезлы кышкытлык ваё зол ӵашетон, зуркан, электромагнитлэн пиштэмез. Огаз сузьетын сётэмын Россия Федерациысь Госкомэкологилэн Россия Федерацилэн улосвылаз омырысь озонэз кулэстӥсь-быдтӥсь веществоосты ваён (озьы ик Россиысь поттон но) радлык. Соя пӧртэм продукциез - холодильникысен кутскыса аэрозольёсын йылпумъяса - контрактын верамлэсь тросгес вуттыны лэземын ӧвӧл. *** Жингырты "Вож телефонъя"! Республикаысьтымы тросаз ёросъёсын меӵак "вож телефон" пыр кенешон усьтэмын. Ваньмыз со радъяське инкуазьлы кышкытлык кылдонлэсь утиськонъя нуналъёсты пусъемен валче. Куатетӥ арзэ ни соос Удмуртиын ортчыло котькуд тулыслы будэ. Озьы лэсьтӥське инкуазез утён уже тросгес калыкез кыскон понна. Туэ сыӵе уж нуиське ни март толэзьлэн пумысеныз, нош йылпумъяськоз 5-тӥ инвожое, Инкуазез утёнъя калык куспо нуналэ. Соин валче инкуазез утёнъя ёзъёслэн ёросъёсысь комитетъёсаз ужрадъёс чакламын. Ортчозы улон интыез чылкытатонъя субботникъёс, пичи шуръёслэсь ӧрзэс но ошмесъёсты сузян, писпуос но куакъёс мерттон. Эскерись ёзъёс акция ортчытон вакытэ ӵош чакланы медо юон вулэсь чылкытлыксэ, ву котырысь утиськись но вож зонаосты. Тросэз комитетъёс чаклало ёросъёсын потӥсь газетъёсын умой кусып возьыны, экологилы сӥзем нимаз рубрикаос усьтыны. Кез, Камбарка но Сарапул ёросъёсысь изданиосын пото ини сыӵе рубрика улын мынӥсь материалъёс. Сяме пыӵазы ини экологилы сӥзем гужем лагерьёс. Соос ортчытӥсько ёросъёсысь но республикаысь инкуазез утёнъя ёзъёслэн юрттэменызы. Тросэз пиналъёс сыӵе лагерьёсын инкуазез утён ужрадъёсы асьсэос пыриськозы. Кылем арын инкуазь кышкытлыклэсь утиськонъя нуналъёс Россиын кун комитетэн умоен лыдъямын вал. Оло, туэ ортчытоно ужрадъёсмы мукет улосъёс понна адӟем карымон луозы. Н. ЩЕГОЛЕВА. Ӟечкыласьком! Инвожолэн огаз сяськаяськись нуналаз вордӥськыны тупам Завьял ёросысь Изгуртын ужась врачлы Татьяна Васильевна Тереховалы. 5 июне со пусъёз асэсьтыз юбилейзэ. Акушер-гинеколог нылкышноосты эмъюмъёсын гинэ уг йӧнаты, со котькудӥзлы визьмо дэмланъёс сётэ но шуныт кылъёсын буйгатэ. Татьяна Васильевна ас удысаз ялан выль амалъёс утча. Солэсь ужамзэ учкыны америкаысь но ветлӥллям ини. Чырмыт нылкышно дыр шедьтэ калык пӧлын валэктон уж но нуыны, удмурт культурая обществолэн ужаз но пыриськыны. Кин уг тоды "Италмас" ансамбльлэсь кивалтӥсьсэ Анатолий Васильевич Мамонтовез. Ӵапак та выжыысь ик Татьяна Васильевна но. А гаез сямен ик со синмаськымон ужъёсыныз тырше удмурт калыклэсь данзэ ӝутыны. "Удмурт дунне" газетлэн редакциез ӟечкыла Татьяна Васильевнаез вордӥськем нуналэныз, сӥзе солы ӟеч мылкыд но бадӟым вормонъёс. Удмурт Республикаысь Кун Кенешлэн гурт удысъя, музъем кусыпъёсъя но инкуазь узырлыкъёсты утёнъя но соосты кутонъя ялан ужась комиссияз адямиосты быръён сярысь Удмурт Республикаысь Кун Кенешлэн Постановлениез Удмурт Республикаысь Кун Кенеш пуктэ: Удмурт Республикаысь Кун Кенешлэн гурт удысъя, музъем кусыпъёсъя но инкуазь узырлыкъёсты утёнъя но кутонъя ялан ужась комиссияз быръёно таӵе адямиосты: Возисов Виталий Михайловичез - быръёнъя 94 номеро Сюмси ёрос округысь депутатэз, Горбунов Виктор Дмитриевичез - быръёнъя Сарапулысь 62 номеро Набережной округысь депутатэз, Кудрявцев Владимир Сергеевичез - быръёнъя 86 номеро Красногорск ёрос округысь депутатэз, Лапин Анатолий Николаевичез - быръёнъя Воткинскысь 54 номеро Привокзальной округысь депутатэз, Малков Аркадий Трофимовичез - быръёнъя 84 номеро Кизнер ёрос округысь дуптатэз, Малюк Михаил Семеновичез - быръёнъя Сарапулысь 65 номеро Гончаровской округысь депутатэз, Молчанов Александр Михайловичез - быръёнъя Ижевскысь 20 номеро Центральной округысь депутатэз, Никитин Валериян Арсентьевичез - быръёнъя Завьялово ёросысь 75 номеро Камской округысь депутатэз, Першин Александр Васильевичез - быръёнъя Глазовысь 52 номеро Институтской округысь депутатэз, Першин Петр Александровичез - быръёнъя 71 номеро Глазов ёрос округысь депутатэз, Сорокин Николай Борисовичез - быръёнъя Глазовысь 51 номеро Центральной округысь депутатэз. Удмурт Республикаысь Кун Кенешлэн Тӧроез А. А. Волков. Ижевск город, 1999 арын 25 мае � 39-ИИ. Москвае кошкизы Туннэ странамылэн шоркараз усьтӥське Россиысь этнографъёслэн но антропологъёслэн куинетӥ конгрессы. Солэн ужаз пыриськон вылысь, Москвае кошкизы Удмуртиысь но тодосчиос. Соослэн научной докладъёссы чузъяськозы пӧртэм секциосын, бӧрысь огъя сборнике пыртэмын луозы. И. КРИЧЕВ. Удмурт Республикаысь Кун Кенешлэн Наукая, дышетонъя, культурая но егитъёсын ужан политикая ялан ужась комиссияз адямиосты быръён сярысь Удмурт Республикаысь Кун Кенешлэн Постановлениез Удмурт Республикаысь Кун Кенеш пуктэ: Удмурт Республикаысь Кун Кенешлэн Наукая, дышетонъя, культурая но егитъёсын ужан политикая ялан ужась комиссияз быръёно таӵе адямиосты: Касимов Энвиль Владимировичез - быръёнъя 67 номеро Балезино поселковой округысь депутатэз, Кочетков Владислав Анатольевичез - быръёнъя Воткинскысь 48 номеро Заречной округысь депутатэз, Кудинов Валентин Ивновичез - быръёнъя Воткинскысь 43 номеро Пугачевской округысь депутатэз, Марченко Анатолий Владимировичез - быръёнъя 72 номеро Грах ёрос округысь депутатэз, Образцова Нина Андреевнаез - быръёнъя 66 номеро Алнаш ёрос округысь депутатэз, Рыбаков Роберт Юсуфовичез - быръёнъя Сарапулысь 60 номеро Прикамской округысь депутатэз, Соловьев Виталий Александровичез - быръёнъя 69 номеро Вавож ёрос округысь депутатэз, Ходырев Валерий Васильевичез - быръёнъя Ижевскысь 14 номеро Чайковской округысь депутатэз, Чувашов Николай Федоровичез - быръёнъя Ува южной округысь депутатэз. Удмурт Республикаысь Кун Кенешлэн Тӧроез А. А. Волков. Ижевск город, 1999 арын 25 мае. � 38-ИИ. Матэкто милицилэн нуналъёсыз Туэ республикаямы сизьыметӥзэ ортчозы ини Милицилэн нуналъёсыз. Соос пусъемын 9-12 июньлы. Вуоно ужрадлы сӥземын вал Югдурез утёнъя министрлэн воштӥсезлэн Григорий Фалалеевлэн журналистъёсын пумиськонэз. Шулдыръяськонъёс кутскозы Ижевскысь Шор площадьын 9 июне 18 час 30 минутэ. Татын луоз строез учкон, егит милиционеръёс присяга кутозы, тужгес но устооосыз Россиысь МВД-лэн наградаосыныз но синпель кузьымъёсыныз пусъемын луозы. 10-тӥ июне шулдыр ужрадъёс нырысьсэ ортчозы Глазовын. Нош йылпумъяськоз праздник 12-тӥ июне Ижевскысь "Газовик-Газпром" (азьвыл "Зенит") стадионын. Нялтас вераса, соку ик ортчоз Городлэн нуналыз но. Праздник нуналъёсы ортчозы пӧртэм ужрадъёс: прикладной удысъёсъя ӵошатсконъёс, эстафета, тэтчалозы парашютистъёс, луоз фейерверк. Люкаськемъёсты шулдыртозы эктӥсьёс но кырӟасьёс, музыкантъёс. Нялтас вераса, туэ асьме доры куное лыкто Татарстанысь но Свердловск областьысь милиционеръёслэн духовой оркестръёссы. Кызьы пусйиз министрлэн вштӥсез, милицилэн нуналъёсыз ортчытӥсько калыкен ӟечгес кусыпъёс тупатон, солэсь ужзэ яркытгес возьматон понна. Ортчоно праздник сӥземын Россиысь МВД-лы 200 ар тырмонлы. Г. ТИХОНОВ. ПОЛИТИКА Нунал пӧрат буша мандат Кун Кенешысь депутаъёс уг быгато кун властьлэн быдэсъясь органъёсаз должносте кутэмъёс луыны - тазьы гожтэмын асьме республикалэн конституциезлэн 78-тӥ ёзэтаз. мукет сямен вераса, представительной но исполнительной властез люкиськом бере, депутатэз, шуом, министре яке правительствоысь мукет уже юнмато ке, со депутат полномочиослэсь люкиськыны кулэ. Майлэн пумаз Ижысь Дума Устинов ёрослэн администрациезлы кивалтӥсе выльысь юнматӥз Геннадий Останинэз. Быдэсъясь ёзын-а ужано, мандатэн-а кылёно шуыса малпаськемез бере, со асьме парламентлэн депутатэзлэсь полномочиоссэ дугдытоно кариськиз. Озьыен, 40-тӥ округысь мандат бушаз. Отын матысь дыре выль быръён радъяно луоз. Кин ке дэмла та ужрадэз 12-тӥ сентябре ортчытыны, кин ке оскыса учке Кун Думае депутатъёсты быръён нунал (19-тӥ декабрь) шоры. Озьы-а, тазьы-а - тодмо огез - ар пумозь та округысь мандат мукет адями киын луоз ни. Быръён нуналэз тупатоз Удмурт Республикаысь быръён комиссия. Лыдӟисьёслэн тодазы вайытэм потэ. 40-тӥ округын туэ тулыс вылтӥ вить мурт нюръяськиз. Геннадий Останин, 1740 куара люкаса, 50 номеро школалэсь директорзэ Наталья Судариковаез ог 400 куаралы азьпалтӥз. Та кышномурт нырысетӥ ӧтчамын депутат вал. Котьку сямен шара дурбасьтылӥз Александр Волковлы, нош выляз быръёнэ потӥз компартилэн флагез улсын. Оло озьы шонаськемез, оло маке но мукетыз люкетӥз мандат басьтыны - вераны шуг. Мон сямен, бадӟымез мугез герӟаськемын та округъя ик ортчем кандидатэн бускель школаысь дышетӥсен Наталья Радионоваен. Анай-атайёслэсь но музон бырйисьёслэсь куараоссэс соос шори люкизы, озьы огзы но ӧз ворме. Малпан вань, та кышномуртъёс мандат понна нюръяськонэ выльысь пыриськозы шуыса. Сударикова (вылӥысь юрттэмъя) быгатӥз ке "эшсэ" буйгатыны, мандат басьтыны луонлыкез уже кутытэк уз кельты. Валамон, дыр трос на бере, мукет но кандидатъёс шедёзы на, но таосызлэн, кызьы шуо, кидыссы бусые киземын ни тулыс вылтӥ ик. Ижысь 18-тӥ округ но бушаз. Егит ужбергатӥсь Сергей Чикуров Правительствое ужаны выжеменыз валче, мандатэзлэсь мозмытсконо луиз. Сыӵе югдур городын. Но таосызлэсь азьло ас интызэ бушатӥз ни вал 98-тӥ Юкаменск округъя депутат Юрий Питкевич. Сое уго юнматӥзы Правительстволэн тӧроезлы нырысетӥ воштӥсе (та дырозь но отын ужамын). Куд-огез пайме но: малы, пе, кулэ вал солы мандат? Сыӵе вамышлэсь мугзэ валэктыны луэ кадь. Нырысетӥез потэ адямилэн аслэсьтыз кужымзэ возьматыны тыршемез бордысь: тани учке, мон мукет политикъёслэсь пӧртэм ӧвӧл, со мандат пӧлысь одӥгез - кисыям. Кыкетӥез. Котькуд депутат куаралэн дуныз тужгес но бадӟым луэ нырысетӥ сессиын, куке пӧртэм ярдуръёсын сылӥсьёс азьпала асьсэлэсь азьветлӥсьёссэс поттыны тыршо. Озьы вал ньыль ар талэсь азьло, куке Александр Волков уй ӵоже кӧня ке муртэ ас палаз берыктыны быгатӥз. Пӧртэм ӧз луы туэ но. Кызьы тодӥськоды, со вормиз, 55 куара люкаса. Вить адями Удмуртилэсь вуонозэ бырйиз, шуыны луоз. Депутатъёслэн куараоссы туж дуно вал мукет кивалтӥсьёсты бырйыку-юнматыку но. Соин но валэктыны луоз Юрий Питкевичлэсь мандат понна бызьылэмзэ. Куинетӥез муг азьпала улонэн но герӟаськемын. Россиысь бадӟым кивалтӥсьёслэсь ӵем вошъяськемзэс асьме политикъёсмы адӟытэк уг уло ук. Соин азьло ик "небыт валес" дасяло. Кин тодэ, кытчы шедёд ӵуказе. Марысь мар ке, кыедам бусыед ки улын медло. Округысь кузёосын эшъяськемед кондонэз, кужымез кыске ке но, ӟеч улонлы дышон дуногес сылэ уго. Юрий Питкевичен ӵош Юкаменск ёросын но Яр ёрослэн ог люкетаз нюръяськиз "Удмртские семена" кун предприятилэн кивалтӥсез Виктор Макаров. Таизлы дурбасьтӥз "Удмурт кенеш" но. Мыноз-а со выльысь шудзэ утчаны? Уг, шуэ. Но сӥзьылозь дыр вань на, соглаш кариськоз, вылды, округе берытскыны. 27-тӥ мае тодмо луиз на мандатсэ ӝӧк вылэ понэм муртлэн нимыз. Со Валерий Загайнов, Николай Ганза та адямиез ӵектэ вал аслыз воштӥсе. Но депутатъёслэн куараоссы сыӵе решение кутыны ӧз тырме. Кызьы гожтӥз со бере Ижысь одӥгез газет, "политическая бесхребетность Загайнова настолько стала одиозной, что у большинства депутатов это выразилось в избирательной аллергии..." Озьы ке но, Александр Волков эшсэ вылӥе ӝутон малпанлэсь ӧз куштӥськы. Сессилэн огаз кенешоназ ӵектэмын вал Правительство сярысь законэ воштон пыртыны: кулэ ӧвӧл, пе, жилкомхозъя нимаз воштӥсь, выль министерство гинэ кылдытоно. Депутатъёс "ньылӥзы". Кинлы ке со гинэ кулэ вал - уго министрез Правительстволэн кивалтӥсез огназ юнматыны быгатэ. Со озьы ик кариз - Загайновлы портфель сётӥз. Тӥни сыӵе, ява, политика гурезе сюрес... Я, Селта мандат бушаз. Азьлоез депутат но, Кун Кенешлэн кивалтӥсьёсыз но, вератэк валамон ни, тыршозы "пась" округе асьсэ адямиез пуктыны. Нош ик Ижысь кандидат ваёно ке, гурт бырйисьёс сыӵе муртэ палэнтыны но быгатозы. Озьыен, утчано ёросысь. Кинэ? Малпасько, куд-ог адямиосын ужано ни. Гужем вылтӥ соослэн нимъёссы тодмо луозы. асьмеос кызьы ке изьыса медам кыле вал... Тӥни озьы: ньыль округын нюръяськон выльысь пуромоз. Быръён ортчиз - быръён матэктэ. Куддыр малпаськод, соос ӧй луысалзы ке, улонамы шулдырез ик ӧй луысал, дыр. Концерт но ӧй возматъясалзы, кузьым но ӧй сётъясалзы, вераськон муг но ӧй шедьысал ни... Серекъясько. Быръён кулэ. Но солэсь кулэгес та ужрадэз законъя, чылкыт киын ортчытон. Соку сомында дыр но коньдон быдтэммы пайдаен берытскоз. ИВАН ЛЕБЕДЕВ. Удмурт Республикаысь Кун Кенешлэн Улон-вылонэз радъян политикая ялан ужась комиссияз адямиосты быръён сярысь Удмурт республикаысь Кун Кенешлэн Постановлениез УдмуртРеспубликаысь Кун Кенеш пуктэ: Удмурт Республикаысь Кун Кенешлэн Улон-вылонэз радъян политикая ялан ужась комиссияз быръёно таӵе адямиосты: Ворончихин Николай Вениаминовичез - быръёнъя 82 номеро Кез ёрос округысь депутатэз, Каимов Кирим Фаттахутдиновичез - быръёнъя Глазовысь 55 номеро Южной округысь депутатэз, Одиянков Евгений Германовичез - быръёнъя Ижевскысь 29 номеро Сосновской округысь депутатэз, Семенов Игорь Николаевичез - быръёнъя Можгаысь 57 номеро Короленковской округысь депутатэз, Сологуб Валерий Макаровичез - быръёнъя Сарапулысь 64 номеро Электрозаводской округысь депутатэз. Степнова Зоя Ивановнаез - быръёнъя Ижевскысь 28 номеро Школьной округысь депутатэз, Чуршин Алексей Дмитриевичез - быръёнъя Ижевскысь 39 номеро Школьной округысь депутатэз. Удмурт Республикаысь Кун Кенешлэн Тӧроез А. А. Волков. Ижевск город, 1999 арын 25 мае. � 37-ИИ Улысал ке сю аресозь... Удмурт шаер ӟеч мылкыдын пусйиз быдӟым аспал эшмылэн дано маршаллэн Фёдор Фалалеевлэн вордскемез дырысен сю ар тырмонэз. Можга улосвылын будэм но кыдам адямилы сӥзем ужрадъёс ортчизы солэн ас палъёсаз. Со сяна - Ижын. Дано маршалэз буре ваён нуналэ Удмурт кун филармонилэн юртаз люкаськылӥзы та адямиез но солэсь ӵыжы- выжыоссэ ӟеч тодӥсь муртъёс, ожысь но ужысь ветеранъёс, литература, искусство, культура удысъёсын тыршисьёс. Трос тунсыкозэ но кылзымонзэ веразы дано маршаллэн вынызлэн пиез Пётр Фалалеев, ожысь но ужысь ветеран Мария Каргашина, Фёдор Фалалеевлэн аспал адямиез нырысетӥ классъем лётчик Василий Беляев, пинал лётчикъёслэн школаысьтызы дышетӥсь Тамара Торохова, шаерысьтымы ожысь но ужысь ветеранъёслэн кенешсылэн тӧроез Михаил Зыков. Ӝытлэн кыкетӥ люкетаз аспал эшмес сӥлазы-бурлазы Ижысь 73-тӥ школаын дышетскись пиналъёс. Люкаськем калыклы соос выльысь мадизы та дано батырлэн пинал дырыз, быдэ вуон но кыдан вакытъёсыз сярысь. Маршаллы сӥзьыса ик та школаын кылдытэмын синпель сэрег. Со сярысь дугдылытэк сюлмаське татысь дышетӥсь Раиса Сонина. Фёдор Фалалеев сярысь ӟеч кылбур но кырӟан гожтэм шаерысьтымы тодмо крезьгурчи Россия Федерациысь искусствоосъя дано ужась Геннадий Корепанов-Камский. Котьку сямен ик таяз учыре но чебер куараенызы, усто кырӟаменызы шумпоттӥзы ог- огзылэсь люконтэм эшъёс - Удмурт Элькунысь калык артистъёс Николай Копысов, Вячеслав Фатеев но Николай Вахрушев. Удмурт Элькунысь калык артистка Валентина Пудова данаксэ бӧрӟытӥз, дыр. Быдэс ӝытэз нуиз крезьгурчи Удмурт Элькунысь искусствоосъя дано ужась Евгения Копысова. Сӥё-дано ужрадэз ортчытонэ пыриськизы Удмурт Элькунысь Кун Кенешлэн Тӧроезлэн нырысетӥ воштӥсез Павел Вершинин но Удмурт Элькунысь Кивалтэтлэн Тӧроезлэн воштӥсез Виктор Шудегов. Микрофон дорын - Удмурт Элькунысь военком генерал-майор Геннадий Барсков. Фёдор Фалалеевлэн вынызлэн пиез Пётр Фалалеев. Дано маршал. Владимир Камашевлэн туспуктэмъёсыз. Удмурт Республикаысь Кун Кенешлэн Бюджетъя, вытъёсъя но коньдон ужпумъёсъя ялан ужась комиссияз адямиосты быръён сярысь Удмурт Республикаысь Кун Кенешлэн Постановлениез Удмурт Республикаысь Кун Кенеш пуктэ: Удмурт Республикаысь Кун Кенешлэн Бюджетъя, вытъёсъя но коньдон ужпумъёсъя ялан ужась комиссияз быръёно таӵе адямиосты: Авзалов Рустем Альбертовичез - быръёнъя Ижевскысь 7 номеро Индустриальной округысь депутатэз, Боровик Юрий Ивановичез - быръёнъя 100 номеро Яр ёрос округысь депутатэз, Городилов Сергей Аркадьевичез - быръёнъя Ижевскысь 17 номеро Университетской округысь депутатэз, Забродина Людмила Ивановнаез - быръёнъя Ижевскысь 13 номеро Лесозаводской округысь депутатэз, Загайнов Валерий Федоровичез - быръёнъя 93 номеро Селта ёрос округысь депутатэз, Каримов Равиль Мухаметовичез - быръёнъя Можгаысь 58 номеро Авторемзаводской округысь депутатэз, Молчаов Сергей Михайловичез - быръёнъя Ижевскысь 6 номеро Халтуринской округысь депутатэз, Наумов Игорь Юрьевичез - быръёнъя Ижевскысь 37 номеро Нефтяной округысь депутатэз, Соловьев Александр Васильевичез - быръёнъя 68 номеро Балезино гурт округысь депутатэз, Суркин Валерий Сергеевичез - быръёнъя Ижевскысь 33 номеро Ворошиловской округысь депутатэз, Фридрих Валерий Леонидовичез - быръёнъя Воткинскысь 42 номеро Березовской округысь депутатэз. Удмурт Республикаысь Кун Кенешлэн Тӧроез А. А. Волков. Ижевск город, 1999 арын 25 мае � 31-ИИ. Быдӟым Пушкинлы сӥзьыса Операя но балетъя театрын 4-тӥ инвожое ортчиз Александр Сергеевич Пушкинлэн вордскемез дырысен 200 ар тырмонлы сӥзем сӥё-дано ӝыт. Быдӟым гений кысӥсьтэм, со вань дауръёслэн но калыкъёслэн кылбурчизы. Та малпанэз котькудӥз ас сяменыз усьтыса вераськизы Кун Кенешлэн Тӧроезлэн нырысетӥ воштӥсез Павел Вершинин, Кун Кенешысь Наукая, культурая но калыкез дышетонъя комиссилэн кивалтӥсез Алексей Красильников, Удмурт Республикаысь Правительстволэн Тӧроез Николай Ганза. А. С. Пушкинлэн дунне культураын кыӵе инты басьтэмез но солэн аслаз дунне шоры учкемез сярысь ивортӥзы филология наукаосъя кандидатъёс Зоя Богомолова но Виктор Чулков. Татын ик быдӟым поэтлы сӥзем сочинениосъя, лыдӟонъёсъя вормисе потэмъёслы кузьымъёс сётэмын. Соос пӧлын - Ижевскысь Ксения Владыкина, Елена Гуц, Воткинскысь Сергей Пузанов, Каменное черкогуртысь (Завьял ёрос) Юрий Егоров, Вуж Моньялась (Пичи Пурга) Ольга Никитина но мукетъёсыз. Сӥ-бур карон ӝыт бере Операя но балетъя театр возьматӥз "Алеко" спектакльзэ. С. Рахманиновлэн та одӥг актъем операез гожтэмын А. Пушкинлэн "Цыганы" поэмаезъя. Бадӟым шулдыръяськон арня нуналэ ортчиз Национальной музейлэн азбараз но. Татчы лыктэмъёс адӟизы "ассэ" Пушкинэз но, бадӟым балэз но - кылбуръёс пӧлы выйылӥзы, крезьгуръёслэсь ӧз ӵыдылэ... Нылпиослэн Пушкинлы сӥзем балазы. Скрипкаен шудо крезьгуръя училищеысь нылъёс. В. Камашевлэн туспуктэмъёсыз. Шур дурын, гуждор вылын... Кызьы тодмо, нырысетӥ удмурт грамматикаез кылдытӥз но 1775-тӥ арын печатлаз Казаньысь миссионер В. Г. Пуцек-Григорович. Гурт калык доры сюресэз кузь вал. Малы ке шуоно, удмурт гуртъёсын школаос усьтӥськизы ай ортчем даурлэн пумаз гинэ но ЪЪ даурлэн кутсконаз. Валамон ини: гуртъёсын улӥсьёс нокыӵе календарьёсты ӧз тодылэ. Йылолъёссэс, праздникъёссэс инкуазез чакласа ортчытъязы. Куазь шоры уката ик зол учкылӥзы бусы ужъёс но вӧсяськон йылолъёс дыръя, луд вылэ, возь вылэ, шур дуре потакузы. Кенешо властьлэн нырысетӥ аръёсаз но калыкмы трос гуртъёсын йылолъёссэ куазез чакласа ортчытъяз. Гуждор вылэ, возь вылэ потылӥзы Акашка дыръя. Куддыр - Виль дыръя. пӧртмаськыку коркась корка ветлылӥзы, шулдыръяськылӥзы, Быдӟым Октябрь нуналъёсты пусйыку но. Огласянь со умой вал. Малы ке шуоно, кык праздникез пусйыку но соин валче одӥг нуналэ юмшаку, сиён-юон но, дыр но ӧжытгес бырылӥз, вылӥ кивалтӥсьёс но ӧз пыкылэ, ӧз пумитъяськылэ, удмурт йылолъёсты тодэ ваем но вӧсяськем понна. Вашкала дыръя удмуртъёс понна выль ар кутске вылэм тулыс. Зэм но, та вакытэ котьма улӟе - будосъёс но, вань лулосъёс но. Лудэ гырыны-кизьыны потон дырозь нылкышноос черсон, куиськон, керттӥськон ужъёссэс одно ик йылпумъяны туртто вылэм, пиосмуртъёс вань кизён тӥрлыкъёсты дасяллязы. Оштолэзе лымы ӝог шуна. Шунды вылэ но вылэ ӝутске. Куазь чеберске. Кунян ваем скалъёс тросгес йӧл сётыны кутско. Тулыс ӝужась инкуазь котькинлы кыӵе ке но оскон вае: угось та дыре адями улонысьтыз вань уродзэ, кулэ луымтэзэ ортчем нуналъёсы кельтыны турттэ. Соин ик инмарлы, кулэм ӵыжы-выжыосызлы сӥзьыса, пудо вандэ но сӥльын ӝук пӧзьтэ, табань, перепеч, мильым, пӧртэм пушкесо кутэмнянь пыже, сур пӧзьтэ. Ваньзэ сое вӧсяськон лудын, шур дурын Быдӟым Инмарлы куриськыса-вӧсяськыса сие-юэ. Тулыс куазь котькуд аре одӥг кадь уг луы. Соин ик куддыръя вашкала йылолъёс одӥг дырегес укшало вал. Вӧй, Дӧдьы куштон, Йӧ келян ӵапак сыӵеесь. Та праздникъёслэн куд-ог тодметъёссы но одӥг кадесь. Тани, шуом, дӧдьыен ворттылон-нискылан, кылем лымыын погылляськон, ӟечыран, пучыен шудон, вӧсяськон. Вӧй дыръя ӟазег сӥльын ӝук пӧзьто, выль скал вӧен котькыӵе сиён-юонэз ческытато, кутэмнянь пыжо. Дӧдьы куштон дыръя но озьыгес ик пӧраськылӥллям. Сиемзы-юэмзы, вӧсяськемзы бере, вань кылем-мылем, кулэтэм арбериоссэс, вужмем дӧдьыен нуыса, кырем гопе куяло вылэм. Ӵуказеяз уробо кыткылӥллям ини. Тулыс праздникъёс пӧлысь одӥгез чеберез-шулдырез - Йӧ келян. Сое шур дурысь гуртъёсын Инмарлы зол оскисьтэмъёс но шӧдытэк уг кылё. Калмез - асьме шаерысь одӥгез бадӟымез шур. Сюмси ёросысь Вылынгурт, Ӵашкагурт палтӥ ортчыкуз, солэн пасьталаез 50-70 метр луэ, нош йӧ кошкыку, тудву дыръя - ог ӝыны иськем но. Йӧ вырӟыку, шур туж зол шаугетэ. Куараез уин но та палась улӥсьёсты сайкатэ. Куддыръя йӧ кошке вить но, сизьым но нунал. Валамон ини, сое келяны, шурлэсь сюанзэ учкыны вань гурт калык люкаське. Сьӧразы куд-огез сиён-юон но вайыны уг вунэто. Али вӧсяськонъёс вуно ке но ини, калыклы шундыё гурезь бамалын валче туж шулдыр - лумбыт кошкемзы уг поты. Вырйылын угось гуждор но вожектэ ини, интыен- интыен вазь ӝужась сяськаос но адскыло. Йӧ вырӟон нуналэз мӧйыос азьвылгес ик шӧдо вылэм ини. Соин ик та нунал понна мунчое пыро, пыжисько, пӧрасько. Вашкала дыръя вань лыктэмъёс сиён-юонзэс нырысь ик Бадӟым вӧсясьлэн ӝӧк вылаз пуктылӥллям. Со ваньзэ вӧсяса веръя но берен семьялы сётэ. Сиён-юонэз вӧсям бере, Бадӟым вӧсясь, шурлы пумит султыса, инмарлэсь куриське, тулыс умой мед ортчоз, тудву изъян медаз вай, пудо но адями шуре медаз вые шуыса. Котькуд ёросын асьсэ сяменгес вӧсясько вал: угось инкуазь котькытын пӧртэм. Иж котырын улӥсьёс вӧсяськылӥзы Оӵ, Лудӟи, Позимь шуръёслы. Куд-ог куриськонъёс таӵеесь вал: "Остэ Инмаре, Кылчинэ, Куазе, Юсь воршудэ, Оӵ мумые, Лудӟи мумые! Ӟеч мылкыдын лыктӥмы ярдурад нянен, сурен, чечыен, вӧен. Оӵ, Лудӟи мумыос, капчи ар, шудбур сётэ калыклы..." "Куасьмылӥсьтэм мумыос! Ву сьӧры келялэ котькыӵе висёнэз, через. Ӟеч выжытъялэ шурды вамен. Визыл бызисьёс, ю шур мумыос, нюрдэс сётэ турынлы-юлы! Турынмы ӟеч пудомылы сиыны мед яралоз. Ю-няньмы калыклы сиыны мед яралоз". Куриськемзы бере вӧсям сиён-юонэз юдэсэн-юдэсэн вуэ куяло. Кумышкаез ньӧр кузя шуре кисьто. Собере, йӧэз келяса, шур валлин васько. Кӧня ке ортчемзы бере, кырӟаса нош ик выллань тубо. Кӧс вырйылын шулдыръяськон кутске. Нырысь ик эктыны потэ вылэм вӧсясь. Нош пиос выль кенъёс котырын бергало, соосты вуэ куяны туртто. Кенъёсты маке сётытозязы уг лэзё". Шур дурын шулдыръяськемзы бере, коркась корка ветло на вылэм. Вашкала йылолъёс калыкез эшласькыса, ог-огедлы юрттыса улыны дышетӥллям. Котькуд гуртын бадӟым ужъёс азьын яке соосты быдэстэм бере, праздникъёс адямилы выль кужым, азьланезлы оскон, умой мылкыд сётылӥллям. Удмуртъёслэн йылолъёсазы номыр умойтэмез ӧвӧл, соосты тодэ ваёно, котькуд аре ортчытъяно. Вӧй, Дӧдьы куштон, Йӧ келян праздникъёс одӥг выллемесьгес бере, соосты ӵош карыны умойгес луысал кыӵе ке шур яке ошмес дурын йӧ вырӟон дыръя. Шорт миськонэн, пучы арняен герӟаськем йылолъёсты бӧлякъёсын ӵош ик ортчытъязы. Н. ВОЗИСОВ. Удмурт Республикаысь Кун Кенешлэн Промышленностья, инфраструктураез азинтонъя, вузъёсын но юрттэтъёсын рынокез кылдытонъя ялан ужась комиссияз адямиосты быръён сярысь УдмуртРеспубликаысь Кун Кенешлэн Постановлениез Удмурт Республикаысь Кун Кенеш пуктэ: Удмурт Республикаысь Кун Кенешлэн Промышленностья, инфраструктураез азинтонъя, вузъёсын но юрттэтъёсын рынокез кылдытонъя ялан ужась комиссияз быръёно таӵе адямиосты: Батанов Александр Сергеевичез - быръёнъя Ижевскысь 41 номеро Союзной округысь депутатэз, Белоголовкин Данил Ефимовичез - быръёнъя Ижевскысь 30 номеро Пролетарской округысь депутатэз, Бычков Юрий Федоровичез - быръёнъя Воткинскысь 44 номеро Центральной округысь депутатэз, Галеев Азат Таисовичез - быръёнъя Ижевскысь 22 номеро Кировской округысь депутатэз, Красноперов Геннадий Филипповичез - быръёнъя Ижевскысь 38 номеро Трудовой округысь депутатэз, Лошкарев Григорий Андреевичез - быръёнъя Ижевскысь 36 номеро Дружной округысь депутатэз, Прасолов Алексей Михайловичез - быръёнъя Сарапулысь 61 номеро Парковой округысь депутатэз, Роговец Климентий Антоновичез - быръёнъя 95 номеро Ува северной округысь депутатэз, Русских Виктор Ильичез - быръёнъя Ижевскысь 11 номеро Новостроительной округысь депутатэз, Шутов Андрей Васильевичез - быръёнъя Сарапул ёросысь 92 номеро Прикамской округысь депутатэз. Удмурт Республикаысь Кун Кенешлэн Тӧроез А. А. Волков. Ижевск город, 1999 арын 25 мае. � 35-ИИ. Удмурт Республикаысь Кун Кенешлэн Кунэз радъянъя, калыкъёс куспын политикая но интыысь аскивалтонъя ялан ужась комиссияз адямиосты быръён сярысь Удмурт Республикаысь Кун Кенешлэн Постановлениез Удмурт Республикаысь Кун Кенеш пуктэ: Удмурт Республикаысь Кун Кенешлэн Кунэз радъянъя, калыкъёс куспын политикая но интыысь аскивалтонъя ялан ужась комиссияз быръёно таӵе адямиосты: Беркутов Сергей Георгиевичез - быръёнъя Ижевскысь 35 номеро Мирной округысь депутатэз; Григорьев Михаил Алексеевичез - Быръёнъя Можга ёросысь 90 номеро Пычас округысь депутатэз; Долганов Николай Витальевичез - быръёнъя Пичи Пурга ёросысь 87 номеро Яган-Докъя округысь депутатэз; Любимов Виктор Николаевичез - быръёнъя Ижевскысь 16 номеро Холмогоровской округысь депутатэз; Перешеин Владимир Юрьевичез - быръёнъя Глазовысь 50 номеро Молодёжной округысь депутатэз; Соболев Юрий Борисовичез - быръёнъя Воткинскысь 46 номеро Школьной округысь депутатэз; Тубылов Валентин Кузьмичез - быръёнъя Пичи Пурга ёросысь 88 номеро Уром округысь депутатэз; Шаргаев Сергей Николаевичез - быръёнъя Ижевскысь 12 номеро Заречной округысь депутатэз; Шестаков Юрий Владимировичез - быръёнъя Ижевскысь 19 номеро Набережной округысь депутатэз. Удмурт Республикаысь Кун Кенешлэн Тӧроез А. А. Волков. Ижевск город, 1999 арын 25 мае � 41-ИИ. Ӝуатскозы выль кизилиос... Урамысен яке шутэтскон интыысен, тодмоосын пумиськылыкум, вераськон потэ ке кыӵе удысын кин луыса ужаме сярысь, шумпотыса шуисько: "Мон - пинал удмурт усточиослэн визьнодасьсы". Тазьы верамме кылыса, соку ик трос юанъёс сётыло. Соин ик мылкыды кылдӥз лыдӟисьёсты толэзьлы быдэ газет пыр тодматылыны татысь улон-вылонэн, удмурт пиослэн но нылъёслэн синмаськымон дышетскон юртэнызы. Таӵе интыын, валамон ни, валтӥсь инты басьтэ дышетскон: ӟеч тодон-валантэк угось уд луы зэмос крезьгурчи но, кырӟась но, суредась но. Бадӟым саклык висъяське пиналъёслы ӟеч сямъёс пыӵатонлы, соослэсь лулпушсэс узырмытонлы, улон шоры паськытгес учкытонлы. Мылкыдэз бурдъясь ужрадъёсты мылысь- кыдысь бергато дышетӥсьёс, визьнодасьёс, школа-интератэнымы кивалтӥсьлэн воштӥсезлэн Ангелина Семеновна Золотаревалэн сюлмаськемез улсын. Пусъем потэ созэ но: дышетскон ар котьку кутске музыкантъёслы сӥзем ужрадэн. Выль адямиослы ортчоно луэ тыл, ву, ыргон пыр. Со сяна, маке понна кыл кутоно луэ. Ӟечкыланы котьку лыкто культурая министр но удмурт калыклэн дано артистэз Г. Корепанов-Камский. Со школамес одӥгез усьтӥсь ук. Та пумиськон ик луэ гуртысь лыктэм пиналъёслэн профессиональной искусствоен нырысетӥез тодматсконзы. Соос кылзӥсько, синъёссэс, ымзэс усьтыса. Туж паймо. Усточиосмы доры арнялы быдэ вуыло куноос. Вуылӥзы ни крезгуръя училищеысь дышетӥсьёс баянист В. Е. Новиков, И. Н. Поздеева, домрист Г. С. Рузманов. Школамес йылпумъяса, пиналъёс дышетсконзэс отын азьланьтозы. Вуылӥзы ни А. П. Шкляев, "Удмурт дунне" газетлэн валтӥсь редакторез, тодосчи профессор Ф. К. Ермаков, тодмо суредась П. В. Ёлкин, Удмурт лулчеберлыкъя "Дэмен" огазеяськонлэн тӧроез Альберт Разин. Туж шуныт мылкыд кельтӥз тодмо крезьгурчилэн Е. В. Копысовалэн творческой ӝытэз. Со пиналъёсмес дышетэ крезьгур гожъяны. Шутэтскон нуналъёсы нылпиос вуыло Мунё, Драмая удмурт кун, ӟуч Драмая кун но Операя но балетъя театръёсы, вань репертуарез шумпотыса учко. Мылкыдзы ӝутӥське удмурт артистъёслэн концертъёссы бере - одӥгзэ но уг кельто. Ярато "Айкаез", "Шулдыр ӝытэз", "Италмасэз". Толэзьлы быдэ асьсэос но усточиос возьматъяло концерт. Кыӵе кулэ соос! Озьы покчиос возьдаськонлэсь, кышканлэсь каллен-каллен мозмытско. Нош ӵем дыръя адӟиське: люкетэ ик востэм сямзы, быдэсак усьтӥськыса, инструментэн шымырскытэк шудыны. Зэм, куддыр шудо асьсэлэсь но ужъёссэс. Оскыны кутско кужымзылы, быгатэмзылы. Будыны юрттэ на бордгазет. Соос сӥземын ни вал Куӟебай Гердлы, Ашальчи Окилы, Н. П. Кралиналы... Пиналъёс асьсэос но пырисько газет поттонэ. Мылкыдзэс тужгес но ӧръяло, концертэ, театре ветлэмзы бере. Ар ӵоже ни кыстӥсько Куӟебай Гердлы сӥзем ужрадъёс. Солэн "Гондыръёс" выжыкылэзъя спектакль но пуктылӥмы. Туж шуныт ортчиз тодмо гожъясен, юристэн Н. С. Кузнецовен пумиськон. Со выльдӥз, муромытӥз пиналъёслэсь Куӟебай Герд сярысь тодонъёссэс. Кузьмаз пиналъёслы книгаоссэ. Дышетӥсьёс кузпалъёс Морозовъёс дышетскисьёссэс нулло вань выставкаосы. Егит суредасьёсмы вань ужрадъёсты суредъёсынызы чебермало. Туж яркыт малпанъёс кельтӥз Выль арез пумитан. Ноку уз вунэтэ пиналъёс улонысь дырызлэсь вазь кошкем тодмо бесерман кылбурчимес Михаил Федотовез буре вайыса ортчытэм ӝытэз. Туж шуныт ортчиз со. Кылбурчилэн гожъямъёсыныз тодматскыны юрттӥзы кузпалыз Анна Васильевна Федотова но кылбурчиос- эшъёсыз Вячеслав Ар-Серги, Пётр Захаров, Сергей Матвеев. Соос зол дунъет сётӥзы эшсылэн улэм-вылэмезлы. Миша сярысь трос умойзэ тодӥмы солэн сизьымдон кык аресъем варманаезлэн Валентина Петровналэн верамысьтыз но. Пиналъёс поэтлэсь кылбуръёссэ лыдӟизы, кырӟанъёссэ кырӟазы, кылбуръёсызъя кылдытэм асьсэлэсь но кырӟанъёссэс кырӟазы. Кыӵе шумпотысал ачиз кылбурчи, улэп луысал на ке... Адӟыны кулэ вал созэ но: кыӵе выставка дасязы егит суредасьёсмы Мишалэн кылбуръёсызъя! Кылбуръёслэсь пуштроссэс валаса суредаллям соос. Анна Васильевна Федотова сюлмыз ик вырӟыса шуиз: "Таӵезэ ӧй на адӟылы вал..." Анна Васильевна Михаил Федотовлэсь библиотекамылы кузьмаз кылбур книгаоссэ. Куд-ог ужрадъёсамы вуыло пиналъёслэн анай-атайёссы но. Шудо синъёсын тау каро соос школа-интернатлэн директорезлы Нина Михайловна Устюговалы, нылпиоссы сярысь сюлмаськемзы понна. Нош кызьы уд тыршы?! Удмурт калык оске ук соослы, возьма будэмзэс, азьланяз удмурт культурамес ӝутэмзэс. Анна Сапожникова, школа-интернатысь дышетӥсь-визьнодась. АЛЕКСЕЙ ЕЛЬЦОВ Ӝыны даур ини ожын Тани туннэ но нюжтӥське Пересь ожчи ю бусыетӥ. Кызон пӧсьтэ но сайкатске, Быдэс уйзэ ветлӥз кытӥ? Пычей сямен портэ-вандэ Шимес ожысь ваем чалеп. Вӧсь луыса содат гуньдэ - Кылёз на-а меда улэп? Ӝыны даур ини сӧсыр, Туннэ гинэ кадь вал война. Суй-пыд ни куалекъя дыр-дыр, Ӟигар меда кӧня вань на? Ӝыны даур ини ожын, Ӝыны даур возе пыӵал. Ӧз кылды улыны жин-жин, Ӧй вал уез изён чал-чал. "Кенеш" журналлэн выль номерез Пальпотод-а, лулӟылод-а... Лыдӟисьёсмылы ӝегатскытэк ивортӥськом "Кенеш" журналлэн куартолэзь понна выль номерез сярысь. Кыӵе ужпумъёсъя кенешоз со тӥледын таяз радэ? Мае тужгес но лыдӟымонзэ ӵекто журналэз дасясьёс? Озьыен, вакчияк солэн пуштросэныз тодматтском. Курыт синвуос, секыт кайгуос, шимес курадӟонъёс, берыктонтэм ыштонъёс пыр потэм калыкмылэн сюлэмызлы туж матын, дуно но дано празднкез - Вормон нуналэз - быдэс дунне вылын тани 54-тӥзэ паськыт пусйизы ни. Шаерысьытымы уд шедьты сыӵе семьяез, кытын ӧвӧл кышкыт ожъёслэн бервылъёссы. Пӧсь тылӝу пыр ортчиз Можга ёросысь Бадӟым Уча черкогуртын вордскем Фёдор Яковлевич Фалалеев но. Ӵапак та толэзь солы сю арес тырмысал. Авиациысь маршаллэн ортчем сюресэныз тодматэ писатель Меонид Емельянов. "Солдатысен - мершалозь" ниамын солэн тодэ ваёнъёсыз. "Улонын мар но уг луы" повестьлэн авторез Кузьма Куликов "зарезь дурын мугорзэ ӵыжатыса" люкиськиз лыдӟисьёсыныз ньылетӥ номерын. Нош кыӵе выль пумиськонъёс витё тӥледыз азьпалан? Сое тододы таяз учыре - повесть азьланьтӥсьёс но "Весяк тонэ ярато" шуыса нимам спрозаик Кирилл Ломагин выль вероссэ. Номерын бадӟым инты висъямын быдӟым ӟуч кылбурчилы А. С. Пушкинлы. Солэсь дасо пала ужзэ, удмурт кылэ берыктыса, тӥледлы ӵектэ кылбурчи Сергей Матвеев. "А, С, Пушкинлы - 200" сэрегысь ик шедьтоды журналистлэсь Василий Никитинлэсь тодэ ваёнъёссэ. Пумиськылонъёс дыръя егитъёс со ӵемысь вераны косо, лэся, ноку вунэтонтэм учыръёс сярысь. Ожысь ветеран со пумысен гожтэ: "А. С. Пушкинлэсь улэм интызэ но солэн кышноезлэсь Н. А. Гончаровалэсь вордӥськем посёлоксэ смозмытӥмы". Прозаик Николай Никифоров журналэз басьтӥсьёсты трос ужъёсыныз шумпоттылӥз ни. Тани таяз но потэмын солэн "Вить йырси нюжаос" выльь повестез. Туала улонлэсь шимес йыружъёсын герӟаськем палзэ возьматэ со. Лыдӟисьёсмы ӵектонъёссэс, мылкыд каронъёссэс лыдэ басьтыса, "Кенешамы" выль сэрег усьтӥмы - "Нылпи дунне". Отын тросгес мед печатласькозы вылэм асьсэлэн пиналъёслэн гожъямъёссы. Алияз сётӥськомы соослэсь трослы мӧйыос гожъясьёслэсь Андрей Вахрушевлэсь "Коӵышлы - паспорт" ужзэ. Номерысьшедьтоды озьы ик "Оло зэм, оло даур". "Шаермылэн историысьтыз", "Кенешжн кенешез", "Юады - валэктӥськом" но мукет сэрегъёсысь материалъёсты. Нош кырӟанэз яратӥсьёс понна нотаосын журналлэн валтӥсь выль кырӟан дэмласьком. Пётр Сергеев, Журналлэн валтӥсь редакторезлэн воштӥсез. Пыӵалэн вузкарон - пайда поттон Кылем арняе Ижевске вуылӥз "Росвооружение" кун компанилэн ужась группаез. Компанилэн валтӥсь директорез Г. Рапота сяна, асьме доры вуылӥзы департаментъёслэн кивалтӥсьёссы но валтӥсь специалистъёс. Куноос шаерамы ужан нуналзэс мытӥзы Кун Кенешлэн но Кивалтэтлэн Президиумъёсазы быръем адямиосын пумиськонысен. Кызьы шуиз Александр Волков, "Росвооруженилэн" ужаз Удмуртия нимысьтыз инты басьтэ. Арысь аре асьме предприятиос компания пыр пыӵал тӥрлыкен вузкаронзэс паськытато. Тани туэ но кунгож сьӧрысь басьяськисьёсын 6 миллион долларлы тупанкылъёс (контрактъёс) гожтэмын. Со - Ижевскысь электромеханической заводэз вератэк. Но та удысэз эшшо но паськытатоно. Асьме предприятиослэн со понна трос на ай уже кутымтэ луонлыкъёссы. Арлы быдэ сямен соос выль продукция кылдыто но потто. Сое вузаны амалъёс но сюресъёс шедьтоно вылэм. Та удыс чотын шаермы экономиказэ ӝутыны но калыклэсь улонзэ умоятыны быгатысал. Соин ик "Росвооруженилы" мыло-кыдогес тыршоно вылэм асьме продукцилы басьяськисьёсты утчаны. Сыӵе мылкыдзэ меӵак вераз куноослы Кун Кенешлэн Тӧроез. Со сяна, нимысьтыз юрттэт куриз М.Калашниковлэсь музейзэ лэсьтонлы.Туэ ноябре дано конструкторлы 80 арес тырме, та вакытлы музеез усьтыны кулэ вылэм. Г.Рапота вакчияк вераз компаниезлэн Удмуртиен герӟаськем ужпумъёсыз сярысь. Нырысь ик, шуиз со, тодматскыны кулэ Ижевскын поттыны кутскем выль пыӵал тӥрлыкен, отӥяз сое кунгож сьӧры вузан вылысь. Кыкетӥез. Али "Росвооружение" Удмуртиысь предприятиосын уртче ужа ке но, кусыпъёсты юнматыны но паськытатыны, соослэсь пайдалыксэс будэтыны кулэ. Кызьы шуиз вылӥ куно, солэн компаниез Удмуртилы пунэмен тыриськонэз ӧвӧл. Соин ик пыӵал тӥрлык поттӥсьёслы матысь дыре кредитъёс висъян сярысь ужпумез эскерыны луоз. Со нуналэ ик Москваысь куноос Ижысь электромеханической заводын пумиськулӥзы "оборонкаысь" кивалтӥсьёсын. Собере вуылӥзы "Ижмаш" огазеяськонэ. Москваысь делегация асьме доры ветлӥз, Кун Кенешлэн Тӧроезлэн Александр Волковлэн ӧтемезъя. Г.ТИХОНОВ. Дано адямилы - дано ним Ижын вордӥськем тодмо шаерчи Олег Владимирович Севрюков (1920-1981) ас вакытаз историлы дышетӥз шаерысьтымы культурая училищеын. Иж сярысь кык пол книга поттӥз. Трос гожъяз цирк сярысь. Олег Владимирович лулысь-сюлмысь тунсыкъяськылӥз быдӟым ӟуч кылбурчилэн А. С. Пушкинлэн улэм-вылэменыз но - люкалляз со сярысь книгаос, открыткаос, медальёс, маркаос, газетъёсы гожъямъёсты. Ваньмыз со юрттӥз А. С. Пушкинлы сӥзем синпель сэрег кылдытыны. Азьвыл фронтовик ӵемысь вералляз: А. С. Пушкинлэн 1937-тӥ арын поттэм книгаез соин ӵош ортчиз быдэс тыложез. Кылбурчилэн кылъёсыз вырӟытъязы солдат сюлэмъёсты, тырмытъязы соосты ӟеч малпанъёсын, ваньмон дыръя эшъёс мае ке лыдӟыны курыку. Олег Владимировичез ачим но ӟеч тодӥсько вал. Капчи но шара мылкыдо адями котькинлы ӟечсэ гинэ сӥзьылӥз. Трос пол вуылӥз А. С. Пушкинэн герӟаськем интыосы. Соин валче та адями сярысь тодон-валанэз но тросгес луиз. Городмылэн кивалтӥсьёсыз мед быдэстысалзы таӵе куронме: Олег Владимирович Севрюковлы сётоно "Ижевск городлэн дано адямиез" вылӥ ним (кулэмез бере коть). В. РОГАЛЁВ. Тазалык Дунтэм но дантэм 3-4 июне Ижевскын ортчиз шаерысьтымы шоро-куспо тодон-валанэн эмъясьёслэн 1-тӥ съездзы. Отчы люкаськылӥзы районъёсысь но городъёсысь больницаосысь ыстэм делегатъёс. Вуылӥзы бускель республикаосысь Тазалыкез утёнъя министерствоосысь ужасьёс но. Удмурт Республикаысь тазалыкез утёнъя министр С. Г. Шадрин, съездэ люкаськемъёсты ӟечкыласа, та удысын тужгес но кема но усто ужамъёсты пусйиз Россия Федерациысь но Удмурт Республикаысь Тазалыкез утёнъя министерствоослэн, Удмурт Республикаысь Правительстволэн грамотаосынызы. Кыкетӥ нуналаз съезд нимаз секциослы люкиськыса ужаз. 18 сюрс медсестраос, фельдшеръёс-акушеръёс шаерысьтымы больницаосын, профилакторийёсын, медпунктъёсын тыршо туннэ. Уен-нуналэн юртто соос висисьёслы. Нош гуртъёсысь фельдшеръёс ӵемысь ас вылазы врачлэсь ужзэ басьтоно луо. Жаляса верано луэ, туннэ медсестраос азе бадӟым куронъёс пуктыса, государство уг дырты соослэсь ужзэс дунъяны. Шоро-куспо тодон-валанэн эмъясьёслэн уждунзы 200-400 манет. Юалляськемъёс пӧлысь ӝыныез жаляло та удысэз быръемзы пумысь. Вань уго мукет мугез но: медсестра шоры учко врачлэсь косъяськонъёссэ быдэсъясь мурт шоры сямен гинэ. Нош умой-умой учконо ке, куд-ог ужпумъёсъя со врачлэсь тросгес тодэ, уго солэн киосыз эмъяло висисез. Солэн лэсьтэм янгышез дуногес сылыны быгатоз висись понна. Кунгож сьӧрын медсестра шоры мукет синмын учко. Отын сое врачен огкадь дунъяло. Кылсярысь, Америкаын ӝыныез медсестраос наукаосъя докторъёс, кандидатъёс. Улон асьме медицина азе но сыӵе куронъёс пуктэ. Соин ик, медсестраослэсь тодон- валанзэс будэтон, ужзылэсь данзэ ӝутон понна, 1995 арын Ижевскысь медицинской академиын выль факультет усьтэмын. Табере отысь вылӥ образованиен медсестраос потозы. Шоро-куспо тодон-валанэн эмъясьёслэсь ужзэс умоятон вылысь, съезд резолюция кутӥз. Соя ужъёс мынӥзы ке, медсестралэн ужез матысь дыре ик, зэмзэ но, туж дано луоз. Нош солэн висисен сюлмысь вераськемез, небыт ваземез, лӥятэмез али но туж дуно. З.РЯБИНИНА. Удмурт Республикаысь Кун Кенешлэн Экономикаын политикая, асваньбурен герӟаськем ужпумъёсъя но инвестициосъя ялан ужась комиссияз адямиосты быръён сярысь Удмурт Республикаысь Кун Кенешлэн Постановлениез Удмурт Республикаысь Кун Кенеш пуктэ: Удмурт Республикаысь Кун Кенешлэн Экономикаын политикая, асваньбурен герӟаськем ужпумъёсъя но инвестициосъя ялан ужась комиссияз быръёно таӵе адямиосты: Ануфриев Вячеслав Николаевичез - быръёнъя Ижевскысь 26 номеро Авангардной округысь депутатэз, Биганишвили Гиви Несторовичез - быръёнъя Ижевскысь 34 номеро Автозаводской округысь депутатэз, Бодров Владимир Петровичез - быръёнъя Ижевскысь 32 номеро Родниковой округысь депутатэз, Дудин Сергей Геннадьевичез - быръёнъя Воткинскысь 47 номеро Южной округысь депутатэз, Жебровский Валентин Витальевичез - быръёнъя Ижевскысь 1 номеро Буммашевской округысь депутатэз, Кайгородов Юрий Михайловичез - быръёнъя Кез ёросысь 83 номеро Кулига округысь депутатэз, Лопатин Александр Константиновичез - быръёнъя Ижевскысь 5 номеро Тимирязевской округысь депутатэз, Мохначев Владимир Александровичез - быръёнъя Можгаысь 56 номеро Стеклозаводской округысь депутатэз, Осколков Андрей Эдуардовичез - быръёнъя Ижевскысь 24 номеро Республиканской округысь депутатэз, Подсевалов Владимир Анатольевичез быръёнъя 97 номеро Шаркан ёрос округысь депутатэз, Светлов Сергей Вадимовичез - быръёнъя Ижевскысь 21 номеро Административной округысь депутатэз. Удмурт Республикаысь Кун Кенешлэн Тӧроез А.А.Волков. Ижевск город, 1999 арын 25 мае, � 32-ИИ. Я выбираю село Училище � 34 приглашает 427370, Удмуртская республика, село Сюмси, ул. лесная, 23 Из истории училища. Наше училище одно из старейших. Издавна население района занималась лесным и сельским хозяйством. Были свои лесопромышленники. История училища начинается с 1904 года. Тогда оно готовило специалистов для лесного хозяйства. потом профиль училища однократно менялся. Но разве можно представить развитие училища в не связи с особенностями района, его потребностями? Это и определило в настоящее время главное направление нашего училища: оно вновь готовит специалистов для сельского хозяйства. А с этого учебного года юноши получат новую профессию - мастер по лесному хозяйству. мастера и преподаватели училища работают над главной проблемой: дать учащимся такие навыки и умения, чтобы их рабочие руки нашли применение, были востребованы. Для выживания, созданы такие специальности: портной по пошиву лёгкой женской одежды и резчик по дереву и бересте. Срок обучения по всем профессиям 3 года. Учащиеся обеспечиваются бесплатным питанием, стипендией, иногородние общежитием. Ждём вас в наше училище. Н. И. Телицин, директор ПУ-34. "О нашем директоре замолвите слово" Об этом просили нас его коллеги. Николай иванович Телицин иногда сам теряется: кто же он? С одной стороны вроде директор училища, он в ответе за коллектив преподавателей, мастеров и учащихся. Но иногда ему кажется, что он - председатель колхоза. На сегодняшний день училища имеет около 800 гектаров земли, 50 голов крупного рогатого скота, 20 свиноматок, 96 единиц сельскохозяйственных машин, 38 тракторов, 28 автомобилей и другой техники. ну чем же не колхоз? Сам Николай Иванович на работу в это училище пришёл второй раз. 10 лет работал заместителем главы администрации района. Удивляется: уходил, пришёл, а кадры те же. В его отсутствие училищем умело руководил Николай Самойлович Телицин, человек про которого здесь сказали: крепкий хозяин. А про нынешнего говорят: требовательный, авторитетный, но самое лавное у него слово никогда не расходится с делом. Мы же заметили, что он еще немногословен. И все же о себе николай иванович сказал так: - Родом из Сюмсинского района. По образованию историк. Был членом партии, никогда считает себя коммунистом. Кроме того все время оставался старовером. В общем, мы поняли, что человек он надежный, живет с верой и крепко стоит на земле. Он не разделяет мнение тех, кто искусственно поднимает сейчас национальный вопрос. Испокон веков и в Сюмсинском районе и в училище мирно жили, трудились люди разных национальностей. - Вот у меня сейчас четыре внука, - рассуждает Николай Иванович. Кто они, если зять - мордвин, сноха - бесермянка, а мы с женой русские? Дело не втом, кто ты по национальности, а какой ты человек и что умеешь делать для общества. Быть человеком - это самое главное. Вот таким человеком оказался директор училища в Сюмсях. Сюмсинское ПУ-34 объявляет набор учащихся на 1999 год на базе основной школы ( 9 классов) с получением среднего (полного) образования по профессиям: 1. Мастер сельскохозяйственного производства (фермер) со специальностями (юноши); - слесарь�ремонтник; - тракторист-машинист категории "АВГ"; - водитель автомобиля категории "С", - мастер животноводства. 2. Мастер по лесному хозяйству со специальностями (юноши): - слесарь-ремонтник; - тракторист-машимист категории "АВ", - водитель автомобиля категории "С'*; - лесник. 3. Хозяйка усадьбы (девушки) со специальностями: - мастер машинного доения; - повар; - портной по пошиву легкой женской одежды. 4. Хозяйка усадьбы (девушки) со специальностями: - мастер машинного доения; - повар; - бухгалтер сельскохозяйственного производства. 5. Изготовитель художественных изделий из дерева со специальнсстями: - резчик по дереву и бересте; - изготовитель художественных изделий из дерева. Срок обучения по всем профессиям 3 года. Учащиеся обеспечиваются бесплатным питанием, стипендией, иногородние - общежитием. Порядок приёма Начало занятий 1 сентября. Прием учащихся производится на основе оценок в документах об образовании, по собеседованию или тестированию: 16 августа по профессии "Мастер с/х производства". 27 августа по профессии "Хозяйка усадьбы". 16 августа по профессии "Мастер по лесному хозяйству" и "Изготовитель худ.изделий из дерева". Прием документов до 15 августа. Необходимые документы для поступления в училище: 1. Заявление. 2. Декумент об образовании. 5. Медицинская справка ( справка о прививках обязательна) 4. Копия свидетельства о рождении. 5. Справка о семейном положении. 6. Фотографии (для юношей 3,5 х 4,5 на матовой бумаге) - 4 шт. Без учхоза училищу не прожить Александр Аркадьевич Кудрявцев - заведующий учебным хозяйством. "Дайте землю", - попросило училище у местной администрации. Дали. Но в 29 километрах от училища. Нашли молодого, энергичного специалиста с высшим образованием. Им оказался агроном, ранее работавший в колхозе, А. А.Кудрявцев. Директор училища без лишних слов ему сказал: "Вот тебе 800 гектаров земли, техника - заарабатывай сам". Так в заброшенной деревне Бадӟым шур, где училищу отвели место для учебного хозяйства, закипела работа. Теперь учхоз заготавливает корма, выращивает пшеницу, картоель, овощи, имеет свою животноводческую ферму. Сеном обеспечивает всё население Сюмсей. На отдельных полях урожайность пшеницы достигает до 25-ти центнеров с гектара, а в некоторых местных и до 40 центнеров. В начале на заброшенных полях получали всего 2-3 центнера пшеницы. Своей техинкой училище помогает близлежащим колхозам, а те в свою очередь помогает топливом, запчастями, скотом. Учебное хозяйство обслуживают всего 18 человек. Говорят, что здесь появилась новая семья, родился ребенок. Значит есть надежда и на возрождение этой деревни. На землях учхоза учебную практику проходят учащиеся училища - будущие фермеры хозяйств. Мастер он и есть мастер Любовь Михайловна Тихонова - мастер высшей категории. Это она учит девушек выполнять портные работы, шить лёгкую женскую одежду. До недавнего времени в училище принимали только юношей. Теперь здесь ежегодно набирают одну группу девушек. они получают специальность мастер машинного доения с умением выполнять портные работы. Удмурт Республикаысь Кун Кенешлэн Законъёсты быдэсъямез чакланъя, калыкез кышкытлыклэсь утёнъя но гражданъёслэн правооссыя ялан ужась комиссияз адямиосты быръён сярысь Удмурт Республикаысь Кун кенешлэн Постановлениез Удмурт Республикаысь Кун Кенеш пуктэ: Удмурт Республикаысь Кун Кенешлэн Законъёсты быдэсъямез чакламъя, калыкез кышкытлыклэсь утёнъя но гражданъёслэн правооссыя ялан ужась комиссияз, быръёно таӵе адямиосты: Богомольный Евгений Исааковичез - быръёнъя 77 номеро Играысь нырысетӥ поселковой округысь депутатэз, Бузилов Валерий Викторовичез - быръёнъя 80 номеро Камбарка ёрос округысь депутатэз, Дементьев Валентин Владимировичез - быръёнъя 74 номеро Завьялово ёрос округысь депутатэз, Кацемон Владимир Ивановичез - быръёнъя 99 номеро Якшур-Бодья ёрос округысь депутатэз, Салтыков Анатолий Ивановичез - быръёнъя Ижевскысь 10 номеро Александровской округысь депутатэз, Сычев Николай Семеновичез - быръёнъя 65 номеро Кияса ёрос округысь депутатэз, Юшков Николай Петровичез - быръёнъя Сарапулысь 63 номеро Привокзальной округысь депутатэз. Удмурт Республикаысь Кун Кенешлэн Тӧроез А. А. Волков. Ижевск город, 1999 арын 25 мае � 36-ИИ. Асьсэлэсь кужымзэс эскеризы Санкт-Петербургын дӥськут кылдытӥсь егит дизайнеръёс куспын "Адмиралтейская игла- 99" калык куспо конкурс йылпумъяськиз. Ӵошатсконлэн нырысетӥ люкетаз Россиысь, Украинаысь, Белоруссиысь, Казахстанысь, Молдоваысь, Латвиысь, Финляндиысь, Франциысь, Италиысь, Великобританиысь, Индиысь но США-ысь 600 егит модельер пыриськиз. Кыкетӥ тураз шедем 280 мурт куинь номинациен дасям дӥськутсэ возьматӥз. Калык куспо Восточно-Европейской университетлэн Искусствоосъя Ижевскысь колледжаз дышетскись нылъёс Ольга Осколкова но Наталья Бокова конкурсэ пыриськизы но "Северная Пальмира" но "Живопись Тиффали" коллекциенызы тодматӥзы. Нылъёс Санкт- Петербургысь дипломъёсын берытскизы. Котькудӥз аслаз номинацияз 10-тӥ инты басьтэмез сярысь вера. Таӵе бадӟым конкурсын дасэтӥ инты басьтон - со туж вылӥ дунъет ини. Вераны кулэ, котькуд номинацие пыриськиз 40-лэсь трос адями, нош "Живопись" номинациын 40 мурт пӧлын вал модая 7 агентствоын ужасьёс! Шумпотоно соизлы но, конкурсэ пыриськемъёс пӧлын одӥг но шор ёзо дышетскон заведение ужъёссэ ӧз вутты. Ваньмыз дышетскизы чеберлыкъя вылӥ школаосын. О. Осколкова но Н. Бокова Киевысь Художествоосъя академилэсь но Санкт-Петербургысь технологиосъя но дизайнъя кун университетлэсь дышетскыны ӧтёнзэс басьтӥзы. Нош Киевысь модельеръёс соослэн экспозициенызы тунсыкъяськемзы сярысь веразы. Калык куспо Восточно-Европейской университетлэн пресс-службаез. Ваньмыз та цирконий лэсь Газетамы азьлогес печатламы Глазовысь Чепецкой механической заводлэн (ЧМЗ-лэн) кызьы кылдэмез, отын уран, кальций но цирконий поттыны кутскем сярысь. Нош туннэ вакчияк вералом цирконийлэсь изделиос сярысь. Цирконий нимлэн кылдэмез герӟаськемын циркона (дуно из). Араб кылысь берыктыса, со луэ "златоцветный" буёл. Цирконий туж чебер, сыномисьтэм пӧртэм буёло, кема чидась но юн корт луэ. Соин вашкала дырысен тунсыкъяськизы ювелиръёс. Соос ӟеч тодо вал, сыӵе усто металлэсь олома но лэсьтыны луонзэ. Но тужгес паймымонэз луиз цирконийлэн тазалыкез утьыны, эмъяны быгатэмез. Со азвесь кадь ик микробъёсты быдтыны быгатэ, юрттэ пыд висёнъёсты, радикулитэз, гипертониез, ку висёнъёсты йӧнатыны, адямилэсь огъя кужымзэ будэтыны. Тӥляд чебер, йӧно но аспӧртэм адӟиськемды потэ ке, эн вунэтэ цирконийлэсь лэсьтэм бижутериез (чыртывесьёс, зундэсъёс). Соос котькыӵе дӥськутлы тупало, чебергес каро костюмдэс, дэремдэс, тужгес но концертэ, киное ветлонооссэ.Цирконийлэсь изделиослы вылӥ дунъет сётэмын Италиысь, Англиысь, Швециысь но Швейцариысь выставкаосын. Соос туала кышномуртэз уката чебермыто но вунонтэм кельто. Асьтэос но куноосты кыӵе шумпотозы, ӝӧк вылады цирконийлэсь посуда пуктӥды ке. Соос кылын верантэм чебересь, кияд кутэмед потытэк кутод. Син шорады нырысь ик йӧтозы вина но коньяк юон наборъёс, рюмкаос. Соос сыӵе вольытэсь, юбилейёсы, праздникъёсы самой усто синпель кузьым луо. Г. ВАСИЛЬЕВ. А. С. Пушкинлэн вордскемез дырысен - 200 ар Валто чебер выжыкылэ Пичи Пурга ёрос библиотека кык ар ӵоже ини ортчытъя быдӟым ӟуч кылбурчилэн Александр Сергеевич Пушкинлэн вордскемез дырысен кык сю ар тырмонлы сӥзем ужрадъёс. Зэм, кин но со лыдъя: та адями кемалась вунӥз ни. Но шонер-а меда та веран? Пиналъёслэн юбилеен герӟаськем ужрадъёсы, суредъёслы сӥзем конкурсъёсы, лыдӟисьёслэн быдӟым ӟуч кылбурчилэн ужъёсыныз, улон-вылонэныз тунсыкъяськыны мылкыд каремзы быдэсак палэнтэ та мылкыдэз. А. С. Пушкин тросэзлы тунсыко. Кылбуръёсыз сюлэмез вырӟыто, выжыкылъёсыз бордазы кыско, нош кузьверосъёсыз (повестьёсыз) валто асьмеды чебер но ӟеч улон-вылонлэн дуннеяз. Кылбурчилы сӥзьыса, библиотекаын мыло-кыдо ортчыло литератураё но крезьгуро ӝытъёс. Шумпоттэ пиналъёслэн суредъёсъя "Мынам Пушкинэ" конкурсэ лулысь-сюлмысь пыриськемзы. Александр Сергеевичлэн выжыкылъёсыз, поэмаосыз луонлык сёто эркын малпаськыны. Соин ик покчиослэн ужъёсынызы адӟытон но туж тунсыко пӧрмиз. Нош кыӵе устолыксэс возьматӥзы нылпиос лыдӟисьёслэн конкурсазы! Татьяна Лариналэн, Евгений Онегинлэн, Руслан но Людмилалэн лулъёссы ӵапак поръязы кадь та нуналэ библиотекалэн юртэтӥз. Конкурс нош возьматӥз: Александр Сергеевич Пушкинлэн кылбуръёсыз туж тупало туала вакытлы но. Солэн яратон, эшъяськон сярысь верамъёсыз трос аръёс ортчыса но уз вужме. Библиотека кичӧлтэмъя ик ортчытэмын кылбурчилы сӥзем ӝыт. Соин ӵош ик - пинал нылъёс понна "Натали" нимо конкурс. Дас куать нылмурт луиз кадь та нуналэ зэмос Наталия Гончарова. Конкурсэ пыриськисьёс кылбурчилэсь ортчем сюрессэ гинэ ӧвӧл, ЪИЪ даурысь ӟеч сямъёсты но, кунсьӧр кылэз но, Наталилэсь аспӧртэмлыкъёссэ но тодыны кулэ вал. Турлы буёлъёс, Александр Сергеевичлэн кылбуръёсыз, сюсьтыл дырекъямъя чузъяськись романсъёс туж чеберъязы ӝытэз. А. С. Пушкинлэн книгаосыз котькудӥзлэсь сюлэмзэ вырӟытозы азьвыл яке бер, пичи дыръяз яке - быдэ вуыса. Котькудӥз шедьтоз аслыз шумпотон яке буйган, чебер но визьмо малпан, ӟеч ужъёсы бурдъясь мылкыд. Котьку тау кароз быдӟым кылбурчилы. Е. Абдрахманова, ёрос библиотекаысь библиограф. Ӧтчам азьын: кыл сётӥзы ке... Кенеш ноку но мултэс уз луы Кӧня ке нунал гинэ кыле на 19-тӥ июнёзь - соку ортчоз Вань удмуртъёслэн азьло пусйымтэ ӧтчамзы. Валамон ни, нунал ӵоже трос адями малпанзэ вераса уз вутты. Тае лыдэ басьтыса, ми кенешим газетамы выль сэрег усьтыны. "Ӧтчам азьын: кыл сётӥзы ке..." рубрика улын печатлалом пӧртэм эшъёслэсь гожтэмъёссэс-верамъёссэс. Тужгес но тодэм потэ вылэм, гажано лыдӟисьёс, съездлы, "Удмурт кенешлэн" исполкомезлы ӵектонъёстэс. Асьме калыклэсь движенизэ кужмоятыны соос одно ик юрттозы. Гожтэ, жингыртэ (тел. 444-344), пыралэ... Кутскон понна дэмласьком Ижын улӥсь автормылэн гожтэтэныз тодматскыны. Алигес бускеле ёртӥз: мар-о, пе, тӥ (ачиз со ӟуч) съезд люкано кариськиды, кин таӵе дыре уж сярысь вераське? Ма, шуисько, тон телевизорез чик уд учкиськы шат, отын нуналлы быдэ олокыӵе но кенешонъёс сярысь верало ук. Я Немцов эшъёссэ люка, я Лужков кинэн ке пумиське, кенеше, я эшшо кин ке съезд ортчытэ... Соин ик, мон сямен, удмуртъёслэсь ӧтчамзэс люканысь номыр но кышкытсэ адӟыны кулэез ӧвӧл. Кенеш, ог- огеныд вераськон нокинлы но изъян ӧз вайы на. Адямиос ог-огзылэсь малпанъёссэс тодыны кулэ, сотэк уртче ужан уз пӧрмы. Мон съездэ уг шедьы, дыр. Азьлояз делегат ӧй вал уго. Соин ик кӧня ке малпанме газет пыр верало. Котьмалэс кулэез - уногес удмуртъёсты огъя уже кыскон амал шедьтоно. Кызьы асьмеос вуом котькуд гуртозь, кызьы утём ӟучомонлэсь городэ выжем бӧлякъёсмес - та сярысь одно ик кенешоно. Куд-огез шуэ: удмуртъёслы, пе, дугдоно ни кырӟамысь-эктэмысь. Кызьы озьы? Калыкмылэн вираз пыӵам сямъёсты быдтыны уг луы ук. Мукет ужпум: та шулдыръяськонъёсты кызьы ке но уже кутоно, адямиос пӧлын валэктон уж нуоно. Туж сюлмаськытэ кадръёслэн тырмымтэзы. Дышетӥськом ичи. Ай сооссэ но ыштӥськом. Син азямы ум вазиське. Удмурт нылъёсмы-пиосмы сылмо мукетъёсыз пӧлы. Вот "Удмурт кенеш" (правительство пыр, валамон ни) быгатысал ке соослы кыӵе ке юрттэт сётыны... Шуом, егит удмурт специалистъёслы улон инты басьтыны коньдон кредитэн. Оло, уж вылын эскероно? Вожзэ медам вай тӧромы, но Валентин Кузьмичлэн арлыдыз люкаськиз ни, озьыен, вуоно съездын (черодъя ортчонояз) асьмелы биньгозыез егитгес муртлы сётоно луоз ни, дыр. Вань-а сыӵе адями? Меӵак вераса, син шоры уг йӧты на. А. ПЕРМЯКОВ, ужысь ветеран. Республиканская комиссия объявляет конкурс по привлечению автотранспорта юридических и физических лиц к маршрутным перевозкам пассажиров в междугороном сообщении по маршрутам: � 210 "Ижевск-Шаркан", � 213 "Ижевск-Камбарка", � 217 "Ижевск-Булай", � 218 "Ижевск-Подгорное" (по будням), � 226 "Воткинск-Зюзино", � 228 "Глазов-Валамаз", � 231 "Ижевск-Жужгес", � 233 "Глазов-Н. Елово", � 238 "Сарапул-Каракулино", � 242 "Можга-В. Ятчи", � 245 "Ижевск-В. Ятчи", � 243 "Воткинск-Петуньки", � 249 "Какмож-Ижевск", � 257 "Балезино-Сергино", � 258 "Глазов-Сергино", � 264 "Сарапул-Киясово", � 270 "Воткинск-Бородули", � 276 "Воткинск-Можга", � 277 "Ижевск-Кулябино", � 278 "Ижевск-Аксакшур", � 279 "Ижевск-Бураново" (ч/з М. Пургу), � 284 "Кизнер-Можга", � 286 "Сарапул-Ижевск" � 318 "Дебессы-Б. Соснова" (Пермская обл.), а также по предложению заявителей, при условии соблюдения требований указанных в условиях проведения конкурса, опубликованных в газете "Удмуртская правда" от 16.02.99 г. � 23. Начало проведения конкурса по истечении 1 месяца с момента публикования в печати. Дополнительную информацию об условиях конкурса можно получить по адресу: 426057 г. Ижевск, ул. Красная, 144. Телефоны: 78-25-26; 78-07-02. Республиканская комиссия. Удмурт Республикаысь Кун Кенешлэсь кыкетӥзэ (азьвыл чакламтэ) сессизэ люкан сярысь Удмурт Республикаысь Кун Кенешлэн Президиумезлэн Постановлениез Удмурт Республикаысь Кун Кенешлэн Президиумез пуктэ: Удмурт Республикаысь Кун Кенешлэсь кыкетӥ ӧтчамезлэсь кыкетӥ (азьвыл чакламтэ) сессизэ люкано 1999 арын 22 июне Ижевск городын. Удмурт Республикаысь Кун Кенешлэн Тӧроез А. А. Волков. Ижевск город, 1999 арын 7 июне, � 7-ИИ. *** Удмурт Республикаысь Кун Кенешлэн кыкетӥ(азьвыл чакламтэ) сессияз эскерыны чакламын законъёс кылдытон бордын Кун Кенешлэн туэ ужан радлыкез, Удмурт Республикалэн "Акцосын ужась куд-ог Огазеяськонъёсын кивалтонэ пыриськонъя Удмурт Республикалэн нимысьтыз правоез ("зарни акция") сярысь" Законэзлы инъетэз. Кремер Гарий Ильич Вордскиз 1947-тӥ арын 19 июле Удмурт Республикаысь Балезино посёлокын. Еврей. Дышетскемез вылӥ. 1973-тӥ арын йылпумъяз Удмурт кун университетэз, физкультуралы дышетӥсь специальностья. "Россия Федерациысь физической культура удысысь дано ужась", "Удмурт Республикаысь физической культура удысысь дано ужась" сӥё-дано нимъёсын пусъемын. 1964-1965 аръёсы - Удмурт АССР-ысь Глазов городысь (а/я 38) электрослесарьлы дышетскись. 1965-1966 аръёсы - Глазов городысь 4 номеро цехысь промышленной электроустановкаосты ужатонъя электромонтёр. 1966-1968 аръёсы - Советской Армиын. 1969-1973 аръёсы - Удмурт кун университетысь студент. 1973-1986 аръёсы - Республикаысь егитъёслэн спортъя школазылэн директорез. 1986-1987 аръёсы - Глазов городысь хоккеен шудонъя "Прогресс" командалэн кивалтӥсез. 1987-1989 аръёсы - "Ижмаш" огазеяськонлэн улон юртъёсты возёнъя 13 номеро управлениысьтыз участоклэн кивалтӥсез. 1989-1990 аръёсы - хоккеен шудонъя "Ижсталь" командалэн тренерез-администраторез. 1990-1991 аръёсы - футболэн шудонъя "Зенит" клублэн кивалтӥсезлэн воштӥсез. 1991-тӥ арын - УАССР-ысь Мугорез юнматон культурая но спортъя кун комитетлэн спортсооружениосызъя валтӥсь инженер. 1991-1994 аръёсы - Удмурт Республикаысь Мугорез юнматон культурая но спортъя кун комитетлэн коммерция ужъёсъя "Ижспорт" центрлэн директорез. 1994-1999 аръёсы - Удмурт Республикаысь Мугорез юнматон культурая но спортъя кун комитетлэн тӧроезлэн воштӥсез. Удмурт Республикаысь Правительстволэн Тӧроезлэн косэмезъя, 1999-тӥ арын 26 мае юнматэмын Удмурт Республикаысь Мугорез юнматон культурая но спортъя кун комитетлы тӧрое. Ялон Туэ, 12 июне Кузьымгуртысь школалы 100 ар тырме. Ӧтиськом пумиськонэ та школаын азьвыл аръёсы дышетскемъёсты. Коллективы торфопредприятий, НГДУ и ГП "Удмуртторф" выражают глубокое соболезнование генеральному директору Марченко Анатолию Владимировичу по поводу безвременной кончины его сестры Татьяны Владимировны. Лыктэлэ Кызьпу арамае! Дас кыкетӥ июне Ижын но ортчоз Гербер - та вашкала йылолэз яратӥсьёс выльысь люкаськозы Кызьпу арамае. Азьвыл сямен ик кемаласен кылдэм тодметъёсты утьыса луоз вӧсяськон. Вӧсям ӝукез веръяса, Кызьпу арамае люкаськем адямиос йыбырттозы Утись-Вордӥсьмылы. Кыӵе Гербер кырӟан-верантэк?! Таяз учыре но лыктэм калыкез шумпоттозы "Инвожо", "Тюрагай", Ижысь но ёросъёсысь мукет удмурт коллективъёс. Луозы ӟеч тазалык кузьмась, мугорез кыдатӥсь ӵошатсконъёс но. Вормисьёс понна чакламын нимысьтыз кузьымъёс. Тужгес дуноез - электротылэн ужась вуриськон машина. Гербер кутскоз ӵукна дас часысен. Дунне вылысь вань ӟечез сярысь гинэ малпаськыса лыктэлэ Кызьпу арамае! Е. РОМАШОВА. Удмурт Республикалэн "Удмурт Республикаысь Кун Кенешлэн депутатэзлэн статусэз сярысь" Законэзлэн 47-тӥ ёзэтаз воштонъёс но ватсанъёс пыртон сярысь Удмурт Республикалэн Законэз 1-тӥ ёзэт. Удмурт Республикалэн "Удмурт Республикаысь Кун Кенешлэн депутатэзлэн статусэз сярысь" 47-тӥ ёзэтэзлэн кыкетӥ люкетаз ватсано таӵе кылъёс 4-тӥ абзац карыса: "полномочиослэн дырзы бырем но выль полномочиослы бырйымтэ дыръя". 2-тӥ ёзэт. Та Закон кужыме пыре сое печатлам нуналысен. Удмурт Республикаысь Кун Кенешлэн Тӧроез А. А. Волков. Ижевск город, 1999 арын 25 мае � 34-ИИ. Бурдов Геннадий Николаевич Вордскиз 1952-тӥ арын 22 июле Татариысь Алексеевской ёросысь Красные Горки гуртын. Ӟуч. Дышетскемез вылӥ. 1973-тӥ арын йылпумъяз Казаньысь ветеринарной институтэз, ветеринарной врач. 1992-тӥ арын быдтӥз Всесоюзной государственной научно- исследовательской институтлэсь аспирантуразэ. Ветеринарной наукаосъя кандидат. Сётэмын "Россия Федерациысь дано ветеринарной врач", "Удмурт Республикаысь гурт удысъя дано ужась" нимъёс. Удмурт Республикаысь Правительстволэн премиезлэн лауреатэз. 1973-1974 аръёсы - Удмурт АССР-ысь Завьялово ёросысь пӧйшур вордонъя "Ижевское" хозяйствоын ветеринарной врач. 1074-1976 аръёсы - Советской Армиын. 1976 арын - Пермь областьысь пӧйшур вордонъя "Пермское" хозяйствоын ветеринарной врач. 1976-1982 аръёсы - Удмурт АССР-ысь Завьялово ёросысь "Вараксино" тылобурдо вордон фермаын ветеринарной врач. 1982-1987 аръёсы - Удмурт АССР-ысь ӟеч выжы тылобурдо вордонъя "Увинский" совхозлэн директорез. 1987-1989 аръёсы - ыж вордонъя научно-исследовательской лабораториын старшой научной ужась, кивалтӥсь. 1989-1994 аръёсы - республикаысь ветеринарияя лабораторилэн директорез. 1994-1999 аръёсы - Удмурт Республикаысь ветеринарияя валтӥсь управленилэн кивалтӥсез. Удмурт Республикаысь Правительстволэн Тӧроезлэн косэмезъя, со 1999 арын 26 мае юнматэмын Удмурт Республикаысь ветеринарияя валтӥсь управленилы кивалтӥсе - Удмурт Республикалы министре. Пономарев Петр Парфельевич Вордскиз 1949-тӥ арын 10 июле Воронеж областьысь Острогожск районысь Ближняя Полубянка черкогуртын. Ӟуч. Дышетскемез вылӥ. 1968-тӥ арын йылпумъяз Пермьысь вузкаронъя техникумез, калыкез сюдонъя технолог специальностья, 1974-тӥ арын - Москваысь вузкаронъя заочной институтэз, вузаронысь экономика специальностья. Сётэмын "Удмурт Республикаысь вузкарон удысысь ветеран", "Удмурт Республикаысь юрттэт сётон удысысь дано ужась" сӥё-дано нимъёс. 1968-ӥ арын Ижевскысь столовойёслэн трестысьтызы 72 номеро столовойысь производствоен кивалтӥсьлэн воштӥсез. 1968-1969 аръёсы - 60 номеро столовойысь пӧрась. 1969-1971 аръёсы - Столовойёсъя нырысетӥ трестысь 29 номеро столовойлэн кивалтӥсезлэн воштӥсез. 1971-1972 аръёсы - 55 номеро столовойлэн филиалэзлэн кивалтӥсез. 1972-1981 аръёсы - Ижевск городысь Калык депутатъёслэн кенешсылэн быдэсъясь комитетэзлэн вузкаронъя отделэн кивалтӥсезлэн воштӥсез, отделлэн кивалтӥсез. 1981-1985 аръёсы -"Росторгодеждалэн" Удмурт вузкарон базалэн кивалтӥсез Россия Федерациысь Вузкаронъя министерствоысь (али - оптовой вузкаронъя "Росторгодежда" Удмурт предприятиез). 1985-1994 аръёсы - Удмурт АССР-ысь вузкаронъя министрлэн воштӥсез. 1994-тӥ арын - Удмурт Республикаысь вузкаронъя министрлэсь ужъёссэ быдэсъясь. 1994-1999 аръёсы - Удмурт Республикаысь вузкаронъя но улон-вылонын юрттэт сётонъя министр. Удмурт Республикаысь Правительстволэн Тӧроезлэн косэмезъя, 1999-тӥ арын 26 мае юнматэмын вузкаронъя но улон-вылонын юрттэт сётонъя министре. Авиациысь маршаллэн Ф. Я. Фалалеевлэн вордскемез дырысен - 100 ар Леонид Емельянов Дас бурдо ӧрӟи Кылем арын коньывуон толэзе элькунысьтымы кивалтэт шаерамы вордскем сӥё-дано военачальниклэн авиациысь маршаллэн Ф. Я. Фалалеевлэн вордскемез дырысен 100 ар тырмонэз пусъён сярысь нимысьтыз постановление кутӥз. Кылдытэмын оргкомитет. Отчы монэ но пыртӥзы но шуизы: "Тӥ куамын ар пала ни ужаськоды Фёдор Яковлевич Фалалеев сярысь материал люкан бордын, поттӥды ини солы сӥзем книгаос, газетъёсы, журналъёсы гожъяды, радио пыр но уно верады ни. Озьыен, тӥледлы киыз но пыдыз та кулэ ужрадэз дасян бордын ужаны". Ар пала элькунысьтымы ветеранъёслэн кенешысьтызы но военной комиссариатысь эшъёсын Ф. Я. Фалалеевлэсь 100 ар тырмонзэ дасян бордын тыршимы. Маршаллэн юбилеезлы сӥзьыса, калык пӧлын ортчизы ини куд-ог ужрадъёс. Нош куартолэзьлэн пумаз бадӟымесь ужрадъёс вал Можгалан, Бадӟым-Уча черкогуртын, маршаллэн вордскем Полянское гуртаз, Вавож черкогуртын (отын Фалалеев дышетскиз) но Ижын. *** Ф. Я. Фалалеевлэсь улон-вылон сюрессэ эскерон борды мон кутски 1960-тӥ-1962-тӥ аръёсы, Москваын дышетскыкум. Соку удмурт печатьлэн вордскемез но будэмез сярысь книга гожтон бордын выри. Москваысь В. И. Ленин нимо библиотекаын элькунамы потэм газетъёсты но журналъёсты лыдӟылӥ но война вакытэ печатласькем газетъёсысь шедьтӥ Ф. Я. Фалалеевлэсь Удмуртиысь школьникъёслы ыстылэм гожтэтъёссэ. Малпай: "Маршаллэн ӵыжы-выжыосыз Москваын уло, дыр. Агае, Максим Петрович, соку партилэн Нылга райкомаз ужа вал. Со ёросын ик Ӟуч Пычас школалэн директорез вал Пётр Яковлевич Фалалеев, маршаллэн выныз. Тӥни соос пыр мон шедьтӥ Фёдор Яковлевичлэсь ӵыжы-выжыоссэ. Кузпалыз Вера Алексеевна оскиз милемлы, мыным но Пётр Петрович Фалалеевлы (со маршаллэн вынмуртэз), та дано адямилэсь тодэ ваёнъёссэ. Ф. Я. Фалалеевлэсь "В строю крылатых" книгазэ ми поттӥмы "Удмуртия" издательствоын 1970-тӥ арын. Нош кыкетӥзэ ватсаса - 1978-тӥ арын. Али дасямын куинетӥез. Нош быгатомы-а сое поттыны-вераны шуг: коньдон шедьтыны секыт. Та ужен ӵош ик мон дасяй нылпиослы "Маршал сярысь веросъёс" нимо документальной повесть. Удмурт кылын со потӥз 1971-тӥ арын, нош ӟуч кылын - 1988-тӥ арын (берыктӥз Москваысь тодмо писательлэн Артём Весёлыйлэн нылыз - Заяра Весёлая). *** Фёдор Яковлевич Фалалеев вордскиз 1899-тӥ арын куартолэзьлэн берпуметӥ, 31-тӥ, нуналаз туала Можга ёросэ пырись Полянское гуртысь крестьян семьяын. 1919-тӥ арын ас мылкыдызъя куриськиз Горд Армие но вань улонзэ сӥзиз солы. Огшоры солдатысен маршалозь будӥз. Та дырозь элькунамы сыӵе вылӥ ним басьтӥз Ф. Я. Фалалеев гинэ. Быдӟым Отечественной война аръёсы со вал Горд Армилэн, бӧрысь - Советской Армилэн, Военно-Воздушной Кужымъёслэн штабзылэн начальникез, военной кенешлэн адямиез. Верховной Главнокомандующийлэн Ставкаезлэн членэз луыса, Ф. Я. Фалалеев уно бадӟымесь воздушной операциос дасяз но соосты ортчытонэз радъяз. Война йылпумъяськем бере кивалтӥз Краснознамённой военно-воздушной академиен. Али академия Ю. А. Гагаринлэсь нимзэ нуллэ. Калык но государствомы азьын бадӟымесь вормонъёсыз понна маршаллы Ф. Я. Фалалеевлы сётэмын ог кызь пала асьме но мукет кунъёслэн орденъёссы но медальёссы. 1955-тӥ арын, секыт висемез бере, 56-тӥ аресаз мыныкуз, Ф. Я. Фалалеев кулӥз. Ватэмын Москваысь Новодевичье шайвылын. Али мон дэмласько маршал сярысь документальной повестьысьтым куд-ог люкетъёссэ. Вунонтэм пинал дыр Бадӟым Уча черкогуртлы куинь иськеме, сьӧд нюлэсъёс шоры, пуксемын Полянское гурт. Татын аслаз бадӟым семьяеныз улӥз Яков Андреевич Фалалеев. Куать нылпиез вал солэн. "Ку будозы, ку ужаны вуозы таос?.." - ӵемысь малпалляз, дыр, воргорон, векчи нылпиосыз шоры учкыса. Бадӟымез пиез Вася, кӧня ке дышетскыса, приказчикын ужаны кутскиз. Настя нылыз но тани быдэ вуэ ини. Черод вуэ куинетӥезлы пиезлы - Федялы. 1912-тӥ арын со йылпумъяз Вавожысь кык классъем школаез. - Мар бен, пие, - шуиз атаез, - тыныд табере дас ньыль арес. Гожъяськыны, лыдъяськыны быгатӥськод. Мон сямен, вань улондэ музъемын медад гудӥськы. Мынод Гагарин купец доры ужаны. Соин мон вераськи ини. Тонэ, пе, приказчике куто. Кин тодэ, оло, отӥяз ас шуддэ шедьтод. Мын, пие. ...Школаын Федя усто дышетскиз. Классысь классэ Данъян грамотаосын выжылӥз. Дышетӥсез Глафира Николаевна Овчинникова шумпотылӥз пияшлэн быгатэмезлы, сюлмо луэмезлы. Бадӟым Учалась начальной школаез быдэстэмез бере, ньылетӥ но витетӥ аръёссэ Фалалеев дышетскиз Вавожысь кык классъем школаын. Отын соку дышетӥзы сузэръёс Мария Николаевна но Анна Николаевна Меньшиковаос. Соос лачмытэсь, зӥбытэсь вал. Та дышетӥсьёс Федялы но мукет нылпиослы улонэз, дуннеез валан, ӟеч дышетскон мылкыд пыӵатыны тыршизы. Ческыт ӧй вал купец дорын улон, трос курытсэ, кузялзэ шӧмтӥз. Чылкыт сюлэмаз пӧртэм малпанъёс кылдӥзы. Школаын дышетскыкуз, улонэз со чылкак мукет синмын адӟе вал. Нош улонэн пумиськиз но валаз: огкадесь ӧвӧл адямиос. Узыръёс ялан малпало эшшо но узыргес луон сярысь, асьсэлы тросгес капыртон сярысь. Нош куанер адямилы котькытын одӥг кадь кайгу-куректон. Пияш ӵемгес но ӵемгес адӟылӥз узыръёслэсь дышетскымтэ, курадӟыса улӥсь калыкез пӧяллямзэс. Эшшо тани мае валаз со: куанеръёслэн, кӧттырон понна уен-нуналэн ужаса улӥсь адямиослэн, сюлэмзы чылкытгес. Соосын вераськыны, кенешыны но луэ. Кулэ дыръяз котьку юрттозы, визь-кенеш сётозы. Бугрес вакытэ 1917-тӥ арын тулыс пал эксэез сэрпалтӥзы. Начар улӥсь калык та иворез шумпотыса пумитаз. Нош купецъёслы но заводчикъёслы со ӧз яра. Эксэез сэрпалтӥзы, нош империалистической война мынэ на, солэн пумыз уг адскы. Федя малпаськыны кутскиз азьпал улонэз сярысь. валаз со: вузкаронэн уз герӟа вань улонзэ. Мар умоез, муртлэсь вузъёссэ вузаса, прилавок сьӧрын сылыны? - Сюлэмыя кыӵе ке но уж шедьтоно вал, - огпол гинэ ӧз малпаськылы Фалалеев. - Мар мон та Гагарин кадьёс понна тыршом? Кытчы ке, заводэ, интыяськыса, умойгес луысал. Гуртаз бертыса, та малпанзэ атаезлы вераз: - Уг яра мыным купецъёс понна вузкарыса улон. Кыӵе ке ӟеч-ӟеч уж борды басьтӥськоно ини. Оло, Иж заводэ интыяськоно? - Ачид тодод, пие, мон пумит ӧвӧл, - шуиз атаез. Ӵуказеяз егит пи сюрес вылэ потӥз. Бадӟым заводлэн цехъёсыз, станокъёс, ноку кысылӥсьтэм гуръёс Федяез чылкак паймытӥзы: йыг-йыг! жин-жин! вазе котькытын, номыре валаны уг луы. Ӟар-ӟар ӝуась гуръёс синмез мальдыто, прокат бордысь котыр пазьгисько тылкизилиос. Мӧйы рабочийёс серекъяса вералляло: _ Ничего, пияш, дышод ваньмызлы. Тӥни озьы, 1917-тӥ арын тулыс Фалалеев Ижевскысь пыӵал поттон заводын рабочий луиз. Ар пала ужаз обоймаосты вандылонын, нош бӧрысь прокатной мастерскойын конторщик луиз. Иж завод соку кельше вал пӧзись бадӟым пуртылы. Нуналлы быдэ сямен ортчыло митингъёс, кенешъёс. Большевикъёс, меньшевикъёс, максималистъёс, эсеръёс - котькудӥз тыршиз ужась калыкез ас палаз кыскыны. Федя Фалалеев умой уг вала, кин со большевик, кин со меньшевик, кин со эсер, кин пала соос дурбасьто, кин понна сюлмасько. Прокатной мастерскойысь рабочийёс яратылӥзы Семён Иванович Клюкинэз. Со Ижевск советлэн депутатэз вал. Федя но ялан кыстӥськылӥз Клюкин борды. Дышетскемез ӧжытэн, Семён Иванович вераськыны сокем шаплы ӧй вал, нош улонэз ӟеч валалляз. Мултэс зульыны ӧз яратылы, тужгес кулэзэ гинэ вералляз. ... Кутскиз граждан ож. Сибирьысь Урал пала кыстӥсько Колчак адмираллэн войскоосыз. Ижевскын но огыр-бугыр луиз. Ӝытъёсы но уйёсы ульчаостӥ винтовкаосын ветло рабочийёслэсь кылдытэм Горд гвардилэн патрульёсыз. Соос пӧлын ик - Фёдор Фалалеев но. 1918-тӥ арын гужем Ижевскын эсеръёс но тӧдьы офицеръёс ужуретъян ӝуто но властез киязы басьто. Тросэз большевикъёс соку фронтъёсы ожмаськыны кошкемын вал. Эсеръёс кутскизы городэ кылем коммунистъёсты, советъёслы дурбасьтӥсьёсты пытсалляны. Фалалеев большевикъёслэн партиязы пыремын ӧй вал ке но, соослы дурбасьтӥз. Озьы бере, солы городэ кыльыны уг яра. Федя гурт палаз кошкиз. Бертэмез бере кык арня но ӧз ортчы - тодӥз, Семен Иванович Клюкин Можгалан ужа шуыса. Федя соку ик татчы вуиз. Волостной ревкомлэн юртаз пырыса юаз: - Быгато-а Клюкин эшез адӟыны? - Председатель али уг ваньмы, ӧжыт витёно луоды, - кыӵе ке бумагаоссэ бугыръянъяз вераз комнатаын пукись кышномурт. Коридорын кӧня ке пукемез бере, сое ӧтизы. - Феденька, кытысь-марысь вуид тон? - шумпотыса пумитаз сое Клюкин. - Тӥ доры, Семён Иванович, юромо лыктӥ - уж сярысь юалляськыны. - Туж умой, туж умой, Федя. Тон кадь ӧрӟилы уж шедьтом. Я, мар сылӥськом асьмеос - пуксём... Ревкомлэн заседанияз сое огкылысь дэмлазы социальной обеспечениея отделын ужаны. - Дышетскемед вань, заводын но ужамын ини, - шуизы солы ревкомлэн членъёсыз. - Бадӟым уж оскиськом тыныд, Фалалеев эш. Советской власть калыклы пенсиос, пӧртэм юрттэт сётонэз туж кулэ ужпумен лыдъя. Можгалан ик 1918-тӥ арын августэ 1 Фёдор Фалалеевез куто большевикъёслэн партизылэн радаз. Нош сӥзьыл со ас мылкыдызъя Горд Армие куриськиз. Аръёс ортчо Вуиз 1921-тӥ ар. Та вакытэ сӥзьыл Фалалеевез юнмато йыруж лэсьтӥсьёсын нюръяськонъя Украинаысь войскоослэн сводно-маневровой группазылэн штабезлы комиссаре. Махнолэн бандаосыз пазьгымтэ на - быдэс Украинаетӥ калго соос, крестьянъёсты таркаса, виыло партийной но советской ужасьёсты. Секыт вал бандитъёсын нюръяськыны. Уен-нуналэн уиськылӥзы сьӧразы Горд Армилэн отрядъёсыз. Соосын ӵош котьку ик - комиссар но. Арлэн пумозяз вань бадӟымесь бандаос быдтэмын вал. Изюмысь курсъёсыз быдтэмзы бере, Фалалеевез ысто Киевысь артиллерийской школае дышетыны. Татын со ар пала гинэ ужаса вуттӥз. 1924-тӥ арын сӥзьыл Фёдор Яковлевичез юнмато 238-тӥ Мариупольской стрелковой полклы военной комиссаре. Полклэн командирез Соломатин шумпотыса пумитаз комиссарез: - Ну, Фёдор Яковлевич, ӵош ужалом. Мон но алигес вуи полке. Шонерак верало: капчи ӧвӧл татын: ваньмыз егитъёс - дышетоно соосты. Оскисько: тӥ мынам тужгес усто юрттӥсе луоды. - Быгатэмея тыршо, командир эш. Кык ар ӵоже ваче ки кутӥськыса сямен ужазы командир но комиссар. Ужзы пӧзиз. Полк сярысь ӝоген дивизиын, нош отӥяз быдэс округын вераськыны кутскизы. 1926-тӥ арын Фалалеев командиреныз люкиськиз - Соломатинэз Москвае дышетскыны ыстӥзы (куамын ар ӵоже Ф. Я. Фалалеев но М. Д. Соломатин матысь эшъёс вал). Полклы командире юнматӥзы Фёдор Яковлевичез. Гужем ӵоже полк боевой но политической дышетсконын дивизиын нырысетӥ интые потӥз. Со сярысь тодэм нарком К. Е. Ворошилов. 1927-тӥ арын со вуылӥз полклэн гужем лагеряз. Но Фалалеев татысь кошконо луэ - 1927-тӥ арын сое ысто Москвае. "Выстрел" курсын дышетскыны. Сое йылпумъяса, Фёдор Яковлевич луэ Краснолуганской полклэн командирез но военной комиссарез. Куинь ар ӵоже ужатозяз, полк бадӟымесь азинсконъёс басьтӥз. Со сярысь Фалалеевез книга гожтыны косӥзы. 1934-тӥ арын Москваын потӥз "Пути стрелковых успехов" книгаез. Таяз полкын но Фёдор Яковлевичез солдатъёс но командиръёс яратӥзы. Визьмо командир ваньзэ малпаса, быгатыса лэсьтылӥз. Адямиен лякыт вераськылӥз. Янгышам муртэ шонер сюрес вылэ поттыны тыршылӥз. Краснолуганской полкен куинь ар кивалтытозяз, Фёдор Яковлевич уноезлы дышиз. кыдаз. Авиация асьме армиын соку гинэ кылдэ вал ай. Пехотаысь устооссэ командиръёсты ыстӥзы отчы. Соос пӧлын ик вал Фёдор Яковлевич Фалалеев но. Смоленск авиабригадае инспекторе интыяськемез бере, Фалалеевез ысто Н. Е. Жуковский нимо Военно-воздушной академие одӥг толэзьем курсъёсы. Смоленске вуыса, Фёдор Яковлевич бригадалэн командирезлэсь куриськиз лётчике дышетскыны. Ӝоген йылпумъя лётчикъёслэсь-наблюдательёслэсь курссэс. Озьы ке но, Федор Яковлевич шӧдэ: солэсь лётчик ӧз на пӧрмы. 1933-тӥ арын май толэзе егит авиаторез дышетскыны ысто Качинскысь летной школае. Мылысь-кыдысь кутскиз Фёдор Яковлевич тодон-валан люканы. Соослэн группаязы ньыль мурт гинэ вал. Ваньзы выль удыслы вань сюлэмзэс сётыса дышетскизы. Качинскысь школаез усто йылпумъяса, Фалалеев пехотной командир-лётчик луиз. Нош авиациын командир луон понна, уно тодон-валан кулэ на вал. Соин ик эшшо одӥг ар дышетске Н. Е. Жуковский нимо Военно-воздушной академиысь оперативной факультетын. 1935-тӥ арлэн кутсконаз Фёдор Яковлевичез юнмато 4-тӥ Дальнеразведывательной эскадрильялы командире. Эскадрилья тактической но оперативной дасяськонын бригадаын нырысетӥ интыосты возиз. 1936-тӥ арын сое ӟечкылаз но кузьымъёс сётъяз ачиз нарком К. Е. Ворошилов. Нош командирлэн усто ужамез пусъемын кун наградаен. 1936-тӥ арын Федор Яковлевич басьтэ "Знак Почёта" орден. 1940-тӥ арын Фалалеевез Москвае ӧте Горд Армилэн Военно-Воздушной Кужымъёсызлэн командующийзы. Авиацилэсь генерал-майорзэ Федор Фалалеевез ӵекто Нырысетӥ Дальневосточной Армилэн Военно-Воздушной Кужымъёсызлэн командующийзылы воштӥсе. Но Кыдёкысь Шунды ӝужанын Фёдор Яковлевич ӝыны ар пала гинэ ужа. 1940-тӥ арын сое берен ӧтё Москвае но юнмато Кышкытлыклэсь утиськонъя калык комиссариатэ генерал- инспекторе. Егит командирлы оскемын вал бадӟым кун уж. Татын но Федор Яковлевич вань кужымзэ сётыса тырше асьме армиез юнматон бордын. Москваын но фронтъёсын 1941-тӥ арын апреле правительстволэн решениезъя Федор Яковлевич нырысетӥ воштӥсез. Та ужын дыръяз ик кутске Быдӟым Отечественной война. Война кутскон азьын Фалалеев Киев военной округын командировкаын вал. 1941-тӥ арын 22-тӥ июне выжон уе лыктӥз Луцк городысь истребительной дивизие. Изьыны выдон азяз Фёдор Яковлевич кияз "Человек-амфибия" книгаез басьтӥз но пумозяз лыдӟытэк ӧз дугды ни. Ӵапак соку, ӵукна пал, жингыртӥз телефон. Али ик ӧтизы дивизилэн штабаз. Кылӥськиз бомбаослэн пуштылэмзы. Немец бомбардировщикъёс лобало ини Луцк вадьсын. Киевысь ивортӥзы: немецъёс кунгожез выжизы но пуштытъяло ни советской городъёсты но военной объектъёсты. ... Война... Ваньмыз со уйвӧтын кадь. Валлян гинэ ук асьме городъёс но гуртъёс вадьсын шунды пиштӥз. Кин малпаз, туннэ та городъёс, гуртъёс ӝуалозы шуыса. Юнме шорысь быро адямиос. Кисьтӥське вир. Пӧртэм малпанъёс бергало Федор Яковлевичлэн йыраз. 3-тӥ мае гинэ ук Кремльын, военной академиосты йылпумъясь егитъёс азьын вераськыкуз, Иосиф Виссарионович Сталин шуиз: матысь дыре Гитлер асьме вылэ урдскыны уз дӥсьты. Со дырысен кык толэзь но ӧз ортчы - фашистъёс тылож пуромытӥзы. Бен, секыт йӧтоз таиз война асьме калыклы. Нош кӧня адями, кӧня ваньбур быроз! Уз, уз кылды Гитлерлы советской калыклэсь эриксэ таланы. Партия ваньзэ лэсьтоз, тушмонэз ӝоггес пазьгон понна. Зэмлык советской калык палан... 1941-тӥ арын июле кылдытэмын вал Северо-Западной, Западной но Юго-Западной направлениослы командованиос. Федор Яковлевичез юнмато Юго-Западной направлениысь ВВС-лы командующие. Татчы пыризы Юго-Западной но Южной фронтъёс. Нырысь со ужаз Советской Союзлэн Маршалэзлэн С. М. Будённыйлэн кивалтэмез улсын. Штабзы интыяськиз Полтава городэ. 1942-тӥ арын гужем Фалалеевез ӧтё Москвае, Горд Армилэн Военно-Воздушной Кужымъёсызлэн главнокомандующийзы А. А. Новиков доры. - Фёдор Яковлевич, ми тӥледыз малпаськом Горд Армилэн Военно-Воздушной Кужымъёсызлэн штабзылы начальнике юнматыны, - шуиз Новиков. - Александр Александрович, тӥляд ӵектонэныды соглаш луыны уг быгатӥськы, - пумит луиз Фалалеев. - Армиын кемалась ке но, штабын ноку ӧй ужа. Нош тӥ мыным сыӵе бадӟым уж дэмласькоды - уг быгаты сое быдэсъяны. А. А. Новиков ӝотрак вераз: - Мыным, штабын азьвыл ужам муртлы, кулэ зэмос юрттӥсь. Нош тӥ ӵапак сыӵе адями, Фёдор Яковлевич. Мон тӥледлы оскисько. Пумен штабын ужаны но дышоды. Фёдор Яковлевич Фалалеев Кышкытлыклэсь утиськонъя кун комитетлэн дэмламезъя луиз Горд Армилэн Военно-Воздушной Кужымъёсызлэн штабзылэн начальникез но ВВС-лэн главнокомандующийзылэн нырысетӥ воштӥсез. Ог дасо нунал ӵоже Фёдор Яковлевич тодматскиз выль уженыз. Штабын ужасьёс юрттӥзы солы, ваньзэ валэктӥзы. Военно-Воздушной Кужымъёслэн главнокомандующийзы А. А. Новиков ӵем поталляз фронтъёсы. Соку Фёдор Яковлевичлы кивалтоно луиз быдэс авиацилэн ужъёсыныз: воздушной армиосты интыысь интые вошъянэн, выль аэродромъёс лэсьтонэн, резервъёс кылдытонэн но трос мукетыныз. Со сяна, Ставкаын со И. В. Сталинлы арнялы куинь пол ивортылӥз авиацилэн ожмаськемез сярысь. 1942-тӥ арын сӥзьыл асьмелэн правительствомы но Кышкытлыклэсь утиськонъя кун комитет Фёдор Яковлевичлы оско Францилэн правительствоеныз "Нормандия-Неман" эскадрилья кылдытон сярысь вераськыны. Та ужез Фалалеев усто быдэстэ. Францилэн правительствоез косэмъя, Ф. Я. Фалалеевлы Шарль де Голль генерал сётэ Почётной легионлэсь командор ордензэ. Ӝоген Фалалеев правительстволэсь эшшо одӥг бадӟым ужзэ быдэстэ - пумиськылэ асьме союзникъёсмылэн делегациосынызы. ... А. А. Новиков фронтэ кошкемен, 1942-тӥ арын ноябрьлэн пумозяз Фалалеев быдэсъя ВВС-лэн главкомезлэсь но штаблэн начальникезлэсь ужъёссэс. ... Ӝоген воргорон секыт висьыны усе. Бурмемез бере со нош ик фронтъёсын. Ожъёсын кивалтэ Крымын, Прибалтикаын но Восточной Пруссиын. Родинамы азьын бадӟымесь вормонъёсыз понна 1944-тӥ арын Фёдор Яковлевич Фалалеевлы авиацилэн маршалэз вылӥ ним сёто. Ваньмызлы валамон вал ини: фашист Германия ӝоген пазьгемын луоз. Но тушмонэз вормон понна, трос кужым кулэ на вал. ... Вуиз ньыль ар ӵоже витем нунал. 1945-тӥ арысь 9-тӥ маез советской калык, быдэс дуннеысь адямиос ноку уз вунэтэлэ. Советской Армия утиз дуннеысь калыкъёсты фашизмлэсь. 1945-тӥ арын 24-тӥ июне Красной площадьын ортчиз Вормон парад. В. И. Ленинлэн Мавзолеезлэн трибунаяз сылӥзы партилэн но правительстволэн кивалтӥсьёссы, ожъёсын данэ потэм военачальникъёс. И. В. Сталинэн артэ площадьысь воинъёсты ӟечкыласа сылӥз Удмурт шаерлэн дано пиез, авиацилэн маршалэз Фёдор Яковлевич Фалалеев. Парадэн ортчись воинъёс Мавзолей азе куязы пазьгем фашист войскоослэсь знамяоссэс но штандартъёссэс. Ноку вунонтэм праздник вал со. Фёдор Яковлевич Фалалеев. Нылызлэн пиеныз Ваняен. 1945-тӥ ар, 24-тӥ июнь. Быдӟым Вормонлы сӥзем Парад дыръя. Мавзолейлэн трибунаяз А. И. Антоновен, С. М. Будённыен, И. В. Сталинэн артэ - Ф. Я. Фалалеев (паллянысен витетӥез). Фефилов Сергей Самонович Вордскиз 1955-тӥ арын 8 январе УАССР-ысь Красногорск ёросысь Кокман посёлокын. Ӟуч. Дышетскемез вылӥ. 1984-тӥ арын йылпумъяз Ижевскысь гурт удысъя институтэз, гурт хозяйствое механизациез пыӵатон специальностъя, 1995-тӥ арын - Удмурт кун университетэз, экономика но производствоен кивалтон специальностья. 1971-1973 аръёсы - Ижевскысь машина лэсьтон заводысь 252 номеро цехысь механо- сборочной ужъёсъя слесарь. 1973-1975 аръёсы - Советской Армиын. 1976-1979 аръёсы - Ижевскысь машина лэсьтон заводысь 252 номеро цехысь механо- сборочной ужъёсъя слесарь. 1979-1982 аръёсы - "Ижмаш" производственной огазеяськонысь 227 номеро отделысь инженер-технолог. 1982-1993 аръёсы - "Ижмаш" огазеяськонысь 254 номеро цехысь старшой мастер, цехлэн кивалтӥсез. 1993-1995 аръёсы - Удмурт Республикаысь Вылӥ Кенешлэн Промышленностья, транспортъя, связья но энергетикая ялан ужась комиссиезлэн тӧроез. 1995-тӥ арын - Калыкъёс но улосъёс куспысь экономикая ужпумъёсты эскеронъя центрлэн Ижевскысь ёзэзлэн кивалтӥсез. 1995-1999 аръёсы - Удмурт Республикаысь Правительстволэн Ужъя комитетэзлэн тӧроез. Удмурт Республикаысь Правительстволэн Тӧроезлэн косэмезъя, 1999-тӥ арын 26 мае юнматэмын Удмурт Республикаысь Ужъя кун комитетлы тӧрое. Удмурт Республикаысь Правительствое пыртэм муртъёс Горяинов Александр Павлович Вордскиз 1952-тӥ арын 7 феврале Куйбышев областьысь Большеглушицск ёросысь Тамбовка селоын. Ӟуч. Дышетскемез вылӥ. 1974-тӥ арын йылпумъяз Куйбышевысь лэсьтӥськон удысын инженеръёсты дасянъя институтэз, 1995 арын быдтӥз Россия Федерациысь Правительство бордысь калык хозяйствоя Академиез. Кун кивалтонъя магистр луэ. 1974-1984 аръёсы Глазовысь Чепецкой механической заводысь тупатъян-лэсьтӥськон цехъя мастер, кивалтӥсь. 1984-1988 аръёсы та предприятиын ик ужаз технолог но кивалтӥсь луыса. 1988-1993 аръёсы - Глазов городысь калык депутатъёслэн Кенешсылэн быдэсъясь комитетэзлэн тӧроезлэн нырысетӥ воштӥсез. 1993-1994 аръёсы - та городысь ик калык депутатъёслэн кенешсылэн быдэсъясь комитетэзлэн тӧроез. 1994-1999 аръёсы кивалтӥз Глазовысь город администрациен. Удмурт Республикаысь Правительстволэн Тӧроезлэн косэмезъя, 1999-тӥ арын 26 мае со юнматэмын Правительстволэн аппаратэныз кивалтӥсе. Шадрин Сергей Геннадьевич Вордскиз 1954-тӥ арын 13 мае Можга городын. Ӟуч. Дышетскемез вылӥ. 1977-тӥ арын йылпумъяз Ижысь медициная кун институтэз, терапевт. 1977-1978 аръёсы Горький чугун сюреслэн Ижевск станциезлэн больницаяз ужаз врач- терапевт луыса. 1978-1979 аръёсы - та больницаысь ик неврологияя отделениын врач-ординатор. 1979-1981 аръёсы - Советской Армиын. 1981-1986 аръёсы Ижевскысь "Нефтемаш" заводлэн 9 номеро медсанчастяз старшой терапевт, валтӥсь врачлэсь ужъёссэ быдэсъясь, валтӥсь врач. 1986-1989 аръёсы - Ижевскысь медициная училищелэн директорез. 1989-1995 аръёсы - "Ижсталь" огазеяськонлэн 2-тӥ медсанчастяз валтӥсь врач. 1995-1999 аръёсы - Удмурт Республикаысь тазалыкез утёнъя министр. Удмурт Республикаысь Правительстволэн Тӧроезлэн косэмезъя, 1999-тӥ арын 26 мае со юнматэмын Удмурт Республикаысь тазалыкез утёнъя министре. Бессогонов Николай Михайлович Вордскиз 1951-тӥ арын 1 январе Удмурт АССР-ысь Завьялово ёросысь Юськи селоын. Удмурт. Дышетскемез вылӥ. 1973-тӥ арын йылпумъяз Удмурт кун университетэз, тазалыкез кыдатонъя дышетӥсь луиз, 1978-тӥ арын ВЛКСМ-лэн ЦК-езлэн вылӥ комсомол школаяз политика удысъя дышетскиз, 1998-тӥ арын быдтӥз Россия академилэсь кунэн кивалтонъя ёззэ, психолог. Пусъемын "Знак Почета" орденэн. 1973-1974 аръёсы - Советской Армиын. 1974 арын - Удмурт АССР-ысь Министръёслэн Советысьтызы Физкультурая но спортъя Комитетысьтыз егитъёслэн спортъя школазылэн отделэныз кивалтӥсь. 1974-1976 аръёсы - ВЛКСМ-лэн Удмурт обкомезлэн спортъя но оборонно-массовой ужъя отделаз инструктор. 1976-1978 аръёсы дышетскиз ВЛКСМ-лэн ЦК-езлэн вылӥ комсомол школаяз. 1978-1982 аръёсы ВЛКСМ-лэн Удмурт обкомезлэн спортъя но Оборонно-массовой ужъя отделэныз кивалтӥсь. 1982-1985 аръёсы Удмурт АССР-ысь кун музыкальной театрлэн директорез. 1985 арын - ДОСААФ-лэн Удмурт обкомезлэн кивалтӥсезлэн воштӥсез. 1985-1989 аръёсы - Ижевскысь драмая В. Г. Короленко нимо ӟуч театрлэн директорез. 1989-1991 аръёсы - КПСС-лэн Удмурт обкомысьтыз идеологияя отделэзлэн инструкторез. 1991 арын - Удмурт АССР-ысь Вылӥ Кенешлэн Секретариатысьтыз референт. 1991-1993 аръёсы - Удмурт АССР-ысь Министръёслэн Советысьтызы калыклы юрттэт сётонъя управленилэн отделаз валтӥсь специалист. 1993-1995 аръёсы - Удмурт Республикаысь Правительстволэн Аппаратысьтыз калыклы юрттэт сётонъя отделлэн кивалтӥсез. 1995-1999 аръёсы - Удмурт Республикаысь калыкез улон-вылонын утёнъя министр. Удмурт Республикаысь Правительстволэн Тӧроезлэн косэмезъя, 1999-тӥ арын 26 мае со юнматэмын Удмурт Республикаысь культурая министре. Алнаш ёросысь Сизьгуртын вордӥськем но будэм адямиос! 12-тӥ июне тӥледыз возьма мусо, яратоно, дуно Сизьгуртты. Лыктоно 11 часлы. Пусйыны кулэ: таиз пумиськон куатетӥез ни. Бертэлэ, гажано сизьгуртъёс, вордӥськем палъёсады! Шумпотыса пумиталом тӥледыз! Удмурт Республикалэн "Удмурт Республикаысь Кун Кенеше депутатъёсты быръён сярысь" Законэзлэн 84-тӥ ёзэтаз воштонъёс но ватсанъёс пыртон сярысь Удмурт Республикалэн Законэз 1-тӥ ёзэт. Удмурт Республикалэн "Удмурт Республикаысь Кун Кенеше депутатъёсты быръён сярысь" Законэзлэн 84-тӥ ёзэтэзлэн нырысетӥ люкетаз воштонъёс но ватсанъёс пыртыса гожтоно тазьы: "1. Кун Кенешлэн депутатэзлэн полномочиосыз дырызлэсь вазь бырыку, Удмурт Республикаысь Быръёнъя комиссия бушам мандат кылдэм бере, толэзь куспын ялэ со округын ватсаса быръён. Со ортчытӥське быръёнэз ялэм дырысен 70 нунал ортчем бере но 180 нунал тырмемлэсь азьло, та Законлэсь куронъёссэ чакласа". 2-тӥ ёзэт. "Та Закон кужыме пыре печатлам нуналысен. Удмурт Республикаысь Кун Кенешлэн Тӧроез А. А. Волков. Ижевск город, 1999 арын 28 мае. � 49-ИИ. ӦТЧАМ АЗЬЫН: КЫЛ СЁТӤЗЫ КЕ... Асьмеос янгыш Совето власть бырем дырысен удмурт калык ыштонъёс вылысь ыштонъёс адӟе. Быре удмуртлыкмы, тӥясько но сюбегало политической правоосмы. Нош берло ортчем быръемъёс бере, оло, государственностьмес ик ыштӥм. Республикаысь кык Вылӥ кивалтӥсьёс пӧлысь одӥгез но удмурт ӧвӧл. Марлы озьы луиз? Со понна асьмеос, удмуртъёс, нырысь ик янгыш луиськом. Ум бырйиське депутатэ асьме адямиосты. 100 депутат пӧлысь 11 гинэ удмуртъёс. Валамон ини: таӵе дыръя вылӥ кивалтӥсе удмуртэз бырйыны луонтэм секыт. Озьы ик шуг асьмелы законъёс кутыны но. Марлы удмурт калык ас калыкез понна куаразэ уг сёты? Удмурт калыклэн удмурт кивалтӥсьёслы осконэз быремын. Адямиос тазьы шуо: "Марлы кулэ со удмуртэд, пичи портфель сёто ке, ас калыксэ тодмамысь дугдэ, ас калыкезлы номыр уг лэсьты, вӧсь карыны кутске. Ӟучъёс асьмелы тросгес лэсьто..." Вылӥ кивалтӥсьёс асьсэлэсь кырсь политиказэс калык доры вутто пичигес удмурт чиновникъёс пыр. Соин ик калык адӟонтэм карыны кутске кӧня ке ӝутскем удмуртъёсты. Тае лыдэ басьтыса, котькудӥз кивалтӥсь, пичи-а со, бадӟым-а, ас калыкезлы маке но умойзэ лэсьтыны мед турттысал. Марлы асьмеос уллань но уллань лэзькиськом? Марлы удмуртъёслэсь трос поллы ӧжыт лыдъем калыкъёс вылэ но вылэ ӝутско? Соос асьсэлэн правооссы, кунлыксы понна нюръясько. Тани 50 сюрс муртъем черкез калык быдэс дуннелы кылымон вераны быгатӥз ачиз сярысь. Нош марлы 750 сюрс удмуртъёс уг быгато утьыны асьсэлэсь правооссэс, государственностьсэс? Сыӵе лябесь, востэмесь, дыр, удмуртъёс. Соин ик унь-мань карыны туртто асьмемыз. Соку ик потоно вал, дыр, шор площаде митинге, ваньмызлы кылымон верано вал кылдэм югдур сярысь. Нош дӥсьтӥсь ӧз луы. Паймытэ радиолэн но телевиденилэн чус улэмзы. Югдурез мур уг возьмато, вылтӥз гинэ кӧня ке ортчо. Марлы уг кылӥськы писательёслэн, тодосчиослэн, политикъёслэн куаразы? П. К. Чернов азьло лэчытэсь статьяос гожъялляз, нош али солэн но куараез уг кылӥськы. 19-тӥ инвожое ортчытоно съездын ужпумез лэчыт пуктоно. Нырысь ик кулэ удмурт депутатъёслы квота, со 50 процент мед луоз. Квота ке ӧз луы, вуоно быръёнъёсы депутатэ 2-3 удмурт сяна уз шедьы. Республикалэн Вылӥ кивалтӥсез кыксэ ик государственной кылъёсты тодыны кулэ. Удмурт студентъёслэн вузъёсын лыдзы 30 процентлэсь ӧжыт медам луы. Кутоно ни закон государственной кылъёс сярысь. Кылӥ, "Удмурт кенешлэн" "Герд" нимо газетэз потоз шуыса. Сое котькуд удмурт семьяе вуттоно вал. Мед луысал со дунтэк яке туж пичи дунын. Котькуд гуртын мед луысалзы "Кенешлэн" агитаторъёсыз, тужгес но быръёнъёс дыръя. Съездэ Москваысь медаз келялэ вал секретарь-машинисткаез гинэ. Мед лыктысал Абдулатипов яке Михайлов. Кызьы ке уже ӟечгес кутоно артистъёсмылэсь быгатонлыксэс. Сётӥз-а медам туэ, кылсярысь, "Италмасмы" удмурт кандидат понна концерт? Ӧз, дыр, малы ке шуоно, асьмелэнъёсызлэн коньдонзы ӧвӧл. Ас калыкед понна, оло, коньдонтэк но сётоно вал кӧня ке концерт. Вуоно съезд мед луысал удмурт калык понна пайдаё. Б. Блинов, Глазов ёросысь Куреггуртын улӥсь. Котьма сярысь Внучкаез сьӧры... парашютэн Парашют спортъя дуннеын выль рекорд пусъемын Выль Зеландиын. Сыӵе "уж" лэсьтӥз 93 аресъем кышномурт. Парашютъя компаниысь ивортӥзы, Маргарета Мак-Манон 3000 метр вылӥысен тэтчиз шуыса. Арлыдо кышномурт парашютэн тэтчон сярысь малпаськыны кутскиз, 17 аресъем внучкаезлэсь адӟем карыса. Иворъёсъя национальной служба. Паймымон рекорд Тбилисиысь писатель Нариман Яшагашвили книга гожтонъя рекорд пуктӥз. 125 страницаен "Ностальгия любви" романзэ со куинь нунал куспын гожтӥз. Азьвылэз рекордсмен вить нуналскын гожтӥз вал. Литератураын паймымон экспериментэз ортчытонлэн мугез луиз Пушкинлэн вордскем нуналыз. Солэн ик "И жизнь, и слёзы, и любовь" чурез романлэн пуштросэзлы тупаз. Вуоно книгалы план лэсьтонлы одӥг час тырмиз. Собере вуоно рекордсмен кутскиз ужаны. Эскерись жюри но сюриз. Яшагашвили нимаз сётэм комнатаысь куинь нунал ӧз пота. Жюри вылӥ дунъяз рекорд пуктэм романлэсь ӟечлыксэ. Книга возьматэ ӟуч но грузин кусыпъёс сярысь. Автор али Гиннесс книгалэсь дипломзэ вите. Азьланяз эшшо мукет рекордъёс сярысь малпаське. Яшагашвили верамъя, таӵе ужлы дасяськиз со дас ар. "Комсомольская правда" газетысь. ВИКУЛОВ ВИКТОР АРКАДЬЕВИЧ Вордскиз 1957-тӥ арын 10 феврале Украина ССР-ысь Кировоград городын. Украинец. Дышетскемез вылӥ. 1984 арын йылпумъяз Удмурт кун университетэз, историк, 1997 арын - Москваысь калык кусыпъёсъя кун институтэз, удысэз - кун ужъёсын кивалтӥсь. 1976- 1983 аръёсы граждан авиацияя Урал ёзэзлэн Ижевскысь огазеям авиаотрядлэн диспетчерез. 1983-1992 аръёсы Удмурт АССР-ысь Кышкытлыклэсь утиськонъя кун комитетын ужась. 1992 ар - Удмурт АССР-ысь Министръёслэн Советэнызы кивалтӥсьлэн юрттӥсез. 1992-1995 аръёсы - Удмурт Республикаысь Мукет кунъёсын экономика удысын кусыпъёс возёнъя кун комитетлэн кивалтӥсезлэн воштӥсез. 1995-1999 аръёсы - Удмурт Республикаысь мукет кунъёсын кусыпъёс возёнъя министр. Удмурт Республикаысь Правительстволэн Теоремаӧроезлэн косэмезъя, 1999-тӥ арын 26 майысен со юнматэмын Удмурт Республикаысь мукет кунъёсын кусыпъёс возёнъя министре. Кун Кенешлэн Президиумаз Ортчиз Кун Кенешлэн выль Президиумезлэн заседаниез. Сое нуиз Кун Кенешлэн Тӧроез Александр Волков. Эскеремын куать ужпум. Нырысь ик, Президиуме быръемъёс юнматӥзы Кун Кенешлэн Аппаратэзлы кивалтӥсь. Та удыс нош ик оскемын Александр Филимоновлы. Юнматэмын Кун Кенешлэн ужась ёзъёсыз. Азьвыл созывен ӵошатыса, госаппарат куинь муртлы будӥз: Кун Кенешлэн Тӧроезлэн куинезлы ик воштӥсезлы табере луонлык сётэмын быдэн одӥг юрттэт возьыны. Эскерон палата быремен, парламентын кулэсмиз ялан ужась депутатъёслэн лыдзы. Со чотын котькудаз али ужась комиссие ватсаськиз быдэн одӥг адями. Огъя вераса, ар ӵоже парламентлэн уждунэз кыскоз 6 миллион манетлэсь ятыр. Ужан интыос сярысь ке верано, соос тырмыт. Котькуд фракцилы висъяськоз нимысьтыз кабинет. Президиуме быръемъёс соглаш луэмзэс веразы Кун Кенешлэн юртаз выльдон-тупатъян ужъёслы коньдон висъяны. 18 ар ӵоже интыен-интыен со вужмиз ни. Президиум учкиз государственной служащийёслы ватсаса нимысьтыз пенсия тыронъя ужпумез но. Вераськон мынэ 1990-тӥ арозь партилэн обкомаз отделъёсын кивалтӥсьёс но республикаысь профсоюзъёслэн комитетсылэн председателез сярысь. Та ужпумъя вань Правительстволэн постановлениез, Россиысь Президентлэн Указэз. Нош закон асьме дорын туннэ нуналозь кутымтэ на. Башкортостан но Татарстан та ласянь кык арлы парламентмес азьпалтӥзы ни. Нимысьтыз пенсия тырыны чакламын 8 муртлы. Со понна араз висъяно луоз 95 сюрс манет. Депутатъёс та юанэз эскерон борды берытскозы на. Президиум тодматскиз но умоен лыдъяз Тамбовысь парламентарийёслэсь обороная предприятиослы коньдон висъян сярысь Россилэн Правительствоезлы вазиськонзэс. Та удысъя югдур котькытын огкадь - урод. Кутэмын постановление асьме дорын финн-угор калыкъёслэсь сизьыметӥ фольклор фестивальзэс ортчытонъя. Коньдон висъя федеральной бюджет. Кӧня ке вис карем бере, 22 июне, депутатъёс люкаськозы азьвыл чакламтэ кыкетӥ сессие. Отын учкозы Кун Кенешлэсь 1999 арын законъёс бордын ужан сярысь планзэ. Президиумын эскеремын мукет ужпумъёс но. Л. Медведева. Возьматӥськом улӟись коллективъёсты Куашкам огазеяськон пыд йылаз султэ Ижысь сӥль комбинат, али усьтэм амалэн ужась акционер огазеяськон (ИМКО), одӥгез бадӟым но огсыр ужаны кутскись предприятие луэ. ИМКО нуналлы быдэ шорлыдын 6 тонна колбаса поттэ. Холодильниказ 1250 тонна сӥль продукция тэре. 300 пала ужасьёсыз ӟеч мылкыдын тыршо. Берло дыре 40 выль ужасьёс кутэмын. ОАО пумен кузёмытэ вамышъёссэ. Ижысь сӥль комбинат - республикаямы одӥгез самой бадӟымез но мӧйыез предприятие. Сое пуктон, музъем висъян сярысь решение кутэмын вал 1931-тӥ арын 14 октябре, нош ужаны кутскиз ньыль ар ортчыса. Туэ солы 64 ар тырме. Ас вакытаз со быгатэ вал город калыклы тырмыт сӥль но колбаса сётыны. Но шоркармы 50-тӥ-60-тӥ аръёсы кылын вераны луонтэм ӝог ӝутскиз-паськытаз, нош сӥль завод огинтыяз сылӥз. Югдурез, улонлэсь куронъёссэ чакласа лэсьтоно вал бадӟым сӥль комбинат. Озьы ик со луиз. Нырысь пуктӥзы сӥль-кӧй поттонъя цех, холодильник но мукет производственной юртъёс. Тӥни озьы 1963-тӥ арын город сьӧры, Сарапулэ нуись сюрес дуре, пуксиз выль куронъёслы тупась завод. Шаерамы таӵеез предприятие ӧй на вал Магазинъёс тырмизы ческыт сӥль сиёнъёсын. Вузаськизы чеснокен лэсьтэм пӧртэм колбаса но сӥль продуктъёс. Нош странаямы выльдӥськон кутскон, рынокен экономикае выжон вакытэ Ижысь сӥль поттонъя комбинат усьтэм амалэн ужась акционер огазеяськон (ИМКО) луиз. Шуг- секытъёслы чидатэк, предприятие каллен-каллен ужан ӧрзэ ыштӥз, гуньдӥз, куашказ, шуыны луоз. Озьы кылем арын 2 июле таӵе ӟеч коллектив банкротъёс пӧлы шедиз. Сыӵе решение кутӥз республикаысьтымы Арбитраж суд. Предприятие лыктӥзы выль кивалтӥсьёс. Мукет сямен вераса, кылдытэмын вал палэнысь киватон. Сое внешней управление шуыса нимало. Валтӥсь луиз Александр Алалыкин (выль условиосын ужаны дышетскем адями). Со ас котыраз люказ оскымон воштӥсьёс-юрттӥсьёс, ужез ӟеч тодӥсь но ог-огзэсты валась адямиосты. Озьы кылдӥз выль команда. Вакчи дыр куспын со быгатӥз вань уъёсты ӟеч радъяны, тыронъёсты берыктыны, адямиослы быдэс ар ӵоже тырымтэ уждунзэс сётыны но огсыр ужанэ потыны. Колбаса поттӥсьёс, специалистъёс ӝог валазы выль кивалтӥсьёслэсь соос сярысь сюлмаськемзэс-тыршемзэс. Коллектив син азьын воштӥськиз, ватсаса кужымен ужаны ӧдъяз. Сое тужгес яркыт возьмато таӵе лыдпусъёс. Валля арын 2570 но 1500 сюрс манетлы изъян адӟизы. Югдур чылкак мукет пала берытскиз туэ. Кылем арын нырысетӥ кварталэ 970 сюрс манет изъян адӟизы ке, туэ сыӵе ик дыр куспын нырысьсэ 92 сюрс манет пайда басьтӥзы. Кызьы бен огазеяськонлэн ӝутскон сюресэз кутскиз, кызьы пыд йылаз султэ? Туннэ со сярысь мадё асьсэос ужасьёс, специалистъёс но кивалтӥсьёс. Комбинат кыкетӥзэ вордскиз Кызьы верай ни, огазеяськонэн кивалтыны оскизы Александр Николаевич Алалыкинлы. Шуг-секытъёслэсь кышкатэк басьтӥз со ас вылаз куашкам предприятиез. Азьло ужаз "Нефтемаш" заводын парторг, партилэн Первомайской райкомезлэн нырысетӥ секретарез луыса, нош талэсь азьло вал Ижысь Вакуумно-электронной машинаосъя (ВЭМ) научно- исследовательской институтын директорлэн коньдон ужпумъёсъя но экономикая воштӥсез. Усто организатор луэмез но калыкен одӥг кыл чаляк шедьтыны быгатэмез выль ужаз юн яразы. Дышетскемез но юрттэ, кык институтэз быдтэмын - Свердловскын но Москваын. Кыӵе бен вал огазеяськон, Александр Алалыкин татчы лыктыку? Зэм, ИМКО-ез юнме шорысь банкрот ӧз каре. Со кабзэ ӧз ужа, шуыны луоз. Тани палэнысь кивалтон тупатон азьын 4 толэзь ӵоже 11 тонна колбаса поттӥзы, нош собере ньыль толэзьскын ик лэсьтэмын 257 тонна, яке 23 поллы трос. Нош али одӥг нуналскын 6 тонна колбаса потто. Валэктонэз ӧвӧл, азинскон син азьын. Мукет сямен вераса, Ижысь сӥль комбинат шаерамы таӵе предприятиос пӧлын нош ик валтӥсь интые потӥз (Сарапул бере). - Огазеяськонлэн уждунъя гинэ 850 сюрс манет тыронэз люкаськемын вал, - маде Александр Николаевич. - Али ваньмыз со берыктэмын но толэзьлы быдэ чик ӝегатытэк уждун сётъяськом ни. Озьы ик быдтэмын мукет пунэм тыронъёсмы (вытъёс, электрокужымлы, газлы но музонэзлы). Со бадӟым вормон. Калыклэн мылкыдыз ӝутскиз, милемлы оскыны ӧдъязы. Мукет предприятиосын адямиосты ужтэк кельто, нош ми ватсаса 40 выль ужасьёс кутӥм коллективмы 300 муртъем луиз ни. Город понна но со туж умой. Кызьы бен та огазеяськон шуг-секытысь потыны быгатӥз? Трос ужрадъёс ортчытэмын. Нырысь ик, выльдэмын производство, кылсярысь, котельнойзы пытсан калэ вуттэмын вал. Шедьтӥзы 1500 сюрс манет коньдон но тупатъязы. Али умой ужа ни. Ӟеч-ӟеч выльдӥзы технологической оборудованизэс, компрессорноез, утизы лабораторизэс, холодильниксэс, кудаз 1250 тонна сӥль-колбаса тэре. Предприятилэн палэнтӥз ӧз ортчы 17 август. Мар сярысь вераськон мынэ, со ваньмызлы тодмо. Сӥльлы дунъёс шӧдскымон будӥзы. Соин ик предприятие толэзяз 80-90 тонна колбаса поттэ, нош огсыр ужан но умой азинскон вылысь, ичизэ 120-130 тонна лэсьтоно. Со понна луонлыкъёс вань. Сӥль комбинатлы озьы ик трос юртто республикаысьтымы Пудоез эмъянъя управление (кивалтӥсез Г. Н. Бурдов) но Гурт удысъя но сиён-юонъя министерство. Сӥль комбинатлэсь секыт югдурзэ ӝог валаз "Восточный" совхозлэн директорез И. М. Гараев но. Огъя вераса, огазеяськонын вань ужъёсты валаса, шонер радъязы, дисциплинаез юнматӥзы, лушкаськон учыръёсты дугдытӥзы. Котькытын порядок тупатӥзы. Озьы син азьын ужъёс вырӟизы. Огазеяськонлэн сюлэмшугъяськытӥсь ужпумъёсыз ӧжыт ӧвӧл ай. Но тужгес умоез но пусйымонэз - вузкарись организациос ИМКО пала берытско, солэсь продукцизэ тросэн басьтыны кутскозы. Со шумпотымон. Мугез тодмо. Коллектив ГОСТ-лэн куронъёсызъя гинэ ужа, ӟеч колбаса но сӥль поттэ. Колбасаосазы, умойтэм ватсэтъёс уг тыро, вылӥ ӟечлыкен сӥль гинэ поно. Соин ик ӝӧк выламы ческыт сиён вутто, но дуныз ӧжыт вылӥынгес - умой сӥльпонна тросгес тыроно луо. Комбинатын зол пуктэмын ветеринарной, технологической но санитарной эскерон. Котькуд ёзын со юн шӧдӥське. Азьло азбараз ик кӧня жуг-жаг, силё люкаськемын вал. Табере ваньмыз со чылк-чылк утялтэмын-ӵужемын. Мукетсэ но пусъеме потэ. ИМКО пала берытскизы гурт хозяйствоос. Огдыре соос татчы сюрессэс ыштӥзы, солы мышкин берытскизы ни вал. Табере огазеяськон соослы азьвыл тыронъёссэ берыктӥз но сӥль вузам понна коньдонэз со нуналаз иксётэ. Озьы гуртысь ваньбур поттӥсьёсын огазеяськонлэн кусыпъёсыз пумен юнмало но паськытало. Тани берло дыре, коммерцияя директорлэн Станислав Гавриловлэн ивортэмезъя, татчы тужгес трос вутто Завьялово ёросысь "Восточный" совхоз, "Родина", "Россия" гурт кооперативъёс, Сарапул районысь "Удмуртский", Пичи Пургаысь "Молния" но мукет хозяйствоос. Огазеяськонэ озьы ик сӥль ваё Якшур-Бодья, Вавож, Алнаш, Ува, Грахово ёросъёс но мукетъёсыз. ИМКО-е мултэс сӥльзэс вузало фермеръёс но нимаз адямиос. Нош азьло со, калыклэсь пудозэ басьтыса, соослэн куремзыя гинэ колбаса лэсьтэ вал. Туннэ татын чылкак музон югдур. Огазеяськон али, зэмзэ но, кыкетӥзэ вордӥське. Нырысез бадӟым выльдӥськон но гурезе тубонэз вал 1965-тӥ-1975-тӥ аръёсы. Соку сӥль заводэз паськытатонъя но кужмоятонъя нимысьтыз ужрадъёс кутэмын, малы ке шуоно, Ижын ӝутскиз бадӟым автозавод, город юн ӝог будӥз. Кулэ вал трос сиён-юон. Со дыре одӥг смена ӵоже завод 65-70 тонна сӥлез переработать карылӥз но 22 тонна колбаса лэсьтылӥз. Комбинат куинь сменаен ужаз. Трос сӥль кошкылӥз Москвае но. Андрей ФРОЛОВ, быдэсъясь директор, производствоя но вузкаронъя валтӥсь тӧролэн воштӥсез: - Татчы монэ ӧтизы палэнысь кивалтон тупатэмлэсь (банкрот каремлэсь) кык толэзьлы вазьгес. Трос ужай кышкытлыклэсь утиськонъя кун ёзъёсын (КГБ-ын), ож тӥрлык поттон удысын. Вордски Ижын, йылпумъяй татысь механической институтлэсь приборостроительной факультетсэ, эшшо быдтӥ Россилэн Правительствоысьтыз калык хозяйствоя академиез, экономист луи, собере юристэ дышетски на. Асьмеос быгатӥськом усто ож тӥрлык, пыӵал, ракетаос поттыны, но жаляса верано луэ, кунгож сьӧрын та ласянь рынокез ыштӥм. Но асьмеос озьы ик быгатӥськом калыклы ӟеч сиён-юон лэсьтыны. Дорамы поттэм колбасаез ӵошатод шат палэнысь (США-ысь, Германиысь, Даниысь) ваеменыз?! Нокызьы уд. - Андрей Борисович, ИМКО-е лыктыса, мар бордысен ужаны кутскиды? - Нырысь ик экономической анализ лэсьтӥм. Малы ке шуоно, ужпум сылэ вал одӥг - огазеяськонэз вузано яке палэнысь кивалтон тупатоно но вань тыронъёсты пытсано (отчы пыро уждунлы, электрокужымлы, газлы тыронъёс, вытъёс но мукетыз) Ми кыкетӥ сюрестӥ мынӥм, палэнысь кивалтон тупатӥм но табере пыд йыламы султӥськом ни. Кӧня ке ортчемзэ верало. 1992-тӥ арысен предприятие ялан уллань гылӟиз. 1997-тӥ арозь колбаса поттон 9 пол синӥз. Нош туэ югдур умой пала берытске. Апреле 86 тонна колбаса поттӥм, палэнысь кивалтон пыӵатэм дыр ӵоже ОАО продукция поттонзэ 5 пол будэтӥз. Ми азьпалан мынэ на Сарапулысь сӥль комбинат, но Ижевскын данмес ӝутӥм, колбаса поттонъя валтӥсь инты басьтӥськом ни. Ми колбаса пушкы нокыӵе умойтэм ватсэтъёс ум тыриське, кызьы лэсьто кунгож сярысь фирмаос но асьмелэн пичиесь колбаса поттӥсь куд-ог цехъёсмы (соя пызь но музонзэ поно). Соос ужало технической условиосъя, нош ми - ГОСТ-ъя гинэ. Озьы колбасамы дуногес усе. Республикаямы ми гинэ тазьы ужаськом, но данакез басьяськисьёс сое уг тодо. Соин ик рынокын возиськыны капчи ӧвӧл, ведь колбаса дунэз ялан уд ӝуты. Собере огшоры адямилэн басьяськыны луонлыкъёсыз уг будо: уждун, пенсиос но пособиос дыраз уг ётӥсько. Кылем сӥзьыл милемлы но капчи ӧй вал. 10-15 процентэз сӥль Москвае но мукет городъёсы кошкз, августэ гинэ производствомы будыны ӧдъяз. Кусыпъёс тупатӥм вузкарись организациосын. Соос умоен пусъё колбасалэсь ӟечлыксэ. Тӥни соин ик 70 процентсэ продукцимес басьто Ижевскын улӥсьёс. Дорамы озьы ик сюрес лёго бускель Татарстан, Башкортостан республикаос, Пермь, Екатеринбург но Киров областьёс. ИМКО 160 вузкарись организациосын кусып возе. Соос пӧлысь бадӟымъёсыз - "Продторг", "АСПЭК" огазеяськонъёс но музонэз. Магазинъёсын сиёнъёсмы котьку медаз луозы шуыса, арняяз 6 нунал ужаськом, субботае гинэ комбинат шутэтске. Соин ик понедельнике магазинъёсы колбаса келяськомы ни. Асьмелэн 12 автомашинаосмы. Басьяськисьёс асьсэ транспортэн но нулло. Холодильникамы 1250 тонна продукция тэре. Зэм, одӥг ар куспын бадӟымесь воштӥськонъёс ортчытэмын. Вылӥ кивалтӥсьёс, ваньмыз сямен воштӥськизы, кылемын огшоры ужасьёс, специалистъёс но шор ёзо кивалтӥсьёс. Огъя вераса, коллектив утемын. Колбасалэн ӟечлыкез потэ со бордысь: кызьы пудоез вандод, сӥлез утялтод но технологиез быдэсъялод. Сое хозяйствоос но тодыны кулэ. Ведь ӟеч куайытэм пудоез валатэк утялтӥд, соин мылкыдтэк ужад ке, ческыт колбаса ноку уд лэсьты. Соин ик ми пудо сётӥсьёслэсь котьку юаськом, вераны куриськом ужысьтымы шекъёсмы сярысь яке ӵектӥськом дэмланъёс-ӵектонъёс сётыны. Соос милемыз валало, юртто, ми но озьы ик лэсьтӥськом. Но гуртысь ваньбур поттӥсьёслэсь но переработчикъёслэсь интересъёссэс утён, кусыпъёсмес уката юнматон вылысь, республикаямы кылдытоно вылэм огъя ёз. Сое котькызьы ниманы луысал - ассоциация, кооператив яке огазеяськон. Пусъём на тани мае 1994-тӥ арысен, палэнысь кивалтон кылдытытозь, производствоез азинтонэ одӥг манет но висъямтэ. Нош миым 2 июльысен тазэ ужан тӥрлыкез выльдыны 1200 сюрс манет кутӥм. Али вужзэ тупатъяськом, но азьланьын одно ик выльзэ басьтом. Со юрттоз республикаямы нош ик нырысетӥ интые потыны, кызьы ке продукция поттонъя, озьы ик вылӥ ӟечлыкезъя. Ольга ЗАЙНАГУТДИНОВА, производственно-ветеринарной эскеронъя отделлэн но лабораторилэн кивалтӥсез: - Переработкая удысысь котькуд предприятиын нимысьтыз инты басьто лаборатория но производственно-ветеринарной эскерон. Сотэк уго ӟеч продукция уд потты, вылаз ик шудтэм учыръёс но луыны быгатозы. Соин огазеяськонамы милесьтым ужмес валаса радъян сярысь выль кивалтӥсьёсмы трос сюлмасько. Чылкак мукет югдур вал талэсь азьло, вуж кивалтон дыръя. Предприятимылы секыт ке но йӧтэ, лабораторимы улэ, со Чехиысь басьтэм оборудованиен ужа. Шаерысьтымы сӥль заводъёс пӧлысь милям гинэ таӵе ӟеч лабораторимы вань. Соин ик Пудо эмъянъя но санитарной эскерон туж зол пуктэмын. Огазеяськонын радъямын нимаз государственной ветеринарной эскерон. Соос кыл куто республикаысьтымы ветеринарной управление азьын гинэ. Производственно-ветеринарной эскерон но лаборатория азьын одӥг ужпум сылэ - ӟеч продукция поттоно. Тӥни соин герӟаськемын быдэс ужмы - пудоез кутонысен колбаса лэсьтытозь. Ветврачъёс госветнадзорен ӵош ваньзэ чаклало. Пудоез басьтыку, клинической осмотр лэсьто, собере ветврачъёс ватсан экспертиза ортчыто. Соос ик чаклало холодильникысь ветеринарно-санитарной правилоосты но сӥль воземез. Озьы ик учко дась продукциез. Выль кивалтӥсьёс, азьвылъёсыз сярысь, вань ӵектонъёсмес но куронъёсмес лыдэ басьто но уже пыӵато. Со возьматэ кивалтӥсьёслэсь заводэз улӟытыны тыршемзэс. Отделын но лабораториын быгатӥсь врачъёс ужало, опытсы бадӟым. Соос оскем ужзэс мылысь-кыдысь, быдэсъяло. Ачим сярысь ке верано, татын 20 ар тыршисько ни. нырысь техник-химик вал, собере лабораториез оскизы, нош миым - производственно- ветеринарной эскеронъя отделэз. 1980-тӥ арын йылпумъяй Можгаысь ветеринарной техникумез, али Ижысь гурт удысъя академиысь зооинженерной факультетлэн куинетӥ курсаз дышетскисько. Вордски Можгалан но ялан улӥсько Ижевскын. Лаборатория вазь ӵукна ик ужаны кутске. Куать часэ уже лыктӥсько, келяно подукциез ваньзэ учкиськом-эскериськом. Госветнадзорез нуо кык ветврачъёс - Альфинур Габдулловна Файзуллина но Ирина Петровна Опарина. Нырысез специалист татын 20 ар ужа ни, кыкетӥез - 31 ар. Таӵе эскерон одӥг предприятиын но ӧвӧл. Соослэн син азьысьтызы номыр уг поты. Соин ик нокыӵе ӝожтӥськонъёс ӧвӧл. Алевтина ТРОШКОВА, бактериолог: - Татын 18 ар ужасько ни. Можгаын ветеринарной техникумез быдтэме бере, вить ар ужай Воткинск районын. Вордскемын Пычас посёлокын. Сӥль заводэ вуыса, нырысь мыным оскизы пудоез вандон цехын ветврач луыны. Собере, 1986-тӥ арын бактериологе пуктӥзы.Со дырысен та удысэз нуисько, микроскопе но мукет аппаратурае умой ужало, юмоке ӧй шедьылы на. Мон чакласько, кызьы цехъёсын быдэсъяло санитарилэсь куронъёссэ, учкисько оборудованиез, поттэм колбасаез, вуэз, колбаса пӧзьтэмез, ӵынатэмез, сӥлез, сӥль но лы пызез, лэсьтӥсько бактериологической исследованиос, кизисько микробъёс. Уже кельше. Кузпалэным ныл но п будэтӥськом. Ольга ФИЛИППСКИХ, валтӥсь технолог - Маин висъяське поттэм продукцимы? Милям огазеяськонмы, нимысьтыз предприятие- комбинат луэ. Мыно поточной линиос, номыр кылем-мылеме уг кошкы. Сыӵе ужан амалъёс тупатэмын. Производстволэн котькуд люкетаз, пудо кутонысен колбаса потытозь, юн эскерон пуктэмын. Шаерамы одӥг предприятиын но таӵеез ӧвӧл. Вандэм сӥль уг лошъяськы, сӥятӥське но холодильнике кошке. Котькытын - цехъёсын, сӥлез вандылонын, сӥль коранын (фарш лэсьтонын), холодильникын - пӧртэм температура возиське. Сӥятэм сӥлен гинэ ужаськом. Ачим татчы лыктӥ 1982-тӥ арын. Вордски Ставрополь крайын. Нырысь мастерын ужай. Котькуд производстволы ӟеч организатор кулэ. Сотэк предприятие чутоз. Кызьы вал милям азьло, ужъёсты радъяны ӧз быгатэ ни, огазеяськон кык ар ӧз ужа, шуыны луоз. Кылем арлэн пумаз но туэ гинэ производство вырӟиз, пыд йыламы султӥськом ни. Озьы калыклэн ужан мылкыдыз ӝутскиз. Данакез огшоры тыршисьёсмы сӥлен ужаны нимысьтыз дышетскемын, профессионально-технической училищеез яке техникумез быдтэмын. Котькудӥз оскем ужзэ ӟеч тодэ, лулысь-сюлмысь тырше. Со бордысь потэ продукцилэн ӟечлыкез. Ми ГОСТ-ъя гинэ ужаськом. Али 34 пумо колбаса поттӥськом, ваньмызлы сертификат сётэмын. Отчы пыро пӧзьтэм, ӵынатэм колбаса но мукет сиёнъёс. Нош алигес пастромаез но балыкез 200 граммен вандылыса пакетэн келяны кутским. Отчы омыр уг шедьы но 5-8 градус шунытэн 8 нунал возиське, уг сӧриськы. та ужез валаса быдэсъя Людмила Сергеевна Калганова. Людмила КАРМАНОВА, весовщик-кладовщик: - Талэсь азьло 10 ар ужай Воткинскысь сӥль комбинатын, сомында ик тыршисько ни татысь колбаса лэсьтон цехын. 1973-тӥ арын йылпумъяй Можгаысь ветеринарной техникумез. Вордски Можга ёросысь Лудзи-Шудзи гуртын. Уже яра, кошкыны уг малпаськы, уждун басьтӥськом. Уже вазь ӵукна вуисько. Сбытъя отделлэн куронъёсызъя колбасаез келясько, ӝытазе складэ кутӥсько. Ваньзэ умой, шонер мертано-лыдъяно. Сотэк ас чырты вылад но пыртод. Но сыӵе учыръёсы ӧй на вал, син медаз усьы. Светлана НИКОЛАЕВА, валтӥсь мастер: - Быдтӥ Полтава городысь сӥль промышленносья техникумез. 1975-тӥ арысен татын ужасько ни. Колбаса лэсьтон цехын мастер вал, 10 ар старшой мастер луисько ни. Мастеръёс азьын одӥг бадӟым ужпум сылэ - производствоез радъян но сбытъя отделлэсь заявкаоссэ быдэсъян. Нуналлы быдэ 6 тонна колбаса лэсьтӥськом, нош та кужымен ик 10 тонна поттыны быгатысалмы, но вузкарон рынок уг сёты. Ӟеч продукцилэн дуныз но бадӟымгес, тросэз басьсяськисьёс уг тодо, колбаса одӥг сӥльлэсь гинэ лэсьтӥське шуыса. Москваысь технической условиос (соосъя вань колбаса цехъёс ужало) вайылӥм но ми солэсь куштӥським, соя ужаны ӧм кутске. Калыкез пӧяса, кӧш колбасаен сюдэммы уг поты. Милям 4 ужан ёзмы: сырьё дасян, сӥль коран но колбаса тырон, колбаса пӧзьтон- ӵынатон но ливер колбаса лэсьтон. Колбасаез ӵынатӥськом пипу но нинпу пила пызен гинэ. Сое басьтӥськом Сов. Никольской леспромхозысь но артысь ужбергатӥсьлэн пилорамаысь. Со сяна, вуэм заявкаосъя, кыӵе сортэн (вылӥ, И но ИИ), ГОСТ-лэн куронъёсызъя сӥль басьтӥськом. Соя ик адямиослы уж сётӥськом. Вера ДАНИЛОВА, сӥль вандылӥсь - Огазеяськонын самой кема ужасез луисько. Татын 42 ар тыршисько ни. Вордски Пичи Пурга ёросысь Капустино гуртын. Быдтӥ ФЗО-ез. Сӥль заводэ лыктыса, нырысь вал пудоез вандонын, али сӥлез лыэз бордысь люкылонын ужасько, обвальщик луисько. Ужмы каньылэн уг сётскы, 14 кузя пыд йыламы ужаськом, ваньзэ киын быдэсъяськом. Нокыӵе странаын но та уж капчиятымтэ на. Мастермы Зоя Николаевна Федотова ужъёсты шонер радъя, куспамы тупаса тыршиськом, ог-огмылы котьку юрттӥськом. Быдэс коллективмы яра. Куинь пенсионеръёс кылемын на - Люция Давлетшина, Галина Хихматуллина но мон. Эшъёсмы сӥль пушкысь сынъёссэ висъяло, жиловщикъёс луо. Дышетскисе Насима Камаева усто, чылкыт ужаны тырше. Кык ар талэсь азьло пенсие потӥ ке но, ужысь уг улляло. Таосыз кивалтӥсьёс туж сюлмоесь, быгатӥсесь, ужась калык сярысь сюлмаськисесь. Выль кивалтӥсьёсмы медаз кошке, кема мед ужалозы, огазеяськон медаз куашка. Милям вань ужасьёслэн мылкыдзы сыӵе, ӟеч ужаны тыршиськом. Ведь колбасамы кошке больницаосы, нылпи учреждениосы, школаосы, пересьёслэн юртъёсазы но музон азе. Аслам улонэ но капчи ӧй вал. Вить арескысен анай-атайтэк кыли. Кык сузэръёсы монэ ӧз куштэ, котьку юрттӥзы, соослы тау карисько. Гуртысь 1958-тӥ арын кошки, 25 арескын кузпалтэк кыли, пие мединститутэз быдтӥз. Калыкез жалясько, гажасько, соослы юрттыны быгатӥсько, инмарлы оскисько. Вань сад-бакчае, муш но вордӥсько. Котьмарлы дыр шедьтӥсько. Ужме яратӥсько. Йылпумъян интые Пумазвераме потэ: Ижысь сӥль комбинат (ИМКО) вакчи дыр куспын азинскон-ӝутскон сюрес вылэ потӥз. Со шумпотымон. Сӥль завод городын но шаерамы нош ик данзэ шедьтэ, трос но ӟеч колбаса поттэ. Таӵе предприятиосмы уногес луизы но тыро-пыдо ужазы ке, кунгож сьӧрысь одӥг грамм но колбаса, сӥль кулэ уз луы. Бен, огазеяськонлэн йыг-йыг пыд йылаз султоназ ичи ӧвӧл тыршемез, кужымзэ, визьзэ сётэмез кивалтӥсьлэн Александр Алалыкинлэн, озьы ик солэн воштӥсьёсызлэн но быдэс коллективлэн. Бамез дасяз Геннадий РОМАНОВ. Туспуктэмъёсыз Владимир КАМАШЕВЛЭН. Удмурт Республикалэн "Удмурт Республикаысь интыысь аскивалтонлэн быръем ёзъёсаз депутатъёс быръён сярысь" Законэзлэн 72-тӥ ёзэтаз воштонъёс но ватсанъёс пыртон сярысь Удмурт Республикалэн Законэз 1-тӥ ёзэт. Удмурт Республикалэн "Удмурт Республикаысь интыысь аскивалтонлэн быръем ёзъёсаз депутатъёс быръён сярысь" Законэзлэн 72-тӥ ёзэтэзлэн нырысетӥ люкетаз воштонъёс но ватсанъёс пыртыса гожтоно тазьы: "1. Удмурт Республикаысь интыысь аскивалтонлэн быръем ёзъёсаз депутатлэн полномочиосыз дырызлэсь вазь бырыку, муниципальной ёзысь быръёнъя комиссия бушам мандат кылдэм бере толэзь куспын ялэ со округын ватсаса быръён. Со ортчытӥське быръёнэз ялэм дырысен 70 нунал ортчем бере но 180 нунал тырмемлэсь азьло, та Законлэсь куронъёссэ чакласа". 2-тӥ ёзэт. Та закон кужыме пыре печатлам нуналысен. Удмурт Республикаысь Кун Кенешлэн Тӧроез А. А. Волков. Ижевск город, 1999 арын 28 мае. � 50-ИИ. Ӧтчам азьын кыл сётӥзы ке... Зэмос патриотъёсты уг адӟо Ортчем быръёнъёс сярысь трос вераськон вал кадь ини. Озьы ке но, "Удмурт кенешысь" валтӥсь эшъёслы тодазы вайытэм потэ: городын, тужгес но Ижын, мынам малпамея, удмуртъёс пӧлын туж урод ужамы. Ма, собере быръёнын удмуртъёслэн бере кылёнзы кандидатъёсты ӵектон бордысен ик адӟиськиз ини. Котькуд округъя 5-6 мурт ӵектэмын вал ке, вылӥысь эшъёс пӧлысь нокин ӧз валэкты ук, кинлы дурбасьтыны кулэ удмуртъёс таяз яке сояз округын. Соос кандидатъёсты умойгес тодыны, актив пыр калыклы ас малпанъёссэс ивортылыны яке ӧз тырше, яке туж ляб тыршизы. Басьтом тани 39 номеро Школьной округез, кытын мон но бырйись вал. Нырысь ик, отын куать кандидатъёс пӧлын одӥгез но удмурт ӧй вал, ӵектэмын вал украинка, ньыль ӟуч но одӥг бигер. Ми, бырйисьёс, малпам, ӵектэм ужбергатӥсьёс удмуртъёс но куанер улӥсьёс понна сокем ик уз тыршелэ шуыса, куарамес сётӥм А. Д. Чуршин врач понна, со пала кариськизы тросэз мӧйыос. Сыӵегес ик югдур 40 номеро округын но - ваньзы ӟучъёс но украинка вал. Бырйизы Г. М. Останинэз. Солы оскизы вал удмуртъёс но. Нош табере ивор вуиз: со выльысь Устинов ёросэн кивалтэ, та окургын выль быръёнъёс ортчозы. "Удмурт кенеш" та учыре нош ик бабоз-а? Огез валамон: городысь бырйисьёс пӧлысь тросэз быръёнэ пыриськизы малпаськытэк, соослы политикаез валэктӥсь ӧз луы. Паймисько куддыръя КПРФ-лэн валтӥсьёсызлы. Солэн рескомезлэн кивалтӥсез Кун Думалэн депутатэз Н. И. Сапожников партиезлэн быръёнъёс дыръя программаез сярысь туж валамон вераськылӥз кадь, нош бырйисьёсыз доры ӟеч-ӟеч сюрес ӧз шедьты. Коммунистъёс ужась калык понна ужалозы шуыса ялан оскыто, нош асьсэос, мон сямен, данак янгышъёс лэсьтыло. Патриот луись кужымъёсты огазеяськом шуо, нош луылэ озьы: зэмос патриотъёсты уг адӟо. Удмуртъёс асьсэ республиказылэн патриотъёсыз уг луо шат? Соосын огъя кыл шедьтэмзы уг поты, лэся. Яке тани. Ялӥзы вал: тӧро интыын адӟемзы потэ удмуртэз М. И. Шишкинэз. Со малпанзэс шара вераса, мон сямен, соос янгыш лэсьтӥзы: уг тодо шат, туала политикъёс-реформаторъёс пӧлын коммунистъёсты адӟонтэм карисьёс тырмыт шуыса? Кивалтӥсьёслэн сыӵе вамышсы пайда интые изъян ваиз, дыр. Соин ик коммунистъёслы но удмурт национальной движенилы ог-огзэс валаса азьпала вамышъяны кулэ вылэм. Сыӵе валан уг тырмы. Куд-ог политикъёс ваньзэ азьвылзэ, советской вакытысь ӟеч сямъёсты ӵушылыны, быдтыны дась вылэм: уз пӧрмы! Улон сое туж ӟеч возьматӥз ини. Ужась калык адӟе: кин понна тыршо соосыз яке таосыз чиновникъёс. Кема-а оскомы пӧяськисьёслы, асьсэды асьсэос гинэ тодӥсьёслы, узырмыны-капыртыны дась луисьёслы, калык чотын куаисьёслы. Сыӵеос ик, пӧечи рыноке валтыса, калыкез курадӟонэ, начар улонэ вуттӥзы ини. Власть борды сыӵе кырмиськемъёсты, йыруж лэсьтӥсьёсын огкылысь луисьёсты, палэнтылыны кулэ вылэм... Л. Федоров, Ижын улӥсь. Котьку пальпотоз... Одӥгез сӥё-дано, адскымон, йӧно, чебер артист вал Сергей Павлович Кудрявцев. Нош эзель сое басьтӥз самой кужмо ужан вакытаз - 50 арес гинэ вал соку, 1996 арын толсур толэзе ватыкузы. Лымы согиз пытьыоссэ... Нош али, юг-юг, пур-пур сяськаос усьтӥськон дыре, со нош ик пальпотыса учке мынӥсь-ветлӥсь шоры. Хохряки шай вылэ сторож сюрестӥ пырид ке, бур киын адӟиськоз солэн постамент вылысь тусбуез - сайкыт-пурысь гранитлэсь памятник. Россиысь но Удмуртиысь дано артистлы, республикаысьтымы кун премилэн лауреатэзлы Сергей Кудрявцевлы памятникез усьтӥзы 9-тӥ инвожое. Та ужрад быдэстэмын Удмурт Республикаысь Правительстволэн нимысьтыз постановлениезъя. Скульптураез лэсьтӥзы егит сурадась - Дмитрий Постников но Александр Суворов. Памятникез усьтонын сюлмысь кылъёссэс веразы Кун Кенешысь Наукая, культурая, калыкез дышетонъя но егитъёсын ужанъя комиссилэн кивалтӥсез Алексей Красильников, татысь ик референт Анетта Сидорова но мукетъёсыз. Сюлэм вӧсеныз ӵош синпелетлы шумпотонзэ усьтӥз артистлэн кузпалыз Стелла Александровна (со "Айкай" театрлэн директорез луэ). Нош тужгес но трос буре вайыны люкаськиллям Сергей Павловичлэн эшъёсыз - республикаысьтымы Операя но балетъя кун театрысь артистъёс. Соос лыдӟизы кылбуръёс, тодазы ваизы ӵош ужам, шудэм аръёссэс. Шуизы: ми солэсь пальпотонзэ ноку ум вунэтэ... Зэмзэ ик, Василий Тёркинэз гинэ тодэ ваёно ке... Нош рольёс котькыӵеез вал - сюлэсь трос шудэмын. Адямиен ӵош кошке солэн быдэс дуннеез. Нош актёрен ӵош - олокӧняез, дыр. Т. Петрова. Сергей Кудрявцевлы памятник. Памятникез усьтон дорын. Ӝож чузъяське шай вылын скрипка куара. Туспуктэмъёсыз Владимир БЕЛОМОРСКИХЛЭН. Вамышты милициен ӵош! Удмуртиысь милицилы сӥзем нуналъёс асьме дорын нырысьсэ уг ортчо ни. Городын улӥсьёс но, милициын ужасьёс но та праздникез чидатэк возьмазы. Шулдыръяськон кутскиз 9-тӥ июне шор площадьын. Учкисьёс азьтӥ милициын ужасьёс строен ортчизы, нош тужгес но устоосыз ужасьёс Россиысь МВД-лэн наградаосыныз но синпель кузьымъёсыныз пусъемын вал, Россиысь МВД-лэн Юридической институтэзлэн Ижысь факультетаз дышетскисьёс диплом басьтӥзы. Праздникез усьтӥз элькунысьтымы югдурез утёнъя министр милициысь генерал-лейтенант Владимир Щербаков, люкаськемъёсты ӟечкылазы на Кун Кенешысь, Удмурт Правительствоысь но город администрациысь кивалтӥсьёс. Учкисьёслы тужгес но кельшиз пӧртэм пумо автомашинаосты учкыны. Югдурез утёнъя министерствоын туннэ нуналлы ваньмыз-ӧвӧлэз 1100 машина лыдъяське, нош туэ вить толэзь куспын 35 машина басьтэмын. Бӧрысь ортчытэмын вал югдурез утёнъя пӧртэм удысъёсаз ужасьёс пӧлын ӵошатскон. Спортлэн пӧртэм пумо удысъёсаз кужмо луэмзэс возьматӥзы йыртэмамзы понна кыл кутонэз быдэсъянъя управлениын тыршисьёс, патрульно-постовой но тылпуосын нюръяськонъя (ДПС) службаосын ужасьёс. Тужгес но тунсыкоез ужрад ортчоз ӵуказе элькунысьтымы "Газовик-Газпром" стадионын (азьвыл "Зенит"). Со кутскоз 20 час 30 минутын. Мар бен, ойдолэ ваньмы ӵош эшъяськоме но вамыштоме милициен ӵош. В. Кутузова. Праздник дыръя. Туспуктэмъёсыз В. Камашевлэн. Ижлэн нуналэзлы но туннэ нуналлы туж тупа вунэтэм кылбурчилэн П. Красильниковлэн "Гудыри" газетлэн 92-тӥ номераз (1924-тӥ арын инвожо толэзьлэн пумаз) потэм кылбурез: Иж кар Иж завод удмуртлэн - Шор карез, сюлэмез; Иж карын ик солэн Кужымез но вырез. Кызьы вир сюлэмысь Мугоре вӧлдӥське, Тӥнь озьы ик Ижысь Кужыммы но потэ. Вир ке вань сюлэмын, Вирсэрын но со вань. Ижын вань ке кужым, Гуртъёсын но со вань. "Удмурт дуннеын" печатланы ӵектӥз Л. Федоров. Валэктэ юрист Сэрегез нуэ адвокат Лилия Шкляева Луэ-а ваньбурен кузёяськыны нотариустэк? Юртъерме вузаны медӥсько. Огкылмес (договормес) нотариус дорын юнматон дуно усёз, шуо. Быгатӥсько-а юртме мукет кузё кие выжтыны нотариустэк? Н. И. Шаркан район. Асьме закон 1996-тӥ арысен куре: ваньбурен кузёяськонэз (вузанэз, басьтонэз, кузьманэз но мукетсэ) одно ик пусъёно (регистрировать кароно) ӧвӧл нотариус дорын. Та ужез лэсьтыны быгато регистрациен вырись ёзъёс (комитетъёс) но. Озьы ке но, оскымонгес луоз, нотариуслы вазиськыса. Таиз шараяны быгатоз лыктэм адямиослэсь лушкем (оло нош юри ватэм) малпанъёссэс зэмос-а, ӧвӧл-а шуыса рос-прос учкоз документъёссэс, валэктоз огкыллэсь пуштроссэ. Тужгес умой соиз: нотариус кыл кутэ лэсьтэм бумагаосызлэн "чылкытлыксы" понна. Кыӵе ке янгышсэ берло шараяло ке, вазиськем мурт вылэ усем изъянэз ачиз берыктэ. Квартира воштонын яке юртъер вузанын кинэ ке умойтэме вуттӥз ке, солы тыроно луоз ышем ваньбурлэсь дунзэ. Пусъёнэн (регистрациен) вырись комитетъёс кунлэн уг лыдъясько бере, ас ужъёссы понна чурыт кыл уг куто. Н. А. сямен ик ог люкетэз адямиос курдало, нотариус лекос трос коньдон куроз шуыса. Шонер ӧвӧл таӵе малпан. Самой троссэ со басьтоз огкыллэн дунызлэн 15 процентэз мында. Пусъёнэн вырись комитет тырытоз дунтэмгес - 10 процентозь, но со кыл уг куты документъёсыз понна. Удмурт Республикалэсь "Удмурт Республикаысь эскеронъя кун комитет сярысь" Законзэ кутэмен валче, "Удмурт Республикаысь Кун Кенешлэн Эскеронъя палатаез сярысь" Законэз кужымзэ ыштэмен лыдъян сярысь Удмурт Республикалэн Законэз 1-тӥ ёзэт. Удмурт Республикалэсь 1995-тӥ арын 30.08 кутэм "Удмурт Республикаысь Кун Кенешлэн Эскеронъя палатаез сярысь" 91-1 номеро Законзэ кужымзэ ыштэмен лыдъяно. 2-тӥ ёзэт. Удмурт Республикаысь Кунэз радъянъя, калыкъёс куспын политикая но интыысь аскивалтонъя ялан ужась комиссилы Эскеронъя кун комитетэн ӵош толэзь куспын вуттоно, Кун Кенешын эскерон вылысь, нормативъёсъя но правоосъя актъёсы воштонъёс но ватсанъёс пыртон сярысь дэмланъёс. 3-тӥ ёзэт. Та Закон кужыме пыре печатлам нуналысен. Удмурт Республикаысь Кун Кенешлэн Тӧроез А. А. Волков. Ижевск город, 1999 арын 28 мае. � 46-ИИ. Дунне адямиез будэтыны Башкортостанын милемыз, Удмуртиысь журналистъёсыз но кылбурчиосыз, возьмало вылэм "Дэмен" колхозысь Бальзюга фермаын, Выль Татышлыысь (Выльгуртысь) культура юртын, татысь ик шор ёзо школаын, озьы ик Майск, Калмияр, Улысь Балтач, Кызылъяр но Бигиней школаосын. Шонерзэ ке, витьымтэ шорысьгес луизы та пумиськонъёс, кемалась ивортытэк, но вуэммы бере соосты соку ик ӟеч радъяны быгатӥзы Выль Татышлы гурт кенешлэн тӧроез Тимур Тимерханович Марданов, школалэн директорез Радик Галимзянович Рахимов но Калмияр гурт кенешлэн тӧроез, Удмурт национально-культурной центрлэн кивалтӥсезлэн воштӥсез Аркадий Нуртдинович Миниахметов. Та куинь воргоронъёс - азьветлӥсьсылэн Ренат Биктимирович Галямшинлэн оскымон юрттӥсьёсыз, ас интыязы зэмос кузёос, ваче герӟаськыса но ог-огзылы юрттыса ужало. Йыгмыт туссыя, сэзь малпанъёссыя, озьы ик быдэстэм ужъёссыя но валаны луэ: таӵе адямиос возё удмуртлыкмес, выжыосмылэсь чылкытлыксэ. Татысь калык таза улэ но шока, выль кылдэм "Ошмес" газетсылэн ӧтёнэзлы вазиськыса кадь: "Мур мед луоз калык визьлэн ошмесэз, чылкыт мед луоз инкуазь ошмеслэн вуэз!" Зэм ик но, та палась гурт урамъёсысь, озьы ик райцентрысь ми ӧм адӟылэ одӥг но юыса-йӧнтэмъяськыса яке кураськыса-бичаськыса ветлӥсь муртэ. Урамын зор ву, дэри но уг пук люкаськыса. Нялмыт гинэ уллань васькись интые пуксиллям гуртлэсь шорсюлэмзэ кылдытӥсь коркаос: колхоз правленилэн но гурт администрацилэн юртсы, культурая юрт (дворец но шуыны луоз сое), типовой проектъя пуктэм выль школа, колхозлэн столовоез, магазинэз, кунокуаез (гостиницаез)... Та юртъёс улыно-вылыно, котыразы сюресъёс асфальтэн шобыртэмын. Капчи татчы дугдылыны сюресчилы. Столовое пырид ке, одно ик пӧсь шыдэн, сӥлен-картошкаен куноятозы. Соин ик юрт вадьсын котьку но радэн сыло Пермь-Уфа сюрес вылысь кожем бадӟымесь автомашинаос. Та сюрестӥ мыныку адӟиське мечеть но. Выль Татышлыысь 180 корка пӧлысь 25-яз бигер семьяос уло. Соос понна кык ар талэсь азьло ӝутӥзы вӧсяськон инты. Выллапал урамтӥ тубид ке, гурт пуме вуыса, син азяд усьтӥськоз Вӧсь кыр. Татын, Бисьмен шур дурысь пересь кызьпуос пӧлын - трос укноё Вӧсь корка. Кӧня ке ар талэсь азьло сое пуктӥз "Дэмен" колхоз. Совето власть таркамлэсь утьыны быгатӥзы пересьёс ас вӧсяськон йылолъёссэс. Татын луыло нимаз гуртэн вӧсьёс но, куинь-ньыль гуртэн но, дасо гуртэн люкаськыса но. Самой бадӟымзэ Мӧр вӧсь шуо. Сое адӟыны кыдёкысь палэнысь, кунгож сьӧрысь но вуыло. Таӵеез уго мукет интыын - Башкортостанын но, Удмуртиын но ӧвӧл. - Дунне адямиез будэтон понна та вӧсь кулэ, - шуэ та палан вордӥськем, будэм писатель Федор Пукроков. - Соку вань дуннеен, инмарен кусып тупатӥськод. Мӧр вӧсь кыстӥське толэзь, кизилиос ӝуатскытозь... Мӧр вӧсь но, мукетыз но, озьы ик Лудэ пырон вашкала дырысен ортчыло нокыӵе курыт юонъёстэк. Соин ик нылпиосты будэтонын та языческой обрядъёс умойлы гинэ. Выль Татышлы школаын син шоры йӧтымон воштӥськонъёс вань ини. Пиналъёс вылын но со шӧдӥське: соос лачмытэсьгес, визьмоесьгес но луизы кадь, шаянтон сямзы зӥбломиз. Нылпи фольклор коллективзы культура юртысь "Шулдыр ӝыт" ансамбль сьӧры кыстӥськыны выре (таосыз уго Эстоние но ветлӥзы ни). Улысь Балтачын ортчем фольклор фестивальын выльгурт пиналъёс туэ кыкетӥ интые потӥзы, Будӟынал (Пасха) обрядэз возьматӥзы. Кудаз школаосы вуылӥм, пырон ӧс йылазы гожтэмын "Добро пожаловать", "Гажаса пырыны куриськом" яке "Гажаса пумитаськом". Одӥг кадь типовой проектъя лэсьтэмын. Выль Татышлы но Калмияр школаос. Вож будосъёс-сяськаос ӝужамтэ на, но адӟиське: котырзэс татын туж ӝикыт возё. Нош школае пырем бере нырысь ик паймим борддоръёс кузя, укно янакъёс вылэ интыям сад горшокъёслы. "Кияз сяська возись муртлэн киыз уз ӝутӥськы урод ужлы" - кылбурчилэсь верамзэ тодазы возьыса кадь уло татын. Чылкытлык, чеберлык котькытын кузёяське. Соин ик кезьыт кариськыку школаез шунтымтэзы но мылкыдэз уг сӧры. Кӧня ке тодматскеммы бере, школалэн директорез Р. Г. Рахимов кабинетаз ӧтьыса возьматӥз маке быдӟа, пинё-пинё куаро будосэз.Кидыс кузьмаз на: тае мерттӥды ке, пе, кӧня ке арскын вӧлдэтозь но будоз - фация нимаське со, лымшор палась ваемын. Иське, директорлэн аслаз но мылкыдыз садъёс бордын, соинтэк-а котькытын сяськаос, учительскойын но соос синэз шулдырто. Таӵе чеберлыко дуннее мынэмед потытэк но мынод. Озьы татчы ӵукналы быдэ вамышто 145 пиналъёс но соослэн 23 дышетӥсьёссы, воспитательёссы. Школаын кема тыршемъёс пӧлын - кузпалъёс Зиятовъёс: Аниса Радиковна, биолог, химик но Закир Зиятович, историк, математик, школалэн директорез луыса кема ужаз. Кибашлы, усточи но сое шуод. "Ошмес" газетсылэсь нимзэ суреданы солы оскизы. Закир Зиятович ик пырак башкир кылысь удмуртэ берыктӥз А. Атнабаевлэсь пьесазэ - "Нуныкайёс" нимам спектакльзэс школаысь драмколлектив котыр ёросын трос пол пуктылӥз ни. Дмитрий Константинович Константинов азьвыл аръёсы литкружок нуиз, гожъяны кутскисьёслэн печатлам чуръёссы альбоме люкамын. Солэн кыкез но нылъёсыз, Зифирина но, Индира но, та школаын дышето. Мылкыдзэс, визьзэс пиналъёслы сёто Шаритдиновъёс, атаез но пиез - Леонид Шаритдинович но Марс Леонидович. Данъямон дышетӥсьёс Рудольф Гильфанович Гафуров но Римма Намиевна Дерюшева. Соос сярысь ушъяса вераз школаын внеклассной ужез радъясь Зинаида Пукроковна Зайнуллина. Ачиз но со ас удысаз "ӵын поттыса" тырше. Урокъёс бере нунал пайдаё ужъёсын пачыламын. Сӥзьыл ке вуэ... Колхозысь сахар кушманэз октоно, куштӥськем корт бичано, мӧйыослы Тимур сямен юрттӥськыны вуоно... "Зоринча", "Алло, ми утчаськом талантъёсыз", "Рыцарьёслэн турнирзы", "Робинзонлэн маршрутэз". Кызьы адӟиськоды, татын вунэтымтэ, аналтымтэ азьвыл пионеръёслэн ӟеч кутосконъёссы. Татышлы пиналъёс Башкортостанысь пионер огазеяськонэ пыро но вожен-лызэн галстук нулло. Ошмесысен кутско шуръёс, кивалтӥсь бордысен - ӟеч ужъёс. Пуксеттэм луэменыз мукетъёсызлы но маза уг сёт Галимьяныч (вакчияк, гажаса озьы нимало сое эшъёсыз). Физкультурая дышетӥсь гинэ ӧвӧл, сизьыметӥ арзэ директор ни со. Дышетскемезъя географ но. Ӵапак сямызъя ик быръем удысэз. Утчаськемысь-бызьылэмысь ноку уг дугдылы. Вералом одӥг учырез гинэ. Выль культура юрт пуктыкузы чаклазы вал, отын вуриськон мастерской луоз шуыса. Малпамзыя ӧз пӧрмы, нош со понна Радик Галимзянович "кӧкыяз" веттам малпанзэ быдэстӥз. Бадӟым Качаке но мукет интыосы вуылӥз: кызьыгес ай та музеез кылдытоно... Асьсэ дорын устогес пӧрмиз (табере музей усьтыны малпасьёс таослэсь адӟем каро): висъето-висъето, огысьтыз мукетаз выжылоно. Нырысь ик син азе усьтӥсько удмурт корка пушкысь куэм-чильпам дӥсьёс, ӵушконъёс, куиськон станок, собере - юртъерысь пӧртэм ужан тӥрлыкъёс. Отӥяз - Быдӟым ожын быремъёслы йыбырскон сэрег, гуртлэсь, колхозлэсь ортчем сюрессэ возьматӥсь стендъёс, дано аспал адямиоссылэн тусбуйёссы... Зэм ик но, дунне адямиос Татышлы музъем вылысь потэмын: кивалтӥсь ке со - тужгес кужмоез (Р. Галямшин), писатель ке - тужгес визьмоез (Ф. Пукроков), суредась ке - тужгес тунсыкоез (М. Гарипов). Шуысал на: школалэн директорез ке - тужгес шаплыез. Шаплыез но сюлэмшугоез. *** - Ми доры кожатэк, нокызьы эн кошке вал. Пиналъёслы огпол ке но адӟытэммы потэ улэп кылбурчиосыз. Таӵе куронэн милемыз, Галина Романоваез, Владимир Возняковез но мукетъёссэ, дораз ӧтиз Майск школалэн дирекорез Г. Ш. Гарифьянов. Та гуртын 35 корка гинэ бере, дышетскисез но сомында - 11 кузя. Малокомплектной шуиське таӵе школа. Нош татын котькытынлэсь усто потӥз милемлы. Ас вордэм коркад кадь, шуныт. Бадӟым залэз, сиськон бӧлетэз, физкультурая комнатаез. Кыказ ик классъёсын пиналъёслэн суредъёссы, киужъёссы син шоры йӧто. Соиз но вожъяськымон: пианинозы вань. Соин шудэ дышетӥсьсы Татьяна Дмитриевна Марданова. Та пичи дуннеязы ваньмыз асьсэлэн. Бакчаязы будэто ваньзэ, мар гинэ кулэ. Уката ик ческыт потыса сиё но вазьгес быдто жимолость вареннязэс... Нош Григорий Гарифьянович туала егит удмурт литератураез тодэменыз висъяське. Со уго дышетскем В. Ар-Сергиен, В. Шибановен ӵош. Школаосын викторина ортчытъяса ми валамы: удмурт литератураысь, искусствоысь выль нимъёсыз та палась пиналъёс уггес тодо, Удмурт шаерысь улонлэсь висъяськемын. Асьме палъёсыз уг возьматы телевизорзы. Удмурт радиоез кызыны быгато соос гинэ, кинлэн приёмникез вань. Газет-журналъёс... Озьы бере, кытысь пиналъёс, озьы ик мӧйыос но, омыръялозы кулэ луись иворъёсыз, гуртлы быдэ кык-куинь газет-журнал гинэ усе ке? (1989 арын переписья Башкортостанын 60-лэсь ятыр удмурт гурт лыдъяське вал.) Но калык янгыш ӧвӧл, та изданиосыз лыдӟись доры вуттон умой радъямтэ шуыса. Каталоге удмурт газет сюрымтэ ке, кызьы со гожтӥськоз? Котьма ке но, редакцимылэн нимыныз ивортыны быгатӥсько: почта кусыпъёсъя вылӥ ёзъёс матысь дыре малпало Башкортостанын но Татарстанын удмурт изданиослы гожтӥськонэз капчиятон ласянь ужрадъёс кутыны. Кам та палась Кам со пала (тупала) шумпоттӥсь иворъёс лобӟыса кадь вуылысалзы ке... Ӝож ӧй кылӥськысал, дыр, кырӟан гур но: "Со пал ярысь чагыр сяська та пал ярын мед луоз вал..." Ог-огмылы матынгес мед луомы. ТАТЬЯНА ЧЕРНОВА. Выль Татышлы школалэн директорез Р. Г. РАХИМОВ ас эшъёсыныз. Нылпиослэн фольклор ансамбльзы. Кивалтӥсьсы Зинаида ЗАЙНУЛЛИНА, баянэн шудэ Марс Шартдинов. В. Беломорскихлэн туспуктэмъёсыз. Берытскоме 1992 аре. Ньыль гуртэз - Майскез, Бальзюгаез, Уразгильдыез но Выльгуртэз - огазеясь Выль Татышлы сельсоветын соку басьто вал "Удмурт дунне" - 84 экземпляр, "Ӟечбур!" - 71, "Кенеш" - 103, "Иновжо" - 50, "Кизили" - 72. Нош туэ быдэсак Башкортостанэ газет-журналъёс та мында гинэ вуо: "Удмурт дунне" - 38, "Ӟечбур!" - 123, "Кенеш" - 82, "Инвожо" - 50, "Кизили" 185, "Вордскем кыл" - 40. Ӟечкылан Жингыр, шу! Завьялово районысь Якшур гуртысь Медведевъёслэн семьяязы туннэ кылдэ выль семья. Сергей Медведев, "Путь Ильича" колхозысь механизатор, аслэсьтыз шудзэ шедьтӥз Пичи Пурга районысь Сундуково гуртысь. Елена но Сергей! Улонды инвожо толэзь кадь ик шулдыр но шундыё мед луоз, быдэс даурдэс ваче ки кутскыса ортчыны мед кылдоз. Ӵыжы-выжыосты но матысь эшъёсты. ПӦРАСЬ Юмореска Мемие мыным шуылоз вал: пие, пурты котыртӥ поръяд ке, сютэм уд кулы. Кызьы уд кылзӥськы, самой дуно адями уродлы уз дышеты. Соин школаез быдтэм берам кулинарной училищее пыри. Бубыли кадь чебер нылъёс пӧлын асме чоръясь атасэн лыдъялляй. Ма пӧраны но дыши, уката ик перепечъёсы но шаньгиосы удалтылӥзы. Шыдэ но ӟеч пӧрмылӥз, коктельёсме оскалтыны министерствоысь ачиз Борис Данилович Культяпкин кафеямы пыралляз. Армиын но умой интыяськыны быгатӥ. Ӵош вуэм эшъёсы плацын маршироватькаро, казармаын выжъёстфы сузяло, ульчаын кынмо, нош мон пуртыосме котыръясько, сиён пӧзьтӥсько. Самой зумытсэ-ческытсэ аслым кельтӥсько, нош кылемез солдатъёслы яра ни. Но прапорщикмы Смен Зубко но лейтенантмы Семен Вырубайко огдыре акыльтыны кутскизы. Рядовой Шкляев, - кесясько, столовое пырыса. - Кышноосмы пыэдэн висё, пиналъёсты сюдыны номырин. Шуддэ но коклеттэ кельтыны эн вунэты. - Ма кызьы кельтом, мултэс дасяны сӥль но вӧй кулэ, ма картофкатэк но кеньыртэк но шыд уд пӧзьты. Монэ ведь командирмы суд улэ кыскоз сиён-юонмес ӧй ке шыръя, - валэктӥсько эшъёсылы Сеняослы. Нош соос нокыӵе кариськытэк визь тырыны кутско. Нош "визь тырон" - со дас минутскын ведра картофка сузян. Ма кароно? Улон дышетэ, шуо. Сержантъёсты нап шыдэн но сӥлё коклетэн сюдӥсько. Нош солдатъёслы мед тырмоз шуыса, лыдэз кизергес кароно луисько. Нош сӥль интые, коклетэ тросгес нянь ватсаны кутски. Но сюлэмме малпан портэ: та Зубко но Вырубайло монэ уродэ вуттозы, часстьлэн командирез кескич ужъёсме шараяз ке, пӧрасьысь уллялоз. Оло гауптвахтае яке штрафно батальонэ келялозы. Сюлэм шӧдэ вылэм. Зэмзхэ но, роталэн кмандирез но солэн воштӥсез эскеронэн вуизы. Кыӵе-мар, е, солдат эш, сюдӥськод. Умой, шуисько, тани оскалтэ борщмес но шницельмес. Ушъязы. Ма кызьы уд ушъя, та сиён сержантъёслы дасямын ук. Роталэн командирез валатскиз, лэся: "Пӧрась эше, ну-ка бадӟым пуртыысь шыд оскалтом ай..." - Шыдэд кизер, шницелед кӧш... малы? - юалляське командирмы. Мон ма вераны ик уг тодӥськы. Оло, пӧй, прапорщикмы Зубко но лейтенантмы Вырубайло юрттозы, валэктозы. Нош сос ӝӧк сьӧрын пуко, сисько, серемпыр шорам учкем каро. Ну бен, ӟырдан: тӥ удмурт пияшез "выйытӥськоды" но, а дыре ик серекъяськоды. Товарищ командир, шуисько, столовоямы кык коӵышъёс вань (ачим кырмыштӥсько кык Сеняос пала), соос туж сӥль, йӧлвыл ярато. Собере коӵышпиоссэс но сюдоно луисько... - А-а, - влатскиз командирмы. - Валамон, таӵе "коӵышъёслэсь мозмытсконо, таӵе "коӵышъёс" роталы кулэ ӧвӧл. ... Кык Сеняосты кемалась ӧй адӟылы ни. Мукет часте келяллм, шуо. Ойдо мед, улонэ умой луиз. Азьвыл сямен ик солдатъёслы ческыт шыд но коклет пӧрасько. Ма, сержантъёсмы но визьмаськизы, солдат пуртыысь ик сёнэз ческыт шуыса сиё. Петя ШКЛЯЕВ, ефрейтор. Гажано эшъёс! Сюлмысьтымы ӟечкыласьком дано нуналэн - Иж шур вылэ кылдэм городлэн нуналэныз. Рабочей посёлоклэн историез, берло Удмурт Республикалэн шоркарез луыса, урал мастеровойёслэн улонэнызы герӟаськемын. Ижевск город шонерезъя лыдъяське Россилэн пыӵал возён интыеныз, державаез утёнъя щит лэсьтӥсен. Вылӥ научно-технической но визья кужым, историлэн, ужлэн но лулчеберлыклэн сямъёсызлы оскон дуннеын тодмо каризы сое. Ижевскын улӥсьёс котьку выльзэ пыӵатон но творчество удысын утчаськонъёс нуон, ужез но улонэз яратон мылкыдын висъяськылӥзы. Сӥзисько тӥледлы юн тазалык, шуд, ужын но дышетсконын азинсконъёс, пилемъёстэм инбам, вордскем шаермылэн но Атыкай музъеммылэн данэз понна ӟеч осконъёсты мед быдэсмозы. Удмурт Республикаысь Удмурт Республикаысь Кун Кенешлэн Тӧроез Правительстволэн Тӧроез А. А. Волков. Н. А. Ганза. Ӟечкыласьком! Пӧсьсэ но курытсэ но ӵош чидаса, 50 ар артэ вамышъяло ни Пичи Пурга ёросысь Вуж Монья гуртысь Валентина Федоровна но Николай Петрович Петровъёс. Соослы шуныт мылкыд, юн тазалык но кема улон даур сӥзиськом. Нылкышнооссы, ӵыжы-выжыоссы. Промышленностьлы юрттоно Та нуналъёсы Нижний Новгородын ортчиз Федерацияя Кенешлэн экономикаын политикая ужпумъёслы сӥзем пумиськонэз. Ортчытэм ужрадлэн таӵе мугез: Россиысь вуз поттӥсьёслы юрттоно, со понна кулэ луись законъёс кутоно. Кенешын вераськон мынӥз асьме дорын дасям вузъёслэн ӟечлыксы пумысен. Кенешонлэн ужан радаз пыртэмын вань бюджетъёсы пунэмъёсты берыктон, предприятиослэн кивалтӥсьёссылэсь асьсэ удыссы понна кыл кутонзэс ӝутон ужпумъёс. Делегацие пыртэмын вал Федеральной Собранилэн 16 муртэз, Кун Думалэн 8 депутатэз, РФ-ысь Правительствоын, Россилэн Президентэзлэн Администрацияз ужась адямиос. Ужрадэ пыриськиз Удмурт Республикаысь Кун Кенешлэн Тӧроез Александр Волков. Пумиськонлэн йылпумъянэз луыны кулэ Федерацияя Кенешен кутэм постановление. Отын Правительстволы промышленностез ӝутонъя куд-ог дэмланъёс сётэмын. Кенешын озьы ик эскеремын Кун Думаен матысь дыре кутэм законъёс но соослэн улосвылъёсын ӵектэм инъетъёссы. *** Кенешон йылпумъяськем бере мукет нуналаз Кун Кенешлэн Тӧроез Александр Волков Федерацияя Кенешлэн ужаз пыриськиз. Пумиськонлэн ужан радаз пыртэмын Россия Федерациысь Вооружённой Кужымъёсты выльдон но соос азе пуктэм куронъёсты быдэстыны сюлмаськемзы сярысь ужпум. Вераськон мынӥз гуртын поттэм продукцилэн (юрттэтлэн) но отын кутӥськись вузъёслэн дунзылэн огкадь луымтэзы но соин валче ыштонэз берыктон сярысь Федеральной Собранилэн вылӥ палатаез кылзоз Россия Федерациысь Правительстволэсь туэ арлы бюджетэн чакламъя улосвылъёслы коньдонэн юрттэмез сярысь ивортонзэ. Ваньзэ вераса, кызь куинь ужпум эскеремын. Удмурт Республикаысь Кун Кенешлэн пресс-службаез. Пушкин ульча ворекъялоз Городлэн нуналэзлы сӥзьыса чакламын данак ужрадъёс. Азьвыл сямен ик шаугетоз Шор карлуд (Центральной площадь). Татчы ӵукна ик лыктэм нылпиос пыриськыны быгатозы "Мон гожъясько, суредасько, книга-выжыкыл пӧрмытӥсько" нимо конкурсэ. Городлэн нуналэныз валче уно калыкъем люкаськон луоз А. Ф. Дерябинлы памятник дорын. Луозы данак шулдыртӥсь ужрадъёс. Эктонъя "Розовый слон" театр, кырӟанъя но эктонъя "Танок" ансамбль, искусствоосъя 95 номеро колледж, "Чингыли" мюзик-холл, эстрада кырӟанъя "Ижысь кизили-99" конкурсэ пыриськемъёс та нуналэ ваньмызлы кузьмалозы капчи мылкыд. Чеберлыкез яратӥсьёс нош ик паймылозы аспӧртэм выставкаослы. "Асьмелэн Ижевскмы" фотовыставка радъямын луоз Шор карлудын. Пиналъёс быгатонлыксэс эскерозы асфальт вылэ суреданын. Та нуналэ ик ортчозы быдӟым ӟуч кылбурчилэн А. С. Пушкинлэн вордскемез дырысен 200 ар тырмонлы сӥзем ужрадъёс. Ӵапак соин герӟаськоз Пушкин ульчалэн нуналэз но. Александр Сергеевичлэн выжыкылъёсыныз тодматскыны луоз "Дружба" кинотеатрын. Татын ик возьматӥськоз чеберлыко фильм. Луоз литературая викторина. А. С. Пушкинлэн вордскемез дырысен 200 ар тырмонлы но Ижлэн нуналэзлы сӥзьыса ик Россилэн кунгурез (гимнэз) чузъяськоз "Россия" кинотеатр вадьсын. Та нуналэ ик луозы турлы шудонъёс, аттракционъёс, спорт ӵошатсконъёс. Вузкарозы турлы киужъёсын. Операя но балетъя кун театрысь хор, искусствоосъя школаосысь нылпи хоръёс, духовой оркестръёс калыкез шулдыртозы толло ӝытаз ик. Ӝытазе Шор карлуд вадьсын чилекъялоз-ворекъялоз фейерверк. Городлэн нуналэныз валче Ижын улӥсьёсты ӟечкылалозы Анатолий Салтыков но мукет адямиос. ШӦКЫЧ Департамент, ФГСЗН но Креветка Тодмо писатель Иван Тургенев куке шуиз вал: "Кыӵе быдӟым но кужмо асьмелэн ӟуч кылмы!" Ӵапак соос тодам лыктӥзы, Ижевскысь одӥгаз учреждение вуылыкум. Шонерзэ вераса, мынӥ Первомай ёросысь калыкез уже интыянъя центре. Озьы нимаське вал со вазенгес. Кивалтӥсьлэн ӧсэз бордысь таӵе ивортонэз лыдӟи. Ӟуч сямен ик сёто ай: "Калинина Людмила Александровна. Начальник отдела департамента ФГСЗН по УР г. Ижевска по Первомайскому району". Вот огшоры калык кытысь тодыны кулэ ма со сыӵе ФГСЗН? Бен, ужтэк кылемъёслэн али лыдзы трос. Нош кӧня меда соос лыдъясько та вакытэ Первомай ёросын? Кивалтӥсь чутрак пумит луиз вераны со сярысь. Лыдпусъёсты, пе, шараяны уг яра. Озьыен, государственной тайна? Ог пыремен югдурез ачим сэрттоно-пертчоно кариськи. Али ужасьтэмъёслы пособие тыро 1997 арын ноябрь толэзь понна. Ар но ӝынылэсь кемалы ӝегало. Зэм, пособиез выжтыны луэ квартиралы дун тырон понна, электрокужымлы. Куд-ог фирмаос но предприятиос тыронъёссы интые маке со вузъёссэс но дэмлало. Тужгес но син шоры йӧтэ сузям креветка ӵектон сярысь ялон. 200 граммез сылэ 35 манет. Толэзьлы 600 манет пособиед усе ке, тыныд 3 кило 430 грамм креветка шедёз. Яке пособиедлы 25 манетэн воргорон трус басьты, 1 манет 02 коньыен горд кирпич. "Дрейд" ОАО-лэн вузъёсыз куртчылӥськогес. Тани солэн ӵектэм арбериосыз. Тупатъятэк сётӥсько: Вузлэн нимыз: Дуныз (манетэн вераса: УКМ-112 1362,06 Кофемолка - 2 86,94 Овощерезка 132,48 УКМ 2 МК 122 (?) 2417,76 Кроссовка (Индонезия) 423,50 Ма со УКМ - тодыны ӧй быгаты. Департаментлэн но сюлмаськонъёсыз ӧжыт ӧвӧл, дыр. Уноез предприятиос пунэме кылемын. Ижысь механической завод гинэ, кылсярысь, 14 миллион 751 сюрс манет висъяны кулэ, Горький чугун сюреслэн Ижысь отделениез - 11 миллион 669 сюрс манет... Туэ январьысен ужтэк кылемъёслы толэзьлы ичиез пособие тупатэмын 83 манет 49 коньы. Солы кӧня креветка усе меда? Асьтэос лыдъялэ ни. Н. ЛЯЛИН. Со пал ярысь чагыр сяська Башкортостанысь удмуртъёслэн такмакъёссы Со пал ярысь чагыр сяська Та пал ярын мед луоз вал. Толон адӟем яратонэ Туннэ татын мед луоз вал. Тополь ӝужыт, тополь ӝужыт, Учкисько ке, шурдӥсько. Тон шоры ке учкисько, Тон чебер, возьдаськисько. Ӝужыт-ӝужыт гурезь йылэ Кыкнамы тубом али. Ог-огмес яратыса Валче уломы али. Легезьпулэсь, ой, сяськазэ Малы сокем яратӥ, Нылъёс пӧлысь одӥгзылы Малы сокем синмаськи. Ой, италмас, италмас, Тӧл ке потэ, кисьтӥське. Милям пинал дауръёсмы Италмас кадь кисьтӥське. Учкы, туган, учкы шорам, Учкы мынам синъёсам. Учкы мынам синъёсам, Тон соку луод мынам. Припевез кык пол кырӟано. СЮМСИ ПАЛАН ТУННЭ Сюмси ёросысь Васькино гуртысь Анастасия Афанасьевна Воронина вордскиз 1910-тӥ арын. Солэн правнучкаез алигес пи вордӥз. Озьы пересь кышномурт прапрабабуш луиз. Пуж-пуж йӧл кыско Сюмси. "Выль улон" эштосэз нокыӵе хозяйство но али матаз но сутыны уг быгаты. Отын али котькуд скалзылэсь 12,5 килограмм йӧл кыско. Миым сярысь, со кык поллы уногес, нош бере кылись эштосэн ке ӵошатоно, 10,3 килограммлы уногес. Ӝегалод - ыштон адӟод Сюмси. Миым "Нива" эштос гинэ выль тракторъёс басьтӥз. Ёросын тулыс гырон-кизён уж борды ӟеч кутскон вылысь, 265 трактор кулэ, нош соос 241 гинэ. Та вакытлы ӝыныез сяна дасямтэ ай. Бен, прицепной техниказы ӟечгес, нош тракторъёсты али уен-нуналэн тупатъяны, ас мастерскойёсазы кулэ ёзъёссэс выльдыны кулэ. Кытын ӟеч сюлмасько, отын уж пӧрме ук. Тани "Нива" эштос минеральной удобрение но ворттӥз ни. Хозяйствоысь валтӥсь аргоном С. В. Аитов удобрение поттӥсьёсын вазен ик огкыл шедьтӥз, вуоно ю-тысьсы чотын сылалъёс куриз. Пересьёз медаз вунэ Ёросын вить сюлэсь уно ожысь но ужысь ветеранъёс. Соослы юрттэт сётон медаз лябӟы шуыса, ветеранъёслэн кивалтӥсьсы С. Ф. Ашихмин советсэ ӵемысь люкалля. Ортчемаз пленумын со вераськон ӝутӥз мӧйыослы юрттэт сётон, дышетскисьёсын кусыпсэс муромытон, школаосын данъян комнатаос усьтон сярысь. Палэнын медаз малпалэ Кыдёкын шуыса, вордскем кылзэс уг вунэто, уката мургес дышето Гураысь нылпи садике ветлӥсь нылпиос. Выоспитательзы Людмила Ильинична Радыгина но музыкантсы Ирина Леонидовна Воронцова, угось соосын пӧртэм шудон но ӵошатскон амалъёсын, вормисьёслы пӧртэм кузьымъёс люкылыса ортчытъяло ужрадъёссэс. П. НИКОЛАЕВ. Тыпы кадь Таяз толэзе сизьымдон арес тырме алнаш музъем вылын быдэ вуэм но кыдам адямилы Поляков Анатолий Григорьевичлы. Анатолий Григорьевич вордӥськиз 1929-тӥ арын 17-тӥ июне Ӟунняшур (Юмьяшур) гуртын огшоры крестьян семьяын. 1945-тӥ арын Варзи-Ятчи школаез йылпумъяса дышетскыны пыриз Асанысь зоотехникуме. 1948-тӥ арын ыстӥзы Ува райсельхозотделэ - армие ӧтьытозязы ужаз зоотехник луыса. 1950-тӥ арысен 1953-тӥ арозь - Военно-морской авиациын Советская Гавань городын. Запасысь офицер луон вылысь, экзамензэ экстерн амалэн сётэ но берытске вордӥськем гуртаз. Зоотехник луыса ужа "Красное знамя" колхозын. Пинал адямилэсь ӟеч быгатонлыкъёссэ соку ик синйылтӥзы но 1955-тӥ арын март толэзе Голюшурма МТС-э валтӥсь зоотехнике юнматӥзы. Куинь ар ужамез бере дэмлало "Горд Октябрь" колхозлы тӧрое. Ньыль ар кивалтэмез бере, колхоз азьмынӥсь луиз. Отӥяз партилэн райкомез сюлмысь куриз сое бере кылись бускель "Совет" колхозэн огазеяськыны. Огазеяськемзы бере, колхозлэн нимыз "Кама" луиз. Та улосвылын соку вал МТС, спиртзавод но пудо куайытон. 1958-тӥ арын вань машинно-тракторной станциосты быдтӥзы - вань техниказэс вузазы колхозъёслы. Голюшурма МТС-ын но озьы ик лэсьтӥзы. Солэсь вань ужан юртъёссэ но, улон интыоссэ но сётӥзы "Кама" колхозлы. Собере асьмелэн колхозъёсмы но бускель, бигер, колхозъёс МТС-э тракторъёссэс тупатъяны, озьы ик мукет ужъёсты но быдэсъяны ветлӥзы. Голюшурма спиртзавод колхозлы тачак пыды келя вал. Соин валче сӥльлэн, йӧллэн- вӧйлэн ӟечлыксы но будӥз. 1962-тӥ, 1963-тӥ, 1964-тӥ, 1965-тӥ аръёсы колхоз пыд йылаз юн-юн султӥз. Ӟеч азинсконъёсыз понна солы ялан сётъяллязы киысь кие выжылӥсь Горд Знамя. Голюшурмаысь пудо куайытон фермаез озьы ик сётӥзы колхозлы. Отын дунтэм сиёнэн сюдыны кутскизы сюро таза пинал пудоез но парсьёсты. Ужын вылӥ азинлыкъёсыз понна пудо утись О. В. Дёмина бырйылэмын партилэн ЪЪИИ ӧтчамаз делегатэ. 1962-тӥ арын Алнаш ёросэз огазеязы Можга ёросэн. Колхозлэсь азьмынӥсь тӧрозэ А. Г. Поляковез быръё огазеям Можга производственно-колхозно-совхозной управленилэн парткомаз, талэсь азьло КПСС-лэн Алнаш райкомезлэн бюроезлэн членэз вал ке но. 1965-тӥ арын Алнаш ёросэз выльысь люко Можга ёрослэсь. Ноябрь толэзе А. Г. Поляковез быръё КПСС-лэн райкомезлы нырысетӥ секретаре. Та удысын тырше 1981-тӥ арысь ноябрь толэзёзь. Кык ар ӵоже вис карыса дышетскиз Москваын, КПСС-лэн Центральной Комитетэзлэн Вылӥ партшколаяз. Ёросын дас вить ар ӵоже ужатозяз, А. Г. Поляков возьматӥз котькыӵе удысэз радъяны быгатэмзэ. Та вакыт ӵоже райцентр, ёросысь колхозъёс, Асан совхоз-техникум но Варзи-Ятчи курорт тодмантэм воштӥськизы. Ӟеч ю-нянь сётыны кутскизы бусыос. Пудо вордон удысысь поттэм сиён-юонлэн но ӟечлыкез будӥз. Трослы умояз колхозникъёслэн но рабочийёслэн улон-вылонзы. Районэ вуиз газ. Соин шунтыны кутскизы райцентрысь нимаз юртъёсты но трос квартираем коркаосты. Огдыре ик лэсьтӥськизы асфальт сюресъёс, чеберскизы райцентрысь ульчаос. Алнаш станцие вуыны ӧдъязы лэсьтӥськон материалъёс, пу, музъем эгыр, удалтытӥсь сылалъёс. 1965-тӥ арын райцентрын вал кык гинэ из юрт. Нош кӧня ке дыр ортчыса, соос туж трос луизы. Колхозъёсын но пуктэмын уно из юртъёс. Анатолий Григорьевич Поляковез бырйылӥзы КПСС-лэн ЪЪВ ӧтчамаз делегатэ. Вал УАССР-ысь Вылӥ Кенешлэн ньыль ӧтчамезлэн депутатэз. Пусъемын Трудовой Горд Знамя орденэн но медальёсын. Берло аръёссэ А. Г. Поляков ужаз автозаводын - вал цехлэн начальникезлэн воштӥсез. Отысен ик шутэтскыны потӥз. Бадӟым арлыдыз шоры учкытэк, воргорон али но уг ӵыды калык понна ӟеч лэсьтон мылкыдызлэсь. А. Г. Поляков луэ Удмурт шаерысь аграрной партилэн тӧроезлэн воштӥсез но Алнаш бӧляклэн тӧроезлэн воштӥсез. Та адями - ёрослэн огъёзэз. Али дасяське гуртэзлэсь куинь сю аръем юбилейзэ пусйыны. Анатолий Григорьевичлэн кузпалыз, Евгения Николаевна, ужаз дышетӥсь луыса. РСФСР- ысь но СССР-ысь калыкез дышетон удысысь азьмынӥсь. Калык понна озьы ик трос ӟечсэ лэсьтӥз. Кузпалэныз ӵош будэтӥз но ӟеч сямъёслы дышетӥз кык пизэс. Бадӟымез Вячеслав ужа шаерысьтымы Югдурез утёнъя министерствоын. Покчиез - инженер-строитель. Сизьымдон аресэз тырмемен валче, гуртоосыз но вань матысь адямиосыз, пӧртэм удысъёсын ӵош ужам эшъёсыз, ӵыжы-выжыосыз сӥзё Анатолий Григорьевичлы кедра мульы кадь юн тазалык но дунне вылысь вань ӟечсэ гинэ. Гажано эшъёс! Странамылэн историяз 12-тӥ июнь аспӧртэмлыко нунал - со выль демократической Россилэн вордӥськем нуналыз, солэн зэмос кунлык но асэрик басьтэмез. Укмыс ар ӵоже, Россия Федерацилэн суверенитетэз сярысь Декларация кутэм дырысен, асьме улонамы бадӟымесь воштӥськонъёс ортчизы. Аскулэлыксыя соос быдэс даурен ӵошатымон. Калыклэн асваланаз мур пыӵаз государствоез демократилэн сюрестӥз азинтон сярысь малпан. Туннэ та уж туж секытэн мынэ ке но, властьлэсь ёзъёссэ кылдытыку, огъя кун ужпумъёсты сэрттыку, бадӟым инты басьтэ калыклэн мылкыдыз. Обществолэн улоназ арысь аре кужмоя законлэн данэз. Демократилэн вормонъёсыныз лыдъяны луэ шара мылкыдэз веранэз но котькыӵе ужен ас мылкыд каремедъя выронэз. Вордӥськем нуналэз пусъён - со праздник гинэ ӧвӧл, со озьы ик ортчем сюреслы дунъет сётон. Ачиз улон асьмеды оскытӥз: экономикаын рыноке выжон киоскъёсын но ларёкъёсын уг лэсьтӥськы, со лэсьтӥське бадӟым но шоро-куспо предприятиосын, кудъёсаз та секыт вакытэ но быгато ӟеч ужаны, дыраз тыро уждун, утё калыкез туала шуг-секытъёслэсь. Макем тросгес луозы асьме республикаын пӧртэм асваньбурен предприятиос, сокем шӧдскымонгес но пайдаёгес луозы реформаос. Ми понна Россия - со вань улӥсь калыкъёслэн эшъяськонзы, кудъёсыз культураен, сямъёсын герӟаськем сяна, огазеяськемын на асьме производствоез ӝутонъя но улӟытонъя огъя ужен. Республикамылэн вань бадӟым ужан кужымез - со данъяськыны быгатэ аслаз кибашлы рабочийёсыныз, гурт ужасьёсын, интеллигенциен. Соин ик Россилэсь валтӥсь праздниксэ ми бадӟым осконэн пумитаськом. Удмуртия вань кужымзэ сётоз, Россиез демократия сюрестӥ мынӥсь, быдӟым но сяськаяськись карон понна. Праздникен тӥледыз, гажано эшъёс! Удмурт Республикаысь Кун Кенешлэн Тӧроез А. А. Волков. Удмурт Республикаысь Правительстволэн Тӧроез Н. А. Ганза. Шӧкыч Малпаськытӥсь суред - Пенсиез одӥг курег макеслы сяна ӧз будэтэ. Оло сиёд соин, оло юод?.. Туспуктэмез Г. Сидоровлэн. - Лавказы али гинэ усьтӥськиз - нош басьяськисьёсыз кӧня ни!.. - Басьяськисьёс ӧвӧл со, со налогъёсъя полиция, санэпидемнадзор, тылпуосъя инспекция, рэкетиръёс... Суредэз А. Шульгиновлэн. ШӦКЫЧ Зор бӧрсьы... зор Таяз вир нуналэ Ижын туэ нырысьсэ гудыръяса-чилекъяса зориз. Шумпотыны кулэ вал кадь солы. Нош шоркарысьтымы Михайлов ульчаысь 9-тӥ юртын улӥсьёслы, шонерзэ вераса 2-тӥ подъездлы, со бадӟым куректон ваиз. Инбам "куно" ортчем бере, 18 часысен 22 часозь, подъездын "зор" кутскиз. Ву васькись гумы жуг-жаген тымиськем. Липет вылысь зор ву пылатӥз быдэс подъездэз, борддоръёсты, электрощитъёсты. Ӧтемын вал аварийной служба. Кык слесарьёс вуизы ик. Сёрос сузян тросэн. Тунгонэз пилаен вандыса юрт йылэ тубизы. Дас этажъем юртлы троссы вакчигес вылэм. Ӵуказеяз ӧте, пе, домоуправлениын ужасьёсты. Кошкизы. Мукетыз сярысь но вератэк уг луы. Та подъездын кык арня талэсь азьло гинэ йылпумъяськизы вал тупатъян-буян ужъёс. "Кыкетӥ зор" ваньзэ гылтӥз. Н. БАЙТЕРЯКОВ, та юртын но подъездын улӥсь. Закон куремъя Алдасьёс-а, алдамъёс-а? Владимир Николаевич Капин Каракулино районлэн кузёез луиз 1994 арын. Кызьы со кивалтӥз районэн нырысетӥ аръёсаз, али шуг ни вераны. Шонергес дунъет сётыны быгатозы, дыр, асьсэос отын улӥсьёс. Нош берпум 1998-тӥ арын кузёяськемез табере умой тодмо трос адямиослы. Тужгес но прокуратураын ужасьёслы. Кылем арлэн пумаз республикаысь прокуратура В. Н. Капинлы но районысь кивалтэтлэн коньдон ужпумъёсъя отделэзлэн кивалтӥсезлы В. А. Кулемалиналы пумит уголовной уж ӝутӥз но эскерон ужрадъёс мытӥз. Кам дурысь кивалтӥсьёслэн уголовной ужзы дасо томъёсын уг люкаськы ке но, со понна кыӵе бадӟым лыдпусъёсын со паймытэ! Миым нырысетӥ палар ӵоже районлэн бюджетаз уг тырмы вал (мукет сямен вераса - дефицит) 6 миллион 830 сюрс манет. Ӧз тыриськылы калыклы уждун, нылпиослы юрттэт но пӧртэм компенсациос. Та вакытэ 14 мае В. Н. Капин ужбергатӥсен В. А. Желнинэн тупанкыл гожтэ. Соя, тупанкылъя, район, шонергес вераса В. Н. Капин, ужбергатӥсьлы сётӥз му вӧй поттӥсь "Сиданко" компанилэсь 1 миллион манет тыр 5 вексельёссэ . Со понна В. А. Желнин ӵектӥз 580 сюрс манет уксё но "Евразия" банклэсь 420 сюрс манет тыр вексельёссэ. Коньдон ужпумъёсъя министерстволэн справкаезъя банклэн вексельёсыз сыло вал гожтэмезлэсь 38 процентэз гинэ. Районысь бюджет соин сэрен 258 сюрс 594 манет ыштон адӟиз. Кудӥз меда ассэ гажась кузё басьтоз сыӵе вексельёсты, вылаз ик, быдэс дунзэ тырыса? Но таӵе кескич вузкаронэз-басьтонэз бӧрысьгес эскером ай. Со толэзе ик районлэн кузёез аслаз воштӥсезлы Л. А. Кондаковлы лэзиз "Сиданколэсь" 1,5 миллион манет вексельёссэ "Сэмпл" фирмалы вузаны. Соос вузамын вал нокыӵе пайда сётонэз но кулэяськонэз лыдэ басьтытэк. Вылаз ик, фирма меӵак пӧяз районэз. Озьы бюджет 1999 аре 1 январьлы басьтытэк кылиз 250 сюрс 321 манет коньдонзэ. Нош огъя ыштонъёсыз луизы 1 миллион 91 сюрс 521 манет. Кылем арын В. Н. Капин пыриськиз районысь кивалтэтлэн тӧроез луон понна нюръяськонэ. Быръёнэн кивалтӥз В. А. Закиров. Таиз кивалтӥсь эшезлэсь калык азьын данзэ будэтон понна ӵектӥз район казнае коньдон вуттыны, нош ик "Сиданколэсь" вексельёссэ вузаса. Басьтӥз соосты "Валерия" фирма понна Закировлэн эмеспиез А.Закурдаев. Таяз учыре бюджет "восьмиз" 1 миллион 216 сюрс 660 манетлы Малы бен район собыдӟа ыштонъёс адӟоно луиз? В. Н. Капин, оло, валамтэеныз янгышаз? Озьы ке, малы солы ӧз юртты коньдон ужпумъёсъя "министрез" В. А. Кулемалина? Юрттӥз, кызьы нош ӧз. Но юрттӥз сотэк но векась бюджетэз тус-тас карыны, куашкатыны. Тӧро тодон-валанэз тырмымтэен янгышаз шуыны луысал ке, озьы вераны уг луы районысь валтӥсь бухгалтер сярысь. Табере валаны тыршом, малы кулэ луиз вексельёсты вузаны. В. Н. Капинлэн верамезъя, со туж тыршиз бюджетэз "кышъяны". Со понна ик вузаз вексельёсты. Но та дуно бумагаосты луэ вал банкъёсын улэп уксёен чик ӝегатскытэк воштыны. "Сиданколэн" вексельёсыз угось котькытын оскымонэсь вал. Нош Капин малы ке но мукет амал бырйиз. Шедьтӥз осконтэм, ляб тодмо басьяськисьёсты, соос сярысь рос-прос тодыны ӧз тыршы. Яке тодэ ик вал? Шуг вераны, басьяськисьёс-шырмачъёс кызьы ке тау каризы-а меда бусьтыр тӧролы. Сыӵе дыръя "тау карон" ужрадъёс угось шара уг ортчо. Но закон чакламъя, аслыд пайда поттон меӵак коньдон басьтонэн котьку ик герӟаськемын уг луы. Луэ эшъёсыдлы, ӵыжы-выжыосыдлы юрттон улсын. Ма, ӧжыт шат луонлыкъёс "мон - тыныд, тон - мыным" амалъя пайда поттыны? Ваньмыз та вылӥ верамъёс В. Н. Капинэз но В. А. Кулемалинаез янгыше уськытон вылысь ӧвӧл гожтэмын. Соослэн ужъёссылы берпум дунъет сётыны суд гинэ быгатоз. Нош районын улӥсьёс сое сётӥзы ини. (Нялтас вераса, соослэн чагиськемзыя ик прокуратура кутскиз югдурез сэрттыны-пертчыны.) Калык адӟе ук, кин котькуд копейказэ лыдъя, нош кин куае но куае. Таиз пумысен яркыт суред. Следствие мыныку, В. А. Кулемалина аслыз дунтэк, государство чотын, адвокат куриз: медъяны, пе, коньдонэ ӧвӧл, ёрмыса улӥсько. Нош ужысьтыз справкаын гожтэмын: уждунэз толэзяз ньыль сюрс манет пала усе... Кудӥз меда районысь бюджетник таӵе уждун басьтэ? Н. Коряков. ГОЖТӤСЬКОН-2000 "Удмурт дуннеен" - котыр дуннее Та нуналъёсы Печатья но иворъёсъя министерстволэн коллегиез эскериз 2000-тӥ ар понна газетъёслы но журналъёслы гожтӥськон ужпумез. Отын чакламын та ужрадэз 1-тӥ июльысен мытыны. "Удмурт дуннелы" ар понна гожтӥськон усёз 84 манетлы. Пенсионеръёслы, оже ветлэмъёслы, студентъёслы - 78 манет. Редакциысь газет басьтӥсьёслы - 48 манет. Пятницае телепрограммаен газет басьтӥсьёслы - 30 манет. Ӵошатон понна вералом: "Удмуртская правда" но "Известия Удмуртской Республики" газетъёсты ведомствоос басьтозы 180 манетэн, нимаз адямиос - 132-ен, льготаен адямиос - 108-эн. "Кенеш" журнал ар ӵоже потоз 10 номер, сылоз 53 манет 20 коньы, "Кизили" - 10 номер 32 манет, "Инвожо" но "Вордскем кыл" - 6 номер 36 манет но 32 коньы. Тужгес дунтэмез газет - "Ӟечбур": 52 номер сылэ 28 манет но 80 коньы. "Удмурт дуннеын" ужасьёс арлы быдэ сюлмасько тиражзэс будэтыны. Берло аръёсы со таӵе вал: 1994 - 11.500 1995 - 19.760 1996 - 12.235 1997 - 10.000 1998 - 13.000 1999 - 15.000 Кытчы мынэ со али? Тодады вайытӥськом: 1. Алнаш 1870 2. Балезино 705 3. Вавож 433 4. Воткинск 79 5. Глазов176 6.Грах 245 7. Дэбес 1488 8. Завьялово 724 9. Игра 855 10. Ижевск 176 11. Каракулино 3 12. Камбарка 5 13. Кез 431 14. Кизнер 339 15. Кияса 426 16. Красногорск 24 17. Пичи Пурга 1867 18. Можга 1327 19. Сарапул 32 20. Селта 190 21. Сюмси 28 22. Ува 288 23. Шаркан 1543 24. Юкаменск 84 25. Як.-Бодья 311 26. Яр 92 27 Удмуртилэн палэназ 201 Республикалэн палэназ югдур таӵе: Татария 120 Башкирия 73 Приморье край 10 Пермь улос 5 Волгоград Горно-Алтай Екатеринбург быдэн 1 Киров Красноярк Ростов Самара Челябинск Та вакытэ Россия Федерациысь данак улосъёсын (республикаосын, крайёсын, областьёсын) дасяло гожтӥськонъя каталогъёс. Отын возьматэмын луозы газетъёслэн но журналъёслэн нимъёссы, дунъёссы, адресъёссы. "Удмурт дунне" газетлэн редакциез но федерациысь почта кусыпъёсъя Удмурт управление алигес вуизы таӵе огкылэ: "Удмурт дунне" газет пыртэмын луоз Удмуртилэн, Башкирилэн, Татарилэн, Пермь улослэн каталогъёсазы. Озьыен, асьме республикаысь но палэнысь удмуртъёслы луонлык кылдэ вуоно арлы гожтӥськон сярысь али ик малпаськыны. 2000-тӥ аре - удмурт газетэн! "Удмурт дуннеен" - котыр дуннее! А. Шкляев. ЖУРНАЛИСТЪЁСЫН ПУМИСЬКОНЪЁС Ваньмыз - егитъёс понна 27 июне - Егитъёслэн нуналзы. Таин валче журналистъёсын пумиськылӥз республикаысьтымы Егитъёсын ужанъя кун комитетлэн тӧроез Андрей ГАЛЬЦИН. Со вакчияк тодматӥз, кыӵе ужрадъёс чакламын но нуисько егитъёс пӧлын, ма шугъяськытэ но шумпоттэ туала вакытэ. Кызьы пусйиз Андрей Иванович, ваньмаз ёрос администрациосын та удысъя кылдытэмын нимысьтыз ёзъёс, кызь куиняз кутэмын целевой программа. Та ужпумъя Пичи Пургаын, Ярын, Сарапулын но куд-ог музон интыосын ортчиз депутатъёслэн сессизы. Программалэсь быдэсъяськемзэ эскеризы Алнаш, Балезино, Завьялово, Игра районъёсысь Глазов, Можга городъёсысь депутатъёс. Егитъёсын ужанъя республикалэн бюджетысьтыз нимысьтыз коньдон висъяське. Ма тужгес но юн шугъяськытэ туала нылъёсты но пиосты? - Нырысь ик, уже интыяськон. Кыкетӥез - улон инты басьтон, - шуиз А. Гальцин. - Быгатэммыя юрттыны сюлмаськиськом, но тросэз малпамъя уг пӧрмы. Туала экономической политика озьы ик пуктэмын: ужтэк кылемъёслэн лыдзы уз кулэсмы. Тужгес но секыт йӧтэ гужем, студентъёс но школьникъёс каникулэ потэм бере. Предприятиос уг куто - асьсэлэн но калыксы ма карыны ёрмемын, биржаос пыр ваньмызлы инты уг сюры. Уродэныз артэ одӥг-ог пумиськылэ ӟечез но. Юн экономикаен предприятиос, колхозъёс ӝегатскытэк толэзьлы быдэ пиналъёслэсь уждунзэс сёто. Нош республикаысь биржа тае март толэзёзь кыскиз. Таяз гужем 23 сюрс пиосты но нылъёсты уже интыяно, но чакламъя уз пӧрмы. Тросэз пиналъёсмы нош ик ульча кузя калгыса ветлозы. Нимысьтыз вераськон - урод ужъёсы кыстӥськись нылпиос сярысь. Азьвыл аръёсы сямен, соос понна Завьялово рай онысь Пероггуртын усьтэмын лагерь шуге-леке шедемъёсын ужало тодӥсь-валась специалистъёс. Кызьы ортчоз шаерамы егитъёслы сӥзем праздник? - Со одӥг нунал гинэ уз кыстӥськы. 25 июне республикаысьтымы устоосыз пӧлысь устоосыз 50 ужасьёс, студентъёс но дышетскисьёс ӧтемын луозы Правительстволэн юртаз. "Динамо" стадионын 27 числое ортчоз бадӟым концерт. Та нуналъёсы семья кылдытӥсьёслы загсъёс озьы ик дасяло аспӧртэмлыко ужрад, соослы юрттэ Егитъёсын ужанъя комитет. Огъя вераса, праздниклэн шӧмыз шӧдӥськоз городын но, районын но. Воткинскын, кылсярысь, ортчозы тымет вылын ӵошатсконъёс, Сарапулын - егит семьяослэн слётсы, Граховоын - фольклор ӝыт, Завьялово районысь Шаберды гуртын - "Егит семья" клуб. Ма шумпоттӥсез вань на егитъёсын ужанъя программаын? Пусйыны кулэ "Егитъёслы улон инты" нимаськись проектэз. Корка пуктӥсьёслы чаклаське кредитъёс висъяны. Пыӵалоз-а со улонэ, шедёз-а коньдон? Тӥни ма бордын ужпум. Тросэз ӟеч малпанъёсмы асьмелэн уго бумага вылэ кылё. Л. МЕДВЕДЕВА. Ижевсклы - 239 ар Котькуд ар инвожо толэзе дуно но чебер Ижевскмы пусъе аслэсьтыз нуналзэ. Арлыдыз бен солэн сокем бадӟым но ӧвӧл - 239 арес. Оӵ шур вылын сылӥсь городмы котьку данъяськылӥз но данъяське кибашлы адямиосыныз. Асьме дорын поттэм вузъёсты дуннеысь унояз кунъёсын басьто. Таяз празднике но городын улӥсьёс понна бадӟым ужрадъёс радъямын вал. Быдэс столицамы шулдыръяськиз аслаз нуналаз. Туэ со ӧжытак аспӧртэмлыкогес ортчиз. Со герӟаськемын вал Александр Сергеевич Пушкинлэн вордскемез дырысен 200 ар тырмонэн. Котьку сямен шор площадьын ортчиз вузкарон ярмарка. Кырӟан-эктон гуръёс чузъяськизы городлэн пӧртэм интыосаз. Палэнэ ӧз кыле пиналъёс но. Соос кырӟазы но, суредаськизы но, ӵошатскизы но. Праздник йылпумъяськиз бадӟым фейерверкен. Пеймыт инбамез чебертӥзы пӧртэм пумо тылсиос. Кайта городмылы тырме 240 ар. Вуоно праздникозь, яратоно Ижевскмы! Б. Никитин. В. Камашев (фото). Музъемлэн ватосэз пумтэм Вашкала удмуртъёслэсь улон интызэс - Иднакарез - умой-умой эскерыны кутскем дырысен 25 ар тырме. Нош одӥгезлэн сое эскерисьлэн А. П. Смирнов археологлэн вордскемез дырысен - 100 ар. Та бадӟымесь датаосыз сӥё-дано пусъён вылысь, 15-18 июне Глазкарын ортчытӥське калык куспо симпозиум. Татчы люкаськозы А. Смирновлэн дышетскисьёсыз, солэсь ужзэ азьланьтӥсьёс. Соос сэрттозы-пертчозы Волга но Урал куспысь музъем шедьтосъёсты эскеронъя ужпумъёсыз, кызьы ӟечгес утьыны луоно финн-угор выжыослэсь шор дауръёсысь бервылъёссэс, кызьы та ужын кутоно компьютеръёсты. Алексей Петрович Смирнов - туж бадӟым археолог, финно-угровед. Солэн данъяськымон дышетскисьёсыз табере ужало Уралысь, Рссиысь но кунгож сьӧрысь наукая центръёсын. Тыршо асьме дорын но. 29-тӥ мае Алексей Петровичлэн вордскемез дырысен 100 ар тырмиз. Солы сӥзьыса, Шунды ӝужан пал Европалэн нюлэсо музъемысьтыз утчаськонъёссэ сӥлы-бурлы карыса, Москваын но Татарстанын ортчытэмын ни научной конференциос. Удмуртилэсь шор дауръёсысь памятникъёссэ эскерон борды А. П. Смирнов кутскиз 1920- тӥ аръёсы. Со дырысен Чупчи шур котырысь вашкала ватосъёс пыризы туж дуно памятникъёс чотэ. Та учёнойлэн ужъёсыныз ӵош археологияя литератураын тодмо луизы Иднакар, Дондыкар, Учкакар, Чемшай но мукетыз. Та каръёсты эскерон бордысь со ӧз куштӥськылы берло аръёсаз но. Гудыса шедьтэм бервылъёсъя со удмуртъёслэсь гинэ историзэс но культуразэс ӧз эскеры, огазеясь малпанъёссэ гожъяз сюрс ар талэсь азьвыл улэм шунды ӝужан пал финнъёс сярысь. Озьы А. П. Смирнов вашкала выжыосмес утчанын кутскон ӧр сётӥз. А. П. Смирновлэн дышетскисьёсыз ини берло 25 аръёсы усьтӥзы но пыр-поч эскеро Чупчи дурысь музъемлэсь тужгес узыр сӥзэ - Иднакарез. Соин кивалтэ история наукаосъя доктор Маргарита Григорьевна Иванова. Та музъемын лыдъянтэм узырлык ванен усьтэмын Удмуртиын нырысетӥез историяя но культурая музей-заповедник. 1991-1998 аръёсы УрО РАН-лэн физико-технической институтаз ужасьёсын ӵош уже кутэмын электрон амалэн эскерись, автоматизировать карем комплекс, озьы памятникез "вӧсь карытэк" луэ тодыны солэсь арлыдзэ но кытӥ, мар быдӟа кыстӥськемзэ. (Табере та методикаен, асьме странаын гинэ ӧвӧл, кунгож сьӧрын но тунсыкъясько.) Соин ӵош ик уж мынэ вань тодэмъёсыз компьютере бичан ласянь но. Алексей Петровичлэн туж потэ на вал лёгаськемез та пинал дырысеныз тодмо музъем вылтӥ. Ӧз кылды ни. Но солэсь удыссэ паськыт шоналтыса мыно дышетскисьёсыз. Н. Иванова. ӦТЧАМ АЗЬЫН: КЫЛ СЁТӤЗЫ КЕ... Вань финн-угоръёс понна Ижын улӥсь егит удмурт Владимир Русин - аспӧртэмлыко адями. Солэн сюлмаськонъёсыз тросэзлэн ӟырдыт удмуртъёслэн кадь ик. Удмурт калыклэсь культуразэ, науказэ, огъя финн-угор кылэз ӟеч-ӟеч азинтон вылысь, со ӵектэ: удмуртъёс удмурт кылын вылӥ тодон- валан котькыӵе удысъя - биологияя, медициная, химияя, астрономияя, математикая но музонъёсызъя - мед басьтозы шуыса. Удмурт шаерын кылдытоно Финн-угор калыкъёслэсь дунне университетсэс. Отчы ӧтьыны луысал быдэс финн-угор дуннеысь - Финляндиысь, Эстониысь, Венгриысь, озьы ик - финн-угор адямиосын узыр США-ысь, Австралиысь дышетӥсьёсты. Со юрттоз асьмелы финн-угор экономикаын, коньдон ужпумъёсъя удысын, юриспруденциын, калык куспо экономикаын, гурт улон-вылонын тужгес кужмо луыны. Финн-угор калыкъёслэн дунне университетазы дышетозы финн-угор кылъёсын. Озьы ик валтӥсь инты басьтозы ӟуч но мукет славян кылъёс: поляк, чех, югослав. Та вазиськонэз лыдэ мед басьтысал Вань удмуртъёслэн "Удмурт кенеш" огазеяськонзы но. В. Александров. Ӧтчам азьын: кыл сётӥзы ке... Кепыратэк верало Республикамылэн Кун Кенешаз трос быръемын предприятиослэн директоръёссы но ужбергатӥсьёс. Малы? Шат соослэн заводъёссы, акциосын огазеяськонъёссы туж умой ужало? Кыдёкын но ӧвӧл! Но соос понна куаразэс сётыса, бырйисьёс тазьы малпазы, вылды: директор ваньзэ лэсьтоз, вормоз, солэн пельпумъёсыз паськытэсь. Кивалтон уже туж ӧжыт шедё вашкала дырысен вордскем музъем вылазы улӥсь удмуртъёс. Соос пумен ӧжытгес сюро Кун Кенеше, нош Кун Думаын огез но ӧвӧл. Городэз вератэк ини, районъёсын но удмурт кивалтӥсьёс чиньыен ладъямон но ӧвӧл. Ӵем дыръя кивалтон уже удмуртъёсты быръён сярысь вераськон потэ ке, быгатӥсь кадръёс тырмымтэ вылэ чӧлскон кылдэ. Бен кытчы соос пыризы? Али асьмелэн данак ини учёнойёсмы, ужын будэм пиос но нылкышноос. Вал соос азьло аръёсы но. Республикаен кивалтӥзы ужез тодӥсь адямиос, соос пӧлын А. Тронин, А. Караваев, П. Сысоев но мукетъёсыз. Зэм, соослэн дышетскемзы тырмыт, оло, ӧй вал. Опыт соослы юрттӥз. Но тодӥськом: республика огинтыяз ӧз лёгаськы, солэн азинсконъёсыз шӧдскымонэсь вал. Учке ай Ижмес гинэ, со паськытаз но чебергес луиз, выль заводъёс ӝутскизы, улон коркаос лэсьтэмын. Куд-огез шуэ:"Удмурт кенеш" огазеяськон ас азяз пуктэм ужпумъёссэ тыро-пыдо быдэсъяны уг быгаты. Мон сямен солы юрттыны кулэ Кун Кенеш но, Правительство ласянь но. Нош та ёзъёс понна "Удмур кенеш" кыл вылэ потэм пӧськы кадь, сое чик кулэтэмен лыдъясьёслэн но куаразы кылӥськылэ. Алигес ортчем сессиын удмурт огазеяськонлэсь тӧрозэ Кун Кенешлэн Президиумаз бырйыны дэмламын вал. Сое отчы бырйыса, туж кулэ ужпумъёсты сэрттыны-пертчыны капчигес луысал уго. Но "Удмурт кенешлэн" тӧроез Валентин Тубылов Президиуме ӧз сюры. Туала демократъёслы со люкетоз кадь потӥз, лэся. "Удмурт кенешлэн" огаз пумиськоназ вераськон ӝутэмын вал визьмо удмуртъёсты кивалтон удысъёсы ӵектон сярысь. Вераськон туж ӟырдыт ортчиз. Со уго Кун Кенешлэн тӧроезлы воштӥсьёс быръён азьын вал. Пукиз та кенешын Кун Кенешлэн тӧроез А. Волков но, солэн бакчаяз но изъёс усьылӥзы. Ӧйтӧд кызьы валаз со кенешчиослэсь верамзэс, но ӟечезлы оскем потэ вылэм. Съездэ лыктэм котькудӥзлы делегатлы малпаськоно сюлмаськонъёсыз, республикаын кылдэм югдур сярысь. Кышкано ӧвӧл сюлэме люкаськем малпанъёсты вераны. Нокин но вӧзаз пукись эшезлэн пельпум сьӧраз ватскыса медам кыльы. Ватскон, кепыран сям асьмемыз ик ултӥянэ вуттэ. В. СМИРНОВ. Удмурт Республикаысь Кун Кенешлэн Регламентъя но Кун Кенешлэсь ужзэ радъянъя ялан ужась комиссияз адямиосты быръён сярысь Удмурт Республикаысь Кун Кенешлэн Постановлениез Удмурт Республикаысь Кун Кенеш пуктэ: Удмурт Республикаысь Кун Кенешлэн Регламентъя но Кун Кенешлэсь ужзэ радъянъя ялан ужась комиссияз быръёно таӵе адямиосты: Варламов Владимир Сергеевичез - быръёнъя 70 номеро Воткинск ёрос округысь депутатэз; Зенин Владимир Николаевичез - быръёнъя Завьяловоысь 76 номеро Лесной округысь депутатэз; Кузьменко Олег Леонидовичез - быръёнъя 81 номеро Каракулино ёрос округысь депутатэз; Кучерявенко Михаил Ильичез - быръёнъя Ижевскысь 31 номеро Магистральной округысь депутатэз; Тарасенко Виктор Дмитриевичез - быръёнъя Ижевскысь 9 номеро Московской округысь депутатэз; Хорошавцев Виктор Геннадьевичез - быръёнъя Ижевскысь 25 номеро Пушкинской округысь депутатэз; Шаляпин Александр Павловичез - быръёнъя 78 номеро Игралась Поселковой округысь депутатэз. Удмурт Республикаысь Кун Кенешлэн Тӧроез А. А. Волков. Ижевск город, 1999 арын 28 мае, � 47-ИИ. Маин Шаталов умой Авзаловлэсь? Та нуналъёсы Удмурт Республикаысь Вылӥ суд эскероз Уралтрастбанклэн президентэзлэсь Рустем Авзаловлэсь куронзэ. Тэргаськон кылдӥз Индустриальной ёрос суд быръёнъя 7 номеро Индустриальной округлэн ог люкетаз ортчем быръёнэз шонертэмен лыдъямен. Та округ аспӧртэм. Солэн улосвылаз интыяськемын городысь тюрьма. Судзэс витись 2500-лэсь трос муртлэн правоез вань бырйыны но быръемын луыны. Василий Шаталов чакла, татысь адямиослэсь куронъёссэс со умойгес быдэсъясал шуыса. Саур вылъёссы ӧвӧл ярам Кылем арня куспын "Твой стиль" шоу-театрын ортчиз "Тхе Бест" модельной агентстволэн учконэз-эскеронэз. Кунгож сьӧрын улӥсьёс, манекенщицаосын тодматскон понна, нырысьсэ лыктӥзы шоркарамы. Ужрадэ пыриськем куамын пала нылъёс пӧлысь соос бырйизы куиньзэ гинэ. Табере соос мынозы Японие. Мукетъёсызлэн саур вылъёссы, пе, паськытэсь. Кышномурт-а янгыш? Сояз арня пумын Камбаркаысь 35776 номеро воинской частьысь рядовой Сергей Лабазный люизитэн базаез возьманъя постсэ кельтӥз. Постысь буш киын ӧз кошкы, патронъёсын ӵош Калашниковлэсь автоматсэ сьӧраз басьтӥз. Склад возьмаськисьтэк кылиз. Соин сэрен республикаысь быдэс милиция ӝутэмын вал. Сюресъёс, шур вамен потанъёс, выжъёс пытсамын. Али тодмо ӧвӧл на солдатлэн пегӟем мугез. Кошкемезлэсь азьло, пе, со азьвыл кузпалэзлэсь гожтэт басьтэм. Нош ик-а кышномурт янгыш? Иворъёсъя национальной служба. АБИТУРИЕНТ-99 "Учитель, перед именем твоим..." Уважаемые выпускники школ! На переломном этапе жизни нашего Отечества профессия народного учителя оказалась не самой престижной из тех, к которой стремится часть молодежи. Но данное обстоятельство не может умалять одну из самых благородных общественно значимых профессий. Учитель был и будет во все времена. В отличие от других занятий эта профессия больше защищена от безработицы. Сейчас происходит смена поколений в учительстве, поэтому объективно растет потребность в нашей профессии. Из года в год увеличивается число желающих учиться в нашем институте. Этому способствует не только престиж нашего вуза но его все более улучшающаяся учебно-материальная база. За время обучения студенты могут неоднократно пройти оздоровительный курс в институтском профилактории. Институт гордится своим профессорско-преподавательским коллективом. За последние три года защищено 18 докторских и кандидатских диссертаций, в том числе шестью выпускниками института. В этом году в институте открыта своя аспирантура. имеется филиал вуза на базе Ижевского педучилища, идет подготовка к организации такого же филиала в г. Можге. Учитель - это профессия самоотверженных людей. Сегодня уже нельзя быть просто учителем-исполнителем. Школе нужны лидеры-труженики, способные убеждать в правоте своих идей, умеющие увлечь своих коллег ради воспитания ученика новой фармации. Г. А. Поздеев, ректор Глазовского пединститута. Из истории Институт своим началом восходит к открытой в 1915 г. мужской учительской семинарии (ныне 2-й корпус института, где размещаются педагогический и музыкально- педагогический факультеты). Пройдя ряд этапов преобразований, в 1952 г. он приобрел статус педагогического института с двумя факультетами: филологическим и физико-математическим. Впоследствии были открыты: - 1959 г. - факультет педагогики и методики начального обучения; - 1960 г. - музыкально-педагогиечкое отделение; - 1984 г. - исторический факультет; - 1987 г. - факультет дошкольного образования; - 1995 г. - факультет иностранных языков; - 1997 г. - факультет дополнительного образования. Институт готовит педагогические кадры по 12 специальностям, в т. ч. по таким, которые пользуются наибольшим социальным спросом: информатика; история, иностранная филология (английский и немецкий языки), педагогика дошкольного образования и др. Высокий научный потенциал преподавателей способствует тому, что студенты ежегодно представляют свои научные работы на международных, российских и региональных конференциях. Студенты пединститута занимаются в различных спортивных в секциях. Многие получают квалификации мастеров спорта. Иногордние проживают в 4-х удобных общежитиях. Студентами Глазовского пединститута были славные сыны и дочери удмуртского народа - это Герои Советского Союза Т. Барамзина и А. Пряженникова, народный поэт Удмуртии Ф. Васильев. Правила приема Прием документов осуществляется на дневное отделение с 22 июня по 15 июля, экза- мены с 16 по 27 июля. Зачисление проводится с 28 по 31 июля На заочное отделение - с 15 по 29 июня, экзамены с 30 июня по 10 июля. Зачисление - 12-13 июля. В приемную комиссию представляются следующие документы: 1. Заявление на бланке. 2. Документ о среднем или высшем образовании в подлиннике или его копию, заверен- ную в ГГПИ. 3. 8 фотографий 3 х 4 см (без головного убора). 4. медицинская справка по форме 086/у. 5. Копию трудовой книжки (для имеющих стаж работы). 6. Паспорт или документ, удостоверяющий личность, гражданство, документ об отношении к воинской обязанности (предъявляется лично при подаче документов). 7. Дополнительные документы, которые могут быть учтены при равенстве конкурсных баллов (направление МНО УР, районо, гороно, грамоты, дипломы, свидетельствующие об успехах и склонности к избранной специальности). Лица, окончившие с медалями средние образовательные учреждения, а также имеющие диплом с отличием начального и среднего профессионального образования сдают один экзамен по профилю факультета. При получении оценки "отлично" они освобождаются от других экзаменов и зачисляются в институт, а при иных положительных оценках сдают все экзамены. Лица, занявшие 1-е место на всероссийских, республиканских (Удмуртия) олимпиадах, освобождаются от вступительных экзаменов по соответствующему предмету, а в ведомость выставляется оценка "отлично". Все вступительные испытания проводятся в форме экзаменов, кроме экзаменов по музыке, по программам, составленным институтом в соответствии с программами средней (полной) общеобразовательной школы. Абитуриенты, сдавшие все экзамены на положительные оценки, но не прошедшие по конкурсу, могут быть зачислены в институт на платное обучение. На заочное отделение по специальностям педагогика и методика начального образования, педагогика и методика дошкольного образования принимаются с 4-х летним сроком обучения только лица, имеющие соответствующее среднее профессиональное образование и работающие по профилю избранной специальности. Прием на платное обучение проводится по договору, заключенному после завершения конкурсного отбора Заключение договоров о платном обучении заканчивается 10 сентября. Вас ждут факультеты Физико-математический факультет Специальность "Математика и информатика": прием - 70 чел , Экзамены: математика (письм ), математика (устно), русский язык (изложение) - зачет/незачет. Специальность "Физика и информатика": прием - 50 чел. Экзамены: физика (устно), математика (письм.), русский язык (изложение) - зачет/незачет. Специальность "Информатика и английский язык": прием - 20 чел. Экзамены: английский язык (устно), математика (письм.), русский язык (изложение) - зачет/незачет. Примечание: абитуриент имеет право сдавать вступительные испытания по информатике устно в качестве альтернативного по математике. Филологический факультет Специальность "Филология": прием на дневное отделение - 45 чел., на заочное - 40 чел. Экзамены русский язык (сочинение) - оценка за содержание и грамотность, русский язык (устно), литература (устно). Специальность "Удмуртская филология": прием - 25 чел. Экзамены: русский язык и литература (устно), удмуртский язык (устно), русский язык (изложение). Факультет иностранных языков Специальность "Английский язык": прием - 20 чел. Экзамены: английский язык (письм.), английский язык (устно), русский язык (изложение). Специальность "Немецкий язык": прием - 20 чел. Экзамены немецкий язык (письм), немецкий язык (устно), русский язык (изложение) Исторический факультет Специальность "История": прием на дневное отделение - 50 чел, на заочное - 45 чел Экзамены история России (устно), русский язык (изложение) - зачет/незачет, история России (письм.) - оценка за содержание. Факультет дошкольного образования Специальность "Педагогика и методика дошкольного образования": прием на дневное отделение - 50 чел., на заочное - 40 чел. Экзамены русский язык (устно), литература (устно), русский язык (изложение). Педагогический факультет Специальность "Педагогика и методика начального образования": прием на дневное отделение - 55 чел., в том числе выпускники педучилищ - 20 чел., на заочное - 30 чел. Экзамены, русский язык (изложение), математика (письм.), русский язык (устно). Специальность "Педагогика и методика начального образования в национальной школе": прием - 20 чел. Экзамены: удмуртский язык (устно), русский язык (изложение), математика (письм.). Музыкально-педагогический факультет Специальность "Музыкальное образование": прием - 25 чел. Экзамены: специнструмент, сольфеджио, русский язык (изложение) - зачет/незачет. Порядок зачисления в институт Зачисление проводится по высшему конкурсному баллу, который определяется по результатам экзаменов на каждом факультете. Вне конкурса при получении положительных оценок на вступительных экзаменах зачисляются: - дети-сироты, оставшиеся без попечения родителей; - инвалиды 1, 2 группы, которым согласно заключению ВТЭК не противопоказано обучение в педагогическом вузе; - граждане других категорий, предусмотренных законодательством; - лица, получившие направления от МНО УР в порядке внеконкурсного набора в соответствии с количеством выделенных для этой цели мест (примечание: при количестве направлений МНО УР, превышающем план, среди этих лиц проводится конкурс). Если в результате вступительных экзаменов остается вакантная часть мест, вы- деленных для целевого набора, то она передается на общий конкурс. На оставшиеся места зачисляются лица с учетом количества полученных баллов. При равенстве конкурсных баллов преимущественное право на зачисление имеют в соответствии с приведенным ниже порядком: 1) военнослужащие, уволенные в запас в течение 3 последних лет; 2) лица, получившие на экзаменах или имеющие в аттестате об образовании более высокий балл по профилирующей дисциплине; 3) имеющие стаж работы по родственной специальности не менее одного года; 4) проявившие способности и склонности к избранной специальности (по результатам профессионального тестирования), а также имеющие направления гороно, роно, педсовета, школы, предприятия; 5) выпускники педучилищ; 6) лица, проживающие в сельской местности; 7) лица, проживающие на территории Удмуртии. Наш адрес: 427600 г. Глазов ул. Первомайская-25. Телефоны 7-15-14, 7-15-78. Факультет иностранных языков Декан - Лапшина Антонина Михайловна. Один из молодых факультетов. Существует с 1995 года. Самые первые выпускники этого факультета нынче получат дипломы учителей немецкого, английского а также французского языка. Институт наладил тесные связи с вузами Англии, Германии, США. В прошлом году 2 студента проходили стажировку за границей. В этом году на практику в США изъявили желание поехать 11 человек. Студенты первого выпуска радуют преподавателей своими глубокими знаниями и свободным владением иностранными языками. Валерия Викторовна Корнейчук - заведующая педагогической практикой студентов. Без нее не обходится ни один студент Глазовского педагогического института. Как устроить каждого студента на практику, если кругом безработица? Эту сложнейшую проблему ректорат институтм решает сообща. И все же распределением студентов на практику - в школы, в лагеря и в детские сады - занимается эта чуткая, внимательная и всегда понимающая студентов женщина. Она, как добрая фея, всех выслушает и постарается помочь. Если в школу идут настоящие оптимисты, искренне мечтающие помочь нашим детям, то с такими студентами интересно работать, считает Валерия Викторовна. Диана Габдуловна Касимова - молодой преподаватель отечественной истории, выпускник исторического факультета Глазовского института. Исторический факультет один из молодых факультетов. В ходе археологических экспедиций собран богатый материал по культуре северных удмуртов. Быт, одежда, утварь древних удмуртов теперь прдставлены в специальную созданной этнографической лаборатории. Писательёс ӧтчамлы дасясько Ӝоген, инвожолэн 25-тӥ нуналаз, Удмуртиысь писательёс люкаськозы дас витетӥ бадӟым ӧтчамазы. Съездлы дасяськон ӟырдыт кутскиз. Нырысь ик, куартолэзьлэн пумазгес огазеяськонлэн кивалтэтэз (правлениез) кенешыны ӧтиз критикъёсыз. Вераськемын та секцилэсь выль кужымен азьланьтыны, туала литературалэсь кудпала азинскемзэ мургес возьматыны но, газет-журналъёсын кусыпъёсыз юнматыны. Критикъёслэн секциенызы кивалтӥсе ӵектэмын филология удысысь тодосчи Виктор Чулков. Алигес кенешонын вераськизы Удмуртиысь Писательёслэн союззылэсь выль уставзэ кутон сярысь. Соин валче оскон кылдэ, общественной организациосын оградэ "усем" огазеяськонлэн данэз ӝутӥськоз шуыса. Озьыен, писательёс понна кысык вакыт кутскиз. Съездлы дасяськыса, котькудӥз малпаськоз, дыр, мар со выльзэ лэсьтӥз, гожтӥз вить ар куспын, кызьы юрттӥз огазеяськонзылэсь данзэ возьыны. Съезд дыръя кылзэмын луоз Писательёслэн огазеяськонзылэн кивалтӥсезлэн но ревизионной комиссилэн отчётсы. Кутозы выль Устав. Озьы ик быръемын луозы огазеяськонлэн выль правлениез но солы председатель. Т. Николаева. ЖУРНАЛИСТЪЁСЫН ПУМИСЬКОНЪЁС Дунтэк но, дунын но Валлян, 15-тӥ июне, Правительствоын журналистъёсын пумиськизы УР-ысь Правительстволэн Наукая, вылӥ но шор профессиослы дышетонъя комитетэзлэн тӧроез Сергей Решетников но кун вузъёслэн кивалтӥсьёссы - Виталий Журавлев (УдГУ), Иван Абрамов (Иж ГТУ), Николай Стрелков (ИГМА), Валентин Фокин (ИСХА), Геннадий Поздеев (Глазовысь кун пединститут). Соос люкаськемъёслы мадизы выль дышетскон арлы студентъёсты кутон, выль специалистъёс дася но азязы сылӥсь куд-ог мукет ужпумъёс сярысь. Туннэ капчи ӧвӧл вылӥ дышетскон удыслы. Ваньмыз сямен шуг-секытъёс герӟаськемын коньдон тырмымтэен. Та ёз федеральной бюджет чотын возиськыны кулэ ке но, Москваысь тырмыт уксё ноку уг вуы. Вузъёс кемалась сыӵе югдуре шедемын ни. Россиысь коньдон вуэ уждунлы но стипендилы гинэ. Соин ик та удыслэн тыронъёсыз пумен тросгес луо: кызьы ке бюджетэ пырисьтэм фондъёслы, озьы ик - коммунальной услугаос сётӥсьёслы но, энергетикъёслы. Югдурез кӧня ке умоятон вылысь, вузъёс коньдон поттон ласянь асьсэос пӧртэм амалъёс утчало. Кылсярысь, Удмурт кун университет огкылъя специалистъёс дася МВД- лы, прокуратуралы, юстицияя удыслы, Ижысь калыкез дышетонъя управленилы но мукетъёсызлы. Со сяна, вузъёс студентъёсты дун тырытыса дышето. Коньдон басьто на абитуриентъёслы юрттэмзы, документъёс сётэмзы понна. Со дунъёс котькудаз вузын пӧртэмесь. Ӧжытэз туннэ нуналлы - гурт хозяйствоя академиын (60 манет). Глазовысь пединститутын (100 манет). Медакадемиын абитуриентлэсь 130 манет басьто, технической университетын - 175-ысен 300-озь, нош УдГУ-ын - 240 манет. Мар бен вылез луоз туэ студентъёсты кутонын? Азьло аръёсын ӵошатыса (соку кудзэ- огзэ кыкетӥ курсэ но пыртыны лэзиське вал), туэ ваньмыз абитуриентъёс 1-тӥ курсэ гинэ пырозы. Сыӵе огкадь условиос тупатэмын. Нош дунын дышетскисьёслы котькуд вузын пӧртэм тырон пуктэмын. Шорлыдын со 6-7 сюрс манет усе, нош куд-огаз со лыдпус одӥг но ӝыны пол тросгес луэ. Тани Глазовысь пединститутын вуоно музыкантъёс араз 8,5 сюрс манет уксё сёто. Таин ӵош ик вузъёсмы огинтыязы уг сыло, арысь аре паськытало. Ижысь технической университет туэ кык выль ёз усьтэ: лэсьтӥськон экономикая но ӟечлыкен кивалтонъя. Вузэ пырыны гуртысь выпускникъёслы но огкадь условиос кылдытэмын. Туэ нырысьсэ куатяз районъёсын подготовительной курсъёс ужазы. Университетысь дышетӥсьёс экзамен кутыны потазы Ува, Як.-Бодья, Можга но музон ёросъёсы. 30 базовой школаосын дышетскисьёс экзамен сётӥзы ни, ваньмыз 1000 мурт. Нош вуоно студентъёсты котыр ласянь эскеронъя (тестирование) центр пыр 600 адями ортчиз но кӧняез ке соос пӧлысь экзаментэк вузэ кутэмын луозы. Студентъёсты кутонын вылез вань Ижысь гурт хозяйствоя академиын. Татын абитуриентъёс ваньзэ экзаменъёсты туэ гожтыса гинэ сётозы но таӵе дунъет-оценка басьтозы: 2; 3; 3,5; 4; 4,5 но 5. Шаерысьтымы 5 техникумъёсын 15 майысен академия экзаменъёс ортчытӥз ни. Нош медакадемиын шор школаын пуктэм оценка туэ лыдэ уз басьтӥськы ни. Вуз 350 студентъёсты кутоз. Со пӧлысь 151-езлы целевой (дунтэк) инты висъямын. Нырысьсэ сыӵе интыос туэ сётэмын Башкортостанын улӥсь удмуртъёслы. Соя нимысьтыз огкыл кутэмын. Азьло сямен ик академиын тодон-валанъёс басьтозы музон странаосысь пиос но нылъёс. Асьме дорын со дышетон, мукет интыосын (Москва, Санкт- Петербург) ӵошатыса, дуно ке но усе, адямиос дорамы лыкто. Малы ке шуоно, татын муресь тодон-валанъёс сётӥсько. Одӥг ар дышетскем понна 1500 доллар тыроно, музон интыосын 500-600 доллар басьто. Ялан азинске Удмурт кун университет. Туэ ватсаса 7 выль специальностья дасяны ӧдъялозы. Отчы пыро переводчикъёс, логопедъёс, валеологъёс, экологъёс, кышкытлыклэсь утиськонъя социальной педагогикая но печатлан ужъя специалистъёс. Огъя вераса, УдГУ 62 пумо специалистъёсты дышетэ. Кӧня бен студентъёсты кутозы туэ асьме вузъёс? Медакадемия сярысь верам ни. Самой трос кутэ Иж ГТУ - 1350, УдГУ - 1260, ИСХА - 650, Глазовысь пединститут - 450. Ваньмыз соос нуназе дышетскозы. Йылпумъяса пусъем потэ. Республикамы Урал улосвылын вылӥ специальностъёсты дасянъя нырысетӥ инты басьтэ, 10 сюрс муртлы 212 студент усе. Вузъёслы секыт ке но йӧтэ, соос кулэяськемзы пӧлысь ӝынызэ коньдонэз асьсэос поттыны дышизы ни. Ваньмыз со мынэ вузэз азинтонэ. Уждунлы, стипендилы одӥг манет но уг кутӥськы. Г. РОМАНОВ. Газлы дунъёс будозы Республикаямы кизертэм газлы дунъёс тупатонъя нимысьтыз комиссия туэ 1-тӥ июньысен газлы дунъёсты будэтон сярысь ужпум кутӥз. Удмурт Правительстволэн 1995-тӥ арын 27-тӥ ноябре "Кизертэм газлы дун сярысь" 353 номеро кутэм постановлениезъя 1 кило газлэн дуныз 1 манет 35 копейкаысен 2 манет 35 копейкаозь возиськоз. Соин ик кизер газлэн дуныз сокем шӧдскымон ӧз буды. Комиссия гумыостӥ мынӥсь газлы выль дун тупатӥз 1-тӥ июньысен. Калыклы газ сётӥсь организациос сое 1 кубометрзэ 22 копейкаысен 29 копейкаен вузалозы. Улон интыосын одӥг муртлы газлэн дуныз усёз 2 манет 32 копейка. Азьвыл сое вузало вал 1 манет 76 копейкаен. Инкуазь газэн шунтӥськись 50 квадрат метр улон корка понна тыроно луоз 130 манет 50 копейка. Пӧртэм асваньбурен улон коркан улӥсь калыклы улон инты но коммунальной юрттэтъёс понна ыштонэз берыктон (субсидиос) тырон азьвыл сямен ик мыноз. Удмурт Республикаысь Тарифъёсъя но дунъёсъя кун комитет. Ӟечкыласьком! Толон, 16-тӥ июне, 70 арес тырмиз Грах ёросысь Вуж Ятчи гуртын улӥсь анаймылы Дмитриева Анна Сергеевналы. Ми, солэн нылпиосыз но матысь адямиосыз, вань сюлмысьтымы ӟечкыласьком мусо аныкаймес вордӥськем нуналэныз! Мылкыд кариськом та дунне вылын туж кема улыны. Вордскем нуналэныд, аныкаймы! Туж гажаса но яратыса - Лёня пиед, Люся кенэд но вань матысь адямиосыд. Ӟечкылан Та шулдыр инвожо толэзе 62 арес тырме Усо гуртын улӥсьлы Попов Василий Николаевичлы. Бадӟым праздникеныз ӟечкылало, юн тазалык но шудбур сӥзё кузпалыд, нылпиосыд, эмеспиосыд но соослэн нылпиоссы. Трос интые вуылӥз. Мед луоз пайдаез Кылем арня вискын Удмурт Республикаысь Кун Кенешлэн Тӧроез Александр Волков пыриськиз Федерацияя Кенешлэн Нижний Новгородын ортчем пумиськоназ. Газет со сярысь ивортылӥз ни. Кенешлэн заседаниез ортчем бере ӵуказеяз Александр Волков но Удмурт Правительстволэн Тӧроез Николай Ганза Москваын пумиськылӥзы Россия Федерациысь югдурез утёнъя министрлэн воштӥсеныз, Москвалэн мэреныз Юрий Лужковен. Вераськон мынӥз Москва но Удмуртия куспын гожтэм огкылэз быдэсъян сярысь. Со нуналэ ик Кун Кенешлэн Тӧроез пумиськиз Россия Федерациысь Центральной Банклэн тӧроезлэн воштӥсеныз. Та нуналлэн кыкетӥ ӝыныяз Кун Кенешлэн но Правительстволэн Тӧрооссы пыриськизы Германилэн посольствояз Удмурт Республикалэсь предприятиоссэ возьматонэ. Александр Волков пусйиз Удмуртиысь но Германиысь огазеяськонъёслэсь валче ужамзылэсь но вузкаремзылэсь ӟеч емышсэс: кылем арын гинэ 26 миллион доллар тыр вузкариллям. Республикаын усьтэмын кӧня ке ӵош ужась предприятиос. Республикалэн кивалтӥсьёсыз вераськизы Ижевскысь автозаводын "Фольксваген" концернэн ӵош выль машина поттон сярысь. Посол "Фольксвагенысь" кивалтӥсьёсын пумиськыны но таӵе малпанъёсты улонэ пыӵатыны юрттыны дась луэмзэ вераз. Удмурт Республикаысь Кун Кенешлэн пресс-службаез. Ӟеч выжы пудо луоз Завьял ёросысь "Россия" эштослэн шор фермаяз ӟеч пудо выжы уськытонъя операторъёслэн конкурссы ортчиз. Районысь куамын кык мурт Россиын ортчылӥсь ӵошатсконъёслэн куронъёссыя нюръяськиз. Ӟеч тодоно вал теориез, возьматоно луиз тыршыны быгатэмез, документъёсын валаса ужамез. Конкурсын туэ нырысьсэ вормисе потӥз Азин нимо эштослэн Казмаска фермаысьтыз Любовь Кузнецова. Со 100 луоноез пӧлысь 92 балл люказ. Таӵе конкурсын кылем арын вормиз вал "Подшивалово" эштосысь Татьяна Тетерина. Таяз учыре со кыкетӥ интые кылиз. "Правда" эштосысь Светлана Степанова куинетӥ интые потӥз. Вормисьёс но, мукетъёсыз конкурсэ ветлэмъёс но пусъемын коньдон премиосын. Таяз сӥзьыл "Россия эштосын ортчоз республикамылэн конкурсэз. Н. Иванов. Кун Кенешын Аракыез оскалтом куарусёнэ Ортчиз Кун Кенешлэн Президиумезлэн заседаниез. Со выльысь учкиз на вуоно сессиын эскероно ужпумъёсты. Азьвыл чакламтэ сессия ужаны кутскоз 22 июне. Депутатъёс юнматыны кулэ парламентлэсь 1999 арын законъёс бордын ужан радзэ. Ӵектэмын выльысь берытскыны Кун Кенешысь азьвыл депутатъёсын куд-ог кутэм законъёссы борды, кылсярысь, калыкез уже интыян сярысь но приватизация сярысь законъёс борды. Президиум умоен лыдъяз Удмуртиысь Правительстволэсь тылобурдо вордон фабрикаослы 25 миллион манет тыр кредит висъян сярысь постановленизэ. Коньдон вуыны кулэ Россилэн Центральной банкысьтыз. Кылзэмын Балезиноысь спирт поттон завдэз лэсьтон сярысь ужпум. Та предприятилэн огъя лэсьтон дуныз - 140 миллион манет. Уже кутэмын ни 100 миллион манетэз. Кун Кенешлэн Президиумез та заводлы коньдон висъян сярысь решение кутӥз. Ивортэмын вал, туэ августлэн пумаз спиртзавод ужаны кутскоз ни шуыса. Сентябре со поттоз нырысетӥ продукцизэ. Озьыен, 200 адями аслыз ужан инты шедьтоз, нош республикалэн бюджетаз арлы быдэ ватсаса 70 миллион манет коньдон вуоз. Озьы малпамын. Нош кызьы со быдэсмоз - улон возьматоз ини. Президиуме быръемъёс эскеризы на кадръёс сярысь ужпумез. Кун Кенешлэн Аппаратэныз кивалтӥсезлы нырысетӥ воштӥсе юнматэмын Александр Ушаков, Кун Кенешлэн информационно-аналитической управлениезлы кивалтӥсе - Сергей Роев. Президиум озьы ик соглаш кариськиз Кун Кенешлэн Тӧроезлы А. Волковлы куинь арнялы отпуск сётон сярысь ӵектонэн. Т. Миронова. ӦТЧАМ АЗЬЫН Асьме бордысь потэ Югдур ас кожаз уг кылды. Котьку сямен сое адямиос асьсэос кылдыто. Тазьы малпаса, куд-ог мылкыдъёсме газет пыр возьматоно кожай - уго соос йырысь ноку но уг потыло, весь но весь шугъяськыто. Малпанъёс сурасько, куддыр ог-огенызы но уг герӟасько. Озьы ке но, лыдӟе, тодматске. Удмуртъёс гинэ ӧвӧл, котькудӥз калык аслэсьтыз улон-вылонзэ мылкыд каремезъя ачиз радъяны кулэ, соиз кемалась тодмо. 11 ар талэсь азьло зор ултӥ но, сулеп усьыку но коркась корка, организациысь организацие ветлыса, пӧсь сюлэмо удмурт адямиосты утчаса, ми, кӧня ке эшъёс, удмуртъёс, огазеяськыны ӧтьылӥмы. Туннэ "Удмурт кенешлэн" исполкомаз быръемъёс пӧлысь куд-огез соку та ужмес кулэен но ӧз лыдъяллялэ, вал сое шудонэн лыдъясьёсыз но. Я, таиз ини история. Табере асьмеос шӧдскымон будӥмы. Удмуртъёслэн республикаен кивалтонэ ляб пыриськемзы сярысь трос верамын ни. Нош мугъёсыз сярысь верасьёс ӧжыт, бервылъёсынызы нюръяськыны тыршо уго, тӧл вукоосын сямен. Нош висёнэз палэнтон понна, нырысь ик мугъёссэ шараяно. Удмурт адямиосмы таяз учыре Кун Кенеше азьлолэсь но ӧжыт шедизы. Малы со озьы? Тросэз кенешчиос али шовинист мылкыдо адямиосты янгышен лыдъяло. Но ойдолэ сакгес ас шорамы учкоме. Уго ваньмыз ке но уг, тросэз асьме бордысь потэ. Политика кулэ каре юн сямо луэмез. Асьмелэн озьы уг пӧрмы на. Ӧвӧл вунэтоно созэ но: кема зӥбыса возем удмурт калыклэн психологиез раблэн выллем на, кужмогес калыкез азьпалтыны уг дӥсьты. Ултӥяса возем калыклэн ассэ дунъян мылкыдыз но синмаськымон ӧвӧл. Сое люканы, огазеяны секыт. Огазеяськод ке но, азьмынӥсен ӵошен ужан интые, соос тынэсьтыд ик юрттэт витьыса уло, солэсь но ортчыт - чыры-пыры мугъёсъя копаськыны ӧдъяло. Ляб ужаммы потэ решениосмес быдэсъямтэмы бордысь но. Ӧтчамъёс ортчо. Планъёс кутӥсько, делегатъёс доразы кошко. Нош кызьы быдэсъяськом решениосмес? Удмурт культура огазеяськонлэн но "Удмурт Кенешлэн" куремзыя, 1994-тӥ арын элькунысьтымы Министръёслэн Советсы удмурт кылэз но огазьын улӥсь калыкъёслэсь кылъёссэс азинтонъя кун программа кутӥз. отын таӵе ужпум но чакламын: "... государственной но общественной учреждениосын, предприятиосын, правоохранительной органъёсын, тазалыкез утён, вузкарон, калыклы юрттэт сётон, калыкез дышетон, культура, связь, транспорт, коммунальной хозяйство удысъёсын пусъёно сыӵе должностьёсты, кытын кун кылъёсты тодон, солэсь профессизэ сяна, возьматэ на квалификацизэ но. Программа улонэ, каллен ке но, пыӵа ик. Нош берпуметӥез веранмы озьы ик бумага вылэ кылиз. Малы со озьы луиз, кин со понна кыл кутоз? Кивалтэтын асьме адямиос вал ук. Табере... Табере югдур воштӥськиз. Ӧтчаммы пусйиз вал, республикаямы национальной кадръёсты будэтонъя кун программа дасяно шуыса. Со но дасямтэ. Сое яке экерыса возьыны, яке дасяны кулэ вал асьмеос, кенешчиос. Нош туннэ со понна ӟуч кивалтӥсьёсты янгыш кариськом. Ӧвӧл со озьы, чебер но со уг адӟиськы. ВИ ӧтчаммылэн резолюцияз шуэмын: "... удмурт калыклэсь Конституциен юнматэм правооссэ быдэсъян амалъёс шедьтоно". Ӧм на утчалэ шуи ке, умойтэм, дыр, луоз, но тодӥсько: пумозяз ӧм вуттэ. Тросэз национальной политика Россиен кивалтонысь потэ. Азьло аръёсы Нациослэн Кенешсы (Совет Национальностей) но вал, нош туэ дыре солы воштэт ӧм но утчалэ, ӧм на ӵектэ на. Кытын Россиен кивалтонын чувашъёс, удмуртъёс, ханты-мансиос? Асьмеос сое россиысь финно-угор калыкъёслэн огазеяськонзы пыр, "Идель-Урал" огазеяськон пыр тупатыны кулэ. Ӵапак соос пыр тыршоно вылэм Госдумае но депутатъёсмес но поттыны, пӧртэм нациосын (калыкъёсын) ӵош Россиысь Кивалтэтлэн структураосаз пыриськыны. Дыр вуиз ни вань удмурт калыклэн ӧтчамезлэсь статуссэ но, огшоры общественной организациосын ӵошатыса, вылэгес ӝутыны. Та чуръёслэн авторзы но А. А. Разин 1997- тӥ арын Вань удмуртъёслэн ӧтчамзы сярысь Законлы инъет дасязы. Отын удмурт калык ас улон интыяз выжы калыкен ялэмын, ӧтчам выжы калыклэн аскивалтонэзлэн вылӥ органэныз, нош солэсь Удмурт исполкомзэ кун бюджетысь коньдон басьтыса ужатыны чакламын. Та законлэн инъетэз кызьы шуо, "кот" на, но со бордын ужано. Кун Кенеш проектэз пумозяз вуттысал ке, югдур мукет луысал. Одӥгез кужмо ошмесмы татысь потыны кулэ. Али "Удмурт кенешез" пыкылӥсьёс трос: куд-ог ёросъёсын, пе, со удмурт луисьтэм яке финн-угор луисьтэм калыкысь потэм муртъёслы дурбасьтӥз. Мон сыӵе ужысь умойтэмзэ уг адӟиськы. Быръёнъёсы асьмеос национальной программаен гинэ ӧм мынэ, озьы лэсьтыны уг но яра. Власте мыно политика но экономика шоры огкадь учкисьёсын яке матысь программаен огазеяськонъёсын ӵош. Бен, вал списокын куд-ог валантэм муртъёс. Кулэ вал, вылды, сакгес кариськыны. Асьме движенимылы, мон сямен, уг тупало нациослэсь государственностьсэс быдтыны тыршисьёс, вань калыкъёсты губерниосы люкасьёс, ӧжыт лыдъем калыкъёсты ултӥясьёс, ӟуч эксеез ӝутӥсьёс гинэ. Озьы ик ӧвӧл кулэ асьмелы Россиез вузасьёс, музъеммес тус-тас карисьёс, калыкъёсмылэсь, огшоры адямиослэсь коньдонзэс, ваньбурзэс пӧяса кыскись чубайсъёс. Лыдӟисьёс малпало ни, дыр: та адямилэн визь гинэ тыремез потэ. Ӧвӧл, эшъёс. Кӧня ке верало на калыкен ужанэз кужмоятон сярысь. Тодӥсько: асьме огазеяськонъёслэн инъетъёссы лябесь. Ӧжыт пельтӥз но, пограмы. "Кенешлэн" тужгес зол структураез - Брангуртысь кенеш. Но со гинэ но удмурт кандидатэз депутатэ поттыны ӧз быгаты. Ма сярысь со вера? Ёросъёсын, тужгес но городъёсын, асьме эшъёс 20-30 кузя люкасько но тӥни. Ӧжыт, туж ӧжыт со. Микрорайонъёсын, урамъёсын шыпыт, отысь адямиосын ужась ӧвӧл. Одӥг Устинов ёросын гинэ 29000 удмурт улэ, нош Ижын - 100000 адями! Али быръёнъёс дыръя, 13 адямиез люкаса, Союзной ульчаысь округъя "Метеор" заводлэсь директорзэ А. С. Батановез депутатэ поттыны тыршим. Одӥг ульчая коркаосысь гинэ 1100 удмуртъёсты шедьтӥм. Устинов ёросын концерт возьматыкумы, соос пӧлысь 260- эз пумиськонэ лыктӥзы. Табере соосын адӟиськиськод ке, ку нош ик люкаськомы шуыса юало. Соос пӧлысь 4-5-ез активист луыны дась. Бен, со трос ке но ӧвӧл, одӥг ульчалы инъет луысал. Нош кӧня урамъёс асьмелэн? Элькунамы 42 процентэз удмуртъёс городъёсын но городлы укшась посёлокъёсын уло. Со - огазеямтэ кужым. Тросэз эшъёс удмурт культуралэсь палэнын сыло, куддыр соослэн огазе кариськыны мылкыдзы луылэ ке но. ... Нош А. С. Батанов кыкетӥ интые потэм кандидат куинь пол трос куара люказ. Удмуртъёслэн ужамзы шӧдӥськытэк ӧз кыльы. Ваньмыныз верамъёсыным соглаш уд луэ. Озьы ке но, нокинэн даллашеме уг поты. Быгатэмея котькудӥныз ӵош ужаме потэ. Василий Осипов. Удмурт Республикаысь Правительствоын Коньдон ӧжыт вуэ Республикаысь Коньдон ужпумъёсъя министерствоын кенеш ортчиз. Отын эскеремын бюджет чотын улӥсьёслы уждун тыронэн герӟаськем но тарифъёсъя ставкаос будэмен валче ватсаса коньдон шедьтон ужпумъёс. Жаляса вераны кулэ, интыосын югдур секыт. Тодады вайытӥськом: Правительство но интыосысь администрациос куспын огкылъёс гожтэмын вал, кудӥзъя ёросъёсын но городъёсын люкам коньдон пӧлысь ӧжытсэ 40 процентсэ висъяны кулэ вал уждун тырыны. Республика сётэм кылзэ быдэсъя, 7-тӥ июньлы дотация басьтӥсь улосъёсы 131 миллион 683 сюрс манет коньдон вуиз, 6 толэзьлы со чакламын вал 130 миллион 230 сюрс манет. Но со дыре ик интыосын уждун тырыны коньдон уг шедьы. Югдур тужгес но секыт Вавож, Сюмси, Киясово, Кизнер, Яр ёросъёсын но Ижевскын, отын уждун тыронъя ӝыны арлы план 50 процентлы но быдэстэмын ӧвӧл. Соин ик республикамы Россия Федерациысь Правительствоен гожтэм огкылзэ быдэстыны уг быгаты. Озьы центрысь коньдон басьтон но ӝега. Бюджетэ коньдон уг вуы ог-огеныд взаимозачёт амалэн уксётэк ужан бордысь но. Соин ик выль тариф сеткая уждун тырыны но уг луы. Но со дыре ик куд-ог ёросъёс но городъёс уждун тырон бордын ӟеч ужало. Озьы вераны луоз Кез, Красногорье, Шаркан, Воткинск, Якшур-Бодья, Каракулино, Игра, Завьялово, Ува районъёс, Воткинск но Можга городъёс сярысь. Удмурт Республикаысь Правительстволэн секретариатэзлэн пресс-службаез. 01 ИВОРТЭ Юатэк кузёяське Нуналлы быдэ шаерамы "горд атас" кузёяське. Тылпу кысӥсьёс туэ ар понна гинэ 1079 пол гомась тылэн нюръяськизы. Тӧлъя-буръя кошкиз 9,9 миллион манет. Тылӝуын бырыны шедиз 61 адями, со пӧлысь ньылез нылпиос, нош 68-эз сӧсыр луизы. Тылпу кысӥсьёслэн туэ арзы секытэн кутскиз. Тылӝу кенжылӥз бадӟымесь юртъёсын. Тросэзлы вунонтэм кылиз, дыр, Удмурт кун университетысь ньылетӥ корпуслэн ӝуамез. Со бӧрсьы гомӟиз Ижевскысь гурт хозяйствоя академилэн корпусэз. Калык ваньбур син куспын пеньлы пӧрме. Трос адямиос люкаськон интыосын ик (дышетскон заведениосын, больницаосын) ӵемысь "горд атас" но кузёяське. Кемалась ик ӧвӧл тылпу кысоно луизы Сюмси ёросысь Пижил психоневрологической интернатын. Ӵапак соку отын эмъяське вылэм 36 адями. Нялтас верало на, интернатлэн азбараз пӧртэм пумо 21 юрт сылэм, со пӧлысь дасэз пулэсь лэсьтэмын, ньылез ӵыжак выль. Пусйыны кулэ на, Пижил интернатын котьку дась сылӥз тылпу кысон машиназы. Соин ик гомась тылэз асьсэ кужымен кысыны кутскизы, нош висисьёсты - мукет интые поттаны. Тӧлъя-буръя 10 сюрс манет шупчиз, нош тылпу кысӥсьёслэн ӝог ужамзы юрттӥз 360 сюрс манетэз утьыны. Та учыръя Сюмси РОВД-ын ужасьёс эскерон ортчыто на. Дэмен ужлэн ӟечлыкез но адске. Жаляса верано, тросаз дышетскон заведениосын яке больницаосын, коньдонлы ёрмыса улэменызы, тылпуэн нюръяськисьёсты кулэтэм адямиосын лыдъяло. Соосыз ик нырысь ужысь но кулэсто. Калыкын юнме уг шуо, дыр, дыртэмлэсь адӟон кылдэ. Озьы одӥг адямиез ужтэк кельтод, нош ачид пень вылэ кылёд. Манеттэ шыръялод, сюрссэ, миллионзэ тӧлъя-буръя келялод. Бен, таӵе югдур быдэс дуннеын. Озьы туэ 18-тӥ мартэ бер уин тылпу кенжиз Волгоград улосвылысь Устюжанск ёросысь Михайловск посёлокысь психоневрологической интернатын. Отысь ужасьёслэн дыго-мого луэменызы 104 сюрс манет ыштон адӟизы, 20 висись тылӝуын бырыны шедиз. Сюмси ёросысь тылпу но секыт адӟонэ вуттыны быгатысал. Соин ик предприятиослэн, организациослэн, учреждениослэн кивалтӥсьёссылы вазиськыса курысал нырысь ик тылпу кысӥсьёс сярысь сюлмаськыны, соослэсь ужан тӥрлыксэс утьыны. Ю. МИХАЙЛОВ. Вожась верос Пичи Аркилэн вожан сямыз вань. чебер, питырес ымныро Насьтокез шоры кескич учке но горд тушсэ сынакуз-маяллкуз малпа: "Аркиез уд пӧя. Шӧдӥсько, калгиськод тон". Куддыръя, шӧмаськемез дыръя, кышнозэ мыжыкен но "кунояны" уг возьдаськы. - Аркаш, нокыӵе мугтэк лыз=вож кариськод ук. Калык азьын возьыт, - викышъя Насьта. - Ничего, чида. Мугез луысал ке, интыяд ик ӵашйысал, - лекъяське Арки. Одӥг нуналлы буйгатске, собере сюлэмзэ нош ик пычей портыны кутске: "Калге, бес! Эскеры вылэм, н кызьы?.." Быдэс уй малпаськыса, ӟардон азьын "эврика!" кеськиз. Пилеш басьтыны кутскем йыркобыяз туж тунсыко малпан вордскиз уго. Вуж арлэн берпуметӥ нуналаз, шок-пуль шокаса, гуртаз вуиз. - насьтӥ! - кеськиз со. - Монэ предмы командировкае келя. Выль арез огнад пумитано луод. Калгид ке, мотри, лыдэ-сьӧмдэ огазе люкало. Песьтэраз тыриськиз но ватскыса эшез доры бызиз. Ӝытозь огзэ тӧдьы йырозэ зӥбиз. Собере Пичи Арки маскаръяськыын дасям дӥсьсэ дӥсяз, горд тушсэ эгырен-суэн сьӧдмаз. Нокинлы тодмантэм луиз - гусар но гусар. Насьтӥ укнояз учке но - дораз солдат-гусар пыре. Уд улля ке, пуксьыны ӧтиз. Нош гусар ӧз пуксьы - кизэ кутӥз, ӟыгыртыны турттэ. - Мынам Аркаше вань, эн мерскы! - кеськыса Насьтӥ кунолэн бамаз сачкытӥз. Чырты бертӥз кутыса, коркась улля. Эшшо ке ухват кутыса, тыбыр кузяз васькытӥз на... Со дырысен Пичи Аркилэн вожан сямыз тӧлӟиз. С. ШИРОБОКОВ. ТАЗАЛЫК Куалектыса уд бурмы Берло дыре адямиосты погыртыны кутскиз лек, жалясьтэм висён - пыктос (рак). Мугъёсыз пӧртэм луо. Но тросаз учыръёсы адями ачиз висёнэзлы эрик сётэ, тазалыксэ со уг чакла, соин ик чер выжыоссэ мур лэзе но... юрттыны бер луэ. Вылаз ик али ваньмыз дунын. Висись адями мар карыны пайме, висёнэныз ваче син кыле. Сыӵе муртъёслэн ӝожтӥськонъёссы вуо редакциямы. Ӝожтӥсько онкодиспансере бер келямысьтызы, отын кезьыт пумитамзылы, эмъямзы, эскеремзы понна дун куремзылы, больницаын телефон ӧвӧллы но мукет. Соосты (?) сэрттон-пертчон понна ми пумиськылӥм республикаысьтымы онкодиспансерысь валтӥсь врачлэн воштӥсеныз Г. И. Чирковаен. - Ӝожтӥськонъёсын вань зэмез но, зэмтэмез но. Висисьёсыз валаны луэ - соос, куректон пӧлазы выем муртъёс, кызьы но озьы вуо Ижевске. Бадӟым черодын сылоно луо, но врач доры сюрыса но опреацизэс берлолы выжтоно луэ анализъёссы вужмемен. Милям отын нокыӵе янгышмы ӧвӧл: ёросын вань анализъёс дунтэм лэсьтӥсько, соин ик ваньзэ люкамды бере, соку ик лыктэ диспансере. Адямилэн сюрес вылын кыстаськемез ке уг поты, ӵектӥськом милям диспансерамы выльысь анализъёс сётыны, но дунын, малы ке шуоно, дунтэк лэсьтыны луонлыкъёсмы ӧвӧл. Сыӵе ик югдур эмъюмъёсын. Лыдӟисьёс янгышало - ракен висисьёсты эмъяммы, операция лэсьтэммы понна ми дун ум басьтӥське, куриськом эмъюм гинэ. Валамон, со али туж дуно, но адямиос валаны кулэ, ми висисьёслэсь коньдонзэс шумпотыса ум басьтӥське. Дунтэк телефон пыр ёросъёсы висисьёс азьвыл но ӧз жингыръялэ, нош автоматмы вань - телефонной карточкая жингыръяны луонлык вань. Ӝожтӥсько, шуиськоды, врачъёслэн, медсестраослэн котькуд висисьлы нимысьтыз саклык висъямтэысьтызы, лулысь-сюлмысь пумитамтэысьтызы. Но учке ай асьтэос, кыӵе условиосын ми ужаськом? Регистратураын ужа 3 мурт (интымы ёркытысь сое паськытатыны нокызьы ум быгатӥське). Ӵукна 7 часысен кутскыса, кӧня сю адями ортче соос пыр. Валамон, котькудӥз аслэсьтыз лексэ нырысь ик регистратураын ужасьёс вылэ кисьтэ. Кин озьы чидалоз? Висисьёсты валаны луэ: висёнзылэсь кышкаменызы, керӟег, куатаськись луо, но соос но врачъёсты валаны кулэ ук: нунал ӵоже одӥг врач 30-40 висисез эскере! Вылаз ик, йӧскадь ужан интыез но ӧвӧл: люкыт кабинетын кык-куинь кузя пуко. Лабораториос быдэс городын кӧня ке час гинэ ужало, милям - лумбыт. - Сыӵе висисьёсты нимысьтыз буйгатӥсь-психолог кулэ? - Штатъя диспансерын психолог, зэмзэ но, ужаны кулэ. Но кытчы ми сое пуктом? Выль корпусмес 1997 арысен возьмаськом ни. Огзэ вераме потэ на: онкодиспансере сюрем мурт соку ик осконзэ ыштыны кулэ ӧвӧл. Ӵемысь диагноз уг зэма. Собере, операция лэсьтэм бере, тросэз кызь арлэсь кема уло ай. Лек висёнлэсь нокин но утьымтэ. Туннэ со погыртэ тодмодэ, ӵуказе - кин тодэ... Соин ик ойдолэ юрттом ог-огмылы. Ӟеч адямиос, учке котырады! Оло, ӵап тӥляд шуныт кылды яке пичи ке но коньдон юрттэтты юрттоз осконзэ ыштэм муртлы выльысь улӟыны. З. РЯБИНИНА. - Футбол Йырдэ ӝут, "Газовик!" Томскысь футболистъёслы 1:2 лыдын келямез бере, "Газовик" пумиськылӥз Махачкалаын но Астраханьын. Татын но ӧз удалты. Нырысяз 0:2 лыдын, мукетаз 1:2 лыдын келяз. Вуоно шудонъёссэ "Газовик" дораз ортчытоз - Орехово-Зуевоысь но Тулаысь спортсменъёсын. М. Кузьмин. ШӦКЫЧ "Мынам телевизоре" Берло дыре куд-ог адямиос дуно кортъёс чотын узырмыны дышизы. Вандыло электроезъёсты, качало трансформаторъёсты, уг кепырало шайвылысь памятникъёсты но лушканы. Сыӵе кортъёсты басьтонэз дугдытон сярысь правительство куд-ог документъёс но кутӥз ни. Но соос малы ке уг быдэсъясько. Дуно кортэз лушкан уката сяськаяське кадь. Тани туспуктэмъёс вылысь адӟиськоды М. Горький нимо ульчае пуктӥськись юртэз. 16 этажъем со. Но лушкаськисьёс отчы но сюрес мытӥллям. Самой вылӥ этажаз тубыса складысь 50 кило ыргон езэз маялтӥллям. Но кортсэс нуыны ӟигарзы тырмымтэ, шӧдске. Куакъёс пӧлы ватыса кельтӥллям. Прораблэн Сергей Злобинлэн верамезъя, ыргонэз лушканы медо вылэм нокытын ужасьтэм егит шӧртчиос. Лушкаськисьёслэн бервылтӥзы ветлӥз В. КВАКИН. МЫЛКЫДМЫ ДОР ПАЛАМЫ Нош писпуос адямиос кадь, Весь будо но, будо... Л. Кутянова. ... Вайёсын чагыр инэз полысало, Соосыз ӧте мукет шаер... Т. Чернова. Зэм, писпуос но адямиос кадь будо, сяськаясько но улонысь кошко, ас бӧрсязы пинал пушъетъёссэс кельтыса. Соос умойгес выжыясько ас вордӥськем палъёсазы, нош соин ӵош ик дышо мукет палъёслы но... Ачим мон улӥсько Сочи городын. 34 ар ужай школаын, пӧртэм должносте вал, нош котьку ик мыло-кыдо дышетӥ егит муртъёсты математикалы. Мыным шуд усиз Ижевске Вань удмуртъёслэн ВИ съездазы ветлыны. Трос тунсыко ужпумъёсты но учыръёсты тодӥ, соин ӵош паймымон адямиосын пумиськи. Соку мон тодматски Уфа университетысь доцентэн Кузяхметов Григорий Гильмияровичен. Со мыным вераз, кык племянникъёсыз Сочиын уло но ужало шуыса. Дорам бертыса, мон таосын тодматсконо кариськи. Соос вылӥллям Андрей но Сергей Кисмятовъёс. Вордӥськемын Башкортостанысь Кургак удмурт гуртын. Андрей Михайлович, дораз дышетскемез бере, Свердловскысь радиотехнической техникумез быдтӥз. Собере армие басьтӥзы но, шедиз Тбилиси городэ, собере Сухумие, отын республиканской военкоматын связист луыса ужаз. Андрей Михайловичлы туж кельшиз Кавказ гурезьёс сьӧрын улон, яркыт шунды, быдэс ар ӵоже зарезьын пыласькон - ваньмыз солэн сюлэмызъя вал. 1992 арын Сочие выже но милицилэн Дагомысысь отделенияз ужаны интыяське, котьку но котькуд адямилы дась юрттэт сётыны, соин ик сое эшъёсыз но, кивалтӥсьёс но туж гажало. Ужан интыезлы матэгес Уч-Дере посёлоке аслыз юрт пуктэ. Солы туж юрттӥз атаез Михаил Гильмиярович, географилы дышетӥсь, Россиысь дано дышетӥсь. Ас вакытаз со дышетскиз Удмурт пединститутын. Со сяна, та адями туж быгатыса вордэ ас дораз муш семьяоссэ, зэмзэ ик гуртоосыз сое лыдъяло муш атаен. Михаил Гильмиярович ужез яратон мылкыд пыӵатӥз ас нылпиосызлы. Солэн вить пиосыз, ваньзы ик тыршисесь, шоретӥез дышетске Ижевскысь технической университетын, со бӧрсьы кыкез школаын тодонлык басьто али. Андрей Михайлович кышно басьтӥз асьсэ палась удмурт нылэз Альбинаез, со йылпумъяз Сарапулысь медицинской училищеез. Гуртын ӵош дышетскизы, кырӟан-эктон ансамбле пыриськизы. Али соос лымшор шунды улын будэто ини куинь нылзэс, куспазы удмурт сямен лабырто. Нош Сергей Михайлович 1972 арын вордскемын, Сарапулысь радиотехникумез йылпумъямез бере армие ветлӥз. Собере сое агаез дораз Сочие ӧте. Али Сергей Кисматов Уч-Дере посёлокысь войсковой частьын прапорщик луэ. Озьы ик пуктӥз аслыз умой юрт. Таизлэн но кышноез удмурт, вить аресъем нылзэс будэто. Та агай-вынъёс туж тупаса уло, ог-огзылы котьку юртто. Озьы уго, мукет калык пӧлын ӵош улыны капчигес, котьку но удмурт сюлэм удмуртэз борды кыске. Соин ик мон но соос доры ветлӥсько, тодэ ваиськом вордӥськем палъёсмес, гажано шуръёсмес, кырӟаськомы яратоно удмурт кырӟанъёсмес. Озьы дор паламы вуиськом кадь. Вало шур сярысь уката но трос кылпум поттылэ Анна Афанасьевна Ордынская, Вало дорысь Тылойыл (Малая Валожикья) гуртын вордӥськем но будэм мурт. Сочиын со 40 арлэсь кема улэ ини, картэз, тодмо нылпи писатель В. С. Клепов, ог 15 ар талэсь азьло кулӥз ни. Анна Афанасьевна чылкак огназ кылиз, нылпиоссы ӧй вал, ӵыжы-выжыосыз уло Можга городын, Сочиын племянникезлэн нылыз улэ, но сое чаклась ӧвӧл. Кылем арын Анна Афанасьевна больницае шедиз но весь отын ик кылле... Мон гинэ тыршисько дораз ветлыны. Соку со мылкыдыныз нош ик дор палаз вуылэм кадь потэ. Ми ӵошен удмурт кылынымы вераськиськом, тодмоосмес лыдъяськом, Вало шур дуръёстӥ калгеммес, сяська керттэт бичаммес тодэ ваиськом. Ваньмыз со нош ик Анна Афанасьевналэсь мылкыдзэ умоятэ - соку ик валаны кутскиськод, макем бадӟым кужымез вордӥськем кылыдлэн, удмурт кырӟанлэн. Асьме палась маке гинэ ӟечсэ верасько, соку ик висись эше бурдъяське... Тодэ лыкто К. Гердлэн кылъёсыз: "Котькыӵе кыл ас интыяз чебер, жингрес,дырыз дыръя котькыӵе кыл луэ узыр но сэзь, жингрес..." Анна Афанасьевналэн уката ик сюлмаз пыриз но мылкыдъяз луиз Вань удмуртъёслэн ВИ ӧтчамазы ветлэме сярысь мадеме. Со но, ачим но туж тау кариськом "Удмурт кенеш" огазеяськонын ужасьёслы монэ съездэ ӧтемзы понна. Мон озьы ик малпасько али Краснодарской крайысь Усть-Лабинской районэ ветлыны, отын одӥгаз станицаын данак гинэ удмуртъёс уло шуыса тодӥ. Сочиын но со котырын улӥсь вань удмурт тодмоосылэн нимынызы сӥзисько выль ӧтчамлы ӟырдыт мылкыдын ортчыны, пусъем ужрадъёсыз азинлыко быдэсъяны. Мария Ермакова, Вань удмуртъёслэн ВИ ӧтчамзылэн делегатэз. Бадӟым кенеш - юнман понна Кенеш. Ӧтчам. Быдэс калыклэн бадӟым кенешез. Вань удмуртъёслэн ӧтчамзы. Сизьыметӥ ӧтчамзы. Азьло чакламтэ ӧтчамзы... Со ортчоз ӵуказе. Ижын. Удмурт нимез нуллӥсь республикалэн шоркараз. Малы кулэ луиз таӵе ужрад? Оскиськом, тросэз валазы ни шуыса. Уго адями но шугъяськыны кутске ке, со пумысен кинэн ке кенешыны турттэ. Озьы ик калык но. Солы но, одӥг-ог ке но, бадӟым кенешонъёс кулэ луыло. Ма кароно, улонмес умоятон понна? Кинэн ваче ки кутсконо, азьлане йыгмытгес вамыштон понна? Кыӵе амал шедьтоно, ог-огенымы тупаса улон понна? Дауръёсын висьытӥсь та ужпумъёс котыртӥ ӧръяськоз, вылды, ӵуказе вераськон. Пӧртэм интыосысь вуэм блякъёсмы кенеше вуттозы асьсэлэсь, иськавынъёссылэсь, ӵыжы-выжыоссылэсь сюлэмвисёнъёссэс. Огазе люкаськыса тыршозы азьпала нуись сюрес ӵогыны. Медам луэ вал ву коже дыртыса тэтчисьёс, медам луэ вал изьыса кылемъёс. Вакыт косэ ваньместы ик чупресгес кариськыны, кескичгес луыны, малпаськысагес ужаны. Огез визьмо удмурт воргорон Бадӟым кенеш азьын тазьы шуиз: "Та съездлэн асьме улонын интыез туж шӧдскымон луыны быгатоз - яке асьме дорысь адямиос палэнскозы, яке дорамы трос выльёсыз лыктозы. Ойдолэ ваньзэ лэсьтом, огазеяськонмес кужмоятон понна!" Озьы мед пӧрмоз. Ужды, гажано делегатъёс но ӧтем куноос, берекето медло! Удмурт калык тӥ шоры оскыса учке. Шӧкыч Шаерысьтымы госсанэпиднадзорлэн вирусъёсъя лабораторияз ужасьёслэн ивортэмзыя, лемтэй куртчемъёслэн лыдзы ялан будэ. Уноез нюлэс кибыос энцефалит висён "кузьмазы" ни. Лемтэйёс трос пумиськыло Ижевск котырын но. Соос шараямын Киров нимо паркын гинэ но. Одӥг иськем сюрес вылын сюриз 56 лемтэй, котькудӥз тямысэтӥез черо. Суред - Ну, Пети, марымед лупаен бадӟым адӟиське ук!.. - Тон, Матрон, марымез эн учкы, тон лемтэйзэ утча! Суредэз Л. Прозоровлэн. Шунды сиослы оскон вань на "Кыӵе инты басьтэ удмурт интеллигенция ас калыкезлэсь сюрессэ азинтонын". Та ужпумез 10-тӥ инвожое эскеризы Завьял ёрос конференцие люкаськемъёс. Ӧтчамлы кутскон ӧр сётыса, нырысь ик малпанъёссэ вераз "Удмурт кенеш" ассоциацилэн вице-президентэз Нина Игнатьевна Малых. Со трос инты висъяз удмурт кадръёсты дасянлы. Тани лыдпусъёсыз ке басьтоно, удмуртъёс пӧлын 3,5 процентэз гинэ вылӥ образованиен луо (ӟучъёс - 5,5-ез, бигеръёс - 7,5-ез). Тужгес но ӧжыт удмурт пиналъёс - 6,1 процент - дышетско технической университетын. Соин паймонэз ӧвӧл, инженерно-технической ужасьёс пӧлын 6 процентэз гинэ удмуртъёс шуыса. Со пӧлысь но тросэз воксё уг пырисько удмуртлыкмес ӝутонэ-азинтонэ. Тани удмурт культура котырын, шуом, тросгес бергало удмурт кылъя, литературая дышетӥсьёс. Нош физик, биолог яке мукетыз ӵем дыръя палэнэ кылемын луо. Та ласянь сюлэмшугзэ вераз Люк школалэн азьвыл директорез Галина Яковлевна Лёнина, дышетскемезъя физик, математик. - Кӧня ужасько, - шуиз со, - нырысьсэ таӵе ӧтчаме ӧтизы. Ачим но ӧй дӥсьтылы "кулэтэм" интые нырме месыны. Асьмеос ведь озьы дышетэмын: интыяд пук, калыклэсь пӧртэм эн выры... Зэм, асьмеос кепырасесь, нош кыӵе ужасесь. Ушъяськытэк ке верано, тани Пермьын сю директоръёс люкаськылӥзы, Удмуртиысь витезлы данъян грамота сётӥзы, соос пӧлын мыным но, удмурт адямилы. Зэм, вылӥ образование басьтон гинэ тырмыт ӧвӧл, шуизы та ӧтчаме люкаськемъёс. Асьмелы воштоно лул пуштросмес, психологимес. Тодӥсь-валась гинэ ӧвӧл, кышкатэк вылез борды кутскись луоно. Ог-огмылы юрттон, гажан сярысь но вунэтоно ӧвӧл. Вожъяськон, ог-огдэ выйытон медаз быдтэ асьмеды. - Эскеронъёсы монэ паймытӥзы, - пусйиз история наукаосъя кандидат, этнология но социология удысысь тодосчи Георгий Кузьмич Шкляев. - Интеллигенция азьпал радын луыны кулэ шуиськом ке но, али со уг ик висъяськы мукетъёсызлэсь. Куд ке ласянь бере но кыле. Асьмелэн 62 процентэз гинэ интеллигенция вордскем кылыныз лыдъя удмурт кылэз. Ӝыныез сямен пумит луо анай кылэз школаосын дышетонлы. Завьял ёрос сярысь ке верано, татын удмурт кылэз али дышетэ 2680 нылпи. Берло вить ар куспын та ласянь шӧдскымон вамышъёс лэсьтэмын. Удмурт сямъёс, фольклор вылын дышетон пушъе ини 23 нылпи садикын. Иж котырысь посёлокъёсын но удмурт кыллы саклык висъяло ни. Но татын сюлэмшуго учыръёс пумиськыло ай. Шоркармылы матын бере, тани Октябрь шор ёзо школаысь отличникъёсыз анай-атайёссы Ижевске лицейёсы, колледжъёсы выжтоно кариськиллям. Соин сэрен лачак сюлмаськонэз, синкылиез адӟоно луо. Завьял ёрослэн Ижевскез котыр ласянь "ӟыгыртэмез" умоен но, уродэн но берытске. Кызьы нош со шӧдӥське удмурт интеллигенция вылын? - Пӧртэм ёросъёсысь лыктэмын бере, котькудӥз аслэсьтыз культуразэ, малпанъёссэ вае, аслэсьтыз сямъёссэ пыӵатэ, - шуиз удмурт культурая "Чагыр дыдык" дэменлыклэн кивалтӥсез Мария Дмитриевна Ишматова. - Озьы ке но, ми котьку шуиськом: Завьял ёрос быгатӥз ас удмуртлыксэ утьыны, со адӟиське районын арлы быдэ ортчытъяськись фольклор фестивальёсъя, конкурсъёсъя но. Азьвыл туж умой радъямын вал егитъёсыз общественной улонлы дасян. Нылпи политической организациос быризы, реформа кутскем дырысен соос интые номыр ик ӧз кылды. Тани Завьял ёросын вань школалэсь палэнын ужась нылпи центр. Ольга Петровна Бегишева мукет уже выжемен валче, татын удмурт нылпиосын уж уг нуиськы ни. М. Д. Ишматова бадӟым осконзэ вераз, ёросын удмурт егитъёсын ужан выльысь ас ӧрзэ шедьтоз шуыса. "Шунды сиос" бордысь но потоз, кызьы асьмеос дасяломы удмурт кадръёсмес ЪЪИ дауре, луомы-а кузё ас вордӥськем музъем выламы. "Асьмеос быриськом - ӟучъёс но, удмуртъёс но, бигеръёс но... Арлы быдэ странаямы улӥсез 700-800 муртлы кулэсме... Удмурт Республикаямы но, 1993 арысен кутскыса, 4,7 сюрслы ичигес адями кылиз..." Шаерамы но странаямы кылдэм демографческой югдурез лыдпусъёс пыр сэрттыса-пертчыса вераськиз экономика наукаосъя доктор, УрО РАН-лэн экономикая институтысьтыз секторен кивалтӥсь Анатолий Константинович Осипов. Тани одӥгзэ гинэ пусъём. Удмуртия суицидъя дуннеын нырысь интые потэ ке (сю сюрс адями пӧлысь 72-76 мурт ассэ ачиз быдтэ), лыдъяло вал, тросэз со удмуртъёс шуыса. Но озьы вылымтэ - эскеронъёс возьматӥзы: удмуртъёс ӟучъёс бере кыкетӥ интыын. Удмурт нацимы пушъёз, интеллигенция, аслэсьтыз лул кужымзэ огазеяса, калыкмес ас сьӧраз валтыны дась луиз ке. Нош али, эскеронъёсъя тодмо, 8 процентэз гинэ сыӵе мылкыдзэ усьтэ. Люкетэ, дыр, крестьян выжыысь потэммы, ас кожад гинэ кариськыса улыны тыршеммы. Конференцилэн нимыныз ӵектэмын вал югдурез умоятонъя пӧртэм ужрадъёс. Нырысь ик, котькуд нодлыко дышетскисьлы вань быгатонзэ усьтыны луонлыкъёс кылдытоно, ёрос кенеш нимын институтэ пырыны дэмланъёс сётоно, квотаослэсь но вылтӥ амалъёс утчано. Гуртъёсысь пинал "кизилиос" понна усьтоно райцентрын нимысьтыз юрт ("Пурга кизилиослэн" выллем). Политикая тодон-валанъёсты калык пӧлы вӧлмытӥсь группа кылдытоно, та ласянь "Тодон" огазеяськонэн валче ужано... Вань удмуртъёслэн сизьыметӥ ӧтчамазы ӟырдыт пыриськоно шуыса ӧтён но вал. Калык пӧлын азьветлӥсь луыны быгатэмзэс та конференция дыръя нош ик усьтӥзы "Удмурт кенеш" ассоциацилэн Завьял ёзэныз кивалтӥсь Валерьян Арсентьевич Никитин, ёрос администрацилэн тӧроезлэн нырысетӥ воштӥсез Василий Иосифович Афанасьев, Лудорвайысь инбам-липет улысь музейлэн кузёез Борис Евгеньевич Баталов, Пироггуртысь культурая дэменлыклэн кивалтӥсез Алевтина Павловна Рябова но мукетъёсыз. Т. Петрова. "Сюлэм вӧзын арган шунске" "У сердца гармошка пригрелась" - таӵе нимо конкурс таяз кӧс нуналэ 19-тӥ июне ортче Сарапулын. Ёросъёсын ас быгатэмзэс возьматэмзы бере татчы люкасько вормисьёс: арганчиос, крезьчиос, калык кырӟанъёсты, такмакъёсты быдэстӥсьёс. Соос пӧлын - Бобья-Учаысь нылкышно арганчиос, Качкашурысь (Глаз ёрос) пуньыен шудӥсь пиналъёс, Играысь Татьяна Халяпова, Сергей Чирков, Дэбесысь Таисья Кулёмина, Валерий Чирков, Алнашысь Анна Плотникова, Валерий Гоголев но мукетъёсыз. Та конкурс шараяны кулэ выльёссэ усто кырӟасьёсты, вашкала инструментъёсын шудӥсьёсты. Со Сарапулын бадӟым праздниклы пӧрмоз, тужгес шулдыр интыосын, Кам шур вылын но ортчытӥськоз. Культурая министерстволэн "Удмуртиысь ошмесъёс" фондысь премиосыз вормисьёслы сётэмын луозы туэ коньывуонэ (октябре). А. Апаева. Синвуос выльысь ӧръяськизы Ӟеч муртлэсь нимзэ дауръёс ӵоже буре ваё. Тазьы вераны луоз быдӟым удмурт кылчи, кылбурчи но гожъясь Георгий Архипович Архипов сярысь. Пичи Пурга черкогуртын ини кемалась ортчиз та адямиез буре ваён нунал, нош верам кылъёс, кылэм учыръёс татчыозь уг вуно. Кылчи, кылбурчи но гожъясь сярысь туж шуныт, туж ненег вазиськизы "Удмурт кенеш" огазеяськонлэн тӧроез Валентин Кузьмич Тубылов, "Маяк" нимо ёрос газетын трос аръёс ӵоже ужам журналист Зинаида Яковлевна Титова, Пичи Пурга ёрос кивалтэтлэн тӧроезлэн воштӥсез Валентина Ильинична Панфилова, Георгий Архиповичлэн сузэрезлэн пиез Национальной музейын ужась Борис Евгеньевич Боталов, журналист, прозаик Кирилл Егорович Ломагин, журналист, кылбурчи Алексей Алексеевич Ельцов, Кылъя, литературая но историяя Удмурт институтын ужасьёс тодосчиос кылтодон наукаосъя кандидат Людмила Евгеньевна Кириллова, философия наукаосъя доктор Людмила Леонидовна Карпова, Георгий Архиповичез тужгес ӟеч тодӥсь адямиос Валентина Спиридоновна Зорина, Зоя Ивановна Поликарпова. Тодмо тодосчилэн гуртоосыз но, юриос, пумиськонэ буш киын лыктӥллямтэ. Крезьгурчи Юрий Афанасьев Георгий Архипович Архиповлэн "Вордскем шаерам мон бертӥ но..." кылбурезъя кылдытэм туж усто кырӟан. Сое но мукет гуръёсты кылзыса, син азе выльысь но выльысь пуксьылӥз та лачмыт но сайкыт визьмо адямилэн яркыт тусбуез. Буре ваён нуналэ. Владимир Камашевлэн туспуктэмъёсыз. Шӧкыч Тыл гома, гома... Тылпу кысӥсьёслэн ӟырдыт вакытсы вуиз. Куазь кӧс но тӧло улэмен, котькытын секыт югдур кылдӥз. "Горд атас" вуылэ шоркарамы но. Одӥгаз кӧс нуналэ Первомай ёросысь тылпулэсь утиськонъя часте жингрытӥсь луиз: 65-тӥ школа дорын пу корка ӝуа. Комбинатной ульчаысь кузётэм юртъер гомӟем. Тылэз лапкатӥзы. Изъян адӟемын 5 сюрс манетлы. Нош коркалэн кузёез таки ӧз шедьы. Бабушкин ульчаысь 96 номеро юртын тылпу потӥз нуназе куазен. Коркалэн кузёез А. Бессольцев но солэн семьяез со вакытэ доразы вылымтэ. Тылпуэз кысӥсьёслы бадӟым кышкытлык кылдытӥзы газэн куинь баллонъёс. Ярам, соосты дыраз поттыны вуизы. Но тыл изъянтӥз юртъерез, мунчоез но мукет пуктэмъёсты. Нырысь чакламъя, тыл юртэ юромо куштэмын вылэм. Йыртэмасез утчало. Нош семья гужемлы улон интытэк кылиз. А. Емельянов. Тазалык Алӥсьёс Улон уродмемен, пӧртэм черъёслэн алямзы уг паймыты. Кылдо выльёсыз, азьвыл тодмотэмъёсыз но. Эмъясьёс шуге-леке вуо модиамез, искусственной пекля но мукет шуг выль процедураос лэсьтыку кылдӥсь инфекциосын. Соос операция бере бурмись муртэ но выльысь погырто. Веранэз ӧвӧл ни СПИД, гепатит но мукет вирусъёс сярысь. Кылсярысь, ӝыныез калык герпесэн курадӟе. Туннэ паласькись висёнъёсын нюръяськисьёс - эпидемиологъёс ужало республикаысьтымы ваньмаз эмъян но висёнъёсты алон интыосын. Асьсэ ужзэс ӟеч тодӥсь специалистъёс дырыз дыръя алыны тыршо матэктӥсь через, висёнлэсь кышкытэзлэсь мукетъёссэ утьыны тыршо. Сыӵе ужасьёс ӧжыт ӧвӧл, но уката пусъем потэ СПИД-эн но мукет паласькись висёнъёсын нюръяськонъя центрысь эмъясьёсты Зоя Васильевна Камалетдиноваез, Надежда Федоровна Холстоваез, Людмила Павловна Адаховскаяез, Галина Васильевна Зотоваез. Азьвыл эпидемиологъёс клиникаосын гинэ ужазы ке, табере вань ни госпитальёсын но. Соос чакласа возё больницаысь чылкытлыкез. Уката бадӟым саклык висъяно луэ эмъян тӥрлыкъёсты стерилизовать каронлы. Эпидемиологъёслэн тыршеменызы берло куинь аръёс ӵоже шаерамы кулэсмиз В но С гепатитэн (ӵужектонэн) висён, инъекциос лэсьтэм бере азон учыръёс но мукет . Али шаерамы укмыс ВИЧ-ен паласькемъёс, огез соос пӧлысь СПИД-эн висе. Котькудӥз та учыръя пӧртэм ужрадъёс кутэмын - висисьёслэн тодмооссы, ӵыжы-выжыоссы, соосын кусып возем адямиос эскеремын. Эпидемиологъёслэн ужзы - висёнэз алон. Оскисько, сос быгатозы асьмеды кышкыт черъёслэсь утьыны. Л. Кузелин. СПИД-эн но мукет паласькись висёнъёсын нюръяськонъя центрысь валтӥсь врач. ШӦКЫЧ Адӟон пыд улысь потэ Улонысь учыр Микворлы гуртаз вазь ӵукна ик гаражысь но сад-бакчаысь бускелез жингыртэ. - Тон-а та, Педор? - шумпотӥз Миквор. - Кыӵе ини тазалыкед? Маланьяед зол пыжиз-а? Мынамез уг но вераськы. Ужаз дуринчи кадь пурӟыса кошкиз. - Маланьяен йырин ӧвӧл-ай, - трубкаысь кылӥськиз ӝуштӥсь куара. - Йыр таба кадь. Ӟырдамын, тани-тани шори пилиськоз. Толон ӟенелик пыдсамы ӧз кыль меда? Гульчык коть лэзёно вылэм. - Ачим но со сярысь малпаськисько, - нялтас луиз Миквор. - Ойдо-ай кузь быжъёсмы ӧвӧл дыръя ӝогак ветлом. Кин тодэ, оло, кужымммы ӧз тырмы ни ваньзэ чатыртыны. Тани кык эшъёс вамышъяло ни гаражзы пала. Макмырен курадӟисьёслэн вераськонзы нокызьы уг сэраськы. Тодмотэм муртъёс кадь лашкыто, мынон интыязы гинэ ӝоггес вуоно. Юдэсэн-юдэсэн тодазы лыктылэ толло нунал. Чилектэ - вунэ, чилектэ - вунэ. Соос пусйизы вал Микворлэсь спортолотоысь коньдон утэмзэ. Шонергес вераса - та коньдонэн "Жигули" басьтэмзэ. Микворлэн правоез ӧвӧл бере, руль сьӧры пуксиз Педор. Сюрес вылысь аракы басьтӥзы но гаражъёс пала ширтӥзы. - Удалтэ ик тыныд, Миквор! Машина басьтӥд утэм коньдонэн. Гараж шедьтӥд мынаменыз артэ. Пересь бускеле сое тыныд ӝыны дунын вузаз. - Бен, удалтӥз. - вуиз Миквор. - Тау тыныд гараж утчаны юрттэмед понна. Пеймытозь, шулдыръяськизы воргоронъёс. Гуртазы бертоно луизы - Миквор тунгонзэ нокытысь уг шедьты ни. Борддор борды кутскыса, отчы, татчы мынэ, машина улэ учкылэ - оло му ньылэм. - Вай капкадэ езэн позыртом, уй куспын йыртэмась уз луы, - амал шедьтӥз Педор. - Чу-ай, Педие, - шенгыляз Миквор. - Ойдо мынэсьтымзэ машинаез тынад гаражад пуктом, тынэсьтыдзэ - мынамаз. Ачид валаськод: тынэсьтыд шальтрам урободэ йӧтылӥсь уз луы. Нош мынэсьтым соку ик валтозы. Озьы ик каризы. Микворлэн выль "Жигулиез" пыриз Педорлэн гаражаз. Ӧсэз ворсазы, секыт тунгонэн пуньязы. Педорлэн вуж "тарантасэз" каръяськиз Микворлэн гаражаз ӧсаз ез ошизы но позыртӥзы. Кызьы кошкемзэс уг тодо ни. - Ма, мар та таӵе, Педор? - Микворлэн пыдъёсыз дыр! куалекъяны кутскизы, макмырез соку ик тӧлӟиз. - Пыраллям ук, пыраллям, шайтан басьтонъёс! Нёжто валтӥзы?.. Педор учкиз гаражзэ. Тунгон вадьсытӥ ӧс паньгамын, маке йылсо арбериен конгыръямын. Озьы ик вань - гараж буш. Педор дэралэсь тӧдьыгес луиз: - Ы-ы, ӧвӧл ни машинае... Ма-ма, машинамы... Аракы тодын ӧвӧл ни. Учко - музон гаражъёсысь но тунгонъёс тӥямын. - Педор, - гу пыдсысь кадь кылӥськиз Микворлэн ӟазырес куараез. - Сэртты, пертчы та езэз. Чиньыосы уг выро. Капкаез мырдэм но кызьы усьтӥзы. Микворлэсь гаражзэ усьтӥзы. машина интыяз. Воргоронъёс синйылтӥзы ӧс куспысь кагазэз. Педор сое мычиз Микворлы. Таиз лыдӟе: "Ӟуч тунгонэз" ум тӥяське. Вождэс эн вае". - Валад-а табере? - буйгатскыны уг быгаты Педор. - Гараж езэн пытсамын бере, йыртэмасьёс отын номыриз ӧвӧл кожазы. - Озьы ке озьы, дыр, но, - мур лулскиз Миквор. - Мынӥм милицие, - сэзьтӥськиз Педор. Н. ДОЛГОВ. Книгаен юрттон Берло аръёсы асьме кун уг бугаты ни школаосысь, нылпи юртъёсысь, школа- интернатъёсысь, быдэ вуымтэослэн колониосысьтызы библиотекаосы тырмыт коньдон висъяны. Соин ик выль потэм книгаос отчы туж чаклатэк но дырын-дырын гинэ вуо. Сыӵе ик югдур кылдэмын Удмурт Элькунын но. Россия Федерациысь Печатья кун комитет вань издательствоослы таин валче вазиськиз, юрттон ужрад ортчытыны ӧтьыса, та ведомствоосысь библиотекаослы асьсэ поттэм книгаоссэс дунтэк сётыны курыса. "Удмуртия" книжной издательство кун предприятие но та вазиськонэз ӟеч мылкыдын пумитаз, Калыкез дышетонъя министерстволэн школаосысьтыз но школа-интернатъёсысьтыз библиотекаослы интыысь авторъёслэсь 17128 экземпляр - 31 пумо книгаоссэс висъяны луонлык шедьтӥз. Удмурт Элькунысь Мерлыко (социальной) юрттэт сётонъя министерстволэн нылпи юртъёсысьтыз, мӧйыосты но сӧсырмемъёсты возён интернатъёсысьтыз библиотекаослы издательство сётӥз 5380 экземпляр - 25 пумо книгаоссэ. Сюрслэсь трос экземпляр - ваньмыз 30 пумо книгаос озьы ик келямын Россия Федерациысь Юстицияя министерстволэн Удмурт Элькунъя Кылкутытонэз быдэстон управлениезлы. Соос сётэмын луозы Можга но мукет колониосысь библиотекаослы. Книга поттӥсь вань организациослы, учреждениослы, фирмаослы но пӧртэм асъетъёсысь книгаен вузкарись магазинъёслы ми вазькиськиськом, та юрттон ужрадэ мылысь-кыдысь пыриськыны ӧтьыса. Ум вунэтэ нылпиосты, быдэ вуисьёсты, мӧйыосты но сӧсырмемъёсты! В. Ившин, "Удмуртия" издательствоысь валтӥсь редактор. ВАЛЭКТЭ ЮРИСТ Сэрегез нуэ адвокат Лилия Шкляева Юрт пуктыны кредит Кинлы сёто корка пуктыны ссуда? Н. Муравьева. Кизнер районысь Арвазь-Пельга гурт. Мон али секыт учырын. Кинлы вазиськоно? Кинлэсь юрттэт куроно? Мар карыны уг тодӥськы. Соин ик тӥледлы вазиськыны малпай юанъёсын. Ми улӥськомы куинь кузя - ачим, 1 но 5 аресъем пиналъёсы. Пыремын кык квартираен школа юртлэн одӥг палаз: 3 метр пасьтана но 6 метр кузьдала. Пичияк эстӥськон гур- плита куашкан калэ вуэмын. Котыр тупатъяны кулэ ини, толалтэ кезьыт луэ. Кузпалы пытсэт сьӧры сюриз ньыль арлы. Со гуртын дыръя ссуда но юаллямы. Уг сётъяло, шуылӥзы. Гуртамы юртъёс уг пуктыло колхоз но, государство но. Аслад кужыменыд гинэ быгатод. Али кыли огнам, ссуда юай но - уз, пе, сётэ: коньдон ӧжыт басьтӥськод - толэзяз 150-240 манет. Кызьы мон пуктом юрт? Кин юрттоз мыным? Ссуда ке сётысалзы, мон сое кӧняен ке тырысал, пудое но пичияк вань. М. К. Можга ёрос. Та ужпумез быдэсъян вылысь кылдытэмын улон инты басьтыны кредитъёс висъян сярысь положение. Удмурт Республикаысь Правительство 1997-тӥ арын 30-тӥ июле со пумысен кутӥз 748 номеро постановление. Тупатэмын Россиысь Сбербанклэн Удмурт банкез пыр кредит сётъян радлык (порядок). Улон интызэс озьы умоятыны (лэсьтыны, выльдыны, басьтыны) быгато бюджетэ пыртэм учреждениосын но организациосын ялан ужасьёс но соослэн семьяязы улӥсьёс - огъя хозяйство нуисьёс - кытын ужамзэс учкытэк; гуртын вуз поттӥсьёс но соослэн семьяязы улӥсьёс - огъя хозяйство нуисьёс - кытын ужамзэс учкытэк. Банклэн учреждениосыз огкылъя (договоръя) кредит сёто, таӵе куронъёсты быдэсъяку: коньдонэз улон инты басьтонэ (лэсьтонэ) кутыку но дыраз берыктыны луонлык кылдыку. Кредитлэсь кытчы мынэмзэ одно ик возьматоно документъёс пыр. Вань сыӵе кылъёс - обеспечение кредита. Мукет сямен вераса, коньдон пунэмась адямилэн марысь-мар учырлы мед луоз ваньбурез. Узырлыксэ законъя кутыны медло залог чотын. Адями кредитсэ берыктоз шуыса, озьы ик кулэ луозы тыриськыны быгатонзэ возьматӥсь документъёс. Банк сётыны быгатэ кык пумо кредит - улон инты лэсьтыны но басьтыны (дас арозь). Кӧня процент но кин чотын тырон сярысь валэктон шедьтыны луоз банклэн учрежденияз. Собере адями тупатэм радлыкъя курон (заявление) гожтэ интыысь аскивалтонъя ёзэ. Таиз решение кутэ но сое банке ыстэ. Кредитлэсь быдӟалазэ тупатыку, лыдэ басьтӥсько: адямилэн уждунэз яке барышез (доходэз); Удмурт Республикаын котькуд адямилы тупатэм улон интылы норма; одӥг квадрат метр улон интылэн шоро-куспо дуныз; адямилэсь татчыозь улэм интызэ кытчы карон сярысь ивортон (вузан, семьяысь мукет муртъёслы кельтон, мозмытон); улон интылэсь кредит сяна кылем дунзэ берыктыны шедёно коньдон. Кредитлэн быдӟалаез улон интылэн дунызлэн 70 процетэзлэсь трос медаз луы. Вылӥ верам адямиослэн кредит басьтэмзы луоз-а, уз-а - шуг вераны. Асьсэос гожтэмъя, ваньбурзы сокем трос ӧвӧл. Нош банк юрттэ пунэмзэ берыктыны быгатоноослы гинэ. Тӥни сыӵеесь асьмелэн законъёсмы. Кузпалъёс люко ваньбур Картэным вить нылпи вордӥськом вал - куиньысен дас куать аресозь. Али люкиськыны дасяським. Суд лыдэ басьтоз-а нылпиослэсь кулэяськонъёссэс? Н. А. Россия Федерацилэн Семья сярысь кодексысьтыз 39-тӥ ёзэт (статья) валэктэ: кузпалъёс огъя ваньбурзэс шори люко, куспазы мукет огкыл (договор) ӧй вал ке. Суд таӵе куронэз палэнтыны быгатэ, быдэ вуымтэ пиналъёслэсь но кудӥзлэсь ке кузпаллэсь бадӟым кулэяськонзэс санэ басьтыса. Шуом, кузпал нокыӵе мугтэк барыш (доход) ӧз вайылы яке огъя ваньбурез кутылӥз семьялы изъян лэсьтонэ. Огъя ваньбурез люкыны луэ, кузпалъёс ӵош улыку но, нимаз кариськемзы бере но. Быгато ваньбурзэс ас понназы люкыны, та пумысен нотариус дорын документ лэсьтыса яке лэсьтытэк. Куспазы ченгешон потыку, ваньбурез люко суд пыр. Соос куремъя, суд тупатэ, кыӵе арбери кинлы выжоз. Огезлы укыр дуно вуз шеде ке (шуом, юртъер яке машина), мукетыз со понна коньдон курыны быгатэ. Пумиськылэ таӵе учыр. Шуом, воргорон аслыз машина басьтӥз кышно ваемезлэсь азьло. Люкиськыкузы суд таӵе решение кутыны быгатоз: машина - картлэн гинэ ваньбурез, люконо арбериос пӧлы уг пыры. Озьы ик люкыны уг яра быдэ вуымтэослэсь котырзэс - дӥсез, пыдкукез, дышетскон, спортэн но музыкаен вырон макеосты, нылпи книгаосты но музонзэ. Соос выжо нылпиен кыллись кузпал доры. Огъя нылпиос вылэ кассае тырем коньдон соослэн лыдъяське но уг люкиськы. Люкиськем бере ваньбур люконэн герӟаськем ужпум судын эскериське куинь ар ӵоже. Тазалык Мылкыдзэ ӧз вошты комсомол но Комсомолэ пыртыкузы, Любалэсь юазы: - Кин луод? Нылаш кышкасагес шуиз: - Эмъясь. Со вакытэ райкомъёс колхозэ скал кыскыны кылись комсомолецъёсты данъяллязы уго. Но Любаез комсомолэ кутӥзы. Кӧня ке ар ортчыса нош, со зэмзэ но фельдшер луиз. Медучилищеез йылпумъямез бере ыстӥзы Завьял ёросысь Докшае. Со дырысен дас тямысэтӥ арзэ ужа ни со татысь фельдшерско-акушерской пунктын. Нырысь огназ вал, али вӧзаз акушеркаез вань. Ӵош ужась эшез сярысь веракуз, со Оляе гинэ шуэ: "Оляе отпускын ке но, висись доры ӧтчаллям", "Оляе пинал ке но, кык кышномуртлы нуны вайыны юрттӥз ни..." Сыӵе уго гуртысь фельдшеръёслэн ужзы - отпускын-а, ӧвӧл-а, уг юало: уйшоре но, ӵукна ньыль часэ но ӧтё. Огпол ӵук пал нуны ваись кышномурт доры ӧтизы. Любовь Никифоровна Завьялысь "Скороез" ӧтиз. Соосыз пумитазы потыны косӥзы. Дачаяз шутэтскись тодмо артистлы юрттэт курыса вазиськиз. "Скороен" пумиськытозь келяз, но кышномуртэ сояз машинае выжтытозязы берытскиз но кошкиз. Любовь Никифоровна сюрес вылэ кылиз. Олокӧня иськем пыдын бертоно луиз. Гуртэ пырыкуз калык уже мынэ ни вал. Огез пиосмурт горе: "Мар-о, Люба, кема калгиськод?" "Ой, ӝож потӥз соку" - шуэ кышномурт. Нош огполаз сенигысь нуыса кошкизы. Адями, пе, выем. Кыӵе турын на отын? Асьсэ гуртзы ӧй вал ке но (Докшаын туж трос шутэтскисьёс), вылаз ик, кудӟылэмын ке но, кызьы уд юртты, тон эмъясь ук! Кема выризы тыосысьтыз вузэ поттыны, сюлэмзэ жугиськытыны. Выем муртлэн пиез Люба шоры Инмар шоры кадь учке, вань оскон солы гинэ. Быгатӥз ведь улӟытыны! Сыӵегес ик учыр пичи пияшен вал. Соиз колдэче усьыса ӝокам. Уг шока ни вал, но "Скорой" вуытозь ик быгатӥз улӟытыны Любовь Никифоровна. Али пияш школае ветлэ ни. - Кышкыт-а сыӵе учыръёсы? - юасько гуртысь фельдшерлэсь. - Кышкыт. Соку адямилэн улонэз быдэсак тон киын луэ, соин ик куд-ог дыръя врачлэсь но трос тодэм-быгатэм кулэ. Зэм, та учыръёсыз сярысь со И-тӥ категория басьтон понна экзамен сётыкуз ӧз поттылы, юанэз ӵапак "выем муртъёслы нырысетӥ юрттэт сётон" вал ке но. "Мар соин ушъяськонэз, адямиез утён, эмъян мынам уже ук, - шуэ со. - Татчыозь, пе, огпол но ӧй жаля на фельдшерлэсь ужзэ быръемысьтым. Кыӵе шумпотоно, пересь муртъёс лыктэмдэ возьмало ке. Сӥзьыл-тулыс соосты эскерыны вӧзысь гуртъёсы но потаськом, тани турнан азьын укол пуктылом ай. Участоказы 570 мурт. Но тросгес ӧтчало дачаосын шутэтскисьёс. Сьӧръёс шуыса юрттытэк уд кельты. - Тӥляд тау карон книгады туж зӧк, дыр, ни, - юасько Любовь Никифоровналэсь. - Ой, ми сыӵе книга чик ум возиське, малы со кулэ? Ушъяськыны уг яраты уго та кышномурт, тау каремзэс возьматэк ужзэ лэсьтэ. Но тыршемзэ синйылтытэк уг уло. Июнь толэзе шоро-куспо тодон-валанэн эмъясьёслэн 1- тӥ съездазы Любовь Никифоровна Урсегова Удмурт Республикаысь Правительстволэн Данъян грамотаеныз пусъемын. З. Рябинина. Ӟечкыласьком! "Удмурт дуннеын" ужасьёс сюлмысьтызы ӟечкылало газетлэсь Завьялысь бадӟым эшсэ Елизавета Ивановна Камашеваез. Та шулдыр вакытэ со пусъе 70 арес тырмонзэ. Таза лу, шудо лу, Лиза апай! Вошты малпандэ - воштӥськоз улонэд Кин-о пыре гуртысь интеллигенция пӧлы? Нырысь ик дышетӥсьёс, эмъян но культура удысын ужасьёс, администрациын но куд-ог предприятиосын тыршисьёс. Нош музъем ужъя, пудо вордонъя специалистъёс - агрономъёс, инженеръёс, ветеринаръёс, зоотехникъёс - малы ке ноку но удмурт интеллигенция пӧлы ӧз пыриськылэ, уг но пырисько. Со туж бадӟым ыштон, малы ке шуоно, музъем бордын ужась адями - со кузё луыны кулэ. Нош кузё ке ялан азьлань ӧтиз, нырысь радын ке луиз, мукетыз но со сьӧры мыноз, юрттоз. Кыӵе визьмоесь удмурт специалистъёсмы, фермеръёсмы но вань - кулэ лидер, солэн бадӟым авторитетэз мед луоз, мед нуоз город котырысь удмуртъёсыз азьлане. Сыӵе адямимы али асьмелэн вань: со Валериан Арсентьевич Никитин - ёрос думалэн но Кун Кенешлэн депутатсы, "Путь Ильича" колхозлэн тӧроез. Оскиськом, солэн азьпал сюресэз эшшо но паськыталоз. Кивалтӥсьёс но асьсэ коже уг будо. Туж ӟеч кусып луыны кулэ: школа - вуз. Райцентрысь школамы колледж луэ бере, гурт хозяйствоя, медициная академиосын герӟаськыса ужа. Удмурт Правительстволэн 133 номеро Постановлениезъя гуртысь ӟеч дышетскись выпускникъёс льготаен пырыны быгато институтъёсы. Туэ но милям 35-ез сыӵе нылпиосмы "Удмурт кенеш" пыр дэмламын луозы. Удмурт культурая "Чагыр дыдык" дэменлыкмылэн нырысь ужпумез луэ калыкмылэсь чебер йылолъёссэ утён-азинтон. Тани милям культура юртысь комнатаямы таяз дышетскон аре удмуртъёслэн улон-вылонэнызы, дӥськутэнызы, сиён-юонэнызы тодматскыны вуылӥзы сюрс пала покчигес дышетскись но садике ветлӥсь пиналъёс. Но малы ке адями быдэ вуэмъяз палэнтӥськыны ӧдъя ас выжыосызлэсь. Старшеклассникъёс уг ветло ни удмурт пукон ӝытъёсамы, писательёсын, тодосчиосын, артистъёсын пумиськонъёсы. Иське, та удысамы выль амалъёс утчаны кулэ. Ӵемгес ортчытъяно удмурт культуралы сӥзем нуналъёс, арняос, толэзьёс. Котькуд нылпи садын, школаын, культура юртын, мукет учреждениосын но мед шӧдӥськоз удмурт шӧм. Со понна одно ик кулэ огазеяськыны, вань удмурт кужымъёсты огазеяны - ӟуч культуралэсь люкиськытэк, нимазъяськытэк, сабырлы гинэ валче ужаны. Огмес огмы вӧсь карытэк. Гуртысь интеллигенцилэн улоназ бадӟым инты басьто газетъёс, журналъёс, радио, телевидение. Коньдонлы секыт луэмен, ёрос газетъёс али шуген потыло. Милям "Ӟардон" газетмы толэзяз воксё кык пол ӝыны быдӟалаен гинэ потэ на. Сое но басьтӥсь, лыдӟись ӧй вал ни. Соин ик администрация шонер лэсьтӥз, удмурт газетэз "Пригородные вести" газетлы приложение карыса - сое ӟуч подписчикъёслы но сётъяло. Нош Ижевсклэн сопалаз улӥсьёс - Шаберды, Люк, Пирогово, Шор Постол палъёс уг кыло районысь радиоез, туж жаль, ёросысь кивалтӥсьёс но уг кылзӥсько сое. Асьмелэн, удмуртъёслэн, кыӵе-о тырмымтэмы? Кышкаськом! Лэсьтэмзэ но возьматыны ум быгатӥське. Шараяны луонозэ но ватыса возиськом, ойдо адямиос сотэк но адӟозы, синйылтозы ай, кожаськом. Адямилэсь асваланзэ (самосознанизэ) жутон понна, ёрос радио пыр арнялы одӥг пол коть удмурт кылын вить-куать минутъем передачаос нуоно вылэм. Тани Калифорниын 40 ар ӵоже ни нуналлы быдэ 45 минут, пе, верасько "вошты ас малпандэ - воштӥськоз тынад улонэд" темая. Ӟеч малпан ӵукна ик сёто ке, быдэс нуналлы малпаськыны тырме, шуо. Павел Николаевич Вершинин понна дурбасьтыны Кун Кенешлэн сессиез азьын пикет ортчытэмын вал, нош ми отчы мыныны ӧм быгатэ. Кизнер районысь Кармыж школалэн директорез С. П. Петрова со сярысь тазьы гожтэ "Удмурт дунне" газетэ: "Политической нюръяськонэ ваньмыз пыриськыны уг дӥсьто: "быжзы" музын ке, лёгыны шедьтозы". Мугзэ тодытэк, адямиез озьы янгыше уськытыны луэ меда? Асьмеос, удмуртъёс, дышемын туж ӝог йылпумъян лэсьтыны. Мынам со нуналэ, зэмзэ ке верано, сюлэмы пӧсь тылын ӝуаса улӥз, национальной собрание но ӧй сюры, пикетэ но ӧй ветлы шуыса... Нош со бӧрсьы ик, 27 мае, газетысь интервьюын П. Н. Вершинин шуэ: "Пикетъёслэн пайдазы али ӧжыт ни, тодады вае шахтеръёсты ик, Россилэн кивалтӥсьёсыз сыӵе нюръяськон амал шоры уг ни учко. Утчано мукет нюръяськон амалъёс. Ӝутоно огъя культурамес, муромытоно тодон-валанмес. Соку политика ужпумъёсы ум йыроме. Быръёнъёс дыръя но йыромыса улэммы шӧдӥськиз".Туж шонер верамын, мон быдэсак та кылъёсын соглаш луисько. Дышетоно политика ласянь удмурт калыкез, тужгес но егитъёсыз. Тани коньывуон толэзе районысь думамы эскерыны чакла туж кулэ ужпумъёсыз - кадръёсъя программаез, егитъёсын ужанъя программалэсь быдэсъяськемзэ. "Удмурт кенешлэн" ёросысьтымы ёзэз, удмурт культурая дэменлык, нылкышноослэн огазеяськонзы, егитъёслэн "Шунды сиоссы" та уже одно ик пыриськыны, ас малпанъёссэс-планъёссэс сётыны кулэ. Та ужын районысь интеллигенцилэн но интыез туж бадӟым. Нош шорсюлэмыз солэн луыны кулэ администрациысь нациосъя валтӥсь специалист О. П. Бегишева. Возьмалом "бусымылэсь" ӟеч удалтонзэ. Араны мед вуозы ини егитъёс. М. Ишматова, Завьял ёросысь удмурт культурая "Чагыр дыдык" дэменлыклэн кивалтӥсез. Властез уг ке сёто, сое басьто?.. Валентин Кузьмич Тубыловлэн съездын лэсьтэм докладэзлы делегатъёс но ӧтем куноос вылӥ дунъет сётӥзы. Залын пукись удмуртъёс кытӥяз йырзэс но ошылӥзы - возьыт луылӥз. Возьыт асьме понна. Макем шонер вераз "Удмурт кенешлэн" тӧроез! Асьмеды кык урод сям, пе, быдтэ: ум быгатӥське кырсь ужъёслы пумитъяськыны но ялан ог-огмылы вожъяськыса но "пыд пуктылыса" улӥськом. Быръёнъёс дыръя но соин йырин ик ыштонъёс ум адӟиське меда? Съездын вис каронъёс дыръя тодматски та ужрадэ лыктэм адямиослэн мылкыдъёсынызы. Малы мон ӧй вормы? Лидия Федоровна ИВАНОВА - Балезино ёросысь "Удмурт кенеш" огазеяськонлэн кивалтӥсез: - Куке-соку мон вал посёлокысь каЛылк депутатъёслэн Советсылэн депутатэз. Но таӵе бадӟым быръёнъёсы нырысьсэ пыриськи. Зэм вераз В.Тубылов, асьмеос ог-огмылы пыд пуктылӥськомы шуыса. Балезино посёлокын ми сизьым кузя кандидат вал, соос пӧлын кӧня ке удмуртъёс но одӥг бигер. Вормиз бигер. Ас адямизы понна Балезиноын улӥсь бигеръс огкылысь кариськыса куараоссэс сётӥзы, нош ӟучомем удмуртъёслэн мылкыдзы таӵегес вал: котькин мед вормоз... Озьы Кун Кенеше ортчиз Балезиноын вордӥськем но али Ижын улӥсь Э.Касимов. Югдурез валасьтэм удмуртъёс табере ик мынэсьтым юало: "Кызьы вазиськоно Касимовлы? Зэмзэ-а политикаын сыӵе секыт югдур?" Тазьы малпасько: удмурт калыкез сайкатон понна, гурт кенешъёсты ӝутоно. Малы ке шуоно, гурт администрациос районысь администрациен одӥг гурез кырӟало, калыклэн мылкыдызъя кариськыны уг быгато. Кыӵе кандидат тупа районысь кивалтӥсьёслы, со понна ик ужаны косо гуртысь администрациез. Ӧй вормы шуыса, асме но янгыш карисько. Уже ляб кутӥ активез. Собере аслам дурбасьтӥсьёсы но, кудъёссэ медӥсько вал ас палам ужатыны, мукет округе ужаны кошкизы. Ужано Николай Николаевич МУСАЛИМОВ - нациосын ужанъя министр: - Съездын туж лэчыт доклад лэсьтэмын вал. Делегатъёслэсь вераськемъёссэс кылзыкум, тазьы малпаськыса пуки: кызьы меда верам кылъёс адямиослэн вирсэръёсазы пырозы? Урод инфекция вире пыре ке, быдэс мугор соин нюръяське, сое быдтыны выре. Та съезд бере но озьыгес мед луоз вылэм - урод сямъёсмылэсь куштӥськоно, янгышъёсмес валаны турттоно, пушкамы ӟечез-тазаез гинэ мед кылёз. Нациосын ужанъя министерство съездын пуктэм ужпумъёсты одно ик лыдэ басьтоз. Нырысь ик, кылъёсъя законэз йылаз-пумаз вуттоно. Ужано кадръёсъя закон бордын. Та дырозь Удмуртиын ӧвӧл на нациослэн огазеяськонъёссы сярысь закон но, нош асьме республикаын 70-лэсь ятыр калыкъёс уло. Вань выжыысь потэм калыкъёслы юрттыны тыршоно но со дыре ик утьыны, кельтыны быгатоно удмуртъёслэсь государствозэс. Министерствомы куинь арня талэсь азьло гинэ вордӥськиз, быдэсак со кылдытэмын но ӧвӧл ай. Но культурая министрен Н.Бессогоновен ӵош вуылӥм ни Москвае, пумиськылӥм культурая но национальной ужпумъёсъя министръёсын. Вераськон мынӥз республикаямы ортчоно финн-угор фестиваль сярысь. Отчы пыриськозы дуннеысь трос калыкъёс, соин ик та бадӟым ужлы трос коньдон кулэ луоз. 400 сюрс пала шедьтыны быгатӥм. Удмуртъёслэн съездысьтызы одӥг малпанэн потӥсько: ужано. Ми палан удмуртъёс мукетэсь. Юрий Саитович САИТОВ - Янаул городысь делегат: - Мон сямен, таиз съезд удмуртъёс азе туж шонер валанъёс пуктӥз. Умой шат со, куке тӥляд парламентады дасо пала гинэ удмуртъёс сюремын, самой ӧжытэз куамын мурт коть луыны кулэ. Азьланяз удмурт калык сомында янгышъёс медаз ни лэсьты вал. Ми, Удмуртилэн палэназ улӥсь удмуртъёс, туж паймиськом но сюлмаськиськом тӥляд таӵе югдуре вуэмдылы: кивалтонысь удмуртъёсты палэнтыны выро, кылды, культурады но эркын уг шока. Милям югдур мукетгес: Янаулысь администрацилэн тӧроез удмуртъёсты туж гажа, нош дышетон милям районын вить кылын радъямын. Оскыса улоно. Сергей Анатольевич КОРШУНОВ - Свято-Михайловской соборысь лэсьтӥськись: - Югославиын ожмаськон мынэ, Россилэн улосвылъёсаз но куд-ог калыкъёс куспын жугиськонъёс пуромемын, нош Удмуртиын политикаен герӟаськем ужпумъёсты тазьы съездэ люкаськыса сэрттыны-пертчыны малпаллям. Соин ик, мон сямен, со туж пусйымон но адӟем карымон луыны кулэ. Оло, Удмуртиысь калыкъёсты огазеясал та соборез лэсьтон но. Инмарлэсь палэнскыса улон но асьмедыз уг-а меда вутты пӧртэм вожвылъяськонъёсы. Учке ай: черкъёс вӧзысь азбаръёсты но утялтыны кужыммы уг тырмы, ӧвӧл ни отын пукон интыос, ӧвӧл мерттэмын сяськаос - кӧня ужъёс асьмеды возьмало, нош ми выемын керетонъёсы. Ачим вордӥськи Москваын, семьяеным улӥсько вал удмуртъёслэн шаеразы но коркае сутскем, кузпалы бырем бере вань кужымме сётӥсько соборез улӟытонлы. ��� Тӥни сыӵе малпанъёс. Съезд йылпумъяськиз. Со удмуртъёслэн сюлэмъёсазы одно ик кыӵе ке пытьы кельтыны кулэ, угось татын берло аръёсы нырысьсэ дӥсьтыса но шара верамын вал асьмелэн, удмуртъёслэн, быръёнъёс вакытэ лэсьтэм янгышъёсмы но, вылӥ ӟуч кивалтӥсьёслэн удмурт калыкез кун кивалтонысь палэнтыны турттонъёссы сярысь. Вань таӵе веран: властез уг ке сёто - сое басьто. Озьы медаз ик луы вылэм, угось басьтон - со ожмаськон ини. Соин ик съезд удмурт национально-демократической движенилэн нимыныз Кун Кенешлэн но Правительстволэн Тӧрооссы азе лэчытэсь куронъёс пуктӥз. Т.БАННИКОВА. Вань сюресъёс - Завьялэ Ӵуказе улыса, 24-тӥ июне, Завьяловоын кутско гурт спортсменъёслэн 8-тӥ гужем шудонъёссы. Отчы лыктыны мылкыд каризы республикаысьтымы ваньмыз ик 25 ёросъёс. Ӵошатсконъёс мынозы ньыль нунал ӵоже но йылпумъяськозы 27-тӥ июне. Тодады вайытӥськом: кылем гужем шудонъёсын нырысетӥ интыез басьтӥз вал Завьял районысь команда. Озьыен, чемпионъёс дорын нюръяськон капчиен уз ортчы. Шудонъёслэн нырысетӥ нуналазы 14 часысен ортчозы воргоронъёслэн но нылкышноослэн волейболэн нюръяськонзы. 16 часэ кутскозы футболэн шудонъёс. Со дыре ик нылкышноос бызьылозы - 800, воргоронъёс - 1 иськем но 500 метре. Гужем шудонъёсты сӥё-дано усьтон ортчоз 25-тӥ июне 19 час 30 минутэ Завьяловоысь стадионын. Бадӟымесь азинсконъёс но вормонъёс тӥледлы, гуртысь спортсменъёс! Н. Байтеряков. Йырпоромон возь вылын Удмуртъёслэн гырон-кизёнэз йылпумъянлы сӥзем шулдыръяськонзы - Гербер - кылем арня нуналэ ортчиз Пичи Пурга йросысь Улын Юри гуртын. Шаерамы таӵе праздник тямысэтӥзэ вал ни. Азьло аръёсы ас доразы куноосыз пумиталлязы Алнаш (Кузёбай), Можга (Пазял), Кияса (Вуж Салья), Шаркан (Вуж Пашур), Завьял (Якшур), Воткинск (Кукуи), Вавож ёросъёс. Котькудӥз ас тусбуеныз, тодэ ваёнъёсыныз кылиз. Улын Юри котырын бадӟымесь шуръёс ӧвӧл бере, ас эрказ будӥсь турыно возьёссы но ӧжыт. Озьы ке но, юриос Герберез ортчытыны шедьтӥллям шулдыр инты: куиньна пал ласянь писпуосын котыртэмын. Огпалаз чурен интыяськизы вузкарисьёс, мукет палаз радэн султылӥзы машинаос. Со валлингес ик ас чильпам, керттэм, кутам но пуэз вӧлыса чеберъям арбериосынызы интыяськизы пӧртэм ёросъёсысь кибашлыос. Со киужъёс шоры учкыса, син палёме, кие кутэм, маяллям потэ, - жаль, соосыз басьтыны туж ӧжытэз быгатӥзы. Визылась пичи ӧр кузя ӵындӥзы тылскемъёс. Уно пуртыосын пӧзиз така сӥлен шыд-ӝук. Пӧзьтэм сиёнэз вӧсям бере, люкырак-люкырак пуксьылӥзы сиськыны. Тамында калык пӧлын ог-огдэ ыштонтэм вылысь, котькуд районлэн интыез пусъемын-гожтэмын вал. Но малы ке Ижевскысь но республикамылэн палэнысьтыз лыктэмъёс сярысь вунэтӥллям, соин ик таос нырысь-валысь "йыромыса" ветлоно луизы. Сценалы но инты умой тупатӥллям - возьлэн улланязгес, пуртыослы матэ. Вылланегес тубыса но адӟыны луэ артистъёслэсь кырӟамзэс-эктэмзэс. Нош соос кытысь гинэ ӧй вал - ас куараенызы, ас буёлэнызы: "купанчаос", "ашальчиос", "инвугуръёс"... Таӵе дыръя Ижысь артистъёсыд но кулэ уг луо, эсьма, Валентина Пудоваез но, татын ке но вал, сцена вылэ ӧтись ойлась... Нош нырысь ик, валамон ни, сцена вылэ тубазы, калыкез ӟечкылазы вылӥ кивалтӥсьёс. Кун Кенешлэн но, Правительстволэн но Тӧроссы татын вал. Александр Волков, Бобья- Учаысь нылкышно арганчиос Финляндие мыныны мед быгатозы шуыса, ас кисыысьтыз сётӥз дас сюрс манет. Эшшо дас сюрс, шуиз со, туннэ тӥ та праздникын люканы кулэ - кин кӧня сётоз... Ваньмыз огазе сураськиз та нуналэ: микрофонысь кырӟан но калык пӧлын гужлам куараос, шуак полынь шӧм вуттӥсь омыр но ӝук зынэн суро лӧсъяськись ӵын... Шунды ӧз ышылы ке но, куазь чидантэм пӧсь ӧй вал - удалтӥз. Зэм, восяськон-куриськон йылолъёс пумен вуныса кошко. Татын но сое туж ик шӧдыны ӧйлась. Йыр поромымон уно калык пӧлын азьвыл сямен валэкъяса микрофонэн ветлӥсь ӧй вал, соин ик таӵе дыръя кытын мар ортче уд тоды. Валэн вуорттыса ӵошатскисьёсыз но кин гинэ меда адӟиз... Уката пӧсь йӧтӥз та нуналъёсы Пичи Пурга ёрос администрацилэн тӧроезлэн воштсезлы Валентина Ильинична Панфиловалы, культура удыслэн кивалтӥсьлэн воштӥсезлы Александра Александровна Ефремовалы но, улын юриослэн кивалтӥсьёссылы но. Татысь калыклы но бадӟым тау шуыны кулэ мылкыдзэ сётэмез понна. Таиз Гербер соин пӧртэм вал: удмуртъёслэн ВИИ ӧтчамазы ветлэм делегатъёсыз азьвыл ӝытаз ик Пургалан пумитазы: котькуд ёросысь куноосыз утялтӥз кыӵе ке но гурт. Т.Петрова. Гербер шулдыръяськонын. Туспуктэмез В.Камашевлэн. Сюлэмшугъяськытӥсь югдур Милесьтым куарамес кылозы-а?! Ньыль ар талэсь азьло Ижын усьтӥськиз Нылпиосты дышетонъя удмурт кун центр. Калык сое Шиловалэн школаез шуэ: угось усьтӥз но кивалтэ соин Ольга Константиновна Шилова, ӟырдыт, визьмо удмурт кышномурт. Нырысь-валысь люкаськиз одӥг класс, собере - кыкетӥез, туннэ татын сю ньыльдон кузя нылъёс но пиос дышетско ини. Школае шедён понна, соос аспӧртэмлыко конкурсэз ортчизы. Малы ке шуоно, татын нырысетӥ классысен ик куинь кылэз дышето: удмурт, ӟуч но англи. Асьтэос валаськоды: сыӵе быгатонлык ваньмызлы сётэмын ӧвӧл. Та школаын дышетсконэз но капчи ужен лыдъяны нокызьы уг луы. Нырысьёсыз визьпогъёс туэ витетӥ классын ни. Шумпотымон соиз но: кык берло арзэ дышетскыны мылкыд карисьёс йылӥзы. Соин ик "а" но "б" классъёс но кылдӥзы. Урокын тодон-валанзэс будэтэм сяна, нылпиос пӧртэм кружокъёсы но ветло. Кылсярысь, сцена вылын шудыны, киужъёс пӧрмытъяны, крезьгурез валаны дышетско. Озьы ке но, анай-атайёслэн пиналъёссэс урокъёс бере чебер эктыны, йӧспӧртэм суреданы дышетэмзы потэ на вылэм. Но коньдон ӧжытэн но мукет мугъёсын сэрен, школаын уг тырмо зэмос дышетӥсьёс: хореограф, суредась но мукетыз. Кемалась ӧвӧл усьтӥськиз егит архитекторъёслэн кружоксы. Кивалтэ соин Касим Галиханов. Умой луысал, тодмо архитекторлэсь адӟем карысалзы ке мукетъёсыз но - ас ужзэс ӟеч тодӥсь-валась адямиос. Малы ми тужгес но сюлмаськиськом та сярысь? Таӵе центр усьтэмын, удмурт калыкмылэсь кылзэ, йылолъёссэ азинтон но соосты городын вордскем но будэм пиналъёс но егитъёс пӧлын юнматон вылысь, озьы ик - удмурт калыклэн ӵуказе нуналэз сярысь сюлмаськыса. Городын угось тужгес но секыт ас выжыдэ, асваландэ, ас лулпуштэ утьыны но узырмытыны. Удмурт интеллигенция пӧлын трос али гуртын вордскем но будэм адямиос. Но соосты ӝоген воштозы мукетъёсыз, кыкетӥ выжыысь интеллигентъёс. Соос пӧлын тросгес луозы ни городын вордскемъёс но будэмъёс. Кыӵеесь луозы соос, кыӵе улон сюрес быръёзы? Со сярысь малпаськыны кулэ туннэ! Таин валче, малпаськомы, умой лэсьтэ Ольга Константиновна Шилова, школамес Куӟебай Герд нимо гимназия карон сярысь сюлмаськыса. Малы бигеръёслэн Ижын асьсэлэн гимназизы вань, нош асьмеос ас шаерамы та ласянь бере кылиськом?! Ӟеч малпанэз улонэ пыӵатыны одно ик тыршоно. Шонерзэ вераса, шуг-секытъёс уно. Нырысь ик, школа пичи. Ньыль ар талэсь азьло куштэм нылпи садлэн юртэз азьвыл ваньмызлы тырме вал. Зэм, сое но туж кема сётыны курадӟизы. Нош табере?.. Вераны возьыт, но вератэк но уг луы: куинетӥ классын дышетскисьёс азьвыл сьӧрос (туалет) но мисьтаськон интыын воштӥськон дӥсьсэс, пыдкутчанзэс возё. Татын ик шудо но. Нырысетӥ класс азьвыл сиськон интыын дышетске. Дышетӥсьёслэн сэрегзы нош воксё ӧвӧл. Ярам, туэ озьы но тазьы инты ваньмызлы нош шедиз. Нош вуоно арын мар луоз? Кытын дышетскозы витетӥ, куатетӥ классъёсы потэмъёс? Калыкез дышетонъя министерствоын та юанлы шонерак валэктыны туннэ но уг быгато. Нош дыр ортче. Ижлы йыр бырйыку, ваньмыз сямен анай-атайёс куаразэс сётӥзы Анатолий Салтыков понна. Школаез паськытатыны юрттоз шуыса, солы туж оскизы вал. Но кызьы возьматэ улон, политикъёсмы берло ӵемысь вунэто юрттыны дась луэмзэс. Бадӟымесь сметаос но малпанъёс озьы ик кылизы бумага вылэ. Нош школа милемлы туж но туж кулэ. Зэмос бадӟым, чебер школа! Выльысь но выльысь синмаськиськом пиналъёсмылы: угось арысь аре визьмогес луо. Кырӟаны но, вераны но, кылбур гожъяны но дӥсьто ни, котькуд ужзэс, сюлэмшунытсэс поныса, мыло-кыдо лэсьто. Валамон ини, тазьы эрико но визьмо будыны соослы нырысь ик юртто дышетӥсьёссы. Нош шугадӟонъёс туннэ но пумтэм. Милесьтым сюлмаськонъёсмес нырысь ик мед тодысалзы Удмурт Элькунысь Калыкез дышетонъя министерство но Удмурт кивалтэт. Нырысь ик кулэ дышетскон юрт. Отӥяз мед быдэсмысалзы мукет малпанъёсмы но. Ойдолэ дэмен юрттом визьпогъёсмылы! Дышетскись пиналъёслэн анай-атайёссылэн нимынызы - Светлана Любимова. Медаль кисьто Алнаш ёросысь Туймыйыл гуртысь школа туэ кылдэмез дырысен даур тырмонзэ пусъе. Туннэ нуналлы отчы тодон-валан басьтыны ветлэ 241 дышетскись, нош визь-кенеш сётэ 26 дышетӥсь. Дышетӥсьёслэн дэмен ужзы но кужмо луэмзы шӧдӥське пиналъёслэн тодон- валанъёссы вылын. Берло куать ар ӵоже школаез 13 мурт медален йылпумъяз, со пӧлысь ньылез - зарни, укмысэз - азвесь. Туймыйылысь уноез нылъёс но пиос дышетсконзэс азьланьто Москваысь, Санкт-Петербургысь, Эстониысь но Удмуртиысь пӧртэм вылӥ дышетскон заведениосын. Юбилейлы дасяськыса (валэктонъёс сётэ школалэн кивалтӥсез А. В. Печников) - Сю ар - со огшоры лыдпус гинэ ӧвӧл. Куноез пумитаны, утялтыны, школаез та юбилейлы дасяны трос коньдон кулэ, нош тӥляд кыӵе югдурды та ласянь? - Коньдон ласянь югдур котькытын секыт, дыр. Милям но пӧртэм ӧвӧл. Туннэ дышетсконо школамы 23-тӥ арзэ сылэ ни, нош ӟеч-ӟеч тупатъян-выльдон ужъёс тыро-пыдо ортчытымтэ на. Толалтэ шорын куазь зорыса улэмен, школа борддоръёс котмизы, пильылӥськизы. Куашканы гинэ медаз кутскы вал. Озьы ке но, юбилейлы дасяськыса, школамес быгатэмъямы выльдыны тыршиськом. Кабинетъёссэ но коридоръёссэ буяськом. Солы кӧня ке коньдон роно висъяз ик. Со сяна, бадӟым юрттэт сётэ "Прогресс" колхоз, коньдон бичамын на школаын дышетскись пиналъёслэсь но, колхозын улӥсь пенсионеръёслэсь но. - Алексей Владимирович, нош кыӵе кусыпъёс возиськоды колхозэныды? - Умоесь. Ог-огмылэсь куронъёсмес быдэстыны тыршиськом. Ми соослы картофка бырйыны, сое бусыысь бичаны юрттӥськом. Пиналъёсын валче туэ уно гектар выль нюлэс мерттӥмы. Колхоз но милемлы юрттэ. Али, кылсярысь, школа садэз котыртыны штакетник сётӥз. Кытчы ке мынон вылысь, автобус висъяло. - Ёросысь мукет школаосын ӵошатыса, кыӵегес адӟиське Туймыйыл школа? Ужало-а кружокъёс? - Ми уиськоно луиськомы Алнаш но Варзи-Ятчи шор ёзо школаос сьӧры. Бен, коллективамы но азьветлӥсьёсмы вань. Тросэз дышетӥсьёсмы туэ аттестациез ортчизы яке вылӥ категория басьтон понна нюръяськизы. Умой ужало кружокъёсмы но. Пиос яратыса ветло пуэн ужанъя мастерское, нош мукетъёсыз кырӟанъя, эктонъя кружокъёсы. Школаын дышетскись пиналъёсмы, ёросын ортчем КВН-э пыриськыса, кыкетӥ инты басьтӥзы. - Школаяды туэ пиослэн военной лагерьзы ортчиз. Кызьы ке герӟаськемын вал-а со школалэн юбилееныз? - Котькуд аре со пӧртэм школаосын ортче, туэ ми дорын вал. Военной лагерьлэн аслаз программаез. Озьы ке но, тау карем потэ пиослы. Соос юрттӥзы школа садлэсь кенерзэ выльдыны. Мае аралод, сое ик кутсалод (валэктонъёс сётэ школаысь директорлэн дышетон удысъя юрттӥсез Н. С. Кузнецова) - Нина Степановна, туала выпускникъёс, азьвыл аръёсын ӵошатыса, кыӵеесьгес пото тӥледлы? - Туала егитъёс котыр ласянь шаплыесьгес. Тодон-валанъёссы но соослэн устоесь. Дышетӥсьёсмы но шаплыесь. Ужало но, кылзэс но верало. Кузьыли кар кадь, дырзэс жалятэк школаын тыршо. Дышетӥсьёслэн ӟеч ужзы нылпиослэн тодон-валанъёссы вылын шӧдӥське. Кылсярысь, туэ ёросын ортчем олимпиадаосын тросэз вормисе потӥзы. Нош нюлэс, экология но литература предметъёсъя ёрослэсь данзэ утизы шаерамы ортчем олимпиадаын. Пусйыны кулэ, 11-тӥ классын дышетскись Елена Прохорова, нюлэс хозяйствоя кыкетӥ инты басьтыса, конкурстэк Удмурт кун университетэ дышетскыны кутэмын ни. - Медалистъёсты вань-а туэ? - 26 выпускник пӧлысь одӥгез, Светлана Конюхова, азвесь медален йылпумъя. Азьвыл аръёсы школаез дышетӥсьёслэн нылпиоссыгес медален йылпумъязы. Берло аръёсы колхозын ужась анай-атайёслэн но пиналъёссы ӟеч тодон-валанъёссэс возьмато. Кылсярысь, Коноваловъёслэн, Белкинъёслэн, нош Головкинъёслэн кык нылпизы медаль басьтӥз. Азьланяз мукет семьяосысь но медаль басьтозы шуыса, оскон вань. Котькыӵе шуг-секытъёс пумисько ке но, дышетскон тросэзлы дуно усе ке но, анай-атайёс суй- пыдзэс уг юско. Соос нылпиоссылэн азьлань сюрессы сярысь ялан сюлмасько. - Дуно усе шуиськоды, книгаос но асьсэос-а басьто? - Берло аръёсы школаослы нокыӵе коньдонэн юрттэтъёс уг висъясько ни. Книгаос ласянь шугъяськоногес. Выль чаклам программая дышетоно ке, книгаос ӧвӧл. Бадӟым классъёсын дышетскисьёс асьсэос басьтоно луо. Куд-ог семьяосын ньыль яке вить дышетскись пиналъёссы вань. Соослэн коньдонзы уг тырмы бере, вуж книгаосын но дышетыны тыршиськом. Дышетытэк уд кельты ук. *** Коньдон поттыны уд сюлмаськиське-а шуыса юанэлы школаысь дышетӥсьёс серекъяса кадь валэктӥзы: "Пиналъёсыз ужаны ум дышетӥське, солы асьсэос но улонын дышозы али. Ужмес ми медален дунъяськом. Тодон-валанзы тырмыт луиз ке, коньдон поттыны но быгатозы". В. КУТУЗОВА. ПС: 26 июне Туймыйыл школа пусъе 100 ар тырмонзэ. Та нуналэ со куное вите азьвыл аръёсы дышетскемъёсты но та школаын дышетэмъёсты. Нырысетӥ тоннаосыз вань Вараксино тылобурдо вордон фабрикаын толалтэлы сиён дасяны кутскизы. Со понна дыраз тупатъязы кулэ луись техникаез. Басьтэм АВМ-1,5 агрегатсы вужмемын ни. Сое выльдоно луиз, куд-ог ёзъёссэ воштӥзы. Со вӧзы эшшо кыксэ басьтӥзы на. Моӵсы сузиз кык КСК-100 комбайн но кык жатка басьтыны. Одӥг комбайнлы нормая 100 га интые 425 га турын октоно луоз. Фабрика будэтэ 350 гектар клевер но люцерна, вань на 150 гектар виказы но сезьызы. Гужем ӵоже 1250 тонна витамино турын пызь изыны чаклало. Куазь кезьыт улэмен, турын каллен будэ. Озьы ке но, 11-тӥ июньысен кык АВМ-1,5 агрегатэн 74 тонна вож гранулаос дасязы ини. Трос аръем турынъёс 40 гектар вылысь октэмын. В.Лагунов. Вань удмуртъёслэн азьвыл чакламтэ ӧтчамзылэн удмурт калыклы Вазиськонэз Уно дауръёс ӵоже улытозяз, удмурт калык котькыӵе вакытэз адӟылӥз ни. Вал ӝутскон но лэзькон, шумпотон но куректон дыръёсыз. Выль дауре выжон азьын сизьым сю витьтон сюрсъем калык секыт югдуре учыраз. Пӧртэм мугъёсын сэрен, удмуртъёс кунэн кивалтон ёзъёслэсь палэнтэмын, шуыны луоз, озьы бере, удмурт кунлыкез быдтыны кышкытлык кылдэмын, соин валче шугоме асьме культураез, кылэз, искусствоез азинтон. Умойтэм югдурез возьмато Кун Кенешлэн кыкетӥ ӧтчамаз депутатъёсты быръён но властьлэсь ёъёссэ выльдон. Республикалэн парламентаз удмуртъёслэн лыдзы 11 процентозь кулэсмиз. Туэ тулыс тӥямын вал дасо аръёсын возиськем ӟеч сям - азьвыл кун властьлэн кык вылӥ кивалтӥсез пӧлысь огез одно ик удмурт луылӥз. Ӧвӧл ни табере удмуртъёс Россиысь Федеральной Собраниын но. Республикаямы улӥсьёс ог-огзылэсь палэнскемын. Озьы луэмын, выжы калыклэсь кулэяськонъёссэ умой-умой чакламтэен. Удмуртиын будэ странаямы губернизация ортчытон сярысь вераськонъёслэн йылэмзы пумысен шугъяськон. Республикаямы кылдэм общественно-политической югдурез эскерон вылысь люкамын вал Вань удмуртъёслэн азьло чакламтэ съездзы. Ми, та Бадӟым ӧтчаме лыктэмъёс, вазиськиськом вань удмурт калыклы, политика ужпумъёсы сэзьгес пыриськыны но удмурт нацилэсь кунлыксэ быдтонэз дугдытонъя юн ужрадъёс кутыны ӧтьыса. Асьмеос умой валаны кулэ: азямы сылӥсь ужпумъёсты нокин но мукетыз уз быдэсты. Удмуртъёс ултӥянэз весь шыпыт чидаса улӥзы ке, удмурт калык басьтэм азинсконъёссэ но пумен ыштоз, озьы ик ыштоз инкуазь но мукет узырлыкъёссэ, отӥяз - нацилэсь вуонозэ но. Асьмелы дышетскыны кулэ политикаын нюръяськонлы. Туэ декабре ик возьматоно ни, удмурт калыклэн общественной огазеяськонэз республикаын кужмоосыз пӧлы пыре шуыса. Асьмемыз вите Удмуртилы тӧро быръён, соку удмурт калык ас шаерез сярысь рос-прос сюлмаськемзэ но солэн азьланез понна кыл кутыны дась луэмзэ возьматыны кулэ. Ми нош пусйиськом, республикалэн тӧроез огдыре правительствоен но кивалтыны кулэ шуыса. Асьмеос валаны кулэ ни: ӵош, огазе кариськыса гинэ утьыны быгатом калыкмылэсь ӵуказе нуналзэ. Нацимес утён но азинтон понна, асьмелы кулэ ог-огмылы йыркурмес вунэтыны но азьлань мыныны. Асьмеос огазеяны кулэ удмуртъёслэсь но республикаын улӥсь мукет калыкъёслэсь азьпалан ӟеч улон понна тыршемзэс. История возьматэ, секыт вакытэ адямиослэсь вань кужымзэс республикаын улонэз умоятон уже кутыны кулэ шуыса. Асьмеос Удмуртиын котькуд улӥсьлы, пайдаё ужан вылысь, оскымон луонлыкъёс кылдытыны кулэ, со понна палэнсконо керетонъёслэсь, юнгес кусып тупатоно бускель улосъёсын но финн-угор республикаосын. Вань удмуртъёслэн азьло чакламтэ ӧтчамзы удмурт калыклы мылкыд каре аслэсьтыз кулэяськонъёссэ утёнын юн, кужмо кариськыны. Кутэмын 1999-тӥ арын 19-тӥ инвожое. Ижевск город. Фермаосын Удмуртия - нырысь интыын Турынъёс туэ удалтэмын: зор-кот тырмиз, пӧсь ӧй вал. Июньлэн кутсконаз киземез но, возь вылысез но ӝог ӝутскиз, интыен-интыен пельпумозь будӥз ни. Озьыен, пудо сиён луоз. Та нуналъёсы синмаськымон ужало шаерысьтымы фермаос. Кылем арен ӵошатыса, скаллы быдэ килограммлы ятыргес йӧл кыскиськом. Республикая та лыдпус туннэ 11,3 миым 10,6 килограмм вал. Россия Федерациын - 9,8. Урал котырысь улосвылъёсъя ке учконо, Удмуртия ваьзэ азьпалтэ. Ӵошатон понна тодматске бускельёсмылэн ужаменызы. Киров областьысь скал кыскисьёс скаллы быдэ али басьто 10,5 килограмм, Пермьын - 10,2, Курганын - 9,1, Челябинскын - 8,5, Свердловскын - 9,4, Оренбургын - 10, Татарстанын - 10,9, Марий Элын - 10, Башкортостанын - 9,8 килограмм. Кылем арын та вакытэ бигеръёс асьмелэсь шӧдскымон трос кыско вал - 11,7 килограмм. Туэ асьмеос соосты азпалтӥськом ке но, та лыдпусозь ӧм вуэ на. Районъёс пӧлысь тужгес но ӟеч ужало играос. Пуж-пуж Йӧл кыскон сярысь ке верано, соослэсь адӟем карыны кулэ, дыр. Та вакытэ йырлы быдэ 13,6 килограмм котырын люкаське. Играос бӧрсьы мыно Воткинск, Вавож, Юкаменск районъёсысь фермаос. Лябгес ужало Кизнеръёс. Соос 9,7 килограмм сяна уг кыско. Но кылем арын сярысь - со быдэс килограммлы ятыр. Оглом республикая ке учконо, 25 район пӧлысь 5 район 12 килограммез ортчиз ни, 8- сэз - 11 килограммез. Кызьы шуизы Гурт удысъя но сиён-юонъя министерствоын, продукция будӥз, скалъёсты возь вылъёсы, гужем лагерьёсы поттэм бере. Фермаосын возёноосызлы но ӟеч сиён шеде: турнам турынэз вис карытэк вортто. Л.Медведева. ЧУРЪЁС, ЧУРЪЁС... Тани 54-тӥзэ туэ пусйим Вормон нуналэз. Нош сивуосмы туннэ но уг куасьмо. Вормон понна келям фронтэ атайёсмес, агайёсмес, кузпалъёсмес. 10-12 аресысен гырыны кутским, вань секыт ужез выламы басьтӥм, сютэм будӥм. Атайтэк будэм пиналъёс но пал кышноос табере асьсэос но пересьмизы ни, но умой улонэз ӧз адӟе на. Мар басьтод 300-400 манет пенсиен: няньлы-а, пулы-а, эмъюмлы-а тырмытод сое? Туж ӝож потэ, малы милемлы кулэезъя саклык уг висъяло. Мед карысалзы война вакыт курадӟемъёслэсь пенсизэс дальневосточникъёсын огмында. Соку вӧсьмы но, оло, ӵошкасал. Мед адӟысалзы та гожтэтэз вылӥ кивалтӥсьёс, депутатъёс. И. Камашев. Кияса черкогурт. Самараын бадӟым тылпу ортчем бере, сыӵе шудтэм учыръёслэсь утиськонлы быдэс Россиын саклык висъяны кутскизы. Та ласянь тэк уг пуко шаерысь тылпуэн нюръяськисьёс но. Ижевскын гинэ уно вашкала юртъёс сыло на, тылпу ласянь кышкытлык кылдыто. Со ӟуч но удмурт театръёс, технической университетлэн Горький нимо ульчаысь азьвыл юртэз. Тужгес но тылпу кысӥсьёсты сюлэмшугъяськытэ азьвыл правительстволэн Советской ульчаысь 1 номеро юртэз. Ӵапак отын алигес дышетсконъёс ортчытэмын вал. Сое радъязы УР-ысь Правительстволэн Граждан оборона ужпумъёсъя но кышкыт учыръёслэсь утиськонъя комитетэз но Югдурез утёнъя министерстволэн тылпулэсь утиськонъя управлениез. Б. Сергеев. Туспуктэмъёс вылын: Советской ульчаысь 1 номеро юртын ыдшетсконъёс дыръя. В. Камашевлэн фотоосыз. Пичи Пурга ёросысь Каймашур гуртын вордскемъёс но соослэн ӵыжы-выжыоссы! Ӧтиськом тӥледыз гурттылэн нуналаз. Пумиськон ортчоз 26-тӥ инвожое (июне) 10 часысен. Правительствоысь иворъёс Адямиосты воштоз компьютер Кык ар талэсь азьло Удмурт Республика Россиысь мукет куать улосъёсын ӵош ужаны кутскиз калыкез улон-вылонын утёнъя ёзъёслы кадръёс дасянъя программа бордын. Дышетскем адямиос кыл кутозы нылпиослы пособиос тырон понна. Та дыр ӵоже ёросъёсысь но городъёсысь пенсиосъя но пособиосъя отделъёсы 3,6 миллион манетлы техника вуиз. Со пӧлысь республикамылэн бюджетысьтыз висъямын 555 сюрс манет гинэ. Та удысэ компьютеръёсты пыӵатон луонлык сётӥз ужасьёслэсь лыдзэс кулэстыны. Озьы чакламъя 1430 интые штатэ басьтэмын 210 мурт гинэ. Ог 600 сюрс манетлы ичигес коньдон кутӥське статуправленилэсь ёззэ возёнлы, почта ужъёслы. Ӝоггес дасясько пенси тыронъёсъя документъёс но. Дас сизьыметӥ июне Правительстволэн кивалтӥсез Николай Ганза, Калыкез улон- вылонын утёнъя министр Светлана Андреева но солэн нырысетӥ воштӥсез Наталья Кузнецова пумиськылӥзы калыкез шуг-секытъёслэсь утёнын реформаосъя Россиысь фондаз ужасьёсын Владимир Трубинэн но Елена Феоктистоваен. Чаклам ужрадэз 2000-тӥ арозь быдэстон вылысь ӵош ужан сярысь кенешемын. Туэ калыкез улон-вылонын утён ёзъёс 500 сюрс долларлэсь унолы тӥрлык басьтозы, республика висъялоз та коньдонлэсь куиньмос люкетсэ гинэ. Удмурт Республикаысь Правительстволэн секретариатэзлэн пресс-службаез. Алексей Ельцов Ӝыны даур ини ожын Тани туннэ но нюжтӥське Пересь ожчи ю бусытӥ. Кызон пӧсьтэ но сайкатске, Быдэс уйзэ ветлӥз кытӥ? Пычей сямен портэ-вандэ Шимес ожысь ваем чалеп. Вӧсь луыса, солдат гуньдэ - Кылёз на-а меда улэп? Ӝыны даур ини сӧсыр, Туннэ гинэ кадь вал война. Суй-пыд ни куалекъя дыр-дыр, Ӟигар меда кӧня вань на? Ӝыны даур ини ожын, Ӝыны даур возе пыӵал. Ӧз кылды улыны жин-жин, Ӧй вал уез изён чал-чал. Одӥг мурт котыре Мон малпасько, асьмелы кулэ ӧвӧл весь ӝожтӥськыса улыны. Вань ук пӧламы син шорын будӥсь адямиос. Сыӵеос трос гинэ. Тани али ик вераны луоно Светлана Смирновалэсь, Алексей Красильниковлэсь, Владимир Байметовлэсь, Алексей Шкляевлэсь нимъёссэс. Та адямиос пӧлысь кудзэ ке рос-прос дасяд ке, солы котыр ласянь юрттӥд ке, со быгатысал Государственной Думае шедьыны, вылӥ мандат басьтыны. Туэ ар пумын асьмеос одно ик огазеяськыны кулэ ортчымон, кызьы шуо, проходной кандидат котыре. Тыршеммы- бызьылэммы юнме медам луы шуыса огазеяськоно мукет движениосын, партиосын. Та ласянь асьмелы, удмуртъёслы, матынгес луо аграрийёс но коммунистъёс. И. МАКСИМОВ. Ӧтчаським. Кенешим. Визьматским? 19-тӥ июне Операя но балетъя театрын ортчиз Вань удмуртъёслэн ВИИ (азьло чакламтэ) ӧтчамзы. Ньыль сю пала делегатъёс ог кык сю ӧтемъёс лумбыт кенешизы азьланьын улонэз умоятон сярысь. Кыӵе дунъет сётыны луоз ортчытэм ужрадлы? Быдэстӥз-а со пусъем ужпумъёсты? Съезд возьматӥз, кыдёкын улӥсь удмуртъёс но кылдэм югдур пумысен шугъясько шуыса. Валамон, интеллигенция, солэн азьпал радаз вамыштӥсь эшъёс та ласянь асьсэдыз дӥсьтысагес возё, мылкыдзэс кивалтӥсьёс дорозь вутто. Но озьы ик луыны но кулэ, дыр. Ӧтчаським. Кенешим. Документ кутӥм. Азьпала выль вамыш лэсьтӥм. Мар но со ласянь визьматским но, вылды. Уно адямиослэсь, соос пӧлын вылӥ кивалтӥсьёслэсь, зэмос мылкыдъёссэс тодӥм. Нунал ӵоже вал ӟеч верамъёс, вал янгышъёс. Котьмалэсь дуноез - удмурт калыклэн ыстэм муртъёсыз ог-огзылы матэгес луизы, съездысь азьланезлы оскон мылкыдын кошкизы. Ӧтчам возьматӥз кужыммес. Солэн тулкымъёсыз табере мед вуозы котькуд гуртэ, котькуд адями доры. И. Лебедев. Съезд ужан дыръя. В. Камашевлэн туспуктэмъёсыз. Тау кариськом "Гербер" шулдыръяськонын шуныт но ӟеч мылкыдын пумитамзы понна тау кареммес вераськом Пичи Пурга ёросысь "Колос" колхозын тыршисьёслы, солэн кивалтӥсезлы Валентин Анатольевич Васильевлы. Сӥзиськом ужазы азинсконъёс, ӟеч тазалык! Селта ёросысь делегация. 58 ар талэсь азьло кутскиз Быдӟым Отечественной война Геройёслэн пытьыостӥзы Кызьы ке кезьыт тол нуналъёсы мон Юкаменск, Красногорье но Завьял ёросъёстӥ лекциос лыдӟыса ветлӥ. Дышетскисьёс но дышетӥсьёс ӵемысь юалляськылӥзы: "Кытысь тодӥды Германиен война кутскем сярысь?" "Мар бордысен кутскиды Брестэз утисьёсты утчаны?" Озьы вал. 1941-тӥ арын 22 июне куазь пӧсь кариськиз. Оӵ тымет дурысь Киров нимо парке уно калык лыктӥз. Мон, сизьым аресъем пияш, соку нырысьсэ адӟи самолётэз. Сое соку малы ке аэроплан шуыса нималлязы. Сурон шлемен лётчик юанъёсмылы мылысь-кыдысь валэктонъёс сётэ. Егитъёс ӝутскем мылкыдын кырӟало: "Ӵуказе ке война..." Шунды яркыт пиштэ, котькытын пальпотӥсь ымныръёс. 12 часын радио пыр кунсьӧр ужъёсъя нарком Молотов вераськиз но Германилэн Советской Союз вылэ войнаен омырскемез сярысь ялӥз. Ми соку ӧм тодылэ, Ижевсклы 2229 иськеме интыяськем Буг дорын вазь ӵукна ик секыт ожъёс мыно ни вал шуыса. Лек ожез нырысь ик ас вылазы басьтӥзы Брест гарнизонысь боецъёс но командиръёс. Тужгес но кышкасьтэм луэмзэс возьматӥзы полковниклэн Алексей Кузнецовлэн 17-тӥ Брестской Краснознамённой пограничной отрядэз но майорлэн Петр Гавриловлэн 44-тӥ стрелковой полкез. Гаврилов бӧрысь Советской Союзлэн Героез луиз. Брест крепостез утисьёс пӧлын вал Удмуртиын вордскемъёс но. Соос сярысь мон тодӥ 35 ар талэсь азьло. Соку мон Якшур-Бодья ёросысь Кыква школаын историлы дышетӥ. Одӥгаз шутэтскон вакытэ СССР-ысь Обороная министерстволэн архиваз кошки. Со интыяськемын Москва вӧзысь Подольск городэ. Войналэсь историзэ эскерисьёсты Белоруссиез фашистъёслэсь мозмытэм дырысен 20 ар тырмонлы сӥзем ужрадэ ӧтчазы. Со ортчиз Москваын Союзъёслэн юртазы. Шумпотыса тодматским дано адямиосын. Отын вал Советской Союзлэн Маршалэз Филипп Голиков но Завьял ёросысь Ярушки гуртын вордскем землякмы Советской Союзлэн Героез генерал- майор Александр Сабуров. Соку Александр Николаевич ӵектӥз Брест понна ожмаськемъёсты утчаны. Озьы мон вуи Белоруссилэн ӵапак шунды пуксён палаз интыяськем городэ. Нырысь ик тодматски Брест крепостез утёнъя музейлэн архивеныз. 17-тӥ отрядысь кышкасьтэм воинъёс пӧлын вылӥллям бесермян калыклэн пиосыз но - Юкаменск районысь Ежевское починокысь Александр Тимофеевич Антуганов но Яр районысь Пепеево гуртысь Аркадий Степанович Матвеев. Кавалеристъёс соку лек ожын быриллям. 1964-тӥ арын 9 июле сизьым пограничникъёслэсь нимтулъёсс тодыса, Ижевске вуи. Брестэз утись солдатъёсты утчан ужме азьланьтӥ. 1965-тӥ арын 24 мартэ Ежово селоысен пумитай нырысетӥзэ Брест крепостез утисез Габдульбар Абашевез, Брестысь полковой школаысь азьвыл курсантэз. Габдульбар Хатимович вордскемын Бадӟым Палагай бигер гуртын (Юкаменск ёрос). Горд Армие басьтэмын Ижевскысь Азин райвоенкоматэн 1940-тӥ арын октябре. Егит пиосты келязы Брест-Литовске. 1965-тӥ арын май-июле Октябрь райвоенкоматлэн (азьвыл Азин военкомат) архивысьтыз шунды пуксён палан ожмаськемъёслэсь нимтулъёссэс шедьтыны луиз. Та ласянь бадӟым юрттэт сётӥз майор Мартынов. Ижевскысь 30-тӥ школаез йылпумъям мурт Федор Версальский ӟуч театрын художник луыса ужаз. Войналэн нырысетӥ нуналъёсаз ик лек ож ӝуэ пыриськиз. Одӥг пол Брестэз утисьёслы сӥзем телепередача нуи вал. Соку мон Федор Федорович Версальскийлэсь но нимтулзэ поттылӥ вал. "Мон варенья пӧзьтӥсько вал. Соку пиелэсь, Федорлэсь нимзэ поттылӥзы. Куаляк луэменым вареньяен тэркые ик усиз", - вера драмтеатрысь азьвыл артистка Зоя Васильевна Версальская. З. В. Версальская ялан утьыса возе яратоно пиезлэсь куать гожтэтъёссэ (витез гожтэмын война кутскытозь, куатетӥез - война кутскыку). Ф. Ф. Версальский 1941-тӥ арын 21 феврале гожтэ, "война кутскытозь дыр трос ӧз кыльы ни шуыса. Гожтэт таӵе кылъёсын йылпумъяське: "Ужъёсы огъя умой мыно, шумпотӥсько, мыным Родинаме утьыны шуд усиз шуыса. Горд Армиысь саламен тӥляд внукты Федор. Нош апреле Федя анаезлы гожтэ: "Выжим Брестэ. Улӥськом вуж крепостьын. Толон гожтэт гожтонме куспетӥ кароно луи. Полклэн штабаз агитаторъёслэн собраниязы ӧтизы. Табере ведь мон ротаысьтымы борддор газетлэн редакторез но луисько на". Зоя Васильевналэн верамезъя, Федя уно лыдӟиськиз но усто суредаз, быгатыса кылбуръёс гожъяз. Ф. Ф. Версальский секыт ожъёс дыръя. Вадим Сивков ульчаысь Октябрь военкомат вӧзтӥ ортчыкум, котьку тодам ваисько курсантэз Габдульбар Абашевез но артиллеристэз Александр Осотовез, Федор Версальскиез но соослэсь ӵош ожмаськем эшъёссэс - Василий Щенинэз, Аркадий Чуринэз, Николай Широбоковез. Соос 58 ар талэсь азьло нырысетӥ вамышъёссэс лэсьтӥзы фашист Германиез пазьгонын. Оскисько, асьмелэн землякъёсмы-солдатъёсмы "По местам боевой славы" книгаям одно ик шедёзы шуыса. Виктор Поздеев, отставкаысь капитан. Туспуктэмъёс вылын: автормылэн "Они защищали Брестскую крепость" книгаезлэн вылтусыз; Федор Версальский. Алексей Алексеевич Ельцов вордӥськиз 1955-тӥ арын 13-тӥ ноябре Яр ёросысь Тум гуртын совхозысь рабочийлэн семьяяз. Нырысетӥ кылужъёсыз но кылбуръёсыз печатласькизы ай, школаын дышетскыкуз, "Сельская правда" ёрос газетын. Кӧня ке дыр ӵоже дышетскыса, 1975-тӥ арын луиз техник-механик. Ужаны ыстӥзы "Удмуртсельпроект" институтэ. Отын тыршиз, армие кошкытозяз. Службаез дыръя связист вал Южно-Сахалинск городын. Соку но мылысь-кыдысь печатласькиз дивизилэн но армилэн газетъёсазы. 1977-тӥ арысен корреспондент луыса ужаны кутскиз "Советской Удмуртия" газетын. 1989-тӥ арысен - арнялы быдэ потӥсь "Вестник Тастелерадио" газетлэн редакторез, отӥяз - Удмурт радиолэн нимысьтыз корреспондентэз. 1996-тӥ арысен - "Кизили" журналлэн валтӥсь редакторезлэн воштӥсез. Йылпумъяз Удмурт кун университетэз. Зэмос журналист луыса, мылысь-кыдысь печатласькыны кутскиз шаерысьтымы газетъёсын но журналъёсын. Вить ар ӵоже дасяз но нуиз "Жильырты, ошмес!" нимо радиопрограммаез. Веранъёсыз но печатласькем ужъёсыз кӧня ке пол пусъемын Удмурт Элькунысь Журналистъёслэн огазеяськонзылэн но Инкуазез утёнъя кун комитетлэн премиосыныз. 1989-тӥ арын потӥз кылбуръёсыныз "Ӟардон пумитэ" нырысетӥ книгаез. 1995-тӥ арын - покчиослы кылбуръёсыныз "Кӧжыпок" книгаез. Таиз вылӥ дунъет басьтӥз Нижний Новгородын инкуазез утёнлы сӥзем адӟытонын. 1998-тӥ арын "Удмуртия" издательствоын потӥз кылбуръёсыныз "Урт" книгаез. Уноез ужъёсыз сӥземын инкуазез утёнлы. Удмурт Элькунысь Инкуазез утёнъя кун комитетлэн куремезъя, Алексей Ельцовлэн кылъёсызъя кылдытэмын "Мусо шаер" баллада-кырӟан. Печатласькылӥз коми-пермяк но чуваш кылъёсын. Ӟуч кылын "Веселые парнишки", "Луч" журналъёсын, "Удмуртия" литературной газетын. Шаерысьтымы крезьгурчиос Алексей Ельцовлэн кылбуръёсызъя пиналъёс но мӧйыос понна гожтӥзы ини куамын ёрос кырӟан. Запасысь солдат Мынэсьтым атайме Дмитрий Баймурзинэз, солэсь эшъёссэ Василий Смагиновез, Аркадий Сизовез, Николай Беляевез но Тимофей Тихоновез армие басьтӥзы 1943-тӥ арын 9 декабре. Куиньзэ пиосты нуизы Казане, берлооссэ кыксэ - шунды ӝужан пала. Казаньысен пияшъёс ожлы дасяськыны кутскизы: ар пала маршировать каризы, пыӵал тӥрлыкен тодматскизы, ыбылӥськизы, "ож" бусыын "тушмонэз" уллязы. Митя пулемётчик луиз, Вася - снайпер, Аркаш - бронебойщик (танкъёслы пумит дасям кузь гумыё пыӵалэн - ПТР-ен). Дышетэм солдатъёсты фронтэ келян азьын люкылӥзы "маршевой ротаосы", выль дӥськут, пыӵал тӥрлык сётӥзы. Одӥгысьтыз ротаысь Аксак Митя починкаысь эшсэ, Чабак Коляез, адӟиз. "Митя! - кеськиз со. - Ми фронтэ кошкиськом!" Киыныз шонтӥз: кин тодэ, оло, берлозэ адӟиськизы. Сӧсырмыса бертӥз со ожысь. Солэсь тодӥзы: Аркашлэн гадьтӥз пуля потэм, нош Васялэсь кизэ узвесь юдэс ишкалтэм. Госпитальысен гожтэт ыстэм: "Бертӥсько!" Но сое ноку но ӧз адӟылэ ни: фронтысь кошкись санитарной поездэз фашистлэн самолётэз пазьгем. Озьы быризы Митялэн эшъёсыз... "Мон но бырысал, дыр, - вера атай, - но командире юрттэмен улэп кыли". Кызьы со вал? Берытском службаезлэн кутсконаз. Призывникъёсты нырысетӥ уяз ик Казань дорысь нюлэскысь лагере интыязы. Улон интызы - 100 метр кузьдалаем землянка. Пушказ пеймыт, шор ветлонлэн кык палаз ик улыно-вылыно нараос, куролэсь валесъёс. 800 адями интыямын вал отчы (4 рота быдэн 200 солдатэн). Пеймыт. Митя мырдэм шедьтӥз интызэ. Нош отчы москвич интыяськем ни - улляса лэзиз. Буш инты утчаса, кыӵе ке ӧс доры вуиз, пыриз. Ленинской комната вылэм. Котомкаысьтыз нэнэезлэсь лэзем пот няньзэ, курег бурдзэ сииз но умме усиз. Сайказ, тревогаез кылыса. "Подъём!" кеськемез кылымтэ. Стройын нимтулзэ кеськиллям - вазись ӧвӧл. Соку гинэ сайкам пияшез утчаса шедьтӥллям, султытӥллям строе. "Кин тодэ писарьлэсь ужзэ?" - юало командиръёс. Митя вазиськем (армие басьтон азьын со сельсоветын ужа вал). Озьы со батальонлэн штабаз писарь луиз. Татын ик тодматскиз командиръёсыныз. Туж матынэсь луизы гвардиысь капитанэн Тимофей Ивнаович Порталенкоен. Курск областьысь вал со, семьязэ фашистъёс быдтӥллям; Митяез аслыз пи карыны малпа вал. Сӧсырмыны шедьыса, Ижын госпитальын кыллем. Собере Казане лэзиллям. Пияшлэсь Удмуртиысь луэмзэ тодыса, со рос-прос юалляськиз гуртоосыз сярысь. Одӥг пол лагере чиганъёс лыктӥллям. Одӥгез кырым пыдэсэ учкыса гинэ но вераны быгатэ вылэм солдатлэсь ортчем но вуоно сюрессэ. Митя но эшезлэсь ӝыны пилет сакыр курыса дораз мынэм. Паймытэм сое чиган: "Атаед ожын быремын ни, гуртад пересьёсыд но вынъёсыд кылемын". Зэм, атаез 1942-тӥ арын Сталинградын быриз. Гуртын - синтэм пересь дядяез, анаез но быдэ вуымтэ вынъёсыз. Фронтэ кошкыны дыр вуэм бере, капитан сюлмыз нёркак луыса ик шуиз: "Гуртад югдур умой ӧвӧл, атаед быремын, семьядэ Пушкин-а, мар-а, сюдоз?! Бырод тон ожын. Ӵуш фамилидэ списокысь!" Эшъёсызлэсь висъяськемез уг пот ке но вал, кылёно луиз. Ар куспын полклэн школаяз младшой сержант луиз, "Максим" пулемётлэн расчётэныз кивалтӥз. 1944 арын 10 июле полкез келязы Белоруссие. Немецъёс соку чигнало вал ни шунды пуксён пала. Фронтэ дасяны кутскизы интыысь калыкез дезертиръёсты, баптистъёсты но мукетъёссэ. Лагерь интыяськемын вал Минск дорысь Урочище пичигес городын, нюлэскын. Минск соку туж зол куашкатэмын вал. Станциын чугун сюресъёс номырлы ярантэм каремын: ожъёс дыръя вокзал куинь пол киысь кие вошъяськиз. Кӧшкемыт суредэз солдатъёс адӟылӥзы, дышетскыны ветлыкузы. Одӥг пол ротаос Логойской шоссе кузя "наступать" каро вал. Ӝыт пал кыӵе ке ӝуам вуко доры вуизы. Ӵыпет кыремын ни. Отын ик пичигес ӝуам гурт. Бырем коркаос азьын шыпыт сыло ӵуштаськем, ӵужектэм кызьпуос. Кытын но отын эгырӟем капка юбоос юрттэт курись киос кадь инме мычиськыса сыло. Шимес гурт бервылэтӥ малпаськыса, боды вылэ пыкиськыса губырскем пересь поръя. Тӧдьы йырсиосыз туж бадӟым куректонэз адӟемез сярысь верало. Малы ке одӥг солдат но юалляськыны ӧз дӥсьты гуртлэн нимыз сярысь. Шимес суред ваньзылэсь мылкыдзэс зӥбиз. Дасо аръёс ортчыса гинэ быдэс дуннее тодмо луиз йырсиез пужырскытӥсь "Хатынь" кыл. Пӧсь гужем 1943-тӥ арын фашист карательёс та гуртэз шуак котыртӥллям. Отын соку, пересьёс но нылпиос сяна, нокин ӧй вал. Вань улӥсьёссэ пытсаллям обине (сарае). Одӥгез егит кышномурт валес вылаз пинал возьма вылэм, султэмез луымтэ. Фашист сое кӧтаз бышкалтэм. Обинез котыр ласянь бензинэн пазяса ӝуатӥллям. Потыны турттӥсьёссэ ыбылӥллям. Озьы гуртэ одӥг улэп адями но кыльымтэ ни. Но та шимес йыружез адӟем одӥг пияш. Мумиз сое быронлэсь утем, мугор улаз ватыса. Мукетыз адӟись, пересь воргорон, калыкез быдтыкузы артысь гуртэ укшам. Вал мон Хатыньын. Кыдёкысен адӟиське кулэм пияшез киосаз возись пересь. Сюлворыса кадь со шуэ: "Адямиос, уте дуннеез сьӧсь кужымъёслэсь!" Бен, табере со пересь кисьтэмын бетонлэсь. Белорус музъем вылын Хатынь сямен ик эшшо 185 гуртъёс быдтэмын, отын 260 концлагерь вал. Крематорий гуръёсын виемын но сутэмын 2 миллионлэсь уно адями. Со быремъёс пӧлысь котькудӥз ньылетӥез белорус! Быдэс дунне тыр жонгето гырлыос, бырем гурт сярысь тодэ вайытыса. Но юнме, лэся. Тани али но син азямы Югославиез пӧрмыто ни выль Хатыньлы. Горд Армия фашистъёсыз пырак дуринчи карозязы улляз. Нош полклэн школаез Вормонэз Минскын пумитаз. Полк ож сюрессэ йылпумъяз, солдатъёс гурт палазы кошкизы. Кылизы на ог тямыс офицер но сержант. Сӥзьыл соос доры дивизиен кивалтӥсьлэн юрттӥсез вуиз. Солдатъёслэн гадязы "За победу над Германией" медальёс бырттылӥз. Солэсь юазы: "Ма понна? Ми ожын ӧй вал ук." Офицер шуиз: "Армия запасной войскоостэк уг луы. Тӥ ожлы солдатъёсты дасяды". 1946-тӥ арын тулыс Митя огдырлы отпуске куриськиз. гуртаз вуыса, корка пыриз. Адӟе: пересь дядяез пуклёк вылын шундыберган пуд кора. "Мар озьы кариськод?" - юа. Пырем муртлэсь куаразэ пересь шуак ӧз тодма. Собере валатскиз, ӟыгырскизы. "Тани вукое нуыны дасясько, пызь луоз". Паймонэз ӧвӧл солы. Уго война бере ог 10 ар ӵоже гуртын нинэз, потэз, гурыез куасьтыса-изыса пызь нергеен сураса "нянь" пыжылӥзы. Соин-а ӟигар пыроз? Ӝоген анаез но выныз вуизы. Бусыысь салазкиен куро ваиллям. Кыӵе шумпотон вал пизы-агайзы бертэмлы! Отпускез бырем бере Пичи Пурга райвоенкоматлэн комиссарез Мальцев солдатэз Казане службазэ йылпумъяны келяз. Ньыль ар ортчыса, Митя Аксаке бертӥз . Кышнояськиз, корка пуктӥз, нылпи будэтӥз. Колхозын председатель, бригадир луыса ужаз. Собере клубен кивалтыны кутскиз. Вань сюлэмзэ сётыса, пиналъёсын ужаз, мунё театр кылдытӥз, ачиз ик "геройёссэ" лэсьтӥз, гуртъёстӥ спектакльёс возьматъяса велӥзы. Берлогес ни художник-оформитель вал. Ас мылкыдызъя клублэсь борддоръёссэ суредаз, трос ужъёсыз гуртлэн историезлы но инкуазьлы сӥземын. Войнае бырем солдатъёслы сӥзьыса, альбомъёс дасяз, сельсоветысь котькуд 166 быремлэсь туссэ суредаса, кытын ожмаськемзэ но быремзэ пусйыса. Ог вить ар кошкиз та ужлы. Огдыре ик колхоз правленилэн юртаз историлы сӥзем музей усьтӥз. Кема дыр ӵоже пенсионеръёслэн азьветлӥсьсы вал. Но таӵе бадӟым уж лэсьтэменыз но культура удысысь дано ужась нимлы "ӧз кыскы". Сое сётыны мукет мертэтъёс кулэ, лэся... Дано нимъёс мукетъёсызлы шедизы. Котькуд адямилэн аслаз улон сюресэз. Котькудӥз сое ас сяменыз ортче - я ӝуаса, я ӵындыса, яке яркыт тыл сьӧры ватскыса. Нырысьёсыз ӧжытгес. Соосты дыраз адӟыны кулэ вылэм. В. Баймурзин, Пичи Пурга ёросысь Аксакшур школаысь дышетӥсь. "Асьмелэн ваньмыз пӧрмоз" Кылем покчи арняе Кун Кенешын ортчиз Удмурт Республикаысь ёросъёслэн но городъёслэн кивалтӥсьёсынызы семинар. Сое усьтыса, Кун Кенешлэн Тӧроез Александр Волков тодматӥз Удмурт Республикаын, Урал улосын но огъя Россия Федерациын экономика ласянь кылдэм секыт югдурен. Пермьын алигес ортчиз Урал улосысь областьёслэн но республикаослэн экономика удысын ӵош ужанъя Ассоциацизылэн Советэзлэн пумиськонэз. Отын верамын вал таӵе лыдпусъёс: 1990-тӥ арын Уралысь предприятиосын 160 сюрс гурт ужан машинаосты бичало ке вал, али - 9 сюрс гинэ. Шӧдскымон кулэсмиз капчи промышленность удысын вузъёсты поттон - 1990-тӥ арен ӵошатыса со али 15 процент гинэ луэ. Соин валче асьме дорын вузъёсты поттонэз паськытатон, сярысь ужпум ӝутске. Зэм, сое ӝутон но азинтон понна кулэ пайдаё ужась власть. Татын нырысетӥ интые пуктоно кун власть но интыосын ас коже кивалтон органъёс куспын ог-огеныд ӵош ужанэз. Со ужпумлы ик сӥземын вал семинар. Отчы ветлэмъёс эскеризы территориосын ас коже кивалтон ёзъёслэсь ужзэс радъянэз, ёросъёсысь быръем органъёслэсь но гурт администрациослэсь ог-огенызы ӵош ужанъя амалъёссэс. Бадӟым саклык висъяськиз республикаысьтымы ёросъёслэсь но городъёслэсь Уставъёссэс матысь дыре пусъён ужрадлы. Вераны кулэ, та выллем семинар-совещаниос табере ортчылозы толэзьлы быдэ. Вуонозэ кенешез ортчытыны чакламын июльлэн кыкетӥ ӝыныяз. Отын сэрттэмын-пертчемын луоз ёросъёслэн но огъя республикалэн туэ ӝыны арлы социально-экономической азинскон сюресэз. Пумиськонэз йылпумъяса, Александр Волков шуиз: "Мон оскисько - асьмелэн ваньмыз пӧрмоз". Семинарлэн ужаз пыриськизы Кун Кенешлэн Тӧроезлэн нырысетӥ воштӥсез Павел Вершинин, Кун Кенешлэн Тӧроезлэн воштӥсез Светлана Смирнова, Кун Кенешысь ялан ужась комиссиослэн кивалтӥсьёссы, аппаратын ужасьёс. Удмурт Республикаысь Кун Кенешлэн пресс-службаез. Кильмезе кожо Биллъёс... Алигес Киров улосвылысь Кильмезьын туж тунсыко пумиськонъёс ортчизы. Кильмезь пыр но ортчизы уго дуннеысь велопробеге пыриськисьёс. Кин англи, кин немец кылын вераськыны выриз норвежецъёсын. Мӧйыос вожъяськизы школаын дышетскисьёслы - соос школаын кунсьӧр кылъёсты умой дышето вылэм. Та нуналэ ик ӝыт пал ортчиз эшшо одӥг пумиськон. Таяз учыре - ӟуч американецъёсын. Асьме палась Америкае кошкем егит фермер Василий Григорьевич Милкомук (соос сямен - Билл) тодмоосыз доры кунояны бертэм. Ӵуказеяз Кильмезь возьмаз тодмо писательёсты Владимир Крупининэз но Владимир Ситниковез. Но кыӵе ке мугъёсъя писательёс ӧз лыктэ. "Ӵок ни, нуналлы быдэ тунсыко адямиосын но пумиськылыса жадёд", - серекъязы кильмезьёс. Н. Никифоров. Киров улос Бураши гурт. Визь ке вань, нянь но сюроз 1724-тӥ арын Петр И эксэйлэн указэзъя Россиын кылдытэмын вал Наукаосъя академия. Дышетскем адямиосмы ӧй вал - ӧтизы кунгож сӧрысь. Наука ужез вырӟытыны но бергатыны вуиз 17 академик. Кутскон сётэмын вал. Россия наукалэсь нырысетӥ вамышъёссэ но бӧрысь азинскон сюрессэ возьматӥз Наукаосъя академилэн Урал люкетысьтыз Удмурт центреныз кивалтӥсь А. М. Липанов. Суредэз яркытгес син азе пуктыны юрттӥзы Операя но балетъя театрысь артистъёс. Сӥё- дано ужрад сӥземын вал Россия академилэн 275 ар тырмонэзлы. Али Россиын 1136 академик но член-кореспондент. Нош нырысетӥ академикъёс но быдэс дуннеын тодмо учёнойёс луизы М.В.Ломоносов, Д.И.Менделеев, А.И.Попов, И.И.Мечников, И.П.Павлов, С.М.Карамзин, А.С.Пушкин но мукетъёсыз. Урал улосвылын наукая 8 центр кылдытэмын. Огез соос пӧлысь Ижевскын, кылдӥз 23 ар талэсь азьло. 3 институтъёсты герӟа-огазея та центр: физико-технической, прикладной механикая, историяя, кылъя но литературая. Шуг-секытъёс вылэ чӧлскытэк, учёнойёс тыршо, азьланяз улонмы понна сюлмасько. Тужгес устоосыз пусъемын дано нимъёсын, коньдон кузьымъёсын. М. Кузьмин. ШӦКЫЧ Юри но уд малпа Дунъет Кузпалэзлэсь уж дурысьтыз кудӟыса бертэмзэ валамез бере, Уня пурӟиз. - Эх, ортчытӥсько ук та шузиен каръян гумырме. Пичи муртлы конфет медло, тыныд - аракы. - Мусое, - кышноезлэсь керӟегъяськемзэ кылымтэ улсы кариськиз Пави. - Мон тыныд кузьым басьтӥ. Пыр ай ӝӧк улэ, соку гинэ возьмато, - кисыяз бугыръяськемъяське картэз. Уня, керетонзэ вунэтыса, ӝӧк улэ нюжтӥськиз. - Я, возьмат ни ӝоггес! Дуноен-а басьтӥд? - Ну, - сректӥз воргорон, - табере малпаськы ни отын: тон-а, мон-а шузигес та дунне вылын? Ӵошатон Пельняньлы сӥль дасянъяз Уня ӝожтӥське: - Эх, сӥльмы но быре ини, Пави. Дыртӥд ук кунянмес вандыны. Толшорозь сюдысалмы ке, гондыр быдӟа будысал. - Шедьтӥд ӵошатон, - кузпалзэ уретӥз Пави. - Кылем арысьсэ вандонэз ӧй вал. Сюдысалмы ке, слон быдӟа луысал ни. Выль закон Улмопуос ултӥ ортчыкуз, Павилэн йыраз улмо усиз. "Нумырен портэм емыш котьку вазь кирга", - выль закон чилектӥз воргоронлэн йыраз. Кулыса уть ай Кузпалъёс ӝӧк сьӧрын чай юыса пуко. Воргорон ас тазалыкезлы ӝожтӥське: - Висисько. Оло, кема но уг улы ни. Только, Уня, тыныд, огнад кыльыса, туж секыт луоз ук, - кузпалзэ жаля воргорон. - Кулыса уть ай, Пави, собере адӟом, - нокыӵе кариськытэк, чайзэ ӟузьылонъяз пумитаз вазиз кышномурт. Пумиськысалмы - Пави, улонэз выльысь кутскыны ке луысал, тон монэн ик-а кузпалъяськысалыд? - тунсыкъяське Уня. - Ӧй. Мон тынэсьтыд сизьым иськем палэнэтӥ ортчысал. - Мон но... - Ма, соку нош ик ваче пумиськысалмы ук, - серектытэк ӧз чида ни воргорон. Кужмын но эшъёсын Толон Завьялово черкогуртын кутскизы гурт спортсменъёслэн 8-тӥ гужем шудонъёссы. Соос йылпумъяськозы 27-тӥ июне. Тодматске шудонъёслэн программаенызы. 24 июне 14.00 - Волейбол(воргоронъёс). 15.00 - Теннис (нырысетӥлюкетэз). 16.00 - Футбол. 16.45 - 800 метре бызьылон (нылкышноос). 17.00 - Волейбол (нылкышноос). 18.00 - Футбол. 18.00 - Винтовкаысь ыбылыса эскерон (ёросъёслэн кивалтӥсьёссы). 18.45 - 1500 метре бызьылон (воргоронъёс). 20.00 - Судьяослэн коллегизылэн кенешез. 25 июне 9.00 - Теннис. 9.00 - Волейбол (воргоронъёс). 10.00 - Бызьылон сюресэн тодматскон. 10.00 - Гиря ӝутъянъя но ки кужымъя ӵошатсконъёслы дасяськон (60, 65, 70, 75 кг). 11.00 - Гиря ӝутъянъя но ки кужымъя ӵошатскон. 11.00 - Капчи атлетика. Спортивной семьяослэн эстафетазы. 11.30 - 100 метре бызьылон (нылкышноос). 11.50 - 100 метре бызьылон (воргоронъёс) 12.00 - Кузьдалае тэтчан (нылкышноос). 12.00 - Волейбол (нылкышноос). 13.00 - Кузьдалае тэтчан (воргоронъёс). 13.30 - Волейбол (воргоронъёс). 15.00 - Винтовкаысь ыбылӥськон (ёросъёслэн кивалтӥсьёссы). 16.00 - Триатлонъя сюресэн тодматскон. 16.30 - Волейбол (нылкышноос). 17.00 - 3000 метре бызьылон (нылкышноос). 17.30 - 5000 метре бызьылон (воргоронъёс)7 18.00 - Волейбол (воргоронъёс). 18.00 - Командаослэн парадлы дасяськонзы. 18.30 - Шудонъёсты сӥё-дано усьтон. 20.00 - Футбол. 22.30 - Вормисьёсты ӟечкылан. 26 июне 7.00 - 80 иськемез вал вылын ортчисьёслы старт. 9.00 - Теннис. 10.00 - Волейбол (воргоронъёс). 10.00 - Городки (ёросъёслэн кивалтӥсьёссы). 10.00 - Гиря ӝутканъя спортсменъёсты дасян (80, 90, 90-лэсь ятыр кг.) 10.00 - Капчи атлетикая кросс, спортивной семьяос. 11.00 - Гиря ӝуъянъя но ки кужымъя ӵошатсконъёс. 11.00 - 400 метре бызьылон (нылкышноос). 11.30 - 400 метре бызьылон (воргоронъёс). 12.00 - 1500 метре бызьылон (нылкышноос). 12.30 - 3000 метре бызьылон (воргоронъёс). 12.30 - Волейбол (нылкышноос). 14.00 - Волейбол (воргоронъёс). 16.00 - Футбол. 16.00 - Триатлон. 17.00 - Волейбол (нылкышноос). 19.00 - Судьяослэн коллегизылэн заседаниез. 20.00 - Футбол. 22.00 - Вормисьёсты ӟечкылан. 27 июне 9.00 - Волейбол (воргоронъёс). 10.00 - 100 метре бызьылон (воргоронъёс, нылкышноос). 10.30 - Эстафета 400х300х200һ00 (нылкышноос). 11.15 - Эстафета 800х400х200һ00 (воргоронъёс). 12.30 - Вормисьёсты ӟечкылан. 13.00 - 8-тӥ гужем шудонъёсты сӥё-дано ворсан. ШӦКЫЧ Куалекъялэ, руль сьӧрын пукисьёс! Тросэз шофёръёс али ке но тодазы возё азьвыл ГАИ-ын ужасьёсын сюрес вылын ваче син кыльылэмзэс. Инспектор машинадэ эскерыны кутскиз ке, тод ини: одно ик маке но шексэ шедьтоз. Я штраф тырытоз, я праводэ талалаоз. Водитель, чибориё бодыен яке горд "табаен" адямиез кыдёкысен адӟыса, дыр! куалекъяны кутскылӥз. - Басьтӥз, уз басьты? - нокыӵе "сьӧлыкез" ӧвӧл ке но, кисыысьтыз коньдонэныз шалтыртыса туналляз. - Э-э, ортчемын ни со дыръёс. - Киыныз шонтоз куд-огез. - Табере ГАИ ӧвӧл ни. Со интые ГИБДД вордскемын. Сое кылдытыку, отысь кивалтӥсьёс меӵак ивортӥзы: ми, пе, азьвыл сямен кыл кутытӥсь гинэ ӧвӧл ни, нырысь ик, водительёслы юрттӥсь ёз. Так что азьланьын инспекторъёсын огкылысь ужалом. Вазьгес шумпотӥськоды, гажано водилаос. Зырез котькызьы нима - со кышкатӥсь зыр ик кылёз. Озьы ик ГАИ-ысь пучыяськем ГИБДД но. Выль нимын (кулэез вал-а меда сое воштыны?) Тыро-пыдо ужаны ӧз вутты на, машина возисьёсты йыр тышказы мышласянь зырен шуккыны выль амалъёс утча ни. 20-тӥ апреле МВД юнматӥз ГИБДД-ысь генералъёслэсь пӧрам 297 номеро мудрон приказзэс. "Россия Федерациысь МВД-лэн сюресъёс вылын шудтэм учыръёслэсь утиськонъя инспекциысьтыз (ГИБДД - Н. Д.) дорожно-патрульной службаезлэн ужезъя валэктонъёсты юнматон сярысь" нимаське со. Ма вылез бен отын? Трос гинэ, ява. Но малы ке ваньмыз соос "корт вал" возисьлы пумит малпамын. Азьвыл автоинспектор машинаез ӝегатыны быгатэ вал таӵе учыръёсы гинэ: водитель кудӟемын яке сьӧраз ӧвӧл документъёсыз, автолэн урод ужало тормоз яке руль но нуись-кыскись ёзъёсыз, мыдланесь яке чылкак ӧвӧл номеръёсыз. Табере котькыӵе шек - техникаез ГИБДД-ын дыраз регистрация лэсьтымтэ, техосмотр ортчымтэ но мукетыз понна, тӥледды сюрес урдсы кельтыса, машинадэс кужмысь талалозы но, дун тырытыса, сылэтон интые валтозы. Отысь ньыль питрано македэс шексэ палэнтытэк мозмытыны уд быгатэ ни. Валады, луоз, кытчы кыстӥське гозы: машинаез "возьман- чаклан" понна дун часлы быдэ будэ, сое тупатыны, ачид ке уд быгатӥськы, вуттоно автосервисысь слесарьёсты. Эшшо но паймытэ мукетыз - машинаосты сылэтон, соосты тупатъян-выльдон интыос али коммерсантъёс ки улын. Кызьы, ма муген ГИБДД но коммерсантъёс огкыл шедьтӥзы? Ма соосты герӟа? Таӵе амал автоинспекторъёслы паллян коньдон поттыны сюресэз уката уг паськытаты меда? Одӥг гинэ оскон вань, вылӥ верам приказлы кема веканы кылдэмын ӧвӧл шуыса. Ас дыраз ГАИ та выллем ужрад пыӵатӥз ни вал. Сюрес вылэ мыдлань пуктэм машинаосты кутскиз вал нимысьтыз сылэтон интыосы нуллыны. Судъёс пыриськыса, та амалэз лушкемак вунэтӥзы. Яке мукетыз. Правительство кутӥз правозэс ыштэм водительёслы выльысь экзамен ортчон сярысь постановление. Малыез валамон: нош ик муг кылдэ калыклэсь кокьдонзэ кыскыны. Россиысь Верховной суд тае законлы тупасьтэмен лыдъяз. Озьы ик луыны кулэ, дыр, 297 номеро приказэн но. Малы ке шуоно, адямилэн правоез вылэ урдскыны ГИБДД-лэн "инструкциосызъя" уг луы. Нош али, руль сьӧрын пукисьёс, нош ик куалекъялэ!.. Н. ДОЛГОВ. ШӦКЫЧ Кутэзъя кабыз Сиропу ик та калык, Сё выжыятоз. Кызьы, мар луиз, малы? - Сюлъёсты нуйтоз. Сукыр мурт ке луысал Я вылэм ни, ӵок - Бӧлякъёстэ тодмаса Гозыез уд ӵог... Бускелям, пӧй, каль пырай - Кунояськиськиз. Ваньзэ оскалтӥ, веръяй, Йыр но шӧмаськиз. Тау ӧй кары. Возьмалэ, шуисько огшап. Тау карыны кузпалэн Вуомы тып-тап. Уӵыме ӧй ке ӧтьы Вань чырссэ поттоз. Выӵыргес сямыз, оть-тать! Кин тодэ - пуштоз. Но эн сюлмаське, мар вань Тырмытом валче, Ӟеч кыллэсь бон мар-о вань Шунытэз-ӟечез... Бускельлэн синъёс - таба! Шумпотэ. Иське... Ӝӧк вылэ пуксёз кабак - Уть-тэ, шӧдӥськем. Со виын нош укное Учкыны кемдӥ: Уӵые ук, кышное! - Кыл куспам ӵемтӥ. Эк, ӧй вуы бертыны - Пуштыса вуэм. Бодыен шобыръяны Мон дӥне вуэм. Бускеле учке небыт. Мар карод - валай. Кутэзъя луэ кабыз Шуиллям далай. ... Сиропу ик та калык; Сё выжыятэ - Кызьы, мар луиз, малы? - Сюлъёсты нуйтэ. С. КАРПОВ. Монополистъёс огазеясько Москваын Россиысь Правительство но му вӧй поттонъя, электрокужым сётонъя но андан ӵыжатонъя бадӟым огазеяськонъёс Россилэсь экономиказэ юнматонъя огкыл гожтӥзы. Россиысь Правительстволэн нимыныз отчы гожтӥськиз нырысетӥ вице-премьер Николай Аксёненко. Бумага улэ кизэс нюртӥзы чугун сюресъёсъя министр Владимир Старостенко, эстӥськонъя но электрокужымъя удысэз нуись Виктор Калюжный, бадӟым - "Газпром", РАО "ЕЭС", "ЛУКОЙЛ", "ЮКОС", "Сибнефть", "Славнефть", "Северсталь", "Магнитка" - огазеяськонъёслэн кивалтӥсьёссы. Тупанкыл гожтонэ пыриськиз Россилэсь рыноксэ кылдытӥсь 53 компания. Документлэн пуштросэзъя монополистъёслэн поттэм продукцизылы дун вераськыса тупатӥськоз. Аксёненко верамъя, ас мылкыд каремзыя гожтэм огкылын "ӧвӧл вылӥысен дунъёсын кивалтон, кун ласянь зӥбон". Отын вань производствоез зэмос ӝутонлы оскон. Иворъёсъя национальной служба. Лудӟилы - 225 ар Лудӟиос асьсэос но паймизы, гуртсы сокем вашкала вылэм ни шуыса: туэ солы 225 ар тырме. Гуртлэсь кылдхэм вакытсэ азьвыл малы ке нокызьы ӧз пусйылэ. Яке соин тунсыкъяськись ӧй вал-а? Нош архивъёсын бугыръяськыны кутскизы но - юбилеез матэктэ. Таӵе бадӟым лыдпусэн эгесам нуналэз пумитаны гурт калык лулысь-сюлмысь, сюанлы кадь дасяськиз: урамъёссэ чылкытатӥз, юртъер котыръёссэ чеберъяз-буяз. Шулдыръяськыны но гурт котырысь тужгес тузӥ интыез - тымет дурысь вож гуждорен сыръясь нёжалэз бырйиз. Куазь ӵукна ик зорен, гудыриен кышкатъяз ке но, малпам ужрадэз йылаз-пумаз вуттыны луонлык сётӥз - пумаз гинэ, йылпумъяса выллем, зорзэ жаляк! кисьтӥз. Люкаськем калык туж тунсыкъяськыса кылзӥз гурт тӧролэсь Василий Петрович Дмитриевлэсь Непременная Лудзя гуртлэн кылдэмез, азинскемез сярысь мадемзэ. Лудӟи гурт азьвыл мукет интыын, сюрес вылын, сылэ вылэм. Али отын - "Правда" ОАО-лэн бакча сиёнъёс будэтон бусыез. Та гурт пыр ас вакытаз ожгарчиосыныз ӵош ортчем Емельян Пугачев. Но интыез ярамтэен-а (татын нюр интыос) яке кыӵе ке мукет мугъёсын-а, лудӟиос выль интые выжыны ӧдъяллям. Ӝыныез пала туала гуртлэн интыяз пуксиллям, нош кылемъёсыз Кам шур сьӧры кошкиллям, выль интые пуктэм гуртсэс но Лудӟи ик нималлям. Вань на-а Кам сьӧрын со гурт - тодӥсь ӧвӧл ни. Калык гуртсэ Лудӟи гинэ шуэ, нош документъёсын со Непременная Лудзя шуыса пусйиське. "Непременной" ватсэт малы ке но тросэзлы валантэм, куддыръя тумошо но йӧтэ. Мукет гурт нимъёс борды лякиськем Вылӥ, Улӥ, Бадӟым, Пичи ватсэтъёс нокыӵе валантэмзэ уг кылдыто. Нош "Непременной" кылэз валэктон понна, одно ик историез бугыртоно луэ. Лудӟи борды таӵе ватсэт лякиськем, гуртын улӥсьёсты Иж завод понна ужаны косэмзы бере. Гурт калык, нюлэсэз кораса, заводлы эгыр дася вылэм. Эгыр поттон туж секытэн сётӥськем. Пуэз, кызь сажем кузьда люкаса, сюен сого но собере кенжыто, пе, вал. Со ӝуась люкъёс дорын уен-нуналэн кошкылытэк возьмаськыса улӥллям. Люксэс эскерыса ветлыкузы, солэн ӝуаса бушам интыяз гуштылыса, куд-огез сутскыса бырыны но шедьылӥллям. Берлогес, гуштэмлэсь утиськон вылысь, бушам интыоссэ зӧк бодыен эскерыса ветлылӥллям ни. Дасям эгырзэс, ньӧрлэсь керттэм бадӟымесь коробъёсы тырыса, валъёсын Иж заводэ вортто вылэм. Завод соку пу эгырен гинэ ужам. Непременное пыртэм гуртъёсысь пиосты (яке - заводлы ужаны гожтэмъёсты) солдатэ но уг басьто, пе, вал. Гуртлэн узыр историез вылэ пыкиськыса, та нуналлы нимысьтыз сӥзьыса, кырӟан но кылдэм. Нош гожтэм сое Лудӟи клублэн кивалтӥсез - егит, туж чырткем нылкышно Зинаида Федоровна Галкина. Ар быдӟа гинэ ужатозяз, со вань гурт калыкез котыраз огазеяны быгатӥз, аслыз трос юрттӥсьёс шедьтӥз. Та ужрадэз нуыны но солы ик оскизы. Гуртсэс вордскем нуналэныз нырысь ик ӟечкыланы кыл сётӥзы покчиосызлы - нылпи садэ ветлӥсьёслы. Жингрес кырӟамзэс люкаськем калык туж мусо карыса кылзӥз. Лудӟиосты ӟечкыланы лыктӥллям кузёос но. Завьял ёрос администрацилэн тӧроезлэн воштӥсез Г. Г. Тронин ватыны ӧз быгаты паймемзэ но: гуртсэс таӵе юн яратӥсь калыкен солы ӵем ик пумиськылыны уг кылды, пе. Григорий Геннадьевич озьы ик оскытӥз на, Лудӟиын пуктыны кутскем начальной школаез туэ ик йылаз-пумаз вуттыны луонлык сётом шуыса. Таиз ивор гуртоос понна тужгес шумпотымонэз вал. Азьланяз но таӵе ик капчи мылкыдын улыны но ужаны сӥзизы акциосын "Правда" огазеяськонлэн кивалтӥсез Борис Аркадьевич Лубнин но Юськи гурт администрацилэн тӧроез Михаил Ильич Четкарев. Шуныт пумитаз гурт калык ӧтем куноосызлэсь - элькунысьтымы культурая училищеысь "Зарни крезь" ансамбльысь артистъёслэсь - кырӟам-эктэмзэс. Егитъёсын кузьмам шулдыр, задор мылкыд собере шулдыръяськон йылпумъяськытозь кузёяськиз ни. Кырӟанлы сӥзем конкурсэ но пыриськыны мылкыд карисьёс пумтэм люкаськизы. Нош кутскон сётӥз Галкинъёслэн семьязы. Сергей пизылэн арганэн быгатыса шудэмъяз, соос тодмо ӟуч кырӟанэз быдэстӥзы. Нош Анна Шубиналэн дас кузя будэтэм нылпиосыз семьяосынызы быдэс хор тыр люкаськизы. Аспӧртэм ансамбль кылдытӥллям Тупал ульчаысь нылкышноос но. Та ужрад азьын ялэмын вал пӧртэм пумо конкурсъёс. Жюри йылпумъянъёс лэсьтыны кутскиз но воксё шуге-леке вуиз. Кызьы сыӵе ческыт пӧраны быгатӥсь лудӟи нылкышноослэн пыжиськемъёссы пӧлысь тужгес ческытсэ быръёд? Озьы ке но, тужгес усто пӧрасен лыдъямын Клавдия Григорьевна Галкина - солэсь губиен перепечъёссэ ваньмыз ушъяса сиизы. Котькинлэсь ӝикыт, чылкыт, йыг-йыг шуыса пусъемын вал Валентин Григорьевич Дмитриевлэн юртъерез. Нош куэм, керттэм, пужыятэм, суредам ужъёслы жюри инты но ӧз сётъя ни, ваньзэ кузьымъёсын пусйиз. Соос - Искра Виноградовалэн, Елизавета Михайловалэн, Екатерина Шубиналэн но трос мукет усточиослэн киужъёссы. Гурт калыклы кузьым выллем луизы Михаил Гаврилович Юшковлэн Лудӟи котырысь чебер инкуазез возьматӥсь суредъёсыз. Мон ачим но, та гуртын вордскем, будэм адями, туннэ та ужрад шоры журналистлэн синмыныз учкыны тырши. Та нуналэ мон эшшо но золгес шӧдӥ: та гуртысь котькудӥз адями лулыныз-сюлмыныз биниськемын ас вордскем интыез борды. Со сярысь уг вера шат таӵе югдур но: егит пиосмы асьсэлы кузпал асьсэ гуртысьтызы яке бускель гуртъёсысь бырйыны тыршо. Егит нылъёсмы но асьсэлы эш палэнысь уг утчало. Азьвыл тросэз улыны Иже ке кошко вал, али татчы ик юртъер ӝуто, семья кылдыто. Озьыен, азьланяз эшшо но пезьгытгес пушъёз, азинскоз вашкала Лудӟи гуртэ. Оскисько: палэнэ кошкыса но солэн нылпиосыз Непременной Лудзяязы непременно вуылозы. Малы ке шуоно, выжыоссы бордазы непременно кыскозы. Ольга Бородина. Ныргындаос шулдыръясько Тулыс бусы ужъёс йылпумъяськем бере, гуртоос "Окрашудо" ("Кыр чеснок") праздник ортчытъяло. Туэ со Кам шур дурын вал. Шулдыръяськонэ ветло пор но ӟуч гуртъёсын улӥсьёс, тужгес но мыло-кыдо пырисько егитъёс. Ӵем дыръя татын тодматскыса ик соос семья но кылдыто. Туэ "Окрашудо" шулдыръяськонэз усьтӥз "Дружба" колхозлэн тӧроез Ю. Н. Якимов. Бӧрысь сцена вылэ потӥзы Ижевскысь лыктэм "Ош пеледышь" ("Тӧдьы сяська") пор фольклор ансамбль. Трос аръёс ӵоже соин быгатыса кивалтэ ини Николай Ямаков. Шулдыръяськонын кырӟам-верам сяна, гуртоос пӧртэм ӵошатсконъёсы пыриськизы. Нимысьтыз конкурс радъямын вал арганчиос понна но. Нош праздник йылпумъяськиз Ныргындаын. Татын улӥсьёс лыктэм куноосты коркась корка пыртас, шулдыр юмшатӥзы. Р. ТОКМУРЗИН. Журналистика Университет дышетӥз гожъяськыны Удмурт кун университетын туэ нырысьсэ диплом сётъязы журналистэ дышетскемъёслы. Кызь куать муртлы, удмуртъёслы но ӟучъёслы, луонлык кылдӥз улонзэс герӟаны газетъёсын, журналъёсын, телевидениен, радиоен. Шумпотымон соиз но: горд диплом басьтэм Алексей Андриянов мылкыд кариз "Удмурт дуннее" лыктыны. Пинал журналистъёсты ӟечкылазы печатья но иворъёсъя министр Сергей Васильев, Журналистъёслэн союззылэн тӧроез Людмила Прокошева, тодосчиос (ученойёс) Олег Шибанов но Александр Шкляев. Университетысь проректор Владимир Байметов егитъёслы мылкыд кариз дышетскем интызэс котьку тодазы возьыны. Америка дышетэ гожъяськыны Та нуналъёсы Ижын ортче республикаысь журналистъёслэн семинарзы. Со сӥземын гожъяськисьёслы эрик сётон ужпумъёслы. Семинарез радъязы Россиысь Журналистъёслэн союззы но Журналистъёсты дышетонъя центрлэн Удмурт люкетэз (таӵе люкетъёс Россиын куинь гинэ). Люкаськемъёсты ӟечкылазы Кун Кенешлэн Тӧроез Александр Волков, печатья но иворъёсъя министр Сергей Васильев, Россиысь Журналистъёслэн союззылэн секретарез Леонид Речицкий но мукетъёс. Семинарлэн ужаз пыриське Дуннеысь журналистъёслэн федерациысьтызы эксперт Роберт Траутман (США). Удмурт журналистъёс туж витизы солэсь прессалы эрик сётон сярысь дэмланъёссэ. Но Траутманлэн вераськемез кельшиз тундрае кизем сахар кушманлы. Укыр пӧртэмесь асьмеос - Россия но Америка. Удмуртия дышетоз гожъяськыны Туэ сӥзьыл, 8-15-тӥ сентябре, Ижын ортчоз "Быдэс Россиысь пресса - 99" фестиваль. Сое радъяло Россиысь Журналистъёслэн союззы, Вузкаронъя но промышленностья палата, Печатья кун комитет, Федерациысь телевидениея но радиовещаниея служба, Удмурт Республикаысь Кун Кенеш, Правительство, Журналистъёслэн союззы, Иж городысь администрация. Кенешон мыноз прессалы право но экономика ласянь юрттэт сётон сярысь. Ортчозы пӧртэм ӵошатсконъёс, ярмаркаос, концертъёс. Фестивальлэн политклубаз ужаны мылкыд каремзэс веразы ни тодмо кивалтӥсьёс Юрий Лужков, Ментимер Шаймиев, Владимир Жириновский но мукетъёс. А.Шкляев. ШӦКЫЧ Мынам телевизоре Чебересь ик асьмелэн Кам палъёсмы! Соин но, дыр, адямиос улон интыоссэс шур дуре пуктылӥзы. Чебер интыын сылэ Завьял ёросысь Докша посёлок но. Зэм, берло аръёсы татын тросгес уло дачникъёс. Нош коттеджъёссы кыӵе тузӥесь соослэн! Калыклэн верамезъя, Кам дуре бадӟым кузёос но узыр адямиос интыяськиллям. Я бен, соиз ӵок ини вылэм но... Но Кам дурын ик ӝожмыт сылэ ожын быремъёсты буре ваён мемориал пул. Оло со ачиз куашкам яке пильылӥллям. Нокинлы но кулэ луымтэ ни. Вуоно арын Быдӟым Вормонлы 55 ар тырмоз. Оло, отчыозь кинлэн ке тодаз лыктоз сое тупатыны? Кам кузя поръязы Н. Лялин но В. Камашев. Шӧкыч Чеберъяськы... но эскериськы Гужем вуэмен, нылъёслэн но нылкышноослэн тужгес чебер дэрем но костюм дӥсямзы потэ. Нош дӥськут вӧзы ма кулэ на? Шонер, буяськон-чеберъяськон (парфюмерия но косметика) вузъёс. Котькуд егит дыды котырысь мед лӧсъяськоз йырез поромытӥсь ыркыт омыр, пальпотонэн пачылмись синъёсыз но ымдуръёсыз мед кыскозы бордазы. Реклама но кӧня сётэмын та пумысен. Номыр ик шугез ӧвӧл кадь сыӵе луон понна. Мын матысь магазинэ но басьты аслыд кулэ вуз. Валамон, кисыяд шальтыртӥсез вань ке. Ӧвӧл ке, соиз ини мукет ужпум. Нош ваньмыз-а меда ӵектэм вуз сыӵе куронъёслы тупа? Сыӵе юанлы валэктон сётӥзы Удмуртиысь вузкаронъя инспекциын ужасьёс, Ижевскын, Можгаын, Сарапулын, Играын но Уваын эскеронъёс ортчытъяса. Соос вузкарисьёслэсь пӧртэм бумагаоссэс-документъёссэс эскеро. Котькуд вузлы тупась сертификатэз мед луоз, малэсь но кызьы кутӥськемзэ возьматӥсь ӟуч кылэ берыктэм аннотациез, кӧня дыр ӵоже возьыны чаклам сярысь бумагаез но мукет. Ужбергатӥсьёс парфюмериез вузаны упаковкатэк басьто. Нош продукцилэн вузан дырызлэн ортчемез сярысь тодмо ӧвӧл. Сыӵе вузъёссы уно гинэ вылӥллям Ижевскысь Л. В. Арзамасовалэн, М. Ф. Петраковалэн, В. Д. Черепановлэн, В. П. Рыловлэн, А. Г. Кожемякиналэн, А. С. Овчинниковлэн, Н. С. Перевозчиковалэн, А. М. Урсеговлэн, Сарапулысь - Н. Ю. Федоровалэн, Т. М. Муриналэн, М. Р. Гаевалэн, Можгаысь А. С. Бегишевалэн, В. А. Даниловлэн, В. В. Романовалэн, Игралась - Е. П. Новокшановалэн но В. В. Чирковалэн лавкаосазы. Куронъёслы ӧз тупа ымнырлы гельёссы но кремъёссы, дезодорантъёссы, гижы буян лакъёссы, йырсилы буёлъёссы, лосьонъёссы, одеколонъёссы, шампуньёссы... Соос поттэмын Ирландиын, Болгариын, Германиын, Россиын. ГОСТ-лэн куронъёсызлы ӧз тупалэ Украинаын поттэм шампунь. Шампуньлэн пыдэсаз маке валантэмез уя вал. Соин ик, дыдыос, чеберъяськон басьтыкуды ӟечгес эскере вуздэс, эн кепыралэ документъёссэс но юаны. Е. Кучумова. Шудоосызлы - вольыт сюрес! Шаерысьтымы педучилищеосты, культурая училищеез но таос выллем мукет дышетскон юртъёсты йылпумъямъёсты, оглом - Можга палан улӥсьёсты ӝоген шумпоттоз таӵе ивор: та адямиос, ужзэс куспетӥ карытэк, вылӥ тодон-валан басьтыны быгатозы Можга педучилищеын. Куать ар интые дышетсконо куинь но ӝыны ар, дун тырыса (кылем арын адямилы быдэ быдӟалаез таӵе вал - 3.800). Дышетскыны мылкыд карись тросгес луиз ке, дуныз пичигес луоз. Кылчи (филолог) сяна, татын дышетскисьёс луыны быгатозы удмурт но ӟуч, удмурт но англи, удмурт но немец кылъёслы дышетӥсьёс но. Со сяна, быгатозы на социологияя, культурологияя, улон-вылонлы сӥзем педагогикая, логопедияя, андрологияя тодон-валан басьтыны. Педучилищее лыктыны мылкыд каремъёсты дышетозы Удмурт кун университетысь дышетӥсьёс ик. Калык тросгес люкаськиз ке, быръёзы тужгес устооссэ абитуриентъёсты. Дышетскыны пырыку кутӥськись документъёс университетэ пырыку кутӥськисьёсыз кадь ик. Соосты сётоно август толэзёзь Можга педучилищее яке Удмурт кун университетэ. Нимысьтыз справка курыса вазиськоно на университетысь удмурт кылтодонъя факультетлэн туэ абитуриентъёсты кутонъя (приёмной) комиссияз Плетнева Ирина Николаевналы. Юанъёсты кылдылыку жингыръялэ таӵе телефон номеръёсъя: 75-33-56, 78- 21-88. Е. Ромашова. 69 берыктӥсьёс пӧлын "Переклад удмуртською мовою Семена Перевощикова". "Удмурт кылэ берыктӥз Семен Перевощиков" шуэм луэ та украин кылын. Нош берыктӥз со тодмо украин кылбурчилэсь Владимир Сосюралэсь "Любить Украну" ("Яраты Украинаез") кылбурзэ. 190 бамен, 1000 экземпляр тиражен Киевыфн алигес потӥз та кылбурлэн ик нимыныз нимам книга. Йтын, кылсярысь, таӵе кылъёсы берыктэмез но вань: чиган, чукча, юкагир, япон, китай, лак, лезгин саам, нанай, ногай, табасаран. Эсперанто кылэ но берыктӥллям. Таӵе иворез Семен Андреевичлы ыстӥз книгалэн редакторез Кость Хоменко. Тау карыса лэзем книгазэ но. Удмуртиысь писательёслэн союзазы кылем арын кылбурез берыктыны курыса вазиськылӥз вал Украинаысь писательёслэн тӧрозы Иван Драч. Озьы Семен Перевощиков 69 переводчикъёс пӧлысь огез луиз. Т. НИКОЛАЕВА. Пичи футболын бадӟым вормон Алигес Селтаын шаерысь егит спортсменъёслэн пичи футболъя берпуметӥ ӵошатсконзы ортчиз. Отчы люкаськизы зонаосын вормем командаос. Асьсэ зонаязы нырысетӥ луыса, Селтае вуэмъёс пӧлын вал Завьяловоысь пиналъёс но. Тренерзы Валерий Русских нылпиослы вормон мылкыд пыӵатыны быгатэм. Озьы дэриос люкаськемъёсты но учкисьёсты чырмыт шудэменызы паймытыса кельтӥзы. Селтаосты 3:0 лыдын вормыса, кылем арысь чемпионъёсты - Играысь пинал спортсменъёсты 1:0 лыдын азьпалтӥзы. Каракулиноысь нылпиос завьялъёслы бадӟым лыдын келязы - 8:0. Алнашысь командаен ӵошатскон, нокин вормытэк, 1:1 лыдын йылпумъяськиз. Ньыль шудонэ пыриськыса, Завьяловоысь команда 10 очко люказ. Озьы со республикаын чемпион луиз. Кыкетӥ интые кылизы селтаос (7 очко). Куинетӥын - Играысь спортсменъёс (5 очко). Россиысь гурт спортсменъёс пӧлын пичи футболъя Удмуртилэсь данзэ утёз Завьяловоысь команда. Солы коньдон шедиз ке... Н. Иванов. Кун Кенешын Парламентын - каникулъёс 22 июне ортчиз Кун Кенешлэн азьвыл чакламтэ сессиез. Каникулэ потон азязы депутатъёс эскеризы на куд-ог ужпумъёсты. Сессия кутскиз Быдӟым Отечественной войнаын быремъёсты буре вайнэн. Кун Кенешлэн но Правительстволэн торооссы, депутатъёс Ялан ӝуась тыл доры сяська тугоко понӥзы, одӥг минут чал-чал сылӥзы. Уго самой таӵе ик шундыё, туж шулдыр нуналэ, 58 ар талэсь азьло, фашистской Германия СССР вылэ войнаен лыктӥз вал. Озьы 22 июнь асьмелэн историямы весяклы сьӧд буёлэн кылиз. Удмурт парламент кыкетӥ сессияз учкиз но юнматӥз 1999 арын законъёс бордын ужаны чаклам планэз. Соин тодматӥз Кун Кенешлэн Тӧроезлэн воштӥсез С.К.Смирнова. Та ужпум кенешонын валтӥсь инты басьтӥз, малы ке шуоно, шонер дасям закон бордысь потэ Кун Кенешлэн, Правительстволэн огкылысь, пайдаё ужамзы. Ватонэз ӧвӧл, азьвылэз депутатской корпусмы самой со вылын трос пол канжаськылӥз но судъёс пыр потоно луиз. Лэсьтэм янгышъёс вылын дышетскыны али бер ӧвӧл на. Ар ӵоже эскеремын но юнматэмын луозы республикамы понна тужгес но кулэ луись документъёс. Соос герӟаськемын выт тыронэн, интыосын аскивалтонэз радъянэн, инкуазез утёнэн, ожысь но ужысь ветеранъёслы юрттонэн но мукет. Социальной ужпумъёсъя комиссилэн тӧроез Н.А.Харина ӟырдыт вераськиз ВИЧ-инфекциен но СПИД-эн висисьёсты эмъян пумысен программалы тырмыт коньдон висъян сярысь. Туннэ нуналлы, депутат верамъя, Удмуртиын таӵе висисьёс 11 мурт лыдъяське ни. Кышкыт эзель Россиын ӝог вӧлме. Кыкетӥез висён - ӵужектон. Со кутске али гинэ врдскем пинал борды но. Дыраз ӧд ке эмъя, мус борды кылдоз кышкыт пыктос. Таизлэсь адӟонлэсь утиськыны юрттоз вакцина. Солы коньдон кулэ. Депутатъёс ог-огзэс валазы кадь. Табере аслэсьтыз кылзэ мед вералоз Правительство: Удмуртиын улӥсьёсты уго нокин уз утьы. Кунгож сьӧрын тазалыксэ юнматыны котькудӥз уз быгаты. Таяз сессиын юнматэмын на 5 судья. Озьы ик Удмурт Республикаысь Вылӥ судлы калык заседательёс. Соос берлозэ быръемын вал 1992 арын. Депутатъёс кык пол но кутскыса эскерыны выризы "Удмурт Республикалэсь акциосын огазеяськем куд-ог предприятиослэн кивалтоназы пыриськонъя нимысьтыз правоя ("зарни акция") законлы инъетэз. Та ужпум борды парламент выльысь берытскоз сӥзьыл гинэ. Отчыозь тодмо мед луоз, кыӵе огазеяськон, кыӵе предприятие шедьыны быгатэ "зарни акция" улэ. Таӵе куронэн сессия азе потӥз промышленникъёслэн но предпринимательёслэн фракцизы. Валамон, законэз кутон капчиен уз сётскы, эркын ворттылӥсь валэз огкутскемен табере озьы гинэ уд куты. Татын но асьмеос бускель республикаослэсь бере кылим ни. Кыӵе югдур уждун тырон ласянь? Таиз юан тужгес но шугъяськытэ бюджет удысын ужасьёсты. Жаляса верано, но шумпоттӥсез ивор ӧвӧл. Пунэмен тыронъёс республикая люкаськемын 178,4 миллион манет, уждунэн ӝегаськом 2,4 толэзьлы. Сессия эскериз куд-ог музон но ужпумъёсты. Депутатъёс табере выльысь люкаськозы сентябрь толэзе. Соку ортчоз Кун Кенешлэн вуоно сессиез. Л.Медведева. Фотоез В.Камашевлэн. Шӧкыч Солдат пӧллиськонъёс Полковниклы йырвиымаз операция лэсьто, хирург йыркобызэ усьтӥз, йырвиымзэ поттӥз. Со вакытэ дежурной пыре: - Полковник эш! Тӥледлы генерал-майор ним сётэмын! Таиз султэ, картуззэ понэ но ӧс пала дыртэ. Хирург: - Йырвиымдэс вунэтӥды! - Малы со табере мыным кулэ на! х х х Часовой постын сылэ. Лыктэ майор. - Фамилиед? - Рядовой Петров! - Ротаяды кӧня адями? - Сизьымдон! - Нош батальонады? - Кык сю витьтон! - Нош малы сое шарае поттӥськод? Оло, мон шпион? Ыбем куара чузъяське. Солдат: - Учкы ай, кыӵе сволочь вылэм! х х х Армие басьтон комиссиын. - Кин луыса ужаськод? - Механик. - Умой! Танкист луод! - Нош тон? - Юрист. - Писарь луод. - Нош тон? - Нош мон мо-могасько... - Пулемётчик луод. Туннэ Ижевскын ужа Удмуртиысь писательёслэн ЪВ бадӟым ӧтчамзы Татчыозь мынӥм. Табере кытчы вуом? Котькуд вакытлэн аслаз куронъёсыз. 1932 арын 23 апреле ВКП (б)-лэн ЦК-езлэн "Литературно-художественной организациосыз выльдон сярысь" постановлениез потэм бере, УдАПП быдтэмын вал но, со интые кылдӥз нимысьтыз оргкомитет. М. А. Коновалов кивалтэм улсын оргкомитет ортчытӥз кык конференция. Ӵапак кыкетӥяз, 1934 арын 13-15 ибне, кылдытэмын Удмуртиысь Писательёслэн союззы. Правление пыризы М. Коновалов, Г. Медведев, А. Писарев, С. Медведев, кивалтӥсе юнматэмын Кедра Митрей... Ортчиз ӵапак 65 ар. Туннэ Ижевскын ужа Удмуртиысь писательёслэн дас витетӥез съездзы. Таяз ӧтчаме тужгес трос кузя люкаськемын луыны кулэ. Кылем арын уго ноябрь толэзе Россиысь СП-лэн секретариатэз Ижевскын ужам бере, горд выло книжка басьтӥз дас одӥг гожъясьмы. Табере Удмуртиысь Писательёслэн огазеяськоназы 56 мурт: 42 удмуртъёс но 14 ӟучъёс, 48 пиосмуртъёс но 8 нылкышноос (берлоосыз пӧлын кутэмын Сарапулысь Лидия Шемякина). Лыд бордын кужым, дыр. Быдэс Россиысь писательёслэсь "армизэс" кужмоятыны со юрттэ. Нош мукет ласянь ке учконо, интыосын рос-прос эскерытэк яке чик эскерытэк Союзэ кутон гожъяськон шоры вылӥ куронъёсын учконэз лябӟытэ, дунлыкъёсыз кулэстэ. Озьы Писательёслэн огазеяськоназы сюрыны быгато "кыл кутасьёс", нош зэмосъёсыз, ӵошатыны яратӥсьтэмъёс, палэнэ ик кылё. Шаерамы, странаямы огъя секыт югдур кылдэмен валче, Писательёслэн огазеяськонзы но ас бордаз улонмылэсь висёнъёссэ-гижлооссэ басьтоно луэ. Пож вуэн пыласькем бере, чылкыт синмын учкыса, азьлань мыныны уг луы. Удмуртъёслэн али ортчем ВИИ ӧтчамазы но писательёслы меӵкытыса верамын вал: "Тазьы улӥмы ке, кытчы меда вуомы?" Палэнысен адскегес, шуо. Адями шоры, озьы ик солэн улон интыез шоры ортчись мурт нырысь ик вылласянь учке, дунъя. Нош кыӵе тӧлпери поръя со адямилэн сюлэм пушказ, соин ӵош ик "корка" пушказ - созэ ваньмызлы адӟыны уг кылды. Нош озьы ке но... Озы ке но, ас котырысьтыд жуг-жагез мурт син азе поттытэк ик умойгес. Писатель - калыклэн синучконэз шуиськом ке но, соглаш луытэк уг луы мукет сямен веранэн но: кыӵе ке калык, сыӵе ик солэн писателез. Со борды лякиськемын улонмылэн вань тодметъёсыз, кырсез но, пожез но. Котькыӵе изъян адӟемлэн, ас бордысьтыд сяна, палэнысь мугъёсыз но вань. Кыӵе данэз луоз писательлэн, ассэ туж чебер возиз ке но, асьме государство творческой ужасез, тужгес но гожъяськон удысысьсэ, пыд улаз лёгиз, кураськисе кельтӥз ни ке? Артистъёс культурая министерстволэн, начар ке но, бурд улаз. Суредасьёсмы асьсэ коже кызьы но озьы кӧтсэс тырыны быгато на. Крезьгурчиос... таослы писательёсын ӵош пуйы кутыны кылиз. Ортчем вить ар куспын, шуыны луоз, СП-лэн членъёсызлы одӥгезлы гинэ (А. Кузнецовалы) сётэмын улон инты (сое басьтыны коньдон). Книга поттоно ке, гонораред - чипыос серекъямон (азьло машина басьтымон но луоз вылэм), эшшо ке ай - авторез ас кисыысьтыз поттыны куро. Кин но со одӥг-кык арзэ басьтӥз правительстволэсь стипендия. Ваньмызлы сётӥськись пособие - куинь тоэзьлы огпол 80 манет - кык но ӝыны арлы тырмиз. Уг тыриськы ни выступлениос понна дун (уг утьы литератураез вӧлмытонъя бюро но). Уг луы басьтыны командировочной (отысь но налог пызьыртыны кутскиллям). Висись муртлы ӧвӧл юрттэт (кылсярысь, А. Леонтьевлэн таӵе осконэз быриз). Уд мыны ни творческой юртэ - уг ӧтё Пицунда, Коктебель, Дубулты, Малеевка, Переделкино... Литфонд таркамын (писательёс кутъёс сямен быро - ивортонъёс вал Москваысь). Асьме писательёс но нуналысь нуналэ езэс юнгес золтоно луо. Кӧттырон, семьяез сюдон сярысь сюлмаськон йыр визылъёсыз куасьтэ. Зэмзэ но, таӵе-а луыны кулэ "кык сменаен" ужась писательлэн улонэз, адӟонэз? Оло, чик кулэ ӧвӧл ни чеберлыко литература, гожъясьёслэн огазеяськонзы но? Со общественной организация, соин артэ ымзэс усьтыса нянь кусок возьмало сад-бакча возисьёслэн, пуны-коӵыш возисьёслэн но мукет со выллемъёслэн огазеяськонъёссы но. Кун Кенеш сюрнылпиез сямен палэнтӥз ке, зэмзэ ик, Союзмы (СП) быроз. Соин ик кулэ Уставе воштонъёс. Нош сое ортчытыны куремын, пӧсьтолэзь кутскытозь. Тӥни малы таиз, дас витетӥез ӧтчам вазьгес ортчытӥське (со декабре луыны кулэ вал). Нош та дырозь Писательёслэн огазеяськонзы вал бере, со мар ке но ужаз. Кун бюджетысь арлы быдэ коньдон висъяськылӥз аппаратэз возьыны но, творческой ӝытъёс ортчытъяны, писательёслы юрттэт сётыны но. Зэм, татын вераны кулэ, куд-огез гажано писательёсмы трос пол "лэчкатэмын" луо, нош мукетъёсызлэн курыны, оло, тодазы но уг лыктылы. Туннэ ӧтчамын нош шараяськозы трос сюлэмвисёнъёс, пӧськыос. Тужгес соос алямын книга, журнал поттон, вӧлмытон котыре. Али котькудаз Ижысь магазинэ пыр - удмурт книгаез уд шедьты. "Инвисысь" гинэ но. Гурт магазинын но кемалась ӧвӧл ни книга ӝажыос. Литератураез вӧлмытӥсь организациос - "Удмурткниготорг", бибколлектор - куашказы, соос интые номыр вылез ӧз кылды. Книгаослэн тиражзы 500-озь усиз. "Удмуртия" издательствоын нимысьтыз отдел ас продукцизэс отчы-татчы дэмла, трос интые со уг вуы. Озьы ик туж шугомемын школаослы выль учебникъёс дасянэн-вуттонэн. Типографие коньдон вуымтэен, кылем арын поттытэк кылизы "Кизили", "Инвожо" но "Вордскем кыл" журналъёслэн берло номеръёссы. Туэ но, тодмо ини, куд-ог номеръёс кык толэзез ӵош валчеяса печатламын луозы. Егитъёсын ужатэк, творческой семинаръёс ортчытъятэк, бадӟым ыштон луысал. Азьвыл аръёсын уд ӵошаты ке но, писательёслэн огазеяськонзылэн правлениез ӧз куштӥськы на та ужлэсь. Никвлад Самсонов ӝабырес, ӝуалскись сямыныз возе "Пурга кизилиосыз". Нош кытын меда мукет литобъединениос? Паймоно кадь: ӟучъёслэн соос пушъё: Глазовын, Воткинскын, Сарапулын, Можгаын, Уваын, Сюмсиын. Губи кадь ӝужало выль книгаоссы но. Тани Глазовын йӧн-йӧн печатласько, "Галерея" гуманитарной фонд юрттэмен, вуоно арлы но таос дасо авторлы сюрес усьтыны чаклало. Книгаез али кин кызьы быгатэ поттэ. Пӧртэм издательствоосын. Шара но шӧдымтэ улсын. Лицензия гинэ медло. Автор ачиз ик редактор но, корректор но луыны быгатэ, суредась шедьтэ. Книгалэн титулаз но огпалаз, озьы ик пумаз даннойёс кызьы ке сюрем пуктӥсько, госстандартъёсыз, нормаосыз чаклатэк. Паймоно кадь: таӵе радызтэм книгаослы нокыӵе могӟет пуктыны уг луы. Уката ик соос кылэз пашмыто - трос уго "урымтэ чабеез": автор ачиз но кыл ласянь куанер, грамотаез ляб, редактор но ужамтэ кадь адӟиське. Озьы дунъет пыр ортчымтэ произведениос лыдӟисьлэсь чеберлык сярысь валанзэ шӧгомыто. Адӟиське ни, лэся, "атайёс" но "пиналъёс" куспын вожвыл луон но. Огпалаз - литератураез, озьы ик калыкез "быонлэсь утись, выльвылэз ӝутӥсь", ваньмыз шоры выль синмын учкись, "интеллектуальной валанэн" этнофутуристъёс. Мукет палаз (яке соослэн мышказы?) - пыд улзы, идеологизы куашкаса, "асьсэды кытчы карыны валатэк", этнофутуризме пегӟем но сое пост-модернизмен сурам "лушкаськисьёс". Озьыен, огпалаз - В. Романовлэн дышетскисьёсыз, мукет палаз - Г. Перевощиков но мукетъёсыз. Та шоры серем пыр гинэ учконо вал, дыр, шуо куд-огез, но мар гожтэмын, сое тӥрен уд кора (учкы "Удмурт дуннелэсь" туэ 27-тӥ мае потэм номерзэ). Зэм, асьмелэн мӧйыгес писательёсмы мар со этнофутуризм, маин сое "сиёно" уг тодо на. Огзэ гинэ валало: мар лэсьтэмын сю ар ӵоже удмурт литератураын, сое уг луы ӵушыны, нош туала ӧрез уг луы шуак пыӵатыны этнофутуризм яке пост-модернизм шӧмен. Кудпала азинске удмурт проза но поэзия, кыӵе отын йылъёсыз но дӥньёсыз, озьы ик векчи пушъетъёсыз - ас кылзэс вераны кулэ критикъёс, литературоведъёс. Нош соос ӧвӧл ке, озьыен, ӧвӧл асьме кылбурет (литература), солэн будонэз сярысь сюлмаськон. Со пумысен вераськон алигес вал правлениын критикая секцилэн кенешоназ. Та но мукет ужпумъёсыз эскерон туннэ но съездын ӟырдыт кужымен ӧръяськоз. Бадӟым механизм дугдэ ке, капчи ӧвӧл вырӟытыны. Выль рычагъёс кулэ луо. Вормозы-а таосыз ик эшъёсмы сое бералтыны - оскемзэ яке оскытэмзэ вералоз съезд. Нош писательёслэн вить ар куспын кыӵе ужамзы, улэмзы понна кыл кутонэз шӧдо, дыр, правленилэн членъёсыз Петр Поздеев, Генрих Перевощиков, Алексей Ермолаев, Вениамин Ившин, Владимир Емельянов, Валерий Болтышев но Галина Романова. Нош тужгес но - соослэн Йырзы, Олег Четкарев. Татьяна Чернова. 1976-тӥ арын "Молот" ("Кенеш") журналлы 50 ар тырмиз. Та юбилеез пусйыны Ижевске вуылӥзы вынлыко республикаосысь журналъёслэн валтӥсь редакторъёссы, соос пӧлын - Заки Нури, Семен Николаев. Асьме писательёс Владимир Романов, Аркадий Клаубков, Семен Самсонов, Трофим Архипов (журналлэн соку тӧроез), Василий Широбоков но Генрих Перевощиков вамышто куноосын артэ. Таӵеен соосты адӟиз Александр Кузнецов. Сьӧдкырысь эмчи Игра ёросысь Выль Ӟатча село сьӧры 12 иськем ортчыса, Сьӧдкыр удмурт гурт шеде. Татысь калык вазен ини туж ужась вал. Тэль пушкы интыяськем гуртысь воргоронъёс нюлэс дасяллязы, коръёссэс Кильмезь шур кузя келяллязы. Ваньмон дыръязы пӧйшураны яратӥзы. Секытгес йӧтӥз кышноослы. Гурт котырысь вань ужзэс быдэсъям сяна, нылпиоссэс но дышетыны тыршылӥзы. Та гуртын 1929-тӥ арын 25 июне Соломанида Сергеевна но Максим Федорович Корепановъёслэн семьяязы Толя пизы вордскиз. Жаляса верано луэ, секыт война аръёсы та семьяысь ньыль нылпи пӧлысь кыкез бырыны шеде. Шӧдтэк шорысь дырызлэсь вазь улонысь кошке Соломанида Сергеевналэн кузпалэз но. Вань секыт уж погыльскиз нылкышно пельпум вылэ. Котыр "витьёс" Быдӟым ож дыръя Толя Корепанов гуртысьтызы удмурт начальной школаез, 1945-тӥ арын Выль Ӟатча гуртысь неполно-средней школаез "витьёсын" гинэ йылпумъяз. Ас ёзъёсызлэсь со сокем ӧз висъяськылы. Гужемъёсы, эшъёсыныз ӵош, колхозын тыршиз. Пыриськиз Лесозаводысь чугун сюрес (узкоколейка) но Якшур-Бодья-Ижевск трактэз выльдон ужъёсы. Пичи арлыдыз шоры учкытэк, Толя сюлмо тыршиз бадӟымъёс вӧзын. Визьмо луэмзэ мӧйыос соку ик шӧдӥзы. Эшъёсызлы но котьку юрттэ вал. Солэсь адӟем карылӥзы Павел Малых, Коля Баженов, Ульяна Корепанова, Женя Шкляев, Игнатий Максимов но мукетъёсыз. Гуртысьтызы школаез йылпумъяса, Толя артиллерист луыны малпаз. Тазалыкез лябен отын дышетсконзэ азьланьтыны ӧз быгаты. Выльысь берытскиз вордскем гуртаз. Ужаны быгатонлыкъёссэ шӧдыса, сое бригадире пуктӥзы. Но егит пилэн, эркын ветлӥсь валлэн сямен, мылкыдыз тазалыкез эмъян борды кыстӥськиз. Ас понназ трос книга лыдӟиз, эмъясьёслэн ужзы шоры ялан вожъяськыса учкылӥз. Анатолийлэн лушкем малпанэз быдэсмыны ӧдъяз витьтонэтӥ аръёсы. Ижевскысь фельдшерско-акушерской школаез 1950-тӥ аре 120 дышетскись йылпумъяз. Со пӧлысь кыкез, Анатолий Корепанов но, горд диплом басьтӥзы. Таин гинэ ӧз буйгатскы пияш. Тодон-валанзэ будэтӥз на Ижевскысь медициная институтын. Пусйыны кулэ, Корепановлэн горд дипломез нош ик одӥглы ватсаськиз. Выллане тубон Анатолий Максимович врач луыса ужаны ӧдъяз 1956-тӥ арысен. Ужанъяз ик тодон- валанзэ эшшо йылэтӥз на: терапия госпитальысь кафедралэн клинической ординатураяз дышетскиз, кандидатской диссертациез борды басьтӥськиз. 1961-тӥ арын кандидатской, 1975-тӥ арын докторской ужзэ (диссертацизэ) утиз. Гуртысь удмурт воргоронэз котькудӥз врач синйылтыса улӥз, солэн бадӟымесь вормонъёсызлы шумпотӥзы. Тазалыкез эмъян удысын тыро-пыдо ужамзэ медициная академиын вылӥ дунъязы. 28 ар ӵоже со кивалтӥз факультетской терапия кафедраен, нош 1976-тӥ арын партилэн ЪЪВ съездэзлэн делегатэз вал. Та вакытэ Анатолий Максимовичлэн кивалтэмез улсын трос дышетскисьёс асьсэлэсь кандидатской но докторской диссертацизэс утизы ини. Кылсярысь, усто специалист луиз ас вордскем гуртысьтыз ик воргорон Ю. В. Горбунов. Та вакытэ Юрий Викторович ужа Зура селоын. Данъяськымон атай Анатолий Корепановлэн кык пиез будэ. Бадӟымез, Сергей, Казаньысь консерваториез но Москваысь аспирантураез йылпумъяз. Табере тодмо композитор луэ. Кыкетӥ пиез Алексей атаезлэн пытьыезъя мынӥз. Ижевскысь медициная институэз йылпумъяса, врач луыса ужа ожысь ветеранъёслэн госпиталязы. Медициная наукаосъя докторлы, профессорлы А. М. Корепановлы тазалыкез утён удысысь дано ужась ним сётэмын. Со - наука удысысь 185 ужлэн авторез, Нью-Йоркысь наукаосъя академилэн членэз луэ. Кызьы уд данъяськы таӵе сӥё-дано адямиен! Н. Сандалов. Редакцилэсь: ми но, удмурт газетчиос, Анатолий Максимовичез ӟечкыласьком та нуналэныз. Шудбур но тазалык сӥзиськом! Егитъёслэн праздникенызы! Удмурт Республикаысь Кун Кенешлэн но Правительстволэн нимынызы сюлмысь ӟечкыласьком тӥледыз Егитъёслэн нуналэнызы - азьланезлы оскон праздникен. Котькыӵе вакытэ егитъёс вал но луо Россия кунлэн ӟеч пушъетэз. Страна понна секыт нуналъёсы но, выль улон лэсьтон аръёсы но асьме калык котьку оскылӥз егитъёслэн кужмо киоссылы но сайкыт визьзылы. Оскем ноку юнме ӧй вал. Туала егитъёс номырин бере уг кылё азьвылъёсызлэсь. Ас калыксэ, яратоно шаерзэ узырен но шудоен адӟыны мылкыд каро асьмелэн егитъёсмы. Тӥледлы улоно но ужано ХХИ дауре. Соин ик Россиысь вань калыкъёс нош ик учко тӥ шоры. Страна оске: выль даурын Россия пӧрмоз кужмо но сяськаяськись кунлы. Ӟеч тазалык тӥледлы, гажано эшъёс, тупаса но шудо-буро улон, яратон но Удмурт шаермы понна выльзэ но умойзэ лэсьтон мылкыд. Удмурт Республикаысь Кун Кенешлэн Тӧроез А.А.Волков. Удмурт Республикаысь Правительстволэн Тӧроез Н.А.Ганза. Ӟеч кӧл Семен Васильевич! Толон ватӥмы гажано эшмес Семен Васильевич Шкляевез. С. В. Шкляев вордскиз 1918-тӥ арын 14-тӥ апреле Зураын. 7 класс но удмурт кылын делопроизводство нуонъя курс бере вал машинист, электрик, моторист. 1941-тӥ арысен Семен Васильевич вань улонзэ герӟаз "Удмурт коммунаен"-"Советской Удмуртиен"-"Удмурт дуннеен". Тодон-валанзэ йылэтон вылысь, 1951-тӥ арын йылпумъяз КПСС-лэн Удмурт обкомысьтыз партийной школаез, бӧрысь дышетскиз на КПСС-лэн ЦК-езлэн вылӥ школаяз. Газетлэн редакцияз С. В. Шкляев вань тубатъёсты ортчиз, вал огшоры корреспондент, берыктӥсь, промышленностья но транспортъя отделлэн, культура отделлэн кивалтӥсез, кыл кутӥсь секретарьлэн воштӥсез, бело аръёссэ ужаз редакторлэн нырысетӥ воштӥсез луыса. Семен Васильевич дӥсьтыса но валаса басьтӥськылӥз газетын пӧртэм ужпумъёсты ӝутон борды. Лыдӟисьёслы туж кельшылӥзы солэн лэчыт статьяосыз но мур пуштросъем очеркъёсыз. Быгатэ вал со серекъятӥсь юморескаос но гожъяны. С. В. Шкляев уно кужымзэ сётылӥз калыкен ужанлы. Ӵем поталляз кыдёкысь хозяйствоосы. Яратэ вал заводъёсын ужасьёсын но пумиськылыны. Юнме шат сое уно пол бырйылӥзы Первомайской райсоветэ но Ижысь горсоветэ депутатэ. Вал со партилэн горкомезлэн членэз. Кема аръёс ӵоже кивалтӥз редакциысь коммунистъёсын. Семен Ваасильевичез гажазы ӵош ужась эшъёсыз. Уно егитъёслы со журналистикае сюрес усьтӥз, трос лэсьтӥз удмурт культураез азинтон но вӧлмытон понна. Солы сётэмын "Удмурт АССР-ысь культура удысын дано ужась" ним. Мыло-кыдо тыршемзэ лыдэ басьтыса, С. В. Шкляев пусъемын "Знак почёта" орденэн но кӧня ке медален. Ваньмыз, кин тодэ вал Семен Васильевичез, солэсь яркыт тусбуйзэ сюлмазы возёзы. Ӟеч кӧл, Семен Васильевич! Тынэсьтыд уждэ ми умой азьланьтыны тыршом. "Удмурт дунне" газетын ужасьёс. 27 июне - Россиысь Егитъёслэн нуналзы ПИТРАН АС КОЖАЗ УГ БЕРГА Егит дыр нокинэ но палэнтӥ уг ортчы. Пичи этилэн яке дыдӥлэн ваньмыз азьпал на ке, арлыдо адямиослы но песянай-песятайёслы пинал дырзэс тодэ вайыса пальыштоно яке лулзӧно луэ. Нош мар сӥзе егитъёслы туннэез нунал? Вань-а соос сярысь сюлмаськись, соослэсь мылкыдзэс но малпанъёссэс валась ёз? Россиысь Егитъёслэн нуналзы матэктэмен валче редакциямы пумиськон ортчиз республикаысьтымы Егитъёсын ужанъя кун комитетлэн кивалтӥсеныз Андрей ГАЛЬЦИНЭН. Солэн та вакытэ одӥг сюлмаськонэз - умоятоно шаерысьтымы егитъёслэсь улон-вылонзэс. Озьыен, кыл сётӥськом Андрей Гальцинлы. - Егитъёсын ужанъя кун комитет аслаз ужаз куинь валтӥсь ужпумъёс вылэ пыкъяське. Нырысетӥез, егитъёсын ужась ёзэз кылдытон. 1991-тӥ арысен комсомол огазеяськон интые республикаысьтымы городъёслэн но районъёслэн администрациосазы, озьы ик Россиысь тросаз улосъёсын кылдытэмын вал егитъёсын ужанъя ёзъёс. Кичӧлтонэн потӥзы асьсэос комсомолецъёс. Озьы со аре Удмурт Республикаын кылдытэмын вал Егитъёсын ужан политикая кун комитет. 1995 арысен солэн нимыз воштӥськиз, луиз Егитъёсын ужанъя кун комитет. Нош Россия Федерациын Егитъёсын ужанъя Россиысь кун комитет кылдытэмын вал 1992 арын. Туннэ нуналлы республикаысьтымы егитъёсын ужан ёзъёсын кивалтэ тямыстон мурт. Со пӧлысь куамын тямысэз ужа кун комитетлэн ставкаез чотын, кылемъёссэ ас вылазы басьтӥзы городъёслэн но районъёслэн администрациоссы. Трос-а, ӧжыт-а со? Ӵошатон понна таӵе лыдпус верало. 1989 арын Ижевскысь Октябрь районын ВЛКСМ-лэн кивалтон ёзаз ньыльдон вить мурт ужаз. Гуртысь районъёсын со лыдпус дас куиньысен дас сизьымозь вал. Алиен ӵошатыса, макем паськыт валэктон уж нуиськиз соку егитъёс пӧлын. Котькуд пичигес предприятиын гинэ но комсомоллэн комитетъёсыз кылдытэмын вал. Ваньмыз озьы чакламын, одӥг егит мурт но палэнэтӥ медаз ортчы. Со вакытэ нылъёс но пиос ӧз сюлмаське, кытын ужалозы, дышетскозы, шутэтскозы. Нош туннэ нуналэ сокем трос шуг-секытъёс зӥбиськизы егитъёс вылэ, государство ачиз но дась ӧвӧл соосты палэнтыны. Но асьме обществолы, государстволы кулэ вал, дыр, со вакытэз ортчыны. Выльдӥськонлэн дасэтӥ араз тросэз валатскизы: уг яра вужезлэсь пырак палэнскыны, вань ӟечсэ, умойзэ басьтыса гинэ, азьлань мынон вамышъёс чаклано. Нош мар лэсьтӥське странаямы али, со понна егитъёс янгыш ӧвӧл. Комсомол вакытэ республикаямы люкам ваньбур ваньмыз чиптэм-чаптэм ышиз. Милемлы кутсконо луиз буш интыысен. Россия вылэ но туж ик оскиськыны уг луы. Пыкъяськоно луэ асьме кужыммы вылэ. Кулэ-а, ӧвӧл-а туннэ нуналлы Егитъёсын ужанъя кун комитет, Удмурт Республикаысь выль Правительство ласянь но юанъёс уг кылдо, ваньмыз лэсьтӥське законъя. Россия Федерациын егитъёсын ужанъя ёз быре но, выльысь кылдэ ке, асьме республикаын комитет нимаз ёз луыса ужалоз. Но Россиысь комитет милемлы кулэ егитъёсын ужан ёзлэн азьлань улонэз понна. Егитъёсын ужась ёзэз кылдытон республикаямы йылпумъяськыны кулэ 1999-тӥ арын. Котькуд ёросысь сельсоветъёсын егитъёсын ужанъя нимаз адями кутэмын луоз. Кызьы со ужалоз, ӝыны ставкаен яке кыӵе ке мукет амалэн, созэ чаклалозы ни интыысь кивалтӥсьёс. Та бадӟым ужпумез йылпумъяса, егитъёсын ужасьёслэн лыдзы трослы будоз. Но комсомол вакытэн кужыммес уд ӵошаты, отчыозь будыны туж кыдёкын. Партия но комсомол кивалтон вакытэ ваньмыз туж кулэ документъёс улэ гожтӥськылӥзы странаысьтымы ньыль валтӥсь кивалтон ёзъёс: коммунистъёслэн огазеяськонзы, Министръёслэн Советсы, профсоюз но комсомол огазеяськонъёс. Мон вераны уг турттӥськы, валтӥсь документъёс улэ мон но гожтӥськыны кулэ шуыса. Но Удмурт Республикаысь Кун Кенешлэсь но Правительстволэсь егитъёсын герӟаськем законопроектъёссэ но постановлениоссэ эксперт комиссия мед дунъялоз но комитетэн кивалтӥсь ас кылзэ мед вералоз. Со бордын ми али ужаськом. Комитет азьын сылӥсь кыкетӥез валтӥсь ужпум - законъёс бордын ужан. 1997-тӥ арын кутэмын "Удмурт Республикаын егитъёсын ужанъя кун политика сярысь" Закон. Кема но секыт уж вал со. Та законысь егит адями ассэ уз шедьты. Шуом, кӧня килограмм пызь висъяны солы кулэ яке кӧня час ӵоже со дунтэк дышетскыны быгатоз. Но вераны кулэ, ми али ужаськом ни социальной нормаос но нормативъёс кылдытон бордын но. Закон гожтэмын, кин понна чакламын егитъёсын ужанъя кун политика, со - егит семьяос, 14 аресысен 30 аресозь егит адямиос, нылпиослэн но егитъёслэн огазеяськонъёссы. Законын озьы ик верамын, кыӵе ужпумъёсты государство ас вылаз басьтэ но кызьы ужа со бордын. Пусъемын дас вить валтӥсь ужпум, быдэ вуымтэосты но егитъёсты уже интыян бордысен кутскыса, егитъёслы ӟеч сямъёс пыӵатон дорозь. Ужаськомы мукет законъёс кылдытон бордын но. Куинетӥ арзэ огкылъёс гожтӥськом ни районъёсысь но городъёсысь улосъёсын но администрациосын, сыӵе огкыл тупатымтэ на Ижевскысь администрациен гинэ. Озьы ик договор амалэн ужаськом пӧртэм министерствоосын но ведомствоосын, кудъёсыз герӟаськемын егитъёсын. Котькуд программаез ӵошен эскериськом. Туннэ нуналэ палэнэгес кылё на ужась заводъёсысь егитъёс. Но та ласянь азинсконъёс вань ни. Заводын егитъёсын ужась ёз кылдытон пумысен огкыл гожтэмын Глазовысь Чепецкой механической заводэн. Егитъёсын ужась комитет кылдытэмын Ижевскысь электромеханической заводын. Табере выжом коньдон ужпумъёс вылэ. Комитетлэн бюджетэз Удмурт Республикалэн бюджетэзлэн 0,28 процентэз луэ. Со коньдон мынэ тужгес бадӟым программаосты быдэстонэ. Республикаысьтымы котькуд районын егитъёсын ужанъя нимысьтыз программа кутӥське на. Районысь но городысь депутатъёслэн советъёссы эскеро, кӧня коньдон висъяно соизлы яке таизлы программалы. Озьы ик Калыкез дышетонъя, Тазалыкез утёнъя министерствоослэн бюджетсылэн бадӟым люкетэз мынэ егитъёс понна. Спорткомитетлэн но 80 процентэз пала бюджетэз егитъёслы ужа. Пиналъёслэн но егитъёслэн огазеяськонъёссылы коньдон висъян сярысь ке верано, со огшоры ужпум ӧвӧл. Огазеяськнъёслэсь ужзэ эскере дунъясь кенеш. Татын но нырысь ик лыдэ басьтӥське котькуд огазеяськонэн ӵектэм программалэн ӟечлыкез, кулэлыкез. Озьы ик лыдэ басьтыны тыршиськом огазеяськонэ пыриськемъёслэсь лыдзэс. Но тазэ шуггес чакланы, комсомол вакытэ сямен, котькуд адямия учёт нуон радлык нимыстыз тупатымтэ. Дасяз Л.Малых. Кулэ-а бен егитъёслэн ужпумъёсынызы вырыны? Туннэ нуналэ ваньмыз валало:югдурез тупатон понна вань быгатонозэ лэсьтоно. "Кедр" котыраз люка Туннэ Россиын сюрс пала пичи но бадӟым огазеяськонъёс инкуазез утёнэн выро. Но малы меда уг шӧдӥськы соослэн пайдазы? Малы дуннеысь самой кырсь омыро инты Россиын шараямын? Со - Челябинск областьысь Карабаш город. Малы ньылондор висёнэн (щитовидной железа) курадӟись нылпиос пӧлысь 65 процентэз Брянск городын уло? Мар кароно Россилэн музъем вылаз возиськись кышкыт химоружиен? Инкуазез утёнэн герӟаськем ужпумъёслы туэ бадӟым саклык висъязы Саратовын, экологъёслэн ӧтчамаз, но Москваын - "Кедр" партилэн съездаз. Та ужрадъёсы пыриськизы Россиысь "Вож кирос" ("Зеленый крест") огазеяськонлэн Удмуртиысь ёзэныз кивалтӥсьёс В. Алексеев но А. Арефьев, республикаысьтымы Инкуазез утёнъя комитетлэн кивалтӥсез Г. Рудных. Кылем арняе соос журналистъёсын пумиськылӥзы, кудзэ радъяз Удмурт Республикалэн Общественной палатаез. Инкуазез утён ужъёслы туж ӧжыт коньдон висъяське, шуиз Г. Рудных. кылем арын коньдонэн юрттэт 40 процентлы кулэсмиз. Туэ сое эшшо 10-15 процентлы кулэстыны малпамын. Со дыре ик инкуазь узырлыкъёсмес туж дунтэмен кунгож сьӧры вузаськом. Россиысь "Вож кирослэн" кылдэмез дырысен туэ вить ар тырмиз. Солэн ёзэз ужа Удмуртиын но. Бадӟым лэсьтэм ужъёсын ушъяськыны уг на луы. Озьы ке но, кызьы пусъемын вал та пумиськонын, огазеяськонлэн тыршеменыз, куинетӥ арзэ ини Камбаркаысь но Кизнерысь 25 пала нылпиос лагерьёсын но санаторийёсын тазалыксэс юнмато. "Кедр" партия мыр-мыр пыриськыны малпа Кун Думае быръёнъёсы. Солэн программаезлы туэ дурбасьто инмарлы оскисьёс но: буддистъёс, мусульманъёс, православной христианъёс но еврейёслэн общиназы. Политика ласянь "Кедрлэн" нокыӵе тушмонъёсыз ӧвӧл, соин ик луонлык вань та партия котыре трос адямиосты огазеяны. Т. БАННИКОВА. Городысь гинэ ветлӥзы "Ижпланета" клубын ӝог шахматэн шудонъя (котькудӥзлы шудӥсьлы малпаськыны сётӥське 25 минут) Удмуртилэн первенствоез ортчиз. Жаляса верано луэ, ӵошатсконэ пыриськыны быгатӥзы Ижевскысь коллективъёс гинэ. Коньдон ӧвӧлэн, Глазовысь, Сарапулысь но ёросъёсысь огазеям командаос лыктыны ӧз быгатэ. Азьвыл аръёсы таӵе шудонъёсы одно пырисько вал. Котькуд командае пыриськиз 5 воргорон но 1 кышномурт. Ӵошатсконын нырысь интыез утӥз "Импульс" (радиозавод) команда - 13,5 очко. Одӥг очколы гинэ бере кылизы "Прометей" коллективысь спортсменъёс (акциосын "УНГС - город" огазеяськон). "Куполын" шудӥсьёс 12 очко люказы. Турнирной таблицалэн улӥяз кылизы Удмурт кун но технической университетъёсын но спортъя 6 номеро нылпи школаын дышетскисьёс. Соослэн быдэн 11 очкозы. Нимаз шудонын кужмо луэмзэ возьматӥз "Прометей" коллективысь спортъя мастер Владимир Гребенкин. Со ньыльзэ ик партиез вормиз. И. Вельтмандер. Республикаын кылдэм югдур но "Удмурт кенеш" азьын сылӥсь ужрадъёс В. К. Тубыловлэн Вань удмуртъёслэн ВИИ (азьвыл чакламтэ) бадӟым ӧтчамазы лэсьтэм докладэз Асьмеос туннэ люкаськимы Вань удмуртъёслэн азьвыл чакламтэ ӧтчамазы, малы ке шуоно, люкаськытэк нокызы но уг луы ни вал. Быдэс Россиын, республикаын но социально-экономической кризис удмуртъёслэсь, мукет калыкъёслэсь сямен ик, улонзэс верантэм секыт кариз. Со сяна, секыт югдур кылдӥз политической улонын, тужгес но берло толэзьёсы, "Удмурт кенешлэсь" ӵектонъёссэ санэ басьтытэк, выль быръем кун властьмы меӵак султӥз удмурт кадръёсыз общественно-политической удысысь палэнтон сюрес вылэ. Соин ик вуоно съездэз возьматэк, одно ик кулэ асьмелы кенешыны, чакланы выль ужрадъёс, мургес валаны, кыӵе югдур кылдэмын асьме шаерамы. 80-тӥ аръёслэн пумаз ортчем воштӥськонъёс удмурт калыклы осконъёс сётӥзы вал, солэн кулэяськонъёсыз лыдэ басьтэмын луозы, но со эрико улоз ас музъем вылаз шуыса. Бадӟым тиражъёсын потӥсь газетъёсын печатламын вал соку калыклэн кулэяськонъёсыз сярысь кужмо статьяос. Шаерамы кылдӥзы удмурт калыклэн огазеяськонъёсыз: удмурт культурая "Дэмен" общество, Удмурт нылкышно кенеш, егитъёслэн "Шунды" огазеяськонзы, удмурт Инмарлы оскисьёслэн "Вӧсь" огазеяськонзы но "Удмурт кенеш" ассоциация. Удмурт калык пыриз финно-угор калыкъёслэн огазеяськоназы. 1992-тӥ арын Сыктывкарын ортчем нырысетӥ финно-угор калыкъёслэн Конгрессы кылдытӥз Консультативной комитет, кудӥз туж кулэ документъёс но резолюциос кутӥз. Удмурт калык ООН-лэн ассоциированной членэз луиз. Шаерамы но быдэс финно-угор дуннеын ортчизы трос пӧртэм фестивальёс, конкурсъёс, праздникъёс, кытчы пыриськизы удмуртъёс но. Удмуртиысь вань улӥсьёслэн праздниксылы пӧрмиз Гербер удмурт праздник. Калыкез дышетонъя министерство умойгес ужаны кутскиз удмурт кылэз но литератураез, калыклэсь историзэ, этнографизэ школаослэн программаосазы пыртон понна. Кутэмын вал национальной дышетонлэн концепциез но Кылъёсыз азинтонъя кун программа. Усьтӥськизы удмурт детсадъёс но школаос. Асьме шаерамы гинэ ӧвӧл, солэн палэназ но: Башкириын, Татариын, Марий Элын но Пермь областьын. Ижын, Воткинскын, Можгаын усьтӥськизы удмурт классъёс, лицейёс. 1997-тӥ арын кылдытэмын вал нимаз Удмурт Элькунысь дышетон удысын национальной ужпумъёсыз тодон-эскерон институт. 1994-тӥ арын кылдытэмын Нациосын ужанъя комитет, табере со луиз министерство. Ваньмыз та пусъем но мукет ужрадъёс юрттӥзы удмурт калыкез сайкатыны, вырӟытыны. Солэн улӥе мыкыртэм йырыз вылэгес ӝутскыны кутскиз вал кадь. Тросэз асьме эшъёс ӝутскем мылкыдын пырисько "Удмурт кенешлэн" ёросъёсысь, каръёсысь ёзэтъёсызлэн ужазы. Гуртъёсын выльысь кылдыны кутскизы гурт кенешъёс. Пичи Пурга ёросысь Брангуртысь гурт кенешлэн уженыз тодматскон понна ортчиз семинар. Ми, ваньмы, исполкомлэн членъёсыз, ёрос кенешъёслэн кивалтӥсьёссы соку одӥг малпанэ вуимы, гурт калыкез ӝутон-вырӟытон асьме ужын та вакыт самой кулэез луэ шуыса. Ялан тросгес но тросгес луо мылысь-кыдысь, тунсыко амалъёс кутыса, калыкен но кивалтӥсьёсын огкыл шедьтыса ужаны тыршись ёрос кенешъёс. Соос пӧлы пыртыны луоз "Удмурт кенешлэсь" Балезино, Можга, Завьял, Сюмси, Селта, Вавож ёросъёсысь, Глазов но Камбарка каръёсысь ёзэтъёссэ. Озьы ке но, республикаямы политика удысын кылдэм югдурез асьмеос удмурт калык пала берыктыны ӧм быгатэ на. Югдур арысь аре шуггес луиз но туэ кылдэм учыре вуттӥз. Нырысетӥез ик, удмурт калык каллен ыштэ суверенитетсэ. Валэкто: 1920-тӥ арын Удмурт (Вотской) область кылдытэмын вал, удмурт калыклэн автономиез луыса. Со ӧй вал удмуртъёслы кинлэн ке "кузьымез", кызьы тыршо валэктыны асьме шаерысь куд-ог политикъёс. Аслэсьтыз кужымзэ асьме калык нюръяськонын ачиз басьтӥз. Удмурт Автономия понна улонзэс сётӥзы Максим Прокопьев, Трокай Борисов, Степан Барышников, Иосиф Наговицын, Куӟебай Герд но удмурт калыклэн мукет уно сю тодмоосыз но тодмотэм азьветлӥсь пиосыз но нылъёсыз. Автономиез кылдытон, сое юнматон - со вераны луонтэм секыт уж вал. Ӟуч калык асьмемыз валаны тыршиз, но тырмыт вал шовинистъёс но, кудъёсыз пумтэм-йылтэм люкетӥзы, пыд пуктылӥзы властез ас киязы гинэ кельтон понна. 1922-тӥ арын Трокай Борисов юн куректыса гожъяз: "Ижысь эшъёс, пролетариатлэсь диктатуразэ утиськом шуыса, котькытчы пукто асьсэ адямиоссэс. Удмурт областьын, кытын удмуртъёс но кивалтӥсьёс пӧлы пырыны кулэ, соослэсь ужамзэс но улэмзэс чик но чакламзы уг поты". 1925-тӥ арын областьын ортчем партийной конференция, кудаз ӟучъёс удмуртъёслэсь уно пол тросгес вал, кутӥз резолюция. Самой кышкытэн со резолюциын ялэмын вал "удмурт шовинизм но назионализм". Тӥни озьы, дауръёсын зӥбем, шимес Мултан уж пыр ортчем, йырзэс мырдэм ӝутыны кутскем удмуртъёсыз "шовинистъёс но националистъёс" пӧлы пыртӥзы но соослы пуит нюръяськон ялӥзы. Жаляса вераны кулэ, та урод сям асьме шаерын али но туж зол шӧдӥське на. 1934-тӥ арын Удмурт автономия вылэгес лёгетэ ӝутскиз, область интые республика кылдӥз. Нош со дыре ик удмурт суверенитетсэ ыштӥз: 1937-тӥ арын кутэм Конституциын гожтэмын: "УАССР - рабочийёслэн но крестьянъёслэн государствозы". Валамон ини, та шимес аръёсы нокин но ӧз дӥсьты тодэ вайытыны, Удмурт Республика удмурт калыклэн автономиез луэ шуыса. Озьы ке но, со вакыт но депутатъёс пӧлын, правительствоын 45-50 процент удмуртъёс луо вал. Титульной нацилы квота чакламын вал. Соин, дыр, асьмеос, удмуртъёс, дышим, лэся возьмаса улыны: кинъёс ке но калыкмы понна сюлмаськозы, ньӧмыз понна инты сётозы, оло, кулэяськонъёсмес но кӧня ке но чаклалозы. Буйгатским, нош "перестройка но демократизация" вакытэ власть понна нюръяськон йыре лыктонтэм кырсь амалъёсын пуромыны кутскиз. Удмурт калык кивалтэтын аслэсьтыз люкетсэ пумен ыштыны кутскиз, пумитъяськыны ӧз быгаты. Кылсярысь, Верховной Советын (1991-1995 аръёсы) вал 26 процент удмурт депутатъёс, кылемаз Госсоветын - 16 процент, али 11 процент гинэ кылиз. Али нокин но асьме сярысь уг сюлмаськы ни, котькудӥз нюръяське ачиз понна, кивалтонэ аслэсьтыз сюрессэ коньдонэн лэсьтэ. Сое тужгес возьматӥзы туэ Госсоветэ ортчем быръёнъёс. Озьы ик ӧвӧл али асьмелэн адямиосмы (удмуртъёс) Россиысь Федеральной Собраниын но. Удмурт автономия кылдэм дырысен нырысьсэ вылӥ кивалтӥсе быръемын ӧвӧл удмурт адями. Удмурт депутатъёслэн ӧжыт луэмзэс, кивалтонысь удмуртъёсыз палэнтонэз валэктыны луэ. Москвалэн национальной политикаез мыдлань лэсьтэменыз, ӧжыт лыдо калыкъёслэсь кулэяськонъёссэс санэ басьтымтэеныз, калыклэн укыр начар улэменыз но удмурт калыклэн юн, кужмо огазеяськыны быгатэмтэеныз. Асьмелэн весь улэ на удмурт адямилэн луонлыкъёсызлы, быгатонлыкезлы оскытэк улон. Тросэз малпало, ӟуч яке мукетыз калык визьмогес но, быгатӥсьгес но шуыса. Озьы сӧремын асьмелэн асваланмы, асьмемыз гажанмы, валанлыкмы. Нош удмурт номыр уг быгаты шуыса малпан чик одӥг но шонер ӧвӧл ук. Удмуртъёс пӧлын туж трос учёнойёс, кивалтӥсьёс, артистъёс но мукет быгатыса ужасьёс, кутскид ке, вераса но уд быдты. Асьме калыклэн, мон сямен, кык туж бадӟым тырмымтэосыз вань: 1) Асьмеос ум быгатӥське пумитъяськыны урод, кырсь ужъёслы, уката ик политикаын. Кызьы шуо, туж ляб пыӵамын астэ утён - иммунитет самозащиты. Соин удмуртъёсыз ултӥяны, зӥбыны турттӥсьёс тодо - таос уз пумитъяське, кухняын вераськозы, лулӟылозы но буйгалозы. Озьы ик луэ. Азьланяз тазьы улыны уг луы ни, тырмоз! 2) Кыкетӥез, кудӥз тыпак лябӟытэ, уллань уськытэ, сереме кельтэ калыкмес - со вожъяськон, ог-огмес йыръён. Валамон, сыӵе сямъёс толон гинэ кылдэмын ӧвӧл, оло, удмуртъёс со понна янгыш но ӧвӧл, дыр, трос аръёс ӵоже соослы ултӥяса улоно луиз бере. Но солы пум куке но поныны кулэ ни. Удмуртъёслэн депутатэ ӧжыт потэмзы, нырысь ик, та бордысь но потэ. Пӧртэм калыкъёс законъя огкадь правоё луыны кулэ шуыса гожтонлы ноку но уд оскы, кивалтон удысъёсын удмуртъёс туж ӧжыт яке чик ӧвӧл ке. Таӵе шуг учыр кылдэмен валче, "Удмурт кенеш" огазеяськонлэн исполкомез 28-тӥ апреле кутӥз нимысьтыз кык вазиськон: Кун Кенешлэн депутатъёсызлы но Республикаын улӥсь вань калыклы. Отын верамын вал, Госсоветлэн кивалтӥсьёсыз но депутатъёс нырысетӥ вамышъёссэс шонер лэсьтымтэен, элькунын политической кризис шӧдӥське гражданской обществоез, калыкез люкон понна нимысьтыз уж нуиське шуыса. Сётэмын вал та пумысен ӵектонъёс но куронъёс. Исполкоме но Пичи кенеше ӧтьылэмын вал Госсоветлэн кивалтӥсез Волков А. А. но Правительстволэн кивалтӥсез Ганза Н. А. Озьы ик ортчытэмын вал пикетирование но. Жаляса верано, та куарамес кивалтӥсьёсмы кылымтэ улсы кариськизы. "Удмуртская правда" но "Известия Удмуртской Республики" газетъёс - госструктураослэн нимысьтыз органъёссы - та вазиськонъёсыз ӧз печатлалэ. Санэ басьтэмын ӧвӧл "Удмурт кенешлэн" правительствое ӵектэм адямиосъя дэмланъёсыз но. Нош "Кенеш" вазиськонъёссэ кутэм бере ик "вордске". Элькунысь общественной палатаезлэн секретариатэзлэн вазиськонэз. Отын гожтэмын: "Опредленные политические силы, утратившие реальную власть, ставят под сомнение механизм формирования новых органов власти в республике, отдавая приоритет при выдвижении на государственные должности только национальному или партийному признаку без учета деловых качеств". Та-а ӧвӧл удмуртъёсыз сантэман? Озьыен, асьме калыкмы пӧлын ӧвӧл кивалтонын ужаны быгатӥсь адямиос? Ӵуказеяз ик национальной политикаез валамтэез возьматӥсь та документ потӥз вань газетъёсын. Нош удмурт калыклы пумит серметэз шӧдӥсьтэм кыӵе кампания нуиськиз, али но нуиське газетъёс но журналъёс пыр? Кыӵе республикаын дунне вылэ потыны быгатысал меда "Мурлот" выллем роман? Кытын прессаын со быдӟа инты сётысалзы Е. Шумиловлы но мукетъёсызлы, кудъёсыз дас ар ӵоже узато ини ӟуч калыкез удмуртъёс вылэ. Маин гинэ ӧз кышкатэ ини куанер ӟуч калыкез! Соос пӧлын "Удмурт кылын" ваньмызлы ӟучъёслы вакцинация ортчытон но, удмурт веднаськисьёс но, удмурт идиотъёс но, номыре валасьтэм "бездарной" удмурт кивалтӥсьёс но, кудъёсыз возё ас киязы вань властез но ӟуч калыклэсь улонзэ шугомыто. Кыӵе гинэ сьӧлыкъёс уг ошыло соос удмуртъёс вылэ? Шат таӵе гожъямъёс юрттозы калыкъёсмылэсь кусыпсэс юнматыны., быръёнъёсын вормыны?! Туннэ люкаськем съездлэн делегатъёсыз вань удмурт калыклэн нимыныз сётыны кулэ асьсэлэсь дунъетсэс республикаямы политика удысын кылдэм таӵе секыт югдурлы. Удмуртъёслэн но чиданзы пумтэм ӧвӧл. Таин улон уг быры. Азьпалан (декабрь толэзе) Россиысь Госдумае быръёнъёс ортчозы, озьы ик азьланяз республикамылы вань калыкен кивалтӥсь быръёно луоз. Кыӵе луоз асьмелэн азьлань стратегимы но тактикамы? Кыӵе умойгес но пайдаё амалъёсты уже кутоно вуоно быръёнъёс дыръя? Кызьы удмуртъёслэсь асваланзэс ӝутоно? Кызьы "Удмурт кенешлэн" ёзъёсызлы золгес пыриськоно политикая но экономикая ужрадъёсы? Таӵе но мукет юанъёс пумысен рос-прос вераськыны кулэ асьмелы та съездын. Ивор вӧлмытӥсь куд-ог ёзъёс, озьы ик кивалтӥсьёс, муртлэн шуге усемезлы шумпотыса кадь дыртӥзы ивортыны, "Удмурт кенеш" быръёнъёсын урод ужаз шуыса. Нош номыр уг верало, кӧня кужым, коньдон куштэмын вал пумит ужанлы. "Удмурт кенешлэн" депутатэ котькуд кандидатэзлы пумит нюръяськыны пуктэмын вал Госсоветлэн кивалтӥсьёсызлэн блокысьтызы адямиос. Уже кутэмын вал бырйисьёсыз ас палазы уксёен, сиён-юонэн кыскон, пӧян, соосыз кышкатон, шантаж но трос мукетыз. Кун Кенеш ваньзэ лэсьтӥз, 130 округ медам луы шуыса, соос уго кылдытэмын луысалзы гурт ёросъёсын, соку удмуртъёс депутатэ тросгес потысалзы. "Удмурт кенеш" - со общественной организация, быгатэмезъя, спонсоръёс юрттэмъя, со аслаз кандидатъёсызлы висъяз коньдон но ортчытӥз трос мукет ужрадъёс. "Кенешен" ӵектэм адямиос асьсэлэсь данзэс ӧз ыштэ, соос чылкыт амалъёсын нюръяськизы пумозяз. Мон туннэ тӥляд нимыныды тау карысал вань депутатэ потэмъёсызлы но, потымтэосызлы эшъёсмылы но та секыт нюръяськонэ пыриськемзы понна. Ваньдылы туннэ вормыны ӧз кылды, но кылдоз ӵуказе, мукет дыре. Кышкаса, курдаса гинэ пуким ке, вормонъёс ноку но асьсэос уз лыктэ. Кызьы тодмо ини, "Удмурт кенеш" исполкомлэн ӵектэмезъя кылдытэмын вал быръёнъёсъя нимысьтыз блок - "Элькун". Отчы пыризы "Удмурт кенеш" огазеяськон, бигеръёслэн но поръёслэн огазеяськонъёссы, Писательёслэн союззы, Удмурт нылкышно кенеш, Удмурт культурая дэменлык, культура удысын ужасьёслэн профсоюззы. Кылдытэмын вал нимысьтыз план, депутатэ кандидатъёсын ужан понна юнматэмын вал тодосчиос, писательёс, кылбурчиос, артистъёс, журналистъёс. Ваньмыз ог 50 пала мурт та уже ас дырзэс жалятэк пыриськемзы понна туннэ тужгес но тау шуэме потэ Галина Васильевна Романовалы, Галина Аркадьевна Никикитанлы, Вячеслав Дмитриевич Михайловичлы, Зоя Витальевна Суворовалы, Леонид Дмитриевич Загребинлы, Роза Ивановна Яшиналы, Людмила Степановна Христлюбовалы, Анатолий Ермолаевич Комаровлы, Геннадий Иванович Бекмановлы, Валентина Михайловна Ившиналы но мукетъёсызлы. Ёзъёсыз пӧлысь пусйыны кулэ "Удмурт кенешлэн" Сюмси, Балезино, Селта, Кизнер, Можга ёросъёсысь ёзъёсызлэсь тыршыса ужамзэс. Куд-ог районъёсын кандидатъёсмы депутатэ ӧз ке но потэ, быдэстэм уж юнме уз луы. Оскон кылдэ, политикаен герӟаськем ужрадъёсы та ёзъёс азьпалан уката но юнгес пыриськозы шуыса. Трос умойзэ та уже пыртӥзы "Удмурт интеллигенцилэн ас калыксэ азинтонын интыез" ужпумъёслы сӥзем научно-практической конференциос. Соос ортчизы Ижын но 16-яз ёросъёсын. Быръёнъёс дасяку но конференциос ортчытыку, интеллигенциен, дышетон но культура удысын ужасьёсын, механизаторъёсын, кивалтӥсьёсын, пудо утисьёсын трос пумиськонъёс ортчытэмын вал. Мае возьматӥзы та пумиськонъёс? Кыӵе малпанэ соос вутто? Малпанъёс, шуыны луоз, туж ик капчиесь ӧвӧл. Быдэс дуннеын удмурт калык ужась луэменыз тодмо луэ. Ужаны быгатӥськом, нош малы асьме пӧлын ӧжыт кивалтӥсьёс, коньдон ужъёсты бергатӥсьёс, предпринимательёс? Малы асьмеос умой-умой огазеяськыны ум быгатӥське? Малы огъя кариськыса ог-огмес вылӥгес ӝутыны ум тыршиське? Удмурт интеллигенцилы сӥзем конференциос озьы ик возьматӥзы, дышетскем эшъёсмы пӧлысь куд-огезлэн али но сюлэмзы ас калыкез пала берытскемын ӧвӧл на шуыса. Сыӵеос тазьыгес шуо: мон аслэсьтым ужме ӟеч лэсьтӥсько, нош калыкмы сярысь кивалтӥсьёсмы мед сюлмаськозы. Зэм, котькин ас ужзэ ӟеч лэсьтыны, со сярысь сюлмаськыны кулэ. Озьы ке но, асьмелы, удмуртъёслы, вань калыкмы сярысь но малпаськытэк-сюлмаськытэк улыны уг яра. Ӟуч но мукет трос лыдо калыкъёс трос сюлмаськытэк но уз быре. Удмуртъёслы озьы улыны уг яра - асьмеос ӧжыт! Интеллигенция котькуд калыклэн элитаез луэ, со ас калыксэ азьлань нуэ. Та пумысен асьмелэн вань адӟем карымон адямиосмы: удмурт калыклэн дано пиез Куӟебай Герд но дано нылыз Ашальчи Оки. Та кизилиослэн яркыт пиштэмзы али но юрттэ мылкыдъёсмес бурдъяы, осконъёсмес кужмотяны, удмуртлыкмес ӝутыны. Туннэ но туж тупало Куӟебай Гердлэн ӟырдыт кылъёсыз: Султэ! Вырӟе, эшъёсы, Сайкатэлэ калыкез... Вань удмуртъёслэн ВИИ (азьвыл чакламтэ) ӧтчамзылэн "Элькунын туала общественно-политической югдур но "Удмурт кенеш" огазеяськон азьын сылӥсь ужпумъёс сярысь" резолюциез "Удмурт кенеш" огазеяськонлэн исполкомезлэсь "Элькунын туала общественно- политической югдур но "Удмурт кенеш" огазеяськон азьын сылӥсь ужпумъёс сярысь ВИИ ӧтчамлы докладэз кылзыса но эскерыса, делегатъёс пусъё, Удмурт Элькунысь Кун Кенешлэн кыкетӥ созываз берпуметӥ быръёнъёс ортчем бере, трос аръёс ӵоже нырысьсэ тужгес урод но лэчыт политической югдур кылдӥз шуыса. Удмурт кунлык кылдэм дырысен нырысьсэ тӥямын одӥгез валтӥсь политической принцип: кык вылӥ кивалтӥсьёс пӧлысь одӥгез котьку удмурт луэ вал. Россиялэн парламентаз нырысьсэ ӧвӧл одӥг удмурт но. Шӧдӥсько удмурт калыклэсь кунлыксэ быдтыны мылкыдъёс. Озьы луэ, калыклэсь кулэяськонъёссэ лыдэ басьтытэк кивалтэмен. Кун Кенеш ӧз быгаты огазеяны вань общественно-политической кужымъёсты, экономикамес кризисысь поттыны. Кун Кенешысь кивалтӥсьёс ялан ултӥяло "Удмурт кенеш" огазеяськонэз, лыдэ басьтытэк туртто солэсь асьме калыклэн аскивалтонъя органэз луэмзэ, чик санэ уг басьто ассоциацилэсь заявлениоссэ, вазиськонъёссэ но ӵектонъёссэ, кудъёсыз герӟаськемын удмурт калыклэсь правоосэ утёнэн. Али но кутэмын ӧвӧл кун кыл сярысь закон, национальной кадръёсты дасянъя кун программа, юнматымтэ вузъёсы но мукет дышетонзаведениосы удмурт егитъёслы пыртыны квота. Кивалтэтэз юнматыку, чик но лыдэ ӧз басьтэ исполкомен дэмлам кандитураосты. Куд-ог газетъёс ("Известия УР"), "МК в Ижевске", "Городской стиль", "Удмуртская правда", "Панорама") удмурт калыкез ултӥясь, мукет калыкъёсын ваче пумит пуктӥсь материалъёс печатлало, юри умойтэм возьмато "Удмурт кенеш" огазеяськонлэсь ужамзэ. Со дыре ик ӧтчам пусъе быдэс огазеяськонлэсь лябгес ужамзэ. "Удмурт кенешлэн" ёзъёсыз лэчыт нюръяськонлы, моральной но психологической зӥбетлы дась ӧй вал. "Удмурт кенешлэсь" куронъёссэ но дэмланъёссэ быдэс калык ӧз вала, ӧз луы сое иземысь сайкатыны. Соин ик, сыӵе округъёсын но, кытын 80-90 процентэз улӥсьёс удмуртъёс, быръемын удмурт каылклэсь кулэяськонъёссэ санэ басьтӥсьтэм дупетатъёс Кун Кенешлэн кыкетӥ ӧтчамаз удмурт депутатъёслэн лыдзы 11 процентозь кулэсмиз. Вань удмуртъёслэн ВИИ (азьло чакламтэ) ӧтчамзы пуктэ: 1. "Удмурт кенеш" огазеяськонлэн исполкомезлэсь ӧтчамын докладзэ умоен лыдъяно. Ӧтчамын верам ӵектонъёсты лыдэ басьтоно. Кылдэм югдурез валэктон вылысь, удмурт калыклэсь кунлыксэ утён понна, 1999-тӥ аре 1-тӥ ноябрёзь ваньмаз ёросъёсын но каръёсын активлэсь паськытатэм собраниоссэ ортчытоно. Удмуртъёслэсь асваланзэ ӝутон вылысь чаклано кужмо амалъёс но шонер сюресъёс, юнматоно калыклэсь политикае пыриськон мылкыдзэ. Золгес ужано егитъёсын. Удмурт движение тросгес кысконо кужмо, нюръяськыны быгатӥсь адямиосыз. Юнматоно гурт, ёрос но город кенешъёсты. 2. Кун Кенешлэн депутатъёсызлы вазиськоно Удмурт Элькунлэн Констиуцияз удмурт калыклэсь правооссэ но кивалтон органъёсын представительствозэ утись статьяос пыртон пумысен. 3. Кун Кенешлы кутыны ӵектоно: - Вань удмуртъёслэн ӧтчамзылэн статусэз сярысь законэз; - Удмурт Элькунысь кун кылъёс сярысь законэз; - Национальной кадръёсты дасянъя государственной программаез. 4. Элькун Кивалтэтлы ӵектоно: - ГТРК-ын удмурт кылын мынӥсь программаосты йылэтыны; - Вань удмуртъёслы удмурт но ӟуч кылъёсын потӥсь "Герд" газетлы коньдонэн юрттыны; - Куӟебай Гердэз ялан буре ваён вылысь, ужрадъёсын программаез одно ик быдэстыны. 5. Международной правоез но вань удмурт калыклэсь мылкыдзэ лыдэ басьтыса, Вань удмуртъёслэн ВИИ ӧтчамзы музъемез вузаны-басьтыны мылкыдъёслы пумит луэмез сярысь вера. 6. Удмурт егитъёслы вылӥ но шоро-куспо профессиональной образование сётон вылысь, Удмурт Элькунлэн кивалтэтэзлы нимысьтыз ужрадъёс кутоно. 7. Кун Кенешлы вазиськоно таӵе ужпумен но: элькунамы кылдытоно вань калыкен быръем тӧролэсь постсэ, со огдыре Кивалтэтлэн тӧроез луыны кулэ. Та пумысен толсуре Российской Федерацилэн Кун Думаяз депутатъёсты бырйыку но референдум ортчытоно. 8. "Удмурт кенешлэсь" Россилэн мукет регионъёсаз ёзъёссэ лыдэ басьтыса, исполкомлы косоно ассоциациез Российской Федерациысь юстицияя Министерствоын пусйыны, солы межрегиональной организацилэсь статуссэ сётон вылысь. Кутэмын 1999-тӥ арын 19-тӥ июне. Ижевск город. Наталь Керетонлэн выжыез Таӵе визькыл вань: "Тупаса улӥсь кузпалъёсты ачиз Лакшми (Шудваись инмумы) бакель каре". Кузпалъёс тупаса уло ке, нылпиоссы, пересьёссы но туж шудо уло, сыӵе семьяос узыргес но ваньбурогес луо. Сыӵе семьяын юонлэсь но мылкыд куашканлэсь утиськыны капчигес. Тыршись воргоронлэн солэн котьку вань юрт котыраз ужез. Со матысь муртъёсызлэсь сюлэмзэс шумпоттыны тырше но улонзэс капчигес карыны сюлмаське. Нош кузпалъёс ялан керето ке, одӥгзылэн но мылкыдзы уз луы юрт котырзэс чебергес карыны, ог-огзылы юрттыны. Талы пумит, соос ог-огзылы могӟет пуктылозы но секыт мылкыдо улозы. Вашкала вакытэ удмуртъёс гуртъёсазы тупаса улӥллям. Одӥг улыэн кадь. Сое выльысь берыктоно вылэм. Котькуд адями аслэсьтыз удыссэ но ужзэ шедьтыны турттысал но ас удысаз сюлмысь ужасал ке, ачиз но шудо луысал, мукетъёссэ но шумпоттысал. Ведакат валэктэмъя, ваньмы асьмеос тупал муртъёс. Асьмеос ваньмы духовной дуннеысь, материальной дуннеын таман гинэ улӥськом. Та дуннеын улыса адямилы дышетсконо но кин луэмзэ валано, пе. Асьмеос али ог-огмес мыдлань дунъяськомы. "Таиз куанер, таиз узыр. Таиз эше, таиз тушмонэ, тазэ мон яратӥсько, тазэ тодэме но уг поты" - тазьыгес малпаськомы асьмеос. Нош мугор со дӥськут гинэ. Мугор сурыкмемен, сое нумыръёс сиёзы но ваньбурмы но, коньдонмы но мурт кие сюрозы. Асьмеос огкадь паймымон чылкыт лулъёс. Инмарлэн пиосыз. Азьвыл лэсьтэм ужъёсмыя гинэ турлы мугоръёсы понэмын кармакатэн но куазен. Кин ке огдырлы узыр но кужмо мугоре понэмын азьвыл ӟеч ужъёсызъя, кин ке куанер но ляб мугоре. Сьӧмлыкъёсыз понна. Кӧня ке дыр ортчыса, соос воштӥськозы интыенызы. Котырамы ваньмыз Инмарлэн ваньбурез но асьмеос ваньмы Солэн туж шудо но паймымонэсь нылпиосыз. Сое валаса улыны кулэ. Керетонлэн выжыез сюлэмамы. Сюлэммес чылкытатыса гинэ асьмеос шонергес но ӟечгес улыны быгатом. Юсь Падем, Можга ёрос. Николай НИКИФОРОВ. Вунэтӥ ни... Малпамтэ мадёс Степан агай кылем аре арлыдыз тырмыса шутэтсконэ кошкиз. Озьы ке но колхоз ужлэсь чутрак ӧз палэнскы на. Быгатэмезъя фермае но юрттӥськыны вуэ, вукоысь но сое пумиталод. Воргорон лапег, чиед мугоро. Ымнырыз восьтэт но кӧсыт. Синме шарак йотымонэз - азьлане сётскем йылсо нырыз но бур пыдыныз чутыса лёгаськемез. Кыллы туж шаплы Степан агай. Ымдэ усьтыса кылзӥськыку, азвесьсэ но алтын* чотэ алдаса сётыны быгатоз. Солэн юртъераз котьмаиз котькинлэсь усто, кузпалэз - котькинлэсь мусо но усточи. (Ма таиз ласянь ченгешонэз но ӧвӧл. Улон гумырзэс ӵошен ортчытэм, огазе куинь нылпиоссэс быдэ вуттэм кышнозэ шат уз ушъя?!) Воргорон егитъёс пӧлы ке шеде, ассэ туж эрикоен лыдъя кадь. Котьма сярысь мадиз ке но шонертӥсез, эрекчамзэ шараясез уз луы ук. Олокӧня пол кутскыса мадемзэ кылэме вань: туж кибашлы луэм со нинлэсь пыдкутчан - кут кутанъя. Татын кӧня ке кыл историысь пыртытэк амалы ӧвӧл. Гажазы, ушъязы ӟеч, чебер кут кутась пиосмуртэ. Крестьян калык кутэн ветлӥз ук. Революцилэсь азьло тодмо исследовательлэн Н. Н. Блиновлэн лыдъямезъя, Удмурт шаерын дас куинь пӧртэм кут кутало вылэм: ӟуч, удмурт, бигер, пор, чуваш... Асьсэлэн уженызы даньяськыса, удмурт крестьянъёс - кутасьёс вералозы вылэм: "Петр Великий котьмар лэсьтыны быгатылэм, нош кут кутан борды кутскыса ёрмем, пӧрмытымтэ но шуэм: "Та ужлэсь уродэз номыр но ӧвӧл". - Чильпаса, пужыё-пужыё карыса кутасько вал, - маде Степан агай. Эсьмаса, кытын гинэ ӧз синмаськылэ мынам киужелы?! Куное бертэм ӵыжы-выжыосы Йошкар-Олае но нуыса кошкизы, Ижкаре но келяй, Кировын но синпель кузьым интыын возё... - Степан Фролыч, - вазисько мон, солэсь ушъяськонзэ куспетӥ карыса. - Вожо ӝыт матэктэ тани, шулдырьяськон-пӧртмаськон вакыт. Кута ай мыным но сизьымо я укмысо кутъёс. Тынад киуженыд быдэс калыкез паймытысал. - Ма, ма... - огдырлы могӟе воргорон. - Мон дась нинъёс шедьто. Ӝытъёсы куталод, буш уг кары, дунзэ тыро. - Кемалась ни вал со, Никол, - синъёссэ сырк-сырк выретыны кутске со. -Кутаськыны вунэтӥ ни... Люкаськемъёс гурак серектӥзы. Мон ӧй пальыша. Огез гинэ сюлэмме портэ: "Шат куке но ужам ужез воксё вунэтод? Ужам-тыршемъя выльысь тодэ вайыны луэ ук". * Алтын (бигер кыл) - зарни. Вуиз турнан дыр Гуртын туннэ - праздник: вуиз турнан дыр. Кышоос, нылъёс, чебер дӥсяськыса, возь вылэ пото. Воргоронъёс - кусоосын, кылкышноос, пиналъёс - мажесъёсын. Соос утялто нюко-гопо интыосты, нюлэс кушъёсты. Жин-жон! жин-жон! шуккиське ужгур. Жич-жич! погра удалтэм турын. Артысь бусыын лысву усьытозь гурето тракторъёс но машинаос. Соос турнало кизем турынъёсты, куасьмемзэ пумен тюкъёсы бинялто но ферма котыре вортто. Куазез пӧсьсэ уг жаля. Ӝыт пал зорзэ куд-ог интыосын кисьтэ ке но, ӵукнаозь ваньмыз тӧлӟе. Нош турын туэ удалтэмын! Нюргес возьёс вылын адями ик ыше нап ӝужам тузь, шашы пӧлы. Толалтэ со но ӟеч сиён луоз - бере гинэ эн кыльы, дыраз утялты. Кыӵе югдур та ласянь шаерамы? Кизем турынъёсты ӝутонын синмаськымон ужало Можга районысь хозяйствоос. Соос 1600 гектар вылысь турназы но интыязы ни. Каллен ке но, вырӟизы Каракулино, Алнаш, Вавож палъёсын. Та нуналъёсы соос умой-умой басьтӥськизы пудо сиён дасян борды. Нош Красногорск но Кез районъёсын гужемлэн вуэмез уг шӧдӥськы на: кусо шуккемез та котырысь шер кылод. Республикая туннэ нуналлы кизем турынъёс погыртэмын ог 8 сюрс гектар вылысь. 2 сюрс тонна ёрос кӧс турын ӝутэмын, со дыре ик мынэ сенаж но силос дасян. Улон возьматэ, кытын ӟечгес но тросгес пудо сиён утялтэмын, отын толбыт пуж-пуж йӧл но кыско, пудозэс но мултэс сюлмаськытэк будэто. Л.Медведева. Вуоно пумиськытозь! Гурт спортсменъёслэн 8-тӥ гужем шудонъёссы йылпумъяськизы. Завьял ёрос шырыт пумитаз кунооссэ. Ньыль нунал ӵоже нюръяськизы гуртоос таӵе бадӟым "олимпиадаын". Туэ но нырысетӥ интыез басьтӥзы Завьял районысь кужмо спортсменъёс. Соос 379 очко люказы. Кыкетӥ интыын можгаос - 354 очко. Чылкак кык очколы гинэ бере кылиз Играысь команда - 352 очко. Кыкетӥ группая (татын лыдэ басьтӥське ёросын улӥсьёслэн лыдзы) азьпала потӥз Ярысь команда - 285 очко, кыкетӥ луизы вавожъёс - 283 очко, куинетӥ инты шедиз Дэбес районысь командалы. Ӵошатсконысь интыс но дыр сярысь пыр-почгес тодматом газетмылэн 6-тӥ июле потӥсь номераз. Н. Байтеряков. Туспуктэмез В. Камашевлэн. Кузьымгурт школалы - 100 ар Кин малпаны быгатысал, огшоры пичи (начальной) школаез йылпумъям адямиосын пумиськон гуртын сокем бадӟым шулдыръяськонлы пӧрмоз шуыса? Но со озьы ик вал. Школалэн директорез Людмила Васильевна Антонова азбарысь жӧкъёс сьӧры президиуме пуктылэ дуно кунооссэ но микрофон пыр ялэ Кузьымгурт школалэн сю ар тырмонэзлы сӥзем пумиськонэз усьтэмен. Табере туж усто дасям концертсэс возьмато-кырӟало, экто но люкаськемъёсты шулдырто алнаш артистъёс. Пумиськонлэсь кыкетӥ люкетсэ нуэ школалэн директорез, солы юртто дышетӥсьёс но дышетскисьёс. Та палан вазен улэм-вылэм Ушков помещик. Гурт калыклы малпам со пичи ке но грамота сётыны... Собере тодмо луэ, вуж школалэн юртэз вӧзысь зӧкесь топольёс 1914-тӥ арын Ӟаччалась вайыса мерттэмын вылэм шуыса, нош школае азьло аръёсы ветло вылэм Лебедевка, Чукырча, Базака, Тыло, Кезьыт ошмес гуртъёсысь нылпиос. Пумиськонэз дасясьёс бадӟым эскерон уж нуиллям, шуыны луоз. Тани история наукаосъя докторлэн Н.Лупповлэн "Из наблюдений над бытом удмуртов В.-Ятчинского края" книгаяз (потэмын 1927 арын) верамын: Кузьымгурт школа черклэсь нимаз кариськыса ужа 1914 арысен. Тае шонерен лыдъя 1906 арын Кузьымгуртын вордскем Анастасия Васильевна Арбаева но. Яке тодмо луэ: Кузьымгуртын 1710-тӥ арын 6 корка но 29 улӥсез вылэм. Данакез куноос кыл куризы но вордскем гурт калыксы азьын вераськизы: соос пӧлын вал тодосчиос агай-вынъёс Разинъёс, самодеятельной композитор Михаил Оськин, Можга педучилищеысь директорлэн воштӥсез Лев Афанасьевич Смирнов, отставкаысь полковник Григорий Гаврилович Смолин но мукетъёсыз. Чузъяське кырӟан. Со сӥземын дано агроном Николай Гаврилович Шабалин понна. Со уго музем удалтонлыкез ӝутӥз. Азьвыл гектарысь 9 центнер кутсало ке вал, Шабалин та лыдпусэз 25 центнерозь вуттӥз. Школаез йылпумъямъёс пӧлын вань дышетӥсьёс, эмъясьёс, гурт улонэз бергатӥсьёс, культура, наука удысэз азинтӥсьёс. Нош Москваын улӥсь Иван Докукин кемалась ни наукаосъя доктор луэм, зэм, вордскем палъёсаз вуыны пӧрмымтэ. Школалэн выль директорез шуныт пусйиз пӧртэм аръёсы ужам дышетӥсьёс сярысь. Наталья Александровна Докукина, ӟуч кышномурт удмурт нылпиосты анай кылзылы но дышетӥз, та школаын ужаз 30 ар ӵоже. Нылпиос солы пулэсь вӧлыса сиён пӧран арбериос дасяллям. Дышетӥсьсы ачиз Ижысь лыктыны быгатымтэ, соин кузьымзэс сётӥз солэн пиезлы. Шуныт кылъёсын тодазы ваизы фронтын быре дышетӥсь Николай Васильевич Скобелев сярысь но. - Пумиськон туж ӟеч дасямын вал. Со туж шулдыр но пайдаё ортчиз. Кузьымгурт школа дышетон ужзэ умой быдэсъя, нылпиосыз ю-нянь будэтыны но пудо вордыны дышетэ. Азьланяз дышетскыны но юн инъет кылдытэ. П.Кузнецов. Кылем арын "Удмурт кенешлэн" исполкомез, город но ёрос кенешъёс трос пӧртэм ужрадъёс ортчытӥзы, Куӟебай Гердлы но Ашальчи Окилы сӥзьыса. Та дано адямиослэн нимъёссы ноку но медам вунэ. Интеллигенциен ужанэз конференциосын гинэ йылпумъяно ӧвӧл. Отын кутэм ӵектонъёсыз уже кутыны тыршоно. Исполкомлэн но Пичи кенешлэн ужан планаз со пумысен нимысьтыз ужрадъёс пыртоно. Быръёнъёс озьы ик возьматӥзы "Удмурт кенешлэн" активезлэсь калыклэсь асваланзэ ӝутонын ляб ужамзэ, политика удысэ ляб пыриськемзэ. Пумиськонъёсын ӵем дыръя кылӥськылӥзы таӵе верамъёс: "Кыӵе пӧртэмез, кин понна куараез сётыны, ми понна гинэ мед сюлмаськоз". Маин берыктӥське озьы малпаса, мае ке возьмаса улон? Со берытскоз удмурт калыклэн ляльчилы пӧрмеменыз кылеменыз. Шаркан, Игра, Селта, Кез, Яр, Юкаменск, Пичи Пурга ёросъёсысь, Глазовысь удмуртъёс, кытын соос ӝынылэсь трослы уногес, ӟуч депутатъёсыз бырйизы? Котькуд удмуртэз китӥз валтыны кулэ шат, со аслэсьтыз улонзэ мед валалоз шуыса? Калыкмылэн асваланэз вылӥынгес луысал ке, асьмелэнъёс депутатэ удмурт кандидатъёс понна дурбасьтысалзы ке, соку самой ӧжытсэ укмысэз удмуртъёс, кин кылиз кыкетӥ интые, потысалзы на Госсоветэ депутатэ. Нош Юкаменск, Як.-Бодья, Яр ёросъёсысь огазеяськонъёсмы трос пол вераськыса но асьсэлэсь адямиоссэс депутатэ кандидатэ ӧз ӵектэ. Озьыен, татысь ик адӟиське: кыӵе секытэн вырӟе удмурт калыкез огазеян, сое политика удысэ кыскон уж. ВИ съезд бере та юанъёс пумысен ӧжыт ӧм ужалэ кадь. Кӧня ужрад ортчытэмын вал ёрос кенешъёслэн кивалтӥсьёсынызы исполкомлэн ӝыныез заседаниосыз (ваньмыз 17 вал) ортчылӥзы, соосты ӧтьылыса. Ёрос кенешъёслэн ужан амалъёсынызы тодматскон понна, Пичи Пурга, Завьял, Можга ёросъёсын но Глазовын ортчизы нимысьтыз семинаръёс. Озьы ке но, али но тросгес ортчытыны тыршиськом на пӧртэм фольклор праздникъёс, пукон ӝытъёс, пумиськонъёс гинэ. Таӵе уж но кулэ. Со валамон. Но соос юонлы но эктонлы гинэ медаз пӧрме вал, соку но вунэтоно ӧвӧл агитация нуонэз, калыкмылы валэктоно улонлэсь кудпала бергамзэ. Валалэ, эшъёс, политикае пыриськытэк, асьмеос правоосмес утьыны, калыкмылэсь данзэ ӝутыны ум быгатэ. Жаляса верано луэ, тросэз асьме кивалтӥсьёсмы сое гинэ возьмало: удмуртъёс, пе, мед кырӟалозы, мед эктозы, нош политикае медаз пыриське. Нош зэмзэ верано ке, правоосмы понна нюръяськем интые, асьмеос ӵемгес вань кужыммес понӥськом куспамы жугиськонэ. Ӵем дыръя пож ву кисьтаськом ог-огмы вылэ газет но журнал бамъёсын. Собере паймиськом, малы асьмемыз, удмутъёсыз, мукет калыкъёс сокем ултӥяло шуыса. Дугдоно ини, куштӥськоно таӵе выронъёслэсь. Гажано эшъёс! Та кылдэм учырлэн мугъёсыз удмуртъёслэн нюръяськыны быгатымтэенызы гинэ герӟаськемын ӧвӧл. Трос мукетъёсыз но мугъёс. Удмурт калык ваньбурлэсь гинэ ӧвӧл, тодон-валан басьтонлэсь но люкемын луэ. Арысь аре тани студентъёслэн лыдзы кулэсме. Республикаямы кулэсме удмут калыклэн лыдыз но. 1989-тӥ арын асьмеос республикаын 30,9 процент вал ке, али асьмеос ӧжытгес луимы. Удмуртъёс республикалэн палэназ но кошко, али котькудӥз куинетӥез удмурт улэ Удмуртилэн сьӧраз. Со дыре ик али но асьме шаере тросэн лыкто мукет калыкъёс: кылсярысь, 1996-тӥ арын лыктэмын 16809 мурт. Озьыен, асьмеос луимы "национальное меньшинство". Мукет странаосын выжы калыкъёслэсь правооссэс нимаз законъёс утё. Асьмелэн сыӵе законъёс ӧвӧл. Оло, сыӵе документ кутон сярысь али ик малпаськоно ини. 1994-тӥ арын кутэм Удмурт Элькунлэн Конституцияз ӧвӧл статьяос, кудъёсыз нимысьтыз утё асьме калыклэсь правозэ. Удмурт калыклэн суверенитетэз истриен гинэ герӟамын. Ӧвӧл одӥг но статья, кудаз верамын луысал Удмурт Республикалэн вылӥ кивалтӥсез удмурт мед луоз, яке удмурт кылэз мед тодоз, яке Удмуртиын вордӥськемын мед луоз шуыса. Таӵе ӵектонъёс удмурт депутатъёс сётъязы вал, но куаразы тырмымтэен, Конституцие соос пыртэмын ӧй вал. Азьланяз сыӵе тупатъянъёс одно ик Конституцие ӵектыны кулэ. Озьы ик тырмыт луонлыкъёс уг сёты удмурт калыклы кивалтонэ ас адямиоссэ пыртыны национальной политикая концепция. Тужгес кышкыт соиз, концепциын кылдытэмын сыӵе луонлык, кудӥз вакчияк вуттыны быгатэ губернизацие, Удмурт Республика интые Ижевской губерния кылдытонэ. Таӵе югдур кылдэмез тросэз уг валало на. Соин ик туж умой валэктоно сое. Азьланяз но асьмеос политикалэсь палэнтӥськыса улӥмы ке, валатэк но кылёмы республикамылэсь гинэ ӧвӧл, калыкмылэсь но быремзэ. Ваньзэ тае чакласа, али ик,ӝегатскытэк кутсконо Россиысь Госдумае быръёнлы дасяськон борды. Со ортчоз туэ декабрь толэзе. Табере пичи ке но политической ужын опытмы вань ини, соин ик трышоно вормонъёс но басьтыны. Улон возьматэ, удмурт калыкез азинтонын, удмуртлыкез утёнын одӥгзэ но ужпумез быдэстыны уз луы кужымъёсмес огазеятытэк, "Удмурт кенеш" огазеяськонлэсь ёзъёссэ юнматытэк. Соин валче рос-прос кутсконо гурт кенешъёсты кылдытыны. Соос пыр асьмеос быгатомы калыкез ӝутыны, валэктон уж нуыны. Та ужез вырӟытытэк, коркась корка ветлытэк шуг луоз азьланяз но вормонъёс басьтыны. Одно ик кулэ кылдытыны асьмелэсь газетмес (туннэ нырысетӥ номерез потӥз, ӟечкыласьком сое дасясьёсыз), озьы ик кулэ нимаз телевизионной удмурт канал кылдытыны. Умой-умой малпськоно со сярысь но, кыӵе огазеяськонъёсын-блокъёсын ӵош асьмеос быгатысалмы пыриськыны быръёнэ. Удмурт калыклэсь парвооссэ быдэсъян вылысь, одно ик тыршоно Госдумае удмурт депутат бырйыны. Валамон, общественной организация ас понназ гинэ уз быгаты калыклэсь улонзэ умой карыны, солэсь вань шуг-секытъёссэ пылэнтыны. Со понна зол но умой, калыкез валаса но гажаса ужаны кулэ республикаысь ёросъёсысь кун структураос. Общественной организациослы но соос юрттэт сётыны кулэ. Таӵе юрттэт туннэ нуналлы уг шӧдӥськы на. Удмурт калыклэсь асвалнзэ будэтонын бадӟым инты басьтэ удмурт кыллэн зэмос кыллы пӧрмемез. Конституциын со кемалась ялэмын, нош улонын со татчыозь озьы ӧвӧл на. Удмурт кылъя законлы проектэз Вылӥ Совет 7 ар талэсь азьло дасяз вал ини. Нош закон али но кутэмын ӧвӧл. Берло ньыль ар ӵоже та законлэн проектэз сессие ик поттылэмын ӧй вал. Съездлэн нимыныз выльысь куроно та законэз кутыны. Удмурт кылэз тодонэз квалификационной куронъёс пӧлы одно ик пыртоно кивалтон удысъёсы ӵектыку яке бырйыку, элькун йыр бордысен кутскыса, ёрос кивалтӥсьёс дорозь. Али нош лэсьтӥське ваньмыз талы пумит. Кылмес тодон - со адямилэсь правооссэ тӥян уг луы, мукет цивилизованной странаосын чиновникъёслы кун кылъёсыз тодон одно ик кулэен лыдъяське, кылсярысь, Швейцариын тодоно луо 3 кылэз, Финляндиын - 2, шведъёс отын 6 процент гинэ ке но. ВИ съезд бере элькун кивалтӥсьёслы, Нациосын ужанъя комитетэ но мукет организациосы 30 пӧртэм вазиськонъёс, заявлениос но гожтэтъёс ыстылэмын вапл, тросэз соос пӧлысь - исполкомлэн нимыныз. Кылсярысь, кылем арын 9-тӥ июне исполкомлэн паськытатэм заседанияз кутэмын вал Кун Кенешлы но Правительстволы вазиськон, кудаз пусъемын, Куӟебай Гердлэн юбилееныз герӟаськем Программа туж ляб быдэсъяське шуыса. Ортчиз ини быдэс ар, нош воштӥськонъёс ӧвӧл. Та дырозь тодмо ӧвӧл, кыӵе луоз но кытын сылоз Куӟебай Гердлэн памятникез. Со пумысен исполком аслэсьтыз кылзэ вераз: таӵе памятник сылыны кулэ Ижевсклэн шор площадяз. Ку пуктэмын луоз бюст-памятник Вавожын? Татчыозь Куӟебай Гердлэн нимыз сётэмын ӧвӧл урамъёслы, культура но искусство учреждениослы. Поттэмын ӧвӧл словарез но солэн нимыныз герӟаськем мукет книгаос. Озьы ик вазиськонъёс ыстэмын вал удмурт школаосын дышетскон книга поттон, Ижын удмурт гимназия усьтон пумысен но мукетъёсыз. Жаляса верано, та ужпумъёсъя нокыӵе валэктон "Удмурт кенеш" ӧз басьты. Съездлэн нимыныз та пумысен юн верано, оло, кивалтӥсьёслэн пелязы пыроз. Нимысьтыз вераськон нуоно национальной кадръёс дасян пумысен. Валамон, улонмес умойгес карыны, калыкез азьлань нуыны быгатозы визьмоесь, дышетскем, ас калыксэс гажасесь кадръёс. Нош кызьы пуктэмын соосыз дасян ужрад асьме элькунамы? Урод, шуыны луоз. Туннэ нуналлы ӧвӧл на национальной кадръёс дасянъя кун программа. Таӵе югдурез лыдэ басьтыса, кылем арын 20-тӥ мае "Удмурт кенеш" та ужпумез ӝутӥз паськытатэм исполкомаз. Отчы ӧтемын вал Правительствоысь, Кун Кенешысь ужасьёс, министръёс, вузъёслэн ректоръёссы. Кадръёсын ужась комиссия та исполкомлы бадӟым аналитической материал дасяз. Татысь адӟиськиз удмурт калыклэн вылӥ образование басьтон удысын бере кылемез. Кылсярысь, удмуртъёс пӧлысь 3,5 процентэз вылӥ образование басьтэмын, ӟучъёс пӧлын - 5,5, нош бигеръёс пӧлын 7,5 процентэз. Озьы ке но, Ижевскысь гурт хозяйствоя академиысь, Глазовысь педагогикая институысь, Медициная академиын гинэ удмурт студентъёслэн лыдзы шаерысьтымы удмурт калыклэн лыдызлы (32,2) тупа. Нош УдГУ-ын 18,0 процентэз гинэ студентъёс удмутъёс, Иж ГТУ-ын - 10,0 процент, МВД-лэн юридической институтэзлэн Ижевскысь факультетаз - 8 процент гинэ. Малы таӵе югдур кылдэмын? Асьмеос тодӥськом, удмуртъёс тросгес уло гуртъёсын. Гурт школаосыз быдтэмъёс конкурсъёсын вормыны уг быгато. Кылсярысь, кызьы быгатозы пиналъёс юрист луыны, куке гурт школаосын тыро-пыдо уг дышето "Основы государства и права" предметэз, кудӥз вступительной экзаменъёсын валтӥсь луэ. Юнме шат юриспруденция специальностья университетын дышетскисьёс пӧлын 9 процентэз гинэ удмуртъёс? Нош ёросъёсын но каръёсын 158 судьяос пӧлысь 36 гинэ удмуртъёс луо. Таӵе примеръёс вераны луысал туж трос. Асьмеос сюлэмшугъяськиськом, нош вылӥ кивалтӥсьёсмы сое уг но адӟо, уг но шӧдо, уг но валало. Таӵе секыт югдурысь потон понна луонлыкъёс вань. Соос ваньмыз гожтэмын вал исполкомлэн кутэм решенияз. Нырысь ик: вылӥ прфессиональной образование басьтонын удмурт пиналъёс конституциен чаклам гарантиоссэс быдэстон понна, Правительстволэсь куремын вал вузъёсын но шор ёзо профессиональной училищеосын экзаменъёс дыръя квота юнматыны, удмурт группаос усьтыны. Умой-умой ужатыны кулэ федеральной бюджет чотын кадръёс дасянъя кун заказ сярысь нимысьтыз кутэм постановлениез. Та постановлениын 30 процентъем квота юнматэмын гуртысь абитуриентъёслы. Мукет ӵектонъёс но гожтэмын вал. Жаляса верано луэ, югдур ӧз воштӥськы. Та куронъёсыз съездлэн резолюцияз выльысь гожтоно. Министерствоосын но пӧртэм комитетъёсын ужасьёсты должностьёсыз чакласа адӟиське: удмутъёс пуктэмын кыкетӥ-куинетӥ воштӥсьёсы гинэ, нырысетӥ кивалтӥсьёс пӧлын соос 16,5 процентэз гинэ луо. Берло дыре Вылӥ судлэн, Гостелерадиокомпанилэн, Калыкез дышетонъя но Социальной ужъёсъя министерсвоослэн кивалтӥсьёссы воштэмын ӟучъёсын. Та удысъёсын котьку ик удмуртъёс ужало вал. Малы озьы луиз? Кивалтӥсьёс шуо: ӧвӧл, пе, дасям удмурт кадръёс. Вань соос. Нош ӧвӧл ке, малы соосыз уг дасяло, малы "Удмурт кенешлэсь" куронъёссэ лыдэ уг басьто? Шат удмуртъёс понна общественной организация гинэ тыршыны кулэ? Сюлмаськонзы ӧвӧл бере удмуртъёс понна, соку кивалтэтэ но пыриськоно ӧвӧл?! Малпан кылдэ, удмурт кадръёсты нокин уг утча, соосыз уг адӟо, ваньзэ но юри палэнто. Маин умойгес меда, шуом, ГТРК-лэн кивалтӥсез Гарнов Шибановлэсь, Кун Кенешлэн комиссиезлэн кивалтӥсез Фролов Малковлэсь. Сыӵе бадӟым опытэз но быгатонлыкез луыса, малы ӧз яра ас интыяз Лисина? Кемалась дась дышетонъя министрен ужаны Можга педучилищелэн директорз Пискунов но трос мукетъёсыз. Кенешлэн исполкомез та пумысен аслэсьтыз мылкыдзэ юн вераз вал. Санэ уг басьто, уг кыло калыклэсь куронзэ. Асьме республикаын кивалтӥсьёсыз быръён но юнматон возьматӥз умойтэм сямез, али та уж таӵе принципъя нуиське: пыриськыны гинэ мед быгатозы вылӥ кивалтӥсьёслы. Удмурт сямен вераса, ымаз учкыса мед улозы - соку умой луоз. Ваньмыз та верам но лэсьтэм анализ возьматэ национальной кадръёсыз дасянъя концепцилэсь но кун программалэсь кулэзэ. Съездмылэн резолюцияз нимысьтыз пусъёно, та ужпум быдэстэмын ӧз ке луы, национальной политика понна кыл кутӥсь ужасьёсыз съездлэн нимыныз куроно воштыны. Пыкылэм потэ асьме удмуртъёсыз но. Бадӟым уже потыса, куд-огез ӵем дыръя вунэтэ ас калыкез сярысь, асьсэлы юрттӥсьёсы уг куто быгатӥсь удмуртъёсыз, кышкало, лэся, "националист" шуэмзылэсь. Со бордын асьмелэн та калэ вуэммы. Умой луысал удмурт кивалтӥсьёмылэсь газетъёс, радио пыр, исполкомын но Пичи кенешын кылзэс юаны: мар со лэсьтэ но лэсьтӥз ас калыкез понна. Валамон ини, али республикаямы кылдэм общественно-политической югдурын асьмелэсь кулэяськонъёсмес быдэсъяны туж шуг луоз. Озьыен, утчаны кулэ выль сюресъёс. Мон малпасько, кылдэм югдурез воштыны луоз таӵе амалъёсын: 1. Удмурт калык юн кылзэ вераны кулэ, вань калыкен вылӥ кивалтӥсез бырйыку. Малы кулэ элькун йыр? Со кулэ луыны ваньзэ герӟась ёз. Сыӵе луыны быгатоз калыкен быръем кивалтӥсь гинэ. Кун Кенешлэн Тӧроез, кудзэ быръё депутатъёс, республикалэн вылӥ кивалтӥсез луэ ке но, со уг быгаты калыкез огазеяны, уг быгаты властез юнматыны. Со луэ депутатъёслэн яке фракциослэн гинэ быръем адямизы, солы азьзэ-берзэ учкыса ужано луэ. Нош вань калыкен быръем кивалтӥсьлэн, тӧролэн, статусэз трослы вылӥын луэ. Элькун кивалтӥсь огдыре мед быдэсъялоз Правительстволэн Тӧроезлэсь ужзэ но. Нимысьтыз структура кылдытоно ӧвӧл. Со луонлык сётоз коньдонэз шыръяны, кулэтэм структураослэсь куштӥськыны. Тодады вайытӥсько, таӵе ӵектонэн Пичи кенеш потылӥз вал ини кылем арын ноябрь толэзе. Та ужын вормыны луоз соку, куке вань удмуртъёс сайкалозы но улон шоры сазь синмын учкыны быгатозы. Удмурт Элькун удмуртъёслэн госдураственностьсы луэ бере, солэн азьветлӥсез одно ик удмурт луыны кулэ. Та ласянь калыкын али ик бадӟым уж нуоно. Кун Кенешлэн ӝыныез пала депутатъёсыз, ваньмыз сямен удмурт, пор но бигер калык, озьы ик тросэз ӟучъёс но азьветлӥсьын адӟо Можга ёросын будэм воргоронэз Павел Николаевич Вершининэз. Тӥни со вылэ ик ӝегатскытэк кужмо ужаны кутсконо. 2. Кун Кенеш азе ӝот-ӝот курон пуктоно: 30 процентэз округъёс удмуртъёслы гинэ висъямын мед луозы. Та пумысен нимысьтыз закон кутыны кулэ. Таӵе опыт вань Дагестанын. 3. Вань удмуртъёслэсь ӧтчамзэс удмурт калык понна вылӥ кенешон орган кароно, бадӟыматоно съездлэсь статуссэ но солэсь куронъёссэ одно ик быдэсъян понна нюръяськоно. Соин Удмурт съездлэн статусэз сярысь нимысьтыз закон кутон понна. Нош "Удмурт кенеш" огазеяськонлэсь статуссэ межрегиональноёзь ӝутоно, солэсь Уставзэ Россиысь юстиция министерствоын пусъёно. Огазеяно быдэс дунне вылын улӥсь удмурт калыкез. Гажано эшъёс! Али асьмеос туж секыт вакытэ улӥськом, ӝыны ар ортчыса выжом ЪЪИ дауре. Удмурт профессор В.Е.Владыкин книгаяз "Ми - удмуртъёс. Ӟечесь-а?" гожтэ: "Дауръёслэн чигиськемзы. Вапумъёслэн герӟетсы. Ачиз дыр но пустодметъёссэ ыштэ кадь валантэм сюлэмшугъяськонын". Та дырез "йӧнэз ыштэм вакыт" шуо. Таӵе вакытъёс кышкыт, куддыръя кӧшкемыт но, бездо-гужало буёлъёс, улонлэн вирсеръёсаз вӧсь карись шӧдон-валанъёс бугырско... Таӵе вакытэ капчи йыромыны адямиослэн пумйылтэм зарезязы, весяклы ог-огдэ вунэтыны, астэ ыштыны - одӥг адямилы гинэ ӧвӧл - быдэс калыклы". Озьы медам луы шуыса, ойдолэ кылом ог-огмес, ойдолэ вань кужыммес сётыса тыршом, шаерамы улонэз умоятон понна. Удмурт калык нокинэ но ӧз ултӥя, нокин вылэ но ожен ӧз ветлы. Со али элькунамы улӥсь котькыӵе калыкен тупаса улэ. Ми умоен лыдъяськом Россиысь вань калыкъёслэсь ассамблеязэс кылдытонэз. Сыӵе ассамблея (огазеяськон) ужаны кулэ асьме Элькунамы но. Дыр вуэмын Ижын усьтыны Калыкъёслэсь эшъяськон юртсэс но. Россиысь Вань калыкъёслэн ассамблеязы Рамазан Абдулатипов шуиз: "Нация - это не мифологическая абстракция, а конкретный феномен жизнедеятельности конкретных индивидов, объединенных общностью истории, культуры, языка и традиций. И не надо бояться наций или призывать забыть о нациях. Бунтуют нации, о которых забыли, бунтуют нации, к которым проявлено равнодушие. Именно национальное, духовно- политическое самочувствие человека, независимо от национальности, - главный залог укрепления единства и целостности общества и государства". Шонер верамын. Вань ужрадъёсты одӥг докладэ уд пырты. Малпасько, делегатъёс уно ӵектонъёс сётозы, ас малпанзэс вералозы. Уго татчы люкаськемын удмурт калык понна тужгес но сюлмаськись адямиос. Оскисько, съездмы пайдаё, кулэтэм споръяськонъёстэк ортчоз но асьме калыкмылэн улоназ шӧдскымон азинсконъёс но вормонъёс басьтыны юрттоз шуыса. Выт дыраз тыро "Удмуртнефть" ОАО туэ ӝыны ар понна бюджетэ тыронъёссэ дырызлэсь вазь пытсаз: казнае келяз 1 миллиард манет пала коньдон. Кылем арынлэсь со шӧдскымон ятыр. 54 процентэз кылёз республикалэн бюджетаз но му вӧй кыскон районъёсы. Верано на, тыронъёс пӧлысь 85 процентэз вуэмын "улэп" коньдонэн. Бизнес-планъя палар понна чакламын вал 484 миллион манет тырыны, но "Удмуртнефтьлэн" кивалтӥсьёсыз луон шедьтӥзы та лыдпусэз кык поллы будэтыны. Со чотын ӧжытак капчигес шокчозы дышетӥсьёс но калыкез эмъян удысын ужасьёс. Коньдон тырон ласянь та вакытэ югдур тужгес но секыт Ижевскын. Сое лыдэ басьтыса, му вӧй поттӥсьёс городлэн бюджетаз чаклам налогъёссэс дырызлэсь вазь тырозы. Ижевсклэн кивалтӥсьёсыз понна со бадӟым юрттэт луоз. Л.Дмитриева. ТАЗАЛЫК Нылкышноослы 5 апрельысен 5 маёзь Ижевскысь маммологической центр нылкышноослэсь гадь висёнъёссэс алон ужрад ортчытӥз. Толэзь ӵоже центре 1457 адями вазиськиз. Тросэз соос пӧлысь - 20-45 аресъем нылкышноос. Шараямын пӧртэм висёнъёс. Диагноз Вазиськемъёслэн лыдзы Фиброзно-кистозной 960 висён (мастопатия) Кышкыт пыктос 21 Кышкытлык ваисьтэм пыктос 186 воспаление 16 арлыдэн герӟаськем 225 воштӥськонъёс Кызьы адӟиськоды таблицая вазиськем нылкышноослэн, 49-езлэн сяна, висёнъёссы шараямын. Туж кышкатэ мастопатиен курадӟисьёслэн лыдзы, угось та висён кышкыт пыктослы пӧрмыны быгатоз. Соин ик та нылкышноослы пӧртэм эмъяськон амалъёс ӵектэмын. Одӥгез кышномурт эскериськыны лыктӥз нокыӵе ӝожтӥськонъёстэк. Нош маммография лэсьтыса, шараяськиз пичи пыктосэз. Зэм, со али кышкытлык уг вайы на, но тазалыкез утьыны кулэ висён погыртэмлэсь азьло. Толэзьем ужрад йылпумъяськиз, но центр ужа ялан. Соин ик, вань ке кыӵе ке умойтэм шӧдсконъёсты, вазиське милям врачъёсмылы. Макем вазьгес шараялоды висёндэс, сокем ӝог вормоды сое. А. Глухих. медицина наукаосъя кандидат. Тамперее ветлэм бере... Алигес Культурая министерствоын журналистъёс азьын вераськизы Финляндиысь Тампере городын хоръёслэн калык куспо фестивалязы пыриськем "Ингур" капеллалэн кивалтӥсез Валерий Яковлевич Митрофанов но Усточи нылпиослэн интернатсылэн директорез Нина Михайловна Устюгова. Пиослэн капеллазы валлян арын Эстоние но кылем арын Венгрие вуылӥз. Венгриысь зарни дипломен берытскиз. - Венгрие ветлӥмы вал кырӟаны дышетскыны. Вормеммы малпамтэ шорысь луиз но милемыз бурдъяз. Таяз ӵошатсконэ пыриським ни, кужыммес шӧдыса, - вераз Валерий Яковлевич. - "Тамперелэн крезьгуръёсыз" фестивале арлы быдэ дуннеысь хорен кырӟась трос коллективъёс люкаськыло. Туэ но 67 интыысь вуизы. Финляндиысь гинэ 44 ансамбль лыктӥз. Россиысь 4 хор вал, Германиысь, Хорватиысь, Япониысь, Украинаысь, Сингапурысь но мукет интыосысь быдэн одӥг ансамбль. Куинь нунал ӵоже кырӟасьёс огзы бӧрсьы огзы тубазы туж тодмо Тампере-Хилл дворецлэн сцена вылаз. Финнъёс туж данъясько та юртэнызы. Дунне вылын со ӟечлыкезъя Карнеги-хол бере кыкетӥез луэ. Туж чебер но бадӟым концерт пуктылон интылэн вӧлдэтэз крезьгурлы чылкыт чузъяськыны тупатэмын, компьютерен чакласа, тодосчиослэсь кылзӥськыса. Тампере городэ вуим 11-тӥ июне 9 часын ӵукна. Соку ик программа сётӥзы но веразы, нуназе бере куинь часлы концертлы мед дасяськомы шуыса. Куриськом: луоз-а берлогес - ми али гинэ вуим. Уг луы, шуо. Ярам, дасяськиськом гостиницае мыныны. Милмлы вазё: нуназе бере кык частэк отчы уг лэзё. Кызьы озьы?! Ми куинь нунал ӵоже сюрес вылын жадемын. Тӥни озьы, ӵошатсконэз радъясьёс пальпотонэн ӵош чурыт куронъёсын пумитазы милемды. Мон пиналъёсын вераськи, номыр шоры учкытэк, йырзэс ӝутыса вань быгатэмзэс возьматыны. Дворецын ик вань шутэтскон комнатаос. Ми пиналъёсын ас котыръёсмес тупатъям, мисьтӥським но дыртӥм сцена вылысен куарамылэсь шуккиськемзэ (акустикаез) эскерыны. Кырӟан интыысь вӧлдэт лэсьтэмын купол манер. Куара вылӥе ӝутске но берлань ваське кадь. Сыӵе чеберез адӟыса но валаса, жадеммы ик тӧлӟиз... Пиналъёс возьматӥзы сое, малы дышетэмын. Ми дасяським классикаез кырӟаны, нош татын йӧспӧртэм (авангард) крезьгуръя фестиваль вылэм. Кӧня ке куалектӥм. Быдэстӥм финн композиторлэсь Тормислэсь но венгер крезьгурчилэсь Айремлэсь произведениоссэс. Кырӟаммы бере умой чабизы. Пиосмурт хор куинь гинэ вал, нылкышноослэн сизьым хорзы, мукетъёсыз огазеям хоръёс. Нокыӵе нимаз номинациос ӧвӧл. Милемыз, пиналъёс шуыса, йырси кузя ӧз маяллялэ. Ӵуказеяз Валерий Митрофанов пумиськылӥз ратушаын Тамперелэн вице-мэреныз. Кылем арын отчы вуылэм Выль Сӥзёнэз (Новый Заветэз) удмурт кылэ берыктӥсь Михаил Атаманов. Вице-мэр шуныт тодаз ваиз со сярысь. Нош со вискын капелла паркысь сцена вылын кырӟаз на. Ушъямзы бере паркысь куд-ог шудонъёсын дун тырытэк шутэтскизы. Со нуналэ нылпиосыз возьма на вылэм эшшо одӥг эскерон. Соосты ӧтизы ӵукна куинь час бере (финн сямен одӥг час кафедральной соборын кырӟаны. Кышкыт вал, пиос кырӟан куспазы умме усёзы шуыса. Духовной крезьгур уката ик уммез вае. Бер уй шоры учкытэк, вӧсяськон итыын лачак калык люкаськемын. Котьма ке но, пиослэн чылкыт куараоссы кылзӥсьёсты шумпоттизы. 13-тӥ июне гала-концертэ быръё тужгес устооссэ 15-16 кллективез. Соос пӧлы шедён сярысь малпаны ик кышкыт вал. Озьы ке но, "Ингур" отчы сюриз. Нош кылем арын нырысетӥ интыез басьтэм коллективлы Кировоградысь (Украина) хорлы ӧз удалты. Концертын кыӵе произведениез быдэстыны кузёос асьсэос куро. Капеллалы Даргомыжскийлэн "Русалка" операысьтыз ог люкетсэ кырӟано луиз. Капчи ӧвӧл та произведение. Мукет конкурсантъёсын ог радэ пуктыны уг луы - асьме пиослэн ансамбльязы ӝыныез али гинэ крезьгур грамотаез дышетыны кутскемын ай. Коллектив котькуд аре воштӥське угось - дышетскемез кошке, со интые гуртъёсысь выльёсыз усточиос вуо. Но "Ингурысь" пиослэн пӧртэм арлыдо луэмзы ваче тупаса кырӟаны уг люкеты. Капеллалэн кивалтӥсезлэн ӟеч ужамезлэн емышез со. Удмуртиысь лыктэмъёс конкурслэн дипломантъёсыз луизы. Нош вормиз Финляндиысь хор. Кыкетӥ интые потӥзы Санкт-Петербургысь лыктэмъёс. Туж вылӥ дунъет - Гран-при - басьтӥзы Сингапурысь егит кырӟасьёс. "Таӵе кырӟамез нокытысь кылылэммы ӧй вал на", - огымысь кадь шуизы тросэз. Таос уго фольклор кырӟанэз куать куараен кырӟазы. - Кунгож сьӧры ветлон пиналъёс понна бадӟым школа, дышетскон луэ, - шуиз Нина Михайловна Устюгова. - Ас поннад, ас коллективад гинэ "пӧзьыса", азьлане трос уд вамышты. Дуннеез, адямиосыз адӟиськод ке, мукет дунъет сётӥськод аслыд но, котырысь эшъёсыдлы но. Асьме страна ӝутӥз-ӝутӥз коммунизм, нош вуим капитализме. Коммунизмез ми адӟим, дыр, Финляндиысь. Отын ваньмыз лэсьтэмын, адямиез гажаса, солы умой мед луоз шуыса. Ӵошатоно ке, кӧт ӝож луэ асьме Россия понна. Озьы ке но, номыр шоры учкытэк, ми тыршиськом кивоштӥсьёсмылы ӟеч тодон-влан сётыны. - Милям Финляндие вуылэммы, - азьланьтӥз веранзэ Удмурт филармонилэн чеберлыкъя кивоштӥсез, - Правительствомы понна туж дуно усиз. Но ведь со уксё тыриськиз азьпал улонмылэн сяськаосыз понна. Капеллаысь кырӟасьёс - асьмелэн вуоно усто специалистъёсмы. Кӧня ке ар ортчыса, асьме удмурт кырӟан искусствомес вылӥе ӝутозы шуыса, оскыны луэ. Таӵе пумиськонъёс будыны юртто. Коньдон сярысь верано ке, милемлы куинетӥ арзэ юрттэ ни "Удмуртнефть". Внешторгбанклэн Удмуртиысь ёзэз но милесьтым ӧз палэнскы. Та огазеяськонъёслэн кивалтӥсьёссы валало ужмылэсь кулэзэ. Тау соослы. Е.Пахомова. "Ингур" Тампереысь паркын концерт сётэ. Умой адямиос "Наталь" "Улӥмы золтэм ез кадь" Матрена Агафоновна Григорьева но Роман Яковлевич Мартынов кыкназы но доразы укшазы. Шуныт пумитазы. Ӵуш-пур выро. Матрон апай соку ик чай пуктӥз, кузпалыз чечы поттӥз. Витьтон ар ӵоже огазьын улэмын ини соос. Ӵапак зарни сюанзэс пусйыны дасясько вал. Роман Яковлевичлы 82 арес тырмиз ни, нош Матрена Агафоновналы - 79. Кыкназы ик бадӟым сюресэз ортчемын, кызьы шуо, шӧгзэ но, кузьытсэ но веръямын. Улонады мар тужгес но вунонтэм кылиз шуыса юамелы юртлэн кузёез вераз: - Кузпалъяськеммы, ваче тыршеммы, трос шудо нуналъёсмы. Чебер егит дыры кылиз Шунды ӝужан пала, кунгож дуре. Тямыс ар ёрос, эсьмаса, золтӥськем ез выллем улӥм, асьме музъеммес японецъёслэсь утьыса. Я таяз интыын, я музоназ мерско шаерамы. Пешкытӥськом гинэ - выльысь урдско пичиен-пичиен. Соку бен кужыммы бадӟым вал - ӧз дӥсьтэ граница вамен армизэс выжтыны. Котькуд часэ, минутэ пыӵалмес куятэк музэн сылӥмы... - Жадиды, дыр? - Ӧй кадь. Яке вунӥз-а, мар-а ини ваньмыз. Удмурт пиос чидасесь ук. Картофкалэсь гинэ мӧзми. Весь чорыг, весь чорыг сёто вал. Ярам коть, сое умой дасяны дышимы. Одӥг полаз шыдэн пӧзьтӥськод, музон дыре - бадӟым табаын ӵыжатӥськод, я сылалтӥськод.... Тямыс ар ӧзгес тырмы - асьмеос выжим Японилэсь кунгожзэ, пазьгим ожгарчиоссэ, Монголие но вуылӥ. - Нош отӥяз мар вал, Роман Яковлевич? - Быдӟым Вормон. Бертӥ. Тодматски Матронэным. Туж чебер потэ вал. Кузпалъяським. Отӥяз, оло, быдэс улонме муш вордыса ортчытӥ. Колхозын. Трос пичи пиналъёс вуыло вал муш бакчае. Ваньзэ куноятӥсько. "Тау, Чечым дядяй", - шуо но, будӥсь чуньыос выллем шаплы ширто гурт паламы... - Али но муш вордӥськоды на-а дорады? - Кызьы сотэк? Зэм, куинь семья сяна ӧвӧл ни. Кужым пумен шупче. Визь но тӧлӟылэ, лэся, ни кытӥяз (гор-гор серектэ воргорон). Толон тани, оло, ӝыны нунал пала утчай туш мычон бритваме. Пумен ӵем малпаськылӥсько ини: пересьмемъя кытчы меда кошко задорлык но лэчыт визь? Арлыдъёс-а, мар-а сьӧразы нуо? - Гурт калыкеныды кусыпъёсты кыӵеесь, Роман Яковлевич? - Умоесь. Калыкмы милям туж ӟеч ук. Уг вунэто. Ай зарни сюанмес но тани дэмен пусйыны дасясько, лэся. Культура юртамы, пе, люкаськылом. - Нош мар уг тырмы кадь тӥледлы та вакытэ? - Шуныт уггес тырмы. Тазэ коркаме пуктыкум ик бигер юлтош шуиз вал: кезьыт луоз сэрегед. Пу юртлэсь шунытэз номыр ӧвӧл. Кивалтӥсьёсмы эстӥськонэн золгес мед юрттысалзы. Пересьёслы медаз чурыталэ та ласянь... Вераськонмес азьланьтӥськом Матрёна Агафоновнаен. - Ма, мыным но вунонтэм кылизы Романэным кузпалъяськеммы, егит дырмы. - Ӝужыт, таза, кужмо вал таи мынам. Синмаськи. Огазеяським. Ӝыны даурлэсь кема ини уртче улӥськом-шокаськом. Номырлы ӧм ёрме кадь. - Егит дырды ма ласянь пусйымон? - Калыклы ужаменым. Мон, кызьы шуо, тямыс гуртысь пиналъёслы огнам гогымумы вал. Огезлэн нылпиез вордӥське - монэ ӧтё, музонэзлэн вордӥськон дырыз вуэ - уин но нуыса кошко. Больницамы соку ӧй вал ай. Кезьыт лымы ымныре пазяськыку но, гужем небыт тӧл вешаськыку но пиналъёс доры, висисьёс доры ширтӥсько вал. Чарссэгес ужпиез кыткиськод но - сюрес вылэ. Уг тодӥськы ни, кӧня муртъёсын огъя мумы лыдъяськисько мон. - Музон уже ӧд выжылэ-а? - Ӧй. Весяк одӥг удысын. Калык яратэ вал. Соин шудо шуисько асме. Жаль: синъёсы каньылля лябӟо. Алигес тани операция лэсьтӥзы Ижын. Ма, та реформа шуонэнызы сэрен, вань улон уродме. Быдэс калыклэн тазалыкез кыля. Вылаз ик, эмъяськон чутрак дунояз. Азьло сямен ик ваньзэ дунтэк мед лэсьтозы вылэм. Сыӵе ӟеч улон вал азьло. Кивалтӥсьёсмы, депутатъёс мед нюръяськысалзы тазалыкез утёнлы государство ласянь тросгес коньдон висъян понна... Завьял ёросысь Постол гуртысь та кузпалъёс дорысь кошкыкум, куаро писпуос пӧлысь адӟи одӥг пинал кызэз. Весь-весь вольыт, шонер со. Чебер, ыльыс. Ӵапак сыӵе потӥз Роман Яковлевич но. Яратоно Матронэз доры пумиськыны бызьыкуз, сажень кузьдаесь вамышъёс кельтылэ вал, дыр, кужен сюресъёс вылэ. Быдэс улоназ но солэн вамышъёсыз сыӵеесь. Кыз вӧзын ик сылэ веськрес кызьпу. Таиз чылкак Матрон апай выллем потӥз... Шудоесь та кузпалъёс. Корказы тырмемын жин-жин пинал куараосын. Доразы будэто племяницазылэсь нылзэ. Конюх Юлялэн Надя нылыз бадӟымгес ини. Таиз азьланяз воштоз, дыр, ай Матрон песянайзэ. Выж вылтӥ но, гур вылтӥ но питран выллем бызьылэ пичи Романзы. Таиз одно азинтоз песяезлэсь мытэм ужъёссэ. Озьы, выжыысь выжые азинске угось улон. Нош кык кузпалъёслэсь зарни сюанзэс ваньмыз сямен гуртоосы дэмен пусийизы. Кӧня кырӟазы, эктӥзы, шулдыръяськизы, ӟеч кылъёс веразы! Кузьымъёс но, саламъёс но пумтэм вал. Тужгес но зол егитъяськизы арлыдооссы - мӧйыос. Пичильтык коньдон юрттэт но висъяны шедьтӥллям. Эштоссылэн тӧроез но, Завьялысь но куд-огез кивалтӥсьёссы ветлӥзы зарни сюанэ. Кирилл Ломагин. Авторлэсь: Материалэз печате дасян вакытэ тодмо луиз: Роман агай кулэм. Сое быдэс гуртэн ватӥллям. Ачиз ӧвӧл ни ке но, ӟеч пытьыосыз солэн кылемын. Шаерамы кузёяське арлэн самой чебер вакытэз - инвожо. Адямилы гинэ ӧвӧл, пудолы но со шумпотон: кӧт тырымон вож жалем сиён шеде. Нуналъёс кузесь, лумбыт возь вылын улыса, кӧтсы зӥб-зӥб тыре. Тужгес но ӟеч али ужало Игра районысь пудо возьмасьёс но скал кыскисьёс. Тӥни кытын йӧл шур бызе! Син медаз усьы, но играос скаллы быдэ туннэ 14 клограмм пала йӧл кыско. Соослэсь ӧжытаклы гинэ берегес кылё вавожъёс но воткаос. Куинетӥ интыын - Якшур-Бодья но Грах ёросъёсысь фермаос. Шаермыя ке верано, кылем арен та вакытэз ӵошатыса ог 1 килограммлы ятыргес кыскиськом. Л.Дмитриева. Шарканын пумиськонъёс Кылем арня вискын Правительстволэн Тӧроез Николай Ганза Шаркан ёросэ ветлӥз. Премьер-министр вуылӥз "Шаркан-трикотаж" огазеяськонэ, ёросысь югдурез утисьёс доры, шор ёзо школае, 18 номеро газокомпрессорной станцие, Николай Собинлэн фермер хозяйствояз, "Югдон" подсобной хозяйствое. Пумиськонъёслы йылпумъянъёс лэсьтыса, Николай Ганза нырысь ик пусйиз шарканъёслэсь ужез гажамзэс. Кылсярысь, Россиысь котькуд фермер адӟем карыны быгатоз Николай Собинлэсь. Солэн хозяйствояз 23 мурт тырше. Миым ар куспын 4 миллион манет тыр продукция поттэмын вал ке, туэ - 3 миллионлы ни. Со коньдон лэсьтӥськон удысэ мынэ. Вань озьы ик асьсэлэн вукозы, пул пилён интызы. "Шаркан-трикотаж" но ӟеч ужа. Предприятилэн продукциез паськыт вӧлме, солэн лыдыз но ялан будэ. Ёрос кивалтӥсьёсын пумиськон дыръя эскеремын нюлэсэз уже кутонэн, пудо сиён дасянэн, толлы дасяськонэн, нылпиослэсь гужем шутэтсконзэс радъянэн герӟаськем но мукет ужпумъёс. Куд-огезъя, кылсярысь, шор ёзо школая лэсьтонъя, Правительстволэн Тӧроез быдэстоно ужрадъёс ӵектӥз. Удмурт Республикаысь Правительстволэн пресс-службаез. Ӧтчаськизы, кенешизы Бадӟым но лэчыт ужпумъёс эскеремын вал Удмуртиысь писательёслэн ЪВ ӧтчамазы кылем удмурт арня нуналэ, пятницае. Берло дыре уго та огазеяськонлэн, соин ӵош ик писательлэн но данэз асьме обществоын улэ усемын. Соин ик сюлмаськыны кулэ солэсь юридической статуссэ ӝутон сярысь, нош писатель котькудӥз ик - прозаик, драматург, коть кылбурчи - ас нимзэ вылын возьыны кулэ. Мар лэсьтэмын ортчем вить аръёс куспын - та сярысь ивортӥз правленилэн председателез Олег Четкарев. Солэсь докладзэ эскерыса, Писательёслэн огазеяськонзылэсь ужзэ выль кужымен вырӟытон вылысь, пӧртэм дэмланъёс вал. Удмуртиысь Писательёслэн огазеяськонзылы тӧрое быръемын Егор Загребин. Правленилэн членъёсыз луизы Петр Чернов, Никвлад Самсонов, Вячеслав Ар-Серги, Сергей Матеев, Анатолий Демьянов, Виктор Чулков, Анна Зуева-Измайлова но Татьяна Чернова. Т. Николаева. "Ошмеслэн" нырысетӥ номерез Ивортӥмы ни вал, Башкортостанысь удмуртъёслэн "Ошмес" республиканской газетсы потыны кутске шуыса. 1-тӥ июньысен лыдӟисьёс солэсь нырысетӥ номерзэ киязы кутӥзы. Газет поттӥське, республикалэн Президентэзлэсь М. Г. Рахимовлэсь "Башкортостанысь калыкъёслэн национально-культурной азинсконзыя республика программаос сярысь" указзэ быдэсъяса. Асьсэ шаеразы улӥсь поръёслэсь, чувашъёслэсь, удмуртъёслэсь куронъёссэс лыдэ басьтыса, республикалэн кивалтӥсьёсыз шонер национальной политика нуо. Нырысетӥ номерын ик трос тунсыкоез: та палан улӥсьёслэн улон-вылонзы но, Удмуртиысь иворъёс но газет баме вуттэмын. Кыӵе удмурт гуртъёс пумиськыло Башкортостанын но со вӧзысь Пермь, Свердловск улосъёсын - та сярысь гожтэ Риф Насибуллин. Ваньзэ вераса, Удмурт Республикалэн палэназ 200 пала удмурт гурт, ог 70-эз вылэм башкир музъем вылын (табере ӧжытгес ни). Алигес куд-ог гуртъёсы вуылэм "Италмас" дано ансамбль. матысь одӥгез солистка, Людмила Ахтариева, Янаул районын будэмын. Алтау гуртлэн данъяськонэз - художник Касим Галиханов. Кызьы валано солэсь творчествозэ - та сярысь но маде газет. Озьы ик ивортэ, финн-угор егитъёслэн огазеяськонзылэн-МАФУН-лэн берло кенешонэз Янаулын, Стерлитамакын но мукет интыосын ортчиз шуыса. Асьсэ палъёс сярысь вераса, газет бадӟым Качакын ортчем нылпи творчествоя фестивальлы. Пӧртэм конкурсъёс ӵошатсконъёс но отын вормисьёс сярысь пыр-поч гожтэ газетлэн корреспондентэз Галина Алексеева. "Ошмеслэсь" сюрессэ табере уд ни пыкы. Солэн учредителез - Башкортостан Республикаысь Министръёслэн кабинетсы. Валтӥсь редакторез - тодмо гожъяськись Андрей Гильмаев. Т. НИКОЛАЕВА. КОТЬМА СЯРЫСЬ Эн возьдаськы, Билл... Билл Клинтонэз адӟем муртъёс шуо, ымнырыз, пе, солэн гордэктэм. Югославие ыстэм "асъёзъёсызлэсь" сербъёслэсь пумитъяськонзэс дугдытыны быгатымтэенызы но Моника Левинскиен ченгешеменыз возьдаськыса ӧвӧл. Америкаысь "Нэшнл инкуайрер" журнал ивортэмъя, США-лэн президентэз паласькись ку висёнэз - пеллаграез - "кутыны" шедьтэм. Гордэктэм бамъёс, ныр но ангес висёнлэн ванез сярысь верало. Странаын та висёнэн курадӟе 13 сюрс адями. Пеллаграен ас вакытаз висизы Рембрандт но Диана принцесса. Клинтон зэмен ик висе ке, эмъясьлы вазиськытэк солы уз луы. Озьы ик чакласьконо диета ласянь: курытсэ ыме тыроно ӧвӧл. Шунды шорын пыжыны но пӧсь вуэн ымнырзэ пылатыны уг яра. ("Комсомольская правда" газетысь.) НАТАЛЬ Семьяез ултӥянлы - пумит Ижевскысь "Шугъяськись семья" муниципалитет учреждение сярысь газет бамамы одӥг пол гинэ ӧм гожъялэ ни. Та нылкышно центр али нимаське "Шуныт корка". Интыяськемын со городысь Индустриальной ёросэ. Шугъяськись семьяоос, юрттэтлы кулэяськись пинал нылъёс но нылкышноос татчы сюрес лёгизы ни. "Шуныт юртысь" специалистъёс - психологъёс лыдӟисьёсмылэн юанъёссылы газет пыр но валэктонъёс сёто. Шумпотымон, Ижевскысь нылкышно центр аслэсьтыз ужзэ пумен паськытатэ. Кызьы вераллям ни вал, татчы вазиськемъёслы юрттэт сёто психологъёс, юрист, терапевт. Лэсьтӥськон ужъёс йылпумъяськизы ке, "Шуныт корка" огдырлы интыяськыны быгатозы семьяязы жугонлы но ултӥянлы шедем нылкышноос нылпиосынызы, семьязылы мултэс луэм быдэ вуымтэ нылъёс пичи нуныосынызы. Со сяна, центрын ужа "Оливия" нылкышно клуб. Огазе люкаськыса, нылкышноос улоназы пумиськылӥсь пӧртэм ужпумъёсты сэртто-пертчо, специалистъёсын пумиськыло, мылкыдзэс юнмато пӧртэм тренингъёс, тестъёс пыр, аэробикаен выро. Кивалтэ та клубен Ольга Закирова. Ольга Сергеевналэн кивалтэмез улсын ик дасямын "Семьяез ултӥянлы - пумит" проект. Вераны кулэ, та ужпум борды нылкышно центр мылысь-кыдысь басьтӥськиз. Соослэсь ужзэс синйылтӥз Москваысь Открытое общество институт (ИОО). Нылкышно ужпумъёсъя программаослы юрттэт сётӥсь калык куспо огазеяськон Россиын но быдэс дуннеын ортчытӥз устоезлы проектлы конкурс. Ижевскысь центр вормисе потӥз. Озьы "Семьяез ултӥянлы - пумит" проектлэн кивалтӥсез Ольга Закирова но "Шуныт юрт" центрлэн кивалтӥсез Наталья Бакакина апреле вуылӥзы Венгрие, Будапештын ортчиз семьяез ултӥянлэсь алон ужпумъёсъя семинар - тренинг. Ижевскысь центр сяна, семинаре пыриськизы Украинаысь, Молдавиысь, Нижний Новгородысь но Албаниысь огазеяськонъёс. Валамон, ужрад пайдатэм ӧз ортчы. "Шуныт юрт" нылкышно центр выль кужымен басьтӥськиз семьяын ултӥянэз алон борды. Татын ужасьёслэн верамзыя нырысь ик, валэктон уж нуоно калык пӧлын, нылъёсты, нылкышноосты асьсэды гажаны, ултӥянлэсь утиськыны дышетоно. Семья ужпумъёсъя югдурез котьку но синйылтыса возьыны кулэ вылӥ кивалтӥсьёс. Соин ик, выльысь но выльысь ӝутъяно семьяез утён ужпумъёсъя вераськонъёс. Лыдӟисьёслы тодазы вайытӥськом: семьяяды кыӵе ке валамтэос, шуг-секытъёс кылдӥзы ке, юанъёсын вазиськыны быгатоды таӵе телефонъя: 44-40-33. Яке гожтэ редакцие. "Шугъяськись семья" учреждениын ужасьёс тӥледлы юрттыны котьку дась. Л.Малых. НАТАЛЬ Сыӵе, дыр, мынам адӟонэ..." Со вал куинь ар талэсь азьло. Алнаш ёросэтӥ шумпотон ивор вӧлмиз. Актэмыръёслэн кензы куиньмо пинал ваиз. Шудо анай-атайёсыз Мария Тимофеевна Павлова но Владимир Романович Мясниковъёсыз ваньмыз ӟечкыланы дыртӥзы. Нуналъёс ортчо. Валя, Галя но Рома каллен будо ни вал, но... Жаляса верано, дуннеын ваньмызлы шудо луыны кылдымтэ. Кинлы ке со шумпотон, кинлы ке - куректон. - Сыӵе, дыр, мынам адӟонэ, - шуэ Мария Тимофеевна. - Бызи вал, кузпалэным шудо улыны ӧз кылды. Люкиськи. Дас арес пиеным гуртэ бертоно луи. Озьы улонъям, тодмоосы, ӵыжы-выжыосы, монэ жаляса, воргоронэн тодматӥзы. Адскылӥм, кельышлы потӥз. Выльысь шудме эскерыны малпай... Кӧня ке дыр ортчыса, югдур калленэн огпала воштӥськиз. Мон нылпи ваёно луи. Секытэн дыръяз Маша туж кепыраса ветлӥз. Гурт бере гурт ини. Ымысь ыме, пельысь пеле ивор ӝог вӧлме. Вылаз ик, сое пӧлэстыса верасьёсыз но сюро. Анай луыны дасяськем муртэ сьӧраз "кузьымен" лыктэм шуисез но вал. Уго сизьым толэзь дыръяз ик Машалэн кӧтыз укмыс толэзьлэсь бадӟым адске вылэм ни. 1996-тӥ арын август толэзе куинь пинал вордскиз, секталазы быдэн кило но ӝыны. Вань секытэз кутскиз бӧрысьгес. Шулдыр но пыдлось Актэмыр гуртын куазь зорылыны ӧдъяз. Гурт пурысь пилемъёсын шобырскиз. Актэмыре нуись сюрес кизермиз. Туймы шур но ас сяменыз вогъяське. Со котькуд тулыс сьӧраз нуэ выж нергеез. Байтэрекозь мыноно ке, куать иськем, нош сое куинь нылпиен нунал ӵоже но уд ортчы, дыр. Кузпалъёслэн сюлмаськонъёссы нуналлы быдэ йыло. Анайлэн йӧлыз тырмымтэен, пиналъёсыз нылпи суретэн сюдоно луиз. Сое дасяны ӧдъя гинэ но - сурет кузьыра. Актэмыр гуртысь одӥг куйыез (колодчаез) но, ошмесэз но, колонкаез но эскерытэк ӧз кельтэ. Нокытысь но ву нылпи сурет дасяны ӧз яра. Ярано коть, Володялэн Катя апаез почта нуллӥсьын ужа. Со быдэс ар ӵоже Байтэрекысь бидонэн ву нуллӥз. Машалэн но Володялэн курадӟонзы со гинэ вылымтэ на. Арес тырмиз, нош нылпиоссы уг пуко на. Анай сюлмаськыса бызьылыны ӧдъяз. Толэзьёсын-толэзьёсын больницаостӥ ветлэмзы бере, нылпиоссылы кык арес тырмыку тодмо луиз: пиналъёсты пери шуккем - церебральной паралич. - Нырысь-валысь врачъёс но номыр ӧз вералэ. Тыро-пыдо валэктытэк, арес тырмемзы берегес, детдоме кельтыны куро вал, - веранзэ азьланьтэ Мария Тимофеевна. - Жаль потӥзы. Курадӟыса кутэтысь поттӥ но палэнэ келяме ӧз поты ни. Нош табере дырын-дырын жаляно но луисько. Мар-о мынам курадӟемелэн пайдаез? Больницаостӥ эмъюмлы яке йӧнатӥськыны ветлы вылэм, пиналъёсыз кытчы карыны паймоно. Одӥгзэ, оло, кельтысалыд но, куиньзэ озьы гинэ мурт доры уд кельты. Пересьёсмы-утисьёсмы ӧвӧл, кузпалэ колхозын ужа. Райцентрмы матын луысал ке... - Нош бадӟымез пиды кытын? Уг юрттӥськы шат? - Юрттӥськыны туж ярасал, дыр. Кузпалэлы мултэс луиз, лэся. Нырк карыны кутскиз, со сяна, кизэ но вуттылӥз. Табере пие ньылетӥ арзэ ини анае дорын улэ. Мӧзмисько ке но, чидано луисько. Бен, котьмае но чидано луэ кышномуртлы. Азьвыл аръёсы куиньмо пинал вордэм семьялы райцентрысь яке городысь улон инты висъяллязы. Нош берло аръёсы, огъя югдур секыт луэмен, таӵе юрттэт ӧвӧл ни. Нылпиоссы вордскем бере, кузпалъёслы Удмурт Республикаысь Правительство вить миллион но ёрос администрация миллион манет ватсаса юрттэт сётӥзы. Мясниковъёс малпало вал Алнашлы матэгес кариськыны - уксёзы ӧз тырмы. Ӵемысь одӥг пиналэз утьыны жадиськом, нош татын соос куинь кузя. Чырткемесь- бызьылӥсесь ке луысалзы... Паймоно Мария Тимофеевналэн чиданэзлы. Огназ куинь ӧлексы пиналзэ сюдэ-дӥся (нош кузпалыз ӵемысь "ышылыны" но яратэ, лэся). Со сяна, пудо-живот утялтонэз трос гинэ. Ярано коть, гуртооссы быгатэмзыя юрттӥсько. Кин кылем-мылем дӥськутсэ сётэ, кин утиськыны ветлэ. Нялтас пусйысал на, законъя куиньмо пиналэз эскерыса-утьыса возись адями луыны кулэ на. Вылаз ик - таос ӧлексы вордскемъёс. Алнаш администрациысь семья отдел пыр утиськисьёс вуылӥзы ик Актэмыре. Гужемзэ школаын дышетскись нылпиос но юрттӥзы. Жаляса верано, одӥгзы но кема ужаны ӧз чидалэ. Будӥсь пиналъёсты ӵем поттылоно чылкыт омырен шоканы. Анайлы тужгес но шуг тол куазен. Куинетӥ нылпизэ дӥсяса поттытозяз, нырысетӥез лымыен "кӧтсэ тыре" ни. Озьы огез висьыны усе ке, куиненыз ик больницае сюре. - Тазалыксэс юнматысал на, дыр, витамино сиён, - шуэ Мария Тимофеевна. - Гужем бакчаямы мар удалтэ, сое ик сииськом. Толэзьлы огпол, дыр, улмо йӧтэ, нош колбасалэсь шӧмзэ ик вунэтӥськомы ни. Уксёлы ёрмиськом. Пиналъёс вордскемзы дырысен ик висисесь, нош сӧсыр шуыса кылем арын июнь толэзьысен гинэ пенсия тырыны кутскизы. Со уксё но тыриськонъёслы ик кошке. Кылсярысь, одӥг машина пу ваён понна 400 манет кулэ: 200 манет машинаезлы, 200 - пулы. Дуно усе, нош кытчы пырод, кезьыт коркан уд толйы ук. Трос коньдон кошке на эмъюмъёслы. Та пиналъёслэн жальзылы чидано ӧвӧл. Кин ке-кин ке, дыр, кемалась вылӥ кивалтӥсьёс доры юрттэт курыса вуысал ни. Нош та востэм, лачмыт кышномуртэ огпол-кык пол чурыт кыл вераса гуртаз лэзизы ке, со выльысь уз вазиськы ни. Вылаз ик, пиналъёсыз ӧлексы кылемысь ассэ ик больницаын но куарето ке, кытчы вазиськоз на меда шудтэм анай? Ёрос администрациысь кивалтӥсьёс но калыкез улон-вылонын утёнъя министерствоысь специалистъёслэн верамзыя, таӵе югдуре шедем анай-атай потыны быгатоз тазалыкез эмъясьёслэн юрттэмзы улсын гинэ. Пичи дыръязыгес соослэсь тазалыксэс но юнматыны капчигес луысал, вылды. Анайлэн шудэз нылпиос бордын. Кин тодэ, кызьы учкозы меда нылпиос анай-атайзы но улон-вылонмы шоры быдэ вуыса. Галя, Рома но Валя. Валентина Кутузова. Егитъёс - егит кужым Егитъёслэн нуналзы азьын Правительствоын ӟечкылазы азьветлӥсь егитъёсты. Ужрадэ пыриськизы Кун Кенешлэн Тӧроезлэн воштӥсез С.Смирнова, Правительстволэн Тӧроезлэн воштӥсез Ю.Питкевич, Президентлэн Удмуртиысь оскем муртэз В.Балакин, Егитъёсын ужанъя кун комитетлэн кивалтӥсез А.Гальцин но мукетъёсыз. Промышленность, гурт хозяйство, культура, журналистика удысысь мыло-кыдо егитъёс но соослы юрттӥсьёс (ёросъёсысь администрациослэн тӧрооссы) пусъемын Кун Кенешлэн, Правительстволэн, Егитъёсын ужанъя кун комитетлэн грамотаосынызы. "Республикаямы 400 сюрс пала егитъёс. Кӧня ке ар отчыса, соос воштозы мӧйыосты: огшоры ужасьёсты но, вылӥ кивалтӥсьёсты но. Соин ик али асьмелы куспамы тупаса, ог- огмылэсь дышетскыса ужано шаермылэн сяськаяськонэз понна" - шуиз пумиськонын Ю.Питкевич. Нош 27 июне ваньмаз ёросъёсын но городъёсын праздниклы сӥзем шулдыръяськонъёс ортчизы. З.Вахрушева. Журналистъёсын пумиськонъёс Биньгозы золтӥськ Республикаысьтымы Ваньбуръя кун комитетлэн кивалтӥсез Сергей КАСИХИН алигес Правительствоын пумиськиз журналистъёсын. Люкаськемъёслы со мадиз "Зарни акция сярысь" Закон кутон но куд-ог музон ужпумъёс сярысь. Малы бен акциосын бадӟымесь огазеяськонъёс берло дыре чутыны ӧдъязы но бюджетэ пумен ичигес уксё пырто? Трос мугъёсыз пӧлысь одӥгез люконтэм герӟаськемын "Зарни акция сярысь" Закон кутонэн. Россиысь законодательёс огазеяськонъёс сярысь законъёсын сослэн ужазы пыриськыны луонлык сёто. Вераськон мынэ государстволэн адямиосызлы бадӟымесьгес правоос сётон но соос пыр кивалтонэз умоятон сярысь. Басьтом тани "Удмуртнефть" огазеяськонэз. Солэн акциосын валтӥсь пакетэз "Сиданко" АО киын. Со ялан тырше асьме му вӧймес дунтэмгес вузаны но бюджетэ ӧжытгес коньдон пыртыны, озьы троссэ аслыз кельтэ. Соин ик "Зарни акция сярысь" Законъя государстволэн адямиез солэн ужаз пыыриськыса, АО-лы ваньбурмес пичи дунын вузаны уг лэзьы, мукет сямен вераса, сыӵе решенизэ дугдытэ, вето пуктэ. Государстволэн адямиезлы озьы ик право сётӥське огазеяськонэз быдтон яке выльдон, солэсь уставной капиталзэ воштон сярысь. АО акциоссэ но государстволэн адямиеныз кенешытэк вузаны уг быгаты. Валамон, таӵе закон акционеръёслы уз кельшы. Али соослэн кенешъёссы мыно. Но государство АО-ослэн ужзы шоры палэнысен учкыса улыны уг быгаты. Вылаз ик, куд-ог огазеяськонъёслэн ("Удмурттелеком", "Удмуртнефтепродукт" АО-ослэн) акциоссы ваньмыз Москвае келямын, Удмурт Республикаысь Правительстволы одӥг процентэз но сётымтэ. Кылсярысь, "Телекомлэн" "Связьинвест" киын. Сергей Касихинлэн ивортэмезъя, акциосын валтӥсь пакет кужмысь, солэсь кивалтӥсьсэ ужысь мозмытонэн кышкатыса, басьтэмын. Озьы ик лэсьтэмын мукетъёсызъя но. Тӥни соин ик таӵе огазеяськонъёслэн ужазы государство юнгес пыриськыны кулэ. Бускель Татарстан но Башкортостан Республикаос кемалась озьы ужало ни, нош асьме Правительство но Кун Кенеш таӵе закон кутонэн быдэс арлы бере кылиз . 22-тӥ июне пусйымтэ сессиын но депутатъёс сое сӥзьыл эскерыны кельтӥзы, кутонтэм вылысь, пӧртэм мугъёс утчазы но шедьтӥзы. Эшшо одӥгзэ верам потэ на. Бигеръёс музъемез уставной капиталэ пырто. Та ласянь но асьмелэн номыр уг лэсьтӥськы, вераськонъёс гинэ мыно. Г.Романов. Ӟеч ужалод, каньылэн улод Завьялово ёросысь улон юртъёсты возёнъя участокын ужасьёс алигес асьсэлэсь праздниксэс пусйизы. Уно аръёс ӵоже ини соин быгатыса кивалтэ удмурт воргорон Александр Александрович Волков. Газэн эстӥськись укмыс котельноез эскерыса возе ньыльдон укмыс адями. Соос иинтыяськемын Завьяловоын, Первомай посёлокын, Пироггуртын, Ожмосын, Изгуртын но мукет интыосын. Гужем нуналъёсы татын ужзы ӧжытгес луэ. Соин ик али соос сюлмасько вуоно тол сярысь. Завьяловоысь укмыс сю метр сисьмем гумыез вошъяны-выльдыны малпало, нош шуныт сётон трассаез эскерыса, тупатъяса потозы. Александр Александровичлэн верамезъя, коллективын тыршисьёс но ас ужзэс ӟеч быдэсъяло. Арлы быдэ тодон-валанзэс будэто. Ӟеч тыршемзэс пусйыны луысал операторъёслэсь но слесарьёслэсь, электрикъёслэсь но сварщиклэсь. Эшъёссы пӧлын котьку азьветлӥсьёс луо Татьяна Васильева, Валентина Корепанова, Римма Антонова, Василий Стяжкин, Анатолий Щемякин, Алексей Полушин, Геннадий Репин но мукетъёсыз. Быдэстоно ужъёссы трос гинэ. Завьяловоысь юртъёсты возёнъя участокын ужасьёс гужемзэ ӟеч ужазы ке, толзэс но каньылэн ортчытозы. Н. ИВАНОВ. НАТАЛЬ Конкурс! "Егит семья: туннэ но ӵуказе" "Удмурт дунне" газет но республикаысьтымы "Егит семья" центр туала егит семьяос сярысь гожтэм ужъёслы конкурс яло. Ужъёс мед тодматозы тунсыко егит семьяосын, мед усьтозы солэсь сюлмаськонъёссэ, шуг-секытъёссэ но соосты вормон амалъёсты, нылпи утемлэсь но кузпалъёслэсь ог- огзэс гажаса улэмзылэсь аспӧртэмлыкъёссэ. Конкурсэ пыриськыны быгатозы бадӟым классъёсын дышетскисьёс но студентъёс, егитъёсын но семьяосын ужась специалистъёс, журналистъёс но вань мылкыд карисьёс. Конкурс кыстӥськоз ар пумозь. Устоосыз гожъясьёс пусъемын луозы дуно кузьымъёсын. Возьмаськом ужъёссэс. Кӧшкемыт тулкым матэктэ Берло дыре шаерамы трослы йылӥзы наркотикез вӧлмытон учыръёс, со бадӟым кышкытлык вае нимаз адямилы, обществолы но кунлы. Туэ ӝыны ар ӵоже Россия Федерациысь ФСБ-лэн Удмурт Республикая управленияз ужасьёслэн сак тыршеменызы наркотикез вӧлмытӥсьёслэсь талазы 13 килограмм героин, шараямын соослэн "лушкем" сюресъёссы. Ог толэзь талэсь азьло ФСБ-ын ужасьёс 6,3 кило наркотик талазы. Трос ик дыр ӧз ортчы, Удмуртиысь "чекистъёс" нош ик 5 кило "тӧдьы кулон" ваись порошокез куилтӥзы. Лушкем вуззэс вато пӧртэм интыосы. Ӵем дыръя сое шедьто офисъёслэн вӧлдэтъёсысьтызы но квартираослэн пӧртэм интыосысьтызы, автомашинаосысь, озьы ик лушкемен наркотик вӧлмытӥсьёслэн ӝушысьтызы. Нош берлояз учыре сьӧд ужен вырисьёс, ляб интыоссэ шӧдыса, курьер интые кутӥзы кык пичиесь нылпиосын Таджикистанысь вуэм кышномуртэ. Ижевске поездэн вуыса со вузэныз дыртӥз "тодмоосыз" доры. Удмуртиысь ФСБ-ын ужасьёслэн ӝог тыршеменызы басьяськисьёсты кырмизы. Таджикистанысь вуэм кунолэн сумкаысьтыз, нылпи дӥсьёс пӧлысь, вить кило героин шедьтӥзы. Та учыръя уголовной уж ӝутэмын, нош кышномуртэ пумитасьёслэн улон интыысьтызы шедьтэмын на эшшо сю грамм героин но патронъёсын револьвер. ФСБ-лэн Удмурт Республикая уравленияз ужасьёслэн тыршемзылэн пайдаез зол гинэ шӧдӥське. 17 миллион манет тыр дунъяське. Со 650 000 пала адямилэн тазалыкезлы йырез усыкмытӥсь сурет тырмысал. Медикъёслэн верамзыя, героинэз кык пол "шӧмъясь" мурт наркотиклы дышыны кутске. Мукет сямен вераса, тамында героин кышкытлык вайысал шаерысьтымыц котькуд ньылетӥ адямилы, вож нуныосты но лыдэ басьтыса. Россия Федерациысь ФСБ-лэн Удмурт Республикая управлениез, та ужрадэз азинтыса, адямиослэсь тазалыксэс но огъя югдурез утьыса, Удмуртиын улӥсьёслы куронэн вазиське. Правоез утёнъя органъёсын ужасьёслы дэмен юрттӥмы ке, шаерамы вуись кӧшкемыт тулкымез палэнтыны быгатысалмы. Наркотикез вӧлмытӥсьёс сярысь кыӵе ке ивор кылӥды ке, куриськомы милемлы ивортыны ФСБ-лэн но МВД-лэн приёмнояз. Со интыяськемын Пушкинской но Советской урамъёслэн сэрегазы. Россия Федерациысь ФСБ-лэн Удмурт Республикая управлениезлэн пресс-службаез. Министерствоосын но ведомствоосын Нюлэсъёс куашетозы Удмурт Республикаысь нюлэсъёсъя управленилэн коллегиезлэн кенешаз йылпумъянъёс лэсьтэмын тулыс быдэстэм ужъёслы. Вить толэзь ӵоже 4693 гектар нюлэс мерттэмын. Та уж тужгес но ӟеч радъямын вал Якшур-Бодья, Ижевск, Игра, Вавож, Дэбес, Грахово но Яган лесхозъёсын. Питомникъёсын ортчытэмын нюлэс кизён. Мерттыны дась ни 26 миллион 854 сюрс пинал писпуос, кылем арын сярысь, со 1,6 поллы уногес. Сизьымез лесхозъёс автомобиль ветлон сюресъёс кузя писпуос мерттонзэс азьланьто. Озьы 1998-тӥ-1999-тӥ аръёсы 675 иськем кузя писпу мерттэмын. Нюлэс выльдон ужын вормисен лыдъямын Глазов, Игра но Яган лесхозъёс. 2000-тӥ ар сярысь кенешизы Удмуртиын кылдытэм Сьӧрлось калыкъёсын кусыпъёсъя министерствоын республикаысьтымы национально-культурной огазеяськонъёслэн кивалтӥсьёсынызы нырысетӥез пумиськон ортчиз. Со огазеяськонъёслэн ужаменызы тодматӥз шаерысьтымы прокурорлэн юрттӥсез Любовь Амбарцумян. Озьы ик та организациослы 2000-тӥ арлы коньдон висъян но ужан программа сярысь кенешемын. Законын воштонъёс Удмурт Республикаысь Ужъя кун комитет Правительстволэн Президиумаз вазиськиз, "Удмурт Республикаын кун служба сярысь" Законэ воштонъёс пыртыны курыса. Воштонъёс герӟаськемын Удмурт Республикаысь госслужащийёслы квалификациосъя разрядъёс тупатонэн. Та документэз юнматонлы коньдон уз кутӥськы. Законлы инъет эскерыны сётэмын Удмурт Республикаысь Кун Кенеше. Юн эскериськоз Пытсэт сьӧрын пукисьёсты кыл кутытонъя управлениезлы бюджетысь 700 сюрс манет ссуда сётон сярысь постановление вылэ гожтӥськыкуз, Правительстволэн кивалтӥсез Николай Ганза пусйиз, коньдонэз кутон юн эскериськоз шуыса. Уксё висъяськоз управленилэсь подсобной хозяйствооссэ юнматонлы. Выль кивалтӥсь Покчи ужбергатонлы юрттонъя Удмурт кун фондлэн Попечительской Кенешаз выль адямиос юнматэмын. Соин кивалтэ Правительстволэн кивалтӥсезлэн воштӥсез Сергей Чикуров. Выжтэмын 1-тӥ октябрьлы Кудӟытӥсь юонъёсты штрихкодэн пусъён 1-тӥ июльысен 1-тӥ октябрьлы выжтэмын. Сое Правительстволэн президиумез юнматӥз 28-тӥ июне. Правительстволэн Председателез Николай Ганза, покчи ужбергатонъя фондлы юрттон вылысь, федеральной фондэн огкыл гожтӥз. Ватсаса мукет ужпумъёс но эскеремын. Валтӥсь ужпумъёс Правительстволэн кивалтӥсез Николай Ганза 28-тӥ июне аппаратлэн ортчем кенешаз министръёслэн кабинетсы азе матысь дыре быдэстоно ужпумъёсты ӝутӥз. Отын валтӥсь инты висъямын выт бичан ужез умоятонлы. Соин валче кылдытэмын ужась группа, отчы пыро налогъёсъя полициын, налогъёсъя инспекциын, эскеронъя но ревизиосъя управлениын ужасьёс. Чакламын кылем ар понна 354 миллион манет налогъёсты берыктонъя ужпум. Туннэ быдэстоно ужпумъёс пӧлысь Правительстволэн кивалтӥсез Балезиноысь спирт завод лэсьтонэз ӝогомытыны куриз, озьы ик бадӟымгес саклык висъяны ӵектӥз "Сэмсон" компаниен нефтен узыр интыос ласянь вераськонъёслы, "Ижмаш-Шкода" проектъя документъёсты дасянлы но М.Т.Калашниковлэсь 80 ар тырмонзэ пусъёнлы. Удмурт Республикаысь Правительстволэн секретариатэзлэн пресс-службаез. Ужаз Можгаын 29-тӥ июне Удмурт Республикаысь Правительстволэн Тӧроез Николай Ганза Можга городэ ветлӥз. Со пыраз ёрос больницае, мургес тодматскиз хирургияя корпусэз лэсьтон ужен. Озьы ик вылӥ кивалтӥсь вуылӥз на консерва заводэ, "Красное знамя" но "МСО" огазеяськонъёсы. Нуназе бере Николай Ганза кенешон ортчытӥз Можга город администрациын ужасьёсын но горсоветлэн депутатъёсыныз, пӧртэм предприятиосысь но организациосысь кивалтӥсьёсын. Нош Ижевске кошкемезлэсь азьло пумиськиз на "Свет" огазеяськонын ужасьёсын. Пусйыны кулэ, Правительстволэн Тӧроеныз ӵош Можга городэ вуылӥзы на лэсьтӥськонъя, архитектурая но улон инты возён политикая министр Валерий Загайнов, промышленностья но транспортъя министрлэн воштӥсез Лоенид Курочкин, тазалыкез утёнъя министрлэн воштӥсез Юрий Блохин. Можга городын соос асьсэ удысъёссыя ужазы. Удмурт Республикаысь Правительстволэн пресс-службаез. Максимлы сётӥзы медаль Россия Федерацилэсь кун наградаоссэ сётон ужрадэ лыктэм адямиослэн но журналистъёслэн син шоразы соку ик йӧтӥз чиед гинэ мугоро пияш. Медаль сётэмзы бере солы уката но трос кичабисьёс вал. Сарапул ёросысь Нечкино шор ёзо школаысь дышетскисьлы Максим Соколовлы туэ сётэмын вал выись адямиез утемез понна медаль. ... Кышкыт учыр кылем гужемлэн огаз пӧсь нуналаз вылэм. Максим эшъёсыныз ӵош тыметэ пыласькыны мынэм. Мукет ярдур палаз уяса потэмез бере ини Максим выйыны кутскем эшсэ синйылтэм. Кызьы сое вуысь поттэмез сярысь пияш али вераны но уг ни быгаты. Но туж ӟеч тодэ, мар кариз со кулон калэ вуэм эшеныз бӧрысь, ярдуре кыскемез бере. Тодаз ваиз, кызьы соосты школаын ОБЖ урокъёсын дышетылӥзы выем муртлэн мугорысьтыз вуэз поттыны, массаж лэсьтыны. Озьы ик со лэсьтӥз. Кӧня бергаз эшез котырын, шуг вераны. Но юлтошезлэн ӟузем вуэз потыны кутскиз, шоканэз но радъяськиз. Кун Кенешлэн юртаз, кытын Максимлы медаль сётӥзы, со вал анай-атаеныз но школалэн директореныз. Туэ Максим Соколов 7-тӥ классэз йылпумъяз, вань азьло аръёсы сямен ик - "витьёсын" гинэ но грамотаен. Школалэн директорез та семья сярысь ушъямон кылъёс гинэ вераз. Максимлэн анаез татын ик дышетӥсь луыса ужа. Соколовъёслэн семьязы школаын ортчоно ужрадъёсын котьку но кичӧлтӥсьёс-юрттӥсьёс луо. Соин ик оскымон, данъяськымон но визьмо пи будэтэмзылы паймонэз ик ӧвӧл. Т.Банникова. Туспуктэмез В.Камашевлэн. Максим Соколов. Маршаллы сӥземын Пермьысь печатья фабрика асьмелэн тодмо землякмылэн авиациысь маршаллэн Ф. Я. Фалалеевлэн вордскемез дырысен сю ар тырмонлы сӥзем конверт поттӥз. Отын возьматэмын Можга ёросысь Бадӟым Уча гуртэ интыям бюст (скульпторез Е. Егоров). Конверт поттэмын трос тиражен. В. РОГАЛЕВ. Кун Кенеш ивортэ 28-тӥ июньысен Удмурт Республикаысь Кун Кенешлэн Тӧроез Александр Волков куинь арнялы шутэтскыны потӥз. Солэсь азьвыл, 25-тӥ июне, Россиысь Журналистъёслэн огазеяськонзы но Журналистъёсты дышетонъя центрлэн Удмурт люкетэз Ижын ортчытӥз республикаысь журналистъёслэсь семинарзэс. Солэн ужаз Александр Волков но пыриськиз. Семинарын вераськон мынӥз "Удмуртия выль дауре выжон азьын" ужпумъя. Пусйыны кулэ, одӥгзэ пресс-конференциез сётӥзы Интернет калык куспо сеть пыр. Люкаськемъёс бадӟым саклыкен кылзӥзы "Отечество" огазеяськонлэн Удмуртиысь Кун Кенеше депутатъёсты быръёнэ пыриськемез сярысь, озьы ик ӟечен пусъемын вал палэнысь коньдонэн шаермес азинтыны сюлмаськон, кылсярысь, "Ижмаш-Шкода-авто" проектэз уж вылын быдэстон. Удмуртиысь иворъёсты вӧлмытӥсь ёзъёслэн котькытчы вуыны тыршемзы тросэзлы тодмо. Сентябрь толэзе, Кун Думае депутатъёс быръён азьын, республикаын ортчытыны чакламын "Быдэс Россия-99" ньылетӥ фестиваль. Отчы пыриськозы Москваысь но вань улосвылъёсысь журналистъёс, общественной ужасьёс, политикъёс но трос вылӥ кивалтӥсьёс. Удмурт Республикаысь Кун Кенешлэн пресс-службаез. Пӧсьтолэзь: тодмо нимъёс но нуналъёс 1. - 95 ар талэсь азьвыл (1904) Глазовын усьтӥськиз пиоцмуртъёслы прогимназия; - 25 ар талэсь азьвыл (1974) Ува посёлокын усьтэмын суредъёсын калык галерея. 2. - 30 ар талэсь азьвыл (1969) Кизнер ёросысь Вуж Мултан черкогуртын усьтэмын ӟуч писательлы В. Г. Короленколы сӥзем музей-юрт но памятник. 5. - 105 ар талэсь азьвыл (1894) кылдытэмын Асаново совхоз-техникум; - 65 ар талэсь азьвыл (1934) республикаетӥмы нырысьёсыз почта но калыкез нуись- ваись поездъёс ортчизы. 15. - 70 ар талэсь азьвыл (1929) ВЦИК-лэн Удмурт автономной областез администрациосъя люкылон сярысь постановлениез кутэмын. 34 волость но 3 уезд интые кылдытэмын 21 ёрос: Алнаш, Балезино, Вавож, Глазов, Дэбес, Зура, Ижевск, Карсовай, Кез, Пичи Пурга, Можга, Селта, Сюмси, Шаркан, Юкаменск, Якшур-Бодья, Яр, Святогорск, Нылга-Жикья, Выль Мултан; - 55 ар талэсь азьвыл (1944) Глазовын усьтӥськиз драмая кун те атр. 25. - Вордскемез дырысен 90 ар тырме Филипп Григорьевич Кедровлы (1909-1944), удмурт кылбурчилы но прозаиклы. Вордскемын Алнаш черкогуртын. 28. - Вордскемез дырысен 60 ар тырме (1939) Игорь Сергеевич Бехтеревлы, суредасьлы. Вордскемын Камбарка ёросысь Ершовка черкогуртын. И. Бехтерев - "Сурсву", "Внукъёсын ӵош мунчое", "Атаелэн тулысэз" но мукет суредъёслэн авторзы. 30. - Вордскемез дырысен 75 ар тырме (1924-1985) Герман Афанасьевич Корепановлы, удмурт крезьгурчилы, УАССР-ысь Кун премилэн лауреатэзлы, РСФСР-ысь, УАССР-ысь искусствоосъя дано ужасьлы. Г. Корепанов - "Наталь" нырысетӥез удмурт опералэн, "Мятеж" опералэн, нырысетӥ симфонилэн, 8 спектакльлы крезьгуръёслэн, озьы ик вокально-духовой сюитаослэн, кантатаослэн но мукет произведениослэн авторзы. Пӧсьтолэзе - 70 ар талэсь азьвыл (1929) усьтӥськиз Ижевск городысь суредасьёслэн нырысетӥез адӟытонзы. Отын возьматэмын 5 авторлэн 100 ужез; - 65 ар талэсь азьвыл (1934) усьтӥськиз Ижевскысь ипподром; - 25 ар талэсь азьвыл (1974) нырысетӥ продукцизэ сётӥз Ижевскысь пластмассаосъя завод. Е. Ушакова, Удмурт Республикалэн туала историезлы сӥзем центрысьтыз отделлэн кивалтӥсез. ШӦКЫЧ Пурӟе тополь мамык Адӟон пыд улысь, пе, потэ. Таӵе пӧсь нуналъёсы шаерамы ӵемысь "горд атас" кузёяськыны яратэ. Нош топольлэн мамыкез, юри дасям порох выллем, туж ӝог кенже но котыр улослы кышкытлык вае. Тополь мамык тӧлъя пурӟе, асьме ваньбурмы борды "лякиське". Озьы, Ижевскысь Октябрь ёросын гинэ 22 июне час куспын кык тылпу кенжиз. "Горд атас" куное пыраз Коммунаров урамысь музейлэн лэсьтӥськон-выльдон площадяз но. Ма ватонэз, бадӟымъёслэсь адӟем каро пичиос. Кысымтэ тамак пумлэсь тополь мамык чаляк кенже бере, нылпиослы но тыл поттон ӝуатъяны инёк, лэся. Жаляса верано, соослэсь маин шудэмзэс асьмеос ум синйылтӥське. "Тополиный пух, жара, июль" кырӟанын сямен ваньмыз умой луоз кожаськом, лэся. А.Гущин. Валэктэ юрист Сэрегез дася адвокат Лилия Шкляева Ӧлексы муртлы пенсия Тӥледыз гажаса но тӥлесьтыд валэктон курыса вазиське нырысетӥ группаен инвалид. Мон 1982-тӥ арын вӧсь луи: чыртыысьтым сюрлые интыысьтыз тэтчылӥз. Гожтӥзы: бытовая травма - общее заболевание. Туж ӧжыт пенсия тупатӥзы. Май толэзе будэтэмен валче, 349 манет 93 копейка гинэ. Мынам таӵе юанэ: шонер-а врачъёс гожтӥллям огъя висён шуыса? Сюрлыен вӧсь луэмъёслы коньдон тросгес луыны кулэ кадь. Алексей Алексеев. Алнаш районысь Выль Шудья гурт. 1996-тӥ арын 13-тӥ августэ Россия Федерациысь Правительство поттӥз 965 номеро постановление. Со нимаське тазьы: "Гражданъёсты ӧлексыен (инвалидэн) лыдъян радлык (порядок) сярысь". Отысь 21-тӥ ёзэт (пункт) валэктэ: инвалидэ поттыны мугъёс луо огъя висён, ужын шуккиськон, ужен сэрен висьыны усён, пиналысен висись кылён, сӧсырмон, яке военной службаын висьыны усён, Чернобылен сэрен висисе кылён но законэн чаклам мукет учыръёс. 1986-тӥ арын 25-тӥ декабре РСФСР-ысь Калыкез улон-вылонын утёнъя министерство поттӥз вал 161 С номеро приказ. Отчы воштонъёс пыртэмын 1993-тӥ арын 24-тӥ мае. Приказын сётэмын инвалидэ поттыны мугъёсты тодонъя валэктонъёс. Адями ӧлексы кылиз ке ужакуз яке уж бере, дышетскыкуз пӧртэм висёнъёсын сэрен, нош висёнъёс меӵак герӟаськемын ӧвӧл ке ужен, муг тазьы нимаське - огъя висён. Соку уг учко ни, чырты-а висе, пыд-а. Люкиськиськом шол Тодэме потэ ваньбурез люкон сярысь. Кузпалэным люкиськемын 1994-тӥ арысен, но улӥськомы огинын. Вань дас аресъем нылмы, пиналысен ӧлексы. Огинын улыса пуктӥм вал корка, со гожтэмын мон вылэ. Кузпалы улэ пропискатэк, юэ, уг ужа. Куинь ар куспын кык пол басьтӥзы правозэ. Валэктэ вал: кызьы люконо ваньбурез, кыӵе люкетэз кыле мыным, кыӵеез - солы, озьы ик нылмылы но. Вань-а солэн кыӵе ке правоез коркалы? Быгатӥсько-а мон сое улляны (вань автомашинамы но мотоциклмы)? Л.Иванова. Ӵошен улыку люкам ваньбур огъя лыдъяське. Озьы валэктэ Россия Федерациысь Семья сярысь кодекслэн 34-тӥ ёзэтэз (статьяез). 38-тӥ ёзэт индылэ: огъя ваньбурез люкыны луэ соглаш кариськемъя. Кузпалъёс мылкыд каро ке, та пумысен нотариус гожтэ документ. Кузпалъёс огъя кылэ уг вуо ке, мед мынозы судэ. Соку ик тупатэ котькудӥзлэсь пайзэ. Огезлы сюре ке люкыны луонтэм дуно ваньбур (корка, машина), мукетыз ас пайзэ басьтыны быгатэ коньдонэн яке мукет ваньбурен. Нимазы улыку люкам ваньбурез суд лыдъяны быгатэ огезлэн гинэ адямилэн. Быдэ вуымтэослы басьтэм вузъёс (дӥськут, пыдкутчан, дышетскон но спортэн яке музыкаен вырон арбериос, книгаос но мукет) уг люкисько - кылё нылпиен улоно мурт дӥне. Ваньбурез висъяны луэ люкиськем бере куинь ар куспын. Соослэн пайзы огбыдӟа лыдъяське, куспазы мукет огкыл (договор) ӧй вал ке. Суд та пайлэсь быдӟалазэ воштыны быгатэ пӧртэм мугъёсъя. Шуом, нылпиос огезлы гинэ кузпаллы кыльыку, яке огез адями семьялы барыш ӧз вайылы но огъя ваньбурез тус-тас карылӥз. Огъя ваньбурлы правоез вань сыӵе кузпаллэн но, кин ӵош улыкузы гурт хозяйствоез нуиз, пиналъёсты утиз но мукет мугъёсын сэрен барыш ӧз потты. ШӦКЫЧ Сям Депутат гуртаз вуэ. Кышноез юа: - Борщ сиёд-а? Картэз дышем сямыныз кизэ ӝутэ. - Котлет сиёд-а? Картэз кизэ ӝутэ. - Аракы лэзём-а? Кичабонъёс. Уждун Егит пи милицие ужаны интыяськиз. Ортче толэзь, кык, куинь, нош со уждун басьтыны уг лыкты но уг лыкты. Кивалтӥсез сое ӧте но юа: - Тон мар уждундэ уд басьтӥськы? - Мон малпай, пистолет сётӥды бере, аслым ик бергано луоз ни. Ивор Диктор политикалы сӥзем иворъёсын тодматэмез бере ялӥз: - Табере культура удысысь иворъёс. Толон ыбемын вал филармонилэн директорез... Коньдон - Песятай, кызьы-о тӥ таӵе кема улыны быгатӥды, - юа сю аресъем пересьлэсь журналист. - Улытозяды тӥ огпол но курытсэ ӧд шӧмъялэ, дыр, ӧд кыске, зарядка лэсьтӥды? Номырзэ ватытэк вералэ вал. - Мар отын ватонэз! Ватыны коньдонзы ӧвӧл... Кышкатӥз сильтӧл Удмурт Республикаысь Граждан оборона ужпумъёсъя но кышкыт учыръёслэсь утиськонъя комитетлэн ивортэмезъя, 24 июне нуназе бере 3 часын Можга ёрослэн лымшор палтӥз кужмо сильтӧл ортчиз. Вуж Березняк гуртысь 21 юртлэсь липетъёссэ нуиз, куашкатӥз итымез, фураж возён кеносэз, скал гидэз, 6 интытӥ электроезэз ишкалтӥз, 25 улон коркалэсь липетъёссэ тарказ. Сильтӧл изъян лэсьтӥз Ныша но Вуж Какси гуртъёсын но. Адямиос но пудо-живот номыр ӧз луэ. Г.Стрелков. ГУЖЕМ КАНИКУЛЪЁС Тодматским поръёсын Городын будӥсь пиналлы гуртэн тодматскон, отысь калык сямъёсты ас синмыныз адӟон- кылон - аспӧртэмлыко урок. Ижевскысь 56 номеро гимназиысь 7-тӥ - 8-тӥ классъёсын дышетскисьёс гужемлы быдэ потало этнографияя экспедицие. 8-10 нунал ӵоже соос уло кыӵе ке гуртын, тодматско отысь калыкен, пумиськыло арлыдо адямиосын, юасько- верасько ортчем сюрессы сярысь. Ваньзэ гожъяло. Люкам материал ӟеч ватсэт луоз этнографияя но историяя урокъёсын. Газет пыр тау карон кылъёсме вераме потэ Шаркан районысь Ляльшур но Пашур-Вишур гуртын улӥсьёслы, Красногорск районысь Бараны, Захватай, Ефремово, Вавилово, Балезино палась Б. Юнда но М. Юнда, Ягошур, Падера гуртъёсысь но Завьялово районын улӥсь калыклы. Соос мылысь-кыдысь юрттӥзы, ужаны ӟеч мылкыд сётӥзы. Туэ вуылӥм Грахово районысь Мари-Возжай но Иж-Бобья палъёсы, Кизнерысь Мари- Сарамаке. Тодматским отын улӥсь поръёслэн улон-вылонэнызы, сямъёсынызы. Экспедицие потэмъёс пӧлысь котькудӥз ужаз аслаз заданиезъя: огез эскериз юртъер пуктон манерез, мукетыз - пӧраськон-пыжиськонэз, куинетӥез - дӥськут-пыдкутчанэз, сюан ортчытонэз, адями ватонэз но мукетсэ. Пиналъёслы туэ тужгес но удалтӥз, шуыны луоз. Июньлэн кутсконаз быдэс арня ӵоже тодматским Мари-Возжай гуртэн. Куноосты сямен, пыжиськемъёсын пумитазы-утялтӥзы, усьямтэ шыкысъёссэс усьязы. Со понна нырысь ик тау карем потэ Анастасия Степановна Морозовалы но Татьяна Ивановна Бусыгиналы. Калык юрттэмен но сюлмаськемен, пиналъёсмы узыр материал шедьтӥзы, уно выльзэ тодӥзы. Школаысь музеямы но туж аспӧртэмлыко арбериос вуизы. Лэсьтэмын трос снимокъёс. Соос пыр табере тодматскыны луоз Удмуртиысь поръёслэн улон-вылонэнызы, дӥськутэнызы, киужъёсынызы, юртъеренызы. Нош кӧня люкаськизы пӧртэм пумо мадёнъёс! Соос пыр адске ужась сямо калыклэн вань манерез. Огпол адӟыса-пумиськыса синмаськод пӧлысьтызы кибашлыослы, кырӟаны-вераны быгатӥсьёслы. Тодматским гуртысь музеен но, соин кивалтэ А. С. Морозова. Туж яразы татысь экспонатъёс. Гуртлэн вань ортчем сюресэз чырыен-пырыен люкамын. Ма быдӟа уж лэсьтэмын! Кылзӥм, кызьы шудо пор сюанэз. Вашкала аръёсы кылдэм сям туннэ но возиське, выжыысь выжые кыле но утиське. Нимысьтыз вераськон - сиён дасянъя. Поръёс, удмуртъёс сямен ик, туж быгатыса куто инкуазен сётэм узырлыкез: чорыг, нюлэс емыш, губи, турын-куар - ваньмыз пӧраськонэ мынэ. Вань кылэммес-адӟеммес гимназиысь оператормы Олег Борисов плёнка вылэ пуктӥз, отын ик - семык пор калык праздник но. Таизэ адӟим Кизнер районысь Мари-Сарамак гуртын. Пиналъёс понна вунонтэм кылёз пор кылъя но литературая дышетӥсен Галина Дмитриевна Искаковаен но солэн анай-атаеныз пумиськон. Таиз ини зэмос энциклопедия! Юртъерзыя ик адске: татын улэ ужась семья: нош корка пушказы ма но ӧвӧл: пужыятэм валес котыр, ӝӧккышет, ӵушконъёс... Кӧня отчы сюлэм шуныт понэмын меда. Зарни киос гинэ таӵе чеберлыкез кылдытыны быгатозы. Кельшизы та гуртысь дышетӥсьёс. Соос ваньзы маин быгатӥзы милемлы юрттӥзы. Вераським сӥзьыл нош ик пумиськыны. Мари-Возжай школа гимназиямы ортчытоз пор культуралы сӥзем нуналъёсты. Пиналъёсмылэсь тодон-валанзэс со эшшо но узырмытоз, дунне шоры паськытгес учкыны дышетоз. Озьыен, выль пумиськытозь! АЛЕКСАНДР ШУДЕГОВ, Ижевскысь 56-тӥ школа-гимназиысь историяя но этнографияя дышетӥсь. ШӦКЫЧ Галина Романова Сӧризы, снн уськытӥзы Серемес верос Всё, гуртэ бертӥсько! Ӵуказе ик та сурымо, эрекчи, адямиез сӧрись городысь мемей- дядяй доры берто. Пыро вордскем гуртам но шуо: Усьты, дядяй, капкаостэ, Вӧлды, мемей, ӝӧккышеттэ... Собере вордскем коркам пыро, ӝик-ӝик ӟыгырто пересьёсме... Син уськытӥзы мыным та городын. Мар борды гинэ уг кутскиськы - ваньмыз йырчукин кошке. Заводын дасо аръёс ужам маке, сокращение сюри. Эшъёсме кельтӥзы, монэ уллязы. Шӧдӥ вал куатьтонэтӥ цехысь Нинуклэсь шорам синмаськыса учкылэмзэ. Ачиз номыр но уг вера, учке но учке со сьӧд блёко синъёсыныз. Сюлмы нёркак луиз. Синмыд-пельыд монэ ӧз адӟы, ӧз кылы шуыса, пельпум сьӧртӥм куинь пол сялӟи. Ӧз юртты. Лешак, шораз сялӟоно вылэм. Уллязы, малпамтэ шорысь ужысь поттӥзы. Газетысь ялонъёсыз учкылонъям уж дэмлась фирмаез шедьтӥ. Как раз мыным, гуртысь потэм муртлы тупа ужзы: вешенка губи, пе, будэтыны юрттом. Толэзяз пайдаез - сюрс манет пала. Куазь гужем, шуисько, соосты балконын будэтыны туж умой луоз. Фирмаын кызьы веразы, ваньзэ озьы лэсьтӥ. Як.-Бодья нюлэскысь сирпу кислэсъёс ваи, вешенкалэсь кидыссэ кизи, ву киськай. Витисько ини сирпу губиосылэсь мычиськемзэс. Уин но султыса, спичка тылын эскерисько. Куинетӥ нуналаз вазь ӵукна ик йыгаськись луиз. Бускель Ванька вылэм. Кышноен, пе, куаретӥм но одӥг валесын ёркыт луиз. Ортчы, шуисько, ортчы. Умой али, малпасько, кышнояськыса ӧй на вутты, а то та Ванька сямен аслад коркад пыдчиньы йылын ветлоно луысал. Ванька пыриз гинэ но монэ балконэ тамаканы ӧте. Потӥм. Лешак, тодысал ке, ӧсме но ӧй усьтысал. Кутскиз ук сирпу кислэсъёсты учкылыны. Марлы но марлы шуыса ёртэ. Нош ачиз пумен киыныз но кутылэ ини, вылаз но пуксьыса утча. Эх, малпасько, быризы мынам губиосы, паймем син, пе, дасо синлы укша, кык-куинь поллы золгес сӧре. Ванькалы ма вераны ёрмыса, киыным шонтӥ но пырак шуи: - Тазьы губи будэтӥсько. Ванька шорам долказ - талэн ваньмыз-а меда котыраз шуэ, лэся. - Нош мынам Зинуле балконын кеч будэтэ, - котырме эскерыса шуэ Ванька. - Умой, - шуисько, - умой. Балконын кечъёсты но, курегъёсты но, парсьёсты но будэтыны луэ. Ванькае ӝыныё кыскем тамаксэ кысӥз но пырс потыса кошкиз. Тӥни озьы йылпумъяськиз мынам губи будэтонэ. Аслам бускеле син уськытӥз, губиосы ӧз потэ. Сенной базаретӥ ортчо али, малпасько. Оло, кыӵе ке уж нерге но сюроз. Адӟисько, сьӧд воргорон монэ чиньыеныз ӧте. Апельсинэн ящикъёсыз, пе, машинаысь ӝоктоно вал, коньдонзэ соку ик тыро. Нош ачиз шорам сьӧд-сьӧд чилясь синъёсыныз сыӵе кескич, мыр-мыр учке. Мон но учкисько. Уг сётскы, малпасько, тынад гипноз синъёсыдлы. - Кылтэм-о, мар-о тон? - юа. - Кылтэм, - шуисько. "Лыктэм сьӧд куака, азьтэм бака, лешак басьтон, - поннам тышкаськисько, ачиз мынэсьтым быдэс йырлы ӝужыт, паськыт, ӵыжыт ымныраз кыкетӥ ангес будэтэм ини, нош монэ ужаны медъя. Уть, синъёссэ кыӵе пуктылэ. Сыӵе-сыӵе сьӧд синъёс, пе, гипноз карыса, адямиез туж зол сӧрыны быгато. Ужалод но, вылысьтыд берпум штанидэ сётыса кошкод, берло мазэ-созэ уд но тоды ни. Уг, уг сётскы мон та сьӧд куакалы. Синъёсме эшшо но бадӟымесь питыртыса учкисько со шакшы сьӧд синъёсаз. Ворми ведь. Адямиед пумем кадь интыяз сылыса кылиз. "Служба занятости" шуон интыязы ветлоно кариськи. Кыӵе специальностьты вань, шуо, мар карыны, пе, быгатӥськод. Котьма карыны быгатӥсько, шуисько: кулэ ке кытысь ке мае ке окто-калто но, ӝокто но, нулло но, кулэ ке, эскерыны-чакланы, миськыны но быгато. Сыӵеос, пе, татын лачак. Милемлы, пе, специальностез возьматӥсь бумага кулэ, шофёр яке тракторист, шуом. А мынам, заводын ужам муртлэн, кыӵе-о бумагае луоз. Отын мон цехысь цехе детальёсты нуллӥсько вал бере. А так траторез но, грузовой машинаез но гуртын нуллыны дыши вал ини. Школа бере, праволы шуыса, экзамен сётыны мынӥ. Сӧризы монэ отын. Азям юри сьӧд синмо кышномуртэ пуктӥзы. Ну, юа ук, ну, юа. Ачиз шорам сиёно кадь учке, тани-тани ньылоз. Султӥ но кошки. Со дырысен трактор-машинаез адӟеме ик уг луы - дырекъяны кутскисько. Ярам али, гуртэ легковой машинаос ветлыны кутскизы. А то со кышномурт зол гинэ монэ сӧрем, лэся, берло дыре автобусэз но адӟеме уг луы ни. Мемей-дядяйлы тау ини. Кыкназы пенсия басьто. Сомында коньдонэз гуртын кытчы-о карозы - лавка ӝажыос бушесь. Мыным, одӥг гинэ пизылы, сёто. Озьы "Служба занятости" шуоназы, юрттэм интые, висись яраме гинэ ӵабыштӥзы. Юри юалляськизы, луоз. Адямиосын ужало ук, тодо, луоз, лешакъёс, кинэ кызьы сӧрыны. Тырмоз, тырмоз, нокыӵе уж утчаса уг курадӟы ни. Берто, ӵуказе ик берто. Берло бертылыкум пунымылы кар лэсьтыса кельтӥ вал. Пуны кар лэсьтыны быгатӥсько бере, корка но ӝуто. А то вужез луткам курег кадь сылэ ини. Выль корка вӧзы бадӟымесь гидъёс лэсьто. Парсьёс басьто. Парсьпи будэто но вузало... Ӧвӧл, ӧвӧл, парсьпиослы укыр чаляк син усе. Скал вордыны кутско. Вӧзаз кроликъёсты но басьто. Озьы йӧл но, сӥль но луоз. Вордскем гуртэ городлы кыдёкын ӧвӧл, базарын соосты вузало, узырмо. Собере кышно сярысь но малпаськыны луоз. Ужасьсэ, инбам кадь чылкыт чагыр синмозэ шедьто... Эх, мемей-дядяй! Кырӟаса улом! Экты, дядяй, лёг пыддэ, Кырӟа, мемей, чаб кидэ, Дорады пиды бертэ... Одӥгезлэсь гинэ вот кышкасько, кепырасько: син медаз уськытэ вал, Нинуклэн кадь урод синъёс милям гуртамы вань гинэ ведь. Тау карон Газет пыр тау кариськом 12 июне милемды юбилеенымы ӟечкыланы ветлэмъёслы. Никитин кузпалъёс. Балезино ёросысь Турецкой гурт. Омыр пумен ӟырдаз... 25-тӥ инвожое ортчиз Удмуртиысь писательёслэн ЪВ ӧтчамзы Азьвыл таӵе ӧтчамъёс-съездъёс бадӟым праздниклы пӧрмо вал. Писательёслэн, лыдӟисьёслэн праздниксылы. Эркын залын, литератураез паськыт эскеронэн. Ӧтемын луозы вал Писательёслэн союзазы пырымтэ гожъяськисьёс, егитъёс, книгаез вӧлмытӥсьёс, библиотекарьёс, дышетӥсьёс но. Нош таиз, Удмуртиысь писательёслэн дас витетӥез бадӟым ӧтчамзы, Культурая министерстволэн сюбег конференц-залаз ортчиз. Мултэс синъёстэк-пельёстэк. Выль министр Николай Бессогонов но Кун Кенешысь референт, азьвыл министр Анетта Сидорова гинэ лыктоно кариськиллям. Со бордысен - ик аслэсьтыз юридической правооссэ паськытатон, статуссэ ӝутон понна, Уставаз воштонъёс, ватсанъёс пыртон пумысь кенешонэн кутскиз ас ужзэ Писательёслэн огазеяськонзы. Москваысь нокыӵе юрттэт ӧвӧл ни бере, вань оскон асьме вылӥ кивалтон ёзъёслы гинэ, соос уз куштэ шуыса. Кылем съезд дырысен вить ар ӧзгес ортчы на, но та дыр куспын сильтӧл-пери зол турказ улонмес. Писательёслэсь огазеяськонзэс но сэстӥз. Но чылкак куашкатыса ӧз вутты. Соин ик кылем сӥзьыл Россиысь СП-лэн секретариатэз Ижевскын ужаку, Москваысь лыктэмъёс кӧня ке паймемзэс но веразы, асьме Писательёслэн союззы пыд йылаз возиське на шуыса. Мукет интыосын уго таӵе огазеяськонъёс воксё ёзнаськылӥзы, кык-куиньлы но люкиськылӥзы. Мар лэсьтэмын - со син азьын. Номыр шоры учкытэк, пусъем ужрадъёс тросэз быдэсъяськизы (валамон ни, "коньдон борды пыкъяськон" ӧз ке люкетылы). Тазьы малпаны луэ, СП-лэн правлениезлэн председателезлэсь Олег Четкаревлэсь ӧтчетсэ- докладзэ кылзыса. Ортчем дыр куспын 25 адями Союзэ кутэмын, табере отын 56 мурт лыдъяське (но та ӧтчаме пӧртэм муген лыктӥллямтэ 12-ез). Ӧвӧл ни пӧламы Андрей Бутолин, Николай Байтеряков, Петр Любомиров, Герман Ходырев, Иван Данилов, Михаил Федотов... Озьы яке тазьы пусъемын 13 писательёслэн юбилейёссы. Та дыр куспы тупаз тужгес бадӟымъёсыз - Куӟебайлэн, Ашальчилэн сю аръем юбилейёссы. Республикамылэн палэназ но кыдёке шуккиськиз соослэн куаразы - Башкортостанэ, Татарстанэ, Пермь, Киров улосъёсы. Но, жаляса верано, тужгес бадӟымъёсыз ӝытъёс, Ижевскын но Москваын, шулдыръяськон-чеберъяськон луизы пӧртэм чиновникъёс, политика котырын бергасьёс понна - писательёс татчы ӧжытэз сюризы. Шуген ке но, синпелетъёсъя уж мунэ. В.Садовниковез, Ф.Васильевез буре ваён пулъёс (мемориал доскаос) усьтэмын, М.Коноваловлы, Т.Архиповлы памятникъёс, К.Гердлы стела ӝутэмын. Али дасяське Г.Ходыревлы, И.Гавриловлы. Юнмало, шуыны луэ, финн-угор эшъёсынымы кусыпъёс. Асьме писательёс пыриськизы Венгриын, Финляндиын, Эстониын но Сыктывкарын ортчем ӧтчамъёсы. Финн-угор писательёслэн ассоциацизылэн Удмуртиысь ёзэзлы кивалтӥсе быръемын Виктор Шибанов. Уг вунэто асьмеды Чувашиысь эшъёсмы но. Писательёсмес трос печатлало асьсэ кылын, дано нимъёссэс но сётыны уг жаляло. Чувашиысь культура удысысь дано ужась (деятель) луизы В.Ванюшев, В.Ар-Серги. Нош асьме ласянь - Мишши Юхма но Роза Петрова. Юхмалы сётэмын на Герд нимо национальной премия. Соос ласянь премиен пусъемын Василий Ванюшев. Удмуртиысь гожъяськисьёслы но тросэз культура удысын дано ужась дорозь вуизы ни. Берло дыре Россилэн нимыныз тазьы данъямын Генрих Перевощиков, Егор Загребин но Вениамин Ившин. "Знак Почета" орден сётэмын Петр Поздеевлы, Эшъяськон орден - Зоя Богомоловалы (азьвылгес - Фома Ермаковлы). Нош Удмурт Республикалэн Кун премиез берло дыре, кылем аре, палэнэтӥ ортчиз. Сое сётыны луысал ни, пусйизы куд-огез съездын, Валерий Болтышевлы ("Тихий дол" книгаез понна). 30-тӥ аръёсы репрессия улын быремъёсыз ӝутэмез, "Ӵашъем нимъёс" книгаеныз пыдло ватэм сӥосыз бугыртэмез понна таӵе премиен пусйыны кулэ вылэм Александр Шкляевез но (оло, эшшо кинэ ке). Асьмелэн одӥг гинэ кылиз Удмуртиысь калык кылбурчимы - Олег Поскребышев. Таӵе ним озьы ик кемалась куриське ни Можгалан улӥсь кылбурчи Александр Белоногов вӧзы. Солэсь кылбуръёссэ вожмаськыса кырӟанлы куто крезьгурчиосмы. Зэм, ортчем дыр куспын гожъясьёсмы писательёслэн радазы котькулэсь трос кутэмын вал. Куд-огез шыпытак, шуак шедизы отчы, кудӥзлэсь али но ымнырзэс ум тодмаське на. Нош шуныт кылэз ӧз шӧдэ на, дыр, быдэн одӥг ке но прозаен книгаоссэс поттэм гожъяськисьёсмы: Николай Никифоров, Константин Емельянов, Геннадий Мадьяров, Алексей Веретенников... Палэнысь гуртъёсын уло шуыса, уг луы шат соосыз.огазе огпол ке но люканы, чашка чаен ке но куноятыны? Озьы ик ёросъёсысь нылкышно кылбурчиосмес. Ас выжыосыныз тунсыкъяськыса, дыр, съездын пукиз Краснодар палась вуэм егит писатель, фантастикая книгаослэн авторзы Леонид Кудрявцев (атаезъя удмурт). Но малы ке соин тодматыны вунэтӥзы. Будо егит пушъетъёсмы. Нырысетӥ книгаоссэс поттӥзы - куд-огез беромыса ке но - Любовь Тихонова, Ольга Ведрова, Лидия Нянькина, Римма Игнатьева, Надежда Лопатина, Лия Малых, Рафит Мин, Георгий Грязев, Александр Лаптев, Илья Байметов но мукетъёсыз. Мукет кун издательствоосын ӵошатыса, книга поттонмы но ӧз куашка на (берло аре печатлам авторъёслэн лыдзы кык пол кулэсмиз ке но). Зэмзэ, книга потэ ке - потэ: чебер, чилясь выло, вольыт, юг-тӧдьы бумагаен, киысь куштэм уг поты. Кызьы уд шумпоты Куӟебай Гердлэн, Ашальчи Окилэн книгаоссы но соослы сӥзем альбомъёс понна. Писательёслэн правленизы сюлмаськемен, эшшо витезлэн авторъёслэн книгаоссы югыт дуннеез адӟизы на. Вераны кулэ, таиз съезд ӧз усьты литературамылэсь азинскон ӧръёссэ-визылъёссэ. Докладын но со ӧз шӧдӥськы. Нимысьтыз пусъемын вал куд-ог произведениос. Кылсярысь, калыкмылэсь ортчем сюрессэ возьматон борды кышкатэк басьтӥськизы егит гожъясьёсмы Петр Захаров, Вячеслав Ар-Серги, Иники Вольӧг (Николай Бехматов), "сюрес усьтӥз" Анатолий Леонтьев но. Исторической тема бордын ужа Егор Загребин. Со дыре ик уг азинскы фантастика, ӧжыт тодэ ваёнъёсын (мемуарной) литература (таиз ласянь берло дыре бадӟым уженыз - "Пинал дыр кырӟанъёс" - висъяськиз Петр Чернов). Ас адӟонъёсынызы сюлэмез чепыльтӥсь книгаос гожтӥзы Евгений Афонин ("Йырмурт") но Августа Конюхова ("Шудтэм шуд"). Туала улонлэсь тулкымъёссэ "гыро" Генрих Перевощиков, Павел Куляшов, Никвлад Самсонов, Вячеслав Ар-Серги, Лидия Нянькина но мукетъёсыз. Туала гожъясьёсмы ӵем дыръхя зэмлыкозэ герӟало осконтэменыз, "уйбыртонъёсын". Сыӵе утчаськон сюрес ӟеч емышъёссэ сётэ ни. Шӧдӥське со поэзиын но. Дышем ӧрлэсь кожысагес мыно Вячеслав Ар-Серги, Эрик Батуев, Рафит Мин. Ас тусбуйзэс тучало этнофутуристъёс но. Ӟуч поэзиын шуак усьтӥськиз Владимир Фролов, будӥз Владимир Тяптин, Глазовысь поэтъёс зол тыршо. Критика трослы бере кыле, уг синйылты гожъямъёсыз. Но оскон вань, Удмурт университетын туала будӥсь кужым ассэ шӧдытоз шуыса: студентъёс трос полэс бугыръяса, сӥсъяса возё литературамес - со адӟиське курсовой, дипломной ужъёсысь, - куд-огез печатласько ни журналъёсын но. Правленилэн тӧроезлэсь докладзэ кылзэм бере, пӧртэм мылкыдъёс бугыръяськизы. Кудӥз капчияк веразы ас малпанъёссэс, ӵектонъёссэс, кудӥз вуж правление вылэ омырскылӥзы но. Сотэк но пӧсь омыр уката ӟырдаз. Вылысьтыз вылаз юанъёс... Кыӵе адске писатель калык пӧлын? Адске-а со? Кыӵе солэн йӧнэз-данэз? Малы уг шӧдӥськы писательёслэн ӟырдыт куаразы газетын, уг чузъяськы радио, телевидение пыр? Малы соос уг пырисько удмурт движение, калыкез огазеян-ӝутон уже? (Татын вераны кулэ: пырисько, но одӥгъёсыз ик: П.Чернов, В.Ванюшев, К.Ломагин, Г.Романова...) Малы писательёслы туж ӧжыт тыриське гонорар? (П.Куляшов лыдъямъя, книгазэ гожъякуз, нуналлы уждунэз "кирень быж" тыр гинэ усем). Ку луоз писательёслэн улон но ужан условиоссы сярысь сюлмаськон? Куке сётозы на-а соослы квартираос? Кызьы бергаз Писательёслэн огазеяськонзылы правительствоен висъям уксё ар куспын, вить ар куспын? Кытчы но кызьы со кутэмын? (Та ласянь зол пыкылонъёс вал ревизионной комиссилы - Г.Ходырев но И.Данилов улонысь кошкем бере, кыл кутоно луиз Л.Кутяновалы.) Писательёслэн огазеяськоназы кылдэм югдурез умоятыны чакласа кутэмын резолюция. Берлогес вал быръёнъёс. Лушкем сётэм куараосты лыдъяса тодмо луиз: выль тӧрое - Егор Егорович Загребин, 27 мурт со пала кариськем. Генрих Ксенофонтович Перевощиков 16 куара люкам. Ачиз шуэмъя, со ассэ дэмламзылэсь ӧз куштӥськы, быръёнъёс "шулдыргес" мед ортчозы шуыса. Со сяна, туж потэ вал ог-огед куспын сьӧсь кадь вожомонэз дугдытэмез. Писательёслэн огазеяськонзылэн правлениез чылкак ужатэк ӧз пукы. Луэ шат, воксё югытсэ адӟытэк, сьӧдмаса-погмаса гинэ куштыны? *** 27-тӥ июне Писательёслэн огазеяськонзылэн выль правлениез кенешиз. Тӧролы воштӥсе быръемын Владимир Яковлевич (Никвлад) Самсонов. Правление пыремъёс Петр Чернов, Анатолий Демьянов, Анна Зуева, Вячеслав Ар-Серги, Сергей Матвеев, Виктор Чулков но Татьяна Чернова вераськизы валче тупаса ужаны: котькуд писатель сярысь сюлмаськон мед луоз, юрттоно книгаоссэс поттыны, улон интыоссэс умоятыны. Писательлэсь творческой мылкыдзэ возён понна - пӧртэм ужрадъёс. Т.Петрова. Удмуртиысь Писательёслэн огазеяськонзылэн выль тӧроез Егор Загребин. Съезд мыныку. Ижмех: Макаров пистолетлы но пӧйшуран пыӵаллы - 50 Ӟеч вуз басьтӥсьсэ шедьтэ Шаерамы, Россиын но дуннеысь уно кунъёсын Ижысь механической заводэз умой тодо. Солэн данэз герӟаськемын ӟеч продукция поттыны быгатэменыз. Пӧйшуран пыӵалъёссэ, пистолетъёссэ но музон тӥрлыксэ котькытын шумпотыса басьто. Ижмех - со дуннеысь одӥгез бадӟым пыӵал тӥрлыкпоттӥсь предприятие. Солэн изделиосыз мыно Россиысь, СНГ-ысь но дуннеысь рыноке. Предприятиое умой возе но ялан азинтэ Россиысь пыӵал поттӥсьёслэсь ӟеч ужъёссэс. Татын тыршо устоесь, бадӟым опытэн конструкторъёс, технологъёс, гравёръёс (пыӵалэз чеберъясьёс), дизайнеръёс но музон специалистъёс. Заводысь мастеръёс-кибашлыос, рыноклэсь туала лэчытэсь куронъёссэ лыдэ басьтыса, вис карытэк умоято продукцилэсь ӟечлыксэ, кылдытъяло но выльдо быдэс дуннеын ярамон пыӵалъёс но пистолетъёс. Соос висъясько чебер вылтусэнызы, ӟечлыкенызы но дунынызы. Завод котьку пыриське оружиез учконъя дуннеысь выставкаосы. Табере "Байкал" вузкарон нимез котькытын ӟеч тодо ни. Сое яркыт возьмато Россиысь но музон кунъёсысь вуэм данак тау каронъёс. Предприятие али дасяське бадӟым ужрадлы. Солэн Макаров пистолет но пӧйшуран пыӵал поттыны кутскемез дырысен ӝоген 50 ар тырмоз. Таин валче ик заводысь валтӥсь конструкторен Александр ДОРФЕН вераськонмы. Алигес соин пумиськылӥз "Удмурт дунне" газетлэн корреспондентэз Геннадий РОМАНОВ. - Александр Ушерович, пумен матэ вуэ бадӟым юбилейды. Соин валче кӧня ке вералэ вал заводлэн историез но ортчем сюресэз сярысь. - Ижысь механической завод кылдытэмын стрелковой оружие поттон вылысь СССР-ысь Обороная кун комитетлэн решениезъя 1942-тӥ арын 20-тӥ июле. Война вакытэ предприятие поттӥз Токаревлэсь пистолетъёссэ, наган револьверъёс, Дегтяревлэсь, Симоновлэсь противотанковой пулеметъёссэ но мукет ож тӥрлык. Завод, зэмзэ но, юн секыт война аръёсы вордскиз но трос ӟеч ож тӥрлык поттыны кулэ вал. Коллектив озьы ик лэсьтӥз, вань кужымзэ сётыса но луонлыкъёссэ кутыса, усто оружие дуриз. Соос пӧлын шӧдскымон инты басьтӥзы тодмо ПМ, АПС, ПСМ пистолетъёс но ракета комплексъёс. Война вакытэ трос стрелковой оружие поттэм опытмы коллективмылы юрттӥз уката ӟеч выль пистолет кылдытыны. Ӝыны даур талэсь азьло 1949-тӥ арын поттэмын Н.Ф.Макаровлэн конструкциезъя войскоосын эскеронъя нырысетӥ партия пистолетъёс. Собере 1953-тӥ арысен сое тросэн поттыны ӧдъям. Озьы со дырысен 5 миллион пала Макаров пистолет лэсьтэмын ни. Таӵе ож тӥрлык поттыны уно визьзэс, кужымзэс но быгатэмзэс сётӥзы заводысь конструкторъёс но технологъёс. Соин пистолетлэн данэз ӝог ӝутскиз но со эталон кадь луиз. Война бере заводын кылдытэмын дуннеын бадӟымез спортивной но пӧйшуран пыӵалъёс поттон. 1948-тӥ арын конвейерысь васькизы спортивной пистолетъёс, инъетэз басьтэмын вал М.В.Марголин конструкторлэн пистолетэз. Нош 1949-тӥ арын ӧдъям вольыт гумыен трос пӧйшуран пыӵалъёс поттыны. Со заводлы быдэс дуннеын дан ваиз: кутским кык модель бордысен - Казанский ЗК одӥг гумыен но Иж-49 кык гумыен пыӵал бичаны. Собере заводысь специалистъёс уно пумо пыӵалъёс кылдытъязы но выльёсыз бордын ужазы. Дуннеын нырысьсэ ми поточной амалэн пӧйшуран пыӵалъёс поттонэз радъям. Озьы пыӵалъёсмы кунгож сьӧрысь данак странаосы сюрес лёгизы. Соин ӵош ик номенклатуразэ чаляк паськытатӥм. Тани 1993-тӥ арын 30 пумо гражданской но служебной оружие поттӥм ке, вить ар ортчыса, солэсь лыдзэ 55-ёзь вуттӥм, нош туэ со 90 луоз ни. Озьы чебер пыӵал тӥрлык поттонъя нокин косытэк нимаз школа кылдӥз. Со яркыт адӟиське дуннеысь пыӵалъёсты возьматонъя выставкаосын. Отын Ижмехлы нокинэн ӵошатскыны: кызьы ке лыдызъя, озьы ик ӟечлыкезъя но трос пумо луэмезъя. - Ӝыны даур ӵоже кӧня бен таӵе тӥрлык поттэын ни? - Кин кызьы та шоры учкоз, но лыдпусъёс, зэм но бадӟымесь. Витьтон ар ӵоже тамында бичамын: одӥг гумыен 5,5 миллион пыӵалъёс; куара сётытэк ыбись (пневматической) 5 миллион винтовкаос но пистолетъёс; артысь кык гумыен 2,4 миллион пыӵалъёс; куара сётӥсь (сигнальной) но газовой 2 миллион пистолетъёс но револьверъёс; вылысьтыз вылаз кык гумыен 1,5 миллион пыӵалъёс; 300 сюрс спортивной пистолетъёс. Улон азинске. 1990-тӥ арысен заводын кутскиз продукциез чутрак выльдон. Малы ке шуоно, сотэк дуннеысь рыноке пырыны ӧй быгатысал. Со понна заводысь специалистъёс ваньзэ лэсьтӥзы, ӟеч ож тӥрлык, пыӵалъёс поттон вылысь. Нырысь ик, кылдытэмын вал выль классэн изделиос - газовой оружие, магазинэн вольыт гумы пыӵалъёс но служебной оружие. Кыкетӥез, лицензия басьтытэк выль законъёсъя вузаны лэзиськись оружие - спорт удыслы пневматической но сигнальной. Куинетӥез, трос пумо пӧйшуран пыӵалъёс. Тани мае пусъеме потэ на. Завод производстволэсь умой ӧрзэ шедьтӥз. Предприятилэн ож тӥрлыкез эскеронъя станцияз усто специалистъёс ужало. Соослэн юрттэмзыя Ижевскын кылдытэмын ож тӥрлыкъя центр. Со юрттэ уно вантьбурез шыръяны. Берло дыре умоя маркетинг. Тӥни соин ньыль арскын (1991-1995) гражданской оружие поттон но сое вузан 1,9 поллы йылӥз. Шӧдскымон кулэстӥм выль пумо изделие дасян но производствое пыртон дырез. 1994-тӥ арысен Россиысь таӵе предприятиос пӧлысь ми нырысьсэ асьме коже пыриським Нюрнбергысь ИВА международной оружейной выставкае. Нош 1996-тӥ арын гражданской но служебной оружиез выльдэмзы но умоятэмзы понна заводысь кӧня ке специалистъёс но производствоослэн кивалтӥсьёссы Россиысь Правительстволэн премиеныз пусъемын. Туэ США-ысь "Шот Шоу" дуннеысь бадӟым адӟытонын завод басьтӥз оружие поттӥсьёслэн но вузасьёслэн американской огазеяськонзылэсь дипломзэ. - Мар бен солы юрттэ? - Заводын кылдытэмын ӟеч ужан амалъёс но технологиос: туж усто, нокинлы тупасьтэм корт кисьтон; выль амалэн пыӵал гумыос лэсьтон; пыӵалъёслэсь пу люкетсэ лэсьтон но чеберъян, усто полуавтоматъёсын волятон. Тӥни ваньмыз со юрттэ дуннеысь рынокын мынӥсь продукция поттыны. Собере завод калыклы пыӵалъёс но пистолетъёс поттэмен ӵош, лэсьтэ на армилы но правоосты утись ёзъёслы стрелковой оружие. Кылсярысь, 1991-тӥ-1993-тӥ аръёсы предприятиын вуттэмын но поттыны кутскемын Е.Ф.Драгуновлэн пистолет-пулеметэз. Авторезъя ик солы ним сётэмын КЕДР (Конструкция Евгения Драгунова). Быдэсак выльдэмын Макаровлэн пистолетэз, али лэсьтӥсько 9һ9 миллиметръем ӵыжак выль пистолетъёс. 2000 ар кутскон азьын поттыны ӧдъялом, соос воштозы выжыкылэ пырем "Макаров" пистолетэз. Таосыз уката ӟечесь, юнэсь, чидасесь луозы. Кызь одӥгетӥ даурез Ижмех пумита стрелковой ож тӥрлык поттонъя дуннеын одӥгез бадӟым предприятие луыса. Продукцимы кошке данак странаосы. Со шумпотымон. Ми арлы быдэ 500 сюрс пӧртэм пумо пыӵалъёс поттӥськом. Со адӟем карымон кунгож сьӧрысь вань фирмаослы. - Александр Ушерович, пыӵалъёстэс кытчы тросгес вузаськоды? - Ми ваньзэ лэсьтӥськом, басьяськись аслыз сюлмаз ярамон пыӵал бырйыны мед быгатоз шуыса. Соин ик уно пумо пыӵалъёс бичаськом. Озьы ик нокытчы уд палэнты продукцилэсь ӟечлыксэ. Соин тросэз герӟаськемын. Тани пыӵалъёсмес басьто (асьсэос но трос оружие потто ке но - Г.Р.) Англия, США, Бельгия, Германия, Франция. Милям продукцимы озьы ик кошке Скандинавиысь, Востокысь но Африкаысь кунъёсы. Ваньзэ вераса, 50 странае вузкариськом, ӝыныез продукцимы отчы мынэ. Пыӵалъёсмылэн данзы юнме шорысь ӧз ӝутскы. Соос чебересь, юнэсь, дунтэмесьгес. США-ысь экспертъёс пыӵалъёсмылы вылӥ дунъет сёто. Ми вылӥ классэн пыӵалъёс но поттыны быгатӥськом. Нош кызьы ужало Голанд-Голанд, Перде но музон фирмаос. Соос араз 10 сыӵе пыӵал бичало но кузьмало корольёслы, президентъёслы, шейхъёслы. Сыӵе фирмаослэсь бере ум кылиське. Но соосын ӵошатыса, предприятимы туж егит ай. Озьы ке но, милям асьмелэн вань инструментальной производствомы, лэсьтӥськом кыӵе кулэ станокъёс, оснастка но инструментъёс. Ӵыжатӥськом андан, металлэз лазерен но обработать кариськом, кужмо литейной производстволы. Цехъёсмы ӟеч оборудованиен узырмытэмын. Куке-соку отын ож тӥрлык дурим, табере калыклы пыӵалъёс но спортивной оружие поттӥськом. Быдэс дуннеын милям кадь предприятиос ӧвӧл, ми вань фирмаосты ортчиськом трос предукция поттэменымы но ӟечлыкенымы. - Берлоез юанэ. Шутэтскыны дырды кыле на-а? Отпускады кытчы ветлӥськоды? - Канарысь шормучъёсы уг потаськы. 1995-тӥ арысен йӧскадь отпуск ӧй басьтылы на. Воложкаын пыжен уяны яратӥсько. Книга лыдӟисько, джаз музыка кельше. Дуннеын таӵе ож тӥрлык но пыӵалъёс поттӥсь предприятиос ӧвӧл. *** Ижмех ӝыны даур ӵоже 16,7 миллион пыӵалъёс, пистолетъёс но винтовкаос бичаз ни. *** Завод дуннеысь рынокын шӧдскымон инты басьтэ, 50 странаосын вузкаре но ӝыны продукциез отчы кошке. *** Предприятие арлы быдэ 500 сюрс пыӵалъёс поттэ. Выль улонэ вамыш Нош ик вуиз гужем. Покчиос понна - шулдыр вакыт, соос шудо-шутэтско, нош дышетскись но дышетскыны мылкыд карись егитъёс гижысь-пиньысь тыршо дышетыны но тодазы вайыны ар куспын люкам тодон-валанъёссэс, угось соослэн али самой секыт вакытсы - экзаменъёс. Мар вите соосты азьланьын? Тани мон туэ йылпумъяй Можга педучилищеез. Нош ваньмыз 120-лэсь ятыр мурт диплом басьтӥз. Дышетскон заведенимылэн директорез Николай Аркадьевич Пискунов верамъя, Можга ёросысь школаосын 7 муртлы гинэ ужан инты вань. Озьы бере, данакез егит специалистъёс быръем удысазы уз тырше. Покчи классъёсты дышетӥсь луэм сяна, училищеын соос мукет удысъёсъя но ватсаса тодон-валан люказы, кылсярысь ӟуч кылъя но литературая, математикая, кунсьӧр кылъёсъя, крезьгуръя, суреданъя, сценической искусствоя. Соин ик уже интыясько пӧртэм предприятиосы но организациосы, культура учреждениосы. Уноез эшъёсы дышетсконзэс азьланьтыны, вылӥ заведениосы пырыны чаклало. Бен, азьпалан - выль улон. Нош училище - отчы нуись сюрес. Угось татын ми уно визь-бур, тодон-валан люкам. Бадӟым тау карем потэ дышетӥсьёслэн коллективсылы, тужгес ик Алевтина Ивановна Шмыковалы, Елена Ивановна Шумиловалы, Татьяна Михайловна Ефимовалы. Е.ТРОФИМОВ. Можга ёрос. Газетчи но со вал... Геннадий Красильников улонэтӥ вамыштысал ни, 71 арессэ тырмытыса. Но солы 50 аресозь но улыны ӧз кылды... Писатель гожъяськон сюрессэ кутскиз журналистика бордысен Быдӟым ож бере. "Алнаш колхозникын" но, "Советской Удмуртиын" но ужаз. Со дырысен ӝыны даурлы азьпала вамыштӥз ни газет поттон удыс. Нош воштӥськиз-а мар ке, кыӵе ужпумъёс али пуктӥсько журналистъёс азе? Со сярысь вераськыны люкаськозы Г.Красильниковлэн ӵош ужам эшъёсыз но егит гожъясьёс. Пумиськон луоз ӵуказе, 7-тӥ пӧсьтолэзе, Г.Красильниковлэн музей-квартираяз таӵе адресъя: Ижевск, М.Горький урам, 45-18. Ӧтиськом вань мылкыд карисьёсты. Ӧс усьтэмын 10-ысен 14 часозь. М.БУЛДАКОВА. Удмурт Республикаысь улосвылын куштӥськем кортэз но буёло металлъёсты басьтон- октонъя, нуон-ваёнъя, пайдаё кутонъя, интыянъя эскерон ужез кужмоятонъя ватсаса ужрадъёс сярысь Удмурт Республикаысь Правительстволэн Постановлениез 1999 ар 24 май, Ижевск город. � 471. Шаерамы секыт югдур кылдэмын, сьӧд но буёло, музъемын шер пумиськылӥсь, радиациен пыӵам металлъёсты лушкан учыръёс йылэмен. Калык хозяйство бадӟым ыштонъёс адӟе, оборудованиос но машинаос ужан ӧрысь потэмен, электрокужым но шуныт сётӥсь ёзъёсты тӥямен но мукет со выллем учыръёсын сэрен. Йыружъёслэн йылэмзы герӟаськемын буёло металлъёслэн бадӟым дунъёсынызы. 1998 арын 1 январьысен 1999 арын 1 апрелёзь элькунын 786 йыруж шараямын, 4,7 миллион манет тыр изъян лэсьтэмын. Элькунысь предприятиос пӧлын тужгес но бадӟым ыштонъёс адӟо му вӧй, газ поттӥсьёс, ож тӥрлык лэсьтӥсьёс, связистъёс, транспортын, чугун сюрес вылын но ядерно- энергетической комплексын ужасьёс. Озьыен, таӵе югдур элькунысь экономикалы бадӟым кышкытлык кылдытэ. Пусйыны кулэ, асьме заводъёсын тросэн уже куто куштӥськем кортэз. Соин сэрен пумиськыло сое элькунлэн палэназ вузан учыръёс. 1997-1998 аръёсы гинэ Удмуртиыст келямын 5 сюрслэсь ятыр тонна буёло кортлэсь лэсьтэм арбериос. Предприятиосысь но организациосысь сьӧд но буёло кортэз, солэсь лэсьтэм арбериосты лушканэз, элькунлэн палэназ поттонэз алон вылысь но Россия Федерациысь Кивалтэтлэсь 1996 арын 26 феврале юнматэм "Котырысь инкуазез утён удысын куд-ог ужъёслы лицензия тупатон сярысь" 168 номеро положенизэ лыдэ басьтыса, Удмурт Элькун Кивалтэт пуктэ: 1. Удмурт Элькун улосвылын куштӥськем сьӧд но буёло кортэз басьтон-октонъя, нуон- ваёнъя, интыянъя, пайдаё кутонъя ужрадъёсын Радлык юнматоно. 2. Удмурт Элькунысь Югдурез утёнъя министерстволы Котырысь иинкузез утёнъя комитетэн ӵош толэзь ӵоже эскероно та ужен вырись вань предприятиослэсь но ужбергатӥсьёслэсь лицензиен тупатэм куронъёсты, озьы ик та постановлениен но Радлыкен юнматэм ужрадъёсты быдэсъямзэс. 3. Удмурт Элькунысь Югдурез утёнъя министерстволы радъяно элькун улосвылын сьӧд но буёло металлъёсты но солэсь лэсьтэм арбериосты басьтон-октонъя, нуон-ваёнъя, интыянъя, пайдаё кутонъя ужрадъёсын Радлыкез ялан эскерыса возёнэз: сьӧд но буёло металлъёсты калыклэсь октон интыосын, телефон кабельёсын, транспортын, связьын, лэсьтӥськонын кутӥськись арбериосты лушкась, вузась муртъёсты тодон-шедьтон понна; куштӥськем кортэз октӥсь-басьтӥсь нимаз адямиосты но ужбергатӥсьёсты; ГАИ-ысь постъя службалы ралъяно куштӥськем кортэз элькунлэн палэназ нуись автотранспортэз эскеронэз. 4. Удмурт Элькунысь городъёслэн но ёросъёслэн администрациосцслэн тӧрооссылы дэмлано Югдурез утёнъя министерствоен, Котырысь инкуазез утёнъя комитетэн ӵош радъяны ас улосвылъёсысьтызы сьӧд но буёло кортэз октон интыосты эскерыса возёнэз, нимаз адямиослэсь но ужбергатӥсьёслэсь нормаосты но правилоосты чакласа ужамзэс. Тупатэм радлыкез тӥяса ужась организациосты но нимаз адямиосты кыл кутытоно Россия Федерацилэн но Удмурт Элькунлэн законъёссыя. 5. Удмурт Элькун улосвылын интыяськем Горький чугун сюреслэн Ижевскысь ёзэз, Горький чугун сюреслэн Киров ёзэзлэн но Свердловск чугун сюреслэн Пермь ёзэзлэн станциоссы, "Удмуртавтотранск" ТПО, граждан авиацилэн Урал управлениезлэн Ижевскысь огазеям авиаотрядэз, Сарапулысь но Камбаркаысь портъёс, элькун улосвылысь пристаньёс куштӥськем кортэз шаермылэн палэназ поттыны лэзё, сое келясьёслэн вань ке Удмурт Элькунысь Инкуазез утёнъя комитетын пусъем Федеральной лицензизы. 6. Удмурт Элькунысь предприятиослэн но организациослэн кивалтӥсьёссы куштӥськем кортэз но буёло металлъёсты юридической но нимаз адямиослы вузаны быгато, соослэн вань ке сьӧд но буёло кортэз нуыны-вайыны, октыны, иинтыяны лэзись нимысьтыз лицензизы. 7. иворъёсты вӧлмытӥсь ёзъёсын печатланы лэзёно сьӧд но буёло кортэз басьтон- октон сярысь ялонъёссэс сыӵе предприятиослэсь, организациослэсь но нимаз адямиослэсь гинэ, кудъёсызлэн вань Россия Федерациысь Инкуазез утёнъя кун комитетэн яке улосвылысь ёзэн - Удмурт Элькунысь Инкуазез утёнъя комитетэн сётэм лицензизы. 8. Кужымзэ ыштэмен лыдъяно Удмурт Элькун Кивалтэтлэсь 1998 арын 21 январе юнматэм "Куштӥськем сьӧд но буёло металлъёсты басьтон-октонъя, нуон-ваёнъя, интыянъя, пайдаё кутонъя эскеронэз кужмоятон сярысь" 35 номеро постановленизэ. 9. Та постановленилэсь быдэсъяськемзэ эскерыны косоно Удмурт Элькунысь Инкуазь узырлыкъёсъя но Инкуазез утёнъя министерствоез. 10. Постановление кужыме пыре, сое печатлам дырысен 15 нунал ортчыса. Удмурт Элькун Кивалтэтлэн Тӧроез Н. А. Ганза. Люкасько инженеръёс Туэ октябрь толэзе Москваын Россиысь инженеръёслэн съездзы ортчоз. Сыӵе кичӧлтонэн потӥз Россиысь инженерной академия. Сое умоен лыдъязы наукая куд-ог организациос, бадӟымесь промышленной улосвылъёслэн кивалтӥсьёссы. Та вакытэ съездъёс ортчо интыосын. Удмуртиысь инженеръёс люкасько 7-9 июле Ижысь "Аксион" культура двореце. Ужрадын паськыт вераськон мыноз шаерысьтымы промышленной предприятиосты шуг-секытысь поттон, производствоез улӟытон но паськытатон, та уже научно-инженерной кужымез кыскон но мукет ужпумъёс пумысен. Съездлэн ужаз пыриськозы республикалэн, предприятиослэн но организациослэн кивалтӥсьёссы, инженеръёс (тодосчиос но ваньбур поттонын ужасьёс), куноос. Татын ик быръемын луозы Россиысь инженеръёслэн съездазы делегатъёс. Ю.МИХАЙЛОВА. Журналистъёсын пумиськонёс Дунъёсты думыса уд возьы Туннэ котькуд адямиез сюлэмшугъяськытэ нуналлы быдэ дунъёслэн вошъяськемзы, тужгес но сиён-юонъёслы. Ӵапак со сярысь вераськон мынӥз Правительствоын журналистъёслэн пумиськоназы Тарифъёсъя но дунъёсъя кун комитетлэн тӧроеныз Олег БЕЛОБОКОВЕН. Та нуналъёсы Удмурт Правительство постановление кутӥз шаерамы калык вузъёслы дунъёсты радъянэ государстволэн пыриськонэз пумысен. Вераськон мынэ, та продуктъёсты поттыку, пайда басьтонъя лыдпус тупатон сярысь. Кылсярысь, нянь но нянь изделиослы предприятиос 30 процентлэсь уно пайда (рентабельность) басьтыны уг быгато, нош йӧл но йӧл сиён поттӥсьёс но пызь изӥсьёс - 10 процент гинэ. Со сяна, калыклы сиён-юон поттӥсь предприятиослы вузкарон ватсэтъёс (надбавка) тупатэмын: няньлы но булкаослы - 30, нош йӧллы но солэсь сиёнъёслы - 27 процент. Отчы мороженой уг пыры. Тӥни соин валче Тарифъёсъя но дунъёсъя кун комитет азьын ужпум сылэ дунъёсты радъянъя амалъёс кылдытон ласянь. Со герӟаськемын кин кызьы, ас мылкыд каремезъя дунъёс тупатонэн. Азьланьын со озьы уз луы. Кыкетӥез, переработчикъёс пайдазэс висъяны-люкыны кулэ сырьё сётӥсьёслы, кылсярысь, йӧл заводъёс гурт хозяйствоослы. Озьы ик лэсьтыны кулэ нянь комбинатъёс но элеваторъёс. Правительстволэн та решениез чик но уг вера, розничной дунъёс будыны кулэ шуыса. Бускельёсмы кемалась тазьы ужало ни. Мукетыз ужрад потэ вузкарон ватсэтъёслы лыдпус тупатонэн. Солэсь вылэ нокин тэтчыны уг быгаты. Кин со куронэз тӥялоз, со законъя кыл кутоз. Тани пачкатэм газлы огкадь дун юнматэмын вал. Со умойтэмен берытскиз, бускельёсмы дорамы дунтэмгес "чагыр эстӥськон" вузаны ӧдъязы. Али ваньмызлы газ хозяйствоослы ("Ижевскгаз", "Удмуртгаз") огкадь бадӟымгес дун тупатэмын, но табере соос дунтэмгес сое вузаны быгато. Одӥг июльысен дун будӥз городъёсын автобусэн но электротранспортэн ветлэм понна. Табере 1,5 манет луиз. Урал улосвылын асьмеос гинэ, пе, дунтэм ветлӥм, котькытын 1,5-2 манет тупатэмын вал ни. Самой трос тыро Оренбургын - кык манет. Городъёсы но город котырысь гуртъёсы но сад-бакчаосы ветлӥсь автотранспортлы 1 иськем сюресэз ортчем понна дун тупатэмын. Сое ваньмыз быдэсъялоз, шуом, "Удмуртавтотранс" но, "Сапсан" но. Озьы вань автотранспортной предприятиослы огкадесь ужан условиос кылдытӥсько. Электрокужымъя но югдур умой ӧвӧл. Соин ик 1 июньысен 1 киловатт электрокужымлы тариф воштэмын, 13 копейка интые 17 копейка каремын. Но со сӥзьыл нош ик йылыны быгатоз. Алигес Москваын эстӥськон но бензин поттӥсь 53 предприятиос-монополистъёс люкаськылӥзы-кенешизы. Соос, дунъёсты будэтонтэм вылысь, тупанкыл гожтӥзы. Со понна Россиын но Удмуртиын оперативной штаб кылдытэмын. Асьмеос РФ-ысь Эстӥськонъя но энергетикая министерствое дунъёс но тарифъёс сярысь толэзьлы быдэ ивортылыны кулэ. Валамон, быдэс странаын югдур уродмемен, дунъёсты возьыны юн секыт луэ. Соин ик переработчикъёс но пищевикъёс огазеяськон кылдытӥзы. Отысь адямиез комитетлэн коллегияз пыртыны чакламын. Али ваньмыз азьын одӥг ужпум сылэ: рынокын медаз кулэсме сиён-юонъёс но соос палэнэ медаз кошке. Со туж кулэез. Телефонъя, электросвязья услугаослы тарифъёсты будэтэм пумысен Олег Михайлович номыр вераны ӧз быгаты. Сое, пе, бергатэ Москва, асьмеос отчы пыриськыны ум быгатӥське. Озьы ке но, Удмурт Правительство Москваысь вылӥ ёзъёслы вазиськиз, связьлы дунъёсты воштыку, интыосын кенешыны. Ведь тарифъёсты но дунъёсты вошъяку, одно ик учконо предприятилэсь ужаны быгатонлыкъёссэ. Сое нокин кужмысь куашкатыны уг выры. Нош мукет ласянь, калыкез но утёно, солэн улонэз ялан медаз уродмы. Соин ик нуналмысь кулэ луись вузъёслы дунъёсты будэтыны уз лэзе. Отчы пыро нянь но йӧл. Комитет азьын сыӵе ужпум сылэ. Г.Романов. Ужбергатӥсьёсын пумиськон Кызьы тодмо, июль толэзьлэн нырысетӥ нуналъёсаз ужбергатӥсьёслэсь выт басьтон сярысь федеральной законэз Удмурт Республикалэн улосвылаз улонэ пыӵатонлы шаерысьтымы уноез ужбергатӥсьёс пумит луэмзэс веразы. 2-тӥ июле Правительстволэн Тӧроез Николай Ганза, солэн воштӥсез Сергей Чикуров, Ижевск городлэн мэрез Анатолий Салтыков но Правительстволэн Аппаратэзлэн кивалтӥсез Александр Горяинов пумиськизы ужбергатӥсьёсын но соослэн профсоюззылэн кивалтӥсьёсыныз. Кенешем бере чакламын кылдытыны тупан (согласительной) комиссия. Кык арня куспын со шуг-секытысь потон амалъёсты утчаны кулэ. Та дыр ӵоже ужбергатӥсьёс та учырлы тупась документъёс дасяны но сётыны кулэ выт бичанъя службае. Со бӧрьсы малпамын Кун Кенешлэсь азьвыл чакламтэ сессизэ ортчытыны. Отын выльысь эскеремын луыны кулэ ужбергатӥсьёслэн огъя барыш поттэмзылы сӥзем ужпумъёс. Правительство кыл сётэ вузкарон инты понна дунлэсь быдӟалазэ выльысь эскерыны. Озьы ик, юн чакласа возиськоз вузкарон интыосысь югдур. Кык арня ортчыса, комиссилэн ужамезлы куд-ог йылпумъянъёс лэсьтэмын луозы. Удмурт Республикаысь Правительстволэн пресс-центрез. Каникулъёс... "Шундыкар - 99" кык кечез уйыса, куиньзэ суто Пӧсь тылсиоссэ пазя шунды "Шундыкар" вылэ. Кырын чидантэм пӧсь ке но, шундыпиос но шундынылъёс корпусъёсын ватскыса уг пуко: кин юмша, кин шудэ, кин вуэн пазяське. Нош самой чеберъёсыз ӝытозь ортчоно "Чеберина"-лы даясько, йӧспӧртэм костюмъёс дасяло, йырсиоссэс пӧртмало. Газетмылэн валтӥсь редакторез вуэмен, соос огазе люкаськизы. Алексей Петрович ачиз мылкыд кариз пиналъёслы тунсыко лекция лыдӟыны. Сизьыметӥ арзэ таӵе смена радъя ни удмурт егитъёслэн "Шунды" дэменлыксы республикаысьтымы егитъёсын ужанъя кун комитетлэн юрттэмез улсын. Туэ но тани "Прометей" лагерьын 10 нунал ӵоже шутэтскозы но дышетскозы 145 пинал устоичос. Татчы сюрон понна, бадӟым конкурс пыр ортчоно луизы соос. Азьвыл аръёсы конкурсэ пыриськисьёс ӧжытгес ке вал, туэ куд-ог удысъёсъя одӥг интые 5 мурт но мылкыд карисез вал. Арлы быдэ "Шундыкарын" эстафетая, фолклоръя, керамикая, литературая, тележурналистикая, суредамъя. Отрядъёс ужало. Туэ вадьсаськиз на эшшо кык: "удмурт костюмен дизайнэз", но "азьветлӥсьёс". Та удысъёс лагерьын вывылесь бере, мыным соос тужгес но тынсыко потӥзы. Национальной костюмлэн аспӧртэмлыкъёсыныз тодматэ, сое выльдыны, туала модалы тупатыны дышетэ дизайнер Светлана Анатольевна Береснева. - Костюм кылдытэмын ни туж кемалась. Но сое ялан выльдыны кулэ. Со дыре ик чаклано, вашкала тодметъёссэ. Тани асьмелэн пересьёсмы туж ӟеч шӧдо-валало ке вылэм орнаментэз но колоритэз, туала егитъёс саклык висъяло фасонэзлы гинэ. Конкурсэ вуэм ужъёсын но тросаз ӧй вал вкусэз - пужыос чебер понна гинэ лэсьтэмын, тросэз соос синмаськымон яркыт. Нош вашкалаосмы котькуд пужылы, котькуд буёллы бадӟым саклык висъяллязы. Соослэн котькуд пужызы маке сярысь вералляз, мукетъёслы тодмотэмзэ усьтлӥз. Отрядэ шедем пиналъёс туж тунсыкоесь, тани туннэ "Чебериналы" соос асьсэос маке- маке йӧндыризы ни. Азьветлӥсь пиналъёсты нимаз люкаса азьветлыны дышетыны гшундыос кылем арын ик малпало ни вал. Туэ сыӵе луонлык кылдӥз. Дышетэ соосты "Шунды" дэменлыклэн тӧроез Т. В. Мазитова. - Татьяна Викторовна висъясько-а тӥляд отрядысьтыды пиналъёс мукетъёсызлэсь, таӵе семане сюрем пиналъёс ваньды сямен школаосазы азьветлӥсьёс ук? - Озьы но тросэз соос азинско ас быръем удыссыя гинэ. Нош милемлы азьланезлы азьветлӥсьёсты-кивалтӥсьёсты дасяны кулэ. Кӧня ке занятимы ӵоже, соос тодо ни кызьы школаязы дэменлыклэсь ёззэ кылдытыны, соин кивалтыны. Пиналъёслэн пӧртэм юанъёссы кылдыло. Асьсэлэн уженызы кивалтон удысын будэм сюресэнызы, азьветлӥсьлэн тунсыко улонэз сярысь мадизы ни пумиськонъёсамы П. Н. Вершинин, А. И, Гальцин, Н. Н. Мусалимов, Л. С. Христолюбова. Психотренинг ортчытӥз университетысь дышетӥсь И. М, Байметов. - Туж тунсыко, кыӵегес ёросъёсын будо тужшес но шаплы азьветлӥсьёс? - Конкурс пыр ортчыса, ортчдэ шедизы Шаркан, Алнаш, Кияса, Завьял ёросъёсысь пиналъёс. Куд-огезлэн, зэмзэ но шӧдӥське азьланяз кивалтӥсь луон мылкыдзы, тунсыкъясьуко туала югдурен, экономикаен. - Мылкыдзы вань-а пиналъёслэн гужем шорын дышетскыны? - Та смена со понна ик радъямын. Гуртысь пиналъёслэн та удысъёсъя ӟеч тодон-валан басьтыны школаосазы луонлыкъёссы ӧвӧл. Собере, жадьымон ум дышетӥське, занятиос луо нуназеозь гинэ. Нуназе бере пиналъёс шутэтско, шулдыръясько, пӧртэм ужрадъёс ортчытъяло. Син шоры йӧтӥз шундыпиослэн плназы. Лагерьын нунал туж аспӧртэм ортче, шӧдске. Нырысетӥ нуналаз соос Дунне писпу сярысь легендаен тодматскиллям. Та легендая дасям туэ Надежда Уткина сюжетно-ролевой шудон. Кыкетӥ нуналзы- льӧмпу нунал (Пушкин. Сяськаослэн балзы), собере - Тыпы нунал (батыръёслэн ӝытсы), Кызьпу нунал (Чеберина), Шупу нунал (серекъян нунал), Улмопу нунал (сюан, эктон), Сусыпу нунал (сьӧд кужымлэн нуналыз), Пужым нунал (финн-угор калыкъёслэн фестивальзы), Пипу нунал (тылобурдо ярминга), Беризь нунал (сменалы йылпумъянъёс) но Бадьпу нунал (бӧрдон-люкиськон). Но люкиськ ытозь кема ай. Али пиналъёс со сярысь уг малпало на. Ма собере тросэз вуоно гужем но лыктозы. Таин эстрада ортядысь Оля Рябинина но Ваня Марков куинетӥзэ лыктӥзы ни. Озьы ик пинал гожъяськисьёс Алёна Родионова, Маша Ишкова, Вероника Кириллова но мукетъёс. Усто специалистъёс сыӵе пиналъёсы лагерь бере син азязы возё. Тани Надежда Уткиналэн дышетскисез Таня Ишматова ачмиз артистка кадь ини. Туэ со лагерьын вожатой луыса ужа. Надежда Эдуардовна сярысь нимысьтыз вератэк нокызьы уг луы. Ӵапак солэн кичӧлтэмез улсын кылдытэмын вал таӵе сменалы программа. Одӥг мурт но солы ӧз пумитъяськы. Нош туэ синйылтӥзы ЮНЕСКО-ын но. Отысь "Дуннеысь культура" проектъя ужасьёс-эскерисьёс "Шундыкар" программаез туж пайдаен но устоен лыдъязы, та ужез азинтон понна Финляндиысь 10 сюрс финн марка ыстӥзы. Тӥни озьы шунды пыже но пыже. Синъёс амалтэк каньырско "Шундыкарысь" куазез эскерисьёслэн верамзыя ӝытпал зор-кот усьыны кулэ шуизы вал кадь. Э-э, ма со вуэм пазяськонзэс серекъяса озьы шуиллям ук! Нош ӵукнапал, пе, лагерьысь выж вылын лымы "кыллёз (пинь миськон паста, иське). Ох, шӧртчиос! Тодэ лыктӥз шудо пинал дыр. Али шутэтскыны гинэ кыле на. Тани ӝыт сиськемзы бере пиналъёс дискотекае мынозы, нош жадьытозязы эктэмзы бере, уйшорозь тылскем дурын сюлмысь вераськыса, гитара шудэм улсын кырӟаса пукозы... ... Малы меда мон пичи дыръя таӵе лагерьёс ӧй вал", - жаляса вераз бертыкумы кивалтӥсьмы но. З. РЯБИНИНА. Туспуктэмъёсыз В. КАМАШЕВЛЭН. Шутэтскон дыръя. Гурт улон Позимь сьӧрын Репортаж Маин меда ӵошатод та турнан вакытэз? Инкуазьлэн вань чеберез, шулдырез тымиськемын кадь али возь вылын, зыл-зыл бызись Позимь шур котырын. Лабрес бадьёсын, лулпуосын, льӧмпуосын сайям ӧретӥз вуоссэ со дыртытэк нуэ Иж пала. Гуч-гуч юыны мускытэз тырме вань улослы. Сотэк-а татысь возь вылъёсын сыръяса сылэ турнаны вуттымтэ турынэд, чильк-вальк кисьтаське, шудэ вылаз пуксем жаль-жаль лысвуэд. Но ӵукна шулдырез шӧдтэк шорысь вандыса кошке машина куара. Вуизы турнасьёс.Вжик! вжик! вазе Позимь кузя. Ӧжытак бергес возь вылэз тырмытӥзы мажсаськисьёс но турын ӝутӥсьёс. Быдэс гурт туннэ татын люкаськемын, вань семьяен ужасьёсыз но. Дырыз сыӵе уга: таӵе ӟырдыт вакытэ сюлмаськон котькудӥзлы тырме. Завьялово районысь "Путь Ильича" колхозлэн правлениез арлы быдэ пудо сиён дасянэ кыске вань калыкез. Тани туэ но специалистъёс но куд-ог музон удысъёсын ужасьёс понна тупатэмын норма - ужано 5 нунал. Палэнэ уг кыльы колхозлэн председателез но. Сотэк уг луы. Фермаысь пудолы макем трос но ӟеч турын, витамино пызь, силос дасялод, сокем умой уждун басьтод. Ватонэз ӧвӧл - хозяйство али коньдон "дуре" йӧл но сӥль вылын. Куазь пӧсьсэ кисьтэ но кисьтэ, ӵапак турын ӝутӥсьёсты жаляса кадь. - Пудо сиён туэ номыр ӧвӧл, дыраз гинэ утялтоно, - шуэ агроном Валерий Ашпалатов. - Татын 38 гектар возьёсмы. Валлян турнамзэ туннэ ӝутӥськом ни. Шунды шорын ӝог куасьме. Ваньмыз сямен ужъёс механизировать каремын. Соин ик кусо шуккисьёсты та нуналэ адӟыны ӧз кылды. Куажыртӥсь турынэз берыкъя Олег Князевлэн агрегатэз. Бӧрсяз чурен- чурен мыно мажсаськисьёс. Та кысык вакытэ колхозлы мылысь-кыдысь юртто Якшур школаын дышетскись нылъёс но пиос. Чупрес ужало Елена Воронцова, Татьяна Тимофеева, Анжела Андреева, кык Аняос: Игнатьева но Перевозчикова, Саша Тимофеев, Володя Ильин но мукетъёсыз. Вань турынэз - киземзэ но, возь вылын будӥсьсэ но - погырыса вуо кык механизаторъёс: Владимир Логинов но Павел Байкузин. Бервылзы ӵошкыт, вольыт кыле. Утялтэм турынэз, азьвыл аръёсы сямен, интыяз уг люкало. Соку ик вортто ферма доры, тыро зуродъёсы. Нунал ӵоже ваньмыз радызъя ке мынэ, татчы ог 70 тонна турын вуэ. Чупрес ужало шофёръёс Владимир Морозов, Василий Филимонов, Леонид Воронцов, Николай Дородов, Анатолий Бочкарев, Алексей Широбоков. Турынэз лач-лач зуродэ интыя Владимир Коротаев. Механизаторъёс бер ӝытозь ужало, 10-11 часозь, куд-ог дыръя уйшор котырозь но. Гуртоослэн мылкыдзы умой. Турнан вакытэ пӧсь ке но йӧтэ, араз со - одӥг ук! Колхозлэн правлениез но ужасьёсыз сярысь сюлмаське. Возь вылэ нуо-ваё автобусэн. Нуназе шорын сюдо пӧсь сиёнэн, пыжиськемъёсын. Та ласянь пусйыны куризы водителез Юрий Тимофеевез но поварез Алевтина Четкареваез. Столовойын дасям сиён-юонэз соос ӝегатскытэк возь вылэ вуттыны тыршо. Нош нуназеям бере, кызьы чидалод Позимьын пыласькытэк? Уката но пиос. Жомбыль потто соос юзмыт шурлэн кожаз, ӵуж-ӵуж пиштӥсь ву сяськаос пӧлын. Бере уг кылё нылъёс но. Шутэтскыса выль кужымен басьтӥсько мытэм ужзы борды. Та нуналэ вуылӥм Керемет бамын турын ӝутӥсьёс доры но. Нуназеяны дыр ке но вуэмын, тракторъёс куаш! поттыса ужало. Сиён вуттӥсь автобусэз адӟыса гинэ моторъёссэс кысӥзы. Кизем турынэз татын соку ик тюкъёсы бинялто. Син шорын бусы буша. Кык ӵыж выль ЛТЗ тракторъёс шунды шорын чильк-вальк пишто, асэнызы ушъяськыса кадь. - Туэ 4 таӵе трактор колхоз басьтӥз, одӥг - МТЗ, - шумпотонзэс уг вато егит механизаторъё Владимир Баймачев но Василий Ашпалатов. - Туннэ татын нырысетӥ нуналзэ ужаськом, эскериськом выль техникамес но. Куд-огезлэн кабинаяз пуктэмын магнитофон. Кылзы ӟеч музыка, пумен ужа. Усто! Бригадазы бадӟым ӧвӧл, нош турын люкаське. Таизэ участокез йылпумъяса выжозы мукетаз. Арня ӵоже 300 тонналэсь ятыр кӧс турын ферма доры вуиз. Изэмын 20 тонналэсь ятыр витамино пызь. Ӝоген кутскоз гуосы силос тырон. Куазез эскерисьёс верамъя, июль пӧсь но кӧс сылоз, турын ӝутыны уз люкеты. Нош мукет ласянь, пӧсь пень кадь ӟырдам луоё музъем чидатэк вите ни жаль-жаль зорез. Ӝытлань Позимь палтӥ нуналлы быдэ сямен сьӧд пилемъёс люкасько ке но, одӥг-кык пол гудыртыса, палэнтӥ кошко. Турнасьёсты жаляло, дыр. Людмила Медведева, Владимир Камашев (фото) Позимь шур сьӧрысь возьёсын турын туэ удалтӥз. Уж дурын сиён ческыт кошке. "02" ивортэ Пунэмзэ берыктӥз Ортчем толэзьлэн берпуметӥ нуналъёсаз милициын ужасьёслы трос гинэ пӧсяно луиз. 68 йыруж лэсьтэмын, со пӧлысь 59-эз шараямын. Урамъёсын ӝегатэмын 531 юэм мурт, 267-ез сазьтӥськонние вуттэмын. Со сяна, милициын ужасьёс 65 пол потазы семья кусыпъёсты тупатыны. Сюрес вылын 9 шудтэм учыр вал, одӥг мурт бырыны шедиз, нош 9-эз сӧсырмиз. Йылэ нуназе куазен лушкаськисьёслэн лыдзы. Озьы Ижевскысь Ленин ёросысь ужбергатӥсь доры ӵукна ик, 7 часын, ӧтьымтэ "куноос" пыризы. Корка кузёез пуртэн но пистолетлы укшась макеен кышкатыса, 2,4 сюрс манетсэ, Иж-306 магнитофонзэ, телефонзэ, видеокассетаоссэ но дуно дӥсьёссэ таласа пегӟизы. Ужбергатӥсь но пунэмзэ берыктӥз. Лушкаськисьёсты кияз Иж-12 пыӵалэн уйыса сутӥз но таламзэс сётыны косӥз. Соос талы пумит луизы. Соку ужбергатӥсь одӥгзэ, Чайковскийысь 28 аресъем Толяез, ыбоно луиз. Сӧсыр муртэ эшез кема нуыны ӧз чида, сое огназэ кельтӥз но ачиз пегӟиз. Али лушкиськисез милициын ужасьёс утчало, нош вӧсь луыны шедем эшез больницаын, лушкам тӥрлык берыктэмын. Правоез утисьёс озьы ик талазы на ужбергатӥсьлэсь пыӵалзэ. Чаклаське, суредам коньдон! Июнь толэзе шаерамы вӧлмыны ӧдъязы 500 манетъем суредам коньдонъёс. Соос шараямын Вотка но Можга городъёсын. Пусйыны кулэ, Воткинскын суредам манетъёслэн ваньмызлэн одӥг кадь серизы но номерзы - ЧА-6135811. Зэмос манетэн ӵошатыса, пӧяса лэсьтэм коньдон пеймытгес но вольыт, куасалляськись интыетӥз буёлэз быре, вылӥысьтыз паллян палысьтыз кунпуслэн (герблэн) буёлэз уг вошъяськы. Можга городысь пӧяса лэсьтэм коньдонлэн номерез но сериез пӧртэмесь: ГЗ-6823877, ЗГ-8632372, ЗГ-6323782, ЗГ-7328836 но ГЕ-7328836. Таяз учыре "кескичъёс" уже кутӥллям буёло принтерез. Озьы ке но, сульдэрам коньдон зэмос манетлэсь зол гинэ висъяське. Кагазэз небыт, буёлэз вуэ шедьыса бездэ, ӧвӧл "Россиысь Банклэн билетэз" гожтэмлэн гожъёсыз (рельефез). Удмуртиысь МВД-ын ужасьёс ваньдэсты сак кариськыны куро. Пӧяса лэсьтэм коньдон вӧлмытӥсез ӝегатыны тырше яке ӟеч-ӟеч тусбуйзэ учкыса, милицие ивортэ. Сыӵе адямиос законъя кыл кутыны кулэ. Россия Федерациысь Уголовной Кодекслэн 186-тӥ ёзэтэзъя (статья) таӵе йыруж понна 15 арозь пытсэт сьӧры шедьыны быгатозы. Нош кин тодэ кыӵе ке ивор коньдон суредасьёс сярысь, ивортыны луэ таӵе телефонъёсъя: 55-77-29 яке 02. Продается мука в/с, 1 с, 2 с, ржаная обдирная или меняется на картофель и др. овощи. Закупаем картофель и овощи. Возможна доставка. Тел. 71-42-22. Товар сертифицирован. Ижмех: устоосыз пӧлысь устоез Сизьгуртысь конструктор Виталий ВОТЯКОВ - Ижысь механической заводысь валтӥсь конструктор. Со татын гинэ ӧвӧл, элькунамы но, Россиысь та удысысь предприятиосын но тодмо адями. Данэз герӟаськемын ӟеч пыӵалъёс кылдытыны быгатэменыз. Солэсь изделиоссэ шумпотыса басьто кунгож сьӧрын но. Виталий Петровичлэн 31 рационализаторской ӵектонэз но 7 изобретениез уже кутэмын. Ваньмыз со заводлы 240 сюрс манет тыр пайда ваиз. Пыӵал гумылэн юнлыкез сярысь ужез печатламын научной журналын. Тыршемез пусъемын СССР-ысь ВДНХ-лэн 2 азвесь но бронза медаленыз, нош алигес - Россиысь Правительстволэн премиеныз. Солы 8 пол сётэмын предприятиысь устоез кичӧлтӥсь (новатор), дано рационализатор, Удмуртиысь дано изобретатель но устоез рационализатор ним. Али Виталий Вотяков тросэн поттыны дася выль МР-151 самозарядной пыӵал. Таӵеез быдэс дуннеын ӧвӧл на. Со Россиын дано конструктор луыны быгатэ ни. Сизьгуртъёс ноку ӧз малпаллялэ, дыр, куд-огез нош, оло, али но уг тоды, соослэн будэтэм пизы Удмуртиын, Россиын но дуннеын тодмо конструктор луоз шуыса. Виталий умой дышетскиз, шор ёзо школаез но, институэз но одӥг "ньылен" быдтӥз. Нош конструктор луон сюресэз тунсыко кутскиз. Саша Калугин эшеныз Ижысь механической институтлэн приборостроительной факультетаз экзаменъёс сётӥзы, радиоконструктор луыны малпало вал, но баллзы ӧз тырмы. Татчы ӧз кутэ, ӵектӥзы машиностроительной факультетэ пырыны. Гуртысь пиос соглаш луизы. Но соку студентъёслы ӝыт люкетын дышетскисьёслы сямен производствоын ужано вал. Озьы Виталий 1963-тӥ арын Ижысь механической заводэ вуиз. 18 аресъем удмурт пияш 1,5 ар слесарь-фрезеровщик луыса ужаз но, дышетскиз но. - Эшеным ӵош диплом практикае но татчы ик ыстӥзы, - тодаз вае Виталий Петрович. - Но солэсь азьло ми Машзаводэ практикае ветлӥм. Отын кабзэ ӧз кельшы. Нош татын кылын верантэм зол яраз завод шорысь шулдыр улмо сад. Диплом практикаысен ик кык эшъёсты 58 номеро цехе уже кутӥзы. Со вал 1968 арын. Ӵапак Виталий Вотяков заводысь валтӥсь конструкторлэн отделаз вуиз. Нырысь вал огшоры инженер-конструктор, собере ИИИ, ИИ но И категория басьтыса кивалтӥз конструкторской бюроен, ужаз заводысь валтӥсь конструкторлэн воштӥсез луыса. Али валтӥсь конструктор луэ но выль изделиос кылдытонъя группаен кивалтэ. Ортчемзэ верано ке, егит инженер-конструктор заводэ лыктӥз ӵапак пӧсь вакытэ - кык гумыен Иж-27 выль пыӵал лэсьтон дыре. Соку та пыӵалэз тросэн поттыны дасяло вал. Та бордын ужазы конструкторъёс Анатолий Климов (кулэмын ни), Николай Репин но Герман Протопопов. Самой татын, пыӵалэз производствое лэзёнын, Виталий Вотяков ассэ возьматӥз, кылдытӥз ЕСКД (конструкторской документацияя огъя амалъёс). Азьло со котькудӥзлэн пӧртэм но туж уно солань-талань кысканъёс, бызьылонъёс но дыр быдтонъёс вал. Табере ваньмыз огшоры луиз, интыяз пуксиз. Тӥни озьы 1972-тӥ арын Иж-27 пыӵал конвейере пыриз. Со дырысен 27 ар ортчиз ни, нош со али но потэ, уг вужмы, самой усто конструкциез луиз: вылысьтыз вылаз (вертикальной) гумыен. Асьме дорын но, кунгож сьӧрын но сое яратыса басьто. Выль пыӵаллэн авторъёсыз - Климов, Репин но Протопопов. Виталий Вотяков но та пыӵаллы уно кужымзэ, визьзэ но быгатэмзэ сётӥз. Котькуд изделилэн, пе, кыӵе ке но ляб интыез, шекез кыле, шуэ конструктор. Соин ик Виталий Петрович но Герман Протопопов сое шедьтӥзы, эжекторной механизмзэ 1975-тӥ арын выльдӥзы. Озьы пыӵал эшшо умойгес, юн чидась луиз. Тӥни та вал конструкторлэн Вотяковлэн нырысетӥ изобретениез. Собере ватсаськизы мукетъёсыз но, со лыдпус сизьымозь вуиз, нош рационализаторской ӵектонъёсыз 30-лэсь ортчемын. Сизьымдонэтӥ аръёсы лэчыт ужпум сылэ вал пыӵалъёслы ӟечлыкъя кун пус (знак) басьтонъя. Конструкторъёс, технологъёс но Виталий Вотяков со бордын дырзэс, кужымзэс жалятэк ужазы но та ужпумез умой быдэстӥзы. Али вань пыӵалъёс кун пусэн гинэ пото. Соку Виталий Петрович трос ветлӥз командировкаосы (Тулае, Климовске). 1990-тӥ арын Виталий Вотяковлы оско выль пӧйшуран пыӵалъёс кылдытонъя группаез. Озьы 1992-тӥ-1995-тӥ аръёсы вордске Иж-81 выль пыӵал. Со помповой, зарадаське солань-талань кыскаса (азьлоосыз ӵогыса-тӥяса кадь лэсьтӥсько). Таӵе пыӵал уно пӧйшурасьёслы кельше. Трос басьтэ Алжир, ӝоген партия келялозы Германие, США-ысь но курон вань. Конверсия конструкторъёс, технологъёс азе уката бадӟымесь куронъёс пуктӥз. Ӵапак со вакытэ Сибирьысь егит пияш Сергей Антонов, пӧйшуран пыӵалъёсмес умоятон вылысь, ӵектонъёссэ, чертёжъёссэ ысъяны кутскиз. Валтӥсь конструктор Олег Кузьменко сое заводэ ӧтиз но слесаре интыяз. Соку заводлэн но усто конструкциез вал. Но кибашлылэсь малпанъёссэ ӧз палэнтэ, кыкысь одӥг конструкция лэсьтонъя нимаз группа кылдытӥзы. Отчы пыриз Виталий Вотяков но. Нош Сергей Антонов - зэмос самородок, завод солы квартира сётӥз. Озьы выль усто пыӵал пӧрмиз. Но Сергей алигес вордскем палъёсаз кошкиз. Выль пыӵал МР-131 К нимаське. Солэн кык магазинэз: одӥгаз бадӟым пӧйшуръёсты ыбылыны патронъёс, мукетаз - тылобурдоосты. Басьяськисьёслы со уката яраз. Нош конструкторъёс ялан азьлане вамышто. Виталий Вотяков кылдытӥз чылкак выль самозарядной МР-151 пыӵал. Со бордын 2 ар ужа ни. Али 70 пыӵал бичамын, но уг вузало на, пыр-поч эскеро ай. Та вакытэ заводысь конструкторъёс 12х89 патронэн уката ӟеч пыӵал поттыны дасясько. 89 - со патронлэн кузьдалаез, 89 миллиметр. Пӧйшуран пыӵалъёс, пе, куинь пумо: 12х70, 12х76 но 12х89 патронэн луыны кулэ. Дуннеын берлозэ бичало ни, соин ик, рыноке шедён понна, асьмелы таин дыртоно. Виталий Вотяков сое ӟеч вала. Отпусказ но нуналлы быдэ ужаз вуылэ, шутэтскон, пе, уйвӧтын гинэ адӟиське. Нош солы та вакытэ туж кулэ вал ваньмон дыр. Анаез, Удмуртиысь дано дышетӥсь, ӵем висьылэ ни. Вордскем гуртаз хозяйствозэ нуыны юрттоно. Соин Виталий Вотяков гужемзэ гуртаз улэ, нош толалтэ арнялы быдэ 2-3 пол анаез доры вуэ. Нош Дарья Михайловналэн улонэз вӧй вылтӥ кадь ӧз ортчы. Сизьгуртысь 4 иськеме, Кеные тол но, гужем но, тулыс но, сӥзьыл но 30 ар пала дышетыны ветлӥз. Синтэм-пельтэм пелляське-а, дышетӥсез нылпиос возьмало. Со 83 аресаз мынэ ни. Удмурт кыллы дышетӥсь "Удмурт дунне" ("Советской Удмуртия") газетэз киысьтыз ӧз куштылы. Али, пе, туж жалясько, синмыз урод адӟе ни шуыса. Тӥни Дарья Михайловна Вотякова таӵе визьмо пи, усто конструктор будэтӥз. Азьвыл удмурт кыллы дышетӥсьлы сюлмысьтымы тау кариськом. Тӥляд будэтэм Виталий Петрович пиды кадь удмуртъёсмы уката тросгес мед луысалзы. Виталий Вотяковлэн пыӵалъёс сярысь мадёнэз уй но нунал тырмысал. Тани али, пе, Иж- 43 К ковбойёслы выльдэм пыӵалэз США-е вузаськом. Нош Иж-27 пыӵаллэн инъетэз вылын "Север" пуледробовик кылдытӥзы. - Пыӵалъёс трос пумо луыны кулэ, - шуэ конструктор. - Басьяськись бырйыны мед быгатоз. Тани Иж-94 нарезной пыӵал кунгож сьӧры мынэ ни. Сое 39 номеро мелкосерийной цехын бичало, нош тросэн пыӵал поттӥськом 36 номеро цехын. Паймоно та Виталий Петровичлы. Со дыр шедьтэ на муш вордыны, гурт шорысьтызы прудын чорыганы. Но та яратоно ужелы, пе, пумен ичигес дыр кыле ни, ӝожтӥськыса кадь вера Виталий Петрович. Азьло тыметазы бадӟымесь карпъёс улӥзы, но огпол толалтэ бырыны шедизы, ӝоказы, лэся. Юш, чабак, линь (тыпарсь) кылемын на. Та шоро-куспо мугоро, бабля йырсиен воргоронэн вераськемъя вераськем потэ, люкиськыны но уд ӵыды. Солы ай 54 арес гинэ, кызьы шуо, кын куртчон вакытэз. Озьыен, Виталий Вотяковлэн азьпалаз трос на выль, уката ӟеч пыӵалъёсыз... Геннадий Романов. Конструктор Виталий Вотяков. Туспуктэмез Владимир Камашевлэн. Гужем шор Котькуд ар музъем черсэныз шунды пала огсямен берытске но уйшор пал музъем дуннее уногес шуныт вуыны кутске. Пӧсьгужем толэзь шуныт дырлэн цамой шор вадесэз луэ. Та вакытэ вань улэп макеос тужгес но шаплыгес но сюлмаськисьгес луо: 80 процентлэсь уноез будосъёс пӧлысь сяськаяло-емышало, пӧйшуръёс-бурдоос тыршо пиоссэс поттыны, вож куаръёс, жадёнэз валатэк, уй но нунал вуоно вакытлы сиён но кужым кылдыто, музъем пушкын но нюлэскын сисьмем куаро сӥын векчи вубудосъёс но лулпырыос уно молекулаё тырметъёсты огшоры тыристъёслы берыкто. Адямиос но та вакытэ кусозэс куштыса ӧз вуэ на, нош ӝоген кулэ луоз ини сюрло басьтыны. Возьёсын но нюлэсъёсын, нюръёсын но нёжалъёсын вуо-кисьмало пӧртэм емышъёс. Пиналъёс июньлэн пумаз веръяса вуизы ини узыез (соин нырысь ик шӧмъятыто тужгес но мусо но дуно адямиосты), ӝоген пӧлы быдӟа борыен но лянэс пыдэсэз ӵоктаны кутскозы. Дыр вуэ ини эмезез но кудымульыез бичаны. Табере нюлэсэз но возез яратӥсь адямиосты сӥзьылозь инкуазь дорысьтызы уз ни лэзьы. Нош кӧня та вакытэ бичаны луэ эмъюм будосъёсты! Шуо, зэмос гужем вуэ, беризь сяськаяськыку. Соку мушъёс вожомыса но огенызы ӵошатскыса окто беризьлэсь сяська мӧльзэ. Соослы та сиён сыӵе ик кулэ, кызьы адямилы пызь. Адями пызьлэсь нянь ке поттэ - пыже, муш мӧлез чечылы пӧрмытэ. Кӧс возьёсты чебермало гербер (гвоздика) но тӧдьы (нивяник) сяськаос, куакъёс вискын ӵуж ӟускиосын гома виртурын (зверобой), ӟег пушкын - зангари (василек). Гужемлэсь шор дырзэ возьматэ дуринчисяська (цикорий) но. Сю ар талэсь азьло асьме палась та чебер чагыр сяськаё будосэз шедьтыны уг луы вал. Нош та вакытэ со сюрес дурысь кыр интыосын, городъёсын но гуртъёсын ассэ кузё сямен возе. Сяськаосыз укыр чебер - лыз инбамлэсь буёлзэ басьтэм, кожалод. Нош модосъёсыз но вайёсыз чебер суредэз сурало - укыр абыршак адӟисько. Ву вылын лэйкаса бабо тӧдьы но ӵуж вумульыос (кувшинка но кубышка). Соослэн паськыт куаръёссы вуэз пальккиськыны уг лэзё - валало, лэся, сяська пушкы ву пырыос медам усе шуыса. Кытчы гинэ эн мын, кытчы гинэ синдэ эн уськыты, котькытын та вакытэ шулдыр. Шор гужем - ӟозъёслэн дырзы. Кӧня пӧртэмесь соос турын-куар пушкын! Басняез гожъясь И.Крылов соосты азьтэмен возьматӥз - нош со шонер ӧвӧл: ӟозъёс дырто но сюлмысь тыршо нылпи поттыны, асьсэлэсь но кӧтсэс тырытыны, кулэ дыръяз тушмонъёслэсь но пегӟыны - ӟоз сӥлез яратӥсьёс укыр уно уга. Соос вань лобасьёсыз но, бызьылӥсьёсыз но. Быдэ вуэм но мӧйы бакаослы майбыр - соос шыпыт но лачмыт пуко интыязы но вӧзтӥзы лобаса-бызьыса кошкись векчи лулосъёсты шуак капырто. Таослэсь нымы-кибыослы пегӟыны капчи ӧвӧл - бакаос быгато пуля выллем кузь кылзэс ыбыны, нош нымы - кибыос со борды лякисько. Пӧсь куазен тужгес но секыт пудо-животъёслы. Та вакытэ урмем кадь асьсэзыс возё вир юись нымы-кибыос но кутъёс. Векчи нымы (пырнымы), чибинь сяна, трос на бадӟымъёсыз но - сутӥсь кут (жигалка), пӧртэм лузьёс. Гужем шорын котькудӥз тылобурдо, котькудӥз пӧйшур аслыз сиён тырмыт шедьтэ. Кыр ӟазегъёс но ӵӧжъёс та вакытэ тылыоссэс выльдо, соин ик та дыре соослэн лобан мылкыдзы ортче но соос пегӟыса уло ӝужыт но ӵем будӥсь турын-куар пӧлын: кӧтсэс тыро вазь ӵукна но уин гинэ. Ӟольгыриос но бӧдёноос кыкетӥзэ ини пуксё пузъёссы вылэ, пӧсьтолэзе вуэ валэс юосты октон дыр, нош зэмос аран дыр герӟаськемын августэн. В.Туганаев, биология наукаосъя доктор, профессор. ИНТЫОС НО ДЫР Капчи атлетика 800 метре бызьылон (нылкышноос): 1. Максимова Яна (Якшур-Бодья) .............................................. .. 2.17,1 2. Семакина Елена (Дэбес) ............................................................. 2.19,7 3. Пьянкова Елена (Балезино) ........................................................ 2.20,9 1500 метре бызьылон (воргоронъёс): 1. Болтачев Александр (Игра) ......................................................... 4.06,7 2. Григорьев Василий (Завьялово) .................................................. 4.07,9 3. Машев Иван (Пичи Пурга) ......................................................... 4.10,1 100 метре бызьылон (нылкышноос): 1. Скобкарева Александра (Якшур-Бодья) ..................................... 12,6 2.Максимова Татьяна (Балезино) ................................................... 13,0 3. Потапова Анна (Завьялово) ......................................................... 13,2 100 метре бызьылон (воргоронъёс): 1. Вершинин Александр (Кизнер) ................................................... 11,2 2.Фоменко Евгений (Якшур-Бодья) ............................................... 11,3 3. Коробейников Александр (Воткинск) ........................................ 11,3 Кузьдалае тэтчан (нылкышноос): 1. Чунарева Надежда (Шаркан) ............................................................ 5.19 2. Овчинникова Ольга (Киясово) ......................................................... 5.10 3. Скобкарева Александра (Якшур-Бодья) .......................................... 4.93 Кузьдалае тэтчан (воргоронъёс): 1. Логинов Евгений (Яр) ....................................................................... 6.81 2. Мухамидеев Илья (Завьялово) .......................................................... 6.75 3. Вершинин Алексей (Пичи Пурга) .................................................... 6.35 Кросс. Нылкышноос (300 метр): 1. Максимова Яна (Якшур-Бодья) ....................................................... 8.52 2. Семакина Елена (Дэбес) ................................................................... 8.56 3. Хохрякова Оксана (Дэбес) ................................................................ 9.06 Кросс. Воргоронъёс (5000 метр) : 1. Машев Иван (Пичи Пурга)................................................................ 11.11 2. Болтычев Александр (Игра) 14.17 3. Яманов Николай (Селта) .....................................................................14.22 400 метре бызьылон (воргоронъёс): 1. Ворошилов Александр (Ува) ..................................................................51,6 2. Коробейников Александр (Воткинск) ......................... .........................53,1 3. Фоменко Евгений (Якшур-Бодья) ............................... .........................53,2 400 метре бызьылон (нылкышноос): 1. Скобкарева Александра (Якшур-Бодья) ................................................ 1.00,6 2. Чунарева Надежда (Шаркан) ....................................... ...........................1.01,5 3. Русский Наталья (Игра) ............................................... ...........................1.02,9 300 метре бызьылон (воргоронъёс): 1. Болтачев Александр (Игра) ...................................................................... 8.34,4 2. Машев Иван (Пичи Пурга) .......................................... ............................8.37,1 3. Яманов Николай (Селта) ..........................................................................8.45,8 1500 метре бызьылон (нылкышноос): 1. Максимова Яна (Якшур-Бодья) .................................. 4.50,6 2. Семакина Елена (Дэбес) .............................................. 4.56,1 3. Ермолаева Ирина (Игра) ............................................. 4.56,2 Эстафета (нылкышноос): 1. Якшур-Бодья 2. Завьялово 3. Игра Эстафета (воргоронъёс): 1. Пичи Пурга 2. Сарапул 3. Завьялово Гиря ӝутъян Секталаезъя 60 килограммозь: 1. Вахрушев Сергей (Шаркан) ......................................................... 222 2. Калинин Иван (Воткинск) .......................................................... 200 3. Муканов Эдуард (Можга) ............................................................ 136 Секталаезъя 70 килограммозь: 1. Прокопьев Герман (Можга) ......................................................... 205 2. Комаров Юрий (Пичи Пурга) ...................................................... 160 3. Ончуков Валерий (Кез) ................................................................. 126 Секталаезъя 75 килограммозь: 1. Семенов Николай (Пичи Пурга) ................................................... 258 2. Жуков Валерий (Сюмси) ............................................................... 170 3. Сергеев Сергей (Сарапул) ............................................................. 154 Секталаезъя 80 килограммозь: 1. Тихомиров Александр (Воткинск) ................................................ 240 2. Александров Виталий (Завьялово) ................................................ 211 3. Коротаев Сергей (Шаркан) ............................................................ 198 Секталаезъя 90 килограммозь: 1. Кокорин Александр (Вавож) .......................................................... 208 2. Емельянов Михаил (Игра) ............................................................. 149 3. Потеряев Константин (Яр) ............................................................ 130 Секталаезъя 90 килограммлэсь ятыр: 1. Мамонтов Николай (Завьялово) ................................................... 201 2. Булдаков Филипп (Завьялово) ...................................................... 194 3. Новоселов Сергей (Вавож) ............................................................ 175 Дуатлон 1. Игра .................................................................................... ............ 1.22.56 2. Завьялово .................................................................................... ... 1.32.12 3. Ува .................................................................................... .............. 1.24.08 Теннис (воргоронъёс): 1. Юшков Дмитрий (Завьялово) 2. Комаров Николай (Пичи Пурга) 3. Сапожников Николай (Сарапул) Теннис (нылкышноос): 1. Иванова Надежда (Камбарка) 2. Швецова Любовь (Пичи Пурга) 3. Хохрина Татьяна (Можга) *** 1. Сарапул 2. Можга 3. Завьялово Волейбол (нылкышноос): 1. Завьялово 2. Камбарка 3. Вавож Волейбол (воргоронъёс): 1. Завьялово 2. Можга 3. Ува Футбол 1. Ува 2. Игра 3. Балезино Спорт семьяослэн ӵошатсконзы 1. Григорьевъёс (Завьялово) ....................................................... 56 2. Валиевъёс (Сарапул) ............................................................... 50 3. Овчинниковъёс (Кизнер) ....................................................... 48 Ыбылӥськон 1. Завьялово 2. Можга 3. Сарапул Ки кужымъя (армспорт) ӵошатскон Секталаезъя 58 килограммозь (нылкышноос): 1.Шутова Надежда (Юкаменск) 2. Другомирова Надежда (Сюмси) 3. Булдакова Елена (Яр) Секталаезъя 73 килограммозь (нылкышноос): 1. Евстафьева Елена (Ува) 2. Наговицына Светлана (Балезино) 3. Смакулова Тамара (Грахово) Секталаезъя 65,73,81 но солэсь ятыргес килограммозь (воргоронъёс): 1. Корепанов Василий (Игра) 2. Ахмедов Руслан (Шаркан) 3. Шибанов Алексей (Красногорье) *** 1. Порымов Михаил (Грахово) 2. Леконцев Вадим (Кез) 3. Бузмаков Петр (Балезино) *** 1. Иванов Юрий (Пичи Пурга) 2. Кокорин Алексей (Вавож) 3. Васильев Владимир (Яр) *** 1. Данасиенко Александр (Завьялово) 2. Вотинцев Юрий (Ува) 3. Нэвэла Богдан (Игра) Огъя ӵошатсконъёсын вормизы Нырысетӥ группая: 1. Завьялово 379 2. Можга 354 3. Игра 352 4. Ува 343 5. Пичи Пурга 318 6. Якшур-Бодья 314 Кыкетӥ группая: 1. Яр 285 2. Вавож 283 3. Дэбес 271 4. Юкаменск 270 5. Алнаш 270 6. Красногорье 262 Визьмын! Кужмын! Эшъёсын! Бен, ӵапак та кылъёс тупало республикаысьтымы гурт спортсменъёслэн 8-тӥ гужем шудонъёссылы. Улон-вылонмы секыт ке но, Удмурт Республикамы нош ик быгатӥз гуртоосты огазеяны, бадӟым но кужмо праздник радъяны. Завьялъёс, зэмзэ но, ужазы визьмын, кужмын, эшъёсын. Та ёросысь команда туэ сизьыметӥзэ ни луиз чемпион. Спортлэн пӧртэм удысъёсызъя дэриос синмаськымон вормон басьтӥзы. Соос быгатыса пумитазы кунооссэс но, ӧтем адямиосты но. Ӵошатсконъёс туэ ортчозы ик шуыса, нырысь-валысь осконъёс но ӧй вал кадь. Тау шуыны кулэ Правительствомылы, ёрос администрацилы, спортъя кун комитетлы, куд-ог министерствоослы но ведомствоослы, коньдонэн юрттӥсьёслы. Табере Завьяловоысь стадионын но спортъя залын Россилэсь чемпионатсэ но ортчытыны возьыт уз луы ни. Гурт шудонъёсты усьтонэн валче ӟечкылан кылъёсын вераськизы Завьял администрацилэн кивалтӥсез Галина Баталова, ёрос Думалэн тӧроез Валентина Дементьева, Удмурт Республикаысь Кун Кенешлэн Тӧроезлэн воштӥсез Павел Вершинин, Правительстволэн Председателезлэн воштӥсез Юрий Питкевич. Гурт "Олимпиадалэсь" тылзэ ӝуатӥз бадӟым Олимпиадалэн ньыль пол, дуннелэн укмыс пол, СССР-лэн уно пол чемпионкаез, Удмурт Республикалэн сӥё-дано улӥсез Галина Кулакова. Ӵошатсконъёс арысьаре узыргес но узыргес луо. Кыкетӥ арзэ ни ортчытэмын вал вылын ӵошатскон, туэ программае нырысьсэ пыртэмын теннис. Учкисьёсты шумпоттӥз Правительствоын ужасьёс но ёрос администрациослэн кивалтӥсьёссы куспын футболэн шудон. 2:0 лыдын вормиз Удмурт Кивалтэт. Ваньмыз умой ортчиз кадь. Но малы ке арысь аре уродгес радъяны кутскизы шутэтскон- ваньмон дырез. Таяз учыре но ӝытъёсы вал дискотека гинэ. 8-тӥез гужем гурт шудонъёс йылпумъяськизы. Вуоно шудон табере ортчоз 2001-тӥ арын. Нош 6-тӥзэ тол шудонъёсты ортчытыны чакламын вуоно арын февральлэн пумаз Шаркан черкогуртын. Редакцилэсь: вань журналистъёс тау каро валтӥсь судьялэн Вячеслав Беляевлэн но солэн эшъёсызлэн быгатыса ужамзылы. Н.Байтеряков. Туспуктэмъёсыз В.Камашевлэн. Вормонъёс тӥледлы! 5-9 июле Ижевскын нырысьсэ ортче Россиысь МВД-ын ужасьёслэн бызьылонъя но ыбылӥськонъя ӵошатсконзы. Татчы лыктыны мылкыд кариз 47 команда. Котькуд командае пыриське 7 адями - 6 воргорон но нылкышно. Спортсменъёс толон шаерамы вуизы, нош туннэ "Динамо" стадионын чемпионатэз сӥё-дано усьтон ужрад ортчоз. Удмуртиысь команда таӵе ӵошатсконъёсын вылӥ интые ӧз потылы на. Ас дорад борддоръёс но юртто шуо бере, асьме командамылэн но вормонъёс басьтыны осконъёсыз вань. Ма бен, вормонъёс тӥледлы, гажано эшъёс! В. АНДРЕЕВА. "Россия но монэ яратэ" Президентлэн Указэзъя та нуналъёсы Россилэсь кун наградаоссэ басьтӥз республикаысьтымы куамын пала адями. Культура но искусство удысын кема аръёс ӵоже сюлмысь тыршемез понна Почёт орденэн пусъемын удмурт писатель Петр Кириллович Поздеев. Мар сярысь малпаське меда адями, бадӟым награда басьтыкуз? Кин ке, оло, шуак пичи дырзэ тодаз вае, кин ке син азяз пуктэ ортчем шуг-секытъёссэ, кин ке тодаз вае яратоно адямиоссэ. - Нош мон таӵе кылбурме тодам ваи, - шуэ Петр Кириллович, - Шуом, чебер тон тусбуен, Киыд зарни, сямыд шаплы. Шуом, усьтӥд тон ог уе Вань сюлэмдэ гажанэдлы. Шуом, усьтӥд - нош со ачиз Шорад уг учкылы, уг мадь - Синмаськыны уго капчи - Ачид кельшод-а, Вот ведь ма. - Пичи дырысеным ик тодӥсько вал: мон Россиез яратӥсько. Нош туннэ умой-умой валай мукетсэ но: Россия но монэ яратэ. Наградаос басьтэмъёс азьын озьы ик верай. Одӥгез юаны шедьтӥз: "Ма, ӧй-а тырмысал Россиез гинэ яратыса улыны?" Мон солы шуи: "Ма, мон ке яратӥсько, монэ но мед яратозы вылэм. Озьы улыны шулдыргес". Вераськонмес йылпумъяса, мукетгес мылкыдын ини Петр Кириллович тазьы вераз: - Зэмзэ верано ке, шумпотонэз уж бордысь гинэ адӟисько, награда бордысь уг. Нырысь ик уж лэсьтэмын медло. Мынам уже - гожъяськон. Данак малпанъёсы. Соосты быдэстыны дауре уз тырмы. "Удмурт дунне" газетын ужасьёс ӟечкылало тӥледыз, Пётр Кириллович, басьтэм наградаеныды. Вань малпанъёсты мед быдэсмозы. Т. Банникова. Туспуктэмез В. Камашевлэн. Кун Кенешын Казна шутэтсконэз уг тоды Депутатъёс отпуске потэмын ке но, ялан ужась комиссиос ас удыссэс азинто. Кылем арня пумын люкаськылӥз экономика ужпумъёсъя но бюджетъя комиссия, кивалтӥсез депутат С. Э. Широбокова. Отын учкемын бюджетэ но бюджетэ пырисьтэм куд-ог фондъёслэн коньдонэз кутэмзы. Оглом верано ке, казнамы уг узырмы, налогъёс каллен но ӧжытэн вуо. Нош Москва, республикамылы оске: Удмуртилэн кужмыз ассэ ачиз возьыны тырмыт. Кызьы пусйиз Софья Эльфатовна, центрын вераськон мынэ асьмеды дотация чотын улӥсь регионъёс радысь поттыны. Валамон, шаермы понна со коньдон ласянь бадӟым шуккет луоз. Комиссия азьын вакчияк отчёт лэсьтӥз "Удмуртавтодор" ГУП-лэн кивалтӥсез депутат А. В. Соловьев. Со вераз бюджетэ пырисьтэм фондэз кутэмзы пумысен. Котькуд автопредприятилы али луонлык сётэмын ас луонлыкезъя улыны но ужаны. 25 автохозяйство пӧлысь 11-езлэн вань сыӵе юридической правоез. - Та амалэ ми выжим, Челябинсклэсь адӟем карыса но тырмымтэоссэс лыдэ басьтыса, - шуиз Александр Соловьев. - Отын янгыш лэсьтӥзы, вань автохозяйствоез огкутскемен унитарной амалэ поттыса, озьы ыштӥзы 4 предприятиез. Ми та ласянь ум дыртэ. Озьы ик кылзэмын Инкуазь узырлыкъёсъя но инкуазез утёнъя министерство. Комиссия учкиз бюджетэн герӟаськем музон ужпумъёсты но. Л. ДМИТРИЕВА. Кужым ужын кыда Можга ёросысь "Красный Октябрь" колхозын миым вуко ужаны кутскиз. Со сярысь ивор котыр улосэ ӝог вӧлмиз. Табере татчы мукет ёросъёсысь, Алнашысь, Пичи Пургалась но, ю изыны курыса вазиськисьёс вань - нимаз адямиос но, хозяйствоос но. Озьы бере, вукоысь операторлэн Петр Павлович Зоринлэн ужез тырмыт. Колхоз кисые коньдон но жильдӥське. Центнер юэз изэм 50 манет сылэ. Пусйыны кулэ, та вакытэ колхозэн быгатыса кивалтэ И.И.Бабкин. Иван Иванович - специальностезъя агроном. Азьвыл ужаз школаын биологияя дышетӥсь луыса. Хозяйствоен кивалтыны оскемзы бере, мылысь-кыдысь басьтӥськиз выль удыс борды. Тыршемезлэн емышъёсыз - син азьын. Кемалась ик ӧвӧл колхоз ӵыж выль 3 трактор но 1 автобус басьтӥз. Туала хозяйствоос пӧлысь ичиез, дыр, асьсэлы таӵе кузьым лэсьтыны быгатозы. Е.Трофимов. Правительствоысь иворъёс Туннэ нуналлы сӥзьыса Правительстволэн Тӧроез Николай Ганза берло кенешсэ сӥзиз выт бичанэн герӟаськем ужпуъёсты радъянлы. Кылсярысь, вераськон мынэ ватсаса доходысь (вмененной налог) выт басьтонъя Законэз улонэ пыӵатон сярысь. Собере Николай Алексеевич люкаськемъёслы мадиз 2 июле пичи ужбергатӥсьёсын пумиськылэмез сярысь. Правительстволэн Тӧроез озьы ик ачиз МВД-ен ӵош эскериз-чаклаз рынокъёсын кылдэм югдурез но кызьы та ласянь ужало бускель республикаос. Вузкаронъя ужбергатонэ али шаерамы 26 сюрслэсь уно адями пыриське. Но рынокъёсын, уката ик Ижевскын, соослы юн бадӟым аренда дун тупатэмын. Шоркарын со толэзяз 1200 манетозь вуэ, яке, республикаысь ик мукет городъёсын ӵошатсыа, 3-4 пол трос. Со сяна но вузкарисьёсты вӧсь карисьёс шедё, законэз тӥяса, коньдонзэс кыско. Кинлы кулэ, соослы косэмын рынокын порядок тупатыны. Выт бичанэз умоятон вылысь, озьы ик кылдытоно нормативной условиоя но вылӥ верам законэз одно ик быдэсъяно. Та ужез радъяны косэмын Правительстволэн Тӧроезлэн воштӥсезлы Сергей Чикуровлы. Кун ваньбурез - син азе Правительство постановление кутӥз. Соя Удмурт Республикаысь Ваньбуръя кун комитетлы вуоно арозьлы косэмын вань кун ваньбурез лыдэ басьтыны, инвентаризация ортчытыны. Озьы ик учкемын луоз Россия Федерацилэн но ваньбурез. Таӵе ваньбуръя объектъёсты лыдэ басьтонъя положение юнматэмын. Школалы - юрттэт Дэбес районысь Вылӥ Четкер шор ёзо школалэсь спортзалзэ (шудтэм учыре сюриз) выльдыны ёросысь администрацилы 50 сюрс манет коньдон висъямын. Тая решение кутӥз Правительстволэн Президиумез. Сыӵе ик юрттэт сётэмын Грах районысь "Заря" колхозлы скал гидзэ тупатъяны. Мугез тодмо: азьланьын шудтэм учыр медаз луы. Воштыны косэмын Гурт удысъя но сиён-юонъя министерстволы, Ваньбуръя кун комитетлы туэ 1 октябрёзь косэмын кун предприятиосты Сарапулысь нянь продуктъёсъя но Ижысь 1 номеро нянь продуктъёсъя комбинатэз усьтэм амалэн ужась акционер огазеяськонъёс карыны. Малы ке шуоно, 100 процент акциоссы сётэмын Удмурт Республикаысь Ваньбуръя кун комитетлы. Ватсаса 3,2 миллион манет Туэ республикаямы пичи ужбергатонэз азинтонъя Удмуртилы федеральной фондысь 3,2 миллион манет коньдон висъямын. Удмурт Республикаысь Правительстволэн секретариатысьтыз пресс-служба. М. Т. Калашниковлэн вордскемез дырысен 80 ар тырмонэз пусъён сярысь Удмурт Республикаысь Кун Кенешлэн но Правительстволэн Президиумзылэн Постановлениез 1999-тӥ арын ноябре Михаил Тимофеевич Калашниковлы - ас нимзэ нуллӥсь дано автомат кылдытӥсьлы - 80 арес тырме. Автоматической стрелковой пыӵал тӥрлыкъя быдӟым конструкторлэсь вормонъёссэ лыдэ басьтыса, Удмурт Республикаысь Кун Кенешлэн но Правительстволэн Президиумзы пуктэ: 1. 1999-тӥ арын 11-тӥ ноябре М. Т. Калашниковлэн вордскемез дырысен 80 ар тырмонэз сӥё-дано пусъёно. 2. М. Т. Калашниковлэн вордскемез дырысен 80 ар тырмонэз пусъёнлы дасяськонэз радъясь комитетэз юнматоно (сётӥське). 3. Радъясь комитетэз 1999-тӥ арын 7 июлёзь ужрадъёсын план но расходъёсъя смета дасяны косоно. 4. Удмурт Республикаысь Коньдон ужпумъёсъя министерстволы коньдон висъяно юбилей ужрадъёс понна Удмурт Республикалэн "1999-тӥ арлы республикалэн бюджетэз сярысь" Законэзъя. 5. Удмурт Республикаысь Правительстволэн 1999-тӥ арын 1-тӥ мартэ кутэм 259 номеро "М. Т. Калашниковлэсь 80 арессэ пусъён сярысь" Постановлениез Удмурт Республикаысь Правительство воштӥськемен валче кужымзэ ыштэ. 6. Та постановленилэсь быдэсъяськемзэ эскеро Удмурт Республикаысь Кун Кенешлэн Тӧроезлэн Нырысетӥ воштӥсез В. И. Агашин но Удмурт Республикаысь Правительстволэн Тӧроезлэн воштӥсез Н. И. Хохлов. 7. Та постановлениез республикаысь иворъёсты вӧлмытӥсь ёзъёсын печатлано. Удмурт Республикаысь Кун Кенешлэн Тӧроезлэн Нырысетӥ воштӥсез В. И. Агашин Удмурт Республикаысь Правительстволэн Тӧроез Н. А. Ганза. М. Т. Калашниковлэн вордскемез дырысен 80 ар тырмонэз пусъёнлы дасяськонэз радъясь комитетэ пырем муртъёс: 1. Ганза Н. А., Удмурт Республикаысь Правительстволэн Тӧроез, оргкомитетлэн тӧроез 2. Агашин В. И., Удмурт Республикаысь Кун Кенешлэн Тӧроезлэн Нырысетӥ воштӥсез, оргкомитетлэн тӧроезлэн воштӥсез 3. Хохлов Н. И., Удмурт Республикаысь Правительстволэн Тӧроезлэн воштӥсез, оргкомитетлэн тӧроезлэн воштӥсез 4. Салтыков А. И., Ижевск городлэн мэрез, интыысь ас коже кивалтонлэн йырыз, оргкомитетлэн тӧроезлэн воштӥсез (кенешемъя). Комитетлэн членъёсыз: 5. Агеенко Н. В., Удмурт Республикаысь Национальной музейлэн директорез 6. Ахророва Г. А., Ижевск городысь администрацилэн кивалтӥсезлэн воштӥсез (кенешемъя) 7. Бельтюков В. В., Удмурт Республикаысь коньдон ужпумъёсъя министр 8. Бессогонов Н. М., Удмурт Республикаысь культурая министр 9. Васильев С. В., Удмурт Республикаысь печатья но иворъёсъя министр 10. Горбушина Р. Г., "Удмуртия" кун телерадиокомпанилэн генеральной директорезлэсь ужзэ быдэсъясь 11. Горяинов А. П., Удмурт Республикаысь Правительстволэн Аппаратэзлэн кивалтӥсез 12. Гродецкий В. П., "Ижмаш" ОАО-лэн генеральной директорез 13. Долгов В. И., Удмурт Республикаысь промышленностья но транспортъя министр 14. Коновалов А. А., ИжГТУ-ысь профессор, технической наукаосъя доктор, академик 15. Кушко В. М., Кун Кенешысь Промышленностья, инфраструктураез азинтонъя, вузъёсын но юрттэтъёсын рынокез кылдытонъя ялан ужась комиссилэн тӧроез 16. Чугуевский В. С., "Ижевский механический завод" ГП-лэн генеральной директорез, Удмуртиысь "Развитие" промышленно-экономической ассоциацилэн тӧроез 17. Шудегов В. Е., Удмурт Республикаысь Правительстволэн Тӧроезлэн воштӥсез. ШӦКЫЧ Куинетӥ класс Ураметӥ веськрес мугоро туж чебер нылмурт вамыъя. Дораз таксист лугдэ но вазиське: - Чебер апай, тӥледды нуоно ӧвӧл-а? - Нуоно вылэм но, только кыӵе тӥляд водительской классты? - Нырысетӥ. - Мын ас сюрестӥд! Водитель выльысь берытскиз но нылаш доры дугдӥз. - Тӥледды нуоно ӧвӧл-а? - Нош кыӵе тӥляд классты? - Кыкетӥ! - Водитель нош ик берытскиз нылмурт доры. Соиз выльысь юа: - Кыӵе тӥляд классты? - Куинетӥ. - Соку мынӥм! Ныллэн коркаез доры вуизы. Нош таксист юатэк ӧз чида: - Ӧй вала серем каремдэс, малы тӥледлы одно ик кулэ вал куинетӥ класс? - Туж огшоры. Нырысетӥ но кыкетӥ классъем водительёс, соос вӧзы пуксиськод ке, одӥг киынызы руль борды кырмисько, нош мукетсэ юбка улэ донго. Нош куинетӥ классъем шофёр кыкеныз ик киосыныз руль борды кырмиське. *** Павловез (со премьер дыръя) допросэ ӧтё. Следователь юа: - Кытын партилэн зарниез? Павлов валэктэ: - Со коммерческой тайна. *** Аракылы вузкарон магазин дорын бадӟым черод. Ураметӥ атаеныз мынӥсь пияш юа: - Атай, кинъёс озьы черодын сыло? - Соос, пие, азьтэмъёс, асьсэлэн аракы пӧзьтэмзы уг поты. Г. ВАХРУШЕВ. Ивор вӧлмытон Кырӟа-экты, газетчи! Кызьы ивортылӥм ни, туэ сентябре Ижын ортчоз прессалэн "Быдэс Россия - 99" фестивалез. Талэсь азьвыл со люкаськылӥз Волгоградын, Новосибирскын но Курскын. Фестивалез радъяло Россиысь Журналистъёслэн союззы. Вузкаронъя но промышленностья палата, Печатья кун комитет, Федерациысь телевидениея но радиовещаниея служба, Удмурт Республикаысь Кун Кенеш, Правительство, Журналистъёслэн союззы, Иж городлэн организациез но мукетъёсыз. Фестивалез дасянъя комитетэн кивалтэ Кун Кенешлэн Тӧроез Александр Волков. Отчы озьы ик пыртэмын печатья но иворъёсъя министр Сергей Васильев. "Удмурт дунне" но "Удмуртская правда" газетъёслэн валтӥсь редакторъёссы Алексей Шкляев, Николай Нестеренко, музон адямиос. Ужрад усьтӥськоз дуннеысь журналистъёсын огкылысь луон нуналэ - 8-тӥ сентябре. Эскеремын луоз таӵе бадӟым ужпум: "Быръён: журналистика но политикаысь амалъёс". Бадӟым инты висъялозы ивор вӧлмытӥсьёсты утёнлы. Тодмо луоз: мар со сыӵе тарифъя тупанкыл (соглашение), коллективын огкыл (договор), контракт, страховка, право но улон-вылон ласянь юрттэт. Журналистъёсын Ижын пумиськыны мылкыд каро Ментимер Шаймиев, Юрий Лужков, Владимир Жириновский но музон политикъёс. Ог-огзылэн ужан амалъёсынызы тодматскозы газет-журнал чеберъясьёс (дизайнеръёс), репортёръёс, фотосуредасьёс, рекламаен вырисьёс. Ялэмын луоз журналистъёслы сӥзем кырӟан гожтонъя ӵошатскон. Удмурт эстрадаен эшъяськисьёс сое кылытэк-адӟытэк медаз кыле вал. Дэмен ми тросгес лэсьтом Берло аръёсы пресса бадӟымгес инты висъя сӧсыръёслы. Россиысь Журналистъёслэн союззы но Ӧлексыослэн (инвалидъёслэн) обществозы ялӥзы. "Дэмен ми тросгес лэсьтом" ӵошатскон (конкурс). Со сӥземын висисьёсты утёнлы, соослэсь радзэс юнматонлы, адямиосты улонлэн пӧртэм удысъёсаз кысконлы. Ӵошатсконэ ыстыны луоз 1998-тӥ арын 1-тӥ декабрьысен 1999-тӥ арын 30-тӥ октябрёзь печатлам материалъёсты. Нырысетӥ инты нимаське "Зарни перо", сылэ 1500 доллар. Пумиськон Мукетыз ӵошатскон нимаське "Пумиськон". Нырысьсэ со ортчиз вал 1998-тӥ арын мартэ-июне. Отчы пыриськиз Россиысь ог 130 журналист. Ӵошатсконлы йылпумъян лэсьтон азьын 7-тӥ июне, Элиста городын виизы "Советская Калмыкия сегодня" газетлэсь валтӥсь редакторзэ Лариса Юдинаез. Солэсь гожъямзэ жюри вылӥ дунъяз автор кулэм бере. Со кышкатэк нюръяськиз вал Калмыкилэн президентэзлэн Кирсын Илюмжиновлэн ачимъяськемезлы пумит. Нырысетӥ конкурслы йылпумъян лэсьтыку, "Яблоко" партилэн кивалтӥсез Григорий Явлинский но мукетъёсыз ялӥзы, сыӵе ӵошатсконлы сётоно Лариса Юдиналэсь нимзэ но та ужрадэз ортчытъяно арлы быдэ. Туэ таӵе конкурс выльысь ялэмын. А. ПЕТРОВ. ТАЗАЛЫК Кышкыт-а тӥледлы инфаркт? (экспресс-тест) Валэктэ милям 10 юанмылы. 1. Ӵемысь жадьыса ветлӥсько. 2. Умме усьыны курадӟисько. 3. Уин урод кӧлӥсько, ӵем сайкаллясько. 4. Ӟигартэм ветлӥсько. 5. Мыным ноку но уз удалты кадь потэ. 6. Чыры-пырыос понна но керӟегъяськисько. 7. Мылкыды ялан урод. 8. Пиосмуртэн (кышномуртэн) лушкем кусыпъёс шумпотон уг ваё. 9. Кӧлэмысь жадьыса султӥсько. 10. Улэме ик уг поты. Тӥ куинь пол гинэ "бен" шуиды ке, инфаркт тӥледлы матын ӧвӧл. Куать пол ке, врач доры вазиськыны вазь на, но тырше асьтэды чакланы - шуккетъёслэсь утиськыны, тросгес шутэтскыны. Куатьлэсь трос пол ке, али ик басьтэ отпуск, куштӥське урод сямъёстылэсь - юонлэсь, кысконлэсь, вунэтэ огдырлы ке но гурт ужъёсты сярысь. Нош вӧзаз ик тӥ зӧк адями, бадӟым давлениен курадӟиськоды ке, инфарктлэсь уката утиськыны кулэ. Николай Ганза - Дэбесын Валлян Правительстволэн Тӧроез Николай Ганза Дэбес ёросын ужаз. Со вуылӥз Дэбес шор ёзо школае, тодматскиз солэн выль лэсьтӥськись юртэныз. Собере премьер пумиськиз ёрос больницаын, ЖКХ-ын, колбаса поттон цехын, "Мир" колхозысь парсь вордон комплексын ужасьёсын. Лымшор бере Николай Ганза ужзэ азьланьтӥз Дэбесысь му вӧй месторождениын но педучилищеын. Собере хозяйствоослэн, предприятиослэн, организациослэн кивалтӥсьёсынызы, ёрос администрациен, ёрос кенешлэн депутатъёсыныз но гурт администрациослэн кивалтӥсьёсынызы кенешон ортчиз. Удмурт Республикаысь Правительстволэн пресс-центрез. Журналистъёсын пумиськонъёс Москва юрттыны уг малпа ни Шаерысьтымы Коньдон ужпумъёсъя министерствоен куатетӥ арзэ кивалтэ ни Владимир Бельтюков. Кыӵе солэн песьтэрез, секыт-а, капчи-а, ваньмызлы валамон. Кун бюджетын котьку сямен ик коньдон уг тырмы: кызьы ке дыраз уждун сётъяны, озьы ик мукет удысъёслы но лэсьтӥськонлы висъяны. Озьы ке но, Владимир Васильевич оскем ужзэ урод быдэсъя шуыны нокинлэн ымыз уз усьтӥськы. Юнме шат со выль Правительствое но кылемын. Таяз арняе, 6 июле, со пумиськиз журналистъёсын но трос юанъёслы умоесь валэктонъёс сётӥз. Владимир Васильевич мадёнзэ кутскиз бюджет бордысен. Со нырысь ик ивортӥз, туэ ӝыны аре, миым та дырен ӵошатыса, бюджетэ уногес уксё пыртэмын шуыса. Умойгес ужаны кутскизы промышленной предприятиос но куд-ог мукет удысъёс. Тӥни озьы ваньмызлы дышетӥсьёслы шутэтскыны потэмзы понна коньдон сётэмын. Югдур уг тупатскы Ижевскын но Сарапулын. Татын бюджетлэн доход люкетэз урод быдэсъяське. Тани Сарапулын уждунлы 27 процент гинэ коньдон кутэмын, Ижевскын - 30,8, нош быдэс республикая - шорлыдын 31 процент. Та лыдпусэз данаклы ортчемын юрттэт басьтӥсьтэм Вотка, Каракулино, Игра, Як.-Бодья районъёс, Можга город но музонэз. Мар чотын бен дышетӥсьёслы май-июнь толэзьлы уждун тыремын? Москва 40 миллион манет юрттэт (трансферт) сётӥз. Огъя вераса, калыкез дышетон удыслы 47 миллион манет уксё висъямын. Республика аслаз поттэм коньдонысьтыз районъёслы май толэзе 8 миллион келяз. Министерство азьын али нош ик бадӟымесь ужпумъёс сыло. Урамын 30 градус пӧсь, но шӧдтэк шорысь вуоз кезьыт тол. Солы али дасяськоно: ӝоггес вуттоно школаосты, больницаосты, соосты ӟеч-ӟеч тупатъяно но тырмыт ваёно эстӥськон. Та ужез быдэсъялоз "Удмуртлестоппром" огазеяськон. Солы музъем эгыр басьтыны Правительство 4,5 миллион манет коньдон висъяз ни. Таин ӵош кысык ужъёс мыно гуртын. Турын но пудо сиён люканлэн али самой кысык вакытэз. Та удыслы но юрттэт кулэ. Собере матэ вуэ ни аран. Солы но котыр ласянь пыр-поч дасяськоно: техникаез, воштос ёзъёс но эстӥськон. Ваньмызлы нош ик уксё сётоно. Кызьы тодмо, туэлы кун бюджетын 25 процент коньдон уг тырмы, яке 740 миллион манет. Озьы ке но, бюджетлэн доход люкетэз али 82 процентлы быдэсъяське ни. Урод ӧвӧл со. Республика бюджет чотын ужасьёслы 1-тӥ апрельысен будэтэм уждун тыре, нош Москваысь со понна 460 миллион манет уксё али ке но ӧз вуы на. Алигес юалляськон ортчытэмын вал: кин быгатоз аслаз кужыменыз будэтэм уждун тырыны? Вотка, Можга городъёс но Игра район гинэ та ужпумез вормом шуизы. Оглом пусйыса, кун бюджет туэ ӝыны арлы 109 процентлы тырмытэмын, нош дефицитэз чакласа, сое 125 процентлы быдэсъяно. Ваньзэ сое лыдэ басьтыса, правительство коньдон поттонъя ватсаса амалъёс утча. Тани уно уксё быдтэмын эмъян тӥрлык (860 сюрс доллар), вычислительной техника (5 сюрс доллар) но гуртлы кунгож сьӧрысь техника (47 миллион манет) вуттыны. Али озьы ик басьтыны кулэ колёсной но гусеничной тракторъёс. Беларусь МТЗ-оссэ асьмелы сётэ. Пумиськонын вераськон вал, малы, пе, Гурт удысъя но сиён-юонъя министерство кунгож сьӧрысь дуно техника (ю тысь но пудо сиён дасян комбайнъёс) басьтэ. Валамон, та ласянь пӧртэмесь малпанъёс. Немецъёс гуртлы усто техника потто. Но ваньмыз со асьмелы тупа-а, уг-а, чакланы кулэ. Министерствоез котьку сямен ик сюлэмшугъяськытэ федерация но кун бюджет кусыпъёс. Соос али ке но йылаз-пумаз вуттымтэ, нормативной база (инъет) юнматымтэ, уката ик социальной удысъя. Вылаз ик, Москва асьмелы юрттонлэсь палэнскыны малпа, Россилы юрттэт сётӥсе (доноре) поттыны выре. Озьы шаермы вуоно 2000 арын ичизэ 345 миллион манет ыштоз, республикае сомында коньдон уз вуы. Тӥни, оло, таӵе улонэ вуом. Табере ваньмыз потоз республикалэн кивалтӥсьёсызлэн Москваен кызьы вераськыны быгатэмзы бордысь - кылёмы-а асьмеос юрттэт басьтӥсь шаерен яке ум? Нош элькунамы улон-вылонмы уг умоя, уката секытгес луэ. Г.РОМАНОВ. Владимир БЕЛЬТЮКОВ (паллянысез) кенеше Можгалэн мэреныз Игорь СЕМЕНОВЕН. Туспуктӥз В.КАМАШЕВ. ТАЗАЛЫК Юртты аслыд ачид Нуны возьмась но нонтӥсь нылкышноослы утиськоно таӵе эмъюмъёслэсь: - антибиотикъёсты (пенициллинъёслэн группазы, цефалоспарин, тетрациклин, маркомед...); - сульфанимамидъёс (норсульфазол, сульфадилитоксик, стрептоцид, дисептол...); - вируслы пумитъяськисьёсты (метисазон, мидантан, идоксуридин, ацикловир...); - губиослы (грибок) пумитъяськисьёсты (нистатин, леворин, гризеофульвин, олефотерицин "В"...); - туберкулёзлы пумитъяськисьёсты (фтивазид, метазид, салюзид, ларусан, ИНГА-17, этамбутол...); - протозой пумитъяськисьёсты (метронидазол, хиниофон, трихомоноцид, фуразолидон, хинин, хингамин, бигумаль, осарсол...). А.Ураков. Тазалык Нылпи но сьӧд очки Туннэ сьӧд очки нуллон туж модно лыдъяське. Уката ик пӧсь гужем. Соосты куятэк нулло лумбытэн, куддыр ӝомыт азьын но куштыны уг дырто. Шунды зэмзэ но укыр зол пиштыку, сыӵе очкиос мальдэмлэсь умой. Умой соос машина валтӥсьёслы но. Но жаляса верано луэ, мода уг ортчы пиналъёс вӧзтӥ: 5 аресъем пинал анаезлэн юбкаез борды ӝабырскыса мынэ ай, нош ныр вылаз сьӧд очки. Сокем сьӧд, куддыръя соос пыр номыр уг адӟиськы. Егит анай азьланяз но нылпизэ озьы шоголляськыны лэзиз ке, 10-15 ар ортчыса, мукет очки басьтоно луоз - лябӟем синъёссэ тупатыны вырыса ёрмоз. Малы мон тае верасько? Кышкатон понна ӧвӧл. Но чаклалэ ай асьтэос - одӥг мурт но синмыз мальдэмлэсь сукыр ӧз кыльы на. Адями ялан сьӧд очкиен ветлэ ке, синъёс жадё, уродмо. Зэм, пӧсь, яркыт шунды шоры но шонер учкыны кулэ ӧвӧл, но вазь ӵукна шунды ӟардыку яке ӝыт пуксьыкуз учкемлэн пайдаез шӧдскымон луысал синъёс понна но, лулсэръёсты буйгатон, мылкыдэз умоятон понна но. Тазалык Уяськод - эмъяськиськод Зэм, пыласьконлэн пайдаез адямилы туж бадӟым пайда вае: со мугор ёзъёслы юнманы- кыданы но кулэезъя ужаны юрттэ, озьы ик буйгатэ нервной системаез. Эсэпсэ валаса пыласькон эмъяськон амал выллем луэ сюлэм но нервной висенъёс дыръя. Пусйыны кулэ, уян - физкультуралэн ог люкетэз гинэ ӧвӧл, со котькуд адямилы туж кулэ луись маке. Висъясько пӧртэм уян амалъёс: брасс, кроль, баттерфляй, тыбыр вылын но мукет. Пыласькыны но уяны кулэ, сиськем бере 1,5-2 час ортчыса. Ӟыдам яке кынмем мугорын вуэ пырыны уг яра. Соку ик быдэсак коттӥськоно. Верам вал ини: уян - со физкультура, соин ик адями вуын выросъёс (движениос) лэсьтыны, ву кезьыт ке - уката шаплыгес. Дырекъяны-куалекъяны кутскиды, жадиды, ымдуръёсты лызектӥзы ке, вуысь одно ик ӝегатскытэк поттоно, угось таӵе дыръя пыласькон мугорлы изъян вал ни. Собере ӵушконэн умой-умой кӧсатӥськоно, но 15-20 минут ӵоже ӵыдэтсконо. Пыласькыны мынӥсьёс одно ик тани тодыны кулэ, кызьы секыт учыръёслэсь утиськоно. Адями уяны уг быгаты на ке, со лазег интыез бырйыны кулэ, нош ву вылын выросъёсты ярдур пала быдэстоно. Шӧкыч Хамелеон Паймымон пӧйшурлэн туссэ вошъямезлы тросэз синмасько, вылды. Оло, солэсь ик адӟем каро ни адямиос но. Озьы Можга ёросысь одӥгаз гурт правлениын Коля нимо воргорон ужа. Калык азьын со котьку чебер вераське, ваньмызлы маке со обещать каре, нош быдэстыны вунэтэ. Пиналъёс но мӧйыос понна вунонтэм кылёз 18-тӥ июнь. Дас одӥгетӥ классэз йылпумъям пиналъёс, соос куинь кузя вал, сьӧрлось гуртэ выпускной вечере мыныны дасяськизы. Машина ласянь вазен ик Коляен кенешизы. Пальпотӥсь ымныро пиналъёс но анай-атайёс та нуналэз, часэз гинэ витьыса улӥзы, но... Дыр вуиз ини, автобусэ пуксьыса, сьӧрлось гуртысь школае мыныны, нош автобус ӧвӧл но ӧвӧл. Озьы, пичи гуртысь выпускникъёс берпуметӥ ӝытсэс анай-атайёсынызы ӵош ортчытоно луизы. Ӵуказеяз Колямы мугзэ валэктыны курадӟиз: - Ма, мон городэ ветлӥ, нош шофёрлы вераны чылкак вунэтӥськем. Мукетыз атайлы, пе, шуэм: - Простить кар монэ, куинь муртлы автобус сётыны ик уг малпаськы вал мон. Нош аслаз ӵыжы-выжыосызлы, пе, ватсам: - Мыным С. К. автобус сётоно шуыса ӧз вера. Дыр ортчиз ни. Бен, янгыш муртэ утчаны бер ни табере. Огезлы гинэ кӧт ӝож, "хамелеон" выллем адямиослэн лыдзы уг кулэсмы. Соос, пичи но кӧбератэк, пӧламы уло, асьмемын кузёясько. Оло, тӥляд но гуртады сыӵе адями улэ? Шонер улӥсь. Можга ёрос. Егит улыны юрттэ... ву Арлыд будэмъя адямилэн мугорысьтыз ву кулэсме: югыт дуннее кылдон азяз нунылэн со - 94 процент ке, 60 аресъем муртлэн - чылкак 60 процент гинэ ни. Пусйыны кулэ, мугорын ву ӧжыт луэмен валче нырысь ик лябӟе ку: со кӧс но кисыриё луэ. Озьы ке но, мугорез вуэн узырмытон амалъёс вань: яке нуналаз 2 литр пала пӧртэм сок, напиток но мунетсэ юыса, яке уже кутыса куэз коптӥсь но юзматӥсь нимысьтыз кремъёсты но лосьонъёсты. Кремдэс маллян азьын, шуныт компресс лэсьтыны быгатӥськоды. Со понна ӵушкондэс веттылэ пӧсь вуэ, пызьыртэ но соин шобырске. Дас минут ортчыса, мугорды ӟеч-ӟеч шоканы кутскоз, солы пайдаё луись веществоос азады мур пыӵалозы. Чибинь нырзэ мертчытӥз Гужем куазь шулдыр но... Но куртчылӥськись нымы-кибыос вань уга. Нош соослы пумит мазьёс дуноесь. Собере гуртъёсын аптекаос но ӧвӧл ук. Ми ӵектӥськом куртчем бере лыдонэз буйгатӥсь суретэз эскерыны. Дасяно сое тазьы. Одӥг мында люкано виртурын, мята но тыпы сул, ваньзэ сурано. Басьтоно сое кык бадӟым пуньы мында, одӥг стакан быректэм вуэн суралтоно но 30 минут ӵоже пӧсь пар вылын возёно. Сӥятоно но сӥсъяно. Дасям суретэн марлялэсь салфеткаез коттоно, сое куртчем интые пононо. Киосаз - сюлэм шунытэз Быръёнъёс дыръя одӥг дышетӥсь залын султӥз но шуэ: "Сюрлы висёнэн курадӟыкум, мон вазиськи Е.А.Чумаковлы. Со мынэсьтым куронме санэ басьтӥз, вань ужзэ куштыса йӧнатӥз монэ". Висёнлэсь мозмытэмъёс туж уноез быгато туннэ тау карыны Ермолай Александровичлы, угось йӧнатскисьёслэн шӧдэмзыя киосы пыр со вань сюлэм шунытсэ сётэ. Ог дышем сямен асьмеос адямилэн вордскем нуналаз ӟеч кыл вераськом, сӥзиськом солы тазалык. Нош Ермолай Александрович вань улонзэ сӥзиз тазалыкез утёнлы.. Дышетсконзэ 1959 арын йылпумъямез дырысен вань мылкыдзэ сётыса тырше Е. А. Чумаков эмъяськон удысын. Калыкез йӧнатон борды нырысь ик кутске фельдшер луыса. Иж карлэн палэназ кылем Кез ёросын олокыӵе но секыт учыре сюремъёслы юрттэт сётыса тырше пинал ӧнерчи. Кулэ луись эмъюмъёс но уг тырмо, аппаратура, приборъёс но огшорыесь гинэ. Гуртысь гуртэ мыноно ке, транспортэз но вань но, ӧвӧл но. Ас киосызлы, ас валамезлы оскыса нюръяськылӥз со олокыӵе но висёнъёсын. Ачиз ик терапевт но, хирург но, син йӧнатӥсь но, пинь кыскись но, пель, ньылон висёнлэсь утись но, акушер но. Ӟырт кезьыт тол куазен но, лёгиськыны луонтэм дэри сюресъёс дыръя но уез но нуналэз чаклатэк ветлоно луылӥз юрттэт сётыса. "Вал уробоын нылпи ваись кышномуртлы но юрттэме вань", - шуэ Ермолай Александрович. Гурт калыклэн тазалыкез фельдшер киын вылэм шуыса валаз пинал ӧнерчи. Соин, дыр, валтӥсь врач луыса ужакуз но нырысь ик саклык висъялляз со гуртысь медпунктъёслы. Солэн кивалтэмез улсын Завьял ёросысь медпунктъёс зэмос амбулаториослы пӧрмизы, шуэ кивоштӥсез Щелконогова Валентина Ивановна. Тын-тын юнмаз ёрос больница но. Ермолай Александровичлэн татчы ужаны лыктэмезлэсь азьвыл кутскемын вал ни йӧнатон комплекс лэсьтон. Нош нокызьы йылаз-пумаз вуттыны уг быгато вал. Лэсьтӥськон удыссы "долгострой" шуонлы пӧрмиз. Нош Ермолай Александрович лыктыса, вакчи дыр куспын йӧнатсконниез но вуттӥз, ужасьёслы квартираос но лэсьтӥз. Вылӥ кивалтӥсьёс синйылтӥзы ӟачча пилэсь (Чумаков водскемын Алнаш ёросысь Варзи- Ятчи гуртын) тыро-пыдо ужаны быгатэмзэ. Кез ёросын тыршемзэ солэсь пусйизы "Удмурт Элькунысь дано врач" нимен. Нош Завьял ёросын тазалык утён удысэз радъямез понна Ермолай Александровичлы сётэмын вал "Россия Федерациысь дано врач" ним. Врачъёс, сестраос туж гажало вал кивалтӥсьсэс, тыршемзэ шӧдыса туртто вал ас ужзэс рос-прос лэсьтыны. Соин, дыр, сокем оске вал Ермолай Александрович ужасьёсызлы. Кыл кутон ужез ас вылаз ке но басьтэ, одно ик кенеше вал больницаын ужасьёсын. Выль адямиез уже кутоно-а, кинэ ке тодон-валанзэ будэтон институтэ лэзёно-а, йӧнатон амалъёсыз, аппаратураез, юртъеръёсыз выльдоно-а, коньдон ужпумъёсы кыӵе ке ватсанъёс пыртоно-а - ваньзэ та ужъёсыз кивалтӥсьмы лэсьтэ вал шара, милемлы оскыса, вера В. И. Щелконогова. Врачъёс пӧлын солэн вал самой ичи уждунэз. Угось дырыз уг ни кыль вал аслыз коньдон дурыны. Гурт администрациослэн йыръёсынызы, ёрос администрациен, министерствоен - ваньмыныз кусып возёно, отын ик аслад завхозэныд, ас больницаедлэн ӧнерчиосыныз ужано. Ачиз со дышетскемын невропатологлы, быгатӥз на мануальной терапевт но луыны. Ми дорын валтӥсь врач луыса ужакуз, шуэ Валентина Ивановна, вылӥ кивалтӥсьёс азьын Ермолай Александрович кыл кутоно луэ на вал "Сепычевский" совхозлэн йӧл кысконэз пумысен но. Ваньмаз вуэ вал, котькуд ужзэ лэсьтэ вал радызъя, рос-прос. Адямилэн тазалыкез понна сюлмаськемзэ шӧдыса, дыр, атайзылэсь ныпъетсэ ас вылазы басьтӥзы нылпиосыз но. Мария Семеновна кузпалэныз ӵошен будэтэм Олег пизы военной хирург луыса Севастопольын ужа, нош Татьяна нылзы Иж карын врач луыса тырше. Ачиз Ермолай Александрович али эмъюмъёсты дунтэмгес карыса вӧлмытон удысын адямиослы юрттэ тазалыксэс утьыны, нош кужмоесь киосыныз пыч-пыч кырмыса йӧнатэ висись сюрлыез. Ойдолэ, гажано иськавынъёс, та вылӥ быгатонлыко эмчимылы 60 арес тырмон нуналаз аслыз но сӥзём тазалык! Кема аръёс ӵоже мед шӧдомы на удалтэм удмурт воргоронлэсь сюлэм шунытсэ, кужмоесь киоссэ! Шудо адямиен артэ улыса, ачид но шудо луиськод. Р. Разин, Удмурт университетысь Адямилыкез эскерон Институтысь социолог. Почтаын ужасьёс 11-тӥ июле асьсэлэсь праздниксэс пусъё Россиысь почтаын ужасьёс. Почталэн туннэ нуналыз, вормонъёсыз но шуг-секытъёсыз сярысь журналистъёслы вераз Удмурт Республикаысь Почта кусыпъёсъя управленилэн кивалтӥсез Ю.М.Кайгородов. Куать ар талэсь азьвыл электросвязьлэсь люкиськыса, асьсэлэсь удыс сэс нимаз азинто соос. Та дыр ӵоже вал умоез но, уродэз но. Тужгес секыт йӧтӥз кылем арын - пенсия нуллэмзы-сётъямзы понна табышсы кулэсмемен (4 процентысь 1,5 процентозь), почта служба соку ик ёрмыны кутскиз, пунэмъёсы пыриз. Мар кароно? Управлениын эскерыны малпазы мукет амалъёсын табыш поттыны, почта услугаос понна гинэ вуись коньдон пунэмъёссэс но ӧз ворсалля уго. Озьы азинскыны ӧдъязы калыклы тужгес но кулэ луись арбериосын, сиён-юонэн, книгаосын, пӧртэм газетъёсын- журналъёссын вузкарон, эксперсс-почта Али шаерамы улӥсьёс почталэн киоскъёсысьтыз 150 пумо газет-журнал басьтыны быгато. Коньдоно муртъёс нош берло дыре дунъяны кутскизы экспресс-почталэсь ужзэ. Йӧно воргоронъёс табере асьсэлэн туганзылы котьку ссяька ыстыны быгатозы - командировкаын дыръязы но. Почтаысь синмаськымон ужасьёс сое туганды доры уин новуттозы. Зьы ик почта пыр кафеысь ческыт торт яке мукет сиёнъёс курыны,нылпиды доры Тол Бабаез ӧтьыны луэ. 1998 арын вузкарон почталы 31 процент табыш ваиз. Азьвыл аръёсы почтае гожтэт, посылкаос ысъям коньдон пырто ке вал, али со чутрак кулэсмиз. Тани 10 ар талэсь азьло Почтамт пыр куддыр нуналаз 52 сюрс посылка ке ортче вал, али ӵемысь чик уг луы. Озьы ик гожтэтъёсын но. Но почтовикъёс та услугаослэсь воксё уг аналско. Калыкез гожтэтъёс ысъяны лӧпыкытъян понна, "Гожтэтлэн арняез", "Шудо гожтэт", "Миллионэтӥ гожтэт келясь" ужрадъёс ортчытъяло, шудоосыз, зэмзэ но, кузьым басьто. Почта котьку ик юн кусып возьылӥз прессаен. Ӵапак почтальонъёс вутто лыдӟисьёс кема возьмам газет-журналзэс. Огвакыт тиражъёс чутрак усьылӥзы, но али соос огсыр возисько, будо но. Кылем ар июлен ӵошатыса, туэ паларе тиражъёс 2 процентлы будӥзы. Та ласянь Почта кусыпъёсъя управленилэсь тыршемзэ ппусйынй кулэ. Гожтӥськонэз ӟечгес радъян понна, отын ужасьёс портэм амалъёс утчало, "Гожтӥськисьлэн нуналыз", "Гожтськисьлээн арняез" ужрадъёс ортчытъяло. Та нуналъёсы гожтӥськон дунъёс юри пичиятэмын луо, нош гожтӥськисьёс пӧлын кузьымъёсын лотерея радъяло. Уж шумпотымон соиз: шаерамы тужгес трос (40 процент) басьто республикаямы потӥсь газетъёсты, соос пӧлын тӥляд "Удмурт дуннеды" но. Оскиськом, кайта аре но почтальонъёс тӥ доры сое дыраз вуттылозы. Чырмытге но тазалыко луыны мылкыд каром соослы, праздникен ӟечкылыса. З. РЯБИНИНА. Ӝоген - Ижын Тодмо кырӟасьмы, аспал эшмы Маргарита Суворова али улэ Москваын. Ӝыны даур ӵоже ини солэн жингрес куараез шумпоттэ кылзӥсьёсты. Тодмо кырӟась та вие малпа классика борды басьтӥськыны. Со сярысь ивортэ "Труд" газет. Та адямилэсь быгатонлыксэ дунъясьёс ноябрь толэзе кылзыны быгатозы сое вордскем палъёсаз - Ижын. В.Рогалев. Сётэмын крезьгурчилэн нимыз Свердловск улосысь Алапаевск городын Чайковскийёслэн семьязы улӥз 1849-тӥ-1852-тӥ аръёсы. Вуоно крезьгурчилэн атаез со вакытэ кивалтӥз Алапаевскысь но Нижненевьянскысь заводъёсын. Татын огсыр улон Воткалан выллем ик вал. Чайковскийёслэн корказы туннэ но сылэ на. Отын 1938-тӥ арын усьтӥськиз крезьгуро школа. Солы сётэмын быдӟым ӟуч крезьгурчилэн нимыз. 1965-тӥ арын татын кылдытэмын музей. Нош 1967-тӥ арын пуктэмын П.И.Чайковскийлы памятник (скульпторез В.Ушаков). Музее люкамын Волга но Урал котырын улӥсь калыкъёслэн крезьгуро инструментъёссы. Соос пӧлын ик - удмуртъёслэн но. Алапаевск сярысь нырысэ поттылэмын 1659-тӥ арын. В.Рогалев. ШӦКЫЧ Пунылы шумпотон, милемлы - куректон Тросэз Ижын улӥсьёс али, ӝӧк вылзы чылкак буша ке, Сенной шуон базаре дырто. Ма, гуртоос но, городэ вуыса, нырысь ик отчы кожыны дырто. Татын угось вузъёс, лавкаосын сярысь, шӧдскымон дунтэмесь. Ми но Палагееным, пенсимес басьтыса, тау Инмарлы, али дыраз сётъяны кутско ни кадь, базартӥ котырсконо кариським. Ветлӥськом, учкиськом, магес басьтыны луоно кадь калыклы вераны возьыт коньдонэнымы. Вузкарисьёс туала арын лякытэсь луизы. Господаосты сямен пальпотыса пумитало. Кыдёкысен вазисько: "Ма утчало меда гажано песянай но песятай?.." - Тани холодильникысь али гинэ поттӥ, - сьӧд мыйыксэ маялтыса, бадӟым сӥль юдэс шоры возьматӥз тӧдьы саесъёсын воргорон. - Тӥ понна нимысьтыз возиськем, шӧдске. Вай-вай... - Кӧня куриськоды? - дӥсьтытэкгес юаськом. - Ветеранъёс понна номырме уг жаля. Вай-вай. - Зарни пиньёссэ ӟар поттӥз воргорон. - Таӵе сӥлез мукетъёслэсь уз шедьтэ. Нош мон соослэсь мултэс уг куриськы. Сюдэм- будэтэм кунянэ асме гольык кельтэ ни вал ке но. Кошкыны турттӥськом ни вал. Воргорон дугдытӥз. - Кытчы тӥ, вай-вай?! Кенешом - огкыл шедьтом. Кияды кутылэ - одӥг сӥль гинэ. - Аслэсьтыз куаса кыллы бырымтэ маке. - Тӥ, тыл но ву пыртӥ ортчем адямиос понна, уськытӥсько дунзэ. Ӧм жалялэ коньдонмес, басьтӥм сӥлез. Ӝыны пенсие вузкарисьлэн кисыяз кӧчиз. Ярам коть, тау карыны валаз. Сӥльды, шуэ, ческыт мед мыноз. Ульчае потэммы бере, Палагее сумкаме кияз кутӥз. Ӝутъяз. - Таид, Ондӥ, вить кило уггес кыскы кадь. - Шорам учкиз кузпалы. - То-то синйылтӥ, - келякуз кескич пальышаз. - Ма, - вазисько, - адямиед оскымон кадь. Ӧз пӧя, дыр. Азямы мертаз ук. - Асьме кадьёсты, Ондӥ, али вамышлы быдэ пӧяло-ултӥяло, - уг сётскы Палагей. - Вай ай мукет вузкарисьёс доры мыныса выльысь мерталом. - Я, ум ни выре озьы, - пумитъяськем карисько. Кытын, пе. Кузпалы я огез, я мукетыз ӝӧк доры мынэ. Мыным сётэм бодызэ но вунэтӥз. Кинлы уг вазиськы, "Мертаны лэзёды-а?" шуэмез кыло гинэ, вань гиръёссэс пыдлогес вато. Ми, шуо, вузкарон тӥрлык понна коньдон тыримы. - Юнме дырдэс быдтӥськоды, - ма муген ветлэммес адӟыса валэктӥз микадь ик пересь басьяськись. - Татын тӥ сӥльдылэсь зэмос секталазэ ноку но уд тодэ. Ваньзылэн сослэн гиръёссы я пушкыз портэмын, я капчи кортлэсь нимысьтыз кисьтэмын. - Ойдо ӵок ини, Палагей, - буйгатӥсько кузпалме. - Сю, кык сю граммез отчы, я татчы - со но, асьмеос но ум узырме. Гуртамы вуыса, Палагее валэктэ: - Тае тон ӧжытак юн но кубистаен суро кора. Огпол коть, азьвыл дыръёсы сямен, пельнянь сиём. Кӧня ке шунамез бере, базарысь ваёсмес киям кутӥсько. Ма-ма... Ма адӟон та? Ӝӧк вылэ кылиз табань зӧкта сӥль шорет, нош киям - пересь коблалэн саур лыэз быдӟа моклок. - Остэ, Инмаре! - лаб чабкиськиз Палагее. - Лы борды сӥль юдэс кынтӥллям ук, чатранъёс. Нош ик конгыльтӥмы базаре. Тодмо вузкарисьмес кыдёкысен адӟыса, капчи лулским. Возьматом ай, пе, ми солы, кытын "каракаос толъё". Тон, возьыттэм ымныр, шуиськом, ми кдаь куанеръёс чотын узырмыны турттӥськод. Милемлы вузам лыэд аслад ньылонад мед ваменскоз. - Мар, мар? - воргоронлэн мыйыкез коӵышлэн кадь ӵогырскиз. - Кызьы дӥсьтӥськоды сьӧлыктэм адямиез мыскыл карыны?! Иськавынъёс, вай-вай, - вазиськиз котырысьтыз воргоронъёслы. - Та кык гур суранъёс кытысь ке качам моклок вуттӥллям, интыяз мынэсьтым сӥльме куро. Рэкетиръёс! Юрттэлэ! Милиция, дружина, ӝоггес татчы!.. Мышкамы кема кылӥськизы на милемды ноку но озьы ултӥямтэ жоб кылъёс. Палагее али но нуналаз куинь-ньыль пол юэ сюлэм кутэмлэсь эмъюм. Мыйыко адямиос котыре, шуэ, пыдме уг лёга ни. Нош моклокмес кытчы каримы, шуиськоды-а? Мон сое колунэн мырдэм пыргытӥ. Бобикмылы туннэ ке но шыд пӧзьтӥськом. Ма бен, со шумпотэ. Нош ми пересеным куректӥськом: вуоно пенсиозь нош ик нянь но картофка вылэ кылим. Пельняньтэк кылем Ондӥлэсь верамзэ гожтӥз Н. Долгов. Пиосмуртъёслы Эрослэн рецептъёсыз Чечы сиёд - чечым кӧлод Быдэн 100 грамм курагаез, изюмез но инжирез векчиятоно, 200 грамм пыргытэм пушмульы ватсано но 100 грамм чечыен суралтоно. Нуналаз 1 пуньыен сиёно. Сугонэн йӧлпыд - пинал мылкыд Вож сугонэз, укропез, петрушкаез, сельдереез векчи юдыса йӧлпыдэн яке кефирен суралтоно, сылал. (вань ке - пушмульы) ватсано. Сиёно кезьытэн. В.Щеглов. Шӧкыч Эркын лэзем вал сямен дунъёс ялан будо. Берлоез шуккет луиз автобусэн мынӥсь- ветлӥсьёс понна. Городысь администрацилэн решениезъя, 1-тӥ июльысен дун будӥз городъёсын автобусэн но электротранспортэн ветлонлы. Табере со 1,5 манет луиз. Нош город сьӧры ворттылӥсьёс иськемезлы 25 копейка тырыны кулэ. Кылсярысь, Завьял ёросысь Кеныын сад-бакча возисьёс нуналаз 7,60 манет быдто. Озьыен, толэзяз быдэс уждунзы отчы кошкоз. Ма веранэз ини кыдёкысь гуртъёсы ветлӥсьёс сярысь. - Бускель! Пӧсямед, лэся, ни. Ме, коть ву ӟузь! Сюресэд кузь на. Валэктэ юрист Сэрегез дася адвокат Лилия ШКЛЯЕВА Анае кельтӥз коньдон Мынам анае Шалашова Матрена Михайловна вордскемын 1918-тӥ арын. Кулӥз 1996-тӥ арын. Кылиз сберкассае тырем коньдонэз. Со завещаниея мыным кельтэмын. Мон ачим али нырысетӥ группаен инвалид. Уз луы-а со коньдонэз мынам али басьтэме? Виталий Коколов. Алнаш районысь Удм.Гондырево гурт. Россия Федерациысь Правительство 1998-тӥ арын 30-тӥ июне юнматӥз 677 номеро постановление. Отын верамын 1991-тӥ арын 20-тӥ июньлы Сбербанкын кыллись коньдонлы нырысетӥ компенсация тупатон сярысь. Со пумысен кутэм закон нимаське тазьы: "Россия Федерациысь гражданъёслэсь коньдонзэс (сбережениоссэс) берыктон но утён сярысь". Али сое басьтыны быгато: 1920-тӥ арозь вордскемъёс (пӧлазы 1920-тӥ арозь вордскемъёс - нырысь черодын кельтос (наследство) басьтӥсьёс; нырысетӥ группаен инвалидъёс; коньдон кузёос кулыны шедьыку, соосты ватон понна 1 сюрс манетозь. Нырысетӥ компенсация сётӥське Сбербанклэн филиалъёсаз 1991-тӥ арын 20-тӥ июнёзь понэм коньдон понна. Сое курыны быгатэ вкладчик, кельтос (наследство) басьтӥсь яке соослэн адямизы (представительзы) тупатэм радлыкъя лэсьтэм доверенностен. Законъя, Коколов эш, тӥляд сыӵе праводы ӧвӧл на. Ас палъёссэ уг вунэты Миым Киясын, тодмо художниклэн-баталистлэн П. А. Кривоноговлэн вордскем палъёсаз, усьтӥськиз солы сӥзем музей. Отысен ик тодматски мон суредасьлэн выныныз Александр Александрович Кривоноговен. Таиз трос аръёс ӵоже улэ ни Екатеринбургын. Александр Александровичен кенешыса валай: мон азьын - туж аспӧртэмлыко адями. Вордскем палъёсаз кызетӥ-куамынэтӥ аръёсы улэм адямиос сярысь со кылдытэм "Киясовские были" книга. Алигес ачим но вуылӥ Екатеринбурге, выльысь пумиськылӥ суредасьлэн выныныз. Александр Александровичлытямыстон ньыль арес ни. Озьы ке но, ӟеч тодэ на пичи дырзэ. Кривоноговъёслэн семьязы трос нылпиё но куанер вылэм. Александр Александровичлэсь атайзэ 1919-тӥ арын быдтӥллям белочехъёс. Нылпиосызлы кураськыса, калык пӧлтӥ мычем киын ветлоно луылӥз. Озьы ке но, олокыӵе но шугадӟонъёс ӧз тӥялэ Кривоноговъёсты - соос мылысь-кыдысь кыстӥськизы дышетскон борды. Сюлмо вал Саша но. Покчи классъёсты йылпумъяса дышетскиз Гольяныын, собере - Сарапулысь совхоз-техникумын. 1933-тӥ арын вуиз кыдёкысь Алтае. Татын егит агроном ужаз одӥгаз эштосын. Озьы ке но, вордскем палъёсыз доразы кыскизы. Киясэ берытскыса, армие кошкытозяз агроном луыса ужаз. Службаез дыръя ассэ ӟеч ласянь гинэ возьматыны тыршиз. Озьы ке но, янгыш уськытонзылэсь палэнэ ӧз кыльы. Дас ар ӵоже чидано луиз ГУЛАГ-лэн лагерьёсаз. Екатеринбургын поттэмын "Жертвы и палачи" книга (авторез - Ф. И. Мартыномев). Отын верамын А. А. Кривоноговлэн но курадӟемез сярысь. Янгыше уськытэмъёслэн Свердловск улоысь огазеяськоназы ужакуз, А. А. Кривоногов тодматскиз Кумырса гуртын вордӥськем Мария Степановна Гусеваен (азьвыл Глуховаен). Свердловск улосэ келяллям сое куамынэтӥ аръёсы. Ваче кенешонъёс, архивысь матералъёсын тодматскон юрттӥзы "Кумпреинская правда" очерк кылдытыны. Кияс райгазетэз лыдӟисьёс сое туж ӟеч мылкыдын пумитазы. Гожтӥсь мадиз аспал эшъёсызлы та гуртлэн ортчем сюресэз, солэн нырысетӥ улӥсьёсыз - Костромитинъёслэн но Краснопёровъёслэн семьяоссы сярысь. Трос улӥз ни, трос тодэ ни Александр Александрович Кривоногов. Ваньмыз сярысь верамез потӥз вордскем палъёсысьтыз адямиослы. Нош малпанэз одӥг: гожтоно ӟеч но лыдӟымон. В. ЛАГУНОВ. ТАЗАЛЫК Инмарлэсь - эмъюм Туала арын калык выльысь берытскыны кутскиз инкуазь пала. Табере эмъюм но эмъяськон амалъёс но отысь утчало. Фитотерапия (турын-куаръёсын, будосъёсын эмъяськон) тодмо вашкала дырысен. Адямиос ас вылазы эскерыса тодылӥзы соизлэсь яке таизлэсь будослэсь пайдазэ. Эмъюм дасясьёс турын-куарез туж тодыса-чакласа, куинь пол кыл вераса бичаллязы: "Господи, бакельдэ сёт! Тон но, анай-музъеммы, та турынэз ишкалтыны бакельдэ сёт. Тон будэтӥд сое адямилы пайда сётон понна, Соин ик мон ишкалтӥсько... Музъемлэсь - турын, Инмарлэсь - эмъюм. Аминь!" Эмъюм турынэз бичано сюресъёслэсь иськемлы, городъёслэсь - 20-30 иськемлы палэнысь. Турын-куарлэн эмез мед луоз шуыса тодоно солэсь бичан дырзэ. Кызьпу, пужым, тополь бычыосты бичало вазь тулыс (март-апрель толэзьёсы), тордэм дыръязы. Куасьто салкым, тӧло интыын. Бадяр, лулпу, сул дасяло тулыс. Выжы - сӥзьыл, куар усён вакытэ. Турын-куарез, сяськазэ бичано кӧс куазен, ӵукна, лысву тӧлӟем бере. Куасьто ышыг азьын. Кисьмам емышез бичано озьы ик ӵукна яке ӝыт, лысву усьытозь. Куасьтон азьын кык нунал шунды шорын возёно, собере 70-90о С гурын куасьтоно. Йыр висён гумы, тӧдьыгырлы сяськаосты бичаку, чакласькыны кулэ: миськымтэ киосыныды эн йӧтскылэ ымнырды, синъёсты борды. Палэнтэ сое нылпидылэсь. Котырысь инкуазьлы изъян ваёнтэм вылысь эн ишке эмъюм турын-куарез арлы быдэ одӥг интыысь, бичан интыяды кельтэ кидыслы кӧня ке сяськаясь яке емышась будосъёсты. Я, турын-куар бичады, табере сое эмъюмлы пормытоно. Тани мынам кӧня ке ӵектонъёсы. Паросъёс дасяно одно ик эмаль яке горд сюй посудаын, кортлэсяз уг яра. Со сяна, умойгес луоз, паросэз пулэсь, куролэсь тылскем вылын дасяса. Пӧземез бере, паростэс сӥсъялэ. Юоно шунытэн (пӧсен уг яра). Дорын паросъёс лэсьтыны уг яра кужмо ядо турын-куаръёслэсь. Валатэк лэсьтыса, тӥ тазалыктылы кышкытлык гинэ ваёды. Соосты дасяло аптекаосын. Нош кислород коктейлез тӥ каньылэн дасяны быгатоды дорады но. Пыргытэм турын-куардэс, марлялэсь пуйые поныса, кезьыт вуэн кастрюляе куштэ. Пытсэтэн ӵоксаса, ляб тыл вылын 7-10 минут быректытэ. Собере 7-10 час ӵоже пукетэ, марля пыр сӥсъялэ. Паросады йылтэ емыш сироп (умойгес луоз легезьпу мульылэсь), 1 литр парослы 100 грамм курег пуз тӧдьы. Ваньзэ тае, сиён-юонэ кисьтыса, кислородэн тырмытэ. Турын-куарен эмъяськон али тужгес но каньылэз но дунтэмез. Но асьмеос тодамы возьыны кулэ: тазалыкмес утён - со висьыкумы эмъяськон ӧвӧл, со висёнэз алон, таза улыны тыршон. Нюлэскы мыноно чылкыт малпанъёсын, ӟеч мылкыдын, шумпотыса. Адями оскыны кулэ ненег турын-куарлэн йӧнатон кужымезлы, соку нюлэскы ветлэмды тӥледлы, зэмзэ но, пайдаен гинэ берытскоз. И. Девятых, врач. Иженеръёс шудтэм учырын Туэ Удмурт кун университетысь физической факультетын усьтӥськиз выль кафедра. Со нимаське тазьы: "Секыт югдур но кризис дыръя кивалтон ". Вить ар дышетскем бере студентъёс басьтозы сыӵегес нимын ик специальность. Озьы ик татын луоз куать ар ӵоже заочной люкетын дышетскыны. Табере университет дасялоз аспӧртэм инженеръёсты. Соос быгатозы пӧртэм юанъёслы валэктонъёс но нырысетӥ юрттэт сётыны. Сыӵеослы номыр кышкыт ӧвӧл: чилекъян-гудыръян но тылпу, ву тудӟон но пелляськон. Выпускникъёс оло пыриськозы наукае но дышетон уже. Со сяна соослы сётӥсько ожмаськонъя но инкуазез утёнъя тодон-валанъёс. М.КОСТЫЛЕВА. Инсьӧре сюрес "Инсьӧрен герӟась гож". Тазьы нимам аслэсьтыз берло выставказэ Касим Галиханов. Та адӟытонэз солэн радъямын вал - нырысьсэ - ужан интыяз, "Удмуртгражданпроект" институтын. Архитектор, дизайнер, график, скульптор - со эшшо огпол усьтӥськиз ас быгатонэзлэн пӧртэм палъёсыныз. Кызьы тодӥськом, К. Галихановлэн проектъёсыз - Пичи Пургаысь калык творчествоез азинтонлы, шаерысьтымы ошмесъёсыз чылкытатон-чеберъянлы сӥземъёсыз - вормисе потылӥзы быдэс Союзын, Россиын но Венгриын ортчылэм конкурсъёсын. Удмурт театрлы проектэз но республикаямы нырысетӥ премиен пусъемын. Озьы ик "Зодчество-96" фестивальын одӥгез устоез шуыса лыдъямын удмуртъёслэн вӧсяськон интызылы - Быдӟым куалалы проектэз. "Шундыкар" лагерьын ужаса, К. Галиханов Россилэн зодчествоя конкурсаз дэмлалляз нылпиослэсь ужъёссэс но. "Кузьыликар" студиысьтыз пинал архитекторъёс кылем арын басьтӥзы нырысетӥ степенё диплом но нырысетӥ премия (азьвыл араз - кыкетӥ премиез). Ас утчаськонъёсыныз та адями весь азьлань мынэ. Графикая ужъёссэ нырысь ик поттӥз ас гурт калыкез азе, Башкортостанын. Собере "пӧрмытсконъёссэ" возьматӥз Москваын, архитекторъёслэн Шор юртазы. "Ин юбозэ" адӟизы Ижевскын Выставкаосъя залын. Нош туэ ӝыны ар куспын Галихановлэн ньыль (!) адӟытонэз вал ни. Ньыльдон аресозяз вырйылэ ӝутсконэзлэн тубатъёсыз: "Зерно четырех стихий", "Этнографика пространства", "Образ. Знак. Символ" но "Космическая диагональ". Музъемысь выжыос борды тып-тып кырмиськыса, Шунды доры кыстӥсько Быдӟым куалалэн сэрего-сэрего йылъёсыз. Удмуртъёслэн та луыны кулэ лул кужымзэс огазеясь юртсы, татын ик - дуннеез пыкъясь Ин юбо... Огшоры адями лӥяллэсь-улвайлэсь сумбырес палзэ гинэ адӟе. Нош К. Галиханов понна пулэн гожъёсыз - со быдэс дунне, пӧсь кужымо пусъёслэсь кылдэм дунневыл. Со пумтэм- йылтэм кыстӥськись гож, удмуртлэн толон, туннэ но ӵуказе улонэз. Вашкала удмурт пусъёс-лыдпусъёс - со огшоры гопчем бервыл гинэ ӧвӧл - со куинь сюан гуръёслэн (вордӥськонлэн, зэмос сюанлэн, кулонлэн) асьме вакытозь шуккиськыса кылемзы, со вань выжыосыз возись, музъемез инбамен, инсьӧрен герӟась кусып. Нош пӧртэм фирмаослэн знакъёссы - "Крезь", "Бурд", "Азвесь", "Чипсон", "Дарт" - со туала тодметъёс гинэ ӧвӧл, со туннэ нуналлэн вашкалаеныз герӟаськыса кужым люканы тыршемез. Чылкыт гожлэн шокамез адӟиське котькуд графической листын. Художник кызьы кутскиз гожзэ, озьы пумозяз нуиз-котыръяз но вуттӥз ас малпанэз дорозь... "Сӥзьыл мӧзмон", "Уретэм лобӟон", "Чиптэм-чаптэм гожтэтъёс", "Акшан", "Шудбур тылы", "Музалэн ӟыгыртэмаз", яке - "Калмезысен Ваткаозь", "Калмез вадьсын", "Быдӟым шурлэсь куриськон", "Вӧсяськон", "Воршудъёсыз утись", "Выжыослэн ӧтемзы" - ваньмыз со сильтӧл (инсьӧр?) кужымен поръятэ, бинялтэ, пӧртэм малпаськонэ вуттэ. Автор сьӧры мыныса, солэсь образъёссэ - пусъёссэ, символъёссэ, мифъёссэ валаны тыршиськод. Ваньмызлы со уг усьтӥськы. Шонерзэ ке - аслыз кылдытӥсьлы (авторлы) гинэ, дыр. Ас Алтау гуртысьтызы Люза Бадретдинова кылбураз гожтэм сямен, Касим Галихановлэн но "сизьым полэс малпанэз, тямыс полэс осконэз". Бен, осконэз художниклэн эшшо но бадӟымгес: - Ин юбо кадь адями асьме пӧлын луыны кулэ. Огзэ ӝутэмлэсь кышкано ӧвӧл. Со ас идеязэ мед пыӵатоз калыкмылы. Сотэк асьмеос вылэ ӝутӥськем нация луыны ум быгатэ. Т. ПЕТРОВА. Архитектор, суредась Касим ГАЛИХАНОВ. Графикая ужъёсыз: "Инсьӧрен герзась гож", "Пыр улонлэн бергатӥсез". ТАЗАЛЫК Кин тодэ эмъюм амал? Мон кемаласьгес ни сюлэм астмаен курадӟисько. Туж тодэме потэ та висёнэз эмъяны калык амалъёсты. Оло, газет пыр валэктозы тодӥсь муртъёс яке мынам кадь висёнэн курадӟисьёс. Оскыса А.П., Алнаш ёрос. Кияса ёросысь Кумырса гурт алигес пусйиз кылдэмез дырысен кык сю ар тырмонзэ. Трос калык люкаськылӥз татчы. Вуылӥзы гуртын вордӥськем но будэм адямиос, та чебер улосэн герӟаськем муртъёс, ӧтем куноос. Гуртэз кылдытӥллям кужмо но кышкасьтэм адямиос. Дас тямысэтӥ даурлэн пумаз та пала вуиллям соос, музъем утчаса. 1799-тӥ арын Кумырсаын вылэм ни дас пала юртъер. Нырысетӥ адямиос лыктӥллям Сарапул палась. Соос вылӥллям Усатовъёс, Красноперовъёс, Замараевъёс, Жижинъёс, Пермитинъёс, Зубковъёс, Каргапольцевъёс, Шадринъёс, Быковъёс, Глуховъёс, Каракулинъёс. Гуртын улӥсь калык шудзэ шедьтэм, музъем ужен вырыса. Со сяна, куд-огез куиськон станок, корка пушлы ярась тӥрлык йӧндырылӥллям. Кумырсалэн сьӧраз туж данъяськылӥллям гуртысь лэсьтӥськисьёс, сапег вурисьёс, вышкы пӧрмытъясьёс. Куд-огез ку посо, гозы пуно, сапег гындо, горд сюйлэсь гур азь палан куштӥськись тӥрлык, дӧдьы, уробо лэсьто, сир пӧзьто, эгыр суто вылэм. Туж дано удысэн лыдъяськылэм дурисьлэн ужез. Кумырсаысь трос калык кошкем граждан ож дыръя, кулаке поттыку, быдӟым тылож аръёсы. Кошкылӥллям городъёсы, лэсьтӥськонъёсы, уноез семьяосынызы - Сибире. Быдӟым тылож дыръя фронтэ кошкем сюлэсь ятыр адями. Соос пӧлын нылъёс но: К.К.Быкова но Е.Ф.Зубкова. Фронтысь берытскем куамынэз гинэ. Уноез ивортэк ышиллям, концлагерьёсын быриллям, госпитальёсын кулӥллям. 50-тӥ аръёсы колхозъёсты бадӟыматӥзы. Кумырса нырысь-валысь огазеяськиз Кады- Сальяен, бӧрысь одӥг колхоз луиз быдэс Кырыкмассьӧр. Туннэ Кумырса - ёросысь тужгес кыдёкысез гурт. "Рассвет" колхозлэн та бригадаяз лулысь-сюлмысь ужало механизаторъёс, пудо утисьёс, мукет удысъёсын тыршисьёс. Вань школа, медпункт, магазин, клуб. Зэм, шумпотонэн артэ трос сюлмаськон. Юрмалай (Ермолаево) гурт кенешлэн тӧроез М.Ф.Корнева верамъя, та палан ӧвӧл ӟеч сюресъёс но улон интыос. Озьы ке но, гурт утиськыны кулэ. Гуртсылы кык сю ар тырмемен валче, кумырсаосты ӟечкыланы ветлӥзы ёрос кивалтэтлэн тӧроез Г.Г.Каримов, "Рассвет" колхозлэн председателез П.Г.Петров, Депутатъёслэн ёрос кенешсылэн тӧроез Н.Д.Шатрова, писатель П.Ф.Куляшов, Удмурт Элькунысь Калыкез дышетонъя министерствоын ужась В.Н.Вахрин, мукет адямиос. Юбилей дыръя. Мударис Менладшинлэн туспуктэмъёсыз. ШӦКЫЧ Вячеслав Ар-Серги "Ёк-макарёк (моноспектакль) Александр Перевозчиковлы сӥзисько, Артистлы. Сцена вылын синучкон гинэ. Кукъёс вылын гинэ сылэ. Кытысь ке кылӥське лунгыр- лангыр куара. Кырӟамъяське. Урамын пуны утэ. - Онисья, Онисья, шуисько, тылэз ӝуаты-ай корказьысь. Коть син-мад донгы, ява. Ӝуаты тылэз..! Мыным кулэ "луч света в тём-ном корказе". Ёк-макарёк! Пыре пересь пиосмурт. Со - Макар. Пенсионер. Колхозын вань улонзэ тыршем адями. Пыре со пыдесъяськыса. - Онисья, шуисько, марлы тылэз ӧд ӝуаты? Уд вазьылӥськы-а? Ну и эны! (кырӟа). Куке но мон вал, дыр, Туж етӥз воргорон Ӧй тодылы мон Куректонэз-бӧрдонэз. (Ик! каре.) А мон бусён доры пырай, вот! Гурт со пала. Толон парсьсэ пач-катыны юрттӥ вал - утялтӥз туннэ! Так что - али монэ не трошь! Мон - шӧмо! Эктыны выре. Усемъяське. Сак кылзӥське. - Онисья, пыдме вонялтӥ кадь... Учкы ай... (сюлворем каре). Тани, тани татӥяз вӧсь луэ. У-ух вӧсь ук, ёк-макарёк! Возьма. Собере лулскыса султэ. - Дождёшься, пе, тынэсьтыд ӟеч кылдэ! Ну, прак ведь тон муры скал кадь... Я кереты-а, мар-а ни? Кӧтын капчигес луоз. Собере лыктэ синучкон доры. Ассэ адӟе. Мыкыръяське. Аслыз ачиз юан сётэ, валэктэ но. - Ӟечбуресь, Макар Кузьмич! - Ӟечбуресь. - Куазь жобаське, лэся, педлон? - Ӧжытак жобаське ни. - пеймыт корказьын пыддэс шуккиды-а? - Ӧй. Югыт коркан. Вольыт пол вылын ӵемтӥ. - Ну, ничо-ничо. Валлэн ньыль ке но пыдыз, со но ӵемтэ, шуо. Мар ке мылкыдды не оченьгес кадь? - Кышноос! Кышноос быдто улонэз. Макар Кузьмич... Тани мынамез куинь нунал монэн уг вераськы ни... А мар понна. Пыӵ сурттэм понна! Кышнопала пыддэ ик эн лёга ни. Гулбечысь ӝыны литразэ шедьтӥм Педор бускелен - и ликвидировали! Педорлэн внукезлэн бен арез вал. Олёшезлэн, кудӥз со Чечняязы быриз. Ёк-макарёк, прости господи! Нош буре вайыны номырин. Педорлэн кышноез райцентрысь больницаын, солы Педор мешок картош но куинь сукыри ас пыжем няньзэ нуиз вал. Мар-о карод на? Пенся ӧвӧл ни ӝыны арзэ... Нош бырем солдатэз буре вайыны - святое дело! Мон ведь со Олешез таӵе дырысеныз тодӥсько вал... Ну, и Педор бускелен разведка ортчытӥм юрт котырын. Шуисько аслым: "Макар, тон партизан, тушмонэз шедьтоно". Тодско - Онисьяе, пу вайыны шуыса, ӝыны митрей басьтӥз вал, сӥзьыл картошмес "сьӧдъёслы" сдатьтэм уксёен... Табере, пе, нюлэскысь пудэ ачид салачкиен вайылы... А мар-о? Ваё... Йӧн- йӧн коръёс милем нокин уз сёты, векчи ньӧръёс - секыт ӧвӧл!.. ... Тӥни озьы... Приговорили ми Педор бускелен со ӝыны "митреез", значица... Солы гинэ луыса - семейной благополучие куашказ, ёк-макарёк луиз! Тӥни - куинь нуналзэ уг верасьскы... Тон... 45 ар ӵош улӥськом ни... Нош Онисья ялан азьло кадь ик... Так... табере арня уз вераськы... Собере косъяськыны кутскоз, нуналаз дасо кыл вераса. Кыкетӥ арняяз быдэс ӝыт куэз ниыса керетоз... Собере буйгалоз... Мукетыз югдурозь... Календарь кадь, ява... Сьӧд нуналъёс, горд нуналъёс... - Онисья, сиён кодь пӧсьтӥд-а? Кеносын сезьы кеньырмы вал на ук ӝуклы... (Чус). - Иське, значица, номыр пӧсьтымтэ. Нош кӧтын юмыра ик ини... Ма, ӵукназэ чай гинэ ю ай сакыртэк... Нош кытын быдэс нунал ветлӥд, шуиськод-а? Кытын? Миклай Илля доры пырай - солэн скалэз таки кунянаны уг быгаты... Собере Иллялы пу писъёс пыртӥ... Нылпиосыз уг бертыло. Кыдёкын уло - атайзэс эскерыны уг быгато. Коньдон но йок! Кусын висе Миклай... Уг султылы. Гурзэ эстӥ. Выжзэ ӵужем кари... Тау карыса бӧрдӥз, ява... А ведь завфермой вал... Начальство. Нош кытын ӟамыртӥ, шуиськод-а? (Сипыртэ.) Да пияла кадь чылкыт мон, ёк-макарёк! Малпай шӧмо кариськыса пыро, нош кышно соку ик керетыса ымзэ усьтоз... Собере адӟоз - сазь! Озьы ик кӧтыз берытскысал. Но! Маскировка ӧз пӧрмы, лэся. Мар сярысь мон верасько вал..? А-а, Илля Миклай доры пырай... - Онись, тон ведь тани ӧд юа, кызьы ми Миклай Иллялэсь парсьсэ ваньмытӥм... У-у, чисто родео кадь вал ведь. Парсез солэн гурезь быдӟа. Айы, вылаз ик. Нош кӧез - кикур пасьта-зӧкта, ява. Люкаським ми куинь кузя... Собере эшшо лыктӥзы на Петрован, Бӧчы Серга но Тури Ладьмер... Илля соку ик тусе, ясно дело, ӝыны ведра сопкетон кисьтӥз, парсезлэсь пельсьӧрзэ бичатэ, корма... Петрован шуак кутскиз ук азь бур пыдыз борды но кыскиз. Парсь усиз, ми со вылэ. Олокызьы мар Илля-то со кабан улэ шедиз. Со котьку небыльток вал, ньылетӥ кышноен ке но улэ - ачид тодскод. Кышно ляльчи со! Парсь жир! кесяське, Илля шимес вузэ со улын! Ёк-макарёк, ява. Олокытын парсез, олокытын Илляез... Петрован кесяське: "Илля кудо, мар каром?" Илля ӝуштэ: "Вандэ ни, вандэ, сволочъёс!" Нош кинэ вандод? Петрован Бӧчы Сергалы кеське: "Вай пуртэз". Ёк-макарёк. Нош пуртэз вунэтскеммы. Илля малпаз - Петрован кутӥз. Петрован малпаз, Тури Ладьмер кутӥз шуыса. Илля как кеськиз ук кышноезлы: "Феня, пурт вай!" Нош соизлэн вирез адӟем уг луы - пегӟем кытчы ке. Оло, пӧй, куала ватскиз. Куара бырытозь кесяським: "Феня, пурт вай!" Час пала. Парсь ыргетэ, Илля ӝуштэ, ми - пӧсям. Феня бускельёс доры парсь ӵушканлы потэм вылэм. Кылӥз ик ведь, албасты! Вуиз. Парсед нош, ява, пуртэз адӟыса, как зурскалскиз ук - ми кучапиос сямен пазьгиським. Собере мырдэм но кызьы куала ик пырим - кенешыны, мар карыны. Петрован шуэ - участковоез ӧтёно, пе. Илля соку ик чигиз: "Да со участковойлэн пистолетаз куке но патронэз вал-а, мар-а, пе?" Бӧчы Серга шуэ: "Пӧйшурась Микитэз, пе, ӧтёно. Мед ыбоз парсез кымесаз ик". Нош Тури Ладьмер соку ни валэктӥз: "Микит, пе, туннэ ачиз нюлэскы шуса, пыӵалэныз кошкиз. Кык нуналлы. Чимошур Матрон дорын ик, дыр, юмша. Собере Илля токен шуккыны малпаз. Петрован нош пумит луиз - миым солэсь пунызэ токен шуккыса виизы ук. Озьы, пе, нечеловечно! И да... Онись, ӝытозь ченгешим, ява. Милемыз жаляса Феня, ява, кык пол мусурзэ поттылӥз гуысь. Вала ситуациез! Визьмо кышномурт. Азбаре потӥськом - парсьмы бызьылэ, ява. Но мар ке но пичигес луэм со - куректыса, дыр. Пудолэн но сюлэм шӧдэ ук. Живо-два сабим сое. Пурт но сюриз. Ярам, ӵушкаськом ни. Феня вуиз но как! тыбыръёс кузя карнанэн ворттылыны кутскиз ук. - Пуны ымныръёс тӥ, коӵыш пузъёс! Тулысвыл парсьпиез бызьылытыны поттӥ вал! Вандоноез гидын ук! Вот сыӵе осечка. Эх... Судьба ни со - адӟон, значица. Мар карод? Парсьпиез октӥм- калтӥм, буре но ваёно луиз. Жаль ик со парсьпи... Кыӵе бызьылысал ай, нурскетысал ай, кыедаз чапыльтысал... Шудтэм лул. Вот, Онисья, тон но куинь нунал монэн уд вераськиськы ни... Куинь нунал пӧсь шыд сием ӧвӧл ни. Со парсьпиез ми жаляса кодь буре ваим, нош монэ кин жалялоз?.. Уд вераськы... Ну и эн вазьы - воксё но возьытэд ӧвӧл ни ке. Депутатъёс сямен бырйись калыкедлэсь пегаса ветлӥськод - крыть-то нечем! (Солань-талань ветлэ, учке.) - Нош асьмелэн мудормы воксё тузонӟем ук ини, Онись. Чонари вотэсэз но адске кадь... Яке уг-а... - Тае-тае Илья адӟысал ке - вожпотэменыз пилиськысал, дыр. Со ведь табере воксё оскись адями луиз. Паймод та улонлы, шу. Со Илля ик секретарь парторганизации вал, завфермафаын ужаз, начальство вал. Сурон сапегез ми сямен ӧз нуллы - ялан кунян кулэсь гинэ. Кисыяз "Правда" газет донгылӥз - толэзьлы бергес ке но - сё ровно, пропагандис. табере Иже черке ветлэ, кыӵе ке попен тодматскем но соиз удмурт сен черк книга сётэм таизлы. Азьло Иллялэн ӝӧк вылаз Ленинлэн книгаосыз тузонӟизы, табере - Бадӟым киросоез. Вот так-то вот! Кышноез тӥни пиез доры кунояны мынэм - Илля, значица, огназ али. Огназ ке но - пудозэ уг аналты. Солэн табере вань улонэз - черкъя гинэ. Ошсэ Авраам шуэ, айы парсьсэ - Давид, коӵышсэ - Исаак, пунызэ - Иуда, ас кышнозэ - Рашель шуэ. Со гинэ ӧвӧл. Азбарзэ но - Самасия шуэ, гур муръёзэ - Иерихон, бакчазэ - Гоморра. Юасько, марлы, пӧй, озьы карид но. Шуэ - медам, пе, вуны. Нош закоддэ, пӧй, кызьы шуиськод - алтарь-а, мар-а... Ӧвӧл закодлэн, пе, нимыз озьы ик кылиз - президиум. Ачиз кызэ. Святой книгазэ ялан нырысетӥ бамзэ учкылыса возе - лыдӟисько, пе. Ну, мон солы ву пыртӥ, гурзэ эстӥ. Учкисько - гур сьӧраз вуӵыр карыса флягаен бражкаез пуке. Шуисько - Илля, пӧй, уртчоз ук соид, лӧтсано вал кӧня ке, сёт вал мыным ог кобыдэ жадем вылэ. Со нясь-нясь ымнырзэ кариз но шуэ - "Сын мой, пе, бог тебе подаст". Собере киосыныз шонаны кутскиз. Озьы ик кошкиськиз. Мар шуод ини - Илля со Илля ик вань. Ӵуказе районысь, шуом, косон вуоз - - вань книгаослэн (кыӵеосыз вань) нырысетӥ страницаосыныз президиуме ветлоно! Нош со - нош ик в первых рядах луоз. Пельёс солэн ба-адӟымесь, соку ик пельтӥсь тӧлъёсты шӧдэ. Визьмо адями! А ведь пинал дыръяз балда балдой вал. Кӧня сое кузгатъязы нырысь мурт улмо садъёсы, собере мурт кышноос доры нюлышскылэмез понна. Вань собраниосын азьло ӟуч сен шенгыльтӥз, удмурт медам кожалэ шуса, табере ас кылзэ но тодаз ваем. Визьмо ик адями со Илля. - Нош мон кыӵе вордски, сыӵеен ик ваньмытско ни, дыр. Онись. (Лулӟе.) - Кылӥськод-а, уд-а, Онисья, шуисько. Уд вераськы-а? Я, эн вазьы, иське. Дырыз ӧз на вуы на... А мон сё ж таки шумпотско - ваньмыз воштӥське, нош тон кыӵе вал - сыӵе ик. Куинь нунал уз вераськы но - точка. Улонын мар ке но постоянноез-то луыны кулэ ук. Шуом, тол бере тулыс вуыны, тулыс бере гужем, юэм бӧрсьы - макмыр, сием бӧрсьы президиуме ветлон. Всё правильно! Вот такой вот ёк-макарёк! (Отӥ-татӥ ветлэ, учкылэмъяське, зынъяське. Синучкон доры султыса мынчыръяське. Собер шуак тодаз вае кадь.) - Эт-то, Онисья, слышь-ко! Мар-о, пе, туннэ нуназе гуртамы "Скорой помощь" ветлэм? Ӧд тоды-а? Мыным Иван Марья вераз. Тӥляд урамады, пе, пыриз машиназы... Нош ик-а, мар-а петыр кумлы урод луиз? Воксё ведь куасалтӥз воргоронэз со Чернобыльзы. Ведь тыпы кадь вал. Охо-хо! Табере нин пуппы кадь гинэ кылиз. Тазалык быриз мискиньлэн, пенсия тамаклы гинэ тыро, созэ но арлы куинь пол... Семья куашказ, кышноез палэнын калге... Мынам Петырлэн, пе, пичи петырез сярысь тодэ ваён сяна ӧз кыль ни - собака кышномурт. ... Иське, уд тодӥськы кин доры со "Скоройзы" ветлӥз... М-да... ярам вуиллям кодь.. Петырлэн райцентрысь милица братэз косэмъя гинэ, дыр. Нош асьме доры "Скорой" уз но ву, Онисья... У-уз... Каккой, пе, там... Сисьме но супырӟе ойдо, пересь лӥялъёс шуозы но - и делов-то! ... Вот озьы чоньдод но вез-вез выдод юрт шорад... Нош Опочез ӟеч ик ватӥзы кылем толэзе... Вожъяськыса со горданьлы кал быриз, ява. Пичи дырысеныз угось со везучой вал. Атаез но кык вуко возьылӥз, ми сямен лебедаен кын картош кӧмез ӧз сиылэ. Опоч кулэ дыръяз татяезлэсь отказачкиз, уксёзэ капыртӥз. Армиын но ми сямен ӧз куасаськылы, дышетскемез вань бере - писарьын, шунытын улӥз. Нош милям мар - куинь класс, ньылетӥез - колидор. Эх, кыӵе ортчыт шулдыр ватӥзы Опочез. Тон ӧд адӟы, Онись. Кытын-ай вал-то соку?.. Нош ик ведра картошен Сенькалы городэ ветлӥд, дыр. Нош соиз соку ик вузаса макмырзэ веськатӥз... Как и положено одӥг нылпилы. Тьфу! (Ымнырыз кӧё-вӧё луэ.) ... Гропсэ Опочлы кыкто Семонъёс кӧс доскаослэсь коказы. Пыжез кадь... Нош асьмелы колхоз сисьмем, котсэ сяна уз сёт. Ну, а собере... Гропсэ горд басмаен бинязы... Со Опоч цар кадь кыллиз гропаз. Костюмен... Созэ кык-куинь пол гинэ дӥсямзэ адӟылӥ. Тӧдьы дэремен. И-и... Халстукен! Президиумын кадь, ява. Вань улонзэ складын завын, склад комакын улӥз. Дворец-корка пуктӥз, нылпиоссэ колхоз чотын дышетӥз, соослы патер Ижын басьтӥз. Мар шуод - колхоз кеносэз аслэсьтыз ӧз люкылы. Нош асьмеос - тон скал кыскись, мон пудо возьмась... Асьмедыз, наверно, скал куян гуэ гинэ куштозы но тӥни. ... И эшшо - Опочез музыкаен ватӥзы! Вот так вот! Ватозы небоч - пиез райпотребсоюзын бере... Асьмелэнэз нош та шузи балаган юртмес вузаса, веськатӥз ке - и то ладно. Ай да, хрен с ними, онисе, котьмар ини отӥяз мед карозы, но сё ж таки бускельёс азьын возьыт кадь... Вань улонэз ужам, ӧм шутэтске, муртлэсь я калыклэсь сьӧд гижы быдӟа но ӧм басьтэ... ... Тӥни ук Ефимез - мискинез мар кариллям. Одӥг арысь ми соин. Больницаын кулэм, семьяез басьтымтэ ни. Да семья но солэн мар - висись кышно да чут пиез, инвалид. Озьы ик кельтӥллям, значица, больницае - яке пеньлы сутӥллям, яке таре студентъёс вандыло, дышетско. Эк, курадӟе ни ук лулыз Ефимлэн. Осто, инмаре, эн сёт сыӵе адӟонэз адӟыны. ... Нош Опочлэн куинь уяз, ява, сюанын кадь ӝӧксы вал... Куинь стопка "Столичнойзэ" но юиськиз. От зол! Осто козма, ӵемгес, пе, ветлоно вал узыр кӧтъёслэн куинь уязы - шуиз соку Большевик Семи. Самой соиз, кудӥз кылем ар кулон уксёзэ спекулянт банке сётэм но ыштэм. Таре - с концом. Ошиськыны выре вал. Нырысетӥяз - гозыез чигем, кыкетӥяз - кенэз кутэм, шуо. Большевик Семи но визьмо адями, сельсоветын ужам, а ведь мотри - сое но кутчазы. Народной контрольын ветлӥз ведь. Пиезлэн школа сумкаяз вуж газетъёс туйнаса. ... Бен. Царез кадь ватӥзы Опочез. Автобусэн-маин... (Ӟус вылэ выдэ. Киоссэ гадь вылаз кироса.) - Кыллё мон тазьы сисьмем-кырсьмем доскаослэсь гропын. Тон тышкаськыса вузод вӧзын: "Калералы-а шуиськод вал - уртче, пӧй, кулом. Озьы-а, тазьы-а - ӵош улӥм, ог-огмес ум кельтэ дуннее курадӟыны. Нош та сотана кутӥз но чоньдӥз". Собере шур сьӧрысь Васька лыктоз. Таки ведь, ёк-макарёк, кылем арын пунэмам дас манетсэ ӧз сёты ведь. Шуиз - пенсиозь, табере - хрен дождёшься. Бускельёс лыктозы. Бадӟым Анна палэзь кадь чырс бражказэ ваёз. Ӵужодӥг Фира котьку но мултэс сылало кубистазэ ваёз. Валэн нуозы монэ шайвылэ но номыре вератэк - гуэ донгозы. Куинь уйын нош Вортча Микит гармошказэ кыскаса бӧрдэмъяськоз. Собере тон сельсоветэ военной билетме но паспортэз нуод. И всё... И всё... (Шуак султэ.) - Стой. Сельсоветысь Никитишнаез адӟылӥ туннэ. Шуиз - вуоно толэзе, пе, пенсионеръёслы дунтэмгес дунын пу ваёзы. Так что - некогда. Интересно, а кытысь меда ваёзы, казна нюлэскысь-а, яке фермаосты сэрттэм ныгӟем доскаосты-а... Пӧртэмез ӧвӧл ке но - сё ж таки... А, Онисья, тон ӧд кылылы-а... Никитишна монэн сокем ик ӧз вераськы... Пыра гинэ шуиз - гын сапегме, пе, гындоно вал... Сойзэ ми - мигом. Нош Никитишна тодскод-а марлы сурым кадь ветлэ? Ха-ха! Щас верало. (Умойгес интыяське. Синучкон азьын йыг-йыг кариське. Со вие шимес вузыны пуны кутскиз.) - Пошёл, Полкан! Ӵукназэ мон тыныд шыдмылес сётӥ - норма! ... Так вот, Онисья, тодскод ук - Никитишналэн пиез миым кышнояськиз. Кышно солы, небыльтоклы, тыл кадь шедиз. Йырсиез но горд бӧм быдӟа, синъёсыз - табаос. Гадьёс - во, берыз валлэн сарвылыз кадь... Нош картэз нуналаз тусьты шыдэз но мырдэм сие. Нош мон, тодскод, живо-два быдэс чугункаез но бералтӥсько вал, соин ик ӝытъёсы ӝӧк улэ ватскылӥд, дыр. Озьы-а? Нош вот, значица, кензы-а яке дусымез-а ог-огзылы кельшиллям. Ветеринар маке. Токо кышнояськемын, куинь нылпи ини. Нош ветеринар-музьыез - ош! Литра "Сарапульский" гучкытоз - хоть бы хны! Ӵемысь соосты уртче адӟылыны кутскиллям. Никитишналэн но кенэз сярысь пель сьӧраз вуэм. Так вот. Кылем арня нуналэ ӵукна ик кензы нош ышем, вуэ кадь тюам. Ну и малпа Никитишна - та мунчо кузё ныл ветеринарен ӟыгыръяське, пе, дыр, сурон бам. Проверитьтыны малпам. Тодэ угось ветеринар кышно дышетскыны кошкемын. Суворов сен вамышъяса, обед бере ини, Никитишна мынэм ветеринар доры. Точно - капка пась. Кияз зыр кутэм. Мынэ - корказь но корка ӧс но ӵогамтэ. Али ваньмыз ӵогасько ук - азьло со ӧм ӵогаськылэ. Тӥни алигес Зиналэсь пырак азбарысьтыз ик городъёс кык ыжзэс кайпалтӥллям. Так вот. Ёк-макарёк! Никитишна пыре но адӟе - валес вылын пиосмурт но кышномурт "ӝук пӧзьто". Вылӥяз - ясно дело, кузё, улӥезлэн кузь йырси гинэ адске. Эх! Пужалскем ук Никтишна! "Шедиды-а бессовестнойёс!" - шуыса кеське но со зырен ка-ак! шобыртэ ук воргорон куске. Соиз отчы ик онгроме! Хирасима-Нагасаки! ... И тодскод-а, Онисья, ветеринар-то ас кышноеныз вылэм, нош ас кенэз родня дорын выль дэрем вуре вылэм. Ветеринар кышноезлэсь мӧзмыса, соку бертэ гинэ - нуназе ик чидамтэ ни, нылпиос урамын шудо бере. Вот тӥни озьы пострадал ветеринар. Табере солэн кышноез Никитишнаез судэ, пе, сётэ. Ветерианрлэн кус ошкем, гуртаз больничнойын, пе, кылле, ак но, бак но уг вазьы, мольк гинэ сэргы учкыса пуке... Нош Никитишналэн кенэз кинэн ке райцетрын ворттылэ ни, пе. Картэз гинэ жаль, кышноезлэсь дӥсьсэ тӥрен корам. Али дас вить сутка пуке. Тамак, пе, куре но выль газет. ... Онисья, марлы уд серекъяськы? Бен. Серекъяны но мылкыд кулэ ук. Уката ик ӝытсэлы сиён но пӧрамтэ со лэсянтэм сямыныд! Блокада! (Нош ик шимес кылӥське пуны вузэм.) - Пошёл, шуисько, Полкан! Ма, та пудо-живот но, воксё уг вала ни адями кылэз. Пошёл, пӧй. А может со ӟуч кылэз уг вала? Эй, Полкан, воньды но шайяськы!.. Учкы ай, валаз ведь. (Мыр-мыр ветлэ. Шимес тус пуктэ синучконлы.) ... Ма, Онисья, сомында ар ини ӵош улӥськом но таки ведь кӧтыд уг берытскы. Ветыл кадь чарс тон. Бен, со сюанамы нырысь уйзэ мон тонэн ӧй кӧл. Но ведь - обстоятельства! Тон весь малпаськод, Райка доры кошки шуыса. Ӧй-ӧй - ёк-макарёк! Верало шонерзэ. Возьыт ке но. Онисья, ӝӧк сьӧрын соку аръянэн сӥль сии, араку но куинь стопен сяна ӧй юы. И ведь, ёк-макарёк, кӧтэ йӧтӥз. Мон ведь кӧт ласянь сокем кужмо ӧвӧл. куноос кошкизы, нош мынам кӧтын - революция! Бугыр-бульыр каре. Ӝыны уйзэ закодын сӥзьыл куазен пукиськиз, ява. Али но гольыш инты юзмалля на. Нош султӥсько - соку ик бульыр карса, кӧтэ зырын кадь мырӟе, ява. Ӵукна пал гинэ гур вылэ вуиськиз. Нош вераны возьыт... Бӧрдон-жалян интые, тон вань уонэз соин пыкылӥськод. Из сюлэм тон! Из сюлэм. - Слышь, Онисья, а нош соку сюан ӝӧк сьӧрын монэ ӧз ведналэ-а меда кин ке. Укыр вожъяськыло ук вал асьмелы. Дыдыкъёс кадь гурлало, пе. Бен, гурласькиз ик соку кезьыт закодад. Быдэс улонлы кырӟанлы кадь пӧрмиз, ява. (Дол-дол сылэ. Синучконын кык киыныз ик пакала возьматэ.) - Тодскод на-а, онисья, эк кыӵе чебер нунал вал Позим шур дурысь возь вылын. Тон соку шуид мыным: - Я, иське, бызё. Но первой корка пуктоно вал. Шундыё, тылобурдоос жильыр каро... Синъёсыд лыз инбамъёс кадесь. мынам пыдам - выль кутъёс. Огез, чёртэз, до тово паллян пыдысь чиньыосты пачкатӥз, штан пыдэз ик котмиз. Мон ведь сое но шумпотэменым ӧй шӧды ни. Собере быдэс ӝыт шуныт вуын возёно луиськиз пыдэз. А нош армиысь бертыкум, мон тыныд кышет ваи... Возьвыл сяськаосын... Нош тон мыным выль гын сапег кузьмад. Эх, и шунытэсь вал гын сапегъёс , ява. Кутча на вал али соосты... Нош кытын табере соос? Йӧс вылын саркмизы. Но шунытэсь, небытэсь вал. Шал-шал буш коркан. Коӵыш но кытчы ке пырем. Вай ай радиоез Кыӵе пайдазы вож но курень буёлъёслэн? Можгаын вордски но будӥ. Татын ик шедьтӥ аслым яратоно уж. Дас классэз йылпумъяме бере, огазеяськонэ лыктӥ. Технической эскеронъя отделэ (ОТК-е) контролёре пуктӥзы. Кык ар ужаса, завод дышетскыны ыстӥз Свердловскысь Урал политехнической институтэ. Стипендия но огазеяськон тыриз. Администрацилы со понна туж бадӟым тау карисько. Бен, юнме шорысь сыӵе ӟеч вамыш лэсьтымтэ, дыр, вал. Малы ке шуоно, татын ик ужазы анае-атае, семьямес ӟеч тодо вал. Табере тани ачим 1992-тӥ арысен татын, 2-тӥ цехын технолог луыса ужасько ни. Со производствоын ваньмыз понна кыл кутэ: оборудование но, пияла пӧзьтӥсьёс но умой мед ужалозы. Кылсярысь, пияла пӧзьтон гурын 1500 градус пӧсь возиське. Технолог озьы ик чакла электрокужым, газ сутэмез, сыръё кутэмез но мукетсэ. Син азям возисько толэзьлы быдэ планъёсты быдэсъямез, выль продукция поттэмез но музонзэ. Миым октябре тани вож буёло пияла посуда поттыны ӧдъям. Таӵе но курень бутылкаосын сур кема возиське, уг уродмы. Ӟенеликмы данак интыосы кошке, но тужгес трос басьтэ Татарстан. Наталья ТЮГЕЛЕВА, технолог. Промышленность но рынок МОТОЦИКЛ - ПУНЭМЕН Пырак Правительство юртлэн укноосыз улысь вож гуждор вылын чильк-вальк пишто завод цехысь поттэм мотоциклъёс, ӧтё басьтӥсьёсты, витё кузёоссэс. Таӵе вамыш лэсьтыны дӥсьтонлыкез тырмиз "Ижмаш-Мото" ДОАО-лэн. Мукет сямен вераса, правительствоын ужасьёс ке уг лыкто заводэ, завод ачиз лыктӥз Правительстволэн юртэз азе. Жаляса верано, Ижевскысь мотозаводлэн ог 70 процент продукциез туннэ кошке кунгож сьӧры. Мотоосмес нуо Иранэ но Турцие, Монголие но Латинской Америкае, Колумбие но Грецие, Америкалэн Соединённой Штатъёсаз. Господин Соболевски, КМW американской фирмалэн директорез (со ужа Тойота, Ниссан, Дженерал-Моторз машинаослэсь двигательзэс "ижъёсы" пуктон бордын) алигес шуиз: американской рынокын туннэ вузаны луонлык вань 10 сюрсозь "Эндуро" мотоциклъёсты. "Ижмаш-Мотолэн" со выль продукциез. Кылем арын завод кунгож сьӧры келяз 16 сюрс мотоцикл, туэ чакламын 32,5 сюрс, яке кык поллы трос. Нош кӧняез кыле на асьмелы? Ог 30 процентэз. Со тырмыт, малы ке шуоно, куанер улӥсь семьялэн мотолы но уксёез туала вакытэ уг тырмы ни, нош узыръёсызлы кулэ ӧвӧл - басьто машина. Пусйыны кулэ, "Ижмаш-Авто" мыло-кыдо басьтӥськиз но ачиз поттэ ни амортизаторъёс, подвескаос, тормоз барабанъёс, колонкаос. Соосты азьло басьтылӥм музон заводъёсысь, республикалэн палэнысьтыз. Ма сётэ заводлы кунгож сьӧры мотоциклъёсты келян? Нырысь ик, рынокын астэ возьматон, дандэ ӝутон. Коньдон сярысь ке верано, кунгож сьӧрын улӥсьлы асьмелэн продукцимы дунтэм усе. Отчы тросэн вузаськом "Иж-Планета 5" маркаёзэ (350 куб.см классъем). Сое гуртын ужась вал интыын возе: котькыӵе сюрестӥ мын - нуоз. Мотозаводын ужасьёс верамъя, шоссе вылтӥ "Ижез" "Хонда" азьпалтоз, нош Ливиысь луо пӧлтӥ асьмелэнэз гинэ потыны быгатоз. Озьы ке но, экспорт бадӟым барыш уг вайы. Заводлэн кивалтӥсьёсыз соин ик лыдъяло, та вузкарон огдырлы гинэ шуыса. Со герӟаськемын, 17 август бере дунъёс будэмен. Кылсярысь, алюминий тоннаез азьвыл сямен ик 1000 доллар ке сылэ, манетэн вузаса, килограммез 2-3 поллы дунояз. "Иж-Планета 5" мотоцикл туэ сылэ 15 сюрс манет. Котькудӥз сомында уксё уз шедьты. Мотозаводлэсь берло аръёссэ кызьы ужамзэ учкон понна ӵошатом куд-ог лыдпуъёсты. 1996 арын ДОАО "Ижмаш-Мото" поттэ 26 сюрс мотоцикл, 1997 арын - 43,5 сюрс, 1998 арын - 21 сюрс, туэлы чакламын - 32,: сюрс. Валтӥсь модель луэ "Иж-Планета5-010". 1998 арын потэмын 12 сюрс, 1999 арын - 9,5 сюрс, со пӧлысь 5 сюрсэз келямын кунгож сьӧры. Туэ отчы завод вузалоз 2 сюрс пала "Планета-12" мотоцикл но 16780 мотокомплект. 1999 арын И квартал ӵоже лэсьтэмын ни 6 сюрслэсь ятыр мотоцикл, кунгож сьӧры келямын 1097-ез. Конструкторъёс али ужало бадӟым кужымен двигательёсты азинтон но пичи кужымен модельёсты (50 куб. см) кылдытон бордын. Ӝоген выльдӥськоз "Планеталэн" двигателез. Правительстволэн юртэз азьын ортчем выставкае поттэмын вал устоосыз пӧлысь устоосыз модельёс: тылпу кысонъя мотоцикл, мотоблок, 50 кубической сантиметръем двигателен кык пӧртэм модель, "Чоппер" ("Харлей-Дэвидсон" американской моделья). Таиз модель дасямын ай адӟытон понна гинэ. Туэ эскерон вылысь поттэмын луоз 50 мотоцикл. Пусъём на: "Чоппер" июнь толэзьлэн нырысетӥ нуналъёсаз вуылӥз ни Калужской областьысь Малоярославец городын ортчем международной выставкае. "Иж-Планета5". Возьматоно модельлэн таквем двигателез лэсьтэмын Тайваньын, чакламын кунгож сьӧры вузаны. Специалистъёс верамъя, басьтӥсез сокем трос ӧвӧл, соин ик двигательзэ Тайваньысь ваён асьме дорын лэсьтэмлэсь дунтэмгес усе. Возьматонэ шедизы озьы ик спортивной мотоциклъёс, мотовелосипедъёс. Чакламын соос 5-8 аресъем пиналъёслы но та вакытэ дуннеын сыӵе модель поттэ Италиысь "Малагутти" фирма гинэ. Но Ижевск понна со конкурент ӧвӧл: "малагутти" сылэ ке 1 сюрс американской доллар, Ижын поттэм нылпи мопедлэн дуныз кык поллы ӧжытгес луоз. Эшшо одӥг "секретэз" - мопед "будоз" пиналэныды ӵош. Сыӵе луонлык сёто конструкторъёс. "Иж-Ҡ5" ("эндуро"). Дуннеысь куронъёслы, жаляса верано, со уг тупа на. Кулэ каре азинтэмез. "Иж-7.205" (двигателез 7.205, 450 куб. см.) Ӟеч мотоцикл, 50 вал кужымъем. Но поттэмын ӧжыт, ог 20 пала гинэ. 90-тӥ аръёсы кыкез пыриськиз Швециын ортчем дуннелэн кубокез понна ӵошатсконъёсы, басьтӥзы бронза медаль. Тӥни сыӵе техника поттэ асьмелэн мотозаводмы. Лыдӟисьёсмылы - ӟеч ивор: гуртын улӥсьёс понна мотоциклъёсты вузалозы кредит чотын. Пунэмаськем уксёез тырыны луоз будэтэм продукциен но: сӥльын, вӧйын, картофкаен, бакча сиёнэн. Л. МЕДВЕДЕВА. Малпаськытӥсь югдур Визь бездэ шат уксё вӧзын? Уксё, студент сямен, лобыса уг пыры университет пушкы. Со лыдъямез яратэ. Школаез быдтэмъёс анай-атаенызы артэ коридор кузя вамышъяло. Мае ке но юаса кадь учко ымныр шоры. Кинъёс со? Абитуриентъёс. Кылем арын, соос сямен ик, мон но анаеным ӵош пыри университетлэн кыкетӥ корпусаз. Пӧртэм шуг-секытъёс пыр ортчыса, студент луи. Кыӵе сюлмаськонъёсын уло туннэ абитуриентъёс? Соос понна ужало-а репетиторъёс? Юртто-а меда соос абитуриентлы студент луыны? Котьку но малпалляй: удмуртлэн возьытлыкез вань, дӥсьтоз меда со репетитор луыны? Янгышаськем, табере удмурт филологияя факультетын но вань таӵе уж - репетиторство. Экзаменъёс азьын котькуд факультет усьтэ огъя репетиторствоя арня. Абитуриентъёсты дасяло экзаменъёслы. Таӵе дышетсконлы тыроно вить сю витьтон манет. Кызьы мон юалляськыса тодӥ тросэз абитуриентъёслэн нимаз дышетӥсь шедьтэмзы потэ. Озьы, пе, оскымонгес. Нош уксё ласянь верано ке, огъя курсъёс понна тырем коньдон кошке универистетлэн огъя кассаяз, нимаз репетиторъёслы касса ӧвӧл ни. Университетлэн борддоръёсаз вань на таӵе ялонъёс: "Шедьтомы нимаз репетитор. Вазиськоно нырысетӥ корпусэ". Таиз но уг яра абитуриентъёслы, асьсэлэсь оскымон тодмооссэс утчамзы потэ. Мон туннэ ӧй эскерысал репетиторлэсь кисызэ, нош одӥгзэ тодытэме потэ вал. Кылсярысь, басьтомы удмурт филологияя факультетысь удмурт-ӟуч отделениез. Татчы пырон понна сётоно куинь экзамен: удмурт кыл но литература, ӟуч кылын сочинение но удмурт кылын диктант. Репетитор одӥг академической час понна басьтэ витьтон манет. Одӥг час куспын гинэ тросэныз тодматыса уд вуы, соин ин дышетскыны ветлоно луоз вить-куать пол ке но. Озьыен, одӥг экзамен ог куинь сю манет тыр усе. Куинь экзамен понна укмыс сю манет пала люкаськоз. Удмурт-немец но удмурт-англи отделение пырисьёслы кунгож сьӧр кылъя репетитор часаз куатьтон манет сылэ, пе. Таосызлы ини ог сюрсэз дасяно луоз. Ватсалэ на та вӧзы куриськон сётон понна кык сю манет. Озьыен, бадӟым лыдпус сюрс кык сю манетозь вуэ. Тамында коньдон люкано луозы удмурт кылэз яратӥсь егитъёс. Вань пӧлазы сыӵеосыз но, кудъёсыз удмурт кылэз гажатэк вылӥ образование басьтыны малпало. Заявление но сёто удмурт филологияя факультетэ. Таӵеосыз умой тодмооссы пыр кык-куинь пол уксё тросгес "мычо". Табере таӵе юан кылдэ: кудӥз студент луоз? Рыноклэн законэзъя ке - трос коньдоно мурт. Соин сэрен визьмоосыз палэнэ кылё, нош коньдонлы бусьтыръёсыз, оло, сокем визьмо но уд шу соосыз, удмурт филологияя факультетысь радъёссэ тырмыто. Валамон ини, таӵе югдур кылдэмын вань факультетъёсын. Йылпумъян лэсьтыса вуисько таӵе малпанэ: кыӵе луоз вить, дас, кызь ар ортчыса удмурт филологияя факультет, кудӥз 1998 арын данъяськыса пусйиз витьтон ар тырмонзэ? Оло, сю ар тырмонэзлы сцена вылэ уз ни потэ пинал учёнойёс, будӥсь кельмаковъёс, таракановъёс, соколовъёс. Юнме шат тыршо асьмелэн профессоръёсмы? Ма понна курадӟизы асьмелэн азьветлӥсьёсмы: Григорий Верещагин, Куӟебай Герд, Кедра Митрей, Михаил Коновалов...? Юнме...? Мон улӥсько ӵуказе нунал понна, нош отысь пеймыт уез сяна, номыре уг адӟиськы. Ӵуказе нуналын ваньзэ мертало коньдонэн гинэ, отын визь но, лул-сюлэм но, чылкыт малпанъёс но уксё вӧзын бездо ни. Алёна ИОНИНА, Удмурт кун университетысь студентка. Буре ваён МУЗЪЕМЛЭН ПИЕЗ 1 Озьы шуо Корнил Ильич Шибанов сярысь соин артэ улэм но ӵош ужам эшъёсыз. Та паймымон но паймытыны быгатӥсь адями быдэс улонзэ сётӥз гурт удыслы, музъемен герӟаськем наукалы. Вордскиз Корнил Ильич Завьялово районысь пичигес гинэ Коньки гуртын, Сарапулэ нуись тракт вӧзысь куинь иськемын. Пичи дыръяз пиосын ӵош нуналлы быдэ сямен тубалоз вал котырысьтызы самой ӝужытаз вырйылэ - Кичиргурезе. Отысен солэн адӟемез потылӥз котыр улосэз, бадӟым улонэз; быгатысал ке, тылобурдо сямен, вылӥе-вылӥе ӝутскысал но - бадӟым городъёсты, зарезьёсты одӥг пол коть учкысал. Будӥз, ӝутскиз, сьӧраз трос сю егитъёсты валтӥз. Удмурт историкъёс пӧлын нырысетӥез история наукаосъя доктор, профессор луиз. Улонысьтыз ог кызё арзэ сӥзиз кивалтон ужлы, куамын арлэсь ятыр дышетӥз Ижевскысь гурт удысъя институтын (академия усьтытозь улыны ӧз кылды ни). Зэмос интеллигент луон понна, пе, атаедлэн атаез но интеллигент медло. Нош Корнил Ильич потӥз тыпак дышетскымтэ, ёрмыса улӥсь удмурт крестьян семьяысь. Инкуазен сётэм визьмыз, дышетскон борды кыскись кужымез Коньки гуртысь пиез Кичиргурезьлэсь но вылӥе ӝутӥз. Вордскиз но со гужемлэн самой шулдыр вакытаз, тройча праздник котырын, 1909-тӥ арын. Нэнэез Ксения Устиновна но бубиз Илья Иванович пизэс пыртӥзы Ожмосысь черкын. Кулыны-бырыны медаз шедьы шуыса, калык сямъя пизылы кык полэс ним сётӥзы: Корнил но Геннадий. Кин тодэ, оло, ӵапак со ик утиз Шибановез вань даураз. Нош семьязы бадӟым вал: бӧрсьысь бӧрсьы вордскизы тямыс пи но кык ныл. Ньылез пичиысен ик кулӥзы. Тӥни малы пизылы кык полэс ним сётоно луиз: выжызэс утён вылысь. 1915-тӥ арын анайзы кулэ, солы 40 арес сяна ӧй вал ай. Бубызы кыкетӥзэ кышнояське. Сюрмумызы лек сямъем сюриз. "Уроки жизни" книгаяз Корнил Ильич тазьы гожтэ: "Со кышномурт милемыз огместы но ӧз яраты. Аслэсьтыз Паня нылзэ гинэ утялтӥз, сое нимаз пуктыса ческыт сюдылӥз. Мон туннэ но, 80 аресам потэм мурт, ӧй вунэты, кызьы со одӥг урег пуз сиеме понна ымнырам векчи корт жильыен жугиз". Нэнэйзылэсь вань сюлмаськонзэ вылаз басьтӥз Уля апайзы но Варя ӵужодӥгзы. 1921 арын улонысь кошке бубызы но. Тулыс, самой тудву тудӟон дыръя, валэныз ӵош шуре кымалске. Бубызы соку сельуполномоченной луыса ужаз, артысь гуртэ кулэм кураськисьлэсь шӧйзэ нуыса бертыкуз, шудтэм учыре шедиз. Кынмам муртэ ӝогак больницае нуоно вал - со интые доразы пелляськисез вуттӥзы. Нунал ортчыса, бубызы кулӥз, нылпиоссэ чоркак сирота кельтӥз. "Ми асьмеды бадӟымесь шуиськом вал ини (пичиез Гриша вынмы дас кыказ мынӥз). Асьмеос юртъермес возим, пу корам, пудо но вордӥм, бакчамес но кизим-мерттӥм. Мон туж яратӥсько вал усыяны. 13 аресысен гырыны кутски. Секытгес йӧтылӥз ю-нянез аран. Бусые вань гурт калык потоз вал: пичиысен пересёзь. Мынам али ке но паллян чиньыосам сюрлоен гожмем бервылъёс кылемын. Крестьян семьяын вордскем но будэм нылпиос улонлэсь ческыт палзэ но, курыстэ но ӝог валало, вазь шӧмъяло шуг-секытэз но. Улон кыӵе но кыӵесъёс уг дася: быгатод ке пыртӥз потыны - улэп кылёд, ӧд ке - дырызлэсь вазь сопал дуннее кошкод. Огпол монэ итыме культо ворттыны ыстӥзы. Возэ бадӟым, валэ мырдэм ворме. Нӧд сюресэз кожон вылысь, меӵ гурезьтӥ васьконо кариськи. Пинал визь ке, пинал визь ни. Валэ возэныз валче йырин-чукин пограз, ачим культоос улэ пачкай. Но шудэ вылэм на: кеськем куараме бускеле кылэм. Со ик быронлэсь утиз". Корнил Шибановлэн школае мынонэз вадьсаськиз гуртазы Советской власть вуонэн ӵош. Пиналъёс тае валазы поплэн урокъёсты нуэмысьтыз,расписаниысь усиз закон божий но. Нош гурт калык нунал пӧрат кенеше люкаськылӥз. Конькиын асьсэлэн школазы ӧй вал, пиналъёс кык иськеме Ожмос-Пургае ветлӥзы, нош бадӟым классэ потыса - Ожмос черкогуртэ. Корнил эшъяське ачиз кадь ик котьмае тодыны-валаны тыршись пиен, Тебетеев Васяен. Та эшъяськонзы вань улытозязы кыстӥськиз, берпуметӥ шокчытозязы, шуыны луоз. Тодэ ваёнъёсаз Корнил Ильич гожтэ: "Вордскем гуртам бертылыкум, мон нырысь ик Тебетеевъёс доры кожисько вал, собере гинэ - атай юртам". Эшез кык арлы вазьгес кулӥз. 2 Ортчем сюресмес котькызьы мед курлалозы, но Советской власть туж трос крестьян пиослы но нылъёслы бадӟым дуннее потыны вӧл-вӧл капка усьтӥз. Комсомольской ячейка, рабфак, партия - со пыр потӥзы ваньмыз бадӟым кивалтӥсьёс, тодмо адямиос. Таос радын - удмурт пи Корнил Шибанов но. Улонысьтыз 20 арзэ со сӥзиз комсомольской но партийной ужлы, 30-зэ - гурт удыслы, музъемлы. "Мон понна пыраклы вунонтэм кылиз 1927-тӥ ар: кутӥзы партие кандидатэ. Соин ӵош обком оскиз Шаркан районысь комсомольской организациен кивалтыны. Дырыз ӟырдыт вал! Гурт улонэз, коллективизациез пӧзись вулканэн гинэ ӵошатыны луоз, дыр". Туала историкъёс со вакыт шоры туннэ асьсэ валанэн учко, озьы ик дунъет но сёто, нош Шибановлэн поколениез нюръяськиз выль улон понна, коькуд крестьян семьялэн ӝӧк вылаз нянь сукыриез медаз бырылы, нылпиосыз сютэм медаз кулэ но грамоталы мед дышетскозы шуыса. Шарканысен 20 аресъем комсомольской секретарез партие пырто. Егит коммунистлы эшшо но секытгес удыс сёто - пукто комсомоллэн обкомезлэн пропагандая отделэныз кивалтонэ, кӧня ке дыр ортчыса - партилэн обкомаз. Корнил Ильичез тодэ быдэс республика, со ачиз но, эшъёсыз верамъя, "улэп энциклопедия" вал: котьуд районэз, кивалтӥсез, председателез, азьмынӥсь ужасьёсты нимын-тулын тодӥз. Сямызъя со лек ӧй вал, но куронъёс чурытэсь пуктылӥз котькуд янгыш понна, дышетӥсь музэн, дунъет сётъяляз, соин ӵош - визьнод. Нош Корнил Ильичлэн дышетэмъёсыз уно гинэ. Соосты Удмуртиын гинэ ук, республикалэн палэназ но тодо: Семен Иванович Зайнаков - Социалистической Ужысь Герой, Федор Евлампиевич Чернов, Михаил Николаевич Сметанин, Павел Иванович Гудимов, Савватей Алексеевич Жигалов... Кӧня кивалтӥсьёсты, гурт удыслы специалистъёсты дасяз Ижевскысь сельскохозяйственной институтын 30 ар ӵоже! Одӥг гурт но, одӥг колхоз но Шибановлэсь палэнэ ӧз кыльы, котькудаз со ӟеч кидыс кизьыса кельтӥз. Выпускникъёсыз пӧлын: Леонид Леонидович Максимов, Николай Федорович Чувашов, Юрий Иванович Корепанов, Павел Николаевич Вершинин, Валентина Ивановна Ушакова но трос мукет тодмо нимъёс. Та адямиослэн быгатонлыксы вылын ӝутскиз музъемлэн удалтонлыкез, азинскиз республика, выльдӥськизы гуртъёс. 3 К. И. Шибанов вань улытозяз улыны-ужаны дышетскиз. Одӥг пол, "Знание" всероссийской обществолэн съездаз, солы Терентий Семенович Мальцевен ӵош гостиницаысь номерын улыны кылдӥз. Вераськизы ке, вераськизы ни! "Мынам туж тодэме потэ вал, кызьы та огшоры воргорон быдэс страналы тодмо луиз нянь будэтэменыз. Терентий Семенович семьяез, пналъёсыз, ужез сярысь но ваньзэ туж ӟеч тодмоезлы кадь вераз. Агроном луэмез бере ик со пӧртэм пумо эскеронъёс борды басьтӥське. Курган областьысь "Заветы Ленина" колхозын арлы быдэ гектарысьтыз 30- 40 центнер ю тысь кутсаны кутско. Амалэз огшоры: кизён дырез тодоно но чаклано. Муэ вазь согем кидыс ӝог кужым люка, но соин ӵош пушъе шайтан сезьы (овсюг) но чабеез соге. Мальцевлэн аслаз технологиез: майлэн кутсконаз со жуг-жаглэсь ӝутскемзэ вите, вожектэм бусыосты кык-куинь пол усыяло, толэзь пумын гинэ кизьыны пото. Ваменэс сямо агрономез кӧня пол "ковёр вылэ" ӧтчазы, выговор сётъязы, райкомлэсь уг кылзӥськы шуыса, нош сӥзьыл ке вуэ - Мальцевлэн урожаез котькинлэсь вылӥын. Вераз со ядохимикатъёстэк ужанлэсь но "секретъёссэ": муосты шутэтон, дыраз кизён, гырон- утялтон, ӟеч кыедан - тӥни вань "секретэз". Музъем ужъя академикен, кык пол Социалистической Ужысь Героен Т. С. Мальцевен Корнил Ильич одӥг пол гинэ ӧз пумиськылы. Бӧрысьгес Удмуртиын но будӥзы солэн дышетэмъёсыз: Смоленцевъёс, Коробейниковъёс, Бобровъёс... Улонысь Корнил Ильич Шибанов кошкиз, ӟечезлы оскыса. Калык хозяйствоез таркамез, солэсь куашканзэ ӧз адӟы ни. Со умойлы, дыр. Людмила МЕДВЕДЕВА. Министерствоосын но ведомствоосын Мынэ пудо сиён дасян Гурт удысъя но сиён-юонъя министерстволэн коллегиез ортчиз. Отчы ветлӥзы районъёсысь гурт удысъя управлениослэн кивалтӥсьёссы. Кенешын йылпумъянъёс лэсьтэмын тулыс кизёнлы но будосъёсты утёнлы. Но тужгес ӟырдыт вераськон вал пудо сиён дасянлэн мынэмез сярысь. Районъёсы пото Та министерство ик гурт калыклы ялан юрттэ. Кылем арняе министрлэн воштӥсьёсыз районъёсы потазы, райсоветъёслэн сессиосазы но гурт хозяйствоя управлениослэн кенешъёсазы пыриськизы. Республикаысьтымы та удыслы методической юрттэт сётэмын. Таяз арняе но соос районъёсын пудо сиён дасянэз радъяны юртто. "Утиськонъя школа" Тазалыкъя "Заря" центрын 5 июле устӥськизы дышетскисьёслэн кун ӵошатсконъёссы. Со нимаське "Утиськонъя школа". Йылпумъянъёс лэсьтӥзы 8 июле. Фестивальлы дасясько Национальной политикая министерствоын мынэ дуннеысь финн-угор калыкъёслэн ВИИ фестивальзылы дасяськон. Ыстэмын ни ӧтёнъёс, юнматэмын программа. Та уж али но азинске. Министерствоысь ужасьёс мылысь-кыдысь юрттӥзы "Сабантуй" бигер праздникез радъяны но ортчытыны. Кенеш луоз Россиысь Федерация ужъёсъя но национальной политикая министерствоын кенеш ортчоз. Со сӥземын луоз "Россиысь финн-угор калыкъёслэсь культуразэс азинтонъя кун юрттэт сётонъя" нимаз федеральной программаез эскеронлы. Отчы пыриськозы Удмурт Республикаысь адямиос но. Шутэтскозы ӟеч дышетскись пиналъёс "Строитель" профилакторийын 11 июльысен шутэтскозы Удмуртиысь ӟеч дышетскись нылпиос. Удмурт Республикаысь Правительстволэн пресс-центрез. Удмуртиын но Россиын Можгаысь акциосын "Свет" огазеяськон - тодмо предприятие. Со туала ӟеч оборудованиен трос пияла посуда поттэ. Лыдпусэн вераса, араз 240 миллион бутылка лэсьтэ, яке нуналлы быдэ - 700 сюрс. Продукциез кошке Россиысь но СНГ-е пырись странаосысь 200 предприятие. Огазеяськон кунгож сьӧрысь но Россиысь ваем автоматъёсын тӧдьы, вож но курень тусо пияла посуда лэсьтэ. Со мынэ сиён-юон поттон, химической, нефтеперерабатывающей промышленностьлы но тазалыкез утён удыслы. Предприятиын кылдытэмын ӟечлыкен кивалтонъя амалъёс. Вань продукуиезлы сётэмын сертификатъёс, соос тупало Россиысь кун стандартлы. Озьы огазеяськон али 70 пумо выль бутылка поттэ юзматӥсь юонъёс, кудӟытӥсьтэм винаос, сур, вина, водка, шампанской но мукетсэ лэзьяны. Предприятие озьы ик лэсьтэ полиэтилен плёнкаос, ведраос, бекчеос, канистраос но музонзэ. Огазеяськон арысь аре паськыта, азинске. Али куинетӥ цехсэ пуктэ ни. Нош солэн продукциез Россиысь но дуннеысь выставкаосын но конкурсъёсын валтӥсь инты басьтэ. "Свет" АО луэ Удмурт Республикалэн Кун премиезлэн лауреатэз. Миым Москваын ортчем дуннеысь "Росупак-98" выставкаын заводлэн сур бутылкаезлы зарни медаль сётэмын, нош ӟеч тара поттэмез Почёт дипломен пусъемын. 1996-тӥ но 1998-тӥ аре "Сарово" минерал ву лэзьян бутылкаез понна "Свет" дуннеысь "WОРЛДСТАР" конкурсын вормисен лыдъямын. Узей-Тукляослэн киужъёссы Котькуд гуртын вань кибашлыос. Нош кытын ке соосын ужась, кивалтӥсь вань, усьтылэмын нимысьтыз юртъёс. Озьы Ува ёросысь Узей-Тукля гурын но, Геннадий Сидоров та уж борды ӟырдыт басьтӥськем бере, усточиоссы огпол гинэ ӧз шедьылэ ни пӧртэм выставкаосы. Али нош соослэн ужъёссы возьматӥсько Ижевскын, Чеберлыко киужъёсъя шор юртын. Шӧдӥське: узей-тукляос туж быгатыса куто писпуэз. Туж чебересь пӧрмо пулэсь вӧлэм арбериоссы, буё-буё суредамын кызьпу туйлэсь посуда. Огъя вераса, пулы, улвай- выжыослы таос кыкетӥ улон сёто. А. АПАЕВА. Чернобыльлэн "иськавынэз" Сибирьын кыкетӥ Чернобыль луыны быгатоз, гожтэ "Независимая газета". Кышкыт учыр луиз 1999 арын 14 июле Сибирьысь химической комбинатлэн реакторез. Предприятие интыяськемын Северск городэн артэ. Радиация улэ шедиз кык мурт. "Секыт югдур кылдӥз ужъёсты суп-сап радъямен", - газетлы шуиз Россиысь Госатомнадзорысь отделлэн кивалтӥсез Николай Филонов. - Та вакытэ реакторлэсь ужамзэ азьвыл ӧраз ик вуттонъя но излученилэсь кужымзэ лябзытонъя ужъёс ортчытэмын. Но авторлэн бервылъёсыз ваньмыз быдтэмын шуыны ум быгатӥське на. Иворъёсъя национальной служба. Байков - усто оператор Кыкетӥ номеро цех нырысезлэсь ӧжыт палэнэ интыяськемын. Таиз лэсьтэмын но берлогес, ужан условиоссы но умоесьгес. Котыр чылкыт, ӵынэз-зынэз сокем уг шӧдӥськы. Самой таты, 15 операторъёс пӧлысь одӥгез устоез луэ Петр Байков. Бен, 5-тӥ разряд юнме шорысь сётымтэ. Оскем ужзэ со вить чиньызэ кадь тодэ. Байковлэн кышноез Фаина но татын ужа, гуре луо но пилем пияла ӝоктэ, засыпщица лыдъяське. Соос куинь нылпи будэто. Бадӟым нылызлэн нылыз вань ни. Шоретӥез дышетске Сарапулын экономистэ. Пиез йылпумъя 9-тӥ классэз, дасяське Можгаысь механизацияя школае пырыны. Таяз цехын чалмытгес, автоматъёс чылкыт ужало, посуда пичи шунды кадь горд-горд ӟырда. Котькуд агрегат дорын мартен гурысь выллем пӧсь потэ. Нош оператор Петр Байков номыре но уг шӧдылы кадь, ас ужзэ дыртытэк но оскымон быдэсъя. Юнме уго со усто оператор уг луы. Г. ВАСИЛЬЕВ. Шундыпиос но куке бадӟым шундыос луозы Сизьыметӥзэ ини "Шундыкар" люкалляз аслэсьтыз пичи "шундыпиоссэ" но "шундынылъёссэ". Туэ визьмопогъёс асьсэлэсь тодон-быгатонъёссэс узырмытӥзы но шутэтскизы-шулдыръяськизы "Прометей" лагерьын 10 нунал ӵоже. Кинъёс гинэ ӧвӧл татчы люкаськиллям? Кырӟасьёс, кылбурчиос, суредасьёс, архитекторъёс, журналистъёс, дизайнеръёс. Азьвыл аръёсы кадь ик пиналъёсты дышетӥзы пӧртэм профессионалъёс. Со асьме республикаысь тодмо архитектор Касим Галиханов, художник Василий Морозов, кырӟась-крезьгурчи Анна Плотникова но мукетъёсыз. Асьсэлэсь пӧрам-пӧрмытэм ужъёссэс пиналъёс адӟытӥзы ӧтчам куноослы сизьыметӥ июле, лагерьлэн ворсаськон нуналаз. Мае но татысь адӟыны ӧз луы! Одӥг залэ быдэс борддор тыр интыяськем "Кузьыликар". Суредъёсын адӟытон со. Паймымон: борддор шорысь учко пӧртэм вукузёос, пӧртмаськисьёс, вожоос, вашкала дӥсен кышноос но воргоронъёс. Шундыпиос мылысь-кыдысь суредаллям вашкала удмуртъёсты но выжыкылъёсысь персонажъёсты. Мукет пала интыяськем дизайнъя выставка. Нылпиос асьсэос малпаллям но вуриллям удмурт дэремъёс но дӥсяллям мунёос вылэ. Нош ӝӧк вылын мар адӟиське? Коӵышъёс, кечъёс, адямиос, сыло. Ваньмыз горд сюйлэсь лэсьтэмын. Сюй мунёос пӧлын сыло Света Корепановалэн но ужъёсыз. Света "Шундыкарысь" самой чеберез нылаш луэ. Малы шуоды? Угось со пыриськиз но вормиз "Чеберина" конкурсын. Табере сое татын ваньзы тодо но Чеберина шуыса вазисько шораз. Света лыктэм "Шундыкаре" Балезино ёросысь Вӧёгуртысь. - Света, мар тыныд юрттӥз вормисе потыны? - Нырысь ик тусбуе, малпасько. Озьы ик кырӟаны быгатэме но эктэме. Мон гуртам ветлӥсько эктонъя кружоке. - Нош конкурс бере тыныд ӧжытак вылтӥяськон сям ӧз пыӵа-а? - Кыӵе вал, сыӵе ик кыли кадь. Но туж кельше пиослэн котыртӥм ветлэмзы, монэ Чеберина гинэ нимамзы. - Кыӵе кулэ луыны чебер кышномурт, тон малпамъя? - Кышномурт тусбуезъя но, пушкызъя но чебер мед луоз. Солэн медло котьку умой мылкыдыз. Мед быгатоз калыкен вераськыны, адямиосты ас бордаз кыскыны но аслэсьтыз шулдыр но задор мылкыдзэ соослы кузьманы. - Света, шуом, тыныд Голливудэ мыныны луонлык шедиз. Тыныд сётӥзы рольёс: чебер вунылмурт, принцесса, пересь ведӥн, азьтэм нылаш Марфушка. Кудзэ бырйысалыд? - Соос одӥгез но мыным матын ӧвӧл. Мон шудысал Золушкаез. Малы ке шуоно, со вылтусызъя но мусо, сямыз но огшоры гинэ, ужанэз но яратэ, лулпушкыз но чебер. Лагерьлэн ворсаськонэзлы пиналъёс дасяськиллям ке, дасяськиллям ини. Куноосты шулдыр кырӟанэн, эктонэн пумитазы. Жин-жин куараенызы но тапыртонэнызы нылпиос чылкак паймытӥзы Николай Алексеевич Ганзаез, Правительстволэсь кивалтӥсьсэ, Кун Кенешлэн Тӧроезлэсь воштӥсьёссэ Павел Николаевич Вершининэз но Светлана Константиновна Смирноваез. Правительствоысь вылӥ куноос чылкак сураськизы пичи шундыпиос пӧлын, оло нош асьсэлэсь пинал дырзэс тодазы вайыса. Нылпиосын туж капчи, эшлыко вераськизы соос. Пиналъёслэсь ужъёссэс вылӥ дунъяса, куноос соослы азинсконъёс сӥзизы, быгатонлыксы медаз ышы шуизы. "Шундыкарлэн" визьнодасез, тодмо удмурт философ, Ангелина Крылова вылӥ кивалтӥсьёслы вань пиналъёслэн нимынызы куриськонэн вазиськиз: - "Шундыкар" - со мастерской, татын пиналъёс дышетско малпаськыны, тодо пӧртэм удмурт йылолъёсты, пӧрмо зэмос адямиослы. Тросэз асьсэ ужъёсынызы ветлэмын ни Россиысь пӧртэм адӟытонъёсы. Отын соослы вылӥ дунъет сётӥзы. Пиналъёслэн быгатонлыксы тэк медаз кысы шуыса, ми куриськом но Кенешлэсь, Правительстволэсь юрттэтсэс. Пиналъёслы дышетскон центр кылдытоно, сотэк 10 нунал куспын гинэ "Шундыкар" трос сётыны уг быгаты. Павел Николаевич Вершинин та вазиськонэн быдэсак соглаш луиз. Со вераз: - Егитъёслэн быгатонлыксы медаз ӵакмы шуыса, асьмеос одно ик умой, йӧн-йӧн тодон- валан соослы сётыны кулэ. "Шундыкарлэн" лулэз соос пушкы мед пыӵалоз вал. Асьсэ быгатонъёссэс возьматон сяна, соос мед гажасалзы калыксылэсь историзэ, йылолъёссэ. Со понна ми пуктыны медӥськом культурая но дышетонъя центр. Али республикаямы со выллем центр вань, но отын нылпиосты дышето витетӥ классозь гинэ. Вуоно арысен гуртысь нылпиос тодон-валан басьтыны быгатозы Ижысь 28 номеро школаын. Витьтон инты висъямын луоз. Конкурс луоз бадӟым. Нылпиослы ӟеч тодыны кулэ пӧртэм кылъёсты, экономикаез, искусствоез. Малпаськом, "Шундыкарлэн" малпанэз ӝоген быдэсмоз шуыса. Быгатонлыкъёс уз ыше. Нош пичи шундыпиослэсь пӧрмозы зэмос бадӟым шундыос. Марина КОСТЫЛЕВА. Чеберинады Света Корепанова. ТУЭ - АРЛЫДООСЛЭН АРЗЫ Татын сямен гажасалзы ке 25 ар талэсь азьло "Буммаш" заводын кылдытэмын вал ветеранъёслэн огазеяськонзы. Со дырысен та огазеяськон туж синмаськымон ужа. Али но, та секыт вакытэ, соос ёрмись пенсионеръёслы юрттэт сётыны быгато. Огазеяськонлэн кивалтӥсез Аркадий Венидиктович Пицков мӧйы муртъёсты шуныт пумита, улэм-вылэзы сярысь юалляське. Заводын луонлык шедьто тужгес но ёрмись ветеранъёслы коньдонэн юрттэт, висисьёсызлы - санаторийёсы путёвкаос висъяны. Туэ "Милосердие" завод сметая 160 сюрс манет коньдон висъяз. Арлыдоослэн нуналазы пенсионеръёсты ужам цехъёсазы ӧтчазы, ческыт сиёнэн-юонэн утялтӥзы, кузьым сётъязы. Заводысь 1842 пенсионеръёс пӧлысь 59-эз - оже ветлэмъёс, 308-эз фронт мышкын ужамъёс. Соосты туж сӥлы карыса ӟечкылазы Вормонлы 54 ар тырмон нуналэ. Пусъем потэ созэ но, республикаямы потӥсь газетъёс ӧжытгес гожъяло ветеранъёс сярысь, нош заводысь газет мукетъёслы адӟем карымон тырше. Редактор В. Сенченок ачиз туж мыло-кыдо гожъя ветеранъёслэн улэм-вылэмзы, сюлмаськонъёссы сярысь. "Буммашысь" ветеранъёслэн огазеяськонзы городын гинэ ӧвӧл, быдэс республикаямы тодмо. Ваньмаз предприятиосын мӧйыосты тазьы гажасалзы ке, буш ӟенелик бичаса ветлӥсьёс, оло, ӧй но луысалзы. В. ЧЕРНОВ. Быдэс улонэз - завод Адями ас улонзэ ачиз лэсьтэ: кинлэн кызьы пӧрме. Ӵемысь ӵошатоно сое дӥськут воштӥсен-вурисен. Огезлэн ужез мугор вылын кисьтэм-басьтэм кадь пуке, мукетызлэн - кырыж-мерыж, номырлы ярантэм. Озьы ик улон но. Со кылдэ трос пумо юдэсъёслэсь. Огез огзэ ватса, чеберъя но котькудӥз ас радзэ шедьтэ ке, озьыен, тон шудо адями. Тазьы шуыны луоз, дыр, Нина Ильинична Мартьянова сярысь но. Улэ со Можгаын, ужа "Свет" заводын валтӥсь директорлэн экономикая но коньдонъя воштӥсез луыса. Нош вуиз со татчы 41 ар талэсь азьло, Калинин городысь текстильной техникумез йылпумъяса. ... Нина Корпусова школаын "витьёслы" гинэ дышетскиз. Гуртысь школаез зарни медален быдтэм нылашлы улон усьтӥз вань ӧсъёссэ: дышетскы, тодон-валан люка, сюлмыдъя уж бырйы. Нина кыстӥськиз куиськон удысэ, туж потэ вал технолог луэмез. Син азяз пуктылӥз шатыр поттыса ужась станокъёсты, иськемъёсын бинем яркыт буёлэн пиштӥсь басмаосты. Техникуме со капчиен пыриз, но технолог ӧз луы, луиз экономист. Ӵапак та вакытэ школаез "4"-лы но "5"-лы йылпумъямъёс пӧлысь кылдытӥзы экономистъёсты вакчи дыр куспын дасянъя группа. Шедиз отчы Нина но. Тӥни озьы, ньыль ар интые, техникумлэсь программазэ ортчиз куинь арскын. Выль "пыжем" специалистэз ужаны ысто кыдёкысь Удмуртие, Сюга заводэ. - Со нуналэз мон туннэ кадь тодӥсько, - шуэ Нина Ильинична. - Татчы вуи 1958 арын 5 августэ, туж шулдыр шундыё нуналэ. Городэз но кельшиз: чалмыт но пичи гинэ, ульчаосыз писпуос пӧлы ышемын. Бордаз кыскиз завод но. Пияла посуда поттонэ мон нырысьсэ шеди, та дырозь практика дыръям ужай куиськон фабрикаосын гинэ. Тӥни озьы, 1958 арын "Свет" заводлэн проходнойтӥз пырыса, Н. И. Мартьянова туннэ нуналозь татын ужа. Ныл фамилизэ но лыктэм берегес ик воштӥз: вуоно кузпалзэ пумитаз заводысь. Владмир областьысь лыктэм егит, чебер пиен тодматскыса, ньыльдон ар ӵоже улонэтӥ ӵош вамышъяло ни. Нина Ильиничналэн улонэз чебер пужыосын пуктэм ковёр кадь пӧрмиз шуыны луоз. Заводын сое гажало. Нылкышнолы оскемын огез секытэз удыс - экономика но коньдон понна кылкутон. Та интыын пукыны кулэ вал кадь чурыт сямо йыг-йыг пиосмурт, но кышномурт пельпумъёс котьмалы дышемын, лэся. Озьы ини асьмеос будэтэмын: тыныд оско бере, ужа, шуг-секытъёсты пыд улад лёгаса кельты. Н. И. Мартьянова сярысь ке верано, улонлэсь йӧлвылзэ со утчаса ӧз ветлы: 41 ар ӵоже нормировщицаысен кутскыса вуиз директорлэн воштӥсез дорозь. Пумен ужаса, тодон- валанзэ азинтӥз Удмурт кун университетын, экономистлэсь дипломзэ басьтӥз. - Татчы вуэм берам, монэ нормировщике пуктӥзы. Шеди шальк-шальк воргорон коллективе, ремонтно-механической цехе. Отын куать ар ужай. Мыным туж яра вал нарядъёсты лыдъяны-чотаны. Отын номыр но секытэз ӧвӧл кадь, но адямиос азьын кыл кутонэз бадӟым. Одӥг ласянь, заводлэн кассаысьтыз мултэс коньдон медаз кошкы, мукет ласянь - ужась мурт ӝоже медаз усьы. Трос справочникъёсты учконо луиз, расценкаосты шонер пуктон понна. Соку данакез рабочийёс коньдон басьто вал быдэстэм нормазыя. Озьы ке но, уждунзы бадӟым ӧй вал. Куать ар ортчыса, Н. И. Мартьяноваез выжто планово-экономической отделэ. Куинь ар ӵоже со кивалтӥз заводысь профсоюзной комитетэн, бӧрысьгес луиз валтӥсь экономист. Куинетӥ арзэ ужа директорлэн воштӥсез луыса. Та дыр ӵоже предприятизы выльысь дунне вылэ вордскиз кадь. Вуж цехъёс пӧлысь кылемын на нырысетӥез гинэ, 1958 арын лэсьтэмез, кылемез ваньмыз выльдэмын, туала куронъёсъя пуктэмын. - Ортчемзэ тодэ ваёно ке, зэмен но, сюресмы капчи ӧй вал. Заводлэн азбар шортӥз ик ву бызиз, дэриез но коланы тырме вал. Гуръёсты пуэн эстылӥм, собере - мазутэн, али - газэн. Азбармы асфальтэн шобыртэмын, писпуосын котыртэмын. Егитомиз ужасьёсмылэн но арлыдзы. Шорлыдын вераса, али со 44 арес. Воштӥськиз "Светлэн" поттоно продукциез но. Россиысь химической промышленностез куашкатэмен сэрен, 1992-1993 аръёсы завод ужтэк кылиз, шуыны луоз. Соослэн химической реакциослы дасям посудазы нокинлы но кулэ ӧз луы ни. Самой соку завод оскыса но оскытэк выжиз пӧртэм пумо бутылка лэсьтонэ. Асьсэос утчазы рыноке потон сюрес, басьтӥсьёсты. Али 200-лэсь ятыр предприятиен юн кусып возё. Нина Ильиничнаен вераськытозямы, олокӧня адями кабинетаз пыраз. Одӥгезлы бумага вылэ гожтӥськемез кулэ, мукетызлэн юанэз вань. Директорлэн воштӥсезлэн ужез тырмыт. Котькудӥзлы кыл шедьтоно, кулэ интыяз юрттоно. - Мон шудо, дыр, - шуэ ачиз сярысь Н. И. Мартьянова, - малы ке шуоно, котырам сомында ӟеч адямиос. Умоен гинэ пусъеме потэ валтӥсь директормес Владимир Александрович Мохначевез. Дорамы со секыт вакытэ вуиз, коллективмес уг тоды вал. Но вакчи дыр куспын солэн ӧраз пыриз, производствоез выльдон борды басьтӥськиз, предприятиез шуг-секытысь поттӥз. Нина Ильинична 41 ар ӵоже ньылетӥеныз директорен ужа ни. Огез сярысь но уродзэ уг вера, но Владимир Александрович кемлаз ӵапак выльдӥськон шуонэн ӵош. Ма шуод, ваньмызлы пӧсь йӧтӥз. Но завод пыд вылаз йыг-йыг султӥз. Уждун татын толэзьлы быдэ кык пол дыраз басьто, шорлыдын вераса - 2 сюрс манет. Вылӥ квалификацен рабочий - 3 сюрслэсь ятыр. Утьыны быгатӥзы социальной удысэз но. Предприятилэн - аслаз профилакториез. Толэзь шутэтскон путёвка сылэ 1800 манет, рабочийёс тыро солэсь 10 процентсэ - 180 манет. Вань медпунктсы, спортъя но шутэтсконъя базазы, клубзы, магазинзы. Нимысьтыз юрттэт висъяло пенсие потӥсьёслы. Огъя вераса, калык сярысь сюлмаськон партия кивалтон аръёсы кадь шӧдӥське. Столовойзы но асьсэлэн - отын шӧдскымон дунтэм но ческыт сюдо, горо дысьёсыныз уд ӵошаты. Ваньзэ тае адӟоно коллектиылэн зӥб-зӥб ужан мылкыдызъя. Пӧсекъяса, керӟегъяськыса бызьылӥсьёсты заводысь уд пумита. Ӟеч вӧям, радъям машинаын музэн, котькуд ёзэз ас интыяз берга, ужа, пайда поттэ. Нина Ильинична Мартьянова улытозяз одӥг пол но ӧз жаля Можгае вуэмезлы, улыны кылемезлы. Кумнь ар талэсь азьло анайзэ но дораз ваиз ини. - Удмуртиын мыным ваньмыз кельше: инкуазь но, адямиос но. Вордскем палъёсам куинь ар ӧм вуылэ ни, - шуэ со. - Вань пичи гинэ сад-бакчамы, отын шутэтскиськом. Ваньмон дыръям тросгес саклык висъяны вырисько внукъёсылы. Яратӥсько пӧраськыны, пыжиськыны. Азьвыл аръёсы быдэс семьяенымы шутэтскылӥм ӵыжы-выжыосмы дорын, вуылӥм зарезь доры. Путёвкаен ветлӥм Кубае, Болгарие, дышетскыны кылдӥз Венгриын. Коньдон люканы ноку но ӧм тырше, туж потэ вал дуннеез адӟеммы. Н. И. Мартьянова, арлыдыз шоры учкытэк, али но егит. Со мыло-кыдо пыриське заводлэн но городлэн общественной улоназ. Юнме шорысь та нылкышноез ӧз быръе ук Можга город кенешысь депутатэ. Отын бюджетъя но коньдон ужпумъёсъя комиссиын ужа. Озьы бере, уксё ласянь татын котьку но радлыкез луоз, сое лыдъян-чотан - оскымон киын. Вералом на, городлэсь казназэ возёнын "Свет" завод ӧжыт уг лэсьты: ӟеч ужась предприятие тыронъёссэ ноку но уг ӝегаты. Ваньмыз со потэ умой коллектив, визьмо кивалтӥсь бордысь. Эшшо - бордаз вань ке Н. И. Мартьянова кадь адямиос, улон- вылонмес быгатыса пужыятӥсьёс, оскымон юрттӥсьёс. Нина Ильиничналэн ужез пусъемын пӧртэм наградаосын, солы сётэмын "Удмурт Республикаысь дано экономист" ним. Людмила МЕДВЕДЕВА, Туспуктэмез В. КАМАШЕВЛЭН. Нина Ильинична Мартьянова. Пайдаё шутэтско Пӧсь гужем нуналъёссэс пайдаё ортчыто вавож нылпиос. Ёросысь культура удысын ужасьёс туэ нырысетӥ арзэ басьтӥськизы нылпиослэсь гужем шутэтскон нуналъёссэс радъянэ. Сослэн кичӧлэмзыя сизьым маршрутъя экскурсия ужа. Нылпиосты нулло Срапаул, Воткинск, Чайковск, Ижевск но Можга городъёсы, нош кык маршрутсы ёросэтӥзы ортче. Лымшор палан улӥсьёс, мылкыд каремзыя, уй пала вуылозы, нош уй палъёс - лымшоре. Пиналъёс тужгес но шумпотыса мыно городэ. Пӧртэм музейёсы, адӟытонъёсы пырам сяна, тодмастко на со городъёсысь дышетскон заведениосын, нош Ижевске вуыса Иж шур кузя теплоходэн уяло. Таӵе экскурсиосы мылысь-кыдысь пыриськизы ни Тыловыл-Пельга, Вавож, Зеглуд-Какси, Каменной Ключ, Валипельга, Выль Бия школаосын дышетскись пиналъёс. Пусйыны кулэ, таӵе экскурсиосы ветлыны нылпиос кык но, куинь но пол мылкыд каро. Уго, анай-атайёс, асьсэос дун тырыса пиналзэс городэ нуизы ке, билет дунзы шӧдскымон дуно луоз. Со сяна, Вавож культура юртфн ужасьёс эшлыко кусыпъёс тупатӥзы ини сарапулъёсын. Туннэ нуналлы Сарапул ёросысь нылпиос вавожъёслэн сӥё-дано интыостӥзы экскурсия ортчытӥзы ни. Таӵе кутсконлы ваньмы умой дунъет сёто. Озьы бере, вавожъёслэсь адӟем кароно вылэм мукет ёросын улӥсьёслы но. В. КУТУЗОВА. Пачылэс уж ке вань... - Шудбур - вань ке уж, трос ке уж. Пачылмымон трос ужан... Со сётэм кужымды кык пол но, куинь пол но мед берытскоз асьтэлы ик, Глафира Николаевна. Туж гажано адямизэс тазьы ӟечкылазы 36 кузя люкаськем эшъёсыз, дышетскисьёсыз кылем арня вискын, 7-тӥ июле. Г.Н.Никольская - Москваысь Дышетон удысысь национальной ужпумъёсъя институтысь профессор, педагогика наукаосъя доктор, Россиысь но Удмуртиысь наука удысысь дано ужась. Но мултэс ӵашетыса нимо-дано каремез со уг яраты, соин ик 70 арес тырмон юбилеяз но ӧтиз тужгес матысь, дуно адямиоссэ гинэ. Ортчиз та ӝыт Ижевскысь радиозаводлэн егитъёсын ужанъя центраз. Глафира Николаевналэн кивалтэмез улсын педагогика удысысь трос тодосчиос будӥзы ни: наукаосъя доктор Геннадий Афанасьевич Ушаков, кандидатъёс Валентина Михайловна Ившина, Маргарита Родионовна Сельченкова, Антонина Михайловна Комарова, Галина Анатольевна Турова, Надежда Антоновна Шутова. Нош нырысь ик та нимез басьтӥз вал номыртэм лякыт кышномурт, Удмурт пединститутысь дышетӥсь Тамара Георгиевна Гаврилова (жаль, улонысь вазь кошкиз). Та вакытэ Г.Н.Никольскаялэн "бурд улаз" дышетско Юлия Байтерякова но Надежда Боталова. Анай интыын луиз со Москваын Щепкин нимо институтын дышетскем егит артистъёсмы понна но. "Татын ми удмурт кыллы зэмос дышим. Анай шоры сямен шорады учкылӥм. Оло, куддыр пунэмамъёсмес но берыктыны вунэтылӥмы," - тау каремзэ вераз Алексей Ложкин. Та нуналэ Дышетӥсьлы сётэмын асьме Кун Кенешлэн Данъян грамотаез. Ӟечкылазы Павел Николаевич Вершинин но Алексей Геннадьевич Красильников. Шуныт кылъёс веразы ас палъёсыз но - Шаркан ёросысь лыктэмъёс. Т.НИКОЛАЕВА. Пушкинлэн лицеез кадь Чеберез тужгес валась нылпиос - искусствоосъя школаосын дышетскисьёс - туэ гужем шутэтско "Радист" лагерьын. Татчы ке лыктӥды, тӥ Царское Селое кадь сюроды, "лицеистъёсын" пумиськоды. А.С.Пушкин улон вакытэ выллем суредъёсыз адӟоды - сценкаосыз, балъёсыз, конкурсъёсыз. 300 шутэтскись пиналъёс пӧлын "Глазовчанка" хор, Воткинскысь пияшъёслэн хорзы, Ижевскысь 1 но 8 номеро искусствоосъя школаосысь скрипкаен но духовой инструментъёсын шудӥсьёс, озьы ик пинал художникъёс. Усточиослэсь гужем шутэтсконзэс радъяны коньдонэн юрттӥз асьме правительство. А.Апаева. Туна астролог Асьме Удмурт элькунамы кылдымтэ на астрологъёслэн бадӟым но юн огазеяськонзы. Син астрологъёслэн асьсэ понна тыршись сообществозы ӧте бордазы огазеяськыны вань мылкыд карисьёсты, кинлы тунсыко улонысь трос валантэмез. Адямиослэсь адӟонзэс азьло ик тодыны но вераны мылкыд карисьёс ми дорын кулэ книгаос но юанъёссылы валэктонъёс басьтыны быгатозы, аккультизм удысын тодон-валанъёссы сярысь кенешозы. Ми юрттомы соослы талисманъёс но амулетъёс басьтыны, аккультизм удысысь квалифицированной специалистэн пумиськыны но астрологияя заочно дышетскыны, гуртысь нокытчы ветлытэк но. Со лэсьтӥське сыӵе адямиос понна, кудъёсыз вордӥськемын гипнозъя, тунаськонъя, пелляськонъя, астрологияя валанъёсын но быгатонъёсын, нош асьсэос со сярысь уг тодо, ӟеч уг тодо яке сое валало но, астролог луыны малпаса, милям радамы пыриськыны мылкыд каро. Таӵе адямиослы ми юрттысалмы соослэсь быгатонлыкъёссэс пуромытыны. Берло дыре наука возьматӥз ни, астрологъёслэн верамзы шонер шуыса, соин тросгес но тросгес адямиос милемлы оско. Милям астрологъёсмы, кылсярысь, вераны быгато, ог- огзэс яратӥсь эмеспи но вылькен, семья кылдытыса, кема аръёс ӵоже куспазы тупаса егитъёс азьло ик тодыны быгатысалзы ке, урод адӟонзэс палэнтэмзы луысал но семья куспазы улонзэс шудо радъясалзы, нош нылпиоссы анайтэк яке атайтэк ӧй будысалзы. Ми озьы тк тунаськом, кыӵе интыын адямилы улыны умойгес, кызьы кусыпъёссэс ӟечгес тупатоно семьяосазы но ӵыжы-выжыосынызы, ку ужбергатон борды басьтӥськоно яке нылпи вордоно но мукет пӧртэм сюлэмшугъяськон ужпумъёсты, озьы ик сэрттӥськом- пертчиськом, кыӵеесь янгышъёс лэсьтэмын адямиен азьло аръёсы. Со сяна, кылдытӥськом на огъя гороскопъёс, со пӧлын - ужбергатон сярысь но, но умойгес , котькуд адями аслыз нимаз гороскоп кылдытыны чакла ке. Милям пичи содружествоысьтымы асторологъёс адямиослэсь азьпалан адӟонзэс одыны быгато, соослы адями ку, кыӵе вакыт вордӥськемез но ачиз сярысь мукет даннойёссэ вера ке. Ми гожтэт пыр кусып возьыны быгатом нимаз адямиосын но быдэс коллективъёсын, луоз пумиськонэ лыктэммы яке дорамы лыктэм муръёсын пумиськеммы но соослэн вань юанъёссылы пыр-поч валатон сётэмлы, гороскоп дасяммы. Вазиське "Твой дом и сад" газетэ но независимой астрологъёслэн республиканской сообществоязы. Д. ПАРАМОНОВ, астролог. "Стройотряд" кыл ӧз вуны, иське Росссиысь студентъёслэн лэсьтӥськонъя отрядъёссы "улӟыны" кутскизы. Та сярысь ивортэ Сыктывкарысь "Красное знамя" газет. Городын кык отряд кылдытэмын ни. Ваньмыз умой радъяськиз ке, чакла Коми Республикаысь Егитъёсын ужанъя комитет, вунэтэм удысэз одно ик азинтоно луоз. Матысь дыре чакламын бригадаосты ужаны сьӧрло келянэз радъяны.Нош та вакытэ студентъёс дор палъёсазы тыршо. Туж тунсыко объектъёс шедиллям соослы. Одӥгез отряд Летка черкогуртысь психоневрологической диспансерлэсь изён юртсэ тупатъя, кыкетӥез отряд Емваын призывъя пункт лэсьтэ. Иворъёсъя национальной служба. Адыгеяысь нюлэскын удмуртъёс медаз йыроме! Пӧсьтолэзьлэн (июльлэн) нимыз ик омырез ӟырдатэ. Уката ик туэ. Шунды чик жалятэк сиоссэ музъемлы кузьма. Шур чильыр-вальыр бызьыса чортэ мугорез юзматыны, ог шапыклы ке но гомась шундылэсь ватӥськыны. Сое ӟеч валало каникулэ потэм пиналъёс. Шутэтско, шудо, пыласько. Нош, куд- огезлэн шутэтскон дырозь ӧй вал та вакытэ. Малы ке шуоно, "Заря" шутэтскон лагерьын ортчизы соослэн аспӧртэм ӵошатсконъёссы. Нимзы таӵе: шуге-леке шедемъёслы юрттон школа. Сыӵе ужрад республикаямы нырысьсэ радъямын. Отчы пыриськизы пӧртэм ёросъёсысь 150 пала нылпиос - 10 команда. Коньдонэн юрттӥзы Калыкез дышетонъя министерство но Правительстволэн Граждан оборона ужпумъёсъя но кышкыт учыръёслэсь утиськонъя комитетэз, Удмурт Республикаысь Егитъёсын ужанъя кун комитет. Пиналъёс улыны палаткаосы интыяськизы. Вуоно спасательёслы пӧсь куазь но, чибинь но кышкыт ӧвӧл. Ваньзы задор мылкыдоесь, дасясько нырысетӥ конкурслы. Тани лыктӥсько одӥгез палатка дуре. Кылӥсько гитараен шудэм куараос. - Кытысь-о тӥ, пиналъёс? - Селта ёросысь. - Осконды вань-а вормыны? Кузь но зӧк йырси пунэтэн нылаш кыллы кисыяз уг пыры: - Вань. Милемлы школаямы шуизы: вормытэк эн бертэ. Зэм, татысь нюлэскытӥ шуггес луоз ветлыны - писпуос ӵем будо, силё трос. Но милям мылкыдмы капчи, малпаськом: ваньмыз пӧрмоз. Нош ӧм ке быгатэ вормыны - ныръёсмес ум оше: шутэтском но мукет пиналъёсын тодматском. - Тӥляд чыртыяды компас ошемын. Нош зэмос улонын тэле йыромиды ке, сюрес доры потыны быгатоды-а? Уд-а кышкалэ? - Ум. Ми ведь компастэк но сюресэз шедьтыны быгатом. Ӝуйы будэмъя, шундыя, кизилиосъя. Милемды ваньмызлы тренеръёсмы дышетӥзы. Тани кылӥськиз валтӥсь судьялэн Сергей Владыкинлэн куараез. Строе люкаськоно, пе. Чузъяськиз ӵошатсконъёслэн гимнзылэн гурез. Ӝутскизы флагъёс. Кивалтӥсьёс ӟечкылам бере кутскизы ӵошатсконъёс. Соос ортчизы куинь этапен. Нырысетӥез - нюлэскын сюрес утчан - ориентирование. Кыкетӥез - боевой листок дасян. Куинетӥез - адямиез шедьтон но утён. Мар но ӧз косэ нылпиосты лэсьтыны! Котькинлэсь чаляк вуоно вал силё-гопо нюкъёс вамен финиш гожозь. "Сӧсырмем" адямиез носилка вылэ выдтыса поттоно тӥяськем выж вамен. Нюлэстӥ кӧт вылын нюжтӥськыса мыноно. Эшшо ке йыромоно ӧвӧл на. Янгыш лэсьтӥд ке - штраф балл. Изьыны но меӵак кызь куинь часэ выдоно. Собере кесяськид-кырӟад ке, эшшо штраф балл кузьмалозы на. Вормисе потозы самой ӧжыт очкоен командаос. Куинь нунал одӥг час кадь чаляк лобӟиз. Ӵошатскем сяна, пиналъёс тылскем котырын гатараен пукизы, дискотека радъязы, трос выль эшъёс шедьтӥзы. Нош йырысьтызы уг кошкылы одӥг малпан: кызьы вормоно? Азьветлӥсьёс августэ мынозы Адыгеялэн шоркараз - Майкопе, Россиысь нырысь инты понна ӵошатсконъёсы. Тани вуиз вормисез ялон дыр. Куинетӥ инты басьтӥллям Игра но Каракулино ёросъёс, кыкетӥзэ Вотка-1 но Можга. Чемпионъёс луизы Кез ёросын но Ижысь Октябрьской ёросысь шудоос. Соос ик басьтӥзы киысь кие выжись кубокез. Самой амалоосызлы но шумпричъёсызлы кузьмазы Удмурт университетэ дышетскон направление. - Туэ университетын кылдӥз выль кафедра, - валэктӥз комитетын ужась полковник Виктор Колесов. - Отын дышетозы секыт учыръёслэсь утиськон амалъёслы. Ми сётӥськом отчы направление. Мукет абитуриентъёсын одӥг кадь балл люказы ке, дышетскыны кутозы тӥледды. Кыӵе меда вормисьёслэн мылкыдзы? - Нылъёс-пиос, шуг-а вал вормисе потыны? - Ма, туж ик ӧй вал. Милям командамы туж умой, ог-огмес капчи валаськом, ваньмы ми амалоесь но задор мылкыдоесь. Эшъяськонмы юрттӥз, дыр, вормыны. - Нош татчы лыктыны трос-а дасяськиды? - Милемлы дасяськонъёс шуг ӧз йӧтэ, угось ми ваньмы эшъяськиськом спортэн, яратӥськом бызьылыны но тэтчаны. - Адыгеяе мыныны тӥ дась-а? - Тросгес дасяськыны кулэ луоз. Асьме республикамес ми возьматомы ук. Марина КОСТЫЛЕВА. Инкуазь суредъёс Кучыран. Монэ президентэ ке бырйысалзы, нюлэслэсь оглом вылтуссэ но, пуштроссэ но воксё воштысал. Вылӥысен мыным ваньмыз умой адӟиське. Бадяр, тыпы, пужым, кызьпу воштысалзы пипу но беризь выллем лябесь писпуосты, соослэсь уго йыг-йыгесь юртъёс пуктылыны луэ, чебересь арбериос юнэсь, чебересь пӧрмо. Кедрез но вайыса котыр вӧлмытысал. Котькинлы уж но шедьысал соку - улысалмы майбыр, курадӟонэз, куанермонэз тодытэк. Быръе монэ президентэ! Балян. Кин со, мар со кучыран - номыр уз пӧрмы солэсь. Капыръяны гинэ турттэ. Уин шыпытак - лушкемак гожеръя, чаклаське но кӧня ляб бурдоосты быдтэ - изьверлы укша. Соин ик сое уйсы но шуо тышкасько, куарето. Нош монэ президентэ ке бырйиды нюлэскын зэмос кузё луо. Ӵыжинъёс интые кызъёсын но пужымъёсын колбасаос, котлетъёс, пельняньёс, конфетъёс но шоколадъёс ошылӥськысалзы - си кӧня мылыд потэ. Соку котыр нюлэс сяськаяськоз, шулдыр крезьгурен пачылмоз. Кион. Нош мон, мон ке президент луысал, туж ӝог улонэз воштысал. Али тани кӧня пӧйшур вынъёс но агайёс, анайёс, кенакъёс но туклячиос ужтэк кылемын. Асьме нюлэсъёсын инты трос - мертты, эн азьтэмъяськы емышо садъёс, ыж, скал, кеч, парсь вал гидъёс пуктыны. Вакчияк вераса, ворды лачак пудо-живот. Сиёнэд-юонэд ӝӧквылтыр котьку луоз. Кӧня ке ар куспын улонэд паймымон воштӥськоз Дисциплина кулэ, дисциплина, гажано нюлэс эшъёс. Нош асьмелы порядокез сюлоен но пряникен, шуэм сямен, тупатыны уд быгаты. Нырысь секытгес ке но луиз, бӧрысь ваньбурен, бусьтыр улонэн но шудэн берытскоз Соку ини ӟичы лудкечен, кунулскыса ветлӥзы, ваньмыз ӵошен - гондыр кырпарсен, кион ыжъёсын но кечъёсын эктозы, шулдыръяськозы, шулдыр гурен кырӟалозы бурдоос. Коньы цирковой программазэ возьматоз. Чик вина юытэк но мылкыд лӧптоз, шукыяськоз. Ӵуказеяз нош ужамъя ужам потоз. Бурдоосын но пӧйшуръёсын кенешиз Г. ГОРОДИЛОВ. Ижмех: Макаров пистолетлы но пӧйшуран пыӵаллы - 50 Кизилиос инмысь уг усё Эрий Корепанов - механической заводын тодмо адями. Куамын укмыс ар талэсь азьло, Ижысь механической институтэз йылпумъямез бере, со татчы вуиз. Нош одӥг ар ортчыса, 158 номеро отделэ пуктӥзы. Со дырысен татын тырше: нырысь вал огшоры инженер- конструктор, собере 10 ар пала кивалтӥз спортивной но пӧйшуран пыӵалъёсъя конструкторской бюроен. Али сыӵе изделиосты поттонъя валтӥсь инженер-конструктор луэ. Тыршемез пусъемын "За доблестный труд", "Ветеран труда", ВДНХ-лэн 3 медаленыз,пӧртэм знакъёсын, трос пол сётъямын заводысь умоез кичӧлтӥсь, изобретатель ним. Эрий Корепанов - предприятиын одӥгез усто конструктор. Солэн аслаз 7 изобретениез но 60-лэсь уно рационализаторской ӵектонъёсыз. Солы дыр вуэмын ни Удмурт Республикаысь промышленностья дано ужась ним сётыны. Эрий Александровичлы миым 60 арес тырмиз. Сое шутэтскыны келян сярысь малпаськись но ӧвӧл. Удмурт конструктор вордскемын но будэмын Балезино станциын. Пичиысен со веръяз улонлэсь шӧгзэ но кузьытсэ, секытсэ но капчизэ. Берлоез трос-а вал - шуг вераны. Малы ке шуоно, Эрий ньыль арескын атайтэк кылиз, Сталинград дорысь лек ожъёсын Александр 1942-тӥ арын бырыны шедиз. Нош нэнэез та югыт дуннеысь кошкиз, Эриклы дас аресыз мыныку, 1948-тӥ туж секыт арын. Пичи пияшез ӧз кушты бабушез: сюдӥз-вордӥз, пыдйылаз вуттӥз. Соин Эрий Александрович бабушезлы пумтэм тау каре. Нылпи юртэ шедьысал ке, пе, али кин тодэ, кин луысал... Озьыез бен озьы. Но улон сюрес быръён ласянь аслэсьтыз адямилэсь но тросэз потэ. Эрий трос лыдӟиське, туж устоесь сочинениос гожъя. Соин ик, вылды, ӟуч кыллы дышетӥсьёс меӵак шуылӥзы, тӥледлы, пе, МГУ-ысь филологияя факультетэ сюрес усьтэмын, усто филолог луоды. Ваньмыз со шонер, озьы ик луысал, дыр, Эрий дышетӥсьёслэсь дэмланъёссэс пеляз понысал ке. Но со туж шумпотыса но яратыса ветлэ техникая кружоке. Сое нуиз Эрий Корепановлэн гажано дышетӥсез физик Николай Васильевич Калинин. Со быгатӥз егит пиосты техника борды кыскыны, малпаськыны но маке выльзэ утчаны. Эрий Александрович Балезиноысь шор ёзо школаез азвесь медален йылпумъяз но Ижысь механической институтэ 1955-тӥ арын экзаменъёс сётытэк пыриз. Соин ӵош эшшо 4 мурт кружоке ветлӥсь эшъёсыз татчы лыктӥзы на. Одӥг школаысь одӥг институтэ 5 адями пыриз. Туж умой ук со. Дано конструктор быдэс улонзэ сӥзиз механической заводлы, спортивной но пӧшуран пыӵалъёс поттонлы, соосты умоятонлы но выльдонлы. Ортчем сюрессэ ноку но уг жаля. Но одӥгзэ гинэ верамез потэ. Со шуэ: - Мыным ноку кизилиос инмысь ӧз усьылэ, ваньзэ ас кужыменым лэсьтӥсько- быдэстӥсько. Со сярысь жаляса уг вераськы. Улон сюресме выльысь ортчоно луысал ке, тазэ ик бырйысал. Эрий Александрович пичиысен дышиз шугзэ-секытсэ вормыны. Котькуд адямилы со кулэ, дасьсэ возьмаса улӥд ке, номыр ӟечсэ уд адӟы. Ведь калык юнме уг шуы, капчиез, пе, ӝӧк вылын. Ваньмызлы со валамон кадь, но куд-огез сое вунэтэ. Эрий Корепанов сярысь гинэ озьы шуыны уг луы. Конструкторъёслэн отделазы вуыса, егит инженер саесъёссэ пужалляса ужаз пыриз. Со нырысь ик умоятӥз-выльдӥз вылысьтыз вылаз кык гумыен Иж-39 пыӵаллэсь ударно-пусковой механизмзэ. Басьяськисьёс тае ӝог шӧдӥзы. Тӥни со луиз Эрий Корепановлэн нырысетӥ изобретениез. Собере со лыдпус ялан йылӥз но 7-озь вуиз. Нош рационализаторской ӵектонъёсыз сярысь веранэз ик ӧвӧл, таосыз 60-лэсь трос ни. Заводын али ӧвол, дыр, сомында выльдонъёс сётӥсьёс. Ижмехысь одӥгез устоез конструктор Эрий Алексадрович лэсьтӥськон удысын но ужаз, нош ӝытазе дышетскиз. Со вал сантехник, каменщик. Улонын номыр мултэс уг луы, ваньмыз яра.Озьы ик Корепановлы но. Конструктор кышноеныз пи но ныл будэтӥзы. Кыксэс ик пыдйылазы пуктӥзы ни. Алигес "Жигули" машина басьтӥзы. Табере 25 иськеме сад-бакчаязы ветлонзы капчи луиз. Нош кызьы шутэтскиськоды юанэлы Эрий Александрович жаляса кадь тодаз ваиз: - Туж яратӥсько вал шахматэн шудыны. Куасэн бызьылӥ, ГТО-я нормаос сётъяй. Оглом вераса, спортэн выри. Аръёс ортчемъя-а, мар-а шуод, али ваньмыз вунэ ни. Кузпалэ яратэ турлы сяськаос будэтыны. Ачим солы юрттӥсько гинэ. Эрий Александрович шумпотэ заводлэн пыд йылаз султыны быгатэмезлы. Огдыре, пе, югдурмы секыт вал. Туэ выль арозь предприятие уждунъя вань тыронъёссэ быдтӥз. Али ваньмыз дыраз уждун басьто. Тӥни озьы конструкторъёслэн но ужан мылкыдзы уката ӝутскиз. Соос зэмзэ выль вормонъёсын пумитало паӵалъёс поттыны кутскемзы дырысен 50 ар тырмон юбилейзэс. Кызьы шуо, кисыязы трос выль изделиос, уката устоесь, ӟечесь пыӵалъёс бичаны дасямын. Эрий Александровичлэн но котькудаз тыршемез понэмын. Со эшъёсыныз ӵош данъяське заводазы таӵе, кунгож сьӧрын басьтыны ярамон, продукция поттэменызы. Нош Ижысь оружейникъёс быгато чебересь пыӵалъёс, пистолетъёс поттыны. Дуннеысь рынокын соос пумен бадӟым инты басьто ни. Г.РОМАНОВ. Туспуктэмез В.КАМАШЕВЛЭН. "Кенеш" журналлэн выль номерез Финн гожъясьёс - удмурт лыдӟисьёслы "Тӧллы пумит" - сыӵе йыръянэн усьтӥське журналмылэн проза сэрегез. Туала улонысь адӟемъёссэ, чакламъёссэ куать пичиесь веросъёслэсь сузьетаз возьматэ Рашит Хайдар. Прозаик Николай Никифоров "Вить йырси нюжаос" повестьсэ таяз номерын тазьы йылпумъя: "Следовательлэн кабинетысьтыз егит кузпалъёс асьсэ коже ӧз потэ ни. Соосты милиционеръёс келязы но машинае пуктӥзы". Тӥни кыӵе югдуре шедизы муртъёс чотын капчиен гинэ улыны дышем геройёс. Соосын тодмо ни тӥ витетӥ номерын печатлам люкетэзъя. Журналмылэн та ар понна нырысетӥ вить номеръёсысьтыз ик лыдӟиды Кузьма Куликовлэн "Улонын мар но уг луы" повестьысьтыз люкетъёссэ. Инвожо толэзе произведение йылпумъяськиз. "Кенешысь" ӵем гинэ лыдӟылӥськоды финн тодосчиослэсь ужъёссэс. Ӵыжы-выжы луись калыклэсь кызьы но маин улэм-вылэмзэ алияз номерамы паськытгес но мургес усьтоно кариськимы. Лыдӟисьёсмылы ӵектӥськомы лириклэсь Эйно Лейнолэсь кылбуръёссэ, писательлэсь Анатолий Уваровлэсь но М.А.Кастрен обществолэн кивалтӥсезлэсь Ильдико Лехтиненлэсь ваче син вераськемзэс, финн писательлэн Мика Валтарилэн повестьысьтыз люкетсэ но литературоведлэсь Кари Салламаалэсь статьязэ. Таиз тодосчи, шаерамы вуылыкуз, "Кенеш" журналлэн редакцияз но пыраз. Ужасьёсынымы тодматскемез сярысь Финляндиын потӥсь издание гожъяз. "Эшъёсмы, кусыпъёсмы" сэрегысь та сузьет дуно луэ на тани мар ласянь: номере дасям вань ужъёс удмурт кылэ меӵак финн кылысь берыктэмын, ӟуч яке мукет кылъёсты кутытэк. Соосты асьмелы туж валамон карон бордын ужазы тодосчиос В.Шибанов, Ю.Перевощиков но Л.Девятова. Туэ гудырикошкон толэзе Россиысь Писательёслэн огазеяськонзылэн членэзлы кылбурчилы Семен Перевощиковлы 70 арес тырме. Матэктӥсь юбилееныз валче, солэсь берло дыре гожтэм кылбуръёссэ ӵектӥськом. Котькуд номерысьтымы сямен ик таисьтыз но шедьтоды выль кырӟанэз, лыдӟисьёсмылэн гожтэтъёсысьтызы чуръёсты, дэмланъёсты но трос мукетсэ. Тодады вайытӥськом: туэ пӧсьтолэзь но гудырикошкон толэзьёс понна потоно кык номермес огазеяськомы. Кызьы верамы вал ини, сое ми быдэсак сӥзиськомы калыкмылэн яратоно кырӟанъёсызлы. Отын озьы ик бадӟым инты басьтозы нылпиослы гожтэмъёсыз. Кырӟанъёсын выль номермылы кулэяськисьёслэсь вазиськемзэс туж витиськомы 21-57-73 телефон номеръя яке гожтэт пыр. Гурт улон Вужезлэсь уг куштӥсько Гуртъёсысь пудо сиён дасясьёс понна пӧсь вакыт вуиз. Туннэ нуналлы шаерамы дасямын 51 сюрс тонналэсь ятыр кӧс турын. Туэлы чаклам планлэн со 20 процентэз луэ. Жалем сиён силос гуэ согемын 21 сюрс тонна, планъя со 9 процент. Котькытын сямен ик та шулдыр шундыё нуналъёсы пумтэм сюлмаськонъёссы Шаркан ёросысь гурт хозяйствоя "Мишкинский" огазеяськонын но. Туннэ нуналлы соос ёросын азьветлӥсьёс луо. Вера та хозяйствоысь валтӥсь агроном Надежда Ивановна Вахрушева: -Туэ пудо си ён дасянын шуг-секытъёс кылдо техника ласянь. Трактор-машинаос вужесь. Огинтызэ тупатӥськод но, мукетыз сӧриське. Эстӥськон но воштос ёзъёс басьтыны выриськом, йӧл яке сӥль вузаса. 7 июльлы силос дасямын ни 2 сюрс 100 тонна. Кӧс турын утялтон борды та нуналъёсы гинэ кутскимы ай. Отын умой тыршо комбайнер Анатолий Ложкин Сергей пиеныз. Пӧртэм шуг-секытъёс кылдо ке но, Мишкиноысь пудо сиён дасясьёс соосты ӝог сэртто- пертчо. Татысь ужасьёслэн, нош соос ваньзы сямен егитъёс, мылкыдзы но задор. Соос эшъёсынызы ӵошатскыса выллем тыршо. Силос аран комбайнэн ужало Николай Сунцов но Герман Титов, гуэ вож сиён вортто Андрей Ившин но Вячеслав Перевозчиков, тракторен силос лёго Василий Перевозчиков, Игорь Соболев. Пусйыны кулэ, Анатолий Вахрушев берло верам эшъёсызлэсь ужзэс азьланьтэ уин. Та вакытэ тросаз ёросъёсысь хозяйствоосын турын пызь уг изо, гранулаоос но уг лэсьто. Нош "Мишкинский" огазеяськонын сое дунъяло на. Туннэ нуналлы кык тонна гранула лэсьтэмын ни. Та удысын умой тыршо оператор Андрей Медведев но солэн юрттӥсез Сергей Быстров. Кызьы вераз Надежда Ивановна, Шаркан ёросын, пе, соос гинэ гранула поттонэн выро на. Толлы тырмыт пудо сиён дасялозы шуыса, осконэ бадӟым. Уго кылем арын ӟеч пудо сиён дасямзылэн пайдаез туннэ но шӧдӥське на. Курозы но силоссы хозяйствоысь пудоез сюдыны быдэс гужемлы тырмоз на, пе. В. КУТУЗОВА. Силос утялтон комбайнэн ужа Николай Вахрушев. Кенешо Андрей Иванов, Костя Пушин но агроном Надежда Вахрушева. Бусые ужгур вӧлме. Туспуктэмъёсыз В. КАМАШЕВЛЭН. Солэн сюлэм либытэз "Наука туж уно шедьтӥз, усьтӥз ини выльзэ, паймыны гинэ кыле, кызьы озьы та дырозь сокем трос тодэмын, эскеремын. Нош мае ум на тодӥське, со пумтэм-йылтэм. Тани Оксфордын поттэм книгаын шуэмын: Музъем вылысь 8 миллион пӧртэм лулосъёс (животнойёс) эскерымтэ на. Кызьы ке улон, озьы ик наука но дугдылытэк азьлань мынэ. Нош инкуазь ас ватосъёссэ пыдлон возе. Со шыпыртыса, лушкем гинэ вера. Выль утчаськонъёс выль но выль ужпумъёс пукто. Нош котьма ке но, дунне вылын макем кыстӥськоз улон, сокем ик нырысь интыын луоз адямиез эскерон (изучать карон)". Арсений Загребин. Зэм, наука бадӟым вамышъёсын азьлань мынэ. Чаклано ке, Россиысь морфологъёслэн (анатомъёслэн, гистологъёслэн но эмбриологъёслэн) съездъёссы нырысь ик сизьым, собере куать, отӥяз вить ар куспатыса ортчылэмын: 1981-тӥ арын Оренбургын, 1988-тӥ арын Ленинградын, 1994-тӥ арын Тюменьын. Нош берлозэ, Ньылетӥ ӧтчамзэс, люкаллязы туэ инвожо толэзе Ижевскын. Малы быръемын вал асьмелэн шоркармы? Татысь медициная академиысь адямилэн анатомиезъя кафедра бадӟымесь азинсконъёс басьтӥз ни таӵе эскеронъёс ласянь: кызьы асьсэды возё-воштӥсько тужгес шӧдӥсь лулсӥё пуш тӥрлыкъёс (нервной аппаратъёс) но лысьӧм бордысь быгытъёс, куке соос борды йӧтӥське палэнысь кужым. шуом, вылӥ энергиен протонъёс, радиоактивной кобальтлэн гамма-излучениез, музъемлэн укыргес кыскемез, магнитлэн котыртэмез, тужгес шӧдӥсь интыосыз венен бышкан но мукетыз. Ӵапак та удысын шаерамы нокинэн ӵошатонтэм бадӟым уж лэсьтӥз республикаысьтымы наука удысын дано ужась Ижевскысь медициная академиысь дано академик Арсений Михайлович Загребин. 1973-тӥ арысен со луэ медицина наукаосъя доктор, 1974-тӥ арысен - профессор. Солэн кивалтэмез улсын быдэстэмын одӥг докторской но дас одӥг кандидатской диссертациос, кылдытэмын анатомъёслэн-нейроморфологъёслэн научной школазы. Ачиз Арсений Михайлович эскероно удысэзъя гожтӥз но печатлаз 168 уж. 1992-тӥ арын ВНОАГЭ - Россиысь анатомъёслэн, гистологъёслэн, эмбриологъёслэн научной огазеяськонзы - А. М. Загребинэз кутӥз аслаз Дано адямиосыз радэ. Та нимез солы юнме ӧз сётэ шуыса адӟиськиз, Ижевскын съезд ужан дыръя но. Арсений Михайловичез тодмаса, гажаса но ӟечкыласа дораз лыктылӥзы, котыртылӥзы пӧртэм городъёсысь - Благовещенскысь, Новосибирскысь, Челябинскысь, Тюменьысь, Москваысь, Санкт-Петербургысь - тодосчиос. Ачиз но котькудӥзлэсь нимысьтыз юалляськылӥз, кыӵе мыно ужъёсыз, кельше-а татын, мар юрттэт кулэ... А. М. Загребинлэн та ӧтчамысь тужгес но адӟемез потӥз 87 аресъем эшсэ но дышетӥсьсэ, кудӥз юрттӥз солы докторской диссертацизэ дасяны, Россиысь медицина наукаосъя академиысь академикез В. В. Куприяновез. Ӧтемезлы пумит уго Василий Васильевич гожтӥз вал: "Ӧйтӧд, быгато меда... Улонысь кошкиз кузпалы..." Арсений Михайлович нош ик куриз: "Одно ик тырше вал лыктыны, мон дорын куно луоды..." Нош съезд ортчем бере нырысь нуналаз ик В. В. Куприянов тау карыса ыстэм открытка: "Туж но туж тау... Ижевскын мыным номыртэм кельшиз. Тӥляд семьяды - асьтэос но, нылды но - вань сюлэм шуныттэс сётыса пумитады-утялтӥды". Вераны кулэ, А. М. Загребинлэн нылыз, Ирина Арсеньевна Исаева, ӵап доразы, Ижевске бертэмын вал. Со атаезлэн сюрестӥз ик мынэ - врач-анатом, медицина наукаосъя кандидат. Нош кузпалыз Арсений Михайловичлэн, Клавдия Анисимовна, ар-кык талэсь азьло сое квартираяз огназэ кельтыса кошкиз ни... Россиысь морфологъёслэн ИВ ӧтчамзы Ижевскын ужаз инвожолэн 17-тӥ-19-тӥ нуналъёсаз. Со сӥземын вал А. Н. Миславский но С. С. Михайлов профессоръёсыз буре ваёнлы. Ортчытӥзы съездэз Россия Федерациысь Тазалыкез утёнъя министерство, Россиысь анатомъёслэн, гистологъёслэн, эмбриологъёслэн научной обществозы но солэн Ижевскысь ёзэз, медициная кун академия. Та ужрадлы бадӟым саклык висъязы асьме республикаысь Кун Кенеш но Правительство. Съездэз ортчытыны туала куронъёслы тупась, умой условиос кылдытэмын вал. Усьтӥськиз со Операя но балетъя кун театрын, секциос ужазы Удмурт университетлэн выль юртаз - "Интернет" центрын. Морфологилэн пӧртэм удысъёсызъя дас секция радъямын вал. Огъя вераса, куинь нунал куспын лыдӟем докладъёслэн- ивортонъёслэн лыдзы 300-лэсь ортчиз. Устоосыз ужъёс пусъемын дипломъёсын. Ортчем дыр ӵоже быдэстэм ужпумъёсъя вераськиз ВНОАГЭ-лэн кивалтӥсез Россиысь медицина наукаосъя академиысь академик Лев Львович Колесников. Со выльысь быръемын та огазеяськонлы кивалтӥсе. Ижевскысь медициная академиысь, гурт хозяйствоя академиысь но кун университетысь 200 пала тодосчиос пыриськизы съездлэн ужаз. Соос пӧлын вал уно доцентъёс, профессоръёс, академикъёс. Кӧс кылын гинэ ӧвӧл - пӧртэм видео- адӟытон амалъёсын (слайдъёсын, фильмъёсын) но юнматылӥзы вераськемъёссэс. Медициная академиысь анатомияя кафедралэн азинсконъёсыз сярысь мадиз медицина наукаосъя доктор, профессор Виктор Михайлович Чучков. ... Нырысетӥ курсысен кутскыса ик та нодлыко пияшез, студентъёслэн научной обществозылэсь кивалтӥсьсэ, синйылтыса возиз А. М. Загребин. Куке солы дэмлаз анатом луыны. Виктор Чучков пыкиськиз: уг, хирург луэме потэ... Нош улон ас сяменыз кариз: Виктор Михайлович луиз адямилэн анатомиезъя кафедралэн кивалтӥсез. "Мынам дышетскисе", - данъяськыса вера та доктор сярысь Арсений Михайлович. Кафедразылы тырмиз ни 65 ар. Со сярысь пыр-поч гожъямез шедьтыны луэ "Российские морфологические ведомости" сборниклэн кылем арын потэм 3-тӥ-4-тӥ номерысьтыз. Съездлы дасяськон вакытэ ик ини куд-ог валтӥсь учёнойёслэн докладъёссы, озьы ик мукет вераськисьёслэн тезисъёссы печатламын та вылӥ верам сборниклэн туэ потэм нырысетӥ номеръёсаз. Нош съездлэсь вань материалъёссэ дасям, печатлам бере, Арсений Михайлович соосты сётоз Удмурт Республикаысь Центральной архиве. Тазьы котькуд дуно кагазэз, арбериез ӝикытатыны, утьыны тыршемез понна та архивлэн дирекциез сое пусйылӥз ни вал Почёт грамотаен но. Арсений Михайлович Загребинлэн ортчем сюресэз - быдэс, зӧк книга гожтымон. Быдӟым Октябрь революция азьын вордскиз, крестьян ужлэсь вань секытсэ адӟиз, Быдӟым оже пыриськиз... Огшоры гинэ ӧз - военной врач, авиационной частьын медико-санитарной службалэн начальникез вал. Война бере дасо арлэсь кема - больницаын хирург, валтӥсь врач. Республикаысьтымы тазалыкез утёнъя министрлэн воштӥсез интыын но тыршиз. Нош собере вань лул кужымзэ, тодон-валанзэ сётӥз Ижысь медициная институтлы (али академия). Ньыльдон арез герӟаськемын вуоно врачъёсты будэтонэн, соослы наукае сюрес усьтонэн. Институтлэн ректорез, анатомияя кафедралэн кивалтӥсез, профессор... Мар быдӟа визь, сюлэм (кужым, чидан, тыршон) луыны кулэ, такем бадӟым удысэн кивалтыса, наукае йырын-пыдын зымиськыса, со дыре ик пӧртэм общественной ужъёсыз быдэсъяны. Арсений Михайловичез бырйылӥзы КПСС-лэн ХХИИ съездаз делегатэ (1961). РСФСР-лэн Вылӥ Советэзлэн куатетӥ ӧтчамаз (1963-1967) со тазалыкез утёнъя комиссилэн кивалтӥсез вал. Кинлэсь ке возьмаса ӧз улы - Арсений Загребин ачиз гожтӥз книга - "Клятва Гиппократа" (1988). Солэн сюлэм либытэз, вуоно врачъёсты будэтонын атай кадь сюлмаськемез пыӵамын, дыр, котькуд чураз. Туж гажаса гожтэ со аслаз ӵош ужам, ожмаськем эшъёсыз сярысь но. Кырымпыдэс вылэ пуктыса кадь возьматэ ас институтсэ, кафедразэ, нимысьтыз ӝутыса ик вера анатомия наукаез сярысь. Зэм, та наукалэн кылдэмез, азинскемез, адями мугор люкетъёс но соосты дышетон, эмъян сярысь Арсений Михайлович уйшор уин сайкатыса но, дугдылытэк вераны быгатоз... Нош вань та адямилэн эшшо одӥг Инмарен сётэм шӧдонэз, быгатонлыкез - со сярысь нокыӵе данъян грамотаосыз но, биографиысьтыз, книгаысьтыз чуръёс но уг верало. Со шӧдонэз-валанэз визыла пинал дырысь, Бодья ошмесысьтыз. Ассэ шараятэк кадь улӥз но - ӧръяськыса потӥз 90-тӥ аръёсы гинэ. Арсений Загребинлэн бӧрсьысь печатласькыны ӧдъязы кылбуръёсыз: я газетын, я журналын. Кызьы гожтӥз нырысетӥ дунъет сётӥсез, Петр Поздеев, та чуръёс "классической поэзилэн куронъёсызлы уггес тупало... Озьы ке но, солэн кылбуръёсыз сюлэмез бордазы кыско - соос ӝужатэмын йӧно малпанъёс но мылкыдъёс вылын". Озьыен, Арсений Михайлович инкуазез, дуннеез усьтыны тырше кылбуръёс, чеберлыко валанъёс пыр но. Со бордысь но адӟе аслэсьтыз шудзэ - пайда сётэмзэ. Оло нош, со луысал Степан Широбоков кадь зэмос калык кылбурчи? Наукаын тодымтэзэ усьтыны тыршонэз - дартэз ӧз ке гомӟытысал вань лул пуштроссэ, ӧз ке дурысал сое анатомия борды. Т. ПЕТРОВА (ЧЕРНОВА). * Поезд вырӟон азьын. Профессор А. М. ЗАГРЕБИН (бурысез) Москвае келя бадӟым эшсэ, дышетӥсьсэ Россиысь медицина наукаосъя академиысь академикез, профессорез В. В. КУПРИЯНОВЕЗ. Чуръёс, чуръёс... Кыдёкын шуыса, адӟытэк эн кельтэ Юмъяшур гурт Алнашлы кыдёке интыяськемын, кызьы шуо, со - неперспективной. Соин ик газ пыртыны но учкемын ӧвӧл. Собыдӟа гуртлы одӥгетӥ гинэ телефон пыртэмын, со но ӵемлэсь ӵем сӧриськылэ. Тылпу потон учыре нырысь ик Татарие вазиськоно луэ, бигеръёс милемлы матын уло угось. Отчы но асфальт сюрес лэсьтэмын ӧвӧл. Сюреслы луыса ик шуг- секыт учыръёсы ӝеганъ1с луо, уката ик тулыс яке зоръёс ортчем бере. Гуртамы пенсионеръёслэн лыдзы арысь аре йылэ, пиналъёс кошко но кошко. Клубмы но куашкан калэ вуэмын. Калыкез нуись-ваись автобус ӵукна гинэ ветлэ, нуназе бере Варзи-Ятчи курортозь сяна уг вутты. Арлыдо пересьёс, ӧлексыос сизьым иськемез пыдын бертоно луо. Районамы выль быръем депутатъёслы вазиськем потэ вылэм, медаз кыльы гуртмы палэнэ, автобус Юмьяшурозь ик мед ветлоз. Секыт улонэз адӟем пересьёс, ожысь ветеранъйс сярысь сюлмаськон но тросгес мед шӧдӥськысал, чаклам льготаос соос понна уг ужало. Кылсярысь, газ понна 50 процент гинэ тырыны кулэ кадь, нош малы ке но ваньмызлэсь одӥг кадь дун басьто. В. ГЛЕЗДЕНЕВ, ожысь ветеран. Ӟечкылан! Шаркан районысь Вортча починка гуртын улӥсь Нина Наумовна Сергееваез вордскем нуналэныз ӟечкылалонылпиосыз но соослэн пиналъёссы, озьы ик матысь ӵыжы-выжыосыз. Сыӵе ик чырткем лу, эн сётӥськы шуг-секытъёслы но висёнлы. Нылпиосыд но матысь ӵыжы-выжыосыд. Михаил Калашников - пыӵал поттӥсьёслы Макаров пистолет но пӧйшуран пыӵал поттыны кутскем дырысен ӝыны даур тырмемен валче, заводын та нуналъёсы сӥё-дано ужрад ортчиз. Актовой залэ люкаськизы огшоры ужасьёс, конструкторъёс, технологъёс, цехъёслэн кивалтӥсьёссы но мукетъёсыз. Почёт грамотаен но коньдон премиен пусъемын данакез ужасьёс. Ужрадэ пыриськиз дано но тодмо конструктормы, РФ-ысь пыӵал тӥрлык поттӥсь огазеяськонлэн тӧроез Михаил Калашников. Со грамотаос но кузьымъёс сётъяз. Ачиз но Михаил Тимофеевич кузьымтэк ӧз кыльы, пистолет, факс но сяська керттэт сётӥзы. Люкаськемъёслы вазиськыса, конструктор шуиз: - Мон дуннеысь 30 кунэ ветлӥ ни. Мылкыды кылдӥз, государстволы асьмелэн ож тӥрлыкмы кулэ ӧвӧл ни кадь. Но со озьы ӧвӧл. Оборона удыс пыд йылаз султоз. Вашкала пистолетлэн авторез Макаров эшеныз авиационной пушка кылдытӥз. Со асьмелы бадӟым наследие кельтӥз. Сое асьмеос умоятӥськом-выльдӥськом. Одӥг пенсионер кускыз висемен огшоры музъем копан лопатаез выльдэм. Соин ик дуннеысь ваньзэ умойзэ-ӟечсэ асьмеос эшшо выльдыны кулэ на. Вань конструкторъёс азьын сыӵе ужпум сылэ. Пумиськонэ заводысь ветеранъёс но ветлӥзы. Соосты но данъязы, кузьымъёсын пусйизы. Музейын Талэсь азьло заводэ вуылӥзы Ижысь журналистъёс. Соос тупен-тупен тодматскизы заводлэн музееныз, отысь выль ож тӥрлыкен но тодмо конструкторъёсын. Татын уката зол адӟиськиз предприятилэн азьлане шӧдскымон вамыш лэсьтэмез, дуннеысь рыноке потэмез но ӵуказе сайкыт нуналэз. Тани туэ Германиын (Нюрнберг) ИВА выставкаын Ижмехлэн пыӵал тӥрлыкез паськыт возьматэмын но вылӥ дунъямын. Юнме шат асьмелэн заводмы дуннеын таӵе продукция поттӥсь 5 бадӟым предприятие пӧлы пыре. Со вакчи дыр куспын ож тӥрлык поттонысь калыклы вузъёс лэсьтонэ выжиз но дуннеысь рыноке потӥз. Али завод одӥг куиньмос продукцизэ кунгож сьӧры вуза. Нош Макаров пистолет но пӧйшуран пыӵал поттонъя со егит предприятие луэ. Угось солы ваньзэ-ӧвӧлзэ 50 ар тырме. Пыӵал тӥрлык поттӥсьёслы азьланьын уката ӟеч ужаны, усто продукция поттыны мылкыд кариськом. Г. РОМАНОВ. Радиозаводын вылез "Локомотивлы" - 280 миллион манет Алигес акциосын "Ижевский радиозавод" огазеяськонын бадӟым кенеш ортчиз. Отчы люкаськылӥзы Россиысь чугун сюресъёсъя министрлэн воштӥсез Юрий Герасимов, та удысысь кӧня ке департаментъёслэн но чугун сюресъёслэн кивалтӥсьёссы. Ӟырдыт вераськон мынӥз чугун сюрес вылын шудтэм учыръёсын нюръяськон но адямиосты утён сярысь. Тӥни соин ик Москваысь научно-исследовательской институтэн ӵош Ижысь радиозавод чугун сюрес транспортлы ӟеч оборудование кылдытӥзы. Ӵапак со КЛУБ шуыса нимаське. Таӵе аппаратура уно пумо лэсьтӥське - КЛУБ-У, КЛУБ-П, КЛУБ-УП. Мар бен со сыӵе оборудование? КЛУБ локомотивлэн машинистэзлы шуккиськон учыръёсты (авариосты) палэнтыны юрттэ. Со кутӥське Россиысь чугун сюрес вылын гинэ. Али 1800 локомотиве сыӵе аппаратура пуктэмын ни. Со ужа микросхема амалэн, озьы поезд оскымон мынэ. Министерство 1990-тӥ-2000-тӥ аръёсы чугун сюрес вылын шуккиськон учыръёсын нюръяськонъя нимаз кун программа кутӥз. Отын валтӥсь инты басьтэ КЛУБ аппаратураез пыӵатон. Соин ик министерство радиозаводлы туэ декабрёзь таӵе оборудование поттыны 280 миллион манет коньдон висъя. Угось "Ижевский радиозавод" ОАО нимысьтыз конкурсын вормисе потӥз. Нош отчы пыриськизы дасо пала ож тӥрлык поттӥсь предприятиос. Та программа нырысь ик герӟаськемын калыкез утёнэн. Тани валля арын чугун сюрес вылын 42 кышкыт учыр ке вал, миым - 8 гинэ. Кылем арын одӥг адями быремын, 1997-тӥ арын - одӥг но ӧвӧл. Валамон, автотранспортэн нокызьы уд ӵошаты. Татын арлы быдэ дасо сюрсъёсын калык быре, сӧсырме. Заводын КЛУБ аппаратура поттон 2001-тӥ арозь чакламын. Солэн самолётын сямен спичка коробка быдӟа "сьӧд приборез" вань. Отчы ваньмыз гожтӥське. Кылсярысь, КЛУБ-е пыре сыӵе устройство (СУД), кудӥз вакчи дыр куспын возьматэ поездлэсь мынон графиксэ но локомотивлэсь ужамзэ. Мукет сямен вераса, машинистлэсь ужамзэ но гожъя. Угось поездэз валтӥсь мурт шӧдтэк шорысь висьыны кутскоз яке умме усёз, йырсазьзэ ыштоз, соку КЛУБ аппаратура быдэс поездэз дугдытыны быгатэ. - Заводлы таӵе аппаратура поттон пайдаен берытскоз,- шуэ валтӥсь директор Игорь Валиахметов.- Заводын усьтӥськозы ватсаса выль ужан интыос. Собере 280 миллион манет тыр заказэз пичи уд шуы. Со азьланезлы нош ик огсыр ужаны оскон кылдытэ. Тӥни таӵе ӟеч аппаратура поттэ Ижысь радиозавод. Г. РОМАНОВ. Маин шумпоттэ нунал? Я пӧсь, я кезьыт, я йӧзор усе, уж ас ӧраз пӧзе. Котьмалэн аслаз вакытэз. Кельтоно гинэ ӧвӧл чаклатэк, октытэк. Одӥг нуналэ сюрес ваиз Пичи Пурга ёросысь Баграш-Бигра гуртэ. Тодэм потӥз, кызьы татын уло, ужало, шулдыр гужем нуналзэс ортчыто. Нырысь ик пумитамы шедиз Володя Петров, ужасьтэм. - Мар шумпоттэ, сюлэмшугъяськытэ тӥледыз та нуналэ? - Номыр ик уг. "Шумпотто" бакчаысь колорад бӧчыос. - Гозы кутыса, кытчы сокем дыртӥськоды ай? - А, скал кутыны. Милемыз возьмаса кадь, сюрес дуре люкаськиллям велосипедъёсын пиос. - Ӟечбуресь, кытчы дасяськиды? - Вераськиськом. - Малы уд шутэтскиське лагерьын? - Ялкарысалмы но, уг ужа. Туспуктэме шедем пиос юаса кошкизы: - Ку нош газетэ поттоды? Вамыштӥськом азьлань. Мотикез нориллям воргоронъёс. Вераськисько одӥгеныз, нимтулзэ ӧз вера. - Мар бордын выриськоды туннэ? - Дасяськиськом толалтэлы. Комбайнъёсыз, тракторъёсыз тупатӥськом. Ю-нянь октонлы но дась медло. Кинъёс ке турын дасяло. Озьы нунал ортче. Маин шумпоттэ нунал шуыса юанэлы Валя Леонтьева, кунян сюдӥсь, меӵак шуиз: - Номыр уг. Колхоз йӧлмес уксёен басьтэм сяна. Арня пумын коньдонзэ сёто. 3,8 процентъем напен йӧлэз литрзэ кык манетэн басьто. Таӵеез но луэ вылэм. Дас ар ӵоже скалъёссэс луд вылэ потталлямтэ. Туэ вож турынэн сюдо ни лагерьын. Колхозын вордо 320 скал. Скал кыскисьёс пӧлын нырысь интыын мыно Анастасия Орлова но Люба Баграшовалэн звенооссы. Нуналлы быдэ 12,4 л йӧл усе. Сюлмаськемзэ вера зоотехник Николай Коровин: - Туэ 600 тонна силос тыримы, 150 тонна турын дасямы ни. Матысь нуналъёсы кутском сенаж гуэ тырыны. Кӧс турын ӝутом на. Гужембыт дасяськом ни фермаосмес толлы. Мар бен, ужъёс мыно ке но, мӧзмытгес потӥз Баграш-Биграын. Нылпиослы лагерь, сад уг ужало. Со понна ньыль-вить аресъем Алёшаен Коля шурысь бакапиосыз кутыло. Огзэ- кыксэ кутӥд, ма быдӟа шумпотон ини. Уг курдало вуэ усемлэсь но, уяны дышиллям ни. Бадӟымъёсызгес пиналъёс бакчаын. Кин ке вал вылын ворттылэ. Клубзы куашканы кутскемен, артистъёс но татчы уг вуыло. Соосыз пиос вераны ӧз тодэ, туж тодмооссэ но. Библиотекаын но лыдӟыны номыр. Книгаос октыны уксё ӧвӧл. Та палъёсын, пе, узы-борылы палэнэ ветлоно луо. Со понна бакчаос "ӵыж-ӵыж емышо" ... колорад бӧчыосын. Тӥни кытын бичаськон. Колхоз ас бакчаысьтыз урыны ӵектэм кубиста - куать чур, горд кушман - куинь чур но ӵуж кушман. Ма, мылыд ке потэ - ур, басьтод емышсэ. Озьы семьяос ог-огзылэсь адӟем карыса тыршо колхоз бусыын. Кин ке аслыз юрт пуктэ... Уждун... Январь понна гинэ ай сётӥллям. "Бен мар-о карод, кытчы-о пырод..." Светлана ЯКОВЛЕВА. Валэктэ юрист Сэрегез дася адвокат Лилия Шкляева Музъем пай но ваньбур пай Гожтэ тӥледлы лыдӟисьты. Мынам вань кык юанэ. Ужай кызь ар колхозын. Собере улон воштӥськиз. Колхозмес эштос каризы. Мон отын ӧй ужа ни, музъем пайме басьтӥ но кошки. Ваньбур пае эштосэ кылиз. Али сое басьтэме потэ, но уг ни быгатӥськы. Валэктэ вал: мынам луоз-а басьтэме сое? Уз ке - малы? Мумилы 90 арес ни. Пенсие потытозяз ужаз колхозын. Мон армие кошкем бере, улон интызэ воштоно луиз, Воткинске кошкиз. Али но отын. Тодэм потэ: вань-а ужам хозяйствояз солэн паез? Вань ке: луоз-а басьтэмез? Мон та пайёс понна ӧй но вырысал, но улон туж секыт луиз. Куддыръя нянь басьтыны уксё ӧвӧл. Коть караул!!! шуыса кесяськы. Азьло ик тау карисько юрттэмды понна. Николай Воронцов. Та юанъёслы валэктон сётэ Россия Федерациысь Правительство 1996-тӥ арын 1-тӥ феврале юнматэм постановленияз. Со нимаське тазьы: "Музъем кесэглы (долялы) но ваньбур пайлы правоез быдэсъян радлык сярысь". Озьы ик кутэмын колхозъёсты но совхозъёсты выльдон сярысь но гурт хозяйствоя предприятиосты нимаз кузёослы вузан (приватизация) сярысь положение. Соосъя колхозын но совхозын тупатӥсько нимаз муртъёслы ваньбур пайёс но музъем кесэгъёс. Россия Федерацилэн Президентэзлэн 1992-тӥ арын 2-тӥ мартэ гожтэм 213 номеро Указэзъя дунтэк музъем басьтыны быгато: колхозъёсын, совхозъёсын но гурт хозяйствоя предприятиосын тыршисьёс, отысь пенсие потэмъёс - татын улӥсьёс; гуртысь улон-вылонэн герӟаськем муртъёс - калыкез дышетӥсьёс, эмъясьёс, сюдӥсьёс, культураын, бытын, кусып возёнын (связьын), вузкаронын ужасьёс, соослэн предприятиоссы но организациоссы интыяськемын ке гурт хозяйствоысь предприятилэн улосвылаз (территорияз). Соос сяна, списоке шедё на огдырлы кошкемъёс - армие басьтэмъёс, колхозлэн стипендиеныз дышетскисьёс но мукетъёсыз, озьы ик татчы берытскыны правоен адямиос, ужасьёсты кулэстэмен валче ужысь 1992-тӥ арын 1-тӥ январь бере мозмытэмъёс. Музъем кесэглэн быдӟалаез тупатӥське, татын ужам дырез лыдэ басьтытэк. 1992-тӥ арын 4-тӥ сентябре Россия Федерациысь Правительство юнматӥз "Агропромышленость удысысь предприятиосын но организациосын приватизация но реорганизация ортчытон радлык сярысь" постановление. Соя ваньбур пай басьтыны быгато: хозяйствоын тыршисьёс, бадӟым муген сэрен огдырлы кошкемъёс, хозяйствоысь пенсионеръёс. Ужась коллектив озьы ик решение кутыны быгатэ та списоке мукет адямиосты пыртон пумысен, кылсярысь, татысь улон-вылонэн герӟаськем удысын тыршисьёсты, хозяйствоын азьло ужасьёсты, ужасьёсты кулэстэмен валче ужысь 1992-тӥ арын 1-тӥ январь бере мозмытэмъёсты. Ваньбур пай тупатӥське адямилэн огъя ваньбурез кылдытонэ кӧня пыриськемезъя. Отын лыдэ басьтӥсько ужам дыр, уждун но музон лыдпусъёс. Улон-вылонэн герӟаськем муртъёслэн пайзы тупатӥське ужась коллективын юнматэм радлыкъя. Ваньбур пайлэн но музъем кесэглэн кузёзы ваньбурзэ тазьы кутыны быгатэ: сое огъя хозяйствоысь потыкуз басьтыны, крестьян (фермер) хозяйство кылдытон вылысь, выль кылдӥсь эштосэ, акциосын огазеяськонэ, кооперативе сётыны взнос чотын, мукетъёсызлы вузаны яке арендае сётыны, наследство чотын кельтыны, музъем кесэгез ваньбурен, нош ваньбурез музъемен воштыны. Адями куремъя, музъем кесэгез но ваньбур паез сётыны луэ коньдонэн. Николай Воронцовлэн юанъёсызлы вакчияк тазьы валэктыны луэ. Ваньбур пайлы праводы вань, нош малы сое басьтыны уд быгатӥське - валантэм. Анайдылэсь пайзэ басьтон вылысь, тӥ куронэн вазиськыны кулэ колхоз правление. Отын курондэс быдэстыны пумит ке, юрттэт куроно судысь. Ческытэн кивалтӥсь Глазовысь пищекомбинатын поттэм ческыт печенняослэсь, мармеладъёслэсь но конфетъёслэсь шӧмзэс республикаын улӥсьёс умой тодо. Туннэ со огез пыд йылаз возиськись предприятие. Пунэм тыронъёсыз ӧвӧл асьме бюджетэ но, Россилэназ но. Уждун но татын дыраз тырыны туртто. "Президентлэн дыраз уждун тырон сярысь указэз понна мон калык азьын быдэсак кыл кутӥсько", - шуэ акциосын огазеяськем комбинатлэн директорез Виктор Яковлевич ЖУРАВЛЕВ. Та предприятиен со куинетӥ арзэ гинэ кивалтэ. Нош татчы ужаны лыктӥз вал 1993 арын Чепца механической заводысь. Нырысь ужаз валтӥсь инженер луыса. Собере директоре бырйизы. Дышетскемезъя Виктр Яковлевич - инженер-металлург, йылпумъямын горно-металлургической институтэз. Табере солы ужано луэ чылкак мукет удысын. - Солы сокем ик паймоно ӧвӧл, - шуэ Виктор Яковлевич. - Технологиен герӟаськем ужъёсты нуон понна, предприятиын вань мастеръёс но нимаз специалистъёс. Нош директорлы быгатыса кивалтоно гинэ. Егит директорлэн умой кивалтэмез коллективлэн улоназ ӟечен шӧдӥське. Вакчи дыр куспын татын выль сямен лэсьтэмын вал цехъёс (угось завод нырысь чакламын вал ческыт винаос поттон понна), ужасьёслы - шутэтскон комнатаос. Директор ӟеч мылкыдын юрттэ нылпи садъёслы, школаослы, сирота кылем пиналъёслы. Ӟеч сямлы татын пӧрмизы ни арысь аре ортчытъяськись "ческыт арняос". Сыӵе нуналъёсы уката но паськыт радъяське пищекомбинатлэн продукциеныз вузкарон. Предприятие Глазов городын ньыль магазинъёссэ возе. - Предприятилэн азинсконъёсыз азьланяз но луозы, - оскыса вера директор. - Угось со бордын ужало вань специалистъёсмы. Т.Банникова. Туспуктэмез В.Камашевлэн. Шӧкыч Улонысь учыр Бомжъёс Калыкын шуо: чорыгась чорыгасез кыдёкысен адӟе. Озьы бомж но бомжез соку ик синйылтэ. Бомж шуэмысь. Азьло удмурт калыклэн валаназ кураськисьёс вал. Сыӵе радэ потылӥзы тылпу потыса юртъертэк но ваньбуртэк кылемъёс. Таӵе дыръя адямиос огъя кужымен юрттылӥзы шудтэм учыре шедемъёслы. Туж секыт луэ вал ю-нянь удалтымтэ дыръя. Куд-ог аръёсы кураськон калэ вуылӥзы быдэс гуртъёсын. Бен, бомж - со кураськись, но туала кураськись, пыдйылчи. Азьло кураськисез жаляллязы, солы ӧвӧлтэм нянь юдэсэнызы юрттылӥзы, но туала бомжъёс вӧзтӥ киоссэс шонтыса гинэ ортчо. Туала предприниматель-ужбергатӥсьлы бомж - со толыктэм, визьнодтэм тордос. Эшеным пукиськом вал одӥгаз азбарысь скамья вылын вераськыса. Вӧзамы пиосмурт интыяськиз, кысконмес куриз на. - Улон инты шедьтӥд ни-а, Витя? - юаз эше. - Шедьтод, - вазиз шоро-куспо арлыдъем кырсь но вуж дӥськутэн дӥсяськем пиосмурт. - Тӥляд подъездады кӧласько вал - участковой улляз. Арня талэсь азьло Иж ӵыпетын пыласькылӥ, дӥськутме миськылӥ, нош табере сыӵе луонлыке быриз. - Нош сузэред сэрег уг висъя-а? - Зонаысь бертэм берам нырысь уйзэ кӧлтӥз, дӥськутме сётӥз, Кӧня ке манет мычиз но "Ӟеч лу!" шуиз.Соос уго ваньзы ментовка котырын ужало. Арзэ чидасько ни лушкаськытэк. Эрик пытсэтлэсь дуногес. - Мар чотын улӥськод? - Буш бутылкаос бичасько. Колды нянь басьтон понна, куддыр ӝыны нунал буш ӟенелик утчано луэ. Вераськонамы итӥськиз на мукетыз бомж. - Сад-бакчаын мунчо пуктыкум, майбыр улон вал. Сюдӥзы но, сю манет но сётӥзы. Кӧты ӧз тыры, бускельзылэн корказ лушкаськыны пырай. Валатскизы но улляса лэзизы. - Сьӧлыкад, иське? - Бен соослэсь ӧй лушкаськы вал но. Инмар адӟе, лэся... Дыр ортчиз. Эшеным нош ик пумиськимы но тодамы ваимы со бомжъёсты. Одӥгез, пе, шумпотэ вал ини, соос понна но нимаз улон инты висъялозы шуыса. Но... сыӵе шумпотонэз адӟыса вуттымтэ милям тодмомы. Оло сютэм кулэм, оло юыса, оло кынмыса, оло шумпотэменыз... П.СКОБЕЛЕВ. "Берлинэ вуо", - шуэ Владимир Кондратьев Россилэн сюресъёсыз вылтӥ кык ар пала ветлэ ни азьвыл шофёр Владимир Кондратьев. Одӥг куз сапег гинэ ӧз быдты ни, куинь солдат форма нуллыса пӧсьтӥз. - Сюрес вылэ потӥ 1997-тӥ арын 1-тӥ июле Южно-Сахалинск городысь, - вера сюресчи. - Вуылэме потэ вань герой-городъёсы. Таӵе "походме" сӥзисько Быдӟым вормонлы 55 ар тырмонлы. Дыртэ песятай. Сюрес вылаз сюрись гуртъёсысь но городъёсысь улӥсьёсын пумиськылэ но ож тыл пыр потэм адямиосын тодматске. Владимир Иванович пыра ветеранъёслэн огазеяськонъёсазы, вуылэ кунгож заставаосы но воинской частьёсы, пумиськылэ городъёсысь кивалтӥсьёсын. Солдат дӥсен вамышъясь Кондратьевлэн котомкаяз пулемёт лентаысь гильзаос тыремын. Гильзаос фронтын бырем солдатъёслэн шайвылъёсысьтызы музъемен тырмытэмын. Со малпа 1418 гильза - война кыстӥськем нунал мында - люканы но Москваысь Поклонной гурезьысь музее сётыны. Азьвыл шофёрлы машинаен ветлӥсьёс азьлань мыныны юртто. Ожгарчилэн сямен ик солэн куронъёсыз огшорыесь. Сие мае сёто, нуналлы огпол, кӧлэ - кытын сюрем: коть липет улын, коть нюлэскысь тылскем дурын. Санкт-Петербургын кык арня ӵоже Суворовской училищеын улӥз. Трос пумиськонъёсы пыриськем сяна, "Лебединое озеро" но "Сибирский цирюльникез" адӟыны вуиз. Бадӟым сюрес вылэ кыкетӥзэ потӥз ни Сахалинысь Кондратьев. Вить ар куспын Россиез 50 сюрс иськемлэсь трос котыртӥз ни. Ож тыл пыртӥ Берлинозь вуэм бубизлэн сюресэз кузя мынэ Владимир Иванович. Тазалык сӥзём солы. Э. Усманова. "Фаворит" газетысь. ВИ тол гурт шудонъёс Шуд усиз Шарканлы Ульчаын 25 градус пӧсь, сяськаяське беризь, нош Шаркан районысь администрацилэн кивалтӥсезлэн кабинетаз ӟырдыт вераськон мынэ куас сюресъёс, тол ӵошатсконъёс сярысь. Ваньмыз шонер: дӧдьыез гужем дасяло. Ӵапак Шаркан ёрослы шуд усиз уга вуонозэ ВИ республиканской тол праздникез ортчытыны, ЪЪИ даурлэн кутсконаз пичи олимпийской тылэз асьсэ музъем вылазы ӝуатыны. Солы дасяськон мынэ ни. Кылдытэмын ӵошатсконъёсты радъянъя комитет республикаын но, районын но. Шарканэ вуыны кулэ ог 900 спортсменъёс но куноос. Кызьы соосты пумитано, сюдоно-утялтоно? Кытӥ но кытын ортчозы куас сюресъёс, ӵошатсконлэн музон удысъёсыз? Та пумысен пыр-поч вераськон мынӥз оргкомитетлэн нырысетӥ кенешоназ. Отчы пыриськиз Шаркан районлэн администрациез, райполэн кивалтӥсез, спортэз радъясьёс, Удмурт Правительстволэн Тӧроезлэн воштӥсез В. Е. Шудегов, Физической культурая но спортъя кун комитетлэн тӧроез Г. И. Кремер, гурт шудонъёсты ортчытонъя кыл кутӥсь международной классъем судья В. И. Беляев. Соос пыр-поч учкизы праздникен герӟаськем интыосты: школаез, школа-интернатэз, спортзалэз вуоно куас сюресъёсты. Вераны кулэ, куатетӥ тол шудонъёслы инъет вань, но ужез трос. Дыр но вань на - ӝыны ар пала. Выль дышетскон ар кутскытозь тупатъямын-выльдэмын луозы дышетскон юртъёс - нылпи садъёс - отчы интыяськозы гуртъёсысь вуэм спортсменъёс но куноос. Шаркан дасяське. Соин ик оскон вань: таиз но тол праздник ӟеч ортчоз. Оргкомитетлэн заседанияз вакчияк йылпумъянъёс лэсьтэмын кылем толалтэ татын ик ортчем "Удмурт дунне" газетлэн призэз понна ӵошатсконъёслы. Бадӟым ӵошатсконъёс азьын таиз асвыллем репетиция луиз. Кузёос ласянь со умой радъямын вал, спортсменъёс басьтӥзы ӟеч кузьымъёс. Умоен пусъемын "Удмурт дунне" газетлэн редакциезлэн ӟеч сямъёсты утьыны но азинтыны быгатэмез: 1952-тӥ арын мытэм ӵошатсконъёс секыт вакытэ но ӧз дугдэ. Ар ортчыса, гуртысь спортсменъёс люкаськозы 50-тӥ ӵошатсконъёсазы. Ма луоз Шарканын вылез? Нырысьсэ куас вылэ султозы ёрос администрациослэн кивалтӥсьёссы но Правительстволэн командаез. Соос кужымзэс мерталозы эстафетаын но огъя бызьылонын. Озьыен, ВИ тол шудонъёслы кутскон сётэмын. Солы дасяськонлэн кызьы мынэмез сярысь газет ивортылоз на. Л. МЕДВЕДЕВА. ГИБДД - выль юртэ Кылем пятницае, 9 июле, Ижевскын бадӟым ужрад ортчиз. Вуттэмын ГИБДД-лэн шукрес чебер выль юртэз. Со интыяськемын 9-тӥ Январь ураме, Ремзавод вадьсын но Индустриальной районысь милициен артэ. Сюрес вылын шуккиськонлэсь утиськонъя кун инспекциын ужасьёс понна со зэмос но вунонтэм праздник вал. Угось лэсьтӥськисьёс огшоры юрт ӧз ӝутэ, со ГИБДД-лэн быдэс комплексэз, пуктэмын туала куронъёсъя, узырмытэмын компьютеръёсын но мукет приборъёсын. Вань усто спортивной залэз, конференц-залэз. Но тужгес но шумпотозы водительёс но соосын ужасьёс. Соослы умоесь условиос кылдытэмын, азьвылэныз уд ӵошаты. Лэсьтӥськонъя 18 номеро управление но субподрядчикъёс та комплексэз кема, 4 ар ӝутӥзы ке но (соос янгыш ӧвӧл, коньдон ӧй вал - Г. Р.), юрт усто пӧрмиз. Сое усьтонэ трос калык люкаськиз: лэсьтӥськисьёс, республикаысь но городысь кивалтӥсьёс, бускель улосвылъёсысь куноос но мукетъёсыз. Правительстволэн Тӧроезлы Николай Ганзалы комплекслэн дась луэмез сярысь ивортӥз ГИБДД-лэн кивалтӥсез милициысь полковник Михаил Гончаров. Собере православной черкын ужасьёс выль юртэз вӧсязы но умой ужаны мылкыд каризы. Ӟеч сям - горд басма вандэмын. Сӥё-дано кенешын вераськизы Кун Кенешлэн Тӧроезлэн нырысетӥ воштӥсез Владимир Агашин, Правительстволэн Тӧроез Николай Ганза, Россилэн Президентэзлэн Удмуртиын оскем адямиез Виктор Балакин, Ижлэн мэрез Анатолий Салтыков, югдурез утёнъя министр Владимир Щербаков, Россиысь ГИБДД-лэн кивалтӥсезлэн нырысетӥ воштӥсез Владимир Тимошин, лэсьтӥськонъя 18 номеро управленилэн кивалтӥсез Алексей Прасолов, дано конструктормы Михаил Калашников. Со тодаз ваиз, Ижын, пе, куке но куинь "Победа" автомашина вал, озьы ик со уг вунэты Советской ульчаысь Пушкинское кожонэ, МВД вадьсын, сюрес вылэ нӧдэмзэ. Нош алигес ачим, пе, 2,5 сюрс иськеме Златоуст городэ пулемёт поттӥсьёс доры ветлӥ. Сюресъёс умоесь. Нош соку СССР-ысь Министръёслэн Кенешсылэн Тӧроезлэн воштӥсез доры пырам Ижын нырысетӥ асфальт лэсьтон завод пуктон пумысен. Зэм, улон азинске. Та юрт пуктэмын калык понна, сюрес вылын шуккиськон учыръёсты кулэстон вылысь. Угось адямилэн улонэз самой дуно, номырин уд вошты. Котькуд шофёр сюрес вылын кышкатэк мед ветлоз, соосты эскерисьёс ватскыса медаз ужалэ. Гаишникъёс водительёслы матысь эшъёс но юрттӥсьёс мед луозы. Со понна таӵе юрт но пуктэмын. Г. РОМАНОВ. Шӧкыч Лидия Чернова Озьы, иське Шуо: Нодтэм Рае дыртэм. "Кытчы?!" - корт ӧс Сое подэм. Вератэк сьӧлыкъёстэ Эн, пе, чуртна нырдэ. Озьы, иське? Эк-ке-ке! ъ ъ ъ Шырез алӥзы: - Эн пыр ӟенелике! Ӧз кылзы. Пыриз. Зынӟиз. ъ ъ ъ Уй. Возьвыл. Толэзь уя. Либыт кыл - Кӧян-вӧян. Тыр толэзь Малы ватскиз? Медам, пе, луы Адӟись. Шӧкыч Серем пыр Франция кунгожысен вагонэ пыриз эскерись-таможенник но пукисьёслэсь юа: - Коньяк? Тамак? Наркотик? - Луэ ке, чашка кофе, пожалуйста. ъ ъ ъ Лушкаськись банкысь сейфез усьтыны выре. Быдэс час юнме курадӟемез бере сялӟиське: - Лешак басьтон! Быгато ведь адямилэсь мылкыдзэ, улонзэ сӧрыны. ъ ъ ъ Кык нылъёс куспазы верасько. - Сыӵе чебер, мусо тон, малы татчыозь ӧд бызьы на? - Нош малы со кулэ? Мынам вань пуные, кудӥз ялан утэ, попугае, кудӥз ялан тышкаське, но коӵыше, кудӥз уйёссэ ялан кытӥ ке калге. ъ ъ ъ - Ӧте вал телефонэ кивалтӥсьтэс. - Со уг ваньмы. - Но мон солэн кузпалыз. - Э-э, ваньмыз озьы шуо. Ижмех: Макаров пистолетлы но пӧйшуран пыӵаллы - 50 Егитъёс пӧлысь одӥгез Шаерамы таӵе пичи гуртъёс тросэз быремын ни. Соос пӧлы пыре Кез районысь Медьма но. Со Полом сельсоветэ пыре вал. Гурт ӧвӧл ни, нош отын вордскем но будэм пиос но нылъёс гуртсылэсь данзэ ялан ӝуто но азинто. Кинъёс бен соос? Одӥгез соос пӧлысь Петр Ившин - Ижысь механической заводысь нырысетӥ категориен инженер-конструктор. Пистолетъёсъя егит специалист арлыдо эшъёсыз сьӧры йыгмыт вамышъя ни. Со ваньмызлы адӟем карымон тырше. Сотэк уго вакчи дыр куспын быдэс заводын одӥгез усто конструктор ӧй луысал. Петр Сергеевичлэн кисыяз кык ни изобретениез, вить рационализаторской ӵектонэз. Со заводлы 40 сюрс манет тыр пайда ваиз. Предприятиысь котькуд конструктор Петр Ившин кадь ужасал ке, валамон, заводлэн улонэз уката каньылгес луысал. Озьы ке но, туннэ со кыӵесэ шедемын шуыны уг луы. Берло дыре предприятие пыд йылаз йыг-йыг султэ, дуннеысь рынокын продукциез пумен бадӟымгес инты басьтэ. Отын вань котькуд конструкторлэн, технологлэн, быдэс коллективлэн но, Петр Ившинлэн но тыршемез-сюлмаськемез. Нош кызьы татчы вуиды юанэлы, Петр Сергеевич туж тунсыко валэктӥз. Дас классэз йылпумъямез бере, военкомат сое но эшсэ Ульяновскысь вылӥ военной училищее дышетскыны ыстӥз. Улӥзы палаткаын. Петр Ившин кынмиз но висьыны усиз. Соку со эшезлы шуиз, ойдо, пе, татысь кошком. Но кызьы? Вуоно экзаменын юри "кык" басьтом но асьмеды бертыны лэзёзы. Луоз, пе, со озьы, кыкнамылы "куинь" пуктӥзы. Но кык егит удмурт пиос приёмной комиссиысь адямиосты ас палазы берыктыны быгатӥзы, документъёссэс куризы. Мырдэм сётӥзы. Лӧптыса кадь вуизы Удмуртие. Вордскем гуртазы кожатэк, соку ик Ижысь механической институтэ йыгаськизы. Отчы пырон дыр чиньыен лыдъямон кылемын ни вал. Кык "военнойёслы" машиностроительной факультетэ интыяськыны дэмлазы. Отын дышетскыны мылкыд карисьёс, пе, трос ӧвӧл. Петр Ившинлы ӵектӥзы автоматической но полуавтоматической машинаосъя ёзэз. Мукет сямен вераса, со артиллерист специальность сётэ. Нош Петр Ившин малпа вал двигательёсты дышетон люкетаз пырыны. Кезысь ӝужыт мугоро удмурт пияш институтысь дышетӥсьёслы кельшиз. Петр Ившин уго ӟеч дышетске но кылзӥськись студент луэ. Эшъёсыз но гажало, котыраз бергало. Ӝог ортчиз вить ар. 1986-тӥ арын инженер-механикез ужаны ысто Ижысь механической заводэ. Со луиз егит специалистлэн ужаны кутсконэз. Петр Ившин шеде пистолетъёс поттонэ, инженер-конструктор луэ. - Соку татын, 1986-тӥ арын, чылкак 3 пумо боевой пистолет потто вал,- шуэ Петр Сергеевич.- Одӥгез вал Макаров пистолет, мукетыз - ПСМ (малогабаритной самозарядной пистолет), куинетӥез - куара но тылгизьы сётытэк ыбылӥсь пистолет. Нош спортивной оружие поттӥз музон бюро. Со но 3-4 пумо пистолет бичаз. Тӥни татчы шедьыса, ужме яратӥ но пистолетъёсты выльдон-умоятон борды басьтӥськи. Арлыдо эшъёсы котьку юртто, умой визь-кенеш сёто. Инженер-конструктор Петр Ившин ужаны кутскиз 303 номеро производствоын. Со люконтэм герӟаськемын вал пистолет поттонэн. Татын 4 ар тыршиз. Но егит специалистлэсь утчаськемзэ, малпаськыса ужамзэ чаляк синйылтӥзы. Сое выжтӥзы пистолетъёс но пистолет-пулемётъёс кылдытонъя группае. Вить ар ӵоже инженер- конструктор мылысь-кыдысь пыриське Макаров пистолетэз выльдонэ но поттонэ, 9 миллиметръем парабеллум патронэн "Байкал-442" спортивно-тренировочной пистолет кылдытонэ. Со озьы ик, огкыл кутыса, рос-прос ужа "Кедр", "Клин" но "Кедр-В" пистолетъёс-пулемётъёс кылдытонын. Али соосты Златоустысь машиностроительной завод поттэ. Петр Сергеевич 1995-тӥ арысен кивалтэ 303 номеро производствоын пистолет поттон группаен. Со ялан пыриське вужъёссэ пистолетъёсты умоятонэ но выльёссэ кылдытонэ. Озьы Петр Ившинлэн юрттэмез улсын кабзэ выльдэмын РС-31 револьвер, Иж-35М спортивной пистолет, кылдытэмын Иж-78-8 газовой пистолет но лазерен Иж-71 пистолет. Со ыбоно интыез горд виштыен (точкаен) возьматэ. Ӵапак сыӵе ож тӥрлыкез, адӟыны луэ американской боевикъёсысь. Петр Сергеевич 13 ар ӵоже ужатозяз, Россиын "Пыӵал тӥрлык сярысь" Закон кутэмын. Со конструкторъёслы паськыт сюрес усьтӥз уно пумо ож тӥрлык поттыны. Соос табере лэсьто ИЖ-71 служебной оружие. Сое басьто возьмаськись ёзъёс, правоосты утись органъёс но мукетыз. Завод озьы ик поттэ пӧртэм газовой оружие, спортивной но куара сётӥсьтэм пистолетъёс. Бен, Петр Ившин кадь ужась конструкторъёс заводын трос. Соос егитъёслы сюрес возьмато. Тани Петр Сергеевич вакчи дыр куспын 3, 2 но 1 категориен инженер- конструктор луиз. Нош 1997-тӥ арын заводысь научно-технической ужъёсты возьматонъя конкурсын Петр Ившин ИЖ-71 лазерной пистолетэз понна вормисен лыдъямын. Мукет конкурсъёсын но солэсь тыршемзэ-утчаськемзэ адӟытэк ӧз кельтылэ. Тӥни таӵе адямиос ужало заводын. Петр Сергеевич Ольга кышноеныз ныл будэто. Туэ Наташа нырысетӥ сентябре школае мыноз ни. Г. РОМАНОВ. Туспуктэмез В. КАМАШЕВЛЭН. Арсений Загребин Куинь усьтонэ Вань мынам, эшъёсы, куинь пӧртэм усьтонэ, Одӥгез усьтонэ - со тодон-валанэ... Кыкетӥ усьтонэ - быгатон кужыме, Егитэсь врачъёсты дасяме, ужаме... Куинетӥ усьтонэ - со мынам малпанэ, Улонмы мар сямен азинске но мынэ... Инкуазез, дуннеез усьтыны тыршыса, Куинь пӧртэм усьтонме возисько утьыса. Я тазэ, я созэ тодыны вырисько, Мылкыды тырмемъя, шуд-пайда сётӥсько. Со шундыё нунал... Егит дыре ортчем гужеммы, Артэ ветлэм сюресмы, тэльмы, Подрочискаын * сяськаосын Пужыятэм возь вылъёсмы Нош ик Тодам лыктӥзы, Сюлмысьтым сиоссэ сайкатӥзы, Малпанме ортчеме берыктӥзы... Чагыресь инмын одӥг-одӥг Йыромем тӧдьы пилемъёс, Музъем вылтырын пумтэм кадь ик, Вӧлтыр вожесь будосъёс. Сюлмаськись муш семьяос Сяськаысь мӧль бичало, Ужаны дышымтэ бубылиос Возьёс вылтӥ поръяло. Тюрагай чылкыт омырын Кырӟанзэ кисьтэ, вӧлскытэ, Чебер куазьлы-инкуазьлы Со но туж шумпотэ. Лыктэм сюресмы тэле пыриз, Подрочиска сьӧрын Кӧлӥсьтэм тэльмы Инвис сьӧры ни ышиз... Сыӵе вал Со шудо нуналмы, Подрочиска возьёс вылтӥ Яратон сяськамес октэммы. Трос аръёс ортчемын, Тюрагаймы улонысь кошкемын, Яратон сяська керттэтмы Куасьмыса ини усьылэмын. Нош Подрочиска возь вылъёсмы, Со шундыё гужем нуналмы, Ӧвӧл вунэтэмын-быремын - Сайкалляло лулын, малпанын. -------------- * Подрочиска - инты ним. Ву Котькытчы дыртэ, Котькытчы вуэ, Газ кариськыса, Омыре ӝутске. Уйёсы ваське Турын-куар вылэ Лысвуэн пуксе, Шапыкен пиштэ. Пилемын лоба - Зоръёсын усе, Тӧдьы бус луса Куддыръя вӧлске. Музъеме пыӵа, Будосэз сюдэ. Ошмесэн потэ, Коркае вуэ. Сиёнэн-маин Мугоре пыре, Вирен ӵош ветлэ, Туж кулэ луэ. Со чылкыт вуэз Пожамлэсь утём, Улонлэсь соку Умойзэ витём. Визь но сюлэм Сюлэм но визь Уртче мыно Но асьмемын Весь кивалто. Сюлэм куддыр Вылтӥяське, Мылкыдъёссэ Эрказ лэзе. Озьы визьмы Уродэ усе, Янгыш потэ, Гажан ыше. Озьы медаз лу вал. Сюлэм Вирен тупасагес, Уртче мед улозы вылэм, Соку кема, дыр, потысал улэм. Асьсэос будэто, асьсэос вузало Бакча сиёнъёсын вузкарись магазинъёс лымшор палась но кунгож сьӧрысь ваем ӵуж кушманэн но кубистаен тырмытэмын. Но тани кӧня ке нунал ини Сенной базарын но куд-ог интыосын вузкаро Завьялово ёросысь акциосын огазеяськем "Правда" эштослэн бусыосаз но теплицаосаз будэтэм огречен но кубистаен. Нырысез 15 тонна кияр но 100 килограмм кубиста вуиз вузкарон организациосы. Соос эштосэн тулыс ик огкыл кутӥзы вал. "Правдаысь" ӟеч продукциез шумпотыса басьто "АСПЭК", гостиницаосъя хозяйство, "Плодоовощторглэн" ёзъёсыз. Хозяйстволы улэп коньдон поттон понна, асьсэос но бакча сиён будэтӥсьёс вузкаро. Вераны кулэ, соос продукцизэс дунтэмен басьтыса дуноен вузасьёслы (перекупщикъёслы) оскиськытэк ужаны тыршо. Озьыен, асьме дорын будэтэмез бакча сиён дунтэмгес луоз. Н. ИВАНОВ. Иж - пыӵал поттӥсьёслэн городзы Шоркарлэсь данзэ кемалась юн возё но ӝуто ни пыӵал тӥрлык поттӥсьёс. Соос пӧлы нырысь ик пыро заводысьтымы оружейникъёс. Кибашлыос, усто мастеръ1с даурысь дауре быгатонлыксэс сёто асьсэды воштӥсьёслы - егитъёслы. Тани 1870-тӥ арын заводын кылдытэмын вал пыӵал тӥрлык поттонъя школа. Отын 100 мурт ньыль ар дышетскиз. Со пыре вал Артиллерилэн валтӥсь управленияз. Школаын дышетӥзы ваньмызлы: пыӵал поттыны, сое чеберъяны, тупатъяны, дуриськыны, пуэз но кортэз токарной станокен волятыны но музонлы. Школа дася вал 2-тӥ разрядэн пыӵал поттонъя мастеръёсты. Соосты басьто вал войсковой частьёсы но арсеналъёсы. Нош 1885-тӥ арын оружейной заводын (али Ижысь механической завод) усьтӥзы ремесленной школа. Татын но 100 мурт ньыль ар дышетскиз. Котькуд дышетскисьлы подмастерье ним сёто вал. Отысь ӟеч дышетскисьёсты потто вал оружейной школае. Октябрь революция бере школа пытсаське. Но улон куремъя, 1945-тӥ арын заводын нош ик усьтӥське школа. Но ар ортчыса, пыӵалъёс поттонэз выжто 524 номеро заводэ (мотозаводэ), нош 1949-тӥ арын та ужез выльысь потто 622 номеро (механической завод) заводэ. Школалэн но пыӵал поттӥсьёслэн вордскон сюрессы, кызьы адӟиське, капчи ӧй вал. Дышетонэз азинтонлы трос юрттӥз СССР-ысь вооружениея министр Д. Ф. Устинов. Школа азе одӥг бадӟым ужпум пуктэмын вал - дасяно пӧйшуран пыӵал поттӥсьёсты. Озьы заводын кылдэ выль 14 номеро учебно-производственной цех. Пыӵал тӥрлык поттонлы дышетон школа - со, пе, зэмос воргоронъёслы школа, шуо отын дышетскемъёс. Татын 15-18 аресъем пиос дышетско. Данакез соос пӧлысь ярато пӧйшураны но ыбылӥськыны. Профессия басьто пӧйшуран но спортивной пыӵалъ1с поттонъя слесарь- сборщик. Соос та ужлы дышетско дышетскон мастерскойёсын. Со программаысь ӝыныез луэ. Котькуд группаын 15-18 мурт дышетске, сое радъя производстволы дышетонъя мастер. Тани синмаськымон тырше Леонид Беляев. Со та ужлы вордскемын кадь, 30 ар мастерын ужа ни. Ачиз стажировка ортчиз 36 номеро сборочной цехын. Нош школаын бадӟым инты висъяло пыӵал тӥрлык поттон амалъ1сты (технологиосты) дышетонлы, тужгес но пневматической пыӵалъёсъя (Иж-53, Иж-38, Иж-60, Иж-61 но МР-512). Та уго туж кулэ производство. Ваньзэ "витьлы" гинэ лэсьтоно. Малы ке шуоно, таӵе пыӵалъёс Россие гинэ ӧвӧл, Германие, Финляндие, Болгарие но мукет кунъёсы кошко. Со понна дышетскисьёслы стипендия но дунтэм сюдэм сяна, уждун но тыро. Дышетскисьёс производственной практиказэс ортчо цехъёсын. Ньыль толэзьлы наставник юнматӥське. Озьы соос зэмос мастеръёс луо но кызьы ужамзыя разряд басьто. Кылсярысь, Сергей Морозовлы 20 арес гинэ ай. 15 арескысен школае пыриз но мастере-оружейнике дышетскиз. Туэ "ИВА-99" дуннеысь выставкае пыӵал дасяз. Со усто слесарь-сборщик, мастер луэменыз ӵош егит слесарьёслэн дышетӥсьсы-наставниксы ни. Туэ тунсыко но аспӧртэмлыко пуэн ужан. Чебер приклад, кикутон но музонзэ лэсьтон каньылэн уг сётскы. Чурыт пуэн (кызьпу, буг) ужан трос быгатэмез кулэ каре. Татын зэмос мастер луиз Александр Климов. Со Аркадий Брыловлэсь дышетскиз ложеос, прикладъёс вӧлыны. Нош аслыз 17 арес гинэ Туж утчаськись, малпаськыса ужась мастер луэ. Кызьы бен вератэк кельтод граверъ1с сярысь. Соос пӧйшуран пыӵалъёсты кызьы гинэ уг чеберъяло, кияд кутэмед поттэк кутод. Егитъёсты таӵе синмаськымон ужлы дышетэ мастер-инструктор Александр Передвигин. Со уно усто гравёръёс дасяз ни. Тани Владимир Хомяков граёрлэсь ужзэ вить чиньызэ кадь тодэ ни. Нош солы 18 арес гинэ. Со пу вылэ но суредъёс лэсьтэ ни. Калык художниклы Леонард Васевлы 70 арес тырмыку, школалы солэн нимыз сётэмын но мемориальной пул шуккемын. Со уго кылдытӥз зэмос гравёрной искусство. Солэсь дышетско ваньмыз гравёръёс - пыӵал чеберъясьёс-суредасьёс. Леонард Михайлович кельтӥз таӵе ноку вунонтэм бызись кеч, турын пӧлын кыр курег, лобись ӵӧжъёс, кесяськись лосьёс, кышкасьтэм тылобурдоос но пуны, "Мороз" суредъёс. Ваньмыз со пӧйшуран пыӵалъёс вылэ лэсьтэмын. Леонард Васев уно гравёръёс будэтӥз. Соос пӧлын - Геннадий Макаров (мӧляяз Ленин орден пиштэ - Г. Р.), Леонид Куршин, Юрий Кропачев, Николай Ермолаев, Юрий Блинов, Александр Передвигин но мукетъёсыз. Ваньзы соос 1-тӥ классэн гравёръёс луо. Бен, ваньзэс вераса но уд быдты. Школа юбилеез ӟеч мылкыдын пумита. Любовь КЛИМОВА, Васев нимо оружейной школалэн дышетонъя кыл кутӥсез. ШӦКЫЧ Галина Баженова Варманай Гужем шорын вал со. Огпол, ужан вискын, тамак пурккетыса пукиськом, Исьтапан Олёшкалы шуисько: "Мынам кадь ӟеч варманаез нокинлэн но ӧвӧл, дыр"... - Варманаед? Шузимид шат, кыл но эн поттылы соос сярысь! Мынамез, ӵукна султэм бераз ик весь нукыртыса ветлэ. Номыр но солы уг яра. Азьтэмъяськон сямыз вань. Кылын етӥз, гур вылысь ӵыжатэм кӧй кадь ӵыж-ӵаж кароз но кельтоз. Кӧлыкуз гинэ лякыт. - Нош мынамез, - итӥськиз Рави Веня, - ярам коть монэн уг улы. Мынӥськод ке юрттӥськыны, весь чырсам сюкасеныз гинэ секта. Я бен, аракызэ но одӥг-ог поттылэ. Тямагазэ шуисько. Мукетъёсыз сое ӧй но юысалзы. Синэз бералтымон чырс луэ сюкасез. - Мынамез, - шуэ Понтя Витя, - юыкум туж урод потылӥз. Нош юэмысь дугдӥ но, небыт гадь вылаз йырме ик поныса воземе потэ, ява. Усто мынам варманае, азьвыл кадь ӧвӧл... Тӥляд, оло, серемды но потоз, нош мон соин бӧрдон калэ вуылӥ. Огпол со монэ туж юн кышкатӥз. Койка улысь кудыын мумы ӟазегмы пуке. Куро улаз варманай аракызэ ватылоз вылэм. Огпол шедьтыса юи, кык пол, вот и дыши кудые пыраны. Нош варманае валатскем но, кудыяз айы ӟазегзэ пуктэм. Ка-ак чепыльтӥз ук, коркась ӧсэз шарк пытсаса, тӧлпери сямен ури-бери потӥ. Корказьын пукисько, тамакме кыскыса. Мар кароно табере? Йырку ик меӵыр вазе. Шӧдтэк шорысь варманае потыса, пельёсме, оло, вӧлдэтозь ик кыскиз ук. Чир-р! кесяськисько, таиз но айы ӟазег сямен чепылляське туннэ... Собере ачим но валай янгышме, юонме куштӥ. Табере варманай тыбырме вешаса ик пумита: "Яратоно эмеспие лыктӥз-а?" Гужем каникулъёс Кузьым интые - дунтэк сиён Дышетскись пиналъёслы вордскем шаерзэс яратон мылкыд пыӵатон удысын Ижевскысь библиотекаос усто тыршо. Калыкез дышетонъя министерствоын сое тодытэк уг уло. Пӧртэм адӟытонъёс, викторинаос, пумиськонъёс пиналъёслэсь шаермы сярысь тодонъёссэс паськытато, сюлэмъёсазы гажан но данъяськон мылкыд пушйытыны юртто. Котькуд библиотекалэн вань покчи юрттӥсьёсыз. Пиналъёс мылысь-кыдысь пырисько ортчись ужрадъёсы. Тодон-валан дуннее йыгмыт вамышъяло татын ужасьёсын ӵош. Соин ик, одӥг ар но кельтытэк, роноос тыршылӥзы ёросысь библиотекаослэсь ужзэс ӟечен пусйыны. Нош таосыз ӧз вунэтылэпокчи эшъёссэс. Тужгес но чырмыт но котьмае тодыны тыршись пиналъёсты шумпоттыны турттӥзы пичияк кузьымъёсын. Нош туэ мукет сяменгес лэсьтоно кариськизы. Роно дэмламъя, Октябрь ёросысь культурая отдел библиотекаослы ӵектӥз аслаз пичи эшъёсызлы юрттыны... Маин малпаськоды? Сиёнэн. Бен, пиналъёсты куинь арня ӵоже тазалыксэс юнматонъя лагерьын дунтэк ческыт сюдозы. Со интыяськемын 70 номеро школае. Сыӵе шумпоттӥсь ивор сярысь милемлы вераз Азин нимо библиотекаысь валтӥсь библиотекарь Тамара Михайловна Лямина. Татын ужасьёс бырйизы покчи юрттӥсьёссы пӧлысь тужгес но устооссэ но чупресъёссэ. Ёросысь кык библиотекаысь (55 номеро библиотека но) 14 пинал ветлэ 70 номеро школаысь лагере. Юри быръемын ӧй вал ке но, усто пиналъёс пӧлы уногес кулэяськись но трос нылпиен семьяосысь покчиос шедизы. Тани Андрей но Таня Байкузинъёслэн но Маша Пушкарёвалэн семьяосазы куинь пиналъёс будо. Ваньзы соос дышетско 35 но 70 номеро школаосын. Азьветлӥсь пиналъёс котьма ласянь устоесь вылӥллям. Вань нылпиос дышетскон арзэс умой йылпумъязы. Ӵукна сиськон но нуназеян вискын покчи эшъёс библиотекалы юртто: уродмем книгаосты выльдо-"кышъяло", кема возисьёслы пунэмъёссы сярысь тодазы вайыто но мукет. Та секыт вакытэ котькуд юрттэтлы шумпотоно. Ческыт но витамино сиськыса, шутэтскон дырзэс пайдаё ортчытыса, пиналъёс вуоно дышетскон арын висёнъёслы но урод ужъёслы уз сётске шуыса малпано. Эшшо но умойгес луысал, дыр, нылпиосты дунтэк сюдонэз дышетскон арлэн нырысетӥ толэзезлы выжтысалзы ке. Е. ПАХОМОВА. Кыл шерисьёс - Тон малы мон шоры черекъяськод, кучапи! Атаед-а мон тынад, ӧвӧл-а? - Кытысь-о мон тодӥсько? *** Папа, ми туннэ пиосын изэн лэзяськыса ӵошатским. - Кин бен вормиз? - Мон. - Молодец, пие. - Иське, тон тырод пияла укно пна дун? *** Аптекае пыриз йӧно чебер кышномурт. - Вождэс эн вае, тӥляд ӧвӧл-а йыр висемлэсь противозачаточной таблеткады? - Сыӵеез луэ шат? - Кызьы уз луы. Мон ӵукна нылылэн кофеяз одӥг таблетка суралтӥсько но, лумбыт йыры уг висьы ни. *** Одӥг кышномуртлэн нуныез сьӧд куо вордскем. Картэз со вакыт командировкаын вылэм. Кышноез, пе, солы гожтэ: "Дуное, пимы вордӥськем бере, мынам йӧлы ӧй вал, соин ик негр кышно нонтӥз. Со бӧрсьы пимы сьӧд куо луиз!" Картэз та иворез аслаз анаезлы вера, соиз шуэ: - Тодӥськод-а, пие, тон вордскыку мынам но йӧлы ӧй вал, соин ик тонэ скал йӧлын сюдоно луи. Но сюръёсыд али гинэ будӥзы. Бускельёсмы дорын Юбилейлы дасясько Киров улосвылысь Кильмезь посёлок ӝоген пусъёз 70 арессэ. Юбилейлы сӥзем ужрад ортчоз 1-тӥ августэ. Та вие районысь предприятиос, организациос но гурт калык райцентрез чылкытатон бордын ужало. Озьы ик, 1-тӥ августэ ортчытэмын луоз на посёлоклэн нуналэз но. Дышетскизы гуртоос Июнь толэзьлэн пумаз "Надежда" колхозысь культура юртын семинар-дышетскон ортчиз. Колхозысь кивалтӥсьёс, валтӥсь агрономъёс но зоотехникъёс, пудо сиён дасян но картофка будэтон удысысь звеньевойёс кенешизы ю-нянь, картофка но пудо сиён будэтонысь выль амалъёс сярысь. Пумиськонэ вуылӥзы Ижевскысь гурт хозяйствоя академиысь учёнойёс. Соосын ӵош бускельёсмы доры ветлӥз Вавож ёросысь Мичурин нимо колхозысь агроном В. А. Копеев. Кенешон пайдаё ортчиз: агрономъёс тодазы ваизы азьло ужан сямъёссэс, ог-огзылы мадизы ӟеч, адӟем карымон амалъёссы сярысь. Куноын - койыкъёс Кильмезь посёлоке вуылӥзы... койыкъёс. Соос Федоров нимо паркетӥ калгизы. Нош вазь ӵукна чорыгасез адӟыса кышкатскизы но кыре-буре шонтӥзы. Н. ТУРИН. Удмурт Республикаысь Кун Кенешлэсь куинетӥ (азьвыл чакламтэ) сессизэ люкан сярысь Удмурт Республикаысь Кун Кенешлэн Президиумезлэн Постановлениез Удмурт Республикаысь Кун Кенешлэн Президиумез пуктэ: 1999 арын 29 июле люкано Удмурт Республикаысь Кун Кенешлэсь кыкетӥ ӧтчамезлэсь куинетӥ (азьвыл чакламтэ) сессизэ, "1999 арын нырысетӥ палар ӵоже калык хозяйстволэн ужезлы йылпумъянъёс сярысь" ужпумез эскерон понна. Удмурт Республикаысь Кун Кенешлэн Тӧроезлэн Нырысетӥ воштӥсез В. И. Агашин. Ижевск город, 1999 арын 15 июле. � 26-ИИ. Журналистъёсын пумиськонъёс Куашка сюрес, куашка... Кылем арня шорын Правительствоын паськыт пресс-конференция ортчиз. Татчы пыриськизы Горьковской чугун сюреслэн пресс-центрез но Н. Новгородысь журналистъёс (газетъёсысь, радиоысь но телевидениысь). Люкаськемъёсын пумиськизы Удмурт Правительстволэн Тӧроез Николай ГАНЗА, Горьковской чугун сюреслэн кивалтӥсезлэн воштӥсез Александр ЖУКОВ но солэн Удмуртиысь ёзэзлэн тӧроез Клементий РОГОВЕЦ. Та ужрад сӥземын вал чугун сюресэз выльдонлы, та удысын реформа ортчытонлы. Кивалтӥсьёс журналистъёслэн трос юанъёссылы валэктонъёс сётӥзы. Таӵе ужпумез ӝутэмлы, журналистъёс гинэ ӧвӧл, Николай Алексеевич но паймемын. Ма, кызьы озьы, Россиын одӥг чугун сюрес гинэ огсыр ужа на, табере сое куашкатон борды басьтӥсько. Со чик валантэм. Ӟуч "реформаторъёс" та удысэз дыраз адӟиллямтэ, лэся, яке кунгож сьӧрысь али сыӵе курон вуэмын. Кызьы шуо, ваньмыз лэсьтӥське азьло чакламъя. Озьыен, дыр вуиз чугун сюресэз куашкатыны. Но кызьы? Амал шедьтӥзы. Сое куиньлы люконо - федеральной, региональной но интыысь сюреслы. Вань секытэз усёз берло кыкез вылэ. Али но соос мырдэм шокало, изъянэн ужало. Соин ик Москва чакла со сюресъёсты интыос вылэ погыльтыны. Кызьы но мар бен со луоз? Умойзэ номыр ум адӟе, нош Россиысь огъя чугун сюрес люкиськыны быгатоз, шуом, бигеръёс, башкиръёс, удмуртъёс понна. Но озьы со улыны уз быгаты. Пресс-конференциын но ӵапак со сярысь вераськон мынӥз. Шуом, Горьковской чугун сюреслэн люкетэзлы бадӟым изъян вае солэн Удмурт ёзэз. Озьыен, Москва малпа та удыслэсь ляб интызэ Удмурт Республика вылэ палэнтыны. Туж ӟеч малпамын. Быдэс Россиын чугун сюрес огъя кужымен лэсьтэмын, табере сое куинь люкетлы люкыса, пайда сётӥсьсэ Москва аслыз кельтыны чакла. Шонер-а со? Ӧвӧл. Огъя вераса, улосвылъёслы али юн секыт йӧтэ. Бюджет чотын ужасьёслы Россия уждунзэс будэтэ, нош коньдон уг висъя. Нош ик республикаос, областьёс вылэ погыльтэ. Кӧня со кыстӥськоз - шуг вераны. Чугун сюрес, ватонэз ӧвӧл, ассэ туж ӟеч возьматӥз война вылтӥ. Ваньзэ вормон понна лэсьтӥз. Али но урод уг ужа. Но тарифъёсты инмозь ӝутэмен кулэсмизы грузъёсты нуон- ваён но адямиос ветлэмысь дугдӥзы. Кин отын янгыш? МПС эсэпсэ ӧз шедьты яке, кинлэсь ке (МВФ-лэсь) кылзӥськыса, со юри лэсьтӥське. Югдур шоры котькызьы учкы, но одӥгез валамон: чугун сюресэз шори но, кыклы но люкыны уг яра. Со сярысь люкаськемъёслы валэктыны выриз Николай Ганза но. - Та ужпумен люконтэм герӟаськемын мукетыз,- ватсаз Александр Жуков,- берло дыре чугун сюрес вылын чидантэм луиз буёло металлэз лушкан но адямиосты шуккиськонлэсь утён. Кыкетӥезъя МПС ужрадъёс кутэ, поездлэн машинистэзлы юрттыны КЛУБ аппаратура басьтыны кутске (туж бер ке но - Г. Р.). Малы мон озьы шуисько? Западын адямилэн улонэз юн дуно лыдъяське, нош асьмелэн? - Нокин озьы уз шуы. Чугун сюреслэсь ортчем сюрессэ тодэ вайыса вералом, Горьковской чугун сюрес кылдӥз 1961-тӥ арын. Отчы пыртэмын Казанской сюрес. Нош солэсь азьло отчы пыро вал Московско-Нижегородской, Московско-Казанской, Вятско-Двинской но Северной чугун сюресъёс. Али та сюрес услугаос сётэ 6 республикалы но 9 областьлы, яке татын 14 миллион калыклы. Сюреслэн 358 станциез, соос пӧлысь туж бадӟымез - 6. Суткаяз отӥ грузэн 3-ысен 10 сюрсозь вагонъёс ортчо. Горьковской чугун сюрес Россиын одӥгез умоез лыдъяське. Татын 90 сюрслэсь уно адями ужа. Калыкез нуллэм сяна, сюрес кыӵе гинэ грузъёс уг нуы-вайы. Отчы пыро минерал сылалъёс, металл, цемент, лэсьтӥськон материалъёс, нюлэс, ю тысь но мукетыз. Со понна бадӟымесь городъёсын (Владимир, Н. Новгород, Киров, Казань, Ижевск) пуктэмын транспортной терминалъёс. Сюреслэн кузьдалаез 5,4 сюрс иськем пала. Куд-ог интыостӥ пассажирской поездъёс часкын 160 иськем ӝоглыкен ветло ни. Калыклы билетъёс вузасько "Экспресс-2" АСУ пыр. Сюреслэн ваньбурез 1 миллиард долларлэсь уно. Соин ик сое векчи люкетъёслы люкыса, номыр ӟечсэ ум адӟе. Сюресэз куашкатыны уг яра. Г. РОМАНОВ. Гуртысь адямиос Кубанёзь кыдёкын ке но... Шаерамы Вавож районысь "Колос" гурт хозяйство одӥгез устоез лыдъяське. Выльдӥськон кутскем бере, республикаысьтымы данакез эштосъёс, фермер (крестьян) хозяйствоос куашкан калэ вуизы ни. Нош выль бияос берло 5 ар ӵоже арлы быдэ Кубаньын кадь котькуд гектарысь шорлыдын 30 центнерлэсь уно ю тысь кутсало но скаллы быдэ 4000 килограммлэсь ятыр йӧл кыско. Миым 2000 сюрс манетлэсь уно пайда басьтӥзы, рентабельностьсы 34 процент луиз. Та лыдпусъёсын, веранэз ӧвӧл, трос тыршемез-сюлмаськемез пудо вордонъя хозяйствоысь бухгалтерлэн Людмила Егоровна Бушковалэн но. Со татын вордскемын- будэмын. Колхозын 30 ар ужа ни. 1968-тӥ арын йылпумъяз Сарапулысь совхоз- техникумлэсь экономикая люкетсэ. Собере Людмила татын 11 ар экономист но 8 ар парторганизацилэн секретарез вал, нош бухгалтериын - 12-тӥ арзэ. Лыдъян-чотан ужез ӟеч тодэ. Али солы оскемын валтӥсь но секыт удыс - пудо вордон но складъёс. Котькудаз лыдъян-чотан умой радъямын. Гуртын та вакытэ кысык ужъёс мыно - пудо сиён дасян. Тужгес но шулдыр ужгур чузъяське кизем турын лудъёсын. Выль бияос 600 тонналэсь уно кӧс турын люказы но 4 сюрс тонналэсь ятыр силос тыризы ни. Хозяйство гурт калыксэ но уг вунэты, котькудзылы, кӧня ужамзыя, капка азязы ик тюкен-тюкен турын вуттэ. Пенсионеръёслы но озьы ик сётъяло. Хозяйстволэн тӧроез Владимир Красильников шуэ: "Гурт калык сярысь макем умой сюлмаськод, сокем со ӟечгес ужалоз". Нош бияос сярысь веранэз ик ӧвӧл. Татын муш кадь тыршись калык улэ, кулэ дыръяз гурезез но берыктоз, верало бускельёссы. Шумпотымон со. Тани али самой турыно-сиёно вакытэ куд-ог хозяйствоосын скаллы быдэ нуналаз 10 килограмм но йӧл уг кыско, бияослэн со - 15,5 килограмм, нош июне быдэс пуд люказы. Татын но Людмила Егоровналэн кибервылыз шӧдӥське. Г.Романов. А. С. Пушкинлэн вордскемез дырысен - 200 ар Хоттабыч луысал ке... Малы меда мон пересь Хоттабыч ӧвӧл? Пурысьтам тушысьтым одӥг нюжазэ али ик ишкалтысал но Пушкинэз улӟытысал. Малы? Кенешыны. Малы меда мон киын ӧвӧл дырлэн машинаез шуонзы? Туннэ ик лобӟысал Пушкинлэн даураз, солэн берпум аръёсаз. Нокызьы но уг оскиськы, со ваче ыбылӥськонэз дугдытыны уг луы ни вал шуыса. Оло, соку ке улысал, югдурез валасал, вылды. Гожтэт но гожтысал мон Александр Сергеевичлы. Кутскысал тазьы: - Ӟечбуресь, гажано Александр Сергеевич! Трос лыдӟи ини мон тӥлесьтыд книгаостэс. Тӥ сярысь но книгаос палэнэ ӧз кыле. Тӥ, Александр Сергеевич, лыдӟиськыны туж яратӥськоды вылэм. Нош туалаосыз нылпиос - чик уг. Мар дэмласалды тӥ соослы? Выль туж-туж тунсыко книга гожтысалды на шат? Эшшо одӥг юанлы мон валэктон ӧй шедьты: малы тӥ ноку но ӧй вал кунгож сьӧрын? Нош мон тодӥсько: тӥляд Францие вуылэмды туж потэ вал... Трос юанъёс кылдо йырын. Но жаляса верано луэ: Александр Сергеевичен кенешыны уг ни быгаты: мон Хоттабыч ӧвӧл, дырлэн машинаез шуонзы но ноку но уз кылды, гожтэтэ но Пушкин доры ноку но уз вуы. Озьы ке но, та адямилэн ужъёсыныз пыр-поч тодматскид ке, трос юанъёслы валэктон шедьтод. Мон лыдӟиськыны яратӥсько бере, Пушкин палэнэ ӧз кыльы. Трос ужъёссэ лыдӟи, нош тужгес но яраз но сюлэмам весяклы кылиз "Евгений Онегин" романэз. Али но кут но гожты кадь Татьяналэсь гожтэтсэ яратоно эшедлы. Котькӧня ар мед ортчоз, котькыӵе машинаос но компьютеръёс мед поттозы - адями книга лыдӟемысь ноку уз дугды. Нош Александр Сергеевич Пушкинлэсь произведениоссэ туж яратоз. Аня Васильева, Можга медучилищеын дышетскись. Бӧлякъёсмы но рекордсменъёсмы луиллям Пӧртэм рекордсменъёс, паймымон учыръёсты, адӟем карымон быгатонлыкъёсты пусйись Россиысь "Диво" книгалы дас ар тырмоз ини. Со потэ Москваын "Интерстронг" издательствоын. Быдэс дунне вылын адямиос радио кылзо, телевизор учко. Нош соос дорамы кылдытэмын ук - Россиын, озьы ик видеомагнитофон, видеокассета, персональной компьютер но тросэз мукетыз. Жаляса верано луэ, асьме адямиослэн йыръёсазы кылдэм малпанъёс кыштырак гинэ Западэ кошко. Угось отын соосты ӝог гинэ уже кутыны быгато, собере асьмелы ик бадӟым дунэн вузало. Бадӟым кулэлыктэм вормонъёсты но азинсконъёсты "Диво" Гиннесслэн Рекордъёсъя книгаез выллем уг пусйы. Отчы пыро зэмос улонлы матын луись, адямилы юрттыны быгатӥсь, визьнодась, азинсконъёсты умоятыны кичӧлтӥсь рекордъёс. Книгаысь асьме бӧлякъёсмы сярысь но лыдӟыны луэ, кылсярысь, дано спортсменка Галина Кулакова, секыт гиря ӝутъясь Иван Шутов сярысь. Нош 1999-тӥ арын та книгаын пусъемын калык куспо "Солнце" огазеяськон но (кивалтӥсез Василий Рогалев). В. ВАСИЛЬЕВ. Пунэм тыронъёс кулэсмизы Вить ар ӵоже нырысьсэ Пенсиосъя фондэ вуись налоглэн лыдыз июне одӥг толэзьлы тыроно пенсилэн быдӟалаезлэсь ортчиз. Удмурт Республикаысь Пенсиосъя фондлэн ёзэз люказ 207 миллион манет, нош одӥг толэзьлы пенсиез тырыны кулэ 181 миллион манет. Мултэс люкам коньдон чотын Ижевскын апрельлы пенсия тыремын. Таӵе югдуре Москваысь юрттэт возьманэз ик ӧвӧл ни. Озьы ке но, Россиысь Пенсиосъя фондысь июне республикамылы висъямын вал 22,6 миллион манет коньдон - со сярысь сюлмаськиз Удмурт Правительстволэн Тӧроез Николай Ганза. Выль кивалтӥсьлэн пенсиосъя кылдэм югдурез сэрттон-пертчон борды ӝегатскытэк басьтӥськемез азьланезлы оскон кылдытэ. Азьло аръёсъя чаклано ке, гужемлы политика но экономика улон котькытын ик пуксьытске, выт тырон но Удмуртиын июле-августэ ичиёме. Озьы ке но, Пенсиосъя фондлэн ёзэз апрель толэзьлы пунэм кылем пенсиез июльлэн пумаз сётыны чакла Воткинск, Сарапул городъёсын, Воткинск но Сарапул районъёсын. Нош вуоно толэзе пенсия тыриськоз мукет районъёсын. Кызьы оскытэ Степашинлэн правительствоез, пенсиосъя пунэм тыронъёс быдэс странаын, озьы ик Удмуртиын но, сентябрёзь сётэмын луозы. Азьланез возьматоз ни верамезлэсь шонерзэ. Но улонлэн умоямезлы оскытэк уг луы. Пенсиосъя фонд азьын пунэм кылем бадӟым предприятиослэн лыдзы кулэсмемъя, соос пӧлын "Удмуртнефть" АО, "Чепецкий механический завод" ОАО, Горьковской чугун сюреслэн Ижевскысь ёзэз, "Ижсталь" АО, "Электромеханический завод" ГП. "Удмуртгеология" АО, экономикая югдур ӧжытак тупатске ни, шуыны луоз. Шаерысьтымы вить сю пала шоро-куспо но пичи предприятиос озьы ик Пенсиосъя фондэ вань пунэм тыронъёссэс сётӥзы ни. Югдур трослы умояз, Россия Федерация пениос пумысен закон кутэмен но. Озьы ке но, тросэз предприятиос оскыса уло, пениос но штраф азьланяз вунэтэмын луоз. Но сыӵе малпан предприятиосты секыт югдуре вуттыны быгатоз, сое валаны луэ берло аръёсъя но. Асьсэос ке пунэмъёссэс ӧз сётэ, кужмысь тырытозы. 1999- тӥ арлэн нырысетӥ ӝыныяз Пенсиосъя фондлэн удмурт ёзаз нимысьтыз ужрадъёс кутыса пыртэмын 29.353 сюрс манет. Предприятиослэн кивалтӥсьёссылы пумит ӝутэмын ни 34 уголовной уж. Чурытэсь ужрадъёс кутэмен ик 147 организацилы ӵошен тыроно 1.157.403.332 манет пунэме кылем коньдонзэс. Пӧлазы "Ижмаш" ОАО, республикаысьтымы пенсионеръёслэсь со пунэмаськиз ни 120 миллион манет пала. Судебной уж ӝутэмъя, арлэн нырысетӥ ӝыныяз Пенсиосъя фондэ пыртэмын ни 7,5 миллион манет, нош Предприятиосты банкрот ялэм чотын фондэ вуиз 13 миллион манет. Выт - налог тырытонъя уж азьланьтӥськоз. Россия Федерациысь Пенсиосъя фондлэн Удмурт Республикаысь ёзэз. Пыӵал тӥрлык таламын ФСБ-ын ужасьёс чакласа уло, законэз тӥяса, пыӵал тӥрлыкез, пуштӥсь макеосты лушкем возисьёсты, сое бичасьёсты но вузасьёсты. Шаерамы кырсь ужен вырисьёс трос гинэ. Уго Ижевскын интыяськемын Россиысь пыӵал тӥрлык поттонъя кык бадӟым предприятие. Отын лэсьто ожын кутӥськись (быдэс Россияя 90 процентэз) пӧйшуран, спорт но газэн ыбылӥсь пыӵалъёс. Соин валче, нимысьтыз кышкытлык погыльске та предприятиосын ужасьёс вылэ, озьы ик военизированной возьмаськонлэн ёзъёсаз ужасьёслы. Берло аръёсы шараямын уно учыръёс: куке предприятиосысь пыӵал тӥрлык ёзъёсты лушкало но ватскыса нимысьтыз цехъёсын соосты бичало. ФСБ-ын но МВД-ын ужасьёслэн тыршеменызы, берло дыре пыӵал тӥрлык лушкасьёслэн лыдзы кулэсмиз ке но, со ӧр чылкак пытсамын ӧвӧл на. Со сяна, ож но спорт пыӵалъёсъя кылдытэм газ пыӵалэз Ижевск городын тросэн поттыны кутскемен валче, ож патронъёсын ыбылӥсь карыны луонлыкъёс кылдӥзы. 1997-тӥ-1999-тӥ аръёсы Управлениын ужасьёс 88 пыӵал, 57 сюрс пала боеприпасъёс, 17 пуштӥсь маке шедьтӥзы. Ижевск но Глазов городъёсысь шараязы пыӵал лэсьтонъя лушкем интыосты. Тросэз ужъёс судын эскеремын, йыртэмасьёс кыл кутӥзы. Со сяна, уретэмын "пыӵал тӥрлык бизнесэн" вырисьёслэн Москваысь, Екатеринбургысь, Татарстанысь, Свердловск, Нижний Новгород, Ульяновск улосвылъёсысь, Сибирьысь, Дальней Востокысь но СНГ-е пырись странаосысь юлтошъёсынызы кусыпъёссы. 1999-тӥ арын ФСБ-ысь оперативникъёс выль иворъёс вуттӥзы. Январь толэзе кык пол шедьтэмын вал туж кужмо пуштӥсь маке (взрывчатка) - "пластит". Огполаз банда ки улысь - 2,3 килограмм, кыкетӥяз - Ижевскын улӥсь егитъёслэсь - 260 грамм. Нош та нуналъёсы Ижевск городысь нимаз (частной) коркаосты эскерон вакытэ шараямын пыӵал лэсьтонъя кык мастерской. Лушкем интыосысь шедьтэмын 10 дась пыӵал, со пӧлын ик оптической прицелэн снайперской винтовка, автомат, Симоновлэн карабинэз (СКС), пистолетъёс, сюрс пала патрон, килограмм пуштӥсь маке. Пыӵалъёслэн глушительзы вань. Со сяна, специалистъёслэн верамзыя, люкам ёзъёс эшшо ог 15 автомат но 20 пистолет лэсьтыны тырмысалзы на. ФСБ-ын ужасьёслэн чакламзыя, лушкем лэсьтэм пыӵалъёс Удмуртие гинэ ӧвӧл, палэназ но вӧлмытэмын луысалзы. Россия Федерациысь ФСБ-лэн Удмурт Республикая управлениез уголовной уж ӝутӥз. Отчы кыскемын Ижевск городын улӥсь кык мурт. Пусйыны кулэ на мукетсэ но: пыӵал тӥрлык шедьтэмын Пироговка шур пыдсысь но. Россия Федерациысь ФСБ-лэн Удмурт Республикая управлениезлэн пресс-службаез. Дуно ваньбур - рукописьёс Удмурт калык кылбурчи Герман Алексеевич Ходырев улытозяз паймымон трос люказ дуно ваньбур: рукописьёс, гожтэтъёс, нуналмысь ортчись югдуръёслы дунъет сётӥсь чуръёс, туспуктэмъёс. Ваньзэ сое пыр-поч эскерыны, радъяны но интыяны кулэ музее яке архиве. Та пумысен кылем пятницае кенешон вал Кун Кенешысь Наукая, дышетонъя, культурая, егитъёсын ужан политикая комиссилэн кивалтӥсез Алексей Красильников дорын. Т. НИКОЛАЕВА. Удмурт Элькунын дунъёсты кун ласянь радъян сярысь Удмурт Элькунысь Правительстволэн постановлениез Удмурт Элькунлэсь 1998 арын 17 ноябре кутэм "Удмурт Элькунын дунъёсты (тарифъёсты) кун ласянь радъян сярысь" 703-1 номеро Законзэ но Удмурт Элькун Кивалтэтлэсь 1998 арын 20 мартэ юнматэм "Дунъёсты (тарифъёсты) кун ласянь радъянъя ужрадъёс сярысь" постановленизэ лыдэ басьтыса, Удмурт Элькун Кивалтэт пуктэ: 1. Юнматоно но кужыме пыртоно вузъёсын переченез, кудъёсызлы дунъёс радъяно пайдалыклэсь (рентабельность) вылӥ быдӟалазэ тупатыса. 2. Юнматоно но кужыме пыртоно вузъёсын (кунгож сьӧрысь ваемъёссэ но вераса) переченез, кудъёсызлэн дунъёссы радъясько, сое поттэм-дасям предприятиослэн оптово- отпускной дунъёссы вӧзы вузкарон надбавкалэсь вылӥ быдӟалазэ тупатыса. 3. Кужымзэс ыштэмен лыдъяно: Удмурт Элькунлэсь 1998 арын 30 декабре кутэм "Удмурт Элькунын дунъёсты (тарифъёсты) кун ласянь радъян сярысь" 1244 номеро постановлениысь няньлы но йӧллэсь сиён-юонлы дунъёсты радъян сярысь люкетсэ; Удмурт Элькун Кивалтэтлэсь 1999 арын 25 январе юнматэм "Удмурт Элькунын дунъёсты радъян сярысь" 91 номеро постановленизэ; Удмурт Элькун Кивалтэтлэсь 1999 арын 1 феврале кутэм "Удмурт Элькунын няньлы дунъёсты радъян сярысь" 157 номеро постановлениысьтыз 1, 2, 3 пунктъёссэ. 4. Та постановленилэсь быдэсьяськемзэ эскероз Удмурт Элькунысь Дунъёсъя но тарифъёсъя кун комитет. Удмурт Элькун Кивалтэтлэн Тӧроез Н. А. Ганза. 1999 ар 28 июнь, Ижевск город. Н 580. Та постановлениея: - няньлэн но мукет пыжиськемъёслэн асдунзы вӧзы пайдалыклэсь вылӥ быдӟалазэ 30 процент тупатоно; - йӧллэн но йӧллэсь сиён-юонлэн (мороженой сяна) асдуныз вӧзы - 10 процент; - пызьлэн асдуныз вӧзы - 10 процент; - нянь но мукет пыжиськемъёсын вузкарон надбавкалэсь вылӥ быдӟалазэ 30 процент тупатоно; - йӧл но йӧллэсь сиён-юонъёсын (мороженой сяна) вузкарон надбавкалэсь - 27 процент. Малпаськытӥсь югдур Гидъёсын уг гырдалты ужпи Гуртъёсын али жингыра кысык но шулдыр ужгур - ӵапак турнан вакыт уго. Та дырез котькудӥз ужась калык дасяськыса возьма. Ужан тӥрлыкез но дась медло, калык синъёсты палёмытымон дӥськутэз но. Удмурт гуртъёсын угось вашкала дырысен та чебер сям возиське. Турнан - трос кужымез кулэ карись уж. Уката ик, чебер нуналъёсы ӝог быдэстоно ужрад. Нош котьма ке но, малпамъя, мылкыд каремъя гинэ уг азинскы турын дасян. Ӝегатӥсь мугъёс тырмыт гинэ. Асьмеос трос поттылӥм ни колхозъёсын машина-трактор возён паркъёслэн куашкамзы сярысь. Туала дыре узыр кузё гинэ выль техника басьтыны йӧндыроз. Нош сыӵеос асьме улосын чиньыен лыдъямон гинэ люкасько. Вылаз ик, маял вылын кадь ӝутске воштос ёзъёслы, бензинлы, эстӥськонлы дун. Чылкак абдрано луэ гуртын улӥсь-ужасьлы, та выллем югдуре шедьыса. Ма кароно, кызьы мозмытсконо капканысь? Та нуналъёсы Кильмезьысь автобусэн бертыкум адӟи пичи дырысьтым вунонтэм суредэз. Покчи пиос валъёсын зурод вӧзы турын нулло. Эх, кыӵе шумпотон луоз вал со покчи кивоштӥсьёс понна! Гадьын данъяськон мылкыд ик лопырске: "Ми но арлыдоосын валче ужаны йӧндыриськом ни. Быгатэммыя ас колхозмылы юрттӥськом". Берло аръёсы ужась валъёслэн данзы синӥз. Соос понна бусы ужъёсты быдэсъяллязы трос вал кужымъем трактор-машинаос. Мӧзмылэс луиз вал гидъёсын. Уллёослэн лыдзы чутрак кулэсмиз. Малы-о, пе, мултэс сюдон-вордон возёд на. Сӥльызъя но парсьёсын уд ӵошаты валэз, асьме палан кумыс но уг дасяло. Та нуналъёсы Киров телевидение возьматӥз документальной фильм. Афанасьев ёросысь "Гординский" колхозын ужано валъёссы, пе, сю йырлэсь ятыр! Ужтэк уг сыло, шуыса ивортэ журналист. Соиз но тунсыко: валэн быдэстыны луоно ужез машина-тракторен быдэсто ке, председательзы сыӵеосты штраф, пе, тырытэ. Ваньмыз со лэсьтӥське, бензинэз, эстӥськон вӧез, машина ёзъёсты ӟеч шыръян вылысь. Вожъяськон мылкыд лопырскиз вал: уть ай, югдурез кыӵе ӟеч валась кузёос вань! Нош тани "Удмурт дунне" газет но ас лыдӟисьёсызлы ивортӥз: "Техникаез возьыны но ужатыны дуно луэмен, ӟеч кузё туала вакытэ валэз тодаз вае. Угось гидэ пудо сиёнэз валэн пыртылон, бакчаез гырон трослы дунтэмгес усе. Ува ёросын тае кемалась валазы ни. "Дружба" эштосын али 199 йыр валзы. Эштос сиес тӥрлыкез но ачиз дася - дунтэмгес усе, со сяна, воргорон киослы уж вань. Вал кыткон котырзэс басьтыны мукет ёросъёсысь но вуыло" (1999-тӥ ар, 15-тӥ номер). Со дыре ик куд-ог колхозъёс-эштосъёс та сярысь уг ик малпасько. Киров улосысь Кильмезь ёросын 1994-тӥ арын валъёслэн лыдзы 240 йыр лыдъяськиз ке, туэ та лыдпус 150-озь шупчиз ни. Уг, мынам азьвыл аръёсы сямен кужмо черетскеме уг поты. "Будэтоно валъёслэсь лыдзэс!" - сыӵе йыръян но уг сёты гожтэмелы. Котькуд ужрадын чакласа-лыдъяса лэсьтэм вамыш дуно. Соиз яке таиз колхоз ачиз мед лыдъялоз кӧня вал вордыны, кыӵе ужъёсты быдэсъяны. Та югдурлэн мукет палыз но вань на. Гуртысь тросэз егит воргоронъёс вал кыткыны гинэ но уг йӧндыро ни. Зэм, зэм. Ас синъёсыным адӟеме вань. Серем но, ӝож но. Вашкала грекъёс вералозы вылэм: адями бере самой визьмоез лулос - вал. Кыӵе юрттысалзы, дыр, соос нылпиосмылы, ӟеч мылкыдо, ужез гажась будыны. Пиналъёс уго туж ярато валъёсты утялтыны, ӵошатсконъёсы пыриськыны, соосын ужаны. Вань, вань асьмелы ма сярысь йыртышмес кормыштыны но малпаськыны, югдурез тупатыны но бер ӧвӧл на. Н. ТУРИН. Сильзор-сильтӧл вамен Сизьымдон ньыль арессэ пусъёз ӝоген Алнаш ёросысь Удмурт Вишур гуртын улӥсь Семен Петрович Герасимов. Гуртысь витьтонлэсь трос воргоронъёсын ӵош вамыштӥз вал со тылӝуэ. Сомында мурт пӧлысь куамын кыкезлы гинэ шуд усиз вормон сюрес кузя бертыны. Нош туннэ Семен Петрович чылкак огназ гинэ на кылемын. Соин ик со Удмурт Вишурын тужгес но дано, гажано адямиен лыдъяське. ... Син азям пуктӥсько трос вераськыны яратӥсьтэм, востэм воргоронэз. Малы ке керпотысагес возьматӥз со орден книжкаоссэ. Фронтысен сётэм документъёс верало солэн секыт сюресэз ортчемез сярысь. Вордӥськыны но кылдэм ук 1925-тӥ арын 28-тӥ июле. Гурт калыклы тужгес но секыт дыре. Дышетскон сярысь тросэз ӧз ик малпаськылэ соку. Нош Семен Петрович пырпотӥз дас классэз ик. "Дышетсконэ туж дуно усьылӥз - ваньзэ коньдонэн басьтоно вал. 9-10 классъёсме йылпумъяй Алнашын. Сизьым иськемез кутэн ветлӥськиз. Алнаш пиналъёс ботинкаосын, милемыз, гуртысьёсыз, серекъяло вал, кутэн ветлэмысь. Атае, колхозлэн тӧроез вал бере, валатэк ӧз улы дышетсконлэсь кулэзэ. Со монэ визьманы тыршиз. Собере аслам но туж бадӟым мылкыды вал тодон-валан басьтыны", - пинал дырысьтыз учыръёссэ тодаз уськытӥз воргорон. - 1941-тӥ арын, дышетсконмес йылпумъяммы бере, милемыз, мылкыд карисьёсты, куризы школаосын ужаны, - нош ик тодаз вае Семен Петрович. - Со дырез али кадь ик тодӥсько на. Дорам шумпотыса бертӥ но анаелы кеськи: "Мон дышетӥсь луо! Коть тӥледлы но, пичияк ке но ужаменым юртто". Соин ик, пиналъёсты яратэменым, куриськон гожтӥ. Август толэзе лэзизы Юмьяшур школае. Дышетскон кутскытозь, та гуртын ик араны потай. Со понна быдэс воз нянь сётӥзы. Кыӵе бадӟым юрттэт вал со семьяелы! Атае фронтэ кошкем бере, ӝоген, ивортэк быремын шуыса, кагаз вуиз. Анае куинь нылпиез сюдыны- вордыны огназ кылиз. Дышетон удыс но нырысь-валысь капчиен ӧз сётӥськы. Семен Петровичлы оскизы 2-тӥ но 4-тӥ классъёсты. Ӟеч коть: отын ужаз Алнашысь дышетӥсь. Со ик дышетӥз Семенэз уроклы план гожъяны но, пиналъёсын вераськыны но, улонэз валаны но. Та вакытэ Герасимовлэн ӵош дышетскем эшъёсыз фронтэ но армие кошкылэмын вал ини. Классысьтыз тужгес но пичиез вал бере, солы огназлы кылёно луиз. Но дыр ӝоген ортчиз. 1943-тӥ арын 2-тӥ январе Семен Петровичез келязы армие. Бадӟым куректон но сюлмаськон вал со лябӟем анаезлы но пичи сузэр-вынызлы. Службазэ ортчытыны кутскиз Воткинске ваем Ленинград пехотной училищеын. Улон татын но бышкись йӧтӥз пияшлы. Тужгес но нюръяськоно луылӥз сютэм улонэн. Нош мабыдӟа шумпотон вал Семилы но эшъёсызлы: анаез но эшшо ньыль кузя нылкышноос пыдын, салазкие тырыса, сиён-юон ваизы. Зэм но, сыӵе адӟиськон азьланяз мылкыд но, кужым но ватсаз. Но татысь службазэ йылпумъяса ӧз вутты. Куать толэзь ке дышетсконо вал, витетӥяз шор ёзо тодон-валанэн пияшъёсты басьтӥзы Подмосковьеысь воздушно-десантной войскоосы. Озьы 1944-тӥ арозь Семен Петрович десантник луиз. Нош июнь толэзе, дембельёсты люкаса, часть кылдытӥзы но келязы Карел фронтэ. Та музъем вылысен кутскизы воргоронлэн тужгес но секытэсь адӟонъёсыз. Финляндия пала кыстӥськыку, трос городъёс но гуртъёс мозмытэмын вал каргам фашистлэн сьӧсь ки улысьтыз. Меӵ ыбылӥсько асьме солдатъёс. Алнаш палась тросэз эшъёсыз весяклы выдыса кылё ни тодмотэм интыосы. Пунэмзэ берыктон понна, сэзь, кышкатэк ожмаське Герасимов. Тани ӝуа ни немецъёслэн ватскон юртсы. Визьтэммыса бызьыло сьӧсьёс. "Ыбылэ со кыйёсты!" - кесяське сержант Герасимов. Нош ачиз я нюжтӥськыса, я чырмыт лось кадь тэтчаса вутскылэ автоматэныз "сьӧд куакаос" вылэ. Вӧзтӥз шуласа ортчо пуляос. Пуштыло снарядъёс. Гранатазэ зӥртыны шуыса султӥз но..., ӵап тушмон пуля вандыса мертчиськиз бур пельпумаз. Берпум кужымзэ сётыса пазьгиз со виръ юисьёсты: одӥгтэм быдтэмын вал сьӧсьёс. Ымныраз ӝуатскем пальпотонэн но вирен пыласькись мугоро солдатэз соку ик келязы госпитале. "Асьмеос одно ик вормом! Тӥ мон понна но пунэмзэ берыктэлэ!" - осконэн кеськиз Герасимов эшъёсызлы. Сӧсыр луэменыз валче, сержантлы ӧз кылды ни Финляндилэн кунгожез дорозь вуыны. Госпитальын шуныт но, кӧттыро ке но вал, батырлэн сюлмыз шуг улӥз. Нуналъёс но туж кема кыстӥсько кадь ини. Но тани вуизы эшъёсыз - соос вормонэн лыкто вал ини Финляндилэн кунгожез дорысь. Частьлэн командирезлэн но кельтэмез ӧз поты ни Герасимовез: - Ну, давай, малпаськы, эше: яке милемын ӵош кошкиськод, яке шуныт валесад кылиськод. Кылид ке, ачид тодод. Но мынам частям тон уд шедьы ни. Та кылъёсты кылыса, воргоронлэн мылкыдыз ӧръяськиз: "Эшшо ке юаськод на!" Бур суйзэ ӝуткамез но луытэк, госпитальысь пегӟиз Семен. Табере ини частьсэс вуттӥзы Калининградэ. Татысен, кӧня ке дышетскыса, сюрес лёгиськиз пырак Украин фронтэ. Нырысь ик Румыния понна ожмаськон вал. Азьпалан - Венгрия но Австрия. - Таослэсь шоркаръёссэс мозмытонъя жугиськонъёс тужгес но секытъёсыз вал, - вера Семен Петрович. - Валаськом ини, вормон асьме киын шуыса. Пичи но кулэм уг поты ни. Озьы ке но, эрик понна, шаеред понна астэ жалян сярысь малпаны ик уг яра. Гитлер солдатъёс но шимес вожомемын. быронзэс шӧдыса, лэся, урмем кадь нюръясько. Сётскемзы, осконзэс ыштэмзы уг поты на. Со ӝужда коркаос, вань этажъёсын жугиськон мынэ. Бӧрсьысь бӧрсе усьыло снарядъёс. Котьмае вотсась ӵын лӧсъяське. Кӧня ке немец пияшъёсты, пленэ кутыса, отделениысьтым солдатъёсы дорам вуттӥзы. - Мар каромы, сержант? - Йырберазы шукконо но, ужез быроз! - вазьыло куд-огез. Соку мон Гитлерлэн сюдосъёсыз шоры учкыса верай: - Мар басьтод на, соосты шуккыса?! Вормон табере асьме киын ини. Винтовкаоссэ басьтэ но, чалякгес мед ышозы татысь. Укыр пиналэсь на. Анай йӧлзы ик ымдуразы ай. Соослэн но асьмелэн кадь ик улэмзы потэ. Бен, котькыӵе учыръёс, пумиськонъёс вал улонын. "Секыт ке но вал, кӧня пол ми ваче пумит жугиськимы, огаз но тылӝуын ӧм чигналэ. Пырак азьлань вормон дурыса мынӥмы", - ӟырдам мылкыдын лёгам сюресъёссэ тодаз уськытэ ож батыр. - Тани Австриын, Дунай шур дурын, ожмаськеме туннэ нуналозь пытьызэ кельтӥз ымнырам но, - вылӥ ымдурзэ йӧтылэ но пальпотыса возьматэ Семен Петрович. Чалеп зырӟем но пуссэ кельтэ мдаурлы. Туннэ со ожгарчилэсь серемзэ гинэ поттэ на. Нош зэмос ожын кӧня чидано, тазалыкез быдтоно луиз! Сержантлэсь батыр луэмзэ шӧдытэк ӧз кыле. Семен Петровичлэн мӧля вылаз бырттӥзы "Венаез мозмытэм понна" медаль, куинь степенё Слава орден, нош Австриын кышкасьтэм луэмез но меӵ ыбылӥськемез понна сётэмын Горд Кизили орден. Австриез мозмытэм бере азьланьтӥзы вормон пала нуись сюрессэс. Пыдын сюрс кык сю витьтон иськемез ортчыса вуизы Кечкемет городэ. Татын нош дышетыса лэзьязы на ожъёсы, фашистлэсь лябӟем кужымпырыоссэ пызьыръяны. Капчиен ӧз сётӥськы Вормон нунал. 25-тӥ ноябре бертӥз Семен Петрович вордскем гуртаз. Зуркатӥсь ож бусыос кыдёке кылемын ини. Герасимов ӝегатскытэк яратоно ужаз кыстӥськиз. Дышетӥз Алнаш школаысь покчи классъёсы ветлӥсь пиналъёсты. Ужан куспаз ик йылпумъяз Можга педучилищеез. Улон-вылон сямен пумиськиз чырмыт но лякыт кузпал луонэныз - Евдокия Николаевнаен. Тупаны но кулэ ук: таиз но нылкышно - ожгарчи. Фронтын со прожекторист вылэм. Утем Москваез но Ленинградэз. Шуг-секытъёсты вормемез понна, мӧля вылаз бырттӥллям "Ленинградэз мозмытэм понна" медаль. Кузпалъёс сюлмо, тыршыса ужазы. Тэк пуконэз ноку но ӧз тодылэ. Сыӵе адямиез котьку синйылто уго. Семен Петровичез куризы Туймыйыл сельсоветлы секретарь луыны. Нош 1951-тӥ-1953-тӥ аръёсы Алнаш райкомын пропагандистлэсь ужзэ быдэсъяз. Бен, пӧртэм удысъёсы вуттӥськиз Герасимов. Котькытын но адӟем карымон тыршиз. Солэн сюлмаськеменыз ик 1957-тӥ арын Удмурт Вишур гуртын выль школа но пуксиз. Дышетон удысын сыӵе юрттэт сётэмез понна, сое Данъян грамотаен пусйизы. С. П. Герасимовлэн дышетэм пиналъёсыз пӧлысь тросэз луизы дышетӥсьёс но журналистъёс, эмъясьёс, офицеръёс, ӟеч кивалтӥсьёс но гуртын сюлмо тыршись адямиос. 1985-тӥ арын шутэтскыны потыса но, ужтэк пуконэз валатэк, учётчикын ужаз на. Туж яратэ газет-журнал бамъёсты учкылыны. Книгаосыз но люкен-люкен сыло. Ялан выльзэ тодэмез потэ на. - Луонлыкты луысал ке, кыӵе уж борды кырмиськысалды на меда? - юасько гуртоелэсь. Семен Петрович мур-мур малпаськыса лулскиз: - Али мынэсьтым ужась уз пӧрмы ни. Но мон весь малпасько пиналъёс пӧлын ужамме. Шудоесь мед луозы вал соос. Курадӟонэз, жугиськонэз ноку но медам пумиталэ. Соин, дыр, али но пиелэн покчи нылыз котырын бергамъяськисько, юрттӥсько, гуртэ сётэм ужзэ лэсьтыкуз. Сюлэм уг чида - куриське туала пиналъёслы визь-кенеш сётыны, соосын огкыл шедьтыны. Светлана НИКИТИНА, Удмурт кун университетын дышетскись. Кысӥсьтэм гений Милям Пушкинмы! - Вераськом ми выльысь но выльысь. Ми тынад нимыныд будӥмы... Тон вань калыклэн данъяськонэз но яратонэз. Тон яркыт гениез вань музъемлэн. Элляй, Якутиысь калык кылбурчи. Пичи дырысеныз ик Александр мукет пиналъёслэсь маин ке но висъяськылӥз. Ӟырдыт йыгаськись сюлэмыз но уно малпанъёсын тырмем йырвизьмыз сое возизы кыӵе ке но аспӧртэм, туж узыр но мурт синъёслы тодмотэм дуннеяз. Будэмъяз Александр Пушкинлэн син азяз туж шимес, сюлэмез вӧсь карись суред ялан яркытгес но яркытгес пуксьыны ӧдъяз. Со шимес суред - чурыт, из сюлэмо узыръёслэн куанер калыкез секыт зӥбет улэ пачкатыса воземзы. Поэтлэн улоназ туж ӵем воштӥськонъёс вал. Озьы ке но, котькуд выль интые вуэмез бере, оскемез потытэк, со валалляз: суред котькытын огвыллем. "Деревня" кылбураз вань таӵе чуръёсыз : Здесь барство дикое, без чувства, без закона, Присвоило себе насильственной лозой И труд, и собственность, и время земледельца. Та чуръёс пыр асьмеос яркыт адӟиськомы, макем бадӟым узыръёслэн "кужымзы", макем жалятэк пыд улэ лёгамын ужась калык. Пушкинлэн куддыръя азьланезлы осконэз кысыны ӧдъялляз, но со котьку возьмалляз эрико улонэз: Увижу ль, о друзья! Народ неугнетенный И рабство, падшее по манию царя, И над отечеством свободы просвещенной Взойдет ли наконец прекрасная заря? Кылбурчи оскылӥз огшоры ужась калыклэн кужымезлы. Мукет ласянь, солэн эрик понна ожмаськыны ӧтись чуръёсыз бадӟым кужым но оскон сётылӥзы куанеръёслы. Соин ик государство кышкалляз со сэзь гожъям чуръёслэсь, тыршылӥз соосты кыдёкегес сэрпалтыны. Озьы ке но, кылбуръёс шедьтылӥзы ас сюрессэс. Товарищ, верь: взойдет она, Звезда пленительного счастья. Таӵе чуръёсты лыдӟыса, калыкъёслэн сюлэмъёсазы оскон тылси кенжылӥз, нош туж уно курадӟонъёс адӟем, бездэм синъёсазы пальпотон ворекъяны ӧдъялляз. Вань улытозяз Александр Пушкин вадьсын поръязы сьӧд пилемъёс. Но сое чигтэмзы ӧйлась. Со ялан гожъялляз ӵыдонтэм кылбуръёссэ, повестьёссэ, выжыкылъёссэ; ялан паськытгес но мургес ӧръяськиз солэн ужез. Александр Сергеевичлэн бадӟым кужымез но сӥяны сётсконтэм мылкыдыз вал. Александр Сергеевич Пушкинэз тодо но дунъяло вань дуннеын улӥсьёс, туж яратыса лыдӟо солэсь гожъямъёссэ. Кызьы-о бен уд дунъя та бадӟым гениез?! Пичи дырысенымы ик Пушкин душетэ асьмеды шонер улыны. Выжыкылъёссэ лыдӟыса, котькуд пинал валаны ӧдъя, ма со ӟеч но ма со урод. Выжыкылъёс дышето асьмеды сьӧд кужымъёсын нюръяськыны, соослы сётскытэк улыны. Пиналъёс валаны ӧдъяло, ноку но лек, аксым, чурыт сямо, вылтӥяськись, ушъяськись ӧвӧл луоно шуыса. Соос валало: урод сям ӟече уг вутты. Нош макем устоесь поэтлэн инкуазь сярысь кылбуръёсыз! Нокыӵе суред пыр уд возьматы сое озьы, кызьы возьматэ поэт ас чуръёсыныз. Инкуазьлэсь узырлыксэ номырин но воштонтэм буёлъёссэ, крезьгурзэ утьыны ӧте кадь асьмеды кылбурчи. Со возьматэ, макем инкуазь ненег но ӝог сӧриськись. Пушкинлэсь кылбуръёссэ лыдӟыса, асьмеос адӟыны кутскиськомы сое но, кудзэ азьвыл ӧм адӟылэ. Ӝужыт турын пӧлысь лапег но туж ненег сяськаез асьмеос ум но учкиське, со вылэ вамыштӥськомы но кошкиськомы. Нош Александр Сергеевич котькуд пичи луо но лултэм макеосты синйылтэ кадь. Сое валаськомы, кылбуръёссэ лыдӟыса. Валаны ӧдъяськом: асьмеос огшоры пичи сяськаез гинэ ӧм тӥялтэ, луло макелэсь "сюлэмзэ" чигтӥмы. Пушкинлэсь нимзэ кылӥсько ке, мынам син азям пуксе таӵе суред: котыр туж пеймыт, коть синмад бышкалты, нош азьпалан яркыт-яркыт тылси пиштэ. Со тылси весь азьлань ӧте, пеймытын сюресэз югдытэ. Ялан азьлань мынӥськод, нош со дорозь нокызьы вуыны уг луы. Ӟигар быре, оскон кысыны ӧдъя, нош тылси шоры учкиськод но, сюлэм нош ик выль кужымен йыгаськыны ӧдъя. Со яркыт тылси, кудӥз асьмеды югытэ поттыны тырше - Александр Сергеевич Пушкин. Мон оскисько: дунне вылэ туж уно генийёс вордӥськозы на. Озьы ке но, А. С. Пушкинэз нокин воштыны уз быгаты, со котьку но луоз асьмелэн самой яратоноез поэтмы. Ольга ГЛАВАТСКИХ, Кез ёросысь Пажман шор ёзо школаын дышетскись. Возьматӥськом усто предприятиосты: Чепецкой механической завод Тазьы юнмаз цирконий поттон СССР-ын цирконий но солэсь сплавъёс кулэ луизы 1954-тӥ арын Обнинск городын атом электростанция (АЭС) пуктэм бере. Атом электростанциослэсь пайдазэс ӝутон вылысь умоятоно вал реактор эстонэз, уранлэсь ӟечлыксэ. Мукет сямен вераса, воштоно вал сыномисьтэм кортэз выль материалэн - циркониен. Со сыномисьтэм кортлэсь капчигес, пушкытӥз ӝоггес лэзе ядерной нейтринъёсты. СССР-ысь Министръёслэн Советсы 1957-тӥ арын 9 мае Шоро-куспо машиностроениея министерствоез косӥз странаысь атом энергетикалы цирконий поттонэз радъяны. Кутэмын вал нимысьтыз распоряжение. Е. П. Славский министрлэн приказэзъя, со арын ик 14 мае Чепецкой механической заводын чурыт (металлической) цирконий поттонъя 701 номеро корпус лэсьтон ужъёс кутскизы. Лэсьтӥськон мынӥз, нош нимаз кун проектной институтлэн ужаз ялан воштонъёс пыртылӥзы. Со дыре ик заводысь, научной центръёсысь специалистъёс цирконий но солэсь сплавъёс поттонъя умоесь амалъёс утчазы. Озьы дуннеын таӵе шер пумиськылӥсь металлэз нырысьсэ электролиз амалэн басьтон пыӵаз. 1959-тӥ арын тулыс поттэмын нырысетӥ промышленной цирконий. Нош чылкыт ядерной цирконий дуннеын котькинлэсь азьло басьтыны ӧдъям иодид амалэн. Сыӵе цирконий мынэ трос пумо сплавъёс дасяны. Куатьтонэтӥ аръёслэн кутсконазы предприятие цирконийлэсь таӵе сплавъёс лэсьтӥз: ? 110 - цирконий 1 процент ниобиен, ? 125 -цирконий 2,5 процент ниобиен, ? 110Б - куинь компонентэн цирконий сплав 1 процент ниобиен но борен. Собере кутскиз цирконий поттонэз азинтонлэн мукет люкетэз. 1966-тӥ арын 11 ноябре СССР-ысь Министръёслэн Советсы постановление юнматӥз. "Гипроцветметобработка" институтлэн проектэзъя заводын кутскиз проектно-прессовой производство лэсьтон. Со чакламын цирконийлэсь пӧртэм пумо сплавъёс поттыны. Быръемын вал 110 но 125 сплавъёс лэсьтон. Лэсьтӥськонын уже кутэмын Первоуральскысь новотрубной, Челябинскысь трубопрокатной, Кольчугинскысь Орджоникидзе нимо заводъёслэн опытсы но оборудованизы. ЧМЗ-ысь но та удысысь научно-исследовательской институтъёсысь специалистъёсын ӵош кылдытъязы цирконий сплавлэсь изделиос лэсьтонъя выль технологиос, сое эскерон амалъёс но мукетсэ. 1972-тӥ арын гумыос келямын Нововоронежын но Белоярскын, Болгариын лэсьтӥськись АЭС-ёсы, нош берлогес гумыос дасязы Финляндиысь "Ловинса" АЭС-лы но ВВЭР-1000 реакторъёсын атом электростанциослы. 1971-тӥ арын 1-тӥ январе вуттэмын цирконийлэсь изделиос поттонъя выль цех, выльдэмын сое бичан-дасян технологиос, уже кутэмын гумыосты эскеронъя электрозвук установка. 1971-тӥ арлэн пумаз Ленинградысь атом станцие келямын заводлэн цирконийлэсь продукциез. 1973-тӥ арын кыкетӥ кварталэ гумыос поттон производство быдэсак ужаны ӧдъяз. Лэсьтыны кутскемын пӧртэм зӧкталаен гумыос. Та вакытэ бадӟым инты висъяло производствоез автоматизировать каронлы. Тани 1975- тӥ -1980-тӥ аръёсы уже кутӥсько программной управлениен 16 станок но гумыосты эскеронъя заводын лэсьтэм автомат. 1985-тӥ арын кун аттестационной комиссия ЧМЗ-ысь цирконий поттон производстволы ӟечлыкъя вылӥ категория сётӥз. Странаямы атом энергетика азинскемен, цирконийлэсь изделиос поттон 1987-тӥ арозь ялан будӥз. Соя ЧМЗ-ын арлы быдэ 30 выль изобретение кылдылӥз. Ваньмыз со юрттэ вал ужан амалъёсты умоятыны, ужазинлыкез ӝутыны, ужан условиосты умоятыны но инкуазез утьыны. Чернобыльын кӧшкемыт учыр луэм, СССР куашкам бере, Россиын атом кужымъя программаез быдэстон лябӟиз. Вылаз ик, АЭС-ёс матысь кун странаосы шедизы. Тӥни соин сэрен цирконилы кулэяськонъёс шӧдскымон кулэсмизы. Нош мукет ласянь, утёно вал туж усто специалистъёсты но ужасьёсты, ужатоно тэк сылӥсь усто оборудованиез но радъяно выль пумо продукция поттонэз. Кызьы тодмо луиз, цирконийлэсь сплавъёс адямилы номыр уродзэ уг сёто. Соин шобыртэм изделиос чебересь, дуно металлъёс кадь пӧрмо. Сое лыдэ басьтыса, ЧМЗ 1989- тӥ арын Минскысь час поттон заводэн кусып тупатӥз. Озьы кышномурт часъёслэсь корпуссэс цирконийлэсь дасяны ӧдъязы. 1989-тӥ-90-тӥ аръёсы ӝыны миллионлэсь уно сыӵе час корпусъёс поттэмын вал. СССР куашкам бере, кусыпъёс быризы. Со дыре ик заводын кутскизы цирконийлэсь бижутерия, сиськон пуньыос но пӧртэм сервизъёс лэсьтыны. Нош Россиысь Тазалыкез утёнъя министерстволы тӥрлык поттыны ӧдъязы. Жаляса верано луэ, удыс сое басьтыны ӧз быгаты. Берло дыре умоен пусйыны кулэ диоксид цирконий но керамика поттонэз. Со кутӥське токен ужась электрохимической генераторъёс но му вӧй кыскыны насосъёс лэсьтонын. Али ЧМЗ-лы секыт ке но йӧтэ, цирконий поттон ялан паськыта. Технологъёс, конструкторъёс, научной ужасьёс та удысысь научно-исследовательской институтъёсын ӵош умоято цирконийлэсь гумыос поттонэз но волятонэз. 1997-тӥ арын вылӥ ӟечлыкен 16 пумо выль изделие дасямын. Ӝоген вуттозы ни твел гумыосты эскеронъя установказэс. Предприятиысь коллектив азьын бадӟым ужпум сылэ - цирконий поттонэз выльдон. Со уж кыклы люкемын: Нырысетӥез - пӧзьтон но ӵыжатон производствоез выльдон. Со понна оборудование басьто кунгож сьӧрысь валтӥсь фирмаослэсь но асьсэос лэсьто (1996-тӥ-99-тӥ аръёсы). Кыкетӥез - химико-металлургической производствоез выльдыса, туж чылкыт ядерной цирконий басьтон (1997-тӥ-2002-тӥ аръёсы). Мар бен али лэсьтэмын? "АЛД" (Германия) фирмалэн вакуумной дуговой гуръёсаз 3,5 тоннаен слитокъёс ӵыжато ни. Со сяна, ужа "Маннесманн" фирмалэн 6 станэз. Пуктэмын но гурето программной управлениен станокъёс. Соин потто ӵыжатон инструмент. Соин ӵош ик пуктӥське кунгож сьӧрысь мукет оборудование. Ваньмыз со юрттэ продукцилэсь ӟечлыксэ ӝутыны. Со тупа дуннеысь нормаослы но стандартъёслы. Сотэк-а 1996-тӥ-98-тӥ аръёсы кунгож сьӧрысь фирмаосын огкыл гожтэмын цирконийлэсь изделиос но заготовкаос вузанъя. Али выльдӥськонлэн кыкетӥ люкетэз но улонэ пыӵа ни. Со уката юрттоз на цирконийлэсь продукциез данак мукет странаосын но асьме дорын вузаны. Цирконий уг сыномы. Соин ик со туж ӟеч материал луэ нефтяной, газовой но химической промышленностьлы оборудование поттыны. Али ЧМЗ лэсьтэ ни Астраханьысь газоперерабатывающей заводлы гумыос (теплообменникъёс), Волгоградысь "Каустик" заводлы - запорной арматура но мукетсэ. Дасяз Иван ФАРУШЕВ, бюролэн кивалтӥсез. Улонысь учыръёс Тыпы Сӥзьыл вал со. Нюлэс дуре интыяськем сад-бакчаын трактор гуретэ. Нош со бакчалэн шоразгес тыпы будэ. Ӝужыт ӧвӧл на ке но, тракторлы ужаны туж люкетэ. Малы сое уг корало меда? Озьы ас поннам малпаськыса сылонъям бакчалэн кузёез вуиз. Со ёрос больницаын ужась врач-терапевт Г. А. Образцов вылэм. Ӟечбуръяськеммы бере, куспамы вераськон ӧръяськиз со тыпы сярысь. - Георгий Андреевич, бакчаысьтыды тыпы котыртӥ бергаса, тракторлэн ӟигарыз ик быре кадь ини. Погыртыны кулэ, дыр, со писпуэз,- шуисько мон солы. Георгий Андреевич паймыса кадь учкиз шорам: - Бусыын огназ будӥсь писпуэз уг яра йӧтылыны. Корад ке сое, ишан гинэ адӟод. Собере вераськонмы выжиз инкуазь вылэ. Г. А. Образцовлэсь юасько: оске-а со инмарлы? - Врачлэн ужез юн герӟаськемын инкуазен. Со одно ик оскыны кулэ инмарлы,- шуэ со. Со мадиз на, кызьы одӥг висись, операцие выдон азяз, черке пырыса вӧсяськем. Операциез солэн умой ортчиз, вакчи дыр куспын йӧназ. ... Тракторист ужзэ быдэстэм бераз, мукет бакчае кошкиз. Георгий Андреевич но, машинаяз пуксьыса, дор палаз шонтӥз. Нош мон огшап сылӥ на нюлэс дурын, инкуазь сярысь ас поннам малпаськыса. Чиньыез чигиз ке но... Азьвылгес мон ужай одӥгаз лэсьтӥськон предприятиын плотник луыса. Мынам отын вал туж умой эше - В. И. Гирбасов. Ачиз Василий Иванович вордскемын но будэмын Варзийыл гуртын, нош собере Алнаше "каръяськем". Эшелэн киосыз зарни, котьма лэсьтыны мастер. Бугроез ӵуписькод ке, котькытын солэн кибервылыз адӟиське. Мумыкорез лэсьтон бордын огназ ужаз. Кор быръёз но кораськыны кутскоз. Ужзэ пумозяз быдэстытэк уз дугды. Одӥг пол Василий Ивановичен шудтэм учыр луиз. Солэн чӧльыез коръёс вискы пачказ. Вӧсь луэмезлы чидатэк, кизэ шонаса сылэ. - Василий Иванович, мын больницае.. Йӧнатозы,- шуиськом солы. - Уг мын... Йӧналоз ай,- учке шорамы. Огшап сылэм бераз, уж борды кутскиз. Кема ик висиз солэн чиньыез, но больницае ӧз мын. Кызь ар пала В. И. Гирбасов ужаз на кияз тӥрен. Пенсие потэм бераз но огназ бугро ӵыпиз, выль корка пуктӥз на. Али кузпалэныз выль корказы уло. Пырасько ке соос доры, матысь кунозэс сямен пумитало. Калыкез йӧнатӥз Кемалась ни вал со. Гужемлэн шораз кузпалэным мотоциклэн Кам шур дуре мынӥм. Пыштурын бичам. Шулдыр татын! Лымшор берегес пильмаськиз, чилекъяны, гудыръяны кутскиз. Мотоциклэ пуксьыса, дор пала кошким. Нош сюрес вылысен милемыз зор сутӥз. Дэриетӥ гылӟыса, мотоциклэ бекмыльске вал. Соку кузпалэ пыдзэ вӧсь кариз. Больницаын пыдзэ гипсэн бинялтӥзы. Толэзь пала ортчыса, гипссэ куштӥзы. Нош пыдыз ялан висе. Со вылэ султэмез уг луы. Мар кароно? Тодам лыктӥз Удмурт Гондыр школаысь И. П. Бобровлэн (али школалэн кивалтӥсез) анаезлэн суй-пыд вырӟемъёсты тупатыны быгатэмез сярысь верамез: "Шудтэм учыре шедид ке, ми доры лыкты". Вуим со доры. Иосиф Петровичлэн анаез, Люба апай, арлыдо песянай ини. Милемыз шуныт пумитаз. Верамы лыктэм мугмес. Со ӝегатскытэк уж борды басьтӥськиз. Кузпалылэсь пыд вырӟем интызэ тупатэм бераз ватсаз на: - Я, нылы, султы... Зэм но, кузпалы султӥз но вамышъяны ӧдъяз. Люба апай вань улонзэ колхозын валтӥсь бухгалтер луыса ужаз. Ныл дыръяз, пе, атаез сое косэм вырӟем интыосты тупатъяны. Пӧрмем ведь. Со дырысен Люба апай висисьёсты йӧнатэм. Жаляса верано, пӧламы ӧвӧл ини со. Но солэн ӟеч ужъёсыз ноку уз вунэ калыкын. Ческыт зыно чай Кузилие вуыкум, мон пыри А. Орехова доры. Арлыдо песянай ке но, Анисия апай выре на мушъёсын. Секыт кайгыронэз адӟиз со. Куинь пиосыз бӧрсьысь бӧрсе кулӥзы. Анисия апай монэ нырысь ик бакчаяз ӧтиз. Отын мушъёс гужлало. Отын но татын ческыт зыно турынъёс будо. - Мелисса со. Кулэ ке, басьты, бакчаяд мертты. Эмъюм турын, чаез солэн ческыт зыно,- шуэ Анисия апай. Турынэз бакчаям мерттӥ. Вуоно гужемаз со аляз на. Ческыт ик вылэм чаез. Нош сое юыкум, котьку но син азям пуксе Анисия апайлэн тусбуез. Николай КОНДРАТЬЕВ. Алнаш черкогурт. Удмурт Республикаысь Кун Кенеш, Правительство ӟечкылало Кун Кенешлэн Тӧроезлэсь Нырысетӥ воштӥсьсэ В. И. Агашинэз вордскемез дырысен 50 ар тырмонэныз Гажано Владимир Иванович! Сюлмысьтымы ӟечкыласьком Тӥледыз 50 арес тырмон юбилееныды! Сое тӥ пумитаськоды ӵош ужась эшъёсын но Тӥледыз мур гажась адямиосын. Ми Тӥледыз тодӥськом вылӥ куронъёс пуктыны, выль сямен малпаськыны, котькыӵе секыт югдурын туж шонер амалъёс шедьтыны быгатӥсь адямиен. Кун службаын ужатозяды, Тӥледыз гажаны но дунъяны кутскизы ӵош ужась эшъёсты. Соос тодо угось, тӥ быгатоды коллектив азе пуктэм ужпумъёсты ӟеч быдэстон понна ӝутыны но йылпумъянъёсты кулэезъя дунъяны. Вань сюлмысьтымы сӥзиськом Тӥлед юн тазалык, шудо-буро улон но, вань мытэм ужъёсты но малпанъёсты улонэ мед пыӵалозы. Россия Федерацилэн кун наградаосыныз пусъён сярысь Россия Федерацилэн Президентэзлэн Указэз Кун азьын вормонъёссы, ваньбур поттон удысын ӟеч тыршемзы но калыкъёс куспын эшъяськонэз но ӵош ужанэз юнматонын бадӟымесь азинсконъёссы понна пусъёно: "За заслуги перед Отечеством" орденлэн ИИ степенё медаленыз Поляков Валерий Геннадьевичез - "Удмуртавтотранс" кун предприятилэн "Глазовское автотранспортное предприятие" кун предприятиысьтыз водителез, Удмурт Республика. Цыгвинцев Виталий Ювенальевичез - Ижевск городысь калыкез автотранспортэн нуон- ваёнъя производственной огазеяськонысь водителез, Удмурт Республика. Россия Федерацилэн Президентэз Б. Ельцин. Москва, Кремль, 1999 арын 1 июле. � 862. Кавказэ ветлытэк но адӟи... Кызьы валэктыны вань калыклэсь та бадӟым поэтэз яратэмзэ? Малпасько, ӧвӧл сыӵе адями, кин уг тоды Александр Сергеевич Пушкинэз. Со пичи дырысенымы ик котырысь инкуазь, омыр кадь пыӵа котькудӥзлэн улоназ. Пушкинлэн произведениосыз валамон ваньмызлы. Укмысэтӥ классысен ми дышетӥм солэсь "Кавказ" кылбурзэ. Соку адӟим Кавказлэсь вань чеберзэ: гурезьёссэ, лымы йылъёссэ, ву усёнъёссэ (водопадъёссэ). Поэт усьтӥз мыным тодмотэменыз номырин воштонтэменыз бордаз кыскись инкуазез. Шонерзэ вераса, Кавказэ ветлытэк но мон адӟи солэсь кужымзэ но узырлыксэ. Озьы ик мыным яра, кызьы Пушкин ӧте поэзиез валаны, калыклэсь дуно кылзэ утьыны. Ачиз со ас произведениосаз туж оскымон возьматӥз ӟуч калыклэсь тусбуйзэ, сямъёссэ, ужъёссэ. Дунне вылын улон кӧня кыстӥськоз, сомында ик калыкез келяса, келяса-пумитаса улоз быдӟым поэт. Татьяна НАГОВИЦЫНА. Балезино ёрос, Люк черкогурт. Юбилейзэс пусйизы Ижысь механической заводын 20 июле зэмос праздник кадь ужрад ортчиз. Спортивной но пӧйшуран пыӵалъёс, пистолет поттӥсьёс сӥё-дано пусйизы ӝыны дауръем юбилейзэс. Кун предприятилэн актовой залаз тыраз люкаськизы рабочийёс, мастеръёс, конструкторъёс, технологъёс, гравёръёс но мукет ужасьёс. Устоосыз пӧлысь устоосызлы сётэмын дано нимъёс но Кун Кенешлэн Почёт Грамотаосыз. Г.РОМАНОВ. Редакциын пумиськонъёс Виктор Шудегов: "Ми ужаны лыктӥм" Куинетӥ толэзьзэ Удмуртия улэ но ужа выль Правительство кивалтэм улсын. Ма лэсьтэмын ни та дыр ӵоже, кыӵе ӟеч воштӥськонъёс вань? Со пумысен "Умурт дунне" газетлэн редакцияз ужасьёс кенешизы Правительстволэн Тӧроезлэн воштӥсеныз Виктор Евграфович ШУДЕГОВЕН. Со вакчияк тодматӥз, ма бордын туннэ ужа Правительство но солэн Тӧроез: - Правительствое быръем муртъёс пӧлысь котькудӥз оскем удысэз борды умой-умой басьтӥськиз ни. Н. А. Ганза котькудӥз азе чурыт курон пуктэ но кылзэ юа. Татчыозь со ачиз ужамын военной заводын, соин но туж шӧдӥське радлыкез чакламез-утемез. Ми нуналлы быдэ 18 часын люкаськылӥськом пичи кенеше: ортчем нуналлы йылпумъянъёс лэсьтӥськом, син азямы возиськом республикаысь югдурез, ӝегатскытэк сэрттӥськом- пертчиськом лэчыт ужпумъёсты. Виктор Евграфович пыр-поч вераз социальной ужпумъёсъя Москваын ортчем бадӟым кенешон сярысь. - Доклад лэсьтӥз Россиысь Правительстволэн кивалтӥсез С. В. Степашин. Со шуиз: социальной удысэз котьку возим но возём син азьын. Быръёнъёс азьын татын нокыӵе бугыръяськонъёс медаз кылдэ, со понна ваньмызлы ужаны кулэ. Сергей Вадимович нимысьтыз саклык висъяны куриз ёрмись семьяослы. Россиын 156 пумо льгота висъяське, ваньмыз со чакламын калыклы юрттон вылысь. Отчы кошкыны кулэ 356 миллиард манет. Бюджет понна со шӧдскымон ныпъет. Соин ик, кызьы шуиз Правительстволэн кивалтӥсез, юрттэт сётоно солы, кин кулэяське. Али чаклано ке, пиналъёслы висъям пособие пӧлысь 60 процентсэ басьто коньдоно семьяос. Секыт югдур эмъюмъёслы льготаос ласянь. Асдуныныз вузаны дуно, юрттэт сётыны нокытысь. Вераськон мынэ асьме фармациез азинтон но быгатэммыя импортлэсь куштӥськон сярысь. Соку данакез эмъюм дунтэмгес сылоз. Куд-ог регионъёс, кызьы пусъемын вал та кенешонын, социальной удысын воштӥськонъёс ортчытӥзы ни. Кылсярысь, Волгоградской областьын лыдэ басьтэмын вань куанер семьяос, соослы пособилэн быдӟалаез 10 поллы будэтэмын. Коньдон шедьтӥзы узыр улӥсьёсыз чотын - соослы пособие сётытэк. Но, законъя ке учконо, та амал шонер ӧвӧл, пособие висъяськыны кулэ ваньмызлы: бизнесменлэн кышноез-а тон, ужатэк пукисьлэн-а. Закон азьын ваньмыз огкадь. Москваын ортчем совещаниын нимысьтыз вераськон ӝутскиз сӧсыр, ӧлексы кылем адямиослы машина висъян сярысь. Государство соослы юрттыны уг быгаты ни. Кулэ мукет амал: таксопарк яке автопарк пыр услуга сётон. Кызьы шуиз Валентина Матвиенко, висъям льготаосты али асьсэ понна тросгес куто нылпиоссылэн нылпиоссы. Вераз одӥг учырез но. Машиналы шуыса лыктэм песятайзэ внукез приёмное "вунэтыса" кельтэ, ачиз выль машинае пуксьыса кошке. Озьы но луылэ, дыр. Соин ик умой-умой кутскыса учконо на кинлы кыӵе юрттэт сётонэз: мед шедёз со тужгес но ёрмись киосы. Валентина Ивановнаен мон нырысьсэ пумиськи. Кык пол соин вераськыны кылдӥз. Пырак кияз сётӥ Канифольныйын нылпи юртэз йылаз-пумаз вуттонъя куронмес. Федеральной бюджетысь коньдонтэк асьмелэн кужыммы сое пуктыны уз тырмы. Россилэн Правительствоез вань регионъёсты косӥз сентябрь йылпумъяськытозь, бюджет чотын коньдон басьтӥсьёслэсь уждунзэс выль сямен тырыны. Солэн доход люкетысьтыз 40 процентэз одно ик уждунлы висъяськыны кулэ. В. Е. Шудегов валэктон сётӥз журналистъёслэн пӧртэм юанъёссылы. Со шуиз: - Выль ужан журналистъёсын мон тазьы нырысьсэ пумиськисько. Солы кутскон сётӥз "Удмурт дунне" газет. Со ик нырысетӥ интервью басьтӥз вал Удмурт кун университетын наукая проректор луыса ужаны кутскеме бере. Малпасько, кусыпъёсмы азьланяз но таӵе ик эшлыко луозы шуыса. - Виктор Евграфович, вераськон мынэ республикамес дотация чотын улӥсь регионъёс радысь поттон сярысь. Шонер-а со? - Шонер. Москва оске: Удмуртия, промышленностьсэ ужатыса, ас кужыменыз улыны быгатоз шуыса. Ар-кык улыса, таӵе воштӥськонъёс ортчозы, дыр. Но со понна ужатыны кулэ вань заводъёсты. Трос лэсьтыны быгатысал "Ижмаш", выль машинаосты поттон. Но али со сылэ, шуыны луоз, экономикамес ӝутонэ номыр уг пырты. Военно-промышленной комплекс сярысь ке верано, отын но ушъяськыны номырин. Югдурез берло нуналъёсы шугомытӥз му вӧйлы дунъёсты шуак будэтон. Нефтьмы вань вылысь, кизер эстӥськонлы ёрмиськом, переработкая завод ӧвӧлэн. Ваньмыз со республикалэн экономикаез вылын юн шӧдӥське. Коньдон поттон сярысь ке верано, казнае со кылем арын сярысь налогъёс чотын 30 процентлы ятыргес пыртэмын. Но трос пунэмен тыронъёсмы но. Нылпи пособиос, кылсярысь, кык ар ӵоже люкаськемын ни. - Трос-а гожтэтъёс, вазиськонъёс вуо Правительствое? - Берло дыре гожтэтъёслэн лыдзы будӥз. Со возьматэ калыклэсь выль быръем Правительстволы оскемзэ. Трос юанъёс сёто пумиськылонъёс дыръя но. Глазовын, музон интыосын но арлыдоос возьмало эмъюмъёслы вормымон дун пуктэмез. Пичи Пургаын огез воргорон меӵак шуиз: ку луоз интыосын порядок? Самоуправление милемлы акыльтӥз ини. - Берлоосыз быръёнъёс возьматӥзы: удмурт кивалтӥсьёсты будэтон республикаын туж ляб радъямын. Та ласянь кызьы ужаны малпаськоды? - Визьмо, быгатонлыко специалистъёсмы асьмелэн ӧжыт ӧвӧл, Удмурт кун университетын гинэ кӧня соос! Вань пӧлазы 4-5 кылын вераськисьёсыз но. Ужпум мукетыз бордын: уг пырисько соос политической улонэ, быдэсак выемын ас удысазы. Кивалтӥсь луон понна, удмурт кылэз тодон гинэ туннэ тырмыт ӧвӧл: ортчоно юриспруденциез но, экономикаез но, быгатоно коньдон но поттыны. Национальной кадръёсты дасян мынэ. Со понна 56 номеро школа-гимназиын усьтэмын педкласс, нимысьтыз программая ужало госуниверситет но гурт удысъя академия. Туэ арысен кутскыса, вылӥ дышетскон заведениосын гуртысь вуэм абитуриентъёслы тупатэмын квота. Та амал ассэ умоен возьматӥз партия вакытэ. Удмурт пиналъёсты дышетскыны келяськом Удмуртилэн, Россилэн палэназ но. Отысь соос дипломен дорамы берытскозы. - Виктор Евграфович, политикае выжемды сярысь уд жаляське-а? - Уг, кема ке но малпаськи та ласянь. Республикамылэсь улонзэ асьмеос воштыны, радъяны кулэ. Со понна ужано. Николай Алексеевич Ганза ачиз трос лэсьтэ, командазэ но нырысь вамышысен ик зол кыткиз. Ужан нуналмы кыстӥське 22 часозь. - Тӥ чакламъя, умой пала воштӥськонъёс ӧжытак ке но шӧдӥсько-а ни? - Шӧдӥсько. Нырысь ик, коньдон ужпумъёсъя мон верай ини, пунэмен тыронъёсмы ӧжытаклы кулэсмизы шуыса. Бюджет удысын ужасьёс дыраз коньдон басьто. Кылем арен ӵошатыса, тросгес люкамын налог. Пусйыны кулэ промышленностьлэсь вырӟемзэ. Правительство ласянь чурыт куронъёс пуктэмын "Удмуртнефтепродукт", "Удмуртэнерго", "Удмуртрыба" но куд-ог мукет акционер предприятиос ласянь. Редакцие ӧтем кунолы музон но юанъёс сётэмын вал. Людмила МЕДВЕДЕВА. Туспуктэмез Владимир КАМАШЕВЛЭН. Ӟечкылан! 24-25 пӧсьтолэзе вордскем нуналзэс пусъё Алнаш ёросысь Улын Асангурт шор ёзо школалэн кивалтӥсез Владимир Карпович Павлов но Ижысь мебель лэсьтон фабрикаын ужась Матвей Николаевич Васильев. Ми, соослэн ӵыжы-выжыоссы, сюлмысьтымы ӟечкыласькомы та праздникенызы. Сӥзиськом шудбуро улон, задор мылкыд но юн тазалык. Гажаса Кизнер ёросысь Павловъёслэн но Черновъёслэн семьяоссы. "Ваньзэ-а верай..." Ӵуказе улыса, пӧсьтолэзьлэн 25-тӥ нуналаз, тодмо удмурт писательлэн Филипп Григорьевич Кедровлэн вордскемез дырысен 90 ар тырме. Солэн юбилеезлы сӥзьыса, "Удмуртия" издательство поттыны сюлмаськиз выль книгазэ - "Ваньзэ-а верай..." нимаське со (дасяз А. Ермолаев). Поэтлэн кызё мында кылбуръёсыз печатламын удмурт но ӟуч кылын. Троссэ ӟуч кылэ берыктӥз Герасим Иванцов, соос пӧлын - "Верь, Родина!", "Люблю я осень", "Матери", "Этой жизни", "Тебе, комсомол!", "Пой, река Тойма!" но мукет. Нош "Сыну", "До свидания, родная..." кылбуръёссэ поэт гожтэм вылэм ӟуч кылын. Вераны кулэ, Филипп Кедровлэн та выллем книгаез - "Та улонлы" - потӥз ни вал кызь ар талэсь азьвыл, 70 аръем юбилеезлы, Алексей Ермолаевлэн азькылэныз. Нош таиз книга эшшо но пыр-почгес усьтэ, шуыны луоз, 1944-тӥ арын 13-тӥ феврале фронтын бырем поэтлэсь творчествозэ. Яркытгес син азе пуксе тусбуез но. Татын уго печатламын на Михаил Петровлэн Кедровлы сӥзем "Кырӟан улоз" поэмаез. Нош ӟуч кылэ сое 1947-тӥ арын берыктӥз Ленинградысь кылбурчи Н. Грудинина. "Ваньзэ-а верай..." книгаын азькыл интые кутэмын тодмо венгер литературоведлэн Петер Домокошлэн Филипп Кедровлы сӥзем чуръёсыз. Нош тодэ ваёнъёссэ гожтэм писательлэн пиез Юрий Филиппович Кедров. Поэтлэсь-фронтовиклэсь тусбуйзэ улэпен син азе пуктыны юртто семьяезлы гожтэтъёсыз, армиысь командованилэн дунъетъёсыз, озьы ик кузпалэзлэн Татьяна Еремеевналэн тодэ ваёнъёсыз. Син азям пукиськод, туганэ, Азьлолэсь но чебер тон туннэ. Мычисько азьлане киосме, Ӟыгыртӥ, чупасько мон тонэ...- трос дасо аръёс ортчыса но шуккиське кылбурчилэн либатӥсь, чалмисьтэм куараез. В. УРАЗАЕВА. Шӧкыч Галина Романова Карт утчасько Серемес верос Пӧйшур дуннеын лев но тигр эксэй выжыысь луо. Нош мон гороскопея Лев но Тигр. Соос кадь ик йӧно, чебер, вольыт нылмурт. Сямы но та мусо пӧйшуръёслы тупа: небыт, востэм, визьмы - ас палам, сюресы - аслам. Йырме кур каро ке, чиданэ пӧсьтэ ке, гижыосме поттылӥсько. Вир потымон ӵабыръяны но быгатӥсько. Соин ик мыным туж визьмо, чидась карт кулэ. Со сяна, мон понна, милям семьямы понна со тыл но ву пыртӥ потаны мед быгатоз. Сотэк али сютэм кулод. Аръёс ортчо ини угось, соин сюлмаськисько. Берло шорад кылем-мылем пиосмуртъёс гинэ учкозы на. Нош мынам, эксэй выжы нылъёсмуртлы, сыӵеосты котырам дас иськеме но лэземе уг поты. Тазьы астэ гинэ чакласа-чеберъяса, мукетъёс шоры вылӥысен улӥе учкыса улӥд ке, бызьытэк но кылёд, ява. Эх, каръян пинал йыры! Кинэ медам карт быръёно? Гороскопъя утчано луоз. Тани, шуом, Комак. Тьфу, кызьы мон соин одӥг валесэ выдом - юрӟым песьтэр! Ош - таиз умой вылэм. Туж зол сютэм дыръя кӧттэ но тырныы луоз. Сюръёссэ только вандылыны быгатод меда? Коӵыш - векчи, пичи ке но, мынам эксэй выжыысь луэ. Нош кык эксэйёс одӥг коркан уг тэро. Собере солэн кескичез вань - кие кутны уз сётскы. Дракон - одӥг йыро гинэ луысал ке, ярасал но, оло. Нош берло кыкетӥ яке куинетӥ йырзэ поттыса, лек тылэн шокчиз ке, кытчы, кудпала пегӟемдэ но уд вала. Кый - чиндыр-вандыр вырисьёсты, нюжтӥськисьёсты уг яратӥськы. Кеч - укыр векчи пудо-живот, не йӧлзэ, не ыж гонзэ уд адӟы. Обезьян - таиз семьяын улыны чик уз тупа, весь писпуысь писпуэ пуаса ветлоз. Атас - кышноос азьын укыр атасъяськыны яратэ. Соиз шоры но, таиз шоры но учкылоз, ваньзэс аслыз каремез потоз. Нош быжаз кырмиськид ке, кияд чилясь гонзэ кельтыса пегӟоз. Пуны - умой эш. Но со тупалоз Парсь, Кеч кадьёслы гинэ. Собере кулэ но, кулэтэм дыръя но утыны яратэ. Парсь - дэриез укыр яратэ, азьтэмез асэныз ӵош вордӥськемын. Водолей - малы мыным ву кисьтась кулэ. Гуртысь но озьы ик ваньзэ палэнэ кисьталоз-пазялоз. Чорыг - тазэ кие кырмыны уд быгаты - вольтчоз. Такалэн но Кунянлэн Кечлэн сямен ик пайдазы гижы быдӟа. Эгызоос - эксэй выжыысь ке но мон, кык картэн улэме уг поты. Кисло-кусло - таиз ини чылкак мукет дуннеысь. Туала цивилизация вакытэ солы туж секыт, дыр. Ваньмыз азьлань, ог-огзэ азьпалтыны турттыса базё, нош со - берлань. Дева - азьыз сяська, берыз силё луоз. Огшоры кышномуртъёслы кадь ик, соослы оскон ӧвӧл. Весы - умой вылэм, шонер ке мертаськысал. Нош берло вань люкам ваньбурмес ас палаз ке мертаз? Скорпион - фу, малпаме ик уг поты со шиё нымы-кибыез. Кин бен кылиз на? Вал - Стрелец. Бен, бен, соос гинэ мыным тупалозы. Вал ужась, визьмо пудо-живот, чебер, веськрес, зол ворттылэ, нош Стрелец утчаны-шедьтыны быгатэ. Кулэ луиз ке, музъем улысь но шедьтоз. Шедьтоз но ыбоз. Ыбоз но гуртэ ворттоз. Озьы милемлы Инсьӧрысь лыктӥсь нокыӵе кометаос но, музъем зурканъёс но, тӧлпериос но кышкыт уз луэ. Зол бызьылӥсь-ворттылӥсь, ыбылӥськись гинэ туэ улэп кыльыны быгатоз. Эксэй выжы нылаш мон, соин ик кыдёке азьлапал адӟонэ но вань. Нош али Валэз-Стрелецез утчаны потоно. Мар карод, ас шуддэ ачид дурыны кулэ, пе. Валэктэ юрист Картэным ум тупаське Сэрегез дася адвокат Лилия Шкляева Картэным ум тупаське но, мон люкиськыны медӥсько. Картэ соглаш ӧвӧл. Нылмылы куать арес. Вань сад-бакчамы, машинамы, куинь комнатаен квартирамы. Татын уло лыдъяське со, мон, нылмы но картэлэн нырысетӥ бракез дыръя вордэм пиез. Приватизация бере улон интымы гожтэмын картэ вылэ. Люкиськыку но ваньбур люкыку кулэ-а адвокат? Мае нырысь лэсьтоно - асьмелы-а люкиськоно, ваньбурмес-а люконо? С.В. Та выллем юанъёслы "Удмурт дунне" олокӧня пол валэктон сётӥз ни. Россия Федерациысь Семья сярысь кодекс ваньбурез люкыны лэзе кузпалъёс ӵош улыку но, нимазы кариськемзы бере но. Сыӵе куриськонэн вазиськыны быгато карт но, кышно но. Ваньбурзэс асьсэ коже люкыны уг быгато ке, судэ мынэмзы луэ. Огъя ваньбуре уг пыро:кузпалъяськемлэсь азьло люкам маке, ӵош улыку кузьым чотын вуэм узырлык, кельтос (наследство) но куд-ог мукет арбериос. Кузпалъёс люкиськем бере ваньбурзэс люкон пумысен судэ вазиськыны быгато куинь ар ӵоже. Соин ик тӥ, С.В., быгатӥськоды нырысь асьтэос но люкиськыны, ваньбурдэс но люкыны. Асьтэос люкиськем бере куинь ар ӵоже ваньбурдэс ӧд ке люке, сыӵе праводэс ыштоды. Адвокатэз ӧтён сярысь. Со кулэ луоз искен курон (заявление) дасяны, документъёс люканы, тӥлесьтыд правоостэс но быдэсъяно куронъёстэс (обязанностьёстэс) валэктыны. Ӧтёды-а, уд-а адвокатэз - асьтэос тододы ни. х х х Журналистъёсын пумиськонъёс Куанермиськом Тросаз семьяосы каллен-каллен пыре коньдонлы ёрмон, сиён-юонлы ӝимон. Госкомстат ивортэмъя, туэ ӝыны ар куспын начаръёс радэ Удмуртиын улӥсьёс пӧлысь шедиз 55,7 процентэз. Шорлыдын вераса, толэзьем уждунмы вуиз 1094 манетозь. (Та лыдпус поттэмын, узыръёслэсь но куанеръёслэсь уждунзэс оглом лыдъяса-чотаса, пенсиослэсь будэмзэс чакласа). Толэзь ӵоже тужгес но кулэ луись сиён-юон басьтыны туала дунъёсъя кулэ ог 900 манет. Тӥни сыӵе арифметика. Та лыдпусъёсын журналистъёсты тодматӥз республикаысьтымы Ужъя кун комитетлэн тӧроез Сергей Фефилов. Уждун будӥз ке но, калыклэн улон-вылонэз вылын со ӧз шӧдӥськы, малы ке шуоно, дунъёс азьвылгес ӝутскизы. Кӧттырмон сиськон понна, адямилы быдэ толэзяз кулэ 942 манет но 52 копейка, ӝыны ар талэсь азьло сиён-юон пуйымы сылӥз 850 манет. Озьыен, со быдӟа луыны кулэ вал самой пичи уждунмы. Тӥни малы 300-400 манет басьтӥсьёс туала вакытэ ноку но калык радэ уз потэ - дунъёс пачкатӥзы. Правительство та ласянь ялан утчаське. Ма но со лэсьтэмын ини: кулэсмизы пунэмен берыктонъёс, кылем арын сярысь, тросгес люкамын налог. Куд-ог предприятиос юнматӥзы экономиказэс, со чотын бюджетэ вуиз коньдон. Озьы шуыны уг луы "Ижмаш" сярысь. Та завод ачиз но, бордаз кылдэм дочерней предприятиез но шедемын туж секыт югдуре. Уждун тыронэн арлэсь ятыр ӝегало. Трос тыронъёссы люкаськемын городысь казнае. Кызьы пусйиз С. С. Фефилов, коньдон ласянь уката но шуге-леке сюремын Ижевск. Татысь дышетӥсьёс мылкыдзэс веразы ни: уждунзэс дыраз ӧз ке басьтэ, 1-тӥ сентябре дышетскон ар уз кутскы. Журналистъёс вазиськизы пӧртэм юанъёсын. Кылсярысь, кӧня мурт али ужа Правительствоын но шорлыдын кӧня уждун басьто отысь чиновникъёс? - Министерствоосты лыдэ басьтыса, ог сюрс адями. Матысь дыре та лыдпус кулэсмоз. Уждунлэн быдӟалаез, шорлыдын вераса, 2 сюрс манетлэсь ятыргес. Кивалтӥсьёслэсь уждунзэс пуктэ но эскере Кун Кенеш. - Гурт хозяйствоя но сиён-юонъя министерствоысь тросэз-а специалистъёс "мултэсъёсыз" радэ шедёзы? - Мон озьы уг малпаськы. Но кӧня ке инты бушалоз, дыр. - Кивалтӥсьёслэсь уждунзэс тыро-пыдо радъянъя-чакланъя закон асьме дорын кутӥськоз-а? - Бюджет чотын коньдон басьтӥсьёс но кун предприятиос ласянь со ужа, мукетыз сярысь вераны шуг. Л. МЕДВЕДЕВА. Красильников бордысен Кудӥз шуэ: газет уже укыргес пыриськид ке, писатель уд луы ни. Озьы-а, тазьы-а - но газетэ "выйылытэк", оло, зэмос гожъясь уд луы. Та школаез пырпотӥз Геннадий Красильников но. Нырысь ик со ужаз "Алнаш колхозникын", собере - "Советской Удмуртиын". Сое умой тодо на журналистъёс Николай Кондратьев, Михаил Перевозчиков, Евгений Афонин, Геннадий Вахрушев, Михаил Абрамов, Петр Орлов, Николай Тебетеев, Василий Смирнов, Василий Михайлов. Та кык берлоосыз эшъёс алигес ветлӥзы Г. Красильниковез буре вайыны солэн музей-квартираяз. - Писатель луыса но со журналистикалэсь ӧз палэнскы,- тодэ вайыса вераз Василий Михайлович Михайлов.- Культурая министрын ужакум, командировкае потоно ке, огпол но солы жингыртытэк ӧй кельтылы, сьӧрам чортылӥ. Озьы ми потамы, кылсярысь, Яр ёросэ, Даманской полуостровын герой сямен ожмаськыса бырем Валентин Золотаревлэн гуртаз. Красильниковлэн геройёсыз малпаса лэсьтэмын ӧй вал. Очеркъёсаз со ужась адямиез возьматылӥз. Егит ке но, кичӧлтӥсь вал. Со бордысен бурдъёссэ вӧлъяз "Шӧкыч". Уж бере но люкаськыса литература сярысь вераськонъёс пуромылӥзы... Г. Красильниковлэн вордскем нуналаз солэн улэм квартираяз люкаськон ӟеч сямлы пӧрмиз ни. Туэ но татчы ветлӥз, писатель сярысь трос тунсыкозэ мадиз сузэрез Мария Дмитриевна Ишматова. Нош та огшоры буре ваён гинэ ӧй вал - журналистикаысь, егит гожъясьёсыз будэтонысь сюлэмшуго ужпумъёсъя вераськонлы пӧрмиз. Татын уго вал Удмурт кун университетысь журналистикая выль кафедралэн кивалтӥсез Александр Григорьевич Шкляев но. Со шуиз: - Геннадий Красильников вакытысь газет-журнал поттон ужпумъёс тросэз али но озьы ик кылё. Шуом, гожъясь мурт котькыӵе вакытэ луыны кулэ зэмлыко, шонер. Нош али дыре котьма шоры учконо луэ ни коньдон мертэтэн. Озьы ик журналистъёс но уиськыны кутскемын нянь, кӧттыр сьӧры. Газетъёс ас печатласьконо интыоссэс вузало. Мукет авторъёслы шуггес луиз печате шедьыны. Гонораръёс ичи... Соин ӵош ик А. Г. Шкляев пыр-почгес ивортӥз туэ университетын кылдэм журналистикая факультет сярысь. Азьвыл таӵеез ӧй вал ке но, шуиз со, 120 гожъяськисьёс (писательёс) пӧлысь ӝыныез пала дышетскемын кылтодонъя факультетын. Али журналистикае тросгес кыстӥсько нылъёс. Куд-огез малпало, дыр, та данэ потыны капчи амал шуыса. Но журналистика - со секыт пиосмурт уж. Дышетскемъёс пӧлысь тыро-пыдо гожъясь луо ог 30 процентэз гинэ. Та пумиськонын ас сюлмаськонзэ вераз Национальной музейлэн историяя но литературая люкетэныз кивалтӥсь Людмила Евгеньевна Уракова но. Со шуиз: музей-квартира - со сюбеггес инты. Асьмелэн республикаын одно ик луыны кулэ нимысьтыз литературной музей. Нош со понна али ик люкано материал. Та ужын нырысь ик мед юрттоз вылэм Писательёслэн союззы. М. БУЛДАКОВА. Вузчи малпа лумбыт: Кулэ ӧй вал выль выт Кытын гинэ уг верасько вменённой налог шуон сярысь. Мар со сыӵе? Ӟуч нимыз таӵе: единый налог на вменённый доход. Мукет сямен вераса, адямилы ӵекто кӧня ке дыр куспын сыӵе-сыӵе барыш поттыны. Ичигес-а, тросгес-а пайда басьтод - созэ уг юало. Но барышъя тупатэм выттэ одно ик тыр. Тӥни кыӵе со - выль налог. Городын та ласянь югдур туж лэчыт. Вузчиос огъя вытэз шумпотыса ӧз пумиталэ. Асьсэлэсь мылкыдзэс возьматон понна забастовкае потазы, сюресэз пытсаллязы. Нош городлэсь палэнын, пичи базаръёсын мар меда луэ? Редакцилэн косэмезъя, мае ке тунсыкозэ тодо шуыса, Пичи Пургалась базаре вуылӥ. Малпай: вузчиос вань кӧтӝожъёссэс кисьтозы. Но озьы ӧз пӧрмы. Юанъёсылы мылзы потытэк гинэ валэктонъёс сётӥзы. Выт кутонозь, пе, умойгес ик улӥмы: сины-куртчыны коньдон тырме вал. Нош али тросэз та удысысь кошкыны ӧдъяло - ужзылэн пайдаез, пе, ичи луоз. Юай: вань-а тӥляд лушкем "выт" октӥсьёс - рэкет манерен коньдон жильдӥсьёс? Ӧвӧл, пе. Та ласянь милям татын гань-гань. Оскытӥзы: базаре нимысьтыз милиционеръёс юнматэмын, соос эрказъяськыны уз сётэ. Зэм, час куспын одӥгзэ но улэп милиционерез ӧй синйылты. Дӥськутсэс воштыса, базарез чаклало, вылды. Басьяськисьёс чагиськыны вуттӥзы: бускель Агрыз городысь бигер шпанаос куд-ог дыръя вуыло, пе. Небытгес сямо вузчиосты кытӥ-кытӥ шымыръяло но. Нош соос сярысь шара вераны базарын нокин ӧз дӥсьты. Кышкало-а, мар-а. Вузчиосын вераськеме бере мон таӵе малпанъёсы вуи. Азьвыл выт тыронлэсь пегӟыны луэ вал - табыштэ бумага вылын юри пичиятӥд ке. Соку коньдонзы лымшор палан шутэтскыны но люкаськылӥз. Нош выль вытлэсь нокытчы уд пегӟы ни. Потэ-а мылыд, уг-а - тыроно. Соин сэрен ик, дыр, вузчиос ужзэс куштыны медо. Нош умой-умой лыдъяса, таиз выт азьвыл тырем куинь вытлэсь пичигес. Таиныз сэрен бызьылонэз но ӧжытгес. Марина КОСТЫЛЕВА. Спорт Ӵошатско футболистъёс Гурт спортсменъёслэн 8-тӥ гужем шудонъёсазы Завьяловоысь футболистъёс ньылетӥ интые гинэ шедизы. Оло, асьсэлэсь лябгес луэмзэс шӧдыса, футболистъёс выльысь ӵошатсконъёс борды басьтӥськизы. Али ортче районлэн чемпионатэз. Пыриське отчы куать команда: Завьялово но Бабино черкогуртъёсысь, Первомайский, Италмас но Хохряки посёлокъёсысь но Шор Постол гуртысь футболистъёс. Котькуд команда кык круг ортчыны кулэ. Соос шудозы куноын но, ас доразы но. Туннэ нуналлы, кык тур йылпумъяськем бере, азьпалан Первомайский посёлокысь футболистъёс. Пусйыны кулэ, та спортсменъёслы дӥськутэн но коньдонэн юрттэ Гурт удысэз эскеронъя Удмурт кун институт. Кивалтэ соин Владимир Гусев. Солэн сюлмаськемез улсын ик та командалы тренер но шедиз - Александр Стародумов. Первомайский посёлокысь спортсменъёслэн азьпалан секыт шудонзы - вормоно Завьяловоысь футболистъёсты. Ӵапак соос таӵе ӵошатсконъёсын кылем арын чемпионъёс вал. Н. ИВАНОВ. Пенсиос, пособиос но мукет Лыдӟисьёслэн юанъёссылы валэктэ калыкез улон-вылонын утёнъя министрлэн воштӥсез Наталья Кузнецова. - Эмъяськыны кутымтэ путёвкаез луэ-а воштыны коньдонэн? Мон кыкетӥ группаысь инвалид. М. Наговицын. Шаркан район, Карашур гурт. - Санаторийын но курортын эмъяськон путёвка интые коньдонэн компенсация басьтыны быгато войнаысь инвалидъёс, кудъёсыз путёвка курыса вазиськонэнызы ӵош сётӥзы санаторийын но курортын эмъяськон сярысь врачъёслэсь дэмланзэс. Компенсация сётӥське кык арлы одӥг пол. - Синмы адӟымтэен, мон пиналысен нырысетӥ группаен инвалид, нош пенсия басьтӥсько огъя висёнэн кыкетӥ группаысь инвалидъёсын одӥг быдӟа. Т. Степанова. Кияса район, Нӧднюк починка. - Огъя висёнэн кыкетӥ группаысь инвалидъёслэн но пиналысен нырысетӥ группаысь инвалидъёслэн пенсизылэн быдӟалаез одӥг мында компенсациос сётэм чотын. Мукет сямен вераса, тӥ басьтӥськоды 349 манет 93 копейка - со государствоен сётӥськись ӧжытэз пенсия, компенсациез но лыдъяса. - Мон огнын анай, будэ куинь нылпие, 1998-тӥ арын февраль толэзьысен уг басьтӥськы нылпи пособие. Ку сётыны кутскозы пособиез? Н. Муравьева. Кизнер район. - Нылпи пособиос сётӥсько, семьялэсь югдурзэ лыдэ басьтыса - семьялэн табышез (доходэз) адямилы быдэ улыны чаклам дунлэсь ӧжыт ке, пособие нырысьёсыз пӧлын сётӥськыны кулэ. Коньдонэн секыт югдур кылдэмен, пособиос сётӥсько вузэн яке кыӵе ке юрттэт пыр. Котькудӥз ёрос администрация ачиз кусып тупатэ кун казнае (бюджетэ) пунэм кылем предприятиосын, кудъёсыз пумит ӧвӧл тыронъёссэс взаимозачёт амалэн сётыны. Собере лыдъян-чотанъёс ортчыто, нылпи пособиез тырыны кӧня тыр вуз кулэ луоз. Кизнер районын нылпи пособиея пунэм тыронъёс 81 процентлы быдэстэмын. - Мон кыкетӥ группаен инвалид, нокытын уг ужаськы. Кытысь басьтыны луоз нылпиелы шутэтскон лагере мынон путёвка? Пиналы таза. Л. Бушкова. Ижевск город. - Жаляса верано луэ, нылпи лагерьёсы путёвка ӧжыт дунын сётӥське ужась анай- атайёслы. Быдэсак дунын путёвка басьтыны луоз лагерьёслэн администрациосысьтызы. - Ожысь инвалидъёслы газ понна 50 процент дун тырыны чакламын. Малы со куронъёс уг быдэсъясько? В. Глезденёв. Алнаш район, Юмьяшур гурт. - Газ удысъя ёзъёс льготаослы пумит ӧвӧл. Но со льготаос сётӥсько, калыклы газ пыртэ ке гурт предприятие. Ужпум со бордын. Кышкытлыклэсь утиськонлэн куронъёсызъя гурт удысысь котькуд предприятиын луыны кулэ газэз чаклась специалистъёс. Но уждун тыронэн шуг-секытъёс кылдэмен валче, тросаз гурт предприятиосын кулэстэмын газ удысъя специалистъёс. Адямиос ас быгатэмзыя коркаязы газ пырто ке, сыӵе учыре льготаос уг сётӥсько. Шӧкыч Кин мон табере? Яратон, пе, синтэм. Кинэ адӟо, солы ик синмасько. Ӟучъёс удмуртъёсын кушласько, удмуртъёс бигеръёслы бызё. Одӥг пол суро семьяын юмшаны кылдӥз. Удмуртомыны кутскем ӟуч воргорон кузпалэзлэсь данъяськыса юа: - Кин мон табере?! - Кучапи,- лякыт гинэ вазем соиз. Ӵуказе нуналаз воргорон ушъяське эшъёсыз азьын: - Кин мон табере? Кучапи мон! Кучапи! Эшъёсыз мыняк-мыняк пото, нош вазьыны уг дӥсьто. Бӧрысьгес одӥгез эшез чидамтэ, ушъяськисьлэсь ымзэ пытсам. Соизлэн мылкыдыз пильмаськиз, дораз бертыса, кышноезлэсь эшшо юа на: - Кин мон табере? - Кучапи. - Возьмано мон тыныд, кучапи! Шӧкыч Песянай: - Ма, туннэ но пенсия сётыны уг медо, лэся, ук? Куака: - Собесын ужасьёс ваньзы шутэтскыны кошкизы. Суредаз И. КИЙКО. Ӝамдэ шутэтско али. Оло, берлань потыны аслам ик кынары тырмоз на. Пумиськылӥзы егит суредасьёс Шулдыр но капчи мылкыдын мытӥзы та толэзез Глазов городын улӥсьёс. Отын ортчиз егитъёс пӧлын суреданъя фестиваль. Вазь ӵукнаысен бер ӝытозь город паркын калык ӧз бырылы. Нылъёс но пиос асфальт вылэ суредазы вуоно даурлэсь ӵукназэ, нош учкисьёс эскеризы тунсыко ужъёсты. Пусйыны кулэ, таӵе ужрадэ пыриськизы на Ижевск, Можга, Воткинск городъёсысь но Яр посёлокысь пинал суредасьёс. Соос ог-огенызы ӟечгес тодматскизы, нош йылпумъяськиз таӵе пумиськон нылпиослэн ӵукнаозь эктонъёсынызы. В.НИКОЛАЕВА. Огазея зарезь тулкым но кезьыт ву Арлы быдэ Военно-Морской Флот 25 июле пумита аслэсьтыз праздниксэ. Та нуналэ огазе люкасько зарезез гажасьёс, морякъёс. Соин куинетӥ ползэ ини праздник ортчоз "Аврора" кинотеатр палан. Сӥё-дано люкетэз кутскоз 11 часын. Военной морякъёс, флотын службазэс ортчытэмъёс, ВМФ-ез гажась муртъёс, зарезь тулкымъёсын эшъяськисьёс но огшоры шулдыръяськыны яратӥсьёс адӟыны быгатозы Андреевской Флаг ӝутэмез, сюрсо воротникъёсын солдатъёслэсь вамышъямзэс. Озьы ик радъямын луозы пӧртэм ӵошатсконъёс но флотын кадь дасям макаронъёсын куноятон. Ужрадэ лыктыны быгатозы вань мылкыд карисьёс. М.КОСТЫЛЕВА. Фестивальлэн вуюись букоез Финн-угор калыкъёслэн Консультативной комитетсылэн программаезъя та выжы калыкъёслэсь ВИИ калык куспо фольклор фестивальзэс туэ августэ ортчытыны чакламын Удмурт Республикаын. Та пумысен асьме Правительство 21-тӥ июне кутӥз нимысьтыз постановление. Кылдытэмын фестивалез ортчытонъя оргкомитет. Соин кивалтэ Удмурт Правительстволэн Тӧроезлэн воштӥсез В. Е. Шудегов. Юрттӥсьёсыз (сопредседательёс) луо Кун Кенешлэн Тӧроезлэн воштӥсез С. К. Смирнова, Россия Федерациысь культурая министрлэн нырысетӥ воштӥсез Н. Л. Дементьева но федерация ужпумъёсъя но нациосын ужанъя министрлэн воштӥсез А. А. Томтосов. Оргкомитетлэн кивалтӥсьёсыз, членъёсыз но ужась группаослэн азьветлӥсьёссы та нуналъёсы люкаськыса вераськизы фестивалез тыро-пыдо ортчытыны дасяськонлэн кызьы мынэмез пумысен. Калык куспо фольклор фестиваль асьме дорын луыны кулэ вал ни кылем арын ик. Но коньдонлы ёрмон та ужез одӥг арлы ӝегатӥз. Фестиваль ортчытонэз кылем гужем ас вылаз басьтӥз Эстония. Туэ та ужрадлы коньдонэн юрттозы Россия Федерациысь Культурая, Федерация ужпумъёсъя но нациосын ужанъя министерствоос. Ваньмыз со мыноз концертъёсты-выступлениосты радъянэ, артистъёсты сюдонэ, гостиницаосын возёнэ. Нош лыктӥсьёс ласянь дун тыриськоз сюрес понна гинэ. Фестивалез ортчытонлэн вань шуг-секытэз нырысь ик усе республикаысьтымы Культурая но Национальной политикая министерствоос вылэ. Пӧртэм калыкъёсын макем ужаны быгатэмлэн пайдаез шӧдӥськоз азьпалан кусыпъёсмы вылын. ВИИ фольклор фестивале лыктыны мылкыд каремзы сярысь ивортӥзы ни Мордовия, Мари Эл, Карелия, Коми республикаосысь, Коми-Пермяк, Ханты-Манси автономной округъёсысь, Башкортостанысь, Татарстанысь, Пермь, Киров, Ленинград улосъёсысь фольклор коллективъёс. Асьме ласянь но мылкыд карисьёс трос гинэ. Быръемын таӵеосыз: Пичи Пургалась "Зарни шеп", Глазовысь "Иднакар", Воткинскысь "Тюрагай", Дэбесысь но Сундурысь (Игра ёрос) "Ӟардонъёс", Киясаысь "Ашальчи", Вавожысь "Гуждор", Бадӟым Учаысь (Можга ёрос) "Чибори", Узей-Тукляысь (Ува ёрос) "Азвесь", Ср. Постолысь (Завьял ёрос) "Пинал даур", Арзамасцевоысь (Каракулино ёрос) "Вуюись", Шамарданысь (Юкаменск ёрос) "Лампачей", озьы ик Ижевскысь "Инвожо" но "Эктон корка". Тросэз таос "калык ансамбль" ним басьтэмын ни, ас быгатонзэс возьматъямын шаермылэн палэназ, кунгож сьӧрын но. Соослы бадӟым оскон, удмурт калыкмылэсь фольклор искусствозэ яркыт усьтозы шуыса. Озьыен, ВИИ фольклор фестиваль Удмуртиын луоз 6-тӥ-9-тӥ августэ. Нырысь нуналаз куноос лыктозы, шоркаренымы тордматскозы гинэ ай, нош асьме коллективъёс возьматскозы ни репетициын. 7-тӥ августэ Шор карлудын (Центральной площадьын) ваньзы ик быдэсак усьтӥськыны быгатозы. Татын ик радъямын луоз пӧртэм калыкысь усточиослэн киужъёсынызы выставка-ярмарка. Та нунал ик эшъяськонлы сӥзем ӝыт луыны кулэ. (Куазь зореныз кышкатӥз ке, юрт дась - Операя но балетъя театр). 7-тӥ, озьы ик 8-тӥ августэ фестиваль бурдъёссэ вӧлъялоз быдэс шаерамы. Ижысь культурая учреждениосын, паркъёсын-садъёсын сяна, концертъёс луозы Вотка, Завьял, Игра, Можга, Пичи Пурга, Кияса, Каракулино, Ува, Шаркан, Як.-Бодья ёросъёсын. Фестивалез йылпумъясь гала- концерт жингыртоз 8-тӥ августэ 19 часысен Ижевскысь "Динамо" стадионын. Ӵуказеяз, 9-тӥ августэ, куноосынымы люкиськон, сюрес вылэ келян гинэ кыле на. Иське, пӧсь толэзь пытсаз ке ӧсъёссэ, гудырикошкон вӧлак пумиталоз - уно буёлъем вуюисьлэн букоез мед чеберак усьтӥськоз шуыса. Т. ПЕТРОВА. 25-тӥ июле вордскемез дырысен 70 ар тырме В. М. Шукшинлы Сюлэм чеберлык Асьме удмурт прозаез азинтонын усточиосмы ӧжыт ӧвӧл. Мынам лул-мылкыдылы туж матынэсь луо Роман Валишинлэн гожъямъёсыз. Ӟуч литератураысь ке, гурт улонэз возьматэменызы ик дуноесь луизы Валентин Распутин, Федор Абрамов. Паймемысь уг дугдӥськы Михаил Шолоховлэн устолыкезлы но. Туж жалясько: беромысагес пумиськи Василий Шукшинлэн творчествоеныз. Тодматски но, быдэс мылкыды пӧзись ошмес син музэн бугыръяськыны кутскиз. Та аспӧртэмлыко усточи, кыллэн художникез вордскиз Алтай улосысь Сростки гуртын сизьымдон ар талэсь азьло. Но "инсьӧр кузё" Василий Макаровичлы югыт дунне вылын улыны кема дыр ӧз висъя. Ваньзэ-ӧвӧлзэ ньыльдон вить ар гинэ. Кулӥз со, "Они сражались за Родину" кинокартинаез пуктыкузы, 1974-тӥ арын 2 октябре. Солэн та вакчи улон но ужан вакытэз гульсяськаосын гинэ валемын, шумпотонъёсын гинэ чильпамын ӧй вал. Пиналысен атаезтэк кылиз, пӧртэм чер-висёнъёсын курадӟиз. Эсьмаса, быдэ вуыса но йыр йылаз аслыз липет шедьтыны шугъяськыса улӥз. Алигес лыдӟи: Москваын дышетскыкуз, ӵемысь уйёссэ вокзалъёсын ортчытъяно луылэм. Озьы уго: кин-о гуртысь адямиез бадӟым карын шумпотыса пумита? Писатель ачиз но ӟеч валаз гурт пияш понна городлэсь сюранай мылкыдо луэмзэ. Берлогем ас лыдӟисьёсызлы сюлэм ӧссэ ӟубис карыса гожтӥз вал ук: "Ньыльдон аресам вуыкум, озьы луыса потӥз: городын улӥсь кариськыса но ӧй вуы, гуртысь выжые но поремын. Шонергес луысал, дыр, тазьы пусйыса: одӥг пыды ярдурын, мукетыз - ву вылысь пыжын. Уятэк но амал ӧвӧл кадь, та сямен уяны но курдано". Нош маин висъясько мукетъёсызлэсь Шукшинлэн гожъямъёсыз? Нырысь ик пусйыны кулэ соослэсь психологической, адямилэсь лул-пушсэ, мылкыдзэ возьматӥсь луэмзэс. Тырмыт гинэ татын серем, шаян мылкыдоосыз но. Ӟуч эскерисьёс солэсь геройёссэ озьы ик пусйылӥзы уго: "Шукшинлэн чудикъёсыз"! Нош соос огшоры йӧнтэм, шузи адямиос ӧвӧл. Авторлы юн кельшо сэзь-ӟырдыт мылкыдоос, котькытчы вутскыны турттӥсьёс, со дыре ик мытэм ужзэс кема чидатскыса йылаз-пумаз вуттӥсьёс. Валамон ини, таӵе геройёс вань бере, ог-огзылы ваче пумит луон - конфликт - дась. Татын нош ик ӵошатыны луысал Роман Валишинлэн серемес веросъёсыныз. "Тодметъёс" (1990) книгаез лыдӟисьёс доры вуытозь, мон солэсь таӵе аспӧртэмлыксэ чик уг тодӥськы вал. Усточи прозаиклэн Шукшинлэн аслыз гинэ тупась гожъяськон манерез. Сое бордазы кыско гуртын улӥсьёс, соослэн нуналмысь сюлэмшугъяськонъёссы. Куддыр веросъёс туж вакчиесь. Мӧзмылэс, сюлэмшуго гурт улонэз возьматӥсь новеллаос нимасал мон соосты. Соос лыдӟисез мур малпаськыто, валантэм-адскисьтэм кужыменызы бордазы кыско. Малы? Мугзэ вакчияк гинэ валэктом: писательлэн адямиез возьматыны быгатэменыз. Со кыксэ ик буёлэз огӵош кутэ - "сьӧдзэ" но, "тӧдьызэ" но. Ас адӟем-кылэмъёссэ ноку уг люкылы бадӟым но пичи кесэгъёслы. Адямилэн улонысьтыз ваньзэ лыдъялляз кулэен, веросъёсаз, кинофильмъёсаз пыртымон луисен. Быдӟым гожъясь тыршылӥз адями бордысь пичильтык ке но ӟечсэ шедьтыны, возьматыны, лулпуш чеберлыксэ ятыргес карыны. Творчествозэ эскерисьёс пусъё: В. М. Шукшин ас быгатонлыксэ-талантсэ усьтыны вутскиз дас - дас кык ар куспын но: гожтӥз кык роман, кӧня ке повестьёс, сюлэсь уно веросъёс, киносценарийёс но пьесаос. Ас гожтэмезъя пуктыны вуиз вить чеберлыко фильм: "Живёт такой парень", "Ваш сын и брат", "Странные люди", "Печки- лавочки", "Калина красная". Усто гожъясь луэменыз валче, кыӵе быгатӥсь артист но вал со! Кӧня геройёсты экран вылэ вуттӥз, учкисьёслы яратымон кариз?! Нош мынам син азям - аслаз киноповестезъя пуктэм "Калина красная" фильмысь Егор Прокудинэз. Та фильм серекъятэ но, бӧрдытэ но, туж юн малпаськытэ но. Ма, Шукшинлэн быдэс творчествоез та шӧмо ук. Отын котьку данъямын адямилэн сюлэм чеберлыкез. Нош чеберлык нокинлы уг акыльты. Соин, вылды, Василий Макарович Шукшинлэн нимыз но яркыт кизили музэн югдыса-воринъяса улэ котькуд выжыысь калыклэн улон-вылон инвисаз. Николай НИКИФОРОВ. Мынэ пудо сиён дасян Тяпайтыны ноку Пӧсь, кӧс куазь турын ӝутӥсьёслы туж юрттэ. Кытын но отын возьёс бушазы ни, но трос ай турнан интыос куакъёс котырын, улыгъёсын, нюлэс пушкын. Таоссэ утялтыны секытгес, озьы ке но, уд сисьты ук. Шаркан районысь хозяйствоос, азьвыл аръёсын ӵошатыса, туэ чупрес ужало. Пудо сиён дасянъя республикаын устоосыз радын мыно. Туннэ нуналлы турын дасямын ни ог 70 процентэз, соин ӵош азинске сенаж но силос тырон. Чакламлэсь трос пудо сиён люказы ни "Свобода", "Нива", "Карсашур", "Родина", "Эрик" но куд-ог мукет хозяйствоос. Бере кылё "Восход", "Дружба", "Пахарь", "Победа", "Маяк". Тужгес но дыг ужъёссы мыно "Мишкинское" эштосын но "Искраын". Витё, вылды, зоръёслэсь вуэмзэс. Йӧл кысконъя та нуналъёсы ваньзэс азьпалто "Луч" но "Колос". Скаллы быдэ татын 14 килограммлэсь ятыр йӧл кыско, соос бӧрсьы мыно "Суроновский", "Дружба", "Восход". Таӵе чебер куазен 7 килограмм сяна уг басьты "Искра" эштос. Ляб ужало "Мишкинское", "Заря". Али ке пуж-пуж йӧл ӧд кыскы, ку люкалод на? Азинлыко ужась хозяйствоосын, туннэ оскыса вералом ни, пудо сиёнзы толйыны тырмоз. Соос котькуд нуналэз, часэз быгатыса кутыны сюлмасько, нош бере кылисьёсызлы бускельёссы дортӥ нош ик кураськыса, тэльмырыса ветлоно луоз, дыр. Л. МЕДВЕДЕВА. Тазалыксэс эскеризы Можга. Ёросын радъямын вал флюорография пыр ортчон толэзь. Гуртъёсын улӥсь пенсионеръёс но ужтэк кылемъёс ӵем дыръя ӧтьыса но уг лыкто асьсэлэсь тазалыксэс эскерыны. Нош таӵе толэзь ортчытыку тазалыкез утисьёс чаклазы на туберкулёз, пыктос, глаукома но венерической висёнъёс ласянь. Ортчем арын ужрадэ пыриськиз ёросысь котькуд ньылетӥез пенсионер гинэ. Со бадӟым кышкытлык вае вылӥ верам висёнъёслы ёросын капчиен аляны. Уго 1998-тӥ арын эскерон ортчытыку шараяськиз, вань висисьёс пӧлысь 22 процентэз пенсионеръёс но 44 процентэз нокытын ужасьтэм калык луэ шуыса. Жаляса верано, тросэз флюорографиез ортчоно уг кожало, нош кулэ вылэм. Е. ЗАКОЛЮКИНА. Андан ӵыжатӥсьёс но кырӟаны быгато Кылем четверге "Металлург" культура двореце трос калык лыктӥз андан ӵыжатӥсьёслэсь нуналзэс пусйыны. Устоосызлы металлургъёслы сётӥзы Удмурт Республикаысь промышленность удысысь но мукет организациосысь данъян грамотаос. Ӝытэз шулдыртӥз "Ижсталь" заводлэн ваньбур поттон цехаз азьвыл ужам, али Удмурт Республикаысь калык артистка Валентина Пудова. Андан ӵыжатӥсьёслэн нуналазы, 18-тӥ июле, уно калык люкаськиз Металлургъёслэн городоказы "Аврора" кинотеатр доры. Отын шулдыр концерт возьматӥзы "Чингыли", "Андан", "Василёк" ансамбльёс. Люкаськемъёсты праздникен ӟечкылаз Кун Кенешлэн депутатэз, "Ижсталь" огазеяськонлэн генеральной директорез В. Моисеев. Мылкыд карем потэ, заводлэн кивалтӥсьёсыз праздник нуналъёсы гинэ медаз тодэ вае асьсэлэсь бырйисьёссэс, уката ик ужысь ветеранъёсты - соослэн сюлмысь тыршеменызы али но ӝуало угось мартен но электрогуръёс. В. ЧЕРНОВ. 01 ивортэ "Горд атас" чортоз - ваньбурмы лобӟоз 13 лыдпус шудтэм, шуо. Озьы ик вылэм. Сое ас вылазы шӧдӥзы Ижевск вӧзысь "Металлург" совхозысь Ялтинской но Демократической урамъёсын улӥсьёс. Выль нуналлэн нырысетӥ часаз ик "01" службае тылпу кенжем сярысь ивор вуиз. "Горд атас" машина но мотоцикл возён гаражъёсын кузёяськыны ӧдъям, солы матын сылӥсь юртъёсын но мунчоосын. Ӝыны иськем быдӟа интыын огыр-бугыр вал. Гуртоос но быгатэмзыя асьсэ транспортсэс утьыны выризы. Бадӟым шуг-секытъёс кылдӥзы на, ву матын ӧвӧлэн. Тылпу кысӥсьёслы шурысь ву кысконо луиз 400 метр кузьда гумыетӥ. Та урамъёсын улӥсьёс кышкыт учырлэсь сю сюрс манет пала ыштонъёс адӟизы. Ӝуаз 6 гид, 3 гараж, 3 мунчо но кӧня ке автомототехника. Пусйыны кулэ на, татысь юртъёс нокин лэзьытэк пуктэмын вылэм. Нош табере юан кылдэ: "Кин янгыш? Ма кароно?" Мукет учыр вал Ленин ёросысь Нагорной урамын. Кык этажъем пу юртын улӥсь пенсионеркалы "металлургъёслы" сярысь удалтӥзгес. "Горд атаслэсь" утьыны быгатӥзы гидъёссэ, нош улон коркаез, жаляса верано, пеньлы пӧрмиз. Специалистъёслэн чакламзыя, юрт юри сутэмлы укша. Оскон вань, следствие та ужез йылаз-пумаз вуттоз шуыса. Вазиськеме потэ нимаз юртъёсын улӥсьёслы. Сакгес кариське. Тылпулэсь нокин утиськемын ӧвӧл. Адӟонлэсь уд пегӟы, озьы ке но... А. ЕМЕЛЬЯНОВ. Инкуазьлы тау карыса Пинал экологъёслэсь лагерьёссэс радъян шаерамы сяме пыӵаз ини. Туэ республикаысь сизьымаз (интыосысьёссэ вератэк) шутэтскыны но инкуазез утён удысъя тодон-валанъёс басьтыны быгатозы 600-лэсь трос пиналъёс. Вераны кулэ: ар ӵоже вис каремез бере ужаны кутскиз "Егит семья" лагерь. Отын нылпиос мумы-бубыосынызы ӵош шутэтско. Туж чебер - "Берегиня" - нимын палаткаосын лагерь радъямын "Нечкинский" инкуазь паркын. Август толэзе Каракулино ёросысь Зуевы Ключи гурт дорын "Инкуазез утён профессиос" профессия бырйыны юрттонъя лагерь ужаны кутскоз. Татын дышетскон мыноз куинь удысъя: "инкуазез утён право", "журналистика инкуазез утёнын", "инкуазез утён но тазалык". Вотка ёросын "Экосива" лагерь усьтӥськоз. Татын но нылпиос трос выльзэ но кулэзэ тодозы. Пиналъёс тодматскозы "Валеология но таза улон", "Будосъёс но инкуазез утён" но пӧртэм лекциосын. Лагерьёс озьы ик усьтӥськозы Грах, Кез, Пичи Пурга но Завьялово ёросъёсын. Инкуазез утёнъя лагерьёслы туэ коньдонэн юрттӥзы шаерысьтымы но ёросъёсысь Экологияя фондъёс, Егитъёсын ужанъя кун комитет, озьы ик Калыкез улон-вылонын утёнъя фонд. Вераны кулэ, юрттэт сётонэ умойгес пыриське ни Калыкез дышетонъя министерство. Кылсярысь, со Грах ёросысь лагерьлы коньдон висъяз. Таӵе ужрадъёс ортчытон бадӟым пайда вае. 7-10 нунал куспын пиналъёс чылкыт омырын шутэтско. Со сяна, инкуазьлы тау карыса кадь, быгатэмзыя солы юртто но: ошмесъёсты сузяло, шур дуръёсты чылкытато но мукет. Тужгес но пусйымонэз: нылпилэн инкуазь шоры учконэз воштӥське. Утялтэм шур котыре жагтӥськыны возьдаськод, улэп лулосэз вӧсь карыны киыд уз ӝутскы ни. Ю. ЖАРКОВА. Удмурт Республикаысь Инкуазез утёнъя кун комитет. Юрттэттэк ӝӧк выл куанермоз Кизнер районысь уже интыянъя биржа туэ нырысьсэ ужтэк кылем анай-атайёслэн нылпиоссы понна радъяз шутэтскон лагерь. Ужа со Кизнерысь 2 номеро нылпи садлэн - санаторной интернатлэн юртаз. Быдэс толэзь ӵоже лагерьын районысь пӧртэм гуртъёсысь 40 пала пиос но нылъёс шутэтско, кӧтсы тырымон сисько. Сюдо соосты нуналаз вить пол. Нылпизэс лагерьын возён анай-атайёс понна 20 манет тыр гинэ усе. Шутэтскыны мылкыд карисьёс трос, соин ик лагере инты нырысь ик сётӥське трос нылпиё но тужгес ёрмись семьяосысь пиналъёслы. Лагерез возьыны юрттэт сётӥзы Кизнерысь "Карконд" завод, йӧл сиён-юон поттонъя предприятие. Июле кӧня ке коньдон висъяз кун бюджет но. Август толэзьлы сыӵе юрттэт чакламын ӧвӧл, соин ик пиналъёслэн ӝӧк вылзы куанермоз. Ӧй луысал меда луонлыкъёс шедьтыны сояз толэзьлы но. В. МАХНЕВА. Кенешизы Екатеринбургын Кызьы ивортэ Кун Кенешлэн пресс-службаез, Александр Волков но Николай Ганза та нуналъёсы ужазы Екатеринбургын. Отын ортчиз Урал котырысь областьёслэн но республикаослэн экономика удысын ӵош ужанъя Ассоциацизылэн Советэзлэн кенешез. Эскероно ужпумъёс пӧлысь валтӥсез - "Россия Федерациын интыосын ас коже кивалтонэз но государство ласянь кивалтонэз радъян". Доклад лэсьтӥз Россиысь Правительстволэн Тӧроез Сергей Степашин. Ассоциацилэн кенешаз озьы ик учкемын электрокужымез Урал регионын кутонъя ужпум но мукетыз. Вузкаро вуж дӥсен Якшур-Бодья. 19-тӥ пӧсьтолэзьысен ёрос библиотекаын ужаны кутскиз вуж дӥсьёсын вузкарон. Ёросысь куд-ог улӥсьёслэн со дӥсьёссэс юнме куштэмзы уг поты, вылаз ик, солы куяськисьёс вань ке. Табере пичи кылем яке вужмем дӥсьсэс бодьяос библиотекае ваё. Кин ке сое ичи дунэн вуза, кин ке - дунтэк но вуттэ. Та вузкаронысь озьы ик шедьтыны луэ на пыдкутчанъёс но школаын дышетскисьёс понна учебникъёс. Пусйыны кулэ созэ но,вузлэн 10 процентэз ёрос библиотекае кыле. Таӵе усьтэм вузкаронэ ӵемгес пырало гуртъёсын улӥсьёс. Кылсярысь, одӥг кышномурт 250 манет тыр басьяськиз. Туннэ нуналлы та вузкаронын тужгес но дуноез дӥсь луэ бадӟым классын дышетскись пиос понна кунгож сьӧрысь ваем пиджак. Сое татын вузало 200 манетэн, нош магазинын сыӵе пиджак сылэ, пе, 400-500 манет. Н. РЕШЕТНИКОВА. Кыл кутытӥд ке - малпаськозы Кизнер районысь югдурез утён удысэ Игорь Ермаков вуиз 1995-тӥ арын, нош солэсь азьло Киров нимо колхозын валтӥсь агроном вал, собере фермере кариськиз. Малпамтэ шорысь улон сюресэз солэн чутрак кожиз - луиз участковой инспектор. Игорь Николаевичлэн эскероно участоказ ньыль колхоз но куинь гурт огазеяськон. 50- 55 километр кеме интыяськемын 13 гурт, улӥсьёсыз 3 сюрс пала. Сюлмаськонъёс но шуг- секытъёс тырмыт. Со пумысен ик вераськонмес мытом. - Участок туж аспӧртэмлыко. Югдур секытгес Короленкоысь сельсоветын. 1998-тӥ арын 14 йыруж лэсьтэмын вал. Соин ӵошатыса, Русская Косаын, Кусо Каксяын секыт йыружъёс ик ӧй вал. Сое валэктыны луоз, дыр, гуртъёслэн селолы кыдёке интыяськеменызы но, адямиос но отын ужасесь. Куд-ог дыръя ужано луэ, уез-нуналэз чаклатэк. Кылсярысь, таяз арын январь толэзе гинэ куинь мурт виемын вал. Тынад участокад йыруж лэсьтэмын яке кинлэн ке мукетызлэн, ваньмыз басьтӥсько сое сэрттон-пертчон борды. Следственно-оперативной группаосын толэзьлы ньыль пол но дежурить кароно луэ. Участокам кыӵе ке йыртэман учыр луэ ке, нош ик потоно. Ачим мон улӥсько Дружина гуртын, интыяськемын со участокелэн шораз ик. Телефонэ ӧвӧл, соин ик нырысь жингыртоно луо Кизнере. Отысен мон доры ысто машина. Уйшор-а, ӟыр кезьыт-а, мынӥськод ни. - Кыӵе йыртэман учыръёс ӵемгес луо гуртъёсын? - Ӝыныезлэсь троссэ йыружъёсты лэсьто ужтэк кылемъёс, со лушкаськон учыръёс. Вылаз ик, тросэз со лэсьтӥське юэм йырын. Тани Короленко сельсоветэз ик басьтом. Отчы люкаськемын тужгес но трос ужтэк кылемъёс, палэнысь лыктэмъёс вань, пытсэт сьӧрын пукемъёс но отчы ик вуо. Адямиос ас понназыгес улыны туртто, мукет гуртъёсын сямен, ог-огенызы эшъяськыса уг уло. Гуртёсы трос потано луэ семья куспын керетонъёс пумысен но. - Районысьтыды югдурез утён удыс кӧня мурт вылын возиське? - Участокъя инспекторъёс районамы дас, кык мурт соослы юрттэ на. Вневедомственной охранаез но вераса, Кизнерысь РОВД-ын сю мурт пала тырше. - Кыӵе уж нуиськоды быдэ вуымтэос но егитъёс пӧлын? - Школаос ӧтчало анай-атайёсын, дышетскисьёсын кенешонъёсы. Дышетскон вакытэ школаосын ик нимысьтыз урокъёс ортчыло быдэ вуымтэосты йыртэман учыръёслэсь алонъя, йыртэман понна кыл кутонъя. Бадӟымгес ужрадъёс, пумиськонъёс дыръя школаосын дежурить кароно луэ. - Нош уг лу меда дежурить каронэз гуртоос пӧлын ик радъяны? - Азьло вакытъёсы югдурез эскерыны юрттэ вал калык дружина - ДНД. Туж жаль, аналтӥзы со ужез. Русская Косаысь сельсоветлэн кивалтӥсеныз Елена Кузьминична Рябоваен малпамы гуртысь интеллигенциез югдурез эскеронэ кыскыны. Шуом, мар уродэз, клубын ужасьёсын ӵош соос но быдэ вуымтэосты, егитъёсты чаклазы ке - медаз юэ, медаз жугиське. Уката ик шутэтскон нуналъёсы, дискотекаос дыръя чакласькыны кулэ. Со общественной уж, адямиосты мылкыд каремзыя кысконо отчы. Кызьы верай ни, Русская Коса гуртын югдур урод ӧвӧл, арлы кык йыртэман учыр луиз ке, луиз. Дежурить карыса, югдур азьланяз но умой возиськысал. - Шаерысьтымы тросэзлэн гуртъёслэн бӧрдонзы - ужан дыръя юон учыръёс. Тӥляд кызьы со ласянь? - Ми но бере ум кылиське. Шофёръёс, трактористъёс пӧлын но руль сьӧразы юыны яратӥсьёс вань. Мон нимысьтыз чакласа возисько, кин кӧня пол кыл кутӥз ни. Нош ик Русская Косаысь ужасьёсты умоен пусйысал. Мукет гурт удысъёсын ӵошатыса, татын калык юонэ мур выемын ӧвӧл ай. Та ласянь гурт кивалтӥсьёслы инспекторен одӥг кылысь ужаны кулэ вылэм. Ялан вазиськисько соослы, мед ивортозы юыса уже потымтэос сярысь яке кин ке ужын юэ. Одӥг пол, кык пол кыл кутытӥд ке, азьланяз адями малпаськоз � шонер сюрес вылысь уг кожы меда? Колхозлы но со умоен берытскысал. Но малы ке но ваньмызлэн ик сое валамзы уг поты. Л.МАЛЫХ. Наталь Сюлмаськон бугор Яратӥсько но пегӟисько Юри чаклалэ ай: котькудӥз гожъяны кутскись нырысь кылдэм чуръёссэ ӧз сӥзьы меда ас вордэм анаезлы? Зэм но, вужмисьтэм тема. Котькудӥз ас анайзэ данъяны шунытэсь, чебересь, сюлэм пыртӥз потэм кылъёсты шедьтыны тырше. Тодмо ӟуч педагог В.А.Сухомлинский пиналъёслы вазиськиз вал: " Пиналъёс, гажалэ но уте анайдэс!" Берлогес ватсаз на: "Анайёс, гажалэ но уте ас нылпиостэс!" Нош мар луэ туала улонын? Трос гожъямын ни юись кузпалъёс, нылпиоссэс аналтэм анай-атайёс сярысь.Сыӵе семьяын улонлэн шумпотонэз, дэлетэз ӵук лысву инӟыос музэн тӧлӟе-ыше. Ӧвӧл ни кадь отын ӟечезлы оскон но, сюлэмез шунтӥсь, шуныт кылъёс но, нокинлэсь ӟеч визь-кенеш курыны. Сыӵе семья ӵемысь таркаське: анай-атайёсты люко нылпиоссылэсь, пиналъёс нылпи юртъёсы, тросэз кырыж сюрес вылэ кожо, озьы пытсэт езъёс сьӧры сюро. "Ой, тӧл тӧла..." повестям та югдурез ик мон мукет сямен усьтыны-сэрттыны тыршисько. Сизьыметӥ классэз йылпумъям Утямыш Олег - Апасов - аслэсьтыз семьязэ утьыны тырше. Укыр жаля со юись анайзэ, куддыр визьноданы тырше ужатэк калгись, юон вылэ чӧлскем сюратайзэ, сюлмаське вын-сузэръёсыз сярысь. Ӧвӧл, мон пинал геройме "дунне адями" дорозь вуттыны уг тыршиськы. Вань гинэ Олеглэн но янгышъёсыз, сямыз но сылалэн-чечыен суро. Вордскем дорзэс кельтыса, тодмотэм сюрес вылтӥ пегась нылпиос сярысь азьвыл аръёсы городъёсысь гинэ кылод вал. Табере со гуртъёсы но вӧлме ни. Озьы уго йӧнтэмез, уродэз котьку но ӝог аля, выжыяське, вӧлске. Алнаш ёросысь егит нылъёслэн ортчись машинаосы пуксьыса "юмшамзы" сярысь гожъяз ни вал "Удмурт дунне" но. Повесте бордын ужакум, та кышкыт но кӧшкемыт югдурез валэктыны курыса вазиськи Киров улосысь Кильмезь ёросысь быдэ вуымтэ нылпиосын ужась валтӥсь инспекторлы Р.С.Грозныхлы. - Арысь аре югдур секытоме, - ивортэ Роза Салиховна.- Тани алигес Кильмезьысь Саша нимо нылаш анаеныз керетэм. Арня ӵоже пегаса ветлэмез бере гинэ дораз берыктӥм. Дас сизьым аресъем Наташа - юмшась сюресчи. Быдэс ёросэз котыръяз ни. Анай-атаез аракыен воштӥзы сое. Кытын ветлэмез сярысь но уг тунсыкъясько, уг но утчало. Ваньмыз милициын ужасьёслэн пельпум вылазы мултэс ныпъетэн пуксе. Дас ньыль аресъем Тоня дорысьтыз кошкон азяз гожтэм: "Мама, мон тонэ туж яратӥсько. Озьы ке но... пегӟисько". Нылмурт Тюмень улосысь машинае пуксьыса кошке. Арня улыса, сое КамАЗ машиналэн кабинаысьтыз синйылто. Толэзь ортчыса гинэ Удмурт шаерысь Сюмси ёросын ӝегатэмын, дораз вуттэмын вал. Та выллем учыръёсты трос гинэ мадиз Роза Салиховна. Куд-огзэ кылзыса, йырсиос ик пежырско, сюлэм кужекъяны кутске. Нылпиослэсь дорысьтызы пеган мугъёссэс юись анай-атайёс вылэ гинэ погыльтыны уг луы вылэм, пумиськыло мукет учыръёс но. Тани мар мадиз Оля З.: - Пичи дыръямы ми агаен корка липет вылэ ӝутским. Шудонъямы Лёня отысен питыраз но пыдзэ чигтыны шедьтӥз. Гумырезлы чут кылиз. Со дырысен анай-атайёс понна яратоно, жаляно, муспотоно нылпилы пӧрмиз. Вань ческыт сиён, чебер дӥськут - Лёнялы. Эсьмаса, анай ӵукна сайкатыкуз но агаез чупаса сайкатылэ вал. Нош мон, покчи нылпиез луыса но, вешамез, чупамез тодытэк, агаелы вожъяськыса будӥ. Озьы мылкыдам вожъяськон, вожпотон пуромиз кадь. Семьяямы ми ньыль нылпи, нош малы анай-атай огзэ гинэ сокем яратыны кулэ? Табере Лёня школаез йылпумъяз ни. Ашкынэмын. Шӧдэ-вала уго со - анай-атайлэн яратоно, гажано нылпизы. Вина юэ, тамак кыске. Керетэ анай-атаен но. Нош соос чус уло. Ог уе монэ эриктэманы турттэ вал, шакшы лул! Соин ик дорысь пегаса ветлӥсько. Ӧвӧл монэ яратӥсез но, шуныт вазиськисез но. Бен, сӧсыр, висись нылпи сярысь тросгес сюлмаськоно луылэ. Озьы ке но, мукет нылпиослэсь шумпотонзэс талано ӧвӧл, дыр. Шунды сямен ик шунтӥсь тылсиосты котькуд будослы огкадь люкыны тыршоно. Анай-атайлэн нылпизэ яратэмез, валамез, ӟеч визь- кенеш сётыны быгатэмез, аръёс ортчыса, ӟеч емышен ик быгыльске. Та сярысь ноку ик вунэтоно ӧвӧл. Нылпиос киысь чиньыос выллем, вандӥд ке, котькудӥз но вӧсь луоз. Н. НИКИФОРОВ. Дунъёс Нянь луоз Август вуон азьын арлы быдэ сямен няньлы но мукет сиён-юонлы дунъёс шудыны кутско. Озьы ас кужымзэ возьматэ йӧскадь радъямтэ рынок. Берло арняоссэ шӧдскымон дуноязы нянь но пызь, кеньыръёс. Маин со герӟаськемын? Та юанлы валэктон вылысь, кылем пятницае журналистъёсын пумиськылӥз Правительстволэн Тӧроезлэн воштӥсез М. И. НАЗАРОВ. Пресс-конференцие озьы ик ӧтемын вал "Удмуртхлебопродукт" огазеяськонлэн кивалтӥсез А. М. КОТЕЛЬНИКОВ, Сарапулысь хлебопродуктъёсъя комбинатлэн директорез М. С. МАЛЮК, Правительствоысь агропромышленной комплексъя валтӥсь специалист Н. С. КЛЮШНИК, Дунъёсъя но тарифъёсъя кун комитетлэн председателезлэн нырысетӥ воштӥсез Е. И. АГАФОНОВ. Соос пыр-поч тодматӥзы республикаын туннэ нуналлы кылдэм югдурен. Соку ик пусъём: Удмуртия арлы быдэ ваньзэ сямен чабеез палэнысь басьтэ бере, шуге-леке вуон учыръёс выль урожай вуон азьын ӵем пумиськыло, коньдонлы ёрмон вакытэ - тужгес но. Республикалы пызь изон али быдэсак сямен усемын Сарапулысь комбинат вылэ. Кызьы шуиз солэн директорез Михаил Малюк, предприятие одӥг нунал но тэк уг сылы. Россиысь Правительство косэмъя, Европаысь вуыны кулэ 41,5 сюрс тонна чабей - гуманитарной юрттэт. Вуэмын ни 23,5 тонна яке 60 процентэз. Кылемзэ ыстозы тупатэм графикъя. Со сяна, предприятие чабей басьтэ на мукет областьысь но республикаосысь. Дунзэ пукто тысь вузасьёс. - Нуналаз комбинат изэ 180 тонна пызь, ӟеч вакытъёсы, кык секциен ужаса, та лыдпус 360-озь вуылоз, - шуиз Михаил Семенович. - Пызь тырмыт республикамы понна, соин ик няньтэк ум кыле. Солэсь кышканэз ӧвӧл. Вералом на: асьме дорын будэтэм чабей та предприятие 3 сюрс тонна вуттэмын вал, со 12 нуналлы ужаны тырмиз. Нош нянь пыжыны гинэ араз кулэ 150 тонна. Тӥни малы Удмуртия мукет регионъёстӥ тысь утчаса ветлэ. Сое басьтӥськом Ставропольеысь но Кубаньысь, Татарстанысь но Башкириысь, Сибирьысь, Курганысь, Казахстанысь. Чабейлэн дуныз ялан будэ. Ӵошатон понна: 1996 арын тоннаез 700-900 манет ке сылӥз, 1998 арын вуиз 3200-озь. Талы муг сётӥз кӧс ар. Туэ но интыен-интыен ю-нянь му вылаз ик сутскемын-пыжемын, озьыен, тысьлэсь дунтэмамзэ возьманэз ӧвӧл. Тӥни малы сукыри нянь ар кутскем дырысен 70-80 процентлы дуно дуиз. - Магазин ӝажыосысь нянь уз быры, калык медаз шугъяськы, - оскытӥзы журналистъёсты пресс-конференцие лыктэмъёс. - Республикаын котьку но 12 нуналлы чаклам пызь вань, ю тысь вуэ. Азьвыл аръёсы сямен, адямиос мултэс сукыри уг окто, нянь нормалэсь ятыр уг кошкы. Зэм, пызь вузан йылӥз. Кеньыръёс сярысь. Соос но нянен ӵош дуноязы. Вить пӧртэм кеньырез асьме дорын изо. Озьыен, йыды, сезьы, чабей кеньыртэк ум кыле. Нош дунъёс тэтчалозы но берен интыязы пуксёзы. Сахар песокъя ке учконо, со ар ӵоже кӧня пумо но ӧз пӧртмаськы? Басьтӥсь ӧвӧл ке, дунъёс ас кожазы уз шудэ. Журналистъёс вазиськизы пӧртэм юанъёсын. - Европаысь вуэм чабейлэн кыӵе ӟечлыкез? - Ньылетӥ сортъем, нянь пыжыны мынэ, кеньыр уг пӧрмы. Изоно пызе ватсаськом вылӥ сортъем чабей. - Няньлэн шӧмаз со уг шӧдӥськылы-а? - Нырысь-валысь шӧдӥськиз, али дышизы ни пӧртэм ватсэтъёс поныса пыжиськыны. - Урал котырын кытын нянь тужгес но дунтэм? - Курганын но Челябинскын. Одӥг килограммез отын сылэ 4 манет 40 копейка, асьме дрын - 5 манет 80 копейка. Булка дунояз 30,6 процентлы. - Вужмем нянез магазинъёсысь ӵем-а берыкто? - Туж шер, малы ке шуоно, огез но предприятие мултэссэ уг пыжы. - Сарапулын изоно пызьлы ку дунъёс ӝутскизы? - 15 июльысен. - Ӝоген араны потон дыр вуоз. Республикаын кизер эстӥськон тырмыт-а дасямын? - Ӧвӧл. Та ласянь жаляса верано, югдур туж секыт. Колхозъёс, кассаын уксёзы вань вылысь но, басьтыны уг быгато. Сыӵе югдур асьме дорын гинэ ӧвӧл, - тросаз регионъёсын. Дунъёслэн шудэмзы но герӟаськемын му вӧйлэн дуно луэменыз. Ваньмыз ог-огеныз герӟаськемын. Л. МЕДВЕДЕВА. Инкуазь суредъёс Мудӥськисьёс Турынъёслэн кужым басьтыса вылэ ӝутскон, сяськаосын лопырскон дырзы вал ай. Быдэс улос вож буртчинэн воринъяське кожалод. Шутэтскон нуналам асьмелы турнаны висъям нёжалэз эскероно кариськи. Нёжалэ вуи но чабкиськи, быдэс возьвыл гыремын-мудэмын кожалод. Соку ик валатски: кыр парсьёс кунояськыны вуылӥллям. Уго бугыръям сюй вылысь шарак синйылтыны луэ на пытьыоссэс но. Нырысьсэ кыр парсьёсын ваче син луи мон вазь ӵукна. Шунды ымнырзэ инвис сьӧрысь ӧз возьматы на. Котырак вӧлскемын нап, салкымос бус. Турын вылын лач-лач лысву пуке, кӧня ке вамыш лэсьтыса, пыдъёс сучыр-сучыр котмыны вуо. Нюлэс вӧзысь ты пала матэктыку синйылтӥ сьӧдалэс вужерез. Сакгес кариськеме бере валатски: кыӵе ке пӧйшур! Кыре потэм кыр парсь сак эскериське. Мон сое кышкатыса музэн шултыса лэзи. Парсь, мышсэ учкыса-учкыса, бусы пала бызьыны ӧдъяз. Сюрес вылэ потэмез бере гинэ мугзэ валай: сьӧраз сизьым кузя пиосыз бызё вылэм. Сыӵе чырткемесь, ява! Кужмо бызись анайзы сьӧрысь чик уг кылё. Кыр парсьёсты син азе пуктыны шуг ӧвӧл. Асьме гидъёсамы вордоно парсьёсмылэн ӵыжы- выжыоссы уго. Кырын улӥсьёсызлэн пельёссы чоркак сыло, гонзы пештырскемын, тыбыр кузязы аспӧртэмлыко тӧдьыалэс гож кыстӥське. Айыосызлэн туж кужмо вазер пиньёссы. Кыр пудоослэсь улэм-вылэмзэс эскерисьёс пусъемъя, та парсьёс улон интылы сокем уг бырйисько. Кӧттыр гинэ медло. Яратыса сиё пӧртэм будос выжыосты-сугонъёсты, ӟеч кӧттыр луэ пушмульы, тыпымульы. Вуыло кукуруза, кӧжы бусыосы но. Соин ик соос трос изъянтыны шедьто кизем юосты, шер будӥсь будосъёсты. Толалтэ синйылтыны луэ фермаос котырысь но. Гужем тужгес гажало нюр интыосты, ӝокыт нюлэсэз. Отын уго соослы майбыргес, векчи чибиньёслэсь, лузьёслэсь утиськыны ӟечгес. Лыдӟемея ӟеч тодӥсько: айы но мумы кыр парсьёс, пиоссэс утён вылысь, юн сюлмасько. Кионъёс, гондыръёс урдскыку, покчиоссэс котыртэме пыртыса, утьыны султо. Соин ик кионъёслы ӵемысь висись яке йыромыса кылем парсьпиосын гинэ кунояськыны шуд усе. Парсьпиос, быдэ вуыса, асьсэ уллёе ик кылё. Соин ик асьмеос бадӟым уллёосты пумитаны кулэ вал, дыр. Нош озьы уг луы. Арлыдо но егит айы парсьёс пӧлын вир кисьтӥськись жугиськонъёс пуромыло. Сыӵе дыре ог-огзэс адӟемпотостэм каро соос. Соин ик кудӥз-огез кузъяськыса палэнске. Таӵе шукыръяськонъёс ӵемысь ортчыло сюанзэс шудон дыре. Арлыдо айы кыр парсьлэн улэм-вылэмезъя вазер пиньёсыз ныжомо, жугиськыны, ас данзэ утьыны кужымез уг тырмы ни. Сое шӧдыса, егит айыос ас атайзэс уллёысь улляло. Мӧзмыт но вожпотон мылкыдын ортчытэ ни берпум аръёссэ мултэс луэм парсь. Огназ калтыртэ со, сиён утчаса. Кыр парсьёс быдӟалазыя сокем ик бадӟымесь уг адско. Нош эскерисьёс пусъё, пумиськыло, пе, 320-360 килограмм секталаемъёсыз но. Кыр парсьёсты чакласагес утё. Пӧртэм висён черъёс, кион-гондыръёслэн пинь улазы шедён сяна, соослэн сӥленызы гусъяськыны мылкыд каро пӧйшурасьёс, браконьеръёс но. Соин ик соосты нимаз лицензиен гинэ ыбылыны лэземын. Н.Турин. Наталь Нылпи быдэсме семьяын Кемалась ик ӧвӧл, вурӟем газетъёсме чаклакум, нош ик син шорам йӧтӥз Галина Савиналэн "Тон мынам луод" материалэз. Мон сое огпол лыдӟи ни вал но соку ик малпанме ӧй гожты. Собере, ӧйгес оскы, со зэмос улонын луэм учыр шуыса. Выльысь лыдӟыса, малпанэ воштӥськиз, автор юнме юрттэт курыса уз вазиськы, дыр? Автор туж лэчыт ужпумез ӝутэ татын. Улон урод луэмен, пиналъёс но йӧнтэмесь луо ини. Мон уг тодӥськы, мар карысал со учыре, таӵе югдуре сюрылэме ӧвӧл бере. Собере, азьло егит пиос но нылъёслы сыӵе возьыттэм куронъёсын ӧз вазиськылэ кадь. Малпасько, Гелялы сыӵе курданы уг яра вал Костялэсь, оло, пи сое шӧдыса ик озьы вормытъяське. Пилы валан сётоно, закон азьын кыл кутоно луоз шуыса. Мон малпамъя, туала егитъёс асьсэ поннагес уло, нокинлы соос кулэ ӧвӧл. Секыт югдуре сюрыкузы, специалистъёслэн но визь-кенешсы туж кулэ вылэм, ӧвӧл курдано соослы вазиськыны. Мыным туж тунсыко потэ мар луиз Геляен Костя куспын. Огкыл шедьтӥзы-а соос, ӧз-а? Яке аслэсьтыз кариз-а пияш? Собере, автор ӧжыт гожтэм Костя сярысь. (Геляез тодӥськом, - со - студент). Нош пияш кытын ке дышетске-а, ужа-а? Кӧня солы арес, кыӵе семьяын со улэ, одӥг нылпи-а со? Малы мон сое юасько? Малы ке шуоно, адями нырысь ик семьяяз быдэсме, собере ини обществоын. Мынам аслам но нылы будэ, соин но та учыр туж сюлэмшугъяськытэ. Нуналысь нуналъёс пиналъёс уг кылзӥсько анай-атайёссылэсь, уг кышкало ог-огзэс вӧсь карыны, йыруж лэсьтыны. Паймисько, малы нокин ик ӧз вазиськы нылмуртлэн куронэзлы, оло, асьмеос сыӵе чурытэсь луэмын ини? Асьмелэн но нылпиосмы утемын ӧвӧл ук сыӵе югдурлэсь. Людмила К. Алнаш черкогурт. Наталь Тодматскон сэрег Аб.306. Удмурт нылкышно, 45/160/56, тӧдьыкысъем, учкымон тусбуё, будэ пие. Ужасько тазалыкез утён удысын. Семья кылдытон вылысь тодматскысал ӟеч сямо воргоронэн - 55 аресозь. Аб.307. Удмурт пияш, 26/167, гороскопея Овен. Улӥсько гуртын, ужасько колхозын, тамак кыскисько, юонэн уг эшъяськиськы, вань аслам хозяйствое. Тодматскысал чебер, веськрес мугоро, ужез гажась 18-23 аресъем нылашен, пумит ӧвӧл одӥг нылпиезлы. Редакцилэсь. Лыдӟисьёсмылэсь ялонъёссэс тодматскон сэреге сётӥськомы, дун басьтытэк. Нимзэс, кытысь луэмзэс газет пыр ум шараяське, ваньмызлэн адресъёссы редакциын. Ялон сётӥсен тодматскыны мылкыд карисьёслы ивортӥськом: адресъёсты ми нокинлы ум келяське. Абонентлэсь номерзэ пусйыса, редакцие гожтэт ыстэ. Нош кинлы ке сӥзем гожтэттэс маркаен конвертэ понэ - ыстомы кулэ адресъя. "Я+Я" Та служба ужа Юкаменскын. Тодматскемды потӥз ке, гожтэ таӵе адресъя: 427630. П.Юкаменское, а/я 10 "СЗ", аб.�... Куронъёссы милям кадесь ик: гожтэттэс маркаен чылкыт конвертэ понэ - ыстозы кулэ адресъя (гожтэттэс янгышаса "Удмурт дунне" газетэ эн лэзе). Абонентъёслэн ваньзылэн одӥг куронзы вань: пытсэс сьӧрын пукылэмъёс медаз вазиське. Воргоронъёс: Аб.� 93. 31/162/55, удмурт, синъёсы куренесь, йырсие сьӧд, гороскопъя Стрелец, ужасько техник-строитель луыса, юонэн уг эшъяськиськы, улӥсько гуртын анай-атаен ӵош. Тодматскысал 25-30 аресозь нылмуртэн, пумит ӧвӧл одӥг нылпиезлы. Аб. � 130. 61/160, удмурт. Пенсионер, кышное кулӥз. Вань аслам юртэ, пиналъёсы нимаз уло. Яратӥсько бакчаын, юрт котырын берганы. Тодматскысал ужез яратӥсь 40-60 аресозь нылкышноен. Аб. � 199. 58/170, удмурт. Кышное кулэмын. Улӥсько райцентрын. Лякыт сямо, учкымон, чылкытэз яратӥсь, вина туж шер юисько. Вань аслам юртэ, гидкуае. Тодматскысал лякыт сямо, керӟегъяськисьтэм, тӧдьыкысъем 40-45 аресозь нылкышноен. Пумит ӧвӧл 10 аресозь одӥг нылпиезлы, улыны лыктоно мон доры. Аб. � 74. Учкымон пияш, 20 арес, удмурт. Улӥсько анай-атаеным ӵош. Яратӥсько крезьгурез, спортэз. Тодматскысал улон интылы ёрмисьтэм 19-20 аресозь сьӧдкысъем нылмуртэн. Пумит ӧвӧл нылпиезлы. Аб. � 236. 25/70/60, Козерог, механизатор, пуктӥсько корка. Сямы лякыт, вераськись, ужаны яратӥсько. Тодматскысал веськрес мугоро 19-25 аресозь нылмуртэн, нылпиосыз медам луэ. Аб. � 370. 65/160, удмурт, пенсионер, фермер. Яратӥсько музъем ужен вырыны, пудо котырын берганы. Улӥсько огнам. Тодматскысал ужез яратӥсь 55-60 аресозь нылкышноен, улыны лыктоно дорам. Аб. � 378. 36/162, веськрес мугоро удмурт, Овен. Ужасько, улӥсько анаен благоустроенной квартираын. Лякыт сямо, чылкытлыкез яратӥсько, уг юиськы, спортэн вырисько. Тодматскысал лякыт сямъем 25-35 аресозь нылкышноен, пумит ӧвӧл нылпиосызлы. Улыны лыктоно дорам. Нылкышноос: Аб. � 0360. Удмурт, 20/168/59, вераськись, яратӥсько керттӥськыны, сиён пӧраны, дышетскеме шор ёзо. Тодматскысал лякыт сямо 20-25 аресозь пияшен. Аб. � 0372. 40/70/74, сьӧд йырсиё, дышетскеме шор ёзо. Вераськись, яратӥсько пӧраськыны, лыдӟиськыны, чорыганы, губияны. Будэ 6 аресъем нылы. Тодматскысал шоро- куспо мугоръем, лякыт сямо, ужез яратӥсь, юисьтэм 39-43 аресозь воргоронэн. Аб. � 0386. 30/152, удмурт, учкымон. Кык нылпие: 10 но 16 арес. Ужасько вузкарисьын. Тодматскысал улон интылы ёрмисьтэм 40 аресозь воргоронэн, винаен медаз эшъяськы. Аб. � 0432. 31/158/59, удмурт, бухгалтер. Вылӥ образованиен, нылылы 8 арес. Урод сямъёсы ӧвӧл, керӟегъяськисьтэм, улӥсько аслам юртам. Тодматскысал дышетскем воргоронэн - 35-45 аресозь, пумит ӧвӧл нылпиосызлы. Улыны лыктоно дорам. Аб. � 0433. 21/168/70, удмурт, тӧдьыкысъем, бухгалтер, дышетскеме средне- специальной. Лякыт сямо, ужась. Вераськись, яратӥсько пӧраськыны. Улон интыме воштыны соглаш. Тодматскысал средне-специальной яке вылӥ образованиен, ужаны яратӥс чылкытлыкез гажась, веськрес мугоро пиосмуртэн - 21-30 аресозь. Аб. � 0499. 36/165. Веськрес мугоро удмурт, картэ кулэмын, нылпиосылы 8 но 14 арес, яратӥсько керттӥськыны. Тодматскысал Глазов городын улӥсь сьӧдкысъем 30-40 аресозь воргоронэн, улон интылы но коньдонлы медаз ёрмы. Аб. � 0500. 29/170, пекарь-кондитер, нылпиосылы 4 но 6 арес. Улӥсько анай-атаен ӵош, ужасько, улон интыме воштыны соглаш. Лякыт сямо, яратӥсько керттӥськыны. Тодматскысал веськрес мугоро, сьӧдкысъем, улон интылы ёрмисьтэм 25-32 аресозь пиосмуртэн. Ӵошатскизы скал кыскисьёс Ортчем арня вискын Завьялово ёросысь фермаосысь чупресъёсыз скал кыскисьёс люкаськылӥзы Совхозный посёлоке. Отын соос возьматӥзы зооветеринария ласянь тодон- валанъёссэс, аппаратэз ӝог кесяны но бичаны быгатэмзэс но ӟечлыко йӧл кыскемзэс. Куинь этапъем ӵошатсконын вормисе потӥзы Людмила Стрелкова ("Подшивалово" ОАО), ёросысь тодмо скал кыскись Надежда Берестова ("Родина" ОАО) но Людмила Петрова ("Правда" ОАО). Нош соосты эскеризы но дунъет сётӥзы ёросысь но шаерысь зооветеринария удысын ужась специалистъёс. Таӵе конкурсъёс ортчытъяны кулэ, дыр, быдэс шаерамы. Озьы скал кыскисьёс ог-огзы сьӧры уиськозы но тросгес ӟечлыко йӧл кыскозы. Нялтас вераса, Завьялово ёросысь скал кыскисьёс ӝыны аръем планзэс мултэс быдэстӥзы. Иське, вань кинлэсь адӟем карыны. Н.ИВАНОВ. Чиньыосын - аспӧртэмлыко суред Дактилоскопияя ивортон - адями киысь чиньыослэн сӥосызлэсь (вирсӥньысъёсызлэсь) аспӧртэмлыко суредзэс возьматон. Нокин косытэк асьсэос сярысь сыӵе ивор сётыны быгато Россия Федерацилэн гражданъёсыз. Югдурез утёнъя ёзъёсын ас мылкыд каремзыя чиньыоссылэсь аспӧртэмлыксэс пусъё улон интызыя куриськон сётэм муртъёс. Адямилэн чиньыосыз сярысь аспӧртэм ивортонэз эскеро паспортъя но визаосъя ёзъёс (службаос). Ас мылкыд каремзыя дактилоскопиез ортчон понна, гражданъёс таӵе документъёс возьматыны кулэ: 1. киысь чиньыослэсь сӥоссылэсь аспӧртэмлыксэс возьматӥсь суредзэс (дактилоскопиез) пусъён сярысь куриськон; 2. паспорт; 3. 14 арес тырмымтэ, озьы ик 14, 16 арес тырмем но паспорт басьтымтэ муртъёс - вордскем сярысь свидетельство. Дактилоскопиез ортчем адямилэн куремезъя, паспортъя но визаосъя службаын ужасьёс сыӵе амалэз ас мылкыдзыя лэсьтытэм сярысь справка сёто. Ас мылкыд каремъя киысь чиньыослэн сӥоссылэсь аспӧртэмлыксэс возьматӥсь суредзэс пусъён мыноз, гражданъёслэн улон интыосысьтызы паспортъя но визаосъя ёзъёсы вазиськыса. Соос татчы вазиськыны быгато улон интыязы пусъён но паспортъёсты воштон пумысен. Паспортъя но визаосъя службалэн ужан дырыз 9 часысен 18 часозь, нуназеян - 13 часысен 14 часозь. Вирнунал - ужантэм нунал, шутэтскон - кӧснуналэ, арня нуналэ. Ф. ПЕТРОВА, Ижевскысь Первомайской РОВД-лэн паспортъя но визаосъя службаезлэн кивалтӥсез. ГАЗЕТ ГОЖЪЯМ БЕРЕ Ныл дандэ эн сёты лёганы 9-тӥ апреле потэм номерысьтыды Галина Савиналэсь "Тон мынам луод" материалзэ лыдӟыса, ас малпанме вераме потӥз. Мынам но улонам со выллем учыр вал. Егит дыръям мон сьӧры ветлӥз одӥг пияш, яратӥсько шуылӥз. Но мынам сюлэмы ӧз берытскы со пала, пумит луи соин ӵош луыны. Соку со монэ кужмысь каронэн кышкатъяны ӧдъяз, яке ачид, пе, сётскы. Юрттэт курыса вазиськи бадӟым агаелы, со ик юрттӥз мыным шуг-секытысь потыны - вераськиз котырам ерись пияшен. Но кызьы мон валай газетысь материалэз лыдӟыса, Гелялэн ӧвӧл бадӟым агаез, озьы ик матысь эшез, кудӥз со вӧзын мед луысал. Нылашлы вазиськыса, тани мар вераме потэ. Геля, тон янгыш ӧвӧл сыӵе югдур кылдэмлы, Костяез но туж ик ултӥ кареме уг поты. Сыӵе ини воргоронлэн сямыз: ас азяз ужпум пуктӥз ке, котькыӵе амалъёсын сое быдэстыны тыршоз. Мон малпасько, Костя бордысьтыз озьы гинэ уз мозмытскы. Соин ик тон интыын мон яке яратоно муртэлы бызьысал (газетын верамын вал, яратоно пияшед Ижевскын улэ шуыса), яке сюанэз возьматэк сётӥськысал солы. Вождэ эн вай меӵак озьы верамелы. Кызьы мон валай, тон пиосын матысь кусып возьымтэ на. Исамтэ шуыса ик Костяез тон борды кыске, луоз, азьланяз но котырад мерскоз. Соин ик, пиосын кӧламтэ ке, нырысез яратон уед мед ортчоз гажано, яратоно муртэныд. Аслэсьтыд ныл дандэ кыӵе ке калгись пимуртлы эн сёты. Вылаз ик, со тонэ уг яраты, ултӥям каре. Костялы ӧвӧл кулэ тынад лулпуш мылкыдыд, сое бордаз кыске мугорыд. Нош сыӵе вамыш лэсьтыны уд ке дӥсьтӥськы, чакласькысагес ветлы, огнад эн кыльылы. Костяез милициен но кышкатыны луоз. Малпасько, анай-атаед тонэ озьы ик валасалзы. Атаед яке матысь эшед соин воргоронэн сямен мед вераськоз. Бутылка но тон солы пуктыны ӧвӧл кулэ - кышкатыса кылдэ кыскон вал со. Бен, Костя, оло, синмаськемын тыныд, но валанэз ӧвӧл кызьы ассэ нылъёсын возёно. Кӧня мон тодӥсько сыӵе адямиосты, соос асьсэды киязы кутыны уг быгато, эриктэманлэсь но уз кепыралэ. Костялы валатон сётоно - аслаз кырсь ужез понна со одно ик кыл кутоно луоз. Адӟисьёс шедьты, котырад мерске, кышкатъя шуыса. Котьма ке но, улонад кылдэм шуг-секытъёс капчиен мед тӧлӟозы. ЮЛИЯ В. Ижевск город. Шинеле, дыр, шудо Секытэн ортчиз Саша Дроздовлэн пинал дырыз. пичиысен ик анайтэк кылиз, войналэн нырысетӥ нуналысеныз ик атаез оже кошкиз. Секыт уж погыльскиз пияшлэн пельпумез вылэ. Бадӟымъёсын артэ со но тракторен ужаз, гыриз, кизиз, нош 18 аресэз тырмон азьын солдат шинель дӥсяз. 1943-тӥ арлэсь ӝынызэ запасысь артиллерист полкын "учёбкаын" ортчытӥз. Бӧрысьгес 2-тӥ украинской фронтын ожмаськиз. Туннэ кадь ик тодаз возе на Полтавщинаысен Днепр шур вамен потэмзэс. Пеймыт но кезьыт уез югдыто пумтэм-йылтэм ыбылонъёс. Йӧ вылтӥ "Полуторкаен" потонъязы шудтэм учыре шедьыса, солдатъёс мырдэм но кызьы улэп кылё. - Шудо шинель дӥсяськем,- тодаз вае Александр Антонович. - Полтаваысен Прагаозь куинь ар ожмаськытозям зол ӧй сӧсырмылы. Жаляса тодам ваисько син азям бырем эшъёсме. Нош ож сюресэз йылпумъяськиз Чехословакиын 1948-тӥ арын. Смоленщина палъёсын вордскем но будэм пияш Удмуртие вуиз. Уго война кутскемлэсь азьло ик Анна сузэрез та пала улыны лыктэм вылэм. Нырысь милициын ужаны кутскиз, нош бӧрысьгес сюлмыз кыскиз тылпу кысӥсьёс доры. Озьы вуиз со Ижевскысь машина поттон заводэ. Тодон-валанъёссэ будэтӥз Молотов (али Пермь) но Свердловск городъёсын. Старшой инспекторын ветлӥз со 1982-тӥ арозь, пенсие потытозяз. Уж дорысьтыз секытъёсты вормыны юрттӥзы Александрлы яратоно кузпалыз, нылпиосыз. Ӝыны даур ӵош улытозязы, семьяын ӧз пурӟылэ керетонъёс. Александр Антонович туннэ шутэтске ни, нош тылпу кысӥсь луыса ужаменыз ялан данъяське. Солэсь кутскем ужзэ Алексей внукез азьланьтэ. Алигес со профессиональной училищеез горд дипломен йылпумъяз но зэмос тылпу кысӥсь луиз. Соин-а уз данъяськы Александр Антонович! Ӝоген "Ижмаш" ОАО-ысь тылпу кысон удыс 70 ар тырмонзэ пусъёз. Та юбилеен ӟечкыласьком вань ветеранъёсты, соос пӧлын Александр Антоновичез но. А.ЕМЕЛЬЯНОВ. А.А.Дроздов. Ӟечкылан! 27 июле вордскем нуналзэ пусъе Шаркан районысь Вортча починка гуртысь Юлия Максимовна Широбокова. Нылпиосыз Аля, Вова но Лёша озьы ик ыордӥськемын та толэзе. Нылпиоссы, сузэр-вынъёссы, матысь ӵыжы-выжыоссы ваньзэсты соосты ӟечкылало вордскем нуналэнызы. Сӥзё шудбуро улон, тазалык, вань шуг-секытъёс ӝоггес палэнскозы котырысьтыды. Шундыез уд возьы пыкъяса Та вакытэ тросаз колхозъёсын но эштосъёсын скал кысконзы радъямын гужем лагерьёсын. Тужгес но трос ужало соос Пичи Пурга ёросын. Сыӵе лагерьёс куд-огъёсыз интыяськемын гуртъёс вӧзыгес, нош куд-огъёсыз - пыдлось нюлэсъёсы. Вуылыны кылдӥз "Уромское" ОПХ-лэн одӥгаз скал кыскон лагеряз. Станокен кысконояз ужа куать группа, озьы бере, куать кузя скал кыскисьёс нуналлы быдэ чылкыт омырен "шоканы" ветло. Со сяна, таяз лагерьын одӥг вошъясьсы, осеменаторзы но ветеринарзы ужа на, нош нюк сьӧрысяз - эшшо тямыс скал кыскисьёс. Скал кыскон лагерь интыяськемын, Уром посёлок сьӧры тямыс иськем мыныса, пичигес гинэ тымет дурысь нюлэскын. Шулдыр интыын кыӵе мылкыдын ужало меда нылкышноос? - Эн но юалэ, эн но вералэ, - огымысь кадь вазизы скал кыскисьёс. - Сюресмы но, ужмы но ялан одӥг - скал кыскон, мынон-бертон. Дорамы бертыса, сиён гинэ пӧраны яраськом, нош сое сиыны ум вуттӥське ни. Семьяосмес но тыро-пыдо адӟыны уг кылды. Толэзь пала нуналаз кык пол скал кыскылӥм, эркынгес но шокчим ни вал кадь. Табере выльысь куинь пол кысконо луиськом. -Шат со урод? - Урод шуыны но луоз меда сое, - веранзэс азьланьто нылкышноос. - Милесьтым ӧз юалэ, косӥзы но тӥни. Котыр ласянь чаклано ке, нуналаз кык пол кыскыкумы, йӧлмы куинь сю литр пала люкаське ни вал, нош куинь пол кысконо луим но - лыдпусмы берен 270 литрозь кулэсмиз. Ма, собере асьмеос но мыныса-ветлыса жадиськом. Вылаз ик, дыртоно луэ шофёръёсмы дыртӥсесь" ке. Шӧмаськем дырзы сярысь веранэз ик ӧвӧл ни. -Скалъёстэс урод сюдо-а, мар-а? Яке эшшо кыӵе ке мугез вань на-а ӧжыт йӧл кыскемдылэн? - Кӧня ке час куспын ма сиыса вуттозы соос? 8-30-сен 11-30-озь, 15-ысен - 19 часозь скалъёсмы тросгес дырзэс ортчыто солань-талань ветлыса, нош нуназезэ шокчыны ик уг луы лузьёсын. Скал кыскыку но аппаратэз ӵем гинэ уськытъяло. Со-а ми понна ыштонъёсын уг берытскы? Уромысь скал кыскисьёс пӧлын азьветлӥсьёс луо Анастасия Рысова, Галина Лопатина но мӧйы ужась Антонида Дьяченко, соос сьӧры уисько Фаина Максимова, Надежда Муканова, Елена Демьянова, Алевтина Михайлова. Скал бызьылытӥсьлэн (Римма Сухихлэн) но, ветеринарлэн (Татьяна Филипповалэн) но сюлмаськонъёссы уно гинэ. Вылаз ик, туэ кунянъёссы лябесь вордско, скалъёссы кунян кушто, лэся. Со ини быдэс гид понна ыштонъёсын берытске. Уждун ласянь но туж уг шумпотто скал кыскисьёсты. Шорлыдын 300 манет котыр уждунзы люкаське, пе. Та дырлы январь толэзьлы 30 процентсэ сётъяллям ини. Уромысь скал кыскисьёс адӟем каро, оло, ӵошатско, шуыны луоз, та хозяйствоысь ик мукет фермаослэсь. Соослэн, пе, бидон миськисьсы но нимаз, уждунзы но трос. Нош уромъёслы кыле на вожъяськон гинэ. Гуртын улӥсьёс коньдон поттыны выро доразы пудо-живот вордыса, картофка будэтыса. Таяз учыре но скал кыскисьёс доразы куное гинэ бертало, шуыны луоз. Та нылкышноослэн, одӥгезлэн сяна, дораз скалзы но ӧвӧл. Ваньмызлэн сямен кузпалъёссы но та хозяйствоын ик ужало. Уждунзэс толэзьёсын уг адӟо. Ярам, семьяосазы пересьёссы вань ке, пенсия чотын уло. Нош ӧвӧл ке?! Кылем арын хозяйство аслаз ужасьёсызлы пызь но сётыны быгатэм вылэм, туэ ке, солэн но дуныз сакыр-песокен ӵошказ ни. Тросаз-а меда хозяйствоосын та вакытэ нуналаз куинь пол кыско? Мынам малпамея, уг, дыр. Уромъёс али скаллы быдэ дас но ӝыны литр йӧл кыско. Нош толэзь талэсь азьло, кык пол кыскыкузы, одӥг литрлы уногес люкаськылэм. Оло, хозяйствоысь кивалтӥсьёслы малпаськоно вылэм та сярысь. Бен, шундыез саникен пыкъяса уд возьы. Югыт нуналъёсмы но пумен вакчиёмозы. Со сяна, дыр вуэмын ни пудо возён гидъёсыз но тупатъяны- выльдыны. Хозяйствоын та ласянь но уг дырто на, шӧдске. В.КУТУЗОВА. Дэриысь "ботфоръёс" Та нуналъёсы Ижын футболъя чемпионат ортче. Отчы дас куинь команда пыриське. Соос пӧлысь кыкез - ёросысь. Огез - Завьялысь "Ботфор", мукетыз - Хохрякиысь "Хохряковская звезда". Ижысь шӧртчиосын ӵошатскыны Хохрякиысь футболистъёслэн ӟигарзы тырмымтэ, лэся. Берпуметӥ интыосын мыно. Нош "ботфоръёс" 16 очко люкаллям ни. Соос таблицалэн шораз интыяськиллям. Кин тодэ, оло, азьлане но тэтчыны быгатозы. Уга ӵошатсконъёслэн ӝыны люкетэз гинэ ортчемын на. Эшшо ке, Дэриысь команда чемпионат ортчемъя пумен выльдӥське. Отчы школаын дышетскись пиосты куто. Таосыз бадӟым агайёслэсь капчигес бызьыло, футбол бусы кузя тупез сэзьгес нуо. Нош нырысетӥ куинь интыез али люко "999" (Ижсталь), "Буммаш" но "Нефтемаш". Н. ИВАНОВ. Журналистъёсын пумиськонъёс Эшъяськелэ "Ижстален"! Толэзяз заводлы 28 сюрс тонна куштӥськем корт кулэ. Ӝыны ар ӵоже республикая бичамын но андан пӧзьтӥсьёслы келямын 23 сюрс тонна, кылемзэ "Ижсталь" утча Удмуртилэн палэнысьтыз. Ӟеч ужамзы понна пусъемын Алнаш, Пичи Пурга но Завьялово районъёс. - Макем трос вуоз куштӥськем корт, сокем ӟеч ужалоз завод, - шуиз журналистъёсын пумиськон дыръя "Ижсталь" ОАО-лэн гереальной директорез, Кун Кенешлэн депутатэз Валерий Васильевич Моисеев. Таиз пресс-конференция ортчиз пырак заводын. Вераськонэ пыриськизы предприятиысь валтӥсь спецалистъёс, директорлэн воштӥсьёсыз, промышленностья но транспортъя министрлэсь ужзэ быдэсъясь Л. А. Курочкин. Кызьы улэ туннэ "Ижсталь", столицамылэн но республикамылэн данъяськонэз? Умой. Тазьы шуэмез али шер ке но кылод, "Ижсталь" ассэ утьыны быгатӥз: уен-нуналэн тырше, андан ӵыжатэ. Продукциез дугдылытэк кошке асьме доры но, Россилэн палэназ но. Корт ваньмызлы кулэ. Огез шугъяськытэ металлургъёсты: ӧжыт вуэ куштӥськем корт, заводлэн "сиёнэз". Нош со ялан кулэ, малы ке шуоно, мартен гуръёс дугдылытэк ӝуало, сутка ӵоже 1,5 тонна пала сырьё кулэ каро. Городысь предпрятиосты та уже кыскыны каньыл: соос асьсэос "шихтаез" заводэ вутто. Берло дыре секытгес луиз гуртоосын, районъёсын кусып тупатыны. Азьвыл аръёсы сямен, кужмысь косӥсь, план пуктӥсь ӧвӧл ни. Соин ик ужлэсь палэнскизы колхозъёс но эштосъёс, школаос но лагерьёс. Андан ӵыжатӥсьёслэн ужзы вылын со юн шӧдӥське. "Ижсталь" ОАО-лэн кивалтӥсьёсыз туэ нырысьсэ пусйизы асьсэлэсь тужгес но оскымон юрттӥсьёссэс. Соос радэ ӝыны арлы йылпумъянъёсъя шедиз куинь район: Алнаш, Пичи Пурга но Завьялово. Вормисьёслы сётэмын быдэн куинь сюрс манет премия. Гуртоос пумиськонысен мылкыдзэс веразы: куштӥськем корт интые умой луысал воштос ёзъёс яке кулэ корт соку ик басьтыны. Районъёсын та ужез ӟечгес радъяно на. Но татын вань одӥг мугез: завод вуись сырьёез радиация ласянь юн эскере ке, котькудаз приёмной пунктын таӵе приборъёс вал. Тӥни малы "Ижсталь" ачиз кыл кутыны тырше куштӥськем кортэз люкан понна. Андан ӵыжатӥсьёс шихта утчало пӧртэм интыосысь, республикалэн палэнысьтыз. Ваё Татарстанысь, Башкортостанысь, Ульяновскысь... - Ми шумпотӥськом котькуд тонналы, котькыӵе кортлы, - шуиз В. В. Моисеев. - Соин ик газет пыр вазиськиськом вань хозяйствоослы, школаослы, юрттэт курыса. Предприятие пунэме уз кыльы. Журналистъёс вуылӥзы 18-тӥ, 23-тӥ, 30-тӥ цехе. Асьсэос адӟизы, кыӵе продукция поттэ завод. Огез но со складъёсын уг кылльы, дугдылытэк кошке Россиысь заводъёслы но кунгож сьӧры. Трос заказ вуэ Америкаысь, Франциоысь, Канадаысь, Испаниысь но музон интыосысь. "Ижсталез" дуннеын тодо, синмасько андан ӵыжатӥсьёсмылэн кисьтэм кортсылы. Соин ик предприятие рынокын ассэ шедьтӥз, ужасьёссэ утьыны быгатӥз, экономиказэ юнматӥз. Удмуртия понна со туж умой. Л. МЕДВЕДЕВА. Тодэ ваён Эшъяськытӥз ож Та учыр одӥг тулыс ӝытэ вал. Дышетскисьёсыным кенешыкум, соослы ивортӥ: "Толон гинэ, куамын одӥгетӥ мартэ, кулӥз СССР-ысь кышкытлыклэсь утиськонъя министр Советской Союзлэн Маршалэз Родион Яковлевич Малиновский". - Виктор Петрович, нырысетӥ апрелен валче озьы маскаръяськиськоды, дыр, - ӧз оскы сержант Андрей Заремба. Озьы ке но, мынам визьмо дышетскисьёсы, Галина Катаева но Нина Дудырева, веразы: Р. Я. Малиновский, зэмзэ но, кулӥз но, со сярысь ивортӥзы радио пыр. Дышетскисьёсы соку ик улӟизы. Мон верай соослы дано полководецлэн Советской Союзлэн кык пол Героезлэн Родион Малиновскийлэн улон сюресэз сярысь. Родион Яковлевич армие кошкиз ас мылкыд каремезъя 1914-тӥ арын. Красногорск районысь Тараканово гуртын вордӥськем удмурт воргоронэн Никифор Васильевич Филипповен ӵош кемдэм одӥг ротае. Нырысьсэ пумиськи та адямиен мыным тужгес дуно нуналэ - 1950-тӥ арын 24-тӥ сентябре. Соку мон ӝыт ужась витетӥ школаысь укмысэтӥ класслэн дышетскисез луи. Ӟеч сюлэмо воргорон мадиз милемлы кемалась ортчем нуналъёс сярысь. 1914-тӥ арын гужем Балканын кутскиз ож. Германилэн ожгарчиосыз вуыны ӧдъязы Париже. Францие, солэсь шоркарзэ утён вылысь, Россиысь вуиз Буро генераллэн экспедиционной корпусэз. Отын трос вал Ватка губерниысь адямиос но. Россиысь солдатъёс возьматӥзы батыр луэмзэс: соос утизы Парижез тушмонлэсь. Никифор Васильевич Филипповез нимысьтыз пусйизы. Ньыльдон вить ар талэсь азьло, 1954-тӥ арын гужем, мон вуылӥ Никифор Васильевич доры Тараканово гуртэ. Азьвыл солдат возьматъяз Франциысь ваем туж уно туспуктэмъёссэ. Татын ортчытэм нуналъёс пыраклы тодам кылизы. Велосипедъёс вылэ пуксьыса, куддыр ӵошен ветлылӥмы Малягурт палась вырйылъёсы. Шаермылэн аспӧртэм чеберезлы паймыса, Никифор Васильевич, ваче вераськыкумы, огпол шуиз: "Граждан ож дыръя Малягурт вырйылъёсын нюръяськизы гордъёс но тӧдьыос. Кӧня ке гуртоосы быризы татын. Нош ачим сизьым ар ӵоже Россилэсь туж кыдёкын вал". Кызь вить ар ортчыса, выльысь вуылыны малпай кемалась тодмое доры. Но мынам эше луло вылымтэ ни. Капчи ӧй вал азьвыл солдатлэн улон сюресэз. 1940-тӥ арын сое дауре янгыш каро. Тямыс ар ӵоже чидано луэм Свердловск улосысь лагерьёсын. Нош янгыш каронзылэн мугез таӵе вылэм. Огпол Никифор Васильевич тазьы шуыны шедьтэм: Франциын кияръёс но помидоръёс бадӟымесь, вазьгес кисьмало но. Со понна ик пуктӥллям. Пытсамъёс пӧлын библиотекарь луыса ужам В. И. Ленинэз улонлэсь люкыны малпась Фанни Каплан. Юнме ӧз вералля Никифор Васильевич: "Кылыд 58-тӥ статьяозь вуттоз". Тараканово гуртын вордӥськем унтер-офицер, кышкасьтэм луэмез понна, трос пол пусйылэмын медальёсын. Тямыс ар улӥз Франциын. Собере бакча сиён будэтӥсь, дӥсь вандӥсь-вурись вал. Никифор Васильевич туж данъяськылӥз Р. Я. Малиновскиен, ӵемысь вералляз солэн ӟеч ужъёсыз сярысь. Со гужем ӝытэ ик Н. В. Филипповлэсь вуж туспуктэмъёссэ возьматӥ Васильево школалэн азьвыл директорезлы М. И. Ловкинлы. Михаил Иванович та арбериосты кутылыса шуиз: "Туж дуно ужъёс та. Таос понна тём пеймыт уин лымыё бусыостӥ но нюлэс сюресъёстӥ дас иськем ортчыса но уд жадьы..." Нош кызь витетӥ мартэ, пумиськон нуналамы, ми тодӥмы: Балканын кутскиз выль ож... ВИКТОР ПОЗДЕЕВ. Н. В. Филиппов эшеныз. Сӥлы каро Вавож. Ёросысь загсын ужасьёслэн сямазы пыӵаз ни зарни сюанэз но сӥё-дано ортчытон. Кемалась ик ӧвӧл соос вуылӥзы Южный Какмож посёлокысь Полинёвских кузпалъёсты ӟечкыланы. Загсын ужасьёс сяна, кузпалъёсыз зарни сюанэн ӟечкыланы ветлӥз на ёрос администрациен кивалтӥсь В. П. Абашев. Кемалась ик ӧвӧл зарни сюанзы пумысее шуныт кылъёс веразы Каменный Ключ гуртысь Северюхин кузпалъёслы. Таосызлы ӟечкылан ыстэм Удмурт Республикаысь Кун Кенешлэн Тӧроез А. А. Волков но. Арлыдо кузпалъёсты ӟечкыланын тужгес но дуноез луэ, дыр, сӥлы карон, шуныт кыл веран но капчи мылкыд кузьман. Асфальт кисьто Кема курадӟоно луизы, алама сюресъёстӥ ветлыса, Выль Бия но Зямбай гуртъёсын улӥсьёс. Бен, туннэ нуналлы та сюресэз йылаз-пумаз ӧз вуттэ ке но, ӝынызэ асфальтэн шобыртӥзы ни. Вавож ёросысь сюреслэн та люкетэз понна кыл куто Уваысь сюрес лэсьтӥсьёс. Соин ик, вавожъёсын кенешыса, Вуж Бия гуртозь асфальт кисьтӥзы уваос но, вавожъёс но. Со-а шумпотон ӧвӧл бияос понна? В. БОГАТЫРЕВА. Тон мынам луод Озьы нимамын вал Галина Савиналэн нылашлэн шуг-секыт югдуре шедемез сярысь материалэз. Жаляса верано, Галялы юрттыны мылкыд карыса, кык мурт сяна ӧз вазиськы. Со гожтэтъёс нылашлы аслыз келямын. Эриктэман, кышкатыса кужмысь ултӥян учыръёс улонамы трос гинэ пумиськыло. Соин ик выльысь берытсконо кариським та вераськон борды. Азьланяз кыл сётом специалистъёслы. Тубылов ужа Женеваын "Удмурт кенеш" огазеяськонлэн тӧроез Валентин Тубылов тазэ арняез ортчытоз Женеваын. Швейцариысь тодмо горродын толон усьтӥськиз ООН-лэн дас сизьыметӥ сессиез. Финн-угор калыкъёслэн Консультативной комитетсылэн решениезъя, Валентин Кузьмич огъя заседаниын яке секциын ивортоз Россиысь финн-угоръёслэн улэм-вылэмзы сярысь. Со озьы ик ужалоз ичи лыдъем калыкъёсты ултӥяны сётонлэсь утёнъя комиссиын. Дуннеын асьме ужпумъёс сярысь ватсаса тодон мултэс уз луы. И КРИЧЕВ. Туэ - арлыдоослэн арзы Тылӝулэн шокамез гуртъёсы сузьтӥськиз - Ӝыны ар лыктӥськод ни, - таӵе кылъёсын пумитаз монэ Матрон апай. Огназ ке но улэ, азбарез сюлмо утялтэмын, ӝикытлыкез чакламез соку ик адӟиське. Корка пушказ но чылкыт, ваньмыз лачмыт интыямын. Азь сэргын, вашкалаослэн сямен, ӝӧк. Со вылын шораз ик чилясь самовар сылэ, пырисьёсты чаен утялтыны котьку дась. Ӝӧк вадьсын - мудор. Секыт улонэз адӟемын та кышномурт, инмарлы осконэз но юрттӥз, дыр, солы ваньзэ чиданы. - Йыр кур, кӧт ӝож. Толэзяз 12-18 манет басьтылӥм ук, трудоденен ужам. Азьло кытын дуно уж вал, кытысь пенсия потоз?- чабкиське со. - Али нош, дуно ужын ужаса, пенсия но бадӟым басьто. Нокин но сое валаны уг тыршы. Ойдолэ ӵошен ортчом Матрон апайлэсь улэм сюрессэ. Матрёна Терентьевна Бектуганова вордскемын 1929 арын. Дядяез кибашлы вал, туж чебер кут кутаз. Нэнэез арня гинэ дышетскем: кин черсоз, куоз, тыныд дӥсь вуроз шуыса нэнэй-дядяез лэзиллямтэ. Одӥг гинэ нылзэс Матрёнаез дышетэмез потӥз. 1936-тӥ арын нылаш школае мынӥз, 4 классэз быдтӥз. Удалтӥз солы дышетӥсьёсын. Лыдӟон- гожъянлы, географилы, кырӟан-эктонлы дышетӥзы соосты. 1939-тӥ арын тетрадьёс но чернила но быриз. Шӧдскиз, лэся, Финляндиен война. - Вуж книгаосы гожъяськиськом вал, сулэсь, горд кушманлэсь чернила лэсьтыса, - вера Матрон апай. - Кечпи Микунь со войнаысь посылкаен тетрадьёс лэзем. Кыӵе шумпотӥм! Ачиз нош, куанер, контузие шедьыса бертӥз. 4-тӥ класс бере ужаны кутским ни. Али дас куинь аресъем пиналъёс ужез нокыӵе уг валало на, вал доры мыныны кышкало - мон соку геры кутӥ ни. Война дыръя Матрон апай эшеныз Шарип Юляен фермаын ыж сюдыса улӥз. Сиён ӧвӧл. Турын кабан бервылэз, сисьмем турынэз сюдыса, 29 ыжпи кулӥз. Кӧня веразы фермаен кивалтӥсьлы, сиён ваёно шуыса - пеляз ӧз поны. Судэтӥ кысказы со понна. Но арлыдзы тырмымтэ нылъёсты судья янгыш ӧз кары. - Озьы пичи дырысен судо-быжо луиськиз, - лулӟиське Матрон апай. - Сиёнлы ёрмыса, адямиос скалъёссэс Атабае нуыса, ньыль пуд пызен вошъязы. Кӧнялы гинэ со тырмоз шуыса, нэнэй скалмес ӧз нуы. Солэсь коть йӧл, аръян сюре вал картошкаез, кӧмеч нянез гылтыны. Дядяйме нош трудармие басьтӥзы. Висись вал, гуртын толэзьлэсь кема улӥз. Со понна тюрьмае пуктӥзы. Ижевск заводысь самой секыт 74 номеро цехын ужаз. Квартираысен уж дораз быдэс час мынэ вылэм висись пыдъёсыныз. Дас кык арескысен Матронлы секыт ужез быдэсъяно луиз. Юртлы быдэ сямен дас вал, дас скал утялтыны юнматӥзы. Куро ӧвӧл, липетысь курыса, парыса сюдӥзы. Соин кужым пыроз-а? Валъёслэн султэмзы уг лу, синкылиен бӧрдо. Ныр улазы куро тырылӥзы, кылльыса коть мед сиськозы, пе. Нош коӵо-куакаос нульӟылэм мугорзэс отын ик кокчало ни. Пыд йылазы султыны быгатӥсь валъёсты усемлэсь кык палтӥз гозыен кутыса возизы. Озьы ик ужазы, гыризы, усыязы. Герыез кӧня ке кыскыса, жуммем валъёс дугдо шутэтскыны, йырзэс ошыса ашкымен бӧрдо. Гырисьёс но, жальзылы чидатэк, валзэс чыртытӥз ӟыгырто но изнэссэ котто. - Война дыръя ӧм адӟе одӥг пуляез но, тылэз-ӝуэз но, но самой секытэз йӧтӥз гуртлы, - пыдлось шокче кышномурт. - Дорын улонэз адӟыса ӧм вуттэ. Шунды пуксем бере гыремысь бертӥсько, нэнэе - арамысь. Пеймытэн скалмес кыскиськом. Нош бригадир ветлэ ни, культо люканы косыса. Мар карод? Суралтэммес сииськом но - нош уже. Зол ужато вал калыкез. Нош ужам понна - трудодень, пуньыен-стаканэн пызь. Кисаль суралтыны сяна уг тырмы вал. Пызьлы ёрмыса, кӧмеч нянь пыжылӥзы, потэн, пӧзьтэм картофка кӧмеч сурам маке. - Ӟигармы ӧвӧл ни, таӵе нянен ужаськом, - сётэм одӥг пол нэнэез кӧмечсэ бусытӥ ортчись районысь уполномоченнойлы. Паймем соиз: - Кивалтӥсьты шуиз, килограммен, пе, нянез люкиськом - малы таӵе нянь сииськоды? Ужен зӥбем калыклэсь няньзэ кыскало вылэм гуртысь кивалтӥсьёс ик. Уполномоченнойёслы соос возьмато нянез килограммен люкылэм бумага, нош граммензэ - ӝӧке вато. Асьсэлы - уробоен, калыклы - стаканэн. Нылпиоссэ сюдыны ёрмем кышномурт сюре ке сузь мында юэн - пытсэт сьӧры келяло. - Война Аксакын гинэ вал, мукет азьын таӵе ӧй вал, - лулске Матрон апай. - Тани Аксак починкаын но (Куюкын) нянез обидьытэк люкыло вылэм. Война зол куасалтӥз кышноосты. Бусы уж но, юртъер котыр но - ваньмыз соос вылын. Вить бригадаен гыризы-кизизы колхоз бусыез. Шулдыр ужазы, война ке но. Котькинлэн но аслаз пинал дырыз шулдыр потэ вал, - тодаз вае Матрон апай. - Жадьыса ужам бере но кырӟаны-эктыны вис шедьтылӥм. Война бере но кышноослы шутэтскон ӧз сюры. Аксаке калыкез, мукет гуртъёсысь сямен ик, 1946-тӥ арын Постол йылэ нуизы нюлэс кораны. Лыктэмъёсты кунокуае интыязы. Корка пыремъёс паймизы ӝӧк вылысь няньлы: со быдӟа узырлык! Нош асьсэос пырдэм кӧмеч няньзэс пуйыысь кырымен поттаса сиё. - Малы няньтэк сиськиськоды? - юало кузёос. - Милям няньмы сурагат, - шуо, пе, таосыз. Ужысь суч котмыса берто, дӥськутсэс гур борды ошыло уйлы. Ӵукна кузёос сайкато: - Султэ, гур ӟырдаз! Гом ӝуась гурлы но паймиллям аксакъёс: - Милям таӵе уг ӝуа. Ми кот силёез гурын куасьтыса эстӥськом, лыс тыриськом пу ӧвӧлэн. Абдраллям кузёос, бадӟым нюлэс дорын уло бере, соос пулы уг ёрмо вылэм - лэсьтӥськонлы мынӥсь кызъёсын эстылӥзы гуръёссэс. Нюлэс корасьёс кӧлыны бушен ӧз бертылэ - пуэн. Кӧлась возисьёслы государство номыр но ӧз сётылы. Кубометр нюлэс кора но вал. Тырмыто ке нормазэс, 500 грамм нянь сёто карточкаен. Ужась муртлы со тырмыт ӧй вал. "Ледянка" сюрес вылтӥ валлы быдэ одӥг поттэмен 12 кубометр пуэз кыскылӥзы чугун сюрес доры. Лучкиен, бычкиен погыръязы зӧк нюлэсэз. Шпалалы 6 метръем вандылӥзы, шахтаослы - 4 метръем, паровоз эстыны - 1 метръем. Коньдон ӧз тыре, трудоденьлы ужаськоды, пе. Курчумын кораськыкузы ни 1950-тӥ арын быдэн 32 манет сётӥзы. 1956-тӥ арын кораськон быриз. Берлозэ нюлэс погыръязы старозятчинской ёросын, Коробовка гурт дорын. Улӥзы староверъёс дорын. Лумповской леспромхозэн кивалтӥсьлы Матронлэн ужамез кельшем: - Кыль, тазьы корано уз лу ни, эстакадаос вылын гинэ ужалоды. Ӧз кыльы, дор палэз кыскиз. Нюлэскысь бертыса, гурт калык капчигес шокчиз. Улон тупатскыны ӧдъяз. Колхозъёсы тракторъёс, комбайнъёс, машинаос вуыны ӧдъязы. Пиосъёс музъем уж борды, лэсьтӥськонэ кутскизы, кышноос - пудо борды. Матрон валъёсты утялтӥз, скал кыскиз. Уждун 60-70 манет сёто вал. - Ӟырт кезьытэн бусыын, куро люк котырысь лымыез пазяса, дӧдьые тырем вань, - тодаз вае Матрон апай. - ДТ-54 трактор буксовать каре, солы но сюрес усьтыны кулэ. Воз вылын бертыса, пӧсяммес тӧлӟытӥськом ни. Озьы скалъёсмес сюдылӥм, йӧл поттӥм. 1969-тӥ арысен Матрон апай школаын ужаны кутскиз. Дасо аръёс ӵоже мукет техничкаосын ӵош дышетӥсьёслы пу дасяса улӥз. Нюлэскы кошкыкузы, школаысь вань уж дежурной вылэ кыльылӥз. Ужез уйшор берозьлы тырме вал - пу пыртано, гуръёсты эстоно, выж миськоно, интернатысь пиналъёсты эскероно. Уждун 70 манет басьтылӥзы. - Акулина Ивановна Захарова, школалэн кивалтӥсез, милемыз уродлэсь но, умойлэсь но ӧз кельты, - вера кышномурт. - Со дыръя концертэн но ветлӥськом вал Пургала. Валалляз милемыз. Корказ пиосмуртэн улыны кышномуртлы инмар ӧз сёты. Озьы ке но, кык нылпи будэтӥз. Зоя нылыз Кечейылын улэ нылпиосыныз. Олёш пиез воргорон дыръяз бырыны сюриз. - Тани нош огнам кыли, улӥсько, инмар юрттэмъя, - лулске со. - Пичи дырысен весяк ужаса будӥ, кытчы косо - мынӥсько вал, ӧй пыкиськы. Со понна ик 1947-тӥ арын "За трудовую доблесть" медаль сётӥзы. Куинь соос мынам, нэнэелэн но сомында ик. Ӟеч улӥськом шуиськом: ваньмыз гуртамы будэ, ческыт нянь сииськом, ӧжыт ке но, пенсия сёто. Талэсь урод улон медаз лу ни вал. Войналэсь инмаред мед утёз, солы оском ни - сайкыт ымнырын быдтӥз веранзэ улэм-вылэм кышномурт. В. БАЙМУРЗИН. Пичи Пурга ёрос, Аксакшур. "Сьӧд кышетэ тӧдьы луиз..." Каракулиное ветлыкум тодматски сабырлы, йӧно кузпалъёсын - Зоя Максимовна но Александр Спиридонович Мельниковъёсын. Александр Спиридонович Можга палась вуэм татчы. Дас куинь ар пала "Прикамская правда" газетэн кивалтэм. Культура удысысь дано ужась ним сётэмын. Нош Зоя Максимовна - Алнашысь. Можга педучилищеез йылпумъяса, куамын куать арзэ школаын ужам. РСФСР-ысь дано дышетӥсь. Каракулино ёросын али ог сӥзьым сю пала гинэ удмуртъёс лыдъясько. Озьы кузпалъёс быдэс улонзэс ортчытӥзы, шуыны луоз, ӟучъёс пӧлын. Со сярысь кӧтыз ӝоженгес тазьы вера Зоя Максимовна: - Удмурт ёросын улэме потэ вал, но ӧз кылды. Кузпалме партшкола бере татчы, Каракулиное, келязы. Удмуртъёслы ми пайда тросгес сётысалмы кадь потэ. Туж яратӥсько удмурт кырӟанъёсты, такмакъёсты. Нош кыӵе чебер асьмелэн дэреммы! Можга ёросысь Выль Юбера гуртысь школаын ужакум, котькыӵе ужрадъёсы, праздникъёсы удмурт дэремен потӥськомы вал. Табере ваньмыз огкадь дӥсясько. Уд тодма ни, кин со: удмурт-а, ӟуч- а, бигер-а... Кузпалъёс пинал дыръязы ик пӧртэм самодеятельной кружокъёсы ветлӥзы. Кыкназы ик кырӟаны-вераны туж ярато. Нош Александр Спиридонович ачиз ик кылбур гожтэ, солы гур пӧрмытэ но баянэн шудыса кырӟа. Вӧзаз кузпалыз итӥське. Озьы - быдэс улонзэс. Каракулиноын кузпалъёс ӧз вунэтэ ас кылзэс, йылолъёссэс. "Фронтовикъёслэн куаразы" нимо хор кылдытӥзы, ӟучъёсыз но удмурт кырӟанъёслы-эктонъёслы дышето. Нош Александр Спиридонович, Каракулинолы сӥзьыса, сое данъясь кырӟан гожтӥз. Табере сое та палан пичиез но, бадӟымез но кырӟа ини. - Куное лыктӥськом ке, ӝӧк сьӧрын тазьы кырӟаськом вал, - шуэ Зоя Максимовна: Сиеммы бон потӥз шат но. Юэммы бон потӥз шат? Ӧз поты шат тӥледын валче, Ой, улэммы? Ӟеч муртлэн но ӝӧк сьӧръёсаз Пуксён дыръя, туганъёсы, Уг лу меда ӟеч кылъёсмес, Ой, вераммы? Ӟеч кылъёсыз, ой, вераны Ӟеч мурт кулэ, эшъёсы. Ми ведь ӧвӧл ӟеч муртлэн ук Али но нылыз-пиез. Ӟеч муртлэн но нылыз-пиез Ми ке гинэ ӧй луысалмы, Ӧм пукысалмы ӟеч муртлэн ук Ӝӧк сьӧръёсаз. Ӵуж полыштоп, вож полыштоп, Ми ке юим, буш кылёз. Ми кошкем но, ой, беръёсы Тӥляд кӧтты ӝож кылёз. Туж уно но сиимы но, Туж уно но юимы. Ӧм шедьтэлэ ӟеч кылъёсмес Али ке но вераны. - Нош кӧня такмакъёс тодӥськомы вал! Соос йырысь али но уг кошко. Тӥяй, тӥяй бадьпу ньӧрез Тӥяй ке но, ӧз чигы. Малпай, малпай со туганме, Малпай ке но, ӧз кылды. Кытчы ӵоги, отчы усиз Вудур бадьпу шелепе. Кытчы шудӥ, отчы кылиз Со яратон туганэ. Ой, туганэ, туганэ но, Кудпалан тон, туганэ? Шунды шудэ весь вадьсад но, Уг лу мынса адӟеме. Синмы сузён, ой, интые Киосы ке сузьысал. Вань яратон туганъёсме Огазе ӟыгыртысал. Даур меда дауре но, Сяська меда дауре. Даур ке но, ортче, дыр, но, Сяська ке но, тӧлӟе, дыр. Зарни луэмед потӥз-а, Азвесь луэмед потӥз? Зарни кадь ик туганэныд Люкиськемед потӥз-а? Зарни луэме уг пот вал, Азвесь луэме уг пот. Зарни кадь ик туганэлэсь Люкиськеме уг пот вал. Зарниез но, азвесез но Ужаса ми шедьтӥськом. Ужаса уг лу шедьтыны Та яратон туганэз. Та яратон туганэз Ужаса ке шедьтысал, Уез-нунал кӧлытэк, дыр, Али но мон ужасал. Мак сяськаез кизи вал мон Бакчаез шулдыртыны. Кытчы бон кыли меда мон Тӧлӟемзэ, ой, адӟытэк? Туганэным кушласьки вал, Уг люкиськы шуыса. Кытчы бон кыли меда мон, Люкиськемме шӧдытэк? Ой но, ой но, шуисько но Кырӟан капчи карисько. Оппа! оппа! шуисько но Эктын капчи карисько. Тон толон ӝыт кытчы ветлӥд Сари валдэ кыткыса? Ми но озьы ветлом али, Чебер пиез утчаса. Бур пыдылы мар-о луиз? Улмо чибор вал лёгиз. Туганэлы мар-о луиз? Мон шоры уг вазьылы. Йӧнтэмъяськом, визьтэмъяськом - Тожо визьмо уз шуэ. Тодэм калык ӧз ке басьты, Тодымтэзэ алдалом. Тӧдьы айшетме керттыса, Кусъёсме ӝикатыса, Кин шоры бон мон вазём на, Тонэ кадь яратыса? Сьӧд кышетэ тӧдьы луиз, Оло, лымы усиз-а? Пинал йыры мыкыртӥськиз, Оло, кайгу зӥбиз-а? Сие меда туганэ но, Юэ меда туганэ? Сие ке но, гуньдэ, дыр, но, Юэ ке но, воньдэ, дыр. Изе меда туганэ но, Пуке меда туганэ? Изе ке но, вӧта, дыр, но, Пуке ке но, малпа, дыр. Сьӧд атаслэсь, ой, чортэмзэ Поезд куара кожад-а? Поезд куара кожад-а но Туганэд бертэ кожад-а? Галина РОМАНОВА. Владимир БЕЛОМОРСКИХЛЭН туспуктэмез. Наталь "Егит семья - туннэ но ӵуказе" конкурсэ Анай-атайёсты кузпалъя нылпи Пинал нылаш секытоме, яратӥсь пилы номыр уг кыльы ни, кышнояськон сяна. Куд-ог дыръя нылмурт ачиз но валаса уг вутты - яратон-а вал со, оло, синмаськон гинэ. Соин но, вылды, кӧня ке дыр ортчыса, егит семья куашка. Нош Надялэн шудо улонэзлы осконэз уг кысы. - Надя, кызьы малпаськод, кузпалэныд ог-огдэс шедьтӥды-а? Оло, со синмаськон гинэ, тон туж пинал ук на? - Синмаськон гинэ ӧвӧл, со бадӟым яратон, нош яратон но синмаськон туж висъясько. Яратӥм ог-огмес - кузпалъяським. Вал азьло синмаськоно пиос, но со пумен сӥя-быре, нош кузпалме гажан, яратон весь гома но гома. - Ваньзэ выльысь берыктыны луысал ке, али улонысьтыд марзэ ке воштысалыд-а? - Мон туж шудо адями, малы ке шуоно, мынам вань яратӥсь кузпалы, пиналмы. Нош школа сярысь ке верано, кызьы но озьы йылпумъяй. Тазалыке номыр ӧвӧл, мар кулэ на эшшо шудо улон понна? Ваньзэ выльысь берыктыны луысал ке но, номырзэ ӧй воштысал. - Нош кызьы тӥляд уксё ласянь? Ачид уд ужаськы, пичи сузэр-вынъёсыд вань на. Кызьы со шуг-секытысь потӥськоды? - Картэ ужа ке но, зэм, уждун ичи басьтэ, сое но дыраз уг сёто ай. Каллен тыршиськом улыны - озьы но, тазьы но. Зэм, туж секыт, нош мар карод, кызьы ке но улыны кулэ ук, нылмес будэтоно. - Нылпиед луоз шуыса тодэмед бере шумпотӥд яке куректӥд? - Туж кышкай анай-атайлэсь, собере, калык мар шуоз. Озьы ке но, туж зол шумпотӥ, малы ке шуоно, нылпи - со самой дуноез улонын. - Кыӵе со, семьяен улон? - Шонерзэ вераса, со номырин уг висъяськы кадь анай-атай вӧзын улонлэсь. Но нырысь дышыны кулэ мурт семьялы. Асме мон кузпалэн но, анаен нго шӧдӥсько ини. Пичи мурт сямен шудыса улэм уг луы ни. Кузпалъяськиськод ке, рос-прос кышномурт кадь луыны тыршоно. - Озьы ке но, малы сыӵе дыртыса семья кылдытонэз, нылпи ваёнэз? - Малпаськытэк. дыртыса номыр ӧй ужа. Нош гурт калык сярысь ке верано, кырыжгес учко, но со нырысь гинэ озьы потэ, собере дышоно-а, мар-а. Но мыным секыт ӧй вал. Мар ужзы соослэн? Котькудӥзлэн аслаз улонэз, котькуд адями улэ озьы, кызьы солы кельше. - Надя, кыӵеен адӟиськод азьлань улондэ? - Ваньмыз умой луоз шуыса оскеме потэ вылэм. Мон азьлолэсь но шудо луи. Вань кузпалы, пичи нылы, пуктыны малпаськом выль корка. Оло, улонмы но умойгес луоз ай, коньдонэн но шуг-секытъёс уз кылдэ ини. - Шутэтскон вакытады мар кариськоды? Кыӵе ке кылъёсын тонэ кузпалыд мусоя-а? - Шутэтскон вакытмы ӵошен туж шер луэ. Ӵукна вазь ик кошке, ӝыт берозь ужа. Нуназе сиськыны бертылэ. Нош мусоян кылъёссэ котькуд нунал кылӥсько. - Надя, мон ваньзэ умойзэ сӥзисько тыныд, нылыдлы, кузпалэдлы. Юн кужым, капчи мылкыд тӥледлы. Оля НИКИТИНА. Пичи Пурга ёрос, Вуж монъя гурт. Котыр ласянь пайдаё книга Чылкыт сюлэмо яке лул пушсэ дунматон-тазатон сярысь малпаськись муртлэн книгаез, шуысал мон Библия сярысь. Кемалась ик ӧвӧл (1997 арын) удмурт лыдӟись кие вуиз вал "Выль Сӥзён"- Библилэн одӥг люкетэз. Нош солэсь кӧнялы ке азьлогес - 1992 арын - "Ӟеч ивор" (удмурт кылын ньыль Евангелиос). 1994 арын - "Вӧсяськонъёс". Ваньмыз та бадӟым ужъёс нырысьсэ берыктэмын туала удмурт литературной кылэ. Макем шумпотыса пумитазы соосты Инмарез сӥлы карись калык но, асьме тодосчиос но. Угось "Ӟеч ивор" но, "Вӧсяськонъёс" но, "Выль сӥзён" но "Псалтырь" но - со вашкала-вашкала ваньбурез туннэ нуналозь вуттӥсь книгаос. Уката ик дуно со тани ма ласянь: со номырин мертаны луонтэм тодон-валанъёсын, визьмо малпанъёсын асьмеос табере тодматскыны быгатӥськомы, вордскем кылынымы лыдӟыса. Та ужъёссы понна бадӟым тау карыны кулэ святой книгаосты асьме кылэ берыктӥсьлы филологи тодосъя докторлы, Успенье черкысь диаконлы, отец Михаиллы яке Михаил Гаврилович Атамановлы но Библиез берыктонъя Институтлэн Хельсинкиысь филиалаз ужасьёслы, уката ик редакторлы Марья Картанолы. Алигес та эшъёс Инмарлы но адямиослы кельшымон эшшо одӥг ӟеч ужез быдэстӥзы. Соос удмурт кылэ берыктыса поттӥзы Вуж Сӥзёнлэсь одӥг люкетсэ - Псалтирез. Кызьы асьмеос тодӥськомы, Библия кык люкетлы висъяське: Вуж Сӥзёнлы но Выль Сӥзёнлы. Христослэн вордскемез бере нырысетӥ даурын гожтэм Выль Сӥзёнэ пыро: ньыль Евангелие, Апостолъёслэн ужъёссы, соослэн гожтэтъёссы но Иоанн апостоллы Усьтӥськон. Та гожъямъёсын удмурт сямен асьмеос тодматскимы ни вал 1997 арын потэм "Выль сӥзён" книгая. Нош Вуж Сӥзён гожтэмын Христос вордскемлэсь азьло. Татчы пыро Моисейлэн вить книгаез, пророкъёслэн гожъямъёссы но Псалтирь. "Псалтирь" книгаысь унозэ крезьгуръёсты кылдытӥз ог 3000 ар талэсь азьло Вифлеемын улэм Давид эксэй. Еврей калыклэн та сӥё-дано эксэезлэн, кылбурчилэн, пророклэн выжыысьтыз потӥз Мессия - Иисус Христос (Рим. : 3; 2 Тим. : 8). Псалтире пырем крезьгуръёсаз Давид пророк Кузё-Инмарлы вазиське - Тылыс пуктон праздник бере но, коркаез выльдыку но, лулын-сюлмын куалекъяса улыку но, яратонлы сӥзьыса но, субботаез тодэ вайытон понна но... Та котыр ласянь тунсыко книгаен тодматскыса, син шоры соку ик йӧтэ тани ма. Нуналлы быдэ - ӵукна, нуназе но ӝыт - чирдоно книга огшоры удмурт адямилы туж валамон, капчи берыктэмын. Оло, соин но та вӧсяськон гуръёсты огшокчемен лыдӟоно. Кузё-Инмарлы вазиськонъёсты ас вордэм анаедлэн кылыныз чирдыса, амалтэк валаськод: ваньмыз та визьноданъёс но дышетэмъёс - зэмосэсь, соос огшоры адямилы та валантэм дуннеын кызьы улыны сюрес возьмато. Берло аръёсы асьмеос трос вераськиськомы анай кылмес дышетон, сое утён но азинтон сярысь. Та удысын удмурт кылын поттэм Псалтирь уката пайдаё луэ. Угось котькуд анай ас нылпиосызлы нуналлы быдэ вордскем кылынызы вӧсяськон гуръёсты чирдӥз ке, вуоно кивоштӥсьёсмы ӟучомонлы ноку но уз сётске. Наука ласянь чакласа но та книга синмаськымон узыр. Малы ке шуоно, Псалтирез (озьы ик вылӥын верам азьлооссэ книгаосты) удмурт кылберыктӥсьёс туж ӟеч шӧдо анай кылмылэсь аспӧртэмлыкъёссэ но куронъёссэ. Ӵапак та шӧдон ик берыктӥсьёслы юрттэ удмурт кылмылэсь узыр "шыкысъёссэ" усьтыны но та ваньбурез уже пайдаё кутыны. Книгаысь вӧсяськон гуръёсты лыдӟыку, ас поннад одно пусйиськод: макем узыр ук асьмелэн вордскем кылмы! Тани "святой" кылэз гинэ пуштросэзъя кӧня пумо вераны луэ вылэм: дун-сьӧлыктэм (Инмар сярысь), дун-чылкыт (Инмарлы оскись адямиослэн улэмзы сярысь), дун-шектэм (Инмарлы оскись адямиос сярысь). Книгалэн пумаз сётэмын нимысьтыз кыллюкам но валэктонъёс. Ваньмыз со юрттэ "Псалтирез" шугъяськытэк лыдӟыны но валаны. Сьӧлыкъёслэсь чылкытатӥськыны дасяськись удмурт вӧсяськисьёс та книгаез туж шумпотыса пумиталозы шуыса оскисько. Кылтодон удысын ужасьёс но синйылтытэк уз кельтэ, дыр. Нимысьтыз тау карыса пусйыны кулэ: та чебер книга финн христианъёслэн удмурт калыклы номырин ӵошатонтэм бадӟым кузьымзы луэ. Таин валче Псалтирез чирдыны мылкыд карисьёс книгаез черкысь басьтыны быгатозы дунтэк. Римма ЛАПТЕВА, журналист. Емыш чырсалоз яке коньдонлы пӧрмоз? 1-тӥ июньысен шаерамы улонэ пыӵаз табышез азьпала лыдъя басьтэм выт сярысь закон. Пичи ужбергатӥсьёс сое кичабонъёсын ӧз пумиталэ. Законэ воштонъёс но ватсанъёс пыртыны курыса, вузкарисьёс пумитъяськон ужрадъёс ортчытъязы. Кун Кенеше быръем депутатъёс санэ басьтозы-а пичи ужбергатӥсьёслэсь куронъёссэс, созэ ини возьматоз таиз сессилэн ужамез. Нош вузкарисьёс сюлэмшугъясько, возьмало. Соослэсь мылкыдзэс тодон понна вуылӥ "Электротехника" но Глазовской магазиёс дорысь базаръёсы. Тани мар веразы пичи ужбергатӥсьёс табышез азьпала лыдъяса басьтэм выт сярысь асьсэлэсь малпанъёссэс. Светлана Дробинина: - Табере ми толэзьлы быдэ кык сюрс манет тырыны кулэ. Азьвылгес сюрс вить сю луэ вал. Поттэм табышысь кызь тямыс процентэз кошке вал налоглы. Асьмеос озьы но тазьы уж шедьтӥм вал, милесьтым ик нош уксёмес кыскозы. Елена Шмадченко: - Мылкыд ваньмызлэн кадь ик: вань рынокъёс ворсаськозы. Ваньмы дэмен биржае султоно луом. Таскира Галимова: - Мар ужанэз на. Ми нокӧня но ум басьтэ, ваньмыз налоге кошкоз. Лицензиез, налогъя тетрадез берен сётоно но тӥни. Бензин дуноямен-а, мар-а налогез будэтӥзы, валаса ӧй вутты али. Елена Павлова: - Выль закон кутэмез тазьыгес валай: качало милемыз но тӥни. Табере кекатыса возёзы ни эскеронъёсынызы. Кызьы толэзьлы быдэ вить сю манет тыром? Квартирае аслам ӧвӧл, нылпи сад понна тыроно - толэзяз сюрс манет усе. Махмат туж юрттэт курыса кадь ӝожмыт вера: - Тани кык толэзь понна укмыс сю тямыстон манет коньдон тыри. Шуизы: тыри ке выт - ужалод. Адӟом, мар пӧрмоз. Ужано кадь луиз ке, ужалом, ӧз ке - берен Таджикистанэ бертом. Пумитъяськон ужрад дыръя кык нунал куспын кӧня емыш чырсаз. Со понна нокин милемлы уг тыры ук. Уен-нуналэн ужаськом, асьмеос коньдон поттӥськом, ум лушкаськиське. Мар озьы даурто?! Римма Иванова: - Наталья эшеным ми лымшор палась лыктэмъёсын ужаськом. Соослэн нокыӵе документъёссы ӧвӧл, татын уг уло бере. Кызьы соос бумагаосын вырыны кулэ? Нош милемлы кызьы ке но семьяосмес сюдоно. Нокин юнме шорысь таӵе уже уз мын. Кызьы ми толэзяз 445 манет тыр налог тырыны кулэ, нуналаз куамын манет басьтыса? Котькуд вузкарисез нимысьтыз чакласа кутоно вал со законэз, котыр ласянь малпаськыса. Ма, сиён-юонэн вузкарыса кызьы со быдӟа налог тырод? Табере ми государстволы гинэ ужалом на шат? Лушкаськон сяна, мар кыле на. Куанеръёс эшшо но куанермозы. Людмила Петрова: - Табере, пе, вузаны поттэм вузлэн быдӟалаезлэсь налог тыроно луоз. Оло вузаськоз, оло уз яке сисьмыса быроз. Калыклэн но коньдонэз ӧвӧл, нош налог тыр. Кытысь, марлэсь? Шонертэм со. Вузамлэсь басьтысалзы ке, валамонгес ик. Шуом, вуз басьтӥ но кыӵе ке муген ӧй ужа. Мае мон тырыны кулэ? Вузкарисьёслэн мылкыдзы туж лек. Тросэз соос рос-прос валаллямтэ на табышез азьпала лыдъяса басьтэм выт тыронэз. Базаре поттэм вузэзъя выт тыронэз но, оло, 400- 500 манетозь уг люкаськы, но огезъя огез кариське. Табышез азьпала лыдъяса басьтэм выт сярысь законэ воштонъёс пыртымтэ на бере, зэм но куд-огзэ вузчиосты со пачкатэ. Озьы ке но, закон кутэмын, со ужа. Шаерысьтымы 26 сюрс пала пичи ужбергатӥсьёс пӧлысь 5 сюрслэсь ятырез вазиськизы ни вытъя инспекциосы выль свидетельствоос понна. Нош кемагес бабыса улӥсьёсыз закон азьын кыл кутоно луозы. Оскон кыле, Удмурт Республикаысь Кун Кенешлэн сессиез та ужпумез интыысьтыз вырӟытоз. Солы оскыса ик пичи ужбергатӥсьёс люкаськылӥзы Кун Кенешлэн юртэз азе. С.Яковлева. Нырысьёсыз пӧлын Завьялово ёросысь "Подшиваловское" ОАО-ысь нянь утялтӥсьёс нырысьёсыз пӧлын вазь вуись йыдыез кутсаны кутскизы. 27 июльлы кутсамын ни 57 гектар вылысь йыды. Шумпотымон, гектарысьтыз со 18,5 центнерен усе. Туннэ нуналлы бусыын ньыль комбайн ужа. Ӟеч тыршо Вячеслав Баранов, Александр Олюнин, Виктор Медведев но егит камбайнёр Дмитрий Петухов. Ю-нянь ворттонын умой ужало Леонид Никитин но Николай Соловьев. Хозяйствоысь мукет комбайнъёсты та вакытэ тупатъяло но. Жаляса верано, шуг-секытъёс кылдо воштос ёзъёс басьтонын. "Подшиваловское" ОАО сьӧры уиське "Колос"" эштос. Татын вазь вуись йыдызэс погырто гинэ ай. Озьы ик бусые потэмын ини "Путь Ильича" но "Ижевское" хозяйствоос. Таосыз окто-калто вӧё будосэз (рапсэз). Нош ёросысь мукетъёсыз ю-нянь утялтӥсьёс аранлы дасясько гинэ ай. Н.Иванов. Шӧкыч Нуналлы быдэ - сю грамм Котьмар вера но, туннэ улон котькинлы ик секытэн сётске. Тужгес но городын улӥсьёс но начар заводын ужасьёс понна. Асьтэос чаклалэ ай: толэзьем уждунэ 400 манет, кузпалылэн солэсь но ичи - 300-350 манет. Огазеяса, 700-750 манет луэ. Мукет сямен ке чаклано, ог 25 ӟенеликлы тырме. Улыны но луымон кадь, но... Лыдъяны-чотаны кутсконо ке, барыш тӧлъя лобӟе вылэм. Квартира понна тыроно? Тыроно! Сизьым ӟенелик ӧвӧл ни. Тыллы, телефонлы - кыкез кошке, вулы... Со сяна, кузпалэлы но, аслым но проездной билет кулэ на. Одӥг пумо транспортлы басьтоно ке, кыкнамылы вить ӟенелик кошке ини. Пиналмы школаын дышетске на. Солы но проездной кулэ, чыры-пырылы, мороженой кадьёслы яке сиськыны коньдон кулэ - вить ӟенелик кошке. Ма веранэз ини отын дӥськут басьтон яке кинотеатре ветлон сярысь. Созэ уго арлы огпол басьтыны выриськом. Кылсярысь, нылкышно туфли - дас ӟенелик, нылкышно сапег, туфли сярысь, кык, куинь поллы дуногес. Ма, аслым пыдкутчанъёс но дунтэмесь ӧвӧл. Куректыны вазь на. Семьямылэсь вань барышсэ лыдъяса-чотаса улыны кыле на вылэм куать ӟенелик! Мукет сямен вераса, нуналлы быдэ - сю грамм! Со граммдэ табере, оло сиёд, оло юод, оло "пузатыса" возёд. Чиед луыны амал Специалистъёс лыдъямъя, нуналлы быдэ пыдын ветлыса, 7 килограммлы жуммыны луэ. Ветлоно паськыт вамышъёсын но ӝог. Соку сюлэм зол ужаны кутске, мугор мултэс секталаезлэсь мозмытскыны тырше. Нырысетӥ арняяз ветлоно 5 нунал ӵоже 30 минутэн, кыкетӥяз - 5 нунал ӵоже 40 минутэн, куинетӥяз - 6 нунал ӵоже 50 минутэн, ньылетӥяз - 6 нунал ӵоже 60 минутэн. Тырше тросгес ветлыны. Вамышъялэ шаплы. Юоно трос ву, мугорады со тырмыт мед луоз. Дӥсьты люкетӥсь медаз лу. Акыльтэмлэсь кышкаськоды ке, одӥг сюрестӥ ялан эн ветлэ. Ӧжыт сие голькыт но кӧё-вӧё сиен. Тазалык "Ӝуйы бичан сямен висён кутӥ..." Шаерысьтымы эпидемиологъёс кышкатӥзы вал: туэ тулыс, гужем вылтӥ лемтэй висёнэн (клещевой энцефалит) но шыр висёнэн (геморрагической лихорадка) курадӟисьёслэн лыдзы кылем арын ӵошатыса, шӧдскымон йылоз. Веранзы та дырозь ӧз быдэсмы на: куазь юрттӥз, шуыны луоз, лемтэйёслэн лек куртчылӥськон вакытсы ӵапак кезьыт дырлы тупаз. Озьы ке но... Кышкытлык быремын ӧвӧл на. Уката ик шыр висён ласянь. Республикаысьтымы паласькись висёнъёсъя больницаысь инкуазьын кылдэм (природноочаговой) инфекциосъя отделениын ужасьёс таӵе югдурлы дасесь, шӧдске. Отделенилэн кивалтӥсезлэсь ужзэ быдэсъясь врач Т. Н. Соколова верамъя, ӵапак июль- август толэзьёсы висисьёс трос луо, угось та вакытэ тросгес адями сад-бакчае ветлэ, возь вылэ, нюлэскы пота. Тани кӧня ке лыдпусъёс. Ӝыны ар куспын йӧнатӥллям 57 муртэ. Али отделениын кылле 35 адями. Озьы бере висисьёслэн лыдзы чутрак будӥз. Кылем арын шаерамы висем 599 мурт, пиналъёс - 33, арлыдоос - 566. Отделениысь врачъёс шумпотэмзэс уг вато: инмар утиз, пе, миым одӥг мурт но ӧз кулы. Тӥни, иське, кыӵе кышкыт маке со - шыр висён. Мыжыклэсь но пичи пӧйшур - луд шыр (полевка) - таза муртэ но кӧня ке нунал куспын сопал дуннее келяны быгатэ. Вирус палаське, адями кырын-парын кырсь киын сиське, тузонэн шока ке. Тани одӥгез учыр: сад-бакчаын дыръяз пичи пияш шыр кутылыны кутскем. Со гинэ тырмымтэ, куро пыр пӧйшуръёсты шар выллем пелляны кутскем. Валамон, висись шыр соку ик солы вирус "кузьмам". Туж секыт висиз пияш, тодазы ваё эмъясьёс, но утьыны сое быгатӥллям. *** - Татьяна Николаевна, тодӥськоды луоз, та нуналъёсы секыт югдур кылдэмын Ростов областьын. Отын вӧлме тодмотэм висён, нош куд-ог тодосчиослэн чакламзыя - геморрагической лихорадка. Зэм ик-а меда? - Ачим отын ӧй вал бере, вераны шугъяськисько. Но висёнлэсь тодметъёссэ чаклано ке, соос геморрагической лихорадкалы тупало ик. Таӵе висёнлэн вирусъёсыз пӧртэмесь луо. Тани шаерамы, озьы ик Башкириын, Татариын вӧлмем шыр висён дыръя вирус лябӟытэ адямилэсь пекляоссэ (почка). Висён вакытэн-вакытэн кыстӥське. Вирус паласькем бере 3-тӥ - 4-тӥ нуналаз кынмам дыръя кадь адями ӟырда, йырыз висе, ӧскемез потэ. 4-5 нунал ортчем бере, кускыз висьыны кутске, сюэз чидантэм куасьме, трос юэ, но педло потамез уг поты. 10-12 нунал бере, адямилэн кызез трос потыны кутске ни, но кылем- мылемъёс (шлакъёс) мугораз ик кылё. Со возьматэ, пекляос йӧназ уг ужало шуыса. Ми висисез больницаямы 25 нунал ӵоже эмъяськом. Но шонерзэ верано ке, адями быдэсак йӧнатске ӝыны ар куспын гинэ. Пусйыны кулэ, шыр висёнлэн уката ик кышкытэсь бервылъёыз (осложнениос). Луыны быгато инсульт, инфаркт, ты висёнъёс но мукет. Соин ик лябӟемдэс шӧдӥды ке, соку ик врачлы вазиське. Асьтэос асьтэды пыд йылады ӝутыны уд быгатэ. Шыр висёнлэн чылк-чылк вирусэз ас кожаз шедьтымтэ-поттымтэ на, соин ик висисез йӧнатонлэн но кыӵе ке аспӧртэмлыкъёсыз ӧвӧл. Пуктылоно луэ быдэс мугорез юнматӥсь капельница, висёнэн лябӟытэм ёзъёслы, кылсярысь, сюлэмлы но вирсэръёслы юрттон понна сётъяно пӧртэм препаратъёс. Шыр висёнэз эмъяло шаерысьтымы ваньмыз ик инфекционной больницаос но отделениос. Нош трос мурт черланы ӧдъя ке, висисьёсты доразы куто терапияя отделениос но. Угось верам вал ини, йӧнатсконлэн аспӧртэмлыкъёсыз ӧвӧл, собере вирус адямилэсь адямилы паласькоз шуыса но кышкытлык ӧвӧл. - Кыӵе амалъёсын шыр висёнлэсь утиськыны луэ? - Нырысь ик мон пусйысал: котькуд адями ачиз сярысь сюлмаськыны, котырзэ, чылкытлыкез чакланы кулэ. Шуом, тулыс сад-бакчаяды лыктӥды. Утялтӥськоно киын перчаткаосын, ымнырез марля бинетэн ӵоксано. Сиён-юондэс умой-умой ворсаса возе, шыръёс отчы шедьыны медаз быгатэ. Киостэс ӵем но рос-прос миське. Нош кызьы луэ асьмелэн: воргорон губи бичаны мынэ, нюлэскытӥ юмшанъяз кырсь киосыныз пумен тамак пурккетэ. Паймонэз ӧвӧл ни, малы со висьыны кутске. Шыр висёнлэн вӧлмемез возьматэ мукет ужпумез но: котыр улосмы, нюлэсъёсмы кырсесь. Соосты утялтон бордын ум ужаське. - Нош кыӵе арлыдо муртъёс ӵемгес висё? - Азьвыл аръёсы отделениямы данак кыллё вал 20-50 аресъем воргоронъёс. Табере югдур воштӥськиз - трос висё пересьёс. Улонмы секыт луэмен, транспортын дун будэмен, шӧдске, сад-бакчаосы но, нюлэскы но мӧйыос ӵемгес ветло. - Татьяна Николаевна, инкуазьын кылдэм инфекциосын сяна, кыӵе висёнъёсын нюръяськоно луэ на отделенияды ужасьёслы? - Ми йӧнатӥськом на векчи сьӧсь лулосъёсын сэрен кылдэм черъёсты. Тани, Кам шурысь чорыг данакез висись. Нош, тодӥськоды, луоз, чорыганы яратӥсьёс асьмелэн ӧжыт ӧвӧл. Азьвыл аръёсы кезегъян (малярия) воксё вунэмын вал ини. Табере со выльысь "улӟиз", шуыны луоз. Висисьёс данак, ваньзы сямен Азербайджанысь. Йӧнатыны нош соосты капчи ӧвӧл. Уло пропискатэк, Россилэн гражданъёсыз уг луо, нокытчы но взносъёс уг тыро. Озьы бере, ми соосты дунын эмъяны кулэ, нош коньдон тыремзы уг поты. Нялтас вераса, асьме висисьёсты но эмъюм, мукетсэ басьтыны куриськом. Выльдӥськон вакыт, рынок кунгожъёсты "лябӟытӥз". Соин валче кыдёкысь кунъёсысь но "салам" вуылэ. Тани ми пумиськоно луим та палан ноку адӟылымтэ висёнэн - тропической маляриез. Воргорон ужам судноын, ветлэм кыдёкысь зарезьёстӥ, черланы ӧдъям. Ярам, ми сое утьыны быгатӥм. Нош кӧня ке ар талэсь азьло стажировкаын Нижний Новгородын вал. Тропической маляриен висиз 12 мурт, соос пӧлысь куатез кулӥзы. Бен, котькуд адями валаны кулэ, тазалыксэ со ачиз гинэ утёз. Соин ик кунгож сьӧры потыны дасяськиськоды ке - умой чаклалэ, кыӵе странае мынӥськоды, одно ик прививка пуктэлэ. Кыре-паре потӥськоды ке, эн вунэтэ чылкытлык сярысь. *** Больницаысь кошкон азям тодматски висисьёсын. Тани одӥгез - А. И., воргорон, 38 арес. Маде: - Сад-бакчаям мунчо пуктӥсько. Нюлэскы ӝуйы бичаны ветлӥ вал, озьы шыр висён кутӥ. Туж секыт йӧтӥз, кӧня ке сутка реанимациын но вал. Ярам коть, али капчигес ни. Дыры жаль потэ. Гужем ортче ни, нош мынам уже быдэстымтэ на. Сӥзьыл ӝог вуоз ук. Мон мунчоын веникен пырыны туж яратӥсько. Ю. АЛЕКСАНДРОВА. Кун Кенеш ивортэ Пумиськонъёс - Удмуртилэн палэназ 1999-тӥ арын 23-тӥ пӧсьтолэзе Екатеринбургын ортчиз Урал котырысь областьёслэн но республикаослэн экономика удысын ӵош ужанъя ассоциацизылэн советэзлэн кенешонэз. Солэн ужаз пыриськиз Россиысь Правительстволэн Тӧроез Сергей Степашин. Удмурт Республикаысь отчы ветлӥзы Кун Кенешлэн Тӧроез Александр Волков но Правительстволэн Тӧроез Николай Ганза. Эскеремын кык валтӥсь ужпум: "Россия Федерациын интыосын ас коже кивалтонэз но кун ласянь кивалтонэз радъян" но "Урал улосвыллы электрокужым сётон". Ваньзы сямен люкаськемъёс соглаш луизы, интыосын ас коже но государство ласянь кивалтон органъёс куспын шуг-секытъёс кылдэмын. Соос отын ужась адямиос бордысь уг пото. Тырмымтэос герӟаськемын законодательстволэн лябеныз, Россиысь улосвылъёсын закон кылдытъясь но быдэсъясь ёзъёслэсь ӵош ужзэс радъянъя документъёс ӧвӧлэн. Кенеше пыриськемъёс вуылӥзы Нижний Тагил городэ. Отын соос тодматскизы Россиысь одӥгез тужгес но бадӟым обороная заводлэн улон-вылонын кутӥськись продукциеныз, ыбылӥськемзэс эскеризы. 26-тӥ пӧсьтолэзе Кун Кенешлэн Тӧроез Александр Волков ужан нуналзэ ортчытӥз Москваын. Тужгес но кулэез вал машина поттонъя "Ижмаш" - "Шкода-авто" проектэз азьланьтон. Кун Кенешлэн Тӧроезлэн верамезъя, азьланезлы оскон вань, туэ август толэзьлэн кутсконаз та предприятиез кылдытон сярысь кулэ документъёс гожтэмын луозы. Александр Волков пумиськылӥз на Москва городлэн мэреныз Юрий Лужковен. Кенешизы Москваен вузкарон, столицаын Удмурт Республикалэсь представительствозэ лэсьтон, му вӧй компанилэн ужез, М. Т. Калашниковлы сӥзем музеез лэсьтонэ Москвалэн мэриез пыриськон сярысь тупанкыллэн быдэсъяськемез пумысен. Юрий Михайлович "Ижмаш" заводоуправленилэсь юртсэ выльдыны юрттыны мылкыд кариз. Со сяна, Москваысь мэр соглаш луиз на М. Т. Калашниковлэсь 80 арессэ сӥё-дано пусъёнэ пыриськыны. Удмурт Республикаысь Кун Кенешлэн пресс-службаез. Инкуазез утисьёс иворто Оло, барыш ваёз ай Удмурт кун университетысь тодосчиос но "Урал-НИИ-Гипрозем" предприятиын тыршисьёс эскерон ужъёс ортчыто, "Шаркан" инкуазь парк кылдытон вылысь. Вуоно арын мартэ соос быдэсмыны кулэ. Американецъёслэсь улыны быгатэмзэс чакласа, Удмурт Республикаысь Инкуазез утёнъя кун комитетысь специалистъёс дэмлало вуоно паркез, инкуазез утён интылы пӧрмытэм сяна, барыш поттонын но кутыны. Шаркан ёросын спортлэн тол удысъёсызъя но гужем туризмез радъянъя база кылдытыны чаклаське. Таӵе удыс бадӟым пайда вайысал. Оло, куке-соку "удмурт Швейцаримы" шунды пуксён палаезлэсь бере уз кыльы ай. Вотка тыметлы - нимаз саклык Вотка тыметысь вулэн кырсь луэмез кулэ кариз городысь муниципалитетэз Удмурт Правительствое куронэн вазиськыны. Бадӟым городэз вуэн сектась шур асьмелэсь сюлмаськеммес возьма но соин инкуазьлэн нимысьтыз утиськись интыеныз лыдъяськыны кулэ. Шаркан, Вотка, Берёзовка шуръёс но город котырысь вож интыос асьмелэсь эскереммес но утеммес витё. Инкуазез утёнъя комитет юрттэмен, соосты эскеронъя нимысьтыз комитет кылдытэмын. Вотка ёросын республикаын нырысетӥез "Нечкинский" национальной парк усьтэмын. Шӧдске, татысь "вожъёс" тэк уг пуко. Зӧк томъем луиз Алигес Инкуазез утёнъя кун комитетын аспӧртэм адӟытон ортчиз. Сыӵе ужрадлы пӧрмиз комитетэн 1998-тӥ арын "Удмурт Республикаын инкуазьлэн кыӵе луэмез сярысь" бадӟым докладэз "кыре поттон". Соин тодматскизы ужлы вордскыны юрттӥсь организациосысь но предприятиосысь специалистъёс. Соослэн сюлмысь тыршеменызы, доклад паськытаз но секытомиз. Сизьым ар ӵоже пичияк брошюраен потӥсь "Экологический бюллетень" пӧрмиз зӧк томъем ужлы. Музъем кузёос пумит Шаерысьтымы кык районын - Воткаын но Уваын гинэ - быдэстэмын республикаямы нимысьтыз утёно инкуазь улосвылъёсты пусъён. Таӵе амал юнматэмын вал ини 1992-тӥ арын. Со чакламын пӧртэм лулосъёсты но будосъёсты утён вылысь. Али нимысьтыз утёно улосвылъёслэн лыдзы паськытаз. Отчы пыртэмын 350 инты: национальной но инкуазь паркъёс, инкуазь синпелетъёс (памятник) но мукетыз. Соос пӧлысь 162-ез гинэ ужа - Удмуртилэн улосвылэзлэн 1 процентэз луэ. Россия Федерацилэн Президентэзлэн Указэзъя, сыӵе интыос республикаослэн, регионъёслэн, областьёслэн улосвылъёсазы луыны кулэ 3 процент. Музъемъёслэн кузёосынызы огъя кыл шедьтымтэен, уж ӝега. Соос пумит луо нимысьтыз утьыны чаклам интыын музъем ужъёсты нуонэз дугдытыны. Аспӧртэмлыко "Валяй" Выль статус - инкуазь заказниклэсь статуссэ - басьтоз матысь дыре "Урочище Валяй" инкуазь памятник. Камбарка ёрослэн администрациез Инкуазез утёнъя комитетэ вуттӥз соепаськытатон сярысь документ. Туж шер пумиськылӥсь инкуазь синпелет кулэ каре нимысьтыз утялтэмез. Озьы лыдъяло ёросысь депутатъёс но инкуазез утёнъя инспектор. Нырысь-валысь "Урочище Валяй" чаклаське вал вашкала историен герӟаськем дуно инты луыса утиськыны. Уго татын куке-соку вал урал промышленниклэн Демидовлэн дачаез. Отын мерттэмын асьме инкуазьлы тупасьтэм кедр, манчьжурской пушмульы, сливолистной улмо. Нош пыр-поч эскерем бере тодмо луиз: урочище инты дуно инкуазьлэн трос пӧртэм лулосъёс но будосъёс будэтэменыз. Соин ик чакламын татчы инкуазь заказник кылдытыны. Омыр чылкыт медло Кык толэзь мында кыстӥське ини "Чылкыт омыр" ужрад. Кутскиз со 1-тӥ июне. Омырлэсь кыӵезэ эскерон мынэ городъёсысь трос машинаос ветлӥсь ульчаосын. Инкуазез утёнъя комитетлэн экологической эскеронъёсъя но анализъёсъя инспекциезлэн ивортэмезъя, кырсь омырын трос углеродлэн оксидэз, азотлэн диоксидэз но формальдегид. Нош ик тужгес но кырсь омыр Удмуртской но Советской, Пушкинской но Карл Либкнехт ульчаослэн вожвылазы. Кык ар ини тазалыклы кышкытлык ваись кырсь омыр город вадьсы ӧжытгес вӧлдӥське. Озьы ке но, экологъёс йылпумъянъёс уг лэсьто на. Со понна кулэ Гидрометеорологияя но котыр улосэз эскеронъя удмурт центрлэн но республикаысь госсанэпиднадзорлэн эскеронъёссы. "Чылкыт омыр" ужрад ортчытыку, Удмурт Республикаысь ГИБДД-лэн транспортъя инспекциеныз ӵош Инкуазез утёнъя комитетын ужасьёс чаклало кун автотранспортлэсь ӵынызлэсь кырсьсэ. Кылем арын ортчытэм эскеронъя республикаын ветлӥсь транспортлэн 12 процентэз мултэс сурым потто. Туэ но лыдпус пӧртэм уз луы. Н.ЩЕГОЛЕВА, Инкуазез утёнъя кун комитетын ужась. "Даурлэн вирсэрез йыгаське улонам" Адями 70 арессэ тырмытӥз ке, озьыен, со дасо аръёссэ ни "шутэтске". Кызьы шуо, солэн улонэзлэн "шунды пуксён" палыз адӟиське. Сыӵе дыръя жаляны гинэ кыле кадь. Нош та адямилэн ки улаз уж пӧзе, йырыз бадӟым малпанъёсын тырмытэмын, арысь аре книгаосыз печатласько ке? Соку ини таӵе муртлы амалтэк вожъяськон но кылдэ. Ӵапак тазьы вераны луоз тодмо ӟуч прозаик Павел Фёдорович Куляшов сярысь. Кызьлэсь уно повестьёс, романъёс, юбилеезлы выль книгазэ дасяз, азьпаллы эшшо ӧжытсэ вить книга поттыны малпанэз вань. Юбилеез пусъён - со критикъёслэн, литературоведъёслэн йылпумъяса дунъет сётэмзы гинэ ӧвӧл. Со нырысь ик аслэсьтыд ачид кылдэ юан: кыӵе сюрестӥ мынӥськод тон тужгес усто книгаед, геройёсыд доры, мар шуо тон сярысь адямиос? Та ласянь Павел Фёдорович ӟудоно уг луы. Быдэс сюресэныз возьматӥз лыдӟисез азьын кыл кутыны быгатэмзэ. Витьтон ар талэсь азьвыл сое басьтӥзы армие. Службазэ ортчытӥз Владивостокын. Отысен ик кутскиз гожъяськыны. Нырысетӥ вероссэ печатлаз 1952-тӥ арын. Нош солэсь азьло - заметкаос, зарисовкаос, корреспонденциос... Газетэн со улытозязлы герӟаськиз. "Комсомолец "Удмуртии", Киясаысь, Воткинскысь ёрос газетъёс, Чайковскийысь "Камский строитель" (таяз со дас кык арзэ валтӥсь редактор вал), "Удмуртская правда" - таиз газет кызь вить арлэсь кема ни П. Куляшовлэсь веросъёссэ, очеркъёссэ печатла. Газетэ гожъяса, писатель кизэ возе кадь "даурлэн вирсэрез" бордын: шӧдэ улонлэсь кызьы, кыӵе ӝоглыкен визыламзэ, воштӥськонъёссэ. Соин ӵош ик чакламъёсыз, адӟемъёсыз пыро бадӟым жанрен гожтэм произведениосаз. Озьы кылдӥз но 1966-тӥ арын печатламын вал, нырысь ик "Молодая гвардия" журналын, "Камская оратория" повестез. Со гожтэмын, Воткинск ГЭС-эз лэсьтӥсьлэн синмыныз учкыса, пӧсь ужам бервылъёсъя - татын уго Павел Куляшов ньыль ар тыршиз арматурщикын (со дыре ик заочно дышетскиз на Урал университетын). Кытын гинэ ӧз потылэ Павел Куляшовлн книгаосыз - Ижевскын, Пермьын, Казаньын, Свердловскын, Москваын - котькытын ик Удмуртиысь писателез лыдӟисьёс сӥлы карылӥзы, гожтэтъёс вуылӥзы Якутиысь, Азербайджанысь, Новосибирскысь, Минскысь... Нош тужгес но сюлэмысь сюлэме шуккиськыса вӧлмиз "Материнское сердце" повестез, 1971-тӥ арын печатламын вал "Огонёкын", собереяз - "Наш современникын", нош "Советская Россия" издательство поттӥз нимысьтыз книгаен. Юнме шорысь сокем ӧз дунъялэ та повестез, со уго гожтэмын зэмос адями, кышномурт М. Д. Некрасова сярысь, кудӥз будэтӥз, аслыз кариз пӧртэм выжы калыкысь дас одӥг нылпиез. Павел Фёдоровичлэн тыпы кадь юн выжыез Уралысь, вордскемын со Свердловск улосысь Манчаж гуртын. Нош быдэ вуыса кыстӥськиз Удмуртие. Соин ик повестьёсаз но романъёсаз - асьме музъемлэсь кужымзэ, сямзэ басьтэм адямиос. Сое шӧдыны луэ "Медвежий угол" (1968), "Камские зори" (1983), "Легенды и были Прикамья" (1990), "Картофельный бунт" (1996) книгаосысьтыз. Писатель суреда историлэсь тужгес вӧсь вакытъёссэ: ЪВИИИ дауре заводъёс лэсьтонэз, Пугачевлэсь ожен ортчемзэ, Сталинлэсь сьӧсьяськон дыръёссэ ("Было двенадцать разбойников"), Быдӟым ожез ("Солдатки", "Трудный год", "Повесть о землячке"), ожлэсь йӧнасьтэм яраоссэ ("Сухолетье", "В чужой шинели", "Вятские - мужички хватские"). Озьы Удмуртиысь но Россиысь ӟуч литератураез узырмытонэ Павел Куляшов ас визьбур шыкыссэ усьтӥз. Мукет сямен вераса, писатель-реалист котькуд произведениеныз усьтылӥз историлэсь выль но выль бамъёссэ, нош сюжетъёссэ кылдытыны юрттылӥзы солы зэмос документъёс. Тани одӥгез учыр. Воткинскысь завод 200 арзэ пусйыны дасяськыку кулэ вал поттыны документальной книга, кытын мед адӟиськысал заводэз лэсьтон, паськытатон но солэн оборонамес юнматонын кужмез, уката ик война аръёсы. Вазиськизы П. Ф. Куляшовлы. Со кӧня ке толэзьзэ пукиз архивъёсын, бугыръяськиз документъёс пӧлын, куд-огзэ тодэмъёссэ вуттӥз курись- косӥсьёсызлы, нош ачиз гожтӥз... Очерк, документальной книга гинэ ӧвӧл - "Шалые люди" исторической роман. Сое, зэмзэ, пуктыны луэ М. Коноваловлэн "Гаян", Д. Бор- Раменскийлэн "Данило Шитов" романъёсынызы артэ. Заводэз лэсьтыны кутскыку сюлэмез шурдытӥсь, дырекъятӥсь суредъёс гинэ ӧвӧл, Емельян Пугачёвлэн армиезлэн Удмурт шаеретӥ бугыръяськыса, пӧртэм выжыысь калыкъёсты сьӧраз ӝутыса ортчемез но умой адӟиське романысь. Чеберлыко произведениос бордын тыршем сяна, Павел Фёдорович возьматӥз ужез умой радъяны быгатэмзэ. 1975-тӥ арын СССР-ысь Писательёслэн союзазы кутэмзы бере, со ньыль арзэ кивалтӥз Удмуртиысь СП-лэн художественной литератураез вӧлмытонъя бюроеныз. 1979-тӥ арын быръемын Писательёслэн огазеяськонзылэн тӧроезлы воштӥсе. Соку но, профессиональной ужын дыръяз но П. Ф. Куляшов ӵем поталляз калыке, литературалы сӥзем нуналъёсыз радъялляз. Ветлӥз РСФСР-ысь писательёслэн витетӥ съездазы. Бырйылэмын Политической репрессиосын быремъёсты буре ваёнъя ассоциацилы кивалтӥсе. Али но таӵе утчаськон ужлэсь уг куштӥськы, курадӟытэм адямиос сярысь очеркъёссэ печатла Москваын потӥсь "Пятьдесят восьмая" газетын. 1997-тӥ арын Павел Фёдорович луиз Калык куспо Славян Академилэн член-корреспондентэз. Пероез солэн уг ныжомылы. Бадӟым жанръёс бордын ужамен огдыре гожъя "чыры- пырыос" но. "Удмуртская правда" газетэз но "Луч" журналэз лыдӟисьёс берло дыре тодматскизы Ф. Васильев, М.Петров сярысь тодэ ваёнъёсыныз, "Деловой человек", "Пушкинский Локон", "Алла Борисовна" веросъёсыныз, "Адовы дороги Колымы" очеркеныз. Вылӥ верамъёсыз сяна, вань "Многоженец" (1989) повестез, "Незаконные Васята" веросэз, кытын пачылос гинэ серем пырыосыз. Та гажано прозаикмы сярысь гожъязы "Урал", "Молодая гвардия", "Звезда", "Москва", "Литературное обозрение" журналъёс. Улон тубатъёс кузя тубытозяз, солы сётэмын А. Гайдар нимо литературной премия, пусъемын Селта ёросысь В.И.Ленин нимо колхозлэн премиеныз но. Республикаысьтымы культура удысын дано ужась ним басьтӥз на. "Шулдыр ӝытэд одно ик матэктоз, нуналъёстэ сӥзид ке ужъёслы". Гётелэсь тазьы верамзэ секыт, сьӧд ужез быдэсъясь писатель вылэ выжтоно ке, оскыса вералом: матысь дыре асьмеос Павел Куляшовез адӟомы творчествоезлы, юбилеезлы сӥзем ӝытэ. Соку ини луозы сяськаос, шуныт тау карон кылъёс но. Зоя БОГОМОЛОВА, Россиысь Писательёслэн союззылэн членэз. Котьма сярысь Одӥгез умой, нош тросэз... Трос кышноосын улэмез шараян сярысь Ингушетиысь президентлэн указэз троссэ паймытӥз. Россиысь уноез улосвылъёсын улӥсьёс та шоры пӧртэм сямен учко. Озьы ке но со сярысь тросэз газетъёс нимысьтыз вераськонъёс ӝуто на. Нош "Вечерняя Казань" газет ӝогак гинэ тодоно кариськиз лыдӟисьёсызлэсь мылкыдзэс. Кызьы малпамын вал, воргоронъёс, тужгес но мусульманъёс, тросэз таӵе указлы пумит ӧвӧл, сюлмаськонъёссы трослы йылоз шуыса валало ке но. Со понна вань нылкышноос чутрак пумит луо. Соос соглаш уг луо яратоно кузпал луыны гинэ но. Дунне пум вуиз ке... Берло дыре уно вераськонъёс вӧлмизы туэ гужем луоно бадӟым шугадӟон (катастрофа) пумысен. Музъемен, пе, шуккиськозы астероид яке комета. Зэмзэ но-а меда таӵе кышкытлык вань? Озьы ке, кыӵе амалъёсын адями ассэ утьыны кулэ? С. Лавочкин нимо НПО-ысь валтӥсь конструктор Анатолий Зайцев шуэ: Нострадамуслэн, мукет муртъёслэн веранъёссылы оскытэк луэ, но кызьы лыдэ уд басьты наукаез. Куке но одно ик Музъем вылэ космосысь маке усёз, со дырозь асьмеос утиськон амалъёс ӧм шедьтэ ке. Эскеронъёс возьмато, Россия но мукет кунъёс технологиос ласянь трос но пайдаё ужало, та дыре быдэс планетаез утись система кылдытыны луэ ни. Пусйыны кулэ, Советской Союз дыръя ай таӵе системалэн ваньмыз сямен люкетъёсыз кылдытэмын но эскеремын вал ини. Соосты ик уже кутыса, С. Лавочкин нимо НПО-ын "Цитадель" нимо системалы инъет дасязы. Выль даурлэн кутсконаз ик ини со Музъем вылысь калыкез космосысь кышкытлыклэсь утьыны быгатоз. Та вакытэ планетамы доры матэктӥсь 200 комета шараямын. Нош кыӵе луоз Музъеммы, астероидэн яке кометаен "мырӟиськемез" бере? Космосэз эскерись наука та юанлы валэктон сётӥз ни. Планетамы укшалоз Марслы. Ӵапак со быриз астероидно-кометной бомбардировка бере. Иворъёсъя национальной служба. Валэктэ юрист Сэрегез дася Лилия Шкляева Дунтэк визь-кенеш Тау "Удмурт дуннелы" дунтэк визь-кенеш сётэмез понна. Но котькыӵе чыры-пыры юанэн тӥледлы уд вазиськы ук. Кылылэме вань: кинлы но солы,пе, адвокатъёс дунтэк визьнод сётыны кулэ. Шонер-а? А. АРДАШЕВА. Якшур-Бодья район. Котькудӥз сямен юридической консультация адскымон азе ошыса возе дунтэк кыӵе-кыӵе юрттэт сётэмез сярысь ялонзэ. Огез - тросгес, мукетыз - пичигес. Консультацилэн кузёез котькин медло - коть адвокатъёслэн коллегизы, коть нимаз адями - адвокатъёс одно ик коньдонтэк дурбасьтыны кулэ таӵе учыръёсы: истецлы - нырысетӥ инстанциысь (районысь) судын таӵе ужъёсты эскеронын: алиментъёс тырытон, ужын тупамтэосты радъян, ужын шуккиськыса но сӧсырмыса адӟем изъянэз берыктон, сюдӥсь ужен герӟаськем муген бырыса адӟем изъянэз берыктон; мукет адямиослы - пенсия но пособие тырон пумысен курон (заявление) гожтонын, бырйисьёслэсь списокъёссэс умой лэсьтэмез тупатонын; депутатъёслы - ас ужзэс быдэсъянэн герӟаськем законъёсъя визь-кенеш сётонын. Юридической консультацилэн кивалтӥсез, адвокатъёслэн коллегизылэн предприятиез, следствие нуись ёз (орган), прокурор, суд, адямилэсь ваньбур ласянь кызьы улэмзэ лыдэ басьтыса, сое дун тыронлэсь быдэсак яке ог люкетэзлэсь мозмытыны быгато. Озьы валэктэ "РСФСР-ысь адвокат сярысь положение" (сыӵе Закон юнатэмын 1980-тӥ арын 30-тӥ ноябре). Россия Федерациысь Правительство 1994-тӥ арын 3-тӥ мае юнматӥз 419 номеро постановленизэ. Солэн нимыз таӵе: "Политикая репрессиосын курадӟытэм лыдъям муртъёслы но шонере поттэм муртъёслы льготаос сётон радлыкез юнматон положение сярысь". Отчы воштонъёс пыртэмын 1995-тӥ арын 18-тӥ сентябре. Монэ ужысьтым мозмытӥзы, законэз тӥяса. Суд монэ берыктӥз азьло ужам, тырытӥз басьтымтэ уждунме. Мон лыдъясько: ужатэк пукыкум, юн сюлэмшугъяськи но моральной изъян шуонэз адӟи. Та ужпумъя но администрациез кыл кутытыны медӥсько вал - ӧз лэзе: сыӵе закон ӧвӧл, пе. Зэм-а веразы? О. ВАХРУШЕВА. Якшур-Бодья район. Тӥледлы сокем ик шонер валэктон ӧвӧл сётӥллям. Бен, нимаз законын сыӵе учыр сярысь верамтэ. Но Россия Федерациысь Вылӥ судлэн пленумез 1994-тӥ арын 20-тӥ декабре та ужпумез юри учкиз но нимысьтыз постановление кутӥз. Со нимаське тазьы: "Моральной изъянэз берыктонъя законодальствоез кутонысь куд-ог ужпумъёс сярысь". Отысь 4-тӥ пункт валэктэ: законын изъянэз берыктыны меӵак косэмын ӧвӧл ке но, со уг вера, вӧсь карем адямилэн сыӵе куронлы правоез ӧвӧл шуыса. Ужысь законэз тӥяса куштон адямиез вӧсь карон луэ. Озьыен, соин валче адӟем изъянзэ берыктон пумысен со судэ вазиськыны быгатэ. Городын ке но улӥсько, гуртысь корка басьтӥ. Берлогес тодмо луиз: юртлэн кузёез кык вылэм - мыным сое вузась но агаез. Таиз шуэ: тӥляд корка вузам-басьтэмды - законэз тӥян. Кыӵе учыръёсы сделка зэмос уг лыдъяськы? А. АФАНАСЬЕВ. Иж город. Жаляса верано луэ: тӥляд юрт басьтэмды законэз тӥям луэ. Сыӵе ужрадъёс зэмос уг лыдъясько данак учыръёсы. Кылсярысь, законэз тӥяку, кинэ ке алдаса яке курдатыса лэсьтыку. Тупанкыл гожтэмын 27 июле Удмурт Республикаысь Правительство но Россия Федерациысь Юстицияя министерство валче ужан сярысь тупанкыл гожтӥзы. Со сӥземын уголовно-исполнительной ёзъёслы (УИС) сиён-юон вуттонъя кун заказэз кылдытонлы но быдэстонлы, озьы ик УИС- лэн но Удмурт Республикалэн ӵош ужанзэс азинтонлы. Та документъя кун контрактъёсты быдэсъякуз кооперированной кусыпъёсты азинтон понна, Удмурт Республикаысь Правительство кулэезъя уже кутэ Россия Федерациысь Юстицияя министерстволэсь Удмурт Республикаысь учреждениосызлэсь кужымзэс, кылсярысь, тара, воштос ёзъёс лэсьтонын. Со сяна Кыл кутытонъя валтӥсь управленилэн куремезъя республика, УИС-лэн ёзъёсызлы сётэ шаерысьтымы предприятиосын поттэм но оброная кун заказэн чаклам ваньбур но эстӥськон. Тупанкыл улэ гожтӥськизы Удмурт Республикаысь Правительстволэн Тӧроез Николай Ганза но Россия Федерациысь юстицияя министрлэн воштӥсез Юрий Калинин, Россиысь Экономикая министерстволэсь "Сиён-юонлы обороная кун заказ сярысь" ӵектонзэ лыдэ басьтыса, озьы ик уголовно-исполнительной ёзлы сиён-юон вуттонъя ужъёсты радъян но быдэстон вылысь. Удмурт Республикаысь Правительстволэн пресс-центрез. Шӧкыч Эскериськись-а тӥ? (воргоронъёс понна тест) 1. Ӵукна дорысьтыды дыртыса потыкуды мынонъяды ик тӥ йырады изьыяськоды: а) асьтэлэсь шляпадэс - 2 балл; б) кузпалдылэсь шляпазэ - 1 балл; в) маке мукетсэ - 0 балл. 2. Нӧд урамтӥ мыныкуды, тӥ учкиськоды: а) пыд улады - 2 балл; б) вӧзтӥды ортчись нылкышно пыдъёсы - 1 балл; в) инбам шоры - 0 балл. 3. Дорады бер вуыку тӥ: а) синучкон доры чаляк мыныса, ымдурысьтыды помада бервылдэс ӵушылӥськоды - 2 балл; б) кузпалдылы сётӥськоды убо вылысь ишкалтэм сяська - 1 балл; в) пӧяськоды, урамысен укылтэмъёс вылады урдскизы шуыса - 0 балл. 4. Вармумыдылэн вордскем нуналаз тӥ: а) котькинлэсь вазь, ӵукна ик вить час котырын, юбилееныз ӟечкыласа жингыртӥськоды - 2 балл; б) вазь ӵукнаысен ик вина юыны кутскиськоды - 1 балл; в) кузпалдэс жингыртыны косӥськоды - 0 балл. х х х Табере ваньзэ лыдъялэ-чоталэ. Люкаськиз ке тӥляд: 8 балл - тӥ туж эскериськись кузпал. 4-ысен - 7 балл - тӥляд кылдэмын ини эскериськон сямды. Озьы ке но, "тӧлатскыны" кулэ на. Кылсярысь, кузпалдэс эн вунэтэ, басьтэ солы выль шляпа. 4 балл яке ӧжытгес - синмаськыны кулэ тӥляд эскериськондылы. Паймоно та тестэз но синйылтэмдылы. Басьтэмын "Чаян" журналысь. Аспӧртэм ӵошатскон Вормонэн йылпумъяськиз Россиысь "Дон-2600" комбайнлэн Америкаысь "Кейс-2366" машинаен аспӧртэм ӵошатсконэз. Соос "кужымзэс" мертазы Ростов областьысь бусыосын. Жаляса верано луэ, вить ар талэсь азьло Ростовысь заводын бичам комбайн серие пыртэмын ӧвӧл но эскерыны поттэм маке гинэ луэ. Нош Америкаысь машина ӵыжак выль но али гинэ конвейерысь васькиз. "Ростсельмашлэн" продукциез таӵе ӵошатсконъёсы нырысьсэ уг пыриськы но котьку ик вормисе потэ. 1996-тӥ арын Алтайын вормиз Канадаысь "Вестерн-8570" машинаез, берлогес - немецъёслэсь "Клаас" комбайнзэс. Кызьы ивортэ "Экпресс-репортер" газет, Россиысь Правительство чакла комбайнэз поттон понна коньдон висъяны. Иворъёсъя национальной служба. Тазалык Комакъёс эмъяськизы, нош адямиос? Франциысь ИНСЕРМ институтлэн нейробиологияя но молекулярной фармакологияя лабораториысьтыз тодосчиос кылдытӥзы наркотиклэсь но юонлэсь куштӥськыны юрттӥсь эмъюм. Лабораториен кивалтэ тодмо учёной Пьер Соколофф. ВР-897 шуыса нимам вещество ассэ умой возьматӥз кокаин "юись" комакъёсыз йӧнатонын. Специалистъёс верамъя, усыкмытӥсь мукет макеосын нюръяськонын но препарат юрттыны кулэ. Вылаз ик, эмъюм кысконлэсь но юонлэсь куштӥськыны юрттэ на. Матысь дыре эскеронъёс ортчозы адямиос вылын но. Тодосчиослэн та эмъюмлы осконзы туж бадӟым. Со быдэс дуннеысь усыкмытӥсь юонъёсын герӟаськем трос миллион адямиослы азьлань улыны луонлык кылдытысал. Иворъёсъя национальной служба. Экономика Кин кузёез Кам котырысь му вӧйлэн? Тӥ тодӥськоды-а, кӧня организация туннэ кыске асьме му вез? "Удмуртнефть", "Удмуртторф", "Удмуртгеология", "Уральская нефть", Удмурт нефтяной компания но озьы азьлань... Берло аръёсы кылдэмъёсыз пӧлы пыре акциосын "Белкамнефть" огазеяськон но. Со ужаны кутскиз валля арын, но му вӧй поттон борды татын умой-умой басьтӥськизы миым гинэ. Ар ӵоже поттӥзы 1,72 миллион тонна нефть. Продукцилы дуннеын дунъёслэн кулэсмемзы но Россиын кылем августэ луэм кризис манетъёсты суразы ке но, нефтяникъёс быгатӥзы пайда поттыса ужаны - ар куспын со 62 миллион манет люкаськиз. "Белкамнефть" тупатэм дыре сётэ Россиысь, Удмуртиысь но Башкириысь бюджетъёсы тыронъёссэ. Малы, шуом, Башкирие? Ужпум со бордын. Уно аръёс ӵоже асьме музъемысь нефтез кыскыса улӥзы бускельёсмы - "Башнефть" предприятиын ужасьёс. Асьмеос ӧм но тодылэ кӧня но кыӵе ваньбур поттэмзэс. Валамон ни, пайдазэ но ӧм адӟылэ. Совето вакытэ уго сыӵе ужпумъёс шоры учкись ӧй вал. Выльдӥськон дыръя асьме кивалтӥсьёс озьы но, тазьы но выризы югдурез тупатыны. Пумен таӵе малпанэ вуизы: кылдытоно нимаз удмурт-башкир огазеяськон, акциоссэ кыкезлы но республикаослы сётоно. Озьы вордскиз "Белкамнефть". Солэн валтӥсь директорез луиз Олег Кузьменко, Кун Кенешлэн нырысетӥ ӧтчамаз экономикая но бюджетъя ялан ужась комиссилэн кивалтӥсез (депутат луэмезлэсь азьло со Ижысь механической заводын валтӥсь конструктор, пыӵал тӥрлыкъя ӟеч специалист вал). Али компанилэн 43,5 процентэз акциосыз Удмуртия киын. Соин ик кылем арлы йылпумъянъёсъя республикалэн бюджетаз дивиденд чотын 4,35 миллион манет вуоз. Сыӵе решение кутэмын акционеръёслэн огъя кенешазы. Выль организация чотын сомында коньдон басьтон умой ини. "Белкамнефтьлэн" али 1700 скважинаосыз.1200-ысьтыз нефть кыско. Ваньмыз соос Каракулино ёросэ интыяськемын. Акциосын огазеяськон налог тыре интыысь бюджетэ но. Умой соиз: обществолэн директоръёсызлэн советазы пыре ёросысь администрацилэн кивалтӥсез но. Со луонлык сётэ компанилэсь быгатонзэ районлы тужгес но кулэ ужъёсы кутыны. - Нырысь-валысь кызьы ке асьме республикалэн кивалтӥсьёсыз, озьы ик башкиръёс ог- огзы шоры оскытэкгес учкылӥзы, кышказы, лэся, кин ке но пӧялоз шуыса, - вера Олег Кузьменко. - Табере югдур тупатскиз. Ваньмыз валазы, ӵош кариськыса ужан котыр ласянь пайдаё шуыса. Соиз озьы. Юнме шат Башкириысь Ваньбуръя комитет алигес кутӥз нимысьтыз постановление, кудӥзъя "Башнефтьлэн" Удмуртие интыяськем ваньбурез быдэсак сётӥське "Балкамнефть" кие. Ваньмыз ог 2 миллиард манетлы. Асьме понна сыӵе вамыш умой. Нош малы бускельёсмы озьы лэсьтӥзы? Соос но палэнэ уг кыллё. Ваньбурез ватыса, соос таӵе курон пукто: поттэм му вӧез келяно Башшкириысь нефтез чылкытатонъя заводъёсы. Озьы республика ватсаса коньдон поттоз, бензин асьмелы но яралоз. Выль огазеяськон лэсьтэменыз буйгатскыны уг малпа. Та нуналъёсы йылпумъямын "КАМНК" общество кылдытонъя документъёсты дасян. "Камбарская нефтяная компания" вуоно арняе ик ини кутскоз му вӧй поттыны. Солэн учредителез - "Белкамнефть". Камбаркаысь месторождениос сокем ик ӟечесь ӧвӧл (соос интыяськемын Кам сьӧрын, уно аръёс ӵоже басьтӥсь ӧз шедьы ук). Озьы ке но, туала вакытэ вань луонлыкъёсты уже кутыны тыршоно луэ. "Белкамнефть" тужгес но бадӟым инты висъя кадръёс дасянлы. Туннэ ужасьёс пӧлысь уноез Башкириын уло. Выль кивалтӥсьёс ужпум пукто Каракулиноысь ужлы ёрмисьёсты интыяны. Кӧня ке мурт озьы уж шедьтӥз ни, кӧняез ке дышетскыны келямын, пенсие кошкисьёс интые куто ёросысь егитъёсты. - Каракулино районэз азинтон - одӥгез бадӟым сюлмаськонмы, - шуэ Олег Леонидович (кылем тулыс татысь калык сое Кун Кенеше депутатэ бырйиз). - Уртче малпаськиськом та вакытэ юнме сылӥсь объектъёсты утён-ужатон сярысь, сюрес, электротыл линиос лэсьтӥськом, музъемез но быгатэммыя умоятӥськом. Обществоын кылдытэмын сыӵе ик нимын фонд. Отысь коньдон кутӥське тужгес но ёрмисьёслы юрттыны, социальной программаосты быдэсъяны. Коньдон тырмонтэм вакытэ ужез озьы радъян трос адямиослы шумпотонэн берытске. "Белкамнефтьлэн" кивалтӥсьёсыз пумиськон дыръя мон юатэк ӧй чида бензинэн югдур пумысен. Тани ма вераз О.Л.Кузьменко: - Эстӥськонлы быдэс Россиын ёрмон асьме республикаын мукет умойтэм учырен укшаз - ӵапак та гужем шуге-леке вуиз "Удмуртнефтепродукт" огазеяськон. Солэн сю пала заправкаосыз. "АСПЭК"-лэн, кудӥныз ми ваче ужаськом, - 12 гинэ. Толэзь ӵоже со пыр ог 1700 тонна бензин но мукет эстӥськон ортче вал. Валтӥсяз предприятиын югдур шальтрамен, "АСПЭК" бензин сётонэз кык пол йылэтӥз ке но, со ялан уг тырмы на. Тулыс пал ик валамон ни вал, Россиысь бензинэз кунгож сьӧры тросэн келяло шуыса. Правительство та ужпумез аналтӥз. Луэ вал ук нимысьтыз документъёс кутыны, дунъёсты, шуом, ар пумозь кортнаны � номыр ӧз лэсьтэ. Дизельной эстӥськонэз Западэ келян, асьме рынокын вузанэн ӵошатыса, куинь пол бадӟымгес барышен берытске. Валамон ни, ужбергатӥсьёс асьсэ кулэяськонзэс азьпала пукто. Монэ шугъяськытэ тол. Колхозъёсын чик ӧвӧл на кезьыт дырлы эстӥськонзы. Соослэн уксёзы уг тырмы. Тани каракулиноос ик кылем тол понна ай 300 сюрс манет пунэм тыронзэс берыктыны уг быгато. Удмурт Правительство али бабиз ке, талалтэ туж секыт югдуре вуом. Нош азьланьын дунъёс сярысь верано ке, соос эшшо но йылозы на. Тани ми нефть дунэз августысен 15 процентлы йылэтоно луиськом. Валамон ни, со сьӧры вань мукет вузъёс кыстӥськозы. Сыӵе ини экономикалэн куронъёсыз. Югдурез тупатон борды рос-прос басьтӥськыны кулэ быдэсъясь ёзъёс. И. Лебедев. ШӦКЫЧ Галина Романова "Импичмент ялӥсько" Серемес верос Ӵукна скал кыскем йӧлме сӥсъяса сылыкум, дорамы шок-пуль шокаса бускель пияш Васи пыриз. - Ой, Олёнапай, - ӧс куспысен ик дыртыса кисьтэ, - дедушмылы оломар луэм. Ваньмес гуртысь улля, импичмент, пе, ялӥсько. Ойдолэ дорамы. Мынам киысьтым ведрае ик усиське вал. Зэмзэ но, та Лёгор кум вактаз усем, луоз, вань семьязэ пичи мент шуэ бере. Ма, соос одӥгзы но милициын уг ужало ук. - Васи, - сьӧраз бызёнъям юасько, - городэ кошкем выныд милицае ужаны пыриз шат, соин тӥледыз песятайды пичи мент шуэ? - Пичи мент ӧвӧл, импичмент. Уг, пе, оскиськы ни тӥледлы, ваньды, шуэ, Скуратов кадь лушкем ужаськоды: азьын чебер, нош берын - изьвер, вазер пиньёстэс шериськоды. Васиослэсь капказэс усьтыку, быдэс семьязы азбарын вал, нош Лёгор укно пыр дӥськутъёссэ сэрпалля но кесяське: - Монэ вормоды-а кожаськоды! Уд, уд ворме! Собере, монэ адӟыса эшшо золгес лекомиз: - А-а, парламентёр ысто ини! Мон тӥледлы Милошевич ӧвӧл! Йыры - пельпумам, визьмы - бордам! Ваньдэс уллясько, импичмент ялӥсько. Лёгорлэн Лида нылызлэн бӧрдонэз тани-тани пӧсьтоз, бордам ӟыгырскиз но шуэ: - Телевизор сӧриз сое, Олёнапай, телевизор. Уй-нунал со политиказэс учке, собере ас понназ вераськыса ветлэ. - Дугды ай, дугды, - шуисько, - телевизор сӧриз бере, соин ик сое эмъялом но. Кызьы шуо, тулэз тулэн шукком. Ачим мон со политика шуонзэс уг но кылзӥськы, уг но учкиськы. Соин Лёгорлэн Коля эмеспиезлэсь юасько: - Со пичи мент ассэ кин-о кожа? - Валаса ӧй вутты на: оло Зюганов, оло Жириновский. Кытӥяз Ельцинлы но кельше кадь. - Озьы бере, - шуисько, - солы юрттӥсь кулэ ук. Мон валамъя, котькыӵе кузёлэн юрттӥсез луэ. - Бен, - шуэ Коля, - одӥг гинэ уг луы али, куинь но, ньыль но. Нош политикъёслэн солэсь но трос. - Нош тӥ - куинь кузя. Иське, ваньдылы инты сюроз. - Кызьы озьы? - ӧз вала Коля. - Варматаедлы юрттӥсьлы куриськоно луод. - Шедьтэм ук! - пинь пыртӥз дыльдыеныз чизйыса лэзиз Коля. - Сокем-сокем эн йӧнъяськы. Татын визьмын ужаны кулэ. Вӧзамы сылӥсь Васи мынэсьтым верамме политика кылэ берыктыса шуиз: - Дипломат луоно, атай. Коля йырберзэ кормаз ик но, милемын соглаш кариськиз. Варматаезлы луыса, быдэс гурт калыклы серекъянэ гинэ, пе, медам усе вал, нокин медаз тоды-кылы вылэм. - Асьмеос, - шуисько, - Штирлиц кадь лушкем ужалом. Гуртэ одӥг кыл-куара но уз кылӥськы. Нош али ваньмы дорам мыном. Ми дорын ваньзэ рос-прос бергатэм, кенешем бере, Лёгор доры вамыштӥм. Соиз милемыз вите вылэм ини, шӧдске. Азбаре пырим гинэ, укноетӥ кеське: - Дугдэ! Та мынам территорие. - Лёгор кум, - шуисько, - мар тон варгаз ӟазег сямен огнад улыны малпаськод шат. Ойдо пуксьыса ваньмы ӵош кенешом, ог-огмес, оло, валалом. - Ваньдылы импичмент ялӥсько. Нокуддэс но аслам территориям уг лэзьы, - уг сётскы Лёгор. - Варматай, - шуэ Коля, - огнад тон номыр но карыны уд быгаты ук: кин тыныд сиён пӧралоз, коркадэ миськоз-утялтоз, мунчо эстоз. Нош ми тыныд ваньзэ сое лэсьтысалмы, юрттӥсь кариськысалмы. - Лёгор кум, сиемед но потэ, дыр, ини, тани соку гинэ кыскем йӧл ваи, - мон но будэтӥсько. Лёгор чалмиз, малпаськыны кутскиз, лэся. Собере шуиз: - Одӥген-одӥген пыре, вераськом ке вераськом. Нырысь ик пыриз Коля, кӧня ке минут ортчыса, со потӥз но, Лида пыриз, собере - Васи. Берло ини ваньмы ӵош пырим, одӥг ӝӧк сьӧры пуксим. - Табере, - шуэ Лёгор, - голосовать каром, кин мар ужаны кулэ. Коля эмеспиелы мон ӵектӥ самой дано уж - коммерсант, коньдон поттоз. Лида нылы - гурт хозяйствоя министр луоз, татын ваньзэ бергатоз-лэсьтоз, нош Васиез дышетскыны лэзём. Визь люказ ке, оло мон интые, банкире, пуксёз. "Тӥни кин со вылэм - банкир!" - поннам мынектӥсько но шуисько: - Лёгор кум, мон тыныд пӧрась карисько. - Но азьло ик верасько, Олёна, котькуд нунал мыным но мынам юрттӥсьёсылы ньыль пол сиён пӧралод, эн вунэты шуныт йӧл пуктыны. - Ярам, Лёгор кум, - шуисько, - ярам. - Мон тыныд Лёгор кум ӧвӧл! - нош лексэ поттӥз Лёгор. - Вера али - кин мон! - Банкир Егор Семенович. - Вот озьы. Вераменым соглаш ке, голосовать карыны курисько. Ми ваньмы, соглаш кариськыса, кимес ӝутъямы. - Табере, господаос, уж борды, - вераськонмес йылпумъяса шуиз Лёгор. Азбарысен Коля мыным шуэ: - Олёнапай, гуртэтӥ али ик ортчы, кызьы вераським вал, боевикъёсын тросгес видеокассетаос люка. Мон со йӧнтэм варматаез политикаезлэсь йӧнато. Зэмзэ но, юрттӥзы кадь со видеокассетаос. Лёгор лапкомизгес, ас понназ вераськемысь но дугдӥз, милемыз но дораз ӝӧк сьӧрын кенешыны ӧз ни ӧтча. Но одӥг ӵукна Васи нош шок-пуль бызьыса дорам пыре но шуэ: - Олёнапай, дедушмы нош берланьяське, оломар луэм! Мон терминатор шуыса, киоссэ сэзъя, пыдъёссэ йыг-дым лёга, пуньы-тэркыосты лэзья... Правительствоын Кенешонлы йылпумъянъёс Кызьы ивортӥмы ни, кылем арня пумын Кун Кенешлэн но Правительстволэн тӧроссы Александр Волков но Николай Ганза ужазы Екатеринбургын, пыриськизы Урал котырысь улосвылъёсысь кивалтӥсьёслэн бадӟым кенешоназы. Отчы ветлӧз Россиысь Правительстволэн Тӧроез Сергей Степашин но. Вераськон мынӥз экономической ужпумъёсъя, кизер эстӥськон но электрокужым висъямъя, государственной но муниципальной властез одӥг ӧре выжтонъя. "Бадӟым Урал" совещанилы йылпумъянъёсъя Николай Ганза ивортон лэсьтӥз понедельнике ортчем аппаратной кенешонын. Эстӥськонэз ӝикыт кутоно Правительствоын ортчем кенешонын Николай Ганза пӧртэм поручениос сётӥз. Кылсярысь, Михаил Назаров, Правительствоын агропромышленной комплекс, вузкарон но бытовой услуга сётон понна кыл кутӥсь, ю-нянь аран-кутсан вакытэ эскерыса-чакласа возёз государственной фондысь висъям ГСМ-лэсь кутӥськемзэ. Со ик кенешон нуоз тысь басьтонъя. Сергей Чикуровлы но Николай Хохловлы косэмын предприятиослэсь Пенсионной фондэ пунэмен тыронъёссэс сэртыны-пертчыны. Энергетикая но связья министр Виктор Савельев но Ваньбуръя кун комитетлэн тӧроез Сергей Касихин пыриськизы 28 июле "Удмуртэнерго" АО-ын ортчем селекторной совещание. Правительстволэн Президиумезлэн кенешаз 26 июле кутэмын "Удмурт Респуликаын "Муниципальной служба сярысь" Законлэн инъетаз воштонъёс пыртонъя постановление. Вераськон ӝутскиз бюджетэ пырисьтэм инкуазез утёнъя фонд ласянь но. Таизъя озьы ик кутэмын поставновление, отын вераськон мынэ "Удмурт Республикаын бюджетэ пырисьтэм фондъёс сярысь" Законэз быдэсъян но та фондэз российской законъёсъя улонэ пыӵатон пумысен. Президиум учкиз музон ужпумъёсты но. Ыстэмын Декларация Удмуртиысь Национальной политикая министерство дасяз но келяз Россиысь ваньмаз улосвылосъёсы но финн-угор странаосы финн-угор калыкъёс куспын эшлыко но культура кусыпъёсты утён но азинтон сярысь Декларация Удмурт Республикаысь Правительстволэн пресс-центрез. Кудзэ быръёно? Скал вӧй яке кӧс вӧй вылын сиён пуштытыны пайдаёгес? Нырысетӥяз кӧез сяна вань на сыркез но, нош сыркын - белок. Ӟырдатыку со белоктӧдьы шукы выллем луэ, собере куренялэс луэ но сутске, адямилэн тазалыкезлы кышкыт луись веществоос кылдо. Ӵапак белок сутскемен ик данакез кузё кышноос скал вӧез уже уг куто. Пайдаёгес луоз шунтэм вӧй. Со 180-200 градусозь ӟырдамез одӥг час пала чида. Кӧс вӧй вылын пушштытыны луэ. Но одӥг вӧез ик трос пол уже кутыны уг яра. Угось озьы солэн ӟечлыкез быре. Сиёд ческытсэ - кылёд пиньёстэк Пересьёс шуо, голькытсэ трос эн сиы - пиньтэк кылёд. Зэм-а со? Басьтом шоколадэз ик. Со - уно калориен сиён, шуыны луоз, отын трос кӧез, углеводъёсыз, витаминъёсыз но минерал веществоосыз. Пайдаё луэ секыт ужан дыръя, уно кужым бырыку. Нош огшоры вакытэ шоколад мултэс сиемлэсь чидатсконо, уката ик - пиналъёслы. Уно ческытсэ сиеменызы соослэн пиньёссы лябӟыны кутско. Арлыдо муртъёс но та сярысь вунэтыны кулэ ӧвӧл. Мар со сыӵе - пальпотон? Визажист понна - со ымныр туслэсь аспӧртэмлыкъёссэ возьматӥсь тодмет. Синъёс ӝуало, ым пичияк усьтэмын, пиньёс чиляло, ымныр ас бордаз кыске кадь. Психолог понна пальпотон � адями лулсюлэмлэн, сямъёслэн синучконзы. Со, чиньыысь сиос кадь ик, котькуд адямилэн аслаз. Пальпотэмезъя, серекъямезъя адямилэсь пуш дуннезэ шараяны луэ. Пальпотыны быгатон - шуд но тыро улонлэн тодметсы. Французъёс юнме уг шуо ук: "Жалятозь мед вожъяськозы". Соин ик ӵемгес пальпотэ-серекъялэ. Герман Корепанов пусйиз композиторлэн вордскемез дырысен 75 ар Крезьгуро ошмес Ми соин нырысьсэ пумиськыку, крезьгурчилы 27 арес гинэ вал ай. Мон соку "Советской Удмуртия" газетлэн редакцияз ужай, культурая но бытъя отделэн кивалтӥ. Герман Афанасьевич ӵем гинэ вуылоз вал отделамы, соос кылбурчиен Степан Павлович Широбоковен ӵош эскерылӥзы егит авторъёслэсь ыстэм кылбуръёссэс но кырӟанъёссэс, газетамы дэмлаллязы асьсэлэсь гожтэмъёссэс но. Та эшъёслэн тросэз кырӟанъёссы калык сюлме пыӵаса кылизы, али но ӵем чузъясько концертъёсын, радио но телевидение пыр. Кинлы тодмо ӧвӧл "Зарни сӥзьыл", "Чупчи тупалан-а?", "Мон шаертӥм мынӥсько...мукет кырӟанъёссы. Озьы ик калык кырӟан луизы Герман Афанасьевичлэн "Мон тодам ваисько", "Родной Кам шурмы" но мукет кырӟанъёсыз. Берлоез кырӟан узырмыса-паськытаса вордскиз Удмурт Республикамылэн Гимнэз. Витьтонэтӥ аръёслэн пумазы но куатьтонэтӥ аръёслэн кутсконазы юн азинскыны ӧдъяз крезьгуро искусство. Быдэ вуон дырзэ, кызь вить ар тырмемзэ пусйиз, кырӟанъя но эктонъя ансамбльмы. Удмурт театр пӧрмытэмын вал музыкально-драматической театрлы. Озьы композиторъёслэн луонлыкъёссы паськытазы. Кырӟанъёс но пичиесь инструментальной пьесаос бордысен соос басьтӥськизы бадӟымесь сочинениос борды. Нырысь ик кылдӥз Г. М. Корепанов-Камскийлэн "Любушка" опереттаез, со бӧрсьы Г. А. Корепанов гожтӥз нырысетӥзэ удмурт опера - "Наталь", таос бӧрсьы ик вордскизы Корепанов-Камскийлэн "Италмас" билетэз но Герман Корепановлэн нырысетӥ удмурт симфониез. Крезьгурчиос куспын зэмос творческой ӵошатскон. Сое азинтон но юнматон понна кулэ вал Композиторъёслэсь союззэс кылдытыны. Со пумысен мыным, культурая министрын ужасько вал бере, пумиськылоно луиз СССР-ысь Композиторъёслэн союззылэн кивалтӥсеныз Д. Д. Шостаковичен, культурая министрен Е. А. Фурцеваен, композиторен А. Г. Новиковен. Мукет ласянь ке учконо, Композиторъёслэсь союззэс кылдытыны уг луы вал: отын ичизэ луыны кулэ куинь членъёсыз. Нош асьмелэн соку со одӥг гинэ вал - Н. М. Греховодов, со гинэ консерваторилэсь композиторъёсты дасясь отделенизэ йылпумъяз. Озьы ке но, та ужпумез быдэстыны оскон кылдӥз, Г. А. Корепановлэсь "Наталь" операзэ 1961-тӥ арын январе удмурт но ӟуч кылын пуктэм бере. Удмурт музыкальной искусствоын та бадӟым праздникез пусъён вакытэ Ижевске ӵап вуизы странаысьтымы тодмо композиторъёс Т. Н. Хренников но А. И. Хачатурян. Операез кылзэмзы бере, соос Герман Афанасьевичез сюлмысь ӟечкылазы но выль творческой азинсконъёс басьтыны мылкыд каризы. - Герман Афанасьевич Корепановлэн музыкаез вӧл-вӧл ӧръяське, сцена вылысь суредъёсын огазеяськыса, учкисьлэн сюлэмаз пыӵа, - шуиз Тихон Николаевич Хренников. - Умой луысал, театр та операез возьматысал ке мукет городъёсын но, Москваын но. Опера юн герӟаськемын удмурт калык крезьгурен. Опералы озьы ик вылӥ дунъет сётӥз Арам Ильич Хачатурян: - Искусство удысысь таӵе бадӟымесь произведениос - опера, симфония - нимаз адямилэн кужыменыз гинэ уг кылдытӥсько. Быдэс калыклэн огъя культураез му дася сыӵе произведениослы пушйыны но ӝужаны. Корепановлэн но "Наталь" операез кылдӥз, удмурт калыклэн огъя лул чеберлыкез вылын. Композитор - сайкыт но мур малпаськись, кибашлы адями. Герман Афанасьевичлэн та опера нырысетӥез бадӟым ужез, оскисько: азьланьын со кылдытоз ай данак мукет яркытэсь, синмаськымонэсь произведениос, соос озьы ик матын но валамон луозы калыклы. Дано композиторъёс вылӥ дунъет сётӥзы мукетъёсызлы но опера бордын ужасьёслы: либретто гожтӥсьлы А. Симоновлы, дирижёрлы Г. Бехтеревлы, художниклы Г. Векшинлы, кырӟасьёслы Г. Титовлы, Е. Пахомовалы, В. Нисковскихлы но мукетъёсызлы, хорлы но оркестрлы. Куноос кошкизы. Ми кылимы тулкымъясьтӥсь мылкыдын. Кык арня пала ортчыса, Герман Афанасьевич пыриз мон доры но азям гожтэт понӥз. Ыстӥллям сое СССР-ысь Композиторъёслэн союзысьтызы. Тани, шуэ, куриллям Союзэ пырон пумысен куриськон, автобиографиме, фотоме ыстыны. Озьы Герман Афанасьевич, ассэ Москвае ӧтьылытэк, СССР-ысь Композиторъёслэн союзазы кутэмын вал. Нош республикаямы Крезьгурчиослэсь огазеяськонзэс кылдытытозь кема на вал. 1971-тӥ арын Геннадий Корепанов-Камский, Казаньысь консерваторилэсь композиторской отделенизэ йылпумъямез бере, та огазеяськонэ кутэмын вал. Отӥяз вуизы егит крезьгурчиос. Озьы 1973-тӥ арын гинэ республикаямы кылдӥз Композиторъёслэн союззы. Герман Афанасьевич Корепановлэн крезьгуро ошмес синэз, ачиз пӧламы кемаласьгес ӧвӧл ни ке но, ӧз ӵоксаськы, ялан кужмо жингыртэ. Со дун ошмеслэн паськыт ӧръяськемез ик юрттӥз, дыр, Ижевскын Операя но балетъя театр усьтыны, данак крезьгуро, чеберлыко коллективъёслы будыны. Атаезлэсь ужзэ быгатыса азинтэ пиез - Александр Германович Корепанов. Табере со кивалтэ республикаысьтымы Композиторъёслэн огазеяськонэнызы. Василий МИХАЙЛОВ. Герман Корепанов (шорысез) 1961-тӥ арын "Наталь" операзэ возьматэмзы бере. Соин кенешо тодмо композиторъёс Арам Хачатурян но Тихон Хренников. (Туспуктэм басьтэмын "Удмуртская правда" газетлэн архивысьтыз.) Ӟечкыласьком! Алнаш ёросысь Евгения Георгиевна Степанова туннэ пусъе вордскем нуналзэ. Ми, солэн нылпиосыз, милям кузпалъёсмы но, пиналъёсмы, ӟечкыласьком анаймес та праздникен. Мед луоз тынад тазалыкед, кылемез шедёз. Оскы, анай, котьма луоз умой! Кыӵе луоз ХХИ дауре дышетон? Дышем сямъя, Ижевск дорысь "Дзержинец" шутэтскон лагерьын туэ нош ик ортчытӥське финн-угор дуннеысь сташеклассникъёслэн слётсы. Та В Калык куспо слёт луэ ни, со ужалоз 31-тӥ июльысен 6-тӥ августозь. Куное лыктэмын Эстониысь, Карелиысь, Коми Республикаысь, Мордовиысь, Марий Элысь, Татарстанысь но Удмуртиысь пиналъёс. Та слёт дыръя луозы научно-практической конференция, фольклоръя пичи фестиваль, педагогикая семинар. Ужалозы пӧртэм мастерскойёс - керамикая, батикъя, куиськонъя, удмурт дӥськутъя, калык эктонъёсъя но кырӟанъёсъя, футуризмъя. Ваньмыз та ужрадъёс ортчытӥсько, "Национальное образование" проектэз быдэсъяса. Проектлэн шорсюлмаз луэ туала дуннеын пӧртэм калыкъёслэсь культураоссэс герӟаса Выль школа кылдытон. Соин валче ужпум пуктӥське пичи (ичи лыдъем) калыкъёслэсь культуразэс азинтыны, ог- огед куспысь валамтэосыз кулэстыны, со понна выль дышетон технологиосыз уже кутыны. Кун Кенешлэн депутатъёсызлэн "Единство" фракцизы дэмлаз калыкез дышетон но кун национальной политикая котырес ӝӧк ортчытыны. Пӧртэм темаосъя лекциос лыдӟо удмурт тодосчиос Маргарита Гришкина, Зоя Суворова, "Финно-Угрия" фондлэн кивалтӥсез Яак Прозес но Ижевскысь 44 номеро гуманитарной лицейлэн директорез Михаил Черемных. Старшеклассникъёслэсь слётсэс ортчыто Удмурт Республикаысь Нациосын ужан политикая, Калыкез дышетонъя, Культурая, Калыкъёслэн кусыпъёссыя министерствоос, Егитъёсын ужанъя кун комитет, гуманитарной лицей. Коньдонэн юртто Финляндиысь М. Кастрен нимо огазеяськон, Федерациысь почта кусыпъёсъя управление, акциосын "Аспэк" огазеяськон но Урал Траст Банк. Т. НИКОЛАЕВА. Нош ик пӧязы Дышетӥсьёсыз нош ик пӧязы. Соосты кӧня пол оскытъязы ни, уждун сётонэз радъялозы шуыса. Кыл вылын умой пӧрме, нош улонын... Та дырозь уноез дышетӥсьёс ӧз басьтэ на кылем гужем понна уксёзэс. "Пытсамтэ" тулыс толэзьёс. Мар кароно? Ижевскысь Устинов ёросысь школаосын ужасьёслэн малпамзыя, югдур урод возиське, вылӥ ёзъёсысь кивалтӥсьёслэн кусыпъёссы тупамтэен. Тазьы ик луиз ке, дышетӥсьёс 1-тӥ сентябре, оло, уже ик уз потэ. Правооссэс утён вылысь, соос решение кутӥзы быръем муртъёссэс Москвае ыстыны. Соос озьы ик ӧтизы мукет школаосысь эшъёссэс та секыт вакытэ огазеяськыны но ужпумез огъя кужымен быдэстыны. Вазиськонзэс дышетӥсьёс Кун Кенешлэн депутатъёсызлы но сётӥзы. И.Максимов. ГУРТ УЛОН Ныпъетсы секыт ке но Азьвыл аръёсы гуртын будэм егитъёс школазэс йылпумъямзы бере тросэз улыны городэ кошкылӥзы. Яке мукет интыосысь шудзэс шедьтылӥзы. Надежда Михайловна Иванова, Шор Постол школаез йылпумъяса, Ижысь гурт удысъя институтын дышетскиз. Агрономлэсь дипломзэ басьтыса, вордскем гуртаз берытскиз. Дас витетӥ арзэ ю-нянь будэтэ "Труженик" эштосын. 1992-тӥ арысен быдэсъя валтӥсь агрономлэсь ужзэ. Хозяйстволэн кивалтӥсез Н. С. Соловьев музъем ужъёсъя специалистэз сярысь шуныт кылъёс вераз: - Ӟучъёс шуэмъя, где родился, там и пригодился. Надежда Михайловна туж тыршись кышномурт. Ужзэ шонер радъяны быгатэ, валтӥсь агрономлэсь секыт ужзэ но капчиен быдэсъя. Шор Постолэ вуыса, Надежда Михайловнаез ужан кабинетысьтыз шедьтыны ӧм быгатэ. Бусыосты котыртэмез бере вутскиз машинно-тракторной парке. Эскерытэк ӧз кельты кеносъёсын ужасьёсты. Сюрес вылысен пайдаё кенешъёс сётӥз пумитаз шедем фермеръёслы. Ужез трос ке но, ваньмыныз вераське капчи мылкыдын но шуныт пальпотонэн. Валтӥсь агроном луыса но косъяськыны дышымтэ та кышномурт. Эштосын ужасьёс кык сюрс гектар вылын будэто картофка, пудо сюдон культураос, валэс юос но трос аръем турынъёс. Музъем ужъёсты валаса нуэмен, мулэсь удалтонлыксэ ӝутон шӧдскымон азинскиз. Тулыс бызись вуос мулэсь вылӥ сӥзэ, азьвыл сямен, гылтыса уг кошко ни. Ваньмыз со ӟеч ужамлэн емышез. Надежда Михайловналэн верамезъя, коньдон ӧвӧлтэм вылэ чӧлскыса, эштосын музъем ужлэсь культуразэ ӝутонлэсь ӧз куштӥське на. Наукалэн дэмламезъя нуо кизён бусыосты вошъянэз (севооборотэз). Хозяйствоысь кивалтӥсьёс бадӟым инты висъяло кыед поттонлы. Тани туэ картофка бусые котькуд гектар 60-70 тонна люкаськиз. "Кыкетӥ няньлэсь" ӟеч урожай басьтон понна та лыдпус тырмыт луэ. Будосъёслэн висёнъёсынызы нюръяськон понна кулэ луэмезъя куто ядохимикатъёсты. Озьы ке но, тыршо кидыслы мынӥсьёсаз гинэ лек "эмъюмен" пызйыны. Сезьы, чабей, йыды но картофка бусыосты сиисьёслэсь утьытэк ӧз луы. Пудо сиён дасян машинаос вужмемын но пӧсьтэмын ке но, эштосын тыршисьёс ужаны быгатӥзы. 149 тонна кӧс турын дасямын, 837 тонна сенаж но 2988 тонна силос тыремын. Вань со ужъёсын кивалтӥз агроном Н. М. Иванова. Таиз понна Надежда Михайловналэн сюлэмыз капчи. Эстӥськонлы курадӟыса ке но, уж азьланьтӥське. Та нуналъёсы потозы ни араны-кутсаны, агроном сюлэмшугъяське октэм кидысэз куасьтон-утялтон сярысь. КЗС- сы выльдэмез кулэ каре. Нош солы коньдон ӧвӧл. Агрегатлэсь куд-ог ёзъёссэ воштӥзы ик, но со ӧжыт. Музъем ужасьёслэн кибашлы но амало луэмзы, ваньзэ лэсьтыны тыршемзы вылын гинэ ткиз кысык вакыт умоен ортчоз. Уждунзэс вузъёсын басьтыса но басьтытэк ужало эштосын тыршисьёс. Ю-нянь октонлы дасяськыса, техниказэс тупатъяны выризы механизаторъёс. Эштослэн кивалтӥсьёсыз сое адӟо но валало, вань сюлэмзэс сёто соослэсь улонзэс капчиятон понна. Но ваньмыз пыкиське кунлэн гурт шоры кизэ шонтэмез вылэ. Нош гурт калык уг сётскы, ужаны тырше. Тулыс бусы ужъёссэс умой ортчытӥзы, табере дасясько ю октон- калтонлы. Эштосын усто механизаторъёссы ӧжыт ӧвӧл. Соос пӧлын К. Ф. Лошкарев, С. Н. Кузнецов, О. И. Рогожников, В. С. Тукташев, А. Г. Леконцев, шофёръёс В. И. Зорин, В. Н. Зорин, А. А. Братухин, И. И. Белов но мукетъёсыз. Кӧс куазен юос вакчиесь будэмын, утялтыны секыт луоз. Вылаз ик, эстӥськонлы дунъёс шуак вылӥе тэтчизы. Россия Федерациысь Правительстволэн Тӧроезлэн гуртын ужасьёслы юрттыны кыл сётэмез кыл вылын гинэ медаз кыльы вал. Та секыт вакытэ но азьпала учке агроном Н. Иванова. Соин ик юн кусып возе гурт ужъёсъя академиысь тодосчиосын. Учёнойёслэн дэмламзыя тырше эштосын выль амалъёсты но технологиосты уже пыӵатыны. Асьме инкуазьлы но муослы тупась сортъёсты но культураосты будэтыны сюлмаськемез эштослы умоен берытске. Азьланьын но ӟеч емышен шумпоттоз ай музъем ас утялтӥсьёссэ. Сыӵе осконэн но сюлмаськонъёсын уло эштосын ужасьёс. Н. ИВАНОВА. Завьялово черкогурт. Удмурт Республикаысь Кун Кенешлэн Республикаысь калык хозяйстволэн 1999 арлэн нырысетӥ палараз ужамезлы йылпумъянъёс сярысь Постановлениез Удмурт Республикаысь Кун Кенеш пуктэ: 1. Удмурт Республикаысь Правительстволэсь калык хозяйстволэн туэ нырысетӥ паларе ужамезлы йылпумъянъёс сярысь ивортонзэ лыдэ басьтоно. 2. "Бюджет удысын ужасьёслы уждун тыонэз радъян сярысь"Федеральной законэз быдэсъяны республикамылэн бюджетаз коньдон тырмымтэен вазиськоно Россия Федрацилэн Президентэзлы, Россия Федерациысь Федеральной Собранилы но Россиысь Правительстволы Удмурт Республикалы коньдонэн юрттэт курон но республикамылы трансфертъёсты йылэтон сярысь. 3. Удмурт Республикаысь Правительстволы: - вань ужрадъёс кутоно республикамес 1999 арын азинтонъя программалэсь учкем люкетъёссэ улонэ пыӵатон но республикамылэсь 1999 арлы чаклам бюджетсэ быдэстон понна; - гурт хозяйствоын эстӥськонэн секыт югдур кылдэмен, нимысьтыз ужрадъёс чаклано, эскероно эстӥськонэз госрезервысь басьтон сярысь ужпумез но; - пудо сиён дасянэз но ю-нянь утялтонэз умой ортчытон понна туэ куинетӥ кварталэ быдэсак уже кутоно республикалэн бюджетаз 1999 арлы гурт хорзяйстволы государство ласянь юрттэт сётон сярысь учкем статьяез; - 1999 -тӥ арын 15-тӥ августозь решение кутоно республикалэсь ю тысьлы но мукет сиён-юонлы кулэяськонъёссэ быдэстон понна, со дыре ик районъёсысь но городъёсысь администрациосын ӵош чакласа возёно дунъёсты; - кулэ ужрадъёс кутоно калык хозяйстволэсь но социальной удыслэсь объектъёссэ 1999-тӥ-2000-тӥ аръёслы сӥзьыл-толлы дасян пумысен; - 1999-тӥ арын 1-тӥ сентябрёзь ужрадъёс кутоно республикамылэн городъёсаз но районъёсаз правоез тӥясьёсын нюръяськон понна, нимысьтыз саклык висъяно законэз тӥясь этиловой спиртэз поттӥсьёслы-вузасьёслы, аракыен но наркотикъёсын вузкарисьёслы, буёло но сьӧд кортъёсты лушкасьёслы но озьы ик базаръёсын ужась гражданъёслэсь коньдон октонлы; - Удмурт Республикалэн Конституциысьтыз 93-тӥ статьяезъя Кун Кенешез 1999 арын ИВ кварталэ ужано программаеныз тодматоно. 4. Та постановленилэсь быдэсъяськемзэ эскерыса возьыны кулэ Кун Кенешлэн Экономикаын полтикая, асваньбурен герӟаськем ужпумъёсъя но инвестициосъя ялан ужась комиссия. Удмурт Республикаысь Кун Кенешлэн Тӧроез А.А.Волков. Ижевск город, 1999-тӥ арын 29-тӥ июле. � 63-ИИ. Бакчае, сад-бакчае Кылъёсыз но крезьгурез А. Белоноговлэн Бакчае тон, ой, мынам сад-бакчае, Узые но борые, ческыт чае, Сутэре но эмезе, Улмопуэ, чияе... Сюлэмме буйгатӥсе - Сад-бакчае. Котькыӵе но луылэ та улонэ, Возьмало нош, возьмало котьку монэ Сутэре но эмезе, Улмопуэ, чияе, Сюлэмме буйгатӥсе - Сад-бакчае. Со но, та но ужаса весь бергасько, Котырам мыным ваньмыз эш карисько: Сутэре но эмезе, Улмопуэ, чияе... Сюлэмме буйгатӥсе - Сад-бакчае. Кошкыкум бӧрсям учко кесяськыса, Лыктыны, лэся, монэ нош ик косо Сутэре но эмезе, Улмопуэ, чияе, Сюлэмме буйгатӥсе - Сад-бакчае. "Отечествоез" Лондонын тодо Западысь инвестициосъя бадӟымесь компаниос Россиысь вань политической партиос пӧлысь "Отечествоез" быръё. Соос умоен лыдъяло огазеяськонлэсь туала, пайдаё ужась рынокен экономика но зэмос демократия кылдытонъя платформазэ. Та сярысь тодмо луиз "Отечестволэн" экономикая но научно-технической политикая комиссиезлэн кивалтӥсез Андрей Кокошин Великобританилэн столицаяз вуылэм бере. Отын ортчизы огазеяськонэн тодматон ужрадъёс. А. А. Кокошин Лондонэ ветлӥз, инвестициосъя куд-ог фондъёс ӧтемъя. Кылсярысь, пумиськонъёс но кенешонъёс вал "Джи Пи Морган", "Фиделити", "Беринг", "Эллайнс Кэпитал", "Варбург Дилон Рид" компаниосын. Пусйыны кулэ, Западысь ужбергатон удысын соос кужмоосыз луо, ваньбурзы 1 триллион долларлэсь ортчемын. Ваньзы сямен ик Россилэн рыноказ ужало, азьланьын но отчы коньднзэс ыстыны чаклало. Инвестициосъя фондъёслэн малпамзыя, "Отечестволэн" экономикая политикаез Россиысь туала югдурез ӟеч валаса, странамылэсь аспӧртэмлыкъёссэ лыдэ басьтыса лэсьтэмын. Отын нырысетӥ инты басьто информатикаез но электроникаез азинтон, космос но лазер технологиос кылдытъян но мукет. Инвесторъёс озьы ик умоен лыдъяло огазеяськонлэсь ваньбурлы правоосты утёнъя, промышленностья туала корпорациос но оскымон банкъёс кылдытонъя программазэ. Кинлы матынгес? Парламентэ быръёнъёс азьын "Отечестволы" вань огазеяськонъёс пӧлысь тужгес но матын луэ "Вся Россия" блок. Кыӵе бен луыны кулэ закон кылдытъясь ёз? Та ласянь тунсыко луо блоклэн одӥгезлэн азьветлӥсезлэн Минтимер Шаймиевлэн малпанъёсыз: - "Вся Россия" блоклэн валтӥсь ужпумез - декабре ортчоно быръёнъёсы пыриськон. Асьмелы пайдаё ужась Кун Дума кылдытоно, со политической шудонъёсын мултэс медаз выры. Ог-огдэ валаны тыршон юрттоз ӟеч правительство люканы. Соку гинэ властьлэн вань ёзъёсыз странамы азьын кулэезъя кыл кутозы, куспазы керетонъёс ӧжыт пуромозы. Со Россиысь демократилэн бадӟым вормонэз луоз. Выль Думае уногес быръёно улосвылъёсысь адямиосты, соку федерацилэн субъектъёсыз но асьсэ ужпумъёсынызы палэнэ уз кыле. Серемес чуръёс - Лужков сярысь "Отечествоэн" Астраханьысь ёзэз Лужковлы сӥзем серемес чуръёс понна кузьым сӥзиз. Огазеяськонлэн юрттэмез улсын городын КВН-лэн шудонъёсыз ортчизы. Отын вормисьёс понна эшшо одӥг приз дасямын вал на. Кӧня ке ар ӵоже ини азьпала потэм команда ветлэ Сочи городэ КВН-лэн фестиваляз. Та радэ Сьӧд зарезь дуре мыныны юрттӥз "Отечестволэн" ёзэз. "Ӟырдыт" нюръяськонын котькинлэсь сэзь но визьмо луэмзэ возьматӥз Астраханьысь инженерно-строительной институтысь команда. Ӵошатсконлэн тужгес тунсыко люкетэзлы пӧрмиз Юрий Лужковлы сӥзем серемес чуръёсты мадёнъя конкурс. Пусйыны кулэ, лэчыт кылоос понна дыр вань на: "Юрий Михайловичлэсь нимзэ нуллӥсь" конкурслы йылпумъянъёс лэсьтэмын луозы 2000-тӥ арын май толэзе. Огазея крезьгур Быдэс дуннее вӧлмемын сям - партилы нимысьтыз гимн кылдытон. Крезьгур но угось огкадь малпаськись но улӥсь адямиосты огазеяны юрттэ. "Отечестволэн" сыӵе гимнэз ӧвӧл на, но кырӟаны яратӥсь Саратовын та ужен ӝегаса ӧз улэ. Кичӧлтӥсьёс пӧлын данак егитъёс вал. "Отечестволэн" Саратовысь ёзэзлэсь гимнзэ гожтон сярысь но сюлмаськиз егитъёслэн секцизы. "Отечество" ОПОО-лэн иворъёсъя аентствоез. Герман Кириллов Ӧръяське кырӟан гур Сӥзисько В. Пудовалы Кырӟасьлэн улонэз, пе, шудтэм - Калыкын куддыръя верало. Но уг оскы, уг оскы сюлэм Кыз йылысь кеж кырныж куаралы. Кырӟаны ке кутске Валямы, Вань дунне азвесен жингыра, Вуюись ӝуатске инбамын, Вань шаер шундыя югыра. Ӧръяське кырӟан гур омыре, Асьмемыз шудогес со каре. Поттылэ тыл но, ву но пыртӥ, Валтылэ лёгымтэ сюрестӥ. Кырӟасьлэн улонэз, пе, шудтэм - Калыкын куддыръя верало. Но уг оскы, уг оскы сюлэм Кыз йылысь кеж кырныж куаралы. Гудырикошкон: Тодмо нимъёс но нуналъёс 1. - Вордскемез дырысен 120 ар тырме (1879-1968) Вера Васильевна Толстаялы, УАССР- ысь школалэн дано дышетӥсезлы. 25 ар ӵош В.Толстая ужаз Быдӟым Сибы (али Можга ёрос) удмурт гуртын. Дышетӥз пиналъёсызлэсь анай кылзэс, урокъёс нуиз вордскем кылынызы; - 70 ар талэсь азьвыл (1929) Можга городын ӝутыны кутскемын дубильной экстрактъёс поттонъя завод. 6. - 65 ар талэсь азьвыл (1934) Ижевскын усьтӥськиз С.М.Киров нимо шутэтскон парк. 11. - 80 ар талэсь азьвыл (1919) потӥз "Красное Прикамье" газетлэн нырысетӥ номерез, со вакытэ РКП(б)-лэн Сарапул уездысь комитетэзлэн но уисполкомлэн органзы. 12. - Вордскемез дырысен 80 ар тырме (1919) Степан Иванович Широбоковлы, география наукаосъя кандидатлы, профессорлы, УАССР-ысь наукаосъя дано ужасьлы. Вордскемын Якшур-Бодья ёросысь Малые Ошворцы гуртын. С.Широбоков � 2 монографилэн, 4 брошюралэн, Удмуртилэн экономикаезлы но географиезлы сӥзем 50 научной статьялэн авторзы; - вордскемез дырысен 75 ар тырме (1924-1943) Советской Союзлэн Героезлы Вениамин Андреевич Сидоровлы. Вордскемын Кез ёросысь Изошур гуртын. Дано ним сётэмын быремез бере Харьков областьысь Качаловка черкогурт дорын фашистъёслэн трос танкъёсынызы жугиськон дыръя сэзь, кышкасьтэм но геройлыко луэмзэ возьматэмез понна. 13. - 215 ар талэсь азьвыл (1784) Царской Селоын юнматэмын Сарапул городэз ӝутон план; - 55 ар талэсь азьвыл (1944) Ижевск, Воткинск, Сарапул, Глазов городысь школаосын юнматэмын пиосты но нылъёсты нимаз дышетон. 14. - 30 ар талэсь азьвыл (1969) Ижевскын кылдытэмын эшъяськонъя "СССР-Франция" но советско-немецкой огазеяськонъёслэн ёзъёссы. 15. - Вордскемез дырысен 75 ар тырме Советской Союзлэн Героезлы Алексей Павлович Котельниковлы (1924-1944). Вордскемын Каракулино ёросысь Галаново черкогуртын. Сэзь но кышкасьтэм луэмзэ А.Котельников возьматӥз Умань город понна ожмаськонъёсын. 17. - Вордскемез дырысен 80 ар тырме Советской Союзлэн Героезлы Владимир Никифорович Опалевлы (1919). Война дыръя кышкасьтэм лётчик 204 пол инбаме ӝутскылӥз, тушмонлэсь уно техниказэ но улэп кужымзэ быдтӥз; - 55 ар талэсь азьвыл (1944) 184-тӥ дивизиысь 297-тӥ стрелковой полкысь Василий Петрович Зайцевлэн (1915-1944) кивалтоно ротаез нырысьёсыз пӧлын вуиз Восточной Пруссиен кунгож доры. Со понна Василий Зайцевлы сётэмын Советской Союзлэн Героез дано ним. Вордскемын Завьялово ёросысь Лудӟийыл гуртын. 18. - Вордскемез дырысен 70 ар тырме Геннадий Михайлович Корепанов-Камскийлы (1929), тодмо крезьгурчилы, РСФСР-ысь но УАССР-ысь искусствоосъя дано ужасьлы, УАССР-ысь калык артистлы, УАССР-ысь Кун премилэн лауреатэзлы. Вордскемын Дэбес ёросысь Ягвуко гуртын. Г.Корепанов-Камский "Любушка" нырысетӥ удмурт оперетталэн, "Италмас" балетлэн, "Чипчирган" опера-балетлэн, "Рооссиянка" опералэн, трос кырӟанъёслэн но романсъёслэн авторзы. 20. - 35 ар талэсь азьвыл (1964) Сарапулысь нюлэс комбинатын нырысетӥ продукцизэ сётӥз древесно-волокнистой плитаос поттонъя цех. 22. - Вордскемез дырысен 90 ар тырме Советской Союзлэн Героезлы Иван Данилович Юдинлы (1909-1945). Войналэсь азьвыл ужаз Кезысь етӥн сэстон заводын. Дано ним сётэмын Днепр шурез ӟеч выжемез но солэн бурпал ярдураз плацдармез паськытатонэ пыриськемез понна. 25. - 85 ар талэсь азьвыл (1914) усьтӥськизы Крезьгуръя Ӟуч императорской огазеяськонлэн Сарапулысь ёзэзлэн Ижевскысь крезьгуръя классъёсыз. Удмуртилэн улосвылаз со луэ кыкетӥез крезьгуръя дышетскон заведение; - 70 ар талэсь азьвыл (1929) "Горд Знамя" промысловой артель кылдытон сярысь ужпум утэмын. Берлогес со Можгаысь машина детальёс поттонъя завод луиз. 30. - Вордскемез дырысен 70 ар тырме Семен Андреевич Перевощиковлы (1929), удмурт кылбурчилы но журналистлы. Вордскемын Игра ёросысь Нязь-Ворцы гуртын. С.Перевощиков - кылбуръёсын "Вуюись", "Пот пумитам", "Лобо луд ӟазегъёс" но мукет сборникъёслэн авторзы; - 30 ар талэсь азьвыл (1969) Ижевскысь машина лэсьтон заводысь 7 комсомолец советской делегациен ӵош пыриськиз "Вормонлэн знамяез" мотоциклэн калык куспо ворттылонэ. Мотоциклэн ворттылонъёс ортчытӥськизы, ВЛКСМ-лэн ЦК-еныз Украинаез, Белоруссиез, Болгариез, Польшаез, Румыниез фашистъёслэсь мозмытэм дырысен 25 ар тырмонлы сӥзьыса; - 30 ар талэсь азьвыл (1969) Ижевскысь машина лэсьтон заводысь спортсменъёслэн командазы Ярославль городын ортчись "Медведь-69" автораллиын нырысь инты басьтӥз. Алигес республикаысьтымы бадӟымаз стадионын ортчиз вылӥ кивалтӥсьёслэн кенешонзы. Отын вераськон мынӥз "Газовик-Газпромез" (тазьы нимало табере азьло "Зенит" шуиськись стадионэз) выльдон сярысь. Чакламын тупатыны пукон интыосты, воштыны лампаосты но мукетсэ. Люкаськемъёс кенешемзы бере дӥсьсэс воштӥзы но... футболэн шудӥзы. Кун Кенешлэн но Правительстволэн командазы кужымзэ мертаз предприятиослэн кивалтӥсьёсынызы. Шудон 2:2 лыдын йылпумъяськиз. * Шудон дыръя. Александр ГОРБУНОВЛЭН туспуктэмез. Кӧня асьмеос? Кинъёс асьмеос? Финн-угор калыкъёс но соослэн кылъёссы люкисько сизьым вайлы. Нырысетӥез - балти-финн вай Быдэс дуннеын уло 4 миллион 700 сюрс пала финнъёс (тросэз Финляндиын), 1 миллион 26 сюрс пала - эстонъёс, 131 сюрс - карелъёс, 12 сюрс 500 вепсъёс, сюрс - ижоръёс (ӝыныез Россиын, ӝыныез Эстониын), 226 - ливъёс (Россиын но Латвиын). 1989-тӥ арын адямиосты лыдъяку, водьёс лыдэ басьтэмын ӧвӧл (Удмуртиысь бесермянъёс сямен ик). Тодосчиос оскыто: Ленинград областьын соос кызё мында кылемын на. Кыкетӥез - саам вай 50 сюрс пала саамъёс уло Швециын, Норвегиын, Финляндиын. Россиысь Кольской полуостровын соос ог 2 сюрс лыдъясько. Куинетӥез - мордва вай Со огазея эрзянь но мокшань калыкъёсты. Дуннеын уло 1 миллион 154 сюрс пала мордваос. Мордовиын - одӥг куиньмосэз гинэ. Ньылетӥез - пор (мари) вай Возь поръёс но гурезь поръёс 700 сюрс котыре вуо ни. Витетӥез - пермь вай Отчы пыро удмуртъёс, коми-зарянъёс но коми-пермякъёс. Ог 800 сюрс удмуртъёс уло Удмурт Республикаын, Татарстанын, Башкортостанын, Пермь, Киров но мукет улосъёсын. Коми Республикаын удмуртъёс 3 но ӝыны сюрслэсь ятыр. Коми-зарянъёс 350 сюрс пала лыдъясько, коми-пермякъёс - ог 155 сюрс. Куатетӥез - угор вай (шонергес - обь-угор) Отчы пыро 23 сюрс пала хантыос но 10 сюрс котыр мансиос. Сизьыметӥез - венгер вай Паймоно кадь, со но туж матын луэ угор вайлы. Дунне вылын уло ог 15 миллион венгеръёс (мадьяръёс), 10 миллионэз - Венгриын, кылемез - Румыниын, Югославиын, Польшаын, Чехиын, Словакиын. Украинаын соос 163 сюрслэсь ятыр, Россиын - 6 сюрс пала. Данакез финн-угор калыкъёс шедемын асьсэ кунзылэсь палэнэ. ПОЛИТИКА Коньдон тырод - кандидат луод Матэкто Россиысь Кун Думае быръёнъёс. Кинъёс бен нюръяськозы таяз учыре закон кылдытъясь вылӥ ёзэ шедён понна. Быръёнъя Центральной комиссия ялӥз - декабре кужымзэс мерталозы 139 партиос но огазеяськонъёс. Нырысь ик пусъём тодмо нимъёсты - КПРФ, ЛДПР, "НДР", "Яблоко" движение, "Трудовая Россия" (Ампилов), "Честь и Родина" (Лебедь), Боровойлэн, Шахрайлэн партиоссы но мукетъёсыз. Берло дыре кылдӥзы но кужым люкало ни Лужковлэн "Отечествоез", улосвылъёслэн кивалтӥсьёссылэн "Вся Россия" блоксы. 139 пӧлын вань тужгес тунсыкоосыз но. Телевизор учкисьёс умой тодо, луоз, Валерий Комиссаровлэсь кӧня ке ар ӵоже ини мынӥсь "Моя семья" передачазэ. Табере Россиын таӵе нимын ик политической движение ужа. Кивалтӥсез но со ик - Валерий Комиссаров. Машинаен ворттылыны яратӥсьёс но огазеяськиллям. Кылдытӥллям "Автомобильный клуб России" политической движение. Бензинлы дунъёслэсь будэмзэс шӧдӥзы, луоз... Нош ик паймытӥз Жириновский. Со быдэс семьязэ политикае кыске ни, лэся. Апаез Любовь Андреевна Жириновская выль партия люкам: Лулчеберлыкез улӟытонъя партия (ӟуч сямен - Партия духовного возрождения). Валамон, огшоры бырйись чабкиськоз, ява: ма, кызьы 139 пӧлысь кулэзэ быръёд, йыромод но тӥни. Сокем ик кышканэз ӧвӧл. Котькудӥзлы партилы но огазеяськонлы Быръёнъёс сярысь законъя 200 сюрс кинюртэм люкано на. Соослэсь зэм луэмзэс чаклалоз но дунъялоз Центр избирком. Со бере гинэ быръён кампание пыриськыны луоз. Нош партилэн яке движенилэн тырмыт кинюртэм бичаны кынарыз ӧз тырмы ке, мукет амал вань - тыр залог, 2 миллионлэсь ятыр быдӟалаен. Тросэз-а меда партиос тамында коньдон шедьтозы? Собере коньдондэ берлань басьтод на шуыса чик но осконэз ӧвӧл. Партия, огазеяськон одно ик 3 процент куара люканы кулэ. Озьы ӧз пӧрмы ке, залог кун казнае кӧче. Нош кыӵе югдур вал ортчем быръёнъёсын. Кун Думае сюрон понна нюръяскьизы 140-лэсь ятыр движениос. Нош та вакытэ отын ужало кӧняез ке гинэ - КПРФ, ЛДПР, НДР но "Яблоко". Мар ватонэз, куд-ог депутатъёс Думаез кыл кутонлэсь пегӟон амалэн лыдъяло. Тодады ваиськоды-а "МММ"-лэсь кивалтӥсьсэ Сергей Мавродиез. Табере котькудӥз кандидат быръёнъя комиссие ивортыны кулэ доходъёсыз но ваньбурез сярысь. Верано луоз гражданствоез сярысь но, озьы ик кыл кутон улэ кыскаллямын-а, ӧвӧл-а. Партиос но объединениос сямен ик нимаз кандидат но кинюртэм бичаны кулэ. Мылыд уг поты ке, сёт залог - 83 сюрс манет. Берлань басьтод шуыса, оскыны озьы ик секыт. Кандидат люканы кулэ быръёнэ лыктэмъёслэсь 5 процент куараоссэс. Ӟырдыт вакыт матэктэ. Быръёнъя кампания кутскытозь, кӧня ке нунал гинэ кылиз на. Сое ялыны кулэ Россилэн Президентэз аслаз Указэныз 19 августозь. Нош кыӵе мылкыдын пумита меда та вакытэз огшоры бырйись? Анатолий, врач, 32 арес: - Али Россилы зол кивалтӥсь кулэ, Пиночет выллем военной. Солэсь мед кылзӥськозы, солэсь кӧня ке коть мед кышкалозы. Нош асьмелэн кутэм законъёс гинэ но уг быдэсъясько. Соин ик мон куараме сётысал Александр Лебедьлэн партиез понна. Екатерина, заводын ужась, 45 арес: - Депутатъёсмы шуныт пуконъёсазы пуко, асьсэ сярысь сюлмаськыса. Нош калык понна ужамзы малы ке но уг шӧдӥськы. Ми тани заводын ужаськом, странамылы туж кулэ луись продукция поттӥськом. Азьвыл аръёсы сямен ик ужтэк ум пукиське. Нош уксё сизьым толэзь понна ӧм басьтэ ни. Мон туж паймыса кылзӥ Юрий Лужковез, Ижевске ветлыкуз. Пенсионеръёс но, пе, Москваын пенситэк уг курадӟо, предприятиос но тэк уг сыло, ужбегатӥсьёс но коньдон потто. Юрий Михайлович мэриысьтыз котькуд чиновниклэсь юаны-курыны быгатэ. "Отечествоен" ӵош Юрий Лужков быдэс Россиен, оло, кивалтыны пӧрмытоз. Любовь Григорьевна, пенсионерка, 67 арес: - Странаямы кылдэм секыт югдур понна янгыш каро коммунистъёсты. Мон талы чутрак пумит. Ӵапак коммунистъёс дыръя ик кӧттырмон нянь сиим. Нош али нянь вылын гинэ но шыръяны выриськом. Ярам ай, ми, гуртын улӥсь пенсионеръёс, ӧжыт ке но, пудо вордӥськом, бакча мерттӥськом. Соостэк воксё сютэм кыльысалмы, дыр, ук. Котьма ке но, мон дурбасьтӥсько коммунистъёслы. Ю. АЛЕКСАНДРОВА. Вамыш азьлань, вамыш берлань Ивортылӥм ни, кылем четверге Ижевскын Кун Кенешлэн азьло чакламтэ куинетӥ сессиез ортчиз шуыса. Малы со люкаськылӥз? Кулэ-а вал гужем шорын депутатъёсыз люканы? Сессиез ортчытон герӟаськиз кылдэм югдурен. Ваньмыз огсыр луысал ке, эскероно ужпумез бӧрысьгес но учкыны быгатысалзы. Нош али ваньмыз огъя бугоре биниськиз: дунъёслэн будэмзы но гурт хозяйствоын ужъёслэн ӝегамзы, ужбергатӥсьёслэн выль вытэн соглаш луымтэзы но толлэн матэктэмез. Нырысь-валысь ялэмын вал, депутатъёс калык хозяйстволэсь арлэн ӝыныяз кызьы азинскемзэ гинэ эскерозы шуыса. Озьы ӧз пӧрмы. Вузкарисьёслэн куронъёссы санэ басьтэмын вал. Соослы луыса, повесткае ватсаса эшшо ньыль ужпум пыриз на. Республикаысьтымы экономикалэн куать толэзь ӵоже ужаменыз люкаськемъёсты тодматӥз Правительстволэн Тӧроез Николай Ганза. Депутатъёслы, валтӥсь предприятиослэн директоръёссылы, городъёслэн но, ёросъёслэн кивалтӥсьёссылы но мукет эшъёслы со ивортӥз Удмуртиын кылдэм югдур сярысь. Бюджетэ коньдон ичи вуэ, промышленность но гурт хозяйство кулэезъя уг ужало, быдэстэм ужъёс но поттэм ваньбур понна Москва коньдон сётыны уг дырты, МВД, вытъёсъя инспекция но мукет та выллем ёзъёс выт бичанэз чакламъя радъяны уг быгато, соин ик уг луы уждунэз дыраз сётъяны, социальной пособиосты тырыны, пусйиз премьер-министр. Экономикаын ма но со ӟечез адӟиськыны кутске гинэ, соку ик маке но шеде. Кылем арын августэ, кризис шуккиз, туэ тани бензин но мукет эстӥськонэн шуге-леке вуим. Та вузъёс дуноязы бере, сумедэ пуксизы уно предприятиос но огазеяськонъёс. Калыклэн но улон-вылонэз шӧдскымон уродмиз. Правительство вань луонозэ лэсьтоз, югдурез син азьын возён но умоятон понна, пусйиз Николай Ганза. Со вераз, берпуметӥез министр юнматэмын ни шуыса. Вераськон мынэ гурт хозяйствоя но сиён-юонъя кивалтӥсь сярысь. Ог дасо муртэ та пуконэ мертамзы бере, премьер дугдэм Петр Першин вылэ. Кин со? Глазовысь "Чура" хозяйстволэн кивалтӥсез, 1948-тӥ арын вордскем ӟуч воргорон. Кун Кенешлэн депутатэз. Нырысетӥ сессиын со калыкез паймытӥз вал, трибуна сьӧрысен киоссэ гадь вылаз кечат- вамат тырыса вераськеменыз. Кивалтэтлэн тӧроез пусйиз, берло дыре республикаямы выт тыронлэсь пегасьёсты шараян борды рос-прос басьтӥськизы шуыса. Куд-огезлы озьы ужаммы уг кельшы ке но, шуиз Николай Ганза, мыдлань ужасьёслы ми маза ум сётэ, "Удмуртгеологиын" тани кивалтӥсез воштӥм ни, мукет организациосын но радзэ шедьтыны тыршом. Та дыре тужгес но шугъяськытӥсь ужпумъя - нянь дунъёсъя - вераськиз вице-премьер Михаил Назаров. Со шуиз: кылдэм югдурлэн мугъёсыз Россиын кылем арын чакламлэсь трослы ичигес нянь октэмен герӟаськемын. Соин ик асьме нянь комбинатъёс но тырмыт ю тысь дасяны ӧз быгатэ. Ярам коть, гуманитарной юрттэт шуон чотын республикалы 40 сюрс тонна сиёнлы ярась чабей висъязы. 23 сюрсэз изэмын ни. 10-эз али сюрес вылын. Но Западысь дядяйёслэн няненызы гинэ кӧтэз уд тыры. Сюлмаськоно дорамы будэтэм ю тысез дыраз утялтон сярысь но. Со туэ кылем арын мында люкаськыны кулэ - 600 сюрс тонналэсь ятыр. Валамон, асьме тысь нянь пыжыны сокем ик уг яра ке но, пудо сиёнлы но мукет кулэяськонъёслы со туж кулэ. Правительство олокызьы но юрттыны выре Сарапулысь хлебокомбинатлы - уго удысысь та бадӟымез предприятие. Озьы ке но, депутатъёс шугъяськемзэс веразы, Москваен но трос нянь будэтӥсь улосъёсын али ик огкыл тупатытэк, тол вылтӥ асьмеос ёрмон калэ вуом шуыса. Докладъя прениосын вераськизы Валерий Фридрих, Михаил Кокорин, Энвиль Касимов, Павел Вершинин, Аркадий Малков но Анатолий Салтыков. Ижевсклэн мэрез пусйиз, городэз толлы дасян шуген мынэ шуыса. 70 процентэз гумыос вужмемын ни. Со сяна, люкето на коньдон понна визьтэммемъёс - сыӵеос городысь ог 70 километр (!) алюминь езъёсты вандылӥллям ни. Соин валче уно предприятиос ватсаса бадӟымесь ыштонъёс адӟо. Нуназе бере депутатъёс эскеризы тупатэм табышысь (доходысь) огъя выт басьтон сярысь законъёсын герӟаськем ужпумъёсты. Пусйыны кулэ: пикетэ ӵукна поттэм ужбергатӥсьёс зор но пӧсь шунды улын лумбыт сылӥзы-пукизы Кун Кенешлэн юртэз азьын - сокем витизы соос депутатъёслэсь маке но лэсьтэмзэс. Правительствоын нимысьтыз кылдытэм комиссилэн нимыныз ивортӥз Пичи ужбергатонъя комитетлэн кивалтӥсез Мхаил Зайцев. Уно пумиськонъёс бере кун властьлэн ыстэм муртъёсыз, предпринимательёс, соослэн профсоюззы но та вакытэн герӟаськем мукет эшъёс данак пунктъёсъя огкылэ вуизы. Кӧня ке коэффициентъёсты воштыны соглаш кариськизы. Правительстволэн членъёсыз куд-ог юанъёсъя законын тупатэм нормаосты шонерен лыдъяны ӧдъязы ужбергатӥсьёс. Озьы ке но, сессиын мылкыдъёслэн пӧртэм луэмзы туж шӧдӥськиз на. Воткинскысь, Можгаысь депутатъёс эшъёссылы вазиськизы, котькуд городлэсь но ёрослэсь аспӧртэмлыксэ лыдэ басьтыны курыса. Николай Ганзалэн, солэн воштӥсезлэн Сергей Чикуровлэн малпанзы таӵе вал: ойдолэ туннэ юнматом комиссиен ӵектэм воштонъёсты, соосъя кӧня ке толэзьзэ ужалом, отӥяз улон возьматоз шонер яке мыдлань лэсьтэммес. Табышез азьпала лыдъяса басьтэм выт сярысь закон - Кун Кенешлэн кыкетӥ ӧтчамысьтыз депутатъёслэн нырысетӥ "мильымзы" (кадръёсъя решениоссэс вератэк). Жаль, но со комъяськиз. Законэз выльысь "пыжоно" луиз. Татын таӵе но шекез шараяськиз. Асьме властьёс та дырозь ӧз дыше на лэсьтэм ужъёссэс калыклы валэктыны. Весь малпало, лэся, валасез валалоз, валасьтэмезлы со кулэ но ӧвӧл шуыса. Кызьы пусйиз Анатолий Салтыков, пикетэ лыктэмъёс пӧлын но трос вал на, пе, документлэсь пуштроссэ пумозяз валасьтэмъёс. Кин люкетӥз та ужез закон кутэмлэсь азьло но, бӧрысьгес но радъяны?.. Тӥни озьы ик улӥськом. Одӥг вамыш азьлань лэсьтӥськом, собере выльысь берлань чигнаськом. Озьы весь интыямы кыллиськом. Куке быгатом ни меда умой-умой кыкетӥ вамыш лэсьтыны? И. ЛЕБЕДЕВ. Кун Кенеш ивортэ Кылем арня пумын Сарапулын ортчиз Удмурт Республикаысь городъёсысь но ёросъёсысь администрациослэн но быръем ёзъёслэн кивалтӥсьёсынызы кенеш. Кенеше люкаськемъёс вераськизы пудо сиён дасянын но ю-нянь октонын кылдэм ӟырдыт ужпумъёс сярысь. Республикаын кысык югдур сярысь кенешонэ лыктэмъёс азьын вераськиз Удмурт Республикаысь Правительстволэн Тӧроезлэн воштӥсез Михаил Назаров. Со пусйиз, ю-нянь октонын туэ шуг-секытъёс уг кылдо эстӥськон тырмымтэен гинэ. 30 процентэз комбайнъёс бусые потыны уз быгатэ - соос тупатъятэк кылемын. Соин ик вань секытэз усёз вужмем но пӧсьтэм агрегатъёс вылэ. Котькуд комбайн шорлыдын 220 гектар утялтыны кулэ. Сыӵе югдурысь потон понна, Михаил Назаров дэмла кужмоесь "Доминатор" комбайнъёсты уже кутыны. Кенешлэн ужаз пыриськиз Правительстволэн Тӧроез Николай Ганза. Гуртъёсысь ёрос администрациослэсь кивалтӥсьёссэс со куриз ужез ӟеч радъяны но асьсэ районысьтызы котькуд хозяйствоын кылдэм югдурез син азязы возьыны. "Асьмеос умой тодыны кулэ, ма лэсьтоно, аран-кутсан ужъёс радызъя мед ортчозы шуыса",- вераз Правительстволэн Тӧроез. Кенешонэ люкаськемъёс Правительстволы вазиськизы ӵектонэн: коркаосты шунтон понна эстӥськон ӧвӧлэн, со понна кутыны ыль нефтез. Солы пумит луиз Кун Кенешлэн Тӧроез Александр Волков. Правительстволэн нырысез быдэстоно ужрадэз луыны кулэ гурт хозяйстволы эстӥськонэн юрттон но комбайнъёслэсь ужзэс ӟеч радъян, шуиз со. Ӟырдыт вераськон мынӥз толлы дасяськон пумысен. Тужгес но секыт югдур кылдӥз Камбаркаын. Татын ужъёссы кутскемын но ӧвӧл на. Секыт мылкыд кылдытэ озьы ик акциосын "Ижмаш" огазеяськонлэн котельнойёсызлэн толлы дасяськемзы. Со сярысь ивортӥз Ижевсклэн мэрез Анатолий Салтыков. Совещание люкаськемъёс Правительстволы вазиськизы федеральной бюджетысь коньдон басьтӥсь газ кутӥсьёсын тыронъёссэс ог-огенызы взаимозачёт пыр ортчытыны юрттыны куронэн. Удмурт Республикаысь Архитектурая но лэсьтӥськонъя кун комитетлэн тӧроезлэн нырысетӥ воштӥсезлэн Александр Ходыревлэн шаерын лэсьтыса быдэстымтэ объектъёсын ужпум сярысь ивортонэз люкаськемъёсты бадӟым вераськонэ ӝутӥз. Пусъемын вал, дас, яке дас вить ар талэсь азьвыл кутскем куд-ог лэсьтӥськонъёс та дыре ӝутыны уг ярало ни, куд-огъёсызлэн кулэлыксы но быремын. Озьы ке но, отчы кутэмын трос коньдон. Соин ик та объектъёсыз пайдаё кутоно. Николай Ганза Архитектурая но лэсьтӥськонъя кун комитетлы дэмлаз гуртын пуктӥськись улон юртъёслэсь асдунзэс ичиёмытыны но котькуд быдэстымтэ лэсьтӥськонэз шонерезъя дунъяны. Йылаз-пумаз вуттымтэ трос ужпумъёс кылдэмын кун но муниципальной асваньбурен кивалтон удысын. Сое эшшо огпол возьматӥз на Удмурт Республикаысь Асваньбуръя кун комитетлэн тӧроезлэн Сергей Касихинлэн вераськемез бере пуромем кенешон. Ужрадэ люкаськемъёс ветлӥзы Сарапулысь нянь продуктъёсъя комбинатэ но тодматскизы Башенин купецлэн азьвыл дачаяз интыяськем архитектурая но культурая памятникен. Удмурт Республикаысь Кун Кенешлэн пресс-службаез. Николай НИКИФОРОВ Кылбурась мылкыд Малпамтэ мадёс Инкуазь чеберлыкен кудӟон вакыт вал со. Туръя гурт урам, льӧмпу, улмопу сяськаослэсь воринъяськыса, быдэсак шукыяське. Шур вӧзын ӵыккето уӵыос, кесясько сюан шудӥсь эбекъёс, кинлэсь ке арлыдъёссэ лыдъя ни ёросэ шер вуылӥсь кикы. Мон капка выжыысь пуксёнэ интыяськи но али гинэ печатласькем "Молот" журналэз бугыръясько. Гадям тэронтэм шумпотон тымиськемын: "Молотын" - выль ним" рубрика улын печатламын мынам куинь кылбуре (1977-тӥ арын потэм 4-тӥ номераз). Журналлэсь та номерзэ мон чидатэк возьмай. Угось литературовед Алексей Ермолаев гожтэт пыр ивортӥз вал: "Кылбуръёстэ ӵектӥ журналын печатланы". Соку мыным, нырысь чуръёсме гожъяны кутскись муртлы, котькуд печатлам уже бадӟым вормон луэ вал. Писательёслэн журналазы шедёнэз кызьы дунъяны кыл шедьтод шат?! Туала улонэз малпаса лыдӟисько но валатскисько: кылбуръёсы лябесь. Нош кулэ вал, дыр, ук монэ но бурдъяны, сюлэмам оскон тылгизьы кенжытыны... ... Нош со тулыс нуналэ мон шудолэсь но шудо вал. Ас поннам ушъяськон мылкыды но вупульыяськылэ: "Кин ке лыдӟиз ни меда? Эх, вожъясько, луоз!" Ӵапак соку, вӧзам лыктыса, бускельмы, Кузьма агай, пуксиз. Ӧжытак шӧмаськемын. Киысьтым журналэз синйылтыса вазиз: - Чебересь кылъёс шедьтыса гожтэмед: яразы кылбуръёсыд. Шонерзэ ке верано, мон ачим но кылбурась адями,- тамаксэ аратонъяз, вераськонмес кенжытыса лэзе арлыдо бускеле.- Укыр яратӥсько Герман Ходыревлэсь гожъямъёссэ. - Мыным но ярало. Усто кылбурчи. - Лыдӟом-а солэсь одӥг поэмазэ? - сӥсъяса ик шорам учке. - Оло, уд оскиськы? Быдэсак дышетӥ, ява! - Оскисько. Лыдӟы, Кузьма агай. Кутскиз ук кылбураны! "Италмасъёс", "зангариос", "ӵуж уӵыос", "лыз ошмесъёс"... Кыӵе гинэ чебересь кылъёсты оградэ уг сузьйы арлыдо воргорон! Соку ик валатски: ачиз малпаса пӧлэстэ - Ходыревлэн таӵе поэмаез ӧвӧл. Нош кызьы-о сое шара вералод, арлыдо муртлэсь ӝутскем мылкыдзэ "сӧсыртод"? Шып кылзӥсько. Кузьма агай, артист музэн, киоссэ шонаса, пыдъёссэ выретыса ик лыдӟе-маде, яратон сярысь "поэмаезлэн" йылыз но, пумыз но ӧвӧл, кожалод. Берлогес ачиз но валаз "биньгозызэ" лябӟытэмзэ. Нош дугдыны уг быгаты ни. Йырвизьзэ кема тӥяса ӧз пукы - "ӵок!" шуиз но йылпумъяз. Та кылбуранлэн ритмез но, рифмаез но ӧй вал. Озьы ке но, бускеле ӟеч возьматӥз аслэсьтыз кылбурась мылкыдзэ. - Нокинлы но эн поттылы, Никол. Мон ачим но кылбуръёс лушкем-лушкем гожъясько. - Оло, лыдӟыны сётоды? Ӟечъёссэ газетэ ыстыны но быгатысалмы. - Уг, уг сёты,- лулскиз со.- Ас поннам гинэ гожъясько. Дорам огнам луыкум, мылкыды инсьӧры бурдъяськыку. Шонерзэ вераса, арлыдо бускелелэн кылбуръёс гожъямезлы ӧй оскы мон. Нош солэн сыӵе мылкыдыз вал, дыр. Угось, кырӟаны-вераны быгатэм сяна, арганэн но шудылӥз, сапегъёс но гындылӥз, мукет воргорон ужъёслы но кибашлы вал. Осконтэм понна эшшо одӥг муг шедиз на. Ёросамы потӥсь газетэ оже ветлэмъёс сярысь материал гожтон вылысь, Кузьма агай доры кожай вал. Соку ивортӥз: "Ож дыръя орденэн пусъемын вал. Гадям бырттыса ӧз вуттэ". Нош военной билетаз "За отвагу" медалез сярысь гинэ верамын. Егит визьмыным малпай: "Ваньмызлы бырттӥллям - тыныд вутскиллямтэ"... Ох, янгышаськем, сьӧлыко лул! Ож бере ньыльдон вить ар ортчыса, Кузьма агаез данъяса, военком гадяз со ордензэ бырттӥз. Малы меда ум оскиськелэ куддыр матысь адямилы но? Малпасько но, сюлэм ик шымырске. Та учырез тодэ ваисько ке, Кузьма агайлэн кылбуръёс гожъямезлы но оскыны кутскисько. Кылбурась мылкыдо адями вал... Финн-угор калыкъёслэн ВИИ фольклор фестивальзы Выжыосмы - огазьын Матэ вуэ финн-угор калыкъёслэн ВИИ Калык куспо фольклор фестивальзы. Асьме доры лыктыны дасясько 12 пӧртэм коллективъёс, соос пӧлын - коми кырӟанъя "Пелысь" ("Палэзь") ансамбль, коми-пермякъёслэн "Шондыбан" (Шунды бам") ансамбльзы, Карелиысь Сегозерск калык хор, "Марий памаш" но "Эрвел" пор ансамбльёс, Мордовиысь "Дигеля" (эрзя) но "Мокшаночка" коллективъёс, Ленинград улосысь вепсъёслэн "Армас" но ханты-мансиослэн "Уй пал кырӟанъёс" ансамбльёссы. Фестивале озьы ик пыриськозы шаермылэн палэназ улӥсь удмуртъёслэн фольклор коллективъёссы: Башкортостанысь Выль Татышлыысь "Шулдыр ӝыт", Пермь улосысь Бадӟым Гондыр гуртысь "Тюрагай", Киров улосысь Уни районысь "Купанча", Татарстанысь Балтаси ёросысь "Зангари". Фольклор фестиваль усьтӥськоз 7-тӥ августэ, кӧснуналэ, 11 часын Ижевскысь Шор площадьын. Татын ик луоз пӧртэм калыкъёслэсь киужъёссэс адӟытон. Та нуналэ эшъяськон ӝытъёс, концертъёс луозы ни, Ижевскын сяна, райцентръёсын но. Дас кыксэ ик фольклор коллективъёсты пумиталозы Удмуртилэн пӧртэм районъёсаз: Воткинскын, Завьялын, Играын, Як-Бодьяын, Киясаын, Пичи Пургаын, Уваын, Сарапулын, Каракулиноын но мукет. Оскыны кулэ, ог-огеныд эшъяськон, ог-огедлы юрттон мылкыд та нуналъёсы юнмалоз шуыса. Шуом, фестивальын ог-огзылы матэ кариськозы "зарни шепъёс" но "палэзьёс", "ашальчиос" но "шондыбанъёс", "ныргындыш семъёс" но "Марий памашъёс", "эрвелъёс"... Та фестиваль ог выжыысь калыкъёслэсь кусыпъёссэс юнматонын бадӟым вамыш луыны кулэ. Чакламын ог-огеныд тупанкылъёс (соглашениос) гожтыны, со мед юрттоз, культурамес гинэ ӧвӧл, наукамес, экономикамес но азинтыны. Фестивале лыктыны кулэ Финляндилэн Россия Федерациысь посолэз Маркус Люра, Венгер посольстволэн культурая атташеез Рита Майер, Наукаосъя Венгер Академиысь музыковедениея институтысь Ласло Фёльфельди но Гергей Агон, озьы ик Будапешт университетысь финно-угроведениея кафедраысь доцент Энике Сий. Т. ПЕТРОВА. Туннэ Кун Кенешлэн Тӧроез Александр Волков но акциосын "Ижмаш" огазеяськонлэн валтӥсь директорез Владимир Гродецкий кошкизы Прагае. Отын гожтэмын луоз автомобиль поттонъя "Ижмаш" - "Шкода-авто" ӵош предприятие кылдытон сярысь документ. Кызьы пусйиз Александр Волков, Чехилэн шоркараз вуылон но ӵош предприятие кылдытон сярысь тупанкыл гожтонэн йылпумъяське ужрадлэн нырысетӥез, дасяськон, люкетэз. Россия Федерациысь Правительстволэн "Ижмашлы" Чехиысь вуттыны чаклам воштос ёзъёслы но оборудованилы таможняын льготаос сётон сярысь постановлениез луоз тупанкыллэсь люкетсэ азинтонъя ужрад. Со юрттоз Ижевскын выль классэн автомобильёс бичанэз матысь дыре кутскыны но республикаын кылдэм югдурез умоятыны. Чехие визитэз йылпумъяськем бере, Александр Волков чакла Россия Федерациысь Правительстволэн Тӧроеныз Сергей Степашинэн пумиськыны но автомобиль поттонъя ӵош предприятие кылдытон сярысь тупанкылэз улонэ пыӵатонъя ужпумъёс пумысь кенешыны. х х х Бускельёсмы дорын Машина кулэ - люка евро Россиысь Правительство нош ик чурытэсь куронъёс пуктӥз кунгож сьӧрысь автомобиль ваисьёс азе, гожтэ "Вечерняя Казань" газет. Газет чакламъя, "бугор" сьӧрысь машина басьтыны матысь дыре "выль ӟучъёслэн" но коньдонзы уз тырмы. Алигес со ужпумъя улонэ потӥз кык постановление. Одӥгез соос пӧлысь уже кутӥське ини, мукетыз сӥзьыл улонэ пыӵалоз. Озьы ивортӥзы Татариысь таможня ужъёсъя управлениын, гожтэ газет. Нырысез постановлениея Белоруссиысь автомобиль ваисьёслэсь курозы машиназы кытын поттэм сярысь сертификат. Та странаын лэсьтэмын вӧл ке, таможня пыр огшоры вуз поттыку сямен тыроно луоз. Мукет постановление вуж иномарка понна таможняын огазеям тыронэз палэнтоз - сётоно луоз двигательлэн кубической сантиметрез понна 0,85 евро дун. Судэ, пе, вазиськозы Челябинскысь макарон поттонъя "МАКФА" тодмо фабрика чакла Москваысь "Экстра-М" фабрика вылэ судэ вазиськыны. Шоркарысь ужасьёсты челябинскъёс янгыше уськыто реклама нуонын кырсь амалъёсты кутэмен, ивортэ "Вечерний Челябинск" газет. Мугез таӵе: Москваысь макарон поттӥсьёслэн вузэн коробказы вылын "Экстра-М" - Россиын нырысетӥ интыын" гожтэмын. "МАКФА"-лэн кивалтӥсьёсыз лыдъяло, соосын вожвылъяськисьёс Россия Федерацилэсь "Реклама сярысь" законэзлэсь куд-ог ёзэтъёссэ тӥяло шуыса. Челябинскысь ужасьёс оско Москваысь вуз вылысь сыӵе гожтэмез быдтыны но рекламаен герӟаськем ужпумъёс сярысь вылӥысь кивалтӥсьёслы тодэ вайытыны, йылпумъя газет. Иворъёсъя национальной служба. Чуръёс, чуръёс... Мертчан дэрем будоз-а бусыын? Туннэ нуналлы магазинъёс, вузкаронтӥос тырмытэмын синтетикалэсь басмаосын, дӥськутэн, носкиосын. Толалтэ сыӵе дӥськут кынтэ, гужем пӧсятэ, мугор шокамысь дугдэ. Аллергия вӧлмем сяна, адямилэн огъя тазалыкез лябӟе. Со сярысь тазалыкез утён удысын ужасьёс но верало. Нош етӥнлэсь, ыж гонлэсь дӥськут мугорез шунтэ, няськатэ, висёнлэсь уте. Етӥнэз ик басьтом. Дӥськутлы сяна, кытчы гинэ уг куштӥськы та будос. Кидысэз вӧйлы мынэ, кужзэ лэсьтӥськонэ куто. Номыриз но уг кутӥськы, ваньмыз уже кутӥське. Кыӵе визьмо кивалтӥсьёслэн йыразы шуккиз етӥн культураез шаерамы будэтонлэсь куштӥськыны, етӥн заводъёсты аналтыны. Соин йырин но куиськон фабрикаос ворсан калэ вуттэмын. Малы та понна нокин но кыл уг куты? Азьвыл аръёсы етӥнэз утялтонын мӧйыослы но, дышетскисьёслы но уж тырме вал - урон, ишкон, тышкан, вӧлдон... Ӵошатскыса сямен, ог-огзылы юрттыса ужазы соос. Тодӥсько на, пиналъёс пӧлысь кин быдэстоз нормазэ, солы нырысь ик сёто вал чечыен нянь. Етӥнэз выльысь кизён борды басьтӥськыса, ужтэк пукись егитъёслы но шедьысал мар карыны. Тросгес возьматоно, данъяно туала вакытэ етӥн будэтӥсьёсты, соослэн ужан опытсы мукетъёсызлы но адӟем карымон луысал. Д. ШАХМАЕВА. Ижевск город. Лыдӟисьёслы вазиськон Коньдон ласянь югдур уродмемен йырин "Удмурт дунне" али потэ арняяз кык пол - вторнике но пятницае. Соин ик лыдӟисьёсмес куриськом: почта нуллӥсьёслы вождэс эн вае - соос янгышесь ӧвӧл. Печатья но иворъёсъя министерство али амалъёс утча, "Удмурт дунне", "Удмуртская правда", "Известия Удмуртской Республики" газетъёсты но удмурт журналъёсты ӵемгес печатлан вылысь. Со шуг-секытъёс огдырлы. "Удмурт дунне" газетэз 2000-тӥ арын но арняяз куинь пол поттыны чакламын. Ӵектэм дунъёсъя газетлы быдэс ар понна гожтӥськиды ке, дунъёс котькӧня выллане мед тубозы, "Удмурт дунне" дорады быдэс ар ӵоже вуоз. Гожтӥськыны луоз толэзен-толэзен, ӝыны арен но. Таяз учыре ини дунъёс азьланяз уз будэ шуыса вераммы уг луы. Соин ик, газетмылы быдэс арлы гожтӥськыса ик коньдонды трослы шыръяськоз. Нош таиз ивор Ижевскын улӥсьёслы. "Удмурт дунне" газетлы гожтӥськыны луэ "Информпечатьлэн" вань киоскъёсаз. Быръе, кудӥз тӥляд дордылы матын, арняяз куинь пол газетмес асьтэос басьтоды киоскысь. Быдэс арлы гожтӥськон дун 48 манет. 8 августэ - Лэсьтӥськисьёслэн нуналзы Лэсьтӥськон - со улон Асьме республикаын лэсьтӥськон удыс огез азьмынӥсез луыны кулэ кадь, угось куд-ог вылӥ кивалтӥсьёсмы но тани лэсьтӥськисьёс: Кун Кенешлэн Тӧроезлы А. Волковлы но Правительстволэн Тӧроезлэн нырысетӥ воштӥсезлы Ю. Питкевичлы лэсьтӥськон удысысь сиё-дано ужась ним но сётэмын. Озьы ке но, лэсьтӥськисьёсмылэн туннэ сокем ик трос шумпотонъёссы ӧвӧл. Удыссы азьын вормонтэм шуг-секытъёс сыло. Со сярысь вераськон мынӥз Правительстволэн юртаз - татчы праздник нуналзы азьын люкаськылӥзы республикаысьтымы устоосыз лэсьтӥськисьёс но лэсьтӥськонъя управлениослэн, фирмаослэн но предприятиослэн кивалтӥсьёссы. Туннэ нуналлы шаерысьтымы уно адямиос квартираослы кулэясько. Соку малы меда лэсьтӥськисьёслы ялан Удмуртилэн палэназ ужано луэ? Соослэн тыршеменызы йыг-йыг улон юртъёс пуктылэмын ини Киров, Пермь улосъёсын. Кылдэм югдурез тазьы валэктӥзы Глазовысь лэсьтӥськонъя Чепецкой управленилэн директорез В. Перешин но Воткинскысь "Мастер" предприятилэн прорабез С.Волков: - Ӧвӧл заказъёс. Лэсьтӥськонлы нокинлэн коньдон висъямез уг поты. Та ужез ӝутон понна туж кулэ нимысьтыз программа. Сомында усто специалистъёсмы уждунтэк но ужтэк кылё. Тӥни соин ик палэнысь уж утчано луиськомы. Кызьы шуиз В. Перешин, солэн управленияз 2,5 сюрс ужасьёс тыршо - данакез ужало мукет улосвылъёсын. Со дыре ик Глазовын квартиралы черодын сылэ 12 сюрс адями. Лэсьтӥськон удысъя туэ Удмуртия Россиын берпуметӥ интыын мынэ. Нош кемалась ӧвӧл, 1997-тӥ арын, республикамы улон юртъёс лэсьтонъя Россия Федерациын огез азьмынӥсез вал. Россилэн мукет улосвылъёсыныз ӵошатыса, сыӵе улӥе табере васькимы ке но, пусйыны кулэ: кылем арын сярысь улон коркаос республикаямы 2 процентлы тросгес пуктэмын. Та ласянь ужзы ӟеч радъямын Игра, Каракулино, Завьялово, Воткинск, Сарапул, Камбарка районъёсын но Ижевск, Воткинск городъёсын. Тросгес лэсьтӥсько гуртъёсын. Туэ январь- июнь ӵоже ас кожазы лэсьтӥськисьёсын 365 корка пуктэмын. Шӧдскымонгес луиз сюрес лэсьтӥсьёслэн ужамзы. Усто ужась предприятиос пӧлын республикаямы лыдъясько: Лэсьтӥськонъя 17 но 18 номеро управлениос, Воткинскысь "Мастер" фирма (татын ужасьёслэн шоро-куспо уждунзы 2100 манет), Ижевскысь "Экспресс" АО, Можгаысь лэсьтӥськонъя огазеяськон но Глазовысь Чепецкой управление. Туэ Кун Кенеше быръёнъёс ортчем бере вылӥ кивалтонъёсы, министерствоосы выль адямиос быръемын. Кылдытэмын Лэсьтӥськонъя но архитектурая выль министерство (министр В. Загайнов). Оскем потэ, оло, выль кужымен лэсьтӥськон удыслы республикаямы бадӟымгес саклык висъяськоз? Улон юртъёсты ӝутытэк, одӥг семьялэн но улонэз шулдыр уг луы. Республикаысьтымы вань лэсьтӥськисьёслы сӥзиськом умой мылкыд, кужым но тазалык. Т. БАННИКОВА. Даур ӵоже шумпоттэ Сарапул городысь Пушкин нимо шутэтскон сад туэ даур тырмонзэ пусъе. 1899-тӥ арын отчы нырысетӥ писпу мерттӥзы. Кызетӥ аръёсы та сад пушйыны ӧдъяз, соку ик нимысьтыз статус но сётӥзы. Солэн азбараз пуктэмын вал гужем ужась пичи театр, бадӟым лыдӟиськон залэн библиотека, пиналъёс понна пӧртэм шудонъёс, аттракционъёс радъямын вал. Тужгес но бадӟым азинсконъёс кылдӥзы куатьтонэтӥ аръёсы. Соку садэн быгатыса кивалтӥз Николай Андреевич Дубов. 1958-тӥ арын татын ужасьёс пӧртэм ӵошатсконъёсы пыриськылӥзы. Всероссийской ӵошатсконын соос кыкетӥ инты басьтӥзы. Шулдыр вал со вакытэ садын. Городын улӥсьёс дэмен шутэтскылӥзы. Со аръёсы ик выльдӥськонъёс ортчизы. Пуктӥзы культурая бадӟым юрт. Радъяло бадӟымесь праздникъёс. Кылсярысь, умой пусйизы Пушкинлы вордскемез дырысен 200 ар тырмонэз. Та юбилейлы сӥзьыса, городысь парктӥ асфальт кыскизы, пукон интыосты тупатъязы, кырӟан-веран инты (эстрадной площадка) дасязы. Табере та сад тодманы луонтэм воштӥськемын ни. Нуналлы быдэ отын оркестр шудэ, нош лыктэмъёс пайдаё шутэтско но капчи мылкыд басьто, фонтан дурын пукыса. В. ЛАГУНОВ. Бере кылиськом Удмурт Республикаын али толэзьем шоро-куспо уждун 1095 манет луэ. Улыны луымон коньдонлэн быдӟалаез - 950 манет. Озьыен, кык нылпиен семьяын анаен атай ог 4 сюрс манет уждун басьтыны кулэ. Ӝыныезлэсь унояз семьяосын озьы уг пӧрмы. Соин ик начар улӥсьёслэн лыдзы пумен будэ. Тужгес но али - дунъёс чутрак йылон вакытэ. Ӵошатон вылысь вералом: Уралысь мукет улосъёсын уждунзы шӧдскымон тросгес. Кылсярысь, Пермь, областьын ужасьёслы толэзяз 1578 манет тыро, Свердловск палъёсын но асьмелэсь 1,5 пол уногес коньдон басьто. Власть но воштӥськиз кадь, нош улонмы ялан уг тупатскы. Малы меда?.. И. КРИЧЕВ. Дан тӥледлы! Лэсьтӥськон удысын ужасьёслэн нуналзы странаямы котькуд аре паськыт пусйиське. Бен, та удыс уго паськыт возьматэ государстволэсь но отын улӥсьёслэсь улон-вылонзэс. Шуг-секытъёс шоры учкытэк Удмуртиысь лэсьтӥськисьёс асьсэ удыссэс ӧз аналтэ. Туэ гинэ пӧртэм удысъёсъя 375 юрт пуктэмын, со пӧлысь диагностикая центр, Ижысь нылпи поликлинка, Сюмсиысь нылпи вордон юрт но мукет интыос. Шӧдскымон будэ шаерысьтымы гуртъёсын лэсьтӥськон. Толэзьлы быдэ куатьтонлэсь уно семьяос выль коркаосы пыро. Та удысэз республикаямы ялан уно но уно адямиос азинто. Гажано лэсьтӥськисьёс. Праздник нуналады тау кареммес вераськом ӟеч но пайдаё ужамды понна. Вань сюлмысьтымы сӥзиськом шуныт мылкыд вуоноезлы оскон, асьтэлы но семьяостылы усто мылкыд. Тазалык но шудбур тӥледлы! Удмурт Республикаысь Кун Кенешлэн Тӧроез А. А. Волков. Удмурт Правительстволэн Тӧроез Н. А. Ганза. Финн-угор калыкъёслэсь ВИИ калык куспо фольклор фестивальзэс радъясьёслы, отчы пыриськись адямиослы но куноослы Гажано эшъёс! Финн-угор калыкъёслэсь культураоссэс азинтонъя фондлэн кивалтэтэзлэн нимыныз сюлмысьтым ӟечкыласько но ӟеч мылкыд каронъёс келясько, усто азинсконъёс сӥзисько финн-угор калыкъёслэн Удмурт Элькунын ортчись ВИИ калык куспо фольклор фестивалязы люкаськемъёслы. Та ужрадын тӥляд возьматоно устолыкты кылдӥз кемалась. Отчы асьсэлэсь быгатонлыксэс, визьзэс но вань сюлэмкужымзэс понӥзы асьме дырозь улэм уно адямиос. Асьме выжыосмылэн вашкала дыръя кылдэм калык кылоссы туж узыр но аспӧртэмлыко. Со котьку егит. Малы ке шуоно, кужым но визь басьтэ пинал адямиослэсь. Калык кырӟан но эктон бурдъяло йырын-визьмын ужасез, чылкак юскиськыны уг сёто музъем ужасьлы. Огшоры кылбуръёслэн но вашкала крезьгуръёслэн дано кылдытӥсьёссы ӧвӧл. Озьы ке но, соос вутто асьме доры финн-угор калыкъёслэсь ноку гожтымтэ чуръёссэс. Соос паймымонэсь, калыклэн улон-вылонэз кадь. Ноку кысонтэмесь, калыклэн сюлэмыз кадь. Финн-угор калыкъёслэсь культураоссэс азинтонъя фондлэн Йошкар-Олаысен 1990-тӥ арын кичӧлтэмезъя, асьме выжыосмы финн-угор дуннеысь та одӥгаз валтӥсь ужрадэ сизьыметӥзэ ини келяло фольклоръя, этнографияя тужгес устоесь коллективъёссэс, киужъёс кылдытон удысысь тужгес быгатӥсь усточиоссэс. Ӧвӧл тӥ пӧлын, гажано кырӟасьёс но эктӥсьёс, киужъёсты кылдытӥсьёс, тужгес золъёсыз но тужгес лябъёсыз - ваньдылы кузьмамын калыкъёстылэн номырин дунъяны луонтэм узыр культураоссы. Капчи ӧвӧл та вакытэ таӵе бадӟым ужрадъёсты дасяны. Нош фестивалез радъясьёс, Удмурт Элькунэн кивалтӥсьёс, Россия Федерациысь федеральной органъёс юрттэмъя, ваньзэ лэсьтӥзы, финн-угор калыкъёслэн ВИИ калык куспо фольклор фестивальзы мед луоз шуыса. Ми оскиськом: та ужрад азинлыко ортчоз куноосты котьку усто пумитаны быгатӥсь удмурт музъем вылын. Эшшо огпол возьматоз искусстволэсь калыкъёс куспын эшъяськонэз юнматыны быгатэмзэ, узырмытоз улонмес чеберлыкен но визьбурен. Эшшо огпол ӟечкыласьком но бадӟымесь вормонъёс сӥзиськом. Тазалык но удалтонлык тӥледлы! Ӟеч мылкыд каронъёсын - Финн-угор калыкъёслэсь культураоссэс азинтонъя фондлэн Тӧроез, Марий Эл Республикалэн Государственной секретарез Николай Гаврилов. 1999-тӥ ар 5-тӥ август, Йошкар-Ола. ФИНН-УГОР КАЛЫКЪЁСЛЭСЬ ВИИ КАЛЫК КУСПО ФОЛЬКЛОР ФЕСТИВАЛЬЗЭС ОРТЧЫТОН РАД Удмурт Республика 1999-тӥ арын 6-тӥ-9-тӥ августэ 6-тӥ августэ (удмурт арня) Фестивале лыктӥсьёсыз пумитан, интыян. 7-тӥ августэ (кӧснунал) 1. Фестивалез усьтон. Ижевскысь шор площадьын, 11 часысен 13 часозь. Финн-угор калыкъёслэн чеберлыко киужъёсынызы выставка-ярмарка (отын ик.) 2. Фольклор коллективъёслэн шоркарамы но районъёсын концертъёссы-выступлениоссы. Эшъяськон ӝытъёс. Культурая юртъёсын, паркъёсын-садъёсын, 15 часысен 22 часозь. 8-тӥ августэ (арня нунал) 1. Фольклор коллективъёслэн Ижевск городысь вить районъёсын выступлениоссы. Нимысьтыз графикъя, 10-11 часысен 13 часозь. 2. Фестивалез ворсан, гала-концерт. Ижевскысь "Динамо" стадионын, 19 часысен 21 час 30 минутозь. 9-тӥ августэ (вордӥськон) Фестивале ветлэмъёсыз сюрес вылэ келян. фольклор коллективъёс - республикаысьтымы районъёсын 7-тӥ августэ 1. Мордовиысь "Диголя" но "Мокшаночка" ансамбльёс. Воткинск ёросысь Кукуи гуртын, 15 часысен, П.И.Чайковскийлэн музей-усадьбаяз, 17 часысен, Б.Кивара гуртысь ЦСДК-ын,19 часысен, Пихтовкаысь СДК-ын, 20 час 30 минутысен. 2. Йошкар-Олаысь "Марий памаш" коллектив. Каракулино ёросысь Ныргында СДК-ын, 15 часысен 22 часозь. 3. Башкортостанысь "Эрвел" пор ансамбль. Ува ёросысь Узей-Тукля СДК-ын, 15 часысен 21 часозь. 4. Печора городысь коми кырӟанъя "Пелысь" ансамбль. Пичи Пурга ёрос библиотекаын, РДК-ын, 16 часысен, Курчум-Норьяысь СДК-ын, 17 часысен. 5. Кудымкарысь "Шондибан" коми-пермяк ансамбль. Кияса ёросысь Вуж Салья СДК-ын, 15 часысен 22 часозь. 6. Ханты-манси коллективъёс (3 пӧртэм). Сарапул ёросысь Шевырялово СДК-ын, 15 часысен, 17.30-21.00 часэ, Башенинлэн дачаяз, 16 часысен. 7. Киров городысь "Слобода" ӟуч но Уни СДК-ысь удмурт фольклор ансамбльёс. Як.- Бодьяысь Шутэтсконъя шор юртын (Досуговой центрын), 15 часысен 22 часозь. 8. Башкортостанысь Выль Татышлы СДК-ысь "Шулдыр ӝыт" удмурт фольклор коллектив. Игра ёросысь Сундур культура юртын, 16 час 30 минутысен 20 часозь. 9. Татарстанысь Балтаси ёросысь "Зангари" удмурт ансамбль. Можга ёросысь Б.Сибы СДК-ын, 15 часысен 21 часозь. 10. Пермь улосысь Куеда ёросысь "Тюрагай" удмурт коллектив. Завьял ёросысь Ильинка гуртын (музейын), 15 часысен 19 часозь. Фольклор коллективъёс - Ижевск городын 7-тӥ августэ Устинов ёросысь "Метеор" заводын (ЭМЗ-лэн филиалэз), 14 часысен - Карелиысь Сегозерск калык хор. 8-тӥ августэ 1. Октябрь ёросысь М.Горький нимо садын, 11 часысен - "Диголя" (эрзя), "Мокшаночка" но ханты-манси коллективъёс. 2. Ленин ёросысь "Строитель" городокысь "Семья" центрын (Клубной урам), 11 часысен - "Эрвел" но "Шондибан". 3. Первомай ёросысь "Дружба" кинотеатрын, 11 часысен - "Пелысь", "Зангари" но Сегозерск калык хор. 4. Индустриальной ёросысь Космонавтъёслэн парказы, 11 часысен - "Марий памаш", "Слобода" но "Купанча". 5. Устинов ёросысь "Мир" культура дворецын (автозавод вӧзын), 10 часысен - "Тюрагай" (Бадӟым Гондыр, Пермь улос), "Шулдыр ӝыт" (Выль Татышлы, Башкортостан). *** Фестивале пырисько Удмуртиысь фольклор коллективъёс но. Шор площадьын, фестивалез усьтыку, быгатэмзэс возьматозы "Иднакар" (Глазов), "Ӟардон" (Дэбес), "Тюрагай" (Воткинск), "Ашальчи" (Кияса), "Сяськабей" (Камбарка), "Гуждор" (Вавож), "Чибори" (Бадӟым Уча), "Азвесь" (Узей-Тукля), "Пинал даур" (Шор Постол), "Инвожо" но "Эктон корка" (Ижевск). Гала-концертэ пыриськозы "Лампачей (Юкаменск), "Ӟардон" (Сундур), "Зарни шеп" (Пичи Пурга) озьы ик вань вылӥ верам коллективъёс - лыктэмъёсыз но, асьмелэнъёсыз но. Концертъёс дунтэк. Оргкомитет. ШӦКЫЧЛЭН СЭРЕГЕЗ Эктытӥзы юмореска Тӥ мыным юнме шорысь усьтыр-табыр эн но пайме, бакча суред шоры сямен ӟудык- ӟадык эн но ӟудэ. Мынам, кызьы шуо, кӧня ке шупчемын, но мон воксё вактазмемын ӧвӧл ай. Кӧня ке возиськисько на. Зэмзэ ке верано, огшоры кылъёсын куадаса, мынам юри сямы сыӵе. Нокин борды но, нокыӵе гопе но туктантэм адями кадь, лэся, мон. Кызьы шуо, кудъёсызлэн йыръёсазы ваньмыз тырме, некондиция, нестандарт, пе, мон. Со сярысь тӥледлы, кызьы ке котыръятэк, чебергес валэктоно вылэм но, ӧйтӧд, быгато меда? Валэктон удыс - со трудодень понна ужам мар ке кадь - уд но лыдъя, уд но мерта сое. А-а-а, тодэмды кияды, мон сярысь котьма малпалэ, мыным ярам. Табере мынэсьтым сямме кеӵевыл уд кары ни. Коть сандал вылын, коть пуклёк вылын тышка, гонэз сямен ик, номырин но уд шонерты ни. Ортчыт яратӥсько мон мыд-мыдлань ветлӥсь адямиосты, мыр-мыр чакласа, учкыса улыны. Ма асьтэлэн но вань, дыр, сыӵе учыръёсын пумиськылэмды. Кыӵе но адямиос ӧвӧл та югыт дунне вылын. Огъёсыз тани, ӧйтӧд мар кулэ соослы, олокытчы луть-лать вамышъян сяменызы нялтас шытыр-шатыр шара, ас понназы урам тыр мар ке нёръяло, ларгето, зулё. Тумошо-а ӧвӧл, ай синхронно пӧрмыто ява. Соин гинэ уг тырмы ай. Вуж тӧл вуколэн шальтрам бурдъёсыз музэн, солань-талань киоссэс шонало, уллань-выллань мыжыкъёссэс сэзъяло, пыдъёсынызы кинэ ке лычсузьымон ӵыжало. Учкиськод, учкиськод соос шоры но, мискинь адямиос жаль но пото, серем но потэ. Зоопарк но зоопарк. Улон угось, таӵе улон асьмеды со калэ вуттэ. Лулсэръёс, вирсэръёс, пыдсӧнъёс но уг чидало ни. Нош мон тазьы малпасько. Озьы ӟызомем тӧл вуколэн пӧсьтэм бурдъёсыз музэн киосыныд котькӧня шона, мыжыкъёстэ котькызьы сэзъя, омырез котькудласянь ӵыжа, ас поннад котькӧня кесяськы, улонэз со-о-пала но, та-а-пала но уд кырыжты. Улон асэрказ но ас эриказ, пельтэм мурт сямен, огсыр берга но берга. Нокинлэсь но, номыр но уг юа, уг но вера, уг но куры. Мыным со тунсыко потэ. Мынам паньтэме но, визьмо адями со, философ, озьы ик шуэ, объективной истина, пе, со. Асьме кылын вераса - зэмлык! Кун казна ыше но - со но зэмлык. Кин ке кӧтад ӵыже но - таиз но зэмлык. Я ӵок, асьсэос тодо ини созэ, нош пичильтык юан кылдэ ик... Ку меда со зэмлыксы асьмеды зэмос зэмлыке вуттоз ини? Улытозь-вылытозь сое но веръям, утчам, кутылэм потэ вал угось. Озьы тупен-тупен, сӥен-сӥен улон-вылонэз сӥсъян-пызьнан сяменым, палэнысен мыр-мыр учкыса сылон виын, паллян пельпумам кин ке лоп-лоп вешась луиз. Йырме берыктыса ӧй вуы, кин ке но киосме тар-тар кырмиз. Ӟечен та ӧвӧл, дыр, шуыса, синъёсме кымесам золтӥ но азьлань учкисько. Син азям кык кузя омонъёс сыло, сьӧд бодыосынызы макес кузязы саб-саб сабыло, мон шоры быльк учко. Детектив но детектив. Улон син куспын воштӥськиз. Син азе мукет суредъёс пуксизы. Асме ачим, котьма ке но, буйгатыны турттӥсько. Азям угось тыпы кадесь кык таза, йыг-йыгесь пиос сыло. Соосты погыртон сярысь эчешонэз ик ӧвӧл. Нош ныр ултӥ тӧлась сьӧд бодыосты адӟыса, зэмлык пумысен йырысь малпан малы ке соку ик кофе сямен сылмиз. Малпасько, та сьӧд бодыосын шуккемлы быдэ уно зэмлык поттыны луоно, дыр. Но мон ӧй кышка кадь. Батыръёс кадь кужмо, депутатъёс кадь визьмо кариськыса, адямиослэсь музэн юасько, ачим дыр-р-р куалекъясько, гажано эшъёс, мар луиз, пӧй, мар бордын ужпум? Пӧсьтурын кадь луизы ява. Кӧйзы голям ужпиос сямен, тыпыр-тыпыр, тыпыр-топ, тыпыр-тыпыр-тыпыр-топ, артистъёс сямен, мылысь-кыдысь эктыны ӧдъязы. Дышиллям ини, шӧдске, пишмыто ведь. Йӧскадь! Пыдысь пыдэ, сураськытэк экто. Культура удысысь юан но ӧй сёт кадь, нош мар таӵе та? Экто но экто. Куддыр сьӧд бодыосынызы макес кузязы шлач! шукко, куддыр ш-ю-и-ть! шултыса лэзё. Эх шулдыр ук! Шоу но шоу! Таӵе витьымтэ-ӧтьымтэ шорысь культурной номер малы ке мыным акыльтыны ӧдъяз но, бур киме ӝутыса, гажано эшъёс шуисько, отӥзэ ӟуч сямен верасько, нельзя ли, пӧй, обойтись без свистопляски? Концерт шуак дугдӥз. Артистъёс ог-огзы шоры ымнырзэс ку-у-зял-чырс карыса, ӝот-ӝот учкизы. Собере одӥгез мыным тяп-тяп удмурт сямен шуэ, кылзы ай, гажано эш, татын али зырымесьёстэк но йӧвалег дыръя кадь гылыт!.. Мадёнзэ йылаз-пумаз вуттӥз-а, ӧз-а - али бӧрсьысь бӧрсьы ваньзэ вераны уг тодӥськы ни, вунэтӥ луоз, со сьӧд бодыеныз тыбыр кузям ка-а-ак та-а-аӵ! васькытӥз ук. Мон номырзэ но тыро-пыдо валаса ӧй вутты ке но, соку котырысь вань арбериос интыязы пуксизы. Нялтас зырым но куасьмиз, зэмлык но кытысь ке чульк гинэ кыре потӥз, йӧвалег но быриз. Эх дубинушка, ухнем, еще разик, еще раз-з-з шуыса, юнме шорысь уг чирдо вылэм ява. Концерт таин гинэ ӧз йылпумъяськы ай. Нош сюлэм маза уг сёты, одно ик тодэм потэ уга, мар понна монэ таосыд кырмизы, пӧй. Озьы, огшоры, юнме шорысь ӧз дыр ук? Мар понна, мар понна? Сое гинэ но уд валаськы-а, мар-а, пе, мушко йыр! Ульча кузя сисьмем тӧл вуколэн чигылэм бурдъёсыз музэн, киостэ шонаса, ӟольгыри быдӟа мыжыкъёстэ кинлы ке выллань сэзъяса, гульымед тыр шара кесяськыса ветлэмед понна, пе! Валад-а? Валай, валай, шуисько, кызьы сое но уд вала. Мон простой ук. Та кылъёс бере вылтыртӥм пӧсь ву пальккиськиз кадь. Ма, ма, ма, нёжто мон но со калэ вуи меда ини? А ведь асме ачим уг шӧдылӥськы. Нош омонъёс тэбинё но тэбинё. Я- я-ко, али ик вера ай, тон кинэ озьы с, х, п, к, з, б букваен кутскись кылъёсын урам тыр сокем задор тышкаськиськод вал, а-а-а? Клинтонэз-а? Шрёдерез-а? Волковез-а? Широбоковез-а? А-а-а? Татысь тодмо статья зын уг поты-а? А-а-а? Табере мон ачим соос азьын эктыны кутски. Пыд вылысьтым пыд вылам огсыр ритмично тып-топ, тып-топ лёгаськисько. Мынам но йӧскадь усто пӧрме вылэм ява. Эктод угось, эктод, куке йырад колыма сярысь экзотической малпанъёс тулкымен-тулкымен поръяны кутскизы ке. Мар гинэ ай со! Эктон сямен киосты ик шлач чабем потыны ӧдъяз. Эх чабкы вылэм ву вылэ, лобӟозы уясь ӵӧжъёс шуыса, эктон сяменым кырӟаны ӧй-а шедьты? Эх пурӟизы ук гажано эшъёсы, монэ солист нерге шуизы но, сюл-кал гинэ кечато-вамато укноосын юртэ вуттӥзы. Соослэсь лябгес эктӥськем, лэся. Серекъяськонэн-мактаськонэн йырин соку мыным ӧй вал ини. Кивалтӥсьсы ныр улам кык лист кагаз мычиз. Отчы, пе, ваньзэ рос-прос, пыр-поч гожты. Кин тон сыӵе? Кытысь потэмын? Малы ульча кузя озьы калыкез кышкатъяса калтыртӥськод? Малы с, х, п, к, з, б букваен кутскись кылъёсын кивалтӥсьёсты сапкытӥськод? Асьмелэн, пе, сыӵе визьмо азьветлӥсьёсмы ӧй ке луысалзы, мон но, тон но, со но кемалась чыртыямы пуйыен кураськыны потысалмы ини. Тон малы ке но демократиез экзотикаен сурамед кадь! Озьы- а? А-а-а? Таӵе кылдэм югдурлы ачим но палёмыса, ваньзэ бумага вылэ лад-лад гожтоно луи. Ужпум, пӧй, тазьы вал. Кык час талэсь азьло мон яратоно дусыме доры, ас поннам мур малпаськыса, кышно кураны мынӥсько вал. Соку син азям таӵе суред пуксиз. Монэ умой пумитазы кадь. Ӝӧк вылэ аракы, пыжем ӟазег пуктӥзы. Мон но чыры-пыры бискыли, коньяк, торт поттӥ. Варматай луонэн ваче жин! шуккыса юим кадь. Варманай шуон но нялтас мия гинэ кариське. Озьы, озьы, нуныосы шуыса, ялан кыл вискамы пыремъяське, валамъяське, няняське. Сателлит но сателлит. Бератаз воксё небӟиськеммы, лэся. Варматайлы пыжем ӟазегез жаль потыны кутскем. Укыр ческыт вал угось. Со монэ тып-тып пыкылыны кутскиз, ачид мугорын гын сапег быдӟа сяна ӧвӧл, нош пыжем ӟазегез огнад куртчылыса быдтӥд, пе. Нош ачиз мынэсьтым тросгес саказ-соказ. Тросгес тордӥз но. Ваче гадь кырмиським ява. Тыӵыр-таӵыр гинэ вазе на. Нош вармумы шуон ульчае потӥз но, варгаз ӟазег сямен, юрттэ, юрттэ, милемды одӥген, одӥген виыло ини шуыса, чир-р-р кесяське. Мырдэм мозми ява. Милиция вуэмлэсь азьло, варматай шуон дорысь синтэм-пельтэм лобатӥ. Табере пыдме но со доры уг лёга ни. Сямыз кыӵе сукым вылэм. Пыжем ӟазегез понна адямиез виыны дась. Вылаз ик, горлопан эшшо, хулиган кадь... Нош асьме кивалтӥсьёсмы сярысь мынам нокыӵе лэсянтэм кылъёс вераме ӧвӧл. Мон политикаен уг выриськы. Мон - слесарь-инструментальщик. Матрицаос, пуансонъёс, кондукторъёс лэсьтӥсько. Варматай шуонлы йыркурен мон озьы, вактазмем мурт сямен, ас поннам киосме шонаса, мыжыкъёсме сэзъяса, ым тыр асме тышкаськыса, ульчаетӥ доре бертӥсько вал. Конфликтной ситуациен сэрен, стресс вал, дыр, угось... Милиционеръёс чылкак паймизы, монэ жаляны ӧдъязы. Сыӵе варматаен улытозь, пе, уске килька сиыса огнад улод. Нош дусым мукетыз но шедёз. Чеберезгес но. Озьы ке, озьы, дыр, ай но... Милициысь кивалтӥсьсы укыр гуманной мурт вылэм, филантроп кадь. Милиционеръёслы шуэ, эмеспиосты вӧсь карыны уг яра, эмеспиосты жаляны кулэ! Котькуд пыжем ӟазег понна эмеспиосты ас понназы вераськон калэ, вактазмон калэ вутто бере, тӥ сое психотерапевтлы возьматыны нуллэ ай, пе. Татын каль маиз ке но валантэмгес, озьы демократиез но экзотикаез туж резко сураны уг яра, пе. Вератэк но валамон кадь, конечно. Мон уг, уг шуыны ымме вайясько вал но сьӧд бодыосты но кульчоен жильыосты адӟыса, капчи, ӝутскем, лӧптэм мылкыдын я шуи. Мар бен, больницаын ваньмыз умой ортчиз. Врач, психолог дорын сю куамын сизьым юанлы тест лэсьтӥ, валэктонъёс сётӥ. Ушъязы, визьмо адями, пе, тон. Но шумприч сямыд ваньгес, пе. Сыӵе сям адямиослы кышкыт ӧвӧл, дыр, ук шуисько. Ӧвӧл, ӧвӧл, пе. Тани ми тыныд со сярысь справка но сётӥськом. Фу-у-у, шумпотэменым кӧты ик кыльыр-кольыр кариз ява. Ну, экзотика ӧвӧл-а со, а-а- а? Табере мон урамъёстӥ ӝот-ӝот, йыг-йыг адями сямен ветлӥсько. Нош кагазме котьку, уй но, нунал но, весяк сьӧрам кисыям нуллӥсько. Соиз валамон, дыр? Озьы-а? Демократиез экзотикаен сураськод медаз шуэ. ЛЕОНИД СУВОРОВ. Гудырикошкон толэзь Та толэзез удмурт калык мукетъёсызлэсь висъя. Со асьмеос умой валаськомы - тулыс герыен герӟаськемын ке, собере черод вуэ кусолы, нош гудыри кошкон толэзе сюрло луэ тужгес но кулэ арбери. Ӵапак соин вашкала дыръя ю-нянез вакчи дыр куспын окто-калто вал. Кӧня ке улыса, ю-нянь бусыосысь адӟыны луэ вал суслонъёсты, собере соослэсь ӝуто вал бадӟым кабанъёс. Удмурт крестьянъёслы азьло вакыт паймо вал - кызьы соос быгато сыӵе ӟег нянез сокем кема возьыны кабанын? Пумисько вал ог 5-7 аръем кабанъёс! Туала вакытэ бусыын сюрлоен уг ни ужало. Озьы ке но гудырикошкон толэзьлэн дунлыкез ӧз кулэсмы. Ю-нянь утялтон дыр ӧз воштӥськы, бусыысь куро будосъёс гинэ ӧвӧл, кыр будосъёс но валало кадь, пӧсь вакыт вуэ шуыса. Куазь ог куамын градусозь ке но вуэ, музъемлэн шунды котыретӥ берган сямыз азьло кадь ик, соин ик нунал но вакчия, уйёс но шӧдымон кузь кыстӥсько. Инкуазьлэн таӵе выросэз вазь-а, бер-а одно ик шӧдӥськоз-адӟиськоз куазь воштӥськон пыр. Тани возьёслэн но вылтуссы воштӥськемын ини. Соос вылтӥ кусо но ортчиз, тросэз сяськаё будосъёс но тӧлӟыны кутскизы, нош куд-огъёсызлэн тысь-емышъёссы вань ини. Гудырикошкон толэзь бырытозь, уноез соос пӧлысь емышъёсынызы люкиськозы. Нош шашы, бадьпу, сирпу, кызьпу, тросэз куро модосо выжыысь будосъёс тысьёссылэсь люкисько яке вазьгес, яке та толэзе. Вуын будӥсь сяськаё будосъёслэн та толэзе туж кысык улон-вылонзы. Кыӵезэ гинэ соос пӧлысь эн басьтэ, котькудӥз яке сяськаяське, яке емышъёссы быгыльско ини. Тыосын ву будосъёс (водоросльёс) акылес луымонын трослы лыдзэс будэто. Шоканы омыр тырмымтэен бырыны но сюро. Озьы соосты инкуазь интыязы пуктэ - укыр медаз алялэ. Соосын йырин омыр тырмымтэен, тросэз лулосъёс но ӝокаса лыдзэс кулэсто. Нош каракалы но тыпарсь чорыгъёслы пыкмем ву но яра. Толэзьлэн пумазгес ву кезьытгес луэ ини, вубудосъёс но шергес луо, ву чылкытгес луэ. Вакчияк вераса, лулосъёс но будосъёс капчиен шокчо, соослэн улыны секыт дырзы ортче. Гудырикошкон толэзьлэн пӧсез тужгес но ярамон луэ кут-чибинь котырын лобась вир юисьёслы. Кыӵеосыз но ӧвӧл соос пӧлын! Пересьёслэн чакламзыя, огшоры кутъёс но бер гужем вӧсь карымон куртчылӥськыны кутско. Та веран сокем ик шонер ӧвӧл - бер потӥсь кут со огшоры кут ӧвӧл, со кут выжыысь мукет йӧс. Сое ӟуч сямен жигалка, яке асьме кылын - пульсатӥсь кут шуо но со, зэм ик, куртчылӥськись луэ. Нош кыӵе курадӟыто куртчылӥськись вир юисьёс пудо-жвотъёсты! Та сьӧсь ужын нырысь интыез люко лузьёс но чибиньёс. Кӧня ке вераны кулэ вал лузь сярысь. Дыртыса но бызгетыса лоба со вал котыртӥ но собере шуак, вакчи дыр куспын ляке пузъёссэ валлэн гонэз борды. Ӝоген пузъёсысь векчи нумыръёс пото но валлэсь кузэ йырйыса кузёзылэсь лыдсузьзэ потто. Валлэн яиданлыкез быре но кутске вӧсё-бичатон интыосыз йырйыны, куртчылыны, нюлыны. Та ик кулэ нумыръёслы. Соос нырысь ик валлэн ымпушказ вуо, отысен - ӝушаз. Татын ини соос чылкак эрказмо - вирен но ӝуш дыльдыен кӧтсэс тырыса ӝог будо но ог 10 толэзь ортчем бере, валлэн пушкысьтыз кыедэн ӵош кыре пото. Собере лузь нумыръёс нюръяськыса пыро музъеме но отын кӧкыясько. Бератаз - гужем - отысь бурдо йӧс - вал лузь - потэ, но виро уж борды кутске. Тӥни кыӵе но воштӥськонъёсыз ӧвӧл та лулослэн, нош бадӟым улон сюресэз кутске гудыри кошкон толэзе. Та толэзе ик тужгес но чакланы-утялтыны кулэ кубистаез. Со вылэ та вакыт ярато вуыны возьмамтэ куноос - кубиста нумыръёс. Соослы эрик сётӥд ке - кубиста емыштэк кылёд. Колорадысь бӧчыос но азьло толэзьёсы кадь нерад возё картошка будэтӥсьёсты. Тыкосо нумыръёссы укыр бадӟым изъян лэсьтыны быгато, уга. Кузьылиослэн вуиз кысык дырзы - пӧсь толэзьлэн пумаз но гудыри кошконлэн кутсконаз соос палэп кылдыто. Кызьы та учыр ортче? Дыр вуэ, но соос уно сюрсэн муӵ пушкысь пото. Нош соос огшоры бызьылӥсь кузилиос ӧвӧл ни, - пӧрмемын бурдо лулосъёслы. Бадӟымъёсыз соос пӧлысь - нылпал луо, пичиосыз - пи. Омырын соос огенызы огзы шудо - пумиськыло но собере пи кузилиос куло, нош нылъёссы музъем вылэ пуксё, бурдъёссэс йырйыса кушто но музъемысь векчи пасьёс шедьтыса выль кар кылдыто. Отчы ик пузъёс но ваё. Инкуазьлэсь гудыри кошкон толэзе кыӵе гинэ сэрегзэ эн басьты - котькытын гужем пумлэн вуэмез адӟиське. Тросэз тылобурдоос (дукъя, сяла, тур но мукетъёсыз) кӧтсэс тырыны кутско нюр но нюлэс емышъёсын гинэ (кылсярысь, ягмульыен, нюрмульыен, куды мульыен но мукетъёсын). Кыр ӟазегъёс, ӵӧжъёс, юсьёс тылыоссэс выльдо, соин кӧня ке дырлы дугдо лобамысь. Таӵе дыръя соос уло ӝужыт но ӵем будӥсь нюр но ву дурын пумиськись турын-куар пушкын - сьӧсь пӧйшуръёс соосты медам шедьтэ шуыса. Нош курег выжыысь, кырӟась но сьӧсь тылобурдоос тылыоссэс вошто дыртытэк, соин ик лобаны быгатонзэс уг кушто. Ӟольгыриос но тюрагайёс кутско ини кыкетӥ радзэ пузаны. Гужем бырытозь, соос вуозы на нылпиоссэс поттыны-будэтыны. Кенӟалиос но пузаны кутско та толэзе. Пуззэс сюе вато шуныт но кӧс интыосы: кузили муӵъёсы яке куро-турын-кыед пушкы. Ӵуж йыро кый шуныт интыосы кельтэ ог 30 пузъёссэ. Ваньзы соос сӥньыс выллем тырметэн огенызы огзы борды герӟамын, соин ик одӥг пузэз басьтыку, мукетъёсыз но кыстӥсько. Зэмос весь кадь! Койыкъёс пӧсь толэзь дыръя кадь ик лобась вир юисьлэсь пегаса шуръёслэн мур ӧразы ярато сылыны. Ӟичы, кион но мукет изьверъёслэн но пӧйшуръёслэн нылпиоссы та толэзе ӝог будо, жадьыны валатэк шудонъёсын дышетско улыны-вылыны. Гондыр ветлыны кутске сезьы бусые. Толэзьлэн пумаз пузъёсысь пото ӵуж но сьӧд йыро кыйпиос. Пинал тылобурдоос кылдыто уллёос но бадӟым мылкыдэн дышетско ӵош лобаны но улыны. Яр пӧськыос, уӵыос но кикыос гудыри кошкон толэзе ӟечлуясько ини асьмепал шаерен - соос ваньмызлэсь азьло люкисько вордӥськем интыосынызы. Гудыри кошкон толэзь адямилы но кысык дыр. Кыӵе но емыш уг вуы сад бакчаын! Эн гинэ азьтэмъяськы. Инкуазь но та толэзе уг жаля аслэсьтыз кузьымъёссэ. Кин тол сярысь малпа, со тодэ кызьы ортчытыны та толэзез. В. ТУГАНАЕВ, УдГУ-ысь профессор. Законэз ке ӧд тӥя, янгыш уд луы Республикаын йылпумъяськиз куштӥськем кортэз но буёло металлъёсты басьтӥсь пунктъёсты эскеронъя месячник. Удмурт Республикаысь Правительстволэн "Удмурт Республикаысь улосвылын куштӥськем кортэз но буёло металлъёсты басьтон-октонъя, нуон-ваёнъя, пайдаё кутонъя, интыянъя эскерон ужез кужмоятон вылысь ватсаса ужрадъёс сярысь" постановлениезъя Инкуазез утёнъя комитет Югдурез утёнъя министерствоен ӵош 1-тӥ августозь эскерыны кулэ вал республикаын пусъем ваньзэ буёло металлъёсты кутонъя 156 интыез. Ижевскын соос 52 лыдъясько. Туннэ нуналлы Комитетын ужасьёсын эскеремын Ленин ёросысь пунктъёс. Татын соос, мукет азьын сярысь, шӧдскымон тросгес - 30. Эскерыса 17-езлы ужаны лэземын ӧвӧл. Мугъёссы - лицензиослэсь но правительстволэн постановлениезлэсь куронъёссэ тӥян. Кылсярысь, куштӥськем кортэз басьтӥсьёслэн металлэз эскерыны ӧвӧл дозиметръёссы но мукет приборъёссы. Соослэн ӧвӧл дышетэм но таӵе ужез нуыны аттестациез ортчем специалистъёссы. Таӵе чурыт куронъёс юнме ӧвӧл. Радиациен кырсёмем металл нуллонэз паськытатыны лэзёно ӧвӧл. Буёло металлъёсты октонэз чаклам дыръя шараямын одӥгез пусйытэк ужась пункт. Со ужамысь дугдытэмын. Специалистъёслэн-экологъёслэн но МВД-ын ужасьёслэн ӵош эскеронъёссы кышкатӥзы, шӧдске, куштӥськем кортэз но буёло металлъёсты басьтӥсь троссэ пусйымтэ интыослэсь кузёоссэс. Со сярысь верало толэзьлэн кутсконысеныз - эскерон кутскем дырысен - Инкуазез утёнъя комитетлэн сертификатъёсъя но лицензиосъя отделаз юанъёсын вазиськисьёслэн трос луэмзы. Адямиослэн тодэмзы потэ, кытысь но кызьы луэ басьтыны куштӥськем корт но буёло металлъёс октонъя пунктъёс усьтон понна лицензия. Налогъёсъя полициен - ӵапак со ужрадъёс кутэ законэз тӥяса ужбергатонэн вырись адямиослы пумит - нокинлэн янгыше усемез уг поты, шӧдске. Н. ЩЕГОЛЕВА, Инкуазез утёнъя кун комитетын ужась. Арганлэн чылкыт крезьгурез... Россиысь телевиденилэн нырысетӥ (ОРТ) каналысьтыз "Играй, гармонь любимая!" передачаез учкиськод ке, мылкыд зыл-зыл ӧръяське, капчия но вылэ ӝутске кадь. Та передача юрттэ калыкъёсыз матэ карыны, эшъяськытыны. Кыӵе луыны кулэ Россилэн национальной идеологиез шуыса, политикъёс кужмо куараен эчешон вакытэ, Геннадий Заволокин аслаз семьяеныз мултэс кыл-куаратэк гинэ быдэсъя та ужез. Телевидениын али паськыт ӧръяськемын шунды пуксён палась вуэм асьмелы мурт луись, кырсь мылкыдэз бугыртӥсь "чеберлык". Нош Россиысь адямилэн сюлэмызлы мусо но шулдыр потэ Заволокинлэн арганэзлэн жингыртэмез. Бадӟым тау кареме потэ передачалэн авторезлы арганлэн чылкыт но сюлэмез няськатӥсь крезьгурез понна. Синкылиос быльырало, куд-ог арганчиослэсь быгатыса шудэмзэс адӟыса. Йыружъёсын, порнографиен но политикаын йыртэманэн тырмем экран вылын Заволокинлэн передачаез чылкыт омыр кадь. Шокышты гадь тыросад. Россиысь пӧртэм калыкъёс понна арган луэ сюлэмлэн крезь сиосыз выллем. Кырӟалоз одӥг хорен быдэс Россия, нош хорен кырӟан, кызьы тодмо, "паллянэ" кожемез уг яраты. Ӟуч калык инструмент - гармонь сяна, вань на бигер, мари но мукет арганъёс. Удмуртиын но крезьгурез яратӥсьёс ас улонзэс аргантэк уг адӟо. Асьмелэн сӥё-дано кырӟасьёсмы Валентина Пудова, Анна Плотникова но кылем арын Заволокинлэн передачаяз пыриськизы. Кудымкарысен эшъяськиз соин Киясаысь Юрий Митрянов но. Удмурт арганлэсь жингрес куаразэ паймыса но шумпотыса кылзӥськизы Россилэн пӧртэм палъёсысьтыз куноос. Удмурт такмакъёс оскон сёто, мукет калыкъёслы но соос тунсыко, ярамон кылӥсько. Таӵе вормонъёс бурдъяло мукетъёссэ но кибашлыосты. Мед чузъяськоз шаермы но Россия вадьсын жингрес арганлэн крезьгурез. Оло, Правительствомылэн куке-соку уксёез тырмоз таӵе фестиваль асьме дорын но ортчытыны? Али, странамы секыт висён вакытэ, "Шуд, яратоно арганэ!" выллем передачаос бурмонлы оскон сёто. Арганлэн крезьгурез уго эмъюм интыын. Юнме уг шуо ук: "Таза мугорын - таза мылкыд". В. САВЕЛЬЕВ. Батка ӧте чорыг лым сиыны Та гужем нуналъёсы шутэтскыны мылкыд ӧте кытчы ке кыдеке, палэнэгес. Огдырлы ке но мозмытскем потэ нуналлы быдэ шугъяськон-сюлмаськонъёслэсь. Соин ик, вань ужмес аналтыса, кӧня ке семьяен ӵош шонтӥмы Ватка-Вятка шур дуре. Крымской Слудка палъёсы. Макем трос вылэм татын шутэтскисез! Ижысь, Можга, Алнаш, Грах ёросъёсысь... Трос чорыгасьес. Но, юлтоше, соку ик эн дася али визнандэ-калтондэ. Ватка шурын туж ческыт чорыг, пе, вань. Сое эскерыса возё. Веръян понна кӧня ке кутӥд - тырмоз. Чайкаос гинэ уг чаклало сое: сиё, кӧня мылзы потэ. Тодо угось: быжтӥзы соосыз нокин уз куты. Зэм, умой татын шунды улын пыжыны, пыласькыны. Нош кыӵе чебер адске сопал ярдур (отӥын Киров улос ни) - чылкак джунглиын кадь - синэз кыскыса возе. Ву кузя солань- талань уяло чорыг чакласьёс. Шулдырто баржаос, катеръёс. Кин кырӟа, кин эктэ, кин ке уин, дас кык часын, чорыг лым сие... Бертон азямы юри эскерыны ветлӥ бускель эшъёсмылэсь бервылзэс. Оло нош ӵужыса кельтӥллям, ява. Малпай: иське, татчы нырысьсэ уг вуо соос. Утялтыса возё интыоссэс. Пиналъёс йырйиськытэк уг чидало. Шоколад, печення... Усто луысал, сиён-юонэн вузкарон инты радъясалзы ке татын. Шуом, Вятка шур дуре пырон азьын медло таӵе тодмет: 150 метр кемын ужа кафе яке бар. Шумпотысалзы пичиос но, бадӟымъёс но. Светлана ЯКОВЛЕВА. . Кун Кенеш ивортэ Удмурт Республикаысь Кун Кенешлэн Тӧроезлэн нырысетӥ воштӥсез Владимир Агашин туэ 4-тӥ августэ Алнаш ёросын ужаз. Со пыриськиз районын 1999-тӥ нырысетӥ паларе экономикаын но социальной удысын лэсьтэм йылпумъянъёсъя кенеше. Ужрадын озьы ик чакламын вал кыкетӥ паларе быдэстоно ужпумъёс. Та пумысен пыр-поч валэктон сётӥз ёрос администрацилэн кивалтӥсез Виталий Городилов. Кылсярысь, со пусйиз, ёросын кулэсмизы уждунъя, пенсиосъя пунэмъёс, будӥз йӧл но сӥль вузан, йылыны кутскиз пудоослэн лыдзы, тырмыт дасяське пудо сиён. 5,7 процентысен 3,4 процентозь кулэсмиз ужтэк кылемъёслэн лыдзы, будыны кутскиз калыклэн лыдыз. Соин ӵош ик промышленностьлэн куашкаменыз сэрен кулэсмиз выт бичан, озьы бюджетэ но отчы пырисьтэм фондъёсы коньдон люкан кулэсме. Ӝыны ар ӵоже тужгес но секыт югдур кылдэмын чагыр эстӥськон но электрокужым понна тыронъёсъя. Район та ласянь куамын процентсэ гинэ тыронъёссэ висъяны быгатэ. Али тужгес но сюлэмшугъяськыто ю тысьлы дунъёс, эстӥськонлы кулэяськон но Алнашысь спирт поттон заводэз лэсьтонын кылдэм югдур. Кенеше люкаськемъёслэн малпамзыя, ёрослэн туннэ но ӵуказе улоназ бадӟым инты басьтыны кулэ ваньбур поттонэз будэтон, чагыр эстӥськон но электрокужым понна дунъёсты тыронэз кулэстон. Нырысетӥ инты басьтыны кулэ кыкетӥ паларе юосты октон-калтон но кизён ужъёслы эстӥськон но мукет ваньбур висъян ласянь ужпум. Районын улӥсьёс бадӟым осконэн уло спирт поттон завод лэсьтонэз азьланьтонлы. Троссэ ужпумъёсты быдэстыны луоз, шаерысьтымы вылӥ кивалтон ёзъёсын гинэ огазеяськыса. Одӥгез сыӵе амал - гурт удыслы льгота сётон. Гуртъёсын улон-вылон сярысь ивортон лэсьтӥз Удмурт Республикаысь гурт удысъя но сиён-юон поттонъя министрлэн воштӥсез Василий Наговицын. Кенешез йылпумъяса, Владимир Агашин ивортӥз Удмурт Республикаысь Кун Кенешен но Правительствоен эстӥськон висъян, юосты утялтонлы но кизёнлы коньдон тырон, сиён- юонлы дунъёсты будэтонэз кулэстон сярысь ужпумъёс бордын ужан сярысь. Владимир Агашин озьы ик вуылӥз "1 Май" колхозэ но спирт поттон заводэ. Удмурт Республикаысь Кун Кенешлэн пресс-службаез. Шӧкыч Николай НИКИФОРОВ Кунояськиз Улонысь учыр Ми доры бускельмы Шача Римма ӝытлы быдэ вуылыны кутскиз. Мугез - телевизорзы тӥяськем. Нош кышномурт сюлэм бразильской сериалэз учкытэк уг чида. Дорысьтыз ужпӧръёссэ йылпумъяса, нылпиоссэ но Санька кузпалзэ сюдэ но киуж басьтыса вуэ ни. Нуналысь нуналэ тунсыко мадёсъёс шедьтэ со. Паймисько куддыр: оло телевизорез, оло бускельмес кылзоно? Римма уго кыллы шаплы, кӧня ке шорт синзэ бичатозяз, сю кыл вералоз. Спортивной комментатор кадь ик лабыртэ, ява! Тани туннэ но телевизор азе пуксиз но мадёссэ кутскиз. - Осто, козма! Ма, ку-о та Санькаез дуриськон куалаысьтыз (кебитысь) туздырозы меда? - секытак лулске со.- Кажной нунал лыгыр кудӟыса бертэ. Кинлы ке маке-маке лэсьтэ, тупатъя но, сое курыт вуэн кунояло, албастыос. - Ужез сыӵе ук, Римма. Ымдурзэ вӧяно интыын тырше,- куаразэ сётэ кузпалэ. - Ярасал вылэм, юыса ӟеч ке кӧлысал, семьялы ке ӧй люкетысал. Бускель кышномурт, маке ке тодаз вайыса, кит-кит серекъяны кутске. Бычырам синкылизэ кимышкыныз ӵушалтэ но мадёссэ азинтэ. - Тани толон ӝыт. Нылпиосмы сиськыса кӧлыны выдӥзы. Мон тусьты-пуньыосты утялтӥ но вӧё вузэ ӧй кисьты. Плита вылэ ик интыяй. Малпасько: "Бадӟым "куное" бертӥз ке, сюдо-вордо но, тэркыоссэ утялтыса кельто". Резиналэсь губкаме но ву вылам ик кельтӥ вал. Сӥлен пӧзьтэм кубиста шыдме газ плита вылын пӧсятыса гинэ возисько. Санькае уго сиськыны крокодил кадь. Кытчыяз тыке меда, паймисько. Я сиён пуртыез (желудокез) кык луоз, яке, ӵӧжлэн музэн, сиемез соку ик кыре потэ. Витён-возьманъям синъёсы кыниськиллям. Кылӥсько: гур азьын кин ке кастрюля шобретэн шалтыртэ. Бадӟым куноме ческыт шыдэн кунояло шуыса вамыштӥ, нош Санька монэ азьпалтэм ни, албасты. Тэркые тусьты-пуньы миськем вӧё вуэз ӝутэм, нянь юдэм. Губкаез басьтыса, мукет пичи тэркые интыям. Ачим серекъяны но, синвуаськыны но ёрми. Ма муген серекъямме кызьы-о валэктом? Шӧдытэк кылёд кувалда мыжыкеныз йӧтскемзэ но. "Кытчы-о сокем дыртӥськод, сиён ӝутэмме но уд витиськы?" - сюлэмы чидамтэен куаретӥсько ни. Нош со аслэсьтыззэ силе: "Ярам ай, пе, мусое, чия мульые (мылкыдыз ӟеч дыръя озьы нималля со монэ), шыдэз плита вылэ кельтэмед. Пӧсь, туж ческыт". Шыд тэркызэ бушатыса, кияз пурт, вилка басьтӥз но губка-сӥлез борды басьтӥськиз. Курадӟыса-курадӟыса векчи юдэсэн вандэ но ньылэ, крокодил. Шорам учкыса юа на: "Мусое, чия мульые, сӥльдэ ӧжытгес пӧзьтӥд шат? Чурыт". "Кӧтад небӟоз ай",- лекак вазисько. Санькае кӧтсэ тыриз но номыр тодытэк-валатэк умме усиз. Нош мон ӵукнаозь синъёсме ӧй кыньылы. Кожасько, маке-маке умойтэм ке луиз, ӝогак фельдшермес ӧтё. Ӧвӧл, номыр ӧз луы. Туннэ ӝыт нош ик кудӟыса вуиз. Со сием губкаез фильтрлы пӧрмытскиз ни, лэся. От, крокодил! Куд-ог эшъёсылы кенеш ӵектытэк амалы уз луы ай. Юись кузпалзылы губка гинэ мед дасялозы. Вылтӥз майонез, горчица зыраса но яралоз, жаль ке ӧвӧл, нӧкы вӧй мед ватсалозы. Ӝог но капчи дасяны. Мынам Санькае музэн ушъяса-ушъяса сиёзы. Шача Риммалэсь мадёссэ куспетӥ карыса, телеэкранын бразильской сериал кутскиз. Правительствоын Кыл кутоз Экономикая министерство Кыӵе вузъёслы, ужлы но услугаослы кулэяське Удмуртия, табере ваньзэ тодыны кулэ республикаысьтымы Экономикая министерство. Сыӵе решение кутэмын вал Правительстволэн берло заседанияз. Но со дыре ик министерство кыл уз куты жилищно-коммунальной хозяйстволэн, лэсьтӥськон удыс понна, озьы ик пичи ужбергатонлы юрттонъя программаез быдэстон понна. Коньдон тыронзы капчиятэмын Асваньбурез пусъем понна коньдон тыронлэсь мозмытэмын сирота кылем но мумы- бубыосынызы аналтэм нылпиос, быдэ вуымтэос, Быдӟым Отечественной войнаысь инвалидъёс но куд-ог мукет гражданъёс. Озьы ик 50 процентлы кулэстэмын сыӵе дун тырон Быдӟым Отечественной войнаын ожмаськемъёслы но та радэ пыртэм адямиослы, Чернобыль АЭС-ын пуштэм бервылъёсты утялтӥсьёслы, 2-тӥ группаысь инвалидъёслы. Республикамылэн стипендиатъёсыз Удмуртилы кадръёсты дасян азинске. Россилэн вузъёсаз дышетскыны ыстэмын 17 адями. Со пӧлысь 7-ез дышетскоз Калык эшъяськонъя университетын, 2-ез - Россиысь театр искусствоя академиын, 2-ез - Санкт-Петербургысь гуманитарной университетын. Со сяна, Удмуртиысь студентъёс тодон-валан люкалозы на Челябинскысь культурая институтын но Пермьысь хореографической училищеын. Спирт луоз Сарапулысь но Глазовысь аракы поттӥсь заводъёсысь бюджетэ мултэс коньдон вуэмен, 6 миллион манетэз висъямын Балезиноын лэсьтӥськись спирт заводлы. Азьпалан - Удмуртпотребсоюз Туэ нырысетӥ паларе ужамлы йылпумъянъёсъя Россиын куинетӥ интые потӥз Удмуртпотребсоюз. Ӟеч ужаменызы нырысетӥос пӧлы потӥзы Кизнерысь но Каракулиноысь райпоос, кыкетӥ интыын - Дэбесысь райпо. Аракыез вузаны быгато Вузкаронъя но калыклы юрттэт сётонъя министерство юнматэмъя, аракыен вузкарыны быгато таӵе организациос: акциосын "ТД Купеческий" огазеяськон, "ИНТЭР" ООО, "Фирма ФВФ" ООО, "Эдельвейс" ООО, "Номак-опт" ЗАО, "ИТЭС" ООО, "Диара" ТОО, "Прикамский Межрегиональный ТД" ООО, "Ларго" ООО, "Сови" ООО НПО, "Ассо- Продукт" ООО, "Юлена" ЗАО, "Элексы" ООО, "Бахус" ООО, "Торговый дом СТМ" ООО, "Марс Плюс" ООО, "АСПЭК" ЗАО, "Март" ООО, "Поиск" ООО. Предприятиос: "ЛВЗ "Глазовский" ГУП, "Сарапульский ЛВЗ" ГУП, "Бахус" ЗАО. Удмурт Республикаысь Правительстволэн пресс-центрез. Мар возьмато ворпо ящикын? Уно адямиос, я шутэтскон, я мае ке тумошозэ адӟон, я выльзэ тодон вылысь, телевизор учкыны ярато. Тросэзлэн кельшоно передачаоссы вань. Кӧня йӧлын ӝук уртче меда котькыӵе Розаосын, Альбертоосын, Мариеленаосын, Милагресъёсын сэрен? Нылкышноослэсь пӧртэм ӧвӧл воргоронъёс но. Футболъя чемпионат кутске ке, туганъёссы но кулэ ӧвӧл ни. Таӵе дыръя корка пушкады туп ӵыжанъя быдэс команда люкаськем, кожалод, ява. Озьы ик котькуд телевизор яратӥсьлэн аслаз тужгес но ярамон каналэз вань. Самой та сярысь ик мыноз вераськон но. Али пӧртэм студиос я кылдо, я кытчы ке чиптэм-чаптэм ышо. Югдурез валэктыны курыса вазиським республикаысь телерадиотулкымъёсты вӧлмытӥсь центрлэн кивалтӥсезлы Виктор Григорьевич ЖИДКОВЛЫ. Ижын куд-ог улӥсьёс дышем сямен ворпо ящиклэсь кнопкаоссэ зӥбылонъязы, кыӵе ке выль канал борды мырӟиськиллям. Нимыз, пе, "ТВ-Центр". Кыӵе со программа, кинлэн- марлэн? Виктор Жидков валэктӥз: центр али эксперимент выллем ортчытэ. Удмуртиын улӥсьёс адӟыны быгатозы Москва городлэсь одӥг каналзэ. Учкисьёслы кельшиз ке, оло, "ТВ- Центр" умой-умой юнмалоз асьме улонэ. Пытсаськиз "Арсенал" телекомпания. Ма муген? Оло, телерадиоэфирез вӧлмытӥсь центрлы уксё тыронзы вань? Виктор Григорьевичлэн верамезъя, "Арсеналысь" ужан тӥрлыксы, пе, дырызлэсь азьло пӧсьтэм. Телекомпанилэн тулкым сётон тӥрлыкез (передатчикез) туж трос электрокужым сие. Соин сэрен уно ыштонъёс луо - барышез чик ӧвӧл. Телерадиотулкымъёсты вӧлмытӥсь центр "Арсеналлы" дэмлаз тарифъёсты ӝутыны. Нош сотэк но ОРТПЦ-лы тыронъёсыз вань. Выль тарифъёслэсь кышкаса, "арсеналъёс" малпазы вужмем передатчикез выленыз воштыны. Сое басьтыны решение кутэмын вал кыкетӥ паларын. Но шӧдтэк шорысь вужез передатчик тӥяськиз. Мар кароно? Сӧриськемзэ тупатоно ке, 300-500 сюрс манет пала тыроно. Выльзэ басьтон кӧнялы ке гинэ дуногес усёз. "Арсенал" бырйиз кыкетӥ сюресэз. "Арсенал" аслэсьтыз передачаоссэ сентябрьысен возьматыны кутскоз, нокыӵе люкетонъёс ӧз ке луэ. Кемалась ик ӧвӧл телевизор пыр веразы, "Новый регионэз" банкрот карыны медо шуыса. Пӧртэм интыосы пунэм тыронъёсыз, пе, вань. Ужалоз-а, пытсаськоз-а со? Телерадиотулкымъёсты вӧлмытонъя центрлы "Новый регионлэн" тыриськонъёсыз ӧвӧл. Соин татын уг тодо телекомпанилэсь азьпал улонзэ. "Альва" я ужа, я уг. Ку меда кутскоз лад-лад эфире потыны? Таиз сярысь Виктор Жидков номыре уг тоды. Угось "Альва" телекомпания центрен нокызьы герӟаськемын ӧвӧл. Марина КОСТЫЛЕВА. Финн-угор калыкъёслэн ВИИ Калык куспо фольклор фестивальзы Тӧдьы тури - шуд ваись 7-тӥ-8-тӥ гудырикошконэ шаерамы вуюись буёлъёссэ пазяса жингыртӥз финн-угор калыкъёслэн ВИИ фольклор фестивальзы. Асьме доры ас кырӟан-эктонъёссэс ваизы Печораысь коми-зырянъёс но Кудымкарысь коми-пермякъёс, Йошкар-Олаысь но Башкортостанысь поръёс, Мордовиысь мокшаос но эрзяос, Ханты-Мансийской национальной округысь кырӟась семьяос, Карелиысь усточиос, озьы ик республикамылэн палэнысьтыз Пермь, Киров улосъёсысь, Башкортостанысь но Татарстанысь удмурт фольклор коллективъёс. Фестиваль усьтӥськиз 7-тӥ августэ Ижевскысь Операя но балетъя кун театрын. Татысен ик герӟаськиз ни ваче эшъяськон. Котькудзэ ик лыктэм куноосыз удмурт сямъя вӧйын- нянен но кырӟанъёсын пумитазы асьме фольклор коллективъёс. - Удмурт калык - тужгес кырӟась калык. Нош калык искусство - куасьмисьтэм ошмес. Та дыре но вордско весь выльёсыз но выльёсыз фольклор коллективъёс. Оскисько, та фестиваль дыръя эшъяськон гердъёс юнмалозы, выльёсыз чебер кырӟанъёс вордӥськозы, - шуиз фестивалез усьтыса Удмурт Правительстволэн Тӧроез Николай Ганза. Фестивальлэсь флагзэ ӝутӥзы удмурт фольклор коллективъёслэн кивалтӥсьёссы Федосья Тубылова, Анатолий Чирков, Любовь Овчинникова, Лидия Михайлова, Сергей Крутихин, Сергей Трофимов но мукетъёсыз. Кызьы тугокое выль но выль сяськаос-куаръёс ватсасько, озьы ик та фестивалез усьтон концертэ но пӧртэм-пӧртэм коллективъёс итӥськылӥзы. Котькудӥныз ӵош ик сцена вылэ "лобӟыса" вуылӥз тӧдьы тури (ханты но манси калыкъёслэн оскемзыя, тӧдьы тури - шуд ваись) - соосты возьматӥзы балетъя калык театрысь нылашъёс. Буёл бӧрсьы буёл - быдэсак сяськаяз, тулкымъяськиз сцена. Огшоры мылкыдын, синвуаськытэк учкыны уг луы вал та пӧртэм калыкъёслэн эшъяськон тугокозы шоры. "Сюлэм олокытчы кошкиз, интыяз ӧвӧл ни кадь", - шуиз Удмурт кенеш" огазеяськонлэн тӧроез Валентин Тубылов но... Финн-угор калыкъёслэн эшъяськонзы арысь аре юнма. Огазеяськон бордын - кужым. Асьме калыкъёс огазеяськыса гинэ шедьтозы шудо сюрессэс. Таӵе мылкыдзэс веразы Россия Федерацилэн Финляндиысь посолэз Маркус Люра, финн-угор калыкъёслэн Консультативной комитетсылэн кивалтӥсез Валерий Марков, та выжы калыкъёслэсь культуразэс азинтонъя фондлэн председателез Николай Гаврилов, Россиысь Культурая но Нациосын ужанъя министерствоосысь Марта Шульга но Александр Демченко. Асьме ласянь мылкыд каронъёссэс веразы Кун Кенешлэн Тӧроезлэн воштӥсез Светлана Смирнова но Ижевсклэн мэрез Анатолий Салтыков. Нош калык кылбурчи Олег Поскребышев шуиз: - Асьмеос - тылобурдоос кадесь, лобӟеммыя бурдъёсмы юнмало. Нош зор ке усе - татын номыр янгышез ӧвӧл. Зор - со умой куноослы. Зэм, зор ӧз люкеты ӟеч мылкыдын малпам ужрадлы, ортчытон интыез воштоно луылӥз ке но... Асьме городъёсын но гуртъёсын бер ӝытозь ӧз чалмылы пӧртэм куараосын кырӟан- гурлан, пыдпыдэс ӟырдатозь тыпыртон-эктон. Нуназе бере пӧртэм шаеръёсысь лыктэм артистъёс концерт возьматӥзы но кунояськизы пӧртэм ёросъёсын: коми "пелысьёс" - Пичи Пургалан, Курчум-Норьяын, коми-пермяк "Шундыбамъёс" - Вуж Сальялан, "диголя"-эрзяос но "мокшаночкаос" - Воткаын, Кукуиын, Пихтовкаын, "марий памашъёс" - Ныргындаын но Быргындаын, "эрвелъёс" (башкир поръёс) - Узей-Тукляын, хантыос но мансиос - Шевыряловоын. Шаермылэн палэнысьтыз удмуртъёс вуылӥзы Бадӟым Сибые, Шор Постолэ, Сундуре но Як.-Бодьяе. Шулдыръяськонлэсь палэнэ ӧз кыле "ашальчиос" но "чибориос", "гуждоръёс но "иднакаръёс", "эктон коркаос". Нош "Инвожо" пумитаз "Ӟардонэз". Ӵуказеяз но зор кыдыраз. Праздник "Динамо" стадионысь воштӥськиз "Металлург" двореце. Сое йылпумъян сярысь ивортом на. Т.Петрова. Шунды пиштэ пилем пыртӥ Адӟылэмды вань, дыр, шунды шоры шедем синучконэз. Со возьматэ кадь: мон инбамысь агаелэсь лябытгем ӧвӧл. Бадӟым фестивальлэн пичи но яркыт юдэсэзлы пӧрмиз Пичи Пурга ёросысь Курчум-Норья гурт. Солы пумитаны оскизы уга удмуртъёслэсь тужгес матысь выжы-кумъёссэс - комиосты. Берлогес тодмо луиз на: соосын ӵош лыкто, пе, вавожъёс но венгръёс. Уинысен кисьтӥськись зор ӝыт пал лябомиз. Курчум-Норья пумысь чеберъям капка доры вуо кема витем куноос. Олокӧня автобусъёс но машинаос дугдо отчы. Пумиськем- ӟечбуръяськем бере куноос вамышто ульча кузя. Пурга калыклэн сямыз шырыт. Корка дортӥз вамышъясь муртэ - тодмозэ но, тодмотэмзэ но - одно ик дораз чортоз. Дуно дырез шыръян вылысь, курчум-норьяос аспӧртэм амал шедьтӥллям. Ӝӧкъёссэс пырак укно улъёсазы поттӥллям. Вить-куать улы (семья) огазеяськем но огъя ӝӧк дасям. Огез поттэ аспӧртэм аракызэ (сое татын малы ке "Лариса" нимало), мукетыз - мусурзэ, куинетӥез - перепечсэ, ньылетӥез - шаньгизэ... Школа доры вуытозязы, куноос уно пол дугдылӥзы, соослэн пыдъёссы чарак жильмизы, нош кылъёссы сэразы. Соосты шулдыр кырӟанэн пумитазы нылпиос. Собере черектӥзы: - Тӥянлы кузьым - мичы ӟориӟ! (Тӥледлы кузьым - чебер сяська). Люкаськемъёсты школа азбарын ӟечкылазы Пичи Пурга ёросысь администрацилэн йырызлэн воштӥсез Валентина Панфилова но Пичи Пурга черкогуртысь администрацилэн йырыз Юрий Петров. Нош "Юж-Пурга" колхозлэн тӧроез Николай Русинов таӵе бадӟым ужрадын но амал шедьтӥз ужысь азьмынӥсьёсты нимын-тулын вераны но выль азинсконъёс сӥзьыны. Татьяна Маштакова куноосты тодматӥз гуртлэн кылдэменыз но ортчем сюресеныз, мукетъёсыз - ожын но ужын дан люкаменыз. Пумиськонэз быгатыса нуизы школалэн директорез Лидия Пушина но шофёр Василий Иванов. Кыдырась зор улын чебер кырӟазы Пичи Пургалась дано "Зарни шеп" коллектив но "Девчата" ансамбль, Вавожысь "Гуждор". Кӧня кичабонъёс вал Коми Республикаысь Печора городысь "Пелысь" ("Палэзь") ансамбльлы! Ваньмыз сямен кышнооссы но воргоронъёссы баскетболитъёс ӝуждаесь, куараоссы реактивной самолётлэн кадесь. Эктыны ӧдъяло ке - уг, музъем уг зурка - ожо-гуждор вадьсытӥ омыретӥ лобо кадь, одӥг куар но уг вырӟы. Усто калыкез ас котыраз огазеям кивалтӥсьсы Олег Беляев. Вылаз ик, кырӟамъёслэн ӝыныез пала кылъёссы асьмелы валамонэсь. Комиосты вылӥ дунъяммы адӟиськиз со вылысь но - соосын ӵош ворттылӥз но телемадёс дасяз ачиз Владимир Евсеевич Алашеев - Удмурт телевиденилэн директорез. Возьытэ ӧз усе Курчум-Норьялась кырӟасьёс но (ансамбльзэс маскаръяськыса асьсэос "Дэноминация" нимало вал, табере "Инфляция"-а, мар-а шуоно ни, пе). Пумиськонэз дасянэ пыриськем вань адямиосты верам потэ вал, но газетын инты уз тырмы. Кин ке ваиз одӥг тусьты чечы, нош Николай Русинов висъяз сӥль, кеньыр но мукетсэ, кин ке дасяз пу но пурты, кин ке радъяз вузкарон. Кызьы мерталод котькудӥзлэсь ужзэ-пӧрзэ? Курчум-Норьяослэн куноосты ас доразы шуныт пумитамзы ӵуказеяз йылпумъяськиз туж аспӧртэм - Николай Русиновен ӵош соосты Андан пӧзтӥсьёслэн культура дворецазы пырыны ӧз лэзе. Туж чебер ӧтён билетъёссы киязы вал ке но. А.Шкляев. Толэзь вужер Ӵуказе 11-тӥ августэ, Шундыез Толэзь сайялоз. Югыт нуналмы кӧня ке секунд куспын уйлы пӧрмытскоз, нош шундымы - пеймыт кульчолы. Быдэсак шунды сайяськонэз адӟыны луэ 200-300 арлы огпол гинэ. Солэн вужерез (пасьталаезъя 112 иськем) усёз Индия, Пакистан, Иран, Афганистан, Ирак, Турция, Болгария, Румыния, Австрия, Венгрия, Германия, Франция вадесъёсы, Англилэн но Сьӧд зарезьлэн лымшор но шунды пуксён палдуръёсаз. Та акшан кыстӥськоз кык но ӝыны минут пала. ЪЪ дауре сыӵе учыръёс вал сизьым пол - 1917-тӥ, 1935-тӥ но 1982-тӥ аръёсы. Астрономъёслэн чакламзыя со луэ 18 арлы огпол. Вуоноосыз таӵе шунды сайяськонъёс луозы Северной Америкаын (2117-тӥ арын 21 августэ), Китай-Япониын (2035-тӥ арын 2-тӥ сентябре) но Москваын (2126-тӥ арын 16-тӥ октябре). Басьтэмын Интернет пыр. А. С. Пушкинлэн вордскемез дырысен - 200 ар "Тӥляд кылбуръёсты шыркун кадь жингырто..." Ӟуч калыклэн быдӟым гожъясез асьме кунэ пырись вань калыкъёслэн культураязы шӧдскымон пытьы кельтӥз, солэсь адӟем карыса гожъяны кутскизы тросэз писательёс, дышетскизы улонэз, зэм возьматэм сяна, яркыт кылын, син шоры пуктымон суреданы (удмурт писательёс пӧлысь Щагинэз нырысь ик бордаз кыскиз ӟуч классик). Сыӵе луэ А. С. Пушкинлэн "Сказка о рыбаке и рыбке" туж тодмо луэм но революцилэсь азьло ик школаосын дышетэм произведениез, Солэсь адӟем карыса, Г. Е. Верещагин кылдытэ "Зарни чорыг" поэмазэ. Отын со озьы ик кельтэ ӟуч произведенилэсь сюжетсэ но чеберъян амалъёссэ, нош соин ӵош ик пыртылэ удмурт калыклы матын луись тодметъёсты но учыръёсты. Ӟуч оригиналысб куатетӥ чурын вераськон мынэ куинетӥяз учыре зарни чорыглэн потэмез но адями сямен вераськемез сярысь, нош Г. Верещагинлэн поэмаез сю куать чурлэсь пӧрмем но, отын кык пересьёслэн улэм-вылэмзы сярысь тросгес вераськон мынэ. Со сяна, вераськоно чорыглэн тусыз но асьме палась шуръёсын улӥсь чорыглы кельше; Маке юш кадь чорыг, Шедьтылӥ мон пая, Юш быдӟа, туж чебер... Шедьтылӥ головня, Кисьтаське зарни кадь. Ма кызьы пӧяськиз Чорыгась туж абдрам. Шедьыны жводам? - Таӵезэ, - шуэм со, - Вумуртлэн шат нылыз Адӟеме но ӧй вал на, Шудыкуз йыромиз? Та бен зэм-а чорыг, Ас юртсэ шедьтэмез Кыӵезэ шедьтылӥ? Нокызьы но ӧз лу... Сыӵе вераськись чорыгез шедьтыса, пересь Баймет чылкак пайме но вазиське: Пельгае ке мынам Мар лэсьтом соин - Луысал монэным, Кенешысалмы татын. Озьы удмурт писатель умой возьматэ удмурт улонэз: тросэзлэн этнографъёслэн мадемзыя, удмурт пиосмурт одӥг бадӟым ужзэ но кышноеныз кенешытэк уг лэсьты вал, соин ик удмуртъёс вылӥ дунъяло вал нылкышноез, со сярысь тросэз верам визькылъёс лэчыт кылъёс. Озьы ик революцилэсь азьло берыктэмын вал А. С. Пушкинлэн "Сказка о попе и о работнике его Балде" произведениез. Сое удмурт кылын озьы ик кӧня ке воштонъёс но ватсанъёс пыртыса печатлаз ини. Максим Прокопьев революция бере, 1918-тӥ арын. Ӟуч оригиналын Балдаез чёртъёс доры оброслы ысто ке, татын М. Прокопьев геройзэ, поплэн косэмезъя, уин ыстэ нюлэскы пу вайыны. Тон малпа вал ини, Балдаез кионъёс таркалозы шуыса, нош кескич ужась адями поплэсь валзэ кионъёслы сюдэ, нош со интые, дӧдьые кионэз кыткыса, быдэс воз пу вае но паймем поплы вазиське: Озьы ке кион но Валлэсь но ӟечгес. Туж ӟеч ветлоно, Только сиыны Солэн ворттэмез Мар сётом солы? Таизлэн выллем ик произведенилэн пумыз но мукетгес сётэмын ини: Собере визьтэм Поплэн семьяез Поп дорысь кошкем. Марлы кур луоз? Али кытынэз Одӥг поп гинэ Тодмо ӧвӧл солэн. Ӵуж юртын улэ. Мешок уксёен Акре огуин Узырмем куен Кулоз со отын. Та чуръёс эпилог луыса возьмато поплэсь "ӵуж юртэ", сюремзэ. Революцилэсь азьло психиатрической больницаосты ӵуж буяло вал. Таяз учыре но М. Прокопьев ӟуч произведениез удмурт лыдӟисьлы матэ карыса но умой валамон мед луоз шуыса пыртылэ куд-ог тодметъёс но учыръёс. Куӟебай Гердлэн но "Гондыръёс" поэмаез куд-ог тодметъёсыныз но учыръёсыныз матын луоз А. С. Пушкинлэн "Сказка о рыбаке и рыбке" произведениезлы. Но со гожтэмын удмурт калык выжыкылъя. Со сяна, татын паймымон чорыг интыын - паймымон беризь. Со ик быдэстэ пересь кышнолэсь вань куронъёссэ. Берло ини, кузьмам зарнизэ медам лушкалэ шуыса, пересь кышно куре: соос доры нокыӵе адями но, пӧйшур но кышкаса медам пыралэ. Соку пересез но кышнозэ кӧшкемыт бадӟым гондыръёслы пӧмытэ, соин вань калык, соослэсь кышкаса, гуртысь кошке. Нош пумаз ини Куӟебай Герд егит лыдӟисьёслы вазиськыса гожтэ: Пичи эке, пичи кыл, Зэм меда та выжыкыл? Малпа, эскеры сое Тон ачид ик, мусое. Озьы автор котькуд лыдӟисьсэ малпаськыны дышетэ, солэсь визьзэ муромытыны юрттэ. Со сяна, 20-тӥ аръёсы куд-ог архиреволюционной гожъясьёс черекъяны кутскизы, Пушкин выль вакытлы уг тупа шуыса. Нош соку ик Куӟебай Герд туж гажаса но вылӥ дунъяса гожтӥз: "Для русской литературы произведения А. С. Пушкина - такая же вершинная точка классического стиха, как Моцарта в музыке и Рафаэла в живописи. Стихотворения и поэмы Пушкина являются идеальной организацией устной речи. Звучание речи образует со смыслом согласованное целое. Смысловое ударение всегда совпадает с ритмическим ударением стиха, а ритмическое членение - с синтаксическим". Куӟебай Гердлэсь тазьы верамъёссэ пусйыса, академик А. С. Пушкин, "Пушкинский дом" нимаськись ӟуч литературая институтлэн директорез, шуиз: Мон А. С. Пушкинлэн творчествоез сярысь туж трос верамъёсты тодӥсько, нош таӵе мур но туж шонер дунъетэн нырысьсэ пумиськисько. Кыӵе шунытэсь кылъёс вера ӟуч академик удмурт писательлэн дунъетэз сярысь! Революция бере нош ик А. С. Пушкинлэн творчествоез бордаз кыскиз удмурт писатель1сты. Озьы Ашальчи Оки, калык творчестволэсь адӟем карыса гожъям сяна, 1918- тӥ арын "Гажан эше" кылбурзэ, кӧня ке тупатъяса, А. С. Пушкинлэн "Если жизнь тебя обманет" произведениезъя пӧрмытэ: Шудэд тонэ алдаз ке, Эн чигиськы, эн бӧрды. Секыт нунал лыктӥз ке, Чидатӥськы, оскиськы: Куддыр вапум секыт ке но, Азьпалан ӟеч нуналъёс. Ваньмыз ортчоз, ортчоз, кошкоз - Ортчем вапум мусо потоз. Советской власть кылдон вакытэ ик Д. Моторов 1920-тӥ арын печатлаз "Удмурт комиссариат" кылбурзэ. Со сӥземын вал Трофим Борисовлы. Нош та произведение гожтэмын А. С. Пушкинлэн "Медный всадник" поэмаезлэсь адӟем карыса: Тӧдьы Камлэн ярез дурын Ляков малпаськыса сылэ, Котыр учке... Солэн азяз Камез чиля, Отын вужмем лодка уя, Тӧдьы Камлэн ярез дурын Отын-татын юртъёс сыло. Со юртъёсын удмурт улэ, Шунды солы ӧжыт йӧтэ. Кам шуредлэн ярез ӝужыт, Татын кезьыт, татын пеймыт. Со малпаське: "Татын ма югыт поттом, Сое утчало удмуртъёсмы. Комиссариат пуктон инты Татын ӟеч луоз милемлы, Удмуртъёслы укно усьтом, Соос пӧлы югыт пыртом..." Та чуръёс туж умой возьмато, кызьы удмурт поэт, ӟуч классической произведениосты басьтыса, ас вакытэзлы тупась мылкыдэз но учырез возьматэ, сое удмурт калыклэн улэменыз герӟаса суреда. Нош куамынэтӥ аръёсы, А. С. Пушкинлэн быремез дырысен 100 ар тырмемез пусйыса, быдэс СССР-ын нимыьтыз ик данъямон ужъёс ортчизы. Соку ӟуч классиклэн произведениосыз куд калыклэн кылыныз печатламын вал. Озьы 1936-тӥ арын потӥзы А. С. Пушкинлэн "Сказкаос" книгаез. Отчы пыремын "Сказка о рыбаке и рыбке", "Сказка о Царе Салтане" (берыктӥз А. Эрик), "Сказка о попе и работнике его Балде" (берыктӥз А. Багай). 1937-тӥ арын П. Усков берыктӥз "Капитанская дочка" повестьсэ. Нош "Станционный смотритель" берыктэмын вал 1938-тӥ арын. Война бере, 1949-тӥ арын, нош ик А. С. Пушкинлы сӥзем юбилей дыръя печатламын "Дубровский" повестез (берыктӥз Г. Сабитов), "Руслан и Людмила", "Медный всадник" но "Борис Годунов" трагедия (берыктӥз И. Гаврилов). Уката умой пӧрмемын М. Петровен берыктэм кылбуръёсыз - "Зимнее утро", "Зимний вечер", "Зимняя дорога" учебникъёсы пыризы. Со сяна, удмурт поэтъ1с, асьсэлэсь малпанъёссэс но А. С. Пушкинлэсь быдӟым ужзэ данъяса, ӟуч классиклы сӥзьыса, тунсыко кылбуръёс гожъяны кутскизы ини 30-тӥ аръёсы ик. Озьы М. Петров "Пушкинлы" кылбураз гожтӥз. ... Монэ куке уно пӧртэм кылын Вералозы, шуид вал кылбурад. Вуиз со дыр. Тонэ пӧртэм калык Вордэм пидэ кадь гажаса вера. Ӟуч поэтлы сӥзьыса, таӵе выллемесь ик чуръёс гожтӥзы П. Чайников ("Пушкинлы - дан"), И. Дядюков ("Эрикез кырӟасьлы"), А. Лужанин ("Пушкинлы"), М. Покчи-Петров ("Пушкинлэн памятникез дорын"). Мукет сяменгес но ӟуч классиклэсь лэсьтэм ужзэ вылӥ данъяса вазиське Ф. Васильев "А. С. Пушкинлы" кылбураз: Тӥялд кылбуръёсты - Инмысь чылкыт вуды Инмысь ошмес вуос, Чылкытатэ лулме. Тӥляд кылбуръёсты - Югыт чильпась сиды Тулыс шунды сиос. Вордэ кадь бурдъёсме. Куректыку соос Адске кыдёкегес Монэ но буйгато. Паськыт улон сюрес, Шумпотыку сос Мон валасько мургес Шыркун кадь жингырто. Шедьтэм шудэз-бурез. А. С. Пушкинлы сӥзьыса, тунсыко кылбуръёс печатлаз В. Романов. Тодмо луизы солэн "Пушкинлэн кылбуръёсыз" но "Болдино. Пушкинлэн юртэз нимо произведениосыз. Озьы тӥни ӟуч классиклэн творчествоез юрттӥз удмурт писательёслы умоесь произведениос гожтыны, солэсь кылбуръёссэ, поэмаоссэ берыктыса, удмурт поэтъёс но дышизы тунсыко ужъёс кылдытъяны. Ф. К. ЕРМАКОВ, профессор. А. С. Пушкин. Тол сюрес (Зимняя дорога, берыктӥз М. Петров) Тулкымо инмын уйшор пал Тыр толэзь каллен уя, Мӧзмытэсь лудэ со чал-чал Югытсэ кисьтэ уе, Луд вылтӥ сюрес кузы нош Тройка ӝог азьлань ворттэ, Уй куспын гырлы куара но Акылес кадь жингыртэ. Ой, мӧзмыт, чалмыт уйшор дыр, Нош лудын ямщик кырӟа. Со кырӟа капчи юмшан гур Я мӧзмон гуръёс кырӟа. Чик ӧвӧл тылъёс, юртъёс но... Кыр инты, пумтэм лымы... Сьӧд гожмоесь юбоос но Ӧжыт шедьыло мыным. Зарезьлы (К. Морго, берыктӥз П. Чайников) Ӟеч лу, эрикысь инкуазь кужым, Тон берпумзэ погыльтӥськод Тулкымъёстэ мон син азьын, Дан чебереныд ворекъяськод. Эшлэсь кадь мӧзмыт верам кылдэ (Ӧтиз кадь кошкон часэ), Шимес, ӧтись ӵашетэмдэ Мон кылӥсько ни берпумзэ... Бен, ӟеч лу, зарезь! Малпаса Дано шулдыр чеберлыктэ - Кема-кема уло кылса Ӝыт часъёсы гуретэмдэ. Нуо тэле но кыръёсы, Юон изъёстэ, палькккаськемдэ, Вужеръёстэ, чилямъёстэ. А. С. Пушкин. Чузъяськон (Эхо, берыктӥз А. Лужанин) Вузэ-а сьӧсь пеймыт сикын, Я гудыръя, шудэ гумы, Я ныл кырӟа вырйыл сьӧрын - Ваньмыз шоры Тон вазиськод чус омырын Шӧдтэк шорысь. Тон валаськод гудыръямез, Сильтӧл но ву куашетэмез, Гуртысь пастухъёслэсь кылзэс - Но вазиськод: Пумитад вазись ӧвӧл... Поэт ӵапак Сыӵе ик тон. Пилем (Туча, берыктӥз Е. Самсонов) Пазям сильтӧллэн тон берпум пилемез! Огнад тон чагыр инбамтӥ ортчиськод, Огнад мӧзмытэсь вужеръёс сётӥськод, Огнад тон ӝожмыт кариськод нуналэз. Инэз кемалась ик ӧвӧл шобыртӥд, Кышкыт котыръяз вылтырдэ чилекъян, Соку вӧлмытъяз тодмотэм гудыръян, Зорен тырмостэм музъемез пылатӥд. Я, ватскы, тырмоз табере. Дыр ортчиз, Музъем сайкиськиз, тӧлпери но кошкиз. Сэзь тӧл, вешаса куаръёссэ писпулэсь, Улля ни тонэ чалмытскем инбамысь. Тонэ мон яратӥ... (Я вас любил..., берыктӥз В. Будин) Тонэ мон яратӥ, яратонэ Оло, чылкак ӧз кыс али сюлмам; Но со медаз иса ини тонэ; Уг пот ӝожомытэме тонэ мынам. Я дӥсьтытэк, муртэн-а вожаса, Мон яратӥ чалмыт но оскытэк. Макем мон яратӥ мусояса, Вылез мед яратоз вунэтытэк. М. Петров. Пушкинлы (Пушкину) Лек аръёсы яркыт пиштӥсь тылын Тон югдылӥд шимес пеймыт уез, Сюлме оскон пыртӥсь ӟырдыт кылын Шудбур сярысь кырӟад тон калыклы, Югыт сюрес вылэ ӧтид сое. Шуд вуонлы оскись сэзь куараед, Зарни крезен шудэм кырӟанъёсыд Удмурт гуртэ вуылӥзы, поэт. Сьӧд тэльёсын ми кылзылӥм сое. Кылбуръёстэ лыдӟим чагтылъёсын. Гожъяд вал тон: ӟардоз шудо ӵукна. Ӟардӥз ни со, ӝужаз яркыт шунды. Тулыс выллем вуиз со ми понна, Вуиз кема витем, малпам шудмы. Монэ куке уно пӧртэм кылын Вералозы, шуид вал кылюурад. Вуиз со дыр. Тонэ пӧртэм калык Вордэм пизэ кадь гажаса вера. М. Покчи-Петров. Пушкинлэн памятникез дорын (У памятника Пушкину) Трос дауръёс пыртӥ вамышъянъяд, Татчы тон дугдэмед кадь огдырлы, Адӟон понна, кызьы ӟуч музъемад Мукет дыре улэ быдӟым калык. Тон адӟиськод-а, пушкин, вуэмын Шудбур ваись чебер выль ӟардонэд. Тон ӧтьылӥд сое аръёс вамен, Сое туж юн потэ вал адӟемед. Калык ачиз ваиз со ӟардонэз, Басьтӥз со визьмыныз, ас кужмыныз, Со тодмантэм выльдӥз ӟуч музъемез, Нош ӟардонзэ нима со - коммунизм. Тон тодӥськод, поэт, со калыкез. Ачид ӧвӧл ке но соин артэ, Тынад нимыд - солэн данъяськонэз, Уждэ, верамъёстэ со яратэ, Тани шорад пионеръёс учко, Огез азяд сяська букет кельтӥз. Выльысь кадь соослы тон вазиськод: "Ӟеч-бур, шудо дыре улӥсь нылпи!" Соос, тыныд кизэс шоналляса, Кырӟанъёсын пото выль улонэ, Таӵе чебер дырзэс азьпалтыса, Егит сюлэмазы нуо тонэ. Ф. Васильев. Пушкинлэсь улэп дыръяз суредам берло портретсэ учкыса. Жадем пушкин, лачмыт пуксьыса, Ас понназ маке мур малпаське. Солэн меӵ но паськыт кымысаз Берпумез кисыри ватсаське. Со адӟе, дыр, бырон нуналзэ, Тушмонэз, дыр, понназ мыскылля. Со уг жаля вакчи улонзэ, Нош ваньзэ туж умой со вала. Кезьытгес карисько нуналъёс, Шунды си но пыра дыртыса. Весь шергес вуыло гожтэтъёс, Эшъёсыз но ӧвӧл ни вӧзаз. Эксэйлэн дыртӥсьтэм валъёсыз Коркаез азетӥ ортчыло, Эксэйлэн чидасьтэм синъёсыз Усьтымтэ укноез абъяло. Пилемъёс но лэзько улэгес Сьӧд инвис но юнгес эгеса, Адӟиське ни берпум нуналэз, Ваньзэ Пушкин учке валаса. Ӝажыысь яратон книгаос, Натали шундыез гинэ, дыр, Ӟеч шунто на солэсь сюлэмзэ, Кынарзэ но ӝуто на, вылды. Жадем Пушкин, вӧзам пуксьыса, Мае ке вераны кадь медэ. Кыдёке азьпала адӟыса, Аръёс пыр вераськон кадь мытэ. Ижевск, 8.03.78. Конкурс Буре ваён вылысь Удмуртиысь Солдат анайёслэн комитетсы но Интыосын ортчем (локальной) ожъёсысь ветеранъёслэн комитетсы, туала вакытэ (1999-тӥ арын 19-тӥ июльысен 20-тӥ сентябрёзь) воинской долгзэс быдэстыкузы бырыны шедем аспал эшъёсмес буре ваён синпелетлы (памятниклы) проект кылдытыны конкурс ялэ. Мемориалэз пуктыны кенешемын Ижевскысь Милиционной но Набережной урамъёс вискы 0,7 гектар музъем висъяны. Конкурсэ пыриськыны быгато вань мылкыд карисьёс: нимаз адямиос но, коллективъёс но. Та ужрадэ пыриськон вылысь ыстоно куронъёсмылы тупась эскиз. Отчы пыӵамын мед луоз улон понна нюръяськон, егитъёслы Родинамес утён мылкыд . Со сяна, лыдэ басьтоно на мемориаллы ним гожтонэз но бырыны шедем муртъёслэсь списоксэс радъянэз, сяська понон интыез. Уждэс быдэстоно А-4 форматъем бумага вылэ. Пусйыны кулэ, конкурсын вормисе потэмъёсты вите коньдон премия. Нырысетӥ премия - 5 сюрс манет, кыкетӥ премия - 3,75 сюрс манет, куинетӥ премия - 2,5 сюрс манет. Конкурсэ вуэм вань ужъёс возьматӥськозы "Архитекторъёслэн юртазы". Юанъёсын вазиськыны луоз Удмурт Республикаысь Архитекторъёслэн союззылэн председателезлы Р. Г. Яковлевалы 78-27-22 телефонъя. Удмуртиысь Солдат анайёслэн комитетсы. Котьма сярысь "Политической" аукционъёс дано луо Лондонысь тодмо "Сотбис" фирмалэн аукцион азьын выставкаез ужа. Со тодматэ выль историлэн сюресэныз. Таӵе "политической" аукционъёс туж кельшо адямиослы. Учкисьёсты паймыто политикаысь тодмо адямиослэн Ленинлэн, Сталинлэн, Гитлерлэн, Линкольнлэн, Рузвельтлэн, Черчилльлэн куке-соку вылэм арбериоссы. Алигес "Сотбис" тодматӥз кулэмез бере Сталинлы лэсьтэм маскаен. Тӥледлы тунсыко-а со? Мынам мугоры малы ке юзыр-кезьыр луиз... Иворъёсъя национальной служба. Пайдаё шутэтскизы Завьяловоын йылпумъяськиз ужанъя, шутэтсконъя но тазалыкез кылдытонъя аспӧртэмлыко лагерь. Ёросысь нылпиослэн спортъя школаысьтыз 30 нылпиос толэзь ӵоже сӥль-вирзэс кыдатӥзы, пайдалыко ужазы но тунсыко шутэтскизы. Нош кичӧлтон сётӥз "Россия" ОАО- лэн кивалтӥсез Владимир Шишов. Пусйыны кулэ, со азьвыл аръёсы куасэн бызьылонъя но биатлонъя кык полэс спортъя мастер вал. Соин ик, спортэз гажан но яратон мылкыдыз туннэ но пуксемын ӧвӧл на. Тренеръёсын Игорь Ураковен но Георгий Булычевен ӵош, эскерон ортчытон вылысь, соос лагерь радъязы. Пиналъёс татын спортэн эшъяськем сяна, трос юрттӥзы колхозлы. Озьы соос лагерьын улэм-вылэм дунзэс ужаса поттэм коньдонэнызы асьсэос ик берыктыны быгатӥзы. Со сяна, коньдонзы кисыязы но кылиз на. "Россия" ОАО-лэн кивалтӥсез шумпотэменыз пиналъёс понна басьтӥз на куасъёс. Владимир Шишовлэн таӵе лагерь радъямез понна шумпотӥзы нылпиос но, тренеръёс но. Эскерон ортчытон вылысь радъям лагерь умоен лыдъямын. Малпало, таӵе лагерез кайта но усьтыны. Владимир Шишовлэсь таӵе кичӧлтонзэ адӟем мед карысалзы вылэм мукет кивалтӥсьёс но. Оло, соку пиналъёс но шутэтскон дырзэс пайдаё ортчытысалзы. Н. ИВАНОВ. Журналистъёсын пумиськон Пар валэн уд суты финнъёсты Финн-угор калыкъёслэн сизьыметӥ калык куспо фольлор фестивальзы шаерамы трос вылӥ куноосты вуттӥз. Удмурт Правительстволэн юртаз суббота нуналэ журналистъёсын пумиськизы Россия Федерациысь Финляндия Республикалэн чрезвычайной но полномочной посолэз Маркус Люра но та посольствоысь ик Кыкетӥ секретарь Никлас Линдквист. Пумиськонэ озьы ик пыриськизы Удмурт Республикаысь Международной кусыпъёсъя министр Виктор Викулов но Удмурт Правительстволэн Тӧроезлэн воштӥсез Виктор Шудегов. Юанъёс тросгес сӥземын вал посоллы Маркус Люралы. Вылӥ куно шугъяськытэк мадиськиз ӟуч кылын. Соиз валамон но, азьвыл Советской Союзын но Россиын со дас кык ар ӵоже ужамын. Кык арзэ ини Маркус Люра посол. Россиысь финн-угор республикаослэн улэм-вылэменызы тодматскылӥз Москваысен гинэ. Фольклор фестиваль сюрес усьтӥз Удмуртие. Финляндиысь куноос малпало вал Ижевскез начар городэн. Но Удмуртилэн столицаяз вуыса, мылкыдзы воштӥськем. Куноос тодматскизы Национальной музеен, чеберлыко киужъёсъя центрен, вуылӥзы Воткинскысь Чайковскийлэн музеяз. Но тужгес пусйымонэз соос понна вал фольклор фестивалез усьтон. Праздник праздникен. Вал Удмуртиен Финляндия куспын экономика ужпумъёсты азинтон сярысь вераськонъёс но. Финляндиысь куноос пумиськылӥзы Кун Кенешлэн Тӧроеныз Александр Волковен но Удмурт Правительстволэн Тӧроеныз Николай Ганзаен. Вераськемын экономика ужпумъёсты эскеронъя но радъянъя нимысьтыз комиссия кылдытыны. Финляндиез тужгес но тунсыкъяськытэ шаерысьтымы нюлэс узырлык но му вӧй. Россиысь тросаз городъёсын финнъёс басьтӥськизы ни мебель поттон борды, Мурманскын но Новгородын вань мебель поттон заводъёссы. Огъя предприятиос усьтыны луоно Ижевскын но. Нош али ӟечесь кусыпъёс тупатэмын пыдкутчан лэсьтонъя "Сарабелла" фирмаен, азинске вузкарон удыс. Маркус Люралэн верамезъя, кылем арын 17-тӥ август, Россиысь калыклы шуккет лэсьтыса, ӝынылы кулэстӥз Финляндиысь странаямы ваёно вузлэсь лыдзэ но. Дорамы ужась куд-ог предприятиослэн но азинлыксы кулэсмиз, но ужамысь нокудӥз ӧз дугды. Экономика удысын кусыпъёсты азинтэм сяна, Финляндия азьланяз но эшъяськоз Россиысь ӵыжы-выжы луись калыкъёсын, юрттоз соослы культуразэс азинтыны. Кызьы шуиз Маркус Люра, макем зол луоз Россия, сокем ӟечгес азинскоз финн-угор калыкъёслэн культуразы. Нош соослы юрттон ласянь али ӧжыт уг лэсьтӥськы. Асьме республикая ке верано, ӟеч кусып радъямын вузъёсысь студентъёсын но преподавательёсын вошъяськонъя, соослэсь тодон-валанзэс будэтонъя. Словарьёс, книгаос поттон ласянь но Финляндилэн юрттэтэз шӧдӥське. Сорос фонд пыр Удмуртие мукет юрттэт но вуэ. Финн-угор калыкъёсты озьы ик огазея фольклор. Финнъёс берло дыре туж тунсыкъясько калыксылэн вашкала искусствоеныз. Посол туж жаляса вераз, фольклор фестивале Финляндиысь делегация вуымтэ пумысен. Коньдон ласянь шуг-секытъёссы сярысь тодысал ке, пе, ачим басьтӥськысал юрттыны. Мар тужгес но паймытӥз вылӥ куноез асьме шаерамы? Москваысь мэрен Юрий Лужковен пумиськылыса тодэ вал, соин валтэм "Отечество" огазеяськон али гинэ бадӟымесь вамышъёс лэсьтыны кутске. Нош Удмурт Республикаысь Кун Кенеше та огазеяськонысь 44 мурт быръемын. Иське, шаерысьтыды калык, пе, "Отечестволы" дурбасьтэмзэ вера ни. Нош маин паймытӥз но вожъяськытӥз Маркус Люра шаерысьтымы журналистъёсты? Политика улон Финляндиын туж мӧзмыт, пе. Правительство азьлоез ик, быръёнъёс бере воштӥськонъёс нокӧня ик ӧз луэ. Выль бюджет туж ӝог кылдытэмын - одӥг нунал куспын. Финляндиысь 5 миллион калык понна со кылдытэ 100 миллиард доллар. Нош Россиысь 100 миллионъем калык понна бюджетлэн быдӟалаез 500 миллиард асьме манетэн. Мар кулэ на кадь Финляндиысь калыклы шудо улон понна. Ваньмыз радъяськемын, маин рай ӧвӧл? Озьы ке но, отын но вылэм асьсэлэн сюлэмшугъяськонъёссы. Калык тросэн чӧлскемын юон вылэ, вӧлмемын асьсэды быдтон учыръёс. Егитъёс инмар доры уг кыстӥсько, пӧлазы трос сатанист шуонъёс. Соос уг кепырало шай вылъёсты но кирпазь карыны. Финнъёслэн сямысьтызы Маркус Люра пусйиз вераськисьтэм луэмзэс. "Особенности национальной рыбалки" фильм пумысен юанлы серекъяса вераз, сыӵе учыр, пе, Финляндиын луыны быгатысал. Пумиськонысь пусйысал на эшшо одӥгзэ. Маркус Люра но Никлас Линдквист национальностьсыя кыксы но шведъёс. Финляндиын соос ичи лыдъем калыкъёс пӧлы пыро. Озьы ке но, странаын кык кун кылзы. Вань документъёс лэсьтӥсько финн но швед кылын, урамъёсысь гожтэмъёсты но кык кылын адӟод. Нош ку асьмеос со дыре вуом? Л. МАЛЫХ. Фестиваль Пармаослы синмаськизы Сяськаясь возьёс, вож-вож тэльёс уката чебер каро коми-пермякъёслэсь улон интыоссэс. Калыкмылы тужгес матысь выжыосмы лыдзыя витетӥ инты басьто. Кӧня ке сю ар талэсь азьло пермякъёс шаермылэн уй палаз улӥллям, бӧрысь удмуртъёсын, ӟучъёсын сураськиллям. Соосты асьмелэсь висъя пичи гинэ гож. Коми-пермякъёсын герӟаськемын ӧвӧл меда шаерамы вӧлмем Пермяков фамилия? Валамон ини, кыл сяна асьмелы мытын соослэн киужъёссы но, корказы котырысь арбериоссы но. Финн-угор калыкъёслэн ВИИ калык куспо фольклор фестивальзы дыръя Удмурт шаерын улӥсьёс "Шондибан" ассэ ансамблез сяна, адӟизы солэсь киужъёссэ но. Усточиослэсь чебер арбериоссэс шаерамы ваён сярысь трос сюлмаськиз коми- пермякъёслэн культурая центрысьтызы чеберлыкъя кивалтӥсь Ольга Анатольевна Истомина. Та Центр куамын тямыс ар ужа ини. Отчы люкамын сюрслэсь трос арбери. Ваньмыз туж аспӧртэмлыко, тунсыко. Центре уно калык пыра. Татын пиналъёсты пӧртэм киужъёслы дышето, калыклы кулэ луись тӥрлык лэсьто но сое вузало. Фестивале сюлэсь трос экспонат ваемын вал. Ӝыны мындазэ басьтӥзы празднике лыктэмъёс. Калыклы тужгес яразы туйлэсь, бадьпу ньӧрлэсь, нинлэсь дасям кутъёс, сарбаос, кудыос. Куэм, пужыятэм киужъёс шоры но ваньмыз синмаськыса учкизы. Ольга Анатольевна котькинэ пальпотыса, шумпотыса пумитаз, куное ӧтиз Коми- пермякъёслэн вашкала Парма музъемазы. Киужъёссы сяна, асьме калыкмы туж матын коми-пермякъёслэн кырӟан-эктон гуръёссы, кылзы но. Со тужгес шӧдӥськиз, "Шондибан" ансамбль быгатэмзэ сцена вылын возьматыку. Лыктэмъёс кема чабизы куноослы. Ӝож соиз гинэ: ог-огмы доры ӵем ветлыны ум быгатӥське. Озьы ке но, пумиськонъёс табере ӵемгес луозы ни, дыр. Н.Возисов. Пыд йылэ султӥськод гинэ - нош шукко Игра ёрос интыяськемын Удмуртилэн шораз. Кылдэмын со 1937-тӥ арын. Отын улэ ог 50 сюрс адями. Ӝыныез со пӧлысь - Игра посёлокын. Та ёрос республикаысьтымы одӥгез валтӥсез, со ассэ ачиз "сюдэ", элькун бюджетысь коньдон татчы уг висъяськы. Валамон ни, сыӵе луонлык кылдэмын му вӧй чотын. Кызьы уло играос али? Кыӵе ужъёсын йылпумъязы соос арлэсь нырысетӥ ӝынызэ? Та сярысь вера ёрос администрацилэн кивалтӥсез Валентин УСКОВ: - Районлэн экономикаяз юн шӧдӥсько асьме республикаын, быдэс Россиын но огъя дуннеын ортчись ужрадъёс. Странаын югдур ялан вошъяське бере, ми дорын но ваньбур поттӥсьёс огсыр ужаны уг быгато. Лыдпусъёсъя учконо ке, азинсконъёс вань кадь. Тани туэ нырысетӥ паларе потэмын 638,9 миллион манетлы пӧртэм вузъёс. Кылем арын та дырен ӵошатыса, со 2,1 пол тросгес. Игра НГДУ, "Играмолоко", "Факел", "Темп" огазеяськонъёс, Зура ётӥн завод, коньдонэн вераса, данаклы уногес ваньбур сётӥзы. Но ми валаськом ук, кытысь пото миллионъёс. Соос тэлеӟё, котьмалы дунъёс йылэмен. Басьтом тани нефть кыскисьёсмес ик. Соос 590 сюрс тонна му вӧй поттӥзы. Дунызъя со, зэм но, трос. Нош быдӟалаезъя кылем арынлэсь 2,2 процентлы ичи. Данак мукет удысъёсъя но югдур пӧртэм ӧвӧл. Туэ кулэсмиз пулэсь вузъёс, ӟенелик, сӥль-вӧй поттон. Умойгес югдур йӧл кысконэн. Котькуд скаллэсь ӝыны ар ӵоже басьтэмын 1675 килограмм. "Чутырское" эштосын скаллы быдэ кыскизы 2185 килограмм йӧл - шумпотымон азинскон. Но, одӥг инбам улын ужаса, со дыре ик "Нива" но "Радуга" хозяйствоосын 1000 литр но поттыны ӧз быгатэ. Мынам малпамея, валтӥсь мугез герӟаськемын гурт кивалтӥсьлэн кызьы ужаменыз. Со шӧдӥське пудо сиён дасянын но. Куд-ог интыосын кык арлы тырмымон турын-сенаж дасязы ни, нош куд-ог эштосъёсын планзылэсь ӝынызэ но ӧз лэсьтэ на. Гуртоослэн мылкыдзы, валамон ни, ӟечгес луысал, соослы государство ласянь умойгес юрттысалзы ке. Тани кылем сӥзьыл закупочной дунъёсты будэтӥзы. Со соку ик шӧдӥськиз экономикаын. Кылем арын (нырысетӥ ӝыныяз) одӥг хозяйство но пайдаё ӧз ужа вал, туэ со дыр ӵоже ик дасэз эштосъёс 2,4 миллион манет огъя прибыль басьтӥзы. Витяз эштосъёсын уждунъя люкаськем пунэм тыронъёссэс быдтӥзы, кылем арын сыӵеос - уждунэз дыраз сётӥсьёс - чик ӧй вал. Тазьы ик ужа ни вал туннэ но - уг луы. Пыд йылэ султӥськод гинэ, выльысь тыбырад шукко. Бензинлы дунъёс чутрак йылэмен, гуртоос нош ик сюрес урдсы кылё. Уго тонна эстӥськон понна соос кык пол трос йӧл сётоно луо. Таӵе югдурез умой шуод шат? Улонын ваньмыз герӟаськемын ук. Предприятие ӟеч ужа ке, со дыраз тыре налог. Озьы бюджетэ коньдон люкаське. Со чотын луэ ни кулэяськисьёслы юрттэт сётонэз радъяны. Тани нылпиослы пособиос тыронэн огдыре шугъяським. 1998 ар понна пособиосты вузъёсын но услугаосын сётӥм. Валамон, со тросэзлы ӧз кельшы. Но кытчы пырод, мукет амал ӧй вал бере. Кыкетӥ палар сётъям ни коньдонэн. Администрацилы та ласянь туж юрттӥзы Кун Кенеше асьме ёросъя быръем депутатъёс Софья Широбокова но Евгений Богомольный. Нырысетӥ категорие пырись анай-атайёслы нылпи пособиос туэ понна но сётъяськом ни. Мон малпасько, асьме правительство шонер лэсьтӥз, социальной юрттэт сётонэз адямиослэн доходзыя радъяса. Уго куддыр учкиськод: пичи пияш чебер дӥсямын-кутчамын, со номырлы уг ёрмы, нош государство ватсаса коньдон сётэ на. Со дыре ик уно сю мукет нылпиос нуналъёсын сиёнэз уг адӟыло. Милям сыӵеос ваньзы лыдэ басьтэмын. Тыршиськом котыр ласянь юрттыны. Школаын дунтэк сюдо, транспортын дунтэк нулло. Куанеръёслы но висисьёслы юрттон ласянь ассэ умоен возьматӥз Социальной обслуживаниея центр. Со пыр ог 8 сюрс адями ортчиз ни. Озьы ке но, сюлэм интыяз ӧвӧл на. Мон арнялы быдэ планёркаын юасько: кӧня мурт вордскиз, кӧня быриз. Ар ӵоже ужатозям, одӥг пол гинэ нырысетӥосызлэн лыдзы кыкетӥосызлэсь уногес вал... Туэ куать толэзь ӵоже районамы 255 мурт вордскиз, 318 адями пыраклы кошкиз. Туж шугъяськытэ егит, ужаны быгатӥсь адямиослэн кулэмзы. Тани 156 кулэм воргоронъёс пӧлысь 59-эз пенсие потэмзылэсь азьло люкиськизы та улонэн. Жаляса верано луэ мукетсэ но: тросгес кулыны ӧдъязы вож нуныос. Тазьы учкиськод ке, ваньмыз сямен соос куанер, юись семьяосын вордскемын вал. Урод на югдур районамы порядокез утён ласянь но. Ӵем луыло шудтэм учыръёс. Алигес та ужпумез сессиын но эскерим, чакласьком милицилы юрттонъя фонд кылдытыны. Малпан вань ГИБДД-лэсь но ужзэ мукет сяменгес радъяны. Али инспекторъёс трос дырзэс ортчыто Играысь постын, бадӟым сюрес вылын. Нош сюрес вылтӥ ветлон правилоосты тӥясьёс тросгес палэнын, кыдёкысь гуртъёсын. Соин ик кужымез отчы ӧръяны кулэ. Сюлмаськонъёс пумтэм. Пудо сиён дасянэн герӟаськем ужъёсты йылаз-пумаз вуттӥм, шуыны луоз. Табере - аран, вань будэмзэ кеносэ вуттыны тыршон. Соин ӵош дасяськоно ни толлы но. Мынам бадӟым осконэ герӟаськемын Директоръёслэн советсылы. Сыӵе кенеш ёросамы куке но вал ни. Табере выльысь кылдытӥм. Уртче кариськыса, предприятиослэн но организациослэн кивалтӥсьёссы администрациен ӵош эскерозы ваньзэ "пӧсь" ужпумъёсты, дэмен утчалозы та валантэм вакытэ азьлане мынон сюресэз. Котьма сярысь Пытсаськизы... гермокамерае Алигес одӥг немецез но Россиысь куинь муртэ пытсазы... Ӧз, тюрьмае ӧз. Калык куспо космической станцие лобыны дасясь Медико-биологической ужпумъёсъя институтысь "Марсолёт" гермокамерае 110 суткалы пытсаськизы Германиысь психолог Бернд Йоханнес, Россиысь Игорь Нечипорук, Владимир Сапоньков но Евгений Бобровник. Экспериментлэн трос ужпумъёсыз пӧлысь огез луэ пӧртэм нациысь адямиослэн ӵош ужанын асваланзэс эскеронъя ужъёс. Иворъёсъя национальной служба. СПИД-эн нюръяськонъя центрлы - 10 ар Эзель тунаса уг улы Тодады вайытом: Россиын ВИЧ-инфекция нуллӥсь нырысетӥ адямиос шараямын вал 1987-тӥ арын. Дас ар куспын соослэн лыдзы 7 сюрслэсь уно луиз. Туннэ странаямы инфекция 16 сюрс муртлы паласькемын, соос пӧлысь 527-ез - нылпиос. Кулӥз 407 мурт. Та вакытэ югдур уката секытоме. Толэзяз сюрсозь выль висисьёс шараясько. 60 процентэз соос уло Россилэн шор улосвылъёсаз, нырысь ик Москва городын но областьын. Югдур уродме Уралын: Челябинск областьын пусъемын 195 мурт, Свердловск областьын - 115, Татарстанын - 155, Башкортостанын - 33, Пермь областьын - 84 мурт. Пусйыны кулэ, ВИЧ паськытгес вӧлме 15-20 аресъем егитъёс но наркоманъёс пӧлын. Нош наркотикъёслы коньдон шедьтон понна наркоманъёс-нылкышноос асьсэдыз вузало, наркоманъёс уксё понна вирзэс сёто. Озьы инфекция мукетъёсызлы но палаське. ВИЧ-инфекция вӧлмемлы пумит нюръяськон понна Удмурт Республикаысь Правительстволэн 1989-тӥ арын августэ кутэм постановлениезъя нимысьтыз служба кылдытэмын вал. Отчы пыро 30 койкаё стационарен центр, интыосысь 6 центр, диагностикая 12 лаборатория, нимтулэз шараятэк эскеронъя 6 кабинет. Республикаын туннэ нуналлы шараямын 12 ВИЧ-инфицированной, 1-ез СПИД-эн висе, 10 воргорон но 2 нылкышно. Котькуд учыр рос-прос эскеремын, висисьёслэн кусыпъёссы чакламын. Матысь адямиоссэс медикъёс синйылтыса-эскерыса возё. Пусйыны кулэ, шаерамы донор вирез чакланъя ӟеч ёз кылдытэмын. Арлы быдэ СПИД-я 200 сюрслэсь уно мурт эскериське. Со понна трос коньдон кулэ. Центрлы со висъяське федерацилэн бюджетысьтыз. Та ужез уката паськытатон вылысь, Ижысь СПИД-эн нюръяськонъя центрын сяна, нимтулэз шараятэк эскеронъя кабинетъёс усьтэмын республикаысь но Ижевскысь кожвендиспансеръёсын, Вотка центрын, семьялы юрттонъя Сарапулысь центрын но Глазов ёрос больницаын. Тазалыкез утисьёслы ВИЧ-инфекциен нюръяськонъя ужрадъёсты радъяны юрттон вылысь центрысь специалистъёс интыосы 400-лэсь трос пол потазы. Вань городъёсын но ёросъёсын 1998-тӥ-2000-тӥ аръёслы "Анти-ВИЧ (СПИД)" программа кутэмын. Солэсь быдэсъяськемзэ межведомственной комиссиос чакласа возё. Висёнэз алон ужлэн ӟечлыкез шонерак герӟаськемын кадръёсын. Йӧнатон учреждениын со понна кыл кутэ валтӥсь врачлэн эмъян ужъя воштӥсез. Та уж ӟеч радъямын Завьялово, Кияса, Кез, Пичи Пурга, Камбарка ёрос больницаосын (валтӥсь врачъёс Савельев В. С., Агичев Д. И., Ворончихин Н. В., Зямаева Н. М., Савина Г. В., Сарапулысь 2-тӥ больницаын (валтӥсь врач Пискотин В. С.), республикаысь врачебно-физкультурной диспансерын (валтӥсь врач Щуклина М. С.). Та дырозь ВИЧ-инфекцилы пумит эмъюм кылдытэмын ӧвӧл. Соин ик эпидемиез кортнаны амал одӥг - профилактикая ужез кужмоятон но паськытатон. СПИД-лэн вирусэз ӝог вӧлме инфекция бышкась наркоманъёс но соослэн сексъя юлтошъёссы пӧлын. Ӵапак "вень пыр" ӵемгес палаське висён мукет муртлы. Шаерамы официальной лыдпусъёсъя туэ ар кутсконэ усыкмытӥсь макеосын герӟаськем 700 адями вал. 1996-тӥ арын 3,6 поллы тросгес. Азьвыл аръёсы сыӵе адямиос городъёсын гинэ вал ке, табере "наркомания" диагноз гуртъёсы но кӧчиз. Нош наркоманъёс пӧлын данак егитъёс бере, озьыен, соос ик ВИЧ-инфекция но ӵемгес кутозы. Соин ик асьмелы СПИД-эн герӟаськем ужпум шоры учконмес быдэсак воштоно. Со борды дэмен кутсконо. Эзель тунаса уг улы, воксё сьӧлыктэм муртэ но пыд йылысьтыз погыртэ. Профилактикая уже кыскисько пӧртэм ведомствоосысь специалистъёс. Дышетӥсьёс, анай-атайёс, МВД-ын, культура, нылпи учреждениосын ужасьёс понна лекциос, ӝытъёс радъясько. Школаосын, училищеосын дышетскисьёс, студентъёс, армие кошкись егитъёс пырисько "котырес ӝӧк сьӧрын" вераськонъёсы. Соос пӧлын СПИД-лэсь утиськон амалъёсты тодэмзы пумысен анкетированиос ортчо. Быдэ вуымтэос ветло "СПИД но наркомания" дискотекаосы. Отын басьто СПИД-лы пумит буклетъёс. Каникулъёс дыръя лагерьёсын нимысьтыз занятиос мыно. Кемалась ик ӧвӧл Удмурт Республикаысь Егитъёсын ужанъя комитетэн ӵош "Егитъёс СПИД-лы пумит" плакатъёслы смотр-конкурс ортчытӥм. Туэ "СПИД. Это нужно знать" брошюра печатлам. Коньдонэн юрттӥз Тазалыкез утёнъя министерство. Бен, СПИД-эн нюръяськонъя ужпум берло дыре гинэ ӟырдаз. Озьы ке но, ми ужан опыт люкам ини, шуыны луоз. Коллективмы ӟеч, тыршись. Специалистъёсмы визьмоесь, валасесь. Данакез - шаерамы тодмо муртъёс, кылсярысь, Россия Федерациысь дано врач Н. Ф. Холстова, Удмурт Республикаысь дано врач Г. Д. Воронина, Удмурт Республикаысь тазалыкез утён удысысь дано ужась Г. В. Зотова, вылӥ категориен врачъёс- эпидемиологъёс З. В. Камалетдинова, В. П. Кузнецов, Р. Я. Садыков, Л. П. Адаховская. Та вакытэ центрысь коллектив дасяз ВИЧ-инфекция вӧлмонэз алонъя 2000-тӥ-2003-тӥ аръёслы Программа. Со пумысен кенешемын ини вань министерствоосын, ведомствоосын но службаосын. Ӝоген документ эскерыны но кутыны ыстэмын луоз Удмурт Республикаысь Кун Кенеше но Правительствое. Л. КУЗЕЛИН, СПИД-эн нюръяськонъя центрысь клинической эпидемиологияя отделенилэн кивалтӥсез, Удмурт Республикаысь тазалыкез утён удысысь дано ужась. В. Степашин отставкае келямын Толон Вадим Степашинлэн Правительствоез отставкае келямын. Со сярысь ивортӥз Россиысь Президентэзлэн пресс-службаез. Премьер-министрлэсь ужзэ быдэсъясе пуктэмын Владимир Путин. Паймымон югдур кылдэмын Россиын. Борис Ельцин, шӧдске, одӥгеныз но Правительствоен огъя кыл шедьтыны уг быгаты. Одӥг но ӝыны ар куспын куинетӥез Правительство воштӥське ини. Огез но рос-прос ужаса уг вутты. Ваньмызлэсь кема ужаз Виктор Черномырдин. Августэ кризис луэм бере уллязы Сергей Кириенкоез. Политикаын югдурез тупатон вылысь, Правительстволы тӧрое пуктӥзы Евгений Примаковез. Таиз парламентлы но, президентлы но тупаз. Бератаз Ельцинлы Примаковлэн будӥсь кужымез кельшемысь дугдӥз. Странаысь экономика радъяськыны кутскиз гинэ, лыктӥз Степашин. Таиз куинь толэзь сяна ужаса ӧз вутты. Но бензинэн бадӟым шуг-секыт кылдӥз. Со понна шат ужысьтыз но мозмытэмын вал. Вераны кулэ, Примаковен Степашин азьвыл разведчикъёс. Вылез но премьер-министр Россиысь разведкаен кивалтӥз. Куиньзылы ик Ельцин аслэсьтыз оскемзэ вераз. Берпуметӥез кыл парламент киын. Юнматоз-а, уз-а Путинэз Правительстволы тӧрое - улыса тодом. Кивалтэтлэн воштӥськемез огшоры калыклы номыр но ӟечсэ уз вайы. Бензин ӧвӧлэн дунъёс будэм сяна, манетлэн но дуныз усёз. Соку возьма вань вузъёслэсь дуноямзэс. МВФ но таӵе югдуре долларзэ Россилы уз сёты, дыр. Озьыен, Россия выль гуэ усе. А. Андриянов. ГАЗЕТ ГОЖЪЯМ БЕРЕ Ваньмыз радъямын 27-тӥ июле газетамы печатласькиз "Шундыез уд возьы пыкъяса" гурт улон сярысь статья. Талы вазиськонъёс вуэмен мон выльысь вуылӥ Пичи Пурга ёросысь "Уромское" ОПХ-е. Куд-ог шонертэм гожтэмме (скал кыскисьёслэн уждунзы но пудо возён гидъёсыз тупатъян-выльдон сярысь) вылам басьтӥсько но хозяйствоысь кивалтӥсьёсты простить карыны курисько. Туннэ нуналлы югдур мукетгес. Хозяйствоысь кивалтӥсьлэн В. Е. Леонтьевлэн верамезъя, сётканы кутскемын ни июль толэзь понна уждун, Уром отделениысь скал кыскисьёслэн 6 толэзь ӵоже шорлыдъем уждунзы люкаське: ичи басьтӥсьёсызлэн - 395- 416,65 манет, трос басьтӥсезлэн - 1083,25 манет. Со сяна, хозяйствоысь ужасьёс, ас мылкыд каремзыя, уждун чотын вуз но басьтыны быгато. "Уромское" ОПХ-ысь скал кыскисьёс та вие ёросын котькинлэсь но трос йӧл кыско. Ньыль отделениез ӵош басьтыса, скаллы быдэ 12-12,5 литр йӧл басьто. Продукция вань бере, уждун но вань. Йӧлэн вузкаронъя ӝыны аръем планзэс уромъёс быдэстӥзы 100 поцентлы. Туэ нырысетӥ арзэ, йӧл вузаса, совхоз аслыз 769 сюрс манет тыр барыш поттэм. Нош вузало сое "Ижмолокое" но Киясово ёросысь "Пермяковлэн" ЧП-яз (Яжбахтино). Шумпотоно, та предприятиослэн пунэм тыронъёссы туннэ нуналлы ӧвӧл. Хозяйствоын толлы дасяськон но мынэ. Пудо возён гидъёсыз тупатъяло-выльдо. Котькуд отделениын лэсьтӥськонъя бригадаос ужало, 15 корпус пӧлысь 11-ез дась ни, пе, нош мукетъёсаз кылемын на пичи ужъёс. Мукет колхозъёсын, эштосъёсын сямен ик татын но гижысь-пӧньысь басьтӥськизы ю- нянез аран-кутсаны. Бусыын 17 комбайн пӧлысь 15-ез ужа 4 августлы 30 гектар вылысь кӧжы, 105 гектар ӟег, 55 гектар чабей кутсамын ни. Гектарысьтыз со усе: кӧжы 13, ӟег - 14, чабей - 8 центнерен. Ю-нянь октонэз чалякгес йылаз-пумаз вуттон вылысь, огкыл лэсьтэмын Пичи Пурга ёросысь Сельхозхимилэн базаяз кылдытэм МТС-эн. 500 гектар вылысь ю-няньзэс кутсалозы немец комбайнъёсын. Кызьы вера В. Е. Леонтьев, шуг- секытъёс палэнтэмын луозы. Бензинзы тырмыт, нош эстӥськон ласянь секытгес вераны. Соин ик эстӥськон понна хозяйство тыроз картофкаен. Зернотокъёс но ваньмыз дасесь. Хозяйствоын мукет интыосын сямен ик куд-ог лушкаськон учыръёс луо. Кылсярысь, картофка му вылэ пырало. Сыӵе учыръёсты палэнтон вылысь, 5-тӥ августысен ужаны кутскиз ёросысь ыстэм нимысьтыз милиционер. В. КУТУЗОВА. Капчи атлетикаысь - "секытаз" Кызьы малпаськоды, кӧня арес та егит пиосмуртлы? 28. Егит, бен-а? Нош со куинь ар талэсь азьло ик хозяйстволэн кивалтӥсез луиз ни, ар ортчыса - районысь депутатэз. Игра ёросысь "Родина" колхоз бере кылисьёсыз пӧлын вал. Но Юра Чураков - соку "Ленин сюрес" колхозысь егит агроном ӧз кышкатскы, ӵектэмзы бере кема малпаськытэк та уже кыткиськиз. Куд-огез алыны выризы: сундур калык туж секыт, аспӧртэм, сыӵеосын ужаны шуг - огъя кыл ке ӧд шедьты, астэ "сиёзы". Но "сием" гинэ ӧвӧл, ар ортчыса, сундуръёсыз сое депутатэ быръё. Вить кужмо кандидат пӧлысь ворме самой егитэз. - Маин бырйисьёсты ас палад берыктӥд? - юасько Юралэсь. - Уг тодӥськы. Мон номыр но мултэс ӧй сӥзьы, гурт хозяйствоез ӝутӥм, сюлмо ужам ке, нефтяникъёслэсь урод ум улэ шуыса валэктӥ. Колхозникъёс адӟытэк ӧз кыле, дыр, хозяйство понна тыршемме. Зэм, вормонъёс кыдёкын ай, но со вакытэ гуысь каллен потыны кутским ни вал. - Тросэз ужазы олокыӵе но кырсь амалъёсты куто, трос коньдон быдто... - Мон паймисько сыӵеослы. Уг тодӥськы ни, кӧня коньдон сётӥзы вал кык ар талэсь азьло быръён уж нуыны, но со мыным кулэ ӧз луы - сю манетсэ сяна ӧй быдты (со туж ӧжыт, адямиос ӧз оскылэ). Нырысетӥ сессиын пукыкуз ик Юрий Аркадьевич трос ӟечсэ но уродзэ синйылтӥз. Депутатъёс люкиськизы кык группалы. Огъёсыз тазьы шуо, мукетъёсыз озьы. Ачиз нокуд пала ӧз кариськы. Соосызлэн но, таосызлэн но ӟеч ӵектонъёссы понна куаразэ сётъяз, аслэсьтыз малпанъёссэ вералляз. Зэм, куддыр егит муртэ синйылтытэк кельтыны туртто, вазь ай, пе, индылыны. Но Юрий Аркадьевич уг юскиськы, ваньмыз со вуж системалэн адямиосыз, шуэ, кышкало пыдберазы лёгиськемлэсь. Юрий Аркадьевичез утчакумы, со сярысь адямиос малы ке "тунсыко, аспӧртэм" шуыса суредазы. Ваменэсгес но, дыр. Яке аслаз визьмызлы оскись, азьпалзэ адӟись муртъёслэсь косъяськонъёссэс палэнтыны быгатӥсь адями шуод-а. - Малы одно вань хозяйствоос одӥг удысъя азинтӥськыны кулэ? - шуэ со. Сӥльын сярысь, йӧлын тросгес пайда поттыны луэ ке, валамон, мон скал уллёез йылэто, котькӧня мед куаретозы. Тани колхозэ вуэме бере, ужъёсын тодматскыса, мон адӟи: тросэз огкылъёс хозяйствоез качало гинэ, куд-ог уыдсъёс но изъян гинэ ваё. Нырысетӥ нуналъёсаз ик олокӧня изъян ваись огкылъёслэсь куштӥськиз со. Озьы но хозяйство Чураковлэн нырысетӥ кивалтон араз 3 миллион 700 сюрс манет изъян адӟиз на. Быдтӥзы ӟазег уллёез, со интые парсьпи будэтыны кенешизы. Али та удыссы пичиен-пичиен пайда сётэ ни. Кылем аре изъянзы кык поллы ичиёмиз, нош туэ Юрий Аркадьевич сое быдтыса, азьланяз пайдаен ужаны малпа. Туэ тани лейкозэн висись скалъёссэс быдтӥзы, уллёзэс выльдӥзы - малпало тросгес вылӥ ӟечлыко йӧл басьтыны. Зэм, колхозникъёслэн уждунзы али ушъяськымон уд шуы - 500 манет котыр. Ӝегамзы бадӟым, но толэзьлы быдэ пичиен ке но сётъяны тыршо. Нефтяникъёсын ӵошатыса, куанер, но паймоно кадь, колхохникъёс уг ӝожтӥсько. Иське, оско кивалтӥсьсылы, хозяйствозылэн узырмемезлы. Веранэ кӧс но бездыт луоз, егит кивалтӥсьлэн будэм сюресэз сярысь ке ӧй гожты. Игра школаысь 8 классэ йылпумъямез бере, 15 аресъем Юра Москвае кошке. Соку со, Играын но Удмуртиын гинэ ӧвӧл, Россиын но тодмо пинал спортсмен вал ни. Капчи атлетикая ӵошатсконъёсын со котьку сямен нырысетӥез луылӥз. Москваысь тодмо тренер Л.Шац ӧтиз Юраез "Олимпийской резервъёслэн школаязы". Юраез пыртӥзы СССР-лэн сборнояз. Пӧртэм калык куспо ӵошатсконъёсысь Дуннелэн чемпионатъёсысьтыз вормонъёсты басьтылӥз со. Вань зарни медалез но. Кӧня городъёсты, шаеръёсты, ӝыны Европаез адӟиз егит пияш, ӵошатсконъёсы ветлыса. Али малпа: "Зэм ик-а со мон вал?" Но гуртын будэм пияш улон шоры сэзь синмын учкылӥз - реалист шуо сыӵеосты. Школазэ йылпумъямез бере дышетскыны пыриз Тимирязев нимо гурт хозяйствоя Академие. Вуоно чебер данэз но коньдонэз воштӥз музъемын копаськонэн. Агроном луыса берытскиз со дор палъёсаз. Академиын басьтэм тодон-валанъёссэ уже пыӵатыны кутскиз. Нош отӥзэ тӥ тодӥськоды ни. - Но спорт но гурт хозяйствоен кивалтон - со воксё пӧртэм ужъёс ук. Секыт ӧй вал-а воштӥськыны? - Ӧвӧл, спорт но кивалтон ӵапак огкадесьгес. Сояз но, таяз но трос кужым, визь кулэ. Сояз но, таяз но вормон понна нюръяськоно. Пӧртэмлыкез соиз шат - Юра Чураков капчи атлетикаысь секытаз выжиз. Но пичи дырысен кыдам адямилы со кышкыт ӧвӧл. Уката ик вӧзаз сое валась, ужась калыкез, яратоно семьяез вань ке. 9 толэзьем Саша пиез атаезлэсь мар ужамзэ уг вала ай, но жадемзэ со кадь ӟеч нокин но улляны уг быгаты. З.Рябинина. Калмез шур кузя Туннэ, 10-тӥ августэ, "Удмурт дунне" газетын ужасьёслэн кутске Калмез шур кузя журналистской экспедицизы. Со радъямын, Ижын ортчоно "Быдэс Россиысь пресса-99" фестивальлы сӥзьыса. Редакциысь журналистъёс асьсэ сюрессэс мытӥзы Игра ёросысь Пионерский посёлокысен, кудӥз интыяськемын та шурлэн кутсконэз дорынгес. Газетчиос чаклало кильмезьёслэсь улон-вылон но экономика ужпумъёсын кылдэм шуг-секытъёссэс возьматыны, нюлэсо шаермылэн историеныз тодматыны. Экспедиция ортчоз шаерысьтымы ньыль ёросэтӥ, нош йылпумъяськоз Киров областьын. Та ужрадэз радъяны журналистъёслы юртто акциосын "Удмуртнефть" огазеяськон но Удмурт Республикаысь Инкуазез утёнъя кун комитетысь валтӥсь специалистъёс. О. МАРКОВ. Вачырес сюрес Гожъяськись мурт котьку но синмаське аспӧртэмлыко адямиослы. Мон понна сыӵе потэ "Рассвет" колхозлэн тӧроез Иван Чирков. Лапег мугоро воргорон паймытэ котькытчы вутскеменыз, трос тодэменыз. Мукетъёсызлэсь пӧртэм луэмзэ шӧдӥ таяз учыре но, алигес Играла вуылыкум. Иван Петровичез пумитай шор площадьын. Тани, пе, маин ке доре бертоно вал. - Ма, юасько, - председательлэн но машинаезлы бензин ӧвӧл ни шат? - Бензин шедьысал, шофёрме отпуске лэзи ай... - Таӵе кысык вакытэ? - А мар-о? Конвейер ужа. Пудо сиён дасямын, табере тани юосты арало. Малы мыным кулэ отчы чуртнаськыны. Люкетэм уг поты, - ымнырзэ йыг-йыг карыса вера Чирков. Тӥни озьы. Кудӥз-огез гурт кузё та дыре изёнэз уг тодылы, нош таиз... Умой, вылды, со. Куке аранлы яке мукет ужлы азьло ик дасяськиськод, бӧрысь ваньмыз чакламъя радъяське. Эстӥськон но тырме, шертон-куасьтон техника но тӥяськытэк берга, уждун но люкаське. Контораын экономистэн Ирина Силинаен тодматскыса, соин ӵош ми ветлыны малпам ю бусые. Тодоно, пӧй, уг чеберъяськы медам та председатель, ваньмыз умой шуыса? Порвай ферма сьӧрысь вырйылын йыды кисьмамын ни, нош отчы мынон сюрес вӧзын сезьы воксё вож сылэ на. - Тодӥськоды-а, малы озьы луиз? - валэктыны выре егит специалист. - Туэ тулыс кизён ньыльдон нунал кыстӥськиз - куазед укыр шукрес вал уго, я лумбыт зоре, я лымы усе. Соин ик юос но пӧртэм дыре вуо. Кытчы пырод табере - бусыысь бусые ветлоно луэ ни. Лудын вить комбайн ужа. Кизергес будэм юэз соос ӵышкыса ортчо. Тани огез агрегат дугдӥз тысьсэ кисьтыны. - Емельянов мон, Саша, эшъёсы Шурик шуо, - ваземмес санэ басьтыса, ми пала кариськиз "Нивалэн" кузёез. Ачиз пичи гинэ, нош мугорыз тып-тып. Малы ке но тодэ лыктӥз сабантуй - ӵапак таӵе пиос отын ярато кужымзэс мертаны. Александр вераны туж ик уг яраты. Ваньзэ кылтӥз кыскыса тодоно луэ. Озьы валам, механизаторъёслэн, зэм но, ӝожтӥськонъёссы ӧвӧл шуыса. Техника ужа, сиён вутто. Специалистъёс пыр-поч валэктӥзы, ма бордысь кӧня уждун потоз. - Эх, юос ӟечгес будысалзы на ке, - лулӟиз вераськеммес кылзӥсь одӥгез мӧйы механизатор - Укыр вачырес уга та йыды... Мон понна тодмотэм кыллэсм пуштроссэ соку ик ӧй вала. Выльысь юано кариськи. - Милям озьы нимало кӧтвеськантэм мае ке, - уката но мудрон валэктӥз пурысьтам воргорон. Пиослы милемын йырин ӧвӧл. Нунал пумозь, пе, бусыез араса-кутсаса вуттоно. Ирина Силина куректэ: тӥледлы толон вуоно вал, бускель бусыын юос чебергес будӥзы, отын гектарлы быдэ 20 центнер люкаськиз, нош туннэ 17 пала гинэ. Бертыкумы кожам на правление. Иван Петрович Чирков нылъёсыныз (озьы нима бухгалтериын ужасьёссэ) кенеше. Со яратэ татчы пыраны - гуртлэн шорсюлмыз отын, дыр. Выль иворъёс, выль лыдпусъёс одно ик конторае вуо. Ма, собере быдэс хозяйстволы кылем одӥг телефон но татын ук. Коньдон тырмымтэен, мукетъёссэ кысоно луизы. Бухгалтериын ик тодӥм, туэ котькуд ужасьлы чечы сётэмын ни шуыса. Кылӥм, председатель колхоз коньдонэн 500 арбуз басьтэм но табере калыклы вуоно уждунзы чотын сётъяны косэм шуыса. Озьы ик шӧдӥм, "Рассветын" ӟеч мылкыдын уло, озьы ик ужало шуыса. Шуг-секытъёс шоры учкытэк. ...Лонки-Ворцыысь кошкыкумы, машина пияла вылэ кӧня ке шапык усиз. Иж палан воксё зорыны ӧдъяз. Малы ке но тодэ лыктӥз "вачырес" кыл. Уг сёты улон крестьянлы пыӵ- пыӵ ужаны. Я малпамтэ шорысь зорыны кутске, я эшшо маке шеде. Нош мукет ласянь учконо ке, вольыт сюрес мӧзмыт луысал. Оло, озьы ик луыны но кулэ. И. ЛЕБЕДЕВ. Порвай бусыын али кысык. В. Камашевлэн туспуктэмъёсыз. Виль ке - выль Ӝыны гужем кӧс улэм бере, гудырикошкон толэзьлэн (августлэн) нырысетӥ нуналаз лумбыт зориз. Сое удмурт шаерын улӥсьёс кемалась возьмазы. Нош удмуртлыкез утисьёс ӧжытак сюлэмшугъяськизы но: ӵуказеяз, кыкетӥ гудырикошконэ, нош ик зороз кожаса. Угось Ижын та нуналэ Вилез (Ильин нуналэз) пусъё, инмарлы така сӥльын ӝук но мукет сиён-юон дасяса, соин ӵош асьсэос но утялскыса. Инкуазь соослэсь малпанзэс кылӥз кадь. Виль нуналэ зор дугдӥз, шунды но потаз. Туэ та праздникез ньылетӥзэ пусйиськом ни. Вашкала йылолэз выльысь улӟытон сярысь дырзэс, кужымзэс, ваньбурзэс жалятэк сюлмасько Семён Андреевич Ильин, солэн кузпалыз Лидия Андреевна Ильина, Альберт Алексеевич Разин но мукетъёсыз - удмуртлыкез яратӥсьёс. Куазь пилемогес ке но вал, калык ӧжыт ӧз люкаськы. Тани сайкыт кыралэ ческыт сиёнлэн зыныз вӧлскиз. Иське, така сӥльын ӝук дась ини. Вань калык огинэгес, тыллы матэгес кариськиз. Вашкала йылолъёсмылэн калыкмылэсь аспӧртэмлыксэ утёнын бадӟым инты басьтэмзы сярысь веразы Альберт Разин, Семён Ильин, Алексей Шкляев, Роза Ильина. Вӧсясьлэн ческыт сиёнэз вӧсямез но инмарлэсь куриськемез бере, вань лыктэмъёс кӧттырымон кунояськизы выль ӝукен но мукет пӧрамъёсын. Чылкыт омырен тырмем тэльын угось сиён уката ческыт потэ. Виль котькуд аре ортче Завьял ёросысь Игерман удмурт гурт палан. Татын культура юртсы ноку рос-прос ӧз ужа, соин но, дыр, калык пумен вунэтыны кутскиз вашкала сямъёсты, кырӟанъёсты-эктонъёсты. Игерманъёс понна та праздник - бадӟым кузьым- шумпотон. Татчы лыкто соос, чебер дӥсяськыса, асьсэ сиён-юонзэс вайыса. Шулдыръяськонъёсы шумпотыса пырисько. Игерманъёс сяна, Вилез пумитаны котькуд ар ветло Алнаш ёросысь Туймыйыл гуртын вордскем-будэм адямиос. Татын ик нырысетӥ вамышъёссэ лэсьтӥз Семён Ильин. Гуртоосыз сое зол ярато-гажало. Виль ӝук веръяны, ас калыкенызы ӵош шулдыръяськыны котькуд аре лыкто Удмурт кун университетысь тодосчиос Иван Тараканов, Валентин Кельмаков, Александр Шутов, журналист, Удмурт Элькунысь культура удысысь дано ужась Милитина Гаврилова-Решитько. Солэн кузпалыз Георгий Решитько калыкез арганэн шулдыртӥз. Вилез пумитан но шулдыръяськон йылпумъяськиз бер ӝыт. Зэм, татчы лыктыку, мылкыдэз сӥято туала "воштӥськонъёслэн" емышъёссы. Нырысь ик - али аналтэм-ӝуам "Игерман" удмурт ресторан но кӧня ке ар ӵоже пиналъёсты "адӟылымтэ" "Черёмушки" пионерлагерь. Отысь азьло йыг-йыгесь, чебересь улон юртъёс сисьмо-куашкало. Ярам коть: али гужем. Соин ик соос син шоры туж ик уг йӧто. Вилез пумитасьёс усто шутэтскизы, кужым люказы. Табере чидатэк витёзы выль пумиськонъёсты, вуонозэ Вилез. Н. ВОЗИСОВ. Вашкала сямъёс но йылолъёс Ма со возькон дыр? Пичи дыръям вал ай со, войналэсь азьло. Турын ӝужаку, турнан бырытозь, нуназе шорын вашкала сямъёсъя уг лэзё вал пыласькыны, ву вайылыны, дӥськут миськыны, гур эстыны яке кытчы ке тылскем ӝуатыны, шуланы, чипчирганэн шудыны, кортъёсты жугыны. Нуназе 11-12 часысен 3 часозь котырак чал-чал карыны туртто вал. Турнасьёс кусооссэс турын улэ сого, тамак кыскисьёс куак пӧлы сайясько. Пичияк шултыны шедьтӥд ке, мӧйы мурт пельдэ позыртоз, мумид-аидлы вералоз на. Соосыз нош киязы е куто вал. Та пичи дыр адӟемъёсме тодам вайыса, огпол юано кариськи кышноелэн апаезлэсь, оло, со тросгес тодэ та сямез. Кышноеным кыкнамы ми Селта районысь, со Женвай палась. Апаез номыр ӧз тоды та сярысь вераны. Одӥг аре, куазь туж пӧсь улэм вылысь, шуак пильмаськиз, кезьыт кариськиз. Озьы кыстӥськиз кык-куинь нунал. Соку тӥни нош ик кылӥ пересьёслэсь вераськемзэс, возиськонэз умой чакламтэенымы, куазь таӵе кариськиз, пе. Мынам таӵе веранэз но кылэме вань. Гужем шорын куазь кезьытгес кариське ке, шуо вал, кин ке но шуре бырем адями вань, дыр. Паймоно кадь, ма со возькон дырзы вал удмуртъёслэн. Турын ӝутыку, та сямез уг чаклало ни. Турынэз ӝуто вал бере ӝыт гинэ, турын уг пырды, лысвуэз но ӧвӧл на, пе. Мон вераны уг быгатӥськы, ваньмаз-а гуртъёсын возькон дырзы вал. Та сярысь нокытысь лыдӟеме но ӧвӧл. В. МОШКИН, Завьялово ёросысь Шор Постол станциын улӥсь. Луоз-а августэ бензин? Кылем арын августэ ортчем кризислэн яраосыз бурмыса ӧз вуэ на, калык мукет шуккет улэ сюриз. Бензинлэн дуныз будэмен валче, адямиослы машиназэс гаражазы пуктоно луиз. Вылаз ик, эшшо эстӥськон заправкаосын быриз. Одӥгаз АЗС-ын бензин ӧвӧл ке, мукетаз одно ик туж кузь черод луоз. Таӵе югдур ваньзэ шуге-леке вуттӥз. Кивалтӥсьёслы калык азьын ӧжытгес ушъяськыса улоно, дыр, малы ке шуоно, сыӵе вераськемзы одно ик берытскыса кошке. Тани Россиысь кивалтэтлэн Тӧроез С.Степашин ГСМ-лы дунъёсты чакласа возёмы шуыса гинэ вуттӥз - соос йылӥзы. Нош кӧня ке дыр ортчыса, эстӥськонэз но шедьтыны шуг луиз. Солэсь мугзэ пӧртэм сямен валэкто. Кин ке но шуэ, эстӥськонэз дуноятыса юромо поттытэк возё. Кризислэн мугез одӥг - дуннеын му вӧйлэн дуноямез. Со сьӧры будӥзы нефтьлэсь поттэм вузъёслэн но дунъёссы. Мукет странаосын бензинлэн дуныз соку ик вылӥе тэтчиз. Россиын дунъёсты кутыса возьыны тыршизы ке но, ӧз быгатэ. Вераны кулэ, нефтьлэсь вузъёс, туэ ортчем арен ӵошатыса, ньыль процентлы тросгес поттэмын, нош кунгож сьӧры вузамын дас куать процентлы тросгес. Озьыен, палэнэ келямлэн табышез бадӟымгес вал. Кызьы потоно та югдурысь? Властьлэн кык амалэз. Эстӥськонэз Россиын тросгес поттыны кутсконо, нош кунгож сьӧры вузанэз кулэстоно. Югдурез тупатон понна, эстӥськонэз заправкаосын возёзы, дуныз дуннеын кадь луытозь. Асьме шаере техникалы эстӥськонэз 30-35 процентсэ "АСПЭК" пыртэ, куатьтонзэ - "Удмуртнефтепродукт". Шугомытэ соиз но, удмурт музъем вылын му вӧй вань вылысь, элькунамы одӥг но нефтеперерабатывающий предприятимы ӧвӧл. Нош "Удмуртнефтепродукт" АО вылэ кык полэс шуг-секытъёс усизы. Республикалы тырмыт ГСМ утчано, вылаз ик предприятилэсь генеральной директорзэ Н.Сычевез изъян ваемен янгыш карыны туртто. Таӵе кысык вакытэ югдурысь потон амал утчано кадь, нош элькунэн кивалтӥсьёс политикаен шудэмысь уг дугдо. Удмурт кивалтэтлэн Тӧроезлэн нырысетӥ воштӥсезлэн Юрий Питкевичлэн верамезъя, элькунлы гудырикошконэ 76 но 92 номеро бензин но дизтопливо быдэн дас кык сюрс тоннаен кулэ луоз. Нош ю-нянез октыны гинэ 22 сюрс тонна дизтопливо но 7 сюрс тонна 76-тӥ бензин кулэ. Та вакытэ Россиысь Правительствоен кенешонъёс мыно Удмуртилы госрезервысь техникалы эстӥськон висъян пумысен. Нош "Сайгас" АО пыр элькунлы данак дизтопливо басьтыны чакламын. Удмуртиысь кивалтӥсьёс оскытӥзы, август толэзь понна, эстӥськон ӝоген тырмыт басьтэмын луоз шуыса. Нош Россиысь минтопэнерголэн кивалтӥсез Виктор Калюжный бензинэн югдур кык толэзь куспын тупалоз шуиз. Бензин тырмыт ке но луиз, руль сьӧрад туж ик пуксемед уз поты ай. Кызьы лыдъяло аналитикъёс, ар бырытозь бензинлэн дуныз эшшо 20 процентлы будоз на. А.Андриянов. Туспуктэмез В.Камашевлэн. Санквылтап шудэ - котыраз ӧте "Ханты-манси калыклэн искусствоез ноку но чакламын ӧй вал сцена вылын пуктыны. Соослэн сценазы - нюлэс, кыр улос. Нош улон ог интыяз уг сылы бере, татысь адямиос но сое шӧдытэк уг кылё. Ялан ӧжытгес ини сыӵе интыос, кытын чаклало-возё на калык сямъёсыз. Но тани витетӥ арзэ ужа. "Пужейлэн пытьыезъя" манси калык театр. Али но возьматъяло отын зэмос гондырлэсь шудонъёссэ, ритуальной кырӟанъёсыз-эктонъёсыз. Сое быдэстыны юртто санквылтап но нарс-юха калык шудон инструментъёс. Режиссёр- постановщик, театрлэн кивалтӥсез Д.Агеев тыршемен, вашкала манси ритуалъёс, фольклор вамыштӥзы сцена вылэ". В.Литвиненко "Священный напев санквылтапа". Фестивалез усьтон нуналэ, нуназе бере, ханты-манси коллективъёсыз но Юкаменск ёросысь "Лампачей" бесермян ансамблез автобусъёсын нуизы Сарапул городэ Башенинлэн дачаеныз тодматскыны, нош собере - Шевырялово гуртэ. Кема витем куноосыз кылын верантэм шулдыр пумитазы. Татын улӥсьёс нырысьсэ ас синмынызы адӟизы та уй пал выжы эшъёсмес. Зол кичабонъёс вал сцена вылын кырӟакузы но. Нырысь ик концерт возьматӥзы Сарапул ёросысь кырӟанъя но эктонъя "Чеберина", "Купанча" ансамбльёс. Баянэн шулдыртӥз Сарапул педколледжысь усто музыкант Павел Шмыков. Сюлмысьтызы ӟеч кылъёс веразы но кузьымъёс сётъязы Сарапул ёросысь кивалтӥсьёс Петр Киреев, Геннадий Глазков, Алевтина Пушкарева. Пумиськон йылпумъяськиз огъя ӝӧк сьӧрын. Куноосын ӵош ваче ки кутскыса эктӥзы- кырӟазы. Эшъяськон ӝытэз, арганэн шудыса эшшо но зол лӧпкытӥз шамарданъёслэн "Лампачей" ансамбльзы. Ханты-мансиос сцена вылэ потэм бере ик аспӧртэм туссы-буйзы син шоры йӧтӥз. Дӥськутсы вуремезъя туж кельше вылэм удмурт дэремлы. Айшет гинэ керттыны кыле. Ымнырын но тупало, сьӧдкысъемесь. Мугорын - пичиесьгес. Мон пайми дэрем вылысь пужыослы. Соосты пукто, басмаез вандылыса, аппликация амалэн. Нылъёс, пе, ог-огенызы ӵошатскыса дасяло дэрем. Шуом, огез дас чур пужы пуктӥз ке, мукетыз - дас вить. Одӥг дэремез чеберъянлы, шоро-куспо ужаса, куинь толэзь кошке. - Ма со туж акыльтымон ук... - Мон быдэс нунал но быгатӥсько пукыны, киуж лулсӥосыз (нерваосыз) буйгатэ, - шуиз Галя, манси ныл. Бен, Ижысь Шор площадьын адямиос киязы кутылыса ик учкылӥзы дэремъёссэс. Та амалэн сяна, дэремлэсь сирессэ, мылазьзэ, сӧзулзэ пужъято яркыт ыж гон шортэн. Чебермало векчи весен - бисерен но: горд, тӧдьы, сьӧд буёло. Ханты-мансиослэн пыдазы кутчамын колошалы кельшись - ниры - пыдкутчан. Со вуремын пужей кулэсь но чеберъямын весен. Озьы ик таослэн кузь, чебер пужыё керттэм пыдвылъёссы. Хантыос но мансиос ог-огзылэсь висъясько кылынызы но куд-ог сямъёсынызы. Нош дӥськутазы номыр ик пӧртэмез ӧвӧл кадь потӥз. Василий Сондыков, хант, данъяськыса возьматӥз аслэсьтыз дэремзэ. Та выллем ик пужыё дэремъёссы манси кышноослэн но. Но мансиос дэрем вылазы дӥсяло, пе, сукнолэсь вурем дӥсь - нуйсахи, хантъёс - халат порма чебер дӥсь. Пумен инвис сьӧры кадь ышо калык сямъёс, нылпиос кепырало ни вераськыны анай кылынызы. Но тужгес но возиське на юртаосын, гуртъёсын улӥсьёслэн кылзы. Татын вашкала сямен тыршо ай улыны. Нош кин цивилизацие шедиз, со ӟучомизгес. Азьло анай кылзэс гинэ тодыса мыно ке вал школае, али озьы ӧвӧл. Соин нырысь ӝыны арзэ ӟуч кыллы дышетылӥзы. Валамы, пе, янгышмес: анай кылэз гинэ тодон туж люкетэ вылэм школаын дышетсконлы. Хант но манси кылъёс уго воксё аспӧртэмесь, секытгес, ӟучез сярысь. Но бодылэн пумыз кык. Табере мукет ужпум кылдэм: кызьы пыӵатоно-дышетоно анай кылзэс. Соин валче ортчыло пӧртэм праздникъёс, анай кыллы сӥзем нуналъёс, вань нимысьтыз телепередачаос. Усьтӥсько ни христиан черкъёс но... Ханты-манси эшъёсы ивортӥзы на: берло аръёсы йылэ ужтэк кылемъёслэн лыдзы. Валамон ни, та радэ сюрем муртъёс кин пӧйшура, кин чорыга, нош кин ке юыны чӧлске. Али та чер, пе, туж аляны кутскиз калыксы пӧлын. Ханты-мансиос сцена вылэ потӥзы пӧзьыосын, бадӟымесь кышетъёсын, ымныръёссы ворсамынгес. Талэн мугез сыӵе: вашкала дыръя бызем нылкышно ымнырзэ ватэ вылэм атайзылэсь, мӧйы кышноос - эмеспизылэсь. Озьы одӥг семьяын ик туж кема ог-огзэс адӟытэк-тодматэк улозы вылэм. Та сям возьматэ воргорон азьын йыбыртъямез. Нош бадӟым кышетлэн пумыз юрттэ эктыку мульы бичанэз, губиянэз но мукетсэ возьматыны. Но малы ке но фестивалез ворсан нуналэ нылъёс кышетъёссэс керттӥзы ини берлань, ымнырзэс усьтыса. Оло, адямиослэсь адӟем каризы-а... Котькудӥзлы уг удалты семьялэсь ансамбль кылдытыны. Со туж секыт уж. Манси выжыослэн - Альпинъёслэн семьязы Варьёга гуртысь, Нижневартовск районысь, дас-дас вить ар лыдъяське ини туж кырӟась-мадись семьяен. Ньыль ар ӵоже асьсэ коже потало ни калык азе. Фестивальын соос возьматӥзы туж вашкала кырӟанэз, нимаське "Священный бубен". Альпинъёслэсь семьязэс ӟечкылазы нимысьтыз дипломен. Кызьы адӟиськом, адямиос таӵе фестивальёсы ысто усточи семьяосыз но. Чаклано ке, асьмелэн но вань данъяськымон кырӟась-эктӥсь семьяосмы. Кылдоз-а соослы куке но таӵе фестивальёсы пыриськыны? Коллективъёс пӧлысь фестивалез усьтыны шуд усиз ханты-мансиослы. Малы бен нырысь ик соослы кыл сётӥзы? Фестивальлэн валтӥсь режиссёрез - С.Б.Сухенький тазьы валэктӥз: - Финн-угор выжы калык шоры мон учкисько писпу но солэн вайёсыз шоры кадь. Та писпулэн самой йылаз - ханты-мансиос. Ӧй учкы, ляб-а, кужмо-а. Озьы васькимы выжыозяз. Ханты-мансиослэн огъя мылкыдзы умой кылиз. Ӧз ватэ "бере кылемзэс" но. Валентина Вокуева, дышетӥсь, ансамблен кивалтӥсь: - Ми дышетскиськом гинэ ай. Татын унозэ адӟим-синйылтӥм. Оло, мае ке уже кутом. Туж кельшизы шулдыресь удмурт кырӟанъёс, куно пумитан сямды. Тӥляд ваньмыз лад-лад интыяз пуктэмын ини. Милям ӧвӧл, уг пӧрмы на. Соин тӥ доры вуылэммы туж пайдаё луоз. Василий Сондыков, Ханты-Манси автономной округъя администрацилэн тӧроезлэн воштӥсез, Северысь ичи лыдъем калыкъёслэн ужпумъёссыя кивалтӥсь: - Куазь люкетӥз ке но, мыным туж яраз. Умой малпаллям фестивальлэсь йылпумъянзэ но, усьтонзэ но. Телевиденилы сётӥ интервью. Валентина Кочетыгова, Сургутысь "Городлэн садэз" муниципальной учрежденилэн директорез: - Усьтонзэ-ворсанзэ туж ик уд ушъя, милямен ӵошатоно ке. Туж кемалы сюлме кылёз Шевыряловое ветлэммы. Усто, шулдыр пумитазы! Басьтӥм удмурт пу мунё. Табере таӵегес ик асьме дорын лэсьтом. Но тужгес дуноез - эшъяськон. Алена, чеберлыко киужъёсъя кыл кутӥсь: - Ваимы вал асьме киужъёсмес, но трос ик ӧз басьтэ. Укыр дунтэмен татын вузасько киужъёс. Басьтӥм книгаос но. Номыре ум жаляське. Галина Волдина, киужъёсъя методист: - Ми дорын ортчем фестивален ӵошатыса, начаргес сюдӥзы. Магазинъёстӥ но ветлыны ӧм вуэ. Ӧжытгес дыр висъяллям шутэтсконлы. Огъя мылкыдмы умой. Софья Каксина, дышетӥсь: - Мон нырысьсэ таӵе фестивальын. Ваньмыз туж усто потэ. Удмурт калык паймытӥз куно пумитаменыз. Самолётысь ваським гинэ - эктыны кутскимы. Мария Мерова, пенсионерка: - Мон вал ини Венгриын, асьме дорын Ханты-Мансийскын фестиваль дыръя. Татын но кельшиз. Бертыса нылпиосылы верало. Фестиваль ортчиз. Но... эшъяськыны гинэ вуттӥзы - самолётэ пуксёно луизы. Бен мар, лобӟизы-кошкизы туриос. Ог-огмес герӟазы кадь соос. Мертчемын сюлэме малпанъёс, Мӧзмытэсь луизы ульчаос. Но кыле ук, кыле ук оскон: Яке хант, яке манси эше Нош "Ӟечбур!" шуыса ӟыгырытоз на куке! Светлана ЯКОВЛЕВА. � Ваче ки - куноосын, фестивалез йылпумъян нуналэ. � Мансийкаос экто толалтэ. � "Луд кечлэн пельёсыз" пужы. Удмурт Республикаысь Правительство мур куректэмзэ вера Калыкез улон-вылонын утёнъя министрлэн воштӥсезлы Липина Галина Юрьевналы анаез КУЗЬМИНА Юлия Михайловна улонысь кошкемен валче. Удмурт Республикаысь Калыкез улон-вылонын утёнъя министерствоын ужасьёс мур куректэмзэс верало эшсылы, министрлэн воштӥсезлы Липина Галина Юрьевналы анаез КУЗЬМИНА Юлия Михайловна улонысь кошкемен валче. Лидия ЧЕРНОВА Пышкылон Та музъем улон Туж мудрон улон. Ӝыныез улон - сюлмаськон. Изкаын коть ул, Сюйкаын коть ул, Шуд вае ӟырдыт яратон. Г. Касимов. Вань сыӵе дунне (Паймытэ гинэ): Изкае тубай, Сюйкае васькай - Шуд пуйы далай Мон утчай... ...Огпумтӥз кырми- Киысьтым вольтчиз. Мукеттӥз выри - Пыд улысь чальтчиз... Сюлэмы куасьме, Сюлэмы куарса. Яратон - пӧет Мылкыдме куаса. Ой, туж шуг вылэм Утчаны шудэз. Мылкыды - курдэс. Кылбуре урдэс. Москваын пумиськонъёс Валлян Удмурт Республикаысь Кун Кенешлэн Тӧроез Александр Волков Москваын пумиськиз Россия Федерациысь Правительстволэн Председателезлэсь ужзэ быдэсъясен Владимир Путинэн. Та пумиськон герӟаськемын вал Россиысь Экономикая министерствоен асьме дорын автомобильёс поттонъя "Шкода" компаниен огкыл гожтонэн но соин валче "Шкода-Авто-Удмуртия" ӵош предприятиез кылдытонъя постановленилэсь инъетсэ дасянэн. Нимысьтыз вераськон вал федеральной министерствоослэн Удмуртиысь обороная предприятиослы пунэм тыронъёссы пумысен. Туэ 1-тӥ июльлы заказ сётӥсьёслэн пунэм тыронъёссы люкаськемын ни 438 миллион манетлэсь уногес. Соин валче асьме бюджетэ коньдон висъянъя шуг-секытъёс кылдо, ӝега бюджет чотын ужасьёслы пособие но уждун тырон. Озьы ик Кун Кенешлэн Тӧроез та пумиськонын федеральной правительствоен чакла на кенешыны М.Т.Калашниковлы сӥзем музейно-выставочной комплексэз лэсьтонын юрттэт курон но пыӵал-тӥрлык кылдытонъя дано конструкторлэсь 80 арессэ сӥё-дано пусъён пумысен. Нуназе бере Удмурт Республикаысь Кун Кенешлэн Тӧроез Александр Волков Федерацияя Кенешлэн заседанияз пыриськиз. Удмурт Республикаысь Кун Кенешлэн пресс-службаез. "Муравейниклэсь" кузьым Москваын печатласькись инкуазьлы сӥзем "Муравейник" нылпи журнал выльысь радъяз 4-тӥ-11-тӥ апреле Тылобурдоосты утёнъя нуналъёс. Вазен таӵе праздникез странаямы арлы быдэ ортчытъязы. Тулыс бурдо эшъёсмы шуныт палъёсысь вуон азьын нылпиос соосты выль лэсьтэм умортоосын пумиталлязы. Жаляса верано, улон дуноямен ӟеч сямъёс но йылолъёс вуныны ӧдъязы ни вал. "Муравейник" журналлэн кичӧлтэмезъя, Россиысь Нюлэс хозяйствоя федеральной службалэн но Тылобурдоосты утёнъя огазеяськонлэн юрттэмзы, туэ та нуналъёсты котькытын ик шулдыр мылкыдын пумитазы. "Муравейник" журналлэн редакцияз 350 пала нылпиослэн ужъёссы вуизы. Нош алигес та ужрадлы йылпумъянъёс лэсьтэмын вал. Пусйыны кулэ, вормисе потэмъёс пӧлы шаерысьтымы покчи эшъёсмы но шедемын. Кизнер ёросысь Короленко черкогуртысь нылпи лесничествое ветлӥсьёс пусъемын Россиысь Нюлэс хозяйствоя федеральной службалэн Почёт грамотаеныз но коньдон кузьымен. Сюмси ёросысь Кильмезь школаысь нылпиос утӥзы "Муравейник" журналын одӥгзэ сэрегез нуись журналистлэсь В.М.Песковлэсь кинюртэмен книгазэ. Озьы ик пусъемын на Игра ёросысь Лоза школаын дышетскись пиналъёслэсь ужъёссэс. Кузьымъёсты сётон радъямын луоз сентябрь-октябрь толэзьёсы. В.Кутузова. Валэктэ юрист Сэрегез дася Лилия Шкляева Мыным вузазы термос. Доре бертыса, отчы пӧсь ву кисьтӥ но, колбаез юдэсэн-юдэсэн пырдӥз. Мон быгатӥсько-а сое магазинын мукетэныз воштыны? И. ДОРОФЕЕВА. Глазов город. Шер ке но, вузкарисьёс куддыръя алыло та часэз эн басьтэлэ - сыӵеос чаляк сӧрисько, та телефон аппаратлэн паспортэз ӧвӧл, соин ик кужмысь ум дэмлаське. Вузкарись но басьяськись куспын сыӵе кенешон ӧй вал ке, адямилы шекен арбери вуэмын ке, со быгатэ : шексэ дун тырытэк тупатытыны яке тупатэм понна дун тырытыны; вузлэсь дунзэ кулэстытыны; шекен вуззэ та маркаен но умоеныз воштыны; шекен вуззэ мукет маркаысь мукет арбериен воштытыны, шекен вузэз берен берыктыны но коньдонзэ курыны. Одӥг фирмае уже куриськи. Кутом шуизы но вайыны косӥзы уно справкаос: кыӵе семьяе, кыӵе висёнъёсын курадӟи но мукет, уг ужаськы-а музон интыын. Шонересь-а сыӵе куронъёс? Н. СИЛАНТЬЕВ. Игра район. Тӥ ӧвӧл вераллямды кыӵе фирмае но кыӵе удысэ медъяськемдэс. Огъя курон таӵе: адями уже пырыкуз возьматэ паспортсэ но сётэ ужан книжказэ. Со татчыозь нокытын ужамтэ ке, ужан книжкаез интые возьматэ жилкомхозъя ёзысь (домоуправлениысь) яке сельсоветысь ма каремез сярысь справка, нош армиысь бертэм мурт - военной билетсэ. Законэн чаклам музон учыръёсы администрация курыны быгатэ мукет документъёс. Шуом, шофёре уз кутэ правотэк, медсестрае - дипломтэк, сварщике - свидетельствотэк. Автоинспектор юнме шорысь штраф тырыны косӥз. Кытчы ӝожтӥськоно со вылэ? С. ПУЗЫРЕВ. Иж город. Автоинспекторлэсь нимтулзэ адӟыса-кылыса вуттӥды ке, ӝожтӥськондэс гожтэлэ солэн кивалтӥсезлы, шуом, сюрес вылын кышкытлыклэсь утиськонъя кун инспекцилэн (ГИБДД-лэн) районысь начальникезлы. Инспекторез уд тодӥське ке, гожтэттэс келялэ районысь яке республикаысь инспекцие. Татын тӥледлы толэзьскын валэктон сётыны кулэ. Тупатэм дыр куспын валэктон ӧз вуы ке, яке со тӥледлы уг кельшы ке, судэ вазиськемды луоз. Кудаз? Яке улон районысьтыды, яке инспекцилэн интыяськем районысьтыз. Судэ мыноно правоосты тӥям учыр бере куинь толэзьскын яке ГИБДД-ысь гожтэт басьтэм бере толэзьскын. Тодмое уг берыкты пунэмам коньдонзэ. Судэ мыныны керпотӥсько. Вань-а мукет амал коньдонме берыктыны? Р. КОРЕПАНОВА. Иж город. Сыӵе амал вань. Огшоры суд сяна, вань на третейской суд шуон. Кызьы со кылдэ? Кыкез ик ченгешисьёс (споръяськисьёс) оско ке куинетӥ адямилы (адямиослы), соос ужпумез эскерыны быгато асьсэ куспазы дунтэк, судэ вазиськытэк. Удмурт Республикаысь Кун Кенешлэн ньылетӥ сессизэ ӧтчан сярысь Удмурт Республикаысь Кун Кенешлэн Президиумезлэн ПОСТАНОВЛЕНИЕЗ Удмурт Республикысь Кун Кенешлэн президиумез пуктэ: Удмурт Республикаысь Кун Кенешлэсь кыкетӥ ӧтчамезлэсь ньылетӥ сессизэ люкано 1999- тӥ арын 5-тӥ октябре Ижевск городын. Удмурт Республикаысь Кун Кенешлэн Тӧроез А.А.Волков. Ижевск город, 1999 арын 10 аувгустэ � 33-ИИ *** Цессиын эскерыны чакламын Удмурт Республикаын кун ваньбурен кивалтонъя документъёсты тупатонэн герӟаськем ужпумъёс, озьы ик законэз чаклатэк дуно но сьӧд кортъёсты басьтэм понна кыл кутытонъя ужрадъёс. Удмурт шаерын улӥсьёслы вазиськон Инкуазь - асьмелэн огъя коркамы. Асьмелы отын улоно, соин ик со сярысь туж сюлмаськоно. Асьмеос быгатӥськомы но юрттыны кулэ сое выльысь улӟытыны. Куашкатыны вуэммылэсь пичи люкетсэ коть. Асьмеос быгатӥськомы но утьыны кулэ инкуазен сётэмзэ - чылкыт омырез, чылкыт вуэз, вож турын-куарез, чебер сяськаосты, кырӟась тылобурдоосты. Асьмеос быгатӥськомы но дышетскыны кулэ коркамес утьыны. Инкуазьлэсь басьтоно гинэ ӧвӧл. Солы сётыны но кулэ. Россиысь экологияя "Кедр" партия, инкуазез но адямиез ог-огзылы матэктытон вылысь, инкуазез яратӥсьёсты ӧте кужымъёссэс огазеяны. Инкуазез, калыклэсь выжы но кыл ласянь эрикъёссэ утён удысъёсысь сюлэмшугъяськытӥсь ужпумъёсты асьмеос ӵош сэрттомы-пертчомы. Николай архиепископ, Михаил Калашников, Геннадий Корепанов-Камский, Виталий Журавлев, Николай Стрелков но мукет эшъёс. Редакцилэсь. Та вазиськон улэ гожтӥськизы ни шерысьтымы трос тодмо адямиос. Сыӵеослэн лыдзы пумен йылэ. Ужрадэз ортчытэ Россиысь "Кедр" партилэн Удмуртиысь штабез (телефонзы 78-74-21). Финн-угор дунне Бадӟым классъёсын дышетскисьёслэн бадӟым слётсы 31-тӥ июльысен 6-тӥ августозь "Дзержинец" лагерьын бадӟым классъёсын дышетскись финн-угор пиналъёслэн В калык куспо слётсы ортчиз. Отчы люкаськылӥзы Мордовиысь, Марий Элысь, Татарстанысь, Карелиысь но Удмуртиысь пиналъёс. Слётлэн ужаз пыриськиз Финн-угор егитъёслэн ассоциацизылэн президентэз, эстон Яак Прозес. Слёт ужан ӵоже трос пайдаё ужрадъёс ортчизы: научно-практической конференция, фольклор ӝыт, национальной ужпумъёслы сӥзем лекциос, "котырес ӝӧк" сьӧрын вераськонъёс, педагогической семинар но "ЪЪИ даурысь школа" проект лэсьтонъя шудон. Ужазы керамикая, куиськонъя, удмурт калык костюмъя, эктонъя-кырӟанъя, психологияя мастерскойёс. Ольга Александрова возьматӥз аслэсьтыз моноспектакльзэ. Слётэ пыриськемъёс учкизы "Тень Алангасара" художественной фильмез. Трос тодмо учёнойёс но политикъёс та ужрадъёслэсь пуштроссэс тунсыкогес но пайдаёгес карыны юрттӥзы. Слётэ люкаськем финн-угор пиналъёс азьланяз ӟечгес кусыпъёс возьыны кенешизы. Слётэз радъязы Удмурт Республикаысь Национальной политикая, Калыкез дышетонъя, Культурая, Сьӧрлось калыкъёсын кусып возёнъя министерствоос, Егитъёсын ужанъя кун комитет, Наукая, Вылӥ но шор профессиослы дышетонъя комитет, Кун Кенешысь депутатъёслэн "Единство" фракцизы, Ижевскысь калыкез дышетонъя управление, Гуманитарной лицей. Коньдонэн юрттӥзы М.Кастрен нимо общество (Финляндия), Удмурт Республикаысь Почта кусыпъёсъя федеральной служба, "АСПЭК" ЗАО, Урал трастовой банк. Президиумъёс ӵош кенешизы 10-тӥ августэ Удмурт Республикаысь Кун Кенешлэн но Правительстволэн Президиумъёссылэн ӵош заседанизы ортчиз. Отын соос нырысь ик эскеризы акциосын "Евроазиатский банк экономического развития" огазеяськонэн "Агентство по реструктуризации кредитных организаций" (АРКО) кун корпорация азьын пунэмъёсызъя огкыл-поручительство сярысь ужпумез. Республикалэн кивалтӥсьёсыз соглаш луизы та корпорацилэн директоръёсызлэн кенешсылэн Удмурт Республикаысь Правительстволэн банк-агнетэзлэн ужаз пыриськон сярысь решениеныз. АРКО нырысь-валысь учредительлэн взносэз чотын 25 миллион манет сётыны чакла но Евроазиатской банклы, Удмуртиысь Правительстволэн оскытэмезъя, пунэмен 95 миллион манет висъя. Та ужпумъя Правительстволэсь азьвылгес кутэм решенизэ, Кун Кенешлэн Президиумез сяна, сессия эскерыны кулэ, озьы ик республикалэн бюджетэз сярысь законэ воштонъёс но шонертонъёс пыртоно. Кун Кенешлэн Тӧроезлэн нырысетӥ воштӥсез Владимир Агашин пус йиз: Удмурт Республикаысь Правительстволэн банк-агентэзлэн учредительёсыз пӧлы АРКО-ез пыртон Евроазиатской банклэсь статуссэ уз вошты. Акциосын кун пакет туннэ 51 процент лыдъяське но республикалэн ваньбурез луэ. Кун Кенешлэн Президиумез умоен лыдъяз Удмурт Республикаысь Правительстволэсь Глазовысь но Сарапулысь ликёро-водочной заводъёсын поттэм ваньбурзы чотын 6 миллион манетлы акцизъёссэс висъянэз. Та кун предприятиос со коньдонэз сётыны кариськизы Балезино посёлокысь спирт поттонъя заводын лэсьтӥськон ужъёсты йылпумъянлы. Предприятие ужаны кутскыны кулэ ни сентябрь толэзьлэн пумаз. Туэ ик отын 70 сюрс декалитр спирт поттыны чалкамын, со бюджетэ 3 миллион манет коньдон берыктыны луонлык сётоз. Кун Кенешысь Президиумлэн заседанияз Удмурт Республикаысь Кун Кенешлэсь ньылетӥ сессизэ 5-тӥ октябре ортчытон сярысь кенешизы. Юнматэмын сессилэн ужан радлыкезлэн инъетэз. Со тросэз герӟаськемын луоз куд-ог акционер оагзеяськонъёслэн ваньбурен кивалтонъя законлы инъет кутонэн. Озьы ик юнматэмын Президиумлэн, ялан ужась комиссиослэн но Удмурт Республикаысь Кун Кенешлэн Аппартэзлэн туэ куинетӥ кварталэ ужан планзы но ялан ужась комиссиосыз сярысь положение. Президиум Кун Кенешлэн материально-технической юрттэт сётонъя отделэзлы кивалтӥсе юнматӥз Николай Дмитриевич Украинецез. Со сяна, эскеремын мукет ужпумъёс но. Президиумлэсь ужзэ нуиз Удмурт Республикаысь Кун Кенешлэн Тӧроез Александр Волков. Удмурт Республикаысь Кун Кенешлэн пресс-службаез. Шӧкыч Дано луим куашкаса... Улонмес ялан умойгес но ӟечгес кариськом шуо политикаен вырисьёс. Соизэ-таизэ лэсьтӥм, пе, соизэ но мукетсэ басьтӥм. Нош Пичи Пурга районысь Баграш-Бигра гурт сюрес дуре интыяськемын шуыса-а, мар-а ёросысь кивалтӥсьёслэн татчы пыдзы уггес кыскы, лэся. Ма, мае учкод, кинэ кылзод? Клуб куашка. Зор зоре, что кырын, что пушказ. Одӥг вӧлдэтэз юбо зӧкта корен но пыкъямын, ява. Кызьы татын кулэ ужаны? Ужрадъёс ортчытъяны нокыӵе луонлык ӧвӧл. Ярам, дискотека нерге луылэ ик. Концерт залэ пырыны ик курдыт. Вӧлдэтэз тани-тани вылад усёз. Пыкъяны шуыса материал куриллям вылэм, пул шедьтӥллямтэ. Зол! Таӵе клубын ужало ни куинетӥ арзэ. Нош районын ортчытъян ужъёс пумысен куро лыдпусъёс. Вылаз ик, план но сёто на. Вот тамаша та! Клубын ужасьёс ӝожтӥсько: "Культура али нокинлы но кулэ ӧвӧл ни. Асьме коньдонэн ма но со аппаратура шедьтӥм ик. Культура юрт шуонысь потыку, одӥг вамыш лэсьтӥськод но библиотекае пыриськод. Соку ик син шоры шедё пурысьтам книгаос. Толалтэ кадь пушказ кезьыт, мальдытэ куашкась вӧлдэт. Лыдӟыны выль книгаос ӧвӧл. Соос 1990-тӥ арысен уг вуо ни. Журналъёсты культурая отдел вить уйлы одӥг манетэн висъя. Тӥни со люкам барышен паста-мар окто. Ма, Баграш-Бигра гинэ-а куашкамын? Мукет ёросъёсын но клубъёсъя югдур пӧртэм ӧвӧл. Нош кытын быръем депутатты? Нокин уг юртты ни ке. Яке вунэтӥды-а ини? Ай-яй-яй. Соос ведь тӥледлы куке но туж ӟеч улон сӥзизы вал. Вазиськылӥды ни-а соослы? Ӧд ке, юалэ. Быръёнъёс азьын кадь, оло, нош ик шумпоттозы. Кин тодэ?! Оло, вӧлдэттэс ке но пыкъяны материал шедьтозы? Ц.Светланова. Туспуктӥз В.Камашев. ДЫШЕТОН УДЫСЫСЬ Гырись адями азьлане учке Выль дышетскон ар азьын Ижевскысь Дышетонъя "Нылпи сад-школа" кун национальной центрлэн улоназ туж шӧдскымон воштӥськон ортчиз. Со национальной гимназия луиз. Дышетон заведение нуллоз удмурт калыклэн быдӟым пиезлэсь Куӟебай Гердлэсь нимзэ. Алигес милям корреспондентмы пумиськылӥз гимназилэн директореныз О. К. Шиловаен. - Ольга Константиновна, мон уг янгыша, дыр, шуи ке, гимназилэсь статуссэ басьтон - со бадӟым вормон но дуно кузьым. Ма ваёз та выльдӥськон дышетӥсьёслы но нылпиослы? - Шонер вераськоды, дыр, гимназилэн аслаз нимтулыз, аслаз сюресэз. Отын туж пӧртэмлыко, бадӟым куронъёсын ужаны кулэ кивалтӥсьёс но, дышетӥсьёс но, воспитательёс но. Гимназия луим, Куӟебай Гердлэсь нимзэ басьтӥм бере, вань ужасьёслы кужымзэс жалятэк тыршоно удмурт калык понна визьмо нылъёс но пиос будэтон понна. Мед луозы соос кивалтон удысын, экономикаын, мед луозы писательёс, кылбурчиос, артистъёс. Ойдолэ басьтом Операя но балетъя театрез. Трос-а отын удмуртъёс? Ӧвӧл. Нош удмурт калык котьку но вал кырӟаны яратӥсь, ужа-а со - кырӟа, куректэ-а со - кырӟа. Кырӟан пыр со вань сюлэмзэ, малпанзэ вера. Выль ним милемлы мед пыӵатоз кужым, пиналъёслы тодон-валан сётонын выль ӧр мед шедьтомы, утчаськон, ӟечсэ улонэ пыӵатон мылкыдын быдэс коллективмы мед ужалоз. Гимназия луим бере, милям ужан программамы но воштӥськоз. Выльёсыныз ужаны тыршом, вужъёссэ палэнэ кельтытэк, пӧртэм амалъёсты уже кутыса. Тани пичи классъёсын математикая пӧртэм программаос вань. Выльёсыз пӧлын тужгес но висъясько Петерсонлэн ужъёсыз. Соос пиналъёсты мур малпаськыны дышето. Пинал ачиз йылпумъян мед лэсьтоз, шуом, кызь витез люкиськом ке витьлы - луэ вить, малы? - Зэмзэ но, туннэ олокыӵе пӧртэм программаос вань. Одӥг школаысь ик классъёс пӧртэм программаосъя ужало. Кин соосты быръе - дышетӥсь, школа, роно, министерство? - Дышетскон ар йылпумъяськыку лэсьтӥськом дышетон план. Сое быдэс коллектив эскере. Собере юнматӥськом Калыкез дышетонъя министерствоын. Пусйыны кулэ, ми ас мылкыд кареммыя гинэ ум ужаське. Одно ик лыдэ басьтӥськом Россия Федерациысь, республикаысьтымы министерствоосын ӵектэм огъя дышетон планъёсты. Ортчем ар ӵоже ужаммес, тырмымтэосмес но азинсконъёсмес чакласа, планъёсамы выльзэ пыртыны тыршиськом. Тани туэ милям "Речь и этикет"занятиосмы луозы. Шӧдӥмы угось, пиналъёсмы ӟуч кылын но ӵем дыръя тодэмзэс но вераны уг быгато. Со бордысь ик уг поты меда возьдаськон? Пиналъёсмы шаплыесь, дӥсьтӥсесь мед луозы. Тӥни озьы вамышен- вамышен пичильтык ке но вормонъёс басьтом, дыр, кожасько. - Озьыен, дышетон ужын вошӥськонъёс луозы. Нош дышетӥсьёслы ма выльзэ ваёз гимназия? - Россия Федерациысь законодательство юнматэ: дышетон заведение мур но ватсаса тодон-валанъёс сётэ ке, отысь дышетӥсьёс уждунзылэсь ватсаса 15 процентсэ басьтыны быгато, валамон ини, соос тыршыса, сюлмысь ужаны кулэ. Ӵапак сыӵе школаос пӧлы пыртэмын гимназия но. - Кызьы мон тодӥсько, школа-сад республикалэн дышетон учреждениез вал. Гимназия кылдэм бере, та кусыпъёс ӧз воштӥське-а? - Усьтэм дырысен школамы республикалэн учреждениез шуыса лыдъяськылӥз. Соин ик котьку министерстволэн бурд улаз вал. Со милемыз котьку но чакласа, эскерыса возиз. Ӵектонъёсмес уже пыӵатыны юрттылӥз. Тани уждун тыронэз ик чаклалом. Городысь школаосын со апрель понна тырымтэ на, нош ми июль понна басьтӥм ни. Но куд-ог учыръёсы тросгес чакланы кулэ вал, дыр. Тани мон 1997-тӥ арысен бызьылӥсько ни гимназилэсь статуссэ басьтон пумысен. Трос кенешонъёс, ченгешонъёс вал. Пумитъяськисьёс шедьылӥзы: тӥляд, пе, юртъерды ӧвӧл. Оло, зэмзэ но, шонер со. Но мон туж шумпотӥсько, калыкез дышетонъя выль министр Любовь Григорьевна Захарова милесьтым куронмес валаз. Со шокчыны маза уг сёты. Лэсьтытӥз 28-тӥ школаен огкыл. Та документъя ми классъёссэс арендае басьтӥськом. 5-тӥ, 6-тӥ классъёсмы отын дышетскозы. Угось асьмелэн юртамы инты уг тырмы ни. Тау кареме потэ Любовь Григорьевналы: выль адями лыктӥз но сюлмаськонъёсмес валаны тыршиз. Инмар ӧвӧл, шуо, нош мон инмар вань, шуисько. 28-тӥ школа милемын артэ интыяськемын. Директорзэ Наталья Михайловна Лагуноваез тодӥсько 68-тӥ школа ласянь. Отын аслам куинь пиналъёсы дышетскизы, мон ачим но та школаын географиез нуи. Огкылэ туж капчи вуим. Шуг вакытэ усьтӥськиз удмуртъёслы школа. Секыт югдур коньдонэн. Туж ӧжыт милям туала аппаратурамы, ӧвӧл телевизормы, видеомагнитофонмы, видеокамерамы. Нош ужын соос туж кулэ. Тани кыӵе ке занятиос ортчытӥськод но сое видеокассета вылэ гожтӥськод. Выль синмын учкыса, дэмен со урокез дунъяськод. Ӟечсэ, ляб интыоссэ пусйиськод. Дышетӥсьёс понна туж пайдаё амал, шуысал мон. Калыкмы юнме уг шуы: уж адямиез дышетэ. Умой мед луоз дышетӥсьёслы но, нылпиослы но. Анай-атайёсты но палэнэ ум кельтӥське. Мед соос тодозы, кызьы ми улӥськом, кыӵе омырен шокаськом. Выль дышетскон аре мумы-бубыос понна психологияя, тазалыкез утёнъя, дышетон удысъя нимысьтыз лекциос лыдӟом. Гырись адями берзэ уг учкы, гырись адями учке азьлань. Ми но ялан азьпала учкыны, вамыштыны тыршиськом. - Ольга Константиновна, гимназилэн нимаз юртэз ӧвӧл. Осконды вань-а, со ӝутскоз шуыса? - Осконэ туж бадӟым. Алигес дорамы ветлӥз Павел Николаевич Вершинин. Со пусйиз, удмуртъёс понна элитарной школа лэсьтонын нырысетӥ вамыш лэсьтэмын шуыса. Мон малпасько, со быдэс коллективмылэн вормонэз, мынам вормонэ. Бен, шуг-секытъёс трос. Туж ӵем шуккыло монэ. Но куке адӟисько пиналъёсты, анай-атайёсты, ужасьёсме, мылкыды бурдъяське. Валамон ини, малпаськом пуктыны выль юрт. Солэн аслаз тусыз луоз, мукет школаослэсь висъяськоз. Отын, малпасько, луоз садэз но, бассейнэз но, спортзалъёсыз но. Шуизы, мынам малпанъёсы Наполеонлэн кадь, пе. Но соос улонэ пыӵасалзы ке, туж умой луысал. - Шаерысьтымы гуртъёсын удмурт школаос данак. Соосын кыӵе ке кусып возиськоды-а? - Зэм, туж ӵем кенешылӥськом мукет директоръёсын, министерствоын ужасьёсын. Но ми мынӥськом асьмелэн ӧртӥмы. Тани Алевтина Николаевна Журавлёва дасяз ӟучомем нылпиосты дышетон программа. Но милемлы со уггес тупа. Ми нырысетӥ классысен ик ужаськом удмурт букварен но грамматикаен. Дышетӥсьёсмы утчаськыса ужало, туж юн чаклало пиналъёслэсь кыл ласянь быгатонлыкъёссэс. Нылпиосмы удмурт кылын чылкыт верасько, вольыт гожъясько. Тани 5-тӥ классын пор пимы вань. Кылэз тодӥсьтэм мурт со али туж умой гожъяське но ни, аффрикатаосты но уг сура. - Тӥляд ужды выльвылэз гыронлы тупа кадь. - Зэм. Асьмеос асьмелы сюрес лэсьтӥськом, лёгиськом но паськытатӥськом. Бадӟым тау кареме потэ Любовь Григорьевна Захаровалы. Министре юнматэмзы бере кык толэзь но ӧз ортчы, гимназия кылдӥз. Озьы ик котьку но милемлы юрттыны дась министрлэн воштӥсьёсыз Галина Николаевна Васильева, Василий Трофимович Кисляк, национальной школаосъя отделын ужасьёс. Коньдон вуэ ке, школамылы одно ик пичияк ке но висъяны тыршо. Валамон, со уг тырмы. Но мон соосты озьы ик валаны тыршисько. Ӧвӧлтэмзэ вань уз каре ук соос. Тани милям выль дышетскон арлы школамы тупатъямтэ на. Лэсьтӥськисьёсты шедьтӥ ик, тыронъёсмес взаимозачёт амалэн радъяны малпаськом. Но ку соос уж борды басьтӥськозы, тодмо ӧвӧл. Али асьме кужмын, анай-атайёс юрттэм улсын тыршиськом юртмес кӧня ке коть кышъяны-мараны. - Вакчияк вералэ вал школалэн кылдон но азинскон сюресэз сярысь. - Городысь удмурт нылпиослы школа кылдытон сярысь малпаськыны кутски 90-тӥ аръёсы Калыкез дышетонъя министерствое ужаны выжеме бере. Нош со дырозь нылпи садын но, школаын но тырши. Тодам лыктэ таӵе учыр. Командировкае мынӥ Дэбес ёросэ. Одӥгаз гуртысь нылпи садэ пыри. Покчиосын удмурт кылын вераськыны кутски. 3-4 аресъем пияш шуэ шенгыль-пенгыль ӟуч кылын, мамае-папае удмуртъёс, пе, нош мон ачим ӟуч. Таӵе тумошо, со дыре ик туж сюлмаськытӥсь суредэз адӟыса, юалляй аслэсьтым - малы асьмеос, удмуртъёс, кин луэммес вунэтӥськом. 1994-тӥ арозь удмурт школа кылдытонъя документъёс дасян бордын тырши. Соку калыкез дышетон сярысь законъёс Россиын но, Удмуртиын но кутэмын ӧй вал на. Валамон, трос пӧсяно луиз. Нош регистрациысен юрист шуиз, документъёсмы, пе, ӟеч лэсьтэмын. 1995-тӥ арын нырысетӥоссэ пиналъёсты кутӥм. Та вакытэ школаямы дышетске 141 пинал, нылпи садэ ветлэ 47 мурт. Нылпиосмылэн лыдзы будэ. Тани туэ но нырысетӥ классэ 25 покчиосты басьтӥськом. Вань мылкыд карисьёсты ум кутӥське. Котькуд пиналэз котыр ласянь чакласьком-эскериськом, вормоз-а со милесьтым куронъёсмес, нырысетӥ классысен ик куинь кылэз (удмурт, ӟуч, англи) дышетыны быгатоз-а. Вакытмы секыт ке но, шумпотӥсько, азьпала вамышъёс лэсьтыны быгатӥськом, осконмес ум ыштӥське. Вормонъёс но лыкто. Гимназия кыдытон но солы Куӟебай Гердлэсь нимзэ сётон мон понна но, коллективмы понна, быдэс удмурт калык понна но туж бадӟым вормон луэ. Ю. АЛЕКСАНДРОВА. ШӦКЫЧ Экеос но дыдыос (туала басня) Улон-вылон али воштӥськыны турттэ кадь. Инкуазь но пӧртмаське, адямиос но асьсэлэсь пӧртэм луизы ини. Табере нылпиосты но номырин уд паймыты ни. Одӥгзэ гинэ тодэм потэ на вылэм, кин кинэ вормоз? Мукет сямен лӧдыса, патриархат-а, матриархат-а азьланяз луоз? Туала вакытэ нылъёс пиослэсь номырин но бере уг кылё ни кадь. Сурон тупен но шаплыгес шудо ини. Ог ӝыт кык нылкышноос (картъёссылэсь куриськыса, дыр) нылъёслэсь сурон тупен шудэмзэс учкыны мынӥзы. Нош отын конкурс ялэмын вылэм. Кин тодоз кыӵе лыдэн шудон быроз, солы кызь сюрс манет кузьым сётозы. Нылкышноос ӝот-ӝот малпаськизы, малпаськизы но огез эшезлэсь лушкемен юа: - Экеед арняяз кӧня пол бордад тэбиньылэ? Соиз возьдаськыса вазе: - Тон мар-о олома но супыльтӥськод? Возьыттэм! Нош мукетыз уг дугды: - Я вера ини, шудонлэсь лыдзэ тодоно ук. Кызь сюрс манет сюрес вылын уг костаськы. Мынам тани куддыр кык пол я мар. Ужысь жуммыса вуэ, шӧдске, эке. Соиз кит-кит серекъяса шуэ: - Ой лулы-сюлмы, ой гогы-кӧты, мынам но эше сыӵегес ик. Соку озьы ик гожтом, шудом нокин вормытэк, 2:2 лыдэн йылпумъяськоз шуыса. Зэмзээ но, шудон 2:2 лыдэн быриз. Паймод, ява. Нылкышноос быдэн дас сюрс манет басьтӥзы но лӧптыса доразы бертӥзы. Мукетъят картъёссы но (кышнооссылы вераса, дыр) футболэ ветлыны кенешизы. Со ӝытэ "Зынгаз пычкон" команда шудэ вал угось. Отын но конкурс ялэмын вылэм. Кин шудон лыдэз тодыны быгатоз, куамын сюрс манет кузьым басьтоз. Соку огез пиосмурт кырымпыдэсаз тёп сялӟиз, киоссэ ваче шлач чабкиз но эшезлэсь юа: - Арня куспын тон дыдыдэ кӧня пол чу..? Соиз кыл висказ пыриз: - Укмыс пол. Нош тон? - Мон дас одӥг пол. Иське, тазьы каром, дас одӥгысь укмыссэ кулэстӥськом но кӧня кыле? Кык! Озьы ик гожтом, асьмелэнъёс 2:0 лыдэн вормизы. Шудон йылпумъяськиз. Калтак, калтак, "Зынгаз пычкон" команда 1:2 лыдэн келяз. Эшъёс стадионысь секыт мылкыдын доразы луть-лать бертӥзы. Сур но ӧз юэ ни. Ӧз, ӧз. *** Йылпумъянэз: ушъяськон ӟече уг вутты. Л.Сюрзин. Ӟечкыласьком Туннэ 50 арес тырме Можга ёросысь Ягул гуртын вордскем Семен Васильевич Исаковлы. Со милям сюлмысьтымы яратоно пимы но котьма ласянь адӟем карымон гажано агаймы. Улон сюресэз егит дырысеныз Пермь шаерысь Чайковский городэ вуттӥз. Кузпалэныз Валентина Павловнаен синмаськымонэсь пиос будэтӥзы. Ваньзы соос - котьмалы мыло-кыдоесь, устоесь, чырткемесь адямиос. Пимес но агаймес юбилееныз ӟечкыласа, сӥзиськом солы дауръёсын сылӥсь батыр пужымлэсь кужымзэ, жадёнэз тодылӥсьтэм чылкыт ошмеслэсь улон аръёссэ, яркыт пиштӥсь шундылэсь пальпотонзэ, тулыс куазьлэсь ӟырдыт мылкыдзэ но ваньзэ-ваньзэ умойзэ. Яратыса но гажаса Исаковъёс, Медведева, Сергеевёс но соослэн нылпиоссы. Журналистъёсын пумиськонъёс Автозавод уж возьма Кылем арняе Кун Кенешлэн Тӧроез А.Волков Прагаын ужаз, "Шкода-Авто-Удмуртия" огкыллэсь инъетсэ йылаз-пумаз вуттон вылысь. Кызьы гожъяллямы ини, та проект дасямын вал кылем арлэн пумаз. Журналистъёсын 9 августэ пумиськонзэ А.Волков туж ӟеч мылкыдын кутскиз - соя ик валано ини вал, Чехиын ужамез пайдаё ортчиз шуыса. Зэмзэ ик, автозаводын "Фелиция" но "Октавия" машинаосты бичан сярысь Огкыл табере юнматэмын. "Шкода" но "Ижмаш" предприятиослэн валче ужанзы пумысен кутэмын Устав кылдытэмын Директоръёслэн Кенешсы но Правление. Татчы быдэн кык адями юнматэмын Чехия ласянь но быдэн одӥг адями - Удмуртия ласянь. Директоръёслэн Кенешазы пыртэмын "Ижмашлэн" генеральной директорез В.Гродецкий, Правление - Г.Кириллов. Табере РФ-лэн Правительствоез нимысьтыз постановление кутыны кулэ бичано автомобильлы кулэ ёзъёс вуттон понна льготаос тупатон сярысь. Та сярысь С.Степашинэн вераськемын ни шуиз А.Волков. Ӵапак та пресс-конференция дыръя А.Волковлы ивортӥзы, Президентлэн Указэзъя С.Степашинлэн Правительствоез отставкае келямын шуыса. "Кин чакламын со интые?" - юрттӥсьёссэ тодыны косӥз А.Волков. Нош ик ивортӥзы: "Владимир Путин". Кӧня ке малпаськемез бере Кун Кенешлэн Тӧроез паймыса пукись журналистъёслы шуиз: - Москваысь кивалтӥсьёс доры куатетӥ арзэ вуылӥсько ини. Монэ тодо, мон но троссэ тодӥсько. Путин но мон понна тодмотэм адями ӧвӧл. Озьы ке но, Правительствоын воштӥськонъёс кутскем ужмес ӝегатозы. Степашинэн вераськемын ни вал таиз арня ӵоже постановление бордын ужанэз йылпумъяны. Табере выль кивалтӥсьёсты юнматон кык толэзь ӵоже, дыр, кыстӥськоз. Тӥни озьы асьме автозаводмес ӝутонлы сӥзем вераськон ялан политика урдсы кожылӥз. Но Александр Волков Президентлэн Указэзлы мур дунъет сётонлэсь возиськиз. Россиысь Правительствоез ялан вошъян асьме автозавод вылын гинэ но шӧдӥське. Паймонэз но ӧвӧл ни, малы пыд йылаз султыны уг быгаты Россилэн огъя экономикаез. Вань ӟеч кутсконъёс вылӥысен ӵогисько. Соин ик инвесторъёс но асьме производствое коньдонзэс поныны уг дырто. "Шкода-Авто-Удмуртия" проектлэн дуныз, немец маркаосын вераса, 500 миллион. Туэ арлэн пумозяз Ижысь автозаводын 3 сюрс выль автомобиль поттыны чакламын. Огкыл гожтонэз дасянъя бадӟым уж нуэм Россилэн Чехиын посолэн Николай Тимофеевич Рябов. Кӧня луоз выль машиналэн дуныз? Александр Волковлэн верамаезъя, 5-7 сюрс доллар пала, но таможнялэсь пошлиназэ 30 процентлы кулэстыны быгатӥмы ке. Ӵош ужась предприятилэсь акциоссэ ас киязы возёзы "Шкода" (75 процентсэ) но "Ижмаш" (25 процентсэ). Кун Кенешлэн Тӧроез оскемзэ вераз, "Шкода-Авто-Удмуртия" проект асьме автозаводэз выльысь улӟытыны быгатоз шуыса. Азьло аръёсы республикамылэсь бюджетэзлэсь 40 процентсэ "Ижмаш" тырмытэ вал, нош берло аръёсы со отчы 4 процент пала гинэ коньдон пыртэ. Сыӵе югдурез воштоно. Документ улонэ пыӵаз ке, арлы быдэ автозавод 50 сюрс машина поттыны быгатоз, "Орбитаез" но вераса. 13 сюрс адями аслыз уж шедьтоз. "Шкода" но "Ижмаш" предприятиослэн ӵош ужанзы вить арлы чакламын. Одӥгез кышкатэ: кӧня правительствоос воштӥськозы на меда Россиын та дыр ӵоже? Юрттозы-а, люкетозы-а соос ӟеч кутсконъёсмес улонэ пыӵатыны. Т.Банникова. Шӧкыч Чаклаське: Корка зурка ӟардыку Вить часын султыса, Николай Васильевич бакча берысьтыз тыметэ чорыганы кошкиз. Кузпалыз но нылпиосыз кӧлыса кылизы. Но небыт валесазы кема кылльыны ӧз кылды ни соослы - 5 час 20 минутэ кузпалыз кыӵе ке кужмо зуркамлэсь диван вылысь миндэреныз ӵош корка шораз палдӥз. Укноос жинграк! каризы, шкафъёс погразы, корка сэрег шальтраз. "Мар та, музъем-а зурка, война-а кутске?" - куалектӥз кышномурт. Кырыжам ӧстӥз мырдэм потыса гинэ валаз: пырак корка пушказы "Урал" грузовой машинаен пыриське вылэм Ижевскысь "Агробиохимиысь" 31 аресъем водитель В.Васильев. Кудӟем сурыменыз Як.-Бодья ёросысь Мукши гуртысь ураметӥ ширтыкуз, саклыксэ ыштыса, со Перевощиковъёслэн коркаязы месӥське. Ярам, коркан но чуланын кӧлисьёс ӧз шуккиське, сотэк али Васильев казёной коркан лым ӟузьылысал ни. Кӧня манет тыр изъян лэсьтэмын, лыдъямтэ-чотамтэ на. Но коркаез тупатыны уз луы ни. Кӧня тыр изъян ваемын тазалыклы, лыдъясь ик уз луы, дыр. Но валамон, пичи ӧвӧл. Дамка кучапизы гинэ но тӥни куалектэмысьтыз олокӧня нунал ӧвӧл сиськем. Йыртэмась водительлы номыр луымтэ. Но солэн кивалтӥсьёсыз бадӟым изъян адӟем Перевощиковъёсын судэ вазиськытэк ик огъя кыл шедьтӥзы кадь - куазь кезьытскытозь ик арболитлэсь выль корка пуктозы (Васильевлэн уждунэз чотын). "Но луоз-а туала арын оскыны сётэм кылзылы?" - паймыса сыло азбар шоразы Перевощиковъёс. Дыр мынэ, сӥзьыл вуэ. Ӝоген картофкаез утялтоно, кытчы тырод сое? Али семья мунчоын ёркаса улэ... Корка зуркамлэн бервылаз вуылӥзы З.Рябинина но В.Камашев. Правительствоын *** Правительстволэн Аппаратэзлэн кенешаз Николай Ганза пусйиз матысь дыре быдэстоно куинь ужпумез. Огез со пӧлысь - дышетӥсьёслы ӝегатэм уждунзэс тырон. Та пумысен алигес Н.Ганзалэн Москвае вуылэмез бере, республикамылы 35 миллион манет тыр ссуда сётэмын. Мукетыз ужпум герӟаськемын "Удмуртэнерго" ОАО-лы пунэм тыронъёсты берыктонэн. Правительстволэн Тӧроез министерствоосты но ведомствоосты нуналлы быдэ чакласа возьыны куриз няньлы дунъёсты но эстӥськонлы кулэяськонэз. *** Правительстволэн Президиумез выльысь эскерыны келяз "Удмурт Республикаысь Правительство сярысь" Законэ пыртэм воштонъёсты но ватсанъёсты. Отын, кылсярысь, чакламын, Правительстволэн адямиосыз арлы быдэ выт бичась ёзъёсы доходъёссы сярысь ивортылыны кулэ шуыса. Законын рос-прос верамын, кыӵе луыны кулэ республикамылэн Правительствоез, кызьы сое кылдытоно, кыӵе кусыпъёсыз луыны кулэ Кун Кенешен, городъёслэн но районъёслэн администрациосынызы. *** Правительстволэн Тӧроезлэн воштӥсез Сергей Чикуров Правительстволэн Президиумез азе ӵектонэн потӥз, Правительстволэн ужбергатонъя, дуно бумагаосъя но фондовой рынокъя комитетъёсыз интые Ужбергатонъя кун комитет кылдытоно шуыса. Озьы ик со вераз, Правительствоез кылдытыку, мултэс адямиос но расходъёс кутэмын медаз луэ. Солэсь ӵектонъёссэ Президиум лыдэ басьтӥз. *** Сьӧд но буёло кортъёсты бичасьёслы лицензиос сётон дугдытэмын. Буёло металлъёсты бичась пунктъёс ворсаськозы, Россия Федерациысь Правительство та ужпумъя выль решение кутытозь. *** Сиён-юонъя но гурт удысъя министерстволы 1 миллион манет висъямын, пудо сиён дасян техникаез басьтэмлы пунэм тыронъёсты берыктон вылысь. *** Быдӟым Вормонлы 55 ар тырмонэз сӥё-дано пусъёнлы дасяськон кутскиз. Кылдытэмын оргкомитет. Соин кивалтоз Правительстволэн Тӧроез Н.Ганза. Коньдон ужпумъёсъя министерстволы учкыны куремын юбилеез пусъёнлы республикамылэн бюджетыстыз 600 сюрс манет коньдон висъяны. *** "Белкамнефть" ОАО-лы луонлык сётэмын август-октябрь толэзьёсы Югдурез утёнъя министерстволы му вӧй продуктъёсты 2,5 миллион манет тыр висъяны, со пӧлысь АИ-92 маркаен бензинэз - 60 процент, А-76 маркаен бензинэз - 40 процент. Му вӧй продуктъёс висъяськозы "Удмурт Республика" огазеяськонэ пырем акционеръёслы дивидендъёс чотын. Удмурт Республикаысь Правительстволэн пресс-центрез. Иворъёс но быръёнъёс Кызьы ивортылӥм вал ни, 8-тӥ - 15-тӥ сентябре Ижын ортчоз Россиысь прессалэн фестивалез. Сое ортчыто Россиысь но Удмуртиысь Журналистъёслэн союзъёссы, Вузкаронъя но промышленностья палата, асьме республикаысь Кун Кенеш но Правительство, Иж городысь мэрия но мукет ёзъёс. Фестивалез дасянъя оргкомитетэн кивалтэ Кун Кенешлэн Тӧроез Александр Волков. Комитетэ пыртэм муртъёс алигес люкаськизы но пӧртэм ужпумъёсты эскеризы. Кенешонэ озьы ик пыриськизы Россия Федерациысь Журналистъёслэн союззылэн секретарез Леонид Речицкий но союзын ужась Павел Шумаков. Фестивале лыктыны кулэ 300-ысен 600-озь адями - Россиысь вань республикаосысь, крайёсысь но областьёсысь журналистъёс. Кун Думае но президентэ быръёнъёс матэктэмен валче, Иже вуылыны мылкыд каризы данак партиослэн, движениослэн но организациослэн кивалтӥсьёссы. А. ПЕТРОВ. Выль вормонъёс тӥледлы! Ӵуказе - Физкультурниклэн нуналэз. Шаермы котьку но данъяськылӥз физкультура но спорт удысын басьтэм азинсконъёсыныз. Уно спортсменъёслэн нимъёссы быдэс дуннелы но тодмо луизы. Ижевскын берло дыре ортчылыны ӧдъязы Европалэн но Россилэн чемпионатъёссы. Собере Удмуртия бадӟым саклык висъяны ӧдъяз гурт спортэз азинтонлы. Туэ гурт спортсменъёслэн 8-тӥ гужем шудонъёссы вал ини, нош 6-тӥез тол шудонъёс ортчыны кулэ вуоно арын февральлэн пумаз Шаркан черкогуртын. Ваньдэс, кин эшъяське физкультураен но спортэн, ӟечкыласьком праздникеныды! Выль вормонъёс но азинсконъёс тӥледлы, эшъёс! Утелэ "вож зарнимес" Нюлэсъёсты юнме шорысь "вож зарниен" уг ӵошато, дыр. Макем сое ӟечгес утялтом, сокем чылкытгес омырен шокалом. Нош котыр улосмес чебергес карон сярысь тросгес сюлмаськоно луо нюлэсчиос. Вера Удмурт Республикаысь Нюлэсъёсъя управлениысь но тэльёсты утёнъя отделысь валтӥсь специалист Анатолий Данилович МЕДВЕДЕВ: - Туннэ нуналлы нюлэсэз утёнын 1360 адями ужа, со пӧлысь 800-эз лесникъёс луо. Сюлмаськонъёс котьку но лачак, тужгес но гужем. Уго соку нюлэскы мынӥсь-ветлӥсьёс тросгес. Куд-огъёсыз пичи но уг чаклало асьсэлэсь бервылзэс, малпаськытэк тамак пум но кушто, тылскем бервылзэс уг чаклало, мукетъёсыз машина-мотоен ветлыны лэзьымтэ интыостӥ ворттыло. Нюлэсъёсын соин сэрен тылпу потон ласянь кышкытлык эшшо но йылэ. - Мукет улосвылъёсын ӵошатыса, кыӵегес югдур шаерысьтымы нюлэсъёсын? - Гужем нуналъёсы асьме шаерын но пӧсь луэ, тужгес но туэ. Сибирьын, Дальний Востокын сяна, асьме палась нюлэсъёсын но куд-ог дыръя "горд атас" кузёяськылэ. Нырысетӥез тылпу 24 апреле гомаз Кам шур дурысь Нечкино паркын. Со дырысен ик шаерамы ялэмын тылпулэсь утиськонъя кышкытлык вакыт. Туэ Ижевскысь нюлэс хозяйствоын 11 пол нюлэс ӝуаз, Сюмсиын - 13, Камбаркаын но Воткинскын - 11, Играын - 9 пол. Нюлэсъёсын 92 процентаз учыръёсы тылпу кенже адямиослэн янгышенызы, тямыс учырын гинэ "горд атас" кузёяськиз инкуазьлэн уродъяськеменыз - ӵашъемен. Но мукет улосвылъёсын ӵошатоно ке, Удмуртиын, син медаз усьы, тылпу ӧжытгес вал. - Кыӵе аръёсын тужгес но бадӟым тылпу поталляз асьме нюлэсъёсын? - Тужгес но трос нюлэс ӝуаз 1960-тӥ арын. Тылпу гоман учыръёс 245 пол вал, пеньлы пӧрмиз 934 гектар нюлэс. Секыт вал 1972-тӥ арын. Тылпу соку кенжылӥз 126 пол, ӝуаз 384 гектар нюлэс. Бадӟым кышкытлык кылдылӥз на 1982-тӥ арын. Таяз учыре 59 пол гинэ "горд атас" чортӥз ке но, 840 гектар нюлэс ӝуаз. Туэ но югдур ушъяськымон ӧвӧл. Шаерысьтымы нюлэсъёсын 129 пол тыл гомаз, 28 гектар нюлэс пеньлы пӧрмиз. - Нюлэс ужасьёс пӧлын кыӵе ке конкурсъёс ортчытъяськоды-а? - Кызьы сотэк. Арлы быдэ нюлэсчиос понна конкурсъёс ялӥськом. Кылсярысь, лесник аслаз нюлэсаз арлы быдэ одӥг ке но шутэтскон инты лэсьтыны кулэ. Кузь сюрес вылын мыныку-бертыку шутэтскем но потэ. Нош чебер шулдыр интыосын, чылкыт омырын сиён но иназгес мынэ кадь. Кылсярысь, синмаськыса учконо Якшур-Бодья ёросысь выжыкылысь выллем сюрес дурысь шутэтскон интыосы. Татысь лесникъёс ужазы куто лӥялъёсыз (мыркъёсыз). Соосыз чебересь буёлэн чеберъяло. Соку быдэс нюлэслэн ик тусыз шулдыр луэ кадь. Но, жаляса верано, лесникъёслэсь тыршемзэс ваньмыз сӥлы уг каро. Шутэтскон интыосты изъянто яке чылкак кесяло, сием-юэм бервылзэс уг утялто. Со сяна, пичи вож будосъёсыз но тӥяло. Соин ик калыклы вазиськеме потэ: асьме нюлэсъёсмес одӥг мурт гинэ утялтыны уз быгаты. Дэмен басьтӥським ке, шулдыргес, узыргес улом. Озьы ик, губияны-эмезяны ветлӥсьёсты но сак кариськыны курысал. Эн куштэ кысымтэ тамак пумдэс, эн вунэтэ тылскем бервылдэс учкыны. Вераськиз В. КУТУЗОВА. Г.Корепанов-Камский композиторлы - 70 арес Тэтчаса гинэ азьлань уд мыны Выль дышетскон ар азьын "Шудоос" - выль школаосы Матэктэ выль дышетскон ар. Туннэ нуналлы шаерамы ужа 2087 визь-тодон люкан учреждение. Со пӧлысь 888-эз - школа, 867-ез - нылпи сад, 114-ез - ватсаса тодон- валан сётӥсь учреждение но шор ёзо заведениос. Кыӵе мылкыдын пумитало меда выль дышетскон арез школаосын? Калыкез дышетонъя министрлэн воштӥсеныз Галина Николаевна ВАСИЛЬЕВАЕН алигес пумиськылӥз милям корреспондентмы. - Галина Николаевна, маке вылез вань-а таяз дышетскон арын? - Туэ пиналъёсыз дышетскыны куто ини куать но ӝыны аресысен, но со понна анай- атайёслы куриськон гожтыны кулэ. Тросаз школаосын покчи классъёсысь пиналъёс ньыль ар дышетско, нош куд-огаз - куинь ар. Россия Федерациысь Калыкез дышетонъя министерство азьланяз 12 ар дышетскон сярысь ужпум пуктэ ни. Солы дасяськон али кутске гинэ ай. Таӵе ужпумез улонэ пыӵатон понна кулэ луоз на трос законъёс бордын ужаны. Нош тазэ армес мытӥськомы азьвыл сямен ик. - Уноезлэн пиналъёслэн, дышетӥсьёслэн но анай-атайёслэн выль дышетскон арез выль юрын пумитамзы потэ, вылды. Нош вань-а сыӵе "шудоос" туэ? - Выль школаос пуктон туала вакытэ туж секытэн сётӥське ке но, та удысмы чылкак аналтэмын ӧвӧл на. Туэ выль школаос усьтӥськозы Красногорьеын, Алнаш ёросысь Муважи но Грах ёросысь Улын Юраш гуртъёсын. Нош Можга ёросысь Сосмак гуртын ужаны кутскоз школа-сад. Ижевскысь 97 номеро школалэн вуттэмын кыкетӥ юртэз. Куд-огез та школаос туж кема пукутӥськизы. Жаляса верано, йылаз-пумаз вуттымтэ выль школаос куашкан калэ но вуо вал ни. Улон секыт луэмен школаосты асьсэзыс но коньдон поттыны куриськом ини. Дасьсэ гинэ витьыса улӥд ке уго ваньбуро уд луы. Котькудӥз школа, ас мылкыд каремезъя, ӝыны гектарысен куткыса 50 гектарозь музъем басьтыны быгатӥз, нош куд-огез солэсь но тросгес. Кин ужын чырмыт выре, со аслыз коньдон но поттыны быгатэ. Сыӵе школаосын ик арлы быдэ выльдӥськон-тупатъян ужъёс но умой радъямын луо. - Кылем арын куд-ог нылпиос, дӥськутсы но книгаоссы ӧвӧлэн, 1-тӥ сентябрез доразы пумитазы. Пуксёзы-а парта сьӧры начар семьяосысь нылпиос? - Улон-вылон уродмемен валче, зэмзэ но сыӵе учыръёс вал. Но Калыкез дышетонъя министерство вань пиналъёсыз школае келян сярысь сюлмаське. Туэ Удмурт Правительство начар семьяослы 400 сюрс манет коньдон висъяз. Со пӧлысь 144 сюрс манетэз мыноз книгаос, мукет дышетскон котыр басьтыны, 256 сюрсэз - дӥськутлы. Таӵе юрттэт сётэмын луоз шаерысьтымы 353 пиналъёслы. Секыт югдур учебникъёсын. Уноез соос вужмемын, выльёсыз уг вуо, школаосысь библиотекаос куанересь. Югдурез тупатон вылысь, таяз дышетскон аре 1,5 миллион манет тыр книгаос келямын луозы. Со сяна, 500 сюрс манет висъямын на "Удмуртия" издательствоын поттэм удмурт книгаосты басьтыны. Школаосысь библиотекаосы вуыны кулэ 1-тӥ класслы "Букварь" (авторез Р.И.Данилова), 3-тӥ класслы "Анай кыл" (А.Н.Журавлева но Ю.П.Байсарова), 5-тӥ-7-тӥ классъёслы "Даур куара" (В.Е.Владыкин, М.В.Гришкина, М.Г.Иванова, Л.С.Христолюбова) но мукет книгаос. Эшшо 500 сюрс манет висъямын на анай-атайтэк кылем нылпиослы книгаос басьтыны. - Галина Николаевна, азьвыл аръёсы школаосын трос дышетӥсьёс уг тырмо вал. Туэ кыӵе югдур та ласянь? - Туннэ нуналлы шареысьтымы школаосын 40400 дышетӥсьёс ужало. Азьвыл аръёсы дышетӥсьёслы ялан кулэяськиськомы ке вал, али югдур чылкак мукетгес. Туэ соослы 508- тӥ инты гинэ висъямын вал. Та лыдпусэз кылем арынэн ӵошатоно ке, со кык поллы ичигес. "Мултэс" луизы покчи классъёсын дышетӥсьёс, воспитательёс. Куд-ог школаосын кулэясько ик математика, химия, биология, география, кунгож кылъя предметъёсын дышетӥсьёслы. Туж ичи удмурт кылын ужасьёслы вакансиос. Табере дышетӥсьёс но ужан интызэс вошъяны уггес тыршо ни. Городъёсын 10-12 процентэз дышетӥсьёс вошъясько ке, шаермыя та лыдпус 7 процент гинэ луэ. - Озьы бере, шаерысьтымы школаосын дышетскись нылпиослэн тодон-валанъёссы но йыло, дыр? - Сотэк-а. Арлы быдэ будэ школаез зарни яке азвесь медален йылпумъясьёслэн лыдзы. Кылсярысь, туэ школаез 281 выпускник зарни но 473-ез азвесь медален быдтӥз. Медалистъёс пӧлын тросгес луизы удмурт кылэз дунъясьёс. Удмурт кылын гожтэм сочинениоссэс асьме университетэ келязы Татьяна Савинова (Алнаш ёросысь Байтэрег школа) но Евгений Федоров (Кияса ёросысь Вуж Салья школа). Озьы ик 11-тӥ классэз йылпумъясьёс пӧлысь 18 процентэз асьсэ мылкыд каремзыя удмурт литературая сочинение гожтӥзы, нош 25 процентэз та предметэз устно сётӥзы. Азьвыл аръёсы удмурт кылъя но литературая предметъя экзаменэз чиньыен лыдъямонэз гинэ быръё вал. Тросэз пиналъёс анай кылмыя олимпиадаосын но ӟеч тодон-валанъёссэс возьматӥзы. Пургаосты но аланашъёсты сяна ушъяны луоз на Вавож ёросысь Зямбай но Балезино ёросысь Исаково школаосысь, озьы ик Ижевскысь пиналъёсты. Нялтас пусъё на: туэ Ижевскысь школаын нырысьсэ удмурт класслэн выпускез вал. Со сяна, али городысь котькудаз кыкетӥяз школаын национальной (удмурт яке бигер) класс вань. Удмурт классъёс усьтӥсько на Глазов, Воткинск, Можга городъёсын но. - Кыӵе мылкыдын пумитаськоды выль дышетскон арез но а сӥзьысалды дышетӥсьёслы? - Та нуналъёсы дасяськиськомы выль дышетскон ар азьын ортчылӥсь конференцилы, кудӥз луоз 20-тӥ августэ "Металлург" дворецын. Ма бен, шуг-секытъёс котькытын но трос. Соин ик, соосыз палэнтыса, дышетӥсьёслы капчи мылкыд сӥзем потэ. Озьы ик та секыт аръёсы анай-атайёс но маин ке юрттыны мед быгатысалзы школаослы. Та удысын вань тыршисьёсты выль дышетскон ар азьын ӟечкыламе потэ. Сӥзисько капчи мылкыд но шуд, бадӟым чидан но азьланезлы оскон! Вераськиз В.КУТУЗОВА. Юалэ - валэктом Оло утӥ, оло ӧй... Февраль толэзе Дэбесысь кык "Русское лото" билет (228-тӥ, 229-тӥ тиражзэ) басьтӥ вал. Но эскерыны ӧй быгаты, почтаын таблицамы ӧвӧл шуизы. Быгато на-а соосты эскерыны? А.Иванова, Деэбес ёрос, Уйвай гурт. Юанлы валэктэ "Русское лото" Ижысь ёзэзлэн валтӥсь бухгалтерез Н.И.Ушакова. - Дэбес почтаын тӥ билетъёстэс эскерыны уд быгатэ, малы ке шуоно, али соосын ӵош ужан огкылмы ӧвӧл. Эскерыны быгатоды Ижевскын (Советская урам, 10 номеро юрт) яке "Комсомольская правда" газетысь, та тиражъёс ортчем бере потэм номеръёсысьтыз. - Калык та билетъёсты басья, луыло ик-а утонъёс? - Тиражлы быдэ. Пичиен басьясьёс туж трос, суменакен - алигес 124 сюрс манет басьтӥз Ижевскын улӥсь, кылем арняе гинэ 22 сюрс манет утӥз Сарапулын улӥсь. Дасяз З.Вахрушева. География наукаосъя кандидатлы профессорлы Степан Иванович ШИРОБОКОВЛЫ 12 августэ тырмиз 80 арес Капчи улон ӧй утча Мон пичиысен анайтэк кыли, атае пиналъёсын бултыр ваиз. Озьы мултэс нянь сиись луи. Пинал дыры шулдыр ӧз ортчы. Туж умой валай огзэ - дышетсконо. Ветлӥ Ванькагуртысьтымы ик школае, собере пыри Якшур-Бодьяысь педтехникуме. Дышетскон аръёс капчиен ӧз сётске. Озьы но институтэ пырон сярысь малпан йырын бергамысь ӧз дугдылы. Пыри ведь Удмурт пединститутэ. 1940-тӥ арын июнь толэзе армие басьтӥзы. Институтын басьтэм тодонъёсын кемалы гинэ солдатъёслэн строязы султӥ. Армиын дуно эшед дорын куноын кадь ӧвӧл, кытчы косо, отчы мыноно луэ. Полковой школаын но вал, взводъёслы командиръёс дасясь курсъёсын но дышетски. 1941-тӥ арын июне, Пермь областьысь военной лагерьёсты кельтыса, частьмы сюрес вылэ потӥз. Поезд милемыз нуэ шунды пуксён пала. Кытчы со дугдоз - ум тодӥське. Белорусской военной округлэн Дретуньской лагерьёсаз ваизы. Кык нунал ортчыса кутскиз война. Со нунал ик бомбаос пуштылӥзы ини. Мон вал огневой взводысь расчётлэн командирез, сержант званиен. Секытэсь ож сюресъёс олокыӵе но малпанъёсы вутто. Ӵош ожмаськем эше Юрий Андреевский мыным огпол шуэ: - Кудмы ке улэп кылим ке, кӧня тодэ ваёнъёс луозы. Юраен мыным люкиськоно луиз. Июль толэзе танкъёсын атака дыръя мон сӧсырмыны шеди. Мукетъёсыныз ӵош монэ келязы Тамбовысь госпитале. Бурмытскыса, кужым люкаса, нош ик фронтэ мыноно. Главной командованилэн резервысьтыз артилерийской полкын монэ ыстӥзы топовычислительной взводысь отделенилы командире. 1942-тӥ арын апреле милемыз келязы Брянской фронтэ. Декабрёзь сылӥм Орловской областьын, утим городъёсты но гуртъёсты. Татысен ик монэ но кӧня ке сержантъёсты ыстӥзы артучилищее дышетскыны. Соку Фергана городын ужаз Ленинградысь училище. Витьымтэ шорысь висьыны уси, келязы госпитале. Сэзъязы монэ тиф но, кезеген висён но. 1943-тӥ арын сӥзьыл нош ик дышетскыны ысто. Табере мон шеди Термез городысь пулемётной училищее. Артиллериын служить кари бере, мынам аслам куриськонэ вал. Озьы монэ ыстӥзы миномётной батальонэ. Училищеез йылпумъяса, младшой лейтенант ним сётӥзы. Выльысь фронтэ вуи. Табере Кыкетӥ Украинской фронтысь стрелковой полкен ӵош ортчоно Чехословакиетӥ, Венгриетӥ, пыриськоно Будапештэз басьтонэ. Таиз но сюрес капчиен ӧз сётскы. Ӟеч ожмаськеме понна сётӥзы Горд Кизили орден но "За взятие Будапешта" медаль. Война мон понна йылпумъяськиз 1946-тӥ арын тулыс. Со тулысэ ик областной партийной школае ужаны пыри. Дышетӥ экономической но политической географилы. Ижевскын квартирае ӧй вал. Басьтӥ вуж коркаез. Сое выльысь сэзъяй, выльдӥ. Институтэз быдтӥ ке но, тодонъёсы тырмыт ӧй вал кадь потӥз. Пыри МГУ-ысь геолого- почвенно-географической факультетэ заочно дышетскыны. Со вакытэ ик нуи на республикаысьтымы заочной средней школаын географиез. Уж трос, пумен ачим но дышетскисько. Университетэз йылпумъяй 1950-тӥ арын. Но соин дышетсконэ ӧз быры. Пыри МГУ-ысь аспирантурае. Табере кандидатской диссертацилы дасяськоно. Со понна трос материал кулэ. Ветлӥсько районъёсы, пӧртэм интыосын тодматскисько, ваньзэ ас синмыным адӟеме потэ. Пумен гуртъёсын, райцентръёсын лекциос лыдӟисько. 1953-тӥ арын сӥзьыл монэ ӧтизы Удмурт пединститутэ. Татын мон дышетски, ваньмыз сямен тодмо. Кабинетъёслэн, залъёслэн ӧсъёссы огпол гинэ усьямын ӧвӧл. Табере дышетоно студентъёсты геологилы. Та предметъя учебникъёс, пособиос библиотекаын ӧвӧл. Ма кароно, курсэз дасян понна материал кулэ ук? Ваньзэ аслым утчано луиз. Мон нуназе но, уин но пукылӥ лекциосты дасян бордын. Вылаз ик, дышетон методикаез умой валаны кулэ на. Ужлэн, оло, пумыз но ӧвӧл. Пединститутын ужамен ӵош ӧтьыло дышетӥсьёслэсь тодон- валанзэс будэтонъя институтэ географиен герӟаськем ужпумъёсъя лекциос лыдӟылыны. Куддыръя ачим но пельпумъёсы вылэ ныпьет ӝутылӥ. Тани республикаямы СССР-ысь географияя обществолэн ёзэз ӧй вал. Басьтӥськи сое кылдытон борды, асме ик бырйизы кивалтӥсе. Эшъёслэсь оскемзэс аналтод-а? Мон ӧй тодылы отпускъёсты но шутэтскон нуналъёсты. Табере монэ районъёсы ысъя ини "Знание" общество но. Лекциос лыдӟем сяна, научной уж нуыны материал люкалляй. Мыным юрттӥзы Госплан но Статуправление. Бӧрысь со материалъёсъя вераськылӥ научной конференциосын Свердловскын, Пермьын, Уфаын. Мыным удалтӥз СССР-ысь географической обществолэн Киевын ортчем ИИИ съездлаз делегат луыса ветлыны. Отчы мынэмлэсь азьвыл печатламын вал ини мынам статьяосы но брошюраосы. Соос пӧлын "Физико-географический очерк Удмуртской АССР" но "Комплексное развитие экономики Удмуртской АССР". Ӧй вунэты кандидатской ужме но. Диссертациме утьыса, география наукаосъя кандидат луи. Нош книга поттон издательство печатлаз "Удмуртская АССР. Экономическо- географическая характеристика" монографиме. Табере ини мон доцент. Аслад ортчем сюресэд сярысь вераны, оло, умой ӧвӧл, ушъяськем кадь луэ, но мон ноку ӧй утча капчи улонэз. Лёгымтэ сюресъёс вылэ но потоно луиз. Тани школаосын дышетскисьёслы республикамылэн географиезъя учебник кулэ луиз. Нокыӵе материал ӧвӧл, ма бордысен кутсконо? Калыкез дышетонъя министерстволэн дэмламезъя Географической обществолэн удмурт ёзэзлэсь советсэ люкам. Отчы ик ӧтим географилы дышетӥсьёсты. Со азелы мон дасяй учебниклы план-проспект но физической карталы макет. Дышетӥсьёс одӥг кылысь секыт ныпъетэз мон вылэ ошизы. Кыл сётӥзы юрттыны, учебникез эскеронэ мылысь- кыдысь пыриськыны. Ужаме юнме ӧз луы, 1964-тӥ арын книга издательство учебникез поттӥз. Дышетскисьёслы со кие кутымон юрттэт луиз. Институтын вал ини естествознаниея факультетлэн ёзэз (биология, химия). 1962-тӥ арын гужем ялӥзы географияя но биологияя отделение абитуриентъёсты кутон сярысь. Билогъёслэн шугъяськонзы ӧй вал ке, географилы дышетонэз нульысен кутсконо луиз. Оскизы со ужез мыным. Герӟаськоно луиз Москваысь магазинъёсын. Кулэ вал учебникъёс, картаос, приборъёс. Тодӥ, ВДНХ-ысь куд-ог экспонатъёсты кушто. Отчы вазиськи. Данак гинэ экспонатъёс институтамы вуизы. Нырысетӥ араз географияя но биология отделениын ужаны шуг вал. Огнам нуоно луи вань курсъёсты. Кулэ литература уг тырмы, утчано пӧртэм библиотекаосысь.Отӥяз отделенимы пумен паськытаз, вуизы выль специалистъёс, соос пӧлын А.П.Перевощиков, Е.К.Кузьминых. Нош 1964-тӥ арын нимысьтыз географияя кафедра усьтӥськиз. Соин мыным ик кивалтоно луиз, географияя кружокез но ачим валтӥ. Кулэ луизы Удмуртяя дышетскон атлас но "Природа родного края" сборник. Нош ик люкано кариськи Географияя обществолэсь удмурт ёззэлэсь советсэ. Сборникез дасяны авторъёсты ӧтим. Нимаз-нимаз люкетъёсты гожтыны басьтӥськизы городысь специалистъёс. Но сборникез поттон кемалы ӝегаз. Огез автор материалзэ вуттӥз тямыс ар ортчыса гинэ. Дышетскон атлас но "Природа Удмуртии" сборник потӥзы 1972-тӥ арын гинэ. КПСС-лэн удмурт обкомез но Верховной Советлэн Президиумез трос аръёс ӵоже ужамме вылӥ дунъязы. Мыным сётӥзы наука удысысь дано ужась ним. 1974-тӥ ар но мон понна вунонтэм кылиз, луи профессор. Нош ик лекциос, табере ини СССР-лэн экономической географиезъя, промышленной географиезъя но мукет курсъёсъя. Аръёс капчиесь ӧй вал ке но, кызьы ке ӝог ортчизы. Али но аслэсьтым юасько: ваньзэ-а мон лэсьтӥ улытозям, пенсие потытозям? Тросэз малпанъёсы быдэсмытэк но кылизы кадь. Арлыдъёс зӥбыны шӧтазы. Бен, ортчем сюресэ орденъёсын но медальёсын пусъемын. Мынам мӧля вылам бырттӥзы Горд Кизили, И степенё Отечественной война орденъёс, медальёс сётӥзы, трос данъян грамотаос. Ужаськод ке, лэсьтэм ужез дунъяло. Туннэ мон уг ужаськы, улӥсько странамылэн, республикалэн но Ижевсклэн улонэныз. Ваньмыз-а яра мыным? Мултэс шоналляськон шӧдӥське. Республикамы огшоры область кадь гинэ кыле на. Кивалтон ужъёсы удмуртъёс уг шедё ни. Кун Кенеше депутатэ гинэ но дас одӥгез гинэ быръемын. Мӧйы муртлэн синъёсыныз учкисько но тодам ваисько азьло аръёсты. Войналэсь азьло но война бере республикаен кивалтӥзы удмурт воргоронъёс но нылкышноос. Соос ӧз быгатэ шат ужаны? Озьы ӧй шуысал. Республика шӧдскымон вамышъёс лэсьтӥз. Со куспын кадръёс но будӥзы, соосты адӟыны гинэ кулэ. С.Широбоков. Кужыммес огазеялом - ӟечгес улом Кызьы ивортылӥмы вал ни, "Удмурт кенеш" огазеяськонлэн тӧроез Валентин ТУБЫЛОВ Женевае вуылӥз, ООН-лэн ичи лыдъем калыкъёсты ултӥяны сётонлэсь утёнъя комиссиезлэн ужаз пыриськиз. Швейцарие ветлэмез сярысь со мадиз газетмылэн корреспондентэзлы Алексей Андрияновлы. - Финн-угор калыкъёслэн консультативной комитетсылэн решениезъя, Швейцарие ми кык кузя ветлӥм. Эше Коми Республикаысь вал. 1993-тӥ-2003-тӥ аръёсты ООН-лэн Ассамблеяез дуннеысь выжы калыкъёслэн аръёсынызы ялӥз. Та дыр куспын специалистъёс ичи лыдъем калыкъёсты котыр ласянь эскерозы- чаклалозы. ООН-лэн калыкъёслэсь правооссэс утёнъя ялан ужась комиссиез вал ни. Нош табере нимысьтыз кылдытэмын выжы калыкъёслэсь правооссэс утёнъя комиссия. Сессиын дас кык ужпум эскеремын. Со пӧлысь одӥгез валтӥсез - ООН-ын дуннеысь выжы калыкъёслэсь ялан ужась форумзэс кылдытон. Россиын 15 пӧртэм финн-угор калыкъёс лыдъясько. Озьыен, котькудзэ нимаз висъяса возьматыны уз луы. Соин форумын нимаз калыкъёслэн огазеяськонъёссы муртъёсыз мед ужалозы шуыса ӵектонмес умоен лыдъязы. Россиысь финн-угоръёслэсь адямизэс ыстыны быгатоз консультативной комитет. Отын вошъяськыса ужалозы. Кылсярысь, одӥг-кык ар удмурт луоз, собере коми, пор, карел... Но со адями ООН-ын Россиысь вань финн-угор калыкъёслэсь мылкыдзэс вераны кулэ. Тани вань на Северысь, Сибирьысь но Дальний Востокысь выжы калыкъёслэн огазеяськонъёссы. Кавказын но вань асьсэлэн ассоциацизы. Соос но ООН-э быдэн одӥг адямиен ыстозы. Лэзем адями калыкез возьматӥсь гинэ медам луы. Солэн куараез юн чузъяськыны кулэ. Шуом, ООН кыӵе ке решение кутэ, но выжы калыкъёслэсь мылкыдзэс уг чакла. Соку кӧня ке калыкъёслэн ыстэм муртсы решенилэсь кужымзэ дугдытыны мед быгатоз (право вето). Мукетыз валтӥсь ужпум, кудзэ эскеримы, комиссиын тазьы шуиське: выжы калыкъёс но соослэн музъемен герӟаськемзы. Татын трос юан кылдэ. Быгато-а калыкъёс ас музъеменызы кузёяськыны? Тупатэмын-а та ласянь правоос? Кытчы кошке музъем узырлык? Музъем - со сюдӥсь-вордӥсь гинэ ӧвӧл. Соин адямилэн вань улонэз герӟаськемын. Татын солэн анай-атаез вордӥськиз, татысь выжыез потӥз, татын ик луыны кулэ ӵуказе нуналэз. Вераськон вал калыкъёслэсь дуно интыоссэс, памятникъёссэс утён сярысь но. Удмуртъёслэн тани трос куалаоссы, вӧсяськон интыоссы вал. Сыӵе азьысь вазен писпуэз но кораны ӧз лэзьылэ. Табере та куронэз чаклась быриз. Но котькуд калыклэн музхъем узырлыкеныз кузёяськыны правоез вань ук. Нош асьмелэн луэ озьы но, куке палэнысь лыктэм мурт лыктыса котьмаин кузёяськыны ӧдъя. Кивалтӥсьёслы валаны кулэ: со гинэ кузё ӧвӧл. Пайда поттон сярысь малпаськыку, выжы калыклэсь но кулэяськонъёссэ чаклано. Уго кивалтӥсьёс вошъясько, нош калык ас дораз кыле. Али ООН-э дуннелэн пӧртэм сэрегъёсысьтыз ичи лыдъем калыкъёслэсь трос ӝожтӥськонъёс вуо. Сессиын со сярысь ӟырдыт вераськон ӝутскиз. Калыклэсь данзэ ӝутыны турттӥськод ке, националист шуэмзы потэ. Кызьы озьы ултӥялод? Тани асьмелэн но вань элькунмы, нош вылӥ кивалтӥсьёс пӧлын одӥг но удмурт ӧвӧл. Кин янгыш? Бырйись, пе. Кызьы бырйись быдэсак янгыш луоз, куке удмуртъёс лыдзыя республикаын ӧжытгес. Но со дыре ик бырйисьлэн но янгышез вань. Вузаськыны яратӥськом асьмеос. Берло йыр бордамы кутскиськом: кытчы луизы мискинь удмуртъёс? СССР дыръя нимаз закон тупатэмын ӧй вал ке но, квота сётӥськылӥз. Шуом, вить депутат Удмуртилэсь бырйиське, куинез одно ик удмурт луыны кулэ. Со ик шуиське национальной политика. Кинлы ке власть гинэ кулэ шуыса мон уг вераськы. Мед луоз адямиез, калыкез гажан. Асьмелэн со ӧвӧл. Чылкак мукет югдур Финляндиын. Кунлэн уйпалаз саам калык улэ. Парламентын соослы нимысьтыз инты висъямын. Отчы кин ке мукетыз лыктыса бырйиськыны уг быгаты, одно ик саам луыны кулэ. Туэ ноябре нош ик ортчоз ООН-лэн выжы калыкъёсты ултӥянлы сётонлэсь утёнъя комиссилэн сессиез. Отчы табере карел мыноз. Сӥзьыл ик ООН выжы калыкъёслэсь ялан ужась форумзэс кылдытонэн герӟаськем ужпумез эскероз. Али сое дасянъя ужъёс мыно ни. Калыкъёслэсь улэм-вылэмзэс чакласа, ваньзэ эскерем бере, ООН выжы калыкъёсты ултӥяны сётонлэсь утён пумысен декларация кутоз. Малпасько, та документ удмурт калыклы но пайдаё луоз шуыса. Быръёнъёслы дасяськон кутскиз Выль дауре - выль парламентэн Россиысь улӥсьёслы вазиськоназ туэ 9 августэ Россилэн Президентэз ялӥз Кун Думае ортчоно быръёнъёслэсь дырзэс - соос луозы 1999-тӥ арын 19-тӥ декабре. Озьыен, быръёнъёслы дасяськон кутскиз. Ӵуказеяз ик 10-тӥ августэ республикаысьтымы Быръёнъя комиссия кенеш ортчытӥз. Отчы люкаськылӥзы районъёсысь но городъёсысь быръёнъя комиссиослэн тӧрооссы, политика огазеяськонъёслэн кивалтӥсьёссы но журналистъёс. Быръёнъя комиссилэн тӧроез А.И.Тубылов но секретарез Г.С.Пчельников люкаськемъёслы тупен-тупен валэктонъёс сётӥзы Кун Думае быръёнъёсъя выль федеральной законлэн пуштросэзъя. "Депутатъёс асьме обществомылэн синучконэз луо", - шуиз А.Тубылов, - соин ик парламентэ чылкыт адямиосыз гинэ быръёно. Со понна выль законын чакламын котькуд кандидатлэсь пыр-поч эскерыны улон сюрессэ. Таӵе уж нуымтэ сэрен ик 1995 арын ортчем быръёнъёс дыръя Кун Думае сюризы суд улэ кыскемъёс но. Туала закон вуоно кандидатъёс азе чурытэсь куронъёс пуктэ. Кылсярысь, депутатэ кандидат луыны уг быгато мукет государстволэн гражданъёсыз, озьы ик нокыӵе гражданствотэк адямиос, суд улэ кыскемъёс. Табере котькуд кандидат ас ваньбурез (доходэз) сярысь калыклы шара вераны кулэ. Кандидат сярысь материалъёс дасяку, та учыръёсты иворъёс вӧлмытӥсь ёзъёслы ватыны уг яра. Агитация мынон вакытэ лэземын ӧвӧл калык пӧлын кузьмаськон но со выллем ужъёс нуыны. Вуоно быръёнъёсы пыриськоз 139 политической огазеяськон - сомындаез туннэ нуналлы лыдэ басьтэмын Россия Федерациысь Юстицияя министерствоен. Кинлы калык золгес дурбасьтоз, вераны вазь на. Но Г.Пчельниковлэн ивортэмезъя, туэ 4-тӥ апреле Кун Кенеше быръёнъёс дыръя золгес кужымзы вал таӵе партиослэн но огазеяськонъёслэн: КПРФ, ЛДПР, НДР, "Экологический союз", "Яблоко", "Отечество", "Удмурт кенеш". Азьло быръёнъёс дыръя сямен ик Россилэн парламентаз 225 депутат быръемын луоз партиослэн списокъёссыя но 225 депутат одӥг мандатъем округъёсъя. Быръёнъёсы пыриськон понна кандидатъёс азьло сямен ик кинюртэмъёс бичаны кулэ. Но Федеральной законын мукет амал но чакламын: гожтӥськемъёс бичам интые кандидат яке быръёнъёсъя огазеяськон (блок) коньдон тырыны быгатэ. Кандидатлы тупатэмын 83490 манет, огазеяськонлы 2087250 манет. Быръёнъёс дыръя 5 процентлэсь ӧжыт куара бичам кандидатлы коньдон уг ни берыктӥськы. Котькыӵе быръёнъёс асьме государство понна туж дуно усё. Кун Думае быръёнъёс ортчытон понна Россилэн бюджетысьтыз 1,5 миллиард манет коньдон кошкоз. Ваньзэ тае лыдэ басьтыса, Удмуртиын чакламын Кун Думае быръёнъёсын ӵош ортчытыны Кун Кенеше депутатъёсты быръёнэз (азьвыл быръем депутатъёслэн С.Чикуровлэн, Г.Останинлэн, В.Загайновлэн, Ю.Питкевичлэн мукет ужан удысъёсы выжеменызы валче). Озьы ик та нуналэ куд-ог ёросъёсын ортчозы аскивалтон ёзъёсы быръёнын куд-ог депутатъёс ас ужзэс дырызлэсь вазь дугдытэмын. 19-тӥ декабре Россиысь калык быръёз выль парламент. Кыӵе со луоз, асьмеос, бырйисьёс, бордысь потоз. Мед со луоз калыклэн зэмос парламентэз. Вунэтоно ӧвӧл: выль быръем депутатъёсын асьмеос 2000-тӥ аре выжомы. Т.Банникова. Нянь уз тырмы, картофка луоз Гурт удысын ужасьёсты туэ инкуазь уг шумпотты. Нырысь кӧс улӥз, нош табере, ю-нянь утялтон вакытэ, ӵем зорылэ. Кызьы та югдурысь потыны туртто кивалтӥсьёс? Кыӵе амалъёс утчало соос гурт калыклэсь улонзэ шулдыргес карон понна? Та юанъёслы валэктонъёс басьтон вылысь, кылем арняе Правительстволэн пресс-службаез журналистъёс понна Завьял ёросысь хозяйствоосын тодматскон радъяз. Та ужрадлэн кичӧлтӥсез вал Правительстволэн Тӧроезлэн воштӥсез Михаил Иванович Назаров, нош ёрослэн музъемъёсыз вылтӥ нуллӥз Завьял Думалэн тӧроез Галина Васильевна Баталова. Завьял ёросын огез бадӟымез луэ акциосын Азин нимо огазеяськон. Татчы нуназе шорынгес вуимы, тужгес но ужано вакытэ. Но бадӟым элеватор буш. Утялтэм ю-няньлэн зыныз уг шӧдӥськы. Ужасьёс уг адӟисько. Чал-ча. - Тысё юосты октон-калтон куинь нунал гинэ мынэ ай, - маде хозяйстволэн кузёез Василий Степанович Данилов. - Толъем юосмы туэ туж лябесь. Кыкетӥ арзэ ини уг удалто. Кылем арын гектарысьтыз 7-8 центнер гинэ тысь басьтӥм, туэ 10 центнер, оло, потоз ик. Азьло аръёсы 18-20 центнер басьтӥськом вал. Кызьы валамы, та хозяйство ньыль "китъёс" вылын возиське. Татын нянь но картофка будэто, йӧл но сӥль потто. Нянен туэ хозяйстволы секыт йӧтоз. Вань оскон мукет удысъёслы, нырысь ик - пудо вордонлы. Пудо сиён тырмыт люкамын. Уката ик жалем сиёнъёс. Туннэ нуналлы турын 112 процент дасямын ни, куро -135 процент, силос - 65 процент. Пудо сиён дасянын выль ужан амалэз уже кутыны дӥсьтӥллям. Кыдёкысен ик синйылтӥм ферма азьысь тӧдьы целлофанэ биняллям макеосты. Соос ӝужыт гурезь кылдытӥллям. Мар-о со? Валэктэ хозяйстволэн валтӥсь агрономез Сергей Спиридонович Моисеев: - Кемалась кылӥмы ни вал, Италиын тазьы пудо-сиён дасяло шуыса. Ваньзэ машинаос лэсьто, турынэз турнало, чумолёосы люкало но целлофан плёнкае биняло. Ваньзэ ӧвӧлзэ 2 час дыр кошке. Плёнка пушкын жалем сиён небӟе, ческытгес луэ на. Нокыӵе витаминъёсыз но каротинэз уг быро. Одӥг бинялтэтэ 650-690 килограмм пудо сиён тэре. Хозяйствоын та амалэн туэ 137 тонна пудо сиён дасяллям. Кыӵе луоз солэн пайдаез, берытскоз-а та техникалэн дуныз, вераны шуг на. Скалъёс тросгес йӧл сётыны кутскизы ке, соку гинэ ваньмыз тодмо луоз. Но котькыӵе выль уже кутсконлэн сямен ик, татын но кышкытлыкез вань. Кылем арын та амалэз яръёс кутыны выриллям, но кыӵе ке янгышъёс лэсьтэмен, ужзы пӧрмымтэ. Азин нимо огазеяськон вить ар ӵоже пыд йылаз йыг-йыг возиське. Пудо животлэсь лыдзэ но, кизёно музъемъёссэс но кулэстӥллямтэ. Адӟем карымонэз вань йӧл кысконын но. Холмогор выжы скаллэсь пумен мозмытскизы, куӵо выжы вылэ вуизы. Кылем арын одӥг скаллэсь 3000 килограмм йӧл кыскизы, туэ та лыдпусэз 3300 килограммозь вуттыны малпало. Йӧл кысконын но ялан выльзэ утчало. Скаллэн йӧлыз кыл вылаз шуо. Со шонер. Но тани мар паймытэ: куд-ог хозяйствоосын скалъёсты ӟеч сюдо ке но, пайдаез уг луы. Угось берло дыре пудоос ялан мастит висёнэн курадӟо. Ужпум со бордын вылэм: туж ӝог тӥясько скал кыскон аппаратъёс. Та хозяйствоын со аппаратъёсты нимысьтыз приборен эскеро. Выль амалэн тодматскон вылысь, татчы люкаллязы республикаысьтымы мукет хозяйствоосысь специалистъёсты но. Табере та амалэз куать хозяйствоын уже куто ни. Республикаямы кема вераськонъёс мыно ни Германиын поттэм "Доминатор" комбайн сярысь. Сое туж ушъязы. Асьме бусыосы но, пе, соос тани-тани вуозы. Вуиллям. Кыксэ адӟоно луиз Дуброво отделениысь. Комбайнъёсты, итальян технологиен пудо сиён дасясь машинаосты сямен ик, басьтэм Гурт хозяйствоя научно-исследовательской институт (директорез В.В.Гусев). Маин бер "Доминатор" умойгес асьме "Нива" но "Енисей" комбайнъёслэсь? Институтысь учёной С.Курылёва солы таӵе дунъет сётӥз: - "Доминаторен" нуналаз 56 тонна ю тысь утялтыны луэ. Нош "Ниваен" самой троссэ - 26 тонна гинэ. Выль комбайнлэн паськыт жаткаез - 6 метр. Германиысь техникаен ужало устоосыз механизаторъёс Фёдор Павлов но Владимир Митрофанов. Владимир дышетскыны ветлӥз Тулае. Институтысь специалистъёслэн верамзыя, "Доминатор" асьме бусыослы али уггес тупа, комбайн ӟеч ужа вӧл-вӧл, ӵошкыт бусыос вылын, нош Удмуртиын музъемъёс гопо-выроесь. Собере выль комбайн ужа гыремлы пумит гинэ. Озьыен, "Доминаторез" уже кутон азьын нырысь ик сюлмаськоно бусыосты дасян сярысь. Ужпум кылдэ воштос ёзъёс пумысен но. Соос ӧвӧл, ньыль вуэм комбайнъёс пӧлысь али кыкез гинэ ужа. Кышкатэ каомбайнлэн дуныз но - одӥгез 5,5 милион манет сылэ. Та комбайнъёсты институт кредитэн басьтӥз, коньдонэз берыктымтэ на. Завьял ёросысь кӧня ке арзэ эскеронъёс мыно ни картофка будэтонъя. Удмурт научно- исследовательской институтын ужасьёс мур пыӵато грядово-ленточной технологиез. Учёной Николай Васильевич Донец та амал сярысь дугдылытэк мадьыны быгатэ: - Картофка мерттӥське гурезё чуръёсы. Чурлэн пасьталаез одӥг метр. Та амал туж яра асьме инкуазьлы. Зор-кот но, кӧс куазь но картофкалы уг люкеты. Республикамылы тужгес но тупа "Невский" сорт. Удмуртиын али 74 процент хозяйствоос та выжыез мертто. Тӥни озьы тыршо Завьял ёросын музъем ужасьёс. Нош кыӵе меда югдурзы уждун ласянь? Азин нимо хозяйствоын 380 ужасьёссы но 220 пенсие потэмъёссы. Уждун шорлыдын 500 манет пала, тросгес басьто скал кыскисьёс. Соос ужало, звеноосы люкиськыса, быдэн 20 нунал, уждунзы та дыр ӵоже 700-800 манет котыр усе. Хозяйствоын уждун тыремын ни июнь понна. Нош пенсиез август понна сётъяны кутскиллям. Ужтэк кылемъёс ӧвӧл, шуыны луоз. Василий Степанович Даниловлэн верамезъя, хрозяйствоын котькуд ужасьлы туэ быдэн одӥг тонна турын висъямын. Арысь аре семьяослы татын ю тысен, техникаен юртто. Саклык висъяське лэсьтӥськонлы но. Туэ хозяйстволы секытгес йӧтэ эстӥськонэн. 80 тонна вань ке, ужан понна кулэ на 60 тонна. Та югдур паймытэ, угось Завьял ёросын му вӧй поттонъя вить интыоссы вань, арлы быдэ район 700 сюрс тонна му вӧй кыске. Кыӵе югдурзы музъем ужасьёслэн Завьял ёросын, тодмо кадь луиз. Татын шуг- секытъёсты вормыны туртто, выль ужан амалъёсты уже кутыса. Озьы ке но, няньзы уз тырмы. Нош кыӵе югдур огъя республикая? Правительстволэн Тӧроезлэн воштӥсез Михаил Иванович Назаров пусъемъя, республикаын улӥсьёс туэ палэнысь ваем нянез сиёно луозы. 1994-тӥ арын сярысь, туэ нянь кык поллы ӧжытгес утялтомы. Югдур кылем арын кадьгес ик луоз. Соин ик 41 сюрс тонна чабей ваемын луоз Америкаысь, нош ар ӵоже асьмелы 161 сюрс тонна нянь кулэ. Азьло аръёсы сямен ик республикамылы юрттозы Оренбург, Ставрополь но мукет улосвылъёс. Бусы ужъёсты ортчытон понна, республикалы толэзяз 220 сюрс тонна вӧян-эстӥськон материалъёс кулэ. Сое бастыны коньдон висъямын Россия Федерациысь но асьме правительствоысь. Тӥни сыӵе ужпумъёс пӧлы арысь аре выйыса уло гурт хозяйствоын тыршисьёс. Республикаямы усто хозяйствос вань на, но соос, шӧдске, огъя югдурез тупатыны уг быгато. Т.Банникова. 1999 арын 2 августэ Н 733 Ижевск город Удмурт Элькун Кивалтэтлэн 1998 арын 2 ноябре кутэм "Интыяз кыллись ваньбуръя (недвижимое имущество) но соин сделкаос ортчытонъя правоосты кун ласянь пусъён но та мугъя ивортон понна дунъёс тупатон сярысь" 1018 померо постановленияз воштонъёс но ватсанъёс пыртон сярысь ПОСТАНОВЛЕНИЕЗ. Элькунысьтымы калыклы правоя юрттэт сётон но сое мерлык удысьн утён вылысь, Удмурт Элькун Кивалтэт пуктэ: 1. Удмурт Элькун Кивалтэтлэн 1998 арын 2 ноябре кутэм "Интыяз кыллись ваньбуръя но соин сделкаос ортчытонъя правоосты кун ласянь пусъён но та мугъя ивортон понна дунъёс тупатон сярысь" 1018 номеро постановленияз таӵе воштонъёс но ватсанъёс пыртоно: 5-тӥ, 6-тӥ, 7-тӥ пунктъёсты тазьы лыдӟоно: "5. Интыяз кыллись ваньбуръя но соин сделкаос ортчытонъя правоосты кун ласянь пусъён но та мугъя ивортон понна тыронъёслэсь мозмытоно: нимаз но юридической адямиосты - "Удмурт Элькунын интыяз кыллись ваньбуръя но соин сделкаос ортчытонъя правоосты кун ласянь пусъёнъя Регистрационной палата" юстицияя учрежденилэн но солэн филиалъёсыныз кун ласянь пусъён ужез кутскемзы сярысь Удмурт Элькунысь Юстицияя министерстволэн нимысьтыз уведомленияз верам дырлэсь азьло кун пусъет ортчытэмзы понна; сирота кылем но мумы-бубыосынызы аналтэм пиналъёслэсь правооссэс кун ласянь пусъёнэз быдэсъясь нимаз но юридической адямиосты; быдэ вуымтэ нылпиосты; быдэсак кун юрттэм улсын улӥсьёсты; Быдӟым Отечественной войнаын сӧсырмемъёсты; Советской Союзлэсь Геройёссэ, Социалистической Ужысь Геройёсты, Россиялэсь Геройёссэ, куиньзэ ик Слава но Ужъя Слава орденъёсты басьтэм адямиосты; 1-тӥ группаен сосыръёсты, пичиысен сӧсыр кылемъёсты; кулэм кузпалзылэсь интыяз кыллись ваньбурзэ кельтосэ (наследство) басьтэм кузпалъёсты. 6. Интыяз кыллись ваньбуръя но соин сделкаос ортчытонъя кун ласянь пусъён но та мугъя ивортон понна 50 процент тыронлэсь мозмытоно: Быдзым Отечественной войнаын ожмаськемъёсты но та радэ пыртэм адямиосты; Чернобыль АЭС-ын кышкыт адӟонлэсь бервылъёссэ быдтон-палэнтонэ пыриськемъёсты но та радэ пыртэм адямиосты; 2-тӥ группаысь инвалидъёсты; мукет кун улосвылъёсын ожъёсы пыриськемъёсты. 7. Интыяз кыллись ваньбуръя но соин сделкаос ортчытонъя правоосты кун ласянь пусйыку. Федеральной законэн тупатэм ичи уждунлэн быдӟалаезлэсь 10 процентсэ басьтоно: кун властьлэн ёзъёсызлэсь, кун управленилэн ёзъёсызлэсь но интыысь аскивалтонъя ёзъёслэсь, улон юртъёс лэсьтонэз азинтонъя Удмурт Элькун Кивалтэт Ваньбуретлэсь (Фонд), озьы ик Удмурт Элькунлэн коньдэтэз (бюджетэз) чотын, муниципальной кылдэтъёслэн (образованиослэн) коньдэтъёссы чотын улӥсь ужъюртъёслэсь; Россия Федерациысь Кивалтэтлэн 1996 арын 3 августэ юнматэм "Россия Федерациысь улон интызэс умоятыны кулэяськись гражданъёслы лэсьтӥськыны но улон инты басьтыны берыктонтэм вылысь субсидиос сётон сярысь" 937 номеро постановлениезъя, Удмурт Элькун Кивалтэтлэн 1997 арын 27 июне кутэм " Удмурт Элькунлэн бюджетэз чотын лэсьтӥськоны яке улон инты басьтыны берыктонтэм вылысь субсидиос сётонъя Поло-жениез юнматон сярысь" 650 номеро постановлениезъя но 1998 арын 27 мае кутэм "Военнослужащийёслэн статуссы сярысь" 76-ФЗ номеро Федеральной законъя улон интылы право басьтэм адямиослэсь"; ватсано таӵе пуштросэн 8-тӥ выль пункт: "8. Удмурт Элькунысь Коньдонъя министерстволы "Удмурт Элькунын интыяз кыллись ваньбуръя но соин сделкаос ортчытонъя правоосты кун ласянь пусъёнъя Регистрационной палата" юстицияя учрежденилэсь коньдонэз чакласа но интыяз уже кутэмзэ эскерыса возёно"; 8-тӥ пунктэз 9-тӥ пунктэн лыдъяно но тазьы лыдӟоно: "9. Постановленилэсь быдэсъяськемзэ эскероз Удмурт Элькунысь Юстицияя министерство. Та постановлениез кутэм дырысен ар ортчыса, Удмурт Элькунысь Юстицияя министерство солэн быдэсъяськемез сярысь ивортоз Удмурт Элькун Кивалтэтлэн Президиумаз". 2. Удмурт Элькун Кивалтэтлэн 1998 арын 2 ноябре кутэм "Интыяз кыллись ваньбуръя но соин сделкаос ортчытонъя правоосты кун ласянь пусъён но та мугъя ивортон понна дунъёс тупатон сярысь" 1018 номеро постановлениеныз юнматэм Удмурт Элькун улосвылын интыяз кылись ваньбуръя но соин сделкаос ортчытонъя правоосты кун ласянь пусъён но та мугья ивортон понна тыронъёслэн радзы, дьгрзы но амалъёссы сярысь Положение таӵе воштонъёс но ватсанъёс пыртоно: ватсано таӵе пуштросэн 2-тӥ, 3-тӥ, 4-тӥ выль пунктъёс: "2. Интыяз кыллись ваньбуръя но соин сделкаос ортчытонъя правоосты кун ласянь пусъён но та мугья ивортон понна дунэн лыдъяське Удмурт Элькун улосвылын одно ик тыриськись коньдон взнос, кудӥз басьтӥське: интыяз кыллись ваньбуръя правоосты кун ласянь пусъем понна; интыяз кыллись ваньбурен сделкаос ортчытонъя кун пусъет понна; кӧня но мамында ваньбур возььны лэзён сярысь правоосты кун ласянь пусъем понна; кун ласянь пусъем правоос сярысь ивортон сётэм понна, озьы ик: интыяз кыллись ваньбуръя но соин сделкаос ортчытонъя правоосын Огъя кун реестрысь выписка сётэм понна; ивор возььны быгатӥсь адямилы интыяз кыллись ваньбур объектъёсын сведениос басьтэмъёс сярысь ивортон сётэм понна; право юнматӥсь документъёслэн пуштроссы сярысь сведениос сётэм понна; нимаз адямиослэн интыяз кыллись ваньбуръя объектъёслы правооссы сярысь огазеям сведениос сётэм понна; правоез кун ласянь пусъён сярысь ыштэм, вужмем яке ярантэм луэм свидетельство интые выльзэ сётэм понна. 3. Интыяз кыллись ваньбуръя но соин сделкаос ортчытонъя правоосты кун ласянь пусъён но та мугья ивортон понна дун (отӥяз - кун пусъет понна дун) басьтӥське юридической но нимаз адямиослэсь, кинлы дурбасьтыса быдэсъясько интыяз кыллись ваньбуръя но соин сделкаос ортчытонъя правоость! кун ласянь пусъён но та мугъя ивортон ужъёс. 4. Кунэн пусъем но правоосты пусъем сярысь ивортон сётэм понна дунлэн быдӟалаез тупатӥське, Федеральной законэн юнматэм ичи уждунлэсь быдӟалазэ нимысьтыз чаклам лыдпуслы унояса. Кун пусъет понна дун пуктӥське, адямилэн вазиськыкуз ичи уждунэзлэн толэзьлы быдӟалаез шоры учкыса. Ичи уждунлэн быдӟалаез яке кун пусъет понна дунлэн быдӟалаез воштӥськыку, тырем коньдон кутэм вазиськонъёсъя выльысь уг лыдъяськы ни. Кун пусъет понна дун нимаз басьтӥське котькуд пусъем уж но та Положенилэн 2-тӥ пунктаз верам вань ивортонъёс понна". азьвылъёссэ 2-тӥ, 3-тӥ, 4-тӥ пунктъёсты 6-тӥ, 7-тӥ, 8-тӥ пунктъёсын лыдъяно; 5-тӥ пунктэз тазьы лыдӟоно: "5. Кун пусъет понна тырем коньдон адямилэн вазиськемезъя берен сётӥське одӥг толэзь куспын таӵе учыръёсы: тупатэм дунлэсь тросгес коньдон тырыку - тырем но пуктэм дунъёслэсь быдӟалазэс чакласа; правоосъя Огъя кун реестре нимысьтыз гожтымтэ дыръя, вазиськись адями кун ласянь пусъёнлэсь палэнскыку, озьы ик правоосты пусъем сярысь ивортэмлэсь азьло сыӵе ивор басьтонлэсь куштӥськыку - тырем дун быдӟа; правоосты кун ласянь пусъён дырез тӥяку - тырем дунлэсь но та ужъёсты быдэстыны тупатэм дырлы тырыны пуктэм дунлэсь быдӟалазэс чакласа; законодательствоен чаклам инъет вылэ пыкиськыса, кун ласянь пусйыны пумит луон сярысь нимлыко (официальной) гожтэтэн вазиськыку"; 6-тӥ, 7-тӥ, 8-тӥ пунктъёсты куштоно. 3. Удмурт Элькун Кивалтэтлэн 1998 арын 2 ноябре кутэм "Интыяз кыллись ваньбуръя но соин сделкаос ортчытонъя правоосты кун ласянь пусъён но та мугъя ивортон понна дунъёс тупатон сярысь" 1018 номер постаиовленилы "Интыяз кыллись ваньбуръя но соин сделкаос ортчытонъя но та мугъя ивортон понна тыронъёслэн быдӟалазы" Приложениез выль сямен лыдӟоно: "1. Законодательствоен юнматэм дыре интыяз кыллись ваньбуръя но соин сделкаос ортчытонъя правоосты кун ласянь пусйыку, дун тазьы басьтӥське: 1.1. Интыяз кыллись ваньбуръя правоосты пусъем но правоез кун ласянь пусъем сярысь свидетельство сётэм понна: нимаз адямилэсь - Федеральной законэн юнматэм ичи уждунлэн 1,5 быдӟалаез ; юридической адямилэсь - 20 ичи уждун быдӟа. 1.2. Сделка ортчытэмез возьматӥсь документэ нимысьтыз гожтыса, интыяз кыллись ваньбурен сделка ортчытэмез пусъем понна: нимаз адямилэсь - Федеральной законэн юнматэм ичи уждунлэн 1,5 быдӟалаез ; юридической адямилэсь - 20 ичи уждун быдӟа. 1.3. Кӧня но мамында интыяз кыллись ваньбур возььны лэзён сярысь кун пусъет понна: нимаз адямилэсь - Федеральной законэн юнматэм одӥг ичи уждун быдӟа; юридической адямилэсь - 15 ичи уждун быдӟа. 1.4. Огья улон интыослэн ог люкетсы нимаз адямиослы вуэм сярысь кун пусъет понна: одӥг адямилэсь - та нунктлэн 1.1. подпунктаз юнматэм быдӟа дун; мукет адямиослэсь, та постановленилэн 5-тйӥ пунктаз пусъемъёссэ вератэк - Федеральной законэн юнматэм ичи уждунлэн быдӟалаезлэн 10 процентэз. 1.5. Ваньбур комплексэн лыдъяськись предприятилы кун пусъет понна - 100 ичи уждун быдӟа. 1.6. Интыяз кыллись ваньбуръя но соин сделкаос ортчытонъя правоосты кун ласянь пусъён понна, озьы ик пичи ужбергатӥсьёслы кӧня но мамында интыяз кыллись ваньбур возььны лэзён сярысь кун пусъет понна - Федеральной законэн юнматэм 15 ичи уждун быдӟа. 1.7. Гараж, сад-бакча, дача возисьёслэн коммерцие пырисьтэм огазеяськонъёсазы интыяськем лэсьтӥськемъёсын музъем участокъёсты кун ласянь пусйыку, озьы ик со музъемъёсын сделкаос ортчытыку, нимаз адямиослэсь котькуд пусъён уж понна басьтӥське Федеральной законэн тупатэм одӥг ичи уждунлэн быдӟалаез. 2. Правоосты пусъем сярысь ивортон понна басьтйӥське: нимаз адямилэсь - Федеральной законэн тупатэм ичи уждунлэн 25 ипроцентэз; юридической адямилэсь - одӥг ичи уждунлэн быдӟалаез. 3. Интыяз кыллись ваньбуръя но соин сделкаос ортчытонъя правоосты 7 нуналозь пусйыку, тырон будэ 1,5 коэффициентэн, 15 нуналозь ке - 1,3 коэффициентэн". 4. Та постановление кужыме пыре ивор вӧлмытӥсь ёзъёсын печатлам нуналысен. 5. Постановленилэсь быдэсъяськемзэ эскерыса возёз Удмурт Элькунысь Юстицияя министерство. Удмурт Элькун Кивалтэтлэн Тӧроезлэн нырысетӥ воштӥсез Ю.С.Питкевич. Ижевск город, 1999 арын 2 августэ � 733. Удмурт Элькун Кивалтэтлэн Торосзлэн нырысетй воштйсеа В. Питкевич Челны вузкарон Ортчем арня пумын Ижевскысь Национальной музейын ортчиз "Челны ярмарка-99" адӟытон-вузкарон. Ижевскын улӥсьёс но городэ лыктэм куноос адӟизы но басьтыны быгатӥзы Набережные Челны городысь предприятиослэсь поттэм продукцизэс. Со сяна, та ужрадын пумиськылӥзы но азьланяз ӵош ужаны мылкыдзэс веразы Ижевскысь но Набережные Челны городысь ужбергатӥсьёс. В.Андреева. Шулдыръяськизы быдэс посёлокен Завьял ёросысь Хохряки посёлокын витетӥ арзэ ини пусъё гуртсылэсь нуналзэ. Кылем кӧс нуналэ отын улӥсьёс праздниксэс огазеязы физкультурниклэн нуналэныз. Нырысь ик йылпумъянъёс лэсьтэмын вал пӧртэм конкурсъёслы. Дышетӥсьёс пӧлын удысэзъя устоез луиз Людмила Густенева, воспитательёс пӧлын вормиз Ирина Сюрсина, хозяйственной ужез умойгес радъям Галина Вахрушева. Посёлокын бадӟым саклык висъяло улон но ужан интыосты чылкыт возёнлы. Ар ӵоже та удысын тужгес чупрес ужам нылпи садлэн коллективез (кивалтӥсез Людмила Колотова).Тужгес усто юртъерез вылэм Павел Тараненколэн семьяезлэн. Ӟеч кылъёс верамын вал физкультурникъёслы. Устоосызлы сётэмын коньдон кузьымъёс. Вераны кулэ на: та посёлокысь хоккеен шайбаен шудонъя мӧйыослэн командазы туэ Удмуртилэн чемпионэз луиз. Праздникын вал шулдыръяськонъёс, ӵошатсконъёс. Н.Иванов. Ульфат БАДРЕТДИНОВ ШУДОН пьеса Автор. Ойдолэ тодматскоме. Тани Григорий Николаевич - школалэн директорез, 49 аресъем йӧно пиосмурт. Кыӵе со, мае яратэ, кызьы ужа - ваньзэ азьланьын тододы. Семён Федотович - физикалы дышетӥсь, 27 аресъем. Туж яратэ аслэсьтыз кабинетсэ, уй но нунал отын пукыны дась. Анна Кирилловна - англи кыллы дышетӥсь, егит на, задор мылкыдо. Кылыныз олокытчы но вуттоз. Рево Карпович - 29 аресъем дышетӥсь. Кӧня ке дыггес, но ужзэ ӟеч тодэ. Таня - поездын проводница луыса ужась, Анна Кирилловналэн эшез. Автор - со мон. Зэмзэ вераса, мон - со мон гинэ ӧвӧл, дыр. Угось олокытчы но вуисько, куддыръя мукет адямиослэн малпанъёссылы но берытскисько. Табере кӧчоме одӥг ёросысь шоро-куспо гуртэ, вуыломе отысь школае. Ӵапак та школаен кивалтэ Григорий Николаевич. Тол каникул нуналъёсы школаын шер кылод пиналъёслэсь куараоссэс. Нош дышетӥсьёс ужын. Вуоно четверть сярысь сюлмасько. Тӥни Семён Федотович аслаз кабинетаз выль прибор дася. Быдэс кабинет тыр чузъяське Владимир Котковлэн "Яратэ" кырӟанэз. Семён Федотович но кырӟамъяське. Кӧня ке улыса, кабинетэ пыре школалэн директорез Григорий Николаевич. Сое адӞыса, Семён федотович магнитофонлэсь куаразэ пичиятэ. Григорий Николаевич. Нош ик тон, Семён Федотович, "яратондэ" бергатӥськод. Пеляд но уг пыры-а, мар-а? Семён Федотович. Шулдыр гур мултэс ӧвӧл. Чебер кырӟан чузъяськыку скалъёс но йӧлзэс тросгес сёто, пе. Григорий Николаевич. Классика - со классика. Солэсь кужымзэ скал но шӧдэ, вылды. Нош эстрада... Таиз... Семён Федотович. "Вожъёслы"? Озьы шуыны турттӥськоды кадь. Григорий Николаевич. Уг, уг. Эстрадной гуръёсты урод кареме уг поты. Но... мон музыкант ӧвӧл. Ваньзэ уд но вала: рок, поп... Семён Федотович. Туж вакчи но сумбрес валэктоно ке, рок- со публицистика, поп - проза но поэзия. Григорий Николаевич. Публицистика но проза пӧлы пыре ук! Семён Федотович. Но мон прозаез нимаз ӧй висъя, проза но поэзия шуи. Григорий Николаевич. Ярам, ярам. Кинлы - рок, кинлы - поп... Мон мукет ужпумен пыри татчы. Семён Федотович магнитофонзэ кысэ. Семён Федотович. Кылзӥсько, Григорий Николаевич. Григорий Николаевич. Кызьы валэктод ай тыныд... Семён Федотович. Котыръятэк-маратэк вералэ. Григорий Николаевич. Вообще-то, тон техникаез умой валаськод кадь. Семён Федотович. Машинады тӥяськиз, оло? Григорий Николаевич. Ӧз, ӧз. Марым... одӥг арбери лэсьтоно вал. Со кыкнамылэсь ик ужмес капчиятысал. Семён Федотович (паймыса). Кыӵе арбери? Григорий Николаевич. Алигес роноын веразы: одӥг школаын, пе, директорзы дышетӥсьёслэсь кызьы ужамзэс аслаз кабинетысеныз гинэ эскере на. Радио пыр. Кыӵе классэз кылзэмез потэ - кнопкаез зӥбе - и всё. Техника! Семён 1Федотович. Ин-те-рес-но! Нош дышетӥсьёс тодо-а директорзылэсь озьы кылзӥськемзэ? Григорий Николаевич. Уг, пе. Семён Федотович. Вот таиз тамаша! Григорий Николаевич. Вообще-то, умой со. Котькуд классэ радио пыртэммы луоз ук. Пушказ микрофон но интыяны быгатом. Перемена дыръя, урокъёс дыръя крезьгуръёс чузъяськозы. Тыныд но, завучлы, капчи луоз. Семён Федотович. Хм, дышетӥсьёс тодӥзы ке? Григорий Николаевич. Вордскымтэ чуньы вылын ум ворттылэ на, Семён Федотович. Тон нырысь вера: быгатод-а сыӵе система лэсьтыны? Семён Федотович. Быгато, дыр. Но... Григорий Николаевич. "Но"-эз кулэ ӧвӧл ни. Коньдон тыро - оскытӥсько. Кулэ ёзъёс аслыд утчано луоз. Эшшо огпол верасько: мон тыро, кӧня кулэ - тыро. Семён Федотович. Соку договор гожтоно... Григорий Николаевич. Мынам договорен вырем уг поты вал. Ачид валаськод: юалляськыны-мараны кутскозы... Вообще-то, радио пыртон пумысен договор гожтыны луоз. Асьмелэн, радиоточка сяна... Ачид валаськод... Семён Федотович. Интересно... Демократия, гласность вакытэ асьмеос таӵе... Григорий Николаевич. Валай, валай. Иське, мылкыдыд ӧвӧл? Семён Федотович. Кызьы шуо таӵе дыръя... Григорий Николаевич. И хочется, и колется. Озьы вераны турттӥськод-а? Семён Федотович. Мон утчасько, эскеро. Григорий Николаевич. Валасько: ваньзэ сое шуак-дуак уд лэсьты. Мон уг дыртытӥськы. Ку быгатод, ку дырыд луоз. Семён Федотович. Ёзъёс сюризы ке, лэсьтыны кема ӧвӧл. Григорий Николаевич. Ярам, иське. Семён Федотович магнитофонзэ нош ик лэзе. Чузъяське удмурт гур. Григорий Николаевич. Семён Федотович, мынам эшшо одӥг ужпумъя вераськонэ вань на. Семён Федотович. Мон кылзӥсько. Крезьгур люкетэ ке... Григорий Николаевич. Уг, уг. Мед шудоз... Семён Федотович, мон вунэтӥськем вераны... Семён Федотович. Мае? Григорий Николаевич. Алигес мон доры ветлӥз Рево Карповичлэн кузпалыз. Картэз пумысен кенешыны. Юылэ, тышкаськылэ, пе. Семён Федотович (паймыса). Рево Карпович юэ, пе? Григорий Николаевич. Кышноез озьы шуиз. Семён Федотович. Школае юыса лыктэмзэ адӟеме ӧвӧл мынам. Ма, асьтэос но тодӥськоды: Рево Карпович - усто дышетӥсь. Адямиос но уродзэ уг верало. Григорий Николаевич. Писпу куар тӧлтэк уг выры, шуо. Семья кусыпъёсты тодыны шуг. Кышномурт чагиськыны юнме шорысь ӧй ветлысал, дыр. Вообще-то, сыӵе кышноосты мон ачим но уг гажаськы. Корка пушкысьтыз кырсьсэ педло поттӥсь адями аслаз пыд улысьтыз вайзэ ӵогисьлы кельше. Семён Федотович. Мон ӧйгес вала ма вераны турттэмдэс... Григорий Николаевич. Вообще-то, аслэсьтым янгышме ивортӥсько тыныд. Кенешоно вылэм Рево Карповичен. Нош асьмеос сое кутӥм но экскурсие ыстӥм. Анна Кирилловнаен ӵош. Мар малпалоз Рево Карповичлэн кузпалыз? Тодӥськод ук: Анна Кирилловнаен йырин керетонъёс вал ни. Семён Федотович. Рево Карпович экскурсие ачиз куриськиз ук. Нош Анна Кирилловнаез кужмысь сямен ыстӥмы. Дышетӥсьёс пӧлысь мыныны мылкыд карисьёс ӧз сюре. Ярам коть, Анна Кирилловнамы вань - ноку уз пумитъяськы. (Серемез потэ.) Григорий Николаевич (паймыса). Мар-о серекъяськод? Семён Федотович. Аслам верамелы сереме потӥз. Григорий Николаевич. Номыр сыӵе-таӵезэ ӧд вера кадь ук?! Семён Федотович. Ноку но уг пумитъяськы шуи кышномурт сярысь. Григорий Николаевич (серемез потэ). А-а... Шедьтӥськод тон оломар но. Чузъяське крезьгур. Автор. Экскурсие мынӥсь пиналъёс поездэз витё. Соос асьсэ понна верасько. Рево Карповичен Анна Кирилловна палэнынгес сыло. Рево Карпович. Кӧняетӥ вагон асьмелэн? Анна Кирилловна. Тямысэтӥ но укмысэтӥ. Рево Карпович. Малы озьы? Билетъёс ӧз тырме шат одӥг вагонэ кариськыны? Анна Кирилловна. Одӥгез - плацкарт, мукетыз - купе. Валамон? Рево Карпович. Ничего не валамон. Анна Кирилловна. Визьтэм улэ эн аналскы. Ай ноу ю. Рево Карпович. Ма, валэкты умойгес. Анна Кирилловна. Плацкарт - пиналъёслы, купе - асьмелы. Рево Карпович. Малы озьы? Анна Кирилловна. Нош ик "малы"? Пиналъёс нокытчы уз пыре. Бускель вагонысь соосты чакланы секыт уз луы... Нырысьсэ уд ветлӥськы, дыр, ук экскурсие, Рево Карпович? Рево Карпович. Нырысьсэ... (Пальпотэ.) Анна Кирилловна. Зэм-а? Рево Карпович. Нырысьсэ... тонэныд ӵош. (Серекъяло.) Радио пыр иворто, Москва - Ижевск поездэ пуксьыны дыр вуиз шуыса. Анна Кирилловна (пинальёслы вазиськыса). Пиос но нылъёс, тӥ тямысэтӥ вагонэ пуксиськоды. Билетъёсын интыос пусъемын. Света, тани басьты билетъёсты, тон ваньзэ ачид валаськод ни. Ми Рево Карповичен укмысэтӥ вагонын дас куинетӥ купеын. Юанды-марды кылдӥз ке, милемыз шедьтоды. Рево Карпович. Асьтэлы валес котыр басьтэ... проводниклэсь. Ваньмыз валамон ке, по вагонам! Автор. Поезд дыртэ азьлань. Вагон питранъёс асьсэлэсь гурзэс мытӥзы. Рево Карпович но Анна Кирилловна укно вӧзы пуксизы. Рево Карпович. Москвае ветлӥсьёс но ӧвӧл ни шат? Анна Кирилловна (паймыса кадь). Малы? Рево Карпович. Тани ук асьмелэн но кык интымы буш. Анна Кирилловна (серекъя). Рево Карпович, тон номыре но валамтэед на. Мон быдэс купеез басьтӥ ук. Ӵошен мынон понна. Малы-о паймид? Рево Карпович. Ӧй, ӧй паймы. Марым... Анна Кирилловна. Марым, пе, кырым пыдсын. Рево Карпович. Молодец, шуисько! Анна Кирилловна. Вот сыӵе кылдэ ик витисько вал мон. Рево Карпович. Молодец шуыны шуи но ачим маке уг оскиськы. Тон, Анна Кирилловна, пумит вал кадь экскурсие мыныны? Оло, монэн йырин? Анна Кирилловна (серекъя). Серемез поттӥськод. Рево Карпович. Романтикалэн тактикаез аслаз. Ай лайк чу плэй! Шудыны яратӥсько, валад, дыр, верамме? Рево Карпович. Сю граммтэк уд вала тонэ. Ей богу. (Юонзэ поттэ.) Анна Кирилловна (паймем кадь кариськыса). О-о, тынад аслад тактикаед вылэм. Рево Карпович (пальпотыса). Кыӵе тактика? Таин (чиньыеныз бутылкаез тэшкылля) ӧжыт ке но шулдыргес луоз. И всё. Нокыӵе политикаез ӧвӧл. Анна Кирилловна. Тодӥсько мон тактикадэс но, политикадэс но. Рево Карпович. Я, я, пичияк гинэ. (Юонзэ стаканъёсы лэзе.) Таиз тыныд, Анна Кирилловна. Анна Кирилловна. Мед сылоз интыяз ик. Оло, градусэз кӧнялы ке пичиялоз. Рево Карпович. Курытсэ уд юиськы, оло? Анна Кирилловна. Мугез ӧвӧл кадь. Рево Карпович. Шедьтэмед сюлмаськон. Юон гинэ мед луоз - муг сюроз. (Стаканзэ бушатэ.) Оъ, курыт ке курыт. (Ымаз нянь басьтэ.) Ойдо ю, Аня. Анна Кирилловна. Анна Кирилловна вал мон та минутозь. Рево Карпович. Ну... табере Аня. Яралоз-а озьы? Анна Кирилловна. Собере Анечка? Рево Карпович. Ну... Анечка шуисьёс монтэк но вань, дыр. Тон кадь чебер, веськрес нылмуртлы синмаськисьёс... Анна Кирилловна (Рево Карповичлэсь веранзэ куспетӥ карыса). Я, тырмоз! Сыӵе кылъёсты кылэме ик уг поты! Рево Карпович. Марым... Вождэ поттыны уг малпаськы вал. Просто интересно: малы тон, Аня, уд бызиськы? Анна Кирилловна (интыысьтыз султыса). А-а, валай. Тынад сю граммед вирад пыӵаны кутскиз, Рево Карпович. (Солань-талань ветлыны ӧдъя.) Рево Карпович. Ну, сю грамм - со сю грамм, просто мынам кемалась юаме потэ вал ни. Анна Кирилловна. А-а, озьы, иське. Сыӵе юанэд али гинэ кылдӥз шуыса малпай вал. (Рево Карпович вӧзы пуксе.) Рево Карпович (нылмурт шоры учкыса). Уггес валаськы мон тонэ, Аня. Зэмзэ верасько. Анна Кирилловна. Котькуд адями - мадиськон. Куд-огзэ лякытэн тодыны луэ. Мукетсэ кулытозяд но уд вала. Мон асме секыт мадиськон пӧлы пыртӥсько. Рево Карпович. Интересно... Анна Кирилловна. Мылкыдыя мон улӥсько. Куддыръя сюлэмылэсь но уг кылзӥськиськы. Тани, мылкыды ӝутскиз ке, тонэ ӟыгыръяны быгато. "Ай лав ю", - шуо но. Тон ачид но уд вала "пленэ" сюремдэ. Нош "сьӧлтаськемдэ" ӵуказеяз вань калык азьын вераны быгато. Рево Карпович. Тон сыӵе ӧвӧл, Аня. Анна Кирилловна. Школаын мон одӥг пӧртэм, гуртын - мукет, татын - воксё аспӧртэм. Куддыръя мынам эрико бурдъёсы кылдо. Соос кытчы нуо, отчы ик мынӥсько. Соин ик нокинлы уг сёты эрикме таланы. Рево Карпович. Кыӵе эрик сярысь вераськиськод тон? Анна Кирилловна. Аслам эрике сярысь. Рево Карпович. Дунне вылын одӥг адями но эрико ӧвӧл, дыр. Мон озьы малпасько... Собере... Анна Кирилловна. Собере, Рево Карпович, умойгес кылзӥськоно. Мон шуи: ''Куддыръя". Валад-а? Куддыръя мынам эрико бурдъёсы кылдо. Рево Карпович. Ей богу, валантэм адями тон, Аня. (Кӧня ке чалмыт улэмез бере, Анялы стакан мыче.) Ойдо, ю ни та лэземзэ. Анна Кирилловна. Мед пукоз на. Мон юытэк но вераськыны быгато. Рево Карпович. Ма, мон кыл шерон понна уг юиськы. Мылкыдэз кӧня ке капчиятыны кулэ, соин гинэ... Анна Кирилловна (куспетӥ карыса). Мынам мылкыды ас интыяз. Рево Карпович (стаканэ юон лэзьыса). Ас интыяз шуиськод? Сое вырӟытоно, дыр. Ну, пичияк ке но. Анна Кирилловна интыысьтыз султэ но солань-талань ветлыны ӧдъя. Анна Кирилловна. Мылкыдэз вырӟытыны кема ӧвӧл, нош интыяз пуктыны... Ачид валаськод... Рево Карпович. Валасько, валасько, Аня. (Стаканзэ бушатэ.) Анна Кирилловна. Мае валад, Рево Карпович? (Интыяз пуксе.) Рево Карпович. Тон ялан: Рево Карпович, Рево Карпович. Просто Рево шуыны уг луы-а? Анна Кирилловна. Просто Мария кадь? Рево Карпович. Мед луоз тон сямен. Нош мон тонэ просто Аня шуыны уг дӥсьтӥськы. Анна Кирилловна. Тон сое валай, шуид-а? Рево Карпович. Сое но, мукетсэ но. Анна Кирилловна. Мае мукетсэ но? Рево Карпович. Мон ведь синтэм ӧвӧл. Пельёсы но кыло на. Анна Кирилловна. Мае соос кылӥзы-адӟизы? Рево Карпович. Аня, мон подсудимой кадь луисько ни тон азьын. Пластинкамес ум воштэ-а? Анна Кирилловна. Рево Карп... Рево, а шуид бере, б-ез но верано, дыр. Рево Карпович. Веранэз кыльымтэ ни. Ваньмызлы тодмо: тон - аспӧртэм адями. Ма, али гинэ астэ секыт мадиськонэн ӵошатӥд. Анна Кирилловна. Собере мар? Рево Карпович. Одӥг нуналэ тынад бурдъёсыд кылдӥллям-а, мар-а. Тӥни соку директормылэсь йырзэ берыктэмед. Али но со сыӵе йырыныз ветлэ кадь. Анна Кирилловна (гор-гор серекъяса). Мон ведь тодӥсько кинлэсь йырзэ берыктыны. Рево Карпович. Валамон. Директор киын асьмелэн улонмы... Нош Семён Федотович маин юрттэ тыныд? Малы сое но курикад? Анна Кирилловна. Семён Федотович, шуиськод? Со но кивалтӥсь ук! Завуч - бадӟым кивалтӥсь. Рево Карпович. А-а, кивалтӥсьёс котырын гинэ тон бергаськод. Ми кадьёс шоры удгес учкиськы, иське? Анна Кирилловна (серекъяса). Тон, Рево, кышномурт кадь малпаськыны эн кутскы вал. Рево Карпович. Кышномуртъёслэсь кызьы малпаськемзэс тодыны шуг. Мон таки уг валаськы тынэсьтыд кивалтӥсьёсын кивалтыны кутскемдэ. Анна Кирилловна. Кивалтыны? Рево Карпович. Бен! Тон азьын соос пыдчиньы йылазы ветло ни. Тонэн йырин одӥгзэ дышетӥсьмес ужысьтыз улляны туртто вал, мукетыз выговор басьтӥз. Нош тыныд кузьыт но, кезьыт но ӧвӧл. Анна Кирилловна. Мон сыӵе герой-а, ма? Мон асме уг но тодӥськы вылэм. Рево Карпович. Тодымтэ улэ эн аналскы, Аня. Тон ӧжыт гинэ кык семьяез ӧд куашкаты... Анна Кирилловна. Нош тон, Рево, уд кышкаськы-а мынэсьтым? Кышноед вожась ведь. Рево Карпович (паймыса). Кытысь тодӥськод? Анна Кирилловна. Мынам но синъёсы, пельёсы вань. Рево Карпович. А-а, озьы, иське... Мон, Аня, тазьы малпасько: кышномурт вожаны кулэ, сотэк со картсэ яратэмысь дугдоз. Анна Кирилловна. Нош кышномуртлэсь вожанзэ пуромытон понна, тӥ мукет кышноос котырын берганы кулэ. Озьы-а? Рево Карпович. Ну... кызьы шуод... Пиосмурт - со пиосмурт. Анна Кирилловна. Кышномурт но адями пӧлы пыре. Номыр выльзэ ӧм вералэ кадь? Рево Карпович. Тынад но малпанэд аслад, мынам но. Миру - мир! Автор. Рево Карпович интыысьтыз султэ но Анна Кирилловна вӧзы пуксе. Со малпа вал Аняез ӟыгыртыны. Но ӵапак соку... Вождэс эн поттэ, гажано эшъёс, та выллем югдуръёсын тӥ трос пол пумиськылӥды ни. Сыӵе дыръя милемыз, гожьяськисьёсты, пыкылэмды потэ: малы тужгес тунсыко интызэ кугӟаса куштӥськоды? Но улонын витьымтэ шорысь учыръёс ӧжыт шат? Соос уродзэ яке ӟечсэ ваё, тазалыкмес утё яке быдто, серекъято яке бӧрдыто. Куддыръя валаны ик уг луы сыӵе учыръёслэсь кызьы, малы кылдэмзэс. Оло, инмар озьы лэсьтыны косэ... Озьыен, Рево Карпович малпа вал Анна Кирилловнаез ӟыгыртыны. Тӥни ӵапак соку купелэн ӧсаз йыгаськись луиз. Таня, проводница со. Таня (ӧсэз усьтыса). Чай юоды-а? Рево Карпович. Чай? (Анялы вазиськыса.) Тыныд, Аня, кулэ-а? Анна Кирилловна. Ӧвӧл. Рево Карпович. Соку одӥг стакан гинэ... Таня. Пожалуйста. Эшшо маке кулэ на-а? Рево Карпович. Тау. Туж сюлмаськись вылӥллямды. Кемалась ни вал пумитаме таӵе проводницаез. Таня. Осто шу! Рево Карпович. Малы осто? Таня. Син уськытод. Рево Карпович. А-а, валай. Анна Кирилловна (Таня вӧзы матэктыса, шыпытак). Мон, Таня, ӝоген тон доры вуо. Вераськон вань. Таня (шыпытак). Лыкты, возьмало. Чай юом. (Рево Карповичлы но кылымон куараен.) Ӟеч луэ, ӟеч шутэтске! Рево Карпович. Ӟеч. Таня кошке. Рево Карпович. Тон, Аня, проводницаен но тодматскыны вутскемед ни, лэся. Анна Кирилловна. Мон... кофезэ юай вал... Ӧвӧл, пе. Рево Карпович. Кофе юэмед потэ? Анна Кирилловна. Йыры кӧня ке висе, соин кури вал. Рево Карпович. Ялкары, иське. Яке та сю граммез ю. Йырыд но висемысь дугдоз. Анна Кирилловна. Сю грамм, мон сямен, йӧнатэ ялан юись муртэ гинэ. Рево Карпович. А-а... Анна Кирилловна (шуак, Ревоез куспетӥ карыса). Рево, мон пиналъёсты эскеро ай. Рево Карпович. Я, я. Только кема эн ветлы. Анна Кирилловна купеысь потэ. Рево Карпович (ас понназ). Эх, шу! Сыӵе нылаш! Ӟыгыръя но ӟыгыръя вылэм... Только сямыз секытгес кадь. Капчиен уд шедьты сюлэмызлэсь усьтонзэ. Но... тон, Рево, пиосмурт! Пи-ос-мурт! Автор. Рево Карпович выиз чебер малпанъёсаз. Ойдо мед малпаськоз. Али солы люкетӥсь ӧвӧл. Нош Анна Кирилловна вуиз... Кытчы шуоды?Ӧз, пиналъёс доры со ӧз мыны. Вуиз Таня проводница доры. Тӥни ӧсаз йыгаське ни. Таня. Кин со? Анна Кирилловна. Таня, усьты... Таня (ӧссэ усьтыса). Ойдо, ойдо, Аня. Солань-талань ветлӥсьёс, ӧсъёсты эскерисьёс трос. Соин ик ӵогаськыса улко. Анна Кирилловна. Али син куспысьтыд нырдэ но ишкалтозы. Мон номырлы уг паймиськы ни. Таня. Пуксьы, Аня. Мон кофе пӧзьтыны пукто. Анна Кирилловна. Мон понна эн сюлмаськы. Тӥни дась чаед но вань. Таня. Чай - со чай. Кофе но юоно. Оло, тонэ кофеен сектазы ни? Анна Кирилловна (паймыса). Кин? Таня. Кавалеред. Укыр йӧно кадь со. Анна Кирилловна (серекьяса). Йӧны кадь йӧно! Ачиз пунысюллы кельше. Таня. Кин бон со сыӵе? Дышетӥсь-а? Анна Кирилловна. Дышетӥсь. Котьмалы оскись адями. Таня. Тон пӧяськыны быгаткод, Аня, котькин оскоз. Анна Кирилловна. Вань пиослэн йырвизьзы одӥг пала берга. Таня. Малы озьы шукод? Анна Кирилловна. Тодӥськод-а, Таня, со оскиз быдэс купеез кык муртлы басьтӥ шуыса верамелы но. Таня. Кызьы? Анна Кирилловна. Вот озьы! Буш интыосты адӟыса шуэ: "Москвае ветлӥсьёс ӧвӧл ни". Мон соку ик меӵкытӥ: "Та купеез асьмелы басьтӥ". Таня. Оскиз-а? Анна Кирилловна. Нырысь кӧня ке паймиз кадь. Собере номыр ӧз юалляськы ни. Кытысь, кӧня коньдон тыри буш интыос понна - солы майбыр улон. Юон поттӥз. Сектаны монэ турттӥз. Ну, Таня, ачид тон ваньзэ валаськод... Мон сыӵе спектакльёсы уг пыриськиськы. Таня. Тон, Аня, мукет ролез шудкод. Созэ мон тодко. Анна Кирилловна. Кыӵе мукетсэ? Таня. Тон ачид ваньзэ тодкод. Пиослэсь йырзэс бергатыны яраткод. Роман бӧрсьы роман. Анна Кирилловна. Тон, Таня, эн серекъя, тани куто но роман гожто. Таня. Ачид сярысь? Анна Кирилловна. Пиослэн яратон вотэсэ сюремзы сярысь. Таня. Соку астэ вотэс карод. Анна Кирилловна. Тонэ но, Таня, герой карыны луоз. Таня (паймыса). Монэ? Анна Кирилловна. Эн паймы. Ачид мадьылӥд одӥг романэд сярысь. Таня. Вашкала дыръя вал со... Анна Кирилловна. Вашкалазэ туннэ нуналэ берыктыны шуг ӧвӧл. Кылын котьмае лэсьтыны луэ. Таня. Кылын ӧвӧлзэ но вань карод. Анна Кирилловна. Куддыръя пӧяськыны но кулэ, дыр. Сотэк шӧг йӧтоз та улонмы. Таня. Шӧг, пе! Кузьытэз, кузялэз сяна, маиз вань меда та дуннеын? Анна Кирилловна. Югытэз! Таня. Нош югытэз ваньмызлы тырме меда? Кинлы ке нуналлы быдэ вужерын улоно луэ. Анна Кирилловна. Соиз озьы. Кинлы ке югыт но сьӧд адӟиське. Таня. Ой, Аня, асьмеос воксё философьёс кадь зульком. Тӥни ву но быректӥз. Кофе юом ни. (Стаканъёсы кофе лэсьтэ.) Анна Кирилловна (кофеез веръяса). Уф, укыр пӧсь ук кофеед! Тылын пӧсятӥд-а, мар-а? Таня. Мон ачим но тыл кадь пӧсь но, лек но. Анна Кирилловна. Ой, ой, тон вӧзын пукыны ик кышкыт, иське ӝуатод... Таня. Эшъёсме мон уг обидьты. Нош кин мыным пумит султэ... Ачид тодкод; сыӵеослы маза уг сёткы. Анна Кирилловна. Ой, Таня, озьы улыны секыт, дыр, ук? Таня. Мар секытэз! Вожпотонэз пушкад возёд, оло? Анна Кирилловна. Вожпотонэз воксё исано ӧвӧл. Таня. Кызьы? Анна Кирилловна. Вождэ поттыны турттӥсьёслэсь кужмогес кариськоно. Таня. Вераны гинэ капчи. Акылес-мыкылесъёслэн выремзы ӵемонэ ик вуэ ук, соку чидалод на, пе! Анна Кирилловна. Вот угось! Тросэз тон сямен малпасько. Собере чигем чиданзэс интыяз пуктыны уг быгато. Вожпотонме кутыны ӧй дышысал ке, монэ кемалась ужысьтым уллясалзы ни. Таня. Кивалтӥсьёсыныд умой улкод, дыр. Анна Кирилловна. Кызьы валано умой шуэмдэ? Таня. Ачид тодкод ваньзэ... Анна Кирилловна. Чагиськыны мон уг яратӥськы. Пыриськыны но уг быгатӥськы. Ай лайк чу плэй! Шудыны яратӥсько. Таня. Шудыны!? Пиосъёсын-а? Анна Кирилловна. Умойтэм малпаськиськод, Таня. Таня. Номырзэ ӧй вала. Директореныды ӧд кӧла-а, мар-а? Анна Кирилловна. Кӧлонозь вуттоно ӧвӧл! Соку шудон быре. Пиосмурт вормисе потэ. Тон солы кулэ уд луиськы ни. Таня. Тон, Аня, умойгес валэкты ми кадь визьтэмъёслы. Анна Кирилловна. Ваньзэ валад ни. Таня. Нош завучты? Со но синмаськемын-а тыныд? Анна Кирилловна. Директормылэсь чиданзэ эскерон понна, мон завуч котырын берганы кутски. Семён Федотович ачиз но ӧз вала кадь мынам сакам сюремзэ. Табере директорен завуч ог-огзы шоры кырыж учкыло. Мыным со тунсыко потэ. Таня. Нош одӥг пол соос тынэсьтыд шудэмдэ валазы ке? Анна Кирилловна. Мед! Соку мон шудон правилоосме вошто но мукет сяменгес выро. Таня. Ма, озьы улыса, егит дырыд но ортчоз. Семья кылдытэмед уг поты-а? Анна Кирилловна. Ваньмызлы ик семьяен улыны гожтэмын ӧвӧл, шӧдске. Котькытын вань правилоослэн гожъёссы сьӧры тэрытэк кылемъёс. Кин тодэ, оло, мынам но адӟонэ сыӵе? Таня. Тон егит на ай, Аня! Куд-огез мӧйымыса гинэ куззэ шедьтэ. Анна Кирилловна. Визьтэмгес дыръя бызьыны кулэ, дыр. Берло бырйиськыны кутскиськод. Собере огез но уг яра ни. Мон доры дэмчиос, курасьёс ветлыло, сыӵеослы от ворот поворот сётӥсько. Кулэзы ӧвӧл. Таня. Огез но ӧз яра на, иське? Анна Кирилловна. Мынам ведь сюлэмы вань. Соя мон улӥсько. Сюлэмыя ӧвӧл ке, котьма кар: яратыны уг кутскы. Таня (интыысьтыз султыса). Аня, кофемы копак сӥям ни, лэся? Анна Кирилловна (кофеез веръяса). Ӧвӧл, ӧвӧл. Ӵапак таӵеен юыны яратӥсько. Автор. Ӧс сьӧрын кылӥське Рево Карповичлэн куараез. Рево Карпович. Ан-на! Кытын тӥ?! (Кыӵе ке ӧсэ йыгаське). Вождэс эн поттэ вал, тӥ доры егит нылмурт ӧз пыр-а? Анна нимо... Анна Кирилловна... Кытчы луиз меда со? Пиосмурт куара. Кытчы пыроз?! Мукет вагонын яке ресторанын пуке, луоз. Анна Кирилловна (ӧс палагес кариськыса). Таня, ӝоген со татчы вуоз. Кытчы ватском? Таня (паймыса). Малы ваткод солэсь? Анна Кирилловна. Адӟем уг поты юэм муртэ! Таня. Осто, бырод тонэн! Инсьӧрысь лыктэм мурт кадь выркод! Анна Кирилловна. Эн усьты ява, Таня. Татын нокин ӧвӧл, шу. Таня. Я, я, эн кышка. Рево Карпович йыгаське проводницалэн ӧсаз. Рево Карпович. Проводница, усьтэ, пожалуйста! Адями ышиз! Валаськоды-а, адями ышиз! Таня (ӧс сьӧрысен). Кин со? Мар луиз? Рево Карпович. Усьтэлэ... мон дас куинетӥ купеысь. Мон Аняен... Анна Кирилловнаен ӵош вал. Со... пиналъёсты эскерыны потӥз но... кытчы ке ышиз. Таня. Кызьы ышиз? Рево Карпович. Усьтэлэ ӧстэс, ваньзэ валэкто... Таня. Тӥ кадь кудӟемъёсын акыльтӥ ни! Тӥляд котьку кинды ке ыше яке пегӟе. Рево Карпович. Вождэс эн поттэлэ: мон кӧня ке юи. Но зол кудӟемын ӧвӧл. Мон зэмзэ верасько - Анна Кирилловна ышемын! Куинь вагонысь эскери ни - ӧй шедьты. Валаськоды-а - ӧй шедьты. Таня. Тышкаськиды-а, мар-а соин? Рево Карпович. Ӧй, ӧй... Таня. Соку сюроз! Рево Карпович. Малы уд усьтӥськелэ ӧстэс? Алигес гинэ ӟеч мылкыдын мыным чай ваиды вал, табере мукет сямен вераськиськоды. Таня. Мыным ялкарыны кулэ. Рево Карпович (куаразэ будэтыса). Ялкарыны?! Ышемын а-дя-ми, нош тыныд ялкарон! Возьмато ай мон ялкарон! (Мукет вагонэ кошке кесяськыса.) Ан-на Кирилловна! Ан-на! Анна Кирилловна. Утча, утча, оло, юэмед тӧлӟоз. Таня (кышкатскыса). Соид маке уз даурты-а? Анна Кирилловна. У-уз, небыльток со. Автор. Тӥни со вакытэ поезд питранъёс, пелез вандымон куара поттыса, бергамысь дугдӥзы. Вагонын кесяськем, бӧрдэм куараос кылӥсько. Анна Кирилловна (кышкаса). Авария?! Таня. Стоп-кранэз кыскизы! Анна Кирилловна (Таня шоры дол-дол учкыса). Рево Карпович? Таня (ӧссэ усьтонъяз). Со, дыр. Небыльтокьёс пӧлын котькыӵеез вань. Чузъяське крезьгур. Автор. Школалэн директорез Григорий Николаевич солань-талань ветлэ: кабинетэзлэсь кузьдалазэ мерта, кожалод. Ымнырыз - чырс шу кисаль сием бере кадь. Ас понназ вераське, кыӵе ке ролез дышетэ шуыса малпалод. Григорий Николаевич. Ох, та быгылес йырме пачкатозы ни. Анна Кирилловна ваньзэ сура-пожа... Вообще-то, ачим но янгыш. Рево Карповичез соин ӵош келяно ӧй вал. Ма карод на? Усем интые куро вальыны бер ни. Т-а-ак! Мар бордысен кутсконо ай Анна Кирилловнаен вераськонме? Котыръяса-а яке меӵак-а? Огез но солы уз яра. Асме ик серем кароз. Ох, кыл медаз вӧлдэ вал. Чибинез скал быдӟа карозы. Сыӵе ужын ваньзы мастер. Ой... (Шуак, мае ке тодаз вайыса.) Роное жингыртыны вунэтӥськем. (Жингыртэ.) Алло! Станислав Абрамович?! ӟечбуресь! О-о, мон, мон. (Вис.) Ужъёс... асьтэос тодӥськоды... (Вис.) Соосын ӧй вераськы на. Туннэ... (Вис.) Валай. Станислав Абрамович, та учыр сярысь вылӥын медаз тодэлэ вылэм. Тӥледлы но умой ӧвӧл. (Вис.) Валай, валай, Станислав Абрамович. Тӥ ку вуоды ми доры? (Вис.) А-а, валай... Марым... тӥледлы бакча сиёнъёс но дасямы вал. (Вис.) Ма, ми сое сюлмысь... Школа садысь. (Вис.) Я, я, ваньзэ валай. Озьы ик каро. Ӟеч луэ! (Телефон трубказэ понэ.) Да-а... Автор. Кабинетэ пыре Рево Карпович. Рево Карпович. Ӟечесь-а, Григорий Николаевич! Григорий Николаевич. Пуксьы, Рево Карпович... (Ӝӧк вылысьтыз бумагаосты бугыръя.) Тани счёт вуиз "ужамдылы". Рево Карпович. Счёт? Григорий Николаевич. Вот угось! Вить миллион манет тыр! Рево Карпович. Чугун сюрес... Григорий Николаевич (куспетӥ карыса). Вот, вот, ваньзэ валаськод вылэм. Поездэз дугдытэмэд понна со. Рево Карпович. Мон-а, мар-а ваньзэ тырыны кулэ? Григорий Николаевич. Кин, иське? Анна Кирилловна? Школа? Рево Карпович. Табере мон быдэс ар уждун басьтытэк ужаны кулэ. Озьы-а? Дорысь но ӝоген уллялозы. Григорий Николаевич. Рево Карпович, мон тыныд верай вал ук - Анна Кирилловнаен эн герӟаськы. Рево Карпович. Кыӵе герӟаськон сярысь вераськоды? Асьтэос косӥды ук экскурсие ӵош мыныны. Григорий Николаевич. Соиз озьы. Нош поездын сыӵе-таӵе кусыпъёсты ӧй вал-а, мар-а? Рево Карпович. Григорий Николаевич, мон объяснительноям ваньзэ гожтӥ. Мыным уд оскиське, оло? Григорий Николаевич. Оскисько, оскисько. Но... Анна Кирилловна тонэ гинэ янгыш каре. Рево Карпович. Тӥ сое умой тодӥськоды... Григорий Николаевич. Вот угось, умой тодӥсько. (Вис.) Ярам, тазьы каром, Рево Карпович. Вить миллион пӧлысь кыксэ тон тырод. Кыксэ - Анна Кирилловна. Одӥгзэ мон шедьто. Рево Карпович (паймыса). Анна Кирилловна соглаш-а? Григорий Николаевич. Соиз мынам сюлмаськонэ. Рево Карпович. Валай, валай, Григорий Николаевич. Григорий Николаевич. Ваньзэ тон ӧд вала на. Та вераськеммы пумысен кыл медаз вӧлмы вылэм. Нокин но медаз тоды. Кузпалэд но. Кыл вӧлмиз ке, ваньзэ ачид тырод... штрафтэ, шуисько. Мон уг кышкатӥськы. Югдур сыӵе. Но мон тонэ гажасько, соин ик тырондэ но пичиятыны малпай. Нылпиослэсь ужаса поттэм коньдонзэс но... Рево Карпович (куспетӥ карыса). Валай, валай, Григорий Николаевич. Григорий Николаевич. Юанэд вань на-а? Рево Карпович. Кӧня дыр куспын тыроно? Григорий Николаевич. Кык толэзьскын. Рево Карпович. Да-а, пунэмаськытэк уз луы... Ярам, ваньмыз валамон. Ӟеч луэ! Григорий Николаевич. Ӟеч. (Рево Карпович кошке. Директор интыысьтыз султэ но солань-талань ветлыны ӧдъя.) Таиныз одӥг кылэ вуим кадь. Пиосмурт - со пиосмурт. Кышномуртэн... ӧйтӧд, мар пӧрмоз. Маке но кема ӝега Анна Кирилловна. Автор. Григорий Николаевич вамыштэ ӧс пала. Тӥни соку Анна Кирилловна пыре кабинетэ. Григорий Николаевич. Анна Кирилловна, пожалуйста, ортче тапала. Тани пукон, пуксе. Анна Кирилловна. Тау. Григорий Николаевич (пукон вылэ пуксьыса). Котыръяса - мар ум улэ, Анна Кирилловна. Югдур таӵе. Тани школае счёт вуиз. Поездэз ӝегатэмды понна, вить миллион манет тыроно. Анна Кирилловна. Кин ӝегатӥз, со ик мед тыроз! Григорий Николаевич. Анна Кирилловна, мон тӥледыз янгыш уг кариськы. Рево Карповичез но валаны кулэ. Поездэз со юнме шорысь ӧз дугдыты, вылды. Тӥ сярысь малпаськиз. Сюрес вылын оломар но луэ ук. Анна Кирилловна. Рево Карповичез жаляса, мон но штраф тырыны кулэ? Озьы-а? Григорий Николаевич. Эн пӧсекъялэ, Анна Кирилловна. Мон ваньзэ радызъя верало. Рево Карпович штраф тыроз. Ну... шуом, ӝынызэ. Кылемзэ школа шедьтоз. Тӥледлы, Анна Кирилловна, одӥг куронэ вань - пожалуйста: али вераме сярысь нокинлы эн поттылэ вал. Штраф пумысен юазы ке, тыри, шу. Анна Кирилловна. Эшшо кыӵе кылъёс вералом на? Ролез быдэсак дышетоно. Сотэк юмоке сюрод. Григорий Николаевич. Мон шудыса уг вераськы, Анна Кирилловна. Анна Кирилловна. Улон - со шудон, Григорий Николаевич. Тӥледлы та вакытэ директорлэсь рользэ шудыны сётӥзы. Мынам аслам роле. Тӥ эшшо выльзэ дэмласькоды. Григорий Николаевич. Философие ум вые. Отчы пырим ке... Дыр ӧвӧл. Анна Кирилловна. Соку ваньмыз валамон. Мыным, Григорий Николаевич, выль роль эн сётэ. Мынэсьтым артист пӧрмымтэ. Григорий Николаевич. Артистъёс тынэсьтыд дышетскыны кулэ. Тӥляд талантты, Анна Кирилловна, аспӧртэм. Анна Кирилловна (шудыса, исаса). Номырлы но ярантэм... Григорий Николаевич (шудонэз азьланьтыса кадь). Номырин но дунъянтэм. Анна Кирилловна. Кышъетлэсь но кулэтэм. Григорий Николаевич. Анна Кирилловна, пожалуйста, монэ валаны тырше. Мон тӥледыз гажасько... Соин ик штраф но тырытэме уг поты. Анна Кирилловна. Мынэсьтым лулме коньдонэн басьтыны турттӥськоды? Григорий Николаевич (паймыса). Мар тӥ? Сыӵе малпан йырам ноку ӧз пырылы. Адямиез гажанлэн мертэтэз мукет. Анна Кирилловна. Кыӵе? Григорий Николаевич. Сое одӥг кылын уд валэкты... Автор. Вождэс эн поттэлэ, эшъёс. Асьмеос чаляк гинэ кӧчоме физикая кабинетэ. Отын Семён Федотович огназ пуке. Туннэ со крезьгур уг кылзы. Сюлмаськонэз та вакытэ мукет: тодэмез потэ, мар верасько Григорий Николаевич но Анна Кирилловна. Директорлэсь куронзэ со быдэстӥз, но та сярысь нокин уг тоды на... Григорий Николаевич но. Радиоприёмникын кылӥське Григорий Николаевичлэн куараез. Григорий Николаевич (радиоприёмникысь). Анна Кирилловна, вообще-то, мон тӥледлы оскисько. Анна Кирилловна. Кыӵе оскон со? Григорий Николаевич. Оскисько тӥляд ӟеч сюлэмдылы. Анна Кирилловна. Туж бадӟым тау, Григорий Николаевич, ӟеч кылъёсты понна. Но огез валантэм: школалэн коньдон пуйыез узыр-а, мар-а? Кытысь сомында коньдон сюроз?!. Григорий Николаевич. Соиз сярысь эн сюлмаськелэ. Анна Кирилловна. Но... (Гуньдэм кадь луэ.) Гозыез котькӧня пун, солэн пумыз вуэ. Соку... Григорий Николаевич (Анна Кирилловнаез куспетӥ карыса). Анна Кирилловна, та вераськонлы точка пуктоно ни. Гозы пунонэз ӧвӧл. Анна Кирилловна. Ярам, иське, точка пуктом. Монэ ӧтьытэк но точка пуктыны быгатысалды. Григорий Николаевич. Э-э, озьы гинэ уг луы. Мынам тӥледыз адӟеме потэ ке вал? Тӥлесьтыд вераськемдэс кылэме? Анна Кирилловна. А-а, озьы-а, ма?! (Серекъя, кабинетысь потэ.) Чузъяське крезьгур. Григорий Николаевич (ас понназ). Вот озьы, Анна Кирилловна! Мон тынэсьтыд йырдэ берыктыны быгато ай. Автор. Семён Федотович паймемын, онграм кадь пуке. Семён Федотович (ас понназ). Штраф? Вить миллион? Марлы сое ватыса возе меда? Нош Рево Карпович мар вераськиз? Эх, кылзыса ӧй вуы ведь... Автор. Семён Федотович магнитофон кассетазэ бергатыны кутскиз. Со вакытэ Григорий Николаевич дышетӥсьёслэн кабинетазы пыриз. Григорий Николаевич. Ӟечбуресь, эшъёс! Кыӵе мылкыдды? Куараос. - Умоесь. - Ӟечесь... - Номыр ӧвӧл кадь... Автор. Витьымтэ шорысь кабинет тыр радио вераськыны кутске. Григорий Николаевич (радиоысь). Котыръяса - мар ум улэ, Анна Кирилловна. Югдур таӵе. Тани школае счёт вуиз. Поездэз ӝегатэмды понна вить миллион манет тыроно. Григорий Николаевич (дышетӥсьёс дорысен). Мар со? Анна Кирилловна (радиоысь). Кин ӝегатӥз, со ик мед тыроз. Григорий Николаевич (дышетӥсьёс дорысен). Семён Федотович? Кытын со?! Автор. Григорий Николаевич дышетӥсьёс дорысь бызьыса сямен потэ... Чузъяське крезьгур. Автор. Улон азьланьтӥське. Нош мон пьесаме таин йылпумъясько. Тӥляд йыр вадьсады яркыт мед пиштоз пӧсь шунды, уин мед ворекъялозы тӧдьы кизилиос. Сюлэмъёсады мед луоз чылкыт яратон... ___________________________ 1 Юалэ - валэктозы Удмурт Республикаысь югдурез утёнъя министерствоысь дежурной люкетэзлэн кивалтӥсез Анатолий Ильич Радыгин туэ 25-тӥ августэ 10-ысен 12 часозь телефон пыр меӵак кенешон ортчытоз. Юалляськыны луоз 55-73-33, 55-74-74 но 55-75-75 телефонъёсъя. Калмез кузя 2. Малягуртэ уг ветлы паровоз И. НЬЫЛЬ ар талэсь азьло "Удмурт дунне" газетын ужасьёс экспедиция ортчытӥзы ни вал. Соку сюресмы кутскиз республикамылэн уй палаз - Глазов ёросысь Сева гуртын. Отысен ми ортчим Удмуртилэн лымшор дорозяз - Ватка дурын сылӥсь Крымская Слудка черкогуртозь. Таяз учыре мынӥськом шаермылэн шор люкетэтӥз - шунды ӝужан паласен Киров улосозь. Шонерзэ вераса, нош ик Ваткаозь. Та кык сюресъёслэн пумиськон интызы ӵапак укша Малягурт посёлокен. Бен, соку вуылэммы али но ӧз вуны на. Кызьы йырысь потоз ёрк-ёрк тӧдьы губи сиеммы сярысь тодэ ваён? Зоя но Василий Абашевъёсты 1995-тӥ арын пумитамы вал, тэльысь губиен быдэсак тырмытэм корзинаосын бертыкузы. Александр Кузнецовмы соку ӧз чидатскы, кузпалъёслэсь сылалтэм губизэс веръятэк. Жаль, туннэ со пӧламы ӧвӧл ни. (Экспедициын одӥг нунал но уг ортчы, ыштэм эшмес маин ке сэрен коть буре вайытэк.) Улонысь кошкем Василий Андриянович Абашев но - вань даурзэ нюлэскын ортчытэм воргорон. Мукетыз азьло тодмомы лесопунктэн уг кивалты ни - улэгес васькытӥллям. Но бадӟымез воштӥськон сюбег чугун сюресэн герӟаськемын. Витьтон ар ӵоже посёлокез сюдэм-вордэм маке отын туала улӥсьёслы кулэ луымтэ ни. Уг, соосыз янгыш карыны уг яра. Вакыт воштӥськиз уго. Выль машинаос кылдӥзы, нюлэс ичигес кораны ӧдъязы, Игра леспромхоз но (отчы пыре Малягурт лесопункт) копак "пуксиз". Посёлокысь мӧйыослэн верамзыя, коръёсты чугун сюрестӥ поттон туж дунтэм усе вал, визьмо муртъёс таӵе секыт аръёсы со чотын трос пайда поттысалзы. Ма, визьмоос барыш уськыто. Но асьсэ сямен. Шӧртчи ужбергатӥсьёс кӧня ке километр сюресысь корт рельсъёсты вузаллям ни - соос угось оломалы но ярало. Тӥни сыӵе бизнес... Та палъёсы азьло вуылыкумы тодыны ӧм быгатэ вал посёлок нимлэсь кытысь потэмзэ. Таяз учыре валэктӥсь шедиз. Пӧйшурась Николай Пушкарев тазьы вераз: - Посёлоклэн нимыз "малевой" кыл бордысь кылдэмын. Война дыръя, куке татчы вуизы нырысетӥ нюлэс корасьёс, тэлез Калмез кузя келяллязы. Озьы ик шуылӥзы - малевой сплав. Посёлокын трос вал удмуртъёс. Соосъя ик кошкиз, вылды, Малягурт ним. ИИ. УЙ ӴОЖЕ люкаськем бус пумен тӧлӟе ни. Тямыс час котырын вуим Малягурт лесничестволэн контораез доры. Огшоры пу юртлэн пырон азяз дасо пала воргорон пуке. Кин вераське, кин тамак кыске. Машиналэн кымысысьтыз экспедицилэсь пуссэ адӟыса, пиос валатскизы, журналистъёс вуизы шуыса. "Светлый путь" райгазетсэс лыдӟиллям вылэм ни. - Я бен вералэ ни улэм-вылэмды сярысь - ми сое тодон понна лыктӥм дорады, - вазиськиськом нюлэсчиослы. - Саник борды ӧм кутске на, но сыӵе дыр ӝоген вуоз ни кадь, - оло серекъяса, оло секыт улонлэсь акыльтыса сачкытӥз кыллы устоез. - Малы озьы? Тӥляд котьма вань ук: чорыг, губи, олокыӵе но мульы, тэль но тани кыӵе йӧно сылэ на, - шуг-секытъёссэс тодӥськом ке но, юромо заводиськом пиосты. - Кхе, чорыг... Ма, Калмез вамен колошаен потыны луэ ни, - кыӵе ке анайзэ тодаз вайыса сялӟиськиз та дырозь шып пукем воргорон. - А мульы сярысь ке, тодӥськоды-а, кӧня кужым быдтоно луэ, сое ведра тыр бичан понна? Базарын гинэ узы-боры чебер адӟиське... Воргоронлэсь бугырскем мылкыдзэ лапкатыны тыршыса выжиськом уж сярысь вераськонэ. - Мар-о мадёнэз? Адӟемды потэ ке, ойдолэ делянкае, ми али отчы мынӥськом, - биньгозыез кияз кутӥз кыллы шаплы пиосмурт. Володя Чирков вылэм со. Кызьы ке соку ик шӧдӥськиз, таиз мукетъёсызлэсь улон шоры сазь синмын учкыны быгатэменыз висъяське шуыса. - Вот тӥ шуиськоды, татын котьмар вань, - огдырлы буйгатскем воргоронлэн сэпез нош пӧсьтэм, лэся. - Милям туэ картофкамы но чик уз луы. Кынмиз со, Петровкае, июль шорын, татын куать градус кезьыт кариськиз. Соку ик картофка пуд супырӟиз. Кияр- помидор сярысь веранэз ӧвӧл ни. Георгий Юсаевмы, берло аръёсы бакча ужез яратыны кутскем мурт, фотоаппаратсэ ик уськытэ ни вал: - Кызьы озьы? Можгалан чик ӧз кынтылы. Пӧяськоды, дыр? - Эн оске. Но тодэ: Малягурт аспӧртэм азе интыяськемын, улыге, мукет сямен вераса, бадӟым котлованэ. Соин ик куазь но туж висъяське. Тани артэ ик Новые Зятцы, отын ялан кӧня ке градуслы шунытгес луэ. Милям быдэс посёлокын одӥг яблокпу но, вишня но ӧвӧл - уг будо. Куакъёс кызьы ке возисько ик. ИИИ. ЛУОЁ нюлэс сюрестӥ машина берзэ олань-талань сэмберъяса мынэ. Тани-тани кудаз ке кожонын бекмыльскоз кадь. Но таӵе интыетӥ укыр каллен мыныны уг яра - питранэд луое мур лэзиськиз ке, "валдэ" пӧсятозяд донгано луод. - Тани вуим, - анекдот веранзэ куспетӥ карыса вазиз Владимир Николаевич. Тэль шорын - сайккем инты. Ог палаз кыскамын кызьпу коръёс, мукет палаз пужым люкамын. - Лесничество нюлэс дасянэн вырыны кулэ ӧвӧл ке но, план сёто, - маде Чирков. - Санитарной рубка шуон маке ортчытоно луэ. Олокызьы но тыршиськом ватсаса коньдон поттыны. Но малпамъя уг пӧрмы. Кин басьтоз та нюлэсэз? - киыныз шонтэ лесник зӧк пужым коръёс шоры. - Таӵе кыдёкысь сое поттоно ук. Кыллёз-кыллёз но... сисьмоз. Асьмелэн милям ужасьёсмы но ӧвӧл. Палэнысь басьтӥсь утчаны моӵмы уг тырмы, лэся. Огъя верано ке, ваньмыз мыдлань лэсьтӥське. Со дыре нюлэс пумен сайка ни. Кык пиос мотопилазэс кутыса кошкизы тэлез погыръяны. Мукетъёсыз нимысьтыз тракторен коръёсты огинэ кыскало. Владимир Николаевич соослэсь кӧня лэсьтэмзэс пыд кунчияз понэм тетраде пусйылэ. - Ми, лесничествоын ужасьёс - государственой адямиос, уже кутэмын, нюлэсэз утён понна, - валэктэ Чирков. - Но ми ум шӧдӥське кун ласянь сюлмаськонэз. Та ласянь нюлэс хозяйство, оло, гурт хозяйстволэсь но зол аналтэмын. Но гуртоос коть асьсэдыз фермерын эскерыны быгато, нош ми... Тани огдыре кутским вал бугро ӵупонэн рос-прос вырыны. Кин вузалляз, кин холодильниклы яке телевизорлы воштылӥз. Табере озьы уг луы ни. Бугро шедьтыны луэ матысьгес. Нош татысь коръёсты городэ вуттон туж дуно усе. Я, лесничествоын ужасьёс коть созэ тодо: нюлэсэз чаклано луоз ӵуказе но, бӧрысь но, озьыен, коть пичи уждунэн ке но, уж луоз азьланьын но. Озьы вераны уг луы лесопунктысь рабочийёс сярысь. Таосызлэн ӵуказе нуналзы - леспромхозлэн кивалтӥсьёсызлэн киязы. Быгатӥзы ке соос огъя ужез радъяны, улон азьланьскиз. Ӧз пӧрмытэ ке, воргоронъёс доразы пуконо луозы. Али соослы ушъяськыны номырин. Делянка басьто ке но, уж уг ӧръяськы. Малы? Дышем сяммы люкетэ, лэся. Ялан маке но уг тырмы. Погыртоно нюлэс вань, солярка быре. Эстӥськон шеде, техника тӥяське. Трактор "улӟе", кузёез погра. Тӥни сыӵе эгес. ИВ. МАЛЯГУРТЪЁСЛЭН одӥгез бадӟымез сюлмаськонзы - ужлы ёрмон. Вазен, куке татын, паськыт производство сяна, нылпи сад но пекарня, столовой но больница вал, со ваньмызлы тырмылӥз. Тросэз бергазы узкоколейка котырын. Табере шерез кышномурт уже ветлэ. Пиос пӧлын но ужтэк кылемъёс ичи ӧвӧл. Егитъёс ӝытъёсы ма карыны уг валало. Кин но со, оло, семья но кылдытысал ни - уг луы. Кисыяд копейкаед ӧвӧл ке, маин-о тэркы-пуньы ик басьтод? Нош кытын улод? Школаез быдтэмъёсын ӵош калго посёлокысь ог дасо ар талэсь кошкемъёс. Соос туртто вал выжызэс городэ яке райцентре лэзьыны, отын квартира басьтыны. Уноезлэн озьы ӧз пӧрмы. Осконзы быриз. Табере анай-атайёссы дорын уло. Бен, утчасез шедьтэ. Николай Павлов лесниклэн верамезъя, солэн кузпалыз нунал куспын кык ведра кудымульы бичам но базарысь ваем ог 400 манет - картэз сомында коньдон толэзь ӵоже но уг басьты. Но та уж капчиен уг сётскы. Нюлэскысь ческыт ваньбурлы кулэяськисьёс трос. Кылем арын соос уката но уно вылӥллям. Ягмульыез, пе, вожен октыса нуиллям. Туэ мульы трос будымтэ. Соин, вылды, "ау" кесяськисьёслэн лыдзы чутрак кулэсмиз. Собере бензинлэн дуноямез но туж шӧдӥське. Игра администрациын тазьы веразы: ӵектӥськом, пе, вал ужтэк кылемъёслы пудо вордонэн вырыны, пособие чотын кунян но парсьпи люкылыны. Но малягуртъёс сыӵе дэмланлы пумит кариськиллям. Чӧлскиллям пролетар сямзы вылэ: милям атайёсмы- песятайёсмы нюлэс коразы, пудо ӧз вордэ, ми но мылкыд ум кариське кыедэн вырыны. Кӧня ке муртлэсь юалляськи та пумысен. Огымысь кадь шуизы: сыӵе веран шонер ӧвӧл, малягуртъёс ваньзы сямен гидазы пудо возё, сотэк, шуо, кемалась быргысалмы ни. Мон малпасько, администрациын но ӧз пӧялэ, гуртоос но шонер пусйизы. Уго вераськон мынэ ужтэк пукисьёс сярысь. Вожзэс медам поттэ но, пӧлазы вань ук коньдонэн пособиез гинэ возьмаса улӥсьёс, сыӵеослэн мултэс вамыш лэстэмзы уг поты. В. АЛЕКСЕЙ Яковлевич Тимофеев - Малягуртын улӥсьёс пӧлысь одӥгез мӧйыез. Татчы со витьтон ар талэсь азьло вуиз. Кизнер палъёсын будэм удмурт пияшез ремесленной училище бере сюрес вуттӥз Игра нюлэскы. Атаез, фронтэ кошкыса, чиптэм-чаптэм ышиз. Выжыосыз гуртэ кылизы. Малягурт посёлок соку кылдэ гинэ вал ай. - Армие ветлӥ но, снова татын ужаны куськи, - лымшор удмуртъёслэсь вераськон манерзэс ӟуч кылъёсын сураса вера Тимофеев. Посёлокын асьме выжыос ӝыныезлэсь уно ке но, удмурт сямен вераськисез туж ичи. Соин, вылды, мӧйыос но шугъясько. - И вот вуж знакомойёс шуо: айда, пе, скоро новую машину дадут. Озьы ик кыли, кышнояськи, на родину бертэм ӧз ни поты... Алексей Яковлевич леспромхозын тодмо адями вал. Кык арлы быдэ сямен солы выль трактор сётылӥзы. Кыӵеез но ӧз ортчы киосыз пыр? Умой тодэ на газогенераторной машинаосты но. Таосыз паровоз кадь ужало вал. Бускельёсызлэн верамзыя, Тимофеевлы куке но Социалистической Ужысь Герой ним сётыны туртто вылэм. Тупамтэ. Ӧвӧл тырмем дышетскемез. Собере кисыяз партбилетэз но вылымтэ. Леспромхозлы висъям зарни кизили мукет адямилэсь гадьзэ чебертӥз. Али ветеран пенсиын ни. Нылпиосыз яна потӥзы, кышноез сопал дуннее дыртӥз. Но уг сётскы Алексей Яковлевич шуг-секытъёслы. Кибашлы воргорон лесопунктлы тӥр ныд лэсьтэ. Адӟим ми солэсь товарзэ - вольыт пӧрам маке бордаз синмез ик кыске. Одӥг ныд понна лесопункт ньыль манет тыре, толэзяз ог 150-зэ басьтэ. Лыдъяды-а? Ай со сяна лэсьтэ на тусь, черсон но пулэсь мукет чыры-пыры вузъёс... Та сярысь гожтӥсько, ужлы ёрмем егит калыкез тодэ вайыса. ВИ. ПОСЁЛОК Сибирь трактлэсь кыдёке интыяськемын ӧвӧл ке но, татчы шедьыны капчи ӧвӧл. Бен, Игралась автобус ветлэ ик. Дэри ӧвӧл ке. Лымы пельтымтэ ке. Маке мукетыз уг люкеты ке. 400 мурт калыклы куинь телефон вань. Зол ук? Гуртоос райцентре туж кулэ муген гинэ потало. Городэ ветлӥсьёс чиньыен лыдъямон - уго ньыляз семьяын гинэ вань асьсэлэн машиназы. Умой коть, укмыс классэз татысь ик школаын пырпотыны луэ. - Адями котьмалы дыше. Озьы юнме вераллямтэ. Кин татысь аръёсын уг пота, улонэз уг тодо. Нош мукет интыосы вуылӥсьёсыз адӟо, кыӵе капканэ ми шедемын. Куддыр чылкак улэм ик уг поты та чёрт кушын, - тодэ лыктӥзы Владимир Чирковлэн сюлмысьтыз потэм кылъёсыз. ... Малягуртэ уг лоба самолёт. Отчы табере паровоз но уг вуылы ни. Бадӟым музъемен герӟась нюжа арысь аре вакчия. Ма луоз татын вуоно дауре? Кытчы кошкиськод, Россия? Ӧвӧл валэктон. Иван Лебедев, Георгий Юсаев (фото), Леонид Прозоров (суред), Владимир Потапов (авто). * Тани соос - нюлэсчиос. Азьплаз - Владимир Чирков. * Тэль дасясь Алексей Лукоянов. * Кинлы ке яралоз-а та ваньбур? Музъем ужасьёслы вазиськон Гажано эшъёс! Йылпумъяське бугрес но валантэм ЪЪ даур. Кыӵе вормонъёсын сое йылсаськом асьмеос, музъем ужасьёс, дунне вылысь котьмалэсь бадӟым узырлыкез - нянез - кылдытӥсьёс? Пӧлысьтымы тросэз берло аръёсы, государство гуртэз куашкатыны вырон вакытэ, политикалэсь пегӟыны, ватскыны выризы, валэктыны тыршыса, ми, пе, пичи адямиос. Ӧз пӧрмы. Лек туала вакыт ваньмес куасалтӥз. Туннэ даур йылпумъяськыку пукиськом асьмеос пень вылын малпаськыса, ма вите меда асьмеды азьланьын, выль даурын. Валаны кулэ ини крестьянъёс: котькызьы пегӟыны эн выры политикалэсь, солэсь уд ватскы. Музъем ужасьёс валазы: политикалэсь палэнсконо ӧвӧл, солэн пумитаз мыноно, сое кие кырмоно. Угось государстволэн гуртын кӧня ке ар ӵоже нуэм политикаез отысь улонэз уродмытӥз, музъем вылын тыршисьёслэсь ужзэс кулэтэм кариз. Арысь аре техникаен югдур начар луэ. Минерал удобрениос уг тырмо. Тулыс яке сӥзьыл вуэ ке, юаськом: кизём-а? Урожаез октыны-калтыны эстӥськон шедёз-а? Ми валаськом, гуртын югдур эшшо но секытгес луыны быгатысал, удысэз куашкатонлы пумитъяськисьёс ӧй ке луысалзы. Соос пӧлын - Россиысь колхозъёслэн но мукет амалъёсын хозяйствоез нуисьёслэн кенешсы, Аграрной (Агропромышленной) союз но фермер огазеяськонъёс. Та уже уно кужымзэ понӥз Россиысь гурт удысын ужасьёслэн профсоюззы. Озьы, дэмен нюръяськонын юнмаз крестьян движенилэн политической кужымез - Россиысь Аграрной партия. Политикалэсь нокытчы но уд пегӟы. Нош солэсь, озьы ик вуоно улонмылэсь, ӟечлыксэс ӝутом пӧртэм политической партиосты шонер дунъяны но бырйыны быгатӥм ке. Политической партиос - со парламентын пӧртэм законъёс. Пӧртэм законъёс - со экономикаысь соиз яке таиз удыс понна бюджет. Ойдолэ юалом, кыӵе политической кужым парламентын нюръяськоз гурт удыслы, отын улӥсьёслы коньдон понна? Берло дыре парламент уженыз ӟеч возьматӥз, асьмеос, гуртын улӥсьёс, нокинлы но кулэ ӧвӧл, асьме политической огазеяськонлы - Россиысь Аграрной партилы сяна. Мукет политической партиос крестьянъёс сярысь дыртыса, нялтас гинэ тодазы ваё. Кыӵе ке бадӟымесь стратегической планъёссы вӧзын крестьянъёслэн ужпумъёссы палэнэ кылё. Сыӵеос сярысь шуыны луоз: та партиос гуртлэсь укыр кыдёкын. Музъем ужасьёслэн нимынызы верасько ке но, яркыт ӧтёнъёссы сьӧрысь соос уг адӟо гуртлэсь зэмос кулэяськонъёссэ, уг валало шуг-секытъёссэ но ужпумъёссэ. Но туала политической нюръяськон туж лэчыт ортче, отын асьмеос, крестьянъёс, келяськом, бере кылиськом. Ойдолэ тодамы ваём, РСФСР-ысь калык депутатъёслэн, гуртысь быръемъёслэн, дэмен но кужмо луэменызы, съездлэн но вылӥ кенешлэн заседаниосаз кыӵе ӟеч законъёс но решениос кутэмын вал. Асьмеос быгатӥм утьыны гурт хозяйствоез Чубайслэн приватизациезлэсь, колхозъёс но совхозъёс вузамын ӧй вал городысь узыръёслы, кызьы луиз заводъёсын но фабрикаосын. Соку парламентын крестьянъёсын быръем депутатъёс сю витьтонлэсь трос вал. Тодамы ваём Кун Думалэн нырысетӥ ӧтчамаз быремъёсты, Россиысь Аграрной партилэн фракцияз огазеяськемъёсты. Коьку ик ӧз пӧрмылы ке но, ми быгатылӥм гурт понна пайдаё луись решениос кутылыны. Соку витьтонлэсь кӧня ке гинэ ятыр депутатъёс вал. Туала парламентын крестьян депутатъёс эшшо ӧжыт: Россиысь Аграрной партие пырисьёс кызь котыр. Валамон ини, тамында кузя (Кун Думалэн вить процентэз) гуртоос понна пайдаё ужаны туж секыт. Ма вите гуртэз азьланьын, кыӵе луоз асьмелэн улонмы, ваньмыз со трослы герӟаськемын соосын, кинэ быръём Кун Думае вуоно быръёнъёсын. Ваньмызлы тодмо, Россия Федерацилэн Конституциезъя Кун Дума законэз кылдытъясь ёз гинэ уг луы, со озьы ик - кун властьлэн представительной органэз. Озьыен, парламентын луыны кулэ обществоысь валтӥсь социальной группаослы дурбасьтӥсь депутатъёс. Россиысь миллионъёсын адямиос гуртын уло но ужало бере, озьыен Кун Думаын соосын ыстэм адямиос луыны кулэ. Угось асьсэос крестьянъёс асьсэлы кулэ луись законъёс бордын ужаны кулэ. Дыр вуиз ини валаны, парламентын крестьянъёсты возьматыны быгатозы асьсэос гинэ крестьянъёс. Гуртын улӥсьёс сюлмасько ке асьсэлэн, нылпиоссылэн, внукъёсылэн ӟеч улонзы сярысь, вуоно быръёнъёсын соослы огазеяськоно, Думае сюрес одӥг кужмо крестьян мыжыкен усьтоно, быръён нуналэ Россиысь Аграрной партилы но солэн крестьян кандидатъёсызлы дурбасьтоно. Дыр вуиз ини малпаськыны но ужаны! Сюлмаськоно асьмеос но гуртын ужасьёслэн вуоно поколениоссы сярысь! Крестьянъёслэсь политической куншетсэс ум сётэ нокинлы но, Россиысь Аграрной партилы сяна! Дэмен асьмеос, крестьянъёс но Россиысь Аграрной партия, вормом! М.Лапшин, Россиысь Аграрной партилэн кивалтӥсез. Улонэз кырӟан кадь вал Удмурт радиоын татчыозь ужатозям, пӧртэм тунсыко адямиосын пумиськылыны кылдӥз ни. Азьпалан но соос трос луозы ай шуыса оскисько. Туж уноез пӧлысь котькулы вунонтэм кылизы, дыр, Васса Кирилловна Виноградоваен пумиськылэмъёсы. Кырӟан-веранэн узырлэсь но узыр шыкысэзлэсь оглюкетсэ ке но ас калыкезлы кельтон мылкыд вуттӥз сое радиое. 1974-тӥ арын сӥзьыл пал, оло нош, арня ӵоже гожъямы ми Васса Кирилловналэсь тодэ ваёнъёссэ, кырӟанъёссэ. Ми доры со кыӵе ке празднике кадь ветлылӥз. Сяська пужыё бадӟым кышетсэ керттыса, йыг-йыг гинэ вамышъяса, ассэ туж веськрес возьыса пыроз вал кабинетэ. Зӥб-зӥб гинэ вераськыны кутскоз, отын ик жинграк гинэ серектоз, улонысьтыз кыӵе ке серемес учырзэ тодаз вайыса. Нош, студие пырыса, микрофон доры ке пуксе, чылкак воштӥське, тодэ ваёнъёсаз вые, кырӟанъёсыз пӧлын пыласькыны кутске. Соку гожъям магнит лентаосты табере утьыса возиськомы Удмурт радиолэн зарни фондаз. Туннэ мынам лыдӟисьёслы ӵектэме потэ Васса Кирилловналэн тодэ ваёнъёсысьтыз кӧня ке люкетъёссэ. Соос ваньмыз ик герӟаськемын кырӟанъёсын. Васса Виноградова ӧй вал юри дышетскем кырӟась. Озьы ке но, вань улонэз герӟаськемын кырӟанъёсын. Тани кызьы тодаз вае со Удмурт театрлэн сцена вылаз вуэмзэ: - Атаелэн бадӟым апаез, Анна Фёдоровна Фёдорова, гуртысьтымы школаез йылпумъямез бере, Карлыганын дышетскиз, собере Алнаш районын ик дышетӥсьын ужаз. Берло ни Казань университетысь рабфакын но та вузын дышетскиз, врач луиз. 1929-тӥ арын Ижын ужа ни вал. Монэ ас дораз нуны утисе, корка учкисе ваиз. Пыри мон профсоюзэ, нош соос эскеро, кызьы возё кузёос асьсэлэсь ужасьёссэс. Бадӟым апайлы со ӧз яра но, монэ эшез доры ужаны лэзиз. Со кузё кышное но врач вал, картэз - инженер. Нош бускель кышнозы туж шаплы маке, партийной вал - Мария Андриановна. Со косэмъя, мон заводэ токаре интыяськи. Отын комсомолэ кутӥзы, лэзизы пропагандистъёслэн куать толэзьем курсъёсазы. Сое йылпумъяса, заводын кышномуртъёс пӧлын уж нуыны кулэ вал. Женрук шуо вал соосты. Тӥни со курсъёсты йылпумъякумы, концерт дасямы. Возьматӥмы сое КОР (Клуб Октябрьской революции) клубын (али со интыын - "Ижмашлэн" культура дворецез). Кырӟай отын "Мемие гурзэ эстэм, дыр, но...", "Тӧдьы Кам кузя пароход кошке" кырӟанъёсты. Анаелэсь дэремзэ дӥсяй, пыдам - бирдыё катаос. Кырӟанме быдтӥ но гримме куштэме уг поты: туж чебер потӥсько аслым. Нош грим мыным лэсьтӥз вал театральной техникумысь Иван Денисов. Тӥни озьы пукыкум, дорам лыкто кык казак пиос. - Чебер апай, кытысь тон? - юало. - Алнаш районысь, Гондыргуртысь, - шуисько. - Усто кырӟаськод, - шуо. - Нош театрез тодӥськод-а? Удмурт театрез? - Ветлӥ, - шуисько. - "Вало ӧр куашетэ" спектаклез учки. - Уд мыны-а ми доры ужаны? - юало ни соос. - Ӵуказе дас кык часлы татчы лыкты. Нош театрын ужасьёс вылӥллям Кузьма Алексеевич Ложкин но Игнатий Гаврилович Гаврилов. Тӥни озьы мон 1931-тӥ арын 20-тӥ августэ, аслам вордӥськем нуналам, театрын ужаны ӧдъяй. Озьы мытӥськиз Васса Виноградовалэн выль улонэз. Соин ӵош ужаны кутскизы Клавдия Фанталова-Гаврилова, Вячеслав Волков, Яков Перевощиков но мукет егитъёс. Туж секыт вал геры но станок дорысь лыктэм нылъёслы, пиослы зэмос театрлэн сцена вылаз. Удмурт театрлэн артистъёсты дышетон амалъёсыз но ӧй вал на. Ӧй вал дась репертуар но, ӧй вал нокыӵе инъет но. Ваньзэ ик соос асьсэос кылдытӥзы, ваньмыз ик со соос дыръя кылдӥз. Егитъёслэн уго сцена вылын шудэмзы туж потэ вал. Тӥни татын ик туж кулэ луиз калык кырӟан-веранэз тодэмзы. Сое профессиональной театрлэн куронъёсыныз пӧлэстыса, зэмос театр кылдытӥзы. Васса Виноградовалэн нырысетӥ бадӟым ролез вал И.Г.Гавриловлэн "Кезьыт ошмес" трагедиысьтыз Жага. Трос гинэ курадӟоно-пӧсяно луиз егит артисткалы, оскымон образ кылдытон понна. Гуртысь эшъёссэ но тодаз вайылӥз, базаре но юри ветлылӥз, калыкез учкон, солэсь выросъёссэ, вераськон манеръёссэ шедьтон понна. Режиссёръёс шӧдытэк ӧз кыле Васса Виноградовалэсь тыршемзэ. Выль спектакльёсын валтӥсь рольёс сётылӥзы солы. "Камит Усманов" трагедиын Чабья вал, "Вуж Мултан" драмаын - Наталь, "Италмас" балетын - Италмас. Драматургъёслы но режиссёръёслы ӟеч тодмо вал: артистка трос кырӟан тодэ. Соин ик ӵем дыръя кенешо вал соин соизлэсь яке таизлэсь геройлэсь пуштроссэ кырӟан пыр яркытгес усьтон сярысь. Туж мылысь-кыдысь тодаз вайылӥз Васса Кирилловна "Вуж Мултанысь" Наталез: - Огпол репетиция бере фойеетӥ ортчисько (соку театр НКВД-лэн клубаз ужа вал). Михаил Петрович Петров мыным вазе: - Васюка туклячи, асьмелы Натальлы кырӟан шедьтоно вал (солэн апаез ми гуртэ быземын вал бере, ог-огмес туклячи-кудо шуылӥм). Шедьтомы-а, ум-а? - Ма, утчамы ке, шедьтомы, дыр, - шуисько. - Ойдо ай тодамы ваём, кызьы асьмеос пинал дыръямы шудон пӧлын кырӟаськом вал! - киосмес, тыбыр сьӧрамы кирос карыса, ваче кутӥм но фойеетӥ ветлӥськом, кырӟан утчаськом. Ӝож кырӟан кулэ. - Михаил Петрович, тон пиосмурт, тынад дорад ужед ӧвӧл, нош мыным ӝытазе спектакле лыктоно на, - шуисько. - А-а-а, мон соиз сярысь чылкак вунэтӥськем. Утча, шедьты кырӟан. - Тон но утча. Ӵукна уже лыктӥсько но, со отын ни, пальпотэ (нош Михаил Петрович туж чебер пальпотэ вал, пиньёсыз ӟар-ӟар тӧдьыесь, синъёсыз таӵе ик зоро кадь). Пальпотэ но юа: - Шедьтӥд-а, туклячи? - Нош тон шендьтӥд-а, Миша кудо? Мон шедьтӥ, - шуисько, - тыныд яралоз ке. Вай кырӟало. Со кылзӥз но быдэсак пумиз кадь. Та кырӟанэз мон егит дыръям ай гуртысен кылӥ вал. - Кельшиз-а? - юасько. - Туж зол! Ачид малпад-а? - Ӧй, калык кырӟан. Гурез но калыклэн. - Ма, тон ачид ик крезьгурчи но, ачид ик кылбурчи но, - шуэ Михаил Петрович. - Туж зол кырӟан. Тӥни озьы, та кырӟанэ спектакле пыриз. Трос гуръёсын тодматӥз Васса Виноградова крезьгурчиосты. Д.Васильев-Буглай, М.Коробов, И.Красноперов, Н.Греховодов, Г.Корепанов солэн кырӟаса сётэм гуръёсызъя выль кырӟанъёс кылдытъязы. Тросэз соос калык пӧлын уло. М.Коробов гинэ В.Виноградовалэн гур сётэмезъя гожтӥз "Етӥн", "Гожтэт", "Яратон" кырӟанъёссэ. Туж яркыт вералляз Васса Кирилловна валтӥсь куаралэн хорен ӵош кырӟанмез сярысь: - "Сюан" комедиын Туливитьлэсь рользэ шудӥз Анна Чубукова. Узыр картлы, Алангасарлы, сётыкузы, анаеныз люкиськыса кырӟа. Н.М.Греховодов туж чебер крезьгур гожтӥз. Хор кырӟа гурзэ, нош со, Туливить, кырӟан гурез "пужъятыса", аслэсьтыз гурзэ кырӟа. Тани, шуом, бадӟым басма кесэг (со - хорлэн кырӟамез), нош шор куара (солистка) со вылэ аслаз куараеныз турлы буёло пужыос пуктылэ. Трос спектакльёсын шудӥз Васса Виноградова, театрын ужатозяз. Берло рольёсыз пӧлысь (ма, ваньмыз пӧлысь, дыр, тужгес яратоноез вал Г.Красильниковлэн "Вуж юрт" повестезъя инсценировкаысьтыз Зоя. Спектаклез пуктӥз И.Кудрявцев. Но, котьку сямен озьы луэ: вольыт сюрес кыӵе ке могӟет борды одно пыкиське. Ленинградысь кыкетӥ студия бертэм бере, мӧйы артистъёслы театрын инты ӧз кыльы ни. Дышетскемды ӧвӧл шуыса, соосты уллязы. Берпуметӥ нуналозяз элькунысьтымы калык артистка (зэмос калык артистка!) театр сярысь малпанъёсын улӥз. Кыӵе потэ вал на солэн сцена вылын шудэмез! Ӧз, кулэ ӧз ни каре. Тӥни озьы, сцена вылысь кошконо луизы мукетъёсыз но, нырысетӥосыз артистъёс. Ма, соослэн тросэзлэн дышетскемзы уго ньыль класс сяна ӧй вал. Озьы ке но, пушкынызы, визьмынызы, мылкыдынызы, мугорынызы, сюлмынызы шӧдо вал театрлэсь, Удмурт театрлэсь аспӧртэмлыксэ, солэсь лул-сюлэмзэ. Сыӵеос пӧлы пыре Васса Кирилловна Виноградова но. Кызетӥ гудырикошконэ солэн вордӥськемез дырысен укмыстон ар тырмиз. Кемаласенгес со асьме пӧлын ӧвӧл ни ке но, шудэм рольёсыз, кырӟам кырӟанъёсыз, нимыз кема улозы на калык пӧлын. Л.Гусев, Удмурт радиоысь режиссёр, Удмурт Элькунысь культура удысысь дано ужась. Уждун но пунэмъёс Удмурт Республикаысь Правительстволэн кивалтӥсез Николай Ганза 19-тӥ августэ пумиськылӥз профсоюзъёслэн Федерацияя Советазы ужасьёсын. Отын эскеремын тазалыкез утён удысын ужасьёслэн куронъёссы. Кызьы тодмо, отын 5 куронъёссы пуктэмын. Соос пӧлысь тужгес сюлэмшугъяськытӥсез луэ бюджетысь коньдон басьтӥсьёслы огъя тарифъёсын сеткая (ЕТС) уждунэз будэтон. Николай Ганза бюджет удысын ужасьёслэсь 1-тӥ апрельысен уждунзэс будэтон сярысь туэ 5-тӥ апреле кутэм 386 номеро постановленизэ Правительство ласянь быдэстыны дась луэмзэ вераз. Та ласянь али уждун выль сямен лыдъяське ни, но пунэмъёсты тырон кутскоз октябрьысен. Коньдон ужпумъёсъя министерстволы косэмын ватсаса коньдонэз ыстыны сыӵе районъёсы, кытын бюджетысь уксё басьтӥсьёслы уждун тыремын ӧвӧл на март толэзь понна. Пусъемын: коньдон ужпумъёсъя министерство 17-тӥ августэ ёросъёсы но городъёсы толэзьем уждун мында коньдон келяз ни. Со сярысь Правительство ялӥз вал профсоюзъёслэн кивалтӥсьёсынызы 6-тӥ августэ ортчем пумиськонзы дыръя. Удмурт Республикаысь Правительстволэн секретариатэзлэн пресс-службаез. Шормуӵ Паймоно кадь: Сибирь тракт асфальтэн шобыртымтэ на, дэри куазен отӥ озьы гинэ уд ортчы, нош со борды итӥськем пичи сюрес карта кадь вольыт. Кызьы озьы? Мугез огшоры. Асфальт вуттэ "шормуӵе" - Селта но Игра вискысь пеймыт тэле интыяськем "Арлеть" станцие. Куашкам нюлэс посёлокъёс но тус-тас карем пудо гидъёсты адӟем бере оскыны ик уг луы, таӵе объект соослэсь кӧня ке дасо иськемын гинэ интыяськемын шуыса. Шунды шорын пӧртэм буёлъёсын чилясь гумыос, чебер кортъёсын шобыртэм юртъеръёс, азбарын радэн будӥсь астраос но мукет сяськаос, нимысьтыз дӥськутэ быдэскем ужасьёс - ваньмыз со "Арлеть", му вӧез зӧк гумыосъя келясьёслэн станцизы. Соку ик валэктом. Югдурез тодымтэен, куддыр асьмеос малпаськом, республикаысьтымы му вӧен герӟаськем вань предприятиос "Удмуртнефть" огазеяськонэ пыро шуыса. Озьы ӧвӧл. Вань трос мукет организациос но. Кылсярысь, витьтон ар талэсь азьло кылдытэмын вал "Северо-Западные магистральные нефтепроводы" огазеяськон. Отын ужасьёс ӵапак та нуналъёсы пусъё юбилейзэс. Та трассалэн огъя кузьдалаез 6,5 сюрс километр луэ. Нефтепроводлэн ог люкетэз ортче Удмуртилэн шор вадестӥз. Соин ик "СЗМН" АО-лэн шаерамы нимаз управлениез вань. Асьме доры интыяськемын 55 станция пӧлысь куинез - Дебёсын, Арлетьын но Сюмсиын. Туннэ ми тодматом тӥледыз шорысеныз. Станцие вуыса, соку ик пырим предприятилэн кивалтӥсез Александр Радыгин доры. - Ма, мар та таӵе? Журналистъёс ми доры сюресэз аръёсын тодытэк улӥзы, табере ке нуналлы быдэ сямен вуо, - ужъёссэ палэнтыса, пумитамы потӥз лапег мугоро, юн сӥльвиро воргорон. Ми вамыштӥм станцилэн азбараз. Котькытын чылкыт, жуг-жагез уд адӟы, вань борддоръёс, гумыос, мукет тӥрлык ӝикыт буямын. - Станция кылдытэмын, нефтепроводъя лыктӥсь му вӧез келян понна, - валэктэ Александр Федорович. - Но али со уг ужа. Вань оборудование уже кутӥське кулэ дыръяз гинэ, куке бускель станциосын тупатъян ужъёс яке кыӵе ке малпамтэ учыръёс луо. Но малпан медам кылды, ми татын ма карыны ёрмыса улӥськом шуыса. Уго ми борды юнматэмын трассалэн ог люкетэз. Специалистъёсмы гумыосты ялан чакласа возё. Марысь мар ке, интыен-интыен выльдо. Со понна олокыӵе но техника возёно луэ. Коллективын ог 60 мурт лыдъяське. Операторъёс, связистъёс, тупатъясьёс - туннэ соослэн радазы шедьыны мылкыд карисьёс туж трос. Уго татын дыраз сётъяло уждун, вакытлэн воштӥськемез шоры учкытэк, ялан висъяло на дунтэк улон инты. Ваньмыз сямен ужасьёс асьсэ посёлокын уло - Магистральный шуиське со. Кызь ар талэсь азьло, посёлокез кылдытыку, татчы ӝутӥзы вал пулэсь огдырлы юртъёс. Али кыкез сяна ӧвӧл ни - куашказы. Соин ик кивалтӥсьёс рос-прос басьтӥськизы кирпичлэсь коркаос ӝутон борды. Кык чебер юртъёсын адямиос уло ни. Ӝоген вуттозы куинетӥзэ. - Тазэ но 27 квартираен коркамес лэсьто уваос, умой ужало, - данъяськыса вера станцилэн кивалтӥсез. - Малпасько, сое уже сётыса, улон интылы ёрмисьёсмы уз луэ ни. Шуг-секытъёс, оло, чик но ӧй луысалзы. Но... озьы пӧрмиз. Селталы матысь станция малы ке но Игра ёросэ пыре. Отысь валамтэос пото. Басьтом эмъяськонэз ик. Посёлокын улӥсьёс Селта больницае мыно ке, отын соосты мылкыдтэк пумитало. Нош Играе мыныны кыдёкын - ог 60 иськем. Станциен пумен тодматыса, Радыгин вуттэ операторъёс доры. Бадӟым залын туж трос приборъёс. Лампочкаос я кысо, я кыньыръяло. Одӥгаз ужан интыын пуке Нина Родионова. Кышномуртлэн верамезъя, татын ӟеч условиос кылдытэмын. Холодильниксы, сиён пӧран интызы но вань. Ужа гинэ. Бен, станция резервын возиськыку, сокем кысык уг луы. Но му вӧй татысь ёзъёс пыр ортчон вакытэ туж пӧсь йӧтэ. - Малпалэ ай, гумыын котькуд сантиметр борддорез 20 килограмм зӥбе - туж бадӟым давление. Ӵошатон понна: легковой автомашиналэн камераяз со дас пол ичигес, - валэктэ Александр Федорович. Метръем кык гумыостӥ уен-нуналэн кошке Сибирьын поттэм нефть. Асьме пыр ортчыса, со азьлань мынэ но озьы Европалэн шорозяз вуэ. Му вӧй берытске улэп "вож" коньдонэн. Уж, улон инты, азьланезьлы оскон - станциын тыршисьёслэн туннэ со ваньмыз вань. Но странаын югдурез чакласа, куддыр соос но шугъяськыны кутско: уз пытсалэ меда "Арлетез" вылӥысь кузёос, уз быдтэ меда Сибирьын нефтез? Радыгинлэн верамезъя, матысь дыре шугъяськыны мугез ӧвӧл. Станция улоз, станция ужалоз. Нюлэс шорысь шормуӵ шоры тын ужасьтэмъёс весяк вожъяськыса учкылозы. И.Лебедев. * Тани со - "Арлеть". * Станцилэн кивалтӥсез А.Радыгин (паллянысез) кенеше ужасьёсын. * Оператор Н.Родионова. Г.Юсаевлэн туспуктэмъёсыз. Л.Прозоровлэн суредэз. Пайдаё пумиськонъёс Удмурт Республикаысь Кун Кенешлэн Тӧроез Александр Волков 18-тӥ августэ ужаз Россия Федерацилэн Правительствояз. Александр Волковлэн Россия Федерациысь экономикая министрен Андрей Шаповальянцен пумиськонзы герӟаськемын вал Россия Федерациысь Правительстволэсь "Шкода-Авто- Удмуртия" ӵош предприятие кылдытонъя постановленилэсь инъетсэ дасянэн но сое быдэстонэн. Табере Удмурт Республикаысь Кун Кенешлы, Правительстволы но "Ижмаш- Автоысь" кивалтӥсьёслы толэзь ӵоже гижысь-пиньысь тыршоно луоз, "Шкода-Авто" компаниен ӵош предприятие быдэсак ужаны мед кутскоз шуыса. Соку ватсаса 13 сюрс ужан интыос кылдозы, выльдӥськоз завод, республикамылэн бюджетаз шӧдскымон коньдон вуыны кутскоз. Александр Волков но Андрей Шаповальянц Росгосцирклэн президентэныз Людмила Яироваен ӵош вераськизы Ижевскысь цирклы выль юрт ӝутон сярысь. Андрей Шаповальянц но Людмила Яирова Александр Волковлэсь кичӧлтонзэ умоен лыдъязы но сое ӝоггес быдэстон вылысь, нимысьтыз ужрадъёс ӵектӥзы. Ижевске выль цирк ӝутон - шӧдскымон вамыш. Со возьматыны кулэ кун властьлэсь но интыосын ас коже кивалтонлэсь, Удмуртиысь предприятиослэсь кужмо луэмзэс. Республикаысьтымы ваньмыз сямен улӥсьёслы со бадӟым кузьым луысал. Нуназе бере Александр Волков но Удмурт Республикаысь коньдон ужпумъёсъя министр Владимир Бельтюков пумиськылӥзы Россия Федерациысь коньдон ужпумъёсъя министрен Михаил Касьяновен. Кенешон часлэсь кема кыстӥськиз. Со секытэн ке но ортчиз, Александр Волков но Владимир Бельтюков быгатӥзы республикамылы ватсаса 30 миллион манет трансферт басьтыны. Со коньдон Удмуртие 5 сентябрёзь вуыны кулэ, та уксёез висъяны чакламын дышетӥсьёслы но врачъёслы пунэмъёссэс тырыны. Юосты утялтонэз ӝогомытыны но республикаямы эстӥськон но вӧйёс ласянь югдурез шӧдскымон тупатыны юрттоз Удмуртилы ватсаса ГСМ висъян сярысь кенешон. Александр Волковлэн но Михаил Касьяновлэн пумиськонзы эшшо одӥг емыш сётӥз на. Со "Ижмаш-Автоын" автомобильёсты буянъя цехез быдэсак выльдонлы Япония ласянь кредит висъян сярысь вераськонъёс. Удмурт Республикаысь Кун Кенешлэн пресс-службаез. Андан ӵыжатон промышленностьысь акционер огазеяськонъёсын, предприятиосын но организациосын ужасьёсыз Россия Федерацилэн кун наградаосыныз пусъён сярысь Россия Федерацилэн Президентэзлэн УКАЗЭЗ Кун азьын вормонъёссы, андан ӵыжатон промышленностез азинтонын но кема аръёс ӵоже пайдаё ужамзы понна пусъёно: Почёт орденэн Голосеев Виктор Вениаминовичез - "Ижсталь" ОАО-ысь вальцовщикез, Удмурт Республика; "За заслуги перед Отечеством" орденлэн ИИ-тӥ степенё медаленыз Андреев Виктор Михайловичез - "Ижсталь" ОАО-ысь мастерез, Удмурт Республика, Вшивцев Виталий Ивановичез - "Ижсталь" ОАО-ысь отделлэсь начальниксэ, Удмурт Республика, Губаев Зуфар Абударовичез - "Ижсталь" ОАО-ысь мастерез, Удмурт Республика, Карнаухов Виктор Николаевичез - "Ижсталь" ОАО-ысь слесарь-ремонтникез, Удмурт Республика, Роженцев Владислав Владимировичез - "Ижсталь" ОАО-ысь лабораториен кивалтӥсез, Удмурт Республика, Холмогоров Юрий Николаевичез - "Ижсталь" ОАО-ысь андан ӵыжатӥсез, Удмурт Республика. Россия Федерациысь дано андан ӵыжатӥсь ним сётоно: Жеребцов Леонид Михайловичлы - "Ижсталь" ОАО-ысь анданэз кыдатӥсьлы, Удмурт Республика, Пушин Валерий Кондратьевичлы - "Ижсталь" ОАО-ысь отделэн кивалтӥсезлэн воштӥсезлы, Удмурт Республика, Федоров Михаил Петровичлы - "Ижсталь" ОАО-ысь андан кисьтонъя ӧръёс (канаваос) дасясьлы, Удмурт Республика. Россия Федерацилэн Президентэз Борис Ельцин. Москва, Кремль. 1999 арын 30 июле. � 945. Гожтӥськон - 2000 Дунъёс кулэсмозы одӥг арнялы Удмурт Республикаысь Почта кусыпъёсъя управление шаерысьтымы но Россиысь кӧня ке газет-журналъёслэн редакциосынызы ӵош 6-тӥ сентябрьысен 12-тӥ сентябрёзь ортчытэ "Гожтӥськисьлэсь арнязэ". Газет-журналъёслэн дунзы та нуналъёсы 10 процент пала кулэсмоз. Малы кулэ таӵе ужрад? Нырысь ик, тросгес лыдӟисьёсты почтаосы кыскон понна. Кызьы шуиз редакциосын ужасьёсын пумиськонын Почта кусыпъёсъя управленилэн кивалтӥсезлэн эксплуатацияя воштӥсез Сергей Верченов, 1998-тӥ арен ӵошатыса, газет-журналъёслы гожтӥськон таяз арын Россиысь тросаз регионъёсын усемын, нош асьме республика быгатӥз возиськыны. Верало кӧня ке лыдпусъёс, сётэмын 1-тӥ январьлы. _______________________________________________________________________ Республикаос Тираж, сюрс экземлярен 1000 улӥсьлы кӧня экземпляр усе но областьёс 1998-тӥ ар 1999-тӥ ар 1998-тӥ ар 1999-тӥ ар __________________________________________________________________________________ ___ Удмуртия 286,7 283,8 175 173 Башкортостан 2264,4 2296,4 552 558 Татарстан 1829,7 1853,1 486 490 Марий Эл 120,7 115,4 158 152 Мордовия 240,5 211,0 253 225 Коми 357,5 316,3 305 276 Пермь 583,1 501,6 195 168 Киров 416,7 386,4 257 241 Свердловск 716,9 626,8 154 135 Москва 917,8 751,3 139 115 __________________________________________________________________________________ ___ Лыдӟисьёсты бордаз кыскон понна Почта кусыпъёсъя управление пӧртэм амалъёс утча. Одӥгез соос пӧлысь "Гожтӥськисьлэн арняез". Та ужрадэз газет-журналъёслы гожтӥськисьёс но асьсэлы пайдаёен лыдъяллям. Почта кусыпъёсъя управление "Гожтӥськисьлэн арняезъя" нимысьтыз эскеронъёс отчытӥз. Республикаямы потӥсь куд-ог изданиосъя таӵе йылпумъянъёс лэсьтэмын. _______________________________________________________________________ Изданилэн нимыз Гожтӥськемын "Гожтӥськисьлэн 4-тӥ графаез 2-тӥ графаен 15.07.98 арысен 20.12.99 арозь арняез" ӵоже ӵошатыса, процентэн 24 арня ӵоже 1 арня ӵоже ---------------------------------------------------------------------------------- ----------------------------- 1 2 3 4 5 ---------------------------------------------------------------------------------- -----------------------------"Удмурт дунне" 12328 513 1534 16,4 "Удмуртская правда" 26712 1113 3211 12,0 "Известия Удмуртской Республики" 25293 1053 792 3,1 "Ӟечбур" 1369 57 170 12,0 "Кизили" 1315 54 95 7,2 "Кенеш" 786 32 47 6,0 "Инвожо" * 590 24 28 4,7 "Вордскем кыл" * 525 21 39 7,4 __________________________________________________________________________________ ___ * - "Гожтӥськисьлэн арняез" ужрадэ редакция ӧз пыриськы. Гожтӥськон дунъёс кулэсмемен ӵош, таяз но "Гожтӥськисьлэн арняяз" куд-ог редакциос лыдзӥсьёс пӧлын лотерея ортчытозы. Мукет газет-журналъёсын ӵош "Гожтӥськисьлэн арняяз" пыриське "Удмурт дунне" но. Та арня ӵоже вань гожтӥськемёс понна дуно кузьымъёсын лотерея ортчытыны луонлыкмы ӧвӧл. Озьы ке но, гожтӥськон дунмес кӧнялы ке кулэстӥм, нуон-ваён дунзэс почтаын ужасьёс но ӧжытгес каризы. Озьыен, 6-тӥ сентябрьысен 12-тӥ сентябрёзь "Удмурт дунне" газетлы гожтӥськыны луоз таӵе дунъёсъя: _______________________________________________________________________ Индекс 6-тӥ-12-тӥ сентябрьлы Арлы гожтӥськон дунъёс гожтӥськон дунъёс ---------------------------------------------------------------------------------- ----------------------------- 54400 77 манет 16 копейка 84 манет 14402 71 манет 76 копейка 78 манет 14400 43 манет 20 копейка 48 манет 54402 27 манет 30 манет _______________________________________________________________________ Гажано эшъёс, кин гожтӥськыса ӧз вутты на, луонлыкъёс шедьтэ газетмес дунтэменгес басьтыны. Нош вань лыдӟисьёс пӧлын арлы йылпумъянъёсъя лотерея ортчытон сярысь ке верано, редакция утча спонсоръёсты. Кин ке, оло, ачиз но вазиськоз. Л.Малых. Ошмесъёс, нюрэмезь но мукетыз Удмурт кун университетысь тодосчиос кӧня ке ар ӵоже ини эскеро Красногорье ёросысь инкуазез. Алигес экспедиция вуылӥз "Верхшамовское" но "Малиновское" гыбедо нюръёсы, Валамаз лесничествоысь кедра нюлэсэ, одӥгаз пужым яге, "Кулеменский" но "Многоструйчатый" ошмесъёсы, дукъя коткан интыосы. Озьы ик эскеремын "горд книгае" пыртэм будосъёсты утемез - туж лапег кызьпуэз, нюрэмезез (морошка), векчи емышо нюрмульыез. Ужъёсын кивалтэ биология наукаосъя доктор, профессор В.В.Туганаев. Бӧрысь кылдытэмын луоз инкуазь узырлыкъёсты тужгес зол утёнъя нимысьтыз ёрос ёзэт (особо охраняемые природные территории). Таӵе ёзэт кылдытон бордын ужан али мынэ Шаркан районын но. Та ужъёслы коньдон висъя шаерысьтымы экофонд. С.Васильев. Огдырлы ке но Та вакытэ Селта ёросын 563 мурт ужтэк кылемен лыдъяське. Кылем арын та вакытэн ӵошатыса со 3 процентлы ӧжытгес. Ужлы тужгес но кулэясько нылкышноос. Капчи ӧвӧл быдэ вуымтэослы но. Та ласянь огкыл гожтэмын егитъёсын ужанъя отделэн. Озьы огдырлы 250 ужан инты шедьтэмын. Та кысык вакытэ огдырлы уже интыямын 97 адями, со пӧлысь 60-эз нылкышноос. Озьы ик уж шедьтӥзы 70 егитъёс. Н.Петров. НАТАЛЬ Анай-атайёслы школа 1-тӥ сентябрёзь кылиз... нунал Кинлэн ке кемалась ваньмыз дась ни: портфелез но, костюмез но, книга-тетрадез но. Ӵукналы быдэ календарь доры султыса лыдъя со, кӧня нунал кылиз школае мынытозь. Нош кин ке школалэсь кышка. Кызьы юрттоно сыӵе пиналъёслы? Кызьы дышетоно нырысетӥ классэ мынӥсь пиналэз школалы дышыны. Школа - шудон гинэ-а? Тӥ асьтэос но уд тодӥське, потэ-а тӥляд нылпидылэн школае мынэмез? Соку ӝогак кутэ ручка. Куре пиналдэс та юанъёсмылы валэктыны. 1. Школаын мынам трос эшъёсы луозы. 2. Тунсыко, кыӵе меда урокъёсмы луозы. 3. Вордскем нуналам быдэс классмес ӧтьыло. 4. Урок переменалэсь тунсыкогес. 5. Тодэме потэ, маин отын сюдо? 6. Школаын мон умой дышетско. 7. Школаын самой умоез - со каникулъёс. 8. Школаын нылпи садын сярысь трослы тунсыкогес. 9. Мон мынысал школае, малы ке шуоно тросэз эшъёсы ветло ни. 10. Мон кылем арын ик школае мынысал ни. Лыдъялэ, кӧня пол "бен" шуиз. 1-3 пол - тӥляд пиналдылэн школае мынэм потэмез уг шӧдӥськы. Ӵемгес вераськылэ соин, валэктэ, ӝоген солэн улоназ бадӟым воштӥськонъёс луозы шуыса. 4-8 пол - бен, пиналдылэн школае мынэмез потэ. Но мар понна? Со трос полгес вить нырысетӥ юанъёслы "бен" шуиз ке, школаын шудон сярысьгес малпаське. 6-ысен 10- озьлы ке, тодэ, мар со школа, вала луоно воштӥськонъёс сярысь. 9-10 пол - туж умой, та мылкыдыз 10 ар дышетскытозязлы ке тырмиз. Кин ӧжыт изе, сиське - школаын ляб дышетске Тодӥды? Табере. Татчыозь пиналдылэсь режимзэ ӧд воштэ на ке, туннэ ик выдтэ сое вазьгес. Дышетэ ӵукна 7 часын сайкалляны. Пиналды ачиз пыласькыны, дӥсяськыны быгатыны кулэ. Озьы ик дышетоно ӵукна сиськыны - школае сютэм ветлӥз ке, ӟеч дышетскемзэ эн возьмалэ. Кызьы нимыз дышетӥсьсылэн? Тӥ школае мынӥсь пиналдылы дӥськут кемалась дасяды ни? Туж умой. Дӥсяллялэ сое ӵемгес дорады - пинал мед дышоз выль костюмезлы. Нош ӧд вунэтэ-а чыры-пырыос сярысь: воштон пыдкутчан, ныркышет, носки? Пиналды азьын ӵемгес поттылэ дышетӥсезлэсь нимтулзэ, вераллялэ со сярысь умоен гинэ - пиналды медаз кышкатскы мурт адямилэсь. Секыт сюрес Кӧня ке пол ӵош ортче школае мынон сюрессэ. Та ласянь туж секыт городын улӥсьёслы. Дышетэ пиналдэс светофоръя яке музъем улысь переходэтӥ сюресэз выжыны, чакласькыса ветлыны. Дышетэ ассэ ӧстэс ворсаны-усьяны. Пиналдылы одно ик кыкетӥ усьтон лэсьтытэ. Мар возьма? Табере пуксе пиналыныды артэ. Мытэ сюлмысь вераськон. Валэктэ солы, кыӵе сюлмаськонъёс возьмало сое. Пинал тодыны кулэ, со мукет пиналъёслэсь уродгес но визьтэмгес ӧвӧл шуыса; солэн но ӵош дышетскись эшъёсыз, кыӵе ке шуг-секытъёссы кылдыло ке но, азьтэмесь но визьтэмесь ӧвӧл; эшедлы огпол юрттӥд ке, мукетъят со тыныд юрттоз. Уг яра кинэ ке янгышез понна пышкылыны, серекъяны; дышетӥсьёс - анай-атайёс ӧвӧл, соин ик котькыӵе дырзы луылоз - куаретыкузы куатаськыны уг яра; школа - со тынад ужед. 1-тӥ сентябрь Ӟечбур, школа! Одно ик ӟечкылалэ пиналдэс дышетскон ар кутскемен. Котьма шуэ, но со праздник. Ӵукна сиськыны косэ. Школае нырысетӥ нуналаз вазьгес вуыса умой луоз - линейкае султытозь, пиналлы выль интылы дышыны кулэ. Дасяз З.Вахрушева. НАТАЛЬ Специалистэн кенешон "Тон мынам луод" Азьланьтӥськом таӵе нимын 9-тӥ апреле газетамы потэм материал пумысен кенешонмес. Кызьы ивортӥмы вал, таяз учыре кыл сётомы специалистлы. Вераськисько Ижевскысь шугъяськись семьяослы юрттэт сётонъя "Шуныт юрт" центрысь психотерапевтэн Ольга Пчельниковаен. - Ольга Александровна, тани тӥ тодматскиды газетамы потэм "Тон мынам луод" материалэн. Кыӵе дэмланъёс, визь-кенеш сётыны быгатысалды Гелялы. Озьы ик со выллем секыт югдуре шедем пинал нылъёслы, нылкышноослы. - Нылкышноез, пинал нылэз яке пичи нылпиез кужмысь карыны, эриктэманы турттӥсь муртлэн осконэз вань, та учыр сярысь нокин уз тоды. Шуом, нылмуртэз со кышкатыны турттэ, кинлы ке пал кыл поттылӥз ке, адямиос сое ассэ ик урод карозы. Бен, шедёзы кырыж учкисьёс: ассэ ӟеч возьысал ке, пе, котыраз нокин ӧй тэбиньысал. Но ваньмыз озьы уз малпалэ, тросэз дурбасьтозы. Уг яра калык учкемъя гинэ улыны. Тани Гелялэн но чалмыт улэмез Костялы гинэ ӟечен берытске, малы ке шуоно, со ачиз кышка. Кырсь малпанъёсыз медаз шараяське шуыса ик, нылмуртэ кышкатъя. Мар дэмласал мон Гелялы? Мед вераськоз анаеныз, одно ик быдэс семьялы усьтӥськыны кулэез ӧвӧл, дыр. Но татын сыӵе ужпум кылдыны быгатоз. Нылпи ваёно луо яке мукет кыӵе ке шуг-секытъёс дыръя нылъёс ӵемысь кышкало анайзылы вазиськыны. Куд-огез мыно психолог я психотерапевт доры. Шуо, анай тодӥз ке, пе, виёз, коркась уллялоз яке эшшо мукет мар ке. Но трос дыръя улон возьматэ, со анай ик нылзэ умой вала. Бен, пыкылоз, куаретоз, сотэк уз луы - татын мон уг вераськы юись, шугъяськытӥсь семьяос сярысь. Анаеныз ӵош Гелялы вазиськоно милицие. Адӟисьёс ӧвӧл бере, валамон, Костяез кыл уз кутытэ. Но со луоз алон выллем. Со ик, оло, пияшез визьмаськытоз. Нош азьланяз но котыраз тэбиниз ке, куке-соку но адӟисьёс сюрозы. Валамон, милицие вазиськон, со югдурез калыклы шараян. Кин ке та шоры умоен учкоз, кин ке курлалоз. Ужея мон тодӥсько, кинлэн семьяяз нылъёс вань, соос шуге-леке сюрем нылмурт понна луозы. Озьы-а, тазьы-а, но астэ утьыны быгатоно. Нылмуртэ керӟегъяськытэмез понна Костялэсь кылзэ но юаны луысал, но сое эскерыны луоз суд пыр гинэ. Мукетыз ужпум. Геляез кышкатыса эриктэманы туртто, нош со золос пумитъяськемзэ уг возьматы: пияшез мукет дырын "сюдэ", эриксэ юонэн басьтэ. Озьы бере, со ачиз Костялы кыӵе ке но оскон сётэ. Тросэзлэн пиослэн малпамзыя, нылмурт нырысь-валысь гинэ пумитъяське, аслыз дун пуктыны вырыса. Киноосысь но сыӵе суредъёсты ӵемысь адӟыны луэ угось. Ассэ утён понна, Геля кыӵе ке вамыш лэсьтысал ке, шуом, кинлы ке верасал яке милицие вазиськысал, соку Костя но со шоры ассэ утьыны быгатӥсь мурт шоры кадь учкысал. Эскеронъёс возьмато, эриктэман учыръёсы шедё асьсэды утьыны быгатӥсьтэм, ляб сямо нылкышноос. Аслыз оскись, улонэтӥ йыг-йыг вамышъясь ӧй шуысал мон Геляез, зэмлык со палан ке но. Сыӵе сямыныз со азьланяз но таӵе учыръёсы сюрыны быгатоз. - Кыӵе юрттэт сётыны быгатэ та вылем учыръёсы шугъяськись семьяослы юрттонъя центр? - Тыршиськом калык пӧлын валэктон уж нуыны - нылъёс, нылкышноос мед дышозы асьсэ понна сылыны. Эриктэман сярысь кылпум потты гинэ, адями ватӥськоз, синъёссэ лэзёз. Асьмеос ӧвӧл дышемын та ужпумъёс сярысь шара вераськыны. Тросэз психологъёс, психотерапевтъёс гинэ но палэнско меӵак юанъёс сётъяны - ас вылад собыдӟа сюлмаськон басьтоно ук. Нош адямиез утён понна, югдурез пумозяз сэрттыны-пертчыны кулэ. Мон доры кызё пала вазиськисьёс вал ни. Тросгес лыкто вить-куать аресъем пиналъёсын, берло дыре пичи пиосты но трос эриктэмало. Трос ужано луэ, со нылпиослэсь сӧриськем лулчеберзэс эмъян понна. Быдэ вуымтэос усьтӥськыны уг дӥсьто. Ужатозям куинь нылъёс юрттэтлы вазиськизы. Ассэ быдтыны турттӥсь одӥгзэ нылэз анаез ваем. Паймемын, маин юрттыны уг тоды ас пушказ выем нылызлы. Нош мугез сыӵе: нылашез эриктэманы турттэ вылэм сюрбубиз, вож дырысеныз ик атай интыын ке но. Кышномурт понна со бадӟым шуккет вал. Шуимы, нылзэ утьыны ӧз ке быгаты, палэнысь юрттэт утчано луоз. Тодам лыктэ мукетыз учыр. Кезьыт тол куазен нылаш часъёсын урамъёстӥ калге, сюрбубиз котыраз мерскемысь. Ваньмыз со сярысь тодо, нош анаез адӟымтэ улэ аналске, семьязэ утьыны турттыса. Жуг-жагез коркась уд потты шуо ке но, сыӵе учыръёсы нылъёслы палэнысь юрттэт утчаны кепырано ӧвӧл. Городын улӥсьёс милям центрамы ик вазиськыны быгатозы (телефонлэн номерез - 44-40-33), кулэяськисьёсызлы татын огддырлы улон инты висъялозы. Вераны кулэ, "Шуныт юрт" центр шуге-леке сюремъёслы куинь пӧртэм юрттэт сётыны быгатэ. Нырысетӥез ик - социальной. Татын ужасьёс юрттозы улон-вылонзэ радъяны. Кыкетӥез - юристлэн юрттэтэз. Нылмуртлы валэктозы, кыӵеесь солэн правоосыз вань, мар карыны, кытчы вазиськыны кулэ. Куинетӥез юрттэт - мылкыдэз, чигиськем лулчеберез йӧнатон. Таиз бордын ини ужало психологъёс, озьы ик мон но. Геля сярысь ик ке верано, мон ӵектысал солы дорамы яке мукет специалистъёс доры вазиськыны. Солы юрттыны кулэ асваланзэ, асгажанзэ ӝутыны, мед дышоз ассэ дунъян. Ачиз ке ӧз, кин сое улонын утёз? Нош асэныз пумиськытэк, матысь тодматскытэк, кыӵе ке пайдаё дэмланъёс сётыны шуг. Л.Малых. Семьяос йыло Туэ Селта районын ӝыны ар ӵоже вордскизы 40 пиос но 45 нылъёс. Со кылем арын сярысь ньыль пиналлы ӧжытгес. Но со понна шумпотто выль семьяослэн кылдэмзы. Туэ кузъяськизы 41 семьяос, со 12-лы уногес. Кулэсмиз люкиськисьёслэн лыдзы. Пиослы та дыре тужгес но трос сёто Александр, Максим, Николай нимъёс, нылъёсты уногес нимало Анна, Анастасия, Екатерина но Виктория шуыса. Н.Сергеев. Наталь Анай керттӥз тугоко Котькуд вакытлэн аслаз пӧртэмлыкез, чеберлыкез, адями но семья кусыпъёс шоры учконэз. Тани даурмылэн кутсконаз шуозы вал: ужась мурт укно пыр ик адӟиське. Нош али? Шонер луоз, дыр, тазьы вераса: "копейкаё мурт укно пыр гинэ но чильк-вальк чиля. Соку шуозы вал: нылпи - улонлэн сяськаез. Али нош пиналъёс мумы-бубыоссылы ӵемгес сюлмаськон, куректон ваё шуи ке, уг янгыша, малпасько. Озьы ке но, тросэз анай-атайёс понна нылпиос сяськаен ик кылёзы, куд-огезлэн соос быдэс керттэт. Трос нылпиё семья шоры али данакез валатэк учко, чиньызэс йыр вадьсазы карыса бергатозы на. - Мынам семьяе огшоры, мукетызлэсь номырин уг висъяськы. Уг валаськы, мар муген, тыбырам возьматыса, адямиос котьку но асьсэ понна сипырто, - шуэ Людмила Аркадьевна. Та мыло-кыдо кышномурт кузпалэныз Виктор Ивановичен дас одӥг нылпи вордӥзы. - Малы мон улонам та быдӟа "подвиг" лэсьтӥ-а? - серекъя трос нылпиё анай. - Кузпалъяськеммы бере, чутрак вераським: пиналмы куиньлэсь ӧжыт но, трос но уз луы! Одӥг пинал - со пинал ӧвӧл, кык пинал - ӝыныё нылпи, нош ӝот-ӝот од�ӥг нылпи будэтон понна кулэ куиньзэ вордыны. Вордскизы Настя, Алексей, Екатерина... Озьы ик луим ми дас ньыль кузя. Мар бен, дыр вуиз ни лыдӟисьёсмес Ижевскын улӥсь та тунсыко семьяен матэгес тодматыны. Людмила Аркадьевна но Виктор Иванович Корневъёслэн нырысетӥ куинь нылпиоссы сюрес вылэ потӥзы ни. Настя (28 арес) ужа "Ижмаш" заводын секретарь луыса, будэтэ Денис пизэ. Алексей (26 арес) - Первомай ёросысь участковой милиционер, Никита пиезлы ньыль арес. Нош Екатериналэн (25 арес) будэ Соня нылыз, ачиз ужа нылпи садын кладовщица луыса. Корневъёслэн мукет нылпиоссы уло анай-атайзы вӧзын. Кӧня дыр но кужым кулэ таоссэ но пыд йылазы султытыны! Андрей (22 арес) туэ Ижевскысь механической университетэз йылпумъяз, нош уже интыяськыны нокызьы уг быгаты. Наталья (20 арес) ньылетӥ разрядэн вуриськись, нош ужа кастелянша луыса. Оля (18 арес) ужтэк кылемъёслэн семьяязы пыре. Нокинлы но кулэ ӧвӧл, пе, кыкетӥ разрядэн керттӥськись. Соин нылаш ужа дораз, тодмоосызлы, семьяезлы керттӥське. - Дӥськутлы ми магазинэ, базаре чик ум кожаське, - вера Людмила Геннадьевна. - Вуро но кертто милям барышняосмы (анай нылъёссэ мусояса озьы нима, нош пиоссэ - казакпиос. Озьы ик, одӥг вуж дӥськутмес но ум куштӥське, выльдыса вуриськом, керттӥськом - учкымон юбка, дэрем пӧрме. Мукетыз барышнялы Мариналы - 16 арес, таяз дышетскон аре йылпумъялоз школаез. Кин луоз азьланяз - анайлы кизэ гинэ вӧлъяны кыле на. - Пудо-живот сяна, солы номыр кулэ ӧвӧл, - шуэ со. - Любамы (15 арес) тани туж висъяське кибашлы луэменыз, вань ужзэ лад-лад лэсьтыны тыршеменыз. Со керттӥське но, вуриське но. Сергеез но Ленаез кин луон уг сюлмаськыты на, уго нырысетӥез туэ дышетсконзэ азьланьтоз 8-тӥ классын, кыкетӥез - 6-тӥ классын. Самой покчиез, быдэс семьялэн муспотон комокез - вить аресъем Мишазы. Тӥни сыӵе со - Корневъёслэн узырлыксы. Э-э, сылэ ай, вунэтӥ на кадь эшшо одӥг казакпиез, Рокки нимозэ. Вожмаськыса уте со яратоно кузёоссэ но корказэ. Урамысен нокинэ ик пичи эшъёсыз доры матэктыны уг лэзьы, пе. Нош бадӟымъёссэ котькуд ӵукна уж дорозязы ик келяса ветлэ. Келя но, берен дораз бертэ. Эсьмаса, пуны гинэ но вала, та семьяын нырысетӥ интыын ог-огдэ дунъян (нош улэ кыкетӥ арзэ гинэ ай). Ог-огед сярысь сюлмаськон, юрттыны тыршон Людмила Аркадьевналэн малпамезъя ӝужа нылпиосты ужлы дышетон бордысь. Но огшоры ужаны дышетон ӧвӧл со, косытэк быдэсъян. - Косыса ужась - ужась ӧвӧл, - шуэ кузё кышно. Анай сюлэмез туннэ улонысь ваньмыз чепылля: нылпилы ӟеч воспитание сётон но, улон- вылон ужпумъёс но (уждун, дӥськут, сиён басьтон), государстволэн трос нылпиё семьяослы юрттэтэз но...). Кыӵе юрттэт бен сётӥське туала вакытэ трос нылпиё семьяослы? Нылпи пособие, школаын дунтэк сиськон, транспортын дунтэк ветлон... Ма, ӧжыт-а соос бумага вылын пусъемын. Нош кӧняез улонэ пыӵамын. - Государстволэн сюлмаськонэз ми понна берытске ултӥяськонэн. Оскыто, кыл сёто, ӵуказе яке толэзь улыса лыктыны куро. Нош нылпиез осконэн уд но сюд, уд но дӥся, - сюлэм висёнзэ вера Людмила Аркадьевна. - Мон аслым ачим меӵак шуи: "Вунэты со льготаос сярысь, тырмоз йыбыртъяны!". Соин ик маке висъяло ик ке милемлы - юри уг мынӥськы. Ми улӥськом асьме тыршемен, ас кужыменымы ик будэтом нылпиосмес но. Ужа Людмила Геннадьевна мотозаводын сторож луыса. Уждунэз 300-400 манет. Сое но басьясал ке дырыз дыръя. Ӝегатэмын ни уждунзы ӝыны арлы. Соин вань осконэз та семьялэн - Виктор Ивановичлы. Ужа со "Ижсталь" заводын нагревальщик луыса. Бадӟым семьялэн кузёезлы атаёслэсь азьло султыны но соослэсь бер выдыны кулэ луэ. Валамон ини, сеьмязэ рос-прос адӟыны уг кылды, (Ӧз кылды мыным но пумиськыны - *). Нош тырме меда ужаса поттэм коньдонэз? - Шоро-куспо уждунмы толэзяз 1500 манет луэ. Ваньмыз кошке сиён-юон басьтыны, - танӥськытэк вера кузё кышно. - Тырмыт-а со милемлы? Ӵошатэ али дунъёсты но асьтэос ик малпаське. Ярам вылэм, со гинэ сюлмаськон луысал ке. Анай сюлэмез пычей сямен портэ мукетыз малпан: кыӵеесь будозы соослэн нылпиоссы, кыӵе сюрес асьсэлы быръёзы та улон шоры учкыса. - Ужаны мылзы потымтэен, тросэз егитъёс йыртэмало, капчи улон сюрес быръё. Собере телевизор, газет пыр мар гинэ уг возьмато. Пинал ваньзэ сое ас сяменыз вала. Кызьы бен солы берло валэктод на, мар со умой, нош мар урод? Чутрак пумит султэ Людмила Аркадьевна нылпиосты эрказ лэземлы, мултэс нуныянлы, ӧвӧл дышетэмын, пе, соос лэсьтэм ужъёссы понна кыл кутыны. - Интыяз небыт кыл но, чурыт кыл но кулэ, - шуэ анай. - Мон сямен, нылпиос шоры кесяськоно ӧвӧл. Гань-гань, эшшо ке серем пыр вераськод ке, пичи мурт тонэ юнгес вала. Озьы ик будэтыны тырше со сяська тугокозэ. А.Митрофанова. Быръёнъёслы дасяськон мынэ Кин сьӧры мынозы крестьянъёс? Туэ 19 августэ ортчиз Россиысь Аграрной партилэн Удмуртиысь ёзэзлэн кенешез. Со эскериз кык ужпумъёсты: политикаын туала вакытэ кылдэм югдурез но АПР-лэн ВИИИ-тӥ съездаз делегатъёсты бырйиз. Гурт калык котьку но политикалэсь палэнскысагес улэ. "Мар милем политика - ужано" - тазьы улэмен сэрен ик, оло, политика быдэсак крестьянъёслы пумит берытскиз. Ма, кин-о бен крестьянъёс понна кулэ законъёс кутоз? Россилэн парламентаз крестьян депутатъёс 16 сяна кылемын ӧвӧл, нош республикамылэн Кун Кенешаз, алигес ортчем быръёнъёс бере соос, ӧжыт луэменызы, нимаз фракция но кылдытыны ӧз быгатэ, огазеяськизы городысь депутатъёслэн фракциенызы. Сыӵе ляб кужымен гурт хозяйствоез уд ӝуты. Мар кароно крестьян депутатъёслэсь лыдзэс Россилэн парламентаз будэтон понна? Та ужпум сярысь кенеше лыктэмъёс азьын вераськизы В.Благодатских, Удмуртиысь аграрийёслэн кичӧлтӥсьсы, но М.Кошкин, Кун Думаысь депутатмы. Вуоно быръёнъёсын АПР ас кожаз гинэ вормыны уз быгаты, крестьян кандидатъёсты Думае ортчытоно, мукет партиосын но движениосын огазеяськыса. Сыӵе кужмо блокен В.Благодатских лыдъя "Вся Россия - Отечество" блокез. Вылаз ик, шуиз со, та блоке пыртэм кандидатъёслэсь списоксэс валтыны соглаш кариське Россилэн азьвыл премьерез Е.Примаков. Та блокен валче ужаны озьы ик ӧте АПР-лэн лидерез М.Лапшин. Огвакыт АПР-лэн бадӟым осконэз вал КПРФ-лы. Но туала быръёнъёсы коммунистъёс ас кужыменызы мыныны малпало, АПР-лэсь висъяськизы. Малы озьы луиз? Солэсь мугъёссэ М.Кошкин тазьы валэктӥз: - Лапшин но Зюганов ог-огенызы уг тупало. Со бордысь ваньмыз потэ. Со дыре ик Лашинлэн юрттӥсез Н.Харитонов коммунистъёслы юн дурбасьтэ. Озьы АПР-лэн радъёсыз но пумен кыклы пазьгисько, туннэ нуналлы 30 процентэз аграрийёс Харитонов - Зюганов сьӧры мыно, отӥосыз Лапшин пала кыстӥсько. Та кенеше люкаськемъёслэн мылкыдъёссы но кыклыгес люкиськиз. "Быръёнъёсы "Отечествоен" ӵош мыноно, макем бадӟым огазеяськон, сокем золгес вормыны луонлык", - шуизы куд-ог вераськисьёс. Нош Удмуртиысь фермеръёслэн кивалтӥсьсы А.Шадрин тазьы шуиз: "Начаръёс коммунистъёс сьӧры мынозы. Соин ик коммунистъёслэсь ӧвӧл люкиськоно". Но В.Благодатских туэ Кун Кенеше ортчем быръёнъёсты тодаз вайытӥз. Гуртын улӥсьёс, пе, коммунистъёс понна куараоссэ ӧз сётэ. Али но озьы луиз ке, кышкытлык вань, крестьян депутатъёс Кун Думае сюрыны уз быгатэ шуыса. Умойгес луоз "Вся Россия - Отечество" блокен ӵош мыныны. Со понна кариськыны ӧте М.Лапшин. Кудпала кариськоно АПР-лы эскеремын луоз августлэн пумаз та партилэн ортчоно ВИИИ- тӥ съездаз. Кенеше люкаськемъёс отчы куать делегат бырйизы. Нош али АПР-лэн радъёсаз зол шонаськонъёс шӧдӥсько. Т.Банникова. Кӧня сюлмаськонъёс усё, туала вакытэ мумы-бубыос вылэ нылпиоссэс утялтон-будэтон понна. Выль дышетскон ар матэктэмъя, уката но зол шӧдӥське коньдонлэн тырмымтэез. Одӥг пиналэз школае дасян понна гинэ но кулэ пыдкутчан, дӥськут дышетскон книгаос, тетрадьёс. Нош семьяын 10 нылпи ке? Сюлмаськонъёс но дас поллы уногес, дыр. - Сомында нылпиосы шуыса уг но шӧдӥськы, - шуэ Татьяна Николаевна Кадрова. - Ваньзы ик ӟеч дышетско, Маринамы тани "витьёсты" гинэ нуллэ, ӝоген школаез йылпумъялоз. Пиналъёсмы ужасесь, ог-огзылы юрттыса, эшъяськыса уло. Картэныз 10 нылпи будэтэ Можга ёросысь Пычас шор ёзо школаысь дышетӥсь Т.Н.Кадрова. Президентлэн Указэзъя туэ гужем солы Почёт орден сётэмын. Со сяна, Кун Кенешлэн Тӧроез А.Волков нылкышнолы дуно кузьым кузьмаз на - дас кык адямилы чай юон ӵашаос. - Кин тодэ, нылпиосмы, оло, 12 кузя но луозы на ай, - серекъяса шуиз нылкышно. Татьяна Николаевна ачиз но, озьы ик картэз но трос нылпиё семьяосысь будэмын. Нош вордӥськемын со Пичи Пурга районысь Улын Юри гуртын. Калыкын шуо, одӥг нылпиез, пе, секытгес будэтыны. Нош трос ке, пӧртэмлыкез ӧвӧл ни, куинь-а, дас-а - ваньзы ог-огзэс будэто. Оло, та веран огласянь зэмзэ ик шонер луэ? Т.Банникова. Фотоез В.Камашевлэн. Иворъёсты вӧлмытон удысын, радиоын но телевидениын ужасьёсты Россия Федерацилэн кун наградаосыныз пусъён сярысь Россия Федерацилэн Президентэзлэн УКАЗЭЗ Культура но иворъёсты вӧлмытон удысын, калыкъёс куспын эшъяськонэз но ӵош ужанэз юнматонын бадӟымесь азинсконъёсыз, кема аръёс ӵоже пайдаё ужамез понна пусъёно: Эшъяськон орденэн Горбушина Роза Порфирьевнаез - "Удмуртия" кун телевизионной но радиовещательной компанилэн генеральной директорезлэсь нырысетӥ воштӥсьсэ. Россия Федерацилэн Президентэз Борис Ельцин. Москва, Кремль, 1999 арын 2 августэ. � 956. Наталь Кылдымтэзэ уд кары Кудаз ке "Наталь" бамын Н. Туринлэн йырберыктон сярысь ужез потӥз. Туж кельшиз. Шонер гожтэм автор - малы озьы уродъяськонэз, сьӧлыкед астэ ик шуккоз. Тани мон но одӥг учырез тодам ваисько. Анна но Пекла азьвыл туж тупаса улӥзы. Одӥг ымысь сиизы но, юизы но шуэм выллем. Но аръёс ортчемъя, нылпиос быдэ вуэмъя, узырмемъя кусыпсы сӧриськыны кутскиз. Анна кенаклэн картэз улонысь вазь кошкиз. Ярам коть инмар ӧз кушты, нылъёсыз будӥзы. Эмеспиосыз юртсэ выльдӥзы. Нош Пекла кенак, матысь эшезлы юрттэм интые, солань-талань лёгаське, каргаське, сюлэмыз сьӧд эгырен ӝуа. Угось корказ ньыль бызьыны вуэм нылъёсыз пуко, нош курасьёс уг но кожало ӝыт туган кутыло ик, пе, но "сьӧлыкамзы" бере кушто. Кутскиз Пекла ачиз эмеспи утчаны. Гуртын улыса умой карт уд шедьты, пе, Маринказэ городэ келяз. Бызиз ик, но секытэн луэмез бере дораз бертӥз. Кыкетӥзэ но, куинетӥзэ но бызьытӥз - ӧз удалты. Зинказэ трос курасьёс вал, но таиз ачиз бадӟымъяське. Бызьытэк ик кӧт шедьтӥз. Дашеньказэ Пекла чупаса гинэ возе. Апайёсыд сямен, пе, возьытэ уд уськыты, бай интые бызёд. Покчиезлэн но нылызлэн улонэз ӧз удалты. Пеклалэн ныль кузя нылъёсыз табере кӧкы дурын пуко, карт возьмало. Инмар ваньзэ адӟе, шуо. Озьы ик вань. Кӧня супыльтыса, кыл вӧлмытыса ветлӥз Пекла Анна кенак сярысь. Мумызылэн сьӧлыкез нылъёсыз вылэ усиз. Табере нош кылӥське ни, Пекла, пе, Анналэсь огзэ эмеспизэ аслыз карыны турттэ - туноос дортӥ ветлэ, кудзэ ке нылы вылэ пырто, пе. Нош ик "сьӧлыкез" ассэ шуккиз. Тушмонаськеменыз ик сюлэмыз путӥз, дыр - инфаркт луыса кулэм. Таки ӧз адӟы со нылъёсызлэсь семьяен шудо улэмзэс. Одӥгез гинэ, Пекла кулэм бере, аслыз куз шедьтӥз. Нылъёсыз шоры учкисько но, жаль пото - мумыенызы сэрен пал кылизы. Оло тупалоз ик ай улонзы, Инмар весь уз йыркуръяськы. А. Г. ШӦКЫЧ Юрттэлэ вал! Гажано Шӧкыч уром! Тон доры гожтэтэн вазисько "Медик", "Каменное-1" но "Каменное-2", "Нефтяник-Кены", "Южная-2" но "Урал" сад-бакча возисьёс. Ӝожтӥськонмылэн мугез таӵе. Кызь ар талэсь азьвыл милемлы сад-бакчаос висъязы вал. Сюрес но кыскизы, асфальтэн но шобыртӥзы. Но тани куинетӥ арзэ ини милемды куд-ог кузёос-кивалтӥсьёс серем каро. Со нырысь ик Завьяловоысь ГАИ-ын ужасьёс. Зэм, туала арын милицилэсь та ёззэ ГИБДД шуо кадь ини. Вераськон мынэ 142-тӥ маршрут автобус пумысен. Сад-бакчаосын емышъёс, бакча сиёнъёс вуо гинэ но, автобуссы ветлэмысь дугдэ. Сюресты сюбег шуо, пе, гаишникъёсыд. Соин сэрен пересьёс но, висисьёс но будэтэм емышсэс ас вылазы вортто. Нош вамышъяно луэ ог 10 иськемзэ. Сюрес сюбег шуо ке но, коммерческой шуон автобусъёслы со малы ке ӟоскыт уг поты. Мукет автомашинаос но шур! гинэ ортчо со сюрестӥ ик. Тани ӝоген сӥзьыл но вуоз ни. Картофкаез копано луоз. Маин сое ваёд, ӧйтӧд. Собере куд-огез сад-бакчаос та нуналъёсы 20 ар тырмонзэс пусйыны дасясько. Зол кузьым дасязы ГИБДД-ын ужасьёс! Милям ӵектонмы сыӵе: оло, кыӵе ке комиссия кылдытыса, сюресэз рос-прос эскероно, дунъет сётоно? Ми коньдонмес ӧм жалясалмы. Юрттэ гинэ вал! Тэльмыриськом! Куать сад-бакча возисьёслэн нимынызы гожтӥз Н.Сергеев. Валэктэ юрист Сэрегез дася адвокат Лилия Шкляева Нылпие вордӥськиз ӧлексы Нылпие ӧлексы (инвалид) вордӥськиз. Миым ноябре солы 3 арес тырмиз. Юрттӥсьёсмы ӧвӧл бере, мон куриськи сое 6 аресозь утялтыны. Озьы ке но, миым весь ужано луи. Январе - 10 нунал, феврале - 16, мартэ - 18, апреле-декабре - 2-ысен 17 нуналозь. Трос нуналъёс ӵоже нуныеным больницаын кыллим. Мыным со понна но, отпуск понна но, толэзяз ньыль нунал дунын отгул понна но дун уг тыро, малы ке шуоно, мынам вань пиналме утьыны куронэ (заявление). Шонер-а лэсьто озьы? Н. АВЕРКИЕВА. Шаркан район. Гожтэтъя валаны уг луы кытын, кин луыса но кыӵе условиосын ужамдэс, кызьы уждун басьтэмдэс. Россия Федерацилэн Уж сярысь кодексысьтыз 107-тӥ ёзэт (статья) кышноослы ас мылкыд каремзыя сётэ нылпилы 1,5 арес тырмытозь отпуск, соку дун тыриське соцстрах чотын. Со сяна, кышномуртлы ватсаса отпуск сётӥське, пиналлы 3 арес тырмытозь, соку тыриське законъя тупатэм компенсация. Вылӥ верам отпускъёс уг пыро арлы быдэ отпусклы право сётӥсь стаже. Койкаын кыллем понна дун, арлы быдэ отпуск понна дун, ӧлексы нылпиез утем нуналъёс понна дун басьтыса, тӥляд ужамды луэ тупатэм дырлэсь ичигес яке дорады. Но соку тӥ выль курон (заявление) гожтыны кулэ нылпидэс 6 аресозь утялтыны курондэс кужымтэмен лыдъян пумысен. Уральский международный университет приглашает получить образование по рабочим специальностям: лаборант-эколог, программист, мастер отделочных строительных работ, автомеханик, контролёр-кассир, секретарь-референт, слесарь, монтажник. Проводится набор на обучение по программам среднего и высшего профессионального образования по специальностям: дизайн, финансы и кредит, бухучёт и аудит, экология, теплогазоснабжение и вентиляция, гостиничный бизнес. Возможна организация обучения на местах, приглашаем к сотрудничеству инициативных людей. г. Ижевск, ул. Авангардная, 4Б. Тел. 43-00-26, 43-01-62, 23-22-10. Ӵош ужаны дась Тазьы шуиз Юрий Дмитриевич Маслюков, "Отечество" организацилэн Удмурт люкетэзлэн Кенешеныз пумиськонэз дыръя. Ужрад ортчиз, "Отечестволэн" Ижысь общественной приёмнояз. Сое усьтыса, Кун Кенешлэн Тӧроез, "Отечестволэн" Удмурт люкетэзлэн кивалтӥсез Александр Волков пусйиз, Юрий Лужковлэн движениез но компартия матын луо, нырысь ик - патриотизм мылкыдынызы. Соос правой кужымъёсын одӥг сюрес вылэ ноку уз султэ. Юрий Дмитриевич Маслюков, азьвылгес республикаямы ужаз бере, соин кусыпъёссэ али но уг ышты. Евгений Примаковлэн Правительствояз вице-премьер дыръяз но шаермылы юрттӥз, кылсярысь, Чехиысь автомобиль поттӥсьёсын кусыпъёс юнматон но ӵош ужан сярысь огкыл гожтон ласянь. Юрий Маслюков шаерамы вуэмезлэсь мугзэ шонерак усьтӥз: - Удмуртиын улӥсьёслы тодазы вайытыны тыршисько, сыӵе-сыӵе адями вань на шуыса. Ӵапак татын мон будӥ, зэмос инженер луи. Палэнэ кошкыса но ӧй куштӥськы малпанэлэсь: котькинлэсь но ӟеч инженеръёс ужало Ижевскын. Дорады лыктӥ кенешыны: вуоно быръёнъёсы пыриськыны быгато-а ӵапак татын депутатэ кандидат луыса. Мон КПРФ-лэн членэз луисько. Лыдъясько, вань ӟеч кужымъёсты одӥг знамя котыре люкано. Дунъясько "Отечествоез", Лужковез, Примаковез. Малпасько, Кун Думаын но ог-огдэ валаса, пайдаё ужаны луысал. Пусйыны кулэ, Юрий Маслюковлэн Россиысь Правительствоын ужамез зол шӧдӥське. Кылсярысь, Удмуртилэсь экономиказэ вырӟытон понна со ӵектэ инвестициос кыскон борды золгес басьтӥськыны, озьы ик дуннеысь мукет кунъёсын кусыпъёсты паськытатыны. Россия сярысь веракуз, Москваысь куно пусйиз законъёстэк улэммес. Тани али но, пе, асьмелэн ӧвӧл на продукцилэсь асдунзэ (себестоимостьсэ) лыдъян-чотан рад сярысь законмы. Ӵапак таӵе документтэк вытъёсъя система "чутэ", вытъёс тырмыт уг люкасько бере - уждун ӧвӧл. Россиез быдӟым страна шуиськом. Нош бадӟым-а со, дуннеысь валютая организациос юрттытэк, номыр но лэсьтыны уг быгаты ке. Ю. Д. Маслюковлэн шаерамы вуылэмез яркыт возьматэ, быръён кампания кужым люка ни. Кин вормоз - вераны секыт. Но "Отечество" но КПРФ азьпал радъёсын луозы шуыса, оскон вань. Шуг-секытъёс кылёзы президент бырйытозь Берло пумиськоназы республикаысьтымы газетъёслэн редакторъёссы эскеризы Кун Думае быръёнэн герӟаськем ужпумъёсты. Кудӥз ке кандидат яке блок понна гожъяса дурбасьтыны ноябрьысен гинэ лэзёзы. Нош данакез изданиос та ужен али ик выро ни. Озьы мыдланьяськон понна тупатэмын пӧртэм сямен кыл юан амалъёс. Люкаськемъёслэн юанъёссылы рос-прос валэктонъёс сётӥзы республикаысь Быръёнъя комиссилэн тӧроез Афанасий Тубылов но солэн воштӥсез Георгий Пчельников. Собере газетчиос азьын вераськиз Кун Кенешлэн Тӧроез Александр Волков. Со тодматӥз экономикаысь но политикаысь югдурен. - Шуг-секытъёс кылёзы, президент бырйытозь, - пусйиз со. Али тросгес коньдон висъяно луоз нянь дасяны. Соин валче уждун тырон но, оло, кӧня ке ӝегалоз. Нош сентябре капчигес шокчом ни. Александр Александрович нимысьтыз вераз автозавод сярысь. Солэн ӝутсконэзлы кин но со уг ке но оскы, та предприятие быдэс республикаез улӟытоз ай. Удмуртилэн кужымез тырмоз дотация басьтӥсь улосъёс (субъектъёс) пӧлысь потыны. Тӧро валэктӥз юанъёслы. - Юрий Лужков шуэ: президент котырысь адямиос "Отечествоен" тушмонъясько. Нош ачиз Борис Ельцин соосын соглаш ӧвӧл шат? - Бен, Лужков куд-огезлы уг кельшы. Президент аслаз адямиосызлы мыдлыньяськыны лэзе бере, соосын со огкылысь. - Кызьы уськиськоды музон партиос но движениос шоры? - Россия Федерациысь компартилэн данак ӵектонъёсыз мыным матынэсь. "Яблоко" уг кельшы. Чебер вераськытозь но ваньзэ пыкылытозь кутскы но возьматы вал ачид кызьы ужаны. Буръёс (правойёс) куашкатыны гинэ быгато. Соосын сюресмы одӥг ӧвӧл. Санаторийын уз эмъяське - дышетскозы Люкаськылӥз "Быдэс Россия-99" прессалэсь фестивальзэ дасянъя оргкомитет. Солэн кивалтӥсез Александр Волков вакчияк ивортыны куриз быдэстымтэ ужъёсты гинэ. Соос трос ӧвӧл. Шуом, городэз чеберъян, автоинспекциен (ГИБДД-ен) ужан, куноосты аэропортын пумитан. Россия Федерациысь Журналистъёслэн союззылэн дорамы лыктэм тӧроез Всеволод Богданов вераз ас малпанъёссэ: - Политикаысь кӧняез ке азьветлӥсьёс мылкыд каро доразы лыктыны. Соос пӧлын - Москвалэн мэрез Юрий Лужков. Либеральной демкорат шуонъёс укыр медаз ӵашетэ вал. Президентлэн администрацияз ӝожтӥсько: малы милемды палэнэ кельтӥськоды? Мукет интыосын таӵе фестивальёс бадӟым пайда сётӥзы. - Александр Волковлы ивортӥз Всеволод Богданов. - Курск областьлэн губернаторез Александр Руцкой журналистъёслы ӟеч юрт кузьмаз но уждунзэс ньыль пол будэтӥз. Кенешонэз Александр Александрович йылпумъяз шуныт кылъёсын: - Таиз оргкомитет, мукетъёсыныз ӵошатыса, паймымон чупрес берга. Оскисько: фестивальмы но озьы ик мыноз. А. ПЕТРОВ. Калмез кузя 3. Чатыртэ нырдэс, арлетьёс! И. ТОДЭ лыктэ социализм вакытысь мадёс. Пыре воргорон магазинэ но чабкиське: "О-о-о, мады но тӥляд ӧвӧл! Няньды ӧвӧл, вӧйды ӧвӧл, сӥльды ӧвӧл..." Тазьы ик шуыны луоз Арлеть посёлок сярысь. 60-тӥ аръёсы татын ваньмыз вал: кык школа, магазин, столовой, пекарня, клуб. Ог 300 мурт ужаз леспромхозын, отын машинаоссы гинэ 60-лэсь ятыр лыдъяськизы. Табере... Гуртын улӥсьёс шундыез кемалась уг адӟо ни. Ӧвӧл, инме со пота ик. Но калыклэн йырыз ошиськемын - ваньмыз сямен арлетьёс ӵуказе нуналлы осконтэк уло. Татысь уд адӟы выль юртъёсты, вужмемъёссэ но тупатъясь ӧвӧл ни: мар-о, пе, юнме кужым но коньдон быдтод, сёровно посёлок быроз. Соин ик адямиос толзэ ортчыто кезьытын, мисьтасько чильпырась мунчоын. Тросэз коркаос буш сыло. Соосты чупресъёсыз арлетьёс куке но я пичи дунын басьтӥзы, я приватизация шуон вакытэ ас вылазы озьы гинэ гожтӥзы. Кузё кариськизы, нош кузёяськыны оло уг ваньмо, оло мылкыдзы уг тырмы. Тани кылем тол вылтӥ кык интыын липетэз лымы пачкатӥз - со пумысен нокин куректӥсь но ӧвӧл кадь: зӥбиз ке зӥбиз, ойдо ӵок. Арлетьын туннэ ог 80 мурт улэ. Шонер вераны нокин ӧз быгаты - уг тодо. Уго вань кӧня ке сыӵе адямиос, кудъёсыз татчы я гужемлы, я арнялы вуо но бӧрысь кемалы ышо. Со тямыстон пала улӥсьёс пӧлысь 55-ез - пенсионеръёс. Валамон ни, пенсия сётъян котькудӥз нунал посёлокын бадӟым праздниклы пӧрме. Вузкарисьёс, кырныжъёс сямен, сое возьмаса гинэ уло: олома но татчы вутто. - А мар-о милемлы кулэ? - киоссэ вӧлъя татын улӥсь мӧйы удмурт воргорон Николай Филиппович Поскребышев. Ми соин Калмез дурын пумиським. - Сакыр, сылал, пызь... Всё. Ну, кыскисезлы, конечно, тамак. Юисезлы - ӟенелик. Николай Филиппович та палъёсы вуиз ог ньыльдон ар талэсь азьло. Шудзэ утчаса. Шедьтӥз-а? Шуг вераны. Егит дырзэ умоен тодэ вае. Бен, секыт вал, туж жадьылӥзы - тэльын уж капчи ӧвӧл. Озьы ке но, азьпала валтӥз улонэз яратон мылкыд. Ужазы дэмен, шулдыръяськизы, быдэс бригадаен шур дуре потыса. Кин соку малпалляз, посёлокез ӝоген сьӧд пилем сайялоз шуыса? ИИ. ИНМАРЕН вунэтэм инты. Таӵе веран туж тупа туала Арлетьлы. Чебер шур, чылкыт омыр, узыр тэль сяна, татын номыр ӟечез ӧвӧл ни кадь. Уг, калык сярысь вераськон уг мыны. Мискинь адямиос ваньзэ чидало, маке но бызьыло, маке но лэсьто. Игра леспромхоз воксё куштӥськыны уг дӥсьты на "нылпиезлэсь". Комендант, шофёр, тракторист, кык слесарь, вал сюдӥсь (со ик ву кыскись)... Эшшо кин? Ваньзэ верай кадь. Куать мурт уждун (200 манетэз озьы ниманы луэ ке) басьтэ леспромхозысь. Соос пӧлын - Георгий Сухих. Кузпалэныз ӵош со ньыль нылпи будэтэ. Герой. Бен, бен. Пиналъёсты сюдон-дӥсян понна, воргорон я кинлы ке пу пиле, я эшшо ке кыӵе ке уж шедьтэ. Ярам коть, варманаез артысь гуртын, Узиын улэ. Со юрттэ. Нылпиосыз отчы дышетскыны нуналлы быдэ пыдын ветло бере, шутэтскыны, сиськыны песянайзы дорын быгато. Арлетьёс быдэсак натуральной хозяйствое выжизы ни, шуыны луоз. Сиён-юонзы асьсэлэн, нянь котькуд семья ачиз пыже. Ӝоген, оло, куиськыны но выльысь кутскозы ни. - Кинлы-о ми кулэ? Лулско татысь песянайёс. - Быдэн 30-40 ар тэльын ужаса, туннэ ми пасяськем колошалы укшась макеос луим ни. Сое но уго чебер чилясь дыръяз яратыса нулло, отӥяз куштӥськон интые сэрпалто... - Я, мар-о бӧрдкоды? Туж кылзэмзы потэ кожаськоды шат палэнысь лыктэмъёслэн асьме шуг-секытъёс сярысь? - гужем куазен фуфайка дӥсям кышномурт эшъёссэ уретыны малпаз, лэся. - Вазен но сюлмаськонъёс тырмо вал. Тодады вае ай, маин-о гуръёстэс эстӥды? То-то. Вань ӟеч коръёсты татысь келяллязы, асьмелы лӥял сяна ӧз кыльылы ни, сое ик сётъязы. Пурысьтам кенакъёсын огкыл ӝоггес тупатон вылысь мадисько азьло нуналаз кылэм учырез. Малягуртын тол вылтӥ мӧйы воргорон кулэм. Вань даурзэ, пе, нюлэс котырын бергаз. Улонысь кошкиз бере, кызьы ке но сопал дуннее келяно ук. Оскыны шуг но, корос лэсьтыны пул быдэс посёлокысь шедьтӥллямтэ. Куштӥськем лапасысь но кенерысь шонеръёссэгес пулъёсты кыскаса, кызьы но озьы гроб йӧндыриллям ни. Арлетьёсты таӵе мадёсъёсын паймытыны уг луы вылэм. Асьсэос со пыр потэмын ни. Умой ай, посёлоклэн комендантэз Любовь Андреевна Абашева - сюлмо кышномурт - туэ леспромхозысь ньыль кубометр пул вайыны быгатэм. Юри курем, корос лэсьтыны шуыса. Табере умойтэм учыр луэ ке, складысь кӧня ке пул висъяло. Ай со гинэ ӧвӧл, трактор но сёто. Тӥни озьы. ИИИ. ТУЭ гужем Ижын потӥсь одӥгаз газетын печатлазы Арлетьын улӥсьёс сярысь статья. Та посёлокын но со котырын, пе, олома но луылэ. Кин ке югыт куазен тодмо интыын йыроме, кин ке тэль кузёез адӟе, куинетӥез кыӵе ке тылъёсыз синйылтэ... Ми татчы 11 августэ вуим бере та нуналэ дунне быроз шуыса кышкато вал), валамон ни, котькуд выль тодмомылэсь гуртлэн аспӧртэмлыкез сярысь юалляськыны тыршим. - Ха-ха, лыдӟим ми со гожтэмез, кин ке городысь вуттэм, - гор! серектӥз одӥгез воргорон. - Татын дасо аръёсын улыса, номыр но сыӵезэ-таӵезэ ӧм кылылэ. Висисьгес, дыр, со гожъясь... Только уг валаськы, кинлы кулэ вал сыӵе статья. - Посёлокмы со ласянь гинэ пӧртэм луэ: Арлеть омыре ошемын, - юаммылы валэктӥз Николай Поскребышев. Милям синъёсмы паськытазы, шӧдске.Паймеммес адӟыса, воргорон буйгатӥз: - Меӵак озьы эн валалэ. Мон мукетсэ верасько. Татын ужатозям, лесопунктмылэн йырыз олокӧня пол вошъяськиз. Нырысь кузёосмы Валамазын вал, бӧрысь - Новые Зятчыын, берло аръёссэ милемыз Игра леспромхоз борды думизы. Районэн но валантэм луэмын. Татысен Селтаозь кыдёкын ик ӧвӧл. Пиналъёс со ёросысь Узи черкогуртэ ветло. Нош ми Игра районэ пыртэмын. Оло, соин но посёлокмы воксё аналтэмын: играослы но, селтаослы но мултэс йырвисён кулэ ӧвӧл, лэся. Тӥни сыӵе пӧртэмлыкмы. ИВ. ОЗЬЫ ке но, озьы ке но... Малы ке та посёлок бордаз кыске ук аспӧртэм адямиосты! Кылем арын татчы вуиллям партиецъёс - ЛДПР-е пыремъёс. Жириновскийлэн "ӧрӟиосыз" сюрс манетэн басьтӥллям огзэ куштӥськем юртэз, кӧня ке тупатъяллям, майыг йылэ лыз флаг ошиллям но аномалия шуонъёсты утчаны кутскиллям. (Таос бордысь ӧз поты меда статья?) Валамон, журналист сюлэм ӧз чида ни, та корка вуылытэк. Пул щитъёслэсь огшоры юрт. Куке но отын кык квартира вал, дыр. Табере кӧня ке висъетэн комнатаослы люкемын - плацкарт вагонын кадь потӥз мыным. Кӧлан интыос - выж вылын. Кӧня ке ӝажыосын уно книгаос но журналъёс тыремын: фантастика, Эдгар По, Гоголь, "Жизнь насекомых" но мукет. Нимысьтыз пуктылэмын ЛДПР-лэн поттэм книгаосыз. Артэ пачкаосын кылле партилэн Москва штабысьтыз ыстэм газет. Но таиз котьмалы яра, лэся. Азбарысь лапасын но со лошъяське, городысь вуэмъёс газет вылын эмъюм турын куасьто. Жаль, но "ӧрӟиосты" адӟыны ӧз кылды - плот лэсьтыса, ми вуонлэсь нуналлы вазь кошкиллям Калмез кузя. Кузёяськыны кельтӥллям Алексей нимо арлеть воргоронэз. Со ик мадиз мыным эшъёсыз сярысь: - Туж тунсыко адямиос. Пӧлазы тросгес шедё школаын дышетскисьёс. Вань студентъёс но, ужтэк пукисьёс но. Ма бен каро соос? Ӧйтӧд, туж ик уг юаляськиськы. (Мон татын кышноелэсь пегӟыса улӥсько.) Маке но весь утчало соос. Дозиметръёсын отӥ-татӥ ветло, музъемез эскеро, турын-куар бичало, шутэтско. Ялан вошъясько. Кӧняез ке кошке, соос интые мукетъёсыз вуо. Кивалтӥсьсы но адскылэ. Маке поттыло вал, Жириновский, пе, соослы муш бакча басьтыны турттэ. Уг валаськы, ма соин карозы. - Ма бен возьмато эскеронъёссы? - Незнай. Но радиация, верамзыя, уг шараяськы - мукет интыослэсь пӧртэм ӧвӧл. - Нош татысь калыкен кусыпъёссы вань-а? - Ӧвӧл, шуыны луоз. Куддыр Магистральный бускель посёлокысь егитъёс татчы лыкто но нылъёсын тодматскыны туртто. Уг пӧрмы. Городъёс шоры шузиос шоры кадь уг учко - чылкак валантэмесь, пе. Нош таосыз сыӵе кылъёсын ик верало гуртоос сярысь. А так нокинлы уг люкето, уг йыртэмало, асьсэ дуннеязы уло. Малы ке но мынам малпан кылдӥз, ЛДПР-ез та егитъёс коньдонэз понна гинэ ярато шуыса. Уго улон сямъёссыя соос "вожъёслэн", инкуазез утисьёслэн, партизылы тупалогес кадь. Алексей дорысь кошкыкум, син шорам йӧтӥзы коӵышъёс. Кыӵеез но пӧлазы ӧвӧл: гордэз, куӵоез, чиль-чиль сьӧдэз. Вань Атос пунызы но. Таиз пичи гинэ ке но, гурт пуныос, пе, солэсь туж кышкало. Иже бертыса герӟаськи "Кедр" движениын но "Вож Кирос" обществолэн киватӥсьёсыныз. Соослэн Арлетьысь экологъёс сярысь кылэмзы ӧвӧл. Жириновскийлэн партиезлэсь Удмуртиысь ёззэ шедьтыны ӧйлась. Телефонзы оло воштӥськемын, оло кысэмын. Тӥни сыӵе политика, эсьма - пыдло ватскем гуртозь но сузе солэн киыз. В. АРЛЕТЬ сярысь трос гожтыны луоно на. Огласянь та посёлок Калмез дурысь мукет улон интыослы тупа: огкадь югдур, огкадь тырмымтэос, огкадь ӵуказе нуналэз адӟон... Бен, Малягуртэн, Пионерскиен, Винишур-Бияен ӵошатыса, татын ваньмыз висёнъёс пыдлогес пыӵамын. Соин ик таосызлэн огъя мылкыдзы но уродгес. Но арлетьёслэн шуг-секытъёслы копак сётскемзы уг поты ай. Серекъян сямзэс соос ыштӥллямтэ на. Та сярысь вера таӵе учыр. ... Вазь ӵукна урамын сылӥськом, кӧня ке адямиосын вераськыса. Пӧлазы ик Любовь Андреевнамы но (ми кӧлим солэн кыкетӥ коркаяз). Комендант доры олокин но вуэ: я паспортъёссэс ваё, я жингыртыны курисько (быдэс посёлоклы одӥг гинэ телефон), я огшоры вераськыны лыкто. Туннэ тужгес но, уго четверге гинэ ӵукна автобус калыкез Играе нуэ. Адямиос отчы дырто. Боды вылэ пыкиськыса, ми пала ик вамышъя горд мыйыко воргорон. Кин луэммес тодыса кутскиз ук, кутскиз ук мадьыны... Ньыльдон ар талэсь азьло, пе, кор кыскантӥын инвалид луи, табере арнялы быдэ эмъюмлы ветлӥсько, туж курадӟисько, шуэ. Ма, ми кылзӥськом, ми оскиськом. Я, выль тодмомы кошкиз автобусаз. Нош гурт калык милемыз серекъяны кутскиз ук: эх, пиос, пиос, ымдэс усьтӥды, лэся. Тодмо луиз. Та мыйыко дядяед пӧяськыны (оло, серкъяны) яратэ вылэм. Сюрлызэ вӧсь карем "шутэтскон" юртын, секыт йыруж понна пукыкуз. Тазалыкез, пе, чидамон ай. Райцентрысь комиссия азьын корка пушказ кык киыныз пукон вылэ пыкъяськыса ветлэ, соосыз кошко гинэ - мотоциклзэ сермета но чорыганы дыртэ. Огполаз играос адӟиллям озьы дауртэмзэ - группазэ кызьы ке но куштӥллямтэ. Ма бен, йырмес солы ми кур ӧм каре. Сыӵе адямиостэк пурысь нунал шулдыр луысал шат? Чатырдэ нырдэс, арлетьёс! Улон азьланьске ук. Иван Лебедев, Георгий Юсаев (фото), Леонид Прозоров (суред), Владимир Потапов (авто). � Комендант Любовь Абашева Играысь вуэм ужасьёслы ческыт сиён пӧрам. � Арлетьысь егит воргоронъёс пӧлысь одӥгез - Георгий Сухих. � Николай Поскребышев водительмылы азьлань мынон сюресэз возьматэ. � Калмез. ШӦКЫЧ Берло дыре городъёс котыре интыяськем сад-бакчаосын трослы йылӥзы лушкаськон учыръёс. Тужгес но эрказъясько пыдйылчи кылемъёс - бомжъёс. Куд-ог кооперативъёс милициез но медъяно луизы ни... Гожтэтысь. Пересь нылкышно: - Суйды-пыдды мед чигылоз, сотонаос! Убиръёс тӥ, возьыттэмъёс! Суредэз Л.Прозоровлэн. Мынам телевизоре Шаерамы ӟеч тодо ни "Продторг" акционер огазеяськонэз. Соин ик солы мултэс реклама но кулэ ӧвӧл. Но одӥг вузэнызы асьсэлы асьсэос антиреклама лэсьтӥллям. Тылпоттон сярысь вераськон мынэ. Вот со спичкаез басьтыны эн дыртэ. Ӝынызэ сэрпалтоно луоды - я воксё йырыз ӧвӧл, я тыл интые ӵын гинэ тэлеӟе. В.Рекламов. Удмурт Правительствоысь иворъёс Быдэсъясько-а косонъёс? Правительстволэн кивалтӥсез Николай Ганза 23-тӥ августэ аппаратэзлэн ортчем совещанияз саклык висъяз азьвылгес сётэм косонъёсызлэн быдэсъяськемзы. Соин валче кылдӥзы мукет ужпумъёс но. Кылсярысь, матысь дыре школаосты, училищеосты сӥзьыллы но толлы дасянъя кенеш ортчытыны чакламын. Нырысь ик бадӟым саклык висъяськоз ёросъёсысь гурт школаослы. Кызьы вераз правительстволэн премьерез, татын город но ёрос ласянь нокыӵе аспӧртэмлыкез луыны кулэ ӧвӧл. Правительстволэн Председателезлэн воштӥсезлы Николай Хохловлы УР-ысь Промышленностья но транспортъя министерствоен ӵош косэмын М.Т.Калашниковлэсь 80 арес тырмонзэ пусъёнэн валче быдэсак программаез дасяны. Азьланьтӥське Удмурт Республикаысь Правительсволэсь 1999-2003 аръёсы ужан радлыксэ дасян. Нош ик "2000-тӥ ар сярысь" 2000-тӥ ар вуэмен валче компьютер но электроника удысын умойтэм учыръёс медаз кылдэ шуыса, Правительстволэн Президиумез нимысьтыз комиссия кылдытӥз. Со ужалоз выль даур вуон азьын кылдэм ужпумъёсты быдэстон бордын. Кин кузёяськоз ваньбурен Удмурт Республикаын Кун ваньбурен но приватизация ортчытонэн герӟаськем ужпумъёсты радъян сярысь ивортон лэсьтӥз шаерысьтымы Кун ваньбуръя комитетлэн кивалтӥсез Сергей Касихин. Кызьы пусйизы документэз эскерыны лыктэмъёс, со бордын ватсаса ужаны кулэ луоз на. Кун ваньбурез мукет кузёослы вузанэн герӟаськем ужпумъёс эскериськозы Удмурт Республикаысь Кун Кенешлэн сӥзьыл ортчоно сессияз. Усточиос понна Республикаысьтымы калыкез дышетон удысын югдурез умойгес радъян вылысь Правительстволэн Президиумез нимысьтыз постановление кутӥз. Озьы пытсаськозы куд-ог дышетскон центръёс. Соос интые гуртъёсын улӥсьёс понна усьтэмын луозы тямыс интернат классъёс. Ужалозы на кассатэк Россия Федерациысь Правительстволэн постановлениезъя, 2000-тӥ арын 1-тӥ июлёзь газет но журнал вузась киоскъёслы калыкен ужаны лэземын контрольно-кассовой машинаостэк (ККМ). Но газетъёсты но журналъёсты вӧлмытон огъя вузкаронын товарооборотлэн быдӟалаез 40 процентлэсь уно медаз луы. Удмурт Республикалэн Правительствоез таин валче сыӵе ик постановление кутӥз. Удмурт Республикаысь Правительстволэн секретариатэзлэн пресс-центрез. Понедельнике эн вордске, ятэ (Плейӧтон) Понедельник - секыт нунал. Та нуналэ югыт дуннее потэмъёс сярысь кырӟан но юнме шорысь кылдымтэ, дыр. Ма, асьтэлэн но со кырӟанэз нёръямды вань, вылды. Вань, дыр, вань. Кытын ке туж паськыт зарезь шорын вань, пе, кыӵе ке шормуӵ. Уло-выло, пе, отын кычомемъёс. Ужъёссы но соослэн асьсэос кадь ик, йӧскадь уг мыно, пе. Нош удалтымтэзы понна кычомемъёс анайёссэс тышкасько, пе, понедельнике вордскытӥллям шуыса. Озьы, тазьы-а, нош корел тысез татын вань кадь, маиз ке но кӧтурдэсы йӧтыса кошке. Ярам ай, шундылы тау, асьмеос коть копак кычомемын ӧвӧл на. Шынь-шонь ке но азьлань, я берлань мынӥськом. Тани возьмаса, возьмаса вузпӧре но вуиськом кадь ини. Мыным но дыр вуиз, шӧдске, пырак ырак вузпӧре пыреме потӥз. Калык марда улэм потэ угось. Ялан шугектыса улэм уг поты. Утыр пырыны пыри но берлань потэме уг луы ни. Тямысопыд музэн со монэ сюпсе но сюпсе. Нош мон пичияз гинэ вузпӧре пыри вал. "Электротехника в быту" магазин дорысяз. Нош бадӟымаз пырыны шедьтӥд ке? Мар гинэ отын уг вузало. Сыномем езэн кутскыса, супермаркетэн дугдыса - ваньмыз вань. Коть сисьмем помидор, коть вуымтэ арбуз сок но мукет. Вузъёс дуно пото ке, эн басьты. Киостӥд кыскасез ӧвӧл. Ма, созэ но тазэ веръям потэ шуоз кудӥз-огез. Потэ, дыр, но чидалод ни. Ӵыжы-выжыосмы но чидаллям ук, сул но куар сиыса улӥллям. Банан будэ шуыса, мискиньёс, чик уг но тодо вылэм. Вузпӧр, вузпӧр... Ужасьёс ӧвӧл, нош вузкарисьёс кузьыли мында. Зэмзэ но инкуазь буш интыез воксё уг чида, шӧдске. Кин тодэ на? Собере басьтӥсьёслы ваньмыз сярысь тодыны но кулэ меда? Берло дыре корка котырысь электроарбериосын вузкарисьёслэн но лыдзы йылӥз. Шуом, кылсярысь, тыныд электросчётчик, автовыключатель, ез кулэ луиз - вузпӧрын соос ваньмыз люкен-люкен кыллё - мын но басьты. Нош кытысь со арбериос вузпӧре вуэмын, нокинлэн но йыраз валэктон уг шуккы, шӧдске. Вузкарись муртъёслэн гуртазы мини- заводъёссы вань-а, мар-а? Малы ке шуоно, кӧня ке чур винты, пинь вандон понна гинэ но станок нерге кулэ уга. Огезлэсь вузпӧрчилэсь юатэк ӧй чида, кытысь сыӵе электроарбериос шедьтӥськоды шуыса. Милям, пе, юри поставщикъёсмы вань. Соослэсь дунтэмен басьтӥськом, нош калыклы дуногес вузаськом. Ӟабыльтон вискын йыр вылам ӟольгыри чызйиз. Вузпӧрчи кӧтсэ ик посыса, гор-гор серекъяны ӧдъяз. Кинлы ке серем, нош мынам йырам таӵе малпан чилектӥз. Ӟольгырилы тау. Ваньмыз таӵе ужрад бизнес шуиське, пе. Ӟуч сямен вераса "дело", пе, иське уж. Усто уж, мар шуод на. Озьы-а, тазьы-а, нош корел тысез татын но вань кадь. Дунтэмен басьты, дуно вуза, коньдон жильды. Мынам но лушкаськем потыны кутскиз шуыны шедьтод ай йыркурен сэрен, дотово вузкарыны мылкыд ӝутскиз. Эсьмаса, киосы ик гырпумозь лыдыны ӧдъязы. Ужа н ужа, дунтэм басьты, дуно вуза. Куке-соку таӵе "делоез" спекуляция шуо вал-а, мар- а? Но силлогизм интые шуод ай, йылпумъяса мар юам но верам потэ. Кӧня ке ар талэсь азьло вузкарисьёс ӧжыт, эскерисьёс тырмыт вал. Туэ вузкарисьёс данаклы тросгес луизы, нош эскерисьёс кулэсмизы, шӧдске. Соин ик, вылды, сюлэм но гизи-гази луэ, та пумысен юанъёс но тымисько... Малы вуымтэ но сисьмем емышъёсын вузкарыны лэзё? Малы соосты эскерисьёс но алӥсьёс ӧвӧл? Малы вузкарисьёслэн санитарной кагазъёссы ӧвӧл? Малы радиациез возьматӥсь кагазъёс ӧвӧл Кызьы асьме доры визаостэк мукет кунъёсысь вузаськисьёс пыро но кузёясько? Малы адямиосты пӧяса, вузкарон правилоосты тӥяса вузкарисьёсты кырмисьёс но штраф тырытӥсьёс ӧвӧл? Кызьы огшоры адямиос лушкам арбериосын вузкарисьёсты адӟо, нош эскерисьёс соосты тёп-тёп уг адӟо? Малы одӥг вузпӧрчи но, лавка но, киоск но пӧяськытэк уг ужало? Ой, малы, малы?.. Ой малы, малы?.. Кырӟаса лэзёмы шат? Кылӥськод-а, уд-а, мон тынэсьтыд юасько, лэся? Тумошо-а ӧвӧл, нош кинлэсь мон юалом? Нёшто сыӵе чырыен- пырыен пӧртэм инспекциосын, полициосын, вылаз ик, Кун Кенешын, кивалтэтын пукисьёс вырозы? Сыл ай, таӵе юанъёс кылдэмлы но, йӧспӧртэм улон-вылонмылы но, марым, марым, мон валэктон шедьтӥ кадь. Ваньмыз понна понедельник янгыш, дыр. Котькыӵе ужез угось, адямиез но шуэм сямен, азьло ик чакласа, котыр ласянь лыдъяса, ятвылтыса, мертаса, мудрон амалэн лэсьтыны кулэ, дыр, понедельнике медаз вордскы шуыса. Озьы но? Вузпӧре вуылӥзы Мартемьян Азбаров но Леонид Суворов. Журналистъёсын пумиськонъёс Азьтэмъёслы гинэ-а уж уг шедьы? Ужтэк кылемъёс шоры учкон пумен воштӥське. Нырысь-валысь тросэз лыдъяло вал, азьтэм муртъёс гинэ, пе, ужтэк кылё. Табере мукет валан кылдӥз: ужтэк кылён - со обществолэн котыр ласянь шуг-секытъёсы выемезлэн бервылыз. Калыкез уже интыянъя федеральной службалэн Удмуртиысь департаментэзлэн кивалтӥсез Юрий Михайлович Брусянский та удысын туэ январь-июль толэзьёсы кылдэм югдурез журналистъёсын пыр-поч сэрттӥз-пертчиз. Та дыр куспын уже интыянъя службаосы 130 сюрс пала адями вазиськем. Со пӧлысь 14 сюрсэз - дышетскисьёс но быдэ вуымтэос. Июле вазиськемъёс пӧлын тросгес школаосын, вузъёсын, техникумъёсын но училищеосын дышетскисьёс. Озьыен, егитъёслэн ужамзы потэ. Но гужем ӵоже огдырлы уж шедьтӥзы 6 сюрсэз гинэ дышетскисьёс. Департамент бадӟым саклык висъя ужтэк кылемъёслы. Соос радэ пыртон азьын адямилы луонлык сёто 10 нунал ӵоже аслыз уж шедьтыны. Та дыр ӵоже уже интыяськыны уг ке быгаты, ужтэк кылем муртэн лыдъяське ни. Туэ 7 толэзь куспын 45,8 сюрсэзлы ужтэк кылемлы уж ӵектэмын, кылем арын сярысь со 15 процентлы тросгес. Ю.Бруснянскийлэн верамезъя, 1999-тӥ арын уже кутон сярысь федеральной законэ куд- ог воштонъёс пыртэмын. Кылсярысь, азьло аръёсы ужтэк кылем муртлы уж утчан понна одӥг ар ке висъяське вал, табере куать толэзь гинэ. Аналскыса улыны дыр ӧжытгес кыле ини. Удмурт Республикалэн законэзъя предприятиослы косэмын кӧня ке ужан инты кельтыны ужтэк кылемъёслы, сӧсыр адямиослы, быдэ вуымтэослы. Котькуд сыӵе адямиез уже интыям понна, предприятилэн бюджетэ налог тыронъёсыз капчиятэмын луо. Кылем арын та амалэн 27 сюрс адями уже интыямын вал, туэ предприятиослэн кузёоссы 39 сюрс адямилы ужан интыос висъяны кулэ. Но куд-ог кивалтӥсьёс та законлэсь палэнскыны выро. Со понна кыл кутытэмын Кез районысь жилищно-коммунальной хозяйство. Кивалтӥсез штраф тыриз - коньдон келямын Сарапулысь инвалидъёслэн юртазы. Нимысьтыз программа кутэмын дышетскон интыосты йылпумъям муртъёс пумысен, угось ӵем дыръя дипломен адями но аслыз уж уг шедьты - 546 мурт уже интыямын. Кыӵе профессиос туннэ кулэтэмен лыдъясько? Юрий Михайловичлэн верамезъя, со - улӥ разрядэн токарьёс, фрезеровщикъёс, инженеръёс. Уно юанъёс кылдыло ужтэк кылемъёслы пособиос тырон пумысен. Соос туж ӝегаса вуо. Туэ но югдур уг воштӥськы, пособиосты тырон огинтыын сылэ. Лякытгес югдур Ижевскын, Завьял, Игра, Якшур-Бодья районъёсын. Предприятиослэн уже интыянъя фондлы тыронъёссы 34 миллион манет люкаськемын, тужгес трос Глазовысь Чепецкой механической заводлэн, Ижевскысь механической заводлэн, "Ижмашлэн" но Горький чугун сюреслэн. Таизлэсь тыронъёссэ суд пыр куриллям, озьы ке но, 30 миллион манет пӧлысь со пичи люкетсэ гинэ тырем ай. Огъя верано ке, Урал улосвылъёсы пырись предприятиосын ӵошатыса, Ижевскысь предприятиосын али ужтэк кылемъёс тужгес но тросгес лыдъясько - 1,9 процент пала. Кылем арын республикаын одӥг ужан инты понна 15 муртлы нюръяськоно вал. Туэ но югдур сыӵегес ик. Т.Банникова. Вуюись лентаё аръёс Али гинэ вал кадь дас сизьым арес. Табере ачиз Людмила Андреевна кемалась анай ини. Нош егит дыр кыдёке кылемын, лызо-вожо кисьтӥськись вуюись лентаос вискы ватӥськемын. Анаез но кемалась ӧвӧл ни. Ноку но Людмила Андреевна ӧз малпа, вордӥськем интыосызлэсь ӵыдыны быгатоз шуыса. Табере анай-атай гуртаз куно луыса гинэ бертылэ. Пичи дырысь тодмо лудъёс, возьёс, нюкъёс но нюлэсъёс соку анай сямен сое "мӧзмид-а" шуыса шуныт пумитало. Нылмуртлы атай юртысь кошкыны кылдэм. Быдэ вуыса, улэм интыысьтыз выжыеныз ик ишкалскыса, солы мурт семьяе пыроно, отысь сямъёслы дышоно. Миля (озьы шуо сое Аксакын) соку гинэ Сигаевоысь совхоз-техникумез йылпумъям чебер, йӧно, Вася нимо пияшез пумитаз. Собере сюан, тӧдьы дӥсь, егит дыр эшъёсын люкиськон. Аксак школаын вожатойын ужась нылашлэн пыдлось малпанэз но быдэсмиз со - Сарапулысь педагогической училищее заочно дышетскыны пыриз. Васиез дорын, Шор Кечёлын улыкузы, егитъёслэн Ирина нылзы вордӥськиз. Соку кузпалыз кылпум поттылӥз Завьялово ёросысь Сизьгуртэ кошкон сярысь. Нылмы но, пе, садике ветлоз, аслад но ужед луоз, колхозлы специалистъёс кулэ, шуо. Квартираос но, пе, дасесь, корка ву кыскемын. Нош улыны лыктӥзы но чабкиськизы. Корказылэн выжъёсыз гинэ но вӧлдэмын ӧй вал. Йылаз-пумаз вуттымтэ ужез асьсэос ик Тепинъёс йылсазы. Азьлань-берлань уд ветлы ук, кыл сётӥм бере, татчы ик интыяськом ини шуизы. Бӧрысь лыктӥзы Завьялово черко гуртэ. Василий Николаевич "Россия" колхозэ бухгалтере интыяськиз, нош Людмила Андреевналы оскизы колхоз нылпи садэн кивалтыны. Кивалтон уж сюлмаз ӧз биниськы, нылпиос борды ик кариськиз. Али ужа 2 номеро "Колосок" нылпи садын, воспитатель луыса. Колхоз ӟеч- ӟеч улон инты сётӥз. Писпу сямен, семья татчы юн-юн выжыяськиз. Вордӥськизы на Надизы но Колизы. "Край мой Завьяловсктй" книгаез учкисько но, отысь но Людмила Андреевнаез адӟисько. 30 ар со сётӥз та музъемлы кужымзэ, визьзэ, тазалыксэ, тодон-валанзэ. Соин ик со татын гажамон адями, удмурт культура обществолэн тӧроезлэн воштӥсез луэ на. Капчи мылкыдыныз кытчы гинэ со уг вутскы. Ваньме-а, уг-а, "уг" шуонэз уг тоды, уж бере удмурт дӥсьсэ дӥся но сюрес вылэ потэ. Людмила Андреевнаен Василий Николаевич визьмо но калыклы ушъямон нылпи будэтӥзы. Бадӟымез Ирина нылзы Завьялово школаын нылпиосты математикалы дышетэ, Надизы но анаезлэн но апаезлэн сюрес кузязы вамыштӥз, Ижкарысь педучилищеез йылпумъяса, Докша гуртысь нылпи садын воспитатель луыса ужа. Нош Колизы туэ йылпумъяз ИжГТУ-эз, визьмо пияшез университетэ ик аспирантурае кельтӥзы. Нылпилэсь но, пе, золгес шумпотоно нылпилэн нылпиезлы. Тепинъёслэн соос куинь кузя - Саша, Маша но Вера. Паймисько мон та семьялы, ку гинэ соос доры эн пыры, кытысен гинэ эн пумита, котьку капчи мылкыдоесь, вазиськисесь, кунозы сьӧры одно ик маке но салам келяны шедьтозы, доразы пырем муртэ, пӧсь мунчоязы пыртозы (нуналлы быдэ соослэн со эстэмын). Сыӵе капчи луэмзы понна ик, дыр, соосты гурт калык гажа. Миля апай ваньмызлы анай кадь луэ, шунтыны быгатэ. Со доры вуо, берто, лыкто трос ӵыжы- выжыоссы но тодмооссы. Тепинъёс асьсэ кужымен 20 гектар музъем возё, отчы картофка мертто. Василий николаевич фермер лыдъяське. Нош корка берысьтызы пичи бакчаязы ке пырид - паймод, выжыкыл дунее вуи кожалод. Ӟеч адямилэн киыныз мерттэм-будэтэм емыш но удалтэ, дыр. Мар но уг буды отын! Адӟиське, ваньмыз рос-прос, йӧн-йӧн лэсьтэмын. Бен, бакча котырын гинэ ке вырон-берган луысал, ай пудозы но соослэн гид тросаз. Тепинъёс, тэк улонэз тодӥсьтэм адямиос, соин ик соос тыро-пыдо, бусьтыр уло. Туэ эшшо но бадӟым уж борды басьтӥськизы-Завьялово пуме выль корка ӝутыны малпазы... Тани туриос Людмила Андреевналэн йыр вадьсытӥз витьтонэтӥ ползэ гурласа ик лобозы шуныт палъёсы. Туннэ солэн вордӥськем нуналыз. Нош шепаськем ю веттаське но веттаське, аслэсьтыз кырӟанзэ со шунды си кадь кисьтэ. Людмила Андреевналэн сюлэмыз нёркак луэ - Аксакын но тазьы ик меда нёжъя та вуэм зарни шеп? Любовь Тихонова. Эстӥськон тырмыт луоз 24-тӥ августэ Удмурт Республикаысь Кун Кенешлэн Тӧроезлэн Александр Волковлэн кивалтэмез улсын юосты утялтонлы сӥзем кенешон ортчиз. Отчы пыриськизы Удмурт Республикаысь Кун Кенешлэн Тӧроезлэн нырысетӥ воштӥсез Владимир Агашин, Удмурт Республикаысь Правительстволэн Тӧроез Николай Ганза, Правительстволэн Тӧроезлэн воштӥсез Михаил Назаров, коньдон ужпумъёсъя министр Владимир Бельтюков, гурт хозяйствоя но сиён-юонъя министр Петр Першин, "Удмуртнефтепродукт" АО-лэн валтӥсь директорез Андрей Осколков но мукетъёсыз. Совещаниын юосты октон-калтон вакытэ бензинэз но эстӥськонэз дыраз но вискарытэк висъянъя ватсаса ужрадъёс чакламын. Пусъемын вал, сӥзьыл бусы ужъёсыз дыраз йылпумъяны эстӥськон тырмыны кулэ. Та ужрадэ пыриськемъёс соглаш луизы Александр Волковен, Удмуртиысь Кун Кенешл но Правительство валтӥсь ужпумен лыдъяны кулэ куинь толэзьлы тырмымон ю тысь запас кылдытонэз. Со куд-ог шуг-секытъёсыз палэнтыны юрттоз. Удмуртиын ю-нянь туэ сокем ик ӧз удалты. Соин ик таӵе амал ыштонъёсыз но берыктыны луонлык сётоз. Удмурт Республикаысь Кун Кенешлэн пресс-службаез. Валэктэ юрист Сэрегез дася адвокат Лилия Шкляева Мон вордскемын Н. Лудзя гуртын 1922-тӥ арын октябрь толэзе. 6 классэз быдтӥ но отӥяз ӧй ни дышетскы: сузэръёсы но выны пичиесь вал, мӧйыосмы лябесь. 6 класс бере ик фермае ужаны мынӥ. 1955-тӥ арын кунян сюдыны кутски, скал кыски. 1961-тӥ арын лыктӥ Юськие. Дояркаын ужай 1978-тӥ арозь. Собере техник-осеменатор вал 1997-тӥ арозь, пенсие потытозям. Пусъемын пӧртэм грамотаосын. 42-43 ар весь пудо вордонын ужаса, шутэтскон нуналъёсты адӟытэк, мар мон басьтӥ? "Ветеран труда" шуонзэс гинэ но ӧз сётэ! Шуизы: со, пе, 1992-тӥ арысен ӧвӧл ни. Нош отчыозь ваньмыз заподряд басьязы ук. Кыӵе ужад, мар лэсьтӥд - пенсие потон арлыдыд вуиз но - "Ветерана" получай и "Ваня, гуляй" Сыӵе ветеранъёслэсь льготаоссэс син адӟыса но пель кылыса, кызьы-о йырыд кур уз луы? Коть ас вылад бензин пазьгы но тыл кушты. Но таӵеезлэсь инмар ачиз мед утёз. Амалтэк оломар кылъёсты но гожтод вожпотэмен, Николай Некрасов сямен: "Полить бы дождям кровавым, Греметь громам суровым". Валэктэ вал со ветеран ним пумысен кытчы вазиськыны. Ираида СЕМЁНОВА. Завьялово ёросысь Юськи черкогурт. Та юанлы валэктон утчаса вазиськоно луиз Кун Кенешысь наградаосъя секторе. Отын валэктӥзы: "Ветеран труда" но "За доблестный труд в годы Великой Отечественной войны" медальёс табере уг сётъяло. Басьтыны луэ "За доблестный труд в годы Великой Отечественной войны" удостоверение. Со понна тӥледлы архивъёсы вазиськоно, война аръёсы ужамды сярысь документъёс утчано но Завьялово районлэн администрацияз вазиськоно. Документъёс ӧз сюре ке, люканы луысал адӟисьёслэсь (свидетельёслэсь) гожъямъёссэс. Но сыӵе амалэз кутыны быгато 1930-тӥ-1931-тӥ аръёс бере вордскемъёс гинэ. Фестиваль бере Синмальдон Ог выжыысь калыкъёс пӧлын удмуртъёс, пе, тужгес но кырӟаны яратӥсесь, поръёс эктыны мастакесь, комиос кузь кырӟан-мадён ласянь устоесь. Нош мордваос? (Шонерзэ: мокшаос но эрзяос - соосты висъяса вераны шонергес.) Тодосчиослэн эскеремзыя, мордвалэн, финн-угор калыкъёс пӧлын гинэ ӧвӧл, быдэс дуннеын синмаськымон луэ уно куараё хорен кырӟамез - дас куараозь но со вуэ. Та малпанэз зэматыса паймытӥзы ке паймытӥзы Мордовиысь "Мокшаночка" но "Диголя" фольклор ансамбльёс. Инсар ёросысь Кочетовка гуртысь куамын-ньыльдон аресъем нылкышноос кырӟаны ке кутско, золтэм ез кадь пезьгыт, жин-жин, задор шуккиське куаразы. Кырӟамзы, дӥськутсы гинэ ӧвӧл, нимъёссы-фамилиоссы но тупало: куатез Асташкина, кыкез Ермакова, быдэн кыкен Валентиназы, Тамаразы, Любазы, Надежда, Анна. Таос лыктэмъёсыз пӧлысь. Витез зол кырӟасьёссы гуртазы кылиллям. Кочетовкаязы туж дано, 50-60 ар талэсь азьло кылдытэм хорзы вань, тросэз нылкышноос отчы ветло. Нош "Мокшаночкаен" 38 арзэ кивалтэ ни Анна Трофимовна Асташкина. Куинетӥ классысен кутскыса, татын быдэсмо выль но выль кырӟасьёссы. Али сьӧразы Удмуртие кутылӥзы ньыльзэ дышетскисьёссэс. Кин крезьгуръя школае ветлӥз яке ветлэ, быгатэ баянэн, аккордеонэн но шудыны. Нош кытчы но вуылӥллямтэ ни та "мокшаночкаос" - Финляндиын но ваньзэс паймытыса кельтӥллям. Векчи весьлэсь - бисерлэсь - чильтэр быдэсак шобыртэ пельпумзэс, гадь вылзэс. Нимаз весьёс бырттылэмын на. Нош юбкаоссы, паськытэсь азькышетъёссы - быдэсак вуюись: чуро-чуро пужъятэмын-итылэмын. - Азьло дыръя уксёен, вашкала весьёсын трос чебермало вылэм. Но сыӵе дӥсез секытгес нуллыны, - паймемме адӟыса валэктэ ансамбльысь одӥгез етӥз нылкышно, гурт администрацизылэн тӧроез Валентина Сергеевна Асташкина. - Кызь ар талэсь азьло Саранскын лэсьтӥзы та чеберъяськонъёсмес, компони шуиськом сое. Табере хорамы вань та киужен вырыны быгатӥсь кышномурт, кружок нуэ, нылзэ но дышетӥз ни. - Нош ми, диголяос - рабочей посёлокысь, Чамзинкаысь, огшоры эрзя пиос, - шуиз кивалтӥсьсы Виктор Андреевич Сыркин. Шуиз ке но, огшорыесь вылӥллямтэ. "У нас руки золотые, сварим суп из топора" шуыса но паймыто, "рос поксясонь местеня" выллем кылъёсын но асьме учкисез пӧртмало. Маскаръяськонзы таослэн уртчыса потэ, соин ик залын гур вазьыса улэ. Баянэн, арганэн гинэ ӧвӧл, пеллянэн, шальккетонэн шудыны кутско ке, пыдъёс эктыны курисько. Нош Диго, Диголя - со эрзя пилэн нимыз, пе. Озьыен, таос асьсэды мусояса озьы нимало. Огшоры ке, та вить егит воргоронъёс вераськисьтэмесь кадь, нош сцена вылэ тӧдьы пужыятэм сиресо-сӧзуло дӥсьёсынызы пото но, кыскыса уд васькыты ни. Уката ик - чагыр-чагыр синмозэ, Анатолий Кузьминэз. Нош Евгений Зуковез, ӝужытсэ, веськрессэ, весь пӧлазы сюанэ кыско, эмеспи каро "мокшаночкаос". Огъя вераса, динь-динесь та эрзя пиос, ваче тупамын: Сергей Кантеев арганчизы но, Александр Пигарев егит кырӟасьсы но. Нош Виктор Сыркин - азветлӥсьсы, амалтэк серемез поттӥсь, маскара адями. Я, тодматским, лэся, эрзя-мокшаосын, табере - сюрес вылэ. ПАЗ но УАЗ автобусъёсын кызь час лыктэмъёслы шутэтскыны маза ӧй вал, вуэмзы бере ик - репетиция. Ӵуказеяз - фестивалез усьтон, собере - Вотка каре... Сюрес вожын возьма ни вылэм Воткинскысь туж тодмо ӟуч ансамбль - "Горенка" (Египетэ но вуылэм таид). Ӟуч сямен сылалэн-нянен, удмурт перепечен, бигер чак-чакен пумитазы, паськыт вож сюрес сӥзизы. Нош отӥяз Кукуи культура юрт вӧлак усьтӥз ӧсъёссэ. Татысь "Дыдыксин" клуб, "Шулдыр мылкыд" ансамбль, солэн кивалтӥсез Алевтина Перевощикова, арганчи Юрий Федотов, усточи Павел Роготнев но мукетъёсыз чечыен, паронкаен, пыжиськемъёсын, емышъёсын тырвыло ӝӧк дасяллям. Нош сцена вылын жингыртӥз концерт... П.И.Чайковскийлэн вордскемез дырысен 150 ар тырмыку, асьсэ доры крезьгуро фестивале ветлӥз ни вал "Мокшаночка". Нош композиторлэн музей-юртаз пыраны али гинэ кылдӥз. Беромыса ке но вуим, та дано интыен тодматӥзы. "Юбилейный" ДК ӝуатэм ни тылъёссэ. Дворец ке дворец ик та: позыръяськись тубатъёстӥ инме кадь тубиськод. Ньылетӥяз этажын - бадӟым сценаен зал. Чеберак ӝӧкъёс но пуктылӥллям, соос сьӧры ӧтизы кунооссэс. Варсен аракызэс веръятӥзы, пыжкемъёсын куноятӥзы. "Тюрагай" фольклор ансамбль, кивалтӥсез Сергей Трофимов, нырысьсэ пыриськиз таӵе фестивале, данзэ ӧз уськыты - алигес солы калык ансамбль ним сётӥзы. Озьы ик "Крезьчи" нылпи ансамбль мусо адӟиськиз, Оля Вахрушева, чебер куараеныз оскытӥз, тодмо кырӟась луоз шуыса. "Сиеме но уг поты но, юэме но уг поты, сием-юэм интыысьтым кошкеме но уг поты" шуыса ик люкиськоно луизы "тюрагайёс" "диголяосын" но "мокшаночкаосын". Нош мар карод - дыр бероме. Вуоно на вал киваръёс, отысен пихтовкаос доры. Ярам, таос огазе - Пихтовка культура юртэ - кариськиллям. Киварысь 14 кырӟась песянайёс озьы гинэ лэзьысалзы меда дорысьтызы? Та юртын но соослэн туж потӥз асьсэды возьматэмзы: бадӟым концерт пуктӥзы, внукъёссы но пӧлазы пыриськизы. Гурпул но, кусо но жингыртонэ кутэмын вал... Мукет дыръя ку ай таӵе учыр шедёз: ноку адӟылымтэ куноос лыктэмын ук! "Шулдра чокчне!" ("Шулдыр ӝытэн!") - "диголяослэн" вазиськонзы ас сьӧраз валтыса нуиз... Таос но, "мокшаночкаос" но таяз учыре асьсэлы эрик сётӥзы, кӧня мылзы потэ кырӟаны. (Шонер лэсьтӥллям: ӵуказеяз уго, фестивалез ворсан нуналэ, соослы чик инты ик ӧз сётэ ни кадь.) Нош Ижысь "Эктон коркась" егитъёс мар эктонэз быдэстӥзы та пумиськонъёс дыръя: алнашъёс сямен - куатен, грахъёс сямен - ньылен, варклед-бодьяос кадь - тямысэн, гурезь поръёс выллем но... Синмаськыса ик быризы куноосмы - эктоно ке, милям хореографмы ӧвӧл. Ӝӧк сьӧрын ваче пукизы, чорыг лым сиизы, эшъяськонзэс азьланьтыны вераськизы. Уйшор бере кык час котырын гинэ люкиськизы. Кин кытчы ветлӥз та ӝытэ (нош кытчы - гожъямы ни вал), пыраклы вунонтэм кылёз. Гурт калыкмы куноятэ ке, вань мылкыдзэ сётэ, вань пӧрамзэ поттэ. Куноосмы понна ёросъёсы вуылэмзы, зэмзэ ик, пурысь зор вискын вуюись пиштэм кадь вал. Нош огъя - мар ушъямонэз? Кылзом ай нырысь ик, мар шуо куд-ог асьме эшъёсмы. Андрей Прокопьев, "Эктон корка" коллективлэн кивалтӥсез: - Умой ик ӧвӧл мылкыды. Но Воткинскын туж кельшиз. Уг тодӥськы, малы фестивалез радъясьёс пӧлын ӧй вал фольклоръя одӥг но специалист. Усьтон дыръя котькудколлектив фонограммаен сётэмын. Венгер музыкантлы Гергей Агочлы но озьы ик шуизы: фестивале пыриськемед потэ ке, фонограммаед мед луоз. Со пумит луиз.(Пыриськиз, фестивалез ворсам бере ини. - Т.П.) Сценография уг тупа вал. Гуртысь артистъёсыз, шуом, выльысь дышетӥзы пыдчиньы йылэ кариськыса эктыны. Постановщиклэн ассэ кызьы воземез, вераськемез ӧз яра. Асьме фольклор коллективъёсыз, соослэсь мае возьматэмзэс ӟечгес быръёно вал. Огъя вераса, Культурая министерство ас ужзэ умой ӧз быдэсты. Надежда Пахомова, Киясаысь "Ашальчи" калык ансамбльысь кырӟась-эктӥсь: - Кемагес мед луысал та фестиваль, одӥг нунал коть ялкарыны мед сётысалзы. "Шондибанъёсын" ми тодмоесь вал ни соос доры ветлэммыя, нош татын дыр ӧз тырмы мукетъёсыныз тодматскыны. Кудымкарын но, Нефтекамскын но озьы ӧй вал, кызьы асьмелэн репетициосын курадӟытӥзы. Фестивальлэсь азьло кык нунал Иже ветлӥм. Собере усьтон азьын репетиция, ӵуказеяз... Сальялан уйбыт куно карыса потӥм, 6 часын гинэ бертӥм, 8 часын кошким ни Иже репетицие. Отын - 11 часысен, ӝыт одӥг час ялкарыса сцена вылэ потоно ни вал. Нош режиссёр огназ, со янгыш ӧвӧл, дыр, копак ваньмыз воштӥськиз бере... Тау, чидазы "ашальчиосмы". Районысь кузёосмылы тау - весь милемын вал, юрттӥзы. Озьы ик - сальяослы но, номырзэс ӧз жалялэ, утялтӥзы. Нош вылӥысь, котьку сямен ик, нокыӵе юрттэт, коньдон ӧй вал. Тау но ӧз шуэ. Тазьы котькудӥз пӧсь сюлэмзэ кисьтыны быгатысал. Шуом, репетициосын жуммытӥзы, нош концертын возьматскыны дыр ӧз сётэ. Кин ке ас дораз, гуртын, куноятӥз, нош ӵуказеяз сое "Металлург" двореце нырзэ чуртнаны ӧз лэзе. Кинэ ке радио яке газет алдаз - фестивальлэсь концертсэ учкыны мынӥз, нош со отын ӧвӧл. Кинлэн ке потэ вал финн, эстон, мадьяр эктӥсь-кырӟасьёсыз адӟемез... Бен, мар но уз поты учкисьлэн... Кылзэмед потоз вашкала шӧмо кырӟанъёсыз, нош солы дэмлало кыл йылын пӧськытэмъёссэ (та ласянь чакласьконо вылэм палэнысь удмурт коллективъёсмылы). Собере куд-огез кыдёкысь куноосмы одӥг-кык кырӟанэн гинэ потазы на берло, нош со дыре ик мукетъёсыз быдэс программазэс возьматыны шӧтазы. Малы ке но ӟуч коллектив вал фестивальын, нош вашкала дырысен матысь эшъёсмес - чувашъёсыз - весь вунэтӥськом... Я, ӵок, фестиваль йылпумъяськиз, комъяськиз ке но. Нош комъяз сое, шуом ни, куазь, дугдылытэк кыдырась зор. Малы меда фестивалез радъясьёс тае лыдэ ӧз басьтэ? Шор площадьын ке ӧвӧл - Операя но балетъя театрын, "Динамоын" ке ӧвӧл - "Металлургын". Ивортонъёс-ялонъёс ӧй вал. Урамысь калык ӧз тоды, макем узыр, аспӧртэм вал киужъёсын ярмарка. Кӧня калык адӟысалыз но, пыриськысал на инбам улын шулдыръяськонэ. Зэм, зор люкетӥз... Но люкетӥз, дыр, мукетыз но. Фестивальлы дыртыса дасяськоно луизы, Москваысь висъям коньдонэз кема возьмазы. Культурая но Нациосын ужанъя министерствоослэн куспазы ужзэс люкемзы но кытӥяз люкетӥз, дыр. Малы пуктоно вал прессаен ужаны нимысьтыз адями, со оргкомитетэ но уг пыры, югдурез уг тоды бере? Журналистъёслы, телевидениын ужасьёсызлы сяна, аккредитация ортчытэмын ӧй вал, соин ик соос гожеръяса ветлоно луизы. Со быдӟа калык тулкым - ог 300 мурт - погыльтэмын вал одӥг режиссёр-постановщик вылэ. Семён Борисович Сухенький укыр тыршиз, валамон, азьвыл аръёсы кадь синмальдымон карыны фестивалез. Нош соин сэрен малы курадӟытоно вал куноосты? Жадемзэс-а тодазы ваёзы? Оло, кызьы шуиз огез пияш, вань лыктэм калыклы урамын шулдыръяськыны эрик сёт вылэм но - номыр кулэ ӧй луысал ни. Берло озьы ик луиз. "Металлург" двореце "тэрымтэ" калык артистъёсын ӵош кырӟаз, поръяз, эктӥз. Дэрем пужыоссэс но кутылыса ик учкыны быгатӥз. Фестивальлэсь флагзэ лэзем бере, Венгриысь эшъёсмы оскытӥзы: - Ми дорын тӥледлы татынлэсь уродгес уз луы... Озьыен, тямысэтӥез калык куспо финн-угор одӥг но фольклор фестиваль - вуоно арын 21-22-тӥ инвожое Сегешпехешвар карын. Ӟеч лу, удмурт музъем вылысь зоро-бусо но вуюисё фестивальмы... Т.Петрова. � Тани соос, мокшаноыкаос. Михаил Егоровлэн туспуктэмез. Сарапулын ужаз 25-тӥ августэ Удмурт Республикаысь Кун Кенешлэн Тӧроезлэн нырысетӥ воштӥсез Владимир Агашин ужаз Сарапул городын, пыриськиз Сарапул ёросысь дышетӥсьёслэн конференциязы. Со люкаськемъёсты сюлмысь ӟечкылаз школа улонысь бадӟым праздникен - Тодон-валанъёсъя нуналэн но выль дышетскон арен, со сяна, тужгес сюлмо дышетӥсьёсты кун наградаосын пусйиз. Дышетӥсьёслэн тыршемзы шӧдӥське нылпиослэн тодон-валанъёссы вылын но. Тани туэ Сарапул ёросысь 21 дышетскись шор ёзо школаез зарни яке азвесь медален йылпумъяз. Конференцие пыриськемъёс пусйизы на: ёросысь дышетон учреждениослы ӟеч ужаны юрттэ дыраз коньдон висъян. Кылем арен ӵошатыса, туэ паларе со кык поллы трос вуиз. Сарапул ёрос администрацилэн кивалтӥсезлэн Александр Антроповлэн ивортэмезъя, туннэ нуналлы кулэсмизы ни пунэм тыронъёс. Калыкез дышетон удысын ужасьёс уждун ньыль толэзьлы бере кыльыса басьто ке вал, та вакытэ со толэзьлы гинэ ӝега. Ёросысь школаос туннэ дась ини пиналъёсыз парта сьӧры пуктыны. Удмурт Республикаысь Кун Кенешлэн пресс-службаез. Туннэ - Кинолэн нуналэз Ӟеч азинлыкъёсын пумита сое Россиысь тодмо актёр но кинорежиссёр, Россиысь калык артист Никита Сергеевич Михалков. Со - тодмо калык кылбурчилэн Сергей Владимирович Михалковлэн пиез. Никита Сергеевич Михалков учкисьлы тужгес тодмо "Свой среди чужих, чужой среди своих", "Раба любви", "Неоконченная пьеса для механического пианино", "Пять вечеров", "Несколько дней из жизни И.И.Обломова", "Родня", "Без свидетелей", "Очи черные", "Урга" фильмъёсыныз. Берло дыре тужгес тодмо луизы "Утомленные солнцем" но "Сибирский цирюльник" киноосыз. Никита Михалковлы сётэмын Америкаысь киноискусствоосъя академилэн "Оскар" нимо премиез. 1993-тӥ арын - Россия Федерацилэн Кун премиез. Валэктэ юрист Сэрегез дася адвокат Лилия Шкляева Ӟечесь-буресь! Трос аръёс ӵоже лыдӟисько "Удмурт дунне" газетэз. Тӥляд вань "Валэктэ юрист" сэрегды. Мынам но кылдӥз тӥледлы юанэ, малпасько: тӥ сётоды валэктон. Нош юанэ таӵе. Колхозысь мон ваньбур пайме басьтыны турттӥсько квартираен. Со - хозяйстволэн, али отын улӥсько. Колхозлэн правлениез озьы сётыны соглаш. Нотариальной контораын шуизы: паез квартираен басьтыку лэсьтӥське вузан-басьтонъя договор. Соку мыным тыроно луэ квартиралэн дунызлэсь 2,5 процентсэ. Шонер-а веразы мыным? Кыӵе ке мукет договор лэсьтыны уз луы-а? Пичи Пурга ёросысь Таня апай. Сыӵе ужрадэз быдэстон понна лэсьтоно огкыл (договор). Сое нотариальной контораын юнматоно ӧвӧл. Огкылын пусъёно ваньбурлэсь нимзэ но дунзэ, сотэк договор зэмос уз лыдъяськы. Квартираез тӥледлы выжтозы нимысьтыз актъя, таиз огкыллэн висъянтэм люкетэз лыдъяське. Россия Федерацилэн Граждан кодексэз но "Интыяз кыллись ваньбурлы (недвижимое имуществолы) но соин герӟаськем ужрадъёслы правоосты кун ласянь пусъён (регистрация) сярысь" Россия Федерацилэн Законэзъя сыӵе огкылэз кун ласянь пусъёно. Озьы лэсьтэм бере гинэ огкыл кужыме пыре. Удмурт Республикаысь Правительство 1998-тӥ арын 2-тӥ ноябре та ужпумъя постановление кутӥз. Соя огкылэз пусъё нимысьтыз кылдытэм организациын - Регистрацияя палатаын. Соку тӥледлы сётозы свидетельство но квартираен кузёяськыны право. Пусйыны кулэ мукетсэ но. Улон интыен герӟаськем документъёсты туж сак эскеро. Соин ик тӥляд кыӵе ке валатэк кылем учыръёсты вань ке, мынэлэ та ужен вырись юрист доры. Та удысын копейкаез шыръян вуттыны быгатоз трос манетъёсын ыштонэ, Таня апай. ШӦКЫЧ Ӟеч кӧлод, кема улод Туэ 17-тӥ августэ ньыль часын ӵукна вал со. Завьял ёросысь "Родина" СПК-ысь Мещеряки гурт вӧзысь гужем пудо возён лагерь эскерисьлы та уй кузь потӥз. Парсьёс со парсьёс ини. Азбаразы мурт адями вуыса кузёяськыны ӧдъяз ке, пель урмымон кесяськыны кутскозы. Соин но, дыр, парсьёслэн уй кузёзы сак изе. Солэн пал синмыз котьку усьтэмын. Тани та ӵукна но Аркаш, сюлэмзэ буйгатон вылысь, тамаксэ пурккетыны потӥз. Шӧдтэк шорысь артысь скал гидын юг-юг тыл ӝуатскиз, укноысь вужеръёс адскизы. Куинь тодмотэм воргоронъёс быдэн скал капыртыны малпаллям. Парсь гидысь уй кузёлы сялӟиськы но тӥни вал - ӧз чида. Малпаз скал гидысь эшезлы юрттыны. Ворасьёсты кышкатыса кеськиз но... бӧрысь аслыз ачиз ик жаль потыны ӧдъяз. Уго скал гидысь юрттыны нокин но ӧз поты солы. Юэм бӧрсяз, пе, со адямиез танкен но, пушкаен но сайкатыны шугъясько вылэм. Озьы ик луиз таяз учыре но. Куинь бугайёс возьмаськисьёслэсь капчиен мозмытскизы - юн жугизы. Нош синйылтэм скалзэс вандыса, 100 кило пала сӥль лушкаса нуизы. Сӧсырмем эскерись мырдэм пыд йылаз султӥз, милицие жингыртӥз, калыкез люказ. Фермаен кивалтӥсь вуыса, скалъёсты лыдӟиз но кулыса усе ни вал. Уллёысь 60 скал ышемын, нош лушкаськисьёслэн пытьызы одӥг но кыльымтэ. Гуртоос соку ик сазьтӥськизы, Завьял ёросысь милиция но пӧсе вуэмын. Бӧрысь гинэ тодмо луиз, "ышем скалъёс" усьтэм ыбесэтӥ, пастухез возьматэк ик, лудэ пазьгиськиллям. Скал гидысь уй кузё гинэ номыре ӧз тодылы. Ваньмыз огыр-бугыр вакытэ но со кужмо кӧлэ на вал. Малпасько, кема улон вылысь кужмо кӧлалоз ни гуртаз гинэ. Ю.Байбеков. "Корт катанчи" уг люкеты ни Алигес Ижысь механической завод нош ик ас дораз журналистъёсты люкалляз. Таяз учыре предприятилэн продукциеныз ӧз тодматэ. Ортчиз "котырес ӝӧк" сьӧрын тунсыко пумиськон. Солэн мугез но аспӧртэм. Азьвыл аръёсы Удмуртия "корт катанчи" сьӧрын вал. Табере пыӵал тӥрлык поттӥсь предприятиосамы но мукет кунъёсысь специалистъёс, вуз басьтӥсьёс, журналистъёс вуыло ни. Механической заводэ США-ысь кык журналистъёс лыктӥзы: Майкл Буссард - "Американский стрелок" журналлэн технической редакторез, Герри Джеймс - "Оружие и боеприпасы" журналлэн валтӥсь редакторез. Та изданиос Америкаысь лыдӟисьёсты дуннеын поттэм пыӵал тӥрлыкен тодмато. Но, кызьы шуизы куноос, Россиысь таӵе продукция поттӥсьёс сярысь Западын уг тодо на. Соин американецъёслэн та удысэн интыяз ик тодматскемзы потӥз. Журналистъёс тодматскизы Ижын поттэм пыӵал тӥрлыкен. Со сярысь умой мылкыдзы кылиз. Кызьы шуиз Герри Джеймс, быдэс дуннеез котыртыса, ож тӥрлык поттӥсь та быдӟа заводэз ӧй пумита вал на. Предприятиын дасям оружилэн ӟечлыкез но умой. Италиын поттэм пыӵалъёсын ӵошатыны луоз. Америкаысь лыдӟисьёслэн Россиысь ожмаськон тӥрлыкен, солэн технической тодметъёсыныз тодматскемзы потэ. Таӵе амалэн ужало "Американский стрелок" но "Оружие и боеприпасы" журналъёс. Соослы пыӵал поттӥсьёс кык-куинь пыӵал тӥрлыксэс но соослэсь технологизэс келяло. Татын ож тӥрлыкъёсты котыр ласянь дунъяло но журналазы печатлало. Изданиос эрикоесь, соин ик пыӵаллэсь ӟечлыксэ курланы уг кышкало. Нош Удмуртиысь ожмаськон тӥрлыкез лыдӟисьёссылы басьтыны дэмлалом шуизы. Удмурт журналистъёс США- ысь куноослы юанъёс сётъязы. - Кызьы дунъяськоды Ижысь механической заводэз? - Ми ӧм адӟылэ на вал та быдӟа, ужзэ умой радъям обороная предприятиез. Заводлэн вань аслаз профилакториез, госпиталез. США-ын таӵеез ӧвӧл. Татын пыӵал тӥрлык поттыны егит специалистъёсты дасянъя школа но вань. Дунне вылын соос кык-куинь гинэ лыдъясько. - Пумиськылӥды-а тӥ Михаил Калашниковен? - Таӵе ужрад чакламын ӧвӧл. Америкаын дунне вылысь тодмо но дано адямиос сярысь телепрограммаос потыло. Мон Калашников сярысь передача дасяны ӵектӥ, - шуиз Герри Джеймс. - Мар верасалды интеллектуальной пистолет сярысь? - США-ын трос сыӵе политикъёс, кудъёсыз куд-ог адямиос пумысен иворъёсты шараямез кулэстыны туртто. Ми солы пумит. Ижысь механической завод пыӵал тӥрлыксэ Америкае 1990-тӥ аръёсы вузаны кутскиз. Таяз аре гинэ 2 миллион доллар тыр келямын ини. Ар бырытозь, заводлэн кивалтӥсьёсыз 3 милион долларлы оружие вузаны малпало. США-ын 75 миллион муртлэн пыӵалъёссы вань. Та лыдпуслэн мугез но валамон: Россиын 635 магазинлы пыӵал тӥрлык вузаны лэземын, нош США-ын - 16 сюрсэзлы. Ижысь механической завод Америкае вузаны 23 модификациен пыӵал тӥрлык дася. Заводлэн вуоно арлы но заказъёсыз уно ини. Ижын поттэм пыӵаллэн данэз Западын ялан будэ. А.Андриянов. Туспуктэмез В.Камашевлэн. Кырӟанъёсмы яраллям Финн-угор калыкъёслэн сизьыметӥ калык куспо фольклор фестивальзы дыръя милемлы но шуд усиз куно пумитаны-келяны, ӵыжы-выжыосынымы огинын шулдыръяськыны. Ижысь Устинов ёросысь вузкаронъя "Метеор" юртэ лыктӥзы удмуртъёс но карелъёс. Таӵе адямиос пӧлын ми но, Дэри ёросысь Пероггуртысь "кильтырнаос", зэмос артистъёс кадь вал. Шулдыръяськонысь бертӥм туж капчи мылкыдын. Карелъёслы туж яраллям милям кырӟанъёсмы. Троссэ гожтыса сьӧразы нуизы. Куноосмес вокзалозь ик келямы. Перронын ваньмы кырӟам, эктӥм - карелъёслэн арганчизы лулысь-сюлмысь шудӥз. Милемыз таӵе ужрадэ ӧтемзы понна, туж бадӟым тау кариськом Удмурт лулчеберлыкъя дэменлыкысь адямиослы Василий Андреевич Осиповлы, Римма Пантелеевна Яковлевалы, Галина Александровна Вахрушевалы, "Метеор" заводлэн директорезлы Александр Сергеевич Батановлы. Евгения Мохова, ансамбльын кырӟась. КУН ДУМАЕ БЫРЪЁН АЗЬЫН Юрий Маслюков: "Экономикалэсь палэнтэмын, книга но мон сярысь уг гожто" Туэ 24 августэ Удмуртие вуылӥз Юрий Дмитриевич Маслюков, Россилэн азьвыл премьер- министрезлэн Евгений Примаковлэн воштӥсез. Берлозэ со республикаямы ветлӥз кылем арын октябрь толэзе. Соку со пыриськиз ож тӥрлык поттӥсь предприятиослэн Воткинскын ортчем бадӟым кенешазы. Сыӵе гажамон, визьмо но бадӟым адями вуылэм бере, республикамылэн но предприятиослэн кивалтӥсьёссы юн оскыса улӥзы: Юрий Маслюков юрттоз, предприятиос секыт югдурысь потозы. Но вань кутскем ужъёс малпамтэ шорысь дугдӥзы. Президент Примаковлэсь правительствозэ отставкае келяз. Табере кыӵе муген нош ик вуиз асьме доры быдэс дуннелы тодмо учёной Юрий Дмитриевич Маслюков? Журналистъёсын пумиськылыкуз, со та но мукет юанъёслы валэктонъёс сётӥз. - Туннэ мон правительстволэсь но, политикалэсь но, экономикалэсь но (таиз тужгес но вӧсь каре) палэнэ кельтэмын. Республикадэс, солэсь кивалтӥсьёссэ умой тодӥсько. Удмуртия пумит ӧз ке луы, мылкыды вань республикаяды Кун Думае быръёнъёсы пыриськыны. Сюлмы туж вӧсь луэ туала Думалэн ужамезъя, отын экономикаен, гурт хозяйствоен герӟаськем ужпумъёсты уг но эскерыло. Мар со сыӵе Россия, воксё вунэтӥзы ни, лэся. Пумиськеме потэ тӥляд калыкеныды, "Отечестволэн" Удмуртиысь ёзэныз, нылкышно огазеяськонъёсын, экономика удысэн кивалтӥсьёсын. Малпасько вуылыны Воткинске но Ижевск городлэн мэрияз. Мон сямен, Россиез, Удмуртиез секыт югдурысь поттон понна, али ӧвӧл сураськоно пӧртэм партиос, блокъёс пушкы, шедьтоно улонлы тупась шонер, центристской, линия. - Малы тӥ Думае депутат луон понна, одно ик Удмуртиын нюръяськыны малпаськоды? - Удмуртиын мон 14 ар ужай. Инженерлэсь, исследовательлэсь, проектировщиклэсь сюрессэ татын ортчи. Автозаводэз фундаментысеныз липетозь тодӥсько. "Шкода-Авто- Удмуртия" проект бордын нырысь ик мон ужаны кутски. Удмуртиын улӥсьёс мынам канидатураелы пумит ке луизы, мон огаз регионын Думае сюрон понна уг нюръяськы. - Кызьы тӥ учкиськоды Россилэн выль правительствоез шоры? - Мар со сыӵе правительство? Та валанлэн пуштросыз шоры учкисько мургес. Нош кызьы "дунъяло" али сое политикъёс? Правительствоен шудыны кутскзы, пӧртэм политикъёс сое солань-талань кыскало. Мар отын ӟечез?! Инмар мед юрттоз таизлы правительстволы ми мында коть (8 толэзь) возиськыны. Правительствоосты вошъямен, туж трос коньдон тус-тас луэ. Со коньдонэз ик мукет ужъёсы кутыны луысал. Экономикаез ӝутон сярысь мургес сюлмаськоно вылэм. - Юрий Дмитриевич, кызьы герӟаськоды экономистлэсь ужзэ коммунизмлы осконэн? - Коммунизмлы яке инмарлы оскон - со адямилэн пуш улонэз, совестез. Бен, мон коммунист. Та дырозь партбилетлэсь ӧй люкиськы. Но правительствоын ужакум, мон нырысь ик вал экономист. Монэным ваньмыз ужазы, коммунист луэме шоры учкытэк. Экономист луыса, мон "зарни шорез" шедьтон поннагес ик кариськисько. - Алигес телевизор пыр Россилэн азьвыл премьерез С. Степашин шуиз: "Коммунистъёс ноку властез уз басьтэ!" Мар шуысалды солэн верамез пумысен? - Бен, со лекгес верамын вал. Но мон уг оскиськы Степашин, зэмзэ ик, озьы малпаське шуыса. Кызьы мон малпасько коммунистъёс сярысь? Зэм, коммунистъёс чылкак огназы властез басьтыны уз быгатэ, нош мукет партиосын огазеяськыса, трос интыос басьтыны кужымзы тырмоз. - "Отечество" блокын али тросгес инты басьто Москваын улӥсьёс, озьы регионъёс отысь уз-а палэнтӥське? - Малпасько, ваньмыз радъяськоз. Озьы ик Примаков-Лужков-Шаймиев-Яковлев лидеръёс сяна, мукет тодмо адямиос но, дыр, отчы пырозы на. Мон сямен, "Отечество" - со огез тунсыкоез огазеяськон. Нырысь отчы пыризы вал шор ёзо кивалтӥсьёс, туж оско вал, улонын соку ик бадӟымесь воштӥськонъёс луозы шуыса. - Удмуртиын тӥ пумиськыны малпаськоды "Отечестволэн" татысь кивалтӥсьёсыныз. Мар муген? - Тодэме потэ, мар малпало соос мынам быръёнъёсъя 29 номеро Удмуртской округъя депутатэ кандидат кариськон мылкыды сярысь. Пумит луэмзэс шӧдӥ ке, Думае быръёнъёсы уг пыриськы. - Мар сярысь вераськиды, Кун Кенешлэн Тӧроеныз А. Волковен пумиськон дыръя? - Монэ тодматӥзы социологъёслэн Удмуртиын ортчытэм эскеронъёсынызы. Тодӥ: Думае чаклам депутатэ кандидатъёс пӧлын мон али 7-тӥ интыын сылӥсько вылэм. Со пумысен мон аслым йылпумъянъёс лэсьтыны кулэ. Вераським, кызьы мыным бырйисьёс пӧлын "данме" вылӥегес ӝутоно. Пумиськон туж пайдаё ортчиз. - Верасько, пресс-секретарьды тӥ сярысь книга гожтэ шуыса. Зэм-а со? - Верасько тазьы но: мынам пресс-секретаре, пе, али пумиськылэ Волошинэн но Басаевен. Ӧйтӧд, соос сярысь со, оло, гожтэ ик книга, но мон сярысь, шонерзэ верасько, - уг. - Тӧдьы юртын вань на-а кабинетты? - Правительствоысь вань кошкем адямиос кабинетъёссэс асьсэлы кельтысалзы ке, кӧня Тӧдьы юртъёс пуктоно луысал. Ӧвӧл, конечно. Нош ӧс бордам нимтулыным шуккем пусэз алигес дорам ваизы. - Кыӵе кусыпъёсты Юрий Лужковен? - Троссэ малпанъёссэ умоен лыдъясько. Маиз ке уг ке кельшы, соку ик верасько, тупатӥсько, оскытӥсько. Мон сямен, со али премьерлы, озьы ик президентлы огез тупась адями. Уг кельшы солэн куд-ог адямиосты, партиосты, мур малпаськытэк, "Отечествояз" кыскемез. Солы вунэтоно вылымтэ, Россиын югдурез тупатон понна али асьмелы берпуметӥ вамыш сётӥське шуыса. Тани Удмуртилэн самой ӟеч ож тӥрлык поттон промышленностез но 20 арлы берлань чигнатэмын, сое выльысь ӝутон понна, 50 ар кулэ луоз на. Калыкен пумиськылыса, Ю. Д. Маслюковлэн Удмуртилэн округезъя Кун Думае депутат луон понна нюръяськон мылкыдыз юнмаз. Нош мынам тодам лыктӥз, кызьы огпол Кун Думаысь депутат Н. Сапожников со сярысь тазьы шуиз: "Маслюков кадь визьмо экономистъёс дуннеын чиньыен лыдъямон гинэ". Зэмзэ ик, асьмелы таяз быръёнъёсы туж умой малпаськоно, кинэ быръёмы Россилэн парламентаз. ТАТЬЯНА БАННИКОВА. Тодӥськоды-а тӥ? Ваньмыз пиналъёс понна Ижевскын кылдытэмын нылпи учреждениосын дышетӥсьёс понна огъя ёз. Дышетӥсьёслэсь тодон-валанзэс будэтонъя "Альтернатива" центрын сюрс пала педагог дышетскиз, нылпи садъёсын кивалтӥсьёс, куатьтон мындаез, вылӥ тодон-валан басьто Международной Восточно-Европейской университетын. 60 процентэз нылпи садъёс арлы быдэ выль программаосты уже пыӵато. 1998-тӥ арысен усьтэмын 12 базовой но 3 городской экспериментальной площадкаос, кытын выль программаосыз пыр-поч эскеро но уже пыӵато. Ижевскын ужа 3 прогимназия, пиналэз эскеронъя 2 центр, 15 нылпи садын интыяськемын покчи классъёс. Быдӟым саклык висъяське висись пиналъёслы. 51 нылпи садысь 146 группаын дышетско но тазалыксэс юнмато ог кык сюрс пала нылпиос. Дошкольной образованиея управление сюлмаське на национальной ужпумъёсты азьланьтыны. Озьы 20 дошкольной учреждениын удмурт группаос ужало, 7-аз - бигер. 112 номеро нылпи садын усьтэмын национальной воспитаниея центр. Покчи эшъёсмы отын дышето шаермылэсь историзэ но культуразэ, анай кылмес. Куарусён толэзь Котьку сямен сӥзьылэз мытэ куарусён толэзь. 22-тӥ сентябре музъем ӟечыран ӝыныё луыса кошке: огмында кыстӥське уй но, нунал но. Озьыен, кыдёкысь уй паласен, Тол Бабай асьме пала вырӟе ни, выльысь дӧдьызэ дасяны кутске. Нош асьмеос та вакытэ тол сярысь ум на малпаське на.Уго укно сьӧрын та вакытэ покчи гужем, шунды шумпоттэ шуныт но яркыт тылсиосынызы. Бакчаосын, садъёсын, бусыосын уно емышъёс утялтэмез возьмало, возьёсын но нюлэсъёсын вань на сяськаяськись будосъёс. Таяз толэзе тросэзлэн анай-атайёслэн сюлэмшугъяськонзы будэ - нылпиос школае, нош тужгес но пичиосыз садике ветлыны кутско. Базарын али бакча-сад емышъёслы дунъёс кулэсмо - укыр уно уго вузкарисьёс. Ӵукнаосы матэ ветлӥсь автобусъёсы пуксьыны инты но шедьтыны шуг: кин губилы дыртэ, кин нюлэс но нюрмульы бичаны вамыштэ. Куд-огез эмъюм-турын но дасяло на. Сентябре эмъюм тырметъёсын узырмо писэйтурынлэн (валериана), калган сяськалэн (лапчатка-узик) но куако интыосын пумиськись лыз сяськалэн (синюха) выжыоссы. Вазь сӥзьыл инкуазь котькуд адямиез кыске ас бордаз. Куазь зорымтэ дыръя инкуазьлэн котькуд сэрегаз укыр шулдыр, уга. Тыосын но шуръёсын ву чылкытамын ни - векчи будосъёс яке солэн пыдэсаз лэзисько, яке салкым улэмен, алямысь дугдо. Писпуослэн куаръёссы вож туссэс пӧртэм буёлъёсын вошто. Кыӵеез но ӧвӧл соос пӧлын - ӵужез, гордэз, куренез, лемлетэз! Нош куд-ог писпуос вож куаръёсынызы толлы но уг люкисько. Соосты асьмеос умой тодӥськом - пужым, кыз, ньылпу, сусыпу. Огкылын вераса, лысо писпуос но куакъёс. Сирень но уг дырты вож куарзэ сэрпалтыны. Нюро интыосын но нюлэскын пумиськылӥсь турын-куаръёс уноез вож куаръёсын ик пыро лымы улэ. Сӥзьыллэн аслаз гинэ суредэз - пӧртэм буёлэн чебермам писпуос. Беризь кызьпу, сирпу, бадяр, тыпы концертэ мыныны дасяськем нылмурт кадь дӥсяськемын кожалод. Калык туж шонер чаклам вазь сӥзьыл инкуазез, сое "кышномурт сӥзьылэн" ӵошатыса. Та вакытэ писпуос дырто куаръёссылэсь люкиськыны. Нош куартэк кыльыны соос кемалась дасяськемын вал ини. Гудырикошкон толэзе куарньӧр юнматскон интыын кылдэ пробкаё сӥ. Со куарлэсь модосэн юн герӟетлыксэ лябӟытэ. Та дыръя ик куаре люкаськем ватсэтъёс кыстӥсько модос пушкы но выжыосы, нош вож буёл сётӥсь хлорофилл воштӥське ӵуж яке мукет буёло тырметъёсын ( каротин, ксантофилл но мукетъёсыныз). Ӵужектэм куарез ляб тӧл но ишкалтыны быгатэ, Нош куаръёс оглом куашканы кутско нырысь кынтылэм бере гинэ, со дырозь соос музъем вылэ мылкыдтэк но ӧжытэн усё. Сӥзьыллэн нырысетӥ толэзяз тросэз тылобурдоос яке дасясько, яке кошко ини шуныт палъёсы. Лушкемен кадь, оген-оген палэнэ дырто кикы но уляби (козодой) - таосыз уллё уг кылдыто. Кыр ӵӧжъёс но ӟазегъёс возьмало кезьытгес луэмез, соку уго соослы сиён уг шедьы ни. Нош куазь шуныт ке улэ, соос лымшор пала дырто. Туриос вазьгес кошко, люкисько кадь ӝожмыт куараен, радэн-радэн лобо шундыё но шуныт кунъёсы. Ӟольгыриос, куакаос, ӵанаос городъёсы но гуртъёсы кыстӥсько - кезьыт дыре соослы татын капчигес сиён шедьтыны. Сӥзьыл асьме пала вуо уйпал тылобурдоос, кылсярысь, кайсы (клест), шушы (снегирь), тэчы (чечётка), вьюрок. Нош кыӵе воштӥськонъёс луо изьверъёс но пӧйшуръёс пӧлын? Тросэз йырйисьёс толалтэлы тырмыт сиён дасяло, шыръёс каръяськыны дырто амбаръёс, элеваторъёс. кеносъёс но чуланъёс котыре. Лобась шыоъёслы сӥзьыл кӧтсэс тырыны секыт - омырын нымы-кибыос уг ни пумиськыло. Соин ик куд-огъёсыз толлы умме усё, куд-огез тылобурдоос палэнэ кошко. Нош кытчы меда карисько та вакытэ нымы-кибыос, бубылиос, чонариос? Соос но дасясько меда толлы? Чонари нылпиос, вотэс сӥньыс борды ӝабырскыса, парашютэн выллем омыретӥ лобӟо, асьсэлы тупамон инты шедьтытозязы. Толалтэ соос кынмыса кулэм кадь луозы, нош тулыс шунды сиос соосты выльысь улӟытозы. Тросэз нымы-кибыос "кӧкы" лэсьтыса музъемын, куаръёс яке сисьмем лӥялъёс пушкын толэз ортчыто. Уноез бубылиос "инкуазь" ужзэс быдэстыса (пузъёссылэсь мозмытскемзы бере) куло. Нош вань сыӵеосыз но, кудъёсыз кезьыт азьын чик уг кӧберало. Кылсярысь, пушнер бубыли (крапивница). Толалтэ со кынмыса из кадь луэ - бурдъёссэ ваче карыса изе. Нош басьтӥськод ке сое кие, шунтӥськод ке, со вылэ шокаса, со улӟе но коркаетӥ лобаны кутске. Со тулыс вань бубылиослэсь азьло улӟе. Куарусён толэзь укыр тупа. писпуэз йырйись нымы-кибыослы но нумыръёслы. Ческыт сиён та вакытэ соослы укыр уно, со тырме сиыны но, толлы дасяськыны но. Чибинь-мумыос куртчылӥськемысь дугдо но тыршо корка улэ (подвалэ) яке мукет шуныт но нюр интыосы пегӟыны - толалтэез соос отын ортчыто. Ву но мувыр бакаос, кыйёс, кенӟалиос "бабыны" дасесь ни, нош куазь шуныт возиське на ке, соос солы шумпото но шундыё интыосын шунтӥськыса уло. Зэм, шудон сямзылэсь куштӥсько, ӧжытгес сиё но. Чорыгъёс но раката (кисло-кусло, рак) та вакытэ жуммем кадь луо, шаплы уямзы уг ни поты, мур интыосты утчало. Куарусён толэзь суредъёслэн, крезьгур гожъяськисьёслэн но малпаськыны яратӥсь адямиослэн дырзы. Инкуазь чутрак воштӥське бере, сюлэме пыре кыӵе ке но валантэм мылкыд, сюлэм кытчы ке но кыстӥське-ӧтиське, толэзь но кизилиос выльдӥсько кадь. В. ТУГАНАЕВ, биология наукаосъя доктор, профессор. . Выль гид пукто Ува ёросысь Ленин колхозын ӟеч радъямын пудо возён гидъёсты тупатъян-выльдон уж. "Строитель" ОАО-лэн бригадаосыз 1990-тӥ арын кутскизы вал парсь гид ӝутыны. Конструкциосыз ӟечлыко вылымтэен, ужез куспетӥ уретӥзы. Май толэзе колхоз администрация кутскем ужзэс выльысь азьланьтыны малпаз. Мылкыд карисьёс трос гинэ вал, нош сяртчигуртъёс оскизы "Строитель" ОАО-лы. Та нуналъёсы лэсьтӥськон уж йылаз-пумаз вуттэмын луоз. Секыт вакытэ но колхозлэн кивалтӥсез А.Ф.Сырых коньдон шедьтыны быгатӥз бадӟым гид пуктонлы. Солэн лыдъямезъя, производствоез азинтытэк, хозяйстволэн но азьлань улонэз быроз. Председатель лэсьтӥськисьёслы дыраз коньдон тыре. Туала вакытэ туж ӧжытэз тазьы ужаны быгато. А.Петрова. Кытчы пуктоно циркез? Удмурт Элькунысь Культурая министерство но Кун (Государственной) цирк удмурт шаерын улӥсьёс пӧлын ортчыто Ижысь цирклы юрт пуктон пумысь юан-веран. Вань таӵе амалъёс: 1. Циркез кельтоно азьвыл интыяз ик. 2. Цирклы юрт пуктоно выль интые: Ленин, Вормонлы 40 ар ульчаос но "Сосновый" профилакторий вискы. 3. Тӥляд ӵектонъёсты. Асьтэлэсь дэмланъёстэс ыстыны куриськом туэ 8-тӥ сентябрёзь таӵе адресъя: 426051, Ижевск, Максим Горький ульча, 73, Удмурт Элькунысь Культурая министерство. Культурая министр Н. М. Бессогонов. Калмез кузя 4. Кытчы вуттоз селта бугор? И. Кытысь ке но кылэм вань, котькуд адями азьло улоназ пӧйшур, тылобурдо, чорыг яке нымы-кибы вылэм шуыса. Кин тодэ, оло, озьы ик вань со. Юнме шат асьмеос берло дасо аръёсы олокыӵе но китай, япон яке мукет гороскопъёсты чакласа улыны ӧдъямы? Ма, собере дауръёсты чидам выжыкылъёс но асьме доры вутто улонэз пӧйшур яке пудо пыр возьматэм суредъёсты. Зэм ук, куд-огез шоры учкыса, адямиен мургес тодматскыса - синйылтӥськод кыӵе ке улэп макелы тупась сямъёсты, выросъёсты. Одӥгез гондыр кадь дыг, мукетыз ӟичы кадь кескич, куинетӥез чибинь кадь бызгетӥсь... Малызэ соку ӧй вала, но нырысь тодматскеммы бере ик Наташа Кононова мыным ваёбыж кадь потӥз. Тани со цехе кошке, отысь бызе конторае, кытчы ке жингыртэ, нош потэ азбаре. Уг, егит кышномурт инметӥ уг лоба, со лоба музъем вылтӥ. Бурдо выжыысь ӧй луысал ке, быгатысал шат нунал ӵоже сомында ужез бергатыны, ӵуказеяз выльысь со борды кутскыны? ... Сизьым ар талэсь Николай Овчинников кык эшъёсыныз ӵош басьтӥськиз йырзэ кема аръёс ӵоже висьытэм малпанэз быдэстон борды - кылдытӥз "Ижлён" фирма. Нырысь, валамон ни, номыр ӧй вал: ужан инты но, телефон но, коньдон но. Но вал оскон. Ӟечезлы оскон. Ӵапак со ик юрттӥз, вылды, пиосмуртлы уйвӧтаз уно пол адӟылэм чебер тылобурдоез быжтӥз кутыны. Ӧз, инмысь малпамтэ шорысь усем шуд ӧй вал со, Николай Владимирович рыноклэн тулкымъяськись зарезяз зымон азьын кема гинэ ужаса вуттӥз етӥн будэтон но солэсь вузъёс поттон бордын. Вал Зура етӥн сэстон заводлэн кивалтӥсез, бӧрысьгес ужаз элькунысь льнообъединениын. Аслыз удыс кылдытон сярысь кема малпаськиз, ваньзэ лыдъяны-чотаны выриз ке но, чакламъя соку из ӧз пӧрмы. Улон - ужпи ӧвӧл, сое кенерам азбаре уд пырты. Документъёс бичаны, юрттӥсь утчанэн, туала зэмос кузёосын (валаськоды, дыр, кин сярысь вераськон мынэ) огкыл шедьтонэн герӟаьскем шуг-секытъёс пумтэм вал. (Ма, кудӥз ке коть ужбергатӥсь соостэк улэ меда?) Овсянников ӧз сётскы - чидаз. Озьы Селталась етӥн сэстон завод вӧзын, Калмез шур дорын, кутскизы арболит плита лэсьтыны. Етӥн борды умой-умой басьтӥськон понна, кызьы ке люкано вал коньдон. Ваньбур поттон паськытамен, Николай Владимировичлы кулэ луизы сое валаны быгатӥсь выль эшъёс. Кинлы вазиськоно? Ижысь "Зангари" фабрикаын ужась сузэрлы? Но укыр егит на ук - 25 арес гинэ. Я, эскероно...Озьы Наташа луиз "Ижлён" фирмалэн Селталась производствоеныз кивалтӥсь. ИИ. Пичи гинэ мугоръем егит кышномурт шоры учкыса уд но оскы, таид 200 муртъем коллективен кивалтэ шуыса. - Татчы лыктыкум, милям кык бригада гинэ вал - 12 мурт, - азьлозэ тодаз вае Наталья Владимировна. - Кӧня ке ар ӵоже шӧдскымон "куаим". Ай азьланяз ужасьёсмылэн лыдзы уката но йылоз. Селтаын тупамон юрт ӧвӧлэн, етӥн мертчанэз сынась-чылкытатӥсь машинаез нырысь- валысь Зура льнозаводэ пуктӥзы. Тэк сылытэмлэсь пичи ке но пайда луоз, малпазы "Ижлёнын". Озьыгес ик берытскиз. Но Селтаын инты дасям бере, тямыс метръем агрегат татчы вуиз. Трос ик дыр ӧз ортчы, со гуретыны ӧдъяз. Селтаос ӝикыт бинетъёсы котыръям мертчан лентаез черсӥськон фабрикаосы келяны кутскизы. Вакчигес кылем мертчанлэсь лэсьтӥськонэ пакля чотын мынӥсь лента поттон радъязы. Юрт ӝутӥсьёслы со кельшиз - тросэн басьто. Учке ай магазинъёсысь, макем чебер адске та продукция. - Алигес нош кык стынок басьтӥм, - вера Кононова. - Дорамы ик лэсьтӥм лентаез эшшо чылкытатӥськом на. Солэсь ини шпагат лэсьтӥськом. Я, ойдолэ цехе мыныса учкоды... Ми, таӵе удысэз, оло, ньылетӥзэ адӟись муртъёс, кема гинэ бергам кадь кузь станокъёс котыртӥ. Отӥ-татӥ ортчыса, лента векчи гозылы пӧрме. Сое соку ик бабинаосы биняло. - Кинлы меда кулэ на таӵе векчи гозы, быдэс дуннеын сое пластмасса воштӥз ни кадь? - одӥг эшмылэн юанэз кузё кышнолы ӧз кельшы кадь. Но ӝоген шӧдӥз, со серекъяса верамын вал шуыса. - Озьы луысал ке, шпагатмы тузон пӧлын кылльысал, нош ми сое поттыса ум вуттӥське - ур-вар каро. Гуртоос тани турын керттыны басьто, нокыӵе пластик кулэ ӧвӧл, шуо. Льнозаводъёс гинэ но продукцизэс керттылыны векчи гозы утчало, - сётэм юанэлы валэктоно кариськиз Наташа. ИИИ. Одӥг смена ӵоже селтаос туннэ ик быгато ни куинь тонна мертчанэз сынаны, солэсь вуз поттыны. Республикаысьтымы шоро-куспо льнозавод 200-300 килограмм мертчан лэсьтэ. Табере лыдъялэ, кӧня сыӵе предприятие ужаны кулэ, "Ижлёнлы" тырмыт уж сётон понна. Кӧня ке ар талэсь азьло татчы сырьё вайылӥзы Белоруссиысь (вагонъёсын Уваозь вуылӥз), Марий Элысь (КрАЗ кужмо автомобильёсын ворттӥзы). Берло дыре югдур воштӥськиз. Мертчанзэс нокытын но сётэмзы уг поты ни - ваньмыз асьсэос чылкытатыны тыршо. Озьы луиз, Россиын "уй пал буртчинлы" бадӟымгес саклык висъяны кутскемен. Етӥн программа кызьы ке быдэс странаын, озьы ик асьме дорын удысэз сайкатӥз кадь. Та ласянь умоен шӧдӥськытэк ӧз кыльы ар талэсь луэм кризис но. "Ижлён" табере амалтэк юнгес ужано луэ асьме ваньбур поттӥсьёсын. Огкыл шедьтэмын Шарканэн, Ярен. Балезиноын нылпи (дочерней шуиськись) предприятие но кылдытэмын ни. Пичи гинэ контораысь ужасьёсыныз ӵош одӥг кабинетын пуке Наташа но, синйылтӥ выставкае кадь пуктэм етӥн керттэтъёсты. Туж пӧртэмесь соос. Кудӥз кузь будэмын, чылк-чылк адӟиське, мукетыз ог 20 сантиметр гинэ. Кызьы милемлы валэктӥзы, Наталья Владимировна гуртъёсын етӥнэз утялтэмзылэсь азьло уно хозяйствоостӥ ортчем, котькудысьтыз "букет" вуттэм. Табере, пе, учком ни, кинэн пайдаёгес ужаны. Гаӵоло кыллись хозяйствоослы юрттон вылысь, селтаос нимысьтыз огкылъя соослы тулыс вылтӥ кидыс висъяно -луэмезъя мар но со мукетсэ но сёто - бӧрысь ини етӥн курозэс басьто. Тазьы ужан кыкна ласянь пайдаен берытске. ИВ. Кононова сьӧры уиськыса мыноно луэ - зэм но лобаса кадь ветлэ. - Таӵе юртъёсты куноослы возьматыны возьыт ке но, учке, - Наташа кизэ ӝутэ зӧк муръёен юртъер пала. - Отын азьло льнозаводлэн котельноез вал. Ми сое быдэсак выльдӥм. Вужмем тӥрлыкез утялтӥм, интыяз пичигес гинэ пурты пуктӥм. Табере шуныт тырме. Умой соиз но, кулэ ӧвӧл ни эгыр яке музон эстӥськон. Гурез костра шуонэн эстӥськом? Со - етӥн сэстонысь но чылкытатонысь кылем-мылем маке. Куке но предприятие вӧзы вордскем фирма та заводэз копак ньылӥз ни, шуыны луоз. Пунэм тыронъёсыныз ӵош. Куашкам организациез рынок вакыт пытсан калэ вуттӥз. "Ижлён" ёмырам корпусъёсы табере пумен вае етӥнлэсь вуз поттонъя машинаос. Туэ гинэ дасо пала станок инъямын ни. Бен, ужан условиос качаресь на. Озьы ке но, выльдӥськись заводэ куриськисьёс лачак. Уго адямиос адӟо-кыло татын ортчись воштӥськонъёсты. Собере уждун ласянь но верамъёс сюлэмез позырто - "Ижлёнын" ужась толэзяз шорлыдын 1200 манет басьтэ. Ваньбур поттон пумен паськыта. Векчи гозы сяна, татын туэ лэсьто ни сӥньыс но. Бен, со чурыт, зӧк на - дэра поттыны сяна уг яра. Но ваньмыз азьпалан. Юнме уг шуо ук: кутсконэз гинэ медло. В. Азьланез сярысь вераськон ӝутскыку, Наталья Владимировналэн синъёсыз воксё ӝуатско: - Сӥньыс поттонэз ми одно ик радъялом. Солэн ӟечлыкез арняысь арняе умоялоз - тодӥсько. Нош отӥяз басьтӥськом куиськон борды. Тани алигес басьтӥм "Динамит" фирмалэсь юртсэ. Отын чипсы лэсьтэм каро вал - "ӝуазы" юлтошъёс пыжем картофкаенызы ӵош. Вот отчы ми куиськон станокъёс пуктом. Кин тодэ, оло, таяз дауре ик етӥнлэсь басма куыны кутском. Малпасько, солэсь вурем простынь, миндэр пуйы но мукет вузъёс кузёзэс ӝог шедьтозы. Соглаш-а? Кононовалэн кылъёсызлы эн оскы вал - уг быгатӥськы. Солэн туннэ ужъёсыз ик взьмато ни, "Ижлён" мытэм удыссэ одно ик паськытатоз шуыса. Али ик татын оломар но лэсьто. Векчи гозызылэсь ог люкетсэ келяло Шарканэ - отын сое машина вӧйын котто но лэсьтӥськисьёслы вузало. Каталока уго туж кулэ гумыосты итылонын. Татын озьы ик кутскизы мертчан лентаез ньыль сантиметрлы юдыны. Сыӵе вузэз шумпотыса басьто суро (хлопок но етӥн) басма поттӥсь фабрикаос. Кусып тупатӥзы Свердловск областьысь Асбест городысь специалистёсын но - таосызлы но етӥнлэсь вуз туж кулэ вылэм. "Ижлён" уг куштӥськы арболит плита лэсьтонлэсь. Солэсь но ортчыт - фирмаын ужасьёс туэ басьтӥзы Селтаысь кирпич шуккон заводэз. Кык ар пала юнме сылӥсь предприятиын радыз чик ӧй вал ни. Выль кузёос тупатӥзы отысь дуно тӥрлыкез, выльдӥзы складъёсты. Вакчи дыр куспын 150 сюрс кирпич шуккемын ни, матысь дыре кутскозы сое ӟырдатон борды. ВИ. Калмез кузя интыяськем тэль посёлокысь лапкам мылкыдо калыкен уно пумиськонъёс бере Наташаен тодматскон милемыз ог интыын сылӥсь вуысь шур коже поттӥз кадь. Быдэс бригадамы пальпотыны ӧдъяз. Кононовалэн задор сямыз милемлы но палаз. Нош газетмы пыр со тӥ доры но мед вуоз вылэм. Уго ӵапак таӵе муртъёс бордын асьмелэн ӵуказе нуналмы. Валамон ни, паймеммес ми ӧм ватэ. - Туж курисько, малпан медам кылды, ваньмыз та мон бордысь гинэ потэ шуыса, - вераны дыртӥз выль эшмы. - Предприятилэн йырыз Ижын - директормытэк ми номыр лэсьтыны ӧм быгатысалмы. Нош киосыз татын. Кызьы уд ушъя Стерхов Александр Михайловичез яке Анна Ивановна Лукьяноваез? Озьы ик трос мукетъёссэ. - Я, йырзэ шедьтӥм, кизэ-пыдзэ адӟим, соку бен тон кин луиськод? - юано кожам Наташалэсь. Со ӵыжектӥз, мар шуыны ӧз вала. - Валамон ук - коллективлэн бурдъёсыз со бордын, - лэчыт югдурез сӥятӥз суредасьмы. Шонер вераз. Бурдо егит кышномурт выжыкылысь герой музэн лобаса сямен мынэ сэрась бугор сьӧры. Кытчы-о со вуттоз? Туж оскем потэ ӟеч улонэ шуыса. Уго со бугор ас киын лэсьтэмын. Иван Лебедев, Георгий Юсаев (фото) Леонид Прозоров (суред) Владимир Потапов (авто.) Майбыр улонлэсь уд алы Та югдур толон но, валлян но ӧй вал, азьвылгес - 1996-тӥ-1997-тӥ аръёсы. Озьы ке но, солэн лэчытэз, мон сямен, туннэлы но кылемын на. Вераськон мынэ "Удмуртавтодор" предприятилэн ужамез сярысь. Кызьы тодмо, со республикаямы сюрес лэсьтӥсьёс-возисьёс пӧлысь тужгес но бадӟымез луэ. Соин ик асьме правительство солы гинэ оскиз вал 1995-тӥ арысен сюрес лэсьтон-тупатъян фондэн кузёяськыны. Кыӵе "кузё" пӧрмиз "Удмуртавтодорлэсь", сое ик миым эскериз Кун Кенешлэн Эскерон палатаез. Нырысь одно ик вераны кулэ, дыр, кызьы кылдэ вылӥ верам фонд. Сое "люктась" ошмесъёс таӵеесь: сюрес вылтӥ мынӥсь-ветлӥсьёслэсь выт, транспорт басьтӥсьёслэсь но возисьёслэсь выт, чакламлэсь секыт яке бадӟым груз нуллӥсьёслэсь дун, пропускъёс понна дун, пӧртэм штрафъёс но пеняос. Со сяна, коньдон вуэ на федеральной фондысь. Ачиз "Удмуртавтодор" йӧназ пайда уг потты, шуыны луоз. Нош фондэ коньдон ӧжыт уг люкаськы. Тани 1996-тӥ арын отчы вуиз 310 миллиард 224 миллион манет (вуж уксёен). Кызьы бен уже кутӥське та ваньбур? Вераны кулэ: "Удмуртавтодор" аслаз объектъёсызлы ачиз проектъёс дася, ачиз ик сметаос тупатэ, ачиз ик лэсьтӥське но. Мукет сямен вераса, солэн луонлыкъёсыз вань ас чакламезъя коньдон кутыны-быдтыны. Озьыен, сьӧлыканы луонлыкъёсыз тырмыт, вылаз ик, коньдонэд ачид ужаса ӧвӧл поттэмын бере. Соин ик сьӧлыкъёс медам гочатэ шуыса, правительство предприятиез косӥз объектъёслэсь дунъёссэс Госстроен огкылысь тупатыны. Жаляса верано луэ, "Удмуртавтодор" кылэм-адӟем карымтэ со косонэз, калык коньдонэн ас тодэмезъя кузёяське. Валамон ини, аслыз пайда поттыса. Огъя кылъёс бордысь выжом лыдпусъёс борды. Предприятиысь специалистъёс Киясово- Ермолаево сюрес лэсьтонэз дунъяллям 54172,1 сюрс манет тыр. (Дунъёс ӵем вошъяськемен сэрен, сураськон учыръёс медам луэ шуыса, куд-ог удысъёсын соосты 1984 арлы тупатэмъёсын лыдъяло.) Нош государственной экспертиза дыръя шараяське мукет дуныз - 3038,8 сюрс. Озьыен, объектлэн дуныз 44 процентлы бадӟыматэмын. Яке басьтом Глазов-Красногорск сюресэз. Солэн дуныз, кызьы нош ик шараяз государственной экспертиза, будэтэмын вылэм 24 миллион 538 сюрс манетлы. Озьы ик мултэсэн (14,6 процентлы) документъёсын возьматэмын Можга - Большая Пудга, Норья - Иваново-Самарское (20,4 процент) сюресъёсты выльдон дунъёс. Кызьы, мар чотын бен сметаосты бадӟымато? Амалъёс пумтэм вылэм. Сюрес тупато- лэсьто гужем куазен, нош документэ гожто лымы сузямзы сярысь. Яке электрокужым понна дун тырмезэс бадӟымато. Сметае пырто трос ар ӵоже ужам понна, ватсаса отпускъёс но выль объектъёсты вуттэм понна тырем коньдонэз. Предприятие Пичи Пурга районысь Аксакшур гуртэ пуктӥз йӧл поттон цех. Ӧйтӧд, малы со кулэ луиз "Удмуртавтодорлы". Но татын но тӧлъя-буръя кошкиз 327 миллион манет. Тужгес но пусйымонэз тани мар. Цехез пуктӥз Пичи Пургаысь сюресъёсъя управление. Отысь бухгалтерилэн документъёсаз лэсьтӥськон ужъёслэн дунзы гожтэмын 1 179 миллион манет, татысь ик производственной отделлэн - 3 246 миллион, нош "Удмуртавтодорлэн" - 4 817 миллион ини. Паймод, ява, кызьы гожъям "Шӧкыч" уроммы. Шонергес верано ке, ваньмыз та коньдон тӧлъя-буръя ӧз кошкы. Со кулэезъя кутэмын... кивалтӥсьёслы уждунлы. Татын лэсьтӥськон ужъёслы дунъёсты Госстроен кенешытэк тупато ке, озьы ик уждун ласянь но. Азьвыл аръёсы кивалтӥсь ёзлы уждунлы висъяны чакламын вал быдэстэм ужъёс понна поттэм коньдонысь 1,6 процентсэ. Нош 1997- тӥ арын та лыдпус 2,4 процентозь ини вуиз. Вылӥ кивалтӥсьёс 1996 арын толэзяз шорлыдын вераса 3,5 миллион (штатъя луыны кулэ 1,7 миллион) басьто ке вал, 1997 арын уждунзы 5,9 миллион манетозь будӥз. Тани басьтом Пичи Пургаысь сюресъёсъя управлениез. Татын котькуд ужась 1997 арын толэзяз, шорлыдын вераса, 2 510 сюрс манет басьтӥз. Рабочийёс быдэн 1 955 сюрс манет, нош кивалтӥсьёс но специалистъёс быдэн 6 009,8 сюрс манет. Со дыре ик ужазинлык, 1991 арен ӵошатыса, кык пол кулэсмиз. "Удмуртавтодорын" туж шукрес выро премиосын. Соосты тырыны кулэ выль объектъёсты дыраз вуттэм понна гинэ. Нош татын одӥгез коть сюрес яке выж дыраз лэсьтӥське меда? Лэсьтӥськон ужъёс ӝегало, нош солэн мугъёсыз сярысь одӥг документ но ӧвӧл. Предприятиын выль объектъёс понна гинэ ӧвӧл, тупатъян ужъёс понна но со улсын премиос басьто. Пусйыны кулэ: кивалтӥсь ёзын ужасьёс ваньзэ со премиосты окто. Пусъём мукетсэ но. Тупатэм радъя, выль объектэз пуктэм понна премиосты шори люкыны кулэ заказчиклы но подрядчиклы. "Удмуртавтодор" ачиз ик соиз но, таиз но луэ бере, кивалтӥсьёс быдэс премиез басьто."Удмуртавтодорын" тужгес но кӧбератэк тус-тас каро федеральной фондысь вуэм коньдонэз. Казань-Малмыж-Пермь-Екатеринбург сюрес лэсьтыны висъям коньдон чотын пуктэмын кык улон корка 360 квадратной метр огъя быдӟалаен. Сюреслы проектно-сметной документъёсын та юртъёс сярысь пал кыл но ӧвӧл. Озьы ик ӧвӧл та объектъёсты лэсьтон пумысен "Удмуртавтодор" но Сюресъёс лэсьтонъя департамент куспын нимысьтыз гожтэм огкыл но.Нош ик вуом Пичи Пургаысь управление. Татын нимаз улон юртъёс пуктыны быдтэмын 7 37,4 миллион манет. Одӥгез но корка предприятилэн балансаз пыртэмын ӧвӧл. Лыдпусъёс возьмато 1. Туэ усьтӥськоз ньыль выль школа. Но 1-тӥ сентябре ужаны кутскоз одӥгез гинэ: Можга районысь Сосмач школа. Сое лэсьтыны выризы 10 ар, дышетскоз 10 нылпи. 2. Учебникъёс басьтыны 1,5 миллион манет коньдон висъямын. Федеральной комплектэ пыртэм учебникъёс республикае вуозы 15-20 сентябрьлы. Дунтэк соосты басьтозы трос нылпиё но начар семьяосысь, интернатъёсысь но нылпи юртъёсысь пиналъёс. Сыӵе нылпиос республикаямы 55 сюрс пала лыдъясько. 3. Дотационной районъёсы Удмурт Республикаысь Правительство 400 сюрс манет келяз, коньдон сётэмын луоз начар семьяосысь нылпиослы школалы дасяськон понна. 4. Дышетскон ар азьын ворсамын 9 пичи школа, кытын 1-3 нылпи гинэ дышетске вал, куинь нылпи сад но Яр районысь фильмотека. 5. Республикаямы ужа 3 частной школа (Ижевскын, Глазовын, Сарапулын). 6. Туэ нырысетӥ классэ дышетскыны мыноз 21 сюрс нылпи, со кылем арлэсь 3 сюрслы ӧжытгес. Озьыен, куд-ог дышетӥсьёс ужтэк кылёзы. Со дыре ик дышетӥсьёсты 165 ужан инты возьма. 7. Ужаны кутскись дышетӥсьлэн уждунэз 200 манет (7-тӥ разрядъя), кема ужасезлэн - 490 манет (14-тӥ разрядъя). Лыдпусъёс верамын одӥг ставкаез лыдэ басьтыса. Россиысь дышетӥсьёсын ӵошатыса, асьме дышетӥсьёслэн уждунзы 20 процентлы ичигес. Лыдпусъёс шараямын вал калыкез дышетонъя министрен пресс-конференция дыръя. Улон чигнатэ ке но, нылпи будэмысь уд дугды. Туэ республикаямы Нырысетӥ сентябрез пумиталозы 42 сюрс дышетӥсьёс, 363 сюрс нылпиос но калыкез дышетонъя выль министр Любовь Григорьевна Захарова. Собыдӟа удыс быдэс ар ӵоже министртэк улэм бере, дышетӥсьёс понна со бадӟым шумпотон ини. Дышетӥсьёслэн 20 августэ ортчем бадӟым педсоветсы ужаз выль министрлэн кивалтэмез улсын. Министр мултэс ӧз вераськы, но валэктонъёс сётӥз дышетӥсьёс азьын сылӥсь лэчыт ужпумъёсъя. Вераськонзэ кутскиз уждун тырон пумысен. Зэм, таиз огез "ӝуась" ужпум. Удмуртиысь Правительстволэн туэ апреле кутэм постановлениезъя бюджет удысын ужасьёслэн уждунзы 1,5 поллы будыны кулэ. Соку дышетӥсьёслэн ичи уждунзы 345,6 манетысен 520,3 манетозь луыны кулэ. Но Россилэн но республикамылэн бюджетъёсазы коньдон будэтонэз пыртыны "вунэтӥллям". Уждунтэк ужась дышетӥсьёс быдэс ар ӵоже я отын, я татын пумитъяськон ужрадъёс ортчытъязы. Мар бен табере? - 17 районэ но 2 городэ отпускнойёс будэтыса келямын, - шуиз Любовь Григорьевна. - Мукетъёсызлы келямтэ на администрациослэн фондъёсы тыронъёссы сэрен. Дышетӥсьёслы уждун тыремын апрель понна, тросаз школаосын сентябре уждунзэс басьтозы май понна. Озьыен, туэ оскон кылдэ, дышетӥсьёс 1 сентябре урокъёссэс урамъёсын уз, кабинетъёсазы ортчытозы шуыса. Дышетонэн кивалтонэз чутрак воштоно, шуиз министр. Таиз мукетыз бадӟым ужпум. Кызьы? Одӥг ласянь, кулэстоно министерствоысь мултэс ужасьёсты (чакламын 30 процентозь), мукет ласянь, школаослы юрттон понна выль отделъёс кылдытоно, кылсярысь, правоя, иворъёсты вӧлмытӥсь ёзъёсын кусыпъёс возёнъя, лицензиос басьтонъя (татчы юнматэмын ини А. В. Еременко) но мукет. Та ужпум сярысь дышетӥсьёслы кылем арын ик ивортэмын вал, но министерстволэсь структуразэ воштон, шӧдске, могаз, министр ӧвӧлтэм. Ми, "Удмурт дунне"газетын ужасьёс али но тани ум шӧдӥське, министерствоын прессаен ужанъя ёз кылдытэмын шуыса. Соин ик "сарафан" радио пыр гинэ кылӥськом школаосын кыӵе ке ужрадъёс ортчылон сярысь. Любовь Григорьевна шара ивортӥз, туэ 1-тӥ сентябрьысен Калыкез дышетонъя министерство выль ужан графике потэ шуыса. Министр ужалоз нуналлы быдэ 8 часысен 20 часозь, нош солэн воштӥсьёсыз ужалозы суббота нуналъёсы но. Шонерзэ вераса, таӵезэ огаз кенешысь но берло дыре кылылэм ӧй на вал. Таӵе ивортонэз залын пукисьёс шуныт пумитазы - озьыен министерстволэн ӧсъёсыз вань пырисьёслы усьтэмын луозы. Нош кыӵе бадӟым ужпум бордын ужалоз министерство азьланяз? Нырысь интыын сылоз дышетонэз 12 арлы выжтон ужпум. Россиын школаос но пумен сыӵе дышетскон программаез уже кутозы. Ваньмыз со герӟаськемын нылпиослэсь тазалыксэс утёнэн. Трос предметъёсты дышетэмен сэрен, нылпиослэн туж зол сӧриське лулсэрзы. Соин ик туэ выль дышетскон арысен мултэс предметъёслы дышетон 970 окладлы кулэстэмын луоз. Туэ дышетӥсьёслэн кенешазы ӧжытгес кылӥськизы ӝожтӥськонъёс, тросгес вераськизы дышетон удысэз выльдон сярысь. Умоен пумитамын вал Можга городысь администрацилэн тӧроезлэн И. Семеновлэн ӵектонэз: школаосы берыктоно нылпи формаосты. Зэм, начар улонэз одӥг кадь вурем дӥськутэн уд ваты. Озьы ке но, узыр но начар нылпиос парта сьӧрын пукыкузы коть асьсэды огкадь мед шӧдозы. Туэ Можга городын дышетскисьёс школае огкадь вурем дӥськутэн мынозы. Кун Кенешлэн но Правительстволэн Тӧрооссы А. Волков но Н. Ганза, дышетӥсьёсты выль дышетскон арен ӟечкылам сяна, куд-ог ӵектонъёссэс веразы, кызьы та удысын коньдонэз шыръяса ужано. Кылсярысь, Н. Ганза шуиз: - Быдтоно огкадь ужпумъёсын вырись ёзъёсты, пичи классъёсты но ӧжыт нылпиосты дышетӥсь школаосты. Кыл кутытоно коньдонзэс тус-тас карисьёсты. Дугдытоно малпаськытэк школа, нылпи-сад юртъёс лэсьтыны кутскем ужъёсты. Соосты йылаз-пумаз вуттон понна туннэ кулэ луысал 5,5 миллиард манет коньдон. Удмурт кун университетлэн ректорез В. Журавлев ӵектӥз 2000-тӥ арез дышетскон арен ялыны. Дышетскыны мылкыд карисьёслэн лыдзы Удмуртиын, Россиын сярысь, арысь аре йылэ. Республикаысьтымы Калыкез дышетонъя министерстволэн бурд улаз кариськыны малпало шаерысьтымы вузъёс но училищеос. Выль министрлэсь кужымзэ шӧдыса, дыр. Туж умой кылъёс вераз Пичи Пурга районысь Бобья Уча школаысь дышетӥсь С. Иванова: "Нылпилы уд шуы, дугды, эн буды, возьма, ку заводъёс ӝутскозы, коньдон тырыны кутскозы". Дышетӥсьёс валало: нылпиосын ужано нуналлы быдэ, шуг-секытъёс шоры учкытэк. "Нырысетӥ сентябрь одно ик луоз" - Асьмеды кышкатӥзы дунне быронэн - ӧз пӧрмы. 17 август но, "сьӧд нунал", выльысь ӧз берытскы. Нош мае асьмеос одно ик тодӥськом: номыр шоры учкытэк, одно ик, вуоз выль дышетскон ар! - тазьы шуиз Ижысь 30 номеро школалэн директорез Владимир Иванович Хохряков. Мар бордын ужа быдэс Россилы тодмо школалэн директорез? Али нырысетӥ интые со пуктэ "утёно" кылысь потэм ужъёсты. Утёно коллективез. Утёно школалэсь ваньбурзэ. Утёно кружокъёсты но факультативъёсты. Утёно дышетонэз но нылпиосты будэтонэ пыӵам ӟеч амалъёсты. Утёно дышетӥсьёсыз кулэтэм ужъёсы кыскамлэсь. Вань та лэсьтоно ужъёс пото секыт улонмы бордысь. Нош кӧня выльзэ, умойзэ пыӵатыны быгатысал на меда коллективезлэн улоназ Владимир Иванович, берлань чигнатӥсь ужъёс ке ӧй луысалзы? Озьы ке но, директор ас коллективзэ ялан выль ужан амалъёсы кыске. Соин ик кужмо со ачиз но кужмо солэн коллективез. Али шуг вераны кылдоз-а, уз-а Россиын правовой государство, но 30 номеро школаын-лицейын али та уж борды ӝабыр-ӝабыр басьтӥськиллям. Правоя урокъёслы дырзэс уг жаляло. Оло, зэмзэ ик, татын сыӵе "государство" вазьгес кылдоз? Педсоветэ люкаськемъёсты В. И. Хохряков таӵе малпанэныз паймытӥз: муниципальной школалэсь модельзэ кылдытон борды, пе, басьтӥським. Республикаямы сыӵе школа ӧвӧл на бере, валамон ини, со сярысь нокыӵе законъёс но кутымтэ на. Соин ик кутскыны туж секыт. Но директор оске - пӧрмоз. Т. БАННИКОВА. Верало дышетӥсьёс Удмурт учебникъёс кулэ Та кенеше трос юанъёсын лыктӥ. Мар тодэме потэ вал, валэктонъёс шедьтӥ кадь. Огез бадӟымез сюлмаськон: дышетсконэз 12 арлы выжтон. Дышетӥсьёс солы пумит ӧвӧл. Сомында дышетсконэз анайёс но умоен лыдъяло. Туала курадӟонъёслэсь пиналъёс школаын умойгес утемын, соослэн правооссы понна дышетӥсьёс но нюръясько. Мынам малпамея, пайдаез луоз. Пӧртэм тодон-валанэз пиналъёс йыразы капчигес понозы. Дышетскисьёс, оло, ӧжытгес висёзы. Но школаын золгес ужано луоз пиосты армие дасян бордын, угось тросэзлэн школа бере ик армие мынон дырзы вуоз. Огшоры дышетӥсь ужаны дышемын инструкциосъя. Соин ик министерстволы ӝот-ӝот вераны, куд-ог дыръя косыны но, дыр, кулэ, кызьы басьтӥськоно та бадӟым уж борды. Туж шумпотӥсько, туэ удмурт кылын учебникъёс потозы ни шуыса. Министр вераз, та ужлы 700 сюрс манет висъямын шуыса. Национальной школаосы сыӵе учебникъёс туж кулэ. Куд-огез шуэ: кулэ-а, пе, удмурт нылпиосты удмурт учебникъёсъя дышетыны. Тазьы малпасько: кулэ. Ӧвӧл кышкано, удмурт нылпиос ӟуч кылэз вунэтозы шуыса. Ӟуч кыллы соосты улон, радио, телевидение дышетозы. Нош удмурт кылэз тодыса, соос асьсэлэсь кулэлыксэс умойгес валалозы, асьсэды вылӥгес дунъялозы. Нация ӝутскоз. С.Савинов, Завьялово роноысь методист. Чигиськем мылкыды буйгаз Туж кылзэммы потэ вал выль министрлэсь, правительствоысь адямиослэсь верамъёссэс. Ӵем дыръя сыӵе сюлэм чигиське, оскемысь дугдӥське. Татчы лыктыкумы но ялан малпаським: кин ке но милемыз буйгатоз на-а, оскон сётоз-а? Министрлэн но, Н.Ганзалэн но ӵектонъёссы кельшизы. Уката но кельшиз трибуна сьӧрын вераськем дышетӥсьёслэн кылъёссы. Ваньзы шуо: школаез утёно, школалы юрттоно, ӟечезлы осконо. Вить ар ужай ини директор луыса. Мар карод - секыт. Но шуг-секытъёсты дэмен вормиськом, кылем арын ас кужыменымы школамес тупатъям. 15 дышетӥсьёсмы, 102 нылпимы, 9 классозь дышетӥськом. Собере мылкыдоосыз дышетскыны Балезиноысь, Исаковоысь, Юндаысь шор ёзо школаосы мыно. Берло аръёсы тросэзгес Балезиное мыно - татын вузъёсы пырыны соослы паськытгес луонлыкъёс усьтӥсько. Шонер вераз министр, 10-тӥ-12-тӥ классъёсын дышетскисьёслы, пе, институтъёсы пырон понна нимысьтыз классъёс усьтоно. Соин ик мон 12 ар дышетсконэз умоен лыдъясько. Соглаш луисько Н.Ганзалэн вераменыз но: кема лэсьтӥськись школаосты пуктэмысь дугдытоно. Школа пуктытозь (куд-огез дасо аръёс лэсьтӥсько ни), нылпиослэн лыдзы кулэсме. Тани милям Быдыпи школаямы но туэ нырысетӥ классэ 5 мурт гинэ мыноз. Но монэ кышкатэ таӵе ужпум: малокомплектной школаосты кулэстӥмы ке, ум-а обиде нош ик удмурт нылпиосты? Н.Набокова, Балезино районысь Быдыпи школалэн директорез. УДМУРТ ЭЛЬКУНЫСЬ ПРАВИТЕЛЬСТВОЛЭН Куштӥськем корт сьӧд но буёло металлъёсын ужамлы нимысьтыз кагаз (лицензия) сётьянэз дугдытон сярысь ПОСТАНОВЛЕНИЕЗ 1998 арын 25 сентябре кутэм "Куд-ог ужъёслы лицензия тупатон сярысь" 158- Ф3 номеро Федеральной закон улонэ пыӵаны кутскемен валче, кудӥзъя куштӥськем сьӧд но буёло корт люкан-вузан но солэсь выль арбериос поттон ужъёслы лицензия тупатыны чакламын, озьы ик Россия Федерацилэн Гражданской кодексысьтыз 49 статьяез лыдэ басьтыса, Удмурт Элькун Кивалтэт пуктэ: 1. Россия Федерациысь Кивалтэтлэн куштӥськем сьӧд но буёло корт люкан вузан но солэсь выль арбериос поттон ужъёслы лицензия тупатон сярысь Положение кутэмезлэсь но лицензия сётъясь ёзэз пусъемезлэсь азьло Удмурт Элькунысь Инкуазез утёнъя комитетлы куштӥськем кортэз но буёло металлъёсты басьтон-октон нуон-ваён интыян ужъёслы лицензия сётъянэз дугдытоно, федеральной лицензиосты пусйылэмысь дугдоно, куштӥськем кортэз басьтӥсь пунктъёс усьтэмлэсь алоно. 2. Постановление кужыме пыре сое печатлам дырысен 15 нунал ортчыса. 3. Та постановленилэсь быдэсъяськемзэ эскерыса возёз Удмурт Элькунысь Инкуазь узырлыкъёсъя но инкуазез утёнъя министр А. В. Кулагин. Удмурт Элькун Кивалтэтлэн Тӧроез Н. А. Ганза. 1999 арын 9 августэ Н 741 Ижевск город Гажано дышетӥсьёс, дышетскисьёс, студентъёс! 1-тӥ сентябрь, Тодон-валанъёслэн нуналзы - праздник, со котьку ик асьмемын ӵош. Котькуд адямилэн лул-сюлэмаз со яркыт пиштэ но нырысетӥ гырлы, нырысетӥ дышетӥсь, школаез йылпумъянлы сӥзем бал сярысь тодэ ваёнъёсын шунтэ. Быдэ вуыса, асьмеос пичи дырамы выльысь вуиськом нылпиосынымы, внукъёсынымы ӵош, валаськом, та аръёс улонысьтымы ӟечъёсыз вал шуыса, куретӥськом, угось соосты уд берыкты ни, вожъяськиськом нырысетӥ классэ мынӥсьёслы но шумпотӥськом соос понна, соослэн ваньмыз азьпалан на ук. Улон сюрес вылын олома но луэ, озьы ке но дышетӥсьёсмес гажан но тау карон мылкыдмес ялан азьпала нуиськом. Выль даур матэктэмъя, валамонгес луэ - калыкъёслэн но кунъёслэн ӵуказе нуналзы, дуннеысь цивилизацилэн азинскон сюрес вылаз интызы трослы герӟаськемын луоз тодон- валан сётон радлыклэн кыӵе луэменыз. Ӵапак со вылэ пыкъясько страналэн экономика ласянь кужымез, наука но социальной удысъёсын азинсконъёсыз. Туннэ классъёсы но аудиториосы лыкто соос, кин улоз ЪЪИ даурын. Кыӵе луоз выль даур герӟаськемын соосын, визь-буренызы - ваньмызлэсь, мае кылдытэ туала школа. Выль дышетон технологиосты Россия понна традиция выллем луэм фундаментальной дышетонэн герӟан емыш вае ни. Удмуртилы котьку но кулэ вал но кулэ луозы тодӥсь- валась специалистъёс, визьмо тодосчиос, калык хозяйстволэн вань удысъёсаз, дышетонын, тазалыкез утёнын но культураын зэмос профессионалъёс но кибашлыос. Соин ик Удмурт Республикаысь Кун Кенеш но Правительство азьланьын но вань луонлыкъёсты кутыны тыршозы котькудӥзлы тодон-валан дуннее сюрес усьтон, Удмуртиысь дышетӥсьёслы юрттон понна. Ми тодӥськом - ваньмызлэн ик дышетӥсьёслэн но дышетскисьёслэн туннэ праздник мылкыдзы ӧвӧл. Йыркуръяськыны но куректыны мугъёс ӧжыт ӧвӧл. Ми валаськом, та праздниклэн валтӥсь адямиосыз азьын государстволэн пунэмез бадӟым. Но со уг кулэсты солэсь быдэс республикамылэн улоназ интызэ. Ми оскиськом - арысь аре тодон-валанъёслэн пиштэмзы эшшо яркыт но бордаз кыскись луоз. Праздникен, гажано эшъёс! Удмурт Республикаысь Кун Кенешлэн Тӧроез А. А. Волков. Удмурт Республикаысь Правительстволэн Тӧроез Н. А. Ганза. Устоосыз Москваын дышетскозы Школаез йылпумъям егитъёс гужем нуналъёсы "пӧсь" вакытэ вуылӥзы. Вылӥ но шор ёзо дышетскон заведениосын тросаз дышетскыны куто ини коньдон тырыса, нош сыӵе луонлыксы ваньмызлэн ӧвӧл. Воткинск городысьысь Привокзальной микрорайонын улӥсьёслэн огъя кенешазы (кивалтэ соин А.А.Разживин) трос пол куронэн вазиськылӥзы Кыкетӥ посёлокын улӥсьёс. Соос куризы нылпиоссылы дышетскыны яке уже интыяны кыӵе ке луонлыкъёс сётыны. Та ужпумез пыр-поч эскерыса, огъя кенешын одӥг кыл шедьтӥзы маштехникумлэн кивалтӥсеныз В.М.Безвановен. Кыкетӥ посёлокын улӥсь пиос, Привокзальной микрорайонысь кенешлэн ӵектэмезъя, экзаменъёссэс умой сётъязы ке, маштехникумын дун тырытэк дышетскыны быгатозы. Со сяна, кыкез депутатъёслэн юрттэмзыя, дунтэк дышетскыны быгатозы на Москваысь социологияя университетын но. В.Андреева. Пичи юртын котьку шулдыр Та вакытэ тросаз ёросъёсын культура учреждениослэсь толлы дась луэмзэс эскеро. Ортчиз со Ува ёросын но. Трос гуртъёсысь шутэтскон интыосыз клуб шуыны но уз луы, дыр, типовой юртъёс ӧвӧлэн. Озьы ке но, пичи яке куштӥськем юртэз но шулдыр карыны луэ вылэм. Администрациысь культура ёзлэн кивалтӥсез Л.Н.Ворошилова ӟечен пусйиз Пислег клублэсь кивалтӥсьсэ Галина Камаеваез. Клублэн пушкыз котьку шулдыр, нош котыраз картофка мерттэмын. Со но утялтэмын. Малпалоды, кинэ сюдыны ӧдъяло? Уз сюдэ, сое Галина вузалоз но поттэм коньдонэныз гурт калыкез шумпоттоз - пӧртэм ужрадъёс ортчытъялоз. В.Алексеева. Паспорттэ воштэмед потэ ке... Шаерамы вуизы кема возьмам выль паспортъёслэн бланкъёссы. Табере вужзэ выленыз, Россилэн гражданинэз луэмез возьматӥсь паспортэн, воштыны быгатоз котькудӥз 14 арес тырмем мурт. Со понна домоуправлениысь паспортъёсын ужась адямилы ваёно вуж паспортэз, кык фотография но 41 манет 75 копейка дун тырем сярысь квитанция. Сомында сылэ выль паспортлэн бланкез. Выль паспортын гожтэмын солэн кузёезлэн фамилиез, нимыз, атай нимыз, ку но кытын вордскемез, ку но кытын паспорт басьтэмез, кышноез-картэз но пиналъёсыз сярысь ивортонъёс, военнообязанной яке ӧвӧл, улон интыязы пусъем яке ӧвӧл сярысь пусъёс. Паспортлэн кузёез куремъя, отчы пуктӥське вирлэн группаез но резус-фактор сярысь тодметэз. Мукет ивортонъёс (кылсярысь, национальность) ӧвӧл. Выль паспортэз басьтӥсьёс Россилэн гражданъёсыз луо. Россилэн выль паспортэз сое тупатъянлэсь вужезлэсь ӟечгес утемын. Солэн кӧня ке аспӧртэм тодметъёсыз вань. Паспортъёсты сётъян радъямын югдурез утёнъя ёзъёслэн паспортъя но визаосъя службаосазы (паспорт басьтӥсь гражданинлэн улон интыезъя). Первомай РОВД-лэн паспортъя но визаосъя ёзэз интыяськемын таӵе адресъя: Ухтомский ульча, 23. Ужан дырыз 9.00 часысен 18.00 часозь, нуназеян - 13.00 часысен 14.00 часозь. Вирнунал (среда) - ужантэм нунал. Ф. ПЕТРОВА, Ижевскысь Первомай РОВД-лэн паспортъя но визаосъя службаезлэн кивалтӥсез. "Воткинский завод" Кун производственной огазеяськонлэсь коллективзэ пусъён сярысь Россия Федерациысь Президентлэн РАСПОРЯЖЕНИЕЗ Асьмелэсь ракетно-космической комплексъёсмес кылдытонын бадӟымесь азинсконъёссы понна Россия Федерацилэн Президентэзлэсь тау каронзэ ялоно Удмурт Республикаысь "Воткинский завод" Кун производственной огазеяськонлэн коллективезлы. Россия Федерацилэн Президентэз Б.Ельцин. 1999 арын 12 августэ. � 283-рп. Сюлмаськонъёс Школае вамыштон дыр вуэмын. Тросэз анай-атайёс нылпиоссы понна сюлмасько, уз-а коже алама сюрес вылэ, азьланяз дышетыны быгатозы-а, ужаны интыяськозы-а шуыса. Ижевскын улӥсьёс пӧлын алигес юалляськон ортчытэмын вал. Со возьматӥз анай- атайёслэсь таӵе сюлмаськонъёссэс: 100 процентэз паймо нылпиоссэс кытчы уже интыяны; 90 процентэз кышкаса уло наркоманиен эшъяськыны кутскемзылэсь; 75 процентэз йыртэманы ӧдъямзылэсь; 62 процентэз ӟеч дышетыны тыршо; 58 процентэз анай-атайёс пиоссэс армие келяны кышкало; 21 процентэз анай-атайёс лыдъяло, нылпиоссылэн ӟеч тодон-валанъёссы вань вылысь но вылӥ дышетскон заведениосы коньдонтэк пырыны уз быгатэ шуыса. Сяськаос - чеберайёс Монстера, аспидистра, арум, олеандр, семполия, виола, сансевьера, циперус... Та кылъёс кинлы ке мудрон потозы, нош сяська будэтӥсьёслэн соос котькуд нунал кыл йылазы, нимызъя ик син азязы пукто, котькуд будослэсь туссэ но сямзэ, шумпотыса ву кисьтало горшокъёсы. Тани Башкортостанысь Татышлы ёросысь Улысь Балтач школаын дышетскись пиналъёс но гужем куспын мӧзмыны вуизы ас киынызы кылдытэм оранжереязылэсь. 1-тӥ сентябре ик, школае пырыса, тросэз дыртозы отчы: мар воштӥськем, кӧняез сяськаяське, макем пуштырскиллям будосъёссы... - Чеберлыкезъя нырысь иинтыын - пальма, - ас малпанзэ вера Альфия Миникаловна Байшева. - Солэн выжыосыз тропикъёсын, субтропикъёсын. Нош милям та вож сэрегмы кутскиз кипарис бордысен. Ог дас ар талэсь азьвыл сое Анапаысь ваиз биолог Закир Акунович Адуллин. Но та шуола лымшор будосъёсынызы гинэ уг паймыты. Со ӧте ас бордаз азбарысь сяськаосыныз но. Котырзэс вож бурдъёсын чебертон ласянь быдэс республикаын вормисе потыло улысь балтачъёс. Школа бакчаын нош мар гинэ ӧвӧл: кешыр, кушман, помидор, пӧсьтурын, каляга, кубиста... Удъёссэс будэто тулыс оранжереяязы. Сӥзьыл, толалтэ соос емышен шумпотто ӝӧк вылзэс. Туннэ школа столовойын тужгес шулдыр - гужембыт будэтэм сяськаослэсь адӟытон усьтӥське. Ортчоз куарусён, коньывуон... Лымы усёз. Пыриды ке та школае, вож "оазисэ) сюроды. Куатетӥ классын дышетскись нылъёс Марина Хазимарданова, ксения Гильфанова, мая Саяфарова пыр-поч тодматозы но валэктозы, кыӵе луо бегониос, гераньёс, фиалкоас, гортензия, фикус, цикламен, примула, аспарагус... Сяськаос-чеберайёс кадесь ик асьсэос но та нылъёс: Марина, Ксения, мая но Вероника. Соосын ӵош дышетӥсьсы Альфия Миникаловна. Владимир Беломорскихлэн туспуктэмъёсыз. Сизьымдон арес тырмиз тодмо кылбурчилы, журналистлы, дышетӥсьлы, Удмурт Элькунысь культура удысысь сӥё-дано ужасьлы Семен Андреевич Перевощиковлы. Семен Андреевич вань ужатозяз тыршиз газет-журнал поттонын. Удмурт кылбуретэз пичиысен яратэм адями уг люкиськы солэсь быдэс улонэз ӵоже - лыдӟисьёссэ шумпоттылэ паймымон чеберлыкен но сюлэмкужымен тырмем чуръёсыныз. Аспӧртэмлыко юбилейзэ пумитаса, кылбурчи шутэтсконэз уз тоды. Яратоно лыдӟисьёсыз сярысь одӥг нунал но вунэтытэк, азьланяз но кузьмалоз соослы одӥг сӥньысэ сузьем марӟан пырыоссэ. Сентябрь: тодмо нимъёс но нуналъёс 1. - 115 ар талэсь азьвыл (1884) Июльскойын усьтӥськиз школа. Нырысь церковно- приходской школаын 12 мурт дышетскиз, бӧрысьгес со 7 классъем луиз. Нош 1956-тӥ арын со пӧрмытэмын шор ёзо школалы; - 75 ар талэсь азьвыл (1924) ортчиз Удмуртиысь рабселькоръёслэн нырысетӥ совещанизы; - 60 ар талэсь азьвыл (1939) ужаны ӧдъяз Глазовысь учительской (али педагогической) институт; - 45 ар талэсь зьвыл (1954) Ижевскын усьтӥськиз Гурт хозяйствоя институт. Со кылдӥз Москваысь вал вордонъя зоотехнической институтэз Ижевске выжтэмен валче. Со арын ик СССР-ысь Вылӥ образованиея министерстволэн 18-тӥ августэ гожтэм приказэзъя институтлэн И курсаз 150 студентэз кутыны чаклазы. 2. - Вордскемез дырысен 80 ар тырме Советской Союзлэн Героезлы Григорий Петрович Евдокимовлы (1919). Вордскемын Вавож ёросысь Русские Ожги гуртын. Война дыръя кышкасьтэм лётчик 300 пол инбаме ӝутскылӥз; - вордскемез дырысен 70 ар тырме Леонид Петрович Емельяновлы (1929), удмурт прозаиклы но публицистлы, УАССР-ысь культура удысысь дано ужасьлы. Вордскемын Можга ёросысь Чурайгуртын. 9. - Вордскемез дырысен 75 ар тырме Советской Союзлэн Героезлы Леонид Арсентьевич Ардашевлы (1924-1952). Вордскемын Кез ёросысь Лып-Булатово гуртын. Дано ним сётэмын 21-тӥ июне 1944-тӥ арын, Карел фронтын геройлыко луэмзэ возьматэмез понна. 10. - 70 ар талэсь азьвыл (1929) ужаны кутскиз Сарапулысь пыдкутчан вурон фабрика. 11. - 45 ар талэсь азьвыл (1954) ужась кужымъёсын кивалтонъя Удмурт республиканской управлениезлэн начальникез Ижевске технической училищеос усьтон сярысь приказ гожтӥз. 14. - Вордскемез дырысен 85 ар тырме Михаил Сидорович Воронцовлы (1914-1963), удмурт прозаиклы но публицистлы. Вордскемын Шаркан ёросысь Вортча починка (Малый Казес) гуртын. 15. - Вордскемез дырысен 105 ар тырме Михаил Георгиевич Худяковлы (1894-1937), тодмо этнографлы, удмурт культураез эскерисьлы. 16. - Вордскемез дырысен 75 ар тырме удмурт поэтлы Марк Андреевич Чайниковлы (Анатолий Юговлы) (1924-1988). Вордскемын Вавож ёросысь Малиновка гуртын. 20. - Вордскемез дырысен 80 ар тырме Павел Федорович Блиновлы (1919), Советской Союзлэн Героезлы. Войналэсь азьвыл Ижевск аэроклубын ужаз. Ож вакытэ кышкасьтэм лётчик 200 пол инбаме ӝутскылӥз, тушмонлэсь куать самолётсэ уськытӥз. - 25 ар талэсь азьвыл (1974) Ижевскын вордскиз 500 сюрсэтӥез улӥсь. 21. - 240 ар талэсь азьвыл (1759) Воткинск заводын нырысьсэ корт поттэмын. 24. - Вордскемез дырысен 95 ар тырмеБорис Васильевич Паринлы (1904-1968), академиклы, медицина наукаосъя докторлы, республикаямы вир басьтонъя станциез кылдытӥсьлы, РСФСР-ысь наука удысын дано ужасьлы. Вордскиз Сюмси селоын. 25-28. - 80 ар талэсь азьло (1919) Сарапулын ужаз удмуртъёслэн ИИ Всероссийской съездзы. Отчы ветлӥз 109 делегат. Съездэз радъяз Трофим Борисов.Съезд удмуртлыкез ӝутонын бадӟым инты басьтӥз. 26. - 55 ар талэсь азьло (1944) Ижевскын усьтэмын Санитарной просвещениея юрт. Сентябрь - декабрь - 145 ар талэсь азьло (1854) Глазовын ссылкаын вал тодмо ӟуч писатель-сатирик М.Е.Салтыков-Щедрин. Сентябрь 80 ар талэсь азьло (1919) Глазовысь дышетӥсьёсты дасянъя семинария пӧрмытэмын педагогической техникумлы. 75 ар талэсь азьло (1924) Шаркан волостьысь Сосновка черкогуртын Удмуртиын нырысетӥез крестьян егитъёслы школа усьтӥськиз. 40 ар талэсь азьло (1959) Ижевскын кылдытэмын художественной вузъёс поттон фабрика. Нылпи дунне Гужем ортчиз, нош лагерь уг пытсаськы Туж кема кадь витимы гужемез. Вуиз со. Ӧм но шӧдылэ - киыныз шона ни. Туж ӝог ортчиз ук таид. Туннэ-ӵуказе жингыртоз чингыли, нылпиосты ас дораз ӧтьыса. Кызьы шутэтскизы асьме пиналъёс? Вал, вылды, оломаиз но. Тодӥсько огзэ: кин каникулзэ ортчытӥз "Варзи-Ятчи" лагерьын, кошкись гужемез со мыньпотыса гинэ син азяз пуктоз. Кызьы сотэк? Быдэс страналы тодмо санаторийын кылем арын, тулыс пумын, усьтӥськиз эмъяськонъя нылпи лагерь. Курортлэн кивалтӥсьёсыз асьме Правительствоен ӵош таӵе малпанэ вуизы: пиналъёслэсь тазалыксэс юнматон но корпусъёсты уже пайдаёгес кутон вылысь, татчы арбыт ик люкалляно висись нылпиосты, дышетон радъяно, сюдон ласянь малпаськоно. Кылзы тупаз. Чылкыт омыр, шыпыт инты, мугорлы пайда сётӥсь сылалъёсын узыр ву но дэри, тодӥсь- валась специалистъёс... Ма кулэ на? Ваньмыз вань. Бен, котьма вӧй вылтӥ кадь кошкиз шуим ке, янгышалом. Шуг-секытъёс нырысь-валысь ичи ӧй вал. Но соос сярысь верам уг поты - туннэ нуналлы лагерьын улон радъяськемын ни. Котькуд смена 21 нуналлы чакламын. Куинь арня ӵоже 7-14 аресъем пиос но нылъёс тазалыксэс пӧртэм сямен юнмато. Кибашлы врачъёслэн чакламзы улсын соослы котькудӥзлы нимаз эмъян амал тупато. Но ваньмыз ик пиналъёс массаже ветло, ваннаын кыллё, турынъёсын чай юо, ужа соосын психотерапевт но. Санаторийын сюлмасько пичиослэсь ваньмон дырзэс ӟечгес радъян сярысь но. - Гужемлы ми тазьы кенешим, - вера педагог Светлана Григорьева, - сменаез куинь вакытлы люкиськом, нырысетӥяз арняе ог-огенымы тодматскиськом, выль интылы дышетӥськом, кыкетӥяз тросгес дырез висъяськом физкультуралы но спортлы, соку ик ӵошатскон но ортчытӥськом, куинетӥ, берпуметӥ арняяз, пиналъёс творчествоен выро, быгатэмзэс возьмато, газет потто, кылбур гожъяны дышетско. Озьы лагерьын улон тунсыкогес луэ, пиналъёслэн йыразы но со сярысь тодэ ваёнъёс бӧрысь умойгес возисько. Со сяна, лагере лыктэмъёс палэнэ но потало. Соосты тодмато Алнаше интыяськем музейёсын, вайыло Ашальчи Окилэн но Геннадий Красильниковлэн юртъёсазы. Бадӟымъёссэгес нулло на Елабугае, тодмо ӟуч художниклэн Иван Ившинлэн вордӥськем палъёсаз, возьмато солэсь суредъёссэ, отын ик вань на трос мукет учкымон интыос. Лагерьын нуналлы быдэ сямен ортчыло пӧртэм шудонъёс, шулдыръяськон ӝытъёс. Мылкыд карисьёс быгато дискотекае ветлыны, кино учкыны, тыметын пыжен уяны. - Ми дорын али 289 адями шутэтске, - вера лагерьлэн кивалтӥсезлэсь ужзэ быдэсъясь врач Ольга Владимирова. - Соос вуэмын пӧртэм ёросъёсысь но городъёсысь. Ваньзэс ик эмъяны кулэ. Оскиськом, пайдаез луоз. Пиналъёсты нуналаз куать пол сюдо, весь чакласа возё. Ӟеч инкуазь но ужасьёслэн тыршемзы юрттоз соослы таза эшъёсынызы оградэ султыны. Гужемлэн кутсконаз но шораз "Варзи-Ятчи" лагерьын тазалыксэс юнматӥзы Ижысь школа-сад комплексысь (али гимназия каризы) нылпиос. Нош августэ туэ нырысьсэ экологической смена усьтӥзы. Таиз сярысь татын данъяськыса верало. Со понна витетӥ корпусэз сётӥзы. 70 пиос но нылъёс вуэмын Камбарка городысь но Кизнер ёросысь. Ма соосты герӟа, тодӥськоды, вылды. Бен, химической ож тӥрлык. Сыӵе ик кышкыт маке вань Киров улосысь Оричев районын. Бускельёсмылэсь мылкыдзэс лыдэ басьтыса, отысь пиналъёслы 15 путёвка висъязы. Табере ваньзы та нылпиос огазьын шутэтско-эмъясько. Ольга Анатольевна монэ тодматӥз соосын. Тазьы учкыса, огшоры пиос но нылъёс кадь. Но кин тодэ, кызьы шӧдӥське яке шӧдӥськоз шурдыт химия тазалык вылын. Сое чаклан понна кема дыр кулэ на. Борддоръёсын - дасо пала плакатъёс, газетъёс. Вань гербарийзы но. Пиналъёслы кылдытэмын нимысьтыз программа. Соос потало вӧзысь возьёсы, сике, эскеро инкуазь тодметъёсты. Валамон ни, татын покчиослы туж кельше. - Смена усьтыны юрттӥз Вож Кирос (Зелёный Крест) общество, шонергес вераса, солэн Швейцариысь ёзэз, - маде "Кедр" движенилэн Удмуртиысь люкетэзлэн одӥгез кивалтӥсез Анатолий Арефьев. - Отысь эшъёс августэ татчы вуылӥзы, лагерен тодматскизы. Номыр умойтэмзэ ӧз шедьтэ, азьланьын но юрттыны мылкыд каремзэс возьматӥзы. Тӥни сыӵе лагерь вань асьме республикаын. Августэ шутэтскемъёс ӝоген доразы бертозы. Соос интые лыктозы мукетъёсыз. Таосыз пуксёзы ни парта сьӧры. Гужем ортчиз - лагерь ужзэ азьланьтэ. И. ЛЕБЕДЕВ. "Варзи-Ятчиысь" тыметын. Вӧй шуккозы Агрикольын Сыӵе нимо гурт пыре Красногорск ёросысь ХХИ партсъезд нимо колхозэ. Гурт дорысь комплекс вӧзын сылӥз куштӥськем юрт. Берло дыре солэн вылтусыз воштӥськыны ӧдъяз. Озьы отын вӧй шуккон цех лэсьтон кутскиз. Кивалтэ соин Иван Вершинин. Солэн верамезъя, ваньмыз умой мынӥз ке, цехын вӧй шуккозы, йӧлвыл но 3,6 процент наплыкен йӧл поттозы. Ма но со оборудование басьтэмын ни. Кулэ на йӧлэз сӥятон компрессор. Но солы коньдон ӧвӧл на. Зэм, 150 кубометрлы нюлэс висъямын ни. Сое вузаса, оло, ма но со басьтыны луоз ик. Гуртоос оско, ӝоген Агрикольын но нӧкы вӧй шуккозы шуыса. Н.Семенов. ГУРТ УЛОН Котьку-а янгыш куазь? Сюрес вылтӥ мыныку, мыд-мыд палтӥз кылё ю бусыос. Туэ соос тӧлъя уг веттасько. Россиын котькыӵе югдуре куазез янгыш каро вал. Таяз аре но гуртысь ужасьёсты куазь бадӟым пайдалыкеныз ӧз шумпотты. Зор ӧвӧлэн, юос вакчи будӥзы. Вавож ёросысь "Луч" эштослэн тӧроез Иван Перевощиков вакчи юэз но октыны быгатом шуиз. "Дон" комбайн ваньзэ, пе, басьтоз. Эштос ю-няньзэ быдэсак утялтыса вуиз ке, кылем арын мында ик люкаськоз. Фураж но силос тырмыны кулэ. Нош ю тысьлэсь сенаж дасяса ӧз вуттэ - син куспын юос ортчизы. Эштослэн тӧроез лыдпусъёсты уг яраты. Ю-няньлэсь удалтэмзэ вӧлыосын мерта. Берлозэ 5 ар куспын соос кык поллы ӧжытгес кылиллям. Нош картофка сярысь верано ке, пудэз чебер, но выжыяз номыр но ӧвӧл. Уго туэ зоред пӧсь гур вылэ ву кисьтэм кадь вал. Нош бер зоръёс картофкаез бадӟымато яке трос но векчи каро. Кивалтӥсь юос вакчи кылемлэсь уг кышка, курозы тырмоз. Миым сое бусыосысь поттыны ӧз быгатэ. 32 ар ӵоже гурт хозяйствоын ужатозяз, туэ нырысьсэ чабеез ӟеглэсь азьло октоно луизы. Иван Павловичлэн Россилэн Президентэзлэн ужамезлы пайме. Уг кельшы солы Правительствоез ӵемысь вошъямзы. - Берло вакытэ Ельцин Правительстволы Тӧрое погонэн адямиосты пуктылэ. Нош соос экономикаын, уката но гурт хозяйствоын, номыре но уг валало. Примаков гуртоосты кӧня ке "маялляз". НДС-эз быдтӥз. Со вакытэ силос октӥсь выль комбайн, одӥг трактор, вуко басьтыны быгатӥм. Асьмеос ик пызь но изӥськом. Пайме "Луч" эштослэн тӧроез: кызьы, пе, меда уло адямиос, кинлэн аслаз вукоез, тысез ӧвӧл. Туннэ чабеез 2 манет но 50 коньыен басьто. Ю-нянь будэтӥсьёслы со ӧжыт потэ. Но И. Перевощиковез мукетыз но сюлэмшугъяськытэ: кызьы улоз огшоры калык? Одӥг колды нянь туннэ вить манет сылэ, мешок пызь - 410. Нош Москваын шуиллям: нянь, пе, 2,5 манетлэсь трос медам сылы. Эштослэн кивалтӥсез вань сюлмыныз дурбасьтэ "Дон" комбайнлы: - Котьма мед шуозы, но одӥг немец комбайн интые мед басьтозы вылэм куиньзэ "Дон- 1500" яке витьсэ "Дон-1200" комбайнъёсты. Немецъёслэн техникаенызы ужаны быгатэм кулэ. Вӧл-вӧл интыостӥ "Дон-1500" туж умой аралоз. Нош бусы сэрегъёстӥ но гопъёстӥ "Ниваен" октоно. 1200 гектарлы одӥг ке но "Нива" кулэ. А. Андриянов. "Гожтӥськисьлэн арняез" Удмурт Республикаысь почта кусыпъёсъя управление шаерысьтымы но Россиысь кӧня ке газет-журналъёсын ӵош 6-тӥ сентябрьысен 12-тӥ сентябрёзь ортчытэ "Гожтӥськисьлэсь арнязэ". Газет-журналъёслэн дунзы та нуналъёсы 10 процент пала кулэсмоз. "Удмурт дунне" газетлы та арняе готӥськыны луоз таӵе дунъёсъя: индекс 6-тӥ - 12-тӥ сентябрьлы Арлы гожтӥськон гожтӥськон дунъёс дунъёс 54400 77 манет 16 копейка 84 манет 14402 71 манет 76 копейка 78 манет 14400 43 манет 20 копейка 48 манет 54402 27 манет 30 манет Шӧкыч Кышъям гумыен буйгатоз 36 ар талэсь азьло андан ӵыжатӥсьёслэн городоказы улон патер сётӥзы. Эх, шулдыр улон кутскиз ук соку! Титанысь котьку но пӧсь ву бызиз. Жаляса верано луисько: ваннаысьтымы со бекчемес гумыен воштӥзы. Но... корт но сисьме вылэм. Табере со гумытӥ пӧсь вумы тыро-пыдо уг вуы ни. 1 номеро жилсервис шуонысь ужасьёс гумыосмес ялан "кышъяло но кышъяло" пӧртэм кылъёсын буйгато милемыз. Со сяна, не вань, не ӧвӧл понна коньдонмес толэзьлы быдэ кисыысь кыско но кыско. Азьвыл аръёсты уйвӧтамы гинэ но тодамы ваиськомы. "Ижсталь" заводлэн бурд улаз улыкумы гумыосмес дыраз вошъязы, ялан эскерыса возизы. Нош городлы сётӥзы но - пшик! Ми сярысь чылкак вунэтӥзы. Ӵок, ойдо, гумыос гинэ луысалзы ке, хрущёвка шуон коркаослэн липетъёссы но вужмемын ни. Сӥзьылэн-тулысэн вулэсь гумыетӥ ӟизамзэ ум возьмаське ни, сое вӧлдэтысь но люканы луэ. Ӵок ини, кызьы ке но чидалом ини. Кун Думае быръёнъёс дырозь кема ӧз кыльы ни. Оло, юрттозы ай... В. Сьӧдошмесов. Легезь шиё, но пайдаё Толлы дасям сиёнъёсты уката витамино луозы, пӧлазы легезьмульылэсь парос ватсады ке ( 1 муртлы - 50 грамм) легезь туж узыр С но Р витаминэн. Витаминэн узыр пӧрме яблок но ӵужкушман сокъёсты сураса. Кияр, помидорды С витаминэн узыр мед луоз шуыса, ватсалэ мята, сельдерей ( 1 литрлы - 50 грамм). Нош тодӥськоды-а тӥ, уксусэз тӧдьы еж горд сутэр воштыны быгатэ шуыса (1 черыклы 2 кырым мында). ТАЗАЛЫК Урод сиськиськом - асьмеды сииськом Вуиз ик со вакыт - адямиос удалтэм бакча-сиёнзэс окто, компот, салат лэсьто, висказ улмо ишкалто но бызьыса губияны кошко. Но куддыр ческыт сиёнэнызы гусъяськемзы бере шугомо. - Арысь аре со озьы. Август-сентябрь ке, тод ини: йылозы сиён-юонэн шугомыса вуись висисьёс, - шуэ республикаысьтымы инфекционной больницаысь кӧтсюлъёсты эмъянъя отделениен кивалтӥсь врач Ангелина Петровна Малюгина. - Уката ик со шӧдӥськыны кутскиз берло аръёссэ: отравлениос лыдзыя ортчизы дизинтериез но, сальмонеллёзэз но. Адямиос ёрмемысьтызы дунтэматэм сиён-юон басьто, сое кема возё, изъянмемез бере но уг кушто. Сыӵе сиён-юонын токсинъёс (ядъёс) кылдо, соин ик адями шугоме. Валатэк пӧртэм емыш, губи окто, умой миськытэк, кема пӧзьтытэк сиё. - Ангелина Петровна, али ялан ало, вандылэм арбузэз басьяны уг яра шуыса. - Шонер ало. Шунды шорын улыса, отын микробъёс аляло. Собере, быдэскын басьтыкузы но, арбузлэсь кисьмамзэ тодон понна, пушкессэ кырсь пуртэн вандыса возьматыны косо. Ваньмыз потэ асьме бордысь. Шугомемзы бӧрсьы но, адямиос врачлы уг вазисько, соин ик ӵемгес дорамы "скороен" вутто, куддыр реанимацие келяно луэ. - Оло, керпото: кыӵе ке йӧно адями, нош солэн - вождэс эн вае - кӧтыз вия... - Висён - со висён, тон коть Инмар лу - уг юа, соин ик керпотонэз ӧвӧл. Висёнэз аналтыса, бӧрысь эмъяны туж шуг: микробъёс но улон азинскемъя азинско - вуж эмъюмъёс соосты уг вормо ни. Туала эмъюмъёс ӟечесь, но укыр дуноесь - милям но, висисьёслэн но басьтыны луонлыкъёссы ӧвӧл. - Шаерамы гужемлы быдэ я отын, я татын кӧткыль (дизентерия) аля. Туэ но тани Шабердыын эпидемия вал. - Та учыръёсы висён вӧлмиз урод вуэн сэрен. Вуысь паласькем палочкаосты Флекснерлэн шуо. Со Зоннойлэсь (сиён-юон, арбериос, кырсь киос пыр паласькисезлэсь) секытгес. Соин ик быректымтэ вуэз юыны уг яра, киосты котьку майталэн миськоно. Жалятэк куяно кылем-мылем сиёнэз. - Секыт-а висён со? Луыло-а кулон учыръёс? - Дизентерия - секыт висён. Со туж бадӟым изъян вае кӧтпушлы, бурмемзы бӧрсьы но тросэз курадӟо на. Нош висьыны кутскыку вандыса кӧт висе, ӧскем потэ, ӵем кӧт вия, адями ӟырда, лябӟе, висьылӥсь ёзъёсыз уката лябӟо. Зол висё пиналъёс но мӧйы муртъёс. Кылем арын кызь кык мурт реанимациын но кыллизы. Чылкак дизентериен куло шуыны уг луы - дизентерия лябӟытэ мугорысь кудзэ ке лябзэгес органэз, тӥни со уг ке чида... Кылем арын кулӥз сизьымдон аресъем пиосмурт. Солэн сальмонеллёз вал (пӧртэмлыкез трос ӧвӧл), сюлэмыз ӧз чида. - Сальмонеллёз - курег сӥль сиыны яратӥсьёслэн висёнзы, озьы-а? - Озьыгес. Огпӧртэмез сальмонелла палаське курег сӥльысь, курег пузысь. Учке ай, ӝыны базар курег пузэн вузкаре - сомында шунды шорын пыжо, зынмыто, нош асьмеос сое басьтӥськом. Кызьы соин уд висьы? Мукетыз палаське чорыг, йӧл, йӧлпыд, мукет сиёнъёс бордысь. Сальмонелла, кӧтэ сюрыса, векчи сюлэ интыяське но отын тросэн аляны, яд вӧлмытыны кутске. Нош куать час ортчыса (кудӥзлэн - куинь нунал), адями висьыны кутске: ӟырда, йырыз висьыны, ӧскыны ӧдъя, кӧтыз вия, вандыса висе... Кӧтпуш сяна, курадӟо мус, пекляос, сюлэм, йырвиым. - Кызьы алоно тазэ висёнэз? - Мукетъёссэ сямен ик: ӵемгес киосты миськоно. Сӥлез кема пӧзьтоно, курег пузэз - 20 минут. Пӧзьтэм сиёнэз кема возьыны уг яра (котлетэз, чорыгез, салатъёсты дас кык часлэсь кема возьыны уг яра, йӧллэсь сиёнъёсты - кызь часлэсь. Миськем бере емышъёсты, бакча сиёнэз быректэм вуэн гылтоно на. Нош асьмелэн ваньмыз мыддорин: анай, нылпизэ чылкытлыклы дышетэм интые, урамысь банан, яблок басьтэ но кияз мыче. - Бурмем бӧрсьы но та висёнъёс тазалык понна пытьытэм уг кылё, дыр? - Бен, кӧтпуш лябӟе, соин ик азьланяз чакласькыса сиськыны кулэ - толэзь мында ке но одно возиськоно курыт, кузьыт, кӧё-вӧё сиёнъёслэсь, кудӟытӥсь юонъёслэсь. З.Рябинина. ТАЗАЛЫК Уте гужемез... гулбечады Гужемлы быдэ нылкышноослэн трос мукет сюлмаськонъёссы вӧзы ватсаське на эшшо огез - толалтэлы ческыт витамино сиён дасян. Ӝытбытэн уг кошкыло соос плита вӧзысь: варення-компот, пӧзьто, кияр-помидор сылалто. Но кӧня ке дыр ортчыса, зарни дунъем кудымульыен варення пурысьтаны кутске, киярен черык изён шорын ыбыса лэзе. Мар кароно - ваньзэ шонер лэсьтӥд вал кадь ук? РАМН-лэн Сиськонъя (сиён-юонъя) институтысьтыз сиён-юонын кутӥськись ватсэтъёсты эскеронъя лабораториын ужасьёс ӵекто пӧрасьёслы Россиысь Минздравен эскерем ватсэтъёсты уже кутыны. Куд-огез соос пӧлысь котьку ки уламы (уксус, сылал, сода), куд-огзэ луоз аптекаысь басьтыны (ацетилсалициловой, глутаминовой кислота, хлористой кальций) яке магазинысь (сорбиновой кислота, сахарин...). Та ватсэтъёс юрттозы тӥледлы бакча сиёнэз, емышъёсты вуоно гужемозь выль кадь ческыт, чебер, витамино утьыны. Куажыр-куажыр! Сылатэм кияр, губи, ческыт пӧсьтурын куажыр каро чурыт вуын. Нош ву небыт ке? Соку юрттоз хлористой кальций. Бакча сиёндэс сылалтыку, 1 литрлы ватсалэ ӝыны пичи пуньы 10 процентъем хлористой кальций. Сомында ик пононо, 1 килограмм кубиста сылалтыку. Нош ягмульылэсь но сливалэсь компотэ - 1 литрлы пичи пуньылэн ӝыныезлэн ӝыныез мында, соку емышъёсты толбыт выль кадь улозы. Ческыт губи Губи ческыт шӧмо луэ, сылалтыку пӧлаз глутаминовой кислота поныса. Озьы ик мынэ со бакча-сиёнъёслэсь салатъёс дасяку. 1 литрлы 2-5 грамм кислота понэ (та порошок вузаське аптекаосын). Чильпырась улмо Котькӧня банкаостэ миськы-быректы, пытсэт улысь груша юдэсъёс сьӧдэкто. Малы озьы луэ? Пытсэт улэ котьку ик кӧня ке омыр кыле - со ик чырсатыны кутске емышъёсты. Озьы медаз луы шуыса, стерилизовать карон азьын улмолэсь, грушалэсь компотъёсты (1 литрлы 4�мг) аскорбиновой кислота ватсано. Выль ар уе - выль помидор Тодӥськоды-а, кызьы помидорез выль кадь возьыны луэ? Гурын ӟырдатэм чылкыт кӧс банкаосы тыраз ик помидор тыре. Банкаяды кык пуньы спирт кисьтыса ӝуатэ. Кык пол сэзъялтэ но банкадэс ӝогак ворсалэ. Ческыт мед кошкоз! Удмуртиысь му вӧй но чагыр эстӥськон кыскон удысын ужасьёс! Матэктэ тӥляд профессиональной праздникты. Соин валче сюлмысьтымы ӟечкыласьком та удысын тыршисьёсты. Зэм, тӥляд ужды секыт, но со данъяськымон. Нефтяникъёс но буровикъёс, транспортсн но лэсьтӥськон удысын ужасьёс, геофизикъёс но гумы кыскисьёс - ваньпс луо но луозы странамылэн оскымон ужасьёсыз. Куазь шоры учкытэк, быдэстоно уждэс уретытэк, Удмуртилы тӥ узырлык ваиськоды. Тӥляд ужды кышкытлыкен герӟаськемын. Со сярысь котькинлы кемалась тодмо ни. Валамон, тӥляд быгатонлыкты котьку юрттоз странамес секыт югдурысь поттыны. Соиз понна котькудӥз тау карон кылъёссэ вералоз. Праздникен тӥледды, шудбур но тазалык асьтэлы но семьяостылы, ӟечезлы оскон но капчи мылкыд! "Отечество" организацилэн Удмурт люкетэзлэн Кенешез. ШӦКЫЧ Берло дыре Ижевскысь унояз улон юртъёсын электрокужымез лыдъянъя счётчикъёсты лушкало. Ваньзэ соосты бӧрысь базарын ик вузало. Милициын ужасьёс учко-эскеро но ма карыны ик паймо: йыртэмасьёсты кырмон понна нокыӵе закон, пе, ӧвӧл... Гожтэтысь. Пересь нылкышно: - Аверьян, ма, тон милестым счётчикъёмес маялтэмед кадь ук? Номерез тыпак милям ведь. Суредэз Л. Прозоровлэн. Бускельлэн емышез ческытгес Кытӥяз мон аслэсьтым ачим юасько: "Ма меда гожъясал быдӟым писатель Николай Васильевич Гоголь асьмелэн туала улонмы сярысь. "Ма лэсьто Россиын?" юанлы со вакчияк шуэм: "Лушкасько". Зэмзэ но, вашкала дырысен асьме дорын лушкаськон тросэзлэн сямаз ик пыӵаз кадь. Тани милям сад бакчаямы пичи гинэ тыметмы вань. Та чебер гужем нуналъёсы со магнит кадь бордаз кыске Ижевскысь пиналъёсты. Отын соос пыласько, тамак кыско, курытсэ юо, наркотикъёсын шузиясько. Соосын йырин татын туэ нош ик быдэс юрт ӝуаз. Сад утисьёслэн кенешазы адямиос ӵектӥзы вал та прудысь вуэз лэзьыны. Но тыметысь ву тылпуэз кысыны яра шуыса, та малпанлэсь палэнскизы. Куд-огез ӵектӥз быдэс массивез кенераны, мукетъёсыз - бакчае пропускен гинэ лэзьяны. Но юрттоз-а кудӥз ке та амал, куд-огез бакча утисьёс асьсэос бускельзылэсь емышсэ бичало ке? Мар на ӝожтӥськонэз шузи-мази пиналъёс вылэ. Городысь милиция кыл сётӥз куд-ог дыръя сад бакчаосты эскерылыны. Улом но адӟом ини ма луоз азьланяз. Возьыттэм муртъёсты лушкаськемлэсь, оло, соос алозы. В. ВОЛОДИН. Калмез кузя 5. Пужымъёс милям котькытынлэсь ӝужытэсь... И. Шурлэн кулэлыкез трос пӧртэм. Одӥгезлы со дуно чилясь чорыгеныз, мукетызлы - чылкыт вуэныз, куинетӥезлы - луоё ярдуреныз. Ольга Александроваез кӧня ке ар талэсь азьло та палъёсы вуттӥзы эшъёсыз, шутэтскыны шуыса. Адӟиз со ӝужытэсь пужымъёсты, шур котыръёсты, ненег вож турынэз но паймиз: ӵапак таӵе азьын ортчиз ук пинал дырыз. Соку ик син азе пуксизы сюлэмез чепыллясь тодэ ваёнъёс: оломаин но тунсыкъяськись атаез, губиен тырмытэм кужнялы шумпотон, меӵ ярдуръёстӥ салазкиен нискылан... - Тӥ котьмар каре, нош мон табере татын уло, - эшъёсыз тазьы верамезлы нырысь- валысь ӧз но оске кадь. Но сыӵе ни адями Ольга - шуиз ке, озьы ик кароз. ...Виняшур-Бия посёлоке беромыса вуим. Ярам коть, сьӧрамы кутӥм Ольгалэсь сузэрзэ - сюрес утчано ӧз луы. Корка кузё али гинэ мунчоысь потэм вылэм. Ачиз но, эшез Людмила Молчанова но Ижысь куноослы шумпотӥзы. Син куспын ӝӧк вылэ вуиз пыштурынэн парем чай, мылкыд карисьёслы ӵектӥзы каунэн шыд. Леонид Прозоровмы, Александроваен далайгес ини эшъяськись мурт, шормаз сьӧраз ваем арбузэз. Кемалась турттӥсько ни вал татчы вуылыны. Туж тодэм потӥз, ма сокем-сокем кыске Ольгаез та пала - улон интыезлэсь, Ижевсклэсь, ог сю витьтон километр кеме интыяськем корка? Шат уг луы вал та выллемгес ик юрт матынгес возьыны? - Калмезэз мукет шуръёсын ӵошатыны ик уг луы, - шуныт пальпотыса вера Ольга. - Татын аспӧртэм омыр, аспӧртэм калык, аспӧртэм музъем. Мон татчы кык-куинь нуналлы вуылӥсько ке, дорам лобыса бертӥсько. "Лобыса" кылэз Александрова юнме уг вера. Солэн кыкез но пуштросэз учырлы тупа уго. Ольгалэн мылкыдыз но лобе, ачиз но лобе. Бен, бен, виняшур-бияос дышизы ни кадь, гуртысьтызы выль бускельзэс вертолётэн нуо-ваё шуыса. Солы синмаськем нефтяникъёс, му вӧй кыскись гумыоссэс эскерон сямен, одӥг-ог дугдыло посёлоке. ИИ. Нош тӥ уд тодӥське шат Александроваез? Куинь сюан гуръёсты быдэстӥсь артистка, "Иднакар" театрлэн кивалтӥсез, визьмо но чебер кышномурт. Ольгалэн улонэз вить арлы азьпала нуналэн-нуналэн пусъемын ни. Шуом, кайта со пыриськоз Финн-угор калыкъёслэн конгрессазы, Хельсинкие люкаськем делегатъёслы возьматоз быгатэмзэ. Солэсь азьло вуылоз Швейцарие но Венгрие. Шонерзэ вераса, артистка берло аръёсы улонэзлэсь ог куиньмос люкетсэ ортчытэ кунгож сьӧрын: я со Канадаын ужа, я Норвегие мынэ, туэ тани Финляндиысь огаз театрын финн кылын шудӥз. Западын удмурт нылкышнолы кизэс вӧсь луытозь чабо, со сярысь трос гожъя пресса, нош Удмуртиын... Асьме дорын со сокем ик кулэ ӧвӧл кадь. Малы ке ӧз яратэ быгатӥсь адямиез бӧлякъёсыз. Кин ке пыкылэ, асьме выжыос озьы кесяськыса уг кырӟало шуыса. Кин ке чик но адӟымтэ улсы кариське. Малы озьы луэ? Та юанэн вазиськи Ольгалэн эшезлы - Людмилалы. Нялтас пусъём: таиз но адями туж аспӧртэм. Ачиз ӟуч ке но, уно аръёс ӵоже ужа ни удмурт пужыосты, удмурт дӥськутэз эскерон бордын. Солэн эскизъёсызъя вуремын ни трос костюмъёс. Людмила Молчанова - история наукаосъя кандидат, чеберлыкез сюлмыныз шӧдыны-валаны быгатӥсь специалист. Кӧня ке ар ӵоже издательствоын кылле дасям книгаез. Черодзэ вите, уксё ӧвӧлэн. Та быдӟа шаерамы уг шедьы юрттыны быгатӥсь адями. - Мон сямен, - вера Молчанова. - Ольгалы вожъясько. Кызьы озьы, шуо, огназ быгатэ олокытчы но вуылыны, олома но лэсьтыны. Соин ик куддыр сюрессэ но ворсаны выро. Но Ольга - туж кужмо кышномурт. Ачиз пичи гинэ ке но, лул кужымез гурезез берыктымон. Тани быгатӥз ук театр кылдытыны, ас котыраз ӟеч адямиосты люканы. "Тристан но Изольда" спектаклез дасякумы, ми ог-огмылы сокем матын луим, табере тани шутэтскыны но ӵош тыршиськом. Людмилалэн верамезъя, Виняшур-Бия Ольгалэн улоназ бадӟым инты басьтэ. Татын гинэ со быгатэ вань огназ луыны. Уго Ижын яке гастрольын ӝамдэлы но висъяськыны амал ӧвӧл - учкисьёс, журналистъёс, огшоры адямиос весь маке но юаллясько, олома но тодыны тыршо. Нош татын котьма кар. Кык эшъёс туэ гужем, уртче шутэтскыкузы, трос лэсьтыса вуизы. Калмез ярдурысь луо вылын уно малпанъёссэс шараязы, репетиция ортчытъязы, быгатонлыксэс волятӥзы, лыдӟиськизы. Ӵуказезяз ӵукна Ольга милемыз улон интыеныз тодматӥз. Солэн данъяськонэз - музей. Бен, лапас улаз интыяськем музей. Вашкала арбериос радэн-радэн тыремын, сяськаосын чеберъямын. Ужан тӥрлык, посуда, дӥськут... Котькудӥз сярысь корка кузё, оло, выжыкыл мадьыны дась. Сыӵе аспӧртэмлыко "висёнзэ" тодыса, гуртоос табере оломар но вутто. Ольга кузьымъёслы шумпотэ, ваньзэ лач тыре пичильтык музеяз. Экспедицимылэсь ог люкетсэ Александрова дорын ортчытэммы ваньмылы ик кельшиз. Оло солэсь палаз ӟеч мылкыд, оло, зэм но, шур котырысь чылкыт омыр сюлэмез лӧпкытӥз - азьлань сюрес вылэ ми бурдъяськыса потӥм. ИИИ. Виняшур-Бия - Калмез дурысь вынъёсызлэсь висъяськисьтэм посёлок. Адӟонэз сыӵе ик. Куке но татын ог 500 хозяйство вал. Кык школаын кык сменаен дышетскизы. Табере сю муртлэсь ӧжыт гинэ трос, пе, улӥсьёсыз. Куд-огеныз тодматом. Виктор Кириллович Феклистов - татын вордскем воргорон. Ӝоген пенсие потон дырыз вуоз ни. Али лесникын ужа. Вазен сюбег чугун сюрестӥ нюлэс ворттӥз. - Калык возиське гидэз-бакчаез чотын гинэ, - вера Феклистов. - Коньдон уськытыны мукет амал ӧвӧл. Ужасез ужа. Азьтэмез - мурт чотын узрымыны выре. Милям одӥг учыр вал. Егит воргорон уллёысь ыжез лушкам. Тупаны но кулэ ук - варманаезлэн пудоез тупам. Пуктӥзы. Ньыль арлы. Тӥни кызьы но луылэ. Александра Павловна Баранова татчы кемалась ӧз вуы на. Азьло со семьяеныз Ключёвкаын улӥз. Куштӥськем коркаез кузпалэныз ӵош выльдӥзы но посёлоке нинтыяськизы. Солэн верамезъя, татын трос удмуртъёс уло, но кылзэс туж ик уг поттыло. Пиналъёс чик но уг тодо ни. Бияос веразы, шур со палан, Сплавной пристань шуонын, сю аресъем удмурт кышномурт улэ шуыса. Валамон ни, ми отчы дыртӥм. Аксинья апай (Моськина) мырдэм потӥз коркаысьтыз милемын кенешыны. Вань улонзэ со колхозын ужамын. "Усасько, гырко вал, тэль бордын но трос выри", - пересь кышномурт шуген вераське ни. Бен, выль тодмомылы сю арес вылымтэ на - 93 гинэ. Озьы ке но, ми чик ӧм жалялэ, татчы кожим шуыса. Сплавнойын улӥсь сизьым мурт пӧлын котькудӥз тунсыко вылэм. Василий Маркович Тураев - селта воргорон. Гужемлы райцентрысь татчы пегӟе, муш вордэ. Муш бакчаез Калмезлэн ӝужыт ярударз ик интыяськемын. Виталий Александров, 42 аресъем мурт, вордскемын та палан, нош улэ Уваын, отын семьяезлэн куинь комнатаен квартираез вань ке но, арбытгес ик Сплавнойын ужа. Пудо вордэ, музъем но возе. - Мон Ленинградын но улыса вуттӥ, - вера Виталий. - Отын "БелАЗ"-эн ужай. Но вордӥськем палъёслэсь мӧзмыса, татчы вуи. Уже ӧвӧл, соин ик парсь вордӥсько. - Нош биржае султэмын-а? - Ӧвӧл. Толэзяз отчы пусйиськыны кык пол ветлоно, кӧня коньдон кулэ луоз со понна? Пособизэс сёровно уг сётъяло... Пудоезлэсь ваньмон дыръяз Александров тэлетӥ калге, узы-боры бича, губи утча. Бай уг улы ке но, кельше солы татын. Кызьы, пе, уз яра? Пужымъёс уго татын котькытынлэсь ӝужытэсь. Иван ЛЕБЕДЕВ (текст), Георгий ЮСАЕВ (туспуктэм), Леонид ПРОЗОРОВ (суред), Владимир ПОТАПОВ (автор). Валэктэ юрист Сэрегез дася адвокат Лилия ШКЛЯЕВА Ас тодэмея юрт пуктӥ ке... Берло аръёсы Иж дорын ӝутско куинь-ньыль-вить этажъем коттеджъёс. Туала узыръёслы ӧчкарыса, мон вӧзазы сарай ӝутӥ ке, мар карозы монэ? А.Корепанов. Иж город. Кулэ-а меда сыӵе ужен вырыны? Уголовной кодексъя сое хулиганство шуыны уз луы, дыр. Россия Федерацилэн Граждан кодексысьтыз 222-тӥ ёзэт (статья) та ужез лыдъя ас тодэмъя лэсьтӥськонэн. Мукет сямен вераса, отчы пыро лэсьтӥськыны висъямтэ музъем вылэ маке пуктон, сое лэзьытэк пуктон но тупатэм куронъёсты тӥяса пуктон. Сыӵе умойтэм учыръёслы пумит нюръяське интыысь администрация. Нош таиз ачиз законэз тӥя яке закон тӥямез адӟымтэ улэ кариське ке, со вылэ судэ сётыны луоз. Машинаос мырӟиськизы Сюрес вылын машинае шоры мырӟиськиз мукет автомобиль. Янгыш каризы соизлэсь кузёзэ. Со мыным машинаме тупатыны дэмла 2 сюрс манет. Мон лыдъясько: ичизэ 5 сюрс манет тыр изъян адӟи. Одӥг кылэ ӧм вуэ ке, ма лэсьтоно мыным? В.Белов. Иж город. Куспады одӥг кыл уд шедьтӥське ке, вазиськелэ судэ. Отын тӥ рос-прос валэктыны кулэ, малы изъянэз 5 сюрс манет тыр лыдъяськоды. Татын тужгес оскымон документъёс - экспертизая акт яке машинаез тупатонъя калькуляция. Шуге-леке усьылэм муртъёс куддыръя куро мораль ласянь адӟем изъянэз берыктыны. Озьы лэсьтӥське, адями ваньбурен герӟаськымтэ муген вӧсь каремын ке. Машинаос мырӟиськыку, изъян лэсьтэмын солэн машинаезлы - ваньбурлы. Соин ик суд уз сэртты- пертчы мораль ласянь адӟем изъян сярысь ужпумез. Кинэ ӧтёно адӟисе? Эше бызе но монэ загсэ адӟисе ӧте. Нош мынам кылэме вань: кузпалъяськисьлы табере адӟисьёс кулэ ӧвӧл ни. Шонер-а? Н.Корепанова. Игра посёлок. Шонер. Туэ 1-тӥ июльысен загсъёсын документъёсты выль сямен лэсьто. Кузпалъяськыку табере адӟисьёс зэмен ик кулэ ӧвӧл. Нялтас верам потэ музон воштӥськонъёсты но. Азьвылгес брак лэсьтыны луэ вал картлэн, кышнолэн яке соослэн мумы-бубыоссылэн улон интыязы. Табере пусйыны лэзё Россиысь котькудаз загсын. Зэм, кузпалъяськем сярысь документлэн копиез кулэ ке, со понна Сахалинэ яке Калининградэ мынон дуно усёз. 1998-тӥ арын 6-тӥ июле кутэмын таӵе постановление: "Граждан югдуръя актъёс сярысь" федерацилэсь законзэ быдэсъянъя ужрадъёс сярысь". Кузпалъяськем сярысь документэ табере одно пусъё гражданствоез, мылкыд каремъя - национальностез, чик уг возьмато ужам интыез, дышетскемез, нылпиосты но мукетсэ. Адӟисьёс загсын кулэ ӧвӧл шуэмез меӵак валаны уг яра. Ӟуч сюанын соос кемалась вал. Кылдэм сямлэсь куштӥськемды уг поты ке, адӟисьёс медло. Нош закон азьын зэмос лыдъясько кузпалъяськем сярысь документъёс гинэ. Таосыз утисько 75 ар ӵоже. Дэмен басьтӥськиськод ке - пӧрме Инвалидъёслэн бытовой юрттэт сётонъя центрзы Уваын толэзь пала ужа ини. Сое кылдытон борды басьтӥськиз ёросысь инвалидъёслэн огазеяськонзы, кивалтӥсез Светлана Николаевна Глебова. Вераны кулэ, Уваысь огазеяськонэ 518 мурт пыремын ни. Бытовой юрттэт сётонъя таӵе центр кылдытон пумысь кичӧлтонэз Уваысь ёрос администрацилэн кивалтӥсез Сергей Григорьевич Иконников умоен лыдъяз. Азьвыл нылпи садлэсь юртсэ вить арлы арендае сётэмын инвалидъёслэн огазеяськонзылы. Центрез усьтыны дэменак юрттӥзы Уваысь ваньмыз сямен предприятиос. Табере я телевизор тӥяськиз, я вылӥ дӥськутэз выльдоно, пыдкутчанлы кыкетӥ улон сётоно, татчы вазиськыны быгатозы ваньмыз, но инвалидъёс понна дун ӧжытгес тупатэмын. Инвалидъёс сяна, юрттэт сётонын тыршо ужтэк кылемъёс но. Ӝоген удыс паськытаны кулэ. Дась ни сиён-юонэн вузкаронъя магазин, сое ужатон понна кулэ на коньдон. Нош малпанъёсын трос мукет пӧртэм юрттэт сётонэз радъяны. Л.Кимова. Губиен шугомыку нырысетӥ юрттэт: Выдтэ висись муртэ валес вылэ, сётэ шуныт чай. Ӧте врачез. Ӧскемзэ люкалэ тазэ (кулэ луоз анализ лэсьтон понна). Ӧскемез бере сётэ активированной суэн ву. Кыкетӥзэ ӧскемез бере нош ик сётэ ву, собере - 100 мл ляб марганцовка ву. Дугдылытэк ӧске ке, кӧт вылаз грелка понэ. Кӧтыз висемысь уг дугды ке, сётэ календулалэсь парос. Губиен шугомон учырлы ки улады таӵе эмъюмъёс луыны кулэ: анальгин, марганцовка, календула, коӵыштурын (валериана) - таблеткаен, пенициллин, активированой су. Кызьы юоно эмъюмез? Таблеткаосты юоно вуэн сураса. Со понна таблеткадэс пыргытыса пурт йылын тямыс огкадь люкетъёслы люконо. 1 аресозь нылпилы - 1 люкетсэ 1-2 аресъемлы - 2 люкетсэ 3-4 аресъемлы - 3 люкетсэ 5-6 аресъемлы - 4 люкетсэ 7-8 аресъемлы - 5 люкетсэ 9-10 аресъемлы - 6 люкетсэ 11-12 аресъемлы - 7 люкетсэ 13-14 аресъемлы - быдэс таблетка. Физической культурая но спортъя учреждениосын но организациосын ужасьёсыз Россия Федерацилэн кун наградаосыныз пусъён сярысь Россия Федерацилэн Президентэзлэн УКАЗЭЗ Физической культурая но спорт удысэз азинтонын, калыкъёс куспын эшъяськонэз но ӵош ужанэз юнматонын сюлмысь тыршемез понна "Россия Федерациысь физической культура удысысь дано ужась" ним сётоно: Будрин Альберт Дмитриевичлы - Удмурт кун университетысь капчи атлетикая клублэн кивалтӥсезлэн воштӥсезлы. Россия Федерацилэн Президентэз Борис Ельцин. Москва, Кремль, 1999 арын 30 июле. � 943. Фанералы - Увае Ува лескомбинатын огвакыт секыт югдур кылдэмын вал экономика ласянь. Поттэм продукцизэс басьтэмысь дугдӥзы. Азьвыл щитовой коркаосты но паркет, со тросэзлы басьтыны мылкыд карисьёслы трос вал. Нош табере соослы кулэяськисьёс быризы. Секыт югдурысь потон вылысь, лесокомбинатын ужасьёс пӧртэм амалъёс утчазы. Цехъёсты пытсантэм но калыкез ужтэк кельтонтэм вылысь, татын поттыны кутскизы выль продукция - фанера. Соин нырысетӥ вагонъёс Санкт-Петербурге келямын ини. Уваос шугъясько выль оборудование басьтыны. "Увадрев" ОАО коньдонэн бусьтыр ӧвӧл бере, уже кутоно луо вуж станокъёсты. Фанера поттон цехысь мастерлэн Василий Мингазутдиновлэн верамезъя, татын ужало бадӟым опытэн адямиос. Соос асьсэос ик котыр ласянь утчасько, мукет заводъёсы вуыло. Отын оборудованиез ёзнало но доразы вайыса пукто. Лескомбинатын шӧдо, фанера поттон уж пайдаё луэ шуыса. Сырьё асьме дорын ик вань. Туннэ нуналлы фанера лэсьто кызьпулэсь. В. НИКОЛАЕВА. Футбол Шоро-куспо Ижысь "Газовик" турнир радын тулкым вылын кадь веттаське. Я кужмо командаез ворме, я лябезлы келя. Али гинэ витетӥ интыын вал, табере 22 команда пӧлын шороез. Берпуметӥ пумиськоназ "Газовик" Санкт-Петербургысь "Локомотивлы" 0:1 лыдын келяз. 7 но 10 сентябре командамы нюръяськоз Читаысь "Локомотивен" но Красноярскысь "Металлурген". М. КУЗЬМИН. Шара гожтэт (серемес верос) Эшъёс-юлтошъёс, иськавынъёс-бӧлякъёс, пиналъёс-пересьёс но гуртысь вань пудо- животъёс, писэйёс-пуныос! Чылкак тыныльыса шара гожтэт пыр вазиськисько. Мугез одӥг - туннэ нуналысен мон бак кариськисько бере, куара поттэмме уд кылэ ни... Таӵе улонэ вуиськиз ас кылы кузен. Огӝытэ мусо (чатран басьтон люкет!) кузпалэным кӧлыны выдӥм. Погылляськи-погылляськи небыт валес вылам но умме усеме уг лу. - Тон туннэ изьыны валалод-а, уд-а? - турк гинэ кӧтурдэсам васькытӥз палы. - Уг тодӥськы, гыдыке. Йырам весь одӥг малпан берга, сюлэмме ик позыртэ, - кочон кадь пукси койка пуме. - Али ик вера, мар луиз! А то ке эшшо васькыто на... - вӧзам пуксиз таи. Вератэк ӧйлась. Толон, шуисько, вачеберин улӥсь бускельмылэсь, Покой Микворлэсь, сю манет пунэмай вал но ваньзэ юыса быдтӥськем. Ӵуказе маин пунэмзэ берыктом, ӧйтод... - У-у, сотона шымыртон, гульымдэ корт кисэн паськатон люкет! шуыса, палы ури-бери дӥсяськиз но азбаре потӥз. Зырын-а, маин-а меда та монэ васькытоз ни шуыса, возьмаса пукон вискын сои нюштырак гинэ корка пыриз но валесэ выдӥз. Монэ но вӧзаз шобыръяз, вешам кариз, валаса ик ӧй вуы - умме усиськем, ява. Ӵукна капка азе потӥ гинэ, бускеле возьма ни: - Эк, Офонь, Офонь, тыныд ӟеч кариськод, нош тон... Толон со палыдлы луыса, быдэс уез изьытэк потӥськиз. - Ма, мар-о сокем луиз? - номыре валатэк юасько солэсь. - Ма, соид дауре уин дорамы укно улэ вуиз ук. Тын-тын гинэ налишнике йыгаське. Укное мычиськытэк ӧйлась. Тыныд, пе, Офоне сю манет сётыны кулэ-а? Кулэ, шуэмысьтым, ява, таре, пе, тод со тыныд пунэмзэ ноку но уз берыкты ни... Быдэс уез чырым но кареме ӧйлась зэмзэ ик, берыктыны уд ни малпаськы ке шат? Ма, ачим пунэмай бере, берыкто, пӧй, мырдэм буйгатӥ Микворез. Кышно азьын со дырысен бак луэм кадь улӥсько вал ни. Нош адӟонэ бырымтэ на вылэм. Оград шутэтскыны путёвкаос висъязы колхозамы, ӵапак кышнолэн кус висёнэзлы тупа. Мар карод, рынок не рынок, дуно-а, ӧвӧл-а, кунянэз вузаса но келяй со чатран люкетме Варзи-Ятчиязы. Капчияк шокчем ни вал: огнам, пӧй, шутэтско ай. Ӵуказеяз ӵукна ужаны потӥ но, бускель Параска пумитам сюриз. Кытын, пе, Матронэд? Кошкиз, шуисько, мусо эшед, ышиз-быриз. Кызьы-озьы, "ышиз-быриз", кутскиз ук выжыятыны, ява, воксё акыльтӥз. Ӧй чида, кулӥз-быриз шуисько, тынэсьтыд мӧзмыса. Уж дуре вуыса вуттӥ-а, ӧй-а, монэ бригадир утча ни. Офонь, шуэ, дорад мар ке луиз-а, мар-а, юрт вадьсад лачак кышноос люкаськиллям. Юрт чакласе дорын ӧвӧл бере, шуэрскыса ик дор палам бызисько: сюлэм дырк! гинэ тэтча: гурез ворсай кадь, пудоез пастуханы келяй, элетроен ӧй выры... Учкисько, зэм но, корка вадьсам нылкышноос люкаськиллям, пӧлазы чигиськыса ик Параска маке чирдэ. - Корказы пытсамын, ачиз вазь ӵукна ик кытчы ке кошкиз, шайтан басьтон, кышное кулӥз-быриз шуиз ук! Э-э, мискинь Матронэ, Матронэ, кытысь-марысь сыӵе пал но аслыд шедьтэмед?! Котыраз нылкышноос люр-ляр! гинэ каро. Монэ адӟизы но... Отӥзэ уг вера ни, сотэк но кузпалы азьын бак луэм вал, табере бускельёс азьын но бакомиськиз. Бартер шуон карыса, дунтэм сакыр-песок ваиллям но пичильтык ӧтчам нерге люказы. Кинлыгес, пе, висъялом ай. Мон но пӧлазы кылзӥсько. Я, таизлы сётӥзы - умой, соизлы но сётыны мон пумит ӧвӧл. Ӧй чида ни, кураме няркытгес карыса вазись ӧй лу-а, нош мыным, пӧй, тракторист Офоньлы уд висъялэ-а? Кышноос муш палэп кадь пурӟизы ук! Кин, пе отын сыӵе-таӵе, куаразэ сётӥз? Кемалась-а, пе, Митрей Манялэсь аракы курыса, капказэ ошак сямен лека вал, нош туннэ сакыр сиемез потэм-а? Эк, малпасько ас поннам, ужам ужез уг адӟо, пичильтык янгышаськод ке, ӧвӧлзэ но вань каро. Мон со Митрей Манялэсь капказэ ачим ӧй лека ук, трактореным гинэ пичияк мырӟытӥ вал, сук вылэмысьтыз... Эк, ма, ческыт ымез кӧш карытозь, чал-чал улом-ай. Огкылын вераса, эшъёс-юлтошъёс, ӵош юмшан но кырӟан-веран бускельёс-иськавынъёс, гурт калыке (писэез но, пуныез но, шуэм сямен) та нуналысен монэ Бак Офонь шуиды ке, уд янгышалэ. Мар ке юан-веранды вань ке, мынам "ӟучъёс шуэмзэ" несравненной Матронэ вань, вазиське инь солы. Мур-мур гажамме вераса, киосме ик сюлэм вылам поныса, Бак Офонь. Анатолий ПЕТРОВ. ШӦКЫЧ Зарни жильы Йӧнтэмесь луизы берло дыре воргоронъёсыд, ох, кыӵе йӧнтэмесь! Нылмурт-а тон, кышномурт-а - шорад уз но учкелэ, нуназе куазен кылёзы, ява. Ижысь агайёслы тужгес но удалтӥз туэ 16-тӥ августэ. Шоркарысьтымы "Родина" магазин дорысен 11 час котырын ог 25-28 аресъем воргорон 43 аресъем Ольгалэсь чыртыысьтыз зарни жильызэ ишкалтэм. Пияшез ӧз кутэ ни, калык пӧлы "сылмиз". Одӥг кылын вераса, пегӟиз. Со нуналэ ик Индустриальной ёросысь Фронтовой ульчаысь 2 номеро юрт дорысен ӧз удалты 24 аресъем Светланалы. Таяз учыре но егит кавалер нылоклэсь зарни жильызэ ишкалтэм. Соку ик 3 часын Пушкинской ульчаысь 144 номеро юрт дорысен зарни чеберъянъёсыныз люкиськиз 36 аресъем Галина. Пырак центрын ик эрказъясько ни табере пиосыд. Мар бен ватсалод на та вӧзы? Та выллем йыружъёс берло дыре трос гинэ лэсьтӥсько. Унояз учыръёсы лушкаськисьёс пегӟыны вуо. Кыӵе бен дэмлан сётод таӵе дыръя чебер арбериосты нуллыны яратӥсьёслы? Зарни чеберъянъёсты эн нуллэ шуид ке, умой уг кылӥськы кадь. Соин ик калыке потон азяды умойгес малпаське - оло, зарнилэсь арберитэк но ветлыны луоно. Нош лушканы шедьтӥзы ке, соку ик милицие вазиське. Ю.Васильев. Валэктэ юрист Кинлы кылёз улон инты Куинь комнатаен квартира гожтэмын (приватизация лэсьтэмын) мынам кузпалэ вылэ. Ар талэсь азьло со кулӥз. Пропискае мынам со квартираын. Картэлэн пиезлэн но отын ик, но со аслаз семьяеныз мукет интыын улэ. Квартира понна дун мон гинэ тырисько. Тодэме потэ вал, кинлы кыльыны кулэ квартирамы? З.Богатырева. Кулэм адямилэн ваньбурез кыле нырысь ик солэн нылпиосызлы, кузпалэзлы но мумы- бубыосызлы одӥг быдӟа паен. Озьыен, таяз учыре Богатыревлэн квартираез кыле кузпалэзлы но пиезлы шори вылысь, пиез отын уг ке но улы. Рос-прос но кемалы Странаысьтымы му вӧй поттон удысын ужасьёс 5-тӥ сентябре асьсэлэсь праздниксэс пусъё. Удмуртиысь нефть кыскись предприятиос, акциосын огазеяськонъёс но компаниос соос пӧлын шӧдскымон инты басьто, угось продукцизэс вузанлэсь люкаськем вытъёс республикамылэн бюджетэзлэсь бадӟым люкетсэ тырмыто. Му вӧй кыскон - аспӧртэм, секыт но дано удыс. Со герӟаськемын уно коньдон берганэн, соин ик сое син шоразы ялан возё кивалтон ёзъёс, интыосысь но федеральной ёзъёсты вераса, озьы ик ёросъёсысь ужаса улӥсьёс, кытын му вӧй месторождениос усьтӥсько но уже кутӥсько, угось соосын шонерак герӟаськемын тыро но ӟеч улонзы. Удыссылы сӥзем нунал азьын му вӧй поттӥсьёс ужамзылы йылпумъянъёс лэсьто, матысь но кема дырлы ужпумъёс чаклало. Иворъёс вӧлмытӥсь ёзъёс республикаямы нефть кысконэз ялан чакласа-эскерыса возё. Соин ик мадем потэ, кызьы ужаз ар ӵоже Удмуртиын та удысын ужась одӥгез егит предприятие - "Удмуртская нефтяная компания" ОАО. Туэ май-сен тябрь толэзьёс компанилэн ӵоже ужамезлы йылпумъянъёс лэсьтыку, нырысь ик пусйыны кулэ тани мае: эскерон ужъёс мытэмын Патраки но Центральной месторождениосын. Соосты арендае сётӥз Удмурт Республикаысь Ваньбуръя кун комитет. Озьы ик Турецкой месторождениын проектной но утчан ужъёс нуонъя материалъёс юнматэмын. Огазеяськонлы та месторождение "Чепецкое НГДУ" ЗАО-лэсь выже. ОАО сыӵе право басьтӥз 1998-тӥ арын 28-тӥ январе ортчем конкурслэн йылпумъянъёсызъя. Соосты юнматӥз Удмурт Республикаысь Правительство 1998-тӥ арын 9-тӥ феврале кутэм постановлениеныз. Мар шуод, йылпумъянъёс сярысь чуръёс кӧсэсь пӧрмо, но соос сьӧрын - ОАО-ысь специалистъёслэн уно тыршемзы-пӧсямзы. Конкурслэсь условиоссэ быдэстон понна тыремын вал 680 сюрс доллар мында коньдон (бонус). Муосты кутыны, озьы ик мукет ужъёс нуыны лицензиос юнматэмын но басьтэмын. Вань месторождениосты уже кутонъя проектъёс лэсьтэмын. 1998-тӥ арын Патраки но Центральной месторождениосын скважинаосъя технической условиос басьтэмын но проектной ужъёс йылпумъямын. Проектъёс ортчизы республикаысьтымы инспекция ёзъёс но кун экологической экспертиза пыр. Соосты умой дунъяз Удмурт Республикаысь Инкуазез утёнъя комитет. Тау карем потэ кун инспекциосын, комитетъёсын но комиссиосын ужась специалистъёслы, нокыӵе ӝеган- люкетон учыръёс ӧй вал. Проектъёсты чаклан-эскерон вакытэ мынӥзы утчаськон ужъёс, кылсярысь, Патраки, Центральной но Турецкой месторождениосын эскеремын но пусъемын вал инкуазьлэн, кылсярысь, мулэн аспӧртэмлыкъёсыз. Соосын кивалтӥз Удмурт университетысь профессор Т. Н. Ильминских. Та ужъёсъя научной отчётъёс дасямын. Соос лыдэ басьтӥськозы, месторождениосты уже кутонъя проектъёсысь инкуазез утёнъя люкетъёсты кылдытыку. Юнматэмын Историяя но культурая памятникъёсты утёнъя но уже кутонъя управлениен огкыл. Та документ вылэ пыкиськыса, история но культура ласянь дуно луись объектъёсты шараян понна эскериське Патраки но Центральной месторождениослэн котырзы. Та уж октябрёзь йылпумъямын луоз но азинтӥськоз Турецкой месторождениын. Республикаысьтымы санэпиднадзоръя служба шуръёсысь но ошмесъёсысь вуэз басьтӥз, му вӧй кыскон вакытэ сое чакласа возёз. Месторождениосын азьланьын чаклам ужъёсъя валэктон уж нуэмын котыр гуртъёсысь улӥсьёсын, ортчытэмын кенешъёс но собраниос, отчы пыриськизы гурт администрациослэн кивалтӥсьёссы но (Якшур-Бодья ёросысь Патраки гуртын, Игра ёросысь Чутырь черкогуртын но 131-тӥ Лесоучастокын, Шаркан ёросысь Бисул-Кучес но Кулак-Кучес гуртъёсын, Балезино ёросысь Турецкое черкогуртын). Та кенешъёсын ужаса улӥсьёс му вӧй кысконлы пумит ӧз луэ. Нош скважинаос улэ музъем висъямын вал бере, "Удмуртская нефтяная компания" ОАО музъем ужасьёслы вань ыштонъёссэс берыктыны тыршиз. ОАО-лэн генеральной директорез но ёрос администрациослэн кивалтӥсьёссы кенешизы азьланьын кутоно тупанкылъёсъя (соос чакламын вал конкурслэн условиосызъя). Месторождениосты уже кутыку, ужаса улӥсьёслы социальной юрттэт сётӥськоз. Солы коньдон сметае пыртэмын луоз. Та удысъя уж мынэ ни Игра но Шаркан ёросъёсын. Матысь дыре тупанкылъёс гожтэмын луозы. Проектъёс юнматэмын 8 скважиналы. Акционеръёслэн коньдонэнызы куать скважина ужа ни. Озьы удыслы сӥзем праздник азьын компанилэн валтӥсь фондъёсаз вуиз 3,8 миллион манет. Сентябре эшшо 3,2 миллион манет вуоз на. Сентябрёзь 10,3 сюрс тонна му вӧй кыскемын вал. Компания толэзяз 2 сюрс тонна "сьӧд зарни" поттыны кутскиз. Озьы компанилэн тыршемез улсын Удмуртилэн но Россия Федерацилэн бюджетъёссы но бюджетэ пырисьтэм фондъёс 20,53 миллион манетлы узырмизы. Нош 2000-тӥ арын му портон ужъёс паськыталозы, валамон, со лыдпус шӧдскымон йылоз. Чакламъя, куинь месторождениысь араз 750 сюрс тонна му вӧй кыскыны луоз. Азьланяз та бадӟым ужпумез быдэстонын бадӟым инты басьтоз "Обустройство Патраковского нефтяного месторождения" проект. Туннэ нуналлы со дасямын ини, шуыны луоз. Та вакытэ документэз кун инспекциосын но комитетъёсын эскерыны кутско. Центральной месторождениын топогеологической эскеронъёс йылпумъясько ни. Проект 1999-тӥ арын октябре дась луоз. Озьы ик дась ни ИВ категориен автосюреслы проект. Со "Чутырь-Киенгоп" тракт дорысен "Бисул-Кучес - Бадьярово" сюрес дорозь кыстӥськоз. Огвакытэ ик гумыосты кысконъя проектъёс дасясько. Турецкой месторождениез ужатон пумысен огкыл кутэмын "УГНС-Город" фирмаен. Таӵе ӵектонэн потӥз вал солэн генеральной директорезлэн воштӥсез М. С. Ханеев. Валамон ини, ас кожаз номыр но уг лыкты, соин ик кыкезлы ик огазеяськонлы трос кужымзэс сётоно луоз. Озьы бере, азьланьын тунсыко уж вите. Турецкой месторождениез уже кутонъя материалъёс ӝоген дась луозы, собере юнматон понна келямын луозы Удмурт Республикаысь Правительствое. "Удмуртская нефтяная компания" ОАО-лэн ужамезлы нырысетӥ йылпумъянъёс верало, огазеяськон аслэсьтыз Патраки, Центральной но Турецкой месторождениосты уже кутонъя конкурсной обязательствооссэ ӟеч быдэсъя шуыса. Со понна луонлыкъёс вань, соос пӧлын висъясько ОАО-ысь коллективлэн ужаны тыршемез но быгатэмез. Йылпумъяса тау кареме потэ Удмурт Республикаысь Правительстволы, "Удмуртнефть" ОАО-лэн, "Удмуртнефтестрой" ЗАО-лэн, "Игринский СМУ" ЗАО-лэн, "Удмуртнефтегазэлектромонтаж" АО-лжн, "УдмуртНИПИнефть" институтлэн, ёрос но гурт администрациослэн, крестьян но фермер хозяйствоослэн кивалтӥсьёссылы огазеяськонмы пыд йылаз султон вакытэ юрттэмзы но валаны тыршемзы понна. Компанилэн директоръёсызлэн кенешсы но дирекция оско, азьланьын но ог-огмес валаса ужалом шуыса. Со ваньмыз понна пайдаен берытскоз. Удысысь эшъёсме ӟечкыласько профессиональной праздникен. Соослы, семьяоссылы, вань лыдӟисьёслы ужын азинсконъёс, шудо но тупаса улон сӥзисько. А. ЛЕСНЫХ, "Удмуртская нефтяная компания" ОАО-лэн генеральной директорезлэн капитальной лэсьтӥськонъя воштӥсез. Вазиське - юрттом "Россия Федерациысь Федеральной Собранилэн Кун Думаяз быръёнъёс ортчытон сярысь" Федеральной Законлэн 55-тӥ ёзэтэзлэн 8-тӥ люкетэз вылэ пыкиськыса, "Кенеш" журналэз дасясьёс но Кун Думае быръёнъёс азьын агитация нуыны мылкыд каремзы пумысен иворто. Сыӵе ик ивор сётэмын Удмурт Элькунысьтымы Быръёнъя Комиссия. Кун Думае депутатэ кандидатъёс быгатозы журналмылэсь бамъёссэ дунтэк но дун тырыса агитация нуон ужазы кутыны. П.Куликов, "Кенеш" журналлэн валтӥсь редакторез. Ку возьматоз "Арсенал"? "Арсенал" но 34-тӥ канал возьматэмысь дугдэм бере, чагыр экран дорын пукыны мӧщмытгес луиз. Угось пӧртэм каналъёсысь кельшись передачаосты бырйыны дышим вал ни. Каналъёс ужамысь дугдӥзы передатчикъёссы тӥяськемен валче. Одӥг передатчикез кык толэзь ӵоже лэсьто, нош дуныз 1-1,2 миллион манет тыр усе. "Арсенал" телекомпанилы передатчик сентябрь шорын вуыны кулэ. Кык арня куспын сое итыялозы. Нырысетӥ октябрьысен канал ужаны кутскоз шуыса чаклало. Нош 34-тӥ канал декабрьлэн кутсконаз ужзэ радъялоз. Азьпалан быръёнъёс, соин ик передатчикъёсты пуконэн жеган уз луы, дыр. ГТРПЦ-лэн ужамез сярысь ке верано, азьвыл солэн азинсконъёсыз бадӟымесь ӧй вал. Вараксиноысь телевышкае трос передатчик пуктыны уг луы - озьы лэсьтэмын. Нош Ижысь Песочной урамысь мачтаез выльдон мынэ. Со йылпумъяськиз ке, дециметровой тулкымъёсын ужась куать выль передатчик пуктыны чакламын. Озьыен выль каналъёс усьтӥськозы. Та пумысен лэзён вань ини. Нош радио удысын эшшо 10-12 канал усьтыны луоз на. Соку аслыд кельшись передачаен трос каналъёсысь бырйыны луоз. Но таӵе луонлык матысь аре гинэ кылдоз ай. А. ФРОЛОВ. Иван Куратовлы сӥзьыса Иван Алексеевич Куратов (1839-1875) - нырысетӥез коми кылбурчи. Солэн вордӥськемез дырысен туэ пӧсьтолэзе тырмиз 160 ар. Коми калыклэн сӥё-дано пиезлы сӥзьыса, Сыктывкарын ортчиз "И.А.Куратов но финно-угроведение: туала эскероно ужпумъёс" калык куспо научной конференция.Татчы люкаськем тодосчиос кык пленарной заседаниосын докладъёссэс лыдӟизы но вить секциосын эскеризы. Огъя кенешонэ асьсэлэн шедьтэм- малпамъёсынызы пыриськизы дас кык удмурт тодосчиосмы. Кылсярысь, Анна Измайлова лыдӟиз "Г.Красильниковлэн творчествояз экзистенциализм ужпумъёс" докладзэ, Светлана Арекеева - "Куӟебай Гердлэн поэтикаез", Тамара Пантелеева - "Удмурт верослэн чеберлыкез", Лидия Долганова - "Куӟебай Герд - удмурт нылпиослы". Конференциез дасязы но ортчытӥзы Россиысь Наукаосъя Академилэн Коми наукая центрысьтыз Кылъя, литературая но историяя институт но республикаысьтызы Нациосын ужанъя министерство. Та уже уно кужымзэ сётӥз филология наукаосъя доктор, вылӥ верам институтысь литературая ёзэн кивалтӥсь Владимир Николаевич Дёмин. "Куратов но Европаысь поэзия" - озьы нимаськиз солэн конференциез ӧръясь но нырысетӥ коми кылбурчилэсь гожъямъёссэ паськыт дунеен герӟась докладэз. Сыктывкарысь бертэммы бере кӧня ке нунал ортчыса ини басьтӥм сюлэммес туж вӧсь карись телеграмма: Владимир Николаевич кулэм... Мынам темае вал "Иван Куратовлэн удмурт кылэ берыктэм кылбуръёсыз". Ку но кызьыгес удмурт печатьын потылӥзы коми кылбурчилэн гожъямъёсыз? Со сярысь веранме йылпумъяй "Менам Музае" (1866-1867) клыбурзэ берыктэменым. Сое ӵектӥсько газет лыдӟисьёслы но. Мынам Музае Сыӵе мынам музае - Ноку уг вуза сое. Кылбуръёсме уг ысты базаре, Басьясьёсты уг витьы собере. Ваче кариськыса, Лушкем гинэ Ӵошен ми кырӟаськом, Янгыш пӧрме - Соку ик шӧдӥськом, Ас кожамы Серекъяськом но асьмемыз - Камин ыме Янгышъёсмес келяськомы. Сэрыт эскериськом Гожъясь кимес - Выль чуръёсмес ӝутом Калык визьнод кеме! Поэма Мед шараялоз пӧясьёсты, Тужгес но Кузь дӥсё Паськыт сӧзулъёсты. Соос ни асьсэды Укыр бадӟым каро, Дась сиисьёс, Уть, киоссы виро! Куаё калык чотын. Калык ке нош - Нунал потэм - кынме, Сютэм улэ, Шудлы вань осконэз - Сопал дунне гинэ... Сыӵе мынам Музае, Ноку уг вуза сое! Василий ВАНЮШЕВ, филология наукаосъя доктор. ТАЗАЛЫК Куазь зориз, губи потӥз Асьмелэн нюлэсэз тодымтэмы ӵемысь куректонэн берытске. Нюлэс пушкын улыса но мырдэм висъяськом шыргубиез кыедгубилэсь. Соин ик, губиян азьын, лыдӟе милесьтым кӧня ке ӵектонъёсмес. * эн аналске губидэс ӟеч миськыны. * эн бичалэ тодмотэм губиосты, вужмемзэ, сисьмыны ӧдъямъёссэ - ӵапак отын кылдо тазалыклы кышкыт луись макеос. * губи сиыны яра чылкак таза муртлы гинэ. Со - секыт сиён, соин ик мӧйыослы но пиналъёслы возиськоно губи сиемлэсь, нош ӝушенызы, мусэнызы но пекляосынызы курадӟись муртъёслы губи сиыны воксё уг яра. Губилэсь шугомыку, вандыса кӧт висе-вия. Ӟырдано, ӧсконо, син лябӟе, куддыр сӥль быгытъёс кысканы кутско. Сыӵе тодметъёс кылдо губи сием бере 5-7 час ортчыса. Губиен шугомыку, асьтэлы асьтэос юрттыны уд быгатэ, одно ик ӝегатскытэк вазиськоно врачлы. Губиен шугомон тужгес кышкыт пиналъёс понна. Соослэн мугорзы уг быгаты на губи токсинъёсын пумитъяськыны, соин ик 100 шугомем пинал пӧлысь 5-ез-6-ез кулэ, 25-ез- 30-ез висись кыле. Сизьым аресозь пиналъёслы губи сётъяны уг яра! Нош губиен шугомиды ик ке, нырысьсэ ӧскемды бере, юэ содаен ву. Ватсалэ отчы активированной су. Кыкетӥзэ ӧскемды бере - льӧль марганцовка ву. Дугдылытэк, зол ӧскиськоды ке, кӧт вылады шуныт грелка понэ. Тужгес кышкыт луо шыргуби, гоногуби (яггуби), сьӧдгуби (чернушка), сиёно тӧдьыгуби (белянка, сиёно тӧдьыгуби, сморчок. Соосты кык пол пӧзьтыса, вузэс кисьтоно. Быректоно 10 минут ӵоже. Тодӥськоды-а тӥ? Россиысь Правительствоын одӥгез но премьер рос-прос ужаса уг вутты. Кылсярысь, берло одӥг но ӝыны ар куспын куинетӥез кабинет воштӥське ини. Нош кудӥз премьер кемагес ужам меда? 1990-тӥ аре 15-тӥ июньысен -1991-тӥ аре сентябрёзь - И.Силаев. 1991-тӥ аре ноябрьысен -1992-тӥ аре июнёзь - Б.Ельцин (совместительствоя). 1992-тӥ аре июньысен декабрёзь - Е.Гайдар (премьерлэсь ужзэ быдэсъясь). 1992-тӥ аре декабрьысен -1998-тӥ аре 23-тӥ мартозь - В.Черномырдин. 1998-тӥ аре 24-тӥ апрельысен 23-тӥ августозь - С.Кириенко. 1998-тӥ аре 23-тӥ августысен 11-тӥ сентябрёзь - В.Черномырдин (премьерлэсь ужзэ быдэсъясь). 1998-тӥ аре 11-тӥ сентябрьысен -1999-тӥ аре 12-тӥ маёзь - Е.Примаков. 1999-тӥ аре 19-тӥ майысен 9-тӥ августозь - С.Степашин. 1999-тӥ аре 9-тӥ августысен - В.Путин (премьерлэсь ужзэ быдэсъясь). "Комсомольская правда" газетысь (� 146, 1999-тӥ ар). ФЕСТИВАЛЬ Выль эшъёс шедьтӥз Ижысь фольклор"Инвожо" ансамбль но ӧз малпалля вал гужем репетициос, концертъёс ортчытъяны, нош пӧсьтолэзе финн-угор калыкъёслэсь ВИИ калык куспо фольклор фестивальзэс радъясьёс соосты куризы та тунсыко шулдыр ужрадэ пыриськыны. Татысь усточиослы оскемын вал лыктэм коллективъёсты пумитаны. "Инвожо" ансамбльысь артистъёс, куноосты перепечен куноятӥзы, ческыт удмурт юонъёсын сектазы. Ӵыжы- выжыосмы шумпотӥзы таӵе капчи мылкыдо эшъёс доры вуэмзылы. "Инвожо" ансамбльын ваньмызлэн куараоссы жингресэсь. Кызьы уд вера Лидия Романова, Леонид Овчинников, Александр Иванов, Зинаида Мадьярова, Валентина Векшина, Людмила Емельянова, Марьяна Кутлубаева сярысь. Нош арганчиос Михаил Журавлев, Сергей Мадьяров уй-нунал дась калыкез шулдыртыны. Анатолий Поткин, Галина Пантелеймонова, Светлана Петкова, Михаил Охотников эктонъёсынызы ансамблез уката чебер каро. Алевтина Поткина трос аръёс ӵоже коллективлэн старостаез вал. Али со - "Инвожолэн" чеберлыкъя кивалтӥсез. Нош солэн нырысетӥ юрттӥсез - Удмурт Республикаысь культура удысысь дано ужась Михаил Журавлёв. Михаил Павлович ансамбле нырысетӥ нуналъёсысен ик ветлэ, дас кык ар ӵоже ни кырӟа-шудэ. Фестиваль ортчыку, "Инвожолы" матысь эшъёс луизы Печора городысь "Пелысь", Дэбесысь "Ӟардон", Мордовиысь "Диголя но "Мокшаночка" ансамбльёсысь артистъёс. Та праздник дыръя ансамбль трос пол калык азьын кырӟаз, эктӥз, нош куноосты келян ӝытэ, гала-концерт дыръя, вань артистъёс сямен ик, сцена вылысь ӧз кошкылы. "Инвожо" кема тодаз возёз та праздникез. Н. ВОЗИСОВ. Прессалэн фестивалез азьын Кыӵе синмыз журналистлэн? Берло дас ар ӵоже асьме пресса котыр ласянь воштӥськиз. Сое пӧртэм ласянь дунъяло: уродгес но, умойгес но луиз, шуо. Ас вакытаз прессалы одӥг кылын валэктон сётылӥзы: "Партилэн орудиез", "подручноез"... Бӧрысь журналистикаез политикалэсь палэнтыны кутскизы. Но со вакыт ик печать, властьлэсь мозмытскыса, бадӟым бизнеслэн ляльчиез луиз. Кызьы туннэ улэ пресса, кыӵе солэн интыез улонын? Та юанлы валэктон сётыку, валтӥсь интые журналистлэсь ужзэ пуктыны кулэ. Журналистъёс улонысь зэмлыкез утчаны тыршо, тодыны-валаны туртто "демократия" шуонлэсь пыдъяськемзэ. Прессалэн аслаз трос шуг-секытъёсыз, уноез со пӧлысь экономикаен герӟаськемын. Журналистъёслэн ӧжыт уждунзы. Куанер журналист, шонерзэ ке верано, эрико луыны уг быгаты. Кузёез сое пачкатэ, нош лыдӟись солы уг оскы. Партийной пресса азьын одӥг ужпум гинэ пуктэмын вал: зэмлыкез возьматоно. Совето журналистикалэн со бордын ик секытэз но: теория но улон вискын бадӟым пӧртэмлыкез вал. Туннэ идеология ласянь зӥбет ӧвӧл ни. Тон котькыӵе партилы яке группалы дурбасьты, но солэсь азьвыл профессионал луыны кулэ. Туннэ журналистлэн валанэз мед луоз: мар со сыӵе журналистлэн профессиез, кыӵе солэн куронъёсыз. Ивор вӧлмытон удысын ужасьёслы озьы ик чаклано на журналистлэсь профессиональной этикая кодексэ. Со закон ӧвӧл. Кодексэз тӥям понна номыр но уз луы. Сыӵе дыръя ӵош ужась эшъёсыд яке редактор гинэ пыкылыны быгатэ. Партия дыръя кырсь журналистика пумысен вераськонэз но ӧй вал. Нош туннэ югдур мукет. Кин кызьы быгатэ, озьы ог-огзы вылэ ыргето. Ӧвӧлтэмзэ но вань карыса сёто - сенсациез гинэ мед луоз. Калык сыӵе статьяос ик возьма но ваньмызлы оске. Удмуртиын но вань ни сыӵе ивор вӧлмытӥсьёс. Тае мон обществолэн одӥгез висёнэз шуысал. Россилэн историяз печать котьку но юн герӟаськемын вал экономикаен. Совето власть дыръя журналистъёс со сярысь ӧз сюлэмшугъяське. Государство ваньзэ сётэ вал. Нош газет вузанлэн барышез ваньмыз кунлэн но партилэн кисыяз кошкылӥз. Выльдӥськон вакыт журналистикалэн "зарни даурез" вал. Соку дунъёс но "зарниесь" улӥзы уго: газетъёс 3-5 копейка, журналъёс - 10-20 копейка сылӥзы. Дунъёслы тупатэм льготаос но бадӟым тиражъёс трос барыш вайылӥзы. Ивор вӧлмытӥсьёс тираж, уксё поттон пумысен шугъяськыса ӧз улэ, журналистика удысын гинэ тыршизы. 90-тӥ аръёслэн кутсконазы тодмо луиз: прессалэн уксёез ӧвӧл. Выльдӥськонлэн одӥг яраез кылиз: редакторъёслы лэзизы газетлэн барышез чотын журналистъёслэсь уждунзэс тупатыны. Но со уксёез компьютеръёс, оборудование басьтыны висъяно вылэм. Озьы ивор вӧлмытӥсьёс спонсоръёс утчаны, вузаськыны ӧдъязы... Пресса эрикогес луиз, шара вераськыны кутским, уно тунсыкоез кылдӥз. Нош лыдӟисьёс газетъёсты басьтыны уг быгато, малы ке шуоно, соос дуноесь луизы. Озьы ик дунояз газет-журнал поттон. Туннэ редактор кык пӧртэм удысэз нуыны кулэ. Газетлэсь пуштроссэ, чеберлыксэ узырмытоно. Со виын ик экономикаен выроно. Ог вакытэ кык ужпумез быдэсъян - со умой ик ӧвӧл. Журналист ӵемысь редакторлэн косэмезъя ужа. Нош редактор спонсорлэсь заказзэ быдэстэ. Али печатьлэн эрикез быдэсак уксёен герӟаськемын. Кин уксё тыриз, со вылэ ик ужа журналист. Прессаез "ньылетӥ власть", шуо. Куке но со Россиын но озьы вал. Нош али ӧвӧл ни. Та вакытэ ивор вӧлмытӥсьёс бадӟым бизнеслэн шудонэз луо. Куке-соку прессаез государстволэсь мозмытыны куриськом вал. Нош собере президентэ быръёнъёс ортчизы. Кинъёс Ельцин пала ужазы, соос ик - прессаез но киултӥзы. Табере ини ивор вӧлмытон со ньылетӥ власть ӧвӧл. Но пресса - кӧня ке адямиослэн киязы власть. Шонерзэгес вераса - банкъёслэн, корпорациослэн нимысьтыз адямиослэн инструментсы. Та дыре государство соос пыр прессаен кивалтэ, шуыны луоз. Озьыен, тросэз ивор вӧлмытӥсьёс одӥг куараен вераськыны кутскизы. Али кылдо монополиос, кылсярысь, Бердовскийлэн, Гусинскийлэн но мукет. Озьы обществолы кышкытлык кылдэ. Юаме потэ: кызьы умойгес - партилэн интструментэз-а яке кыӵе ке одӥг адямилэн-а шудонэз луыны? Жаляса верано луэ: куанер улэменымы журналистика ассэ вузась ныллы укша. Умойгес луысал, журналист аслаз статьяезлэн пуштросэз понна сюлмаськысал ке, но со понна кыл кутыны дась луысал. А. АНДРИЯНОВ. Нянь будэтӥсьёслэн удысэз ноку капчиен ӧз сётскы. Азьвыл шуг-секытъёс вылэ табере погыльскизы выльёсыз: куашка техника, уг тырмы эстӥськон. Котькытын сямен, Селта районысь Ленин нимо эштосын но ёрмон зӥбе-пачкатэ. Нош музъем ужась дышем сямъя номыр шоры учкытэк гыре, кизе, нянь будэтэ. Тани Николай Митров ньылетӥ арзэ юосты утялтэ, вуж комбайнэз но ӟеч ужатын быгатэ. Таӵе адямиосын хозяйство возиське - ваньбур поттэ-люка. Н. Н. Митров (бур паласез) но солэн юрттӥсез В. М. Ершов. Туспуктэмез Г. ЮСАЕВЛЭН. "Лэсьтэмын Удмуртиын" Удмурт Республикаысь Правительстволэн Покчи ужбергатонлы юрттонъя но азинтонъя комитетэз, Удмурт торгово-промышленной палата, Пичи ужбегатонлы юрттонъя но азинтонъя Удмурт кун фонд, "Удмурт экспоцентр" акционер огазеяськон "Лэсьтэмын Удмуртиын" адӟытон радъяло. Отын возьматӥськозы Удмурт Республикаысь покчи предприятиосын поттэм вузъёс. Выставка усьтӥськоз туннэ Удмурт Республикаысь Национальной музейын ("Арсенал"). Адӟытон ужалоз 9-тӥ сентябрёзь. Улон - питран 2-тӥ сентябре тодмо удмурт журналистлы, писательлы, Удмурт Республикаысь культура удысысь сӥё-дано ужасьлы Леонид Петович Емельяновлы тырмиз 70 арес. Вордӥськемын со Можга ёросысь Чурайгуртын. Дышетскемын Можга педучилищеын. Удмурт кун педагогической институтын но Вылӥ партийной школаын. Кузь ужан сюресэз сое пӧртэм удысъёсы вуттылӥз: огшоры журналистысен партийной ужасёзь. Огвакытэ ик Леонид Емельянов гожъяз веросъёс, очеркъёс, повестьёс. Таосыз возьмато советской калыклэсь война вакытэ батыр луэмзэ, удмурт шаерлэсь пиоссэ данъяло. Соос пӧлын: "Сьӧд пилем но эркын тӧлъёс", "Степан Барышников", "Кудпала берга дунне питран" но мукетъёсыз. Юбилеез азьын Л. П. Емельянов кӧня ке юанмылы валэктон сётыны мылкыд кариз. - Леонид Петрович, Тӥледлы тырме 70 арес. Кыӵе лыдпус со Тӥ понна? - Бадӟым сюрес ортчемын ини, шуыны кулэ. Выльысь валаны кутскиськод улон-вылонэз. Егит дыръя улон кызьы ке капчиен учкиськод, нош табере котькуд вамыштэ малпано. 70 аресме туж ик шулдыр ӧй пумита, шуод-а, мар-а. Алигес секыт виси, соин улонэлы йылпумъянъёс но лэсьтӥсько ини. Сюлэм висён сыӵе ук: туннэ улэп, ӵуказе - ӧвӧл. Журналистлэн, писательлэн ужез секыт: ваньзэ сюлэм пыр лэзёно. Зэмзэ ке верано, писательын мон кыкетӥ сменаын ужай, нош валтӥз журналистика. Творчествоен шутэтскыкум выри. Сад-бакчаям мыныса но гожъяськылӥ. - Асьтэдыз кинэн лыдъяськоды: журналистэн-а, писателен-а? - Журналистэн. Но мон ноку но уг малпаськы вал, гожъяськись луо шуыса. Котьку но дышетӥсь луэме потэ вал. Пичи дыръям но дышетӥсь кариськыса шудылӥ. Геннадий Семенович Шишовез но "дышетӥ". - Нош кызьы чекист луиды? - Удмурт пединституысь историяя факультетэз йылпумъяй но, Воткинскысь огаз школае дышетыны лэзё вал. Ыстӥсь кагаззы но вал ни. Шуак ӧтизы ректор доры. Отын КГБ-ын ужась пуке вылэм. Ойдо, пе, м доры ужаны. Мон уг мыны, шуисько. Партия куре, тон комсомолец, пе. Нокытчы но уд мыны, возьма милесьтым ӧтеммес шуизы. Озьы сюри КГБ-е. Куинь ар ӵоже тырши йыруж лэсьтӥсьёсты утчанъя ньылетӥ отделын. Чекистъёслэсь ужамзэс "Мурт нимын" повестям возьматӥ. КГБ-ез но МВД-ез огазеямзы бере, отысь кошки. - Тросаз произведениосады ож сярысь вераськоды. Тӥ фронтын ӧй вал, нош война удысэ мар кыскиз тӥледыз? - Егит дыры, война вакытэ тупаз^1942-тӥ арын ож лудын атае быриз. Трос гожтэт лэзьяз, котькудмылы - нимаз... Огпол ми пичи выныным, Семиен, школаысь бертӥськом. Анаймы колхозлэн кутсаськон лапасаз ужа, корка пытсамын. Адӟиськом: тунгон вылэ кагаз понэмын. Басьтӥськом сое - печатламын. Анайлы. "Ваш муж, младший политрук, 19 ноября 1942 года геройски погиб..." Мон соку 6-тӥ классын дышетскисько вал, выны куинь ареслы пичигес. Со вакыт анаймы пыре. "Тӥ мар-о, пиосы, отын жугиськиськоды?" - Юа милесьтым. Жугиськиськом?! - паймимы. - Тятямы бырем..." Та учыр йырсазям туж яркыт кылиз. Гожтэтъёсыз ышизы - соизэ жалясько. Радиоын ужакум но ветеранъёс сярысь трос передачаос дасялляй. - КГБ-ысь кошкемды бере, ужан удыстэс воштӥды. Нош кытысен кутскиз журналистлэн сюресэз? -Ӵапак "Комсомолец Удмуртии" газетын ужан интызы вал. Нырысь литсотрудник вал, собере - отделлэн кивалтӥсез, редакторлэн воштӥсез, редактор. Дышетски Вылӥ партийной школалэн журналистика ёзаз. А. Г. Потапов радиое ужаны ӧтиз. Газетысь кошкеме пумысен ӧжыт жаляй ке но, радиоын мыным яраз. Соку ик валтӥсь редакторе пуктӥзы. Нош отын уно тодон-валанэн но кема ужам радиожурналистъёс вал ини, мыным соосын кивалтоно луиз. Тау Гай Сабитовлы - трос юрттӥз. Нырысь пичи жанръёс бордын ужай, собере бадӟымъёсыз борды кутски. Ф. Я. Фалалеев маршал сярысь радиоочеркъёс дасяй. Фалалеевлэн улэм-вылэмез бордын куамын ар ужасько ини. Со сярысь кык изданиен "В строю крылатых" книга поттӥмы. Али куинетӥез дась ни. Но печатланы уксё ӧвӧл на. - Кӧня ке вералэ вал партилэн Удмурт обкомаз ужамды сярысь но... - Отчы туж уг поты вал мынэме. Табере асме ачим янгыш карисько, соглаш луи шуыса. Обкомлэн Нырысетӥ секретарез Валерий Марисов олокызьы но кӧяз-вӧяз. Агае, Максим Петрович, Нылгалан но Пудемын нырысетӥ секретарьын ужамын. Обкомын пропагандая отделлэн кивалтӥсез вал (Леонид Петровичлэн берло потэм книгаез, "Кудпала берга дунне питран?", агаезлы сӥземын). Со шуэ: "Ӧд мыны ке но, Марисов шедьтоз. Радиоысьтыд но уллялоз". Соку мынӥ ини. Марсовлы шуисько: "Кызьы мон искусствоен кивалтон, литератураен гинэ вырисько ке?" Марисов шуэ: "Ӵок ойдо, партиысь принципъёссэ валамед но тырмоз". Озьы 1982-тӥ-1987-тӥ аръёсы обкомын культурая отделлэн кивалтӥсез луыса ужай. Секыт вал. Татын ик нырысетӥ инфарктэ но кутӥз. Куинь толэзь ӧй ужа. Со вакытэ нырысетӥ секретарь П. С. Грищенко ва ини. Со шуэ: "Адями куинь толэзь ужын ӧй вал, шораз учкыса, сое висись уд шуы". Зэм но, ымныры чебер ик улӥз, нош сюлэм ӧз чида... "Советской Удмуртия" газетлэн редакторез Василий Михайлов Грищенколы ӵектэм монэ редакторе пуктыны: ачиз угось пенсие потэ вал ини. Петр Семенович шуэм: "Асьмемыз уз валалэ. Редактор бюрое пырыны кулэ, нош отысь Емельяновез поттӥськом". Поттӥзы. Тазалыке уродмемен валче, куриськон гожтӥ... Редакторе Анатолий Комаровез басьтӥзы, нош мон радиое ик берытски. - Мар малпаськоды туала журналистика сярысь? - Туала журналистлы секыт но, капчи но. Капчи соин - эрик сётӥзы, Азьвыл обком кызьы косэ, озьы ик гожтӥськод вал. Табере трос малпанъёстэ шараяны но калыке поттыны луэ. Нош секытэз со бордын: улонэз валаны шуг. Кызьы шуо, кин уксё тыре, со ик крезьгур но куре. - Тӥляд таӵе книгады вань: "Кудпала берга дунне питран?" Кызьы малпаськоды, кудпала берга со туннэ? - Книгаелэн трос интыяз гожъяй: валантэм туннэ улон. Ум тодӥське, кыӵе асьмелэн быдэстоно ужпуммы. Мон коммунист, сослы дурбасьтӥське. Зюганов яра. Бен, вал партилэн мултэс куасалтон учыръёсыз. Но мар карод на? Огшоры коммунистлэн янгышез отын ӧвӧл. - Леонид Петрович, улонады мар лэсьтоно на кадь? - Мон "История печати Удмуртии" книга поттӥ. Ушъяськеме уг поты, но со кандидат диссертация кадь. Революциысен кутскыса, 1943-тӥ арозь эскери та ужпумез. Эшъёс, тодмоос азьланьтыны куро та удысме. Пенсие потыса но луэ вал ужме йылпумъяны, но улон секыт луиз. Табере ачим валасько: уг луы ни ужаны - жадёно. Кык час пала тыршисько ке, жадисько. Сюлэм но ассэ шӧдытэ... Леонид Емельяновлэн дас куинь книгаез потэмын. Кызьы шуиз со ачиз, вань печатламъёсыз сюрс пала вуо ини. Таӵе ужен данъяськыны но возьыт ӧвӧл. Ӟечкыласьком Тӥледыз, Леонид Петрович, юбилееныды. Оскиськом, арлыдды шоры учкытэк, лыдӟисьёстэс шумпоттоды на трос выль ужъёсыныды. Вань малпанъёсты мед быдэсмозы. Писателен, журналистэн Леонид Емельяновен кенешиз Алексей Андриянов. Тусбуйзэ пуктӥз Владимир Камашев. Туэ - арлыдоослэн арзы Быдэс Европатӥ - "корт валэн" Котькуд ёросын, гуртын улӥсьёс асьсэ сямен дунъяло вордскем палъёссэс. Кытын ке данъясько тодмо адямиосынызы, кытын ке - кырӟан-веранъёсынызы. Нош Пичи Пурга ёросысь Косой починка (Лебедёвка) гуртын улӥсьёс котькуд нуналзэс ас сяменызы шулдыр ортчытыны выро. Соос котьмае но котьку дэмен быдэсъяло: ужало но, шулдыръясько но. Пичи гурт бере, пичи гурт ини. Одӥгез доры куно лыктӥз ке, быдэс гуртэн куноятозы. Кин ке, оло, шуоз но: Косой гуртъёс тросаз ёросъёсын вань, нош маин пӧртэм пургаослэн починказы. Нырысь ик, бордаз кыске шулдыр интыосыныз, нош сылэ со Абдэс- Урдэс сьӧрысь Косой но Бажан гуртъёс вискын. Бен, толалтэ мӧзмытгес ик, нош гужем котыр вож садъёс, Бобинка шур кузя возь вылын тулыс будо италмас сяськаос. Ма, гуртлэн но нимыз аспӧртэмлыкогес потӥз. Удмурт сямен одӥг нимыз, нош ӟуч сямен - мукет. Со сярысь вера гуртысь мӧйы воргорон Иван Васильевич Кузнецов: - Починкамылэн нимыз меӵак герӟаськемын гуртмес кылдытӥсьлэн нимтулэныз. 1925-тӥ арын Косой гуртын улӥсь узыр семьяосты Прохор Дмитриевич Лебедев дӥняз люкам но калыклэсь мылкыдзэ выль гурт кылдытыны ӝуткам. Малпамын - лэсьтэмын. Соин ик, вылды, гуртмылэн удмурт нимыз но - Косой починка, нош ӟучъёс сое, гурт кылдытӥсьлэн фамилиеныз герӟаса, Лебедёвка шуиллям. Огдыре Косой гуртысь 11 семья кошкиз. Бӧрысьгес та лыдпус 14-ёзь вуиз ни вал, но... Шуг-секытъёслы ваньзы ӧз чидалэ, кин ке Бажан гуртэ улыны кӧчиз, кин ке - Учала. 12 семья гинэ "выжыоссэ" пыдло лэзиз но интыысьтыз нокытчы ӧз вырӟылы. Со дырысен гуртмы ялан одӥг быдӟа улӥз. Иван Васильевичез гуртазы Ванягай гинэ шуо. Уго котькинлы со визь-кенеш сётэ, быгатэмъяз маин ке но юрттыны тырше. Мӧйы воргорон улонысь пӧсьсэ но, кезьытсэ но тырмыт шӧмъяз. Ветлэмын Быдӟым оже. Нялтас пусъё на, Кузнецовъёслэн семьяысьтызы огдыре ньыль воргорон ож лудэ кошкиз. - 1938-тӥ арын кызь арес тырмиз, - веранзэ азьланьтэ Ванягай. - Соку монэ кадровое басьтӥзы. Война кутскем бере Москва котырысь Можайск городын ожмаськи. Гуртысен шофёрын ужай бере, ож лудын но руль сьӧры пуктӥзы. Быдэс дуннеез "корт валэным" ортчи кадь. Белоруссия, Украина, Молдавия, Румыния, Венгрия, Австрия, Чехословакия пыр потыса, Вормон нуналэз Германиын пумитай. Атае но пичиез выны бырыны шедизы, агае сӧсыр вуиз. Гуртысьтымы воргоронъёс но тросэз ож лудэ кылизы. Ваньмыз пӧлысь ньылез гинэ улэп берытскизы ке, жаляса верано, туннэ нуналлы со "ӧрӟиос" пӧлысь чылкак огнам кылемын ни. - Нош война бере кызьы улӥды пичи гуртады? - Капчи улонэз уно аръёс ӵоже адӟыны ӧз кылды на милемлы, - тамак аратон сямен мадьыны кутскиз воргорон. - Куамынэтӥ аръёсы ми но Кузнецов Алексейлэн семьяез, нырысьёсыз пӧлын колхозэ пыримы. Мукетъёсыз кышказы, ӧз дӥсьтэ огазеяськыны. Улон огсыр радъяське ни вал кадь. Шӧдтэк шорысь милемыз кулаке каризы, колхозысь но поттӥзы. Озьы кык арзэ улӥмы. Кӧтмес тыроно луимы, асьме лэсьтэм вышкыосты, бекчеосты базаръёсын вузаса. - Со гинэ ке луысал, - вераськонэ итӥськиз Иван Васильевичлэн кузпалыз Агафья Петровна. - 1958-тӥ арозь курадӟыса улӥмы на. Нырысь ик, катьтэммоно вал, урод сюресъёстӥ ветлыса. Фермаын ужай, пӧртэм ужъёсыз быдэсъяй. Тодам ваисько на: пудо сиён тырмымтэен, скалъёс син азьын пограллязы. Ма карод, ӝуткаллям. Киын быдэсъяно ужъёс но лачак гинэ вал. Нуназе бусыын картофка октылӥм ке, уин куро люканы потамы. Ӵемысь ветлоно луылӥз нюлэс дасянэ, нош дӥсь сокем ӧй вал. Оло, соин но тросэз нылкышноос нылпитэк кылизы, соин но, вылды, гуртмы но ялан одӥг быдӟа улӥз. Вераса быдтод шат со вакытысь шуг-секытъёсты. Валъёс тырмымтэен, музъемез гыроно луылӥзы асьсэ кужымен. Нош кин скал вордӥз, соос скалзэс но кыткылӥзы. Аръёс ортчо, улон азьланьтӥське, гурт нуналлы быдэ чеберске, шулдырске. Табере Косой починка гуртлэн но тусыз воштӥське ни, со йыг-йыг пыд вылаз ӝутӥське. Егитъёс уг дырто палэнэ кошкыны. Семья кылдытыса, гуртазы ик бадӟымесь кирпич юртъёс пукто. - Та вакытэ ужа на вал - моӵ быриз, - вера Монья кенак (гуртоос Агафья Петровнаез озьы шуо). - Азьвыл аръёсын ӵошатӥськод ке, улон но али трослы капчиямын. Ужлэсь кышкасьтэм егит кузпалъёс тыро уло кадь, нылпи будэто, пудо вордо. Соослэн сюлмо тыршемзы асьсэлы ик барышен берытске. Нош сиён-юон вузаса поттэм коньдонэнызы машина но басьто. Шумпотоно шоразы учкыса. Бен, ваньбуро улон капчиен уг сётскы туала аре но. Нылкышноос вазь ӵукна ик фермае мыно, воргоронъёс тракторъёссазы пуксё. Ваньмыз вань, тырмыт, ужандэ ужа. Та вие гуртын ваньзэ лыдӟыса,16 корка сылэ, ӧвӧл татын школазы, клубзы, магазинзы. Ма, артысь трослы бадӟымгес Косой гуртын но соос ӧвӧл. Покчи пиналъёс дышетскыны ветло Бажанэ, нош бадӟымъёсызгес - Учала. Бен, гужем нылпи куараос быдэс гуртэз шулдырто. Шутэтскыны вуо ӵыжы-выжыоссылэн нылпиоссы но. Толлы "кынтэм" юртъёс но гужем ӧсъёссэс усьто. Секытэн но мӧзмытгес ас даурзэс ортчытоно луо мӧйыос. Аръёслы сётскем пересьёс ялан гурт котыразы бергало: нянь пыжо, чипы-курег сюдо, бакчазэс утялто, тодмооссылэсь, ӵыжы-выжыоссылэсь бертэмзэс витё. Ярано коть, пенсизэс доразы вутто. - Туала арын уксё шелеп интые кылиз ни, - шуэ Ванягай. - Тазалыкмы ялан векаса улэмен, Пурга больницае ӵем ветлоно луэ. Соку ик базаре но кожиськод. Коньдон ву сямен кошке. Азьвыл аръёсы, кынармы вань дыръя, пудо но вордӥм. Али кыед гинэ но коньдонэн басьтоно луиськом. Сыръясь музъемын кыед 2-3 арлы сяна уг тырмы уго. Ма веранэз ини отын пу сярысь, ярано коть чагыр эстӥськонэз баллонэн нулло. Озьы тӥни улӥзы но уло починкаын. Машинаен вузкарисьёс лыктыку, соос уг учко ни товарлэсь дунзэ. Коньдонзы вань дыръя, Пургалась кытысь ке котомкаен ӝутыса ваёнтэм вылысь, оглом басьтоно карисько. Нош будӥсь пиналъёс шергес веръяло голькыт сиёнъёсты. Со понна пичи "ерпечкаос" висёнлы уг сётско. Чылкыт омырын шудо но серекто. Малпасько, арлыдоослы соос зэмос кивоштӥсьёс луозы, азьланяз но пичи гурт улоз но чеберскоз шуыса. В.Кутузова. * И.В.Кузнецов. * Гуртын туннэ. Туспуктэмъёсыз В.Камашевлэн. Быдэс Россия люкаськоз Ӵуказе Удмурт шаер дуно куноссэ пумита. Шоркарамы прессалэн "Вся Россия-99" ИВ фестивалез кутске. Данак журналистъёс сяна, вуыны кулэ тодмо политикъёс но. Ижевске алигес вуылӥз вал Россиысь журналистъёслэн огазеяськонзылэн кивалтӥсез Всеволод Богданов. Срку со меӵак пусйиз: фестиваль ортчоз туж секыт но ӟырдыт вакытэ. Нырысь ик со герӟаськемын Кун Думае быръёнлы дасяськонэн. Озьыен, вераськонъёс но лэчытэсь луыны кулэ. Но ми, малпаськом, журналисъёс асьме дорын огъя кыл но выль эшъёс шедьтозы шуыса. Нош фестивалез ортчытонлы юрттыны дась луэмзы сярысь ивортӥзы ни Ижевскысь "Купол" электромеханической завод, "Воткинский завод" кун предприятие, "Чепецкой механической завод", Сарапулысь коммерческой банк, акциосын "Удмуртнефть" огазеяськон, "Билайн" Удмуртиын акционер огазеяськон, "Внешэкономбанк", "Наш дом Россия" движенилэн Удмурт ёзэз. Иворъёсты вӧлмытон сярысь юрттоз "Удмуртия" ГТРК. Мар бен, ӟечбур, фестиваль! Н. ЛЯЛИН. Пенсиос - дыраз Удмурт Республикаысь Пенсиосъя фондлэн ёзэз ӝегатэм пенсиосты ваньзэ тыриз! 30-тӥ августысен шаерысьтымы вань городъёсын но куд-ог районъёсын сётыны кутскемын сентябрьлы пенсия. Озьыен, та толэзе пенсионеръёс коньдон дыраз басьтозы. Пенсиосты дыраз тырон сяна, Пенсиосъя фонд азьын та дыре мукетыз бадӟым ужпум сылэ. 1997-тӥ арын 1-тӥ январе Россиысь вань улосъёсын кужыме пыриз "Кун пенсиосты страхование удысын нимаз адямиосъя учёт нуон сярысь" Россия Федерацилэн Законэз. Та закон луонлык сётэ Россия Федерациын пенсиосъя реформа ортчытонъя программаез улонэ пыӵатыны но пенсия тыронэз азьланяз нимаз учёт нуонъя радъяны. Удмурт Республикаысь Правительствоен тупатэм планъя шаерамы йылпумъяське ни та ужлэн нырысетӥ люкетэз, кутскемын нимаз адямиосъя учёт нуонын страховать каремъёсты пусъён. Ужасьёссэс пусъён понна, уж ӵектӥсьёс (работодательёс) котькудӥзъя документъёс дасяны кулэ - страховать карем муртлэсь анкетазэ. Со документъёсты дасяны кулэ та арын 1-тӥ ноябрёзь. Пенсиосъя фондлэн ёзэз уж ӵектӥсь пыр котькуд страховать карем муртлы сётэ свидетельство. Пенсиосъя фондэ асьсэ понна взнос тырисьёс (покчи ужбергатӥсьёс но мукет) пусйиськыны кулэ, асьсэос вазиськыса. Нимаз адямиосъя учёт нуон радъямын шаерысьтымы районъёсын но городъёсын Пенсиосъя фондлэн ёзъёсыз пыр. Котькуд ужась адями сюлмаськыны кулэ Пенсиосъя фонд пыр нимысьтыз лицевой счёт усьтон сярысь. Отчы чаклам дыр ӵоже кулэ ивортонъёс вуозы ужасьлэн уждунэз но ужам стажез сярысь, сое сётэ уж ӵектӥсь. Ужасьлэн лицевой счётэз утёз уждун но стаж сярысь люкаськем ивортонъёсты, уж сётӥсь соосты кытчы ке ыштӥз ке но яке предприятие кыӵе ке муген ворсаськоз. Котькуд адями чакланы быгатоз аслэсьтыз лицевой счётсэ, шонересь-а лыдпусъёс отчы сётэмын, кӧня быдӟалаез страховой взнослэн. Со бордысь уго лыдъяськоз пенсия но солэн быдӟалаез. Уж ӵектӥсен умойтэм сётэм лыдпусъёс озьы ик пенсилэн быдӟалаез вылын шӧдӥськозы. Россия Федерациысь Пенсиосъя фондлэн Удмурт ёзысьтыз пресс-служба. Россия Федерациысь Федеральной собранилэн Кун Думаяз депутатэ кандидатъёсты ӵектон но лыдэ басьтон сярысь валэктонъёс "Россия Федерациысь Федеральной собранилэн Кун Думаяз депутатъёсты быръён сярысь" Федеральной Закон вылэ чӧлскыса, Кун Думае депутатэ кандидатъёсты ӵектыны быгато: - одӥг мандатэн округысь бырйисьёс (бырйись), кинъёслы кандидатэз ӵектон нуналэ тырмемын ни 18 арес; - асьсэды ӵектон амалэн - Россия Федерацилэн гражданъёсыз, кытын улэмзы шоры учкытэк, быръёнъёс нуналэ (1999-тӥ арын 19-тӥ декабре) тырмемын ке 21 арес; - быръёнъя огазеяськонъёс но блокъёс - быръёнъёсъя одӥг мандатэн но федеральной округъёсъя. Одӥг мандатэн округъёсъя кандидатъёсты ӵектыны луэ одӥг мандатэн округъёслэсь гожъёссэс печатлам бере гинэ. Россия Федерацилэн Кун Думаез округъёслэсь гожъёссэ печатла быръёнозь 100 нунал кылемлэсь азьло (1999-тӥ арын 9-тӥ сентябрлэсь бере кыльытэк). Со дырозь округъёслэн гожъёссы печатламтэ ке луо, быръёнъёс ортчо 1995-тӥ арын Кун Думае быръёнъёс дыръя тупатэм округъёсъя. Сыӵе учыре кандидатъёсты ӵектон кутске куара сётон нуналлэсь 90 нуналлы вазьгес (1999-тӥ арын 20-тӥ сентябрьысен). Быръёнъя огазеяськонъёс но блокъёс федеральной списокъёсъя кандиадтъёсты ӵектыны быгато Кун Думае быръёнъёс ортчытыны тупатэм нунал дырысен - 1999 арын 10-тӥ августысен. Одӥг мандатэн округъя кандидатэз ӵектӥсьёс со сярысь гожтыса иворто округысь быръёнъя комиссие (кандидатэз ӵектон вакытлы сыӵе комиссия кылдымтэ на ке - Удмурт Республикаысь Быръёнъя комиссие). Быръёнъя огазеяськонъёс но быръёнъя блокъёс кандидатъёсты ӵектон сярысь иворто Россия Федерациысь Быръёнъя валтӥсь комиссие. Ивортонын пусъёно: - кандидатлэсь (федеральной списоке пыртэм котькуд кандидатлэсь) быдэсак нимтулзэ, вордскем дырзэ, кытын но кин луыса ужамзэ но улон интызэ; - кандидатлэсь (кандидатъёслэсь) та округъя быръёнъёсы пыриськыны соглаш луэмез сярысь куриськонзэ. Отын кандидат озьы ик пусйыны кулэ суд улэ шедемез яке судить карем дырызлэн ортчымтэез но мукет государстволэн гражданинэз луэмез сярысь; - кандидатэз ӵектӥсьлэсь быдэсак нимтулзэ, вордскем дырзэ, улон интызэ, паспортэзлэсь яке сое воштӥсь документэзлэсь серизэ но номерзэ (быръёнъя огазеяськонлэн, быръёнъя блоклэн конференциысьтызы, съездысьтызы, кытын ӵектэмын вал федеральной округъя кандидатъёс, протоколзэс). Одӥг мандатэн округъя кандидатэз ӵектон понна округысь бырйисьёслэн кинюртэмъёссы одӥг процентлэсь ӧжыт луыны кулэ ӧвӧл (Удмурт Республикая - 6000 пала), кандидатъёслэн федеральной списоксыя - 200 сюрс кинюртэмъёслэсь ӧжыт луыны кулэ ӧвӧл, Россия Федерацилэн одӥг субъектаз 14 сюрслэсь трос кинюртэмъёс луыны кулэ ӧвӧл. Федеральной Законын учкемын кинюртэмъёс бичан интые быръёнъя комиссие коньдон сётыны, одӥг мандатэн округысь кандидатлы тупатэмын ичи уждунлэн 1000 быдӟалаез (83490 манет), быръёнъя огазеяськонлы, блоклы - ичи уждунлэн 25000 быдӟалаез (2087250 манет). Бырйисьёсын ӵектэм кандидат понна кинюртэмъёсты бичан кутске ӵектэм мурт сярысь окргуысь быръёнъя комиссие ивортон сётэм бере, федеральной списокысь кандидатъёс понна - Россия Федерациысь Быръёнъя валтӥсь комиссилэн со списоклэсь копизэ лыдэ басьтэмез бере. Кинюртэмъёсты бичан бумагаосты дасяло Федеральной Законэн тупатэм амалъя. Котькуд сыӵе бумагаын пусъемын луыны кулэ кандидатлэн нимтулыз, вордскем интыез, кытын но кин луыса ужамез, улон интыез но быръёнъя округлэн нимыз, кытын кандидат быръёнъёсы пыриське (федеральной округъя пусйисько куинь кандидатъёс, кудъёсыз кивалто федерацилэн но регионлэн группаосазы пыртэм кандидатъёсын). Кинюртэмъёсын бумагае озьы ик пусйыны кулэ кандидатъёслэсь суд улэ шедемзэс яке судить карем дырзылэсь ортчымтэзэс но мукет государстволэн гражданин луэмзэс (сыӵе учыръёс вань ке). Одӥг мандатэн округын ӵектэм кандидат понна кинюртэмъёс бичасько со округын улӥсь бырйисьёс пӧлын гинэ, федеральной окргуъя - быдэс Россия Федерациын. Кинюртэмъёсты бичаны луэ ужан, службаез нуон, дышетскон, улон но мукет интыосын, кытын лэземын федеральной законъёсъя. Бырйисьёс быгато кинюртэмзэс пуктыны пӧртэм кандидатъёс понна (федеральной списокысь кандидатъёс понна), но одӥг кандидат понна (федеральной списокысь кандидатъёс понна) кинюртэмез пуктыны луэ одӥг пол гинэ. Бырйись яке кинюртэмъёсты бичась мурт бумагае пыртэ аслэсьтыз нимтулзэ, вордскем арзэ (18 аресъемъёс - вордскем нуналзэс но толэзьзэс), улон интызэ паспортэзлэсь яке сое воштӥсь документэзлэсь серизэ но номерзэ но кинюртэм пуктэмезлэсь нуналзэ. Кандидатъёсты, федеральной списокъёсысь кандидатъёсты лыдэ басьтон понна округысь но Быръёнъя валтӥсь комиссиосы сётоно таӵе документъёсты (куара сётон нуналлэсь 85 нунал вазьгес но 55 нунал бергес кутскыны уг яра), мукет сямен вераса документъёсты сётыны кулэ 1999-тӥ арын 25-тӥ сентябрь - 24-тӥ октябрь дыр ӵоже; - кандидатлы, федеральной списокъёсысь кандидатъёслы кинюртэмъёсын дурбасьтыса бичам бумагаосты яке Россия Федерациысь Сберегательной банклэн ёзаз коньдон тырем сярысь справка; - кандидатлэн (федеральной списокысь кандидатъёслэн) 1998-тӥ арын доходъёсыз сярысь; - кандидатлэн (кандидатъёслэн) асваньбурлы кузё луэмез сярысь; - кандидатлэн, быръёнъя объединенилэн, быръёнъя блоклэн быръёнъя фондэ коньдон пыртэмзы яке отысь коньдон басьтэмзы сярысь нырысетӥез коньдон ужпумъёс сярысь отчётэз. Округысь яке Быръёнъя валтӥсь комиссия вань документъёсты эскеремез бере но кинюртэмъёсын бумагаос вуэмлэсь 10 нунал ӵоже бере кыльытэк решение кутэ кандидатэз (федеральной списокысь кандидатъёсты) лыдэ басьтон яке лыдэ басьтыны пумит луэмез сярысь. Одӥг мандатэн округысь кандидатэз лыдэ басьтымтэ пумысен ӝожтӥськыны луэ Россия Федерацилэн Быръёнъя валтӥсь комиссияз яке Удмурт Республикалэн Вылӥ Судаз, федеральной списокысь кандидатъёсты лыдэ басьтымтэ пумысен - Россия Федерацилэн Вылӥ Судаз. Одӥг гинэ ӵектэм кандидатэн быръёнъёс ортчытыны лэземын ӧвӧл. Сыӵе учыре, куке куара сётон нуналлэсь 45 нунал азьло (1999-тӥ арын 3-тӥ ноябрёзь) одӥг мандатэн округъя одӥг но кандидат лыдэ басьтэмын ӧз ке луы яке одӥг гинэ кандидат лыдэ басьтэмын луиз ке, нош федерацилэн округезъя кандидатъёслэн федеральной списоксы одӥг но лыдэ басьтэмын ӧз ке луы яке одӥг гинэ сыӵе список лыдэ басьтэмын луиз ке, сыӵе округын быръёсты ортчытон кык толэзьлы кельтӥське. Удмурт Республикаысь Быръёнъя комиссия. Дэмен корка пырон 53 выль одӥг но кык комнатаен квартиралэсь усьтонзэ басьтӥзы Воткинск городын улӥсь мӧйыос. Ветеранъёслэсь улон юртсэс выльдонлы кичӧлтон сётӥз город администрация. Выль юртэ пырыны мылкыд карисьёс трос гинэ, со понна пересьёс быдэстоно луо одӥг куронэз - асьсэ юртсэс яке квартиразэс городлы сётыны. Юртэз вузан-басьтонъя документ лэсьтонэз ас вылаз кутӥз городысь мэрия. Выль юртын улэмзы понна пересьёс 125 манет тырозы. Асьсэос пенсия басьтозы но коммунальной услугаос понна асьсэос коньдон сётозы. Шуге-леке вуыкузы, соослы котьку кизэс мычозы улон-вылонын юрттэт сётонын ужасьёс. Со сяна, та юртын чакламын на усьтыны медпункт, парикмахерской, буфет но мисьтаськон инты. В. НИКОЛАЕВА. Кисыед бушамын - кырӟалод пеймытын Та вакытэ шаерамы толлы дасяськон мынэ. Кыӵе югдурзы меда Кизнер ёросысь культура учреждениосын? Туннэ нуналлы ёросын 35 культура юрт но клуб. Жаляса верано, тросаз (13 клубын) тупатъян ужъёсты пыр-поч быдэсъяно, нош 6-ез пытсаськон калэ вуэмын. Соин валче Батырево но Шор Пыжма гуртъёсысь клубъёс ворсаськемын, нош Вуж Омга, Мари-Сарамак но Вуж Копки гуртъёсысь клубъёс чылкак куашкан калэ вуэмын. Вань шуг-секытъёс пыкъясько коньдон борды. Культура удысын ужасьёс куд-огез асьсэ кужымен коньдон поттыны тыршо ик. Озьы куинь клубын тупатъян ужъёс быдэстэмын вал. Кылсярысь, Саркуз клублэсь липетсэ выльдӥзы, Лака-Пыжмаын куд-ог интыоссэ буязы, нош Балдейкаын клублэн фойеысьтыз выжзэ вошъязы но чеберак буязы. Со сяна, ёросысь 15 клубын, пунэм тыронъёссы трос люкаськемен, электротыл кысэмын. Соос пунэм тыронъёссэс ваньзэ берыктӥзы ке, соку ик культура юртъёсын но югыт луоз. Умойгес югдур эстӥськонэн. Эгыр вуттэмын луоз ваньмаз сямен клубъёсы. Озьы бере, нокыӵе шуг-секытъёс шоры учкытэк, ёросысь культура юртъёс ӧсъёссэс уз ворсалэ. Шуныт луиз ке, оло, куке-соку югыт но сётозы, лэсьтӥськон-тупатъян ужъёс но радъяськозы ай. В.Петрова. Калмез кузя 6. Эх-ма, Прой-Балма! Кузь сюресмылэсь ӝынызэ ортчим ни, нош тып-тып удмурт гуртэ нырысьсэ вуим. Нимыз солэн Прой-Балма. Тодӥськоды-а, кытысь потэмын? Та палъёсысь мӧйыослэн мадемзыя, Калмез шурлэн шор вадьсазгес интыяськем Балма гуртын куке но Прокоп батыр улэм, быдэсак вераса - Прокопий. Вашкала дыръёсы со мылкыд карем шур кузя выллань тубыны, отысь тэльёсын кузёяськыны. Сьӧраз пиналъёссэ но кутэм. Озьы дунне вылэ Прой-Балма вордскем. Нош мукетъёсыз верало, Прокоп вылӥысь васькем шуыса. Озьы-а, тазьы-а, но туннэ татын ӟеч адямиос уло. Машинамес адӟыса, солэн азьпал пиялаысьтыз экспецилы сӥзем суредэз синйылтыса, гуртоос азбаръёсысьтызы оген-кыкен ми пала потыны кутскизы. Кин ке соку ик валатскиз (о-о-о, журналистъёс вуиллям, пе), кин ке милемыз милиционеръёс кожаз ("ма, номыр ик ӧм дауртэ кадь ук..." шуыса чабкиськиз огез арлыдо кышномурт), кин ке ӧжытак "кырыжам" йырзэ шонертыны ӧдъяз (со нуналэ пенсия люкылӥллям). Озьы ог кызё мурт люкаськиз. - Гуртады гостиница вань шуизы, озьы-а? - сиськон-кӧлан понна та нуналэ кыл кутӥз Георгий Юсаев, соин, лэся, мукет ужъёсты азьпалтыса, серем пыр юано кожаз лыктэм адямиослэсь. Таосыз абдразы: кыӵе-мар гостиница, автолавка но арнялы огпол сяна уг кожа бере? - Мынам коркам ваньды тэроды, - валатскиз пилеш йыро воргорон. - Ойдо кыле ин, дорам ызёды, - собере ймнырзэ йыг-йыг карыса ватсаз: - Белоногов... Николай Егорыч бӧрсьы татчы гожъясьёс ӧз вуылэ на ай. Нош соизлэн мугорыз но табре сисьмиз ни, ло... ИИ. Нюлэстэк, шуртэк, возьтэк удмурт адями умой улыны уг быгаты. Котырын маиз ке уг тырмы ке, солэн сюлмыз интыяз ӧвӧл. Тодады вае ай, кӧня кырӟанзэ сӥзиз асьме калык инкуазьлы. Шуръёс сярысь гинэ кӧня мур пуштросъем кырӟан-кылбур вордэмын! Кам, Чупчи, Вала, Лоза, Туймы - озьы азьлань лыдъяса, трос шур нимъёсты вераны луоз. Котькудӥз сямен кылбурчи, композитор вордӥськем палъёссэ данъяны тырше. Нош тодӥськоды-а тӥ Калмез сярысь кырӟанэз яке кылбурез? То-то уго. Ӧвӧл. Вань ке но, соос паськыт ӧз вӧлме. Малы меда озьы луыса кошкиз? - Кыӵе ке но муген ми пал калык дышетскытэк кылиз, - та пумысен малпанзэ шарая Прой-Балмаысь али одӥгез арлыдоез воргорон Анатолий Игнатьевич Филиппов. - Адямиос тэль пала кыстӥськизы. Лесопунктъёсын вазен умой улӥзы уго. Коньдон но вал, вузъёс но трос вуттылӥзы. Соин, лэся, весь отчы мыно вал. Дышетскыны туж ик ӧз дыртэ. Нош палэнэ кошкытэк, ас дуннедэ мукетъёсыныз ӵошатытэк, тэльын пукыса гинэ маке пӧрмытод шат? Мон вазен трос лыдӟисько вал. "Молотэз" арзэ кельтытэк басьтылӥ. Весь возьмасько вал, кин ке, оло, калмез палъёс сярысь но гожтоз шуыса - ӧй шедьты. Ялан Пурга да Алнаш... Мӧйы дядяйлэн вожъяськыса куректэмез валамон. Зэм ик, Калмез шур дурын малы ке но ӧз вордске асьме литератураез яке искусствоез азьпала валтӥсьёс. Тодэ лыктэ Игра посёлокын куд-ог эшъёсын нырысь пумиськеммы. Озьы но озьы, шуиськом, тӥляд Калмезды кузя ортчыны малпаськом. Соосызлэн ымныръёссы чырсазы: милям шурмы, пе, Лоза, нош Кильмезь - соиз играослэн ӧвӧл... Районлэсь историзэ кема аръёс ӵоже пыр-поч бугыръясь шаерчи Иван Шкляев но ватытэк пусйиз, ёрослэн калмез палыз весь "тӧдьы вишты" кадь возиське на шуыса. Селтаос но Калмезэз сокем асьсэлэн уг каро кадь. Ӵемгес Арлетез поттыло кадь, йӧтэ мыным. Оло, Калмезлэн аслаз сямыз сыӵе - инметӥ лобась муртъёсты яратӥсьтэм? Кин тодэ ни. Соиз гинэ буйгатэ. Улон азьланьске бере, вуоно дауре та чебер чылкыт шурлэн ярдуръёсаз но вордскозы ай удмурт кылбурчиос, гожъясьёс. Шур котырысь гуртъёсын, тэльёсын соку чузъяськозы та шулдыр интыослы сӥзем кырӟанъёс. ИИИ. Шур валлин мынӥськом бере, кудаз гинэ гуртэ ум вуиське, одно тыршиськом Калмез ярдуре ветлыны. Таяз учыре милемлы сюрес возьматӥсе ӵектӥськиз егит воргорон Александр Бельтюков. Подольск, Уфа, Кустанай, Сарапул - кытчы но ӧз кожа ни солэн улон сюресэз. Отӥ- татӥ котыръяськемез бере, вордӥськем гуртаз вуиз. Валаз, лэся, нокытын ик нянь колды писпуэ ошиськыса уг буды шуыса. Берло аръёссэ тани Прой-Балмаысь фермаын гур эстэ. Дуннеез адӟемын бере (пиналгес дыръяз трос ветлэмын на Союзысь пӧртэм интыостӥ шутэтскон путёвкаосъя), улон шоры учкон мылкыдыз но паськыт. - Куддыр асме ачим тышкаськисько, малы меда сюлэмылы кельшымон уж уг шедьтӥськы шуыса, - гурт вӧзысь тымет дортӥ вамышъянъяз вера Саша. - Тани учкы ай, кыӵе чебер но ӵошкыт возь татын. Музъмез но быг-быг. Вот кут вал сое кияд, будэты куар яке картофка... - Кин бон тыныд люкетэ кузё луыны? - Ачим но уг валаськы: дӥсьтон-а, шай-а уг тырмы. А мылкыд вань. Калмезозь но выльысь гуртозь калгон дыръямы ми Александрен тазьы кенешим. Саша одно ик вуылоз Селтала, кенешоз отысь специалистъёсын музъемез басьтон пумысен. Но... ӧтёз "Удмурт дуннеез" ас бусыяз будэтэм картофкаен нырысетӥ перепеч яке шаньги сиыны. Луоз-а меда озьы? Вераськеммылэн кыкетӥ люкетэз ӧз пӧрмы ке но, ӵок. Нырысетӥез мед быдэсмысал. Валамон, котькыӵе чырткем лу но, оген трос уд лэсьты. Бельтюковлы утчано эш. Гуртысь ог вить-куать егит пиналъёсын тодматскыны кылдӥз милемлы. Бен, пӧлазы котькыӵеез вань - куд-огзэ ӟенелик пыдэсысь озьы гинэ уд потты ни. Но татын уло ук пеймыт уйёсы Саша сямен ик ӟеч уж сярысь малпаськись адямиос но. Кичӧлтӥсь гинэ мед луоз. Ми вуонлэсь ог кык арнялы вазьгес Прой-Балмаын сильтӧл вылэм. Тӧлпери куд-ог липетъёсты но кесям, кужмо писпуосыз но погыртэм. Ӝужыт майыг йылэ инъям антеннаос сярысь веранэз ӧвӧл - дасо палаез усиллям. Нош тужгес бадӟым изъян луэм нюлэскын - кӧня ке гектар тэлетӥ ветлыны луонтэм трос писпуос пограллям. - Эх, со коръёсты али уже кутыны мед лэзьысалзы, кӧня бугро ӵупысалмы, - тазьы лулӟылонъёсты уно пол кылӥм. Гуртоослэн веразыя, ёрос кузёос пограм кызъёс борды матысь толэзьёсы кутскылыны ик уг лэзё. Отӥяз тол но вуоз, бӧрысь ини кор но сисьмоз... Балма пиослэн котькыӵе югдур шоры кузё синмын учкыны тыршемзы шумпоттэ. озьыен, гурт калык киоссэ копак лэзьымтэ на. Оло, Саша дорын но куке-соку пыжиськем сиён веръяны кылдоз? ИВ. Нош ик берытском Анатолий Игнатьевич доры. Со милемыз паймытӥз "Кызьы улӥськоды?" шуыса ньӧмыз понна сётэм юанмылы тазьы вераменыз: - А мар-о? Умой улком. Зэм-зэм. Пиналъёс будӥзы. Ӝӧк вылын нянь-вӧй вань. Мар кулэ на адямилы? - Кӧня ветлӥськом ни гуртъёстӥ, умой улӥсь муртэ нырысьсэ адӟиськом, - таяз учыре выль тодмомылы шофёр но паймиз, шӧдске. - Мон весь улонме колхозын, пудо котырын, ортчытӥ, - мадьыны ӧдъяз Филиппов. - Кӧня сӥль будэтӥм, кӧня муртлы со тырмиз - ой-ёй! Зол ужам. Умой улӥм. А али?... Водительмылэн синъёсысьтыз нырысь паймон тӧлӟыны ӧдъяз. Таид но токма гинэ озьы чеберъяськем вылэм шуыса, со егит нылкышноос пала кариськиз. Нош Игнатьичмылэн кылыз пӧсьтӥз: - Сталин вуытэк, номыр уз пӧрмы ни. Со берытскиз ке, сё луоз. Дисциплина, порядок, уксё... Вот шуо: Сталин, пе, калыкез ыбылӥз. Ӧз. Со дыръя адямиос ӟеч улӥзы, ужазы. Нош али калык ужамысь дугдэмын... Мар вералод тыныд, гажано Анатолий Игнатьевич? Бускель гуртысьтыд (Кионгуртысь ) мынам песятае Максим Данилович Попов, музъем вылын юн сылӥсь, ужез яратӥсь воргорон, быдэс семьяеныз но уно мукетъёсыныз ӵош юнме шорысь Архангельск улосэ келямын вал шуыса-а? Соос пӧлын ик вал дас одӥг аресъем апае но солэн кык аресъем выныз. Таослэсь курадӟемзэс-а мадём? Оло, тодэ вайытоно чебер пушъем турынэз шырӟем музэн ыбем писательёсмес? Кин тодэ, таосызлэн радазы, оло, вал калмез палан будэм егит кылбурчи но? Трос юан сётыны луысал... Кытын тон, шонер сюрес? Кин туннэ кулэгес асьмелы? Эх-ма, Прой-Балма!. Иван ЛЕБЕДЕВ (текст), Георгий ЮСАЕВ (фото), Леонид ПРОЗОРОВ (суред), Владимир ПОТАПОВ (авто). Анатолий Филиппов. Прой-Балмаысь огез ульча. Гуртысь скал кыскисьёс. Александр Бельтюков. Тросэз пӧлысь огез Игра посёлокын вить ар талэсь азьло усьтӥськиз калык киужъёсъя юрт. Солы кутскон сётӥз Мария Тимофеевна Шуб. Ёрос кивалтэтысь культурая ёзлэн тӧроез луыса, ӟеч вала вал та ужъюртлэсь кулэлыксэ. Шаерамы но соку ӵапак кутэмын вал калык киужъёсты улӟытонъя, утёнъя но азинтонъя программа. Юртлы директоре юнматӥзы Александр Кардапольцевез. Уж борды басьтӥськизы, кулэ тӥрлык шедьтӥзы. Котькуд гужем потазы экспедициосы. Соку ик тодматскылӥзы быгатӥсь киосын. Адямиос мылысь-кыдысь выро вылэм куиськонэн, бадь ньӧръёслэсь пӧртэм арбериос керттонэн, туйлэсь тӥрлыкъёс пӧрмытонэн. Кык ар ӵоже бичазы куэм дӥсь. Отысь пужыос пӧлын котькыӵеез вань: удмуртэз, ӟучез, бигерез. Шедьтыны кылдӥз витьтонлэсь трос ӝӧккышет. Отысь суредъёс ог-огзылы пичи но уг кельшо. Азьланяз усьтыны малпало та удыслы сӥзем музей. Ньыль ар ӵоже ини татын муш но вордо. Муш бакчазы интыяськемын Лудошур гуртэ. Огдыре ик эскериське ёросын мушкан ужлэн азинтӥськемез. Нош Виталий Яковлевич Лекомцев та удыс сярысь книга гожтэ. Калык киужъёсъя юрт алигес нош ик корка пырон ортчытӥз. Кык толэзьлэсь кема дыр кулэ луиз, нылпи садлэсь куштӥськем юртсэ туннэ нуналлы тупамон карон понна. Табере татын вань ини ньӧрлэсь, туйлэсь, пулэсь пӧртэм арбериос лэсьтонъя, чильпаськонъя, куиськонъя сэрегъёс. "Удмурт шаерысь ошмесьёс" ужрадын Игралась калык киужъёсъя юрт аслаз "эшъёсыз" пӧлын басьтӥз нырысетӥ инты. Кык адями луиз лауреат. Соос пӧлын - Татьяна Трефилова, Ольга Денисова. Вить адями - Серафим Корепанов, Зинаида Чиркова, Светлана Наговицына, Вера Лекомцева, Наталья Дубовцева - коньдон кузьымен пусъемын. Калык киужъёсъя юрт ялан утчаське. Толэзьлы быдэ татын ортчыло пӧртэм адӟытонъёс. Потало ёросэ но. Куинетӥ арзэ ини бичало калык кылоссэс. Та вакытэ ужало чылкак выль удыс бордын - куролэсь пӧртэм арбериос пӧрмытъяло. Эшъёссылэсь адӟем карон вылысь, кибашлыос потало бускель ёросъёсы но. Коллективлы ялан юрттэ, солэсь сюлэмшугъёссэ тодыны тырше ёрос кивалтэтысь культурая ёзлэн тӧроез Анатолий Чирков. Уг вунэто Ижысь бадӟым эшъёссы но. Игралан ужало ас удыссэс сюлмысь яратӥсь адямиос. Киужъёсъя юртлэн тӧроез Александр Кардапольцев но солэн воштӥсез Светлана Дмитриева тодо: соос быдэсъяло йӧно но кулэ ужез. А. АПАЕВА. Удмурт Республикаысь Кун Кенешлэн Тӧроезлы Александр Волковлы Гажано Александр Александрович! Россиысь Аграрной партилэн нимыныз ӟечкыласьком Тӥледыз Удмуртиысь гурт спортсменъёслэн Челябинскын ортчем ИИИ Всероссийской гужем шудонъёсын вылӥ азинсконъёсынызы. Та шудонъёс гуртоос понна бадӟым праздниклы пӧрмизы. Секыт вакытэ но, гуртлы кун ласянь юрттэт сётэмен куд-ог улосвылъёсын быгато на радъяны таӵе ӵошатсконъёсты. Гуртоослы со - вераны луонтэм шумпотон. Нимысьтыз пусйысал Удмурт Республикаысь спортсменкаез Елена Корепановаез (Игра ёрос, капчи атлетика). Солы учкисьёс вылӥ дунъет сётӥзы, нош Аграрной партия нимысьтыз кузьым висъяз. Малпасько, гуртысь спорт, мугорез юнматон культура Удмуртиын азьланяз эшшо но паськытгес вӧлмоз, Удмурт Республикалэсь данзэ вылӥегес ӝутоз шуыса. М.Лапшин, Россиысь Аграрной партилэн председателез, Россия Федерациысь Кун Думалэн депутатэз. КУН ДУМАЕ БЫРЪЁН АЗЬЫН Кинлы дурбасьтэ музъем ужась Кылем арняе Москваын ортчиз Россиысь Аграрной партилэн ВИИИ азьвыл чакламтэ съездэз. Солэн ужаз пыриськизы республикаысьтымы куать делегатъёс но. Соос пӧлын вал Россиысь Аграрной партилэн Удмуртиысь ёзэзлэн кивалтӥсез Валерий Филиппович Благодатских но Кун Думалэн депутатэз Михаил Петрович Кошкин. Съездысь вуэмзы бере делегатъёс пумиськылӥзы аграрийёсын но журналистъёсын. Ваньзэсты сюлмаськытӥз одӥг юан: кыӵе блокен огазеяськыса АПР мыноз быръёнъёсы? "Отечествоен" яке КПРФ-ен? Съездын эскерем ужпумъёс сярысь ивортӥз В. Благодатских. 430 пала делегатъёс ас малпанъёссэс ватыса ӧз возе, шуиз со, югдур дырын-дырын лэчытомылӥз но. Озьы ке но данакез мылкыдзэс веразы "Отечествоен" ӵош кариськыны. Со сярысь решение кутэм бере, коммунистъёслы дурбасьтӥсь сю пала делегатъёс Н. Харитоновен валче съездысь кошкизы. Кызьы шуиз В. Благодатских, съездлэн решениезлы пумит луизы Алтай, Краснодар, Тула улосвылъёсысь делегатъёс. Мар огазея аграрийёсты Примаковлэн-Лужковлэн блокеныз? Нырысь ик, программасазы пуктэмын огкадь ужпумъёс: ваньбур поттонэз ӝутон, Президентлэсь властьсэ кулэстон, Думаын аграрийёслэсь фракцизэс кылдытон. Кыкетӥез: музъем вылын ужасьёслы туж кельше Примаков. Премьер дыръяз гуртэ техника но вуыны кутскиз ни вал, пенсия но дыраз сётъязы. Ваньзэ сое гурт калык шӧдытэк ӧз улы. Нош мукет ласянь учконо ке, калык аграрийёс но коммунистъёс шоры одӥг синмын учке. Соин ик гуртын улӥсьёслы валантэмгес потэ, малы та кык партиос ог-огзылэсь люкиськоно луизы. Со понна АПР-лэн лидеръёсыз янгыше уськыто Г. Зюгановез. В. Благодатских югдурез тазьы валэктӥз: - Кылем арын гужем АПР-лэн Центральной Советэз вазиськонэн потӥз КПРФ-лэн Центральной комитетэз азе быръёнъёслы дасяськонъя огъя блок кылдытон сярысь, КПРФ- лэн кивалтӥсез нокыӵе валэктон ӧз сёты. Нош дыр ортче. Зюгановлэн мылкыдыз - тодмотэм. Тӥни озьы кема возьмамзы бере аграрийёс огазеяськыны малпазы "Отечествоен". Малпанзы юнматэмын вал АПР-лэн али ортчем съездаз. Табере АПР-лы калык пӧлын бадӟым уж нуоно луоз коммунистъёслэсь, аграрийёслэсь но "Отечество" блоклэсь пӧртэмлыксэс но огъя куронъёссэс валэктон понна. Со туж секы уж, угось та дырозь гурт калык коммунистъёсты но аграрийёсты оградэ пуктылӥз. Зэм, В. Благодатских шуиз, ми, пе, коммунистъёсын нюръяськыны ум малпаське, "Отечествое" пыримы вуоно быръёнъёсын вормон понна гинэ. Озьыгес ик вераз М. Кошкин но: коммунистъёсын али нимаз кариськимы ке но, бӧрысь Думаын ӵош ужаломы. Озьы ке но, валтӥсь куронзыя КПРФ но АПР туж зол висъясько. Коммунистъёс Россиез социализме берыктыны малпало, нош АПР кыӵе обществое, капитализме яке коммунизме, мынонзэ меӵак уг ке но валэкты, малпаське калыкез зэмлыко улонэ вуттыны. Общество котькызьы мед нимаськоз но крестьянъёслэн будэтэм-поттэм сиён-юонзы котькинлы кулэ - узыръёслы но, начаръёслы но. Туннэ гуртъёсын 30 миллион пала калык улэ. Кудпала кариськозы гуртын улӥсьёс, потоз ини асваланзы но партиослэн ас бордазы кыскыны быгатэмзы бордысь. Т. БАННИКОВА. Сюлэмшугъяськытӥсь югдур Кикыпиос Гужем шорын Шарканысь больницае вуттӥзы татын ик улӥсь Н. кузпалъёслэсь сютэм улыса лябӟем нылпиоссэс. Кык арня ӵоже соосты татын сюдӥзы. Куинь пиос, анайзы-атайзы но луыса, сютэм уло, кыкез соос пӧлысь Шарканысь ик школа-интернатын дышетско, гуртазы каникулъёсы гинэ уло. Мар вуттӥз соосты сыӵе югдуре? Та юанэн мон вазиськи С. В. Барабановлы, ёросысь Калыкез уже интыянъя центрлэн кивалтӥсез. Михаил но Лариса Н. татын учётын сыло. Соос - ужтэк кылемъёс. - Та кузпалъёслы котьку юрттыны тыршимы, - валэктэ Сергей Владимирович, али ми ужтэк кылемъёслы 1997-тӥ ар понна висъям коньдонэз сётъяськомы. Нош Михаил но Лариса басьтӥзы ни пособизэс коньдонэн яке сиён-юонэн но мукет вузъёсын 1998-тӥ ар (!) понна, озьы ик 1999-тӥ арлэсь ог люкетсэ сётэмын ни. Кызьы адӟиськоды, ми соослы мукетъёсызлэсь ортчыт юрттӥськомы. Кузпалъёслы уж но ӵектылӥзы ини, огпол гинэ ӧз. Нош соос яке асьсэос пумит луо (кылсярысь, лесничествоын ужамлэсь), яке уг ортчо, ӧвӧл кыӵе ке ужлы дышетскемзы. Мынам юанэ валэктонтэк ик кылиз. Кузпалъёс пособие басьто ке, нылпиос кызьы ке но сюдэмын, дӥсямын луыны кулэ. Соку мар бордын ужпум? Вазиськисько семья ужпумъёсъя но калыклы улон-вылонын юрттэт сётонъя отделлэн кивалтӥсезлы Т. С. Фроловалы но быдэ вуымтэосын ужась комиссилэн секретарезлы Н. И. Широбоковлы. Та паласен но юрттэт котьку мынэ вылэм. Тани пӧсьтолэзьлэн нырысетӥ нуналъёсаз но сиён-юон басьтыны Н.-ёслы коньдон висъямын вал. - Бакчазы вань дыръя таӵе ватсэтэн улыны луэ, - оскытэ Татьяна Сергеевна. Соку валантэм, малы пӧсьтолэзь пумын нылпиос сютэм кыллё. Кытчы кошкиз висъям коньдон? - Ёросын учётын сылэ 120 пала ёрмись семья: Пашур-Вишур гуртын - 2 семья, Кулак- Кучесын - 1, Мишкиноын - 1... - лыдъя Николай Иванович. - Валамон ини, ваньмызлы ик та семьяослы быгатэммыя юрттӥськомы. Нош кытчы кошке соослэн коньдонзы но сиён-юонзы - соиз ини анай-атайёслэн ужзы. Кылдэм югдурез пумозяз эскерон понна, ми вуимы Н. кузпалъёслэн улон интыязы. Квартиразы пушласянь пытсамын. Кема йыгаськем бере, ӧсэз семьялэн кузёез усьтӥз ик. Дораз пырыны милемыз ӧз лэзьы. Вераськеме, пе, уг поты. Юан сётӥм, кызьы но мар муген пиналъёсыз больницае сюризы, нош пичиез пиез сютэмысьтыз кулыса усиз. Со валэктӥз: - Уг тодӥськы. Мон ветлӥ, кури коньдон, сиён-юонлы ке но... - Кулэ-а тӥледлы али кыӵе ке юрттэт, вань-а картофкады? - Картофка вань. Ӧвӧл, али номыр кулэ ӧвӧл, - пиосмуртлэн, шӧдске, вераськонэз азьланьтэмез уг поты. - Пӧя со, - Н.-ёслэн квартираысьтызы потӥз иськавынзы, - пузы соослэн воксё ӧвӧл. Гурзэс коммунальной ужасьёс тупатӥзы ик, нош толалтэлы пу кулэ. ... Квартирае ми ӧм шеде. Кышноеныз вераськыны Михаил ӧз лэзьы. Иськавынзы пенсизэ "отоварить" карем но, ваньзы ӵош кунояло тани. Соин, картофкаен, нылпиен йырин татын ӧй вал. Но трос нылпиё семьялэн бакчаяз ми пырамы ик. Отын-татын кӧня ке картофка, горд кушман, виктория, кубиста будэ ик. - Ӵуж кушман мерттӥм вал но, кынмиз, - огшоры валэктӥз кузё. Ӝыны бакча жаг турын пӧлы выемын... Больница бере нылпиос Шарканысь школа-интернатэн радъям лагере лыктӥзы. Кыкез бадӟымъёсыз соос пӧлысь татын ик дышетсконзэс азьланьтозы, нош пичиез Кизнерысь нылпи юртэ куинетӥ классэ гожтэмын ни... - Мынэсьтым юатэк, пиосылэн улонэнызы валто, - лекъяське семьялэн кузёез. Но луэ шат нылпиез сютэм улонозь вуттэм анай-атайёслы оскыны? ЗОЯ КУЗНЕЦОВА, Удмурт кун университетын дышетскись. Вормисьёслы кузьым 20-тӥ мартысен 5-тӥ июнёзь шаерамы витетӥ арзэ ортчизы ини "Экология- Безопасность-Жизнь" вазиськонэн инкуазез утёнъя нуналъёс. Соин валче радъямын вал куинь пумо смотр-конкурс. Та нуналъёсы Инкуазез утёнъя кун комитетын ужасьёс ялэм ужрадлы йылпумъянъёс лэсьтӥзы. Умоен пусъемын Глазов, Сарапул но Балезино ёросъёсысь инкуазез утёнъя комитетъёс. Ивор вӧлмытӥсь ёзъёсын ужасьёс пӧлын висъяськизы Глазовын потӥсь "Красное знамя", Дэбесысь "Новый путь" но "Нефтяник Удмуртии" газетъёс. Инкуазез утёнъя нуналъёс дыръя бадӟым юрттэт сётӥзы на Ува ёросысь Рябовка шор ёзо школаын дышетскисьёс, Воткинскысь эколого-биологической центрысь но Камбаркаысь краеведческой музейысь коллективъёс. Вормисе потэмъёслы сётэмын И-тӥ, ИИ-тӥ, ИИИ-тӥ степенё дипломъёс но коньдон кузьым. Шумпотоно, шаерысьтымы инкуазез утисьёс кӧня ке нуналъёсын гинэ уг буйгатско. Кутскем ужзэс ар ӵоже азинто. Кылсярысь, гужемлы быдэ ӟеч ужало экологияя нылпи лагерьёс. Нош нылпиос асьмелэн азьлань улонмы. Ю.Жаркова, Инкуазез утёнъя кун комитетын ужась. Калык кылос уг вуны Таӵе секыт улон-вылонмы шоры учкытэк, Ныргында гуртаы кырӟан-веран уг чалмылы. Азьвыл сямен ик шулдыртэ гуртоосмес калык кылосъя "Ныргындыш сем" ансамбльмы. Зэм, али со, азьвыл аръёсы сярысь, концертъёсын ӧжытгес шумпоттылэ. Та аспӧртэмлыко коллектив алигес пусйиз шаермылэн Советской но Мари-Турек ёросъёсаз. Вашкала ӵыжы- выжыосызлэн музъемзы вылын сётӥз кӧня ке концерт. Ваньмыз понна калык туж кужмо чабиз. "Ныргындыш сем" трос пол шумпоттылӥз ни Ижын, Сарапулын улӥсь поръёты, удмурт гуртъёсын улӥсьёсты, озьы ик - асгурт калыксэ. Концертсылэн программаез узыр но аспӧртэмлыко. Отын трос пор но ӟуч кырӟанъёсыз, такмакъёсыз, оген но тросэз эктонъёсыз. Учкисьлы тужгес яраз "Сӥзьыл шулдыръяськон". Соин но, дыр: артистъёс сцена вылэ потӥзы выль эстрада дӥсен. Нунал ортчыса, тае ик возьматӥз "Ныргындыш сем" Пичи Пургалан. Фольклор ансамбльёслэн тулыс йылолъёслы сӥзем ужрадазы ветлӥзы ошмесо шаерысьтымы трос коллективъёс. Соос паймытӥзы учкисьёсты аспӧртэм чебер дӥсенызы, зэмос устолыкенызы но пӧртэм калык йылолъёсты быгатыса возьматэменызы, соос пӧлысь куд-огез чылкак вунгэтэмын ни ке но. Та ужрад эшшо огпол возьматӥз: фольклорез калыкмы азьвыл сямен ик яратэ. Соин но, дыр, Пичи Пургалась культура юртын буш интыос чик ӧй вал. Нош кырӟась-верась усточиос пӧлын трос ини пиналъёс но егитъёс. Озьыен, калык кылосмы азьланяз оскымон киосын луоз. Вань коллективъёс пусъемын данъян грамотаосын но дипломъёсын. Туж бадӟым тау карем потэ та концертэ пыриськем усточиослы но сое радъясьёслы. Р. ТОКМУРЗИН. Фестиваль бере Куар ву пыдсы выйытозь... Финн-угор выжые пырись калыкъёс, зэмзэ но, вын-сузэръёс кадь уло. Вашкала кӧкыязы - Ватка но Кам вискысь нёжалын - котькин шедьтӥз выль тодмоос, эшъёс. Удмурт музъем вань шырытсэ но шунытсэ усьтӥз со нуналъёсы. Фестивальлэн нырысь нуналаз куноос лыктӥзы Эгра (Игра) ёросэ но. Сундурысь "Ӟардон" но Башкир шаерысь Выльгуртысь "Шулдыр ӝыт" фольклор ансамбльёс ӟеч эшъёс луизы. Куноос нырысь ик Эгралась калык творчествоя юртэ но шаертодонъя музее, собере Сундурысь удмурт культурая центре пыразы. Районмылэсь вашкалазэ утись-вордӥсь сэрегъёсын тодматскыса, вуизы ёросмылэн удмуртлыкезлэн шорсюлмаз - Сеп гуртэ. Татысь калык витем кунооссэ ӟеч удмурт сямъя - вӧйын нянен но шулдыр кырӟанэн пумитаз. Пунэме ӧз кыле лыктэмъёс но. Юнме шат ансамбльзы но "Шулдыр ӝыт" нимаське? Удмурт, бигер но ӟуч сямен чузъяськизы Сеплэн культура юртаз кырӟанъёс. Куноос гинэ ӧвӧл, гуртоос но нёжтӥзы сьӧразы. Нош В.Халиков залысь кыксэ арлыдо кышноосты но бигер эктонэ поттӥз. Выльгуртъёс возьматытэк ӧз кельтэ асьсэ палась сюан йылолзэс но. Со сяна, туала эстрада кырӟанъёссэс кузьмазы. Турлы сяськаосын сыръясь возь выл кадь луиз концертсы. Но котькыӵе шулдыр ӝытлэн пумыз вань. Лэзёзы шат сепъёсмы озьы гинэ, асьсэлэсь пӧзьтэм аракызэс но ческыт пӧраськемъёссэс веръятытэк?.. Нош сюрес вылэ шедись Михайловка гуртысь мӧйы нылкышноослы та пумиськон укыр вакчи потӥз, шӧдске. Эсьмаса, огез машинаысен йыркуръяськем но кариз. Собере пичияк аракыеныз куноятыса, "ина- ина-нюк-нюк" карыса эктыны кутскиз ук! Зэм, туж уг пот вал сеп палъёслэн куноосынызы люкиськемзы. Нош мар карод... Пеймытын векчи кыдырась зор нош ик котыртӥз куноосмес. Уйшор вадес ини сюрессы нош ик Сундур гуртэ вуттӥз. Татын соосты эштос правленилэн юртаз "ӟардонъёс" сиён-юонэн тырмытэм ӝӧкен кемалась возьмало ни вал. Куноосын ӵош лыктэм тӧро, "Дэмен" колхоззылэн председателез Р.Галямшин, часлэсь ятыр ум ни ӝегатске шуиз. Нош сундуръёс сепъёслэсь пӧртэм вылӥллямтэ. Соосыз но, таосыз но шырыт сямынызы быдэс ёрослы тодмо луо. Кырӟанъёсын но эктонъёсын бергась коже шедемъёс озьы гинэ отысь потыны ӧз ни быгатэ. Уйшор бере гинэ, куинь час котырын, кыдёкысь Татышлы ёросысь лыктэмъёс вырӟизы кузь сюрес вылэ. Люкиськон котьку но мӧзмыт луэ. Но юнме шат, эшлыко улонлы гимн музэн, фестиваль нуналъёсы уно пол чузъяськылӥз "Ум люкиське" кырӟан. Зэм но, уз люкиське "ӟардонъёс" но "шулдыр ӝытъёс" "куар ву пыдсы выйытозь но из ву вылэ лӧптытозь" - котьку но соос ог- огзылэн тодэ ваёнъёсазы, сюлэмъёсазы улозы. Нош со тодэ ваёнъёс чебересь, шунытэсь, зор бере инбамын воректэм вуюись кадь ворпоесь... Андрей Клементьев, Удмурт университетын дышетскись. КАЛМЕЗ КУЗЯ 7. Сюмси тылси И. Ёрос кузёлэн ымныраз жадем тус пыӵамын. Ма, кызьы-о таӵе югдурын уд чусомы? Кытчы гинэ уд учкиськы, котькытын - шуг-секытъёс. Кин малпа вал, кылсярысь, эстӥськонэн таӵе шуге-леке шедёд шуыса? Азьло аръёсы бензинэз хозяйствоосъя цистернаосын люкылӥзы, кылем арын - тоннаосын. Нош туэ - вышкыосын. Кӧня ке коньдон люкаське ке, сое келяло Ува нефтебазае. Озьы гуртоос нош быдэс 200-300 литрен эстӥськон басьтыны быгато. Луд пумын сылӥсь комбайнъёс выльысь гуретыны ӧдъяло. - Ладтэм экономика вӧзы мыдланьяськись куазед но итӥське на ук, - чигиське Валерий Рассомахин. - Берло куинь арзэ ини Калмез сьӧрысь хозяйствоос ӟеч урожай уг адӟо: вань будэмез но шунды шорын пыже. Тани туэ 3 сюрс гектарлэсь уно юосты списать карытэк ӧвӧл. А кытчы-о пырод? Умой коть соиз: интыосын табере асьсэос золгес бызьыло, югдурез валасьёсыз косэмез витьыса уг уло. Тодӥсько на, обком вазен весь ӵектэ вал чабей, сьӧдчабей кизьыны. Гурт кивалтӥсьёс, олокыӵе но муг шедьтыса, со верамъёсты санэ ӧз басьтэ. Нош али куинь-ньыль ар ӵоже ни асьсэос та культураосын выро. Пайдазэ шӧдӥзы уго. Озьы ик етӥнэн. Тани вань паймымон кышномуртмы - Ева Промышленникова. Со Гураысь хозяйствоен кивалтэ. Кӧня ке дасо гектар етӥн чотын дышиз табыш поттыны. Куазь тупасал на ке... Сюмси ёросысь нянь будэтӥсьёслэсь ужамзэс возьматӥсь лыдпусэз верам ик уг поты. Со туж пичи. Но эн малпалэ, гуртоослэн урод ужаменызы гинэ озьы луэ шуыса. Ӧвӧл, озьы ӧвӧл. Татын, зэм но, музъем туж начар. Луо вылын трос уд будэты. Тужгес но али, куке муосты узырмытыны амал ӧвӧл. - Эштосъёсмы пудо сюдон тысьтэк кылемын, - вера гурт хозяйствоя управлениен ог дас вить ар ӵоже ни кивалтӥсь Юрий Соковиков. - Туэ югдур туж секыт. Куинез гурт кузёосмы али бускель республикаосы кошкемын, ю-нянь утчало. Администрацилэн йырыз ужпум шоры паськытгес учке. Быдэс Удмуртиын но фураж туэ уз тырмы бере, маке но мукет малпано, шуэ. Кылсярысь, эскероно вылэм, нюлэсэз ю тысьлы воштыса. Сыӵе сюрес ӵектӥсьёс вань. Китаен но та пумысен вераськыны луоно. Рассомахин дэмланъёссэ асьме правительствое вуттӥз ни - табере отын сюлмаськыны кулэ. - Сюмсиын гинэ трос нюлэс дасяны луысал, - Валерий Платонович лыдпусъёсын документъёссэ поттэ. - Милемлы ар ӵоже 350 сюрс кубометр тэль дасяны лэземын. Ёрос кора ог 100 сюрс. Кылемзэ быгатысалмы республикалэн ю тысьлы кулэяськонъёсыз понна сётыны. Майбыр вакытэ (озьы шуо кадь табере 70-тӥ аръёсыз?) сюмсиос ог 2000 гектар картофка будэтылӥзы. Туннэ - 75. Лыдъязы-а, кӧня пол сюбегаз картофка бусы? Тӥни озьы. Азьло вакытэ "кыкетӥ нянез" вылӥысь сётэм адресъёсъя олокытчы но келяло вал. Со кусыпъёс ышемын. Выльёсыз шуген кылдо. Тани кылем арын Лялиноысь фермеръёс урожайзэс Свердловск улосэ келязы. Со понна басьтӥзы кортӵог, шифер но... бадӟым изъян. Пӧязы гуртоосыз. Таосыз сыӵе учыръёслы дышыны но кулэ кадь ни но (государство ачиз но арлы быдэ крестьянъёссэ алда ук!), саесъёсты пужалляса ужан мылкыдэз таӵе югдур уг пуромыты. ИИ. Школаын берпуметӥ арзэ дышетскыкум, ми доры практикае ыстӥзы Удмурт университетысь студентъёсты. Классэнымы кивалтыны оскизы Людмила Эверевалы (табере фамилляез Кириллова луиз, тодмо учёноёзь будӥз). Нош бускель класс шедиз Галина Кабанова кие. Ӵапак со дырысен чакласа возисько та визьмо удмурт кышномуртлэсь улон сюрессэ. Школаын дышетӥсь, ёрос газетлэн редакцияз ужась, колхозысь партбюролэн секретаез... 1990-тӥ арын Зон гуртысь ваньбур поттӥсьёс Любимова луэм Галинаез асьсэлы предэ бырйизы. Дӥсьтӥз ук. - Колхозмы "Звезда" нимаськиз, - тодаз вае Галина Сергеевна. - Нимызъя котьку азьпалан луыны кулэ кадь. Нош ми вань сводкаослэн пумазы возиським. Ӵап сокугес Вань удмуртъёслэн нырысетӥ ӧтчамзы ортчиз, асьме калык йырзэ ӝутыны ӧдъяз... Дэмлай колхозмес "Кенеш" эштос карыны. Бен, вал пумитъяськисьёс но. Татын уго удмурт шоры учкон сыӵегес. Зон калыкен кышномурт кивалтыны кутскем бере, хозяйстволэн нимыз гинэ ӧз воштӥськы. Мукет луиз солэн тусыз но. Лэсьтӥзы спортзал, пилорама, столовой, ыж гон тугон цех, нылпи сад. Син азьын ӝутскиз йӧл кыскон. Уно аръёс ӵоже ӟырдыт ужлэсь шӧмзэ вунэтэм муртъёс гизьыртыны кутскизы: вуиз татчы юбкаен кузё, нокинлы но маза уг сёты... Сыӵеос вӧзы итӥськизы дисциплинаез тӥямзы понна председательлэсь кыл кылэм муртъёс. Отчы но татчы лобизы "сьӧд" гожтэтъёс. Ёрос кузёос нырысь-валысь соосты кылэм-адӟем ӧз карылэ - хозяйстволэсь гурезь йылэ вамыштыны кутскемзэ республикаын но синйылтӥзы ни ук. Кӧня лулпуш кужымзэ сюпсизы ӧжыт ужась но трос зулись адямиос, созэ Любимова ачиз гинэ тодэ. Туэ тулыс тушмонъёсызлэн урамазы праздник вуиз - Галина Сергеевна интые пуктӥзы нимысьтыз дышетскымтэ муртэ. Ортчиз толэзь, кык. Гуртоос огзы бӧрсьы огзы вуылыны кутскизы азьло кузёзы доры: оло, пе, берытскод интыяд ик, а то не уж ӧвӧл ни, не уждун уг сёто. Сельхозуправленилэн кивалтӥсез но кӧня ке пол со выллем ик куронэн вазиськиз ини. Но поезд кошкиз. - Мон дышемын калыкен ужаны, - лулӟе Галина Сергеевна. - Но азьтэмъёсын, пичи нуныосын сямен, вырем уг поты ни. Али фермер хозяйство кылдытӥсько. Парсь вордо. Огнам секыт луоз, валамон. Соин ик мыло-кыдооссэ гуртоосме бордам куто. Бен, выль удыс капчиен уг сётскы, туала вакытэ котьмар дуно уго. Озьы ке но, нырме ошыны уг малпаськы. Любимовалэн озьы верамезлы мон уг но паймиськы. Абдрасал, со мукет мылкыдын улысал ке. Галина Сергеевна - Сюмси ёросэз югдытӥсь шуизы тылсиос пӧлысь одӥгез. ИИИ. Мукетыз сыӵе тылси, мон сямен, Анатолий Медведев. Тазэ пыртыны луоз "выль ӟучъёс" пӧлы. Ӧвӧл, улон манерезъя ӧвӧл. Лэсьтэм ужъёсызъя. Кӧня ке ар талэсь ёросысь фермеръёс таӵе малпанэ вуизы: малы кулэ Ува йӧл заводлэн кивалтӥсьёсызлы йыбыртъяса улыны, ойдолэ асьмелы нимаз цех кылдытом. Озьы вордскиз "Лактан" огазеяськон. Туннэ татын ог 50 мурт ужа ни. Огазьын - скал ферма но йӧл цех. Нырысетӥ люкетаз йӧл потто. Нунал ӵоже чакламын ог 6 тонна продукция лэсьтыны, кык сменаен ужаса потто даслэсь трос. Ваньзэ сямен келяло Иже. Ма, Сюмсиын но нимаз лавказы вань. Но отын басяськисьёс уно ӧвӧл - уго туала дыре гурт калык ачиз скал возьыны тырше. Та нуналъёсы ужаны кутске цехысь кыкетӥ линия. Татын лэсьто кефир но йӧлвыл. - Йӧл басьтӥськом Киров улосысь, - вера валтӥсь технолог Нина Кудрина. - Малы? Шуг вераны. Районысьтымы хозяйствоос продукцизэс келяло Увае я "Ижмолокое". Тӥни озьы. Огласянь учконо ке, рынок вакытэ отын номыр валантэмез ӧвӧл. Котькудӥз утча аслыз тупамон сюрес. Озьы ке но, озьы ке но... Весь шуиськом, Россиын коньдон уг тырмы. Нош кызьы луэ улонын? Сюмсиын кема аръёс ӵоже ужаз Ува заводлэн филиалэз. Умой ужаз. Ваньмыз отын радъямын ни вал. Нош туннэ сотэк сылэ, отысь тӥрлыкез но тус-тас каро ни. - Вазиськылӥм та пумысен олокытчы но, - вера Юрий Соковиков. - Валась ӧз шедьы. Кышказы, лэся, барышсэс ыштозы шуыса. Оло, ӧз но оске, вылды, ӝог гинэ выль цех ӝутскоз но ужаны кутскоз шуыса. Россиын улонэз малпаса радъясалзы ке, государство биньгозыез кияз возьысал ке, озьы лэсьтысалзы шат? Зэмос кузё азьлозэ улыны ярамон юртсэ аналтысал но чылкак выльзэ пуктысал шат? Нош асьмеос... Эк-эк-эк... ИВ. Удмурт Вишорка гуртэ (со интыяськемын Калмез ярдурын) нуназе котыр вуим. Кӧня ке гинэ корка сылэ на. Син шоры йӧтэ йылаз-пумаз вуттымтэ выль гид. Урам кузя киязы сумкаен кык пиос вамышто. Дугдӥм. Тодматским. Огезлы 42 арес, кыкетӥез алигес армиысь бертэмын. Буш ӟенелик бичаса, магазинэ мыно вылэм. - Милям ужмы ӧвӧл, безработнойёс ми, - мыньпотыса вера одӥгез воргорон. - Нош кызьы улӥськоды? - Хм-м... - котырак вӧлскиз макмыр зын. Вишоркае бригадамы фермеръёсты утчаса кожиз. Пумитамы шедем пиосты ик курим соослэсь юртъерзэс возьматыны. Огшоры корка. Вадьсаз - бадӟымгес юрт. Отын куке но клуб вылэм. Табере - Сергей Шкурскийлэн мастерскоез. Ульча шорын пӧртэм пулъёс тыремын. Пуны утэмез кылыса, азбарысь потӥсь луиз. Вера Евгеньевна туннэ огназ. Кузпалыз Воткинске кошкем договор гожтыны. Огназ шуэмысь чылкак озьы ӧвӧл. Анаез сьӧры кыре потӥз пичи нылаш. Люби со. Мумы-бубыез, Юра агаез Кубаньын вордскемын-улэмын ке, таизлэн свидетельствояз Сюмси район пусъемын. Озьыен, родина шуон солы Калмез палъёс луо. Шкурскийёс та огыр-бугыр дуннеын асьсэлэсь интызэс шедьтӥзы, шуыны луоз. Кыдёкысь Удмуртие, ай отысь пыдлось ёросэ вуыса, соос нюлэсо шаерын радъязы ныд поттон. Асьсэос писпу корало, пилорама пыр лэзё, бӧрысь ини нимысьтыз станокъёсын ньыль сэрго бруслэсь котырес боды потто. Со яра лопатэз но мукет тӥрлыкез ныдъяны. - Толэзь ӵоже 2000-3000 ныд лэсьтӥськом, огзэ 5-7 манетэн сётӥськом, - вера Вера. - Бен, бызьылонэз трос люкаське. Уго басьтӥсь асьмелы утчано луэ. Я хлебозаводэн, я кыӵе ке мукет предприятиен кенешиськом. Соосыз кирпичен, макаронэн, мукет вузъёсын берыкто. Ми нош выль басьтӥсь шедьтыны кулэ. Озьы ик бергаськом. Пулэн выремзы сяна, кузпалъёс 9 гектар турын, гектар картофка будэто на. Доразы кролик вордо. Кылем арын ӵыжы-выжыосынызы луэм учыръя дор палъёсазы уртче кошконо луиллям. Гидзэс гуртысь пиосмуртлы кельтӥллям. Нош соиз... Огъя вераса, кроликъёс ваньмыз сямен быриллям. Секыт мылкыд кельтӥз та пумиськон. Огласянь шумпотоно, адямиос асьсэлы уж шедьтӥллям шуыса. Мукет ласянь... малы, малы татын вордскем-будэм таза воргронъёс ужтэк пуко? Кизы но, йырзы но вань кадь ук. Бен, чыртызы но вань на. Мар бордын ужпум? Кызьы юрттоно асьме калыклы рыноклэн мур кожаз выёнлэсь утиськыны?.. Иван Лебедев (текст.), Георгий Юсаев (фото), Леонид Прозоров (суред.), Виктор Белов (авто). Администрацилэн кивалтӥсез В. Рассомахин. Г. Любимоваез журналистъёс котыртӥзы. Н. Кудрина - "Лактанысь" технолог. Вера Шкурская дорын. Россия Федерациысь Федеральной Собранилэн Кун Думаяз депутатэ кандидатъёсты быръёнъя окружной комиссиосты кылдытон сярысь ивортон "Россия Федерациысь Федеральной Собранилэн Кун Думаяз депутатъёсты быръён сярысь" Федеральной законлэн 20-тӥ статьяезъя Удмурт Республикаын кылдытӥське быръёнъя кык окружной комиссия: быръёнъя одӥг мандатэн 29 номеро Ижевск округ но быръёнъя одӥг мандатэн 30 номеро Удмурт округ. Удмурт Республикалэн Кун Кенешез но Правительствоез дэмлало быръёнъёсъя огазеяськонъёслы, блокъёслы, калык огазеяськонъёслы но ас коже кивалтон ёзъёслы, 1999 арын 15 сентябрьлэсь бере кыльытэк, та окружной комиссиосы кандидатъёсты ӵектыны. Ӵектонъёсты сётоно Удмурт Республикаысь Кун Кенеше но Правительствое. Удмурт Республикаысь Удмурт Республикаысь Кун Кенеш. Правительство. Россиысь прессалэн "Вся Россия-99" ИВ фестиваляз пыриськисьёслы Гажано эшъёс! Россия Федерациысь Правительстволэн нимыныз фестивале пыриськисьёслы сӥзисько ӟеч ужан мылкыд. Ижевске люкаськизы быдэс странаысь журналистъёс. Оскисько, асьтэ удыстыя гинэ ӧвӧл, вань обществомылэн улон-вылонэз сярысь бадӟым вераськон ӝутоды. Экономикаысь шуг-секытъёсты вормон, политика югдурез огсыр возён, нимазъяськон- люкиськон мылкыдъёсты палэнтон - ваньмыз со прессалэн, радиолэн, телевиденилэн но ужъёсынызы герӟаське. Эшшо но шонергес, котькуд журналистлэн улон шоры учкеменыз, ужа-а со районын потӥсь пичи газетын, яке шоркарысь телеканалын дасо миллион адямиосын вераське. Ми валаськом, выль Правительстволэн ужъёсыз умой ӧръяськозы, солы калык дурбасьтӥз ке. Кызьы валэктоз-возьматоз пресса, сыӵе ик луоз калыклэн мылкыдыз. Азьлане улонмылэн сюресэз, реформаослэн азинскемзы бадӟым люкетэз журналистъёс бордысь потэ. Оскисько, уноез тӥ пӧлысь "ньылетӥ властьлэсь" кужымзэ шӧдэ-вала но сое ӟеч ужъёсы ӧръяны тырше. Россия Федерациысь Правительстволэн Тӧроез В. Путин. ВАЛЭКТЭ ЮРИСТ Сэрегез дася адвокат Лилия ШКЛЯЕВА Мар со ИНН? Газетын потэм материалэ понна гонорарме уг сёто. Кыӵе ке ИНН кулэ, пе. Мон нокытын уг ужаськы, соин со номерез кызьы басьтыны уг тодӥськы. Малы но кинлы кулэ ИНН? А.Петров. Одӥг политик но туэ уг вунэты налог сярысь вераськонэз. Кин, кӧня но кытчы выт тырыны кулэ? Сое радъян вылысь, 1996-тӥ арын 1-тӥ сентябрьысен адямиосты (физической лицоосты) но лыдэ басьтыны кутскизы. 1998-тӥ арын 1-тӥ октябрёзь отчы сюрылӥзы ас кожазы ужась нотариусъёс но ужбергатӥсьёс (предпринимательёс). Табере пусйиськыны кулэ ваньмыз налог тырисьёс. Соослы сётӥське ИНН - ӟуч сямен: идентификационный номер налогоплательщика. Та сярысь верамын Россия Федерацилэн Налогъя кодексаз (кутэмын 1998-тӥ арын 31-тӥ июле), "Налог тырисьёсты лыдэ басьтон ужрадъёс сярысь" Удмурт Республикалэн Законаз (кутэмын 1997-тӥ арын 23-тӥ декабре) но та законэз улонэ пыӵатон сярысь Удмурт Республикаысь Правительстволэн положенияз (юнматэмын 1998-тӥ арын 11-тӥ сентябре). Вылӥ верам документъёс куро: Удмурт Республикаысь адямиосты пусъё улон интыысьтызы налогъя ёзъёс. Куд-огез та ужрадэз лыдъя эриксэ тӥянэн. Шонер ӧвӧл сыӵе малпан. Адями мед улоз кытын мылыз потэ, нош налогъёссэ одно ик мед тыроз. ИНН басьтон понна, нимаз адями налогъя ёзэ сётэ нимысьтыз курон (заявление). Ужась муртъёслы та ласянь юрттозы бухгалтериязы. Налогъя инспектор учке адямилэсь кытын улэмзэ (прописказэ яке регистрацизэ). Тӥледлы гонорар сётытэк, бухгалтерия шонер лэсьтэм. Кинлы кылёз сад-бакча? Ӵыжы-выжыосылы завещание гожтыса кельтыны малпасько юртме, гаражме но сад-бакчаме. Нош сад-бакчаме люконо ваньбур пӧлы ӧз пыртэ, сое, пе, мон аренда лэсьтыса возисько. Шонер-а веразы? И.Заколюкин. Шонер вераллям. Мукетъёсызлы наследство чотын кельтыны луэ асваньбурез (собственностез) гинэ. Нош сад-бакча - со нырысь ик арендае басьтэм музъем кесэг. Тӥ, Заколюкин эш, сое уже кутӥськоды но отысь пайда поттӥськоды, но сыӵе кесэген пырак но весяк уд кузёяськиське. Югдурез тӥ пала "куасалтыны" амал утчаны луэ, дыр. Музъем сярысь законодательство пусъе: "Арендаын музъем кесэг возись гражданъёслэн правозы вань сыӵе кесегъёсты законодательствоя басьтыны асваньбуре". Зэм, таӵе ужен тросэз ик уг выро, малы ке шуоно, со - ӝегыт но секыт ужпум. Лушкам машина басьтӥд ке... Юн вужмымтэ но чебер машиналы синмаськи базарын. Дуныз укыр пичи потӥз. Басьтыны медӥсько вал - эше алӥз: машина лушкамын ӧвӧл меда? Мар луысал, мон сое басьтысал ке? А.Топоров. "Валэктэ юрист" сэрегын шуг сётыны "сал" пумын кылъёслы валэктон. Вузан-басьтон ӧй вал бере, солэсь бервылъёссэ тодыны шуг. Озьы ке но, ойдолэ куд-ог учыръёсты эскером. Шуом, автомобиль лушкамын вал. ГИБДД-ын (азьвыл ГАИ-ын) регистрациез ортчыкуды, та сярысь ӧд тодылэ тӥ но, инспекторъёс но. Умойтэм учыр шараяськем бере, тӥлесьтыд машинадэс талазы. Тӥ али быгатӥськоды искен (куронэн) вазиськыны вузасьлы. Россия Федерацилэн Граждан кодексысьтыз 461-тӥ ёзэт (статья) валэктэ: "Басьтӥсьлэсь вуззэ вузан- басьтонъя огкыл азьын вылэм учыръёсъя талаку, вузась берыктыны кулэ басьтӥсьлы таизлэсь адӟем изъянзэ, вузась ӧз ке оскытыны быгаты, басьтӥсь сыӵе мугъёсты тодӥз яке тодыны кулэ вал шуыса". Шуом, тӥлесьтыд машинадэс ӧз талалэ на, но та пумысен тӥледлы искен вазиськизы ни. Соку тӥ та ужрадэ кыскиськоды вузасез но. Озьы ӧд лэсьтэ ке, со, оло, кыл кутонлэсь но мозмоз, вылаз ик, тазьы оскытыны быгатӥз ке: со амал шедьтысал машинаез утьыны таланлэсь (РФ-лэн ГК-ысьтыз 462-тӥ ёзэт). Тӥ быгатӥськоды искен вазиськыны Сюрес вылын кышкытлыклэсь утиськонъя кун инспекцие. Автомобильёсты но прицпеъёсты пусъёнъя куронъёс (правилоос) валэкто: инспекция тупатъянъёсты яке янгышъёсты шарая ке документъёсысь, кунпусъёсысь (госзнакъёсысь), документъёсты ӝегатэ но югдурез утёнъя ёзъёсы ивортэ ужрадъёс кутон вылысь. Кун инспекциос утьыны кулэ транспорт возисьёслэсь кулэяськонъёссэс, соос мед нюръяськозы машина вузан-басьтонын законэз тӥянлы пумит. Шӧкыч Мынам телевизоре Кизнер ёросысь Васильево черкогуртын одӥг нуналэ автомобильзы тӥяськиз. Кыӵе ке пичи ёзэз гинэ "стройысь" потэм вылэм. Сое утчатозязы туннэ нуналлы грузовик таин таӵе кылиз... В. БЕЛОМОРСКИХЛЭН туспуктэмез. Улон корка пуштӥз 9-тӥ сентябре выжон уе Москваын уон корка пуштӥз. Плита юдэсъёс улэ сюлэсь ятыр адямиос кылемын. Та дырлы одӥг валэктон гинэ вань ай: одӥгаз квартираын газ пуштэм, пе. Но талы шуг оскыны. Вань мукет но малпан. Таиз юри лэсьтэм йыружен герӟаське но нюжаез Кавказ пала кыстӥське. А. АНДРИЯНОВ. Ужъёс, ужъёс 7-тӥ сентябре ортчиз Удмурт Республикаысь Кун Кенешлэн Президиумезлэн заседаниез. Президиумлэсь ужзэ усьтыса, Кун Кенешлэн Тӧроез Александр Волков пусйиз, 7-тӥ сентябрез лыдъяно "Шкода-авто-Удмуртия" ӵош ужась предприятилэн вордскем нуналэныз. Ӵапак та нуналэ Кун Кенешлэн Тӧроез "Шкода-авто-Удмуртия" АО-лэн валтӥсь директорезлы Богдан Войнарлы сётӥз та предприятиез пусъем сярысь свидетельство. Чехиысь Удмуртие лыктэм специалистъёс ужаны кутскизы ни "Ижмаш" акционер огазеяськонын. Александр Волков Президиумысь ужасьёсты тодматӥз Россия Федерациысь министрлэн Рамазан Абдулатиповлэн ыстэм телеграммаезлэн пуштросэныз. Отын вераськон мынэ Дагестанын кылдэм югдурен валче та республикалы юрттэт курон сярысь. Кун Кенешлэн Президиумез юнматӥз лэсьтӥськонъя, национальной политикая но интыосысь аскивалтонъя Кун Кенешлэн ялан ужась комиссиез сярысь положениез, "Камбарка ёросын интыын ас коже кивалтонъя Уставаз" воштонъёс пыртон сярысь постановление кутӥз, Удмурт Республикаын кышкытлыклэсь утиськонъя общественной Советэзлэсь составзэ юнматӥз но пыӵал тӥрлык кылдытонъя дано конструкторлэн Михаил Тимофеевич Калашниковлэн вордскемез дырысен 80 ар тырмонэзлы дасяськонъя ужрадзэ юнматӥз. Заседаниын эскеремын вал мукет ужпумъёс но. Удмурт Республикаысь Кун Кенешлэн пресс-службаез. Чаклаське - "Сигнал" Удмурт Республикаысь Югдурез утёнъя министерство, йыружъёсын нюръяськон но соосты алон вылысь 2-тӥ-9-тӥ сентябре Ижевскын "Сигнал" ужрад ортчыэ. Эскериськозы уно калык люкаськон но вузкарон интыос, учкемын луозы паспортъёс, пыӵал-тӥрлык возёнэн герӟаськем ужпумъёс но трос мукетыз. Ижевскысь милициын ужасьёслы юрттон вылысь, ёросъёсысь 450 милиционер вуэмын. Премиос ласянь Промышленностьын, лэсьтӥськонын но гурт хозяйствоын туэ бадӟымесь азинсконъёс басьтэмзы понна, Удмурт Республикаысь Правительстволэн Премиезлэн лауреатэз луон вылысь ӵектонъёсты но дэмланъёсты кутон мыноз туэ 1-тӥ октябрёзь. Вазиськоно таӵе адресъя: 426007, Ижевск город, Правительстволэн юртэз, 114 номеро комната. Юалляськоно 52-53-38 телефонъя. Удмурт Республикаысь Правительстволэн Тӧроезлэн секретариатэз. Галина РОМАНОВА Бизнес усьтӥсько вал... Серемес верос Кышноеным ми заводын ужаськом. Азьвыл умой улӥм. Уждунмы сиыны-юыны но, дӥсяськыны но, сберкассае люканы но тырмылӥз. Ма, машина но басьтӥм вал ини. Ӵок, со вакытэз тодам трос вайыса уг улы ни. Улон воштӥське, адямилы но соя воштӥськыны кылдэм, пе. Заводын уждунэз ӝыны арын ӝегатъяны кутскемзы бере, умой-умой малпаськыны кутски азьпалан улонмы сярысь. Отчы но, татчы но учкылӥсько-чакласько: магазинъёс, офисъёс, баръёс, кафеос зор бере чургуби сямен йылыны-будыны-усьтӥськылыны кутскизы. Кунгож сьӧр машинаос но город урамтӥ кузьыли мында бызьыло ини. Иське, калык ужа, малпаське, шедьтэ, лэсьтэ. Ми нош маин соослэсь пӧртэм. Инмарлы тау, мемей-дядяй ки но, пыд но, йыр но, мугор но сётэм. Азьтэмед гинэ аслэсьтыд бадӟым медаз лу. Кышноме ал вылам пуктӥ, ӟыгыртӥ но шуисько: - Лидуше, маин-о асьмеос мукетъёсызлэсь пӧртэм? Айда-ка бизнес усьтом. Лидуше пумит ӧз лу.Картошка но нянь вылын пукыса, пе, вышкы зӧкта луиськиз ини. Малпаськыса пукиськом, мар бордысен кутскыны. Пумен аслым ачим шуисько: котьмар ке но, туала улонлэн ӟеч палыз но вань: воля луиз-котьмар кар-лэсьты-ужа. Азьвыл шуо вал: кионэз пыдыз сюдэ, табере кионэз пыдыз но, йырыз но сюдэ. Киоскысь ялонъёсын газетъёс басьтӥ. Оло, отысь маке кулэзэ шедьто. Шедьтӥ ведь: спирт поттон пичи завод, пе, вузаське. Басьтэм дуныз кык арскын берытске. Нош собере... пайдаез котькуд ар куинь-ньыль пол будэ. Лидушме кутӥ но, ну бергатӥсько, ну бергатӥсько. Шумпот, шуисько, картэд таӵе визьмо шуыса. Собере юасько: - Лидуше, бизнес мар бордысен кутске. - Коньдон бордысен. - Бен. Нош асьмелэн со вань-а? - Ӧвӧл. - Ӧвӧл бере, лэсьтоно. - Кызьы? - Корка пушмес котыр учкы ай, маиз али отын мултэс кадь потэ? - Вералод но ини - ваньмыз интыяз. - Нош шифоньерын? - Отын но. - Умойгес учкы, йырыныд бергаты ай. - Ой, визьме сокем эн туга, вера ни. - Туннэ куазь кыӵе-о? - Тулыс. - Иське, толалтэозь тыныд чагыр кеч шубаед кулэ уз луы. Сое вузалом. - Нош толалтэ маин ветлод? - Ог-кык арзэ вуж пальтоед но чидалоз али. Нош шубаедлэсь дунзэ со дыр куспын кык- куинь поллы берыктом. Лидуше ымдурзэ куртчылӥз ик но пумит номыр но ӧз вазьы . - Спирт поттон пичи заводлы, Лидуше, кулэ луоз сакыр песок. Эшшо котыр учкылы на ай корка пушмес. Матэк-о асьмеос кык-куинь арзэ улыны быгатом? - Ма, ваньмыз кулэ кадь. Эх, малпасько, та кышномурт визь - вись кузьда, пыд азьзэ гинэ адӟе. - Малы, - шуисько, - асьмелы кулэ луоз на телевизор но, видик но, магнитофон но. Сад-бакчаямы спирт поттыса улом ук. Лидуше узыри кадь луиз: коркатӥ солань-талань, азьлань-берлань ветлэ, тани-тани бызгетоз. - Дугды ай, - шуисько, - кӧй-вӧй пӧлын уямед, чайы, чагыр ӟичы шуба нуллэмед потэ-а? - Потэ, - шорам учкытэк гинэ шуэ Лидуше. - Потэ ке, пуксьы вӧзам, кылзы картэдлэсь. Лидуше каллен гинэ пуксиз, нош йырзэ мынэсьтым палэнтыса возе. - Берытскы, - шуисько, - учкы картэд шоры. Бизнес - со сыӵе маке. Кутсконаз макем трос коньдон понӥд, сокем тросгес барышед луоз.Поттэм спиртмес вузан понна кулэ луоз на пичияк лавка усьтыны. Соин ик асьмелы та пичи квартирамес но вузано луоз на. Кык- куинь арзэ сад-бакчаямы улом. Лидуше берытскиз но шорам лек ош синъёсын чилектӥз ук! Мон сое ӟыгыртӥ, гадь бордам ӝиптӥ но шуисько: -Яратӥськод-а монэ? - Яратӥсько-о-о-о, - бызгетэ ини Лидуше. - Яратӥськод бере - оскиськод-а? - Ӧйтод, - эшшо золгес бызгетэ Лидуше. - Оскы, мон тынад картэд. Асьмелы уродзэ лэсьтыны уг малпаськы. Вала ук, кык- куинь ар ортчыса, асьмеос но кунгожсьӧр машинаен ворттылом, вӧл-вӧл бадӟым коркан улом, Лидуше бӧрдэмысь дугдӥз, бордысьтым лэзькиз но султыса кышнопалаз кошкиз. Керӟегъяськыкуз со котьку но озьы лэсьтэ. Уг люкетӥськы, мед ойдо буйгалоз. Буйгаз ке, ӟечгес малпаськоз но мынэсьтым шонерме валалоз. Сыӵе со мынам: пирсэкъя, керӟегъяське но монъя ик кариське. Ӟеч кышномурт картсэ дунъяны кулэ. Пукисько, Лидушме витисько. Маке кема гинэ кышнопалаз улэ ни. Ӧй чида, дораз мынӥ. Кышнопал ӧсэз усьтӥ гинэ но, йырам клёп! Шуккизы. Интыям ик уси. Сайкай но - ымныр вадьсам Лидуше пальпотэ. Султы, мусое, шуэ, султы. Кемагес, пе, ини кыллиськод. Ачиз бамме маяллля, чупа. - Мар-о вал со, Лидуше? - юасько. - Кытын? - Кин монэ шуккиз? - Бизнесэд шуккиз, мусое, бизнесэд. Тӥни, мын но вераськы кышномуртъёсын. Кылдымтэ ини соослы улонэн ӵош вамышъяны. Шуисько ук, визьзы вись кузьда. ШӦКЫЧ Шуныттэк, тылтэк, тупатъятэк Кизнер ёросысь уноезлы егитъёслы вуоно сӥзьыл-тол уйёссэс ферма коркаосын ортчытоно луоз, дыр. Дас куинез клубъёс тупатъямез витё, куатез куашкан калэ вуэмын. Мӧзмыт потоз Батырево, Шор Тыжма, Вуж Омга, Мари-Сарамак но Вуж Копки гуртъёсын улӥсьёслы. Отысь клубъёслэн вӧлдэтъёссы тани-тани куашкалозы ни. Нош тупатъяны коньдон уг шедьы. Азьланяз но уз ни шедьы, дыр... Дас витяз культура юртъёсы электрокужым вуэмысь дугдӥз. Культура удысын ужасьёслы тырмыт уг висъяськы эстӥськон но. Мар кыле на егитъёслы? Юон, кыскон, калгон? Н.Трофимов. Правительствоын Правительстволэн кенешаз эскеремын Удмурт Республикалэн куд-ог законъёсызлэн проектъёсыз. Кылсярысь, правоез тӥям куд-ог учыръёс понна административной кыл кутонэ кыскон сярысь, кун ваньбурлэсь объектъёссэ таланы лэзёнтэм сярысь, кун ваньбурез кузёослы вузанъя программаез юнматон сярысь но республикалэсь кун ваньбурзэ Кун Кенешлэн лэземезъя басьтон сярысь. Та документъёс выльысь эскеремын луозы на Кун Кенешлэн сессияз. *** Калыкез уже интыянэн герӟаськем ужпумъёсты радъян вылысь кылдытэмын нимысьтыз комиссия, кытчы пыро профсоюзъёслэн федерациысьтызы, уж сётӥсьёслэн огазеяськонысьтызы но Удмурт Республикаысь правительстволэн адямиосыз. Комиссиен кивалтозы Правительстволэн Тӧроезлэн воштӥсез Сергей Чикуров но Ужъя кун комитетлэн кивалтӥсез Сергей Фефилов. * * * Йӧллы но йӧл сиёнлы тупатэм дунъёс сярысь Правитетельстволэн азьвыл кутэм постановлениез дугдытэмын, рынокын йӧл сиёнлы дунъёс асэрказ радъяськемен но дунтэмгес луэмен сэрен. *** Удмуртиысь 16 предприятие, со пӧлын 9 бадӟымез, пыриськоз "Нижегородская ярмарка" адӟытонэ, кудӥз ортчоз 8-13 сентябре. Удмуртиысь делегациен кивалтоз Правительстволэн Тӧроезлэн воштӥсез Николай Хохлов. *** Воткинскысь "Мастер" фирма лэсьтӥськись организациос пӧлын лыдъямын Россиысь устоосыз пӧлын. Странаын ортчем ӵошатсконын со пусъемын И степенё дипломен. "Мастер" фирмаен кивалтэ Юрий Бычков. 130 умой лэсьтӥськись предприятиос пӧлы озьы ик пыртэмын "Удмуртнефтестрой" огазеяськон но Кизнерысь сюрес лэсьтонъя управление. Ижевскысь ячеистой бетон поттӥсь завод пыртэмын Россиысь 90 устоосыз предприятиос пӧлы. Удмурт Республикаысь Правительстволэн пресс-службаез. Тодады вайытӥськом: депутатэ кандидатъёс понна дурбасьтӥсь материалъёс "Удмурт дуннеын" печатламын луозы таӵе дунын: огшоры номерын 1 квадрат сантиметр понна - 15 манетэн, пятницае потӥсь номерын - 25 манетэн, "Твой дом и сад" приложениын - 30 манетэн. Журналистъёсын пумиськонъёс Пинал дыр кузьгес луоз Кӧня ке вис карем бере Кун Кенешын выльысь радъяськизы журналистъёсын пумиськонъёс. Табере арнялы быдэ лыдӟисьёс тодматскыны быгатозы Удмуртиысь парламентлэн ужаменыз. Алигес журналистъёсын пумиськонэз нуиз Наукая, дышетонъя, культурая но егитъёсын ужан политикая комиссилэн кивалтӥсез Алексей Геннадьевич КРАСИЛЬНИКОВ. Ум янгышалэ, дыр, шуимы ке, та комиссия вылэ усемын огез бадӟым уж: со утьыны но азинтыны кулэ, республикамылэсь гинэ ӧвӧл, удмурт нацимылэмь тодметъёссэ но. Дышетон огез сыӵе тодмет луэ. Со бордысен ик вераськон кутскиз. Бере-а кыле, азьпала-а мынэ асьме республика нылпиослы тодон-валан сётонъя? Россиысь улосвылъёс пӧлын сылӥськом 28-тӥ интыын, шуиз А. Красильников. Озьыен, югдур сокем урод ӧвӧл кадь. Россиын сярысь Удмуртиын студентъёсмы но тросгес: 10 сюрс муртлы 212-ез студент, Россиын - 175 студент. Дышетскон мылкыдэз ӝутыны, оло, юрттэ республикаямы дышетон сярысь кутэм закон но. Со кутэмын вал 1995-тӥ арын. Та законъя но, Удмуртилэн Конституциезъя но шор ёзо тодон-валан сётон дунтэк тупатэмын, нош Россилэн Конституциезъя дунтэк дышетскыны 9 классозь гинэ учкемын. Азьланяз комиссия тросгес саклык висъяны турттэ гурт школаослы. Соос туж бере кылё, компьютеръёс но отын ӧвӧл, соин ик паймонэз ик ӧвӧл, малы гурт нылпиос тодонзыя сокем зол висъясько городысь нылпиослэсь, шуиз Алексей Геннадьевич. Туэ но тани гуртысь медален школаез йылпумъям тросэз егитъёс вузъёсы экзаменъёссэс туж ляб сётӥзы. Туж трос ужано луоз, школаосты 12 ар дышетсконэ выжтон понна. Та уж борды кутскыны чакламын 2001-тӥ-2002-тӥ дышетскон аре. Печатлано трос выль учебникъёс. Шуг-секытъёс луозы огъя программае выжонэн валче но, угось куд-ог школаосын нылпиосты дышето пӧртэм авторъёслэн программаоссыя, кылсярысь, Ижевскын куать сыӵе школаос. Озьыен, дышетсконэз 12 арозь йылтыса пинал дыр но кузьгес луоз. Но Калыкез дышетонъя министерство сяна, та ужпум бордын пыр-поч ужаны кулэ вань министерствоос но, соос пӧлын Тазалыкез утёнъя, Обороная министерствоос. Удмуртиын вылӥ образованиен адямиос трос ке но, ваньзы ик соос асьсэлы уж уг шедьто. Соин ик, оло, специалистъёсты дасянэз кулэстоногес? Та ужпум ласянь А. Красильников тазьы шуиз: - Рынокен экономика дыръя котьку но озьы луэ: мар ке но мултэс поттӥськом. Куд-ог государствоосын, кылсярысь, Канадаын, дышетскем адямиосты юри тросгес дасяло. Ас удыссыя уж уг ке но шедьто, кышкытэз ӧвӧл, соосты вакчи дыр куспын луэ выль ужлы дышетыны. Озьы государстволы но дунтэмгес усе. Канадаын одӥг адями улытозяз 5-6 профессилы но дышетске. Юнме уг шуо: "Вань улытозяд - дышетскы". Ялан вошъяськись улонмы туала адями азе со куронэз уката но зол пуктэ. Т. БАННИКОВА. Дуннеез утёз чеберлык 9-тӥ сентябре пусйиське Чеберлыклэн нуналыз. Со ялэмын ЮНЕСКО-ен. Глеб Успенский Лувре вуылэмез бере кышноезлы гожтэ: "Тӥни кытын йӧнаны луэ вылэм. Тӥни кытын дуннеысь тужгес чебер но чылкыт адями - Венера Милосская! Со - визьмо тусо, вольыт ымныро, лачмыт. Со - Идеал! Палэнынгес сылӥсь диван вылын пукыса, висись Гейне Венера шоры учкыса бӧрдылӥз..." Чеберлык, чебер - вошъяськись валан. Вашкалаосмылэн чеберзы сярысь асьмеос тодӥськом мифъёсъя, легендаосъя, суредъёсъя. Чеберез котькудӥз ас сяменыз валалляз, дунъялляз. Одӥгъёсызлы чебер потылӥзы тӧдьы йырсиё, бадӟым, сайкыт синмо, векчи куско кузь куко нылкышноос. Нош шунды ӝужан палан яратылӥзы токоль-токоль пичи нылкышноосты. Тужгес но чебер нылкышносты асьсэлы карылӥзы эксэйёс. Кылсярысь, Чингисханлэн вань яратоно нылкышноосыз кырыж куко вылӥллям. Куинь сюрс ас талэсь азьло Вашкала Египетын лэсьтэмын вал Нефертити царицалэн скульптураез. Нош грекъёс тужгес чеберен лыдъяллязы Афродитаез. Соос данъяллязы Чеберез. Шор дауръёсы чебер шоры учкон воштӥськиз. Сое ватылӥзы кузь, паськыт дэремъёс улэ. Чеберен лыдъяны кутскизы сьӧлыктэм тусо - Инмар Анайлы тупась нылкышноосты. Со сяна, туж чебер муртъёсты адӟонтэм карылӥзы - кӧня сюрс Венераос сутэмын вал тыл вылын! ЪВИИ, зарни дауре, чеберлыкез яратӥсьёс дунъяны кутскизы инкуазен сётэм чеберез - кылсярысь, Рубенс мыло-кыдо суредалляз гочатӥсь гольык кышномуртъёсты. Кылем дауре огшоры калыкын чеберен лыдъяськылӥзы кужмо, бадӟым мугоро, ӵыжыт бамо кышномуртъёс, нош светской нылкышноос чиедэсь вал. Соос пуштрес, чебер дэремъёсын ветлӥзы, кусъёссэс корсетъёсын золъязы. Нылкышноослы ӧз ни алылэ мылазьзэс усьтыны, воргоронъёсты гочатъяны. Кылем дауре ик малпан кылдӥз чебер нылкышноос пӧлын ӵошатсконъёс ортчытъян сярысь. Нырысетӥез чеберай луиз Гваделупаысь Берта Сукаре. ХХ дауре чеберлык эрико луиз. Нылкышноос вакчи юбкаен, брюкиен ветлыны, вакчи ӵышкиськыны кутскизы. Туала чеберайёс ӝужыт мугоро, векчи куско. Ӵошатсконын вормемъёслы паськыт сюрес усьтӥське - соос манекенщица луо, рекламая агентствоосын ужало, узыр адямиосын лыдъясько. Удмурт чеберайёс - Наташа Кашина но Алёна Фёдорова гуртын уло. Но чеберлыксы солэсь уг безды - асьсэлэсь но, котыр адямиоссылэсь но улонзэс чебергес карыны юртто. З. РЯБИНИНА. Дуно кузьым Ӟучъёс та кунэз Финляндия шуо, нош асьсэос, татын улӥсьёс - Суоми. Асьмеос, удмуртъёс, та калыкен одӥг выжыысь луиськомы бере, соин ӟеч кусып возьыны тыршиськом. 1997-тӥ арын туж чебер туспуктэмъёсын сю дас тямыс бамъем "Финляндия толон но туннэ" книга потӥз. Со берыктэмын суоми кылысь. Лыдыз трос ӧвӧл - сюрс быртык (экзмепляр) гинэ. Книга быдэсак сӥземын Суоми кунлы. Финнъёс ог вит миллион мында. Уло кезьыт, нюлэсо, тыо, лымыё, нюр музъемъёс вылын. Та каылк туж бадӟымесь азинсконъёс басьтӥз ни - быдэс дуннелы тодмо луиз вылӥ ӟечлыко вузъёсыныз: дӥсен-кутэн, лэсьтӥськон арбериосын, ӟеч книгаосын. Туж вылэ ӝутӥськемен спорт, искусство. Суоми калыкез тодо быдэс дуннеын. Книгаез мон дэмласько школаын дышетскись пиналъёслы. Сое лыдӟисьёс шедьтозы история, кыл, промышленность, киноискусство, спорт но мукет удысъёсысь трос тунсыко иворъёсты. Котькуд нылпилы та книга туж дуно кузьым луоз. Н. ЯКОВЛЕВ. Шӧкыч Лидия Чернова Дуно усем Горыб верблюдлэн Дыльдыез укыр дунтэм. Синмаз кузёезлэн Сялӟыны, шуо, дӥсьтэм. Зэм, та учыр бере Верблюд ӧз шедь рае, Валатскиды, луоз: Шедиз со Пур-ты-е! ъ ъ ъ Урбо но Пыӵ Урбо но Пыӵ пумиськизы. Ас улонзэс юн ушъязы. Урбо шуэ: кӧты быз-быз Юрт кузёлэн, пе, виреныз. Пыӵлэн но, пе, кылыз пӧсьтэм утыр: Ачим но, уроме, туж улӥсько майбыр. Кылӥ: Кыксы но быризы Пӧлы пачкатэмен. Эшмес буре вайыса 1999-тӥ арын 8-тӥ сентябре 54 аресаз мыныку улонысь кошкиз Удмурт Республикаысь Кун Кенешлэн азьвыл депутатэз, Завьялово районысь "Восточный" совхозлэн директорез Ильсур Миниахметович ГАРАЕВ. И. М. Гараев вордскиз 1946-тӥ арын 5-тӥ апреле Удмурт АССР-ысь Алнаш районысь Усмангуртын (Татарский Тоймобаш). Ужаны кутскиз 1972-тӥ арын, армиысь бертыса. Йылпумъяз Москваысь ветеринарияя академиез но татысь аспирантураез. 1976-тӥ арозь ужаз Алнаш районысь валтӥсь ветеринар врач луыса. 1976-тӥ-1981-тӥ аръёсы - Удмурт АССР-ысь Гурт ужъёсъя министерствоысь ветеринар врач, Завьялово районысь гурт ужъёсъя управленилэн кивалтӥсез. 1981-тӥ арын Ильсур Миниахметовичез Завьялово районысь бадӟыменыз хозяйствоен, "Свобода" колхозэн, кивалтыны ыстӥзы. Ужез ӟеч радъяны быгатэменыз, И. М. Гараев хозяйствоез юнматӥз, вылӥе ӝутӥз. Кӧня ке ар ӵоже Ильсур Миниахметович Белгород областьысь "Губкинский" совхозын валтӥсь ветеринар врач луыса тыршиз. 1988-тӥ арысен И. М. Гараевлэн улонэз герӟаськиз республикаысь бадӟыменыз парсь вордон комплексэн - "Восточный" совхозэн. 1990-тӥ арозь ужаз совхозысь валтӥсь ветеринар врач, директорлэн воштӥсез луыса. 1990-тӥ арысен И. М. Гараев кивалтӥз "Восточный" совхозэн. Ӟеч тодон-валанъёсын, кивалтон ужез умой радъяны быгатэменыз висъяськылӥз Ильсур Миниахметович. И. М. Гараев пусъемын "Россия Федерациысь гурт удысысь дано ужась" но "Удмурт Республикаысь гурт удысысь дано ужась" сӥлы карон нимъёсын. Ильсур Миниахметович Гараевлэн яркыт тусбуез весяк кылёз асьмелэн сюлэмъёсамы. Ӟазег: - Ыжъёсыз, парсьёсыз лушкаса быдтӥзы ни. Табере милемыз шашлык карыны малпад? Уз пӧрмы, али ик пузъёсад ыбыса лэзё... Суредэз Л. ПРОЗОРОВЛЭН. Ӟечкыласько 9-тӥ сентябре Вордскем нуналыз Алнаш районысь Ӧркагуртысь Петров Михаил Васильевичлэн. Та бадӟым нуналад сӥзисько тыныд юн тазалык, сю аресозь улон, шуд. Тодад возь: мон тонэ котьку яратӥсько но гажасько. Ижевскын дышетскись Лариса нылыд. Зэмлык дуно сылэ Турлы буёло шаръёс пичи пияшлэн киысьтыз лэзиськизы, омыре ӝутскизы. Азьланезлы сайкыт малпанъёс выллем лобизы соос вуоно дауре. Оскем потэ, шудо вакытэ. Таӵе мылкыдэз лӧпкытӥсь суредэн Ижевскын усьтӥськиз Россиысь журналистъёслэн ИВ фестивальзы. Странамылэн пӧртэм улосвылъёсысьтыз куноос кӧня ке нуналлы республикамылэн шоркараз люкаськизы. Пумиськыны, ог-огенызы тодматскыны, пӧртэм ужпумъёсты ӵош эскерыны. Та секыт вакытэ дэмен ужан но ог-огедлы юрттон кулэ котькыӵе удысын, уката ик журналистикаын. Россиын угось иворъёс вӧлмытон пӧрмиз ни кышкыт ужлы. Берло аръёсы бырыны шедизы 200-лэсь ятыр журналистъёс. 6 мурт али но Чечняын курадӟе, соос заложнике кырмемын. Улонэз шонер но зэмлыко возьматон дуно сылэ. Тае Россиысь журналистъёс умой валазы ни. ИИИ фестиваль ортчиз миым Курскын. Нош туэ со эстафетазэ Ижевсклы кузьмаз. Со юнме шорысь ӧвӧл, дыр. Кызьы пусйиз прессалэсь праздниксэ усьтонлы сӥзем ужрадын Удмурт Республикаысь Кун Кенешлэн Тӧроез Александр Волков, республикамылы вань мае возьматыны. Журналистика удыс сярысь верано ке, лыдӟисьёс понна уно газетъёс но журналъёс печатласько, учкисьёс азе тунсыко передачаосынызы нуналлы быдэ радио- но телеканалъёс пото. Соос шаерысьтымы кылдэм югдурез возьматонын пайдаё тыршо, шуиз Александр Волков. Республикамылэн кивалтӥсез нимысьтыз пусйиз, макем бадӟым инты басьтэ пресса туала улонамы, уката ик политикаын. Ӵапак тае пусйиз, люкаськемъёс азьын вераськыкуз, Россиысь Журналистъёслэн огазеяськонзылэн кивалтӥсез Всеволод Богданов но. Зэмзэ но, политика но пресса - ог-огзылэсь люконтэм макеос. Сое возьматэ тани ма гинэ но: фестивале лыктыны мылкыд каризы куд-ог тодмо политикъёс, кылсярысь, Кун Кенешлэн депутатэз, быръёнъя " Отечетсво - Вся Россия" блоклэн одӥгез кивалтӥсез Олег Морозов. Жаляса вераны кулэ, ужрадэ вуоз шуыса оскытӥз вал та блоклэн сопредседателез, Москвалэн мэрез Юрий Лужков, но люкетӥз кунгож сьӧры командировкаез. Фестивалез усьтонлы сӥзем ужрадын "пӧсь йӧтӥз", шуыны луоз, Россиысь Быръёнъя Центральной комиссилэн кивалтӥсезлы Александр Вешняковлы. Кыӵе инты басьтэ пресса быръёнъя кампаниын, кызьы тае валэктэ законодательство, - таӵе юанъёс, зэмзэ но, Кун Дмае матэктӥсь быръёнъёс азьын ӵем кылдыло но ӟырдало. Центризбиркомлэн тӧроез люкаськемъёс азьын пусйиз: таиз быръёнъя кампания лек ортчоз. *** Ӵапак вуоно быръёнъёслы сӥземын вал фестивальлэн мукетыз ужрадэз но - "Быръёнъя кампания: журналистика но политической технологиос" конгресс. Ӝытазе фестиваль ужзэ азьланьтӥз "Металлург" санаториын. Люкаськемъёс тодматскизы Россиысь иворъёс вӧлмытӥсь ёзъёслэн выставкаенызы, пӧртэм изданиослэн ужъёсынызы. Ӟырдыт вераськон пуромиз политикъёслэн но журналистъёслэн дискуссиязы. Со сӥземын вал Россиын коррупцилы, соин нюръяськонлы но та ужын прессалэн интыезлы. Кенешонэ пыриськизы тодмо политикъёс но журналистъёс О. Морозов, Г. Саттаров, Д. Муратов, В. Богданов но мукетъёсыз. Пусйыны кулэ, коррупция - Россилэн туж кышкыт висёнэз. Георгий Саттаровлэн чакламезъя, соин сэрен Россия арлы быдэ 20 миллиард доллар мында ыштонъёс адӟе. Ӵошатэ: ӵапак та быдӟа чакламын странамылэн бюджетэзлэн доход люкетэз. Нош кунгож сьӧрысь аналитикъёс эшшо бадӟымгес лыдпус верало: 40 миллиард манет, пе, государствомылэн "кисыяз" уг пыры. Кыӵе амалъёсын бен нюръяськоно кузьмаськись-вузаськись чиновникъёсын? Кызьы пусйизы люкаськемъёс, гудыртыны кулэ прессалэн куараез, кышкатэк гожъяно-верано. Мар шуод, та ужлы пумитъяськисьёс шедёзы. Но журналистъёс дэмен луизы ке, кужымзы кӧня ке пол будоз. Сое кенешонын ялан но ялан пусйылӥзы Россиысь Журналистъёслэн огазеяськонзылэн кивалтӥсьёсыз. Ю. АЛЕКСАНДРОВА. Кинэ меда, кинэ?.. Кылем вторнике люкаськылӥзы "Удмурт кенешлэн" быдэсъясь комитетаз быръем эшъёс. Соос юнматӥзы туэ ар пумозь ужан планэз но Вань удмуртъёслэн куатетӥ азьло чакламтэ ӧтчамазы чузъяськем ӵектонъёсты быдэстонъя ужрадъёсты. Рос-прос вераськон ӝутскиз Кун Думае быръёнлы дасяськон пумысен но. "Удмурт кенеш" Ижевск округъя нокинэ но уз дэмла, вылды. Нош Удмурт округъя одно ик кинэ ке ӵектоно. Россилэн парламентаз ужаны быгатымон эшъёс ичи ӧвӧл - Алексей Красильников, Анатолий Ешкеев, Антонина Лисина, Игорь Семенов... "Отечество" движениын ӵем поттыло Светлана Смирновалэсь нимтулзэ. Ма бен, кӧня ке дыр вань на. "Удмурт кенеш" но берпум кылзэ вераны вуоз. Со понна люкано луоз Пичи кенешез. Заседаниын озьы ик учкемын мукет ужпумъёс. И. Кричев. ШӦКЫЧ "Кизер" валюта Аракыез юнме шорысь "кизер" валютаен уг ӵошато. Уго эксэй вакытъёсы но казна со чотынгес узырмылӥз. Совето власть но аракылэсь бадӟым барыш басьтылӥз. Россиын берло аръёсы улон читыр-чутыр луыса кошкемен, "зарни" аракылэсь коньдон палэнэ, нимаз адямиос кие, кӧчыны ӧдъяз. Со шурез возъян понна, туэ Россия Федерациын кутэмын вал "Этил спиртэз, аракыен но спиртэн сурам вузъёсты поттонэз но вузанэз кун ласянь радъян сярысь" Закон. Солэсь быдэсъяськемзэ чаклан вылысь, Госторгинспекцилэн Удмурт Республикая управлениез алигес аракыен вузкаронэз эскериз. Инспекторъёс 37 предприятиосы вуылӥзы но 19-ысьтыз тырмымтэосты шараязы. Кылсярысь, Воткинскысь нимаз вузкарисьлэн Короткихлэн "Бистро" юоннияз вузанысь палэнтэмын "Курыт настойкаез", "Капитанской джинэз". Глазовысь ликёро-водочной заводын поттэм "Клюквенной" ческыт настойка но уг тупа ГОСТ-лэн куронъёсызлы. Вина пушкысь уясь макеоссэ шараязы. Нош Болгариысь "Медвежья кровь" виналы нокыӵе документъёс ӧй вал. Вылаз ик, рюмочнойын нокыӵе куртчон но ӧвӧл. Трос вал мукет тырмымтэос но. Ужбергатӥсьёслы азьланяз винаен вузкарыны ӧз лэзе ни. Сыӵе вузкарисьёс асьме пӧлын трос на. Эскеронъёс бере 19 мурт кыл кутоно луиз. Соос 33,6 сюрс манет штраф тырозы. Урод винаен вузкарон учыръёс трос пумиськыло на. Соин ик, аракы басьтыкуды, ӟенеликтэс бергатыса-бергатыса эскере, сертификат но курыны эн вунэтэ. Тазалыкты понна! Н.Лялин. Республикаямы ортчись "Быдэс Россия-99" фестивальлы сӥзьыса, Удмуртиысь журналистъёс поттӥзы "Вся Удмуртия" нимо чибориё огъя газет. Нимаз бамъёс дасязы (сётӥськом огъя газетлэн бам номеръёсызъя): "АИФ Удмуртии", "Воткинские вести", "Удмуртия" кун телерадиокомпания, "Домино", "Известия Удмуртской Республики", "Калина красная" (Глазов), "Карьера", "Красное Прикамье" (Сарапул), "Можгинские вести", "Панорама", "Перекресток", "Удмурт дунне", "Удмуртская правда", "Центр", "Ижевск". Печатласьком "Вся Удмуртия" газетысь "Удмурт дуннелы" сӥзем бамез. Россия Федерацилэн Кун наградаосыныз пусъён сярысь Россия Федерацилэн Президентэзлэн Указэз Гурт удысэз ӝутонын вормонъёс басьтэмез но уно аръёс ӵоже сюлмысь ужамез понна "Россия Федерациысь гурт удысын дано ужась" сӥлы карон ним сётоно: Наговицын Василий Ивановичлы - Удмурт Республикаысь гурт удысъя но сиён-юон поттонъя министрлэн воштӥсезлы. Россия Федерацилэн Президентэз Б. Ельцин. Москва, Кремль 1999-тӥ арын 23-тӥ августэ � 1107. Кун Думае быръён азьын Александр Вешняков: "Бырйисез вормоно осконэн" Удмуртиысь Журналистъёслэн огазеяськонзылэн ӧтемезъя, асьме доры нырысьсэ вуылӥз Быръёнъя валтӥсь комиссилэн кивалтӥсез Александр Вешняков. Со пыриськиз журналистъёслэн "Быдэс Россия-99" фестивальзылэн ужаз. "Быръёнъёс туж кышкыт луозы",- шуиз Россиысь Журналистъёслэн огазеяськонзылэн кивалтӥсез Всеволод Богданов. Но Александр Вешняков буйгатӥз: "Мон озьы уг малпаськы, ваньмыз законъя ортчоз". Зэм, быръёнъёс сярысь туэ кутэм выль федеральной законын кандидатъёс, иворъёсты вӧлмытӥсь ёзъёс но быръёнъёсъя комиссиос азе туж чурытэсь куронъёс пуктэмын. Ваньмыз со учкемын, криминалэз власте лэзёнтэм понна. Кылсярысь, таяз быръёнъёсын кандидатъёс уз быгатэ ас коньдонэнызы бырйисьёсты басьтыны. Кандидатъёс но блокъёс понна агитациез нуыны лэземын быръёнъя блокъёслэн но избиркомъёслэн коньдонзы чотын гинэ. Агитация нуон дыръя коньдон кутэмез сярысь котькуд кандидатлы куинь пол отчёт лэсьтоно луоз. Озьы ик пыр-поч эскеремын луоз котькуд кандидатлэн улэм-вылэмез, доходэз. - Бен, луозы, вылды, сыӵе кандидатъёс, кудъёсыз ас узырлыксэс бырйисьёслэсь кызьы но озьы ватыны турттозы. Но бырйись тодэ ук, кызьы улэ солэн округысьтыз кандидат, тодэ, кӧня солэн машинаез, квартираез. Осконо шат сыӵе кандидатлы, кудӥз али ик, бырйисьсэ алдаса, власте лыктыны турттэ,- шуиз А. Вешняков.- Быръёнъёс законъя ке ортчизы, соку, зэмзэ ик, вераны луоз: быръёнъёс демократия амалэн - чылкыт но зэмлыко ортчизы. Быръёнъёс сярысь закон вань. Но Законэз тӥян учыръёс луыло. Сое тӥяло иворъёсты вӧлмытӥсь ёзъёс но. Кылсярысь, кандидатъёс но политической огазеяськонъёс сярысь агитация нуыны луэ соосты лыдэ басьтэм бере гинэ (со луоз 1-тӥ октябрь бере). Озьы ке но, телевидениын, газетъёсын лушкем агитация мынэ ини. Малы со озьы луэ? Законэз валамтэммы бордысь-а со потэ яке законэз пӧртэм амалъёсын юри ортчыны турттон бордысь-а? Журналистъёс А. Вешняковлы пӧртэм юанъёс сётъязы: - Кин кыл кутэ кандидатъёс сярысь дырызлэсь вазь агитация нуэм понна? - Али куд-ог партиос но блокъёс пресс-конференциос ортчытъяло. Лыдъяно-а соосты агитациен? - Быгато-а кун чиновникъёс агитация нуыны? Та выллем юанъёсъя ик валамон ини: журналистъёс быръёнъёс сярысь законэз пыр-поч уг тодо, та юанъёслы валэктонъёс законын тупен-тупен сётэмын ке но. Шугъяськытӥсь мугез но бен вань: законлэн быдӟалаез 253 страница - соин тодматскыны дыр уг тырмы, лэся. Карачаево-Черкессиын ортчем быръёнъёс татысь калыкез кыклы люкизы. Кудӥз дурбасьтэ Семёновлы, кудӥз - Деревлы. Зэмзэ ик-а татын быръёнъёс сокем мыдлань ортчиллям? А. Вешняковлэн верамезъя, законэз тӥян учыръёс вылӥллям. Кылсярысь, 35 округын быръёнъёс воксё но ӧвӧл ортчиллям. Озьыен, 15 процентэз бырйисьёс куара сётытэк кылизы. Та нуналэ ик Кун Кенешлэн юртаз А. Вешняков пумиськылӥз республикаысьтымы быръёнъёсъя ёзъёслэн кивалтӥсьёсынызы. Татын но солы быръёнъя выль Закон пумысен юанъёс сётъязы. Федеральной законъя быръёнъёс йылпумъяськыны кулэ 20 часэ, нош республикамылэн законэзъя - 22 часэ. Мар кароно? Удмуртилэн законаз тупатонъёс пыртоно. Пумиськон дыръя мукет тупамтэос но шараямын вал. Кызьы валэктӥз Удмуртиысь Быръёнъя комиссилэн кивалтӥсез А. Тубылов, Россилэн но Удмуртилэн быръёнъя законъёссы эскеремын луозы Кун Кенешлэн вуоно сессияз. Республикаямы вуылыса, А. Вешняков озьы ик пумиськылӥз Кун Кенешлэн Тӧроеныз А. Волковен. Валтӥсь вераськон ужпум вал быръёнъёс. "Бырйисьлы пыӵатоно оскон. Нош оскон потэ законъя ужам бордысь",- шуиз Быръёнъя валтӥсь комиссилэн кивалтӥсез. Т. БАННИКОВА. Кылзы тупаз Берло дыре республикаысьтымы Операя но балетъя театрлы шуг луиз гастрольёсы потаны: со понна уно коньдон кулэ. Театрлэн директорез Светлана Соколовская но чеберлыкъя кивалтӥсез Виктор Гончаренко ужпумез тупатон вылысь амал утчазы. Коньдонэн юрттыны пумит ӧз луэ "Удмуртагроснаб" но "Удмуртнефть" огазеяськонъёс, кивалтӥсьёссы И. М. Маликов но Е. И. Богомольный. Туэ март толэзе Урал но Волга котырысь республикаослэн театръёсынызы огкылъёс гожтэмын. Огзэ соос пӧлысь быдэстон вылысь, нырысь вамыш лэсьтэмын ини. Туэ инвожо толэзьлэн пумазгес Операя но балетъя театрмы ас спектакльёссэ возьматӥз Уфаын. Татын улӥсьёс туж шумпотӥзы "Севильский цирюльник", "Алеко" операослы, "Анюта" балетлы но опереттаослы. Матысь дыре Ижевске гастролен вуыны кулэ Башкортостанысь Операя но балетъя кун театр. Нош асьме театр туэ сезонзэ кутскоз октябре "Собор Парижской богоматери" балетэн но "Пиковая дама" операен. Т. НИКОЛАЕВА. Вакчи веросъёс пӧлысь Никвлад Самсонов Дӥго-дӥго-дӥго-дӥг! Лёнчик туэ школае мыноз ни. Арлыдо. Куддыр амалтэк серемез потэ городын улӥсьёслы: нодтэмесь! Огшоры пумысь но валатскыны уг пӧрмыто. Кылем гужем вал со. Куазь номыртэм пӧсь улӥз. Бускельёссылэн городын улӥсь нунокенызы - Валерикен - Лёнчик быдэс лумбыт шур дурын. Бертыкузы ошмес дурын пазяськизы на. Дырды улысь тусе тыраз ик ву тырмем бере, та Валерик отчы-татчы утчаськыны ӧдъяз: - Лёнчик, а где тут краник? Как выключить? - Ищи,- шуиз Лёнчик. Дырды котыртӥ бызьылэ бускель пияш. Дырды пумысь но учке, тусь котыртӥ но утчаське - ӧвӧл. Нош тусьын вуэз пачылаз ни, вылтӥз ӧръяське. Жаль потӥз Лёнчиклы таид: тусь пыдэскысь пасез ӵоктась тулэз кыскиз - ву жаль-жаль ӧръяськиз. - Как просто-о! - долказ Валеркаед. Яке мукет учыр. Одотья кенак, Валериклэн песянаез, со ӝыт ик та пияштэ курегъёсыз сюдыны косэм. - Тани, пие, ю тысь пазьгы ай, ӟечгес пузалозы... - ачиз корказ пырем. Сылэ Валерка азбар шорын, кияз йыдыен тусьты. - Курица, курица! Мелэ, мелэ! Курегъёслэн кӧбер но ӧвӧл. Одотья апай адӟем тае, лулскыса потэм, ю тысьсэ пазьгыса, жингыр гинэ ӧтё, пе: - Чипу, чипу, чипу, чипу-у! Олокытысь сомында курегъёс потӥллям. Со ӝыт ик Одотья апай пияшез ӟазегъёссэ доре улляны косэм: - Инкубаторноесь, пие, соос, анайзы ӧвӧл, бертыны нодтэмесь... Валера удмурт сямен верамез вала. Нош вераськыны - мылкыдтэм. Усьтыр-табыр шур дуре васькем. Тымет шорын уясь ӟазегъёсыз кызьы-о поттод? Ӧтьыны кутскем: - Гуси, гуси, гуси... Айдате, айдате... Валамон ни - ӟазегъёс гань-гань уяло. Сюлмыз шӧдэм Одотья апайлэн - нунокез сьӧры ик вуэм. Кыдёкысен ик сопал ураме кылӥськымон жингыр ӧте, пе: - Дӥго, дӥго, дӥго! Чале, нуныосы, чале! Огкадь тӧдьы ӟазегъёс, бурдъёсынызы лопыръяса, Валера вӧзтӥ ик - Одотья кенак доры. Тымет шоры ӵӧжъёс гинэ кылиллям на. Пияшлэн синъёс питырскиллям: - Бабушка, как так? Одотья кенак ас понназ мыняк потэм: - Соос, пие, удмуртъёс! Ӟуч сямен уг валало на... Тон кадь ик: тон но удмурт сямен уд вераськиськы на ук? Огдыре дышетске: ачим тонэ удмуртлы дышето, тон соосыз - ӟучлы! Яралоз? Нош ик пуштэм куара зуркатӥз Москваын улон корка пуштэм бере, ньыль нунал ортчыса, мукетыз юрт куашкатэмын. Нырысетӥяз 90-лэсь ятыр адями быриз, 264-ез сӧсырмиз, со пӧлысь 16-ез пиналъёс. Мукетыз терракт ортчиз арня нуналэ уин. Таяз учыре 64 квартираем 8 этажо юрт пуштытэмын. Татын 150 адями улэ вал. Тросэз соос пӧлысь быремын яке сӧсырмемын. Дагестанысь война каллен Россилэн шораз кыстӥське. Тодмо ӧвӧл: кытын туннэ пуштэм куара чузъяськоз? Москваын сяна, мукет городъёсын террактъёс уз луэ шуыса, нокыӵе но осконлык ӧвӧл. Соин Москваын пуштэм куара быдэс Россиез зуркатэ. Вераны кулэ: сентябре куинь улон корка пуштытонъёслэн виссы - ньыль нунал. Огшоры- а со, ӧвӧл-а следствие возьматоз. А.Андриянов. Юалэ - валэктом Лыдӟисьёслэн юанъёссылы валэктэ калыкез улон-вылонын утёнъя министрлэн воштӥсез Наталья Кузнецова. Нылпиме будэтӥсько огнам - Мон - огнын анай, пукисько гуртын нуныен. Улӥсько огнам. Ужаны потэме уг луы, нылпиелы одӥг но ӝыны арес тырмымтэ на. Нош уксё уг тыро. Кылэме вань, огназы анайёслы толэзьлы быдэ пособие сётӥське. Райсобесэ вазиськи вал, шуизы уксё, пе, ӧвӧл. А. А. Пичи Пурга ёрос. - Огназы анайёслы, кузпалъяськытэк нылпи ваемъёслы, калыкез улон-вылонын утён ёзъёс пыр котькуд нылпизылы толэзьлы быдэ сётӥськыны кулэ 134 манет 42 копейка тыр пособие. 1998-тӥ арын 1-тӥ январьысен та пособие сётӥське нырысетӥ категорие пырись семьяослы, мукет сямен вераса, семьяысь котькуд адямилы быдэ табыш (доход) 402 манет 30 копейкалэсь ятыр медаз луы. Нылпи пособие басьтыны черодэз тодон понна (кыӵе категорие пыре семья) улон интыысь калыкез улон-вылонын утён ёзэ - пенсиосъя но пособиосъя отделэ - сётоно семья сярысь но уждун сярысь справкаос. Та дыре огназы анайёслы, озьы ик мукетъёсызлы но, нылпи пособие сётӥське 1998-тӥ ар понна. Пособие тросгес сётӥське сиён-юонэн но вузъёсын. Та нуналъёсы сётэмын ни пособие 41,3 процентэз. Кинлы сётӥське автотранспорт? - Вордӥськемын 1923-тӥ арын, ожысь ветеран, нырысетӥ группаен инвалид. Сётӥськыны кулэ-а мыным автотранспорт яке бензинлы компенсация? Н. Кудрявцев. Алнаш ёрос. - Автотранспорт яке автотранспорт интые бензинлы компенсация сётӥське инвалидъёслы но оже пыриськемъёслы, кудъёсызлы сётӥське автотранспорт басьтыны тазалыксыя нимысьтыз заключение. Сётэ сое Медико-социальной экспертизалэн (МСЭ) автотранспортъя комиссиез. Ваньмызлы инвалидъёслы но оже ветлэмъёслы автотранспорт яке бензин понна компенсация басьтыны луонлык уг сётӥськы. Тани Николай Прокопьевич Кудрявцев транспортъя комиссиез ортчемын 1998-тӥ арын 13-тӥ мартэ. Отын сётэм заключениея, тазалыкезъя солы спецавтотранспорт басьтыны луонлык уг сётӥськы. Тазалыке ужаса лябӟиз, нош пенсие ӧжыт - Вордски 1924-тӥ арын, пенсиын 1974-тӥ арысен. Ужаны кутски дас кык арескын. Чугун сюрес лэсьтонын, нюлэс коранын секыт ужаса, тазалыке лябӟиз. Пенсия басьтӥсько ӧжыт - 350 манет. Пенсие мынэсьтым бер потэмъёс, секыт улонэз адӟымтэос, мынэсьтым тросгес уксё басьто. Туж ӝож. Уз луы-а пенсиме йылэтыны? Е. Виноградова. Алнаш ёрос. - Таӵе юан ӵемысь сёто кема аръёс ӵоже ӟеч тыршем пенсионеръёс. Но ужамзы понна ӧжыт уждун басьтэменызы, соос табере пичи пенсия басьто. Е. И. Виноградовалэн ужам стажез 39 ар. Со трос нылпиё анай. Пенсие потыкуз, уждунэзлэн быдӟалаез вал 77 манет 86 копейка. Озьыен, стажезъя но уждунэзъя пенсиезлэн быдӟалаез луэ 130 манет 12 копейка, война дыръя ужамез понна ватсаське на 47 манет 15 копейка, со вӧзы сётӥське компенсация - 172 манет 66 копейка. Озьыен, ваньмыз люкаське 349 манет 93 копейка. Вераны кулэ, война дыръя ужамъёс, трос аръёс ӵоже ужаса но, ӧжыт пенсия вылэ кылизы. Сыӵе югдурез умоен нокызьы уд лыдъя, но со лэсьтӥське законъя. Дасяз Л. Малых. Дауръёс вискын Укмыс - бугрес лыдпус Кӧня ке бадӟымесь но пичиесь юанъёс кылдо 2000-тӥ ар вуэмен валче. Нырысетӥез - тужгес пичиез но капчиез: кызьы удмурт сямен шонер гожтоно вуись арез - 2000 ар яке 2000-тӥ ар? Ӟучъёс сыӵегес учыръёсы ӵемысь нокыӵе кылпум уг пукто: 1999 год, 2000 год (озьыгес ик: статья 17 Конституции РФ). Тодмо тодосчиен (учёноен) Иван Таракановен амалтэк соглаш кариськод. Со валэктэ тазьы: 1999-тӥ ар бере гинэ кутскоз 2000-тӥ ар, 2001-тӥ ар вуэм бере гинэ ортчоз 2000 (кык сюрс) ар. Соин ик шонер луоз: 2000-тӥ ар. Кыкетӥ юан: ку вуэ 21-тӥ даур - 2000-тӥ арын яке 2001-тӥ арын? 21-тӥ даур мытӥське 2000 (кык сюрс) ар ортчем бере. 2000 ар ортче 2000-тӥ ар йылпумъяськем бере, 2001-тӥ арын. Озьыен, 21-тӥ даур кутске 2001-тӥ арын. Куинетӥ юан: малы компьютеръёс шугъясько 2000-тӥ ар азьын? Соослы азьланьын быдэсъяно ужъёс кылдытыкузы, программистъёс ваньзэ лыдэ басьтӥзы кадь: 1999-тӥ ар - вакчи ар (високосной ӧвӧл), сыӵе-сыӵе числоослы тупало сыӵе-сыӵе нуналъёс, 31-тӥ декабрь (пятница) бере вуэ 1-тӥ январь (суббота). Огзэ гинэ санэ понӥллямтэ. Интыез но дырез шыръян вылысь, асьме даурысь аръёсты возьматъязы кык лыдпусэн. 1989-тӥ ар интые - 89, 1995-тӥ интые - 95. Даурлэн пумозяз туж кема нюжтӥськом кожазы, вылды. Нош со лыктӥз лекос чаляк. Лултэм компьютер табере малпа: 99-тӥ ар бырем бере вуоз яке 00-тӥ, яке 1900-тӥ ар. Соин йырин вань числоос но нуналъёс сураськозы. Космосын но, чугун сюрес вылын но, банкын но шуг-секытъёс кылдо. Кинлы-о кельшоз, солэн 1999 манетэз 0 манетлы пӧрмиз ке. Нош лыдъясь-чотась машиналы, Егор Гайдарлы сямен ик, асьмелэн лекъяськеммы нокытчыяз уз йӧты. Огкылын вераса, асьмеос та вакытэ выжиськом 20-тӥ даурлэн берпуметӥ араз. Таӵе нуналъёс йырвизьмамы мургес мед кылёзы шуыса, "Удмурт дунне" усьтэ выль рубрика - "Дауръёс вискын". Отын ивортыны тыршом 1-тӥ - 20-тӥ даурысь тужгес тодмо нуналъёсты. Соос бадӟымгес пайда сётозы, дыр, шаерен но историен тунсыкъяськисьёслы. Али 1999-тӥ ар бере, син азямы нырысь ик пуктон 9 лыдпусэн но Россиен герӟаськем учыръёсты. Мар бен вал соку? Соку ик вералом: укмыс - бугрес лыдпус. 879-тӥ ар. 1120 ар талэсь азьвыл князь Олег кивалтыны кутскиз славянъёсын. 1019-тӥ ар. 980 ар талэсь азьвыл Ярослав Мудрый кивалтыны кутскиз Киевын. Со кылдытӥз выль законъёс - "Ӟуч зэмлыклэсь" тужгес вашкала люкетсэ - Ярославлэсь зэмлыксэ". 1139-тӥ ар. 860 ар талэсь азьвыл Всеволод Ольгович кивалтыны кутскиз Киевын. 1169-тӥ. 830 ар талэсь азьвыл князь Андрей Боголюбский Киевез киултӥз но тарказ. Со басьтӥз таӵе ним - быдӟым князь Владимирский. 1199-тӥ. 800 ар талэсь азьвыл Галич но Волынь огазеяськизы но Галич-Волынь княжество кылдытӥзы. 1209-тӥ. 790 ар талэсь азьвыл летописьын нырысьсэ гожтэмын Тверь. 1239-тӥ. 760 ар талэсь азьвыл Батыйлэн ожгарчиосыз (воинъёсыз) пыризы ӟучъёслэн лымшор музъемазы, тарказы Переяславлез но Черниговез. 1259-тӥ. 740 ар талэсь азьвыл Новгородын бугырскизы калыкез лыдъянлы пумит. 1269-тӥ. 730 ар талэсь азьвыл ливонъёс лыктӥзы Псков пала. Ливон орденэн тупан (мир) кылдытыса, Новгородлэн но Псковлэн шунды пуксён палазы кунгож юнмаз. 1299-тӥ. 700 ар талэсь азьвыл митрополит Максим Киевысь лыктӥз Клязьма вылысь Владимире. 1319-тӥ. 680 ар талэсь азьвыл Дмитрий Михайлович Лек син кивалтыны кутскиз Тверьын. 1339-тӥ. 660 ар талэсь азьвыл Ордаын виизы Александр Михайлович Тверский князез. 1359-тӥ. 640 ар талэсь азьвыл Дмитрий Иванович Донской кивалтыны кутскиз Москваын. 1379-тӥ. 620 ар талэсь азьвыл Стефан Пермский христианствое пыртӥз (чукыназ) зырянъёсты (комиосты). 14-тӥ даурлэн пумыз. 600 ар талэсь азьвыл Коми музъем огазеямын Москва борды. - Москваысь ожгарчиос мынӥзы Волга дурысь булгаръёс доры но басьтӥзы шоркарзэс. 1449-тӥ. 550 ар талэсь азьвыл Москва но Литва эрикоен лыдъязы Новгородэз но Псковез. 1489-тӥ. 510 ар талэсь азьвыл Москваысь ожгарчиос мынӥзы Ватка пала. Ватка но Ар (Удмурт) музъем огазеямын Москва борды. 1519-тӥ. 480 ар талэсь азьвыл Василий ИИИ Крымысь Мухаммед-Гирей ханэн тупан (мир) лэсьтӥз Польшалэн королезлы но Литвалэн вылӥ князезлы Симумунд И-лы пумит, нош озьы ик Казань ханлы пумит. 1549-тӥ. 450 ар талэсь азьвыл люкаськиз Земской собор. 1569-тӥ. 430 ар талэсь азьвыл Иван ИИВ мынӥз Новгорд но Псков вылэ. 1589-тӥ. 410 ар талэсь азьвыл Ӟуч кунын кылдытэмын патриаршество. Патриархе быръемын митрополит Иова. - Эксэй Федор Иванович кылдытӥз законъёсыз "судебник". 1609-тӥ. 390 ар талэсь азьвыл полякъёс но шведъёс урдскизы Россия вылэ, котыртӥзы Смоленскез. - Лжедмитрий ИИ пегӟиз Калугае. 1619-тӥ. 380 ар талэсь азьвыл баӵко Михаил Федорович Филарет берытскиз полякъёс дорысь пленысь. Сое пуктӥзы Москвалы патриархе. 1649-тӥ. 350 ар талэсь азьвыл Земской собор кутӥз выль законъёс - Алексей Михайлович эксэйлэсь Собор уложенизэ. 1679-тӥ. 320 ар талэсь азьвыл геры понна выт воштэмын азбар понна вытэн. 1689-тӥ. 310 ар талэсь азьвыл гожтэмын Китаен огкыл. Соослэн кунгожзы тупатэмын Аргунь но Горбица шуръёс кузя. 1699-тӥ. 300 ар талэсь азьвыл воштэмын городъёсын но стрелецъёсын кивалтон. 1709-тӥ. 290 ар талэсь азьвыл куашкатэмын Запорожьеысь Сечь. - Полтава дорын ожмаськонын пазьгемын шведъёс. Швецилэн королез Карл ЪИИ но Мазепа пегӟизы Турцие. 1719-тӥ. 280 ар талэсь азьвыл губерниос люкемын провинциослы. 1769-тӥ. 230 ар талэсь азьвыл Россиын нырысьсэ поттэмын бумага коньдон. - Россия нырысьсэ пунэманэ пыриськиз Амстердамын. 1779-тӥ. 220 ар талэсь азьвыл кылдытэмын Сьӧд зарезьын флот. 1799-тӥ. 200 ар талэсь азьвыл Россия пыриськиз Францилы пумит ожмаськонъёсы. - Ф.Ф.Ушаков кивалтэм улсын ӟучъёслэн но турокъёслэн экспедицизы Ион шормуӵъёсы вуиз но Ион республика кылдытӥз. - Ф.Ф.Ушаков кивалтӥз французъёслэсь Корфу шормуӵысь крепостьсэс басьтонэн. - А.В.Суворов кивалтэм улсын ожгарчиос ортчизы Италиетӥ но Швейцариысь Сен-Готард но Шайтан выж гурезьёстӥ. 1809-тӥ. 190 ар талэсь азьвыл император Александр И люказ Финляндиысь адямиосты, кылдытӥз Финляндия быдӟым княжество. - М.М.Сперанский кылдытӥз выльдӥськонлы проект, отын монархиез чаклаз конституцилы матэ карыны. - Помещикъёсты алӥзы крестьянъёссэс Сибире келямлэсь. 1819-тӥ. 180 ар талэсь азьвыл Петербургын кылдытэмын университет. - Ф.Ф.Белинсгаузен но М.П.Лазарев усьтӥзы Антарктидаез. 1829-тӥ. 170 ар талэсь азьвыл Россия но Турция Адрианопольын лэсьтӥзы тупан (мир). Россилы выжиз Дунайлэн зарезе усёнэз, Кубан, Кавказ (Поти дорозь). - Россиын нырысьсэ ортчытэмын мануфактураез возьматон (выставка). 1839-тӥ. 160 ар талэсь азьвыл генерал В.А.Перовский Хивае мынӥз. - Граф Е.Н.Канкрин коньдонэз выльдӥз. Солы инъет луиз азвесь манет. 1849-тӥ. 150 ар талэсь азьвыл И.Ф.Паскевич кивалтэмъя ӟуч армия мынӥз Венгриысь революциез зӥбыны. - Г.И.Невельский капитанлэн экспедициез мынӥз Дальний Востоке, эскериз Амурлэсь зарезе усёнзэ. Амур котыр но Сахалин ялэмын Россилэн музъемъёсыныз. 1859-тӥ. 140 ар талэсь азьвыл ӟуч ожгарчиос басьтӥзы быдэс Чечняез но гурезь Дагестанэз. Шамиль пленэ кутэмын. 1869-тӥ. 130 ар талэсь азьвыл Петербургын ужаны кутскиз народникъёслэн организацизы. 1879-тӥ. 120 ар талэсь азьвыл Александр ИИ эксэез виыны выризы. - "Музъем но эрик" люкиськиз "Калык эриклы" но "Сьӧд люконлы". - Ливадиын гожтэмын ӟуч-китай огкыл (договор). Китайлы берыктэмын Кашгар, ӟучъёслы лэземын Монголиын но Китайын выт тырытэк вузкарыны. - Россия но Китай куспын тупамтэос кылдэмын, Ливадиын гожтэм огкылэз юнматымтэен сэрен. 1889-тӥ. 110 ар талэсь азьвыл Якутске ссылкае келямъёс ож тӥрлык кутыса бугыръяськизы. - Кутэмын калыкез улон интызэ трос вошъяны лэзисьтэм закон. - Петербургын ужаны кутскиз М.И.Брусневлэн социал-демократ кружокез. -Карйил каторгае келямъёс трос кузя асьсэды асьсэос быдтӥзы. 1899-тӥ. 100 ар талэсь азьвыл кутэмын заповедникъёс сярысь закон. Со дворянъёслы юрттӥз музъемен кузёяськыны. - Ӟучъёс но англичанъёс гожтӥзы Китайын чугун сюресъёс лэсьтон сярысь огкыл. - Гаагаын ортчиз тупаса улонъя конференция. Россия дэмламъя кутэмын калыкъёс куспын ченгешонъёсты кенешыса эскеронъя, музъем вылын ожмаськонъёсты нуон законъёсъя но сямъёсъя конвенциос. - Промышленностьын кризис кутскиз. *** 1900-тӥ арысен луэм учыръёсты сётом, толэзен но нуналэн вераса. А. ШКЛЯЕВ. Вашкала сямъёс но йылолъёс Мон трос аръёс ӵоже эскерисько ни Селта ёросысь сямъёсты но йылолъёсты. Таяз учыре тунсыко потӥз дӥсяськон сям. Асьсэлэсь чебер дӥсьёссэс нылкышноос шыкысысьтызы поттылӥзы праздник но базар нуналъёсы. Дэра юбка интые буртчинзэ, огшоры басмалэсьсэ (ситецлэсь) дӥсяллязы. Йыразы юг-тӧдьы кышет, пыдъёсазы, кут интые, керттэтъёсын йылсо ныро базар сапег кутчаллязы. Нылъёс капчи дӥсь дӥсяллязы - кильымо-кильымо юбка, чеберъям дуро кофта. Йырсизэс яркыт буртчин лентаосын пунылӥзы. Воргоронъёс но празднике шоголь дӥсяськылӥзы - базар шароварен. Кусказы - куэм лента, пыдазы - сурон сапег. Тужгес чебер дӥсяське вылэм выль кен. Яркыт дэремен, лентаосын. Сюан дыръя со эмеспилэн ӵыжы-выжыезлы аслэсьтыз пужъятэм ӵушконъёссэ кузьмаллям. Шоголь кышномуртъёс асьсэос оломар но малпаны быгато вылэм. Тӧдьы дэраез, зангари сяськаен буяса, басмазы чагыр луэ, лулпу сулэн ке -нап-ӵуж. Со сяна, буяськыны кутылӥллями сугон кӧмез, пинал кызьпу куарез. Тужгес яратылӥллям лулпу сулэн буям басмаез. Мукетъёслэсь пӧртэмгес селтаослэн кышет нуллэмзы. Бадӟым кышет улэ соос одно сьӧрлань кышет (ӵемгес - тӧдьы) керттылӥзы, гердзэ кымыс вадьсы карыса. Куное, черке мыныкузы, йыразы бадӟым туго сьӧд кышет кертто вал, шонерзэ ке, ангес ултӥзы венен тэчылӥзы. Дӥськутсэс кышномуртъёс киысь кие сётъязы: нылзылы, кензылы, соослэн нылпиоссылы. Куамынэтӥ аръёсы огез бӧрсьы мукетыз кӧлан котырзэс но шоголляны кутскизы. Койка дуръёсазы пужъятэм, чильпам дур (подзор) ошылӥзы, узьыик чеберъяллязы улдэремзылэсь дуръёссэ. Куд-огез дӥсьтӥсь кышноос юри юбка сӧзулзэс ӝуткаса ветлӥзы. Чеберъяськонъёс пӧлысь пель угыос, пртэм зундэсъёс нуллӥзы. В. ЛОГИНОВ. Удмурт кылэз дышетыны мылкыд карись венгер пилы кулэ улон инты, Удмурт университетлы матэгес. Тел. 44-42-58, 25-42-69. Удмурт Республикаысь Кун Кенеш но Правительство кайгыро УАССР-ысь Дунъёсъя кун комитетлэн азьвыл кивалтӥсез, Быдӟым Отечественной ожысь ветеран, куинь "Трудовой Горд Знамя" орденлэн но "Знак Почёта" орденлэн кавалерез Акатьев Дмитрий Митрофанович улонысь кошкемен валче но ӵыжы-выжыосызлы но матысь адямиосызлы мур куректэмзэс верало. *** Шаркан ёросысь Сосновка школаысь выпускникъёс пӧлысь одӥгез - Иван Знаев. Вишур гуртын вордскем, будэм пияш пинал дырысеныз ик малпалляз кыдёкысь странаосы вуылыны, Родинмес утись луыны. Танковой военной училищеын дышетскиз но офицер луиз. Вить арзэ со служить кариз Россилэсь палэнын, Ливиын военной советник вал. Та туспуктэм лэсьтэмын дас ар талэсь азьло - Иван Михайлович Знаев Ольга нылыныз. Берыктытэк Куддыр тазьы но луэ: созэ яке тазэ текстэз берыктыку ыше яке воштӥське солэн пуштросэз. Юнме шат дышетскем адямиос классикаез сое гожтэм кылын лыдӟыны тыршо. Тае лыдэ басьтыса, ми кенешим газетамы "Берыктытэк" выль сэрег усьтыны. Умой соиз: лыдӟисьёсмы пӧлын ӟуч кылэз тодӥсьтэмез ӧвӧл. Туннэ дэмласьком "Комсомольская правда" газетлэн туэ 31-тӥ августэ потэм номераз печатлам интервьюлэн ог люкетэныз тодматскыны. Валэктон сётэ Татарстан Республикалэн президентэз Минтимер Шаймиев. Наш президент должен знать два языка У нас в Конституции Татарстана записано, что кандидат в президенты республики должен владеть обоими государственными языками - и русским, и татарским. Того, кто не знает татарского или русского, не регистрировать. По российским законам нас можно судить: это якобы ограничение прав. Но с точки зрения здравого смысла посыл безупречен: ведь большинство населения - татары и русские. Мы же не говорим, что обязательно татарином надо быть, - нет, у нас есть вице-премьер Владимир Швецов - он татарский язык знает лучше, чем многие татары. Пожалуйста, его будут регистрировать... Права национальностей ведь тоже нужно учитывать - даже в тоталитарном Союзе были Палаты национальностей в Верховных Советах... Все это пытаются объяснить экономическим положением, но Квебек в экономическом положении, наверное, не хуже, а проблем национального характера у них тоже хватает. Нельзя, строя демократическое общество, загонять нерешенные проблемы вглубь... - Это как на войне оставить невзятый город - все, он у тебя в тылу партизанит. - То же самое - история с новыми паспортами. Единый паспорт - все на русском языке написано... Я же не говорю: не надо на русском, если бы я так говорил, меня бы не поняли. Я говорю: напишите мое имя, как его писала, произносила моя мама. Я имею на это право от рождения, я же не виноват, что родился таким, не той национальности. Кто от этого что теряет? Ведь уважение к русской нации огромно... - Два-три таких решения, и можно потерять все уважение. - О чем и речь. Обидно, я вам скажу. Наш Госсовет своим решением запретил выдачу этих паспортов. Вот говорят - неудобный Шаймиев. Но мы же не говорим: нужно нарушать целостность России. Никогда мы этого не говорили. Это наше кредо, мы всегда это подчеркиваем. Но ведь есть и мы. Если мы не скажем свое слово, не будем иметь свою позицию, мы будем виноваты в том, что не смогли построить цивилизованное федеративное государство, не воспользовались этим историческим моментом. Вот ведь цена вопроса какая. Духовность, отношения между народами - вот это доброе суметь бы сохранить и в условиях рыночной экономики. Ӟечгес уло ни Туэ арлэн кутсконаз Завьял ёросысь Холмогоров нимо колхозлэсь 51 процент нимо акциоссэ басьтӥз Ижысь "Промстройкомплект" предприятие. Ягул черкогуртын Холмогоров нимо ОАО кылдӥз. Та огазеяськонэ пыро на Ӟуч Вожойын улӥсьёс но. Калыкен пумиськылыкум, ялан юалляськисько: маиз ке воштӥськиз-а али та гуртын? Ваньмыз сямен верало, умойгес улонлы пичияк ке но оскон кылдӥз шуыса. ОАО-лэн кивалтӥсез Василий Григорьевич Никифоров вераз: - Киземын вал 450 гектар ӟег, 103 гектар сезьы, 380 гектар йыды, 90 гектар силос культураос, 538 гектар - трос аръем турын. Та нуналлы соос ваньмыз утялтэмын. 150 гектарысь картофкаез бичаны кутскемын. Та чебер нуналъёсы даслэсь тросгес гектарысь со утялтэмын ни. Картофка июнь но июль толэзьёсы начар будӥз, нош августэ зоръёс но шуныт куазь соослы выль шокчон сётӥзы. Али уноез лудъёс вож-вож ӝужало, соин ик ум дыртӥське сое копаны. Картофка бичаны потэмын шор ёзо школаын дышетскисьёс. Тӥни озьы, хозяйство вакчи дыр куспын юоссэ кеносэ пыртӥз. Луд ужъёсты дыраз быдэсъян понна, гуртысь техникаез толалтэ ик тупатъяны кутскизы, соин шуге-леке вуонъёс туж уно ӧй вал. Эстӥськон сярысь но гурт кивалтӥсьёс вазьгес сюлмаськизы. Машинаос ӧз сылэ. Хозяйствоысь валтӥсь агроном Юрий Фокин но агроном-семеновод Владимир Мухаметшин, кык егит удмурт воргоронъёс, йылпумъямын Ижысь гурт хозяйствоя академиез. Татысь калыкен одӥг кыл шедьто, ас ужзэс ярато. Ӟеч кылъёс веразы Николай Шадрин, Виктор Горбунов но Николай Чиляков комбайнёръёс сярысь но. Соослэн сюлмысь тыршеменызы, юос ыштонъёстэк утялтэмын. Картофка копанын нырысь нуналъёсы ик ӝегатскытэк тырше, та удысын трос аръёс ӵоже ужась Анатолий Корепанов. Зэм, уно аръёс ӵоже ни хозяйстволэсь лудъёссэ бушатыны "юрттылӥзы" городысь лыктэм но ас гуртысь ик лушкаськисьёс. Соин ик выль кивалтӥсьёс юри кылдытӥзы утиськонъя юрттэт. Соослы сётэмын УАЗ автомашина. Лушкаськисьёс туэ но уно. Но соос ваньмыз сямен буш киын кошконо луо. Вылаз ик, "кузь киосты" Завьяловоысь милицие келяло. Тани кылем уе ик автомашинаен дас одӥг кузя картофка бичаны лыктӥллям. Соос кутэмын но ыстэмын милицие. Озьы ОАО-ын трос ваньбур утиське. Картофка гинэ ӧвӧл. Гурт калык шумпотэ уждунэз дыраз тыремлы но. Лудын ужасьёс колхоз уксёез арлэсь но кема уг адӟыло вал азьвыл. Н. ВОЗИСОВ. Школа но улон Шунтӥсь борддоръёс Улон нюжаос пӧртэм пала кыстӥсько. Кудӥз ке но сьӧраз валтэ, герӟа, огинтые бурмытэ... Анатолий Булдаковен но озьы ик луиз. Кыква школаысь дышетӥсь Виктор Петрович Поздеев, Булдаковъёс дорын улыкуз, куке сое Ижевске сьӧраз басьтӥз. Михаил Лямин доры куное ветлӥзы. Писатель 13-14 аресъем пияшлэсь сак, визьмо луэмзэ соку ик синйылтӥз, вогыриё сьӧд йырси кузяз маялляса дэмлаз солы Свердловске Суворовской училищее мыныны. Нош анаез, Мария Михайловна, бурдъяськись мылкыдызлы лопырскыны ӧз сёты: кык нылъёсыз кошкизы-бызизы, нош кызьы со огназ, кузпалыз но ӧвӧл ни бере? Оло, луоно вылэм солы дышетӥсь, книгаен эшъяськемзэ, котьмае тодыны тыршемзэ лыдэ басьтоно ке. Ас дышетскем школаосысьтыз (Кыква но Сосновка) борддоръёс вань улытозязлы шунытсэс сётӥзы. Улон шоры паськыт усьтэм синъёсын учкись, котьмае сюлэм бордаз "лякись" отличник Толя Булдаков котьку дышетӥсьёслэн син шоразы вал. Трос аръёс ортчыса но... Туэ, Пушкинлэн араз, гажано дышетӥсез Воля Григорьевна Широбокова солы кузьмаз яратоно поэтэзлэсь кылбур сборниксэ. Анатолий Андреевич Булдаков туннэ Россия Федерациысь дано нефтяник. "Ижевскнефть" НГДУ-ын инженер, тусбуйзэ адӟыны луэ данъяськоно адямиосынызы артэ нимысьтыз борддорысь. Нош улэ та адями вордскем гуртаз, Кыкваын (али Як.-Бодья ёросэ пыре). Куинь пиналъёслэн атайзы. Юртъер котырзэ юн чакла-уте. Городэ сое уд кыскы. Соин ик кузпалыз, Светлана Сергеевна, шуэ, дыр: "Солы музъем но трактор гинэ мед луоз". Анатолий Андреевич дышетскиз Ижевскысь гурт удысъя институтын, ачиз кадь ик нодлыко эшеныз ӵош Валерий Телицынэн (таиз сярысь газетмы гожъяз ни). Куиньназы ик та "сэзь кыкви пиос" йылпумъязы Шаркан ёросысь Сосновка шор ёзо школаез. (Котькинлы шуд уг усьы Социалистической Ужысь Герой И.К.Зеленин кадь адямиос дорын дышетскыны.) 130 ар тырмиз ни Сосновка школалы. Туэ 6-тӥ феврале пумиськон ӝытсы вал. Ӝоген школа пинал куараосын тырмоз. Нош азьвыл дышетскемъёс татчы сюресэз уг вунэто - школа борддоръёс сьӧрысь омырен шоканы, ортчем аръёсты тодазы вайыны пырало. Нош туннэ, газетмылэн внештатной корреспондентэз В.П.Поздеев (верамы ни, Виктор Петрович - та эшъёслэн азьвыл дышетӥсьсы) куремъя, Анатолий Андреевич Булдаков маде, маин дуно солы Сосновка школа. Вордскем шаер пасьтана усьтӥське, дыр, школа укноос, борддоръёс бордысен. Тазьы малпаса, мон котьку тодам ваисько классэн кивалтӥсьмес Воля Григорьевнаез (али Шарканын улэ). Куинь ар гинэ дышетӥз со милемды ӟуч кыллы но литературалы, нош кӧня тодонлык сётыны вуиз. Солэн верамысьтыз мон аслым усьтӥ Григорий Егорович Верещагинэз. Кылем дауре, 90-тӥ аръёсы, со дышетэм милям Сосновка школаямы, ваньмон дыръяз калгылэм татысь вашкала беризьёс, кызьпуос, топольёс, пужымъёс пӧлтӥ. Этнограф но краевед Г.Е.Верещагин кема эскериз та палась удмуртъёслэсь улэм- вылэмзэс, собере гожтӥз "Вотяки Сосновского края" книгазэ. Мон та школаын дышетскыку, школалэн директорез вал Павел Михайлович Широбоков. Соос кузпалэныз Воля Григорьевнаен Удмурт пединститутысь удмурт кылъя но литературая факультетлэн нырысетӥ выпускникъёсыз пӧлысь луо. Завуч луыса ужаз, бӧрысь директор луиз РСФСР-ысь школалэн дано дышетӥсез, туж усто математик Захар Степанович Шамаев. Та кивалтӥсьёс нырысьсэ республикаямы пыӵатӥзы кабинет амалэн ужанэз. Кылдытӥзы музей но. Огъя вераса, школалэн улонэз ас ӧраз бугыр пӧзе вал. Ми юн данъяськылӥм биологиен дышетӥсенымы Иван Константинович Зеленинэн. Удмуртиын нырысьсэ но одӥг солы гинэ дышетӥсьёс пӧлысь сётэмын Социалистической Ужысь Герой ним. Школа садысьтымы уг луы вал ӵыдыны. Тулыс яблокпуос тӧдьы но льӧль сяськаос пӧлы выйылӥзы, нош гужем-сӥзьыл та сад шумпоттылӥз пӧртэм емышъёсыныз - вань котырлы вожъяськымон. Сое Иван Константинович синчеберзэ кадь утьыса возиз. Со сяна, мугорзэ кыдатӥз спортэн. Быдӟым оже ветлэмын, арлыдо ке но вал ни, куасэн ортчылӥз уно иськемъёсты, котькыӵе куазь мед луоз. Тӥ, пиналёс, шуылӥз со, одно ик эшъяське спортэн, соку Родинамес зол утисьёс луоды. Нош нырысь ик И.К.Зеленин дышетӥз милемды музъемез, ужез яратыны. Та понна ик солы гадь вылаз кык пол бырттылӥзы Ленин орден. Сосновка школамы соку быдэс шаерамы адӟем карымон вал. Трос интыосысь дышетӥсьёс но пиналъёс ветлӥзы ми доры, экскурсие выллем. Пырем бере ик син шоры йӧто вал стендъёс но отысь туспуктэмъёс, соос пӧлын - Удмуртиын кылдытэм ИИ степенё Кутузов но Суворов орденъёсын, кык Горд Знамяен пусъем 313-тӥ Петрозаводской стрелковой дивизиысь воинъёс. Брест крепостез утисьёс пӧлысь син азям уло Николай Широбоковлэн но Федор Версальскийлэн тусбуйёссы (ӵапак таос сярысь вераз туэ 11 феврале Удмуртиын дыръяз Белоруссилэн Президентэз А.Лукашенко). Та стендъёсыз дасяны но музеймес узырмытыны юрттӥз историлы дышетӥсь В.П.Поздеев, "Они защищали Брестскую крепость" но "По следам подвига" книгаослэн авторзы. Виктор Петровичлэсь ик мон тросгес тодӥ 313-тӥ Петрозаводской дивизия сярысь, кытын ожмаськиз кузпалылэн атаез Сергей Николаевич Долин, сержант-артиллерист, Горд Кизили орденлэн кавалерез (Кизнер ёросысь). Геройёсмы вал милям школаысьтымы потэмъёс пӧлын но. Тани ӧжытэз тодо, дыр, Удмуртиысь школалэн дано дышетӥсез Александр Степанович Шамаев - старшина, 1944-тӥ арын 26-тӥ мартэ нырысьёсыз плын выжиз Румыниен кунгожез. Нош Тарас Емельянов луиз И, ИИ но ИИИ степенё Слава орденъёслэн кавалерзы, бӧрысь Ижын андан пӧзьтӥз. Сосновкаысь нылпи юртын улӥз но школаын дышетскиз Советской Союзлэн Героез Александр Ярославцев. Соин ик паймонэз ӧвӧл, тросэз монэн ӵош дышетскемъёс военной училищеосы мынылӥзы шуыса. Тани Евгений Леонидович Галасеев - полковник, али Ижевскысь Индустриальной военкоматлэн военной комиссарез. Николай Павлович Широбоков (Павел Михайловичлэн пиез) но Валерий Всеволодович Широбоков Хабаровск дорын служить карыса будӥзы подполковник дорозь. Кыдёке кылем 20-тӥ аръёсы Сосновка школаез йылпумъяз полковник Михаил Егорович Шибаев. Трос дасо аръёссэ со сӥзиз госбезопасностьын ужанлы. Солэн кичӧлтэмезъя, черкогуртамы кылдытэмын пужымо сюрес - аллея. Со табере тодэ вайытэ та адями сярысь. Алигес мон лыдӟи Николай Евсеевлэсь "Пеймыт уг гинэ вералоз" документальной повестьсэ. Тодӥ: куке-соку пичи пароходэн баржаос тубыло вылэм Воткинскысен пырак Сосновкаозь. Нош али, нюлэсъёсты корамен, лэся, шуръёсмы лазегомизы. Чупчиысь но кемалась уд адӟы ни пароходэз... Жаль, улонысь кошкиз ни та гажано журналистмы, Сосновка школаын дышетскем эшмы Н.Н.Евсеев. Эшшо огез данъяськонмы - Кутоншурысь Егор Загребин, писатель, драматург, артист. Алигес со Удмуртиысь Писательёслэн огазеяськонзылы тӧрое быръемын. Куамын арлэсь ятыр луиз ни Сосновка школаез йылпумъямелы. Озьы ке но, отысь дышетӥсьёс али но сюлэмме няськатыса возё, музъемозь йыбырттымон тау соослы. Тазьы ик шуыны быгатозы ваньмыз, кин шӧдӥз школа борддоръёслэсь шунытсэс. Анатолий Булдаков. Пайдай ужалод, тыро улод Та вакытэ тросаз фермаосын толлы дасяськон мынэ. Со уж умой радъямын Завьялово ёросысь "Холмогоров нимо" ОАО-ын. Кылсярысь, Ӟуч Вожой гуртысь фермаысь выжзэ, липетсэ, укнооссэ но ӧсъёссэ выльдӥзы ини. Озьы ке но, тупатъян ужъёс лачак гинэ ай. Али ужало шуныт тамбур но корпусъёс куспысь мынон-ветлон интыез лэсьтон бордын. Нош юртто соослы городысь шефъёссы. Та ужзы ӟеч радъямын на ягулъёслэн. Куштӥськон калэ вуэм гидэз соос пыр-поч сэзъязы-выльдӥзы. Малпало на пудо йырез йылэтыны. Хозяйстволэн азинскемез шӧдске, луоз, кивалтӥсьёслэн быгатыса ужамзы бордысь. Та дыре директорын ужа Василий Григорьевич Никифоров, нош валтӥсь зоотехникын Василий Елизарович Горбунов. Соос кыӵе ке уж борды басьтӥськемзылэсь азьло котькуд пыр-поч кенешозы, котыр ласянь эскерозы, соку ини ужзэс но быдэстозы. Н. ИВАНОВ. Футбол "Газовик-Газпром" берло пумиськонъёссэ Ижын ортчытӥз. Читаысь "Локомотивез" со 1:0, нош Красноярскысь "Металлургез" 2:0 лыдын вормиз. Удмуртиысь команда 52 очко люказ но сизьыметӥ интые ӝутскиз. М. КУЗЬМИН. В соответствии с постановлениеи Правительства Удмуртской Республики от 23.08.99 г. � 814 ликвидационная комиссия извещает об упразднении Управления по организации выплаты пенсий и пособий при Министерстве социальной защиты населения Удмуртской Республики. Функции Управления по организации выплаты пенсий и пособий передаются Министерству социальной защиты населения Удмуртской Республики. Все претензии принимаются ликвидационной комиссией в двухмесячный срок со дня опубликования настоящего объявления по адресу г. Ижевск, ул. Ломоносова, д. 5, кабинет 316, тел/факс 75-65-11. Председатель Ликвидационной комиссии М. Е. БЕЛОУСОВА. Туно: Бускеледлэсь пызьзэ курид ке, копейка коть сёт Али чик но паймонэз ӧвӧл ни ведӥнъёслы, туно-пеллёослы, экстрасенсъёслы. Вамышлы быдэ шедё. Пӧлазы - тачак эрекчиос. Уксё поттон понна эмчи кариськыны дась. Малы адями мынэ пелляськись дӥне? Врачъёслы осконзэ ыштыса. Одӥг пол эше чортӥз пелляськись доры. Ачиз витетӥ ползэ мынэ ини отчы но туж ушъя. Сьӧраз одно кыӵе ке емыш басьтэ. Туно-пеллё шуэм: мон вушйылэмысь дугдӥ ке, тон бурмод. Кызьы но малы меда со вушйылэ? Луло туно шоры пал синмыным коть учкеме потӥз. Эшеным ӵош мыныны соглаш луи. Пыримы городысь огаз квартирае. Ма, туж узыр ук: котырак ковёръёс, вазаос, сяськаос. Ӝӧк сьӧрын пуке зӧкомем мугоро кшномурт. Пальпотэ, нош пиньёсыз трос ӧвӧл ни: - Пырелэ, пырелэ. Эше лавкаысь басьтэм грейпфрутсэ но коньдонзэ песянайлы мычиз но пуксиз. Мон ӧс палан сылӥсько, пукон доры лыктыны уг дӥсьтӥськы. Коньдонзэ пересь сэрытак кисы пыдсаз донгиз но, мычем емышез паласа, маке сипыртыны ӧдъяз. Ну вушйылэ ук, ну вушйылэ. Ымзэ куака тэрымон усья. Собере нош ик маке сипыртэ, вушъе, емыш вылэ сялӟе. Фу, юрӟым. Эше грейпфрутэз нокыӵе кариськытэк сииз но, кыре потӥм. Юасько: - Кызьы тон солы оскиськод? - Мар-о бен карод, врачъёс юрттыны уг быгато бере? Нош туно-пеллёос мазэ-созэ валало шуо. Та учыр бере мон туно-пеллёослы оскемысь чутрак дугдӥ. Но... Ӵыжы-выжыосы дорын чай юыса пукисько. Ӵужапае маке бызьылэ, пӧраське, кыӵе ке дуно куноез возьма. Нылыз уж дурысьтыз вуиз. Пересьмем мемиез кызь иськемысь лыктӥз, конгылляса ӧсэтӥ пыриз. Милемды, пе, ваньместы одӥг кышномурт эмъя. Йӧнатон амалэз - медициналы тодмотэм. Сое тазьы возьмаськом. Ӧсэ жингыртӥсь луиз. Усьтӥзы. Тодмотэм кышномуртлэн ӧс куспысен ик маке туж шулдыр бӧтьыртэмез кылӥськиз. Гур азь пала пыриз но пальпотыса чырткемъяськиз. Мон но пумитаз вази. Выжы-кумъёсы соку ик лӧптӥзы ке но, Юлия Владимировна мыным оскон ӧз пыӵаты. Тусызъя 35-40 арес пала, нокыӵе эмчилы уг кельшы. Соин со шоры ӧжыт эскериськысагес учкылӥ. Пуксим ӝӧк сьӧры, сиським. Юлия Владимировна лабыртэмысь уг дугдылы. Весь мае ке маскаразэ маде. Ваньзы горо. Ма, мынам но сереме потӥз ини. Сиськеммы бере эмчи ӵыжы-выжыосме мукет комнатае чортӥз. Мон, пе, тӥледыз эмъяй ни, табере зарядка возьмато. Мугорды мед юнмалоз. Мон но учкыны куриськи. Тумошо ук. Нош Юлия Владимировна мон шоры дунъяса кадь учкиз но шуэ: - А тыныд уг яра учкыны. - Малы? - Кин тонэ тодэ. Адӟем карыса, зарядкаен вырыны кутскод. Нош сое бурмемъёс гинэ лэсьтыны быгато. Тон йӧнатскемын ӧвӧл - эшшо тазалыктэ уродгес карод на. - Ма, мынам нокытӥы но уг висьы кадь, ангина гинэ ӵемысь кекатъя. - Тон ай висёндэ но уд тодӥськы. Тӥни синучкон шоры учкы али. Ымдур сэрегъёсыд улӥе учко. Со возьматэ: тынад ӝушед лэзиськемын, интыяз ӧвӧл. 1Ачид но тодӥськод ук. Куке туж секытэз ӝуткамед вань. Собере ӧскид ук, кӧтыд висьыса. Тодад ваид-а? Тонэ нырысь эмъяно. Ӧжытак куалектӥ. Ма, зэм вера ук та. Валля арын турын пыртам вал коргид сиге. Секытгес йӧтӥз, лэся, мыным. Нош кызьы меда монэ та кышномурт эмъялоз? Веднаське-а мар-а? Малы уг вера йӧнатон амалзэ? Мукет нуналаз кышномуртэ кыштырак гинэ вуэм ини. Мон, пе, толон дорысьтыды кошки, бертӥ но точкаен кубикъёсме чӧлтӥ. Соос веразы: тынад шудлы осконэд вань, но сое шӧдытэк эн кыльы. Соин ик тонэ одно эмъяно. Я, соглаш-а? - О-о, - шуисько, ачим ӧжытак кышкасько. Оломалы йырам шуккиз выжы-кумъёслэн индылэмзы: Юлия Владимировналы ужамез понна, пе, кин коньдон сётэ (кӧня быгатэмезъя), кин - сиён-юон. Гуртын сӥль-йӧл вань ке, яралоз, дыр, шуыса малпай. Пукси ӝӧк сьӧры. Со - азям. Киосме ӝӧк вылэ поныны косӥз. Суйпосъёсы бордысьтым вирсэръёсме пӧлыосыныз калленак зӥбиз. Вань чиньыосаз зарни зундэсъёс. Соос, пе, кужым (энергия) сётыны юртто. Кышкаса но кышкатэк шып гинэ пукисько ини. Мар меда та дауртоз? - Тон мынэсьтым эн кышка, гань-гань кариськы. Тани-тани мае ке шӧдӥсько кадь ини. Тынад хронической форингит ук. Ас лэсьтэм ужъёстэ но ваньбурдэ адямиослы жалятэк сётӥськод. Кызьы меда тодӥз? Университетысь эшъёсы весь лекциосме куро - сётӥсько. Кинлы ке юрттэт кулэ ке - юрттӥсько. - Озьы уг яра карыны. Асьме дунне лэсьтэмын туж аспӧртэм. Улэп лулъёс ог-огенызы лулкужымен вошъясько. Кинлы ке мае ке сётӥд ке - со но тыныд маин ке мед берыктоз. Кылэмед вань, дыр: бускеледлэсь пызьзэ курид ке, копейка коть сёт. Ваньбурдэ солань- талань кузьманы уг яра. Со танад ук. Сётэм арбериеныд ӵош аслэсьтыд лул пырыдэ кузьмаськод, кужымдэ но кӧня ке лябомытӥськод. Тае шӧдыса, висён но бордад кырмиськыны выре. Тон сое валад ке, бурмод. Тани, учкы ай, виред но сэзьгес бызьылыны ӧдъяз. Юлия Владимировна троссэ паймымонзэ вераз на. Йырсазям самой пыдло ватэм малпанъёсме но, куректонъёсме но кырым пыдэс вылысь кадь адӟиз. Ма, тазьы тодэмез бере мон оскыны но кутски, лэся. Кыл бӧрсьы кыл кошкиз. Абдрай: туно-пеллё шуон Юлия Владимировна профессиезъя кардиолог вылэм - сюлэм висёнъёсъя врач. Нош аслэсьтыз таӵе быгатонлыксэ кемалась ӧз шӧды ай. Уно книгаос лыдӟе. Со оске: адями висёнъёссэ ачиз бурмытыны быгатэ. Солы ӧжытак гинэ юрттоно. Кызьы? Юлия Владимировна висисен кенеше, солэн черъёсызлэсь мугъёссэс шарая. Озьы бӧтьыртон сяменызы, адями ассэ сакгес чакла но мугорзэ юнма-юнма шуыса индылэ кадь. Сюлэм, пекляос, тымусъёс амалтэк кылзӥськоно кожало. Угось вань кыльёс пото кышкан, керетон, керӟегъяськон, сюлэмшугъяськон бордысь. Адями ассэ ачиз озьы воштыны быгатэ ке - бурмон пала нырысетӥ вамыш лэсьтэ. Зэм, висисьёс ваньмыз пӧртэмесь. Ог-огзылы дэмланъёс сётыны медаз дыртэ. Котькудӥзлэн мугорыз но йырвизьмыз аспӧртэм. Адямилэн дэмламезъя, ассэ бурмытыны турттоз но, эшшо шуге-леке вуоз. Адями ас черзэ нырысь ик йырыныз валаны кулэ, собере ини - эмъяськыны. Соин Юлия Владимировна котькудӥныз ваче син пуке, юалляське, валэктэ, кужым сётэ, эмъя. Собере эмчи ми доры кык пол вуылӥз на. Кӧтме позыръяз-мараз но ӝушме интыяз пуктӥз (ӵужапае но медик бере - буйгатӥз: зэм, пе). Собере сюрлые пичияк кырыжскемын вал. Сое но шонератӥз ук, ява. Паймод но бырод. Эшшо трос дэмланъёс вераз на. Табере уг тодӥськы - осконо-а, ӧвӧл-а таӵе эмчиослы. Юлия Владимировна, мынэсьтым саламъёсме кутыса, мукет муртъёс доры кошкиз. Нош мон кӧня ке нунал ӵоже возьмай на - кин тодэ, висёнъёсы, оло, огдырлы гинэ пегӟизы. Но тазалыке оглом умояз кадь. Мылкыды капчи. Ӧйтӧд, оло асме ачим буйгатэменым-а со, кышномуртлэн вераськемезлы оскемен-а. Уг тодӥськы, кызьы тӥ, лыдӟисьёс, учкиськоды экстрасенъёс шоры. Но мынам малпанъёсы ӧжытак воштӥськизы ик. Но ваньмызлы оскыны кулэ ӧвӧл, вылды. Пӧлазы уксё понна но ёрмемъёс вань. Соин, гажано лыдӟисьёс, чакласькелэ, туно-пеллё доры мыныкуды. Марина КОСТЫЛЕВА. ___________________________ 1ид но Сюлэмшугъяськытӥсь югдур Возьыт Удмурт кун университетлэн куинь номеро общежитияз пырыса, мылкыд ик ӝутӥськиз вал: буёл зын вӧлске. Татын улӥсьёслэн нырзы нуямын ини. Котькуд выль дышетскон аре соос пичи ке но осконэн лыкто: маке но, оло, воштӥськем улон интыязы. Но жаляса верано луэ, кызьы ке вал, озьы ик кыле. Ольга Андреевна Таушева, общежитилэн комендантэз шуиз, таяз аре но бадӟымесь выльдӥськонъёс, пе, уз луэ. Озьыен, буёл зынэн шоканы "удалтэм" куд-ог этажъёсызлы гинэ. Отчы интыяськизы нырысетӥ курсэ пырем студентъёс, "зӧк кисыоосыз". Уг тодӥськы, вожъяськоно-а, жаляно-а соосты. Ужпум тани ма бордын. Общежитиысь комнатаос одӥгъёсыз кык, мукетъёсыз куинь кузя улыны чакламын. Но куинь кузя улӥсьёсты шер шедьтод, инты тырмымтэен, отчы одно ик ньылетӥзэ интыялозы. Нош кык муртлы чакламаз куинетӥзэ уг интыяло ни: нокытчы лёгиськыны луэ. Котькуд ар студентъёс кык кузя улон понна нюръясько. Удалтэ котьку сямен ик кужмоосызлы, кескичъёсызлы. Нош нырысетӥ курсэ лыктӥсьёс "двухместкаосты" вӧтаса гинэ адӟылӥзы. Туэ арын ваньмыз йыринчукин берытскем. Рыноклэн куронъёсыз общежитие но палазы. Кык кузя улэмед потэ ке, нокин тонэ уз куты, ул. Но нырысь пыр-поч буяно-тупатъяно улоно комнатадэ, блокез, кытчы пыре комнатаед, озьы ик коридорез, кудаз интыяськемын комнатаед. Яке мукет амал вань на: басьтоно аслад блокад сантехника. Мон ӧй чота, кӧня тыр ваньмыз та луэ, но валамон, котькудӥз таӵе дун тырыны уз быгаты, котькӧня кык кузя улэмед потӥз ке но. Туэ арын ог тямыстон мурт пӧлысь дас куатез мылкыд каризы таӵе амалэн интыяськыны. Та лыдпус тросгес луысал, но комнатаос ваньмызлы уг тырмо. Озьыен, шудтэмъёсыз укмыс толэзь ӵоже нуналысь нуналэ лёгаськозы буёлзы ломдылэм выжъёс вылтӥ, синзэс вӧсь карытозы сьӧдэктэм, пурысьтам борддоръёс. Янак пасьёсын шулалоз тӧл. Гуртысьтыд вань ӟустаридэ вайыса гинэ, рос-прос туйылыны быгатод соосты. Дышетскон ар бырыса, студентъёс выльысь пичи ке но осконэн кошкозы гуртъёсазы. Но нырысь вань луоно арбериосты яке дорад нуоно (машинаед ке вань) яке Ижысь ӵыжы- выжыедлы кельтоно, нокыӵе оскон ӧвӧл угось нырысетӥ куарусён толэзьлы ваньмыз интыяз луоз шуыса. Туэ гужем куспын куинетӥ общежитиын ог тямыс комнатаослэн ӧсъёссы тӥямын вал. Лушкаськисьёс, кызьы асьмелэн ӵемысь луэ, шедьтэмын ӧвӧл. Возьыт. Возьыт вылӥ школамы понна, возьыт таӵе общежитиосын улонмес ортчытэм понна, возьыт Россия понна. Л.Постникова. Удмурт кун университетысь студентка. ВАНЬ СЮРЕСЪЁС УДМУРТИЕ ВУТТӤЗЫ Сыӵе ини журналистлэн ужез, улонмы сярысь ужаса улӥсьёслы маде, пӧртэм удысъёслэсь, нимаз адямиослэсь ужзэс чакла-эскере, пӧсь ужпумъёсты сэрттон-пертчонэ пыриське. Нош ӵемысь-а кылод, кызьы со ачиз шока, кыӵе "сюлмаськонъёсын" улэ? Ӵапак ивор вӧлмытон удысысь ужпумъёс сярысь кенешыны люкаськизы Россиысь журналистъёс ИВ фестивалязы. Странамылэн пӧртэм сэрегъёсысьтыз сюресъёс вуттӥзы соосты Удмуртие. Лек висёнлэн тодметэз Фестивальлэн нырысетӥ нуналаз люкаськемъёс кык ужпумез эскеризы. Нырысь ик ивор вӧлмытӥсьёс вераськизы Кун Думае быръёнъёсы пыриськон сярысь. Кызьы ивортылӥмы ни вал, кенешонэз нуиз Россия Федерациысь Быръёнъя валтӥсь комиссилэн кивалтӥсез Александр Вешняков. Журналистъёслэн чакламзыя, мукетыз бадӟым ужпум - странаямы коррупция но соин нюръяськонын прессалэн интыез. Таяз ужрадэ но Москваысь куноос пыриськизы. Кылсярысь, Георгий Сатаров, Президентлэн Кенешезлэн азьвыл членэз, коррупциез эскерон удысысь бадӟым специалист, мадиз, ма со сыӵе коррупция, кыӵе ыштонъёс вае странамылы но калыклы. Адямиос тодыны-валаны кулэ, кин со - кузьмаськонэ-вузаськонэ выем чиновник. Ӵапак сое адямиослы журналистъёс валэктыны кулэ. Нош коррупцилэн кышкытлыкез, зэмзэ но, туж бадӟым. Бюджетлэн палэнтӥз коньдон "тӧлӟем" сяна, экономика лябӟе, солэн ужазинлыкез синэ. Куашка демократия. Та сярысь история но вера. Кылсярысь, 20-тӥ-30-тӥ аръёсы ӵапак соин сэрен быриз Германиысь демократия. Властез диктатор, Гитлер, киултӥз. Нош малы кылдэ коррупция? Г.Сатаров висъяз кык мугъёсты. Кузьмаськон пушъе, кун чиновникъёслэн уждунзы ӧжыт ке. Тани Сингапурын 70-тӥ аръёсы югдур туж секыт вылэм. Сое тупатон вылысь, кун службаын ужасьёслэсь уждунзэс дас пол будэтӥллям. Мар шуоды, табере Сингапурын кузьым басьтӥсь чиновникъёс туж ичи, пе, та ласянь Азиысь страна быдэс дуннеын висъяське. Коррупция озьы ик выжыяське, куке государство экономикае паськыт пыриськыны кутске, шуиз Георгий Александрович. Та малпанэз азинтӥз "Новая газета" изданилэн редакторез Дмитрий Муратов но. Коррупциез журналист радиациен ӵошатӥз. Огшоры адямилы, пе, со шӧдыны луонтэм, нош кышкытлыкез пумтэм. Тодмо газетлэн кивалтӥсез лыдъямъя, журналистъёс кивалтӥсь ёзъёслы уногес юанъёс сётъяны кулэ. Чиновник валэктон сизьым нунал ӵоже ӧз сёты ке, Россилэн законодательствоезъя со вылэ судэ сётыны луэ. Кун Думалэн депутатэз, "Российские регионы" фракцилэн кивалтӥсез Олег Морозов чакламъя, Россиын кивалтӥсь ёзъёсты эскерись ӧвӧл. Калык мултэс оске соослы. Законъёсмы вань ке но, улонын уг быдэсъясько. Соин ик кулэ зэмос эрико, шара вераськыны кышкасьтэм пресса. Мар со сыӵе общественной экспертиза Нош эрико-а меда странаямы пресса? Та юанлы валэктон сётыны быгатэ "Общественная экспертиза" проект. Фестивальлэн одӥгез семинарез сыӵе документэз эскеронлы нимысьтыз сӥземын вал. Пусйыны кулэ, та проект чакла, кызьы адямилэн иворъёс басьтонъя правоосыз быдэсъясько. Со понна эскерисько улосвылъёс, отысь пресса, лэсьтӥське иворъёс вӧлмытон удыслэн эрикезъя аспӧртэм карта. Экспертизалэн технологиез - интыосысь законодательствоосты но кивалтӥсь ёзъёслэсь ужзэс чаклан. Проектэз дасясь командаын ужазы пӧртэм специалистъёс - юристъёс, социологъёс, журналистъёс. Соосты ыстӥз вить организация: Россиысь Журналистъёслэн огазеяськонзы, "Интерньюс" автономной некоммерческой организация, Шара веранэз (Гласностез) утёнъя фонд, Правоя но ивор вӧлмытӥсь ёзъёсъя центр, Социально-психологической эскеронъёсъя национальной институт. Проект мониторинг выллем Россиын нырысьсэ мытэмын вал 1999-тӥ арын май толэзе. Сое радъясь специалистъёс семинарын пыр-поч мадизы нырысетӥ йылпумъянъёс сярысь. Экспертъёс странаысьтымы 87 улосвылаз ужаллям. Кышкыт югдурен сэрен, вуылӥллямтэ Чечняе но Ингушетие. Нош йылпумъянъёс сенсация выллем луо: иворъёсты басьтыны, кылдытыны но вӧлмытыны ӟеч луонлыкъёс одӥгаз улосвылын но ӧвӧл. Тани ивор басьтонъя югдур ӟечгес Ярославль, Иркутск, Мурманск, Иваново, Владимир но Смоленск улосъёсын, Татарстанын но Бурятиын, Корякской но Ямало-Ненецской автономной округъёсын. Одӥг интыын гинэ - Москваын - ивор кылдытыны но вӧлмытыны луонлыкъёс вань. Данаказ улосвылъёсын интыысь законъёс федерацилэсь законодательствозэ лыдэ басьтытэк лэсьтэмын. Кылсярысь, экспертъёс пусйиллям, "Удмурт Республикаын издательской ужез радъян сярысь" постановление федерацилэн законодательствоезлы уг тупа шуыса. Та постановлениея шаерысьтымы ивор вӧлмытон ёзъёс регистарциез ортчем интые лицензия бастыны кулэ. Нош со шонер ӧвӧл. Данак интыосын уг быдэсъяськы СМИ-ослы кун юрттэт сётонъя законодательство. Интыосысь кивалтӥсь ёзъёс ӵемгес юртто сыӵе изданиослы, кудъёсызлы асьсэос учредительёс луо. Теле-, радиовещание нуыны лицензия сётӥсь комиссиосы пырем муртъёсъя гинэ но чакланы луэ, макем кивалтӥсь ёзъёслэн та удысъёсты мултэс эскеремлэсь куштӥськемзы, пӧлазы зэмос профессионалъёсты, калыклэсь представительёссэ кутэмзы уг поты. Тани Москваын лицензиос сётӥсьёс пӧлы пыро 15 кун чиновникъёс но 2 эрико экспертъёс, Чита улосын - 15 чиновникъёс но 1 эксперт. Огкылын вераса, одӥгаз улосвылын но лицензиос сётӥсь комиссиосын эрико экспертъёс ӝыныезлэсь трос ӧвӧл. Нош изданиосты вӧлмытонэз басьтоно ке, данак интыын 1-2 гинэ таӵе ёз ужа (ӵошатон понна: Москваын - 18). Озьыен, издатель продукцизэ вӧлмытӥсьёс азьын пыдесыз вылэ уськытэмын. Соос пыр интыысь кивалтӥсь ёзъёс издателез пачкатыны выро. Экспертъёслэн чакламзыя, изданиосты вӧлмытонъя одно ик мукет ёзъёс кылдытоно. Но та ужлы но уно могӟетъёс люкето. Кылсярысь, Омскын ужбергатӥсьлы газетъёсын но журналъёсын вузкаронъя точка усьтон понна 34 инстанция пыр ортчоно, Москваын - 29 инстанция пыр. "Общественная экспертиза" проект яркыт суреда, кыӵе югдуре шедемын туала Россиысь пресса. Ноябрь толэзе со ужзэ азьланьтоз. Эриктэк ӧвӧл зэмлык Ку, зэмзэ но, пресса эрико луэ? Куке со ачиз аслыз коньдон дурыны быгатэ, куке со учредительёсыз азьын кураськись музэн мычем киын уг сылы. Соин ик юнме шорысь фестивалез радъясьёс одӥгзэ ужрадэз рекламалы ӧз сӥзе, дыр. Люкаськемъёслы пыр-поч валэктонъёс сётӥзы рекламая специалистъёс. Таӵе дышетскон, оскисько, котькуд журналистлы пайда ваиз. Угось асьмеос понна реклама - выль, тодмотэм удыс. Россиысь реклама та вакытэ мукет странаослэсь шӧдскымон висъяське ай. Тани рекламая бадӟым специалист, профессор Игорь Крылов пусйиз, странаямы рекламалэсь данак коньдон жильдэ телевидение, газетъёс пайда ӧжытгес басьто. Кунгож сьӧрын югдур мукет, отын рекламалэсь золгес узырмо газетъёс. И.Крыловлэн чакламезъя, интыосысь пресса бай улыны вань луонлыкъёссэ уг куты на. Та сярысь верало лыдпусъёс но: Россиын рекламая рыноклэсь 75 процентсэ басьтэ центральной пресса, 25 процентсэ - интыысь пресса. Нош кыӵе вузъёсты вӧлмытонэ коньдон тросгес висъяське? Специалистъёс верало: нырысь интыын - автомобиль, собере мыно сиён-юон, компьютерной техника, медицинаен герӟаськем продукция, связь удыслы техника, лэсьтӥськон арбериос но тӥрлыкъёс, туризмен герӟаськем ивортонъёс но мукет. Реклама тросэз коллективъёс понна выльвыл выллем. Социально-психологической эскеронъёсъя институтлэн кивалтӥсез Андрей Мелехин оске, со борды пыр-поч басьтӥськоно, соку гинэ пайда поттыны луоз. Нырысь ик чаклано, шуом, кытчы мынэ газет, кин солэн лыдӟисез, кыӵе вузъёсын со тунсыкъяське. Собере чаклано кадръёсты. Рекламаен вырись ёз люкано, нимазы ужась агентъёс дуннеын ӧвӧл ни. Али ваньмыз ӧръяське рекламной агентствоос пыр. Соин ик Андрей Мелехин дэмла, ужалэ соос пыр. Окылын вераса, пресса, зэмос эрико луэмез потэ ке, ачиз коньдон жильдыны кулэ. Со понна одӥгез валтӥсь амал - рекламаен ужан. Прессалэн эшез Таӵе ним сётӥзы фестивале люкаськемъёс Рамазан Абдулатиповлы. Тодмо политик шаерамы кӧня ке пол вуылӥз ини. Таяз учыре со юри журналистъёсын пумиськыны лыктэм. Валамон ини, ивор вӧлмытӥсьёс солэсь нырысь ик юазы Дагестанын югдур сярысь. Вераны кулэ, Рамазан Абдулатипов вордскиз но будӥз Кавказысь та республикаын. Дагестанын война - со Россилы пумит война, шуиз Москваысь куно, Чечняын ожъёс дыръя ини мон вералляй, та пуромись тылэз кысыны ӧм быгатэ ке, со котькуд юртъер дорозь вуоз. Ӧз кылзӥське. Рамазан Абдулатипов журналистъёсты куре, Дагестанэ пырем бандитъёсты эн нималэ, пе, исламистъёс шуыса. Ислам вань дауръёсы ожмаськонлы пумит вал. Кавказын югдур ӟырдам понна кыл кутыны кулэ Россиысь властьёс. Тодмо политик пайме, кызьы Дагестанысь Чечняе капчиен ортчо пыӵал тӥрлыкен но калыкен тырмытэм КамАЗ-ёс. Меӵ гурезьёстӥ одӥг асфальт сюрес гинэ вань, кудзэ асьме властьёс чакласа возё. Чакласа возё меда яке вузасько? Р.Абдулатипов пусъе, Масхадовен кенешонъёсты мытоно. Дась ини Кавказлэн социально- экономической азинсконэзъя программа. Сое быдэсъяны кутсконо. Асьмелэн ваньмыз вань, уже пайдаё кутыны гинэ ум быгатӥське. Пусйыны кулэ, огвакытэ Рамазан Абдулатипов Нациосын ужанъя министерствоен кивалтӥз. Соку министерстволэсь ужзэ калыкъёслэсь кусыпъёссэс ӧръянэ огазеяны тырши, шуэ азьвыл министр, ведь 150 цивилизация - со керетон-ченгешон гинэ ӧвӧл, со туж бадӟым кужым. "Мын аслад Удмуртияд..." Берло дыре шаермылэн но Москвалэн кусыпъёссы паськытало. Та фестивале но столицалэн мэрез, "Отечество" движенилэн кивалтӥсез Юрий Лужков лыктыны медэ вал. Но ужъёсыз люкетӥзы солы Иже вуыны. Озьы ке но, "саламзэ" вуттӥз пресс-секретарез Сергей Цой. Фестивалез йылпумъянлы сӥзем ужрадын со ялӥз: Москвалэн мэрез Удмуртиысь Журналистъёслэн огазеяськонзылы "Святогор" автомобиль кузьма. Солы коньдон спонсоръёс висъяллям. Пусйыны кулэ, Сергей Петрович Цой - тодмо кырӟасьлэн Анита Цойлэн кузпалыз. Журналистика удысын тыршемез сяна, со но крезьгурез яратэ. Нош Удмурт шаерез, пе, кемаласенгес тодӥсько ни. Горбачев аракыен нюръяськон вакыт, пе, луиз таӵе учыр: сылӥсько Москваысь Елисеевской магазинын водка басьтыны. Учкисько, уно мурт черодлэн палэнтӥз басьяське. Талы пумит куаретӥсьёс луизы. Мон но куараме поттоно кариськи. Вузкарись-нылаш шорам учкиз но лек вазиз: "Нош тон шып ул. Кузё луэмед потэ ке, мын аслад Удмуртияд но кивалты!". Ма верало куноос Бен, тунсыко дискуссиос, семинаръёс уно вал. Со сяна, странамылэн пӧртэм сэрегъёсысьтыз вуэм журналистъёс вуылӥзы республикаысьтымы промышленной предприятиосы, Воткинскысь П.И.Чайковскийлэн музей-усадьбаяз, пумиськылӥзы США-ысь лыктэм инспекторъёсын. Ӝытъёсы соос ӵош шутэтскылӥзы, ог-огенызы кенешылӥзы. Кыӵе мылкыдын люкисько меда куноос Удмуртиен? Галина Анатольевна Самойлова. "Сельчанка" газет, Алтай улос. - Мон понна туж дуно луэ эшъёсын кенешеме. Та секыт вакытэ таӵе пумиськонъёс, жаляса верасько, туж шер луыло. Нош одӥг удысын ужась эшъёсын вераськем потэ ужпумъёс, сюлэмшугъяськонъёс сярысь. Озьы мылкыд но капчи луэ. Ижевск туж тунсыко город вылэм. Вань мае учкыны, маин тодматскыны. Туж шумпотӥсько, татчы вуылӥ шуыса. Наталья Ивановна Харлампиева. "Далбар хотун" нылкышно журнал. Якутия Республика. - Мон Удмуртие нырысьсэ вуылӥ. Ачим нылкышноос понна потӥсь журналэн кивалтӥсько бере, тодматскеме потӥз сыӵе ик изданиослэн редакторъёсынызы, ужасьёсынызы. Пумиськылӥ Башкортостанысь эшъёсын. Жаляса верано, Татарстанысь нылкышноосын кенешыны ӧз удалты. Удмуртиын таӵе журнал ӧвӧл шуизы. Фестиваль дыръя, валамон ини, трос тунсыкозэ тодоно. Мыным тужгес но кельшиз рекламалы сӥзем семинар. Выль тодон- валанме азьланяз ужам куто шуыса малпасько. Реклама ласянь кыӵе сюрестӥ вамыштоно, валай кадь потӥсько. Якутия Москвалэсь кыдёкын бере, центральной изданиос дорамы трос уг вуо. Соин ик ужа но ужа гинэ. Луонлыкъёс со понна вань. Тани кемалась ик ӧвӧл ужаны кутскиз полиграфияя комбинатмы. Отын туж усто, выль оборудование пуктэмын. Валамон ини, та вакытэ якут кылын потӥсь изданиос, ваньзы сямен бюджет чотын уло. Лыдӟисьёсмы данак. Тани республиканской газетмылэн тиражез (30 сюрс экземпляр) котькинлэсь бадӟым. Ӟуч изданиос но сое уг ортчо. Ховалыг Артык Хом-Отуховна, "Эне созу" газет но "Кадын" журнал. Тува Республика. - Милям республикаямы но данакез национальной изданиос бюджет чотын уло. Мон кивалтӥсько нылкышно газетэн. Озьы ик поттӥськом на нылкышно журнал тува, ӟуч но англи кылын. Пусъеме потэ, милям газетмылэн гинэ полиграфической базаез вань. Кӧня ке ар талэсь азьло сое юнматыны быгатӥм. Тиражмы бадӟым вал, озьы техника басьтӥм, али таӵе луонлыкмы ӧвӧл ни. Мон Удмуртие нырысьсэ вуи. Соку ик шӧдӥ, татын туж востэм, лякыт мылкыдо калык улэ. Тау солы шуныт пумитамез понна. Ӟеч лу, фестиваль! Прессалы сӥзем праздник ӝог ортчиз. Кылем пятницае Операя но балетъя театрын сое йылпумъян ӝыт ортчиз. Ужрадэз радъясьёслы, коньдонэн юрттӥсьёслы тау карон кылъёс трос вал. Нош журналистъёс чидатэк возьмазы, кин бен 20 номинацияя конкурсъёсын лауреатъёс луиз. Соосты ялӥзы Россиысь Журналистъёслэн огазеяськонзылэн кивалтӥсез Всеволод Богданов но "Журналист" журналлэн валтӥсь редакторез Геннадий Мальцев. Пусйыны кулэ, лауреатъёс луизы шаерысьтымы данакез изданиос, кылсярысь, "Удмуртская правда", "Красное Прикамье", "Воткинские вести", "Инфо-панорама"" газетъёс, "Удмуртия" телерадиокомпания но мукетъёс. Кыказ конкурсын вормисе потӥз "Удмурт дунне" газет но. Одӥгезъя премия чотын, кызьы шуиз Рамазан Абдулатипов, чакламын кунгож сьӧры, Египетэ, путёвка. Таин фестиваль ужзэ йылпумъяз. Солэн флагез кошкиз бускельёсмы доры Казане. Ӵапак отын вуоно арын май толэзе В фестиваль ортчоз. Ю.Александрова. Калмез кузя 8. Вуын - вутэк И. Сюмси район узыр. Нюлэс, гыбед, узы-боры - олома но татын вань. Сюмси район куанер. Ю тысь котькытынлэсь ичи люкаське. Бюджет котьку "пась". Мар бордын ужпум? - Ми татын ноку но умой ӧм улэ,- валэктэ ёрос администрацилэсь кивалтӥсьсэ воштӥсь Василий Сусеков.- Нянь юдэс котьку ик шуген сётӥськылӥз. Дышемын, лэся, таӵе улонлы. Соин ик митинге но ум потаське, ум куриське, ум бӧрдӥське. Сюмсиос та дырозь уг тодо на, шуыны луоз, канализация кылэз. Газ сярысь ми уйвӧтъёс гинэ адӟиськом ай. Туннэ нуналлы быдэс ёросын одӥг посёлокын но, одӥг коркан но ӧвӧл на гумы кузя лыктӥсь газ. - Кызьы озьы? - оскымтэеным кури на берло верамзэ выльысь вераны. - Вот озьы ик гожтэ: газ ми дорын ӧвӧл на. Бен, сюмси музъем вылын ӧвӧл му вӧй яке газ кыскись скважинаос. Но татӥ ортчо трос трубопроводъёс. Метрлэсь зӧк кык гумыетӥ уен-нуналэн бызе нефть. Райцентрлы матын вань нимысьтыз станция но. Сюмсиысь одӥгез ӟеч улон сэрег Нефтяник нимаське. Гумы кузя дугдылытэк пельто Сибирьысь газэз но. - Малпаськом вал Уваысь газ вуттыны. 52 километр пӧлысь 45-сэ ортчим ни - музъеме 219 миллиметръем гумыос тырим. Кылиз на кӧня ке гинэ. Но... Уксё ӧвӧлэн, вань ужъёс дугдытэмын. 10 миллион манет сюе "согемын" ни, кулэ на эшшо сомында ик,- кӧтӝожзэ вера Василий Вениаминович. - Гумыез уже лэзьысалзы ке, оло, куректонэз но ӧй луысал,- кенешонэ пыриське ёросысь инкуазез утёнъя валтӥсь инспектор Валерий Огальцев.- Соку уго гумы ӧз но сыномысал, малы ке шуоно, сыӵе дыръя уже кутӥське трубопроводэз утёнъя нимысьтыз система. Нош али отӥ газ уг лыкты бере, гумы сисьме но, сыноме но. Вӧзамы учырам журналист Иван Кабов (со кивалтэ ёрос газетэн) йылпумъян лэсьтӥз: - Мар веранэз кытысь ке кыдёкысь Сюмси газопроводэз, быдэс бадӟым Россия одӥг "Мир" космос станциез утьыны уг быгаты бере... ИИ. Ог кызь ар талэсь азьло Сюмси ёросын 450 сюрс тоннаозь торф дасяллязы. Со пӧлысь кык куиньмоссэ - асьсэос, кылемзэ уваос но селтаос поттылӥзы. Табере районын ар ӵоже 28-30 сюрс тонна гинэ гыбед дасяло. Палэнэ вузан но со чотын бюджетэз ӧжыт ке но тырмытон сярысь веранэз ик ӧвӧл ни. Озьы ик - ӟеч урожай сярысь. Муэ согем кидыссылэсь татын ӧжыт гинэ трос ю тысь люкало. Луоё музъем бусьтыр гыбедлэсь кемалась мӧзмиз ни. Кызьы ке секыт югдуре шедемын азьло нюлэс дасясь посёлокъёс, сыӵе ик курадӟонэз адӟо азьло торф поттӥсьёс. Соин ик та пумысен трос вераны кулэез ик ӧвӧл. Огез буйгатэ. Гыбедэн узыр интыос ёросын пумтэм. Тросэз соос эскеремын-дасямын ни - ужа гинэ. Ёрос администрацилэн кивалтӥсезлэн Валерий Рассамахинлэн верамезъя, ар ӵоже быдэн 300 сюрс тонна торф поттӥд ке, со ичизэ 100 арлы тырмоз на. ИИИ. Кызьы шуиз классик, Россиын кык тырмымтэ вань - шузиос но сюресъёс. Уг тодӥськы, кызьы Сюмси ёросын нырысетӥез ласянь, нош кыкетӥ шуг-секытлэсь татын пумен мозмытско ни кадь. Берло аръёсы сюресъёсты умоятон удысын шӧдскымон воштӥськонъёс луизы. Огдыре татын ужазы военнойёс. (Солдатъёслэсь "тыршемзэс" сюмсиос весь тодазы возё на. Трактор тӥяське яке нюр азе выйыны шеде ке, сое тупатъясь ӧй вал ни, пе - ангарысь мукетсэ поттылӥзы). Берло аръёсы ассэ умоен возьматэ сюрес лэсьтонъя управление (со пыре "Удмуртавтодор" предприятие). Асфальт сюрес райцентрез герӟаз Уваен, Киров улосысь Кильмезь посёлокен. Калмез вамен Вылынгурт дортӥ кӧня ке ар талэсь азьло чебер выж ӝутскиз, табере шур сьӧрысь гуртъёс но хозяйствоос тулыс тудву дыръя но шуге-леке уг шедё ни. Ёросысь сюрес лэсьтӥсьёслэн али дырлы бадӟымез сюлмаськонзы - Сибирь трактэз выльдон. Федеральной значениен та сюрес азьланьын герӟаны кулэ Пермь но Казань городъёсты. Асьме республикаын сое кӧня ке интыостӥ лэсьто. Кин вуылӥз берло дыре Селта палъёсы, со паймыса учкиз, вылды, райцентр сьӧртӥ ӝутэм выль паськыт сюресэз. Ваньмыз отын туала куронъёслы тупа - гожъёс но, знакъёс но, асфальтлэн ӟечлыкез но. Таӵе ик сюрес лэсьто Сюмси ёросын но. Татын но со ортче райцентр вӧзтӥ. Туэ вуттыны кулэ куинь иськемзэ. Управленилэн валтӥсь инженерезлэн Иван Бегечевлэн верамезъя, ужъёс графиклэсь бере кыльыса мыно. Кыӵе муген? Соос трос. Нырысез коньдонэн герӟаськемын. Со Москваысь но, Ижысь но висъяське ке но, уг тырмы. Кыкетӥез потэ чыры-пыры тырмымтэос бордысь. Шуом, секыт луиз туэ эстӥськонэн. Нуналлы быдэ управление сое 5 тонна "сие". Августэ таин валче ӵем юнме сылоно луылӥз. Тӥяськылэ техника но. Сое выльдыны туала дыре нокыӵе коньдон уз тырмы. Бадӟымез муг таӵе. Сюреслэн ог люкетэз ортчыны кулэ нюлэс пыр, уго вашкала трактэз али шӧдскымон шонертыны выро. Кора вал сое - уг луы. Москвалэсь юатэк, пе, одӥг кызэз но погыртыны уг яра. Отчы бумагаос кемалась ыстэмын - ӟеч ивор весь ӧвӧл на. Тэк пукытозь, маке коть лэсьтоно шуыса, сюресчиос, нюлэсэз кельтыса, со сьӧры выжизы, Селталы матэгес кариськизы. Амал шедьтэмзы ушъямон. Но азьло чаклам графике пырыны уг луы ни ук. Маркелово гурт дорысен ми кенешим лэсьтӥськонъя мастерен Виктор Доровскихен. Егит специалист татын ог дас ар ужа ни. Удыссэ ӟеч тодэ, со кыл кутэ шуръёс вамен пичи выжъёс, гумыос лэсьтон понна. - Уждун сокем трос уг тыро ке но, милемлы тросэз вожъясько,- вера Виктор.- Уго али калык ужтэк ёрмемын. Кивалтӥсьмы Иосиф Фёдорович Дюпин тырше ужмес умой радъяны, соин ик азьланезлы осконэн улӥськом. Мон тани али аслым корка ӝутӥсько. Иван Николаевич Бегечев но, та ёросын ик будэм удмурт воргорон, оске, Сюмси сюресъёстӥ ветлӥсьёс курадӟемысь ӝоген дугдозы шуыса. ИВ. Нюлэс, сик, тэль, ӵаӵа... Одӥг мае ке возьматон понна, юнме шорысь сомында ним малпамтэ, дыр, удмурт адями. Солэн гогыез уго сикен герӟаськемын. Сюмси калыклэн - тужгес но. Уго татын нюлэслэсь буш интыос трос ик ӧвӧл. Тэль уно дауръёс ӵоже сюдӥз- вордӥз татысь адямиосты. Нош туннэ? Жаляса верано луэ, трос мукетыз сямен, нюлэс промышленность но татын куашкатэмын. Ог 20-30 ар талэсь азьло ёрослэн шорсюлмыз Сюрек леспромхозын йыгаськиз. Озьы шуыса ум янгышаське, вылды. Тани кӧня ке лыдпус. 1991-тӥ арозь Сюмси районлэн бюджетэз вить миллион манет но уг луы вал. Со дыре ик леспромхозлэн прибылез 15-17 миллион манет люкаськылӥз. Ёросын 18 сюрс адями улӥз. Кильмезь посёлокын (отчы интыяськемын леспромхоз) - 5 сюрс. Табере вить миллионэз люке быдэс районлы, нош дас вить миллионэз (прибыльысь ог 35 процентсэ Ижевск басьтылӥз) - одӥг посёлоклы. Валамон ни, нюлэс дасясьёс вӧй пушкын кадь улӥзы. Бен ужазы но зол. Ар ӵоже 420 сюрс кубометр пу дасяллязы. Селта тэльысь гинэ 20 сюрс кубометр поттылӥзы. Сомындагес ик - Кирос улосысь. Туннэ леспромхоз 100 сюрс но уг дася ни. Валамон, кык пол кулэсмиз ужасьёслэн лыдзы. - Чакламезлэсь ӝынызэ но лэсьтыны ум быгатӥське,- вера ЛПХ-лэсь кивалтӥсьсэ воштӥсь Александр Шмыков.- Нюлэс вань - луонлык ӧвӧл. Котьма дуно уго. Азьло милям кор кыскась тракторъёсмы 50 пала вал. Куинь-ньыль ар куспын ваньзэ вылдыны быгатылӥм. Табере озьы матын но уг луы ни. Куд-ог агрегатъёс кызь ар но чидало ини, вылды. Кытчы-о пырод? Одӥг трактор 450 сюрс манет сылэ. Быдэс коллектив со понна кӧня арня ужаны кулэ? Лесопунктъёсын азьло ортчытъяло вал берпуметӥ тӥрлы сӥзем праздникъёс. Озьы шулдыръяськылӥзы, вай корась техникаен ужанэ выжемен валче. Зэм ик, тӥр кулэ ӧй вал ни соку - ваньзэ сучкорез шуонъёс но мукет визьмо но кужмо машинаос лэсьтылӥзы. Табере дыр вуиз вай коранъя берпуметӥ агрегатлы сӥзем шулдыръяськон радъяны. Бензопила, тӥр, зыр - ваньмыз нош берытскиз асьме улонэ. Сюмсиын верало кунгож сьӧрысь лыктэм муртлэсь паймемзэ. Татысь тэльёсты адӟыса, со чабкиськем: "Кызьы тӥ таӵе узырлыкен куанер улӥськоды?" Зэм, малы меда озьы асьмеос ялан урод улӥськом? Кин валэктоз? Иван ЛЕБЕДЕВ (текст), Георгий ЮСАЕВ (фото), Леонид ПРОЗОРОВ (суред), Виктор БЕЛОВ (авто). * Мастер Виктор ДОРОВСКИХ. * Нимтэм шур табере татӥ бызёз. * Вылынгуртысь Зинаида КАМАШЕВА куноосты йӧлэн пумита. * Сюрек леспромхоз: киын быдэстоно уж пумтэм. * Сюмси черкогрутлэн шораз. * Валерий ОГАЛЬЦОВ, Василий СУСЕКОВ но Иван КАБОВ. Кун Кенеш ивортэ 10 сентябре Ижеске вуылӥзы Россия Федерациысь министр Рамазан Абдулатипов, Москваысь Правительстволэн пресс-службаезлэн кивалтӥсез Сергей Цой. Ӵукна соос пумиськизы Удмурт Республикаысь Кун Кенешлэн Тӧроеныз Александр Волковен, Кун Кенешлэн, Правительстволэн Президиумъёсазы пырись муртъёсын, министерствоослэн представительёсынызы. Ужрадын эскеремын Россия Федерациын национальной политикаен, калык кусыпъёсын но Кавказын кылдэм югдурен герӟаськем ужпумъёс. Бӧрысь куноос "Отечество" ОПОО-лэн Удмурт люкетаз вуылӥзы, Россиысь прессалэн "Вся Россия - 99" ИВ фестиваляз люкаськем журналистъёсын пумиськылӥзы. Нуназе бере Рамазан Абдулатипов нацоислэн кусыпъёссылы сӥзем лекцизэ Удмурт кун университетын лыдӟиз. *** Та нуналэ ик Удмурт Республикаысь Кун Кенешлэн Тӧроез Александр Волков Ижевскын цирк ӝутонлы сӥзем кенешон ортчытӥз. Отчы пыриськемъёс выль юртлы инты бырйыны кулэ вал. Эскеремын кык пӧртэм ӵектонъёс: одӥгезъя - циркез, пе, пуктоно азьвыл интыяз ик Центральной рынок вӧзы, мукетызъя - "Сосновый" профилакторий вӧзы. Бырйыны капчи ӧвӧл, угось ӵектэм проектъёслэн дунзы огвыллемгес. Кенешонын специалистъёс котькуд проектлы пыр-поч дунъет сётӥзы, ӟеч но ляб интыоссэс пусйизы. Эскеремын вал экология ласянь условиос, проектно-изыскательской но лэсьтӥськон ужъёсты нуон ужпумъёс, транспорт но инженерной коммуникациос, мукет тодметъёс. Дискуссиез йылпумъяса, Александр Волков циркез азьвыл интыяз ик пуктон сярысь мылкыдзэ вераз, солы быдэс Удмуртиысь калык дышемын ни, пе. Табере ужпум пуктэмын: цирклэсь вуж юртсэ ар пумозь сэрттоно. Пусйыны кулэ, таӵе решение кутмын вал, Ижевскын улӥсьёс пӧлын юалляськонлэсь йылпумъянъёссэ лыдэ басьтыса. Данакез респондентъёс циркез азьвыл интыяз ик пуктон понна кылзэс веразы. Со сярысь кенешонын ивортӥз Удмурт Республикаысь Культурая министерство. Ижевскын циркез ӝутон ужпумъёсты, озьы ик коньдонэн герӟаськемъёссэ но, Кун Кенешлэн Тӧроез ачиз чакласа-эскерыса возёз. Кылсярысь, алигес со Россия Федерациысь экономикая министрен пумиськылӥз. Кенешемын столицаямы цирк лэсьтыны коньдон быдтэмез федерацилэн бюджетэзлэн расход люкетаз пыртыны. Кун Кенешлэн пресс-службаез. Куартолэзьысен - куарусёнозь Удмурт Республикаысь кун симфонической оркестрлэн данэз быдэс дуннее вӧлмиз ни, шуыны луэ. Нош солэн валтӥсь дирижёрез Николай Роготнев пӧртэм калык куспо конкурсъёсын вормисе потылӥз. Асьме оркестр умоесь кусыпъёс тупатӥз Бразилиысь, Италиысь но мукет кунъёсысь музыкантъёсын. Туэ, 24-тӥ куартолэзе, кылсярысь, бразиль крезьгурлы сӥзем ӝытын ас быгатонзэс асьме учкисьёслы усьтӥзы гитарист Тиаго Коломбо но дирижёр Ион Брессан. Кылем арын абонементлэн концертъёсаз пыриськиз вал Италиысь маэстро Леонардо Куадрини. Собере со асьме симфонической оркестрез ӧтиз Италие. Кылем гужем ортчем турне музыкантъёсты уката но эшъяськытӥз. Туэ господин Куадрини Роготневлэсь оркестрзэ нош ик ӧтиз асьсэ доры. Гужем ӵоже асмье музыкантъёс Италиысь 45 городъёсын концертъёс сётӥзы, пӧртэм фестивальёсы пыриськизы. Ижевске берытскозы 14- тӥ куарусёнэ. Т. НИКОЛАЕВА. Удмурт Республикаысь Кун Кенешлэн Тӧроезлы А. А. Волковлы Гажано Александр Александрович! Испаниысь Севилья городын 29-тӥ августэ йылпумъяськиз Дуннелэн капчи атлетикая ВИИ чемпионатэз. Отчы люкаськылӥзы 304 странаысь кык сюрс пала атлетъёс. Россия Федерациысь сборной командае пыриськизы 39 улосвылысь спортсменъёс. Кунгож сьӧрысь спортсменъёсын юн нюръяськыса, Россиысь атлетъёс басьтӥзы 6 зарни, 3 азвесь но 4 бронза медаль. 1997-тӥ арын Афиныын ортчем Дуннелэн ВИ чемпионатэныз ӵошатыса, отын асьме сборноймы киултӥз одӥг зарни, 4 азвесь но 3 бронза медаль, Испаниын соослы удалтӥзгес. Огъя командаос пӧлын но Россиысь сборноймы кыкетӥ интые потз, азьпалтӥз США-ысь команда гинэ. Асьме спортсменъёслэсь та ӵошатсконъёсы пыриськемзэс котыр ласянь умоен лыдъязы кунгож сьӧрысь специалистъёс, ӵошатсконэ пыриськемъёс но ивор вӧлмытон удысын ужасьёс. Россиысь спортсменъёслэн Севильяын басьтэм вылӥ азинсконъёссы оскыто, Сиднеын 2000-тӥ арын ортчоно Олимпиадаын но умоесь лыдпусъёс возьматозы шуыса. Шумпотыса ивортӥськом тӥледлы, Россиысь сборнойлэн командаяз вылӥ азинсконзы возьматӥз тӥляд республикаысьтыды Герман Скурыгин, 50 иськемын спортивной амалэн ветлыса, зарни медаль басьтӥз. Ӟечкыласьком Тӥледыз, Александр Александрович, Германлэн азинсконэныз но солэсь тренерзэ Леонид Вахрушевез. Сюлмысьтымы тау кариськомы капчи атлетикалы бадӟым саклык висъямдылы, спортсменъёс но тренеръёс сярысь сюлмаськемдылы но соослы юрттэмдылы. Федерация оске, улосвылысьтымы азьмынӥсь атлетъёсты - Россилэн сборнояз пырем спортсменъёсты, 2000-тӥ арын ортчоно Олимпийской шудонъёссы, вуоно арын дуннеын ортчись мукет бадӟым турниръёслы дасяськон вакытэ кивалтон ёзъёс, тӥ асьтэос, азьвыл сямен ик котыр ласянь юрттоды. Гажаса но умоесь азинсконъёс сӥзьыса Россиысь капчи атлетикая федерацилэн Президентэз В. В. Балахничев. Валлян "Отечество" организацилэн Удмурт люкетэзлэн кенешез люкаськылӥз. Эскеремын Россия Федерациысь Кун Думае депутатэ кандидатъёсты ӵектон сярысь ужпум. Люкаськемъёс депутатэ кандидатъёслэн списоказы пыртыны ӵектӥзы Ю. Д. Маслюковез (29 номеро Ижевск округ) но С. К. Смирноваез (30 номеро Удмурт округ). Ветеранъёс огазеясько Интыосын ожмаськонъёсы пыриськемъёслэн "Боевое братство" огазеяськонзы ас азяз ужпум пуктэ - калыкъёс куспын тупаса улонэз юнматоно, Россиез улӟытон уже ветеранъёсты паськытгес кысконо. Та огазеяськон огазея миллионлэсь ятыр муртэз, 35 пӧртэм ожмаськонъёсы пыриськемъёсты. Солэн азьветлӥсьёсыз юн чакласа возё, кызьы кун кивалтон ёзъёс ветеранъёслы но соослэн семьяоссылы пӧртэм ужпумъёссэс быдэстыны юртто. Та дырозь "Боевое братство" быръён кампаниосы ӧз пыриськылы на. Нош солэн кивалтӥсез Советской Союзлэн Героез, генерал-полковник Борис Громов 1989-тӥ арын СССР-ысь калык депутат луиз. 1999-тӥ арын сое Россия Федерациысь Кун Думае бырйизы. Б. Громов мылысь-кыдысь пыриське депутатъёслэн "Российские регионы" группаязы. Кин янгыш? "Отечество - Вся Россия" блоклэн быръён кампаниез радъянъя штабезлэн кивалтӥсез Г. Боос ОРТ вылэ иск сётӥз. Туэ 21-тӥ августэ "Время" програмаез нуись П. Шеремет Г. Боосэз янгыше уськытӥз, со, пе, Б. Н. Ельцинлэсь семьязэ быдтонэн кышкатэ. Г. Боос лыдъя, "Независимая газета" изданиысь интервьюзэ "Время" чылкак мыдланьтыса сётӥз, со озьы юри лэсьтэмын вал. Моральной ыштон 5 миллион мане тыр дунъямын. Та коньдонэз Г. Боос Дагестанын бырем военнослужащийёслэн семьяоссылы висъяны чакла. Президентэз дырызлэсь вазь быръён сярысь Юрий Лужков малпамъя, Россия Федерацилэсь президентсэ быръён дырызлэсь вазь уз ортчы. "Борис Ельцинэз тодыса, мон вераны быгатӥсько - со президентлэн интыеныз ноку уз люкиськы" - вераз Ю. Лужков "Коммерсант" газетысь интервьюаз. Солэн малпамезъя, тазалыкез лябӟемен гинэ президент таӵе вамыш лэсьтыны быгатоз. Нош ачиз президент инты понна нюръяськыны малпа-а - таӵе юанлы валэктыкуз, Юрий Лужков выльысь Москвалэн мэрез луыны мылкыдзэ гинэ вераз. "Отечество - Вся Россия" блоклэн парламентэ быръёнъёсы пыриськонэзлы сӥзем юанлы Ю. Лужков вераз: блок коммунистъёслэсь ӧжыт куара бичаны кулэ ӧвӧл. Озьы ик со оске, Кун Думае "Яблоко" но шедёз шуыса. Соку, оло, кужымез огазеяны но луоз. Кунгож сьӧрысь коньдон сярысь Кунгож сьӧрысь прессалэн гожъямъёсызлы дунъет сётыса, Ю. Лужков вераз, та иворъёслы осконо луисько, азьланьын но оско, пе, со дырозь, куке президент но та ужен герӟаськем мукет муртъёс обществолы валэктон ӧз сётэ. Нош кунгож сьӧрысь счётъёс сярысь ивортонъёс - кыл вӧлдэм ке, луонлык вань судэ сётыны. Озьы ик Ю. Лужков пусйиз, та вакытэ Россиын правоя данакез нормаос уг быдэсъясько шуыса. Озьы бере вераны луэ: Россиын ӧз юнма демократической кивалтон, юнмаз Конституцилэн нормаосызлэсь палэнскыны быгатӥсь режим. "Отечество" огазеяськонлэн Удмурт люкетэзлэн пресс-службаез. Кун Кенешлэн сессиез Толон Кун Кенешлэн депутатъёсыз люкаськылӥзы азьло чакламтэ сессие. Нырысь ик соос чалмыт сылыса буре ваизы Россилэн пӧртэм интыосысьтыз улон юртъёсты пуштытъямен валче бырем адямиосты. Собере юнматӥзы Кун Думае депутат быръёнъя округъёсысь комиссиослэсь членъёссэс. Депутатъёс озьы ик эскеризы 1999-тӥ арлэн |бюджет сярысь законэ воштонъёслы ӵектонъёсты. Со сяна, люкаськемъёс тодматскизы Правительстволэн Тӧроезлэн Николай Ганзалэн республикаямы кылдэм югдур пумысен ивортонэныз. Сессиын ужпум ӝутэмын вал "Евразия" банкын югдур сярысь. Туннэ нуналлы солэн бюджетэ тыронъёсыз ӧвӧл ни. Но арыш поттыса ужаны солы но коньдонэн юрттэт кулэ. "Евразия" банклы 95.000 сюрс манет кредит сётыны соглаш луэм "Агенство по реструктуризации" государственной корпорация ("АРКО"). Депутатъёс "АРКО"-лэсь решенизэ куара сётыса юнматӥзы. Озьыен, "Евразия" со кредитэз куинь ар ӵоже уже кутыны быгатоз. Кызьы шуиз А. Волков, со коньдон нырысь ик мыноз республикамылэсь экономиказэ ӝутонэ. Гурт хозяйствоя но сиён-юонъя министр П. Першин ивортон лэсьтӥз та вакытэ бусы ужъёс мынон сярысь. Вуоноаз сессиын нимысьтыз эскеремын луоз агропромышленной комплексын кылдэм югдур. Сессиез нуиз Александр Волков. И. КРИЧЕВ. ШӦКЫЧ Вунэтод - инме лобӟод Куазьмы зоро улэ ке но, шаерамы ӵем гинэ "горд атас" кузёяське. Нош берло дыре, адямилэн янгышеныз сэрен, чагыр эстӥськонэн тырмытэм балонъёс но пуштыло. Озьы та учыръя туэ сизьым толэзь ӵоже 20 пол тылпу вотылӥз. Тылӝуын бырыны шедиз вить адями (со пӧлысь кыкез нылпиос) но куатезлэн трос интыоссы сутскиз. Та тылпуослэсь огъя 300 сюрс манет тыр ыштонъёс адӟизы. Бен, газ плита вылын ческыт но ӝог пӧраны луэ. Озьы ик, сое ӝог вунэтыны но луэ вылэм. Маке пӧзьтыны пуктӥськом но, асьмеос бускеленымы супыльтыны кошкиськом яке умме усиськом. Нош чагыр эстӥськонмы, пыдэстэм бекчеысь сямен, ялан "ужа". Кылсярысь, Ижевскысь Красноармейской урамысь 128 номеро юртысь одӥгаз квартираын "горд атас" кузёяськиз. Нырысь ик со ӝабырскиз матысь штораос борды. Вунэтэм сиёнзэс тодазы вайыса, квартиарын улӥсьёс ас понназы тылпуэз кысыны ӧдъязы вал - ӧз пӧрмы. Со быдэс юртэ бурдъяськиз. Кузёослэн пӧраны пуктэм сиёнзы 5 сюрс манет тыр усиз. Адямиос шуге-леке вуо на чагыр эстӥськонэз огъя кысылэмен. Озьы Камбарка городысь Суворов урамысь 34 номеро юртын улӥсь, огъя газ кысэм дыръя, 50 литръем балонзэ усьтӥз, нош кысыны вунэтӥз но ачиз кошкизы. Кӧня ке час ортчыса, газэз лэзизы но улосын пуштэм куара кылӥськиз. Трос тылпу гома на адямиослэн кудӟем йырынызы сэрен. Озьы одӥг учырын ик куинь мурт бырыны шедиз но кык юрт пеньлы пӧрмиз. Ӵем дыръя урамысь я коркась газ зынэз кылэм-адӟем ум кариське. Со сурым пушкын ялан огсыр улӥськом. Сое дыраз ивортысалмы ке, бадӟым ыштонъёс но ӧй адӟысалмы. Соин валче юрт кузёослы сакгес кариськоно, газ бордын ужасьёсты вить арлы одӥг пол ке но куное ӧтьылоно. Уго чагыр эстӥськонмы 2,3 процент мындаез омыре потӥз ке, улосын пуштэм куара чузъяськоз ни. Шуге-леке вуонтэм вылысь чаклаське, чагыр эстӥськон зынэз шӧдӥды ке, ивортэ газовой службаын ужасьёслы. В. НИКОЛАЕВА. Кужмо луэ! Нюлэсэн ужан - одӥгез шуг удыс. Уно тырмымтэос шоры учкытэк, нюлэсчиос сюлмысьтызы тыршо азязы пуктэм ужпумъёсты быдэсъяны. Профессиональной праздниксы азьын нюлэс котырын ужасьёслы сӥзем потэ юн тазалык, шуд, огсыр улон. Кужмо луэ, гажано эшъёс! Ваньмыз асьмелэн радъяськоз ай. Валентина Фоменко, нюлэс ужасьёслэн профсоюззылэн рескомезлэн тӧроез. Игра леспромхозлэн Малягурт лесничетсвоысьтыз нюлэс дасясь Николай Кононов. Г. ЮСАЕВЛЭН туспуктэмез. Кышкытлык вае Кылэмды вань-а полихлорбифенил сярысь? Ӵапак со сурет ик ватсамын трансформатор вӧе. Нош сое тодосчиос ӵошато "хими" СПИД-эн. Полихлорбифенил шараямын республикаысьтымы тямысаз предприятиын. Уноез трансформаторъёс вужмемын, соос уже уг кутӥсько ни. Акциосын "Ижсталь" огазеяськонлэн куштӥськем корт возён площадкаяз сыӵе конденсаторъёс уно кыллё. Куать тонна трансформатор вӧен. Республикаысьтымы Инкуазез утёнъя комитетын ужась специалистъёслэн лыдъямзыя, азьланяз но арлы быдэ одӥг но ӝыны тонна вӧй люкаськоз на. Кызьы быдтоно сое, тодмо ӧвӧл. Л. СЕРГЕЕВ. КАЛМЕЗ КУЗЯ 9. Ӟечбур, Ватка! Ми вуим тон дорозь Ӵошкыт сюрес нуэ азьлань. Тани вуиськом Вало шур доры. Кемалась ӧвӧл со вамен ӝутӥзы чебер выж. Татӥ ик ортче асьме республикалэн кунгожез. Шур сьӧрын - Киров улос. Георгий Юсаев, Можга палъёсын будэм эшмы, валамон ни, ӧз чида, яратоно шурез доры дугдылытэк. Зэм но, чебер со. Уд но малпа, та пасьта вӧлске шуыса. - А веть вазен Вала кузя пароходъёс ветлӥзы, - лулӟиз Георгий. Солэсь верамзэ бӧрысь юнматӥзы та нуналэ пумитам выль тодмоосмы. Озьы ик вылэм. Кильмезь посёлоке тямыс часлэсь вазь вуим. Дышем сямъя соку ик редакцизэс шедьтӥм. Коть отысен сюресмес рос-прос эскером на шуыса пукиськом огшоры юрт дорын. Дыр ортче, нош редакцие лыктӥсь ӧвӧл но ӧвӧл. Ог ӝыны час ортчыса гинэ валатским, Кировын Москва дыръя уло шуыса. Сюлэм ӧз чида ни - куриськиз Ватка пала. Туннэ милемлы вуоно Калмезлэн пумозяз. Милициысь ужасьёсын кенешыса (нялтас пусъём, асьме элькунын одӥг РОВД но таӵе ёмырам юртэ интыяськемын ӧвӧл ни кадь), сюрес вылэ потӥм. Транспорт дугдылонтӥе трос калык люкаськемын. Милемыз адӟыса, кин но со кизэ ӝутӥз. Автобусэ куинь воргорон пуксиз. Пётр, ньыльдон аресъем мурт, бадӟымос корзиназэ сэзъяса вера: - Толон, уд оске, дас ведра нингуби бичай, туннэ но солэсь ичи уз люкаськы. Ог люкетсэ сылалтӥсько, кылемзэ базаре поттӥсько. Губиен, валамон, уд узырмы. Но сютэм уд кыльы. Воргоронлэн ялан ужез ӧвӧл. Кышноез но ӧвӧл. - Туала дыре астэ но маин сюдыны уд тодӥськы, кузпалэз утёно луысал на ке, воксё бырысал, - кужмысь серектыны выре выль тодмомы, но нокин но уг пальпоты озьы верамезлы. Мукетыз воргорон шып пуке. Куинетӥез - мӧйыгес. Таиз одӥг-ог ымзэ усья ик. Вераськон манерызъя шӧдӥм, со удмурт, дыр, шуыса. Озьы ик вылэм. Леонид Михайлович Бронников - Кильмезьлы матын Кунжек удмурт гуртын будэм адями. Али райцентрын улэ. Солэн мадемезъя, отын асьме выжыос трос гинэ, но кылзэс туж ик уг поттыло, ог- огенызы но сокем уг эшъясько. ИИ. Малы ке но тодэ лыктӥз Алексей Красильниковлэн одӥгаз пумиськонын верамез. Кун Кенешлэн Тӧроезлэн воштӥсез луыкуз, со ветлӥз Кировысь губернаторлэн инаугурация шуоназ, мукет сямен вераса, кивалтӥсе быръемзэс пусъёназ. Соку шуиз: Киров улос асьме шаерлэсь туж висъяське, отысь, пе, чик адӟыны уг луы али лэсьтӥськись выль улон юртъёсты. Оло Красильниковлэн верамез йыре кылемен, оло мукет муген ми Калмез усёнэ мынон сяменымы весь синйылтыны вырим котырысь коркаосты. Зэм, выльёсыз яке выльдэмъёсыз туж шер пумисько. Тани Селино гурт. Дышетӥсь Зульхия Бронникова дыртэ дышетскон ар азьын ортчоно совещание. - Тӥни та ӝыныё-урдсо юртэз адӟиськоды-а? - возьматэ сюрес урдсысь коркаез. - Вуоно школамы милям со. Пиме отчы нырысетӥ классэ нуыны малпасько вал. Туэ дасэтӥе выжиз ни - школа весь лэсьтымтэ... Йылаз-пумаз вуттымтэ таӵе объектъёсты Удмуртиын но, Киров улосын но трос гинэ адӟыны кылдӥз. Соос туала шурдыт вакытмылэн тодметэзлы пӧрмизы ни кадь. Ортчоз меда таӵе дыр? ИИИ. Оло шонер мытӥськом, оло кытчы ке мыдлань кожим ни - валаны уг луы. Сюрес пусъёс но ӧвӧл, пумитамы но нокин уг шедьы. Тани адскиз мотоцикл. Руль сьӧрын - мӧйы воргорон, бӧрсяз - песянай. - Учке ай, учке - "Иж-49" ук та, - кеськиз шофёрмы. Василий Собакинских, Уржум ёросысь Доноурово гуртысь воргорон, та техникаез 1956- тӥ арын тодмоезлэсь басьтэм. Соиз сюрс но ӝыны километр ортчыса вуттэм ни вылэм. Таиз 43 ар ӵоже кӧня ветлэмзэ уг но тоды: - Коленвалзэ сизьым пол вошъяй ни, со ог 20 сюрс иськемлы сяна уг тырмы. Озьыен, лыдъялэ... Всилий Михайлович та корт валэныз кытчы но ӧз вуылы ни. Егит дыръяз Уржуме но, Малмыже но, Сюреке но ветлэ вал. Ма веранэз котырысь нюлэсъёс сярысь. - Таӵе мотоцикл понна мон мар но ӧй сётысал, - пӧлызэ урдэ воргорон. - Номырин но сое уд ӵошаты. Пиналъёс кӧня ке ар талэсь азьло "Юпитер-3" кузьмазы. Уг но пуксьылӥськы. Таиз котькыӵе сюрестӥ каллен мынэ, уг тӥяськы. Василий Михайлович - асьме президентэн ог аре вордскем мурт. Сыӵе ик таза мугоро дядяй. Только таиз коляскатэк мотоез кияз возьыны быгатэ на. Юаськом солэсь правоез сярысь. - Мар тӥ серекъяськоды? - гор-гор гырдалтэ Собакинских. - Улытозям ӧй вал со. Мон уго правилоосты уг тӥяськы. Туж чакласькисько. Ньыльдон ар ӵоже огпол сьӧлыкаме вань - питран улэ курег шедиз. Огшорыез ӧвӧл, директорезлэн. Со сяна номыр ӧй вал. Инмар уте, ява. Та палась уно мукет адямиослэн сямен ик, та адямиослэн но улонзы нюлэсэн герӟаськемын. 1948-тӥ арысен Василий Михайлович Усть-Кильмезь рейдын ужаз, шур кузя кор келяз. - Ар ӵоже кык миллион кубометрозь нюлэс татӥ Калмез кузя ваське вал, - тодаз вае воргорон. - Усть-Кильмезь посёлокын со кылдытэмын вал Кильмезь но Вятка шуръёслэн огазеяськон интыязы, ог ньыль мурт улӥз. Табере номыр ӧвӧл ни. Тросэз юртъёс ӝуазы. Костылевъёс гинэ уло на отын - мукетъёсыз кошкизы. Ми, пур келянэз книгаосъя гинэ тодӥсь муртъёс, губияны мынӥсь кузпалъёсты ёртӥм азьлоез сярысь юанъёсын. Соосыз ваньзэ пыр-поч валэкто. - Тани кылзэ, - Валентина Ивановна кышетсэ ик куштоно кожаз. - Кор ваське вылӥысь. Вяткае вуытэк, со пыкиське нимысьтыз тупатэм сеткае, шеде коридоре. Отысен сое сортиментъёсъя люкыло, бӧрысь ини коръёсты ог-огенызы герӟало. Пучокъёсты лентае керттыло, корт гозыен юнмато. Лентаосты ини плотэ огазеяло. Сыӵе пурлэн кузьдалаез ӝыны километрозь кыстӥськылӥз, пасьталаезъя 50 метрозь луылӥз. Валады-а? Витьтонэтӥ-куатьтонэтӥ аръёсы татын адямиос лачак вал. Уж ваньмызлы тырмылӥз. Тулыслы-гужемлы Украинаысь калык вуылӥз. - Ми асьме коркаын улӥм. - вера кышномурт. - Директор ӧз но юалля, лыктэ но шуэ: тани тӥледлы вить мурт, мед улозы дорады. Кытчы пырод? Озьы ик улӥм. Асьмеос вить кузя, сомында ик куноос. Оло, секыт но вал - табере вунӥз ни. Уго туж шулдыр улӥм соку. Мотозэс заводьыса, кузпалъёс азьлань ширтӥзы. Йыре кылизы Собакинскихлэн кылъёсыз: - В Ижевск приедите, передайте наш поклон мастерам - мировую технику они делают... Куронзэс быдэстӥськом. Мото лэсьтӥсьёс удыс кылдытэмзылы 70 ар тырмонэз али пусъё. Ӟечкыласьком! Азьланьын но ӟеч ужаны мед кылдоз. ИВ. Доноурово - Ватка дуре интыяськем посёлок. Дугдӥськом магазин доры. Кенер вӧзын мӧзмыса пукись воргорон милемлы шумпотӥз. Шонерзэ верано ке, со котькинлы ик шумпотэ, вылды. Огпӧртэм улонэз кызьы ке но шулдыртоно ук. Кытчы мыныны мылкыдмес тодыса, воксё лопырскиз: - О-о-о, пиос, мон тӥледыз отчы вутто! Ойдолэ. Только лавкае нырысь пыралэ вал... Владимир Пашутин мӧйы ӧвӧл ай. Кызьы шуэ, кисыяз куать дипломез. Озьы ке но, туннэ ужтэк пуке. Кӧтсэ тыре, чорыг вузаса. Али эшшо уж шедьтӥз на. Шепига бичасько, пе, аптекалы. Ӟуч кылэз ӧжытак тодӥсько ке но, тазэ верамез нокызьы ум валаське. - Ну шепига, сыӵе горд мульы, эмъюмлы мынэ, - пайме Володя.- Кызьы уд тодӥське шиповникез? Тьфу, озьы ик вера вал. Уго легезь мульыез татын но окто. Кам дурын, кылсярысь, со туэ но туж чебер удалтӥз. Кӧня ке ар талэсь азьло Пашутин Т-63 катерлэн капитанэз вал. Буксирен кор кысказ. Чильпырасьсэ яратэмез понна матросэ выжтӥзы, бӧрысь воксё ярдуре поттӥзы. Николай Батин но капитан вал. Лобань, Вала, мукет шуръёстӥ катерен ветлэмын. - Ай кызь ар талэсь азьло Кильмезьын ву трос вал на, - вера Николай. - Табере со туж лазегомемын. Ма, Вятка но пӧртэм ӧвӧл. Трамвай гинэ но куддыр ветлыны уг быгаты ни. Тани алигес зоръёс ортчизы но, нош ветлыны кутскиз. Ватка со пала ветлӥсь бадӟым катерез татын "трамвай" шуо. Со ог 200 муртэ нуыны- вайыны быгатэ. Владимир но Николай милемыз затон доры валто: ойдолэ, пе, адӟоды "узырлыкмес". Ярдурын, музъем вылын, кыллё (яке сыло-а?) катеръёс. Даслэсь ятыр соос. Мачтаоссы кирос кадь адӟисько. Зэм ик, пароходъёслэн шайвылзылы укша та суред. Кӧня ваньбур, кӧня корт юнме кылле, тус-тас луэ. - Тӥни бур паласен кыкетӥез катер, адӟиськоды-а? - Володялэн синъёсыз котмо. - Ӵапак отын мон капитан вал... В. Эшшо одӥг воргорон сярысь верам потэ на. Владимир Остапович Рудый. 61 аресъем белорус. Тусызъя нокызьы но сомында уд сёты. Туж учкымон адями. Гондыр кадь сӥлё- виро, йырсиез пурысьтамын, чебер тушез егит нылъёслэсь но йырзэс поромытэ на, дыр. Остапыч, озьы нимало сое доноуровоос, 15 арзэ Колымаын ортчытӥз. Ӧз, отчы кин ке ыстыса ӧз шедьы - ас мылкыд каремезъя мынӥз. Зарни утчаны. - Тямыс муртъем звеномы нунал ӵоже 12-15 килограмм зарни люка вал, - вера Рудый. - Я кезьыт кортна мугорез, я чибинь кекатэ. Капчи ӧй вал со аръёс. Коньдон шуген сётӥськиз. Озьы 86 сюрс манет люкай вал. 1992-тӥ арын ваньмыз со "ӝуаз". Яратоно государствое сыӵе "кузьым" лэсьтӥз мыным но, семьяелы но. Кӧня ке минут ӵоже воргорон кинлэсь ке анайзэ тодэ вайыса возьматэ милемлы ӟуч кыллэсь узырлыксэ. Ораське, шуо асьмелэн. - Я, лушкамын-мар луысал ке, сокем жаль но ӧй потысал, вылды, - ассэ буйгатыны выре Остапыч. Кӧня ке ар талэсь азьло Рудый аслэсьтыз быгатонлыксэ но кужымзэ мукет удысэ ӧръяз - кылбураны кутскиз. Милемлы но кӧня ке лэчыт чуръёссэ лыдӟиз. Одӥгзэ Зюгановлы сӥзем, мукетсэ президентлы. Усьтӥськем ыммес адӟыса, воргорон лӧптӥз: оло, пе, частушкаосме лыдӟом на? Бабка деньги собирала: Обеспечу старость я. А как этот пришел к власти, Без трусов осталась я. Огез бӧрсьы мукетыз такмак потэ Остапычлэн ымысьтыз. Огезлэсь мукетыз лэчыт. Рудыйлэсь юаськом Белоруссия сярысь. - Мар сое веранэз? - киоссэ вӧлъя кыллы усточи. - Мон Чернобыльлы матын вордски ук - Могилевын. Агае али но отын улэ. Дор палъёсам бертэм уг поты. Татын дышиськиз ни. Нош отын... отын яблоксы арбуз быдӟа будэ. Губи, тодӥськоды-а, таз быдӟа, ява, ачим адӟылӥ. Будэ, нокыӵе эсэпсэ валатэк. Радиация озьы йӧнтэмъяськытэ. Авария бере нырысь-валысь калыклы юрттӥзы ик. Табере нокин нокинлы кулэ ӧвӧл. - А-а, мар веранэз, - сялӟе Остапыч. - Асьмелэн но югдур пӧртэм ӧвӧл ук... ВИ. Сылӥськом Ватка ярдурын. Ӟечбур, чебер шур! Зыл-зыл кошкись вуын Удмуртиысь возьёсысь-нюлэсъёсысь люкаськем мускыт но вань. Сыӵе малпан мылкыдэз ӝутэ. Кузь сюрес ортчемын. Кӧня выль тодмоос, кӧня выль адӟемъёс. Ми ӧм вералэ на Киров улосысь удмурт гуртъёсы вуылэммы, татысь музеен тодматскеммы, страообрядецъёс дорын шутэтскеммы но трос мукетыз сярысь. Калмез кузя ветлэммы пумысен мадёнмы таин йылпумъяське. Но азьланьын кӧня ке материалъёс луозы на. Выльысь пумиськытозямы. Иван Лебедев (текст), Георгий Юсаев (фото), Леонид Прозоров (суред.), Виктор Белов (Авто). "Иж-49" но солэн кузёез. Остапыч. Катеръёслэн "шайвылзы". ШӦКЫЧ Улонысь учыр Малпаськоно на вылэм Сюмси ёросысь одӥгаз семьяен паймымон учыр луэм. Кузпалъёс, ас машинаязы пуксьыса, кыдёкысь городэ шутэтскыны ветлӥллям. Бертыкузы одӥгаз АЗС-е бензин ватсаны кожиллям. Ог дышемен куртчоно но кариськиллям. Руль сьӧрын пукись воргорон васькем но, пӧсь куазьлы чидатэк, кезьыт сур басьтыса, быдэс ӟенеликсэ бушатэм. Шофёрлэсь "йыртэмамзэ" ГИБДД-ын ужась синйылтэм. Дышетыны малпам - лушкемен "корт валзылэсь" вань питранъёсысьтыз омырзэ лэзем. Нош "капчиям" воргорон соку кышноез интые пуксиз, кузпалыз - руль сьӧры. Мар та таӵе? "Корт валзы" тып-тып пуке, нош милициын ужась дэра кадь кӧдэктӥз. Кышномуртлэн но машина нуллыны правоез вылэм. Со руль сьӧры пуксёз шуыса тодысал ке, ГИБДД-ын ужась аслыз мултэс уж но ӧй лэсьтысал, вылды. Извинить карыны курыса, пӧсятозяз ик ньыль питранэз "качатьтӥз". Табере Сюмсиысь кузпалъёс та учырез серекъяса гинэ тодазы ваё на. В.Андреева. Малы кошке егит тодосчи? Кылӥ, наукаосъя кандидат Виктор Шибанов ужан интыысьтыз, Удмурт кун университетысь, кошкыны дасяське шуыса. Уг ватӥськы, та ивор монэ туж вӧсь кариз. Бен, мон валасько сое, вордскем палъёсаз Глазов ёросэ кошкыса, солы трослы капчигес луоз, вылды, яратоно ужез пушкы, наукае выйыны. Зэмзэ ке верано, мон гинэ ӧвӧл, ваньзы сое валало: интеллигенция пӧлысь мӧйыез но, пиналэз но. Но самой со "ваньзы" кыл ик монэ та учыр шоры лэчытгес но мургес учкыны косэ. Ваньзы шуозы: бен, шонер! Молодец но шуозы на. Но одӥгез но ведь, тужгес но мӧйы интеллигенция пӧлысь, та умойтэм шуыса, нокытын но шара уз вера... Кыӵе кӧшкемыт югдур та. Мынам йырсиосы ик пежыртӥсько. Та югдур ачиз возьматэ ини удмурт интеллигенцилэсь ымныр туссэ. Соин ик "тани милям удмурт интеллигенцимы" шуисьёслы пырак синмазы ик вераме потэ: ӧвӧл ни со! Вылӥ кивалтэт котыртӥ бергась интеллигенция шуныт коркаосын улэ, узыр банкетъёстӥ поръя, нош мукетыз, вузаськымтэез, аслэсьтыз куашкась кенерзэ, липетъёссэ тупатъяны кутскиз. Тросэз шуо: "Я, ӵок ини, монэ гинэ медаз исалэ". Соин ик омырын но, эфирын но чибинь бызгетэм ик кылӥське. Бен, валасько мон Викторез. Нош ваньзы ик меда сое мон сямен валало? Уг шуо меда: туала вакыт сое кошкытэ. Но вакытэз гинэ янгыш карыны луэ шат? Солэсь тусбуйзэ нырысь ик асьмеос кылдытӥськом ук. Нош мон шуысал на: асьме вакытлэсь туссэ-буйзэ нырысь ик кылдыто Виктор Шибанов кадь чылкыт сюлэмо но кыдёке учкыны быгатӥсь адямиос. Киме сюлэм вылам поныса верасько: уг тодӥськы мон туннэ литератураез эскеронъя наукаысь Виктор Шибанов кадь огъя европейской мертэтэн ужась учёноез. Таӵе адямиос даурезлы огпол гинэ вордӥсько. Виктор быдэсак ассэ наукалы сӥзиз. Со сярысь вера кунгож сьӧрысь учёнойёслэн, культурологъёслэн Викторлэн ужъёсызлы вылӥ дунъет сётылэмзы но. Со сярысь верало университетын дышетскем но дышетскись студентъёслэн Викторез туж юн гажамзы. Озьы ик дипломникъёсызлэн, кымесэз ик лӧпкытыса, выль инвисъёсты усьясь ужъёссы. Мар бордысь потэ Викторлэн кошкыны ӝуткаськон мугез? Нырысь ик, мон шуысал, наукаен герӟаськем эшъёсыз бордысь. Соос вӧсь каризы солэсь сюлэмзэ, чигтӥзы осконзэ. Кыкетӥез ужпум герӟаськемын, дыр, улон интыен. Егит учёной дас - дас вить ар ужа ни, но али ке но квартираез ӧвӧл. Улэ общежитиын, кытын урбоос но тараканъёс гинэ кузёясько. Куинетӥез муг, мон сямен, потэ асьмелэн чалмыт улэммы, сьӧд очки пыр югытсэ адӟымтэмы бордысь. Уг, уг ветлы мон та пумысен вылӥ кивалтӥсьёс доры, ма, соос мыным дырзэс но уз висъялэ. Тодӥсько: ми соослы нокин но ӧвӧл, соослэн асьсэлэн быръем поэтъёссы, журналистъёссы но учёнойёссы вань. Соин ик мынам вазиськеме потэ егитъёсызлыгес кивалтӥсьёслы - Светлана Константиновна Смирновалы, Алексей Геннадьевич Красильниковлы, Сергей Фролович Васильевлы. Тодӥськоды-а тӥ та сярысь? Яке со тӥледлы но-а озьы ик кулэ кадь потэ? Вождэс эн вае тӥледлы вазиськемысьтым, мукетъёсызлэсь мынам юаме но уг поты ни. Пётр ЗАХАРОВ, кылбурчи. Тодымтэзэ тодомы Удмурт книгаос туж шер пото. Потэмъёсыз но гуртъёсы уг вӧлдӥсько. Ёзэн-ёзэн будӥсьёс вордӥськем кылынызы уг лыдӟисько, уг тодо калыкмылэсь дано, тодмо, чылкак вунэтэм кылбурчиоссэ, веросчиоссэ. Нош ӵапак та адямиос ик вылэ ӝуто ук калыкмылэсь культуразэ. Мон удмурт книгаосыз лыдӟисько пичиысен. Но 1941-тӥ арозь потылӥзы ӟуч кылысь берыктэмъёсыз. Григорий Верещагин тодосчилэн, поэтлэн кылбуръёсыз киям вуизы мыным куатьтон одӥг арес тырмем бере гинэ. Витьтон ар ӵоже мон солэсь гожъямъёссэ ӧй лыдӟы, книгаосыз ӧз потылэ. Озьы ик ӟеч-ӟеч ум тодӥське на Михаил Ильинэз, Яков Ильинэз, Пересь Шамарданэз, Александр Сугатовез, Константин Яковлевез, Йыгын Курбатэз но трос мукет кылбурчиосмес, веросчиосмес. "Удмурт дунне" газетлэн редакцияз ужасьёслы ӵектӥсько лыдӟисьёсыз арнялы быдэ та адямиослэн кылбуръёсынызы, веросъёсынызы, романъёсысьтызы люкетъёсын тодматыны. Вунэтэм нимъёсыз буре вайыса, шоканы ик капчигес луоз, дыр. Тодымтэзэ тодомы, вераськон кылмес юнматомы, лулпушмес узырмытомы. Элька Микулай (Николай Яковлев). Тюмень. "Чигымтэ чидан" конкурсэ Лулпыжет "Мама, момеме потэ, суйты" - корос котыртӥ берга аресъем Лёшик. Нош мамаез уг кылы мискинь пиналзэ, суйёссэ гадь вылаз тырыса, вез-вез кылле. Огез-кыкез апайёсыз буйгатыны выро пияшез, соиз уг буйга, дынгыр тэтчаса ноны куре. - Кӧня верай кенлы, шайлы-а куатетӥзэ вайыны малпаськод на шуыса. Куштоно вакытаз районысь нылкышно врач отпуске кошкем уга, собере бер луэм. Вордскиз тӥни курадӟыны, лулпыжет, - кыла-бура синтэм песянайзы. Кышнозэ ватэмез бере, Олексан юон вылэ чӧлскиз. Куректонме гылтӥсько шуылӥз, нош пиналъёсызлэсь бӧрдэмзэс ӧз ик кылылы кадь. Собере кушласькиз гуртысьтызы городэ кошкем пал кышномуртэн. Рос-прос малпаськиз-а пиосмурт, нырысь мылкыдызлы сётскиз-а, куать нылпиоссэ синтэм мумиз вӧзы кельтыса, городэ улыны кошкиз. Мон, пе, шутэтскон нуналъёсы бертыло, салам, коньдон вайыло. Зэм, нырысь-валысь со ӵем гинэ бертылӥз, кие тэронтэм бадӟым, ӵыж-ӵыж яблок, конфет, шудонъёс вайылӥз. Но ӝоген отчы-татчы пазяськон акыльтӥз, лэся. Пичиоссэ пиналъёссэ сьӧраз басьтӥз. Кӧня улӥзы, сонямында ик кыл сиизы Оляен Алёша сюранайзылэсь. Огпол Лёшик солэн нылыныз шудонзэс люкыны ӧз быгатэ. Соиз кыска, таиз бӧрдэ. Сюранайзы машинаез ур-вар кыскиз но аслазэзлы сётӥз, пияш шоры кесяськиз на. Олексан пиез понна дурбасьтӥз ке но, ӵуказеяз пиналъёссэ берен доразы келяз. Бӧрысь утиськыны шуыса гинэ ӧтьылӥз на (выль кышноез солы ныл ваиз), но пиналъёс ӧз ветлэ ни. Нырысетӥ классэ мынэмзэ Алёша рос-прос уг тоды ни. Мылкыдыз, зэм, бурдъяськемын вал, кытысь ке сяська керттэт но кияз кылдӥз. Тодэ на огзэ - линейкаын сылыкуз, со туж паймиз, пиналъёс анай-атайёсынызы лыктэмын шуыса. Мар-о, сюресэз но уг тодо-а, мар-а, анайёссы келяллям шуыса малпаз. Тямыс март азьын дышетӥсьсы шуиз: - Праздникамы анайёсты чай юонэн мед лыктозы. "Мамочка милая, мама моя!" - эшъёсыныз ӵош кырӟаз Алёша. Собере Нина Павловна сое огназэ анай сярысь кырӟатӥз на. Та, пе, милям самой чебер кырӟасьмы, шуиз со Алёша сярысь. Соиз "уг" шуиз ик вал но, дышетӥсез шораз туж лек учкиз, чиль сьӧд синкашъёсыз, эсьма, сьӧсь тылобурдолэн бурдъёсызлы укшаны кутскизы. Концерт бере пиналъёс анайёссы вӧзы чай юыны пуксизы. Лёшик солань-талань ветлэ, кытчы пуксьыны уг вала. "Кинлэн та пиез?" - юало тодмотэм апайёс. Озьы ик инты шедьтытэк, сумказэ кутӥз но бертыны потӥз пияш. Кошкемзэ нокин ӧз синйылты. Нырысьсэ соку куать иськем ӵоже куараен бӧрдыса бертӥз пияш, нырысьсэ соку сокем ӧз тырмы солы анай. Городысь вуэм апаезлы Алёша со учыр сярысь мадиз. "Сволочь!" - шуиз Аля Нина Павловна сярысь. - Баба, мон туннэ природоведениен "вить" басьтӥ, только суредаськонъя урокын "кык" пуктӥзы, - оло шумпотонзэ, оло кӧтӝожзэ сокем шокпотыса вера пияш висъет сьӧрын кыллись пересезлы. Куасьмем гадь бордаз ӝиптыса, купырскем киосыныз вешаз со "лулпыжетэзлэсь" мертчан йырзэ. - "Вить" шукод. Ӟеч, пие, ӟеч. Нош малы "кык"? - А-а, кыӵе ке коробка интые машина суредай. Ну, "КамАЗ", кудзэ папае городысь ваиз вал. Со мыным выльысь велик басьто шуиз. Зол, отэ? - Уз, пие, уз басьты ни папаед. Моргын ни со. *** - Ой, кӧты-сюлмы, - ымдурзэ куртчылыса бӧрдэ песянай. - Мар таӵе йыр кыска, пиналъёс школаысь бертозы, сиён но лэсьтэме уг лу. Ма, пӧзьтыны но мае пӧзьтод ай? Сӥль ӧвӧл, картош быриз, йӧлэз Нюра кулэм дырысен шӧмъям уг йӧт ни... Э-э, мар скал вал. Нош плита эстыны пузы тырмоз-а меда? Та Терентьевна субботээ мунчояз ӧтёз-а? Пиналъёс жаль ук - мунчо но сутскыны-а кулэ вал, эк-эк-эк. Оляезлэсь вӧзаз сылэмзэ шӧдымтэ пересь. - Эн бӧрд, баба, ми Лёшикен кӧс улвай ваём, а сиён мон ӝоген пионерлагерьысь вайыло. Смена кутскытозь толэзь гинэ на, мон отчы ветлӥ ни - столовоязы тусьты-пуньы миськисе кутом шуизы. Ӝуксы отын тачак кыле, кудӥз котлетсэс но кельто. Асьмелэн кеньырмы тачак ук, сэре Серга чорыганы мынӥз, со али кык арнялы городысьтыз бертэм, практика, пе. - Лёшик второй сменээ кошкиз, маке пӧраны выриз кадь вал, ны-ы, учкы. - Со кӧс макаронэз жаритьтэм. - Э, ӵок. Маке умойтэм пӧраськод ук, пие, шуи но, нормально, пе. Мар-о сыӵе куаӵыртыса йыръе шуыса кылзӥськисько. Сӥзьыл пал песянайзылы воксё урод луиз. Оляез интернатэ сётӥзы, Лёшикез Алязы городэ нуиз. "Ньыльлы" но "витьлы" дышетскись пияш городын школазэ келляны, "кык" октыны кутскиз. Огпол, география урокын вал со, дышетӥсь быдэс класс азьын кесяськиз: - Тон мар, анай-атаед ӧвӧл шуыса, дышетсконо но ӧвӧл кожаськод-а? Астэ жаляса эн улы, эсьма, нылпи юртэ келялом. Тросгес пенсия басьтон понна, апаед опекун кариськыса улэ, нош кылдэ юамез уг луы. Да, ӵуказе классэн ӵош цирке мынӥськом, мон тонэ отысь вакчи штаниен медам адӟы! Берпуметӥ уроке со нунал Алёша ӧз пыры ни. Ӵуказеяз но, улысаяз но, дорысьтыз сумкаен кошкылӥз ке но, школае ӧз вуылы. Вуж аэропорт дорысь пот бусыын ортчытӥз дырзэ. Школалэсь пегась Валера бускелез нырысьсэ тамак пум веръяны сётӥз соку солы. Штани кукъёссэ Алёша юри сутӥз, апайлы тылскем вамен тэтчакумы уси шуо, малпаз. - Оло, Аля выль штани басьтоз ик. Со "мымралы" уд валэкты ук, пенсизы уг тырмы шуыса: Аля уг ужа ай - пичи нылыныз дорын пуке, кырсизэс ватэмзы бере пунэмъёссэс но ӧз берыктэ на. Табере ку со монэ "каратэе" гожтоз, охо-хо, - мӧйы мурт сямен лулӟылэ укмыс аресъем пияш. Географиен дышетӥсез куинетӥ нуналаз доразы вуиз. Вождэ эн вайы, пе. Дорысь ужзэ доска доры вераны четверть ӵоже огпол но ӧз ӧтча, но кытысь ке журналэ "куиньёс" тырем. Гужем каникулэзлэн нырысетӥ нуналаз ик Лёша бабаез доры кошкиз. Пичи но бадӟым мурт ваче ӟыгырскыса бӧрдӥзы. Зэм, бабаезлэн валесысьтыз султэмез ӧз лу пери шуккыса, со далайгес кылле вылэм ини. - Мон уг кошкы, татчы кылё, кин-о тонэ утялтоз? - ӝот-ӝот вераз Лёшик. - Кошкы, пие, кошкы, ачид ёрмод. Монэ Терентьевна но эскерыны вуылоз. Ма, Люба апаед но пиналэныз татчы берто шуэм, мар ке мужикеныз кусыпсы тупамтэ, лэся. Куанер каризы, дыр, асьмеды. Туж кема ӧз курадӟы ни пересь, гужем бырон азьын кулӥз. Ӵемысь Алёша адӟылӥз сое уйвӧтъёсаз. Ялан вешалляз, буйгатъяз кадь. Шарак сайка но - коркан чал-чал буш, кезьыт. "Малы сайкай, - малпа Алёша, - бабалэн вешамысьтыз тыбыр ик нясь-нясь вал". Миндэраз ӝокатскыса, вӧтсэ азьланьтон понна умме усьыны выре на, но уг быгаты. Ӵукнаозь дырекъяло пельпумъёсыз пияшлэн. ... Армие келякуз, Ксюша куараен бӧрдӥз, мӧзмыса куло шуыса, кылаз-бураз. Нош ӝыны ар ортчыса, Алёшалы гожтэт ыстӥз: "Вождэ эн вайы, мон бызисько. Стаслэн анаез-атаез милемлы квартира басьтӥзы. Тонэ али но яратӥсько, но асьмелы ӵошен улыны секыт луысал: мон дышетскисько, коньдонлы ёрмысалмы..." *** Со марш! Мендельсонлэн маршез! Пыдъёсыз зубектӥзы, уг лу вамыштэмез Алёшалэн горд кышето ӝӧк доры. Сюлэмыз дыр-р! куалекъя. Неужто со кышнояське? Неужто со ӝоген ачиз атай луоз? Регистраторлэсь "табере тӥ законъя кузпалъёс..." шуонъёссэ, шуд но бур сӥземзэ уг ик кылы эмеспи. "Тани али зундэс бырттоно луоз, - куалекъя со. - Уз усь-а зундэсэ, алдаськыса паллян кизэ уз мычы-а Галя?" Югак чилектӥз выль кенлэн чиньыяз зарни зундэс. Кисыысьтыз ныркышетсэ поттыса, нюлам кымессэ ӵушиз Алексей. З.Рябинина. Удмурт Республикаысь Калыкез кышкытлыклэсь утёнъя кенешлэн решениез "Удмурт Республикаын терроризм но соин нюръяськон амалъёс сярысь" ужпумез эскерыса, Кенеш юнматӥз: 1. Удмурт Республикаысь терроризмен нюръяськонъя комиссилэн кивалтӥсезлэсь, Удмурт Республикаысь Правительстволэн Тӧроезлэсь Н. А. Ганзалэсь, Удмурт Республикаысь Югдурез утёнъя минисрлэсь В. Ф. Щербаковлэсь, Россия Федерациысь ФСБ-лэн Удмурт Республикая управлениезлэн кивалтӥсезлэсь ужзэ быдэсъясьлэсь И. Ю Артемьвелэсь Москваын террористъёслэн пуштытъямъёссы сярысь ивортонъёссэс лыдэ басьто. 2. Удмурт Республикаысь Правительстволы ӝегатскытэк ортчытоно Удмурт Республикаысь терроризмен нюръяськонъя комиссилэсь кенешонзэ терроризмез алон но ужаса улӥсьёс пӧлын валэктонэз нуон понна. Кулэлык кылдӥз ке, та ужпумез эскероно Удмурт Республикаысь Кун Кенешлэн сессияз. Удмурт Республикаысь Калыкез кышкытлыклэсь утёнъя Кенешлэн Председателез А. А. Волков. Советлэн секретарез А. В. Ярославцев. Чемпионэз ӟечкылазы 14 сентябре Удмурт Республикаысь Кун Кенешлэн Тӧроез Александр Волков ас дораз шуныт пумитаз спортивной амалэн ветлонъя 50 иськемын Дуннелэн чемпионатаз вормисе потэм Герман Скурыгинэз но солэсь тренерзэ Леонид Вахрушевез. Аслаз ӟечкыланаз Александр Волков вераз, Герман Скурыгинлэн вормонэз понна Удмуртиын куинь полэс шумпотӥзы: ачиз чемпион понна, Россия понна но асьме республика понна. Шаермы узыр кужмо, юн сямо, асьсэ ужзэс гажась адямиосын. Удмуртиысь спортэз гажасьёс мӧзмизы вал ини бадӟым вормонъёслэсь. Туннэ нуналысен куасэн бызьылонъя Галина Кулакова, биатлонъя Валерий Медведцев но шашкиен шудонъя Алексей Чижов тодмо нимъёс борды Удмуртилэн историяз пыроз на эшшо одӥг ним - капчи атлетикая Дуннелэн чемпионэзлэн Герман Скурыгинлэн нимтулыз. Кун Кенешлэн Тӧроез пусйиз на, спортлэн уно калыкез огазеясь удысъёслы но быдӟым спортсменъёслы юрттон республикаысь кивалтӥсь ёзъёслэн одӥгез бадӟым сюлмаськонзы луэ. Герман Скурыгинлы но Леонид Вахрушевлы Александр Волков сӥзиз азьланяз но выль азинсконъёс басьтыны, "Удмурт Республикаысь мугорез юнматон культура удысысь дано ужась" ним сётӥз но ивортӥз на, дуннелэн чемпионэз "Орбита" автомобилен пусъемын луоз шуыса. Дано спортсменэз ӟечкылазы на Кун Кенешысь Наукая, дышетонъя, культурая но егитъёсын ужан политикая ялан ужась комиссилэн тӧроез Алексей Красильников, Удмурт Республикаысь Правительстволэн Тӧроезлэн воштӥсез Виктор Шудегов, Удмурт Республикаысь Мугорез юнматон культурая но спортъя кун комитетлэн кивалтӥсез Гарий Кремер, Герман Скурыгинлэн дор палъёсыз - Селта ёрос администрацилэн кивалтӥсез Николай Останин но ёрос депутатъёслэн кенешсылэн кивалтӥсез Михаил Вязников. Удмурт Республикаысь Кун Кенешлэн пресс-службаез. Чылкыт омыр - асьме ки улын 10 сентябре Удмурт Республикаысь Инкуазез утёнъя кун комитетын ортчиз лицензиосъя комиссилэн азьвыл чакламтэ кенешез. Отын эскеризы государство ласянь инкуазез утёнъя сьӧд но дуно кортэн герӟаськем ужпумъёсты. Шаерысьтымы пӧртэм предприятиосысь дуно кортэз ялан лушкаменызы лицензиос сётъянлы куронъёс чурытомозы. 23-тӥ сентябрёзь сое басьтыны кулэ дуно кортэз кутӥсь пукнтъёсын ужасьёс, соослэн федеральной лицензиоссы вань ке но. Та нунал бере, лицензиосъя нимысьтыз ватсанъёс пыртэмын ӧвӧл ке, документъёс умойтэмен лыдъямын луозы, нош пунктъёслэн кивалтӥсьёссы азе нимысьтыз ужрадъё с кутӥськозы. *** Чакламын инкуазез возьматонъя-утёнъя "Шаркан" нимо парк кылдытыны. Отчы сюрись музъем кузёосын 1-тӥ ноябрёзь тупаеъя кенешон ортчоз. Таӵе ужпум пуктэмын вал Шаркан ёрос администрациын. Отчы пыриськемъёс парк кылдытонэз умоен лыдъязы инкуазьмес утён но экономикаез азинтон ласянь. Музъем кузёосын огкыл шедьтэмзы бӧрсьы чакламын луоз ини кыдытоно парклэн интыез. Нош туннэ тодмо ни солэн огъя быдӟалаез - 16 сюрс гектар. *** Шаерысьтымы инкуазез утёнъя кивалтӥсьёс ӧтемын улосъёсысь "Экология города" семинар-кенешонэ пыриськыны. Со ортче 15-тӥ-17-тӥ сентябре Глазов городын. Семинаре ӧтемын на Урал улосвылысь городъёслэсь чылкытлыксэс эскеронъя службаосын ужасьёс. Та ужрадын вераськозы "Чепецкой механический завод" ОАО-ысь валтӥсь специалистъёс. Соос тодматозы асьсэ предприятизылэн кылем-мылемъёссэ улосмылы кырсь вайытэк, ыштонъёстэк палэнтыны, чылкыт ву дасяны быгатэменызы но мукет пайдаё ужъёсынызы. Со сяна, асьсэ ужан амалъёсынызы тодматозы на Казань, Пермь, Челябинск, Екатеринбург но Ижевск городъёсысь инкуазез утёнъя службаосын ужасьёс. Н. Щеголева, Удмурт Республикаысь Инкуазез утёнъя кун комитетын ужась. ТОЛ ВУОН АЗЬЫН Шуныт тырмыт луоз Оскытӥз журналистъёсты, соин ӵош быдэс республикаын улӥсьёсты егит министр Виктор Алексеевич Савельев. Со кивалтэ шаерысьтымы эстӥськонъя, энергетикая но связья удысэн. Та министерство али гинэ кылдэ ай. Министр верамъя, отын ужалоз 20 мурт, туннэ нуналлы юнматэмын ӝыныез. Ачиз В. А. Савельев туала министръёс пӧлын самой егитэз. Вордскемын 1963-тӥ арын Татарстанысь Альметьевск городын. Ӟуч. Йылпумъяз Казаньысь университетэз, Удмуртиын улэ но жа 1993-тӥ арысен. Улон интыосы вуись тол вылтӥ шунтон ласянь кыӵе югдур кылдэмын Ижевскын но районъёсын? Та юанлы валэктыса, министр шуиз: - Республика понна эгыр тырмыт басьтэмын, но куд-ог районъёс, кылсярысь, Алнаш, Дэбес сое доразы вуттыны уг дырто: шугъясько транспорт но эстӥськон ласянь. Нефтепродуктъёсъя озьы ик шуге-леке вуон учыръёс уз луэ, интыосысь кивалтӥсьёс дыраз вырӟизы ке. Но туннэ нуналозь Воткинск, Глазов, Завьялово но куд-ог мукет районъёс толлэсь матэктэмзэ ӧз шӧдэ на кадь. Секыт луоз газ ласянь. Чагыр эстӥськонэз ваньмыз ярато, но дунзэ тырон ласянь нимаз адямиос но, предприятиос но туж трос манетлы пунэмаськеме пыремын ни. Таин валче кышкытлык кылдэ, газ сётонэз патсалозы но шуыса. Али вань быгатонозэ лэсьтоно на, куректонтэк-бӧрдонтэк толъён вылысь. Электрокужым сярысь, со ялан дуноялоз, малы ке шуоно, таиз шуныт сётон люконтэм герӟаськемын нефтен. Нош нефтьлэн дуныз дугдылытэк ӝутске но ӝутске, дуннеысь рынок сьӧры уиськыса. Связьлы дун пуктэ центр. Вераны кулэ, "Удмуртэнерго", "Удмурттелеком", "Удмуртнефть" республикалэн бурд улысьтыз кемалась потэмын, асьмелэсь вераммес кылэм-адӟем уг каро. В. А. Савельев нимысьтыз вераз нефтез переработать каронъя Удмуртиын пичигес завод пуктон сярысь. Бускель улосвылъёсын таӵе предприятиос ваньмыз сямен усьтэмын но ужало ни, тӥни малы соос асьмелэсь умойгес уло. Тодамы ваём туала гужемез гинэ, бензинлы кузь черодъёсты. Министр верамъя, таӵе югдур кылдӥз, нефтепереработкая заводъёсты огвакытэ тупатъяны, выльдыны дугдытъямен валче. Удмуртиын асьмелэн пичи гинэ инъетмы луысал ке, шуге-леке ӧй вуысалмы. - Завод пуктыны коньдон шедёз, - шуиз Виктор Алексеевич. - Азьланяз вакчи дыр куспын со уксё берытскоз. Л. МЕДВЕДЕВА. Бурдъяло - лапкыто Хоккеез яратӥсьёслэн но доразы праздник вуиз. 15-тӥ сентябре Ижысь Йӧ дворецын Кун Кенешлэн Тӧроез Александр Волков, чемпионатэз усьтыса, йӧ вылэ шайба куштӥз. Нырысетӥ турын "Ижсталь" пумиськылӥз Новотроицкысь "Ностаен". 6:5 лыдын вормизы асьмелэнъёс. Кыкетӥез шудон йылпумъяськиз толон бер ӝыт. Вылӥ лигаын шудӥсь баскетболистъёс но чемпионатсэс мытӥзы. Университетлэсь данзэ утись "Купол" - УдГУ нюръяськиз Волгоградысь "Динамо" - "Автодорен" но Ставропольысь "Пограничникен". Жаляса верано, но туннэ нуналлы куноос кужмогес. Асьме команда ньыль шудонзэ ик келяз. М.Кузьмин. Продюсеръёс люкаськылӥзы 10 сентябре Удмурт Республикаысь Кун Кенешлэн Наукая, дышетонъя, культурая но егитъёсын ужан политикая ялан ужась комиссиезлэн тӧроезлэн Алексей Красильниковлэн кивалтэмез улсын ортчиз Удмуртиысь продюсеръёслэн кенешсы, кудъёсыз ужало "Капик", "Ангажемент" театральной агенствоосын, "П. И. Чайковскийлэн вордскем интыосаз" юрттэт сётонъя фондын, "Коллекция" продюсерской группаын, "Овация" продюсерской центрын, "Марк" ассоциацилэн предприятияз но "Дева" компаниын. "Шоменъёс" нырысьсэ пумиськизы республикаысь законъёс кутонъя кивалтӥсьёсын. Тодмасткем сяна быдэсъязы куд-ог ужпумъёсты но. 2000-тӥ ар - юбилейной. Тодмо крезьгурчимы вордскемез дырысен 160 ар но быдэс Россия Быдӟым Вормонлы 55 ар тырмонзэ пусъёз. Комиссия продюсерръёслы дэмлаз 1999-тӥ-2000-тӥ концертной сезонын вылӥ верам лыдпусъёслы эскеремын саклык висъяны. Пумиськонын эскеремын нылпиослэсь шутэтскон дырзэс радъянъя ужпумъёс но шоу-бизнесын кылдэм налогъёс ласянь кылдэм юанъёс. Удмурт Респбликаысь Кун Кенешлэн пресс-службаез. Дипломен пусъемын Россиысь инвалидъёслэн огазеяськонзылэн (ВОИ) валтӥсь правлениез но "Надежда" газетлэн редакциез ялӥз вал "Инвалид но общество" темая конкурс. Та ужрад сӥземын вал ВОИ-лэн 10 ар тырмонэзлы. Лулысь-сюлмысь потэм кылбур чуръёс гожтэменыз, инвалидъёслэн улонысьтызы котыр ласянь сюлмаськонъёссэс шараяменыз дипломен пусъемын Ува ёросысь Нылга посёлокысь Ирина Пушина. В.Петрова. Гердлэн пор эшез 1931-тӥ арын Советской Союзын экран вылэ потӥз куараё "Путевка в жизнь" нырысетӥ киносуред. Со калыклы туж яраз. Городъёсын быдэс толэзь возьматӥзы.Али но сое учкыны мылкыд карисьёс трос. Киноын возьматэмын анай-атайтэк кылем, улонлэсь палэнтэм нылпиос. Одӥгзэ ролез (Жиганлэсь) шудӥз Михаил Жаров, мукетсэ (Мустафалэсь) - Иван Кырля. Иван Кырля туж яркыт, вунэтонтэм адями вылэм. Киносуредэз возьматэм бере, со Советской Союзысь трос городъёстӥ ветлэм, гастрольёс ортчытэм. Калыклэн яратоно киноартистэз луэм. Зэм, тросэзлы туж ик тодмо ӧвӧл солэн нимыз. Иське, кин со, Иван Кырля, куараё нырысетӥ киносуредысь вунэтонтэм артист? Иван Кырля - пор пи, 20-тӥ аръёсы дышетскем Москваысь одӥгаз институтын. Юн эшъяськем Куӟебай Гердэн. Ог-огзэс ӟеч тодо вылэм. Огвакытэ улӥллям но дышетскиллям Москваын. Иван Кырля тодэ ваёнъёсаз умоен гинэ буре вае Куӟебай Гердэз. Кузьма Павлович котьку ик котыр ласянь адӟем карымон эшез вылэм. Пор кылбурчи но удмурт поэт музэн ик 30-тӥ аръёсы пытсэтэ сюрылӥз. Кык эшъёс - кык яркыт удмурт но пор кизилиос дырызлэсь вазь кысӥзы. Литература удысын тыршисьёслы та адямиослэсь нимъёссэс вунэтоно вылымтэ. Н.Яковлев. 02 ивортэ Граната шедьтэмын 14 сентябре Ижевскысь "Северный рынок" трамвай дугдылонниын 40-45 аресъем воргорон милиционерлы сётӥз... граната. Та снаряд сыномыса улэм ни граждан ож дырысен. Паймымон бинялтэт шедьтӥз Завьял ёросысь Постол гуртысь Ижевске вуэм куно Виктор. Со Дзержинской урамысь 20 номеро юрт дортӥ ортчыкуз жуг-жаг куян интыысь гранатаез синйылтэм. Жаляса верано, Виктор сое калыклэсь палэнтэм интые, адямиос пӧлтӥ милициысь пунктэ нуиз. Нош ма луысал граната пуштысал ке? Цоин ик, калыклы ивортӥськом. Таӵе учыръёс дыръя жингыртэ 02 телефонъя, нош гранаталы укшась макеосты киыныды эн йӧтылэ. Ю. БАЙБЕКОВ. Вашкала сямъёс но йылолъёс Гур шуккон Азьвыл вакытэ гур шуккон корка ӝутэмлэсь секыт вал. Али кирпич гинэ медло, кык нунал ӵоже лэсьтод, нош ВАЗЕН сое кема лэсьтыны вырылӥзы. Валась муртъёс инъяськылӥзы, гулбече юн пыкъетъёс пуктылӥзы. Гурлэн пыдэсаз, сюен сураса, из пырыос тырылӥзы. Гур шуккыны быръё вал лызпыръем горд сюй - со умой шуккиськылӥз. Сюй ворттылӥзы умой куазен - мултэс кӧс но кот медам луы. Гур шукконын уж тырмылӥз пичиезлы но, бадӟымезлы но. Пиналъёс вошъяськыса сюй пыртылӥзы, егит воргоронъёс нушыен тышкаса шуккылӥзы. Селта палъёсын гурзэс одно учоген лэсьто вал. Отын сиён дасяллязы. Али соос уг пумиськыло ни - туала гуръёсты плитаен лэсьто. Гур ым вандылӥз тужгес валась мӧйы мурт. Со сюез (шаез) лачатъязы, коркась корка, гуртысь гуртэ сётъязы. Гур быдэсмем бере одно табань пыжылӥзы. Сое вӧсяськыса сиылӥзы. В. МОШКИН. Чуръёс, чуръёс Астэ ачид тодод, калыкез ӵемтытод Москваын улон коркаос пуштэм сярысь политикъёс али пӧртэм малпанъёссэс верало. Нош мон шуысал, чорыг йырысеныз сисьме. Ӧйтӧд, малы кулэ вал кужмо Советской Союзэз куашкатыны. Соин йырин асьмеос табере таӵе кышкыт учыръёсын пумиськиськом. Мар ватонэз, али пӧртэм чиновникъёс, нефтез, газэз, нюлэсэз но мукет ваньбурмес кунгож сьӧры келяса, трос миллионъёсын асьсэлы коньдон жильдо. Табере соос ик Госдумае кыстӥсько. Удмуртиын но калык ваньбурен узырмем адямиос пӧлысь куд-огез Республикаысьтымы Кун Кенеше но Правительствое кивалтыны сюризы. Табере сыӵеос огшоры улӥсьёслэсь куронъёссэс быдэсъяны уг сюлмасько. Милям юртамы алигес ялон ошизы. Ижевскысь Октябрь ёросысь вытъя инспекция куре кузёослы вузам квартираос понна (приватизировать каремлы) вытэз (налогез) дыраз тырыны. 16-тӥ сентябрысен та выт понна котькуд нуналэ 0,1 процент пеня басьтӥськоз. Налоглэсь мозмытэмын пенсионеръёс. Табере малпалэ асьтэос, тросаз предприятиосын но учреждениосын уждун дыраз уг тыро. Ужасьёс кытысь та нуналэ ик коньдон шедьтозы юнме шорысь малпам выт понна. Ӝоген омырен шокаммы понна но коньдон курозы ни. Шуг-секытъёсын пумаз вуэм калыкез олокызьы но зӥбыны туртто. Сазьтӥськонтӥосын ужасьёс тани алигес правительствое вазиськизы, отын "кӧлэмзы" понна янгыш муртъёслэсь уката тросгес коньдон кысконо, пе. Ми, пе, улӥськом отчы сюремъёслэн коньдонэнызы. Соин, лэся, асьмеос ӵемысь адӟиськом, пыд йылазы сылӥсьёссэ но милиционеръёс кунултыса сазьтӥськонтӥе нуо. Странамылэн оглань-талань шонаськемез пӧртэм со чыры-пырыос бордысь но адӟиське. Уг яра биньгозыез лябомытыны, ас пыдулдэ гинэ адӟыны. В. ЧЕРНОВ. ШӦКЫЧ А-ысен Я-озь Азьтэмлэн дэремез но висе. Алдаськыса кыдёке уд мын. Арезъя куарнянез. Байлы - ыжпи, куанерлы - нылпи. Бӧрдымтэ нунылы нонок уг сёто. Бусы адӟе, нюлэс кылэ. Вал но скал луиз. Вал сезьы доры ачиз мынэ. Ваньлэсь ваньзэ возьма, ӧвӧллэсь - ӧвӧлзэ. Верам кылэз уд ни берыкты. Визьтэм муртлэн законэз кияз. Вордӥськымтэ чуньы вылын ворттылэ. Дунтэм - гонтэм. Ӟечлэсь ӟечсэ возьма, аламалэсь - аламазэ. Кайгу ке утчаськод, аракы ю. Кожась валэз сюлоен жуго. Кӧжыез борддоре уд ляк. Котькыӵе но из сюресэз дагаям вал пыргытэ. Кылыныз Кам сьӧры поттоз. Кыл йылаз тузон уг пуксьы, пыд улаз пыӵ уг сюры. Кызлэн кускылиез кыз выжые усе. Кыл пумысь кыл потэ. Кузьым валлэсь пиньзэ уг усько. Лушкем ыж кутылӥсь пыны. Мактаськиз (лит. ушъяськиз) но саптаськиз. Муртлэн аламаезлы шум эн пот. Муртлэн скалэз но вал кадь адӟиське. Няньлэсь бадӟым мар вань?! Парез парзэ шӧдьтэ. Пушнер выжые пушнер потэ. Пинал даур - мак сяська. Сылалэн нянь пунэмтэм ӧвӧл. Тодэм нянь уг кур. Тазалык - байлык. Ужан дорын нянь ческыт. Ческыт ымез кӧш карын. Чидан чигымтэ. Чеберен ӵыпет уг ӵыпо. Шулдыр куазез тӧл сӧре, улон кусыпез - кыл. Юись муртлэн возьытэз базарын. Юртлэн шулдырез анай-атай вань ӵоже. Янгышен Багыш но кулэм. ШӦКЫЧ Кирень будэтӥсьёс Серемес верос Педор Кушманов Асанысь совхоз-техникумез йылпумъяз. Дораз агроном луыса берытскиз. Мумы-бубыосыз, гуртоосыз шумпотыса пумитазы: табере, пе, колхозмы эшшо одӥг визьмо адямиен узыргес луиз. Кушмановлэн ушъяськон сямыз вал. Соин мыньпотыса шуиз: "Эшъёс крестьянъёс! Музъем вылын ужась узыр улыны кулэ. Нош данэ потон вылысь, кушман будэтом. Ӝынызэ скалъёслы сюдом, йӧл кыскомы, вӧй вузаломы. Кылемзэ Америкае келялом, кушманмы понна долларъёсын тырозы. Та долларъёсын немец комбайн но Китайысь косилка басьтомы..." Быдэс тулыс ужгур чузъяськиз. "Гигантысь" колхозникъёс губырскыса кушман мерттӥзы. Быдэс гужемзэ уризы, нымы-кибыослэсь утизы. Но... тыршемзы токма луиз. Кидыс-а урод шедиз, агрономлэн быгатонлыкез-а ӧз тырмы, но кушманзы ӧз удалты, мыжык быдӟа ӧз буды. Кушмановлы возьыт луиз. Озьы ке но, ӧз гордэкты. Йыраз визьмо малпан лыктӥз. Ма, пе, куректыса улод, тани куштэм-аналтэм бусыосамы, бакчаосамы кирень кыӵе чебер будэ. Я, копалом ай. О-о, вот так удмурт кирень! Таӵе киренез ӟучлэн но, грузинлэн но, армянлэн но ӧвӧл. Айда чальгес октом, вагонъёсы интыялом, но чугун сюрес кузя Францие келялом. Французъёслы со туж яралоз, ведь кирень пиосмуртлэсь кужымзэ дас поллы будэтэ. Соку Франциын но, Удмуртиын сямен ик, тачак пиналъёс вордскозы. Кунгож сьӧрысь адямиос "Гигант" колхозмес данъялозы, быдэс дунне асьмеды тодоз. Ӟеч мылкыдын гуртоос кирень копаны потӥзы. Быдэс нунал ужало, нош ӝытазе асьсэды киренен сюкасен куноято. Дотово ческыт но курыт! Пиослэн но нылъёслэн мылкыдзы ӝутске. Я сеникысь, я мунчо дорысь, я льӧмпуос улысь чупаськисьёсты адӟод. Ма, пересьёс но егитомизы кожалод. Вот кыӵе паймымон бадӟым кужымез удмурт киреньлэн! Францие вуттытозь медаз шуя вылэм, та палъёс но мед шӧдозы киреньлэсь кужымзэ. Соку коньдонзэс уж жалялэ. "Гигант" колхоз франкъёс, долларъёс, маркаос пушкын уялоз. Нош Кушманов Педорлы чылкыт зарнилэсь памятник пуктозы, дыр... Киренёв Коля. "Гигант" колхоз. ШӦКЫЧ Россия берло нуналъёсы пӧрмиз кадь ини пуштытон интылы. Соин валче ик Удмуртиын но терроризмлы пумит штаб кылдытэмын. Юанъёсты кылдӥзы ке, жингыртэ 55-79-46, 55-79-48 телефонъёсъя. Милиционер: - Воргоронъёс, тӥледлы сыӵе план! Уен-нуналэн чаклаське, та юртэ одӥг шпана но медаз пыр, ява! Суредэз Л. Прозоровлэн. Терроризмен герӟаськем кышкыт учыръёсты алон вылысь, экономикая удысъёслэн (учреждениослэн) кивалтӥсьёссылы ТОДЭ ВАЙЫТОН И. Нырысь быдэстоно ужрадъёс 1. Экономикая удыслэн (учрежденилэн) кивалтӥсез объектлэн (учрежденилэн) вань интыосаз тодмотэм арбериосты эскеронъя нуналлы быдэ чакласькон радъяны кулэ. Эскерон ортчытэм бере, вань помещениос пытсасько но возьмаськись кие выжо. Объектлэн (учрежденилэн) вань помещениосызлэн усьтонъёсыз (кыкетӥосыз но) возисько объектэз возьмась киын. 2. Возьмаськонъя службалэсь ужзэ умойгес радъян но ужан интыосын эскеронэз умоятон вылысь, предприятиысь вань тыршисьёс асьсэлэсь арбериоссэс кельто нимысьтыз висъям интыосы. 3. Кышкытлыклэсь утиськонъя (возьмаськонъя) службалэн кивалтӥсез ужасьёсыз пӧлын инструктаж ортчытыны кулэ. Соос лыдэ мед басьтозы таӵе куронъёсты: - адӟо ке тодмотэм но ассэ валантэм возись муртэз; - шараяло ке тодмотэм но юнме лошъяськись арбериосты (бинетъёсты, коробкаосты, портфельёсты но мукетсэ); - тамак кыскон интыосысь, туалетъёсысь но мукет интыосысь ӵемгес эскерылоно кузётэм арбериосты. ИИ. Шимес уж (террор) лэсьтон дасяське шуыса ивор вуэм бере 1. Шимес уж (террор) дасяськем сярысь ивор басьтӥсьлы соку ик рос-прос тодыны тыршоно солэсь мугъёссэ - дырзэ, интызэ, быдэстон амалъёссэ, кузёоссэ но мукетсэ. Сыӵе ивор басьтыкузы вӧзады кин ке учырась луиз ке, жингыртыны куроно 02 телефонъя яке объектын ужась милиционерлы, соку одно ик ивортоно кыӵе номеро телефонъя вераськон мынэ. Вераськон йылпумъяськем бере, телефон трубкаез рычагаз пононо ӧвӧл. Вераськон вакытэ югдурез утёнъя органъёсын кусып тупатыны ӧз ке луы, отчы ивортыны тыршоно ӝегатскытэк. 2. Ивор басьтӥсь муртлы ӝегатскытэк вазиськоно югдурез утёнъя органъёсысь дежурнойлы но объектлэн (учрежеденилэн) кивалтӥсезлы. 3. Объектлэн (учрежденилэн) кивалтӥсез калыкез пырыны лэзьыны кулэ ӧвӧл объектлэн помещенияз но, РОВД-ын ужасьёслэн юрттэмзыя, калыкез отысь поттонэз радъяло. 4. Объектлэн (учрежденилэн) кивалтӥсез азьвыл ик мешокъёсы тырем тужгес кулэ документъёсты поттонэз радъя. 5. Нимысьтыз юнматэм адямиос документъёсын мешокъёсты азьвылгес дасям интые нуо (юртлэсь 50 метрлэсь палэнэ) но соосты возьмало. 6. Эвакуацияя ужъёсты йылпумъям бере, объектлэн (учрежденилэн) кивалтӥсез утиськонъя службаын тыршисьёсын объект бордын ужаны кутске. 7. МВД-ысь но МЧС-ысь специалистъёс вуэм бере, объектлэн (учрежденилэн) кивалтӥсез соослы, ужзэс быдэстон вылысь, котыр ласянь юрттэт сётонэз радъя. Россия Федерацилэн кун наградаосыныз пусъён сярысь Россия Федерацилэн Президентэзлэн указэз Музъем удысэз эскерон удысын вормонъёс басьтэмез но кема аръёс ӵоже сюлмысь ужамез понна "Россия Федерациысь музъем ужпумъёсъя дано ужась" сӥлы карон ним сётоно: Вычугжанин Виктор Ивановичлы - Удмурт Республикаысь Музъем узырлыкъёсъя но му кутонэз радъянъя кун комитетлэн кивалтӥсезлэн воштӥсезлы. *** Нюлэс хозяйство удысын вормонъёс басьтэмез но кема аръёс ӵоже сюлмысь ужамез понна "Россия Федерациысь дано лесник" сӥлы карон ним сётоно: Буераков Николай Яковлевичлы - Удмурт Республикаысь Нюлэсъёсъя управленилэн кивалтӥсезлы. *** Лэсьтӥськон удысын вормонъёс басьтэмез но кема аръёс ӵоже сюлмысь ужамез понна "Россия Федерациысь дано лэсьтӥськись" сӥлы карон ним сётоно: Питкевич Юрий Степановичлы - Удмурт Республикаысь Правительстволэн Тӧроезлэн нырысетӥ воштӥсезлы. Россия Федерацилэн Президентэз Борис Ельцин. Москва, Кремль, 1999 арын 3 сентябре. �1155. Валериян Исламгареев: "Верам кылы медам лу огшоры..." Валериян Исламгареевлы инкуазь котьмарзэ сётэм, шуыны луоз. Со учкымон, йӧно, етӥз... Нош инкуазьлэн тужгес бадӟым кузьымез - Валериянлэн куараез. 1993 арын Россиысь эстрадая артистъёслэн фестивалязы вормисе потыса басьтӥз круизэ билет. Вуылӥз Эстоние, Финляндие, Швецие, Швейцарие, Германие, Венгрие. Та арын ик кыкетӥ вормонэз вал - Удмурт кун университетысь журналистика ёзэтэ пыриз. Нош алигес таӵе ик фестивальын Валериян кыкетӥ интыез басьтӥз. Котькытчы вуттӥське со, улонзэ паськыт ӧръя. Дышетскем сяна, ужа А. Анкудиновлэн "Арганчи" театраз, "Ингур" радиоын меӵак эфирын нуэ программаос. Гороскопезъя - Эгызоос, соин но, дыр, одӥг интыын пукыны уг чида. Пумиськи мон соин "Ингурлэн" студияз. Ӵапак соку меӵак эфирын нуэ вал Г. Сабитовлэн кылъёсызъя гожтэм кырӟанъёсъя передача. Нош ужан часэз йылпумъяськем бере, мыным луонлык кылдӥз матысьгес тодматскыны вуоно журналистэн. - Валериян, кызьы тонэ сюрес вуттӥз "Ингуре"? - Мон дышетскисько вал кыкетӥ курсын, ӵапак соку кылӥ, удмурт телевидение диктор кулэ шуыса. Аслэсьтым кужымме эскерыны малпай. Кивалтӥсез соку Евгений Осипов вал. Со шуиз, тон, пе, ву 3-тӥ-4-тӥ курсозь соку кутом ини дикторе. Но улон воштӥськиз, со но отын уг ужа ини, али кивалтэ радиоын огъя программаез поттӥсь отделэн. Монэ ӧтизы радиое конкурсэ. "Ингурлы" кулэ вал передача нуисьёс. Тӥни со дырысен ужасько ни яратоно "Ингурын". - Тон понна мар со - радио? - Радио - мынам улонэ, кыкетӥ доре. Тани уже бырем бере но, луысал ини мынам кемалась кошкеме, но та юртлэн вань кыӵе ке но кужымез, бордаз кыскисез. Ӵукна султӥсько, чайнике быректытозь, йырам ужме бергатӥсько, суредасько ни. Куд-ог дыръя, малпаськонэ выйыса, чайме но юыны вунэтӥсько. Тани толон малпаськонъям уже тапочкиен кошкисько ни вылэм. Берытсконо луи. - Шуг-а ужаны меӵак эфирын? Жадиськод-а передачаосыд бере? - Ужед ке тунсыко, эфир бере шӧдӥське капчи жадён. Мылкыд капчи луэ лэсьтэм ужлэсь. Нош меӵак эфирын ужаны трослы капчигес потэ. Али монэ кыӵе ке передача гожтыны косӥзы ке, секытгес потоз ини. Меӵак эфирын тон вань кужымдэ, быгатонлыктэ сётӥськод, малы ке шуоно, ваньмыз туж ӟеч луыны кулэ, кыл лобӟиз ке, уд ни берыкты. - Кызьы передачаостэ аспӧртэмлыко карыны тыршиськод? - Радиоэфирам мон огазеясько пӧртэм радиоверанъёсты. Тани, кылсярысь, со луыны быгатэ Р. Куликовалэн "Вералэ - тодэм потэ" сузьетысь радиоверанэз, Н. Степанова аслаз "Чингылиосыныз" но мукетъёсыз. Мон, малпамея, трос тодыны кулэ удмурт литератураез, прозаез, поэзиез. Озьы ик тодэм-валам кулэ музыка удысысь но. Ваньмыз со юрттоз передачаосыз аспӧртэмлыко карыны. - Сценарий азьло ик дасяськод-а? - Быгатӥсько ке, одно ик. Вуоно передачалы быръёно кылбуръёс, кырӟанъёс. Тани кизён дыр ке - кизён сярысь, турнан ке - турнан сярысь, емыш вуэ ке - со сярысь. Трос дыр быре фонотекаын. Умой соиз, али компьютер юрттэ. Со ласянь али туж лякыт луиз ужаны. - Журналистъёс пӧлысь кинлэсь адӟем карыны тыршиськод? - Нырысь ик татчы уже лыктэме бере мыным анай-атай кадь луизы Милитина Васильевна Гаврилова-Решитько, Виктор Ивашкин, Алексей Омелин. Уката ик -Евгений Осипов. Со ушъяз ке но, туж шер. Тонэ, шуэ, кортнаса возёно. Нош Россиысь журналистъёс пӧлысь верасал Владимир Березинэз. Туж тау карисько инмарелы Валентина Леонтьеваен пумиськеме понна. Кельше на Ангелина Вовк - кышномурт кадь но, журналист кадь но. Москвае вуылыны мыным кылдӥз. "Останкиноысь", "РТР"-ысь, "Маякысь", "Ностальжиысь" журналистъёслэсь ужамзэс учкыны. - Нош эстрада? - Эстрада - улонэлэн кыкетӥ палыз. Но радиоын но, эстрадаын но трос огкадез. - Отын но, татын но, тон калыкен кусып тупатӥськод. Вань-а тынад "йыбыртъясьёсыд", "лулӟылӥсьёсыд"? - Трос жингыртыло. Но уг акыльтӥськы - шум гинэ потӥсько. Ушъяло, данъяло ке, эшшо ӟечгес ужам потэ. - Ваньмон дыръяд маин тунсыкъяськиськод? - Мынам ваньмон дыры уг луылы. Луэ ке но, туж шер. Яратӥсько эшъёсын ӵош вераськыса пукыны, сур юыны. - Аспӧртэм тынад нимыд но. - Вордӥськем бӧрсям Валериян Куйбышевлэн юбилеез вылэм. Тӥни озьы Валериян ним понӥллям. Школаын Валерик но, Ян но шуо вал. Нимы аслым кельше, со аспӧртэм, ас кадям ик, мон ачим но аспӧртэм адями, нимы кадь ик. - Самой бадӟым малпанэд? - Бадӟым малпанэ - дышетсконме йылпумъяны. Луэме потэ рос-прос журналист. Татьяна Федотова, Удмурт кун университетысь студентка. Дышетскон дунне Картлы бызёд, ужтэк кылёд Удмурт кун университет выль дышетскон арлы эшшо одӥг факультетлы йылӥз. Табере удмурт филологияя факультетысь журналистика ёзэтаз пырем студентъёс, дышетсконзэс йылпумъякузы журфакез быдтэмзы сярысь дипломъёс басьтозы. Таӵе воштӥськонъёс понна тау карыны кулэ туэ журналистика ёзэтэз йылпумъямъёслы. Соослэсь усто тодон-валанъёссэс лыдэ басьтыса, аттестацияя кун комиссия вераз ёзэт интые факультет усьтыны соглаш луэмзэ. Деканлэн Наталья Валерьевна Киреевалэн верамезъя, факультет кылдэмен, луонлыкъёс трослы паськытазы: куд-ог воштӥськонъёс луозы дышетон планын, тросгес саклык висъяськоз кунсьӧр кылъёслы, компьютерен ужанлы. Оскон кылдэ, студентъёс - журналистъёс табере куштэм писэйпиос сямен нискетыса уз ветлэ ни. Татчыозь соосты нокинлэн бурд улаз басьтэмез ӧз поты. Филологияя факультетлэн деканатаз журналистъёсты туж ик ӧз яратэ. Тӥляд асьтэлэн кузёды вань, ми номыре ум тодӥське шуылӥзы. Нош кивалтӥсьмылэн Александр Григорьевич Шкляевлэн дырыз но чиданэз но ваньмызлы ӧз тырмылы. Озьы, нокинлы кулэ луымтэзэс студентъёс ӵемысь гинэ шӧдылӥзы. Табере котькуд егит журналистлэн луонлыкез вань аслаз факультетэзлэн деканатаз пӧртэм ужпумъёсъя вазиськыны. Факультет кылдэмен туэ нырысьсэ заочной отделение усьтӥськиз. Татчы кутэмын дас сизьым адями. - Мон шумпотӥсько та группа понна, - шуиз журналистикая кафедралэн кивалтӥсез А.Г. Шкляев, - угось, та студентъёс пӧлысь ӝыныез журналистика удыс борды юн кырмиськемын ини. Уноез - ёрос газетъёсын ужасьёс. Нуназе ужась отделение туэ та вакытлы куамын куать дышетскись кутэмын. Но Александр Григорьевичлэн верамезъя, та лыдпус азьланяз эшшо но тросгес луыны быгатоз. Куамын куать студент пӧлысь ньыль-витез дышетскемез понна коньдон тыроз. Нош быдэсак факультет сярысь ке верано, дышетскон дунтэк. Кивалтӥсьёслэн верамзыя, та ужлы коньдонэн дышетыны уг яра. Журналист вузаськись луыны кулэ ӧвӧл. - Нош кӧня ке муртэ коньдонэн дышетыны басьтонэз умойтэмен лыдъяны уг яра, дыр, - шуэ Наталья Валерьевна. - Конкурсэз ортчымтэ адямилэн луонлыкез кылдэ на таӵе амалэн вылӥ образование басьтыны. Куамын куать - со ӧжыт ӧвӧл. Ватсалэ на та вӧзы заочной отделениысь дась сизьым адямиез. Азьло кутэм студентъёслэн лыдзы котькуд курсын кызь витьлэсь ӧжыт ӧвӧл. Таин сэрен юан кылдэ: кытчы интыяськозы журналистъёс университетэз йылпумъямзы бере? Вылаз ик, таӵе специальность сёто Восточно-европейской университетын но. Сомында адями быгатоз меда ассэ журналистикаын шедьтыны? Таӵе юанэлы Александр Григорьевич шуиз: - Мон уг кышкаськы, факультетмес быдтэм студентъёс азьланяз ужтэк кылёзы шуыса. Чакламе вань: журналистикая факультетъёсты йылпумъямъёс ваньзы та уже мынысалзы ке, регионъёсын таӵе специальностен адямиос кулэ но ӧй луысалзы. Но журналистъёс уг тырмо. Журфакез быдтыса, кык куиньмосэз уг ужало уго та удысын. Кышканэз ӧвӧл, соослы уж уз сюры шуыса. Журналистъёс басьто пӧртэм тодон-валанъёс. Соос интыяськыны быгато кивалтон уже, школаосы, пресс-службаосы... Жаляса верано луэ, асьмелэсь выль кылдэм факультетмес туннэ нуналлы универсальной шуыны уз на луы: ляб метариально-технической база, уг тырмы ас ужзэс ӟеч тодӥсь дышетӥсьёс. Студентъёслэн верамзыя, возьыт луэ факультет понна, лыдӟем лекциезъя ик дышетӥсь дышетскисьёсызлэн юанъёссылы валэктон сётыны уг быгаты ке. Но оскон кылдэ, югдур умой пала тупатскоз. Александр Григорьевичлэн верамезъя, матысь дыре тырмыт луозы усто квалификациен специалистъёс. Соосты дасян кутскемын ини, шуыны луоз, - туэ журналистика отделениез йылпумъям студентка Елена Попко дышетскоз Санкт-Петербург университетысь аспирантураын. Мукет выпускникъёс сярысь ке верано, кызь куать пӧлысь туннэ нуналлы дас куинез уже интыяськемын басьтэм специальностезъя. Уноез соос Иже кылемын. Таин сэрен юан кылдэ: кытын асьсэды шедьтӥзы гуртысь потэм егитъёс? Журналистын ужамед потэ ке, гуртэ берытскон сярысь малпанэз ӧвӧл ни угось. Нош городэ кыльыса, сю пӧртэм шуг- секытъёс султо егит адями азе. Нош тужгес сюлэмшугъськытӥсез - улон интылы ёрмон. Уката ик секыт йӧтэ семьяен адямилы. Удмурт нылъёс, ӟучъёсыныз ӵошатыса, уноез бызё студент дыръязы ик. Таин сэрен уже интыяськыны соослы секытгес. Гуртэ бызем адямилы шуггес луэ туала вакытэ городэ яке райцентрэ интыяськыны. Соин ик специальностьсыя уж шедьтыны соослы семья кусыпъёс но люкето. Тани таӵеен адӟиське журналистикая факультет туннэ нуналлы. Трос на отын тырмымтэос, сэрттымтэ-пертчымтэ ужпумъёс. Но оскем потэ, факультет усьтӥськемен, кутскем уж уз пашмы, арысь аре азинскоз. Кызьы мон валай, татысь кивалтӥсьёс, оско, быгатонлыкъёсыз, мылкыдыз вань ке, журналист ужтэк уз кыльы. Соослэн верамзыя али дырлы Ижын одӥг но ужтэк кылем журналист ӧвӧл. Мар бен, улыса адӟом ини, шуо вал таӵе дыръя пересьёс. Л. ПОСТНИКОВА, Удмурт кун университетысь студентка. Куинетӥез луоз Игра посёлокын азьланьтӥське кылем-мылемъёсты куян интыез лэсьтон. Та уж йылпумъяськыны кулэ 2000-тӥ арлэн нырысетӥ кварталаз, нош али та бордын выре проектъёсъя "Удмурткоммунпроект" институт. Ёрос администрация ужъёслы висъяз 215 сюрс манет. "Удмурткоммунпроект" Удмурт кун универститетысь учёнойёсын ӵош дунъет сёто лэсьтоно свалкалы, эскеро, инкуазьмес уз кырсёмыты-а шуыса. Собере Удмурт Республикаысь Инкуазез утёнъя кун комитетлэсь экологической экспертиза ортчоно луоз. Ваньмыз умой пӧрмиз ке, куяськон инты лэсьтон борды басьтӥськозы. Инкуазез утёнъя комитетын ужасьёслэн верамзыя, экология ласянь вань куронъёсыз лыдэ басьтыса, та выллем интыос лэсьтэмын ни Ижевск но Можга городъёсын. Н.Щеголева, Удмурт Республикаысь Инкуазез утёнъя кун комитетын ужась. ШУНДЫ "Кузьма аслыд улон" Тамак эн кыскы - тазалыктэ ыштод! Вина юид ке, тордосъёс пӧлы пырод! Наркотикъёсын йырдэ ыштод! Матысь кусыпъёс тупатыны дыртод - пыдыз сьӧлтаськоз! Алон вылысь алон. Нош чепыльтэ ик меда со пинал сюлэмъёсты? Тросэз кылымтэ-адӟымтэ улсы кылё, дыр. Соинтэк-а вань кырсез быдэ вуымтэос но егитъёс борды лякиське. Озьы ке но, пиналъёслэсь сюлэм чеберзэс вырӟытыны пӧртэм амалъёс утчано. Сыӵе ужпум сылэ республикаысьтымы Егитъёсын ужанъя кун комитет азьын но. Вуныны кутскем вакытысь ыркыт тӧл пельтӥз кадь "Кузьма аслыд улон" ӧтён улсын Играысь, Балезиноысь, Глазовысь, Ярысь егитъёс доры ширтӥсь агитпоездэн ӵош. Ижевскысь валтӥсь психологъёс, наркологъёс, егитъёсын ужась кун учреждениосысь но пӧртэм центръёсысь специалистъёс, пинал артистъёс (ваньмыз ньыльдон куинь мурт) нырысьсэ тазьы ваньзы ӵош люккаськизы шаермылэн уй пал сэрегаз улӥсь егитъёс доры асьсэлэсь тодон-валанъёссэс но быгатонлыкъёссэс вуттыны, сюлмысь вераськыны, мар но солы дышетыны. Ньыляз ик дугдылон интыын таза улонэз вӧлмытонъя пӧртэм ужрадъёс чакламын вал. Отын ик спорт шудон-ӵошатсконъёс, "котырес ӝӧк" сьӧрын пумиськонъёс, шудонъёс-тренингъёс, специалистъёсын кенешонъёс, шулдыръяськон ужрадъёс. Пӧрмиз-а бен чаклам ужрад? Жадемзы веськам бере, сюресчиос Ижевскын ини люкаськылӥзы малпанъёссэс но мылкыдъёссэс вераны. Ваньзы ик бурдъяськемын. Выльысь кытчы ке потоно луиз ке, пе, ог-огдэ ӟеч тодыса сюрес вылын но, ужрадъёс ортчытонын но капчигес луоз. Со сяна, нырысетӥ ужрад бере куд-ог шекъёс но шараяськизы. нырысь ик, кытчы ке потон азьын ӟеч-ӟеч радъяно рекламаез. Калык мед тодоз, кинъёс лыкто, кыӵе ужпумъёс эскеремын луозы. Озьытэк ваче кенешон уз пӧрмы. Озьы ик, пумиськон ортчытоно районъёсысь администрация, егитъёсын ужась вань службаос дась мед луозы таӵе ужрадэз ас доразы радъяны. Али озьы ӧзгес пӧрмы. Азязы пуктэм ужпумъёсты ваньмыз кулэезъя чаклаллямтэ, соин но, дыр, куд-ог пумиськонъёс ӧжыт калыкен ортчылӥзы. Тросэз пиналъёс ужрад сярысь тодӥлям сое ортчытон нуналэ гинэ. Пумиськонлы азьло ик дасяськытэк, кинлэсь лыктонзэ тодытэк юан-веранъёс специалитстъёс понна секытэнгес ортчизы. Агитпоездэн потамъёс мукетсэ но пусйизы. Таза улонэз валэктон уж нуиськом бере, пе, ёрос администрациосын огкылэ вуоно: ужрад ортчон нуналэ юон медаз вузаськы. Люкаськемъёс ваньзы ик соглаш луизы, Ижевсклэн палэназ потса, таӵе ужрадъёсты одно ик азьланьтоно, мед со луоз поездэн потан яке автобусъёсын. Пӧлазы кыскыны кулэ тодмо аритстъёсты, озьы ик косметологъёсты, модельеръёсты - сыӵе мылкыд каронъёссы улосъёсысь егитъёслэн. Бен, гуртысь пиналъёслэн но городъёс сямен шогольяськемзы потэ. Уй пал ёросъёсысь бускельёссылы таӵе шуд усиз шуыса, лымшоръёс табере вожъясько ни, пе. Асьсэ доры но Ижевскысь куноосты ӧтемзы потэ. Егитъёсын ужанъя кун комитетлэн кивалтӥсез Андрей Гальцин таӵе кичӧлтонъёс шоры умоен учке. Зэмзэ но, мылкыд луиз ке, ог-огед доры вуттӥськон амалъёс шедьтыны луоз ни. Ужрад ортчем бере Яр, Балезино, Игра район администрациосысь Егитъёсын ужанъя кун комитетэ тау каронъёсын но мылкыд каронъёсын гожтэмъёс вуизы. Л.Малых. Чидалоз-а семья выль ныпъетэз? Та нуналъёсы Кун Кенешлэн Наукая, дышетонъя, культурая но егитъёсын ужан политикая ялан ужась комиссиез кӧня ке ужпумъёсты сэрттӥз-пертчиз. Соос пӧлысь огез - нылпи сад понна дунъёсты будэтон. Ньыль ар талэсь азьло Кун Кенешлэн Президиумез но Удмурт Правительство нимысьтыз постановление кутӥзы вал. Соя одӥг пинал понна толэзяз пичи уждунлэсь 50 процентсэ тырыны тупатӥзы. Та лыдпус 42 манет вал. Дунъёс будэмен, Правительстволэн моӵез уз тырмы 42 манет но аслаз дуныз вискын пасез ялан кышъяса возьыны. Одӥг нылпиез толэзь ӵоже садикын возён али 350-400 манетлы усе, нош Ижевскын - 400-700. Одӥг нуналлы гинэ 43 манет кулэ. Ижысь мэрилэн куремезъя, Правительство 1995-тӥ арын кутэм постановление воштонъёс пыртыны чакла. Соя нылпи сад понна дун тырон вуоз 120 манетозь. Азьвыл ик валамон вал, депутатъёс таӵе ӵектонлы пумит луозы шуыса. Угось сое улонэ пыӵатӥзы ке, депутатъёслы калык азьын кыл кутоно луоз. Правительство но Ижлэн мэриез пӧртэм сямен валэктыны выро, али ужась постановление Россилэн законъёсызлы уг тупа шуыса. Та муген, пе, нылпи садъёс пытсаськозы. Россиын, шорлыдын вераса, одӥг пиналлы толэзяз 94 манет тыро. Тыронлэсь быдэсак мозмытэмын луозы сӧсыр нылпиос гинэ, нош нимысьтыз группаосы ветлӥсьёслы льготаос тупатозы. Ёрмыса улӥсь семьяослы но нимысьтыз дунъёс пуктозы. Кенешонэ люкаськемъёс ӵектӥзы нырысь ик нылпи пособиосты тыронэз быдтыны, собере гинэ та ужпумез ӝутыны. Вал на мукет ӵектон но: нылпи пособиосты пырак садъёсы сётъяны, нош анай-атайёслэсь дун басьтоно ӧвӧл. Депутат Валентин Кудинов кивалтӥсьёслы меӵак юан сётӥз: "Дунъёсты будэтыны турттыса, кинлы умой карыны малпаськоды: анай-атайёслы-а, городлы-а?" Кема вераськемзы бере, комиссия постановление воштонъёс пыртон бордын Правительствоез рос-прос малпаськыны косӥз на, депутатъёслэсь но ӵектонъёссэс лыдэ басьтыса. Секыт югдур. Татын Правительствоез но, депутатъёсты но валаны луэ. Нылпи садъёсты возьыны уксё уг тырмы. Садикъёс туж секыт югдуре сюремын. Анай-атайёслэн 42 манетэн тыремзы нокытчы йӧтытэк "гылӟе". Садъёс ворсаськон калэ вуэмын. Депутатъёс асьсэ куараенызы гинэ нылпи учреждениосын югдурез тупатыны уз быгатэ. Нош кызьы анай- атайёс выль ныпъетэз вормозы? Али гуртъёсын нылпи садъёсты ворсало, ужасьёсты кулэсто. Пиналъёс гуртазы пуко - номырин тырыны. Дунзэ будэтӥд ке, нылпиоссэс воксё но нуллэмысь дугдозы. Городын, оло, уз но - кытчы пырод, ужано, пиналэз кинэн ке но кельтоно ук. А. АНДРИЯНОВ. "Ческыт" кузьым Сарапулысь кондитерской фабрикаын пӧсь вакыт. Татын ужасьёс, гужем толэзьёсыз но вераса, куинь сменаен тыршо. Пӧртэм пумо ческыт сиён-юонъёсыз поттэм сяна, басьяськисьёс доры вуттоз на витаминооссэ но. Со пӧлын "Ягодка", "Снежинка" вафлиос но "Медовая" карамель, кудъёсыз узыр бетакаратинэн. Со сяна, пӧрамъёс пӧлын вылӥ дунъяське на "Сарапульский шоколадный" торт но "От всей души", "Милой, дорогой, любимой" шоколад конфетъёс. Пусйыны кулэ, фабрикаын туэ ар ӵоже гинэ 20 пумо ческыт сиён кылдытэмын но басьяськисьёс доры вуттэмын. Нош та вакытэ кондитеръёс Выль арлы дасясько ини. Асьсэлэн ческыт "ческыт" кузьыменызы нылпиосты шумпоттыны малпало. В. ПЕТРОВА. Шунды Пиналъёслы но егитъёслы "Шунды" бамез мукет нимын поттон сярысь лыдӟисьёслы ивортылӥм ни вал. Трос ӵектэм нимъёсты учкыса, дугдоно кариським "Дарт" вылэ. Азьланяз но паськыт инты висъялом шаерысьтымы егитъёслэн пӧртэм газеяськонъёссылы, удмурт егитъёслэн "Шунды" дэменлыксылы. "Шудтэм учыр палэнтэмын" Кызьы пуктэмын Удмурт Республикаын граждан обороная ужпумъёсты быдэсъян кышкыт учыръёсты алон но соосты палэнтон? Сое эскерон вылысь ик туэ октябре радъямын вал командно-штабной дышетскон. Ваньмыз со ортчиз зэмос кышкыт учыр дыръя кадь. Дышетскон ортчиз химической ож тӥрлык возён арсеналын. Соку ог-огенызы ӵош ужаны быгатэмзэс возьматӥзы Россия Федерациысь ФСБ-лэн Удмурт Республикая управлениез, Удмурт Республикаысь МВД, Россия Федерациысь Обороная министерстволэн частьёсыз, Граждан обороная но кышкыт учыръёслэсь утиськонъя министерстволэн частьёсыз. Ужпум пуктэмын: ма лэсьтоно химической ож тӥрлык возён арсеналын кышкыт учыр кылдыку калыкез но экономикая объектъёсты утён понна? Дышетскон кутскиз чаклам дыре. Дыр 1.00. Удмуртиысь граждан обороналэн кивалтӥсез оперативной ужпумъёсъя дежурнойлы кивалтон органъёсты ӝегатскытэк кышкыт учырлы дасяськыны косыса приказ сётӥз. Иворез ӝогак вӧлмытӥзы АСО-32 система, СЦВ (Стойка центрального вызова), соос интыяськемын республикаысьтымы кивалтонъя пунктын, озьы ик акциосын "УдмуртТелеком" огазеяськонлэн граждан обороная нимысьтыз телеграфез. 2 час 30 минутэ Кизнер поселок доры вырӟон сярысь приказ сётэмын. Марш умой радъямын вал. Укмыс часысен Кизнер вӧзын ужрадъёс азьланьтӥськизы. Татын службаослэн начальникъёссы, министерствоослэн но ведомствоослэн кивалтӥсьёссы шудтэм учырез палэнтон амалъёсты сэрттӥзы-пертчизы. Соку ик куд-ог службаослэн кивалтӥсьёссы Удмуртиысь граждан обороналэсь начальниксэ кылдэм югдурен тодматӥзы. Командно-штабной дышетсконлы йылпумъянъёс но дунъет лэсьтыкуз, Правительстволэн кивалтӥсез - Удмуртиысь Граждан обороналэн начальникез Н. А. Ганза - граждан обороная службаослэн дась луэмзылы умой дунъет сётӥз. Ӝог но быгатыса ужамзы пусъемын УФСБ-лэн, МВД-лэн, УГПС-лэн, Нюлэс удысъя министерстволэн. Озьыен, командно-штабной дышетскон азьланяз но пайда сётоз на. Со дыре ик дышетскон возьматӥз куд-ог тырмымтэосты. Табере соосты дыраз палэнтыны кулэ. Бӧрысь бер медаз луы вал. Ижевскысь Пинал лётчикъёслэн школазы туэлы курсантъёсты кутон сярысь ялэ. Отчы басьто 5-тӥ-10-тӥ классъёсын дышетскисьёсты. Школа интыяськемын "Вуж Юпитер" магазин дорын. Юалляськоно 75-75-01 телефонъя. Сак луэ Странаямы шимес ужъёсын (терроризмен) сэрен секыт югдур кылдэмен валче, Россиысь ФСБ-лэн Удмурт Республикая управленияз уно вазиськонъёс вуо нимысьтыз адямиослэсь, организациослэсь, иворъёсты вӧлмытон ёзъёслэсь. Сыӵе кышкытэсь учыръёс медаз луэ шуыса, Удмуртиын улӥсьёсты, промышленностья предприятиосты, транспортэз, улон- вылонын тужгес кулэ луись интыосты утён вылысь, туж кулэ ужрадъёс кутӥсько. Россия Федерациысь ФСБ-лэн Удмурт Республикая управлениысьтыз террорлы пумит комиссиезлэн, МВД-ен но правоосты утёнъя мукет органъёсын ӵош кутэм решенизыя бадӟым уж нуиське Удмуртие террористической гыжкалъёсты лэзёнтэм вылысь, республикаямы законэз тӥяса пыӵал тӥрлык но пуштытон арбериосты ваёнэз ӝегатон понна. Тужгес бадӟым саклык висъяське ислам экстремистъёс ласянь кышкатъян учыръёсты эскерон-утчан ужрадлы. Правоосты утён органъёс юн валче калыкен ӵош. ФСБ-лэн Управлениез Удмуртиысь калыклы вазиське асьсэды зӥбыт возьыны, терроризмен нюръяськонын правоосты утён органъёслы юрттыны, юн сак луыны. Умойтэм югдурен яке асьсэды валантэм возись адямиосын пумиськиды ке, жингыртыны куриськом ФСБ-лэн оскон телефонъёсызъя. Соос таӵеесь: 78-61-33 но 75-83-46.Телефонъёс уен-нуналэн ужало. РФ-ысь ФСБ-лэн Удмурт Республикая Управлениезлэн пресс-службаез. Кун Кенешлэн сессияз Ӝутоз-а "Евразия" экономикаез? Кун Кенешлэн ньылетӥ (азьвыл чакламтэ) сессиез кема ӧз кыстӥськы - одӥг нунал ӵоже йылпумъяськиз. Солэн ортчытоно мугез герӟаськемын вал Кун Думае быръёнъёсъя окружной комиссиослы адямиосты юнматонэн но республикамылэн 1999-тӥ арлы кутэм бюджетаз ватсанъёс пыртонэн. Быръёнъёс сярысь законэз чакласа, туэ 10-тӥ сентябре печатламын вал ини одӥг мандатэн округъёслэн гожъёссы. Табере Удмуртиын кылдытэмын Ижевск но Удмурт округъёс. Окружной комиссиосы ужаны юнматэмын 14 адями. Быръёнъя блокъёслэн но партиослэн дэмламзыя, ӝынызэ со пӧлысь ӵектэ Кун Кенеш, ӝынызэ - Правительство. Ӵектэм адямиослэн нимъёсынызы тодматӥз Кун лэсьтӥськонъя, национальной политикая но ас коже кивалтонъя комиссилэн кивалтӥсез Ж. Дворцова. Депутатъёс ӵектэм кандидатураосын соглаш луизы. "Удмурт кенешлэн" дэмламезъя, Удмурт округъя комиссие быръемын тодмо удмурт писатель Леонид Петрович Емельянов. Бюджет сярысь законэ ватсанъёс пыртон пумысен вераськиз Бюджетъя, налогъёсъя но коньдон ужпумъёсъя комиссилэн кивалтӥсез С. Широбокова. Депутатъёсты со туж куриз "Евразия" банклы 95 миллион манет кредит сётонэн соглаш кариськыны. Правительстволы оскиськыса, сомында кредит солы ӵектэ "АРКО" кун корпорация, кредитэз куинь ар ортчыса берыктон вылысь. Депутатъёсты оскытӥзы, сётэм кредит нырысь ик пайдаен берытскоз асьме экономика понна. Озьы-а со луоз, шуг вераны. Куд- ог депутатъёслэн малпамзыя, "Евразилы" сётэм кредит банклэсь ыштонъёссэ но пунэм тыронъёссэ ворсанэ гинэ, пе, кошкоз, нош кредитэз берыктон быдэсак усёз республикалэн бюджетэз вылэ. Соин ик, вылды, депутат С. Беркутов банклэсь директорзэ В. Богатырёвез вераны куриз, кыӵе югдур али "Евразия" банкын. Директор, лыдпусъёс вылэ чӧлскыса, вольыт вераськиз. Но депутатъёс шӧдытэк ӧз кыле солэсь таӵе верамзэ: 1995-тӥ арын, пе, югдурмы капчигес вал. Ӵапак та арын "Евразия" банклэсь коньдон ужпумъёссэ эскериз Центробанк. Нош 1996- тӥ арысен кутскыса, солэсь ужамзэ чакласа возе Удмурт Республикалысь Национальной банкез. Кык ар талэсь азьло "Евразия" банклы, югдурзэ тупатон понна, кредит висъямын вал. Кызьы берыктӥз со кредитэз "Евразия", депутатъёс пӧлысь нокин ӧз юа. Выль быръем депутатъёс со сярысь, оло, уг тодо, нош азьвылъёсыз, шӧдске, тодымтэ улэ аналско. Улыса адӟомы ини, кыӵе пайдаен сётэм кредит берытскоз асьме экономика понна. Нялтас вераломы на: 1999-тӥ арын УР-ысь Правительстволэн гарантиезъя тамында кредит висъямын: 2 миллион манет - пичи ужбергатонлы юрттон фондлы; 5 миллион - Ижевскысь радиозаводлы; 15 миллион - "Удмуртнефтепродукт" ОАО-лы; 1 миллион 58 сюрс манет - Удмурт таможнялы; 25 миллион - СБС-Агробанклы но 95 миллион манет - "Евразия" банклы. Сессия юнматӥз республикамылэн Вылӥ Судаз судьяосты но Ижевскысь Октябрь ёрос судлэсь председательзэ. Пӧртэм ужпумъёс пӧлын эскеремын вал депутатлэн Энвиль Касимовлэн Кун лэсьтӥськонъя, национальной политикая но ас коже кивалтонъя комиссие ужаны выжон сярысь куриськонэз но Петр Першинлэн гурт хозяйствоя но сиён-юонъя министре юнатэменызы валче депутатлэн ужысьтыз куштӥськон сярысь куриськонэз. Кун Кенешлэн депутатъёсыз шып кариськыса буре ваизы Буйнакскын, Москваын но Волгодонскын бырем адямиосты. Собере терроризм но соин нюръяськон амалъёс сярысь вераськиз Николай Ганза - Правительстволэн Тӧроез но терроризмен нюръяськонъя комиссилэн кивалтӥсез. Солэн верамезъя али лыдэ басьтэмын 89 объект, кудзэ пуштытон учыръёслэсь уката но чакласа возёно. Удмуртиын улӥсь нациос куспын керетонъёс ӧвӧл ке но, югдурез котыр ласянь эскерыса возёно, шуиз со. Николай Ганза депутатъёсты ӧтиз калык пӧлын кышкытлыклэсь утиськонъя валэктон уж нуыны. Азьвыл чакламтэ сессия ас ужзэ йылпумъяз. Т. БАННИКОВА. Ӝутско выль юртъёс Туннэ оскыны ик уг луы ни, куке но асьме странаын квартира яке улон корка дунтэк сётъяло вал шуыса. Вал ук озьы, вал. Табере ваньзэ манетэн дунъяло. Уксёед вань ке, коть куинь-ньыль этажъем юрт аслыд басьты. Озьы ке но, куд-ог интыосын социализмлэн "бервылъёсызлэсь" куштӥськыны уг дырто. Алигес ми вуылӥм нефть кысконъя "Арлеть" станцие. Со интыяськемын Селталы матын, но пыре Игра ёросэ. Предприятиын ужасьёс чакласа возё му вӧй гумыосты. Кулэ дыръяз - вошто-выльдо. Одӥг-ог ужатоно луо кужмо насосъёсты. Станциын ваньмыз умой радъямын. Со сярысь верало азбарын будӥсь турлы сяськаос но. "Арлетьлэн" кивалтӥсьёсыз Ижысь кузёосын ӵош (отчы интыяськемын нефтепроводъёсъя районной управление) котыр ласянь сюлмасько стациын ужасьёслэсь улонзэс умоятон сярысь. Магистральный посёлокын арлы быдэ сямен ӝутско выль улон юртъёс. Кылем арын вуттӥзы 16 квартираен кык коркаез. Туэ татын лэсьто куинь этажен юрт. Отын кызь сизьым квартира луоз. - Квартираосты дунтэк сётылӥськом, - вера станцилэн кивалтӥсез Александр Родыгин. - Али ужасьёсызлы но, пенсионеръёслы но висъяськом. Тазэ юртэз вуттыса, улон интылы ёрмисьёсмы уг кылё ни кадь. Нефтяникъёслы выль корка ӝуто Уваысь "Строитель" огазеяськонысь лэсьтӥськисьёс. Отысь мастерлэн Алексей Мерзляковлэн верамезъя, станция коньдон дыраз тыре бере, строительёс вань ужъёсты ӟеч но ӝог лэсьтыны тыршо. Татын али ужало дас ньыль каменщикъёс. Тямыс мурт юрт пушез чеберъя. Вань на куать плотник. Кӧня ке мурт корка вӧзысь сюресъёсты волятэ, бетон кисьтэ. Выль ар котырын станциын ужасьёс корка пыронзэс пусйыны чаклало. Ма бен, ойдолэ ӵош шумпотом соос понна! И. КРИЧЕВ. Александр Артемьев но Николай Сентебов вужмем гумыез эскеро. Магистральный посёлокын сюресъёс городынлэсь но ӵошкытэсь луозы. Туспуктэмъёсыз Г. ЮСАЕВЛЭН. Дас укмыс аресъем герой Верховной Советлэн Президиумезлэн 1943-тӥ арын 21-тӥ сентябре поттэм Указэзъя старшой сержантлы Вениамин Андреевич Сидоровлы бырем бераз Советской Союзлэн Героез ним сётэмын. Туэ 12-тӥ августэ солы 75 арес тырмысал. Изошурысь удмурт пимы пыраклы кылиз дас укмыс аресъем. Кез ёросысь пичи гинэ Изошур удмурт гуртын будэм но войнае ас мылкыд каремезъя мынэм егит пилэн ожмаськемез но данэ потэмез сярысь веранме кутско, сое Герой нимлы ӵектон бумага вылэ чӧлскыса. Наградной листысь чуръёс: "Сталинград. 12.01.1943 ар. Боевой порядок вылэ лыктэ тушмонлэн 18 танкез. Взвод тямыссэ танкез йӧттэ, соос пӧлысь ньылез орудийной расчётлэн лыдаз, наводчикез В. А. Сидоров. 19.03.1943 ар. Северной Донецын Прилипки гурт дорын тушмонлэн вить танкез но одӥг самоходной орудиез шур вамен потӥсьёс вылэ, переправамы вылэ урдӥськиз. Наводчик Сидоровлэн ыбылэмез улсын немецъёс чигназы, шур дуре куинь ӵындӥсь танксэс но изъянтэм самоходной орудизэс кельтыса. 6 июле, фрицъёслэн 1943-тӥ арын наступленизылэн нуналаз, Сидоровлэн расчётэз быдтӥз одӥг "тигрез" но кык пичигес танкез. 17 августэ асьме Горд Армия азьлань мынэ ни вал. Та нуналэ Качаловка дорын немецъёс 24 танксэс контратакае куштӥзы, азязы сылӥсь 3-тӥ батареялэсь боевой порядоксэ лёган-быдтон вылысь. Куспазы пыриз 4-тӥ батареяысь Сидоровлэн орудиез, тушмонлэсь атаказэ пазьгыны но бускельёсызлы юрттыны малпаз со. Шонер ыбылэмысь одӥгез танк гомӟиз. Кыкетӥез, орудиез адӟыса, шоразы ыбылыны кутскиз. Расчётысь боецъёс быризы, наводчик но сӧсыртэмын вал. Но орудилэн командирез но быгатӥсь- валась наводчик Сидоров луло на. Нырысетӥ снарядэн ик со дугдытӥз танкез, нош кыкетӥеныз пазьгиз сое. Озьы ик луиз куинетӥ танкен. Но ваче шуккиськем кужымъёс огкадь ӧй вал. Сӧсырмем но трос вирзэ кисьтэм Сидоров вылэ урдӥськиз ньылетӥез танк. Кужмыз лябӟемен, ожгарчилэн шонер ыбылэмез ӧз луы ни. Солэн ыстэм снарядэз танк бордысь чальтчиз, нош тушмонлэн снаряд пырыез йӧтӥз но стройысь поттӥз котыр ласянь адӟем карымон, кылзӥськись, Атай шаермылэсь эриксэ утись пиез. Кышкасьтэм ожгарчилэн боевой счётаз тушмонлэн 13 танкез". Советской Союзлэн Героез ним сётон сярысь бумага улэ гожтӥськизы Воронеж фронтлэн командующиез армиысь генерал Н. Ватутин но Военной Советлэн членэз генерал-лейтенант Н. Хрущев. Гитлеровецъёслэн командованизы, асьмелэн азьлань мынӥсь частьёсмылы пумит кужым люкаса, 11-тӥ августэ шуккет лэсьтӥз. Качаловка черкогурт азьын тушмонэз пумитаны дасяськизы 496-тӥ истребительно-противотанковой полкысь батареяос. Асьме шаерысь батыр пи быриз 17-тӥ августэ, вить нунал талэсь азьвыл гинэ солы дас укмыс арес тырмиз вал. Вордскем нуналзэ но со ожмаськыса ик ортчытӥз, оло, тодаз но ӧз вайы, ӟечкылась но сое ӧз луы. Удмурт пияшлэн орудийной расчётаз ожмаськизы наводчик Огырчи ёросысь бигер пи Миникаев, украинецъёс Шовкопляс но Петренко, Курск котырысь гуртъёсысь Светличный но Сидоров. Та берло ожын луло кылизы Шовкопляс но Петренко гинэ. Тани кызьы вераз Сидоровлэн расчётысьтыз рядовой Шовкопляс аслаз командирез сярысь (1943-тӥ арын 20-тӥ октябре та гожтэтэз поттэмын вал "Боевой натиск" газетын): "Сидоров герой кадь быриз. Уно солдатъёссэс но бронированной машинаоссэс гитлеровецъёс кельтӥзы ожмаськон бусые... Милям орудиосмы вылэ 24 танк лыктӥз. Соос вылын автоматчикъёс пуко. Кужымъёс огкадь ӧвӧл. Озьы но ми снарядъёсмы бырытозь ожмаськимы. Мон тодам ваисько Сидоровлэсь зӥбыт куараен ыбылыны сётэм командазэ. Куинь танкез быдтӥм соку. Та ожын бырыны шедиз милям командирмы. Со берпум шокчытозяз ожмаськиз. Сидоров быриз ке но, кылизы солэн будэтэм артиллеристъёсыз. Соос котьку дась фашистъёслэсь танкъёссэс пазьгыны". Батыр быре ке но, солэн данэз пырак азелы кыле,- верало калыкын. Вениамин Сидоровлэн вакчи но дано улонэз калыкмылэн сюлэмысьтыз уз вуны, солэн нимыз пыраклы пыроз шаермылэн историяз. В. ГОЛУБЕВ. Дас укмыс аресъем герой Вениамин Сидоров - туспуктэмез поттэмын 1943-тӥ арын августэ "Огонёк" журналын. Эшъёсынызы пумиськылӥзы 15-тӥ-17-тӥ сентябре Сарапулысь Быдӟым оже пыриськем ветеранъёс Москвае вуылӥзы. Дас муртлэсь кылдытэм делегациен валтӥз В. А. Усков, со городысь ветеранъёслэн кенешысьтызы оже ветлэмъёслэн секциенызы кивалтэ. Валамон ни, столицае вуылыны шуд усиз тужгес но "ӧрӟи" луись ветеранъёслы. Соос пӧлын П. П. Колесников, С. И. Наймушин, В. В. Беляев, Т. А. Железняк но мукетъёсыз. Москваын соос ветлӥзы Поклонной гурезе, Вооружённой Кужымъёслэн Музеязы. Ӵапак отын соос пумиськизы ӵош ожмаськем эшъёсынызы, полководецъёсын, маршалъёсын но генералъёсын. Та пумиськон радъямын вал, Быдӟым ожлы 55 ар тырмонлы сӥзьыса. В. НИКОЛАЕВА. ШУНДЫ Таза мугорын мылкыд но егит 1997-тӥ арын газетын мон гожъяй вал асьмелэн землякмы, дано невропатолог но психиатр Владимир Михайлович Бехтерев академик сярысь. Отын вераськон мынӥз солэн Сокольство огазеяськонэ пыриськемез сярысь. Дано землякмес пыраклы буре ваён понна, шаерамы выльысь улӟытоно вылэм сокольствоез, сыӵе мылкыд каронме верай вал со гожтэмам но. Кемалась ӧвӧл, Беларусьысь Егитъёсын ужанъя кун комитетысь басьтӥ гожтэт. Отын ивортэмын, 1995-тӥ арысен ини улосазы кылдытэмын Беларусьысь Соколъёслэн огазеяськонзы, азьвыл сокольстволэн куронъёсыз вылэ пыкъяськыса. Со ас котыраз огазея пӧртэм нациосысь быдэ вуымтэосты, егитъёсты, мӧйыосты. Котькудӥз огазеяськонэ пыре ас мылыд каремезъя. Азязы сылӥсь ужпумъёс: быдэ вуымтэослы но егитъёслы пыӵатоно адямиез, ас шаердэ гажан но яратон мылкыд, будэтоно соосты юн мылкыдо но таза мугоро. Огазеяськонэ пыриськем котькуд адями ассэ кыдатон но юнматон бордын мед ужалоз, адямиослы кулэлыко мед луоз; тодон-валанъёссэ но быгатонлыкъёсэ мед кутоз обществолэсь улонзэ азинтонэ; инкуазен эшъяськыны но пӧртэм шуг-секытъёсысь потыны мед дышетскоз. Кинлэн та огазеяськонэн матысь тодматскемез но адӟем каремез потэ, вазиськыны луоз таӵе адресъя: 220100, Минск город, а/я 112, "Белоруссиысь Соколъёслы" Л.Кривилев. ЖУРНАЛИСТЪЁСЫН ПУМИСЬКОНЪЁС Скал кыскись нӧкы шӧмез медаз вунэты Кылем арын пудо вордон удыс каньылак шокчиз вал: продукцизылы дунъёс будӥзы. Соин ӵош хозяйствоос огдырлы ке но уксё вылэ вуылӥзы, пунэмаськонъёссэс ӵоксаны быгатӥзы, калыклы уждун тыризы. Но гужем шорын эстӥськонлы шуак будэм дунъёс вань люкам коньдонзэс огкутскемен нюлыштӥзы. Соин валче гуртын тыршисьёс нош ик пилиськем тусь дуре кылизы. Йӧл-вӧй поттӥсьёслы, сӥль, нянь будэтӥсьёслы юрттон вылысь, Удмурт Правительство та нуналъёсы выль постановление кутӥз. Соин журналистъёсты тодматӥз Правительстволэн Тӧроезлэн экономикая воштӥсез Сергей Чикуров. Постановлениен чакламын ваньбур поттӥсьёс но переработка удыс куспын выль ужан амалэ выжыны, со понна 1 январёзь кутэмын луыны кулэ огъя куронъёслы тупась договоръёс. Кызьы со юрттоз гурт калыклы? С. В. Чикуров верамъя, переработкалэн поттэм табышезлэн ог люкетэз одно ик вуоз гуртын тыршись доры. Шуом, колхозысь йӧлэз тонназэ нуо ке 2 сюрс манетэн, нош магазинэ со вуэ ке, кык поллы дунояса - 4 сюрслэсь ятырен, та коньдонлэн 25-30 процентэз берытскыны кулэ колхоз кассае, ваньбур поттӥсьлы. Солэн со тыршемез, нюлам ву пызьырамез. Нош туннэ нуналозь нӧкылэн шукыез, жаляса верано, люкаське переработка удысэ, отчы ик пуксе. Правительство чакламъя, выль арысен югдур воштӥськыны кулэ. Бускель республикаос 3-4 ар талэсь азьло выль амалэ выжизы ини. - Нырысь эскером йӧллы дунъёс бордысен, отӥяз пумен выжом сӥль, ю-нянь, бакча сиёнъёс вылэ, - пусйиз Сергей Чикуров. - Ваньбур поттӥсь-будэтӥсь пайдаеныз ачиз мед кузёяськоз, палэнысь эскерытэк-чаклатэк. Вераны кулэ, куд-ог хозяйствоосмы та амалэ кемалась выжизы ни. Доразы переработкая цех усьтыса, соос вузкаро пакетъёсы тырем йӧлэн но вӧен. Нуналлы быдэ кассаязы улэп коньдон вуэ. Мон туннэ умоен пусйысал переработка удыслэсь огъя ужамзэ. Сое ӟеч возьматэ магазин ӝажыослэн узырмемзы. Учке ай, макем воштӥськиз йӧллэсь дасям продукция! Котькудӥз молокозавод тырше выль но выль сиён-юон поттыны, сое басьтӥсь доры вуттыны. Конкуренция та ласянь бадӟым. Со туж умой. Дунъёс сярысь ке верано, котькудӥз переработчик сюлмаське продукцизэ ӝоггес вузаны. Озьыен, дунъёсын шудон, соосты ӝутон бадӟым пайда уз вайы: калыкмы та вакытэ начар. Басьтӥсез уз луы. Правительстволэн гуртоос понна дурбасьтэмез валамон: скал кыскись но нӧкыен няньлэсь шӧмзэ мед веръялоз. Дэри коланэн но кыед зынын гинэ кӧтыз медаз тыр. Л. МЕДВЕДЕВА. ШУНДЫ Ӟырдыт сюлэмоос Сыӵе со Андрей Йӧспӧртэм та пияш. Ачиз востэм гинэ кадь, нош кытчы но уг вутскы. Андрей Клементьевез лыдӟисьёсмы гожъяськемезъя тодо, дыр - со газетамы аслэсьтыз ужъёссэ вуттылэ. Дышетске Андрей Удмурт кун университетын - удмурт кылъя но литературая дышетӥсь луыны малпа. Вот удалтоз кинлы ке! Тодӥськоды-а тӥ, Андрей Клементьевлэн вуоно дышетскисьёсыз, со туж но туж тунсыко адями шуыса? Со дыре ик туж огшоры. Кылсярысь, кыӵе туала пияшлэн мылыз потоз дунтэк дискотекаос, арнялы быдэ тунсыко ужрадъёс ортчытъяны? Сыӵезэ шедьтыны шуг, дыр. Нош Андрей, котькуд субботае Ижысь бертыса, Сундурысь клубын "Мылысь-кыдысь" нимо ужрад нуэ. Ачиз тунсыко куно ӧте, солы юанъёс сётъя, со дыре ик уг вунэты учкисьёсыз сярысь но. Ӟучомем сундуръёс Андрейлэсь тыршемзэ азьвыл серем карыны вырылӥзы: шедем, пе, удмурт культура понна висись! Ужрадзэ сӧрыны вырисьёс но шедьылӥзы, но пияш ӧз юскиськы, та ужез борды эшшо золгес басьтӥськиз. Нош огпол, шурдыт дискотека дыръя, кыӵе ке туж но туж туала кунгож крезьгурез дугдытыса, Андрей ас тодэмезъя пуктӥз Любовь Быковалэсь кассетазэ (пияш солы синтэм-пельтэм синмаськемын). Ди-джей урмиз. Нош егитъёс нырысь ӧз но валалэ кадь "мурт" кырӟан чузъяськемез. Но пумен эктэмъязы удмурт кылъёс валамонгес луизы: "Мон эркын тылобурдо..." Табере пумитъяськисьёс ӧвӧл ни, эсьма, асьсэос Быковаен ӵош кырӟаса экто. Люба тодэ "лулӟылӥсез" сярысь. Андрей уго солэн студияз но вуылэ. Нош мар дауртэ концертъёсаз! Пияш юнме гинэ пукон инты басьтэ, ачиз быдэс концертэз сцена дурын эктыса сылэ. Андрейлэн городысь эшъёсыз - ӟучъёс но бигеръёс. Но соос табере куд-ог удмуртъёслэсь ӟечгес тодо ни асьме туала культурамес. Со гинэ ӧвӧл, Андреен ӵош городысь удмурт нылпиослы дискотека яке мукет ужрад ортчытъяло. Туж ярато соосты О.К.Шиловалэн школаысьтыз нылпиос. Пияшъёс, кырӟан лэзьям сяна, висказ тунсыко шудонъёс, ӵошатсконъёс но ортчытъяло уго. Кылем арын Андрей малпаз университетысь ӟуч студентъёсты туала удмурт эстрадаен тодматыны. Дышетӥсьёс шуизы: уз лыктэ. Лыктӥзы ведь. Трос ӧз ке но, пияш ӧз юскиськы. Тӥни ук юаллясько, маин ке ӵошатыны выро, "нормально" шуо. Нош туэ гужем Сундуре вуылыкумы, Андрей нош паймытӥз. Клуб азьын сылӥсьёс тодмомы сярысь одӥг кылын веразы: мыло-кыдо. Тани, пе, пиналъёсыз каллен клубе люкасько ни. - Кыӵе пиналъёсыз? - Ма, со милям гужем лагерь радъяз. Школамы, зэмзэ ке, пиналъёс сярысь гужем чик уг сюлмаськы. Нош Андрей соосын пересьёс дортӥ вашкала сямъёс-йылолъёс сярысь но юаллляськыса ветлэ, концерт но дася, турын-куар но бича, урамъёсты но утлятэ... - Тӥляд гуртады пиналъёсты туж зӥбытэсь, дыр. Сотэк али кытысь адӟод на турын-куар бичасьёсты? - Милям Андреймы сыӵе. Нуназе котыр клуб доры пиналъёс люкаськыны кутскизы но, соослэн востэмзы сярысь малпамъёсы чаляк воштӥськизы: 10-12 аресъем пияшъёс киосынызы шонаса, йырзэс урдыса ветло, асьсэ куспын гинэ валамон сленген верасько. Кудзы ке тамак кенжытыны но ӧз возьдаське. Нош дӥсяськемын кыӵе: кунгож сьӧрысь тодмо но тодмотэм кырӟасьёслэн тусбуйёсынызы футболкаос, сьӧд джинс яке яркыт шорты, йыразы бандана - кышет. Городысь вуэмъёс шат шуыса малпай нырысь, но город урамысь но сыӵеоссэ синйылтыны ӵем уг кылды. Сундуръёс, пе, котьку но сыӵеесь вал - висъяськисесь. Соослы играос но вожъясько. - Кызьы тон соосын ужаськод? - юасько Андрейлэсь. - Котькызьы. Зэмзэ ке, шуг, но тунсыко. Шуом, к... ке шуизы, тон но шедьты пунэмзэ берыктон кыл. Но со пиналъёсты медаз лекомыты, тупаны мед юрттоз. Андрейлэн йӧспӧртэм луэмезлы пайме анаез но. Зэмзэ ке, ачиз шумпотэ кадь. Сотэк юрттысал-а пиезлы пиналъёсты концертэн нуон понна машина утчаны? Огполаз сьӧрло гуртэ атайзы но нуллӥз. - Пиналъёсты пӧлад карид бере, берга, - шуэ анаез. Пиналъёс нош асьсэос Андрей пала карисько. "Давай" шуыса кыскало, тани туннэ но репетицие люкаськизы. З.Вахрушева. Азьмынӥсьёс Зарни медаль - "Глазовская" водкалы Майлэн пумаз Лондонын ортчиз дуннеысь вина пӧзьтӥсьёслэн адӟытонзы. Отчы асьсэлэсь аракызэс ваизы уно странаос, кылсярысь, Австрия, Швейцария, Нидерланды, Россия но мукетъёсыз. Выставкаын возьматэмын вал вить сю пумо вина но 60 пумо водка. Берлоосыз пӧлын - Глазовысь ликёро-водочной заводлэн "Калашников", "Глазовская", "Шедевр Страдивари" водка, "Чепца" коктейль но "Иднакар" бальзам. Кыӵе мылкыдын бен Лондонэ мынӥз ЛВЗ-ысь валтӥсь технолог Галина Поздеева? Кӧня ке осконэз вал "Калашников" водкалы. Малы ке шуоно, сое туж ӝог яратӥзы Москваысь, Глазовысь, Ижевскысь но Удмуртиысь улӥсьёс. Завод та аракыез ньылетӥ арзэ пӧзьтэ ни. Со дыр ӵоже "Калашников" вал ни дуннеысь но Россиысь данак выставкаосын. Солы сётэмын куинь зарни, ньыль азвесь но одӥг бронза медаль. Табере соин артэ султэ мукетыз водка - "Глазовская". Лондонысь выставкаын продукцизэ возьматӥз Москваысь "Кристалл" тодмо ликёро- водочной завод. Солэн аракыез 30-лэсь уно странае кошке. Но таяз выставкаын москвичъёс одӥг награда но ӧз басьтэ, буш бертӥзы. Нош Галина Васильевна Поздеевалэн шумпотонэз кылын верантэм вал. "Глазовская" водкалы валтӥсь приз - зарни медаль сётэмын, "Калашников" дипломен пусъемын. Зэм, Глазовысь ликёро-водочной заводын кемалась дырысен ӟеч вина пӧзьтыны быгато. Заводлы вуоно арын 100 ар тырмоз. Соин ик солэн продукциез революцилэсь азьло ик Россиын тодмо но данъяське вал ни. Али завод - туала ӟеч оборудованиен предприятие, вина лэзья куинь автоматической линиен, вуэз чылкытато мембранной установкаен. Тужгес но усто ужа ЛВЗ-ысь производственно-технологической лаборатория. Со туала эскерон приборъёсын узырмытэмын. Глазовысь вина пӧзьтӥсьёс вашкала амалъёсты но уг вунэто. Озьы усто пӧрме водказы но, ликёрзы но. Уже куто ю тысьлэсь пӧзьтэм спиртэз гинэ. Али сое басьто Башкортостанысь, Орёл но Пенза областьёсысь. Нош туэ куинетӥ кварталэ ЛВЗ-лэн аслаз спритзаводэз ужаны ӧдъялоз. Со Балезиноын лэсьтӥське, оборудованизэ инъяло ни. Озьы уката ӟечгес продукция поттыны кутскозы. Берло дыре завод 70 пумо водка но вина пӧзьтэ. Сое умой басьто Ижевскысь фирменной магазинъёсысьтыз. Шоркарын гинэ усьтэмын ни 7 вузкарон интыез, нош ваньмыз - 30-лэсь уно. Глазовысь ЛВЗ-лэсь продукцизэ калык ӟеч тодэ. Тани валля арын сӥзьыл дуннеысь выставкаын зарни медаль басьтӥз "Иднакар" бальзам, "Калашников", "Фельдъегерская", "Глазовская" водка но Золотой ярлык" вина азвесь медален пусъемын, нош "Золотая корона" водка но "Журавушка" вина - бронза медален. ЛВЗ-лэн продукциез, кылсярысь, "Калашников" водка вузаське Америкаын, Австриын, Новой Зеландиын, Западын но мукет странаосын. Нош шоркарысь Ленин нимо урамысь (Техника юрт вадьсысь) магазиназ калык шумпотыса пыре. Басьяськисьёсты шуныт пумитало Самойтус Наталья но Костромин Александр. Кивалтӥсез Петр Вершинин вань ужъёсты быгатыса радъяз. Вузкарон интыез ӟоскыт ке но, адямиос асьсэлы кулэ юон шедьто. Ӝажыос уно пумо винаосын но водкаен тырмытэмын. Михаил Калашников быдэс дуннез паймытӥз усто автоматэныз, табере Удмуртилэсь данзэ ӝутэ "Калашников", "Глазовская" но мукет водка. Нош со ваньмыз пӧзьтэмын Глазовысь заводын. Туэ со "Чепца" нимо сур но пӧзьтэ ни. Посудаез но йӧспӧртэм, фирменной, мукет заводъёслэсь висъяське. Огъя вераса, Глазовысь вина пӧзьтӥсьёсты ӟечкыласьком бадӟым вормонэн. Ведь "Глазовская" водка табере дуннеысь самой устоез курыт юонэн лыдъямын. Г.РОМАНОВ. Вузкарись Наталья Самойтус. Туспуктэмез В.КАМАШЕВЛЭН. Ялӥськом конкурс! Ӟечбур, выль даур! Ваньдэс, ваньдэс, ваньдэс: фотоужен тунсыкъяськись пиналъёсты но егитъёсты , мӧйыосты но пересьёсты ӧтӥськом выль конкурсамы пыриськыны. Кыӵеен адӟиськоды тӥ выль дауре выжонэз, мар возьмаськоды вуоно вакытлэсь, кыӵе ӟеч сямъёсты кутсалды сьӧрады, кыӵеоссэ кельтысалды 2000 пус сьӧры. Тӥляд ужъёсты шулдыртысалзы та баммес, быдэс газетмес. Оло, нош ӵапак, тынад туспуктэмед лыдӟись эше, усьтоз выль даурысь нырысетӥ номермес. Пӧртэм амалэн лэсьтэм сьӧд-тӧдьыё яке турлы буёло туспуктэмъёстэс возьмаськом нуналлы быдэ - Выль даурозь! Устоосыз ужъёс поталозы газет бамамы синпель кузьымъёсын но коньдон премиен пусъемын луозы. Политика Р. Абдулатипов: "Эрикез гольык нылэн ӵошатысал" Россиысь журналистъёслэн Ижевскын ортчем ИВ фестивалязы вуылӥз Рамазан Абдулатипов. Шаерамы улӥсь калыкъёслэсь кусыпъёссэс со ӟеч тодэ - одӥг пол гинэ татчы ӧз вуылы. Удмуртилэсь национальной политикая концепцизэ дасяку, солэн но куд- ог ӵектонъёсыз лыдэ басьтэмын вал. Берло ветлэмаз Р. Абдулатипов пумиськылӥз Удмурт кун университетысь студентъёсын, преподавательёсын но журналистъёсын. Кин бен со Рамазан Гаджимуратович Абдулатипов? Нырысь ик Дагестанлэн огез визьмо пиез. Со - философи наукаосъя доктор, профессор, Россия Федерацилэн огез министрез, Россиысь калыкъёслэн ассамблеязылэн президентэз. Та адямилэн вераськемез котьку но йыре-сюлме кыле. Вольыт кылзэ, мур ӵошатонъёссэ, одӥг пол кылыса, ноку уд ни вунэтӥськы. Россиын туннэ 200 пала пӧртэм калык улэ. Кӧня калык - сомында ик улон шоры учкон. Тани кызьы дунъя асьме улонэз но политикаез ичи лыдъем калыклэн огез пиез Рамазан Абдулатипов. - Мар верасалды Дагестанын но Чечняын югдур сярысь? - 1992 арысен Россилэн кивалтӥсьёсызлы 27 гожтэт ыстӥ Дагестанын югдурез тупатон, отын бандитъёсын нюръяськон сярысь. Нокин со дэмланъёсты лыдэ ӧз басьты. Ожмаськонозь вуим. Дагестанлэн пичи ужпумез Россилэн сюлэмшугъяськытӥсь югдурезлы пӧрмиз. Чечняен каллен-каллен нуналлы быдэ ужано вал. Но озьы ӧз луы. Россия но Чечня гожтэм огкылзэс ӧз быдэстэ, нош Масхадовлы югдурез тупатыны юрттоно вал. Табере учке ай: Масхадов, совето вакытысь офицер, ымныр туссэ ик воштӥз. Бандитъёс сямен тушен ветлэ. - Мар возьма Карачаево-Черкессиез? - Отын ваньмыз умой радъяськоз. Угось дауръёсын ӵош улӥсь калыкъёслэсь музъемзэс кыӵе ке гожъёсын люкыны нокинлы ӧз удалтылы на. Йырсазьзэ ыштэм адями гинэ национальной округъёсты быдтыны дауртэ. Одӥг калыкез но уг яра пичи калыкен лыдъяны, зӥбыса возьыны. Карачаево-Черкессиын югдур тупатскоз шуисько ке но, паймисько отысь нылкышноослы: малы соос, югдурез уката но лэчытомыса, лумбыт правительстволэн юртэз азьын сыло. Озьы ожмаськонэз но пуромытыны капчи. Нош кытын меда воргоронъёссы? - Мар малпаськоды туала пресса сярысь? - Ваньмыз со вузаськемын. Соин ик калыклы зэмлыкез веран понна амалъёс утчано. - Тӥ сямен мар со сыӵе демократия но эрик (свобода)? - Демократия - со эриклэн огпалыз. Озьы но луыны быгатэ: вань демократия но ӧвӧл эрик яке вань эрик но ӧвӧл демократия. Эрикез мон чебер гольык нылэн ӵошатысал. Сыӵе ныл шоры котькуд адями пӧртэм сямен учке: огез, чеберезлы паймыса, ки вылаз нуллыны дась, мукетыз - сантэманы. Озьы ик каро эрик понна нюръяськись адямиен но. - Кыӵе партилы тӥ али дурбасьтӥськоды? - Ваньмыз сыӵе юан сёто: огнад улыса, Россиын вамыш но уд ни лэсьты. Соку ик юало: "Кинлы, кыӵе партилы дурбасьтӥськод?" Сыӵе амалъя ик Дума но люкемын: вань фракциослэн лидеръёссы но соослэн ляльчиоссы (рабъёссы), куд-ог депутатъёслы вераськыны кыл но уг сёто, малы ке шуоно, соос - ляльчиос. Ас поннам ваньзэ шедьтӥ кадь, но ӧй шедьты на аслым кельшись партия. Но куд-ог адямиос монэ пыртӥллям Россиысь ужасьёслэн социалистической партиязы. Ярам ни-а, мар-а, кытын ке но луоно ук. - Кыӵе общество лэсьтӥське Россиын? - Россия вакчи дыр ӵоже выжиз вал социализме. Озьы ик вакчи дыр куспын (10 ар - со туж ӧжыт) Россия табере выжиз социализмысь капитализме. Горбачевлэсь пометиназэ мон ӵошатӥсько чабанлэн быгатытэк сыр лэсьтэменыз. Йӧл суретэз пукетыны люкетыку киын сураку, сыр уг пӧрмы - пырдэ. Озьы ик лэсьтӥз Горбачев но, азьвыл улонмес дырызлэсь вазь киыныз сураз-пожаз но выль улонэз лякыны ӧз быгаты? Та пумиськонын одӥг студент тумошо юан сётӥз: кин, пе, УдГУ-лы ректор луыны кулэ. Та юанлы оло валэктон но сётыны кулэ ӧй вал. Но Рамазан Абдулатипов, чик но серекъятэк тазьы шуиз: - УдГУ-эн кивалтыны кулэ тужгес но визьмо... японец. А мар паймонэз?! Вашкала аръёсы Россиен но кивалтылӥзы ук палэнысь ӧтьылэм визьмо князъёс. Россия ачиз соосты утчалляз. Оло соин но али Россиын сокем огыр-бугыр - уг тырмо визьмо кивалтӥсьёсмы? Зэмос визьлэн наци тодметъёсыз ӧвӧл, дыр. Визь со визь ини. Т. БАННИКОВА. Шунды Кӧня сылэ студент? Дунъёс весь будо но будо, сур ялан дуноя, нош сотэк но куанер студентлэсь стипендизэ нокин будэтыны уг малпа, лэся. "3"-лы дышетскись егитъёс самой со стипендиез чебер уйвӧтъёсазы гинэ адӟо. Та ласянь удалтӥз, шуыны луоз, Гурт удысъя академилы гинэ - татын "куиньчиослы" но ӧжытак коньдон висъяло. Валамон ини, стипендиед вылын кыдёке уд вуы. Нош кытысь уксё шедьтэ студент? Та юанэн вазиськи асьсэлы дышетскисьёслы. Лена, Удмурт кун университет: - Школаын немец кылъя дышетӥсько. Трос ик уг тыро (кӧнязэ уг вера - серекъялоды): вылӥ образование ӧвӧл на, ма, собере часъёсы но ӧжыт - арняяз 14 час. Дышетскыны но вуттоно ук. Нош кызьы интыяськи татчы? Газетысь ялонъя жингыртӥ но, кутӥзы. Со школа соку дышетӥсьлы туж ёрме вылэм кадь, мукет нуналаз ик урок нуыны косӥзы, эшшо ке 10- тӥ классъёсын. Нырысьсэ туж кышкаса мынӥ: тодон-валанэ тырмыт ӧвӧл (мон пичиосты гинэ дышетыны ӧдъясько вал), ӝыт куспын рос-прос дасяськыса но ӧй вуы, собере мон туж возьдаськись. Но али дыши ни. Кемагес уг адӟиськы ке, пиналъёсылэсь мӧзмисько. Кык егит пиос (нимзэс ӧз шараялэ), Гурт удысъя академия: - А, мылкыд гинэ мед луоз, аракылы котьку коньдон сюре. Ум ужаське нокытын но. Ну, милесьтым но азьтэмъёсызлы студентъёслы одӥг-ог курсовойёс гожъяськомы. Калым нимаське со. Тыршеммы юонлы ке но тырме. Ирина, Удмурт кун университет: - Мон арлы быдэ гужем нылпи лагерьын ужасько. Кельше мыным пичиосын вырыны. Коньдон сяна, быдэс арлы кужым басьтӥсько кадь татын. Виталий, Ижысь технической университет: - Куддыр, мылкыд вань дыръя, заочно дышетскись эшъёсылы, эшъёсылэн тодмооссылы "вышкаен" (высшой математикаен) контрольнойёс лэсьтӥсько. Ужаме понна трос уг басьтӥськы, ог 50-100 манет - учкисько контрольнойлэн быдӟалаез шоры. Ушъяськымон трос коньдон ӧвӧл ке но, малы но солы тырме. Надя, Медакадемия: - Мон медучилищеез быдтэмын. Али огдыре дышетскисько но, больницаын медсестраын но ужасько. Ужасько уин. Секыт, лекциосын вӧтъёс адӟоно луэ. Сергей, Гурт удысъя академия: - Возьмаськисьын ужасько, нылпи юртэз утисько. Уждунэ 300 манет котыр. Я бадӟымато, я пичиято - уг валаськы малы. Туж ик валаны но уг турттӥськы. Света, Удмурт кун университет: - Ужасал, но уж уг шедьы. Ялонъёсты куддыр учкылӥсько, котькытын пиослы уж ӵекто: я шофёр, я электрик... Нылъёслы та ласянь секытгес. Ма, собере анай-атае но ужаны уг лэзё. Дышетыкумы, пе, дышетскы. Нош мынам асме шедьтэме потэ. Наташа, Удмурт кун университет: - Азьло репетитор луыса тыршисько вал. Пичиосты англи кыллы дышетылӥ. Али та уже куспетӥ луиз. Кемаласьгес вал ни со, али дунъёсты вераны шугъяськисько, но мон часлы 25-30 манет басьтӥсько вал. Утчась мурт одно ик шедьтэ, шуо. Озьы ик, дыр, со. - Ӧжытак шӧртчигес кариськиськод ке, ваньмыз пӧрме,- вера тодмое Таня.- Лул вылазы султоно. Мон кылем арын "Мир фото" лавкаын вузчиын ужай. Кутэмзы уг поты вал, но мон бызьылӥ, быгатӥ интыяськыны. Ачид ӧд утчаськы ке, нокин но тыныд тэркы вылын уж вайыса уз сёты. Зэмзэ но, уноез студентъёс возьмало, уж ачиз соосыз шедьтоз шуыса. Тросэз соос уло, кызьы шуиз вал одӥгез эше, ПМК чотын. Ӟуч кылын сое тазьы валано: пока мама кормит. Нош кӧня коньдон быдто меда анай-атайёс дышетскисьёссылы? Асьсэос студентъёс верамъя, соослы дорысьтызы толэзяз ог 300 манет лэзьяло. Ваньмыз та уксё кошке сиён- юонлы (сиён-юонэ столовойын кӧтэз тырон уг пыры), чыры-пыры вузъёслы но общагаысь улон комната понна тыронлы. Кин ке та лыдпуслэсь тросгес быдтэ, куд-огез, шыръяны быгатӥсез, кӧня ке ӧжытгес. Коньдон сяна, гуртысь лэзьяло на сӥль-вӧй, картофка но мукет бакча сиёнъёс. Бадӟым вузъёс басьяны (кылсярысь, дӥськут, дуно книгаос) анай- атайёс нимысьтыз коньдон дасяны кулэ - арлы ог 1500 манетлэсь тросгес. Пиналзэс огъяулонтӥе лэземзы уг поты ке (Удмурт кун университетын общага понна толэзяз али 9 манет 60 копейка тыро, мукет вылӥ дышетсконтӥосын но тамындагес ик), анай-атайёс квартира яке комната утчано луо. Одӥг комната али 100-200 манет сылэ, одӥг комнатаем квартира - 300 манет пала. Ма бен, табере чоталэ, кӧня сылэ туала студент. Нош милесьтым арлыдоослэн верамзыя, студент дыръязы стипендия соос басьто вылэм 40 манет котыр. Грузчикын яке мукет интыын ӧжытак ужаса, та коньдон улыны но, дуннеез адӟыны но тырме вылэм. Али студентъёслы со осконтэм выжыкыл кадь потэ. Улон нуналысь нуналэ дуноя. Нош куанер студентъёс сярысь сюлмаськон, соослэсь анай-атайёссэс сяна, нокинэ но уг шугъяськыты, лэся. Вань студентъёслэн нимынызы тау шуэме потэ соослы, милемыз сюдӥсь-вордӥсьёслы. Бадӟым тау тӥледлы, анайёсмы- атайёсмы! Лена КИТОВА. СПОРТ Сибирьысь 3 очкоен бертӥз "Газовик" команда. Удмуртиысь футболистъёс кепыратэк шудӥзы но 2:0 лыдын вормизы Тюменьысь спортсменъёсты. Голъёсты пыртӥзы Курилов но Федотов. Томскын но "Газовик" пумиськонзэ ӟырдыт мытӥз. Но Ижысь футболистъёс мултэс пӧсекъязы-керӟегъяськизы но гол пыртэмзы ӧз луы. Нош асьсэлэн капкаязы туп куинь пол пыраз (одӥгез пенальтиысен). Али азьпалан мынэ Воронежысь "Факел". Солэн 68 очкоез, 5 очколы ӧжытгес Калининградысь "Балтикалэн". Махачкалаысь "Анжилэн" - 59 очкоез. Та командаос ик нюръяськозы кык путёвка понна. Вылӥ лигае шедьыны мукетъёсызлэн луонлыкъёссы ӧжытгес. Чемпионат йылпумъяськытозь, "Газовик" 9 пол пумиськоз на. 55 очкоен куатетӥ интыын мынэ. Вуоно шудонъёссэ асьме команда дораз ортчытэ. Нош 12-тӥ октябре Россиысь Кубоклэн 1/16 люкетаз "Газовик" кужымзэ мерталоз Санкт-Петербургысь вылӥ лигаын шудӥсь "Зенитэн". Пумиськон ортчоз Ижысь Центральной стадионын. М. КУЗЬМИН. ЛЫДӞИСЬ ГОЖТЭ Выльысь поттоно Та книга поттэмын Ижын 1996-тӥ арын удмурт, ӟуч но англи кылъёсын. Туж чебер, турлы буёло фотосуредъёсын со. Книгалэн нимыз таӵе: "Ми - удмуртъёс. Ӟечесь-а?" Дасям но поттэм сое удмурт тодосчи Владимир Емельянович Владыкин, Омель Лади. Одӥг пумиськонам мон ог вить таӵе книга басьтӥ. Малы сомында? Выль адямиен тодматӥськем бере, солы кузьман вылысь. Кинлэн лыдӟемез потэ, мед лыдӟоз. Туж шумпотысал, Удмурт Элькунысь Культурая министерство поттысал ке та выллем мукет книгаос. Отын мед луысал Удмуртилэн геокартаез, мед луысалзы пӧртэм ёросъёсысь удмуртъёслэн вашкала нылкышно но пиосмурт дӥськутъёссы. Озьы ик - удмурт тодосчиос, артистъёс, бусыын но заводын тыршисьёс сярысь иворъёс. Сыӵе луонлык вань ке, та книгаяз но выльысь поттыны кулэ вылэм. Н. ЯКОВЛЕВ. Асьмелы но асэстоно Кинъёс тросгес асьме кунын: удмуртъёс-а, чиганъёс-а? Чиганъёс, шуоды, дыр. Ӧвӧл. Удмуртъёс тросгес. 1989-тӥ арын асьмеос 747 сюрс мурт вал ке, чиганъёс - 262 сюрс. Озьы ке но, чиганэз тодӥсьтэм мурт ӧвӧл Каръёсын но, гуртъёсын но. Москваын чиган театр но вань. Чиган кырӟанъёс радио пыр но ӵем чузъясько. Автобусэ, трамвае кык кузя пыро ке, соку ик валало сюресчиос, чиганъёс пуксизы шуыса. Нокинлэсь кепыр вайытэк, соос шара верасько асьсэ кылын, мукет куараосыз зӥбо. Кин ке одӥг чиганэз кызьы ке (кылын-а, киын-а) вӧсь кариз ке, соку ик соос со адямилы пумит султозы. Чиганъёс валче уло, ог-огзылы котьку юртто. Соослэсь куд-ог йылолъёссэс асьмелы но асэстыны кулэ ӧвӧл меда? Н. ЯКОВЛЕВ. Туп интые сюй люкез уд ӵыжа Кытын будо чемпионъёс О-о, тодам ваисько ке школаын субботалы быдэ ортчылӥсь линейкаосты, соку ик син азе пуксе, кызьы физкультураен дышетӥсьмы "та-ак" шуыса лыдӟыны кутске ӵуказе районысь ӵошатсконъёсы мынӥсь спортсменъёслэсь нимъёссэс. Мон кадьёс сыӵе шӧртчиос шоры вожъяськыса учкылӥзы. Уката ик вуоно субботаяз соослы грамота сётъякузы. Али школаосын сыӵе вакытъёс шергес луо ни. Гуртысь администрациос сярысь веранэз ӧвӧл. Шӧртчиос ӧз кулэсме, кулэсмиз соослы саклык. Тани Селта ёрос администрациысь спорт удысэн валтӥсь специалист Владимир Германович Соловьев верамъя, районын спорт аналтэмын шуыны луоз. Коньдонтэк али нокинлэн но ужамез уг поты уго. Ма, собере районэ ӵошатсконъёсы нуыны гинэ я машина, я бензин уг сюры. Школаын дышетскисьёслэн мылкыдзы бадӟым, кужымзы тросгес бере, озьы но тазьы ӵошатсконъёсы вуо ик. Нош гурт администрациос пӧлысь, Монья, Гопгурт, Югдон, Сюромошур, Комсур сяна, пыриськисьёсыз уг луо. Ӧй ке луысалзы пӧлазы Анна Возисова, Аркадий Бабошин кадьёс, калык кемалась вунэтысал ни, дыр, районын ортчылӥсь спартакиадаос сярысь. Таӵе адямиос, асьсэос спортэн вырем сяна, сьӧразы мукетъёссэ но кыско, пиналъёсты лӧпкытъяло. Тани Аркадий Серафимовичлы 48 арес ини, нош сое коркан уд пукетыю. Лумбыт ужаса жаде ке но, спортзалэ мынытэк яке яратоно городкиезтэк уг чида. Городкиен шудонъя Аркадий Серафимович - республикамылэн куинь пол чемпионэз! Чемпионъёс сярысь ке, соос ёросын нокыӵе шуг-секытъёс шоры учкытэк будо - спортъя дас вить мастер, СССР-лэн чемпионэз Лидия Суднева, дуннелэн чемпионэз - Герман Скурыгин. Та берлоез алигес Испаниын, ньыльдон градус пӧсьын спортивной амалэн куатьтон иськемез ортчыса зарни медалез утэм. Спортсмен Селта ёросысь Вутно гуртын вордӥськемын. Соин ик селтаос сое асьсэлэн каро. Вордскем нуналэныз но бадӟым вормонэныз ӟечкыланы юри ӧтчазы чемпионэз ёрос администрацие. Герман тау кылзэ нырысь ик вераз дышетӥсьёсызлы. Соос уго пиналэз вормонъёсы бурдъяло улонэ сюрес возьмато. - Табере пиналъёсмылы адӟем карымон муртмы вань. Соос, Герман Анатольевич шоры учкыса, юнгес спортэз гажаны, вормонъёсты чиданы дышозы, - шуо спортсменэз ӟечкыланы лыктэм физкультурая дышетӥсьёс. Скурыгинлэн спортэ вамышъёсыныз тунсыкъяськисьёс ӧжыт ӧй вал, нош али ёросын со сярысь тодӥсьтэмез ик ӧвӧл, шӧдске. Герман Анатольевич шумпоттӥз бӧлякъёссэ - октябрь толэзе со ёрос школаосысь пиналъёсын пумиськылоз, аслаз будон сюресэз, спорт сярысь мадёз. - Тӥни кыӵеесь ми! - данъяське ёросысьтыз потэм чемпионэн Владимир Соловьев. - Табере, оло, спорт удыслы бадӟымгес саклык висъяськоз, уксё-а шуод, меӵак вераса. Куасэн бызьылӥсь уго куастэк уз бызьылы, футболэн шудӥсь туп интые сюй люкез уз ӵыжа. Вормисьёслы кузьым сётъянъёс нош воксё вуныны кутско ни. Ай тани сӥзьыл кросс ортчытоно - соиз доры ветлӥ ни, таизлы кин ке сьӧры ивортӥ... - Ӵошатсконъёсы озьы коркась корка ветлыса ӧтчаськоды-а, мар-а? - Цотэк кызьы? Мон вань спортсменъёсылэсь коркаоссэс тодӥсько. Телефон кысэмын, нош ужрад ялэмын ук. Бызьыл, бызьыл, спортсмен. Оло, ӵап самой пыдлось гуртын будэ дуннелэн вуоно чемпионэз. Басьты ай тани Скурыгинэз - пичи дыръяз котькуд ӵукна сьӧрлось гуртысь школае ӝог-ӝог вамышъялляз со, Селтала вуылӥз ӵошатсконъёсы шуыса гинэ. З. РЯБИНИНА. Кыӵе улӥськод, ву? Туэ инвожо толэзе газетамы печатласькиз Чупчи сярысь веран. Журналистлэсь Алексей Ельцовлэсь тыршемзэ вылӥ дунъяса но гожтэм ужлы вазиськыса, редакциямы вуиз кӧня ке ивортон. Алексей Ельцовлэсь "Чупчи сярысь веран" кылужзэ лыдӟыса, амалтэк мур-мур малпаськыны кутскиськод: татын верам учыръёс ӵапак возьмато Чупчи шурлэсь курадӟемзэ. Таӵе югдур кылдӥз асьсэлэн, адямиослэн, янгышенызы валче. Тужгес но - ёросъёсысь предприятиослэн, огазеяськонъёслэн вуоноез сярысь сюлмаськисьтэм кузёоссылэн чылкак кӧберсыз (кӧбертэм) луэменызы. Удмурт Элькунысь Министръёслэн Советсылэн (соку ай озьы нимаське вал) Чупчиысь вулэсь ӟечлыксэ умоятонъя постановлениез тупатэм дыре уг быдэсъяськы. Ӝожтӥськонлы мугез одӥг: ӧвӧл коньдон. Озьы ке но, пичияк оскон вань ик: радъяськыло вуэз утёнъя ужрадъёс, трослы умояз югдур Эгра НГДУ-лэн му вӧй поттон интыосаз (ичигес луыло ни шудтэм учыръёс, дыраз палэнтӥсько соослэн бервылъёссы). Чупчилэсь туннэ нуналзэ тодон понна, Удмурт Элькунысь Вуэз чаклась комитет туэ эскероз солэн вуэзлэсь ӟечлыксэ. Чупчи сярысь веран выльысь но выльысь тодамы вайытэ: таӵе секыт югдуре котьку вуттыны быгатоз инкуазез гажамтэмы. Вуоноез сярысь сюлмаськемысь ноку дугдоно ӧвӧл. М.И.Алексеев, Удмурт Элькунысь Вуэз чаклась комитетысь валтӥсь ужась. Та ужаз журналист Алексей Ельцов пыр-поч эскере туж сюлмаськытӥсь удысэз - вулэсь "шокамзэ". Шаерамы Чупчи кыкетӥез бадӟым шур луэ. Бызе со уй палтӥ. Вуоссэ нуэ Кез, Балезино, Дэбес, Эгра, Глаз но Яр ёросъёстӥ. Яр вадесын Чупчи паськытгес но тырогес луэ. Та палан ик, Тум гуртын, вордӥськиз ачиз гожтӥсь но. Соин ик Алексей Ельцов ужезлэн кутсконаз нырысь ик тодаз вае пичи дырысьтыз тодмо Тум шурзэ (таиз ӵапак усе Чупчие). Солэн но вань кайгуосыз синучконын сямен адӟисько Чупчилэн вуосаз. Солэн туннэ нуналыз сярысь гожтӥсь сюлэмыз вӧсь луыса маде аслаз веранъёсаз. Кылбуран амалэз интыен-интыен вошто ваче кенешонъёс, пӧртэм пумо учыръёс но валэктонъёс. Алексей Ельцов тодыны быгатэм кылдэм югдурлэсь мугъёссэ. Дэбесысен сое сюлэмшугъяськытэм пудо вордон фермаос дорысь кыедлэн умойтэм утиськемез. Соин валче вань кыед ву ваське шуръёсы. Эгралан тупатэм куронъёсты тӥяло акциосын "Удмуртнефть" огазеяськонлэн предприятиосыз, Балезиноын сюлмаськытэ войсковой частьлэн полигонэз (таиз шуре кисьтэ пож вуоссэ), посёлокын чылкытатӥсь гумыослэн ӧвӧлзы, Глазовын вуэз кырсёмытэ механикая Чупчи завод. Гожтӥсь эскере Удмурт Элькунысь Министръёслэн Советэнызы 1995-тӥ арын кутэм "Чупчи шурысь вулэсь ӟечлыксэ умоятонъя ужрадъёс сярысь" 82 номеро постановленилэсь быдэсъяськемзэ. Чупчиысь вулэсь ӟечлыксэ умоятыны чаклам тросэз ужрадъёс быдэстэмын ӧвӧл. Алексей Ельцов герӟа сое шаерысьтымы ляб экономикаен но коньдон ӧвӧлэн. Журналист ӟеч тодэ но вала инкуазьмес утён удысысь кайгуосты. Соин ик юн сюлмаське солэсь чеберлыксэ будӥсь пиналъёс понна кельтон сярысь. А.Т.Михайлов, Инкуазез утёнъя кун комитетысь инспектор. Малпанам - ас гуртам Кыдёке но кыдёке кылё со вакытъёс. Секытгес ке но вал, тужгес шудо дыръёсмы ортчизы вордӥськем гуртамы. Пичи коркамы милемлы эркын, шуныт, югыт вал. Мемимы чик ӧз быгатылы ужтэк пукыны. Ӵындӥсь керосин лампа бер ӝытозь ӝуалляз: пӧзь, носки керттыса пукылӥз анае... Аръёс ортчемъя, шер но шер вуылӥсько ни вордӥськем гуртам, жаляса верано, ӧвӧл ни отын каре. Малпанъёсы нош ялан отчы кыстӥсько... Котьку но кема учкисько мон сылэм корка бервылмес, улмопумес... Огез бӧрсьы огез бушесь кылё ини тупалан коркаосмы. Куке но отын жингыртӥз улон гур. Ми вадьсын кык юртын улӥзы чыпышъёс. Кӧня нылпиоссы вал! Али дыре ваньзы сямен пазьгиськемын пӧртэм палъёсы. Сылэ на одӥг корка - выль, бадӟым, учкымон. Озьы ке но, Чыпыш Петя огназ улоно луиз та буш корказ. Мар карод, адӟонэз сыӵе, дыр... Анае ӵем дыръя вералоз вал: шунды ӝужаку ӧд ке адӟы шуддэ, пуксьыкуз уд ни адӟы. Озьы тӥни, бускеле нылпиезтэк, кышноезтэк кылиз. Огназ берга со бадӟым юръераз. Укнооссэ чеберто сяськаосыз - тӧдь-тӧдь гырлыос - возьмало кадь семьяезлэсь берытскемзэ... Котьма ке но, мынам гожтэме потэ гуртын улӥсь апае Фаина Аполосовна Худякова сярысь. Бызиз но улэ со музон гуртын. Пиналысен ик уже кыткемын вал. Секытгес усиз солы, мыным сярысь. Мон самой пичиез вал, соин ик тросгес нуныяллязы. Нош Фаина школа бере ик фермаын ужаз, парсь сюдӥз. Али но со пудо уте, Кез ёросысь пичильтык гинэ, вож-вож садо Квасер гуртын улэ. Мӧзмылӥз ик нырысь-валысь Вортча гуртэзлэсь. Нош аръёс - кыӵе чаль ортчизы. Витьтонлэсь ятыр ини солы... Мон но, Фаи, туэ пумитай ӝыны даурме. Ӵем адӟиськылыны ум быгатӥське, сюресъёс дуноесь. Но тӥ тодэ, котькуд ӵукна уже потыкум, мон ваньдылы сӥзисько тазалык, шудо нунал но кирос понӥсько. Гуртын улон - со нуналысь нуналэ кузьыли кадь тыршон, улондэ чаклан: вуэз но, пуэз но, пудоез но... Ялан, капчи коть секыт, тон ӝутыны, лэсьтыны тыршиськод. Быдэстӥды, улонэ поттӥды куинь нылдэс, ваньзы соос устоесь - дышетӥсь, агроном, садикын ужась. Возьмады вал пи - тужгес но кузпалыд, малы ке шуоно, гуртын-юртын пиосмурттэк секыт, но мар карод... Табере внукъёсыд вань ини. Кузпалыд но сабырлы, ужась. Ог-огдэс валаса, утьыса мед улоды улондэс. Мон нош ик малпанам - вордӥськем гуртам, ветлӥсько кадь корка пушкытӥ, пукисько ӝӧк сьӧрын апаеным Фаинаен - сииськомы пыжем картофка, бӧтьыртӥськомы. Аръёс, аръёс... З.Трухина. ЮАЛЭ - ВАЛЭКТОМ Мар со телепатия? Юа Завьял ёросысь лыдӟисьмы В. Мошкин. Телепатия - парапсихологиысь одӥгез валан. Со - муртлэсь малпанъёссэ солэсь палэнын луыса лыдӟыны яке аслэсьтыд малпанъёстэ солы ыстыны быгатон. Сыӵе быгатонлыксы ваньмызлэн ӧвӧл. Ивор (малпан) ыстӥське валатэк. Шуом, тӥ кемалась дорады ӧд бертылэ ни. Анайды мӧзме, нош маке умойтэм луэ ке, ас понназ тӥледыз ӧтьыны кутске. Маке мукет ужен вырыкуды, тӥ сое уд шӧдӥське, шуак тодады лыктэ но сюлэмды шуг луэ. Дыртыса бертыны потӥськоды. Висись анайды пайме: "Толон гинэ возьмаса бӧрдӥ вал..." Телепатия сярысь тодмо ни вал кылем дауре ик. 1913-тӥ арын француз психолог З. С. Бисскаго парапсихологиысь паймымон учыръёс сярысь книга поттӥз. Отын трос та выллем учыръёс верамын. Но соку телепатилы но мукет шӧдӥськонъёслы туж ӧз оскылэ - наукаен эскерымтэ на вал. Али парапсихология шоры учкон воштӥськизгес. Пумозяз озьы ик эскерымтэ на ке но, тодмо: сыӵе шӧдӥськонъёс зэмзэ но вань. Компьютерен эскерыса, адямилэн йырвиымысьтыз шедьтэмын сыӵе люкетъёс, кудъёсыз юртто та выллем паймымон учыръёсы. Азьпалзэ адӟыны быгатӥсьёслэн, туно-пеллёослэн, гипнотизёръёслэн сеанс ортчытон вакытазы йырвиымысьтызы со люкетъёс (огез - йырберын, кыкетӥез - йыртышын) кужмогес ужаны кутско, пе. Со шӧдӥське киын эскерыса но - адямилэн йырысьтыз со интыосыз ӟырдало. Маин сое валэкто? Малпаськыку, шумпотыку яке куректыку котькуд адямилэн йырвиымез каллен вырыны кутске (асьмеос сое ум шӧдӥське). Со тулкым выже лулсӥосы, собере - адямилэн мугорысьтыз кыре потэ. Огдыре ивор ыстӥсь муртэн огкадь малпанъёсын, мылкыдъёсын улӥсь муртлэн йырвиымаз вуо ӵапак со тулкымъёс. Тӥни малы куддыр кема адӟиськылымтэ бере шуак пумисько ог-огзэс яратӥсь муртъёс, яке шуге-леке шедем мурт доры ӧтьытэк вуэ матысь адямиез... Таӵе шӧдонзы тужгес бадӟым пудо-животъёслэн, пӧйшуръёслэн. Дасяз З. Вахрушева. Мазут кошкиз. Ву чылкыт Кык арнялэсь кемагес ортчиз ини Кам шурын шудтэм учыр луэм бере. Кызьы тодӥськоды, 4-тӥ сентябре 22 часын Каракулино ёросысь Усть-Бельск гурт вӧзтӥ ортчись Кам шур вылын мазутэн танкерез баржа мырӟиз. Вуэ кошкиз 72 тонна мазут. Та дырлы шурез сузян ужъёс йылпумъяськизы ни, шуыны луоз. Асьме дорын Кам чылкыт. Нефтесборщик ог кызь кык тонна мазутэз бичаны быгатӥз. Уноез сьӧд эстӥськон Кам кузя Татарстан пала кошкиз. Кӧняез ке мазут шур пыдсы выйиз. Кӧня ке ар ини Усть-Бельск дорын Каракулино рыбхоз чорыга. Татарстанысь инкуазез утисьёс татысь вулэсь ӟечлыксэ эскеризы. Соос шуизы - ву чылкыт. Озьыен, Кам шурысь кутэм чорыгды ческыт мед кошкоз! Б. НИКИТИН. Мынозы ярмаркае Сарапулысьнянь пыжон комбинат син шорын азинске, вормон вылэ вормон басьтэ. Одӥг выставкаысь но со дипломтэк уг кыльы. Та нуналъёсы предприятие дасяське Пермьын ортчоно международный выставкае мыныны. 1-4 ноябре отын возьматэмын луозы сиён- юонъёс, соосты дасянэ мынӥсь сырьё, продукт поттӥсь машинаос, упаковкалы оборудование. Пермь сяна, выставкаез ортчытон пыриське Германиысь огез фирма. Вераны кулэ, таӵе ужрадъёс Россиын ортчыло арлы быдэ. Кылем арын, кылсярысь, асьсэлэсь ужзэс возьматӥзы сюлэсь ятыр Молдоваысь, Германиысь, Австриысь предприятиос но фирмаос. Россиысь городъёс пӧлысь узыр продукциен шумпоттӥзы Москва, Санкт-Петербург, Пермь, Екатеринбург, Ижевск, Тюмень, Челябинск... Кылем арын выставкае ветлэмзэс туэ нош ик данакез Перме мыныны дасясько. Отчы нуозы асьсэ дорын поттэм пӧртэм пумо продукцизэс. Сарапулысь предприятилы но вань мае возьматыны, маин данъяськыны. Л. МЕДВЕДЕВА. Калмез кузя 10. БЫЧКЫ ЛЭЧЫТ КЕ, ЗӤБЫТЭК НО ВАНДОЗ Кызьы тодӥськоды ни, "Удмурт дуннеысь" журналистъёслэн Калмез шур кузя экспедицизы йылпумъяськиз. Газетчиос кузь сюрес вылын кылэм-адӟемзэс, малпанъёссэс лыдӟисьёс доры вуттӥзы. Лэсьтэмын йылпумъянъёс но: экспедицилэн материалъёсызъя редакциын ортчиз пумиськон. Пӧртэм удысъёсысь специалистъёс сюлмаськытӥсь ужпумъёсъя вераськизы. Тодматӥськом кенешонэ пыриськемъёслэн малпанъёсынызы. В.А.ФОМЕНКОВА, нюлэс ужасьёслэн профсоюззылэн рескомезлэн тӧроез: - Нюлэс ужасьёс доры ӵем вуылӥсько, кызьы-мар уло, тодӥсько. Туж мӧзмыт ке но, шонерак верало: нюлэс посёлокъёсын улон пумен кысэ. Мынам нокыӵе осконэ ӧвӧл, со выльысь улӟоз шуыса. Тани басьтом Сюрек леспромхозэз ик. 70-тӥ аръёсы нюлэс удысын со одӥгез азьмынӥсез но кужмоез вал, уно пӧртэм дипломъёсын пусйылэмын. Нюлэс корасьёслэн Кильмезь посёлоказы ваньмыз вал: больницазы но, школазы но, клубзы но. Егитъёс мылысь-кыдысь конкурсъёсы, концертъёсы пыриськылӥзы. Нокин ӧз малпалля, та калэ вуонзы сярысь. Вож узырлык пӧлын улӥсьёс нунал пӧрат сюлмаськонэн уло, кызьы но маин кӧтэз кышъяно: асьсэос нянь нырко-кото, асьсэос пыжо. Предприятилэн выль директорез Азаматов нылкышноослы чалкам льготаосты (арняяз 36 ужан час) палэнтӥз. Мон юасько, кин сётӥз сыӵе право, кин лэзиз тарифъя соглашениез тӥяны. Нош со пумитам: "Мон со улэ ӧй гожтӥськы". Лынгаысь леспромхозэн кивалтонэ пуксиз ужбергатӥсь Филатов. Уральской шуонъёсты уг тыры, отпускной уг сётъя. Куинь толэзь ортчыса, рабочийёсты ужысь мозмытон сярысь куриськон гожтытэ, собере выльысь йырсазез сурась кагаз "пӧратэ" - уже кутыса. Ымдэ усьтод - соку ик кошкытоз. Кышкатэм адями мукет амал шедьтытэк кылзӥське. Законэн, Кодексэн чаклам правоос вылэ кивалтӥсь "сяла". Та выллем югдур мукет предприятиосын но. Акционер кариськыса, предприятиос нимазъяськизы. Отысь валтӥсь директоръёс мар потэ, сое лэсьто. Профсоюз кивалтӥсьёс но азьло сямен "пиньзэс уг шеро". Соос директор борды "думиськемын", солэсь уждун басьто. Мон малпамъя, Удмурт правительство ӧз ке юртты нюлэс удыслы, тэль корасьёс "сыръясь нюрысь" потыны уз быгатэ. А.И.ЧЕРЕНКОВ, Удмурт Республикаысь Нюлэсъя управлениысь отделлэн кивалтӥсез: Экспедицилэсь сюрессэ чакласа валаськод: со нюлэсо интыос. Соин ик журналистъёслэн син шоразы амалтэк нырысь ик нюлэс посёлокъёс йӧтӥзы, отын улӥсь адямиос. Азьвыл но, социализм вакытэ, нюлэс хозяйствоын шуг-секытъёс кылдылӥзы. Нош туннэ со, гурезьысь погылясь-васькись лымы кадь, сюрес вылысь ваньзэ куашкатэ. Куд-ог посёлокъёслэн али пытьызы но ышиз-быриз ни. Тани мон тодӥсько на, Лумпово лесопункт вал, Красногорск леспромхоз. Соос вазенгес куашказы, быризы посёлокъёссы но. Вераны кулэ, пичиесь посёлокъёсты огдырлы пуктылӥзы. Одӥг интыысь тэлез кораса, мукетаз выжылӥзы. Соин ик улон юртъёс но суп-сап, чеберез-мар чаклатэк лэсьтылӥзы. Нюлэс корасьёсын ми ваче ки мынӥськом, соослы тэль мерттӥськом, будэтӥськом. Но берло аръёсы ужам емышмылэн пайдаез ичиёмиз, будэтэмезлэсь ӧжытгес корамен. Огласянь умой но кадь, но будэтэм нюлэсэз дыраз ӧд ке погырты, солэн ӟечлыкез уродме ук, бератаз интыяз ик сисьмоз - бадӟымгес изъян адӟод. Азьвыл удмурт шаерамы шорлыдын араз 4 миллион кубометр нюлэс дасяллязы. Куд-ог аръёсы та лыдпус сизьымозь но вуылӥз. Соин ик, шуомы ини, мултэссэ куасалтӥм. Югдурез тупатон вылысь, али 3 миллионэз ортчыны уг яра. Нош кораськом талэсь ӝынызэ гинэ. Оло, тэль нокинлы кулэ ӧвӧл ни? Мон талы уг оскиськы. Нюлэс удыс висисьлэн пӧськыез выллем, со азӥз огъя экономикамылэн лябӟеменыз. Нюлэс дасян азьло но ыштонъёс адӟылӥз ке, переработка чотын барыш поттыны луэ ик вал. "Удмуртлес" огазеяськон котьку пайдаен ужаз. Табере ваньмыз йырин-чукин кошкиз. Учке ай, нюлэс трактор басьтыны 300 сюрс манет кулэ. Кӧня тэлез погыртоно-келяно со понна. Ми коньдонэз ум адӟиське, шуыны луоз. Нюлэсэз тылпулэсь утён уж гинэ но кулэезъя радъямтэ. Ярам, инмар уте, бадӟымесь тылпуос шаерамы ог 60 арзэ ӧй вал ни. Социализм шуон аръёсы нюлэс удыс 17-18 миллион манет доход вайылӥз. Со пӧлысь ӝыныез нюлэс хозяйствоез азинтонэ кошкылӥз, кылемез - мукет удысъёсы. Нош али кун ласянь юрттэт ӧз вуы ни ке, экология пумысен бадӟым кышкытлык кылдоз. Туала улонэз чакласа, мынам но бадӟым осконэ ӧвӧл, ваньмыз интыяз пуксёз шуыса. Уно ӟеч кадръёс ыштэмын. Посёлокъёсын улӥсьёслэн тыро-пыдо музъемзы гинэ ӧвӧл, нимаз подсобной хозяйство возьыны луонлыкъёссы ӧжыт. Нюлэсчиос пыд вылазы султӥзы ке но, та удыс азьланяз мукет сяменгес радъяськоз. Бадӟым посёлокъёс азинскозы, нош рабочийёс вахта амалэ выжозы. А.С.ДЕНЬГИН, Удмурт Республикаысь Инкуазез утёнъя комитетлэн тӧроезлэн воштӥсез: - Таӵе акция, мон сямен, кулэ. Журналистъёс азьланяз но та выллем экспедициосы мед поталозы. Соосты ми эшъёсын лыдъяськом, азьланяз но ӵош ужаны дась. Улонамы туннэ сыӵе югдур кылдӥз - тодоно-верано, кыӵе омырен шокаськом, кыӵе вуэз юиськом. Газетчиослэн Калмез кузя ортчем сюрессы но возьматэ: та палъёсын му вӧй но кыско, гумыос кузя чагыр эстӥськон но пельто, нюлэсэз но корало. Вань гожъям материалъёсты ми сак учком-эскером, кулэезъя ужрадъёс кутом. Сыӵе правоосмы вань, законэз тӥясь кивалтӥсьёслэсь кылзэс юаны кужыммы тырмоз. - Нефть поттӥсьёс али майбыр уло. Куке но вӧй пушкын пыласько вал, шуыны луоз, тэль корасьёс но. Уд вуэ-а тӥ но, Николай Трофимович, ог 50 ар улыса сыӵе югдуре? Му вӧй быроз, тӥледыз сюрес урдсы пешкытозы. Н.Т.КЛЕЙМЕНОВ, "Удмуртнефть" огазеяськонлэн калыкен ужанъя отделысьтыз валтӥсь специалист: - Му вӧй шыкысъёсмы шаерамы ӝыныез гинэ эскеремын ай. Со пӧлысь но ог 80-эз нефтен узыр интыос уже уг кутӥсько на. Соин ик ӝыны даурзэ та ласянь асьмелы сюлмаськытэк улыны луоз. Оскон вань, со сярысь верало геологъёс но, му вӧен узыр интыос сюрозы на. Милям удысамы ужасьёс али ӝутскем мылкыдын тыршо, нефть поттон выльысь йылэ, чукинскем производство интыяз пуксе, тупатске. Ми али вить но ӝыны миллион тонна му вӧй кыскиськом. Сюлмаськытэ таӵе югдур: эскерем запасъёслэн йылэмзы кык пол ичи. - Калмез котырын - нюлэсо интыос. Но куд-ог гуртъёсын ю-нянь но будэто. Татын улӥсьёслэн сыӵе ик секыт адӟонзы. Кылсярысь, тани Селта районысь Прой-Балма гуртын ӧвӧл магазинзы, медпунктсы. Калык пыдын ветлэ Селтала, Халдые. Н.А.ШИРОБОКОВ, Удмурт Республикаысь Гурт хозяйствоя но сиён-юонъя министерствоысь отделлэн кивалтӥсез. - Бен, Селта, Сюмси районъёсын музъемзы урод, со луоё. Туэ тани сюмсиослэн юоссы кӧс но пӧсь улэмен сутскизы. Гектарысьтыз чылкак 5-7 центнер ю тысь кутсало. Кеносэ вуытозь, та лыдпус 3-4-ёзь усе. Пудо сиёнлы фураж кулэ, кытысь сое шедьтод, маин басьтод? Кисыын буш бере, одӥг гинэ луонлык кыле - со нюлэс. Мукет узырлыксы сюмсиослэн ӧвӧл. Играос таӵе югдурысь каньылэн пото: му вӧй чотын тырмытэм бюджет, ю тысьлы коньдон висъяса, сокем уг начармы. Шаерысь огъя югдурез ке верано, туннэ 100 сюрс гектар гыроно музъем аналтэмын ни. Атайёсмы Казахстан выльвылэз ӝутӥзы. Нылпиосмы, оло, асьме дорысь жуг-жаген но писпуосын басьтэм музъемез выльысь гырозы-утялтозы. Эстӥськонъя югдур, дунъёс будэмен, вераны луонтэм секыт. Куд-ог колхозъёсын уждун сярысь вунэтӥзы ини, сое кык аръёсын уг адӟо. Калык возиське на аслаз пудоез чотын гинэ. Таизлы нош ик фураж кулэ. Нош юрттэт сётыны чакламын, кин сӥльзэ-йӧлзэ колхоз пыр вуза. Калык мылкыдтэк улэ-ужа. Кулэ выль ужан рад, адями мед адӟоз-валалоз ужезлэсь пайдалыксэ. - Экспедицие потамъёс азе юан кылдӥз, одӥгъёсыз, саессэс пужалляса, суч-суч ужало (кин выль производство усьтэ-радъя, кыкетӥез тӥр ныд яке пулэсь мукет арбери лэсьтэ- вуза, куинетӥез чорыганын яке пӧйшуранын быгатонлыксэ возьматэ), нош мукетъёсыз котмем тютюпиос сямен киоссэс-бурдъёссэс лэзё, шуг-секытъёс азе пыдесъясько. Малы таӵе суред кылдэ, ма бордын ужпум? В.А.ФОМЕНКОВА: - Адямиос огкадесь ӧвӧл, зэм. Туала улон китӥд кутыса уз валты. Аслыд малпаськоно, юн сямо луоно. Азьло егитъёс бадӟым улонэ сюрес лёгылӥзы мӧйыослэн чакламзы улсын, соосын артэ. Табере югдур воштӥськиз, пинал адями вӧзын валэктӥсь-дышетӥсь ӧвӧл ни, аслыд ачид кузё. Нош кузё луыны котькудӥзлэн дӥсьтонэз, быгатонлыкез уг тырмы. А.И.ЧЕРЕНКОВ: - Ляб радъямын валэктон уж. Тросэз уг тодо, кыӵе вуз кулэ туннэ рыноклы. Уг тодо, кызьы, ма бордысен кутсконо, кызьы ужез радъяно. А. С.ДЕНЬГИН: - Малпало вал, рынок ваньзэ ас кожаз радъялоз. Ӧз, ӧз радъя. Уно валантэм ужпумъёс кылдӥзы, ышизы-быризы идеалъёс, азьпала осконъёс. Государстволэсь кужымзэ юнгес кутоно, государство ласянь юрттэт но кулэ, эскерон но. В.Д.ГЕРДТ, УР-ысь Промышленностья министерствоысь валтӥсь специалист, (телефон пыр мылкыдзэ вераз): - Нюлэс хозяйствоез азинтонъя республикаямы нимысьтыз программа кылдытэмын. Солэсь проектсэ эскеризы ни правительствоын. Матысь дыре та ужпумез ӝутоз Кун Кенешлэн сессиез. Чакламын пӧртэм ужрадъёс нюлэс дасянъя-коранъя, переработкая, мебель бичанъя. Леспромхозъёсын югдур тупатскыны кулэ. Тӥни сыӵе вераськон-кенешон пӧрмиз. Оло, вань ужпумъёс эскеремын но ӧй вал. Секыт югдурысь потыны луон, куд-ог сюресъёс пусъемын-верамын ке но вал, быдэсмозы-а вань та малпанъёс, шуг вераны. Калмез палан уло уго асьме адямиос, огъя пуртыын чырсаськом-пӧзиськом. Со пуртыез выльдыса гинэ, дыр, улон радмес тупатом. Г.ЮСАЕВ. Кенешон дыръя. Лэйкась выж герӟа Селта районысь Головизнин Язок посёлокез бадӟым дуннеен. Таӵе суредэз пумитаны луэ котькуд нюлэс посёлокын. Кузь сюрес вылын таӵеез но пумиськылӥз. Дауръёс вискын Укмыс - бугрес лыдпус (Кутсконэз -тӥ номерын) "Дауръёс вискын" йыръянэн азьвыл потэм сэрегамы ми ивортӥм: 1999-тӥ арын печатлалом Россилэн ог 2 сюрс аръем историысьтыз 9 лыдпусэн йылпумъяськись аръёсы вылэм учыръёсты. Озьыен, соос вал 1000... 700... 100... 60... 10 ар талэсь азьвыл. Огсямен улӥмы ке, 2000- тӥ арын сётъялом о (ноль) лыдпусэн дугдӥсь аръёсы луэм учыръёсты. Кин тодэ: 20-тӥ но 21-тӥ дауръёс вискын кутскем та ужмы, оло, уно дасо но сюо аръёс ӵоже кыстӥськоз. Отӥяз, оло, сыӵе лыдпу со узыр шыкыс кылдоз Удмурт улослэн ортчем сюресэзъя но. Россилэн но Удмуртилэн историенызы тунсыкъяськисьёслы ивортэм потэ: туннэ ми 9 лыдпусэн йылсаськись аръёслы сӥзем веранмес ум быдтӥське на. Та уж мыноз туэ декабрёзь. 1919-тӥ ар - 80 ар талэсь азьвыл Январь. А. И. Деникин но П. Н. Краснов соглаш кариськизы Россилэн лымшор палаз ожмаськись кужымъёс кылдытыны. 11-тӥ январь. Россиысь Калык комиссаръёслэн советсы кутӥз продразвёрстка сярысь декрет. Март. А. В. Колчаклэн ожгарчиосыз выжизы наступление. 30-тӥ март. ВЦИК-лы тӧрое быръемын М. И. Калинин (азьвыл тӧро Я. М. Свердлов кулӥз вал 16- тӥ мартэ). Апрель. Горд армия потӥз А. В. Колчаклы пумит наступление. Май. Генерал Н. Н. Юденич вырӟиз Петроград вылэ наступление (пезьдэт басьтӥз июнь пумын). - Генерал А. И. Деникин выжиз Волга пала наступление (24-тӥ июне басьтӥз Харьковез, 30-тӥ июне - Царицынэз). Июль. Горд армия Уралын потӥз А. В. Колчаклы пумит наступление. 12-тӥ сентябрь. А. И. Деникин вырӟиз Москва пала наступление (20-тӥ сентябре басьтӥз Курскез, 13-тӥ октябре - Орёлэз). 1929-тӥ ар - 70 ар талэсь азьвыл Л. Д. Троцкий уллямын СССР-ысь. РСФСР-ысь Таджик автономной республика пӧрмытэмын союзной республикалы но пыртэмын СССР-е. 23-тӥ апрель. Усьтӥськиз ВКП(б)-лэн 16-тӥ конференциез. Со умойтэмен лыдъяз "бур пала кожонэз". Кутӥз вить арлы нырысетӥ план. 1939-тӥ ар - 60 ар талэсь азьвыл 17-тӥ январь. Ортчытэмын калыкез лыдъян. СССР-ын улэ 170 миллион 600 сюрс мурт. 10-тӥ март. Усьтӥськиз ВКП(б)-лэн 18-тӥ съездэз. Со юнматӥз вить арлы куинетӥ план (1939- тӥ - 1942-тӥ). Ялӥз СССР-ын социализм лэсьтонэз оглом йылпумъям сярысь. 17-тӥ апрель. СССР дэмлаз СССР, Великобритания но Франция куспын ог-огедлы юрттон сярысь огкыл гожтыны. Вераськонъёс пайдатэк йылпумъяськизы. 3-тӥ май. Мукет кунъёсын кусыпъёсъя 1930-тӥ арысен калык комиссар М. М. Литвинов ужысьтыз куштэмын но интыяз Калык комиссаръёслэн советсылэн тӧроез В. М. Молотов пуктэмын. 11-тӥ май. Япониысь Халхин-Гол шур дурын пуромиз Япониен ожмаськон. 1-тӥ август. Москваын усьтӥськиз гурт хозяйствоез возьматон (выставка). 12-тӥ август. СССР, Англия но Франция Москваын мытӥзы Германия урдскон кышкытлыклэсь утиськонъя тупанкыл сярысь вераськонъёс (пайдатэм йылпумъяськизы). 19-тӥ август. СССР Германиен огкылэ вуиз вузкаронъя но кредитъёсъя. 23-тӥ август. СССР но Германия гожтӥзы урдсконтэм сярысь огкыл. Отысь лушкем люкетэз сӥземын вал Европалэн шунды пуксёназ кузёяськонлы. 1-тӥ сентябрь. Германия урдскиз Польша вылэ. Пуромиз дуннеын кыкетӥ тылож (война). - СССР-ысь Вылӥ Советлэн азьвыл чакламтэ сессиез кутӥз огъя воинской повинность сярысь закон. 17-тӥ сентябрь. Вылӥ верам огкыллэн лушкем протоколэзъя Горд армия пыриз Польшалэн музъем вылаз пыриз но ялӥз: Западной Украинаез но Западной Белоруссиез утёно Германия киултэмлэсь. 28-тӥ сентябрь. Кутэмын Германиен эшъяськон но кунгож сярысь огкыл. СССР-лэн кунгожез тупатэмын Буг но Нарев шуръёс кузя. Польша люкемын Германия но СССР куспын. - Гожтэмын Эстониен ог-огедлы юрттон сярысь огкыл (сыӵе ик огкыл гожтэмын Латвиен 5-тӥ октябре, Литваен - 10-тӥ октябре). 1949-тӥ ар - 50 ар талэсь азьвыл Январь. Кужмысь коллективизация ортчытэмын Латвиын, Литваын, Эстониын, Западной Украинаын, Западной Белоруссиын. - Кутскиз "космополитизмен нюръяськон". 5-тӥ январь. Кылдытэмын Ог-огедлы экономикаын юрттонъя совет (СЭВ). Отчы пыризы Болгария, Венгрия, Польша, Румыния, СССР но Чехословакия, берлогес - Албания, Вьетнам, ГДР, Куба, Монголия. Март. Мукет кунъёсын кусыпъёсъя министре В. М. Молотов интые пуктэмын А. Я. Вышинский. 29-тӥ август. СССР-ын нырысьсэ пуштытэмын атомной бомба. 8-тӥ сентябрь. Уретэмын Югославиен эшъяськонъя, ог-огедлы юрттонъя но ӵош ужанъя огкыл. 1959-тӥ ар - 40 ар талэсь азьвыл 2-тӥ январь. Лэземын "Луна-1" станция. 27-тӥ январь. Усьтӥськиз КПСС-лэн азьвыл чакламтэ 21-тӥ ӧтчамез (съездэз). Со кутӥз сизьым арлы (1959-тӥ - 1965-тӥ) лыдпусъёс, таосыз воштӥзы 1959-тӥ - 1965-тӥ аръёслы планэз. Н. С. Хрущёв ялӥз коммунизм лэсьтонэз паськыт ӧръян сярысь. 15-тӥ сентябрь. СССР-лэн йырыз Н. С. Хрущёв нырысьсэ мынӥз Америкае, пумиськиз Д. Эйзенхауэр президентэн. 1969-тӥ ар - 30 ар талэсь азьвыл Март. Даманский шормуӵын пуромизы СССР но Китай куспын ожмаськонъёс. Тасты шормуӵ дорын соос кутскизы июне, Жаланшколь ты дурын - августэ. 1979-тӥ ар - 20 ар талэсь азьвыл 17-тӥ январь. Ортчиз быдэс Союзысь калыкез лыдъян. СССР-ын улэ 262 миллион 400 сюрс мурт. 18-тӥ июнь. Гожтэмын ож тӥрлыкез кулэстон сярысь США-ен огкыл (ОСВ-2). 1989-тӥ ар - 10 ар талэсь азьвыл 12-тӥ январь. Ортчиз быдэ Союзысь калыкез лыдъян. СССР-ын улэ 286 миллион 400 сюрс мурт. 26-тӥ март. Ортчиз СССР-ысь калык депутатъёсты быръён. Соку вормизы выльдӥськонлы (реформалы) дурбасьтӥсьёс. 9-тӥ апрель. Грузилы эрик сётыны курыса Тбилисиын демонстрацие потэмъёс ож тӥрлыкен зӥбемын. 25-тӥ апрель. Люкаськиз КПСС-лэн ЦК-езлэн пленумез. ЦК-е быръемъёс пӧлысь 110-эз отысь потӥзы. Май. Литва но Армения асьсэды эрико ялӥзы. 25-тӥ май. Усьтӥськиз СССР-ысь калык депутатъёслэн нырысетӥ ӧтчамзы. Со М. С. Горбачёвез бырйиз Вылӥ Советлы тӧрое, Н. И. Рыжковез - Министръёслэн Советсылы тӧрое. Кылдӥз оппозициысь депутатъёслэн группазы (Б. Н. Ельцин, А. Д. Сахаров но мукетъёс). Июнь. Казахстанысь Узеньын но Узбекистанысь Ферганаын пуромизы калыкъёс куспын вожвылъяськонъёс. Июль. Пуромизы Абхазиын ожмаськонъёс. - Кутскизы шахтёръёслэн забастовкаоссы. 28-тӥ июль. Латвия ассэ эрико ялӥз. 15-тӥ август. Газ промышленностья министерство интые кылдытэмын "Газпром" концерн. 19-тӥ сентябрь. Люкаськиз КПСС-лэн ЦК-езлэн пленумез. Со кутӥз Союзъя огкыл дасян сярысь решение. 23-тӥ сентябрь. Азербайджан ассэ эрико ялӥз. *** Таяз дауре 10, 20, 30, 40, 50, 60, 70, 80, 90 ар талэсь азьвыл луэм учыръёсты сётӥм, сентябрь толэзез но пыртыса. Вылӥ верам аръёсы ик октябре вылэм учыръёсты печатлалом туэ октябре, ноябре луэмъёссэ - ноябре, декабре вылэмъёссэ - декабре. Учкелэ "Удмурт дунне" газетэз! А. ШКЛЯЕВ. Удалтэм! Якшур-Бодьяысь Тамара Андреевна но Василий Никаронович Пасынковъёслэн бакчаязы 28,2 килограммъем каунзы (тыквазы) будэм. Табере кузпалъёс солэсь кидыссэ бускельёссылы кузьмало. Соослэн но, пе, бакча емышсы сыӵе ик мед удалтоз. В. ЗАГРЕБИНА. Выль ёзын луоз удмурт Туала нылкышноослэсь сюлмаськонъёссэс син азьын ялан возён вылысь, Россия Федерацилэн Федерацияя Кенешаз кылдӥз Федерацияя Кенешлэн Тӧроез борды юнматэм выль ёз. Со огломак выроз кышномуртъёслэсь улон-вылонзэс радъянэн. Та ужрадлы сӥзем пумиськонэ вуылэмез бере, Удмурт Элькунысь Кун Кенешлэн юртаз люкаськылэм журналистъёслы со сярысь ивортӥз Удмурт Элькунысь Кун Кенешлэн Тӧроезлэн воштӥсез Светлана Смирнова. Светлана Константиновналэн верамезъя, выль ёзын луоз кызь вить адями. Туэ но кайта кӧня ке толэзь ӵоже со эскерылоз пӧртэм шугадӟонъёсын герӟаськем сюлмаськонъёсты. Нимысьтыз кенешъёс, "котырес ӝӧкъёс" сӥземын луылозы вуоно быръёнъёслы, Анайлэн нуналэзлы, пиналъёслэн азьпал улонзылы. Юри кылдытэм пичи ёзъёс сюлмаськозы нылкышноослы ужын пиосъёсын артэ одӥг кадь правоос сётон, соосты кивалтон уже кыскон, котькыӵе эриксэс утён, тазалыксы сярысь. Выль ёзысь адямиос озьы ик кенешылозы экономика, политика, калыкез дышетон удысъёсысь ужпумъёсъя. Таин валче чылкак уз вунэтэ тужгес сюлэмшугъяськытӥсь югдурез: туж ичи на пӧламы туала вакытлэн куронъёсызъя ужаны быгатӥсь адямиосмы. Кин воштоз туннэ соизлэсь яке таизлэсь заводлэсь директорзэ, колхозлэсь тӧрозэ? Россия Федерацилэн Федерацияя Кенешысьтыз ёз выллем удыс кылдоз Удмурт Элькунлэн Кун Кенешаз но. Выль ужпумез лулысь-сюлмысь сэрттон-пертчон вылысь, та нуналъёсы огинэ люкаськылозы шаерысьтымы нылкышно огазеяськонысь адямиос. Россия Федерацилэн Федерацияя Кенешысьтыз выль ёзэн кивалтоз Россия Федерациысь ужъя но улон-вылонъя министрлэн воштӥсез Галина Карелова. Сое воштылозы Федерацияя Кенешлэн аппаратаз ужась Галина Климантова но Москваысь кун социальной университетлэн нырысетӥ проректорез, профессор Лидия Шинелева. Удмурт Элькунысь Кун Кенешлэн Тӧроезлэн воштӥсезлы Светлана Смирновалы оскемын адямилэн валтӥсь эрикъёсыныз артэ нылкышноослэсь эрикрадъёссэс (правооссэс) чаклан. Е. РОМАШОВА. Утёме "Мирез" ӵош Туж секыт югдуре вуэмын Россиысь "Мир" орбитальной комплексэз азьланяз ужатон. Сое утён понна ӝегатскытэк инвестициос но финансово-промышленной, вузкарон но мукет ёзъёслэсь быгатэмзыя коньдонэн юрттэт кулэ. Ӵапак соин валче Кун Думалэн 1999-тӥ арын 2-тӥ апреле кутэм Постановлениезъя кылдытэмын "Мир" космической станциез утёнъя калык фонд. Улӥын сётӥськом солэсь адрессэ но реквизитъёссэ. Фондлэн адресэз: Москва город, Старой Басманной ульча, 16/1 юрт, 5 стр. Тел./ факс 267-71-48, 261-20-79. Е-маил мир-фунд@аха.ру Фондлэн реквизитъёсыз: Народный благотворительный фонд сохранения космической станции "Мир" ИНН 5050028642 Р/С � 40703810100020106000 в ОПЕРУ сбербанка РФ К/С � 30101810400000000225 БИК 044583225 Валютая счётэз: Народный благотворительный фонд сохранения космической станции "Мир" ИНН 5050028642 Асс. � 40703840400020106000 САВИНГС БАНК ОФ ТХЕ РУССИАН ФЕДЕРАТИОН, ОПЕРАТИОН ДЕПАРТМЕНТ Сwифт цоде: САБРРУММ 011 Шаерысьтымы калык киужъёсъя юртын ужаз выль адӟытон. Со сӥземын вал алнаш усточиослы. Татысь пумитаны луылӥз туйлэсь, нинлэсь, куролэсь дасям пӧртэм пумо киужъёсты. Вылӥ устолыкенызы паймытъязы Виталий Лермонтов, Андрей Петров, Вячеслав Михайлов, Наталья Рябчикова, Иван Печников, мукетъёсыз. Тужгес синмаськылӥзы турлы чеберъянъёслы. Пӧртэм тылобурдоослы, пӧйшуръёслы укшась чигвесьёс, гадь котыретъёс укыр муспотон адскылӥзы. Алнашъёслэн киужъёсынызы трос калык тунсыкъяськиз. Владимир Камашевлэн туспуктэмъёсыз. Бусыосын... тушмон Республикаысьтымы будосъёсты утёнъя станция уй пал ёросъёсысь гурт удысъч управлениосы телефонограмма ыстӥз. Кез, Балезино Игра районъёсысь бусыосын нырысьсэ уноен шараямын будосъёсты изъянтӥсьёс. Со ӟег уд бубыли, ӟег удэз изъянтӥсь нумыр (озимая совка). Мугорыз бурдъёсыныз ӵош ог 46 миллиметр пасьта, гужемлы одӥг яке кык пол пуза (400-500-ысен 2000-озь). Нумыръёсыз сиё толйись ӟеглэсь удзэ яке куаръёссэ но модосъёссэ. Н. СЕРГЕЕВ. Удмурт Республикаысь Журналистъёслэн огазеяськонзылэн кивалтӥсезлы Л. М. Прокошевалы Гажано Людмила Михайловна! Сюлмысьтымы ӟечкыласьком юбилееныды! Куамын ар пала Тӥ ужаськоды ни шаерысьтымы иворъёсты вӧлмытон ёзъёсын. Глазов ёросысь редактор, Удмурт радиоысь собкор, Глазовысь "Красное знамя" газетлэн редакторез, Удмуртиысь Журналистъёслэн огазеяськонзылэн кылкутӥсь секретарез, бӧрысь кивалтӥсез луыса ужады. Котькыӵе удысын тӥ сюлэмдэс, вань тодэм-валамдэс поныса тыршиськоды, шуг-секытъёсыз быгатыса палэнтӥськоды. Тӥляд тыршеменыды валче шаерысьтымы журналистъёслэн союззы уката но сюлмаське государственной, муниципальной но коммерческой изданиослэсь кусыпъёссэс огазеяны, обществоын ог-огдэ валанэз юнматыны. Вань сюлмысьтымы сӥзиськом шудбуро но тазалыко улон, уно аръёс ӵожелы капчи мылкыд. Мед быдэсмозы вань малпанъёсты, ноку медаз кысы азьланезлы осконды. Удмурт Республикаысь Печатья но иворъёсъя министерство. Та ӟечкылан вӧзы итӥсько "Удмурт дунне" газетын ужасьёс но. Вань умойзэ Тӥледлы, Людмила Михайловна! Фоторепортаж Оштраклэн сюрестӥз Газетмылэн редакциез туэ куинетӥзэ ни лыдӟисьёсмы пӧлын лотерея радъяны чакла. Со шудытӥськоз республикаысьтымы "Удмурт дуннелы" гожтӥськисьёс пӧлын. Туэ но шудоезлы шедёз оштрак. Кылем арын со сюриз вал Кизнер ёросысь Вылын Бемыж гуртын улӥсьлы Наталия Ивановна Колесниковалы. Алигес ми вуылӥм та шулдыр гуртэ. Нырысь ик пырамы Натӥ апай доры. Дуно кунооссэ кадь пумитаз со милемыз. Оштрактылэн уксёеныз телевизор, пе, басьтӥ. Туэ но газеттылы гожтӥськи ни, шуэ. Бӧрысь пырано кариським "Югыт Бемыж" эштослэн правленияз. Алигес та хозяйствоен кивалтыны кутскиз Михаил Зайцев. Гуртоослэн верамзыя, председательзы кельше ужзэ быгатыса, валаса радъямез понна. Михаил Николаевич нырысь-валысь Вуж Кармыжысь шор ёзо школаын дышетӥсь луыса ужаз. Берло аръёссэ "Завет Ильича" колхозын валтӥсь механик вал. Табере - бускель гуртаз председатель. Инкуазь туэ татын но пӧртэм ӧй вал. Но со вылэ чӧлскыса уд улы ук. Гуртоос тыршизы, сюлмаськизы. Пудо сиёнзы тырмыт дасямын. Та вакытэ скаллы быдэ 8 килограмм йӧл усе. Нош ю-нянь сярысь ке верано, нырысь чакламъя, со гектарлы быдэ 10,6 центнер кутсамын. Котькытын сямен ик, татын но техника вужмемын ни. Шорлыдын али одӥг комбайнлы 300 гектар музъем усе. Бадӟым осконзы вал етӥнлы. Ӝуаз, ляб пушйиз. Озьы ке но, гуртоослэн суйзы-пыдзы воксё юскиськемын ӧвӧл. Оло, пе, 2000-тӥ ар маке но ӟечсэ, выльзэ сётоз ай. Нош вуоно ар понна газетмылы гожтӥськись пӧлысь шудоезлы "Югыт Бемыж" эштос оштраксэ кузьманы дась. Н. БАЙТЕРЯКОВ. Туспуктэмъёс вылын: 1. Чебер интыын сылэ Вылын Бемыж гурт. 2. Наталия Колесникова тэк пукыны уг чида. 3. Эштослэн тӧроез Михаил Зайцев но валтӥсь агроном Валентин Корнилов вуоно тулыс сярысь кенешо ни. Туспуктэмъёсыз В. БЕЛОМОРСКИХЛЭН. ШКОЛА НО УЛОН Визьмо книга кисыез золъя Выль дышетскон ар, шумпотон сяна, сюлэмшугъяськонъёс но сьӧраз ваиз. Соос пӧлысь одӥгез - дышетскон книгаос. Угось тросаз школа лыдӟиськонниосын учебникъёс уг тырмо. Куд-огез соос пӧлысь укыр вужмемын ини, нош уноез туала школаос ужало выль дышетскон программаосъя. Школаосы выль пособиос ысто яке туж ӧжыт, яке соос татчы чик уг вуо. Соин йырин анай-атайёс нылпиоссылы асьсэос книга басьяно луо. Пиналлы кулэ луись дышетскон книга шедьтыны секыт ӧвӧл али. Ижкарысь ик уно пӧртэм лавкаос трос пумо учебникъёсын вузкаро. Куд-огаз комиссионной отделъёсыз но вань. Татчы басьто вуж книгаосты. Кулэ луисьтэм учебникъёсты школа лыдӟиськонниосын луэ дунтэменгес вузаны. Трос пумо дышетскон книгаосын тужгес но висъяське "Свиток" вузкаронни. Татын дышетӥсьёслы но, дышетскисьёслы но чаклам пособиос вань. Калыкез "Свитокын" котьку тачак луэ, тужгес дышетскон ар кутскон азьын но куарусён толэзьлэн нырысетӥ арняосаз. Соку басьяськисьёсты лавкае кӧня ке адямиен гинэ пыртыло. Мукетъёсыз, ас черодзэс возьмаса, кырын сыло. "Свиток" - пичи вузкаронни. Али сое бадӟыматон ужъёс мыно. Оло, ульчаын возьмаськыса сылӥсьёс но ӝоген уз луэ ни. Мон татчы вуылон нуналэ но "Свитокын" калыкез кузьыли мында вал. - Нуналаз кӧнягес книга вузаськоды? - вазиськи одӥгезлы вузчилы. - Трос, - киыныз гинэ шонтӥз со но соку ик басьяськисьёсын вераськыны ӧдъяз. Татысь вузчиослэн тэк сылыны дырзы ик ӧвӧл уга: одӥгезлы таӵе книга кулэ, кыкетӥезлы - мукетыз. Нимаз адямиос книгаен вузкаро "Свиток" азьын. Учебникъёс ӵыж-вылесь ӧвӧл ке но, кие кутымонэсь на. Соосъя дышетскыны но луоно. Вуж книгаосын вузкарыны чипыен- куреген потэмын: татын - дас-дас кык аресъем нылпиос но, куатьтон-сизьымдон аресъем пересьёс но. Асфальт вылэ вӧлдэмын уно пӧртэм учебникъёс. - Лыктэлэ! Басьтэлэ! Милям олокыӵеез но вань, - базарын трос аръёс ӵоже вузкарем адямиос кадь ас вуззэс ушъяло дас ньыль-дас вить аресъем пиос. Руслан, Стас, Саша но Миша, зэмзэ но, та ужен кемалась выро вылэм. - Куинь-ньыль ар книгаосын вузкариськом ини, - огымысь вазё соос. - Нош кин тӥледлы ӵектӥз татын сылыны? - Нокин но ӧз. Асьмеос малпам. Дорын кулэ луисьтэм вуж дышетскон книгаос вань-а? Вань! Озьы тӥни потӥмы татчы. - Нош вуздэс басьто-а? - Бен. Милям дунъёсмы, "Свитокын" сярысь, пичиесьгес ук: вить манетысен кутскыса, кызь вить манетозь. Кызь витенэз воксё выль книга, - возьмато соос мыным. - Нош ма кариськоды поттэм уксёеныды? - Дышетскыны выль книгаос басьяськом. ... Кыкез пиос дӥсьтытэкгес палэнын сыло. - Ми нырысьсэ татын, - валэктӥзы Андрей Широков (14 арес) но Антон Кудрин (13 арес). - Туж ум пӧрмытӥське на. Нунал куспын куинь книга сяна ӧм вузалэ. - Соку ик басьто "Англи кылэз", вузай ни литературая, географияя учебникъёс, - вера Минадора Ильина, ог 60 аресъем нылкышно. - Кылем арысен та ужен вырисько ини. Нылпиелэн нылпиез, дыдымы, кылем арын школае мынӥз. Солы книгаос басьяны коньдон поттӥсько. Бен, котькуд анай-атай быгатоз меда ас нылпизылы дышетскон книга басьяны? "Свитокын", кылсярысь, тужгес дунтэмъёсыз учебникъёс сыло ог 25 манет, шоро- куспоосыз - 30-40. Огшоры школае ветлӥсь нылпиослы луэ ай азьвыл аръёсы поттэм книгаос басьтыны, дышетон програмаоссы укыр зол вошъямын ӧвӧл угось отын. Нош гимназиосын, лицейёсын, колледжъёсын? Татын воксё выль сямен ужало. Соин ик пиналъёслы выль, берло аръёсы поттэм учебникъёс кулэ. Нош соос туж дуно сыло. Кылсярысь, гимназие 1-тӥ классэ мынӥсь пиналлы анай-атаез ог 400 манет тыр дышетскон книга басьтоно, луо. Нош со нырысетӥ арез гинэ ук ай! Азьпалан эшшо дасо ар. Тросэз семьяос, коньдонзы тырмымтэен, пиналъёссэс рос-прос тодон-валан сётӥсь гимназиосысь, лицей классъёсысь огшорыосаз выжтоно уз луэ меда? Книга сяна но тыронъёс трос люкасько уго. Нош мукет ласянь учконо ке, уксёен книга басьянлэн пайдаез но вань. Тазьы пиналъёс дышозы, дыр, книгаез дунъяны - ас коньдонэнызы басьтэмын ук, азьвыл аръёсы сямен школа лыдӟиськонниысь дунтэк сётэмын ӧвӧл. Тодады вае ай, кыӵеесь луо вал учебникъёсмы? Котькуд бамын асьмелэн, ерпечка дышетскисьёслэн, суреданы-гожъяськыны быгатэммы шараямын. "Немец кылысь" Шрайбикуслы пежыр султэм йырси, бадӟым пельёс, поттэм кыл суредаськом но, Петька - дурак пӧрме. Яке артэ сылӥсь нылэн пи вадьсы "Таня+Вова" гожтытэк ум чидаське. Гуртэ сётэм ужез быдэстэммы уг поты ке, книга бамез кесиськом но гурын сутӥськом. Соку дышетӥсь но "2" уз лякы ни: ми-а мар-а, янгыш книгаямы сыӵе-сыӵе бамыз ӧвӧл шуыса? Оскем потэ: туала пиналъёс книгаоссэс эскерыса-утьыса возёзы. Асьсэлы сяна, мукетъёсызлы но соос яралозы тодон-валанъёс басьтыны. Озьы тӥни, визь басьтэмед потӥз ке, туала улонын ачид ик вузчи но, лыдъясь-чотась но, басяськись но луод. ЕЛЕНА КИТОВА, Удмурт кун университетысь студентка. Эко-сад - Ярын Матысь дыре Яр посёлокысь одӥгаз нылпи садын экологияя программаен ужаны кутскозы. Ӟеч ужрадлы кичӧлтон сётӥз ёросысь инкуазез утёнъя инспектор, нош роноысь специалистъёс талы дурбасьтӥзы. Табере кылиз на огкыл шедьтыны "Аленушка" нылпи садын ужасьёсын. Соос соглаш луизы ке, 2000-тӥ арлы ёрослэн бюджетаз, экофондлы чакласа, коньдон висъямын луоз. Н. ЩЕГОЛЕВА, Удмурт Республикаысь Инкуазез утёнъя кун комитетын ужась. Россия Федерациысь Федеральной Собранилэн Кун Думаяз депутатъёсты быръёнъя окружной комиссиосын ужасьёсты юнматон сярысь Удмурт Республикаысь Кун Кенешлэн Постановлениез "Россия Федерациысь Федеральной Собранилэн Кун Думаяз депутатъёсты быръён сярысь" Федеральной законлэн 20-тӥ ёзэтэныз валче Удмурт Республикаысь Кун Кенеш пуктэ: 1. Быръёнъя одӥг мандатэн 28 номеро Ижевск округъя комиссие юнматоно таӵе муртъёсты: Артемьева Ольга Леонидовнаез, вордскемын 1967-тӥ арын, дышетскемез вылӥ, Завьял ёросысь нотариусэз; Завгородний Олег Тимофеевичез, вордскемын 1943-тӥ арын, дышетскемез вылӥ, акциосын "Радиозавод" огазеяськонлэн генеральной директорезлэсь воштӥсьсэ, Ижевск город; Кричевская Ольга Владимировнаез, вордскемын 1961-тӥ арын, дышетскемез вылӥ, Ижевск город администрациысь управленилэсь начальниксэ; Лялина Алла Анатольевнаез, вордскемын 1964-тӥ арын, дышетскемез вылӥ, ватсаса тодон-валан басьтонъя "Культурно-досуговый центр" муниципальной учреждениысь методистэз, Воткинск город; Пиликин Андрей Викторовичез, вордскемын 1976-тӥ арын, дышетскемез вылӥ, "Республика" юридической агентстволэсь кивалтӥсьсэ, Ижевск город; Сазанов Александр Владимировичез, вордскемын 1963-тӥ арын, дышетскемез вылӥ, акциосын "Ремкомплект" огазеяськонысь валтӥсь инженерез, Воткинск город; Смаева Рада Викторовнаез, вордскемын 1971-тӥ арын, дышетскемез вылӥ, акциосын "Редуктор" огазеяськонлэн генеральной директорезлэсь воштӥсьсэ, Ижевск город; 2. Быръёнъя одӥг мандатэн 29 номеро Удмурт округъя комиссие юнматоно таӵе муртъёсты: Богомолов Виктор Ивановичез, вордскемын 1952-тӥ арын, дышетскемез вылӥ, Играысь юридической консультациысь адвокатэз, Игра посёлок; Бывальцева Валентина Кузьминичнаез, вордскемын 1952-тӥ арын, дышетскемез вылӥ, Удмурт Республикаысь Эскеронъя кун комитетлэн территориальной управлениысьтыз кун инспекторез, Игра посёлок; Емельянов Леонид Петровичез, вордскемын 1929-тӥ арын, дышетскемез вылӥ, "Долг" республиканской газетысь отделлэсь редакторзэ; Журавлев Виктор Яковлевичез, вордскемын 1954-тӥ арын, дышетскемез вылӥ, акциосын "Глазов пищекомбинат" огазеяськонлэсь генеральной директорзэ, Глазов город; Молчанов Михаил Викторовичез, вордскемын 1969-тӥ арын, дышетскемез йылпумъямтэ вылӥ, "Астро" страховой компанилэн директорезлэсь воштӥсьсэ, Ижевск город; Мымрин Андрей Леонидовичез, вордскемын 1960-тӥ арын, дышетскемез вылӥ, Сарапул город администрациысь аппаратэн кивалтӥсез; Рябов Иван Максимовичез, вордскемын 1944-тӥ арын, дышетскемез вылӥ, "Знамя" ёрос газетлэсь редакторзэ, Сюмси черкогурт. Удмурт Республикаысь Кун Кенешлэн Тӧроез А. А. Волков. Ижевск город, 1999-тӥ арын 16-тӥ сентябре. � 69-ИИ. Гурт хозяйствоын вуз поттӥсьёслэн продукцизы, сырьёзы но сиён-юонзы понна шонер дун пуктонэз умоятон сярысь Удмурт Элькунысь Правительстволэн Постановлениез 1999-тӥ арын 13-тӥ сентябре Ижевск город � 900 Удмурт Элькунлэсь 1998-тӥ арын 22-тӥ октябре кутэм "Агропромышленной производствоез кун ласянь чакласа возён сярысь 494-И номеро Законзэ быдэсъян но гурт хозяйствоын поттэм продукцилы дунъёсты, та продукцилэсь дасям сиёнъёслы дунъёсын одӥг быдӟагес возён вылысь, Удмурт Элькун Кивалтэт пуктэ: 1. Удмурт Элькунысь Гурт хозяйствоя но сиён-юонъя министерстволы: 1.1. 1999-тӥ арын 1-тӥ октябрёзь Удмурт Элькун Кивалтэтэ ӵектонъёс дасяса сётоно: переработка лэсьтэм сиён-юонэз суменак (оптовой) вузан-басьтон дунъёсты но гурт хозяйствоын поттэм продукцилы закупочной дунъёсты нормативъёсты чакласа тупатонъя; гурт хозяйствоын вуз поттӥсьёс но гурт хозяйствоын поттэм продукцилэсь сиёнъёс дасясь предприятиос куспын гожтэм огкылъёсы одно ик быдэстоно куронъёс пыртонъя. Огкыллэн одӥгез куронэз луыны кулэ дунъёсъя тупанкыл, кудӥзъя гурт хозяйствоын поттэм сиёнъёслэн закупочной дунъёссы сомындалы воштӥсько, кӧнялы воштӥсько переработка лэсьтэм сиён-юонэз суменак вузан-басьтон дунъёс. 1.1. Гурт хозяйствоын вуз поттӥсьёс но гурт хозяйствоын поттэм продукцилэсь сиёнъёс дасясь предприятиос куспын огкыл гожтонэз 2000-тӥ арын 1-тӥ январёзь радъяно. 2. Та постановленилэсь быдэсъяськемзэ эскерыса возёз Удмурт Элькун Кивалтэтлэн Тӧроезлэн воштӥсез М. И. Назаров. Удмурт Элькун Кивалтэтлэн Тӧроез Н. А. Ганза. Конституциын воштонъёс луозы Кызетӥ сентябре Удмурт Республикаысь Кун Кенешлэн Президиумезлэн кенешонэз ортчиз. Сое усьтыса, Кун Кенешлэн Тӧроез Александр Волков вакчияк тодматӥз Федерацияя Советлэн алигес ортчем заседаниезлэн ужаменыз. Со сӥземын вал терроризмен Дагестанын но Россиысь городъёсын валче кылдэм югдурлы. Кивалтӥсь Федеральной Собранилэсь вылӥ палатазэ туж ик ӧз ушъя, угось, та ужпумъёсъя со умой-умой ужрадъёс кутыны ӧз быгаты. Кун Кенешлэн вуоно сессиез азьын Президиум 28-тӥ сентябре Депутатлэсь нуналзэ ортчытон сярысь ужпум пуктӥз. Соку депутатъёс укмыс юанэз сэрттозы-пертчозы. Уноез соос герӟаськемын кун ваньбурен кивалтон ужпумъёсын. Президиумлэн заседанияз постановление кутэмын Удмурт Республикалэн Конституцияз воштонъёс но ватсанъёс пыртонъёс дасянъя ужась группа кылдытон сярысь. Нырысетӥосыз ӵектонъёс дась луыны кулэ ни вуоно арын нырысетӥ маёзь. Кызьы пусйиз кунэз радъянъя, калыкъёс куспын политикая но интыысь аскивалтонъя ялан ужась комиссилэн тӧроез Жанна Дворцова, Удмурт Республикалэн Валтӥсь Законаз воштонъёс но ватсанъёс пыртон бордын рос-прос ужаны дыр кемалась вуэмын ни, со герӟаськемын социально- экономической, политика но эрикрад удысын бадӟымесь воштӥськонъёсын. Удмурт Республикалэн туала Конституциезлэн пуштросэзлэн уно интыосыз туннэ куронъёслы уг тупало ни. Странамылэн ваньмаз ик улосъёсаз Россия Федерацилэн субъектэныз кун властен кивалтӥсь (губернатор, президент, глава) котькытын сямен быръе федерацилэн субъектаз улӥсь калык. Республикаен кивалтонъя политической институт кылдытон нырысь ик кулэ кун ужъёсын кивалтон системаез умоятон понна. "Удмурт Республикалэн Конституцияз сыӵе институт ӧвӧл. Республикамылэн Конституцияз воштонъёс но ватсанъёс пыртыны кулэ на соин но: солэн куд-ог ёзэтъёсыз ваче пумит луо Россия Федерацилэн Основной законэзлы. Кун Кенешлэн Президиумезлэн членъёсыз эскеризы мукет ужпумъёсты но. Ужрадэз нуиз Удмурт Республикаысь Кун Кенешлэн Тӧроез Александр Волков. Удмурт Республикаысь Кун Кенешлэн пресс-службаез. Россия Федерациысь Федеральной Собранилэн Кун Думаезлэн куинетӥ ӧтчамаз депутатъёсты быръёнъя окружной комиссиослэн заседанизы сярысь ивортон 1999-тӥ арын 20-тӥ сентябре Россия Федерациысь Федеральной Собранилэн Кун Думаезлэн куинетӥ ӧтчамаз депутатъёсты быръёнъя окружной комиссиослэн нырысетӥ заседаниоссы ортчизы. Отчы лушкем куараос сётыса быръемын таӵе муртъёс: Быръёнъя 28 номеро Ижевск округлэн окружной избирательной комиссиез Комиссилэн председателез - Вавилов Михаил Юрьевич, вордскемын 1975-тӥ арын, Удмурт Республикаысь Кун Кенешлэн Аппаратысьтыз правоя управлениысьтыз консультант. Комиссилэн председателезлэн воштӥсез - Антонов Олег Юрьевич, вордскемын 1971-тӥ арын, Удмурт Республикаысь МВД-лэн кун властьлэн органъёсыныз но общественной огазеяськонъёсын кусыпъёс возёнъя группалэн кивалтӥсез. Комиссилэн секретарез - Блинова Надежда Александровна, вордскемын 1973-тӥ арын, Удмурт Республикаысь адвокатъёслэн специализированной коллегизылэн "Юридическое агентство" "ИжЮринформ" юридической консультациысьтыз адвокат. Комиссия интыяськемын таӵе адресъя: Ижевск город, Пушкинской ульча, 276 (Ижевск городлэн администрациезлэн юртэз). Быръёнъя 29 номеро Удмурт округлэн окружной избирательной комиссиез Комиссилэн председателез - Мымрин Андрей Леонидович, вордскемын 1960-тӥ арын, Сарапул городысь администрацилэн аппаратэзлэн кивалтӥсез. Комиссилэн председателезлэн воштӥсез - Журавлев Виктор Яковлевич, вордскемын 1954-тӥ арын, акциосын "Глазовский пищекомбинат" огазеяськонлэн генеральной директорез. Комиссилэн секретарез- Бывальцева Валентина Кузьминична, вордскемын 1954-тӥ арын, Удмурт Республикаысь Эскеронъя кун комитетлэн Игра управлениысьтыз кун инспектор. Комиссия интыяськемын таӵе адресъя: Пичи Пурга черкогурт, Победа площадь, 1 (Пичи Пурга ёрослэн администрациезлэн юртэз). Туп интые сюй люкез уд ӵыжа Кытын будо чемпионъёс О-о, тодам ваисько ке школаын субботалы быдэ ортчылӥсь линейкаосты, соку ик син азе пуксе, кызьы физкультураен дышетӥсьмы "та-ак" шуыса лыдӟыны кутске ӵуказе районысь ӵошатсконъёсы мынӥсь спортсменъёслэсь нимъёссэс. Мон кадьёс сыӵе шӧртчиос шоры вожъяськыса учкылӥзы. Уката ик вуоно субботаяз соослы грамота сётъякузы. Али школаосын сыӵе вакытъёс шергес луо ни. Гуртысь администрациос сярысь веранэз ӧвӧл. Шӧртчиос ӧз кулэсме, кулэсмиз соослы саклык. Тани Селта ёрос администрациысь спорт удысэн валтӥсь специалист Владимир Германович Соловьев верамъя, районын спорт аналтэмын шуыны луоз. Коньдонтэк али нокинлэн но ужамез уг поты уго. Ма, собере районэ ӵошатсконъёсы нуыны гинэ я машина, я бензин уг сюры. Школаын дышетскисьёслэн мылкыдзы бадӟым, кужымзы тросгес бере, озьы но тазьы ӵошатсконъёсы вуо ик. Нош гурт администрациос пӧлысь, Монья, Гопгурт, Югдон, Сюромошур, Комсур сяна, пыриськисьёсыз уг луо. Ӧй ке луысалзы пӧлазы Анна Возисова, Аркадий Бабошин кадьёс, калык кемалась вунэтысал ни, дыр, районын ортчылӥсь спартакиадаос сярысь. Таӵе адямиос, асьсэос спортэн вырем сяна, сьӧразы мукетъёссэ но кыско, пиналъёсты лӧпкытъяло. Тани Аркадий Серафимовичлы 48 арес ини, нош сое коркан уд пукетыю. Лумбыт ужаса жаде ке но, спортзалэ мынытэк яке яратоно городкиезтэк уг чида. Городкиен шудонъя Аркадий Серафимович - республикамылэн куинь пол чемпионэз! Чемпионъёс сярысь ке, соос ёросын нокыӵе шуг-секытъёс шоры учкытэк будо - спортъя дас вить мастер, СССР-лэн чемпионэз Лидия Суднева, дуннелэн чемпионэз - Герман Скурыгин. Та берлоез алигес Испаниын, ньыльдон градус пӧсьын спортивной амалэн куатьтон иськемез ортчыса зарни медалез утэм. Спортсмен Селта ёросысь Вутно гуртын вордӥськемын. Соин ик селтаос сое асьсэлэн каро. Вордскем нуналэныз но бадӟым вормонэныз ӟечкыланы юри ӧтчазы чемпионэз ёрос администрацие. Герман тау кылзэ нырысь ик вераз дышетӥсьёсызлы. Соос уго пиналэз вормонъёсы бурдъяло улонэ сюрес возьмато. - Табере пиналъёсмылы адӟем карымон муртмы вань. Соос, Герман Анатольевич шоры учкыса, юнгес спортэз гажаны, вормонъёсты чиданы дышозы, - шуо спортсменэз ӟечкыланы лыктэм физкультурая дышетӥсьёс. Скурыгинлэн спортэ вамышъёсыныз тунсыкъяськисьёс ӧжыт ӧй вал, нош али ёросын со сярысь тодӥсьтэмез ик ӧвӧл, шӧдске. Герман Анатольевич шумпоттӥз бӧлякъёссэ - октябрь толэзе со ёрос школаосысь пиналъёсын пумиськылоз, аслаз будон сюресэз, спорт сярысь мадёз. - Тӥни кыӵеесь ми! - данъяське ёросысьтыз потэм чемпионэн Владимир Соловьев. - Табере, оло, спорт удыслы бадӟымгес саклык висъяськоз, уксё-а шуод, меӵак вераса. Куасэн бызьылӥсь уго куастэк уз бызьылы, футболэн шудӥсь туп интые сюй люкез уз ӵыжа. Вормисьёслы кузьым сётъянъёс нош воксё вуныны кутско ни. Ай тани сӥзьыл кросс ортчытоно - соиз доры ветлӥ ни, таизлы кин ке сьӧры ивортӥ... - Ӵошатсконъёсы озьы коркась корка ветлыса ӧтчаськоды-а, мар-а? - Цотэк кызьы? Мон вань спортсменъёсылэсь коркаоссэс тодӥсько. Телефон кысэмын, нош ужрад ялэмын ук. Бызьыл, бызьыл, спортсмен. Оло, ӵап самой пыдлось гуртын будэ дуннелэн вуоно чемпионэз. Басьты ай тани Скурыгинэз - пичи дыръяз котькуд ӵукна сьӧрлось гуртысь школае ӝог-ӝог вамышъялляз со, Селтала вуылӥз ӵошатсконъёсы шуыса гинэ. З. РЯБИНИНА. Редакцилэсь: "Югыт Бемыж" эштосэ ми вазенгес вуылӥм ни вал. Соин ик толон жингыртӥм та хозяйствое. Солэсь тӧрозэ Михаил Зайцевез интыысьтыз ӧм шедьтэ. Кузё я туннэ Кизнерын, ӵуказеяз Можгаын, мукет нуналаз Ижевскын. Ма, ӧд ке бызьылы, тыныд номыре но вайыса уз сётэ уго. Бухгалтериын ужасьёс ивортӥзы: вань юоссэ октэмын-калтэмын. Табере кутско люцерналэсь силос дасяны. Со кыкетӥзэ вуэм ини. "Кедрлэн" выжыосыз юнмало "Инкуазь - асьмелэн огъя юртмы, отын ик асьмелы улоно", - верамын Россиысь "Кедр" экологияя партилэн Удмурт ёзэзлэн шаерамы улӥсьёслы вазиськоназ. Алигес кылдытэм партия пумен шӧдскымон азинсконъёс басьтыны ӧдъя ни. "Кедр" (вожъёс) партия но солэн ёзъёсыз бадӟым уж нуо Россилэсь экономиказэ азинтон бордын, котырысь инкуазез утёнэз но лыдэ басьтыса. Со ас сьӧраз валтэ пӧртэм удысъёсыз но. Ваньзэ тае улонын ӟеч быдэсъян понна кулэ на та удыслы тупась нимысьтыз законъёс но кивалтон ёзъёсын тупась асьсэ адямиос. "Кедр" валтӥсь ужпуменыз лыдъя инкуазез политика но законъёс ласянь утёнэз. Инкуазь узырлыкъёсты эсэпсэ валатэк уже кутон асьмелэн улонмылы котыр ласянь изъян вае, котыр улосмес кырсёмытэ. Со сяна, "Кедр" партия тырше на дунтэк эмъяськонэз но дышетсконэз, выльысь берыктыны, нылпиослэсь тазалыксэс юнматон бордын умойгес ужаны. Вань ни нырысетӥ вормонъёс но. Кылсярысь, Россиысь Вож Кирос огазеяськонлэн Удмурт отделениеныз ӵош Кизнер но Камбарка ёросъёсын улӥсь нылпиос понна шутэтскон радъямын вал. Тазалыксэс юнматэм сяна, соос инкуазьмес утьыны но гажаны дышетскизы. Ортчытэмын на "Родники" клублэн нырысетӥ ужрадэз. Инкуазез утёнлы сӥзем конкурсын вормисе потэм нылпиос шаерысьтымы пӧртэм лагерьёсын тазалыксэс юнматӥзы. Та вакытэ "Кедрлэн" ёзъёсыз кылдо ни республикаысьтымы пӧртэм городъёсын но ёросъёсын. Озьыен, котырысь инкуазез утён удысын кужымъёс уката юнмало. Л. ПАВЫШЕВА. Бускельёс дорын Выль сюрес - ӵукнаосы Киров областьысь Ключи-Максимовская сюресэз кӧльыен шобырто ДСПМК-ын ужасьёс. Сое быдэсто, Киров управтодорлэн куремезъя. Жаляса верано, кильмезьёс пӧртэм шуг- секытъёсын пумисько, уг тырмы коньдон. Соин сэрен ӝог быдэстоно ужъёс ӝегало. Озьы толэзь ӵоже кӧльыен шобыртэмын сюрс метрлэсь кӧнялы ке гинэ ятыр сюрес. Та вие сюрес лэсьтонын ужа кык скрепер, куинь бульдозер ео каток. Берло дыре куазь шулдыр улэмен, сюрес лэсьтӥсьёс ужано луо аспӧртэм графикъя - одӥг сменаен, кудӥз кутске уйшор бере кык часысен, нош йылпумъяське ӵукна дас час котырын. Со сяна, соослэн йылӥзы на эстӥськонэн сюлмаськонъёссы. Табере ужзы эшшо дыг мынэ. Сюрес лэсьтӥсьёс Кировысь юрттэт витё ке но, азьланезлы осконзы пичи. *** Лэсьтӥськон уж азьланьтӥськоз Кильмезьын выль культура юрт пуктыны ӧдъязы вал ини кылем арын сӥзьыл. Коньдонэн шуг-секытъёс кылдэмен валче, та ужез "кынтӥзы". Кызьы тодмо, амалтэм маке, оло, выльысь азинтэмын луоз. "Кильмезь лэсьтӥськон участок" ОАО-лэн кивалтӥсезлэн М. Н. Дударевлэн верамезъя, ваньмыз умой радъяськиз ке, уж борды басьтӥськозы матысь толэзьёсы ик. Кулэ лэсьтӥськон материалъёс предприятиын вань, нош коньдонэн юрттэт вуиз ке, со фундаментэ "мыноз", кудӥз та вие ӝыныё аналтэмын вал. *** "Вераське ёрос радио..." Берло дыре столицаысь но пӧртэм улосвылъёсысь радиостанциос чик дугдылытэк ужало, нош ёрос иворъёсты уд кылы. Со сярысь ӵем гинэ ӝожтӥськылӥзы Киров улосвылысь В. Н. Сергеенко губернаторлы пӧртэм гуртъёсын но ёросъёсын улӥсьёс. Сюлмаськонзы юнме ӧз луы. Кылсярысь, "Вятка" кун телерадиокомпанилэн кивалтӥсез Ю. В. Лесников ёрос администрациосысь кивалтӥсьёсын ӵош (огкыл кутыса) котькуд ёросын усьтыны чакла интыосын радиовещание пунктъёс. Ёрос администрациосысь кивалтӥсьёслы косэмын 1999-тӥ арлэн кыкетӥ паларезлы отын ужась корреспондентъёслы коньдон висъяны. "Кировэлектросвязь" ОАО-лы ивортэмъя тодмо луиз, тросаз ёросъёсын радиоузелъёс та дырозь умой возиськизы. Соос ужаны кутскыса, реклама чотын ас ыштонъёссэс берыктыны быгатысалзы. Н. ТУРИН. Киров область. Гажа калыктэ Атае, Илья Ломберский, тодмо пор гожъясь но дышетӥсь, милемлы, куать нылпиезлы, городысь котьку вайылӥз книгаос. Нуналлы быдэ дышетылӥз соосты яратыны. Шуылӥз: книга - тодон-валан сётӥсь. Ачиз артист музэн лыдӟылӥз. Атаелэн ас библиотекаез туж узыр вал - кык сюрслэсь ятыр книга возиз. Ӝажыосын туж трос вал пӧртэм пумо энциклопедиос, справочникъёс, кылбугоръёс, политикаен герӟаськем ужъёс. Узыр вал пор литература но. Котыразы ӵем бергасько вал бере, книгаос дышетӥзы монэ асьсэды яратыны, дунъяны но гажаны. Татчыозь улытозям, туж уно тунсыко ужъёсын тодматски. Али но туж яратӥсько лыдӟиськыны. Берло аръёсы данак выль книгаос басьтӥ. Туэ гинэ - сю дас витьсэ. Нош гуртысьтымы библиотекае выль литература чылкак ӧз ву ни кадь. Атаелэн книгаосыз но аслам басьтэмъёсы книга ӝажыосын тузонӟыса уг кыллё - соосты лулысь-сюлмысь лыдӟо ӟеч мылкыдо бускельёсы но гуртоосы. Со сяна, бичасько аспӧртэмлыко пор калык кылослы, пор эстрадаысь тодмо кизилиослэн но ас кожазы ужась усточиослэн турлы концертъёссылы сӥзем аудио-но видеокассетаос. Соос но тэк уг кыллё - котьку калык пӧлын, сюрес вылын: кайгырыны лэзьытэк шумпотто поръёсты. Мынам гуртоосылэсь гинэ уг, бускель пор гуртъёсын улӥсьёслэсь но мылкыдзэс ӝуто. Нош ненег пор кырӟанъёсын аудиокассетаос калыкез бурдъяло огшоры ужан нуналъёсы но. Туэ ар ӵоже арлыдоос но школаын дышетскись пиналъёс азьын дас пол вераськимы пӧртэм ужпумъёсъя. Трос калык люкаськылон интыосын лэсьтӥмы куамын ньыль стенд. Ваньмыз соос верало пор гожъясьёслэн улэм-вылэмзы сярысь. Та дыр ӵоже ик дасямы ини куинь фотоальбом. Пор калык азьланяз но мед гажалоз аслэсьтыз фольклорзэ, литературазэ, культуразэ, вашкала йылолъёссэ, лулчеберлыксэ. Р. ТОКМУРЗИН. Воткинск - Америка Удмуртиысь эшшо одӥгез делегация кошке США-е. Сое радъя "Вож Кирос" огазеяськон. Асьме дорысь адямиос отын тодматскозы чурыт эстӥськонэн ужась ракетаосты быдтон амалъёсын. Воткинск ласянь Америкае мыно "Вож Кирослэн" Вотка ёзэзлэн кивалтӥсез Л. И. Голомысов, ёрос администрацилэн кивалтӥсез В. С. Варламов, Удмурт Республикаысь экологияя комитетлэн ёрос организациезлэн кивалтӥсез Т. В. Кривилёва. Б. НИКИТИН. Улон но сямъёс Вормы астэ ачид Улытозяз адями ма борды гинэ уг дышы. Кинлы ке ӵукна одно ик кулэ пӧсь кофе, кинэ ке бордазы кыско книгаос, тросэз нылкышноос улонзэс уг адӟо ни телесериалъёстэк. Но жаляса верано луэ, ӵемысь адямиен кузёяськыны кутско солы изъян ваись, шайгуэ кыскись макеос. Мон вераны турттӥсько наркотикъёс, кыскон но аракыен эшъяськон сярысь. Сюлэмшугъяськытэ соиз, ӵемгес та сюрес вылэ султо школаын дышетскись пиналъёс, егитъёс. Кылсярысь, шаерамы 1999-тӥ арын наркодиспансеръёс пыр ортчиз 119 пинал, доразы эмъяськизы 458-эз. Но зэмос лыдпусэз, кӧня адями выемын ини наркоманилэн зарезяз, нокин вераны уз быгаты. Тодмо огез, соослэн лыдзы унолы тросгес но арысь аре будэ. Кемалась дыр вуэмын ини рос-прос кутскыны та ужпум борды. Берло дыре кылдыло пӧртэм центръёс, огазеяськонъёс, соос юрттэт сёто шуге-леке сюрем адямиослы. Одӥгез соос пӧлысь - Ижысь Стрессъя институт. Татысь специалистъёс шаерысьтымы калыкез наркотикъёсын, юонэн герӟаськем ужпумъёсын тодмато. Эмъян сярысь, висёнэз капчигес дугдытыны, шуэ Ольга Анатольевна Зайцева, институтлэн директорез. Соин ик тросгес калык мед тодоз, макем кышкыт та черъёсын эшъяськон. Нуиське валэктон уж: кыӵе бервылъёс кельтэ соиз яке таиз наркотик, кызьы соосты вылтуссыя тодманы луэ. Адями ачиз бырйыны мед быгатоз, кулэ-а солы йырез шузимытӥсь макеос яке соостэк умойгес луоз-а. Бадӟым уж нуиське анай-атайёсын но. Котькуд семьяын пиналъёс уг эшъясько ук наркотикъёсын. Соку ма бордысь потэ кырыж сюрес вылэ кожон? Мугез ӵемысь тани кыӵе. Пиналлэн ассэ бадӟымен возьматэмез потэ, нош анай-атаез сое ялан пичиен лыдъяло на. Пияш яке нылаш утча бадӟымъёслэн дуннеязы потон амалъёс. Ӵапак таӵе дыре "юртто" наркотикъёс. Пинал вала, шӧдэ, эзелен эшъяськыса, со возьматыны быгатэ пичи луымтэзэ. ИНститутын валэктыны тыршо, таӵе югдур семьяын медаз кылдылы шуыса. Со сяна, татчы лыкто школае ветлӥсьтэм пиналъёслэн анай-атайёссы но, пиенызы яке нылынызы огкыл шедьтыны быгатытэк. Но тужгес но бадӟым саклык висъяське наркотикъёслы, юонлы, тамак кысконлы. Та эзельёсын герӟаськем адямиосын ужа психолог Олег Александрович Баринов. - Туннэ нуналлы республикаямы кышкыт югдур кылдэмын, - шуэ со. - Бадӟымесь городъёсын, Москваын, Санкт-Петербургын, наркотикъёс паськыт вӧлмемын. Отын улӥсьёс басьтыны быгато дунозэ. Удмуртиын ӵемгес кутӥське марихуана. Берло дыре шаерамы паськыт вӧлмемын героин. Туж трос тырмемын винт наркотик. Нырысьсэ со тодмо луиз 1978-тӥ арын Прибалтикаын но Удмуртиын. Кунгож сьӧрын винт сярысь туж ӧжытэзлэн кылэмез вань. Мар ватонэз, Удмуртия "данъяське" суицидэн. Нош наркотик адямилэсь керӟегъяськонзэ зӥбломытэ, аслыз осконзэ юнматэ. Йырез шузимытӥсь арбериос пӧлы выемын егитъёс. Уката ик югдур уродмиз 90-тӥ аръёсы. Вераны кулэ созэ, наркотикъёсын ӵемгес эшъясько городын улӥсьёс. Нош гуртъёсын вӧлмемын юон, токсикомания. Удмуртия котьку ик наркогенной улос вал. Шаермы пыр ортчо чугун сюресъёс, Сибирь тракт, бызе Кама. Кунмылэн лымшор улосвылъёсысьтыз шунды пуксён пала ворттӥськись наркотикъёслэн кӧня ке люкетэз кыле Удмуртие. Асьме дорын, Москваен ӵошатыса, та выллем вузъёс дунтэм сыло. Наркотикъёс, Удмуртиез гинэ ӧвӧл, быдэс дуннеез ньылыны дась. Ӧвӧл ни, дыр, сыӵе государство, кудаз адямиос уг курадӟо та эзельлэсь. Соин ик пӧртэм кунъёсысь специлаистъёс огазеясько, ӵош нюръяськыны мылкыд каро. Бере уг кыльы Стрессъя институт но. Туэ тулыс татысь ужасьёс вуылӥзы Берлинэ. Тодматскизы татысь эшъёссылэн ужан амалъёсынызы. Дасямын вал урод сямъёсын нюръяськонъя но таза улонэз вӧлмытонъя программа, ноябрь толэзе асьме доры Берлинысь специалистъёс вуыны кулэ. Соосын ӵош Удмуртилэн пӧртэм сэрегъёсаз дасямын луоз вить площадка, отын ужалозы нимысьтыз адямиос (кураторъёс но волонтёръёс). Соос чаклалозы семьяосты, кудаз вань юись, кыскись яке наркотикъёсын герӟаськем адямиос. Кураторъёслэн ӧтемзыя, институтысь психологъёс пумиськылозы сыӵе семьяосын. Ольга Анатольевналэн малпамезъя, таӵе ужрад пайда вайыны кулэ. Тросаз ёросъёсын али уг тырмо угось специалистъёс. Кылсярысь, Яр ёросын одӥг психологзы но ӧвӧл. Гуртоос городэтӥ юрттэт утчаса ветлоно медаз луэ, юрттӥсьёс асьсэос мед вуозы доразы. Жаляса верано луэ, та выллем ужрадъёс ӵем уг ортчыло. Россиын котьку сямен ик уг тырмы коньдон. Ольга анатольевналэн кылъёсызъя, асьме кивалтӥсьёс валаны уг тыршо, мар со сыӵе психология, кыӵе юрттэт сётэ психолог. Обществомы адямиез дунъяны уг быгаты. Улоз-а со дунне вылын, кулоз-а - бадӟым пӧртэмез ӧвӧл. Та ласянь асьмеос туж зол висъяськиськом Европалэсь. Кылсярысь, Франциын асьсэды быдтон ньыль учыръя дасяло ни нимаз программа, уже кутӥське трос коньдон. Соос понна котькуд адямилэн улонэз номырин дунъянтэм. Шуом, улонысь кошке пиосмурт, семьялэн йырыз. Соку ик кылдо уксёен герӟаськем ужпумъёс. Государство ас вылаз басьтэ таӵе семьялы пособие тыронэз. Но! Нокин уз вошты улэп адямиез. Олег Александровичлэн верамезъя, Германиын туж трос консультационной пунктъёс, реабилитацияя центръёс, соос возисько кунлэн, черклэн яке нимаз адямиослэн юрттэмзы вылын. Тани асьме делегациез нуллӥллям керамикая мастерское, со юри чакламын наркоманъёс понна. Мастерскоез кылдытонэ кутэмын 40 сюрс марка. Ветлэ отчы ньыль адями, арняяз кык пол. Ужало 2-3 час, вылаз ик, уждун басьто на. Таӵе амал тросэзлы юрттэ шуг-секытысь потыны, уж кузьма шумпотон но аслыд оскон. Озьыен, адями буйгатске, кулэяськонъёсыз воштӥсько. Специалистъёслэн верамзыя, наркоманъёс понна нырысь интыын сылэ лулсюлэм кулэяськонзы, мугор висёнзэс палэнтыны капчигес: кыллёз кӧня ке нунал, нокытӥыз уг висьы ни кадь. Нош кытысь шедьтоно коньдон, наркотик вузкасьёсты, соиз йырын весь огпӧртэм берга. Стрессъя институтэ лыктэм адями ачиз быръе: куштӥськоз-а со урод сямъёсызлэсь яке азьланяз но соосын артэ вамышъялоз. Специалистъёслэн верамзыя, со котькудӥзлэн аслаз ужез. Институын ужасьёс азьын мукет ужпум сылэ: валэктоно, кыӵе пытьы кельто наркотикъёс адямилэн улоназ. - Ми тыршиськом, адями кыл кутыны мед быгатоз аслаз лэсьтэм ужъёсыз понна, - шуэ Ольга Анатольевна. Быдэс обществоез эмъяны уз луы наркотикъёслэсь, юонлэсь, тамак кысконлэсь. Котькудӥз ачиз понна кыл кутэ. Быгатӥз ке со та эзельлы "уг" шуыны, сое нокин кужмысь карыны уз быгаты ни. Л.Постникова, Удмурт кун универститетысь студентка. Валэктэ юрист Сэрегез дася адвокат Лилия Шкляева Паспортын янгыш Мынам паспортам фамилляе гожтэмын Кирилов, дипломам но мукет документъёсам - Кириллов. Пенсие потон бумагаосме ӧз басьтэ, отын гожъямъёс огкадесь, пе, мед луозы. Мар кароно? В. Кириллов (Кирилов). Паспортысь янгышез тупатыны кулэ вал сое шараям бере ик. Озьы лэсьтыны али но бер ӧвӧл. Со понна вазиськоно пусйиськем (регистрировать яке прописать карем) интыысь югдурез утёнъя отделлэн (ОВД-лэн) паспорт люкетаз. Сьӧре басьтоно вордскем сярысь свидетельствоез. Таиз ыштэмын ке, вазиськоно архиве яке улон интыысь загсэ. Отын юрттозы кулэ документ шедьтыны. Уж сярысь выль закон Кылэме вань: дасяське, пе, Уж сярысь законъёсын выль кодекс (КЗоТ). Мар вылез отын, туалаеныз ӵошатыса? А. Корепанов. Выль документ нимаськыны кулэ мукет сямен - Ужъя кодекс. Со кужыме пырымтэ, малы ке шуоно, Кун Дума но, Президент но ӧз учке на. Документлы проект сярысь вераськыны али капчи ӧвӧл. Кыӵе со луоз юнматытозязы, шуг вераны. Туннэ пусйыны луоз куд-ог ӵектонъёсты гинэ. Со быдтэ уж басьтыны данак луонлыкъёсты. Тужгес шуге-леке сюрозы семьяен кышноос но кытын ке дышетскисьёс. Уж сётӥсь ӵемысь кыл уз куты ужъя законъёсты тӥямез понна. Вӧсь карем муртэ профсоюз но утьыны уз быгаты. Сыӵе законлы дэмланэз палэнтон вылысь, профсоюзъёс куд-ог ужрадъёс кутӥзы ни. Соос сыӵе куронэн вазиськизы Россиысь Правительствое но Кун Думае. Озьы ик ӵектӥзы Кун Думаын учкыны мукет проектэз. Таиз нимаське тазьы: "РФ-лэн КЗоТ-аз воштонъёс но ватсанъёс пыртон сярысь". Висеме понна... уллязы Монэ уже кутӥзы, туэ 1-тӥ сентябрёзь ужан вылысь. 25-тӥ августэ висьыны уси. Бурмыса 2-тӥ сентябре уже потӥ но, монэ отысь мозмытӥллям ни. Тросгес коньдон басьтэмед потыса, пе, тон юри аналскид висем улэ. Шонер-а лэсьтӥзы озьы? В. Пантелеев. Таӵе юанлы валэктон сёто Россия Федерацилэн Уж сярысь кодексысьтыз 29-тӥ но 33-тӥ ёзэтъёс. Бен, вылӥ верам учыре кивалтӥсь (администрация) быгатэ тӥледды ужысь мозмытыны, но 1-тӥ сентябрь бере гинэ. Огдырлы ужаны быгатымтэ дыръяды озьы лэсьтыны уг яра. 25-тӥ сентябре вордскем нуналыз Можга районысь Кватчи гуртысь Васильева Ольга Васильевналэн. Вань сюлмысьтым ӟечкыласько тонэ, бабае, вордскем нуналэныд. Сӥзисько юн тазалык, шумпотон, лыдъянтэм шуд но кема-кема улон. Яратыса но гажаса Света внучкаед. Нимаз уло - огкадь малпало Пичиесь гуртъёслэн адӟонзы одӥг: пытсасько магазинъёс, юрттэт сётон удысъёс, кысэ радио, ыше-быре электротыл. Сыӵе югдуре вуиз вал Селта районысь Зямай гурт но (ӟучъёс верамъя Малый Жайгил). Кӧня ке азьвыл татын чылкак 8-9 корка гинэ кылиз (туннэ 20-лэсь уно ни). Дышетӥсь Людмила Ивановна Столбова уж утчано луиз палэнын. Интыяськиз Юмга-Омга школае, 10 иськеме. Сокемысь солань-талань уд бызьылы, арняосын семьяезлэсь люкиськоно луиз. Юрт котырез чакла-утялтэ картэз - Виктор Михайлович. Секыт йӧтэ солы: пудоез но сюдоно, аслэсьтыд но кӧттэ маин ке кышъяно, уже но потоно (со механизатор). Вень вылын кадь улэ Людмила Ивановна но, урокъёслы-а дасяське, кӧлыны-а выдэ - дор палъёсыз весь син азяз. Озьы ке но улон герд уг сэрттӥськы. Кузпалъёс осконэн уло. Тани бадӟымез пизы пыд вылаз султэ ни, али Ижын сварщике дышетске. Нош покчиез, Роман, 8-тӥ классэ ветлэ, со дыре ик суреданы йӧндыре, та быгатонлыксэ нимысьтыз школаын волятэ. Кин тодэ, оло, мумы-бубыосызлэн лушкем малпанзы быдэсмоз ай - кутоз но Рома вань Селта калыкез паймытоз, тодмо художник луоз. Мар бен? Мед вылэм! Шер огазе люкаськыло Столбовъёс. Г. ЮСАЕВ. Мотоцикл лэсьтӥсьёс! 25-тӥ сентябре Всесоюзной мотопробеге потэм дырысен сизьымдон ар тырме, со кутскиз Нижний Новгородын но сюрессэ йылсаз Москваын. Ижысь мотоциклъёслэсь нырысетӥ модельёссэ поттонлы сӥзем та ужрад данъяз асьме промышленностьын выль удыслэсь вордскемзэ. Быдӟым странаямы мотоцикл лэсьтыны инты Удмуртиын юнме шорысь быръемын ӧй вал. Ижысь специалистъёслэн но мастеръёслэн-пыӵал тӥрлык поттӥсьёслэн вылӥ быгатонлыкъёссы выль производствоез азинтыны юрттӥз. Ижевскысь конструкторъёс быгатӥсь инженерлэн Пётр Васильевич Можаровлэн кивалтэмез улсын трос лэсьтӥзы, заводлэн капкаосыз сьӧры потыса, мотоцикл адямиос понна кема но оскымон мед ужалоз шуыса. "Иж" маркаен мотоциклъёс туннэ но республикамылэн но акциосын "Ижмаш" огазеяськонлэн визитной карточказы выллем луо. Берло аръёсы кылдэм секыт экономической югдур Ижевскысь мотоцикл лэсьтӥсьёсты уно шуг-секытъёс пыр поттӥз, соос продукцизылэн ӟечлыкеныз гинэ герӟаськемын ӧвӧл. Туннэ оскыса вераны луэ: "Ижмаш-Мотоысь" конструкторъёс но рабочийёс нош ик возьматӥзы - Ижысь мотоциклъёслэн ӵуказе нуналзы вань. Гажано эшъёс! Тӥляд азинскон сюрес вылады яркыт но сюлэме кылись учыръёс ӧжыт ӧвӧл. Соос пӧлын дуннеын ортчем ӵошатсконъёсын советской спортсменъёслэн уно вормонъёссы но, кузь иськемъем мотопробегъёсын азинсконъёс но, мотоцикллэсь выль модельёссэ эскерон но, тӥляд туннэ праздникты но. Вань сюлмысьтымы сӥзиськом тӥледлы Европаысь одӥгезлэсь бадӟым мотопроизводстволэсь кужымзэ но данзэ улӟытон ужын азинсконъёс. Шуд, тазалык но тыро улон тӥледлы но семьяостылы. Праздникен! Удмурт Республикаысь Кун Кенешлэн Тӧроез А. А. Волков. Удмурт Респуюбликаысь Правительстволэн Тӧроез Н. А. Ганза. Гажано машиностроительёс! 26-тӥ сентябре Россия Машиностроительлэсь нуналзэ пусъе. Та праздник Удмуртия понна уката ик дуно, угось республикамы промышленностез азинтон ласянь одӥгез азьмынӥсь улос луэ. Удмуртиысь оборонно-промышленной комплекс кузь сюресэз ортчиз. Солы кутскон сётӥзы 18-тӥ дауре Россиысь императоръёслэн Ураллы сӥзем указъёссы. Мукет урал заводъёсын ӵош Елизаветалэн указъёсызъя 1759-тӥ арын кылдытэмын Воткаысь завод, нош 1761-тӥ арын - Иж завод. Ӵапак татын 1807-тӥ арын мытэмын вал пыӵал тӥрлык поттон удыс. Асьмеос данъяськыны быгатӥськом: секыт вакытъёсы быдэс страна предприятиосмылы оскылӥз. Ижын дурем пыӵал тӥрлыкен утимы Атыкай музъеммес 1812-тӥ, 1941-тӥ-1945-тӥ аръёсы, вань ожмаськонъёсын. Дуннеысь устоез автомат - Калашниковлэн автоматэз - кылдытэмын но эскеремын "Ижмашын". 1930-тӥ-1940-тӥ аръёсы Удмуртия СССР-ысь оборонной но промышленной комплексын одӥгез валтӥсез луиз. Со вакытэ кылдӥзы выль предприятиос: ИЭМЗ, автозавод, "Нефтемаш" но трос мукетъёсыз. Странамылэсь кужымзэ но узырлыксэ .юнматон понна соос вераны луонтэм трос лэсьтӥзы. Туннэ республикаысь заводъёс, шуген ке но, секыт югдурысь пумен пото. Каллен ке но, ваньбур поттон улӟе. Со юнме ӧвӧл, дыр, угось асьмелэн кадь ӟеч специалистъёслэн ужзы но сюлмаськемзы котьку но вылӥ дунъяськозы. Юн оскиськом, асьмелэн дэмен тыршеммы Россилы юрттоз дуннеысь рынокын шӧдскымон инты басьтыны. Али но ини Удмуртиысь заводъёслэн вылӥ технологиоссы Россиысь но кунгож сьӧрысь инвесторъёсты бордазы кыско. Вань сюлмысьтымы ӟечкыласьком тӥледыз профессиональной праздникеныды. Сӥзиськом тӥледлы улонады ваньзэ ӟечсэ гинэ. Азинсконъёс тӥледлы. "Отечество" огазеяськонлэн Удмурт люкетэз. Шӧкыч Серем пыр Берыктӥз Вӧсяськись дораз черкысь бертэ. Со пумитэ шӧмо воргорон потэ но юнме шорысь йыраз таӵ! гинэ мыжге. Соиз погра. Йырсазез берытскем бере, мыжгисьлэсь юа: - Мар понна мыжгид? - Исусэз кечат-вамат каремды понна! - Ма со учыр 2000 ар талэсь азьло вал ук! - Сэре мар? Мон туннэ гинэ тодӥ ай! Каньылатӥз Кабинетын телефон жингыртэ. Кин ке юа: - Алло, КГБ-а та? - Ӧвӧл, КГБ ӧвӧл ни! Кӧня ке улыса нош ик телефон зурка. - Алло, КГБ-а та? - Ӧвӧл, КГБ ӧвӧл ни !! Кӧня ке вис бере нош ик телефон вазе. - Алло, КГБ-а та? - Ӧвӧл, КГБ ӧвӧл ни!!! Кӧня пол верано на? - Озьы-а ма? Вождэс эн вае, тае кылыса, кӧты каньы-ы-ыл луэ ук! Шаер Кыед пушкын кык нумыръёс, атаез но пиез пуко. Пиез юа: - Атай, улмо пушкын бусьтыргес, дыр, улон? - Бусьтыргес, пие, - лулӟыса шуэ атаез. - Апельсин пушкын эшшо но умойгес, дыр, атай? - нош ик юа пиез. - Умойгес, умойгес, пие, - му-у-ур лулӟыса шуэ атаез. - Соку вера, малы асьмеос кыед пушкын улӥськом? - Валаськод-а, пие, вань сыӵе дуно кылъёс - вордскем шаер! Шляпа Универмаге выль адямилэн кышноез пыре но бадӟым шляпаез йыраз кымаса мерта, синучкон азьын кильтыръяське, ас понназ гор-гор серекъя. Ог час пала ортчыса, вузкарись ӧз чида ни, нылкышно доры мынӥз но валэктэ: - Вождэс эн вае, та шляпа ӧвӧл, та жуг-жаг нуллон корзина. Шляпаос вылӥ этажын. Соиз шуэ: - Тыныд нош мар? Мыным йырсиосме зорлэсь утьыны со кулэ. Тани ме сю доллар но ымдэ ворса. Канжаськиз Харитонлэн кышноезлэн "Х" букваез нокызьы но верамез уг луы. Картэз врач доры ветлоно кариськиз. Эмъясь дэмлаз солы, кышнодэ, пе, одӥг пол дэймыты но ваньмыз интыяз пуксёз. Ог ӝыт пал Харитон пеймыт комнатаязы ӵогаськиз но выж вылтӥ ӵуш-паш, ӵуш-паш ветлэ, бурсэ. Со вие кышноез ужысь вуиз но куаляк луыса кесяське: - Каритон, тон-а со отын? Харитон ас ужзэ лэсьтэ, выж вылтӥ ӵуш-паш лёгаське, бурсэ. Кышноез воксё шулӟектыса юа: - Каритон, Каритон, тон-а со отын? Харитон уг куареты, нош пеймытэн пыд улысьтыз ведраез ӧз адӟы но канжаськыса дыбыр-шалтыр усиз. Кышноез нош ик кесяське: - Каритон, Каритон, Каритон, тон-а отын? - О-о, мон, мон со, мон, Каритон, калера басьтон. Эрик Асьме пуны Англие куное мынэм. Ог-огзэс зынъямзы, нюлӥськемзы бере, асьме пунылэсь юало ни, пе: - Кыӵе-мар улон-вылон тӥляд ре-ре-ре-структуризация бере? Соиз валэктэ: - Ре-ре-ре-решительно умой луиз. Вань сиён-юон тусьысь пияла улын табере. Жильыме ку-у-узь каризы. Вӧл-вӧл эркын улӥсько, кӧня, кызьы мылы потэ, озьы ик утӥсько. Люказ Рифиат Барабанов. ШӦКЫЧ Жалясько Юмореска Монэ ваньмыз тодо, Каратэ Дарья мон. Мон супыльтыны яратӥське ке но, ужме уг аналтӥськы. Шунды ӝутскон азьын султӥсько, яратоно картэлы ческыт шыд пӧзьтӥсько. Выжез маялтӥсько, нурскетӥселы сиён поттӥсько, скалмес ульча пуме келясько, ошмесысь ву ваисько. Васяелэсь соргетэмзэ кылзӥськыса пукисько, со нырыныз шулдыр крезьгураны быгатэ. Собере йыры кур луэ: султоно ни, нош со ялан кӧлэ. Бамаз шлач! шуккисько. Васие, шуисько, кут вирдэ сюпсе вал, вии мон сое, тани учкы, ма быдӟа со. Пичи нунылы сямен кырӟасько: Ойдо султы ни чальгес, Нунал но ортчоз ӝоггес. Пинь потоз, шунды вордскоз, Ӝок вылэ выль нянь вуоз. Жаляно пиосмуртъёсты, уката ик кузпалъёсты. Ма, кызьы уд жаля, куке соос макмырен курадӟо. Дырлэсь вазь тазалыксы уродме, пенсие потыны уг вуо, шайвылэ тубтоно ни. Соин картме нуныятыса возисько. Ачим пу корасько, вандӥсько, пильылӥсько. Васие тӥр борды кутске гинэ, тышкаськисько ни: "Гогыед вырӟоз, больницае шедёд, яратоное". Сюлмаськемме адӟыса, картэ монэ ки вылаз нуллыны дась. Но мон меӵак шуисько: "Кӧтыд вырӟоз, тани жарить карем парсь сӥль си но, мамык валес вылад погылляськы". Сыӵе шулдыр улонэ, Яратэ монэ картэ. Мар карод, куке кӧлэ со, Мон ачим ваньзэ лэсьто. Сюлэм висе. Мукет кышномуртъёс кузпалъёссэс воксё уг жаляло. Нием коньыос кадь куасьмемын. Сиён но йӧскадь уг шедьылы, мискиньёслы. Ведь шальк-шальк пал кышномуртъёс гинэ кылемын гуртамы. Таӵе югдурез одно ик воштоно. 2000-тӥ арез кузпалъёсты жалянъя арен ялоно. Кин соглаш, кидэс ӝутэ. Г. БАЖЕНОВА. Правительствоын Валлян Правительстволэн Тӧроез Николай Ганза Вавож ёросэ вуылӥз. Со ветлӥз республикаысьтымы одӥгаз ӟеч хозяйствое "Удмуртия" СХПК-е, Тыловыл-Пельга черкогуртэ, Нюрдор-Котьяысь торфопредприятие. Райцентрын со тодматскиз культура юртэз лэсьтонэн, пумиськылӥз крезьгуро школаысь коллективен, югдурез утёнъя отделын ужасьёсын. Николай Ганза бадӟым саклык висъяз Куӟебай Гердэн герӟаькем интыослы. Тодматскиз кылбурчилэн Бадӟым Докьяысь музеен, ветлӥз Малиновка гуртэ. Правительстволэн Тӧроез музейлы юрттоз шуыса оскытӥз.Нуназе бере ёросысь кивалтон удысын ужасьёсын кенешон ортчиз. Толон премьерлэн пумиськылӥз акциосын "Сиданко" огазеяськонысь адямиосын, собере - республикаысь профсоюз активен. Туннэ Николай Ганза Алнаш ёросэ вуылоз. Удмурт Республикаысь Правительстволэн пресс-центрез. Гажано эшъёс! Сюлмысьтымы ӟечкыласьком тӥледды профессиональной праздникеныды. Машина лэсьтон удыс промышленность ласянь азьмынӥсь котькуд государстволэн инъетэз луэ. Соин юн герӟаськемын страналэн экономикаез, дуннеын но ас дораз политикаез. Странаысьтымы машина лэсьтон удыслэн азинскон сюрес вылаз Удмуртия нимаз инты басьтэ. Республикаысьтымы машиностроительёс котьку ик данъяськылӥзы вылӥ быгатонлыкъёсынызы, уно пол дуннеез паймытъязы поттэм продукцизылэн вылӥ ӟечлыкеныз но оскымон луэменыз, Атыкай музъеммы понна ваньзэ сётыны дась луэменызы. Тӥляд поттэм продукцидылэн бадӟым люкетэз азьло но, али но Россилы дуннеысь сообществоын шӧдскымон инты басьтыны юрттэ. Туннэ быдэс странаенымы ӵош удыс секыт вакытэз чидано луэ. Улонамы выль социально- экономической кусыпъёс пыро. Секыт вакыт, но сотэк уг лу. Оскиськом, республикаысьтымы машина лэсьтӥсьёс вань шуг-секытъёсты чидалозы, соос пыр потыса, вожвылъяськонын тужгес нимо-дано оппонентъёсын нюръяськыны, соосты вормыны дась луозы. Тӥледлы бадӟым но дано ужады азинсконъёс сӥзиськом. Коркаосады мед кузёяськозы шуд, тыро но тупаса улон. Праздникен! Удмурт Республикаысь Кун Кенешлэн Тӧроез А. А. Волков. Удмурт Республикаысь Правительстволэн Тӧроез Н. А. Ганза. Шӧкыч Анатолий ПЕТРОВ Пычей Вань юанэз но веранэз: "Я, ку луоз ни сюанэд"? "Ма, � шуисько, � мусо эше, Куке ортчо ке сюанъёс, Соку луо шат юанъёс"? Уг лу, эке, буйгатыны Ялан выре выжыятны: "Я, кыӵе-мар ни кузпалыд, Кыӵе будо нылпиосыд"? "Ма, � шуисько, � мусо эше, Умой шуи ке � вожъяськод, Урод шуод � жалямъяськол". Уг лу, ява, буйгатыны, Нош ик выре выжыятны: "Маке мултэс начармемед, Кышноеныд люкиськемед?" "Ма, � шуисько, � мусо эше, Пал вайыжен улон мӧзмыт, Шуныт коркан, эсьма, юзмыт". Нош ик уг лу буйгатыны, Таре кутске дышетыны: Ас улэмед ке, пе, уг быга, Мурт улонэз, пе, тон эн туга... Тӥни озьы пычей сямен Сюлэм пушкы мертче пумен. Оло, кин ке но косӥсь, Со кылыныз тонэ сӥсъя. Уд шӧды ведь ожалтэмдэ, Бӧрысь уд куртчы гырпумдэ. АСЬМЕЛЭНЪЁС КУНГОЖ СЬӦРЫН Дано но дуно Швейцариын Цюрихысь аэропорт "Аэрофлот" компанилэсь "Боинг" самолётсэ часлэсь ятыр кутыны ӧз быгаты, "Москва-Цюрих" рейсэн вуэмъёсты шуге-леке вуттыса. Мон но кышканы ӧдъяй: кӧня час витьыса пуконо луоз пумитаны вуэм ӵыжы-выжыосы? Вылаз ик, Москваысь но ми 4 часлы ӝегаса потӥм. Шугъяськеме юнме вылэм. Цюрихысь телевидение нимысьтыз каналъя вор сётыны быгатэ котькуд авиарейсъя. Соин ик ӵыжы-выжыосы аэропортэ вуизы самолётмы пуксем бере гинэ. Котырме басьтытозь, потон ӧс дорын соос монэ роза букетэн пумитазы ни. Доразы вуыса, соку ик ӝӧк сьӧры пуктӥзы, утялтӥзы зарни шампанскоен, юон пӧлын уя зэмос зарни "тузон". Озьы кутскиз толэзьлэсь ятыр Швейцариын кунояськонэ. 360 сюрсъем Цюрих - ужась, банкъёсын тырмытэм город. Коньдон татчы быдэс дуннеысь люкаське. Цюрих монэ паймытӥз мултэс чылкытлыкеныз. Тузонэз нокытысь уд адӟы! Ульчаосты сузяло пылесосэн, мисько шампунен. Город пумын шӧдӥське ни гуртлэн шӧмыз - тӧл вуттэ я сяська, я кыед зынъёсты. Ӝытазе Цюрих пӧрме аттракционъёсын туж бадӟым площадьлы. Вань калык ульчае шутэтскыны потэ. Кыӵе кылын но уг верасько, кин но татчы лыктэмын ӧвӧл! Ужало ресторанъёс, "пӧсь яратонзэс" витё "уй бубылиос". Соос калык пӧлын сокем уг висъясько, но тодмалод сотовой телефонзыя. Таиныз уен-нуналэн уг люкиськыло. Ма карод - ужзы сыӵе. *** Городын улӥсьёс асьсэды эркын возё, керпотон, возьдаськон сямзы ӧвӧл. Огаз барын милемыз сюдӥз-утялтӥз ӝужыт, чебер егит нылмурт, юбкаез туж вакчи, гадяз татуировка пуктэмын, берло модая причёскаен, юн буяськемын. Котыр ласянь синмаськымон кадь. Но маиз ке но мыным ӧз кельшы: мултэс бадӟым киосыз но пыдъёсыз. Берлогес веразы: со "транссексуал", операция лэсьтытозь, та нылмурт пиосмурт вылэм. Швейцариын сыӵеос трос, пиосмуртысь кышномуртэ "выжон" дуно ке но сылэ. Уксё туала вакытэ ваньзэ лэсьтэ уга. Базель но Берн городъёс сямен, отчы вуылӥ 1996-тӥ арын, Цюрих луэ немецкой Швейцария. Вань на итальянскоез но французскоез. Тужгес ӟеч уло немец люкетаз, отын ик самой вылӥ дунъёс. Кылсярысь, дунтэмез картофка 1 килограммез сылэ 4 швейцарской франк яке, асьме сямен вераса, 100 манет; 1 курег пуз - 20 манет. Палэнысь ваем сиён-юон татын дунтэм, Швейцариын поттэмез - туж дуно, малы ке шуоно, лэсьтэмын чылкыт, вылӥ ӟечлыко, тазалыкез утись амалэн. Швейцарецъёс тросгес басьто асьсэлэсь продукцизэс, импортлы уг оско. Зэмен но, кин ӟеч вуззэ муртлы келялоз? Дунъёс татын туж ӝог усё, куд-ог дыръя 90 процентозь. Шуом, сиён-юонлэн вузан дырыз ӵуказе ке йылпумъяське, туннэ сое тӥ басьтыны быгатоды туж дунтэмен. Ваньмыз сярысь тодыны луэ рекламая газетъёс пыр. Таӵе газет дунтэк вуэ котькуд почта ящике нуналлы быдэ. Дунъёс усё мукет вузъёслы но. Велюрлэсь вурем нылъёслы брюки сылэ ке вал 190 франк, кӧня ке нунал ортчыса вуиз 10 франкозь. Умой ук! Озьыен, государство узырезлы но, куанерезлы но улыны-вылыны луонлык сётэ. Тӥни малы Швейцариысь кураськисьёсты уд адӟы. *** Агаелэн нылыз улэ Цюрихлэн ӟеч интыяз. Корказы - нюлэсэн артэ. 5 комнатаен квартиразы - 4 этажъем юртлэн нырысетӥ этажаз. Швейцариын со престижной но дуно лыдъяське, малы ке шуоно, балконысен пырак потӥськод аслад садад, аслад возь вылад. Садэз но, сяськаосты но утялтыса возе городысь нимысьтыз служба. Татын будо вож-вож сылӥсь писпуос но куакъёс, шутэтскыны пуктэмын креслоос, ӝӧкъёс, куноосты утялтон арбериос. Огъя вераса, ваньмыз лэсьтэмын семья понна. Вож участок котыртэмын, капкаез тунгонаське. Мон чакламъя, возь вылын погылляськыны тужгес но кельше Латвиысь ваем Сёма нимо коӵышсылы. Со доры куное ветло (мон таӵезэ ӧй адӟылы на) парсь быдӟа куаем, утялтэм "эшъёсыз". Швейцариын пуныослы, коӵышъёслы нимысьтыз саклык висъяло, дыраз сюдо, эмъяло, юмшаны поттыло. Сёмалэн - аслаз туалетэз, кроватез, сиськон тӥрлыкез. Сюдо менюя, со нуналлы быдэ сямен вошъяське. Ӵышкон, сынан арбериоссы но коӵышсылы тупамон быръемын-басьтэмын. Маиз гинэ отын ӧвӧл! Швейцарие ваемзы бере, Сёмказы висьыны усиз. Ӝог юрттэт сётонъя служба пуктӥз диагноз: кынмамын. Коӵышез соку ик больницае нуизы. Отын зэмос висисез сямен кылльытӥзы реанимацияя отделениын, капельница улын. Кык арня эмъяськемез ӵыжы- выжыосылы 800 франк тыр луиз, яке 16 сюрс манетлы. Соос понна - дуно ӧвӧл, (ӵыжы- выжыелэн кузпалыз толэзяз ог 10 сюрс франк басьтэ). *** Швейцария - выжыкыл дунне. Асьмелы, Россиысь вуэмъёслы, сое валаны шуг. Али гинэ вордскем пиналлы татысь банк счёт усьтэ ни, кӧня ке коньдон понэ. Со вӧзы асьсэлэсь вкладзэс ватсало мукет банкъёс. Быдэ вуытозяз будӥсь муртлэн кузьымез ӟеч люкаське. Таӵе но юрттэт сёто. Шуом, семьяын я кышноез, я картэз кулыны-бырыны шедиз. Пал кылем мурт сярысь сюлмаськонэз государство ас вылаз басьтэ но толэзьлы быдэ солы 2 сюрс швейцарской франк тыре. Коньдон висъяське, выль семья кылдытытозяз. Пособие басьто пиналъёссы но - быдэн 1 сюрс франк. Швейцариын улӥсьёс, 25 аресысен 40 арессэс тырмытытозь, пенсионной фондэ коньдон тыро, 40 арес бере - мылкыд каремзыя. Люкаське ог 100 сюрс франк.Та коньдонэз котькуд адями быгатэ ас тодэмезъя-валамезъя кутыны. Яке со басьтоз улон интылы шуыса бадӟым ссуда, яке - музон кулэяськонъёсызлы. Коркаос отын туж дуноесь. Огшорызэ басьтыны луоз 10 миллион франкозь. Музъем дуно. 40 аресъем швейцарецлэн коньдонэз тырмыт люкаське ни та дыр ӵоже. Кылсярысь, 2 миллион франклы со басьтэ ссуда, корка понна тыре нырысетӥ люкетсэ, отӥяз пунэмаськемзэ берыктэ улон инты понна дун тырыса сямен, толэзяз 1-2 сюрс франкен. Шуом, кыӵе ке муген ссудадэ дыраз берыктыны ӧд быгаты. Тае эскере-чакла нимысьтыз служба. Адями коньдон ласянь туж шугъяське но секыт югдуре ке шедемын, пунэмен тыронзэ государство ас вылаз басьтэ. Семья кылдытыны швейцарецъёс уг дырто, но нылпиосты ярато. Семьялы быдэ 2-4 пинал вордо. Нылпи куштон (аборт) Швейцариын алэмын. Пинал ваёнлэсь утиськон понна, нылкышноос таблетка юо. Соосты вузало вань магазинъёсын но аптекаосын. Кузпалъёс люкиськон дыръя, пиналъёс атайзы вӧзы кылё, малы ке шуоно, коньдон ласянь воргорон ӟечгес улэ. *** Та странаын куноятозям, вуылӥ трос семьяосы. Ваньмыз сямен соос уло ӟеч коркаосын, квартираосын, нылкышноос уг ужало, пинал вордо-утялто. Юасько: - Нош маин выре семьялэн йырыз? - Ужа. Милям ведь кин ужа, со гинэ сие. Зэмен но, та паймымон странаын ваньмыз радызъя пуктэмын, кин сюлмысь ужа, со ик ӟеч улэ. Вань солэн машинаез но, дуно мебелез но. Швейцариын куанеръёс, ёрмисьёс, сютэм костаськисьёс ӧвӧл. Ужтэк пукисьёс гинэ но толэзяз нылкышноос 600 франк басьто, пиосмуртъёс - 800. Улон инты понна соос дун уг тыро. Озьы ик мозмытэмын налогъёслэсь. Но соослы уг дэзиськы пуны но машина возьыны.Тӥни сыӵе законъёс. Ӵем гинэ адӟоно ульчаосы поттылыса пуктылэм мебелез, телевизоръёсты но холодильникъёсты. Соос тӥяськемын но, сӧриськемын но ӧвӧл. Но кузёоссы басьтӥзы выльзэ, вужезлэсь мозмытскизы. Куштэм арбериос бордын озьы ик гожтэмын, "Кинлы кулэ, нуэ милемды дорады, пожалуйста". Швейцариын котьмалэсь но дуно сылэ... жуг-жаг тырон пуйы. Соин ик нуналлы быдэ йыр висён шеде: кытчы, кызьы интыяно кылем-мылемъёсты. Соосты одно ик лач-лач тыроно нимысьтыз пакетэ, тупатэм интые - контейнере. Озьы ӧд ке лэсьты, тырод туж бадӟым штраф. Обществолэсь огъя куронъёссэ быдэсъясьтэм муртэ татын ӝог шедьто - нокытчы уд ватскы. Цюрихлэн ульчаостӥз "бызьыло" кык интыем электромобильёс - Швейцариын "Мерседес" фирмаен ӵош поттэм машинаос. Дуныз 14 сюрс франк. Та коньдонэз куанергес улӥсез но люканы быгатоз. Цюрихын син шоры озьы ик йӧто скалэз данъясь статуяос. Соос ог сюрс мында! Тӥни макем сӥё-дано каро та пудоез Швейцариын улӥсьёс. Нош кыӵе сыр лэсьто! Мон озьы ик пумаз-йылаз валаса ӧй вуы, кӧня пумо со магазинъёсы вуэ. Огезлэсь мукетыз ческыт, ачиз ымын шуна. Ӵыжы-выжыосы верамъя, куинь ар ӵоже басьяськемзылы быдэ соос ялан музон сортсэ басьто. *** Цюрих - тыршись город, шутэтскыны но быгатэ. Мыным тужгес но кельшиз Санкт- Галленысь ву парк. Цюрихлэсь со 80 иськемын. Тазалыкез юнматонъя но шутэтсконъя комплексын олокӧня пӧртэм бассейнъёс: огаз вуэз - зарезьысь, мукетаз - шурысь, куинетӥяз - гурезь тыысь. Огез - мур, мукетыз - лазег. Огаз - зоре, кыкетӥяз - "пӧзе". Саунаос нылкышноос понна но, воргоронъёс понна но одӥг, ваньмыз гольык пыласько. Нырысь-валысь мон солы туж пайми. Кышномуртъёслы саунае шуыса пыри но, бӧрсям ик ог 25 аресъем шортэн дӥсяськем воргорон вуиз. Куалектэменым мон номыр вераны ӧй вутты. Нош со дыртытэк гинэ изъёс вылэ эвкалиптлэсь настой кисьтӥз но ӵушконэн шонаны кутскиз. Кызьы бӧрысьгес валай ини, саунаын ужало егит, чебер пиос. Татчы шедён понна, соос ортчо нимысьтыз конкурс пыр. Бассейнъёс сяна, комплексын вань ресторан, солярий, липет улын - искусственной пляж, шутэтскон комнатаос но мукетыз. Лумбыт ӵоже вань процедурной залъёсты, кабинетъёсты уд ортчы - соос лыдъянтэм. Мыным яраз инбам улысь бассейн. Январьлэн пумаз пыласьки! Швейцариын куазь небыт ке но, гурезьёсын кезьыт, лымы но усе. Бассейнын вуэз - 40 градус шуныт. Нош йыр вылад каллен гинэ васько лымы пырыос. Ачиз бассейн но лымы люкъёсын котыртэмын. Пыласькисьёс вуысь пото но соос вылын погыллясько. Часлы быдэ ветлэ тренер, зарядка лэсьтытэ. Бассейн борддоръёсысь ыбыса потӥсь ву быдэс мугорад массаж лэсьтэ. Таӵе шутэтскон дуно уг сылы - 1 час понна тыроно 30 франк, быдэс арлы абонементлэн дуныз - 300 франк. Ӵыжы-выжыосылэн квартираязы таӵе ик гидромассажзы, солярийзы, велотренажёрзы вань. Мон шутэтски агаелэн нылыз дорын. Шораз учкыса-чалкаса, гуртаз со жадьымоназ уг ужа. Дӥськут миське прачечнойын. Квартираязы тузон уг пуксьы, утялтӥськонэз ӧжыт, малы ке шуоно, ульчаосты нуналлы быдэ шампунен мисько. Маин со сюдэ кузпалзэ, куноосты? Туж яратыса пӧра удмурт сиёнъёсты, пыжиськемъёсты. Шаньгиен но, пирогъёсын но Швейцариын утялски. Кӧня ке кыл вераме потэ посуда миськон сярысь. Юрттӥсько шуыса, мон асьме сямен гылъяны кутски вал сиськем бервылмес. Соос монэ серекъязы: машина, пе, ӝоггес но, чылкытгес но миськоз, киостэ но уд котты. Озьы ик вылэм. Племяницаелэн коркаез пырак нюлэсэн артэ сылэ. Шонергес, дыр, сое парк шуыны, ӝикытак утялтэмын, сюресъёсыз ӵужемын, вань жуг-жагез сузямын. Ӝытъёсы татчы пуныосты, коӵышъёсты юмшаны поттыло. Пеймытэн медаз ыше яке машина улэ медаз шеде шуыса, чыртыязы уин пиштӥсь е керттыло, коӵышъёслы - чингыли. Трос интыосысь адӟод пуныослы "туалетъёсты". *** Москва бере Швейцария паймытэ аслаз чалмытэныз, нокытчы дыртытэк улон-вылонэныз. Адямиос но татын ог-огзылэсь номырин уг висъяськ: ваньзы огвыллем дӥсен, огкадь пальпотӥсь тусбуен. Данакез нулло драплэсь вурем пальто яке плащ. Январе но соос ветло туфлиен, перчаткатэк, йыре пононтэк. 100 градус кезьытэн гинэ арлыдоосты адӟод шубаен. Кулэсь вурем дӥсез татысь туж шер пумиталод. Россиысь вуэмъёсты нош ӵапак тодмалод чайы кулэсь изьыосъя но кулэсь вурем курткаосъя. Римма Николаева. Ижевск-Москва-Цюрих. 18-тӥ сентябре "Друж" ООО-лэн контораысьтыз лушкамын "Евразия" банклэн вить векселез. Сериез: УДМ. Номеръёсыз: 0002503, 0002296, 0004982, 0005170, 0004641. Та вексельёс кияды шедизы ке, ивортыны куриськом милицилэн городысь яке районысь отделенияз. Яке - Алнаше 2-11-95 телефон номеръя (кодэз: 250). Вексельёсын ӵош ик лушкамын печатьёс: азьвыл ТОО-лэн (ООО озьы нимаськылӥз) но "Друж" крестьян хозяйстволэн. Соос уже кутӥськыны уг быгато ни. Та печатьёсын юнматэм документъёсты но шедьтӥды ке, ивортыны озьы ик куриськом милицие яке вылӥын пусъем номеръя. Ивортэмды дунъяськоз. Осконды медаз кысы 26-тӥ сентябре - Машиностроительлэн нуналыз. Та нуналъёсы озьы ик пусъёзы Воткинскысь заводлэсь 240 ар тырмонзэ. Республикаысьтымы машиностроение удысын гажано ужасьёс! "Воткинский завод" ГПО-ын гажано тыршисьёс! Комиссилэн нимыныз ӟечкыласько Тӥледыз дано праздникеныды. Асьтэлы но тӥляд семьяостылы юн тазалык. Сюлэмъёсады медаз кысы ӵуказе нуналлы, республикаысьтымы машиностроительной комплекслэн выльысь улӟонэзлы осконды. Удмурт Республикаысь Кун Кенешлэн Промышленностья, соин герӟаськем удысъёсты азинтонъя, вузъёсын но юрттэтъёсын рынокез кылдытонъя ялан ужась комиссиезлэн тӧроез В. М. КУШКО. Огсыр но пайдаё ужалэ Удмурт Республикаысь Промышленностья но транспортъя министрество Удмурт Республикаысь машина лэсьтонъя предприятиослэсь кивалтӥсьёссэс но коллективъёсты сюлмысьтыз ӟечкыла дано праздникенызы - машина поттӥсьёслэн нуналэнызы! Тӥляд нуналды Россиысь мукет праздникъёслэсь номырин но уг висъяськы. Тӥляд тыршеменыды, машина лэсьтӥсьёс, экономикаын секыт вакытэ азьланьтӥське но азинске автомобильёс но мотоциклъёс, спорт но пӧйшуран пыӵалъёс, станокъёс, топливно- энергетической комплекслы но гурт удыслы оборудование, калыклы кулэ луись вузъёс поттон. Машина лэсьтӥсь предприятиос бадӟым инты басьто Россилэсь обороноспособностьсэ но кышкытлыклэсь утиськонзэ юнматонын. Гажано эшъёс, праздник нуналады сюлмысьтым сӥзисько тазалык, семьяосады шудо-буро улон, ужады азинсконъёс, предприятиосты огсыр но пайдаё мед ужалозы. Удмурт Республикаысь промышленностья но транспортъя министр В. И. Долгов. Гожтӥськон-2000 Газет дун тырод, оштракез утод Сямлы пӧрмиз ини "Удмурт дунне" газетлы гожтӥськемъёс пӧлын лотереяен шудон ортчытъяны. Оштрак, мотоцикл, электробычкы, мукет синпель кузьымъёс. Газетмес вуоно аре но басьтыны мылкыд карисьёсты нош ик возьма ошпи. Ивортылӥм ни вал, таяз аре оштрак аслэсьтыз кузёзэ шедьтӥз Кизнер районысь Вылӥ Бемыж гуртысь. Сыӵе кузьым "Удмурт дунне" газетэз лыдӟисьёслы лэсьтӥз вал Пичи Пурга районысь "Красная звезда" колхозлэн кузёез Василий Окунев. Кызьы тодӥськоды, нырысетӥез ик бадӟым кузьым та палъёсы усиз. Василий Кузьмичлэн кичӧлтонэз адӟем карымон луиз Кизнер районысь "Югыт Бемыж" эштослэн кузёезлы Михаил Николаевич Зайцевлы. Ас хозяйствоысьтыз ошаксэ со лыдӟисьёсмылы кузьманы дась. Адӟом ни, кинэ таяз учыре шумпоттоз кизнер палъёсысь вож турынэн куаем ошпи. Нош дуныз солэн 84 манет, кинлы - солэсь но ӧжыт, - газетлы гинэ эн вунэтэ гожтӥськыны. Л. МАЛЫХ. Тазьы кылдӥзы мотоциклъёс Секытэсь кызетӥ аръёсы егит Совето республикалэн заводъёсаз мотоцикл кылдытон бордын ужаны ӧдъязы. 1925-тӥ арын Москваысь азьвыл велосипедъёс поттонъя "Дукс" заводын "Союз" мотоцикл лэсьтӥзы. Но эскеремзы бере со ӧз чида, тӥяськиз. 1928-тӥ арын толсуре Ижысь инженерлэн Пётр Владимирович Можаровлэн ӵектэмезъя дасям машина ваньзэс паймытӥз. 1929-тӥ арын Можаровлэн кивалтэмез улсын инженер-конструкторъёс В. Кульпак, М. Щукин, А. Дорофец но эшшо кӧня ке адямиос нырысетӥосыныз "Иж-1" секыт мотоциклъёсын кузь сюрес вылэ потӥзы. Сизьымдон ар талэсь азьло асьмелэн мотоциклъёсмы вуылӥзы "Москва-Ленинград-Харьков-Москва" всесоюзной ӵошатсконэ. Соос 4 сюрс иськем секыт сюресэз умой ортчизы. Кунгож сьӧрын поттэм мотоциклъёслы ӧз сётске. 1929-тӥ арлэн пумаз Москваысь Красной площадьын та ӵошатсконэ вуылэм машинаосты выставкаын возьматӥзы. Москвичъёс ӟырдыт ӟечкылазы П. В. Можаровез. Москваысь автоклуб "ижъёсты" умоен лыдъяз но тросэн поттыны куриз. Гужем 1936-тӥ арын заводысь специалистъёслэн кузпалъёссы мотоциклъёсын потӥзы Ижевск-Казань-Горький- Москва сюрес вылэ. Тямыс сутка ортчем бере соос странамылэн шоркараз вуизы. Соосты шуныт пумитазы секыт машиностроениея нарком Серго Орджоникидзе но Советской Союзлэн Маршалэз Михаил Тухачевский. Мотоцикл поттонэз азинтыны люкетӥз Быдӟым Отечественной война. Машиностроительёс басьтӥськоно луизы фронтлы кулэ продукция дасян борды. 1956-тӥ арын "Иж-56" выль модельёс поттӥзы. Собере соосты воштӥзы "Юпитеръёс" но "Планетаос", трос пумо спортивной машинаос. Асьме спортсменъёс калык куспо ӵошатсконъёсын трос медальёс басьтылӥзы. Жаляса верано луэ, берло аръёсы мотоциклъёсты поттон кулэсмиз. В. ЧЕРНОВ. Туалаез уте вашкалазэ Туала Ижын улӥсьёс вашкала удмуртъёслэн яратоно интыосазы праздникъёс ортчытъяло, шутэтско, шулдыръясько. Эшъяськонъя монумент но гужем шутэтсконъя А.М.Горький нимо сад интыяськемын Ягул гуртлэн азьло музъемъёсаз. Та даурлэн шораз та интыосты Ижысь мӧйыос нимало вал на Вотяк гурезь. Яке (асьмеды мыскылляса-а, мар-а) - Тэё гурезь. Пионеръёслэн дворецсылы но монументлы инъет кылдытыку, уно арбериос но корка бервылъёс потӥллям. Монумент дорысь кыралъёс шутэтскон интылы пӧрмизы ньыльдон, витьтон ар талэсь азьло. Нош Гужем садлы кык сю ар пала ини. Со Ижын одӥгез тужгес вашкалаез памятник луэ. Нырысетӥ писпуос ӝужыт ярдуре мерттэмын ЪИЪ даурлэн кутсконаз. Зэм, туж пӧртэм но шаерамы ӧжыт пумиськылӥсь будосъёс татын ас кожазы пушъё вал ни. Но лыктэм адямиослэн асьсэлэсьсэ но лымшор палан будӥсьёссэ "адӟемзы" потэм. Ортчем даурлэн шораз та шундыё, шулдыр интылы синмаськем заводлэн кивалтӥсез. Кузё аслыз юртлы инты кема утчам. Собере быръем Оӵ шурлэн ӝужыт ярдурысьтыз ӵошкытгес бамалэз.1858-тӥ арын юрт дорысьтыз кык гектар пала музъемез аслыз сад карем. Отчы вань калыкез лэзьяллямтэ - татын шутэтскылӥллям-юмшаллям генераллы матысь адямиос но Москвае лыктэм куноос гинэ. Озьы вылэм 1917-тӥ арозь. Та арысен со луиз быдэс посёлокын улӥсьёслэн садзы. Вотской автономной область кылдэм бере, сад выльдэмын вал. 1923-тӥ арын 1-тӥ-13-тӥ июле татын гурт улонлы сӥзем адӟытон радъяськылӥз. Талэсь ӧжыт азьлогес ужаны кутскиз Гужем театр. Таиз калыклы уно пол возьматылӥз А.М.Горькийлэн "На дне" пьесаезъя спектаклез. Отчы Ижын улӥсьёс яратыса ветлылӥзы. Быдӟым писатель кулэм бере, 1936-тӥ арын сад басьтӥз А.М.Горькийлэсь нимзэ. Куамынэтӥ аръёсы ик солэн бур палаз ботаникая сад кылдытэмын. Быдӟым Отечественной война бере татын трос воштӥськонъёс вал, нош генераллэн юртэз сылӥз, пыктос кадь. Трос дасо ар ӵоже отын ӝог юрттэт сётонъя юрт вал. Туэ гинэ со сётэмын Гужем садлы. Юрт куашкан калэ вуэмын. Азьвыл туссэ берыктон понна, трос ужано луоз. Котькуд гужем, гудырикошкон толэзе, сад пусъе вордскем нуналзэ. Таяз 14-тӥ августэ но со ӵукна ик калыкез пумитаз шулдыр гуръёсын. Куазь но шундыё тупаз. Нуназе бере кык часысен вань площадкаос улӟизы. Лыктэмъёслэсь мылкыдзэс нырысь ик ӝутӥз Культурая министерстволэн духовой оркестрез. Пиналъёслэн эстрадазы, цирксы люказы нылпиосты, фольклор ансамбльёс - мӧйыосты. Мунё театрысь "Дека-Денс" балетысь, "Розовый слон" театрысь эктӥсьёс доры пиналъёс но, мӧйыос но люкаськылӥзы. Тужгес трос учкисьёс вал, Анатолий Мальцевлэн "Вечер" ансамблез кырӟаку-эктыку. Соос садлэн шор эстрадаяз калыкен пумиськизы ӝытазе. Уно лыктэмъёс вал "Гармонь певучая" ансамбльлэн концертаз но. Соин трос аръёс ӵоже ни кивалтэ Александр Козлов. Удмурт но ӟуч калык кырӟанъёс угось котькинлы ярало. Садлэн егит режиссёрез Ольга Климентьева сояз но, таяз но площадкае вуттӥське. Ижысь культурая училищеез туж кемалась ӧз ке но быдты, ужзэ умой вала. Ольга Арсентьевна вань концертъёсты дыраз ортчытэ. Резеда Исмагилова садлэн моторез, шуыны луоз. Со татын чеберлыкъя кивалтӥсь. Котькуд шутэтскон нуналлы пӧртэм ужрадъёс чакла. Со понна ӵемысь ӧтчано луэ пӧртэм тунсыко, тодмо адямиосты, концерт коллективъёсты. Солэн сюлмаськемезъя, Садын быгатэмзэс возьматъязы ни тодмо удмурт ансамбльёс но - "Инвожо", "Тюрагай" но мукетъёсыз. Ортчем аре киужъёслы сӥзем ярмаркаын кырӟазы республикаысьтымы вань ёросъёсысь ансамбльёс. Резеда Рифкатовналэн верамезъя, садын концертъёс ӵемгес сётъяло "Вечер" ансамбльысь кырӟасьёс, "Розовый слон" театрысь эктӥсьёс, Удмурт кун филармониысь но Мунё театрысь артистъёс. Татын дас ньыль ар ужатозяз, Резеда Исмагиловалы соос матысь эшъёс луизы ини. Котькуд ужрадлы садын азьло ик дасясько. Августлэн пумаз пиналъёс понна "Паймымон город" праздник ортчоз, нырысетӥ сентябре - Тодон-валанъёслэн нуналзы, куарусёнтолэзьлэн шораз, покчи гужеме - "Зарни сӥзьыл". Кожалэ Гужем садэ! Эн мурталэ! Н.Возисов. Сюлмаськон бугор Музъем такырме Гуртмылэсь вить иськем палэнэ берлозэ губияны ветлӥ. Та интыын куке но сылэм Раменское гурт. Вашкалаос гурт инты бырйыны туж устоесь вылӥллям, шӧдске. Котыр нюлэсъёс, ӵошкыт возьёс, жильыртыса пичигес шур бызе. Ай мон 13 ар талэсь азьло та ёросэ улыны лыктыкум гинэ та кыралэс интыос ваньмыз кизисько, ю бусыос куашето вал. Нош табере воксё чабкиськи: ӝыныез кизёно бусыос жаг турынэн, векчи нюлэсэн шобырскемын ни. Абдрамон учыр: паймиськом няньлы дун ӝутскемлы, ичи ю тысь люкаммылы. Со дыре ик такырмо вордӥсь, ю-нянь сётӥсь музъемъёс. Лыдӟемея тодӥсько: быдэс дуннея ке басьтоно, кык миллиард гектар музъем аналтэмын ни. Татчы пыро Аравийской полустров, Сахара пустыня. Татын куке но вылӥллям ӝокыт нюлэсъёс, ӝужало вылэм пӧртэм сяськаос. Та ваньмыз такырмиз, музъем вордэмысь дугдӥз калыклэн сюлмаськымтэеныз. Туала дыре тодосчиос музъемез эскерыса ке но уло, арлы быдэ быдэс дуннеын ньыль миллион гектар музъем куасьме. Бусылэн уродмемез кутске музъемын гумуслэн ичиёмеменыз сэрен. (Гумус - музъемлэн органической тырметэз. Удмуртиысь музъемъёслэн гумуссы ог 2-10 процент.) Нош милям ёрос музъемъёс та ласянь эшшо но куанересь вылӥллям: 1,5-2,5 процент гинэ. Кӧня ю тысь окто-люкало бускельёсмы? Малмыж ёросын гектарысьтыз шорлыдын 14 центнер усе, Немаын - 11,3 люкаське. Нош милям Кильмезь ёросамы... 6,8 центнер. Музъем ужасьлы ас ужезлэсь емышсэ адӟыны уг кылды бере, кыӵе-о шумпотон луоз меда? Йыркур ук та! Ӵапак ю тысь шертон итымысен пумитай гурт хозяйствоя ёрос управлениысь валтӥсь агрономез Е. В. Николаевез. Паймемме солы но шараятэк уг чидаськы. - Бускельёсын ӵошатыса, асьме музъеммы туж куанер,- валэктэ Евгений Владимирович.- Асьмеды сюдӥсь-вордӥсь музъеммес воксё аналтӥм ни. Минерал сылалъёс басьтыны коньдонмы ӧвӧл, ферма котыре люкаськем кыедэз ворттон понна эстӥськон вӧй уг тырмы. Берпум кужыменыз вордэ ни асьме музъем. Нош пунэммес берыктыны ум дыртӥське. - Нош кӧня кизёно бусыос асьме ёросын аналтэмын ни? - юасько кышкаса. - Туннэ нуналлы жуг-жаг турынэн но будӥсь векчи нюлэсэн ӵактэмын ни дас сюрс гектар бусыос, - секытак лулске агроном.- Тросэз хозяйствоос кизёно музъемъёссэс аналто, коньдонлы ёрмыса. Нош соосты вашкала бабай-песятайёсмы нюлэсэз погыръяса- кораса сайкиллям ук. Бусы кариллям, ю-нянь будэтӥллям. - Нош таӵе югдурысь кызьы потыны малпаськоды? Вань-а кыӵе ке ӟеч амалъёс? Маин пунэммес берыктомы музъемлы? - Тани Удмурт шаерысь Вавож ёросысь Мичурин нимо колхозын та ласянь адӟем карымон тыршо,- пусъе Е. В. Николаев.- Берло дыре та хозяйствоез районысь котькуд специалист адӟем карымон вераса пусйылэ. Нош ма люкетэ меда соослэсь быгатонлыксэс, азинсконлыкъёссэс улонэ пыӵатыны? Отын но кык киё, кык пыдо адямиос уло но тыршо ук. Та хозяйствоын,- мадёнзэ азинтэ Николаев,- юри рапс, ог аръем турынъёс кизьыса будэто но выльысь гыро. Озьы соос музъемзэс сюдо, удалтонлыксэ ӝуто. Кӧжы, вика кадь культураослэсь ӝыжыоссэс гырид ке но гектар музъемын выльысь 1-1,5 тонна гумус кылдэ. Музъем сярысь малпаськыны ке кутскиськод, сюлэм ик вӧсь луэ. Нош та сярысь кыл- куара уг поттылы асьме правительство. Ма, кин-о, ку та ужпумез ӝутыны вутскоз? Ар ӵоже президентмы ньыль премьермес воштӥз ни. Огзэ ӟеч валасько: быръёнъёс матэктон азьын нош ик асьмелэсь "куарамес" басьтон понна уӵы музэн чирдыны-чипсыны кутскозы депутатэ кандидатъёс. "Удмурт дунне" пыр ас куаразэ сётӥз ни Россиысь Аграрной партилэн кивалтӥсез Михаил Лапшин. Малпано ке, асьсэ куспын гинэ но партие пыремъёс огкыл уг шедьто ук. Та партилэн алигес ортчем съездэз сое ӟеч возьматӥз. Кык ёзлы люкиськизы. Гурт калык нош ик паймемын: кин пала кариськоно, кин юрттоз шуг-секытысь потыны? Азьвыл быръёнъёс ортчем бере центральной газетъёс гожъязы гуртысь ичи дышетскем калык, пе, коммунистъёс понна дурбасьтыса куаразэ сётӥз. Гуртын ужась калыкез шузи карыса возьматэмзы потэ. Азьвыл Хрущевлэн кивалтон амалъёсызлы берытскиськомы ни кадь. Соку гурт калык кукурузаен сураса пыжем нянь басьтыны гинэ но уг быгаты ни вал. Табер коньдонлы ёрмыса сютэм сямен уло пересьёс, трос нылпиё семьяос... Эх, ваньзэ вераса, гожтыса быдтод шат?! Висе сюлэм, чида на сюдӥсь-вордӥсь музъем. Ум сётэ бусыослы такырмыны. Та сярысь ваньмылы малпаськыны, шугъяськыны кулэ. Николай ТУРИН. Зоръёс люкето Завьял ёрос республикаямы котькинлэсь уно картофка будэтэ. Ялан кыдыраса улӥсь зоръёсын сэрен "кыкетӥ нянез" копан туэ ӝега. Тани 20-тӥ сентябрьлы 1867 гектар пӧлысь утялтэмын вал 411 гектарысь гинэ. Люкамын ни 5927 тонна музъем емыш. Гектарлы быдэ шорлыдын 144 центнер усе. Картофка октонын азьпалын мынэ "Путь Ильича" колхоз-племзавод. Н. НИКИТИН. Азьвыл аръёсы бакча сиён будэтӥсь хозяйствоос продукцизэс пырак базаосы келяло вал. Табере соос ӧвӧл ни. Гуртоос шуге-леке вуизы. Кубиста бусыосын кылле. Вылаз ик, йылӥзы лушкаськон учыръёс. Медъятэк уг луы милициез... Газетъёсысь. Воргорон: - Ку кошкозы ни та проклятъёс!.. Луд Кеч: - Вот ведь, адямиос: ни себе, ни людям!... Суредэз Л. ПРОЗОРОВЛЭН. Йӧл кулэсме Ёросысь фермаосын, Гурт удысъя Удмурт кун научно-исследовательской институтэз но вераса, йӧл кыскон пумен кулэсме. Кызетӥ сентябрьлы котькуд скаллэсь басьтэмын 8,6 килограмм йӧл. Кылем арын та вакытэн ӵошатыса, со 600 граммлы синӥз. Умоен пусйыны луэ "Восточный" совхозэз (13,4 килограмм), институтлэсь хозяйствозэ (13,2 килограмм) но "Путь Ильича" колхоз-племзаводэз (12,5 килограмм). Тужгес но ӧжыт йӧлзы усе "Докшинский" агрокомбинатын - 6 килограмм. Н. СЕРГЕЕВ. Наталь Кисьмамтэ емышъёс 6-тӥ куарусёнысен Иж карын ортче быдэ вуымтэосын ужанъя толэзь. Со кыстӥськоз 28- тӥ куарусёнозь. Та уже пырисько калыкез улон-вылонын утён удысысь вань службаос, "Семья" центръёс, юрттэт сётӥсь пӧртэм кабинетъёс, клиникаос, югдурез утён удысын ужасьёс. Соос пӧлын семьялы но нылпиослы юрттонъя "Юнона" медико-психолого- педагогической центр. - Егитъёсын ми выриськомы быдэс ар ӵоже, но та толэзе эшшо но трос пумиськонъёс ортчылозы,- верало татын ужасьёс Вера Петровна Вотякова (нылкышно висёнъёсъя эмчи), Наталья Александровна Симонова но Елена Николаевна Пермякова (улон-вылонын юрттэт сётӥсь специалистъёс). - Ми вуылӥськомы школаосы, училищеосы. Яке соос асьсэос вераськыса ми доры лыкто. Дышетскисьёслы лекциос лыдӟылӥськомы, пӧртэм видеофильмъёсты, плакатъёсты уже кутыса. Вылӥ верам специалистъёс сяна, татын тыршо на Венера Абдулкадировна Яфесова- "Юнона" центрлэн директорез, Наталья Владимировна Томашевич - психолог, Алексей Алексеевич Горбушин - психотерапевт, Константин Александрович Пуртов - андролог, сексопатолог. Арысь аре тросгес но тросгес егитъёсын ужа центр. Юрттэт курыса вазиськемъёс пӧлысь 65 процентэз - быдэ вуымтэос. 1996-тӥ арын специалистъёслэсь лекциоссэс 2617 пинал кылзӥз, нош 1998-тӥ арын - 5413. Со сяна, эмчиос нимаз консультациос ортчытъяло на. Татчы ӵемгес вуыло нылъёс. ... Кӧто луэмзэ тодыса, Надя кышказ. Укмыс арня ни, пе. Эмчи озьы вераз. - Осто инмаре! Ма каром мон? - но со дыре ик нылаш ассэ буйгатыны выриз. - Алёша ваньзэ валалоз, монэ кышно басьтоз. Со туэ школазэ йылпумъя ни ук. Ваньмыз мукет сямен берытскиз. - Тон мар, монэ сьӧлтаны малпад? Мон егит на, мынам улэме, шулдыръяськеме потэ. Собере, мон дышетсконме азьланьтыны малпасько. Мыным али пинал кулэ ӧвӧл, - лек вазиз Алёша. Туж курдаса ке но, Надя анаезлы вераз секытэн луэмзэ. Малпаз, одӥг юртын улыса, озьы-а, тазьы-а, но со тодоз. Паймоно кадь, анаез ӧз но черекъя, ӧз но пыкылы, ӧз но тышкаськы. Лад-лад куараен соку ик шуиз: - Лэсьты аборт. Школадэ ке но йылпумъя. Врачъёс та вамышлэсь алыны выризы ке но, Надя пиналзэ куштӥз. Та дырысен нылаш Алёшаен уг ик вераськы ни. Ваче вуо ке, кыкназы ик синъёссэс лэзё но шаплыгес ог-огзылэсь палэнско... Та выллем учыръёсын али ӵемгес но ӵемгес пумиськылоно луэ. Беромыса кутскем секс революция асьме дорын туж ӝог бурдъяське. "Юнона" центрын ужасьёслэн верамзыя, азьвыл аръёсы соос доры тросгес вуо вылэм 17-18 аресъем егитъёс, нош али - 16-17 аресъемъёсыз. Будэ 15 арес тырмымтэослэн лыдзы но. Кылсярысь, 1997-тӥ арын таӵеос 10 мурт гинэ центрысь гинекологлы вазиськиллям, нош 1998-тӥ арын - 20 адями. 15-18 аресъемъёс пӧлын лыдпусъёс таӵеесь: 1997-тӥ арын - 369, 1998-тӥ арын 428 мурт вазиськем. Пӧлысьтызы 80 процентэз огпол гинэ уг вуыло та центре. Специалистъёслэн чакламзыя, матысь кусыпъёс вазьгес тупато шугъяськись семьяосысь егитъёс: анай-атайзы люкиськемын яке семьяын пиналлы тырмыт саклык уг висъяло, пиналэз уг валало яке воксё валаны уг тыршо, укыр чурыт куронъёс пукто. Озьы егит мурт ас сюлэмзэ анай-атаезлы усьтыны уг дӥсьты, палэнысь яратон нерге утчаны кутске. Матысь кусып возёнын арлыд пичиямен ӵош, берло аръёсы будэ быдэ вуымтэослэн секс культуразы но. 3-4 ар талэсь азьло дырен ӵошатыса, али егитъёс юнгес сюлмасько тазалыксы сярысь. - Нылэн пиен куспын ог-огзы понна кыл кутон но вань ини. Азьвыл аръёсы ваньмыз понна (кылсярысь, кто луэм понна) ныл янгыш луэ ке вал, али югдур ӧжытак воштӥське. Ӵемысь пиос, нылашъёссэс китӥзы кутыса, асьсэос ми доры ваё. Егитъёслэн кыл кутонзы тужгес шӧдӥськыны кутске, лекциосмес кылзыса, уката ик аборт тема бере,- верало центрын ужасьёс. Гуманитарной юрттэт вуылыку (1995-тӥ-98-тӥ аръёсы), семья ужпумъёсъя вань центръёсын нылпи сюремлэсь утись эмъюмъёсты дунтэк сётъяло вал. - Али милям сыӵе луонлыкъёсмы ӧвӧл,- азьланьто специалистъёс.- Берпуметӥзэ таӵе юрттэт басьтӥмы 1998-тӥ арын мартэ. Та арын гудырикошкон толэзёзь абортъёслэн но "яратон" висёнъёслэн лыдзы пичияса мынэ вал ке, 17 августысен нош ик йыло нылпи куштон учыръёс, висёнъёс. Эмъюмъёс туж дуно сыло. "Юнона" центре пӧртэм "яратон" висёнъёсын черлам егитъёс вуо: сифилисэн, гонореяен, хламидиозэн, микоплазмозэн, трихомониазэн но мукет. Кылсярысь, 1997-тӥ арын 37 быдэ вуымтэ висись вылэм ке (одӥгезлы 15 арес тырмымтэ), 1998-тӥ арын та лыдпус 109-озь вуэм (15 арес тырмымтэосыз - ньыль кузя). Нош шаерамы огъя кылдэм югдурез верано ке, сифилис гинэ берло ньыль ар куспын егитъёс пӧлын 31 поллы будӥз. Вань висисьёс пӧлысь 10 процентэз - 14 арес тырмымтэ нылпиос, пӧлысьтызы 66 процентэз висён кутэмын, матысь кусып возьыса. 1998-тӥ арын удмурт шаерын егит нылашъёслы (15-19 арес) 2901 аборт лэсьтэмын вал. 15 арес тырмымтэос пӧлысь нылпизэ куштӥз 41-ез. Нош "Юнона" центре вуылэм егитъёс пӧлын лыдпусъёс таӵеесь: 1997-тӥ арын 15 арес тырмымтэос пӧлын одӥг но нылпи куштон учыр вылымтэ (огез вордыны соглаш луэм), нош 1998-тӥ арын аборт лэсьтэмын одӥг нылашлы. 15-18 аресъемъёс пӧлын лыдпусъёс бадӟымесьгес: 1997-тӥ арын нылпизэ куштэм 12 егит мурт, 1998-тӥ арын - 38. - 90 процентэз нылъёс центре вуон азязы ик тодо ни, куштозы-а, вордозы-а пиналзэс. Ми, валамон ини, кенешиськом соосын абортлэн секыт бервылъёсыз пумысен,- верало ужасьёс.- Озьы ке но, лыктэмъёс пӧлысь ог 95 процентэз вордскымтэ нунызэс куштоно луо пӧртэм мугъёсъя. Кин ке дышетске, кин ке анай-атаезлэсь кышка - пиосын матысь кусып воземзэс тросэз нылъёс анай-атайёссылэсь вато. Куддыр паймоно: пичиосты кышкато я милиционерен, я врачен. Нош шуг-секытэ сюрем быдэ вуымтэ нылъёс анай-атайёссылы вазиськыны уг дӥсьто - тӧдьы халатэн адями доры лыкто. "Юнонаысь" гинекологлэн Вера Петровна Вотяковалэн верамезъя, анай- атайёсынызы ӵош егитъёс татчы туж шер вуыло: берло одӥг но ӝыны ар куспын - самой троссэ сизьым пол гинэ. - Со - гинеколог доры,- азьланьтэ улон-вылонын юрттэт сётонъя специалист Елена Николаевна Пермякова. - Мукет эмчиос доры шергес вуо. Мон доры алигес одӥг кышномурт нылыныз лыктӥз: вералэ, пе, солы ныл мугорлэн пӧртэмлыкъёсыз, азинскемез сярысь. Та одӥг пол луэм учыр. Анай-атайёсын школа пыр кусып возиськомы. - Нош уг пыкыло-а тӥледыз, егитъёсты уродлы дышетӥськоды шуыса? - юасько солэсь. - Кӧня адями - сомында ик малпан. Егитъёслы милям ужаммы кельше. Ми соослы юрттэт сётӥськомы ук, ваньзэ пыр-поч валэктӥськом. Нош арлыдоосызгес... Асьсэос анай-атайёс нылпиосынызы ӵемысь та пумысен уг верасько. Нош ми егитъёсты янгышъёслэсь утьыны тыршиськом. Янгышъёс вылын дышетско, шуо ке но, со янгышъёс ӵемысь туж курытэсь луо: аборт, секыт висён, наркоманъёс пӧлы шедён но мукет. Мӧйыос пыкылыны уг пыкыло, но куддыр паймо: малы егитъёслы кулэ таӵе центръёс? Паймыны кулэ ӧвӧл, дыр. Умойгес луоз, пиналъёслы матысь кусыпъёс возён ласянь муресь тодон-валанъёс сётыса. Озьытэк, секс шуон маке соослэсь мугоръёссэс но лулъёссэс вӧсь гинэ кароз. Елена КИТОВА. "Я+Я " Воргоронъёс Аб.496. 31/175/68, удмурт, гороскопея Стрелец, механизатор, яратӥсько чорыганы, пӧйшураны. Кышнояськылымтэ, лякыт сямо, вераськись. Улӥсько анай-атаен ӵош, улон интыме воштыны пумит. Тодматскысал 22-30 аресозь веськрес мугоро нылмуртэн, пумит ӧвӧл одӥг нылпиезлы. Аб.501. 23/167/56, удмурт, механик, дышетскеме средне-специальной, кышнояськылымтэ. Улӥсько анай-атайёсыным ӵош, вань машинае. Вина юисько праздникъёсы гинэ, тамак уг кыскиськы. Яратӥсько чорыганы. Улон интыме воштыны соглаш. Тодматскысал 20-24 аресозь тӧдьыкысъем, веськрес мугоро нылмуртэн, пумит ӧвӧл одӥг нылпиезлы. Аб.526. 21/169/59, гороскопея Кый-Скорпион. Тракторист, столяр. Улӥсько анай-атаен ӵош селоын, ужез яратӥсько. Тодматско 18-23 аресозь вескрес мугоро нылкышноен. Нылкышноос Аб.0499. 36/165, веськрес мугоро удмурт нылкышно, картэ кулэмын, нылпиосылы 8 но 14 арес. Яратӥсько керттӥськыны. Тодматскысал Глазов городысь улонлы но уксёлы ёрмисьтэм 35-40 аресозь сьӧдкысъем воргоронэн. Аб.0500. 29/170, веськрес мугоро, пекарь-кондитер. Нылпиосылы 4 но 6 арес. Улӥсько анай-атаен ӵош. Лякыт сямо. Ужасько. Яратӥсько керттӥськыны. Улон интыме воштыны соглаш. Тодматскысал улон интылы ёрмисьтэм 25-32 аресозь сьӧдкысъем веськрес мугоро воргоронэн. "Я+Я" служба пыр тодматскыны мылкыд карисьёс, гожтэттэс "Удмурт дунне" газетэ эн келялэ. Ыстоно таӵе адресъя: 427630, Удмурт Республика, с. Юкаменское, а/я 10, "СЗ" аб. �... Гожтэтады одно ик понэ маркаен буш конверт, сотэк тӥледлы вазиськись уз луы. "Я+Я" служба ужа ке но Юкаменскын, гожтэтъёс отчы вуо быдэс республикаысьтымы, озьы ик Россиысь но солэн палэнысьтыз. Юрттэт сёто дунтэк. Могӟетъёс палэнтэмын Кылем арня вискын Россия Федерациысь Вылӥ суд В. Лунинлэсь ӝожтӥськонзэ эскериз. Та бырйись лыдъя, "Отечество", озьы ик "Отечество - Вся Россия" блок быръёнъёсы пыриськыны уг быгато шуыса. "Отечество" организация Россиялэсь законодательствозэ тӥя, пе, угось огазеяськонъёс быръён кампание пыриськон понна Юстицияя министерствоын ар азьвыл регистрациез ортчыны кулэ, нош "Отечество" пусъемын миым 19-тӥ декабре. Вылӥ суд В. Лунинлэн ӝожтӥськонэныз соглаш ӧз луы. Озьы бере, "Отечество - Вся Россия" блоклы Кун Думае быръёнъёсы пыриськыны могӟетъёс палэнтэмын. "Отечество" огазеяськонлэн Удмурт люкетэзлэн пресс-службаез. Нылпи пособиос сярысь Удмурт Республикаысь Калыкез улон-вылонын утёнъя министерство ивортэ: 1999-тӥ арын сентябрьысен республикаямы тырыны кутскемын 1998-тӥ арлэн кыкетӥ паларезлы нылпи пособиосъя пунэм тыронъёс. Коньдонэн секыт югдур кылдэмен, нылпи пособиос сётӥськозы вузъёсын, сиён-юонэн яке кыӵе ке юрттэт пыр. Но сое нырысь ик басьтозы сыӵе семьяос, кудъёсызлэн толэзьлы огъя доходзы адямилы быдэ 402 манет 30 копейкалэсь улӥын луэ. Кинлэн кӧня пособие басьтонэз, кыӵе вузъёс но юрттэт сётӥське, со сярысь тодыны луоз ёросъёсысь калыкез улон-вылонын утёнъя отделъёсысь (пенсиосъя но пособиосъя отделъёсысь). Нылпиос понна толэзьлы быдэ сётӥськись пособиос сярысь кыӵе ке юанъёсты кылдӥзы ке, вазиське улон интыысьтыды калыкез улон-вылонын утёнъя ёзъёсы. Вордӥськем нуналэныз ӟечкыласьком Шаркан районысь Пороз гуртысь мусо анаймес Серебрякова Алевтина Леонидовнаез. Сӥзиськом солы жадёнэз тодылӥсьтэм чылкыт ошмеслэсь улон аръёссэ, яркыт пиштӥсь шундылэсь пальпотонзэ, тулыс куазьлэсь ӟырдыт мылкыдзэ но ваньзэ умойзэ: улонысьтыд секытэз мед кошкоз та ортчем арен, умоез мед берытскоз кык полэс шудэн. Гажаса Юськиысь Давыдовъёслэн семьязы. НАТАЛЬ "НУНЫ - 2000" УЖРАД Одӥгысен укмысозь Гажано лыдӟисьёсмы, ӧд вунэтэ на, дыр, газетмылэн 19-тӥ мартэ потэм номераз "Уй ке чечыё, даур но емышо" материалын ялӥмы вал "Нуны-2000" ужрад сярысь. Редакция сое ортчытэ Удмурт Правительствоысь ЗАГС ужпумъёсъя комитетэн ӵош. 2000-тӥ арын 1-тӥ январе вордӥськем нунылы "Удмурт дунне" кузьманы дасяське нылпи коляска, но солэн анай-атаез мед эшъяськоз газетэнымы. Возьматоно луоз газетлы гожтӥськем сярысь квитанциез - 1999-тӥ яке 2000-тӥ арлы. Ар йылпумъяськыку, та пумысен валэктон сётом на. Нош али, али милемыз сюлмаськытэ вуоно даурысь пушъетъёсмылэн но соослэн анайёссылэн тазалыксы, улонзы. Семья но нылкышно ужпумъёсъя газет бамын пӧртэм вераськонъёс ӝутӥськом. "Нуны-2000" ужрадэз лыдэ басьтыса, та ужпумъёслы нимысьтыз саклык висъям потэ. Нуны вайыны дасяськись анайёс, таиз гожтэммы тӥ понна. Авестийской сямъёсъя, Шундылы тупа 1 лыдпус, озьыен, секытамлэн нырысетӥ толэзезлы но. Та вакытэ нунылэн лулчеберлыкез кыда. 2 лыдпус валтэ Толэзез, нош со кыл кутэ мылкыдъёсмылэн вошъяськемзы понна. Нылкышнолэн малпанъёсаз шонаськонъёс кылдо ке пушказ ӝужам лулэз куштон яке вордон сярысь, со нунылэн мылкыдъёсаз но шӧдӥське. Вордӥськемез, будэмез бере анай-атайёс паймо ни, малы нылпимы дӥсьтӥсьтэм, кышкась. Мугез сыӵе, солэн йырвизьмаз гожтӥськиз кулэтэм луэмез сярысь малпан. Сыӵе нылпиос, бадӟым луыса, ӵем дыръя гуртысьтызы кошко. Марс, солэн лыдпусэз 3, мылкыдэз, юнлыкез кыдатэ, малпанэз быдэстон сям пыӵатэ. Куинь толэзь секытэн дыръя семьяын кылдэм керетонъёс, споръяськонъёс нунылы янгыш луэм мылкыд пыӵато яке лек сямо каро. 4-тӥ толэзь Меркурийлэн. Та вакытэ лыдӟиськыны, дуннеен тодматскыны, кытчы ке потаны кулэ, эшъёсын ӵош пуконо, выставкаосы ветлоно. 5-тӥ толэзе кузёяське Юпитер, нош со кыл кутэ дунне но улон шоры кызьы учкем понна, герӟаськемын инмарлы осконэн. Вордсконо нуны тодматске атаеныз. Кӧт борды суйпосэныз йӧтскыса, воргорон нуны гердлы (зародышлы) ачиз сярысь ивор сётэ. Берло, бӧрдӥсь нылпизэ кияз кутӥз ке, соиз буйгатскоз, тодмо йӧтскылэмъёсты тодаз вайыса. Венералы 6-тӥ толэзь укша. Та дыре нылкышнолы вань яратэмез, шунытэз сётоно. Ог- огдэ гажан но валан нунылы выже, яратон мылкыд пыӵатэ солы. Сизьыметӥ толэзе юнма лысьӧм, кивалтэ соин Сатурн. Нылкышно лэсьтӥськисьлы пӧрме. Нуныеныз ӵош со выллане ӝутӥське, аслыз но, нылпиезлы но чиданлык, юнлык сӥзьыса. Зӥбиськем, огнад кылем мылкыд куд-ог дыръя шуг-секытъёс ваё, нылпи сизьым толэзьем вордӥське. Но со понна кайгыронэз ӧвӧл. Та вакытлы ваньмыз ик сизьым планетаос асьсэлэсь ужзэс лэсьтӥзы. Авестая сизьым толэзьем нылпиос кыдамен лыдъясько ни. Тямысэтӥ толэзен кивалтэ Уран. Выльдӥськонъёс но революциос понна гинэ ӧвӧл, со кыл кутэ на адӟыны но кылыны (ясновидение) быгатон понна. Со ик валтӥсь лулсэрез юнматонэ пыриське. Нуныеныды ӵош укмыс толэзёзь но вуиды. Туж зол воштӥськиды, асьтэ шоры синучкон пыр учкемды но уг поты. Оло, малпаськоды тӥледыз азьло сямен уг но ярато ни? Озьы ӧвӧл. Нептун тӥледлы кузьма вылӥ Вселеннойлэсь яратонзэ. Котьмар мед луоз, котькыӵе шуг-секытъёс мед котыртозы - яратон бадӟым уз кушты. Инбам тӥледлы кузьым лэсьтоз - ӝоген дунне вылэ вордӥськоз пичи лул комок, солэсь дуноез но матысез нокин ик ӧвӧл. Л. МАЛЫХ. Дурисьлэн дурисьёсыз Улӥз-вылӥз ас дыраз Алнаш ёросысь Кузьымгуртын Семён Васильевич Кузнецов. Нокинэн воштонтэм, усто дурись вал со. Кузпалэныз, Ирина Марковнаен, ӵош будэтӥзы кык пизэс - Ревоез но Мишаез. Табере атайзылэсь кутскем ужзэ - гурт улонэз дуронэз - азьланьто соос но соослэн пиоссы но нылъёссы. Будӥсь кужым, кутскем ужез азьланьтӥсьёс ванен гинэ арысь аре уката юнма но чеберске Кузьымгурт. Удалтэм ю-нянь но трос пудо вордыса, город калыкез сюдэ. Соин ӵош, пу коркаос интые, кирпичлэсь вӧл-вӧл улон юртъёс ӝутско. Азинсконъёс кылдо гуртын, Кузнецовъёс кадь сюлмо ужасьёслы луыса. Дурисьёс - соин Кузнецовъёс Кузьымгуртын уно аръёс ӵоже тросэзлэн семьяослэн фамилиоссы вылӥллямтэ. Выжы нимъёссы кыльылӥллям ымысь ыме. Нош бӧрысь фамилиос сётъяллям, выжылэсь вашкала дыръя кыӵе уж быдэсъямзэ лыдэ басьтыса. Вуко возисьёс луиллям Мельниковъёс, трос вал вордӥсьёс - Конькинъёс, удалтэм ӟазег будэтӥсьёс - Гусевъёс, нош гуртысь дурисьёс луиллям Кузнецовъёс. Семон агайлы кебитсэ кельтэм атаез, Васьлей. Колхоз кылдыку, со кебитэз кужмысь басьто кӧрыкеныз, сандалэныз но мукет ужан тӥрлыкеныз валче. Пинал Семон атаез вӧзын корт дурыны дышыса уг люкиськы ас ужезлэсь. Тырше ог ньыльдон ар пала. Ожынкык чиньызэ сӧсыртыса бертэ ке но, дуриськон ужзэ уг кушты. Азьло аръёсы сотэк нокызьы уг луы вал: скобаос, капка ӟирыос, ӧскутонъёс лэсьтылӥз. Аръёс ортчемъя, дурись сокем кулэ ӧз луы ни. Соин Семён Васильевичлэн пиосыз, Рево но Миша, улон шоры туала куронъёсъя учкыны ӧдъязы - тракторист но шофёр луизы. Семон агай ачиз, тыл кадь, горд вал, кышноез - чиган кадь, сьӧд, Онтон выжыысь. Ачиз шыпыт сямо, кузпалыз - задор но чырткем. Ачиз - кезьыт тол кадь, кузпалыз - пӧсь гужем выллем. Но гурт калык адямиез ужезъя дунъя. "Ужасесь", - тазьы вакчияк шуылӥзы Семен Васильевич но Ирина Марковна сярысь. Трос нылпиоссы бӧрсьысь бӧрсе кулэмен, анай-атай огезлы пиезлы Койык ним сётэ. Таиз улэп кыле, пичиысен чебер но чырткем будэ. Анаез кадь, сьӧд йырсиё. Ньыль ар куспатыса вордске на Миша. Таиз ӵап тятяез кадь - тыл кадь горд. Кузнецовъёслэн кебитысьтызы атай кӧрыксы, сандалзы но мукет арбериоссы туж кема ужазы на гурт калык понна, выльёссэ но ӟечъёссэгес басьтытозязы. Уже кутӥсько на ай соос али но, асьсэос - Семен Васильевич но Ирина Марковна - улонысь кемаласьгес кошкизы ке но. Кык орденлэн кавалерез Туэ, 12-тӥ июне, кӧснуналэ, кузьымгурт калык пусйиз гурт школалы сю ар тырмонэз. Та гуртын вань вордскемъёс но будэмъёс пырпотӥзы сое. Вордскем юртазы тэтэ карыны дышетскем сямен дышизы лыдӟиськыны но гожъяськыны, чеберез валаны, вордскем музъемдэ гажаны. Школалэн директорез Людмила Васильевна Антонова гуртысь вань дано адямиосты пусйиз. Нош Рево Семенович Кузнецовлэн нитулыз кык пол чузъяськиз. Огполаз учыре шуэмын вал: куать орденэн пусъем муртлы, солы гинэ кыкетӥ но куинетӥ степенё кык Трудовой Слава орден сётэмын. Ожын уг, ужын адями кык орден басьтыны быгатэ. Ю-нянь но бакча сиён будэтыса, пудо вордӥсьёслы юрттыса. - Кӧня ар ӵоже тракторен ужад? - юай Койыклэсь (Кузьымгуртын нимыз сыӵе). Воргорон чиньыоссэ ӝамдэ куасалъяса шуиз: - Трактористэ Можгалан дышетски но ньыльдон ар колхозын ужай. Тракторен - куамын куать ар... Берлоеныз, "Беларусеным", дас куатетӥ арзэ ужасько ни. Шутэтскыны кошкытозь, ар гинэ на кылиз. Тракторме уг ни вошъя. - Мукет тракторъёсыныд но сомында ар ӵоже гырид-кизид-а? - Ӧй. Кык берлозэ, быдэн сизьым ар ужаме бере, выльёсыныз кужмысьгес ик воштӥзы, техникаез ӟеч тодӥсько, сое вӧсь уг кариськы но кема ужатӥсько шуыса. Гырыны-кизьыны юн тазалык, инмарен сётэм бадӟым, тыр мугор но кужым кулэ. Койыклэн мугорыз Марка ӵужатаезлэн выллем ик, но ӝужыт ӧвӧл. - Мон ноку но награда понна ӧй ужа, котьку нырысь ик колхоз ужез быдтыны тыршылӥ, - вера Рево Семенович. - Кивалтӥсьёс сюлмаськемме адӟытэк ӧз кыле, лэся. Кык орденэз сяна, вань на медалез, пӧртэм гадьпусъёсыз. Тужгес данъяське Кун премилэн лауреатэз но устоез тракторист луэменыз. Кыкетӥ ужын Асьме шаерын крестьян калыклэн улонэз озьы радъямын: колхозын ужаса поттэм уждунэныд кӧттэ уд тыры, ужысь бертыса, ас дорад, пудо но бакча котырад отынлэсь но тросгес ӧд ужа ке. Вань даурзэс тазьы уло но тыршо Кузьымгуртысь Кузнецовъёс но. Удмурт йылолъя атай юртэ кыле семьяысь пиос пӧлысь пичиез, вынзы. Мишаез кельтыса, Койык яна потӥз шур сьӧры. Басьтэм корказэ выльдӥз, вить сэрего корка пуктӥз. Вӧзазы ик ӝуто ни выль но бадӟым корка. Таиз тӧдьы кирпичлэсь. Отын пичиез нылзы, Лена, аслаз семьяеныз улоз. - Туэ умгес вуттэ на, дыр, - сюлэмшугъяське атай. - Эмеспие но, Семон, механизатор. Гужем бусы ужъёсын валче уг ваньмы. Выль семьяын будэ туж чырткем пизы - кисьтэм-басьтэм ӵужатаез. Лена, нылпи садысь визьнодась, пизэ таза будэтэ: пичи эке али ик ини нюръяськыны пӧрмытэ... Дыр ортчемъя, нылпиос будо. Тани Миша но атай юртысьтыз кошкиз. Отчы Петя пизэ кельтыса, аслыз бадӟым корка ӝутӥз. Таиз но кирпичлэсь. Быдӟалаез - укмыстон куать квадрат метр. Улыны пырытозязы, куинь ар ӵоже ӝутоно луиз корказэс но бадӟым юртъерзэс - кулэ вал пудо гидъёс но, мунчо но. Азбаразы гинэ но пудо пыртан инты лэсьтӥзы. Гужемлы душ но инъязы. Газ ӧй вал на бере, трос пу дасязы, лапасъёссэс ик паськытатыса. - Ужаса чи-ик ваньмыны уг луы, нерад луиськиз ини, - серекъя Миша, шунды пыжем ымнырзэ киыныз маялтыса. Нош ачиз чик уг кельшы ужлэсь акыльтэм муртлы: вераськон куспын ик ӵужон кутэ но капказьзэ утялтыны кутске - дышымтэ адями тэк сылыны яке пукыны. Гуртын уг луы пудо вордытэк. Лэсьтӥськыны уксё кулэ луэмен, мултэс парсь вордэ. Тылобурдо гинэ кӧня: курег, ӟазег, ӵӧж. Нош кызьы скалтэк? Зэм, Койыкъёслэн сокем ӟеч скалзылы кышкыт чер палам. Гужем шорын скалэз воштон - шудон уж ӧвӧл. Туала арын сомында лэсьтӥськон ужез киын быдэсъяса уд быдты. Койык мыным шумпотыса возьматӥз выль электробычкызэ. Вань мукет но тӥрлыкез: автомашинаез, мотоциклэз. Шур сьӧрын улэ бере, ву ас вылаз ворттоно луэ - колхоз отчы ву таки ӧз кыскы. Велосипед поглянъёслэсь пичи уробо сазнам но ошмесысь ву флягаен ворттэ. Нош кӧня кулэ со: пудоез люктаны, мунчое... Юрт кузё маде: - Шур сьӧры ву гумыос кузя уг кыско бере, сое музъемез портыса поттоно луоз ни. Насосэ вань ни, кулэ гумыос басьтоно но музъем портӥсьёсты ӧтёно. Мишалы та ласянь капчигес: ву табере бызе корказы пушкы. Мисьтӥськем бере ачиз ик гумыетӥ кошке. Чылкак городын выллем. Кузьымгуртысь куамыназ корка газ кыскизы ни. Ӝоген соослэн но гуразы чагыр эстӥськон ӝуалоз. Корказэс, иське, пуэн эстоно уз луы ни. Соку чылкытлыкез но чакланы каньылгес луоз. Тямыс классэз йылпумъям Ирина нылзылэн комнатаез нимаз. Татын - кӧлан кровать, гожъяськон ӝӧк, ӝӧквыл лампа, палас, нимаз укно. Улон умоямен, дыр, берло дыре кузьымгуртъёс пӧлын вылӥ тодон-валан басьтэмъёслэн лыдзы кызьлэсь ортчиз ни. Мишалэн кузпалыз но, Зинаида Аркадьевна, со понна трос кужымзэ сётӥз - куамын одӥг ар ӵоже дышетӥз Кузьымгурт школаын. Гурт паськыта но чеберске.Кужмоя одӥг семьяысь трос семьяос кылдэм чотын. Дурисьлэн, Семон агайлэн, выжыез но туж паськыт пушйиз. Одӥг дурись кельтӥз трос дурисьёсты. Улонэз дурисьёсты. Тӥни соин кужмо, дыр, удмурт калык. Пётр Скобелев. Электрокужымлы дунъёс сярысь Туэ 25-тӥ августэ Удмурт Республикаысь Тарифъёсъя но дунъёсъя кун комитет акциосын "Удмуртэнерго" огазеяськонлэсь электрокужым вузамез понна выль дунъёс тупатӥз но соин валче постановление кутӥз. Комитет татын лыдэ басьтӥз "Россия Федерациын электрокужым но шуныт понна тарифъёсты кун ласянь тупатон сярысь" Федеральной Законэз (кутэмын 1995-тӥ арын 14-тӥ апреле, номерез 41-ФЗ), "Электрокужымлы но шунытлы дунъёс кылдытон инъет, тарифъёсты кун ласянь тупатон но кутон сярысь" Россия Федерацилэн Правительствоезлэсь Постановленизэ (кутэмын 1997-тӥ арын 4-тӥ феврале, номерез 121), "Удмурт Республикаын тарифъёсъя но дунъёсъя кун комитет сярысь" Удмурт Республикаысь Правительстволэсь Постановленизэ (кутэмын 1999-тӥ арын 12-тӥ июле, номерез 656). Удмурт Республикаын та постановление кужыме пыриз ни туэ 1-тӥ сентябрьысен. Электрокужымлы выль дунъёсын герӟаськем тарифъёс сярысь документъёсты сётӥськом ӟуч кылын. Лыдӟисьёс гожто Тодмоосме адӟисько газетысь Семьяямы ми 7 нылпи вал. Ваньмы пичи дырысен ик лыдӟиськом газеттэс - атаймы огпол но гожтӥськытэк ӧз кыльылы уго. Али но "Удмурт дунне" мынам самой матысь эше луэ: лыдӟисько но, тодмоеным вераськем кадь луисько. Ма, озьы ик вань со. Тӥляд газетты пыр тодӥсько ӵош дышетскем, ужам эшъёсы, аслам дышетэм пиналъёсы сярысь. Якшур-Бодья педучилищеын дышетскыкум, практикае Кекоранэ ыстӥзы. Трос визь-кенеш сётӥз, пиналъёсын ужаны индылӥз дано дышетӥсь Клавдия Дмитриевна Загребина. Со туж ӵем пӧртэм газетъёсы гожъяськылӥз. 4-тӥ классын дышетскиз соку туж етӥз мусо нылаш Маша Кутявина (бӧрысь со Пётр Николаевич Кубашевлэн кузпалыз луиз). Педучилищеын ӵош дышетскимы Удмуртиысь дано дышетӥсен, букварьлэн автореныз Вера Ивановна Колесниковаен (Загребинаен). Со сярысь но мон трос тодӥсько тӥляд газетысьтыды. Ижевскын учительской институтын одӥг группаын дышетски Леонид Петрович Емельяновен. Со но данэ потӥз, устоесь произведениос гожъя. 1949-тӥ аре ужаны кутски Пычас ёросысь Бобья-Уча школаын, историен дышетӥсь луыса. 10-тӥ классын дышетскиз соку Федосья Михайловна Михайлова (али Тубылова). Пичи Пургаысь "Зарни шеп" ансамблен кивалтэ, кытчы но соос уг вуо! Нош 6-тӥ классын дышетскиз Кондратий Борисович Ухов. Мон вал соослэн классэн кивалтӥсьсы. Кондратий усто шудылӥз спектакльёсын. Жаль, улонысь туж вазь кошкиз. Бобья-Учаысь медпунктын соку фельдшер луыса ужаз Семён Александрович Самсонов. Со соку ик "Советской Удмуртия" газетэ гожъялляз. Таиз но улонысь вазь кошкиз. Мон ужан вакытэ ик дышетскизы Семён Карпович Карпов но Анатолий Кузьмич Леонтьев. Коньы Толялэсь трос гожъямъёссэ лыдӟи ини. Со вакытэ удмурт кыллы но литературалы дышетӥз Парасковья Кузьминична Кузьмина. Солэн дышетэм нылпиосыз тросэз данэ потӥзы. Алнаш ёросын Кучыран школаын ужакум, усто дышетскиз Фридрих Иванович Иванов. Али со Алнашын дано адями. 1962-тӥ арысен Кузёбайын улӥсько. Татысь школаез йылпумъяз Надежда Анатольевна Шкляева (Волкова) - история наукаосъя кандидат. Ужа со Ижевскын, но газет пыр со сярысь но тодӥськом. Кема ужаз "Советской Удмуртия" газетлэн собкорез, собере партийной улонъя отделлэн кивалтӥсез луыса Павел Ефремович Бушмакин (кошкиз ини улонысь). Со вал мынам двоюродной братэ. Кызьы адӟиськоды, тӥляд газетты пыр трос тодмоосылэсь улэмзэс, ужамзэс тодӥсько. Туж гажаса лыдӟисько Алексей Шкляевлэсь, Георгий Грязевлэсь, Анатолий Леонтьевлэсь но мукет авторъёслэсь статьяоссэс. Шумпотӥсько, милям гуртысьтымы нылъёс но: Таня но Надя Прокопьеваос, Галя Савина газетэ гожъяло шуыса. Туж бадӟым тау тӥледлы. Азьланяз но лыдӟисьёстэс шумпоттыны мед быгатоды. М. ШИШКИНА (ЗАГРЕБИНА), ужысь ветеран. Алнаш ёрос, Кузёбай гурт. Экономика но рынок Тэтэ каремысь дугдоно ни Ижевскын ортчиз ужбергатонэз азинтонлы сӥзем международной научно-практической конференция. Солэн ужаз, Удмуртиысь но Россиысь сяна, пыриськизы Германиысь, Венгриысь, Украинаысь но Белоруссиысь специалистъёс. Кенешонэ люкаськемъёс отын пыр- поч эскеризы ужбергатонэн но экономикаен герӟаськем ужпумъёсты, кылзӥзы, кыӵе югдур та ласянь мукет странаосын, кылсярысь, Венгриын. Асьме республикаын ужлэн мынэменыз тодматӥз С. В. Чикуров, Правительстволэн Тӧроезлэн экономикая воштӥсез (та дырозь 10 ар ужаз ужбергатон удысын): - Удмуртиын туннэ нуналлы та удысэ выжемын ог 70 сюрс адями, данакез соос - ужтэк кылемъёс, ӝыныезлэсь ятырез - нылкышноос, - шуиз со. - Ужбергатӥсьёс шоры учкон берло аръёссэ чутрак воштӥськиз: соос шедизы ни Кун Кенеше но, Правительствое но. Озьыен, тэтэ карон дырмы ортчиз, дыр вуэмын астэ зэмос ужын возьматыны но калык хозяйстволы пайда поттыны. Зэмен но, пичи ужбергатон арысь аре пумен юнгес но юнгес выжы лэзе, туала обществоын со ассэ ӝог шедьтӥз, шуыны луоз. Та ласянь люкаськемъёс сак кылзӥзы А. И. Татаркинлэсь, Россиысь Наукая академилэн экономикая институтэзлэн Урал ёзэзлэн директорезлэсь верамзэ: - Урал понна та удыс туж кулэ, малы ке шуоно, оборонной промышленность асьме дорын бадӟым инты басьтэ, нош конверсиен валче ужтэк кылемъёслэн лыдзы чутрак будӥз. Тужгес но - Удмуртиын. Пичи ужбергатон юрттоз но юрттэ калыклы шуг-секытысь потыны, семьязэ вордыны. Тӥни малы сое азинтон выль но выль амалъёс утчаны косэ. Али быдэс дунне возиське коньдон поттон но сое бергатон вылын, Россия та ласянь, мукет государствоосын ӵошатыса, шӧдскымон бере кылиз. Ортчемзэ тодэ ваёно ке, СССР-ын куд-ог вамыш лэсьтэмын вал. Вераськон мынэ подряд амалэн ужан сярысь. Кызьы пусйиз А. И. Татаркин, хозяйствоосын огвакытэ туж умой пыӵаны ӧдъяз вал семьяосын ужан амал. Самой соку Урал котырысь улосвылъёс умой-умой басьтӥськизы бакча сиён будэтон борды, удалтӥз сугон но. Жаляса верано, государство та сюресэз ачиз ик пытсаз, кышказ, адямиос мултэс юн узырмозы шуыса. Нош пайдаез вал: калык хозяйстволы но, ужась муртлы но. Пичи ужбергатонлы кутскон, озьыен, сётэмын но дугдытэмын вал партийной кивалтӥсьёсын. Али улӥськом музон государствоын, озьы ке но, выль удысэз эскерисьёс-чакласьёс трос. Соос пӧлын вань пыдзэс пуктӥсьёс но. Вылаз ик, законъёсмы улонлэсь бере кылё яке воксё но уг быдэсъясько. Эшшо огез муг: ужбергатонэз азинтыны уг тырмо ӟеч дасям специалистъёс. А. И. Татаркин верамъя, соосты дышетыны кутсконо школа парта сьӧрысен. Сотэк калык радэ ноку но ум потэ. Шаерысьтымы югдурен кенешонэ вуэмъёсты тодматӥз М. П. Зайцев, Удмурт Правительствоысь Пичи ужбергатонлы юрттонъя но сое азинтонъя кун комитетлэн кивалтӥсез. - Ушъяськыны туннэ номырин, - шуиз со. - Пичи ужбергатонэ лыктӥсьёслэн лыдзы каллен йылэ. Ма солы люкетэ? Нырысь ик, дунъёсты будэтон. Шуом, гуртын яке городын улӥсь воргорон столярной ужен вырыны мылкыд каре. Со понна солы нырысь ик уксё тырыны кулэ электрокужым понна, басьтоно сертификат. Ваньмыз та усёз 10-13 сюрс манетлы. Кутскись мурт кытысь соку ик коньдон шедьтоз? Тӥни ма борды канжасько данакез ужбергатонэ лыктӥсьёс. Нош кызьы ужъёссы мыно Венгриысь бизнесэн вырисьёслэн? Со сярысь вераз Кристиан Белла, Печ городысь Я. Паннониус нимо университетысь учёной. Со шуиз: - Приватизация ортчытон улсын ваньзэ бадӟым предприятиосты ми дорын куашкатӥзы, рабочийёс пӧлысь ог куиньмос люкетэз таин валче выжиз бизнесэ. Ужбергатон удыс Венгриын герӟаськемын калыклы пӧртэм пумо услугаос сётонэн, соин ик ужтэк кылемъёсты тыршиськом вакчи дыр куспын дышетыны кыӵе ке но специальностьлы. Коньдон сыӵеослэсь ум куриське - мед луоз быгатонлыксы, нош дышетонэз государство быдэсак ас вылаз басьтэ. Ужбергатӥсьёс ми дорын кыклы люкисько: нырысетӥосыз - герман группа. Татын коньдон ласянь но, ужез быдэсъянъя но котькудӥз азе чурыт курон пуктӥське. Данакез ужбергатӥсьёсмы ӵапак татчы пыро. Кыкетӥ группа - англо-американской. Татын туж ӟеч тодоно англи кылэз, уж дорад золгес бергано но чурыт сямо луоно. Капитал сярысь ке верано, 60 процентлэсь ятырез со кошке иностранной банкъёсы. Странаысь госбанк предприятиослы ссудаен но кредитъёсын уг юртты. Тӥни малы заводъёс ужало музон странаос вылэ. Югдур ми дорын чутрак воштӥськиз Европаысь экономической огазеяськонэ пыреммы бере. Таин ӵош быдэсак сямен куашказ гурт удыс: кивалтӥсьёс лыдямъя, бакча сиён будэтон, Западын сярысь, трослы дуногес усе. Тӥни малы Венгриез туннэ сюдо Испания, Италия но Португалия. Кинлы мар кизёно-вордоно - ваньмызлы кузё луэ международной капитал. Бельгия ас дораз малпа вал лампочка поттонъя бадӟым производство усьтыны - ӧз сётэ, та удысэз усьтӥзы Венгриын. 70 процентэз электролампа табере дасяське ми дорын. Капитализм ваньзэ лыдъяса-чотаса лэсьтэ. Верало на одӥг примерез. Пудо вордон удыс Европаын азинске аслыз гинэ тупась куронъёсъя: одӥг йыр парсьлы висъяське 2 квадрат метр инты - солэсь пичи но, бадӟым но уг яра; чипы вордоно ӵошкыт азьын, тубатъёс медаз луэ - шуккиськозы, соин сэрен продукция кулэсмоз. Огъя вераса, Европаысь экономической огазеяськон котькуд чырызэ- пырызэ чакла, коньдон поттынын ыштонъёс адӟонтэм понна. Валамон, отысь ужбергатӥсь юрттэт но тырмыт басьтэ. Асьме дорын та сярысь вераськыны вазь на, малы ке шуоно, государстволэн коньдонэз ӧвӧл. Со бордысь потэ ужтэк кылён, уждунтэк пукон но мукетыз. Кенешон ма ласянь пайда ваиз? Огазе люкаськон,ог-огдэ кылзон ноку но мултэс ӧвӧл, нош дас ар ӵоже ӵош ужам бере - уката но. Куноос тодматскизы Ижевскен, куд-ог фирмаосын. Вуоно пумиськонзы табере ортчоз вуоно арын. Л. МЕДВЕДЕВА. Наталь "ЕГИТ СЕМЬЯ - ТУННЭ НО ӴУКАЗЕ" КОНКУРСЭ Тон ке шудо, мон но шудо Гуртмылэн шораз интыяськемын эмъяськонни. Азьвыл сямен сьӧрло ветлоно ӧвӧл пинь эмъяны, пуктылыны. Я уж вискад, я урокъёс бере мынӥськод но тӥни. Сьӧрлось лыктэмъёс жалесьгес но адӟисько. Тани али но люкаськиллям тодмотэм адямиос. Одӥг кышномуртлы вазиськи: - Кин доры лыктӥды? - Пинь эмъясьёс доры, - вазиз выль тодмое. - Ма, соос тӥляд туж лякытэсь ук, эсьма, висёнэз ик вунэтоно. - Озьы, озьы, - итӥське мукетыз, - милемлы, пересьёслы, шуныт кыл эмъюмлэсь но дуно. - Мукет азьын пуктэм пиньёсыным одӥг нунал но сиськыны ӧй быгаты, выльысь пуктылоно луи. Тани татын, Моньялан эмъям пиньёсыным мульы но шальтыр пильылӥсько, - вазьытэк уг чида мукетыз кенак. Люкаськемъёс ӵошатскыса сямен шуныт кылъёс верало Светлана но Леонид Огневъёс сярысь. Мон кылзӥськисько но шумпотӥсько. Гуртысьтымы егит кузпалъёс сярысь верало уго. Шудо семья. Ог-огенызы тодматскизы Ижкын дышетскыкузы. Моньялась Света но Ува ёросысь Лёня, кыкназы но бадӟым семьяысь. Татчыозь югыт дуннеын улытозям мон валай ини: семьяын нылпиос ке трос, отын ог-огдэ жалян, сюлмаськон, юрттон вань шуыса. Светлана Алексеевна вазь кылиз анайтэк. Сюрмумыен удалтӥз, анайтэк кылемъёслы анай луиз со, вить нылпиосты бордаз бинялтыны быгатӥз. Ваньзы лякытэсь, ужез яратӥсесь, рос-просэсь, Лёня агайлэн но туж адӟем карымон, лякыт семьяез. Вить кузя вынъёс но одӥг сузэрзы тупаса, ог-огзэс валаса уло. Шуг-секытъёсысь котьку ӵошен потыны тыршо. Огазеяськемзы бере кузпалъёс Огневъёс бертӥзы Моньяла. Будэто кык ныл, бадӟымез 5- тӥ классэ выжиз, нош пичиез туэ нырысетӥ классэ мынӥз. Адӟем карымон семья. Кӧня ке юанъёсыным соослы вазиськи, нош ас поннам малпай: "Тьфу! Тьфу! Тьфу! Син гинэ медаз усьы, сьӧд коӵыш азьпалтӥзы медаз поты, канжатыны турттӥсьёс ноку медаз луэ". - Шудо-а кадь тӥляд семьяды? - Шудо, дыр, нылпиосмы, яратоно ужмы вань бере. - Кызьы потӥськоды туала шуг-секытъёсысь? - Ваньмы ӵошен кенешыса. - Нош нылъёстэс будэтон но визьман кудды вылынгес? - Тыршиськомы кыкнамы но соосын вырыны. - Кызьы уксё поттӥськоды? - Йырынымы, киосынымы но пыдъёсынымы. - Тӥ малпамъя, кыӵе со - шудо семья? - Кудаз ваньмыз тырмыт: уксё ласянь но, ог-огдэ валан ласянь но. - Трос-а дырды быре телевизор азьын? - Толалтэ ӵемгес учкиськом, нош гужем туж шер. Быдэс нуналмы бакчаямыгес ортче. Ӝыт пал гинэ иворъёсын передачаосты учкиськом. Нылъёсмы туж мультфильмъёсты ярато. - Анай-атайёстылэсь ӵем-а юрттэт курылӥськоды? - Ум. Ми асьмеос тыршиськомы соослы юрттыны. - Кызьы учкиськоды, ныл секытэн луыса семья кылдытӥсьёс шоры? - Туж жаль пото сыӵе семьяос. Соос улон шӧмез утчамын ӧвӧл ай, яратонэз но, оло пумитазы, оло ӧз. Уксё но асьсэос поттыны уг быгато, анай-атайлы вылысьтыз вылаз шуг-секыт ваё. Нырысь дышетсконо, дышетсконо, собере ини семья сярысь но малпаськыны яралоз. Улон шоры учконэд но соку йыг-йыггес ини. - Нош городын семьяеныды улэмды уг поты-а? - Дышетсконмес йылпумъяса, милемыз республиканской больницае ӧтё вал, но ми гуртэ бертӥмы. Татын ик умойгес. Аслад бакчаед, азбаред. - Мар дэмласалды егит семья кылдытӥсьёслы? - Сизьым пол мед мерталозы, собере гинэ мед вандозы, семья кылдытон понна нырысь ик мед луоз яратон. Со бордысь ик потэ ог-огдэ валан но. Нош уксё понна кылдэм семьяос кема уз чидалэ, дыр ортчемъя валалозы - уксё шудэз уг вошты. - Леонид Веньяминович, кыӵе сямзэ кузпалыдлэсь тужгес но дунъяськоды? - Монэ валамзэ, сюлэмзэ берыктыны быгатэмзэ. - Нош тӥ, Светлана Алексеевна? - Троссэ дунъясько. Одӥгзэ-кыксэ гинэ висъяме уг луы, нош тужгес но, дыр, мон но дунъясько монэ валаны быгатэмзэ. - Шуом, куспады керетон потӥз. Куддылэн сюлэмды чалякгес берытске? Света апай: - Валасько ке мон янгыш шуыса, ачим нырысь вазисько. Лёня агай: - Мон но озьы, сотэк уг луы семьяын. Туж муспотонэсь кузпалъёслэн нылъёссы пичи Жени но Оксана. Ноку вӧзтӥ вазьытэк уз ортче. Ӝикытэсь, пыр-пыресь, рос-просэсь но визьмоесь. Трос саклык висъяло, уго, анаен-атай нылъёссэс будэтонлы. - Кинлы тон, Оксана, тау шуысалыд? - Одӥг пол вазиськи бадӟым нылзылы. - Мамалы но папаелы, - чик малпаськытэк вераз нылаш. Егит кузпалъёс нылъёсынызы пуко, ӵош книга лыдӟо, дыр шедьто Ижевскысь театре, Летний садэ, зверинеце но нуллыны. Нылъёс но пунэме уг кылё, анай-атайзылы юрттӥсько, ӵош кенешыса, сюлмысь вераськыса ужало, пичи секретъёсэс анайзылы усьто. Нырысетӥ классэ мынэм Жени тодэ ни, кинлы бызёз, кыӵе луоз семьяез. Солэн уго азьланезлы планэз вань ини. Та нылъёслэн эшъёссы но трос - ярато соосты. Ма, кин-о уз яраты лякыт муртэ: пичи-а, бадӟым-а со. Тӥни сыӵе егит семья улэ но ужа Пичи Пурга ёросысь Монья гуртын. Улонэз ярато, гурт калыклы ӟеч лэсьто. Оля Никитина, Удмурт кун университетын дышетскись. Удмурт лулчеберлыкъя дэменлыклэн ӧтчамез азьын Ас выжымы чебергес Ас кылдэ тодон, сое яратон - удмуртлыкез гажанлэн-утёнлэн одӥгез бадӟым люкетэз. Кылзэ тодӥсьтэм адями сярысь вераны шуг, кыӵе выжыысь со.Ватка (Киров) но Пермь улосъёсысь удмуртъёс кылзэс пумен вунэто. Кирос улосысь тямысаз ёросын вань удмурт гуртъёс. Пермь улосын соос Оса но Куеда районъёсын. Та палась гуртъёсысь егитъёс уг дышето удмурт кылэз школаосын, куспазы но удмурт сямен уг верасько, уката ик - Ватка палан. Озьыен, отын удмуртлык быре: калык вунэтэ кырӟанъёссэ, йылолъёссэ. Нош бӧрысь ини ассэ ӟуч кожа, паспортэзъя но удмурт ӧвӧл. Удмурт али но, мукет калыкен ӵошатыса, золгес герӟаськемын инкуазен. Отысь со басьтэ сиён-юон, дӥськут. Калыклэн кылосэз но, йылолъёсыз но инкуазен герӟаськемын. Соин ик со секыт мылкыдын пумитаз ог дыре музъемез "умоятонэз" - трос нюръёс, пичи тыос, шуръёс куасьтэмын вал соку, корамын уно бадӟым тэльёс. Инкуазь нош - асьмелэн инмармы ук. Калыкмы сиён-юон пӧраны но туж быгатылӥз, ваньзэ дасялляз ас дораз люккаськем ваньбурлэсь, уката ик ческыт пӧрмытылӥз няньлэсь сиёнъёс. Нош али радио пыр но верало, газетъёсын но гожъяло, асьме дорын будэтэм юлэсь нянь пыжыны уг луы шуыса. Озьыен, удмурт калык, зэм ик, ыштӥз нянь пыжонъя тодон-валанзэ. Мынам валамея, пӧраськыны быгатон - удмуртлык. Нош кыӵе чебер адӟиське калыкмы ас дӥськутэныз! Со шоры праздникъёсы, шулдыр ӝытъёсы, концертъёс дыръя ваньмыз синмаськыса-вожъяськыса учко. Туж умоесь асьмелэн куно пумитан йылолъёсмы. Соосты чакласа возиськод ке, котькыӵе ужрад капчи но шулдыр мынэ. Н. ВОЗИСОВ. Кин уг ужа, со сие Таӵе пыкылон кылъёс веразы Правительстволы шаерысьтымы данакез профсоюз кивалтӥсьёс. Пумиськон ортчиз республикаысьтымы Профсоюзъёслэн юртазы. Калыкен пумиськылӥз Правительстволэн Тӧроез Н. А. Ганза, солэн воштӥсьёсыз, министръёс, Ижевсклэн мэрез А. И. Салтыков. Одӥг юан но, одӥг ужпум но сэрттытэк-пертчытэк ӧз кыльы, котькудӥзлы валэктон сётыны тыршиз Правительстволэн кивалтӥсез. Нош соос пумтэм-йылтэм. Вераськонэз усьтӥз Рессовпрофлэн кивалтӥсез Е. Н. Орлов. Со ик ӟырдыт кенешонлы кутскон сётӥз, дораз вуэм юанъёсты Правительство азе поттыса. Шаерысьтымы ужаса улӥсьёсты тужгес но шугъяськытэ дунъёслэн дугдылытэк будэмзы. Соос берло ӝыны арзэ гинэ 2-3 поллы ӝутскизы ни, нош уждун 20-30 процентлы сяна ӧз йылы. Та нуналъёсы нош ик дуноя эстӥськон, электрокужым. Нылпи пособиос уг тырисько. Огъя вераса, юанъёс трос гинэ люкаськемын. Зэмен но, кызьы та вакытэ семьялы улоно, кызьы нылпиостэ вордоно? Николай Алексеевич Ганза быгатэмезъя соизлы но, таизлы но валэктон сётыны выриз ке но, люкаськемъёслэн бугырскем мылкыдзы ӧз лапка. Куд-огез залысь но ӝыныё-урдсо султыса кошкиз: таосызлэн осконзы но, чиданзы но быриз ни. Та вакытэ туж секыт югдур автозаводын, мотопроизводствоын. Промышленность 30 процентэз гинэ ужа. "Ижмаш", республикамылэн огез валтӥсь предприятиез, сылэ, малы ке шуоно, заказзы кык поллы кулэсмиз. Правительстволэн Тӧроез верамъя, заводэз ужатон понна туннэ кулэ 100 миллион доллар. Кин асьмелы сомында коньдон сётоз? - Электрокужым сярысь. Вань кулэяськонлэсь 30 процентсэ гинэ Удмуртия поттэ, 70 процентсэ басьтӥськом палэнысь. Дунзэ но отын пукто. Ми бордысь со уг поты, - шуиз Н. А. Ганза. - Югдур секыт, тужгес но гурт удысын. Солэн пунэмаськонъёсыз 1,6 миллиард манетозь вуэмын ни. Нош дотация ваньзэ-ӧвӧлзэ сётэмын 104 миллион манет, та уксё тырмиз кызьы но озьы тулыс кизёнэз ортчытыны но сӥзьыл ужъёсты нуыны. Огвакытэ республика шуге-леке вуылӥз пызь ласянь но: запасмы куинь суткалы гинэ кылльыӥз на. Нефтепродуктъёсъя малы югдур озьы луиз? Зэмзэ вераса, "Удмуртнефтепродукт" огазеяськон ас мылкыд каремезъя выре вал банкрот улэ шедьыны. Правительство та сюресэз пытсаз, кивалтӥсьсэ мозмытӥз, бензинлы черодъёс быризы. Правительство та огазеяськонлэсь ог 60 процент акциоссэ ас вылаз басьтоз, соку шуге-леке вуон учыръёс уз луэ ни. Николай Алексеевич люкаськемъёсты оскытӥз нылпи пособиосты висъям пумысен но. - Та бордын ужаськом, - шуиз со. Зэмен но, Правительство утчаське, татысь но отысь коньдон шедьтыны сюлмаське. Нош дунъёс ялан будо. Соосты дугдытыны Удмуртия ас кожаз уз вормы. Тӥни малы арысь аре начармиськом, пумен уллань лэзьиськиськом. Та выллем пумиськонъёс, ӟырдыт вераськонъёс, ог-огдэ пыкылонъёс луозы на азьланьын но. Нош ма воштӥськоз, ку ужаммыя уждун басьтыны кутском, тыро-пыдо улом? Та юанъёслы туннэ нокин но валэктон уз сёты, секыт югдурлэн выжыосыз туж пыдло кошкемын ни. Л. МЕДВЕДЕВА. НАТАЛЬ ТОДМАТСКОН СЭРЕГ Йыромем шуд Ваньмыз умой вал кадь Татьяналэн улоназ, йыр вадьсаз сьӧд пилемъёс ӧз ик адӟиське. Дышетскиз, картлы бызиз, нылыз вордӥськиз. Вал асьсэлэн юртсы, хозяйствозы. Ул но ул кадь, но ӧз пӧрмы картэныз семья кусыпсы, сьӧд коӵыш, лэся, вискытӥзы потӥз. Озьы но, тазьы но турттӥз на нылкышно тэшканы кутскем кусыпъёссэс радъяны. Номыр ӧз юртты. Люкиськизы. Сюлэмзэ бышкись тодэ ваёнъёслэсь палэнскон понна, Татьяна кыкетӥ вылӥ образование басьтыны малпаз, вить аресъем нылызлы тросгес дыр висъялляз. Но сюлэмыз ӧз тоды буйганэз, пыдло-пыдло каръяськем мӧзмон весь сюпсиз мылкыдзэ. Воргорон киостэк юртъер котырез но гуртын капчи ӧвӧл ас пельпумъёсад нуыны. Озьы ортчиз ар бӧрсьы ар. Ӧз чида, малпаз Татьяна улонзэ чутрак воштыны - вазиськиз Юкаменскысь тодматскон службае. Солэн ялонэз печатламын вал "Удмурт дунне" газетын. Шаермылэн пӧртэм сэрегъёсысьтыз огез бӧрсьы мукетыз вуыны кутскизы сюлэмез шунтӥсь гожтэтъёс. Сокем трос гожтэт вуэмысь, Татьяна нырысь-валысь мар карыны ик паймиз, вазиськиз "Я+Я" тодматскон службае. Собере вал пумиськонъёс, улонзэс герӟаны куронъёс... Трос юасьёс пӧлысь нылкышно сюлэм дугдӥз одӥгез вылэ. Шудэн пачылмем мылкыдын пыриз со дорамы, юрттэммы понна тау карыны. Арня ортчыса, пе, мукет районэ улыны кошкисько. Татьяна шедьтӥз аслыз карт, нылызлы - пичи вын. Тодматскон службаямы вазиськемъёс пӧлысь тросэз асьсэлэсь палзэс шедьто. Учкиськод соос шоры но тодмотэм адямиез адӟиськод кадь. Кисыриоссы но кытчы ке ватӥськиллям, синъёсазы шумпотон пальыша. Семьяен улон адямиез бурдъяськытэ. Л.Бельтюкова, Юкаменскысь тодматскон службаысь специалист. Калык кырӟанлэн но гожтӥсез вань Кырӟан котькинэн эшъяське. Солэн адскисьтэм кужымез бадӟым: сюлэмъёсты вырӟытъя но, бӧрӟытъя но, малпаськытэ но. Котькуд гурлэн аслаз кыстӥськон нюжаез. Одӥгез - огпол кылытозь. Кӧс кырӟанэз уго сюлэме уд лякы. Мукетыз - даур ортчытозь. Бен, пересьёс но юзырам мылкыдзэс ӟеч крезьгурен шунто. Уӵылэн кадь гурез кылзыса, висись но кыльзэ-черзэ огдырлы вунэтэ. Сюлэме каръяське крезьгур, со ини шуд кесэг. Пичи дыръям пересь нэнӥелы паймисько вал. Со уго трос кырӟанъёсты лушкеменгес нёръяз. Шыпытак гинэ, кинлэсь ке ватыса кадь. Нимысьтыз лыдӟиськемзэ адӟеме ӧвӧл, букваосты, ма, тодма ик вал кадь. Нош кытысь сомында кылчуръёсты тодылӥз, ӧйтӧд. Кытӥяз соос пумтэм-йылтэм пото вал (операын кадь, но та кылэз соку ӧй но тодылы). Шулдыръяськон дыръёсы, ваче капка улӥсь Оддок апаен пумисько ке, кырӟан мылкыдзэс ӧръян понна шунтӥсьсэ потто, уйбыт кылало-бурало. (Кыксылэн ик картъёссы война азьынгес быремын. Оло Сталинлэн гижы улаз сюризы, оло... Созэ тодыса ӧй вуы.) Отын ик серекъяло, отын ик синвуасько. Синкыли пыртӥ ӝож гурзэс мыто. Кытӥяз ог-огзэс, кылъёссэс, тупатъяло но вал. Соос уго ӵошен, сюлэм пыртӥзы поттыса, ортчемзэ кырӟазы. (Малы меда ӧй гожъя соку кырӟамзэс - табере йырысьтым тӧлӟемын. Шонерзэ ке верано, ачим но нырулме ӵушыса, штаниме ӝуткаса бызьылӥсько на вал.) Нош урамын музон гуръёс вӧлмемын: "Сталин сюрес одӥг гинэ - нокуд пала ум коже" яке - "Поплэн сюлэм малы ӟырда - калык юзэ ӧз вӧся". Ваньмыз со вал Инмарлы осконэз но ӟеч сабырлыкез ултӥян вакытэ. Ортчизы аръёс, кылдӥзы выль кырӟанъёс. Репрессие шедемъёслэсь данзэс ӝутэм бере, тодмо луизы "ӵушем" поэтъёс, писательёс, вылӥ ёзъёсысь кивалтӥсьёс. Озьы ик шараяськизы калык кырӟанъёслэн авторъёссы. Тодмо луизы гур пӧрмытъясьёс но. Юнме шорысь-а калык артисткамы В. К. Виноградова кулэмезлэсь азьло сюлмыз чигыса ик шуиз вал: "Калык кырӟанлэн но композиторъёсыз вань". Ми дышетскыку, Актэмырын Михаил Николаевич Тимашев сярысь кылпум но ӧз потталэ. Будто ке сыӵе адями дунне вылын чик ӧй вал. Кык вынъёсыз, Вася но Федя, агайзы пумысен малпазы. Сюлэмзы ке но писыръяз, чидатскизы, луоз. Нимысьтыз кабинетъёсын соосыз шымыръязы, дыр. Вася агай фронтовик вал, кайгырон синвуэз "омыръяз", но берпум нуналозяз шып улӥз. Озьы ик покчиез, Федя но. Анайзы бон оскымон кышноос пӧлын Микалез сярысь ма но со поттылӥз ик. Бадӟымзэ пизэ возьмаса-возьмаса даурзэ нуйтӥз. Кисьтон дыръя, шайвылысь палэнскыса, нюк дорын куяськоз вал: бертымтэ пиелэн, пе, азяз мед усёз, бакель медло. Со укыр пересьмытозяз улӥз. Укмыстонлэсь ортчыса люкиськиз дуннеен. М. Тимашевлэн "Насьток" мелодрамаез (1929) нотаосын потэм. Ачиз ик нота усьтонъёсыз но вала вылэм-а, мар-а? Пьесаосыз, веросъёсыз сяна, кылбуръёсыз но уно вылэм. Кин тодэ на табере? Песяйёсмы, оло, солэн кылъёсызъя но пӧрмытъязы кырӟан гуръёссэс. Малы ке-а лушкемен гинэ нёжъязы? Вератэк кельтэме уг поты эшшо одӥг учырез. Витьтонэтӥ аръёсы син висён (трахома) вӧлмемын вал. Кӧшкемыт чер. Ёрос больницаысь врачъёс асьсэос гуртъёсы потазы. Дырзэс но кужымзэс жалятэк ветлӥзы коркась корка. Одӥг ӝокыт гужем нуналэ пыриз ми доры лап-лап кышномурт. Вераське со удмурт сямен, небыт но лать-лать. Пересь нэнӥе самоварзэ аратыны ӧдъяз. Кышномурт, ӟус вылэ пуксьыса, "Беломорзэ" ӝӧк пуме понӥз. Мынэсьтым синъёсме учке, пумен ма но со юалляське. Кыӵе ке мазен зырӟиз, синъёсы ик вогыртӥзы. Со вискын пересь нэнӥе висъет сьӧрысен аслэсьтыз кыла-бура: "Ой, Окыль, Окыль, астэ ке но ум адӟиське, кырӟанъёстэ весь посӥськомы". Мон шузи йырыным кырӟан пӧрмытъясьёс "Беломор" кыскыса ужало кожасько вал. Со кышномурт уго, нэнӥелэсь куриськыса, тамаксэ аратӥз. Собере шуэ: "Со сярысь эн поттылы, Надёк, стихъёсын уг ни выриськы". Нэнӥе паймыса кадь висъет сьӧрысь потӥз: "Ми ведь, Окыль, пинал дыръязэ кырӟаськом на". Мултэс пель шуыса, дыр, монэ ураме лэзизы. Пичи мурт уго, выжыкыллы но оске бере, ваньзэ кылзоно кожа. Мар карод, бадьпу ньӧрез вал карыса шудон но дуно. Эшъёс пӧлы потытэк ӧйлась. Аръёс ортчыса гинэ тодӥ, со вылэм Ашальчи Оки. Нош малы пересь нэнӥеным соос шумпотэмын вал? Оло кырӟанъёс пумысен, оло одӥг ёросысь луыса? (Нэнӥелэн но ныл йырыз Грахысь вал.) Оло нош улонлэн шуг-секытэз соосты маин ке герӟаз? Ӧйтӧд. Мыло- кыдоесь вал но тӥни. Берло дыре Ашальчи Окилэн кылъёсызъя уно кырӟанъёс вӧлмизы ни. Куд-ог кылбурезлы кык-куинь крезьгурчиос пӧртэм гур гожто. Вашкалаоссэ, азьло пӧрмытэм гуръёсыз но вунэтыны уг яра вылэм. Куӟебай Гердэз но сӥлы карыса, вуж кырӟанъёссэ тупатъятэк ик умой ӧй луысал меда. Со уго ачиз кырӟаны усто вылэм. Но соку вакытэз кырыж тырем артана кадь вал. Одӥгзэ ке мырӟид, быдэсыз куашка. Нош туннэ? Мар кырӟамед потэ - кырӟа. Ыж сямен ке но бӧксӥд, кырӟа шуозы. Кылъёсыз но, гурез но аслаз. Мар сярысь вера, валаны уг луы. Быдэс кылбураз дас кылыз, дыр. Дас кыл пӧлысь огзэ ог сю пол погма. Ялан "яратӥ" каре но тӥни. Соиз бен озьы: атас котькӧня мед чоръялоз, ӵӧж солы синмаськымтэ. Кошкизы, лобӟизы вож садысь уӵыос: Кузьма Ложкин, Васса Виноградова, Григорий Титов, Клавдия Гаврилова но мукетъёсыз. Конечно, вань на али кырӟасьёс. Только соос палэнтэмын яке зӥбемын. Оло нош дырызлэсь вазь кужмысь пенсие келямын. Кызьы ке огпол газетысь лыдӟи бигер литературоведлэсь одӥг статьязэ. Номыр но тунсыкоез ӧвӧл кадь. Паймытӥзы монэ соиз: "Вижу чудное приволье" ӟуч кырӟанэз бигеръёслэн шуэ. Ми дышетскыку, ялан сое ӟуч калык кырӟан шуылӥзы. Нош со тазьы валэктэ: 1850-тӥ-1870-тӥ аръёсы, пе, сое бигер кылбурчи гожтэм (нимтулзэ вунэтӥ). Музон кылэ берыктыса, пе, одӥг-кык кылзэ воштӥллям но - ӟуч калык кырӟан луэм. Оло озьы, оло тазьы, но монэ мукетыз "усыкмытӥз": даурлэсь ятыр ортчыса но бигер адями ялан утча аслэсьтыз выжызэ. Кытысь? Ӟуч литератураысь. Удмуртъёс но бере уг кылё кадь. Таӵе ужын нимысьтыз тау карем потэ фольклористлы, кылбурчилы П. Поздеевлы. Номыр уд шуы, агаймы тырше удмурт выжыез понна. Палдэм шелепъёсты бичаса лякылӥз но интыяз пуктыны быгатӥз. Калык кырӟан - "Анае гурзэ эстэм, дыр, но..." - шедьтӥз авторзэ. Айво Ивилэн (Ашальчи Окилэн агаезлэн) вылэм со. Озьы ик шараяськизы "Уллапала, выллапала" калык кырӟанлэн авторъёсыз но. Сое гожтӥллям тодмо поэтмы Тимофей Шмаков но кырӟанъёсты гажась Захар Поздеев. Пётр Кирилловичлэн вань мукетъёсыз но шедьтосъёсыз. Аристъёслэн утчаськемзы трос ик уг поты, шӧдске. Кырӟан сюлмазы кельше ке, калыклэн шуо но тӥни. Авторъёссэ чик но уг яло. Уг тодо-а меда. Сӥлы ке ӧм каре поэтъёсмес, композиторъёсмес кыдёке-а мыномы? Будӥсь пиналъёс копейка тыр но дунъет сётыны уз валалэ ни. Капыръяса но калыклэн сюлмаз уд каръяськы. Куд-огез чеберлыкмес кык-куинь кылэ берыктозы но та милям калык кырӟан шуозы. "Ой, тӥ чебер нылъёс" кырӟанэн вал ни сыӵе учыр. Урод-а, ӟеч-а кырӟан - котькудӥз автор мед кылёз интыяз. Солэн сюлэм шунытэз ас кырӟаназ пыӵамын. ВИТАЛИЙ АГБАЕВ. Юрий Лужков азьланезлы оске Москваын экономикалы сӥзем коференциын "Отечестволэн" кивалтӥсез, столицалэн мэрез Юрий Лужков оскемзэ вераз, 2000-тӥ арын Россиын выль президент ужалоз ни шуыса - со, пе, юн сямо но странаямы пайдаё воштӥськонъёс нуыны мылкыд карись адями луоз. Кун Дума но воштӥськоз, шуиз Юрий Лужков. Солэн малпамезъя, та палатае лыктэм муртъёс, политикае мултэс пыриськытэк, законъёс бордын ужаны быгатозы. Страналэн политической улонысьтыз огыр-бугыр вакыт ортчоз, оске Юрий Лужков. Властез киысь кие воштон законъя, чрезвычайной югдур ялытэк гинэ мед ортчоз, пусйиз со. Кавказын ожмаськон ӝогак гинэ уз йылпумъяськы Тазьы малпа США-лэн Конгрессэзлэн Терроризмен нюръяськонъя центрезлэн директорез Юсеф Бодянский. "Новая газета" изданилэн корреспондентэзлэн куремезъя, со Россиын кылдэм югдур пумысь мылкыдзэ вераз. Бодянский малпа: Басаевлэн но Хоттаблэн Дагестанэ мерскемзы - азьвыл ик чаклам но дуннеысь 1 номеро террорист миллионер Усам бен Ладен юрттэт улсын ортчытэм акция. Нош Америкаысь но Россиысь спецслужбаослэн та пумысь кусыпъёссы сярысь юанлы со валэктон ӧз сёты. Саранча но бадӟым политика Казахстанын дыръяз Россия Федерациысь Правительстволэн Тӧроез Владимир Путин Казахстан но Россия куспын кунгожъёсты радъян сярысь тупанкыл улэ гожтӥськиз. Со 1999-тӥ - 2000-тӥ аръёслы чакламын. Премьер-министр озьы ик ивортӥз, гурт удыслы сӥзем вераськонъёс сярысь, кылсярысь, саранчаен дэмен нюръяськон сярысь. "Правительствоослэн кивалтӥсьёссы бадӟым ужпумъёсын гинэ вырыны кулэ ӧвӧл, - шуиз В. Путин, - эскероно сыӵе юанъёсты но, кудъёсыныз адямиослэн огсыр улонзы герӟаськемын". Выль блок кылдӥз Россия МЧС-лэн кивалтӥсез Сергей Шойгу "Единство" выль быръён блоклэн федеральной списоказ нырысетӥ интыын сылоз. "Россиысь куд-ог улосъёслэн но общественной огазеяськонъёслэн азьветлӥсьёссылэсь ӵектонзэс мон умоен лыдъяй но соин соглаш кариськемме верай, - шуиз ИТАР-ТАСС-лэн корреспондентэзлы министр С. Шойгу. Иворъёсъя национальной служба. Кун Кенеш ивортэ Валлян, 28-тӥ сентябре Удмурт Республикаысь Кун Кенешлэн витетӥ сессиез ортчон азьын Депутатлэн нуналыз ортчиз. Депутатъёс вуоно сессилэн ужан радаз пыртэм но кун ваньбурен кивалтонлы сӥзем куд-ог ужпумъёсты эскеризы. Удмурт Республикаысь Ваньбуръя кун комитетлэн Тӧроез Сергей Касихин кун ваньбурен кивалтонъя законопроектъёсын тодматӥз. Соосты пуштроссыя куиньлы люкиз. Нырысетӥ люкетысь законопроектъёсын вераськон мынэ кун ваньбуре пырись но вузаны луись но луонтэм объектъёс сярысь; озьы ик та объектъёсты Кун Кенеш соглаш луэм бере муниципальной ваньбуре выжтон рад сярысь. Кыкетӥ люкетэ пыртыны луоз кун ваньбурез кузёослы вузанъя но солэн аспӧртэмлыкъёсызъя программалэсь инъетсэ, Удмурт Республикалэн акциосын куд-ог усьтэм огазеяськонъёсын кивалтыны нимысьтыз право ("золотая акция") сярысь законопроектэз. "Удмурт Республикаын кун властьлэн кун ваньбурен кивалтон сое кутон полномочиосыз сярысь" Законлэн инъетэз берпуметӥ люкетэ пыриз. Собере депутатъёслы вазиськиз Кун Кенешысь экономикаын политика, ваньбур но инвестиция ужпумъёсъя ялан ужась комиссилэн кивалтӥсез Раиль Галиахметов. Со Кун Кенеше сётэм документъёсты туж юн эскерыны куриз но аслэсьтыз ӵектонъёссэ пыртыны куриз. Депутат пусйиз: вуоно сессиын кутоно ужпумъёс шӧдскымон ӝутыны кулэ республикамылэсь экономиказэ, озьыен калыклэсь улон-вылонзэ но. Кенешез нуиз Удмурт Республикаысь Кун Кенешлэн Тӧроез Александр Волков. Удмурт Республикаысь Кун Кенешлэн пресс-службаез. Соос уло асьме пӧлын Кузьмичлэн шумпотонэз - О-о-о, кинэ адӟисько мон! Здорово! - шонаськись воргорон киоссэ вӧлъяса дорам матэктэ. Ма, та кинэн ке сура, лэся, малпанъям валатски: уг, солэн сямыз сыӵе, вылды. Тӥни ук редакциысь эшъёсыным но озьы ик ӟечъяське. Ваньмызлы кизэ мыче. Ӝужыт чиед мугоро, погмаськем ымныро дядяйлэн мылкыдыз лӧптэмын. Котырысьтыз одеколон зын паке. Кияз - тамак пум. - Тодкоды-а, пиос, куректонме верам потэ, - писпуос яке юбоос "о-о" шуыны быгатысалзы ке, воргорон соослы но сюлэмзэ усьтысал, дыр. - Мынам коро... Тьфу, искалэ мынам вал. Шудтэм учыре шедиз, чёрт. Кызьызэ-мазэ уг тодӥськы, бер пыдзэ куинетӥ чигтыны шедьтэм. Нунал уг султы, кык, куинь... Мынӥ мясокомбинатэ. "Урал" сётӥзы. Сыӵе бадӟым машинаез тодкоды-а? Скалэз кызьы ке ӝутоно ук. Вань бускельёсме чортӥ. Укмыс кузя люкаським. Кӧня мокким - номыр ӧз пӧрмы. Ярам коть, визьмо мурт лебёдкаен ӝутыны ӵектӥз. Вуттӥм комбинатэ. Асме палэнскыны косӥзы. Пудое, шуисько, кунян ваёно. Озьы гинэ вераса вуттӥ, ява, - воргоронлэн синъёсыз бусаны ӧдъязы. - Тамакме кыскыса но ӧй вутты, ӧтись луиз. Кыль, пе, ӝоггес дэремдэ. Озьы ик кари. Уд оске ведь. Пиос скалэлэн кӧтысьтыз кунянэз поттӥллям. Кызьы шуод ай, кесарево сечение лэсьтӥллям. О-ой молодецъёс! Асьсэос ик ӵушылӥлям, нырпелесъёссэ но пельёссэ сузяллям. Давай, пе, дядя, пуксьы та машинае ик но берт дорад! Вот так... Манькие табере клевер но сие ни. Син гинэ медам усь вал. Дото чебер будэ... Нош скалэ понна три петсот сётӥзы. Воргорон маде но маде. Я бӧрдыны ӧдъя, я гор-гор серектэ. Оло бырем скалэз пумысен куректэ, оло вож кунянэз понна шумпотэ. Пудоез сярысь веран куспын та секыт вакытлы но ӝожтӥськыны вуэ, улонысьтыз маке шулдырзэ но тодэ вае. Бадӟым семьяез но пичи коркаез сярысь но поттылэ. Жаль, но милемыз ӧте выль сюрес. Люкиськытэк уг луы. Кошкон азямы ини юаськом нимзэ-тулзэ. - Фамиллятэм мон, - нош ик киоссэ вӧлъя дядяй. - Ваньмыз Кузьмич гинэ шуо. Таӵе маскара адямиос котькудаз сямен гуртын вань. Щукарьёстэк улонмы мӧзмыт луысал. Таза лу, Геннадий Кузьмич! Тынад задор мылкыдыд котырысьтыд адямиослы но мед палалоз. И.Лебедев. Г.Юсаев (фото). Игра ёрос. Россия Федерациысь Федеральной Собранилэн Кун Думаезлэн куинетӥ ӧтчамаз депутатъёсты быръёнэз ортчытон понна Удмурт Республикалэн улосвылаз кылдытэм быръёнъя улосвыл комиссиосын рад Удмурт Республикаысь Быръёнъя комиссия "Россия Федерациысь Федеральной Собранилэн Кун Думаяз депутатъёсты быръёнъёс сярысь" Федеральной законлэн 21-тӥ статьяезъя но Удмурт Республикалэн улосвылаз ужась автоматизацияя средствоосын "Выборы" комплексъёсты интыянэз лыдэ басьтыса, решение кутӥз Россия Федерациысь Федеральной Собранилэн Кун Думаезлэн куинетӥ ӧтчамаз депутатъёсты быръёнэз орчытон понна Удмурт Республикалэн улосвылаз быръёнъя таӵе улосвыл комиссиос кылдытыны: - Индустриальной ёросысь быръёнъя комиссия; - Ленин ёросысь быръёнъя комиссия; - Октябрь ёросысь быръёнъя комиссия; - Первомай ёросысь быръёнъя комиссия; - Устинов ёросысь быръёнъя комиссия; - Вотка городысь быръёнъя комиссия; - Глазов городысь быръёнъя комиссия; - Можга городысь быръёнъя комиссия; - Сарапул городысь быръёнъя комиссия; - Алнаш ёросысь быръёнъя комиссия; - Балезино ёросысь быръёнъя комиссия; - Вавож ёросысь быръёнъя комиссия; - Вотка ёросысь быръёнъя комиссия; - Глазов ёросысь быръёнъя комиссия; - Грах ёросысь быръёнъя комиссия; - Дэбес ёросысь быръёнъя комиссия; - Завьялово ёросысь быръёнъя комиссия; - Игра ёросысь быръёнъя комиссия; - Камбарка ёросысь быръёнъя комиссия; - Каракулино ёросысь быръёнъя комиссия; - Кез ёросысь быръёнъя комиссия; - Кизнер ёросысь быръёнъя комиссия; - Кияса ёросысь быръёнъя комиссия; - Красногорск ёросысь быръёнъя комиссия; - Пичи Пурга ёросысь быръёнъя комиссия; - Можга ёросысь быръёнъя комиссия; - Сарапул ёросысь быръёнъя комиссия; - Селта ёросысь быръёнъя комиссия; - Сюмси ёросысь быръёнъя комиссия; - Ува ёросысь быръёнъя комиссия; - Шаркан ёросысь быръёнъя комиссия; - Юкаменск ёросысь быръёнъя комиссия; - Якшур-Бодья ёросысь быръёнъя комиссия; - Яр ёросысь быръёнъя комиссия. Удмурт Республикаысь Быръёнъя комиссия. Кун Кенешын Михаил Кокорин: "Коррупция вань, но - шараямтэ" Депутат Михаил Кокорин Кун Кенешлэн азьвыл созываз мыло-кыдо ужаз сиён-юонъя корпорациысь тырмымтэосты шараян бордын. Пӧртэм мугъёсъя йылаз-пумаз сое вуттыны ӧз кылды. Али Михаил Константинович кивалтэ Законностья, обществоез кышкытлыклэсь утёнъя но адямиослэн правооссыя комиссиен. Журналистъёсын ортчытэм пресс- конференциын со шуиз: - Ми эскерыса возём законъёслэсь быдэсъяськемзэс. Соосты тӥян учыръёсты котькудзэ чаклалом но янгыш лэсьтӥсьёсты кыл кутытом, - шуиз ялан ужась комиссилэн выль кивалтӥсез. - Милемыз али тужгес но шугъяськытэ куштӥськем кортэз радтэк вузан но кутон. Та ужпумъя ӝегатскытэк закон кулэ, матысь дыре эскероно Правительстволэн Президиумаз но Кун Кенешын. Нош вуоно сессиын сое учконо ни депутатъёс азьын. М. К. Кокорин озьы ик шугъяськемзэ вераз егитъёсын ужан политикая. Ватонэз ӧвӧл, будӥсь нылъёс но пиос пӧлын дугдылытэк юылэ йыруж лэсьтӥсьёслэн, наркоманъёслэн лыдзы. Юисьёс сярысь вераськон уг мыны ни. Югдурез тупатон, умой пала берыктон понна кулэ нимысьтыз закон. Сотэк правоез тӥясьёс, егитъёсты гылыт но кышкыт сюрес вылэ кыскисьёс обществомес пумен юнгес но юнгес сыръясь тыэ кыскозы. - Республикаысьтымы Югдурез утёнъя министерство верамъя, Удмуртиын, пе, нокыӵе коррупция ӧвӧл. Но мон солы уг оскиськы. Малы? Туэ та дырлы гинэ пусъемын ни 700- лэсь ятыр экономической преступление. Поттэм вуз, пыӵал тӥрлык партиен-партиен заводысь ыше ке, нырысь ик мон янгыш карисько отысь чиновникъёсты. Огшоры ужасьлэн сыӵе луонлыкез но, быгатонлыкез но ӧвӧл. Верало одӥг учырез гинэ. Кызьы тодмо, юон поттӥсь заводъёсмы республикаын тырмыт, продукциенызы вань магазин ӝажыос тырмытэмын. Со дыре ик Удмуртие Северной Осетиысь вутто 1,5 миллион манетлы водка. Кызьы тодмо луиз, ваемын та кудӟытӥсь юон чугун сюрес кузя милиция эскерем улсын. Вань музон но учыръёс, куке правоез утисьёс асьсэос законъёсты тӥяло. Юнме шорысь МВД-ысь кылем арын 30 муртэ ӧз уллялэ ук. Пумиськыло судьяослэн но умойтэм ужъёссы. Жаляса верано, преступность шаерамы уг кулэсмы. Туэ 8 толэзь ӵоже пусъемын 20 сюрслэсь ятыр законэз тӥян учыр, ӝыныез со пӧлысь - лушкаськон. Виемын 268 мурт. Тужгес но секыт югдур Ижевскын, Сарапулын, Воткинскын. Куд-ог районъёс но та городъёслэсь бере уг кылё. Эскеремын 15 сюрс уголовной уж, 6 сюрсэз дугдытэмын. Лушкаськонэ, йыруж лэсьтонэ кыстӥсько ужтэк кылемъёс, пытсэт улысь потэмъёс, майбыр улыны вырисьёс. Ватонэз ӧвӧл: тросэз мурт узырлык вылын байлык люкасьёс йӧл-вӧй пӧлын пыласько. Соос ик дӥсьто югыт нунал шорын магазин кассаез сузяны, квартираосы пыраны, машинаосты вузаны. Огазеяськем преступность "сяськая", закон сыӵеослы гожтымтэ. Тӥни ма сюлэмшугъяськытэ Кун Кенешысь Законностья, обществоез кышкытлыклэсь утёнъя но адямиослэн правооссыя комиссие быръем депутатъёсты. Кызьы соос ужалозы, кыӵе законъёс кутозы но улонэ пыӵатыны быгатозы - со бордысь потоз асьмелэн улон-вылонмы. Л. МЕДВЕДЕВА. Лушкем улӥсьёс йыло Астрахань городын но улосын берло дыре чутрак будӥз лушкем улӥсь иммигрантъёслэн лыдзы, ивортэ "Комсомолец Каспия" газет. Сентябрьлэн кутсконэзлы лыдэ басьтымтэ мурт 20 сюрс котыр вал. Улосын туннэ политика но экономика ласянь бугыръяськонъёс ӧвӧл. Соин но, вылды, татчы кыстӥсько Кавказысь, Казахстанысь, Туркмениысь, Таджикистанысь, Афганистанысь, Конгоысь, Йеменысь, Пакистанысь, Китайысь адямиос. Астрахань УВД-лэн ивортэмезъя, котькудзэ ньылетӥзэ йыружез соос лэсьто. Иворъёсъя национальной служба. Улонлэн вирсэръёсыз Мар со сыӵе биогенез, кыӵе солэн пуштросэз но тодметъёсыз - та ужпумлы сӥзем кенешон алигес Ижевскын ортчиз. Сое радъязы Россия Федерациысь Вылӥ но профессиослы дышетонъя министерство но Удмурт кун университет. Ужрадэ странамылэн пӧртэм сэрегъёсысьтыз куноос пыриськизы. Тодосчиос, экспертъёс но аналитикъёс пыр-поч эскеризы, кызьы Музъем вылын улон вордӥськиз, кыӵе ӧртӥ со азинскиз, кызьы герӟасько туала лулосъёс но экология. Мар шуод, та вакытэ наука паськыт вамышъёсын азинске. Озьы ке но, "тӧдьы виштыос" трос на. Одӥгез соос пӧлысь - биогенез. В. РОГАЛЕВ. Шуныт мылкыд шунтоз сюлэмъёсты Удмурт Республикаысь Калыкез улон-вылонын утёнъя министерствоысь Координационной совет кенеш ортчытӥз. Солэн ужаз пыриськизы ожысь но ужысь ветеранъёслы, пенсионеръёслы, инвалидъёслы улон-вылонын юрттэт сётӥсь кун кивалтэт ёзъёсын ужасьёс, общественной огазеяськонъёс, юрттэт сётӥсь фондъёс. Кенешын эскеремын вал республикаямы Арлыдоослэсь калык куспо арзэс ортчытыны чаклам ужрадъёслэн кызьы быдэсъяськемзы, Арлыдоослэн но Инвалидъёслэн нуналъёсазы (1-тӥ октябре но 3-тӥ декабре) котькудӥзлэсь кызьы пыриськемзэ. Арлыдоослэсь калык куспо нуналзэс республикаямы паськыт пусйыны чакламын. Калыкез улон-вылонын утёнъя министерство, Тазалыкез утёнъя министерство, Ижевск городысь администрация "меӵак телефон" ортчыто "Ветеранъёс сярысь", "Россия Федерациысь инвалидъёсты улон-вылонын утён сярысь" законъёслэн быдэмъяськемзыя, озьы ик пенсиосъя законодательство пумысен. Юанъёсын вазиськыны луоз 1-тӥ октябре 9 часысен 12 часозь таӵе телефонъёсъя: 75-15-69, 78-81-79, 78-86-85, 52-54-31. Арлыдоослэн нуналзылы сӥзьыса, Ижевск городысь ваньмаз ик ёросъёсын озьы ик шаерысьтымы мукет городъёсын пӧртэм ужрадъёс чакламын: Арлыдоослы возьматозы концерт, кинофильмъёс, пӧртэм шулдыръяськон ужрадъёс, конкурсъёс, чай юонъёс луозы, специалистъёсын, кивалтӥсьёсын кенешонъёс, тужгес но ёрмисьёсызлы юрттэт сётозы. Шаерысьтымы вань городъёсын но районъёсын ӧсъёссэс усьтозы поликлиникаос. Таиз ужрад чакламын мӧйыослэсь тазалыксэс эскерон понна. Арлыдоослэсь нуналзэс паськыт пусйыны чаклало гурт администрациосын но. Библиотекаос, культура юртъёс пумитаны дасясько улонэз адӟем, пӧртэм шуг-секытъёс пыр ортчем, озьы ик али но ваньзэ чиданы дась песянай-песятайёсты. Та ужрадъёс пумысен тодыны луоз ёрос газетъёсысь. Л. МАЛЫХ. Пумиталэ 7508-тӥ арез Асьмеды 1999-тӥ арен олокызьы но курдатъязы. Куд-огез тужгес дэймыса возьмазы 11- тӥ августэз - затмение шуонэз. Дунне бырон вуэ шуисьёс но вал уга. Данакез сыӵе супыльтонъёс герӟаськемын Европаын 1503-тӥ-16566-тӥ аръёсы улэм Нострадамус тодосчиен. Со, пе, вань гожъямъёссэ нимысьтыз шифрен ватӥз, 1999-тӥ ар сярысь гинэ шара вераз. Соку, сизьыметӥ толэзе, луыны кулэ кышкыт учыр. Инбамысь васькоз курдыт король Анголмуа. Париж вадьсын абдрамон кирос кылдоз но, Европаез ву гылтоз. Шуг дунъяны, азьпал вакытэз макем умой адӟизы Нострадамус, Дидро, Маркс. Огез валамон: вуоно дырез адями азьло ик тодысал ке, янгышъёс ӧй лэсьтысал, ожмаськон ӧй пуромысал, висёнлы ӧй сётскысал. Паймод но чабкиськод: азьпалась аръёс но дауръёс сярысь кин ке туннэ но шалтыр-р маде, кин ке часэн-минутэн оске. Болгариысь куинь пӧртэм наукаосъя доктор Румяна Асенова-Баллард 1990-тӥ арын ик гожъяз: "1999-тӥ арын Музъемлы космос кышкытлык кылдытоз, планетамес, оло, пуштытытозь вуттоз". Астрономъёсын но астрологъёсын ӵош бугырскизы религилы дурбасьтӥсьёс но. 1999 лыдпусэз йыринуллань берыктыса пӧрме куинь 6 - антихристлы дурбасьтӥсь сьӧсь лыдпус. Россиысь тодмо академик Феликс Величко таин соглаш ӧвӧл. 1998-тӥ арын потэм "Голос Вселенной" газетэз кутыса, со тупен-тупен сэрттэ-пертче курдатъяськисьёслэсь азьпала валэктонъёссэс. Нялтас пусъём: вылӥ верам мае ке печатлало, пе, правительствое пырисьтэм кыӵе ке трансцендентальной шуон удысъёс. Газет оскытэ: 1999-тӥ арын 6-тӥ январе лек тӧлпери пуромоз но Музъем вылысь копак куашкатоз юртъеръёсты, гуртъёсты, городъёсты. Кылёзы на атомен ужась электростанциос, Вавилон башня но Иродлэн дворецез гинэ. Инбамын ӝуатскоз выль Вир кизили. Музъем улын улӥсь антихристлэн пузэз 21-тӥ январе 11 часэ ӵогиськоз. Отысь потозы 1998 ар ӵоже тэлеӟем кыӵе ке кышкыт улэп макеос. Академик Величко таӵе супыльтонъёслы юн пезьдэт сётэ. Россиын сюлэмшугъяськонлэн мугез тодмо, пе: улон-вылонмы лекос секыт. Нош малы кисырало Европа но Америка? 30- тӥ аръёсы асьме экономист Кондратьев усьтӥз экономикаысь пӧртэм тулкымъёсты. Соослы осконо ке, азинскем кун но 58-60-тӥ арлы огпол шуге-леке сюре. 30-тӥ аръёсы кризис бере Америка нош ик сыӵе бугрес "ӧс кусып" азе вуиз. Мукетыз муг герӟаськемын психологиен. Нульёс адямиез котькугес ик шурдыто. Лыдпусъёс огсыр вошъясько-вошъясько но шуак нульёслы пӧрмо. Христианъёс али олома но малпало, нош аръёсты ас сяменызы лыдъяса, Буддалы яке Магометлы вӧсяськисьёс чик уг шимо. Тодамы ваём вашкала вакытэз. Европаысь Христослы оскисьёс 999-тӥ но 1000-тӥ аръёсы туж зӧкесь сюсьтылъёс ӝуатъязы, черклы укыр дуноесь кузьымъёс сётказы. Ӟучъёслэн соку кӧберзы но ӧй вал, малы ке шуоно, соос христианствое пыремзылэсь азьвыл 6507-тӥ арзэс пумитазы. Со понна славянъёс куалекъяса пумитазы 1492-тӥ арез (Христосъя). Вуж сямен лыдъяса, со вал дунне кылдэм дырысен 7000-тӥ ар. Химия наукаосъя доктор Феликс Величко сётэ таӵе дэмлан. 1999-тӥ арлэсь кӧшкемаськоды ке, лыдъялэ: вуиз 7507-тӥ ар. 2000-тӥ ар уг кельшы ке, пумиталэ 7508- тӥ арез. А.Шкляев. Октябрь тодмо нимъёс но нуналъёс 1. - 70 ар талэсь азьвыл (1929) ВЦИК-лэн президиумезлэн 1929-тӥ арын 14- тӥ январе кутэм постановлениезъя РСФСР-лэн улосвылаз кылдӥз Нижегородской область, отчы пыртэмын вал Вотской автономной область но. Нижегородской областьлэн (бӧрысьгес Горьковской край) бурд улаз Удмуртия улӥз 1934-тӥ арозь. - 65 ар талэсь азьвыл (1934) усьтӥськиз вир басьтонъя станция. Солэн кылдытӥсез вал Б. В. Парин, медицина наукаосъя доктор, профессор. 3. - 35 ар талэсь азьвыл (1964) Ижевскын усьтӥськиз "Буревестник" стадион. Сое лэсьтӥзы Ижевскысь механической институтын дышетскись студентъёс. 4. - Вордскемез дырысен 90 ар тырме Кузьма Алексеевич Ложкинлы (1909- 1981), РСФСР-ысь дано артистлы, УАССР-ысь искусство удысысь дано ужасьлы, РСФСР- ысь калык артистлы, режиссерлы, одӥгезлы удмурт театрез кылдытӥсьлы. Вордскемын Дэбес ёросысь Зар.-Медла гуртын. 7. - Вордскемез дырысен 160 ар тырме Николай Николаевич Блиновлы (1839- 1917), педагоглы, просветительлы, литераторлы но шаерчилы. Н. Блинов, Глазов уездысь Карсовай черкогуртысь священик луыса ужакуз, удмурт нылпиос понна школа усьтыны юрттӥз. Тодмо луиз "Лыдӟон" азбукаеныз, нылпиос понна "Грамматика" книгаеныз. 10. - 90 ар талэсь азьвыл (1909) кылдытэмын Сарапулысь земстволэн музеез. 11. - Вордскемез дырысен 80 ар тырме Николай Иванович Огородниковлы (1919) Советской Союзлэн Героезлы. Вордскемын Красногорск ёросысь Огородники гуртын. Солы вылӥ ним сётэмын Днепр шур вамен выжыкуз, кышкасьтэм луэмзэ возьматэмез понна. 12. - Вордскемез дырысен 90 ар тырме Васса Кирилловна Виноградовалы, (1909-1992) УАССР-ысь калык артисткалы. Вордскемын Алнаш ёросысь Гондыргуртын. В. Виноградова нырысетӥ удмурт профессиональной артисткаос пӧлысь одӥгез. Сюлэсь уно рольёсты шудӥз. Со Чабья ("Камит Усманов" И. Гаврилов), Анисья ("Чукдор" С. Широбоков), Васса ("Васса Железнова" М. Горький) но мукетъёсыз. 12-13. - 35 ар талэсь азьвыл (1964) Ижевскын ортчиз машинаос лэсьтон но андан ӵыжатон удысын ужась специалистъёслэн Всесоюзной совещанизы. Со сӥземын вал производствоез азинтонлы но ужазы выль амалъёс поттонлы. 15. - 60 ар талэсь азьвыл (1939) УАССР-ысь Суредасьёслэн союззылэн оргкомитетэз юнматэмын. 17. - 60 ар талэсь азьвыл (1939) Воткинскын усьтӥськиз музыкальной комедияя республикаысьтымы кун театр. 24. - 35 ар талэсь азьвыл (1964) нырысьсэ возьматэмын Г. М. Корепанов- Камскийлэн "Чипчирган" опера-балетэз. 25. - Вордскемез дырысен 80 ар тырме Алексей Дмитриевич Коноваловлы (1919- 1943), Советской Союзлэн Героезлы. Войналэсь азьвыл Ижевск городын улӥз. - 25 ар талэсь азьвыл (1974) ужаны кутскиз Ижевскысь выль аэропорт. 27. - 80 ар талэсь азьвыл (1919) кылдытэмын Ижевск городысь профсоюзъёслэн советсы. 28. - Вордскемез дырысен 110 ар тырме Михаил Васильевич Балагушинлы (1889-1966), художниклы, суреданъя дышетӥсьлы. 30. - Вордскемез дырысен 85 ар тырме Василий Гаврилович Гавриловлы (1914- 1993), УАССР-ысь дано артистлы, нылпи писательлы. Вордскемын Можга ёросысь Бадӟым Сибы гуртын. 31. - Вордскемез дырысен 80 ар тырме Зосим Исаакович Макаровлы (1919- 1994), Советской Союзлэн Героезлы. Вордскемын Кез ёросысь Лома гуртын. Война аръёсы кышкасьтэм лётчик 195 пол инбаме ӝутскылӥз. Октябре 35 ар талэсь азьвыл (1964) Ижевскысь машина лэсьтон заводлэн мотоциклъёс бичанъя конвейерысьтыз васькиз кык миллионэтӥез "Иж-Юпитер-2" мотоцикл. Ойдолэ чебер вераськоме Егит анай нылзэ нылпи садэ нуэ. Нылыз вераськыны быгатэ ни, но куд-ог кылъёсты шенгыль-пенгыль вераменыз, ӝынызэ но верамзэ валаны уг луы. Анаез сое ӟеч вала - кунгож сьӧрысь лыктэмъёс кадь ӟабыль гинэ верасько. Машинаез - масина шуо, школаез - сколя, тракторез - тляктоль. Тани кылзэ ай кыӵе кылӥське ныллэн одӥг гинэ верамез: "Аняй, мальы бонь одьнё сядике мынёнё?" Мусо кылӥське, но... Гажано анай-атайёс! Тӥледлы мон бадӟым гырлыен жингыртысал. Пиналды кадь кариськыса эн вераське, малпаське, одӥг ар улыса нылдылы яке пидылы школае мыноно. Макем жаль сыӵе пиналъёс, кудъёсыз вераськыны уг быгато, эшъёсыз соосты серекъяло. Дышетӥсьлы но соосын нимаз ужано луэ. Пиналлэн школае ветлон мылкыдыз быре. Ӵукналы быдэ бӧрдыса мынэ. Эшъёсызлэсь берегес кыльыса дышетскыны кутске, кызьы вераське, озьы ик гожъяське. Тӥни ведь кызьы, одӥг-кык куараез вераны быгатымтэен, со быдӟа ужпум ӝутӥське. Но со сюлэмшугъяськонъёсыз палэнтыны луонлык вань, Иж карысь дышетӥсьёслэсь тодон- валанзэс будэтонъя институтэ лыктыса. Пиналды нылпи садэ ке ветлэ, тӥляд муспотонэныды ужа воспитатель. Со та ужлы дышетскемын бере, пиналлэсь вераськемзэ чакла но, тупатэ но. Нош кин туэ гинэ пиналъёсын ужаны кутске, солы бадӟым юрттэт сётэ институтысь методист Вера Александровна Анисимова. Ужало тросэз воспитательёс. "Вордскем кыл" журналысь солэсь статьяоссэ лыдӟыны луэ. Нош али Вера Александровналэн "Чылкыт вераськом" нимо пособиез потӥз. Со чакламын 3-5 аресъем нылпиосын ужан бордын. В. А. Анисимова тупен-тупен валэктэ, кызьы ужано котькуд куара бордын. "Ужано" кыл, оло, татчы уг но тупа - "шудоно" ке шуим, ум янгышалэ. Тани одӥгез сыӵе шудон: "кенер кенералом" - пиналъёсты ваче путыса, ымдуръёсты усьтыса. Озьы ик котькуд куараез пинал лэчыт, чебер, валамон вераны мед быгатоз. Автор татын дэмла вакчиесь кылбуръёс пыр ужаны. Пиналъёс, мон сямен, мылысь-кыдысь ужаны кулэ таӵе занятиосын, малы ке шуоно, та сборнике пыртэмын А. Уваровлэн, А. Кузнецовалэн, Ю. Байсаровалэн, К. Гердлэн но мукет кылбурчиосмылэн кылбуръёсысьтызы люкетъёс. Нош та кылбурчиос ӟеч тодо нылпи психологиез. Удмурт нылпи садын ужасьёс понна удмурт логопедъёс понна, анай-атайёс понна мон сямен таӵеез устоез книга ӧй на вал. Гажано мумы-бубыос, пиналды вераськыны кутскыку ик дышетэ сое чебер, вольыт вераськыны. Эн вунэтэ: машина со бибик но ӧвӧл, масина но ӧвӧл, со - машина. Валады- а? Нош В. А. Анисимовалэн "Чылкыт вераськом" пособиез тӥлед юрттоз гинэ. Та сборникез институтысь басьтыны луоз. Оскелэ мыным, та книгая ке дышетӥды, пиналды чылкыт но шонер вераськоз, школаын "витьёс" гинэ басьялоз. Нош В. А. Анисимовалы бадӟым тау шуэм потэ, будӥсь нылпиосмы сярысь сюлмаськыса таӵе сборник поттыны быгатэмез понна. Вера БИКУЗИНА. Спорт "Газовик" дораз келяз Махачкалаысь "Анжилы" 1:2 лыдын. Туннэ асьме футболистъёс шудо Астраханьысь "Волгарь-Газпромен". *** Ижысь "Динамо" но вормыны ӧз быгаты Пермьысь "паньтэмзэ" - "Динамоез". Ог нимо командаысь футболистъёс эшъёс сямен люкиськизы: пумиськон 1:1 лыдын йылпумъяськиз. *** Нош асьме хоккеистъёс "висисьёссэс" шумпотто. "Ижсталь" пумиськылӥз Новостроицкысь "Ностаен", Барнаулысь "Моторен" но Новосибирскысь "Сибирен". Вань шудонъёсын асьме пиосмы сэзьгес бызьылӥзы но куноосты вормизы. "Сибирен" пумиськонъёс 5:0 но 2:1 лыдын йылпумъяськизы. Кылем арняе Ижын йылпумъяськизы егит футболистъёслэн (16 аресозь) турнирзы. Россиысь 10 кужмоез конманда нюръяськиз чемпион луон понна. Вормыны луонлыксы вал асьме пиослэн но. Берпуметӥ шудоназы соос, Санкт-Петербургысь "Сменалы" 0:3 лыдын келяса, кыкетӥ интые потӥзы. Нош чемпионъёс луизы Нева шур дурын будэм пиос. М. КУЗЬМИН. Николай НИКИФОРОВ Тӧдьы куака малпамтэ мадёс Бускельысьтымы Мария Александровна гумырез ӵоже дышетӥз. Арлыдо ке но ини, веськрес мугоро, сэзь выросо на. Чырткем лёгаськыса ветлэ. Пужмераны кутскем йырсиосыз гинэ лушкемен шараяло кышномуртлэсь "улон кульчооссэ". Пудо уг возьы со, курег гинэ но уг ворды. Соин ик, лэся, вазь тулысысен бер сӥзьылозь пуксёнын пукыны яратэ. Вӧзаз люкасько ачиз кадь ик арлыдо кышноос. Соосты кожало егитъёс: огдырлы дугдыло воргоронъёс но. Гуртысь вань выль иворъёс та пуксёнын эскерисько, ваньмыз татын дунъяське, ас "категоризэ" басьтэ. Ох, яратэ Мария Александровна адямиосты улыны-вылыны дышетыны, ас визь-кенешсэ мурт визьме кужмысь пыӵатыны! Аслэсьтыз мӧйызэгес индылыны но, егитъёсты куаретыны но кер уз поты. Сыӵе визьмо но каньыл вераськыны йӧндыремысьтыз, мон сое кылчин кадь сьӧлыктэм адямиен лыдъялляй. Но адямилы вераськыны быгатэмезъя гинэ дунъет сётоно вылымтэ на. Сыӵе дыре янгышаны но кема вылымтэ. Одно ик, улэм-вылэмзэ, лэсьтэм ужъёссэ чакласа, ваньзэ лыдэ басьтыны, ваньмызлы дунъет сётыны тыршоно. Тодмо луиз: та анаймурт кык пиезлэн ик сюаназы ветлымтэ. Сюлэмзэ "коӵышъёс" ӵабыштыны шедьтӥлям. Пиосыз яратыса кузпалъяськиллям. Зэм, анайзылэсь синйылтыса возем нылъёссэ басьтӥллямтэ. Пиосызлы йырыз курен, оло мар, Мария Александровна дас- кызь арлэсь кема люкиськыса улӥсь картсэ ӵошен улыны ӝутка. Шумпотэ арлыдо воргорон, ужысь но ожысь ветеран. Угось кыкетӥ кузпалэз висьыса кулэмын ни, нылпиосыз асьсэ семьяосынызы уло. Чик керпотытэк, воргоронлэсь вань узырлыксэ капыртӥз Мария Александровна. Юрт вузамезлэсь но, пудо вузамезлэсь но. Со понна ӵыжак выльдӥз ас юртъерзэ, басьтӥз выль мисьтаськон машина (дунъёс ӝутскем бере ни), холодильник, ворпо телевизор... Узырмиз но,.. кузпалзэ артысь вуж юртэ улляз. Юасьёслы мугзэ валэктӥз: "Визьмыз сураськыны кутскем ни пересьлэн. Собере укыр ӵем ӵындэ. Нош мон тамак ӵынэз чиданы уг быгатӥськы". Огназ висьыса, курадӟыса улӥз воргорон. Ма, бускельёсыз жаляса юрттылӥзы ик. Дӥськутсэ но мисько вал, пу дасяса но сётылӥзы. Нош Мария Александровна кузпалызлэн тазалыкез сярысь тодыны вуылӥз пенси сётъян нуналъёсы гинэ. Кулӥз ни воргорон. Кузпалъёсызлэн но нылпиоссы, огазе люкаськыса, берпуметӥ сюрес вылаз келязы. Нош Мария Александровна кисьтон гинэ но ӧз ортчыты. Быдэс куака "уллёысь" тӧдьы куака кадь потыны кутскиз со мыным. Ассэ ачиз гинэ ушъя: "Кыӵе йӧно мон, кыӵе "тӧдьы"! Тӧдьы куака ик вань. Пуксёназ кожасьёсты Мария Александровна али но улыны визьмалля. Дышетэ дунне адями кариськыны. Амбал, яке кытысь потэмын таӵе кыл? Пӧртэмъяськыса вераськыны яратӥсьёс бадӟым мугоро, батыр кадь кужмо, гондыр кадь сумбрес адямиосты берло дыре амбал шуысагес нимало. Нош асьсэос соос тодо меда, кытысь потэмын таӵе кыл? Уг ке, та ласянь соослы юрттыны быгатоз Киров улосын вордскем но али Москваын улӥсь ӟуч писательлэн Владимир Крупинлэн "Вятская тетрадь" повестез. Владимир Крупинлэн та произведенияз гожъямезъя, амбал кыл потэмын Кам шур йылысь хантыослэн (остякъёслэн) ЪВ-ЪВИ дауръёс вискын туж тодмо азьмуртсылэн но быдӟым вӧсясьсылэн нимыз бордысь. Хантыосты Иисус Христослы осконэ выжытонэз Вяткаысь татчы лыктэм миссионер Трифон Преподобный кутскем сое ассэ но семьязэ азьло ик черкын пылатон (чукынон) бордысен. Трифон Преподобный такем кужмо адямиез вормемез сярысь Уралысь Строганов кузёослы но, мукетъёслы но паймыса-паймыса мадьылоз вылэм. Амбаллы паймемдэ Трифон Преподобный сярысь гожъясьёс но палэнэ кельтӥллямтэ. Берло аръёсы олокыӵеоссэ но гожъямъёсты шедьтыны, лыдӟыны луэ ни бере, огшоры калыклэсь пӧртэмъяськысагес вераськыны яратӥсьёс амбал нимез кыре-буре поттӥллям ини, огшоры нимкыл (термин) карыса. Озьы, кызьы Библиысь Адам нимысь асьмеос, удмуртъёс, кылдытӥськеммы адями кылмес. Вл. Михайлов, П. Поздеев. Ӟечбур, Яратон Арама! Улӥллям-вылӥллям Кышномурт но Пиосмурт. Ӵукна сайкаса, Кышномурт одӥг пол шуэм: - Мон туж паймымон вӧт адӟи. Асьмеос туж чебер интыын вал. Отын шуд кузёяське. Пиосмурт юам: - Райын кадь сыӵе инты уйвӧтад гинэ вань меда? Малпаллям: музъем вылын но луыны кулэ со. Озьы Кышномуртэн Пиосмурт, ваче ки кутскыса, выжыкыл дуннезэс утчаны потӥллям... Ортчиллям нуналъёс, арняос, толэзьёс, аръёс, нош таӵе инты соослы уг сюры, пе. Одӥг пол, музъем вылэ акшан лэзиськем бере, сильтӧл потэм, туж зол зорыны кутскем. Кышномуртэн Пиосмурт укылтэм куазен ӟигарзы бырытозь нюръяськиллям. Ялкарыны пуксиллям кыӵе ке бадӟым писпу улэ, со ик зорлэсь ватэм. Малпамтэ шорысь сильтӧл лапкам. Адямиос та писпулэсь ческыт мульыоссэ сииллям но татчы ик кӧлыны выдӥллям. Сюрес вылын ортчытэм уно аръёс куспын та вылэм нырысетӥез шудо уйзы. Ӵукна Пиосмурт синзэ усьтэм но шуэ: - Шедьтӥм, лэся, асьмеос выжыкыл интыез. Кышномурт но котыр учкыса валам: быдэсмиз солэн уйвӧтэз. Ваче ки кутскыса, соос та чебер интыетӥ лёгаськиллям-лёгаськиллям но шуак валаллям: ӵапак татысь уно ар талэсь азьло кошкизы вал соос паймымон шаерез утчаны. Музъем-мумы вань кужымзэ сётыса будэтэм Писпу, Кышномуртэн Пиосмуртэз выльысь та интые берыктон понна. Та Писпу - яратонзылэн пусэз луиз. Нош пиналъёссы вордскизы ке, кузпалъёслы косэмын вал: бызён-басьтон нуналазы одно ик писпу мерттоно. Нылпиоссы, нылпиоссылэн нылпоссы та куронэз быдэстӥллям. Озьы вордскем Яратон Арама. Татын будо вылэм бадӟымесь, паймымонэсь писпуос. Но огпол кин ке но янгышен та Арамаысь огзэ писпуэз ӵогем. Собере ик бырыны кутскиллям мукетъёсыз будосъёс - соослэн выжызы одӥг вылэм угось... *** Выжыкылэз кылыса, егит архитекторъёс Мария но Юрий Дреминъёс малпазы: "Та садэз выльысь мерттыны луоно ук!" Рос-прос ужаны кутскизы соос "Яратон Арама" нимо проект бордын. Ужазы кема, вань лул-сюлэмзэс поныса. Выжыкылысь Нылкышноен Воргорон сямен ик соос трос пӧртэм шуг-секытъёсын пумиськоно луизы. Озьы ке но, 23-тӥ сентябре Ижысь Киров нимо паркын вордскиз Яратон Арама. Нырысетӥ писпуосты мерттыны шуд усиз Арамаез усьтонэ лыктэм вань мылкыд карисьёслы но "Паймымон яратон" конкурсын вормисьёслы. (Конкурс ялэмын вал пӧсьтолэзе "Известия Удмуртской Республики" но "Рынок недвижимости" газетъёсын. Гожтоно яке редакцие жингыртыса верано вал асьсэлэн паймымон яратонзы сярысь.) Шуг-секытъёстэк, сюлмаськонъёстэк ӧз ортчы ачиз шулдыръяськон но. - Ми дышемын ни соосты вормылыны, - мынектӥз Мария Дремина. Писпу мерттон шулдыр, чебер крезьгуръя ӧз, ки чабонъёс улсын ортчиз. Уго крезьгур ваёно машиназы витьымтэ шорысь вуэм ӧтёнъя кошкем: нош ик, пе, кыӵе ке коркан бомбалы укшась маке синйылтэмын. Котьма ке но, шумпотымон: быдэсак странаямы таӵе шурдыт, кышкыт вакытъёсы, куке пуштыло улон юртъёс, куке мыно ожмаськонъёс, вань на яратон, чеберлык понна сюлмаськись адямиос. Кызьы малпало асьсэос "Яратон Арама" проектэз дасясьёс, нырысь ик та Арама адямиослэн сюлэмъёсазы пушйыны кулэ, соку гинэ со зэмос улонамы но улӟоз. Арамаез усьтонэ трос калык люкаськиз. Озьыен, адямиос туала улонмылэн нӧд-дэриаз быдэсак выемын ӧвӧл на. Быгатӥськомы на асьмеос яратыны, шӧдыны. Озьыен, пушъе сюлэмъёсамы Яратон Арама. Зэм, люкаськемъёс пӧлын тросгес вал егиъёс. Но оскем потэ: арлыдоос, мӧйыос та инты сярысь тодытэк уз улэ. Пиналъёс сямен ик, ветлозы та Арамае, пыриськозы писпу мерттонэ. 23 сентябре мерттыны чакламын вал дас кык палэзьпу, но Яратон Арамае та нуналэ выжы лэзизы дас витез. Малы одно ик палэзьпуос? Кызьы вераз Мария Дремина, славян калыкъёслэн но, финн-угоръёслэн но мифологиосазы та писпулэн утись кужымез вань. Яратон Арамае ветлылозы яратӥсь сюлэмъёс. Палэзьпуос утёзы соослэсь яратонзэс синусемлэсь, вань куректонъёслэсь. Калык чакламъя, эшшо огез утись кужым - тыл. Тае но лыдэ басьтытэк келтӥллямтэ Яратон Арамаез кылдытӥсьёс. Вань люкаськемъёсты писпу мерттон интые котыр султытыса, киысь кие сюсьтыл лэзизы: сьӧд кужымъёс медаз пыралэ та чылкыт интые. Чебер адӟисько пинал палэзьпуос. Нош соослэсь кыдёкын ик ӧвӧл ог-огзы борды ӝиптӥськыса сыло кык кызъёс. Соос но нылкышноен пиосмуртэз возьмато, яратонзэс данъяло кадь. Машаен Юра люкаськемъёслы горд лентаос люкылӥзы: соосты та кызъёс борды керттылӥд ке, одно ик малпанъёсыд быдэсмозы, пе. Соку ик кык чеберайёс горд пиштӥсь луизы. Озьы ик та лентаос чебертӥзы яратон сӥзись палэзьпуослэсь вайёссэс но. ... Одӥг-ог зор шапыкъёс усьылыны ӧдъязы. Ачиз Инмар бакель кариз писпу мерттон ужрадэз. Яратон Арама арысь аре бадӟыманы кулэ. Палэзьпуос вӧзын кыр интыез трос на. Сое быдэсак вожектытыса, проектлэн кивалтӥсьёсыз Оӵ тымет кузя "Калык эшъяськон" монумент дорозь вуыны ӧдъяло. Но сое быдэстон понна кулэ на, дыр, юрттэт. Нош нырысь вамыш лэсьтыны юрттэмзы понна Дремин кузпалъёс тау каремзэс верало Киров нимо парклэн администрациезлы, Ижлэн администрациезлы, электромеханической заводлы но ваньмызлы, кин пыриськиз Яратон Арамаез улӟытон ужрадэ. Машалэн верамезъя, таӵе Арамаос усьтыны ӧдъяло Завьялово но Каракулино ёросъёсын. Озьы ик мылкыд каремзэ верам ни Кизнер ёрос администрация. Оскем потэ: Дремин архитекторъёсын мытэм уж уз пашмы, Яратон Арамаос, Ижевскын гинэ ӧвӧл, шаермылэн котькуд ёросаз яратӥсьёслэсь шудзэс, лад-лад улонзэс утёзы. Л. КИТОВА. "Чигымтэ чидан" конкурсэ "Инмар косэ, дыр, пие понна улыны" Та егит нылмуртэн мон пумиськи Кизнер палъёсысь одӥгаз гуртын. Любалы кызь одӥг сяна ӧвӧл, нош кайгуэз но куректонэз быдэс даур улэм муртлэн мында ини. Кылзӥсько сое, нош йырам одӥг малпан, кӧнялы чиданэз тырмоз на меда удмурт кышномуртлэн? - Муртъёслэн верамысьтызы асме чеберен лыдъялляй. Уг ваты, сьӧрам пиос трос бызьылӥзы. Нырысь яратонме, мыным соку дас куинь арес вал, кузьмай сьӧр гуртысь пилы. Яратонмы ӝужась сяська сямен пушйиз, но дырыз вуэмъя, сяська шуя вылэм, милям но кусыпъёсмы тэшказы. Солэн али вань ини аслаз семьяез. Озьы тупаз, дыр, ми соин одӥг гуртэ улыны сюримы. Тодысалыз ке гажанэ, тямыс ар ортчыса но ӧй быгаты сое сюлмысьтым куштыны. Туж секытэн люкиськи мон соин: тамак кыскыны ӧдъяй, аракы но ӟузьылонлэсь ӧй палэнскы. "Витьлы" гинэ дышетскись мурт "кык" но "куинь" вылын уяны кутски. Со дыре мыным нокин кулэ ӧй вал. Ӧй но валасалзы, дыр, секытэн кыли угось. Со сярысь анае гинэ тодӥз. Ярам, дырыз трос ӧй вал ай - куштыны вуи. Но вордӥськоно нылпиелэн тусбуйыз собере ӵем гинэ уйвӧтам лыктылӥз. Али куректӥсько ини сыӵе йыруж лэсьтэм понна. Нош мар мон карысал? Тодысалзы ке кӧто луэмме, дышетӥсьёс "сяласалзы", дыр, мон вылэ. Анае но школаын ужа, сое нош мар гинэ ӧй шуысалзы: "Милесьтым нылпиосмес дышетэ, нош аслаз нылыз 8-тӥ классын анай луыны дасяське ини". Мон сяна, семьяямы эшшо кык нылпи вал на. Анай милемыз огназ будэтӥз. Атаймы секыт висьыса кулӥз. Мыным соку дас арес гинэ вал, нош пичиезлы - куать. Тодматскеммы бере анае алыны выриз ик вал, но мон соку кылме сётӥ, сое возьытэ уг уськыты шуыса. Нош ачим тани... Асме воштыны выль гажан юрттӥз. Ма, анае но жаль потӥз. Милемлы луыса, со выльысь ӧз но бызьы ни. Гажанэлы кызь арес вал, мынэсьтым ньыль арлы бадӟымгес. Со монэ туж жаляз, яратӥз. Мон нош ик дышетсконэ кыстӥськи. Малпасько вал анае сямен дышетӥсь луыны. Володя соку ИжГТУ-ын куинетӥ курсын дышетскиз ни. Милям ваньмыз сыӵе умой вал ни. Нош одӥг пол, районысьтымы автобус сӧриськемен, пыдын бертоно луи. Гуртысьтымы чылкак огнам вылӥськем. Бер ӝыт ни, дыртыса бертӥсько. Шуак кин ке ымме пытсаз. Собере маин ке шуккизы но, йырсазьме ыштӥ. Монэ шедьтӥз анаелэн выныз - утчаны потэм вылэм ини... Секытэн луэмме тодыса, асме быдтон дорозь вуисько ни вал. Йырысьтым уг поты: Володя валалоз-а монэ? Больницаын веразы, пиналме куштӥ ке, анай луыны уг ни быгаты. Верай кайгуме Володялы, люкиськыны ӵектӥ. Со монэ ӧз палэнты, дораз нуиз. Собере сюанмы ортчиз. Картэлэн анаез монэ соку ик ӧз яраты. Ма, кинлы кельшоз сыӵе "кузьымен" кен? Ваньзэ чидай. Володя но пие понна гинэ улӥ. Малпай, картэ дышетсконзэ быдтӥз ке, пиеным пукоз, нош мон дышетскыны пыро. Володялэсь улӥегес луэме ӧз поты - медаз мон понна возьдаськы. Озьы ӧз луы. Нош ик йыр вадьсам сьӧд пилем люкаськиз. Володяез, городысь бертыкуз, машина донгем. Йырсазяз лыктытэк ик кулӥз. Анаез соку ик коркасьтыз улляса лэзиз. Одӥг пие гинэ возиз на монэ берпум вамышелэсь. Милям шудмы кык ар мында но ӧз кыстӥськы. Но со аръёс вань улонам самой шудо нуналъёсын кылёзы. Берытски анай корка. Кык толэзь улыса вордӥськиз Володя пие. Но та шунтӥсь комоке толэзь но ӧз улы, шоканэз пытсаськыса кулӥз. Врачъёс но ӧз шедьтэ солэсь висён мугзэ. Али малпасько ини, сое атаез дораз ӧтиз, дыр, сьӧлыко анаезлэсь. Куректон огназ уг ветлы вылэм. Армиысь ивор вуиз, агае Чечняын бырем. Ми нырысь ӧм оске, военкоматын оскытӥзы вал, Сашаез "пӧсь точкаосы" уз келялэ - анаймы куинь пиналъёсты огназ будэтӥз угось. Ма, ачиз но Саша Чечняын ожмаськемез сярысь ӧз иворты. Нош со ньыль толэзь та музъемез лёга ни вылэм. Собере "Груз-200" но вуиз. Коросэз усьтыны ӧз лэзе, анаймы макем сюлвориз ке но. Тазалыкез солэн туж уродмиз, азьло но сюлмыныз курадӟе ни вал. Котькуд нуналэ Саша доры ветлылӥз. Огпол кема бертымтэысьтыз утчаны потӥм. Мусо анаймылэн мугорыз сӥя ни вал. Яратоно пиезлэн шайез вылысь кирос борды кутскыса ик кулэм. Врачъёс верамъя, сюлмыз чидамтэ. Сузэре 9-тӥ классэз йылпумъяса, пыриз Можга педучилищее. Ог-огмы вылэ пыкъяськыса, пыд вылэ султӥм. Малпасько, со ке но ас шудзэ мед шедьтысал ини та улонын. Пие туж ӵем но секыт висьылэ, куддыр малпанэ но вуисько: адями луоз меда та. Монэ Инмар каргаз, дыр, пиналме куштэме понна. Нош семьяе маин янгыш? Али дорын пиеным пукисько. Ужаны но кин меда монэ басьтоз - дышетскеме ӧвӧл, нокыӵе ужлы ӧй дышетскы. Курасьёс но вал. Но соос яке арлыдоесь яке кышноен улэмын ни. Адямиос малпало, дыр, пиналэн маке эшшо бырйиськыса улэ. Нош мынам сюлэмы вань ук, вӧзам валась адями мед луоз. Быдэс улонме тазьы ик ортчытоно луоз, дыр. Улыны мылкыды ик ӧвӧл ни: осконэ но, чиданэ но быриз кадь. Нош Инмар монэ ялан дораз уг басьты, пие понна улыны косэ, дыр. Тӧдьы буёл воштоз сьӧдзэ Тӥни сыӵе адӟонэз Любалэн. Кин солы юрттоз шуг-секытысь потыны, тугаськем малпанъёссэ йырысьтыз палэнтыны? Та югдур пумысен малпанъёссэс вераны кури Удмурт кун университетысь психологияя но педагогикая ёзын дышетскисьёслы. Лариса: - Мон малпамъя, котькыӵе секыт югдуръёсты, ужпумъёсты сэрттыны-пертчыны луэ. Жаляса верано луэ, асьмелэн обществоямы урод мылкыд пыӵамын - урамысь туж тросэн пумиталод сьӧдмыт дӥськутэн пӧрмытскем адямиосты. Коньдонлы ёрмон, кӧттыр утчан обществомес уллане зӥбе, куашкатэ. Кышномуртъёс, статистика верамъя, воргоронъёслэсь кужмоесьгес, кемалась дырысен со озьы мынэ ини. Та нылаш но шуг-секытъёсты вормыны быгатоз - ваньзэ курытсэ со ортчиз ини. Куке адямиез улон пачкатэ, трос люкасько, соку уд ни валаськы мар карыны. Сыӵе дыръя воштыны кулэ улон радэз, улон шоры учконэз. Любалэн будэ пиез. Малы со висе шуоды? Анаез курадӟемысь. Нылкышно весяк йыраз возе азьвыл лэсьтэм янгышсэ. Со пиезлэн но мылкыдаз пыӵа. Секытэн дыръяз та анайлы трос курадӟонъёс пыр потоно луиз. Люба ыштэм ни улонлы осконзэ. Та югдурысь потыны вань пӧртэм ӟеч амал. Котьмалэсь но ӟеч юрттэ маин ке но тунсыкъяськон - киуж, гожъяськон, пӧран... Нылпи - со шуд. Тон шудо адями, Люба. Пиналэз будэтыны - утьыны, пыд йылаз султыны кулэ. Нош озьы ӝожомыса, кайгырыса, номыр но уз пӧрмы. Ольга: - Мон валасько Любаез. Солы али туж секыт. Улонэз сьӧд очки пыр гинэ адӟе - осконэз, чиданэз быремын. Но кызьы шуо тужгес устоез эмчи - дыр. Любалы уг яра осконэзлэсь куштӥськыны. Дыр ортчемъя, яраез бурмоз, висёнэз лябӟоз. Надежда: - Шуг-секытъёс туж трос, курадӟонъёс пыр потыны кылдэм Любалы. Валасько, солэн улонлы осконэз но кысыны кутскиз ини. Озьы ке но, трос верам-дэмланъёс борды будэтэме потэ эшшо одӥгзэ: нырысь ик, Любалы осконо аслыз, ас улонзэ воштыны быгатонэзлы. Мыным улонын уг удалты шуид ке, озьы ик со луоз. Оскон, тӥни мар ӝутэ адямиез пыдес вылысь. Люба, оскы аслыд ачид, ан адӟы улонысьтыд сьӧд буёлзэ гинэ. Соку ваньмыз умой пала воштӥськоз. Туж оскем потэ вылэм, та нылъёслэн ӟеч мылкыдын пыӵам веранъёссы но сӥзёнъёссы одно ик быдэсмозы шуыса. Зэмзэ но, малы ке умоезлы оскытэк уг луы улыны. Котькуд адямилэн аслаз курадӟонэз, кайгуэз. Но чиданэн ӵош вань на ук оскон но вормон. А. КУЗНЕЦОВА, Удмурт кун университетын дышетскись. Корка шулдыр нылпиен Дас ар талэсь азьло шаерысьтымы нылпи юртъёсы шедем нылпиос асьсэлэсь зэмос семьяоссэс шедьтӥзы, шуыны луоз. Солы сӥзьыса, 28-тӥ сентябре Ижевскысь Егитъёслэн центразы сӥё-дано пумиськон ортчиз. Ижевскысь, Селтаысь, Воткинскысь но Игра районъёсысь тямыс нылпи юрт амалэн кылдэм семьяос люкаськылӥзы дас ар тырмон юбилеез пусйыны. Та семьяын ваньмыз 48 нылпи будэ. Геройлыко анай-атайёсты но соослэсь нылпиоссэс Удмурт Республикаысь Кун Кенешлэн но Правительстволэн нимынызы ӟечкылаз но соослы кылъёс, тау карон вераз Кун Кенешлэн Тӧроез Александр Волков. Анай-атайтэк кылем нылпиосты огазеям семьяослы шуд, тазалык, азьланяз ӟеч улон сӥзьыса, Александр Волков ивортӥз, та семьяослы 40 сюрс манет коньдон висъям сярысь. Люкаськемъёсты озьы ик ӟечкылазы Удмурт Республикаысь Калыкез дышетонъч министр Любовь Захарова но Кун Кенешысь социальной политикая ялан ужась комиссилэн кивалтӥсез Наталья Харина. Нылпи юрт амалэн кылдэм семьяос возьматӥзы асьсэлэсь ужаны но улыны быгатэмзэс, ог-огенызы кенешизы шуг-секытъёссы но вормонъёссы сярысь. Л. КИМОВА. КНИГА ӜАЖЫЯДЫ Ваньзэ-а верад? "Удмуртия" книгапоттонни печатлаз Ф. Г. Кедровлэсь кылбуръёсын "Ваньзэ-а верай?.." ("Всё ли сказал?..") книгазэ. Со сярысь ӟеч мылкыдъёсы кылдӥзы, киям сюремез бере. Нырысь ик, шумпотоно котькуд выль удмурт книгалы. Таиз поттэмын удмурт кылбурчиослы сӥзем сериын. Чебер, кие кутымон удмурт-ӟуч книга. Азьвылгес потӥз Ашальчи Окилэн ӵапак таӵе ик "Чыртывесь"-"Ожерелье" книгаез. Тазэ но, созэ но печатланы дасям аслэсьтыз ужзэ ӟеч тодӥсь-валась мурт, критик А. А. Ермолаев. Туж юн мылкыд карыса но сю ньыльдон бамъем книгае ваньзэ тэрытыны уд быгаты, дыр. Куамын вить ареслэсь ӧжытгес улӥз дунне вылын Ф. Г. Кедров. Вордскыкуз инмар, оло, тросгес сётӥз вал, нош улонзэ уретӥз каргам ожмаськон. Книга вылтусэныз ик ас бордаз кыске. Зарни бусӥр вылын лэсьтэм пужыос верало: солэн пуштросэз удмуртлыкен тырмемын. Азькыл гожтэм мадьяр тодосчи Петер Домокош. Книгалы аслаз тодэваёнъёсыныз кутскон сётэ кылбурчилэн пиез - тодмо журналист но кивалтӥсь Ю. Ф. Кедров. Ф. Г. Кедровлэсь кылбуръёссэ ӟуч кылэ берыктэм Г. С. Иванцов. Книгае озьы ик пыртэмын М. П. Петровлэн поэтлы сӥзем "Кырӟан улоз" поэмаез (ӟуч кылэ берыктэм Н. Грудинина). Книгалэн редакторез В. С. Уразаева. Книгаез поттӥсьёс со бордын туж яратыса ужаллям. Яратонлы ик бен - нылмуртэз, кышнодэ, пидэ, анайдэ, шаерез яратонлы - быдэс книга но сӥземын. Школаосын удмурт классъёсын дышетскисьёс вазь тодматско Ф. Г. Кедровлэн кылбуръёсыныз. Азьло но али лыдӟон книгаосы, хрестоматиосы пыртэмын солэн инкуазьлы но шаерез яратонлы сӥзем гожъямъёсыз. Али но син азям но пельсьӧрам аслам учкытэк вераны дышетэме но мукетъёсызлэн озьы ик книгае учкытэк верамзы. Со - "Колхоз бусы" кылбур. Сое лыдӟыкум, мон выльысь вуисько пинал дырам, тодам ваисько бусыосын уриськеммес, етӥн ишкеммес, культо керттылэммес, комбайнлэн куро люканэз вылын ужаммес. Жадем шоры учкытэк, зэм но, шуэм потылӥз: Ӟеч-а, бур-а, мусо бусы, Ӟеч-а, бур-а, выль ю-нянь! Куашетэмед, тынад тусыд Мылкыдэз ӝутэ выллань. Табере та кылбурез но, мукетъёссэ но лыдӟыны быгатозы ӟуч кылын но. Кылбурчи аслэсьтыз бусыоссэ син азяз пуктыса гожъяз, дыр. Тодам на (куинетӥ классысен вал кадь): гуртын дышетыны сётӥзы "Кырӟа, Туймы шур!" кылбурез. Соку, оло, ай тодыны но ӧм вуттэ кадь авторзэ. Кин со? Кытын вордскемын но будэмын? Мар со, Туймы? Туй, ми сямен, кызьпулэн сулэз. Кызьпу туй. Солэсь сарба лэсьто, соин гур кенжыто, соин, ӝог медам пӧзьты шуыса, кутъёсмес дуро вал. Соин ик мон нокызьы но ӧй вала, малы Туймы бызе? Кык пол, куинь пол кутскыса юай дышетӥсьлэсь, кызьы бызе Туй. Со но юанме ӧз вала, вылды, валэктыны ӧз быгаты бере. Мон соку со кылбурез озьы ик валатэк дышетӥ. Алнаш палъёс, Туймы шурез тодыса, кылбурез но валаса дышетӥзы, луоз. Пичи классъёсын дышетскыкумы, ми мылысь-кыдысь кырӟаллямы "Горд армие" кылбурезъя кырӟанэз. Со вал одӥгез яратоноез. Туж умой лэсьтэм "Удмуртия" книгапоттонни, та автор доры берытскыса, солэсь кылбуръёссэ удмурт но ӟуч кылын печатласа. Туж умой соиз но: книгалы азькыл интые пуктэмын Петер Домокошлэн удмурт кылбурчи сярысь гожтэмез. Мадьяр тодосчилэн верамезъя, 30-тӥ аръёсы гожъясь удмурт кылбурчиос пӧлын Филипп Кедров тужгес адскымонэз вал. Со гинэ юнгес но вазьгес шӧдӥз фашизмлэсь матэктэмзэ но солэсь кышкытлыксэ. Со адӟиське "Горд знамя" драмаысь но кылбуръёсысь. Татын поэт вӧзысьтыз улӥсьёсты ӧте сак кариськыны, нюръяськонын юн луыны. Таӵе малпанъёссэ Кедров азинтэ фронтын гожъямъёсаз но. Домокош возьматэ сое "Сыну" кылбур вылын (атаез вазиське пиезлы). Та уж, вера Домокош, тупа Г. Е. Верещагинлэн "Чагыр, чагыр, дыдыке" кырӟанэзлы. Нош гожтэмын кылбур 1943-тӥ арын 16-тӥ августэ ӟуч кылын. Пиез бубизлэсь куронзэ быдэстӥз, шуыны луоз. Дырыз вуыса будӥз но журналист, кивалтӥсь луиз. Книгае куатьтон пала кылбур пӧлысь ӟечъёсыз гинэ пыртэмын. Мыным тужгес ярало на калык куспын эшъяськыса улыны ӧтисьёсыз. Мон ачим будэмын (мынам ёзъёсы но) сыӵе ӧтёнъёс шӧлкын. Со урод ӧй вал кадь. Сыӵе кылбуръёс пӧлын - "Эшъяським горд винотовкаен", "Тыныд, комсомол", "Сюлэм кырӟа..." Вератэк кельтэме уг поты эшшо одӥг кылбур сярысь. Со, - "Оскы, Родина!" Пуштросэз но, йыгмытлыкез но, кылбур чуръёс но - ваньмыз юн пезьдыт. Туннэ но мугорез сэзёмытэ, оскон кылдытэ. Синмаськымон бадӟым уж лэсьтэ, та выллем книгаосты дасяса, А. А. Ермолаев. Издательстволы но тау, таӵе ужъёсты чебер поттыны тыршемез понна. Со кылбуръёсты гожтэмъёслы гинэ дан ӧвӧл, лыдӟисез но вылӥе ӝутон, гажан, соос сярысь сюлмаськон. МИЛИТИНА ГАВРИЛОВА. Гурт улон "Рассветэз" югдытэ керосин лампа Вашкала тодметъёсын туала учыр Укмыстонэтӥ аръёслэн кутсконазы шаерамы фермеръёслэн движенизы туж паськыт вӧлмиз. Гуртлы быдэ сямен кылдӥзы нимаз хозяйствоос, адямиос, ог-огзы шоры учкыса, колхозысь потыны дыртылӥзы, пай курыса, асьсэлэсь удыссэс мытылӥзы. Но ӝоген туж тросэз та ужлэсь куштӥськоно луизы - куке но кредитэн басьтэм техниказы куашканы ӧдъяз, басьтэм барышсы кисыязы ӧз ӝегалля, тупатон ёзъёслы, кидыслы, удобренилы бырылӥз. - Адямиос чаль узырмыны малпазы вал, - шуэ Селта ёросысь крестьян но фермер хозяйствоослэн ассоциацизылэн кивалтӥсез В. Иванов. - Адӟизы: бускельзы ӟеч урожай басьтэ, дуноенгес вузаны быгатэ, нош кутскизы но - секыт йӧтӥз. Тани али районын 110 фермер хозяйство лыдъяське, нош ӝыныез сяна уг ужа. Со понна ужало ке ужало ни - кредитъёсты уг адӟыло ке но вуж техниказы но, вӧй вылтӥ кадь кошке. Со гинэ ма! Электротэк ужась фермермы но вань. *** Тямыс ар ортчиз ини фермерлэн Николай Александрович Игнатьевлэн Селталэсь ог дас вить иськеме бусые инъяськемез дырысен, нош тыл кыскемез татчыозь уг луы. Фермер движение ӝужаку, вылӥ кивалтӥсьёс кӧй но вӧй сӥзизы: льготаен кредитъёс но трос пӧртэм мукет юрттэт. Но кызьы луэ асьме улонын, со кылъёс туж чаль вунӥзы, фермеръёс асьсэлэн шуг-секытъёсынызы ваче син кылизы. Озьы ик луиз "Рассвет" хозяйствоен но. Матысь электроюбоос дорозь - одӥг иськем пала. Одӥг вамыш кадь, но ӵапак со люке Игнатьевез хозяйстволы туж но туж кулэ луись электрокужымлэсь. Ужпум со бордын: хозяйствое тыл лэзьыны кулэ вал фермеръёслэн ассоциацизы - льготая кредитэн, но дырыз дыръя ӧз басьтӥське, табере со быдэсмонтэм малпанлы пӧрмиз. Ачиз фермер тыл кыскыны нокызьы но уг быгаты - со понна быдэс хозяйствозэ вузаз ке шат. Гожъяз ни Игнатьев Гурт удысъя министерствое. Отысь но буйгатӥсь ивор ӧз вуы: туэлы бюджетэн висъям коньдон быдтэмын, кайта ар сярысь но вераны шугъяськиськом, пе. Но эн малпалэ, та воргорон ужезлэсь куштӥськон калэ вуэмын, йыр бордаз кутскыса улэ шуыса. Шуг-секытъёс сое нуналмысь юнгес кыдато. Нырысь Игнатьевлы музъем ӵектӥзы Селталэсь тямыс иськемын гинэ, сюрес дуре. Воргоронлэн мылкыдыз бурдъяськиз - семьяезлэсь кыдёкын ӧвӧл, асфальт вылтӥ дас минут ӵоже дорад вуод. Но малпанъёссы шуак воштӥськизы. Музъемзэ воштӥзы мукет интые - Сюромошур сьӧрысь бусые. Кӧня ке иськемзэ нокыӵе сюрес ӧвӧл, музъемез куанер. Сялӟы но кошкы кадь. Но Николай Александрович саесъёссэ пужалляз: со понна шат со леспромхозлэн директорезлэсь креслозэ куштыса кельтӥз? Бусы шорысь вырйылэ сарай пуктӥз, 44 гектар музъеме ю кизиз, картофка мерттӥз. Каллен выль ужлэн ӧраз пырыны кутскиз, ваньмон дырыз весь ӧжытгес но ӧжытгес кыльылӥз. Ӵемысь гуртаз но бертылыны дырыз ӧз луылы ни - бускель гуртысь тодмоез доры мунчое ветлыса жадиз, кутскиз ачиз хозяйствозэ паськытатыны. Табере кыӵе мунчоез Николай Александровичлэн - саунаен! Со дырысен вырйылэ пуксизы пичи но бадӟым улон корка, мастерской, кенос, бакча сиён возён гу, лапас, загон, парсь гид. Ваньмыз ӝот-ӝот лэсьтэмын. Тани парсь гидысьтыз кыӵе ке амало установкаез, дас мумы парсьлы сиён дасян сяна, гидэз но шунтэ (кезьыт гидын-а парсьпи вордод?) Куинь сю кубометр вышкые ву насосэн кыско. Со понна вить киловаттъем пичи электростанция басьтӥзы. Туж "кӧттыростэм" маке - час ӵоже куинь литр бензин сие. Но мар карод - тракторен весь уд вортты ву: толзэ сюрес но уг луы, гуртоос но тушмонаса лекъясько. Киын дас куать метыр (!) мурдалаем гу гудӥзы вал, ву ӧз поты, нош вутэк татын номыр карыны. Тӥни сад-бакчаяз кубистаез ик сюрс йырлэсь тросгес, дыр. Ю куасьтыны электрокужым ӧвӧлысь, лэсьтӥз Николай Александрович куинь этажо лапас. Куасьмемезъя интыеныз вошъя со юзэ. Улланьынгес - пилорама. Таиз трактор бордысь ужа. Огвакыт пиеныз малпазы дунтэк электрокужым поттыны - лэсьтӥзы "тӧл вуко" - но малы ке ӧз поты солэн ужамез. - Табере дыр луиз ке, йӧндыром на кызь метрлы ӝужытгес лэсьтыса, - шуэ кузё. Мар но уд малпа, ёрмид ке. Телевизор учко, корказэс югдыто машиналэн аккумуляторез бордысь. Но керосин лампа та коркан тужгес но воштонтэм арбери. Тӥни кыӵе йӧно сылэ укно вылын. Юртъерез ӟеч, но маиз ке уг тырмы кадь татын. Кенерез - вот маиз! Аслам синйылтэмелы шумпотыса, юан сётыны дыртӥ: азьвыл корка кузёез кенерезъя учкозы вылэм, дырды уггес тырмы-а? Николай Александрович нокыӵе кариськытэк шуиз: - Малы со кулэ? Милям дормы - быдэс бусы. - Юзыресгес ук. - Кинлэсь? Ми нокинлы урод ум лэсьтӥське, асьмелэсь ужмес лэсьтӥськом. Вожъяськисьёс, конечно, шедьыло, но палэнысен муртлэн улонэз котьку майбыр потэ. Вазь ӵукнаысен бер ӝытозь ужамзэ лыдэ басьтыса, Игнатьев, зэмзэ но, кӧй но вӧй улыны кулэ кадь. Ёрмыны, конечно, уг ёрмы, но шукырес улэ уд шуы. Ай нылъёссэ дышетонэз кӧня! Я, Наташаез пединститутэз йылпумъяз ни, Марина Ижысь Гурт удысъя академиын дышетске, Ольга - медакадемиын. - Берто ке, бергало ни котырам: вай мон быдэс бакчаез огнам уро, вай эшшо мар ке каро, только сёт выль дӥсьлы уксё, - серекъяса вера атайзы. - Нылъёсы вылэ ӝожтӥськыны сьӧлык. Быгатэмзыя, зэмзэ но, юртто. Гужем дырзы тросгес "фазендаын" быре. Нош пие сярысь нимысьтыз вератэк ӧвӧл. Музъем мон басьтӥ Эдик армиын дыръя. Дас ньыль гектар солэсь но пайзэ кури. Вуэмез бӧрсьы кӧня ке дыр ортчыса, анаез шуэ: "Кышнояно Эдикез, азгынмоз". Мон шуисько, кызь куать арескын кышнояськи, азгынмемлы бызид-а? Мед нырысь ӝот-ӝот воргорон луоз, пыд йылаз султоз, кышно котьку шедёз. Юртты ай, пие, мыным самой секыт дыръёсам, нош мон тыныд котьку юртто", - ӵектӥ соку Эдиклы. Кылзӥськиз, табере тани ӵошен шуг-секытъёсты вормиськом - зэмос кузё сямен акар-акар, валаса кутскиз со уж борды. Нош кылем арын тани кышно ваиз ни. Оксана милям пӧрасьмы, - возьматэ со пальпотыса кенэз шоры. - Сыӵе пинал ай, мугорыз но пичи гинэ кадь, нош нокыӵе секыт ужлэсь уг кышка. Солы номыр веранэз-косонэз ӧвӧл, кытын мар ку кароно ачиз тодэ. - Жуммоды ук пиналъёстэс. - Мар тӥ? Ми кужыммылэсь вамен ум ужаське ук - пичиен-пичиен, луэмезъя. Озьы висьыны усьыны но кема ӧвӧл. Нош фермерлэн висьыны правоез ӧвӧл. Собере ваньмонгес дыръя соос асьсэлы шутэтскон нунал лэсьтыны быгато, Селтала бертыло. Тани толалтэ уж пудо котырынгес гинэ, соин ик вераськиськом "вахта" радъяны - кык арня мон уло, кык арня - пиналъёс. Ӟырдыт ужъёс дыръя но арняяз огпол ке но тыршиськом райцентре ветлыны - дуннелэсь чылкак люкиськыса улыны мӧзмыт луысал. Мӧзмыны уггес ик вуттылы, дыр, Николай Александрович. Я со "Музъем ужасьлэсь ӝӧквыл книгазэ" лыдӟе, йыраз бергатэ, я дневниказ ортчем нунал сярысь гожъя. Паймымон кадь - витьтон аресъем воргорон дневник нуэ. Но кин тодэ, оло 50 ар ортчыса Николай Александровичлэн выжыосызлы, ӵап та дневник ӝӧквыл книга луоз. Отын уго зэмос музъем ужасьлэн чакланъёсыз-эскеронъёсыз но амалъёсыз. Оло, югыт электротыл пиштэм улсын лыдӟыны кылдоз ни соослы песятайзылэсь энциклопедизэ. З. РЯБИНИНА. Гажано ветеранъёс! Тӥляд улон сюресъёсты юн герӟаськемын странамылэн историеныз. Тӥледлы но тӥляд огъёзоостылы адӟоно но чидано луиз трос секытсэ. Но тӥ номыр шоры учкытэк дуриды со улонэз: юнматды быдӟым странамылэсь кужымзэ, секыт ож вакытэ утиды сое, будэтӥды, визьнодады но пыд йылазы султытӥды нылпиостэс, соослэсь нылпиоссэс. Со понна музъемозь ик йыбырттӥськом но бадӟым тау кариськом. Али котькудмы секыт вакытэ улӥськом. Оскелэ. Ми ваньзэ лэсьтыны тыршиськом улонмес огсыр возён понна, мӧйыослэсь улон-вылонзэс капчигес карон понна, экономикаын кылдэм югдурысь ӝоггес потон понна. Улон котьку но шуг-секытъёслэсь кужмогес вал, со юн возиське тӥ бордын, нылпиосты, внукъёсты но правнукъёсты бордын. Сюлмысьтымы шуныт кылъёсын ӟечкыласьком Мӧйыослэн нуналэнызы! Юн тазалык тӥледлы, тупаса улон, шуныт мылкыд, матысь адямиостылы шудбур! Удмурт Республикаысь Кун Кенеш. Удмурт Республикаысь Правительство. Ӟечкыласьком! Валентина Кутузова но Николай Емельянов 1-тӥ октябре семья кылдыто. Валентина но Николай! "Удмурт дунне" газетлэн нимыныз ӟечкыласьком тӥледды та шудо нуналэн. Шумпотӥськом, тӥледыз газетмы но огазеяз шуыса. Сӥзиськом яратонлэсь тылгизьызэ утьыса возьыны. Яратон туж кужмо ке но, ӟенелик кадь ик сӧриськыны быгатэ. Газетын ужась эшъёсты. Россия Федерациысь Федеральной Соранилэн Кун Думаезлэн куинетӥ ӧтчамаз депутатъёсты быръёнъя окружной избирательной комиссиослэн интыяськемзы но ужан дырзы сярысь Ивортон Россия Федерациысь Федеральной Собранилэн Кун Думаяз депутатъёсты быръёнъя окружной избирательной комиссиос иворто интыяськемзы но ужан дырзы сярысь: Быръёнъя 28 номеро Ижевск округъя окружной избирательной комиссия - Ижевск город, Пушкинской ульча, 276 (Ижевск городлэн администрациезлэн юртэз, 216-тӥ кабинет), телефонэз 25-86-22. Комиссия люкаське ужан нуналъёсы 9 часысен 18 часозь, вис каре 13 часысен 14 часозь. Быръёнъя 29 номеро Удмурт округъя окружной избирательной комиссия - Сарапул город, Красной площадь, 8 (Сарапул городлэн администрациезлэн юртэз, 212-тӥ кабинет), телефонъёсыз 3-97-64, 3-91-61. Комиссия люкаське ужан нуналъёсы 10 часысен 16 часозь. Быръёнъя окружной комиссия. Шӧкыч Культура интые коммерция Ижевскысь машина лэсьтӥсьёслэн дворецсы котьку данъяськылӥз усто коллективъёсыныз. Кин меда уг тоды Удмурт Республикаысь Кун Премилэсь лауреатъёссэ удмурт калык театрез но "Тюрагай" калык хорез, ожысь но ужысь ветеранъёслэсь калык хорзэс, мукет дано коллективъёсты. Табере соослы пум вуиз, шуыны луоз. Дворецен выль дтиректор Станислав Александрович Абрамов кивалтыны кутскем бере, паймымон учыръёс лэсьтӥсько татын. Выль кузё нимысьтыз приказ поттӥз. Дворецын тупатъян ужъёс кутскемен валче, пе, коллективъёслы ужан комнатаоссэс кӧня ке дырлы мозмытоно луоз. Но мозмытэм интыосы соку ик коммерческой шуон ёзъёс вуизы. Кылсярысь, калык театрлэсь ваньбурзэ соос тус-тас карыны вуизы. Дворец пумен вузкарон интылы но автовокзаллы пӧрмыны кутскиз. Абрамов эш вылӥ быгатонлыкен кивалтӥсьёсты пумен ужысьтызы улляны ӧдъяз. Кылем арын март толэзьысен соос уждун уг басьто ни, шуыны луоз. Со дыре ик директор ялан выль но выль адямиосты уже кутэ. Таосыз культуралы туж кыдёкысь адямиос. Ваньмыз герӟаськемын, лэся, коньдонэн гинэ. Озьы асьмеос туж унозэ ыштӥськом. Адямилэн лулчеберез сярысь вунэтыса, кинлы меда пӧрмом асьмеос азьланяз? Н. ЛЯЛИН. Тазалык Лямблиоз Лямблия - одӥг клеткаем паразит. Яратэ адямилэн но пудо-животлэн сюлъёсаз улыны. Нырысьсэ сое шараяз 1859-тӥ арын Харьков университетысь профессор Д. Ф. Лямбль. Тусызъя лямблия грушалы кельше, ньыль пар "кукъёсыныз" сюл кузя сиён утчаса ветлэ. Кыӵе сиёнэз яратэ со? Пӧртэм эскеронъёс возьматӥзы, лямблиос тросэн вӧлмо углеводэн узыр сиёнэз сиемысь (пыжкем, бакча сиён, емыш, сакыр). Паразитъёс адямилэсь ӧскемзэ потто, кӧтсэ висьыто-виято. Таӵе учыре врачъёс диагноз пукто: "лямблиоз". Куддыр лямблиос кема дыр ӵоже сюлын уло асьсэдыс шӧдытытэк. Со кышкытлык кылдытэ - адями аслаз висёнэз сярысь тодытэк улэ, мукетъёсызлы палатэ. Кызьы со палаське? Трос мукет паразитъёс сямен ик - кырсь киос, сиён-юон пыр. Чылкытлык сярысь тужгес но сюлмаськоно огъя туалетъёсы ветлӥсьёслы, сое утялтӥсьёслы. Ӵемгес висё лямблиозэн нылпиос. Соос ӵемысь киоссэс миськыны вунэто, ымазы кырсь арбериосты тыро уго. Со сяна нылпи мугор уг быгаты на паразитъёсын нюръяськыны. Висемзэс ваньмыз уг шӧдо. Куд-огезлэн гинэ кӧтыз висьылэ, ӧскемез потыса ветлэ, урод сиське, чаль жаде, секталаез уг йылы. Мӧйыос пӧлын лямблиозэн ӵемгес висё мукет кӧтпуш висёнъёсын курадӟисьёс (гастритэн, вандылэм ӝушен). Соку кӧтсы висем сяна, бадӟыма мус, сӧриське сэп. Висёнэз алон вылысь, чылкытгес улыны, эсэпсэ валаса сиськыны тыршоно. Уг яра трос курыт-кузьыт, укыр кӧё-вӧё сиськыны, астэ ачид эмъяны. Врач гинэ тӥледлы шонер диагноз пуктоз но мугордылы изъян вайытэк эмъяны быгатоз. Э. ШИРОБОКОВА, республикаысьтымы нылпи больницаысь врач. Театр Лобӟиз, кошкиз тури... Алигес учкисьёслы ӧсъёссэ усьтӥз Егитъёслэн театрзы. Сцена вылын возьматэмын япон писательлэн Дзюндзи Киноситалэн выжыкылэзъя "Тури тылыос" ("Журавлиные перья") спектакль. Пуктӥз сое театрлэн валтӥсь режиссёрез Ольга Александрова. Спектакльлэн шорсюлмаз - яратонэз данъян, утён. Яратон уг улы кас сюлэмын. Ненег мылкыдэз тужгес тыршоно утьыны. Спектакльын вераськон мынэ Йохио нимо егит пиосмуртлэн уродос гинэ юртаз чебер, тузӥ кышномуртлэн Цулэн вуэмез сярысь. Талэсь азьвыл Йохио кулонлэсь уте туриез - лек муртлэн пукыӵ ньӧлэзлэсь мозмытэ. Воргоронлы со вера кузпал луыны малпамез, сое яратэмез сярысь. Таӵе шуд инмысь усе кадь Йохио понна. Музъем вылэ пыдъёсыз уг йӧтыло ни. Чебер но лякыт луэм сяна, Цу туж тыршись кышномурт вылэм: нунал лумбыт султылытэк пуке куиськон станок сьӧрын. Солэсь куэм кисьязэ (басмазэ) вузаса, картэз трос коньдон понна. Семья куанер улонысь потэ. Егитьёслэсь огсыр улонзэс таркало узыр бускельёссы - вузчи Содо но солэн картэз Ундау. Цулэсь дуно кисьязэ вузаса, соос бадӟым барыш потто. Собере вуо ассэ кибашлыез адӟыны. Ундау вожъяське: та пӧрмостэм бускелезлы сыӵе чебер но ужась кузпал шедем... Йохиоез соос куро, кышнозэ дуно басма куыны мед лӧпкытоз шуыса. Верало гуртазы вӧлмем супыльтонъёс сярысь. Одӥг кышномурт, пе, тыын пыласькыкуз, огдырлы турилы пӧрме. Вуысь потэ но нош ик адямилы берытске. Тури тылы кадь небыт басма куэм понна трос коньдон дэмласа, вузчиос Йохиоез узато кузпалэзлы пумит. Асьсэлэн нош тодэмзы потэ, кызьы ужа Цу куиськон бордаз. Секыт мылкыдын, туж вӧсь луыса ке но, кышномурт соглаш луэ эшшо огпол дуно кисья куыны - но солэсь ужамзэ нокин адӟыны кулэ ӧвӧл. Кузпалэз солэсь куронзэ шумпотыса быдэстыны дась. Уй куспын Цу йылпумъяны кулэ аслэсьтыз ужзэ. Йохио умме усем бере, кышномурт турилы пӧрме. Мугорысьтыз кыскам тылыосыз вӧзы вань сюлэмзэ сётыса куэ со яратонэзлы дуно басма. Бускельёслы кӧттяырмостэм сямзы уг сёты изьыны. Йохиолэн корказ пырыса, адӟо куиськыса пукись туриез. Шуш куараен кесяськыса пото юртысь. Изись кузпалэз сайкаса адӟе тылобурдоез. Бадӟым кайгулы пӧрмо ӟеч малпанъёсыз: солэн кышноез - тури. Нош Цу уг чида таӵе ултӥямез но лобӟе со дорысь. Солэн яратоно муртэз но сое быдтыны турттӥсь адямиослэсь пӧртэм ӧвӧл. Озьы ке но, берпум гурламез но гажано кузпалэз сярысь вал: "Мон тонэ ноку уг вунэты!.." Йохио солэсь ассэ жалятэк ужамзэ ӧз ке но дунъя. Котькуд калыклэн культураез ас понназ тунсыко луэ аслаз сямъёсыныз но йылолъёсыныз. Егитъёслэн театрзылэн но япон выжыкыл борды кышкатэк басьтӥськемез возьматэ солэн ас кужымезлы оскемзэ. Япон культура Европаысь калыкъёслэн культуразылэсь аспӧртэмгес. Сцена вылын возьматыны но сое трослы шуггес. Но спектакльлэн режиссёрез та ужпумез быгатыса сэрттэм-пертчем. Уже кутэмын вашкала япон театрлэн тодметъёсыз. Шудӥсьёс, режиссёр но спектакльын кутӥськись крезьгур кылдыто одӥг композиция - япон улонэз возьматӥсь сузьет. Зэмос японецъёс доры вуэмедлы оскод, артистъёслэсь дӥсьёссэс но йырси керттэтъёссэс адӟыса гинэ но. Вашкала Япониын талы бадӟым саклык висъяськылӥз. Шудӥсьёс трос ӧвӧл - ньыль кузя гинэ. Постановкаын валтӥсь героинялэсь рользэ шудэ Ольга Ганева. Солы возьматоно луиз кык муртлэсь образзэ: кышномуртлэсь но турилэсь. Вераны кулэ: соос пӧлысь котькудӥз синмаськымон пӧрмем. Лякыт но ненег, яратӥсь сюлэмо Цу учкисез ас бордаз кыске чылкыт яратонэныз, бадӟым осконэныз. Солэсь кузпалзэ Йохиоез шудэ Игорь Люкин. Артист быгатыса суредам та пӧрмостэмгес воргоронэз. Сыӵе муртэ яратӥз вал Цу. Улонзэ утемез понна турилэн адямиен ӵош улэмез, солы ӟеч лэсьтэмез потӥз. Аслэсьтыз тылыоссэ кесяса кылдытӥз туж ненег, мамык кадь небыт басма. Но бадӟым дунын вузам ваньбур воштӥз Йохиолэсь улон шоры учконзэ. Табере солы тросгес но тросгес кулэ ни коньдон. Сук сямыз быдтӥз яратон мылкыдзэ, тарказ семьязэ. Куанер пиосмуртлэсь таӵе суро-пожо, бугыръяськись мылкыдзэ артист быгатыса возьматэ. Ляб сюлэмо воргоронэз жаляны гинэ кыле на. Кас, аксым бускельёслэсь кӧтвеськантэм выремзэс умой адӟытӥзы Маргарита Кожевникова (Содо) но Пётр Денисов (Ундау). Кыӵе гинэ кылъёсын уг кӧяло-вӧяло соос Йохиоез, дуно басма куыны косыса. Уг кепырало кышкатыны но. Ӵапак туала улонын кадь ик. Соослы оскыса, куанер мурт кыле пилиськем тусь дуре. Ултӥям но вӧсь карем тури кошке адями дорысь. Озьы ке но йылпумъяське спектакль, секыт мылкыд уг кыльы. Мынам малпамея, тури гинэ ӧвӧл, Йохио но уз вунэты сое. Оло, соос мукет улонын нош пумиськозы... Е. ПАХОМОВА. Спектакльысь суредъёс: Цу - Ольга ГАНЕВА, Йохио - Игорь ЛЮКИН; Кышномурт-тури. Туспуктэмъёсыз В. КАМАШЕВЛЭН. Театр Лобӟиз, кошкиз тури... Алигес учкисьёслы ӧсъёссэс усьтӥз Егитъёслэн "Иднакар" театрзы. Сцена вылын возьматэмын япон писательлэн Дзюндзи Киноситалэн выжыкылэзъя "Тури тылыос" ("Журавлиные перья") спектакль. Пуктӥз сое театрлэн валтӥсь режиссёрез Ольга Александрова. Спектакльлэн шорсюлмаз - яратонэз данъян, утён. Яратон уг улы кас сюлэмын. Ненег мылкыдэз тужгес тыршоно утьыны. Спектакльын вераськон мынэ Йохио нимо егит пиосмуртлэн уродос гинэ юртаз чебер, тузӥ кышномуртлэн Цулэн вуэмез сярысь. Талэсь азьвыл Йохио кулонлэсь уте туриез - лек муртлэн пукыӵ ньӧлэзлэсь мозмытэ. Воргоронлы со вера кузпал луыны малпамез, сое яратэмез сярысь. Таӵе шуд инмысь усе кадь Йохио понна. Музъем вылэ пыдъёсыз уг йӧтыло ни. Чебер но лякыт луэм сяна, Цу туж тыршись кышномурт вылэм: нунал лумбыт султылытэк пуке куиськон станок сьӧрын. Солэсь куэм кисьязэ (басмазэ) вузаса, картэз трос коньдон поттэ Семья куанер улонысь потэ. Егитъёслэсь огсыр улонзэс таркало узыр бускельёссы - вузчи Содо но солэн картэз Ундау. Цулэсь дуно кисьязэ вузаса, соос бадӟым барыш потто. Собере лыкто ассэ кибашлыез адӟыны. Ундау вожъяське: та пӧрмостэм бускелезлы сыӵе чебер но ужась кузпал шедем... Йохиоез соос куро, кышнозэ дуно басма куыны мед лӧпкытоз шуыса. Верало гуртазы вӧлмем супыльтонъёс сярысь. Одӥг кышномурт, пе, тыын пыласькыкуз, огдырлы турилы пӧрме. Вуысь потэ но нош ик адямилы берытске. Тури тылы кадь небыт басма куэм понна трос коньдон дэмласа вузчиос Йохиоез узато кузпалэзлы пумит. Асьсэлэн нош тодэмзы потэ, кызьы ужа Цу куиськон бордаз. Секыт мылкыдын ке но, кышномурт соглаш луэ эшшо огпол дуно кисья куыны - но солэсь ужамзэ нокин медам адӟы. Уй куспын Цу йылпумъяны кулэ аслэсьтыз ужзэ. Йохио умме усем бере, кышномурт турилы пӧрме. Мугорысьтыз кыскам тылыосыз вӧзы вань сюлэмзэ сётыса куэ со яратонэзлы дуно басма. Бускельёслы кӧттырмостэм сямзы уг сёты изьыны. Йохиолэн корказ пырыса адӟо куиськыса пукись туриез. Шуш куараен кесяськыса пото юртысь. Изись кузпалэз сайкаса адӟе тылобурдоез. Бадӟым кайгулы пӧрмо ӟеч малпанъёсыз: солэн кышноез - тури. Нош Цу уг чида таӵе ултӥямез но лобӟе со дорысь. Солэн яратоно муртэз но сое быдтыны турттӥсь адямиослэсь пӧртэм ӧвӧл. Озьы ке но, берпум гурламез но гажано кузпалэз сярысь вал: "Мон тонэ ноку уг вунэты!.." Йохио солэсь ассэ жалятэк ужамзэ ӧз ке но дунъя. Котькуд калыклэн культураез тунсыко луэ аслаз сямъёсыныз но йылолъёсыныз. Егитъёслэн театрзылэн но япон выжыкыл борды кышкатэк басьтӥськемез возьматэ солэн ас кужымезлы оскемзэ. Япон культура Европаысь калыкъёслэн культуразылэсь аспӧртэмгес. Сцена вылын возьматыны но сое трослы шуггес. Но спектакльлэн режиссёрез та ужпумез быгатыса сэрттэм-пертчем. Уже кутэмын вашкала япон театрлэн тодметъёсыз. Шудӥсьёс, режиссёр но спектакльын кутӥськись крезьгур кылдыто одӥг композиция - япон улонэз возьматӥсь сузьет. Зэмос японецъёс доры вуэмедлы оскод, артистъёслэсь дӥсьёссэс но йырси керттэтъёссэс адӟыса гинэ но. Вашкала Япониын талы бадӟым саклык висъяськылӥз. Шудӥсьёс трос ӧвӧл - ньыль кузя гинэ. Постановкаын валтӥсь героинялэсь рользэ шудэ Ольга Ганева. Солы возьматоно луиз кык муртлэсь образзэ: кышномуртлэсь но турилэсь. Вераны кулэ: соос пӧлысь котькудӥз синмаськымон пӧрмем. Лякыт но ненег, яратӥсь сюлэмо Цу учкисез ас бордаз кыске чылкыт яратонэныз, бадӟым осконэныз. Йохиоез шудэ Игорь Люкин. Артист быгатыса суредам та пӧрмостэмгес воргоронэз. Сыӵе муртэ яратӥз вал Цу. Улонзэ утемез понна турилэн адямиен ӵош улэмез, солы ӟеч лэсьтэмез потӥз. Аслэсьтыз тылыоссэ кесяса кылдытӥз туж ненег, мамык кадь небыт басма. Но бадӟым дунын вузам ваньбур воштӥз Йохиолэсь улон шоры учконзэ. Табере солы тросгес но тросгес кулэ ни коньдон. Сук сямыз быдтӥз яратон мылкыдзэ, пертчиз семья гердзэ. Куанер пиосмуртлэсь таӵе суро-пожо, бугыръяськись мылкыдзэ артист быгатыса возьматэ. Ляб сюлэмо воргоронэз жаляны гинэ кыле на. Кас, аксым бускельёслэсь кӧтвеськантэм выремзэс умой адӟытӥзы Маргарита Кожевникова (Содо) но Пётр Денисов (Ундау). Кыӵе гинэ кылъёсын уг кӧяло-вӧяло соос Йохиоез, дуно басма куны косыса. Уг кепырало кышкатыны но. Ӵапак туала улонын кадь ик. Сыӵеослы оскыса, куанер мурт кыле пилиськем тусь дуре. Ултӥям но вӧсь карем тури кошке адями дорысь. Озьы ке но йылпумъяське спектакль, мылкыд секыт уг кыльы. Мынам малпамея, тури гинэ ӧвӧл, Йохио но уз вунэты сое. Оло, соос мукет улонын нош пумиськозы... Е. ПАХОМОВА. Спектакльысь суредъёс: Цу - Ольга Ганева; Йохио - Игорь Люкин; Кышномурт-тури. Туспуктэмъёсыз В. КАМАШЕВЛЭН. Лыктэлэ, шулдыръяське Ижевскысь техникая кун университет арлы быдэ котькуд сӥзьыл ортчытэ отчы пырыны мылкыд карисьёсын но студентъёсын карнавал ӝыт. Та ужрадэ пырисько тямыс факультетысь студентъёс. Куное лыктозы город но ёрос администрациын ужасьёс, мукет тодмо адямиос. Туэ но ужрад ортчоз "Интеграл" культура юртын, 7-9 октябре 18 часысен. Ӧтиськом вань мылкыд карисьёсты. "Улэме школатэк ӧй луысал" Та тусбуез адӟыса, дышетӥсез шуныт мылкыдын тодазы ваёзы Балезино районысь Люк гуртын улӥсьёс. Лев Ильич Волков татысь нылпиосты кема аръёс ӵоже биологилы дышетылӥз. Собере семьяеныз улыны выжиз Ижевске. 21 номеро школа усьтӥськем дырысен ик ялан одӥг интыын ужа. Со сярысь шуо: дышетӥсь-мастер. Лев Ильичез туж ярато нылпиос но, дышетӥсьёс но. Нош бордаз со кыске лякыт сямыныз но визьмыныз. Соин ик сыӵе гажамон дышетӥсь доры урокез тодытэк мыныны ик возьыт. Куд-ог дышетӥсьлэн уно дышетскыса но ужез уг пӧрмы: я пиналъёс уг кылзӥсько, я урокъёс уг удалто. Лев Ильич сыӵеос пӧлы уг пыры - солы дышетӥсь луыны инкуазен сётэмын, лэся. Ма, собере со ачиз но тазьы шуэ: "Улэме школатэк ӧй луысал". Пенсие потэмез бере но нылпиослэсь люкиськыны уг ӵыды, берло аръёсы со ужлы дышетэ - та удысъя но Лев Ильич вылӥ квалификациен дышетӥсь луиз. Кӧня нылпиос дышетэмын, сомында ик писпуос мерттэмын - озьы шуыны луэ на Лев Ильич сярысь. Зэмзэ но, кытын гинэ со мед ужалоз, котькытын школа азбарез писпуос котырто - солэн, биологлэн - кибервылыз шӧдӥське. Тани 21 номеро школа азбарез но пӧртэм будосъёс шулдырто. Кызь ар ӵоже соос школалэсь ӝужытгес луиллям ини. Дышетӥсьлэн кельтэм пытьыосыз - син азьын. Школаын ужатозяз Л. И. Волков трос пол пусйылэмын ини дуно кузьымъёсын. Но со понна тужгес но дуно кузьым - нылпиослэн яратэмзы. Т. БАННИКОВА. Туспуктэмез В. КАМАШЕВЛЭН. Удмурт Республикаысь Кун Кенешлэн заявлениез Удмурт Республикаысь Кун Кенешлэн пресс-службаез "Золотая провинция" газетэз лыдӟисьёслы вазиське, соосты та издание нош ик пӧяз шуыса. "Оскымон источникъёс" вылэ пыкиськыса, газет ивортэ Кун Кенешлэн Тӧроезлэн Александр Волковлэн но Правительстволэн Тӧроезлэн Николай Ганзалэн "ЕЭС России" РАО-лэн кивалтӥсеныз Анатолий Чубайсэн кылем арняе пумиськемзы сярысь. Кун Кенешлэн пресс-службаез шара вера, та печатлам ивор зэм ӧвӧл шуыса. Таӵе гожтэмъёсты синйылтытэк но кельтыны луэ вал. Республикалэн кивалтӥсьёсыз социально-экономической ужпумъёсты быдэстон понна пумиськылыны быгато котькудӥныз федеральной кивалтӥсен, соос пӧлын Анатолий Чубайсэн но. "Золотая провинция" газетын печатлам дезинформация туж валамон политической ужпумъёсты быдэсъя - янгыше уськытоно Кун Кенешлэсь Тӧрозэ но "Отечество" политической движенилэн региональной люкетэзлэсь кивалтӥсьсэ. Та ужпумъёсты быдэстон понна газет нырысьсэ гинэ уже уг куты ни пӧяськонэз но зэм луисьтэм иворъёсты. Оскиськом, "Ивор вӧлмытӥсь ёзъёс сярысь" Законъя, газетлэн редакциез янгышсэ тупатоз, лыдӟисьёс вожзэс медаз вае республикаысь вылӥ должностен адямиослэн ужамзы сярысь зэм луисьтэм иворъёс вӧлмытэмез понна. ТУЭ АРЛЫДООСЛЭН КАЛЫК КУСПО АРЗЫ Чукырчаысь песянай Чукырча? Мар-о со сыӵе, юалоды? Озьы нимало гуртоос Кизнер ёросысь Васильево черкогуртэз. Зэм, черксылэн бервылЫз но кылемын ӧвӧл ни. Куамынэтӥ аръёсы сое куашкатӥзы. Васильевоысь сельсоветэ пыро вал 13 гурт, "Дружба", "Звезда" но Мичурин нимо колхозъёс. Бен, табере та палъёсын но улон-вылон мукет ӧретӥ кошкиз. 75 аресъем Раиса Исакова быдэс улонзэ Чукырчаяз ортчытӥз. Вань калык сямен ик гыризы-кизиз, пудо утялтӥз, нылпи вордӥз. Пенсиез бен сокем ик бадӟым ӧвӧл, но улыны тырме, шуэ. Быгатэ на ай пудозэ утялтыны, юртъер котыртӥз берганы, бакчаяз ужаны. Туэ арлыдоослэн калык куспо арзы бере, Чукырчаысь Рая апайлы шудбур но тазалык сӥзиськом! Н. Лялин. Раиса Исакова. В. Беломорскихлэн туспуктэмез. Гажано дышетӥсьёс! Умой сямлы пӧрмиз ини: зарни сӥзьыллэн одӥгаз арня нуналаз тӥ пусйиськоды асьтэлэсь праздниктэс. Будӥсь адямиослы тӥ асьтэлэсь кужымдэс жалятэк сётӥськоды тодон-валан, сайкыт визь. Сӥзьыл будэм емышъёсты октон дыр гинэ ӧвӧл, та вакытэ вуоно урожай понна сюлмаськон кутске ини. Озьы шуыны луоз асьмелэн дышетӥсьёсмы пумысен но Россиысь интеллегинциез кылдытӥсь но кыдатӥсь адямиос сярысь. Тӥ возиськоды но ялан тыршиськоды азьвыл мытэм ужъёстэс азинтыны, быръем сюрестылэсь ноку но палэнэ уд кожиське. Нуналмысь тыршеменыды будӥсь адямиослы сётӥськоды уно аръёс ӵоже люкам тодон-валанъёстэс, тӥляд быгатэменыды соосты дасяськоды бадӟым улон сюрес вылэ. Тӥ асьме обществомылы зэмос инъет дасяськоды. Дышетӥсьтэк азьланез ӧвӧл. Удмурт Республикаысь Кун Кенеш но Правительство ӟеч валало: 42 сюрсъем дышетӥсьёс асьсэлэн зэмос уженызы Удмуртиын бадӟым кужым луо. Валаськомы, та секыт вакытэ улонады курытсэ но чидано луэ. Озьы ке но, номыр шоры учкытэк, тӥ яратоно уждылэсь уд куштӥськиське, валаськоды, тӥ республикамылэн азинскон сюресаз бадӟым инты басьтӥськоды шуыса. Кун Кенеш но Правительство асьсэ ласянь Удмуртиысь калыкез дышетон удысын вань луонозэ лэсьтыны тыршо. Туэ гинэ дышетскисьёс пыризы куинь выль школаосы, пуктэмын интернат. Ар йылпумъяськытозь, калыкез дышетон удыслы усьтэмын луоз на эшшо дас ньыль объект. Гажано дышетӥсьёс, бадӟым тау кареммес вераськом жадёнэз тодытэк ужамды но будӥсь поколение сярысь сюлмаськемды понна. Асьтэлы но семьяостылы шудбур, тазалык, ӟеч но ог-огдэ валан мылкыд. Удмурт Республикаысь Кун Кенеш. Удмурт Республикаысь Правительство. Тазалык Шунды, омыр но ву - пересьмон уз ву Ку но малы асьмеос вазиськиськом врачлы? Шонер - висён куасалтыку. Малпаськом, врач кӧня ке эмъюм ӵектоз но бурмом. Но малы ке ум вазиськиське солы таза дыръямы - висёнэз алон, тазалыкмес кыдатон сярысь сюлмаськыса. Со дыре ик ваньмылэн кема но таза, егит улэммы потэ. Луэ-а озьы? Луэ! Тазалыксэс чакласа-эскерыса улӥсьёс ваньзы огымысь шуо: милемлы юрттэ физкультура! Ӵук зарядка, тросгес пыдын ветлон, аэробика, теннис, уян, инкуазе потан туж юртто чырткем улыны. Одӥг кылын вераса - шунды, омыр но ву асьмелэн тужгес но матысь эшъёсмы луыны кулэ. Адями ассэ кыдатонэн выре ке, шергес висе, капчи мылкыдо улэ. Корка пушез тӧлатъян, гольык пыд ветлон, душ, мунчо висёнъёсты кыско, кужым пыӵато. Но эн вунэтэ: пыласькем бере кӧс-кӧс ӵушиськоно. Мугорез кыдатонэн выроно котькуд нунал, куазь шоры учкытэк. Но азьло кенешоно врачен. Тол вуон азьын одӥг пичи ӵектон: ньылондэс али ик нуналлы быдэ кезьыт вуэн гылъялляды ке, толалтэ ангинаен уд курадӟе. Али котькытын верало-гожъяло шонер но таза сиськон сярысь. Ми но со понна. Жуммытӥсь диетаос сярысь вераськон уг мыны, адями эсэпсэ валаса сиськыны кулэ. Мугорлы одно кулэ сӥль, чорыг, йӧл-вӧй, нянь, емыш, бакча сиён но мукет. Но ваньзэ сое шонер, валаса сиёно: уг яра огпӧртэм макарон яке йӧл гинэ сиыны. Валатэк сиськон ӵемысь вуттэ сюлэм яке кӧтпуш висёнъёсы. Шутэтскыны яратӥсь муртэ азьтэм шуо. Но адями одно шутэтскыны кулэ, сотэк со чаль жуммоз, висьыны усёз. Туж умой, тӥ шутэтскон нуналъёсады стадионъёсы, спортзалъёсы вуылӥськоды, инкуазе потаськоды ке. Эн вунэтэ ӟеч ум сярысь но - адями нуналаз 7-8 час кӧлыны кулэ, сотэк со выль ужан нуналлы кужым люкаса уг вутты. Т. ГРИГОРЬЕВЫХ, Республикаысь врачебно-физкультурной диспансерысь врач. БУСЫ УЖЪЁС 29 сентябрьлы 1 2 3 4 5 Районъёс Юос кутсамын (%) гектарлы быдэ (ц) Кидыслы кисьтэмын (%) картофка октэмын (%) удалтонлыкез (ц) Яр 78,2 8,1 47,7 76,5 104,2 Глазов 101,2 5,0 72,1 64,8 90,1 Юкаменск 98,2 7,4 56,9 65,9 59,3 Балезино 93,7 5,9 62,7 59,0 85,7 Красногорск 68,3 10,0 95,5 44,8 102,3 Кез 65,2 9,1 46,9 59,6 107,9 Дэбес 83,9 7,1 53,5 69,6 63,1 Игра 98,3 7,9 100,0 75,0 122,8 Якшур-Бодья 76,7 8,1 104,5 52,2 88,3 Шаркан 99,0 8,4 96,3 70,3 96,2 Селта 97,2 6,9 79,7 59,9 92,8 Сюмси 76,2 4,7 43,7 39,4 144,9 Ува 98,1 9,5 92,2 37,2 108,5 Вавож 15,4 90,6 64,8 174,9 Кизнер 102,2 6,4 61,1 39,5 97,7 Можга 94,5 14,4 105,0 43,1 104,8 Грах 100,0 9,8 100,0 14,3 Алнаш 100,0 16,2 123,21 20,5 94,5 Пичи Пурга 93,9 15,5 88,6 35,7 61,9 Кияса 100,0 7,3 60,7 22,6 30,0 Каракулино 66,9 11,2 78,7 58,5 56,3 Завьял 92,1 13,0 91,5 46,6 141,8 Вотка 84,7 9,7 69,0 44,2 113,4 Сарапул 82,9 13,5 54,4 Камбарка 79,7 6,3 54,7 71,4 50,0 Республикая 90,9 10,1 79,2 47,6 119,3 Паймытъялозы устоосыз Туннэ усьтӥське улонысь дырызлэсь вазь кошкем тодмо удмурт крезьгурчилэн, Удмурт Элькунысь искусствоосъя дано ужасьлэн, Россия Федерациысь искусствоосъя дано ужасьлэн, Удмурт Элькунысь Кун премилэн лауреатэзлэн Герман Афанасьевич Корепановлэн вордскемез дырысен сизьымдон вить ар тырмонлы сӥзем фестиваль. Таин валче Ижын ортчозы данак ужрадъёс. Туннэ ик Драмая удмурт кун театрын луоз нырысетӥ концерт. Фестивале люкаськемъёсты шулдыртозы "Удмуртия" кун телерадиокомпанилэн академи хор капеллаысьтыз артистъёс. 14-тӥ октябре та юртын ик калыкез шумпоттоз шаерысьтымы крезьгуръя училищеысь дышетӥсьлэн тодмо крезьчилэн Сергей Кунгуровлэн "Зарни крезь" камерной оркестрез. 25-тӥ октябре шаерысьтымы крезьгуръя училищеын луоз камерной гуръёслы сӥзем ӝыт. Мукет нуналъёсы кылзӥсьёсты шумпоттылозы Николай Роготневен, Андрей Елисеевен, Владимир Михайловен кивалтоно коллективъёс. 15-тӥ ноябре ӝытлэн "кузёосыз" луозы тодмо крезьгурчи Юрий Толкач но "Удмуртия" кун телерадиокомпанилэн академи хор капеллаез. Гала-концерт ортчоз 26-тӥ ноябре Операя но балетъя кун театрын. Татын асьсэлэсь устолыксэс возьматозы фестивале пыриськем вань коллективъёс. Вань концертъёсын чузъяськозы кызетӥ даурлэн кыкетӥ ӝыныысьтыз тодмо крезьгуръёс. Тужгес ик - Герман Корепановлэн, мукет крезьгурчиослэн ужъёссы. Вань концертъёс кутскылозы ӝыт сизьым часын. Е. РОМАШОВА. Праздникен! Гажано анайёс но песянайёс атайёс но песятайёс! Туннэ, арлыдоослэн нуналазы, асьмеос пусйиськом ваньмылэсь праздникмес, угось зэмос обществоын ог-огзэс валаса уло вань поколениос. Асьмеос ялан тодамы вайыны кулэ, егитъёс но бӧрысь арлыдо луозы! Тӥляд узыр улон сюресты, странамылэсь но котькуд семьялэсь азинскемзэс утись тодэ ваёнъёсты, тӥляд лякыт но шуныт мылкыдды - узырлык, соостэк асьмеос улыны ум быгатӥське. Атыкай музъеммы понна тӥ трос лэсьтӥды. Секыт аръёс странамылэсь экономиказэ ӝутӥды, адямилэн историысьтыз самой кышкыт ожмаськонын вормиды. Ми тӥледлы бадӟым тау кариськом ваньмыз понна, мар тӥ лэсьтӥды. Верало, государстволэн цивилизованной луэмез шӧдӥське нылпиос но пересьёс сярысь сюлмаськемез бордысь. Жаляса верано луэ, Россиысь социальной страхованиея радлык та вакытэ пересьёслы кӧттыро улыны луонлык уг сёты на. Ми оскиськом, Россиын сыӵе дыр вуоз, ку пенсионеръёс пенсия дыраз басьтозы, ку арлыдо адямиос туж кулэ макеос вылын шыръятэк улыны быгато. Ми, милям поколенимы, со понна ваньзэ лэсьтоз. Ӟечкыласьком тӥледды праздникен. Сӥзиськом юн тазалык но кема аръёс. Нылпиосты но внукъёсты тӥ сярысь мед сюлмаськозы озьы ик, кызьы тӥ сюлмаськылӥды соос сярысь вань улонды ӵоже. Ымнырады котьку ик пальпотон мед луоз, со угось ваньмылы асьмелы туж кулэ. "Отечество" огазеяськонлэн Удмурт люкетэз. ШӦКЫЧ Динь-динь Серемес верос Ӧбылигурт но Арланшур ог-огзылэсь кыдёкын уг сыло, соосты пичигес гинэ сик висъя. Ӧбылигуртын атас чортэ ке, Арланшуре кылӥське, Арланшурын вал гырдалтэ ке, Ӧбылигуртозь шуккиське. Кык гуртысь егитъёс ог-огзы доры шудыны ветло, мӧйыос юон нергеосазы ог-огзэс куное ӧтчало. Озьы даурысь дауре уло. Ӧбылигуртысь пиос кышно одно ик Арланшурысь басьтыны туртто. Вирзы, пе, мед сураськоз. Ма, трос аръёс ӵоже со сизьымдон сизьым пол но сураськылӥз, дыр, ини но - югдур уг воштӥськы. Ӧбылигуртысь пиос сыӵе ик востэмесь, возьдаськисесь, ӧбыли таракан кадесь кылё, нош Арланшурысь нылъёс кык син куспысьтыд нырдэ ишкалтозы, чиньыдэ ымазы понӥд ке, арлан сямен пурозы. Кыл йылазы соос нискылатозы но, сизьым шур йылэ но вуттозы. Озьы ке но, кылзы - пӧзись пурты, ужзы - пукись ву шуэм арланшурысъёслы чик уг тупа. Татысь нылъёс кылынызы гинэ изэз уг пасяло, киынызы но ужаны мастакесь - гранит изэз но волятозы, измем, пумем сюлэмез но шунтозы. Ӧбылигуртысь пиос нош одӥг кабанзэс куинь нунал ӝутозы, мынон сюрессэс сизьым нунал мынозы. Кин тодэ ини, малы та гуртъёсты шундыен толэзь сыӵе пӧртэм шунтэ-югдытэ? Интызы, дыр, озьы тупамын. Ӧбылигурт сылэ нюлэс дурын, нюрын. Отчы машинаен кынтэм дыръя гинэ пыраны-потаны быгатод, нош Арланшур пуксемын бадӟым сюрес дуре - вань ветлӥсь- кошкись соос дорын. Тани Ӧбылигуртысь Генялэн но "атасэз" чоръяны кутскиз, кышнояськон дырыз вуиз. Кышно басьтон - кут кутан ӧвӧл шуо ке но, Генялы со кабан сюронлэсь но секыт потэ. Кемалась ини уго синзэ куштӥз Арланшурысь Юля шоры. Синмаськем муртлэн синмыз - ньыль, пельыз - сизьым, шуо, нош Геня Юлялэсь зорись синъёссэ, лемлет ӝуась бамъёссэ, чигымон векчи някыръяськись мугорзэ адӟе ке, тюрагай куаразэ кылэ ке, синтэм-пельтэм луэ. Котырысьтыз нокинэ уг кылы-адӟы ни - коть дунне ик му пыр мед виялоз. Генялэсь шудон пӧлысен шораз сиымон учкемзэ шӧдыса, Юля эшшо чырмытгес эктэ- берга-гурла. Ӧбылигурт пиослэсь возьдаськон манерзэс тодэ бере, калык азьын кыл тэчызэ уг поттылы - чебер пиез кышкатод но, берло гырпумдэ куртчыны уд быгаты ни. Генялэн нош кылыз ньылӥськемын, пыдессинъёсыз жилиаськемын. Сыӵе дыръя мар кыле на - нылашлы аслыз азьветлӥсь кариськоно. - Гени, - эшъёссы кылымтэ дыръя вазе Юля, - ойдо поръялом. Геня пукон интыысьтыз серметамысь лэзем ужпи сямен тэтчиз вал но - возьдаськонэз вормиз. Луд синмо, тэль пелё, шуо, татын нош калыкез быдэс уллё. Адӟозы, исалозы. Юля серемез потэмен пуштӥське вал ини но, ассэ дыраз кортназ. - Гени, асьмеос соку пароль кутом. Шудон пӧлысен мон тыныд лушкемен динь-динь шуо, тон поръяны соглаш ке, мыным пи-пи шуыса вазёд, ява! Собере оген-оген калыклэсь палэнском. Кызьы ярашизы, озьы ик лэсьтӥзы. Яратон пеймыт уез но югдытэ вылэм, пиштӥсь кизилиосты но матэктытэ. Ӧбылигуртысь Геня но Арланшурысь Юля ӵукнаозь поръязы-калгизы. Мукет нуналаз шудон пӧлысен Юля Геняез нош ӧте: - Динь-динь! - Пи-пи! - пумитаз вазе Геня. Нош поръяло егитъёс. Генялэн кылыз быгыльмемын, Юлялэн - кӧямын-вӧямын. - Динь-динь! - вераськон куспаз малпамтэ шорысь шуиз Юля. Геня котырак учкиз - одӥг лул но ӧвӧл. - Динь-динь! - шораз мусо пальпотыса нош учке Юля. Яратоно муртлэн синмыз но, пе, вераське. - Пи-пи! - шуиз Геня. Пӧсь ымдуръёс ваче вуизы. Шоразы толэзь пальпотыса югытсэ пазя - егитъёсыз иса. Соосыз льӧмпу улэ ватскизы, гадь тыразы яратонэн шоказы. - Динь-динь! - шуэ нылаш. - Пи-пи! - вазе пияш. Ымдуръёс нош ваче вуо, чалмыт уй омырез улӟыто... Ураметӥ калгыса, шудэз кема уд возьы. Куинетӥ нуналаз юмшакузы Юля Генялы нош шуэ: - Динь-динь! Соиз дышем сяменыз нылашез ӟыгыртӥз, ымдураз йӧтскиз вал но - Юля налим сямен ки улысьтыз вольтчиз. - Динь-динь! - кылӥське уй омырын. Геня паймем кечтака сямен интыяз кынмемын. Кыӵе пыӵ нылашез куртчиз, мар солы кулэ? Юляез сутӥз но толэзен югдытӥсь синъёсаз учкиз. Соосыз нош сыӵе мӧзмытэсь, тани-тани синкылиосын тырмозы. Пияш ваньзэ валаз. - Пи-пи! - шуиз со каллен гинэ. Геня ӵуказеяз ик Юляос доры кышно кураны вуиз. Собере - сюан-бӧрысь! Ӧбылигуртъёс но арланшуръёс арня ӵоже юмшазы. Кӧня бекче меда вина юэмын вал, кӧня выж пулъёс тӥямын! Ярато угось та палан кӧтсы лычсузьымон юмшаны, тужгес но арланшуръёс. Ӧбылигуртъёслэн котькуд бӧрысь бере тупатъян, октон-калтон ужъёссы толэзьлы тырме. Яратон, пе, кунянэз но ош каре, зӥбыт вирез но пӧзьытэ. Генялэн корказ быдэс сандык шуд пыриз. - Динь-динь, динь-динь, динь-динь! - гырлыен жингыра Юлялэн куараез. - Пи-пи, пи-пи, пи-пи! - чингылиен шуккиське Генялэн ваземез. Пӧсь сюлэмъёс ке валчеясько, мукетъёсызлы кыштырак кошконо. Ум люкетэ егитъёслы. Огез кандидатмы - Ю. Д. Маслюков Ижевскысь Ленин районын ортчиз блиц-опрос. Юаськемъёс полысь 63 процентэз Россиысь Кун Думае быръёнъёс дыръя куаразэс сётыны малпазы Юрий Дмитриевич Маслюков понна. Россиысь Правительстволэн азьвыл вице-премьерезлэн данэз калык пӧлын бадӟым, Ижевскын - уката но. Ужан сюресэз солэн ӵапак кутскиз асьме городын, научно-исследовательской технологической институтын. Татын 8 ар ужаз, эшшо 4 арзэ - автозаводын валтӥсь инженер луыса. Пусъёмы на: Россиысь политикъёс пӧлын Юрий Дмитриевич сямен тросэз ик экономикаез ӝутонлы но оборонной промышленностез азинтонлы саклык уг висъяло. Маслюков, Примаковлэн правительствояз ужаса, мыло-кыдо юрттӥз Удмуртиысь предприятиослы, валтӥсь заводъёсмылы. Али но асьмемын кусыпъёссэ возе. Россиысь парламентэ шедьыса, луонлыкъёсыз эшшо но будозы. 3-тӥ октябре Юрий Дмитриевич Ижевске вуоз. Мукет нуналаз избиркоме сётэмын луозы быръёнъёслы дасям списокъёс - соку Маслюков пусъемын луоз депутатэ кандидатэ. Со пумиськылоз республикалэн, районъёслэн кивалтӥсьёсынызы, вераськоз общественной но политической организациосын, ужась коллективъёсын. Т. Кузьмина. Туннэ - Дышетӥсьлэн нуналэз Дышетӥсьлы ляб луыны уг быгаты Дышетӥсьёслы туннэ , оло, котькинлэсь но секыт. Астэ, семьядэ сюдон сяна, солы нылпиосты дышетоно. Нош кӧня табере улонлы осконзэс ыштэм нылпиос, анай-атайёс - дышетӥсь сыӵе курадӟонъёслэсь но палэнтӥ ортчыны уг быгаты, ваньмызлы та улонын возиськыны юрттоно. Дышетӥсь ляб луыны уг быгаты, угось со шоры учко, солэсь адӟем каро, улыны кужым басьто. Сыӵе юн сямо дышетӥсьёс ужало Ижевскысь 21 номеро школаын. Со аспӧртэмлыко луэменыз данъяськыны уг быгаты, мукет но, гимназия но ӧвӧл, огшоры школа гинэ, но татын сюлмысь тыршо быгатӥсь дышетӥсьёс. Пичи классъёсын ужась дышетӥсь Алла Владимировна Табакова ӝожтӥськиз но: олимпиадаосын нылпиосмы вормисе пото ке, соку ик соосты куд-ог лицейёс синйылто но доразы кыско. Бен, дась будэтэм нылпиосын ужаны капчи ни. Та школаын уката но зол пыӵамын Элькоминлэн но Давыдовлэн амалъёссыя дышетон. Нош нырысьсэ со борды ужаны кутскем дышетӥсь Ирина Сергеевна Тихоновна. Мынам дышетскисьёсы, зэмзэ но, кӧня ке мукетэсьгес, - шуэ дышетӥсь, - чебер верасько, ог- огенызы кусыпъёс тупатыны быгато. 21 номеро школаын озьы ик паськыт куто Тальперинлэсь но Занковлэсь методикаоссэс. Нош берло аръёсы коллектив пумен выжыны кутскиз - "2000-тӥ арлэн - школаез" программа борды. Ижевскын 90-лэсь трос школаос ужало. Огаз но ӧвӧл, удмуртъёслэн улонзылы сӥзем бадӟым музей - нош татын вань. Валентина Сергеевна Шмыковалэн тыршменыз татын усьтэмын но ужа "Удмурт корка". Содэн кивалтэмез улсын ик ӟуч школаын тямысэтӥ арзэ дышето ини удмурт фольклорлы. Газетысь лыктэм корреспондентъёсты адӟыса, дышетӥсьёслэн кабинетазы пыризы кык пиос, 11 "б" классын дышетскисьёс Николай но Андрей. Туж куризы Дышетӥсьёслэн нуналэнызы газет пыр ӟечкыланы яратоно дышетӥсьёссэс но уката ик школалэсь директорзэ Галина Александровна Галкинаез. Шуизы, солэн кужмыныз но мылкыдыныз, пе, возиське яратоно школазы. Вераны кулэ: 21 номеро школаын директор но, солэн воштӥсьёсыз вылӥысен пуктэмын ӧвӧл - коллективен быръемын. Соин но, вылды, дышетӥсьёс но администрация куспын ваче пумит луоз учыръёс уг луыло. Паймытӥз таӵе учыр но: дышетскисьёс пӧлын али мынэ бадӟым уж - соос асьсэлы Президент быръё. Школа пушказы республика кылдтыны малпало. Трос кандидатъёс пӧлысь али азьпала потӥллям Оксана Лапина но Радик Нугманов. Кыксылэн ик туж тунсыко программаоссы. Бен, та шудон гинэ ай, но сыӵе амалъёс пыр пиналъёс улыны дышетско. Директорлэн воштӥсез Калининченко Анна Павловна сыӵе "шудонъёслы" кичӧлтӥсь луэ ке но, бӧрысь быгатыса палэнске - солэсь малпанъёссэ пиналъёс йылпумъяло ини. Бен, макем мӧзмыт луысал школаын мылкыд сётӥсь, ӟеч ужъёслы ӝуатӥсь дышетӥсьёстэк. Праздникен тӥледыз, дышетӥсьёс! Т. БАННИКОВА. Школалэн директорез Г. Галкина. В. Шмакова удмурт нылпиосын. Школалэн "зарни" кизилиосыз. Егит дышетӥсь В. Бельтюков. Дышетӥсь-новатор И. Тихонова. Туспуктэмъёсыз В. КАМАШЕВЛЭН. Политика "Фермеръёслы мон оскисько",- шуиз Россия Федерациысь Кун Думалэн депутатэз Владимир Башмачников. Удмуртие со нырысьсэ уг лыкты ни, вуэмезлы быдэ пумиськылэ фермеръёсын. Быгатэмезъя юрттэ но. Таяз учыре дорамы кожиз, Свердловск областе ветлэмез бере. Пумиськылӥз гурт академиысь студентъёсын, фермеръёсын, журналистъёсын, потаз Шаркан районысь огаз хозяйствое. Ветлон мугзэ Владимир Фёдорович ӧз ваты: герӟаськемын Кун Думае быръёнъёсын но депутатлэн мандатэз понна нюръяськонэн. Малпа но оске, Удмуртиысь но Урал котырысь музъем ужасьёс асьсэ адямизы понна куаразэс одно ик сётозы шуыса. - Мон озьы ик курысал дурбасьтыны "Наш дом - Россия" огазеяськон пала, малы ке шуоно, вань партиос пӧлысь фермеръёслы НДР гинэ юрттэ, кулэяськонъёсмес вала,- пусйиз Москваысь куно. - Мар лэсьтыны быгатӥм 4 ар ӵоже? Трос ӧм. Музъемен ужанъя законъёсты воштыны ӧз сёты КПРФ но со пала дурбасьтӥсьёс. Кун Думаын сыӵеос 450 пӧлысь 270 мурт. Соос чутрак пумит луо музъемез вузан-басьтонлы, нимаз крестьян хозяйствоосты азинтонлы. Оскон вань на вуоно Кун Думалы, солэн "буёлэз" музонгес луоз шуыса. Коньдонэн юрттэт сярысь ке верано, банкъёс али нокинлы но пунэмен коньдон уг сёто: колхозъёслы но, фермеръёслы но. Котькудӥз берга ас быгатэмезъя. Музъемлы налог сярысь. Ми малпамъя, со одӥг пумо луыны кулэ, ваньмызлы - огкадь. Гектарез соку секыт "кыскоз", тус-тас карыны луонлык уз сёты, ассэ ачиз утялтытоз. Курган область Кун Думае туэ вазиськылӥз музъемлы налогез доразы пыӵатон пумысен, Дума соглаш ӧз луы. Владимир Башмачников умоен лыдъя Черномырдин кивалтон аръёсты. Со дыръя пыд вылаз султӥз пичи но огшоры ужбергатон, музъемез нимаз кузёослы люкылон. Кириенко бордысен кутскыса, фермеръёс но мукет "векчи" бизнесменъёс шоры учкон чутрак воштӥськиз. Гайдар дышетэмъя, соос ужало олигархъёсын гинэ. Москваысь депутат чакламъя, таӵе реформаторъёс коммунистъёсын огкадесь: фермерлы сюрес уз сётэ. Ма бордысен кутскиз компартилэн но аграрникъёслэн ог-огзэс валамысь дугдэмзы? Бюджетэз юнматыку, коммунистъёс курон пуктӥзы оборонной промышленностез юнматонэ тросгес коньдон висъяны, аграрникъёс - асьсэ удыссэс азинтонэ. Тӥни малы соос люкиськизы но быръёнъёсы нимаз-нимаз мынон сярысь решение кутӥзы. Аграрникъёс куризы на вал городысь музъемлы выт тыронэз будэтыны, коммунистъёс солы пумит луизы. НДР дурбасьтӥз аграрникъёс пала. Кун Думаысь депутат верамъя, нимаз крестьян хозяйствоос туэ гужем умой ужазы. Тужгес но висъясько Калининград область, Кубань. Ӟеч урожай басьтэмын, трос парсь вордо. - Гуртысь социальной ужпумъёс сярысь ке верано, фермер соосты огназ уз вормы. Тӥни малы данакез нош ик огазеяськыса ужало. НДР та амаллы пумит ӧвӧл. Аграрникъёслэн партизы но дурбасьтэ бадӟым комплексъёс пала, уката но пудо вордон удысын. Фермерлы туж секыт, сое нокин уг ваты. Огнад комбайн но басьтыны уд вормы, государство ласянь юрттэт ӧвӧл бере. Зэм, "Россельмаш" туэ нырысьсэ 10 ар куспын 12 комбайн милемлы висъяз, соос ваньмыз келямын Ростов областьысь фермеръёслы. Пумиськонэ люкаськемъёс В. Ф. Башмачниковлы вазиськизы пӧртэм юанъёсын: - Владимир Фёдорович, Россиысь фермеръёс куспын огъя кусыпъёс тупатэмын-а? - Жаляса верасько: ӧвӧл на. Нош кулэ вылэм. Тани туэ Дон котырын ю-няньзы туж удалтэмын, тӥляд - картофкады. Малы-о меда ог-огеныд воштӥськонтэм? Озьы ик мукет продукциен но. Азьланяз со сярысь одно ик малпаськыны кулэ. - Фермеръёслэсь ужамзэс кытын ке чаклало-пусъё-а? - Берло кык арзэ Санкт-Петербургын ортчылӥсь крестьянской ярмаркае быдэс Россия люкаське. Мон тодэмъя, Вятка но Волга палась фермеръёс татын умой кусып тупатӥзы. Удмуртиысь но кӧня ке крестьян хозяйство ветлӥз, продукцизэ возьматӥз. Ярмарка юрттэ ог-огеныд кусып возьыны, ӵош ужась эшъёс шедьтыны. - Тӥ туннэ но ӟечен пусйыны выриськоды Черномырдинлэсь НДР партизэ. Нош ми 10 ар ӵоже огинтыын сылӥськом, солэсь юрттэмзэ ӧм шӧдэ на... - Со понна мон янгыш карисько Президентэз гинэ: сётэм кылзэ ӧз быдэсты. Озьы ик фермер пала уз султэ Зюганов но, Лужков но. Малы-о ярмаркаез Санкт-Петербургын ортчытоно луиськом? Валэкто: столицалэн мэрез милемлы инты ӧз сёты. - Владимир Фёдорович, тӥ туж оскиськоды, фермеръёс странаез сюдозы шуыса, нош колхозъёс? - Коллективной хозяйстволы мон пумит ӧвӧл, со ӟеч ужа ке. Милям партимы - пӧртэм амал понна, кинлы кызьы кельше, озьы ик мед ужалоз, мед улоз-вылоз. Но солэн экономикаын огъя пайдаез мед шӧдӥськоз. Л. МЕДВЕДЕВА. Тазалык Врач эмъя, нош бурмытэ инкуазь Тазалыкез утён удысын берло дыре бадӟым инты басьтӥз рентгенология. Та амалэн адямиез эскерон юрттэ ӝог но вакчи дыр куспын созэ яке тазэ висёнэз шараяны, мугор люкетъёслэсь ужамзэс эскерыны. Пусйыны кулэ, рентген эскерон мугоре пытьы кельтэ. Но кышкытлыкез бадӟым ӧвӧл, угось ачиз инкуазь адямиез радиацилэсь уте. Тани витаминэн узыр сиён-юон адямилы радиоактивной сиосын но мукет мутагенъёсын нюръяськыны юрттэ, шуыны луоз. Та ласянь нырысь ик пусйыны кулэ улмолэсь, мяталэсь, вож перецлэсь но баклажанлэсь экстрактъёсты, бакча сиёнъёслэсь (кубисталэсь, редислэсь, сельдерейлэсь) сокъёсты. Антимутагенъёс пӧлы пыро витаминъёс но провитаминъёс. "В" группаысь витаминъёс гамма-облучениез лябӟыто. Соос тужгес но трос дрожжиын, петрушкаын, шпинатын, скал мусын. Кызьы лыдъяло специалистъёс, тыосын, нылкышно мӧляын, ку вылын пыктосъёс ӵемысь кылдо канцерогенъёсын сэрен. Соослы пумит пайдаё луо ретиноидъёс, мукет сямен вераса, "А" витамин. Со вань чорыг вӧйын, мусын, скал вӧйын, курег пузын, горд перецын, чырстурынын, пушнерын, ӵуж кушманын. Радионуклеидъёсты мугорысь поттон понна ӵектӥсько таӵе амалъёс: - лыслэсь сурет - кыз, пужым, ньылпу лысэз 5 бадӟым пуньы басьтоно но 0,5 литр вуэн сурано, 5 минут ӵоже быректоно но одӥг уйзэ шунытын пукетоно, юоно 2 нуналлы одӥг пол толэзь ӵоже; - улмо; - облепиха вӧй - юоно 1 чечы пуньыен нуналаз 3 пол толэзь ӵоже. Вӧйды ӧвӧл ке, лэсьтыны луэ ненег вайёслэсь но куаръёслэсь сурет; - грецкой мульы - емышъёссэ сиыса яке кӧмезлэсь суретэз юыса (20 мульылэсь кӧмъёссэ 0,5 литр вуэн сурано, 30 минут ӵоже быректоно но 3 час пукетоно), мугорысь пото радионуклидъёс, ртуть, узвесь, стронций; - чечы; - тӧдьысяськалэсь (ромашка аптечная) сурет - 2-3 бадӟым пуньы мында сяськаосты 8 час ӵоже пукетоно 2 стакан мында быректэм вуын но юоно (чечы ватсаны луоз) ӝыны стаканэн нуналаз 3-4 пол сиськемлэсь азьло; - прополис - тужгес пайдаё тулыс бичамез но тополь вылысь басьтэмез. Эмъяськонэ кутыны луэ чылкыт прополисэз (3-5 граммзэ кема сысконо но ньылоно), нуналаз 3-5 пол сиськемлэсь 1,5 - 2 час азьло; - узы - уже кутоно модоссэ но выжызэ. 3 бадӟым пуньы мында басьтыса, 1,5 - 2 час ӵоже 0,5 литр быректэм вуын пукетоно но юоно (чечы ватсаны луоз) 2/3 - 1 стакан суретэз нуналаз 3-4 пол сиськемлэсь азьло яке чай интыын. Л. КРЮКОВА, рентгенлаборант. Театр Котьмалэсь дуно узырлык Ма понна адями адямиез гажаны, яратыны кутске? Нырысь ик, адямилэн ӟечезлы тау карыса. Тодады ваелэ ай "Василиса Прекрасная" ӟуч калык выжыкылэз. Воргорон эбеклэн тусызлэсь ӧз кышка - кышнояськиз. Соин валче эбек туж чебер, ӟеч кышномурт луиз. Нош "Иднакар" театрлэн "Тури тылыос" выль спектакляз тури пӧрмиз кышномуртлы. Ӟуч-а, япон-а выжыкыл нырысь кылдӥз яке соос ӵош-а вордӥськизы - тодмо ӧвӧл. Валамон соиз: кыкез ик малпамын мудрон калыкен. Чебер яратон но сое утьыны быгатон сярысь та спектакль. Бен, бен. Утьыны быгатон - соиз тужгес секытэз. Котькыӵе пӧртэм калык пӧлын. Отын - чидан, ас малпанъёстэ мукетъёсыныз оградэ вуттон, котькыӵе гочатонъёслы пумит луыны быгатон. Та ласянь "Иднакарлэн" выль спектаклез туж ӟеч. Спектакль кутскон азьын сое пуктӥсь режиссёрлэн Ольга Александровалэн верамез но шонер. Ужлэн вылтусыз гинэ басьтэмын япон калыкысь, нош вераськон мынэ котькыӵе калыклэн огъя сюлмаськонъёсыз сярысь. Куанер Йохио быронлэсь уте пукыӵ ньӧлэн сӧсыртэм туриез. Тури нылкышнолы пӧрме, сое яратыны кутске но, соос кышноясько. Йохиолы тау карыса, нылкышно-тури, Цу, уйёсы аслаз тылыосызлэсь юн чебер дуно басма куэ. Со трос коньдон поттыны юрттэ. Коньдон поттон шудэз быдтэ но, Цу, нош ик тури луыса, Йохио дорысь лобӟе. Со - спектакльлэн шорсюлмыз. Та спектакль кужыммес эскерон луэ,- огкылысь шуизы режиссёр Ольга Александрова но дӥсь суредась Людмила Молчанова. Вераны кулэ: людмила Молчанова - история наукаосъя кандидат. Историен тунсыкъяськемез туж юрттэ, луоз, спектакльёслы дӥсь дасяны, интыяз ӧрзэ шедьтыны. Зэмзэ ик, Ольга Александрова уг кышка, ялан утча выльзэ. Выль ужлы быръемын япон драматурглэн Дзюндзи Киноситалэн одӥг действиен легендаез-выжыкылэз. Соин ик дӥсь но, гур но, сцена но солы луыса быръемын. Уже кутэмын япон калык гуръёс, япон композиторъёслэн гуръёссы. Соос юн тупало сцена вылын ортчись суредъёслы, соосты валаны юртто. Соос аспӧртэмлыко но пелез "вандӥсьтэмесь", выжыкыл мылкыд кылдыто, тужгес но - япон калыклэсь чай юонзэ, геройёслэсь мылкыдзэс возьматыку. Эскерон луэ, дыр, соиз но: спектаклез дасяны ӧтемын та ужен азьло вырымтэ адямиос - пуктӥсь-суредась Виталий Окунь, пуктӥсь-хореограф Елена Набель. Кыксылэн ик ужъёссы адскымон. Сайкыт, небыт буёлъёсын суредам кагаз висъетъёс (ширмаос), соос азьын - япон манерен лэсьтэм горд буёло тубат но арка. Сыӵе суредо интыын ортче геройёслэн вакчи улонзы: яратонзы, керетонзы, люкиськонзы. Дыртытэк, каллен, огыр- бугыр вырытэк, кесяськытэк, трос вераськытэк. Кылъёс интые кутэмын пластика, мылкыдэз киосын, пыдъёсын, йырын возьматон. Со тужгес секыт йӧтӥз, луоз, шудӥсьёслы Ольга Ганевалы (Цу), Игорь Люкинлы (Йохио), Маргарита Кожевниковалы (Содо), Пётр Денисовлы (Ундау). Спектакльлы чебер тус кылдытӥз Ольга Ганева: ненег, картсэ яратӥсь, сямъёсты чаклась, ужась. Со дӥсьсэ трос пол вошъяно луиз: япон дӥсез воштылӥз тылобурдо дӥсь. Соиз но, таиз но туж ӟеч, чебер лэсьтэмын. Цулэсь туссэ возьматон но усьтон понна кутэмын вужер-театр. Векчи висъет-катанчи пыр адӟиське турилэн лобемез, сое пукыӵ ньӧллэн сӧсыртэмез, Йохиолэн сое утемез, солэн нылкышно луэмез. Ольга Ганева но Игорь Люкин огзылы огзы юрттыса шудӥзы (озьы ик кулэ но, дыр). Актриса тури-кышномуртсэ котькуд ласянь возьматыны тыршиз ке, актёр ӧжытак огпӧртэмгес вал: солы ужано на героезлэсь сямзэ узырмытон ласянь. Тунсыко суредъёс кылдытӥзы Маргарита Кожевникова но Пётр Денисов. Соос возьматӥзы вузкарисьёсты - Содоез но Ундауэз. Соослэн ужзы, туссы, сямъёссы вераськоназы пыӵамын. Манеръёсынызы но туж пӧртэмесь Цулэсь но Йохиолэсь. Соослэн сюлмаськонзы - коньдон. Со понна Содо но Ундау узатонлэсь но кер уг пото. Куанер улэм но улонэз адӟымтэ, сое валаны дышымтэ Йохиоэз коньдонэн гочато. Кышноед тури тылыослэсь басма куиз ке, узырмод, столицае мыныны быгатод, котьмае адӟод, шуизы. Йохио соосын огкылысь луэ. Яратонзэ коньдонэн воштыны уг пумитъяськы. Тӥни озьы, коньдон та спектакльын адскисьтэм герой луэ. Со яратонэз но быдтыны юрттэ, улонысь умоезлы, ӟечезлы, адями кусыпъёсты куашкатонлы пумит султэ. Солэн аслаз ляльчиосыз вань - вузкарисьёс. Спектакльын соос асьсэды умой возьмато: кескичесь, кылзы лэчыт, шумпотыкузы серекъяло но экто. Соосты улон сыӵе кариз. Одӥг люкетэн, яркыт буёлъёсын но мултэс кесяськисьтэм "Тури тылыос" спектакльын пуктӥсез Ольга Александрова но, артистъёс но, дӥсь, чай юон котыр, сцена вылын катанчиос но мукет арбериос лэсьтӥсьёс - ваньзы учкисьёслы огкылысь вераны тыршо: коньдон - кулэ маке, но дунне вылын, калыкъёс пӧлын вань на котьмалэсь но дуно узырлык - яратон, сое утён, мукетыз понна улондэ сётон. Со капчи ӧвӧл. Солы дышетсконо. Япон улонысь пичи суред вылын, отысь гуръёсты но буёлъёсты, сямъёсты, манеръёсты кутыса, учкисьёсты спектакль малпаськыны косэ, улонысь сайкытсэ, ӟечсэ адӟыны юрттэ. Милитина ГАВРИЛОВА. Шӧкыч Туэ шаерамы "кыкетӥ нянез" утялтон трос интыосын ӝегаз. Вылаз ик, кутскиз на "Трактор" операция... Газетъёсысь. Инспекторъёс: - Ма кароно, начальник, тракторзы ӵындэ, нокыӵе куронъёслы уг тупа ук. - Озьы ик гожты: тракторъёсты кысоно, бусы ужъёсты дугдытоно! Суредэз Л. ПРОЗОРОВЛЭН. Анекдотъёс Доктор доры пырем мурт юа: - Мар мыным кароно, доктор? Гуртэ бертӥсько - кышное дорын палэнысь воргорон. Мон ӵаш поттыны гинэ ӧдъясько, кышное шуэ: "Мын кухняе, кофе ю, буйгатскы". Озьы нуналлы быдэ. Доктор пайме но пельпумъёссэ выретэ: - Нош мынэсьтым мар кулэ тӥледлы? - Мынам тодэме гинэ потэ, укыр мултэс кофе уг юиськы меда? *** - Доктор, мынам паллян пыды висе, - ӝожтӥське больницае вуттэм адями. Врач солэсь пыдзэ учке но, умойтэмзэ адӟытэк, буйгатыса шуэ: - Номыр сыӵе-таӵеез ӧвӧл. - Озьы шат? Ну, соку, иське, бурыз пыды висе. *** - Тӥ мон дорын вал ни кадь, озьы-а? - висисьлэсь юа врач. - Кызьы тӥляд фамилиды? - Семенов. - Плеврит. - Ӧвӧл, Андрей. *** СПИД висёнэз эскеронъя-тодонъя пунктысь потэ егит воргорон. Справказэ лыдӟе но бӧрдыны кутске: - Быри, мынам СПИД. Потэ мукетыз, таиз но бӧрдэ: - Ваньмызлы пум вуиз, мынам СПИД. Потэ куинетӥез, шумпотэ, справказэ чупа: - Ура! Мынам сифилис! Тазалык Висемлы быдэ уд кулы Дунне вылын кӧня адями, сомында ик висён, дыр. Кӧня даур ини выро визьмо адямиос кышкыт черъёсты вормыны. Огзэ зӥбломыто гинэ, мукетыз аля - со Инкуазьлэн законэз. Зэм, пыэдлы, йыр висемлы, радикулитлы адями кемалась дышиз ини - висён шуак кутыку уг куалекты. Но поръя котыртӥмы шимес но ӝабырес висён - рак. Та кылэз кылыса ик адями юзырак луэ, "сяласькыны" кутске. Висён татчыозь вормымтэ на уго. Висись муртлы таӵе диагноз пукто ке, со кулыны дасяське, тодмоосыз, эшъёсыз но, ӟеч кужым но оскон пыӵатыны тыршем интые, жаляса учко, лулӟыло. - Рак, веранэз ӧвӧл, - лек но кышкыт висён,- шуэ республикаысьтымы онкодиспансерысь валтӥсь врачлэн воштӥсез Галина Ивановна Чиркова.- Но со вормонтэм ӧвӧл. Но висён вазь шараямын луыны кулэ - адями висемзэ, маке умойтэмзэ шӧдэмез бере ик врачлы вазиськысал ке, кулон учыръёс трослы кулэсмысалзы. Асьмелэн кызьы луэ? Адями мугтэк ӟырда, нош со ужан висказ аспирин ньылэ но нош бызьыса кошке, яке кӧня ке аръёс ӵоже уг синйылты ымдурысьтыз (!) шӧдскымон пыктосэз. Шуо ук, вазь-а, бер-а, но пыктос выльысь выжыоссэ лэзе. - Бер ке эмъян борды кутскемын, лэзе. Соку гинэ кылдыкуз ке - уг ни. Ма, мынам кызь ар талэсь азьло эмъям адямиос туннэ но уло ай! Тани ньыль-витьсэ нимъёссыя ик тодӥсько на. ... Пелагея Тимофеевна Коробейниковалы 1-тӥ октябре 84 арес тырмиз. Нош кыӵе сэзь ай! Дораз пумиськыны шуыса ветлыкум, со сокугес гинэ больницаысь вуэм вылэм - сэппуйыез куд-ог дыръя кутылэ, но мылкыдыз урод ӧй вал. Ма, ымнырызъя но сомында арес уд сёты ай: чылкыт, кышетэз ӝик-ӝик керттэмын. Шораз учкыса уд но малпа, кызьы куинь ар талэсь азьвыл та кышномуртлэн рак вал шуыса. - Э-э, ма мон сое вунэтӥськем вылэм ини. Врачъёс умоесь вал, бурмытӥзы, тау соослы. Висёнлэсь кутскемзэ Пелагея Тимофеевна ӧз ик шӧдылы. Пенсие потытозяз фермаын скал кыскиз, война дыръя пась кутэн тэль кораз, огназ куинь нылпизэ ӝутӥз - висьылэмез ӧй вал, нош табере тани... Пересь муртлэн шуак нылдырыз берытскиз - толэзьлы быдэ огвакытэгес вир воштонэз кутскылӥз. Нырысь куалектӥз кадь - мар ишан та? Нылызлы вераз, нош соиз серекъяз гинэ: шумпоты, пиналмиськод, эсьма, выльысь бызьытом ай ми тонэ. Серекъян серекъянэн, умойлы уз луы ук та шуыса, Пелегея Тимофеевна кышномурт врач доры мынӥз. Соиз соку ик онкодиспансере келяз. Отын эскеремзы бере ватытэк ваньзэ веразы: али ик операция лэсьтӥськом ке, оскон вань пыктосэз выжыеныз быдтыны. Соглаш луэмзэ юазы. Сазьтӥськемез бере Пелагея Тимофеевна малпаз: ну, табере эшшо тамында уло на. Нуныкарзэ быдэсак вандыса басьтэмысьтызы со туж ӧз куректы, пинал вакыт ортчемын ук. Со понна, зэмзэ но, тани кызь арлэсь кема чырткем улэ ни. Азьло арлы огпол эскериськыны ӧтчаллязы - висёнэзлэсь бервылзэ ӧз шедьтэ. - Соку куалектысал-кышкасал ке, табере мынам лыосы но сисьмемын луысалзы ни,- шуэ Пелагея Тимофеевна.- Али, зэм, секытгес - эмъяськон дунын луиз, но висись муртъёс мед ик шедьтысалзы луонлык асьсэды утьыны. Оске, кызь арлэсь кемалы улондэ кузятон - одӥг-кык сюрс манетлэсь трослы дуногес сылэ. З. РЯБИНИНА. Вормизы удмуртъёс Туэ пӧсьтолэзе Финляндиысь Рааккула городын ортчиз финн-угор кырӟанлы сӥзем дасэтӥез фестиваль. Дасязы но радъязы сое тодосчиос кузпалъёс Лидия но Сеппо Мустоненъёс. Таӵе бадӟым ужрадэ люкаськылӥзы пӧртэм кунъёсысь кырӟасьёс. Удмурт лулчеберлык удысысь валтӥсь Лидия Орехова сюлмаськемен, вынлыко музъем вылэ вуылӥзы удмуртъёс но. Пичи Пурга ёросысь Бобья-Уча гуртысь Екатерина Антоновалэн "Арганчи" ансамбльысьтыз апайёс та фестивальын басьтӥзы нырысетӥ инты. Устолыкез дунъясьёслы тужгес яраллям соослэн сюанлы-бӧрысьлы сӥзем йылолъёссы. Е. РОМАШОВА. Котыраз - котырес лыдпусъёс Утчаське, бызьылэ, Весь маке но шедьтэ, бугыръя. Ветлонъяз со кемдэ Чечыен чай шоры куддыръя. Куинь книга ни гожтӥз (Зэм, бабе на огез, кинлэн ке уксёез ӧвӧлэн). Кытчы ке лёгиськиз - Со бӧрсьы турын-куар но ӝужа сӥзьылэн. Зэм, кӧня геройёс Та дуно адями тыршемен усьтэмын. Вань улос вералоз: Со милям данъямон гожъясьмы. Зэм ик но, паймымон адями Виктор Петрович. Лыдпусъёс пӧлы выйыса, соосын пӧртма, кожалод. Котькуд нунал - солэн (яке странамылэн улоназ) кыӵе ке но котырес лыдпус. Шуом, ньыльдон ар талэсь азьвыл со кутскиз дышетон уж борды. Куамын вить ар талэсь азьло утчаны ӧдъяз Карелиез Брест крепостез утись аспал ожгарчиосмес - утчаз но шедьтӥз Игра ёросысь Дмитрий Корепановез но Николай Никитинэз, Як.-Бодьяысь Николай Широбоковез но Ижевскысь Фёдор Версальскиез. Со могатэк вераны быгатоз, кыӵе арын но кыӵе нуналэ пумиськылӥз Георгий Жуковлэн 20-тӥ аръёсы ординареценыз, бӧрысь 357 номеро стрелковой дивизилэн командиреныз Александр Кроник генералэн, Филипп Голиков маршалэн, Василий Янковский генералэн, Георгий Томиловский полковникен, Исаак Минц академикен... Лыдӟисьёс гожъямезъя тодо: В.П. Поздеев пумиськылӥз Нырысетӥ мировой войнае ветлэм, Парижез утёнэ пыриськем Никифор Филипповен но. Нош куамын ар талэсь азьло... 1969-тӥ ар Виктор Петрович понна тужгес вунонтэмез. Шудоез но, дыр. Олокӧня пӧртэм учыръёс луизы та аре. Тазьы тодаз вае: - Огпол кезьыт тулыспалэ ӵукна запасысь офицеръёсыз люказы школа-интернатэ. Ӧс дорысен пумитай Семён Самсоновез но Пётр Поздеевез. Залэ пыреммы бере, милемыз адӟыса, Ленинской райвоенкоматлэн военкомез подполковник Иван Тимофеевич Кушнаренко пальпотыса вазиз: "Тани Ленин ёрослэн писателез но вуиз." Семён Александрович серектӥз. Нош военком шуэ: "А малы серекъяськоды? Со милям писательмы, книгаос гожъя." Со дырысен Семён Самсонов но, мукетъёсыз но монэ озьы ниманы ӧдъязы. Та аре, 5-тӥ куартолэзе, мыным зэмен но сётӥзы СССР-ысь журналистлэсь горд выло удостоверенизэ. Со аре гужем В.П. Поздеев лекциос лыдӟиз Карелиысь Медвежьегорск ёросын (но соку ӧз тоды на, татӥын Куӟебай Герд ватэмын шуыса), нош сӥзьыл премия чотын шутэтскиз Геленджикысь "Сосновая роща" пансионатын. Та вунонтэм аре ик Виктор Петрович басьтӥз Урал военной округлэн командующиезлэсь Данъян грамотазэ. Нош Выль ар азьын сое военкоматэ ӧтизы но старшой лейтенант (запасысь) звание сётӥзы. Жадисьтэм следопыт но турист Виктор Петрович вуылӥз Новороссийск дорысь Пичи музъем вылэ, Одессаысь катакомбаосы, Бородино бусые, Калининградэ (азьвыл Кенигсберг), Самаркандэ но Батумие, Архангельске но Астрахане... 1964-тӥ арысен ини со удмурт музъемез но котыръя. Уно материал люказ Удмуртиын кылдытэм 313, 97, 192, 208 номеро стрелковой дивизиосын ожмаськемъёс сярысь. Тодмотэм солдатъёсыз со вунонтэм кариз "Они защищали Брестскую крепость" но "По следам подвига" книгаосаз. Дасямын ни "По местам боевой славы" книгаез. Ачиз верамъя, татысь 28 геройёсыз пӧлысь 20-ез удмуртъёс. Улэп кылем на 10-эз гинэ. Дышетӥсь-историк, шаерчи, Россиысь калыкез дышетон удысысь отличник та нуналъёсы пуйиз 65 арес тырмонзэ. Пусйиз огшоры гинэ - ӟеч ужъёсыныз. Тросэз сое тодо, но уг адӟо. Таӵе Адямиез ӝутоз ини ачиз Вакыт. Т. Петрова. Кандидатъёс тодмоесь Сентябрь толэзьлэн пумаз Москваын "Отечество - вся Россия" блоклэн конференциез ортчиз. Отын одӥг мандатэн окрутгъя Кун Думае депутатэ кандидатъёс юнматэмын. Конференцилэн решениезъя, АПР-лэн азьветлӥсез М. Лапшин депутатэ кандидат луыса быръёнъёсы пыриськоз Алтай Республикаын, О. Морозов - Татарстанын, Россиысь Социалистической калык партилэн кивалтӥсез М. Шаккум - Москва улосын, Россия Федерацилэн азьвыл генеральной прокурорез В. Степанков - Пермь улосын. Ненец автономной округе мыноз А. Чилингаров, Ачинской автономной округе - И. Кобзон. Москваын ӵектэмын луозы Таможняя кун комитетлэн азьвыл кивалтӥсез В. Драганов, "Отечество - Вся Россия" блоклэн быръёнъя штабезлэн начальникез Г. Боос, Кун Думаысь бюджетъя комиссилэн тӧроез А. Жуков, "Курчатовский институт" научной центрлэн президентэз Е. Велихов, ФСБ-лэн азьвыл кивалтӥсез Н. Королёв. Конференцие люкаськемъёс Россия Федерациысь Федерацияя Кенешлэн членъёсызлэн зэмлыко но эрико быръёнъёс понна вазиськонзы пумысен заявление кутӥзы. "Отечество" огазеяськонлэн Удмурт люкетэзлэн пресс-службаез. ГЕОРИЙ АРХИПОВЛЭН ВОРДСКЕМЕЗ ДЫРЫСЕН 70 АР Кык даур нокин уг ул та дуннеын Ӵужмуртэным Фома Гаврилович Овчинниковен одӥг группаын дышетским, УГПИ-лэн удмурт кылъя но литературая факультетаз. Соин-а, мар-а ӵем гинэ вуылӥсько вал пиослэн улон интыязы. Огазьын уло вал Георгий Архипов, Семён Перевощиков, Лёня Караваев но Фома Овчинников. Мон соос доры пырисько ке, эшъёсыз Гераез кырси шуыса исаны кутско. - Я тырмоз ни, а то дыдылэн йырыз кур луоз, - озьы вераса дугдыто вал исаськисьёссэ. Нош мон, валамтэ улэ кариськыса, пелям ик ӧй понылы таӵе вераськемзэс. Огшап пукон сямен Гералэн чаез но быректэ вал ини: "Дыды, лимонной эссенциен чай юод-а?.." Тӥни озьы, пиослэн улон интыязы чай но юыса пукон дыръёс вал... Мыным соос доры ветлыны кельшылӥз: соос уго, нылъёс сямен, дӥськут, чеберъяськон сярысь супыльтыса уг пуко. Верасько литература, история сярысь. Куинез соос пӧлысь мылысь-кыдысь гожъяло вал ини кылбуръёс. Гожто но лыдӟо шара, дунъет сёто. Мынэсьтым но мылкыдме юало. Мыным со инёк (мылкыд) луэ вал ини, огшоры лыдӟисьлэсь но дунъетсэ возьмало бере. Маин висъяське вал Георгий Архипов эшъёсызлэсь? Нырысь ик, аслаз сабыр, востэм сямыныз. Малпаськытэк одӥг кылзэ но уз вера, конспектъёссэ но лач-лач, радызъя гинэ гожъя, соин-а, мар-а эшёсызлэсь бере кыльыса но книгаен пукылӥз. Нош тужгес но ваньмес ик паймытэ вал соин: пичильтык басьтэм гонорареныз яке стипендия уксёеныз одно ик газетлы гожтӥське, книгаос октэ. Инты тырмымтэен, валес но миндэр улъёсаз тыре. Книгаоссэ лыдӟыны сётылэ осконо муртъёсызлы. Мон но трос пол курылӥ. Одӥг пол юмоке но сюри: книга вылаз чернила кисьтӥськиз. Туж возьдаськыса берыктӥ... - Ярам ни, вожме уг потты тыныд, юри ӧд сапта ук, - шуиз, книгазэ маялляса. Мынам сюлмы уллань васькиз. Праздникен яке вордӥськем нуналэн ӟечкыласа, Георгий Архипович кузьма вал яке фотозэ, яке книга. Альбомам вань туж чебересь туспуктэмъёсыз (одӥгзэ тӥ адӟиськоды та газетысь). Тани азям ӝӧк вылын Г. Архиповлэн кузьмам книгаез - Евг. Долматовский "Слово о завтрашнем дне", кылбуръёсын книга. Гера ас киыныз тазьы гожтэ: "Люся! Тынад 19 арес тырмон нуналад мынам тыныд одӥг гинэ мылкыд каронэ, луы огшоры гинэ зэмос адями, нош сюлэмын зарни сюлэмъем, кыӵе тон вань али. Мыным туннэ 22-ез шуккиз ини... Гажаса: Гера. 25.5.51 ар. П.С. Мынэсьтым сюлэмме но тыныд мылкыд каронъёсме лыдӟы та книгаысь. - Будущее впереди, в Завтрашнем дне. Архипов." Кылбур чуръёслэн урдэскытӥзы тросэтӥ куинь турлы гожен пусъемын. Тани куд-огез: Но когда сумеет молодость Предъявить свои права, Ни к чему ей будет золото, Ни к чему и кружева. ................ Было пустовато и опрятно. Никаких запасов не имея, Двое жили весело и дружно. То была не бедность - просто юность, Для которой лишнего не нужно. ................ Я светлую девушку вижу. Стоит она возле стола. Она и красивей, и выше, Чем осенью прошлой была. Наверное, скоро зачеты - Раскрытые книги лежат - Иль шелестом позолоты Ей спать не дает листопад. Та чуръёсыз лыдӟыса, син азе пуксе ачиз Архипов: чылкыт сюлэмъем, ас шуд дыдыкез доры кыстӥськись... Чакласькыса гинэ вераське вал, нокинэ но вӧсь карыны медаз шедьты шуыса. Нош ассэ лук-лак карисьёс ӧжыт ӧй вал кадь. Куд-ог егит эшъёсызлы юрттылӥз, маин быгатӥз. Нош таосыз сое котьку ик уг валало вал, серем улсы берыктылӥзы. Тартуын дышетскыкуз, мынам пиосылы дэрем кузьым но лэзьяз. Кӧтсэ ӝож кариськем, кузьымез понна коньдон сётыса. Отын дышетскыкуз ик милемыз куно кариз шоколад вӧйын. Ми со вакыт, веръям гинэ ӧвӧл, ум но тодӥське вал, сыӵе вӧй вань шуыса. Кытын гинэ ӧз улы, кытын гинэ ӧз ужа Георгий Архипович, сюлэм висёнэз вал удмуртлык, удмурт культура, литература. Но солы та уж секытэн сётӥськиз, малы ке шуоно, юрттӥсез но валасез ӧжыт вал. Националист шуыса пыкылӥзы но. 1953-тӥ арын 26 егит пиос но нылъёс быдтӥмы пединститутэз, луимы кылъя но литературая дышетӥсьёс. Кыӵе бадӟым шумпотон вал со милемлы, война аръёсы будэм но дышетскем пиналъёслы. Тросэз ми улӥмы стипендия чотын гинэ. Соин но, дыр, туж тыршыса дышетскимы, одно ик стипендия басьтон вылысь. Тодон-валан люкан мылкыдмы но туж бадӟым вал. Со аръёсы дышетскем муртлэн сӥез но, данэз но вылын - сое ми умой тодӥмы. Туннэ Г. А. Архиповлы 70 арес тырмысал, но тазалыкез лябӟемен, та юбилейзэ пумитаны солы ӧз кылды ни. Но кылизы солэн кылбур чуръёсыз но научной ужъёсыз, дышетэм нылпиосыз. Сузэрезлэн пиез Борис Боталов азьланьтэ солэсь наука удыссэ. Нош ми, ӵош дышетскем эшъёсыз, умоен гинэ тодамы ваиськом общежитиын улэм аръёсмес, удмурт факультетлэн хораз кырӟаммес. Син азямы пуктӥськом чиедгес но ӝужыт мугорзэ, лякыт тусбуйзэ. Ум вунэтӥське котькинлы юрттыны дась луэмзэ. Людмила ПОСАДОВА (ВЕКШИНА). Алнаш черкогурт. Маин шумпоттозы театръёс? Операя но балетъя кун театр 8-тӥ октябре нырысьсэ возьматоз "Собор Парижской богоматери" балетэз. В. Г. Короленко нимо драмая ӟуч театр 15-тӥ-17-тӥ октябре сезонзэ усьтэ премьераен - В. Ольманскийлэн "Хапун" комедиеныз. Мунё театр 16-тӥ октябре пинал учкисьёссэ ӧте "Огниво" выжыкылэ - премьерае. Сарапулысь драмая театр 29-тӥ октябре пуктыны дася Шекспиръя "Двенадцатая ночь" спектакльзэ. Егитъёслэн "Молодой человек" театрзы та нуналэ ик возьматоз "Навсегда, навсегда" постановказэ. Глазовысь "Парафраз" театр дасяз "Ботинки на толстой подошве" выль ужзэ. Нош Удмурт кун национальной театр ӧсъёссэ усьтоз шуркынмонлэн 4-тӥ нуналаз. Возьматозы Е. Загребинлэн Куӟебай Гердлы сӥзем "Кикы силе но силе" пьесаезъя выль спектакль. Т. НИКОЛАЕВА. Удмурт Элькунысь Правительство Удмурт Элькун Кивалтэтлэсь но Удмурт Элькунысь Наукая но инженеръёслэн мер огазеяськонъёссылэсь М.Т. Калашников нимо пре-мизэс сётон сярысь ПОСТАНОВЛЕНИЕ Удмурт Элькун Кивалтэт пуктэ: 1. Умоен лыдъяно Удмурт Элькунысь Наукая но инженеръёслэн мер огазеяськонъёссылэсь М.Т.Калашниковлэн вордскем нуналэныз валче кык арлы одӥг пол сётӥськись таӵеесь куинь премиос сярысь ӵектонзэс: - нырысетӥ премия - элькун бюджетысь коньдон чотын 240 ичи уждун быдӟа; - кык премиос - Удмурт Элькунысь Наукая но инженеръёслэн мер огазеяськонъёссылэн коньдонзы чотын быдэн 120 ичи уждун быдӟа. 2. Юнматоно М.Т.Калашников нимо премияя конкурс сярысь Положениез. 3. Удмурт Элькун Кивалтэтысь премиосъя Кенешез косоно ӵектэм ужъёсты эскеронэз радъяны но М.Т.Калашников нимо премиосъя дэмланъёсты Удмурт Элькун Кивалтэтэ учкыны сётыны. 4. Удмурт Элькунысь Коньдонъя министерстволы лыдэ басьтоно М.Т.Калашников нимо премиос тырыны чаклам коньдонэз. 5. Та постановлениез печатлано "Удмуртская правда", "Удмурт дунне" но "Известия Удмуртской Республики" газетъёсын. Удмурт Элькун Кивалтэтлэн Тороез Н. А. Ганза. Та Положениея: - М.Т. Калашников нимо премия сярысь ӵектон кутэмын 1999 арын Удмурт Элькун Кивалтэтлэн но Удмурт Элькунысь Наукая но инженеръёслэн мер огазеяськонъёссылэн огъя постановлениенызы; премия сётӥське Удмурт Элькунын улӥсь тодосчиослы, рабочийёслы, инженерно-технической ужасьёслы, кинъёслэн дасям-быдэстэм ужъёссы юртто, вооружение удысын сяна, мукет удысъёсын но наукаез, техникаез азинтыны; - та конкурсэ ӵектэмын луыны быгато печатласа поттэм но производствое пыӵатыса вуэм ужъёс, кудъёсыз быдэстэмын кызьы ке одӥг авторен, озьы ик авторъёслэн коллективенызы (ятырзэ 5 адями); М.Т.Калашников нимо премияя кандидатъёсты ӵектыны быгато научно- исследовательской, промышленной но наукая организациос, дышетон заведениос, тодосчиослэн, инженерно-технической ужасьёслэн но изобретательёслэн мер огазеяськонъёссы ; - ӵектэм кандидатъёс пумысен комиссие ыстоно: изобретениослы патентъёслэсь (авторской свидетельствоослэсь) ко- пиоссэс; темая печатлам ужъёсты; изобретениосты уже пыӵатэм сярысь актъёсты; премилы ӵектэм муртлэн фамилиез, нимыз, атай нимыз, учёной степенез, званиез, ужан интыез, кин луыса ужамез, телефонъёсыз, улон интыез сярысь ивортонъёсты; наукая организациослэсь, дышетон учреждениослэсь яке промышленной предприятиослэсь, нимаз тодосчиослэсь но валтйсь специа-листъёслэсь ӵектэм ужъёс пумысен аннотациоссэс но дунъетъёссэс (ичизэ куинь); - материалъёсты ыстоно одӥг экземплярен, соос авторъёслы уг бе- рыктӥсько ни; - конкурсэ ужъёс кутӥсько М.Т.Калашников нимо премияя конкурс ялон арын 1-тӥ октябрёзь; - конкурсэ ыстэм ужъёсты кутон дыр ортчем бере, коллективъёсын но нимаз адямиосын список но Удмурт Элькун Кивалтэтлэн премиосты сётон сярысь постановлениез печатласько "Удмуртская правда", "Удмурт дунне" но "Известия Удмуртской Республики" газетъёсын. 1999 арын 13 сентябре Н 877 Ижевск город 1995 арын 22 ноябре кутэм "Этил спирт, аракы но спирт продукция потто-нэз но вузан-басьтонэз кун ласянь чакласа возён сярысь" 171-ФЗ номеро Федеральной законэз улонэ пычатонъя ужрадъёс сярысь (1999 арын 7 январе кутэм 18-ФЗ номеро Федеральной законын гожтэмъя) Удмурт Элькунысь Правительстволэн ПОСТАНОВЛЕНИЕЗ 1995 арын 22 ноябре кутэм "Этил спирт, аракы но спирт продукция поттонэз но вузан- басьтонэз кун ласянь чакласа возён сярысь" 171 -ФЗ номеро постановлениез (1999 арын 7 январе кутэм 18-ФЗ номеро Федеральной законын гожтэмъя) лыдэ басьтыса, Удмурт Элькун Кивалтэт пуктэ: 1. Юнматоно Удмурт Элькун улосвылын аракыез розницае вузаны лицензия сётъянъя Радлыкез. 2. Удмурт Элькун улосвылын аракыез розницае вузаны лицензия сётъянъя но этил спирт, аракы но спирт продукция поттыны но вузаны-басьтыны лицензия сётъянъя юнматэм ёзлэсь ужъёссэ быдэсъяны осконо Удмурт Элькунысь Вузкаронъя но бытовой юрттэт сётонъя министерстволы. 3. Удмурт Элькунысь Вузкаронъя но бытовой юрттэт сётонъя министерстволэсь аппаратсэ, та удысын юрттэт сётон бордын ужасьёсты (обслуживающий персонал) вератэк, самой троссэ 35 единица юнматоно, аппаратэз 2 единицалы будэтыса, уждунлы арлы фондэз 49 сюрс манет но обслуживающей персоналлэсь лыдзэ 1 единицалы будэтыса, уждунлы арлы фондэз 13 сюрс манет тупатоно. 4. Удмурт Элькунысь Коньдонъя министерство ватсаса тыроно коньдонэз висъяны кулэ аракыез розницае вузаны лицензия сётъяса поттэм коньдон чотын люкаськем уксёысь, юнматэм сметаез лыдэ басьтыса. 5. Та постановлениез печатлам дырысен толэзь куспьн интыысь аскивалтонъя ёзъёс аракыез розницае вузаны лицензия сётъянъя Удмурт Элькун Кивалтэтэн юнматэм ёзлы сётыны кулэ 1998 - 1999 аръёсы уже кутӥськись, ужамысь дугдэм но ужысь палэнтэм лицензиослэсь переченьзэс. 6. Аракыез розницае вузаны азьлогес тупатэм радлыкъя сётъям лицензиос уже кутӥсько, отын пусъем дырзы бырытозь. 7. Кужымзэс ыштэмен лыдъяно: Удмурт Элькун Кивалтэтлэн 1992 арын 21 декабре кутэм "Басьяськисьёслэсь правооссэс утёнъя но спекуляциез дырыз дыръя палэнтонъя ужрадъёс кутон сярысь" 466 номеро постановлениезлэсь аракыез вузаны лицензия сётъянъя люкетсэ; Удмурт Элькун Кивалтэтлэсь 1995 арын 4 августэ кутэм "Аракыез суменак (оптовой) вузаны лицензия сётъян сярысь" 153 номеро постановленизэ; Удмурт Элькун Кивалтэтлэсь 1996 арын 1 апреле кутэм "Этил спирт но аракы поттонэз но вузан-басьтонэз кун ласянь чакласа возён сярысь" Федеральной законэз улонэ пычатонъя ужрадъёс кутон сярысь" 199 номеро постановленизэ; Удмурт Элькун Кивалтэтлэсь 1996 арын 28 июне кутэм "Этил спирт но аракы поттонэз но вузан-басьтонэз ивортонъя Радлыкез юнматон сярысь" 460 номеро постановленизэ; Удмурт Элькун Кивалтэтлэн 1996 арын 9 декабре кутэм "Удмурт Элькун улосвылын аракыез розницае вузаны лицензия сётъян сярысь" 856 номеро постановлениезлэсь 1-тӥ но 2-тӥ пунктъёссэ; Удмурт Элькун Кивалтэтлэн 1997 арын 3 мартэ кутэм "Удмурт Элькун улосвылын аракы поттонэз но вузан-басьтонэз кун ласянь чакласа возён сярысь" 220 номеро постановлениезлэсь 2-тӥ пунктсэ; Удмурт Элькун Кивалтэтлэсь 1997 арын 12 мае кутэм "Удмурт Элькун Кивалтэтлэн 1996 арын 1 апреле кутэм "Этил спирт но аракы поттонэз но вузан-басьтонэз кун ласянь чакласа возён сярысь" Федеральной законэз улонэ пыӵатонъя ужрадъёс сярысь" 199 номеро постановленияз воштонъёс но ватсанъёс пыртон сярысь" 477 номеро постановленизэ; Удмурт Элькун Кивалтэтлэн 1998 арын 20 июле кутэм "Удмурт Элькун Кивалтэтлэн 1996 арын 1 апреле кутэм "Этил спирт но аракы поттонэз но вузан-басьтонэз кун ласянь чакласа возён сярысь" Федеральной законэз улонэ пыӵатонъя ужрадъёс сярысь" 199 номеро постановленияз воштонъёс но ватсанъёс пыртон сярысь" 645 номеро постановлениезлэсь 1-тӥ, 2-тӥ, 3-тӥ пунктъёссэ; Удмурт Элькун Кивалтэтлэн 1999 арын 22 феврале кутэм "Куд-ог ужъёслы лицензиос сётъям понна коньдон басьтон сярысь" 198 номеро постановлениезлэсь 1-тӥ пунктсэ. 8. Та постановление кужыме пыре сое иворъёсты вӧлмытон ёзъёсын печатлам дырысен. Удмурт Элькун Кивалтэтлэн Тӧроез Н. А. Ганза. 1999 арын 20 сентябре, Н 906 Ижевск город Удмурт Республикаысь Кун Кенешлэн Президиумезлэн Удмурт Республикаысь Кун Кенешлэсь ньылетӥ (азьвыл чакламтэ) сессизэ люкан сярысь Постановлениез Удмурт Республикаысь Кун Кенешлэн президиумез пуктэ: Удмурт Республикаысь Кун Кенешлэсь ньылетӥ (азьвыл чакламтэ) сессизэ люкано 1999- тӥ арын 16-тӥ сентябре Ижевск городын. Удмурт Республикаысь Кун Кенешлэн Тӧроез А. А. ВОЛКОВ. Ижевск город, 1999-тӥ арын 23-тӥ августэ, � 48-П. Сессиын эскерыны чакламын "Быръёнъя 29-тӥ Ижевск округъя но быръёнъя 30-тӥ Удмуртской округъя Россия Федерациысь Федеральной Собранилэн Кун Думаяз депутатъёсты быръёнъя окружной комиссиослэсь членъёссэс юнматон сярысь" ужпум. Ческыт мед кошкоз! Асьме калык вашкала дыръя сиён дася вал чылкыт бакча будосъёслэсь но сӥльлэсь, йӧллэсь. Сое пӧзьтылӥз-пыжылӥз сюйлэсь но кирпичлэсь лэсьтэм гурын, чугун но сюй посудае поныса. Озьы сиён туж ческыт но пайдаё пӧрмылӥз. Со сяна, вылӥ ӟечлыко луэ вал. Городын улӥсьёс сыӵе сиён сярысь али тодазы гинэ ваё на, нош кудӥзлэн сыӵе пӧрамез веръямез но ӧвӧл. Плита вылын, духовкаын огшоры лавкаысь басьтэм тусьты- пуньыен дасям сиёнлэн ӟечлыкез зол быре. Таӵе югдурез кемаласьгес валазы ини кунгож сьӧрын. Отын, кылсярысь, Германиын, сиён-юон дасяло хромлэсь, никельлэсь но чылкыт анданлэсь лэсьтэм посудаын. Отын будослэн, сӥльлэн но мукет сиёнлэн ӟечлыксы пӧзьтыку чик уг быры, со уката ческыт луэ, витаминъёсыз но чик уг быро. Кык-куинь ар талэсь азьло сыӵе посудаез асьме доры вайылӥз Германиысь "Цептер" фирма. Но со туж дуно вал - калык трос ӧз басьтылы. Ар талэсь азьло Свердловск улосысь Вылысь Салда карын асьмелэн бускельёсмы дышизы сыӵе ик тӥрлык лэсьтыны. Выль тусьты-пуньы пӧрмытъясьёс ужало Уфаысь "Алгоритм" огазеяськонлэн бурд улаз. Туэ август толэзьлэн пумаз фирма филиалзэ усьтӥз асьмелэн шоркарамы но. Алигес ортчиз солэн презентациез. Менеджер, филиаллэн кивалтӥсез Татьяна Михайловна Лапшина. вераз выль посудаослэн ӟечлыксы сярысь, нош солэн юрттӥсез Милитина Ивановна Анисимова люкаськемъёсты дышетӥз сиён-юон пӧраны. Бӧрысь лыктэм калыкез утялтӥзы пӧрам сиёнэн. Зэм ик, ческыт пӧрме вылэм. Сиёнэз пичи тыл вылын дас-дас вить минут гинэ пӧзьтыны кулэ вутэк, вӧйтэк, сылалтэк. Ватсано соосты, посудаез тыл вылысь басьтэм бере. Со мед сылоз на ог кызь минут ёрос. Та паймымон тӥрлыклэн, пӧрасьлэн юрттӥсезлэн, дуныз но бадӟым ӧвӧл - Германиын лэсьтэмезлэсь кызь вить поллы дунтэмгес. Одӥг-вить литръем кастрюлялэн дуныз 266 манетысен 500 манетозь, табалэн - 250-300 манет, тэркылэн - 60-65 манет, тусьтылэн - 90-172 манет, пӧртэм быдӟалаё бакъёслэн - 615-1132 манет. Та посудаослэсь ӟечлыксэс зол дунъя соосын семьязэ быдэс толэзь ӵоже сюдӥсь Ольга Алексеевна Трефильева. "Табере мон соосты номырин уг вошты ни",- шуэ со. "Алгоритм" фирмалэн агентъёсыз куронъёсты люкало вордӥськонэ но пуксёнэ, нош посудаез вир нуналэ но покчи арня нуналэ басьтыны луэ ини. ОАО-лэн филиалэз али ужа крезьгуръя училищелэн юртаз. Отын тыршисьёсын пумиськыны луэ вордӥськонэ но пуксёнэ ӝыт. Фирмаын ужасьёс оско: калыклы яралоз Вылысь Салдаын лэсьтэм ваньбур. Ческыт мед кошкоз! Н. ВОЗИСОВ. Пумиськонъёс Петер Шредер: "Немецлы тӥляд чиданлыкты валантэм" Берло дыре асьмеос кызьы гинэ ӧм выре ни улон радмес тупатыны: я США-е делегация бӧрсьы делегация кошке, я Германие, я Шунды ӝужан пала. Дышетӥсьёс вуо дорамы но тупен-тупен верало кыӵе сюрес кузя мыныны, кыӵе амалъёсъя ужаны. Валлян гинэ Ижевскысь кошкиз Германиысь куно господин Петер Шредер, политикая консультант но эксперт. Куинь нунал ӵоже пыр-поч вераз ФРГ-ын аскивалтонлэн радлыкез сярысь. Пумиськонэ-дышетсконэ пыриськизы республикаысьтымы вань районъёсысь администрациослэн представительёссы. Ижевске господин Шредер вуиз Свердловскысь, отын кык нунал ужаса, сомында ик ужаз Челябинскын. Талэсь азьвыл ветлӥз Астрахане, Волгоградэ но куд-ог музон интыосы. Ижевскын мон нырысьсэ. Ужея вуылӥ ни трос странаосы, - шуиз Петер Шредер. - Мыным со кельше. Но одӥгезъя но дась концепция сётыны уг быгатӥськы, уката ик - Россилы. Тӥ котыр ласянь туж висъяськиськоды, басьтэм улон условиосты ик: городын со капчигес, гуртын - секыт. Мон верало кызьы улэ Германия, война бере кызьы радъяськиз интыосын ас коже кивалтон (местное самоуправление), маин выре муниципалитет, кызьы тырме солэн бюджетэз. Данакез коньдон кассае вуэ налогъёслэсь, коммунальной услугаослэсь, пӧртэм пумо тыриськонъёслэсь, юрттэт висъя на государство кредит но дотация чотын. Шредер верамъя, Германия, кык ар ортчыса, маркаен люкиськоз, выжоз евровалютае. Сыӵе курон котькуд государство азе пуктэ Европаысь экономикая огазеяськон. Германиын ӧвӧл общенациональной телевидение, котькуд федеральной музъемлэн аслаз телеканалэз (ФРГ люкемын 16 музъемлы), вань нимаз кузёослэн но. Быръёнъёс татын ортчо ас законъёссыя, мукет сямен вераса, странаын соос 16 пумо. Одӥг интыысь мукет интые улыны выжись адями понна куд-ог дыръя валантэмез но пумиськылэ, соин ик отысь законэн пыр-поч тодматсконо луэ. Муниципалитетлэн администрациеныз кивалтэ бургомистр, со ик луэ общиналэн кенешезлэн тӧроез. Советэ быръё 5-70 муртэ. Тужгес но бадӟымез совет - Мюнхен городлэн администрацияз, юнматэмын 70 адями. Пичи городлэн кенешез но пичигес. Отчы быръемъёс син азязы возё бюджетэз, чаклало коньдонлэсь шонер кутӥськемзэ. Бургомистрез быръё 4-5 арлы. Сое кивалтонэ пуктэ но мозмытэ калык гинэ. Улон возьматэ: 80 процентэз кыкетӥ быръёнъёс пыр уг пото ни. Озьыен, маин ке но ӧз кельшы. Бырйисьлы кулэ визьмо, чурыт сямо кивалтӥсь, мултэс небыт, ваньмызлы ӟеч лэсьтыны вырисьсэ уг ярато. Германилэн 90 процент ваньбурез - нимаз кузёос киын. Но государство соослы юрттэ кредитъёсын, арлы быдэ сётэ дотация. - Музъеммы милям туж дуно, - пусйиз господин Шредер. - Соин ик тросэз семьяос асьсэлы улон корка пуктыны уг быгато, уло кунокуаын. Озьы дунтэмгес усе. Пиналъёс арысь аре ӧжытгес вордско, соин ик улон юртъёс улэ музъем пумен ӧжытгес висъяське (узыръёс сярысь вераськон уг мыны). Котькуд муниципалитет чакла, кыӵе буёлэн шобыртоно коркалэсь ульча палзэ, кенерез, кытчы но кыӵе писпу мерттоно, сяська кизёно. Огъя вераса, ваньмыз сярысь сюлмаське администрация. Петер Шредер Россиысь улон-вылонэн кемалась тодмо ке но, уг ваты: кызьы татысь калык сомында курадӟонэз чида но шып улэ. - Германиын дунъёсты пичияк ӝутӥд ке, вань адямиос ульчае потозы, - шуэ со. - Нош тӥледды ялан зӥбо но зӥбо. ФРГ-ын кун предприятиос ӧвӧл, котькудӥзлэн кузёез - нимаз адями. Музъем понна но налог тыре со ик. Фермеръёс сярысь ке верано, таосызлы эрик сётэмын пӧртэм общинаосын музъем возьыны, вытсэ гинэ дыраз мед тыроз но ӟеч урожай басьтоз. Германиысь эксперт но политик уг вала: малы Россиысь Кун Дума музъемез вузанъя- басьтонъя законэз татчыозь ӧз куты на? Со малпамъя, асьмеос соку ӟечгес улыны кутском, дорамы вуозы узыр кузёос, сётозы инвестициос, тырозы налог. Музъем Германиын дуно бере, вытэз но бадӟым. Со вылын возиське бюджет. Отысь 25 процентэз мынэ общиналэн кассаяз. Татые налог тыро пуны возем понна но: одӥгезлы - 100 марка, кыкетӥезлы - 180, куинетӥезлы - 350. - Германиын номыр но коньдонтэк уг лэсьтӥськы. Выт басьтӥське сур, вина, напиток юэм понна, дискотекае, киное, театре (оперноез) ветлон, дача яке кыкетӥ улон инты возён - ваньмыз понна басьтӥське налог. Театр учкыны мыно узыръёс гинэ, куанеръёслэн сомында коньдонзы ӧвӧл. Петер Шредер чакламъя, Россия матысь дыре шуг-секытысь, экономической кризисысь уз поты, малы ке шуоно, данакез предприятиосмы ужало баретер амалэн. Коньдонтэк одӥг государстволэн но ӧз ӝутскы, ӧз азинскы на. - Тӥляд политикъёсты нокызьы но уг пӧрмыто рынок амалэн кусыпъёсты радъяны, сомында музъемзы вылысь, ялан куанермиськоды. Господин Шредер ӧз ваты кышкамзэ но. Со али ик шӧдэ ни, кытчы вуттоз Россиез музъем понна налог тырон но вузан-басьтон, кыӵе кыӵесэ шедёз куанер улӥсь калык. Асьмеос солы дась ӧвӧл. Л. МЕДВЕДЕВА. Журналистъёсын пумиськонъёс КОТЬКУДӤЗЛЫ - НИМАЗ ЮРТТЭТ Калыкез улон-вылонын утёнъя министр Светлана АНДРЕЕВА журналистъёслы мадиз удысысьтыз уно ужпумъёсты. Соос герӟаськемын инвалидъёслы, ӧлексы нылпиослы юрттонэн но пиналъёс понна пособиос тыронэн. Светлана Ивановна министре юнматэмын туэ 26-тӥ мае. Но та удысын со тэтэ карись адями ӧвӧл. С.Андреева социальной удысэз нуиз Ленин районын, нош берло ньыль арзэ вал Кун Кенешын ялан ужась комиссилэн тӧроез. Соин ик калыкез улон-вылонын утёнэз ӟеч тодэ. Та удыслы туннэ секыт йӧтэ. Коммунальной но мукет услугаос понна 350 миллион манетлэсь уно тыронъёсыз люкаськемын. Удыслэн 17 учреждениосаз уло пересьёс, висись нылпиос. Вань солэн подсобной хозяйствоосыз. Асьсэос нянь пыжо но сое вузало, бакча сиёнъёс, картофка будэто но мукет ужъёсты быдэсъяло. Улонэ пыӵа "ӧлексы нылпиос" программа. Нылпиослы кӧлан юртъёс вуттэмын Канифольный но Маяк посёлокъёсын. Берлояз 230 муртлы чакламын. Балезиноысь Пижил гуртысь интернатын 130 интыен корка лэсьтӥське. Россия та программаез быдэсъяны 1 миллион 400 сюрс манет коньдон висъяз. Али одӥг миллионэз вуэмын ни. Со уксёен басьтэмын санитарной транспорт, 3 компьютер но пичи автобус. Али та учреждениос азьын бадӟым ужпум сылэ - толлы дасяськон. Интернатъёсын ноку кезьыт медаз луы. Ведь куд-огез висись адямиос койкаысь но султылыны уг быгато. - Шаерамы пумен умоя пенсиос тырон, - маде Светлана Ивановна. - Али быдэсак тыремын ни сентябрьлы, почтаослы коньдон вуэ ни октябрь понна. Но секыт на югдур нылпиослы пособие тыронэн. Толэзьлы быдэ 172 сюрс адямилы одӥг миллион манет коньдон сётӥське. Ваньмыз соос нырысетӥ категорие пыро. Со пӧлысь 48 сюрс нылпилэн анай- атаез уг ужа. Но огъя вераса, 80 процентэз семьяослы юрттэт кулэ. Али 1997-тӥ ар понна нылпиослы эшшо 17,4 миллион манет тырыны кулэ на, 1998-тӥ ар понна - 95, нош туэ - 188 миллион манет. Таиз ар арлыдоослы сӥземын. Сое ортчытонъя, 33 нимысьтыз ужрадъёс кутэмын. Али республикаямы (Алнаш, Воткинск но Глазов районъёсын сяна) ужало ни социальной юрттэт сётонъя центръёс. Отын нуналлы быдэ 3 сюрс пересь адямиос дунтэк сисько. Калыкез улон-вылонын утёнъя тужгес но адӟем карымон ужало Воткинск городын. Отын усьтэмын ни куанер нылпиосты но улон интытэк кылем арлыдоосты возён юртъёс. Соин ик министерство татын чакла семинар ортчытыны. Удыс пумен кужмоя. Та вакытэ солэн 560 компьютеръёсыз вань ни. Эшшо 215-сэ басьтозы на. Ваньмыз соос келямын луозы районъёсы. Министерство али усьтэ геронтологической центр. Со 120 интыен луоз. Но жаляса верано луэ, "Ветернаъёс сярысь" Закон урод быдэсъяське. Нимаз адямиослы 3 миллион манет юрттэт сётӥське ке но, ляб мынэ дунтэк эмъюмъёс сётон, телефон пуктон. Чернобыле ветлэмъёслы, инвалидъёслы улон инты висъян но музон. Мар бордын бен ужпум? Нырысь ик ветеранъёс сярысь закон федеральной луэ. Но Москва берло дыре 4 пол ичи коньдон висъя. Со трос шуг-секытъёс кылдытэ. Тӥни сое лыдэ басьтыса, котькудӥзлы нимаз юрттэт сётоно. Кылсярысь, нылпиослы пособие тыронъя семьяос куинь категориослы люкисько: нырысяз адямилы быдэ 402 манет доход луыны кулэ, кыкетӥяз - 462, нош куинетӥяз - 650 манет. Г.Романов. Ой, музьые, музьые Ой, музьые, музьые Малы сюлэм шуг али. Малы сюлэм шуг али, Кырӟаса лэзём али. Ярдурысен ярдуре Чагыр лента кыскемын. Туганъёсын юмшаны Ми котьку но ваньмемын. Ой, музьые, музьые, Малы вожаськод монэ. Одӥг гинэ туганэ, Мукетыз ӧвӧл кулэ. Та ураме, ураме, Кыкна палаз чияпу. Та туганэ, туганэ, Сиресь пу но сиресь пу. Ой, музьые, музьые, Калыклэсь пӧртэм ук тон. Нуназе коть ӝытазе Ӟыгыръяны дась ук тон. Лыз чебересь сяськаос Возь вылъёсысь бичалляй. Туганэлы пӧсь кылъёс Юнме, лэся, вералляй. Ӟег культо кадь мугоры, Зангари кадь синъёсы. Малы, малы мон шоры Учкиськод тон огшоры. Ой, пурӟе ук улмо сад, Чеберезлы пайми вал. Малы пукси ал вылад, Мӧзмемъёстэ шӧдӥ вал. Ой, музьые, музьые, Коштан вылэм музьые. Мон эшшо но шукырес, Ныры эшшо чандырес. Туганэ мынам чебер, Йыраз но ӧвӧл тӧлбер. Шудыны потэ ке бер, Со сьӧраз вае миндэр. Кытын меда, кытын меда, Кытын меда туганэ? Нош, лэся, лапас улын, Куиньмойлы куатаськемын. Ньыль-а, вить-а туганэ, Уг тодӥськы кӧнязэ. Одӥг муртэн акыльтэ, Мукетсэ кутэм потэ. Зарни зундэс басьтӥллям, Шор чиньыям бырттӥллям. Чик юатэк-вератэк, Мыным кышно ваиллям. Чупа, чупа, эн куаля, Ымдуръёстэ эн жаля. Ма каром на табере, "Чупа-чупс" басьтӥд бере. Чияпулэн вайёсыз Малы меда чигыло. Та туганлэн кылъёсыз Мылме-кыдме ӵогыло. Кырыж-мерыж, кырыж-мерыж Туганэлэн кенерез. Кырыж-мерыж, кырыж-мерыж Туганэлэн манерез. Чияпулэсь вайёссэ Кезьыт тӧлэд някыръя. Укно улам туганэ Ӝытлы быдэ кыньыръя. Сьӧд ката но басьтӥ вал но, Малы меда ӝог пӧсьтӥз. Тыныд бызё шуи вал но... Шуи вал но скал луиз. Чибориё, чибориё Али дӥсям дэремед. Ӵогыриё, ӵогыриё Корт согы кадь вешамед. Эн ик куры, эн ик куры, Эн ик куры, шуисько. Эн ик куры, мон уг сёты Толалтэ узы-боры. Эктыны ке потӥсько, Пиосты гочатӥсько. Турбича кадь мугоры, Сюлыс пасьта сарвылы. Монэ шуо, пӧсь шуо, Юнме шорысь уг шуо. Ньыль муртэ туэ люки, Витетӥез дась ини. Туганъёсмы вал милям но, Туганъёсты вал тӥляд. Кытчы меда пыриллям но, Палкышноос калтӥллям. Ой, гужем но толалтэ Вож кызъёсыд вож сыло. Вож кызлэсь но вож ини, Ой, вожаса туганэ. Адӟисько ке туганме, Ыштӥсько мон йырсазьме. Ай со мар гинэ, гинэ, Туганэ вӧзам усе. Ой, туганэ, туганэ, Тон мынам кезегъянэ. Тон ӧвӧл - шугектӥсько, Вань дыръяд сэректӥсько. Шур сопалан гажанэ, Шур та палан туганэ. Соиз лётчик, та моряк - Люкиськом шат шорияк. Малы меда яратон, Малы меда люкиськон? Ой, эшъёсы, мӧзмыса Ньӧр кадь кылёд куасьмыса. Ой, туганэ, туганэ, Ӝогак ӟыгырты монэ. Нош соин уг тырмы ке, Чупа на ӟырдыт монэ. Ой, туганэ, туганэ, Ойдо келя ни монэ. Мар учкиськод паймыса, А то кылёд долкаса. Федор СУВОРОВ. 10 ар ӵоже "Шаркан-трикотаж" огазеяськонын лулысь-сюлмысь тырше Валентина Ивановна Малых. Коллективын ӟеч вуриськисез гажало лякыт сямыз, юрттыны дась луэмез понна. Туспуктэмез Г.Юсаевлэн. 7-тӥ октябре люкаське Удмуртиысь пичи предприятиосын ужасьёслэн нырысетӥ конференцизы. Ужрад ортчоз Правительстволэн юртаз (Ижевск, Пушкинской урам, 214, 2- тӥ этаж), кутсконэз 11 часын. "Удмурт дунне" газетлы - 80 Николай ЕВСЕЕВ "Дага дуриськылӥз" шудлы гинэ Азьланьтӥськомы улонысь дырызлэсь вазь кошкем тодмо журналистлэсь Николай ЕВСЕЕВЛЭСЬ мадёнъёссэ. Таяз учыре гажано эшмы тодматэ "Советской Удмуртия" газетын ужаны кутскон аръёсыныз. Соос ӵапак герӟаськемын журналистлэн будон сюресэныз. "Советской Удмуртия" газетэн улонме герӟай 1958-тӥ арын. Гожъяны кутски солэсь азьло, Удмурт кун пединститутын дышетскыкум. Нош нырысетӥ очеркме поттӥзы 1957-тӥ арын. Институтэз йылпумъяммы бере, кышноеным ӵош ужамы Ува ёросысь Нылга шор ёзо школаын. Отын улӥз революция но граждан ож дыръя ӟырдыт нюръяськем большевик Г. Г. Симаков. Со сярысь кӧня ке бам гожтӥ но редакцие ыстӥ. Одӥг-а, кык-а арня ортчиз - очерк шуонме газетэ быдэс подвал быдӟа печатлазы. Эшшо одӥг арня ортчыса, гожтэт басьтӥсько. "Гажано Николай Николаевич! Тау очерк гожтэмды понна. Сыӵе адямиос сярысь произведениос милемлы туж кулэ. Гожъялэ. Саламен П. Яшин", гожтэмын вал. Возьыт потӥз. Бамъёсы ӵужыр ӝуазы кадь. Возьыт, малы ке шуоно, очерклэсь ымнырзэ ачим но ӧй тодма ни - сокем зол тупатъямын вал. Бӧрысь тодӥ: сое печатланы дасям пропагандая отделлэн соку кивалтӥсез, али, мон шуысал, чылкак вунэтэм поэт Георгий Туганов. х х х Школаын уже яра вал, нош директорен кусыпмы малы ке ӧз тупа. Со но, мон но пичиен- пичиен янгышъёс лэсьтӥм, дыр. Шӧдӥсько: гожъяськытэк улэме уг луы. Йырысь уг кошкыло редакцие уже куриськон сярысь малпанъёс. Сюлэм шӧдӥз, лэся, малы республикаысьтымы газетлэн редакторез, партилэн Удмурт обкомезлэн бюроезлэн членэз Петр Михайлович Яшин огшоры дышетӥсьлы аслаз нимыныз гожтэт ыстэм. Сое мон бӧрысь валай ини. Тодӥсько вал, со Шаркан селоысь шуыса. Покчи выныныз институтын огвакытэ дышетским. Вераллязы: нырысетӥ кышноез, Шура, милям селоямы Сосновка детдомын ужам. Нош асэныз Петр Михайловичен пумиськылыны ӧз кылдылы. Пирсэкъяса кема котыръяськи Нылга почтаын междугородной телефон котыртӥ. Минутлы быдэ, оло, мылкыд вошъяське. Жингырто. Нош мар шуоз со? Уг. Мукет дырлы кельто. Дӥсьтӥ, ява. - Петр Михайлович,- юасько,- редакциын интыды вань-а? Коть самой пичиез. Ньыль минут пала возьмай ваземзэ. Тазэ но бӧрысь валай, Яшин решениос малпаськытэк кутыны уг яраты шуыса. Верамезлэсь азьло ваньзэ лыдъялоз-чоталоз. - Лыкты, лыкты,- кылӥсько.- Ӵуказе ик. Возьмало. Мынам кылъёсы тау шуыны гинэ тырмизы на. Ӵуказеяз ӵукна ик мон редакциын вал ини. Курдась коӵыш музэн пырисько редакторлэн кабинетаз. Нош со монэ кемалась тодмо эшсэ сямен пумитаз. - Я, возьматы астэ,- шуиз, ӝӧк сьӧрысьтыз потыса. Монэ пукон вылэ пуктӥз, нош ачиз артэ пуксиз.- Кин тон? - Евсеев,- шуисько. - Николай Николаевич. - Созэ мон тодӥсько. Тани ук - кымысад гожтэмын. - Соку уг валаськы, Петр Михайлович. - Ма карыны, пӧй, быгатӥськод? - Котькызьы малпалэ, но редакциын ужаме потэ. Лыктӥ бере - уг кошкы ни. - Соин ик мон тонэ ӧти. Гожъяськемдэ син азям кемалась возисько. "Тӥни кыӵе вылэм со, редактор,- малпасько.- Пырак сюлэме пыре. Собере отын книгаыцм сямен лыдӟе, кыӵе адями тон. Сыӵе пичиесь, кыньыртэм синъёсыз ваньзэ адӟо". Асме шуак ятвылтӥ но - кӧлэмысь сайкай кадь. Нош со кузь ӵуж мундштук пумзэ ымдураз пыкем но мон шоры пальышаса пуке. Ческыт сигарет зыныз нырпелесъёсты бичатэ. - Удмурт кылэз дышетӥд-а? - юа витьымтэ шорысь. - Дышетӥ. Но грамматикаысь одӥг правилоез но уг тодӥськы,- шуисько, нош ачим шӧдӥсько, кызьы горд кумачен шобырско бамъёсы. Нылгаысен куатьтон километрез та юанлэсь кышкаса лыктӥ - со ик сюриз, экзамен дыръя сямен. - "Кыкъёслы" но "колъёслы" гинэ сочинениос гожъяд-а? - Ӧй, Петр Михайлович. Удмурт кылын сочинениосы понна одӥг "4" но ӧз пуктылэ. - Оскисько. Гожты куриськон,- мыче бумага. - Монэ ужысь уз лэзе, Петр Михайлович. - Соку мукет амал шедьтом. Нош тодӥськод-а, кытчы лыктӥськод? - синкашъёссэ шуак ӝутӥз. - Редакцие,- шуисько. - Шонер,- вазиз, кӧня ке шып пукемез бере.- Котькытын шутэтскон корка ӧвӧл. Нуналлы быдэ кулэ луозы чуръёс, чуръёс, чуръёс. Журналистлэн вань улонэз сюрес вылын но "ожмаськонын". Перодэ лэчыт возёно луоз. Солэн оскисько кылыз монэ бурдъяз кадь. Сюлэм небӟиз. Мон, зэмзэ но, ӧй алда. Школаын озьы ик вал. Янгышъёс ӧй лэсьтылы. Удмурт кылын гожтэм произведениосты, ки улам шедьыкузы, одно ик лыдӟылӥ. Со юрттӥз, лэся. Нош правилоосты, сюлэм борды кутскыса верано ке, али но уг тодӥськы. Петр Михайлович ӝӧк сьӧраз пуксиз. Телефонэн жингыртӥз. - Минпрос? Никифороваен герӟалэ. Елена Александровна, ми одӥг ужасьтэс басьтӥськом. Гожтэлэ, пожалуйста, приказ. Нылга школаысь Евсеевез. Час ортчыса, со тӥ доры вуоз. Озьы мон 1958-тӥ арын 9-тӥ мартэ редакцие ужаны потӥ. "Ожмаськыны" дышетон понна, Петр Михайлович монэ толэзьёсын-толэзьёсын вань отделъёсын ужатӥз. Ӟеч "гындэмзы" бере гинэ инты сётӥзы. Мон понна со туж усто школа вал - Яшинлэн школаез. х х х Огпол монэ Петр Михайлович пырыны косӥз. Ӝогак лыктӥ но ӧс куспы дугдӥ. Шып сылӥсько. Со типографиысь ваем выль полосаез лыдӟыса пуке. Мазэ ке ӵушылэ, тупатъя, нош ик лыдӟе. Одӥг материаллы но, сое лыдӟытэк, югыт дуннее сюрес ӧз усьтылы, ӵуказе мынӥсь вань гранкаосын тодматскытэк, редакциысь ӧз кошкылы. Лыктэмме шӧдӥз но йырзэ ӝутӥз. Синъёсыз сюбегесь гинэ. Соосты эшшо но кыньыртыса, шорам учке. - Редакциын пукыса, штаниед ӧз пӧсьты на-а? - лякытак юаз. Ӧз яра, малпасько, гожъяськеме. Уллялоз но - тӥни тыныд журналист. Нош со: - Тӧлатскыны дыр вуэмын. Командировкае потыны дась-а? - Коть туннэ ик!.. - Уть, кыӵе шумприч! Эн дырты. Кут "Кизили" газетэн вурӟетэз. Тодматскы районысь югдурен. Чакла: мыноно луод Кулига селое. Оло, отчы жингыртод но. Темаед луоз юосты октон. Рейд ортчытод. Озьы вал котьку. Егит журналистъёсты будэтонлы Петр Михайлович вань сюлэм шунытсэ сётылӥз. Маке лэсьтыны куриз ке, ваньзэ кушаса ик валэктоз. Мон огпол но ӧй адӟылы солэсь керӟегъяськемзэ, лек кыл верамзэ. Сыӵе адямилы маке пумит куаретыны кыл но уг пыры. Аслэсьтыз пиналъёссэ сямен будэтӥз со милемды, журналист луыны малпась егитъёсты... х х х Та сямзэ мон бӧрысь но трос пол шӧдылӥ на. Соку дышетскисько вал КПСС-лэн ЦК-езлэн Вылӥ партийной школаяз, нош Петр Михайлович луиз "Удмуртия" издательстволэн директорез. Витьымтэ шорысь огпол гожтэт вуиз. "Гуртысь сценаос туж ёрмо одӥг актэн пьесаослы. Соин ик поттӥськом пичияк сборник. Пыртӥськом тынэсьтыд но "Нюлэс куашетэ" пьесадэ. Юатэк кутэммы понна, йырдэ кур уд кары, дыр", - гожтэ Петр Михайлович. Мон вӧлдэтозь тэтчыны дась вал. Туж шумпотӥ, малы ке шуоно, куинь-вить пичиесь пьесаосы огез но нимаз книгаосы ӧз пырылэ на вал. Собере кӧня ке экземплярзэ мыным Москвае лэзиз. Кивалтӥсь тыныд оске, тон сярысь уг вунэты ке, мылкыд уката бурдъяське ук. Журналистикаын куамын арлэсь кема ужатозям, весь шӧдыса улӥсько П. М. Яшинлэсь, пичи нуны вӧзын сямен, йыр вадьсам шуныт шокамзэ. Милям сад-бакчаосмы артэ вал. Берло аръёсы Петр Михайлович отчы ветлэмысь дугдӥз. Арлыдыз секыт каре ни, лэся. Отын но, маке уг пӧрмы ке, керӟегъяськыны кутскемме шӧдыса, котьку шуылоз вал: "Эн дырты. Сизьым пол мерта - огпол ванды". Сыӵе лякыт адямиез уд шедьты. х х х Школаын кык ар ужаме бере, редакциын нырысь секыт йӧтылӥз. Отын вань нуналъёс пыд йылын ортчылӥзы, нош татын... Ӝӧк сьӧрад пук но гожты чур бӧрсьы чур... Урокъёс вискын азьвыл шутэтскыны пуксьылӥм, нош али пукыса жадиськод. Тэтчыса ик кабинетысь лобем потэ кадь. Журналистикалы нокытын ӧз дышетэ. Соин ик нырысь аръёсаз гожъяськон "университетэз" ортчоно луиз. Аслам зэмос дышетӥсьёсыным лыдъясько республикаысьтымы лыдӟисьёслы трос аръёс ӵоже тодмо вылэм журналистъёсты дасо аръёсын ӵош ужам эшъёсме П. М. Яшинэз, В. М. Михайловез, С. В. Шкляевез, А. А. Стрижовез. Д. Н. Леконцевез, М. С. Воронцовез. Али шӧдӥсько ни: ваньзылэсь сямъёссэс, гожъяськон манеръёссэс, газетлэн кужымезлы юн оскыса ужан мылкыдзэс пырыен-пырыен басьтӥськем, лэся. Нырысь ик редактормы П. М. Яшин монэ дышетоно кариськиз культурая отделын. Кивалтӥсез М. С. Воронцов вал. Кӧня ке нунал ортчыса валаны кутски - тужгес урод гожтэтъёсты дасяны мыным сётъя. Но рос-прос валэктэ, кызьы лэсьтоно, мар будэтоно. Уг дыртыты. Мон пумитъяськыны ӧдъяй. Пештырскиз ук... - Ко-ош! Мон верасько ке, это что-то значит,- шуиз но чалмытскиз. Малпай: та монэ номырлэсь кышкатэк ужаны дышетэ. Собере "гындӥзы" партийной улонъя отделын. Таиз кивалтӥсе Д. Н. Леконцев, вылаз ик, партбюролэн секретарез вал. Дасям материалме гурысь пӧсь табанез кадь возьмаса улӥз. Печатламтэоссэ ӝӧк вылаз матэ но ӧз лэзьылы. Сётӥськод ке, вань ужзэ палэнтыса, ӝегатскытэк кутске гожманы. Сокем сьӧдма - кытӥяз иворлэн "ымнырыз" но уг адӟиськы ни. Огпол облсовпрофлэсь председательзэ начальник гожтӥськем. Со понна зол йӧтӥз. Али но пель сьӧрам кылӥське кадь: - Кызьы сое но уд тодӥськы! Кытын тонэ дышетӥзы? Малы дышетӥзы? Таяз отделын мылкыд кылдӥз ваньзэ рос-прос лэсьтыны, пыӵаз кутскем ужез одно ик пумозяз вуттон сям. Таизлы тужгес трос дышетски А. А. Стрижовлэсь но С. В. Шкляевлэсь. Со аръёсы ӧм ик тодылэ ужысь 18 часын кошконэз. Ку гинэ уд пыриськы партийной улонъя отделэ - А. А. Стрижовлэн ручка йылыз гинэ дырекъя. Нуналаз 200- 300-500 чур. "Вот таиз ӝоглык!" - вожъяськыса учкылӥ со шоры. Витьымтэ шорысь 1963-тӥ арын кинлэн ке йыраз малпан чилектэм удмурт газетэз быдтыны. "Советской Удмуртия" потыны кутскиз "Удмурт правда" нимын. Троссэ журналистъёсты отчы-татчы пазязы. Тужгес бадӟымаз кабинетэ тямыс муртэ интыязы но, сое удмурт кылэ берыктон отдел нимазы. Кин куректӥз, кин шумпотӥз. Лумбыт пукылӥм машинка дурын, ӟуч текстъёсты берыкъяса. - Чидатске, эшъёсы! Чидатске, нуныосы!- лапкатъяз милемыз С. В. Шкляев.- Янгыш лэсьтэмзэс вылӥын одно ик валалозы. Берытскоз газетмы лыдӟисьёс доры. Озьы ик луиз - выльысь вордскиз газетмы. Редакторе В. М. Михайлов лыктэм бере, коллектив выльысь бурдъяськиз кадь. * Николай Николаевич ЕВСЕЕВ, кутскись журналист. Депутатлэсь ӟечкылан Арлыдоослэсь нуналзэс ужась коллективъёс шуныт мылкыдын пусйизы. 1999 ар ЮНЕСКО-ен мӧйыослэн аренызы ялэмын, соин ик 1 октябрь быдэс дунне понна праздниклы пӧрмиз. Удмуртиысь арлыдоослы трос ӟечкыланъёс вуизы, соос пӧлын Россия Федерациысь Кун Думалэн депутатэзлэсь Николай Иванович Сапожниковлэсь но. Думаын ужаса, со мыло-кыдо пыриське законъёсты эскеронэ-кутонэ, котьку дурбасьтэ ожысь но ужысь ветеранъёс пала, уте соослэсь интересъёссэс. Н.И.Сапожников азьланяз но вань быгатонозэ лэсьтоз, законъёс калык понна мед ужалозы шуыса. Т.Кузьмина. Огазеяськон - со ог-огедлы юрттон Кылем арня куспын Завьялово ёросысь Якшур гуртын ортчиз пусйымон пумиськон. "Котырес ӝӧк" сьӧры люкаськизы гурт хозяйствоослэн кивалтӥсьёссы, ужбергатӥсьёс, тодосчиос. Та секыт вакытэ ог-огзылы котыр ласянь юрттон вылысь, соос кенешизы "Удмуртиысь экономикаын кулэяськонъёсты утён понна" движение кылдытыны. Учредительной конференциын эскеремын выль огазеяськонлэн уставезлы инъет, быръемын кивалтӥсь ёз. Исполкомлэн тӧроез луиз "Путь Ильича" колхозлэн председателез Кун Кенешлэн депутатэз Валерьян Никитин. Быдэсъясь директоре юнматэмын Юрий Горячих. Движенилэн "ӧсъёсыз" ваньмызлы усьтэмын. Отчы пыриськыны быгато асьме экономикаез утён-азинтон, шаермылэсь узырлыкъёссэ вань калыклэн кулэяськонъёсызлы кутон сярысь сюлмаськись эшъёс. Пусйыны кулэ на: огазеяськон кылдытэмын "Удмурт кенешлэн" бурд улаз. Вань удмуртъёслэн куатетӥ (азьло чакламтэ) ӧтчамзылэсь решенизэ быдэсяъса. И. КРИЧЕВ. Дышетӥсьёс дышетско Сарапулысь педагогикая колледжын туэ вылӥ тодон-валан но сётыны кутскозы. Озьы Удмурт кун университетэн огкыл тупатыса татын дасялозы историкъёсты, филологъёсты но педагог-психологъёсты, нош Глазовысь пединститутысь преподавательёс дасяны кутскозы покчи классъёсъя дышетӥсьёсты. Зэм, со группаосын дышетсконо луоз дун тырыса. Вань на эшшо одӥгез вылез. Городысь уже интыянъя центрен ӵош ужтэк кылемъёсты пӧртэм киужъёс лэсьтыны дышетозы. Та нуналъёсы колледжын радъямын городысь но районысь покчи классъёсын ужась дышетӥсьёслэсь тодон-валанзэс будэтонъя курсъёс. Соосын ужало Москваысь специалистъёс. Н.Семенов. ОСКОН Эмъясь луыса вордскыны кулэ Мар кароно? Йырын сю пӧртэм малпанъёс бергало. Кудзэ бырйыса умойгес луоз меда? Визь-кенеш но юаны нокинлэсь. Анай-атай тышкаськоз гинэ. Мыным сотэк но урод. Соос ноку валаны ӧз тыршылэ, мар мынам сюлэмам. Эшъёслы ке вазиськоно, ӵуказяез вань веранзы мон сярысь гинэ луоз, сереме уськытозы. Кинлы вазиськоно? Таӵе югдуре, ваньмызлэн ке ӧвӧл, тросэзлэн сюрылэмзы вань, - матысь адямиослы но вазиськыны дӥсьтоно ӧвӧл. Та выллем учыръёсысь потыны юртто "оскон телефонъёс". Татчы жингыртэм адями ватытэк вераны быгатэ вань сюлэмшугъяськытӥсь малпанъёссэ. Тышкаськем интые, сое татын рос-прос кылзозы, асэныз ӵош секыт югдурысь потон амалъёс утчалозы. Вылаз ик, уз юалэ кин тон, кытысь тон. Таӵе телефонъёс элькунамы уно гинэ ужало ини. Вань со Можга городын но. Тямыс ар ӵоже вазиське татчы калык пӧртэм сюлэмвисёнъёсыныз. Арлыдзыя учконо ке, укмысысен куатьтон аресозь. Но тросгес жингырто дас одӥгысен куамын аресозь егитъёс. Азьло аръёсы ӵемгес вазиськылӥзы нылъёс, кышноос, нош берло дыре дӥсьтӥсьгес луэмын воргоронъёс но. Гужем толэзьёсы ваньзэ ӧвӧлзэ юрттэт куриз 165 адями. Тросгес жингырто городын улӥсьёс, но вань гуртын улӥсьёслэн но вазиськонъёссы. Югдур шугомизгес, куке телефонэз уже кутон понна карточкаос басьяно луиз. Школаын дышетскись пиналъёс, ма егитъёс но, дорысенызы, анай-атайёссы азьын, жингыртыны возьдасько, собере, ваньмызлэн телефонэз но ӧвӧл ук. Соин ик азьло урамысен ӵем жингыръяло вал, али - ӧжытгес. Кыӵе бен юанъёсын вазисько меда егитъёс? Нырысетӥ интыын сыло ог-огеныд кусып тупатон шугъяськонъёс. Тунсыкъясько, малы мон сыӵе югдуре шеди, малы эшъёсы монэ уг валало. Трос вазисько яратонэн, вылтусэнызы герӟаськем юанъёсын. Туала егитъёсты сюлэмшугъяськыто улон, оскон (религия) сярысь малпанъёс. Шер ке но, вазисько наркотикъёсын эшъяськем адямиос. Телефон дорын пукисьёс куддыр улонысь кошкыны дасяськем адямиос понна но утисьёс выллем луо. Психологъёслэн верамзыя, аслэсьтыд йырдэ быдтонлэн мугъёсыз ӵемысь таӵеесь: адями шӧдэ, нокинлы кулэ луымтэзэ, нокинлэн син шораз йӧтымтэзэ. Улонысь кошкыса, со быгатоз кадь потэ ассэ возьматыны. Туж ӵемысь улонлэн ярдураз султо шудтэм яратонэн йырин. "Вот, - малпа нылаш яке пияш, - кулэм берам тон мар дауртод меда, кыӵе кылъёс вералод корос дорам? Тыныд аслыд возьыт луоз монэ синйылтымтэед понна". Жаляса верано луэ, оло, вералоз но маке лулгажанэз, но кулэм адями номыре уз кылы ни. Психологъёслэн малпамзыя, улонысь кошкон - со тужгес капчиез амал шуг-секытысь потыны. Номыр веранэз, адями кайгыре, со пумаз вуэмын ини. Но утчась мурт шедьтэ, шуо. Ӵапак мукет амалъёс утчаны юртто телефон дурын пукись адямиос. Та сярысь вера тани таӵе учыр но. Вазиськиз егит воргорон. Нокин ӧз ке но куры, вераз нимтулзэ. Верамысьтыз валамон вал: со улонысь кошкон малпанъёсын улэ. Валэктз мар карыны малпамзэ но. Кенешонъязы психологлы тодмо луиз: егит адями гожъя кылбуръёс, яратэ крезьгурез, нош анай-атаез ӵемысь алылӥзы, пизы нокытын но уг ужа, коньдон уг потты шуыса. Пияшлэн кылъёсызъя татчыозь сое нокин валаны, кылзыны ӧз тыршы. Адями пуш дуннеяз выиз, ассэ мултэсэн лыдъяны кутскиз. Психологез та учыр туж сюлэмшугъяськытӥз. Пияш, зэмзэ но, йырзэ быдтыны дась вал. Но кык-куинь толэзь ортчыса печатласько солэн кылбуръёсыз. Озьыен, вераськон иназ мынӥз. Туж ӵем юрттэт курыса вазисько анай-атайёс, пиналъёсынызы огкыл шедьтымтэенызы. Асьмелэн семьяосамы ӵемысь озьы луыса кошке: бадӟымъёс уг тунсыкъясько пиналлэн пуш малпанъёсыз, соослы дуногес, кыӵе оценка ваиз "вить" ке - умой, "кык" ке - нылзы яке пизы та нуналэ тышкаськон кылъёс сяна уз кылы. Нош тодоно вылэм, кыӵе муген пиналлэн тетрадяз "кык" пуксиз. Огкылысь улон понна, анай-атай нылпилы эш луыны кулэ, висказы нокыӵе тубатъёс медам луэ. Асьмелэн ӵемгес луэ озьы: соос вылӥысен учко пиналзы шоры. Ог-огдэ валамтэос кутско нылпи вордскем бере ик. Венгер психологъёслэн верамзыя, анай но пинал ог-огзэс нырысьсэ адӟыкузы ик азьланезлы кусыпъёс тупато. Шумпотымон соиз, егит семьяосын берло дыре нылпи психологияя тодон-валанъёссы будо: трос литература, школаосын та удысэз ӟеч тодӥсь адямиос ужало. Но со басьтэм тодонъёс уж вылын ляб кутӥсько. Анай-атайёс ӝожтӥсько дыр сюрымтэлы. Нош котьмалэн ас дырыз. Нырысетӥ аръёсаз пиналэн ӧд ке ужа, огкыл ӧд ке шедьты, вить ар ортчыса бер луоз. Собере асьсэос ик анай-атаёс ӝожтӥськозы пиналзы вылэ, куд-огез ужысь но кошкыны дась, нылпиенызы пукон понна. Но макем тросгес дыр ортчемын, сокем шуггес луэ соослы ог-огзэс валаны. Тӥни кытысь утчано наркотикъёсын, тамак кысконэн, юонэн эшъяськонлэсь кутсконзэ. Специалистъёслэн верамзыя, городысь но гуртысь анай-атайёсты но пиналъёсты люкыны уг луы. Ваньмыз потэ, кыӵе семьяын будэ нылаш яке пияш. Пиналлы пичиысен ик валан сётоно: улонын котькуд вамышед понна кыл кутоно луоз. Со мед быгатоз соизлы яке таизлы югдурлы, котырысь улонлы ас понназ дунъет сётыны. Гожтонме йылпумъяса верам потэ: адямилэсь ӝожтӥськонъёссэ, сюлэм висёнзэ валан понна, психологияя тодон-валанъёс сяна, адямиез яратон, ӟеч, лякыт сямъёс кулэ на, кудъёсыз одно ик луыны кулэ телефон дурын пукисьёслэн. Куддыр татчы, зэмзэ но, вазисько улонлэн пумаз вуэмъёс. Соослы юрттон, улонлы шумпотон мылкыд пыӵатон котькнилы уг сётӥськы. Адямилэсь лулчеберзэ эмъяны дышетскыны уг луы, эмъясь луыса вордскыны кулэ. Л. ПОСТНИКОВА. Фермаосын Кин кӧня йӧл кыске Районъёс Скаллы быдэ кыскемын (кг) 1999 1998 1. Воткинск 8,3 8 2. Вавож 8,0 7,8 3. Игра 7,8 8,3 4. Завьялово 7,5 7,8 5. Глазов 7,9 7,4 6. Можга 7,5 7,2 7. Ува 7,4 7,6 8. Грахово 7,4 7,5 9. Пичи Пурга 7,2 8,1 10. Як.-Бодья 7,2 8,0 11. Яр 7,1 8,0 12. Балезино 7,0 7,5 13. Шаркан 7,0 8,4 14. Юкаменск 6,8 7,7 15. Кез 6,5 7,5 16. Алнаш 6,5 7,2 17. Дэбес 6,4 7,3 18. Красногорск 6,3 7,1 19. Сарапул 6,2 7,5 20. Киясово 6,2 6,4 21.Каракулино 5,6 7,7 22. Селта 5,4 6,2 23. Сюмси 5,4 5,4 24. Камбарка 5,1 4,9 25. Кизнер 4,6 5,1 УГНИИСХ 13,2 12,3 Республикая 6,9 7,5 Сентябрьлэн зоро-кото улэмез йӧл кыскон вылын юн шӧдӥськиз. Тросаз фермаосын, кылем арен ӵошатыса, продукция поттон кулэсмиз. Республикая но йӧл ӝыны килограммлэсь ятырлы ӧжытгес кыскиськом. Со дыре ик Воткинск но Вавож районъёсысь скал кыскисьёс миымлэсь ӟечгес ужало. Озьыен, ческытгес сиён ке вань, вылаз ик, пудоез умой утялтӥськод ке, зоръёс уг люкето. Огвакытэ хозяйствоосын чутрак кулэсмиз вал кысконо скалъёслэн лыдзы. Али югдур тупатӥське. Азьвыл аръёслэсь ӧжытгес пудо уллёзы Яр, Глазов, Дэбес палъёсын, нош Юкаменск, Балезино, Кез но куд-ог мукет районъёс шӧдскымон йылэтӥзы ни. Республикая вераса, 1998-тӥ арын сентябрь пумын ог 132 сюрс скал ке возим, туэ - 131 сюрс 549. Ар йылпумъяськытозь, оло, ӵошалоз на. Шуныт нуналъёс азьпалан луозы ай, берпуметӥ гудыри асьмелы со сярысь кылем пятницае ивортӥз. Озьыен, пудо сиён луд вылысь шедёз на. Со эсэпаны юрттоз толлы дасям турын-куроез. Л. ДМИТРИЕВА. "Удмурт дунне" газетлэн редакциез мур куректыса ивортэ валтӥсь редакторлэн воштӥсез Иван Иванович но радиоын ужась Ирина Владимировна Лебедевъёслэн атайзы Сакеев Владимир Дмитриевичлэн кулэмез сярысь но ӵыжы-выжыоссылы но матысь адямиосызлы кайгыремзэ вера. Нобель премилэн лауреатъёсыз Зэмлыкез утчась Вордскемез дырысен 80 арес тырмиз писательлы А.И.Солженицынлы. Александр Исаевич вордскиз 1918-тӥ арын Воронеж улосын. Солэн атаез, подпоручик, ас мылкыд каремезъя кошкиз войнае. Анаез революция бере стенографистка луыса ужаны кошкиз Донысь Ростове. Отын Солженицын йылпумъяз шор ёзо школаез, собере - университетысь физикая но математикая факультетэз. Войналэсь азьло ужаса дышетскиз кылтодонъя факультетын. 1941-тӥ арын сӥзьыл Александрез армие басьто. Артиллерияя училищеез 1943-тӥ арын йылпумъяса, лейтенантлэн погонэныз кошке фронтэ. Нош 1945-тӥ арын феврале капитанэз Солженицынэз, со дыре кык орденэз ке но вал, Восточной Пруссиысь Москвае, Лубянкае, конвоен ваё. Тямыс арлы лагере келяло, азьвыл эшезлы, Сталинэз ултӥяса, гожтэт ыстэмез понна. 1953-тӥ арын мартэ, лагерьын пуконэз бырем бере, Солженицынэз келяло Казахстанэ, Кок-Тереке. Отын со школаын пиналъёсты дышетӥз математикалы, физикалы но астрономилы. 1950-тӥ арын, ссылкаысь быдэсак мозмытэмзы бере, выже Россилэн шораз - Владимир улосысь Мильцево гуртысь школае. Ог толалтэ Александр Исаевич эшеныз носилкаен сюй нуллыкуз малпаз лагерьын улэмез сярысь гожтыны. Одӥг нуналэз гинэ тодэ вайыса но татысь быдэс улонэз возьматыны луоз. - Укмыс ар мон со борды ӧй кутскылы, - азьвылзэ малпаса вераз со Би-Би-Си радиолы. - 1959-тӥ арын гинэ ӝӧк сьӧры пукси но ог ньыльдон нунал куспын повестьме вуттӥ. Мон сое "Щ-854" шуыса нимай. Но валтӥсь редактор, Александр Твардовский, "Новый мир" журналаз сое печатлакуз, "Иван Денисовичлэн одӥг нуналыз" шуыны ӵектӥз. Ачиз Хрущев эскерем бере гинэ 1962-тӥ арын ноябре сое печатлазы. Соку ик писатель Симонов но критик Ермилов "Известия" но "Правда" газетъёсын сое вылӥ дунъязы. Та повесть потэм бере, Солженицынлы туж трос адямиос гожтэтъёс ысъязы, кӧняез ке асьсэос лыктыса мадизы лагерьёсын чидам секыт дыръёссэс. Озьы Александр Исаевич тырмыт материал люказ "Архипелаг Гулаг" романзэ гожтыны. Но жаляса верано луэ: "Иван Денисовичлэн одӥг нуналыз" повестез курласьёс но вал. Сое ассэ зӥбыны кутскизы, повестьсэ вань библиотекаосысь куштӥзы. 1964-тӥ арын апреле Солженицынлэсь нимзэ юнме шорысь ӵушыло Ленин премия басьтыны дасям списокысь. Мукет араз КГБ-ын ужасьёс талало "В круге первом" романзэ но литературной архивзэ. Печатланы ӧз лэзе "Раковый корпус" романзэ. 1969-тӥ арын Солженицынэз кушто Писательёслэн огазеяськемысьтызы. Но гожъяськись муртлэн ноку но капчиен сётскемез уг поты. Александр Исаевич, шуг-секытъёс шоры учкытэк, вань кужымзэ сётӥз, "Архипелаг Гулагез" йылаз-пумаз вуттон понна. Чик танӥськытэк вераз: та книгазэ огназ йылпумъяны ӧй быгатысал. Отын тросэз адямиос ас нимынызы верамын. Ӝыны даурзэ Соловкиысь лагерьын ортчытэм Дмитрий Петрович Витковский, оло нош, та книгалэн редакторез луысал, сое пери ӧй ке шуккысал. Вераськыны ӧз ке но быгаты ни, кӧня ке берпум главаоссэ лыдӟыса валаз: ваньмыз сярысь шонер гожтэмын. Солженицын "Архипелаг Гулаг" романзэ 1958-тӥ арын тулыс гожтыны ӧдъяку, лагерьёс сярысь нокинлэн но тодэ ваёнъёсыз, художественной произведениосыз потэмын ӧй вал на. Ог дас ар гожъямез бере гинэ кияз сюризы Варлам Шаламовлэн "Колымаысь веросъёс" гожъямез но кӧня ке авторъёслэн тодэ ваёнъёссы. Озьы ик юрттӥзы писательлы чекистъёслэн но юристъёслэн лыдпусъёссы но мукет материалъёссы. 1968-тӥ арын мае, эшъёсызлэн юрттэмзыя, ваньмыз куинь том печатламын вал. 1970-тӥ арын, А.И.Солженицынлы Нобельлэсь премизэ сётон сярысь иворез кылыса, асьме дорын сое ултӥяны вырисьёс кыӵе но пож ву ӧз кисьталэ вылаз. 1973-тӥ арын августэ "Архипелаг Гулаг" КГБ-лэн ки улаз сюриз. Со ик сюрес усьтӥз та книгаез Парижын поттыны. Гожтӥсьсэ, Солженицынэз, Родинамес вузаз шуыса, кунгож сьӧры келяло. Нырысь ик со сюриз ФРГ-е, собере - Швейцарие. Нош 1976-тӥ арысен улӥз США- ысь Вермонт штатын. Кунгож сьӧрын со поттӥз азьвыл гожъям ужъёссэ но тыршиз бадӟым книгаез бордын. Отын со мадиз революцилэн Россиын февральысен октябрёзь ортчемез сярысь. Америкаысь Россие улыны берытскемез бере, Александр Исаевич нырысь ик телевизор но газетъёс пыр вералляз асьме улонмы сярысь малпанъёссэ. Нош 1994-тӥ арын 28-тӥ октябре вераськиз Кун Думаын. Соку со мадиз США-ысь поездэн бертыкуз начар улосъёсмес адӟемез сярысь. Одӥгаз стаьяяз Александр Солженицын пусъе: "Россиын демократия шуон туннэ чылкак мукет манерен кивалтонэз ватэ. Туала Россиысь газетъёс пачкатэмын коньдоно кузёосын, улонысь лэчыт ужпумъёсты возьматыны алэмын. 1993-тӥ арын дыртыса (но осконтэм) кутэм Конституцияя Кун Дума зӥбемын президентлэн властеныз. Правоосыз пачкатэмын. Али Россиез курадӟыто йыртэманъёс, миллиард долларъёс сылӥсь калык ваньбурез капыръянъёс. Одӥгез но бадӟымез кырсь уж шараямын ӧвӧл. Огез понна но судын кылзэс юамын ӧвӧл. Кивалтӥсьёс лэсьто секыт йыружъёс. Озьы странаез, миллионъёсын калыкез вутто тарканэ но уно сюрс муртэ быдтонэ. Александр Солженицынлэн вордскемез дырысен 80 ар тырмонэн валче Кун Думалэн депутатъёсыз куризы солы "Москва городлэн дано адямиез" ним сётыны. Солженицын аслаз фондысьтыз коньдонэн юрттэ лагерьёсын возем сюрслэсь трос адямилы, литература но культура удысъёсын тыршисьёслы. Озьы ик вордскем гуртысьтыз арлыдоослы но ватсаса коньдон сётэ. В.Чернов. Вячеслав АР-СЕРГИ Кӧлон гур нылылы Пичи гинэ, мусо нылы, Тон изь туннэ ческыт уммен, Кымес вадьсад шудбур тылы Ыректылоз, аляк тӧлэд музэн. Тон вӧта тол уе Пезьгыт но вож гужем куазез. Дунне вылын кезьыт ке та вие - Тон вӧталод шуныт куазез. Сайкыт уйвӧтъёсад укносы долкам Кынмем чияпуос Пушйылозы мусо но салкымак - Йырез поромытӥсь лулъёс. Кынмем шуръёс но эркынак Куштылозы йӧ кортнэтсэс. Зарезь доры соос сэзяк Дыртытозы егит кужымъёссэс. Анаедлэн но уйвӧтаз Выльысь сьӧдмаськозы тӧдьы йырсиосыз, Соку артысь возьвылъёсад Тугокое бичалоды сяськаосыз. Пичи гинэ, мусо нылаш Мырдэм кылӥськымон вазиз на умпумтӥз: - Озьы, озьы. Кыӵе умой вылэм, Нош мон уг быгатскы бырйылыны Уйвӧтъёсме - Кудӥз лыктэ - созэ ик адӟисько. Вордскем нуналам Купите фуфайку - Отдам за червонец. (Николай Рубцов). Апрель. Витетӥез нунал. Пӧртэм пумо аръёс талэсь азьло Кык шундыос юг адскизы син азьёсам - Вордски дунне вылэ. Кык шундыос - анай гадьёс - Шуныт пумитазы монэ. Соос нош кысыса, Вордскем нунал ёсме мӧзмыт пумитасько. Куке но мон улӥ ни кадь дуннеосын, Нош собере лул берытскиз татчы, Курадӟонэ -, Удмурт поэтлэн мугораз. Йырсиосын лымы уг шуна ни, Тол Бабайлы но оскемысь дугдӥ. Кыли чылкак огнам мон Дуннее, Уг буйгаты монэ кылбур чуре - Урамъёсысь куштэм пуны мындалы кӧттыре. Эше кошкиз шуръёс кузя уллань, Вӧтай мон алигес сое - валлян. Нош яратон тылобурдо лобӟе кадь палэнэ, Сое кутны уг тырмы валанэ. Куасьмем сукыриме мӧзмыт мон кушасько, Та кылбурет садын юбо кадь сылӥсько. Вӧзтӥ ортчо адямиос, Уг адӟо со садэз - Поэзия нимо. Огзэ гинэ уг валаськы но паймисько: Куд-огезлэн синъёсазы вожъяськонэз мон адӟисько. ... Одӥг гинэ кылиз на паймонэ... Резюме. Чияпулэсь сяськаоссэ Ежегодно бичасько. Ар-Сергилэсь гожъямъёссэ Ежедневно лыдӟисько. Удмурт урамын пумиськон Пумиськыку ӵыжыт улмо кадь Тон сётӥд Паськыт кикур шабалаяд: - Ӟечбур, эше! - шуид, Пельпумез чабкыса зуркалтӥд. Ачим но шумпотӥ, оло: - Ӟечбур, эше! Эх, кемалась Ӧм адскылэ ни асьмеос. Я, вера, вера ни ӝоггес, Кыӵе-мар улӥськод - Бусьтыр байлык люкалляськод? - Да мар улон, пе, та?! - Эшлэн ымныр ик кисырскиз: - Ӝыны арзэ ини ужам понна Ум басьтӥське коньдон. Кӧтэз тырон - Огез гинэ кылиз на сюлмаськон. Уин уг лыкты ни кӧлон - Ӵуказеез сярысь маза уг ёты Сюлмаськон. Таӵе мылкыд вылысь, Йыре уг лыкты ни ӟыгыръяськон. Нош нылпиос будо, Нунал ке но уг лыктылы шудо. Бадӟым кӧтъёс-кивалтӥсьёс гинэ Кайта ӝукен ялан сюдо. ... Кема на вераськиз эше, Вань бӧрдонзэ вылам кисьтӥз иськем ӵоже, Нош собере ӵектӥз: - Я, пумиськем понна Пыраломы шат сурбаре - Таре чаляк ум адске, дыр? Соку шуи мон лачмытак: - Мылкыд ке вань, эше, Тон пыра сурбарад огнад. Ум шедьтэ асьмеос Вераськонлы огъя инъет: Тыныд монэн мӧзмыт луоз. Марлы? Тон юалод-а? Верало - огкадь малпась Но огкадь ик улӥсь муртъёс Пумиськыса акыльтыло Ог-огзылэсь. ... Эше ӧз вазь ни мон шорам, Озьы кошки мон ас палам. Туж оскеме потэ: Валаз кадь со монэ - Бур киыныз шонтӥз на мон пала. Вамыш Тон лэсьты вал дорам, Пурысь синмо, Мамык кадь небытэсь, Тулыс шунды сиос кадь шунытэсь Синлысъёсын-бурдъёсыныд, Чылкыт нимын эктӥсь Инву мумымылэн Яратоно нылыз - Одӥг гинэ вамыш, Кикур кузьда ке но - Одӥг гинэ вамыш - Дорам. Мӧзмыт мынам гӧртэм юртам-ерам, Сӥзьыл куаръёс усё кадь лул вылам. Тон лэсьты вал дорам. Одӥг гинэ вамыш. Кикур кузьда гинэ ке но - Одӥг гинэ вамыш - Мынам палам. Соку, азьысь ӵашкаосты ик тӥяса, Дорад мон ыбышто, беромыны курдалляса. Сюрес вӧзысь пурысь изэз музэн, Азьпалысьтым кусыпъёсмес висъясь Меӵ гурезез но палэнто. Кузь саникен бышкалтыса, Мон уй-нунал возё Музъем вадьсын Юг шундыез - Мед югдытоз со сюресме. Паськыт зарезь нош Тулкымскиз ке пыд азям, Пӧрмо соку мон чорыглы - Уг йыромы зарезь пушкын - Полысаса лыкто мон тон доры. Одно вуо - Тон кылӥськод-а, Инву ныл? Ӧй шедьты ке Музъем вылысь, Мон утчало тонэ пилем пушкысь - Соку пӧрмо мон турилы, Лобӟо дорад, уз сут бурдме Ӵыжтӥсь яратонэн пиштӥсь Шунды. Тон лэсьты вал дорам Одӥг вамыш гинэ - Нырысь ачид. Нош кылемзэ, сю сюрс иськемъёсты, Дорад мон бызьыса Ортчо. *** Мон вунэто ваньзэ - Со ӵыдонтэм, эбек тюргетэмен Тырмем Тём уйёсты. Со уйёсысь мон вунэто тонэ, Ӟырдыт мугор нуллӥсь Лулэз. Бубли сямен, тылскем шоры, Дорам Дыртӥсь но бурдъёссэ сутӥсь Лулэз. Кыз улвайёс, сирен сяласькыса, Тачыр карса ик ӝуало, Быдэсмымтэ малпанъёсмы Эгыр но пень луо. Мон вунэтӥ ваньзэ, Порыса куштӥ календарьысь Нуналъёсты - Асьме мугор кульчоосты. Тылскем бервылъёсысь Сьӧд эгырен мон гожъясько Кызьпу сулъёс вылэ: -... Мон вунэтӥ ваньзэ... Эн вунэты вал тон гинэ. Троссэ. Оло, быдэсак улонэз Луэ вылэм со эгырен гожтылыны. Лыдӟись ке вань... Быдӟымнал Христос воскресе! Чузъяське дунне вылын Та бадӟымлэсь но бадӟымгес ик нуналын. Ыбиськыло ни инбаме Пезьгыт пучы вайёс. Буям курег пузлэн кӧтурдэсаз Экто аляк шунды сиос. Тушмонъёсмес но чупалом та нуналэ, Вунэтомы куректонмес но огдырлы. Солы-а луыса казак дыръям Синмаськымон ныллэн Тросгес тырши мон сюресаз Шӧдтэк улсын шедьылыны? Христос воскресе! шуомы, Иське,зэмос тулыс вуиз. Я, ойдо куриськом ни уромлы, ... Мар ке сюын но кӧсатскиз... Удмурт Республикаысь Правительствоын Вуиз тау карон Правительстволэн Тӧроез Николай Ганзалы Россиысь Национальной политикая министерствоысь телеграмма вуиз. Отын тау карон кылъёс верамын Дуннеысь финн-угор калыкъёслэсь фольклоръя ВИИ фестивальзэс умой радъямез но ортчытэмез понна. Эскерон золомоз Правительстволэн Президиумезлэн кенешаз 27-тӥ сентябре учкемын шаерамы этил спирт поттонэн но вузанэн герӟаськем ужпумъёс. Таӵе продукция поттонэз но сое вузанэз государство ласянь уката сак эскерыса возён, рыноке урод спирт вуттонтэм вылысь, Правительство лицензиосын ужез умоятон ласянь нимысьтыз закон дасяз. Со эшшо эскеремын луоз на Правительстволэн кенешаз, собере - Кун Кенешын. Этил спирт, аракы поттонэз но вузанэз ӟеч радъян вылысь, кылдытэмын консультативно-экспертной кенеш. Соин кивалтоз Правительстволэн Тӧроезлэн воштӥсез Михаил Назаров. Отчы пыртэмын Вузкаронъя но бытовой услугаос сётонъя, Экономикая министерствоосысь, Вузкаронъя инспекцилэн кун управлениысьтыз, Ижысь администрациысь но куд-ог музон удысъёсысь адямиос. Конкурслы йылпумъянъёс Республикаямы инвестициос висъянъя конкурслы йылпумъянъёс лэсьтэмын. Вормисе потӥзы Россиысь синтэмъёслэн огазеяськонзылэн "Спутник" предприятиез, "Декоративно-цветочные культуры" интыысь предприятие, "Воткинский мясокомбинат" АООТ но "Концерн "Ижмаш" ОАО. Висъям коньдон мыноз производствоез паськытатонэ, кылсярысь, "Юнкер" мотоцикл поттонэ. Тодмо композиторез данъяса Туэ вордскемез дырысен 75 ар тырме тодмо удмурт крезьгурчилы, Россиысь но Удмуртиысь искусствоосъя дано ужасьлы, республикаысьтымы Кун премилэн лауреатэзлы Герман Афанасьевич Корепановлы. Удмурт культураез азинтонын ӟеч ужъёссэ данъяса, композиторлэсь юбилейзэ пусъёнъя программа чакламын. Со понна 21 сюрс манет коньдон висъямын. Гуртлы юрттэт Дэбес районысь Малыгин нимо колхозысь скал гид куашказ. Сое выльдыны 50 сюрс манет уксё висъямын. Правительстволэн Президиумаз мукет ужпумъёс но эскеремын. Дасяське 2000-тӥ арлы бюджет 28-тӥ сентябре Челябинскын ортчиз Урал улосвылэ пырись улосъёслэн но республикаослэн экономической огазеяськонзылэн кенешез. Учкемын вуоно арлы федеральной бюджетлэн инъетэз. Кенеше ветлӥз Правительстволэн Тӧроезлэн воштӥсез Николай Хохлов. Удмурт Республикаысь Правительстволэн пресс-службаез. Кун Кенеш ивортэ Кылем арня вискын Удмурт Республикаысь Кун Кенешлэн Тӧроез Александр Волков Удмурт кун университетысь студентъёсын но преподавательёсын пумиськылӥз. Ужрадэз усьтыса, со пусйиз, ӵапак татын ик туэ март толэзе сётэм кылзэ быдэстӥз шуыса: соку со оскытӥз вал, Кун Кенешлэн Тӧроез выльысь луиз ке, УдГУ-ысь студентъёсын одно ик нош пумиськылоз. Кун Кенешлэн Тӧроез мадиз, кызьы со адӟе но дунъя странаямы но республикаямы ортчись воштӥськонъёсты. 10 ар ӵоже реформаосты малпаськытэк нуэмен, Россия ляб страналы пӧрмиз. Дуннеын но соин ӵемысь уг лыдъясько ни. Кун властьлэн лябеныз ялан премьер-министръёс вошъясько, ваньбур поттон кулэсме, страналэн улонысьтыз вань удысъёсын государстволэн сюлмаськемез чик уг шӧдӥськы. Ӵапак соин герӟаськемын вань ужпумъёслэн выжызы, та югдурез воштыны луоз, Россиын выль Кун Дума но Президент бырйыса гинэ. Туннэ асьмеос ваньмы туж умой малпаськыны кулэ, странамылэн закон кылдытъясь ёзаз медам быръе сыӵеосты, кин чебер вераське но трос сӥзе, мед быръём соосты, кин аслаз тыршеменыз возьматӥз, со ужаны сюлмаське но быгатэ шуыса, кин понна котькуд адями, Удмуртия, Россия котьмалэсь дуно луо. Асьмелы кулэ кужмо, юн но атыкай музъеммес гажась власть но ужаны быгатӥсь, Россия сярысь малпаськись Президент. Кызьы вераз Александр Волков, юанъёслы валэктыса, ӵапак соин ик бырйиз "Отечество" общественной огазеяськонэз. Ужрадэ лыктэмъёслы ивортэмын вал, Россиысь мукет улосъёс пӧлын социально- экономической тодметъёсъя Удмурт Республика куамын улосъёс пӧлын, нош куд-огъёсызъя - кызь но дас улосъёс пӧлын. Кун Кенешлэн Тӧроез озьы ик вераз, республика вылӥ дышетон заведениосысь бюджет интыосты ноку но уз кулэсты, со сяна ваньзэ лэсьтоз, арлы быдэ сыӵе интыослэн лыдзы будоз шуыса. Пумиськон лекция выллем ӧз ортчы, со золгес кельшиз семинарлы, отын уно юанъёс дэмен эскеремын вал. *** Ортчем арня вискын Кун Кенешлэн Тӧроезлэн Нырысетӥ воштӥсез Владимир Агашин кӧня ке кенешонъёс ортчытӥз. Отын эскеремын вал Удмурт Республикаысь территориальной фондъёсы коньдон вуон но сое уже кутон, озьы ик со фондъёслэн вуоно арлы бюджетъёссы. Кылзэмын вал инкуазез утёнъя, сюресъёсъя, минерально-сырьевой базаез выльдонъя, озьы ик обязательной медицинской страхованиея фондъёслэн ивортонъёссы. Куд-ог кивалтӥсьёслэн дунъямзыя, фондъёс ӟеч ужало, озьы ке но Кун Кенешлэн Тӧроезлэн Нырысетӥ воштӥсез вазиськиз "Удмуртавтодорлэн" кивалтӥсезлы Александр Соловьевлы, республикаысь Сюресъёсъя фонд понна кыл кутӥсьлы, та удысысь пунэм тыронъёсты палэнтыны курыса. Кенешонын кутэм решениея Эскронъя кун комитет арлэн пумаз минерально-сырьевой базаез выльдонъя территориальной фондэз эскерыны кулэ. Кенешонъёсы пыриськизы Кун Кенешысь ялан ужась комиссиослэн тӧрооссы, Коньдон ужпумъёсъя но Экономикая министерствоосысь представительёс. *** Ижевскысь Операя но балетъя театрын ортчиз Дышетӥсьёслэн нуналзылы сӥзем праздник. Республикаысьтымы вань дышетӥсьёсты ӟечкыласа, Кун Кенешлэн Тӧроез А. Волков шуиз: дунтэк дышетонэз утён понна лэсьтоно ваньзэ, государстволэн со огез бадӟымез быдэстоно ужпумез луыны кулэ. А. Волков ивортӥз: туэ арлэн пумозяз республикаямы дасо пала выль школаос усьтӥськозы шуыса. Отын дышетскозы кык сюрс пала нылпиос. Ортчем ужрадын устооосызлы дышетӥсьёслы сётэмын Удмурт Республикалэн кун наградаосыз. Кун Кенешлэн пресс-службаез. Кун Думае быръёнъёс азьын Кызьы ивортылӥмы ни вал, та нуналъёсы республикаямы ужа Юрий Маслюков. Со Евгений Примаковлэн Правительствояз вице-премьер вал. Кун Думае депутатэ кандидатэ ӵектэмын 28 номеро Ижевск округъя. Со понна 6670 кинюртэм люкано ке, бичамын ини 10 сюрслэсь ятыр кинюртэм. Юрий Дмитриевичл Маслюков - эрико кандидат, депутатэ мынэ, Удмуртиын улӥсьёслэн, озьы ик республикаысьтымы куд-ог бадӟым предприяиослэн кивалтӥсьёссылэн кичӧлтэмзыя. Со понна дурбасьто Удмуртиысь тужгес бадӟым политической кужымъёс - КПРФ, "Отечество", "Удмурт кенеш" огазеяськон, профсоюзъёс но ветеранъёслэн организациоссы. Экспертъёслэн дунъямзыя, Ю. Маслюков быръёнъёсын вормыны быгатоз. Сое валэктыны луоз тани маин: ужан сюрессэ ӵапак Ижевскын мытӥз, тямыс ар ӵоже научно- исследовательской технологической институтын тыршиз, собере ньыль ар ӵоже автозаводын валтӥсь инженер вал. Юрий Дмитриевич - федеральной кивалтӥсьёс пӧлысь огез, кин экономикаез но пыӵал тӥрлык поттӥсь удысэз улӟытон сярысь зэмос сюлмаське. Кун Думаысь экономикаын политикая комитетэн кивалтыкуз, трос лэсьтӥз асьме ваньбур поттӥсьёслы ужаны юрттӥсь выль законъёс кылдытон понна. Примаковлэн Правительствояз ужакуз но сюлмаськылӥз Удмуртиысь предприятиос, соосын герӟаськем куд-ог бадӟым проектъёсты улонэ пыӵатон сярысь. "Мон Удмуртиен ялан кусып возисько, Россилэн выль парламентаз ужаса но республикалэсь ужпумъёссэ быдэсъяны тыршо", - шуиз Юрий Маслюков. Кык азвесь печатен Кылемаз удмурт арня нуналэ пусйымон учыр вал Удмурт Элькунысь Кун Кенешлэн юртаз - Кун Кенешлэн Тӧроез Александр Волков сюлмысьтыз ӟечкылаз пинал усточиослэн школа- интернатысьтызы "Ингур" капеллаез: татын кырӟась пиос туэ кык азвесь печатен диплом утӥзы Финляндиысь ? Тамперс городын хорен кырӟанлы сӥзем куинетӥ калык куспо конкурсын. Нылпиослэсь такем бадӟым вормонзэс лыдэ басьтыса, Кун Кенешлэн Тӧроез пиналъёслы кузьмаз ксерокс. Будӥсь усточиосты син азязы воземзы понна, шаерысьтымы вылӥ кивалтӥсьёслы тау карыса вазиськиз капеллалэн кузёез, Удмурт кун филармонилэн чеберлыкъя кивалтӥсез Валерий Митрофанов. Соин валче ик пусйиз: "Ингур" азьланяз но шумпоттылоз кылзӥсьёссэ вылӥ устолыкеныз. Матысь дыре ик пиналъёс сюлмысь дасяськыны кутскозы Быдӟым Вормонлы витьтон вить ар но Иисус Христослэн дунне вылэ кылдэмез дырысен кык сюрс ар тырмонлы. Вылӥ быгатонлыкен усточиосты табере тодо ини тросэз. Алигес ӧтён вуиз Ватиканысь. Таӵе гожтэтъёс нылпиосты уката кужмоято, шугадӟонъёслы сётскыны уг лэзё. Туэ дас ар тырме капеллалэн кылдэмез дырысен. Таин валче толсуре ортчоз юбилейлы дасям концерт. Вылӥ кузёос азьын пунэме ӧз кыль "Ингур" но: ӟечкыланы люкаськемъёсты тодматӥз кӧня ке устоесь кырӟанъёсыныз. Кун Кенешлэн Тӧроезлэн Александр Волковлэн такем вылӥ дунъетэзлы тау карыса, озьы ик вераськиз школа-интернатлэн директорез Нина Устюгова. Уӵыос чирдо дугдылытэк... Та нуналъёсы Удмурт Элькунысь Шаертодонъя юртын (Национальной музейын) усьтӥськиз выль адӟытон - со сӥземын улосысьтымы туж тодмо крезьгурчиослы Герман Корепановлы но Геннадий Корепанов-Камскийлы. Та адямиослэн улон-вылонэнызы но уженызы тунсыкъяськисьёс, адӟытонэн тодмастскыса, трос выльзэ учыртозы. Пияла пушкысь ӝажыосы тырем тӥрлык выльысь но выльысь тодамы вайытэ крезьгурен герӟаськем дуннеез. Ӝажыос йырйылын - Герман Афанасьевичлэн но Геннадий Михайловичлэн улон-вылонысьтызы, ужысьтызы туж дуно туспуктэмъёс. Тросэз соос сӥземын та адямиослэн егит вакытсылы. Арбериос чеберлыксэс уз ыштэ уно аръёс ортчыса но. Е. РОМАШОВА. Асӧртэмлыко музей Ижевскысь 25 номеро профессиональной училищеын, кытын дасяло пӧрасьёсты, пыжиськисьёсты, кондитеръёсты, туж аспӧртэмлыко музей ужа. Музее республикамылэн пӧртэм сэрегъёсысьтыз 500 пала пӧртэм пумо экспонат люкамын. Отчы вуылэмъёс тужгес но тунсыкъясько космонавтъёслэн 4,5 граммъем нянеызы. Пичи маке кӧттыр но вылэм, со сяна, ӝыны ар ӵоже уг чырса, уг вужмы, пе. Туннэ нуналлы музее вуылӥзы ни 25 сюрс пала дышетскисьёс. Экспозиция ялан выльдӥське, узырме. Нош выль дауре дасяське пусйыны аслэсьтыз пичи юбилейзэ - дас арзэ. В. РОГАЛЕВ. Гожтӥськон - 2000 "Спид-инфо" люка эшъёссэ "Спид-инфо" издательство юрт 11-тӥ октябрьысен 14-тӥ октябрёзь ортчытэ "Гожтӥськисьлэсь нуналъёссэ". Республикаысьтымы вань почта ёзъёсын та нуналъёсы дунтэмгес дунын гожтӥськыны луоз "Спид-инфолэн" изданиосызлы. Нош 14-тӥ октябре Ижевскысь почтамтын (Киров урамысь 116-тӥ юртын) "Спид-инфолы" вань гожтӥськемъёс понна ортчоз бадӟым праздник. Кутскоз со нуназе 11 часын. Кыкысен куать аресозь нылпиос пӧлын ортчоз конкурс, люкаськемъёс понна озьы ик радъямын луоз викторина но концерт. "Гожтӥськисьлэн нуналъёсаз" газетэз басьтыны мылкыд каремъёс пӧлын соку ик ортчытэмын луоз лотереяен шудон - "Спид-инфолэн" редакциез ӵектэ синпель кузьымъёс, нош тужгес но шудоез утоз телевизор. Кин пыриськыны малпа та ужрадэ, лотереяен шудон ортчоз 16 час 30 минутэ. Собере ини Сарапулын улӥсьлы кузьмалозы автомобиль, "Жигули - бесплатно" конкурсын вормисе потэмез понна. Спорт Вормонъёс но ыштонъёс Ижын ортчиз кикбоксингъя Россилэн чемпионатэз (аспӧртэмлыко бокс, кудаз киосын сяна, пыдъёсын но жугисько). Асьме город юнме шорысь быръемын ӧй вал. Выль удыс шаерамы выжыяськиз, уно егитъёс та спортэн эшъясько. Ӵошатсконын Удмуртиысь пиос 5 зарни медаль басьтӥзы. х х х Футболъя "Газовик" команда бӧрсьысь куинь шудоназ очкозэ келя ни. Астраханьысь "Волгарь-Газпромен" со дораз 2:2 лыдын пумиськонзэ йылпумъяз (озьы 2 очкозэ ыштӥз). Тулаын татысь "Арсенал" командаен нюръяськон "Газовик" понна умой кутскиз вал, Ижысь футболистъёс 2:0 лыдын азьпалан мынӥзы. Но вазьгес буйгатскиллям. Бератаз асьсэ капкае туп куинь пол пыраз. Турнирын малпамтэ шорысь азьпала потӥз Махачкалаысь "Анжи". Со бӧрсьын мыно Воронежысь "Факел" но Калининградысь "Балтика". Ижысь "Газовик" 8-тӥ интые лэзиськиз. х х х Хоккейя "Ижсталь" команда но канжаськиз. "Кедрлы" со 1:2 лыдын келяз. Зэм, кыкетӥ ӝытаз пиосмы тупатскизы, 352 лыдын вормизы. М. КУЗЬМИН. Вал куиськись, луиз эмъясь Фаина Семеновалэн палатае капельница пуктон арбериосыныз пырыкуз ик мылысь-кыдысь, серектыса вазиськемез секыт сюлэм висёнэн курадӟись адямиослэсь но мылкыдзэс небӟытэ. Лул-сюлмысь потӥсь шуныт мылкыд усто эмъюмлэсь но ӟечгес юрттэ висисез бурмытыны. Оломар йылтӥ со вирсэрез шедьтэ но, лэчыт веньлэсь мугорад бышкалскемзэ уд ик шӧдӥськы. Ас удысаз ӟеч тодӥсь-валась но усточи луэмез понна, Фаяез, висисьёс сяна, кыкетӥ республиканской больницаысь ваньмыз сямен тыршисьёс юн гажало но сӥлы каро. ... Тура начальной но Красногорск шор ёзо школаосын дышетскыкуз но нылашлэн йырвизьмаз эмъян уж сярысь малпанъёсыз ик ӧй вал. Кӧшкемыт ож йылпумъяськем бере, гуртъёсын улон-вылон секыт вал на. Нош Семеновъёслэн семьяязы ньыль пичиесь нылпиос будо. Анай-атайзы вань сюлэмзэс сётыса тыршизы колхоз ужын. Бакчазэс, пудо-животсэс но утялтыны кужымзы тырмылӥз. Трудодень понна нош колхоз туж ӧжыт тырылӥз. Сӥльлэсь-йӧллэсь ӧжытак ке но поттэм коньдонзы вытлы (налоглы) но государственной заёмъёслэн облигациоссылы кошкылӥз. Соин ик егит нылаш ӵем гинэ малпаськылӥз городэ кошкон но кыӵе ке уже интыяськон сярысь. Анай-атаез но нылзылэсь таӵе малпанъёссэ умоен лыдъязы. - Нош кин мыным, гуртын вордскем муртлы, паспорт сётоз? - юалляськылӥз Фая мӧйыослэсь. - Сюлэмдэ сокем эн чигты, нылы - буйгатыны выриз ож пыр ортчем атаез. - Тани газетъёсын гожъяло: Иваново улос егит нылъёсты куиськон удыслы дышетскыны но отын ужаны ӧте. Оло, ветлыса оскалтод? Кин тодэ, шудэд ке вань, инмаред утёз... Чырмыт но кышкасьтэм нылаш кутӥз но шонтӥз Иваново улосысь пичигес Родники городэ. Куиськон фабрикаын калык тырмымтэен, уже кутӥзы. - Вордскем сярысь свидетельствоедъя но школаез йылпумъямед сярысь аттестатэдъя ми йӧндыром тыныд паспорт, - шуизы фабрикаысь кадръёсъя отделын. Ваньмыз пӧрмиз, Фаялэн малпамезъя. Паспорт басьтэмын, выль ужлы но каньылля дышиз, общежитие но инты шедьтӥзы. Ар пала тырше ини со куиськон удысын. Нош сюлмыз ялан кыске вордскем удмурт шаераз. Гуртысь ыстэм одӥгаз гожтэтазы нылашлы ивортӥзы: Кам шур дурысь Воткинск гидроэлектростанциез лэсьтӥсьёслэн Чайковский нимо выль городысьтызы буртчин куись выль комбинатэ ужасьёс кулэ. Шумпоттӥсь ивор нылашлэсь мылкыдзэ бугыртӥз. "Малпаськыса пуконо ӧвӧл, одно ик мыноно Чайковский городэ. Вордскем удмурт шаереным артэ ук, бускель Пермь улосын ке но", - ӵогыса куштэм кадь малпаз Фаина Семенова. Фабрикаысь кивалтӥсьёс нылашез валазы но ужысьтыз лэзьыны пумит ӧз луэ. Ар пала тыршиз нылаш Чайковский городысь комбинатын. Тӧдьы Кам дурысь город туж чылкыт но чебер, ужез но сюлэмъяз кадь. Ужа но ужа кадь. Нош малпанъёсыз кытчы ке весь ӧтё. Огпол нылмурт тодматскиз комбинатлэн эмъяськоннияз ужась медсестраен. Трос пол мылысь-кыдысь вераськемъёссы бере, Фаялэн эмъясьлэн ужезлы дышетскемез потӥз. - Мылкыдыд ке вань, эн ӝегатскы. Асьмемын артэ, Кам дурысь Сарапулын, вань медучилище. Гожты отчы куриськон. Тон егит на, ужаны вуод ай, - ӵектӥз эшез. 1975-тӥ арын Фаина Геннадьевна луиз эмъясь. Ужаны Сарапулэ ик кельто вал. Зэм, чик малпамтэ шорысь Ижысь одӥгаз ӟеч эмъяськонние шедиз. Нош югдур таӵе вал. Вордскем гуртаз толэзь ӵоже шутэтскемез бере, нылок Иже потӥз. Автобусын кемалась тодмо эшеныз Люба Перминоваен артэ пуксьыны кемдӥз. Кыл бӧрсьы кыл. Медучилищеез йылпумъямзэ тодыса, эшез Фаялы ӵектӥз: - Уж утчаса, олокытӥ эн ветлы. Ойдо ми доры - кыкетӥ республиканское. Ачим ӵекто валтӥсь врачмылы Евдокия Николаевна Крюковалы. Оскисько: пумит уз луы. Со дырысен кызь ньылетӥ арзэ ини тырше Фаина Геннадьевна Семенова та юртын. Усто эмъясь луэмез сяна, мылысь-кыдысь пыриське коллективлэн улоназ. Уно аръёс ӵоже ни кардиологической отделениысь ужасьёслэн профоргзы луэ, со сяна - эмъяськонниысь бордгазетлэн редколлегиезлэн членэз. Фаина Геннадьевна понна вань улытозяз синпель луоз Удмурт Элькунысь но Россия Федерациысь калык суредасьлэн Алексей Павлович Холмогоровлэн, та больницаын эмъяськылыкуз, солэсь зэмос туссэ-буйзэ но образзэ кылдытэмез. А. П. Холмогоровлэн ужез возьматъяськылӥз уно пӧртэм выставкаосын. Художниклэн кузпалыз кузьмаз со суредэз аслыз эмъясьлы. Шудбур но тазалык тӥледлы, Фаина Геннадьевна! Тӥледлы, калыклэн тазалыкез сярысь жадёнэз тодылытэк сюлмаськисьлы. Леонид Емельянов. Редакциысь тӧр шорын Меӵ ярдурлэсь уг кӧбераськы Трос тунсыко адямиос вуыло "Удмурт дунне" газетлэн редакцияз. Таяз учыре бадӟым куно вал егит журналист, "Московский комсомолец" газетлэн корреспондентэз Валерий Батуев. Москваысь кун университетын дышетскыкуз ик кыдёкысь удмурт гуртын вордӥськем но быдэ вуэм пиёк ужаны кутскиз "Аргументы и факты" газетлэн редакцияз. Отӥяз та удыс сокем яраз - дышетсконзэ йылпумъяса кылиз татчы ик. Лыдӟисьёслы матысь эш луыса, соосты вакчи дыр куспын паймытыны вуиз адямиос но учыръёс сярысь яркыт но лэчыт, меӵак но могак веранъёсыныз. Леонид Кравчук, Сергей Бабурин, Доку Завгаев, Умар Автурханов, Мовлади Удугов, Аскар Акаев, Инна Ласовская, Иоланда Чен сярысь табере верасько ни быдэс дуннеын. Нош ассэ гожъясез оглом тодэ ни быдэс РОссия. Редакциысь тӧр шоры пуксьыса, кыдёкысь куномы мадиз Москваын улэмез-вылэмез, туала журналистика сярысь. Амалтэк ӵошатоно луисько азьвыл но али вакытъёсме. Москваысь кун университетын дышетскыкум но собере кӧня ке ар ӵоже ужаны кылдӥз "Аргументы и факты" газетлэн редакцияз. Та удысэз сюлэмы куремъя бырйи бере, куддыр чидано луэ ни чылкак малпамтэзэ но. Огпол гожтӥ армия сярысь. Гожтэтам ивортӥ: солдатъёс куддыр мултэс эрказъясько, киысьтызы пыӵалзэс но ыштыло. Кивалтӥселы ӧз яра тазьы "мыдланьяськеме". Мыным оскытэк кушетскиз: армиын сыӵеез ноку уз луы. Мынам кӧты укыр ӝож луиз: гожтэтам мади вал ук зэмос учыръёс сярысь. Котькызьы пумитъяськыны вырыса но чылкак дась ужысьтым тужгес лыдӟымон вадессэ куаӵак вандӥзы. "Московский комсомолец" газетлэн редакцияз шукрес выро мултэс чеберъяськонэн, укыр огшорыяськонэн. Москваысен телефон пыр огпол кенешыны кылдӥз курдъёслэн азьветлӥсенызы (ӵапак эмъяське вылэм). Гожтэтэлы ним сётӥ, отын верам учыръёсты лыдэ басьтыса. Нош редакциысь эшъёсы йыръяллям ас тодэмдыя. Пумозяз тупатъям-выльдэм уже лыдӟись доры вуиз таӵе нимын: "Оджаллан, киостэ лэзь!" Тазьы гожтэмез адӟыса, курдъёс туж йыркуръяськизы. Редакцилэн куремезъя, ӵемысь потано луэ матысь кунгож сьӧры но. Огпол пумиськылыны кылдӥз Киргизилэн Азьветлӥсеныз Аскар Акаевен. Пинал дыръяз та адями пудо возьмам. Зэм, со сярысь гожтыкум ӧй ик малпа, мадёсэлэн йыръянэз ӵапак та учырен герӟаськемын луоз шуыса. Ачим огкылысь луытэк, веранэ газет бамын печатласькиз таӵе нимын: "Азьвыл кутычи (пудо возьмась) луиз Азьветлӥсь". Кызьы учком на табере Президентлэн синъёсаз? Азьвылаз газетын ужакум, трос гожъяй Чечня сярысь. Татын ожъёс кутскон сярысь вазьгес ик тодо вылэм ини. Зэм, соосты алон вылысь, нокыӵе ужрадъёс чаклаллямтэ. Таин валче тодам лыктэ тазьы верамзы. Чечнялэн Тӧроез Джохар Дудаев дворецаз пуке, одӥг но пигонэз вырӟытэк. Нош солэсь юртсэ котырто ни. Та сярысь телефон пыр ивортэмзы бере но Тӧро нырысь-валысь уг оскы. Сюлэмыз мае ке шӧдыса гинэ шуак учке укное. Ульчаысь шукрес суредэз учыртыса, чылкак бакоме: дворец быдэсак кульчоямын ни. Али быдэсъяно уже ӵапак герӟаськемын ож удысэн. Туннэ трос гожъяло-верало Дагестан сярысь. Татын жугиськон мыныку, тодмо вал одӥгез: гурезьёсы пыӵал тӥрлык вуэ сьӧрлось. Тапала потаку но адӟыны кылдӥз сое ишакъёсын нуллэм сюресъёсты. Москваын тамында улыса, трос пол пумиськылӥ ни уно политикъёсын. Соос пӧлын ӵемгес бергаськод бере, куддыр синйылтыны кылдэ аспӧртэмлыко адямиосты. Тодмо депутат Владимир Жириновский Кун Думаын одӥг, ваче вераськыку - чылкак мукет. Али трос верасько но гожъяло Россилы выль кузё быръён сярысь. Юрий Лужков мыным сокем ик уг яра. Кин тодэ, Россиен азьланяз кивалтоз ай, оло, Евгений Примаков?.. Зэм, политикаысь туж-туж тунсыкозэ тодэмед потэ ке, шедьты мудрон амалъёс. Адями мед юрттоз тыныд лушкем. "Аргументы и факты" газетлэн редакцияз сыӵе иворчи вал Сергей Шахрай. Соиз но, таиз но газет туж висъясько котьма ласянь. Нырысетӥзэ дася ке ог куинь сю адями, кыкетӥзэ - ог кык сю. Нырысетӥяз лэчыт визез ӟечгес дунъяло (газетлэн одӥг бамыз сылэ вал тямыс сюрс манет), кыкетӥяз - лябгес. Зэм, вань огкадез но. Созэ но, тазэ но ортчыт ярато сьӧрлон но: соослэсь но, милесьтым но гожъямъёсмес яратыса лыдӟо Америкаын, Италиын, мукет кунъёсын улӥсьёс. Сояз но, таяз но тынад йыр йылад данак кивалтӥсьёс. Газетын печатласьконо уждэ котьку сямен нырысь ик лыдӟе меӵак кивалтӥсед, ачиз ӧвӧл дыръя - сое воштӥсьёс. Сояз но, таяз но газетъёслы-журналъёслы гожтӥськон вадес та ужез радъяло соин нимысьтыз вырись адямиос. *** Пӧртэм интыосы вуылыса, мыным пумиськылыны кылдӥз ни пӧртэм выжыосысь адямиосын. Верасько но соос турлы кылын. Зэм, ачим ӟечгес тодӥсько немец кылэз. Вакыт ортчемъя басьтӥськоно ни, дыр, бадӟымесь ужъёс борды но. Алигес ӟуч кылын гожтӥ чечен ожъёс сярысь верос. Дыр ӧвӧлэн, удмурт кылэ берыктыны таки уг кылды. Та ужме пумозяз быдэстӥ ке, печатланы сёто "Кенеш" журналэ. Улон-вылон Москваын дуно. Муртлэн корказ каръяськемед понна, кузёедлы толэзьлы быдэ тыроно луэ кисыяд пырем уждунэдлэсь куинетӥ люкетсэ. Удмурт выжыме уг ватӥськы. Тодмоосы эшъёссылы мон сярысь пальпотыса ивортыло: "Это наш эксклюзивный удмурт". Удмурт шаерелэсь кемалась люкиськи ни ке но, уйвӧтам ӵемысь вуылӥсько вордӥськем палъёсам. Гуртам бертӥсько ке, соку ик нюлэскы кошкисько. Кыдёкысь Москваын улыса, сюлэм дор паллэсь лекос мӧзме. Елена Виноградова. Тусбуйзэ пуктӥз Владимир Камашев. Кун Кенеш ивортэ Валлян Кун Кенешын Обществоез кышкытлыклэсь утёнъя кенеш люкаськылӥз. Удмурт Республикаысь югдурез утёнъя министр Владимир Щербаков но Кун Кенешысь законностья, обществоез кышкытлыклэсь утёнъя, гражданъёслэн правооссыя ялан ужась комиссилэн тӧроез Михаил Кокорин люкаськемъёслы ивортӥзы шаерамы буёло кортэз бичан но вузан удысын югдур но сое тупатон амалъёс сярысь. Пусъемын вал, кортэз лушканэн герӟаськем уголовной ужъёс туэ, миымен ӵошатыса, 1,5 пол тросгес луизы, нош буёло кортэн герӟаськемъёсыз - 3 пол. Шӧдскымон будӥз йыруж лэсьтӥсьёслэн лыдзы, 161-ысен 463-ёзь. Кенешын та ӟырдыт ужпумъя уно ӵектонъёс сётэмын вал "Кылсярысь, Кун Кенешлэн депутатъёсызлы дэмламын сессия дыръя нимысьтыз законопроектъёсын пакетэ эскерыны. Со сяна предприятиослэн но организациослэн кивалтӥсьёссэс косэмын корт сырьёез но солэсь продукциез утён сярысь юнгес сюлмаськыны. Обществоез кышкытлыклэсь утиськонъя кенешлэсь заседанизэ нуиз Кун Кенешлэн Тӧроез Александр Волков. *** Кун Кенешлэн Тӧроез, Дышетӥсьлэн нуналэзлы сӥзьыса, Ижевск городысь школаослэн директоръёссы понна кун приём ортчытӥз. Пумиськон дыръя Александр Волков люкаськемъёсты Удмурт Республикаысь югдурен тодматӥз но профессиональной праздникен ӟечкылаз. Приёме лыктэмъёс дышетон удыс азьын сылӥсь ужпумъёсты эскеризы. Кылсярысь, Кун Кенешысь наукая, дышетонъя, культурая но егитъёсын ужан политикая ялан ужась комиссилэн тӧроез Алексей Красильников люкаськемъёсты тодматӥз Россия Федерациын Дышетонэз азинтонъя доктриналэн инъетэныз. Доктрина 2000-тӥ арын улонэ пыӵаны кутскоз но 25 ар ӵоже ужалоз. Документ Федеральной Закон выллем кутэмын луоз. Ӵапак соин герӟаськозы дышетон удысъя мукет законъёс. Директоръёс Кун Кенешлэсь Тӧрозэ сюлмысь тау каризы пумиськемез понна. Та ужрад возьматӥз, республикалэн кивалтӥсьёсыз дышетон удысысь ужпумъёсты тодо, соосты быдэстыны тыршо. Кун Кенешлэн пресс-службаез. Музъемез вузан-басьтонлэсь утизы Туала Кун Думаын ужа 450 депутат, со пӧлысь 158-эз - КПРФ-лэн членъёсыз. Кыӵе ужпум пуктӥзы вал ас азязы 1995-тӥ арын депутатъёс-коммунистъёс? Соос быръёнъёсы мынӥзы "За нашу Советскую Родину!" девиз улсын. КПРФ соку кыл сётӥз Россиын улӥсь калыклэсь правооссэ утьыны ужан, шутэтскон, дышетскон, эмъяськон ласянь. Депутатъёс- коммунистъёс ӵектэмъя, Кун Дума лэчыт вераськон ӝутӥз уждунэз, пенсиосты, стипендиез но пособиосты тыронэз ӝегатон пумысен. Кутэмын постановлениос предприятиослы но калыклы электрокужымез висъянъя, электрокужым поттӥсь предприятиосты толлы дасянъя. Депутатъёс-коммунистъёс косэмъя, Кун Дума парламент азьын политической дунъет сётӥз беловежской соглашенилы. КПРФ та дыр ӵоже ассэ валтӥсь политической кужымен возьматӥз. Пусйыны кулэ тазэ но: депутатъёс-коммунистъёс дэмламъя улонэ пыӵазы калыклэсь правооссэ утёнъя пӧртэм пумо законъёс. Соос пӧлын "РФ-лэн Правительствоез сярысь", "Мумытэк-бубытэк кылем нылпиослы ватсаса юрттон сярысь" но мукетыз. Дасямын странамылэсь обороназэ юнматонъя, военно-промышленной комплексэз азинтонъя, военной реформаосты ортчытонъя законлы инъет. Коммунистъёс-депутатъёс но аграрникъёс ӧз сётэ гыроно-кизёно музъемез вузлы пӧрмытыны. Соос дэмламъя кутэмын "Агропромышленной комплексэз государство ласянь возён сярысь" Закон но пӧртэм пумо постановлениос. Коммунистъёслы-депутатъёслы уг яра Президентлэн политикаез, соин валче Россиысь калык пумен начарме, страналэн экономикаез ялан куашка. Соин ик КПРФ вань быгатонозэ лэсьтоз, югдурез умой пала воштон понна. КПРФ-лэн Удмурт Республикаысь комитетэз. Гожтӥськон - 2000 Ныпъет интые - прицеп "Удмурт дуннеез" лыдӟисьёслэсь лыдзэс будэтон вылысь, республикаысьтымы почтальонъёс куспын 2000-тӥ гожтӥськон арлы "Кин тросгес вӧлмытоз?" ӵошатскон ялӥськом. Отчы пыриськыны быгатозы нимаз-нимаз адямиосын ужась городысь но гуртысь почтальонъёс. Ӵошатсконэ пыриськон вылысь, котькудӥз соос пӧлысь газетмылы гожтӥськытыны кулэ 30-лэсь трос муртэ. Гожтӥськон ар йылпумъяськыку, газетмес тужгес но трос вӧлмытэм почтальонъёс пӧлын ортчытэмын луоз лотереяен шудон. Кузьым - мотоцикллы груз нуон-ваён прицеп. Газетмылы ас юрттэтсэ нош ик дэмла "Ижмаш-Мото" завод. Кызьы тодӥськоды на, луоз, кылем арын лыдӟисьёс пӧлын шудытэмын вал коляскаен мотоцикл. Газетмылэн тужгес но матысь юрттӥсьёсыз котьку но вал урамъёстӥ секыт ныпъетэн вамышъясь почтальонъёс. Одӥгез соос пӧлысь пельпумзэ золтӥсь ныпъетэз табере воштыны быгатоз прицепен. Озьыен, "Удмурт дунне" газетэз эшшо но тросгес лыдӟисьёс пӧлын вӧлмытон муг вань. Я, бен, кин шаплыгес? Донорлэн нуналэз Сентябрь толэзьлэн кыкетӥ ӝыныяз Ижевскысь акциосын "Буммаш" огазеяськонын ортчытӥзы донорлэсь нуналзэ. Пусйыны кулэ, берлозэ таӵе ужрадэз радъязы вал туэ март толэзе. Таяз учыре но заводлэн здравпунктаз уно адями люкаськиз, мылкыд каремзыя 118 мурт вирзэ сётӥз. Шумпотыса ивортӥськом, вирзэс сётыны мылкыд карисьёс пӧлысь тросэз сӥё-дано доноръёс луо. Кылсярысь, 217-тӥ отделын ужась Валентин Галичанин вирзэ 85 пол сётӥз, 854-тӥ управлениын но 540-тӥ цехын ужасьёс Валентина Шнайдер но Иван Александрук - 60 пол, 284-тӥ отделын тыршись Анна Васюкова - 50 пол, 537-тӥ цехысь Галина Пашкина - 48 пол. Со сяна, 40 пол вирзэс сётӥзы ни 218-тӥ отделысь Любовь Поздеева но 21-тӥ цехысь Леонид Ефремов, 30 пол сётӥзы 256-тӥ отделысь Виктор Князьков но 130-тӥ цехысь Андрей Миллер но мукетъёсыз. Тазалыкез эмъясьёс малпало, "Буммаш" ОАО-ын азьланяз но доноръёслэн лыдзы уз кулэсмы шуыса. В. НИКОЛАЕВА. Удмурт Республикаын улӥсьёслы вазиськон Пуштылон учыръёс бӧрсьысь бӧрсе Буйнакск, Москва но Волгодонск городъёсын ортчемен валче, Странаямы югдур нуналлы быдэ ӟырдаз. Соку трос адямиос бырыны шедизы. Республикаысьтымы правоосты утёнъя органъёсын ужасьёс пӧртэм ужрадъёс ортчытъяло, соос эскеро улон юртъёсты, промышленной предприятиосты, учреждениосты, организациосты но улон-вылонысь тужгес но кулэ интыосыз. Терроризмлы пумит ужрадъёс ортчытыку, правоосты утёнъя органъёсын ужасьёслы луонлык сётэмын нокыӵе ӝегатонъёстэк пырыны улон юртъёсы, сад-бакчаосы, осконтэм адямиосты, соослэсь котырзэс но машиназэс эскерыны. Таӵе амалэн эскерон юрттоз законъя кутӥськисьтэм пыӵал тӥрлыкез шараяны. "вихрь-антитеррор" операция дыръя гинэ шедьтэмын 400 пыӵал тӥрлык, 1500 патрон, килограмм мында пуштытӥсь арбериос, пуштытӥсь 2 механизм но 16 пурт тӥрлык. Туэ гинэ шаерамы ар кутскем дырысен, пыӵал тӥрлыкез уже кутыса, сю пала йыруж лэсьтэмын. Юромо дасяса дасо мында адями быдтэмын, 30 палаез сӧсыртэмын. Пыӵал тӥрлыкез законэз чаклатэк кутэмен валче, трослы йылӥзы пӧртэм йыружъёс. Удмурт Республикаысь правоосты утёнъя органъёсын ужасьёс вань калыклы вазисько: законэз тӥяса возем пыӵал тӥрлыксэс ас мылкыд каремзыя сётӥзы ке, сыӵе адямиос нокыӵе кыл кутоно уз луэ. Сое басьтозы югдурез утёнъя органъёсысь город но ёрос службаосысь дежурнойёс. Сётэм пыӵал дунъямын луоз коньдонэн. Кин ас мылкыд каремезъя пыӵал тӥрлыксэ сётоз, со вылэ уголовной уж ӝутэмын уз луы, нош мукетъёсыз кыл кутозы законъя. Калыкез куриськомы сакгес кариськыны, йыружъёсты палэнтон, йыртэмасьёсты шараян вылысь огъя юрттэт сётыны. В. ПОХОДИН, Удмурт Республикалэн прокурорез, огазеясь кенешлэн тӧроез, юстицияя 2-тӥ классэн кун советник. Удмурт Республикаысь Правительствоын Правительстволэн кенешаз эскеремын кун ваньбурез люконъя законлэн инъетэз. Со умоен лыдъямын. Кун Кенешлэн сессияз сое юнматэмзы бере, государство но инвесторъёс огкылэ вуыса люкыны но эскерыса возьыны быгатозы республикамылэсь минерал узырлыкъёссэ. х х х Федеральной законэз чакланъя "Удмурт Республикаысь калыкез уже кутонъя" законэ куд-ог ватсанъёс пыртэмын луозы. Кылсярысь, ӵектэмын ужтэк кылемъёс пӧлы пыртоно адямиослэсь лыдзэс герӟаны бюджетлэн коньдон висъяны быгатон луонлыкъёсыныз. Пособиос висъяку озьы ик учконо адямилэсь уж утчан мылкыдзэ. Пособилэсь вылӥ быдӟалазэ тупатоно республикаямы улыны чаклам нормая. х х х Россиысь Сбербанклэн Удмуртиысь банкез азьын Правительство кыл кутоз "Ижмаш-Авто" ДОАО-лы одӥг арлы 27,1 миллион манет тыр коньдонэн юрттэт сётон сярысь. х х х Правительстволэн постановлениезъя Ижевскысь кун технической университетлэн огез ёзэзлы "Стрелковой пыӵал тӥрлыкъя институтлы" сётэмын Михаил Тимофеевич Калашниковлэн нимыз. Удмурт Республикаысь Правительстволэн пресс-службаез. Мар вал октябре 1914-тӥ ар - 85 ар талэсь азьвыл 20-тӥ октябрь - Россия ялӥз Турцилы тылож (война). 1939-тӥ ар - 60 ар талэсь азьвыл 27-тӥ октябрь - Россия Литвалы сётӥз Вильно городэз но Вильно краез. - Западной Украина но Западной Белоруссия пыртэмын СССР-е но сётэмын Украиналы но Белоруссилы. 1944-тӥ ар - 55 ар талэсь азьвыл Тува Калык Республика пыриз СССР-е но пӧрмиз РСФСР-ысь Тува автономной областьлы. Али со - Россиысь Тыва Республика. 13-тӥ октябрь. Рига мозмытэмын немецъёс улысь. 17-тӥ октябрь. Асьме войскоос выжизы СССР-лэн шунды пуксёнысьтыз кунгож вамен но пыризы Восточной Пруссие. 22-тӥ октябрь. Асьме войскоос потӥзы Норвегиен кунгож дуре. 28-тӥ октябрь. СССР, Великобритания но США гожтӥзы Болгариен огдырлы тупан (перемирие) сярысь тупанкыл (соглашение). 1949-тӥ ар - 50 ар талэсь азьвыл Латвиын, Литваын, Эстониын, Западной Украинаын но Западной Белоруссиын кужмысь кылдытэмын колхозъёс. 1959-тӥ арын - 40 ар талэсь азьвыл 7-тӥ октябрь. "Луна-3" станция Толэзь котыртӥ лобиз но солэсь мукет палзэ фотосуредэ пуктӥз. 1989-тӥ ар - 10 ар талэсь азьвыл 9-тӥ октябрь. Кутэмын ужын тупамтэос сярысь закон, лэземын забастовкае потаны. Тазьы кылдӥз "Чукдор"... Удмурт кылбурчиез Степан Павлович Широбоковез кемалась тодӥ. Нырысьсэ пумиськи соин Зура селоын улыкум. Бӧрысь поэтэн ӵош ужамы Дэбесысь "Выль сюрес" газетлэн редакцияз. Гужемъёсы ӵем гинэ пукылӥм, Чупчи шур дурын чорыгаса. Журналистикае шонер сюрес лёгыны Широбоков трос юрттӥз. Ялан шуылоз вал: "Блокнотад пӧртэм жанръёслы тупась материалъёс утчано. Куд-огез толэзь ортчыса но уз вужмы - газет баме сётыны котьку дась луоз". Поэт гуртъёсы потаны тужгес но яратэ вал тулыс, кидысэз муосы согон, ӟег сюрелан, турнан, етӥн сяськаян, ю-нянез утялтон вакытъёсы. Степан Павлович тамак уг кыскы вал. Нош колхозъёсы потыкум, кисыяз одно ик "Беломор" папирос нуллӥз. Паймыса учкылӥ озьы пӧртмаськемез шоры. Огпол юано кариськи. Соку пальпотыса шуиз: - Трактористэн, комбайнёрен кыл мытон со. Соку воргоронлэн бызись ошмесэз золгес ӧръяське. Трос юанъёс сётытэк, ачиз ваньзэ вералоз. Одӥг шулдыр гужем нуналэ "Труженик" колхозэ ветлӥм. Вань ужмес быдтыса, бертыкумы Изнегвай гуртысь пӧйшурась Яков Григорьевич Корепанов доры пыраны ӵектӥз (али гуртэз но, пӧйшурасез но ӧвӧл ни). Капкаетӥ пырыку, син шоры йӧтӥз корказь борды думем бадӟым пуныез. Ачиз кузё гид палан струген лопата ныд волятэ вал. Ужзэ куштыса, дорамы вамыштӥз. - Тазэ тодмай: редакциын ужась. Нош тӥледды тодам малы ке но уг ваиськы, - Степан Павловичлэсь кизэ кутыса шораз мыр-мыр учке. - Пересь визь но сураське ни, лэся. Широбоков кадь тон, озьы-а? Бӧрысь кыкназы ик ӝик-ӝик ӟыгырскизы. Льӧмпу улысь скамья вылэ пуксим. Кемалась пумиськылымтэ эшъёслэн вераськонзы ӧръяськиз. Нош кузпалыз со куспын ӝӧк вылэ пӧртэм сиёнъёс вуттэм ни. Соку вунонтэм кылиз куасьтэм койык но гондыр сӥль сиеммы. Али ке но куажыр вазе на кадь со пинь улын. Сыӵе сӥлез шӧмъяме ноку ӧй вал. Ӝӧк сьӧрын вераськон куспын дырлэсь ортчемзэ ик ӧм шӧдылэ. Бертыкумы Степан Павлович пыр-поч валэктӥз, кызьы шедьтӥз со "Чукдор" драмаезлы сюжет. - Тазьы вал со, - кутскиз мадьыны поэт. - Зура селоын улыкум, огпол нюлэскытӥ эмезяса ветлӥсько. Ӝыт вуэмез валаса но ӧй вутты. Йыромыса Искалмувыр гурт доры потӥськем. Куазь но пеймыт луэ ни. Тӥни соку пумиськи ог витьтон аресъем воргоронэн. Тыбыраз пыӵал ошемын, вӧзаз котыръяське бадӟым пуныез. Кыл бӧрьсы кыл - тодматским. Мон, пе, Изнегвай гуртын улӥсько, Зурае бертыны бер, дорам мыныса кӧлом, шуэ. Пумитъяськыны кужыме ӧз тырмы: луд вылын уйдэ ук ортчыты ук - сьӧраз вамыштӥ. Кема вераським ми соку пӧйшурасен. Улоназ пӧртэм учыръёсын пумиськылэм со. Огпол нюлэскысен койыклэсь али вордскем кунянзэ пумитам. Кема эскерыса улэм сое. Нунал-кык ортчыса но мумиз вуымтэ. Малпам: быдтӥзы. Соку кунянэз дораз ваем. Ним но "Чукдор" сётэм. Скал йӧлын люктаса, нянь юдэсэн сюдыса возем. Койык пи ӝог дышем адями борды. Нюлэскы потыса но бордысьтыз уг, пе, кыльылы ни вал. Сӥзьыл, музъем кынмыса но лымы усьыса, пӧйшурась вордоссэ кыдёке, сике, кельтэм. Нош соиз сюдӥсьсэ вунэтымтэ: арня ортчыса, гуртэ вуэм. Ар-кык ортчыса, койыкез син азьысьтыз чиптэм- чаптэм ышем. Бӧрысь тодэм ни: пӧйшурез браконеръёс быдтӥллям. Та учыр бере, пе, быдэс ар пала нюлэскы ӧй ветлы. Ма ватонэз: пӧйшурасьлы йыркуро адямиос ӧжыт ӧй вал. Соин но, вылды, солэсь кыксэ ӟеч пунызэ кас сямо бускельёсыз быдтӥллям. Дорам бертыса, Корепановлэсь верамъёссэ блокнотам вакчияк гожтӥ. Бӧрысь трос малпаськи та учыр сярысь. Нош сӥзьыл пу пильылыкум, йырам чилектӥз кадь: одно ик драма гожтоно. Тӥни озьы кылдӥз "Чукдор" пьесае но. Калыкен пумиськылыса, соослэсь вераськемъёссэс кылзыса, поэтлы выль кылбур чуръёс кылдытыны, верос яке очерк гожтыны сюжет шедьылӥз. Митрофан МОСОВ. Школаос - лауреатъёс Арлы быдэ быдэс Россиын ортчыло пӧртэм пумо конкурсъёс. Одӥгез тужгес но бадӟымез луэ, дыр, "Школа года-99" конкурс. Та ужрадэ пыриськизы шаерысьтымы школаос но. Пусйыны кулэ, Сарапул городысь куинь школа та конкурсын вормисе потӥз. 2 номеро школа городын одӥгез тужгес но егитэз луэ. Кемалась ик ӧвӧл со вить ар тырмонзэ пусйиз. Озьы ке но, быгатонлыкъёссэ быдэс Россиын но возьматӥз ни. Асьсэды котыр ласянь ӟечен возьматӥзы та школаослэн кивалтӥсьёссы но. Г. С. Марьина (кык номеро школа), Н. Н. Косатеева (10 номеро школа) но Н. А. Кулакова (18 номеро школа) вормисе потӥзы "Директор года - 99" номинациын. В. ПЕТРОВА. Батуринэн пумиськон Ӵуказе, 8-тӥ октябре, калык куспо восточно-европейской университетын ортчоз аспӧртэмлыко лекция. Таяз учыре куноын луоз юридической наукаосъя доктор, Россиысь летчик-космонавт Юрий Батурин. Со вераськоз Россиысь пилотъя космонавтикалэн туннэ улэмез но азьлань сюресэз сярысь. Юрий Батурин - Россиысь Журналистъёслэн союззылэн, "Фемида" премиослэн лауреатэз. Ужамын "Энергия" ракетно-космической корпорациын, Академия наукаосъя государствоя но правоя инрстиутын но Россиысь Президентлэн юрттӥсез луыса. Та вие Ю. Батурин дышетэ МГУ-ын но мукет институтъёсын, со сяна, космонавтъёслэн Гагарин нимо центрысьтызы космонавтэз но. Коньывуон толэзь Та дырозь ноку адӟеме ӧй вал - туэ ӵушъяллы кельшись ӟускиен куро турын (ежа сборная) сяськаё гурызэ лэзем! Пӧсь гужем но кот сӥзьыл "юрттӥллям" та будослы кыкетӥзэ сяськаяськыны. Озьы ке но, сяськаяса улыны та турын-куар уз вуы - матэктӥсь кезьыт куазь но лымы кужымзэ быдтозы, куаръёссэ но музъеме ватскем модоссэ гинэ тулыслы улэпен кельтозы. Урод гырем бусыосты кыр сяртчы (редька дикая) но кыр кубиста (капуста полевая) ӵуж сяськаосынызы шулдырто на. Шундыё нуналъёсы куазь сӥзьлыллы ик уг кельшы кадь. Но та сяськаё турынъёслэн но даурзы вакчи ни - ваньзы соос кын улын бырозы. Ог дасо пӧртэм будосъёс йыромыса кадь кыкетӥзэ ини сяськаясько. Соос пӧлын - льӧмпу но, италмас но, куинь буёло фиалка но. Одӥг нымы-кибыез но, муш-майсыез но, кут выжыысь лулосъёсты но сяськаос вылысь адӟыны уг луы. Вань лобасез, тэтчасез, бызьылӥсез тол вуэмлэсь кышкаса пегӟемын ини, уга. Толалтэ ӧй ке луысал асьме палан, куд-ог будосъёс но, лулосъёс но улон-вылон сямзэс чутрак ӧз воштысалзы. Тросэз улэп макеос сӥзьылэз шӧдо-валало. Сӥзьыл пал шуныт ке но луэ, соос Тол бабаен пумиськыны дась. Коньывуон толэзе тужгес кезьыт ке но луиз, тросэзлы со паймымон ӧвӧл. Тани пушнер но шайгу бубылиос (крапивница и траурница) шуныт куазе лобало ке но, пеймыт но кӧс интыосы пуксьыны дасесь ни. Соос быгато толэз умме усьыса ортчытыны. Толалтэ мугорзэс кӧс но векчи чагез кадь тӥяны луэ. Кожалод, лулзы ик ӧвӧл ни. Нош шокаса шунтӥд ке, соос улӟозы но чик кӧбератэк югыт интые лобӟозы. Сокем ик кезьыт ӧвӧл на бен, пӧртэм кибыос (короеды) но куд-ог кузь мыйыко бӧчыослэн нумыръёссы писпуэз йыръё. Куаем мумы чибиньёс пегӟо мурӝолъёсы, чонариос инты шедьто кузьыли карын. Та вакытэ кузьылиос уг ни бызьыло, уг но куртчылӥсько. Соин ик чонари соослэсь уг кышка. Тулыс вуэмъя, со кузьылиослэсь азьлогес сайка но муӵысь кошке. Кузьылиос уг но тодо, дыр, кыӵе бадӟым юрттэт лэсьто чонариослы! Нош гужем чонари янгышаса муӵе сюриз ке, кӧня ке дыр куспын кузьылиосын быдтэмын луоз. Тросэз нымы-кибыос но кӧкы нумыръёс (куколкаос) толлы куасьмем будосъёслэн гумыосазы интыясько - татын соосты тӧл уг иса, туж ик кезьыт но ӧвӧл. Тэтчась кибылэн (щелкунлэн) нумыръёсыз, колорад бӧчыос кезьытлэсь пегӟо музъем пушкы - картофкаез быдтӥсь бӧчы толалтэ метрлэсь но мургес музъеме поръяське! Кезьыт нуналъёсы кыйёс кӧло, нош шунытгес луэ ке, шундыё интыосы шунскыны пото. Сьӧд йыро кыйёс коръёс но лӥялъёс улысь гыркъёсын огенызы огзы борды гозы выллем пунӥськыса бадӟым бугор кылдыто. Озьы соос огзэс огзы кӧня ке но шунто. Мӧйы кенӟалиос асьсэлэн каразы - музъем тыръёсын уло, нош пиналъёсыз инты шедьто писпу выжыосын. Мувыр бакаос коньывуонлэн берпуметӥ дасо нуналаз небыт музъеме ватско. Кезьытэз соос ляб чидало. Ву бакаос шур яке тыметлэн сумедаз гудӥсько но тулысозь кӧло. Чорыгъёс но вуын улӥсь мукет лулосъёс толлы быръё мур интыосты. Татын 4 градуслэсь кезьыт уг лу уга. Куд-ог чорыгъёс тужгес но мур интыосы бадӟым уллё кылдыто. Кылсярысь, Волга шурын куд-ог интыосын (гуосын) сомлэн пумисько ог 15 сюрсэн! Коньывуон толэзе дорысьтымы лымшор пала кошко шырчикъёс, юберъёс, тюрагайёс, ӟиллёос, мукет тылобурдоос. Юсьёс но луд ӟазегъёс шаерынымы люкисько тужгес но бер, лымы усьыны кутске, яке шур кынмыны кутске ке. Бусы ӟольгыриос, куака но куд-ог дыре коӵо нюлэсъёсысь но куако кыр интыосысь толлы адями доры матэкто. Уго гуртын яке городын сиён шедьтыны капчигес. Сяла но дукъя коньывуон толэзе ярато нюрмульыосты но ягмульыосты сиыны. Тол вуэмъя, луд кеч гонзэ воштэ, йырйиськись лулосъёс дасяло пӧртэм сиёнъёсты. Нюлэскын улӥсь шыр караз дася тысь но выжыосты, толалтэ со умме уг усьы. Бусы шыр адямилэн улон интыосыз интыяське. Коньы но пӧртэм емышъёсты, кускылиосты но губиосты дася. Толалтэ но куд-ог дыре сайкалля. Иземысь султэмез бере со котьку тырше кӧтсэ тырыны. Сиськемез бере нош ик пыре караз (писпу гырке) но умме усе. Тросэз урткыӵъёс кошко шуныт палъёсы, нош ӵем пумиськись лобась шыр пеймыт но кӧс сэреге ватске но татын йырчукин ошиськыса толэз ортчытэ. Со 6 градусысен умме усе. Койык та толэзе писпуэз йырйыны яратэ. Кионъёс огазе уллёосы люкасько. Арлыдо но кужмо кионъёс уллёосын тӧро луо. Коньывуон толэзь со зэмос сӥзьыл толэзь. Соя валаны луэ асьме инкуазьлэсь сямзэ. В. Туганаев, биология наукаосъя доктор, профессор. КУН ДУМАЕ БЫРЪЁН АЗЬЫН Политика лэсьтӥське Москваын, шӧдӥське - условылъёсын Кун Думалэн депутатэз А. Солуянов ялӥз одӥг мандатэн Ижевск округъя Россилэн парламентаз быръёнъёсы пыриськонэз сярысь. Со сярысь вераськон мынӥз алигес журналистъёсын пумиськылыкуз. Мыным туж уг кельшы Москваысь адямиослэн регионъёсысь одӥг мандатэн, округъёсъя кандидат кариськемзы. Удмуртиын мандат сётоно асьме адямиослы, шуиз А. Солуянов. Вераны кулэ, та округъя Андрей Владимировичлы нюръяськоно луоз Москваысь адямиен Юрий Маслюковен, кудӥзлы вормисе потыны юрттыны тыршозы "Отечество - вся Росия" блок, КПРФ но озьы ик Удмурт Республикалэн кивалтӥсьёсыз. Солуяновлэн сыӵе кужмо юрттӥсьёсыз ӧвӧл. Со нокыӵе партие но уг пыры. - Но мон улӥсько Удмуртиын, - шуиз А. Солуянов, - соин ик Маслюковлэсь ӟечгес быгато утьыны огшоры бырйисьёслэсь, , нимаз предприятиослэсь интересъёссэс, сюлмасько республикалэн бюджетэз сярысь. Кун Думалэн депутатэз луыса А. Солуянов ужаз бюджетъя, налогъёсъя, банкъёсъя но коньдон ужпумъёсъя комитетын но депутатъёслэн "Россиысь регионъёс" группаязы. Кыӵе ужъёсын вырыны малпа А. Солуянов, сое нош ик Кун Думае бырйизы ке? - Нырысь ик быдэстыны тыршо бырйисьёсылэсь куронъёссэс, - шуиз со. - Азьланьто ож тӥрлык поттӥсь предприятиослэн ужпумъёссы бордын ужанэз. Озьы ик пыр-поч басьтӥськоно Россиын улӥсь адямиослэсь улон-вылонзэс Москваын улӥсьёслэн кадьгес карыны. Котьмар ласянь регионъёсын калык начаргес улэ. Та ласянь югдур Башкортостанын но Татарстанын гинэ шат умойгес. Туала политикаын бадӟым инты басьто Москваысь кузёослэн ваче пумит сылонъёссы. Ас керетонъёсазы соос регионъёсты но кыско, шуиз А. Солуянов. Кылсярысь, али туж зол урдскыло (прессаез вераса но) "Отечество" но солэн лидерез Ю. Лужков вылэ. Соин валче йӧтэ "Отечестволы" дурбасьтӥсь улосвылъёслэн кивалтӥсьёссылы но. Депутатлэн нокыӵе осконлыкез ӧвӧл Россилэн премьерез Удмуртилэн куд-ог кутсконъёсызлы (кылсярысь, "Шкода" проектлы) лякытэн сюрес усьтоз шуыса, угось В. Путин "Отечестволы" сокем ик синмаськемын ӧвӧл, нош асьме Кун Кенешлэн Тӧроез А. Волков та блоклы оске. Огъя вераса, политикаын ваче пумит сылонъёс Россилэсь экономиказэ нокызьы но ӝутыны уз юрттэ. Сое вераны выроз Кун Думалэн деутатэз но. Чечняын югдур пумысен Андрей Владимировичлэн таӵе малпанъёсыз: Чечнялэн асэрик басьтыны правоез вань, но Россиын улӥсьёс пумит нюръяськытэк. Чечняез Россилэсь зол кенерен котыртоно. Татчы Россилэсь войскооссэ пыртэмез, депутат умойтэмен дунъя. Юнме быро асьме пиос. Азьвыл дауре визьмо ӟуч генерал Ермолов но та калыкез вормыны ӧз быгаты. Мукет калыкез пыд азе пуктон со - дантэм уж. Историын сыӵе учыръёс данак. США но Вьетнамын кема аръёс ӵоже ожмаськыса вормисе ӧз поты, со дыре ик дуннеысь вань калыкъёс Вьетнамлы дурбасьтӥзы. Озьы ик Россилэн правительствоез но Чечня ужпумъя асьсэ калыклы пумит уз-а меда пукты? Т. БАННИКОВА. Постановление Государственного комитета Удмуртской Республики по тарифам и ценам О предельных тарифах на производство тепловой энергии В связи с повышением цен на топливо, в соответствии с Законом Российской Федерации от 10 марта 1995 года � 41-ФЗ "О государственном регулировании тарифов на электрическую и тепловую энергию в Российской Федерации", постановлением Правительства Российской Федерации от 4 февраля 1997 года � 121 "Об основах ценообразования и порядке государственного регулирования и применения тарифов на электрическую и тепловую энергию" и постановлением Правительства Удмуртской Республики от 12 июля 1999 года � 656 "О Государственном комитете Удмуртской Республики по тарифам и ценам" Государственный комитет Удмуртской Республики по тарифам и ценам постановляет: 1. Таблицу предельных тарифов на тепловую энергию пункта 5 приложения к решению комиссии по утверждению тарифов на электрическую и тепловую энергию в Удмуртской Республике � 8/2-рэ от 17 февраля 1999 года читать в следующей редакции: Тарифы на тепловую энергию, руб./Гкал. Средневзвешенная" мощность теплоисточника энергоснабжающей организации, Нкот, Гкал./час Вид топлива Газ Мазут Уголь До 0,6 140 320 270 Свыше 0,6 до 3,0 135-145 270-320 260-270 Свыше 3,0 до 10,0 125-135 250-270 220-240 Свыше 10,0 до 30,0 110-125 240-250 190-220 Свыше 30,0 до 50,0 105-110 220-240 170-190 Свыше 50,0 до 100,0 100-105 210-220 150-170 Свыше 100 90 200 140 2. Данное постановление опубликовать в средствах массовой информации. Председатель Государственного комитета Удмуртской Республики по тарифам и ценам О.М. БЕЛОБОКОВ Комментарий к постановлению Государственного комитета Удмуртской Республики по тарифам и ценам от 22 сентября 1999 года � 5/9 "О предельных тарифах на производство тепловой энергии" Данным постановлением Государственный комитет Удмуртской Республики по тарифам и ценам вносит изменение в решение комиссии по утверждению тарифов на электрическую и тепловую энергию в Удмуртской Республике от 17 февраля 1999 года � 8/2 "О предельных тарифах на тепловую энергию, отпускаемую энергоснабжающими организациями, не входящими в систему ОАО "Удмуртэнерго". Происходит увеличение предельных тарифов, утвержденных 17 февраля 1999 года: по газу - на 5 рублей, по углю - на 10 рублей и по мазуту - на 80 рублей за 1 Гкал. Это изменение связано, в первую очередь,с инфляцией. Так, за первые 8 месяцев 1999 года увеличение оптовых цен на промышленную продукцию составило 57,4 процента. Если говорить о ценах на энергоносители, используемые котельными для производства тепла, то за 8 месяцев 1999 года цена сетевого газа не изменилась, цена угля увеличилась на 2 процента, цена мазута - на 120 процентов. В связи с этим у организаций, вырабатывающих тепловую энергию, увеличиваются затраты на ее производство. Степень увеличения зависит от вида топлива. Нужно отметить, что тарифы, указанные в таблице, не являются окончательными предельными тарифами. Существуют определенные повышающие коэффициенты, зависящие от степени загруженности оборудования - процента использования установленной мощности (см. редакцию решения от 17 февраля 1999 года � 8/2-рэ). Организации (кроме муниципальных), тарифы на тепловую энергию которых превышают предельные значения, должны представить в Государственный комитет Удмуртской Республики по тарифам и ценам расчеты тарифов на тепловую энергию, выполненные в соответствии с Методическими указаниями по расчету тарифов на тепловую энергию, вырабатываемую предприятиями всех форм собственности (кроме муниципальных), не входящих в систему ОАО "Удмуртэнерго", утвержденными решением комиссии от 17 февраля 1999 года � 8/1-рэ, которые можно получить в Государственном комитете Удмуртской Республики по тарифам и ценам (тел. 51-53-09) в электронном виде (при себе иметь дискету). При необходимости специалисты Госкомитета проконсультируют по методическим указаниям. Постановление Государственного комитета Удмуртской Республики по тарифам и ценам О предельных тарифах на услуги по передаче электрической и тепловой энергии В соответствии с Законом Российской Федерации от 10 марта 1995 года � 41-ФЗ "О государственном регулировании тарифов на электрическую и тепловую энергию в Российской Федерации" постановлением Правительства Российской Федерации от 4 февраля 1997 года � 121 "Об основах ценообразования и порядке государственного регулирования и применения тарифов на электрическую и тепловую энергию" и постановлением Правительства Удмуртской Республики от 12 июля 1999 года � 656 "О Государственном комитете Удмуртской Республики по тарифам и ценам" Государственный комитет Удмуртской Республики по тарифам и ценам постановляет: 1. Установить предельный размер рентабельности на услуги по передаче электрической и тепловой энергии в размере 25 процентов к затратам за вычетом стоимости покупной энергии. 2. Данное постановление опубликовать в средствах массовой информации. Председатель Государственного комитета Удмуртской Республики по тарифам и ценам О.М. БЕЛОБОКОВ Ижевск, 22 сентября 1999 г., � 519 Комментарий к постановлению Государственного комитета Удмуртской Республики по тарифам и ценам от 22 сентября 1999 года � 5/9 "О предельных тарифах на услуги по передаче электрической и тепловой энергии" Тариф на передачу электрической и тепловой энергии, в соответствии с "Инструкцией о порядке расчетов за электрическую и тепловую энергию", зарегистрированную Минюс-том Российской Федерации 28 декабря 1993 года � 449, определяется двусторонним договором между поставщиком энергии и ее потребителем и только при возникновении разногласий по уровню договорной цены, тарифы на передачу энергии рассматриваются Государственным комитетом Удмуртской Республики по тарифам и ценам. В этом случае организация-поставщик обязана представить в Госкомитет расчеты тарифов на услуги по передаче электрической и тепловой энергии в соответствии с "Методическими указаниями по формированию и утверждению тарифов на услуги по передаче электрической и тепловой энергии, оказываемые энергоснабжающими организациями, не входящими в систему ОАО "Удмуртэнерго", ут- вержденными решением комиссии по утверждению тарифов на электрическую и тепловую энергию в Удмуртской Республике от 17 февраля 1999 года � 8/3-рэ. В соответствии с вышеуказанными методическими указаниями предусматривается ограничение рентабельности на услуги по передаче электрической и тепловой энергии в размере 25 процентов от себестоимости (без учета покупной энергии). Постановлением Государственного комитета Удмуртской Республики по тарифам и ценам от 22 сентября 1999 года � 5/9 "О предельных тарифах на услуги по передаче электрической и тепловой энергии", для всех организаций, оказывающих услуги по передаче электрической и тепловой энергии, вводится предельный размер рентабельности на эти услуги в размере 25 процентов к затратам за вычетом стоимости покупной энергии. Превышение уровня рентабельности является нарушением государственной дисциплины цен и предусматривает применение финансовых санкций, согласно действующему законо- дательству. Дано нуналъёс матэкто Дэбес ёрос туэ пусъе 70 ар тырмонзэ. Та музъем узыр синмаськымон адямиосыныз. Одӥгез соос пӧлысь - Кузьма Алексеевич Ложкин, Россиысь калык артист, Удмуртиысь искусствоосъя дано ужась. Туэ 4-тӥ коньывуонэ солэн вордскемез дырысен 90 ар тырмиз. Дано кырӟасьлы сӥзем ӝыт луоз 15-тӥ октябре Удмурт кун национальной театрын. Нош вордскем гуртаз, Зар.Медлаын, сое буре ваёзы 30-тӥ октябре. Вордскем юрт бервылаз усьтэмын луоз сквер, барельеф, нылпи площадка, школаын - бюст. Нош гуртэ пырыку ик нимысьтыз пусъя адӟиськоз, макем бадӟым адями потэмын татысь. Синпелетъёслэн авторъёссы - Касим Галиханов но Анатолий Аникин. Дэбесъёслэн мукетыз данъяськонзы - Россиысь искусствоосъя дано деятель, Удмуртиысь калык артист Геннадий Михайлович Корепанов-Камский. Туэ гудырикошконэ солы тырмиз 70 арес. Удмурт Республикалэн дано гражданинэзлы сӥзьыса, 17-тӥ октябрьысен 22-тӥ октябрёзь шаерамы ортчозы пӧртэм ужрадъёс. Вордэм пизэс но куноосты нырысь ик пумиталозы тыловайёс, гуртысь музейын, школаын пумиськонъёс луозы. Ӵуказеяз - Дэбес ёрос культура юртын "Яге - мынам гуртэ" ӝыт. Композиторлэсь юбилейзэ Ижевскын но паськыт пусйыны чакламын. Операя но балетъя театр 19-тӥ октябре возьматоз солэсь "Чипчирган" опера-балетсэ. 21-тӥ октябре аслэсьтыз программазэ Г.Корепанов-Камскийлы сӥзёз фольклор кырӟанъя "Айкай" театр. Нош ӵуказеяз сӥё-дано ӟечкылан но концерт луоз Операя но балетъя театрын. Та ужрадъёсыз дасян но ортчытон понна трос сюлмаське дэбесъёслэн "Байгурезь" огазеяськонзы. Юрттэ соослы аспал нылзы Кун Кенешлэн Тӧроезлэн воштӥсез Светлана Смирнова. Туннэ - Арлыдоослэн калык куспо нуналзы Дунъяно но данъяно ООН-эн ӵектэмъя, туэ мӧйыослэн калык куспо арзы. Нош нырысетӥ октябрь арлыдоослэн нуналэнызы ялэмын. Ма, кызьы уд данъяськы Быдӟым Отечественной война дыръя лек тыл пыртӥ потэмъёсын но ожлэн мышказ жадёнэз валатэк ужасьёсын. Мон тодам ваисько на, колхозлэн бусыосаз, гужем каникулъёс дыръя, мӧйыосын ӵош ю-нянь будэтыны тершеммес. Ми, пичиос, валэн усыямы, гыримы но кизимы. Нош уин валъёсты возь вылын возьмамы. Кыӵе мӧзмыт вал милемлы анайёсынымы люкиськыны, Балезиное мынӥсь чугун сюрес лэсьтыны кутскыкузы. Будэммыя ми тодӥмы, шаерысьтымы заводъёсын но, ож мыныку, гуртын сямен ик секыт вылэм. Тани война кутскем бере Ижевскысь машинаос поттон завод мотоциклъёс лэсьтэмысь дугдӥз, тросгес пыӵал тӥрлык поттыны кутскиз. Тулаысь пыӵал поттон заводэз татчы келязы, озьы Ижысь завод сутка ӵоже 10-12 сюрс винтовка лэсьтыны ӧдъяз. Огъя вераса, со тырмиз быдэс дивизилы. Война ӵоже предприятие поттӥз ог 11 миллион винтовка, авиацилы 140 пулемёт но пушка, танкъёслы пумит нюръяськыны 133 сюрс пыӵал. Ижмаш заводлэн одӥгаз мастерскояз поттӥзы винтовка коробкае пуля сётӥсь пружина. Отын тыршизы куатетӥ-тямысэтӥ классэз йылпумъямъёс. Мастеръёс гинэ мӧйыос вал. Рабочийёс ӧз быгатэ мукет интые кошкыны, планзэс быдэстытэк кельтыны. Кин ке 5-20 минутлы уже бер вуэ ке, карточкаысьтыз кыӵе ке сиёнлы талонзэ вандо, уждунзэ 25 процентлы кулэсто на. Нош 20 минутлэсь унолы бере лыктӥсез нокыӵе судтэк сизьым арлы келяны быгато вал Воркутаысь чугун сюрес лэсьтонэ. Куд-огез быдэ вуымтэос цехын ик кӧлазы. Сютэм улэменызы, уноез тордылӥзы, вал станок доразы кулон учыръёс но. Больницае ӧжыт ветлӥзы, ваньзы вормон понна ӧтён улсын ужазы. Война кутскем бере нырысь нуналъёсы ик Ижевскысь андан ӵыжатон заводын ӟеч поттэм андан мынӥз самолётъёс, винтовкаос, танкъёс, пулемётъёс но мукет пыӵал-тӥрлыкъёс лэсьтыны. Война ӵоже та заводын продукция поттон 63 процентлы будӥз. Ожын вормонэз азинтыны озьы ик бадӟым юрттэт сётӥзы республикаысьтымы мукет предприятиос, колхозъёс. Лек война ортчем бере тупаса улонлы тупась вузъёс поттонэ выжон предприятиослы капчи ӧй вал. Оборудование вужмемен, соосты выльдоно но воштоно луиз. 1948-тӥ арын Ижмашын выльысь радъязы мотоциклъёс поттонэз. Кортэз шыръяны, ужез капчитяны но азинтыны сюлмысь тыршизы выльзэ утчасьёс. Мотоцикллэн питранэзлы нипель лэсьтонэ 12 токарно-револьверной автоматъёсты уже кутэмен, та пичи ёзлэн дунлыкез будӥз. Слесарь-рационализатор Николай Кузьмич Семенов нимысьтыз нипелез поттыны ӵектӥз штамп-автоматэн. Смена ӵоже азьвыл 800 нипель лэсьто ке вал, табере 25-30 сюрсозь поттыны ӧдъязы. Со луонлык сётӥз автоматэз мукет уже кутыны. Ижевскын пумен поттыны ӧдъязы редукторъёс, радиоприёмникъёс но мукет кулэ вузъёс. Трос выль улон коркаосын микрорайонъёс ӝутскизы, выль заводъёс ужаны кутскизы. Нош кызьы уд данъяськы гуртын ужасьёсын! Соослэн жадёнэз валасьтэм киоссы сюдӥзы город калыкез, странамес. Табере та геройлыко адямиос мӧйымизы. Шутэтскы вал нокыӵе шуг-секытъёстэк... Куд-ог "демократъёс" газетъёсы али поттало соосты ултӥяса верам материалъёс. Уг малпало, соос но пересьмозы шуыса. Ветеранъёсты улэп дыръязы данъяны кулэ. Мӧйыосты Родинамес кужмоятонэ егит дырзэс сётэмзы понна тау кароно. Дунъёс будэмен пенсизэс кварталлы быдэ йылэтыса гинэ буйгатсконо ӧвӧл. Кивалтӥсьёсмы кылынызы мӧйыос сярысь сюлмаськемзэс верало, уж вылын сое кемалась ум адӟиське. Ярам, куд-ог предприятиос но учреждениос арлыдоослэн нуналазы мӧйыосты пумиськонэ люкало. Чутытэк ужась заводъёс пенсионеръёссылы пичияк коньдон яке кузьым но сёто. Тани Ижевскысь электромеханической заводысь ужасьёслэн "Заря" сад-бакчаязы алигес ялон ошемын вал. Пенсионеръёсты заводэ ӧтё, юрттэт сётон понна. Туж умой луысал, вань предприятиос но организациос ветеранъёссэс тазьы сӥё-дано пумитасалзы ке. Тросаз коллективъёсын ожысь но ужысь ветеранъёсты Вормон нуналэ гинэ синпель кузьымъёсын тодазы ваё. В. ЧЕРНОВ. Удмурт лулчеберлыкъя дэменлыклэн ӧтчамез азьын Ыжлэсь кечтака уг вордскы, удмурт но шуак ӟучлы уг пӧрмы! Удмуртъёслэн азьвыл чакламтэ сизьыметӥ ӧтчамазы туж зол вераськиз Алнаш ёрос кивалтэтлэн тӧроезлэн воштӥсез Нина Образцова. Сюлэмме лек тылын ӵушказ. Ляб интыосмес, шекъёсмес шараяса, удмуртлыкмес кужмоятон бордын урод ужаммес пусйыса, ас палысьтызы лэчыт кылооссылэсь верамзэс тодаз вайыса, Кун Кенешлэн депутатэз шуиз: "Ыжлэсь кечтака ноку уг вордӥськы, нош удмуртлэсь ӟуч вордӥське". Малпаськелэ ай, кӧня татын асьме сяммес ӵушкасез, ӟучомыны шӧтаммылэсь алӥсез! Кытысен бен кутске удмуртлык? Ми, дэменчиос, калыкен котькуд кенешонамы пусйиськом: анай-атай бордысен, яратоно гуртэд, нылпи сад но школа бордысен, вордскем кылдэ сюлэмад пыӵатон бордысен. Муртъёс нокинэ уз пӧрмытэ ненег ыжлэсь вордӥськем кечтакалы, ас калыксэ ыштэм адямилы. Ваньмыз потэ ачид бордысь. Мыным тани удмурт кылын трос ик дышетскыны ӧз кылды. Быдтылӥ но ӟуч шор ёзо школаез. Брангуртын (Пичи Пурга ёрос) сизьым классэз йылпумъяса пыри Ижевскысь педучилищее. Дышетӥсь луыны чакласько вал. Ӧз сётэ. Нырысетӥ курссэ гинэ йылпумъяй - вуонояз сентябре пырак урокысь басьтӥзы но келязы Тихоокеанской флотэ. Отын нуналлы быдэ сямен куамын иськемлэсь ятыр лэсьтылыса, тодон-валанъёс люкай Ӟуч шормуӵысь офицеръёслэн ӝыт ужась школаязы. Берло ини, Ижевскысь сельхозинститутын дышетскыкум но, Москваысь Вылӥ партшколаын но, валамон ини, удмурт кылын вераськисьёс ӧй вал. Дорме но анай кылме туж яратэме юрттӥзы мыным журналист но, писатель но луыны. Дӥсьтӥсько меӵак вераны: книгаосме ярато лыдӟисьёс. Архивам туж трос соослэн шунытэсь гожтэтъёссы. Тау ваньзылы. Озьыен, анай йӧлэн ӵош ик вордскем кылдэ сюлэмад мур пыӵатӥд ке, мукет кылъёсты но ӟеч тодыны тыршид ке - уд йыромы ас калыкед пӧлын, палдэм шелеп уд луы. Таин валче сюлмысьтым нокызьы уг поты Пичи Пургалась И номеро школа азьын вераськеммы. "Удмурт дунне" газетлэн валтӥсь редактореныз, туж тодмо журналистэн, кылтэчыен, драматурген Алексей Шкляевен тодматскыны чакласьком вал та школаысь дышетскисьёсын. Музон азьын калыкен пумиськылэменымы, школае беромысагес вуим. Директорзы шуэ: - Татын сокем трос дышетскисьёсмы ӧвӧл ни, кошкизы. - Кин кылемын, соосын кенешом, - шуиськомы. - Кыӵе кылын бен тӥ вераськоды? - Асьме кылын. - Тӥледыз соос уз валалэ, Кирилл Егорович,- шуэ директор. - Мар?! - гуньдӥ мон. - Пургала олокытысь но калык вуэмын ини. Ма, удмуртъёсыз но куд-огез ӟучомо... Эн кайгыре. Ӝоген школамылэн юбилеез. Соку ӧтём. Соку но, берло но пиналъёсын кенешыны ӧз кылды. Ми кошкимы ылё-кырсё мылкыдын. Тужгес но мон. Я, шуом, монэ, ас палысьтызы муртэ, оло, ӧй валасалзы пиналъёс. Нош А. П. Шкляев ӟучсэ но, удмуртсэ но, бигерзэ но ас палаз кыскыны быгатэ ук. Алнаш но Пичи Пурга та вакытэ удмуртлыкмес муромытӥсьёс пӧлын тужгес кужмоесь ёросъёс. Ӟучомыны ке ӧдъям, кин луэммес ум вунэтэ-а? "Пурга кизилиосмы" но каньылля уз кысэ-а? Таӵе юанъёс юнме гинэ уг кылдо. Умоесь воштӥськонъёсын ӵош дор палам малпаськытӥсь учыръёсын но пумиськылоно ини. Быръёнъёс дыръя (мон огезлэн удмурт кандидатлэн оскем муртэз вал) тросэз пургаосы куаразэс сётӥзы ӟуч понна. Тӧрозы но удмурт ӧвӧл ни. Удмурт газет поттонын лулысь-сюлмысь тырше вал дэменчи З. Я. Титова. Сое но пенсие келяллям. Мылкыдме шиёмытӥз мукетыз но учыр. Быръёнъёс азьын Пичи Пурга ёросысь ик чебер, йӧно егит кышномуртэн, усто журналистэн, кылбурчиен Надежда Лопатинаен Миндэре ветлӥм. Одӥг визьнодасьлэн куремезъя-дэмламезъя пырано кариським нылпи садазы. Нӧдэз, тудвуэз коласа, мырдэм вуим. Пумитазы ушатысь пож вуэн пылатэм кадь: "Акыльтӥм ни татчы пырамзылэсь!.." Сыӵе азьын-а бен ӟеч сяммы, удмуртлыкмы юн выжыяськоз? Мынам вордскем гуртам, Бодья-Пуроын, кыдёкысь вуэм муртлы котьку шумпото. Миндэрысь нылпи садын ужасьёс понна пельёсы али но ӵыжектыло. Та сярысь трос калыклы, оло, поттылонэз ик ӧй вал. Но удмуртлэсь "акыльтэмъёс" улыны шӧтало мукет агайёсмылэн кивалтэмзы улсын. Сомында калыкен кенешыса вылысь, милям наӵ-наӵ удмурт врачмы-кандидатмы понна миндэръёс чылкак витез-а-куатез-а гинэ куаразэс сётӥллям! Нош школаын "тӥледыз уз валалэ" шуэмлы валэктӥсько: Пургала вуылэммы бере, кӧня ке улыса, милемды - Илья Пельтемовез, Галина Романоваез но монэ - ӧтчазы Кезысь школае. Ми отын лад-лад вераськимы анай кылын. Отын уго золгем басьтӥсько ини удмуртлык борды. Озьы ик вордскем кылынымы кенешим ӟучомыны ӧдъям сэрегын - Сюмси школаын но. Оскисько: Алексей Шкляевен, музонъёсыныз авторъёсын ми одно вуылом ай Пурга школае. Та ёросын удмуртлыкмес муромытӥсьёс туж трос, зол ужало кивалтӥсьёссы но, дышетӥсьёс но, культура удысын тыршисьёс но. Соин ик "Дэменлэн" кивалтоназ быръемъёслэн мылкыдзы вань огзэ коть кенешсэс та ёросын ортчытыны. Ӟеч уженызы тодматскон, ог- огмылэсь шекъёсмес шараян вылысь. Али дэменъёслэн кужымзы туж бадӟым. Огазеяськонэн кивалто удмуртъёс пӧлысь туж тодмо эшъёс. Дэменчиос, огазе кариськыса, умоесь ужрадъёс ортчытӥзы ни Сюмси ёросын, Ижевскын мылысь-кыдысь ортчытъяло "Гербер" но Виль праздникъёсыз. Финн-угор выжыысь калыкъёслэсь фестивальзэс радъянын но трос кужымзэс сётӥзы. "Удмурт кенешлэн" азьвыл чакламтэ ӧтчамез огъя ужысьтымы трос тырмымтэосты шараяз. Соос пӧлысь огез - удмуртъёслэн асваланзы, ас калыкенызы данъяськонзы ляб ӝутӥське. Трос на "мыным макешатъёсмы", ог-огмылы пыдмес пуктӥсьёс. Ляб нюръяськиськомы выжы калыкмылы дурбасьтӥсь законъёс кутон понна. Вордскем кылмы ялан ёркатэмын. Тани В. А. Осиповлэн сюлмаськеменыз, куд-ог автостанциосын, Ижын но, эсьмаса, автобусъёслэн кошконзы сярысь ялыло вал ини удмурт кылын - калыкез нуллӥсьёс тазэ но ужзэс выльысь аналтӥзы. Мар вераммес уз валалэ, шуизы, оло? Оскисько, "Дэменлэн" таиз но конференциез зол ортчоз. К. ЛОМАГИН, кивалтэтэ быръем писатель. ГОЖТӤСЬКОН - 2000 6-тӥ сентябрьысен 12-тӥ сентябрёзь шаерамы ортчиз "Гожтӥськисьлэн арняез". Газет- журналъёслэн редакциосынызы ӵош сое радъяз республикаысьтымы Почта кусыпъёсъя управление. Лыдпусъёс возьмато, таӵе ужрадъёслэн кулэлыксы лыдӟисьёс понна пайдаё. Гожтӥськон дунъёсты кӧнялы ке кулэстон соку ик будэтӥз шаерамы потӥсь газет- журналъёсты басьтыны мылкыд карисьёслэсь лыдзэс. "Удмурт дунне" газетъя "Гожтӥськисьлэн арняезъя" таӵе йылпумъянъёс лэсьтэмын: Почта ёзъёс "Гожтӥськисьлэн "Гожтӥськисьлэн арняез" - 3-тӥ графаез 2-тӥ 20.09.99 арняез" - 6-12.09.99 14-20.09.98 графаен ӵошатыса тамында гожтӥськемын (процентэн) Алнаш 790 737 96 93 Балезино 313 323 370 103 Вавож 175 124 104 71 Воткинск 42 20 4 48 Глазов 65 52 39 80 Грахово 67 46 18 69 Дэбес 228 122 30 54 Завьялово 338 182 30 54 Игра 397 326 82 82 Ижевск 36 28 8 78 Камбарка 2 1 0 50 Каракулино 3 0 0 0 Кез 198 149 110 75 Кизнер 158 57 19 36 Киясово 280 280 92 100 Красногорье 9 9 0 100 Пичи Пурга 898 632 207 70 Можга 538 385 63 72 Сарапул 12 5 4 42 Селта 72 40 5 56 Сюмси 17 9 2 53 Ува 208 157 47 75 Шаркан 278 267 160 96 Юкаменск 28 16 20 57 Як. Бодья 50 54 13 108 Яр 31 13 11 42 Ваньмыз 5233 4034 1534 77 Сӥзьыллы, дышетӥсьлы Изобразительной искусствоя музейын усьтӥськиз "Сӥзьыл пейзаж" адӟытон. Арлэн та чебер вакытэныз герӟаськем инкуазь суредъёссэс, натюрмортъёссэс возьмато шаерысьтымы художникъёс Александр Ложкин, Петр Семенов, Семен Виноградов, Вячеслав Михайлов, Федор Матанцев но мукетъёсыз. Ваньмыз та ужъёс быдэстэмын живопись амалэн. Выставкаысь озьы тк адӟыны луэ тодмо ӟуч суредасьёслэсь Александр но Сергей Ткачев агай-вынъёслэсь "Сӥзьыл" картиназэс. Та адӟытон усьтӥськиз Дышетӥсьёслэн нуналазы. Соослы сӥзьыса, концерт но вал. Шудӥз "Арабески" струнной квартет, кылбуръёс лыдӟизы Удмуртиысь дано артист Евгений Трифонов но Галина Шестакова. Н. НИКОЛАЕВА. Николай Никифоров Сопал дуннеысь куно Кӧшкемыт верос Толэзь ӵоже дораз висьыса кыллемез бере, Тукай Юля туннэ уж дураз ветлӥз ни. Калыкен вераськыса, мылкыдыз ик капчияз кадь: гадяз каньылак кариськиз, юнме шорысь кышкан-курданэз ортчиз, кожалод. Дораз вуыса, егит кышномурт со-та ужпӧръёссэ быдэстӥз но ӝомалэс кариськыны кутскем укноос шоры уӵерак синйылтӥз. Акшан вакытэз тодаз вайыса, укно возъетъёссэ ӝогак гинэ кысказ-лэзьылӥз. Кема малпаськытэк, удмурт кырӟанъёсын кассетазэ магнитофонэ интыяз но, зыл-зыл крезьгуръёс лэйканы кутскизы. Нылызлэсь сыӵе дауртэмзэ синйылтыса, анаез, Тукай Одоть, вазьытэк ӧз чида: - Юнме курдаськод, нылы. Уз вуылы ни эмеспимы дорамы. Ачим но вӧзад ук - артысь висъет сьӧрын кӧласько. - Ас вужерелэсь ачим курдасько ни кадь, анай, - секытак лулскиз Юля. - Пель сӧрам олокыӵе куараос кылӥськозы кадь йӧтэ. Соин ӝегатскытэк магнитофонэз я телевизорез "улӟытӥсько"... Бен, егит кышномуртлы кышканы-кӧбераны мугез но вань. *** Улон-вылон бугорлэсь кудлань сэрттӥськыса питрамзэ тодыны нокин но уг быгаты. Уг тоды адями со нюжаосын кыӵе герд-думетъёслэсь кылдонзэс но. Улон выжыкыл ӧвӧл. Выжыкылысь бугор гинэ мылкыд каремъя питыра. Малпаз вал шат Тукай Юля но, таӵе шимес адӟон вӧзаз лэзиськоз, чиль-сьӧд йырсиосыз пурысьтамон, кымесаз дырызлэсь вазь кисыриос кылдымон, кайгу вуоз шуыса? Ӧз ук, ӧз. Библиотекарьлы дышетскыса, вордскем Качкашур гуртаз берытскиз вал - школаязы дышетӥсь ӧвӧлэн, удмурт кыллы но литературалы дышетыны ӵектӥзы. Бурдъяськыса басьтӥськиз со выль уж борды. Вань мылкыдзэ, тодон-валанзэ сётыса тыршеменыз, вылды, ӝоген пиналъёс, дышетӥсьёс, ас гуртоосыз пӧлын гажано Юлия Семеновналы пӧрмытскиз. Эшъёсыз музэн ӧз бызьылы со егит пиос сьӧры. Ӵемысь клубе потатэк лыдӟылыны тыршылӥз методической, педагогической пуштросъем книгаосты. Ас понназ пальпотоз вал: "Кузпал шедёз ай, зарни ӧвӧл. Инмарен висъям пиосмуртэ вань ке, улон сюрес выламы ваче син вуттоз, пумиськытоз". Ӵапак со сӥзьылэ бускельысьтызы Еткей Витя службаысь берытскиз. Сьӧразы ик вуттэм ӵош служить карем, детдомын быдэ вуэм эшсэ - Рахимзян нимо бигер пиез. Анай- атаез, ӵыжы-выжыосыз ӧвӧл бере, Рахимзян но малпаз, вылды: "Дунне паськыт. Ужлы ярамон луид ке, кӧттыр котькытын шедьтод". Озьы Качкашурын выль улӥсь выжыяськиз. Удмуртъёс сое асьсэ сямен нимазы - Бигер Роман. *** ... Бакчаысьтызы картофказэс октыса быдтэмзы бере, Тукай Юля Иже ветлыны ӝутскиз. Апаез-кырсиез угось кемалась куное ӧтё ни. Я школаысьтыз, я дорысьтыз ужъёсыз бордазы думыса кадь возё. Нош таяз шутэтскон нуналъёсы сюрес вылэ потыны ӝутскиз. Эшшо ке Романэз бурдъяз на: - Ветлы, муспотонэ. Нылпиосмес но сьӧрад басьты. Эсьмаса, шоркармес адӟозы. - Жаль, ӵошен мынэммы уг лу, - лулскиз вал Юля. - Колхозын но ужлэн кысык дырыз, дорамы но пудоосмы вань. - Э-э, эн шугъяськы, муспотонэ, - пальпотӥз Роман. - Выль арлы быдэс семьяенымы ветлом. Апаедлы но базяйлы* вераса кельты: аракы тырмыт мед дасялозы, ӝӧк вылазы пыжем-пырсатэм быдэс ӟазегзы медло. Сьӧрам арганме басьтыса, вань кадь тодэм бигер но удмурт крезьгуръёсме шудыса, жадьытозязы эктытыса-кырӟатыса кельто. Сюрес вылэ потыны дасяськон ӝытазеяз Юля пичи дыр юртаз бертӥз. Анаез но саламъёс, пе, дасяй. Юля, ӝог берытско кожаса, огназ гинэ кошкиз вал. Нош кызьы-о анай-атай юртысь ӝог гинэ потыса кошкод? Пыжем-пӧрамъёсыныз кунояськытозяз, со но та сярысь лабыртытозязы, телевизор пыр "Дыр" программа кутскиз ни. Ӝытлэсь ӝог ортчемзэ шӧдыса гинэ дыртыса ӧс пала вамыштӥз. Сӥзьыл нунал ӟольгыри ныр кузя гинэ, шуо пересьёс. Ма, озьы ик вань уго: нырысь акшан кузёяське, бератаз уй ни катанчизэ-быркенчизэ оше. Югыт коркан пукыны дышем синъёс, пеймытэ потэмен валче, номыре рос-прос синйылтыны уг йӧндыро кадь. Бератаз сакгем карисько ни - сюресэз висъяны кутско. Дыртыса вамышъяны тырше Юля. Ульчаын мынӥсь-ветлӥсьёс уг пумиськыло. Тросаз юртъёсын тылъёс кысэмын, укноетӥ льӧльырало чагыр, ворпо телевизор тылсиос гинэ. Асьсэ улон тыкырыказы** кожыса, кышномурт мышкысьтыз пыд куараосты кылӥз. Берытскыса учкиз но... - быдэс мугораз быректэм ву пальккизы кадь. Бӧрсяз ик ез юбо ӝужда адями вамышъя. Синъёсыз, коӵышлэн музэн, вожмыт ӝуало, зӥрак поттэм пиньёсызъя валатскиськод: пальпотэ. Кышкам-курдаменыз чирак! кеськиз Юля. Ӵемтылыса, канжаськыса бызе дор палаз. Капка выжыяз вуыса гинэ мышсэ синйылтыны дӥсьтӥз. Утёд ке - калъяськем вужер-адями вӧзаз ик сылэ ни. Со но бызем, лэся. Маке ӝуштэ, киыныз йыртышсэ корма. Кышномурт, инмарез буре вайыса, капка ӧсэз усьтӥз гинэ но, бӧрсяз шалтырак гудыртӥз, оп! шуытозь, ӝужыт адями-пӧртмаськись тыл бӧмлы пӧрмытскиз. Лулзэ ыштыса кадь пыриз со корказ. Катьтэммыса гур вӧзысь пукон вылэ лэзиськиз. Газет лыдӟыса пукись Роман но шӧдӥз-валаз кузпалэныз маке умойтэм луэмзэ. - Ма луиз, муспотонэ? - вӧзаз вамыштӥз со. - Воксё тӧдьыэктэмед ук - ымнырыд али тӧдьмам муръё кадь. - Отын... отын... бадӟым сьӧд пуны, - аслэсьтыз эрекчаса верамзэ ик ӧз шӧды Юля. - Сьӧрам калъяськиз. Укыр кышкай пӧрмостэмлэсь. - Лулпыжет адями ик вань мон, муспотонэ, - кузпалызлэсь йырсизэ маялтӥз Роман. - Пумитаны мыноно вал ук. Пыӵал басьтыса, ыбылонэз гинэ вань со кузётэм пуныосты. Воксё ашкынӥзы ни. - Ярам, кышкам ортчоз, - интыысьтыз султӥз Юля. - Ӧз куртчы ук. Кышномурт синъёссэ уйбыт кыньыны ӧз быгаты. Малпаське: "Малы-о таӵе пӧртмаськон? Кыӵе кышкыт адӟонэз вера меда та? Оло, Иже но ветлоно ӧвӧл? Нош котырын поръясь адӟонлэсь пегӟод шат? - отын ик аслыз ачиз пумит луэ. - Дасяськем бере ветло ни. Романлы но, анай-атаелы но пӧртмаськем сярысь уг поттылы. Юнме медаз сюлмаське". ... Ӝыт пал, скалзэ кыскыса кияз ведра тыр йӧлэн пырыку, корказ эшез, Еткей Витя, возьмаса пуке ни вал. - Ох-хо, - пальпотӥз Виктор. - Иське, огдырлы кышномурт кариськытэк, амалыд ӧз луы? - Тупаз тани, Виктор, - пальпотӥз Роман, банкаосы йӧлзэ сӥсъянъяз. - Муспотонъёсы куное кошкизы. Кык нуналлы сам хозяин, сам барин кыли тани. - Укыр усто, - шумпотэмзэ ӧз ваты эшез. - Ужаса гинэ уг луы, шулдыръяськыны но кулэ. Туннэ мынам вордӥськем нуналэ ук. Эшъёсме ӧтчаса, ӧжытак пусйыны малпай. Эн ӝега, ужпӧръёстэ палэнты но ӝегатскытэк лыкты. - Огнам умойтэм кадь, Виктор. - Ну тон, братан, сётӥськод! Юляед, нылпиосыд куноын, тыныд уг яра шат? Ойдо, сьӧрам ик нуо. Романлы пыкиськыны умойтэм потӥз, лэся. Дӥськутъёссэ вошъяз, кисыяз, кузьым интые, дас манетлык понӥз но эшез сьӧры вамыштӥз. Юон ӝӧк сьӧрын озьы уго: огзэ ке юиськод, мукетсэ удо ни. Чаркаосты буш уг возё. Нырысетӥзэ Еткей Витялэн тазалыкез понна сябась каризы, кыкетӥзэ - чутыса ветлонтэм вылысь, бӧрысь - инмар, пе, куинь лыдпусэз яратэ... Арган шудыса, кырӟаса, вераськыса пукемзы бере, Роман тау карыса бертыны ӝутскиз. Эшез келяськон муген, мырт карыса*, нош ик тыро стакан удӥз на. Дораз кудӟыса кошкиз Бигер Роман. Вина уго ошез но пыд йылысьтыз погыртэ, шуо. Уйшоре ӝутскем тылпу вань гурт калыкез пыд йылаз тэтчытӥз. Бигер Романлэсь корказэ, пудооссэ утьыны быгатӥзы ке но, кузёзэ, кеноссэ утьыны беромизы. Калык сайкаса люкаськытозь, кенос липет ӝуаса ланьырамын ни вал. Ӵукнаяз ӝуам бервылысь лыосты адӟыса валатскизы: Роман сутскыса бырем. Татын ик канистраен бензин сылэ на вылэм уго. Кудӟеменыз сигарет пумзэ куштыны шедьтэм луоз, мискинь лул! *** Кузпалзэ ватэмзы бере, воксё уйжомиз кадь Тукай Юля. Кӧня ке нуналскын югырскизы пель дорысьтыз чиль-сьӧд йырсиосыз, кисырмиз, восьмиз вольыт, чебер ымнырыз. Укмысэтӥ уйзэ вӧсяса куноос кошкем бере, кышномурт ӝӧк вылзэ утялтӥз но кӧлыны выдӥз. Умме усьыса вуиз оло ӧз - шуш куараен кесяськыны кутскиз пурысь коӵышсы. Юля валес вылысьтыз ӝогак тэтчиз но тылзэ ӝуатӥз. Коӵыш выж шоры султэм но, гонъёссэ пештыртыса, кухня пала учкыса, шуш черекъя. "Ма дауртӥськод, Небыльток? - кияз басьтӥз со коӵышез. Маялляны но ӧз вунэты. - Малэсь кышкатскид? Ойдо ӵошен кӧлом", - валес вылаз понӥз со коӵышсэ. Кышномурт тылзэ кысыса гинэ вуттӥз - кухняысь кинлэсь ке ветлэм, лёгаськем пыдкуараоссэ кылӥз. Тылзэ ӝуатыса, кухняе вуиз со. Ворсам форточка малы ке пась кельтэмын. Ӝӧк вылысь пепельницаын сигарет пум ӵындэ. "Прима". Ӵапак таӵезэ кыске вал Романэз. Юлялэн быдэс мугорыз юзыр-кезьыр луиз. Ӵукнаозь, тылзэ кысытэк, укно вӧзы пуксьыса пукиз со. Нуназеяз ни анаезлы мадиз, кӧлыны лыктыны куриськиз. ... Вераськем куараослэсь сайказ Одоть. Уй чар-чар югыт. Толэзь, ас азвесь кильёссэ жалятэк, котыр пазя. Пыдчиньыосыз вылын гинэ вамыштӥз со кухня пала. Юля ӝӧк сьӧры пуксем но чай юыса пуке. Кыкетӥ чарказэ укнолы матэ пуктыса, олокинэн лабыртэ. - Ю, Роман, эмезь вареньяен ю. Юри тон понна чай быректӥ тани. Уломы ай, уломы. Ӵошен ик ортчытом та даурмес. Нош со ӝытэ мон тонэ эрекчай вал, - мугтэк серектэ егит кышномурт. - Иже кошкон азям, шуисько. Сьӧрам пуны калъяськиз, шуи вал. Зэмзэ ке верано, пӧртмаськиз соку. Мади ке, йырсиосыд пежырскозы. Ю чайдэ, Роман, ю. Сӥялоз. Тани курег пузэн, губиен пирожкиос но пыжи. Кунояськы..." - Нылы, малы-о уд кӧлӥськы? - тыл ӝуатыса, вӧзаз матэктӥз Одоть. - Ойдо валес вылад. Шутэтскы. - Роман кытчы-о кошкиз, анай? - Олома эн вераськы, нылы. Кулӥз ни асьме Романмы. Эмеспилэн лулыз рае мед интыяськоз ни. - Эрекчаськод тон монэ, анай. Али гинэ ми, ӵошен вераськыса, чай юыса пукиськомы вал ук. Тон люкетӥд. - Ойдо, мусое. Кӧл, шутэтскы, - кунултыса валес вылаз выдтӥз нылзэ Одоть. Мукетаз уе, уйшор азьын, шуш куараен кесяськыны кутскиз Юля. Кышкатскыса бӧрдыны кутскизы нылпиосыз: Игорь но Оля. Тыл ӝуатыса, Одоть нылыз вӧзы бызьыса вуиз. - Осто, инмаре! - гадяз кирос тыре Одоть. - Ма луиз, нылы? Юля валес вылаз пуксем но дыр-р! куалекъяса пуке. Вӧзаз усьтэм укноетӥ выж-выж салкым тӧл пельтэ. - Укноетӥ Роман пыраз вал. Кынми, пе. Ӧжытак мон вӧзын шунскыса кыллиз. - Вӧтамед луоз, нылы. - Ӧй, ӧй вӧта, анай. Ай, китӥм кутыса, монэ но сьӧраз валтэ вал. Сопал дуннеысь куное, пе, лыктӥ. Кышкаменым черекъяны кутски. - Осто, инмаре! Уть кыж-межъёслэсь, - гадьзэ нош ик киросаз арлыдо кышномурт. Бӧрдӥсь внукъёссэ буйгатыса, соосты ӟеч-ӟеч шобыръяз но малпамтэ шорысь ачиз но викыъяны кутскиз. *** Туно дорысь буш киын ӧз берытскы Тукай Одоть. Ӝыны пенсизэ кельтоно ке но луиз, сётэм-ӵектэм арбериоссэ басьтыны соглаш кариськиз. Туно дышетэмъя, куинь ар ӵоже утем-возем мак кидысъёсты укно янакъёс вылэ, ӧс выжые, гур-учог пасьёсы пазяз, Йӧ вылэ султон ӵукна, шур быземъя, басьтэм вуэз корка пушказ, валес вылъёсы, нылыз но внукъёсыз вылэ вӧсь шыпыртыса пызйиз на. Корказяз потыса, яратоно эмеспизэ лушкемен олокыӵе но ораськон, шузиесь кылъёсын тышкаськиз-куаретӥз. Та тунолэсь вань косэмъёссэ быдэстыса ни, мунчое ватскыса, зар-зар бӧрдытэк ӧз чида арлыдо кышномурт. Ӝытазе азьвыл куала интыяз ӟазег вандӥз но сое быдэскын пӧзьтӥз. Кисьтон дыръя выллем вӧсяса, вань ӵыжы-выжыосыныз сиизы. Кышкаса-курдаса пумитаз матэктӥсь уез Тукай Одоть. Куноос кошкемен валче, умме ӝог усизы нылыз но внукъёсыз. Кышномурт, вӧсь шыпыртыса, тылзэ кысыса, валес вылаз выдӥз. Уйбыт корка ӧсъёсы, укноосы йыгаськыса, кин ке котыръяськиз. Кухняысь укное чиньыеныз кокаку, Одоть ӧз чида ни. Укнозэ вӧлак усьтыса, уй пеймытэ вань кадь тодэм ораськон кылъёссэ "бурдъяса" лэзиз. Куаретӥз на: "Сотона лул, интыяськы ни сопал дуннее. Малы-о кузпалдэ курадӟытӥськод, нылпиостэ курдатӥськод? Сабырскы, Роман. Тани ньыльдон уй дэ но ӟеч-ӟеч вӧсялом. Эн иса адямиостэ". Тодмо ӧвӧл, ма юрттӥз пӧртмаськонъёслэсь мозмытскыны? Тунолэн мак кидысэз-а, вӧсям ву-а, ӟазег вандыса вӧсян-а? Яке... Чалмыт кариськиз Тукай Юлялэн юртаз. Егит кышномурт но уйбыртэмысь дугдӥз, кӧсыт ымныраз но ӵыжыт тс ватсаськиз кадь. Ма, туннэ уго уже ветлыны, ас нылпиоссэ сюлмысь мусояны, анаезлы тау карыны но вутскиз ни. *базяй (бигер кылысь) - бусён **тыкырак - проулка, пичи ульча * мырт карыса - кужмысь карыса Кун Кенешлэн сессияз Тӧлэз бусыысь кут на Таяз арня вискын Кун Кенешысь депутатъёс люкаськылӥзы витетӥ сессие. Соослэн ужан нуналзы кутскиз Кун Кенешлэн юртэз азьысен ик, "Дарт" театрлэн пикетэ потэм коллективез бордысен. Артистъёс парламентэ быръемъёслы вазисько одӥг куронэн: пытсам театрлы азьвыл статуссэ берыктыны но ужаны луонлык сётыны. Егитъёслэн та творческой коллективзы 4 ар ӵоже ӟуч но удмурт кылын 14 спектакль пуктӥз, ветлӥз Дуннеысь театръёслэн фестивалязы. Со бӧрсьыгес ик республкаысьтымы Культурая министерстволэн решениеныз ворсамын вал. Артистъёс та пумысен вазиськылӥзы ни Октябрь районысь судэ, Удмурт Республикаысь Вылӥ судэ, табере - депутатъёслы. Кылоз-а парламент соослэсь куаразэс, валалозы-а "Дартлэсь" кулэлыксэ - улон азьланяз возьматоз, дыр. Нош сессия ортчылон залын бугырес вераськон мынӥз Удмурт Республикаын кун ваньбурез нимаз кузёослы люкылон пумысен, мукет сямен вераса, приватизация улсын "прихватизация" ортчытонлэсь пумзэ-йылзэ утчанъя но йылпумъянъёс лэсьтонъя. Отчёт лэсьтӥз С. П. Касихин, Ваньбуръя кун комитетлэн кивалтӥсез. Солэн вераськемез данакезлы депутатъёслы ӧз яра, малы ке шуоно, али ке но валантэм: кыӵе пайда сётӥз приватизация асьме шаермылы, кытчы пыриз сомында коньдон но малы ӧз капчия калыклэн улон-вылонэз? Цергей Касихин одӥг юанлы но рос-прос валэктон сётыны ӧз быгаты. Соин но тросэз депутатъёс пыкылон кылъёс веразы Кун Кенешлы но, Правительстволы но. Соослы валантэм: малы туннэ нуналозь нокин но кыл уг куты калык ваньбурез вузам понна, нокин но вераны уг быгаты, кинлэн отын янгышез? Депутат В. П. Бодров шуиз: - Коммунистъёслэн фракцизы, экономистъёсын кенешыса, огкылэ вуиз: приватизация экономикамес ӝутонын валтӥсь инты басьтыны кулэ вал, но со озьы ӧз луы, ӟеч лэсьтэм интые, ваньзэ но куашкатӥз-быдтӥз. Таӵегес ик мылкыдын вераськизы депутатъёс Н. Ф. Чувашов, Р. Ю. Рыбаков, С. Г. Беркутов но мукетъёсыз. Играысь депутат А. П. Шаляпин районысьтызы депутатъёслэн нимынызы вазиськонэн потӥз 1999-тӥ -2000-тӥ аръёслы Удмуртиын кун ваньбурлы приватизация ортчытонъя программаез юнматонъя ужпумез берлолы кельтыны, малы ке шуоно, та документэз интыосын умой-умой ӧз эскере на. Соин соглаш луизы данакез залын пукисьёс. Вераськон мынэ республикаысьтымы ог 80 пала унитарной предприятиос сярысь. Вуоно арын соосты акциосын ужась огазеяськонъёслы (АО-лы) пӧрмытыны чакламын, 100 процентэз ик акциоссы кун ваньбуре понэмын. Та списоке шедё ваньмыз сямен хлебоприёмной предприятиос, торф поттӥсьёс, автотранспортной предприятиос, чорыг будэтӥсь хозяйствоос, Ижысь полиграфкомбинат, птицефабрикаос но трос мукетыз. Приватизация ортчытэм коньдон мыноз республикалэн бюджетаз. Оскон вань, таяз учыре кун ваньбур ужась коллектив кие шедёз шуыса, азьвыл сямен, уксёез уз тӧлӟы. Со понна ик кутӥське нимысьтыз программа. Витетӥ сессилэн ужез сярысь оглом верано ке, депутатъёс быдэс нуналзэ пайдаё тырши зы. Кыктойлы чаклам ужпумъёс одӥг нуналскын сэрттэмын-пертчемын но кулэ документъёс кутэмын вал. Республикамы понна шӧдскымон юрттэт сётыны кулэ куштӥськем кортэз кутонъя закон. Со бордын берло дыре умой-умой ужа Кун Кенешысь Законностья, обществоез кышкытлыклэсь утёнъя но адямиослэн правооссыя комиссия (кивалтӥсез депутат М. К. Кокорин). Пусйыны кулэ, асьмеос та ласянь бускель регионъёслэсь нош ик бере кылим, Татарстан но Башкортостан лушкаськисьёслы пумит чурыт ужрадъёс куто ни. Депутат В. В. Жебровский ӟырдыт вераськиз "Вторчермет" пумысен: - "Вторчермет" кылдытэмын вал "Ижстальлы" юрттон понна, нош со вань сырьёез, 90 процентсэ, келя кунгож сьӧры. "Ижсталь" сылэ яке, куштӥськем корт утчаса, арысь аре ветлэ пӧртэм улосвылъёстӥ. "Буммаш" но озьы ик. Сырьё ми ваиськом Киров палась. Асьмеос ке ӧм, кин тупатоз республикаысь экономикая радлыкез? Ватонэз ӧвӧл, та удыс кемалась шедемын ни криминальной структураос улэ. Соин ик югыт нунал шорын лушкаськисьёс кӧбератэк вандо электроезъёсты, дуно кабелез, тӥяло лифтъёсты но мукетсэ. Ваньзэ нуо приёмной пунктъёсы. Берлооссэ нокин эскерись- чаклась ӧвӧл, милиция но сыӵеосты уг иса. Тӥни ма тужгес но шугъяськытэ югдурез валась депутатъёсты. Сессиын вераськиз республикаысь военком Г. В. Барсков. Со вакчияк ивортон лэсьтӥз вуоно призывъя. - Тулыс армие басьтэмъёс пӧлысь одӥгез но "пӧсь интые" келямын ӧй вал, - шуиз со. Северной Кавказын та вакытэ Удмуртиысь 352 мурт служить каре, Дагестанын бырыны шедизы куинез пиосмы. Кыкез соос пӧлысь армиын 9 толэзь служить кариз ни вал, одӥгез - ар но ӝыны. Армие келян кутскоз 10 ноябрь бере, Удмуртиысь пиос службазэс нуозы Россиын гинэ, солэн палэназ но Черноморской флотэ басьтозы мылкыд карисьёсты. Витетӥ сессия таин ужзэ йылпумъяз, вуоноез кутскоз 19 октябре. Л. МЕДВЕДЕВА. Туннэ - выль балет Операя но балетъя кун театрмы, 15 ар ӵоже ужатозяз, быгатэ ни вылэм ас бордаз кыскыны. Со адӟиськиз туэ гужем Уфае гастролен потакузы но. Татысь учкисьёслы тужгес кельшиз "Фиалка Монмартра" опереттазы. Гужем ик артистъёс дасяськыны кутскизы "Собор Парижской богоматери" балетэз пуктыны. Ӧтемын вал Санкт-Петербургысь балетмейстер Ольга Игнатьева. Та балетын нырысьсэ эктозы тямыс егит артистъёс, ньылез соос пӧлысь республикаысьтымы Культурая министерство дэмламъя дышетскизы Уфаысь Р. Нуриев нимо хореографической училищеын. Премьера луоз туннэ, 8-тӥ октябре. Со сяна, декабре пуктыны чакламын П. Чайковскийлэн "Пиковая дама" операез. Выльдэмын луоз И. Штрауслэн "Цыганский барон" опереттаез, кудӥз пуктэмын вал дас ар талэсь азьло. Вуоно арлэн кутсконаз учкисьёс адӟозы ревю жанрен пуктэм "Жил отважный капитан" спектаклез. Со И. Дунаевскийлэн произведениосызъя, сӥземын композиторлэн вордскемез дырысен сю ар тырмонлы. Асьме крезьгурчилэн но артистлэн Г. Корепанов-Камскийлэн 70 арес тырмонэзлы дасяське концерт программа. 19-тӥ октябре возьматэмын луоз солэн "Чипчирган" опера-балетэз. Нырысьсэ таӵе спектакль пуктэмын вал 35 ар талэсь азьло. Вить ар талэсь азьвыл улонысь кошкиз Удмурт Республикаысь дано артистка Евгения Пахомова. Сое буре вайыса, 26-тӥ ноябре эшъёсыз возьматозы "Королева Чардаша" опереттаез. Татысь Юлиана артисткалэн яратоно героиняез вал. Спектакль понна бичам коньдонэз уже кутозы Е. Пахомовалы памятник пуктонэ. В. ЛАГУНОВ. Туннэ ке бырйысалмы Москва. Кун Думае депутатъёсты быръён нунал матысь арняе ке ортчысал, куаразэ сётыны 46 процентэз калык лыктысал. Таӵе малпанзэс верало обществоын юалляськонъёс но эскеронъёс ортчытонъя Всероссийской центрысь экспертъёс. Адямиослэсь мылкыдзэс тодон вылысь, соос вазиськылӥзы 1600 муртлы. Кин кыӵе кужым понна куаразэ сётыны ӧдъя? 32 процентэз РФ-ысь Коммунистической партилы дурбасьтэмзэ вераз. "Отечество" - "Вся Россия" огазеяськонлы (Юрий Лужков, Владимир Яковлев но Евгений Примаков) оске 22 процентэз ( июле та лыдпус 16 процент вал). "Яблоко" (Григорий Явлинский, Сергей Степашин но Владимир Лукин) - 12 процент. "Союз правых сил" (Сергей Кириенко, Борис Немцов но Ирина Хакамада) - 4 процент. "Наш дом - Россия" (Виктор Черномырдин) - 4 процент. ЛДПР (Владимир Жириновский) - озьы ик - 4 процент. "Россиысь народно-республиканской партия" (Александр Лебедь) - 3 процент. "Женщины России" (Алевтина Федулова) - 2 процент. Мукет партиос но огазеяськонъёс понна куаразэс сётысалзы 4 процентэз. Юалляськемъёс пӧлысь 10 процентэз кин пала дурбасьтыны уг тодо на. АРЪЁС НО АДЯМИОС Тылын гомась аръёс пыр Удмуртиысь индустрия удысысь батыр - тазьы шуыны луоз "Ижмаш" огазеяськон сярысь. Жаляса верано, та вакытэ предприятие азьпала йыг-йыг вамышъяны уг быгаты, малызэ котькуд лыдӟись вала, дыр. Соин ик шӧдонтэм улсын юбилейёс но ортчо. Тани кемалась ик ӧвӧл кылдэмез дырысен 70 ар тырмиз огазеяськонлэн тылпу кысонъя службаезлы. Нош татын ужазы но ужало синмаськымон адямиос, удыссы понна кужымзэс, визьзэс, тазалыксэс жалясьтэм муртъёс. Одӥгез соос пӧлысь Геннадий Павлович Колосов. Алигес ветеран аслэсьтыз но юбилейзэ пусйиз. Солы 75 арес тырмиз. - Геннадий Павлович, тӥ кузь улон сюресэз ортчиды. Тодэ ваёнъёсты пумтэм, дыр. Кыӵе вакыт сюлмады золгес каръяськиз? - Зэм, пӧртэм аръёс, уно адямиос йыре лыкто. Мон уг вунэтӥськы пичи дырме. Вордски Москва улосысь Облезьево пичи гинэ гуртын. Семьямы бадӟым вал. Пиналъёс гинэ - 12 кузя, мон - куинетӥез. Тямыс аресысен "шӧмъяй" ни, ма со сыӵе музъем уж. Гыри но, кизи но, пу но дасяй - ог кылын вераса, туж вазь быдэ вуи. Атае Павел Дмитриевич колхозэн кивалтӥз. 7 классэз йылпумъяме бере, мӧйыослэн ӵектэмзыя мон но гурт удысъя техникуме пыри. Малпасько вал механизатор луыны, дор палъёсам берытскыны. Но ваньзэ сураз-пожаз война. Дышетсконмес вунэтӥм. Ми, егит воргоронъёс, военкоматэ бызим, фронтэ куриським. Валамон ини, данаксэ берлань келязы, ӧжытак, пе, будэ на. Война - шудон уж ӧвӧл, нош ми, егитъёс, сое валаны ӧм тыршылэ, вожесь на вал угось. - Озьы ке но, войнаез "шӧмъяно" луиды ук. - 18 арес тырмиз но, Горд Армие басьтӥзы. 1942-тӥ арын вал со, странамы понна туж секыт вакытэ. Зэм, фронтэ соку ик ӧз ыстэ. Кӧня ке толэзь ӵоже ожмаськыны дышетским. Нош август толэзе Сталинградэ фронтэ шедим. Подразделенимы - 408-тӥ гвардейской миномётной дивизион - туж аспӧртэмлыко вал. Угось пыӵал тӥрлыкмы - дано "Катюша" - фашистъёсты туж зол кышкатъяз, со сярысь зэмос легендаос ветло вал. Немецъёслэн таӵе пыӵал тӥрлыксы ӧй вал. Соин ик милемлы приказ сётэмын вал, югдур котькыӵе луыны быгатоз, нош "Катюша" тушмон кие медаз шедьы. Ож сюресъёсы Сталинградысен кутскыса Болгария, Румыния, Венгрия, Австрия но Чехословакия пыр кыстӥськизы. Войнаез йылпумъяй 1945-тӥ арын. Прагаын. Али но жалясько, Берлинын ӧй вал шуыса. Асме шудоен лыдъясько, улэп кыли шуыса. Сӧсырмылӥ ик, но киы-пыды интыяз, ма кулэ на. Нош соку мыным 22 арес но тырмемын ӧй вал на. - Нош кызьы Удмуртие вуиды? - Ваньмыз туж огшоры вал: атае фронтэ гожтэт ыстӥз, улыны интыяським, пе, Ижевске, корка но уж шедьтӥм. Адрессэ ивортэм, дораз ӧтем. Ма карод, сюресэ одӥг вал - Удмуртие. Ижевске вуи, ужаны кутски ремзаводын, атаеным артэ. Трос ик дыр ӧз ортчы, егит эшъёсы цехысьтымы комсомолецъёсын кивалтыны оскизы. Нош 1947-тӥ арын городысь егитъёслэн одӥгаз ужрадазы тылпу кысӥсьёсын тодматски. Соос ӵектӥзы, ойдо, пе, дорамы ужаны. Кема ик ӧй малпаськы - соглаш кариськи. - Бӧрысь ӧд жалялэ-а? - Сыӵе мылкыды одӥг пол но ӧй вал. Тылпу кысон угось - воргоронлэн ужез. 1948-тӥ арын монэ ыстӥзы Пермьысь училищее. Ар ӵоже дышетскытозям пӧртэм тылпуосыз адӟыны кылдылӥз. Гомаз Ленин нимо завод, химической комбинат. Отысен ик ас кужымме, юн сямме кыдатӥ, луоз. Удмуртие вуыса, "Ижмаш" огазеяськонлэн тылпу кысонъя службаяз укмыс адямиен кивалтыны косӥзы. Озьы мон пичи командир луи. Уж тырмиз ваньмылы. Эскероно участокмы бадӟым вал, нош техникамы вуж - одӥг ЗИС машина но куашкан калэ вуэм тубат. Ас данмес сӥё-дано утим. - Ӝуась интыосысь адямиосты утьыны кылдӥз-а? - Кызьы сотэк. Туннэ кадь ик тодам ваисько на бадӟым тылпуэз. Со ӝутскиз одӥгез пу юртын. Ури-бери противогазтэк ик пыри. Кылӥсько кин ке юрттэт курыса вазиське. Ӵынэн визьзэ ыштыны кутскем кышномуртэз улӟытӥзы. Бен, кышкасьтэм луэме понна тау карон сётӥзы, пичильтык коньдон премия висъязы. Соку гинэ валай но вылӥ дунъяны кутски мон аслэсьтым быръем профессиме. Мед валасалзы вылэм сое тылпу кысон удысын туннэ ужасьёс но. - Тылпуэз сяна, маиз сюлмады кылиз на та удысын ужамдылэсь? - Огшоры нуналъёсы трос бызьылоно, мугорез кыдатоно луылэ вал. Яратӥсько вал капчи атлетикаез. Со ик юрттӥз, луоз, шуг-секытъёсысь могӟетъёстэк потылыны. Спорт удысын вырем сяна, кырӟан-вераны но яратӥсько на. Отрядысь художественной самодеятельносте ветлӥ. Нош огпол, сизьымдонэтӥ аръёсы, республиканской смотре пыриськыса, дипломант но луи. - Геннадий Павлович, вералэ вал семьяды, кузпалды, нылпиосты, соослэн нылпиоссы сярысь. Тӥлесьтыд мытэм удыстэс кин ке азьланьтӥсь вань-а? - Жаляса верано, тылпу кысон удысын ужасьёсмы ӧвӧл. Валера пимылы ӵектӥмы ик вал та удысын ас кужымзэ эскерыны, со аслэсьтыз сюрессэ бырйиз. Та вие аэропортын диспетчер луыса ужа. Ольга нылмы тырши тазалыкез эмъян удысын. Будо куинь внукмы но одӥг внучкамы. Кузпалы Вера Михайловна туж данъяськымон. Ми соин огкылысь улӥськомы ини 52 ар. Солэн тыршемезлы луыса юртамы котьку но чылкыт, шуныт но кӧттыр. Семьяямы мынэсьтым ужме азьланьтӥсьёс ӧвӧл бере, потэ вылэм егитъёслы вазиськеме. Эн кышкалэ тылпулэсь, кыдатэ мугордэс, тылпу кысонъя училищеосы дышетскыны пырелэ. Уго та удыс ноку уз вужмы. Кин тодэ, оло, ӟеч но кема аръёс тыршемды понна тӥледлы но синпель медаль сётозы. 20 ар ог интыын ужаны, астэ йыг-йыг возьыны быгатэм кулэ. Соку тӥледыз но калык гажалоз, тӥляд уженыды будӥсь пиос данъяськозы. Г. П. Колосов. А. ЕМЕЛЬЯНОВ. Юрий Маслюков Ижевскын Валлян ӝытазе Удмуртилэн столицаяз вуиз азьвыл Правительстволэн вице-премьерез Юрий Маслюков. Со лыктӥз Кун Думае одӥг мандатэн 28-тӥ округъя депутатэ кандидат луон понна документъёссэ окружной комиссие сётыны. Регистрациез ортчыса, Юрий Маслюков быръён кампание мылысь-кыдысь пыриськыны чакла. "Мон Удмуртиен туж юн герӟаськемын. 14 ар ӵоже Ижевскысь пыӵал тӥрлык поттӥсь предприятиосын тырши. Собере Кун Думаын но, Правительствоын но ужакум, Удмуртилэсь экономика удысысь ужпумъёссэ ялан синйылтыса возьылӥ,- шуиз Юрий Дмитриевич вуэмез бере Ижевскысь аэропортын.- Мон Кун Думае мынӥсько вань люкам опытме но кужымме пайдаё кутон мылкыдын Удмуртиысь но быдэс странаын огъя югдурез но законъёсты быдэсъянэз юнматон, республикалы экономика удысысь ужпумъёссэ быдэстыны юрттон понна. Уже куто вань тодон-валанъёсме, Россиысь Правительствоын но мукет федеральной ёзъёсын кусыпъёсме. Шара верасько, Удмуртилэсь ужпумъёссэ Москваысь кабинетъёсы вуттон понна вань быгатонлыкъёсме куто (кылсярысь, республикаысь предприятиослы кун заказ сётон, уждун, пенсия но пособие тырон ласянь). Малпасько, быръёнъя Ижевск округез Кун Думаын возьматыны кулэ сыӵе адями, кин умой-умой тодэ ваньбур поттонэз - заводысь цех дорысен Россиын Правительство дорозь. Туала быръён кампанилэн одӥгез яркыт тодметэз луыны кулэ тани ма: кивалтон уже лэзёно ӧвӧл криминалэз, кырсь амалэн люкам уно коньдонзэс быръёнъёсы висъяны дасяськись муртъёсты. Оскисько, Удмуртиысь бырйисьёс таӵе кандидатъёслы уз дурбасьтэ. Мон кыӵе ке одӥг политической кужымлэн адямиез ӧвӧл, кусып возьыны малпасько ваньмыныз бадӟым политической кужымъёсын - КПРФ-ен но, "Отечествоен" но. Со дыре ик мон Евгений Примаковлэн командаяз кылисько но соин артэ ужасько. Евгений Максимовичен берлозэ пумиськылӥ Ижевске лыктон азям. Со Удмуртиын улӥсьёслы ваньзэ ӟечсэ гинэ вераны куриз". Удмуртиын дыръяз куинь нунал ӵоже Ю. Д. Маслюков пумиськылоз городъёсысь но ёросъёсысь администрациослэн кивалтӥсьёсынызы, Кун Кенешлэн депутатъёсыныз, удысъёсысь профсоюзъёслэн но промышленной предприятиослэн ассоциацизылэн азьветлӥсьёсынызы, вуылоз "Ижмаш" огазеяськонэ но Прикладной механикая институтэ. Ю. МИХАЙЛОВ. Курка - фашист Серемес верос Одӥг пол, шулдыр но чебер нуналэ, мон Актэмыр гуртысь песянае доры мынӥ. Юон вумы быриз но, ведра-карнанъёсты кутыса, куйые вулы кошки. Отчы вуэм берам учкисько - адямиос бадӟым машина доры сьӧд куакаос мында люкаськиллям. Ведра-карнанъёсме палэнэ сэрпалляй но, адямиос доры итӥськи. Юасько, мар сыӵе вузало. Онтон агай шуэ: "Тани курка вузало, немец выжыысь, пе". Паймеменым синъёсы кымысам выжизы. "Немец выжы?!" - кушектӥськыса юасько. "Бен, - шуэ Онтон агай. Мон, буш ведра-карнанъёсме басьтыса, синтэм-пельтэм бызьыса бертӥ. Песянае пумитам потӥз но юа: "Нылы, мар луиз?" "Песянай, песянай, куйы дорын немец выжыысь курка вузало!" - шумпотэменым кесяськыса верасько. Тани кӧня ке час ортчыса, песянае куркаен бертэ ни. Нырысетӥ нуналаз тылобурдо ассэ туж зӥбыт возиз. Нош ӵуказеяз со кутскиз ук кузёяськыны, ассэ Германиын-а, мар- а кожаз. Туж йӧно лёгаськыса ветлэ. Одӥгаз нуналэ сад-бакчае эмезьлы потӥ гинэ но интыям юбо кадь кынми. Курка азям потӥз, тылобурдо павлинлэн кадь ӵушмыртӥз, синъёсыз горд-горд чиляны кутскизы. Шоканы дӥсьтытэк сылӥсько, нош ачим малпасько: маке та курка Гитлерлы кельшыны кутскиз кадь. Со мон доры матэктэ но матэктэ ни. Кема малпаськыса ӧй улы: резинка сапегме куштӥ но как гадёназ лэзи ук. Курка эшшо урмиз. Тылобурдо мон доры вуытозь одӥг-кык вамыш гинэ кылиз на. - Стоять! - шуыса кеськи шораз. - А! Меня не понимать?! Один, два шукки ке резинка сапегеным, пыдъёстэ ик урдылод! Нош курка кылэм но, адӟем но уг кары. "А! Ӟуч сямен не понимать?! Твой понимать будет. Стехен? Стехен, Гитлер! Ну, курка, погоди!" Кыкетӥ резинка сапегме кутыса лэзи. Паймоно кадь - сапег йыраз изьыяськиз. Нош ачим киме чабкисько. Сапегме куштыны выронъяз мон лобатыса вуи ни. Тӥни озьы гинэ со куркалэсь йыры мозмиз. Нош мар луиз собере, соиз ини мукет учыр. Надежда ГАНЬКОВА, Можга педагогической колледжын дышетскись. 10 октябре - гурт удысын но сиён-юон поттонын ужасьёслэн нуналзы Михаил Назаров: "Нянь ваньмызлы тырмоз" Туэ гуртысь нянь будэтӥсьёслэн, пудо утисьёслэн но сиён-юон поттон удысын ужасьёслэн профессиональной праздниксы быдэс толэзьлы вазьгес ортчытыны тупатэмын. Соин ик Правительстволэн Тӧроезлэн воштӥсез Михаил Назаров алигес пумиськиз журналистъёсын. Солы угось оскемын калык хозяйствоысь одӥгез секыт удыс - агропромышленной комплекс. Михаил Иванович люкаськемъёслы мадиз гурт хозяйствоын югдур но сое азинтонэн герӟаськем ужпумъёс сярысь. - Туэ куазь сокем ик ӟеч ӧй вал ке но, куд-ог районъёс удалтэм ю-нянь будэтӥзы, - мадёнзэ кутскиз премьерлэн воштӥсез. - Кин арысь аре кидысэн ӟеч ужа, со уно ю тысь кутса. Сыӵеос пӧлы пыро Вавож, Грахово, Завьялово, Алнаш но куд-ог музон районъёс. Татын пудо сиён но коткытынлэсь уно дасямын, пудо йырлы быдэ 20-23 центнер кормовой единица. Со луонлык сётэ тол вылтӥ уно сӥль-йӧл поттыны. Зэм, удысын югдур капчи ӧвӧл ке но, гурт калык чида на: беромыса уждун басьтыса но данаксэ кысык ужъёсты дыраз но ӟеч быдэсъя. Кылсярысь, миым музъем ужась шорлыдын 370 манет уждун басьтӥз. Туэ со лыдпус будыны кулэ. Котькызьы бергаты, гурт возиське ай. Тани азьланезлы сюлмаськыса, 60 процентлэсь уно музъем кын улэ гыремын, 80 процент кидыс кисьтэмын (115 сюрс тонна интые, 91 сюрс тонна). Куать сюрс гектарлэсь уно картофка бусыос ӝыныезлэсь ятырез бушатэмын ни. Миым сярысь, туэ "кыкетӥ нянь" тросгес шеде, гектарысьтыз 120 центнер пала усе. Но пайдаё ужан вылысь, со ичи, гектарлы быдэ ӧжытсэ 150 центнер люканы кулэ. Озьы ужало вавожъёс гинэ, соослэн шорлыдын 175 центнер бичало. Сю центнерлэсь уно копало Игра, Яр, Сюмси, Ува, Можга, Завьялово но музон районъёс. Нош камбаркаос, жаляса верано луэ, котькуд гектарысь 45 центнер гинэ басьто. Со кидыслы гинэ тырмоз. Сыӵе "ӟеч" ужало ёросысь куинь хозяйствоос. Урод уг мыны бакча сиёнъёсты утялтон. Туэ соос 1200 гектар пала киземын. Ӵуж но горд кушман ӝыныезлэсь тросэз октэмын, нош кубиста - одӥг ньыльмосэз. Шаерамы калыкез сюдыны толэзьлы быдэ 10 сюрс тонна пызь кулэ, веранзэ азьланьтэ Михаил Иванович. Нош ваньзэ республикалы 140 сюрс тонна ю тысь палэнысь ваёно луоз. Сарапулысь нянь продуктъёсъя комбинатэ 20 сюрс тонна вуттэмын ни. Ю-нянь вуэ Краснодар, Ставрополь улосъёсысь но мукет интыосысь. Соин ӵош ик "Аспэк" пунэм тырон амалэн республикалы 48 сюрс тонна ю тысь шедьтыны малпа. Тӥни озьы оскон вань, шаермы няньтэк уз кыльы шуыса. Но няньлы но солэсь сиёнъёслы дунъёс сярысь вераса, Михаил Назаров ивортӥз, соос, пе, герӟаськемын ю тысьлэн дуныныз. Азьланьын со будыны быгатоз но килограммез чабей оло 3,2 манет луоз. Сыӵе малпан вань. Собере асьмеос дунтэмгес пызь вузаны ӧдъям ке, со бускель республикаослы кошкоз, нош пызь изӥсьёсмы бадӟым изъян адӟозы. Мукет ласянь, элеваторъёс пызьлы дунзэс йылэтӥзы ке, нянь пыжисьёс шуге-леке шедёзы. Угось одӥг сукыри нянь пыжыны ичизэ 80 процент пызь мынэ. Соин ӵош ик переработчикъёс предприятиоссылы кузё кариськыны чаклало. Сыӵе малпанзы вань Сарапулысь нянь продуктъёсъя комбинатысь но Ижевскысь 1 номеро нянь кутӥсь предприятиысь ужасьёслэн. Нош кыӵе югдур пудо вордонын? Туэ 9 толэзьскын скаллы быдэ 2210 килограмм йӧл кыскемын, яке, миым та дырен ӵошатыса, 57 килограммлы ичигес. Скалъёслэн лыдзы 588- лы кулэсмемын. Тӥни озьы туэ 13,5 сюрс тонналы ӧжыт йӧл люкамын. Со пӧлысь 10 сюрс тоннаез усе Яр район вылэ. Соин ӵош ик Вавож, Красногорск, Сарапул, Воткинск районъёс данаклы трос йӧл басьтӥзы. Капчи уз йӧты пудоосты толйытон. Али пудо йырлы быдэ быдэс республикая 15,6 центнер гинэ пудо сиён дасямын, нош ичизэ 25 центнер кулэ. Та ласянь бере кылё сюмсиос. Районын ваньзэ-ӧвӧлзэ 10,7 центнер сиён тыремын. Шаермыя туэ 62 сюрс тонналы тросгес кӧс турын дасямын, нош жалем сиёнъёс (силос но сенаж) 65 но 59 сюрс тонналы ӧжыт тыремын, угось гужем кӧс улэмен, кукуруза ӧз удалты. Огъя вераса, гурт удысын югдур пумен уродме. Арысь аре вужмо тракторъёс, комбайнъёс но мукет техника. Сое выльдыны ум быгатӥське. Ваньмыз со уж вылын шӧдӥське. Тани пудо сиён уг тырмы "Восточный" парсь вордон комплексын. 60 сюрс парсез сюдыны нуналлы быдэ 100 тонна комбикорм кулэ. Соин ик Правительство хозяйстволы сиён басьтыны, пунэмен 3 миллион манет сётӥз. Со бен трос ӧвӧл. Нош "Удмуртпродконтрактлы" ю тысь шедьтыны 8 миллион манет ссуда висъямын. Со пӧлысь 3 миллионэз вылӥ верам хозяйстволы чакламын. Кызьы мынэ Москваын "Вузкарон юрт" лэсьтон? Ужъёс али гуньдэмын. Юртэз вуттыны ичизэ 15 миллион манет уксё шедьтоно, нош вузкарон тӥрлык басьтыны эшшо 10 миллион утчано луоз на. Михаил Иванович вань гурт калыкез ӟечкылаз профессиональной праздникеныз, сӥзиз тазалык но шудбур, мылкыд кариз, шуг-секытъёс шоры учкытэк, лулысь-сюлмысь ужаны. Геннадий Романов. Мон уг шедьты тон кадьзэ Калык кырӟан Гурзэ тупатъяз Федосья Тубылова Кылъёсыз Федосья Тубыловалэн Туби но васьки урам кузяды, Ӧй шедьты тӥлесьтыд ӟечъёссэ. Ветлӥ но ветлӥ котыр гуртъёстӥ, Ӧй шедьты тӥлесьтыд мусозэ. Вази но вази, нош тон ӧд вазьы, Вази но, бердэ но ӧд учкы. Туж трос утчалод но тон уд шедьты, Яратон туганэ, мон кадьзэ. Тон мон кадьзэ туж трос шедьтод но, Нош мон уг шедьты ни тон кадьзэ. ВАЛЭКТЭ ЮРИСТ Нылы ваиз ныл... Мынам вазиськеме потэ тӥледлы таӵе юанэн. Мынам нылы туэ 11-тӥ июне вордӥз ныл, 22-тӥ июне быдтӥз дышетсконзэ Можгаысь ветеринарной колледжын. Декретной отпусксэ тыризы колледжын, нылпи вордӥськем понна пособие - картэзлэн ужан интыысьтыз. Юанэ таӵе: кытысь табере басьтыны кулэ нылпи утем понна, толэзьлы быдэ тыриськись пособие? Нылы табере дышетскись но ӧвӧл ни, биржае но уг куто. Н. Н. Можга район. 1995-тӥ арын 12-тӥ мае кутэмын "Нылпиен гражданъёслы кун юрттэт (пособиос) сярысь" Россия Федерацилэн Законэз. Нылпиез утьыку отпуск вакытэ солы одӥг но ӝыны арес тырмытозь толэзьлы быдэ юрттэтлы право басьто: анайёс яке атайёс, музон ӵыжы-выжыос, кинъёс асьсэос пиналэз утялто но кинъёс кун ласянь соцстрахен герӟаськемын; анайёс, кинъёс ужлэсь люкиськыса дышетско улӥ, шор но вылӥ профессиос сётон учреждениосын; анайёс, кинъёс контрактъя мынэмын военной службае, югдурез утёнъя ёзъёсы, уголовной ужъёс понна кыл кутытӥсь ёзъёсы, нош озьы ик кинъёс кутэмын Россия Федерацилэн кунгож сьӧры келям воинской формированиосысьтыз гражданской персоналэ; анайёс, кинъёс секытэн дыръязы, нылпи ваёнэн герӟаськем отпускын дыръязы, нылпизылы арес но ӝыны тырмытозь отпускын дыръязы ужысь мозмытэмын предприятиез, учреждениез, организациез яке военной частез быдтонэн валче, ужан огкылын (контрактын) пусъем дыр ортчемен валче. Куд-ог анайёслэн правозы вань нылпилы одӥг но ӝыны арес тырмытозь отпуск понна пособилы но ужтэк кылемзы понна пособилы. Соку соос быгато кык пӧлысь огзэ юрттэтэз бырйыны. 1995-тӥ арын 4-тӥ сентябре Россия Федерациысь Правительство кутӥз 883 номеро постановление. Со валэктэ: адямиез ужысь мозмытыку (предприятие, учреждение яке организация быронэн герӟаськем учыръёсты вератэк) яке дышетскон йылпумъяськыку: толэзьлы быдэ юрттэтэз сётэмысь дугдоно. Озьыен, нылдылы сыӵе пособие али уз тыре. Сое басьтон понна со мед шедьтоз тупась уж ( нуналаз кӧня ке часлы яке дораз) яке мед пыроз дышетскыны. Жаляса верано луэ: закон уг сёты музон дэмлан. Колхозлэн юртаз улӥсько... Нырысетӥ юан. Мон улӥсько колхоз квартираын правитизировать каремын ӧвӧл. Отчы лыктӥм бырись гуртысь 1984-тӥ арын. Картэ тракторист вал, ачим - вузкарись. Квартирамы понна кварталлы быдэ дун кельтылӥзы 1992-тӥ арозь. 1992-тӥ арын колхозмы люкиськиз вить пичи ассоциациослы пӧрмиз АКХ шуонлы. куинь ар ортчыса, выльысь огазеяськимы но луим одӥг бадӟым АКХ. 1992-тӥ арысен 1999-тӥ арозь квартира дун ӧз ни басьтэ. Табере, сомында ар ортчыса, председательмы косэ улон интылэсь быдэсак дунзэ тырыны. 1988-тӥ аре тупатэм мында. Шонер-а председательлэн куронэз? Кыкетӥ юан. Мон юай квартирамылэсь дунзэ. Улыны кутскем берамы сылэ вал 12 сюрс манет. 1998-тӥ арын луэм ини 17 сюрс. Бухгалтериын шуизы: коркаослы документъёс ышемын. Мон сыӵе дунэн соглаш ӧвӧл. Тодэме потэ: кытысь утчано документъёсты? Куинетӥ юан. Картэ кулӥз 1998-тӥ арын инфарктэн. Юрт со вылын гожтэмын вал. Луэ-а мон вылысь корка дун кельтыны? Ачим ужасько АКХ-ын 1991-тӥ арысен. В. Полтакова. Грах ёрос. Жаляса верано луэ: автор гожтымтэ - кызьы соослы сётӥллям улон инты - огкылэ (договорен) яке ордерен? Юрт гожтэмын ке карт вылын, кыӵе документэн со юнматэмын? Тӥни малы валэктон сётыны луэ огъягес. Коркан тӥ найм огкылъя улӥськоды ке, тӥляд сое приватизация пыр асьтэлы каремды яке вузамды уг луы. Председательлэн правоез ӧвӧл квартираез кужмысь басьтыны. Тӥ солэсь куронзэ ӧд быдэстэ ке но, отын улыны праводэс уд ыштэ, коммунальной юрттэт понна дун тыриды ке. Документъёс ышемын шуо ке но, соосты утчаны кулэ. Бумагаосты но трос интыын утё, архиве сёто, кытысь ке но шедьтыны луоз. Соос сюризы ке, тӥ быгатоды квартирадэс асьтэ вылэ гожтыны. Нош тыроды-а коркалэсь быдэсак дунзэ, уд-а - асьтэос чаклалэ ни. Улэм понна дунэз тӥ соглаш луытэк кельтыны уг яра. Лилия Шкляева, "Ижюринформ" агентстовысь адвокат. Юанъёстылы рос-просгес валэктон кулэ ке, вазиськелэ 25-33-70 телефонъя. ШӦКЫЧ Мырӟиськизы кык автоос Туэ 8-тӥ мае 14 час котырын Шаркан ёросысь Заречной_Вишур гуртысь Широбоков "ГАЗ-5314" колхоз машинаен мырӟиз "ВАЗ-21061" автомобилез. Вож кыез шӧмъямез бере, шофёрлэн мылкыдыз бурдъяськиз, лэся. Озьы со путевой листтэк гаражысь машинаез поттӥз, кабинае эшшо кык эшсэ пуктӥз на. Ширтӥз Широбоков Петуньки гурт пала. Калыкын шуо: "Ӝог мынод, юмоке шедёд". Таослэн но озьыгес луиз. Сюрес сюбег потэмен, бадӟым машина пичиез борды мырӟиськиз. "Жигулиысь" Красильников но Майоров сӧсырмизы. Широбоков вылэ уголовной уж ӝутэмын вал. Но... 28-тӥ июне амнистия пумысен постановление потӥз. Та ивор Красильниковез пыд йылысьтыз погыртэ ни вал. Уго машиназэ тупатонлы гинэ солэн 35 сюрс манетэз кошкиз, со сяна, коньдон эмъюмъёслы но кулэ луиз на. Красильников талы ӧз чида. Ыштонъёссэ берыктыны курыса, вазиськон гожтэ. Нош кин вылэ?! Паймоно кадь, коньдонзэ СХПК "Пахарь", пе, мед берыктоз. Ваньзэ лыдэ басьтыса, суд лыдъяз материальной шуон ыштонъёсты. Со 57412 манет но 30 копейка тыр, нош моральной палзэ ке учконо - 10 сюрс манет тыр люкаське. Судлэн пуктэмезъя закон кужыме пыриз 21-тӥ сентябре. "Пахарь" эштосын та пумысен собрание ортчытыны чакламын. Маин со йылпумъяськиз, ивортом на... Зоя Кузнецова, Удмурт кун университетысь студентка. Удмурт пиосмуртлы ода Тани со - огшоры удмурт пиосмурт. Огшоры кадь, нош кыӵе рос-прос, кышкасьтэм, кыӵе йӧно! Пиосмурт ке пиосмурт. Но со та сямъёссэ шараяны уг дырты. Малы дыртонэз, дырыз вуиз ке - соос асьсэос кыре потозы. "Юмоке сюронтэм вылысь, ӧжытгес ымез усьяно", - таӵе малпанэн улэ со. Эн сюлмаське: дӥсьтӥсьтэмысьтыз ӧвӧл. Эн но тышкаське, ымысьтыз вӧй кисьтӥськемлэсь кышка шуыса. Эсьма, ӧжытгес вераське ке, йӧногес адӟиське. Воргорон ке воргорон ини. Солы синмаськемдэ но валаса уд вуы. Куд-огез чабкисько: удмурт пиосъёслэн асьсэды калык пӧлын, кышномуртъёсын чебер воземзы уг луы. Кин озьы малпа - со чылкак визьтэм адями. Уд но валаське ук: озьы со кышномуртэз гажамзэ возьматэ, нылмуртэз асэныз одӥг радэ пуктэ. Кышномурт солэсь ляб лул ӧвӧл - соос огкадесь. Пересез, пиналэз яке нылкышноез автобусэ азьлогес лэзьыны - эшшо маке ӧвӧл-а? Ваньзылы сюрес сётӥд ке, ачид воксё но пырытэк кылёд. Транспортын инты сётыны - мед чидалозы! Укыр пересесь но, секытэн но ӧвӧл. Укное учкыса, котырдэ адӟытэк мыноно таӵе дыръя. Туж малпаськись тусо кариськоно. Мед шуозы: кыӵе сюлмо, улон сярысь малпаськись та пиосмурт. Пырон ӧс усьтыны, дамалы киез сётыны, выл дӥсьсэс дӥсяны юрттон - соос улэпесь ӧвӧл-а, мар-а? Кизы-пыдзы но чигемын ӧвӧл, асьсэлэн выремзы луэ. Зор улэ сюрем нылашлы зонт дэмланы - сакырлэсь ӧвӧл, уз сылмы! Кышномуртлы сяська кузьманы - шедьтӥллям сюлмаськон! Мар толыкез сяськалэн? Туннэ кузьмад, ӵуказе со шуялоз. Нош ӵуказе улыса соос сярысь малпась ик уз луы ни. Ӟучъёс гинэ со, улонлэсь бергамзэ валасьтэмъёс, туганъёссы доры розаосын ветло. Удмурт пиос - кыӵе соос визьмоесь! Дуногес кузьымен вуыло - тӧдьы йыро ӟенеликен. Мар-о со сяська? Со нылмуртлы гинэ шумпотон вае, дыр, нош воргорон та учыре номыртэк но кыле. Тӧдьы йыроеныз куное лыктэ ке, солы но ӧжытак пальккиське. Шоколадэн ческыт вина? Уд тодӥське-а мар-а, водкаен ӵошатыса, виналэсь мукет нуналаз йыр золгес висе, ӝушлы но уродгес луэ солэсь. Нош шоколад сиыны нылъёслы уг яра: кӧялозы-зӧкалозы эшшо, мугор чеберзэс ыштозы. Туж сиемзы потэ ке, асьсэ коньдонзэс медам жалялэ ни. Кыӵе визь та пиосмуртлэн, кыӵе визь! Кузьымъёсын, шуныт кылъёсын, пе, кышномурт сюлэмез ас палад берыктоно. Я, малы таӵе сюлмаськонъёс? ..Ӧжытак сектаськод, нош кудӟемез бере ӟыгыртӥськод-чупаськод ке, со - тынад. Кыӵе йӧно, тузӥ та пиосмурт, макем визьмо со! Паймоно кадь. Тӧдьы йыроеныз куноям сяна, кырымен-кырымен кисыысьтыз поттылыса, кышноослы со сема люкылэ. Ма, кызьы-о сематэк? Мар карыны кулэ, кылсярысь, ӝытъёсы клубын, сема но ӧд куада ке. Котькыӵе ке но - уж! Нош кӧмзэ пырак выж вылэ. Клубын утялскись юнме коньдон басьтэ ук - пичияк мед тыршоз. Сема сяна, кисыяз эшшо одӥг арбери вань на - кыскон. Сотэк нокызьы уг луы. Ӵемгес пурккетэ "Примаез". Дунтэм ке но, кыӵе зыныз солэн! Йыр ик пороме, ява. Зынъямъя зынъям потэ. Собере, эсьма, нокыӵе одеколонъёс, дезодорантъёс кулэ ӧвӧл. Пиосмурт зын лӧсъяське "Примаез" кыскем бере. Зэмос пиосмурт - тузӥ, йӧно, номырлэсь кышкасьтэм. Огкылын вераса, синмаськымон, син шоры йӧтымон. Нош кыӵе солэн синъёсыз! Визьмоесь, кучапилэн кадь мӧзмытэсь, сюлмаськонэн тырмемын: кытысь меда макмырез веськатыны ӟенелик шедьтоно? Шораз учкыса, жалезлы чидатэк бӧрдэм ик потэ, сюлэм шымырске, ява! Нош кыӵе со йӧно, рос-прос, сэзь, батыр. Со дыре ик - сыӵе огшоры, мукетъёсызлэсь номырин висъяськисьтэм удмурт пиосмурт. Л. КИТОВА. ШӦКЫЧ Бездытгес ик... Чебер малпанъёсын улыны, умой ик, дыр. Но улонлэн но, адямилэн но вань аслаз куронъёсыз. Уго дунне вылын улондэ азьланьтон понна кулэ сиыны но, юыны но, дӥсяськыны но. Но улонмы арысьаре йырчукин берыктӥськыса кошке. Мар карод на, луло адямиез али валасез туж ичи. Зэм, кин ке улоз - быгатымтэез кулоз ке но, маке шат. Таӵе манерен али ортче улонмы. Озьы ик, ваньмыз интыяз, нокин уг но малпа уждунзэ кызьы радъян сярысь. Вылӥын ужасьёс гинэ, ужпиос сямен гырдалляса, сиё-юо. Нош уноез адямиос копейказэс лыдъяса-чотаса нуналысь-нуналэ ужазы дырто. Нош ноябрь толэзьысен улон инты понна но, пе, пени тыроно луоз. Нош мон, вань тыронме сётыса табере сютэм улыны кулэ шат?! Малпаса, малпаса - сюлэм ик путэ - кыӵе ке рабъёсты возён дыръя кадь улӥськомы ини. Нош кӧня адямиос быро шудтэм учыръёсын, музъем зурканын, Чечняын. Адями кыӵе ке улэптэм маке кадь луиз. Самой кышкытэз дуннеез со - пожаны трос визь кулэ, нош чебер улонэз радъян понна - дауръёс кулэ. Сьӧлык ук со - кин улэ "после меня хоть трава не расти" девизэн. Возьыт луоз асьмелы будӥсь егитъёсмы азьын таӵе умойтэм ужаммы понна. Тани та вакытэ кӧня адямиос депутатэ чуртнасько. Но нокин уг малпаськы, со секыт политической но экономической уж шуыса. Мон вылӥысь тӧроослы вералляй ини калыклы уждунэз рос- прос тырон ласянь. Тӥ, гажано тӧроосмы, туж кыдёке выжиды ини. "Совершенно секретно" амалэн ворсады сю поллэсь 100 ятыр басьтэм уждунъёстэс... Вераме потэ ас шаерысьтымы птицефабрикаос сярысь но. Азьвыл басьтӥськом вал дунтэмгес наборъёсты. Табере соос но безотходной амалэн ужаны туртто. Учке али - йырыз но, пыдыз но, ӵемонэз но, мусэз но, сюлмыз но, бурд йылыз но - ваньмыз нимысьтыз фасовать каремын. Нош дуныз чик гонтэм ӧвӧл. Тани пыдчиньыосыз сыло 14 манет но 50 коньы. Огезлы пайми: нош кытын куреглэн сюлъёсыз? Сӥль сиытэк улом ай шуи но куинь сукыри нянь басьтӥ. Озьы тӥни: нокин но нокытын начар, сютэм адями сярысь уг сюлмаськы ни. Дунъёс нош будо но будо, сое нокин но серметаны уг. Бездытгес, бездытгес ик шока улонмы, нош улонмес яркыт карисьёсмы кемалась кӧй-вӧй пушкын уло ни. КУРЛА НАЧАРОВА. Быръён азьын Туннэ Ижын люкаськозы "Удмурт кенеш" огазеяськонлэн пичи кенешаз быръем эшъёс. Соос эскерозы асьме элькунын Кун Думае депутат быръён азьын кылдэм югдурез но мукет ужпумъёсты. О. МАРКОВ. Пиос но будо, пиос но кошко, нош ик со интые пиос вордӥсько Одӥгаз гужем нуналэ эшеным ӵош Ижевскысь тодмомы доры кожим. Котьку чырмыт, задор мылкыдо нылкышно копак катьтэммем. Ӟигары ик ӧвӧл ни, пе, номыр карыны, уйёсме но уг кӧласькы, пие сярысь сюлмаськыса - Людалэн соос кык кузя будо. Бадӟымзэ тани май пумын армие келяз. Кин уз синмаськы таза, батыр мугоро, ӟеч сямо удмурт пияшлы. Ай водителе дышетскемын на. Аслаз но мылкыдыз вал десантник луыны. Армилэсь кызьы ке но палэнскон сярысь ӧз ик малпаськы. Воргорон ке воргорон медло. Келязы Ставрополь пала. Людалэн сюлмыз ик шымырскиз. Ма, кызьы озьы? Солэн лулкомокез, осконэз но нырысетӥ юрттӥсез Чечнялы сокем матын служить кароз! Буйгатӥсь гожтэтъёс вуылӥзы ке но, анай сюлэм синвуэн пыласькиз. Неужто пичиез пиез понна но тазьы ик чигиськоно луоз, соиз но школазэ йылпумъя ни ук. "Оло, таизлы пичи ке но визь пыроз, - осконэн улэ анай сюлэм, - уз кыстӥськы солдат сапегъёсты дӥсяны. Йырвизьмыз ужа, дышетскыны гинэ кытчы ке пырыны мед быгатоз вал". - Ярам, кыктылэн но тӥляд нылъёс, - лулӟылэ Люда, - кыклы люкиськыса уд улэ. - Милям но сюлмаськонъёсмы ӧжыт ӧвӧл, - буйгатыны турттэ сое эше. - Нылъёсмес картлы бызьтоно. Туннэ солдатъёс - ӵуказе эмеспиос. Со пумиськеммы бере кык толэзьлэсь ятыр ортчиз ни. Ожъёс пуромизы Дагестанын, чечняын. Мискинь Люда, мискинь анайёс! Ӝытъёсы телевизор дорысь уг кошкыло. "Оло, мынэсьтым но пиме ожъёсы келяллям? Сӧсыртэмъёс, виемъёс пӧлын ӧвӧл-тэ?" - та но мукет юанъёс маза уг сёто солдат анайёслы. Инмарлы гинэ оскон кыле на. Нош шаерысьтымы куинезлы анайёслы инмар но уз юртты ни. Дагестанын Чечняысь гыжкалъёсын ожмаськонъёс дыръя бырыны шедизы Ува посёлокысь Станислав Моргунов, Кизнер ёросысь Васильево гуртысь Алексей Паранин но Шаркан ёросысь Гондырвай гуртысь Дмитрий Вахрушев. Нош ожъёс азьланьтӥсько. Дас тямыс-дас укмыс аресъем пиос вамышто тылӝуэ. Одӥгез буйгатэ, ожъёсы тросгес кутӥське техника. Калыкын шуо, губи трос потэ секыт арлы - война вакытэ. Верало на, пиос тросгес вордӥсько солдатъёс быронлы. Кӧня муртлэсь верамзэс кылӥ ни, туэ ар пиосын емышо, пе. Шуг-секытъёс вакытэ ачиз Инкуазь кизэ сётэ ни адямиослы. Но малы ке странаен, калыклэн улонэныз кивалтӥсь дядяйёслэн ог-огенызы огкыл шедьтэмзы уг луы. Политикъёслэн, кивалтӥсьёслэн янгышенызы солдатъёс дор палазы цинк коросын берто. Дагестанын ожъёс кутскем бере Россия Федерациысь Правительство калыкез но, солдатъёсты но оскытӥз, ожгарчиос уз ёрме сиён-юонлы но, ож тӥрлыклы, техникалы но. Котькуд ожмаськем нуналзы матэктытоз доре бертон нуналзэс, вылаз ик, трос коньдон басьтозы. Ӧйтӧд, кызьы меда быдэстӥськоз ваньмыз со куашкам экономикаен странаын, ог- огенызы йырйиськись кивалтӥсьёслэн валтэмзы улсын. Россиын улӥсьёслэн адӟонзы сыӵе-а, мар-а - гольык кылъёслы пумтэм-йылтэм оскон. Но анайёслэн уг поты ни со осконэн улэмзы, пиоссэс валантэм войнае гинэ ӧвӧл, огшоры службае но келяны кышкало. Глазовысь солдат анайёс татысь ик солдат анайёслэн комитетэнызы ӵош ужрад ялӥзы. Соос султӥзы пиоссэс Дагестанэ келянлы пумит, мед, пе, служить карозы Удмуртиын. Удмурт Республикаысь Кун Кенеше солдат анайёс ыстӥзы сюрслэсь ятыр кинюртэмен гожтэт. Верамъёслы но куд-ог гожтэмъёслы осконо ке, пӧсь точкаосы тросгес келяло Урал, Сибирь но Дальний Восток палась пиосты. Ӧйтӧд, кызьы учкозы та гожтэт шоры калыкен быръем депутатъёсмы, Дагестан но Россия Федерацилэн люкетэз ук. Закон ваньмыз понна одӥг. Собере, кунгожъёсты нош ик кинлы ке утьыны кулэ. Но медаз усе вылэм вань со шуг- секытъёс "вож" солдатъёс вылэ. Кемалась вераськонъёс мыно ни армиын югдурез воштон пумысен. Пиослэн асьсэлэн мылкыдзы мед луоз служить карыны. Тодам лыктэ, кызё аръёс талэсь азьло армие мынон пумысен анайёслэн но, пиоссылэн но юанзы ӧз кылдылы. Вылаз ик, служить карыны ярантэм пияшъёс шоры кырыж учкылӥзы, кыӵе пиосмурт, пе, со луоз. Нош табере? Армие ӧд яра - шумпот. Солдат сапегъёсты кутчантэм понна куд-огез тазалыксэ но уг жаля, оломар асэныз дауртэ. Амалоосыз мукет сюрес утчало. Озьы ке но, пиос будо, кошко армие. Алигес Воткинске ветлыны кылдӥз. Ижевске лыктӥ поездэн. Арня нунал, калык вагон тыр. Тросгес студентъёс. Вӧзам ик лабыр потто куинь пиос. Вераськемзыя валай, Ижысь Механикая кун университетын дышетско. Кыл бӧрсьы кыл, арми вылэ но вуизы. Эшъёссы, тодмооссы сярысь мадё. Кин тазалыкезъя палэнскыны быгатӥз. Одӥгезлэн анаез пизэ Чечнялэсь утён понна нырысь бызьылэм, табере Дагестанлэсь палэнтыны кузь сюрес вылэ потэм. - Малы лэзёно вал пизэ армие, соку ик амал шедьтыны ӧй быгатысал шат? - пайме одӥгез пияш. - Марысь мар ке, мыным батя юрттоз. Эшъёсыз но уг кайгыро, шӧдске, дышетсконзы азьланьын на угось. Армие басьтон но уг кышкаты, астэ гинэ возьыны быгаты, пе. Пиослэн вераськемзы малпаськонэ уськытӥз монэ. Людалэн кайгыронэз но весь сюлмам улэ. Ветлоно кариськи Ижевскысь солдат анайёслэн комитетазы. Соос ке ӧз, кин юрттоз но буйгатоз анайёслэсь сюлэмъёссэс. Ижевскысь солдат анайёслэн комитетсы кылдӥз 1990-тӥ арын. Кивалтэ соин Людмила Акатьевна Афанасьева. Ужзылэсь ваньмон дыръя тямыс нылкышноос ас мылкыд каремзыя басьтӥськизы солдат анайёслэсь сюлмаськонъёссэс но кайгыронзэс шори люкыны. Котькудзы соос асьсэос шуг-секытъёс пыр потэмын. Ужамзы понна уждун уг басьто, нош бызьылонэз но кыл сиёнэз тырмыт. Ярам, бюжетысь кӧня ке коньдон висъяло. Асьсэос бызьыло на, оло, кин ке сюлмо муртъёс юрттӥськыны басьтӥськозы. Гожтэтъёс, телеграммаос, бланкъёс понна гинэ кӧня коньдон кошке. Нош доразы вазисько быдэс республикаысь солдат анайёс. Ӵем дыръя ужзэс, семьязэс но палэнтоно луо таосыз. Одӥгез ӝож, юрттэмзы понна анайёс тау карыны но ӵемысь вунэто. Ай пыкылӥсьёсыз шедёзы на, мар понна, пе, тӥ татын пукиськоды. Комитетлэн кивалтӥсезлэн воштӥсез Галина Николаевна Галкина шуэ: - Кӧня пол аслым ачим верай ни - куштӥськы та ужедлэсь. Эшъёсме кельтэме уг луы. Мукетъёсыз но озьы ик куштӥськыны уг быгато, ог-огмы борды дышимы ни. Тросэз татчы 1995-тӥ арын лыктӥм. Сӥзьыл но тулыс нылкышноос пуко Ижевск ёросъёсысь армие басьтон комиссиосын. Куд- огезлэн пиослэн анайёссы сокем уг сюлмасько, макем трос соос понна бызьыло комитетысь нылышноос. Армие келяно пиосъя нимысьтыз дневник нуо: кинлэн кыӵе семьяез, тазалыкез, кытын дышетско но мукет. Армилэсь мозмытон мугъёс вань ке, кык киынызы ик басьтӥсько пиез дораз кельтыны. - Али ке но туж жаль потэ одӥгез пияш, - маде Галина Николаевна. - Анайезлэсь нылпиосыз таламын, вань пичи выныз но сузэрез. Будэтӥз песянайзы, со ик опекун. Пияшез кельтыны луэ вал, песянаез нокытчы ӧз вазиськы, мед, пе, калык радъя служить кароз. Кӧня ке дыр ортчоз но, дорамы ки бызьыса лыктоз, юрттэт курыны. Сыӵе учыръёс трос. Соин но солдат анайёслэн комитетазы ужасьёс анайёслы вазисько: доразы лыктоно пидэс армие басьтэмлэсь азьло. Висе ке - ӧвӧл келяно. Комиссиез ортчыку, пиос ӵем дыръя тазалыксы сярысь шонерзэ уг верало. Я кепыр пото асьсэды лябен возьматыны, я эшшо кыӵе ке муген. Анай ке ӧз, кин ӟечгес тодоз нылпиезлэсь тазалыксэ. Комитетын ик тодмасткыны луоз приказэн, кудаз пыр-поч верамын пиосты армилэсь палэнтон мугъёс. Тросэз соосты тодытэк но кылё. Чечняын ожъёс бере солдат анайёслэн комитетазы огдырлы чалмытгес луиз вал. Дагестан нош ик бугыртӥз нылкышноосты. Одӥгаз четверг нуналэ комитетын ужасьёсын ӵош мон но ӝытозь пуки (ужало соос Ломоносов урамысь 9 "б" номеро юртын четвергъёсы витьысен тямыс часозь ӝытазе). Вылысьтыз-вылаз телефон жингыртэ, анайёс но лыкто но лыкто. Тросэзлэн куронзы одӥг - юрттэ вал, пе, пиме Дагестанлэсь палэнтыны. Одӥгез пизэ огназ будэтэ, мукетызлэн тазалыкез ляб, куинетӥезлэн анай-атаез пересесь ни. - Вазиське вал соос азьлогес, - шуэ Галина Николаевна, - соку юрттыны но быгатысалмы. Пиос асьсэос куриськон гожтӥзы ке ожъёсы мыныны, ми номырин юрттыны ум быгатэ. Нош солдатъёс огзыя огзы карисько, эшъёссылэсь бере кылемзы уз поты. Куд-огез анайёс куро пизылэн частеныз герӟаськыны, кытчы келямзэс тодыны. Егит боецъёслэсь школазэс куинь толэзь куспын ортчыса, пиос зэмос солдатъёслы пӧрмо ни угось. Куриськон гожтӥзы ке, соосты пӧсь точкаосы но келяны быгатозы. Одӥгез анай ӧпкеле: - Пие частяз ӧвӧл, кокьдон но келяй вал, ӧвӧл басьтэм. Мар карыны уг тодӥськы. Гожтэ вал гожтэт, утчалэ пиме. Сюлэмы ик вӧсь луиз, солдатлэн анаезлэн куректонэзлы. Кык ар талэсь азьло пиез бырем, нош одӥг пол сётӥськись пособиез та дырозь басьтыны быгатымтэ на. Судэ вазиськоно луэм. Москваысь "Право Матери" фондысь юрттэт утчаны малпа ни. Солдат анайёслэн комитетазы юрттэт курыны вазисько огшоры ужасьёслэн, гуртын ужасьёслэн, дышетӥсьёслэн анайёссы. Ас поннам малпасько, со но мар ке сярысь вера ук! Котькуд солдат анайлэн аслаз сюлмаськонэз, куректонэз, бӧрдонэз. Нош ваньмыз со огъя странамылэн куректон-бӧрдонэзлы пӧрме. Ку меда солдат анайёслэн синвуоссы куасьмозы, ку сюлмыз буйгалоз Людалэн? Л. МАЛЫХ. Дунтэк но дунтэмен Константин Михайлович Татаркин тани кӧня ке аръёс ӵоже ни заказъя мебель лэсьтыса вуза. Чебересь диванъёсыз, креслоосыз, софаосыз дунтэмесь ӧвӧл. Чебер но ӟеч арберилы уго трос но ӟеч материал кулэ. Но мон вераськон уг ӝутӥськы соосъя реклама сётон сярысь. Ужбергатӥсьлэн басьяськисьёсыз тырмыт. Со доры "Буммаш" микрорайонысь "автопарк" автобус дугдылон дорысь РСУ-лэн азьло юртысьтыз мебель поттон цехаз басьяськисьёс тырмыт ветло. Ужбергатӥсьлэн ужез ӟеч мынэ бере, мебель лэсьтоназ кылдо уно кылем-мылем материалъёсыз. Кылсярысь, цехын люкаське пул пызь. Сое кузё дунтэк сётэ: лыкты, машинае тыр но сад-бакчаяд вортты. Туж дунтэмен гинэ вуза со кылем-мылем горбыль пулъёссэ, рейкаоссэ, пӧртэм зӧкталаё фанералэсь кылем-мылемъёссэ, небыт поролонзэ, ДВП-лэсь но ДСП-лэсь кылем-мылемъёссэ. Нош быгатӥсь киос солэсь ӝӧк но, пукон но, пӧртэм ӝажыос, тыриськон ящикъёс, пӧраськон пулъёс но мукетсэ лэсьтыны, корка борддоръёссэ ӵошкыт но чебер шуккыны быгатысалзы. Татркинлэн ассоциациез нимаське "Престиж" шуыса, ужан телефонэз 24-47-91. П. Скобелев. Генераллы - сяська керттэт "Матысь дыре югдур ӟырданы быгатоз. Разведкалэн ивортэмезъя, федеральной кужымъёслы пумит террористической актъёс но диверсиос дасясько" - та кылъёс басьтэмын Анатолий Романовлэн ОРТ телекомпанилы интервьюысьтыз. Нунал ортчыса, генерал Грозный городын пуштытон улэ шедиз. Романовлэн ньыль ар талэсь азьло верам кылъёсыз туннэ нуналлы туж тупало. Терактъёс но, ожъёс но, чечен боевикъёс но сыӵеесь ик. Ньыль ар ӵоже ини генерал кылле Бурденко нимо госпитальын. Отысь палата кыкетӥ дорез выллем луиз. Татын солэн яратоно арбериосыз, туспуктэмъёс, кассетаос. 1995-тӥ арын 6-тӥ октябре бырыны шедизы Романовлэн юрттӥсез Александр Заславский, водителез Виталий Матвийченко но охранникез Денис Ябриков. Ачиз генерал улэп кылиз, но ыштӥз йырсазьзэ. Врачъёс солы юрттыны тыршо, нош кузпалыз Лариса Васильевна оске, Анатолий Александрович одно ик йӧналоз шуыса. Генерал А. Романов сярысь "Комсомольская правда" гожтэ. Газетлэн корреспондентэз та нуналъёсы Грозный городэ генераллэн машинаез пуштэм интые вуылэм. Журналистлы вераллям, арлы быдэ 6-тӥ октябре та интыын, пе, кылле улэп сяськаосын керттэт. Кин сое вае, тодмо ӧвӧл. Иворъёсъя национальной служба. Удмурт Республикаысь Кун Кенеш но Правительство кайгыро, Удмурт Республикаысь Ужъя комитетлэн Тӧроезлэн Фефилов Сергей Самсоновичлэн братэз Фефилов Николай Самсонович шудтэм учыре сюрыса улонысь кошкемен валче но ӵыжы-выжыосызлы но матысь адямиосызлы мур куректэмзэс верало. Гурт удысын тыршисьёс! Сюлмысьтымы ӟечкыласьком гурт удысын но сиён-юон поттон промышленностьын ужасьёслэн нуналэнызы! Гурт удыс котьку вал но луоз кунмылэн экономика ласянь ужаз валтӥсь удыс, со калыкмылэсь улон-вылонзэ умоятонын ялан бадӟым инты басьтылӥз. Уго гурт удысын поттэм ваньбур чотын возиське ог куиньмос люкетэз калыкмы. Таиз ар музъем ужасьёс понна капчи ӧй вал. Гужем куазь кӧс улэмен но сӥзьыл зоръёсын валче удалтэм ю нянь басьтыны ӧз кылды. Но музъем ужась киоссэ ӧз юскы, со улоназ котьку но пыкиськылӥз "кул но, юостэ утялты" калык веран вылэ. Шуныт кылъёсмес вераськом пудо утисьёслы но тылобурдо вордӥсьёслы, сиён-юон поттон удысын ужасьёслы. Тӥляд нуналмысь, жадёнэз валатэк тыршеменыды туэ но республикаямы сиён-юон висъян ласянь шуг-секытъёс ӧй вал. Гажано кылъёсмес сӥзиськом бусыосын но фермаосын тыршисьёслы сиён-юон поттон удысын ужасьёслы, ваньмыз гурт удысэз азинтонэн вырисьёслы, соослэн чидамзы но азьланезлы оскемзы понна. Тӥледлы но тӥляд семьяостылы сӥзиськом юн тазалык, тупаса улон но ваньзэ ӟечсэ гинэ, асьмелэн ошмесо шаерамы кутскем но азинтэм ужъёсты азинлыко мед мынозы. Удмурт Республикаысь Удмурт Республикаысь Кун Кенеш. Правительство. Журналистъёсын пумиськонъёс Коммунистъёс бырйисьлы оско Декабрь толэзе Россиысь Кун Думае выль депутатъёсты быръём. Таин валче республикаямы арнялы быдэ вуыло пӧртэм политикъёс, туала Думалэн депутатъёсыз но вуонояз ужаны малпасьёс. Валлян гинэ журналистъёсын пумиськылӥз Н. И. Сапожников, Кун Думалэн депутатэз, КПРФ-лэн Удмурт республиканской организациезлэн нырысетӥ секретарез. Николай Иванович вакчияк вераз Россиысь парламентлэн сентябре ортчем берпуметӥ сессиез сярысь. - Таин Кун Думалэн кыкетӥ ӧтчамез ужзэ йылпумъяз, - шуиз со. - 23 декабре люкаськоз на ньыль ар ужамезлы дунъет сётыны. Берло сессиын депутатъёс Россия Федерацилэн Конституцияз одӥг воштон пыртӥзы на, эскеризы бюджетэз но Северной Кавказысь югдурез. Бюджет сярысь ке верано, соку ик пусъёно: калык понна со ужа, малы ке шуоно, расходной люкетэз доход ваисьсэ зӥбоз. Туннэ нуналлы Россилэн мукет государствоослы тыриськонэз 220 миллиард манетозь вуиз ни, бюджетысь сяна, берыктыны нокытысь. Чакламын калыкез дышетон удысын ужасьёслэсь 20 процентлы уждунзэс будэтыны, пенсиосты - 30 процентлы, но соослэн пайдазы уз шӧдӥськы - уксёзылэн быдӟалаез, дунъёсын ӵошатыса, улӥе ик кылёз. Бюджетэз Кун Дума ӧз юнматы, келяз учкыны согласительной комиссие. Депутатъёс чакламъя, солэсь доход люкетсэ кык поллы будэтыны кулэ. Но талы пумит султозы олигархъёс, соос, кин кие шедемын странамылэн ваньбурез, узырлыкез. Северной Кавказ сярысь ке верано, коньдон отчы азьвыл сярысь тросгес висъямын. Со кошкоз боевикъёслэсь лагеръёссэс быдтонэ но Чечня котыре кышкытлыклэсь утиськонъя нимысьтыз зона кылдытонэ: отчы медаз шеде наёмникъёс но наркотикен вузкарисьёс. Чечняын кылдэм югдур пумысен депутатъёс кенешизы пытсам ӧсъёс сьӧрын. Н. И. Сапожников журналистъёсты тодматӥз КПРФ-лэн вуоно быръёнъёслы дасяськеменыз но. Со оске, коммунистъёс Россилэн парламентаз нош ик валтӥсь кужым басьтозы шуыса. - Азьвылаз быръёнъёсын Удмуртиын улӥсьёс пӧлысь 98 сюрсэз компартилы дурбасьтӥз, бырйисьёс пӧлысь 15 процентэз. Али но сомында куара люкалом, дыр. Калык ас кандидатъёссэ тодэ, тодэ Юрий Дмитриевич Маслюковез но. Мон лыдъямъя, КПРФ-лэн дэмлам адямиосыз пӧлысь витез одно ик ортчыны кулэ. Бырйисьёсмылы ми оскиськом. Николай Иванович валэктон сётӥз журналистъёслэн пӧртэм юанъёссылы. Л. МЕДВЕДЕВА. Россия Федерациысь Федеральной Собранилэн Кун Думаяз депутатъёсты быръёнъя одӥг мандатэн 29 номеро Удмурт округъя комиссие юнматэм муртъёсты воштон сярысь Удмурт Республикаысь Кун Кенешлэн Постановлениез "Россия Федерациысь Федеральной Собранилэн Кун Думаяз депутатъёсты быръён сярысь" Федеральной Законлэн 20-тӥ ёзэтэзлэн 1-тӥ пунктэзлэн, 23-тӥ ёзэтэзлэн 5-тӥ пунктэзлэн "б" подпунктэныз валче Удмурт Республикаысь Кун Кенеш пуктэ: 1. Быръёнъя одӥг мандатэн 29 номеро Удмурт округъя Богомолов Виктор Ивановичез мозмытоно окружной избирательной комиссиын ужанлэсь, Игра ёросысь депутатъёслэн кенешазы Депутатлэсь ужзэ быдэсъяменыз валче. 2. Со интые быръёнъя окружной комиссие юнматоно Ситников Владимир Юрьевичез, вордскемын 1952-тӥ арын, дышетскемез вылӥ, акциосын "Сарапул дрожжепивзавод" акционер огазеяськонысь инженерез. Удмурт Республикаысь Кун Кенешлэн Тӧроез А. А. Волков. Ижевск город, 1999-тӥ арын 5-тӥ октябре. � 93-ИИ. КЫЗЬЫ УЛӤСЬКОД, СЕМЬЯ? Калыклэсь пӧртэм луод - уродэ усёд Улон адямиосты юри пӧртэм эскеронъёс пыр ортчытэ кадь. Уг юа, ӟуч-а, бигер-а, удмурт-а, ваньзэс сӥс пыр сямен сэзъялтэ. Кин кызьы со шуг-секытъёсысь потыны быгатоз ни, кыӵе вормонъёс дорозь сузьтӥськоз. Ваньмыз со шӧдӥськытэк уг кыльы семьялэн улоназ но. Кызьы потоно секыт зӥбетысь? Удмурт нылкышно огазеяськонэз но сюлэмшугъяськытэ удмурт семьялэн туннэ нуналыз. 11-тӥ октябре Медакадемилэн юртаз "котырес ӝӧк" сьӧрын пумиськон ортчоз. Вераськон мыноз "Калыклэн аспӧртэмлыкез но семья" сярысь. Ужрадэ ӧтемын пӧртэм удысысь специалистъёс. Нош туннэ Удмурт нылкышно огазеяськонлэн кивалтӥсьеныз, история наукаосъя кандидатэн Галина Аркадьевна Никитинаен ӵош ӧтиськом "Кызьы улӥськод, семья?" кенешонэ пыриськыны. Кыӵе ке но малпанъёсты кылдӥзы ке, гожтэ редакцие, семья пумысен вераськонмес азьланьтом, тӥледын ӵош кенешыса. - Вашкалаез сярысь верано ке, удмурт семья тупаса улӥз. Воргорон кышномуртлэсь кылзӥське вал, вань ужъёссэс куспазы вераськыса лэсьтылӥзы. Ог-огенызы но, нылпиосынызы но кусыпъёссы вольытэсь вал. Пиналъёссэс жугыса, косъяськыса ӧз будэтэ. Калыклэн сямаз вашкала дырысен пыӵамын валан: пинал кылзӥськыны кулэ анай-атайлэсь, гурт калыклэсь - семьяез возьытэ медаз вутты. Гурт калыклэн улонэзлэсь висъяськон шоры умойтэмен учкылӥзы: лу ваньмыз кадь, ул ваньмыз кадь. Озьы даурысь дауре калыклэн вираз пыӵам сям пиналлы ассэ возьматыны, азьлане кыӵе ке вамыш лэсьтыны туннэ нуналэ люкетэ гинэ. Нылпиос кышкасесь, возьдаськисесь будо. Соин удмуртъёс пӧлын ӧвӧл бизнесменъёс, политикъёс, банкиръёс... Адями пӧртэмгес ке визьмызъя, быгатонлыкъёсызъя, узырлыкезъя, вашкалаослэн калык радъя ул шуонзы бордысь нош ик потэ вожъяськон мылкыд: "Малы со пӧртэм?" Туала улонын со вожъяськонэнымы асьмелы асьмеос пыд пуктӥськомы. Пиналэз будэтонын семья пыкъяське на вал эшшо одӥг курон вылэ - чидано. Семья кусыпъёс но чидан вылын возиськизы. Юнме ӧз шуэ, дыр, удмуртъёс, чидан чигымтэ. Но дауръёс пыр потыса, чидан но чиге вылэм. Малы ке-а удмуртъёс тросгес йырзэс быдто. Тазалыксы но вань кадь, юон вылэ чӧлско. Быдэс гуртэн юмшало. Удмурт кышноос пӧлын трос-а вал юисьёс? Тазалыкез уродмемен но адямилэн чиданэз чигиське. Семья шоры вашкалаослэн учконзы дас укмысэтӥ дауре кулэ но вал, дыр. Община ӧз яраты укыр куанеръёсты но, укыр узыръёсты но. Бен, туннэ улонын но гурт калыктэк уг луы. Но семья шоры, нылпиосты будэтон шоры мукет сяменгес учконо. Куштӥськоно вожъяськон, вожвылъяськон сямлэсь. Со капчи ӧвӧл. Калык сямез одӥг нуналскын, одӥг арскын уд вошты. Озьы ке но, киосты лэзьыса пукыны уг яра. Висёнмес, асьмелэсь тырмымтэосмес шара верано, быгатэммыя соослэсь палэнскыны турттоно. Семья улонын туж бадӟым инты висъяськиз но висъяське нылкышнолы. Воргорон ужез но со лэсьтыса вуттэ (пӧйшураны кошко ке, шуом), кышномурт уж но со вылын. Даурысь дауре, арысь аре пинал будэтонын озьы ик бадӟым инты басьтэ анай. Архивъёсъя тодмо: пинал ӟеч сямо, ужась ке, удмурт воргоронлэн малпамезъя, со кышномуртлэн вормонэз. Нылпизы азьтэм, жугиськись, лушкаськись ке, воргорон вань янгышсэ нош ик уськытэ кышноез вылэ. Пиосмурт семьяез сюдӥсь, солэсь кылзӥськыны кулэ. Пичи пиос вить - куать арескысен бубинызы ӵошгес луыны туртто вал ини. Калыкын шуо: пи пинал атайтэк урод сюрела. Туннэ нуналэз басьтоно ке, вань шуг-секытъёс нылкышно вылэ усё: пиналэз будэтон, дӥсян, эмъян; коркан чылкытлыкез возён; гурт котырын берган, пудоез утялтон, бакча-сиён будэтон. Вылаз ик, кышомурт вылэ усе ужтэк кылён но. Яке секыт ужез быдэсъяно луэ, кык-куинь уже интыяське. Нош воргоронъёс, шуг-секытъёсын пумиськыса, ӵемысь юон вылэ чӧлско. Школа улонэз учкыса гинэ но адӟиське - тросгес усе нылъёс вылэ. Соос ик кружоке ветло, пӧртэм ужрадъёсы пырисько. Татын но пиос палэнэ кылё. Малы? Со сярысь ваньмылы ик мургес малпаськыны кулэ. Тросгес верано, гожъяно пиналъёсты будэтон пумысь. Дышетоно соосты кепыратэк вераськыны, ас малпанъёссэс шара усьтыны. Ӟуч кылэз но, удмурт кылэз но ӟеч мед тодозы. "Котырес ӝӧк" сьӧрын ваньмыз та пумысен вераськон ӝутскоз. Семьялэсь, нылкышнолэсь улонзэ капчиятон ваньмылэн огъя ужмы. Л. МАЛЫХ. Ветеранъёсты огазеяз шахмат "Ижпланета" клубын шахматэн шудонъя арня ӵоже кужмо нюръяськон мынӥз ветеранъёс пӧлын. Со сӥземын вал дуннеысь арлыдоослэн нуналзылы. Ужрадэ пыриськиз 16 воргорон но 2 нылкышно. Котькинлэсь трос очко люказ, 7 луоноез пӧлысь 5,5, "Темп" спортклубысь нырысетӥ разрядэн спортсмен Виктор Меркульев. Со азьпалтӥз спортъя кык мастерез но кык кандидатэ мастерез. Вормисьлэсь ӝыны очколы кылизы "Темп" спортклубысь ик спортъя мастер Владимир Федосеев но радиозаводысь инженер Владимир Петров. Та выллем ӵошатсконъёсы мылысь-кыдысь пырисько на арлыдоос. Соос пӧлысь Иоганн Вельтно Быдӟым Ожысь ветеран Владимир Иванов сизьымдон арессэс ортчытӥзы ни ке но, эшъёссылы уг сётско на. Кыкназы ик 4,5 очко люказы. Воргоронъёслэсь бере ӧз кыле нылкышноос но. Радиозаводын ужась Тамара Евстратова люказ 3,5 очко, нош Зинаида Иютина - 3 очко. И. ШАХОВ. Кун кивалтон но Удмурт Республикаысь интыын ас коже кивалтон ёзъёсы быръёнъёсын Кун властьлэн федеральной ёзъёсаз быръёнъёсты огдыре ортчытэмен валче быръён дыр сярысь Удмурт Республикалэн Законэз 1-тӥ ёзэт: Огъя валатонъёс "Россия Федерациысь гражданъёслэн референдум ортчытонэ пыриськон правооссы но огъя быръён правооссылэн инъетъёссы сярысь" Федеральной Законлэн 66-тӥ ёзэтэзлэн 7- тӥ пунктэныз валче та Закон Удмурт Республикаысь кун кивалтон но интыын ас коже кивалтон ёзъёсы быръёнъёс дыръя, озьы ик кун властьлэн федеральной органъёсаз ватсаса но выльысь быръёнъёс ортчытыку нимысьтыз дыр тупатэ. 2-тӥ ёзэт. Огдыре быръёнъёс ортчытыку дыр тупатон сярысь Удмурт Республикаысь кун кивалтон но интыын ас коже кивалтон ёзъёсы быръёнъёс, ватсаса но выльысь быръёнъёс ортчытыку, озьы ик кун властьлэн федеральной ёзъёсаз огдыре быръёнъёс ортчытыку, федеральной закон куара сётонлы кутскон но сое йылпумъян сярысь мукет дыр уг ке тупаты, кудӥз чакламын Удмурт Республикалэн законъёсаз, соку быръён ортчытӥське федеральной законэн юнматэм дыре. 3-тӥ ёзэт. Законлэн кужыме пыремез сярысь Та Закон кужыме пыре сое печатлам дырысен. Удмурт Республикаысь Кун Кенешлэн Тӧроез А. А. Волков. Ижевск город, 1999-тӥ арын 5-тӥ октябре � 92-ИИ. Ӟечкылан 9 октябре вордӥськем нуналзэ пусйиз Алнаш ёросысь Писэй гуртысь Лидия Игнатьевна Бусыгина. Шуд но тазалык тӥледлы! Тау сюлмысь дышетэмды понна. Лариса Петрова. Ижевскысь педколледжын дышетскись. Книгалэн шудо сюресэз Александр Пушкинлэсь "Поп но солэн визьтэм ляльчиез сярысь" выжыкылзэ табере асьсэ кылын лыдӟыны быгато удмурт нылпиос но. Сое удмурт кылэ берыктӥз но нимаз книгаен поттӥз Вениамин Ившин, суредъёссэ лэсьтӥз Владимир Коркин. Та книгалэн сюресэз шудо вылэм. Москваысь правительстволэн А. С. Пушкинлэн 200 аръем юбилеезлы сӥзем конкурсаз со диплом но премия басьтӥз. Конкурсэ пыриськем 80 издательствоос пӧлын со вормон вамыш. Н. НИКОЛАЕВА. Кин кинэ вуза? Россиысь авиация 1999-тӥ арысен таӵе ыштонъёсты ӧз адӟылы на вал: 3-тӥ-4-тӥ октябре чеченъёс уськытӥзы Су-25 штурмовикез но Су-24 бомбардировщикез. Кызьы верало специалистъёс, куинь пилотъёс бырыны шедизы. "Коммерсантъ" чакламъя таӵе югдур авиацилэсь Чечняын тактиказэ воштоз: самолётъёс табере инбаме ӵемгес ӝутскылозы. Та газет икпечатла, авиацилэн куям бомбаосыз чечен боевикъёслы ӵем дыръя нокыӵе кышкытлык уг ваё, пе. Кылсярысь, Рязаньысь правоез утёнъя ёзъёсын ужасьёс шараяллям Дягилевысь военной аэродромысь йыртэмасьёсты. Соос авиабомбаосысь взрывчаткаез поттыло но вузало вылэм. Та ужъя пытсэт сьӧры келямын Корнев прапорщик. Лушкаськемзэ со валэктыны выриз, улыны, пе, уждунэ уг тырмы. Иворъёсъя национальной служба. Картофкаез - удобренилы "Кыкетӥ няньзы" удалтӥз туэ Ува ёросысь "Поршур" эштосын. Поршуръёс сое гектарысьтыз 200 центнер пала бичало. Соин ик луонлык кылдэмын картофкаез мукет вузэн воштыны. Кылсярысь, кемалась ик ӧвӧл уваос огкыл шедьтӥзы Кирово-Чепецкысь хозяйствоен. Та дырлы вуиз ни бускельёс дорысь удобрениен нырысетӥез машина, нош уваос соослы келялозы картофка. Пусйыны кулэ, "кыкетӥ нянез" килограммзэ 3 манет но 50 копейкаен келяло, нош удобрение басьто 2 манет но 40 копейкаен. Таӵе амалэн уваос 50 тонна мында картофказэс воштыны малпало. В. АНДРЕЕВА. Кутскизы мотоос бордысен Кемалась ик ӧвӧл Россия Федерацилэн Президентэзлэн Указэзъя "Ижевский мотозавод "Аксион-Холдинг" акциосын огазеяськонын уноез ужасьёс пусъемын странамылэн вылӥ наградаосыныз, тросэзлы сётэмын дано нимъёс. Вераны кулэ предприятилэн улон сюресэз сярысь. Ӵапак татын поттэмын вал нырысетӥ мотоциклъёс. Быдӟым Отечественной войналэн нырысетӥ толэзьёсаз выжизы "Максим" пулемётъёсты дасян борды. Война бере татын ик поттэмын нырысетӥосыз Калашников автоматъёс. 1949-тӥ арысен Ижевскысь мотозавод басьтӥське ракетной но космической техникалы приборъёс лэсьтон борды. Со дырысен туэ тырме ни ӝыны даур. 1960-тӥ арысен космослы аппаратура дасянъя СССР-ысь одӥгез бадӟымез предприятие луэ. Татысь кибашлыослэн арбериоссы интыямын вал нырысетӥ искусственной спутнике, нырысетӥ космонавтлэн Юрий Гагаринлэн ракетаяз. Азьланяз завод космосэз эскеронъя вань программаосын ужаз. Со "Восток", "Восход", "Венера", "Марс", "Мир", "Союз", "Прогресс", "Фобос", "Союз-Аполлон", "Интеркосмос", "Буран" "Энергия" программаос. Заводлэн приборъёсыз ужало музъем вылысен космосын лобась объектъёсты эскеронъя но соосын кивалтонъя комплексъёсын, озьы ик "Академик Королев", "Космонавт Гагарин", "Космонавт Волков" научно-исследовательской корабльёсын. Мотозавод пыриське космос пыр телефонэн кусып возёнъя программае. Отын дасям связья станциосты ужазы куто Москваын, Рязаньын, Нижневартовскын, Саха Республикаын но Россилэн мукет улосъёсаз. Космосэз азинтонын но странамес кышкытлыклэсь утёнын азинсконъёсыз понна завод пусъемын Ленин, Трудовой Горд Знамя но Октябрь Революция орденъёсын. Н. СЕРГЕЕВ. Выжо выль удысэ Туэ акциосын "Ижевский радиозавод" огазеяськон кык бадӟым ужпумез быдэстӥз телеметрия удысын. Лавочкин нимо научно-производственной огазеяськонлэн куремезъя, "Фрегат" изделилы дас система лэсьтэмын. Озьы завод ватсаса коньдон поттыны быгатӥз. Предприятие вить ар ӵоже ини кусыпъёс тупатыны тырше нефть поттон удыслы оборудование дасян ласянь. Туэ Альметьевскысь му вӧй поттӥсьёслэн нырысетӥез куронзы быдэстэмын. Озьы ик сентябре кык телеметрической комплект лэсьтэмын на. Соосты та дырозь Шотландиын гинэ дасяло вал. С. ИВАНОВ. "Кырсь" нюръяськон мынэ Москваысь правительстволэн вице-премьерез С. Ястржембский вераз, государство печать сярысь законодательстволэсь быдэсяськемзэ чакланы но иворъёсты вӧлмытон удысын войнаез дугдтыны кулэ шуыса. Иворъёсъя министерствое со нимысьтыз гожтэт ыстӥз, ОРТ-ез алыны курыса. "ОРТ каналысь телепаредачаосын П. Шеремет но С. Доренко Москвалэн мэрез Ю. Лужков сярысь зэм луисьтэм иворъёс вӧлмыто", - шуэмын гожтэтын. С. Ястржембский лыдъя, та учыре Россилэн законъёсыз тӥямын, угось соосъя журналист иворъёсызлэсь зэмлыксэс рос-прос эскерыны кулэ. Пусъём на, ОРТ-лэн валтӥсь акционерез государство луэ ке но, али отын югдур туж секыт, нош С. Доренко но П. Шеремет эфирын шонерак алдасько. Таӵе дыръя ӵапак государство юн чакланы кулэ, кызьы журналистъёс законъёсты быдэсъяло. С. Доренколэн программаез ивортэ Е. Примаковлэн ӧвӧлтэм кузпалыз, Ю. Лужковлэн кузпалызлэн ӧвӧлтэм агай-выныз сярысь. Таӵе алдаськем понна нокин но нокин азьын но кыл уг куты," - шуиз Москваысь правительстволэн вице-премьерез. Ю. Лужков лыдъямъя, солы пумит нюръяськон кутскемын, угось куд-огез малпа, Юрий Михайлович президент луыны чакла шуыса, со сяна, Москвалэн мэрез оске, та "кырсь" кампания "Отечество" огазеяськонлэсь ужзэ радъямен герӟаськемын. "Отечество" огазеяськонлэн Удмурт люкетэз. Гурт удыслы сӥзьыса Няньтэк ӝӧк сьӧры но уд пуксьы "Улонды перепечё-пельнянё мед луоз", - озьы ӟечкылаз Ижысь "Металлург" культура двореце люкаськемъёсты Кун Кенешлэн Тӧроезлэн воштӥсез С. Смирнова. 7-тӥ октябре татын сӥлы каризы гурт хозяйство удысын ужасьёсты. Туэ арысен соослэн праздниксы туж чебер вакытлы, покчи гужемлы, тупатэмын. Со шонер, дыр, угось коньывуон толэзе тыро-пыдо ужась хозяйствоосын вань бусы ужъёс йылпумъясько ини. Озьыен, соос понна та нунал кык полэс шумпотонэн берытскыны быгатоз. Ужрадын устоосыз пӧлысь устоосызлы сётэмын вал сӥё-дано нимъёс но дуно кузьымъёс. Республикаысьтымы гурт хозяйствоя но сиён-юонъя выль министрмы понна но таиз ужрад огез бадӟымез луиз. Пётр Александрович Першин гурт хозяйство сярысь тазьы малпаське: - Та удысын шуг-секытъёс котьку вал но, луозы но. Солы паймонэз ӧвӧл. Валтӥсь интые пуктоно адямилэсь улонзэ. Соин ик тросгес сюлмаськоно гуртоослэн ӟечгес улэм- вылэмзы, тазалыксы сярысь. Быдэс экономикаез али ик адями пала ке берыктыны луысал, гуртын но городын улӥсь адямиослэн кусыпъёссы одӥг гердэ юнгес биниськысалзы. Та празднике туннэ трос адямиос вуэмын. Соос татчы ог-огзэс адӟыны гинэ лыктэмын ӧвӧл, соослэн нырысь ик тодэмзы потэ кызьы, юрттозы Кун Кенеш, Правительство,министерство гурт калыклэсь улонзэ капчигес карыны. Кун Кенешлэн Тӧроез А. Волков министрез вордскем нуналэныз ӟечкылаз. Люкаськемъёс азьын вераськизы Удмурт Рспубликалэн вылӥ кивалтӥсьёсыз А. Волков, Н. Ганза но Россилэн азьвыл Правительствоезлэн вице-премьерез Ю. Маслюков. Няньтэк ӝӧк сьӧры но уд пуксьы шуо, калыкын. Та веранэз асьме кивалтӥсьёсмылы ӵемгес тодазы вайыло но вылэм празднкъёсы гинэ ӧвӧл - котькуд нуналэ но. Соку, оло, асьсэос нянь будэтӥсьёс но ю тысьтэк, няньтэк шергес кыльылысалзы. Т. БАННИКОВА. Гурт хозяйствоя но сиён -юонъя министр П. Прешин. Кун Кенешлэсь депутатсэ А. Малковез эшъёсыз ӟечкылало "Гурт хозяйство удысысь сӥё-дано ужась" ним басьтэменыз. Туспуктэмъёсыз В. КАМАШВЛЭН. Депутатэн пумиськон Михаил Кошкин: "Бырйизы ке, комитет оскыны кулэ" Кун Думалэн депутатэз Михаил Кошкин берло кык арня ӵоже ужамзэ пусйиз, законъёсты дасясь ёз, шуиз со, бадӟым инты висъяз 2000-тӥ арлы бюджетэз учконлы. Со, пе, юн дыртыса, капчиен лэсьтэмын, Дума докуменэз выльысь берыктӥз но нимысьтыз комиссия кылдытӥз. Лэчыт вераськон вал сюрес фонд сярысь. Со гинэ, пе, странаямы умой ужа, малпазы, лэся, тазэ но удысэз куашкатыны. Правительствоын озьы ик чаклаллям тамаклы 100 процент акциз тупатыны. Умойтэм со. Алигес люкаськылӥз Кун Думаысь аграрийёслэн комитетсы. Отын секыт вераськон мынӥз. Кенеше пыриськизы Центробанкысь, министерствоосысь но ведомствоосысь кивалтӥсьёс. Куашказ шуыны луоз СБС-АГРО банк. Солэн Москвалы но областьлы гинэ 8 миллиард манет тыронъёсыз люкаськемын. Трос коньдон кошкемын кунгож сьӧры татын усьтэм ёзъёсыз пыр. Ӝутэмын уголовной ужъёс. Тӥни соин ик солэн Удмуртиысь люкетэз "Платина-золото" банк луиз ни. Вераны кулэ, СБС-АГРО интыосысь ёзъёсыз ӧз куашкалэ, умой ужазы, асьме ёзэзлэн тыронъёсыз ӧвӧл, шуыны луоз. Аграрной комитет выльысь улӟытыны куре Агропромбанкез. Со пыр, пе, мынысал льготая кредит сётъян. Та ласянь ӵектонъёс вераны косэмын ЦБ-лы, толэзь дыр сётэмын. Комитет озьы ик лэчыт ужпум пуктэ пичи уждунэз (93 манет) 200 манетозь ӝутыны. Ведь дунъёс миым сентябрь толэзьысен йыло. Кун Думалэн гуртысь депутатъёсыз озьы ик ужало Музъем кодекс, дунъёсты радъян но мукет законопроектъёс дасян бордын. Тани, шуом, гуртлы туж дуно техника, тукъёс, эстӥськон сётӥське, нош солэн продукциез юн дунтэмен кошке. Кызьы сое чидалод на? Тӥни таӵе югдурез тупатон вылысь, комитет 30 миллиард манет коньдон висъяны куре, со, пе, вуоно арлы бюджетэ мед пырысал. Странаямы туэ 45 миллион тонна ю тысь кутсамын, яке 10 миллион тонна уг тырмы. Гурт калыклэн партиез "Отечествоен" огазеяськиз бере, солэн съездаз Михаил Кошкин Кун Думае депутатэ кандидатэ ӵектэмын. 150 делегат пӧлысь 148-эз со понна куаразэ сётӥз. Михаил Петрович азьвыл округаз ик бырйиське. Солэн ивортэмезъя, думае, пе, гуртысь 50 депутат шедьыны кулэ. Соку кылдытэмын луоз Аграрной комитет. Михаил Кошкин али подкомитетлэн тӧроезлэн воштӥсез луыса ужа. Нош декабре Кун Думае шедиз ке, оло, комитетэн кивалтыны оскозы. Сыӵе малпан. Оглом, депутат аслаз бырйисьёсыз но республика понна трос ӟеч ужъёс лэсьтӥз ни, тужгес но Россия но Удмуртия куспын пунэм тыронъёсты берыктонъя. Солэн сюлмаськемезъя, "Россия" ним нуллӥсь хозяйствоос налог тыремысь дугдӥзы шаерамы пызь изон 10 вуко вуттэмын ни. Граховоын али быдэс район понна одӥг вуко пызь ужа. Депутат юрттэ Удмурт кун университетлы библиотека ӝутыны. Зураысь етӥн заводлы 2,5 миллион манет коньдон висъямын. Со пӧлысь 1,5-ез вуэмын ни. Отын но депутатлэн бызьылэмез шӧдӥське. Нош ЭМЗ-лэн клиникаез Ижысь гурт хозяйствоя академилы сётэмын. Михаил Петрович нокыӵе секыт ужпумъёслэсь уг палэнскы, мылысь-кыдысь пыриське Камбаркаысь но Кизнерысь химической ож тӥрлыкез быдтон уже. "Ува" санаторийлы юрттэ минерал вуэз бутылкаосы лэзьянэз радъяны, Ярын йӧл завод пуктыны но мукет. Ваньзэ вераса но уд быдты. Михаил Петрович 3 сюрс пала бырйисьёссэ кутӥз ни. Ваньмызлы маин ке но юрттыны тырше. Г. РОМАНОВ. Удмурт Элькунысь Национальной театр 15 октябре ӧте тодэ ваён ӝытэ: РСФСР-ысь калык артистлы, УАССР-ысь искусство удысысь дано ужасьлы Кузьма Алексеевич ЛОЖКИНЛЫ 90 арес тырмон ӝытэ пыриськозы: ӵош ужам эшъёсыз. Возьматэмын луозы крезьгуро но драмая спектакльёсысь люкетъёс. Кырӟалозы Михаил Ворончихин Евгений Серебренников Валентина Загуляева Валентина Меняйло Ольга Зорина Алефтина Корепанова Геннадий Бекманов Вордӥськем палъёсысьтыз фольклор ансамбль. Кутске 18 часэ. Пырыны луоз дун тырытэк. Юалляськоно 78-79-81, 78-45-92 номеро телефонъёсъя. Ненег модос веськрес медло Ӵыдонтэм шулдыр сӥзьыл куазед нюлэскын но сое син шоры йӧтымон карон вылысь адями сюлмаськытэк уг лу. Та дыре нюлэсчиос дасясько тулыслы: кыз, ужым, мукет модосъёсты мерттон интыосты сузяло, тракторен гырыса муресь чуръёс кельто. Ненег модос бадӟым, йӧно, веськрес мед будоз. Можга ёросын нюлэсэн тужгес но узыр Пычас палъёс, кылсярысь, Мельниково котырын. Татысь нюлэсчилэн А. Л. Ильинлэн верамезъя ненег модосъёслы 40 гектар му дасямын. Сузям-бичам куэз басьтымон дунын висъязы гурт калыклы, нош пересьёслы, сӧсыръёслы юрттӥзы на доразы но вайыны. А. АНДРЕЕВ. Ӵок ини, та "репортажлэн" кузёеныз споръяськыса ум улэ. Тодамы ваёме зэмос лыдпусъёсты. Россиысь дано адями сярысь веран понна, ойдолэ, берытскоме 1994-тӥ арын 10-тӥ ноябре ортчем ужрадэ. Озьыен, Удмурт Республикаысь операя но балетъя кун театре. Отын пукон интыез сюрс пала но ӧвӧл. Но Удмуртиысь котькудӥз адями отчы шедьыны малпа вал соку. Удмурт телевидение соку та ужрадэз меӵак эфире сётӥз. Озьыен, сое быдэс шаермы адӟыны быгатӥз. Татын вал Канадаысь, Англиысь, Германиысь, озьы ик Москваысь уно газетъёсысь но журналъёсысь гожъяськись адямиос. Бадӟым ужрадэ ветлӥзы Россиысь Обороная министр Павел Грачев, контрразведкая федеральной службалэн директорез Сергй Степашин, генеральной прокурорлэсь ужзэ быдэсъясь Алексей Илюшенко, Гособоронпромлэн кивалтӥсезлэн воштӥсез Юрий Глыбин, Татарстанысь, Пермь но Свердловск улосъёсысь, Краснодар но Алтай крайёсысь делегациос, США-ысь, Франциысь, Англиысь, Япониысь ыстэм адямиос, пыӵал тӥрлык поттӥсь предприятиосын ужасьёс, космонавтъёс Георгий Береговой но Александр Серебров. Нырысь ик кыл сётэмын вал Россилэн Президентэзлы Борис Ельцинлы. Со шуиз: - Асьмелы дан усиз быдэс дуннелы тодмо адямилэсь, быдӟым ӟуч конструкторлэсь но пыӵал тӥрлык кылдытӥсьлэсь Михаил Тимофеевич Калашниковлэсь юбилейзэ пусйыны. Михаил Тимофеевич ассэ возьматӥз, со ӟуч калыклэн зэмос данъяськымон адямиез шуыса. Кунмы та визьмо адями азьын бадӟым пунэме кылемын. Со калыкмылэн туж кибашлы адямиез, аслаз ужъёсыныз Россилэсь данзэ туж вылӥе ӝутӥз. Михаил Тимофеевич дунне вылын тодмо луиз аслаз автоматэныз. Сыӵеос пӧлын татчыозь нокин ӧй вал на. Паймоно кадь: 30 аресъем ӟуч сержант, нимысьтыз дышетскымтэ мурт, автомат пыӵал тӥрлыкез выльдонын ваньзэ чылкак воштыны быгатӥз, та удыслы воксё мукет сюрес усьтӥз. Тӥляд визьды, быгатонлыкты, ужез яратэмды, зарни киосты, Михаил Тимофеевич, юрттӥзы странамылэсь кужымзэ возьыны. Автоматтылы специалистъёс вылӥ дунъет сётӥзы но, сёто но - со котьку оскымон, со дуннеын самой вылӥ ӟечлыкоез. Туннэ нуналлы поттэмын ни шуо, 70 миллионлэсь уно "калашниковъёс". Нош нимысьтыз лыдпусъёсъя та автоматэз куто 55 кунъёсысь ожгар адямиос. Но асьмеос янгыше усьысалмы, дыр, Михаил Тимофеевич ожтӥрлык поттон бордын гинэ ужа шуысалмы ке. Конструкторлэн тыршеменыз кылдӥз "Сайга" пӧйшуран карабин. Сое вылӥ дунъязы мукет кунъёсысь специалистъёс но. Татын но кибашлы адями возьматӥз визьмо луэмзэ. Социалистической ужысь кык пол Геройлы уно премиосын пусъем муртлы мукет дано наградаос но сётыны но луысал, дыр. Но самой дуноез но вылӥ наградаез луэ "За заслуги перед Отечеством" орден. 1917-тӥ арозь со Россиын вал самой вылӥ пус. Соин данъяллязы тужгес тодмо полководецъёсты. Калашников пусъемын кыкетӥ степенё орденэн, нырысетӥ номереныз орденэн. Соку ик сётэмын генерал-майор ним. Бӧрысь вераськиз Россиысь обороная министр Павел Грачев: - Тодӥськоды-а тӥ, огшоры солдатъёс, офицеръёс сярысь, тӥледыз золгес гажало шуыса. Малы ке шуоно, тӥляд автоматты соослы туж кельше. Сое трос сузяно уг луы, котькыӵе дыре со ужаны но нюръяськыны дась. СНГ-е пырись странаосысь ожгар адямиос ӟечкыланы куризы со понна. Ма вераны быгатысал на та пумысен мӧйы но улонэз адӟем адями? Капчи ӧй вал солы со дыре. М. Т. Калашников шуиз: - Тӥ, Борис Николаевич, мукетъёсыз лыктэм адямиос, вералэ вал, быгатысал-а старшой сержант госпитальын кылльыкуз пистолет-пулемёт кылдытон сярысь малпаны ик? Табере со та дырозь армилы юрттэ на, мон ноку ӧй малпалля, ачиз президент вылӥ орденэн пусъёз шуыса, вылаз ик, нырысетӥ номеро орденэн? Соку азьвыл сержант, вань звание сётон могӟетъёсты ортчыса, запасысь полковник луиз. Табере со генерал-майор. Коньдон бордын гинэ улон уг возиськы, дыр. Солэн данэз быдэс дунне азьын, калыкез азьын. Со шуд ӧвӧл шат? А. АРТАМОНОВ. ДАНО НУНАЛ НО КЫК ПУМО МАЛПАН Михаил Тимофеевич Калашников вордскемез дырысен 75 ар тырмонзэ пусйиз вал 1994-тӥ арын 10-тӥ ноябре. Иворъёсты вӧлмытӥсь ёзъёс солы пӧртэм сямен дунъет сётӥзы. Уноез газетъёс юбилеез герӟазы конструкторлэн дано интыосыныз. Но одӥгез журналист дано нуналэз возьматыны тыршиз пурысь буёлъёс пыр. Америкаысь Даллас городын потӥсь "Чикаго Трибун" газетлэн корреспондентэз Джеймс Галлагер материал сётӥз. Со нимаськиз "Россиын АК-47 автомат кылдытӥсез беромыса данъяло" шуыса. Тани со чуръёс. Ижевск. Россия. Куке Ижевскысь одӥгез пенсионер 75 арес тырмонзэ пусйиз, со доры трос тодмо адямиос лыктӥзы, озьы ик президент Борис Ельцин. Михаил Калашников ӟучъёс пӧлысь одӥгез курадӟыса улӥсь адями. Улэ пичигес ёркыт квартираын, толэзяз ог 50 доллар басьтэ. Ельцин но правительство котырысь мукет тодмо адямиос та мӧйы но висись пересь адями доры беромысагес вуизы. Та воргорон "кезьыт войналэн" ӧраз бадӟым пытьы кельтӥз но 20-тӥ даурез вирен "пылатыны" юрттӥз. Но со сярысь уноез вунэтӥзы кадь. Бен, самой со Калашников, тодмо конструктор, оскымон но ӟеч автомат кылдытӥз. Солэн визьмыныз, киосыныз лэсьтэм тӥрлык берло ньыльдон аръёсы сюрылӥз партизанъёслы но, террористъёслы но, ульчаостӥ калгись бандитъёслы но. Ӟуч конструкторлэн нимыз быдэс дуннелы тодмо луиз вир кисьтонэн валче. Калашниковлэн автоматэз "ужаз" Вьетнамын но, Никарагуаын но, Афганистанын но. Берло дыре та пыӵал тӥрлык шедиз Америкалэн городъёсаз калъяськем йырвандӥсьёс кие но. Калашниковлэн автоматэз ог 50 миллион пала дасямын дуннеысь 12-лэсь уно кунъёсын. Конструкторлэн вордскем нуналаз Ельцин господин ушъяськиз: солэсь автоматсэ али дуннеысь 55 калык уже кутэ шуыса. Та пыӵал тӥрлыклэн самой ичи дуныз али 300 доллар тыр. Калашников дано адями, солэн АК-47 автоматъёсыз ялан выльдӥськизы, уката оскымонэсь луизы. Но со понна конструктор номырин ӧз узырмы. Совето Союзысь правительство сое куд-ог дыръя маин но соин пусйылӥз ик. 1949-тӥ арын басьтэм нырысетӥ Сталинской премиеныз куинь комнатаен квартираяз мебелез татчыозь сылэ на. Бӧрысь солы музъем висъязы, отчы пичигес корка пуктӥз. "Кезьыт война" шуон аръёсы патент но коньдон висъян пумысен вераськонъёс ӧз поттылэ. Дано автоматэз уноен поттылӥзы, ӵемысь государство чотын, но быдэс дуннеысь компартиослы келяллязы. Нош Сибирь музъем вылын вордскем Калашников господин сярысь нокин но умой-умой ӧз тодылы. Туж вылӥ ӟечлыкен дасям автомат сярысь калыкын ивор ӧжыт вӧлмылӥз. Адямиез вунэтӥзы, шуыны луоз. Пытсам ожгар заводын ужаса, со кылзӥськыса улӥз но часэз-минутэз чакласа. Мукет странаосы ветлон сярысь малпанэз ик ӧй вал. Улонэзлэсь бадӟым вакытсэ ортчытӥз Ижевскын, Урал гурезьёслы матэ интыяськем пыӵал тӥрлык дуронъя городын. Калашниковлы коть маин ке но юрттон вылысь, экономикаын шуг-секыт вакытэ Ельцин господин солы толэзяз 145 сюрс манет пенсия тупатӥз, та дыре со ог 110 долларен ӵоша вал. Но инфляция солэсь ӝынызэ "сииз". Калашников господин со пумысен уг ӝожтӥськы. Операя но балетъя театрын сӥё-дано ӝыт дыръя, номыр сярысь но ӧз ӝожтӥськы. Ӧз поттылы солэн "вордэм нуныез" нуналлы быдэ эзель ваён пумысен но. "Улонме выльысь мытоно луысал ке, - пусйиз со куалекъясь куараен, - мон кутскысал со бордысен ик. Мон ваньзэ лэсьтӥ ас мылкыдыя. Нокин кужмысь косӥсь ӧй вал. Ачим бырйи та сюресэз, сое мон ӧй вошъя, уг но вошты". Калашников господин пыӵал тӥрлыкен тунсыкъяськыны кутскиз пичи дырысеныз ик. Нырысетӥ шудон пыӵалзэ лэсьтӥз 10 арес дыръяз. 1941-тӥ арын служить кариз танкист луыса. Немецъёсын ожмаськыкуз, кызь кык аресысен сӧсырмиз, эмъяськиз. Госпитальын кылльыкуз, висись эшъёсызлэсь кылӥз пыӵал тӥрлыксы вылэ ӝожтӥськемзэс, немецъёслэн, пе, ваньмыз вӧй вылын кадь кошке. Озьы со пистолет дасян борды басьтӥськиз. Нырысетӥ ужзэ ӧз ке но кутэ, вылӥ кивалтӥсьёслы егит конструкторез синйылтӥзы.. Куать ар ортчыса АК-47 "банан" вузкарон маркаен потыны кутскиз. Автомат огшоры гинэ лэсьтэмын вал кадь. Но соин ыбылӥськыны луэ вал ӟарт кезьыт дыръя но, пӧсь вакытэ но. Солдатъёслы со кельшиз. "Озьы пыӵал тӥрлык поттонын кутскиз выль вакыт", - пусйиз праздникын Ельцин господин. Калашниковлы вордскем нуналаз Президент Святой Владимирлэсь ордензэ бырттӥз. Сыӵе вылӥ награда монархия куашкам но большевикъёслэн революцизы бере нырысьсэ сётэмын вал. Та нуналысен Калашников отставкаысь генерал луиз. Кун премилы ӵектэм коллектив Таза пинал - таза страна Та бадӟым уж сӥземын туж кулэ луись но туннэ улонлэн куронэзлы тупась ужпумлы - нылпиослэсь ты висёнъёсын курадӟонзэс кулэстонлы но соосты быдтонлы. Берло дыре, зэмзэ но, та висёнъёс туж сюлэмшугъяськыто кызьы ке анай-атайёсты, озьы ик врачъёсты но тодосчиосты (учёнойёсты). Угось, нылпиослэн тыэн, ньылонэн герӟаськем пӧртэм висёнъёссы пумен паськыт вӧлмо Россиын но, Удмуртиын но. Пичиослэн огъя висёнъёссы пӧлысь соос 52 процентсэ басьто. Нош вазен, 50-тӥ-60-тӥ аръёсозь данакез нылпиос ты висёнъёсын кулылӥзы. Соин ик педиатръёс, югдурез тупатон вылысь, та висёнъёсты эмъянлы но алонлы тужгес бадӟым инты висъяны ӧдъязы. Та ужпумлы сӥземын вал уно научной ужъёс. Тодосчиос тодыны тыршизы, малы бен таӵе висёнъёс ныпиос пӧлын туж ӝог аляло? Маин со герӟаськемын? Мугъёсыз трос. Тани ватонэз ӧвӧл, берло аръёсы тужгес уродмиз, калыклэн улон-вылонэз кырсьмиз, ву, омыр, тужгес но Ижевск кадь бадӟымесь городъёсын. Отын интыяськемын ож тӥрлык поттӥсь предприятиос. Собере шуръёсы, тыметъёсы кӧня бызе кыед ву, му вӧй - туннэ нокин уз вера. Нош кӧня кутылӥм дустъёс, гербицидъёс но мукет ядъёс. Ваньмыз соос тудвуэн шуръёсы гылтэмын но будосъёсы шедемын (сиён-юонъёсы). Тӥни ваньмыз со кыдамтэ нылпи мугоръёсы вуэ но пиналъёс ты висёнъёсын курадӟыны кутско но пыраклы, хроникъёс луо. Татын эшшо мае ватсаны кулэ на. Анайёс урод условиосын улэмен, тыро-пыдо сиськымтэен, данакез нылпиос висисесь вордӥсько. Сыӵе ик югдур Пермь, Самара, Екатеринбург но мукет областьёсын. Югдурез тупатон вылысь чакламын вал туж кулэ ужрадъёс: - Удмуртиын но Ижевскын кылдытэмын нылпиослэн ты висёнъёсынызы нюръяськонъя нимысьтыз ёз. Со пульмонологической служба шуыса нимаське; - ужаны ӧдъяз нылпи пульмонологъёслэн огазеяськонзы; - нылпиослэн ты висёнъёсынызы нюръяськонъя центръёс узырмытэмын ӟеч туала оборудованиен. Со юрттэ висёнэз шедьтыны, эмъяны но пиналлэсь тазалыксэ юнматыны; - дасямын устоесь нылпи пульмонологъёс, анестезиологъёс, иммунологъёс, отоларингологъёс но мукет специалистъёс. Озьы асьме республикаямы, палэнэ келятэк, секыт висисьёс но дорамы эмъясько; - республикаямы озьы ик кылдытэмын нылпи санаторийёс. Отын ты висёнъёсын курадӟисьёс тазалыксэс юнмато-кыдато. Тӥни, зэмзэ но, трос ужрадъёс кутэмын ке но, ваньмыз лэсьтымтэ на. Соин ик ты висёнъёсты эмъян кема кыстӥське, будэ секыт висисьёслэн лыдзы, вань кулӥсьёсыз но. Соин ик асьмелы чик ӝегатскытэк умоятоно калыклэсь улонзэ, инкуазез но валэктон ужез. Будэтоно нылпиослэсь мугор кужымзэс (иммунитетсэс). Берло дыре уноез нылпиос одӥг ты висёнэн трос пол висьыны кутско. Со юн сюлэмшугъяськытэ врачъёсты но научной ужасьёсты. Быдэс дуннеын матысь дыре ӝог вӧлме нылпиос пӧлын бронхиальной астма. Соин сэрен пиналъёс инвалид луо. Юнме шат тодосчиос та ужпумлы нимысьтыз саклык висъяло. Кужмоя валэктон уж, пото книгаос. Малы бен та уж туннэ ӵектэмын Кун премилы басьтыны? Вань-а солэн кулэез? Вань. Республикаямы ты висёнъёсын курадӟись нылпиосты эскероно дуннеысь "ЛСААС" программалэн куронъёсызъя. Отын одно ик лыдэ басьтоно инкуазьлэсь кырсёмемзэ. Кыкетӥез, нылпиос медаз висе бронхиальной астмаен. Сыӵе уж нуоно анай-атайёс пӧлын, школаын. умой быдэсъяно тая но кутэм программаез. Туннэ нимысьтыз пусйыны кулэ, И. Г. Гришкинлэн, М. К. Ермаковалэн докторской, Е. В. Стерховалэн, И. И. Лавровалэн, Т. А. Бритковалэн но О. И. Лекомцевалэн кандидатской ужъёссы сӥземын нылпиослэн ты висёнъёсынызы нюръяськонлы. Кылсярысь, Иван Георгиевич нырысьсэ эскериз нылпиослэсь бронхиальной астмаен курадӟемзэс, городъёсын но гуртъёсын висисьёсты. Кыӵе бен пайдаез та ужлэн? Син азьын. Республикаямы 2 пол кулэстэмын нылпиос пӧлын ты висёнэн (пневмониен) курадӟисьёслэн лыдзы, нош кулӥсьёслэн лыдзы 24,4 процентысен 16,1 процентозь вуттэмын. Берло дыре данакез нылпиос ты висёнэн вордӥсько. Сое тодон но шедьтон вылысь, умоесь амалъёс кутӥсько. Озьы анайёс 5 нуналлы больницаын ичигес кыллё. Огъя вераса, нылпиослэсь ты висёнъёссэс тодон, эмъян но алон ужъёс арлы быдэ ӧжытсэ 9 миллион манет пайда сёто. Г. РОМАНОВ. Туэ - Арлыдоослэн калык куспо арзы Лыдӟисьёс дорын куноын - устолык Ижевскысь Азин нимо библиотекаын трос либыт кышномуртъёс ужало. Нина Петровна Учановалэн кивалтэмез улсын татысь коллектив одӥг эшлыко семья кадь луиз. Жаль, али соослы котькуд библиотекаослы сямен ик туж секыт йӧтэ. Озьы ке но, ужасьёс асьсэ лыдӟисьёссэс ярато, пӧртэм пумиськонъёс ортчытъяло. Библиотекаын кема аръёс ӵоже ужась Тамара Михайловна Ляминалэн кивалтэмез улсын мӧйы лыдӟисьёслэсь кылдытэмын "Зарни арлыд" клуб. Та клубе ветлӥсьёсын пумиськыло Удмуртиысь писательёс, суредасьёс но мукет сӥё-дано адямиос. Арлыдоослэн нуналазы лыдӟисьёс пумиськизы Удмуртиысь Ӟуч культурая огазеяськонысь Альбина Сергеевна Кононоваен. Аслаз егит юрттӥсеныз Лия Сергеевна Юдинаен соос пӧртэм буёло бисерлэсь туж тунсыко суредъёс но тусбуйёс лэсьто. Лыдӟисьёс понна радъямын вал пичигес адӟытон. Люкаськемъёс паймыса учкизы соослэсь ужъёссэс. Зарни киё усточиос синмаськымон лэсьтӥллям Александр Сергеевич Пушкинлэсь, солэн няняезлэсь Арина Родионовналэсь но кышноезлэсь Наталья Николаевна Гончаровалэсь тусбуйёссэс, мукет суредъёссэс. А. С. Кононова вордскиз Ува ёросысь Кыйлуд гуртын, будӥз Нылга ёросысь Ӟуч Пычасын. Можгаысь педучилище бере дас куинь ар ӵоже ужаз нылпиосын, собере тыршиз "Ижмаш" огазеяськонын. Мылысь-кыдысь пыриськиз художественной самодеятельносте. Альбина Сергеевна трос лыдӟиське, быгатэмезъя кылбуръёс гожъя. Ӵыжы-выжыосыз пӧлысь шедьтӥз дышетӥсьёслэсь но священникъёслэсь вить поколенизэс. Соин но со святойёслэсь трос тусбуйёссэс лэсьтэ. Кононова сярысь трос шуныт кылъёс верамын адӟытонъёслы сӥзем книгаын. Тани 1994-тӥ арын Ижевскысь 41 номеро лицейысь 2 "а" классысь вань дышетскисьёслэн нимынызы дышетӥсь-психолог Берестова гожтэм: "Тау кариськом искусство сярысь тунсыко мадемды но улонэз яратэмды понна. Инмар Тӥледлы тазалык мед сётоз. Ми доры нош ик лыктэ". Ижевскысь Индустриальной ёросысь калыклы улон-вылонын юрттэт сётӥсь центрысь шутэтскисьёс вань сюлмысьтызы тау каро инмарлы оскон сярысь лекциос лыдӟемез понна. Та пумиськонын но лыдӟисьёс куноослэн ужъёссылы синмаськемзэс веразы. В. ЧЕРНОВ. Учке али бакчамес! ТОдӥськоды-а тӥ, гудырипуз сиёно губи шуыса? Уд? Соин ик ӵыжаса ветлӥськоды, озьы- а? Нош мон соосты кемалась эскерисько ни. Тани туэ шедьтӥ 6,8 килограммъемзэ но! Гуртамы гудырипуз гинэ уг удалты. Гужем куазь туж алякъяськись вал бере, бакча возисьёс кӧтсы веськатэк учкылӥзы картошка пудъёссы шоры. Но сюлмаськемзы юнме вылэм. Учке али та алангасар шоры! Таӵе ӟеч картошка будӥз туэ Грах ёросысь Вуж Эгра гуртын. АЛИК ЯМЩИКОВ, Удмурт университетысь биолого-химической факультетысь студент. Ческыт, ческыт Толэзьлы быдэ 140 тонна ческыт сиёнъёс-пряникъёс, печенняос, кампетъёс потто Воткаысь пищекомбинатын ужасьёс. Арахисэн, изюмен, шоколадэн кампетъёссы тужгес тодмо луо мукет улосвылъёсын но. Та нуналъёсы ужамзэс чакласа тодмо луиз: ортчем арен ӵошатыса, ческыт сиён куинь поллы тросгес поттэмын. Нош 60 ар ӵожезэ учконо ке, туж уно люкаське ук! Воткаын улӥсьёс ӟеч тодо пӧраны быгатӥсьёссэс В. Г. Тутынинаез, Н. П. Хохряковаез, В. П. Огородниковаез но мукетъёсты. "Сникерсъёсын", "марсъёсын" гинэ кӧтыд уз тыр, Воткаысь ческыт-ческыт сиён ӝӧк вылад мед луоз на. А. СИБИН. Шинель сётӥзы, мон дӥсяй Таӵе суредэз арлы кык пол адӟоно луэ: тулыс но сӥзьыл. Шулдыр но ӝожмыт кырӟанъёсты нёжъяса, солдатэ келян гурез арганэн шудыса, егит пиос эшъёсынызы коркась корка ветло. Тодэ лыкто "Шинель сётӥзы, мон дӥсяй" кырӟанысь кылъёс. Аресэд тырмем бере, службалэсь палэнскыны мугед ке ӧвӧл, амалтэк солдат дӥськутэз дӥсяны, пельпумъёсы погонъёс вурӟылыны тупа. Сыӵе асьме Конституция. Кунмылэсь кунгожъёссэ но кинлы ке утёно, возьмано ук. Тани нош ик матэктэ сӥзьыл службае келян вакыт. "Служба", "армия" кылъёсты кылыса ик тросэз юзыр-кезьыр луыса кошке. Сюлэмзы шымырске егит пиослэн: "Мар вите- возьма монэ азьпалан?" Мур лулско анай-атайёс: "Сӧл-тазаен дорамы берытскоз-а вордэм, быдэ вуттэм нуныкамы?" Таӵе сюлэшуго юан гердъёс кылдыны мугъёс тырмыт гинэ. Армиысь - азьвылгес службае мынэм пиослэн эрказъяськемзы сярысь трос гожъяло газет-журналъёсын. Чагыр экран вылысь нунал пӧрат адӟиськом еж пиослэсь киязы ож тӥрлыкен ожмаськемзэс. Куддыр гажанзылэсь ымдурзэс чупаны но вутскымтэ егит пиос сӧсырмыса ӧлексы кылё, бырыны шедьыло "пӧсь точка" нимаськись интыосын. Сыӵеос йыло но йыло. Азьвыл Чечня, Молдова ке вал, бӧрысь ватсаськизы Абхазия, Дагестан, Таджикистан... Асьме нылпиосмы, югдурез тупатон вылысь, юн сыло кунгож сьӧрысь Югославиын но. Анай-атай сюлэм тодытэк-шӧдытэ уг улы. Та нуналъёсы гинэ "Удмурт дунне" газет ивортӥз вал: "Ижевскын улӥсьёс пӧлын юалляськон" ортчытэмын. Со возьматӥз, 58 процентэз анай-атайёс пиоссэс армие келяны кышкало". Та лыдпус но малпаськымон ӧвӧл шат? Берло аръёсы трослы синӥз армилэн данэз. Талы муг сётӥзы Афганистанын но Чечняын кулэтэм ожмаськонъёс. Йырвиын малпан берга: "Ож тылӝуэ пыриськыны кулэ-а 18 аресъем пиос? Котькудӥз лыдӟись соглаш кариськоз: "Инмаред мед утёз ож тылӝулэсь" шуон малпанэн. Нош солдатъёсты таӵе ужлы дышетытэк амал ӧвӧл. Кызьы-о дышетытэк, визьматэк, огшоры пиосты ожгарчилэсь ӧнерзэ пыӵатытэк? Пельпумазы погонъёс бырттэм, Родина азьын присяга сётэм бере, соос дась луыны кулэ кунмес, шаермес утьыны но. Егитъёслэн быгатыса ожмаськемзы сярысь асьмеос ӟеч тодӥськомы Быдӟым оже ветлэмъёс вылын но. Тодон-валан но устолык капчиен уг сётско. Берло аръёсы выль могӟет кылдытӥмы на - школаосын дугдӥзы "Военое дело" предметэз дышетэмысь. Со интые кылдӥз ОБЖ (основы безопасности жизни). Со возьматӥз: службае мыно солдат улонэз чик тодымтэос. Сыӵослы ке кык полэс секыт ук! Озьыен, нош ик берытскыны кулэ, дыр, палэнтэмез вылэ. Зэм, котькытын огкадь аналтэмын ӧвӧл на та уж. Шумпотымон но осконлык кузьмась иворен тодматӥз вал ас лыдӟисьёссэ "Удмурт дунне" (� 83, 1999 ар). "Ижевскысь 6775 номеро воинской частьлэн учебной центраз та нуналъёсы усьтӥськиз военно-патриотической лагерь. Со кылдӥз, Егитъёсын ужанъя кун комитет дэмламъя. Татчы вуэм пиналъёс ваньмыз дышетско военно-патриотической клубъёсын но кадет классъёсын. Сюлэсь ятыр быдэ вуымтэос военной наукая ватсаса тодон-валан басьтозы. Лагерьлэн ужез умой радъямын. Курсантъёс татын шутэтскозы но, дышетскозы но, тазалыксэс но юнматозы, мургес тодматскозы армилэн улон-вылонэныз. Озьыен, пиналысен ик шӧмъялозы солдатлэсь сюрессэ". Та нуналъёсы службаысь шутэтскыны вуылӥз гуртое Владимир Солодянкин. Пияш дышетсконзэ аналтыса, 9-тӥ классэз но ӧз йылпумъя вал. Еж мугорыныз фермаын ужаны кутскиз. Монэ чылкак паймытӥз мукетыз, егит гуртоелэн погонъёсаз лычкаос вурӟемын. Сержант. Азьвыл таӵе званиез сётозы вал шор ёзо яке средне-специальной тодон-валан басьтэм егитъёслы гинэ. Сыӵеос кулэсмизы шат туала армиын? Озьы, дыр. Ичи дышетскемъёс но покчи командир луо бере, мукет малпан кылдыны уг быгаты ни. Та сюлэмшуго юанме ик сётӥсько тодмоелы, Киров улосысь Кильмезь ёрос военкоматын ужась прапорщиклы А. М. Наймушинлы. - Анатолий Михайлович, кыӵе дасьлыкен службае кошко туала егитъёс? Егит прапорщик йырберзэ ик кормыштӥз но валэктыны ӧдъяз: - Туала егитъёс, азьло аръёсын ӵошатыса, трослы воштӥськизы. Соос юнгес эшъясько курытэныз, куддыр шедьыло ни наркоманъёс но. Тулыс службае келян дыръя 48 аспал пиосмы казна дӥськутэз дӥсязы. Институтэз, техникумез йылпумъям одӥг пияш но ӧй вал. Таяз учыре келяны тупаз судэн условно наказать каремъёсты но. Мукетыз "сьӧд вишты": 14 призывник сюрес вылэ потӥз школа партаос сьӧрысен ик. Соос пӧлысь тросэз - ог классазы кык-куинь ар пукемъёс. Сыӵеослэсь дышетскем сярысь справказэс учкытэк но тодмо. Кызьы вералляз одӥг сатирик: соослэн ымныразы чылкак ӧвӧл интеллект тодметсы. Егитъёс пӧлын трос висисьёс, секталазы кулэс луэмъёс. Та ваньмыз туала мыддоринскем улонмылэн тодметъёсыз. - Анатолий Михайлович, нош ма вераны быгатысалды "пересь" солдатъёслэн эрказъяськемзы сярысь? Егитъёс талэсь укыр курдало ук. - "Дедовщиналэсь" тросэз кышкало. Со калтонэ шедё сыӵеос, кин возьматэ аслэсьтыз ляб интыоссэ, калыкен вераськыны, огъя кыл шедьтыны быгатӥсьтэмъёс. Соин ик егитъёс мед тунсыкъяськозы улонысь пӧртэм ужпумъёсын, мед кыдатозы сӥльвирзэс, мед утёзы лулчеберлыксэс. Таза, юн мылкыдо адямилы армия кышкыт луыны кулэ ӧвӧл. Озьы бере, службае мынӥсь пиосмылы огзэ гинэ сӥзёме: ӟеч служить мед карозы ӧрзӥ- пиосмы, ӟеч мед утёзы кунгожмес, сӧл-тазаен мед берытскозы вордскем доразы. Николай ТУРИН. "Шаермылэн усточиосыз" Юбилейёс, юбилейёс... Огез ортче, мукетыз вуэ. Удмурт калыкмылэн дано пиосыз- крезьгурчиосыз Герман Корепанов но Геннадий Корепанов (таиз аслыз берло Камский фамилия ватсаз на) огез бӧрсьы мукетыз удмурт дуннелы кизилиоссэс ӝуатӥзы. 75 арес тырмысал ни Герман Афанасьевичлы, но солы та юбилейзэ адӟыны ӧз кылды. Нош Геннадий Михайлович туэ пусъе 70 арес тырмонзэ. Дано композиторъёсмылы сӥзьыса, шаерамы ортчытъясько пӧртэм ужрадъёс. Та ужлэсь палэнэ ӧз кыле элькун музейын ужасьёс но. Куарусёнлэн 29-тӥ нуналаз татын усьтӥськиз композиторъёслы сӥзем "Шаермылэн усточиосыз" адӟытон. Документъёс пыр возьматӥське соослэн улон сюрессы, творчествозы. Пӧртэм арбериосъя учкись валаны быгатэ, ку но кызьы гожтэмын соиз яке таиз музыкальной произведение.Тодыны луоз, кылсярысь, тазэ но: егит дыръяз Герман Корепанов гожъям кылбуръёс, веросъёс. 50-тӥ аръёсы одӥг веросэз понна солы сётэмын грамота, улӥяз - Корней Чуковскийлэн кинюртэмез. Озьыен, Герман Афанасьевич яратэ вылэм крезьгуран куспаз кылбураны но суредаськыны. Г. А. Корепанов - нырысетӥ удмурт опералэн но симфонилэн авторзы. Удмуртъёс пӧлысь нырысетӥез СССР-ысь Композиторъёслэн союззылэн членэз, Удмуртиысь хоровой обществолэн нырысетӥ председателез, Россия Федерациысь искусствоосъя дано деятель, Удмурт Элькунысь Кун премилэн лауреатэз. Адӟытонлэн кыкетӥ люкетэз сӥземын нырысетӥ профессиональной композиторлы, Удмурт Элькунысь калык артистлы, Россия Федерациысь искусствоосъя дано деятельлы, республикамылэн Кун премиезлэн лауреатэзлы Геннадий Корепанов-Камскийлы. Геннадий Корепанов-Камский - нырысетӥ удмурт балетлэн, оперетталэн, опера-балетлэн авторзы. Музыкальной театрын со уно аръёс ӵоже валтӥсь кырӟась вал, сцена вылын шудэмын трос пӧртэм рольёс, соос пӧлын - "Лобась шыр" опереттаысь Альфред, "Чипчирган" опера-балетысь Туганай но мукет. Адӟытонын уже кутэмын композиторлэн пӧртэм аръёсы пуксем портретъёсыз, произведениосызлэн партитураоосы, шудон инструментъёсыз, наградаосыз но мукетыз. Выставкаез дасян бордын ужазы музейлэн историяя люкетысьтыз научной ужась В. Я. Баринова но университетысь дизайнъя факультетын дышетскисьёс Ольга Соловьева но Наиля Рахматуллина. Е. КУДРЯВЦЕВА, Национальной музейын ужась. Барбиен уд вошты Мунёос - нылпиослэн яратоно шудонзы. Вашкала дырысен ик лэсьто вылэм соосты пулэсь, кызьпу туйлэсь, басмалэсь, куролэсь... Зэм, туала арын соос интые Барби мунёос вӧлмизы ни, озьы ке но, ас киыныд лэсьтэмез дуногес, шунытгес. Шаерысьтымы кибашлыослэн юртъёсазы но тае валаса сюлмасько вашкала киужан амалэз выльдыны. Дас вить ёросъёсысь усточиос асьсэлэсь лэсьтэм муёнеоссэс ыстӥзы республикаысьтымы чеберлыко киужъёсъя юртэ выставкае. Тунсыко мунёосынызы паймыто алнашъёс но пичи пургаос, играос но дэбесъёс, якшур-бодьяос но балезиноос, селтаос... Адӟытонэн тодматскыны луоз 1-тӥ ноябрёзь. Та нуналэ ик выставкалы йылпумъянъёс лэсьтэмын луозы, вормисьёслы кузьымъёс сётозы. А. БУДИНА. Туэ - арлыдоослэн калык куспо арзы ШУНЫТЭЗ НО ЧАКЛАМЕЗ ЯРАТӤСЬКОМЫ Кык ар талэсь азьло, Ижысь Первомай ёрос администрацилэн ӵектэмезъя, татысь социональной обслуживаниея центрын усьтэмын вал пересьёслы нуназезэс ортчытонъя отделение. - Та дыр куспын, туэ июнь толэзёзь, ми дорын ялкариз ни куинь сю кызь кык адями, соос пӧлысь дас куинез - ожысь ветеранъёс, сизьымдонэз - Быдӟым Отечественной ож дыръя секыт ужамьёс, сю куамынэз - ужысь ветеранъёс, - вера та отделенилэн кивалтӥсез Лапшина Любовь Васильевна. Арлыдоосын ньыль мурт гинэ ужа ке но, соосты татын туж учкыса-чакласа возё. Толэзьлы быдэ кызь нуналлы люкало куамын адямилэсь группа, кин мылкыд каре. Вуыло пӧртэм арлыдоос, витьтон аресысен кутскыса. Тужгес мӧйыезлы, Любовь Васильевналэн верамезъя, укмыстон одӥг арес вылэм. - Ми лыктӥськомы татчы дас часлы. Нуназеозь милемлы массаж лэсьто, зарядка ортчыто, Чижевскийлэн лампаез улын пукиськомы. Нош нуназе бере куинь но ӝыны часозь шутэтскиськом яке крезьгуро комнатаосын дырмес ортчытӥськомы, - вераськонмес азьланьтэ татын ялкарись пересь Владимир Федорович Сентяков. Арлыдоосты татын дунтэк йӧнато. Шутэтскисьёслэн веремзыя, йӧнатсконлэн ӟечлыкез шӧдӥське. Огезлэн, пе, уг ни висьылы кускыз, мукетызлэн - вирзӥбетэз (давлениез) пичияз, куинетӥез уйёсы умойгес кӧланы кутскем. Тани Фаина Шаяхметовна Шаяхметовалэн татчы лыктыкуз лёгаськемез ик уг луы, пе, вылэм. - Азьвыл ми сое ум но адӟылӥське вал. Пыдъёсыз висемен, пӧламы ӧз поталля, - верало со сярысь ӵош шутэтскись эшъёсыз, - нош али лёгаське ини, йӧнатэмзылэн емышъёсыз адско. Арлыдоослы тужгес но кельшо нуназе бере ортчытъяськись ужрадъёс. Та вакытэ соос доры я кыӵе ке эктӥсь-кырӟасьёс ветло, я соос асьсэос шулдыръяськонъёс малпало. - Ми доры вуылӥзы ни "Камские напевы", "Тополек", "Клуб дружных" ансамбльёс, "Танокысь" нылпи группа, городысь академической хор. Озьы ик концерт возьматъязы 59, 90, 97 номеро школаосысь но 23, 92, 124, 183 номеро нылпи садъёсысь пиналъёс. Ваньзылы тау кареммы потэ, - азьланьтэ Л. В. Лапшина. - Со сяна, ми дунтэк ветлӥськомы музейёсы, суредъёсын выставкаосы. Эшшо ми потамы на Воложкае, катерен ветлӥмы. Туж чебер отын, - шумпото асьсэос пересьёс. Нокытчы ветлымтэзы дыръя, арлыдоос пуко шутэтскон комнатаын. - Татын эктӥськомы-кырӟаськомы. Ялкарон ужрадъёсты ортчытъяськомы, Валерий Владимирович Юшков ачиз адями-оркестр. Со ялан мылкыдмес ӝутэ. Котьмаин шудыны быгатэ: арганэн но, пианиноен но. Олокыӵе но кылын кырӟа: ӟучен, бигерен, удмуртэн. Тани удмурт кылын туж чебер быдэстӥз "Ой, тӥ чебер нылъёс" кырӟанэз, - шуо удмурт песянайёс Зинаида Петровна Кожевникова но Мария Никифоровна Ускова. Отделениен кивалтӥсьлэн верамезъя, татын трос удмурт кышноос шутэтско, тазалыксэс юнмато. Эшшо пересьёс киужъёсын выро на. Зэм но, шутэтскон комнатазы туж шулдыр утялтэмын. Татын вань пӧртэм пумо пужъятскемъёс, чильпаськемъёс, керттӥськемъёс. Тузӥ адӟисько ӟенеликъёслэсь лэсьтэм вазаос, полиэтилен пакетъёслэсь - болонка пуныос. Вань та киужъёсты центрмылы кузьмаллязы асьсэос пересьёс. - Кылем-мылем басмаослэсь тапочкиос вуриськомы. Ог-огенымы тодон-валанъёсын, быгатонлыкъёсын вошъяськиськомы, - мылкыдзэс ӧръяло песянайёс. - Аспӧртэм ужтерапия со, - серекъя санитарка. Озьы ик татын туж трос книгаос но журналъёс. - Книгаос милемлы дунтэк сётӥзы механической заводлэн библиотекаез но Герцен нимо библиотека. Быдэн сюрс вить сюлэсь уно книга висъязы соос. Куддыр асьсэос шутэтскисьёсмы книга-журнал ваё, кузьмало, - вера Любовь Васильевна. Татчы люкаськемъёс одӥг вордскем нуналзэс но пусйытэк уг кельто. Та смена куспын гинэ куинезлэсь ортчытӥллям ини. Ӵапак отчы вуылон нуналам но Софья Васильевна Крайноваез 84 аресэныз ӟечкыланы ӝӧк выл пуктэмын вал. Пересьёс асьсэос ик кузьым басьто. Татын арессэ пусъем Кожевникова Зинаида Петровна но: - Эшъёсы кӧлан дэрем кузьмазы. Макем чебер со! Туж шумпотӥ. - Ма, урам кузя соин мед ортчоз шуыса кузьмамы ук, - серекто эшъёсыз. Одӥг семья кадь тупаса уло татысь арлыдоос. Ваньзы ӵош шумпото, куректо. Та юрт соослы вордскем дорзы кадь потэ ини. - Нош кинлы ми, пересьёс, кулэ на? - чабкисько соос. - Татын милемыз туж утялтыса возё. Мылкыд вордске, гуртэ бертэм ик, ява, уг поты ни. Ми нош ик ваньмы ӵош декабре люкаськыны вераськимы. Тросэз ми дорын кыкетӥзэ-куинетӥзэ ялкаро ни, шуэ Любовь Васильевна. Кивалтӥсьёс куддыр тышкасько: озьы, пе, уг яра выльёссэ кыскыны кулэ, шуо. Но ма каромы ми? Улляса уд лэзьы ук пересьёсты. Соослы татын кельше бере, выльысь лыкто. Ог 10 процентэз. Одӥг пол гинэ центрын ӧз шутэтске ини. Котьмаиз кельше татын пересьёслы: ужасьёс но, сиён-юон но. Шуныт гинэ уг тырмы, та юртын туж кезьыт. - Ёрос администрацилы вазиськеммы потэ: батареяосты тупатъяны коньдонэн мед юрттысалзы. Асьсэос но ми доры ӵемгес мед ветлозы вал, милемыз медаз вунэтэ - пересьёс чакламез, шуныт кылэз ярато уго. Е. КИТОВА. "Буммаш" кужмо ветеранъёсыныз Быдэс дунне вылын таиз ар лыдъямын мӧйыослэн аренызы. Нош 1-тӥ октябре асьмеос пусйим арлыдоослэсь нуналзэс. Акциосын "Буммаш" огазеяськонысь ветеранъёслэн огазеяськонзылы, вылаз ик, туэ 25 ар тырмиз. 25 ар... Табере луэ, дыр, ини солэн ужамезлы куд-ог йылпумъянъёс но лэсьтыны. Мӧйыослэн огазеяськонзы, зэмзэ но, бадӟым уж лэсьтэ. Та вакытэ со 1881 пенсионерез огазея. Предприятие одӥг ветеранэз но палэнэ уг кельты. Туэ пенсионеръёслы, юрттэт сётон вылысь, 160 сюрс манет коньдон висъямын. Со мынэ адямиослы котыр ласянь юрттэт сётыны. Тани ог дасо ар пала ини "Буммаш" аслаз ветеранъёсыныз пумиськонъёс ортчытэ. Со ужрад толэзь ӵоже кыстӥське. Отчы вань мӧйыос лыкто. Солы предприятие ватсаса эшшо 140 сюрс манет коньдон висъяз на. "Буммашысь" ветеранъёслэн огазеяськонзы вормисе потӥз 1-тӥ республиканской смотр- конкурсын. Солэн кивалтӥсез Аркадий Венидиктович Пицков Удмуртиысь ветеранъёс пӧлын нырысьсэ пусъемын "За заслуги перед Отечеством" орденлэн кыкетӥ степенё медаленыз. Мӧйыос бадӟым тау карон кылъёс верало соос сярысь сюлмаськемзы понна акциосын "Буммаш" огазеяськонлэн генеральной директорезлы, Удмурт Республикаысь Кун Кенешлэн депутатэзлы Валентин Витальевич Жебровскийлы. Та вӧзы ватсаны кулэ на: туэ арлэн пумаз завод 40 ар тырмонзэ пусъёз. "Буммаш" юбилейзэ данэн пумита. Солэн продукциез ӟеч мынэ. Туэ гинэ татын уждунэз куинь пол будэтылӥзы ни. * Предприятиысь ветеранъёслэн Евлампий СНЕГИРЕВЛЭН, Геннадий БАШКОВЛЭН но Василий Скорняковлэн туннэ мылкыдзы умой. Эшъёссэс ӟечкылало предприятиысь, ёросысь, городысь но республикаысь ветеранъёслэн огазеяськоназы ужасьёс но заводлэн генеральной директорез Валентин ЖЕБРОВСКИЙ. Мӧйыосты шулдырто Удмурт Республикаысь культура удысысь дано ужасьёс Марина но Алексей ХАНЖИНЪЁС. Н. БАЙТЕРЯКОВ. В. КАМАШЕВ (фото). Тодэмды потэ, вазиське библиотекае Элькунысьтымы Национальной библиотекаын ужасьёс берло дыре уже куто выль но выль ужан амалъёсты Интернет пыр, кылсярысь, котькуд тунсыкъяськись мурт аслыз шедьтоз Россиысь, шаерысьтымы но пӧртэм ёросъёсын кутэм законъёсты, документъёсты. Со понна вазиськоно библиотекае. Соку тӥледлы висъялозы компьютеръёс но мукет тодон-валан сётӥсь аппаратура, книгаос. Коньдон тыроно ӧвӧл. Тужгес кулэ луись документъёсты ыстыны, тодытыны быгато ини одӥг нунал куспын электронной почта пыр. Т. МОЖГИН. Кенешонъёс Бурдъёс лобыку юнмало Рынокен экономикае выжон Удмуртиысь ужась калык пӧлысь 30 процентэзлэсь нянь юдэссэ талаз. Тулысозь, специалистъёс лыдъямъя, югдур эшшо уродмоз на. Промышленность сылэмен, туала ужтэк кылемъёс борды ватсаськозы сю, сюрс адямиос. Кытчы соос мынозы? Кыӵе удыс дэмлалозы сыӵеослы уже интыянъя центръёс? Тӥни ма шугъяськытэ Правительствоез та вакытэ. Шуге-леке шедемъёслы ас вакытаз "шокчыны" омыр сётӥз ужбергатон (предпринимательство), республикаын улӥсьёс пӧлысь туннэ нуналлы ассэ шедьтӥз ог 100 сюрс мурт. Кылдытэмын 8 сюрслэсь ятыр пичи предприятиос, соос шаерамы поттэм продукцилэсь 8 процентсэ дасяло. Оборонкаен пачылмем республика понна со ӧжыт ӧвӧл кадь, но экономикалэн азинсконэзъя учкыса, мукетгес малпанэ вуоно. Ужбергатӥсьёслэн асьсэлэн но мылкыдзы суро-пожо: соослы йӧскадь бурдъяськыны уг тырмы коньдон. Бюджет та удысэз но музонъёссэ сямен ик арысь аре шымыртэ. 1997-тӥ арын ужбергатӥсьёслы чакламын вал висъяны 4,5 миллион манет, 1998-тӥ арын - 2,4 миллион, 1999-тӥ арын - 1 миллион, нош 2000-тӥ арлы бюджет пунэмен берыктон вылысь сётоз 500 сюрс манет гинэ. Озьыен, государство ачиз ик курадӟытэ "вордскытэм пиналзэ", ас кожаз улыны-вылыны кельтэ: кужмоез - азинскоз, лябез - быроз. Тӥни малы пичи ужбергатӥсьёс 10 ар ӵоже одӥг пол ӵош люкаськыса умой-умой кенешыны малпазы. Соослэн нырысетӥ республиканской конференцизы ортчиз кылем арня вискын Правительстволэн юртаз. Кенешон умой пӧрмиз. Люкаськемъёс пӧлысь огез но ӧз ушъяськы майбыр улэменыз, но ӟеч амалъёссы сярысь веразы. Азинсконъёссы шӧдӥсько пудо вордонын, бакча сиён будэтонын, промышленной удысын. Куд-огезлэн паськытамез но потэ ни, ӟоскыт интыын трос продукция уд лэсьты, но со понна кулэ коньдон. Ӧвӧл на асьмелэн йӧскадь законодательствомы но, со бордысен кутско выт тыронын валамтэос но но ог-огдэ вӧсь карон учыръёс. Воткинскысь ужбергатӥсьёс, кылсярысь, али 2 сюрслэсь ятыр, соос киын быдэс рынок, шуыны луоз, вань на эшшо но бордазы итӥськыны мылкыд карисьёс - уг тырмы коньдон. Кызьы шуиз татысь предпринимаьтель М. Б. Конопаев, умой ужаны люкетэ государстволэн огпалась огпала шонаськемез: одӥг ласянь нимаз кузёослы эрик сёто, мукет ласянь солэсь сюрессэ пытсало. - Пичи киоск пуктон понна гинэ 3-4 сюрс манет тыроно. Кытысь сомында уксё шедьтоз али гинэ уж борды кутскись мурт? Кызьы пусйизы асьсэос ик люкаськемъёс, колодчаын вуэз тырмыт, но сое омыръяны бадьяез ӧвӧл. Тазьы ӵошатыны луоно ужбергатон удысэз. Правительстволэн Тӧроез Н. А. Ганза конференцие лыктэмъёслы ас мылкыдзэ вераз: - Мыным яра тӥляд огазе люкаськемды, уж сярысь рос-прос кенешемды. Но мыным уг кельшы Правительство ӧжыт юрттэт сётэ шуэмды. Льгота ми сётом соослы, кин ужтэк кылемъёслэсь лыдзэс кулэстыны юрттоз, тужгес но районъёсын. Малы асьмелэн сомында музъеммы буш кылле? Маин выре солэн кузёез? Тӥни ма сярысь вераськыны кулэ. Кин ӟеч ужа - солы котыр ласянь юрттом. Конференцие люкаськемъёс вазиськон кутӥзы Кун Кенешлы, Правительстволы, интыысь ас коже кивалтон ёзъёслы, пичи ужбергатонлы азинскыны луонлык мед кылдытозы но коньдонэн юрттозы шуыса. Пичи ужбергатӥсьёслэн кыкетӥ Всероссийской съездазы быръемын 9 делегат. Соос пӧлын Сарапулысь "Лада-С" ЗАО-лэн директорез О. Б. Булатов, Ижевск городлэн мэрезлэн воштӥсез В. Н. Кузьмин, "Камелия" магазинлэн директорез С. В. Кузнецова, "Продконтракт" ООО-лэн директорез А. П. Сорокин, Балезиноысь предприниматель М. Е. Чиркова но мукетъёсыз. Съезд ортчоз Москваын 27-тӥ-28-тӥ октябре. Отын вераськон мыноз пичи ужбергатонэз государство ласянь паськытатон но выт тыронэз выльысь кутскыса эскерон сярысь. Л. МЕДВЕДЕВА. Дунтэм коньдон Улон интытэк курадӟисьёслы юрт лэсьтыны пунэмен коньдон висъян сярысь Сарапулысь депутатъёс ужрад чаклазы. Отын нимысьтыз пусъемын сыӵе адямиос, кинъёс выт тыронлэсь мозмытӥсько: кӧня пунэмад, сомында ик берыкты. Сое ӝогак синйылтӥзы шаплыяськисьёс. Тани, кылсярысь, Сарапул ёросын гинэ 45 пунэмаськемъёс пӧлысь укмысэз Сбербанкысь алдаськыса 108 сюрс манет коньдон басьтӥллям. Сыӵеос пӧлы шедиллям куд-ог кивалтӥсьёс но. Тани ёрос тӧролэн воштӥсез С. Д. Шивырталовлэн юртэз но вань вылысь, кредит басьтыны кариськем. Ачиз ик со уго кредитъёсты висъя но вылэм. Т. Андреев. ДЫШЕТСКО НО, УЖАЛО НО Гуртын ужась специалистъёсты дэмен дасяло Гурт хозяйствоя академиын. Туннэ нуналлы отын дышетске 3600 студент, со сяна 200 мурт тодон-валанзэ будэтэ ужзэ вис карытэк. Шумпотоно, туэ дышетскисьёслэн лыдзы эшшо кык сюлы йылӥз. 1999-тӥ арын аттестация басьтӥзы ке сӥзьым специальностья, туэ вылӥ образование басьтыны быгатозы на ветеринарияя, нюлэс но парк удысъя. Академиын дышетскись студентъёс тодон-валанзэс юнмато уж вылын. Вань соослэн Воткинск ёросын бусызы. Ӟеч тыршемзылэн емышез но адскымон. Ю-няньзы гектарысьтыз 24 центнерен усиз. Туннэ нуналлы кылемын на бакча сиёнъёссэс утялтон ужъёс. Пусйыны кулэ, музъем бордын ужамзэс дышетскисьёслэсь дунъяло коньдонэн. Гурт хозяйствоя академия берло дыре юн кусыпъёс возе шаерысьтымы пӧртэм ёросъёсын. Кылсярысь, Вавож, Можга, Пичи Пурга, Воткинск но Завьял районъёсысь хозяйствоосын. Та палъёсын ик вордскем нылъёс но пиос тросгес лыкто академие. Вузэз быдтэмъёс но та ёросъёсы ик шугъяськытэк уже интыяськыло. Нялтас пусъё на, Гурт хозяйствоя академие дышетскыны капчиен пырон вылысь тросаз ёросъёсын арня нуналэ ужась школаос усьтэмын. Озьы ик, йыло агрошколаослэн лыдзы. Туннэ нуналлы шаерамы 15 агрошкола лыдъяське. В.КУТУЗОВА. Кизён агрегатэн тодматэ доцент П.Л.МАКСИМОВ. Преподаватель С.Ф.МЕРЗЛЯКОВА механизацияя факультетысь студентъёсын. Студентъёс чорыг ӵынатыны дышетско. Туспуктэмъёсыщз В.КАМАШЕВЛЭН. Журналистъёсын пумиськонъёс ДЫР ВУИЗ ДЭМЕН УЖАНЫ Ми ивортылӥмы ни вал, та нуналъёсы шаерамы ужаз Юрий Маслюков. Удмуртие лыктэмезлэсь мугзэ валэктон бордысен со кутскиз прессаын ужасьёсын кенешонзэ. - Республикаяды вуэмелэн мугъёсыз таӵеесь: депутатэ кандидат луон понна вань кулэ документъёсты люкаса сётӥ быръёнъёсъя окружной комиссие, со сяна, пыриськи пӧртэм пумиськонъёсы, кылсярысь, "Удмурт кенеш" огазеяськонэн, Ижевсклэн мэреныз, профсоюзъёсын, предприятиосысь коллективъёсын. Котькуд ужрадын вераськон ӝутскылӥз экономикаез улӟытон ужпумъёсъя. Мон лыдъясько, вуиз сыӵе вакыт, куке асьмеос, оло, берпуметӥзэ быгатӥськом на кун властьлэн куинезлэсь ик ёзъёсызлэсь ужзэс одӥг ӧре огазеяны. Соин ик Кун Думае мед шедёзы зэмос профессионалъёс. - Малы депутатэ кандидат луон понна тӥ Ижевск округез бырйиды? - Москвалэсь мон кышкасько (пальпотэ). Ижевскез вань улытозям гажасько, угось татын улон сюресме мытӥ, зэмос инженер луи. Татысь кошкыса но, соин ӧй люкиськы. Тодӥсько республикалэсь экономика удысысь вань бадӟымесь проектъёссэ, пыӵал тӥрлык поттӥсь предприятиослэсь валтӥсь изделиоссэс. Кулэ дыръя юрттын тыршылӥ. Азьланьын но тазьы ик луоз, малпасько. - Нош тодӥськоды-а Ижысь электромеханической заводын кылдэм югдурез? - Тодӥсько. Мон сямен, предприятилэн но "Антей" корпорацилэн кивалтӥсьёссы куспын ченгешон кылдӥз. Чаклалэ ай, ЭМЗ-лэн валтӥсь директорез татын, Ижын, ужа, нош валтӥсь конструктор Москваын пуке. Озьы одӥг кыл шедьтыны шуг. Зэм, югдур секыт. Со предприятилэн гинэ ӧвӧл, государстволэн но сюлмаськонэз луыны кулэ. - Быръёнъёсы мынӥськоды эрико кандидат луыса. Малы КПРФ-лэсь палэнскиды? - Мон коммунист, КПРФ-лэсь люкиськыны ӧй ик малпаськылы. Нош эрико кандидат луэмме валэктӥсько тазьы: туала обществомылы дэмен ужан, ог-огдэ валан кулэ. Вань пайдаё кужымъёслы огазеяськоно. - Кызьы тодмо, тӥ Евгений Примаковлы дурбасьтӥськоды. - Евгений Примаков - зол политик. Куд-огез вера, со, пе, дышетскемезъя экономист ӧвӧл. Мон тазьы ӧй шуысал. Евгений Максимович та ужпумъёсты умой вала, дуннеысь калыкъёслэн кусыпъёссыя специалист ке но. Со туж визьмо но чылкыт сюлэмо адями. Аслэсьтыз малпанъёссэ мукетъёсызлы пыӵатыны быгатэ. Янгышъёс лэсьтэ ке, соосты валаны но тупатыны тырше. Арлыдыз вань ини, но, кызьы Китайын шуо, 70 арес - егит дыр. Примаков, зэмзэ но, президент луыны быгатоз. Сыӵе оскон вань. - "Отечествоен" кусыпъёсты туж юнэсь. - Та огазеяськонлэн кужымез вань, солэн ӵуказе нуналыз бадӟым. Соин ик соин артэ, пайдалыко ужано. Нош "Отечествое" мон ноку но ӧй пырылы. Кызьы верай ини, мон КПРФ-лэн членэз. Тани али мыным туж зол юрттэ Николай Иванович Сапожников. - Пыӵал тӥрлык поттон удысын уно кужым тэк сылэ. Кызьы сое уже кутоно? - Асьмелэн вань удысъёс - монополистъёс. Ваньзы ик соос государствлэн кияз. Ӵапак сыӵе удысъёслы кулэ луись продукция но тӥрлык асьме дорын лэсьтӥськыны кулэ. Сыӵе луонлыкъёсмы вань. Нош асьмеос кунгож сьӧрысь басьтӥськом, озьы уно коньдонмес келяськом. Тросгес поттоно калыклы кулэ луись продукция. Тани басьтом телевизоръёсты ик. Ми улӟытӥм "Рекорд" телевизор поттонэз. Со кунгож сьӧрысь ваемезлэсь трослы дунтэмгес. Табере толэзяз 26 сюрс телевизор бичаське ни. Тӥни озьы, басьяськисьёс доры вуэ дунтэмгес вуз, нош предприятилэн ужез вань. - Кун Думаын кыӵе интыез басьтыны малпаськоды? - Кыӵе ке пост сярысь чик уг малпаськиськы. Нырысь ик депутат луоно. Кун Думае шеди ке, ужало экономикая ёзъёсаз. - Чечня котырын югдур пумысен малпанъёстэс вералэ вал. - Чечня эшшо огпол возьматӥз на суп-сап ужаммес. Малпасько, ваче кенешонъёсты паськытгес радъяно, али соос чик уг нуисько. - Москваысь данакез политикъёс улосвылъёс пыр Кун Думае мыныны чаклало. - Мон лыдъясько, политиклэн странамылы пайда ваемез солэн улон интыеныз чик герӟаськемын ӧвӧл. Юрий Дмитриевич Маслюков журналистъёслэн уно юанъёссылы валэктон сётӥз. Мылкыдызъя шӧдыны луиз, быръёнъёсы пыриськыны со дась. Ю.Михайлова. Скалъёс быризы Каракулино ёросысь одӥгаз хозяйствоын шутэтскон нунал "пӧсь" вакытлы пӧрмиз. Капчи мылкыдо пастух яратоно скалъёссэ бусые поттэ вал. Но... электроез тӥяськем интыетӥ ток шуккыса тямыс скал бырыны шедиз. Жаляса верано, тӥяськыса усем вакчи электроез гуртоос понна бадӟым ыштонъёс ваиз. Уго одӥгез кысконо скал та вие 10 сюрс манет пала дунъяське. Со сяна, тямыс пӧлысь одӥгез гинэ скал страховать каремын вал. Кылдэм югдур малпаськытэ, уго та выллем учыр вал ини толэзь талэсь азьло Чеганда гуртын. Соку электротоклэсь вить скал кулӥз ке но, электроезъёсыз рос-прос эскерись ӧз шедьы. Та учыръёс бере но уж аналтэмын на. Паймоно, кызьы таӵе интыосы адямиос ӧз шедьылэ на. Соку ма карысалзы меда ёросысь электросетьын ужасьёс? В. НИКОЛАЕВА. Инкуазь Семинар ортчоз 11-тӥ-13-тӥ октябре Москваын ортче инкуазез утён ласянь ивор сётӥсь ёзъёслэн ужзыя семинар. Сое радъя Россиысь Экологияя кун комитет. Семинарлэн ужаз пыриськыны ӧтемын Удмурт Республикаысь Инкуазез утёнъя кун комитетысь иворъёсты вӧлмытон удысын ужась специалистъёс но. Та вие инкуазьмылэн кырсь виштыосыз сярысь ӵемысь ватыны тыршо. Сое шараян вылысь кулэ ивор вӧлмытон удысъя нимысьтыз программа. Солэсь проектсэ ик эскерозы та семинарын. Туннэ нуналлы нырысетӥ вамыш лэсьтэмын - ивор вӧлмытон удысын та ласянь инъет кылдытэмын. ӦТЧАМ БЕРЕ Тэргаськытэк, керетытэк! 12-тӥ куартолэзе, Кун Кенешлэн кивалтӥсьёсызлы пумитъяськемзэс возьматыса, удмуртъёс радъяллязы пыкет. Сылӥськом Кун Кенешлэн юртэз азьын. Возьмаськом калыклэсь люкаськемзэ. Мон Роза Ивановна Яшинаен артэ вал. Со доры кожиз Ижын улӥсь мӧйы воргорон. Кутскиз ук Роза Ивановнаез "Удмурт кенешлэн" ляб, урод ужамез пумысен пыкылыны. Роза Ивановналы дурбасьтыны кутскиз солэн урдсаз сылӥсь воргорон. Зэм, нырысетӥез ӧз чида кыкетӥзэ, дурбасьтӥсьсэ. Мон таосты кылзӥ-кылзӥ но ӧй чида ни, вамыштӥ доразы. Юасько пыкылӥсь воргоронлэсь: "Нош тон маин ке юрттӥд-а ини вӧзад улӥсь удмурт калыкедлы?" "Удмурт кенеш" огназ, асьмеос юрттытэк, трос лэсьтыны уз быгаты. Татын тэргаськыса улытозь, кутскы но юртты калыкедлы ассэ гажаны, удмуртлыкмес ӝутыны. Та воргорон мыг-мог кариз но палэнэ кошкиз... Асьме пӧлысь тросэз таӵеесь: тэрганы дась, нош ужаны?.. Кимес шонтӥськом но палэнскиськом, монтэк но быгатозы ай, монтэк но лэсьтозы ай шуыса. Нош кулэ вылэм тазьы малпаны: "Мон ке ӧй лэсьты, кин лэсьтоз?", "Мон ке ӧй кутскы, кин кутскоз?" "Удмурт кенешлы" но, ёрос кенешъёслы но озьы ужаны кулэ: бордазы калык мушъёслэн мумызы борды бинялскемзы сямен мед бинялскоз. Соку асьмеос туж бадӟым кужым луысалмы. Трос асьмелэн янгышъёсмы. Яратӥськом тушмонаны, ог-огмес пож вуэн пылатыны. Асьмелы адӟем кароно коммунистъёслэсь. Асьтэос тодӥськоды, кыӵе быгатыса ужало соос калыкен. Тужгес но - быръёнъёс азьын. Нош асьмеос маин пӧртэм соослэсь? Малы ум быгатӥськелэ соос кадь? Малы ялан уллань но уллань лэзиськиськом?.. Со понна янгыш асьмеос ик, удмуртъёс. Малы? Ум гажаськелэ вордскем кылмес. Вераськыны гинэ но керпотӥськом. Ми, мӧйыос, быгатӥськом ай. Нош нылпиосмы, нылпиосмылэн нылпиоссы - уг ни. Удмурт кылмы, удмуртлыкмы мед пушъёз шуыса, нырысь ик бадӟым валэктон уж нуыны кулэ анай-атайёс пӧлын. Анай-атайёс нылпиоссылы мед пыӵатозы удмурт кылмес яратон, гажан мылкыд. Вань курадӟонъёсмес лыдэ басьтыса, кемалась кутоно ни вал Кылъёс сярысь закон. Но та малпан ялан кыле кагаз вылэ гинэ. Туж вожъяськисько Алнаш, Пичи Пурга, Глаз, Можга ёросъёслы. Отын трос гинэ удмуртъёс уло, удмуртлыксэс уг ышто. Соос понна та законлэн кулэлыкез но ӧвӧл кадь. Нош ми кадь ӟучомем ёросъёслы туж кулэ со. Нош ик вуозы быръёнъёс. Асьме адямиос вылӥ интыосы мед шедёзы шуыса, кир-пазь луоно ӧвӧл, огинэ кариськоно. Валче ужано мукет калыкъёсын но. Соку гинэ асьмеос пыд йыламы юн сыломы. Нокин уз но лёга, уз но ултӥя. Е. Ильиных, "Удмурт кенеш" огазеяськонлэн Сюмси ёросысь ёзэзлэн тӧроез. Зарни медален пусъемын Сентябрь толэзьлэн пумаз Москваын ортчиз витетӥез калык куспо "Пивоиндустрия-99" адӟытон ярмарка. Отын Ижевскысь юзматӥсь но емыш вуос поттӥсь заводлэн "Вита-сок" вузэзлы зарни медаль сётэмын. Сок лэсьтӥське апельсинлэсь но ананаслэсь. Сое тӥ магазинъёсысь басьтыны быгатоды ни. С. ПЕТРОВ. Кенешизы прокуроръёс Удмурт Республикаысь прокуратуралэн коллегиез законъёслэсь быдэсъяськемзэс эскеронлы йылпумъянъёс лэсьтӥз. Пусъемын: та ласянь югдур республикаямы ушъямон ӧвӧл. Секытэсь йыружъёслэн лыдзы ялан будэ. Но пумиськыло на адямиосты юнме шорысь янгыше уськытон но соосты ӝегатон учыръёс. Умойтэм югдур кылдэмын республикаысьтымы изоляторъёсын. Отын ӝегатэмъёсты возён интыос унолы мултэсэн тырмытэмын. Судъёс уголовной ужъёсты эскерыны уг дырто. Прокуроръёслэн кичӧлтэмзыя, туэ законэз тӥяса ужамзы понна кыл кутоно луизы ог 100 пала милиционеръёс, ӝутэмын 15 уголовной уж. Удмурт Республикаысь прокуратуралэн пресс-службаез. Адямилы улоно Можгаысь "Красная звезда" огазеяськон ӟеч тодмо корка пуш тӥрлык, куасъёс, нылпиослы дышетскон арбериос, шудонъёс поттэменыз. Азьвыл татын лэсьтэм вузъёсты кунгож сьӧрысь 30-лэсь уно шаеръёсы келяло вал, нош "выльдӥськон" кутскемен валче, шуг-секытъёс татчы но алязы, фабрика пытсаськон дырозь вуиз ни вал. Та арын гинэ предприятие выльысь улӟыны ӧдъяз, 250 мурт выльысь уже куриськиз татчы. Финнъёслэсь, итальянецъёслэсь машинаоссэс басьтыса, данаклы ӝутскиз ужазинлык, нюлэсэз ӝикыт, бырйыса дасямен ӝутскиз вузлэн ӟечлыкез. Ӟеч кусыпъёс, ог-огдэ валан юртто огкылысь ужаны Ижысь, Уваысь, Глазкарысь мебель поттӥсьёсын. Шӧдскымон пайда сётэ поттэм вузъёсты кунгож сьӧрысь мукет странаосын возьматъян но. Огкылын вераса, вань уж ас ӧраз пыриз, можгаос туннэ калыклы 130 пумо вузъёс келяло. Шуг-секытъёс лыкто но кошко, нош адямилы улоно. А. АНАТОЛЬЕВ. Ӟечъёсыз пӧлысь умойзэ Кылем пятницае Ижын ортчиз Вань удмуртъёслэн огазеяськонзылэн Пичи кенешаз быръем муртъёслэн пумиськонзы. Люкаськемъёс эскеризы Кун Думае быръёнлы дасяськонэн герӟаськем ужпумъёсты. Та пумысен ивортон лэсьтӥз "Удмурт кенешлэн" президентэз Валентин Тубылов. Со пусйиз: Федеральной Собраниын депутат луыса ужаны быгатозы трос асьме эшъёс, но туннэ асьмелы потоно одӥг гинэ кандидатураен, соку депутатэ шедьыны луонлыкъёс йылозы. Лыктэмъёс депутатэ кандидат луыны ӵектӥзы Павел Вершининлы, Валентин Тубыловлы, Анатолий Ешкеевлы, Алексей Красильниковлы, Антонина Лисиналы но мукетъёсызлы. Та эшъёслэн мылкыд карымтэенызы но мукет мугъёсын валче решение кутэмын кандидатэ дэмланы Светлана Смирноваез, Кун Кенешлэн Тӧроезлэсь воштӥсьсэ. Солы дурбасьтӥзы ваньмыз сямен лыктэмъёс. Ӟечкыласьком! И. КРИЧЕВ. Виталий АГБАЕВ Уно улод, трос адӟод Учыръёс Селифон но телефон "Эй!" шуэмлы дун ӧвӧл, шуо. Уг оскиськы. Котьмарлы дун луэ. Одӥг эше нимме таки уг вера вал. Шорам котьку "Эй!" вазиськылӥз. Селифон мон, шуисько, Селифон. Кык-куинь нунал ортче, нош ик - "Эй!".Оло шудыса, оло исаськыса озьы шуылӥз - мылкыд пумен ӟырдаз. Котьмар ке но, вал ӧвӧл мон. Чиданлэн но пумыз вуэ бере, асме кутыны ӧй быгаты ни, лэся. Супыльӟем дыръяз шорам "Эй!" шуыса вазиз но, кымысаз васькытӥ. Эсьма, лодӥга быдӟа лёг кылдӥз. Соку ик монэ "телефон" , пе. Ойдо, мыным яралоз ини. Со понна шорам, нимтэм пудо-животлы кадь, "Эй!" шуыса уз вазиськы. "Эй!" шуисезлы дунзэ тыри. Табере аслам нимы кык луиз. Кышноелэн лекез потэ ке, соку ик сӧриськем патефонзэ улӟытэ: "Картэ мынам Селифон, ӵыжыр-важыр телефон. Эн ӟургеты воргорон, сӧриськоз ведь телефон." Тӥни вот. Шудо но шудтэм Шудо мурт мыноз - ватос борды канжаськоз, шудтэмез мыноз - губиез ӵыжоз. Ой-ёй, озьы но луылэ, акыр. Вот Поли Микталы удалтэ ке удалтэ ини. Инмар шудзэ кобыен омыръяса кисьта, кожалод. Нош Малань Педорлы пшык! но, тшык! Но ӧвӧл. Ялан кыӵе ке югдуре учыра. Мынӥз Поли Микта нюлэскы. Ӵапак шутэтскон нунал учыраз. Дорын пукытозь, шуэ, тэлез сузяло. Силё-сюрно учог эстыны ӵап интыяз. Сыӵе уж понна лесник но тау гинэ кароз. Ачиз но юзмыт сикын ёзвизэ кыдатоз. Нюлэслэсь чебер мар вань на? Погыртэм писпулэсь улвайёссэ бича, сюрес доры потта. Машинае тырыны, пе, капчигес медло. Одӥг улвай ӝутэ, мукетсэ... Поли Микталэн синъёсыз золскизы: силё-сюрно улын - бинялтэт. Нырысь-валысь кышкатскиз со. Оло, пе... Далай гинэ тунамез бере, сэрттоно кариськиз. Нош отын - койык сӥль. Браконьеръёслы кин ке люкетӥз, луоз. Соин, дыр, улвайёсын шобыръязы. Яке ватэм интызэс суразы. Микта котыр чакласькиз но бинялтэтэз нюштыр гинэ мото коляскаяз ӝоктӥз. Таӵе добралэн интыез, пе, мукет азьын. Со вакытэ ик нюлэскын вал Малань Педор но. Азбарез ӵужыны, шуэ, гужемпу бичало ай. Отӥ-татӥ ветлонъяз, кык пиосмуртъёс борды ӝимиз. Соосыз, зынъяськись пуны кадь, мае ке утчало. Писпуосты эскеро: быдьто ке асьсэлэн мерттэмзы. Койык кукъёсты адӟыса, Педор шальтраз. Му пыр вияны дась вал. Нош пиосмуртъёс со пумитэ: "Тынад ужед та. Тынад тӥред вань". Мискинь воргоронлэн синъёсыз кымысаз тэтчизы кадь: тамаша ук. Сьӧлыклэсь утиськон понна, сюез сиыны дась вал. Каллен но кызьы Педор соослэн син азьысьтызы ышиз. Дораз вуытозь, быземысь ӧз дугды: лашкинтэ но погра, султэ но лашкинтэ. Лулыз ик пыдтышказ вуиз кадь. Гужемпу но, тӥр но кулэ ӧй вал ни. Озьы луиз ини: шудо нуны такъятэк но шудо, нош шудтэм муртлы йӧлвылын но пӧсьтурын. Туслы тус Кин анаезлы тусла, сое калык тодма, шуо. Нош монэ гурт калык уг тодма. Мон но анаелэн пиез. Вот вынме кыдёкысен тодмало: Офинья Ванька, пе. Мон солэсь маин пӧртэм? Мугоръёсмы одӥг кадесь: урдылэм пуӵъёс выллем. Тусбуйын но кесем-басьтэмын: бадярлэн лаковать карем куарезлы укшаськом. Синъёсмы но огпорма: шур пыдсысь кык инӟыос выллем. Йырсиосмы гинэ шат пӧртэмесь: вынылэн суд, мынам - горд. Горд кыдёкысен пиштэ ке но, уг тодмало. Оло, тодмаса но юри Арганчи Очи нимало? Ноку но киям арганэз кутылэме ӧвӧл. Кыскаме вань ик - шудыны уг йӧндыриськы. Озьы ке но, кушем нимы - Арганчи. Гуртамы Нушы Митрей вал. Со арганэн моторъяськиз. Шат сое кадырлы карыса, нимзэ мыным лякизы? Оло нош, анай... Э-э, дунне вылын сьӧлыктэм адями ӧвӧл, дыр. Дӥсьлэсь вурыссэ котькӧня ват - сёромно со кыре потэ, адӟиське. Соин, дыр, мон но, Нушы Митрей кадь, горд палэзь выллем пиштӥсько. Мед тодмалозы шуыса, йырсиосме буяно кариськи. Вынылэн кадь суд, пӧй, мед луоз, вальк-вальк мед пукоз. Сьӧдэн буяй. Йыры куасьмиз но, йырсиосы вожалэс - лызпыръем луизы. Бырод ук: йыры - светофор. Нош ик буяй. Табере вуко изӥсьлы кельшисько. Пызесь луэм вукочи но тӥни. Пинал дыръя пурысьтам уг поты вылэм. Выльысь наштаськытэк ӧйлась. Ог куать пол, тямыс пол буяськем бере, йырсиосы усьылыны кутскизы. Одӥг ӵукна султӥсько но, йыры гонтэм куреглэн кадь - пилеш. Химической составзэ сурай, луоз. Вот беда! Кызь вить арес - йыры вольыт сяртчы кадь быглес. Гурт калык но тодманы кутскиз: Офинья Пилеш Очи, пе. Со понна одӥг кисые бушаз - йырсын уг нуллӥськы. Осто козма, кӧттэ корма. Ми Офинья пиос ке но, тус буёлмыя пӧртэм атайёс выжые мынӥськеммы. Талы бӧрысь шуисько: куар куарлы тупалоз, нош адями адямилы уз тусла. Вышкы эгестэк уг улы Одӥг укноетӥ быдэс урамез уд адӟы, шуо. Зэм, дыр, со. Тӧлатскон сямен потано кариськи городэ. Кемалась вал ини вуылэм. Учконо, пӧй, калыкез, асме но возьматоно. Юнме уг индыло: одӥг интыын ӧд ке пукы - уд кыжмы. "Музъем инӟыелы" базарысь мар но со кузьым басьтӥ. Асме но ӧй вунэты. Кызьы сотэк? Каре вуыса, кӧс ветлыны умой ӧвӧл кадь. Сурез гажасько бере, со мыным до-ото-ого кельше. Пилькалэн пась сапегез кадь. Кык полуштопез бушатыса, родняос доры ветлоно кариськи. Оло, шайтанэз монэ отчы валтӥз. Дыры вал на уго. Ӧй-а пуксьы со троллейбус шуоназы? Йӧн-йӧн гинэ интыяськи но, азям билет вузась вуиз. Удостоверенидэс, пе. "Ӧвӧл", - шуисько. "Соку билет басьтэ", - кизэ мычиз нылмурт. Умой-умой учки но - киросной нылы вылэм. Ну, шум-а бен ӧй поты? Вешаны ик дась вал. Нош со ялан мынэсьтым коньдон позыртэ. Давай, давай, пе. "Нылы, - шуисько, - тон ас визьмад-а? Киросатаед мон". Тодӥсько, пе. Мон отын гуньдэм кадь луи. Синъёсы гинэ, кынмем чорыглэн выллем, шораз долказы. Нош со весь ку посонзэ посэ: "Тӥляд уксёысьтыды - мынам уждунэ". Поттытэк ӧйлась. Со ведь мынам черкын кутэм нылы. Только вот кытысь солы сыӵе сям пыӵам? Бертӥз ке, мон но пунэме уг кыльы. Вышкы эгестэк уг луы. Укноетӥ дуннеез уд адӟы, пе. Нош мыным гуртэ но тырмоз. Милям асьмелэн йылолъёсмы. Ӵыжы-выжыосмы но иськавынъёс котьку почётын. Пиштэ но ыше Яркыт сяська вазь толӟе, пе. Ӧйтӧд, будослэсь сыӵе вакытсэ чакламе ӧвӧл. Вот адямиос пӧлын луыло сыӵе учыръёс. Пиштэ, пиштэ но шуак ыше. Ӵапак тём пеймыт инбамын ворекъясь кизили кадь. Вордӥськиз но улӥз одӥг гуртын Насьта. Ваньмыз сямен ик школае ветлӥз. Эшъёсызлэсь номырин ӧз висъяськылы. Дышетскыкуз пӧртэм предметъёсын тунсыкъяськылӥз. Котьмар уго тумошо потылӥз солы: тылобурдоос, инбам, шур. Ярдуре пуксьыса, часъёсын пукоз вал, инкуазьлэн чеберезлы паймыса. Ӵем дыръя кылылӥз кадь музъемлэсь гадь тыраз шокамзэ но. Оло, солы гинэ озьы потылӥз? Котьмар ке но, яратӥз шаерзэ. Улосэзлы сӥзьыса, кылбуръёс пӧраны кутскиз. Устоесь вал, газетъёсы но потазы. Тунсыкъяськемзэ шӧдыса, дыр, гурт калык нимаз сое Визьпог Насьтӥ. Огпол атаез анаез азьын паймемзэ ӧз ваты: "Хозяйка, нылмы Инмар-Кылдысинлэн сётэмез, акыр. Дышетскыны, пе, катар. Оло лекез потыса, оло индылыса - анаез меӵкытӥз: "Пыд азьдэ учкытэк эн вамышъя: канжаськод я мар". Зэмзэ но, школаез йылпумъякуз, нылаш вал ини йӧно нылмурт. Уно пиос синмаськыса учкылӥзы. Тросэзлэн кӧлон умъёссы вакчиёмизы. Пинал арлыд - зарни вакыт. Институтэз йылпумъяса, ужаны кемдӥз инкуазез утёнъя юртэ. Шаерез яратэ бере, будосъёсъя научной ужъёс гожъяз. Солэн тыршемезлы профессоръёс вылӥ дунъет сётылӥзы. Быгатонлыксэ шӧдыса, дыр, дэмлазы кандидат уж борды басьтӥськыны. Нош улон воштӥськиз мукет пала. Берло дыре инкуазьлы ӧжыт саклык висъяны кутскизы. Кытӥяз люкаськемъёс но ньӧмыз понна гинэ. Ваньмыз пыкъяське уксё вылэ. Ӵыжыт, вуэм емышез котькин сиыны дась. Куинетӥ кузпалэныз люкиськыса пумитаз со музонзэ. Таизлэн малпанъёс узыресь: вылӥе ӝутӥськон, тросгес капыртон. Инкуазьлэсь ӵакмыны кутскемзэ шӧдыса, дыр, Насьта малпанэзлэсь куштӥськиз. Кивалтӥсьёсын нюръяськыны моӵез ӧз тырмы, луоз. Ужез шоры но чиньыос вистӥ кадь учке. Кызьы вань, соиз но, пе, ярам. Ӟырдыт мылкыдыз кылбуръёс пумысен но сӥяз. Насьта быдэсак выиз кузпалызлэн бекчеяз. Нош со бекче тырмытэмын лякыттэм выронъёсын. Озьы тӥни: яркыт сяська вылэ нымы-кибы каръяське. Нош сяська кынмисьтэм ке луысал, со толалтэ но пушйысал. Пиштэ, ворекъя инбамын кизили, шӧдтэк шорысь шуак ыше со. Шуд ке сётӥзы - басьто, ачим уг куры "Йӧно сюан кык нунал, веранзы - арнялы", - шуылӥз мыным песяе. Ӧй оскы. Кызьы, пӧй, озьы луоз. Куке-соку ас вылам оскалтӥ - валай. Шулдыръяськонэз одӥг ӝытозь, ним-дан вӧлдонэз - губырмытозь. Бен, анай-атайлэсь верамзэ ум анлаське, пель сьӧртӥ лэзиськом. Кытӥяз пыкылэм но интыяз туж кулэ. Калер шуккон ке шуисько, асме вӧсь карисько кадь. Сюлмы ик пилиськыны дась. Уг ке лякиськы ӟеч кылме, калер шукконъёс йырзэс урдозы кадь потэ. Шаравар нуллӥсьёсыз озьы нимасько. Кылынызы кӧяло-вӧяло, нош уж вылын, нодтэм кунян музэн, берлань чигнало. У-ух, кӧты уг веська калер шукконъёслы! Кылзы уӵылэн, сюлэмзы кионлэн. Проклятой пиосмуртъёсыз дэй но уг басьты. Тани одӥг эше пизэ армиысь куинь ар возьмаз. Адӟиськыны бертакуз но огазьын вал. Кусыптӥзы ву шапыкен но ӧй ӟизасал. Ог-огзэс сыӵе яратӥзы, ог-огзылы сыӵе оскизы! Гогызы ваче бурмемын кожасалыд. Нош мар луиз? Калер шукконэз армиысь базар мунёен бертӥз. Тусбуен но шумес пыдэс кадь. Оломаизлы синмаськемын. Нош сюанлы дасям дӥсь шифоньере ик кылиз. Со албастылэсь атассэ позыртыса-пызьыртыса ыж куэз сямен куасьтыны ошоно вылэм. Уг луы - закон! Нылкышноос уго ултӥянэз чиданы вордӥськемын. Эше пересь нэнӥезлэсь индылэмзэ кылэм-адӟем ӧз кары, дыр. Басьтом ёросысьтымы нылмес. Эсьмаса, кинишкаын но таӵеез гожтэмын ӧвӧл, дыр. Вот таиз яратон ке яратон! Вань калык шоразы вожъяськыса учкылӥз. Дыдыкъёс выллем, ог- огзылы тупало вал: чебересь, мусоесь, вольытэсь. Но калер шукконлэн йыраз тӧл шула вылэм. Олокытӥ-мартӥ визьмыз паньсаськиз. Чылкак дыго-мого шуккем аръян кадь: не корел, не юмал. Сюанчиос шулдыръясько, шуныт кылъёссэс уг жаляло. Пыд пыдэсъёссы лыдо корка зуркамон экто. Зылмыт куараенызы сайкато кӧлӥсь пуныосты. Соос но, сюанчиослы юрттӥськом кожаса, ур-вар куаньгето. Шулдыръяськон дырекъян вакытэ ныллэн калер шукконэз чемоданзэ кутыса пегӟе. Чиптэм-чаптэм олокытчы ыше-быре. Берло ини сарафанной ивор вуиз. Табере, пе, со, калер шуккон Мускоын улэ. Кивалтӥсь нергеын, лэся, ветлэ. Тӥни вот, проклятой пиосмурт проклятой ик луоз ини. Таиз но нылок пересьёслэсь визь-кенешсэс пыдулаз лёгаз, дыр. Пинал дыръя мылкыд бурдъяськемын, нош визь сурымен тулляськемын. Асме ке басьтоно, татын ачим нушы. Пис бордысь чаг кадь потӥсько. Кӧня пол песяе сюлворылӥз, кӧня пол лулыз шуг луымон индылӥз: эн дырты. Табань сиёно ке, шуэ, табаез кӧяно. Ӧй кылзӥськы, бызёно кариськи. Муспотонэ мынам укыр йӧно, етӥз, визьмо вал. Лушкамзылэсь курдай, луоз. Эсьмаса, курегез но серекъятыны быгатоз. Кызьы, пе, уд синмаськы тузӥ пиосмуртлы. Кытӥяз, сое малпаса, уйёсме но ӧй кӧла. Ох, со уйёс, ох, зарни вӧтъёс! Кенешим-вераським, сельсоветэ люкаським. Солэн но, мынам но анай-атайёс шугъясько: кызьы, пе, сюанмы ортчоз. Табере ведь соос кудо-туклячиос луозы. Эшъёсмы лыктӥллям быдэс куды сяськаосын. Йӧно адскон понна, йӧскадь дӥсяськиллям. Нылъёсы-эшъёсы борддорысь картинка выллемесь. Синучкон азьысь уг кошко: чеберъясько, гольтыръясько. Соосты уго монэн ӵош патретэ шуккозы. Егит дырзы вань даурлы артэ кылёз. Берытскозы шунытэсь тодэ ваёнъёссы гинэ. Висъям дырмы вуиз - муспотонэ ӧвӧл. "Ӝегатске,дыр", - малпай поннам. Ортче час, мынэ мукетыз. Буйгатскон понна, эмъюм веръятэк ӧйлась. Тазьы сюлмыд но путоз. Шунды но пуксён пала ланьырске ини - муспотонэ ялан ӧвӧл. Уг ваньмы, лэся. Ӟечкыланы лыктэмъёс пӧсекъяны кутскизы. Кин мар ӟабыльтэ. Нош асьсэос уг кошко, эмеспиез витё. Юри лыктэм вылысь, шуак-дуак уд вырӟы. Сабырлы ӧвӧл. Ӧс шӧдтэк шорысь ваяк усьтӥськиз но, ашык ӝужда пияш пыриз. Мар, пе, татын тунаськоды. Эмеспи луонды, шуэ, нуназе пал Кузон пала шонтӥз. Автобусэ пуксемзэ, пӧй, ас синъёсыным адӟи. Вот калер шуккон, кызьы кутчаз со монэ? А мар понна? Нокыӵе сьӧлыкъёсы ӧй вал. Ас шудме ачим утчай, шедьтӥ. Мусоке понна ог тямыс пиосыз бордысьтым пешкытӥ. Нош со?! Э-эх, песяе, тынэсьтыд юнме ӧй кылзӥськы. Табере гырпумез куртчыны уг луы. Алдазы уга. Бен, легезьпу сяська чебер, но веньёсыз укыр лекесь. Возьытэ вуылӥ бере, аслым ачим шуисько: шуд ке сётӥзы - басьто, ачим уг куры, уг пыриськы. Улон дышетэ. Кышкан Позыръяськы, берыкъяськы, шуо - уй вакчи потоз. ӧйтод, озьы меда. Миклай Сандырлы та уе ӧз удалты. Ог ньыль пол-вить пол султылӥз. Нырысетӥ этажын уло бере, сак кариськытэк уг улы. Вылаз ик, эрказмемъёс сярысь кыл вӧлмемын. Кин тодэ, лушкаськисьёс корка пуштэ бушатозы - номырзэ уд шӧды. Уйшор. Тёп-шлёп. Сандырлэн синъёс чарка кадь луизы. Кылзӥське. Чус-чус. Умме гинэ усьыны кутске - нош ик: тёп-шлёп. Султытэк ӧйлась. Ураме учкиз - чалмыт, ӧс дорын кылзӥськиз - шыпыт. Ваньзэ эскеремез бере выдыса гинэ вуиз, выльысь - тёп-шлёп. Мар, пе, та - корка пӧртмаське-а, мар-а. Саташись мурт сямен, тӥр кутӥз но ӧс дорын сылэ. Пыризы ке, шуэ, ожалто. Аслам коркае, аслам крепосте. Кышкаку курдатӥсьёс трос луо кадь. Ваннаяз тамаксэ кенжытӥз гинэ, нош ик - шлёп-шатыр. Сё, пе, укноез пыргытӥзы. Шулӟектыса Сандыр комнатаяз вуиз, ваньмыз интыяз. Кышноез, тӥни, тяфыр, нокыӵе уг кариськы, ныс-пыс гинэ кӧлэ. Диваназ пуксиз но малпаське. Оло, пе, вӧсяськыса утчано. Сьӧлыкъёсы, шуэ курадӟыто, дыр, монэ. Оброс азе пыдесъяськиз гинэ - пыдъёсыз котмизы. Вот таиз ишан! Вот кытын беда! Лулыз ик пыдтышказ вуиз, лэся. Ӝогак тылэз ӝуатӥз. Адӟе: холодильник ӟубис усьтэмын. Отысь йӧ усьылыса шунам но вулы пӧрмем. - Мар уй тылобурдо кадь ветлӥськод? - вазиз кышноез. - Выд. Холодильникез уйлы усьтыса кельтӥ. Сузяно. Ачид уд юрттӥськы. Озьы но луэ: чырс палэзь мылкыдэз сура, кышкан - уез вакчиятэ. Гитар Очей Гитар Очейлэн мылкыд туннэ куашкамын. Тау карем интые, кышноез сое Небыльток Гитар шуэм. Ултӥямлы чидатэк, амалтэк сальтра вал кадь юскиськод. Песятаез, лэся, гитараен катар усто шудэм. Табере кушем ним вапумысь вапуме выже. Очей ини арлыдо, йӧно. Удмурт сямен вераськыку, пипу мырк выллем дыл-дыл сылэ. Кушем нимзэ вала ке, мыньпотэ. Данъяське, луоз. Чуки-беки улон азьлань вамышъя. Катъёс вошъясько. Нош адями йырзэ пильымон малпаське: кызьы но мар кароно. Кытысь со шудэз утчано, шедьтоно? Кудласянь сое йыръёно? Одӥг ӵукна, мылыз потытэк сайкакуз, Гитар Очейлэн кузпалызлэн йыраз укыр тузӥ малпан гудыртэм. Сад-бакчаез, шуэ, вузано. Таӵе иворез кылыса, воргорон интыяз ик кысмыляз. Тыпак эбылям чабак кадь, ымзэ гинэ выретэ на. Кышноезлэн кузяз ветлӥз, лэся. Ньылетӥ сад-бакчазэ но огназ ӝутӥз-сазназ. Нырысетӥяз - вуэз ӧй вал. Кыкетӥез - дунне пыдсын, пе. Куинетӥез - музъем начар. Берпуметӥез корказы интыяз. Ваньмыз вань. Гитар Очей, тазалыкез шоры учкытэк, уй но нунал бакчаяз тяпайтӥз. Нош кузпалызлы шумпотон. Картэзлэн киыз котьмалы мынэ. Медъятэк вольыт пӧрмытъяз ужзэ. Сюрес дунъёс будэмен, табере сое Небыльток Гитар шуизы. "Городлы матэ пуктомы, - индылэ кузпалыз. - Коньдонмес шыръяломы. Учкы ай, сюрес понна кӧня шупче?" "Нош мон?" - юаз Очей. "Тон пиосмурт, - нокыӵе ӧз кариськы кузпалыз. - Нылпиос понна улӥськомы". Бен, суам бамлэн тусыз уз лу, азьтэм муртлэн возьыт уз лу. Гитар Очей, мур лулӟыса, пуктэм-инъям бакчазэ учкиз: кӧня кужым, кӧня тыршем, кӧня тазалык понэмын татчы. Нош табере?.. Сотэк но губырскем мугорыз эшшо но шымырскиз на. Бӧрысь ини туж ӝожмыт куараен кышноезлы ӟазыртӥз: "Та мачыез шуккысал но, пуньые ӧвӧл". Тазэ шенгылятэк-пенгылятэк чылкыт удмурт кылын лякиз. "Кенеш" укша ни кенешлы Тазьы шуиз Алнаш ёрос советлэн тӧроез, Кун Кенешлэн депутатэз Нина Образцова, Национальной собранилэн кылем арня пумын ортчем заседанияз вераськыкуз. Сыӵе дунъет сётӥз со Россиысь Кун Думае депутатэ кандидат ӵектонэн герӟаськем ужпумез эскеронлы. Одӥгез пумит луиз, одӥгез мылкыдзэ возьматыны ӧз дӥсьты, кылемъёсыз лыктэмъёс огкылысь дурбасьтӥзы Светлана Смирновалы. Залын поръяз ог-огдэ валаны тыршон мылкыд. "Удмурт кенеш", зэм но, возьматӥз будэмзэ, югдурез валаны быгатэмзэ. Пичи кенешлэн ужаменыз тодматон вылысь, ми дэмласьком отын вераськем куд-ог эшъёсмылэсь малпанъёссэс газет бамын паськытгес сётыны. - Валентин Тубылов: - Кун Думае депутат быръён котырын югдур нуналмысь ӟырда. Пумен тодмо луо мандат понна нюръяськыны турттӥсьёслэн нимъёссы. 28-тӥ Ижевск округъя сыӵеослэн лыдзы даслэсь ятыр ни. Юрий Маслюков, Андрей Солуянов, Сергей Беркутов, Ольга Гурина но мукет тодмо адямиос сяна, татын ик кужымзэс мерталозы трос выль муртъёс. 29-тӥ Удмурт округын но мандат басьтыны капчи уз луы. Куд-ог эшъёс ӵекто чугун сюрес отделенилэсь кивалтӥсьсэ Климентий Роговецез. ФСБ-лэн Сарапул отделениысьтыз Шаньгин эш ачиз ассэ дэмла. "Буммаш" АО-ын ужасьёслэн но кандидатъёссы вань. Глазовъёс но нимаз адямиен пото кадь. Кун Думалэн али депутатэз Михаил Кошкин но одно ик пыриськоз нюръяськонэ. Со луэ Аграрной партилэн членэз. Туннэ асьмелы уно дано эшъёсмы пӧлысь быръёно огзэ, кин быгатысал мылкыдъёсмес огазеяны, калыкмылэсь кулэяськонъёссэ странамылэн парламентаз утьыны. Вячеслав Михайлов: - Мон малпасько, Думаын ужаны дась адямиос пӧлысь тужгес тупасез - Павел Вершинин. Опытэз бадӟым, трос тодэ. Солэн выросъёсыз ик азьветлӥсьлы укшало: кыдёкысен шӧдӥське, солэн лулпуш кужымез туж юн шуыса. Роза Яшина: - Валентин Тубылов - туж гажамон адями. Быгатысал Кун Думаын ужаны. Арлыдыз ке шат?.. Мон дэмласько Алексей Красильниковлэсь кандидатуразэ. Йӧно, визьмо адями. Зэмос интеллигент. Вить кылэз тодэ. Парламентамы кыкетӥзэ быръемын ни. Ойдолэ со пумысен кенешом. Леонид Загребин: - Котькуд калыклэн вань азьветлӥсез. Асьмелэн лидермы - Валентин Тубылов. Сое ик дэмлано депутатэ кандидатэ. Котыр ласянь тупамон ук со. Владимир Савельев: - Одно ик лыдэ басьтоно азьло опытмес. Асьмеос уно пол янгышаллям ни ук, куке одӥг округе кӧня ке дано эшъёсмес ваче пуктылӥм. Кулэ шат со? Ӟеч удмуртъёс ичи ӧвӧл, но туннэ дугдоно огез вылэ. Мон малпасько сыӵе мурт луэ Светлана Смирнова, син азьын ӝужась нылкышно. Анатолий Игнатьев: - Ужаськом Крыловлэн тодмо мадёсаз кадь: кин кытчы валтэ. Ӵемысь ог-огмылы люкетӥськом, юромо пыдмес пуктӥськом. Учке ай, кин вылэ ужазы тулыс вылтӥ тодмо артистъёсмы. Нош "Шунды"? Пытсано та огазеяськонэз... Мон дэмласько Анатолий Ешкеевлэсь кандидатуразэ эскерыны. Пётр Чернов: - Ойдолэ кылдэм югдур шоры сазь синмын учком. Павел Николаевич кандидат луиз ке, солы пумит ужалозы "Отечество" но коммунистъёс. Озьы ик луозы соос Валентин Тубылов ласянь но. Мон соглаш Светлана Смирнова пумысен ӵектонэн. Асьме пӧлын со туннэ одӥгез юн гажаноез егит адями. Депутат кариськыны луонлыкез вань. Павел Вершинин: - "Италмас" поэмаын вань таӵе кылъёс: Яратон, яратон, Малы меда сыӵе тон? Оло тон шумпотон, Оло тон куректон... Улонын кылдылэ сыӵе вакыт, куке адямилэн дунне шоры учконэз чылкак воштӥське. Мон аслым сюрес пусйи. Югдур секыт. Мыным со тодэ вайытэ Куӟебай Гердлэсь ужан дырзэ. Соку но обществоын шӧдӥськзы калыклэсь ӝужась асваланзэ зӥбыны турттон мылкыдъёс. Умойтэм маке со. Али кулэ ӧвӧл утчаськыны, кин кинэ вузаз, кин кинлы дурбасьтӥз. Куд-огез тырше нация пушкын валамтэосты муромытын, уго сыӵе дыръя луэ мукет ужъёсын вырыны. Та вакытэ ваньмылы асьмелы вуноноез сярысь малпаськоно. Одно ик огазеяськоно. Бен, секыт ужпум. Но со туж кулэ. Асьмелы выль поколение будэтоно. Бӧрсямы лыктӥсьёс куспазы тупаса мед улозы. Общество ачиз шӧдыны кулэ, мукет сямен улыны дыр вуэмын шуыса. Шедьтоно огъя национальной идея. Солэн инъетэз, мон сямен, луыны кулэ Удмуртиын улӥсь вань калыкъёслэн лулпуш узырлыксы вылын. Асьмелы юнгес ужано пиналъёсын. Кылдытоно соосты дышетон учреждениос. Удмуртъёслэн азьло чакламтэ ӧтчамзы бере ик мон кутски та уж борды. Училищеосын, гимназиосын усьтэмын гуртысь нылпиослы интернат планъёс. Кӧня ке дано мурт отын дышетске ни. Пиналъёс ас мылкыд каремзыя дышето удмурт кылэз. Пӧлазы вань мукет выжыысь потэмъёс но. Та нуналъёсы вырисько инбам улын музей азьын сылӥсь ужпумъёсын. Пумен юнгес валасько, асьмеос историмес туж ляб тодӥськом на шуыса. Та ласянь но маке малпано. Асьмемыз азьланьын но ваче вуттыны тыршозы. Котькыӵе ужын мед луом, мон ваньзэ лэсьто, адямиосты огазеян понна. Апреле луэм учыр синъёсме паськытгес усьтӥз. Депутатэ кандидат луон пумысен ӵектонъёс трос вал. Тани толон гинэ но Москваысь жингынртӥзы на. Мон меӵак верасько: Кун Думае уг мынӥськы. Ӟеч кылъёсты, ӵектонъёсты понна тау карисько. Светлана Смирнова: - Туннэ мон понна секыт нунал. Ваньмызлы, кин поттылӥз нимтулме, йыбырттӥсько. Вылӥ дунъет сётӥды мыным. Кандидат луыны мон али дась. Сыӵе решение нунал куспын ӧз вуы. Кема малпаськи, трос эшъёсын кенеши. Пумиськи Павел Николаевичен но. Мылкыдзэ азьлогес ик тодӥ. Со депутатэ мынысал ке, туннэ мынам фамилие ӧй но потысал, мон ачим но солы пумит ӧй султысал. Вершининлэсь быгатонлыксэ асьмеос ваньмы адӟиськом. Та дырозь монэным юрттэт ӵектыса вераськизы ни "Отечество", коммунистъёс, инвалидъёслэн обществозы. Валамон мед луоз шуыса верало "Отечество - Вся Россия" быръён блокын кылдэм югдурез. Та огазеяськонлэн Удмуртиысь ёзэзлэн кенешаз кандидатураосты эскерыку, решение кутэмын вал монэ ӵектыны. Москваысь "Отечество" но мыным дурбасьтӥз. Нош куке люкаськизы быдэс блоклэн ыстэм муртъёсыз, Аграрной партия ( со но пыре отчы) потӥз Михаил Кошкинлэн фамилиеныз. Озьы луиз бере, мон быръёнэ потыны малпай бырйисьёслэн нимынызы. Эшъёсы но таӵе малпанэз шонерен лыдъязы. Шонер луысал, удмурт калык нырысьёсыз пӧлын дурбасьтысал ке. Уго тонэ ас калыкед уг вала ке, кандидат ик луыны кулэез ӧвӧл. Уго Кун Думалэн депутатэз парламентын утьыны кулэ ас выжыысьтыз адямиослэсь кулэяськонъёссэс. Тӥ туннэ сётӥды ке мон понна куара куарадэс, мон уката заолгес ужаны быгато асьме калык понна. Люкаськемъёс пӧлысь уноеныз кема аръёс ӵоже тодмо ни. Будӥ огшоры удмурт семьяын. Ваньзэ, ма лэсьтэмын, ачим лэсьтыны тырши. Наукаосъя кандидат но ас киыным-йырыным ужаса луи. Валасько, депутат луыны быгатӥсь адямиос ичи ӧвӧл. Котькудӥзлэн аслаз ӟеч палъёсыз, аслаз тырмымтэосыз. Одӥг мурт ваньмызлы кельшыны уг быгаты, вылды. Но котьку тыршоно, дыр, ог-огдэ валаны, ог-огедлы юрттыны. Мон быдэсак соглаш Павел Николаевичлэн веранэныз. Огазе ӧм кариське ке асьмеос, удмуртъёс, ӟечсэ ум адӟе. Дугдоно ни ог-огенымы керетэмысь. Тани куд-ог удмуртъёс удмуртъёсты газет пыр дэриен погмало, олокызьы но ултӥяны выро. Сыӵе гожъямъёсты лыдӟыса, мукетъёсыз шумпото: вот та удмуртъёс куспазы ожмасько, ойдо мед вырозы... Асьмемыз палэнысь нокин уг зӥбы. Асьмеос асьмемыз быдтӥськом. Валано ни тае. Монэ но весь пыкылыны выро, Волковлэн адямиез луисько шуыса. Ӵок. Но ойдолэ учком югдурез мукет ласянь. Я, ӧй мынысал мон солы воштӥсе. Музон эшъёс но кивалтонлэсь палэнскысалзы. Кин понна соку кылдэм югдур пайдаёгес луысал? Удмурт калык понна? Ӧйтӧд. Мон тазьы шуисько: власть законъя быръемын, соин огкыл шедьтыны тыршоно, вань луонлыкъёсты уже кутоно. Бен, Александр Волков монэ адӟиз, уртче ужаны ӵектӥз, кизэ мычиз. Со понна табере мон курадӟыны кулэ шат? Асьмелы одӥг мыжыке кариськыса ужано. Кулэезъя пыкыло ке, мон шонер валаны тыршисько, верамъёсты лыдэ басьтӥсько. Мукет ласянь учконо ке, тани ӝыны ар ужасько Кун Кенешын. Но малы ке но "Удмурт кенеш" огпол но ӧз лыкты на, ойдо ӵош кыӵе ке ужез быдэстом шуыса. Мон оскисько: азьланьын асьмеос ӵош луом. Нина Образцова: - Туннэ мон дорам ӟеч мылкыдын берто. Асьмеос ог-огмылы но, мукетъёсызлы но возьматӥм, кулэ дыръяз огкылысь луыны быгатӥськом шуыса. Тазьы ужан котькудмылы кельшоз. Быръён сярысь верано ке, ойдолэ табере дэмен кариськыса юрттом Светлана Константиновналы депутат луыны. Уго со вылӥе тубиз ке, сьӧраз мукетъёссэ ӝутоз. Ачим ортчи быръён пыр, тодӥсько, макем со шуг но керӟег уж. Малпасько, "Удмурт кенешлэн" кивалтӥсьёсыз пумиськыны кулэ артистъёсын, писательёсын, огъя интеллигенциен. Соос но огъя кыткетэ мед пыриськозы. Ӵош луим ке, вормом. И. ЛЕБЕДЕВ. КУН КЕНЕШ ИВОРТЭ Кылем пятницае Удмурт Республикаысь Кун Кенешлэн Тӧроез Александр Волков Селта ёросын ужаз. Ӵукна Селтаысь ёрос культура юртэ гурт удысын но сиён-юон поттонын ужасьёс люкаськизы. Кун Кенешлэн Тӧроез соосты профессиональной праздникенызы ӟечкылаз. Ӟечен пусйиз Селтаысь пудо утисьёсты. Соос пудо уллёзэс ӧз кулэстэ, со сяна, ялан тросгес йӧл кыско, продукцизылэн ӟечлыкез будэ. Александр Волков оскытӥз, республикаысь мукет ёросъёсын ӵош, Селта ёрос но Кун Кенешлэн но Правительстволэн син шоразы улоз. Ӵапак та кивалтон ёзъёслэн сюлмаськеменызы, ёросын ӝегатэм уждун сётыны кутскемын, хозяйствоослы эстӥськон дыраз висъяське. Гурт удысын тужгес сюлмо тыршисьёсты Александр Волков Кун Кенешлэн Данъян грамотаосыныз но дуно кузьымъёсын пусйиз. Люкаськемъёсты праздникен озьы ик ӟечкылазы лэсьтӥськонъя, архитектурая но улон инты политикая министр Валерий Загайнов, Селтаысь Депутатъёслэн ёрос кенешсылэн тӧроез Михаил Вязников, ёрос администрацилэн кивалтӥсез Николай Останин. Сӥё-дано кенешонэз йылпумъяз республикаысь калык артисткалэн Валентина Пудовалэн концертэз. Бӧрысь Александр Волков "Ижлён-1" ТОО-ын кылдэм югдурен тодматскиз. Экономика удысын тодметъёсызъя предприятиез бере кылисьёс пӧлы пыртыны уг луы. Отын 213 мурт ужа, шоро-куспо уждун 1 сюрс манетлэсь трос люкаське. Завод продукция поттонзэ ялан паськытатэ, вуоно арын кык пол золгес ужаны чакла. Ваньзэ тае пусйыса, Александр Волков "Ижлён-1" ТОО-лэн директорезлы но шаерысьтымы мукет заводъёслэн кивалтӥсьёссылы ӵектӥз азьлане учкыса ужаны. Туннэ етӥнлэсь пакля, гозы поттон гинэ ӧжыт ини. Берытсконо азьвыл Правительствоен кутэм "Етӥн" программа борды, сое улонэ пыӵатыны кутсконо. Картофка но йӧл бере етӥн тужгес пайдаё культураен лыдъяське. Республикаысь льнозаводъёслэсь ужзэс выльдоно, соос етӥн басмалы вылӥ ӟечлыкен сырьё поттыны мед кутскозы. Экология ласянь чылкытэсь, странаямы но, кунгож сьӧрын но вылӥ дунъям етӥн басмаос республикалэсь бюджетсэ тырмытыны юрттозы. Собере Кун Кенешлэн Тӧроез вуылӥз "Гигант" колхозэ. Ӵапак Александр Волковлэн кичӧлтэмезъя, хозяйстволэн центральной усадьбаяз чагыр эстӥськон кысконъя ужъёс мыно. Туннэ нуналозь 8 иськеме гумыос лэземын, дась ни котельной, со шунтоз колхоз контораез, гурт клубез, школаез но нылпи садэз. Александр Волков лэсьтӥськисьёсын, та ужен герӟаськем муртъёсын кенешон ортчытӥз. Татын газопроводэз лэсьтонъя но уже кутонъя ужрадъёс чакламын. Та нуналъёсы Селтаын юртсэ выльдэмез бере выльысь ужаны кутске Улон-вылонын юрттэт сётонъя центр. Калыклы улон-вылонын юрттэт сётонъя министерстволэн кичӧлтэмезъя кылдытэм та учреждение мылысь-кыдысь тырше пенсионеръёслы, ӧлексыослы, куанеръёслы юрттон удысын. Александр Волков центрлэсь юртсэ учкиз, отысь ужасьёсын тодматскиз, ёрос администрацилэн но Депутатъёслэн ёрос кенешсылэн кивалтӥсьёсыныз ӵош пусйиз центрлы юрттон амалъёс. Пусйымон ужрадлы пӧрмиз Сибирь трактлэсь - Казань-Малмыж-Пермь-Екатеринбург федеральной сюреслэсь - 12 километръем люкетсэ усьтон. Удмуртиетӥ та трассалэн 120 иськемез кыстӥське. Берло аръёсы 71 километрез тупатъямын. 12 иськемъем люкетэз выльдон азьын нимысьтыз тендерной торгъёс радъямын вал. Соос юрттӥзы республикалы 2,6 миллион манетсэ шыръяны но лэсьтӥськонэз вакчи дыр куспын вылӥ ӟечлыкен йылпумъяны. Ужъёслэсь бадӟым люкетсэс "Удмуртавтодор" быдэстӥз. Озьы ик сюресэз лэсьтонэ пыриськизы республикаысь му вӧй поттӥсьёс, Ижевскысь но Уваысь автотранспортной предприятиос. Трасса Удмуртилы шӧдскымон пайда ваёз: со 100 километрлы Москваозь сюресэз вакчиятэ, мултэс транспортлэсь Ижевскез, Можгаез, Воткинскез, Селтаез но Играез мозмытэ, уно гуртъёсты но кӧня ке райцентръёсты герӟа. Федеральной сюреслэсь выль люкетсэ усьтонлы сӥзем митинге пыриськизы Удмурт Республикаысь Кун Кенешлэн Тӧроез Александр Волков, Удмурт Республикаысь Правительстволэн Тӧроезлэн нырысетӥ воштӥсез Юрий Питкевич, лэсьтӥськонъя, архитектурая но улон инты политикая министр Валерий Загайнов, республикаысь ГИБДД- лэн кивалтӥсез Михаил Гончаров, "Удмуртавтодор" ГУП-лэн генеральной директорез Александр Соловьев, сюрес лэсьтӥсьёс, ёросысь калык. Александр Волков, Юрий Питкевич но Александр Соловьев сюрес лэсьтӥсьёсты быдӟым вормонэн ӟечкылазы но тужгес сюлмооссэ почёт грамотаосын но дуно кузьымъёсын пусйизы. х х х Понедельнике, 11-тӥ октябре, Кун Кенешлэн Тӧроез Александр Волков Играысь Депутатъёслэн ёрос кенешсылэн заседанияз пыриськиз. Люкаськемъёс азьын вераськыкуз, со вылӥ дунъяз Игра ёросысь интыын ас коже кивалтонъя ёзъёслэсь ужзэс. Ӵапак со ик туэ ёросысь ужаса улӥсьёслы шӧдскымон вормонъёс басьтыны юрттэ. Кылсярысь, Александр Волков пусйиз, Игра ёросысь бюджетэ, республикаен ӵошатыса, адямилы быдэ коньдон кык пол тросгес вуэ. Татын уждун дыраз тыриське, нылпи пособиос сётон ласянь но лэчыт ужпумъёс уг кылдыло, район азинске, туннэ гурт удысын продукция поттонъя со нырысетӥ интыын вамыштэ. Кун Кенешлэн Тӧроез Играысь депутатъёслы республикалэн вылӥ кивалтон ёзъёсызлэн азьланезлы чаклам ужпумъёссы сярысь ивортӥз. Со пусйиз, "Етӥн" программаез быдэстонъя пыр-поч ужано шуыса, но вераз республикаысь льнозаводъёслэн кивалтӥсьёсынызы кенешон ортчытыны дасяськон сярысь. Александр Волков малпамъя, та предприятиос куашкамысь дугдӥзы, табере соос ваньбур поттон удысын пайда поттыса ужаны кулэ. Александр Волков бадӟым саклык висъяз эстӥськонлы дунъёс будэмен странаын но республикаын кылдэм югдурлы. Федерацилэн Кенешаз но Россия Федерациысь Правительстволэн Тӧроез Владимир Путин дорын кенешонын Александр Волков юаны малпа: малы Россилэн кивалтӥсьёсыз няньлы но йӧллы дунъёслэсь будэмзэс уг чаклало но эстӥськон рынокын дунъёсты уг радъяло. Вуоно арын бюджетэ коньдон вуон ужпумъя Кун Кенешлэн Тӧроез шуиз: экономика но коньдон ласянь уно шуг-секытъёс шоры учкытэк, республика выль школаос, выль больницаос, улон юртъёс но сюресъёс, социально-культурной объектъёс лэсьтыны кулэ. Люкаськемъёслы со озьы ик ивортӥз, Россиысь Правительство Ижевскысь циркез выльдонъя решениез умоен лыдъяз шуыса. Росгосцирклэн правлениез цирклы выль юрт ӝутыны ӝынызэ коньдонэз висъяны дась. Александр Волков ёрос кенешлэн депутатъёсызлы вазиськиз, та ужын юрттыны курыса. Играысь ёрос кенешлэн депутатъёсыз ваньзы ик куаразэс сётӥзы циркез лэсьтон фондэ 1,5 миллион манет висъян понна. Со коньдон люкамын луоз туэ ар понна ёрос бюджетлэн доход люкетаз ватсаса коньдон пыртэм чотын. *** Удмурт Республикаысь Кун Кенешлэн Тӧроезлы Александр Волковлы Москвалэн мэрез Юрий Лужков телеграмма ыстӥз. Со ӟечкыла Удмурт Республикаысь гурт удысын но сиён-юон поттонын ужасьёсты профессиональной праздникенызы. "Асьмеос умой тодӥськом, - шуэмын телеграммаын, - Россилэн кужмыз, калыклэн тыро улэмез герӟаськемын агропромышленной комплексысь ужъёсын. Улосвылъёслэн кусыпъёссы дугдылытэк но пайдаё мед азинскозы, озьы адямиослэн улонзы умоялоз, государство юнмалоз". Юрий Лужков гуртын ужасьёслы, сиён-юон поттон удысын тыршисьёслы тазалык, ужазы азинсконъёс но шудо улон сӥзиз. Удмурт Республикаысь Кун Кенешлэн пресс-службааез. Кун Думае быръёнъёс азьын КУДПАЛА КОЖОНО БЫРЙИСЬЛЫ? Улон-вылон сюресъёсмы асьмеды олокытчы но вутто. Куддыр выжыкылын сямен абдраса сылӥськом, кудэтӥз вамыштыса ӟечгес луоз, кудысьтыз ас шуддэ шедьтод? Таӵе учыръёс ӵемгес пумиськыло, быръёнъёс матэктыку. Кинлы оскыса ас куарадэ сётоно, кинэ бадӟым тӧро кароно? Юанъёс пумтэм-йылтэм. Куд-огез сэрттыны-пертчыны луонтэм. Азьвыл аръёсы трос сюлмаськоно ӧз луылы. Одӥг коммунистъёслэн гинэ валтӥсь партизы вал, быръён бюллетеньын но - одӥг гинэ нимтул. Кинэ ӵекто, сое ик кельты. Ас мылкыд карондэ вераны, ӵектыны лэземын ӧй вал. Табере партиослэсь нимзэс вераны, лыдзэс чотаны но шугъяськоно ни. Но умой: ас мылкыд каремдэ, лул-сюлэмедлы кельшисьсэ, оскымонзэ бырйыны луонлыкмы вань. Озьы ке но, выль нимтулъёс витьымтэ-возьмамтэ шорысь уз кылдэ, политикалэн инвисаз но шуак яркыт кизили уз ӝуатскы. Асьмелы нош ик йыртышмес кормаса "тодмо ымныр-тусбуйёсты" ик бырйыны тупалоз. Соин ик асьмеос юн малпаськыны кулэ. Кудпала вамыштоно? Кышкыт музъем зурканъёс кадь асьмеды дугдылытэк куалекъято ни ож тылӝу алятскем интыос. Нырысь-валысь вал Афганистан, бӧрысь - Чечня... Табере нош ик кирень синвузэс кисьто шудтэм анайёс Дагестанын бырем, сӧсырмем пиоссы понна. Улон-вылон ӟеч пала воштӥськыны ик уг малпа кадь. Сиён-юон, дӥськут дунъёс маял вылын сямен ӝутско. Инкуазь узырлыкен тырмытэм Россия тэльмырыса улэ электрокужымлы, газлы, машина- трактор эстӥськонлы... Ужасьёс толэзь-аръёсын уждун басьтытэк тыршо. Правительствомы таӵе югдурлы дышемын ни. Солы пӧсь но, кезьыт но уг йӧты ужась калыклэн митинге, забастовкае ӝутскемез яке голодовка ялэмез. Трос пиналъёс школае ветлыны гинэ но уг быгато. Я дӥськутлы, я книга, дышетскон котыръёслы ёрмо. Дунтэк эмъяськон, тазалыктэ кыдатон сярысь малпаны ик эн дӥсьты. Конституциын гожтэмын ке но, со сярысь кивалтӥсьёс кемалась вунэтӥзы ни. Туала дыре воксё вунэтэмын культура. Ужась калык уг быгаты газет-журналъёслы гожтӥськыны, выль книгаос басьтыны. Ог дасо арлэсь азьло гинэ Россия лыдъяське на вал дуннеысь самой лыдӟиськись кунэн! Эсьмаса, гурт клубъёсын кинофильмъёс возьматэмысь гинэ но дугдӥзы ни. Ярам ай, пенсионеръёслы сентябрь толэзь понна дыраз коньдон сётъязы. Быръёнъёс матэктэмысь чеберъяськон гинэ ӧвӧл меда та? Арлыдоос уго быръёнъёсы одно пыриськыло, озьыен, трос "куараос" сётыны быгатозы. Таӵеез но нырысетӥез гинэ ӧвӧл ни ук. Кивалтӥсьёс чик ӵыжектытэк, синзэс но кырмыштытэк эрекчаны дӥсьто. Таӵе йырпоромымон, секыт улон дыре ик газет-журналъёс, телевидение дугдылытэк мадё миллиардъёсын Западэ кӧчем-выжем долларъёс сярысь. Поттыло тодмо кивалтӥсьёслэсь, политикъёслэсь нимъёссэс но. Кудъёсыз узырмизы, берло аръёсы кун узырлыкез - нефть, газ, нюлэс - вузаса, 300-500 миллион доллар капыртыны вутскизы. Асьмеды "пилиськем тусь" вӧзы кельтӥзы "приватизация" нимаськись компания дыре но. Киямы ваучер кагаз юдэс кутытӥзы но эрекчазы. Нош та ваньмыз азинтӥське но лэсьтӥське ук туала депутатъёс кивалтон дыре. Соос асьмеды выльысь оскытыны выро: "Куарадэс сётэ мон понна! Мон сюлмасько тӥ сярысь. Ваньмыз умой луоз". Паймытэ но сюлэмшугъяськытэ мукетыз: ма люкетӥз соослы та берло аръёсы бырйисьёслэсь осконзэс быдэстон понна, калыклэсь улон-вылонзэ умоятон понна? Асьме кунын кузёяське ни кунгож сьӧрысь валюта - американской доллар. Огшоры ужасьёслэн солэсь туссэ адӟемез, кияз кутылэмез но ӧвӧл. Эсьмаса, "уксё" нимам, дунтэмам кагаз бумагаосты гинэ но асьмелы дыраз уг сётъяло. Куашкамын экономика. Сое тупатъян-радъян сярысь нокинлэн тодаз ӧвӧл кадь. Тросэзлэн депутат кариськыса Думаысь небыт креслое интыяськемзы гинэ потэ. Соку уго солы бусьтыр луоз: коньдон ласянь, улон инты ласянь но. Исаны уз дӥсьтэ суд, прокуратураын ужасьёс. Завод-фабрикаосын югдур урод ке но, гурт хозхяйство воксё пыдйылчие кельтэмын. Ас сюдӥсь-вордӥсез сярысь нокин уг сюлмаськы, уг юртты. Туннэ гуртъёсын куамын миллион пала калык улэ. Нош гурт калык котьку но политикалэсь палэнскыса улӥз. Вунэтоно ӧвӧл, дыр, самой тунсыко, сюлэмшугъяськытӥсь юан сярысь но. "Кин-о бен крестьян калык понна сюлмаськоз, дурбасьтоз, кулэ законъёс (катъёс) кутоз? Ма кароно, Россилэн парламаентаз музъем ужысь депутатъёслэсь лыдзэс будэтон понна?" Нялтаса созэ но пусъё: Россилэн парламентаз крестьян пала "кырӟась" 16 сяна депутатъёс кылемын ӧвӧл. Нош Удмурт Республикалэн Кун Кенешаз алигес ортчем быръёнъёс бере, соос ӧжыт луэмен, нимаз фракция кылдытыны но ӧз быгатэ. Кин сьӧры вамыштоз гуртысь калык, кинлы оскыса ас куаразэ сётоз? Тросэз ас мылкыдзэс верало коммунистъёсын огкылысь луэмзэс (таиз арлыдо адямиос, шуом), мукетыз дурбасьтэ Аграрной партилэн ӵектонъёсызлы. Паймытэ мукетыз но: гурт ужасьёслэн та кык оскымон партиослэн кивалтӥсьёссы ваче керетыса, пуныен коӵыш музэн кариськыса уло. Калык керетон-ченгешонлэсь котьку кышкаса-курдаса, вӧзысьтыз палэнскыны турттыса улэ уго. Таӵе дыре, кӧберась калык уз сёты-а ас куаразэ Жириновский кадьёслэн партизылы? Быръёнъёслы трос коньдон кулэ. Нюръясько ваче пумит трос коньдоно но эшшо но узыргес адямиос, партиос. Туэ кутэмын быръёнъёс сярысь выль закон. Соя котькудӥз кандидат ас бырйисьёсызлы ивортыны кулэ ас люкам ваньбурез, узырлыкез, суд улэ кыстӥськемез сярысь. Учком ни, быдэстозы меда та куронъёсты калыклэн "слугаосыз". Асьмеос али, быръёнъёс нимаськись сюресэтӥ вамышъяса, огдырлы сюрес воже дугдэмын. Малпаськыны кулэ. Дыр но кема кылемын ӧвӧл ни. Одно ик кык кожон сюрес вылысь огзэ быръёно. Та сярысь валэктыса, "Удмурт дунне" но ас лыдӟисьёссэ мед тодматоз, валэктоз вылэм. Ас анай кылыныд мытэм вераськон, ӟучез сярысь, котьку но йырвизьме ӟечгес пыӵа. Ас малпанъёссэс мед шараялозы лыдӟисьёс но. Куддыр ваче ченгешонын но зэмлыкез шедьтыны луэ. Николай Турин. Кылзэ вералоз калык Чурыт эстӥськонэн ужась ракета двигательёсты Воткинск палъёсын быдтон пумысен вераськонъёс кемалась мыно ни. Соин валче ортчытэмын уно семинаръёс, кенешонъёс. Ма кароно со двигательёсын? Быдтоно-а, кельтоно-а? Яке мукет интые выжтоно? Ӵапак со сярысь вераськонъёс толон кутскизы Воткинскын. Ракетаосты быдтон амалэнызы нырысь ик тодматӥзы США-ысь "Локхид Мартин" фирмаысь специалистъёс, Россиысь тодосчиос, Воткинскысь машиностроительной заводын ужасьёс, котырысь инкуазез утёнъя "Россиысь Вож Кирос" организациысь адямиос. Пумиськон нырыс ик радъямын та ужпумен вань калыкез тодматон понна. Озьыен, берпуметӥ кылзэс вералозы асьсэос адямиос. Б. НИКИТИН. Крестьян рынокысь репортаж ЛЫКТЭМЪЯ ЛЫКТЭМЕД ПОТОЗ Завьялово район, Пирогово гурт. Ӵапак таӵе адресэз алигес гинэ усьтӥськем крестьян базарлэн. Со пуксемын Ижевскен артэ, 11 номеро автобуслэн мынон-ветлон сюресэз пумын. Татӥ ик ортче Ижевскез Казанен герӟась тракт. 9 час ӵукна. Вузаськонлэн- басьяськонлэн самой пӧсь вакытэз. Сюлмоосызгес пумитамы шедизы ни кин скалэн, кин ошен-ветылэн. Дуно вуззэс гурт палазы кык-куинь кузя улляло. Басьяськисьёс - ваньмыз сямен бигеръёс, Ленин районын улӥсьёс. Вузаськисьёс - удмуртъёс, матысь гуртъёсысь вуэмъёс но пургапалъёс. Соос лыктэмын асьсэ пудоен. Басьтӥсьлы дэмлало гужем ӵоже куайытэм ошпиоссэс но кунянъёссэс, трос гинэ парсьпиен, ӵӧжен-ӟазеген вузкарисез. Вань кеч но, курег но дэмласез. Огъя вераса, выль базар сокем бадӟым ӧвӧл ке но, кутскон солы сётэмын ни. Вераськиськом рыноке лыктэмъёсын. Кыӵе соослэн мылкыдзы? - Ми - Кечолысь, Пичи Пурга районысь. Кунянмылы 3 сюрс куриськом. - Ми - Аксакысь. Ошпимы понна сыӵе ик дун шуиськом. - Юасьёс вань-а? - Вань, но туннэ калыкез ӧжытгес, поминка нунал кемлаз уга. - Выль базар тӥледлы кельше-а? - Татар-базарен ӵошатыса, сокем уг. Интыезлы дышыны кулэ, дыр. - Нош тӥ кытысь вуиды? - вазиськисько парсьпиен вузаськись кузпалъёслы. - Веньялась. Милемлы туж яра рынокез матэ пуктэмзы. Кылем субботае басьяськисез трос вал. Куазь чебер, кинлы ма кулэ - бырйы. Пудо тырмыт. 4-5 арняем парсьпилы куро 200-230 манет, кызьы шуо, вузэзъя дУныз но. Вань 150-эн- 180-эн но сётӥсез. Басьтӥсь "мертаське" ас кисыезъя, луонлыкезъя. Арлыдо бигер кузпалъёс кема гинэ бергало ни ветыл котыртӥ. - Скал басьтыны малпаськом вал, коньдонмы уггес тырмы, - шуэ бабай. - Йӧл ялан дуноя. Асьмеос ке вордӥм, сюлмаськонэз семьямы вылэ усёз, со понна кӧттыро улом- вылом. - Таиз рынок ярамон-а кадь городын улӥсьёс понна? - Ветлонэз кыдёкын. Мыныса-мыныса жадёно. Тӥни маиз уг кельшы. Татар-базарын, конечно, умой вал. Отын пудоен но, турын-куроен но вузкаризы. Татын вузэз ӧжыт на. Собере, туж секыт транспорт ласянь. 11-тӥ автобус пырак базарозь мед ветлоз вылэм, сотэк калык татчы уз лыктЫ. Скал соос басьтӥзы ик, 8 сюрсэн. Озьыен, выль базарысь дунъям вуззы семьязэс йӧлын-вӧйын возёз ни. Син шоры йӧтӥзы вальк-вальк куайытэм бадӟым пелё парсьпиос. Тодматскиськом соослэн кузёенызы. - Улӥсько Юськиын, ужасько та рыноклэн директорезлэн воштӥсез луыса - Косарев Виталий Федорович. Нош тӥ "Удмурт дуннеысь"-а? Озьы бере, тӥледыз татын возьмало ни: оскиськом, газет пыр тросгес калык ми сярысь тодоз шуыса. Виталий Федорович ӧз чида вератэк азьланезлы малпанъёссы сярысь но: - Таяз арня вискын навесэз липыса быдтом, соин артэ шуныт павильон пуксёз. Татчы пудо гинэ уз вае ук, тысь но, картофка но, турын-куро но, бакча сиён но вуттозы. Рыноклэн проектэз туж умой малпамын. Интыез - ӟеч, вӧзтӥмы ик бадӟым сюрес ортче. Мон сямен, гурт калык шумпотыса дорамы лыктоз ай. Пургаысен кутскыса, Веньяозь татчы кыстӥськозы. Тау карозы выль базар усьтӥсьёслы. Табере вералом ини: крестьян рыноклы кутскон сётӥзы Анас Султанович но Фарид Анасович Валитовъёс, соослэн "АиФ" огазеяськонзы, ТОО "Ижевское" но Завьялово районлэн администрациез. Рыноклы директоре юнматӥзы Ленин районлы но Ижевск городы тодмо адямиез - Роман Александрович Гариповез. Талэсь азьло со ужаз правоез утёнъя удысын, майор. Дисциплинаен эшъяськемез но сое гажамез шӧдӥське котькуд вамышаз. Туж провор, чупрес сямо воргорон. Ӵапак сыӵеос сярысь шуо, дыр: пыд улаз музъем ӟырда. Котыр ласянь визьмо, шаплы. Тодон-валан люказ Ижевскын но, Москваын но. Малпа на эшшо одӥг вылӥ образование басьтыны - экномической. Ӟеч тодэ политикаез, "шӧмъяз" сое Кун Кенеше депутатэ кандидатэ мыныкуз. Таиз сярысь - нимысьтыз вераськон. Газетмес лыдӟисьёс Гариповен азьланяз но пумиськылозы на шуыса оскон вань. Нош али бергалом рынок бордын. Кыӵеен сое адӟе ачиз кузё? - Урал улосвыл милям проектмылы тупасез вань Самараын гинэ. Но отын сюро таза пудоен уг вузкаро. Озьыен, Ижевскен артэ пуктэмез самой ӟечез луыны кулэ. Дорамы мед лыктозы Башкириысь, Татариысь, Киров, Пермь областьёсысь крестьянъёс но ужбергатӥсьёс - инты ваньмызлы тырмоз. Та буш кыллись вырйылъёсты пӧрмытом картофка, бакча сиён возён гуослы, пуктом шуныт павильон, гостиница, столовой, аптека, вузкарон ларекъёс, складъёс. Ваньмыз со 3-4 ар куспын быдэстэмын луоз. Гуртысь вуэм мурт мед аслэсьтыз но вуззэ вузаны быгатоз, мар хозяйствояз кулэ - сое но мед басьтоз. Крестьян рынок шуыса нимаськом бере, татын, кортӵогысен кутскыса, котьмае шедьтыны медло, туж кулэ луись эмъюмез но. Ми чакламъя, рынок экономикая кусыпъёсты но юнматыны, паськытатыны юрттоз. Татын ортчылозы племенной пудо возись хозяйствоослэн выставкаоссы, музъем ужасьёслэн ярмаркаоссы. Нош кыӵе ярмарка ортче кырӟантэк-эктонтэк! Огъя вераса, азьланезлы малпанъёсмы туж бадӟымесь. Туннэ нуналлы та кутскем ужмес быдэстонэ Правительстволэсь одӥг манет но уксё ӧм куре на, ӧм вазиськылэ на Кун Кенеше но. Матысь дыре сыӵе пумиськонъёс одно ик луозы, дыр. Ми туж оскиськом, Александр Александрович Волков но, Николай Алексеевич Ганза но Крестьян рыноклэсь республикалэн, Ижевсклэн улон-вылоназ кулэлыксэ валалозы шуыса. Одӥг ласянь, городысь базаръёс пудолэсь, кырсь-курлэсь мозмозы, мукет ласянь, гурт калык быдэс город пыртӥ пыроно-потоно уз луы ни. Нош рынок сюдоз-вордоз столицамес но, матысь районъёсты но дорамы будэтэм-поттэм продукциен. Ӟеч юрттэт со луоз ужбергатон удыслы. Таӵеен адӟе тэтэ карыны вырись пиналэзлэсь азьпал улонзэ солэн директорез Р.А.Гарипов. Мынон-ветлон транспорт сярысь ке верано, Крестьян рынокозь Казанский вокзал палась лыктыны луоз 21-тӥ атобусэн, солы дугдылон инты лэсьтӥське ни. Нош 11-тӥ маршрутэз базар дорозь "кузёмытоз" рыноклэн нимысьтыз автобусэз. Со ветлоз 15 минут ортчыса. Али кылдэм шуг-секытъёс - огдырлы гинэ: калык шуэмъя, Москва но огкутскемен ӧз ӝутскы ук. Крестьян рыноклэн нырысетӥ толэзяз ужамезлы йылпумъян лэсьтыса адске: дунъёс татын, Ижевскен ӵошатыса, 20-25 процентлы улӥынгес. Дунтэмгес картофка, колбаса, бакча сиёнъёс. Рынок усьтэмын нуналлы быдэ, понедельнике сяна. "Удмурт дунне" татысь дунъёсын тодматоз азьланяз но. Озьыен, Крестьян базарын пумиськытозь! Людмила Медведева, Владимир Беломорских (фото). Удмурт Республикаысь Кун Кенешлэн кыкетӥ ӧтчамаз депутатъёсты быръёнъя округъёс кылдытон схема юнматэмын Удмурт Республикалэн 1999-тӥ арын 28-тӥ январе кутэм 721-И номеро Законэн) Удмурт Республикаысь Кун Кенеше депутатъёсты ватсаса быръёнъя одӥг мандатэн быръёнъя округъёслэн гожъёссы Быръёнъя 18 номеро Студенческой округ (центрез - Ижевск город, 35 номеро школа, бырйисьёслэн лыдзы - 10.677). Округе пыро: 2-тӥ Подлесной ульчаысь 1б, 2, 4, 6, 8, 10, 12 номеро юртъёс; 3-тӥ Подлесной проездысь 1, 2, 3, 4, 6 номеро юртъёс; 3-тӥ Подлесной ульчаысь 1, 1 а, 2б, 4б, 6, 7, 9, 10, 11, 12, 14, 15, 15а, 16, 16а, 17, 17а, 17б, 18, 19, 19а, 20, 20а, 22, 22а, 29, 35, 37, 39 номеро юртъёс; Вормонлы 30 ар ульчаысь 14, 15а, 15б, 18, 19, 19а, 20, 20а, 21, 22, 23, 24, 24а, 25, 26, 26а, 28, 28а, 29 номеро юртъёс; 4-тӥ Подлесной проездысь 2а, 3 номеро юръёс; 4-тӥ Подлесной ульчаысь 3, 4, 04, 04а, 15а, 17а, 19, 21, 23, 23а, 254 номеро юртъёс; 5-тӥ Подлесной ульчаысь 1, 1а, 2, 2б, 2в, 3, 3а, 4, 5, 5а, 6, 7, 8, 9, 10, 11, 12, 13, 13а, 14, 16, 18, 20, 20а номеро юртъёс; 6-тӥ Подлесной ульчаысь 1, 01,1а, 02, 03, 3, 04, 05, 07, 08, 010, 15, 17, 19, 19а номеро юртъёс; 7-тӥ Подлесной ульчаысь 1, 3, 4, 6, 8, 9, 13, 15, 18, 20, 22, 26, 28 номеро юртъёс; 8-тӥ Подлесной ульчаысь 7-тӥ номеро юрт; металлистъёслэн ульчаысьтызы 4б, 8а, 32, 33, 34 номеро юртъёс; Милиционной ульчаысь 160, 162, 164, 165, 169, 171 номеро юртъёс; Нижний ульчаысь 39, 39а, 40, 42 номеро юртъёс; Песочной ульчаысь 4а, 4б, 6, 8, 10, 12, 14, 16, 20, 22 номеро юртъёс; Школьной ульчаысь 1, 3, 5, 7, 9, 11, 12а, 13, 15, 17, 19, 21, 23 номеро юртъёс. Быръёнъя 40 номеро Молодежной округ (центрез Ижевск город, 32 номеро школа, бырйисьёслэн лыдзы - 12149). Округе пыро: Вормонлы 40 ар ульчаысь 50, 52, 54, 56, 56а, 58, 62, 64, 66, 72 номеро юртъёс; Молодежной ульчаысь 2, 4, 8, 10, 12, 14, 16, 16а, 16б, 18, 22, 22а, 24, 24а, 34, 36, 38, 40, 42, 42а, 44, 46, 48, 50, 50а, 52, 54, 54а, 62, 66, 68, 68а, 70, 70а, 72, 72а, 86, 90, 90а, 92, 92а, 92б, 94, 98, 100, 56, 56а, 58, 60, 74, 74а, 76, 78, 80, 82, 91а, 93, 93а номеро юртъёс. Глазов ёросысь быръёнъя 71 номеро округ (центрез - Глазов город, ёрос администрацилэн юртэз, бырйисьёслэн лыдзы - 12.065) Округе пыро: Глазов ёросысь Адась Верхняя Богатырка, Гылёгурт, Дондыкар, Пӧжы, Качкашур, Кочишево, Курегово, Люм, Октябрьский, Парзи, Понино, Ураково, Чура сельсоветъёсысь гуртъёс. Селта ёросысь быръёнъя 93 номеро округ (центрез - селта черкогурт, ёрос адяминистрацилэн юртэз, бырйисьёслэн лыдзы - 12.147) Округе пыро: селта ёросысь вань гуртъёс но Ува ёросысь Выль Мултан, Поршур-Тукля, Удугучин сельсоветысь гуртъёс. Юкаменск ёросысь быръёнъя 98 номеро округ (центрез - Юкаменск черкогурт, ёрос администрацилэн юртэз бырйисьёслэн лыдзы - 11.097). Округе пыро: Юкаменск ёросысь вань гуртъёс; Яр ёросысь Вортца сельсоветысь Байдагурт, Дзякино гурт, Биграгурт посёлок, - Мосейгурт, 1128, 1129, 1130, 1135 километрысь юртъёс. Удмурт Республикаысь Кун Кенешлэн пресс-службаезлэн заявлениез Удмурт Республикаысь Кун Кенешлэн пресс-службаез "Центр" газетэз лыдӟисьёслы ивортэ, туэ 30-тӥ сентябре потэм 23-тӥ номерысь "Асьмелы Президент быръёзы" заметкаын иворъёс зэмесь ӧвӧл шуыса. 1994-тӥ арын 20-тӥ сентябре Удмурт Республикаысь Кун Кенешлэн Президиумез куд-ог ужпумъёсты эскериз. Соос пӧлын вал Удмурт Республикалэн Конституцияз ӵектэм воштонъёсты но ватсанъёсты дасянъя ужась группа кылдытон пумысен ужпум но. "Центр" газетлэн официальной пресс-релизэн тодматскыны Кун Кенешлэн Президиумезлэн членъёсыз вераськыны 10 нуналыз вал, но со уже кутӥз "СМИ-осы пыӵам информациез". Со "источниклэн" кыӵе луэмез сярысь вера заметкалэн пуштросэз: "Кун Кенешлэн берпуметӥ заседанияз Удмурт Республикалэн Конституцияз воштонъёс но пыртон сярысь ужпум эскеремын вал... соку парламентарийёс бырйисьёссылы оскымтэзэс возьматӥзы... Оло, парламентысь элита лыдъя, таӵе бадӟым ужын калыклэн мылкыдыз вылэ пыкъяськыны уг луы шуыса... Куспазы кенешыса, депутатъёс одӥг малпанэ вуизы, соос асьсэос пусъёзы, кинлы осконо та бадӟым постэз". Кун Кенешлэн пресс-службаез ивортэ, "Центр" газетын печатлам ивор зэмлыклы чик уг тупа шуыса. Кун Кенешлэн пресс-службаез правоез вань шуыны, публикацилэн авторез Сергей Лужин но редакцилэн кивалтӥсьёсыз но Удмурт Республикалэсь Валтӥсь Законзэ учкылӥллямтэ но, Удмурт Республикалэн туала Конституцияз воштонъёс но ватсанъёс пыртон радэн тодматскиллямтэ. Малпан кылдэ, С. Лужинлэн но газетлэн редакциезлэн тодэмзы но ӧз поты, Президиумлэн т заседанияз эскериськиз Удмурт Республикалэн Конституцияз воштонъёс но ватсанъёс пыртонъя ужась группае пырем муртъёс сярысь ужпум. Публикацилэн зэмос ужпумез - лыдӟисьёслэсь йырзэс сураны, алигес быръем Кун Кенешлы оскемысь дугдытыны. Таӵе ужпум туж осконтэм но кырсь, озьы ик быдэстыны луонтэм. Оскиськом, "Иворъёс вӧлмытӥсь ёзъёс сярысь" Законъя газетлэн редакциез янгышсэ тупатоз, республикаысь закон кылдытонъя вылӥ ёзлэн ужамез сярысь шонертэм иворъёс вӧлмытэмез понна лыдӟисьёс вожзэс медаз вае. Удмурт Республикаысь Кун Кенешлэн пресс-службаез. Мон тазьы малпасько Кужыммы - выжыямы М. Ивановалэн "Истоки удмуртского народа" но М. Гришкиналэн "Удмурты" книгаосынызы тодматскыса, мур малпаськонэ усиськод. Вуысалзы ке та книгаос котькуд удмурт семьяе, оло, асьме калык ӝоггес выль улонэ ӝутскысал. Мар со сыӵе Атыкай музъем? Азьло шуысалмы: со - СССР. Нош мон шуысал: Атай музъем - со вашкалаосмылэн музъемзы! Озьы со данъяськымон но оскымон чузъяське. Вашкалаосмылэн музъемзы - улон сётӥсь анай кадь. Со музъем вылын даурзэс ортчылӥзы асьме пересьёсмы, отын кылле соослэн лулзы. Адямиос кулон сярысь малпаськыкузы курылӥзы шӧйзэс вордскем палъёсазы вуттыны. А. Македонскийлэсь но Чингис-ханлэсь мугоръёссэс, данак музъемъёс пыр поттыса, вордскем палъёсазы вуттӥзы. Нош Тарас Шевченко гожъяз: "Кулӥ ке, ватэ монэ мусо Украинаям!" Пушкин, Лермонтов, Герцен озьы ик малпаськылӥзы, кулэмзы бере мумы-бубыосынызы артэ ас музъемзы вылын ватэмын мед луозы шуыса. Нош али кызьы луыса кошке? Ми ваньмы улӥськомы вашкалаосмылэн музъемзытэк, озьыен, Родинамес ыштыса. Христианствоез мукет калыкъёслы пыӵатыса, Иван Грозный пумозяз быдтыны малпаз исламлы оскись Казань ханствоез. 1552-тӥ арын Казанез басьтэмзы бере Иван Грозныйлэн войскоосыз удмуртъёслэсь музъемзэс (Ар ханство) киултӥзы. Казанен нюръяськон вить ар кыстӥськиз, Ар ханствоен - дас ар. Уг, уг поты вал вашкала удмуртъёслэн ас музъемзэс сётэмзы - юн нюръяськизы эриксы понна. Соку нокин ӧз лыдъя, кӧня улон интыос сутэмын, калык быдтэмын. Ар князьёслы ас музъемысьтызы кошконо луиз туала Финляндие, Эстоние, Венгрие - отын кылдытӥзы соос асьсэлэсь выль государствооссэс. Озьы ХВИ даурын быдтэмын вал удмурт калыклэн выжыез (генофондэз), выльысь со ӝутскыны кутскиз ХИХ даурлэн пумаз гинэ. Секыт вал адӟонэз мынам калыкелэн. Граждан ожын, 30-тӥ аръёсы но Быдӟым Отечественной ожын нош ик быдтэмын вал удмурт калыклэн тужгес но усто, визьмо нылъёсыз но пиосыз. 500 сюрс удмурт калык пӧлысь Быдӟым ож бере доразы бертӥз котькуд витетӥез гинэ. Пыд йылаз ӝутскыны калыкелэн кужымез ӧз ни тырмы. Соин ик ӟуч правительстволэн политикаез сое уката но лёганы, зӥбыны кутскиз. Удмурт луэмзылэсь возьдаськыса, адямиос пумен ватыны ӧдъязы удмуртлыксэс, паспорт басьтыкузы, ӟуч шуыса гожтӥськылӥзы. Дугдӥзы ас кылынызы вераськемысь, ӵакмиз удмурт культура. Асьмеды дышетылӥзы, удмуртъёс ас мылкыд каремзыя Ӟуч государствое пыризы шуыса. Удмуртъёслэсь музъемзэс кужмысь киултэм сярысь история уг вера. Озьы 450 ар талэсь азьло удмуртъёс ыштӥзы тӧрозэс (вождьзэс). Удмурт калыкен кивалтӥзы ӟуч эксэйёс, бӧрысь - Ленин но Сталин, собере эшшо кинъёс ке - ваньзэсты тодад ваёд шат. Устинов маршалэз но асьмемын кивалтонэ пуктылӥзы. Кытчы вуттэ сыӵе кивалтон, ӟучъёслы но тодмо - грузинлэн кивалтэмез улсын ӟучъёс но трос ыштонъёс адӟизы. Нош Римын та дырозь данъясько ас эксэйёсынызы - императоръёслэн памятникъёссы ялан сыло. Мукет нациос вашкала музъемъёссэс, пичиен-пичиен люкаса, асьсэлы государство кылдытыны быгатӥзы. Удмуртъёс - пумен ышто. Тодэ лыктэ 1993-тӥ ар. Удмуртилэн Вылӥ Кенешез решение кутӥз республикаямы президентлэсь постсэ юнматон но со пумысен калыкын юалляськон ортчытон сярысь. Паймытӥз удмурт фракциысь одӥг тодмо депутатлэн (нимзэ ум поттылэ ни) мылкыдыз: вуоно президентлы, пе, удмурт кылэз одно ик тодоно ӧвӧл. Ас калыкезлэсь юатэк, кызьы дӥсьтӥз со озьы вераны? 74 процентэз депутатъёс (тросэз ӟучъёс) соин соглаш луизы. Тӥни мар бордын удмурт калыклэн быронэз - со уг быгаты огазе кариськыса нюръяськыны. Калыклэсь висъяськысагес ужа "Удмурт кенеш" но. Соин ик, дыр, ӵектэм кандидатъёсыз Кун Кенеше но ортчыны уг быгато. Удмуртъёс уг тодо асьсэлэсь историзэс. М. Ивановалэн но М. Гришкиналэн книгаоссы та ласянь туж дуно луо. Удмурт нациез улӟытонын соос егитъёслы шонер сюрес возьмато кадь. Зэмзэ но, ми ум тодӥське, кызьы улӥзы удмуртъёс, шуом, 200 ар талэсь азьло, угось зӥбет улэ сюрем удмуртъёслэсь историзэс мур ватыса возизы, нокыӵе эскерон ужъёс ӧз мынэ. Нош кызьы вал партия кивалтон вакытэ? Вылӥ Кенеше быръён понна партилэн обкомез предприятиосын ужась удмуртъёс пӧлысь шедьтыны косылӥз ӟеч ужась, шор ёзо образованиен удмуртэз. Вуоно кандидатэз ӧз утчаллялэ удмурт интеллигентъёс но технической ужасьёс пӧлысь. Визьмо удмуртъёслэсь кышкаллязы, али но кышкало. Сыӵе амалэн Вылӥ Кенеше быръем удмуртъёслы бӧрысь сюрес пытсаськылӥз, вылӥ образованиез ӧвӧл шуылӥзы. 1963-тӥ арысен удмурт нылпиосты республикамылэн правительствоез вузъёсы дышетскыны келялляз. Дышетскем адямиос кивалтон удысъёсын ужаны кулэ вал кадь. Но чакламъя ӧз луы, угось кадръёсъя ужпумез партилэн обкомез быдэсъяз. Соин сэрен республикаен, районъёсын, предприятиосын но заводъёсын кивалтонэ удмуртъёс ӧз сюрылэ. Тӥни озьы предприятиосты выль кузёослы сётон вакытэ (приватизация дыръя) ваньмыз муртъёс кие сюриз. Удмурт Республикалы ним сётӥсь нация ваньбуртэк но властьтэк кылемын. Матэкто Кун Думае быръёнъёс. Кин утёз отын ичи лыдъем калыкъёслэсь интересъёссэс? Татарстанлэсь, Башкортостанлэсь, Удмуртилэсь, Якутилэсь, Чувашилэсь ужпумъёссэс ӟучъёс гинэ-а быдэсъялозы? Мон сямен, Кун Думаын кылдытоно ичи лыдъем калыкъёслэсь фракцизэс. Соку гинэ отчы пырем депутатъёс утьыны быгатозы асьме калыкъёслэсь интересъёссэс, узырлыксэс, музъемзэс. Мон сямен, Иже ни пуктоно удмурт калыклы сӥзем памятник, мед со возьматоз калыкмылэсь бышкаськись ез сьӧрысь потэмзэ, Казьын пуктэмын сыӵе памятник поэтсылы Муса Джалильлы. Удмуртъёслэн И съездзылы дасяськыку, "Удмуртская правда" газетын печатламын вал краеведлэн Е. Шумиловлэн статьяез, кытын со йыркурзэ вера, та съездлы 150 сюрс манет коньдон кошкоз шуыса. Азьвыл депутат обиде усем, малы, пе, солэсь ӧвӧл юаллям, ортчытоно-а, ӧвӧл-а удмуртъёслы асьсэлэсь съездзэс. Бен, Евгений Шумилов, удмурт калыклэн 426 ар талэсь азьло политической статусэз быдтэмын вал. Но таяз даурын 90- тӥ аръёсы удмурт калык сайканы кутскиз. Табере калыкмылэсь политика удысын лэсьтэм вамышъёссэ историысь уд ни ӵушы. Азьло аръёсы трос удмурт семьяос республикамылэн палэназ кошкылӥзы. Соосты выльысь берыктон сярысь ужпумез, оло, эскерыны кулэ. Куд-ог государствоос ас гражданъёссэс берыктон ласянь нимысьтыз ужрадъёс куто ук. Удмуртъёс но вордскем музъем вылазы улыны кулэ. Ми - ичи лыдъем нация, соин ик сое утён но огазе карон сярысь мур малпаськоно. Гуртын улӥсь егит пиосмес, оло, армие сётонлэсь но огдырлы (5-10 арлы) дугдытоно. Гуртъёсын тросгес мед кылдозы кужмо удмурт семьяос. Туала егитъёслэн, визьмо удмурт интеллигенцилэн азьло сямен улэмзы уг ни поты. В. КУДИН. ПравительствоынСтрахование удысын Страховать каронэз ӟечгес радъян вылысь, 1999-2000-тӥ аръёслы та удысын чакламын нимысьтыз концепция. Со юрттыны кулэ бюджетэз узырмытонлы, экономикаез юнматонлы, социальной удысысь югдурез умоятонлы. Страхование чотын ватсаса коньдон вуоз предприятиослэсь, организациослэсь, нимаз адямиослэсь. Та ужпумъя постановление кутэмын Правительстволэн президиумезлэн кенешаз. Промышленностьын Улон-вылнмы уродмемен, тросгес саклык висъямез кулэ каре калыкез шуге-леке шедемлэсь утён, ужан интыосты эскерыса-чакласа возён. Та ласянь Правительстволэн Президиумаз кутэмын нимысьтыз решение. Тужгес но бадӟым кышкытлык кылдытыны быгатӥсь промышленной предпритосын ортчозы ватсаса кутэм ужрадъёс. со понна кыл кутоз Правительстволэн Граждан обороная но кышкыт учыръёслэсь утиськонъя комитетэз. 1 декабрёзь та предприятиослэн списоксы дась луыны кулэ, сое юнматоз республикалэн Правительствоез. Му вӧй но музон нефтепродуктъёслэсь бервылзэс авария бере ӝогак утялтон вылысь, 15 тонна вещество басьтыны чакламын. Удмурт Республикаысь Правительстволэн пресс-службаез. Тылпуэз кысэ... нап бус Тылпуос пӧртэмесь луо, соосты кысон амалъёс но пӧртэмесь. Екатеринбургысь специалистъёс басьтӥськизы "горд атасэз" чылкак выль амалэн лапкатон установка кылдытон борды. Ву интые кутӥськыны кулэ.. нап бус. Сыӵе установкаез нимазы ГИРС (гидроимпульсной ранцевой система) шуыса. Отчы пыро 15 литр вуэн камера, пачкатэм омырен баллон, ыбылӥсь система, утиськон маска. Ыбыку порох газъёс вуэз сьӧразы нуо но сое нап буслы пӧрмыто. Механизмын 17 патрон, со воштӥське 2-3 секундскын. ГИРС-лэсь нырысетӥ партизэ поттыны оскизы Ижевскысь механической заводлы. Ньыль литръем пачкатэм омырлы баллонъёс но пызйись камераез дасязы 166-тӥ отделысь инженер-конструкторъёс В. С. Панкратов но С. Г. Корепанов. Ыбылӥсь механизмез дасян бордын ужаз 158-тӥ отделысь инженер-конструктор В. А. Илюхин. ГИРС-эз ужатыса эскеризы тылпулэсь утиськонъя научно-исследовательской институтын. Со конкурсын та выллем вить установка возьматӥзы. Асьмелэн вузмылы кыкетӥ инты сётэмын. Али 28-тӥ цехын дас установкаос дасямын. Азьпалан эскеронъёс. Ваньмыз ортчиз ке, "ыбылӥськись" вуэз завод тросэн поттыны кутскоз. А. ПЕРЕВОЩИКОВ. Азьтэм муртлэн ӵектонъёсыз Шимес зол кышкасько гудырилэсь. Огпол югак чилектэ, дымбыр-йыг! каре ке, ӝыны улонэ быре кадь. Огаз гужем нуналэ но куазь укыр шукыръяськиз. Ӝыны нунал сэргы ӝиптӥськыса пуки, нош укноосме пытсаны, сетьысь телевизорме кысыны тодам но ӧз лыкты. Розеткаын тачыр-тач! карем бере гинэ султӥ на. Но телевизоре доры вуытозям, диодэз кысӥз. Ӝуаз! Кнопказэ зӥбылӥ-зӥбылӥ, ӧз ӝуатскы ни. Гудыри ортчем бере куректонме вераны азбаре потӥ. Отын бускеле киосыныз сэзъяса ик, видеомагнитофонэз сярысь вера. Чильк! кариз но сутскиз, пе. Сыӵеос вить кузя люкаськиськеммы. - Озьы ик кулэ тӥледлы, азьтэменыды сыӵе телевизоръёс басьтӥськоды ке. Ӝуатыны но медам султэ - пульт медло, ӵукналы будильник но медам пуктэ - телевизор мед сайкатоз, ишь... Мынам "Рубинэ" тани дас ньыль ар ужа ни, - йӧнъяське шугадӟонэ шедьымтэ нылкышно. Одӥгез шаплыезгес бускельмы шуэ: - Арня ӵоже тупатозы, коньдонзэ "электросетьёс" тырозы, отчыозь "Рубинэз" учком. - Тырозы тыныд, шумпотод! - Кызьы уз тыре, соослэн янгышсыя ук: электроезъёс ошиськыса улӥзы, громоотвод ӧвӧл... Кык арня ортчыса, бускельмы, зэмзэ но, "Гарантысь" сётэм бумагаен сэзъяса ветлэ ни: - Телевизорме куинь сю манет тыр тупатӥ, коньдонзэ "Электросетьёс" берыктыны кулэ шуизы. Соберегес ик ми но "Гарантэ" вазиським. Кузпалэ нырысь-валысь частникез гинэ ӧтем вылэм, кык поллы ичигес дун басьтэ шуыса. Пумитъяськыны быгатӥ: со "сетьёсыдлэсь" изъян берыктэмзэс уд возьма, нош страховка, оло, сётозы (страховой компания нимаз ужбергатӥсен гожтэм справкаез уг басьты). "Гарант" аслэсьтыз нимзэ зэматэ. Ваньмыз йӧн-йӧн - асьсэос телевизормес нуизы, тупатӥзы, учкемзы-тупатэмзы сярысь акт, квитанция сётӥзы, "Электросетьёсы" вазиськыны ӵектӥзы. Инженер монэ урод ӧз пумита. Курондэс эскером шуиз. Но куинь арня ортчыса, гожтэт вуиз: "Тӥлесьтыд курондэс быдэстыны ум быгатӥське, та учыре милям нокыӵе янгышмы ӧвӧл - телевизорды ӝуамын гудыриен сэрен". Вакчияк вераса, Инмар янгыш. Бускельёсы но, мон но "электросетьёслэсь" номырзэс ӧм адӟе. Со понна ӟеч кыл вератэк уг быгатӥськы "АСКО" страховой компания сярысь - кӧня манет быдтӥ телевизорме тупатъяны, сомында ик коньдон сётӥзы. Азьланяз асэным но, тӥледын но, лыдӟисьёсын, таӵе учыръёс медаз луэ шуыса, кӧня ке юанэн вазиськи "Центр" сервис-студиысь мастерлы Сергей Деткинлы. - Сергей Александрович, тӥляд магазинъёсты кунгож сьӧрысь аппаратураен вузкаро. Учконо ке, зэмзэ но, паймымон техника но малы ке ӵапак со ӵемгес тӥяське. - Тӥяськозы но, асьмеос уго сое ум жаляське. Тани тӥляд учырады но - малы гудыръяку телевизорды сетьын? Дорады ӧй вал? Но кошкыку сое сетьысь кыскыны луэ ук! Асьтэлэн азьтэменыды телевизордэс сутӥды. - Мукетъёслэн но телевизоръёссы сетьын вал, малы ке ӧз ӝуалэ ук! - Вужгес телевизоръёс, огласянь юнгес. Туалаосыз уг ярато электрокужымлэсь тэтчамзэ, нош со асьмелэн котьку сыӵе. Аппаратура тӥяськемысь 99 процентаз янгыш "электросетьёс". Гудыри сярысь гинэ уг вераськы мон (таӵе учыръёслы, соос сюлмаськемъя, котькуд юбо бордын заземление луыны кулэ), со сяна но электрокужым ялан тэтча: я улон коркалэн подвалаз сварка ужа, я эшшо маке. Тани лыдӟисьёсты пӧлысь тросэз-а тодо, котькуд подстанциын самописецъёс (электрокужым сётӥськемез гожъясь аппаратъёс) луыны кулэ шуыса? Нош электрокужымлы сертификат? Дун тыриськоды, нош малы тӥ, потребительёс, со сярысь уд юаське? Тодэмды потэ-а, "Электросетьёслэн" со ӧвӧл шуыса. Тӥни отын ик валэктон. Мынам аслам но телевизоре ӝыны ар ӵоже ньыль пол тӥяськылӥз. - Ваньмаз учыръёсы янгыш вал "Электросетьёс", соин ик быгатӥ изъян адӟем коньдонме берыктыны. - Тӥ мастер, тодӥськоды кыӵе телевизор тужгес но умой. - "Сони". Но азьтэм муртлэн таиз но кема уз ужа. Эн аналске, кысылэ телевизордэс сетьысь, юн куронъёс пуктэ электрокужымъёс азе. Нялтас вераны кулэ, врачъёс но телевизорез сетьысь одно кысылыны косо. Уката ик со кӧлан комнатаын сылэ ке. Туала телевизоръёслэн радиацизы шӧдскымон ӧвӧл шуо ке но, кин тодэ.. . З. РЯБИНИНА. "Удмурт Республикаысь интыын аскивалтонъя калыкен быръем органлэн депутатэзлэн статусэз сярысь" Удмурт Элькунлэн Законаз воштонъёс но ватсанъёс пыртон сярысь Удмурт Республикалэн Законэз 1-тӥ ёзэт. "Удмурт Республикаысь интыын аскивалтонъя калыкен быръем органлэн депутатэзлэн статусэз сярысь" Удмурт Республикалэн 1995-тӥ арын 21-тӥ феврале кутэм 699-ХИИ номеро Законаз (Удмурт Республикалэн 1999-тӥ арын 21-тӥ феврале 735-И номеро Законэн пыртэм ватсанъёсын) пыртоно таӵе воштонъёс но ватсанъёс: 1. 16-тӥ ёзэтэз сётоно тазьы: "16-тӥ ёзэт. Депутатлэн йӧтылонтэм луонэз Депутат улосвылаз йӧтылонтэм луэ, полномочиосыз быдэсак йылпумъяськытозь. Сое уг луы ӝегатыны (сое йыртэман интыяз ӝегатон учыръёсты вератэк), уг яра утчаськыны улон но ужан интыяз, арестовать карыны, Удмурт Республикаысь Прокурор лэзьытэк уг луы уголовной кыл кутытыны. Депутатэз кыл кутытыны уг луы ас малпанзэ верамез, голосовать карыку мылкыдзэ возьматэмез, депутатлэн статусэзлы тупась мукет ужъёсыз понна, озьы ик полномочиосыз бырем бере но, нош умойтэм лэсьтэм ужъёсыз понна депутат кыл кутэ федеральной законъя. 2. 17-тӥ ёзэтэз куштоно. 3. 18-тӥ ёзэтэз тазьы сётоно: "18-тӥ ёзэт. Депутатэз йӧтылыны луонтэк кельтыны лэзён радлык Депутатэз йӧтылыны луонтэк кельтон сярысь ужпумез Удмурт Республикаысь Прокурор эскере, законэз лыдэ басьтыса". 4. 19-тӥ ёзэтэз куштоно. 2-тӥ ёзэт. Та Закон кужыме пыре, сое газетъёсын печатлам бере. Удмурт Республикаысь Кун Кенешлэн Тӧроез А. А. Волков. Ижевск город, 1999-тӥ арын 5-тӥ октябре. � 91-ИИ. Футбол Вормонэн! Ижысь "Газовик" берло шудонъёсаз "висисьёссэ" ӵемгес шугъяськытӥз. Бӧрсьысь куать пумиськоназ со очкооссэ ыштӥз. Оло, команда, туннэ нуналзэ вунэтыса, азьланезлы сюрес мерта ни. Соинтэк-а арлыдо футболистъёс Андреев, Зекох, Боровик коллективысь уллямын. Нош тренеръёс но клублэн президентэз Владимир Тумаев шара верало: кайта соос кужмогес луозы. Кужмыз вань туала "Газовиклэн" но. Сое возьматӥз Санкт-Петербургысь "Зенитэн" нюръяськон но. Миым ӵапак со утӥз вал Россилэсь кубоксэ. Нош туэ нырысетӥ лигаысь команда пешкытӥз сое кузь сюреслэн кутсконаз ик. "Газовик" вормиз 2:1 лыдын. Голъёсты пыртӥзы Угаров ("Зенит", 36-тӥ минутэ), Итиков ("Газовик", 51-тӥ минутэ пенальтиысен), Федотов ("Газовик", 77-тӥ минутэ). М. КУЗЬМИН. Котьку ул, солдат! Локальной войнаосъя комитет солдат анайёслэн комитетэнызы ӵош басьтӥськизы туала вакытэ бырем солдатъёслы памятник пуктыны. Ялэмын вал тужгес усто памятниклы конкурс. Отчы пыриськизы шаерысьтымы тодмо архитекторъёс, художникъёс. Трос ужъёс пӧлысь жюри бырйиз куинь устооссэ. Кудӥз вылэ дугдозы - азьланез возьматоз ни. Пинал пиосты буре ваён памятникез пуктыны чакламын Ижевскысь Пионеръёслэн дворецсы сьӧры. Бырем солдатъёслэн анайёссы отчы ик писпу арама уськытозы, кыстӥськоз со Горький урам кузя. Но со малпанъёсын гинэ али. Ужъёсты йылаз-пумаз вуттон понна кулэ коньдон. Республикамылэн но, Ижевск городлэн но бюджетсы начар. Кыле на вазиськыны предприятиослы, организациослы, ужбергатӥсьёслы, огшоры адямиослы. Со вылэ ик оско солдат анайёслэн комитетсы но асьсэос ожъёсы пыриськемъёс. Уральской Трастовой банкын усьтэмын нимысьтыз счёт. Нырысетӥез ик юрттэт вуиз Ижевскысь пинал пияшлэсь - ыстэм 200 манет коньдон. Кин мылкыд каре памятник пуктонэ пыриськыны, коньдонэз ыстыны луоз таӵе счётъя: Уральский Трастовый банк, р/счет 40703810300000000009, кор.счет.30101810200000000869, БИК 049401869 ИНН 1833014433. Оскем потэм, тулыслы чаклам ужъёс дыраз кутскозы. Валантэм ожъёсын улонзэс сётэм пинал пиос азьын озьы ке но сьӧлыкъёсмы ӧжытгес кыльысалзы. Л. МАЛЫХ. Ипподромлы - ӝыны даур Таӵе юбилеен валче Ижевскысь ипподромын пӧртэм ӵошатсконъёс ортчыло. Кылсярысь, 29-тӥ мае татчы люкаськылӥзы шаерысьтымы тямыс хозяйствоысь но артэ областьёсысь валэн ворттылыны яратӥсьёс. Нош кутскон сётӥз талы ваньмызлы 40-50-тӥ аръёсы И. Д. Горбушин. Соку Иван Данилович ужаз Удмуртиысь гурт хозяйствоя министр луыса. Кивалтӥсь туж гажаз валъёсты, ужан вакытаз шаерамы 250 сюрс пала валъёс гырдаллязы. Иван Данилович ик малпаз кылдытыны ипподром. Малпамын - лэсьтэмын. 1946-тӥ аре та гидэ Ярушкиысь валъёсыз вуттӥзы, нош нимысьтыз ипподром ним сётэмын вал 1949-тӥ арын гинэ. Со дырысен ик валэн ворттылонъя ӵошатсконъёс радъяны ӧдъязы. Вал вордонын бадӟымесь азинсконъёс басьтэмез понна 1954-тӥ арын Ижевске выжтӥзы Москваысь вал вордонъя зоотехнической институтэз. Кивалтӥсе пуктӥзы Яков Андреевич Бабинцевез. Солэн Ижевске вуэменыз валче, шаерамы азинскыны ӧдъяз конный спорт. 35 ар ӵоже тыршытозяз, Бабиноын ӟеч выжы валъёс уськытӥзы. Татысь валъёсын ворттылӥзы шаерамы ортчись "Гырон быдтон" шулдыръяськонъёсын ӵошатсконъёсын ӧрӟи пиос Василий Бибичев, Николай Козин, Александр Евтушенко, Владимир Карпенко ӝог ворттылӥзы Гарнитур, Снежок, Огонёк ужпиосын. Россиысь ӵошатсконъёсын но соосты азьпалтӥсьёс ӧз шеде. 1973-тӥ арын ипподромын кылдӥз Олимпийской резервен конно-спортивной школа. 1975- тӥ арын гурт хозяйствоя дышетскон заведениосысь студентъёс пӧлын всесоюзной ӵошатсконъёс радъямын вал. Аспал эшъёсмы вань кубокъёсыз киултӥзы. Со дырысен ик юнгес радъяськыны ӧдъязы валэн ӵошатсконъёс. Туннэ нуналлы шаерысьтымы ипподромын люкаськыло кужмо валъёс. Тямыс гидын 16 вал кыда. Туэ юбилеен валче трос ӵошатсконъёс ортчытъязы. Кылсярысь, тол пумын валэн ворттылонъя Удмуртилэн чемпионатэз радъямын вал. Вормонъёс басьтӥзы Можга ёросысь "Россия", Ува ёросысь "Дружба", Воткинск ёросысь "Красный Октябрь", Игра ёросысь "Чутырский" но Дэбес ёросысь "Колос" колхозъёсысь но эштосъёсысь валъёс. Ипподромын кыкетӥ арзэ ужа ини вал вылын ворттылонъя клуб. Кивалтэ соин тренер Владимир Константинович Тарасов. Та клубе мылысь-кыдысь ветло 6-сен 10 аресъем нылъёс, пиос но 40 ареслэсь бадӟымъёс. Ваньмыз-ӧвӧлэз 50 кузя. Люкаськемъёсын урок ортчытъяло ас ужзэс ӟеч быдэсъясь тренеръёс: Михаил Григорьевич Симаков но Александр Иванович Пушкарев, нош нылпиос понна - Юлия Викторовна Богатырева. Та вие клуб данъяське аслаз спортсменъёсыныз. Андрей Вахрушев, Вадим Марков но Леонид Бессонов котькуд ӵошатсконъёсын вылӥ азинсконъёс басьто. Нош 12 аресъем Наталья Ворончихина, Римма Орлова но Елена Борисова Москваын ортчоно ӵошатсконъёслы дасясько. Пичи дырысеным ик туж вожъяськыса учкылӥ валъёс шоры, данъяськылӥ вал вылын ворттылыны быгатӥсьёсын. Учкисез но со аръёсы трос гинэ люкаськылӥз, нош берло аръёсы соос кытчы ке ышизы. Та пумысен вераськыны шуд усиз ипподромын трос аръёс ӵоже ужась кивалтӥсен Александр Егорович Евтушенкоен. Тани ма шуиз со: - Учкисьёсмес берен берыктон вылысь трос коньдон кулэ. Озьы ке но, соос понна кыӵе ке кузьымъёс сётыны выриськом, но, жаляса верано луэ, адямиез пичи шудонэн уд "пӧя" ни туала вакытэ. Улон секыт луэмен, ми доры ветлӥсьёслэн лыдзы ялан ичиёме, бадӟым ӵошатсконъёс радъяськомы ке но. Бен, ипподромын ужзы ас ӧртӥз мынэ. Потэ вылэм, соослэсь но ворттылэмзэс кин ке мед синйылтысал, мед гажасал. В. ЛАГУНОВ. "Удмурт Республикаын интыын ас коже кивалтон сярысь" Удмурт Республикалэн Законаз воштонъёс но ватсанъёс пыртон сярысь Удмурт Республикалэн Законэз 1-тӥ ёзэт. Удмурт Республикалэн "Удмурт Республикаын ас коже кивалтон сярысь" 1996-тӥ арын 28-тӥ мае кутэм 219-И номеро Законаз (Удмурт Республикалэн законъёсаз 1996-тӥ арын 19-тӥ ноябре кутэм 323-И номеро, 1998-тӥ арын 14-тӥ январе кутэм 567-И номеро, 1998-тӥ арын 8-тӥ апреле кутэм 615-И номеро, 1999-тӥ арын 22-тӥ июне кутэм 56-ИИ номеро воштонъёсты но ватсанъёсты лыдэ басьтыса) пыртоно таӵе воштонъёс но ватсанъёс: 1. 13-тӥ ёзэтлэн 8-тӥ люкетаз "депутатъёслэн тупатэм огъя лыдзылэн ӝыныезлэсь тросэз "кылъёс вӧзы ватсано" но куд-ог дыръя та Законэн валче решение кутыны кык-куиньмосэзлэсь ичиезлэн куараез тырме" кылъёс". 2. 13-тӥ ёзэтлэсь 9-тӥ люкетэзлэсь 3-тӥ абзацсэ сётоно тазьы: "Интыын аскивалтонъя представительной органлэн кивалтӥсез кыл кутэ аскивалтонъя представительной орган азьын но сое ужысьтыз мозмытыны быгатэ, быръем депутатъёс пӧлысь ӧжытсэ кык-куиньмосэз со понна куаразэс сётӥзы ке". 3. 14-тӥ ёзэтлэн 4-тӥ люкетэз бере таӵе абзац сётоно: "Аскивалтонъя представительной органэн юнматэм муниципальной улосъёзлэн администрациезлэсь кивалтӥсьсэ ужысьтыз мозмытыны луэ, быръем депутатъёс пӧлысь ӧжытсэ кык-куиньмосэз куаразэс сётӥзы ке". 2-тӥ ёзэт. Та Закон кужыме пыре сое газетъёсы печатлам бере. Удмурт Республикаысь Кун Кенешлэн Тӧроез А. А. ВОЛКОВ. Ижевск город, 1999-тӥ арын 5-тӥ октябре � 94-ИИ. Гиннеслэн книгаяз - сепъёс Адями уг быгаты та дуннеын ог-огеныз кусып тупатытэк улыны. Валче улон но шулдыргес, уж но чырмытгес луэ уго. Куспазы туж вожъяськымон уло Игра ёросысь Сундур но Сеп егитъёс. Та гуртъёсысь клубын ужасьёс ӵемысь ӵош ортчытъяло пӧртэм ужрадъёс. Тани сӥзьыл Сепын радъямын вал "Сӥзьыл Гиннес-шоу". Данак егитъёс люкаськизы клубе. Пумиськон ӵошатскон амалэн ортчиз. Озьы ӝыт пумын тодмо луиз, кин тужгес но ӝужытэз, вакчи ӵышкиськемез, яркыт дӥсяськемез но мукет. Рекордъёс юнматэм бӧрсьы Сундурысь ди-джейлэн Пилотлэн кивалтэмез улсын усто дискотека ортчиз. Октяре нош Сундуре вуылӥзы сепъёс. Таяз учыре радъямын вал гурт ужъёсты йылпумъянлы сӥзем праздник. Андрей КЛЕМЕНТЬЕВ, Удмурт университетысь студент. Асьме фильмъёс ик умоесь Россилэсь фильмъёссэ возьматонъя киноцентр туэ 8-тӥ октябре усьтӥськиз Ижевскын. "Октябрь" кинотеатрлэн ӧсъёсыз со нуналэ вӧлак усьтэмын вал, шудӥз оркестр. Таӵе центръёс кылдытэмын ни Казаньын, Кировын, Уфаын, Перьмын. Соослэн нырысетӥ ужпумзы - асьме дорын поттэм фильмъёсты выльысь улӟытон, берло дыре уго учкисьёс мӧзмыса уло азьвыл поттэм умоесь кинокартинаостэк. "Октябрь" кинотеатр кемалась ни тамында калыкез ӧз люкалля вал. Кинолэн зэмос праздникез шуыны луоз сое. самодеятельной артистъёс но татын шулдыртӥзы. Учкисьёс азьын вераськизы Удмуртиысь Кинофондлэн генеральной ректорез А. Васяев но та кинотеатрлэн кивалтӥсез Э. Лещев. Собере дэмламын вал Станислав Говорухинлэсь "Воршиловский стрелок" фильмзэ учкыны. Та лэчыт сюжето фильмын валтӥсь ролез шудэ Михаил Ульянов. Нош учкисьёсын пумиськонэ лыктэм одӥгзэ ролез шудӥсь артист Александр Пороховщиков. Со трос юанъёслы валэктонъёс сётӥз. Та киноцентр азьланяз но ялан возьматылоз асьме отечественной фильмъёсты. В. ЛАГУНОВ. Эрик дуно сылэ Котькин котьма мед шуоз, но улон-вылонмылэн шуг-секытъёсыз нырысь ик туж секытэн шӧдисько будӥсь пиналъёс вылын. Коньдон... коньдон... Школаын дышетскемзы бере пиналъёс ас эрказы кылё. Соин ик уноез йыртэманы, тамак кыскыны, вина юыны дышо. Кез ёросын нош пинал техникъёслэн станцизы ас ужзэ куспетӥ уг кары. Тани туэ гинэ со 400-лэсь уно пиналъёсты люкалоз авиа-судомодельёсъя, радиотехникая но мукет кружокъёсы. Зэм, ваньмыз дуно ке но, радио ёзъёс, фотоплёнка басьтыны юртто ни анай- атайёс, мотоен ворттылон понна пиналъёс ваё на бензин но. Нылпиос сярысь сюлмаськыса, лэсьтӥськон тӥрлык висъяло ужбергатӥсьёслэн "Восток" огазеяськонзы, Чепцаысь мебельцех. "25 ар ӵоже нылпиос сярысь сюлмаськыса ужаськомы ни, - шуэ татысь дышетӥсь Т.К.Наумова. - Кезысь пинал техникъёс элькунамы трос пол азьпала потылӥзы. Али но быгатэммыя тыршиськомы дэбесъёсын, играосын ӵошатскыны. Ӧд ке сюлмаськы, нылпи но эрказме угось". А.Петров. Валэд ке вань, улон бусьтыр Шаркан ёросысь нюлэсчиос туэ ас кужыменызы 70 тонналэсь ятыр турын дасязы. Соос тросгес пудо вордыны сюлмасько, лэсьтӥзы вал гид, отын 25 йыр чуньыоссы, ужпиоссы. Бензин дуно, корт уг чида, машина тӥяське, нош валэн котькыӵе нюлэс сэреге пырод. Кыштыр гинэ ужало Шарканысь нюлэсчиос. Уждунзы бадӟым ӧвӧл ке но, удысысь уг кошко. Нюлэскын улыса, сютэм кылид ке, паймод ук. А. АНДРЕЕВ. "02" ивортэ Керетонъёс Октябрь толэзьлэн нырысетӥ дас нуналаз республикаямы 743 йыруж лэсьтэмын вал. Со пӧлысь 572-ез шараямын. 8-тӥ октябре Глазов ёросысь Вылӥ Слудка гуртысь 48 аресъем Анатолий, вина юэмез бере, кышноез вылэ йыркуръяськыны кутскиз. Семья пушкысь керетон огшоры гинэ ӧз ортчы. Воргорон аслэсьтыз кузпалзэ зол гинэ жугиз. 46 аресъем юн сӧсыртэм кышномурэз больницае нуоно луиз. Кыле на одӥгез валантэм юан, кытысь потӥз меда 2-тӥ группаен инвалидлэн сомында кужымез? 9-тӥ октябре "пӧсь" вал Камбаркаысь Партизанской урамысь одӥгаз юртын. Суд улэ азьвыл шедьылэм кышномурт, вина ӧжыт луэмен, ачиз сямен суд улэ шедьылэм кузпалзэ пуртэн бышкалтыса вииз. Керетонъёс, керетонъёс. Атайёс но нылпиос куспын сазь йырын но трос валамтэос кылдо. Озьы, Ижевскысь Воткинск шоссе урамысь 80-тӥ юртысь огаз квартираын керетон "гомӟиз". 17 аресъем Рустам керетӥз атаеныз но 20 аресъем агаеныз. Керетонзы вуиз пурт дорозь. Вандӥськыны шедем агайзэ больницае нуоно луиз. Лушкаськисьёс Уг кӧло та вакытэ гуртъёсысь вораськисьёс. Музъем ужасьёслы гинэ ас будэтэм емышсэс утялтыны луонлык сётэмын кадь, нош асьмелэн "дась кӧтъёс" трос вылэм. Соослэн ужан дырзы вуэмын, лэся. 10-тӥ октябре тодмотэм муртъёс Воткинск ёросысь Светлое селоысь бакча емыш возён интыысь тунгонзэ ишкалтӥллям но ньыль тонна картофка лушкаллям. Колхоз 17 сюрс манет тыр ыштон адӟиз. Та нуналэ ик Яр ёросысь "Рассвет" эштосысь фермае кык тодмотэм машина дугдӥз. Фермаез эскерисез жугизы но думылыса кельтӥзы, нош асьсэос кык кунянэз маялтӥзы. Лушкаськисьёсты утчало на. Ӧз пӧрмы "ужез" Грах ёросысь Мари-Возжай гуртысь скал кыскисьлэн. Гидысь вож кунянъёсты лушканы малпам вылэм, но... кыдёке ӧз вутты колхоз ваньбурез, сое кутӥзы. Гылыт сюресъёс Шаерысьтымы сюресъёс та вие йӧен шобырскемын ӧвӧл на ке но, куд-ог шофёръёслы со гылыт потэ ни, лэся. Октябрь толэзьлэн дас нуналэз ӵоже сюрес вылын 72 пол шудтэм учыр кылдӥз. Бырыны шедиз 9 мурт, нош 76-ез сӧсырмиз. Ижевск-Сарапул сюреслэсь оглюкетсэ вылын "костина мельница" шуо. Кӧня ке курытсэ шӧмъям воргорон татӥ "москвичен" вортылыны ӧдъяз. Котыр сюресэз со вакчиятыны ӧдъяз но пумитаз лыктӥсь машина пала кожиз. "Шестеркаез" мырӟиз, нош ачиз сюрес урдсы пезьдӥз. Табере кӧня коньдон кулэ луоз меда машинаосыз питранъёссы вылэ пуктыны? Вина - дышетӥсь, курытсэ шӧмъяса ворттлыны яратӥсьёс понна со туж дуно усе. Жаляса верано, со сярысь юыку нокин но уг малпаськы. Ю. БАЙБЕКОВ. Журналистъёсын пумиськонъёс Рим кылиз историе. Нош асьмеос?.. Огшоры верам кылъёс гинэ со ӧвӧл, улонын, зэмен но, озьы луэ. Малы ке-а вашкала Рим но, Византия но дуннеысь историын туннэ нуналозь уло? Культура вылын возиське но азинске нация, солэн кылыз, литератураез, музон кунъёсын кусып тупатонэз. Самой лек ожмаськон вакытъёсы но культура ӧз ӵакмы. Нош али ма луиз асьмемын? Малы та удыс арысь аре сюрес урдсы кыле? Кин со понна кыл кутоз? Тӥни ма шугъяськытэ творчество удысын ужасьёсты, шаерысьтымы суредасьёслэн, крезьгур гожъясьёслэн, писательёслэн огазеяськонъёссылэсь кивалтӥсьёссэс. Соос нырысьсэ ортчытӥзы пресс-конференция, пумиськизы журналистъёсын, тодматӥзы кылдэм югдурен. котькытын сямен, татын но уг тырмы коньдон, со бордысен кутско вань ӵемтылонъёс но йыр висёнъёс. Котьма шу но, бускель республикаосын ӵошатыса, Удмуртия азьвыл аръёсы но та удысын шӧдскымон бере кыльылӥз, туннэ нунал сярысь поттылонэз ӧвӧл ни. Асьмеос ялан вожъяськыса учкылӥм но учкылом на бигеръёс, поръёс, башкиръёс шоры. Малы соослэн вань национальной театрзы, дыраз пото газетъёссы но журналъёссы, вылӥын пуктэмын кадръёсты дасян но мукетыз? Маин удмурт шаер бускельёсызлэсь пӧртэм? Юанъёс пумтэм. Огез жаль: соослы тыро-пыдо валэктон шедьтыны шуг. Республикаысьтымы куинь валтӥсь творческой огазеяськонъёслэсь кивалтӥсьёссэс но туж шугъяськытэ берло дыре кылдэм югдур. Петр Васильевич Ёлкин пумиськонын трос гинэ сюлэме йӧтӥсь ужпумъёсты ӝутӥз. Огез соос пӧлысь - выставкаосты ортчытъянъя залэз возён. - Али ми сое тупатъяськом бюджетэ пырисьтэм коньдон чотын, кызьы но озьы уксё шедьтӥм. Нош малы та сярысь уг сюлмасько республикалэн кивалтӥсьёсыз? Выставкаосты ортчытъянъя зал, мон малпамъя, аслаз пушчеберлыкеныз калыкез бордаз кыскыны, культурая центрлы пӧрмыны кулэ, нош борддоръёсты суредъёсын ошылыса, сое кенослы пӧрмытӥськом. Суредасьёслэн огазеяськонзы шаерамы огез бадӟымез луэ, отчы пыре 87 мурт. Но та союз художникъёслы кулэезъя юрттэт сётыны уг быгаты ни - ӧвӧл коньдон. Писательёслэн но югдурзы пӧртэм ӧвӧл. Со сярысь вераз союзлэн алигес гинэ быръем тӧроез Егор Егорович Загребин. Татын но книга поттыны уксё уг тырмы. Писательёслэн лыдзы арысь аре будэ ке но, шаермылэн улон-вылоназ со уг шӧдӥськы. - Куд-огзэ мон асьме пӧлы матэ но ӧй пыртысал, но мылкыдмес ӧз юалэ, татын ужазы Москваысь эшъёс, - шуиз Егор Егорович. - Удмуртиысь писательёслэн огазеяськонзы удмуртъёс понна гинэ медаз луы, азьланяз ми кутом бигеръёсты но ӟучъёсты но, мукет выжыысь потэмъёсты но - вань ке соослэн быгатонлыксы но уло ке асьме музъем вылын. Культраез азинтон но кужмоятон понна ужано огкылысь. Крезьгур гожъясьёслэн союзэнызы кивалтэ Александр Германович Корепанов, тодмо композиторлэн Герман Афанасьевич Корепановлэн пиез. Таиз огазеяськон - огез пичиез, 10 мурт отчы пыре. - Композитор, ассэ сюдон вылысь, туннэ я бугро ӵупыса ветлэ, я укно рама лэсьтэ. Нокытчы уд пыры, кӧттэ ке тыремед потэ - берга. Мае со возьматэ? Визьмо, быгататӥсь адямиос асьме кунмылы кулэ ӧвӧл, отысь потэ уждун тырон но, шорамы учкон но. Москва милемыз кемалась куштӥз ни, нош интыосын тодазы ваё кыӵе ке журадъёс ортчон азьын гинэ. Асьмеды асьмеос, удмуртъёс, ӵем пыкылӥськом, республикалэн палэназ культурамы сярысь ӧжыт тодо шуыса. Кин тодэ, азьланяз, оло, воксё но номыре возьматыны луоз, ваньзэ ӧвӧл карыны капчи ук. Л.Медведева. Вуылэ - уд жалялэ Удмурт Республикаысь Национальной библиотека 12-тӥ октябрьысен 17-тӥ октябрёзь ортчытэ туннэ нуналлы тупась книгаосъя адӟытон. Отчы пырисько книга поттонъя "Удмуртский университет" , "Алфавит" юртъёс, книгаен вузкаронъя "Находка" магазин. Возьматӥсько экономикая но правоя книгаос, турлы юанъёслы валэктыны быгатӥсь литература, ас киын дасям ужъёс. Адӟытонэз радъясьёс ӧтё вань мылкыд карисьёсты. Со ужалоз ӵукна дас часысен ӝыт дас тямыс часозь. Кӧснуналэ - ӵукна ӝыт дас часысен дас сизьым часозь. Шутэтскон нуналъёс - арня нунал, вордӥськон. Адресэз: Ижкар, Советской ульча, 11. Тел.: 78-07- 34. Правительствоын Кысконо скалъёслэн лыдзы йылӥз 5-тӥ октябре Правительстволэн юртаз ортчем пресс-конференциын вераськиз премьерлэн воштӥсез Михаил Назаров. Со пусйиз вал, шаерысьтымы фермаосысь кысконо скалъёслэн лыдзы кулэсмиз шуыса. Шонерзэ вераса, ортчем арен ӵошатоно ке со лыдпусэз, туэ кысконо скалъёслэн лыдзы 558 йырлы йылӥз. "Вождэс эн вае",- шуиз та ласянь Михаил Назаров. "Восточныйын" выль директор Удмурт Республикаысь вылӥ кивалтӥсь дорын ортчиз кадръёсын ужанъя советлэн кенешез. Республикаысьтымы тужгес бадӟым парсь вордон комплексэ кивалтӥсе юнматэмын Михаил Анатольевич Широбоков. Талэсь азьвыл со ужаз Сарапулысь кеньыр поттонъя заводлэн кивалтӥсез луыса. Удмурт Республикаысь Правительстволэн пресс-службаез. Люкасько ӵыжы-выжыосмы Венгрилэн, Финляндилэн но Эстонилэн кичӧлтэмезъя 1918-тӥ арысен пусйыны кутскизы финн-угор калыкъёслэсь нуналзэс. Удмурт культурая огазеяськонлэн ӵектэмезъя 1991-тӥ арысен та нуналэз нимало пумитало ни асьме шаерын но. Соин валче 16-тӥ октябре пӧртэм ужрадъёс ортчыло. Таяз шутэтскон нуналъёсы Эстоние люкаськизы быдэс дуннеысь асьме выжы калыкъёс. Удмурт шаерысь отчы мынэмын "Зарни крезь" ансамбль, крезьгурчиос но кырӟасьёс Надежда Уткина но Иван Григорьевых. В. РОГАЛЕВ. Мотоос гуретозы на Санкт-Петербургын ортчем "Россиысь фермер" калык куспо ярмаркае 790 фирма пыриськиз. Соос пӧлысь 50-эз гинэ пусъемын вал дипломъёсын. Акциосын "Ижмаш-Мото" огазеяськонлы нырысетӥ витьёсыз пӧлы шедьыны шуд усиз. Маркетинг удысын ужасьёслэн лыдъямзыя, со юнме шорысь ӧвӧл. Уго Ижын поттэм мотоциклъёслэн гуртъёсын улӥсьёс пӧлын данзы бадӟым. Предприятие али кык выль пумо мотоос дасян бордын ужа. Санкт-Петербургын возьматэмын вал кык пумо машинаос. Соос пӧлын - тылпу кысӥсь мотоцикл, грузъёсты нуллон мотоцикл, мотопомпа, одӥг интыен "Юпитер". Ӵапак соос кулэ уго та вакытэ гуртоослы. "Ижмаш-Мото" сентябре озьы ик пыриськиз Нижний Новгородын ортчем "Россия дауръёс вискын" выставкае. Декабре со мыноз Москвае "Россилэн азьланез: выль технологиос" адӟытонэ. Н. СЕМЕНОВ. Мунёос - покчиослы Мунё театрысь артистъёс гужем шумпоттӥзы 15 ёросысь нылпиосты, 90 пала спектакль возьматӥзы, соос пӧлын - "Прыгающая принцесса", "Старомодные чудеса", "Принцесса на горошине", "Гусёнок". Тросэз таос пуктэмын нылпи лагерьёсын. Таяз кӧс нуналэ Мунё театр усьтэ 65-тӥ сезонзэ. Пиналъёс адӟозы выль спектакль - Андерсенлэн "Огниво" выжыкылэзъя. Пуктэ сое Россиысь искусствоосъя дано деятель Роман Виндерман, сценаез суредаз-чебермаз Удмуртиысь искусство удысын дано ужась Татьяна Старикова. Спектакльын шудо Россиысь дано артист Александр Мустаев, артистъёс Алла Кравченко но Анатолий Тарасов. Выль арлы дасясько премьераос - выжыкылъёс "По щучьему велению" но "Карлик Нос". Ноябрьлэн пумаз луоз "Театр - нылпиослы" арня. В. Лагунов. ТОЛЭН-ГУЖЕМЕН Кылем арын шуркынмон толэзьысен "Ува"" санаторий вис карытэк ужаны кутскиз. Татын толэзьлы быдэ ог 360 адями тазалыксэ юнматэ, нош гужем та лыдпус 550-озь вуэ. Али путёвкаосты ноябрьлы вузало ни. Зэм, соослы дунъёс сокем пичиесь ӧвӧл. Дас ньыль нунал понна тыроно 4200 манет, 20 нунал понна - 6000 манет. Санаторийын ялан куто выль амалъёсты. Кылсярысь, уже пыӵа гидротерапия яке сульыкен, сэраен (пиявка) эмъян. Н.Ятчин. Пул понна � ю тысь Ува ёросысь "Урал" эштосын туэ пудо гидъёссэс тол азелы умой-умой тупатъяса дасязы. Нимысьтыз бригада ужъёс борды кутскиз ини пудоез тулыс возь вылэ поттэм бере ик. Хозяйство укнолы тырмыт пияла басьтӥз. Красносельской фермаын воштэмын вӧлдэтэз, липетэз, выж интые бетон кисьтэмын. Но пудо сиён ласянь югдур секытгес. Уг тырмы 400 тонна котыр фураж. Югдурысь потон вылысь, эштослэн кивалтӥсьёсыз Нылгаысь коммунальщикъёслэсь пул пилён машиназэс арендае басьтон сярысь вераськизы. Собере ини пулзэс ю тысен воштозы. А. УВИН. УДМУРТ ЛУЛЧЕБЕРЛЫКЪЯ ДЭМЕНЛЫКЛЭН ӦТЧАМЕЗ АЗЬЫН Медаз чалмы крезь! Лулчеберлыкмес утись (культурая) дэменлык кулэ-а асьмелы? Котьмае но утись вань: юртъерез чаклало солэн кузёез но тылпулэз кысӥсьёс, ваньбурез уте милиция, кунэз - армия, мушез - мушкась, кивалтӥсез - мугор утисез, вӧсяськонэз - вӧсясь. Вӧсясьёсыз быдтӥзы азьвыл, вӧсяськонъёсмы но быро ни вал. Озьы ик луоз культураенымы но, солэн дурбасьтӥсь дэменлыке ӧм возелэ. Нош вал-а асьме культурамылэн аспӧртэмлыкез, чеберез, утьымон интыосыз? Азьлон но вал, али но вань. Учкелэ али, кыӵе тунсыко кырӟа удмурт калык - бадӟым сиён-юон дыръя опера выллем луэ ук. Адямиос кырӟаса верасько куспазы. Котькыӵе тугаськем шуг веран-малпан мед луоз - нокытчы канжаськытэк, могӟытэк, шур ву кошкем кадь жильыртэ кырӟан гурзы. Нош кылэмды вань, дыр, Карлыган палась одӥг пересь кышномуртлэсь крезен шудэмзэ. Дораз лэсьтэм крезен со озьы шудэ - кылзыса быдэс оркестр шудэ, кожалод. Солэсь крезьгуръёссэ плёнка вылэ гожтыса, телевизор пыр но, радио пыр но лэзьылӥзы вал. Берло аръёсы уг кылӥськы ни. Сыӵе усточиосынымы данъяськыны ум быгатӥське асьмеос. Мынам асьме калыкысь но, палэнысь но крезен сокем усто шудӥсез адӟылэме ӧй вал на. Жаляса верано луисько: со крезьчи кулӥз ни. Плёнказэ калык пӧлы ӧм но вӧлмытэ, озьы ик вунэтом. Мон пичи дыръя, куно пумитан дыръёсы, удмурт корка устолыко киужез возьматонлы пӧрмылэ вал: сокем чебересь ӝуткаса куэм шобыръёс, катанчиос, чебер пужъятэм, чильпам но ӝуткам пумо ӵушконъёс, валес шобыръёс, чебермам, пужъятэм кубоос, усто лэсьтэм чильтэрам пуконъёс но бадӟым ӟусъёс, чеберъяса-кильтыръяса дурем сандыкъёс- шыкысъёс, пужыё лянэсъёс (сарбаос), пужъятэм сюй горшокъёс. Мае гинэ эн басьты - котькытын искусство, дорын кылдытэм устолык. Кыӵе чебересь вал куиськон бордысь выртйыл питранъёс: я шунды кадь, я вал кадь. Нош адямиос вылын - усто куэм-пужъятэм дӥськут, чеберъянъёс-кильтыръяськонъёс: камалиос, чыртыгышъёс, кусильвесьёс, йырсиоктэтъёс, олокыӵе но угыос, зундэсъёс, поскесъёс, азвесь сӥньысэн пужъятэм йыркерттэтъёс, муресазьёс. Мар гинэ ӧй вал... Со ваньмыз ог-огезлы тупась каремын. Озьы корка пушкын кылдэ вал быдэс ансамбль. Со устолыклы паймыса, К.М.Климов олокӧня книга гожтӥз ини. Кандидат но, доктор но луиз. Мон ачим но цветоведениея энциклопедия интые возисько нэнэйлэсь шобыръёссэ но чалмаоссэ-ӵушконъёссэ. Соос мыным суреданы, буёллы буёл тупатыны юртто. Асьме калыклэн сюрс аръёсын люкам буёл тупатон узырлыкез асьме дырозь вуэмын но, сое асьмеос ум быгатӥське ни дунъяны но, утьыны но ум тыршиське. Трос кунъёсын возьматылэмын ини калыкмылэн киужъёсыз, котькытын соосыз туж вылӥ дунъяло. Туала удмуртъёс гинэ уг быгато сое утьыны, дунъяны, соосын данъяськыны. Огпол Венгрие, быдэс дуннеысь финн-угор тодосчиослэн кыкетӥ кенешазы сюри. Отын удмуртъёслэн шундыез котькуд удысазы сӥлы каремзы сярысь вераськи (сюанын но, киужын но. Юртъер пужыосын но, вӧсяськонъёсын но, адями ватонын но, кыл сётонын но, танӥськонын но). Отын вераськизы быдэс дуннеысь тодосчиослы туж тодмо музыковедъёс - венгръёс Ласло Викар но Габор Берецки. Со 1975-тӥ арын вал ини, соин ик нимтулзэс но, оло, янгышгес гожтӥсько ни - аръёс ортчемъя, котьмар вунэ. Но мон уг вунэтӥськы соослэсь мар сярысь верамзэс. Соос шуизы: "Ми трос калык доры вуылӥм ини, пӧртэм крезьгур люкаса. Чын-чын вашкала крезьгур шедьтӥмы удмуртъёс дорысь". Мыным собыдӟа шумпотон но данъяськон вал со. Ымазы пыроно кадь учкыса пукисько, чалякгес мед вералозы ни шуыса. Магнитофонзэс лэзизы но, тодмай гурзэс: со - вӧсяськыку куриськон гур. Соосыз Удмуртие пыраны уг лэзё вал соку. Крезьгурзэс гожтӥллям Карлыган палась удмуртъёс дорын. Тӥни - асьме культурамылэн олокӧня сюрс аръёс пыр потэм, туж-туж вашкала ӵыжы-выжыосмы дорысь вуэм кырӟам-гурламъёсмы вань на вылэм. Асьмеос, вӧсяськонъёсмылэсь крезьгурзэс сяна, верано кылзэс но умой-умой ӧм на эскерелэ, калыкмылы солэсь чеберлыксэ но ӧм на возьматэлэ. Нош со огшоры кыл ӧвӧл ук, инмаръёсынымы вераськон кыл. Отын туж вылӥ поэзия но, философия но, история но. Одӥг мыж кыл вамен гинэ но удмурт калыклэсь трос сюрс аръёс ӵоже кыдам сямъёссэ валаны но син азе пуктыны луэ. Со сямъёс сярысь уг вунэто удмуртъёс одӥг вӧсяськоназы но. Одӥг-ог поттыло со сярысь кисьтонъёс дыръя но. Мынам удмурт улонлэсь котькуд палзэ адӟеме но валаме потылӥз. Огпол Ленинградысь тодосчиен Татьяна Александровна Крюковаен Киров палась удмуртъёс доры экспедициен мынӥмы. Татысен мон тодӥ: тросэзлэн удмурт пужыослэн нимъёссы кылемын. Т. А. Крюкова Ленинградысь этнографияя музейлы люказ удмурт дӥськут, чеберъяськонъёс, улос котырысь ужан тӥрлыкъёсыз, нош мон люкай нимо пужыосты. Ог тямыстон палазэ шедьтӥ (берло аръёсы - мукет интыосысь но). Ваньмыз нош мынам шыкысам ог сю кызь пала нимо удмурт пужы люкаськиз. Ог сю ар талэсь азьлогес ке кутскысалмы бичаны, оло, вань пужыосмылэсь нимъёссэс тодыны быгатысалмы на. Та пужыосыз возьматъяй но соос сярысь вераськи Ленинградын (80-тӥ аръёсы) Всесоюзной конференциын. Отын чеберлыко удысъёсыз улӟытон сярысь вераськон мынӥз. Асьме пужыос выллем пужыос вань ӟучъёслэн но бигеръёслэн киужъёссы вылын, но соослэн пужы нимъёссы ӧвӧл. Мон малпамъя, та учыр возьматэ: асьмеос мукет калыкъёслэсь трос ик пужыоссэс басьтӥськымтэмы, троссэгес соос асьмелэсь басьтӥллям. Озьы бере, асьмелэн культурамы кемаласен ик вылэм ини. Ужаны но удмуртъёс, оло, вазьгес дышиллям, бускель ӟуч, бигер калыкъёс сярысь. Удмурт пужыос сярысь ивортонме тодосчиос туж тунсыкъяськыса пумитазы, трос юанъёс сётъязы. Сюлэмзы ӧзгес оскы, лэся: куэм но пужъятэм арбериостэс, пе, возьматыны ӧй быгатысалды-а? Мон верай, сьӧрам вань шуыса, возьматъяй буртчин сӥньысъёсын пужъятэм пӧртэм буёло кабачиос, азвесь сӥньысэн пужъятэм йыркерттэт но муресазь, со сяна, ӝуткаса куэм ӵушконъёс, трос выртэн ӝӧккышет. Киужъёсме ваньзэ сямен залэ лэзи, киязы басьтыса ик мед учкозы шуыса. Адӟемзы бере, уката но оскизы верамелы, синмаськизы удмурт калыклэн ужаны быгатэмезлы но ивортонме Москваын потэм бадӟым книгаын печатлазы. "Сообщения Государственного Русского музея. Выпуск ЪИ" нимо со. Кыӵе ке но студенткаос но ӟечкылазы калыкен ӵош. Соос Удмуртиысь вылӥллям. Дышетскиськомы, пе, Ленинградысь университетын. В. Гартиг, И. Косарева, Л. Савельева вал соослэн нимтулъёссы - али соос асьсэос тодосчиос ини. Соку соос шуизы: "Вы сегодня на седьмом небе, Вас хвалят, мы рады за Вас и поздравляем Вас с успешным выступлением". Соос но залын вылӥллям. Та конференциысен мон валай: киужъёсмы но, пужыосмы но данъяськымонэсь вылӥллям. Отын сомында калыкъёслэн адямиоссы вал - огез но милям но тамында пужы нимъёсмы вань шуыны ӧз быгаты. Удмурт дӥськутлэн чеберлыкез но трос пӧртэм вылэмез сярысь мон быдэс книга гожтӥ ини. Тужгес но бадӟым тау кариз со понна А. В. Мамонтов, "Италмас" ансамбльлэн кивалтӥсез. Табере, пе, ми кыӵе но дӥськут вурыны ум быгатэ ни... Нош ансамбльлы дӥсь дасясь, Москваысь суредась Марина Барт шуиз: "Нокыӵе калыклэсь таӵе узыр дӥськутсэ адӟылэме ӧй вал на: буёлзыя но вуремзыя но пӧртэмесь соос, пӧртэмлыксылэн пумыз но, йылыз но ӧвӧл". Кызьы уд данъяськы калыкедлэн сокем ушъямон вадесъёсыныз! Сандык (шыкыс) кадь лэсьтэм удмурт юртъеръёс крепостьёс кадь сыло ук. Соос сярысь но, трос мукетыз сярысь но туж уно ӟечсэ вераны луысал на. Удмурт лулчеберлыкъя дэменлыклэн конференциез азьын ваньмы та ӟеч но, кулэ но, чебер но удысъёсмы сярысь вераськыны но, малпаськыны но, данъяськыны но кулэ, дыр. Ваньмылы малпаськоно, кызьы сое, выль даурлы, выль вапумлы тупась карыса, утьыса азинтоно, азьланяз но та устолыкъёс калыкмес дауръёсын мед шумпоттозы но мед данъялозы шуыса. Семен Виноградов, Удмурт Элькунысь калык суредась, профессор. *** Эшшо огпол ивортӥськом: Удмурт лулчеберлыкъя дэменлыклэн ӧтчамез луоз таяз кӧснуналэ, 16-тӥ октябре, Драмая удмурт кун театрлэн юртаз! Кутскоз ӵукна укмыс часын. С. Н. Виноградов (бур паласез) вӧсь дыръя. Чиньыысь уд кыскы чечыез Мон уг янгыша, дыр, ужтэк кылён - обществомы понна тужгес но кышкытэз висён шуи ке. Ассэ сюдыны, дӥсяны быгатӥсьтэм адями, таӵе югдуре шедьыса, ассэ пӧртэм сямен возе. Огъёсыз выё лушкаськонэ, адями виылон, наркотикъёсын эшъяськон, юон дуннее. Мукетъёсыз, кулэ луымтэзэс шӧдыса, улонысь кошконэз быръё. Жаляса верано луэ, ужтэк кылён черлэн гижыосыз вуэмын шаерысьтымы котькуд гуртэ, городэ. Палэнэ кылемын ӧвӧл Можга ёрос но. Калыкез уже интыянъя службаысь валтӥсь специалистлэн Виктор Петрович Марковлэн верамезъя, сентябрь толэзьлы городын но ёросын 1839 ужтэк кылемъёс лыдъясько. Соос пӧлысь 428-эз - гуртын улӥсьёс. Гужем но сӥзьыл та лыдпусъёс кулэсмогес: тросэз интыяськыны быгато гурт хозяйствоосы ю-нянь, картофка но бакча сиён октон дырлы. - Виктор Петрович, маин юрттыны быгатэ тӥляд службады ужтэк кылем адямилы? - Нырысь ик верам потэ: вань мылкыд карисьёсты ми лыдэ басьтыны ум быгатӥське. Со понна адями трос документъёс бичано луэ. Учкиськом, кӧня солэн пудо-животэз, мабыдӟа бакчаез, вань-а кыӵе ке техникаез. Луонлыкъёсыз вань ке ассэ но семьязэ сюдыны, вылаз ик, гурт администрация милемын соглаш луэмзэ вера ке, быгатӥськом сыӵеосты ужтэк кылемъёсын лыдъятэк но. Яке огкыл (договор) гожтӥськом. Соку ас хозяйствоязы ужась адямиослы ми кӧня ке коньдонэн, пудо сиёнэн юрттӥськом. Озьыен, луонлык сётӥське ас дорад ужаса барыш поттыны. Туннэ нуналлы таӵе амалэн 28 адями ужа. Огкыл гожтэмъя соос одӥг но ӝыны ар ми доры уг ветло. Гуртысь калык валаз ини, колхозын ке уж ӧвӧл, луонлыкъёс вань гуртад тыршыны. Азьло аръёсын ӵошатыса, ужтэк кылемъёс ми доры али ӧжытгес вазисько. Валало, пособие дыраз тырыны ум быгатӥське. Али дырлы 1998-тӥ арлэн февраль толэзез понна гинэ пособие сётъямы. Коньдон интые сиён-юонэн басьтыны соглаш луо ке, соос 1999-тӥ ар понна басьяны кутскизы ини. Луонлык кылдыку, ми дорын сылӥсьёслэсь газ, улон инты понна тыронъёссэс ас выламы басьтӥськомы. Службае туж трос егитъёс вазисько. Вань ужтэк кылемъёс пӧлысь куиньмосэз соос. Тужгес но шуг уже интыяны бухгалтеръёсты, педучилищеез но медучилищеез йылпумъямъёсты. Ог сизьым мурт вылӥ образованиен егитъёс: инженер-механикъёс, дышетӥсьёс. Со дыре ик верам потэ, шуг-секытъёс уг кылдо лэсьтӥськисьёсты уже кутонэн. Огдыре штукатур-маляръёс ӧз но тырмылэ. Гужем но сӥзьыл троссэ гурт хозяйствоосы интыяны быгатӥськом. Туэ огдырлы уж шедьтӥз 809 адями. Соос пӧлысь тросэз егитъёс. Пиосты комбайнэн, тракторен ужасьёслы юрттӥсе басьто. Адями ужез яратэ ке, пӧрмытэ ке, сое воксёлы но доразы кельто, но таӵе учыръёс трос ӧвӧл. Ужтэк кылемъёсты интыямзы понна хозяйствоос милям фондамы налог тыронлэсь мозмытӥсько. Гужем вылтӥ дорамы трос вазиськылӥзы школаын дышетскисьёс. 1400-эз соос ужазы колхозъёсын, 305-ез - заводъёсын, лэсьтӥськисьёс дорын. Вуоно дырлы но "Конус" предприятиен вань огкылмы, ар бырытозь ог дасо адямиез сӥзьыл каникулъёс дыръя уже интыялозы. Ми доры вазиськисьёс пӧлын трос инвалидъёс. Гуртъёсысь гинэ 30 адями. Соос пӧлысь куинез гинэ уже кутэмын, мукетъёсыз черодзэс витё. Службаямы нуиське выль специальность басьтонъя дышетон уж. Тани туэ 189 адями дышетске ини, 57-ез - гуртысь. Но вань мылкыд карисьёслэн таӵе луонлыкъёссы ӧвӧл. Дышетскон сярысь огкыл гожтон понна, куинь пӧртэм кинюртэм кулэ: дышетскыны малпась адямилэн, милям службамылэн но уже кутыны чаклась предприятилэн. Уж сётӥсьёсты утчаны ми но юрттӥськом, но тросгес асьсэос, выль специальность басьтыны мылкыд карисьёс, бызьылоно луо. Азьло аръёсы та амалэн дышетскон дунтэк вал ке, али ӝыны дунзэ ми тыриськом, ӝынызэ - ачиз дышетскиись. - Мукет ёросъёсын ӵошатыса, Можгаысь ужтэк кылемъёсын кылдэм югдурез кызьыгес дунъясалды? - Югдурез туж урод шуыны уг луы. Кыкетӥ квартал бере милям службамы басьтӥз куинетӥ инты - Пичи Пурга но Як.-Бодья ёросъёс бӧрсьы. Чакламын вал ужан амалъёсмы, кӧня адямиез уже интыяны быгатэммы. Можга ёросэ город но пыре. Ужтэк кылемъёслэн лыдзы, гуртъёсын ӵошатыса, городын унолы тросгес, соин ик та ласянь милемлы шуггес йӧтэ, мукет ёросъёслы сярысь. Берло аръёсы милемлы бадӟым юрттэт сётэ город но ёрос администрациослэн постановленизы. Та документъя нырысь ик уже интыяськыны луонлык сётӥське инвалидъёслы, быдэ вуымтэослы, кема дыр ӵоже ужатэк улӥсьёслы яке семьяын кык но солэсь тросгес ужтэк кылемъёс вань. Таӵе амалэн 93 адями интыяськемын ини, со пӧлысь 28-эз - гуртын улӥсьёс. - Виктор Петрович, тӥ доры лыкто вань луонлыкъёссэс эскерем адямиос яке дышетскемзыя уж уг шедьто? Оло, татын утчалозы ай шуыса вуисьёс но вань-а? - Пӧлаз котькыӵеез сюре. Тани али картофка, ӵуж кушман октонэ лэзьяськом. Кудъёсыз милемлы маза уг сёто, выльысь но выльысь уже курисько. Нош азьтэмъёсызлэн отчы но мынэмзы уг поты. Соин ик ми дорын кык но, куинь ар но сылӥсьёсыз вань. Берло дыре милям арнялы быдэ кенешонъёс ортчыло. Отын вераськон мынэ арлэсь кема ужасьтэм адямиос сярысь. Шараяны турттӥськом, малы со татчыозь интыяськыны ӧз быгаты, кыӵе мугъёсыз. Бырйыны сётӥськом: яке со ачиз уж шедьтэ, яке кытчы лэзиськом, отчы мынэ. - Кызьы малпаськоды, азьланяз ужлы кулэяськисьёслэн лыдзы кулэсмоз-а? - Городын выль предприятиос, огазеяськонъёс уг усьтӥсько. Колхозъёсын но алама ужасьёсты воземзы уг поты. Соин ик уж интыос азьланяз уз йылэ. Тол азьын ужасьтэмъёслэн лыдзы котькуд ар будэ. Туэ но ог 2500 пала вуоз, дыр. Одӥг оскон - гужем но сӥзьыл ужъёс вылэ. Ужтэк кылемъёс понна туж тупасал гондыръёслэн улонзы: гужемзэ, сӥзьылзэ кӧттэ тыр, нош толзэ чиньыдэ сюпсьыса кӧл вылэм. Но, жаляса верано луэ, инмар сётымтэ асьмелы сыӵе луонлыкъёссэ. Толзэ но, гужемзэ но сием потэ, нош уж ӧвӧл. Л. ПОСТНИКОВА. ШӦКЫЧ Мынам телевизоре Чутырьысен... читыр-чутыр Командировкае потаку, оломае но адӟоно луэ. Нош одӥг учыр сярысь ми тӥледлы но мадёно кариським. Игра-Ижевск сюрес кузя бертыкумы, "Волгамы" азе потӥз кырыж- мерыж ширтӥсь "ЗИЛ" автомашина. Я со сюрес шоры потэ, я шуак паллянэ коже. Секыт грузэн, цементэн, тырмытэм мынӥсь машинаез азьпалтоно кариським. Соку ик адӟим: руль сьӧрысь водитель но со вӧзын пукись воргорон кыксы ик тяп-тяп кудӟемын. Ма, тазьы шудтэм учырозь но кыдёкын ӧвӧл ук. Мар кароно? Кызьы дугдытоно та машинаез? Ярам, кӧня ке мыныса синйылтӥм ГИБДД-лэсь машиназэ. Огъя кужымен кудӟем водитель дугдытэмын вал. Глазовысь механизацияя но лэсьтӥськонъя управлениысь (УМИАТ) водительёс Александр Изотов но Александр Евдокимов та нуналэ Граховое цементэн ӧз вуэ. Кызьы тодмо луиз, соос аракыен сокем усыкмыны вуиллям, Чутырьысь "Пельнянь" кафее пырамзы бере. Соин ик Чутырьысен сюрессы читыр-чутыр кошкиз. Ярам, таяз учыре шудтэм учыр дыраз палэнтэмын вал. Т.Михайлова. Л.Квакин (фото). Шӧкыч Чылкак паймоно та вылӥ кивалтӥсьёсмылы - Прзидентлы но, Правитльстволы но. Соос уг адӟо шат, мар лэсьтӥське странаямы. Тани алигес нош ик бензилы дунъёс будӥзы. Табере тод ини, со вуберган кадь вань дунъёсты сьӧраз кыскоз. Паймиськом... (Гожтэтысь) Кунул бодыен воргорон: - Пиёк, машинаямы одӥг шапык но бензинэз ӧвӧл ни. Больницаозь вуоно вал... Оло, мотормы йӧлын ужалоз? Воргорон: - Милям асьмелэн но эстӥськонлы коньдонмы быриз. Тани эксперимент ортчытыны дауртӥськом ай. Суредэз Л. ПРОЗОРОВЛЭН. "УДМУРТ РЕСПУБЛИКАЫН БЮДЖЕТЭЗ КЫЛДЫТОН НО БЮДЖЕТЭЗ БЫДЭСЪЯН СЯРЫСЬ" УДМУРТ РЕСПУБЛИКАЫСЬ ЗАКОНЛЭН 21-ТӤ НО 22-ТӤ ЁЗЭТЪЁСЫЗЛЭН КУЖЫМЗЭС ЫШТЭМЗЫ СЯРЫСЬ УДМУРТ РЕСПУБЛИКАЛЭН ЗАКОНЭЗ 1-тӥ ёзэт. "Удмурт Республикаын бюджетэз кылдытон но бюджетэз быдэсъян сярысь" Удмурт Республикаысь Законлэсь 21-тӥ но 22-тӥ ёзэтъёссэ кужымзэс ыштэмен лыдъяно, сое Россия Федерациысь Бюджетъя кодекслы тупатытозь. 2-тӥ ёзэт. Юнматоно: республикалэн вуоно арлы бюджетэз сярысь Удмурт Республикалэн Законэз ӵектӥське, эскериське но кутӥське, Удмурт Республикалэн бюджетэз сярысь законлэн инъетэз но "Удмурт Республикаын бюджетэз кылдытон но бюджетэз быдэсъян сярысь" Закон вылэ пыкиськыса. Со тупаны кулэ Россия Федерациысь Бюджетъя кодекслы, "РСФСР-ын бюджетэз кылдытон но бюджетэз быдэсъян сярысь" РСФСР-лэн Законэзлы но огъя Положенилы. 3-тӥ ёзэт. Та закон кужыме пыре сое газетъёсын печатлам бере. Удмурт Республикаысь Кун Кенешлэн Тӧроез А.А.Волков. Ижевск город, 1999-тӥ арын 5 октябре. � 85-ИИ. Бакчаен артэ куяськон инты Завьялово ёросын трос гинэ сад-бакчаос, нош ваньмаз-а отын чылкыт меда? Шуг вераны. Эскерем 20 бакча пӧлысь, кылсярысь, витяз гинэ жуг-жагез куян инты но сое поттон радъямын. Со вакытэ ик Сарапул, Нылга но Якшур-Бодья сюресъёс кузя чакламтэ жаг куян интыос лачак гинэ. Соин валче Инкуазез утёнъя кун комитетын но ёросъёсысь та службаосын ужась инспекторъёс 15 алон гожтоно луизы. Табере сад-бакча огазеяськонъёслэн кузёоссы кыл кутозы но 10-20 ичи уждун мында штраф тырозы. Уго котькуд сад-бакча массивын уставъя радъямын луыны кулэ жуг-жаг куян но сое поттон. Н.Щеголева. Будо егит фермеръёс Кварсаысь 14 номеро училищеын дасяло егит фермеръёсты. Со понна татын вань луонлыкъёс кылдытэмын. Нылъёс но пиос пӧртэм гурт ужъёслы дышетско: скал кыско, нянь пыжо, бакча-сиён будэто, муш вордо. Пичи фермаязы кык скалзы но вань. Отын пиналъёс ужало, звеноосы люкиськыса. Пудо вордон ужлы сизьыметӥ арзэ ини дышетэ Е. Р. Файдуллина. Йӧллэсь сиёнъёс поттон понна училищеын нимысьтыз лаборатория усьтэмын: егитъёс татын вӧй шукко, йӧл кузято. Фермаын ужаны дышетэ мастер Е. Р. Файдуллина. Т. БАННИКОВА. Туспуктэмез В. КАМАШЕВЛЭН. Пичи но бадӟым сценаосын Драмая кун театр 65-тӥ сезонзэ кутске Владимир Короленколэн произведениосызъя дасям "Хапун" выль спектаклен. Соц-арт амалэн пуктэм комедия-плакат бордын ужаз Москваысь режиссёр Юрий Урнов. Со дышетскемын Россиысь театральной искусствоосъя академиын, режиссёр но педагог луыса быдэс дуннеез котыртӥз, трос пол вал Америкаын но. Театрлэн репертуарез туэ но узыр. Дасяське А.Островскийлэн пьесаезъя "Волки и овцы" спектакль, М.Булгаковъя - "Полоумный Журден". Валтӥсь режиссёр В.Сафонов пуктыны малпа Ф.Достоевскийлэн произведениосызъя "Кроткая" спектакль. Утчало туала пьесаосыз но. Кельшытӥзы Марсель Ашарлэсь "Рохлязэ". Выль постановкаосын пичи сцена вылын кужымзэс эскерозы дас егит артистъёс, соос туэ театре вуизы, Челябинскысь культурая институтэз йылпумъямзы бере. В. Лагунов. Депутат 200 пол калыке поталоз Кун Думаысь депутат Андрей Солуянов таяз арняысен ас бырйисьёсыныз пумиськонъёс ортчытъяны кутскиз. Со малпа 200 пумиськон ортчытыны. Думаын ар ӵоже ужамезлы йылпумъянъёс лэсьтэм сяна, со, калыкен вераськыса, азьланезлы ужпумъёс чаклалоз. Кызьы тодмо ини, 28 номеро округъя Андрей Владимирович Кун Думае быръёнъёсы выльысь пыриськыны мылкыд кариз. Бырйисьёсын пумиськонъёссэ депутат Воткинск городысен кутскиз. Ватсаса вералом: Россилэн парламентаз 4 ар ӵоже ужатозяз, А. Солуянов законъёсы 80 пала выль проектъёс но ватсанъёс ӵектӥз, 2000 пала адямиослэсь куронъёссэс быдэстӥз но 900 пол бырйисьёсын пумиськылӥз. Т. МИРОНОВА. Толэзь ӵоже Арлыдоослэн нуналзылы сӥзьыса, Сюмси ёросысь Калыкез улон-вылонын утёнъя центрын ужасьёс толэзь ӵоже мӧйыосты син азязы возёзы. Радъям месячник дыръя соос оген улӥсь пенсионеръёслы но 400 манетлэсь ӧжыт басьтӥсь пенсия чотын улӥсьёслы нимысьтыз юрттэт висъялозы. Со сяна, мӧйыослы юрттозы на бакча сиёнзэс октыны-калтыны, юрт котырзэс утялтыны, толлы пу дасяны, сӧриськем электрооборудованизэс (утюгзэс, электроплитказэс) тупатъяны. Кулэяськисьёслы кыле на ёросысь та центре вазиськонэз гинэ. В.Андреева. Шӧкыч Тӧро бырйизы Серемес верос Огаз люксськоназы гурт калык огмылкыдын тазьы шуиз: берло аръёсы, пе, улыны маза ӧвӧл ни лушкаськисьёсын, юисьёсын, калгисьёсын, керетӥсьёсын. Маке но кароно. А то, пе, бырон калэ вуомы, нылпиосмылэн нылпиоссы выльысь ньыльпыдъяськыса ветлыны кутскозы. - Малы оломар выльзэ малпанэз, вашкалаосмылэсь амалзэс кутоно но тӥни, - шуиз Микол, азьвыл партсекретарьын ужам воргорон. - Кыӵе сыӵе амал? - юа калык. - Ма, вунэтӥды шат ини, пересьёс, колхозъёс кылдэмлэсь азьвыл, пе, котькуд гуртлэн аслаз тӧроез вылэм. Умойтэм ужез понна со адямилэсь кылзэ юаны, наказать карыны быгатэ вылэм. Гурт улонэз но со радъя, эскере, чакла вылэм. Одӥг кылын вераса - кузё. - Бен, бен, озьы вал, - тушсэ маялляса интыысьтыз султӥз Тӥконь песятай. - Солэсь ваньмыз кылзӥськизы. Тӧрое бырйиськомы вал сӥлы, гажано адямиез. - Гажано сяна , со калыкен но ужаны мед быгатоз, опытэз мед луоз, - будэтӥз Микол. - Мон кема аръёс ӵоже партсекретарьын ужамын бере, ӟеч тодӥсько, мар со сыӵе уж. Адямиез но пыртӥз адӟыны быгатӥсько. Люкаськем калык кӧня ке чал-чал пукиз, малпаськиз. - Валентинэз пуктоно! - Лади кеськиз.- Мар понна? - юаз Микол. - Ма, ӟеч адями со. - Тыныд со ӟеч, эшед бере, - шуиз Микол. - Татын котыр ласянь эскероно, эшъёс. Тӥконь агай, тон мар шуысалыд Валентин сярысь? - Мон но ӟеч адями шуысал. - Ӟеч но ӟеч. Ӟечен бон кыдёке-а мынод? Кулэ дыръяз тӧро шизэ но поттылыны мед быгатоз. Нош Валентин быгатоз-а? Уз, уз быгаты. Нюлымтэ кунян на со - вот кин. Мумиз-аизлэн добраез вылын каньылак улэ. Нош ачиз ужаса маке поттӥз-а ини? - Соку Сергеез пуктоно. - Сергеез?! Ну, эшъёс, таӵезэ ӧй витьы вал тӥлесьтыд. Ма, нёжто уд адӟиське! Со ведь коньдон понна кышнозэ но вузалоз. - Витяез соку. - Таиз вина бекчее выйылэ. - Иванэз. - Сямыз - котэм нянь. Со пала но, та пала но погыльскыны сётске. - Юрикез. - Гынтул, вамен пуппы. - Семонэз. - Азбарезлэсь кыдёке уг адӟы. - Лёняез. - Синмыз - мурт добра вылын. - Петяез. - Азьтэмез аслэсьтыз бадӟым. - Олёшез. - Чоръянэз мултэс чоръя. Нылкышно кышетэз адӟемез ик уг луы. - Мон-а чоръясько?! - Олёш ӧз чида, киосыныз шоналляса кесяськыны кутскиз. - Чоръялод туала нылъёсын, куӵектонэз гинэ кылиз на! Соос табере асьсэос чоръяло ини! - Шонер, шонер! - эшсылы дурбасьто егит воргоронъёс. Нылкышноос воргоронъёсты лӥятыны выро, куд-огез картсэ ӟыгыртэ но ини, куд-огез бамзэ но чупа. Мырдэм но кызьы сӥятӥзы пӧзись вирзэс. - Олексан тупалоз, - шуиз Тӥконь песятай. - Улон опытэз вань, калык азьын но ассэ возьыны быгатэ. - Нош тодӥськоды на-а, мар понна сое ӧжыт гинэ тюрьмае ӧз пуктэ вал? Калык чус кариськиз. - Колхоз мастерскойысь аккумуляторез лушказ. - Кӧня верано - ӧй лушка мон со шакшы аккумулятордэс, - интыысьтыз султӥз Олексан. - Ачим базарысь басьтӥ вал. - Нош мастерскойысез кытчы луиз? Тон отын ужаськод вал ук. - Кытысь мон тодӥсько. - Ма, мар со толлозэ бугыръянэз на! - кин ке кеськиз. - Ӧвӧл, ӧвӧл, эшъёс. Вире пыӵам сям куке но нош кыре потэ. Тӧро бырйиськомы ук, со асьмелы синучкон азьын кадь быдэсак мед адӟиськоз. Калык ӝамдэлы чусомиз. Йӧно воргоронъёссы быризы, лэся. - Насьтаез пуктоно! - кин ке кеськиз. - Насьтаез! - интыысьтыз чорк султӥз Ладилэн кышноез. - Вунэтӥды шат, кызьы со ныл дыръяз мынэсьтым Ладиме ӧжыт гинэ ӧз тала. Юмшась мумы пуны со - вот кин! - Мынам но Сергее Насьталы луыса утӥсь пунылы пӧрмылӥз вал, - ымзэ пеперъяса нёжтӥз Сергей кышно. - Ярам ӟеч адямиос юрттӥзы. - Улошоятӥд-а, мар-а?! - кеськись луиз. Калык гурак серектӥз. - Ма, гуртоос, кин-о адӟиз ини нылкышно гурт тӧроез, - шуиз Тӥконь песятай. - Мон егит дыръя нылкышно кутэт миськись, пӧрась вал. - Тӥ дыръя со озьы вал, нош ми дыръя - тазьы! Мон тӧрое пуксё! - киоссэ кӧтурдэсаз пуктылыса, калык азе Райса потӥз. Бамыз - ӵыжыт улмо, ымдурыз - лемлет мак сяська, синъёсыз - зорись вуюись, йырсиез - ӵуж мертчан, мугорыз - вӧлэм мунё. - Нош мар бордысен ужаны кутскысалыд тон, мусо дыдые? Вакчияк программадэ вера вал, - егит кышномурт доры матэ но матэ, коӵыш кадь небыт лёгаськыса мынонъяз юа Микол. Тани со Райса доры вуиз, шораз пальпотыса чильтро учкиз, вӧзаз ик кариськиз. Тани- тани бордаз ӝиптӥськоз, ӟыгыртоз. Райса шуак берыктӥськиз но Миколэз бордысьтыз донгиз. Соиз кышномуртлэн пыд азяз ньыльпыдъяськыса усиз. Райса пыдзэ Миколлэн тыбыр вылаз поныса, калыклы шуэ: - Тынэсьтыд ужан программадэ басьто, Микол агай. Партсекретарьын ужан программадэ. Вералэ али, гуртоос, кин асьмелэн кышноез вылэ кизэ ӝутылэ, кин мурт нылкышннос дортӥ арняен-арняен ветлэ, кин колхоз добраез возэн-возэн дораз пыртылӥз, кин, капиталист сямен, кӧтсэ мычыса гурт кузя лӧш-лӧш ветлэ?.. Эн кепыралэ, вералэ, гуртоос! Шып пуко гуртоос. - Тон со, Микол агай, - ачиз ик шуэ Райса. - Соин ик нырысь уже таӵе луоз: тонэ гуртысь улляно. Гуртоос, кин монэн соглаш, кидэс ӝутэ. Чус-чус омыре киос выллань ӝутскизы. Азьмынӥсьёс радын Сарапулысь сурлы нош ик зарни! Тужгес но ческытэз сур - Сарапулын, шаерамы сое ӟеч тодо. Тодо шаермылэн палэназ но. Тани алигес гинэ Кам дурысь дрожжи но сур поттӥсь завод нош ик пусъемын дуннеысь вылӥ наградаен - "Зарни пальмаен". Призэз юнматӥз Европаысь "Монде Санц Фронтиере" ассоциация. Пусъём на: Сарапул городысь сур пӧзьтӥсьёсты Европаын кемаласенгес тодо ни: 1996-тӥ арын соос кык пол пусъемын вал "Золотая пальма" но "Золотая пинта" наградаосын. Зарни юнме шорысь уг сётӥськы, озьыен, Сарапулысь предприятилэсь ужзэ кунгож сьӧрын вылӥ дунъяло. Россилэн экономикаяз "Сарапульский дрожжепивоваренный завод" ЗАО озьы ик валтӥсь инты басьтэ. Со шедиз Национальной ежегодниклэн "Синие страницы России" сборниказ, устоосыз пӧлысь устоосыз ужась коллективъёс радэ. Та конкурсэз ортчытӥз ООН-лэн экономикая экспертной советэз. Ӟечсэ ӟечен верам потэ, мед тодозы со сярысь шаерамы улӥсьёс но, солэн палэназ но. Сур татын пӧзьто вашкала калык амалъёсъя, асьме шӧмын шутыса, консервантъёс, пӧртэм пумо туала суретъёс ватсатэк. Тӥни малы со небыт но ческыт пӧрме. Заводлэн лабораториез республикаын огез ӟечез луэ. Татын огкутскемен куамын пумо эскеронъёс лэсьтыны луэ, микробиологическойзэ но вераса. Вылӥ ӟечлыко, янтарен пальккаськись юонэз озьытэк уд пӧрмыты. Вормон огез но капчиен уг сётскы. Со бордын уен-нуналэн тырше быдэс коллектив, кивалтӥсез Никлай Петрович Юшков. Та визьмо, быгатонлыко, чупрес сямо воргоронэз Удмуртиын ӟеч тодо. Николай Петрович - Кун Кенешлэн но Сарапул городысь Думалэн депутатэз, солы сётэмын "УР-ысь промышленность удысын дано ужась" ним. Трос шуныт кылъёс вераны луозы Николай Юшков сярысь, огзэ пусъём: сое ноку но мӧзмыт, кунэрес тусын уд адӟы. Самой секыт вакытэ но пальпотоз, сюлэмад улон тылгизьы кенжытоз, ӟечезлы оскон сётоз. Та заводэ но юнме шорысь ӧз вуы ук: 1988-тӥ арын оборонной заводысь цехлэсь начальниксэ пукто куашкан калэ вуэм предприятиез ӝутыны. Ӝутӥз! Сарапулысь сур пӧзьтӥсьёслэн данзы табере Европаозь вӧлмиз ни. Нош директорзы сярысь ке верано, таин со уз буйга на: ялан выль но выль амалъёс утчалоз. Сыӵе ини сямыз - одӥг интыын уз пукы. Л. МЕДВЕДЕВА. Редакцилэсь: "Сарапульский дрожжепивоваренный завод" ЗАО но солэн валтӥсь директорез Н. П. Юшков сярысь "Удмурт дунне" огпол гинэ ӧз гожъя ни. Ми шумпотӥськом соослэн ужаны быгатэмзылы но сюлмысьтымы ӟечкыласьком эшшо одӥг награда басьтэменызы. Политика Туннэ - Чечня, со бӧрсьы кин? Россия пӧрмиз ож бусылы. Чечня, Дагестан ас вылазы шӧдо ни шимес политикалэсь бервылзэ. Улон юртъёс пуштыло ни страналэн шорсюлмаз но мукет городъёсын, быро чик янгыштэм адямиос. Удмуртия но Дагестанын ыштӥз ни куинь пизэ. Ваньмыз со герӟаськемын туала правительстволэн шудонъёсыныз, власть понна нюръяськонъёсыныз, криминаллэн кивалтон удысэ мургес но мургес пыриськеменыз. Хасавюртын кутэм тупанкылъёс но Кремльлэн кык пумо политикаез, выль Чечня кылдытон но Терек вӧзтӥ "санитарной кордон" пуктон - ваньмыз со алдаськон, синпӧет. Россилэн армиез туннэ нош ик Чечняе пыриз, солдатъёсмылэсь мылкыдзэс ӝутыны выро патриотической кужымъёс. Нош кин оскытоз, вуоно быръёнъёс азьын куд-ог политикъёс отчы келям пиосмы вылын асьсэлы кулэ куараос уз люкалэ шуыса? Вань ук пӧламы котькыӵеез. Та юанлы валэктон сётыны курим Россия Федерациысь Кун Думалэсь депутатсэ, Удмуртиысь коммунистъёслэсь кивалтӥсьсэс Николай Иванович Сапожниковез. - Народно-патриотической кужымъёс, зэмен но, Кавказысь террористъёслы пумит кутӥськись ужрадъёсты умоен лыдъяло, но со уг вера, Ельцинлэн Чечня ласянь политиканыз соглаш луонэз. Синтэм муртлы но адске ук, Кремльын пукисьёс пӧртэм амалъёс пыр Россиын чрезвычайной югдур ялыны выро, соин ӵош капчиен воштозы Думае быръёнъёсты. Ваньзэ та вормонъёсты лякозы Путин вылэ. Озьы нош ик вож сюрес усьтӥськоз туала господаослы-кивалтӥсьёслы. Народно-патриотической союз вазиське Россиысь вань улӥсьёслы: Кавказ калыкез юнме шорысь янгыше уськытэмысь дугдоно. Россия понна вань нациос одӥг кадь луыны кулэ. Асьмелэсь эшлыко кусыпъёсмес кужмысь сӧрыны тыршо бандитъёс но олигархъёс, соос, кин узырме адями вир вылын. - Николай Иванович, та ялымтэ ожмаськонлэн тылӝуэз зарезь сьӧрысь "эшъёсмылэн" ужзы ӧвӧл-а? Таӵе малпанэ вуоно, исламлы оскисьёслэсь Кавказ котыре кужмысь мерскемзэс чакласа. - Со озьы ик вань. Ӵапак Америкаысь но Израильысь "юрттӥсьёс"-стратегъёс ваче пумит шуккыны выро православиез но исламез. Тӥни малы ӟуч калыкез узато чеченъёс вылэ. Чеченъёс бӧрсьы луозы ингушъёс, бигеръёс... Славянъёс пӧрмозы "дуннеын выль порядок" кылдытӥсьёслы, быдӟым война пуромытӥсьёслы. Тӥни кытчы вуттоз Кавказын кылдэм югдур. Россиысь вань патриотъёслэн нимынызы мон туннэ верасько: Россилэн улоназ, солэн политикаяз пыриськыны нокинлы но право сётэмын ӧвӧл. Жаляса верано, тае уг валало, валамзы но уг поты Кремльысь туала политикъёслэн. Соосын валлин быро адямиос, азьвыл данзэ ыштэ армия, куашкало гуртъёс, городъёс. Патриотической кужымъёс югдурез тупатон вылысь дась ужаны Россиысь вань политической партиосын. Кавказысь ожмаськонэз дугдытоно. Со понна воштоно Кремльысь "семьяез" но со котырысь нюжтӥськисьёсты-бырйисьёсты. Тӥни малы быръёнъёсты дыраз но умой-умой малпаськыса ортчытоно. Вераськиз Т. КУЗЬМИНА. Ӟеч дунъязы Кылем толэзе Нижний Новгородын ортчиз "Россия дауръёс вискын" промышленно- экономической выставка. Возьматонэ пыриськиз 400-лэсь уно предприятие. Озьы ик вузъёссэс возьматӥзы Польшаысь, Белорусиысь предприятиос. Ижевскысь механической завод отчы нулдӥз пызь, сакыр песок, сылал но со выллем арбериосты пакетъёсы лэзьян автоматсэ, вить пумо электроинструментсэ, кухняын ужан куинь пӧртэм комбайнъёссэ, электрокардиостимуляторзэ, "Уро-Биофон" приборзэ, му вӧй поттӥсьёслы дасям компрессорзэ. Выставкае ветлӥсьёс заводысь продукциез синйылтӥллям. Кызез фирмаос, кылсярысь, басьтыны мылкыд каризы фасовать карон автоматъёсты. Но басьяськисьёслэн куронзы сыӵе: автоматъёсты завод вакчи дыр куспын дасяны мед быгатысал. Н. НИКИТИН. ВАЛЭКТЭ ЮРИСТ АТАЕ ОЖМАСЬКИЗ Атае ожмаськиз фашистъёсын, пусъемын трос орденъёсын но медальёсын. Сӧсырмыса но кема курадӟыса, 1967-тӥ арын кулӥз. Вань-а законъя мынам кыӵе ке но льготаосы транспорт яке налог ласянь но мукет? Вань ке, кӧня ар яке аресозь соос луо? Галина Константинова, пенсионерка. Завьял районысь Ягул черкогурт. Ойдолэ та юанэз сэрттом-пертчом нимаз законъёсъя. 1991-тӥ арын 9-тӥ декабре кутэмын Россия Федерацилэн 2003-1 номеро Законэз. Со нимаське тазьы: "Физической лицоослэн ваньбурлы налогзы сярысь". Со куре: лэсьтэм макеос понна пенсионеръёс налог тыро Россия Федерациысь пенсиос сярысь законъёсъя. Городъёсысь, посёлокъёсысь, черкогуртъёсысь (селоосысь) Советъёс куд-ог адямиослы асьсэос льгота тупатыны быгато. Россия Федерациысь Калыкез шугадӟонъёслэсь утёнъя министерство но Тазалыкез утёнъя министерство 1993-тӥ арын 13-тӥ сентябре юнматэм 1-26 77-18 но 05-16/35-16 номеро гожтэтъёсазы пусйизы тани мае: тужгес ичи пенсия басьтӥсьёслэн удостоверениязы пуктӥське ӝыны дунын эмъюм вузан сярысь штамп; соослы ик пинь протез пуктӥське дунтэк. Жаляса верано луэ: тӥледлы музон льготаос чакламын ӧвӧл. КОРКА НО МОН ӜУТӤ НО... Ог дасо ар талэсь азьло гуртам корка пуктӥ. Атае висе вал ини бере, юртэз гожтӥзы нэнэе вылэ. Атае кулӥз. Нэнэе висе. Вань сузэръёсы быземын, ас семьяосынызы нимаз коркаосын уло. Мон улӥсько я Ижын, я гуртын (со город вӧзын). Берло дыре нэнэеным кылмы уггес тупа, вылаз ик, одӥгез сузэре, ас семьяезлэн юртэз вань ке но, лэсьтэм коркаме ас вылаз гожтыны турттэ. Марысь мар ке, кинлы законъя кыльыны быгатоз та юртъер? Владимир Горбунов. Завьял районысь Пирог гурт. Кулэм муртлэн ваньбурез мукетызлы кыле законъя но завещаниея (законъя - завещание законэз уг вошты ке). Законъя быдэн одӥг мында ваньбур басьтыны быгато: нырысетӥ черодын - кузёлэн нылпиосыз (пӧлазы � мукетыныз ваемъёс но вордыны басьтэмъёс), кузпалыз но анай-атайёсыз; кыкетӥ черодын - кулэм муртлэн вынъёсыз но сузэръёсыз, песянайёсыз но песятайёсыз. Кыкетӥ черодысь адямиос ваньбур люконэ пырисько, нырысетӥ черодын адямиос ӧвӧл ке, яке таосыз завещаниен кельтос (наследство) басьтыны лэземын ӧвӧл ке, яке таосыз ваньбурез асьсэлы карыны пумит ке. Россия Федерацилэн Граждан кодексысьтыз 534-тӥ ёзэт (статья) чакла: котькуд гражданин быгатэ ваньзэ ваньбурзэ яке ог люкетсэ завещаниея кельтыны одӥг яке кӧня ке муртлы, таосыз законъя наследникъёс пӧлы пыро-а, уг-а шуыса учкытэк. Ваньбур кузё аслаз завещанияз пусйыны быгатэ: сое яке тае кельтос басьтыны уг лэзиськы. Владимир Горбуновлэн юанэзлы тазьы валэктыны луысал. Шуом, тӥляд нэнэйды завещанияз пусъёз: юртъерез сётоно сузэръёстылы гинэ, тӥледды кельтоно ваньбуртэк. Тӥ быгатӥськоды судэ вазиськыны но асьтэды юрт кузёен лыдъятыны. Со понна люканы кулэ пӧртэм документъёс: лэсьтӥськон материал басьтэмды сярысь квитанциос но справкаос, тӥлесьтыд та юртъерез ӝутэмдэс адӟисьёслэсь верамъёссэс но мукетсэ. Лилия ШКЛЯЕВА. "Ижюринформ" агентствоысь адвокат. Юанъёстылы рос-просгес валэктон курыны быгатоды таӵе телефонъя: 25-33-70 ШӦКЫЧ Аферистка Иж карысь Первомай ёросысь пенсионеръёслы алигес туж ӟеч "юрттӥсь" шедем. Шуом, куд-огезлэн ульчае потаны но тазалыкез ӧвӧл ни. Нош улон инты, ву, газ но шуныт понна коньдон тыроно ук. Сотэк пеняед будоз. Ӵапак озьы малпаськонъяды, ӧс бордады кин ке тук! тук! йыгаське. - Кин со? - Мон Первомай ёросысь социальной юрттэт сётонъя нырысетӥ центраз ужась Бектышева луисько. - Пыре соку, пыре. - Ӟечбуресь! Кыӵе тазалыкты, кыӵе куронъёсты, маин юрттоно? - Ой, нылы, ӵапак дыраз пырид ай. Патер понна тыронэ куинь толэзьлы люкаськиз ни. - Соку вае книжкадэс, коньдондэс. Моментом быдэсто... Эшшо кӧня ке квартираосы кожаз на механической заводын азьвыл ужам нылкышно. Но Бектышева нокыӵе центрын уг ужа. Одӥг кылын - аферистка. Уно адямиосты "кутчаны" вуиз ни со. Но милиция сое татчыозь кырмыны уг быгаты на. Кескич ик адями, шӧдске. Социальной юрттэт сётонъя центрын ужасьёс тодады вайыто: татын ужасьёс улон интыосы ноку огназы уг ветло. Тодмотэм мурт пыриз ке, кылъёсызлы эн оске, документсэ юалэ. Нош марысь мар ке, 75-19-86 но 75-54-81 телефонъёсъя жингыртэ. Н.Николаев. ЮРИЙ ЛУЖКОВ АТАЙ МУЗЪЕММЫЛЭН ӴУКАЗЕ НУНАЛЫЗ СЯРЫСЬ Материал дасямын Ю.Лужковлэн "Московская правда" газетысь интервьюэзъя. Юрий Михайлович, буре-паллянэ вань шонаськонъёс бере, Россия вылэ усем кризисъёс бере, тросэз странаямы центризм сярысь поттылыны кутскизы. Нош Лужков, котьку сямен, вераськонъёс интые нимысьтыз ужрадъёс чаклаз? Ойдолэ соку ик кенешом, вераськон уг мыны, Лужков Москваысь хозяйствоез нуон, калыкез улон-вылонын утён, экономика удысъёс бордысь быдэс Россилэн политикаенЫЗ герӟаськем ужпумъёсы выжиз шуыса, вераськон мынэ сояз но, таяз но пайдаё ужан сярысь. Кызьы азьло шуылӥзы, совместительствоя ужан... Нош зэмзэ ке верано, нокызьы оскыны уг луы, кыӵе ке шӧдскымон мугъёстэк но кемалы чаклам планъёстэк политикалэн тулкымъяськись но пож зарезяз пырыны луэ шуыса. Планъёс сярысь - кӧня ке бергес. Мон, ма, мон гинэ меда, умой-умой валам ини: быдэс государствоысь югдурез лыдэ басьтытэк, асьмеос улыны но ужаны ум быгатӥське. Нош туала югдур сюлмаськытӥсь гинэ ӧвӧл, со туж кышкыт, со бадӟым шуг-секытэ вуттыны быгатоз. Туннэ асьме государствоен но экономикаен Дума но Правительство уг кивалто, кивалтэ Дуннеысь Валютая фонд. Странаямы ваньбур поттон, валовой продукт кык поллы синӥзы, сюосын предприятиос сыло, сиён-юон поттон удысын асьмеос эрикмес ыштӥм ни, куашкан калэ вуизы машина, автомобиль лэсьтон, электронной промышленность, потыны луонтэм сэргы пачкатӥм "оборонкаез" - нош ваньзы соос котькуд государстволэн инъетэзлэн люкетъёсыз ук. Нош кызьы дунъяны ӵектӥськоды правоосты быдэсъянэз? Государство кутэм законъёсты улонэ пыӵатыны уг быгаты. Тодамы ваём пенсиос, нылпи пособиос сётонэн герӟаськем ужпумъёсты, ум вералэ ни парламентлэн но правительстволэн куд-ог мукет решениосыз сярысь. Ваньзы соос янгышъёс, быдэстымтэ ужъёс гинэ ӧвӧл. Соос куашканлэн тодметъёсыз. Куашканэз дугдытон понна вань одӥг гинэ сюрес: кылдытоно политической система, кудӥз, супыльтӥсьёс интые, мед огазеялоз сазь малпаськыны быгатӥсь, узыр опытэн но тодон-валанъёсын зэмос специалистъёсты. Со решениос кутыны кулэ, дуннеын тодмо луэм но кутэм принципъёс вылэ пыкъяськыса. Собере законъёс гинэ кутылоно ӧвӧл, соосты быдэсъяны, улонэ пыӵатыны быгатоно. Сыӵе система пайдаё мед луоз государствоен демократия амалэн кивалтонын, озьы ик экономической, социальной политика нуонын. Ойдолэ берлань берытском: тӥ улонмылэн азинсконаз выль сямен пыриськыны малпады. Кылдытӥды политической кужым, ивортӥды власть понна нюръяськыны малпанъёсты сярысь. Кылдытӥм но ивортӥм гинэ ӧвӧл. Мон лыдъясько, ми быгатӥм сыӵе идеяос, малпанъёс шедьтыны, кудъёсыз борды миллионъёсын адямиос кыстӥськизы. Учке ай: политической огазеяськонмылы ар но ӧвӧл на, нош уно юалляськонъёсъя, со азьпалтӥз ни сю ар талэсь азьло кылдэм партиез. Озьыен, Россиысь гражданъёс быръё милемды, шонерзэ вераса, милесьтым ӧтёнъёсмес но ужпумъёсмес, соосты пайдаёгес но зэмлыкогес лыдъяло. Юрий Михайлович, мынам малпамея, тросэз огшоры адямиос тодыны тыршо, ма лэсьтоно странамес зэмос азинскон сюрес вылэ поттон понна. Таӵеос дурбасьтозы соослы, кин, сыӵе программа ӵектэм сяна, сое быдэстыны быгатэмзэ возьматоз на. Ми ужаськом, зэмос югдурез лыдэ басьтыса, соин ик умой-умой адӟиськом, кызьы воштоно налогъёсын радлыкез, выльдоно кредитъёсъя, тарифъёсъя, таможняя политикаез. Валамон, та туж секыт уж, но милемлы, теоретикъёслы сярысь, ужаны капчигес. Кылсярысь, мон таӵе дыръя асме предприятилэн кивалтӥсез интые пуктыны тыршисько. Ма со вите государстволэсь? Кыӵе юрттэт солы кулэ пайдаё ужан, ваньбур поттонэз азинтон понна? Инкуазь узырлыкъёсты поттӥсь удысъёслы сырьёез кунгож сьӧры келянлы оскиськыса улонлэсь куштӥськоно. Со ӟече уз вутты. Сюлмаськоно вылӥ технологиосын производствоос сярысь. Туж огшоры но ӟеч пример - ЗИЛ. Ми солы гуысь потыны юрттӥм но, автозаводын ужасьёслы сяна, уж сётӥм на ЗИЛ-лэсь заказъёссэ быдэсъясь 870 предприятиослы- смежникъёслы. Тазьы ик АЗЛК-ез но шуг-секытысь поттӥм. Юрттоно обороная промышленностьлы - кыл вылын ӧвӧл, кун заказэз быдэстэм понна тырмыт коньдонэн. Туала государстволэн номырлы но уксёез уг тырмы. Коньдон мед луоз, шуыса нырысь ик, налогъёсъя зэмос реформа ортчытоно, кыкетӥез, шыръяно расходъёсты. Кун аппаратэз кулэстоно, нош мозмем коньдонэз социальной удысэ сётоно. Ми кылдытӥм "Россилы 100 закон" программа. Отын вераськон мынэ Россиез азинтон понна экономикаен, коньдонэн, правоен но кивалтонэз радъянэн герӟаськем амалъёс сярысь. Та вакытэ экономикая программаез дасян йылпумъяське ни. Зэмзэ верано ке, туала правительстволэн одӥгез ляб интыез - со ас азяз уг пукты сыӵе ужпумез, кудзэ огвакытлы обществолы ӵектыны луысал. Тодмо тани ма: улонын демократической принципъёс, экономикаын государстволэн чакламез улсын, рынок государствлэсь коньдонзэ ваньбур поттонэ инвестициослы но социальной удыслы кутон. Нош со дыре ик кулэяськись муртлы государство юрттыны кулэ, вераськон мынэ ке ассэ сюдыны-дӥсяны быгатӥсьтэм инвалид, пенсионер, нылпи сярысь. Мукетъёсыз ужаса коньдон поттыны мед быгатозы. Нош кин кылдытэ огазеяськонлэсь идеологизэ, политиказэ? Вань-а валтӥсь теоретикты? Идеологияя штабмы милям вань. Та коллективен кивалтэ Александр Павлович Владиславлев. Но эшшо пусъё на, ми чылк-чылк теоретикъёслы ум оскиське, ужаськом практикаез ӟеч тодӥсь специалистъёсын, обществолэсь мылкыдъёссэ но ужпумъёссэ шӧдӥсь-валась адямиосын.Ӵапак сыӵе визьмо, социал-демократической идеяос вылэ пыкиськыса азинсконъя туала концепциос кылдытыны быгатӥсь муртъёс командаямы вань. Ми уж вылын возьматӥм кужмо команда кылдытыны быгатэммес - Москваысь кивалтон ёзъёслэсь пайдаё ужамзэс, мон сямен, токма супылтӥсьёс гинэ уг адӟо. Валамон, федеральной ёзъёсын уж кулэ каре мукет амалъёсты но мукет адямиосты. Соин ик команда кылдытон секыт мынэ, пумитъяськонъёс но вань. Нош милемлы ужаны быгатӥсь, тодон- валанъёсын но малпанъёсын адямиос кулэ. Капчиен таӵе команда уд люка, соин кадръёсын ужан азинске. Нылпиослы кырӟан Кошкиськом ми армие Кылъёсыз но крезьгурез Юлия Байсаровалэн Танк ми лэсьтӥськом, Войско люкаськом, Пуӵ! гинэ ыбылыса Шудыны дасяськиськом. Кошкиськом ми армие - Бӧрдэлэ ини, нылъёс. Кин тодэ, оло, ваньмы Ум ни бертэ дорамы. Ля-ля, ля-ля... Учке - кошкиськом, Тӥледыз утён понна Зол-зол нюръяськом. Ваньмыз ини вань, Бомбамы но вань, Но ӧвӧл тушмонъёсмы, Нокинэн жугиськыны. Ойдолэ бертом пока, Ужъёсмы ини ӝега. Ӧз ке луэ тушмонъёс, Бырозы ожмаськонъёс. Ля-ля, ля-ля... Ожмаськон дугдӥз. Солдатты гуртэ бертӥз, Адскыны бертӥз. Илдико Лехтинен - Хельсинкиысь Национальной музейын ужась, этнограф, пыр-поч эскерыны тырше шунды ӝужан пал финнъёсыз, тужгес но - поръёсыз, та удысъя кык книга но гожтӥз ни. Соин валче ик Лехтинен кӧня ке пол вуылӥз Удмуртие, Вуж Салья, Карамас-Пельга, Улын Юри но пор гуртъёсы. Берло вуылэмаз со Куӟебай Гердъя конференцие пыриськиз, солэн вордскем палъёсаз, Гербер шулдыръяськонэ ветлӥз. Матысь дыре учёной малпа асьме выжы калыкъёслэн материальной культуразыя энциклопедия- словарь дасяны. Та уже пыриськозы удмурт тодосчиос но. Финн тодосчи Илдико Лехтинен (паллянысез) удмуртэ тнографен Людмила Христолюбоваен. В. Камашевлэн туспуктэмез. Валентина Бекманова - поп-культура удысын Шаермылэсь крезьгуро дуннезэ возьматӥсь "Ялыке!" радиопередачаез кылзӥсьтэмез ӧвӧл, дыр. Кызьы ке но сетябрьлэн огнуналаз ӵыжак выль кырӟан чузъяськиз. Техно-поп удысысь маке. Тросэзлэн, тужгес егитъёслэн, йыразы юан чилектӥз, луоз, кин меда кырӟа шуыса. Со вал Валентина Бекманова, кун театрысь актриса. Зэм, тросэз сое тодо актриса палыныз, кылбуръёсыз пыр. Нош 4-тӥ сентябре ӵукна инбамын пичияк гудыртэм кадь йӧтӥз, луоз. Таӵе куазьлэсь мугзэ ачиз Валентина тазьы валэктӥз: - Людмила Кутяновалэсь "Со аръёс" кылбуъёсын бичетсэ лыдӟыса потӥ. Кельшиз мыным. Котькуд кылбурлы ачиз гур лыктэ. Сборникын медам кылле, кырӟан мед луозы шуыса малпай. Мынам котьку но кырӟаме потэ вал, ӧй гинэ дӥсьтылы усьтӥськыны. Но кузьым, сюрприз шуод-а, мар-а, лэсьтэме потэ вал аслым ачим. Вазиськи Александр Козыревлы. Кылзӥз со монэ, кельшиз, лэсьтӥз аранжировка. Мынам выль удысэз вормеме потэ. Эстрада кырӟан - ӵапак со удыс. Но котькыӵе удысэз вормон понна юрттӥсь, валась, мылкыдэз ӝутӥсь адями вӧзад луыны кулэ. Чылкак оген секыт, дыр, нырысетӥ вамышъёс лэсьтыны? Секыт. Та учыре матысь адямие луыны кулэ кадь вал кузпалы. Но али озьы шуыны уг на быгатӥськы. Тау Валентина Загуляевалы. Со шуиз: "Валя, лэсьты, ваньмыз тынад умой пӧрме". Сыӵе пыкет, валась мурт, конечно, туж кулэ. - Кыӵе темаосты тӥ ӝутӥськоды кырӟанъёсады? Пӧртэм. Но ваньмыз со яратон мылкыдэн пыӵамын мед луоз. - Нош уд-а тӥ кышкаське, куке но быръёно луоз шуыса - театр яке поп-культура? Уг. Соос ог-огзэс ватсалозы, ог-огзылы юрттозы гинэ. Поп-культура творческой дуннеме узырмытоз, выль буёлъёс пыртоз. Озьы бере, сӥзём Валентиналы малпанзэ быдэстыны бадӟым мылкыд. А. КЛЕМЕНТЬЕВ. Йыбырттыны ас гуртэдлы Ачим понна Уг бӧрд сюлмы Сюлэмы тй понна ббрдэ, КИНЛЭН ОВОЛ ни, Быдтэмын вордскем гуртэз, Атай юртэз. Потоз одно бертылэмед, Гуртэд ке но бвбл тынад^ Потоз, потоз вуылэмед Коть жамдэлы Гурт бервылад. Лотоз одно бертылэмед Вордскем гуртад, Атай юртад... Ӧз ке но лу вамышъямед, Тон бертылод уйвбтъёсад. Потоз одно бертылэмед Вордскем гуртад Гурт бервылад... Потоз, потоз на адземед Ваньзэ, мае возькод. ^ ^ ^ Малпанъёсам, мынам сюлмам Одйг кыл весь улэ. Уг гожтйськы ке но, сое пыртйсько вань кылбуръёсаг^ со кыд - УЛОК Зор^от акыльтйзы. Зорыса весь улэме^ Сюресъёс кизермизы, Ветлонтэм нбд луэмыӟ Кык иськем гинэ ини Мынонэ кылиз мынам, Нош озьы ке но, Тани Вуэме уг лу дораг^ Мон асфальт сюрес вылысь Кожыны ик кышкаськс^ Собере дэри пблысь Жог уд пот ни - тодйськс^ Гурт пала учкылйсько, Жалясько гуртоосты. Нош но нош тышкаськисько Кивалтйсь агайёсть^ Гурт дортй ик лэсьтйзы Карта кадь в6п-в6п 0Ъ^60. Нош гуртэз - обидизы, Палэнтй кошкиз 0ъ^60. Зеч сюрес гуртэ бз ву, Юнме^э витиз кальи^ Гурт сярысь малпась бз лу, ^Тодазы 40, дыр, бз льи^ Хбня пол гуртоосы Выль сюрес курылйзы, ^Трос пбртэм кенешъёсы ^ Куронъёс ысъялязы. Шуыло: ^Лэсьтом одно^^ Нокин но пумит бвбл. Малы ке Али ке но Сюресэз лэсьтйсь бвбл. КОТЬ 011361^, Коть толалтэ ^УД НО ПЫрЫ, УД НО [101". ^Сюрес ку луоз гурт^ ГВераны нокин уг тс^ Мон кожи асфальт вылысь, Коласько нап дэриез. ^^Тракторен потто гуртысь Йбл нуллйсь машинаез. ^ ^ А Тём пеймыт урамын Тбл вузэ но берга^ Кин ке та улонын ^301-133, дь^ карга. Кинлэн ке ук бвбл Кайгуэз но 80Ъ06. Кинлы ке нош лек тбл Изьыны чик уг сёт^ Байлыкын^ шуд пблын Пылась^ р,ыр, кин ке. Пичи нянь юдэслы ^Вань ёрмись кытын ке. Люкис^дГдь^ кин ке Улонэн та вие... Нош кин ке вордйське Та югыт дуннее. Кинлэн ке улонэз Юг нунал кадь лус^ Кинлэн ке адзонэз Сьбд уйлы укшалоз. ^Адями вордйське ^Кайгулы ^ я шудлы... Вань улон люкиське ^Тбдь но сьбд буёлль^ Кык гинэ буёло Улонэз адзисько^ Сое зэм но, олс^ Валамысь дугдйсько^ - *** Тушмонэз капчигес вормы^ ^Утча ай тон астэ вормьи^ьГ^ жуке шуг-секытлы сёт^^гсы^од, Гкужмыдлы оскемые(дугдйськод, жуке тон тодйс^с^ улыны ^туж бжыт кылемын ни тыныд^ Ыштытэк улонлы оскондэ, Кыӵе улӥськод-вылӥськод, Урал? Россия Федерацилэн Урал огазеяськоназ пыре Башкортостан, Удмуртия, Курган, Оренбург, Пермь, Свердловск, Тюмень, Челябинск областьёс, Коми-Пермяцкой автономной округ. Соослэн 8 толэзь ӵоже ужамзылы йылпумъянъёсъя учконо ке, секыт промышленность удысын ӟечгес ужало Свердловск но Челябинск. Капчи промышленностьын вань регионъёсты азьпалтэ Пермь. Та вакытэн ик 1998 арен ӵошатыса, 141,6 процентлы ятыргес вуз поттэмын. Сиён-юонъя ке учконо, ваньмызлэсь умой ужаз Челябинск область. Удмуртия та ласянь сылэ витетӥ интыын, Тюменез, Курганэз но Коми-Пермяцкой автономной округез азьпалтыса. Со понна асьмеос вань улосвылъёсты кельтӥськом сур пӧзьтонъя но кудӟытӥсь юонъёсты дасянъя. Удмуртия бере мыно Башкортостан, Челябинск но Пермь. Табере ӵошатом гурт удысэз. Сӥль будэтонъя мукет улосвылъёс пӧлын висъясько коми-пермякъёс. Соос миымлэсь ятыргес продукция будэтӥзы. Жаляса верано, но кылемез регионъёс миымлэсь бере кыльыса мыно. Соос радын Удмурт Республика но (97 процент). Йӧл кысконъя югдур уродгес. Уралъя оглом вераса, йӧл туэ ичигес басьтэмын, огез но республика, область та ласянь ӧз висъяське. Но, мукетъёсыныз ӵошатыса, ӟечгес ужазы Удмуртиысь, Тюмень но Свердловск областьёсысь фермаос. Нянь пыжон умой радъямын ваньмаз регионъёсын, Коми-Пермяцкой округез но Тюменез вератэк. Соослэн ужзы дыггес мынэ. Табере ӵошатом ужтэк кылемъёсты. Быдэс Уралэз басьтыса, та ласянь тужгес но висъяське Удмурт Республика. Асьме бере мыно Башкортостан но Тюмень. Кылемаз регионъёсын югдур умойгес. Уждунлэн быдӟалаезъя ке учконо, Удмуртия бере кылё на Курган но Коми-Пермяцкой округ. Тужгес но со вылӥын Тюмень областьын - 3996 манет, Пермьын - 1766, Челябинскын - 1449, асьмелэн - 1194 манет. Лыдпусъёс сётэмын июль толэзь понна. Со дыре ик одӥг адямилы толэзьлы сиён-юон "корзина" сылӥз Башкириын 751 манет, Удмуртиын - 942, Курганын - 785, Оренбургын - 779, Пермьын - 869, Свердловскын - 914, Тюменьын - 1211, Челябинскын - 852, Коми-Пермяцкой округын - 754. Дунъёс таӵеесь. Скал сӥль килограммез тужгес но дуно - 43 манет - Удмуртиын но Пермьын, дунтэмез - 32 манет - Курганын. Йӧл (1 литрез) самой дуноез 7 манет 31 копейка - Свердловскын, дунтэмез - 3 манет 90 копейка - Коми-Пермяцкой округын, Удмуртиын - 4 манет 80 копейка. Чабей нянь (1 килограммез) Коми-Пермяцкой округын "кыске" 9 манетлы, Тюменьын - 8 манет 18 копейкалы, дунтэмез - Челябинскын - 5 манет 17 копейкалы. Берло кык толэзьзэ дунъёс нош ик воштӥськизы, нош ик вылӥе ӝутскизы. Таӵе югдур быдэс Урал улосвылъя. Л. ДМИТРИЕВА. Россия Федерацилэн кун наградаосыныз пусъён сярысь Россия Федерацилэн Президентэзлэн указэз Кун азьын вормонъёссы, ваньбур поттон удысын ӟеч тыршемзы, калыкъёс куспын эшъяськонэз но ӵош ужанэз юнматонын бадӟымесь азинсконъёссы понна пусъёно: Почёт орденэн Шестаков Юрий Владимировичез - "Ижевский электромеханический завод "Купол" кун предприятилэсь генеральной директорзэ, Удмурт Республика; ИИ степенё "За заслуги перед Отечеством" орденлэн медаленыз Ашурянц Владимир Саркисовичез - "Ижевский электромеханический завод "Купол" кун предприятиысь механосборочной ужъёсъя слесарез, Удмурт Республика; Дмитриева Нина Николаевнаез - "Ижевский электромеханический завод "Купол" кун предприятиысь радиоэлектронной аппаратурая но приборъёсъя монтажницаез, Удмурт Республика; Перевозчиков Эдуард Прокопьевичез - "Ижевский электромеханический завод "Купол" кун предприятиысь доводчик-притирщикез, Удмурт Республика; Ярославцев Михаил Дмитриевичез - "Ижевский электромеханический завод "Купол" кун предприятилэн генеральной директорезлэсь воштӥсьсэ, Удмурт Республика. Машина лэсьтон удысын вормонъёсыз понна но кема аръёс ӵоже пайдаё ужамез понна "Россия Федерациысь дано машиностроитель" сӥлы карон ним сётоно: Кондратьев Виктор Геннадьевичлы - "Ижевский электромеханический завод "Купол" кун предприятиысь радиоэлектронной аппаратурая но приборъёсъя регулировщиклы, Удмурт Республика. Конструкторрской удысын вормонъёсыз понна "Россия Федерациысь дано конструктор" сӥлы карон ним сётоно: Никонцев Валерий Павловичлы - "Ижевский электромеханический завод "Купол" кун предприятиысь валтӥсь инженер-конструкторлы, Удмурт Республика; Полозов Владимир Николаевичлы - "Ижевский электромеханический завод "Купол" кун предприятиысь конструкторской бюроен кивалтӥсьлы, Удмурт Республика. Россия Федерацилэн Президентэз Борис Ельцин. Москва, Кремль, 1999-тӥ арын 25-тӥ сентябре. � 1261. Музъеммес утизы пыӵалэн но пероен 55 ар тырмиз Горд Армилэн Белоруссиез немецко-фашистской мозмытэмез дырысен. "Багратион" ожмаськон операцие пыриськизы шаерамы улӥсьёс но. Соос пӧлын вал тодмо калык писательёс Игнатий Гаврилов но Михаил Лямин. Михаил Андреевичлэн дэмламезъя ик эскерыса потӥ Удмуртиысь солдатъёслэсь ожмаськон сюрессэс. Жаляса верано, та писателен берлозэ пумиськыны кылдӥз мыным 1978-тӥ арын июль толэзе. Пушкам возем малпанъёсме туннэ шараяны малпай. Кезьыт тол ӝытэ мон выльысь лыдӟи Игнатий Гавриловлы сӥзем "Солдат двух фронтов" документальной повестез но тодам ваи секыт война аръёсы пичи дырме. Мон соку дышетски Ижевскысь 12-тӥ начальной школаын, кытын ӧжыт ӧй вал эвакуацие шедем пиналъёс. Куддыръя соос синвуаськыса лыктылӥзы но кыл-куара поттылытэк возьматылӥзы "похоронказэс". Нош Горд Армилэн солдатъёсыз, зол пелляськыку но, ӟырт кезьытъёсы но шур сьӧрысь кызьпу арамаын дышетскизы Родинаез утьыны. "Соос асьме городмес немецъёслэсь утёзы", - оскыса веразы мынам огъёзоосы. Но ми номыр ӧм тодэ Урал военной округысь 357-тӥ но 361-тӥ стрелковой дивизиысь солдатъёс сярысь. Пӧртэм арлыдо, пӧртэм профессиен но национальностен адямиос солдат шинель дӥсязы Быдӟым ожлэн нырысетӥ араз. Москва котырысь лымыё бусыосын но пеймыт калинин нюлэсъёсын Быдӟым Вормонлэн ӟардонэз ӝужаз. Отын бадӟым юрттэтсы вал Уралысь воинъёслэн. Совинформбюро иворъёсаз трос пол поттылӥз 357-тӥ но 361-тӥ дано дивизиос сярысь, кудъёсыз висъяськизы немецко-фашистской захватчикъёслы пумит ожъёсын. Нош 1942-тӥ арын 18 мартэ Обороная Наркомлэн приказэныз 361-тӥ дивизия 21-тӥ гвардейской стрелковой дивизия каремын вал. 1942-тӥ арын гужем гитлеровецъёс Северной Кавказ но Сталинград пала вырӟизы. Родиналы бадӟым кышкытлык кылдӥз. Ӵапак та секыт вакытэ Удмурт АССР-ысь Верховной Советлэн депутатэз, Удмуртиысь Писательёслэн союззылэн правлениезлэн председателез И. Г. Гаврилов ас мылкыд каремезъя Горд Армие мыныны малпаз. "Гожъяськон ужъя эшъёсы Михаил Лямин, Петр Блинов, Филипп Кедров ожмасько. Мыным но дыр вуиз фронтэ!" - малпаз Игнатий Гаврилович. Удмуртиысь писатель юнматэмын вал 21-тӥ гвардейской дивизилэн "Победа за нами" газетэзлы гожъяськисе. Редакцилэн коллективез бадӟым вылымтэ но пӧртэм национальностен адямиос: ӟуч, украинец, еврей но удмурт. Асьмелэн Бадӟым Сибыысь землякмы И. Г. Гаврилов кык фронтысь солдат луиз: военной но литературной. 1942 арын 24 ноябре Галицкий генераллэн 3-тӥ ударной армиезлэн Великолукской наступательной операциез кутскиз. Отчы пыриськизы 357-тӥ но 21-тӥ дивизиос. Солдатъёс 1943 арын январе городэз-крепостез но бадӟым чугун сюрес узелэз - Великие Луки городэз штурмен басьтӥзы. Со ожъёсы пӧртэм дивизиосын пыриськизы писательёс Михаил Лямин но Игнатий Гаврилов. 1943 арын сӥзьыл 21-тӥ гвардейскойысь Игнатий Гавриловлэн но 357-тӥ орденоносной дивизиысь Михаил Ляминлэн ӵош ожмаськись эшъёссы вашкала Невель город понна оже ӝутскизы. Та городэз мозмытонэ пыриськем солдатъёсыз унозэ наградаосын пусйизы. "За боевые заслуги" медален данъямын вал Игнатий Гаврилович но, писательлы озьы ик гвардиысь капитан ним сётӥзы. Азьпалан вал партизан движениен но тыосын узыр шаер - Белоруссия. Ӵапак со дыре Игнатий Гаврилов "Советской Удмуртия" газетлэн редакторезлы А. С. Бутолинлы гожтӥз: "Ми татын Миша Ляминэн артэ вылӥськеммы. Но пумиськыны ӧм быгатэ. Ачиз мыным со сярысь гожтӥз. Мон туж шумпотӥ солэн гожтэтэзлы. Со умой, лачмыт адями". ...1944 арын 23 июне Белоруссиез немецко-фашистской захватчикъёслэсь мозмытон понна "Багратион" бадӟым наступательной операция кутскиз. Отчы пыриськизы 21-тӥ гвардейской но 357-тӥ стрелковой дивизиос. Операция туж бадӟым инты басьтӥз, уго Белоруссия, Польша пыр Берлинэ, фашистской Германилэн столицаяз, сюрес вакчигес. Фронтовикъёс но фронт мышкысь гвардеецъёс, вань советской адямиос понна "Берлин" но "Вормон" кылъёс огкадесь вал. Со валатонъёс возьматӥзы самой секыт но трос вир кисьтоно войналы пум вуонэз. Миллионъёсын патриотъёс музъем вылын ӟеч улон понна вормон нуналэз матэктытӥзы. Михаил Лямин но Игнатий Гаврилов асьсэлэсь ож сюрессэс йылпумъязы Балтийской ярдурын - Латвиын. Монэ М. А. Ляминэн но Горд Кизили кык орденлэн кавалереныз И. Г. Гавриловен юн эшъяськон кусыпъёс герӟало. Игнатий Гавриловичен театрын гинэ ӧй пумиськылы, солэн дачаяз но. Ма огкадез Гаврилов, Кроник но Лямин куспын? Соос Родиналэн оскымон пиосыз, творческой быгатонлыкъёсын адямиос. Великие Луки городлэн сӥё-дано гражданинэз Александр Львович историяя кандидатской ужзэ (диссертацизэ) утиз но СССР-ысь журналистъёслэн члензы луэ; Михаил Андреевич - 357-тӥ стрелковой дивизия сярысь "Четыре года в шинелях" книгалэн авторез, Удмуртиысь калык писатель; Игнатий Гаврилович литература удысын азинсконъёсыз понна пусъемын Трудовой Горд Знамя орденэн, со луэ РСФСР-ысь но УАССР-ысь искусство удысысь сӥё-дано ужась, Удмурт АССР-ысь Кун премилэн лауреатэз. Вунэтэмын ӧвӧл соослэн фронтовой сюресъёссы но ӟеч ужъёссы. Кемалась ӧвӧл азьло тодмоелы М. М. Гуляевлы писательёс-фронтовикъёс сярысь ивортӥ. Ми таӵе малпанэ вуим: Игнатий Гавриловлэсь но Михаил Ляминлэсь нимъёссэс пыраклы вунонтэм кельтон вылысь сюлмаськоно. Ижевскын туж уно урамъёс. Жаляса верано, одӥгезлы но писательёслэн-фронтовикъёслэн нимзы сётымтэ. Удмуртилэн шоркараз Некрасов, Гайдар нимо библиотекаос вань, нош Гаврилов но Лямин нимоосыз ӧвӧл. Малы бен удмурт калыклэн оскымон пиезлэн, Родиналэн куинь ордено кавалерезлэн Игнатий Гавриловлэн нимыныз нимантэмез Удмурт драмтеатрез, кудзэ кылдытонэ со пыриськиз? В. ПОЗДЕЕВ, историяя дышетӥсь, асьме землякъёсмылэн геройлыко подвигъёссы сярысь уно книгаослэн авторзы. Ужано, законъёсты чакласа Дас витетӥ октябре Удмурт Республикаысь прокуратураын туэ 9 толэзьлы йылпумъянъёс лэсьтонъя кенеш ортчиз. Пусъемын вал, республикаямы югдур сокем ик ушъямон ӧвӧл шуыса. Секытэсь йыружъёс йылӥзы 21,8 процентлы. Котькудӥз куинетӥез йыруж лэсьтӥське ужасьтэм адямиосын, котькудӥз витетӥез - азьвыл пукемъёсын. Сюлэмшугъяськыто быдэ вуымтэос, соосын сэрен йыружъёс будӥзы 35 процентлы. Тросгес вӧлмыны кутскизы наркотикъёс, уногес пумисько экономика удысын, ужбергатонын, банклэн ужаз йыртэманъёс, уг чакласькы выт бичанъя закон. Городъёсысь но ёросъёсысь прокуроръёс куд-ог ужрадъёс кутӥзы правоосты утёнъя органъёсын тыршисьёслэсь ужзэс умоятон ласянь. Озьы прокуроръёс судэ келязы 900 уголовной уж, кулэсмиз соосты сэрттон-пертчон дыр. Прокуроръёс судэ гражданъёслэсь, кунлэсь но обществолэсь интересъёссэс утёнъя 1700-лэсь уно вазиськонъёс сётӥзы, 634 уж умойтэмен лыдъямын, законэз тӥям сярысь 400-лэсь уно ужъёс ӝутэмын. Ог 300 пала адями кыл кутытэмын. Сэрттэмын-пертчемын ог 5,5 сюрс ӝожтӥськон. Соин ӵош ик куд-ог городъёсысь но ёросъёсысь прокуроръёс умой-умой ӧз басьтӥське коррупциен, кузьмаськонэн, экономика удысэн герӟаськем йыружъёсын нюръяськон борды, тырмыт уж уг нуиськы соосты алон ласянь. Кенешын йылпумъянъёс лэсьтыса вераськиз Удмурт Республикалэн прокурорез В. М. Походин. Со ватсаса ужрадъёс кутыны куриз законэз но правоосты утёнын. Котькудӥз прокурор но следователь ас ужазы тросгес саклык мед висъялозы пӧртэм пумо йыружъёсын нюръяськонлы, соосты алонлы, юн чаклано быръёнъёсты ортчытонъя законъёсты. С. КАЛИНИНА, Удмурт Республикаысь прокурорлэн иворъёсты вӧлмытонъя ёзъёсын но калыкен кусыпъёс возёнъя юрттӥсез. Удмурт усточиос синмаськытӥзы Кайта сизьымдон вить ар тырмоз Коми-Пермяк автономной округ кылдэм дырысен. Та юбилейлы сӥзьыса, улосвылын ортче устолыкъя "Бадӟым Урал Пармаын" фестиваль. Вашкала ӵыжы-выжыосмы ӧтемъя, бускель музъем вылэ вуылӥзы удмуртъёс но - фестивале люкаськемъёсты лулысь-сюлмысь шулдыртӥз Удмурт Республикаысь кун премилэн лауреатэз, Удмурт кун филармониысь эстрада кырӟанъя "Шулдыр ӝыт" ансамбль. Арня ӵоже усточиос потазы куать ёросэ. Мужуй, Юсьва, Белоево, Кочево районъёсын улӥсьёс туж синмаськизы кыдёкысь лыктэмъёслы. Огкылысь пусйизы: таӵе артистъёс ми дорын кемалась ӧй вал ни. Берпуметӥ нуналаз бадӟым концерт ортчиз Пермьысь Операя но балетъя кун театрын. Люкаськемъёсты мылысь-кыдысь шулдыртӥз "Шондибан" ансамбль. Бускель улосвылысь ӵыжы-выжыосызлы татын бадӟым шумпотон кузьмамез понна, Удмурт кун филармониысь эстрада кырӟанъя "Шулдыр ӝыт" ансамбльлы сюлмысь тау кариз улос кивалтэтысь культурая управление, солэн тӧроез Надежда Минуллина. Вуоноез ужрад луоз шуркынмон толэзе. Коми-пермякъёс доры азьланяз вуылозы на Тюмень, Оренбург, Киров улосъёсысь кырӟась-верасьёс. Е.Виноградова. Шахмат Кинлэн визьмыз лэчытгес Алигес Удмуртиын ортчиз нылпиос пӧлын шахматэн шудонъя ӵошатсконъёс. Со радъямын вал тямыс группая, 9 аресысен кутскыса 18 аресозь. Шудонэ пыриськиз 85 пинал. Пусйыны кулэ, ӝыныезлэн мында нырысетӥ разрядзы вал, тросэз Ижевскысь 6 номеро нылпи спортивной школае ветлӥсьёс. Бадӟымъёс пӧлын вормисе потӥз Удмурт кун университетысь спортъя мастере кандидат Алексей Пименов. Со 10 луоноез пӧлысь 9,5 очко люказ. 2,5 очколы бере кылиз Технической университетысь студент Андрей Востриков. Та пиослы ик Удмуртилэсь данзэ утёно луоз 2000-тӥ арын Россилэн ортчоно чемпионатаз. 16 аресъем нылъёс но пиос пӧлын вормисе потӥзы: Александр Бочкарев, Елизавета Бронникова но Анна Доржеева. Шахматэн шудонъя Россилэн полуфиналэз ортчоз 2-тӥ ноябре Ижевскын. Отчы пыриськозы 14 аресозь дасо мында нылъёсмы но пиосмы. Нюръхясько югдурез утисьёс "Динамо" спорт обществолэн удмурт советаз алигес шахматэн но шашкиен шудонъя ӵошатсконъёс ортчизы. Отчы пыриськиз 8 команда. Котыр ласянь усто шудэмзэс возьматӥзы но вормисе потӥзы шаерысьтымы Югдурез утёнъя министерствоын ужасьёс. Нимаз шудӥсьёс пӧлын вормисе потӥз налоговой полицилэн службаяз ужась шашкиен шудонъя Удмуртилэн куинь пол чемпионэз, спортъя мастере кандидат Дмитрий Иглин. Со куинетӥ ӝӧкъя шахматэн шудӥз но ваньзэс вормиз. И.Вельтмандер. Гожтӥськон - 2000 ГАЗЕТ БАСЬТОД - УЗЫРМОД Дас ар талэсь азьло вылбамысьтыз гольык мылазё нылашен "Спеед-инфо" газетэз адӟыса, Людмила Александровна йырзэ гинэ бергатӥз. Соос егит дыръя "со сярысь" шара уг верасько вал. Выльысь ки улаз сюрыкуз, газетэз усьтӥз, куинетӥяз - лыдӟиз, нош ар ортчыса, быдэс арлы гожтӥськиз. Тунсыко потыса укмыс ар лыдӟо ни та газетэз Сарапулысь Барамзинъёс. Кызь куать пол ысъязы газетэн ялэм "Жигули - дунтэк" конкурсэ купонъёс. Нош кызь сизьыметӥяз малпамзы зэмаз! 14 октябре "С-инфо" издательство юрт Людмила Александровна Барамзиналы ӵыжак выль "Жикули" кузьмаз. "Жигули", кузёзэ шӧдыса, Сарапулэ сюрес лёгем, шӧдске - бальзак арлыдъем нылкышно яратэ машина нуллыны - солэн правоосыз но вань. Та нунал эшшо одӥг шудо адями тодмо луиз. 11-тӥ-14-тӥ октябре "Спеед-инфо" газетлы дунтэменгес гожтӥськон нуналъёс ялэмын вал та нуналъёсы. Кык сю куамын кык гожтӥськемъёс пӧлын шудытэмын "Самсунq" телевизор но газет нимлэн логотипеныз майкаос. Усто телевизор сюриз Як.-Бодьялась Надежда Ворончихиналы. Нош майкаос кошкизы Дэбесэ, Шарканэ, Киясае... Паймымон, Ижысь одӥг мурт гинэ кузьым утӥз. Но адямиос ӧз куатаське - соос понна дасямын вал бадӟым праздник - ӵошатсконъёс, шулдыръяськонъёс... Со сяна, табере соос быдэс ар лыдӟозы тунсыко газет. Нош ми оскиськом, тӥляд яратоно газетты туэ но "Удмурт дунне" ик луоз шуыса. Арлэн пумаз кудды ке тӥ но бадӟым кузьым утоды - ӧд вунэтэ на-а таза ошпи сярысь? З.Рябинина. Будённовск городысь больницаын ужасьёслэн шара гожтэтсы Будённовск городысь тазалыкез утён удысын тыршисьёс йыркурзэс верало МАБЕТЕКС фирмалэн президентэзлэн Б. Паколлилэн заявлениез пумысен ОРТ-ын С. Доренколэн программаяз 1999-тӥ арын 10-тӥ октябре со ивортӥз, Будённовск городысь больницаез тупатъянэ рос-прос пыриськиз шуыса. Ми малпамъя, Будённовск городысь больницаез выльдыны луиз Москвалэе мэрезлэн Ю. М. Лужковлэн сюлмаськемез улсын. Столицаысь лэсьтӥськисьёс, архитекторъёс, "Гормедтехника" предприятие вакчи дыр куспын Россилэн Президентэзлэсь заданизэ быдэстӥзы. Терракт дырысен ар куспын больница тупатъямын вал. Ю. М. Лужков ачмз чакласа возиз тупатъян но лэсьтӥськон ужъёсты, ар куспын больницае вить пол вуылӥз, тодмасткиз тазалыкез утисьёсын, азьвыл заложникъёсын, соослэн ужпумъёсынызы. Террористической акт бере Москваысь нырысетӥ юрттэт вуиз 1995-тӥ арын 25-тӥ июне. Ыстэмын вал кардиодиагностической аппаратура, хирургической тӥрлык, одӥг пол кутӥськись шприцъёс, 10 санитарной машинаос. Москвалэн мэрез тыршемен хирургияя стационар тупатъямын но усьтэмын вал 1996-тӥ арын 15-тӥ январе, терракт бере 7 толэзь ортчыса. Ю. М. Лужков больницаын кусыпсэ али но уг ышты. Вуылӥз отчы 1997-тӥ арын июле, 1999-тӥ арын феврале, юрттэ Москваысь лэсьтӥськонъя департамент, Тазалыкез утёнъя департамент но "Гормедтехника" пыр. МАБЕТЕКС сяна, больницаез выльдыны гуманитарной юрттэт сётӥзы "МЕДИПАРТ", "МЕДИАНА РОСС" фирмаос, "Горд кирос" организация, Россиысь Тазалыкез утёнъя министерство. Медицинской ужасьёс понна басьтэмын 56 квартираен корка, коньдон висъяз Россиысь Правительство. Больницаез тупатъян, лэсьтон понна быдтэмын 247883133 манет (41 млн. доллар пала). Тазалыкез утисьёс, Будённовск городын улӥсьёс тау каремзэс верало Москваысь лэсьтӥськисьёслы, Ю. М. Лужковлы больницаез выльысь ӝутыны сюлмаськемзы понна. Тазалыкез утисьёслэн 1999-тӥ арын 12-тӥ октябре ортчем кенешонзылэн косэмезъя гожтэт ыстэмын луоз Россиысь Правительство, Москва городлэн мэрезлы, ОРТ-е. С. Куртасова, больницаысь валтӥсь врач, О. Стасенков, профсоюз комитетлэн тӧроез, Н. Солдатенко, валтӥсь врачлэн воштӥсез, С. Елисеева, валтӥсь врачлэн воштӥсез, Н. Рындина, больницаысь валтӥсь бухгалтер. с 18 по 24 октября В кинотеатре "Россия" Фильм-сенсация 1998 года итальянского режиссера и актера Роберто Бениньи, Удостоенного "Гран-при" Каннского фестиваля. Обладателя 3х премий "Оскар", в том числе за лучшую мужскую роль. Трагикомедия "Жизнь прекрасна" Италия Автор сценария и режиссер - Роберто Бениньи. В ролях: Роберто Бениньи, Николетта Браски. Еврей Гуидо приезжает в маленький итальянский городок и завоевывает сердце местной красавицы. Через несколько лет, Гуидо, его с таким трудом обретенная жена и маленький сын попадают в концлагерь. Чтобы уберечь мальчика от кошмара, отец рассказывает ему, что на самом деле то место, где они находятся - огромный парк аттракционов, где находятся - огромный парк аттракционов, где проводится соревнование по сложным правилам (нельзя плакать, просить есть и так далее). А победитель получает танк. Он был прав - мальчик выживет и действительно получит свой приз: огромный американский танк, входящий в оставленный немцами лагерь, где только накануне вечером расстреляли его отца. Перевод титрами Сеансы: 9-00 льг., 11-00, 13-00, 15-00, 17-00, 19-00, 21-00. Депутатлэн куараез Коньдон тырмоз, сое шонер кутӥд ке Туннэ нош люкаське Кун Кенешлэн сессиез. Депутатъёс выльысь эскерозы огъя ваньбурез мукет кие выжтонэн герӟаськем документъёсты. Редакцие вазиськиз соос пӧлысь одӥгез - "Удмуртпродконтракт" огазеяськонлэн кивалтӥсез Вячеслав АНУФРИЕВ. Ми малпаськом, лыдӟисьёслы тунсыко потоз солэн куд-ог верамъёсыныз тодматскыны. - Вячеслав Николаевич, депутатэ быръемзы бере газетамы тӥ сярысь ӧм гожъялэ на. Ойдолэ тодэ вайытом кин луэмдэс но нырысь вералом, малы кулэ луиз тӥледлы мандат? - Вордскемын 1946-тӥ арын. Вологдаысь йӧлъя институтын дышетскыса, кема дыр ӵоже ужай Ижевскысь йӧл комбинатын, будӥ валтӥсь инженерозь. 90-тӥ аръёслэн кутсконазы вал шоркармылэн администрациезлэн кивалтӥсезлэн воштӥсез. Бӧрысь ужай Гурт хозяйствоя но сиён-юонъя министерствоын. Куамын арлэсь кема луисько ни коммунист. Котькудӥз малпаське, вылды: кызьы озьы, сокем узыр странаын улыса, асьмеос ялан курадӟиськом. Монэ но со ужпум сюлмаськытэ. Кин ке шуылӥз: республикаямы шуг- секытъёс Кун Кенеш бордысь пото, отын ӧвӧл ваньбур поттонэн меӵак вырисьёс. Депутатъёс, пе, дасьсэ гинэ люкыло, нош бюджетэ ватсаса коньдон пыртон сярысь уг сюлмасько. Тӥни озьы малпай дасо аръёс ӵоже люкам быгатонме закон кылдытон ужын эскерыны. - Тӥляд улонды герӟаськемын гурт хозяйствоен, отын будэтэм продукцилэсь вузъёс поттонэн. Мар вералоды удысын али кылдэм югдур сярысь? - Реформа шуон тужгес но зол шуккиз крестьян калыкез. Гурт куашкатэмын. Сиён-юон поттон чутрак кулэсмиз. Огъя ваньбур кужмысь люкылэмын адямиос куспын. Валамон ни, чупресэзлы кӧё-вӧё люкетэз шедиз, нош уноез номыртэк кылиз. Юнме шат табере город вӧзын улыно-вылыно шукрес юртъёс ӝутско, нош гуртоос коньдонэз толэзьёсын уг адӟыло. Соин ик ми, куд-ог депутатъёс, ваньбурен герӟаськем ужпумъёсты эскерыку юано кожам Правительствоысь кивалтӥсьёсмылэсь: ма сётӥз приватизацилэн нырысетӥ вакытэз, кытын выль ужан интыос, кинлы шедиз пайдаез? Валэктон кылыны ӧйлась. Солэсь но ортчыт: залын пукисьёс шиетыны ӧдъязы, вот, пе, коммунистъёс берлань мыныны дэмлало, рыноклэсь палэнско. Мугез валамон, дыр. Ум, ми ум пумитъяськиське ваньбурез мукет кие выжтонлы. Но тазьы шуиськом: предприятие умой ужа ке, сое йӧтылоно ӧвӧл. Кузёез воштоно отын, кытын югдур секыт. Ваньзэ одӥг мертэтэн мертаны уг луы ук. - Кызьы дунъяськоды выльдэм Кун Кенешлэсь нырысетӥ вамышъёссэ? - Шумпотон мылкыд та пумысен ӧвӧл. Укыр трос дыр быдтӥм портфель люкылонлы. Тулыс вылтӥ гуртоос шуге-леке вуизы, эстӥськон тырмымтэен. Правительство ӧй вал, депутатъёс асьсэлы шуныт инты сярысь сюлмаськонэн улӥзы - крестьян калык ас понназ мар но со лэсьтыны выриз. Умой шат со? Милям огазеяськонамы тани 18 предприятие пыре. Кема-а соос возиськозы на? Оренбург областьын та выллем объединениез быдтӥзы, табере гырпумзэс куртчыло. Асьмелэн но озьы уз луы меда? Уго гурт хозяйствоез утён сярысь сюлмаськон уг шӧдӥськы. Кусыпъёс тэшкамын, огъя жильы быремын. Соин ик дунъёс но бадӟымесь, уго гуртысь сиён-юон, ӝӧк вылэ вуытозяз, уно ки пыр ортче. Паймисько, малы государство аслыз ачиз изъян лэсьтэ? Кунгож сьӧрысь сиён-юон басьтыса, асьмеос отысь фермерез сюдӥськом ук. Йыбыртъяса, данмес вунэтыса куриськом Западысь кредит, со коньдонэз выльысь отчы ик келян вылысь. Уг луы шат асьме крестьянлы киез мычыны, солы юрттыса, ас дорамы тырмыт ваньбур поттыны? Кызьы валалод минеральной сылалъёсын кылдэм югдурез? Ваньзэ сямен сое кунгож сьӧры келяськом, нош асьмелэнъёслы ӵектӥськом кык полэс дунын. Озьы-а ӟеч урожай будэтод? Музъем - огшоры арбери ӧвӧл ук. Сое кык-куинь арлы аналтӥд ке, бӧрысь дасо аръёсын янгыштэ тупатыны вырод. Куддыр оскиськод но ни, гуртэз юромо куашкато шуыса. Та ласянь Удмурт парламентэ быръем депутатъёс но юн куаразэс вераны кулэ. - Тӥ ужаськоды экономикаын политикая комиссиын. Озьыен, вуоно арлы бюджетлэн инъетэз борды но басьтӥськиды ни? - Ми ӵектӥськом экономикалы государство ласянь юрттэтэз кужмоятыны. Приватизацилэсь люкаськем пайдалэсь куиньмос люкетсэ дэмласьком котыр ласянь эскерем инвестиционной проектъёсты быдэстонэ кутыны. Одно ик чаклано уждунъя пунэм тыронъёсты берыктонэз. Возьыт ни ук калыклэн синмаз учкыны. Государство кылдытӥське аслэсьтыз гражданъёссэ утён-вордон понна. Кызьы-о сотэк? Нош асьмелэн ваньмыз мыдлань кошке. Весь кылоно луэ: тазэ но, созэ но кар вал - уксё ӧвӧл. Уг оскиськы мон. Учке ай, макем зол улон юрт пуктӥзы мэрилы матын! Кӧня ке сю метръем квартираос отын, гаражез но, оломаиз но вань. Котькудӥз 1-1,5 миллион манет сылэ. Кин, малпаськоды, каръяське отчы? Чиновникъёс. Вот кытчы кошке бюджетысь коньдон. Малпасько, та коркаез лэсьтонэ-чеберъянэ быдтэм уксё тырмысал, шуом, быдэс Ижевскысь дышетӥсьёслы ӝегатэм уждунзэс берыктыны. Та пумысен малпанъёсмес ми Кун Кенешын вератэк ум улӥське. Малы, шуиськом, огшоры ужасьёслэн но кивалтӥсьёслэн уждунзы сю пол висъяське? Эшъёс кырыж учкыны кутско. Нош Африкаысь бере кылем государствоосын кивалтӥсьлэн уждунэз шоро-куспоезлэсь дас пол вылӥын ке, сое малпаськытэк улляло. Нош асьмелэн калыклэсь пыӵал борды кутскемзэ витё, шӧдске. Весь куспазы керето, ваньбурзэс люко, огшоры адямиос сярысь тодазы но ӧвӧл. Ку меда визьмаськом ни?.. Вераськиз И. ЛЕБЕДЕВ. М. Т. КАЛАШНИКОВЛЫ 80 АРЕС ТЫРМОН АЗЬЫН Тон дано но, дуно но Быдэс дуннелы тодмо конструкторлэсь М. Т. Калашниковлэсь нимзэ уно аръёс ӵоже ватыса возизы. Озьы ке но со сярысь тодӥсьёс вал. Журналист Альфред Артамонов 70-тӥ аръёслэн кутсконаз но бӧрысь та дано адямиен чагыр экран азьын вераськылӥз. Солэсь вазьынгес художник Алексей Холмогоров Калашниковлэн тусбуеныз бадӟым суред лэсьтӥз. Но таӵе ужъёс азе одно ик юн курон пуктылӥзы: вераны луэ вал М. Т. Калашников депутат луэ шуыса гинэ. Выльдӥськон аръёсы, Ижевскмы вадьсысь "корт катанчи" куашкам бере, автомат кылдытӥсьлэн нимыз гудыртэм кадь вӧлмиз. Гожъяны кутскизы газет-журналъёс, М. Т. Калашниковез вераськыны ӧтьылӥзы сӥё-дано кенешъёсы, со шоры "мертчылӥзы" фото- видеокамераослэн синъёссы, дано пыӵал лэсьтӥсь котыре биниськылӥзы суредасьёс. Ӵапак художникъёслэн малпанъёссы пумысен ик туннэ вераськонмы ӧръяськоз. Кин-о лэчытгес адӟе адями тусэз, кин шонергес шӧдэ-вала но лыдӟе адями сямез, лул сюлэмез? Художник. Соин ик суредасьлэн, художниклэн синмыныз учком Михаил Калашников шоры но. Вячеслав Костылев, Удмурт Республикаысь искусство удысысь дано ужась: - М. Т. Калашниковлэсь портретсэ суредай кык ар талэсь азьло. Капчиен со сётскиз ӧй шуысал. Дӥсьтыса но дӥсьтытэк кутски со уж борды. Укыр тодмо но дано адями со. Сыӵе муртлэсь тусбуйзэ суреданы кышкытгес ик. Пичи гинэ янгышед, ӧрекчаськемед бадӟым сьӧд виштылы пӧрмоз. Таӵе уж борды басьтӥськиськод бере, чыры-пырыослэсь палэнскыса, быдэсак отчы выйоно. Кызьы ке огпол суредасько вал Зоя Алексеевна Богомоловаез. Со шуэ, тӥ, пе, Вячеслав, шаерысь тодмо адямиослэсь тусбуйзэс пуктӥськоды. Нош малы соос пӧлы Калашников сюрымтэ. Ма, шуисько, Зоя Алексеевна, кызьы-о сое шедьтом, огшоры адями ӧвӧл ук со, адрессэ но нокин уз вера. Мукетаз пумиськонамы Богомоловалы квартираяз жингыртӥсь луиз: Ӟечбуресь, Михаил Тимофеевич, пыралэ вал дорам, - шуэ Зоя Алексеевна, - мон дорын али художник, учке вал, кыӵе мар пӧрме портретэ. Кӧня ке минут ортчыса, пыриз лапеггес тып-тып мугоро спортивной дӥсен воргорон. Со ик вылэм Калашников. Ну, кыӵе мар пӧрме суредмы, кельшисько-а аслым, - кильтыро юалляське Богомолова. - Кунолы уже кельшиз. Озьы ке, тӥледыз но суредасал, шуисько. Михаил Тимофеевич кӧня ке малпаськемез бере соглаш луиз. Только, пе, нырысь Араб Эмиратэ лобало, бертэм берам кенешом ку пумиськыны. Вераськем дыре планшетэн но мукет кулэ арбериен вамыштӥ конструкторлэн улон интыяз. Малпасько, та адями минутэн-часэн улэ. Озьыен, как вуи, соку ик уж борды кутском. Нош пӧрмиз мукетгес сямен. Михаил Тимофеевич туж шуныт пумитаз. Соку ик кухняяз ӧтиз, чай лэзьяз. 75 арес тырмон юбилеяз кузьмам портретсэ возьматӥз. Суредам сое Москваысь Греков нимо военной студиысь художник Сергей Присейкин. Портрет, зэмзэ но, умой пӧрмем. Озьыен, йырыдлэсь вылэ тэтчоно луоз малпасько. Мальдытӥсь уж вӧзын тынадэз бездыт медаз адӟиськы. Та портретын тӥ туж дано адямиен суредамын, костюмен, герой пусъёсын, - шуисько Михаил Тимофеевичлы, - нош мынам возьматэме потэ тӥледыз яратоно атайме кадь. Зэмзэ но, нырысь нуналаз ик со мыным кемалась тодмо но матысь адямие кадь потӥз. Вылтӥяськон, чеберъяськон сямзэ ӧй шӧды соку но, мукет пумиськемъёсам но. Возиськылӥз туж огшоры, лякытэн гинэ вазиськылӥз. Уд но малпа, тон азьын сыӵе дано адями шуыса. Михаил Тимофеевич возьматӥз комнатаоссэ, юаз, кытчы умойгес луоз пуксьыны. Интыяськиз камин вадьсысь креслояз, пианино вӧзы. Пуксемезъя гинэ но валаны луэ, та адями дышемын ваньзэ ӝот-ӝот лэсьтыны. Калашников керӟегъяськытэк, дыртӥд-вуттӥд вырытэк рос-прос интыяськиз пуконаз. Кияз кутӥз карандаш, дышем сямызъя ни, лэся. Алигес гинэ Америкаысь вуэм солэсь пыӵал тӥрлыксэ возьматӥсь книгаез азяз понӥз. Борддорын йыр вадьсаз ошемын лул утисезлэн, Архангел Михаиллэн, суредэз. Со вӧзын ик Парижысь Эйфель башня. Таиз тодаз вайытэ, лэся, Францие вуылэмзэ. Бур палаз - япон конструкторлэн туспуктэмез. тазэ но Михаил Тимофеевич гажа но дунъя, вылды. Тӥни ваньмыз со портретэ шедиз. Вуылӥ мон со доры ваче кенешем нуналъёсы, чаклам часъёсы. Озьы, ог кызь пол, дыр, пумиськылӥм. Суредалляй кытӥяз 20-30 минут, кытӥяз 2-3 час но, кызьы ваньмон дырыз шедьылӥз. Ужме куспетӥ ӧз карылы, оло, акыльтылӥ ке но. Чидась, юн сямзэ мон шӧдӥ, шорам ялан гажан мылкыдын вазиськылӥз. Котькуд велыкум чай юыны ӧтьылӥз. Ужме йылпумъяса ӧти мон Калашниковез мастерскоям. Со вуиз заводысь эшеныз. Михаил Тимофеевич кема учкиз портретэз шоры вазьылытэк. Аслам сюлэмы ик пыдтышкам вуиз: оло, уг кельшы маиз ке. Озьы кӧня ке чус сылэмез бере юа ни эшезлэсь, ӧвӧл-а, пе, мон суредын мултэс лек. Соиз шуэ, ваньмыз умой, Михаил Тимофеевич, портретады тӥ кисьтэм кадь асьтэос. Леонид Прозоров, Удмурт Республикаысь искусство удысысь дано ужась: - Газетын "Удмурт кизилиос" сэрег усьтэм дырысен ог кызё пала тодмо адямилэсь тусбуйзэ суредай. Ваньзы соос удмурт выжыысь, асьме калык пӧлын данэ потэмын. Нош шаерамы улэ ук быдэс дуннелы тодмо мурт. Сое возьматэме потӥз газет лыдӟисьёслы но. Но кудласянь та уж борды кутсконо? Кызьы М. Т. Калашниковен пумиськоно? Тодам лыктӥз Альфред Артамонов. Та журналист автомат лэсьтӥсен кемаласен тодмо. Со пыр тодмо конструкторлэсь ужан телефонзэ шедьтӥ. Но Михаил Тимофеевич ӵап висьыны усем, больницаын, пе, кылле. Со доры ветлонлэсь алӥзы. Йырын малпан чилектӥз бере, озьы гинэ уд улля ни. Арня мар улыса, больницае пырано кариськи, малпасько, бӧрдымтэ нылпилы нонок уз сётэ. Мар кылдӥз - луоз, пельдоре чабкыса уз лэзе. Кыӵе пайми, висисьёслэн нимъёссы пӧлын Калашниковлэн палатаез пусъемын шуыса. Со гинэ ӧвӧл, генерал-конструктор доры капчиен пыри. Серекъям выллем юазы ик, мар, пе, сумкаяд, оло, бомба ватэмын. Лыктэм мугме тодыса, тӧдьы халатэн адямиос ӧз алэ. Нош ачиз Михаил Калашников нырысь пумитъяськиз. Мар, пе, висись адямиез суреданэз. Дорам бертӥ ке - соку ини мукет ужпум. Озьы но тазьы лиятыны выри. Мон шуисько, тӥ висисьлы уд кельшиське, Михаил Тимофеевич, йӧно адскиськоды, мон тӥледыз эшшо тузӥгес возьмато. Собере мон газетын ужась, кема уг курадӟыты, ужме чаляк лэсьтӥсько. Мискине соглаш кариськиз, но куспамы кенешим, врач вуытозь гинэ суреданы. Ужмы вырӟиз. Дыртонъям киосы ик куалекъяло, тани-тани палатае пырозы но ужме быдэстытэк кошконо луо кадь. Вераськыса мар уг улӥськы, гожмасько но гожмасько карандашен. Тани тӧдьы кагаз вылын синъёс улӟизы, бам чокориос но ангес кельшомизы. Ачим но уг кепыраськы ни, киосы-чиньыосы кылзӥсько, адями пукиселэсь тодметъёссэ шонер пусъё. Но суредано адямие шӧдтэк шорысь вушйылыны кутскиз. - Жадиды-а, Михаил Тимофеевич, - юасько: - О-о-о, - шуэ. 10 минутлы вис карим. Со изён интыяз выдӥз, вушйылэ, назьылляське. Кӧня ке шутэтскыса, ужмес азьланьтӥм. Эмъясьёс вуытозь, суредэ дась ни вал. Валче ужмы Михаил Тимофеевичлы кельшиз. Тодматӥ соин газет лыдӟисьёсты но, аслыз Калашниковлы но кузьмай. Пётр Елкин: - Нырысьсэ пумиськи М. Т. Калашниковен Москваын, "Россия" гостиницаын. Кыӵе ке делегациен вуылӥ, выставкаез-а, мар-а усьтонэ. Одӥгез эшмы мыным шуэ, тӥни, пе, буфет черодын Калашников сылэ. Учкисько, ку курткаен, лапеггес мугоро, пурысьтаны кутскем воргорон - туж огшоры адями. Мон ӧй но оскы, собере валаса но ӧй вутты, со Ижысь шуыса. Со вал кадь 70-тӥ арлэн кутсконаз, мон, егит художник, сокугес гинэ институтэз быдтэм пияш вал. Берлогес солы пумиськи матынгес - Алексей Павлович Холмогоровлэн мастерскояз. Та художникен эшъяськиськом вал, мон, егит адями, соин ужъёсме возьматъяй. И вот Алексей Павлович соку тодматӥз Калашниковен (ӵап тодмо конструкторез суреда вал). Учки шораз но тодам лыктӥз гостиницаын черодын сылэм воргоронэ. Верало вал Калашников, пе, военной, озьыен, малпасько, куараез боз-боз, нош со векчи либыт куараен вераське. Суредаськыкузы но маке весь ваче вераськылӥзы. Мон нош паймыса кылзылӥ, кыӵе Калашников ассэ лякытэн возе, кепырасагес выллем. Но кыӵе ке ужпумъёсъя аслаз валанэз вылын юн сылӥз. Собере пӧртэм ужрадъёсын трос пол пумиталляй Калашниковез. Дыр шедьыку, лушкемак сое суредалляй, кытӥяз вис луыку юри но. А. П. Холмогоров кык пол суредаз Калашниковез. Одӥгаз Михаил Тимофеевич пуныосын вал, борддорын пыӵалъёсыз адӟисько. Тӥни со ужзэ возьматӥзы Москваын, Манежын. Та адӟытонэ вуылӥз Удмуртиысь делегация но, оло партилэн съездэз вал соку, оло сессия. Обкомлэн нырысетӥ секретарезлы В. К. Марисовлы ӧз кельшы суред - кыӵе ке барин кадь, пе, пуныосын, возьматэмын. Конечно, солэн кылыз художник понна закон ӧй вал, солэн учконэз искусство удысын ужасьлэсь мукет. Но тӥни сыӵе учыр вал. Бӧрысь мон Калашниковен трос пол пумиськылӥ, ӟеч тодмоос сямен вазиськылӥм. Паймисько мон солэн чырткемезлы. Инкуазь, Инмар солы бадӟым кужым сётэм, со юрттэ мӧйы адямилы умой возиськыны, улонлэн ӧраз пыриськыны. Али но со ужа, заводэ ветлэ, бадӟым ужпумъёсъя визьмо малпанъёссэ вера. 75 арес тырмоназ министр Павел Грачев солы машина кузьмаз. Кызьы ке семьяеным сад-бакчаям потӥ. Одӥгаз ошмесысь ву басьтӥськом. Ошмес вадьсы ик дугдӥз УАЗик но. Отысь егит пи сямен тэтчыса потӥз арлыдо воргорон. Умойгес учки но - Калашников. Со но ву омыртӥз. Чырткемъяським, ма но со вераським но котькудӥз аслаз сюресэныз яратоно инкуазь сэрегаз ширтӥз. Соин ик мынам суредам со казна дӥськутэн уз лу. Гажано адямимес возьматэме потэ удмурт инкуазь пыр. Тодӥсько, Михаил Тимофеевич яратэ турлы будосъёсты, пӧртэм емышъёсты чакласа-эскерыса будэтэ. Бакчаяз вань асэныз малпам-лэсьтэм тӥрлыкез, техникаез. Отын но со кибашлы луэмзэ возьматэ. Суредасько дэра вылэ вӧй буёлъёсын. Уже быдэстымтэ на, но малпанэя, Калашников асьме удмурт бусыын инкуазез чакласа кадь сылоз. Со визьмо гинэ ӧвӧл, со кылбурчи но. Суредам сое возьматыны тыршисько чылкыт сюлэмо, улон шоры югыт синъёсын учкись адямиен. Калашников - со яркыт кизили, пуштросэзъя узыр адями. Куддыръя сыӵеос улон шоры пичи мурт кадь учко, ваньмызлы оскыса. Со сярысь вера таӵе учыр но. Одӥгаз ужрадын мон ваньмызлэсь егит вал. Соин ик Михаил Тимофеевичез келяны басьтӥськи. И вот со, дорозяз вуыса, пырыны ӵектӥз. Ойдо, пе, Петр Васильевич, учкы улон интыме. Монэ паймытӥз соиз. Мукет квартираос корт ӧсъёсын дуремын. Но солэназ - огшоры пу ӧс. Нокин чакласез-эскерисез но ӧвӧл. Нош одӥгез комната - быдэс музей выллем. Пӧртэм странаосысь бадӟым адямиослэсь кузьымъёс, зарнивуам букваосын дипломъёс, быдэс дуннеысь люкам пыӵал тӥрлык, мукет дуно арбериос. Мон кивалтӥсьёслы верано кариськи. Кызьы, пе, сыӵе адямиез огназэ кельтӥськом, ум чаклаське. Со ачиз но дуно но дано адями, музеез но дуно. Ярам, верамме пелязы понӥзы кадь, улон интызэ калык радъя тупатӥллям. М. Т. Калашников. В. Г. Костылевлэн суредэз. Дасяз Г. ЮСАЕВ. САРАПУЛ НО ИНКУАЗЬ Удмуртиысь художникъёслэн выставкаос возьматъян залзы толэзьлы быдэ паймытэ, бордаз кыске кыӵе ке но выль ужъёсын. Таяз учыре татчы ас суредъёссэс ваиллям Сарапулысь куинь эшъёс, Россиысь Художникъёслэн союззылэн членъёсыз Владимир Калинин, Владимир Пузаков но Равиль Хусаинов. Куиньназы ик соос профессионалъёс, дышетскемын университетлэн художественно-графической факультетаз. Соосты огазея, герӟа живопись амалэн инкуазез чебер суреданы быгатэмзы. Сыӵеесь луо В.Калининлэн "Паськыт возьёс", "Сайкыт ӵукна", "Огназ пужым", "Бус тӧлӟе", В.Пузаковлэн "Тулыс. Пужым яг", "Тол шунды" ужъёссы. Та эшъёс яратыса суредаллям Сарапул городэз но со котырысь интыосты. Т.Николаева. СВЕДЕНИЯ о кандидатах в депутаты Государственной Думы Федерального Собрания Российской Федерации, выдвинутых по одномандатным избирательным округам (по состоянию на 15.10.99 г.) � �п.п. Ф.И.О. кандидата � окр. Кем выдвинут Дата подачи уведомления Дата рожд. Место работы и должность 1. Шаматов Рамиль Гумарович 28 Избиратели 20.09.99 07.02.1964 ООО "Горизонт", директор. 2. Маслюков Юрий Дмитриевич 28 Избиратели 21.09.99 30.09.1937 НИИ Автоматической аппаратуры им. Семенихина В. С., г. Москва - Советник генерального директора 3. Рябов Сергей Витальевич 28 Избиратели 21.09.99 26.02.1973 Контролер по охране объектов и сопровождению грузов Управления Федеральной почтовой связи Удмуртской Республики 4. Баранов Сергей Васильевич 28 Самовыдвижение 22.09.99 21.09.1957 Общественное объединение "Общественный комитет за Законность и Народовластие" - ведущий эксперт 5. Баранов Николай Витальевич 28 Избират. блок "Коммунисты, трудящиеся России - за Советск. Союз" 24.09.99 28.09.99 08.09.1950 Верховный Суд Удмуртской Республики - судья 6. Синицына Ирина Евгеньевна 28 Изб. объедин. ВОПД "Духовное наследие" 24.09.99 06.10.99 09.05.1953 Уральский международный инженерный университет - ректор 7. Гурина Ольга Юрьевна 28 Изб. объедин. "Женщины России" 30.09.99 04.10.99 22.10.1955 профессор Ижевской государственной медицинской академии 8. Яирова Людмила Петровна 28 Изб. объедин. ВОПД "Наш дом - Россия" 30.09.99 12.10.99 27.09.1938 Российская государственная цирковая компания - президент, г. Москва 9. Беркутов Сергей Георгиевич 28 Избиратели 04.10.99 03.04.1962 Специализированная коллегия адвокатов Удмуртской Республики - адвокат 10. Баранов Анатолий Юрьевич 28 Избиратели 04.10.99 18.12.1959 Федеральное унитарное предприятие "ВИК МАНО", г. Москва - директор по общественным связям. 11. Солуянов Андрей Владимирович 28 Избиратели 05.10.99 08.11.1959 Депутат Государственной Думы Федерального Собрания Российской Федерации 12. Сямин Владимир Борисович 28 Избиратели 11.10.99 01.07.1959 ЗАО производственно-коммерческ. предприятие "РОСИНТЕРПРОМ" - начальник юрид. отдела 13. Секерин Николай Александрович 28 Избиратели 12.10.99 15.02.1958 Генеральный директор ЗАО "Уральский центр по маркетингу" 14. Соловьев Виталий Александрович 28 Избиратели 15.10.99 05.01.1933 Депутат Государственного Совета Удмуртской Республики 15. Роговец Клементий Антонович 29 Избиратели 23.09.99 03.01.1938 Ижевское отделение Горьковской железной дороги - начальник отделения 16. Роот Юлия Федоровна 29 Изб. объедин. ВОПД "Духовное наследие" 24.09.99 11.10.99 20.10.1977 Ассоциация научных и образовательных организаций "Уральский международный инженерный университет - пресс-секретарь 17. Шаньгин Александр Николаевич 29 Самовыдвижение 30.09.99 30.09.99 30.05.1962 Управление Федеральной службы безопасности по Удмуртской Республике в г. Сарапуле - старший опер-уполномоченный 18. Смирнова Светлана Константиновна 29 Избиратели 04.10.99 04.12.1962 Заместитель Председателя Государственного Совета Удмуртской Республики 19. Конькин Виктор Иванович 29 Избиратели 05.10.99 26.02.1950 Директор по торговле АО "Буммаш" 20. Першин Александр Васильевич 29 Избиратели 06.10.99 23.07.1959 Проектно-производственное предприятие "АРК" - г. Глазов, директор 21. Новоселова Надежда Юрьевна 29 Изб. объед. "ЛДПР" 06.10.99 12.10.99 09.04.1945 Предприниматель, г. Сарапул 22. Кошкин Михаил Петрович 29 Избиратели 12.10.99 10.11.1954 Депутат Государственной Думы Федерального Собрания Российской Федерации 23. Подопригора Владимир Николаевич 29 Избиратели 15.10.99 14.08.1954 Заместитель Главы Администрации Новгородской области. Избирательная комиссия Удмуртской Республики Светлана СМИРНОВА: "Мон оскисько, Удмуртия ӝутскоз". Туэ май толэзе депутатъёс Кун Кенешлэн Тӧроезлы воштӥсе бырйизы Светлана Смирноваез. Солэсь азьло та егит удмурт кышномурт Удмурт Республикаысь Правительстволэн Нациосын ужанъя комитетэзлэн кивалтӥсез вал. Газетлэн корреспондентэз куриз Светлана Константиновнаез кӧня ке юанлы валэктон сётыны. - Кун Кенеше депутат быръем дырысен ӝыны ар ортчиз ни. Шуг-а вал выль удысэ выжыны? - Закон бордын ужан, зэм но, мон понна тодмотэм удыс вал, студент дыръям Ижысь Горсоветэ депутатэ бырйылӥзы ке но. Но котьмалы дышыны кулэ. Кӧня ке толэзь ӵоже шӧдӥ ужлэсь аспӧртэмлыксэ, тодматски трос дасо адямиосын, кызьы шуо, ӧраз пыри ни. Мыным оскемын кунэз радъянъя, интыысь аскивалтонъя, законностез чакланъя, нациос куспын политикая ужпумъёсын вырыны. Соин ик син азьын возисько ялан ужась кык валтӥсь комиссиослэсь ма лэсьтэмзэс. Пусъем потэ: соослэн кивалтӥсьёссы Жанна Дворцова но Михаил Кокорин - юристъёс, кыксы но уж борды ӝутскем мылкыдын басьтӥськизы. Со сяна, вань куинетӥез комиссия - Регламентъя но Кун Кенешлэсь Ужзэ радъянъя. Удысмес ми мытӥм закон кылдытонъя программа дасям бордысен. Уго быдэстоно ужпумъёс туж трос, ваньзэ огдыре лэсьтыны уг луы. Уноез пӧлысь висъяно вал та дырлы укыргес кулэоссэ, соосты сессиосын мукетъёсызлэсь вазьгес эскерон вылысь. Та арлы программаез депутатъёс юнматӥзы. Табере соя ужаськом. - Кыӵе бен ужпумъёсты тӥ азьпала поттӥды? - Законъёсын одӥгез бадӟымез блок герӟаськемын ваньбурез мукет кие выжтонэн (приватизациен) но со чотын экономикаын югдурез умоятонэн. Лыдӟисьёс тодо ни, вылды, 5-тӥ октябре та документъёс пӧлысь уноез эскеремын. Али соосты выльысь учко комиссиосын, вуоно заседаниын та пумысен вераськон нош ӝутскоз. Кун Кенешлэн таяз ӧтчамаз быръем депутатъёс пӧлын кык куиньмослэсь уноез меӵак герӟаськемын ваньбур поттонэн. Соос кивалто бадӟым но шоро-куспо предприятиосын, ужало банкын но мукет со выллем организациосын. Соин ик ӟеч валало ваньбурлэсь кузёзэ воштонъя программалэсь но та ужпумъя законъёслэсь кулэ луэмзэс. Уго дыр вуиз ни приватизация ортчытэммылы куд-ог йылпумъянъёс но лэсьтыны. Котыр ласянь чаклано, ма сётӥз таӵе вамыш соизлы яке таизлы предприятилы, кыӵе янгыш лэсьтэмын, кызьы сое тупатоно. Кыкетӥез бадӟым ужпум потэ кун властьлэсь но интыосысь аскивалтонъя ёзъёслэсь кусыпсэс радъян бордысь. Кызьы ке огъя Россиын, озьы ик асьме дорын тупамтэос кылдэмын ӟеч законъёс тырмымтэен. Таӵе югдур уно улосъёсын пумиськылэ. Соин ик быдэс странаын сое умоятон сярысь малпаськоно. Аслэсьтым та пумысен мылкыдме верано ке, тазьы шуысал: интыысь аскивалтон - государстволэн инъетэз, пӧртэм ёзъёсысь власть ог-огеныз юн герӟаськыны кулэ. Бен, гуртъёсын, ёросъёсын, городъёсын асьсэ ужпумъёссэс асьсэос эскерыны-быдэсъяны кулэ, соиз шонер. Но аскивалтонэз кун властьлэсь люкыны уг яра ук. Кызьы инъетэз юртэзлэсь висъялод? Ас коже кивалтонъя асьме законэ Кун Кенеш куд-ог воштонъёс пыртӥз. Соин ӵош ваньмыз радъяськиз шуыны нокызьы но уг луы на. Та ужпумез ми уно пол эскером на. Мынам малпамея, асьмеос, республикаын улӥсьёс, син азямы пуктыны кулэ ӵуказе нуналмес. Соин ик ми турттӥськом 2003-тӥ арозь закон кылдытонъя программа дасяны. Валамон ни, сое эскеронэ пыриськыны кулэ ваньмыз, кинлы Конституцияя сётэмын законлы кичӧлтонэн потыны право. Та ласянь уж мынэ ни. Депутатъёс, соослэн фракциоссы, ялан ужась комиссиос, озьы ик ёрос администрациос дасяло ӵектонъёссэс. Котькуд дэмланэз ми одно ик лыдэ басьтыны тыршом но ар пумын программалы инъетэз сессие поттыны быгатом. Солэсь азьло радъяны чаласьком на парламентын нимысьтыз кылзонъёс. - Светлана Константиновна, нош та нуналлы дасям заоконопроектъёс сярысь мар верасалды? - Кун Кенешын кылем арысен кыллё интыысь образованиослэн уставъёссы. Соосты юнматыны кулэ Президиум. Но та пумысен нимысьтыз закон ӧвӧлэн, радзэ шедьтыны уг луы. Витетӥ сессиын учкыны чакламын сыӵе документлы инъет. Оскисько, Кун лэсьтӥськонъя комиссилэн ужез юнме уз луы - законэз кутозы, озьы югдурез матысь дыре ик воштыны быгатом. Дасямын депутатэз ужезлэсь мозмытонъя законлы инъет. Солэн кулэлыкез валамон. Адямиос асьсэос быръё бере созэ яке тазэ адямиез депутатэ, соос ик быгатыны кулэ сое та ужлэсь палэнтыны. Озьы ук? Котькудӥз, кин кисыяз возе мандат, медам вунэты быръён азьын сётэм кылзэ но со азьын сылӥсь ужпумъёсты. Малпасько, таӵе закон юрттоз депутатъёслэсь ответственностьсэс ӝутыны. Озьы ик вераны луысал на асьме шаерын корт бичанэз но басьтонэз радъян сярысь закон бордын ужаммы сярысь. Та ужпум туннэ троссэ сюлмаськытэ, соин, вылды, куд-ог эшъёсмы дась ни та пумысен федеральной законлы но инъет ӵектыны. - Печатьын ивортылӥзы ни, Кун Кенеш асьме Конституциез но выльдыны турттэ шуыса. - Бен, кылдытэмын ужась группа. Отчы пырись эшъёс вуоно тулыс ӵектонъёссэс вераны кулэ вань депутатъёслы. Нош ужпум со бордын. Удмуртия - парламентэн республика. Россиысь улосъёс пӧлын асьме дорын гинэ (Дагестанэз вератэк) та дырозь ӧвӧл на вань калыкен быръем тӧро. Кулэ ини элькунамы но кун радэз огъя странаын кадь карыны. Та сярысь, нялтас вераны кулэ, Кун Кенешлэн нырысетӥ ӧтчамаз быръем депутатъёс но уно пол кенешылӥзы. Со сяна, мукет но ужпумъёс вань ни. Малпасько, ужась группа лыдэ басьтоз шаерысьтымы валтӥсь кужымъёслэсь мылкыдзэс но 1-тӥ маёзь Конституцие воштонъёсты но ватсанъёсты дасяса вуттоз. Отӥяз ини адӟом, кызьы соосты кутыны луоз яке референдум ортчытом, яке депутатъёслы оском. Мон верай законъёс бордын ужаммы сярысьгес. Но Кун Кенеш, солэн кивалтӥсьёсыз трос мукет но ужъёсты быдэсъяло на. Мыным, кылсярысь, трос бызьылоно луэ Куӟебай Гердлэсь но Ашальчи Окилэсь нимъёссэс пыраклы тодын возён ужрадъёсты йылаз-пумаз вуттонэн. Озьы ик син азям возисько удмурт нимкылъёсъя комиссилэсь ужзэ. Трос кужымез но дырез кулэ каро оскисьёслэн шуг-секытъёссы. Тани та нуналъёсы кенешиськом лютеранъёсын. Соослэсь черксэс куке но государство киултэм но бӧрысь куашкатэм. Табере инмарлы оскисьёс куро кыӵе ке юрт висъяны яке ыштонзэс коньдонэн берыктыны. Та выллем юанъёс нуналлы быдэ сямен кылдыло. Но соослэсь палэнскыны уг луы -уго Кун Кенеш асьме республикаын вылӥ кивалтӥсь ёз лыдъяське бере, адямиос татчы ӟечезлы оскыса лыкто. - Лыдӟисьёсмес шугъяськытэ Удмуртиын кылъёс сярысь законэз кутымтэзы. Ку сое эскерозы? - Туэ ар пумын чакламын Кун Кенешын та ужпумъя кылзонъёс ортчытыны. Нош кайта законлы инъетэз эскерозы ни сессиын. Вераськонмес йылпумъяса, тазьы шуысал: улонамы та вакытэ пумиськылӥсь уно шуг- секытъёс шоры учкытэк оскисько, Удмуртия матысь аръёсы одно ик ӝутскоз. Сыӵе мылкыд кылдэ, шаерамы улӥсь адямиосын ӵемгес пумиськылыса но соосын матэгес тодматскыса. Книгаос кузьмазы Вавожын, пе, библиотека ӝуам шуыса ивортэмзы бере, Печать юртысь редакциос пыд йылазы ӝутэмын вал. "Кенеш", "Ӟечбур" но "Удмурт дунне" кин кӧня быгатэм книга, журнал люкаса юрттыны дыртӥзы... - Нокыӵе библиотека ӧз ӝуа, - буйгатӥз ёросысь культурая ёзэн кивалтӥсь Виктор Геннадьевич Шутов. - 1996-тӥ арын сутскыны шедиз РДК-ысь кӧня ке методической литература гинэ. Нош али книга люкаськом Нюрдор-Котья торфопредприятиын усьтӥськись выль библиотекалы. Книгалы шуыса Иже лыктӥллям Вавож ёрос администрацилэн кивалтӥсеныз Татьяна Васильевна Иноземцеваен. Акциосын "Буммаш" огазеяськонлэн профсоюз комитетаз 900 пала книгаоссэс дорысьтызы ваиллям та предприятиын ужасьёс. Ӝогак та ужез радъязы профкомлэн кивалтӥсез Федор Николаевич Горшков но солэн юрттӥсьёсыз. Малпало но, выль арозь эшшо кӧня ке чеберлыко литература бичаны. Та амал кыкна ласянь ик умой. Библиотекаос но узырмо, адямиос но кулэтэм луэм, лыдӟем книгаоссылэсь мозмытско. Чаклано ке, таӵе юрттэт - пайдаё кусыплэн огпалыз гинэ. "Буммашъёс" Вавож ёросысь учреждениослы берло дыре кузьмазы мисьтаськон, шунтӥськон арбериос, линолеум. - Азьпалан "Буммаш" та ёросысь производство удысэз шефствое мед басьтоз вылэм, - дэмлаз та пумиськонын Кун Кенешлэн депутатэз Виталий Александрович Соловьев. Т. Петрова. * Т. В. Иноземцева. Ф. Н. Горшковлэн дэмлам книгаосыныз тодматске. В. Камашевлэн туспуктэмез. Инкуазь сярысь Выль адӟытон усьтӥськоз туннэ шаерысьтымы изоискусствоосъя музейын. Со сӥземын улонысь дырызлэсь вазь кошкем тодмо суредасьлы Игорь Бехтеревлы, солэн вордӥськемез дырысен куатьтон ар тырмонлы. Адӟытонысь ужъёс вералозы шаерысьтымы аспӧртэмлыко инкуазь, солэн дано но учкымон интыосыз сярысь. Луозы данак натюрмортъёс, суредасьлэн тодмоосызлы но матысь адямиосызлы сӥзем портретъёс, автопортрет. Ас вакытаз художник дышетскиз Удмурт кун университетысь чеберлыкъя но графикая факультетын. Адӟытон усьтӥськоз дас сизьым часын. Е. РОМАШОВА. Школаын - вить аресъем нылаш Киясово ёросысь Кумырса гуртысь школаын 11 пинал дышетске. Ваньзы огшорыесь кадь, но... Оксана Анатольевна Беляева верамъя, агай-апайёсыз сьӧры школае ветлэ на пичи нылаш. Вить аресъем Настя Красноперова. Номырин уг висъяськы нырысетӥ классэ ветлӥсьёслэсь. Быгатэ ни со гожъяськыны, лыдӟиськыны но сюозь лыдъяськыны. Нылашлы кельше тодон-валан басьтон шаере ветлыны. Кин тодэ, азьланяз но пичи "филиппок" школае капчи мылкыдын ветлӥз ке, оло, Кумырсаысь вундеркинд но луоз. В. НИКОЛАЕВА. Каникулъёслы йылпумъянъёс Тол вуэ, дасяськы гужемлы Писпуос гольык кылизы, лымы пырыос кышкатъясько ни тол куазез ваёнэнызы, нош Ижевскысь Нылпи творчествоя дворецын 19-тӥ октябре выльысь берытскизы кадь шундыё нуналъёс. Нылпиослэн гужем шутэтсконзылы йылпумъянъёс лэсьтыны люкаськизы Удмурт Республикаысь Кун Кенешын, Правительствоын, Егитъёсын ужанъя кун комитетын, пӧртэм министерствоосын но ведомствоосын ужасьёс, предприятиослэн но ёрос администрациослэн кивалтӥсьёссы, педагогъёс, вожатойёс. Оглом вераса, ваньмыз, кин юрттӥз но сюлмаськиз нылъёслэсь но пиослэсь шутэтсконзэс радъяны. Нош кыӵе праздник луоз, асьсэос нылпиос ӧз ке пыриське шулдыръяськонэ. Эктонъёс, кырӟан-веранъёс пыр соос син азе яркыт пуктӥзы гужем нуналъёсты. Шаерысьтымы нылпиос понна ужазы пӧртэм лагерьёс. "Шундыкар" люказ удмурт семьяосысь пинал усточиосты, "Призывник" вуоно солдатъёсты дасян борды басьтӥськиз, "Родникиысь" пионеръёсты сюлмаськытӥз шаерысьтымы шуръёсты чылкытатон, секыт сямо пиналъёсты эшлыко мылкыдын пумитаз Пироговоысь аэроклуб. Ма, ӧжыт-а соос, ваньзэ вераса но уд быдты. Нылъёс но пиос сюлэмзыя бырйыны быгатӥзы экологияя лагерьёсты я пинал нюлэскасе гожтӥськизы, кырӟась-верасьёс но огазьын шутэтскизы. Пусйыны кулэ, таяз аре тросгес вал нимаз ужпумъёсъя-темаосъя ужась лагерьёс. Нылпиослэсь шутэтсконзэс ӟечгес радъянъя программаос кылдытоно вал. Соосты эскере координационной совет. Тужгес но ӟеч программаосты Россия Федерациысь Егитъёсын ужанъя кун комитет сертификатъёсын пусйиз. Нырысетӥ инты сётэмын "Егит семья" кун учрежденилы, экологияя "Берегиня" лагерез радъямзы понна. Кыкетӥ луизы Дэбес ёросысь егитъёсын ужанъя отдел. Нылпиос пыриськизы "Вашкала Сибирь тракт кузя" ужрадэ. Куинетӥ интые потӥз "Шундыкар" лагерь. Шутэтскем сяна, нылпиос тазалыксэс юнматӥзы. Со ласянь тужгес ӟечен пусйыны луоз В арзи-ятчи санаториез. Ёросъёсысь калыкез улон-вылонын утёнъя центръёс но бере ӧз кыле шунытсэс пиналъёслы кузьманын. Огазьын шутэтскыны, шулдыръяськыны сюрес усьтӥськемын инвалид нылпиослы но. Ужтэк кылем анай-атайёс озьы ик капчияк шокчыны быгатӥзы пиналъёссылэн кӧтсы тыр улэмысь. Нимысьтыз саклык висъямез кулэ карись 72 сюрс пиналъёс понна таяз гужем шунды яркытгес пиштыны ӧдъяз, дыр. Сомындаезлы ик пиослы но нылъёслы шуд усиз кыӵе ке но уже интыяськыны, асьсэ киосынызы пичильтык ке но коньдон поттыны. Кин урамъёсты чылкытатӥз, мукетъёсыз пудо котырын бергазы, турын-куар бичазы, школаез тупатъянын ужазы. Мар бен, куазь берланьяськныы выриз ке но, таиз гужем тросэз нылпиос понна пӧсь вал. Шаерысьтымы 220 сюрс пиналъёс шутэтсконзэс пайдаё ортчытӥзы. Со понна висъямын вал 72 сюрслэсь ятыр коньдон. Кызьы шуиз Удмурт Республикаысь Правительстволэн Тӧроезлэн воштӥсез Виктор Шудегов, нылпиослэсь шутэтсконзэс радъян Правительство понна валтӥсь интыын сылэ. Кивалтӥсьёс сое уж вылын но возьматыны тыршо. Гужем шутэтсконлы туэ, кылем арын сярысь, шаермылэн бюджетысьтыз куинь поллы ятыргес коньдон висъямын. Россия Федерациысь бюджет но коньдонзэ ӧз жаля, кык но ӝынылы будэтӥз. Нимыьстыз пусйыны кулэ шаерысьтымы Соцстрахлэсь фондзэ, кудӥныз кивалтэ Иван Морозов. Нылпиослэсь шутэтсконзэс радъяны фонд туэ висъяз 15 миллион манетлы ятыргес коньдон. Озьы ке но, шумпотыны, "ура!" кесяськыны вазь на. Шаерысьтымы тросэз нылпиос гужем каникулъёсы палэнэ кылё. Озьы, эрик пӧлы йыромыса, йыртэман сюрес вылэ но султо. Виктор Шудегов та пумиськонын туж шонер вераз: пиналъёслэсь гужем шутэтсконзэс радъянэ ёрос бюджетъёс тросгес коньдон висъяны кулэ, арысь аре со мед будоз. "Гужем-99" йылпумъяськиз, ӧсъёсы йыгаське ни "Гужем - 2000". Нылпиослэн ужъёсынызы радъям выставкаез учкыса, пиналъёслэсь шутэтсконзэс радъянэ ӟеч пыриськемзы понна Кун Кенешлэн но Правительстволэн Данъян грамотаосынызы пусъемъёсты адӟыса оскон кылдэ - вуоно гужем но пӧсь луоз. Л. МАЛЫХ. Кандидат пусъемын Дас витетӥ октябре быръёнъя окружной комиссия Россилэсь азьвыл нырысетӥ премьер- министрзэ Юрий Дмитриевич Маслюковез одӥг мандатэн 28-тӥ Ижевск округъя Кун Думаысь депутатэ кандидатэ пусйиз. "Мон туж шумпотӥсько, пусъён умоен ортчиз", - шуиз телефон пыр Юрий Маслюков. - "Быръёнэ пыриськыса, кыл сётӥсько нюръяськонэз нуыны пӧяськытэк но шонер!" Вераны кулэ: Юрий Маслюков пусйиськон понна бырйисьёсызлэсь котькинлэсь уно куара люказ но Удмуртиын Ижевскысь одӥг мандатэн округъя нырысетӥез депутатэ кандидат луыса пусйиськиз. Галина РОМАНОВА Ватос верос Деми песятайзэ син шораз бус пыртӥ кадь гинэ пуктэ: бадӟым сьӧд тушо, ӝужыт. Гуртоосыз со сярысь шуо, пыдтышказ но, пе, оло, визьмыз вал, йыртышкыныз но адӟылӥз. Соин солэн поттэм коньдонэз чиньы пыртӥз ӧз кошкылы, трос добра люкам. Нош кулаке поттонзэс шӧдыса, со ваньбурзэ возэн-возэн кытчы ке нуллэм, ваткам. Пичи Демилы кулон азяз шуиз: "Музъемез ке сьӧдманы быгатӥд, пие, уд кулы". Ачиз Деми чиньыр-ваньыр будӥсь серыпу кадь гинэ. Озьы ке но, кызьы пичи вень ваньзэ дӥся-кутча, Деми но семьязэ няньтэк-дӥсьтэк ӧз возьы. Муш сямен ужаз музъем вылын. Нылпиосыз Демилэн лобӟизы. Кышноеныз но мырдэм векась мӧйы песянаеныз гинэ кылизы ачиз кадь ик лапег пу корказяы. Табере Деми дырлэсь вамышъёссэ лыдъяса-чотаса уг ул ни. Шунды ке выллань, нунал но азьлань. Азьвыл со ваньзэ синмыныз гинэ адӟыса улӥз ке, табере трос дырыз луиз визьмыныз бергатыны. Кеносысь песятаезлэсь шедьтэм чильымзэ кенжытоз но кема-кема малпаськыса пукоз. Котыраз одворчазэ учке но лулӟиське: вань улонзэ музъемез гыриз-сьӧдмаз, песятаез дышетэмъя, озьы ке но пилиськем тусь дуре кылиз. Сисьмыны кутскем корказэ пал синмыныз гинэ учке на, гидкуазьзэ куака таркам кожалод. Соосты вакытаз выльдыны моӵез ӧз сузьы - нылпиосыз векчи вал. Собере улон чутрак паллянэ кожиз. Нылпиосыз но берло аръёссэ огез но кыкез Демилэн кисыяз учкылыны кутскизы. А мар отысь утчаськонэз: кызьы со буш вал, озьы ик буш кылиз. Аслыз ачиз Деми сыӵе жаль потӥз - коть вуз. Калык угось вакытсэ шедьтӥз, табере шудон корка кадь юртъёсын уло, машинаосын ворттыло, быгатӥсез коньдон дуре. Ма, Деми кадьёс шоры гуртазы сокем кырыж уг учкыло, но куд-огезлэн пыӵкылэмез, исам-мактамез потэ ик: вайыжед весь-а вакчи на, Деми, ку-о сое воштыны нюлэскысь пипу ваёд. Выжыез выжызэ бер ке но, шедьтэ, шуо. Одӥг пол, кенос азяз песятаезлэсь чильымзэ пурккетыса пурккыкуз, Демилэн йыраз чилектӥз: кытчы медам песятаез ваньбурзэ ватӥз, зарни-азвесез но вал, дыр. Ма, кызьы, пе, уз луы сыӵе синмо-визьмо адямилэн. Со ӝикытаны, кыдёке азьпала учкыны быгатэ вылэм. Нош малы меда кулон азяз песятаез Демилы ватоссэ ӧз вера? Пичигес на вал угось. Оло, песянайзылы вераз? Деми интыысьтыз пинал мурт сямен тэтчиз, корка пыриз. - Песянай, тӥ песятаен ваньбур трос люкады вал, шуо. Уд тодӥськы-а, кытчы сое ватӥз? - Ой, пие, аръёс визез но ведь пурысьтато. Кытчы ке нюлэскы нуллӥз кадь. - Кыдёке-а? - Кыдёке, Куакасеп пала. - Фу! - сялӟиськиз Деми. - Ма, Куакасеп со нюлэс ӧвӧл ук - выро-гопо, вукыремо бусы. Кытчы-о отчы ватод? - Ма, азьвыл отын нюлэс вал кадь. - Вал ке - скал ини. "Дугды ай, дугды, - нош малпаське Деми, - отысь нюлэсэз, иське, коразы, луоз. Ветлоно, чаклано". Йыр малпа, пыд нуэ. Но Куакасепе вуыса, Демилэн мылкыдыз кузял пот сием кадь луиз. Ожоен шобырскем выр-гопъёс, горд сюё но кӧльыё мур вукырем интыысь ватосэз утчан кабанысь венез утчам кадь луоз. Деми киыныз шонтӥз но аслыз ачиз шуиз: "Инмарлэн гожтэмезлэсь азьпала уд мыны". Озьы ке но, сюлмаз-кӧтаз пырем нумырез сое весь бичатыса возе. Дырын-дырын пересьсылэсь нош но нош юалляське. Соиз ымаз ву ӟузем сямен чалмытскиз. Демилэн нумырез маза уг сёты - пересьсы та юанлэсь сыӵе шуак палэнтӥськиз бере, татын маке но вань. Сандыкез, шуо, тунгонэн юнме уг пытсало. Кызьы меда пересьсылэсь ымзэ усьтоно? Деми котыртӥз коӵо сямен кыӵыртыса но берга, кытӥ-отӥ пуны сямен но утэ. Уг, номыр уг пӧрмы. Кышкатоно шат? Пересьсылэн урдэм пуппылы укшась начар, векчи мугорыз шоры учке но, жалезлы уг чида - кытыназ лулыз возиське на. Ӵуказеяз Деми Нылга базаре ветлӥз, пенси коньдонэныз пересьсылы кашимер кышет, дэремлы бурчин басма басьтӥз. Соиз кузьымъёссэ кияз бергатыса-бергатыса учкиз но сандыказ ватӥз. Ымзэ но ӧз усья, пал кыл но ӧз вера. Демилэн кышноез Насьта ваньзэ тае палэнысен учкыса улӥз - висказы ӧз пыры. Адямиослэн мӧйымемзыя йыразы кеньырез йылэ-будэ, нош мынамезлэн кисьтӥське, лэся, шуыса, ас понназ кайгыриз. Висён адямиез уг утча, ачиз сое шедьтэ. Пушкысьтыз нумырез Демиез тани-тани сиыса быдтоз: ымнырыз ӵужектӥз, мугорыз кокормиз. Доразы ӧтем першалъёс киынызы гинэ чабкисько: нокыӵе висёнзэ, пе, ум адӟиське. Деми валес вылэ усем бере, пересьсы солань-талань эли-кеби ветлыны кутскиз - пыдпыдэсказ пыӵ куртчиськем, кожалод. Собере мырдэм кер-кор шокась Деми доры мыкыртӥськиз но пеляз сипыртӥз: - Бакчаын, гид берын, ватэмын со. - Мар? - нырысь ӧз вала Деми. - Ма, мае утчаськод. Деми кышнозэ пинал атассэс вандыны косӥз, кубистаен курег лым, пе, сием потэ. Воргоронлэн ымныраз кык нуналскын ӵыжыт пыриз, куинетӥ нуналаз валэсысьтыз кочон кадь чорк султӥз. Пересьсы Демилэн пеляз нош сипыртӥз: - Уйшор уин атас чортэм бере, бакчае пот но гид бере учкылы: зарни ватэм интыын сюсьтыл ӝуатскоз. Кытын ӝуатскиз - со вадьсытӥ гуд. Демилэн кӧлон вунӥз. Быдэс арнязэ ини со уйёсты бакчаын ортчытъя, нош сюсьтыл уг ӝуатскы. Насьта картэз шоры жаляса учкиз-учкиз но шуиз: - Демие, тырмоз ини бакчамес возьманы, кияр-помидоръёсты октӥ, картошез чылкак уз лушкалэ, дыр. А то нош черлалод. Деми ныр улаз бурккетӥз: - Кулэ вал со картошед! Насьта интыяз ик пуксиз: туно-пелё доры ветлытэк уз луы пересьмон-уймон вакытаз мурт синъёс сое палёмытӥзы, ведназы, луоз. Малпамын - лэсьтэмын. Демизэ, пе, кыӵе ке ӵуж чилясь синъёс кыско, улыны маза уг сёто. - Ма, ӵуж синъёс луо шат? - паймыса юа Насьта туно-пелёлэсь. - Луо-а, мар-а, - стаканысь вуэ куштэм коньы шоры учконъяз шуэ туно-пелё. - Тани тыныд сизьым турын-куаръёслэсь парыса пеллям ву. Изьыкуз шораз пазьгы - юрттоз, нимзэ но вералоз. Дораз бертыса, Насьта нуназе шорын изись картэз вадьсы мыкырскиз но, эмез-юмез та медло шуыса, вань кужмысьтыз пеллям вуэн пазьгиз. Деми синзэ усьтӥз но куалектыса юа: - Кытын?.. Мар?.. Сюсьтыл ӝуаз-а? Зарни адскиз-а? Насьта ачиз но куалектӥз, пӧсь таба вылысь сямен интыысьтыз тэтчиз. Собере, кӧня ке буйгамез бере, ӵыжтэм вӧй куараен вазиз: - Мон со, Демие, мон. Сюсьтыл ӝуатыны вазь на, кулэмедлэсь азьвыл уд кулы. Нош зарниез асьмеос сопал дуннеысь гинэ адӟом ини. - Ужлы ёрмид ке, тӥни со коӵышмес коть куареты, - бурсӥз Деми но коркась пырс потӥз. Мукет уяз Насьта но изьыны ӧз кариськы, картэз сьӧры лушкемен бакчае потӥз. Атас уйшоре чортэм бере, картошка пудъёс вискын кыӵе ке тыл адӟиськиз. Деми кучыран сямен со тыл вылэ омырскиз. - Ӧб-ӧб-ӧб! - кеськем кылӥськиз. Насьта ури-бери соос пала бызиз, картошка пуд пӧлы ватскиз. Деми гуртысьтызы ик егит пияшез кырмем но солэн фонарикеныз бамаз югдытыса кылзэ юа: - Мар татысь кулэ? Мае утчаськод? - Лэзь монэ, - сюлворе пияш. - Эшъёсы косӥзы, мак йыр утчасько. - Эшшо татысь адӟи на ке, атаедлы верало. Сётоз со тыныд мак йыр, - пияшез донгыса лэзиз Деми. Соиз пыдъёсыз йӧтылытэк пегӟиз. Насьта картошка пуд пӧлын шоканы дӥсьтытэк пуке. Деми йырыз курен сялӟиськиз но корка пыриз. Табере Насьта ваньзэ валаз, ассэ ачиз тышкаське. Учкод ке, картэз шпанаосын, наркоманъёсын нюръяське вылэм, нош со, шузи, ӵуж синъёс... Собере йыр бордаз кутскиз: ма, мак сяськаоссы соослэн ӵужесь вал ук, сое ик адӟиз, луоз, туно-пелё. Насьта буйгаз. Табере Демиез, бакчае потыкуз, батырез сямен келя, индылэ: - Уйёс сӥзьыл пала кыстӥсько ини. Шунытгес дӥсяськы. Чакласькысагес ветлы, а то со наркоманъёслы всё одӥг, пе, - мак понна вордэм анай-атайзэс но вузаны дасесь. Маин ке ожалтыны но шедьтозы. Я, мын, мын... - Эн мерскы, ачим тодӥсько, - Деми кышноезлэсь индылэмзэ пель сьӧртӥз лэзе но бурккетыса кошке. Пересьсы кыштырак гур вылаз тубе, ымаз ву ӟузем кадь шып улэ. Кыкетӥ толэзяз Демилэн чиданэзлы пум вуиз. Кышноез адӟымтэ дыръя пересьсэс пыкылэ. Соиз нош весь одӥг гозызэ пунэ: - Песятаедлэн сётэмез уг поты на, дыр, пие. Монэ возьма, луоз. Деми нош бакчае потэ, сыч сямен гид бер пеймытэ учке. Ӝуась сюсьтыллэн тусыз уй но нунал маза уг сёты. Нош зарнилэсь туссэ син шораз пуктэмез нокызьы уг луы - сое угось ноку нокытысь адӟемез ӧвӧл. Демилы потэ, соос зарниен ватскыса шудо кадь - кин кинэ нырысь адӟоз. Пиньзэ куртче но аслыз ачиз шуэ: куто, потто мон тонэ югыт дунее, ӵуж тютюпиез сямен пиям поно. Кулэм муртъёслэн лулзы, пе, адямиос пӧлын ик уло-ветло, ваньзэ адӟо. Деми песятаезлы жаль потӥз, луоз: одӥг уй атас чортэм бере, гид берын сюсьтыл ӝуатскиз. Деми кемалась дасям лэчыт лопатказэ кутӥз но сюсьтыл пала бызиз. Соиз уг кысы, уй пеймытын дырекъяса ӝуа. Матаз коӵыш сямен лаптӥськыса вуиз но - соиз чиптэм-чаптэм ышиз. Деми сюсьтыл бервылэз син шораз возиз, отӥ копаны кутскиз. Сюлмыз тэтча, тани-тани пилиськоз яке гадяз тэрытэк потоз но лобӟоз. Кужмыз кызь арес дырызлы берытскиз - кык метр мурдала гуэз оп! шуытозь копаз. Лопатаезлэн нырыз чурыт борды шуккиськем бере гинэ копамысь дугдӥз. Дырекъясь киосын лэзиськиз со чурыт маке вылэ. Ки улаз сюриз паськыт горшоклэн пельпумыз. Котырысьтыз сюйзэ киыныз сузяз но горшокез ӝутыны дасяськиз. Озьы но, тазьы но котыртӥз берга - ӝутыны уг вормы. Усьтӥз - ки улаз сюризы питырес векчи но таза корт манетъёс. Уй пеймытын соосты Деми адӟыны ӧз быгаты, кияз чачаен сямен шудӥз-шудӥз но жадем мугорыныз горшок вылаз ик ланьырскиз. Озьы шедьтосэныз ӟыгырскыса ӵукнаозь кӧлӥз. Шунды вылэ ӝутскем бере гинэ сайказ, котырак учкиз но кӧшкемаз: мур гуысен инбам кесэг гинэ адӟиське, сюй вылын - ӵуж но тӧдьы корт манетъёс. Деми, горшок вылэ султыса, гуысьтыз потыны сузьтӥськиз. Кытын, пе. Лопатаен гу урдэсаз лёгетъёс лэсьтыны кутскиз вал но, сюез небыт вылэм - юдэсэн-юдэсэн усьылэ. Татчы улэпкын сюе согиськод шуыса, Деми вань кужмысьтыз чангес куараен кеськиз: - Юрттэ! Поттэ монэ татысь! Куараез гулэн борддорысьтыз сюез гинэ уськытӥз - кылӥсь ӧз лу. Нош кеськиз. Чал- чал... Ӵуказеяз, картэзлэсь корка пырымтэзэ шӧдыса, Насьта гурт кузя кошкиз. Демиме, пе, шпанаос кытчы ке шуккыса куштӥзы, луоз. Насьталэсь пыӵ куртчем кадь бызьылэмзэ адӟыса, кудӥз пайме, кудӥз жаля. Зэмзэ но, пе, урам кузя кыӵе ке тодмотэм воргоронъёс ветлӥзы. Картсэ нокытысь шедьтытэк, Насьта бакчаяз потӥз. Оло, картошка пуд пӧлаз онгратӥзы шуыса, кузяз ветлэ. Собере пель сьӧраз кытысь ке музъем пушкысь кадь Демиезлэн куараез шуккиськиз. Кудпала мыныны уг вала. - Деми, - кесяське, - кытын тон? - Татын, татын, гид берын! Насьта шок-пуль вуиз но, картсэ мур гуысь адӟыса, пыдессинъёсыз жильдӥськизы - ӧжыт гинэ Деми доры ӧз усьы. Ярам, музъем вылэ пуксьыны вуттӥз. - Мар бакомид?! - бурсӥз Деми. - Гозы вай, потты монэ татысь! Мырдэм но кызьы Деми гуысьтыз потыны быгатӥз. Кышкамез ортчем бере тодаз лыктӥз: вылӥысен пукем гуаз учкиз. Отын котырак ӵуж но тӧдьы котырес коньдон пазяськемын. Дыртӥд-вуттӥд берен гуаз тэтчиз. Ак но, бак но шуыны вуымтэ Насьтаезлы кеськиз: - Кеносысь мушко вай, зарни-азвесез поттоно. Насьталэн пыдъёсыз музъеме бурмизы - вамыш но лэсьтэмез уг луы. - Кылӥськод-а, уд-а - мушко вай! - кеське Деми. - Ма, ма, ма... Деми, кинлэн-о со зарниез? - Асьмелэн. Насьта, кудӟем мурт сямен шӧл-пал шонаськыса, мушколы кошкиз. Деми горшокез ӝутыны уг вормы, пушкысьтыз зарни-азвесь коньдонъёсты кисыяз, картузаз тыре. Насьта мушко лэзем бере, ватосэз кык пол ӝутоно луизы. Куинетӥяз горшоксэ поттӥзы. Собере гузэс кыкназы согизы. - Деми, кытчы каром тамында зарнимес? - кышкам куараен юа Насьта. - Кин ке тодӥз- мараз ке нош?!. - Кылдэ пинь сьӧрад возид ке, нокин уз тоды. Кузпалъёс зорем зарнизэс-азвесьсэс кеносазы ю пӧлы тыризы. Ватосэз шедьтэмзы бере, пересьсы черлаз. Уг но сиы, уг но юы. Веранэз одӥг: - Песятайды дораз ӧте ини. Зэмзэ но, ватосэз шедьтэм бере арня ортчыса, пересьсы кулӥз. Кулон азяз Демиез ӧтьыса пеляз сипыртӥз: - Зарниды шуд ваёз медам, пие. Песятаедлы сётэм кылме ӧй быдэсты - кулэмелэсь азьвыл ватослэсь интызэ верай. Зарнидылэсь чиньы пыртӥды кошкемзэ шӧдӥды ке, берен со интые ик ватэ. - Ватом, ватом, - буйгатӥз Деми пересьсэс, нош ачиз малпаз: "Кин меда кияз сюремзэ чиньы пыртӥз лэзёз ни". Пересьсэс быдэс гуртэн ватӥзы. Тапал дуннеын вирсэрлы адями вал, сопалаз но ӟеч мед улоз ни шуыса келязы. Ватонын Насьтаен Деми ымазы ву ӟузем кадь улӥзы. Демилэн вордскемез сыӵе - ымыз кортнамын, кулэ дыръя но сиктанэн но уд бералты. Нош Насьталы мар луэм?! Ымыз пельдорозяз ветлӥз, кенерез ӧй вал - табере, кожалод, кин ке сое кышкатэм я жугем. Калык шоры синзэ уг ӝутъя, маке юало ке, кылзэ ньылэм сямен, ныр улаз нукыртоз но тӥни. Пересьсэс ватонысь бертыса, Демиен Насьта соку ик кеносазы пыризы: ӝыны нунал гуртазы ӧй вал, кин ке ӧз лушка-а зарни-азвесьсэс. Деми кеносазы пушкытӥз ӵогаськыны выль тунгон лэсьтӥз. Озьы соос, ог-огзэс вошъяса, кеносазы кӧланы, сиськыны, улыны кутскизы. Кин ке доразы пырись луэ ке, кече-пеле кадь карисько: ӧз шӧдэ-тодэ меда ватоссэс? Ӵогаськем кеносазы гинэ Демиен Насьталэн кылзы сэраське. Зарни-азвесьсэс люкырак тыро но палёмыса учко, учко, учко... Собере киязы сузен-сузен кутылыса кырмало, вылӥе ӝутыса уськытъяло. Соосыз жингырак вазё, кузпалъёслэсь луд кечлэн кадь жугиськись сюлэмзэс икак каро, шумпотонэн тырмыто. Ваньбурзэс лыдъяны-чотаны ньыль пол но, вить пол но кутскылӥзы ини - сурасько. Соку Деми азвесь но зарни манетъёсты безменэн мертаз, медаз вунэты шуыса, бумагае гожтӥз. Нылпиоссы ӝамдэлы бертылыку, кузпалъёс, номыр луымтэ сямен, нош коркан кӧлало. Деми уйшор бере кык-куинь пол поталля кеносэ чакласькыны. Огпол бадӟым пиез юа: - Тятя, мар-о тон со кеносад уен-нунал кариськод? Шыр-комакъёсын ожмаськиськод шат? - Бен, бен, - дыртыса шуиз Деми. - Ожмаськисько, быдтӥсько но олокытысь со черъёс нош вуо. - Вашкалаос сямен капканэн выриськод, дыр. Кулэ ке, городысь эмъюм ваё. Живо-два кӧчозы, быжзэс но уд адӟы ни. - Кулэ ӧвӧл, каллен ас сяменым ик выро. Со эмъюмед оломар маке ай, юэз, пызез сӧроз я мар. Сӥзьыл кезьытъёс вуэм бере, Деми кеносазы корт гур пыртӥз. Табере кузпалъёс отын черодэн кӧланы кутскизы. Насьтаез кӧлыку, Деми дораз потатэк уг чида: кышномурт - со шайтанэн воштэм маке, лушкемен оломар но дауртоз. Ачиз кӧлыны кыльыку, одно ик зарни-азвесьсэ люкен-люкен тыроз но безменэн мерталоз: ӧвӧл-а ышемын. Одӥг пол озьы мертаськыкуз, азвесь коньдонэз ӝыны гирвонкаез ӧз тырмы. Урмем пуны кадь луиз, кышноез доры корка вожомыса пыриз. - Кытчы карид азвесь коньдонэз, шакшы кышномурт! Али ик потты! - тани-тани Насьтаез пуроз. Насьта, татчыозь картэзлэсь сыӵезэ адӟылымтэ бере, нырысь кылтэм-ымтэм луиз, собере бӧрдонэз пӧсьтӥз, синкыли пыр шуэ: - Кытчы мон сое каром, умойгес мерта. Безменэд сӧриськиз, луоз. Зэмзэ но, безмензы алдаське вылэм. Деми тупатэм бере, ваньбурзы ваньмыз сюриз.Та учыр бере Насьта картэзлэсь кышканы кутскиз. Вазем-юамезлы Деми азьвыл ныр улаз ке но бурккетоз вал, табере воксё кылзэ ньылэмын, лек ош сямен, син ултӥз шораз учкоз но кеносаз кошкоз. Мар солэн кӧтаз-пушказ, кыӵе малпнъёсын улэ? Толалтэ шорын Насьталэн чиданэз пӧсьтӥз. - Деми, котьма кар - мон со кеносад уг ни кӧла. Ойдо, со зарни-азвесьмес нылпиосмылы люком но - ужез быроз. Асьмелы но выль корка сярысь малпаськоно ни. Деми синзэ ӝутӥз, кышноез шоры нырысьсэ адӟем сямен учкиз, собере лек тылгизьыосын пазьгиз ук! - Мае валало со кучапиосыд! Ваньзэ кир-пазь карозы, быдтозы! Уг, нокинлы но уг сёты! Татчыям ик виизы ке но, уг сёты! Мынам со! Нош липетмы выламы уг усьы на - асьме даурлы чидалоз. - Кыль соку со зарниеныд, мон пие доры улыны кошко! - чурыт кылзэ вераз Насьта но. Деми киыныз шонтӥз: котьма кар, пе. Сумкаяз тыриськись кышноезлы берпум лек кылъёссэ вераз на: - Кинлы ке зарни-азвесьмы сярысь поттылӥд-верад ке - кылдэ вандо! Тодыса ул! Озьы Деми ӟечырась корказ шал-шал огназ кылиз. Ма, корказ со ӧз но пыра ни. Кеносаз ик пудоезлы сиён шунтыны-пӧзьтыны гур лэсьтӥз, ӧсаз эшшо кык тунгон пуктӥз. Ярам, кеносэзлэн укноосыз ӧвӧл, а то сое кортэн юнматъян сярысь сюлмаськоно луысалыз. Капказэ но эшшо одӥг ваменпулэн кариз на. Анай-атай юртлэн шунтӥсь-лӥятӥсь-утялтӥсез ӧвӧл ни бере, отчы пыдъёс уг ни кыско. Демилэн но нылпиосыз бертамысь дугдӥзы. Табере солэн одӥг гинэ шумпотонэз кылиз: зарниез-азвесез. Соос шунды сямен шунто, пичи муртэ сямен лӧпкыто. Лумбытэн но, уйбытэн но учкыса уг акыльты. Тулыс шунды вань улэпсэ бичатыны кутскем бере, Демилэн кышноез вуиз: чакланы, пе, бертӥ, ӧд огпалмы на-а со зарни-азвесеныд. - Кин-о ваньбурлэсь огпалмиз ини?! - лек вазиз Деми. Насьта куштэм корка пушсэ октӥз-калтӥз но отын кӧланы кутскиз. Огпол уйшор бере Демиез сайкатӥз Насьталэн чир кесяськыса кенос ӧс борды йыгаськемез. Кӧлонэн уйжомем Деми шуак-дуак ӧссэ усьтӥз но сюлмыз путӥське вал: кышноез сьӧрын - сьӧд маскаен шпана. Кияз пыӵалэн, ачиз но быдэсак сьӧд куака кадь дӥсяськемын. Деми шоры пыӵалзэ урдӥз но кеськиз: - Потты зарнидэ! Сёт! А то кыкнадэс сопал дуннее келяло! Деми зол гинэ шурдӥз-кышказ ке но, тамында толэзьёс ӵоже возьмаськыса улэмез сое пелёкучыран кадь сак чакласькись кариз. Кизэ ӝутыса сылыкуз, Деми пырем шпана шоры пырпотымоназ ик учке, маке тодмо кадь потэ: куараез но, мугорыз но. Ымнырысьтыз сьӧд масказэ кыскы вал но, зэмзэ ик ыбиз ке... Шпана нош кеське: - Потты, потты! Улэмед ке потэ, потты! - Сёт ини, Демие, кӧнязэ ке, - Насьта сюлворе, куараяз малы ке кышканэз уг шӧдӥськы ни. Деми, кӧтысьтыз-сюлмысьтыз мазэ ке ишкалтэм кадь луыса, ог кык сузь зарнизэ шпаналы мычиз. - Кемалась озьы кулэ вал, - шуиз шпана но уй пеймытэ ышиз. Деми йыр бордаз кутскиз: - Ой, шуккем йыр, ой, шузи, ма со гуртысьтымы Васьлейлэн пиез вал кадь ук! Табере улон быриз! Чал-чал пукись Насьтаез шоры кеськиз: - Кин тонэ сое дорамы пыртыны косӥз?! Мукет дыръя амало ӟичы кадь кариськиськод, нош татын... - Я, я, Деми, сокем эн кайгыры. Ма со кык кырым зарниедлы луыса, штантэк кылем мурт сямен куректӥськод. - Со курег йырыныд уд валаськы шат, табере зарни-завесьмес быдэс гурт тодоз. Быриз улон, быриз Деми! - Соку ойдо соосты выльысь ватом. Деми чалмиз, кышноез шоры пельпум сьӧртӥз кырыжак учкиз но берыктӥськыса шумпотэм куараен шуиз: - Однако, Насьта, тынэсьтыд но визьмо кылъёстэ кылоно вылэм. Кузпалъёс кылем зарни-азвесьсэс мушкое тыризы, бакчае поттӥзы. - Азьвыл интыяз ик ватом, - шуэ Деми. - Берло утчаськонэз уз луы. - Отчы ик ватом, Деми, отчы ик, - соглаш кариське Насьта. Деми лопата кутыса гудыны кутскиз. Кӧня ке копалтӥз но катьтэм пуксиз. Лопатазэ Насьталы сётӥз, ӟигары, пе, ӧвӧл. Шунды горд тылсиоссэ пазяны кутскытозь, вошъяськыса гудыны курадӟизы кузпалъёс. Зарни-азвесьсэс ас горшоказ ик лач-лач тыризы но кык метръем мурдала музъеме согизы. Пӧсям вузэс ымнырысьтызы ӵушалтыса, корка пыризы. Насьта, номыре луымтэ сямен, солань-талань берга. Я укно дуръёссэ ӵушылэмъяське, я тусьты-пуньызэ октэ-калтэ. Азбаре потӥз но пинал атассэс ӵогыса пыртӥз, ческыт курег шыд пӧзьтӥз. Деми кызьы гаӵоло выдӥз койка вылэ, озьы ик вӧлдэтэ учкыса кылле. Нырзэ курег шыд зын бичатыны кутскем бере, гань-гань султӥз но ӝӧк сьӧры пуксиз. Насьта котыртӥз пинал дыръяз сямен берга-бызьылэ. Кытысь ке вакчи виятэмзэ поттӥз. - Си, ю, Демие, буйгатскы. Зарни синтэм, шуо. Пыдыз-кукыз но солэн ӧвӧл. Нокытчы табере уз ни пегӟы. Нокин уз но басьты, нокин уз но адӟы. Атасэн ческыт шыд лым, пукем вина, небыт кылъёс Демиез каньсыратӥзы. Шӧдылытэк, пичи пинал музэн, лумбыт ныс-ныс кӧлӥз. Со ик луиз буйганэз-йӧнанэз но. Кӧня ке дыр ортчыса, бадӟым пизы доразы выль "Жигулиен" вуиз. Анай-атайзэ машинаяз пуктӥз но городэ дораз куное нуиз. Деми пиезлэн шукырес чебер, вӧл-вӧл квартираетӥз ширъя-поръя но малпа: "Таиз ке но пие песятай выжые мынэм - ваньбурез чиньы пыртӥз уг лэзья..." ДАРТ ШУНДЫ Кутсконэз ми бордын Егитъёсын ужан - со политика ини, лыдъя "Шунды" дэменлыклэн правлениезлэн тӧроез Татьяна Викторовна Мазитова. Солэн верамезъя, "Шунды" котыраз люка тужгес но етӥзъёссэ, устооссэ, сэзьёссэ. Шаермылэн, калыкмылэн азьланез - со туала егитъёс. Соин ик туннэ будэтоно улон ӧре сэзь вамышъясь удмурт егитъёсты. Астэ гинэ тодыса, мукет калыкъёслы вождэ поттыса улон ноку умой ӧз на вутты. Тае ӟеч валало дэменлыкын, "Шунды" ӟеч кусып возе элькунысьтымы бигеръёслэн "Иман", немецъёслэн "Югендхайм", поръёслэн "Ужара" но еврейёслэн огазеяськонысьтызы егитъёсын. Удмуртъёслэн эшъяськон мылкыдзы кельшиз ваньмызлы. Табере милесьтым адӟыса ваньмыз кыӵе ке ужрад дасяло, куное ӧтчало. Азьланяз егитъёс огъя кужымен, оло, кыӵе ке бадӟым уж борды но басьтӥськозы. кылсярысь, усто луысал, егитъёслы калык куспо газет поттыса. Кудъёсызлэн пыкылэмзы но потэ, мукет калыкъёсын кусып возьыса, егитъёс удмуртлыксэс ышто шуыса. Но "шундыослэн" верамзыя, таӵе ужрадъёсы пыриськыса, ӟечгес шӧдыны кутскиськод аслэсьтыд кин луэмдэ, валаськод, тон удмурт калык понна кыл кутӥськод шуыса. Собере, эшъяськон - со урод сям шат? Одӥг музъем вылын улыса, малы удмуртъёс мукет выжы калыкъёсты адӟонтэм карыны кулэ. Немец, еврей егитъёслэн но ужпумъёссы тросэз тупало удмуртъёслы. Нош огазе кариськыса, соосты капчигес вормыны. Пусйымон соиз но, егит дыръя эшъяськон кемалы кыле, шуо. Аръёс ортчыса, кин тодэ, кыӵе инты басьтоз котькудӥз туннэ "Шунды" дэменлыке пырись. Тужгес но шаплыосыз татчы кыстӥсько бере, оскон кылдэ, азьланяз соос азьветлӥсьёс, кивалтӥсьёс, удмурт калыклэсь данзэ возьматӥсьёс луозы шуыса. Нош пинал эшъяськон уз сёты мукет калык вылэ кидэ ӝутыны, сое пож вуэн кисьтаны. Огкылын вераса, "Шунды" азьын али куинь тужгес но лэчытэсь ужпумъёс сыло. Нырысетӥез, удмурт егитъёс медаз кышкалэ, медаз возьдаське асьсэ национальностьсылэсь. Кыкетӥез, соос мед тодозы кин луэмзэс, асьсэ ӵыжы-выжызэс. Куинетӥез, удмурт мед лыдъялоз ассэ бадӟым Музъеммылэн ог люкетэныз. Кыкетӥ ужпумез быдэсъяны дэменлыклы юрттэ МАФУН. Мукет финн-угор шаеръёсы вуылыса шӧдыны луэ, шуэ Татаьяна Викторовна, удмуртъёс та дунне вылын огназы ӧвӧл, соослэн кылзыя, культуразыя матысь ӵыжы-выжыоссы, эшъёссы вань. Та ассоциацие "Шунды" пыриз 1994-тӥ арын, дэменлыкен Светлана Константиновна Смирнова кивалтон вакытэ. Огдыре ик МАФУН-лэн президентэз луыса, та кышномурт огазеяны быгатӥз "Шундыез" но МАФУН-эз. Со дыре споръяськон вал, кытчы кариськоз дэменлык: "Удмурт кенеш" яке "Дэмен" пала. Но "Шунды" Светлана Константиновналэн кивалтэмез улсын азьлань вамыштӥз, нокинэн керетытэк, споръяськытэк аслэсьтыз сюрессэ лёгиз, рос-прос пыд вылаз султӥз, ас котыраз быгатӥсь егитъёсты люказ. Та адямилэн сюлэмыз висе удмурт егитъёс понна. Ма, со понна "Шунды" вордэм нылпиез кадь матын. Туннэ но, Кун Кенешлэн Тӧроезлэн воштӥсез луыса, С. К. Смирнова уг вунэты "шундыосты". Со котьку лад-лад кылзоз, юрттыны тыршоз, визь-кенешъёсыныз выль ужъёсы мылкыдэз ӝутоз. Нош соос "Шундылэн" уно гинэ. Тани али Н. Уткиналэн кичӧлтэмез улсын кылдытэмын "Шундыкар" содружетсво. Татчы пыро гужем "Шундыкар" лагере ветлэм пиналъёс, вожатойёс, специалистъёс. Котькуд толэзь огазе люкаськыса, соос кенешозы лэсьтоно ужъёссы сярысь. Азьланяз тол каникулъёс дыръя но пиналъёсты лагере ӧтчаны чакламын. Аслэсьтыз ужзэ азьланьтэ "Интыл" клуб. Таиз "Шундыкарысь" потэм пиналъёслэн люкаськемзы, шуыны луоз. Угось, тросэз соос пӧлысь гужем сменаосын ужам- шутэтскемъёс, нош али уноез студентъёс луэмын ини. Соос, ӝӧк сьӧры пуксьыса кенешо асьсэлэн огъя ужпумъёссы сярысь, эскеро соосты улонэз валась адямилэн синмыныз. Мукетыз, "Шундылэн" кивалтэмез улсын ужась клуб "Первокурсник" шуыса нимаське. Таиз чакламын гуртысь городэ дышетскыны лыктэм егитъёс понна. Анай-атай юртысь кшкыса, соос медаз ыше, "Шунды" пыр эшъёс шедьтыны мед быгатозы. Дэменлык котьку ик мылысь-кыдысь пыриське МАФУН-лэн ужъёсаз, кылсярысь, май толэзе Эстониын ортчиз егитъёслэн этнофутуризмлы сӥзем калык куспо конференцизы. Удмуртиысь Тарту городэ ветлӥзы "Шундылэн" правленияз пырись адямиос: Н. Уткина, Т. Прокопьева, Ю. Лобанов, П. Захаров, Л. Четкарева. Июле Эстониын ик ортчиз нырысетӥез нылпи фольклор фестиваль. Отчы вуылыны шуд усиз Алнаш ёросысь "Берекет" коллективлы. Али но та шаеръёсы кошкемын культурая училиещеысь "Зарни крезь" ансамбль. Усточиос быгатэмзэс возьматозы "Ӵыжы-выжы шуись калыкъёслэн нуналъёссы" ужрадын. Та сяна но, трос гинэ ужъёс лэсьтэмын. Уноез витё быдэстӥськемзэс азьланяз. Ваньзэ тае бергатӥсь, кичӧлтӥсь муртъёс тросгес ке луысалзы, "Шунды" уката кужмогес луысал, яркытгес пиштысал. Л. ПОСТНИКОВА. Лыктэлэ, юалэ-вералэ Валлян Ижевскысь Операя но балетъя театрын "Отечество" огазеяськонлэн Общественной приёмноез усьтӥськиз. Выль ёзлэсь кулэлыксэ пусйыса, солэн кивалтӥсез Л. К. Моравский вераз, бырйисьёс татын ас ужпумъёссэс, сюлэмшугъяськонъёссэс, мылкыдзэс усьтыны быгатозы шуыса. Матысь дыре ини соос пумиськылозы "Отечество-Вся Россия" блоклэсь депутатэ кандидатъёсын. Леонид Константинович оске, быръёнъёс бере но приёмной ужзэ уз уреты. Угось "Отечество" огазеяськон та ӟырдыт вакытлы гинэ кылдытэмын ӧвӧл. Приёмноез усьтон ужрадэ лыктэмъёс озьы ик тодматскизы тодмо туспуктӥсьлэн Ахат Хисамутдиновлэн куд-ог ужъёсыныз. Ваньмыз соос сӥземын дано конструкторлы М. Т. Калашниковлы, Вераны кулэ, Михаил Тимофеевич "Отечество" огазеяськонлэн ужаз мылысь-кыдысь пыриське. Лыдӟисьёс понна ивортӥськом, Общественной приёмной ужа нуналлы быдэ 12 часысен 18 часозь. Отчы лыктэмъёс понна озьы ик усьтӥськоз юридической консультация. Ю. Михайлова. Россия Федерациысь Федеральной Собранилэн Кун Думаезлэн куинетӥ ӧтчамаз депутатъёсты быръёнъя одӥг мандатэн 29 номеро Удмурт округъя комиссия ивортэ, 23-тӥ но 24-тӥ октябре со ужалоз 10 часысен 18 часозь таӵе адресъя: Сарапул город, Красная площадь, 8-тӥ юрт, 212-тӥ кабинет. А. МЫМРИН, быръёнъя одӥг мандатэн 29 номеро округъя комиссилэн кивалтӥсез. Данъяськиськом Уж сьӧрын - вормон Котькуд ёросын вань адӟем карымон адямиос. Ужын яке дышетсконын соос возьмато асьсэлэсь быгатонлыкъёссэс. Нош мынам туннэ вераме потэ ёросысьтымы егит комбайнёръёс сярысь. Соослы куамын арес но тырмымтэ ай. Алнаш ёросысь егитъёсын ужанъя отдел котькуд аре радъя егит комбайнёръёс пӧлын ӵошатскон. "Аран-99" ужрад туэ но ортчиз. Егит пиос нюръяськизы куинь нырысетӥ интыос понна. Вормисе потӥз "Колос" колхозысь МИхаил Чирков, со кутсаз 5800 центнер ю тысь, аслаз колхозэзъя но нырысетӥ интыез басьтӥз. Кыкетӥ интые потӥз Борис Молчанов - кутсаз 5371 центнер ю тысь, куинетӥ луиз Алексей Гаврилов - кутсаз 5190 центнер ю тысь. Таосыз пиос кыкназы но "Молодая гвардия" колхозысь, асьсэ хозяйствооысьтызы комбайнёръёс пӧлын куинетӥ но ньылетӥ интые потӥзы. "Аран-99" конкурсын вормисе потэмъёс пусъемын коньдон премиен. Нош кык ар талэсь азьло "Аран-97" ӵошатсконын вормисе потӥз "Прогресс" колхозысь Эдуард Печников. Солэн туспуктэмез интыямын вал ёрос администрацилэн егитъёсты данъян пул вылаз. Кылем арын но со ик тужгес шаплы луэмзэ возьматӥз. 1998- тӥ арысен Данъян пулэ интыямын "Нива" колхозысь Геннадий Королевлэн туспуктэмез. 1997-тӥ арын егит комбайнёръёс пӧлын ӵошатсконын со кыкетӥ интые потӥз вал, нош кылем арын куинетӥ луиз. Данъян пул вылэ шеден понна котыр ласянь адӟем карымон луыны кулэ - ужын, семьяын, эшъёсыд пӧлын. Шумпотоно, милям ёросамы вань сыӵе адямиос. Соослэн тыршеменызы ик ӝӧк выламы няньмы вань. Вераны кулэ, "Аран-99" ӵошатсконэ пыриськизы ёросысьтымы кызь тямыс егит пиос. Ваньзылы ик соослы сюлмысь тау карем потэ, усто ужамзы понна. Нош азьланяз мед луозы эшшо но бадӟым вормонъёс. М. БУДРИНА, Алнаш ёросысь егитъёсын ужанъя отделысь специалист. Ужа вал - котырак зӥбо Сюмси районын Сюрек леспромхоз - валтӥсь предприятие. Ог дасо ар азьвыл со шаерысь нюлэс дасясьёс пӧлын но огез кужмоез но азьмынӥсез вал. Выльдӥськон шуон вакытэ предприятие тросэз сямен "кульчое" шедиз, куашканы ӧдъяз. "Налогъёс пачкато, техника басьтыны луонлык ӧвӧл, укыр дуно, - шуэ леспромхозлэн директорез А. Х. Азаматов - Пельпумез вӧлъяны, эркын шокчыны маза ик ӧвӧл. Возьмаськом, государство ваньбур поттӥсез утёз, сотэк мур гуысь ум ӝутске". Владимир Шпанов Кильмезе (тазьы нимаське леспромхозын ужасьёслэн посёлоксы) вуиз 20 ар талэсь азьло бускель Киров областьысь. Сюлмо удмурт воргорон ӝог дышиз тэль ужлы, коллективын гажано адями луиз. Но стропальщиклэн ымныраз шудо тылсиос уг пишто: толэзьёсын ӝегато пичи уждунэз, ӧвӧл ни путёвкаос, льготаос но мукетыз. Таӵе дыръя амалтэк тодэ лыктэ азьлоез: эх, улӥзы ук соос, вӧй пӧлын пыласькизы. Тыршизы но зол, ньылпол уно нюлэс дасязы. Г. ЮСАЕВ. Журналистъёсын пумиськонъёс Удмуртия Россиез азьпалтэ Таяз вторнике, 19 октябре, Правительствоын журналистъёсын пумиськизы вылӥ дышетскон заведениослэн (вузъёслэн) кивалтӥсьёссы. Ректоръёсын таӵе пумиськонъёс сяме пыризы ни. Сое котьку радъя УР-ысь Правительстволэн Наукая, вылӥ но шор профессиослы дышетонъя комитетэзлэн тӧроез Сергей РЕШЕТНИКОВ. Пумиськонын рос-прос вераськон мынӥз туэ студентъёсты кутон, выль специальностьёс усьтон но куд-ог мукет ужпумъёс сярысь. - Удмуртиын 10 сюрс адямилы быдэ, Россиын сярысь, студентъёсмы данаклы трос дышетско, - веранзэ мытӥз Сергей Максимович. - Нош Япония, США но Германия асьмелэсь кык поллэсь уно дышето. Куке-соку Совето странамес быдэс дуннеын самой трос лыдӟиськись но дышетскись кунэн лыдъязы. Озьы ик со вал. Табере югдур воштӥське. Экономикалэн секыт изэз-зӥбетэз зол шӧдӥське вылӥ дышетскон заведениос вылын но. Республикаямы арлы быдэ 10-12 процентлы уногес студентъёс кутӥсько на. Умой со. Берло вить ар ӵоже аспирантъёслэн лыдзы кык пол ёрослы йылӥз но али 715 мурт ни. 2600 дышетӥсьёс пӧлысь 192 докторъёс но профессоръёс (миым 142 вал), нош кандидатъёс но доцентъёс - 1200. Тужгес но трос тодосчиос (учёнойёс) ужало Ижысь кун медициная академиын. 350 дышетӥсьёс пӧлысь 46-ез докторъёс но профессоръёс луо. Татын кунгож сьӧрысь 16 студент дышетске. Туэ врач луыны одӥг интые 3-3,5 мурт нюръяськиз, нош куд-ог факультетъёсын - 8 адями. Кутэмын 350 студент. Со пӧлысь 250-эз бюджет чотын дышетскоз, Москва коньдон висъя. Таӵегес ик югдур музон вузъёсын но. Медакадемия нимаз инты висъя Комиысь, Челябинскысь но Башкортостанысь егитъёслы. Татын одӥг куиньмосэз гуртысь егитъёс лышетско. Туэ академие пырыны 120 медалистъёс (зарни но азвесь) куриськон сётъязы, но 70-эз гинэ конкурсэз ортчизы. Син азьын кужмоя Ижысь гурт хозяйствоя академия. Туэ 9 специальностья студентъёс кутэмын. Конкурс пичи ӧй вал, 4 мурт. Егитъёслы тужгес ярало переработка, ветеринария но нюлэс хозяйствоя факультетъёс. Планъя 650 мурт интые, 705 студент дышетске. Со пӧлысь 169-эз дун тыре. 55 медалист пыремын. Туэ академия районлы быдэ нырысьсэ котькуд специальностья одӥг инты висъяз. Озьы 225 мурт кутэмын, нош гуртысь - 400 адями. Экзаменъёс кутско 15 майысен. Вань студентъёс пӧлысь 70 процентэз удмуртъёс дышетско. Удмурт кун университет 62 специальностьлы дышетэ. Россиын со лыпус 300. Нош РФ-ысь калыкез дышетонъя министрлэн Владимир Филипповлэн ивортэмезъя, та удысын но выльдӥськон (реформа) дасяське. Соя ваньзэ-ӧвӧлзэ 60 специальностья гинэ дышетозы. УдГУ туэ 1575 мурт кутӥз, нош мылкыд каро вал 3500. Вань студентъёс пӧлысь 1250-эз федеральной бюджет чотын дышетске. Вить сюлэсь уно заочной ёзэ пыртэмын. 656 медалист вал. Студентъёс пӧлысь 1220-ез ӟучъёс, 350-эз удмуртъёс, 540 пиос, 1000-ез нылъёс. Университетлы капчи уг сётӥськы. Туннэ гинэ юртъёсазы шуныт сётӥзы. Нош городын эстӥськон дыр 20 сентябре кутскемын. Шаерамы одӥгез мӧйыез дышетскон заведение луэ Глазовысь пединститут. Ноябре солы 60 ар тырме, азьло отын вал духовной семинария. Туэ 450 мурт кутэмын. Егитъёслы уката ик кельше англи кылъя но информатикая ёз. Татчы пырыны тужгес трос вал мылкыд карисьёс. 100 мурт дун тырыса дышетске. Ваньмыз сямен студентъёссы Удмуртиысь, 62 процентэз гуртысь, ӝыныез - удмуртъёс. Пиоссы ичи, одӥг витьмосэз гинэ. Глазове дышетскыны лыкто ни Грах, Кияса, Кизнер, Каракулино районъёсысь. Ижысь 5 мурт кутэмын. Али институтын 1200 адями лышетске. Туэ 91 медалист куриськон сётӥз, нош вузэ пыриз 51-ез гинэ. Институт социальной педагогика но логопед выль специальностьёс усьтӥз. Егитъёслы со яра. Югдур тупатске Ижысь Кун технической университетын. Со дася усьто инженеръёс. Но жаляса верано луэ, производство гуньдэмен валче, огдыре татын дышетскыны мылкыд карисьёс туж ичи вал. ИжГТУ-ын ужа татчы пырыны дышетонъя факультет. Городъёсысь но гуртъёсысь егитъёслы муресь тодон-валанъёс сёто физикая, математикая, ӟуч но иностранной кылъёсъя. Туэ университет 45 специалностья 1600 муртэз кутӥз, производствоын ӟечлыкен кивалтонъя выль специальность усьтӥз. Татчы егитъёс мылысь-кыдысь лыкто. Мар бен возьматӥз вузъёсы студентъёсты кутон? Нырысь ик, медалистъёслэн лябесь тодон-валанъёссы, ӝыныез пала соос вузъёсы пырыны ӧз быгатэ. Озьыен, медальлэн данэз усе, школаосын будэтыса дунъет сёто. Со вузъёсты сюлэмшугъяськытэ. Кыкетӥез, дышетскыны мылкыд карисьёслэн лыдзы пумен тросгес луэ. Со шумпотымон. Но куд-огез вузъёсты индылэ, выпускникъёсты, пе, уж уг шедьто. Шонер-а со? Ӧвӧл. Туэ вузъёсты быдтӥз 5633 мурт. Со пӧлысь 130-ез гинэ уж сётонъя удысэ вазиськиз. Отчы пыро палэнысь лыктэмъёс но. Огъя вераса, вань вузъёсамы туэ 122 специалностья студент кутэмын. Со пӧлысь 4537-ез, дунтэк, государство чотын душетске. Г. РОМАНОВ. Быдӟым Вормонлы 55 ар тырмон азьын Советской Союзлэн Героезлы Л. А. Ардашевлы туэ тырмысал 75 арес. Геройёсмы сярысь И. Кулеминлэн книгаосаз вордскем нуналэз гожтэмын 9-тӥ сентябре 1924-тӥ арын шуыса, нош мынам Геройлэн личной делоысьтыз адӟеме вань солэсь аслэсьтыз гожтэмзэ - 1924-тӥ арын 16-тӥ октябре. Таиз шонергес луоз шуыса малпасько. Кыкетӥзэ фронтэ Тодам ваисько витьтон кыкетӥ арын гужемез. Соку "Советской Удмуртия" газетлэн редакцияз Тимофей Шмаковен пумиськыкумы, мон солы верай вал удмурт Геройёсмы сярысь гожъяны малпаме сярысь. - Вань на-а меда улэпъёсыз геройёсмы? - юанэлы Шмаков шуиз: "Кез ёросысь Героймы но, горд пимы, кулэм ини". Тӥни сыӵе иворез кылӥ. Озьы ке но, со гужеме ик геройлэн вордскем но улэм гуртаз Лып-Булатовое вуылӥ. Отын пумиськи солэн анаеныз, кузпалэныз (со дышетӥсь вал), нылыныз. "Шудтэм учыре шедиз", - шуизы со сярысь. Героймы Глазовысь педучилщеын куинетӥ арзэ дышетске, пе, вал ини. Кызь тямыс арескын солэн улонэз куспетӥ луиз. Нош туэ архивын ужакум тодматскыны кылдӥз 59-тӥ стрелковой бригадалэн документъёсыныз. Отысь нимысьтыз Ардашев сярысь гожтэмъёсыз уг утчаськы вал. Огъёзэлэсь, пурга пилэсь, адӟонзэ тодэме потӥз. Тӥни соку одӥгысьтыз списокысь син шорам сюризы таӵе чуръёс: "Рядовой Ардашев Леонид Арсентьевич 18-тӥ сентябре 1942- тӥ арын Малгобек дорын лек ожын секыт сӧсыр луиз но госпитале келямын". Озьы йылпумъяськиз Ардашевлэн нырысетӥ фронтэ вуэмез. Ньыльдон кыкетӥ арын 5-тӥ мае Ардашевез военкоматэ ӧтизы но Воткинске ыстӥзы. Отын со Ленинградысь пехотая училищеын курсант луиз. Но курсантъёслы лейтенант луыны ӧз кылды, дышетсконзэс куспетӥ карыса, соосыз эшелонэ пуктылӥзы но Ярославской областьысь Буй городэ вуттӥзы. Соос вуизы соку татын кылдытӥськись 59-тӥ стрелковой бригадалэн 4-тӥ батальоназ. Вуоно командиръёс малпало вал, соосыз Ленинград понна ожмаськонэ келялозы шуыса. Но озьы ӧз луы. Ӝог мынӥсь эшелонзэс Астрахане вуттӥзы, собере пароходэн но пыдын Махачкалае келязы. 12-тӥ сентябре 59-тӥ стрелковой бригада пыриськиз Малгобек дорын оже. Кӧня ке нунал ортчыса, Нижний Курп дорын тушмон танкъёслы пумит ожмаськыса но рубежзэс воземзы бере, батальонъёс азьлане мынӥзы. Тушмон киысь огзэ вырйылэз таланы косэмын вал. Куинь сутка ӵоже кыстӥськись секыт ожын 4-тӥ стрелковой батальон азяз пуктэм ужпумзэ быдэстӥз. Но та ожын тросэз асьме боецъёсмы но быризы, уноез сӧсырмизы. Соос пӧлын ик вал Ардашев рядовой но. Солдатэз келязы Азербайджанысь Ленкорань городысь госпитале. Отын солдатлы кема эмъяськоно луиз, висись суйзэ йӧнатон понна отпуск сётӥзы но гуртаз но лэзизы. Озьы йылпумъяськиз Ардашевлэн лымшор палась фронтын нырысетӥзэ оже пыриськемез. Соку со тылӝуын арня ӵоже гинэ вал. Армие кыкетӥзэ сое басьтӥзы но фронтэ ыстӥзы, ар ортчыса, 1943-тӥ арын сентябре. Табере со Ленинград понна ожмаськиз. Ар ӵоже эшшо кык пол госпитальын эмъяськоно луиз на солы. 1944-тӥ арын гужем Ардашев Карелиын ожмаськиз. Окопын сылӥсь боецъёсыз сямен ик роталэн командирез старшой лейтенант Державин но шумпотыса эскериз артиллеримылэсь тушмонлэн позициез вылэ шонер ыбылэмзэ. Снарядъёссы пуштылӥзы тушмонлэн дзотъёсыз вылын, пазьгылӥзы блиндажъёссэ. Старшой лейтенант часэз шоры но учкылэ: матэ вуэ атакалы тупатэм дыр. Телефон трубказэ кутӥз, солэн тодэмез потӥз: ӧз-а воштӥськы атакалы тупатэм дыр. Но трубкаез чалмыт, кытӥ ке ез чигем, лэся. Командир сюлэмшугъяське: одно ик тодоно атакае ӝутскон дырез, вазьгес ке ӝутӥд, яке кӧня ке минутлы ӝегатскид ке, малпам ужез куашкатод. Тушмон нюлэскы ватскемын, сылэ кужмо юнматэм позициосын. Вань ротаос ӵош ӝутскыса гинэ ожлэн азинлыкез луоз. Роталэн командирез связнойзэ Ардашевез ӧтиз но туж ӝог вуылыны косӥз нырысетӥ ротае. Берытскемез бере связной роталэсь командирзэ интыысьтыз ӧз ни шедьты. - Кытын старшой лейтенант? - юаз Ардашев. - Сӧсырмиз, - шуиз окопын сылӥсь снайпер Коваленко. - Медпунктэ келязы. Атака кутскон дырозь кема дыр ӧз ни кыльы. Соку Леонид Ардашев валаз: рота командиртэк оже мыныны уз быгаты. Младшой сержант ракетницазэ ӝутӥз но куинь пол бӧрсьысьбӧрсьы ыбиз. Инмын горд ракетаос ӝуатскизы. Отын но татын кылӥськизы отделениослэн но взводъёслэн командиръёссылэн командаоссы, соладтъёс но сержантъёс окопъёсысьтызы потӥзы. Быдэс рота атакае ӵош ӝутскиз. Ваньмызлэсь азьло Ардашев вуиз тушмонлэн танкъёсызлы дасям гу доры, отчы тэтчиз. Татысен тушмон окопъёс дорозь дас вить - кызь метр пала гинэ на. - Кытын командир?.. - шӧдтэк шорысь кылӥз Ардашев секыт шокась боецлэсь куаразэ. - Татын командир! - кеськиз со. - Дасялэ гранатостэс! Азьлань, эшъёс! Азьлань! Сюй люк вылэ тубыса, Ардашев адӟиз тушмон траншеяез но шоналскыса отчы гранатазэ лэзиз. Гранатаос пуштылэм вискын тачыртӥзы автомат очередьёс, боецъёсмы тушмон пала ыбылӥзы. Тушмонлэн траншеяез мур гудэмын, бордъёсыз пуӵъёсын юнматэмын. Артиллерия ыбылэмезлэсь ватскем но улэп кылемъёсыз тушмон солдатъёс каръёсысьтызы потыло ини. Ньылез тушмон солдатъёс чигнало. Соосыз Ардашев адӟиз. Одырлы пыдес вылаз лэзиськиз но автоматэзлэсь спусковой крючоксэ зӥбиз... Стрелковой рота Ардашев младшой сержантлэн кивалтэмез улсын та ожын азяз пуктэм ужпумзэ азинлыко быдэстӥз. "133 стрелковой полкын 1944-тӥ арын 24-тӥ июле митинг ортчиз. Со сӥземын вал полкысь кыкезлы воинъёслы - Ардашевлы но Товленколы - (бырем бераз) Советской Союзлэн Героез ним сётонлы. Полклэн командирез Копецко майор митингез усьтыса лыдӟиз Верховной Советлэн Президиумлэсь 1944-тӥ 21-тӥ июле арын гожтэм Указзэ но ваньмызлы ик боецъёслы вазиськиз немецко-фашистской захватчикъёсын озьы нюръяськыны, кызьы ожмаськизы Ардашев но Товленко Карельской перешеекысь Кутерселькя гурт дорын. Митинг бере полкысь комсомолецъёслэн но егитъёслэн собранизы ортчиз. Ардашев собраниын вераз ожмаськемез сярысь, со комсомолецъёсыз но егитъёсыз ӧтиз кужымзэс но, улонзэс но жалятэк тушмонэз жугыны". Та чуръёс басьтэмын полкысь ыстэм политдонесениысь. Выборг городын вань Советской Союзлэн Героез Леонид Ардашев нимо ульча. Удмурт калыклэн дано пиезлэн нимыз пыраклы кельтэмын солэн ожмаськем но данэ потэм интыяз. В.ГОЛУБЕВ. Ӝожтӥськонъёс лыдэ басьтӥсько Кун Думаысь депутат А.Солуянов аслэсьтыз бырйисьёссэ ялан тодаз возе. Соин ик со висъяське куд-ог депутатъёслэсь, кудъёсыз мандат басьтэмзы бере калыклэсь куронъёссэс соку ик вунэто. Андрей Владимировичлы калыкен лякыт вераськыны, угось Кун Думаын ужатозяз со уно законъёслы кутсконъёс сётӥз - ваньзы соос пайдаен берытско асьме республикамы понна. Ас дыраз со туж умой юрттӥз ож тӥрлык поттӥсь предприятиосмылы, соос пӧлын - Сарапулысь машина поттон завод, Ижевскысь механической завод, "Ижмаш" объединение. Со сяна, депутат мылысь-кыдысь ужа Воткинскын ракета двигательёсты быдтонъя завод пуктонэн герӟаськем эскеронъёс ортчытон бордын. Соин ик али депутат трос пумиськылэ Воткинскын улӥсьёсын. Росия Федерацилэсь бюджетсэ дасяку, А.Солуянов кичӧлтонэн потӥз "Шефство" программаез выльысь улонэ пыӵатон понна. Солэн лыдъямезъя, бюджет удыслэсь ляб ёзъёссэ, кылсярысь, школаосты, нылпи садъёсты, та вакытэ возьыны луоз предприятиослэн юрттэменызы гинэ. Азьвыл аръёсы шеф амалэн юрттон туж шӧдскымон вал. Бырйисьёсын пумиськылыкуз, А.Солуянов меӵак ивортэ секыт ужпумъёс сярысь но. Жаляса верано, бырйисьёслэн куд-ог куронъёссы быдэстонтэм луо. Озьы ке но, депутат одӥг ӝожтӥськонэз но лыдэ басьтытэк уг кельты. Кун Думаысь депутатлэн А.Солуяновлэн пресс-службаез. Сарапулын пумиськон 18-тӥ октябре нуназе бере Удмурт Республикаысь Кун Кенешлэн Тӧроез Александр Волков но Бюджетъя, вытъёсъя но коньдон ужпумъёсъя ялан ужась комиссилэн тӧроез Софья Широбокова пыриськизы Сарапул ёросысь Депутатъёслэн кенешсылэн сессиезлэн заседанияз. Александр Волков татысь депутатъёслы ивортӥз странаямы но шаерамы кылдэм секыт югдур сярысь, чутрак йылӥзы эстӥськонлы дунъёс. Кун Кенешлэн Тӧроезлэн верамезъя, та ужпумез со ӝутылӥз ни ортчем арняе Федерацияя Кенешлэн заседанияз. Нош вуоно арня куспын кутскем ужзэ азьланьтыны малпа, Владимир Путинэн кенешыса. Удмурт парламентлэн кивалтӥсез Сарапулын вераськонэзлэсь бадӟым люкетсэ сӥзиз 2000-тӥ арлы республикалэсь но Россия Федерацилэсь бюджетъёссэс кылдытонлы. Соин валче пусйиз на, экономикаысь шуг-секытъёс шоры учкытэк, республика азинскыны инъетэз юнматыны кулэ. Азьланьтоно выль предприятиос но улон юртъёс лэсьтонэз, сюресъёсты выльдонэз но чагыр эстӥськонлы гумыос кысконэз, социально-культурной удысын объектъёсты ӝутонэз.. Александр Волков Сарапул ёросысь депутатъёслы вазиськиз, Ижевскысь циркез пуктонлы ёрос бюджетысь 500 сюрс манет висъяны курыса. Тӧролэн куронэныз вань депутатъёс соглаш кариськизы. Пусйыны кулэ, Удмурт Республикаысь кивалтӥсьёслэсь та ласянь ӵектонзэс умоен лыдъязы ни Игра, Воткинск но Завьялово ёросъёс. Туннэ нуналлы Ижевскысь циркез пуктонлы шаермы люказ ни 12 миллион манет. Проектлэн огъя дуныз 200 миллион манет. Ӝынызэ ас вылаз басьтоз Росгосцирк. Александр Волков оске, ар пумын Удмуртия ог 50 миллион манет мында коньдон люкалоз, нош куинь ар куспын цирк пуктэмын луоз шуыса. Удмурт Республикаысь Кун Кенешлэн пресс-службаез. Приложение 1 Министерство юстиции Удмуртской Республики извещает, что с 1 ноября 1999 года будет осуществлять регистрационные действия по регистрации прав на недвижимое имущество и сделок с ним, Кизнерский филиал учреждения юстиции "Регистрационная палата Удмуртской Республики по государственной регистрации прав на недвижимое имущество и сделок с ним". Кизнерский филиал учреждения юстиции будет производить указанные действия с недвижимым имуществом, расположенным на территории Кизнерского района, Граховского района, по адресу: пос. Кизнер ул. Горького д.4 . Приложение 2 Министерство юстиции Удмуртской республики извещает, что с 1 ноября 1999 года, будет осуществлять регистрационные действия по регистрации прав на недвижимое имущество и сделок с ним, Игринский филиал учреждения юстиции "Регистрационная палата Удмуртской Республики по государственной регистрации прав на недвижимое имущество и сделок с ним". Игринский филиал учреждения юстиции будет производить указанные действия с недвижимым имуществом, расположенным на территории Игринского района, Дебесского района, по адресу: пос. Игра, ул. Милиционная, д.6 . Дарт Пушкинэз азинтӥсьёс "Нош али кыл сётӥськомы куамынэтӥ лицейысь дышетскисьёслы", - ялӥз диктор. Надя эше соку ик синъёсыныз чагыр экран борды мертчиськиз: "Учконо ай, рос-прос учконо, кинъёс со лицеистъёс, кыӵеесь соос! Укыр ушъяло ук соосты..." Зэмзэ но, кинъёс со лицеистъёс? Революцилэсь азьло Россиын лицей шуыса нимасько вал дворянъёслэн пиналъёссылы чаклам шор яке вылӥ дышетскон интыос. Татын дышетскон туж бадӟым данэн лыдъяськылӥз. Нош кӧня тодмо адямиос бурдъяськизы со вакытысь лицейёсын! Тодады вае ай Царскосельской лицеез. Та лицей сярысь пӧламы тодӥсьтэмез ик ӧвӧл, дыр. Сое ас чуръёсазы данъязы Пушкин, Ахматова, Гумилёв, Анненский но трос мукетъёсыз. 1917-тӥ ар бере лицейёс но пӧртэм пумо гимназиос, колледжъёс огшоры школаослы пӧрмытэмын вал. Но улонамы воштӥськон-выльдӥськон кутскем бере, 1988-тӥ-89-тӥ аръёсысен соос нош ик улӟизы. Лицей дано нимез басьтӥзы нимысьтыз программаосъя ужась куд-ог школаос но профессиослы дышетӥсь училищеос. Лицейёс но гимназиос эксперимент ортчытон интыос выллем луизы. Республикаысьтымы гурт школаослы таӵе ӧре выжыны секытгес, соин ик татын, быдэсак дышетскон программазэс выльдытэк, лицей классъёс гинэ усьяло. Нош Ижысь уноез школаос ас статуссэс воштӥзы ини. Кылсярысь, 1997-тӥ арын 25-тӥ школа лингвистической лицей луиз, нош 24-тӥ школа - классической гимназия. Солы туж чебер нимо сётӥзы - "Русский дом". Озьы ик гимназия луэмын 56-тӥ школа но. Нош шаерысьтымы тужгес но тодмоосыз лицейёс - со естественно-гуманитарной 30-тӥ лицей но гуманитарной 44-тӥ лицей. Татын дышетскисьёслы ик вазиськимы юанэн: - Маин лицеист висъяське огшоры школаосын дышетскисьёслэсь? Кыӵе со - туала лицеист? Юля (йылпумъямын 30-тӥ лицеез): - Лицеистъёс тросгес тодо, тросгес лыдӟисько - визьмоесьгес, вакчияк вераса. Лицеистлэн нуналаз одно ик мыно яратоно "тридцаткаям", дышетӥсьёссылы йыбыртто. Саша М: - Данэз бадӟымгес. Ми шоры ваньзы вожъяськыса учко. Лицеистъёс ук! Пушкинэз азинтӥсьёс! Лицеист - туж дано кылӥське. Замурий Алиса но Дементьев Никита: - Лицеист - эрико адями, сое косӥсь ӧвӧл - дышетскиськод ке, дышетскы, уд ке, уд. Ваньмыз ӟеч дышетско, татчы уго ваньмыз азьланез сярысь малпаськыса лыкто. Лицеистъёсмы арысь аре пӧртэм удысъёсъя олимпиадаосы но конкурсъёсы пырисько, умоен возьмато республикамес Россиын но кунгож сьӧрын ортчылӥсьёсаз. Тани 30-тӥ лицейысь Артур Измайлов 1997-тӥ арын Канадаысь Монреальын химияя калык куспо олимпиадаын ыргон медален пусъемын вал. Тӥни кыӵеесь асьме лицеистъёс! 19-тӥ октябре соос асьсэлэсь праздниксэс пусъё. Ӟечкыласьком тӥледды, визьпогъёс! Л. КИТОВА. ШУНДЫ Оля мӧзме - кырӟан вордске Кин со бард? Аслаз кылъёсызъя кырӟась мурт. Валамон мед луоз шуыса, тодмато тӥледды Оля Марковаен. Оля Удмурт университетысь удмурт филологияя факультетын дышетске. Ӝытъёссэ общежитиын кутэ кияз гитаразэ но аслэсьтыз кырӟанзэ мытэ. Эшъёсыз шып кылзо сое, кыӵе кылъёс шедьтэм Оля, нош кыӵе гурез! Кырӟанэн со пичи дырысеныз эшъяськем, нош 8-тӥ классын дышетскыкуз, анаезлэсь адӟем карыса (со крезьгуръя дышетӥсь), кияз баян кутӥз, бӧрысьгес - гитара. Гитара! Ма, вань шат солэсь ӟечгес эш быдэ вуон вакытэ? Нырысетӥ кырӟанзэ Оля уг вунэты. Со, пе, нырысь яратон кадь. Али Олялэн 25 кырӟанэз ни. Ваньмыз соос яратон, тулыс, анай сярысь. Гожъя соосты Оля мӧзмыкуз. Огнад пукыку, пе, чуръёс асьсэос лыкто. Нош мылкыдыз шулдыр дыръя со "Эктон коркан" тапыртэ, "Шунды" дэменлыке мынэ, мукет егитъёсты лӧпкытэ, тунсыко ужъёсы "ӝутэ" А.Кузнецова, Удмурт университетын дышетскись. Сьӧрлось куноосты но ӧтчано Яркыт чибор удмурт дӥсен уно лыктэмъёс пӧлын та чебер апай син шоры соку ик йӧтэ. Солэн дэремез но угось вашкала, пыр-пыр учкымон. Мылазь чеберъянэз но дасямын ортчем дауръёсы кисьтэм азвесь уксёлэсь, кышетэз но, сюлыкез но, суйпосэз но котькинлы адскымон, синмаськымон. Кияса ёросысь Уддяди гуртысь Ольга Соловьева шоры мон кемалась ини синмаськыса учкылӥсько. Ольга Николаевнаез нырысьсэ синйылтӥ тямыстонэтӥ аръёсы - Ижкар вӧзысь тэльын "Инвожо" ансамблен ӵош Гуждор праздникез ортчытыкумы. Отчы уддядиос даслэсь трос кузя ветлӥзы, кырӟазы-эктӥзы, пӧртэм шудонъёсы пыриськылӥзы. 1992-тӥ арын Ольга Николаевна Соловьёвалэсь праздник дыръя лэсьтэм тусбуйзэ фотожурналист Георгий Юсаев "Удмурт дунне" газетлэн нырысетӥ бамаз поттӥз. Али вераме потэ: Ольга Соловьева газетмес ог витьтон ар пала басьтэ ини - туэ но солы гужем ик гожтӥськем. Та адямиез котькуд удмурт ужрадын ке но пумиталлясько, матысьгес тодматски алигес, дас витетӥ коньывуонэ (октябре), Удмурт культурая "Дэмен" огазеяськонлэн ӧтчамаз. Вордӥськем но, али но улэ со Кияса ёросысь Уддяди (Карамас-Пельга) гуртын. Татын котькыӵе ужын тыршемын. Фермаын но, лудын но - котькытын синмаськымон пӧрмытылӥз. Котькыӵе секыт ужъёс бере но ноку ӧз люкиськылы кырӟанэн-эктонэн. Гурт ужзэ быдэстэмез бере, котьку дыртэ клубе репетицие. Люкаськонъёс уг луо ке, мӧзме эшъёсызлэсь, ас понназ корказ кырӟа. Уддядиосты республикаямы гинэ уг тодо. Соос шоры синмаськыса учкылӥзы бускель улосъёсысь но удмурт гуртъёсын. Шуд усьылӥз кыдёкысь финн ӵыжы-выжыосмылэн музъемзы вылэ но вуылыны. Отын паймиз Ольга Николаевна финнъёслэн чебер, чылкыт но узыр улэмзылы. Соос Уддядиысь удмурт кунооссэс ки вылазы нуллӥзы: угось укыр яразы соослы калыкмылэн дӥсез-кутэз, солэн сямъёсыз, кырӟан-эктонъёсыз. Пыраклы тодаз кылёз кыдёкысь Финляндие ветлэмез. Али Ольга Соловьева улэ пиеныз, кенэныз но соослэн пиенызы ӵош. Семья кусыпъёссы туж шунытэсь. Азбар, гид тыр пӧртэм пудо, тылобурдо вордо. Пиналъёсыз шумпото нэнэзылэн капчи мылкыдызлы, котькытчы вуэмезлы. "Дэменлэн" ӧтчамаз солы котьма яраз: тодмо адямиосмылэн вераськемзы но, концерт но. Шумпотэ, удмуртъёслэн асваланзы берло аръёсы ӝутске шуыса. Ӧз яра соиз гинэ: ӧжыт кылӥськиз егитъёслэн куаразы. Азьвыл, кенешъёс дыръя, ужъюгдур чылкак мукет вал. Кивоштӥсьёсмы - комсомолецъёс - котькытын азьпал радын мынӥзы, соин ик вуоно чебер аръёслы калык оскыса улӥз. Али нош уноез егитъёс уг ужало, уг дышетско. Озьы ке но, калыклэн азьланезлы осконэз чылкак быремын ӧвӧл на. Таӵеесь ик Ольга Николаевна Соловьевалэн но малпанъёсыз. Соос борды мон но итӥськисько. Куд-огезлы дэмлам потэ: "Дэмен" ӵемгес мед вуылоз вылэм кыдёкысь пичиесь гуртъёсы, бадӟым саклык висъяно ӟучомыны кутскем ёросъёслы. Сыӵе интыосын, вераськем сяна, пичиесь концертъёс но сётъяно. Сое лэсьтыны луысал пичияк коллективъёсын но. Дас витетӥ коньывуонэ (октябре) ӧтчам тунсыко ортчиз. Зэм, палэнын улӥсь удмуртъёслэн куаразы лябгес кылӥськиз. Концертъёсы ӧз пыриськылэ тодмотэм фольклор коллективъёс, вавожъёс сяна. "Дэмен" таӵе ӧтчамъёс мед радъясал котькуд ар. Н. ВОЗИСОВ. А. Починок - Удмуртиын Кык нунал ӵоже Удмуртиын ужаз Россиысь выт бичанъя министр Александр Починок. Со ортчытӥз Удмуртиысь но бускель улосъёсысь выт бичасьёслэн кивалтӥсьёсынызы кенешон. Пумиськон дыръя пусъемын вал, странаямы налог люканэн югдур берло дыре умояз. Толон А. Починок кенешиз республикамылэн но валтӥсь предприятиослэн кивалтӥсьёсынызы. Со озьы ик вуылӥз Воткинскысь машзаводэ но университетэ. Л. КРИМАЛОВ. Зарни шунды ӝужалоз! Кылем кӧснуналэ Драмая удмурт кун театрын ортчиз Удмурт лулчеберлыкъя дэменлыклэн ӧтчамез. Кенеше люкаськылэмъёс данак сюлэмшугъяськытӥсь ужпумъёсты эскеризы. Удмуртлыкмес нуналысь нуналэ утён, солэсь выжыоссэ возён сярысь туж ӟырдыт вераськизы Удмурт лулчеберлыкъя дэменлыклэн тӧроез Альберт Разин, удмурт лулчеберлык удысысь валтӥсь Лидия Орехова, Удмурт Элькунысь калык суредась Семен Виноградов, тодмо тодосчиос Фома Ермаков, Владимир Савельев, Рево Разин, Адольф Широбоков, Дэри ёросысь Изгурт школаысь удмурт кыллы но литературалы дышетӥсь Галина Мамонтова, журналист, писатель Николай Кузнецов, Драмая удмурт кун театрлэн директорез, тодмо режиссёр Анатолий Митрофанов, удмурт фольклор кырӟанъя "Айкай" театрысь кырӟась Пётр Данилов, мукет адямиос. Ӧтчамын эскерем ужпумъёсъя кӧня ке дэмланъёс ватсаса кутэмын нимысьтыз резолюция. Та нуналэ ик выль адямиос быръемын дэменлыклэн кивалтэтаз. Ӧтчаме люкаськемъёс нимысьтыз эскеризы Куӟебай Герд нимо премиен герӟаськем ужпумез. Таяз учыре сое сётыны ӵектэмын тодмо журналистлы, писательлы Кирилл Егорович Ломагинлы. Вис дыръя но кенеш бере трос кырӟан-веран вал. Люкаськемъёсты шулдыртӥзы Удмурт лулчеберлыкъя дэменлыкысь кырӟасьёс, Пичи Пурга, Кияса, Балезино, Вавож ёросъёсысь, шаерысьтымы культурая училищеысь "Инвугур" ансамбльысь усточиос. Паймымон быгатонлыкеныз шумпоттӥз удмурт фольклор кырӟанъя "Айкай" театр. Ӧтчам кутскиз но, йылпумъяськиз но Куӟебай Гердлэн кылъёсызъя "Зарни шунды" ӝужалоз" кырӟанэн. Е. РОМАШОВА. Удмурт Элькун Кивалтэтысь тылпулэсь утиськонъя комиссие воштонъёс пыртон сярысь Удмурт Элькун Кивалтэтлэн ПОСТАНОВЛЕНИЕЗ Удмурт Элькун Кивалтэт пуктэ: Удмурт Элькун Кивалтэтлэн 1998-тӥ арын 26-тӥ январе кутэм 59 номеро постановлениеныз юнматэм Удмурт Элькун Кивалтэтысь тылпулэсь утиськонъя комиссие таӵе воштонъёс пыртоно: 1. Комиссие таӵе адямиосты ӵектоно: Хохлов Н.И. - Удмурт Элькун Кивалтэтлэн Тӧроезлэн воштӥсез, комисс- илэн тӧроез. Шепиль В.М. - Удмурт Элькунысь Югдурез утёнъя министерствоысь Тыл- пулэсь утиськонъя кун службая управленилэн начальникез- лэн воштӥсез, комиссилэн кыл кутӥсь секретарез. Огородов В.Г. - Стандартизацияя, метрологияя но сертификацияя удмурт- центрлэн директорез (вераськыса). Бекасов В.Г. - Россиысь транспортъя инспекцилэн Удмурт Элькунысь люкетэзлэн кивалтӥсез (вераськыса). Гердт Н.Д. - Удмурт Элькунысь Инкуазь узырлыкъёсъя но инкуазез утёнъя министрлэн воштӥсез. 2. Комисссиысь поттоно Ю.С.Питкевичез, Н.В.Угловез, А.М.Беловез, Ю.Г.Блохинэз, В.Н.Гуровез, Г.П.Кижватовез, Л.М.Масловскаяез, В.Н.Обуховез. 3. Таӵе должностьёсты тазьы нимано: "Удмурт Элькунысь нюлэс хозяйствоя министр" интые "Удмурт Элькунысь Нюлэсъёсъя управленилэн кивалтӥсез - Удмурт Элькунысь министр" шуоно; "Удмурт Элькунысь Архитектурая но лэсьтӥськонъя кун комитетлэн тӧроезлэн нырысетӥ воштӥсез" интые - "Удмурт Элькунысь лэсьтӥськонъя, архитектурая но улон инты ужпумъёсъя министрлэн нырысетӥ воштӥсез"; "Удмурт Элькунысь горно-технической инспекцилэн кивалтӥсез" интые - "Россиысь Госгортехнадзорлэн Западно-Уральской округезлэн управлениысьтыз Удмурт ёзэзлэн кивалтӥсез". Удмурт Элькун Кивалтэтлэн Тӧроезлэн воштӥсез Н.И.Хохлов. Ижевск город, 1999-тӥ арын 11-тӥ октябре. � 985. Дарт Визь Америкаозь сузе Школа коридорысь пиналъёслэсь йырзэс тӥямон усьтыр-дабыр бызьылэмзэс адӟыса вожъяськи: вот кытын зэмос школа! Суйёсазы горд керттэтэн дежурнойёс кесяськыса, "сьӧд списоке" гожъяса уг ветло, дышетӥсьёс пельтӥзы уг кыскало. Таослэн директорзы умой, дыр, малпай ас поннам. Селта школалэн директорез умой гинэ ӧвӧл, туж умой вылэм. Со сяна, туж но туж тунсыко. Син азяды пуктэ ай: кияз журналэн директор йӧн-йӧн коридор кузя мынэ. Шуак кытысь ке ерпечка потэ но ӧжыт пыд йылысьтыз уг погырты, нош директор, тышкаськем интые, соин "хелло" шуыса ӟечъяське. Со понна Николай Александровичлэн уроказ со ерпечка ик лачмыт луэ, мыло-кыдо ужа. Туала арын ваньмыз пиналъёсын огъя кыл шедьтыны уг быгато. Нош Николай Александрович Коршунов - туж каньылэн. Тодӥськоды-а, кыӵе кыл со? Английской. Быдэс урок верасько соос кунсьӧр кылын. Пиналъёслы сокем тунсыко потэ - урок бере но куспазы шуак ӟучаз уг выжо на. Мон нырысь ӧйгес оскы вал, нош уроказы пукыса пайми но туж возьдаськи. Шалтыр верасько пиналъёс англи кылын. Мон ӝыныезлэсь ӝынызэ сяна валаса уг вуттӥськы. Нош вӧзам пукись Аня Гороховалэсь американ акцентсэ кылыса, куаляк луи. Ма, со чылк-чылк американ нылашлы укша ук! Тусыз но тӥни эшъёсызлэсь музонгес: мылазё вакчи сарафанэн, модая пыдкутчанэн, йырсиосыз лӧсъямын, вераськыкуз синкашъёсыныз шудэ, ӵем "м-м" карылэ - ар ӵоже Америкаын дышетскемез Аня понна шӧдскытэк ӧвӧл кылем, иське. Сюриз отчы Аня Санта Лингва пыр (та огазеяськон сярысь газетмы гожъялляз ни). Арлы быдэ со бордаз люка кунсьӧр кылъёсын тунсыкъяськисьёсты, пӧртэм конкурсъёс ортчытъя. Дунъяны ветло кунсьӧрысь специалистъёс, соос ик быръё устоосыз пӧлысь устооссэ. Россиысь пиналъёслэсь пӧртэм кылъёсъя тодэм-валанъёссэс муромытон вылысь, асьсэ странаязы дунтэк дышетскыны ӧте. Таӵе конкурсъёс ортчо кунсьӧр кылын. Валамон, отчы тросгес пырисько городъёсысь лингвистической лицейёсысь умой дышетскисьёс. Но вань пӧлазы гуртъёсысь дӥсьтӥсьёс но. Тани Селта школа кӧняетӥ арзэ паймытъя ни аслаз визьмо пиналъёсыныз. Валлян арын, конкурсын вормисе потыса, Лондонэ путёвка басьяз Эрвин Горохов. Кылем арын - Аня сузэрез. Ар ӵоже американ семьяын улӥз Аня. Вал солэн анаез, атаез, агаез. Агаез котькуд ӵукна школае келялляз. Вераны кулэ, отын пиналъёсты школае автобусэн нулло. - Маин ке висъяське-а кунгож сьӧрын дышетскон? - юасько мон Анялэсь. - Туж ик уг. Но отын пиналъёс пичиысен ас визьмынызы улыны дышетско - соос сьӧры дышетӥсьёс уг бызьыло. Дышетон система матэктытэмын университетъёсын дышетонлы - лекциос, зачётъёс, экзаменъёс. Тодаз поныны гинэ ӧвӧл, пиналэз малпаськыны дышето. Бадӟым саклык висъяло искусствоез, культураез тодонлы, спортлы но огшоры ужан удысъёсты дышетонлы. Школаез быдтыса, пинал мед быгатоз ни маке ужаны, малы ке шуоно, куанеръёслэн нылпиоссылэн дышетсконзэс азьланьтэмзы уг луы ни, соин ик асьсэлы коньдон поттоно луэ. Ӵапак соку юрттэ школаын басьтэм тодон-валанзы. Школаын дышетско дас кык ар. - Аня, олокытысь но кылоно луэ, Западын быдэ вуымтэос туж алякесь: наркотикъёсын шузиясько, асьсэды олокин кожаса ветло шуыса. Озьы-а со? - Пӧлазы вань, дыр, котькыӵеез, но мон ӧй пумиськылы. Мыным туж кельшиз семьяосазы асьсэды кызьы воземзы - анай-атайёссэс туж гажало. Валало дышетсконлэсь кулэлыксэ, отын визьмо адямиос урод уг уло. - Тыныд табере ваньмыз вожъясько, дыр? Аня пельпумзэ ӝутка. - Вожъясько, вожъясько, - шуэ дышетӥсез Николай Александрович. - Мон ачим но вожъяськисько. Но Америкае вуылон сярысь малпанэлэсь уг куштӥськиськы. Кылем арын конкурсын кыкетӥ луи. Но куке но вормо, дыр. Николай Александрович Коршуновлэн нимыз республикаысьтымы дышетӥсьёс пӧлын гинэ ӧвӧл, Россиын но тодмо ни али. Сое ӧтчало Казане, Новгородэ.. Кӧня ке ар талэсь азьло со гуртысь школаын англи кылэз муромытыса сётыны кутскиз. Али ужа "Лондмен" издательстволэн учебникъёсызъя. Соос чакламын вылӥ вузъёслэн программаоссыя дышетыны. Валлян арын солэн выпускникъёсыз ваньмыз сямен университетъёсы, институтъёсы пыризы. Валамон, ваньзы ик инязэз ӧз быръе. Дышетско юристлы но, дизайнерлы но, программистлы но. Но англи кылъя тодонъёссы соослы али туж юртто. Азьланез сярысь веранэз ӧвӧл ни - кин пыкиськоз кунсьӧр кылын ӟеч вераськись специалистлэсь? - Кылъёсты тодыны талант луыны кулэ, дыр? - юасько Николай Александровичлэсь. - Тросгес - мылкыд. Пиналэз пичиысен дышетыны кулэ. Со сяна, нуналмысь тыршоно, сотэк номыр но уз пӧрмы. Тани англи куараосты шонер веран понна, ым жадьытозь ужаны кулэ. Паймымон но визьмо дышетӥсь Николай Александрович Коршунов. Паймымонэсь солэн дышетскисьёсыз. Селта школаын нокин но уг юа, малы кулэ кунсьӧр кыл. З. РЯБИНИНА. ДЕПУТАТЭН КЕНЕШОН Компартия утиз но утёз ужась калыкез Россия дасяське быръёнъёслы, декабре куараосмес сётом Кун Думае ӵектэм кандидатъёс понна, вуоно гужем быръём выль Президентэз. Парламентэ шедён понна, нюръяськон мынэ ни. Политической партиос но огазеяськонъёс одӥгъёсыз кузъясько, мукетъёсыз люкисько - котькудӥз аслыз тупась эш шедьтыны выре. Кыӵе адӟиське соос пӧлын Россиысь компартия но кыӵе малпанэн мыно коммунистъёс вуоно быръёнъёсы? Та пумысен вераськиськом Кун Думалэн депутатэныз, Удмурт Республиканской партийной организацилэн секретареныз Н. И. САПОЖНИКОВЕН, - Законъёсъя учконо ке, быръёнъёсты ортчытыны ваньмыз дась. Кандидатъёс ужало, коньдон федеральной бюджетысь висъямын. Компартилэн но Народно-патриотической союз азьын пуктэм ужпум одӥг: Кун Думае быръёнъёсты дыраз ортчытоно но вуоно парламентын тросгес инты басьтоно, Президентэ асьме адямиез пуктоно. Уг ваты, нюръяськон секыт луоз. Кремльын берло дыре трос вераськонъёс мыно Борис Ельцинэз нош ик ас интыяз кельтон ласянь, олигархъёслы, криминаллы туала Президентмы туж кельше. Но Конституцияя суд аслаз решениеныз Ельцинэз куинетӥ сроклы кельтонлэсь палэнтэ, тӥни малы кремлёвской "семьяын" огыр-бугыр луиз. Президент котырын бергасьёс пӧртэм амалъёс пыр выризы но выро кык арлы коть та быръёнъёсты берлогес кельтыны, отӥяз, пе, улон возьматоз. Мугзэ валэкто странаын кылдэм огъя югдурен, Чечняен, пӧртэм пумо политической но экономической ужпумъёсын. - Николай Иванович, та вакытэ дасяськон мынэ выль союзной государство кылдытонлы, Россиез Белоруссиен огазеяны. Таин валче воштӥськонъёс луозы-а? - Кенешемын кун властьлэсь органъёссэ матысь дырлы озьы ик кельтыны, Кун Дума, Федеральной Кенеш, Правительство. Воштӥськонъёс луозы, соиз валамон, но - выль огазеяськон кылдэм бере. - Белоруссилэн Президентэз Александр Лукашенко кемалась куриське Россиен ӵош улыны но ужаны, нош Кремльлэн сыӵе мылкыдыз малы ке уг шӧдӥськы... - Мугез валамон. Белоруссиын, асьмелэн сярысь, ӟеч ужа промышленность, ужтэк кылемъёссы ӧжытгес, калык дыраз уждун басьтэ. Отын асьсэлы тупась дунъёс, музонгес политикая уло. Юан мукетыз бордын, кулэ-а таӵе эшъёс асьме кивалтӥсьёсмылы? - Кавказ котырын кылдэм югдур, Москваын но куд-ог мукет интыосын ортчылэм кышкыт учыръёс вуоно быръёнъёсын кызьы ке герӟаськемын-а? - Одно ик. Ми гужем ик та пумысен вераським ни. Терактъёс кулэ туала властьлы, странаын чрезвычайной югдур ялон понна. Соин валче быръёнъёслэсь дырзэс воштыны но музон "чебер" малпанъёссэс улонэ пыӵатыны, Ельцинэз ас интыяз кельтыны. Калыклы тазьы валэктозы: таӵе секыт но кышкыт югдурын Россилэсь кивалтӥсьсэ воштыны уг яра, ӟуч сямен вераса, "коней на переправе не меняют". Парламентлэсь ужзэ дугдытозы, вань полномочиосты вылаз басьтоз Правительство. Тӥни малы кулэ Кавказэз бугыръян но чик янгыштэм адямиосты быдтон. - Азьвыл быръёнъёсын КПРФ но аграрной партия огкылысь ужазы, али соос коммунистъёслэсь люкиськизы. Ма со сётоз политической нюръяськонын? - Июльлэн кутсконаз аграрникъёс асьсэлэн политкенешазы кутӥзы решение быръёнъёсы нимазы мынонъя. Ми понна со бадӟым ыштон, малы ке шуоно, соослэн но, милям но бырйисьёсмы - гуртын улӥсьёс. Луоз озьы, соос но келялозы, ми но кулэ куара ум люкалэ, куспытӥмы ортчоз кин ке но куинетӥез. ЛДПР, "Яблоко" яке мукетыз, со ик депутатлэсь мандатсэ басьтоз. Тӥни ма бордын ужпум. Мон малпамъя, Кремль аграрной партиен быгатыса шудэ. Но улон ваньзэ радъялоз на, оло, аграрной партилэн самой со быронэз луоз. Ми шумпотӥськом, КПРФ-лэн федеральной списоказ туннэ шедемын Кун Думаысь Аграрной депутатской группалэн кивалтӥсез Николай Михайлович Харитонов, Россиысь Аграрно-промышленной союзлэн председателез Василий Александрович Стародубцев, куд-ог мукет тодмо адямиос. Быръёнъёсы соос коммунистъёсын ӵош мыно. - Николай Иванович, азьвылаз но, вуонояз но быръёнъёсын тӥ шедиськоды Республиканской региональной списоке. Кыӵе республикаос отчы пыро но кӧня куара басьтыны луонлыкты вань? - Башкортостан, Марий Эл, Татарстан, Удмуртия - ваньмыз 4 республика. 1995-тӥ арын КПРФ понна дурбасьтэмзэ вераз 900 сюрс мурт, Удмурт Республикая - 98 сюрсэз. Россилы Президент быръёнын нырысетӥ тураз Зюгановлы 200 сюрс куара сётэмын вал, кыкетӥ тураз - 300 сюрс. Берло дыре ортчытэм эскеронъёс возьмато, та регионысь бырйисьёс пӧлысь данакез КПРФ палан шуыса. 300 сюрс куара, оло, ум люкалэ, но осконмы вань. - Кызьы малпаськоды, Юрий Дмитриевич Маслюков понна Удмуртиын улӥсьёс куаразэс сётозы-а? - Мон солы оскисько. Ижевск понна, республикамы понна оглом та адями трос лэсьтӥз но лэсьтоз на, Думае шедиз ке. Маслюков кадь депутатъёсын улонмы шӧдскымон капчиялоз. - КПРФ парламентын валтӥсь инты басьтӥз ке, быгатӥз ке Президентэ ас адямизэ пуктыны, туала экономичской кризисысь кызьы, кыӵе амалъёс пыр странамес поттоз? - Нырысь ик, вань калыкез, вань кужымъёсты огазеяса, мукет ӧре выжтоно туала социально-экономической курсэз. Кутоно выль Конституция. Воштӥськонъёс ортчозы экономикаын, оборона удысын, агропромышленностьын, социальной сфераын. Со сярысь пыр-поч вераськон мынӥз КПРФ-лэн ЦК-лэн ЪИИ пленумаз. Отын шараям лыдпусъёс малпаськонэ вутто. Верало кӧнязэ ке гинэ. 1991-тӥ арен ӵошатыса, валовой национальной продукт кулэсмиз кык поллы, сиён-юон пӧлысь 40 процентэз гинэ потэ Россиын. Выжытӥз ик кутскыса быдтэмын, шуыны луоз, промышленностьысь вылӥ технологиен но наукаен герӟаськем удысъёс, ачиз но наука туннэ нокинлы кулэ ӧвӧл. Пӧртэм "пасьёс" пыр странаысь арлы быдэ 25 миллиард долларозь коньдон кошке. КПРФ нюръяськоз плановой системаез пыӵатон но дунъёсты кулэстон понна. Музъемез нимаз кузёослы вузаны ум сётэ, со - калыклэн ваньбурез, эмъяськон но дышетскон луыны кулэ дунтэк. Огъя вераса, Россие берыктыны тыршом социализмлэсь лёгаса куштэм принципъёссэ. Озьы гинэ быронлэсь утён начармыны, сютэм улыны кутскем, ужтэк кылем калыкмес, будӥсь пиналъёсмес. Компартия котьку дурбасьтылӥз но дурбасьтоз ужась адями пала. Л. МЕДВЕДЕВА. Уть астэ ачид Коркатэк но, уксётэк но... Ижевскен артэ сылӥсь посёлокын квартиразэ вузам кышномуртлэсь шӧйзэ шедьтӥзы. Уксёез бордаз ӧй вал ни. Кин сое быдтӥз: палэнысь вуэм муртъёс-а яке улон интызэ дунъясьёс-а? Та учыръя эскерон ужъёс мыно на. Огез тодмо: адями быдтэмын коньдон понна. Жаляса верано, туала вакытэ ваньбурез вузан-басьтон но бадӟым кышкытлык кылдытэ ни. Юртъер, квартира, машина воштон-вузан бордаз кыске пӧртэм пумо гыжкалъёсты, мурт чотын узырмыны дышемъёсты. Правоез утён удысын ужасьёслы олокыӵе но шимес учыръёсын пумиськылоно луэ, куд-ог адямиослэн аферистъёслы, лушкем ужась фирмаослы оскиськеменызы сэрен. Кызьы гожтэ "Бизнес для всех" газет, пӧямъёс пӧлы ӵемгес шедё арлыдоос. Огназы улӥсь пересьёс, пичи пинал сямен, сыӵеос сьӧры мыно, улон интызэс ас киосынызы сёто. Нош отӥяз мар луэ? Центральной пресса одӥг пол гинэ ӧз ивортылы ни квартиразэс вузамъёслэн чиптэм-чаптэм ышемзы пумысен. Фирмаос соосты пӧяло, тӥледлы Москва дорысь посёлокын туж ӟеч корка сётӥськом шуыса. Озьы, асьсэос но валатэк, убиръёс кие шедьыса, дырызлэсь вазь улонысь кошко. Ӵем дыръя шӧйзэс но уг шедьтыны уг луы. Кызьы утиськоно таӵе адӟонлэсь, кинлы вазиськоно, юрттэт курыса? Со пумысен газет лыдӟисьёслы валэктон сётэ юридической наукаосъя кандидат, милициысь подполковник Виктор МАКСИМОВ: - Нырысетӥез дэмланэ луоз юрттыны басьтӥськисьёс (посредникъёс) ласянь. Сыӵеос али туж трос, кудӥзлы оскыны луэ, кудӥзлы - уг. Умойгес луоз, соосын герӟаськылытэк. Фирма пыр ке ужаськоды, одно ик юалэ свидетельствозэ, тодматске уставеныз, лицензиеныз. Вань мукет но амал: вузасьёс-басьтӥсьёс нокыӵе юрттӥсьёстэк ас куспазы вераськыны быгатозы. Выль законодательствоя ваньбурез вузан-воштон лэсьтӥське ни нотариус доры ветлытэк но, мед луоз государственной регистрациез гинэ. Огласянь со умой, ӧжытгес коньдондэ куштод. Нош мукет ласянь малпаське: нотариуслэн печатезтэк оскымон-а кадь гожтэм документты? Тодады возе таизэ но: басьтӥсь-воштӥсь яке вузась ласянь валантэмъёс медаз кылдэ шуыса, вань условиостэс бумага вылэ гожтоно. Нотариус юрттӥз ке, валамон, шуге-леке вуонъёс куспады уз кылдэ. Соин ик таӵе ужын коньдон шоры учконо ӧвӧл, дыр. Кыкетӥез. Шудтэм учыре сюронтэм вылысь, бадӟым коньдонэн ветлоно ӧвӧл. Умойгес луоз, вузан-басьтонэз сбербанк пыр ортчытыса. Коньдон тырем сярысь порученилэсь копизэ аслыд кельтоно, озьы ик лэсьтоно квартираез воштыку ватсаса уксё тырон дыръя но. Ассэ ачиз утись муртэ инмар но уте, шуо. Куинетӥез. Улон инты басьтэм сярысь документ лэсьтыкуды, одно ик учконо, кин вылын со гожтэмын, соглаш-а отын улӥсьёс квартиразэс вузанэн. Вань-а приватизация ортчытэм пумысен свидетельствозы. Озьы ик тодоно: та квартира кинлы ке завещать карыса яке кузьмаса кельтэмын ӧвӧл-а? Шуом, тӥ сделка лэсьтӥськоды куинетӥ адями (посредник) пыр. Таӵе дыръя одно ик пумиськоно асэныз квартра кузёен, соин гинэ вераськоно дун сярысь но. "Юрттӥсьёс" ӵем дыръя пӧяло, асьсэлы тросгес коньдон капыртон понна. Ньылетӥез. Приватизация ортчытэм сярысь свидетельстводы яке ордерды ыштэмын ке, ӝегатскытэк ивортоно милицие но интыысь администрацие. Шуом, городысь квартирадэс воштыса, тӥледлы улон инты гуртэ дэмлало. Документ лэсьтыкуды, одно ик гожтоно, кӧня манет тӥледлы компенсация сёто. Со коньдонэз куре банке счётады ыстыны. Умой луоз, вераськыкуды свидетельёсты сьӧрады кутыны. Берпуметӥез дэмлан. Улон интыдэс воштыку-вузаку эн герӟаське лымшор палась лыктэм муртъёсын но чиганъёсын. Документ лэсьтыку, котыр ласянь эскере законлэсь куронъёссэ. Эн дыртэ. Куд-ог дыръя, ятыргес коньдон дэмласа, алдаськыса но бумага вылэ гожтӥськыны косозы. Сыӵеослы осконо ӧвӧл. Соку ачид но улэп кылёд, ужед но малпамедъя пӧрмоз. Дасяз Л. ДМИТРИЕВА "Комплексная безопасность" фирмаен ӵош. Глазовысь автопредприятилы - 50 Туннэ аслэсьтыз "зарни" юбилейзэ пусъе Глазов городысь автотранспортной предприятие. Ӝыны даур ӵоже татын трос воштӥськонъёс ортчемын. 1949-тӥ арын кутскон сётэмын вал грузъёсты нуон-ваёнлы, автопаркысь машинаос ик сьӧрлось гуртъёсысь ю тысь ворттӥзы. 1954-тӥ арын кылдӥз автотранспортъя контора, вуизы выль машинаос: ГАЗ-51 но ЗИС - 150. 1956 ар городлэн истрияз кылёз нырысетӥ кык ПАЗ-651 автобус вуэмен. Со ик кык автобусной маршрутлы кутскон сётӥз. 60-тӥ аръёсы автопарк нош выльдӥське ПАЗ-672 но ЛАЗ-695 автобусъёс чотын. Озьы пичигес гинэ автотранспортной хозяйство пумен пӧрме йыг-йыг ужась предприятилы. 70-тӥ аръёсы вуо ЛиАЗ-ёс, самой соку кутске калыкез тросэн нуон-ваён. Огез бӧрсьы мукетыз маршрутъёс усьтӥсько матысь но кыдёкысь гуртъёсы, райцентръёсы. Глазовысь автобусъёс али ветло Юкаменске, Балезиное, Кезэ, Яре, Красногорске. Туэ 9 толэзь ӵоже пассажиръёсты унон-ваёнъя чаклам план быдэстэмын 115 процентлы. Ватсаса сётэм услугаос чотын та дыр ӵоже ик 57 сюрс манетлэсь ятыр коньдон поттэмын. Автопредприятилэн юбилееныз валче устоосыз пӧлысь устоосыз 7 водительёс пусъемын "За безаварийную работу" И но ИИ степенё пусэн, 50-эз водительёс басьтӥзы Данъян грамота но дуно кузьымъёс. Вералом на: та данъяськымон коллективен быгатыса кивалтэ Владимир Александрович Морозов. Г. РОМАНОВ. Йылпумъянъёс лэсьтэмын Та нуналъёсы "Дни защиты - 99" акция улсын ортчись пӧртэм смотр-конкурсъёслы йылпумъянъёс лэсьто. 12-тӥ октябре Удмуртиысь Инкуазез утёнъя комитетэ пырисьёс потазы Ува ёросэ. Нырысетӥ степенё дипломен но 700 манет коньдон премиен пусъемын Рябово шор ёзо школаысь экологияя отряд. Татысь пиналъёс пыр-поч эскеро инкуазез, утялтыса возё ошмесъёсты. Умой ужамзы пусъемын на территориосъя куд-ог комитетъёслэн ужъёссы. Нырысетӥ но кыкетӥ интыез люкизы Глазов но Сарапул ёросъёсысь оргкомитетъёс. 13-тӥ октябре нырысетӥ степенё дипломен но 3 сюрс манет коньдон премиен пусъемын Сарапул ёросысь оргкомитет. Коньдон люкемын луоз умой ужасьёс куспын. Та нуналъёсы кузьым вуттэмын луоз Глазове но. Пусйыны кулэ, ужрадэз ортчытыны коньдон висъямын республикаысь Инкуазез утёнъя фондысь. Н. ЩЕГОЛЕВА. Выль лицей усьтӥськиз 18-тӥ коньывуонэ "Дзержинец" шутэтскон юртын выль лицей усьтӥськиз. Дышетскисьёс куарусён толэзьлэн кутсконаз экзаменъёс сётӥзы. Лицей ужалоз тямыс удысъя, нылпиос кык ар дышетскозы. Тодон-валан сётозы вылӥ дышетсконниосысь дышетӥсьёс. Лицеистъёс одно удмурт кылэз тодыны кулэ. Та лицеез усьтӥзы Кун но муниципальной службае специалистъёсты но ёросъёсы, гуртъёсы кадръёсты дасян понна. Лицеистъёсты ӟечкыланы ветлӥзы П. Вершинин, Л. Захарова, А. Красильников но мукетъёсыз. Г. Савина, Удмурт университетысь студентка. Матысен адӟимы Шаерамы сӥзьыл вуэмен, ӧсъёссэс паськыт усьтӥзы театръёс но культура ужъюртъёс. Соин валче дорамы нош ик вуылыны ӧдъязы быдэс странамылы тодмо луись артистъёс. Тани Удмурт филармониын алигес ас кылзӥсьёсыныз-учкисьёсыныз пумиськиз усто кырӟасьёс пӧлысь одӥгез - Елена Камбурова. Нош "Металлург" дворецын ортчиз Россиысь калык артисткалэн, СССР-лэн Кун премиезлэн лауреатэзлэн Ирина Муравьевалэн юбилеезлы сӥзем бенефис. Та киноактрисалэн нимыз котькинлы тодмо, дыр. Нош огшоры сцена вылын со мае возьматоз меда? "Актёръёс асьсэ куспын" шуыса нимаське Дмитрий Сухаревлэн кык актъем водевилез. Пуштросэз туж огшоры гинэ: куинь эшъёс-артистъёс - Фома Швыдкой, Терентий но Журавлёв - куке но ог-огзылы кыл сётӥллям вылэм ноку но кышнояськытэк улыны. Нош Журавлёвзы Полина нимо нылмуртэ пумита но синмаське, собере кузпалъяське. Полиналэн но артистка луэмез потэ. Тани Журавлёв аслэсьтыз эшъёссэ ӧте кышноеныз тодматыны. Кык эшъёс нылкышноез шудон карыны верасько. Полина со сярысь кылэ. Картэзлэн сое утьыны быгатымтэезлы вожез потэ но таосты асьсэды серекъяны малпа. Терентиен Фома туж тыршо ке но, асьсэос синмасько тодмотэм нылмуртлы: нырысетӥез - княгиня кариськем Полиналы, кыкетӥез - княгинялэн ляльчиезлы пӧрмытскем Полиналы. Табере соос кыксы но та чебер нылкышноен огазе кариськон сярысь уйбырто ини. Нош макем юмоке сюро Терентиен Фома, Полина соосты зэмос артистка музэн алдаз, сереме уськытӥз шуыса валамзы бере. "Котькыӵе кышномурт, сое шузи кожало ке но, кык усточи воргоронлэсь визьмогес но мудронгес",- огымысь кадь шуо ни бератаз эшъёс. Валады, луоз: Полинаез шудӥз ачиз Ирина Мураьева, нош солы водевилез улӟытыны юрттӥзы Россиысь сӥё-дано артистъёс Владимир Носик, Юрий Чернов но Борис Шувалов. Постановкаез уката синмаськымон каризы Сергей Никитинлэн крезьгурез но Петр Гродницкий балетмейстер-режиссёрлэн дасям эктонъёсыз. Нош Россиысь искусствоосъя сӥё-дано ужась режиссер Леонид Эйдлин ваньнэ тае рос-прос радъяса пуктэм. Созэ но пусйыны кулэ, дыр: таӵе "кизилиосын" пумиськыны быгатысалзы меда Иж карын улӥсьёс, "Коллекция" продюсерской группалы ӧй юрттысалзы ке "АКФИЛ" туристической фирма но "Летас" салон-ателье, озьы ик "Удмуртия" ГТРК, "Круг" радиокомпания, "Русское радио" радиостанция но "Новый Регион" телекомпания? Зэм но, берло дыре трос "кизилиос" вуыло ни асьме доры. Но соосты матысен адӟыны уноез уг быгато: куртчылӥсько уго билет дунъёс. Оло, соин но залын пукисьёс пӧлысь трос ик тодмоосме ӧй синйылты. Нош артистъёсын пумиськон йылпумъяськем бере, эшеным дворецысь потыкумы паймимы культура ужъюрт азьын сылӥсь уно турлы маркаё машинаослы. Озьыен, шаерамы улӥсь узыръёс таӵе ӝытъёсы ветло? Соослэн уго асьсэлэн кизилиоссы. Римма ЛАПТЕВА. Вормон нуналлы усьтӥськоз Каракулино черкогуртысь дас ньылетӥ арзэ лэсьтӥське нт Быдӟым Отечественной войнаын быръёнъёсы буре ваён монумент. Архитекторъёслэн чакламзыя солэн улӥяз музей но луыны кулэ вал. Но та дыр ӵоже "долгостроез" тус-тас карыны но вуизы ни. Кайта Быдӟым Вормонлы тырме 55 ар. Соин валче ёрос кенешлэн президиумез, депутатъёс районын улӥсьёслы кык нуналлы уждунзэс монумент лэсьтонэ висъяны куронэн вазиськизы. Нырысь ик кичӧлтонэн потӥзы культура юртын ужасьёс. Поттэм коньдонзэс соос висъязы памятник лэсьтонъя фондэ. Н. СЕРГЕЕВ. Чалмытске! Таяз арня нуналэ, Огазеяськем нациослэн кылдэм нуналазы быдэс музъем вылын "Сизьым минут тупаса улон" ужрад ортчоз. Ижевскысь Шри Чинмойлэн центрез та акция борды итӥське - 24 октябре 22 часысен Егитъёслэн юртазы люкаськыса, соос сизьым минут ӵоже шып кариськыса музъем вылысь вань калыкъёслы тодмо но тодмотэм муртъёслы ӵыжы-выжыоссылы но асьсэлы тупаса, ог-огдэ гажаса улон сӥзёзы. Ужрадэз дасясьёслэн малпамзыя, огдыре трос калык сӥзьым минут ӵоже ке но ӟеч малпанъёссэ огазеяз ке, бадӟым кужым кылдоз, та огыр-бугыр улонмы, оло, сайяськоз, шудогес луоз. Огазеяське тӥ но, палмылэн сизьым минутлы тупаса улонмы понна! И. Вахрушева. Библиотекаын "Интернет" Удмуртиысь Национальной библиотекаын бадӟым шумпотон: 20-тӥ октябре отын усьтӥськиз Интернет-класс. 1998-тӥ арын та библиотека "Шара общество" институтлы дэмлаз вал "Удмурт Республикаысь кун библиотекаос Интернетын" инъетсэ. Со ик луонлык сётӥз аспӧртэмлыко нюръяськонэ пыриськыны. Со озьы ик огазеяз пиналъёслэсь но егитъёслэсь кун библиотеказэс, городысь Некраосв нимо библиотекаез, Ижевскысь вить школаосты, Пичи Пургаысь ёрос библиотекаез, егитъёслы тодон-валан сётонъя центрез. "Удмурт Республикаын тодон-валанъя но культурая ёзъёс" инъетэз быдэстон понна институт всиъяз 68250 доллар. Б. НИКИТИН. "Шӧкычлэн" азбукаез Алангасар - туала дыре ужтэк кылем воргорон, бомж. Бушкук - бушын ӧвӧл, доллар тырыса Америкаысь ваем курег кук. В. А. А. - ваньмылэн атыкай айымуртмы - Волков Александр Александрович. Гожтэт - ас улэм-вылэмедлы ӝожаса яке ушъяськыса пӧрам произведение. Даслык - Ленин возьматэм сюрестӥ вамышъян дырысь горд тусо валюта. Е -нылпиослэн небыт интыязы йӧттылыса визьман тӥрлык. ЁрГИ (вакчиятэм кыл) - ёрос газетысь иворъёс. Жаг - пыд улын лошъяськись ваньбур. Ӝук - тӥрен пӧзьтыса дасям кӧттырет. Зор - витьымтэ-возьмамтэ шорысь кисьтӥськись инву. Ӟичы - кескич, вуысь кӧсын потыны быгатӥсь адями. Инмар - инсьӧрын улӥсь но нокинлы адскисьтэм лулос. Ӥ - удмурт алфавитлэн аспӧртэмлыко пусэз. Йырбырон - секыт макмыр. Кенос - выль кенлэн кузпалэзлы нылдыр сьӧлыкъёссэ мадён висъет. Лапча - астэ ачид ньӧран инты. Мунчокузё - кузпаллы мусояса вазиськон. Нуны - яратонэн сэрен кубиста пӧлын кылдэм емыш. Ошмес - йӧл сётӥсь ошпи. "Ӧб-ӧб-ӧб" - туала улонмес возьматӥсь удмурт повесть. Пурты - визьмо адямилэн йырыз. Радио - кыл вӧлдӥсь, супыльтӥсь кышномурт. Синучкон - ас тусбуеныд кильтыръяськон пияла. Туг - адямилэн кулэтэм интыяз ӝужам гонэз. Уд - югыт дуннее выль вордскем удмурт нылпи. Фонарь - жугиськыку син котыре пуксем лызалэс-сьӧдо тодмет. Халат - удмурт кимоно, туала гуртын ӟечлы но ужлы дӥсяно дӥськут. Цикорий - дуринчиослэн мӧль люкан сяськазы. Чипы - ас анай-атайзэ визьмась нылпи. Ӵушъял - вакчи ӵышкем йырси. Шӧкыч - маскаръяськыса лекаськись удмурт лулос. Щётка - дӥськутэз сузян согы. Ъ (чурыт пус) - быжтэм-куктэм курег тусо буква. Ым - тунгонамтэ ӧс, яке ӝӧк вылэз чылкытатӥсь вуко. Ь (небыт пус) - кыллэсь пуштроссэ чутрак воштӥсь пус. Кылсярысь: тус-тусь. Эмъюм - пайда но изъян ваись суретъёс. Юбо (синмоез) - ӝужыт адями. Ялон - кузпал утчаку астэ ачид ушъяса гожтэм кагаз юдэс. Азбукаез ас сяменыз лыдӟиз Николай НИКИФОРОВ. Шӧкыч Шаерамы туэ "кыкетӥ нянь" удалтӥз, шуыны луоз. Но со тулыслы кылёз на меда асьме доры - шуг вераны. Бакча сиён базаосты быдтэмзы бере, картофкаез возён интыос ӧвӧл ни. Со понна дуно музъем емышез дунтэмен палэнэ келяло. Гужем вуон азьын картофка зарниен ӵошатлоз, дыр... (гожтэтысь) Лымшор палась басьяськись: - Картошка корошо, нош арбуз ческытгес! Басьтэлэ, дунтэмен воштӥсько. Суредэз Л. ПРОЗОРОВЛЭН. "Шумпотыса чуваш кылэ берыкто..." Нимаз адями аслаз зол, кужмо ужаменыз историлэсь гожъёссэ-тодметъёссэ кылдытэ. Тани со одӥгез тодмет - чуваш нылкышноослэн "Пике" ("Бике") журналзы, солэн 1997-тӥ ар понна 7-тӥ - 8-тӥ номерез. (Жаляса верано, со берпуметӥез луиз - ачиз Раиса Сарби но, валтӥсь редактор, тыл пыр потыны быгатӥсь адями, ӧз шедьты ни та журналэз азинтыны амал - валамон, ужпум уксё борды пыкиськиз.) Маин та журнал тунсыко? Быдэсак номерез сӥземын удмуртъёслы, культура, литература удысысь азьветлӥсьёслы. Статьяос, веросъёс, кылбуръёс, суредъёс, туспуктэмъёс. Чуваш лыдӟись шоры учко Григорий Верещагин но Куӟебай Герд, Вячеслав Ар-Серги но Касим Галиханов, Анна Зуева но Галина Романова, Людмила Кутянова но Анна Прокопьева... Михаил Федотов, чуваш муосысь ас выжыоссэ адӟись... Шор бамъёс яркыт суредо, нылпиослы сӥземын, кылбуръёсыз Владимир Романовлэн (таиз - анаезъя чуваш). Татын ик - Ашальчи Окилэн веросэз. Ваче кусыпъёсмы сярысь гожто Мишши Юхма, Роза Петрова но Василий Ванюшев. Соиз паймытэ: дас куинь статьяос, азькылъёс, берыктэмъёс улэ гожтӥськемын Роза Петрова яке Р. Н. Петрова. Нош тросэтӥ - авторлэн киыз шӧдӥське, но нимыз пуктымтэ. Кин бен со, Р. Н. Петрова? Роза Николаевна Петрова (Ахтимирова) - удмурт писательёсты, культура, искусство удысын ужасьёсты чуваш лыдӟись доры нуись-ваись, педагогика наукаосъя кандидат, И. Н. Ульянов нимо Чуваш кун университетысь доцент. Асьмелэн матысь эшмы. Быдэсак сюлэмыныз бурмемын Удмурт шаермы борды. Котьку но калыкмылы ӟеч лэсьтон сярысь малпанэн улэ. Тани та журналлэсь номерзэ но быдэсак со дасяз, люказ, поттӥз. Кыӵе гинэ учыр кемдэ, со бурдъяськыса вуэ асьме доры. Роза Николаевнаез, сьӧдкысъем чырмыт нылкышноез, адӟыны луиз ни удмуртъёслэн пӧртэм ӧтчамъёсысьтызы, писательёслэн кенешъёсысьтызы. Лыктэмезлы быдэ со уно кузьымъёс но иворъёс вае, татысь озьы ик пачылмем мылкыдын, саламъёсын кошке. Куд-огез Удмурт шаерын улыса но сомында ӧз лэсьтэ на, дыр, кӧня тыршиз ни асьме понна Роза Николаевна. Удмурт эшъёсыз - суредасьёс, артистъёс, писательёс сярысь дас сизьым очерк гожтӥз. "Хыпар" ("Ивор") газетазы туэ тулыспал печатлаз "Удмурт нылкышно сыӵе ик сабырлы, кыӵе чуваш нылкышно" статья. Та газет пыр ик ас калыксэ тодматӥз Геннадий Красильниковлэн но Николай Байтеряковлэн веросъёсынызы. Удмурт веросъёсын, озьы ик кылбуръёсын бичетъёс-сборникъёс дася. 1991-тӥ арын Роза Петрова тыршемен потӥз удмурт литературалэн чуваш кылын антологиез. Куӟебай Гердлэн сю аръем юбилеезлы кузьмаз "Матьи" книгазэ - Гердлэсь "Матӥ" но мукет веросъёссэ, статьяоссэ ачиз ик берыктӥз. Та удысын Роза Николаевна зол тырше. Тани-тани солэн берыктэмез улсын печатьысь потоз Михаил Петровлэн "Вуж Мултан" романэз. Удмурт классиклэн вуоно арын пусъёно 95 аръем юбилеезлы со бадӟым кузьым. Аслыз но со сыӵе ик кузьым луиз: алигес гинэ Роза Николавна куатьтон арессэ пусйиз. Тӥни озьы, Чувашилэн историяз, пумтэм кыстӥськмсь "гозые", со аслэсьтыз зарни- азвесь нюжаоссэ ватса. Паймыны гинэ кыле: кытысь та чиед мугоро нылкышно сомында кужым тырмытэ?... Г. Романоваен ӵош М. Сеспельлэн юбилеяз ветлыкумы, вить ар талэсь азьвыл, та эшмы берло нуналозяз милмын вал сюрес вылэ потон азямы ми доры сиёнэн вуиз... Али но Роза Николавна гожтэт пыр вазиське: "Мусо эшъёсы, возьмасько тӥлесьтыд кылбурен веросъёстэс. Шумпотыса чуваш кылэ берыкто..." Юнме ӧвӧл сётэмын Роза Николаевна Петровалы Удмурт Республикаысь культура удысын дано ужась ним. Сюлэм шунытэз ваньмызлы тырме. Со шӧдӥське та статьяяз но, кудзэ сётӥськом улӥын (со печатламын вал "Чанлах" но "Правда чебоксарская" газетъёсын). Татьяна ЧЕРНОВА. Р. Н. Петрова (бурысез) но Т. Н. Чернова Удмуртиысь писательёслэн ӧтчамазы 1994-тӥ арын шуркынмонэ. Туспуктэмез Александр КУЗНЕЦОВЛЭН. Экономика Быдӟым эксэйлэн нимыныз Туннэ котькинлы валамон: производствоез азинтытэк, экономикаез уд юнматы. Соин ик, вылды, туэ гужем Россиын вордскиз Быдӟым Петр нимо национальной общественной премия. Та дано ним кылдытэмын "Устоез кивалтӥсь" фондэн. Премия Россиын одӥгез бадӟымез луэ но сётӥське солы, кин тужгес трос лэсьтэ, кужымзэ сётэ экономикаез юнматонэ но социальной удысэз азинтонэ. Конкурсэ пыриськизы Россиысь данак ваньбур поттӥсьёс, Удмуртиысь - 12 кандидат. Пусйыны кулэ, соослэн ужъёссы тупало вал конкурслэн куронъёсызлы. Мукет сямен вераса, предприятиослэн кивалтӥсьёссы шӧдскымон вамыш лэсьтӥзы производствоын кивалтонэз умоятонын, выль интыос но устоесь ужан амалъёс кылдытонын. Премиос сётонъя комиссиен кивалтӥз Россиысь промышленникъёслэн но ужбергатӥсьёслэн огазеяськонзылэн тӧроез Аркадий Вольский. Со шумпотыса ивортӥз: Удмуртиысь ньылез кивалтӥсь вылӥ наградаос басьтӥз. Кинъёс бен соос? Быдӟым Петр нимо национальной общественной премилэн лауреатъёсыз луизы Правительстволэн Тӧроез (ЧМЗ кун предприятилэн азьвыл кивалтӥсез) Николай Ганза но "Ижсталь" огазеяськонлэн валтӥсь директорез Валерий Моисеев. Соослы сётэмын зарни пус, зарни медаль но дано диплом. "Россия Федерациысь устоез кивалтӥсь" диплом басьтӥзы "Буммаш" АО-лэн валтӥсь директорез Валентин Жебровский но Правительствоысь Аппаратлэн кивалтӥсез (Глазовысь администрацилэн азьвыл кузёез) Александр Горяинов. Ваньзы соос пыртэмын Россиысь 100 усто кивалтӥсьёс пӧлы. Таяз арняе лауреатъёс пумиськизы журналистъёсын. Та ужрадэ пыриськиз Правительстволэн Тӧроез Николай Ганза но. Лауреатъёс мукетъёс огкылысь пусйизы, палэнысь юрттэт возьматэк, шаерамы одно ик азинтоно производствоез. Промышленность пичи вамышъёс лэсьтэ ни. Со азьланезлы оскон кылдытэ. Но шуг-секытъёс туж трос на, тужгес машинаос лэсьтон удысын. "Ижмаш" но солэн автозаводэз мырдэм пыд йылазы сыло. Берло дыре, конверсия кутскем дырысен трос вераськонъёс мыно выль автомобильёс поттон сярысь. Туннэ тодмо: автозаводмес выльдонэ ичизэ 250 миллион доллар коньдон кулэ. Кин сое висъялоз, - шуг вераны, но луонлыкъёс вань. Му вӧй поттонъя 12 интылы конкурс ялэмын. Кин вормоз, со ик уксё висъяны быгатоз. Конкурсэ пырисько Удмуртиысь но Россиысь кужмоесь нефть поттӥсьёс. Отчы пыро "Лукоил", "Башнефть", "Удмуртнефть" но мукетъёсыз. - Зэм, автозаводэз выльдонын трос дыр ыштэмын , - шуэ Николай Ганза,- отысь вань оборудованиез воштоно но выль технологиос пыӵатоно. Со быгатэ арлы быдэ ичизэ 180- 200 сюрс автомашина поттыны, нош али 70 сюрс но уг лэсьты. Туннэ нимысьтыз пусйыны кулэ: Правительстволэн Тӧроезлэн верамезъя, палэнысь юрттэт возьматэк, нуналмысь азинтоно асьме производствоез. Сое улон куре. Г. РОМАНОВ. Сэрегез дася адвокат Лилия ШКЛЯЕВА Валэктэ юрист Сётӥськоз-а музъем? 1972-тӥ - 80-тӥ аръёсы мон механизатор луыса ужай вал Ува ёросысь Свердлов нимо колхозын, бӧрысь, 80-тӥ - 86-тӥ аръёсы та удысын ик тырши Краснодар крайысь одӥгаз колхозын. Кузпалы но механизатор вал. Кулэ-а сётӥськыны милемлы музъем пайёс со хозяйствоосын? Леонид ВОЗИСОВ. Завьял ёрос, Ягул село. Россия Федерацилэн 1992-тӥ арын 4-тӥ октябре кутэм "Агропромышленной комплексын предприятиосты но организациосты выль кузёослы вузан но отын воштонъёс ортчытон радлык сярысь" 708 номеро но 1995-тӥ арын 1-тӥ феврале кутэм "Нимаз кузёослэн музъем но ваньбур пайя правооссы сярысь" 96 номеро Постановлениосаз верамын, кин быгатэ музъемлэн кузёез луыны. Соос пӧлы пыр: - гурт удысъя коммерческой организациын (предприятиын) ужасьёс, озьы ик та организациысь (предприятиысь) 1992-тӥ арын 1-тӥ январь бере ужасьёслэсь лыдзэс кулэстэмен валче кошкем адямиос но музъемен кузёяськыны соослы право сётӥськем бере. Соос пӧлы уг пыро огдырлы медъяськем адямиос, озьы ик гражданско-правовой огкылъя ужасьёс, кинэ ке воштыса ужасьёс, соослэн асьсэлэн ужан интызы мукет хозяйствоын интыяськемын ке; - пенсионеръёс, соос пенсие пото ке гурт удысъя коммерческой организациосын (предприятиосын) ужамзы бере но со территориын ик уло ке, озьы ик сюдӥсь-вордӥсьсэ ыштэмен валче пенсия басьтӥсьёс, сӧсыръёс, сӧсыръёсты утялтӥсьёс но мукетъёсыз. "Гурт удысъя коммерческой организацилэн (предприятилэн) территориеныз лыдъясько сыӵе музъемъёс, кудъёсыз интыяськемын музъем висъян сярысь тупатэм документъёсъя.. Со документ басьтэмын луыны кулэ, хозяйствоын воштонъёс ортчытонэн валче музъемъёсты люконъя выль инъетъёсты юнматытозь. Гурт удысъя коммерческой организацилэн (предприятилэн) территорияз улӥсьёс пӧлы озьы ик пыро солэн юртъёсаз улӥсь пенсионеръёс (юрт балансын ке), музъемен кузёяськыны право сётӥське со вакытэ пенсионер мукет территориын улэ ке но; - воштонъёс ортчытэмен валче гурт удысъя коммерческой организацилэн (предприятилэн) территорияз улӥсь пенсионеръёс, соос пенсие потӥзы ке со хозяйствоысь, кытын интыяськемын вал солэн кузёяськоно музъемъёсыз; - гуртъёсысь социальной удысын ужась адямиос (тазалыкез утён, культура, бытовой юрттэт сётон, связь, вузкарон, калыкез сюдон но дышетон) соослэн ужан интызы пыре ке гурт удысъя коммерческой организацилэн (предприятилэн) территорияз; - гурт удысъя коммерческой организациысь (предприятиысь) огдырлы кошкем ужасьёс - военнослужащийёс, хозяйствоысь стипендия басьтыса дышетскисьёс, тодон-валанзэс будэтыны ыстэмъёс, соослэн законэн чакламъя азьвыл ужан интыязы берытскыны правозы вань ке, пинал ваёнэн но собере нылпиоссэс утялтонэн валче отпуске потэм нылкышноос. Верам адямиос музъеменызы асьсэос меӵак кузёяськыны быгато яке доверенность пыр сое огдырлы мукет адямилы сётэмзы луэ. Адями ачиз лыктыны яке доверенность ыстыны уг ке быгаты, солэн музъемез хозяйстволы сётӥське. Кузё аслэсьтыз музъемзэ берытскемез бере аслыз курыны быгатэ (солы дыр тупатӥське, законэн чакламъя); - музъемлэн кузёез кулэмын ке, свидетельство басьтытозяз, та пай кыле наследникъёслы. Гажано Возисов эш, жаляса верано луиськом, Тӥледлы музъем висъяны уг луы. Кузпалды сярысь ке верано, тӥляд юанады верамын ӧвӧл, кыӵе аръёсы со ужаз та хозяйствоосын. ӜУАСЬ СЮЛЭМООС Куӟебай Герд чуваш писательёслэн бадӟым эшсы вал. Педер Хузангай, Васьлей Митта но мукетъёсыз сярысь тодэ ваёнъёссэ кельтӥз. Малпа вал удмурт кылэ берыктыны милям классикмылэсь Константин Ивановлэсь "Нарспи" поэмазэ. Удмурт лыдӟисьёсты тодматӥз Никифор Васянкалэн "Кай, кай Ивана" кылбуреныз. Огъя вераса, 20-тӥ-30-тӥ аръёсы Герд трос лэсьтӥз, удмурт но чуваш литераторъёсыз ваче эшъяськытон вылысь. Солэн лёгем сюресэз ӧз пашмы. Ачиз но выльысь ми доры вамыштэ кадь. Тани мынам киям Удмурт кун университетлэн издательствояз поттэм зӧкос книга - "Как молния в ночи..." Татчы пыризы Гердлэсь творчествозэ эскерись чуваш писательёслэн но статьяоссы. Нош но нош берыкъясько книга бамъёсты... Макем бадӟым уж лэсьтэм сое люкась! Пумиськонъёс, гожтэт пыр кусып возён, архивъёсысь документъёс... Кӧня кужым, кӧлымтэ уйёс сётэмын ваньзэ тае бичаны, радъяны. Книгалэсь кузёзэ Зоя Алексеевна Богомоловаез мон кемаласен тодӥсько. Трос аръёссэ со ужаз удмурт классиклэсь Кедра Митрейлэсь творчествозэ эскерон бордын но. Солы сӥзем монографияз шуныт мылкыдын гожтэ чуваш учёнойёс Н.В.Никольский но Н.И.Ашмарин сярысь, сётэ Кедра Митрейлэсь соос сярысь тодэ ваёнзэ. Та научной ужен тодматскыса, мон усьтӥ аслым удмурт классикез но, исследователез но. Тазэ син азе пуктыны юрттӥз на В. Солоухинлэн "Черное платье" статьяез но. Нырысьсэ мон Зоя Алексеевнаен пумиськи 1991-тӥ арын Ижевскын, Вань удмуртъёслэн нырысетӥ ӧтчамзы дыръя. (Татчы монэ ӧтизы, "Ошмесо шаерлэн гуръёсыз" нимо чуваш кылын удмурт литературая антология дасяме понна.) Соин монэ тодматӥз тодосчи, писатель Василий Михайлович Ванюшев. Мон Шубашкарысь, чуваш шуыса тодэмез бере, Зоя Алексеевна юалляськыны ӧдъяз ми палась эшъёсыз сярысь. Таӵе но юанъёсыз вал: "Кыӵе ни отын В.И.Чапаевлы памятник? Сӥлы каро-а вордскем палъёсаз?", "Воштӥськиз-а ини табере шоркарды?" Богомолова ас сярысьтыз но мадьыны вуиз. Вордскем но будэм Оренбург улосысь Озёрная станицаын. Казачка... Вераз кемалась луэм учырез. Мынэ вылэм граждан ож. Соос дорын кӧлэм Василий Иванович Чапаев. Зоялэн атаез братэныз кошкиллям со сьӧры тӧдьыосын ожмаськыны - берытскиллямтэ ни... Тӥни малы дуно та ним Зоя Алексеевна понна. Выльысь ми пумиським Удмуртиысь писательёслэн ЪИВ ӧтчамзы дыръя. Табере мон но мади ас атае, коммунист Николай Ахтимиров сярысь, кудӥз бырыны шедиз Москва дорын 1941-тӥ арын ноябре. Со вал политбоец. Озьы, милемды - Зоя Алексеевнаез но монэ - герӟа вылэм выжыосмылэн огвыллем адӟонзы но, литератураез эскерон удысын огъя тыршеммы но. Мынам ӝажыосам сыло, кылсярысь, Зоя Богомоловалэн "Песня над Чепцой и Камой", "Восхождение", Василий Ванюшевлэн "Расцвет и сближение" книгаоссы. Нош Богомоловалэн библиотекаяз вань чуваш писательёс Константин Иванов, Мишши Сеспель, Педер Хузангай, Васьлей Митта, Юрий Семендер, Геннадий Ирхи, Раиса Сарби но мукетъёсыз. Берло пумиськылыкумы, мон Зоя Алексеевналэсь юай: "Мар малпаса тӥ кутскиды Куӟебай Герд сярысь такем бадӟым книга дасян борды?" Со ӧжытак малпаськыса шуиз: "Мынам атае но солэн братэз, трос коммунистъёс быризы огъя уж понна. Калыклэсь улонзэ умоятон вылысь сюлэмзэ ӝуатӥз Герд но. Со сярысь гожтытэк, мон ӧй чида". Куӟебай Гердлэн ӝуась сюлэмыз пиштэ чуваш калык понна но. Кылем арын, удмурт калыклэн быдӟым пиезлэн вордскемез дырысен 100 ар тырмонлы сӥзьыса, Чувашиысь калык писатель Мишши Юхма поттӥз солэсь берыктэм кылбуръёсын "Зарни шунды ӝужалоз" книгазэ. Нош та чуръёсыз гожтӥсь Гердлэсь веросъёссэ но повестьёссэ, чуваш кылэ берыктыса, "Матьи" нимо книгае огазеяз. Малпасько, Гердлэсь ужзэ азьланьтӥсьёс, ӝуась сюлэмоос вань дыръя, эшъяськонмы уз чигы - кужмоялоз. Солы юрттоз, дыр, туэ ноябрь толэзе милям чуваш классикмылэн Мишши Сеспельлэн вордскемез дырысен 100 ар тырмонлы дасяськон, сое пусъён но. Роза Петрова, Чуваш кун университетысь доцент. * Роза Николаевна Петрова но Зоя Алекесеевна Богомолова. Шӧкыч Федор МИННИГАРАЕВ Ужлы ёрмон дыръя кылдэм малпанъёс Оло берга, оло уг! Тодосчиос шуо: музъем берга. Паймисько! Бускельёсмылэн корказы кытын сылэ вал, али но отын ик сылэ. Толон быдэс черыксэ огнам бушатӥ - малпасько, берганы кутскоз. Ӧвӧл, мон мырдэм пыд йылам сылӥсько ни, нош со берганы уг ик малпа. Со Коперник шуонзы кужмо воргорон вылэм, лэся. Музъем берганы кутскытозь, кӧня черык меда бушатоно луиз?! Возьыт Вань на вылэм дунне вылын географиез тодӥсьтэм адямиос. Ма, кызьы уд тоды, кытын Америка, кытын Индия, яке шуом, Африка. Возьыт! Ымныразы ик сялӟем потэ! Ма, тани толон глобус басьтӥ. Быдэс нунал утчай, быдэс нунал! - ӧй шедьты. Кыӵе шузиез меда лэсьтэм та глобусэз?! Вордскем гуртме, Вукогуртэз, пусйымтэ. Мыдланес малпанъёс Улӥын верам чуръёсты мон ӧй малпа. Соосты мукет визь кылдытӥз. Но мон быдэсак та малпанъёсын соглаш луисько. Тани, шуом, вань парикмахерской. Мынӥськод отчы, ӵышкиськиськод - тыриськод коньдон. Нош малы ӧвӧл, шуом, шухермахерской, яке мукет сямен вераса, мыдланес парикмахерской. Мынӥськод отчы, ӵышкыны номыре кадь, йырыд пилеш. Потӥськод - йырсиед скал быж кадь кузь яке воксё баблес. Со понна тыныд коньдон тыро. Умой ук. Нош малы со ӧвӧл. Паймисько! Яке, шуом, барланес мунчо. Пыриськод отчы миськем сяртчы кадь чыж-чыж чылкыт мугорын, нош потӥськод - кырсь, быдэс мугорыд лыдэ. Со понна тыныд - коньдон. Урод шат? Нош кытын со? Паймисько! Тани пыдкутчан тупатъянниос. Соос котькытын вань. Нош малы мыдланесъёсыз сыӵе интыос ӧвӧл. Сётысалыд ӵыж-выль туфлидэ но, басьтӥськод - отӥыз кеськемын, татӥзэ ляконо. Со понна коньдон тырысалзы. Умой ӧвӧл шат? Яке, шуом, мыдланес лампочка. Кызьы шуо асьме тодосчиос - тылпульы. Ӝуатӥськод сое - котыр пеймыт луэ, нош электрокужымез лыдӟись арбери, счётчик, берлань берганы кутске. Шонер-а верасько? Табере эшшо малпаськом на. Тани мон ӵукналы быдэ уже трамваен мынӥсько. Тырисько коньдон. Нош ӝыт бертӥсько. Шонергес вераса, берлань мынӥсько. Нош малы мыным коньдонме уг берыкто? Паймисько. ШӦКЫЧ "Дышетӥзы" Дэбес ёросысь "Дружба" сельхозкооперативлэн Бадӟым Зетым гуртаз туэ гужем куинь воргоронъёс пӧлын бадӟым "сабантуй" ортчиз. Отысь Стрелков но Тронин фермаын возьмаськисез Сучковез "дышетыны" малпазы. Одӥг литр аракы понна. Кивалтос кутыса, бер уин воргоронъёс ферма пала вырӟизы. Боевикъёс но боевикъёс! Сучковез кыӵе гинэ кылъёсын ӧз сьӧдмалэ. Таизлы куинь ваё саник кутоно луиз. Собере кызьы но озьы пегӟыны вуиз ик. Урмем эшъёс малпазы, Сучков ферма дорысь куро люке пегӟиз, дыр, шуыса. Тыл понӥзы но витьыны ӧдъязы солэсь отысь потэмзэ. Тыл гома, Сучков нема. Тылэз адӟыса, отчы гурт калык люкаськиз. Ярам ай, "горд атас" гид доры ӧз матэкты. Кысӥзы. Та ужез судын но эскеризы. Номыр сыӵе-таӵеез ӧвӧл, пе. Собере амнистия ялэмын вал... Озьы дышетӥзы эрказъяськисьёсты. Н. Воронов. Эн лушкаськы, пие... Тазьы ӵемысь визьнодалоз вал анае. Лыдӟисьёс, оло, паймозы: малы та сярысь гожъянэз на? Нош киям ручка кутыны муг луиз ас пиеным вераськон-кенешон. Службазэс йылпумъяса гуртамы берытскем ньыль пиос, газетысь ялонъя Коми улосэ ужаны кошкизы вал. Кытчы интыяськонзы но тодмо: бышкись ез сьӧры шедемъёсты возьман. Сюлэмлы кельшымон уж ӧвӧл кадь. Нош ма карод? Гуртын улӥсьёс ужаса вылысь уксёлэсь туссэ вунэто ни ке, умой шат? Мукет ласянь, та ужез но быдэсъясьёс кулэ. Пытсэт сьӧрын пукисьёслэн лыдзы будэ но будэ уго. Озьы егит пиос службаысь берытскыса, выльысь погонэн дӥсь дӥсяно луизы. Шутэтскыны бертыкузы юасько: - Вань-а сыӵеос, кудӥз чыры-пыры йыртэмамез понна пытсэт сьӧры шедемын? - Тырмыт гинэ, - лулске пие. - Одӥг воргоронлы утюг лушкамез понна вить ар висъям судья. Газет-журналъёс гожъямъя, таӵе учыръёс тырмыт гинэ. Тюрьмаос калыкен тырмытэмын. Отчы шедьтыны быгато ведра картошка, утюг, курег лушкасьёс но. Калыкын юнме уг верало, дыр: "Тюрьмалэн капкаез котькин понна но усьяське-ворсаське". "Вятский край" газет гожъямъя, ортчем аре Киров улосын йыртэманъёс пӧлын 43 процентэз луэ кӧттырон, курыт ву шедьтон понна лушкаськон учыръёс. Озьы чыры-пыры лушкаськемзы понна соос кӧня ке аръёс ӵоже улыны-вылыны кулэ йырвандӥсьёсын, эриктэмасьёсын, мукет кышкыт йыруж лэсьтэмъёсын. Таӵе кышкыт нюре шедьыса, тросэзлэн чылкыт, пыд йылазы йыгмыт султымон ярдур доры кыстӥськыны кужымзы уг тырмы ни. Соос эшшо но пыдлогес выё. Мынам малпамея, сыӵеосты пытсэт сьӧры келяно ӧй вал, дыр. Мед ужалозы, тыршозы эрикын ик. Мед тырозы бадӟым штраф яке ӝыны уждун басьтыса мед ужалозы судэн тупатэм дыр ӵоже. Озьы соос тросгес пайда сётысалзы, вылды. Пытсэт сьӧрын пукисьёсты но сюдытэк, дӥсятэк, эмъятэк амалмы ӧвӧл ук. Сое ваньзэ пӧртэм налогъёсын пельпум вылаз ӝутэ ужась калык. Нош со ичи лыдпус ӧвӧл. Толэзь ӵоже пытсэт сьӧры шедем адямиез сюдыны-сектаны 153 манет коньдон висъяське (лыдпусъёс басьтэмын 1998 аре потэм газетъёсысь), валес котыръёс, электрокужым, шуныт сётон понна нош ик ватсано на 161 манет, эмъяськыны висъяське - 44 манет. Та сяна кулэ на ужасьёслы уждун тырыны, школаез возьыны (вань сыӵеосыз но). Йӧн-йӧн чотатэк но котькуд зэклы толэзяз 345-350 манет коньдон кутӥське. Табере мукет лыдпусъёс сярысь верало. Ми кузпалэным кыкмы ик пудо вордон удысын тыршыса, толэзяз огазе уждунмы 700-800 манет луэ. Тае люкыны кулэ на школаын дышетскись нылмылы, армиын службазэ азинтӥсь пимылы. Солдатъёс но анай-атайзылэсь коньдон, посылка возьмало ук. Озьы милям семьяямы ужаса вылысь, адямилы быдэ 150- 200 манет уксё шеде. Со ик дыре бышкись ез сьӧрын пукисьёс милесьтым бусьтыргес уло, иське?! Ма понна? Кыӵе ӟеч ужъёссы понна сюдыса-дӥсяса возьыны кулэ соосты асьмеос, налог тырисьёс? Та юанъёслы нокин но валэктон сётыны, утчаны уг дырты. Кулэ ӧвӧл кадь со правительстволы но Думаысь депутатъёслы но. Та йыртӥянэн йырин шат. соослы? Азьпалан быръёнъёс матэкто ук. Оло, мон янгышасько? Соку лыдӟисьёс ас мылкыдзэс мед вералозы. Н. ТУРИН. Киров улос. Спорт Та нуналъёсы Иже дюкаськизы Россиысь 8 улосвылысь кужмоосыз гимнастъёс. 100-лэсь ятыр нылъёс но пиос нюръяськозы олимпиаецъёсты дасянъя школаын. Асьме дорын вормисе потэмъёс берло пыриськозы чемпионатлэн финал люкетаз. ** Нырысетӥ лигаысь футбол командаос чемпионатсэс йылпумъяло ни. Берпуметӥ 3 шудонзэ "Газовик" палэнын ортчытэ. Нош дораз со Нальчикысь "Спартакез" 3:0 лыдын, нош Ставропольысь "Динамоез" 1:0 лыдын вормиз. М. КУЗЬМИН. Сеспельлы - 100 ар Чувашъёслэн кылбурчизы Мишши Сеспель сыӵе ик дано, кыӵе луэ Куӟебай Герд. Аслаз вакчи улонэз ӵоже Сеспель уно кылбуръёс, драма но трос мукетсэ гожтыса вуиз. Но лыд бордын ӧвӧл ужпум. Со чуваш калыклэсь пӧсь кужымо лулзэ герӟаз чеберлыко кылын. 1918-тӥ арын ик кылбурчи чуваш интеллигенцилы вазиськиз: "Чуваш кылмес утён понна огкылысь луоме!" Мишши Сеспельлэн быдэс улон сюресэз курадӟон гинэ вал - 1922-тӥ арын 15 инвожоозь, ку со ассэ быдтӥз. Тэшкам сюресэз сое мур гуэ кадь вуттӥз - но поэт отысь, пӧсь тылсиен ӝуатскыса, вылӥе ӝутӥськиз. Тӧдьы кечсин (сеспель - кечсин шуэм луэ) ӧз чигы, ӧз быры - кизилилы берытскиз. Котькуд ар чувашъёс юн данъяса буре ваё быдӟым адямизэс. Солы сӥзем нуналъёсы доразы ӧтьыло Украинаысь (татын поэт улӥз берло аръёссэ) но мукет интыосысь эшъёссэс. Мишши Сеспельлэсь вордскем нуналъёссэ пусйыны Чувашие ветлӥзы ни удмурт кылбурчиос Владимир Романов, Михаил Федотов, Анатолий Перевозчиков, Людмила Кутянова, Вячеслав Ар-Серги, Татьяна Чернова но Василий Ванюшев. Туэ шуркынмон толэзе Сеспельлэн вордскемез дырысен сю ар тырмонэз пусъёзы. Т.Николаева. Ӟечбур, "Юнкер"! "Ижмаш-Мото" акционер огазеяськонын дасясько "Юнкер" нимын выль мотоцикл поттыны. Со лэсьтэмын луоз Америкаын потӥсь "Харлей-Дэвидсон" мотоцикллэн моделезъя. Странаямы нырысетӥ мотоцикл поттыны кутскем дырысен 70 ар тырмонлы сӥзем выставкаын выль мотолы вылӥ дунъет сётэмын вал. "Юпитерлэн" двигателез сӥятӥське вуэн, аспӧртэмлыко ёзъёсыз но, со юрттэ моторлэсь куаразэ лябомытыны, усто дизайнэз, вылӥын жӧглыкез. Таӵе классъем мотоцикл тупа калык куспо куронъёслы. Выль машиналы сюрес усьтӥз инвестициосъя проектъёслы конкурсын вормисе потэмез. Озьыен, кун ласянь но юрттэт луоз. Правительствоысь экспертъёсъя комиссия "Юнкеръёсты" поттонъя бизнес-планлы вылӥ дунъет сётӥз. Н. КУДРИН. "Аслэсьтыд кылдэ яратытэк, мукетсэ уд дышы гажаны" Сизьымдонлэсь ятыр калыкъёс уло асьме республикаын. Котькудӥзлэн аслаз выжыез - сямъёсыз-йылолъёсыз, улон шоры учконъёсыз. Кема аръёс ӵоже соосты суралтыса возизы? Озьы тросэз ӧжыт гинэ ӧз ыштэ кылзэс, культуразэс... Но югдур воштӥськиз: отын но татын пӧртэм культурая дэменлыкъёс, огазеяськонъёс кылдытыны кутскизы. Соосты умоен лыдъяз, юрттэт ӵектӥз Удмурт Правительство. 1994-тӥ арын Кун Кенешлэн Тӧроезлэн А. Волковлэн кичӧлтэмезъя республикаямы кылдӥз Калыкъёсын ужанъя кун комитет. Со дырысен комитетлэн ужез паськытаз, культура яна но, калыклэн сюлмаськонъёсыз туж трос шараяськизы уго. Статусэз пичи луэмысь ваньзэ сое комитет котьку ӧз быгатылы быдэсъяны - кулэ луиз министерство. Туннэ солэн ужпумъёсыз сярысь вераськиськом министрен Н. Н. МУСАЛИМОВЕН. - Николай Николаевич, куд-огез шуо, сыӵе министерствоос ӧвӧл ке, сюлмаськонъёс но ӧвӧл, кылдо ке, одно калык бугыръяськыны кутске. Озьы-а со? - Ӧвӧл. Министерствоос соин ик кылдо - бугыръяськонъёс медаз луэ, калыкъёс куспазы тупаса, ог-огзэс гажаса мед улозы шуыса. Министерство вань калыкъёсты син азяз возе, соослы юрттыны тырше. Ми понна ваньмыз дуно - удмурт но бигер но, пор но казак но... Тани али республикаямы кызь одӥг национально-культурной огазеяськон. Соосын ужан - министерстволэн огез валтӥсь ужпумез. - Калыклы валамон кылын вераса, мар со - национальной политика? - Политика кыл малы ке троссэ кышкатэ. Но национальной политика - со законъёс кутон, дышетон, культура, социально-экономической ужпумъёсты сэрттон-пертчон. Кылсярысь, законъёсты кутонын али нырысетӥ ужпуммы - матысь дыре кылъёс сярысь законэз йылаз-пумаз вуттон. Тросаз республикаосын сыӵе законъёс кутэмын ни. Алигес мынам воштӥсе Коми шаере мынӥз та закон пумысен тодыны-юалляськыны: мае тужгес но лыдэ басьтоно, кыӵе янгышъёслэсь чакласьконо, законэз кутыку. - Мар вылэ пыкъяськыса ужа министерстводы? - Ми ужаськом национальной кун политика сярысь концепцияя. Сое кылдытон бордын трос ужаз Светлана Смирнова. Министерство луыса, огъя ужан ӧрмы милям ӧз воштӥськы, паськытаз гинэ, соин ик азьланьтӥськом азьвыл ужъёсты. Комитетэн Светлана Константиновна кивалтыку ик ай вазиськемын вал Правительствое Координационной совет кылдытон сярысь. Али со бордын ужаськом. Советэ пырозы учёнойёс, законъёс кылдытон бордын ужасьёс, пӧртэм калыкъёслэн огазеяськонъёсысьтызы кивалтӥсьёс... Совет быгатысал вань дэменлыкъёсын, ведомствоосын кусып юнматыны. - Кыӵе кусыпъёс возиськоды мукет республикаосын, Москваен? - Та ласянь нош ик умоен гинэ пусйыны луысал Светлана Константиновнаез. Комитетэн со кивалтыку, туж ӟеч кусыпъёс тупатэмын вал Россиысь Нациосын ужанъя министерствоен. Соин туж огкылысь ужаськом - бадӟым юрттэт сётӥз Куӟебай Гердлэсь юбилейзэ ортчытонлы. Мукет ужпумъёсъя но ӵектонъёсмес, куронъёсмес санэ басьтытэк уг кельты. Мукет республикаосын кусып одно воьыны кулэ. Ог-огедлэсь адӟем карытэк, дышетскытэк ужаны секыт. Тани алигес мон Оренбурге ветлӥ. Отчы ӵапак пӧртэм улосвылъёсысь калыкъёсын ужанъя министръёс люкаськылӥзы. Мукетъёсын ӵошатыса, асьмелэн югдурмы умой. Куд-ог республикаосын таӵе комитетъёссы гинэ но ӧвӧл ай, кивалтэтъёс ласянь нокыӵе юрттэт уг шӧдӥсьскы. Мон малпасько, Удмуртиын сомында пӧртэм калыкъёс уло бере, озьыен, кельше - соос асьме шаермес доренызы лыдъяло. Табере, ог-огенымы кусыпъёсмы мед юнмалозы шуыса тыршоно. Вуоно арлэн кутсконаз чакламын ассамблея ортчытыны. Со но трос ужпумъёсты сэрттыны-пертчыны юрттоз. З. Рябинина. "Визьмо пистолет" кузёзэ гинэ тодэ Туэ ноябре страна пусъёз тодмо автомат кылдытӥсьлэсь М.КАЛАШНИКОВЛЭСЬ 80 арес тырмонзэ. Нош Ижевскысь кибашлыос ялан выль но выль пыӵал тӥрлык кылдыто. Соос ини уже кутӥськозы ХХИ дауре. "ПИВО" - озьы нимаське Ижевскысь механической заводысь конструкторъёслэн но микроэлектроникая специалистъёслэн вылез ужзы. Со кылдытэмын, Макаровлэн пистолетэз вылэ пыкъяськыса. Нош выль пыӵал тӥрлыклэн аспӧртэмлыкез со бордын: ударно-спусковой механизмаз интыямын электроникая блокиратор. Со кылзӥське пистолетлэн кузёезлэсь гинэ. Сыӵе "визьмо" пыӵал кылдытон сярысь малпан кылдӥз вить ар талэсь азьло США-ын. Со вакытэ "Кольт" фирмаез Европаын потӥсь "Глок" но "Беретти" пистолетъёс ӟечлыксыя азьпалтыны ӧдъязы. Соин ик отын басьтӥськизы электроника системаен пистолет кылдытон борды. Ижевскын электроника бордын ужало ни дасо арлэсь уногес. Ыбылӥськонъя дуннелэн чемпионатаз 1990-тӥ арын нырысьсэ эскеремын вал "Иж-50" спортивной пистолет. Та моделен уноез тунсыкъяськыны кутскизы. Кӧня ке ар ортчыса, конструкторъёслэн кивалтӥсьсылэн Владислав Шиловлэн кичӧлтэмезъя, басьтӥськизы "ПИВО" кылдытон борды. Куд-огез малпалозы, солэн нимыз шукыяськись сурен герӟаськемын шуыса. Ӟуч сямен со тазьы луэ - "пистолет с идентификацией владельца оружия". Солэн магнит катушкаен ужась микросхема-транскондерез, кнопка-клавишаез но мукет ёзъёсыз кылзӥсько одӥг адямилэсь гинэ - кузёлэн киысьтыз сигнал ӧз ке вуы, ыбыны турттӥд ке но, пистолет уз ыбы. Западын та выллем пистолетъёслэсь асьмелэнэз унолы оскымонгес. Соослэн пыӵал тӥрлыксы кузёезлэсь чиньы пытьызэ 3 секундскын тодма, нош со дыр ӵоже олома но луыны быгатоз. Нош "ПИВО"-лэн электроникая блокираторез тодма 0,1 секундскын. Асьме пистолетлэн тырмымтэез одӥг гинэ - со ужа чиньы кадь батарейкаен. Техника бордын вырисьёс ӟеч тодо, кыӵе ӟечлыксы ваем "сониослэн" но "панасоникъёслэн". Соиз ини мукет ужпум. Соин ик та модель бордын ужъёс азьланьтӥсько. Солэн электроникаен тырмытэм кутонэз кельшоз спортивной пистолетлы, чакламын браунинглэн выллем тямыс патронлы. "ПИВО"-ез кылдытӥсьёс шуо: - Пистолетэз кутоно озьы, со ноку но астэ медаз ыбы. Уноез йыружъёс уго лэсьтӥсько лушкам пыӵал тӥрлыкен. Нош кӧня пумисько пистолетъёсты талан учыръёс. Басьтэмын "Труд" газетысь. Кун Кенешын Судьялы кин судья? Таяз арня вискын Кун Кенешысь депутатъёс люкаськылӥзы витетӥ сессие. Со нунал но ӝыны кыстӥськиз. Кутсконэз, меӵак вераса, ӟугырес вал. Талы муг сётӥз сессиын эскероно нырысетӥез ужпум - республикаысьтымы Вылӥ судэ но районъёсысь судъёсы судьяосты юнматон. Азьвыл аръёсы та удыс оскемын вал центрлы, али солэсь полномочиоссэ вылаз басьтӥз Кун Кенеш. Огласянь умой, дыр. Кинэн кызьы ужаны но кытчы юнматыны интыысь власть ӟечгес тодэ, нош мукет ласянь, кылыд ӧз ке тупа яке музон сямен ужад ке, кыкетӥ сроклы уз кельтэ ни. Судъёс пыр потэм, судъёстӥ ветлэмъёслэсь ӵемысь таӵе веранэз но кылод: зэмлыкез судысь уд шедьты. Вань судьяосты одӥг мертэтэн уд мерта, одӥг сынэн уд сына. Котькытын сямен, соос пӧлын но вань коньдон понна вузаськемъёс, янгыштэм муртэ янгыше уськытӥсьёс, калык верамъя, сыӵеослы ачиз инмар судья. Но вань умойёсыз но, чылкыт сюлэмо адямиослы чылкыт киын юрттӥсьёсыз. Удмурт парламент таяз учыре судьяосты юнматон борды зол-зол басьтӥськиз. Тӥни малы сессилэн кутсконаз ик депутатъёслэн мылкыдзы шорияк люкиськиз. Соослэн решениенызы ньыль судья дэмлам интыысьтызы палэнтэмын вал, куинез соос пӧлысь - Вылӥ судын ужасьёс. Таяз учыре Кун Кенеш вераз соослы оскымтэзэ. Кызьы шуиз судья Шишкин, парламент ласянь лэсьтэм вамыш - со "пунэмзэ берыктон", "Альва" передачаен, Шаталовлэн уженыз герӟаськем но вырем судьяослы дунъет сётон. Вераськон мынэ та телеканаллэн Кун Кенешлэн кивалтӥсез вылэ кема дыр ӵоже пож ву киськамез сярысь. Судьяосты юнматон азинскоз на вуоно сессиын. Депутатъёс бадӟым уж лэсьтӥзы республикаямы выль законъёсты кутонъя. Огез соос пӧлысь герӟаськемын куштӥськем кортэз кутон пунктъёсын радлык тупатонэн. Та ужпумъя трос лэсьтӥз депутат Михаил Кокорин но солэн ялан ужась комиссиез. Парламентарийёс ваньмыз сямен куаразэс сётӥзы вылӥ верам решениез ӝегатскытэк улонэ пыӵатон понна. Трос ватсанъёс но тупатъянъёс пыртэмын кун ваньбурез приватизация улэ кыскон сярысь законэ. Депутатъёсты соосын тодматӥз ялан ужась комиссилэн кивалтӥсез Раиль Галиахметов. Кун ваньбурез муниципалитетлы сётэмен. Ӵош выжозы полномочиосыз но, мукет сямен вераса, кин киын луоз ваньбур - со ик табере кузёяськоз. Шӧдскымон воштонъёс но тупатъянъёс пыртэмын приватизация ортчытон сярысь законэ. Учкемын 1999-тӥ-2000-тӥ аръёслы республикаысьтымы кун ваньбурез приватизировать каронъя программа. Отын нимаз-нимаз верамын, кыӵе предприятиосты со улэ кыскыны луэ, кудъёссэ - уг. Кылсярысь, 100 процентэз ик акциосыз государство кие кылёзы Удмурт филармонилэн, Национальной музейлэн, театръёслэн но куд-ог мукет учреждениослэн. Кызьы пусъемын законын, соосты приватизировать карыны уг яра. Та списоке ик шедё нянь пыжон комбинатъёс, племенной ужен вырись коллективъёс. Вань сыӵе но предприятос, кудъёссэ Кун Кенеш аслаз решениеныз одӥг кузё киысь мукетызлы выжтыны быгатэ. - Кызьы шуиз Р. А. Галиахметов, соосъя интыосын нимысьтыз уж нуэмын. Сётэм списоке ватсанъёс но тупатонъёс пыртонэн мыло-кыдо выризы Играысь, Якшур-Бодьяысь, Ижевскысь, Сарапулысь администрациос. - Приватизация ортчытон коньдон поттон сьӧры уиськонлы медаз пӧрмы, акционер предприятие азьланяз пайда вайыны быгатӥсь коллективъёс радэ мед шедёз но бюджетэз узырмытоз, - пусйиз ялан ужась комиссилэн кивалтӥсез. - Китайын та амал ассэ умой ласянь возьматӥз ини, со пыр потэмын ваньмыз азинлыко ужась странаос. Удмурт парламент республикаез, солэсь собственностьсэ котыр ласянь утись законъёс кутыны кулэ. Правительство "Зарни акция" улсын мед быгатоз пыриськыны ваньмаз валтӥсь предприятиослэн ужазы. Та ужпум туж лэчыт сылэ быдэс Россиын. Малы ке шуоно, ас вакытаз акциос киултэмын вал нимаз адямиосын, кызьы шуо туала вакытэ, олигархъёсын. Соос ик политика лэсьто, дунъёсын дугдылытэк шудыса. Сессиын учкемын профсоюзъёслэн вазиськонзы нылпи пособиосты тырон пумысен. Соосты 1997 арысен семьяос уг адӟо ни. Та дыр ӵоже нылпиослы тыронъёс вуизы 281 миллионозь. Со понна кыл кутыны кулэ Правительство но Кун Кенеш. Кызьы валэктӥз Калыкез улон- вылонын утёнъя министр Светлана Андреева, республикая пособие та вакытэ басьтыны кулэ ог 430 семья. Умойгес югдур Можгаын, Глазовын, Воткинскын, тужгес но секыт - Ижевскы. Татын 20 процентэз гинэ пособиос тыремын. Соиз но сётэмын сиён-юонэн но дӥськутэн. Ар йылпумъяськытозь, югдур умой пала воштӥськыны кулэ, оскытӥз министр. Коньдон бюджетэ пыроз налогъёс чотын. Та ужпум ӝутэмын луоз а бюджетэз эскеронлы сӥзем сессиын. Депутатъёс огкылысь кутӥзы "Удмурт Республикаын кун запасъёс кылдытон сярысь" Законэз. Калыкез утёнын солэн кулэлыкез бадӟым. Сессия эскериз музон но ужпумъёсты. Депутатъёс вуоно кенешазы табере люксськозы 30 ноябре. л. МЕДВЕДЕВА. Вунэтэм урам Ува ёросысь Гагарин урамез асьсэос отын улӥсьёс гинэ тодо, шӧдске. Нош кивалтӥсьёс сыӵе ульча вань шуыса вунэтӥзы ни, лэся, яке чылкак кылэм-адӟемзы но ӧвӧл меда? Посёлоклэн пумаз интыяськем ульча данэ потӥз аслаз пыраны-потаны луонтэм дэриеныз. Татысь сюрес толэн-гужемен кӧсаса уг вутты. Быръён кампаниез азьын депутатсы В.В.Перепелкин куное кожылӥз ик вал. Трос ӝожтӥськонъёс верамын ке но вал, урам пуме вуытозяз, соос озьы ик вуныса кылизы. Со гинэ мар ай. Табере сое связистъёс но вунэтыло ни. Радиозы я чылкак уг вераськы, я ас понназ гинэ бӧтьыртэ. Кылсярысь, огвакытэ со воксё шутэтскиз. Нош куинь нунал ортчыса, нуназе бере, маке "ыбылыны" кутскиз. Сентябрьлэн кыкетӥ нуналаз но югдур та выллем ик вал на. Ярам коть, бӧрысь со калык рад ужаны кутскиз ик. Нош кемалы-а меда? Соин ик кивалтӥсьёслы вазиськеммы потэ. Коть тӥ ке но милемыз эн куштэ вал. Тодӥськом, тӥляд ужасьёсты дыраз уждун басьто, вылаз ик - премия но, котькуд аре акциосъя дивидендъёс но. Нош соослэсь уждунзэс "3" яке солэсь но ичигес баллэн дунъяны луысал. Ма понна ми коньдон тыриськомы, нош ма понна радиомес "вандо". Посёлокмылэн мэрез но, депутатмы но, оло, куке-соку радио пыр милемлы вазиськозы ик. Гуньдэм "табамы" пыр куаразэс ӧм кылэ ке, кӧтмы ӝож луоз. В.Токарев. Толлы дасесь Игра ёросысь Штанигурт администрацие пырись учреждениос толлы дасесь, вылаз ик, соос комиссиен кутэмын вылӥ ӟечлыкен. Пу дась, со вандэмын но пильылэмын. Г.Владыкина. Утиськод - йырыд быглес кылёз Ува ёросысь ваньмаз сямен школаосын, дышетскисьёслэсь анай-атайёссэс люкаса, кенешон ортчытӥзы. Азьло отын вань вераськон мынӥз ке дышетскон, пиналъёслэн асьсэды воземзы сярысь, таяз учыре мумы-бубыосын кенешизы школаез, пиналъёсты пӧртэм террактъёслэсь утён сярысь. Россиын сыӵе учыр выль ӧвӧл ни, кин тодэ, мар луоз ӵуказе. Аламазэ малпаса йырку ик выллань ӝутске. Уваысь кыкетӥ номеро шор ёзо школаын 1600 нылпи дышетске. Дышетӥсьёс но анай- атайёс кенешыса, одӥг малпанэ вуизы. Школаын уен-нуналэн эскерон-дежурство радъямын луоз. Чакласьёслы коньдон тыроно луоз. Табере котькуд дышетскись пиналлэсь 5 манет басьтозы. Н.Васильева. Ӝуаз студентъёслэн пӧраськонтӥзы 20-тӥ октябре уйшор котырын Удмурт университетлэн 1 номеро общежитияз тылпу кенжиз. Тылпу потӥз кыкетӥ этажысь кухняын - пӧраськись студентъёс вунэтӥллям электроплитаез кысыны. Янгышам муртъёс шараямын, изъян лыдъяське-чотаське. О.Никитина. Йӧл ӧжытгес кыско Та нуналъёсы Игра ёросысь пудо утисьёс скаллы быдэ 7,4 килограмм йӧл кыско. Кылем арен ӵошатыса, со кӧнялы ке ичигес. Шумпотоно "Чутырский" сельхозпредприятие понна. Туэ соос йӧл кысконзэс йылэтӥзы. Ортчем арын скаллы быдэ 9 килограмм кыско ке вал, туэ куинь сю граммлы будӥз. Ёросысь хозяйствоос пӧлын чутыръёс азьветлӥсьёс луо. Огъя учкыса, тросаз хозяйствоосын йӧлзы синӥз. Сое синйылтыны луоно "Зуринский", "Заря", "Россия", "Сетпиево", "Луч" но "Родина" колхозъёсын но эштосъёсын. Со дыре ик данъяськыны луоно "Рассвет" но "Авангард" СПК-осын. Л. КОРЕПАНОВА. Вӧт ке уг лыкты - тыр вытъёстэ Удмурт кун университетын пӧртэм тодмо адямиосын пумиськонъёс ортчыло. Тани 20 октябре но та дышетсконниысь студентъёс доры вуылӥз Россиысь вытъёсъя но пӧртэм бичанъёсъя министр А.П. Починок. Студентъёс сяна, пумиськонэ лыктэмын вал элькунысьтымы вытъя инспекциысь ужасьёс но. Кыӵе югдур али Россиын уксё ласянь? Кызьы мынэ Вытъя кодексэз дасян? Мар тужгес но сюлэмшугъяськытэ министрез туннэ? Та юанъёслы Починок лад-лад валэктонъёс сётӥз. - Выт бичанэз умой радъян понна асьмелы трос ик кулэ ӧвӧл. Шуг-секытъёс кылдо соку, куке огшоры адями уг тоды, уг вала, ма понна со выт тыре. Соин йырин ик со кивалтэтлы но осконзэ ыштэ. Тани, шуом, быдэс дуннез басьтыса, Швеция выт бичанъя нырысетӥ интыын сылэ. Кызьы соослэн озьы пӧрме? Туж огшоры - котькуд швед тодэ, кытчы кошке солэн уксёез. Мон но соглаш луисько Александр Петровичлэн кылъёсыныз. Соин ик туж шумпотӥ министрлэн калык пӧлын бадӟым дышетон уж нуэмезлы. Минфин юрттэмъя, алигес потӥзы пичи но бадӟым классъёсын дышетскисьёслы выт сярысь валэктонъёсын книгаос. "Котькуд дышетскись школаысен ик мед тодоз, ма понна со государстволы уксё тырыны кулэ. Мед валалоз, кытчы со коньдонэз кошкоз", - вераз А.П.Починок. Озьы ик Росиысь вить вылӥ дышетсконниосын вытъя факультетъёс усьтэмын. отысь вылӥ тодон-валанъёсын специалистъёс потозы. Али шаерамы сизьым школаос нимысьтыз программая ужало ни. Аслэсьтыз Иж каре малы лыктэмзэ министр тазьы вераз: - Шумпоттытэ, дас ар куспын туэ нырысьсэ федеральной бюджет быдэсъяське.Пыӵал тӥрлыкен вырись но пичи ке но табыш ваё ни. Соин ик ми азьын али выль ужпум сылэ: юрттоно Урал регионысь машина поттон предприятиослы. Нош Удмуртиын куд-ог кудӟытӥсь юон дасясь заводъёс машина поттон предприятиослэсь тросгес табыш потто. Ми югдурез валаськом, тыршом машина поттон предприятиослы юрттыны. 21-тӥ октябре Москваысь куно удмурт шаерысь машина поттон предприятиослэсь ужзэс эскериз. Лена Никитина, Удмурт университетын дышетскись. Возьматӥськом усто предприятиосты: Чепецкой механической завод 3. Тазьы вордскиз кальций поттон Глазовысь заводын чурыт (металлической) уранлэн ӟечлыкез люконтэм герӟаськемын вал чурыт кальцийлэн ӟечлыкеныз. Нош палэнысь ваем кальций предприятилэсь кулэяськонъёссэ тырмыт быдэсъяны ӧз быгаты, озьы ватсаса шуг-секытъёс кылдылӥзы. Соин ик 1949-тӥ арын 4 ноябре ужаны кутскиз выль цех, но кальцийлэсь нырысетӥ комок басьтэмын вал. Витьтонэтӥ аръёслэн кутсконазы уран поттон туж ӝог йылэмен, кальций тырмемысь дугдӥз. Озьы Шоро-куспо машиностроенияя министерство решение кутӥз ЧМЗ-ын кальций поттонъя бадӟым производство усьтыны. 1954-тӥ арын ноябре со вуттэмын но уже лэземын вал. Арлы быдэ 200 тонна кальций сётӥз. Со понна таӵе технологической уж лэсьтӥськиз: - изваска йӧл дасян но пушказ хлор понон; - хлористой кальцийлы электролиз лэсьтон но медно-кальциевой сплав басьтон; - медно-кальциевой сплавысь чурыт кальций басьтон; - кальций пызь дасян. 1956-тӥ арын августэ вуттэмын кальций поттон производстволэн кыкетӥ черодэз. Выль производство паськытамен, будӥз пӧртэм пумо продукция поттон. Куатьтонэтӥ аръёслэн кутсконазы завод чурыт кальций тырмыт сётъяз СССР-ысь атом промышленностьлы. Со мынӥз уран, плутоний но мукет металлъёс басьтыны. Со дыре ик заводысь но та удысысь специалистъёслэн тыршеменызы шедьтэмын умоесь ужан амалъёс, троссэ секыт ужъёсты быдэсъязы машинаос но автоматъёс. Производствое пыӵазы туала эскерон амалъёс. Озьы электролиз ортчыку, ваньмыз сямен (99 процентэз) хлор кутӥськиз. ЧМЗ соку быдэс дуннеын самой чылкыт но дунтэм кальций поттӥз! Сизьымдонэтӥ аръёсы дорамы кальций поттонэн тунсыкъяськыны ӧдъязы кунгож сьӧрысь фирмаос. Озьы тросгес поттоно вал кальцийлэсь пӧртэм пумо продукция но умоятоно сое бинялтонэз (упаковкаез). 1973-тӥ арын сое вузан кутскиз кунгож сьӧры. Кальцийлы кулэяськон уката будӥз. Кулэ вал пайдаё ужан амалъёс. Озьы электролизын ртуть интые кремниез кутыны ӧдъязы. Со шӧдскымон юрттӥз ужан интыосты мозмытыны но ужазинлыкез ӝутыны. Та аръёсы ик (1977-1978) хлористой кальциез куасьтон участокын гуръёсты эстон эгырысь газэ выжтэмын. Сизьымдонэтӥ аръёслэн шоразы 5 номеро цехын кутске промышленностьлы монолит кальций басьтон. Вакчи дыр куспын кылдытэмын технология но выльдэмын оборудование. Таӵе кальций поттонлы юн чурытэсь куронъёс пуктэмын вал. 1983-тӥ арын вуттэмын но уже лэземын монолит кальций басьтонъя выль производственной участок. ЧМЗ-ын кальций поттонлы вылӥ дунъет сёто кунгож сьӧрысь партнеръёсыз но. 1984-тӥ арысен кальций вузан умой-умой кутске. Нош 1986-тӥ арын ужаны ӧдъя кунгож сьӧры продукция поттонъя механизированной производство. Со вакытэ предприятие лэсьтэ ни вал монолит кальций, комок, пызь, кеньыр кадь кальций но порошок выллем хлор кальций. Заводын озьы ик радъямын кальцийлэсь мукет пумо продукция поттон - пӧлаз магний, алюминий, свинец. Укмыстонэтӥ аръёслэн кутсконазы завод сьӧд металлургилы порошковой ез поттыны кутскиз. Миым нимысьтыз промышленной участок вуттэмын. Соин ӵош ик ЧМЗ Россиысь металлургической заводъёслы лэсьтыны ӧдъяз трайб-аппаратъёс. Соос ужатыса эскеремын ни. Али "Чепецкой механической завод" ОАО, Россиысь но кунгож сьӧрысь предприятиослэн но фирмаослэн куремзыя, кальцийлэсь 14 пумо продукция поттэ, ваньмыз со дуннеысь стандартъёслы тупа. Дасяз И. ФАРУШЕВ, бюролэн кивалтӥсез. Играос узыр му вӧен. Газ мынӥсь гумыос но музъемазы согемын. Но чагыр эстӥськон кошке палэнэ, нош асьсэос пӧрасько-шунтӥсько кизертэм газэн. Курадӟоно луо ик но - таӵелы гуртоос дышемын. Котьма ке но, газ ваён - гурт понна пичи праздник. Лонки-Ворциысь газ ваён-басьтон огыр-бугыр вакытэз синйылтӥз Георгий Юсаев. Миллионер... улон-вылон Асьмеос кемалась дышемын ни "кузь" уксё сьӧры уиськись адямиосты мыскылляны, серекъяны. Озьы визьмаз но дышетӥз уго быдэс литература. Нырысь синазькыль карим ужаса, тыршыса узырмем гурт воргоронъёсты. Чик курдатэк, "кулак" ним лякыса, соосты выжытэм быдтыны тыршим. Мукет муген узырмемъёс но гожъясьёслэн лэчыт перозы улэ ӵемысь шедьылӥзы. Суредъёсын соос одно ик лэсьтэмын луысалзы, бадӟым кӧто, кескич синмо, лек тусо карыса. Нош со дыре ик котькудӥз лушкемен вожъяськылӥз бусьтыр, тыр улӥсь бускелезлы. Кемалась тодӥсько мон та ньыльдон кык аресъем удмурт воргоронэз. Синмаськисько Сергейлэн (фамилизэ гожтыны ӧз косы) ужез гажась луэмезлы, ӟеч мылкыдын вожъяськисько тыр улэмезлы, шумпотӥсько шудо семьяезлы. Зэм, нош узырлык но коньдон кисые, юртэ асьсэ коже уг лыкто. Со понна пӧсяса- кынмыса, жадьытозь тыршыны кулэ. Гуртысь воргоронлы кык полэс секыт ныпъет ӝутоно луэ. Городын сямен, солы улон инты уг висъяло. Лэсьты ас юрттэ-ердэ, ворды гид тырад пудо! Нош пудоез вордон понна, гужемысен тыршоно луэ. Колхоз ужын таиз но секыт ныпъет. Вылаз ик, сюлмаськоно на толалтэ коркадэ шунтон сярысь. Нош городын улӥсь воргорон таизлэсь но утемын. Турын но, пу но кулэ ӧвӧл майбырлы! Сергей колхозын механизатор вал, "Беларусь" тракторен тыршиз. Валя кузпалыз пудо вордон удысын ужа. Доразы возё куинь скал, куайыто ошпиос. Парсь пиятыса, парсьпиоссэс вузало гуртооссылы. Вашкалаос верамъя, валес вылын шутэтскыкузы, ас вылазы шундыез эктыны ӧз лэзьылэ. Шундыен огӵош пыд йылазы ни вал. Зэм но, узырмизы, гуртооссылы вожъяськымон улыны-вылыны кутскизы. Но асьме адями уг яраты узырмисьёсты. Со дыре ик чик но уг малпа кӧня кужым поттэмзы, жадьытэк тыршемзы сярысь. Улон-вылон огыр-бугыр кариськем бере, гуртын улӥсьёслы эшшо но секыт луиз. Уг тыро уждун, будэтэм, поттэм сӥль-йӧлдэ но басьто улӥ дунын гинэ. Ӧз чида таӵе йыркуро улонэз егит воргорон. Колхоз ужысь мозмытскиз но "Газпром" огазеяськонлэн ёзаз, Ижысь ПМК-е интыяськиз. Шонерзэ вераса, Тюмень улосэ ветлыса, газ поттон удысын ужаны мылкыд кариз. Тямысэтӥ арзэ та ужзэ азинтэ ни. Азьвыл аръёсы уждун миллионэн басьялляз. Гуртоосыз кушем ним лякыны но ӧз ӝегатске - миллионер шуизы. Сергей толэзь ӵоже ужа, толэзь ӵоже гуртын улэ. Басьтӥз ни ас юртаз трактор, пудо сиён дасяны, картофкаез бугыръяны кулэ луись агрегатъёс. Дораз - трос пумо телевизоръёс, холодильникъёс, тусьты-пуньыосты миськон машина... Солэсь адӟем карыса, кузь сюрес вылэ ӝутскизы на эшшо кӧня ке воргоронъёс. Тросэзлы соослы ньыльдон яке - ӧжытак тросгес. Пӧлазы чик ӧвӧл егитъёс (ужтэк кылемъёслэн биржаязы ветло ке но). Секыт ужлэсь курдало, лэся. - Секыт-а ужед, "миллионер"? - пальпотыса юасько Сергейлэсь. - Колхозын сярысь, сю пол секыт, - лулске воргорон, сигаретсэ кенжытыса. - Нырысь ик - семьялэсь палэнын улоно луэ. Кыкетӥез - куазь туж кезьыт, уж но туж секыт. Та сярысь нокин уг тоды, тодэмез-валамез но уг поты. Нош уждун басьтэмелы вожъяськисьёс лачак гинэ. Зэм, секыт со, олокӧня сюрс иськемъёсы ветлыса ужан (ар ӵоже дас куать сюрс иськем люкаське). Вылаз ик, сиён но сьӧразы нуллоно луэ на. Сӥль, вӧй, картошка дорысьтызы басьто. Озьы дунтэмгес усе. Нош сое Иже вуттон сярысь аслыд ик сюлмаськоно. Отысен - самолётэн. Ярам ай, мынон-бертон дунзэс тыре ужан интыысьтызы предпрятие. Уло соос огшоры вагонъёсын. Нокыӵе шудон-серекъян, ӟечлыко шутэтскон адӟытэк. - Э-э, кыӵе шулдыръяськон сярысь тон? - кунэрес пальпотэ Сергей. - Дас кык час ужам бере, быдэс малпан кӧттырон но валес вылэ уськытскон сярысь гинэ. Ӵуказелы выль кужым люкано ук. Нош уж бере нокин но милемды пӧсь сиёнэн уг возьма. Асьмеос дасяськомы. Коньдонэд ке бичатэ - ветлы ресторанэ. Сыӵеос туж ӧжыт. - Нош курыт юонэн кызьы? - О-о, дисциплина туж кужмо. Юыны луэ, но - эсэпсэ валаса. Ӵукналы быдэ - медконтроль. Космонавтъёсты музэн эскеро. Воргоронъёс юонлэсь кутӥсько кык муген гинэ. Нырысетӥез - кезьыт палан макмырен ужан секыт каторга выллем, кыкетӥез - кивалтӥсьёс адӟизы, шӧдӥзы-валазы ке, чемодандэ бертыны дася: ужысь соку ик улляло. - Озьыен, кезьытлы дышид ни? - Дыши кезьытлы но, тӧдьы гондыръёслы но. Соос милемды уг исало. Ужаны луэ. Но... берло дыре милемлы но уждун дыраз тыремысь дугдӥзы. Аванс гинэ сётыло. Кык сюрс манет. - Гуртэ бертыны уд-а малпаськы? - Али уг. Берло адӟом. Таӵе пӧрмиз мынам туала "миллионерен" вераськонэ. "Мурт кисылэсь зӧкталазэ эн учкы", - шуэ асьме калык. Нош мынам азям сыӵе ужпум пуктэмын но ӧй вал. Вераме потӥз ужез гажась, улон борды юн ӝабырскись удмурт воргорон сярысь гинэ. Николай Турин. Медаз быре чик янгыштэм пиосмы Нуналлы быдэ пӧртэм иворъёсысь тодӥськом асьме ожгарчиослэн Чечняын вормонъёссы сярысь. Со дыре ик чик уг верало ыштонъёсмы сярысь, быремъёс но сӧсыръёс пумысен нокыӵе лыдпусъёсты кыре уг потто. Юнме шорысь ӧвӧл, дыр, со. Кӧня егит пиосмы бырозы на та дантэм ожын? Кызьы дугдытоно сое? Ӵапак та сярысь туннэ вераськонмы Кун Кенешлэн депутатэныз А. В. Першинэн. Со юн кусыпъёс возе солдат анайёсын. - Александр Васильевич, профессидыя тӥ архитектор. Кун Кенешын тыршиськоды музъем ужпумъёсъя комиссиын, со дыре ик юн кусып возиськозы солдат анайёсын. Кыӵе муген тӥ кутскиды та уж борды? - "Пӧсь точкаос" шуон, нырысь ик Северной Кавказ, Чечня - со асьмелэн ваньмылэн "висёнмы". Кайгу шӧдтэк шорысь вуыны быгатоз котькуд юртэ. Юнме шорысь быро ке чик янгыштэм, улонэз но адӟыса вуымтэ егит пиосмы, нокызьы уг луы палэнэ кыльыны. - Пуромем вожвылъяськонэз капчи уз луы дугдытыны. Маин ке, кызьы ке юрттыны луэ-а анайлы, кинлэн пиез оже ыстэмын? - Бен, та ож кема кыстӥськоз на. Али ваньмылы юн-юн валаны кулэ: йырвандӥсьёсын юнме вераськыны, соосты кужымен гинэ вормыны луоз. Ожлэсь шимес номыр ӧвӧл ке но, Путинлэсь вамышъёссэ умоен лыдъяно. Чечняын вить ар ӵоже мынэ ини вожвылъяськон, нош со понна кыл кутыны, Путин сяна, нокин ӧз дӥсьты, ас вылаз ӧз басьты Чечняын кылдэм югдурез. Ужпум али со бордын - кин кулэ ожмаськыны. Мар кивалтэ асьме генералъёсын, созэ мон уг тодӥськы. Но ож ӝуэ ыстыны чылкак дышетымтэ, соку гинэ армие басьтэм пиосты - со бадӟым йыруж. Армиын улонэз шӧмъям эшъёссы сярысь, соос дас поллы ӵемгес бырыны шедё. Азьпал радын мыныны кулэ быгатӥсь, юри дышетэм, югдурез ӟеч тодӥсь ожгарчиос. Нош али асьмеос сюосын ыштӥськом егит пиосмес. Солы пум пононо, поттоно соосты со тылӝуысь. Бадӟым опытэн солдатъёслы, офицеръёслы оже пыриськемзы понна тырмыт коньдон тырысалзы ке, соос мылкыд карысалзы Чечняын нюръяськыны. Сыӵеослэсь ик кылдытыны луысал кужмо армия но. - Быгатозы-а солдатъёслэн анайёссы та кылдэм югдурез кызьы ке но тупатыны, ӟеч пала берыктыны? - Одно ик. Солдат анайёслэн комитетъёссы кылдыло ини ваньмаз сямен городъёсын. Адӟиське ини соослэн зэмос ужзы, вань ини нырысь вормонъёссы. Кылсярысь, Президентлэн 16-тӥ сентябре поттэм указэз, кудӥныз юнматэмын "Воинской службаез ортчонъя радлык сярысь положение". Отын верамын: призывъя службазэс ортчись военнослужащийёс вожвылъяськонъёсы пыриськыны быгато 12 толэзь ортчыса но ас мылкыд каремзыя гинэ. - Глазовын, кытын тӥ улӥськоды, вань-а солдат анайёслэн комитетсы? - Сое кылдытонъя ужъёс кутскизы сентябрь толэзе. Таӵе организацилэсь кулэлыксэ ӟеч валало но юрттыны тыршо городысь администрация, уноез предприятиос. Тани кемалась ик ӧвӧл, ми быгатӥм куинь анайёсты Владикавказэ келяны. Мед соос асьсэ синмын адӟозы но тодозы пиналъёссылэсь улэм-вылэмзэс, кулэяськонъёссэс. Азьпалан лэсьтоно ужъёс туж трос. Быдэс шаерысьтымы, вань улосъёсысь солдат анайёс огазе люкаськизы ке, асьмеос луом бадӟым кужым, кудӥз быгатоз огъя юртамы ӟеч улон кылдытыны. Чорыг будэтӥсьёс шумпото Селта ёросын ӟеч тодо "Рыбовод" хозяйствоез. Ог дасо ар талэсь азьло Останин вынъёс-агайёс но со дыре СССР-ысь Вылӥ Кенешлэн депутатэз Владимир Мурашов кылдытӥзы крестьян огазеяськон. Соос мылкыд каризы Халды вӧзысь Сараёнки гуртлэн бервылаз тымет лэсьтыны, отын чорыг будэтыны. Малпанзы, шуген ке но, быдэсмиз. Карп вордӥсьёс табере ческыт чорыгенызы шумпотто кызьы ке Селта палъёсын улӥсьёсты, озьы ик Ижысь калыкез. Валерий Петрович ОСТАНИН вынъёсыз вӧзы алигес итӥськиз. "Рыбоводын" ужасьёс. Г. ЮСАЕВЛЭН туспуктэмъёсыз. Шарканэ вуоз меда? Шумпотымон ивор вуиз алигес "Шаркан-трикотаж" акциосын огазеяськонэ. Фабрикаысь кивалтӥсьёс Испаниысь гожтэт басьтӥзы. Отын верамын: "Престиж и качество-99" конкурсэз радъянъя комитет "Шаркан-трикотаж" огазеяськонлы сётэ "Калык куспо Гран- При - "Престиж и качество-99" конкурсын вормись премия. Премиез сётыны кулэ 31-тӥ октябре Мадридын. Со луоз диплом но бронзалэсь нимысьтыз кисьтэм статуя. Вормисьлы озьы ик кузьым сётонын пуктэм видеорепортаж кузьмалозы. Нош Мадридын потӥсь "Эктчуалдэд" журнал фоторепортаж сётоз. Со сяна, журналлэн редакциез шарканъёслэн вузъёссылы ар ӵоже реклама сётыны чакла. Но акциосын огазеяськон Испание мыныны уг быгаты. Со понна кулэ 3800 доллар. Татын али коньдон ӧвӧл. Ӟеч ивор иворен ик кылёз, дыр. Статуя но Шарканэ вуоз меда? Б. НИКИТИН. Шахмат Ӝог шудо Ижевскысь одӥгаз шутэтскон нуналэ шахматэн ӝог шудонъя ӵошатскон ортчиз. Отчы пыриськиз 10 команда, котькудаз вал 5 воргорон но кышномурт. Командаос пӧлын огъя вормисе потӥз "Ижнефтемашысь" шахматэз яратӥсьёс. Кыкетӥ нтыез утӥзы технической университетын дышетскисьёс, нош куинетӥ луизы физкультурая "Прометей" коллективе ветлӥсьёс. Нимаз шахматистъёс пӧлын вормисе потӥзы "Ижнефтемашысь" Александр Филипенко но Ижевскысь 6 номеро нылпи спортивной школае ветлӥсь 14 аресъем Роман Широбоков. И.Вельтмандер. Пищекомбинатлы - 5 ар Алнаш ёросысь пищекомбинатлы та нуналъёсы вить ар тырмиз. Ческыт сиён-юонэнызы шумпотто алнашъёсыз но, бускель ёросъёсын улӥсьёсыз но. Вить ар ӵоже радъязы чорыглэсь лэсьтэм сизьым пумо сиён но укмыс пумо колбаса лэсьтонэз. Вань на сюэз юзматӥсь юонъёсыз (напитокъёсыз) поттон цехсы. Со сяна, дась ини тысь вӧй лэсьтонъя оборудование но. Жаляса верано, сырьё ӧвӧлэн вӧй поттэмзы уг луы на алнашъёслэн. Л. Ушаков. Та нуналъёсы печатьысь потӥз туж чебер книга. Нимыз солэн - "Ансамбль как образная система в удмуртском нарядном искусстве ЪИЪ-ЪЪ вв." Авторез - Константин Михайлович Климов. Со асьмемыз одӥг пол гинэ шум ӧз потты ни - печатласькылӥзы ни удмурт куиськонлы сӥзем книгаез, удмурт калык искусствоез возьматӥсь бадӟым ужез. Та эскеронэз понна солы сётэмын Удмуртилэн Кун премиез. Отын та адями возьматыны быгатӥз удмурт калыклэсь устолыксэ, буёлъёсыз валамзэ но соосыз йӧнзэ шедьтыса, ас дӥсьсэ но котыръёссэ чеберманын кутыны быгатэмзэ. "Удмурт калык искусство" нимо книгаез милемлы но суредасьлы, вераны луонтэм бадӟым юрттэт сётӥз. Устолыко киужъёсын шыкысъёс вуизы кадь мастерскойёсамы. Ышись-бырись, будӥсь киужъёс нош ик улӟизы. Соосыз школаосын но нылпи садъёсын уже кутыны кутскизы, удмурт калыкез данъяса, урокъёс но занятиос ортчылӥзы. Та книга удмурт калыклэн историяз кылиз, чебер кырӟан кадь. Константин Михайловичлэн мукетъёсыз но ужъёсыз удмуртъёсыз вылӥе ӝуто. Со ужа, утча, шедьтэ усто лэсьтэм удмурт киужъёсты но соосыз асьмелы но, удмуртъёслы но, быдэс дуннелы но возьматыны тырше. Малы асьмелы но возьматэ - шуиз валамон. Туала удмуртъёс песянайёсмы но песятайёсмы кадь ӧвӧл ни. Ум валаське ни ӟечлыко но чеберлыко киужъёсыз, ум валаське, ум но утиське ни. Чебер шобыръёслэсь выжлёгет лэсьтӥськом - дэриесь пыдмес отчы ӵушылӥськом, чебер ӝуткам ӵушконпумъёслэсь шобыртон вуриськомы пукон вылэ, нош отчы механизаторъёс вӧесь челберенызы (шароваренызы) нуналлы быдэ пуксьыло. Яке туала кышномурт (ачиз чебер ӝуткаса куиськыны но уг быгаты али), чебер шобырез шунды йӧтоно, бездоно кадь интые (ӟус вылэ) вӧлдэ но отчы таба но пуктэ, кӧйкышетсэ но нуналлы быдэ олокӧня пол со вылэ сэрпалтылӥз. Вӧй бервылэз кей сие. Яке - шундыя бездыса быре. Иське, вӧяськем дӥсен тракторист пуксьылыса, кӧйкышет кадь луэ, кырсез миськыса но уг кошкы ни, нош буёлэз бездэ. Азьвыл удмурт адями усто муртлэсь ужзэ гажа но дунъя вал. Ымысь ыме вераса данъя но вал. Озьы асьме калык данъяськымон устолыко ужъёс но киужъёс лэсьтылӥз. Али тросэз удмуртъёс вашкалаысь лыктӥсь вылӥ культураез ыштӥзы. Соослэн вылӥ тодон-валан сярысь дипломзы вань но чын, дуннелы тупась культуразы ӧвӧл ни. Нош вашкала дырысен ик асьме калыклэн культураез туж вылӥын вал, со нокыӵе калыклэсь шӧдӥськымон бере уг кыльы вал, кытӥяз ортчылӥз но. Асьмелэн ӵыжы-выжыосмы ог куинь сюрс ар талэсь азьло ананьинской культура кылдытӥзы. Соос сярысь быдэс дунне тодэ. Нош туала алнаш палъёс малы сыӵе быгатӥсьесь? Соос уло вашкала ананьинской культуралэн вӧлдӥськем музъемъёсыз вылын, соин ик соос доры со вакытъёслэн но пичи ке но тулкымзы вуэ, луоз. Малы мон ваньзэ тае верай? Соин - удмурт ас культуразэ уг ни тоды, нош ӟуч адями удмуртлэсь культуразэ ӟеч тодэ но быгатыса эскере, асьмемыз ик бурдъя, дунне калыкъёс азьын данъяськыны дышетэ. Мар вылез Константин Михайлович Климовлэн берло ужаз? Вылез отын со - Удмуртъёслэн улонзылэсь пӧртэм палъёссэ эскерыса, тодосчи валам удмурт искусстволэсь, чын вылӥ вакытсэ. Валан гинэ ӧвӧл, эскерем но лыдӟисьлы возьматыны быгатэм, удмуртъёслэн калык искусствозы, малпаськон сямзы туж вылӥын сылэ вылэм ЪИЪ- ЪЪ дауръёсы. Та ужез понна Москваын Константин Климовлы искусствоосыз эскерон удысысь Наукаосъя доктор дано ним сётӥзы. Уралын но Сибирьын али, со сяна, искусствоосыз эскеронъя докторъёс ӧвӧл ни кадь. Та берло ужаз К. М. Климов возьматэ, удмуртъёс чеберлык пӧлы зымемын, со пушкын пыласькыса уло. Удмуртлэн юртаз пырыса уд вуиськы пужыос капка юбо бордын, ӟезьы карнизын, корка сиг пасьын, укно наличникын, кенос юбоосын, улыно-вылыно кенослэн вылӥысьтыз усёнтэмлы лэсьтэм чильтэр бордын, нош пушказ ошемын пужыё кӧлан ын, сюрыосын - шобыръёс, сюлык кышетъёс, пужыё кубоос, черсъёс, кудмында ӝуткам ӵушконъёс... Вераса быдтонтэм чебер буёлъёс но пужыос дӥсьёс бордын! Но со огшоры гинэ вылымтэ, Константин Михайлович шӧдэм но валэктыны быгатэм удмурт калыклэсь улон-вылон котырзэ, вань дӥсьсэ, тӥрлыксэ, сямъёссэ-йылолъёссэ ог-огенызы герӟаса кыла-бура, кырӟа-вера инкуазез чакласа, дуннеен ог кылысь кариськыса. Солэн корка пушкысьтыз котьмарзэ басьты - арбериос огзылы огзы тупатэмын, ансамбль кылдытэмын, азбарын но озьы ик юртъеръёс ансамбль кылдыто, дӥсь но ансамбль кылдытэ. Куала пушлэн ансамблез аслаз. Удмурт калыклэн дунне шоры учконэз, быдӟым дунне сярысь малпанъёсыз туж кемалась радъяськыны кутскизы ни. Вашкала дауръёсысен, оло, нош, вапумъёсысен ик ини удмурт дуннеез куиньлы люкоз вылэм. Соос - вылӥ ин (космос) - Иньмар (Инмар), шор люкет - Куазь, улӥяз - Мукылчинь. Та малпан котькытчы пыӵамын. Сое ӟеч возьматэ Константин Михайлович. Со кыдёкысен - пермь пӧйшур амалъёсын суредам бордысен кутске. Удмуртъёслэсь но комиослэсь малпаськон сямъёссэс возьматэ. Пермь пӧйшур амалъёсын суредан удысын тросэз суредъёс куинь полэсэсь, улаз-кенӟали, шораз - адями. Йылаз - тылобурдо. Та зӧкос книгае удмурт калыклэн лулучеберлыкез сярысь сомында тодон люкамын - ваньзэ вераса быдтод шат одӥг та газет бамын? Удмурт калыклэсь лулчеберлыксэ эскеронын но возьматонын "Ансамбль как образная система в Удмуртском народном искусстве - ЪИЪ-ЪЪ вв." Книга удмуртъёслэсь быгатонлыксэс, валанзэс но данзэс уте но соосты туж вылӥе ӝутэ. Вера асьмелэн чын дуноез сярысь, сое утьыны но азьланьтыны куре. Удмурт калык искусствоез (устолыкез) эскеронын та - нырысетӥ бадӟым уж Удмурт калык трос полэс тау карыны кулэ Константин Михайлович Климовлы, удмурт искусствоез акыльтытэк эскеремез но сое туж вылӥе ӝутэмез понна. С. Виноградов, Удмурт Элькунысь калык суредась, профессор. Поръялоз, уз чалмы кырӟанэз "Арама кузя", "Поръялоз, поръялоз", "Паськыт, паськыт", "Тулыс уй", "Яратон" ("Возь кузя но васькыса...")... Кузьма Ложкин... Котькуд удмурт адями, дыр, та куараез кылыса, радиоприёмникез доры матэгес кариське. Та дано кырӟасьмылэн номырин ӵошатонтэм (жильыртӥсь ошмесэн гинэ ке шат?) куараез, коркаосамы пырыса, шуныт тулкымъёсын кадь ортче мугоръёстӥ... Озьы ик Кузьма Ложкин пумитаз ас кылзӥсьёссэ Удмурт кун национальной театрлэн юртаз 15-тӥ октябре. Таӵе ӝытэн усьтӥськиз, шуыны луэ, театрлэн туэ сезонэз. Татысь коллектив зол тыршем, нырысетӥ удмурт профессиональной режиссёрлэсь, артистлэсь ужъёссэ син азе пуктон вылысь. Ӝыт кутскиз но, йылпумъяськиз но "Йыромем тури" спектакльысь люкетъёсын. Зэм, тае К. Ложкинлы пуктыны ӧз кылды, но быдэс спектакль пыр сюлэмез позыръятӥсь малпанэн ортче солэн "Анае гурзэ эстэм, дыр, но"... кырӟанэз. Нош нырысьсэ Удмурт театрын со пуктӥз Н. Гогольлэсь "Кышнояськонзэ" ("Женитьбаез"). Соберегес - Ж.-Б. Мольерлэсь "Эриктэм эмъясь" ("Лекарь поневоле") комедизэ. Удмурт театрмы музыкально-драматической дыръя, солэн вань быгатонлыкез яркыт усьтӥськиз. Усто режиссёр гинэ ӧвӧл, нокинэн воштыны луонтэм актёр но со вал. Тужгес но удалтылӥзы серемес рольёсыз. "Свадьба в Малиновке" спектакльын Кузьма Ложкин вал Нечипор но, Попандапуло но. - Тазэ ролез мон со бӧрсьы шудоно луи, - шуиз Кузьма Алексеевичлэн дышетскисез республикаысьтымы дано артист Геннадий Городилов. - Нош нокызьы но со кадь ӧй пишмыты. Мынам аслам образэ пӧрмиз. Операя но балетъя театрысь актёръёс - шаерысьтымы калык артистъёс Юрий Яковлев, Вячеслав Нисковских но Геннадий Городилов, та вылӥ верам спектакльын шудэм сяна, шуныт кылын тау карыса тодазы ваизы Кузьма Алексеевичез, возьматӥзы солэсь дӥсьсэ- кутсэ но, маин шудыны кылдӥз на та ӝытэ. Кузьма Ложкинлы вордскемез дырысен 90 ар тырмон ӝытэ "улӟыны" юрттӥзы асьмелэн тодмо артистъёсмы Леонид Романов, Вячеслав Байков, Фаина Будина, Галина Владыкина, Петр Романов но мукетъёсыз. Виктор Стрелков, "Сюан" спектакльысь туала Юрмег, тодэ вайытӥз Кузьма Ложкинлэсь та ролез шудэмзэ. Калык артистлы таӵегес ик образ кылдытӥз вал Гольдонилэн "Кык кузёослэн ляльчизы" комедиезъя спектакльын, Труффальдино кариськыса. - Мон ӧй малпалля, вунэм атайме такем сӥлы карозы на шуыса, - шумпотэмзэ ӧз ваты К. Ложкинлэн нылыз Татьяна Кузьминична. - Суредась (В. Белых - ред.) портретсэ туж валаса лэсьтэм. Атаелэн учкемез ӵапак сыӵе ик, туж шуныт вал. Песятаезлэн быгатон визылэз пыӵам Денислы но, Удмурт университетысь студентлы, француз кылъя вуоно тодосчилы. Гитараен шудыса со кырӟаз Кузьма Алексеевичлэсь яратоно гурзэ - Александр Вертинскийлэсь романссэ. Россиысь калык артистэз, Удмуртиысь искусство удысысь дано ужасез Кузьма Алексеевич Ложкинэз тужгес но уг вунэто дор палъёсаз - Дэбес ёросысь Зар. Медло гуртын. Татысь усточиос аспал пизэс данъяса кырӟазы, тодазы ваизы. Зал кичабонэн бугырскиз, куке сцена вылэ потӥз вынызлэн нылыз Нина Михайловна Кожевникова. Со туж умой тодэ на уго бечеезлэсь пинал дырзэ, секыт сюрессэ. Кузьма Ложкинэн огвыжыысь луэмез сярысь вераз Кун Кенешлэн Тӧроезлэн воштӥсез Светлана Смирнова (азьвыл Ложкина) но. Ӝытэз нуиз Дэбес ёросын вордскем, будэм егит артист Алексей Ложкин кузпалэныз Светланаен. Оскон вань, таосыз но Ложкинъёс ас фамилизылэсь данзэ уз уськытэ шуыса. Байгурезь юрттэ дэбесъёслы. Тужгес но вылӥе ӝутэ со артистъёссэ. Т. ПЕТРОВА. Кызьпу арамаын кадь ик бергало сцена вылын Зар. Медлоысь нылкышноос. Кузьма Ложкинлэсь пинал дырзэ тодаз вае вынызлэн нылыз Н. М. Кожевникова. В. Камашевлэн туспуктэмъёсыз. Тунсыко адями со, Можга ёросысь Карашур гуртын улӥсь Юсь Падем - Павел Лебедев. Туж сюлмаське удмуртлыкмес утён, удмурт калыклэн ӵуказе нуналыз пумысь. Соин валче ик сюлэмызлы туж ярало вашкала вӧсьёс. Та веранысьтыз но тододы аспӧртэмлыко ведакатъёс, удмурт калыклэн азьвыл улонэз, солэн шугадӟонъёсыз но шумпотонъёсыз сярысь. Малы утёно удмурт выжыез? Куд-ог адямиос малпамъя, удмурт кылэз но удмурт выжыез утьыны турттонэз ик ӧвӧл. Улон воштӥське, вылез вужзэ воштэ - дуннелэн куронъёсыз сыӵеесь, шуо, дыр, соос. Тазьы малпасьёслы верам потэ: котькуд кыл но котькуд дӥнь (иське, выжы) - туж аспӧртэм маке. Котькуд кыл - нимысьтыз дунне выллем. Вашкала выжыосызлэсь уг палэнскы ке, со туж тунсыко но дуно луэ. Нош туала улонъя кариськыны ӧдъяз ке, соку со, зэмзэ но, оло, кулэ уз луы ни дуннелы. Кылъёсты турлы сяськаосын ӵошатыны луоз. Музъем вылысь кыӵе ке сяська яке будос быре ке, быдэс дунне начаргес кыле. Удмурт кыл но удмурт выжы быризы ке, дунне уката но пурысь кылёз, мон малпамъя. Туала улон шоры учкыса, котькин валаны быгатоз: туж тросэз али мыдлань улэ. Нош вашкалаез шоры учкиськод но адӟиськод: ӵыжы-выжыосмы трос ласянь шонергес но визьмогес вылӥллям. Соин ик та дуннеысь вуоно нылпиосмы азьын асьмелэн туж бадӟым ужмы вань, гажано удмуртъёсы. Керетонлэн выжыез Таӵеез но веда-визькыл вань: "Тупаса улӥсь кузпалъёсты ачиз Лакшми (шуд ваись инмумы) бакель каре". Асьмелы нимаз улыосамы (семьяосамы) но, гуртамы но, быдэс удмурт шаерамы но тупаса но дэмен вераськыса улоно вал. Тазьы котькудмы кужмо луомы. Чагез чигтыны капчи, нош писэз уд чигты ни, шуо удмуртъёс. Улыын кузпалъёс но, нылпиос но, пересьёс но куспазы тупаса уло ке, отын туж шудоесь, ужасесь но визьмоесь пиналъёс будо. Сыӵе улыос узыргес но ваньбурогес луо. Пиосмуртлы но юонлэсь но мылкыд куашканлэсь утиськыны капчигес. Котьку кыӵе ке ужез вань юрт котыраз: угось матысь муртъёсызлэсь сюлэмзэс шумпоттыны тырше но соослэсь улонзэс капчигес карыны сюлмаське. Нош кузпалъёс куспазы керето ке, одӥгзылэн но мылкыдзы уз луы юрт котырзэс чебергес карыны но ог-огзылы юрттыны. Ог-огзылы могӟет пуктылозы но секыт мылкыдын улозы. Тазьы ик вераны луоз гуртмылэн улонэз сярысь но. Малпалэ гинэ: кыӵе чебер но кужмо луысал Карашурмы, ваньмы огкылысь но ог-огмес валаны, ог-огмылы юрттыны турттыса улысалмы ке. Соку котькинлэн ӟечгес ужамез но рос-просгес кариськемез потысал. Вашкала вакытэ озьы улӥллям удмуртъёс гуртъёсазы. Одӥг улыэн кадь. Котькудӥз ас гуртэзлы бадӟым пайда вайыны быгатэ. Со понна котькудӥзлы аслэсьтыз удыссэ но ужзэ шедьтыны турттоно но сюлмысь ужано. Ведакат валэктэмъя, ваньмы асьмеос - тупал муртъёс. Асьмеос та асат (материальной) дуннеысь ӧвӧл. Асьмеос сат (духовной) дуннеысь макеос. Нош татчы вуим визьтэм йырынымы. Та асатдунне йӧнтэмъяськись но кылзӥськисьтэм муртъёслы пытсэт выллем. Татын улыса, адямилы дышетсконо, пе, кин луэмзэ валаны. Асьмеос али мугоръёсмыя учкиськомы ук ог-огмы шоры. "Таиз куанер, таиз узыр, таиз эше, таиз тушмонэ, тазэ мон яратӥсько, тазэ кин тон но уг шуиськы",- тазьыгес малпаськомы асьмеос. Нош мугор - со дӥськут гинэ. Мугор сурыкмемен, сое нумыръёс сиёзы но, ваньбурмы но, коньдонмы но мурт кие сюрозы. Асьмеос - огкадь паймымон чылкыт лулъёс. Инмарлэн пиосыз. Азьвыл лэсьтэм ужъёсмыя гинэ турлы мугоръёсы понэмын кармакатэн но куазен. Кин ке узыр но кужмо мугоре огдырлы понэмын азьвыл ӟеч ужъёсызъя, кин ке огдырлы - куанер но ляб мугоре. Кӧня ке дыр ортчыса, соос воштӥськозы интыенызы. Озьыен, керетонлэн выжыез - мыдлань тодон. Шонер но вашкала чылкыт тодонэз дышетыса, иське, ведакатъёсты но мукет дӥнькатъёсты лыдӟыса, асьмеос ог-огмы шоры но, дунне шоры но мукет синмын учкомы. Котырамы ваньмыз - Инмарлэн ваньбурез. Нош асьмеос ваньмы - солэн туж шудо но паймымон нылпиосыз. Керетонлэн выжыез сюлэмамы. Сюлэмамы чылкыт тодон поныса, со пумен чылкыталоз но, асьмеос шонергес но чылкытгес улыны быгатомы. Мон данъяськисько удмурт выжыеным Вашкала удмуртъёслэн но кыӵе ке дӥнькатсы вылэм. Вӧсяськон сэбедъёссы туж зол радъяськылӥллям. Быдэс ар ӵоже турлы вӧсьёс ортчытъяло вылэм. Ведакатъёсты англи кылысь удмурт кылэ ог тямыс ар ӵоже берыктыса, мон туж паймисько но, шумпотӥсько но. Табере мон туж данъяськисько удмурт луэменым. Та вашкала ведакатъёс пыр мон вашкала удмуртъёслэсь улонсямзэс но дунневаланзэс туж гажаны кутски. Ведакатъя валай, малы озьы улӥллям удмуртъёс. Тӥледыз но курисько: эн вунэтэлэ вашкала выжыосмес. Туала йӧспӧртэм улон туж ик медам йыромыты асьмеды. Вашкалаосмыягес кариськыса, шонергес сюрес вылэ потом. Тазьы верало ведакатъёс. Тазьы ик вера сюлэм. Асьмеос туж узыресь Гуртын улӥсьёс туж шудоесь: скалзы но, музъемзы но, нюлэссы но вань. Талэсь бадӟым ваньбур ӧвӧл, шуэ вашкала ведакат. Нюлэс, музъем, скал ваньзэ сётыны быгато. Со понна соосты туж гажано, соослы йыбырттоно но азьтэмъяськоно ӧвӧл. Вашкала удмуртъёсмы куазен туж огкылысь улӥллям. Куазь-анай туж ӟеч сюдыны но дышетыны быгатэ асьмеды. Со понна сое ӧжытак ке но кылзыны турттоно. Витаминъёс но, удалтытӥсь сылалъёс но котырамы вань. Нокыӵе магазин кулэ ӧвӧл. Асьмелы тодоно гинэ, кытысь басьтоно соосты. Асьмелы кужмо луоно, музъемез сюлмаськыса но малпаськыса утялтыса. Аракы но кыскон мугорез азьтэмгес но визьмес ныжгес каро. Тазьы асьмеос ляб луомы. Азьтэмъяськыны чик но уг яра: иське, ляльчие кылёмы. Асьмелы кужмо луоно, чылкыт улыса но асьме удысъёсамы сюлмысь ужаса. Ведакат валэктэмъя, скаллэсь ӟечгес но пайдаёгес пудо ӧвӧл. Скаллэн йӧлыз адямилы чылкыт но вылӥ улонэ сюрес усьтэ. Скал йӧллэсь паймымон ческыт но ашо сиён-юон пӧраны луэ. Ведакатын ик пыр-поч валэктэмын: скаллэн кыедэз муэз кыеданы, лэсьтӥськыны, эстӥськыны, эмъяськыны мынэ. Солэсь ик эстӥськон газ но поттыны луэ. Мыдлань тодон но шонер тодон Адямиез пичи дырысеныз ик дышетӥзы ке азьтэмъяськытэк улыны, ужатэк улыны ик уз быгаты со: сыӵе тодонэз. Нош азьтэмзэ вормыны уг быгаты ке, мугорзэ кыткыны чик но уг туртты ке, тодонэз мыдланьгес. Со уг вала, астэ одно ик вормыны турттоно шуыса. Сюлэм шӧдэ: дунне вылын луыны кулэ туж шонер но чылкыт тодон. Сюлэм вера: со тодон - вашкала вакытысь маке. Угось адӟиськод: макем мыдланес улэ туала адями. Солэн дунневаланэз но тодонэз мыдлань сюрес вылэ кожемын. Вашкала ведакатын вань дунне, улонмылэн котькуд удысэз пыр-поч валэктэмын. Татын ик мадемын мугордэ таза возён, гуртын дэмен улон, музъемез утялтон, корка пуктон, ческыт но чылкыт пӧран, айымесуж (лушкем кусыпъёс), вӧсьёсты ортчытъян сярысь. Ведакатын ик валэктэмын, кин со Будӟым Атай, мар каре со, кызьы кылдо но куашкало Дуннепузъёс (Вселеннойёс). Отын ик валэктэмын, кинъёс луиськомы асьмеос но кызьы асьмелы асатдуннеысь мозмоно но дорамы, сатдуннее, бертоно. Кин мон? Тазьы малпаськоно ке, асьмеос асьмемыз ум тодӥське. Кин мон? Та юанлы нокин но вераны уз быгаты, дыр. Валамон ни, кин ке шуоз мон адями, мон удмурт, мон пиосмурт, мон колхозник, мон та юртлэн кузёез... Нош со - дӥськутлэн, мугорлэн гинэ нимъёссы. Нош кин мон ачим? Адями кулэ ке, мугорыз кыле ук. Нош сое асьмеос чалякгес ватыны тыршиськом кыдёкегес. Шуиськом: "Та адями ӧвӧл ни асьмемын ӵош". Кулэм мугор, дыр ортчемъя, зэмзэ но, уз луы ни, сюйлы пӧрмоз. Нош кытчы пыриз та мугорын улэм адями? Малы со улэп вал? Учкелэ ай ас мугорды шоры. Тани мынам киосы, тани мынам ныры, тани мынам сюлэмы, тани мынам виры. Нош кин со, мон? Та мугорез мынам шуись мурт - кин? Мугор ачиз озьы уг вераськы ук, кин ке палэнысен шуэ: "Та мынам мугоры". Мугор сюйлэсь, вулэсь, омырлэсь, тыллэсь лэсьтэм маке гинэ ук. Вашкала ведакатъёс та юанъёслы пыр-поч валэктон сёто. Асьмеос - лулъёс яке ӟанъёс, ноку кулӥсьтэм макеос. Асьмеос миллион пол вордскылӥм ни турлы мугоръёсын. Луллэн кынарыз мугорез ужатэ. Ӟан, иське, лул, мугорысь потэ ке, мугор сӧриськыны кутске. Луллэн зэмос интыез та асатдуннеын ӧвӧл. Со сатдуннеын улоно маке, отын - солэн вордскем шаерез. Та асатдуннее со аслаз визьтэменыз лыктэ. Асьмеос котькудмы - туж паймымон тупал муртъёс, ӟанъёс. Асьмеос котькудмы вераны луонтэм чебересь, чылкытэсь, котьмае валась но шудоесь муртъёс. Нош Будӟым Инмар Муртлы вожъяськеменымы, Инмар луыны мылпотэменымы, асьмеос та мугорын куанон утчаськом но котырысь дуннеен но адямиосын кузёяськыны турттӥськом. Тазьы асьмеос туж шудтэмесь луиськом. Нылпи вордон но будэтон Ведакатын таӵе визькыл вань: "Юртын ӟеч нылпиосын улон сваргалы (райлы) кельше, нош урод нылпиен улон пумтэм курадӟонэн пачылмемын". Озьыен, ваньмыз герӟаськемын пиналъёсынымы. Урод нылпи будэтӥд ке, вань улондэ куректыса но курадӟыса улод, нош ӟеч но ужась адямиез будэтыны быгатӥд ке, улонэд туж шудо но ваньбуро луоз. Валамон ни, нокинлэн но куректыса но курадӟыса улэмез уг поты. Адями тодон пыр но визь пыр улонзэ но адӟонзэ туж зол воштыны быгатэ. Вашкала ведакат валэктэмъя, асьмеос, лулъёс, весь улӥськомы но ноку ум быриське. Та асатдуннеын асьмеос пумтэм вордсконъёс но кулонъёс пыр потоно луиськомы. Куддыръя лул - писпу мугорын, куддыръя - нумыр мугорын, куддыръя - пудо мугорын, куддыръя - адями яке кылчин мугорын вордскылэ. Адями мугоръёс но пӧртэм луо. Одӥгез лул туж узыр американецлэн мугораз вордске, нош мукетыз - кыӵе ке кыр адямилэн мугораз. Мугор - машина выллем. Яке - дӥськут выллем. Одӥгез дӥсь ярантэм луэ ке пересьмыса яке висьыса, лул мукет мугоре пыре, куазьлэн косэмезъя. Та мугоръёсмы-машинаосмы пыр лул мылпотонъёссэ быдэсъяны быгатэ. Та туж дуно машинаосты асьмелы Будӟым атай кузьма куазь пыр. Таӵе паймымон машинаосты нокыӵе заводын но лэсьтыны уг луы. Мугор кулэ ке, асьмеос туж куректӥськом: угось сое тупатыны ум быгатӥське ни но, со мугорысь лул мугорын улыны уг быгаты ни. Котькыӵе мед луоз нылпиед - котькуд анай-атайлы вань сюлмысьтыз тыршоно сое ӟеч сямо но ужаны яратӥсь адями карон сярысь сюлмаськыны. Анай-атай куспазы керетытэк, ӟеч но шонер улыны тыршизы ке, нылпизы но соосъя кариськоз. Озьыен, асьмелы, шонер тодон вылэ пыкъяськыса, шонер улыны тыршоно. Визьмамы но шонер но ӟеч тодон пыртоно, вашкала дӥнькатъёсты лыдӟыса. Тазьы асьме улыосамы ӟеч сямо но визьмо, ужась нылпиос вордскозы но будӥсь нылпиосмес шонер сюрестӥ валтыны быгатом, кулэтэм куректонлэсь но курадӟонлэсь утём. Нылпидэ шудоен но тазаен адӟем потэ ук. Нош мар кароно, тазьы мед луоз шуыса??? ЮСЬ ПАДЕМ. Сведения о кандидатах в депутаты Государственной Думы Федерального Собрания РФ по Удмуртскому избирательному округу � 29 на 19 октября Фамилия имя Дата Основное место Занимаемая Адрес места Кто отчество рождения работы, службы должность жительства выдвинул 1. Смирнова 04.12.62 Госсовет УР Заместитель УР г. Ижевск, Светлана председателя ул, Удмуртская д.49, группа избирателей Константиновна кв.100 2. Роговец Клементий 03.01.38 Ижевское отделение НачальникУР. г. Ижевск, Антонович Горьк. ж. д. ул. Ленинградская д. 1, кв. 7 группа избирателей 3. Першин 28.07.59 г. Глазов,проектно- директор УР г. Глазов, Александр производственное ул. Крылова д.54, группа избирателей Васильевич предприятие "АРК" кв.16 4.Кошкин 10.10.54 Госдума РФ депутат УР г. Ижевск, группа Михаил ул.К.Маркса д.318, избирателей Петрович кв.47 5 Подопригора 14.08.54 Администрация Заместитель главы г. Москва,ул. Владимир Новгородской Администрации Ак.Королева, д.8, к.2, избиратель Николаевич области представитель кв.450 администрации при Правительстве РФ 6 Никулин 01.01.51 Президиум Удмуртского председатель УР г. Ижевск, Валерий отделения Российской ул.К.Маркса избиратбльный блок Александрович инженерной академии д.300,кв.18 "Блок генерала Андрея Николаева, академика Святослава Федорова" 7 Благинина 06.05.50 редакция "Газеты редактор УР г. Ижевск, Серафима Серафимы Благининой" ул.Заречное шоссе, самовыдвижение Петровна д.33,кв.146 Председатель окружной избирательной комисси � 29 А. Л. Мымрин. Россия Федерациысь Федеральной Собранилэн Кун Думаезлэн куинетӥ ӧтчамаз депутатэ кандидатъёслы, улосысь кандидатъёслэн группаоссылы ивортон Удмурт Элькунысь Быръёнъя комиссия печатла иворъёс вӧлмытӥсь ёзъёслэсь списоксэс, кудъёсыз "Россия Федерациысь Федеральной Собранилэн Кун Думаяз депутатъёсты быръён сярысь" Федеральной законлэн 55-тӥ ёзэтысьтыз 8-тӥ пукнтэз вылэ чӧлскыса, Удмурт Элькунысь Быръёнъя комиссилы ивортӥзы Россия Федерациысь Федеральной Собранилэн Кун Думаезлэн куинетӥ ӧтчамаз депутатэ кандидатъёслы, улосысь кандидатъёслэн группаоссылы эфирын дыр но печатьын инты висъяны дась луэмзы сярысь. 1. "Новый Регион" телекомпания 2. "Карьера" газет 3. "Иднакар" газет 4. "Редакция Воткинского радиовещания" МП 5. "Вперед" газет (Балезино ёрос) 6. "Звезда" газет (Кез ёрос) 7. Кез ёросысь радиовещание 8. "АИФ Удмуртии" газет 9. "Золотая провинция" газет 10. "Московский Комсомолец в Ижевске" газет 11. "Неделя Удмуртии" газет 12. "Перекресток" газет 13. "Радуга" радиостанция 14. "Инфо-Панорама" газет 15. "Старый аэропорт" газет 16. "Красное Прикамье" газет (Сарапул город) 17. "В кругу семьи" еженедельник (Можга город) 18. "Можгинские вести" газет (Можга город) 19. Можга радио 20. "Авангард" газет (Вавож ёрос) 21. Вавож ёросысь радиовещание 22. "Альва" телекомпания 23. "Красное знамя" газет (Глазов город) 24. "Калина Красная" газет (Глазов город) 25. "Удмуртия" кун телерадиокомпания 26. "Долг" газет 27. "Отечество" газет (Сарапул город) 28. "Известия Удмуртской Республики" газет 29. "Удмурт дунне" газет 30. "Слово и дело" газет 31. "Металлист" газет (Ижевскысь механикая завод) 32. "Рабочий путь" газет ("Редуктор" ООО) 33. "Радист" газет ("Ижевский радиозавод" ОАО) 34. Сарапул радиолэн редакциез 35. "Знамя труда" газет (Киясово ёрос) 36. "Алнашский колхозник" газет (Алнаш ёрос) 37. Алнаш ёрос радио 38. "Прогресс" газет ("Ижнефтемаш" ОАО) 39. "Нефтяник Удмуртии" газет ("Удмуртнефть" ОАО) 40. "Сарапул" телерадиокомпания 41. "Сарапульская телерадиокомпания" ООО 42. "Буммашевец" газет ("Буммаш" ОАО) 43. "Машиностроитель" газет ("Ижмаш" ОАО) 44. "Воткинские вести" газет (Воткинск город) 45. "Кенеш" журнал 46. "День" газет 47. "Новая жизнь" газет (Кизнер ёрос) 48. Кизнер ёросысь радиовещание 49. "Удмуртская правда" газет 50. "Телеинформ" телекомпания 51. "Сельская новь" газет (Грахово ёрос) 52. Грахово ёросысь радиовещание 53. "ВТВ" телекомпания (Воткинск город) 54. "ВТВ-плюс" газет 55. "Трибуна" газет 56. "Новый путь" газет (Дэбес ёрос) 57. Дэбес ёросысь радиовещание 58. "Ижевск школьный" газет 59. "Российская Земля" газет 60. "Ижевск вечерний" газет 61. НТВ телекомпания 62. Телесеть - ТНТ 63. "Инвожо" журнал Удмурт Элькунысь Быръёнъя комиссия валэктэ, "Россия Федерациысь Федеральной Собранилэн Кун Думаяз депутатъёсты быръён сярысь" Федеральной законлэн 55-тӥ ёзэтысьтыз 1-тӥ пунктэз улэ шедисьтэм (яке кун (государственной) но интыысь (муниципальной) луисьтэм иворъёс вӧлмытӥсь ёзъёс, Россия Федерациысь Федеральной Собранилэн Кун Думаяз депутатъёсты быръён сярысь решениез печатьын поттэм бере кызь нунал ортчытозь, Удмурт Элькунысь Быръёнъя комиссилы ивортыны кулэ депутатэ кандидатъёслы, улосысь депутатъёслэн группаоссылы эфирын дыр но печатьын инты сётыны дась луэмзы но со понна дунъёслэн быдӟалазы сярысь. Иворъёс вӧлмытӥсь ёзъёс, кудъёсыз та куронэз ӧз быдэстэ, "Россия Федерациысь Федеральной Собранилэн Кун Думаяз депутатъёсты быръён сярысь" Федеральной законлэсь 57-тӥ ёзэтысьтыз 14-тӥ пунктсэ но 56-тӥ ёзэтысьтыз 17-тӥ пунктсэ лыдэ басьтыса, уг быгато депутатэ кандидатъёслы но улосысь депутатъёслэн группаоссылы эфирын дыр но печатьын инты висъяны. Удмурт Элькунысь Быръёнъя комиссия. Гуртлы быдэ вукое Туала гуртъёсын улон-вылон куд-ог ласянь вашкала пала берытске. Азьвыл сямен ик гуртлы быдэ вукоос ужаны кутско. Можга районысь Быдӟымсурдэ Пензаысь "Фермер-2" ю тысь изон ваизы. Центнер юэз пызь карем понна табере 70 манет гинэ тыро. Быдӟымсурдъёс кӧоссэс уин но ужатыны малпало. А. КАЙСИН. Алексей Красильников: "Ӟечгес но золгес ужаме потэ" Алексей Геннадьевич Красильников Кун Кенешысь Наукая, дышетонъя, културая но егитъёсын ужан политикая ялан ужась комиссилэн тӧроез. - Алексей Геннадьевич, Удмурт Республикалэн Кун Кенешаз быръёнъёс бере ӝыны ар сяна ӧз ортчы. Озьы ке но, ужамдылы йылпумъянъёс лэсьтыны луэ ни. Мар сярысь верасалды тӥ бырйисьёстылы? - Бырйисьёсыным пумиськылытэк, нокызьы но уг луы, угось аслам округысьтым адямиос монэ кык пол Кун Кенеше бырйылӥзы ни. Соин ик бырйисьёсылэсь куронъёссэс быдэстыны турттӥсько. Ушъяськеме уг поты, тужгес ик иворъёсты вӧлмытӥсь ёзъёс пыр. Но со дыре ик верало: калык понна сюлмаськон - со меӵак депутатлэн ужез. Ӝыны ар куспын коньдонэн юрттэт сётэмын округысь куинь школалы но ньыль нылпи садлы оргтехника, спортинвентарь басьтон но юртъёссэс тупатон понна. Егитъёслэн "Ювенес" огазеяськонэнызы ӵош улон интыос котыртӥ вож будосъёс мерттэмын, азбаръёс чылкытатэмын. Со кутсконэз гинэ ай. - Мар ватонэз, куд-ог депутатъёс быръёнъёсын вормемзы бере калыкез вунэто. Мар шуысалды сыӵе депутатъёс сярысь? - Бен, сыӵе депутатъёс вань. Но зэмос депутат ас ужзэ меӵак калыкен, микрорайонын улӥсьёсын герӟа. Соин ик ӟеч сямлы пыӵамын ни бырйисьёсын пумиськонъёс ортчытъян. Адямиосын вераськыса гинэ куд-ог дыръя сэрттӥсько-пертчисько кыӵе ке бадӟым ужпумъёс. Собере сыӵе пумиськонъёс депутатлы но туж кулэ, соос золгес но ӟечгес ужаны мылкыдэз ӝуто. Мон понна бурдъясь ужлы пӧрмиз микрорайонысь адямиослэсь улон котырзэс умоятон. Кылсярысь, округын улӥсьёслэсь куронъёссэс лыдэ басьтыса, 83 номеро школаысь дышетскисьёсын ӵош писпуос мерттэмын вал Ижевскысь Холмогоров нимо урамысь 14, 16, 18 номеро юртъёс котыртӥ. Азьланяз малпаськом коркаос вӧзы пукон интыос пуктылыны. Та ужез чакламын вал гужем ик быдэстыны но лэсьтӥськон материалэн шуг-секытъёс кылдӥзы. - Тӥ кивалтӥськоды Кун Кенешысь депутатъёслэн огеныз комиссиеныз. Уз-а со люкеты округын ужандылы? - Зэм, республика азьын сылӥсь ужпумъёс бадӟымесьгес. Но комиссиен кивалтыса, паськытгес луонлык усьтӥське бырйисьёсылэсь куронъёссэс чалякгес улонэ пыӵатыны. - Вождэс эн вае таӵе юанэлы: мае лэсьтыны ӧд быгатэ бырйисьёслы сётэм кылъёсты пӧлысь? - Умойгес, дыр, луоз "ӧй быгаты" интые "ӧй вутты" шуыны. Быръёнъёс бере куать толэзь гинэ ортчиз, нош азьпалан куинь но ӝыны ар ай. Но сётэм юандылы меӵак верано ке, ӧй на быгаты коньдон ужпумъёсын вазиськисьёслы ваньзылы ик юрттэт сётыны. Сыӵеос трос. Но мукет ласянь учконо ке, Кун Кенеш - со законъёс кутӥсь ёз. Соин ик коньдонэн герӟаськем ужпумъёсты ваньзэ ик быдэстыны уз луы. - Политика ужъёсы пыриськемдылэсь азьло тӥледыз тодосчи но преподаватель шуыса тодо вал. Депутат луэменыды сэрен азьвыл ужъёстылэсь уд-а палэнске? - Кун Кенешлэн азьвыл созываз ужакум но соослэсь ӧй куштӥськылы. Законъя дышетон но наука удысъёсын депутатлы ужаны лэземын. Удмурт кун университетысь студентъёслы лекциос лыдӟисько. Научной изданиосын статьяосы потыло. Туэ шуд усиз культурологияя ужпумъёслы сӥзем монографиме но поттыны. Тау вераськемдылы. О.Ранжев. Автотранспортникъёслэн праздниксы азьын Владимир МОРОЗОВ: "Атасъёсын ӵош султо" Глазовын гинэ ӧвӧл, "Удмуртавтотранс" огазеяськонын но Владимир Александрович тодмо адями. Солэн кивалтоно предприятиез удысын одӥгез устоез лыдъяське. Туж секыт, выльдӥськон вакытэ со коллективез возе, 8-тӥ арзэ кивалтэ ни Глазовысь автопредприятиен. Владимир Морозов егит кивалтӥсь. 1956-тӥ арын вордскиз бускель Пермь областьысь Усть-Кишерть черкогуртын. Быдэс улонэз герӟаськемын автотранспортэн. Нырысь дышетскиз Кунгурысь автотранспортной техникумын, собере - Пермьысь политехнической институтын. Берлозэ быдтӥз 1980-тӥ арын, автомобильёсъя но автомобильной хозяйствоя инженер-механик луиз. Ужаз Пермьын, нош Березникиысь грузовой предприятиын эксплуатацияя отделэн кивалтӥз вал. 1987-тӥ арын Владимир Александрович Глазове вуиз (татысь кышно ваиз). АТП-е тупатъян ужъёсъя мастере кутӥзы, собере оскизы грузовой автоколоннаез но эксплуатацияя отделэз. Собере директорлы воштӥсе пуктӥзы. Нош 1992-тӥ арын ачиз тӧро луиз, быдэс предприятиез ас вылаз басьтӥз. Татчы сое юнматӥз "Удмуртавтотраслэн" азьвыл кивалтӥсез (миым кулӥз) Валентин Васильевич Коршунов. Автотранспортикъёслэн профессиональной праздниксы но автопредприятилэн кылдэмез дырысен 50 ар тырмон азьын Владимир МОРОЗОВЕН пумиськылӥз но кӧня ке юанъёс сётъяз "Удмурт дунне" газетлэн корреспондентэз Геннадий Романов. - Владимир Александрович, та нуналъёсы коллективды пусйиз ӝыны дауръем юбилейзэ. Вакчияк вералэ вал предприятидылэсь ортчем сюрессэ? - Та нуналъёсы милям, зэмзэ но, кык полэс праздник. Предприятилэн кылдэмез дырысен 50 ар тырмиз. Кызьы бен со вордскиз? Валамон пичиысен. Нырысь усьтӥськиз военизированной авторота. Отын одӥг грузовой машинаос гинэ вал. Рота городэ ворттӥз кыдёкысь гуртъёсысь ю тысь но мукетсэ. Соку зерноток гинэ вал, нош али кужмо мелькомбинат луиз ни. 1954-тӥ арын авторота луэ автотранспортной контора. Парке вуизы выль ГАЗ-51, ЗИЛ- 150 автомашинаос. Соос пӧртэм грузъёс ворттӥзы. Нош кык ар ортчыса, автоконтора басьтэ кык ПАЗ-651 автобус. Озьы предприятилэн улоназ выль вакыт кутске. 1956-тӥ арын Глазовын усьтӥське калыкез нуон-ваёнъя кык маршрут. Выль машинаослэн руль сьӧразы пуксё усто водительёс Михаил Киселев, Кирилл Боталов, Александр Золотарев, Анатолий Новиков, Габдулла Болтачев но мукетъёсыз. 60-тӥ аръёсы автопарк узырме ПАЗ-672 но ЛАЗ устоесь автобусъёсын. Предприятие пумен юнма, трос грузъёс ворттэ, калыкез нуллон йылэ. Соин ик 1967-тӥ арын автоконтораез автотранспортной предприятие (АТП) каро но 70-тӥ аръёсы татчы вуо ЛиАЗ автобусъёс. Адямиосты нуон-ваён одӥг ньыльмослы будӥз. - Нош али кыӵе югдур, кызьы ужаськоды? - Коллектив огинтыяз ӧз сылы, арысь аре кужмояз. Туннэ городысь калыкез нуллэммы сяна, автобусъёсмы ветло Глазов, Юкаменск, Красногорск, Яр, Балезино, Кез районъёсы но республикалэн шоркараз Ижевске. Огъя вераса, городын 5 маршрут устэмын, нош районъёсы 41 маршрутъя калыкез нуо- ваё. Городын автобусъёслэн ветлон сюрессы 68 иськем кыстӥське, районъёсын - 45-40 иськемлэсь уно. Автобусъёсмы нуналлы быдэ 117 сюрс муртэ нуо-ваё. Водительёсмы, атасъёсын ӵош вазь ӵукна султыса, нуналаз 410 рейс лэсьто, со пӧлысь городын - 280. Берло вить ар ӵоже 453 миллион мурт нуэмын-ваемын, нош туэ 9 толэзьскын - 27 миллион адями. - Владимир Александрович, АТП-лы ӝыны даур тырмиз. Со дыр ӵоже ваньмыз-а вольыт вал? Али кыӵе шуг-секытъёс пумиськыло? - Мон сямен, нокин вӧй шукы вылын кадь уг азинскы. Люкетӥсь мугъёс, сюбег интыос азьвыл но вал, али но вань. Странаын экономика лябӟемен но производство гуньдэмен, предприятилэн ужаз со юн шӧдӥське. Кужмо ог-огед куспын нюръяськон, адямиос но груз сётӥсьёс транспортникъёс луоноезлэсь вылтӥ куронъёс пукто. Берло дыре быризы ялан груз нуллӥсь предприятиос но организациос. Соин ик грузовой машинаослы асьмеос уж утчаськом. Со но котьку уг шедьы. Тӥни соин грузовой транспорт али ваньзэ-ӧвӧлзэ 5 процент доход сётэ, нош 1991-тӥ арын 32 процент вал. 90-тӥ аръёсын ӵошатыса, грузовой машинаослэн лыдзы 60 процентлы кулэсмиз. - Маин бен висъяське ортчемез но таиз ар? - Нырысь ик, паськыта но азинске калыклы услугаос сётон. Россиысь, Удмуртиысь мукет городъёсын сямен ик, Глазовын но адямиосты нуллыны кутскизы пӧртэм организациос, фирмаос но нимаз водительёс. Но татын вераны кулэ, адямиосты культура мед луоз. Вожмаськыса ужаны уг яра, АТП-лэн автобусэз азьын калыкез пӧяса нуллон медаз луы. Кыкетӥез, туэ октябрьысен умоязы кивалтон амалъёс. Радъямын машинаослэсь СО но СН эскерон. Сётӥське огъя талон. Озьы инкуазь, омыр чылкытгес луэ. Машинаосты техосмотрлы дасянъя али лэсьтӥське диагностической центр. Куинетӥез, уно пумо услугаос сётон предприятилы ватсаса 5-10 процент доход вае. - Грузъёс нуэм-ваем понна ваньмыз-а дыраз уксё тыро? - Та милям одӥгез бадӟым сюлэмшугъяськонмы. Данакезлэн милемлы трос ни тыронъёссы. Соос, шуом, ӵуказе транспорт эн висъя вал, но ачид ужтэк кылиськод. Пӧртэм амалъёсын кусыпъёсмес тупатӥськом: ог-огмылы пунэм тыронъёсты берыктон яке вузъёссэс но услугаоссэс басьтон пыӵа. - Азьланезлы кыӵе малпанъёсты? - Али ми ваньмызлы дыраз уждун тыриськом. Умой со. Ужмес ведь капчи уд шуы. Коллективамы ваньмыз сямен воргоронъёс тыршо. Соос вылын семьяос возисько. Но берло дыре туж ляб выльдӥським, автобусъёсмы вужесь ни. Соин ик 2000-тӥ арын тросгес выль машинаос басьтыны чакласьком Озьы гинэ калык хозяйствоын автотранспорт зэмос интызэ шедьтоз. Сыӵе осконмы юн. Нош транспорт умой ужаз ке, экономика но юнмалоз, калык но каньылгес улыны кутскоз. - Владимир Александрович, праздникты азьын ужасьёстылы мар верасалды на? - Пусйыны кулэ, арлы быдэ праздникмы азьын водительёс, кондукторъёс но ремонтникъёс куспын конкурс ортчытӥськом. Туэ но со усто радъямын вал. ЛАЗ-677 автобус нуллӥсьёс пӧлын вормиз М. Зинатуллин. ПАЗ-3205-ын В. Сабреков но ЗИЛ-130 - Д. Монич. Нош алигес городын ортчиз профессиональной мастерствоя конкурс. АТП-лэн командаез 3-тӥ инты басьтӥз. Со юрттэ адямиослы ӟечгес ужаны, калыклэсь куронъёссэ умой быдэсъяны. Нош праздник азьын мылкыд кареме потэ 2000-тӥ арез выль вормонъёсын пумитаны, ваньзэ ӟечкыласько ӝыны даур юбилеен праздникен, котькудӥзлы сӥзисько шудбур но тазалык. "Ать!" карыны гинэ потаз со Куатьтон ар талэсь азьвыл, 1939 арын 14 апреле, кизилиё инбаме выль комета кылдӥз. Удмуртъёс сое "быжо кизили" шуо. Сое нырысь ик адӟиз Балезино районысь Кестым гуртысь дышетӥсь Ахмаров Ибрагим Валиуллович. - Я, маделэ-ай, кызьы вал со, Ибрагим агай, - юай вал мон Ахмаров доры Глазов каре мыныса. - Со ӝытэ милям, Кестымысь школаын дышетӥсьёслэн, шулдыръяськон ӝытмы вал. Дас одӥг часозь эктӥмы, кырӟамы. Бертыны потӥм ни вал. Сюрес вылысен выльысь вераськонъёс потӥзы на. Школаын вераськонъёсмы бырымтэ, лэся. Уй югыт. Инмын кизилиос ворекъяло... Вераськисько, аслам синъёсы кизилиё инбам шорын. Озьы кулэ вылэм, вылды... Син шорам выль комета адӟиськиз, быжо кизили. Таӵезэ, матысьсэ, ӧй на синйылтылы на вал. Астрономиез тодӥсь-валась адями сылон интыысеныз ик лыдъяз-чотаз со выль кометалэсь координатъёссэ. Уез но кӧлыны ӧз чида ни Ибрагим Ахмаров. Ӵукна 6 часын со Балезиноысь телеграфной контораын вал ни. Ленинградысь Пулковской обсерваторие ыстӥз ӟеч иворо телеграмма: "Скорпиос созвездие палась инбаме выль комета кылдэмын, Ахмаров". Со нуналэ ик ӝыт куазен Кестым селое телеграмма вуттӥзы, пырак отысь школае Ибрагим Ахмаров кие. "Зэм, тӥ выль кометаез адӟиллямды. Тау тӥледлы", - гожтэмын вылэм Пулковоысь учёной астрономъёслэн телеграммаязы. Со уе ик выль кометаез адӟыны шедьтэм Воткинск карысь дышетӥсь Юрлов но. Нош вуоно уяз кометаез адӟем ни Норвегиысь учёной астроном Хассель. 1940 арын апреле И. В. Ахмаровез Пулковской обсерваторие куное ӧтизы. Отын солэн мӧля вылаз чилясь медаль тэчизы. Со медаль поттэмын вылэм США-ысь Сан-Франциско городын, Тихоокеанской астрономической обществолэн кичӧлтэмезъя, 1890-тӥ арын. Куатьтон ар талэсь азьвыл адӟем выль комета пыртэмын Бадӟым Советской Энциклопедие таӵе нимын: "Ахмаровлэн-Юрловлэн-Хассельлэн кометазы". Выль комета асьме дунне вылэ "Ать!" шуыны гинэ потаз. Одӥг толэзь гинэ лобаз со. Собере ышиз-быриз. Учёной астрономъёслэн лыдъямзыя, табере со сизьым сюрс ар ортчыса гинэ выльысь адскыны потоз на. Лобалоз со мукет дуннеостӥ, мукет шундыос котыртӥ. Ачиз Ибрагим Валиуллович ӧвӧл ни. Кулӥз со 20-22 ар талэсь азьвыл Глазов карын. Н. Кондратьев. Снимок вылын: 1. Ибрагим Валиуллович Ахмаров. 2. Ибрагим Валиуллович Ахмарков но солэн кузпалыз Наталья Алексеевна Ахмарова. 1968-тӥ ар. Газетлы 50 ар тырмемен валче бордгазет интые потӥз "Тыныд витьтон арес" книга. М. Лямин "Советской Удмуртия" фронтын Али но син шорам на Удмуртиын кылдэм 357-тӥ стрелковой дивизиысь воинъёс-эшъёс. Соосын ӵош мон ож сюресэз ортчи. Трос бадӟымесь подвигъёс лэсьтӥзы асьме землякъёс, соос пӧлын ик "Гудыриын" - "Удмурт коммунаын" ужам журналистъёс но. ... Оже потон азьын Кувшиново город дорысь Тысецкое селоын политработникъёс совещание люкаськизы. Совещание бере мон стрелковой батальонлэн комиссареныз Веретенниковен пумиськи. - Ма ини, Андрей Михайлович? - юасько. - Ачид тодӥськод, - шуэ, - туннэ-ӵуказе тушмонэн ваче пумит кырмиськом... Зэм но, кӧня ке нунал ортчыса, 1942 арын 17 январе, ортчыт лек ож пуромиз. Юн но ӟырдыт сюлэмо комиссар-журналист ("Удмурт коммуналэн" редакцияз партийной отделэн кивалтӥз) Веретенников батальонэз атакае ӝутӥз. Одӥгез но одӥг вамышлы но ӧз чигна. ачиз комиссар секыт сӧсырмиз. Госпитальын кыллиз, бурмиз, собере нош ик строе султӥз. Одӥгаз пӧсь ожмаськонын батыр пимы султонтэм пограз. Мукетыз удмурт журналист Николай Фадеевич Щербаков милям полкамы парторг вал. Таиз сямыныз но, выросэныз но мукет. Мултэс вераськыны ӧз яратылы, нош кутске ке, кисьтэ вал ини: кытысь гинэ сыӵе кылъёс шедьтэ! Одӥгаз ожын Николайлэн киыз сӧсырмиз, нош госпитале ӧз мыны: ортчоз, пе, тани бинём но... Озьы ик бинем киыныз азьпала кошкиз. - Коммунистъёс - азьпала! - кӧня пол чузъяськылӥз солэн куараез. 1942 арын мартэ, фашистъёсты Лошаки станциысь тузыку, коммунист-журналист Щербаков подвиг лэсьтӥз. Тушмон юн пумитъяське, олома борды но кырмиське. Будкае интыяськем немецкой пулемёт тачыртэ но тачыртэ, асьме боецъёслы азьпала мыныны уг сёты. "Гуньдытоно сое!" - йыркурен малпаз Николай. Шара вераса ӧз вутты, противотанковой граната кутӥз но будка доры кыстӥськиз. Будка но пазьгиськиз, ачиз батыр парторгмы но быриз. Ватӥм ми сое Калининской областьысь Котлово гурт пуме. Тимофей Васильевич Токарев егит дыръяз "Гудыри" газетлэн редакцияз ужаз, нош фронтэ лыктӥз книга поттон удысысь. Востэм но тылкӧльы кадь адями вал со. - Пыдъёсыд кыӵе-мар ни, эше? - огпол юай мон солэсь, азьло дыръёсы ревматизмен курадӟылэмзэ тодыса. - Ревматизмен йырин ӧвӧл ни-ай, брат. Миномётэн ыбылыны кулэ. Мон миномётчик ук, - бадӟымесь гордэктэм синъёсыныз быльк-быльк учкиз со. - Эх, эше, тыныд-а таӵе пуромем тылӝуэ шедьыны кулэ на вал. Арлыдо ук ни тон, - малпай мон, солэн востэм ымнырыз шоры учкыса. Собере кема ик ӧз ортчы, милемлы ивор вуиз Тимофей Васильевичлэн быремез сярысь. Котькудӥз таӵе ивор сюлэмез вӧсь карылӥз. Война нокинэ но уг жаля, номыр шоры но уг учкы: пазя, ӵушка, быдтэ. Со ке ӧй луысал, ваньмыз та эшъёсмы али но асьме пӧлын улысалзы. Кӧня книгаос гожтысалзы на, вылды, журналистъёс-писательёс Пётр Блинов но Филипп Кедров. Трос, трос вунонтэм подвигъёс лэсьтӥзы асьмелэн землякъёсмы. Соос сярысь мон очеркъёс гожъяй, данаксэ "Советской Удмуртия" поттылӥз. Котькуд очерк пуме милям полевой почтамылэсь номерзэ сётылӥзы. Со фронтовой адресъя мыным но очеркъёсысь геройёслы гожтэтъёс вуылӥзы. Г. Красильников Кылъёслы ӟоскыт, малпанъёслы эркын медло Со вал кызь ар талэсь азьло. Ноку уг вунэты со учырез. Бело мынам потылӥзы уно статьяосы, очеркъёсы, веросъёсы, кӧня ке книгаосы потӥзы, нош нырысетӥез статьяе котьку син азям. Али кадь ик тодӥсько: столовойын сиськыкум адӟи кияз газетэн воргоронэз. Ӵапак со номерын потэмын вал мынам материалэ. Сиён но уг мыны ни, тэркы вылтӥ ялан лушкемак уччкылӥсько воргорон шоры: лыдӟоз мда мынэсьтым гожтэмме? Лыдӟиз ке, кыӵе луоз солэн мылкыдыз? ло, соку ик мукет адямиослэсь юаны-вераны кутскз: вот, пе, учке али, кыӵе усто статья поттӥллям газетэ, уд тодӥське-а, кин сое гожтӥз, ассэ адӟоно вал... Однако, воргорон сиськиз-мараз, собере тамак калтазэ поттӥз, газетэзлэсь одӥг сэрегзэ ӵажак! кесиз (ӵапак отын вал мынам статьяе!), сэрегпум быдӟа тамак бинялтӥз... Тӥни озьы мынам нырысетӥез журналистской "данэ" омырын, кужмо самосадкалэн ӵынэз плын сылмиз, ӝуаз... Озьы-а, тазьы-а но, читыр-чутыр журналистской сюресъёс 1949 арлэн пумаз монэ вуттӥзы "Советской Удмуртия газетлэн редакцияз. Солэсь азьло Алнашысь районной газетлэн редакцияз кӧня ке ар ужам "котомкае" вал ини. "Советской Удмуртие" ӧтьыса гожтэм гожтэтэз басьтэм берам, юн-юн малпаськоно луиз. Котьмар шу но, всё- таки республиканской газет, выль уж, выль инты, кызь ар ӵоже гуртын улыса, табере городын улыны дышетсконо. Ваньмыз выльысь... Редакциын монэ нырысь культура отделэ интыязы. Монэн ваче пумит пуке восьтэт ымныро, шинелен дӥсяськем адями. Удмурт поэт сокугес армиысь бертэм офицер Тимофей Иванович Шмаков. Уно мултэс вераськытэк, азям кикур зӧкта папка мычиз, военной приказ сётэм вылем, вакчияк вераз: - Татын селькор гожтэтъёс. Учкы, ярамонооссэ газетэ дася, мукетъёсызлы гожтэтъёс лэзь. Валад-а? - Валай, - шуисько, нош ас поннам малпай: "Валай, валай, Вало йылэ вуи... Мар бордысен кутскыны но уг тодӥськы". Конечно, мыным трос юрттӥзы редакциын кема ужам эшъёс. Соку газетэ уно егитъёс лыктӥзы, мынам сямен ик, ужаны мылкыдзы вань, нош опытсы - ӟольгыри ныр кузьда... Егит газетчикъёслы юрттӥзы А. Перевозчиков, В. Г. Широбоков но мукетъёсыз. Соос бордын дышетскизы трос егит удмурт журналистъёс. Самой нырысь тодэм-адӟем учыръёс кема уг вуно. Тани одӥгез сыӵе учыр: комнатаын борддоре ошемын бадӟым бумага лист, со вылын гожтэмын: "Кин кӧня строка сётӥз". Мукет сямен вераса, журналистской "трудоденьёсыз" лыдъян шуод-а, мар-а. Одӥгез, шуом, лумбыт ӵоже вить сю строка сётэм, нош мукетыз - витьтон гинэ, ассэ ачиз мултэс "куасалтымтэ". Кинлэн бен ӵошатсконын азьпала потэмез уг пот? Одӥг пол мыным задание сётӥзы: матысь колхозэ ветлыса, отысь клублэн ужамез сярысь статья гожтоно, пе. Али сямен, машинаос ласянь ми соку туж ик эркеямын ӧй вал, ас пыдъёсыдлы оскы. Сапегъёстэ кутчад но - ать, два, сюрес вылэ! Ӵапак сӥзьыл куазь учыраз, дэриетӥ коласа, кирзовой сапегъёсылэн ултонъёссы олокызьы быдэс кылизы. Озьы-а, тазьы-а но, редакцие бертыса пукси клуб сярысь статья борды. "Тросгес строка кулэ? - малпасько. - Сётом, сётом!" Ну, шол, кисьтӥ ни соку чернилаез, номыр сярысь но гожтытэк ӧй кельты кадь: кыӵе юртын интыяськемын клуб, кыӵе солэн выж-вӧлдэтэз, кыӵеесь пуконъёс, мар сярысь плакатъёс ошылэмын, кин отын ужа, кӧня арес солы, кыӵеесь солэн синкашъёсыз... Статьяе аслым туж вольыт йӧтӥз, печатлазы, лӧптэм мылкыдын нуи секретариатэ. Ответственной секретарь Анна Георгиевна мон шоры пияла син вылтӥз учкиз но вакчияк гинэ шуиз: - Кельты, учко. Возьмаськон котьку ккемав йӧтэ, Ӝыны час ортче, час, кыкетӥез. Ну, малпасько, статьяе туж кельшиз, луоз, тани монэ ӧтёзы но ушъялозы: "Молодец, пияш: усто пӧрмытэмед! Вот, ваньмыз ке тазьы гожъяськысалзы!" Вуиз курьер: тонэ, пе, секретариатэ ӧтё. Ох, тани со, данэ потон минут, кема вити мон сое! - Пуксьы, - шуэ секретарь, - материалдэ лыдӟыса пот. Учки но, пель йылъёсы ик ӟырдаса кошкизы. Сокем вльыт гожтэм статьяе ӝыныезлэсь уноез горд каранадаш кечат-вамат гожмамын, жалятэк "вандылэмын". Мар понна? Ведь мон сокем тырши, со мында иськемез иськемез дэриетӥ коласа ветлӥ! Секретарь мыным валэктэ: - Вольыт гожтэмын, кылыд мынэ, номыр уд шуы. Однако, то вала одӥгзэ: газетамы таӵе куал-куал материалъёс сётъяны кутскимы ке, кин сое лыдӟоз? Материалад "вуэз" укыр уно! Кинлы интересно, кыӵе выжез-вӧлдэтэз со клубын, яке кыӵе синкашъёсыз отын ужась адямилэн? Мултэс супльтытэк гожтоно вал клублэн ужамез сярысь, нош тон аслэсьтыд главной темадэ кулэтэм векчи детальёс пӧлы выйытэмед, согемед. Художественной литератураын тазьы гожъям, оло, мынысал ик, нош газет кулэ каре конкретной фактъёсыз. Мукет сямен вераса, газетэ вакчияк но валамон гожъяно. Йырдэ кур эн кар, берло тае ачид ик валалод, ятэ. Бен, берло ӟеч валай: газет уг яраты мултэс супыльтэмез, кызьы шуо, отын "кылъёслы ӟоскыт, малпанъёслы эркын медло". ВЕТЕРАН Шара но эркын Кызьы кылдӥз "Удмурт дунне"? Алигес мон киям кутылӥ Герман Ходыревлэсь "Мынам азбаре" книгазэ. Со пичи гинэ. Нош данэз туж бадӟым. Угось та книгая вордскем шаерзэ син азяз пуктылӥз Инсьӧрлэн (космослэн) кӧкыяз - Байконурын - трос аръёс ӵоже ужам адями. Космос но пичи книга. Дунне но удмурт кыл. Ӧз, "Мынам азбаре" книга космосэ ӧз вуылы, нош соя удмурт кыл сярысь маке со но тодылӥзы космонавтъёс но соосты лобыны дасясьёс. Малы мон тае верасько. Угось адямилэн улоназ кыл туж бадӟым инты басьтэ. Котькудӥз калык тыршылӥз вордскем кылзэ утьыны, сое волятыны. Тӥни малы кылдӥзы книгаос, газетъёс. Нош адямилэн сямен ик, книгалэн-газетлэн но улон сюресэз вань. Со вордске, будэ, пумен юнма, собере пересьме... Улон - со улон. Огез вужме, бездэ, мукетыз - пушъе, сяськая... 1915-тӥ арын кылдӥз нырысетӥез удмурт газет "Войнаысь ивор". Со бӧрсьы ини потылӥзы мукетъёсыз. Нош 1918-тӥ арын 31-тӥ октябре лыдӟисьёс кие вуиз большевикъёсын дасям "Гудыри" газет. Тӥни со ик луиз удмурт газетлэн вордскем арез. Мукет сямен ӧй но луысал, коммунистъёс угось асьсэ уженызы гинэ лыдъяськылӥзы. Соин ик удмурт грамматикалэсь кылдэм арзэ но трос аръёсы пытсэт сьӧры ватӥзы. Угось со мукет вуко кӧэз бергатылӥз. Мар со газет? Нырысь ик, туннэ нунал, туала улон. Соин ик, югдур воштӥськемъя, со аслыз выль ним но басьтылӥз. "Гудыри" - "Удмурт коммуна" - "Удмуртская правда" - "Советской Удмуртия". Коммунистъёслэн кивалтӥсь карзы партилэсь данзэ ӧй ке саптасал, Советской Союз (СССР) ӧй ке куашкасал-люкиськысал, удмурт газет но берло нимзэ кема возьысал на, дыр... Нош улон ӧрзэ воштӥз. 1991-тӥ арын августэ кылдӥз ГКЧП. Кылдӥз ке, кылдӥз. Москваысь мар сётылӥзы, интыосысь газетъёс сое чик малпаськытэк быдэсъяллязы. ГКЧП-лэн кыкетӥ нуналаз Москваысь пӧртэм иворъёс вуыны ӧдъязы. Кудзы пала кариськоно? "Удмуртская правдаысь" эшъёс чик могатэк дурбасьтӥзы ГКЧП-лы. Соин ик РСФСР-лэн Президентэзлэсь Б. Ельцинлэсь Указъёссэ ӧз печатлалэ, нош "Советской Удмуртия" газет со Указъёсын лыдӟисьёссэ тодматӥз. Озьы "Удмуртская правда" газет ГКЧП-лы дурбасьтӥсьёс пӧлы сюриз, нош "Советской Удмуртия" мукет сюрес вылэ кожиз... Нош со сюрес вольыт вылымтэ ай. Котькытын но кутскизы бугыръяськисьёс. "Демократия" кыл пумен выжыяськыны ӧдъяз. Вань удысъёсын, вань ёзъёсын, Валамон ини, кытын пыдлогес, нош кытын вылтӥз гинэ. Удмурт кыл тодосчиос та югдурез ас сяменызы валазы. Соос нюръяськыны ӧдъязы ӟуч кылын. Удмурт кылэ выжыяськем ӟуч кылъёсты (грек но латин кылъёсысь пыремъёссэ но) тюрк кылъёсын вошъяны дэмлаллязы. Тӥни со вожвылъяськон али но пумен паськыта. Удмурт тодосчиос огзэ уг валало: соослэн та вогъяськонзы удмурт калыкез люкиз, вылаз ик, туж кулэ политика ужпумъёсты быдэсъянлэсь палэнтӥз. Оло, соос самой та ужпумез лушкем быдэсъязы? Кин тодэ. Тӥни со вогъяськон шӧдӥськиз удмурт газетлэн улоназ но. Пушйиз "Советской Удмуртия" нимлэсь куштӥськон сярысь малпан. Вуыны ӧдъязы пӧртэм ӵектонъёс: "Кам дор", "Кам дур", "Выль син", "Выль кымес"... Кӧня адямиос, сомында ик дэмланъёс Со сярысь газет бамъёсын но уно пол верамын ни. Нош кудзэ быръёно, кудӥз шонергес возьматоз удмурт адямилэсь сюлэмзэ, малпанзэ, сюлмаськонзэ? Цо вал выль ар азьын. Редакцие люкаськизы татын азьвыл ужамъёс, вань улонзэс редакциын ортчытэмъёс. Тӥни кинъёслы вазиськоно. Мӧйыос огкылысь умоен лыдъязы секретариатлэсь ӵектонзэ: газетлы сётоно "Удмурт дунне" ним. Дуннелэсь югытэз, чылкытэз, солэсь дуноез номыр ӧвӧл ни. Та нимлы ваньмыз дасямын ни вал. Ӵуказеяз - Выль аре - газет потӥз выль нимын. Бен, нырысь со ваньмызлы ӧз кельшы. Угось дышем сямлэсь куштӥськыны капчи ӧвӧл, со понна нюръяськыны но кулэ вал. Та сярысь газет бамъёсын уно пол гожъямын. Тани тямыс ар ӵоже ини "Удмурт дунне" газет вань удмуртъёсты огазея. Азьланьын но, кызь одӥгетӥ даурын, озьы ик мед луоз. Азьло нимъёссэ сямен ик, газетмы тазэ но нимзэ вылӥын мед возёз, ӟеч-ӟеч ужъёсыныз вань калыкмес бордаз мед кыскоз, вогъяськонъёсын-шонаськонъёсын, вылаз ик, кышкатъяны турттонэн медаз сапта ассэ. Угось демократия, калык, дунне кылъёс ваньмызлэсь дуноесь. Удмурт кыл, шуылоз вал тодмо кылбурчи Герман Ходырев, ас сяменыз туж узыр. Соин котькыӵе валанэз вераны луоно. Тыршоно гинэ, тыршоно... Та сюрес вылын азьвыл сямен ик мед тыршоз "Удмурт дунне" газет но. Кызьы ке ошмес ву дугдылытэк жильыртэ, озьы ик кыл но ас сяменыз зыл-зыл ӧръяське. Сое юромо уд но сюбегаты, уд но паськытаты, уд но муромыты. Кыл - со кыл. Адями сямен ик, со уг яраты муртлэсь (тодосчи ке но со) пыриськонзэ. Пыриськыса, чуртнаськыса номыре но уд узырмыты. Газетэз но, кылэз но, адямиез но. Николай СТРЕЛКОВ, "Советской Удмуртия" - "Удмурт дунне" газетлэн азьвыл кыл кутӥсь секретарез. Йыгмыт вамышъя азьланьын но "Гудыри" газетэн мон нырысьсэ тодматски 1924 арын. Со дырысен одӥг номерзэ но лыдӟытэк ӧй кельтылы ни кадь. 1927 арын мынам нырысетӥез заметкае газетэ потӥз. Со луиз газетъёсы гожъяны кутскеме ик. Нош 1943 арын сӥзьыл монэ редакциын ужаны ӧтизы. Солэсь бадӟымез шумпотонэ оло улытозям но ӧй вал кадь. Ваньмыз ик редакциын ужасьёс егитэсь вал соку. Куспазы вераськон сямъёссы но гуртын выллемгес на вал. Нимын-тулын вазем интые, ог-огзэс Васи, Иви, Йыги, Семи шузы вал. Монэ но кыкетӥ нуналаз ик Кондӥ шуизы. Сыӵе вал сямзы. Культура но уг тырмы на вал, лэся. Пыремез бере ик Ондӥ ним сётӥзы Андрей Степанович Мыльниковлы. Пыриз со "Удмурт коммуна" газетлэн редакцияз туж пинал, оло тушсэ но уг мычы на вал. Со дырысен 24 ар ӵоже фотоснимокъёс вылэ со дасо килограммъёсын сьд "туш" тыриз. "Советской Удмуртия" газетлэн 40 ар тырмон нуналаз тазьы верам потэ: "Советской Удмуртия" газет азьвыл сямен уката йыгмыт вамышъёс лэсьтылыса мед мыноз ас лыдӟисьёсыз пӧлы. Н. КОНДРАТЬЕВ, реадкциын азьвыл ужам мурт. ВЕТЕРАН "Ялыке" Кавказын Кемалась вал ини со, ог куамын ар ортчемын. Тодматски Ижевскысь металлургъёслэн заводысьтызы электрикен, Николай Иванович Агафоновен (али со ӧвӧл ни). Тодматскыны мугез вал. Кыкнамылэн но пиосмы дышетскизы городысь 24 номеро школаын. Кӧлыны выдыкузы гинэ шат ог-огзылэсь люкиськылӥзы. Огпол пумиськемамы Николай Иванович юа: - Учкиськод ке, пиосмы дасэтӥ классэ выжизы ини. Али гинэ нырысетӥ классэ нуи вал кадь. Табере вераськы соин - Москваысь университет кыске ни сое! Гужем, шуэ, кытчы ке ветлоно вал, зарезь дуре умой луысал. Тынад но пӧртэм ӧвӧл, дыр? Путёвкаос мон шедьто. Заводмы арлы быдэ Сочиысь одӥг школаез арендае басьтэ. Шутэтскыны ветлӥсьёс отын уло. Пиосмылы староста луод. Соосыз уго ялан син азьын возёно ай. Озьы одӥг гужем нуналэ андан пӧзьтӥсьёслэн заводысьтызы егитъёсын ӵош сюрес вылэ потӥм. Пумен тодматскиськом заводын ужасьёсын. Кунояны пырем ныл нырзэ ошыса пуке. - Ма луиз? - юаськом солэсь. - Кури вал Люсяен одӥг купее билет басьтыны, тани - люкиллям. Мон татчы шеди, со - артысь купее. - Шедьтэм мар пумысь ӝоже усьыны, - шуи мон. - Пуке татын, мултэс уд луэ. Тани та пиосыным кылды тупалоз. Олялэн (солэсь нимзэ кылӥмы вал ини) мылкыдыз капчияз, ури-бери Люсяез купеямы ӧтиз. Пиос но, нылъёс но нырысь шып пукизы, вераськон мытыны кыл ӧз шедьтэ кадь. Собере кылзы сэраз. Огезлы ярам КВН, мукетызлы - дуннеез котыръян, вуо театръёсы но, Москвае но. Я ВДНХ-етӥ ортчо, я метрое пыро. Гужем шор. Кавказ гурезьёслы матэ вуэмъя, вагонысь омыр пумен ӟырда. Эшъёсы ӵемгес укное учкылыны ӧдъязы, зарезь доры ӝоггес вуэмзы потэ. Поезд дыртэ ке но, Сочи кыдёкын на. Сюреслэн огпалаз ӝужытэсь гурезьёс. Соос инме сузьыны турттыса сямен сыло. Кытысь ке кыдёкысь ӵашетыса лыктӥсь тулкымъёс изо ярдуръёсы шуккисько. Сюрес дуре кылё артэ пуктэм палаткаос, соос вӧзын ик пӧсь шунды шорын "пыжем" ыргон мугоро пиос но нылъёс кыллё. "Таосыз "дикарьёс", дыр, - ас поннам малпай мон. Сое шӧдыса сямен, Люся юаз: - Кыӵе "дикарьёс" сярысь ялан верало? - Ма, тӥни, учкы, - дэмлазы солы пиос. - Адямиосыз сяна уг адӟиськы, нокыӵе дикарьёс ӧвӧл. Шат гольык ветлӥсьёссэ, возьдаськонэз валасьтэмъёссэ озьы шуо? Егитъёслэн вераськон куспазы уг пыриськиськы, куд-огез, оло, пель сьӧртӥм но ортче. - Ой, город адӟиське, Сочи, дыр, со, - ӝажы вылысь васькыса, Оля укно доры лыктӥз. - Гурезь выжыын ик город, паймоно кадь. - Малы паймиды? - юасько мон. - Татысь тросэз городъёс гурезьёс выжые интыяськемын. Сочиын милемыз одӥгаз школае нуизы. Гужем отын Ижевскысь андан пӧзьтӥсьёс уло, отпусксы дыръя зарезь дурын тазалыксэс юнмато. Нуналъёс ортчо но ортчо. Ыштӥм ини Люсяен Оляез но. Зарезь дурысь но, городысь но ми соосты ӧм пумиталлялэ ни. Одӥг нуналэ экскурсие ветлыны мылкыд карисьёсты гожъязы. Кинлэн, пе, егитъёслэн "Спутник" лагерязы ветлэмез потэ, ӵуказе нуозы. Инмысь усем кадь, гожъясьёс доры вуизы Оляен Люся но. Ми но, пе, мыном. Ӵуказеяз ӵукна ми автобусэн потӥмы экскурсие. Лагере нуись сюрес я зарезь дуртӥ ик ортче, я пасьтана вӧлскем писпуос пӧлы ыше. - Вуим, - ивортӥз сьӧд йырсиё экскурсоводмы.- Автобус татын сылоз. Кин ке кылиз ке, ас вылаз мед ӝожтӥськоз. Пумен куазь ӝомыт луыны ӧдъяз. Юртъёсын тылъёс ӝуатскылӥзы. Кизилиосын вераськыса сямен ворекъяло соос. Кытчы вамыштыны тодытэк, экскурсоводлэсь ваземзэ витиськом. - Асьмеос, - шуиз со, - татын шутэтскись егитъёслэсь концертсэс кылзомы. Эн пайме, пӧртэм кылъёсын кырӟалозы соос. Концертлэсь кутсконзэ кема витёно ӧз луы. Нырысь ик липеттэм сцена вылэ потӥзы финнъёс. Ог-огзылэн пельпумъёсазы киоссэс тырыса кырӟаны ӧдъязы асьме калыклы но тодмо гурез. Собере сцена вылэ потӥзы чехъёс, соосыз воштӥзы румынъёс... Кыӵе гинэ кылэз уд кылы лагерьын. Кырӟан гурлы кутскон сёто я скрипка, я баян, чипсонлы но инты шеде. Музыкаез кылзӥсько но тодэ лыкто кемалась ортчем аръёс. Пичи дыръя ветлӥськом вал Тутчи шур дуре. Нюрын будӥсь гумыез вандӥськом но кыӵе ке гурлы тупамон шултӥськом. Егитъёслэсь шулдыръяськемзэс ӧй кылзысал ке, кемалась ортчем аръёс, оло, тодэ но ӧй лыктысалзы. Уката чипсонэн шудон палысьтымы шур дуре вуттэ. Бер ӝытозь жингыртӥз егитъёслэн лагерьзы. Дырлэсь ортчемзэ ик ӧм шӧдэ. Бертыны потӥм но, автобус интыяз ӧй вал ни. Отчы-татчы учкиськом, нокытысь уг адӟиськы. - Ма кароно табере? - мынам пиосы но сюлмасько ини. Городэ пыдын кема гинэ вамышъялод. - Оло "йыромем" автобусты вуоз ай, вите сое, - серекъязы мынӥсь-ветлӥсьёс. Ӧй вал йыромемез но, мукетыз но, "волгаос" но "жигулиос" гинэ, мальдытӥсь "синъёсынызы" югдытыса, асфальт вылтӥ ширто. Витьымтэ шорысь тодмо удмурт гурен кырӟам кылӥськиз. Мар шуыны ум валаське, кытысь со кылӥське. Тани кырӟан куара пумен матэ вуыны ӧдъяз. Ялыке, ялыке, Ойдолэ, ойдолэ... Маке ӧвӧл со, дортӥмы ик ортчизы Оля но Люся. Киосынызы шонало, пыдъёсынызы тапырто: Чебер гинэ эктӥды ке, Чебер угы сётом... - Люся! - одӥг ымысь кадь вазизы пиосы. Нылъёс кылӥзы, лэся, тыпак дугдӥзы. - Кызьы татчы шедиды? - вожмаськыса юало соос. - Тӥ сямен ик ӧм меда? - вази пумитазы. - Милемыз автобус витьымтэ, табере тани тапыртӥськом. Удмуртъёслэсь "Ялыкезэс" Кавказ гурезьёс но мед кылзозы. Нылъёс нош ик кырӟаса но эктыса кошкизы. Соос мултэс сюлмаськонлэсь алӥзы: Гагра палась автобусъёс вуозы на, пе, пуктытэк уз кельтэ. Уг кылӥськы ни эктӥсьёслэн пыд куаразы но, кырӟамзы но. Кин тодэ, Кавказ гурезьёсын та дырозь "Ялыке" гурез чирдӥсь вал-а? Оло, солы кутскон сётӥзы Ижевскысь андан пӧзьтӥсьёслэн нылъёссы гинэ. Бен, шурлэн кутсконэз вань бере, ӧрез уз куасьмы. Жаль мукетыз, уг ужа ни егитъёслэн лагерьзы. Уг кылӥськы ни татын французъёслэн но, финнъёслэн но кырӟам куаразы. Мадьяръёс но, чехъёс но, оло, сямъёссэс но мылкыдзэс воштӥзы ини. Соос ӵемгес учкыло кадь Шунды пуксён пала. Чылкак паймисько болгарёслы. Война вакытэ кыӵе пумитазы соос шаерзэс фашистъёслэсь мозмытэм асьме солдатъёсты! Вмтыр няньзэс но шори люкыны дасесь. Нош туэ американецъёс но НАТО сербъёс вылэ урдскизы но, Россилэсь гуманитарной юрттэтсэ асьсэ музъем вылтӥ келяны пумитъяськизы. Сюлэм вӧсь луыса кылзоно вал сыӵе иворез. Славян калыкъёслэн эшъяськон кусыпазы тул шуккыны туртто. Трос аръёс ортчыса но "Ялыкелэн" Кавказ гурезьёсы чузъяськемез уг вуны. Таин ӵош ик мылкыд сураське, Кавказлэн уй палаз автоматъёслэн тачыртэмзы, пушкаослэн гудыръямзы сярысь иворъёсты кылзыса. В. СМИРНОВ, ожысь но ужысь ветеран. Мон но юрттӥсько газетмес лэсьтыны Газетмылэн дас сюрсэтӥ номерезлы сӥзем юбилеен валче мынам но вераме потэ та газетын кызь ар ӵоже ужаме сярысь. 1934 арысен нырысьсэ ужаны кутски "Удмурт коммуна" газетын художник-ретушёр луыса. Котькыӵе но шуг-секытъёсыз адӟиськиз. Цинкография начар вал, уно дыръя клише лэсьтылын Казане лэзьяно луиз, куке соку линолеум вылэ но лэсьтылон учыръёс вал. Газетын син шоры нырысь ик йӧтэ художниклэн ужез. Рисунокъёс, чеберъяса лэсьтэм заставкаос, шапкаос но карикатураос - соос ваньзы газетлэсь вылтуссэ чеберъяло, солэсь пуштроссэ валамон каро. Газет поттон техника арысь аре будэ но выльдӥське. 1934 арысен ортчем сюресэз та дырен ке ӵошатоно, паймымон ваньмыз воштӥськемын, выльдӥськемын. Мынам но ужан удысам вылез трос. Азьвыл аръёсы юмористической сэрегъёс потазы ке но, туж шер гинэ. Нош али "Паймод ява" сэрег арнялы быдэ пота, отын но мон аслам лэсьтэм карикатураосыным урод ужъёсты шараясько. А. МЫЛЬНИКОВ, художник-ретушёр. ВЕТЕРАН Малы меда? Серемес учыр Больницаысь бертыкум ульчаысен юлтошеным пумиськи. Адскылэммы кемалась вал ини. Кор вылэ интыяським но туж кема, сюлмамы усьытозь вераськыса пуким. Больницаысь со но уг, пе, потаськы. Мынам так-то больницаостӥ ветлэме уггес поты: пересьёсты отын ньӧмыз понна гинэ учко кадь потэ. Кышное но, Матӥ, висемелы чик уг оскы, асьтэмед висе, дыр, шуэ. Тэк улыны маза уг сёты со мыным, ялан ужатэмез потэ. Косэмъяськемезлы акыльтыса, куддыръя кылымтэ-валамтэ улэ но кариськисько. Вожез потэ. Со пельыныд, пе, мон тонэ врач доры нулло ай. Юлтоше мынь потыса кылзэ. Милям но, пе, куспамы котьма луылэ. - Матӥдэ но кемалась адӟылэме ини, сыӵе ик-а со йӧно но чупрес? - Губырскиз ини, - шуисько, - нош кылыныз-ымыныз кортэз но, изэз но пасялоз. Паймисько мон солы: мугор куашка, кыл лэчытоме. Кызьы озьы? Нуназе эшъёсыныз пумиськытэк, соосын кык-куинь час бӧтьыртытэк, кӧтыз уг веська. Толон но амӟа кенакен (кӧттырмостэм выремысьтыз озьы шуо) бер ӝытозь сипыртӥзы. Сипырто ке но, ваньзэ кылко. Сотовоёс сярысь сачырто. Ачиз Митрей, пе, вистэм-вожтэм юыны чӧлскем, нош кышноез, Ляля, егит пиен ворттылэ. - Ляляед ойдо ке ныл дыраз но ассэ йыгыттэм возиз, - шуэ мынамез. Мон ӧй чида. Шуисько, умой ӧвӧл озьы адямиос сярысь зульыса ветлыны. Матӥе пештырскиз: тынад мар ужед, малы кышноослэн бӧтьыртон куспазы пыриськиськод? Астэ тод но ул, уждэ ужа. Пуртъёсты ӧд ке шеры, туннэ астэ картофка палато. Ӝӧкед но, пе, вӧямтэ уробо кадь ӟукыр-р вазе. Юлтоше мынь потыса вера: улэм-вылэмды, пе, артистъёслэн шудэмзы кадь шулдыр. Ай, тӥ, уртче кӧласькоды но дыр. Дыр, дыр, вал, дыр, куке соку сыӵе дыръёс, нош табере, эн но вера, уртче ке но, ваче тыбыр кӧласьком. Мар улэм на со. Матӥ шонерезъя пыкылэ: малы тон мыным сыӵе- таӵе кулэ. Соин ик алигес врачмы доры пырай. Озьы, озьы, шуисько, кышноеным куать нылпи будэтӥм, но табере ваче тыбыр кӧласьком. Малы меда? Врач шорам мынь потыса учке. Пыдесэ йыган молотэныз шудэ, сое кияз жонглёръёс сямен бергатэ. Но пырись- потӥсьёсын сэрен умой-умой вераськыны ӧз кылды. Собере ассэ но кытчы ке ӧтизы. Ӧвӧлтэм дыръяз со молотсэ киям кутылыса учко шуисько вал. Сьӧ раз нуэм, кыль басьтон. Враче кемалы ӧз ышылы. Главноез доры но, пе, пырай, мади тынад югдуред сярысь. Главнойзы тазьы шуэм: "Враче дышетскыкумы милемлы ваче тыбыр кӧлан сярысь лекциос ӧз лыдӟе. Висиседлы вера: солэн "Малы меда?" юанэзлы врач гинэ ӧвӧл, одӥг философ но валэктон сётыны уз быгаты. Со виын враче доры туж секыт висисез пыртӥзы. Со пӧлы пум быдӟа брошкиез ньылэм. Кышноез пӧракуз сяртчы няняз понэм, шудо муртлы мед шедёз шуыса. Картэзлы шедем. Соиз пӧсь сяртчы нянез, кушатэк-маратэк ньылэм. Тӥни тыныд шуд. Врачелы монэн йырин ӧй ни вал. Мон кошки. Ческыт ымез кӧш карем кадь луиз ветлэме. Микта юлтоше ымзэ ик усьтыса кылзэ. Враче, шуисько, пересьёсы сярысь но мар но со юаны-вераны выре вал. Кызьы, пе, соос улӥзы-вылӥзы, кыӵе сямъёссы, кусыпъёссы вал. - Солэн гены шуон сярысь тодэмез потэ вал, дыр, - шуэ эше. - Гены со кас маке, выжыысь-выжые пыӵа. Удмуртъёс сое туж вашкала дырысен тодо. Кудо-туклячи луоно семьяос ог-огзэсты ӟеч-ӟеч тодыны тыршылӥзы. Семьяын (яке быдэс выжыын) юисьёс, азьтэмъёс яке юмшаны яратӥсь нылкышноос вань яке вал ке, тупан сярысь вераськонэз ӧй вал ни. Шуом, тынад Матӥедлэн озьы паллянэ кожан сямыз вань ке, нылдэ сёто шуыса эн ик малпа, уз басьтэ. - Мынам Матӥе зӥбыт но йыгмыт адями, со ноку нокинэн ӧз калгы, нылъёсы ваньзы быземын, - воже потӥз юлтошелы. - Очан, тон монэ ӧдгес вала, мон "шуом" шуи ук, - буйгатэ монэ Микта. Огъя вераса, мынам выжыысьтым ми номыр уродзэ ӧм шедьтэ. Атаен анай уртче, сэрттыны-пертчыны луонтэм улӥзы, ӟыгырскыса кӧлазы. Нош песятай огназ кӧлаз. Кӧтыз солэн ортчыт зӧк вал. Вань кужымез кӧтаз кошкем шуизы. Озьы ик вал, дыр. Одӥг пол со кӧтыныз жугиськись воргоронъёсты бекмылляз. Пограм возэз но капчиен ӝутэ вал. Кӧлаз гаӵоло выдыса, кукъёссэ вайяса, корка зуркамон соргетыса. Мон сямен, гены шуон милям выжыямы чик ӧвӧл. Юлтоше тамаксэ кенжытӥз но пурккетыны ӧдъяз. Мон нош ботинка шнурокъёсме керттылыны мыкырски. Витьымтэ шорысь юлтоше пелез ӵоксамон кеськыса оло кизьнӥз, оло куӵыктӥз. Мон интыям ик куаляк уси но бакоми. Султыса учкисько но, Микта ӧвӧл ни эшшо ке оломае адӟод шуыса, ури-бери Матӥе доры дыртӥ. Ми соин ӝыны даурлэсь ятыр ӵош улӥськом ини. Озьы но тырмыт визьнод люканы ӧм быгатэ, шӧдске. Ялан ог-огмылэсь юалляськиськом: малы озьы, малы тазьы, кин со сыӵе, мар со сыӵе. Мон шоры учкыса, со шуэ: "Э, Очанэ, Очанэ, малы меда йырсиед но пушказ пыриз, нырулыд но нюромылэ, ымнырыд но шуям сяртчы кадь луиз. Асьмелы ваче тыбыр кӧланы гинэ кылиз на. Озьы тӥни, бурдъям интые, мылкыдме куашкатэ. Н. ТЕБЕТЕЕВ. ВЕТЕРАН "Марлы дуннее вордӥським?" Тани ма сярысь дырын-дырын ке но малпаськылыны косэ одӥгез удмурт калык кырӟан сое кылылэм яке кырӟась адямиосты. Кырӟанын та юанлы верам пумысен мон нырысь ик тазьы шуысал: "Ас калыкеным лулысь- сюлмысь вераськыса-кенешыса улыны но ужаны". Удмурт калыкеным мон сыӵе кусып возьыны кутски "Удмурт дунне" "Советской Удмуртия" нимын потон вакытысен - отын 1950-тӥ арын "Лоза тымемын" кылбуре печатласькем дырысен. Марлы туж кулэезлы дышетӥз монэ та газет? Удмурт калыклэн тупатэм радлыкезъя малпаськыны но гожъяськыны. Удмурт пединститутын студент дыръям, 1952-тӥ но 1953-тӥ аръёсы гужем каникулъёс вакытэ редакциын ужакум, та ласянь дунъяны луонтэм бадӟым юрттэт сётӥз культура отделлэн кивалтӥсез, сӥё-дано журналист, писатель но актёр Василий Евдокимович Садовников, мукет сямен вераса, эграосылэн эмеспизы. Мыным со дырме тодэ вайылыны юрттэ газетысь фотокорреспондентлэн Андреевскийлэн редакциысен 1953-тӥ арын лэсьтэм туспуктэмез. Ачиз та туспуктэмын со сылэ паллян палаз, соин оградын диван вылын пуко Семен Перевощиков, Семен Самсонов, Василий Шмаков (газетлэн собкорез) но мон. Редакциын ужам коньдонэным та сӥзьылэ мон базарысь чебер костюм басьтӥ (улытозям нырысетӥзэ!) но со костюмен Якшур-Бодья шор ёзо школаын педпрактикаме ортчытӥ. П. Поздеев, "Кенеш" журналын ужась, писатель. ВЕТЕРАН Тазьы но луэ Летучкаын Редакциын ужасьёс летучкае люкаськизы. Газетлы обзор лэсьтыны кутскиз егит корреспондент. Кема вераськемез бере, со сельхозотдел вылэ но вуиз. - Та отдел, - шуиз обзор лэсьтӥсь, - грамматикаен чик уг эшласькы вылэм. Сельской хозяйствоя министерствоез пичиен гожъя, запятойёсты, тиреосты уг чакла. Заведующий нырулыса пуке вал но чёт! кариськиз. - Мар шуиз со? - пельзэ мынам ымы борды лякыса ик юаз со. - Статьяостэ янгышен поттӥськод шуэ. "Угось" кыл бере запятой, пе, пуктоно вал. Сельской хозяйствоя министерствоез пичиен гожтэм, - валэктӥ мон солы. Заведующий кыл курытэк-мартэк султӥз но шуиз: - Сельской хозяйствоя министерство туж урод ужа, соин ик мон сое пичиен гожъясько. Улон вамышъёс Газетмылэн дано нуналъёсаз редакциын потӥсь "Лэчыт пероен" бордгазетмы бадӟыматыса потылӥз, сое типографиын печатлазы. Отын потэм матералъёс куд-огез туннэ но, редакциын ужасьёслы гинэ ӧвӧл, лыдӟисьёслы но тунсыко луо. Соос пӧлысь куд-огзэ печатласьком улӥын. 1954 ар, 29 декабрь. Газетмылэн 10 сюрсэтӥ номерез потӥз. Кылмес волятоно - 10.000-тӥез! - шуиськом асьмеос вакчияк гинэ. Нош со лыдпус сярысь умой-умой малпаськиськод ке, син шоры макем яркыт пуксе "Советской Удмуртилэн" (азьло "Гудырилэн", собеое "Удмурт Коммуналэн", "Удмуртская правдалэн"), вань шуг- секытъёсты вормылыса ортчем сюресэз. Та дыр ӵоже тодмантэм будӥз газетмы но: умойгес луиз солэн пуштросэз, воляз кылыз, чебергес луыны ӧдъяз вылтусыз, тросгес гожъяны кутскизы пӧртэм удысъёсын ужась адямиос. Ортчем дыр ӵоже будӥзы трос журналистъёс. Газетмылэн 36 ар ӵоже ужамезлы йылпумъянъёс лэсьтэмен но азьланьын кызьы ужаны малпанъёсмы сярысь вераськеменым валче тодэ лыктэ редакциын нырысь аръёсы ужаме. ... Со вал секыт война аръёсы. Газетмы соку "Удмуртская правдаысь" потэ вал. Соин валче туж трос шуг-секытъёсын пумиськылоно луылӥз. Куд-ог адямиос ласянь удмур газетмес ултӥян учыръёсын но ӧжыт ӧм пумиськылэ. Коллективмы соку пичи гинэ ке но вал, вань кужыммес но быгатонлыкмес сётыса, куспамы юн тупаса, огкылысь ужам, тушмонэз вормыны газетмы уногес юрттыны мед быгатоз шуыса. Война бере дыр трос ортчиз ни. Калык азе выль бадӟымесь ужпумъёс пуксизы. Озьы бере, газет азе но выль куронъёс султӥзы. Веранэз ӧвӧл, газетмы соосты данэн быдэсъя. Но соин ӵош ик асьмелэн ужамы тырмымтэос но ӧжыт ӧвӧл. Соос пӧлысь тужгес но верамон луэ литературной кыл бордын ляб ужаммы сярысь, ӟуч кылысь удмурт кылэ суп-сап берыктэммы сярысь. Куд-ог дыръя асьмеос сьӧдэз тӧдьы карыса, валэз скал шуыса берыктӥськом, огшоры пичи материалъёсын гинэ но предложениосмес йырчукин карыса куштӥськом. Ваньмыз со газетмылэсь данзэ лябомытэ, асьмеды сереме уськытэ. Соин ик, асьмелы нимысьтыз сюлмаськыны кулэ кылмес волятон но узырмытон сярысь, ужын выль азинсконъёс басьтон сярысь. А. БОРИСОВА, ответственной секретарь. УЙ БЕРЕ ЮГЫТ ВУЭ Кызьы быдтылӥзы удмурт газетмес Йыромем тури кадь улӥ мон огвакыт. Гурт улосъя институтын заочно инженере дышетски, нош ужай Военной трибуналын. Ӵем гожъяськи яратоно "Советской Удмуртия" газетэ. Ушъяло но вал соос, кытӥяз - "кышъяло" но. Ваньмыз радызъя мынэ вал улонэ. Но институтын малы ке урод сям кутӥзы, заочникъёслы книга сётъямысь дугдӥзы: тӥ, пе, ас удыстыя уд ужаське. Библиотекаысь эшъёсты меӵкытӥ мон: ӵапак, шуисько, книгаосын юрттыны кулэ ми кадьёслы, музон удысъёсын тыршисьёслы. Гурт улосысь адямилы книгаостытэк но каньылгем дышетскыны, тросэз соос дась ӧнерчиос ни! Ӧз кылзӥське, тул кадь ваменскизы. Техникаен герӟаськем уж, пе, утчалэ асьтэлы. Озьытэк, институтысь улляны но быгатозы. Сыӵе секыт учыръёсы мыным котьку юрттылӥз шудэ. Шонерзэ вераса, эшъёсы, ӟеч адямиос. Пичи Пургаысь шор ёзо школалэн кивалтӥсез Корюков (нимзэ-тулзэ вунэтӥ ни - возьыт!) тодмоосы пыр ӧтем школае ужаны. Гурт машинаосъя дышетӥсьмы, пе, ӵапак ӧвӧл. Тихоокеанской флотысь алигес бертэмын вал бере, моряк дӥсеным ик мынӥ школае. Кивалтӥсьсы интыяз вылымтэ. Мон коридоретӥ поръясько. Жингыртӥз гырлы, бадӟым классъёсысь потӥзы жин-жин чебересь нылъёс но пиос. Покчиос мукет юртын дышетско вылэм. Кин ке но ивортӥз, вылды, матрос дышетӥсе лыктэ шуыса. Ыбыло ук, ыбыло ук синъёсынызы тузӥ, мусо нылъёс. Огезлэсь чебергес мукетыз! Шуак кыре потӥ но кошки Иже. Ас поннам малпасько: "Та чеберайёслы огезлы но мон уг быгаты кулэезъя отметка пуктыны - ваньмызлы "вить" сётъяло..." Ӵуказеяз йырме ошыса ветлӥсько. Сыӵе дыръёсы котьку юрттылӥз "кыкетӥез" шудэ. Малпамтэ шорысь монэ телефон доры ӧтизы. Кылӥсько "Советской Удмуртия" газетлэн редакциысьтыз гурт улонъя люкетэн кивалтӥсьлэсь Петр Орловлэсь куаразэ. Со лачмытак шуиз: - Кирилл Егорович, лыктэ вал дорамы. Вераськом. Ми тӥледыз уже кутыны малпаськом. Озьы 1961-тӥ арын тулыс выжи редакцие, гурт улонъя отделэ, ӵапак институтлы тупамон удысэ. Редакция мынэсьтым дышетсконме но ас вылаз басьтӥз шуысал. Пуктӥзы Степан Машковлэн ӝӧк сьӧраз, сое вылӥе ӝутӥзы, кыл кутӥсь секретаре. Гожъяськемме ялан син азяз возиз Степан Григорьевич. Ачиз ик унозэ статьяосме келялляз типографие. Меӵак верасько: яратэ вал со монэ. Олокызьы но лӧпкытъялляз. Очерк нергее потэм бере, кабинетаз ӧтиз но шуэ: "Тон пумен мур гыриськод ини. Шумпотӥсько". Ма, Петр Филиппович но юн юрттылӥз. Тау ваньзылы. Редакциын уже туж яра вал. Чебергес гожъяськонлэн ӧраз пырисько ини каньылля. Ӵем ысъяллязы гуртъёсы. Калыкен пумиськылыса, быдэс песьтэр гожтэтъёс вайылӥсько. Но кема будыны ӧз сётэ, одӥг нуналэ йырам ыбем кадь сачкытӥзы монэ. Отделмылэн тӧроез ыстӥз Шаркан ёросэ. Вай, пе, егитъёс сярысь материал, нялтас отысь етӥн шуккисьлэсь шунытак гожтэтсэ дася. Дыртытэк ужа - куинь-ньыль нунал... Кивалтӥселэсь ваньзэ косэмзэ быдэстӥ. Школае гинэ пыранэ кылиз на вал. Кунокуаям жингыртӥсь луиз. П.Ф.Орлов вылэм. Ӟечъяськемез бере, со вакчияк, йырам нушыен шуккем кадь, шуиз: - Кирилл Егорович, берт чальгес. Гожъямъёсыд кулэ ӧвӧл ни огез но. Газетмес быдтӥзы. - Мар?! - кеськемме ик ӧй шӧды мон. - "Советской Удмуртимы" быриз, - мур лулӟемзэ кылӥ трубкаысь. - Кин быдтӥз? - юасько. - Хрущев, - валэктӥз П.Ф.Орлов. - Телефон пыр ваньзэ уд вера - берт!.. Яратоно удысам кык ар но ужаса ӧй вутты, будон сюресме уретӥзы. Уг ватӥськы: Хрущевлы йыркуре пуромылӥз юн. Нокинэн вераськытэк, уно сюрс, оло, нош миллионъёсын лыдӟисьёслэсь мылкыдъёссэс но юатэк, улосъёсысь пӧртэм кылъёсын потӥсь газетъёсты ваньзэ быдтӥллям, кельтӥллям ӟучъёссэ гинэ. Пӧртэм кылын потӥсьёсызлы, пе, уксё трос быре. Милемыз люказы Журналистъёслэн клубазы. Отчы ӧтиллям Кивалтэтлэсь тӧрозэ А.Т.Марковез. Туж трос лэчытэсь юанъёс сётъязы кивалтӥсьлы. Нош со номыре валэктыны ӧз быгаты. Удмурт газетэз быдтыса, кӧня манет коньдон шыръяськоз, кӧня асьме калык изъян адӟоз - созэ но чик вераны уг тоды. Шӧдӥське: Москваысь кивалтӥсьёслэн таӵе вамышсы солы но воксё малпамтэ шорысь луэм. Кылёз на, пе, ӟучез гинэ газет. Удмуртсэ поттозы, ӟучысь берыктыса. Писатель Михаил Воронцов, огпол пелям сипыртыса, та пумысен шуиз: - Берыктэм газетэз поттон - со муртлэн ужам бервылтӥз ӵужонэн, мучолоен ветлэм кадь луэ ук!.. Туж вӧсь каризы ке но, мынам сюлмам весь улӥз ай пичильтык оскон. Сомында калыкъёсты, лыдӟисьёсты мыскылляло бере, тросэз уз чидалэ, асьсэ кылзэс одно вералозы. 1963-тӥ арын 1-тӥ мартэ монэ выжтӥзы книга поттӥсьёс доры, одӥг этажлы вылӥе. Кошкеме уг поты вал туж но туж. Ай мугзэ но бен вераллям: Ломагинэз, пе, "Удмуртия" издательствое келяськом... коллективез юнматон понна. Пуктӥзы гурт улонъя отделэ "бадӟым" редакторе. "Издательствоез юнматыны" шуэмзы чылкак мукет пала шонтӥськиз. Монэ бырйизы парторганизацизылы секретаре. Ӝоген райком пушкын бадӟымос партком кылдытӥзы на шуыны луэ. Отчы огазеязы "Удмуртия" книга издательствоын ужась коммунистъёсты, "Удмурткниготоргез", Бибколлекторез, Министръёслэн Кенешысьтызы Печатья кивалтэтэз, Писательёслэсь союззэс. Ваньзэ ныпъязы егит пельпум вылэм. Эшшо косо на вал ай типографиез но милям парторганизациямы кыскыны. Пумит кариським. Кулэ дыръяз, зэм, огазьын ортчытъяськом вал кенешъёсмес, уртче эскерылӥм бадӟымесь ужпумъёсыз. Сыӵе дыръя, валамон ини, гожъяськонэ мынам пумен палэнэ но палэнэ кыльылӥз. Я огзэ эшмес эскероно луэ кенешын яке бюроын, я музонзэ. С.Г.Машков ӝог шӧдӥз пумен кысэмме. Огпол дорам тубиз но шуэ: "Тон - гожъяськись адями, ойдо берытскы берен дорамы. Оскисько: газетмы одно ик выльысь потыны кутскоз!" Берыктэм газетлэн пуштросэзлэсь "шӧгомемзэ" лыдӟисьёс ӝог шӧдӥзы кадь. Мар кароно? Мар лэсьтоно "Советской Удмуртия" воксё медаз быры шуыса? Таӵе малпаськон, пычей музэн, ялан сюпсе йырвизьмез. Огез валамон: дасьсэ витьыса пуконо ӧвӧл - нюръяськоно! Мукет дыръя С.Г.Машков монэ дораз ӧтиз но шуэ: - Ӟеч ивор кылӥськиз. Уг тодӥськы, зэм-а со, ӧвӧл-а, но писатель Расул Гамзатов, пе, Центральной Комитетэ ветлэм но бадӟым кивалтӥсьёслэсь "штанизэс куашкатэм".- Степан Григорьевичлэн синъёсыз чиляло. Ымнырыз ӵыжектэмын. - Мукетъёсыз но тодмо адямиос асьсэ калыкъёссылы одно ик дурбасьтозы ай!.. - Оло, асьмелы но Москвае ветлоно? - малпанме шараясько. Ӟырдыт мылкыдо журналист соку ик сюлэмаз пыӵатӥз кадь верамме. Ӵуказеяз монэ кыкетӥ этажысен пумитаз но, отысь сэреге кыскыса, киям бумага мычиз. - Ме, лыдӟе тае. Соглаш ке, гожтӥськы. Центральной Комитетэ ыстом. Туннэ ик. Бускель республикаосысь но трос гожтэтъёс, вазиськылонъёс, пе, вуыло ини. Оло, Хрущев но эшъёсыз валалозы янгыш лэсьтэмзэс? Дас мурт гожтӥськем вылэм ини Москвае ыстоно курон, ӝожтӥськон вылэ. Мон, егит коммунист, дас одӥгетӥез вал. - Табере тырмоз. Мӧйыосын ӵош егитъёс но мылкыдзэс верало бере, оло, вылӥ кивалтӥсьёслэн пельзы усьтӥськоз, - шуэ Степан Григорьевич. Москвае вуылӥсьёс милемлы ивортылӥзы: огыр-бугыргем, пе, луиз берло вакытэ Центральной Комитетын. Бадӟым янгышез тупатыны, пе, амал утчало. Бӧрысьгес, зэмзэ но, ваньмаз бускель республикаосын газетъёссы асьсэ кылын потыны кутскизы. Нош кӧня изъян адӟемын вал! Кӧня журналистъёс, писательёс кир-пазь луизы, яратоно ужзылэсь, калыклы туж кулэ ужзылэсь палэнтэмын вал! Уноез соос чигиськизы, вылӥ кивалтӥсьёсмылы ӟеч осконзы тэшказ. Никита Хрущевлэн но мукетъёсызлэн бадӟымъяськонзы асьме дорын но урод ласянь юн шӧдӥськиз. Куд-огез зэмос усточиос ужтэк кылизы. Тодмо писательлы Михаил Воронцовлы но, эсьмаса, редакциын уж ӧз сюры ни. Сое ыстӥллям кыдёкысь Балезиное, огшоры собкор луыса ужаны. Семьяезтэк, квартиратэк, телефонтэк. Улэм со гостиницаын. Татын, редакциын, сое ваньзы гажало вал. Ачиз но Воронцов аслыз юн оскылӥз. Лыдӟисьёс тодо вал солэсь вань книгаоссэ. Табере со, ожъёсы ветлэм писатель, мултэс адями, коркатэк, сэрегтэк кылем мурт... Мон тодӥсько вал Михаил Сидоровичез. Ижысь педучилищелэн нырысетӥ курсаз дышетскыкумы, дэмен эскерим "Горд кышет" повестьсэ. Эшъёсы сое вылӥ дунъязы. Ма, мукет книгаосыз но ярало вал. Чидамтэ адями. Огнуналэ мыным жингырто. Соку мон парторганизацилэн секретарез вал. Воронцов, пе, ассэ ачиз быдтэм. Ветлэ, пе, квартираяз одно ик, кузпалызлы куректэммес вералэ. Дораз пыри но... Йыркуосы пештырскизы. Йыг-йыг азьлань вамышъясь, ӟеч улонлы, ӵуказелы оскись журналист... вир пӧлын кылле. Таӵе кышкыт вамыш лэсьтыкуз, тодмо писатель кивалтӥсьёсмес но тодаз ваиз, луоз. Али но ӵем тодам лыктылэ Михаил Сидорович. Трос ӟечсэ лэсьтӥз асьме калыклы Никита Сергеевич. Улонмес кӧнялы ке умоятыны быгатӥз вал. Собере, оло, сое кыӵе ке кый лексиз. Пумен бадӟымъяськыны кутскиз. Мыжыксэ но ӵем возьматъяны ӧз кепыралля ни. Алигес телевидение пыр возьматӥзы "Как это было" передачаез. Кыӵе юн мыскылляз со кылбурчиез Андрей Вознесенскиез но мукетъёссэ. Ӵем йӧтылӥз, Евгений Евтушенколы, солэн эшъёсызлы. Газетмы сярысь ке верано, мон кӧня ке ужай на огазеям редакциын. Пуки тодмо кылбурчиен Анатолий Писаревен одӥг комнатаын. М. И. Гнедин монэ трос пол ысъялляз "пӧсь", "ӝуась" ӝожтӥськонъёсты эскерылыны. Гнедин пыртӥ ик келязы Москвае, ЦК- лэн Вылӥ партшколаяз. Отысь бертыса, ньыльдон арлэсь кема тырши яратоно газетам. Кема кивалтӥ гурт улонъя но культурая отделъёсын. "Советской Удмуртия"-"Удмурт дунне" газет трос писательёсты, журналистъёсты, кивалтӥсьёсты будэтӥз, бадӟым сюрес вылэ поттӥз, удмурт калыклэсь асваланзэ, культуразэ ӝутыны юрттӥз. Али но лыдӟись пӧлын солэн кужымез, данэз туж бадӟым. Зэм, улонмес мыдланьтӥсьёс троссэ вормонъёсмес пеймыт бус сьӧры тӧлӟытӥзы ни, нуналмысь начармиськом, бадӟым кунмы куашказ, Россия но весь уллань гылӟе. "Газетмы гинэ медаз быры вал", - ас поннам малпаськисько мон. Ӵемысь тодам лыктылэ Хрущевлэн ачимъяськонэз. Оскисько: калык уз сёты ай вордскем кылынымы потӥсь газетмылы бырыны. Секыт улон медам куасалты пельпумъёстэс, гажано лыдӟисьёсмы! Ӝомыт бере, уй бере одно ик югыт ӵукна вуэ ук! Кирилл Ломагин, Россиысь писатель. 1988 ар. Газетлы тырмиз 70 ар. Бордгазет интые потӥз книга: "Гудыри - Удмурт коммуна - Советской Удмуртия". Герман Ходырев ШЫРЫТ СЮЛЭМО ВАЛ 1948�1952-тӥ аръёсы Можга педучилищеын дышетски. Степан Машковен Пычасысен пумиським но со мыным районной газетэ гожъяны ӵектӥз. Степан Машков газетэ литературной страницаос дасялляз, ачиз но кылбуръёс гожъяз. Тодӥсько на, 1947 арын гужем Ижевскын ортчиз егит авторъёслэн совещанизы. Отчы ветлӥз Степан Машков. Ижевскын дышетскон но ужан аръёсам Степан Машковен ми котьку но матын вал. Егитъёслы газет потыны кутскем бере, сое, областной партийной школаын дышетскись муртэ, "Егит большевик" газетлэн редакцияз ответственной секретаре пукто. Но литературной ужзэ ӧз вунэты. 50-тӥ аръёслэн шор вадесазы со пьесаос гожъяз, данакез егитъёслэн газетазы печатласькизы. Солэн пьесаосызъя постановкаос возьматылӥзы гуртын улӥсьёс. Вунонтэм кылизы 1965�1967 аръёсы "Советской Удмуртия" газетлэн редакцияз ужаме. Редакторлэн Алексей Артемьевич Стрижовлэн малпамезъя, 1964 арысен та газетын арнялы быдэ пионеръёслы но школьникъёслы потыны кутскиз "Пинал куараос" страница. Кык ар но жыны та страницаез дасянын ужаме мыным туж трос ӟечсэ сётӥз. Трос пол макет Степан Григорьевичен лэсьтылӥм. Со вал ини "Советской Удмуртилэн" редакцияз ответственной секретарь.Со одно ик, мар ке выль малпанэз кылдэ ке, соку ик вералоз, дэмлалоз, кенешоз вал. Малпаськыны косылӥз. Котькуд номерлы быдэ пиналъёслэсь трос гожтэтъёссэс печатламы. "Пинал куараослэн" почтазы ялан узыр луэмлы ответственной секретарь юн шумпотылӥз. Огпол кылпум но поттылӥз: вот, пе, табере "Дась лу!" газетэз выльысь поттыны кутсконо вылэм. Тынад страницаед туж умой возьматӥз солэсь кулэлыксэ. Ведь асьмелы журналистской кадръёс но кулэ. Вот отын будысалзы выль егит журналистъёс но, писательёс но. Зэмзэ но, 1968 арын потыны кутскиз "Дась лу!" газет. Пиналъёслэн гожтэтъёсынызы мон но выжи выль уже. Нырысетӥ толэзьёсаз печатласькизы сьӧрам ваем почтаысь гожтэтъёс. "Советской Удмуртиын" мӧйы, опытной эшъёсы возын ужаса, тыршыса, мон уката мур тодӥ но яратӥ журналистлэсь ужзэ. Кыл бордын ужанэз, темаез шедьтон-утчанэз, аслыд оскем уж понна ответственной луонэз мон та газетын ужан аръёсам мур валай. Таӵе мылкыдын ик кызь аръёс пала ужай "Дась лу!" газетын. Банклы - 9 ар Туала вакытэ банкъёслы но капчи уг йӧты. Одӥгъёсыз куашкало, мукетъёсыз мырдэм возисько. "Евразия" банк сярысь алигес журналистъёслы ивортӥз солэн тӧроез Валерий Богатырев. Со меӵак шуиз: - Ми дась "Шкода-Авто-Удмуртия" малпанэз улонэ пыӵатыны. Со понна уксё висъялом. Озьыен, банклэн коньдонэз вань. Со озьы ик чакла мукет предприятиослы но ужбергатӥсьёслы кредит сётыны. Нош залог кутэ долларен но, сельхозтехникаен но. Кылдытэмын сыӵе умоесь луонлыкъёс. Г. РОМАНОВ. ВЕТЕРАН Шукырес тулкымъёс Ӧйтӧд, мар луысал асьмемын, телевидение но радио пыр возьматонъёсты-верамъёсты учкысалмы но кылзысалмы, газетъёсын гожъямъёсты ваньзэ лыдӟысалмы ке. Кыӵеосыз гинэ но теле-но радиокомпаниос но газетъёс ӧвӧл ай. Кин кызьы лыдъя-малпа, озьы дунъет сётэ политикаысь но экономикаысь, коньдон бергатонысь югдуръёслы но учыръёслы, пӧртэм партиослы, соослэн кивалтӥсьёссылы. Бадӟым политикаен, бизнесэн вырисьёс куспазы ӵаш! потто, жоб дыльдыен сяласькыса сямен огзэс-огзы саптаны, чыртыоссэс йырйыны дасесь кадь. Сыӵеос шоры учкыса, ыргетэмъёссэс кылзыса, визьмыд сураськыны, сюлэмыд путыны кутскоз, ява. Кытысь но малы пото со выллем ӵашетонъёс, шукыръяськонъёс, кытчы вуттозы соос? Оло, юри чакласа озьы лэсьто, калыклэсь визьзэ усыкмытон, вожпотонзэ зӥбломытон, малпаськонлэсь палэнтон вылысь? Соиз но вань, дыр. Тодамы ваёме странаямы ог дасо аръёс азьвылгес кутскем воштӥськонъёсты. Выльдӥськон (перестройка) шуон юнме шорысь ӧз поты, вылды. Ваньмыныз кузёяськись- кивалтӥсь КПСС-лэн вылӥ ёзъёсыз (шуом, йыръёсыз) пыкмемын ни вал, азьпала учкыса ужаны, калыклэсь но быдэс партилэсь мылкыдъёссэс тодыны но санэ басьтыны ӧз ни быгатылэ, оло, ӧз но тыршелэ. Сое шӧдӥзы но адӟизы партилэн улӥысь ёзъёсыз, данакез коммунистъёс. Интыосысь парторганизациосын со пумысен ӟырдыт вераськонъёс потылӥзы. Кызьы берлогес ивортылӥзы, партилэн ЦК-аз но трос гожтэтъёс вуылӥллям. Кин тодэ, генеральной секретарь М. С. Горбачев, оло, чылкыт, ӟеч малпанъёсын басьтӥськиз вал выльдӥськон борды. Со шуылӥз: выльдӥськон - Октябрьлэсь ужзэ азьланьтон, зэмос социализм сюрестӥ вамыштон.Нош кызьы но ма лэсьтоно? Соиз валантэм вал. Кин радъясал сыӵе бадӟым но шуг ужез? Партилэн со вакытэ кивалтӥсьёсыз ӧй быгатысалзы, ӧз но быгатэ шонер сюрес пусйыны но кулэ амалъёс шедьтыны. Аслэсьтыз Горбачёвлэсь но огмылкыдо эшъёсызлэсь бӧрысь ма лэсьтэмзэс чаклано ке, шуг оскыны, соослэн музон, лушкем малпанъёссы-тыршонъёссы вылымтэ шуыса. Горбачёв ялӥз "социалистической плюрализм" (та кыл озьы висъяса гожъямын вал газетъёсын). Нош кыӵе луыны кулэ со, кызьы сое уже кутоно - тодӥсь, валэктӥсь ӧз луы. (Плюрализм - латин кылысь, трос пумо валанъёс шуэм луэ). Шумпотыса уйжомиськом (эйфорие усиськом) вал ни кадь: ыркыт тулыс тӧл пельтӥз, котькыӵе малпанъёсты- мылкыдъёсты шара вераны эрик усьтӥськиз. Бен, сыӵе эрик туж кулэ вал, со трос умойзэ сётӥз ни, али но сётэ. Асьме, удмурт калык понна но. Таиз сярысь трос вераны луысал, но... Сокугес ик Москваысь одӥгез журналист, кылын шудыса кадь, "плюй на реализм" нимаз сыӵе "эрикез". Серекъяса верам вылымтэ со. Плюрализмлэн музон, урод палыз золгес пуромиз. Пӧртэм малпанъёсты-валанъёсты ӵошатыса, огазеяса-герӟаса, чылкыт мылкыдъёсын кенешыса, зэмлыкез утчан интые, паськытгес вӧлмизы шукырес тулкымъёс, тэргаськонъёс, вожвылъяськонъёс, лекъяськонъёс. Со вакытэ ик мукет журналистлэн ӵошатэмезъя, зоопаркысь сьӧсь пӧйшуръёсты кыре лэзем кадь луыса кошкиз. Эрказъяськисьёслы сюресъёс усьтӥськизы эфирын но газетъёсын, ульчаосы люкаськонъёсын но митингъёсын. Юри сыӵе югдур кыдытэмын вал кадь потэ табере. Странаысьтымы но сьӧрлось сьӧд кужымъёслы кулэ вал ваньзэ сураны-пожаны. Азьвыл компартиын "шуныт" (пайдаё), ӵемгес - кивалтон интыосты басьтыса ӝутскем, "куаем" муртъёс ик "выль демократъёс" кариськизы но огазеяськизы туж кышкыт, шимес ужъёс лэсьтӥсьёсын. Кызьы но ӧз выре, али но уг дугдыло соос В. И. Ленинлэсь нимзэ саптаны, дышетэмъёссэ мыдланьтыса возьматыны но "сэрпалтыны", зэмос коммунистъёслэсь лэсьтэм бадӟым но ӟеч ужъёссэс курланы-карганы (асьсэос номыр визьмозэ ӵектытэк но лэсьтытэк). Соос уг кӧберало котькыӵе юрӟым амалъёсты уже кутыны: вылымтэзэ но вань карыса супыльтонъёс, фашизмен оградэ пуктыны выронъёс, ыме тэронтэм жоб но лек кылъёсын тышкаськон, меӵак кышкатонъёс... Нош асьсэлы пумит вераны дӥсьтӥд ке, отын ик ымдэ ӵокталозы - амал но муг шедьтозы. Со-а луоз зэмос плюрализм?! Кинлы но малы кулэ вал, кытчы вуттӥз сыӵе эрказъяськон - ваньмыз тодэ но адӟе, ас улоназ шӧдэ. Самой секыт вакытъёсы, трос аръёс ӵоже калыкен кылдытэм ваньбур таркамын-люкылэмын, капыртэмын "выль кузёосын", экономика выжыеныз куашкатэмын, лулчеберлык пожвуамын, данакез адямиос чидантэм куанере кельтэмын, сантэмамын. Йыртэман, пӧян амалъёсын тужгес узырмем но властез киултэм (яке отчы асьсэ адямиоссэс чуртнам) "выль кузёос" (олигархъёс) табере куспазы тэргаськыны ӧдъязы. Ма нош, кызьы-о уз поты соослэн уката узырмемзы! Котькудӥз тырше аслыз бадӟымгес "юдэс" капыртыны. Калыкез пӧяса возён, троссэгес ас палазы кыскон вылысь, соос кылдытъяло иворъёс вӧлмытонъя асьсэлэсь ёзъёссэс, киултыны (яке ужазы кутыны) тыршо кун телерадиокомпаниосты но, медъяло тужге тодмооссэ но устооссэ журналистъёсты. Ӵапак соослэн "тыршеменызы" ик коскатэмын ӧвӧл меда Россилэн огъя кивалтэтэз. Сыӵе малпан кылдэ, туала Кун Думалы (отын али тросэз зэмзэ ик сюлмасько странамы, калык сярысь) пумит пыд пуктылонъёс, соин кутэм законъёсты улонэ пыӵатыны люкетонъёс, Президентлэн ӵем дыръя солы пумит лэсьтылэмез, правительствоез ялан вошъяллямез но мукетыз шоры учкыса. Табере тани паськыт ӧръяськиз Кун Думае выль быръёнлы дасяськон. Олигархъёс котькызьы тыршозы отчы сюрыны яке асьсэ адямиоссэс чуртнаны. Со понна ваньзэ лэсьтозы - лыдъяны луонтэм коньдонзэс но уз жалялэ, бырйисьёсты ас палазы кыскыны музон амалъёсты но кутозы. Пӧртэм огазеяськонъёссы, валтӥсь адямиоссы куспазы тэргасько, властьын тросгес интыосты басьтон понна жугиськыны но вуозы. Ваньзы ик соос калыклэн нимыныз вераськемъясько, бусьтыр но майбыр улон сӥзё. Котькудӥз ассэ возьматыны выре калык сярысь сюлмаськисен, самой визьмоен но быгатӥсен. Нош кинэ соос калыкен лыдъяло меда? Асьсэ выжыысьтызы, асьсэлы дурбасьтӥсь, котыразы бергась, вузаськем но медоос луэм муртъёсты гинэ ӧвӧл-а? Трос-а бен сыӵеос? Странаямы улӥсьёс пӧлысь данакез (куд-ог лыдъямъёсъя, 80-90 процентэз) - со ас киосынызы но визьмынызы ваньбур кылдытӥсьёс, наукаез но культураез узырмытӥсьёс, тазалыкмес утисьёс но нылпиосмес дышетӥсьёс-визьнодасьёс, атыкай музъеммес утисьёс, пӧртэм удысъёсын азьвыл тыршем ветеранъёс, будӥсь егитъёс, - ваньмыз, кинъёс чылкыт сямъёсын уло, мурт сильсьӧрын уг ветло, уг лушкасько, уг йыртэмало. Валамон, туала ужбергатӥсьёс но. Вераськон ӧрелэсь ӧжытак кожыса, татын тани мае пусъеме потэ вылэм. Малы ке асьмеос удмурт кылын ваньзэсты предпринимательёсты ужбергатӥсьёс шуиськом. Соос пӧлын вань ук ваньбур поттон удысъёсын тыршисьёс но, коньдонэз бергатыса, вузкарон кусыпъёсы пыриськыса гинэ асьсэлы табыш поттӥсьёс но. Кыкетӥосыз дасез вылын уло, асьме кисыосты сюпсё ук. Ужаса улӥсьёс али палэнтэмын политикаез, экономикаез радъянлэсь, кунэн кивалтонлэсь но, соос уг быгато ас поттэм ваньбуренызы кузёяськыны но. Политиканъёслы со кулэ, быръёнъёс дыръя тросгес куараос басьтон понна гинэ. Осконо-а соослэн чеберъяськонъёссылы, оломар но сӥзёнъёссылы? Макем трос супыльто, макем трос коньдон кисьто быръён ужрадъёссылы, макем умоен возьматыны туртто асьсэды, сокем пӧясько сыӵеос. Иворъёс вӧлмытӥсь ёзъёсын ӵашпоттон - со шукыос гинэ. Политика зарезьлэн поръясь интыез пыдлонгес, сое адӟыны шуг. Тырмыт-а, шонер-а возьмато со ёзъёс туала улонэз? Калыклэсь кызьы улэмзэ, ужамзэ, сюлэмшугъяськонъёссэ, мылкыдъёссэ возьматон сярысь веранэз ик ӧвӧл. Матаз но уг. Медаз кылды вылэм иворъёс вӧлмытонъя ваньмыз ёзъёс, журналистъёс озьы ужало шуыса малпан. Данакез соос калык понна ужало, нокинлы уг вузасько, зэмлык понна нюръясько. Тани удмурт шаерамы потӥсь газетъёс но журналъёс, асьме телевидение но радио (куд-ог коммерческойёссэ вератэк) уг вунэто ужысь азьветлӥсьёсты, вань кужымзэс но быгатонлыкъёссэс, сюлэмзэс сётыса тыршисьёсты, адӟо-валало но возьмато соослэсь шуг-секытъёссэс, уг кышкало кивалтонысь шекъёсты но янгышъёсты шарае поттыны, лэчытэсь ужпумъёсты сэрттыны-пертчыны, уг пырисько юромо пуромытылӥсь тэргаськонъёсы. Бен, шукырес тулкымъёс пӧлы выён кышкытлык вань. Но ас визьмыныз улӥсь, юн мылкыдо но кужмо сылӥсь муртэ номыр уз погырты, уз куасалты. Со уз сётскы нокыӵе пӧянъёслы, ачиз тодоз ма лэсьтыны но валалоз, кытын зэмлык, кин пала дурбасьтоно. М. Абрамов. Правительствоын Быдэстоно ужъёс Правительстволэн Тӧроез Николай Ганза кенеше люкаськемъёсты тодматӥз матысь кык арнялы чаклам ужпумъёсын. Тужгес но бадӟым саклык висъяз Республикамылэсь нуналзэ но быдэс дуннелы тодмо конструкторлэсь Михаил Тимофеевич Калашниковлэсь вордскем нуналзэ пусъёнэн герӟаськем ужрадъёслы. Та дыр ӵоже ик эскеремын луоз на республикалэн вуоно арлы бюджетэзлэн инъетэз. "Ижмаш" акционер огазеяськонэн ӵош ужрадъёс пусъемын машина поттон удысын шуг- секытъёсты палэнтон ласянь. Николай Ганза вераз Кун Думае быръёнъёс пумысен малпанъёссэ. Пусйиз, одӥгез но депутатэ кандидат Правительство ласянь нимысьтыз висъяса юрттэт уз басьты шуыса. Быръёнъёслы дасяськонэз сак эскерыса возёзы Правительстволэн Тӧроезлэн воштӥсьёсыз Сергей Чикуров но Михаил Назаров. СПИД-лы пумит Жаляса верано луэ, СПИД вӧлмиз ини быдэс Россие. Туннэ нуналлы Удмуртиын шараямын одӥг висись, дас одӥг муртлы паламын та инфекция. Ӵемгес соин курадӟо наркоманъёс. Шаермы та кышкыт черлэсь утиськон вылысь, Тазалыкез утёнъя министерство дасяз нимысьтыз программа. Солэсь инъетсэ эскерозы на Кун Кенешын. Музъемез валаса кутоно Удмурт Республикаысь Музъем узырлыкъёсъя но му кутонэз радъянъя кун комитет Гурт удысъя но сиён-юонъя министерствоен но Эономикая министерствоен ӵош дася "1999-2002 аръёслы Удмурт Республикаын музъем реформаез азинтонъя" нимысьтыз программа. Отын вераськон мынэ музъемез валаса но пайдаё кутон, адямиослэн музъемлы правооссы сярысь, кылдытыны чакламын музъем узырлыкъёсты кун ласянь утёнъя радлык. Удмурт Республикаысь Правительстволэн пресс-службаез. Петр Елкин Татын монэ дышетӥзы Котькуд удмурт адямилэн улоназ "Советской Удмуртия" газет кыӵе ке но пытьы кельтэ, дыр. Со юрттэ вордӥськем кылыныд ас шаердэ, Родинадэ ӟечгес тодыны, визьдэ узырмытыны, сюлэмдэ усьтыны. Нош мынам улонам "Советской Удмуртия" газет анай-атае кадь луэ. Со мыным юрттӥз улон шоры синме усьтыны. Лудорвай школаын дышетскыкум мон ялан гожъялляй яратоно газетам. Отын, школа улонысь суредъёс сяна, поталлязы на критической материалъёсы "Шӧкыче". 0дӥгез корреспонденцие понна анае ӧжытак йӧттӥз но вал. Отын мон крити- ковать кари гуртысьтымы вузкарисьмес магазинэз кырсь воземез, урод ужамез понна. Анаелэн вожез потӥз: "Кызьы мон табере магазинэ ветлом на, малы тыныд нырдэ месоно вал мӧйыослэн улоназы". Но со учыр монэ ӧз кышкаты, улон шоры эшшо но сакгес учкыны дышетӥз. Институтэз йылпумъяме бере сюлэмы кыскиз газетын ужаны. Озьы мон художник-ретушер луи. Шуныт пумитаз редакцилэн коллективез. Соин ик вераме потэ ӟеч сюлэмо адямиос сярысь. Соос мыным оскизы, агай сямен юрттӥзы пыд йылам султыны. Ноку уг вунэты Степан Григорьевич Машковен, Василий Михайлович Михайловен, Андрей Степанович Мыльниковен, Аркадий Николаевич Кузнецовен но мукетъёсыныз ӵош ужам аръёсме. Азьвыл писательёс сярысь гинэ верало вал, "Советской Удмуртия", пе, юрттӥз соослы литературае сюрес лёгыны. Нош туннэ мон шуысал: "Мыным профессиональной художник луыны юрттӥз "Советской Удмуртия" газет, уката ик отын ужась умой адямиос". Трос аръёс ортчизы ни со дырысен. Нош нырысь вамышъёс ялан син азьын. Журналистикаен эшъяськон юнматэ угось адямилэсь гражданской позицизэ, дисциплин азэ, синзэ паськытгес усьтэ улон шоры. Соин ик тау кареме потэ газетлэн коллекти-везлы, ӟырдыт ӟечкыласько журналистъёсты бадӟым юбилеен. Ӝыны даур газетэн ӵош Мон ноку уг вунэты, кызьы 1948-тӥ арын "Советской Удмуртия" газетын потӥз нырысетӥ статьяе. Соку, война бере, гуртъёсы быдэ вуымтэосты ремесленной училищеосын но ФЗО школаосы ӧтьыса ветлӥзы. Озьы Алнаш районысь Вуж Утчан школаысь сизьым классэз быдтэме бере, мон Ижевскысь 4 номеро ремесленной училищее дышетскыны мынӥ. Милемлы выль дӥськут сётӥзы: сьӧд шинель, картуз, ботинка. Берпум коньдонэнымы снимок лэсьтыса, фотомес гожтэтэн дорамы ыстӥмы. ... Одӥг ар дышетскеме бере, мылкыды ӝутскиз, гуртъёсысь пиналъёсты училищеосы ӧтьыса, удмурт газетэ материал гожтыны. Редакциын монэ шуныт пумитаз промышленностья отделэн кивалтӥсь Степан Семенович Иванов. Кема ик дыр ӧз ортчы, гожтэтме, кӧня ке тупатъяса, "Лыктэлэ ми доры" нимын газетэ поттӥзы. Со дырысен мон пӧртэм корреспонденциос гожъяй Ижевскысь металлургъёс но ремесленникъёс сярысь. Училищеез быдтэме бере, заводын ужакум, ӝыт ужась школаын дышетски, собере пединститутлэсь историяя факультетэзлэсь заочной отделенизэ йылпумъяй. 1963-тӥ арын монэ кутӥзы "Советской Удмуртия" газетэ литературной ужасе. Татын промышленной отделын куинь ар ӵоже ужатозям, кивалтӥсьёсы вал Василий Евсеевич Смирнов но Георгий Петрович Никитин. Соос но мукет журналистъёс мыным сюрес усьтӥзы азьланяз гожъяськон борды гижысь-пиньысь кутскыны. Редакция бере Обллитысь цензорын, собере выльысь андан ӵыжатон заводын ужакум, озьы ик пенсие потэм берам но кусыпме ӧй ышты республикаямы одӥгеныз бадӟым удмурт газетэн. Али но отчы гожъясько. В. ЧЕРНОВ. Эшмы - газет Кин асьмеды такем эшъяз? Мон огдырлы озьы малпай. Шаркан, Игра, Дебёс, Алнаш Бен огазьын ук, учке-ай. Ужаськомы, малпаськомы, Ваньзэ лэсьтӥськомы дэмен. Шумпотонмы, куректонмы Одӥг муртлэн шат?- асьмелэн! Тӥни кыӵе огазеяз Коллективмес вордскем газет. Туннэ, солэн ньыльдон араз, Ӟечкыласа сюлэм вазе. Семен Перевощиков. Эшъёс уг вуно 1946-тӥ арын, Советской Армиысь бертыса, ужаны интыяськи обллитэ (соку озьы нимаськиз цензурая орган). Отын вань улонэ герӟаськиз, шуыны луоз, "Советской Удмуртия" газетэн. Солэсь котькуд номерзэ нырысетӥ чурысен берпуметӥ чурозяз лыдӟоно луылӥз, шараяны лэзьымтэ учыръёс сярысь газетын гожтэмын медаз луы шуыса. Озьы кысьтӥськиз ньыль ар. Та дыр куспын тодматски но эшъяськи "Советской Удмуртия" газетлэн редакциысьтыз тросэныз ужасьёсын. Соос ик монэ ӧтизы редакцие. Ноку уг вунэты Георгий Романович Тугановез. Соку со кивалтӥз редакциысь пропагандая отделэн. Обллитын ужакум ик со мыным удмурт кылэ берыктыны сётылӥз "Правда" газетлэн пресс-бюроезлэсь материалъёссэ. Нош соос редакцие трос гинэ вуылӥзы. Берыктэм материалме Георгий Романович котьку рос-прос эскерылӥз, умоесь валэктонъёс сётылӥз. Озьы мон 1950-тӥ арын ужаны кутски "Советской Удмуртия" газетлэн ӟуч кылысь берыктонъя отделаз. Татын мынам оскымон эшъёсы но дышетӥсьёсы луизы отделлэн соку кивалтӥсез Николай Иванович Кондратьев, кыл кутӥсь секретарь Анна Геогриевна Борисова. Таиз мынэсьтым котькуд берыктэм материалме дораз ӧтьыса учкылӥз но рос-прос валэктылӥз, кызьы умойгес луысал созэ яке тазэ предложениез гожтыны. Со аръёсы редакциын ужасьёслы, тужгес ик удмурт кылэ берыктӥсьёслы машинисткаослы но корректоръёслы уйшорозь, куддыр ӵукнаозь ужано луылӥз. Дырыз сыӵе вал уга. Но нокин ӝожтӥськылӥсь ӧй вал, ваньзэ чидамы. Нимысьтыз вераме потэ ТАСС-лэсь материалъёссэ радио пыр басьтӥсьёс Чегодаева но Белькевич сярысь. Соос сыӵе материалъёсты Москваысь радио пыр наушникъёсын бысьтылӥзы но машинкаен печатлаллязы. Со туж ӝегыт но секыт уж вал. Табере кӧня ке дэмланъёсме вераме потэ газетын али ужасьёслы. Азьвыл дыръя кыӵе ке критической материал потэ ке, соя кыӵе ужрадъёс кутэм сярысь газет одно ик ивортылӥз лыдӟисьёсызлы. Со сямез берыктыны кулэ вылэм. Али ум тодӥське, кыӵе ке пайда сётӥз- а, ӧз-а сыӵе материал. Вылаз ик, али сыӵе материалъёс шер потыло. Улонамы тырмымтэос, шекъёс, урод ужъёс но адямиос быризы шат? Ӧз, соос уката трос луизы. Г. ВАХРУШЕВ, ожысь но ужысь ветеран, Удмурт АССР-ысь культура удысысь дано ужась. "Закон вань, калыклэсь мылкыдзэ юано ӧвӧл" Туэ 6-тӥ октябре Россилэн Президентэз Борис Ельцин "Россия Федерациысь улосвылъёсын кун властьлэсь законъёссэ кутӥсь но быдэсъясь ёзъёссэ радъянъя огъя принципъёс сярысь" Законэз юнматӥз. Удмурт Элькунлэн вылӥ кивалтӥсьёсыз тае кемалась возьмаса улӥзы ни. Ӝегатскытэк кылдытэмын Удмуртилэн Конституцияз воштонъёс но ватсанъёс пыртонъя ужась группа. Кивалтоз соин Кун Кенешлэн Тӧроез Александр Волков. Депутатъёс сяна, группае пыре 11 юрист. Алигес соос асьсэлэн нырысетӥ кенешазы люкаськылӥзы. Удмуртилэсь Конституцизэ выльдон пумысен кемалась вераськонъёс мыно ни. Тодӥськоды на, дыр, кык-куинь ар талэсь азьло Кун Кенешлэн комиссиез валтӥсь законлэсь выль редакцизэ дасяз вал. Россия Федерацилэн Конституциезлы тупась кароно, шуылӥзы. Нош мугез воксё мукет вал: элькунмылы президент быръён. Но соку Кун Кенеш удмурт Конституцие пыртыны чаклам воштонъёсты но ватсанъёсты ӧз эскеры. Кыӵе вал солэн мугез - шуг вераны. Оло калыклэсь пумит луэмзэ валазы, оло куд-огез "сое" президентэ уз быръе шуыса шӧдӥз. Талэсь азьвыл но Удмурт Республикаын президентлэсь постсэ тупатыны малпало вал ни. Со пумысен 1994-тӥ арын калыклэсь юалляськон но ортчытӥзы. Странаын кылдэм югдурез чакласа, элькунысь калык президент быръёнлы чылкак пумит султӥз. Озьыен, парламент амалэн кивалтон быдэс Россиын кык элькунын гинэ вань на. Асьме дорын но Дагестанын. Берпуметӥяз но трос пол ини президент бырйыны туртто вал - ӧз пӧрмы. Калыксы пумит луэ. Вазь-а, бер-а, но кыксылы ик вылӥ кивалтӥсь адями быръёно луоз. Угось Россия президент республика луэ. Нош одӥг государство пушкын пӧртэм амалэн кивалтон куд-ог секытъёсты кылдытэ. Валамон, таяз учыре но Конституциез выльдонын валтӥсь инты президент юнматонлы сӥземын луоз. Та сярысь ик вераськиз Александр Волков но. Кызьы со пусйиз, кун власть сярысь закон Кун Кенешлэн азьвыл созывезлэсь шонер сюрес вылтӥ мынэмзэ возьматӥз. Та ужпум, пе, кемалась ӟырдаса улэ ни вал. Закон ваньзэ интыяз пуктӥз. Табере калыклэсь юанэз ӧвӧл ини: кулэ-а солы президент, ӧвӧл-а, законын кулэ шуыса гожтэмын. Но президент быдэс калыкен быръемын луыны кулэ. А. Волков закон вылэ пыкъяськыса вераськиз ке но, куд-ог интыосыз валантэм пото кадь. Огласянь, президентэз бырйыны калыклэсь юатэк но яра, нош мукет ласянь, вераны кулэ: со Законлэн 17-тӥ ёзэтэзлэн 2-тӥ пунктаз гожтэмын: "Россия Федерациысь улосвыллэн Конституциеныз (Уставеныз) тупатӥськыны быгатэ Россия Федерациысь улосвыллэн вылӥ кивалтӥсь муртэз". Озьыен, Удмуртилэн президентэз Удмурт Республикалэн Конституциеныз гинэ тупатэмын луыны быгатэ. Нокыӵе но федеральной закон асьмелы президент бырйыны кужмысь уг косы. Нош элькун Конституцие воштонъёс но ватсанъёс пыртыны быгатэ Удмуртиысь Кун Кенеш гинэ. Озьыен, асьмелы президент бырйыны кулэ ик луоз. Элькунын вылӥ кивалтӥсь муртэ калыклэсь но юатэк юнматозы ке, кызьы сое нимано шуыса калыклэсь мылкыдзэ тодоно луоз. Ӵапак та ужпум борды басьтӥськиз ужась группа. Кызьы чебергес кылӥськоз: "президент", "глава" яке мукет сямен? "Президент" ке шуизы, калыклы уз яра. "Глава"? Кема вераськон кыстӥськиз та пумысен. Ужась группаысь муртъёс пӧртэм ӵектонъёсын потылӥзы: Конституцилэн выль редакциез бордын ужаку гинэ тае эскероно, Кун Кенешлэн сессияз чаклано. Котьма ке но, калыклэсь юалляськон ортчытыны малпазы. 19-тӥ декабре. Нош со дырозь Кун Кенешлэсь азьвыл чакламтэ сессизэ люкано луоз: калыклэсь юалляськон ортчытон сярысь Удмурт Республикалэн законэз ӧвӧл на. Тумошо та улон: кивалтӥсь кулэ-а, ӧвӧл-а, но сое ниман тужгес но секытэз луэ кадь. "Президент", "глава", коть "шайтан" шу - пуштросэз одӥг кыле. Мон сямен, секыт ужпум мукетыз бордын. Президент нимаз структура луоз-а, яке огвакыт ик правительствоен но кивалтоз. Ватонэз ӧвӧл, нимаз структура луиз ке, чиновникъёслэн лыдзы эшшо но трос луоз. Но бускель улосвылъёсын вылӥ кивалтӥсьсылэн нимаз командаез вань. Ма бен, улыса адӟом. Али ваньмыз Конституцие воштонъёс но ватсанъёс пыртонъя группалэсь потоз. Та группалы, нырысетӥ маёзь ужзэ йылпумъяса, Кун Кенеше выль редакциез сётыны кулэ ни. Юристъёслэн группазы арнялы одӥг пол люкаськылоз, нош Кун Кенешлэн Президиумезлэн юнматэм муртъёсыз котькуд толэзьлэн пумаз выль вуэм ӵектонъёсты эскероз. Удмурт Конституцие воштонъёсты но ватсанъёсты сессиын юнматозы яке референдум ортчытозы. Соизэ ини эскерозы Кун Кенешысь депутатъёс. Кызьы Удмуртилэн валтӥсь Законаз воштонъёс но ватсанъёс пыртыны дасяло, азьланяз но тодматом на. А. АНДРИЯНОВ. Азьмынӥсьёсты данъяса Кун Кенешын алигес эскеремын Республикалэн нуналэз азьын Данъян пул вылэ пыртыны чаклам азьмынӥсь коллективъёслэн но нимаз адямиослэн нимъёссы. Кун Кенешлэн Президиумезлэн постановлениеныз ужын вылӥ вормонъёссы понна пусъемын луозы 13 коллективъёс но производствоысь 50 азьмынӥсьёс. Кенешез нуиз Кун Кенешлэн Тӧроез Александр Волков. Удмурт Республикаысь Кун Кенешлэн пресс-службаез. Ветеран Азьло но али Газетмылэн вордскем нуналэныз валче куд-ог малпанъёс Тани тямыстон одӥг арессэ пусъе ини асьмелэн удмурт газетмы. Ичи ӧвӧл со. Кузь сюрес вылын луыло нырко-гопо интыос но, читыр-чутыр кожонъёс но, котькыӵе могӟетъёс но. Нош тон, азьпалад бадӟымесь ужпумъёс пусйыса, нуналмысь сюлмаськид ке соосты быдэстон понна, нокыӵе шуг-секытъёс уз быгатэ тыныд люкетыны. Тӥни озьы чаклано ке, быгатӥз-а асьмелэн газетмы улонлэн пӧртэм вакытъёсаз азяз сылӥсь ужпумъёссэ быдэсъяны? Тупалляз-а солэн нимыз ас вакытэзлы? Тани со нырысь потылӥз "Гудыри" нимын. Граждан ожлэн тылӝуаз вордскыса, со 1918- тӥ арын 31-тӥ октябре потэм нырысетӥ номераз гожъяз: "Инмысь гудыртыку быдэс дуннеез вырӟытэм кадь, та газетлэн но куараез быдэс удмурт калыкез мед вырӟытоз". Бен, газет удмурт калыкез сайкатӥз вуж улонлэсь секыт зӥбетсэ сэрпалтон но выль улон лэсьтон понна нюръяськонэ, сюлмаськиз адямиослы тодон-валан сётон но выль сямъёс пыӵатон сярысь. 1930-тӥ арысен газетлэн нимыз луиз "Удмурт коммуна". Бен уго, со аръёсы асьме шаерамы но, бдэс странаямы сямен ик, мынӥз пичиесь но начаресь крестьян хозяйствоосты огазеян. Кылдылӥзы коммунаос, кооперативъёс но колхозъёс. Газет котькуд номераз печатлалляз та бадӟым ужлэсь мынэмзэ, валэктылӥз солэсь пайдазэ, шараялляз выль сюрес вылысь тырмымтэосты но янгышъёсты. Быдӟым Отечественной война вакытэ, 1943-тӥ арын, газет потыны кутскиз "Совесткой Удмуртия" нимын. Со нош тупаз вакытэзлы. Советской странамес тушмонлэсь утьыса, куашкатэм хозяйствомес ӝутыса, калык быдэсъяз социализм лэсьтонъя бадӟымесь ужпумъёсты. Тӥни соосты валэктон, выль улон лэсьтонэ асьме калыкез огазеян - газетлэн котьмалэсь бадӟым ужез вал. Сое со данэн быдэсъяз. Юнме-а газетлы "Знак Почёта" орден, данак дипломъёс но грамотаос сётэмын. Табере тани 1992-тӥ арысен газетмы луиз "Удмурт дунне". "Советской" кыллэсь куштӥськон понна гинэ ӧй вал, дыр, со, странаямы выльдӥськон кутскемен валче кулэ вал, дыр, ӝыны даур пала нуллэм дӥсьтэ но выленыз воштыны. Собере выль ним историын кыӵе ке вакытэн герӟамтэ ӧй вал, "Удмурт дунне" со котькыӵе дырлы тупамон, уката ик со бордысь "Знак Почёта" ордензэ но куштэм бере. Котьма ке но, выль вакыт, странамяы кутскем выльдӥськон газет азе но выль ужпумъёс пуктӥз. Лыдӟисьёслы валэктыны кулэ вал со выльдӥськонлэсь кулэзэ, та бадӟым ужын котькуд адямилэсь интызэ. Газет нырысь-валысь кутскиз вал со пумысен ик гожъяны. Но Ельцинэн-Гайдарен ялэм реформа чылкак мукет сюрестӥ кошкиз, Быдӟым Советской Союз но куашказ, улон-вылонмы но шукрес коже вуиз, тани-тани ваньмы меӵ яр пыдсы васьком. 1996-тӥ арын президентэ Б. Н. Ельцинэз выльысь быръем бере, со котыре люкаськем "сьӧд кырныжъёс" чылкак ашкынӥзы. Калыклэн улон-вылонэз уката уродмиз. Удмурт газетмы азе, 1918-тӥ арын сямен ик, выльысь таӵе ужпум султӥз: калыклэсь синзэ усьтоно та чукинскем улонмы шоры, валэктоно солы, кызьы но малы сыӵе югдуре вуимы, кин со понна янгыш, ма кароно, выльысь пыд йыламы султон понна? Мон сямен, газет ӧз быгаты со бадӟымесь ужпумъёсты лыдӟисьёслэн сюлэмазы пыӵамон валэктыны. Соинтэк-а тросэз адямиос туннэ но пеймыт нюлэскы йыромем муртъёс кадь уло. Сое ӟеч возьматӥзы республикаямы туэ апреле ортчем Кун Кенеше быръёнъёс но. Валамон кадь ини: кинэ кивалтэтэ ачид бырйид, сыӵе ик луоз улонэд но. Озьы ке но, депутатъёсы трос быръемын вал калык киосын но кужымен кылдытэм ваньбурез капыртыны вуэмъёс. Удмурт районъёсын улӥсьёс но Кун Кенеше бырйыизы сьӧрлось вуэм тодмотэм адямиосты, оскизы соослэн оломар но сӥземзылы. Ма неужто ум валаське: сыӵе адямиос ноку но калык сярысь уз сюлмаське, ас ваньбурзэс йыэтон понна гинэ ужалозы, нош тыныд, сютэм пунылы сямен, йыръем лы гинэ куштозы. Тани нош ик матэкто быръёнъёс. 19-тӥ декабре асьмелы быръёно луоз Россия Федерациысь Кун Думае депутатъёсты. Али ик ини бырйисьёслэсь йырвизьзэс сураны туртто олокыӵе но огазеяськонъёс, движениос кылдытыса. Телевизорысь нуналлы быдэ адӟиськом Лужковлэсь - Шаймиевлэсь - Примаковлэсь, Немцовлэсь - Хакамадалэсь но та дырозь кивалтэтын узырмыса тӧрнам мукет адямиослэсь тусбуйёссэс. Мон уг вераськы ни Гайдар, Чубайс, Черномырдин но соослэн уллёысьтызы мукет сьӧськабъёс сярысь. Табере тани президентлэн администрациез кылдытӥз выль огазеяськон - "Единство" нимо. Калыкез пӧян вылысь отчы адямиослы ӟеч ужъёсыныз тодмо министрез Шойгуэз, нюръяськонъя дуннелэсь чемпионзэ Карелинэз пыртӥллям. Асьсэлы асьсэос уг оско ни, шӧдске, калыклы гажамон луись адямиос сьӧры ватскыса, властез киязы кельтыны туртто. Соос туж кышкало, бырйисьёс зэмос патриотъёс но коммунистъёс пала кариськозы шуыса. Соинтэк-а "Вормон понна!" движение сярысь, коммунистъёслэн странаез выль сюрестӥ азинтон программазы сярысь радио но, телевидение но чик уг поттыло яке олокызьы но мыдланьтыса возьмато. Ӟуч писатель-революционер Н. А. Островский 1934-тӥ арын ик гожъяз вал: "Капиталистической странаосын политической партиос ас ужазы ялан пӧяськыло. Зэмзэ вераны соос уг дӥсьто, малы ке шуоно, калык соослы соку мышкин берытскоз, соин ик соос кивалтӥсь группа но ужась калык куспын солань-талань шонаськоно луо". Тӥни ӵапак озьы выро асьмелэн но: Жириновскийлэн, Явлинскийлэн, Черномырдинлэн, Лужковлэн, Примаковлэн но мукетъёсызлэн партиоссы но огазеськонъёссы олокыӵе но чебер кылъёс утчало бырйисьёсты пӧян вылысь, оломар но сӥзё соослы. Соин ик асьмелы тодамы ваёно ӟырдыт публицистлэсь чехлэсь Юлиус Футчиклэсь ӧтемзэ: "Адямиос! Сак кариське!" Вуоно быръёнъёсын вераськон уг мыны республикаысьтымы калыклэн улон-вылонэз сярысь гинэ. Кинъёсты быръёмы Россиысь Кун Думае, со бордын луоз быдэс странамылэн кыӵе сюрес вылтӥ мынонэз, соин асьмеос герӟаськом азьланьын улонмес яке быронмес. Быръёнъёслы дасяськон вакытэ газет юрттыны кулэ тугаськем бугорез сэрттыны- пертчыны. Уногес печатлано вылэм туала улонамы кылдэм югдурлэсь мугъёссэ валэктӥсь материалъёс. Татын бадӟым юрттэт сётысалзы удмурт учёнойёс, писательёс, дышетӥсьёс, огъя вераса, удмурт интеллигенция. Кытын-о соос, малы азьвыл быръёнъёсы но соослэн куаразы, ӟырдыт кылзы ӧз кылӥськылы? Кыӵе мылкыдын уло соос асьсэос? Огъя вераса, сюлэмшугъяськытӥсь юанъёс асьме азьын трос гинэ. Лыдӟись газет бамысь утча со юанъёслы валэктонъёс. "Гудырилэн" куинетӥ номераз кылбурчи Д. Майоров гожъяз: "Гудыри" газет гудыртоз, Изись удмуртэз сайкатоз. Пеймыт интыын улӥсьлы Югыт сюрес возьматоз." Сыӵе ик оскон вань туннэ "Удмурт дунне" газетлы но. Со лыдӟисьёсын мед вераськоз меӵак, номыре ватытэк, лэчыт юанъёслэсь пегатэк. Сое витё туннэ ваньмыз. В. МИХАЙЛОВ, журналист. 1978 ар. Газетлы тырмиз 60 ар. ВЕТЕРАН Газетлэн кужымез Ачим сярысь газетъёс гожъязы. Нош малы мон номыр уг гожъяськы, шат номыр сярысь вераны? Таӵе малпанъёсын ветлыкум пумиськи одӥг корреспондентэн. Сое мон кемалась тодӥсько ини, мынэсьтым малпанъёсме адӟем сямен юа, малы, пе, тон, Василий Иванович, номыр уд гожтӥськы. Улытозяд кузь сюресэз ортчид ини, вань, дыр, ма сярысь вераны. Пуксьы но гожты, шуэ, эшъёсыд, соослэн малпанъёссы но сюлмаськонъёссы, уж шоры кызьы учкемзы сярысь. Вераны капчи, гожтыны секытгес вылэм. Котьмар ке но, мон гожтӥ, олокызьы пӧрмиз. Кӧня ке нунал ортчиз но аслэсьтым "пӧрамме" газет бамысь адӟисько ини. Лыдӟозы но куштозы, малпай, кыӵе ке Поздеев улыны но ужаны дышетэ шуозы. Нош лыдӟисьёс озьы уг учко вылэм. Мыным гожтэтъёс вуыны ӧдъязы. Асьсэлэсь малпанъёссэс, ӵектонъёссэс верало. Мынам гожтэтэ пумысен газет быдэс ар вераськон нуиз. Соку мон ӟеч валай газетлэсь кужымзэ: киын гожтӥд ке, тӥрен уд кора ни сое. Озьы шуи аслым. В. ПОЗДЕЕВ, Социалистической Ужысь Герой, Ижевскысь механической заводысь электрикъёслэн бригадирзы. Воргоронъёсты быръё нылкышноос Россия Федерациысь Кун Думалэн депутатэз Екатерина Лахова 26-тӥ октябре вуылӥз Ижевске. "Россиысь нылкышно движенилэн" азьветлӥсезлэн Удмуртиен таиз пумиськонэз витетӥез вал ни. Со бордысь ик кутскизы шаерамы "Семья" центръёслэн ужамзы. Шаерысьтымы нылкышно огазеяськонъёсы пыриськемъёс, журналистъёс, огшоры ужасьёс Екатерина Лаховаен пумиськизы "Удмуртгражданпроектлэн юртаз". Кун Думаысь депутат данъяськыса пусйиз, Удмуртиысь Кун Кенешлэн историяз Тӧролэн юрттӥсез нырысьсэ луиз кышномурт. Светлана Смирноваен пумиськон Екатерина Лаховалы ӟеч мылкыд кельтэм. Пумиськон дыръя Екатерина Филипповна пусйиз, воргоронъёсты депутатэ бырйиськом асьмеос, нылкышноос. Нош кыло-а соос бӧрдонъёсмес, куронъёсмес? Быръёнъёсын куараосмес кин ке понна сётыку, со сярысь но малпаськыны кулэ. Л. КИМОВА. 1958 ар. Газетлы тырмиз 40 ар Калыклэсь дышетскыса Мон редакциын ужаны кутски 1925 арын. Партийной отделэн кивалтӥ. Шумпотыса тодам ваисько удмурт газетмлэсь нырысетӥ номеръёссэ поттӥсьёсын ӵош ужамме, И. Наговицынэн, Т. Борисовен, П. Баграшовен, Д. Корепановен, И. Дядюковен пумиськылэмъёсме. Газет уж мыным кельшиз. Соин ик, Иж рабфакез йылпумъяса, Москваысь журналистикая институтын дышетски. Отысен "Гудыри" газетэ гожъяй, редакциен кусып вози. 1930 арын, институтэз быдтэмелэсь азьло ик, монэ Ижевске ӧтё но редакторе ужаны пукто. Редакцимы Советской ульчаын вал, одӥг этажо вуж коркан. Газетлэн тиражез 1600-озь вуиз. Коньдонэн урод вал. Трос малпаським ми газетэз калык пӧлы вӧлдон сярысь. Удмурт автономной областьлы дас ар тырмонэз пусйыны дасяськон вакытэ ми ас азямы ужпум пуктӥм газетлэсь тиражзэ дас сюрсозь вуттыны. редакциын ужасьёс гуртъёсы, заводъёсы потӥзы. Со вакыт но удмурт газет уг мыны, со валантэм шуыса вераськонъёс вал. Калык пӧлы птыса лыдӟоно луиз. Калык пӧлын ик валамон гожъяны дышетским. Куать толэзь куспын газетмы 13.600-озь будӥз. Трос шуг-секытъёсын пумиськоно луиз милемлы. Ми соосты вормыны тыршылӥм, удмурт газетлэсь данзэ ӝутон понна кужыммес ӧм жалялэ. М. ВОЛКОВ. Ветеран Искалмувырысь доктор 1940-тӥ арын толалтэ вал со. Куатьсэ сӧсырмем удмурт пиосты Череповец городысь Военной госпитале вуттӥзы. Кема ик эмъяса ӧз возе, госпитальлэн начальникез вераз: - Ми тӥледды ӵуказе Ижевске келялом. Гуртады эмъяськоды... Тодӥсько: удмуртъёс отын трос ӟазег вордо. Та кынмылэм пыдчиньыостэс ӟазег кӧйын зыраса бурмытыны быгатоды... Киосмес кутылыса, чылк-чылк удмурт кылын шуиз на: - Ӟеч бертэлэ! Паймимы. Ижевске вуытозямы куспамы вераськимы: "Кин вал со доктор? Кытысь со? Кызьы со удмурт кылэз тодэ?" Бертыны сюрес сётӥсь документмы вылысь гинэ шедьтӥмы на госпитальлэн начальникезлэсь фамилизэ - Воробьев. Со адямилэн сайкыт ымнырыз, визьмо тусбуйез, лад-лад вераськемез мынам йырвизьмам кемалы кылиз. Быдӟым ож бере, выльысь кылдӥз соин пумиськыны. Кытысен, кызьы? Белоруссилэн столицаысьтыз, Минскысь, мыным ыстӥзы выль книга. Солэн вылаз гожтэмын: "Война в краю озер". Авторез - Иван Захаров, Фрунзе нимо партизан бригадалэн азьвыл командирез. Книгалэн огаз страницаяз гожтэмын: "Милям бригадаысьтымы сӥё-дано доктор А. Ф. Воробьев вордскемын Удмурт Республикаысь Шкатувыр гуртын". Кыӵе районын со гурт? Верамын ӧвӧл. Кема гинэ витёно луиз Военно-исторической архивлэсь справказэ. Отысь мыным ивортӥзы: Афанасий Федорович Воробьев вордскемын 1899-тӥ арын Удмуртиысь гуртын, Игра ёросысь Искалмувыр. 1928-тӥ арын со дышетскиз Ленинградысь военно-медицинской академиын. Быдӟым ож вакытэ куинь ар ожмаськиз Белоруссиысь Фрунзе нимо бригадаысь партизан отрядын. Афанасий Федоровичез гуртоосыз ӟеч тодо но буре вайыса возё. Искал Мувырын вордӥськем воргорон Вениамин Петрович Шкляев (али со улэ Игралан) тани кызьы мадиз мыным Афанасий Федерович сярысь: - Ӟуч Педорлэн одӥг гинэ пиез вал. Пинал дырысен ик дышетскыны кутскиз. Докторе потӥз. Аслаз отпускъёсаз арлы быдэ бертылэ вал Искал Мувыре. Бертэ - соку ик висисьёсты эмъяны кутске. "Лыктэлэ мон доры коть нуназе, коть уйшор уин, милям ӧсмы котьку пась". Туж быгатэ вал ас ужзэ лэсьтыны. Эмъямез понна нокинлэсь но копейка но ӧз басьтылы. "Милям Котегуртын улӥсьёс но туж ӟеч тодо на Афанасий Федоровичез. Гужемлы быдэ висисьёс со доры Искалмувыре, эмъяськыны ветло вал". - гожтэ Дэбес ёросысь Котегуртын дышетӥсь Тамара Сергеевна Шихова. Ачиз Искалмувыр гурт ӧвӧл ни, но отын вордскем адямиос уг вунэто гуртсэс. Гужемлэн самой шулдыр нуналъёсаз отчы огазе люкаськыло, гуртооссэс буре ваё. Туж гажаса верало сӥё-дано докторзылэсь нимзэ. Лыдӟисьёслэн юамзы потоз на, вылды: кызьы, кытысен партизанъёс пӧлы шедиз доктор Воробьев? Война кутскон азьын Афанасий Федоровичез 174-тӥ стрелковой дивизилэн санитарной службаезлы начальнике юнматӥзы. Дивизиез келязы Белоруссиысь Росаны доры (Витебск область). Войналэн кыкетӥ нуналаз ик фашистъёс 174-тӥ дивизиез котыртыны шедьтӥзы. Санитарной службалэн начальникез А. Ф. Воробьев чигнаса-чигнаса вуиз Новосокольники станциозь. Отысен юн сӧсырмыны шедиз. Оккупантъёс сое Полоцкысь лагере келязы, пеймыт бараке пытсазы. Ярам, сое отысь лушканы быгатӥзы Белоруссиысь партизанъёс. Ваизы сое Освся ты дурысь посёлоке. Отысен Афанасий Федорович луиз ни партизанъёслэн докторзы. Кӧня-кӧня адямиосты, отын сӧсырмемъёсты со эмъяз, выльысь пыдйылазы султытӥз. Война бере Афанасий Федорович кивалтӥз Лепель городысь военной санаториен. Кык пол ветлӥз Освся ты дуре, партизанъёслэн слётазы. Отчы солэн но кибервылыз кельтэмын. Ты дуре ӝужыт сюй люкамын. Та котырын ожмаськем партизанъёс со сюез ал вылазы нуллыса кисьтазы. Кыдёкысен адӟиське со. "Курган славы" солэн нимыз. Погонъёссэ куштыса, Афанасий Федорович, улыны лыктӥз Москвае. Отын со Военно- медицинской академиын лекциос лыдӟылӥз, госпитальёсын ужаз. Паськыт пельпумо мугор вылысьтыз тӧдьы халатсэ ӧз кыльылы 1972-тӥ арозь ик. Н. КОНДРАТЬЕВ, ожысь но ужысь журналист. Удмурт Элькунысь национальной театр 69-тӥ сезонзэ усьтэ 5 ноябре - Премьера Е. Загребин "Кикы нош силе но силе..." (Кык ёзэн эпической драма) сӥземын К. Гердлы. 10-11 ноябре - Т. Ардашева, Е. Загребин "Тӧдьы льӧмпу улын" (Кык ёзэн лирической пьеса) 12 ноябре - А. Григорьев "Парсьпи но эмеспи" (кык ёзэн комедия). 16 ноябре - Ю. Ким нылпиослы "Кто царевну поцелует?" 17, 27 ноябре - С. Широбоков, Н. Шкляев "Ой, чебер нылъёс" (Кык ёзэн комедия) 23 ноябре - Л. Романов "Любовь не стареет" (Кык ёзэн комедия) спектакль мынэ ӟуч кылын. 25 ноябре - Ф. Буляков "Бызьыны вуэм песяйёс" (Кык ёзэн калык комедия) Синхронъя валэктон мынэ бигер кылын. Спектакльёс кутско 18 часэ. Вазиськыны луэ 78-79-81, 78-45-92 номеро телефонъёсъя. Удмурт Элькунысь национальной театрын - Премьера! 5-6 ноябре - Егор Загребин "Кикы нош силе но силе..." (Кык ёзэн эпической драма) Сӥземын удмур калыклэн быдӟым пиезлы - Куӟебай Гердлы. Пуктӥсь режиссёр - Александр Вершинин Суредась - Удмурт Элькунысь искусство удысысь дано ужась Валентин Белых. Крезьгурчи - Удмурт Элькунысь искусство удысысь дано ужась Евгения Копысова. Эктонъёсты пуктӥсь - Виктор Мингалёв. Кутске 18 часэ. Дэмен учкыны вазиськонъёс кутӥсько. Жингыртоно 78-79-81, 78-45-92 номеро телефонъёсъя. Кун Думае депутатэ кандидатъёслы вазиськон Удмурт Республикаысь Быръёнъя комиссия ивортэ: ивор вӧлмытӥсь ёзъёсын дунтэк но дун тырыса валэктон уж нуэмзылы, Россия Федерацилэн Федеральной Собраниысьтыз Кун Думае одӥг мандатэн быръёнъя округъёстӥ депутатэ кандидатъёслы но регионъёсъя группаен кандидатъёслы пусчӧлтон ортчоз туэ 5-тӥ ноябре 11.00 часысен Удмурт Республикаысь Кун Кенешлэн заседание ортчытъян залэзлэн фойеяз. "Россия Федерациысь Федеральной Собраниезлэн Кун Думаяз депутатъёсты быръён сярысь" Федеральной законлэн 55-тӥ ёзэтэзлэн 1-тӥ но 3-тӥ люкетъёсыз вылэ пыкиськыса, телерадиовещания организациослы но газетлэн редакциоссылы, регионъёсысь группаен кандидатъёслы валэктон уж нуон сярысь дунын яке дунтэк ужаны луонлык сярысь печатламын вал туэ 20-тӥ августэ. Удмурт Республикаысь Быръёнъя комиссия тодады вайытэ: ивор вӧлмытӥсь ёзъёсын дунын валэктон уж ортчытӥське "Россия Федерациысь Федеральной Собранилэн Кун Думаяз депутатъёсты быръён сярысь" Федеральной законлэн 56-тӥ ёзэтэзлэн 14-тӥ люкетэзъя но 57-тӥ ёзэтэзлэн 11-тӥ люкетэзъя. Со понна пусчӧлтон сярысь гожтэт ыстэмын луыны кулэ иворъёсты вӧлмытӥсь ёзъёсы. Удмурт Республикаысь Быръёнъя комиссия. Вуоно арысь ужпумъёс Правительстволэн кенешаз серттӥзы-пертчизы "2000-тӥ арысь ужпумъёсты". Удыссыя быдэстэм ужъёссы сярысь ивортӥзы Югдурез утёнъя, Калыкез улон-вылонын утёнъя, Калыклэсь тазалыксэ утёнъя министерствоослэн тӧрооссы, Национальной банклэн, вытъя службаослэн, казначействолэн, Россия Федерациысь Кышкытлыклэсь утиськонъя службалэн, Горький чугун сюреслэн Ижысь ёзэзлэн, акциосын "Удмуртэнерго" но "Удмурт Телеком" огазеяськонъёслэн кивалтӥсьёссы. Комиссия нимысьтыз решение кутӥз Ижевскын та вакытэ кылдэм югдур но республикалэсь бюджетсэ кылдытӥсь предприятиос пумысен. Юрттэт сётыны чакламын Калыклэсь тазалыксэ утёнъя но Калыклы улон-вылонын юрттонъя министерствоослы. Удмурт Республикаысь Правительстволэн пресс-службаез. Удмурт Республикаысь Кун Кенешлэсь куатетӥ сессизэ люкан сярысь Удмурт Республикаысь Кун Кенешлэн ПОСТАНОВЛЕНИЕЗ Удмурт Республикаысь Кун Кенеш пуктэ: Удмурт Республикаысь Кун Кенешлэсь куатетӥ сессизэ люкано 1999-тӥ арын 30-тӥ ноябре Ижевск городын. Удмурт Республикаысь Кун Кенешлэн Тӧроез А.А.Волков. Ижевск город, 1999-тӥ арын 20-тӥ октябре � 116-ИИ. *** Сессиын эскерыны чакламын Удмурт Республикалэн "Республикалэн 2000-тӥ арлы бюджетэз сярысь" Законлэн инъетэз. Кылзэлэ Финляндиез Туэ 30-тӥ октябрьысен М. А. Кастрен нимо дэменлык Финляндиын кутске удмурт но пор кылъёсын радиоверанъёссэ. Соосты кылзӥсьёс кутыны быгатозы вакчи тулкымъёс вылын ужась приёмникъёсын но спутник пыр. Тулкымъёсты кутыны луоз кӧс нуналъёсы 01.00- ысен 01.10 дыре 6190 килогерц (49 метр) но 558 килогерцъя (538 метр). Арня нуналэ удмурт передачаос чузъяськозы 07.30-07.40 часэ, 558 килогерц (538 метр), 13.30-12.40 часэ, 21670 килогерц (13 метр), 17615 килогерц (16 метр) каналъёс пыр. Иворъёстэс басьтозы дунтэк. Со понна вазиськоно Санкт-Петербургысь Финляндиен культура удысын кусыпъёс возёнъя институтэ. Адресэз таӵе: 191040, Санкт-Петербург, Лиговский проспект, 64, 4-тӥ этаж. Удмуртия ласянь таӵе кичӧлтонэн потӥз магистрат Сергей Максимов. Андрей БАЙТЕРЯКОВ, Эстониысь Тарту городысь университетын дышетскись. Мэре - куать мурт 19-тӥ декабре пӧсь нюръяськон луоз, шӧдске, Глазов городын. Туннэ нуналлы городлэн мэрез луыны мылкыд каре куать мурт. Со пӧлысь кыкез - предприятиослэн кивалтӥсьёссы. Пӧлазы вань на кивалтӥсьлэн воштӥсез, банкын ужась, дышетӥсь. Кин вормоз, адӟом ини улыса. Эмъясько, дышетско, шутэтско Сарапулысь нылпи санаторийын кыкетӥ арзэ ужало покчи классъёсын дышетскись пиналъёс понна группаос. Соос татын тазалыксэс юнматэм сяна, визь-кенеш но люкало. Озьы витьтон нылпиос выль дышетскон арзэс санаторийын мытӥзы. Санаторие лыктэм пиналъёс шутэтскон нуналъёссэс гуртазы но ортчытыны быгато. Ноябрь толэзьысен татын шутэтскыны но эмъяськыны быгатозы ни нырысетӥ классын дышетскисьёс но. В.Андреева. Ужын вылӥ вормонъёс понна Удмурт Элькун Кивалтэтлэсь премиоссэ сётон сярысь Удмурт Элькун Кивалтэтлэн постановлениез 1999-тӥ арын 18-тӥ октябре Ижевск город � 1021 Удмурт Элькун Кивалтэтысь Премиосъя кенешлэсь ужын вылӥ вормонъёс понна премиос сётон сярысь ӵектонзэ лыдэ басьтыса, Удмурт Элькун Кивалтэт пуктэ: 1. 1999-тӥ арын ужын вылӥ вормонъёссы понна Удмурт Элькун Кивалтэтлэсь премиоссэ сётоно: "Леса Удмуртии" книгалэн авторъёсызлэн коллективзылы (О. Г. Баранова), Н. Я. Буераков, Н. Е. Зубцовский, А. К. Григорьев, А. Г. Меньшиков, М. Б. Полозов, В. В. Туганаев, В. А. Тычинин, О. Г. Яковлев); акциен усьтэм амалэн ужась "Буммаш" но "НИИМТ" огазеяськонъёсысь авторской коллективлы (В. В. Жебровский, Д. М. Гурков, В. Ф. Ощепков, А. В. Пехота, А. Н. Шашлова, Н. К. Асямолов, О. Л. Гапеев, А. П. Жуков, О. С. Мурадян, В. А. Савин, В. Л. Исаев, С. И. Дьяков, Ю. М. Крут), анданэз гурын ӵыжатытэк улӥ температураё плазмаен чылкытатонъя оборудованиез уже кутэмзы но промышленностьлэн му вӧй, сиён- юон поттӥсь но машинаос лэсьтӥсь удысъёсызлы ваньбурез шыръясь технологиос но рынокын вылӥ дунъяськись корт вузъёс поттэмзы понна; акциосын усьтэм амалэн ужась "Чепецкий механический завод" огазеяськонысь авторъёслэн коллективзылы (Н. П. Анисимов, А. Л. Белоусов, А. В. Вершинин, В. М. Возисов, С. И. Мацко, А. Н. Толкачев, А. В. Тупицын, Н. С. Ушаков, В. Б. Филиппов, А. В. Чащин), "Глазов городысь 1 номеро ТЭЦ-ез газэн ужатонэ выжтыса но огъя оборудованизэ воштыса, сое выльдон амалъёс" ужзы понна; Игра ёросысь гурт удысъя "Чутырский" кооперативлэн коллективезлы, ужын азинсконъёсыз но пудо вордон удысын бадӟымесь вормонъёсыз понна. 2. Удмурт Элькунысь Коньдонъя министерство Удмурт Элькун Кивалтэтлэн Аппаратэзлы элькунлэн бюджетэз чотын висъяны кулэ Удмурт Элькун Кивалтэтлэсь премиоссэ сётыны 26720 манет но премия басьтӥсьёсты данъя ужрадэз ортчытыны 760 манет коньдон. Удмурт Элькун Кивалтэтлэн Тӧроез Н. А. Ганза. Бюджетэз кутоно ӝегатскытэк! Озьы шуэ бырйисьёслэн Ижевск округзыя Кун Думае депутатэ кандидат Юрий Маслюков. "Куке пӧртэм ужъёслы сокем коньдон кулэ, политикъёсты бюджетэн шудыны лэзёно ӧвӧл" - шуэ Россиысь Правительстволэн азьвыл вице-премьерез. Кутымтэ бюджет коньдонэз тус-тас карыны сюрес усьтэ. Бюджет юнматэмын ӧз ке луы, бюджет удысын ужасьёслэн уждунзы нош ик ватсатэк (индексацитэк) кылёз. Озьы ик коньдон уз басьтэ Чечняын ожмаськись солдатъёс. Юрий Маслюков верамъя, Думаысь куд-ог депутатъёслэн тыршеменызы таяз бюджетын учкемын доходъёсты но расходъёсты 46 миллиард манетлы будэтыны. Озьы ик мукет статьяосты выльысь эскерем бере, 7,5 миллиард манетлы тросгес коньдон висъяны учкемын агропромышленной комплекслы, наукалы но кун инвестициослы. Со сяна, выль сямен учкемын бюджетлэсь доходзэ регионъёслы но центрлы люкон, регионъёслы тупатэмын 48 процент (азьло 47 процент вал), центрлы - 52 процент. Шудо сюресъёс, тӥледлы! Республикаысьтымы Автомобиль транспортын но сюресъёсты возён удысын ужасьёсты сюлмысьтымы ӟечкыласьком асьсэлэн нуналэнызы. Туэ автомобиль транспортъя калык комиссариатэз но Удмуртиысь автомобиль транспортъя кивалтэтэз кылдытэм дырысен тырме 60 ар. Элькунмылэн экономика удысаз но калыклы улон-вылонын юрттэт сётонын тӥляд ужды бадӟым инты басьтэ. Одӥг удыс но автомобиль транспорттэк улыны уг быгаты. Туэ гинэ тӥляд кужыменыды нуэмын-ваемын ог миллион пала грузъёс, 200 миллионлэсь уно адямиос. Автотранспортлэн ужаз азинсконъёс огъя удыслэн ӟеч ужамез бордысь пото. Соин ик туала вакытэ кылдэм шуг-секытъёсты палэнтыны луэ огсыр ужамен гинэ. Вылаз ик, тӥ азьлозэ лэсьтэм сюресъёсты возьыны быгатэм сяна, лэсьтӥськоды выльёссэ но. Оскиьком, автмобиль транспортын но сюресъёсты возён удысын ужасьёс азьланяз но озьы ик тыршозы шуыса, соос азьланяз но вылӥ данлыкен быдэсъялозы азязы пуктэм ужпумъёсты. Вань сюлмысьтымы та туж кулэ ужады азинсконъёс сӥзиськом. Тӥледлы но ӵыжы- выжыостылы юн тазалык, тупаса улон, лякыт мылкыд, вань малпанъёсты уж вылын мед быдэсмозы. Удмурт Республикаысь Кун Кенеш. Удмурт Республикаысь Правительство. СПОРТ Шуркынмон толэзьлэн пумаз Пензаын ортчоз спортивной гимнастикая чемпионатлэн финал люкетэз. Отчы мыныны сюрес усьтӥськиз Ижысь гимнастъёслы но. Шоркарамы алигес ортчем зональной ӵошатсконъёсын асьме нылъёслэн но пиослэн командаоссы нырысетӥ интые потӥзы. Вылӥ быгатонлыксэс возьматӥзы Дмитрий Васильев но Александр Соловьёв. *** Дуннеысь 400 пала спортсменъёс люкаськылӥзы Словение. Марафон сюресэз татын ваньмызлэсь ӝог ортчиз Ижысь Алексей Белослудцев. Озьы эшшо одӥгез воргоронмы возьматӥз: кузь сюрес вылын удмурт пиосмы кужмоосыз. М. Кузьмин. Данъясько спортсменъёсынызы Та нуналъёсы Завьялово ёросысь нылпи спортивной школалы 20 ар тырме. Нырысь ик та школа кылдытэмын вал Бабиноын, нош солэн ёзъёсыз ужазы Лудорвай, Якшур, Ягул, Завьялово но Совхозной школаосын. Покчи нылъёслы но пиослы тренировкаос ортчытъязы куасэн бызьылонъя но биатлонъя. Пиналъёслэсь тазалыксэс юнматонын- кыдатонын куать тренер тыршиз. Аръёс ортчемъя, нылпи спортивной школаез выжтӥзы райцентре. 1985-тӥ арысен ик бадӟымесь воштӥськонъёс ортчизы. Кивалтӥсе ӧтизы Асаново совхоз-техникумысь Георгий Булычевез. Ёросысь 16 школаын ужаны ӧдъязы нылпи спортивной школалэн ёзъёсыз. Нош "Россия" колхозлэн кивалтӥсез А. Д. Ершов юрттӥз солэсь материальной инъетсэ узырмытыны. Туннэ нуналлы Завьяловоысь нылпи спортивной школаен кивалтэ Удмурт Республикаысь физической культура удысысь дано ужась Феликс Анатольевич Перевозчиков. Та школа ёросысь ӵошатсконъёсты ортчытонъя центр луэ. Татын дышетско но тодон-валанзэс будэто на ёрос школаосысь физкультураен дышетӥсьёс но тренеръёс. Ужало капчи атлетикая, куасэн бызьылонъя, волейболэн, футболэн но баскетболэн шудонъя секциос. Данъясько завьялъёс асьсэ спортсменъёсынызы но. Чайковский городын улэ спортъя калык куспо классъем мастер, Бабиноын будэм биатлонист Владимир Бектуганов. Со сяна, вань на куасэн бызьылонъя спортъя куинь мастерзы, спортъя мастере кызё мында кандидатсы но трос гинэ нырысетӥ, кыкетӥ но куинетӥ разрядэн спортсменъёссы. Бен, 20 ар сокем бадӟым ик лыдпус ӧвӧл, нош быдэстэм ужъёсъя но та школа пыр потэм спортсменъёсъя учкыса, вань маин данъяськыны. Н. ИВАНОВ. Устоосыз пӧлысь устоез Тау тыныд, водитель! Автобусысь васькыса, ӵем-а меда вераськом та кылъёсты? Ум, дыр, тодамы но уг лыкты. Котькудмы уго дыртӥськом ас ужмыя, нош уж бере - шуныт коркаосамы, квартираосамы. Водитель дораз бертэ, городысь ульчаос чалмыса, уйшор бере гинэ. Кӧня сю, сюрс муртэ туннэ нуиз-ваиз, кӧняезлы шумпотон кузьмаз - ачиз но уг тоды. Солэн арифметикаез одӥг: графикез дыраз быдэсъяно, минутлы но ӝегатсконо ӧвӧл. Городын ужась транспорт азьын уго куронъёс чурытэсь, татын котькуд метред секундъёсын лыдъямын. Пассажиръёс понна со туж умой. Виталий Ювенальевич Цыгвинцев 21 ар ӵоже Ижевскын улӥсьёсты но куноосты нуэ-вае ни. Сое ӟеч тодо 14-тӥ, 17-тӥ автобусъёсын ветлӥсьёс. Кӧня пассажирлы шуд усиз меда та синмаськымон водителен сюрессэ ортчыны - нокин уз вера. Со ачиз но уг, дыр, тоды, кӧня адямиез нуиз-ваиз ни, ИПОПАТ-ын ужатозяз. Янгышаськем. Ижевскысь автотранспортной производственной объединениын котькуд водительлэн - аслаз "досьеез". Самой со ик возьматӥз Цыгвинцевлэсь но "груззэ". Кылем арын, кылсярысь, Виталий Ювенальевич нуэм-ваем 248 сюрс муртэ, валля арын - 215 сюрс. Нош берло куать арзэ ӵош ватсано ке, огъя лыдпус миллионэз ортче. Нош 21 ар ӵоже кӧня миллион меда люкаське? - Уг тодӥськы, со сярысь малы ке ноку но ӧй малпаськылы,- кепырасагес пальпотӥз В. Ю. Цыгвинцев. Синмаськымон, востэм сямо водителен пумиськылыны кылдӥз ӵапак вордскем нуналаз, 20-тӥ октябре, нуназеян куспын. Талэсь азьвыл гинэ со пусъемын вал Россилэн вылӥ наградаеныз - "За заслуги перед Отечеством" орденлэн ИИ степенё медаленыз. Республикаысь автотранспорт удысын ужасьёс пӧлысь сыӵе шуд усиз кык муртлы. - Ачиз сярысь ноку но уз вера, мултэс возьдаськись со милям,- азьло ик вераз Виталий Ювенальевич сярысь предприятилэн профкомезлэн кивалтӥсез А.Б. Ильина.- Нош кыӵе ужа! Кӧня егитъёсты та дыр куспын дышетӥз ни. Газетэ одно ик со сярысь гожтоно. Алевтина Борисовналэн кылъёсыз борды итӥськиз кадръёсъя отделлэн начальникез Лидия Викторовна Блинкова: - Милям коллективмы бадӟым, ог 2 сюрс мурт. Со пӧлысь вылӥ наградаен пусъемын Цыгвинцев гинэ. Озьыен, та адями котыр ласянь адӟем карымон. Ӟеч ужамез понна Виталий Ювенальевичлы трос пол сётъямын ни Данъян грамотаос, синпель кузьымъёс, пусъемын "За работу без аварий" знакен, 1997-тӥ арын солэн нимыз пыртэмын вал республикаысь Данъян пул вылэ. Эшез сярысь шуныт кылъёс гинэ вераз Владимир Александрович Чубуков, 3-тӥ колоннаысь механик: - Виталий Ювенальевичен ӵош трос аръёс ӵоже ужаськом ини. ЛиАЗ-677 автобусэн 17-тӥ автобуслэсь сюрессэ ми ас поннамы стратегической маршрут шуыса нимаськом. Пассажиръёсмы уго ваньмыз сямен я висисьёс, я пенсионеръёс. Калыкез вазь ӵукнаысен бер ӝытозь уг бырылы. Цыгвинцев понна мон шумпотӥсько: котькытын со мед ужалоз - адямиосын огъя кыл ӝог шедьтоз. Семьяез но котыр ласянь адӟем карымон. Алигес улыны выжиз выль квартирае. Сётӥз предприятие. 54-13 номеро автобусэз адӟиды ке, тодэ: руль сьӧрын пуке Ижевскысь огез устоез водитель. Кондукторъёс со доры вожмаськыса мыно: оскымон адями. Эшшо одӥг "ватоссэ" шараяло на: Виталий Ювенальевич туж яратэ куноятыны, ачиз ик пӧра, ӝӧк выл дася. Чорыганы но соин ӵош потаськом. Огпол, бер уин бертыкумы, сюрес вылысен машинамы тӥяськиз. Но "зарни киослы" номыр кышкыт ӧвӧл: мугзэ ӝог шедьтӥз. Гуртэ умой вуим. Малпасько: азьланяз но чорыганы поталом на. Сыӵе вакытэ адямиос эшшо но юнгес ог-огзы борды кыстӥсько, ог-огзэс ӟечгес валало но дунъяло. Цыгвинцевен самой секыт сюрес но вакчи, зоро куазь но шундыё потэ. ИПОПАТ-ын трос ӟеч кылъёс кылӥм Чубуков сярысь но. Та коллективын со 23 ар ини. Якшур-Бодьяын вордскем удмурт воргорон ас интызэ шедьтӥз, гажамон адями луиз. В. Ю. Цыгвинцев вераськеммы бере нош ик дыртӥз автобусэз доры, аслаз тодмо маршрутаз. Со нош ик пальпотыса ӟечбуръяськиз тодмо но тодмотэм пассажиръёсын, больницае вуттоз секыт висисьёсты, сад-бакчаосазы нуоз арлыдоосты. Городэ берытскоз сяськаосын, сӥзьыл емышен тырмытэм рейсэн. Кин ке но солы капчи мылкыдын кузьмалоз ӵыж-горд пиштӥсь астраоссэ, кин ке утялтоз кисьмам улмоеныз... Самой бадӟымез дунъет - сюлмысь потэм тау карон кылъёс. Ойдолэ сое ӵемгес вералом руль сьӧрын пукисьёслы, асьмеды нуись-ваисьёслы. ... Нош Цыгвинцев понна вордскем нуналэз но, награда басьтэмез но кемлаз кузпалызлэн операция ӝӧк вылэ шедеменыз. Нюромем синъёсыз пыр со пальпотыны тырше. Сыӵе ини водительлэн ужез - секыт малпанъёстэ гуртад кельтоно, соку сюресэд но каньылэн сётскоз. Шуд но тазалык тӥледлы, Виталий Ювенальевич! Улонады но, семьяяды но ваньмыз умой мед луоз. Л. МЕДВЕДЕВА. * ИПОПАТ-ысь огез устоез водитель В. Ю. ЦЫГВИНЦЕВ. * Механик В. А. ЧУБУКОВ. шӧкыч Федор Миннигараев Эскеризы Александр Перлюклэсь адӟем карыса - Сыл! Сыл, шуисько! - Сылӥсько. Мар-о луиз? - Таможня. Ми тӥледыз эскером. - Кызьы эскероды? Кыӵе таможня? Азьло та урамын номыр но ӧй вал. - Азьло ӧй вал, табере луоз. Уд тодӥське шат, быдэс Россиез террористъёс зуркатыса возё. Мар вань сумкаяды? - Тӥледлы мар кулэ? Мон бандит ӧвӧл. Мон ужысь гуртэ бертӥсько. - Трос эн супыльтэ! Ми ужын, вератэк но ыбомы! - Валай. Шып улӥсько. - Мар сумкаяды? - Номыр но ӧвӧл. Ма, пичияк колбаса - 350 грамм. - Справкады вань-а? - Кыӵе справка? - Колбасады тазалыко пудо-животлэсь лэсьтэмын шуыса документты луыны кулэ. Оло, со тӥляд сифилисэн висись парсьлэсь лэсьтэмын. Соин сюдыса кинэ ке виыны, оло, ӧдъяськоды?! - Мар тӥ, мар тӥ? Со умой колбаса. Ческыт. Тани оскалтэ. - Эшшо одӥг пол юаськом на: справкады вань-а? - Ӧвӧл. - Туж урод. Колбасадэс талано луомы, культурно вераса, конфисковать каромы. Марды эшшо вань на? - Няне. - Няньдэс но басьтӥськомы. Малпаське ай: колбасады ӧвӧл ке, малы тӥледлы нянь, шонер-а верасько? - Уг тодӥськы. - Со понна ми тодӥськомы. - Валютады вань-а? - Кыӵе валюта?! Мар тӥ?! Учке тани асьтэос, манетъёс гинэ. - Малы тӥледлы коньдон? Оло, долларъёс басьтыны дасяськиды, яке маркаос, собере законэз тӥяса, кунгож сьӧры келялоды. Ӧвӧл, ум лэзе! Вае милемлы. - К-к-кызьы? С-с-со мынам коньдонэ. - Номыр ум тодӥське. Милям ужмы сыӵе. Курткады кытысь? - Базарысь басьтэмын. - Кытын вуремын, шуисько? - Уг тодӥськы. - Вай, учком. Гожтэмын кыӵе ке иероглифъёсын. Озьыен, Китайысь, импортной. Мар-о тӥ, гражданин, асьмелэсь сотэк но ляб экономикамес куашкатӥськоды? - Мон-а? - Бен, бен, тӥ. Шузи эн кариське! Уд валаське шат: кунгож сьӧрысь вузъёсты басьтыса, тӥ Россиын улӥсьёсты ужтэк кельтӥськоды. Валамон-а? Куштэ курткадэс! - Валай, тани басьтэ. - Нош дэремды кытысь? Штанды кытысь? - Ваньмыз кунгож сьӧрын вуремын. - Кыле! - Нош т-т-трусик? - Кыӵе трусик? - М-м-мынам трусике. Со - Италиысь. - Я, мар-о тӥ, ми адямиос ӧвӧл кожаськоды-а? Мынэ бертэ. Но та учыр сярысь нокинлы но эн поттылэ. Трусикты импортной ук. Инструкциез тӥяммы понна милемыз ужысь уллялозы. - Я, мар-о тӥ, монэ шузи кожаськоды-а? Пал кыл но уг поттылы. Чорыг кадь шыпыт уло. Шӧкыч Галина РОМАНОВА Тушмон уг кӧл Серемес верос Илья Петрович ужысь бертӥз но котьку сямен ӝӧкысьтыз кагаззэ поттӥз. Отын куинь бам вылын нимтулъёс гожъямын. Соослэн пумазы йылтӥз: Фёдор Николаевич - мон сярысь вылӥ кивалтӥсьёслы лушкемен чагиськылэ. Собере быдэс списоксэ кутсконысеныз пумозяз учкыса потӥз но йырыныз сэзъяса шуиз: - Эх, улон шу! Нокинлы оскыны уг луы ни. Тушмон вылэ тушмон. Тани Алексей Осипович умой адями вал кадь. Ӧз яра юрттӥсьын ужаны, Илья Петрович интые пуксемез потӥз. Ярам, кырсь малпанъёссэ дыраз шӧдӥз, ужысь куштӥз. Собере Сергей Викторовичез но сьӧраз улляз. Таиз воксё ашкынӥз. Пырак синмаз тон кей нумыр шуиз ведь. Роман Васильевич... Таиз кӧтурдэстӥз шоканы кутскиз. Ничего, кема уз лӧптылы ни, Фёдор Николаевич сьӧры ик кошкоз. Нош кинэ пуктоно меда Фёдор Николаевич интые? Валтӥсь бухгалтерлэсь картсэ Леонид Михайловичез шат? Воргорон востэм, йырзэ мыкыртыса небытак пальпотоз. Винаез, конечно, яратэ, но туала арын сое кӧтсы висисьёс но буш кисыос гинэ уг юо. Собере вина кылэз сэрттэ. Леонид Михайловичен ӵош одӥг ӝӧк сьӧрын пукылӥзы ке, тушмонасьёссэ но ӟечгес тодыны быгатоз. Валтӥсь бухгалтер но солэн кузпалыз... Дугды ай, дугды, вот шуккем йыр! Ма, соос, ӵош кариськыса, коньдонэн олокыӵе но лушкем ужъёс лэсьтыны быгатозы ук. Собере милиция, тюрьма... Григорий Владимировичез ке шат пуктоно? Дышетскемез, конечно, ӧжыт. Но али солэн сокем кулэез но ӧвӧл ни, адямиез гинэ оскымон мед луоз. Григорий Владимирович... Мугорын - ӝужыт, веськыт, ымнырын - чылкыт. Лыктозы, шуом, кунгож сьӧр куноос, тузӥ нылкышноос... Ӧвӧл, ӧвӧл, уз тупа. Йыр со котькытын котьку йыр ик мед кылёз - ужасьёсызлэсь вылӥын, кыдёкысен адскымон, матысен учкымон. Вӧзад юрттӥсед аслэсьтыд йӧно медаз адӟиськы... Кыӵе ке заслуженной пенсионерез шат кутоно? Чал-чал пукоз, вуӵкетэмзэ кылзӥсез, пеляз понӥсез уз луы. Озьы ик кароно - Фёдор Николаевич интые пенсионерез пуктоно... Списокен кагаз вылаз тазьы тунаса пукыкуз, Илья Петровичлэн кышноез пыриз. Магазинэ, пе, ветлӥ. Паймод та нылкышноосын. Илья Петровичлы ваньзэ мар кулэ гуртаз ваё, нош со магазинэ ветлэ. Азьвыл дышем сямызлэсь нокызьы но куштӥськемез уг луы. Магазинэ потатэк, пе, сюлэмыз интыяз ӧвӧл. Илья Петрович кышноез шоры мыр-мыр учкиз: йырсизэ тӧдьмам, бабыльтэм, синъёссэ наш-наш буям, чиньыосаз - зарни зундэсъёс, пеляз - бриллиантэн азвесь пель угы, чыртыяз - марӟан чыртывесь. "Магазинэ тазьы тузӥ уд ветлы, - ас понназ малпаз Илья Петрович. - Оло, лушкем гажанэз вань?" Кышноез мукет комнатае кошкем бере, ӝӧкысьтыз списокен кагаззэ поттӥз но гожтӥз: "Кышно - паллянэ ветлэ кадь, сьӧраз чакласькись пуктоно". Илья Петровичлэн нылыз шок-пуль шокаса пыриз. Бамыз ӵыжектэмын, мылкыдыз - шукыяське. Экзаменме, пе, "витьлы" сётӥ. "Таӵе берозь экзаменын уг ветло, - нылыз шоры мыр-мыр учконъяз малпаз Илья Петрович. - Кышноос - пеймыт нюлэс. Кытчы, кудпала йыромытэмзэс уд но вала. Собере гырпумдэ куртчыны турттод на но, уд сузьы". "Ныл алдаське, чакласькись пуктоно" - списокезлэн пумаз гожтӥз Илья Петрович. Нылыз но кышноез кӧлыны выдэм беразы но Илья Петрович тушмонъяськисьёсыныз списокез кема учкыса пукиз на. Собере таӵе малпанэ вуиз: юрттӥсьёссэ но ужасьёссэ ваньзэс воштоно. А то одӥг тушмон вӧзы кыкетӥез, куинетӥез кылдоз-алялоз. Нылыз кадь егитъёссэ, соку гинэ институтэз быдтэмъёссэ кутоно. Ӵуж тютюпиос сьӧраз котькытчы мынозы, ымаз учкыса улозы. Ӟеч амал шедьтэмезлы шумпотыса, Илья Петрович назьыльскиз, вушйиз но ӝӧк сьӧрысьтыз султӥз. Кӧлыны выдон азяз душе пыриз - мылкыдыз эшшо ӝутскиз. Кот мугорзэ ӵушконэн ӵушылонъяз синучконэ учкиз но кӧшкемаз. Мар та таӵе, кин со?! Шораз учке кырыжам ымо, шер-тур пештырскем йырсиё, питырскем синмо, паськыт ымныро зӧк воргорон. Мар адӟон та, кыӵе тушмон гуртазы но вуэм! Бызьыса сямен ӝӧк дораз мынӥз, списоксэ поттӥз но гожтӥз: "Синучконэз ӵуказе ик воштоно. Квартира азе возьмаськись пуктоно". 31 октябре - автотранспортын ужасьёслэн нуналзы Городын улӥсьёс пӧлысь кин меда тужгес но вазь султэ? Гуртын, соиз котькинлы тодмо - скал кыскись, нош городын - водитель. Гужем соос сюрес вылэ пото ни шундылэн нырысетӥ тылсиосыныз ӵош, сӥзьыл но толалтэ - ӵук ӟардонэз азьпалтыса. Нап пеймытэз вандыса, шаермылэн пӧртэм сэрегъёсаз дырто "икарусъёс" но "лиазъёс", "лазъёс" но "пазъёс". Котькыӵе куазен, котькыӵе вакытэ соос асьме доры дыраз вуыны сюлмасько. Туннэ, праздник азьын, бадӟым тау карем потэ ваньмызлы, кин нуналлы быдэ пуксе руль сьӧры. Сӥзём соослы вольыт сюрес но юн тазалык. Азьпалады котьку мед пиштоз вож тыл! Вакчияк Ижевскын нырысетӥез автобус сюрес усьтӥськиз 1932-тӥ арын июнь толэзе. Городын соку 3 автобус вал. Соос ветлӥзы одӥг маршрутъя: "Ижмаш" ДК-М. Горький ульча-Киров ульча-Октябрьлы 50 ар площадь, Советской ульча-Казанской вокзал. 1934-тӥ арын автобус сюрес герӟа Ижевскез Якшур-Бодьяен, Играен, Чепца станциен. 1940-тӥ арын городысь автобус маршрутлэн кузьдалаез вуиз 11 иськемозь, пригородъёсын - 556 иськемозь. 1941-тӥ арын шофёръёслэсь курсъёссэс йылпумъязы 28 нылъёс. Соос воштӥзы фронтэ кошкем водительёсты. Быдӟым Отечественной война аръёсы Удмуртие одӥг выль машина но ӧз вуы, ванез но водительёсыныз ӵош оже келямын вал. Туала "Удмуртавтотранс" огазея 13 предприятиез. Калыкез нуэ-вае 961 автобус, усьтэмын 344 маршрут, Удмуртилэн палэназ - 10 маршрут. Соос ваё ӵук ӟардонэз Автомобильной транспортын ужасьёслэн профессиональной праздниксы азьын газетлэн корреспондентэз пумиськылӥз "Удмуртавтотранс" государственной унитарной предприятилэн генеральной директорезлэн нырысетӥ воштӥсеныз Анатолий Петрович Кузнецовен. Вераськонмы, валамон ини, кутскиз та удысын кылдэм туала югдур сярысь. праздник азьын ӟечез сярысь гинэ гожтэм потэ ке но, шугъяськытӥсь ужпумъёслэсь нокызьы но палэнскыны уг луы. - Анатолий Петрович, газетмес лыдӟисьёс пӧлысь котькудӥз сямен герӟаськемын мынон- ветлон сюресэн. Озьыен, тӥляд шумпотонды яке шуге-леке вуонды шӧдӥське ми вылын но. Ма возьма асьмеды азьланяз? - Странаын югдур оглом ӧз ке тупатскы, жаляса верано, ӟечсэ возьманы номыр. Сюрес ялан дуноялоз, автотранспорт арысь аре вужмоз, кулэсмоз. Одӥг тонна бензин туннэ сылэ ни 7100 манет, август толэзьысен гинэ со кык поллы ӝутскиз. Таин валче городын мынон-ветлон будӥз 1 манет но 50 копейкаозь. Ар йылпумъяськытозь, эстӥськонлэн дуныз 10 сюрсозь но вуоз. Соин ӵош нош ик билетъёс дуноялозы. - Котьма ке но, палэнысь вуэм куноос Ижевскысь транспортлы синмасько: автобусъёс асьме дорын, куд-ог городъёсын ӵошатыса, дыраз но ӵем ветло. Озьы ик райцентръёсы, городъёсы мынӥсь маршрутъёсын. - Шуг-секытъёс шоры учкытэк, ми вань луонозэ лэсьтӥськом, азьвыл аръёсы усьтэм маршрутъёсты утён вылысь. Туннэ нуналлы, сое шумпотыса пусйисько, огзэ но соос пӧлысь ӧм быдтэ, куд-ог рейсъёсты гинэ кулэстӥм. "Удмуртавтотранс" туэ Правительстволэн нимыныз интыосысь вань администрациосын ӵош социальной маршрутъёсты утён сярысь огкыл гожтӥз. Со быдэсъяське. Калыкез нуон-ваёнын умой ужа ИПОПАТ (пассажиръёсты нуон-ваёнъя Ижевскысь производственной объединение), Сарапулысь, Воткинскысь, Глазовысь, Уваысь, Играысь автотранспортной предприятиос. - Кызьы юрттэ та ласянь Правительство? - Городысь но солы матысь маршрутъёсъя арлы быдэ висъяське дотация. Туэлы, кылсярысь, чакламын вал 32 миллион манет, туннэ нуналлы со пӧлысь вуэмын 16 миллион 600 сюрсэз, пусъемлэн ӝыныез. Таиз но - бензинэн. Эстӥськон ваньмыз кошке предприятиослы, нош "улэп" коньдон поттыны выриськом ни пӧртэм амалъёс пыр. - Анатолий Петрович, август толэзь автотранспортэз нуисьёслы сьӧд адӟон "кузьмаз", кызьы чидаз сое "Удмуртавтотранс"? - Секытэн. Озьы ке но, одӥг автобус но сюрес вылэ потытэк ӧз кыльы. Зэм, куд-ог рейсъёсын ӝеган учыръёс вал, соос кылдӥзы эстӥськонлы черодъёсын сэрен. Республикаын бензин ӧвӧлэн, ми ӝегатскытэк келям бензовозъёсты бускельёсмы доры - Башкортостанэ, Оренбург областе, Пермьысь Верещагино посёлоке. Соос уен-нуналэн ужазы, эстӥськон дыраз вуттӥзы. - Удмуртиысь автотранспорт туэ пусъе 60 ар тырмон юбилейзэ. Та дыр ӵоже трос гинэ умоез но вал солэн ортчем сюресаз. - Сӥё-дано юбилеймы тупаз август нуналъёсы, ӵапак 1939 арын август толэзе РСФСР- ысь Калык комиссариатлэн постановлениеныз Удмурт Республикаын кылдытэмын вал автотранспортной управление. Со огазеяз Ижевскысь но Сарапулысь кык автоконтораез. Отысен кутскон басьтӥз туала "Удмуртавтотранс". Вордскем нуналмес дыраз пусйыны ӧм быгатэ, выжтӥм 31 октябрьлы. Озьыен, вуоно праздникмы кык полэс луоз. Предприятимылэн туж ӟеч вакытъёсыз но вал, уката но 70-тӥ аръёс. Соку республикае вуизы чебересь "Икарусъёс", арлы быдэ выльдӥськизы автопаркъёс. Туннэ, жаляса верано, ушъяськыны номырин. Самой "вылезлы" "Икаруслы" тырмиз ни 10 ар. Коньдон уг тырмы асьме дорын потӥсь автобусъёслы гинэ но, самой пичиоссэ вератэк. Нош таосыз вылын кыдёке уд вуы: салонын кезьыт, пуконъёссы чурыт, "Икарусэн" уд ӵошаты. - Бускельёсынымы ӵошатыса, кин али умойгес улэ-вылэ? - Башкортостан, Татарстан. Соос ӵыж-выль, ӟеч автобусъёсын ужало. Нефть чотын коньдонзы люкаське. Асьмелэн ПАЗ-3205 маркалы сяна уг тырмы. - "Удмуртавтотранс" туннэ кыӵе регионъёсын автобус маршрутъёс возе? - Кызьы верай ни, республикалэн палэназ дас сюрес усьтэмын: Пермь, Набережные Челны, Уфа, Нефтекамск, Нижнекамск городъёсы, со сяна, кулэ дыръяз ыстӥськом Москвае, Казане но музон интыосы. Мылкыд вань вылэм выль маршрутъёсъя но ужаны - ӧвӧл луонлыкмы. Бускельёсмы пӧлысь Ижевске пырало Уфаысь, Пермьысь, Нефтекамскысь, Оренбург областьысь автобусъёс. - Нош билет дунъёс кытын дунтэмгес? - Тарифъёсъя ке учконо, Уфаын. Отын мынон-велон сылэ 1 манет. Но городысь транспорт туж шер ветлэ, соин ик сюрес вылэ потон коммерческой рейсъёсын кык поллы дуногес усе. Алигес билет дунзэс 2 манетозь ӝутӥзы Казань но Киров. - Анатолий Петрович, шуг-секытъёс улонамы тырмыт, озьы ке но, асьмелэн автотранспортмы умой ужа на, шуыны луоз. Со понна бадӟым тау карыны кулэ, дыр, котькуд водительлы, слесарьлы, кондукторлы, ваньмызлы, кин туннэ тырше та удысын. - Коллективмы милям туж бадӟым - 5,5 сюрс адями ужа республикаысь автотранспорт предприятиосын. Соос сюлмаськемен, уен-нуналэн тыршемен, туэ 8 толэзь ӵоже гинэ 900 сюрс тонналэсь ятыр груз нуэмын-ваемын, поттэмын 24 миллион манетлы доход, нуэмын- ваемын 181 миллион 179 сюрс адями. Уг ваты: та лыдпусъёс - данъяськымонэсь. Праздник азьын вераме потэ устоосыз пӧлысь устооссэ ужасьёсмес. 1969 арысен ИПОПАТ-ын слесарь луыса тырше Николай Николаевич Скоробогатов, синмаськымон ужа Воткинскысь АТП-ын И классъем водитель Валентин Андреевич Лопатин. Пусйыны кулэ Играысь слесарез Борис Алексеевич Опаринэз, Ижевскысь Центральной автовокзалысь диспетчерез Евгения Анатольевна Петроваез, татысь ик сменалэсь кивалтӥсьсэ Любовь Дмитриевна Кукаркинаез, Уваысь водителез Валерий Павлович Сюрсинэз, Игра АТП-ысь директорлэсь воштӥсьсэ Михаил Васильевич Максимовез но трос мукетъёссэ. Сюлмысьтым ӟечкыласько соосты басьтэм азинсконъёсын, сӥзисько улоназы ваньзэ умойзэ гинэ. Вуись праздникен, гажано эшъёс! Анатолий Петрович Кузнецов. Бамез дасязы Людмила Медведева, Владимир Камашев (фото) Гуртэ мынам, гуртэ Дэбес ёросын сизьым пумиськон пӧлысь тужгес вунонтэмез, тулкымъяськытӥсез вал вордӥськем Яг гуртаз, гольык пыдын бызьылэм азбараз вуылон, кытын вуоно композитор адӟиз мумы-бубыезлэсь вешамзэс, яратэмзэс, отын ик ас вылаз шӧдӥз сирота пиналлэсь куректонзэ, оген мӧзмонзэ. Анаез висьыкуз шуылӥз: "Мусо пие, шуг луоз ни улонэд. Юн урод луиз ке, ӧть монэ, мон лыкто..." Тямыс аресъем пи зэм но солы оскиз, уин шайвылэ мынылӥз но мумизлэн-бубизлэн шайгуоссы вискын культо вылын кӧлалляз, ӧз кӧшкема - вӧзаз вал яратоно адямиосыз... Али нош ик гуртоосыз нуллӥзы сое шайвылэ. Геннадий Михайлович йыбырттӥз анаезлы- атаезлы, улон сётэмзы понна тау кариз, кирос понӥз, молитва чирдӥз... Нош вордскем азбараз кырӟаз трос удмуртъёс понна яратоно луэм кырӟанзэ: "Гуртэ мынам, гуртэ..." Отын со воксё мукет сямен кылӥськиз: адӟиськиз кадь азбаретӥ бызьылӥсь пичи пи... Бакча берысьтызы бадӟым пужым улын вордскытэм пизэ анай. Табере пересь писпу ӧвӧл ни. Со интые Геннадий Михайлович мерттӥз пинал пужым. Нош Тыловайысь лесничество ас доразы вордскем композиторлэн 70 ар тырмонэзлы сӥзьыса мерттэм быдэс гектар пужым, отчы пусйиллям но со сярысь. Кема сылӥз крезьгурчи Ита шур дурын но. Ӵапак со вадьсын, кытын вал вукозы, кытын атаез пызь изылӥз. Али со интыын ву гинэ бергаса-поръяса кошке... Дэбес музъем вылын пумиськонъёс йылпумъяськизы ёрос культура юртын бадӟым концертэн. Г. М. Корепанов-Камскийлы та ӝытэ сётэмын вал Дэбес ёросысь дано гражданин ним. М. ГАВРИЛОВА. Ӟеч вакытлэн тылыз пиштэ на Асьмеос дышемын ни тупатэм дыре, час кадь, ветлӥсь город транспортлы. Куд-ог городъёсы вуылэм бере, соин но, лэся, асьмелэн Ижевскмы эшшо но но дуногес, ӟечгес потыны кутске. Мынон-ветлон дуноя шуиськом ке но, со самой кышкытэз ӧвӧл на. Кышкытэз - автотранспортлэн кулэсмемез, маршрутъёсты пытсан. Та адӟон Удмуртие ӧз вуы на. Со понна йыбырттыны кулэ "Удмуртавтотранслы", Ижевскысь пассажиръёсты нуон-ваёнъя предприятилы, вакчияк вераса, ИПОПАТ-лы. Та коллектив вылын возиське республикамылэн столицаез но город котырысь гуртъёс. Али малпаны но кышкыт, син азе но пуктыны шурдыт: кызьы улоз туала адями автобустэк яке троллейбустэк? ИПОПАТ-эн али кивалтэ М. И. Копысов. Солэн самой бадӟымез сюлмаськонэз - утёно автопаркез, таин ӵош вань умойзэ, ма лэсьтэмын вал предприятиын ужасьёс понна социализм вакытэ. ИПОПАТ-ын азьвыл сямен ик, бадӟым инты басьтэ профком. Солэн уженыз 20 арзэ вошъяськытэк кивалтэ визьмо, чупрес сямо кышномурт - Алевтина Борисовна Ильина. Коллективлэн шорсюлмыз оскемын нылкышнолы, озьыен, сое татын гажало, дунъяло, сюлэмшугзэс но, шумпотонзэс но профком кузёлы верало. Сыӵе малпанэ вуоно, Алевтина Борисовна доры дугдылытэк пырись-потӥсьёс шоры учкыса. Огез куре профилакторие путёвка, мукетыз куриське отпуске, куинетӥез тау каремзэ вераны лыктэм. Профсоюзлэн кивалтӥсез огзэ но куспетӥ уг кары, котькуд адямиез пумозяз кылзоз но одно ик юрттыны тыршоз. Тӥни ма понна гажало сое водительёс но кондукторъёс, огшоры ужасьёс но кивалтӥсьёс. Туала вакытэ тросэз коллективъёс профкомлэсь кулэлыксэ уг адӟо ни: кин, пе, туэ кылзэ на огшоры адямиез? Кинлы кулэ солэн шугъяськонэз, ёрмонэз. Ижевскысь автотранспорт предприятиын югдур мукет, татын али но пиштэ на, шуыны луоз, ӟеч вакытлэн ӝуатэм тылыз. ИПОПАТ утьыны быгатӥз профилакторийзэ, нылпи комбинатъёссэ, библиотеказэ, сюлмаське но быгатэмезъя юрттэ пенсие потэм ужасьёсызлы. Солы-а уд шумпоты! - Коллективамы 2 сюрс водитель но 700-лэсь ятыр кондукторъёс ужало. Соос пӧлысь устоосызлы "Голубой вагон" профилакторийын шутэтскыны но тазалыксэс юнматыны толэзьлы быдэ 25 путёвка висъяськом. Та сяна, тужгес но кулэяськисьёсызлы 15 процент дунзэ тырыса сётӥськом путёвкаос "Ува" но "Металлург" санаторийёсы. Пиналъёсмы понна ужа кык нылпи комбинат. Путёвка отчы дунтэк висъяське, улэмзы но сиськемзы понна мумы-бубыос тыро ӝыны дунзэ гинэ, ӝынызэ предприятие ас вылаз басьтэ. Нылпи садысь потыса, пиналъёс ваньмыз сямен мыно лицей классъёсы но гимназие. Солы дасяськон кутске ни садикысен ик. Воспитательёсмы милям умоесь, пиналъёсты пичиысен дышето нимысьтыз программая. Отын вань хореографияя но англи кылъя часъёс, ужало кружокъёс. 172 номеро нылпи комбинатын бадӟым саклык висъяло мугорез кыдатонлы. Кызьы пусйим ни, автотранспорт предприятилэн туж узыр библиотекаез. Художественной литература сяна, татысь лыдӟыны луоз Москваын потӥсь газетъёсты но журналъёсты, интыын дасям изданиосты. Валамон, али со ваньмыз дуно усе, котькудӥз семья но уг вормы ни яратоно газетсэ яке журналзэ басьтыны. Тӥни соин ик, туала улонлэсь сьӧдо- пурысё буёлъёссэ санэ басьтыса, ИПОПАТ тазэ но сюлмаськонэз ас вылаз ныпъяз. Лыдӟиськисьёс трос. Книга ӝажыослы тузонэн шобырскыны ноку. Уг вунэто татын ужысь но ожысь ветеранъёслы, арлыдо эшъёссы сярысь но. Соослы профком нимысьтыз саклык висъя. Ӟечкыла праздникъёсын. Арлы быдэ 8 путёвка висъя профилакторие, сётэм узон но юрттэт. Быдэстыны тыршо пенсионеръёслэсь вань куронъёссэс. Мӧйы муртлы нош трос-а кулэ на? Котьмалэсь дуно солы ӵош ужась коллективеныз адскон, артэ пуксьыса кенешон, ортчемзэ тодэ ваён. - Таӵе пумиськонъёсмы арлы быдэ ортчыло, - шуэ Алевтина Борисовна. - Арлыдоослы сӥзем праздникез ми пусйиськом октябрьлэн пумаз, профессияя праздникенымы ӵош. Тӥни соку ик ваньмы огинэ люкаськиськом, ӝӧк сьӧрын пукиськом, концерт учкиськом. Туэ дорамы возьмаськом "Танок" ансамблез. Та нуналэ устоосыз водительёс пусъемын луозы грамотаосын, кузьымъёсын. Тросэз соос пӧлысь праздниксэс пумиталозы сюрес вылын, руль сьӧрын. Ма карод, сыӵе ини ужзы: шутэтскон нуналъёсы но, калык шулдыръяськыку но автобусэз нуллӥсь ас интыяз. Социалистической ӵошатскон али ӧвӧл ни ке но, профсоюзной комитет котькуд экипажлэсь ужамзэ син шораз возе. Кӧня пассажир нуэмын-ваемын, кӧня манетлы билет вузамын, кӧня иськем ортчемын но кӧня эстӥськон быдтэмын - со бордысь потэ водительлэн уждунэз. Автобусын ужаны капчи ӧвӧл - таиз котькинлы тодмо. Сюрес вылын олома но луэ уга: шӧдтэк шорысь пассажирлэн тазалыкез уродме, пумиськыло тылпу потон учыръёс но, яке кудӟемъёсын ваче пумит вуылонъёс. Водитель котьмалы дась медло. - Ми дорын ляб сямоосыз кема ужаны уг чидало, самой троссэ ӝыны ар пала возисько но кошко. Нош кин солэсь ятыргес чида - вань улытозязлы кыле ни, - шуэ кадръёсъя отделлэн кивалтӥсез Л. В. Блинкова. - Коллективмы понна данъяськымон луо Виталий Цыгвинцев, Виталий Старков, Борис Михайлов, Николай Скоробогатов но трос мукетъёсыз. Соос пӧлын вань ни 20 арлэсь ятыр ужасьёсыз. Дорамы арлы быдэ сямен вуо егит специалистъёс. Соосты ми котькудзэ пыр-поч эскерыса кутӥськом, арлы быдэ тодон- валанъёссэс будэтӥськом. Водительёс дышетско 20 часъем программая. Тросэз уг тодо, дыр, городысь автобусын 20 ар ӵоже ужам водитель пенсие потэ 55 арескын, кык номеро льготной списокъя. Озьыен, солэн профессиез пыртэмын тужгес но секытъёсыз пӧлы. Зэмен но, 4 часысен ӵукна кутскыса бер ӝытозь ужаны котькудӥз воргорон уз чида. Нош самой ческыт уммен кӧлон вакытэ кинлэн меда шуныт валесысь кезьыт, пеймыт ураме вамыштэмез потоз? Дасо аръёсын ужаса но талы дышыны шуг. Кондукторъёс доры выльысь берытскытозь, ИПОПАТ-ысь коллективын нылкышноос одӥг-ог гинэ вал - отделъёсын но столовойын. Табере ӝыныез пала - нылкышноос, вань огназы нылпи будэтӥсьёс но. Профком котькудзэ выль лыктэм муртэ синйылтыса возе. Гужем каникулъёс дыръя мылкыд карисьёслы лагере мыныны висъя путёвка, профилакторий но пиналэн анайёс поннагес ужа. Огъя вераса, дыръёс воштӥськемъя, ӟеч сямъёсызлэсь та предприятие ӧз куштӥськы. Манетэн гинэ улонэз мертаны уг луы уга, вань солэсь но дуногес мерттэт - ужась адями сярысь зэмос сюлмаськон. Сое котькудмы асьмеос ас выламы шӧдӥськом - дыраз вуэм шуныт автобусэ пырыса. Автопаркын ужасьёсын пумиськылэм бере, туж умой, куспаз тупаса улӥсь бадӟым семьяе вуылэм кадь потӥ. Со озьы ик вань. Малы ке-а водительёс татысь туж шер кошко, нош семьяен-семьяен ужасьёслэн лыдзы арысь аре йылэ. ИПОПАТ-ын данъяськыса верало Александр Афанасьевич но Андрей Александрович Будринъёсты, Александр Ильич но Илья Григорьевич Кузьминъёсты но трос мукетъёссэ. Алевтина Борисовна Ильиналэн но быдэс семьяез автопредприятиын тырше. Умой ук со. Макем ӟеч ог-огдэ валаськод - сокем юн коллектив, сокем юн ог-огед сярысь сюлмаськон. Удмуртие вуэм нырысетӥ ГАЗ-03-30 автобус. Ижысь ульчаосын "кузёясько" "Икарусъёс". Арлыдоосты уг кушто Туэ - арлыдоослэн арзы. Шӧдо-а сое ас вылазы арлыдоос? Та юанэн мон вазиськи "Ижводоканал" предприятиысь ветеранлы А. И. Романовалы. - Ас вылам номыр ик сыӵезэ ӧй шӧды. Но милям предприятимы ветеранъёссэ уг кушты, сюлмаське. Котькуд аре жилищно-коммунальной удысын ужасьёслэн но арлдыоослэн нуналазы кузьым лэсьто, юбиляръёсты котькуд вить ар ортчыса нимысьтыз ӟечкылало. Предприятиын кык сю укмыстон пала пенсионеръёс, куатьтон витез "Ужысь ветеранъёс", куинез: Р. Котмен, В. Соснин, Е. Сидорова. Быдӟым оже пыриськемын. Ваньзэ соосты предприятие син азяз возьыны, быгатэмезъя юрттыны тырше. Е. КУЗНЕЦОВА, Удмурт университетын дышетскись. ЖУРНАЛИСТЪЁСЫН ПУМИСЬКОНЪЁС "Калык Депутат" - улосвылъёс понна Кун Думаысь депутат Андрей Владимирович Солуянов таяз учыре журналистъёсын пумиськылӥз, 2000 арлы бюджетэз эскеронъя Думаын кылдэм югдурез валэктон вылысь. Бюджетлэсь инъетсэ Москваысь политикъёс куинь пол палэнтӥзы ини, шуиз депутат, соос али вань кужымзэс сёто, бюджетысь коньдон регионъёсы медаз кошкы шуыса. Соос тыршо бюджет эскеронэз вуоно арлы выжтыны, малы ке шуоно, куд-огезлы туж уг кельшы "Москвалэсь кылзӥськисьтэм депутатъёслэн" ас регионъёссы понна сюлмаськемзы. Сыӵе политикъёс малпало Россилэсь Кун Думазэ Москвалэн Думаезлы пӧрмытыны, соин ик соос депутатлэн мандатэз понна нюръяськыны регионъёсы пото. Со туж кышкыт политика. Регионъёсын вормизы ке Москваысь лыктэм кандидатъёс, соку улосвылъёс понна коньдон сюресъёс кемалы пытсаськозы, ваньмыз лэсьтӥськоз Москвалэсь интересъёссэ утён понна гинэ. Андрей Солуянов тодэ вайытӥз, бюджет - со страналэн тужгес но валтӥсь финансовой документэз шуыса. Сое юнматытэк, регионъёс но асьсэ бюджетсэс кутыны уз быгатэ. Озьыен, Удмуртия но бюджеттэк кылёз. Экономикаын секыт югдур уката но лэчытомоз, ӝутскыны турттӥсь предприятиос нош ик ужатэк сылозы. Кызьы учкемын законын, бюджет юнматымтэ дыръя коньдон висъяське азьвыл кутэм бюджетысь 12 поллы ӧжытгес. Коньдонлэсь будэмзэ лыдэ басьтыса, со номырлы уз тырмы. Собере озьы но луоз, Москваысь чиновникъёс бюджетэ пыртымтэ коньдонэз ас мылкыд каремзыя яке кинлы ке синмаськемзыя люкылозы. Нош дотациос чотын улӥсь регионъёслы, кытчы пыре Удмуртия но, секыт йӧтоз. Та дырозь улосвылъёслэсь интересъёссэс Думаын утьыса возьылӥз депутатъёслэн "Россиысь регионъёс" группазы, кытын тӧролэн воштӥсез луыса ужаз А. Солуянов но. Но берло дыре та группае пырись депутатъёс ог-огзэс валамысь дугдӥзы, шуиз Андрей Владимирович. Троссэ ас палаз кыскиз Москвалы дурбасьтӥсь "Отечество". Со улэ али кыскемын "Быдэс Россия" огазеяськон но, кудӥз котьку но пыкъяськылӥз "Россиысь регионъёс" вылэ. Кин табере утьыны кулэ Россилэн улосвылъёсаз улӥсь калыклэсь куронъёссэ. Та ужпум А. Солуяновез туж сюлмаськытэ. Власть но коньдон - ваньмыз люкамын Москваын, нош улосвылъёслэн узырлыксы сыӵе политика сэрен ялан кулэсме. "Озьы азьланяз улыны уг яра!" - шуэ депутат. Москваын но регионъёсын улӥсь адямиослэн улон-вылонзы котыр ласянь - экономикаын, социальной удысын - огкадь луыны кулэ. Асьме депутатмы кадь малпаськисьёс Думаын вань на. Та нуналъёсы соос "Калык Депутат" нимо выль группа кылдытӥзы. Отчы пыризы "Россиысь регионъёс" группаысь но мукет партиосысь куд-ог депутатъёс, кинъёс ас бырйисьёссылэсь интересъёссэс политикаын шудонъёслэсь данаклы вылӥегес пукто. Удмуртилэн депутатэз А. Солуянов озьы ик та выль огазеяськонэ пыриз. Аркадий Перминов. Шӧкыч Республикаямы берло дыре трос луизы "мултэс" музъемъёс. Куд-ог ёросъёсысь фермеръёс сётэм муоссылэсь куштӥськоно луо техниказы тырмымтэен. Нош эштосъёс соосты берен уг басьто ни. Куштӥськем музъемъёс вылын пумен писпуос будыны кутско). Газетъёсысь. - Федотъя, мар-о, тӥляд музъемды мултэс луиз шат? - Мултэс не мултэс. Фермеръёс кулэ ӧз каре ни та бусыез. Коньдонзя быриз, техниказы шалтраз. Табере со нокинлы кулэ ӧвӧл ни. Суредэз Л. ПРОЗОРОВЛЭН. Гажано Павел Николаевич! Удмурт Республикаысь Правительстволэн нимыныз сюлмысьтым ӟечкыласько Тӥледыз дано юбилееныды - 50 арес тырмемен. Тӥляд улон сюресты ваньмызлы адӟем карымон. Вань кужымдэс, мылкыддэс сётыса тыршиськоды, шаерысьтымы, быдэс Россиысь калыклэсь улонзэ ӟечгес, капчигес карон понна. Котькыӵе уж борды лулысь-сюлмысь, солэсь кулэлыксэ мур валаса басьтӥськеменыды Тӥ котьку висъяськылӥды. Со юн шӧдӥськиз вордскем палъёсады инженер луыса ужакуды но колхозэн кивалтыкуды, озьы ик вылӥ кивалтон удысъёсын тыршыкуды но. Уката ик яркыт адӟиськиз удыстылы вань сюлэмдэс сётыса тыршемды, калыкез огазеяны, ӝутыны быгатэмды Удмурт Республикаысь Правительстволэн Тӧроез луыса ужакуды. Улонэз ӟеч тодыса, юнэсь куронъёс пуктыса, мур малпаськыса ужамды - тӥни со ик юрттӥз Тӥледлы республикаысьтымы одӥгез валтӥсь кивалтӥсь луыны, ошмесо шаерамы улӥсьёс со понна тӥледыз гажамзы сярысь верало. Сюлмысьтым сӥзисько Тӥледлы, Павел Николаевич, юн тазалык, шудбур, семьяяды тупаса улон, ӟеч малпанъёсты мед быдэсмозы. Удмурт Республикаысь Правительстволэн Тӧроез Н. А. Ганза. ОСКОН Питрась бугор сэра "Ижнефтемаш" санаторий-профилакторийын та нуналъёсы эмъясько но пумен ужаны дышетско шаерысьтымы инвалидъёслэн ёрос огазеяськонъёссылэн кивалтӥсьёссы, бухгалтеръёс. Удмурт Республикаысь Калыкез уже интыянъя кун службаысь специалистъёс соослы юрттозы пӧртэм юанъёсъя валэктонъёс шедьтыны. Шутэтскыны лыктэмъёс озьы ик тодматскозы ог-огзылэн ужан амалъёсынызы, шуом, кызьы пайдаёгес радъяно ужбергатон удысэз, первичной организациослэсь ужзэс умоятоно но мукет. Огазьын пукыса, соос тодматскозы пенсиосъя выль законодательствоен. Россия Федерация дася инвалидъёсты улон-вылонын утён сярысь законэ воштонъёс пыртыны. Проектэз дась ни. Луонлыкъёс вань сое мур-мур эскерыны но инвалидъёслэсь дэмланъёссэс, ӵектонъёссэс Удмурт Правительствое вуттыны. Шуг-секытэ сюремъёс "Ижнефтемашын" шутэтскозы но эмъяськозы 24-тӥ октябрьысен 6- тӥ ноябрёзь. Кыкетӥ нуналаз ик ортчиз Шаерысьтымы инвалидъёслэн огазеяськонзылэн пленумез. Отын эскеремын вал огазеяськон азьын туннэ нуналэ сылӥсь пӧртэм ужпумъёс, йылпумъянъёс лэсьтэмын укмыс толэзь ужамзылы. Пайдаез вань, но ужзэс ӟечгес радъян понна ёросъёсын ӝутыны кулэ производствоез. Шаерысьтымы огазеяськон пыд йылаз султӥз ке, тросгес муртлы юрттэт сётыны луоз. Тазьы пайдаё шутэтскыны но эмъяськыны луонлыкъёс азьланяз но усьтӥськозы. Пусйыны кулэ, кылем арын но та санаторий- профилакторие ноябрь пумын инвалидъёс люкаськылӥзы семинаре. Но соку ужрад куинь нунал ӵоже гинэ кыстӥськиз. Ӟечен вераны луоз созэ но. Пленумлэн ужаз пыриськизы Удмурт Правительстволэн Тӧроезлэн воштӥсез Виктор Шудегов, калыкез улон-вылонын утёнъя министр Светлана Андреева, Ижевск городысь администрацилэн кивалтӥсезлэн воштӥсез Сергей Протазанов но вань та удысъёсысь куд-ог валтӥсь специалистъёс. Кӧня пол ортчылӥзы ни пленумъёс, конференциос, но таӵеез вал, дыр, нырысьсэ. Озьыен, огазеяськонэн лыдъясько, солэн куараез кивалтӥсьёс дорозь но кылӥське. Мед луоз на вылэм валан но юрттэт. Л.Малых. Политикае выйытэк - Павел Николаевич, тӥледлы оскем удысын сыръясь интыосыз трос гинэ. Ойдолэ вераськонмес кутскомы культураен герӟаськем ужпумъёс бордысен. - Республикаямы али 1200 пала культурая учреждениос, 159-сэ со пӧлысь рос-прос тупатъяно. Озьы ке но, соос ваньзы ик быгатэмзыя ужаны тыршо. Ужало художникъёслэн, композиторъёслэн, писательёслэн огазеяськонъёссы. Огласянь со умой, нош мукет ласянь учконо ке, соос ваньзы ас понназыгес уло. Мон сямен, соослы но, дыр, огазеяськыны кулэ. Сотэк туала вакытэ азьлань мыныны уз луы. Туж люкетэ на вожъяськон - творческой адямиос пӧлын со, оло, золгес но шӧдӥське. Куд-ог дыръя, кыӵе ке союзэн кенешытэк кинлы ке ӟеч мылкыдын юрттӥськод ке, со шумпотонлы уг пӧрмы - кинэ ке но обиде уськытӥськод. Тани ӝоген, 5-тӥ ноябре, Москваын усьтӥськоз спонсоръёслэн юрттэмзыя Костылев художниклэн адӟытонэз. Сыӵе юрттэтлы тау шуыны быгатоно вал. Писательёслэн союзэнызы али кивалтэ Егор Загребин. Оскисько: отын уж умой мыноз. Но вератэк уг луы: отчы выль кивалтӥсь бырйыку, та огазеяськонын коньдонзы 83 копейка сяна ӧй вал. Соослы но юрттытэк уз луы. Композиторъёслы но секыт йӧтэ - соослэн ужпумъёссы сярысь алигес бадӟым вераськон вал. Вань шуг-секытъёс пото коньдон тырмымтэ бордысь. Соин ик культураез, дышетонэз, медицинаез азинтонъя, оло, нимысьтыз фонд кылдытоно ни. Азьвыл аръёсы, Анетта Сидорова культурая министр дыръя, культураез азинтонъя фонд вал ини, отчы уно гинэ коньдон люкаськылӥз. Таӵе малпанэз куд-ог ужбергатӥсьёс но умоен лыдъяло. Пайдаё вераськон пӧрмиз куд-ог банкъёслэн кивалтӥсьёсынызы. Удмуртиын но палэнысь городъёсын асьме художникъёслэсь адӟытонъёссэс ортчытъян пумысен. Малпасько асьме культуралы озьы юрттыны мылкыд карисьёс ӟучъёс пӧлын но сюрозы. - Кыӵе ужъёс чакламын, Лудорвайысь музейез пумозяз вуттон понна? - Жаляса верано, инбам улысь музеймес та дырозь тросэз уг на тодо. Мон но жалясько, Правительствоын ужакум отчы вуылыны дыр ӧй шедьты шуыса. Но тани кунгож сьӧрысь адямиос со сярысь тодӥллям ни. Голландиысь куноос паймыса пыласькиллям отысь "сьӧд мунчоын". Малпан вань та интыез, азьвыл татын Ильинка гурт вал, выльысь улӟытыны. Со понна татчы нырысь ик сюрес лэсьтоно, пруд ӵыпоно - соку вашкала удмуртъёслэсь улэм- вылэмзэс палэнысь лыктэмъёслы но возьматыны возьыт уз луы. Нош меӵак верано ке, республикаямы туризмез азинтонлы азьланяз бадӟымгес, дыр, саклык висъяно. - Удмурт нылпиослы вузъёсы пырыны арысь аре секытгес йӧтэ, кызьы меда юрттоно соослы? - Огвакыт бадӟым оскон вал квоталы. Но правительствоын ужаса, мон солэсь умойтэм палъёссэ но адӟи. Квота висъяса, дышетсконэ соку ик кум-сват-брат пыр чуртнаськисьёс сюро. Мынам малпамея, удмурт нылпиослы али тросгес усьтоно интернат классъёс. Удмуртъёслэн бадӟым ӧтчамзы бере та пумысен нимысьтыз постановление кутэмын. Табере сыӵе классъёс усьтэмын ни Уваысь, Можгаысь, Ижевскысь педучилищеосын но озьы ик Ижевскысь 41 номеро но 56 номеро школа-лицейёсын. Монэ туж сюлмаськытэ 11 классэс быдтэмъёс тросэз уже интыяськыны уг быгато. Туж умой луысал, дыр, нылпиез школаын ик кыӵе ке ужлы дасяны. Сыӵе нылпиос, школаысь дипломен потыса асьсэлы уж но капчиенгес шедьтысалзы. Зэм, та малпанэз уже пыӵатыны али тросэз дась ӧвӧл, республикаямы дышетон сярысь кутэм законлы но со пумит луэ. Озьы ке но, федеральной проектын сыӵе луонлык учкемын ни. Соин ик та уж борды республикаямы каньылля басьтӥськыны малпаськом. - Таиз юан акыльтӥз ни, дыр. Озьы ке но, мар тӥ малпаськоды кылъёсъя закон сярысь? - Сыӵе закон кулэ. Но уг яра котькуд адямиез кужмысь удмурт кыллы дышетыны - та ужпумъя ортчытэм эскеронъёс но возьмато, адямиос тужгес но косыса дышетонлэсь кышкало шуыса. - Павел Николаевич, валэктэ вал югдурез нылпи пособиос пумысен. - Та али одӥгез секыт ужпум. 1995-тӥ арын Правительство кутӥз вал постановление нылпи пособиослы начар семьяослы гинэ тырон сярысь. Со арын, зэмзэ ик, сыӵе луонлык вал, малы ке шуоно, соку зол азинскиз ужбергатон. Соин ик узыр семьяослы нылпи пособиосты тыронэз, оло, кӧнялы ке дугдытоно вал. Но Кун Кенешлэн огез комиссиез но прокуратура та постановлениез умойтэмен лыдъязы но уже кутыны ӧз лэзе. Табере нылпи пособиосъя тыронъёс 700 миллион манет тыр люкаськемын. Котьма ке но 1997-тӥ ар понна пособиосты номыр шоры учкытэк одно ик тыроно луоз. Но 2000-тӥ арозь вань тыронъёсты берыктыны уз луы. Нялтас вераны кулэ эмъяськон удысын ужасьёслы уждун тырон пумысен но. Ӝегатэм уждунзэс соос туэ Выль арозь басьтыны быгатозы, но... уждунзэс йылтытэк. - Кызьы дунъяськоды тӥ республикамылэсь али ужась правительствозэ? - Мон туж шумпотӥсько, азьвыл правительстволэн тросэз адямиосыз али но отын ужало шуыса. Николай Алексеевич Ганза быгатыса кивалтэ - правительстволэн азьло кутскем ужъёсыз азьланьтӥсько. Ӧжытгес ке луиз политикаен вырон, нош тросгес - экономикалы саклык висъян, - ваньмыз умой луоз. Журналистъёслы но, мон сямен, тросгес возьматоно калыклэсь улонзэ. Тӥляд газетты со ласянь умой, нош мукет газетъёс политикае выемын. - Павел Николаевич, юбилейды азьын таӵе юан сётэм потэ на: 50 арес - мар со тӥ понна? - Со сярысь сокем зол уг малпаськиськы, аслам улонэлы кыӵе ке йылпумъянъёс но лэсьтэме уг поты. Малы со кулэ? Собере солы дыры но ӧвӧл. Мар вал улонам - со ваньмыз аслам, номырзэ отысь уд ни вошты. 50 арес - со улонлэн шорыз шуыса но уг малпаськы. Мылкыд егит ке луиз, - нокыӵе арлыдэз уд шӧды. - Озьыен, сӥзиськом тӥлед котьку но лякыт мылкыдо но ӟеч сюлэмо луыны. Тау вераськемды понна. Вераськиз Татьяна БАННИКОВА. Адӟысал ке али Павизэ... Лыдпуслэн тупамез - шудбурлы. Укмыс арзэ со ас вордскем колхозаз валтӥсь инженер вал. Укмыс арзэ - бускель колхозлэн тӧроез. Укмыс ар - Элькун Кивалтэтын. Вордскиз 1949-тӥ арын... Озьыен, 1999-тӥ арын 50 арес тырме. Зэм, ӵапак ӵуказе Павел Николаевич Вершинин зарни арлыдаз вуэ. "Аргурезь йылысен" учке со ортчем аръёсыз шоры. Пасьтана но мурдала адӟе вордскем шаермылэсь, калыкмылэсь бадӟым но пичи висёнъёссэ, ӝожъёссэ, сюлэмшугъяськонъёссэ. Сӥзёме солы эшшо но паськыт шоналскон удыс. Кужымез мед тырмоз калык тулкымез, солы оскись адямиосыз ас сьӧраз нуыны-валтыны. Али Кун Кенешлэн Тӧроезлэн нырысетӥ воштӥсезлы Павел Николаевич Вершининлы оскемын тужгес секыт удыс - калыкез улон-вылонын утён, дышетон, эмъян, лулчеберлыксэ ӝутон ужпумъёс. Республикамылэн нуналыз азьын редакциямы вуылыса, со вераз та ласянь аслэсьтыз малпанъёссэ, сюлэмшугъёссэ, быдэстоно ужпумъёссэ. Нош мар бордысен адями кутске кужым люканы, будыны, кыӵе солэн выжыосыз - та сярысь умойгес верало солэн аспал матысь адямиосыз. Туэ 14-тӥ январе пусйысалзы ни соос зарни сюанзэс. Вуж Выль ар уе, витьтон арлэсь кемагес талэсь азьвыл, сыӵе шудо адямиос ик ӧй вал ни кадь. Ӝӧк вылын сиён-юонэз туж огшоры ке но. 1949-тӥ ар... Нош али тани тэркыосын удмурт сямъя вань шунтэм вӧез но, курег пузэз но, чечыез но, пыжкемъёсыз но... Но... гуньдэмын кадь борддорысь час - со дырысен, ку дугдӥз корка кузёлэн сюлэмыз... Николай Спиридонович. Дас куать арескын фронтэ куриськыса, япон самурайёсын ожмаськем адями. Гуртын нырысетӥез шофёр. Собере сельсоветлэн исполкомезлэн председателез. Автомеханик, гаражлэн кузёез, экспедитор... Улонысь кошкиз валлян арын сӥзьыл. Огназ кылиз Александра Назаровна. Нош та куать борддоръёс пушкы шуккиськыса кылемын вить пиналъёслэн куара- лангазы... Покчиез али улэ мумиз вӧзын ик ас корказ, ас семьяеныз. Со Аркадий, "Россия" колхозлэн тӧроез. Мукетъёсыз но - Александр (автомеханик, гаражлэн кузёез), Нина (дышетӥсь), Светлана (медсестра) - асьсэ Бадӟым Учалан, пӧртэм урамъёсын ке но уло, анай бурд улын кадь. Нош бадӟымез, Павел, кыдёке но вылэ шонтӥськиз: со али Удмурт Республикаысь Кун Кенешлэн Тӧроезлэн воштӥсез. Вераны кулэез ӧвӧл, дыр, макем сюлэмзы висе анайлэн но, сузэр-вынъёслэн но такем бадӟым но туж матысь адямизы понна. Удмурт автономилы 29 ар тырмон азьын, 3-тӥ ноябре, вордӥськиз пизы. Озьы, соку ик инмар пусъем кадь Павеллэсь кин луонзэ. Маин висъяське вал со пичи дыръяз? Та юанэлы Александра Назаровна соку ик ӧз вера (вить чиньыез но луоз-а кырымлэсь висъяны? - котькудӥз аслад, дуно). Бератаз шуиз ик: - Павлике туж адямиез жалясь вал. Жалясь, юрттӥсь Александра Назаровналы дано колхозница ним но, орденъёс но огшоры гинэ ӧз сётӥське. Дас ньыль арескысен ик, война вылтӥ но со бере, тэль кораса кынмылӥз, пинал веськрес мугорзэ куасаз. Кролик яке курег-а, ыж яке парсь-а сюдӥз, кунян яке ошпи-а куайытӥз - вань кужымзэ сётыса, пеймытысен пеймытозь, пудоос котырын бергаз. Ведра, карнан но саник, лопата киысьтыз ӧз усьылэ. Анай киос... Мае но адӟемын ӧвӧл соос! Кыӵе ужез ӧз лэсьтэ на меда? Уз вера со сярысь нокыӵе но медаль... Кызьы уд жаля тонэ сюдӥсь-вордӥсь, будэтӥсь-эркиясь киосты? - Витетӥ-куатетӥ классъёсын дышетскыкузы, Сашаен Павлик одно ик кожало вал мон доры, Рябовоысь курег вордон фермае. Юртто мыным, тямыс-укмыс ведра курег пуз бичало, шобыръяса ящикъёсы тыро (ящике тэре вал 720 курег пуз). Отын ик пу вандыса кельто... Берёзовкаын улыкумы ик, Учалан корка ӝутыны кутским. Куинь ар пуктыны вырим. Павлик но Саша весь юрттӥзы, гур пуктыку, кӧня кирпич пыртылӥзы. Сизьыметӥ классэ Бадӟым Уча школае мынӥз ни Павлике. Нодлыко, кышкасьтэм - Куать аресысен школае мынӥз пие. Кӧня ке ареслы бадӟым эшезлэсь, Женя Ореховлэсь, ӧз кыльы ни. Дышетӥсез Фаина Николаевна шуылӥз: - Ойдо мед, кезьыт ке луиз, ветлэмысь дугдоз ай. Со ӧз аналскы. Школаысь бертӥсь пияшез песянаймы салазкиен но пумита вал. Выль арысен нырысетӥ классэ кутытэк амалзы ӧйлась ни. Шатыр гинэ лыдӟиське вал уго. Калиновкаын школа ӧй вал на, Сундые ветлӥз Павлик. Собере кык арзэ - Мальчике, сизьым иськеме. Тэль пыртӥ потонэз вань. Толалтэ факел (керосинэн банка) ӝуатыса но ветлӥзы пиос. Кионъёслэсь ӧз кышкалэ. Шумприч, бордаз кыскись Анайзы, Александра Назаровна, весь уж дурын, пудо котырын вал бере, вить пиналъёслэсь вань шудон-серекъян-бӧрдонъёссэс котыраз биньыса возиз песянайзы Ольга Васильевна Карпушкина. Уката ик яратэ вылэм со пуксеттэм ерпечка пияшез, Павие гинэ шуылэм сое. Аслаз но пиез уго таӵе нимо ик вылэм, нош картэз, Аркадий, ожын бырем. - Пичи мугоро, погыли кадь чырткем вал со, котькытчы вутскылӥз. Котьку юрттыны дась. Эшъёсыз весь со котырын, ярато вал,- тазьы вера сузэрез Нина Николаевна Фалалеева (Вершинина).- Мон кыкетӥ классэ лыктӥ Бадӟым Уча школае, 42 дышетскись пӧлы. Ӟуч кылэз уг тодӥськы, нырысетӥ четверте ымам ву ӟузем кадь пуки. Нош братэ весь мыным юрттылӥз. Ми соин вожмаськыса ик книга лыдӟиськом вал. Институтын дышетскыкуз но, бертылыкуз, мынам миндэр улысьтым книгаме таланы вутскылӥз. - Нош Сашаез лыдӟиськымтэез понна тышкаськылӥз но,- ватсаз Александра Назаровна. Азьветлӥсь Ӵош дышетскем вакытсы сярысь вера Бадӟым Уча шор ёзо школалэн директорез Полина Трофимовна Романова: - Павел Вершинин классазы комсомол секретарь вал. Мон - школалэн комсомол комитетэзлэн секретарез. Кенешмес люкаськом. Озьы-а, тазьы-а кароно шуыса юаськод но - ваньмыз чалмыт пуко. Павел ас малпанзэ вера, ӵемысь со соглаш уг луы вал огъя решениен. Малы одно тазьы лэсьтоно, малы мукет сямен уг яра? Ваньзэ сэрттоз-пертчоз, котыр ласянь малпалоз. Директиваосъя улӥськом вал уго соку. Нош отын кулэтэмез но луэ. Та ласянь Павел чакласькись вал. Мугорын пичи ке но, ассэ обидьыны уз сёты. Эшъёсыз сое ярато вал. Куасэн, волейболэн, баскетболэн ӵошатскон-а, кыӵе ке ӝытэз дасян-ортчытон-а - со котьку азьпал радын. Сыӵе солэн манерыз. х х х Куамынэтӥ аръёсы та ёросын 52 пичи сельхозартель вал. Туэ огазеяськем "Россия" колхозлы 40 ар луиз ни (со дырысен будэм колхозлэн таиз председателез Аркадий Николаевич Вершинин, солы озьы ик туэ ньыльдон арес тырмиз). Татын валтӥсь инженер луыса 70-тӥ аръёсы ужаз Павел Николаевич Вершинин. Солэн кыкез ик песятайёсыз - Спиридон Никонович но, Назар Александрович но - ас гуртъёсазы, Петропавловоын но Берёзовкаын, колхоз кылдытӥсьёс вал. Асьсэлэсь зол сямъёссэс соос сётӥзы нылъёссылы-пиоссылы. Павел Николаевич та выжылэн тужгес юн пушъетэз луиз, элькун пасьтана вӧлскиз солэн сюлмаськемез-тыршемез. Нош калыкен кивалтыны быгатон потэ, дыр, ас музъемдэ макем яратэмед но со понна сюлмаськемед- бӧрдэмед бордысь. Удмурт Республикаысь Кун Кенешлэн Тӧроезлэн воштӥсез асьмелы та ласянь уката ик дуно. Со асьме адями. Лыдпус ласянь ке - со шудо луыны кулэ. Вуоно дауре Павел Николаевич выже, 50 арессэ тырмытыса. Александра Назаровна 2000-тӥ арын тырмытоз 70 арессэ. Нош Ольга песянай... Адӟысал ке со али Павизэ... Татьяна ЧЕРНОВА. Объявление о проведении конкурса инвестиционных проектов Для публикации а газетах "Известия Удмуртской Республики", "Удмуртская правда", "Удмурт Дунне". Публикация _______ г. Правительство Удмуртской Республики, руководствуясь действующим инвестиционным законодательством Российской Федерации и Удмуртской Республики, а также во исполнение Постановления Правительства Удмуртской Республики �. 926 от 27 сентября 1999 года объявляет Конкурс инвестиционных проектов на размещение инвестиционных ресурсов Удмуртской Республики в виде гарантий (поручительств) Удмуртской Республики. В конкурсе участвуют претенденты, зарегистрированные в порядке, установленном Положением о Государственном Реестре инвестиционных проектов Удмуртской Республики, утвержденным Постановлением Правительства Удмуртской Республики Нә51 от 28.04.98 года. Объем гарантий - 10,39 млн. (десять миллионов триста девяносто тысяч) рублей Условия конкурсного размещения ресурсов Удмуртской Республики по инвестиционным проектам, критерии и порядок оценки проектов осуществляется согласно "Положения о предоставления гарантий (поручительств) Удмуртской Республики по займам и кредитам на конкурсной основе", утвержденного постановлением Правительства Удмуртской Республики от 29 декабря 1997 года �1187. К участию э конкурсе допускаются лица, своевременно подавшие заявки при наличии положительной экспертизы проекта. Конкурс будет проводиться 25 ноября 1999 года по адресу: г. Ижевск, ул. Пушкинская, 214. Заявки на участие в конкурсе принимаются ОАО "Агентство по инвестициям и лизингу" по адресу: г. Ижевск, ул. Горького &;, в помещении "ИМПЭКС - банк", с Юдо 12 часов и с 15до 17 часов ежедневно, кроме выходных. Последний срок подачи документов - 15 ноября 1999 года Список документов, представляемых на конкурс, и консультации по вопросам организации проведения конкурсов проводятся специалистами ОАО "Агентство по инвестициям и лизингу" в соответствии с Постановлением Правительства Удмуртской Республики � 396 от 16.04.99 года. Прием заявок по телефону: 56-04-44 ТАЗАЛЫК Эмъюмез воштэ лазер Лазер терапия сярысь гожтыны курыса, редакцие вазиськон вуиз. "Луэ-а эмъяны та амалэн сахарной диабетэз?" - юа лыдӟисьмы. Та юанэн ми вазиським Ижевск городысь 2- тӥ больницаысь врачлы Татьяна Викторовна Опрышколы: - Туала медицинаын лазер терапия валтӥсь инты басьтэ. Та амал висёнлэсь тодметъёссэ гинэ уг, солэсь мугзэ но шараяны, эмъяны быгатэ. Кӧня ке улыса, висись куштӥське эмъюм юонлэсь - солэн кулэлыкез уг лу ни. Лазер огвакытэ пыӵа вирсэръёсы но куэ. Вирсэръёсы пыӵакуз, вир чальгес бызьылыны кутске, орсмем интыосыз усьтӥсько - сэръёс (сосудъёс) кислородэн узырмо, кужмоя иммунитет. Лазер инфракрасной си, куэ пыӵаса, быгытъёсты тазатэ, отысь пӧртэм веществоослэсь ужамзэс умоятэ, кислородэн тырмытэ, гормон но фермент кылдонлы юрттэ. Со сяна, вӧсез зӥбломытэ, пыктэм-тӧрнамез быдтэ, вирсэръёсты паськытатэ, умоятэ вир ветлонэз, кужмоя микроорганизмъёслэн антибиотикъёсты шӧдонзы. Сахарной диабетэн висисьёс юрттэт курыса ӵем вазиськыло. Соос туж курадӟо пыдъёсысьтызы вирсэръёссы тӧрнамысь. Самараысь медициная университетысь тодосчиос Б. И. Жуков но И. А. Лысов та удысъя бадӟым эскерон уж ортчытӥзы. Соос но таӵе йылпумъянэ вуизы, диабетэз эмъюмъёсын гинэ йӧнатыны уг луы, кулэ пӧртэм амалъёсты герӟаны. Лазер та учыре туж тупа: паськытало пыдлось артериос но, вир умой ветлыны кутске. Мынам чакламея, лазерен эмъяськыны кутскем бӧрсьы нырысетӥ нуналъёсаз ик вӧсь луон зӥбломе, суй-пыдъёс "шунало", кулэсме вирысь сакыр. Лазерен эмъянлы, сое эскеронлы трос научной ужъёс сӥземын. 1997-тӥ арын та ужпумъёсъя нимысьтыз калык куспо конгресс люкаськылӥз. Отын но та амал сярысь умоен гинэ пусъемын. Юанъёсын вазиськыны быгатоды таӵе адресъя: Ижевск, Пушкинской урам, 219, 2-тӥ городской поликлиника. Телефонъёсыз: 78-39-59 (8-ысен 14 часозь), 51-43-17 (18-ысен 20 часозь). Сладость на пользу людям ОАО "Глазовский пищекомбинат" - гарантия качества и надежности 427600, Россия, Удмуртия, г. Глазов, ул. Драгунова, 44. т./ф. (341-41) 3-76-22, 3-75-65 Из истории предприятия У комбината две даты рождения, но одна общая история. Как государственное предприятие оно зародилось незадолго до войны - 17 мая 1941 г. В начале перестройки комбинат был преобразован в завод плодовоягодных вин. Это было 12 января 1987 г. И хотя "сухой" закон, введённый в стране, вновь вынудил перепрофилироваться, современная история пищекомбината ведет отсчет именно с этой даты. Теперь Глазовский пищекомбинат полностью перешел на выпуск мучных кондитерских изделий. А еще чуть позже освоил производство пастилы и мармелада. Третий год руководит предприятием Виктор Яковлевич ЖУРАВЛЁВ. С его приходом на комбинате была осуществлена реконструкция цехов, обновлены вентиляционные помещения, построена газовая котельная. В канун профессионального праздника Дня работников сельского хозяйства и перерабатывающей промышленности ему было присвоено звание заслуженного работника промышленности Удмуртской Республики. Предложение рождает спрос Открытое акционерное общество "Глазовский пищекомбинат" - сегодня одно из стабильных предприятий Удмуртии. Коллектив преимущественно женский. Но самые главные, ответственные роли - у мужчин. И это правильно. Так надёжней. А вот в цехах и на участках роли мастеров и технологов в основном отведены женщинам - с такой кропотливой работой лучше их никто не справится. В трех цехах комбината беспрерывно гудят конвейеры, с одних идет сахарное печенье, с других - затяжное (сухое). А вот - линия с пряниками, а еще где-то варится мармелад, заливается пастила. Очень скоро все это будет расфасовано, упаковано и отправлено потребителям. Вся сладкая, ароматная продукция с витаминами, орехами, маком, шоколадом найдет своих поклонников. Ассортимент продукции пищекомбината, действительно, поражает своим многообразием. Только сахарного печенья производится 32 наименования, затяжного печенья - 20, сдобного - 4, пряников - 12, а еще выпускается несколько видов мармелада и пастилы. Почитателей своей продукции предприятие находит не только в республике, но и за ее пределами. Глазовские кондитерские изделия сегодня с удовольствием покупают в Башкортостане, Татарстане, Перми, Кирове, Тюмени. Продукция комбината постоянно обновляется. А генератором всех новых идей является технический совет, куда кроме руководящего звена входят все главные специалисты. О том, как на предприятии конкретные идеи воплощаются в жизнь, говорит хотя бы такой пример. В марте этого года начальник коммерческого отдела Александр Петрович Сирин был участником выставки в Москве. Его заинтересовали пищевые добавки, которые улучшают не только качество, скажем, теста, но и несут в себе целый комплекс витаминов. Так началась последовательная разработка идеи о выпуске витаминной продукции. Из множества имеющихся пищевых добавок выбрали веторон. Изготовили пробную партию печенья, опробовали, оценили его достоинства и после согласования на высшем уровне выпустили рецептурное печенье - так появилось витаминное печенье "Калорийное". После презентации и всестороннего изучения покупательского спроса началось его массовое производство. Но... это только в сказке все быстро сказывается. На самом же деле трудности были, ведь Глазовский пищекомбинат первым в Удмуртии переходил на выпуск продукции с активными витаминными добавками. И поэтому помощи ждать было не от кого. Как известно, в нашем государстве любые идеи пробивают себе дорогу с трудом. Поэтому хвала и честь глазовским мастерам сладких дел, которые за относительно короткий период (с марта по июль 1999 года) сумели наладить выпуск новой продукции. Первым всегда труднее. И все-таки сертификат на новую продукцию был получен! Теперь очень полезная и нужная продукция глазовчан тоннами доставляется потребителям. Можно сказать, что один из наших отечественных товаропроизводителей - Глазовский пищекомбинат - сегодня уверенно осваивает рынок. У комбината есть несколько специализированных магазинов, где опытные продавцы могут дать покупателям полную информацию о предлагаемом ассортименте товара. Кстати, подробную информацию о сладостях, в том числе и витаминных, можно найти и на этикетках, на информационных листах, которые имеются внутри упаковок. Кроме того, специально для покупателей в магазинах вывешиваются планшеты и плакаты. Таким образом, осведомленные городские покупатели уже точно знают, что такие изделия, как печенье "К чаю" и "Калорийное", пряники "Фантазия", вермишель "Янтарная", а так же хлеб облепиховый имеют витаминные добавки, поэтому предпочтение отдают именно этим продуктам. По словам работников комбината, облепиховый витаминный хлеб пользуется такой большой пополярностью, что более 15 минут на прилавках не залеживается. Горожане уже высоко оценили витаминные изделия Глазовского пищекомбината. Но как быть с сельскими покупателями? Порой нужная информация до потребителей не доходит. Над решением этой проблемы коллективу комбината тоже приходится много работать. Не только в радость... Сладости любят все - и дети, и взрослые. Без них, как правило, не обходится ни один праздник. Но глазовские кондитеры считают, что сладости должны принести не только радость, но и пользу. Именно поэтому здесь такое большое внимание уделяют выпуску витаминной продукции. Итак, чем же она полезна для нашего организма? Известно, что при постоянном употреблении продуктов с витаминными добавками и бета-каротином у людей улучшается пищеварительная деятельность, эффективнее идет усвоение витаминов и минеральных солей. Это относится и к мармеладу, в изготовлении которого применяется агароид, вырабатываемый морскими водорослями. Кроме лечебного эффекта, витаминная продукция оказывает и профилактическое действие на людей, проживающих в зонах риска. Конечно, всех сладостей Глазовского пищекомбината не купишь, но витаминные изделия для пользы здоровья все-таки стоит попробовать. "Нам нужно работать умнее.." Придя в магазин, любая домохозяйка надеется приобрести качественную продукцию. И она не прогадает, если купит изделия именно глазовских кондитеров. Весь ассортимент товаров отличается не только отменным вкусом, но и высоким качеством. А как же не быть качеству, если трудятся здесь высокие мастера своего дела. Говорят, кушанье познается по вкусу, а мастерство - по искусству. Так оно и есть. Многие работники имеют огромный опыт работы, некоторые перешли сюда еще со старого производства. Мастер цеха � 1 Галина Аркадьевна Кожевникова работает здесь уже 12 лет, она одна из ровесников этого предприятия. Цех выпускает сахарное печенье, хлеб и макаронные изделия. С основания цеха � 2 технологом работает Ольга Васильевна Дадашова. Основная продукция цеха - затяжное печенье. Качество продукции она может определить даже по запаху. Большим авторитетом в коллективе пользуются такие мастера и технологи, как Вера Анатольевна Абрамова, Наталья Николаевна Бузанакова, Надежда Егоровна Алмасова. Кем бы здесь человек ни работал - мастером, технологом или просто рабочим - во главу угла ставит качество. А без участия главного технолога Нины Михайловны Завьяловой не пройдет ни одно сырьё, ни один полуфабрикат или готовый продукт. Если, скажем, мука не подходит для изготовления данного печенья или пряника, руководитель строго скажет "нет". Все должно соответствовать принятым стандартам. В недрах лаборатории ежечасно, ежедневно решаются всевозможные вопросы, связанные не только с качеством товара, но и его хранением и даже сбытом. Все успехи предприятия, его настоящее и будущее зависят от профессионализма работников - будь то директор, начальник производства, мастер или технолог. По словам генерального директора, за последнее время он никого не уволил за нарушение трудовой дисциплины. Кто-то может подумать, что работникам комбината есть что терять, кроме рабочего места, ведь они - совладельцы предприятия, акционеры. Может это и так. Но что в этом плохого? Люди поняли свою выгоду. А значит, и прониклись уважением к своей профессии. Именно благодаря профессионализму и умелому руководству предприятие сумело противостоять финансовым потрясениям прошлого года. Но к непредсказуемости рынка привыкнуть сложно: цены на муку неожиданно поднялись в 2,5 раза. И все же цены на продукцию здесь выросли незначительно. На Глазовском пищекомбинате трудится около 300 человек. И каждый из них, без преувеличения, специалист своего дела. Всего пятый месяц работает на предприятии единственный специалист- маркетолог Татьяна Александровна Саркисянц. Это она водила нас по цехам, подробно рассказывая о всех технологических процессах. А нам не верилось: неужели за такой короткий период человек может так досконально изучить производство? Очевидно, можно, ведь не зря же директор, объявив конкурсный приём на должность маркетолога, выбрал именно ее. "Чем она привлекла?" - спросили мы. Директор ответил: "Силой убеждения и здравым смыслом". Именно от нее услышали мы потом такую убедительную фразу: "Нам не нужен сиюминутный миллион, нужен постоянный покупатель". Именно на покупателя работает весь коллектив Глазовского пищекомбината. Главное богатство предприятия Это его люди. Поэтому администрация и профсоюный комитет делают всё возможное, чтобы окружить их вниманием и заботой. Поэтому в коллективном трудовом договоре предусмотрены все формы как морального, так и материального стимулирования. В жизни коллектива немаловажную роль играет председатель профсоюзного комитета Ольга Ильнична Жуйкова. С различными житейскими проблемами люди обращаются прежде всего к ней. На предприятии не забывают и о ветеранах производства. Их на комбинате около 30 человек. Ветеранов чествуют, дарят подарки. Для них организуют льготную продажу товаров. Администрацию предприятия очень волнуют нерешенные социальные проблемы, часто от ее воли и желания не зависящие. А вот то, что в его силах - руководство пытается делать. Уже в хорошую традицию вошли благотворительные акции, проводимые для города. Предприятие оказывает помощь малоимущим, инвалидам, детским домам и интернатам. "Жить в городе и не заниматься этим, я считаю - непорядочно",- говорит директор. Генеральный директор Виктор Яковлевич Журавлев - человек неординарный. Любого поддержит, поможет. Создаст хорошее настроение. Даже посторонний человек, случайно оказавшийся на предприятии, замечает особый стиль взаимоотношений между людьми: все спокойны, улыбчивы и приветливы. А вот какие высказывания пришлось услышать от работниц: "Я нигде такого коллектива не видела. Здесь все друг другу помогают". "Мы живем одной семьей". "Очень желаю, чтобы наше предприятие процветало". Пожелаем и мы открытому акционерному обществу "Глазовский пищекомбинат" дальнейших успехов и процветания. Чтобы никакие политические и экономические потрясения не задушили в людях надежду и веру. Татьяна БАННИКОВА. 1. Генеральный директор Глазовского пищекомбината Виктор Яковлевич ЖУРАВЛЁВ. 2. Рабочий день начальника производства В. В. КНЯЗЕВА начинается, как и положено, с обхождения цехов. 3. Мастер цеха � 1 Г. А. КОЖЕВНИКОВА довольна: за смену выпущено 6 тонн сахарного печенья. 4. Облепиховый хлеб на прилавках не залежится. 5. Работницы цеха � 3 О. ПЕТРОВА и И. ЗАТЕЛЬМАЕР покрывают пастилу шоколадом. 6. Одна из ручных линий по фасовке и переборке. 7. М. ЛУКИНА на комбинате недавно, но уже освоила множество операций. 8. Мастер О. ДАДАШОВА и мастер Н. АЛМАСОВА проверяют качество готовой продукции. Фото Владимира КАМАШЕВА. Гердлэн нимыныз Куӟебай Герд - нырысь ик вавожъёслэн данъяськонзы. Ёросын сюлмасько, солэн нимыныз герӟаськем интыос медаз вунэ шуыса. Вордскем гуртаз, Покчивукоын, стела ӝутэмын, Гурезь-Пудгаын музей усьтэмын. Райбиблиотека азьын луоз Гердлы памятник (бюст). Солэсь котырзэ шулдыртон бордын тыршизы, библиотекаез вылласянь но пушласянь тупатязы татысь лэсьтӥськисьёс. Бадӟым сюлмаськон вань на ёрос культура юртэз лэсьтон ласянь. Солэсь улӥзэ - цокользэ туэ вуттыны чаклало. Быдэсмиз ке, Вавожысь культура юрт республикаямы огез устоез луоз. Мукет сямен луыны но кулэ ӧвӧл: та интыос герӟаськемын быдӟым Гердлэн нимыныз. Т.Николаева. Ӧтчам бере Зарни шунды ӝужалоз! Азьвылгес ивортӥмы ни: Удмурт лулчеберлыкъя дэменлыклэн таяз ӧтчамаз ӟырдыт вераськон вал удмуртлык сярысь. Ас выжыосмылэсь чеберлыксэс, вашкала сэбедъёсмылэсь, йылолъёсмылэсь аспӧртэмлыксэс утьыны курыса, Драмая удмурт кун театрлэн юртаз люкаськемъёслы визьмо кылъёсын вазиськизы Удмурт лулчеберлыкъя дэменлыклэн тӧроез Альберт Разин, удмурт лулчеберлык удысысь валтӥсь Лидия Орехова, мукет адямиос. Ӧтчаме лыктэмъёс но ӧз кӧбералэ лэчыт кылъёслэсь. Газетмылэсь та номерзэ кияды кутыса, тӥ тодыны быгатоды куд-огезлэсь бугрес малпанъёссэ. Удмурт йылолъёсмылэн аспӧртэмлыксы сярысь лулысь-сюлмысь мадиз шаерысьтымы тодмо калык суредась, этнограф Семен Виноградов. Со ивортӥз: - Удмуртъёслэн азьвыл сэбедъёссы туж тунсыкоесь вылӥллям. Адямилэн нимыз сярысь ик кӧня аспӧртэмлыко веран. Гуртын азьвыл ог-огзы шоры, кинэ ке вӧсь каронтэм вылысь, нимын уг вазисько вылэм: солэн, пе, инмар кужымез вань. Ог-огзэс небытак гинэ тазьы шуылозы вылэм: кырси, кенак, ӵужкенак, ӵужапай, эке, апа, эте, ака, ӵужмурт. Зэм, туэ таӵе ӟеч сямез асьмеос малы ке чылкак вунэтӥськом ни. Сюлэмшугъяськытэ куд-ог вашкала тӥрлыкъёсмылэн чылкак ышемзы-быремзы. Таин валче нокызьы уг вуны учыр. Марий Эл шаерысь Мари-Турек ёросысь Ӟаны починкаын (Бадӟым Карлыган гуртын) улӥз одӥг арлыдо крезьчи. Вашкала крезен со озьы шудэ вал - быдэс оркестр кырӟа, кожалод. Со вакытысь культурая министрмылэн воштӥсезлы огпол вазиськи: та адями доры ыстоно вал "Италмас" ансамбльысь егит артистъёсты - крезьчи улэп дыръя мед дышетскозы. Зэм, министрлэн воштӥсез куронме ӧз быдэсты . Табере крезьчи но ӧвӧл ни, егитъёс но дышетскытэк кылизы. Асьмелэн кык турлы крезьмы вал: одӥгез - куамын кык сиё, мукетыз - дас куать сиё. Удмурт гуртъёсын азьвыл вал нергелы сӥзем кырӟанъёс вӧсь. Соос но ышо ини. Сюанлэн но, бӧрысьлэн но вӧсяськон шӧмзы вань: кырӟано но, эктоно но шундыя гинэ. Пужыосмылэн но нимъёссы асьсэлэн. Соос пӧлысь куд-огез утё сӧремлэсь, син усемлэсь. Кисьтон но йыр-пыд сётон дыръя уг вӧсясько. Асьмеос сое но сӧриськомы ини. Удмуртлыкмылэсь выжыоссэ быдтыны уг яра. Утёно вань ӟечсэ! Фома Ермаков, кылтодон наукаосъя доктор, Куӟебай Герд нимо премилэн лауреатэз: - Калыкедлэсь улэм-вылэмзэ тодэмед потэ ке, мын пыдлось удмурт гуртэ. Асьмеос туннэ но дышетскыны кулэ быдӟым Куӟебай Гердлэсь. Кузьма Павлович туж яратӥз удмурт калык кылосэз. Тужгес но - кырӟанъёсты. Соосты люкаса, куинь книга поттыны вуиз. Отын кык сюрс кырӟан. Сюрс витьтонэз - Марий Эл шаерысь Мари-Турек ёросысь Ӟаны починкаысь (Бадӟым Карлыган гуртысь). Гожъяськись луэмед потэ ке, тод, ма сярысь кырӟа вордскем шаеред! Зэм, чылкак вунэтыны уг яра мукет выжыосысь эшъёстэ но. Галина Мамонтова, Дэри ёросысь Изгурт школаысь удмурт кыллы но литературалы дышетӥсь: - Шумпотӥсько: милям Изгуртамы кылдытэмын "Марӟан гур" ансамбль. 1996-тӥ арын соосын ӵош кунгож сьӧры - Эстоние - вуылыны кылдӥз. Венгриысь эшъёсмы бӧрдыса кылзӥзы милемды. Нош кивалтэ та ансамблен школаямы ик дышетскем адями Александр Егорович Четкарев. Туннэ татын веразы: удмурт кылмес дышетон ляб радъямын. Мон шуысал: туж трос шуг- секытъёс. Озьы ке но, соосты вормыны луэ. Шумпотӥсько: школаямы дышетскись Юрий Егоров туэ быдӟым ӟуч кылбурчилэн Александр Сергеевич Пушкинлэн вордӥськемез дырысен кык сю ар тырмонлы сӥзем ӵошатсконын вормисе потӥз. Дас вить ар ужасько ини школаын - одӥг пинал но татчыозь ӧз шуы на: удмурт кылэз уг дышеты. Малы меда куд-ог анай-атайёс сокем-сокем пумит луо удмурт кыллы?! Ижлы туж матын ми - гуртмес но городмес висъя дас кык гинэ иськем. Озьы ке но, дорамы туж шер вуыло гожъяськисьёс, тодосчиос. Нош юрттэт милемлы туж кулэ. Петр Данилов, удмурт фольклор кырӟанъя "Айкай" театрын кырӟась. - "Айкай" ачиз азе таӵе ужпум пуктӥз: возьматоно ас калыкедлэсь чеберлыксэ. Гурезь улэ султыса гинэ дунъяны кутскиськод астэ но, выжыостэ но. Нош кызьы меда ӟеч быдэсъялод уждэ, тонэ пумтэм-йылтэм шуг-секытъёс кекато ке? Удмурт калык понна лулысь-сюлмысь ужан вылысь, нимаз юртмы гинэ но ӧвӧл. Мар веранэз ини куиськон интыос сярысь?! Вылӥ кивалтӥсьёс та кӧткайгумес пелязы мед понысалзы. Вакытэн-вакытэн ми кыл вератэк сюлмаськиськом кинэ ке депутат карон сярысь. Нош таосыз, кивалтӥсь луыса, ми доры сюрессэс отӥяз чылкак ышто. Озьы шергес мед луоз вылэм. Николай Кузнецов, тодмо гожъясь, юрист: - Тросэз малы ке чик уг дунъяло анай кылзэс. Пыриськод Драмая удмурт кун театре, редакциосмылэн юртъёсазы - уноез ӟуч кылын верасько. Драмая удмурт кун театрын толо нимо-дано режиссёрмылы Кузьма Ложкинлы сӥзем ӝыт вал. Тодмо кырӟась Евгений Серебренников шуэ: "Мыным матынгес ӟуч кыл. Мон ӟуч кылын верасько". Озьы ӝутод шат удмуртлыкмес?! Удмурт шаермес кылдытӥсьёс пӧлын одӥгез визьмоез вал Трокай (Трофим Борисов). Нош солэсь нимзэ данъян сярысь чик ум сюлмаськиськелэ. Вить ар ӵоже верасько ни: ойдолэ арлы быдэ нырысетӥ шуркынмонэ буре вайыломе шимес куамынэтӥ аръёсы нокыӵе янгыштэк бырем вань визьлюкъёсмес. Зэм, уж малы ке уг вырӟы. Надежда Пахомова, Удмурт лулчеберлыкъя дэменлыклэн Кияса ёросысь ёзэзлэн тӧроез: - Радио пыр ӵемысь кылоно луэ: удмуртлыкез фольклорен уд ӝуты. Ойдолэ дугдом соку кырӟамысь-верамысь... Асьмелэн вань пӧртэм огазеяськонъёсмы - "Шунды", "Дэмен", "Удмурт кенеш". Нош гурт калык доры нокин уг вуы малы ке... Туж бадӟым тау азьветлӥсь удмуртъёсмылы Лидия Ореховалы, Альберт Разинлы. Нырысетӥ быдӟым удмурт ӧтчам азьын соос вуылӥзы тросаз удмурт гуртъёсы, сайкатӥзы кӧлӥсь калыкез. Азьвыл милям ёрос кивалтэтамы одӥг но удмурт ӧй вал. Ӟучъёс но юрттыса, туэ бырйыны быгатӥм Тамара Васильеваез. Кияса шор ёзо школаын туэ кылдытӥм удмурт класс. Зэм, нырысь-валысь вал пӧртэм шугадӟонъёс. Школалэн директорез шуэ: мар понна Удмурт лулчеберлыкъя огазеяськон - буялэ борддоръёсты! Буёл басьтон вылысь, юри поттоно луиз ас кисыысьтым коньдонме. Адольф Широбоков, тодосчи: - тодмо ӟуч кылбурчи Владимир Маяковский куке но шуиз: Скал ке тынад нимыд, луыны кулэ вераед но йӧлыд. Ӧвӧл ке тынад вераед но йӧлыд, токма гинэ со тынад скал нимыд. Асьмелэн куарамы мед гудыръялоз котькуд сэрегын. Кылем гужем вуылыны кылдӥз Якшур- Бодьяла - отын удмуртлыкмес возён ласянь номыр уг лэсьтӥськы. Асьмелы кылдытоно удмурт лулчеберлыкъя юрт. Отын мед луозы вӧсь сэрег, куноосты пумитан сэрег, музей, библиотека... Туж ӟеч луысал, пыд йылаз султысал ни ке удмурт киностудимы. Вӧсь сэрегмес радъян вылысь, Кызьпу арамаын удмуртъёслы висъязы нимысьтыз музъем. Нош асьмелэн валмы гинэ но отынн татчыозь ӧз на погылляськы. Галина Романова, кылбурчи, журналист: - Алигес вуылӥ Пичи Пурга ёросысь Норья черкогуртэ - отын калык ӟучоме ини. "Инвожо" журналмы, лыдӟись доры вуытозяз, туж секыт сюресэз ортче. Али тужгес шуг коньдон ласянь. Печатья но иворъёсъя министр милемлы шуэ: шедьтэлэ узыр адямиосты. Таосыз нош яло: удмурт кивалтэт мед вазиськоз милемлы редакцилэн нимыныз. Анатолий Митрофанов, Драмая удмурт кун театрлэн директорез, "Ижмаш" культура дворецысь удмурт калык театрлэн режиссёрез: - Удмуртъёслы ужасьёсыз Марлы меда яратско? Анайлэсь кадь, атайлэсь кадь, Соослэсь мон мӧзмисько... Удмуртъёссэ сюлмыз вӧсь луымон яратыса, тазьы кырӟалляз Куӟебай Герд. Кӧня на быдэстоно ужпумъёсмы! Дас вить-кызь ар талэсь азьло ини вал Драмая удмурт кун театрлы выль юрт пуктон сярысь вераськон. Инты но быръемын вал ини, нош театрлы юрт али ке но уг лэсьтӥськы. Кыкетӥ "висёнэ" - удмурт калык кылослы (фольклорлы) сӥзем ӝытъёс. Трос адями люкаськылыса, та ужрадъёс ортчылӥзы "Ижмаш" культура дворецын. Улон-вылон таӵе шуг луэмен, табере соос но чалмизы. Йыре куддыр таӵе но малпан лыктылэ ни: та ӝытъёсты, оло, ортчытъяно ни ёросъёсын? "Ижмаш" культура дворецысь удмурт калык театрен кӧня ар ӵош ни! Табере ми но, "Тюрагай" удмурт калык хор но татысь уллямын. Театрмы али люкаськылэ дворецысь нырысетӥ этаже. Владимир Савельев, Ижысь медициная академиысь профессор: - Ми доры, академие, удмурт егитъёс туж ичи лыкто. Та ужпумез син азязы ялан мед возьысалзы "Шунды", "Дэмен", "Удмурт кенеш". Удмурт эмъясьёс пӧлын кӧня визьлюкъёсмы! Лина Григорьевна Векшиналэн, Александра Ивановна Перевощиковалэн, Семен Иванович Ворончихинлэн нимъёссы нош одӥгезлы но эмъян юртлы сётэмын ӧвӧл, татчыозь данъямтэ. Рево Разин, Удмурт кун университетысь адямилыкез эскеронъя институтын ужась, тодосчи: - Асьмелы котьку сюлмаськоно ӵуказе нуналмы сярысь (шонер вераз Владимир Никифорович Савельев). Соин валче ик вунэтыны уг яра толло нуналмес. Алигес мынам нылы кырӟаны кутскиз Удмурт лулчеберлыкъя дэменлыклэн калык кылосъя (фольклоръя) ансамбляз. Туж синмаськем но паймем тодмо удмурт азьветлӥсьлэн Алексей Гаврилович Мазитовлэн нылызлы Анна Алексеевна Мерзляковалы. Чылкак чабкиське но шуэ: кыӵе адями со, Анна апай! Котьмае тодэ, вала, котькин сярысь сюлмаськыны быгатэ... Ольвиялы мон шуисько: Анна апаед, нылы, йылпумъяз гурт университетэз. Ӟеч тодэ на анай-атаезлэсь, вашкала гуртоосызлэсь, ӵыжы-выжыосызлэсь йылолъёссэс, сэбедъёссэс. Профессор Виктор Бугровский шуэ: "Вашкалаез - культуралэн шорсюлмыз". Нош культуразэ ыштэм адями пудо-животлы пӧрме. Ӧтчаме люкаськемъёслы ӟеч мылкыд каронъёсын вазиськизы "Удмурт кенеш" огазеяськонлэн тӧроез Валентин Тубылов, Удмурт Элькунысь Кун Кенешлэн Тӧроезлэн воштӥсез Светлана Смирнова, калык кусыпъёсъя министр Николай Мусалимов. Соослэн но вераськемъёссы палдурес ӧз пӧрме. Валентин Тубылов: - Нуналысь нуналэ кенешиськом удмурт кылмы сярысь. Кӧня кужым понэмын, сое Конституцие пыртон понна!.. Туэ гужем ортчытӥмы азьвыл ик ялымтэ ӧтчам. Тросэз ӧз валалэ нырысь-валысь: кинлы, малы кулэ со? Нош туннэ шӧдӥськом ни кулэлыксэ. Удмуртлыкмес утён удысын кӧня ке вамышъёс вань. Удмурт кыл выльысь улӟе школаосын, вузъёсы но трос удмуртъёс пыро ини. Туэ вуылӥ Гаагае - Нокытын возьматымтэ калыкъёслэн огазеяськоназы удмуртъёс сярысь вераськись ик вылымтэ ай. Али дасяське выжы калыкъёслэн эрикрадъёссы (правооссы) сярысь декларация. Светлана Смирнова: - Асьмелы вань кужыммес люканы кулэ одӥг кырыме. Соин ик туннэ ваньмызлы вазиськисько: ойдолэ ужалом, ог-огмес валаса, ог-огмылы юрттыса. Алигес люкаськылӥз "Удмурт кенеш" огазеяськонлэн Пичи кенешез. монэ дэмлазы Кун Думае депутатэ. Мандат басьтыны кылдӥз ке, весь вань тодон-валанме, весь вань кужымме сётыны туртто удмурт калыкелы. Чилясь сапег кутчатэк Ӧй дышы чебер эктыны. Пӧртэм нужнаез адӟытэк Ӧй дышы чебер кырӟаны... Та кырӟан туж яркыт суреда удмуртъёслэсь улон-вылонзэс. Ойдолэ чиданы турттоме котькыӵе шугадӟонэз! Николай Мусалимов: - Алигес вуылӥ Вавож ёросэ. Али ке но син азям Брызгалово школаысь дышетӥсьлэн синвуаськыса вераськемез: чалякгес кутэ вал ини кыл сярысь законэз - анай-атайёс нылпиоссэс удмурт кыллы уг дышето!.. Али дасяськом шаермылэн палэназ улӥсь удмуртъёслэсь улон-вылонзэс азинтонъя программа. Ми кичӧлтэмъя ик дасямын финн-угор выжыослэсь улон-вылонзэс азинтонъя программа. Владимир Никифорович Савельев шуиз: кылдытоно пӧртэм огазеяськонъёс. Али ужась кызь одӥгез пӧлысь ньылез - асьмелэн. Валче ужаса гинэ асьмеос шедьтыны быгатом шудбурмылэсь шорсюлэмзэ... *** Кӧня ке ужез быдэстыны чакласа, Удмурт лулчеберлыкъя дэменлык кутӥз нимысьтыз вазиськон. Трос пумо дэмланъёс, ӵектонъёс пӧлысь тужгес кулэосыз таӵеосыз, дыр: Можга педучилищелы берыктоно Трокайлэсь (Трофим Борисовлэсь) нимзэ. Тямысэтӥ арзэ ини мыно та ужпум сярысь вераськонъёс. Зэм, ӟеч воштӥськон уг шӧдӥськы. Ӧтчаме лыктэмъёс огкылысь кариськизы таӵе малпанэн но: арлы быдэ нырысетӥ шуркынмонэ, Куӟебай Герд бырем нуналэ, буре вайылоно шимес куамынэтӥ аръёсы нокыӵе янгыштэк быдтэм удмурт визьлюкъёсмес... *** Удмуртъёсты бугыртӥз ӧтчам. Удмуртъёс понна быриз Куӟебай Герд. Кузьма Павлович весь оскиз: солэн выжыосыз куке но ӝутскозы тужгес яркыт кизили дорозь. Ойдолэ шедьтом сое! Зарни шунды ӝужалоз! Ӧтчамын верамъёсты дасяз Елена ВИНОГРАДОВА. Владимир КАМАШЕВЛЭН туспуктэмъёсыз. Книгаын - пыӵал лэсьтӥсьёс Кызетӥ коньывуонэ Ижмашлэн музеяз Александр Малимонлэн "Отечественные автоматы" нимо книгаезлэн презентациез ортчиз. Александр Андреевичлэн быдэс улонэз ожгар тӥрлыкен герӟаськемын: 16 ар ӵоже полигонын ужаз, берло вакытэ "Ижмаш" заводын тыршиз. А. А. Малимон вылаз шӧмъяз пыӵал лэсьтон удысэз. Та бордысь ик, вылды, вордӥськиз Александр Андреевичлэн книгаез. Сое печатлатозь, автор кык ар ӵоже архивъёсын ужаз, солэсь но уно дыр гожъянлы быриз. Книгалэн нырысетӥ бамъёсыз А. Малимонлэн полигонын ужам дыръёсыз сярысь тодэ ваёнъёсыз, адӟем суредъёсыныз тодмато. Кыкетӥ люкетаз автоматлэн кылдэмез, солэн ёзъёсыз сярысь мадемын. Берпуметӥ бамъёсаз Иж карысь пыӵал поттӥсь заводъёслэн уженызы тодмато. "Отечественные автоматы" книгазэ кылдытыкуз, автор та удысысь ветеранъёсын - ӧнерчиосын пумиськылӥз. Озьы ужаз 400 пала геройёс пыртэмын. "Оскымон гожтыны тырши, - шуэ автор. - Книгае нимаз документ выллем мед луоз". "Уката ик "Отечественные автоматы" конструкторъёслы кулэ книга ялан син азязы мед улоз", - малпанзэ шараяз Михаил Калашников. Та книга, пе, Россиысь ожгар тӥрлык поттӥсьёслы бадӟым кузьым луоз. Жаляса верано луэ, книга ӧжыт тиражен поттэмын. Соин ик лыдӟисьёс-тунсыкъяськисьёс магазин ӝажыосысь сое уз адӟе, вазиськоно луоз библиотекаосы. Оксана Москова, Удмурт кун университетын дышетскись. Кужымдэ сёт! Пужым ягын котьку югыт, сайкыт. Та писпулэн сулэз, быдэс модосэз зарнивуамын кадь. Яге пырыса, вань урод мылкыд вунэ, сюлэме шумпотон лыктэ. Соин но, дыр, удмуртъёс пуксьылӥзы ягъёс вадьсы. Вӧсяськон интыязы, кереметын, кыз сяна, котьку будэ вал пужым но. Нимыз но угось солэн кужым кыллы тупа. Ӝужыт яг, Ягонюр, Вужгурт яг, Сюныг яг. Тазьы нимамын Сюмси ёросысь Вылынгурт котырысь чебер пужымо интыос. Кызьы тодмо, яг шуо удмуртъёс пужым тэлез. Али мынам коркае но пуктэмын яг кыллэсь кылдэм Ягул гуртын. Тэль дурын ке но сылэ, корка дортӥм ортчись сюрес дуре юри мерттӥ на трос пужым. Сыӵе яра со мыным! Та писпу адямилы сётэ кужым, эмъя. Соин ик эмъяськон интыосты: санаторийёсты, профилакторийёсты, больницаосты - пукто ягъёсы, нош отын пужым ӧжыт ке, соосты юри мертто. Ӝог будӥсь писпу, вить-дас ар ортчыса, огшоры корка ӝужда луэ ини. Вашкала ӵыжы-выжыосмы пӧлысь тросэз озьы ик гуртъёссэс пуктылӥллям яг вӧзы. Со сярысь верало соослэн нимъёссы но. Витьтонэтӥ аръёсы шаерамы гинэ тямыс Ягул гурт вал, нош яг кыллэсь вань кылдэмъёсыз, - куамын куинь. Нош малы ӟучъёс тэль кузёзэс яг кышномурт (Баба Яга) шуиллям? Оло, соосты кышкатъяллям асьме пала вашкала дыръя вуылэм пӧйшурасьёс? Угось удмурт пиосмуртъёс азьло ветло вал кышнооссы кадь ик кузь дэремъёссын. Быдӟым Отечественной войналэсь азьло Сюмси ёросысь Калмез шурлэн тупалоз трос сю гектаръем ягъёс сутскизы. Шуг вал оскыны, куке но отын нош ик пужымъёс куашетозы на шуыса. Али татын куатьтон аресъем пужымъёс будо. Тылпуэз тодэ вайыто зӧк, сутскем писпу лӥялъёс но модосъёс гинэ. Тылпу дыръя пырак Калмез дурын будӥсь писпуос гинэ луло кылизы. Табере соосты но куинь-ньыль кузя котыртыса-ӟыгыртыса, киосты ваче кутыны шуг. Кызьы тодмо, луо вылын ю-нянь умой уг удалты кыедатэк, нош Калмез палась лудъёс луоё. Тросэз соос али аналтэмын: уг гырисько, уг кизисько. Нош пужым луоез яратэ. Туж умой луысал, отчы пужым но кедрапу мерттысалыд ке. Та ягъёс калыкмылы, оглом - быдэс шаермылы, аръёс ортчыса, уно пайда сётысалзы. Ма гинэ уг лэсьто, уг потто одӥг выжыысь писпуослэсь? Нырысь ик, вылӥ ӟечлыко лэсьтӥськон материал, С витамин, каротин, вӧй, скипидар, канифоль, тэкит, пӧртэм эмъюмъёс - ваньзэ вераса уд быдты. Сяськаяськыкузы нош мушъёс отысь мӧль но басьто. Сюмси, Сьӧлта, Ува, Эгра, Вотка, Сарапул, Можга, Кизнер районъёс - пужымлэн яратоно интыосыз. Калмез, Ватка но Кам палась ёросъёсын ог сю сюрс гектар пала музъемъёс буш уло. Ма бен карод, соосты кыедатэк, отын ю урод будэ бере? Мамында кызиськод, сомында ик басьтӥськод. Озьы юнме трос ваньбур, дыр быдто колхозъёс. Озьы медаз луы. Отчы пужым, кедрапу но мукет кулэ луись писпуос мерттоно. Кедрапу ягъёсмы нош асьмелэн туж ӧжыт. Нош со муосмы вылын умой будэ. Ортчем дауре ик сое мерттӥзы Эгра (Игра) ёросысь Зура черкогурт палан. Али но шумпоттэ татысь калыкез мульыеныз. Куамын-ньыльдон ар талэсь азьло кедрапу ягъёс вал Шаркан но Дэри (Завьял) районъёсын. Соос туж умой будо, табере мульызы но вань ини. Медаз согиськы чебер музъеммы бадьпуэн, серыпуэн, пушнерен, потэн. Сое уката синмаськымон кароно чибори но пайда ваись будосъёсын, писпуосын. Н. ВОЗИСОВ. Нюръяськон лэчытгес, амалъёс кырсесьгес Кун Думае быръёнъёс дырозь кылиз на толэзь но ӝыны пала. Отчы шедён понна нюръяськон нуналысь нуналэ пуроме, лэчытгес луэ. Зэм, нимаз кандидатъёс но партиос, огазеяськонъёс но движениос куспазы меӵак, шара уг ченгешо ай азьвыл сямен. (Кин тодэ, оло, та чалмыт югдур сильтӧл азьын шыпыт куазь выллем.) Со понна эсэпсэ валатэк эрказъясько ивор вӧлмытӥсь ёзэтъёс - газетъёс, телевидение но радио. Валамон, котькудӥзлэн мышказ сылэ соиз яке таиз политической кужым, кудъёсыз яке кузёос луо соослы яке бадӟым коньдон тырыса медъяло. Сергей Доренколэн нимыз чик бадӟыматэк вераса, быдэс Россилы тодмо, дыр. Номыр уд шуы, визьмо адями, синмаськымон журналист. Но берло дыре солэн программаосыз азьвыл гажан мылкыдэз ялан сӥято, чурытгес ке уд вера. Вераськон мынэ солэн "Отечество - Вся Россия" (ОВР) огазеяськон вылэ пож ву киськамез сярысь. Ватонэз ӧвӧл, Кремль понна та огазеяськон али пӧськы выллем. Президентлэн котырысьтыз кивалтӥсьёс кышкало угось: ОВР быръёнъёсын вормиз ке, соослы властен люкиськоно луоз, бадӟымгес ыштонъёс ӧз ке адӟе ай. Соин ик соос али вань луонлыкъёсты, нырысь ик, ивор вӧлмытӥсь ёзэтъёсты, уже кутыны тыршо. Соос пӧлысь одӥгез - ОРТ телекомпания, Березовскийлэн возёсэз, но С.Доренколэн арня ӝытъёсы потӥсь программаез. Зэм, Доренко одӥгаз но программаяз, уг ке янгышаськы, меӵак ОВР вылэ ӧз урдскылы. Со понна ассэ ачиз вунэтыса дэриен сура огазеяськонлэсь кивалтӥсьёссэ. Быдэс странаез бугыртӥз солэн Ю.Лужковлы но солэн семьяезлы сӥзем передачаез. Ваньзэ одӥг кырсь люке огазеяз гажано журналист - мэрлэсь кунсьӧр кусыпъёссэ но, солэсь валъёссэ но, кузпалэзлэсь ужбергатэмзэ но, таизлэсь вынызлэсь (озьы ке со) ушъяны луонтэм ужъёссэ но. Кытӥяз валаны ик шуг вал, мар вераны турттэ экранысь адями, сокем суро- пожо мадёнэз. Тодады вае ай: "...Лужковлэн семьяез. Лужков но солэн кузпалэз. Лужковлэн кузпалэзлэн картэз - Лужков. Лужковлэн семьяысьтыз адями - ачиз Лужков..." Йырсазьзэ ыштымон кудӟем муртлэн уйбыртэмезлы кельше, озьы ӧвӧл шат? Тӥни кыӵе "пӧрам" ӵектэ телевизор учкисьёслы (лыдӟы: бырйисьёслы) куке но гажамон журналист. Мар вуттӥз таӵе ушъянтэм сюрес вылэ С.Доренкоез: кивалтӥсьёсызлэн косэмзы-а яке кузь уксё-а? Коть соиз, коть таиз, но уг, дыр, яра аслэсьтыд ӟеч нимдэ, дандэ сокем улӥе уськытыны. Сое саптаны кема ӧвӧл, нош берыктыны секыт, куддыръя уг но луы ни. 24-тӥ октябре Доренко нош ик "пиштӥз" быгатэменыз. Таяз учыре "гольык кылиз" Евгений Примаковез. Ярам коть, Лужков вылэ кадь эсэпсэ валатэк пож ву ӧз киська, керпотӥзгес, луоз. Калык пӧлын угось юн гажало ай Евгений Максимовичез. Озьы ке но, тырмыт гинэ "куртчылыны" турттӥз азьвыл премьерез. Доренкоез малы ке но туж сюлэмшугъяськытэ Примаковлэн Швейцариын эмъяськемез. Сыӵе ик операциосты, пе, асьме врачъёс но туж ӟеч лэсьто. Кунгож сьӧрын ортчытэм операцилэсь дунзэ но кыл куспетӥ сямен ивортэ - 45 сюрс доллар: малпаське, пе, гажано гражданъёс, кытысь меда сомында коньдон шедьтэмын. Собере журналист Евгений Максимовичлэн арлыдэныз герӟаськем вуоно висёнъёсыз пумысен мур сюлэмшугъяськемзэ вера. Нош ик малпаськыны ӵектэ кадь: кыӵе, пе, президент пӧрмоз на висись, пересь адямилэсь. Мар шуод та пумысен? Нырысь ик, котькуд адямилэн правоез вань сыӵе врач дорын, сыӵе странаын эмъяськыны, кудзэ со умоен лыдъя, луонлыкъёсыз вань ке. Нош муртлэн кисыысьтыз коньдонзэ лыдъяны воксё но чебер ӧвӧл. Валамон, лушкамын ӧвӧл ке со. Но тазэ эскероно азьвыл. Озьы ик эскероно, дыр, йӧттӥз ик-а кизэ Примаков Шеварднадзеез виыны турттон борды. Собере гинэ со сярысь быдэс страна тыр шара вераны луэ. Нош сотэк Доренколэн вераськемез кыл вӧлдонлы укша. Таяз передачаяз автор нош тодаз вае Юрий Скуратовез. Зэм, Генеральной прокурорлэн нимыз вуоно быръёнъёсын но, ОВР-ен но герӟаськемын ӧвӧл. Но со понна дурбасьтӥзы вал Примаков но Лужков. Озьыен, Скуратов пыр нош ик та адямиосты саптаны туртто. Котьма ке но, кибашлы ик журналист Сергей Доренко. Сомында маде, вылаз ик, уродзэ гинэ Примаков, Лужков но Яковлев сярысь, но одӥг кылын но уг герӟа соослэсь нимъёссэс ОВР огазеяськонэн но, быръёнъёсын но. Нош котькудӥз малпаськыны быгатӥсь адями валаз, малы Сергей Доренко узатэм пуны сямен урдскылэ Кремль понна ярантэм адямиос вылэ. Туж жаляса верано луэ, милям ужъя эшмы сокем кырсь амалъёслэсь уг юрды шуыса. Сыӵеосын сэрен ик потэмын, дыр, "вузаськем журналистъёс" ним но. Кыӵе меда зынмем ивор Кремльлэн тушмонъёсыз сярысь вералоз Сергей Доренко матысь арня ӝытэ? Г.Коряков. Ватсан интые: Та чуръёсты гожъяку тодмо луиз: Кун Дума эскерыны кулэ быръёнъёс дыръя кырсь амалъёсты уже кутонлэсь алон но бырйисьёслэсь сётэм куараоссэс пӧяса лыдъям понна кыл кутон сярысь законопроектъёсты. Мар бен, оскыны гинэ кылиз на, югдур оло, ӧжыт ке но умоялоз но быръёнъёсмы вань дуннелы серем карымон уз ортче шуыса. Ноябрь: тодмо нимъёс но нуналъёс 1. - Вордскемез дырысен 50 арес тырме Анна Сергеевна Измайлова-Зуевалы (1949), Удмуртиысь кылтодон наукаосъя докторлы. 2. - 80 ар талэсь азьвыл (1919) Ижевскын усьтэмын вал роялен, скрипкаен, гитараен, духовой инструментъёсын шудонъя но кырӟанъя дун тырытэк дышетсконъя музыкальной школа. 3. - Вордскемез дырысен 90 ар тырме Советской Союзлэн Александр Егорович Ярославцевилы (1909-1972). Вордскемын Шаркан ёросысь Кайсыгуртын. - 75 ар талэсь азьло (1924) потӥз "Голос крестьянина" газетлэн нырысетӥез номерез - "Ижевская правда" газетлэн приложениез. - Вордскемез дырысен 50 арес тырме Павел Николаевич Вершининлы (1949), Удмурт Республикаысь Кун Кенешлэн Тӧроезлэн нырысетӥ воштӥсезлы. 4. - 80 ар талэсь азьвыл (1919) Сарапулын усьтӥськиз механической техникум. - Вордскемез дырысен 70 арес тырме (1929) Кияса ёросысь Уддяди гуртын вордскем писательлы Владимир Ильич Бубякинлы. - 30 ар талэсь азьвыл (1969) Удмуртиысь нырысьсэ кыскыны ӧдъязы му вӧй: нырысетӥ тонна му вӧй поттэмын Красногорск ёросысь Архангельское черкогурт вӧзын. 6. - 35 ар талэсь азьвыл (1964) Ижевскысь "Октябрь" культура дворецын кылдытэмын вал пинал учкисьёслэн театрзы. 7. - 70 ар талэсь азьвыл (1929) Глазов городын усьтӥськиз колхозно-кооперативной техникум. 8. - Вордскемез дырысен 90 ар тырме Клавдия Кузьминична Гавриловалы (1909-1985), УАССР-ысь калык артисткалы. Вордскемын Вавож ёросысь Сулвай-Какси гуртын. 9. - Вордскемез дырысен 110 ар тырме Дмитрий Петрович Бор-Раменскийлы (1889-1965), ӟуч писательлы, педагоглы. Со кема аръёс ӵоже улӥз но ужаз Сарапул городын. 10. - Вордскемез дырысен 80 ар тырме Михаил Тимофеевич Калашниковлы (1919), пыӵал тӥрлык поттон удысысь тодмо конструктор-оружейниклы, Социалистической ужысь кык пол Героезлы, Ленинской но кун премиослэн лауреатэзлы, технической наукаосъя докторлы. 1949-тӥ арысен Ижевск городын улэ. М. Калашников тодмо луиз быдэс дуннеын "7,62 миллиметръем Калашников автомат" кылдытэменыз, солэн дасям пыӵал тӥрлыкез вӧлмемын быдэс дунне вылын. 12.- Вордскемез дырысен 100 ар тырме Николай Александрович Косолаповлы (1899- 1974), суредасьлы, УАССР-ысь искусство удысысь дано ужасьлы. 13. - 40 ар талэсь азьло (1959) Удмурт музыкально-драматической театрын нырысьсэ возьматӥзы Г. М. Корепанов-Камскийлэн крезьгурезъя "Любушка" удмурт оперетта. 14. - Вордскемез дырысен 85 ар тырме Михаил Вячеславович Горбушинлы (1914-1988), удмурт критиклы, литературоведлы, прозаиклы. Вордскемын Балезино ёросысь Зотино гуртын. 15. - 70 ар тырме (1929) шаерысьтымы нырысетӥез культпросветучрежденилэн ужаны кутскемез дырысен - Октябрь революция клублэн. 16. - 70 ар талэсь азьвыл (1974) Ижевскын усьтӥськиз индустриальной техникум. 23.- 25 ар талэсь азьвыл (1974) Ижевскын ортчиз Удмурт кун филармониысь камерной оркестрлэн нырысетӥ концертэз. 28. - 90 ар талэсь азьвыл (1909) Туркестанысь юбилейной адӟытонысь комитет вылӥ ӟечлыкен лэсьтэм андан но пыӵал тӥрлык понна Ижевскысь заводлы сётӥз Почёт диплом но бадӟым зарни медаль. 30. - 35 ар талэсь азьвыл (1964) Ижевскын усьтӥськиз Машиностроитель спортъя дворец. Ноябре 70 ар талэсь азьвыл (1929) удмурт литератураын нырысьсэ печатласькиз Кедра Митрейлэн (Дмитрий Иванович Корепановлэн) "Секыт зӥбет" романэз. 65 ар талэсь азьвыл (1934) Воткинскысь соборлэн выльдэм юртаз усьтӥськиз городысь драмая театр. 25 ар талэсь азьвыл (1974) Удмурт кун музыкально-драматической театр люкемын вал кык театрлы - драматической но музыкальной. (1993-тӥ арысен - Удмурт Республикаысь Операя но балетъя театр). 25 ар талэсь азьвыл (1974) Удмуртиысь 31 художник пыриськиз Горький (туэ Нижний Новгород) городын радъям 4-тӥ зональной выставкалэн ужрадаз. Возьматэмын вал 97 ужзы. Е. УШАКОВА. Шуркынмон толэзь Куазь туэ пӧртмаське, кожалод: 18-тӥ коньывуонэ гинэ музъем нырысьсэ лымыен шобырскиз. Векчи лымы ын уйлы гинэ чидаз - музъемлэн но омырлэн шунытлыкез сое ву- котлы сылмытӥз. Нош татчыозь шӧдӥсько на вал гужемлэн куд-ог тодметъёсыз. Кылсярысь, нырысетӥ лымы усьытозь, ог 70 пӧртэм йӧсъёс яке ӧз дугдэ на вал сяськаяськемысь, яке кыкетӥзэ сяська быгыльскон дырозь вуизы! Кезьыт луон туссэ соос пӧлысь быдтӥзы но берытскем шуныт нуналъёс та будосъёсты уз ни улӟытэ. Шуркынмон толэзе куаро писпуос гольык сыло ини. Тыпы гинэ куасьмем куаръёсызлэсь люкиськыны уг дырты. Эшшо ке сирень аслаз вож куаръёсыныз абдрамон адӟиське. Нош та будосъёслэн сямзылы асьмеос сокем ик ум паймиське. Соос уго шуныт палась вуэмын асьме доры. Тыпы кыр будосъёс пӧлы пыре ке но, удмурт шаерын лымшор ёросъёсын гинэ вӧлмемын. Куаро писпуо нюлэсъёсын (бадяр, беризь, пипу, тыпы, сирпу) куашкам куаръёслэсь небыт но зӧк пыдул кылдэмын. Лысо писпуо тэльёсын та сӥлэн зӧкталаез сокем ик бадӟым ӧвӧл. Пыдул куар шобрет толалтэ тужгес но кулэ векчи лулосъёслы но будосъёслы, малы ке шуоно, со соослы кезьыт вакытэз шунытэн ортчытыны юрттэ. Нумыръёс, чонариос, нымы-кибыос, мувыр бака выжыысь лулосъёс но мукет векчи но бадӟымесь шоро-куспо лулосъёс кезьытлэсь татчы пегӟо. Тросэз векчи нымы-кибыос но соослэн нумыръёссы толлы ватско векчи но сюбег пасьёсы, сулъёс улэ, вуж, сисьмем лӥял пушкы. Изись-кӧлась векчиослы мукет лулосъёс маза уг сёто. Толлы сётӥськисьтэм тылобурдоослы но изьверъёслы соос сион луо. Кылсярысь, писпу сул улэ но сулъёслэн висъёсазы пегӟем тэчкыосты (гусеницаосты) но нымы-кибыосты шедьто пислэгъёс, сизь, тэлясь (пищуха), кызтэй (поползень). Музъем кӧбӧлё нумыръёсты (май бӧчыослэн) сиыны ярато мудӥсь но мукет шыръёсты (крот, землеройка). Изьыны интыясько ини та вакытэ гондыръёс но нардыос (барсук), нош енот пупыос сярысь верано ке, соос сап-сап кӧлыны уг валало - кӧня ке шунытгес луэ ке, карысьтызы пото но пӧйшураллясько; кӧттыр берытско ке, нош ик умме усьыны интыясько. "Кезьыт виро" лулосъёс толалтэ кулэм кадь луо. Нош соос улэпесь, бырон калэ вуэ пуш вузы ("вирзы") йӧӟектыны сюрыку гинэ. Йӧ пырыос мугоразы ӧз ке кылдэ, нымы- кибыос но бубылиос, чонариос но нумыръёс кезьытэз чидалозы. Ӵушъял, комак, лобась шыр (урткыӵ) толлы мур умме усё. Мугорзылэн шунытсы кезьыт дыре кулэсме, сюлэмзы но шергес тэтча. Изись ӵушъяллэн, кылсярысь, толалтэ мугор шунытэз 1,8 - 4 градус шуныт гинэ луэ, нош урткыӵлэн одӥг градус (гужем со 38-озь но вуэ). Гондырлэн мугор шунытэз гужем но толалтэ огкадьгес (+36,5-37,0 градус), толалтэ шунытэз возён понна со ог 48-80 кило мугор кӧйзэ "сутэ"! Нюжветлӥсьёслэн (пресмыкающиеся) но вуын но музъем вылын улӥсь лулосъёслэн (земноводные) мугор пушказы йӧ уг ке кылды, толалтэзэ кӧбератэк ортчо. Ноябре ву пыдэсы лэзько вӧсь чорыгъёс (осётр выжыысь), карпуш (карп), карака (карась) но мукетъёсыз. Та толэзе ик адӟыны луэ дыртытэк лымшор пала кошкись тӧдьы юсьёсты, куд-ог луд ӵӧж выжыысь тылобурдо йӧсъёсты. Сяла сусыпулэсь мульызэ но мукет будосъёслэсь емышсэ лоскатэ, тул уллёен сиён утчаса лоба бусыостӥ, ӵемгес пыраны кутске лулпу но кызьпу нюлэсъёсы, дунъя лысъёсын, яг но нюрмульыен кӧтсэ тыре. Вераны кулэ на, пӧртэм лулосъёс толалтэлы адямилэн улон котыраз матэкто: бызара, комак, шыръёс, ӟиллё (зяблик), ӵӧжмер (горностай). Адямилэн улос котыраз сиён уга капчигес шедьтыны - шыръёсты. Нош куд-огез, кылсырясь, бызара (хорёк) курегъёс доры но вуттӥське. Ноябре кионъёс тунсыкъяськыны кутско гуртысь пудоосын но пуныосын. Пыӵалэн ке соосты ӧд кышкаты, ыжъёслэн, кечъёслэн но тужгес ик пуныослэн лыдзы кулэсмоз. Та толэзе ик нылпиос куас но коньки вылэ султо ини. Толалтэлэн кузёяськон дырыз вуиз. Быгатоз-а туэ Тол Бабай сямзэ возьматыны - тае тодыны быгатомы ноябре. В. Туганаев, профессор. 1999 ар понна Удмурт Республикалэсь кун премиоссэ сётон сярысь Удмурт Республикаысь Кун Кенешлэн Тӧроезлэн постановлениез Наука но техника удысъя 1999-тӥ арлы Кун премиез сётоно "Нылпиослэсь шокан ёзвиоссэс эмъянъя, висёнэз дыраз тодманъя но алонъя азинлыко амалъёс но соосты улонэ пыӵатон" уж бордын тыршем тодосчиослэн но врачъёслэн творческой коллективзылы: 1. Гришкин Иван Георгиевич - профессор, медицина наукаосъя доктор, Ижевскысь медициная кун академиысь нылпи инфекциосъя кафедраен кивалтӥсь, Удмурт Республикаысь наукаосъя академилэн член-корреспондентэз, Удмурт Республикаысь дано врач, Удмурт Республикаысь нылпи врачъёслэн ассоциацизылэн президентэз - коллективен кивалтӥсь. 2. Ермакова Маргарита Кузьминична - медицина наукаосъя кандидат, доцент, Ижевскысь медициная кун академиысь нылпи висёнъёсъя кафедраен кивалтӥсь. 3. Бриткова Татьяна Александровна - медицина наукаосъя кандидат, Ижевскысь медициная кун академиысь нылпи инфекциосъя кафедраысь ассистент. 4. Гербер Юрий Маркович - 7 номеро медсанчастьысь валтӥсь врач, Россия Федерациысь но Удмурт Республикаысь дано врач. 5. Королева Мария Михайловна - 7 номеро медсанчастьысь нылпи висёнъёсъя отделениен кивалтӥсь, вылӥ категориен врач. 6. Лекомцева Ольга Игнатьевна - Ижевскысь медициная кун академиысь нылпи инфекциосъя кафедраысь ассистент. 7. Лаврова Ирина Ивановна - Ижевскысь медициная кун академиысь нылпи инфекциосъя кафедраысь аспирант. 8. Стерхова Елена Вениаминовна - Ижевскысь медициная кун академиысь педиатрияя но неонатологияя кафедраысь ассистент. 9. Ушнурцев Михаил Юрьевич - Удмурт Республикаысь Ижевск городлэн администрациысьтыз тазалыкез утёнъя управленилэн кивалтӥсез, Удмурт Республикаысь тазалыкез утён удысысь дано ужась. Литература но искусство удысъя 1999-тӥ арлы Кун премиез сётоно Удмурт Республикалэн библиографиезъя кылдытэм ужзы понна Национальной библиотекаын ужась коллективлы. 1. Егорова Любовь Ивановна - кун национальной библиографияя отделэн кивалтӥсь. 2. Кондратьева Людмила Геннадьевна - кун национальной библиографияя отделысь валтӥсь библиотекарь. 3. Захарова Ангелина Васильевна - кун библиографияя секторен кивалтӥсь. 4. Тамбовцева Фаина Николаевна - кун национальной библиографияя отделысь валтӥсь библиотекарь. 5. Богомолова Маргарита Владимировна - редакционно-издательской юртысь валтӥсь библиотекарь. 6. Моисеева Любовь Владимировна - документъёсты наукалэн куронъёсызъя радъян отделысь валтӥсь библиотекарь. 7. Алешин Сергей Геннадьевич - автоматизацияя отделысь инженер-программист. 8. Кирьянова Юлия Станиславовна - автоматизацияя отделысь программист. Удмурт Республикаысь Кун Кенешлэн Тӧроез А. А. Волков. Ижевск город, 1999-тӥ арын 29-тӥ октябре � 168-ИИ. Сюлмысьтымы ӟечкыласьком Пичи Пурга ёросысь Кечево гуртын улӥсь Волков Иван Павловичез вордӥськем нуналэныз. Сӥзиськом шудбур, капчи мылкыд, кема-кема аръёс ӵоже висьытэк улон. Гажаса нылпиосыд но нылпиосыдлэн пиналъёссы. Кӧльы но, пус но кулэ Веранэз ӧвӧл, шаерамы сюресъёсмы арысь аре умояло, чеберско. Алигес со пусъемын вал автотранспортын ужасьёслэн но сюрес лэсьтӥсьёслэн профессиональной праздниказы но. Туала вакытэ сюрес лэсьтон, сое выльдон туж дуно усе но секытэн мынэ. Но шаерысьтымы сюрес лэсьтӥсьёс возисько ай. Милям тыршеммы син азьын: городъёс сьӧрысь сюресъёсмы берло дыре данаклы вольытэсь луизы. Соос, бускель Татарстан, Киров, Пермь областьёсын сярысь, шӧдскымон умоесь. Со бен ас кожаз уг быдэсъяськы. "Удмуртавтодор" кӧльы дася Екатеринбург дорысь Ревда городын. Отын асьме республикалэн флагез ошемын но гербез шуккемын. Та предприятиез кутыкумы, со араз 200 сюрс кубометр кӧльы пыргытэ вал, нош кужымез кык поллэсь трос. Матысь аръёсы ми сое ӟеч-ӟеч выльдӥм, туала оборудование басьтӥм но пуктӥм. Вуоно арын ньыль сэрего векчи кӧльы (5,2 миллиметръем) дасяны ӧдъялом. Со сюрес вылын уг котмы но кема чидалоз. Озьы сюресъёсмы уката ӟечгес луозы. Выль агрегат одӥг часкын 250 кубометр кӧльы пыргытоз, сутка ӵоже - 5 сюрс, нош толэзьскын - 12,5 сюрс кубометр. Та кӧльы дуно усе, одӥг кубометрзэ Москвае 200 манетэн басьто. Асьмеос сое дорамы ваиськом чугун сюрес вагонъёсын. Кӧльымес басьто корка лэсьтӥсь организациос но. Туннэ вераны кулэ, Ревдаысь карьерез Свердловск улосысь кузёос мырдэм сётӥзы, котькыӵе шуг-секытъёс кылдытъязы. Кылсярысь, Екатеринбургысь медеплавильной завод чугун сюрес вылтӥз ветлыны уг лэзьы вал. Али завод арлы быдэ шорлыдын 400 сюрс кубометрлэсь уно кӧльы пыргытэ. Сое ӝоктыны сюрес управлениослэн интыоссы вань. Нош "Удмуртавтодорлэн", "Дорснабез" кылдӥз 1995-тӥ арын. Соин кивалтыны мыным оскизы. Базамы интыяськемын О.Кошевой урамын. Отын лэсьтӥськом сюрес пусъёс, корт кенеръёс но автобус дугдылон интыос. Араз 15-20 сюрс пусъёс лэсьтӥськом. Со понна США-ысь усто плёнка басьтӥськом. Одӥг квадрат метрез 20 доллар сылэ, нош чида со 5-7 ар. Оглом вераса, одӥг сюрес пус 1000 манет сылэ, пуктонзэ но мукет ужзэ вератэк. Озьы ке но, сюрес пусъёсмес басьто ни Татарстанысь Елабуга, Менделеевск городъёс. Тунсыкъясько ни Челябинск, Пермь но Киров областьёс. Сюрес пусъёс асьмелы но тырмыт лэсьтӥськом, вузаны но шеде. Туэ тани миым мында ик 15 сюрс сюрес пус вуттом. Кылем арын 42 иськем корт кенеръёс лэсьтӥм. Туэ но сомында ик луоз. Ньылетӥ арзэ ужа ни легковой автомобильёсты тупатъянъя станция (СТС). Озьы ик пуктӥм пилорама но усьтӥм столярной цех. Отын лэсьтӥськом вольыт пуллэсь (вагонкалэсь) ӧсъёс, укноос но мукетсэ. Али вуттэмын ни вандэм пулэз куасьтон инты. Татын озьы ик пуктэмын автозаправка (3 колонка). Пилорама араз 6 сюрс кубометр пул пиле. "Дорснаб", сюрес лэсьтӥсьёс сярысь сюлмаськыса, Металлург микрорайонын, 9-тӥ Подлесной урамын сиён-юон вузанъя "Сюрес" ("Дорожник") нимо чебер магазин усьтӥз. Отын вузасько Пичи Пурга районысь Аксакшур йӧл цехысьтыз дунтэм но ческыт сиён- юонъёс. Подсобной хозяйстволы 500 гектар музъем но висъямын. Магазинын котьку вузасько нап йӧл, сыр, вӧй, творог но музонэз. "Автодор" Ижын озьы ик усьтэ ужасьёссэ выль сямен эмъянъя кабинет. Со радъяське Колль немец учёнойлэн электропунктурной амалэзъя. Котькуд адямилэн киосаз, пыдъёсаз тужгес шӧдӥсь 180 интыосыз вань. Соос возьмато быдэс мугорлэсь ужамзэ, кужымзэ яке ляб интыоссэ. Нокыӵе УЗИ, рентген кулэ ӧвӧл. Таӵе амалэн трос адямиос эмъясько ни Москваын, Санкт-Петербургын но мукет городъёсын. Асьмелэн со али гинэ выжыяське ай. Нош милям медкабинетамы ужало Любовь Пантюхина но Владимир Князев. Соос тодон-валан басьтӥзы Киевын но Москваын. "Дорснаб" Краснодар крайын но пулэн но солэсь лэсьтэм арбериосын вузкаре. Отын нимаз ёзмы вань. Азьланезлы но милям бадӟымесь малпанъёсмы. Республикаямы чакласьком пичи нефтебаза пуктыны. Отчы 3 сюрс кубометр кизер эстӥськон тэроз. Ялан паськыта Кечевоысь базамы. Со ужа республикалэн лымшор районъёсыз понна. Ортчемзэ тодэ вайыса, ачим быдтӥ Ростовысь автодорожной техникумез но инженерно- мелиоративной институтэз. Куинь ар ужай Глазовысь "Дорожник" кооперативын. Удмуртия соку арлы быдэ 220-240 иськем асфальт сюрес вуттэ вал. Тани 1990-тӥ арын милям кооперативмы гинэ 90 иськем ӟеч сюрес лэсьтӥз. Ваньмыз со уй пал районъёсын (Глазов, Юкаменск, Яр, Кез) вуттэмын. Мукет сямен вераса, Удмуртилэн 500 иськемлэсь уно федеральной сюресэз вань ни. Со ортче Алнаш, Можга, Пичи Пурга, Иж, Як.-Бодья, Игра но Дэбес котыртӥ. "Дорснабын" тыршиськом одӥг малпанэн - кин ужаны сюлмаське, со амалъёс шедьтэ, нош кинлэн ужамез уг поты, со мугъёс утча. Сыӵе кылъёс гожтӥм нырысетӥ этаже пырон азе. Петр Печора, "Удмуртавтодор" кун предприятилэн "Дорснаб" ёзэзлэн тӧроез. Россиын азьпалан Алигес "Удмуртнефть" ас дораз бадӟым ужрад ортчытӥз. Конференцие 63 му вӧй но чагыр эстӥськон поттӥсь но машина лэсьтӥсь 63 компания люкаськылӥз. Соос пӧлын - Россиысь, Германиысь, Канадаысь, Великобританиысь но Пакистанысь специалистъёс. Акциосын "Удмуртнефть" огазеяськон Россиын нырысетӥосыз музъем валлин портыны кутскиз. Озьы, одӥг скважинаысь 45 процентозь нефть кыскыны ӧдъязы. Азьвыл та лыдпус 25-ёзь гинэ вуылӥз. "Удмуртнефть" та ужез радъяны 27 миллион доллар кутӥз. Нош музъем валлин портонэз но гумыосты уже кутон 450 миллион манет пайдалык ваиз ни. "Удмуртнефть", республикаын сяна, му вӧй поттэ на Оренбург но Иркутск улосвылъёсын, Татарстан но Коми Республикаосын. Удмуртиысь му вӧй поттӥсьёс дасясько али Новосибирск улосэ мыныны. Та вакыт ик Ливиен но вераськонъёс мыно. Кызьы пусйиз АО-лэн валтӥсь директорез Евгений Богомольный, мукет кунъёсын му вӧй поттон предприятилы эшшо но тросгес барыш вайыны кулэ. А. АНДРИЯНОВ. М. Т. Калашниковлы сӥзьыса Озьыен, тодмо конструкторлэн Михаил Тимофеевич Калашниковлэн вордскемез дырысен 80 ар тырмон нуналэз ялан матэктэ. Кызьы ивортылӥмы ни, выставка сӥё-дано усьтӥськоз 10-тӥ ноябре 9 часысен М. Т. Калашниковлэн музейно-выставочной комплексаз. Со интыяскьемын Карл Маркс ульчаысь 288-а номеро юртэ (ЦУМ-лэн улӥяз). Нош Удмурт Республикаысь Национальной музейын 10-тӥ но 11-тӥ ноябре 9 часысен 17 час 30 минутозь возьматӥськозы Россиысь АК автомат но мукет пыӵалтӥрлык поттӥсьёслэн ужъёссы. Озьы ик 10-тӥ ноябре 10 часысен Александр Невский соборын радъямын луоз М. Т. Калашниковез сӥлы карыса вӧсян. Со нуналэ ик 11 час 30 минутысен Удмурт Республикаысь Кун Кенешын но Правительствоын ортчоз Россия Федерацилэн но Удмурт Республикалэн кун наградаосыныз пусъем адямиосын пумиськон. Нош ӵуказеяз, 11-тӥ ноябре, 10 часысен Удмурт Республикаысь Операя но балетъя кун театрын М. Т. Калашников кунооссэ пумиталоз. Та театрын ик 15 часэ кутскоз сӥё-дано заседание. Бадӟым ужрад пумысен юанъёсты кылдӥзы ке, жингыртэ сое радъясь комитетэ. Солэн телефонэз - 52-51-19. Н. БАЙТЕРЯКОВ. "Мон улӥсько АСЛАМ шаерам..." Нош мар малпало Республикалэн нуналыз пумысен мукет адямиос? Таӵе юанэн корреспондентмы вазиськиз куд-ог эшъёслы. Юрий ГОРЯЧИХ, "Удмурт кенеш" огазеяськонлэн тӧроезлэн индылӥсез, "Удмуртиысь экономикалэсь кулэяськонъёссэ утён понна" движенилэн исполкомезлэн быдэсъясь директорез: - 4-тӥ ноябрь - мон понна праздник. Озьы луиз, ньыль арес дыръям анай-атае шудзэс утчано кожаллям Кубаньын. Егит дыры отын ортчиз. Но дор палъёсылэсь мӧзмон вормиз ук - мон берытски Удмуртие. Татын вордскизы нылпиосы, кышное но асьме выжыысь. Аръёс ортчемъя, пумен юнгес яратыны ӧдъясько ас палъёсме, быгатэмея али ужасько калыкмылэсь асваланзэ ӝутон бордын. Соин, вылды, мылкыды но умой. Мон улӥсько табере АСЛАМ шаерам... Сергей ШИЧКО, Ижысь ужбергатӥсь: - Мар вераны паймисько. Татчы шеди дас вить ар талэсь азьло - институт бере ыстӥзы. Ужай заводын, уксё тыремысь дугдӥзы но, базаре вузкарыны потӥ. Шоро-куспо улыны быгатӥсько ай. Ушъяськымонэз ӧвӧл кадь. Удмуртия сярысь ке верано, татчы лыктэме пумысен уг кайгыриськы. Калык умой татын, востэм. Пӧртэм выжыысь потэмъёс пӧлын вожвылъяськон ӧвӧл. Огзэ гинэ верам потэ - удмуртъёс медам сётске вал лымшор палась вуэмъёслэн (сыӵеослэн лыдзы нуналмысь йылэ) урод сямъёссылы. Праздникен. Зинаида БАЖЕНОВА, Глазов ёросысь дышетӥсь: - Та нунал мыным туж дуно. Куамын... Уг, уг вера, кӧня ар талэсь азьло 4-тӥ ноябре мон дуннеез нырысьсэ адӟи. Соин ик шумпотыса витисько та дырез. Соку аслэсьтым кин луэмме уката юн шӧдӥсько, республикамылэн азинсконъёсыныз данъяськисько. Тани алигес люкаськылӥм огъя кенешонэ. Ёросысь активистъёс вераськизы азьланез пумысен. Кун Кенешлэн кивалтӥсьёсыз но отчы пыриськизы. Дорам ӝутскем мылкыдын берытски. Максим КРИВОШЕЕВ, школаын дышетскись: - Мон понна котькуд нунал праздник, тужгес ик али - каникул дыръя. Дышетӥсьмы маке поттылӥз вал та сярысь, флаг сярысь но мадиз, но, зэмзэ вераса, со сюлмаськонъёслэсь мон кыдёкын луисько, ас ужъёсыным вырисько. Анатолий ЖИГАЛОВ, пенсионер: - Мон малпасько, Удмуртиын улӥсьёс та нуналэз ваньзы пусйыны кулэ. Котькудӥз мед валалоз шудо луэмзэ. Учке ай, кыӵе югдур туннэ Кавказын. Ма, Москваын но шурдыт ни. Нош асьмелэн, коньдон уг тырмы ке но, ваньмыз умой. Сое дунъяны быгатоно. Юалляськиз И. КРИЧЕВ. Удмурт Республикаысь Гурт удысъя но сиён-юонъя министерство кайгыре Ленин нимо совхозлэн азьло директорез, Киясово ёрослэн дано гражданинэз МАКСИМОВ Леонид Леонидович улонысь кошкемен валче но ӵыжы-выжыосызлы но матысь адямиосызлы мур куректэмзэ вера. Ватозы 4-тӥ ноябре 13-часын Киясово ёросысь Подгорное посёлокын. Удмурт Республикалэн Данъян пул вылаз пыртон сярысь Удмурт Республикаысь Кун Кенешлэн Президиумезлэн но Правительстволэн Постановленизы 1999-тӥ арын ужазы вылӥ азинсконъёссы понна но Республикалэн нуналэныз валче Кун Кенешлэн Президиумез но Правительство пукто: Удмурт Республикалэн Данъян пул вылаз пыртоно: Кизнер райпоысь нянь пыжон комбинатысь бригадаез, сменалэн мастерез - Валентин Петрович Прилуков; Ува ёросысь "Луч" эштосысь Кулябино фермалэсь коллективзэ, фермалэн кивалтӥсез - Антонина Андреевна Коробейникова; Россиысь синтэмъёслэн огазеяськонзылэн "Сарапульское учебно-производственное предприятие "Радиотехника" ООО-ысьтыз коллективез, валтӥсь директорез - Геннадий Егорович Абросимов; Можгаысь "Красная звезда" МПД" ОАО-ысь коллективез, валтӥсь директорез - Рашид Наильевич Абашев; "Ижеевский механический завод" ГУП-ысь коллективез, валтӥсь директорез- Василий Сергеевич Чугуевский; Ижевскысь 8 номеро жилищно-ремонтной предприятиысь коллективез, директорез - Александр Петрович Палиев; Глазовысь розницае вузкаронъя "Викинг" предприятиысь коллективез, кивалтӥсез - Галина Георгиевна Кран; Удмурт Республикаысь Кун национальной театрысь коллективез, художественной кивалтӥсез - Анатолий Андреевич Митрофанов; Якшур-Бодьысь лесхозлэсь коллективзэ, кивалтӥсез Виталий Германович Протопопов; Воткинск городысь но Воткинск ёросысь УВД-лэн милициысьтыз участковой инспекторъёслэсь ужзэс радъянъя ёзэзлэсь коллективзэ, кивалтӥсез - милициысь подполковник Алексей Сергеевич Парамонов; "Удмуртэнерго" ОАО-ысь коллективез, валтӥсь директорез - Юрий Иванович Боровик; "Удмуртнефть" ОАО-ысь коллективез, валтӥсь директорез - Евгений Исаакович Богомольный; Ижевскысь сюрес лэсьтонъя кун унитарной предприятиысь коллективез, кивалтӥсез - Валентин Сергеевич Левин; Аверкиева Надежда Михайловнаез - Шаркан ёросысь "Вестник" газетлэсь валтӥсь редакторзэ; Баженова Елена Викторовнаез - Балезиноысь 5 номеро шор ёзо школаысь ӟуч кылъя но литературая дышетӥсез; Батырева Надежда Романовнаез - Грахово ёросысь "Родина" колхозысь скал кыскисез; Безденежных Сергей Васильевичез - Сюмси ёросысь "Орловское" торфопредприятиысь трактористэз; Бекмансурова Татьяна Ивановнаез - Красногорск ёросысь Валамаз посёлокысь "Товары повседневного спроса" магазинын вузкарисез; Белкин Александр Ивановичез - Ижевскысь "Сактон" ЗАО-ысь мастерлэсь юрттӥсьсэ; Биянов Николай Борисовичез - "Удмуртнефть" ОАО-лэн скважинаосты тупатъян управлениысьтыз мастерез; Булдаков Игорь Вениаминовичез - крестьян хозяйстволэсь кивалтӥсьсэ, Завьял ёросысь Люк гурт; Булдаков Николай Владимировичез - Яр ёросысь "Чепца" кооперативысь механизаторез; Воротов Алексей Борисовичез - "Удмуртнефть" ОАО-лэн Воткинскысь му вӧй но газ поттонъя управлениысьтыз мастерез; Ермокин Евгений Александровичез - Ижевскысь сюрес лэсьтонъя кун унитарной предприятиысь экскаваторлэсь машинистсэ; Завалина Вера Николаевнаез - Завьялово ёросысь "Вараксино" кун предприятиысь тылобурдо вордӥсез; Зеленина Ольга Константиновнаез - сиён-юонъя Ижевскысь 2 номеро комбинатлэн филиалысьтыз, "ИЭМЗ-Купол" ФГУП-ысь поварез; Золотухина Валентина Владимировнаез - Ижевскысь "Торгово-производственная фирма "Иж" АООТ-лэсь валтӥсь директорзэ; Зямбахтин Леонид Геннадьевичез - милициысь прапорщикез, Юкаменск РОВД-ысь ДПС-лэсь инспекторзэ; Карха Галина Леонидовнаез - "Удмуртнефтепродукт" АО-лэн Камбарка нефтебазаысьтыз лаборантэз; Касимов Тавис Исхаковичез - Глазов ёрос больницаысь валтӥсь врачез; Киреева Любовь Ивановнаез - Ижевскысь "Индустриальная" ТФ ЗАО-лэн 26 номеро магазинысьтыз отделэн кивалтӥсез; Кононова Тамара Николаевнаез - Ижевскысь Нагорной психоневрологической интернатысь медсестраез; Корепанова Алевтина Анатольевнаез - Ува ёросысь "Свобода" эштослэн Кунгур фермаысьтыз скал кыскисез; Коробейников Александр Васильевичез - Воткинск ёросысь "Рассвет" колхозлэсь председательзэ; Кутергин Николай Ивановичез - Селтаысь сюрес лэсьтон управлениысь экскаваторлэсь машинистсэ; Кучерявенко Михаил Ильичез - "Ижевские электрические сети" муниципальной предприятилэсь директорзэ; Логвиненко Владимир Васильевичез - Ижевскысь лэсьтӥськонъя 18 номеро управленилэн лэсьтӥськонъя 1 номеро управлениысьтыз каменщикъёслэсь бригадирзэс; Лукина Нелли Сергеевнаез - Глазов ёросысь "Кожильский" кооперативысь сюро таза пудоез куайытонъя звенолэсь кивалтӥсьсэ; Максимова Валентина Николаевнаез - Ижевскысь лэсьтӥськонъя 17 номеро управленилэн юртэз лэсьтыса быдэстонъя управлениысьтыз маляръёслэсь бригадирзэс; Мальцев Владимир Юрьевичез - Ижевскысь "Летний сад имени Горького" унитарной предприятилэсь директорзэ; Митрофанов Валерий Яковлевичез - Удмурт кун филармонилэсь художественной кивалтӥсьсэ; Насыйров Азат Алмазовичез - "Сарапульская городская типография" предприятилэсь директорзэ; Овчинников Владимир Васильевичез - Ижевскысь калыкез нуон-ваён автотранспортъя 1 номеро предприятиысь автобусъёслэн 11 номеро маршрутсыя бригадалэсь кивалтӥсьсэ; Плотников Владимир Николаевичез - "Ижевский оружейный завод" ДОАО-ысь слесарь- инструментальщикез; Пономарева Любовь Григорьевнаез - Сарапул ёросысь "Родина" колхозысь скал кыскисез: Порышев Сергей Николаевичез - Удмурт Республикаысь МВД-лэн тямысэтӥ отделысьтыз старшой инспекторез; Рябов Юрий Петровичез - Можгаысь сортоиспытательной кун станцилэсь директорзэ; Самарин Павел Васильевичез - Каракулино ёросысь КПСС-лэн ХХИИ съездэз нимо колхозысь комбайнёрез; Степанова Зинаида Васильевнаез - Селта ёрос администрациысь калыкез улон-вылонын утёнъя отделэн кивалтӥсез; Стерлядева Галина Евгеньевнаез - Пичи Пурга ёрос больницаысь нуны ваён юртлэсь кивалтӥсьсэ; Стрелкова Зинаида Васильевнаез - Дэбес педучилищеысь математикая но методикая дышетӥсез; Тарасов Иван Яковлевичез - Алнаш ёросысь "Колос" колхозысь комбайнёрез; Тимофеева Анастасия Семёновнаез - Ижевскысь Устинов ёросысь 41 номеро гуманитарно- эстетической лицейлэсь директорзэ; Толмачев Виктор Григорьевичез - "Воткинский завод" ГПО-лэсь валтӥсь директорзэ; Храмов Николай Дмитриевичез - Воткинскысь "Воткинск-молоко" ОАО-ысь кӧс йӧл поттон цехлэсь кивалтӥсьсэ; Черепанов Вячеслав Сергеевичез - Ижевскысь технической кун университетысь "Физика" кафедралэсь кивалтӥсьсэ; Черницына Людмила Африкановнаез - "Сарапульский водоканал" муниципальной предприятиысь операторез; Чиркова Альфия Равильевнаез - Балезино потребобществоысь отделлэсь кивалтӥсьсэ; Шадрина Раиса Александровнаез - Киясово ёрос больницаысь ӝог юрттэт сётонъя фельдшерез; Широбокова Лариса Александровнаез - Кез райпоысь нянь пыжон комбинатлэсь директорзэ; Шкляев Алексей Леонтьевичез - "Удмуртнефть" ОАО-лэн Играысь му вӧй но газ поттон управлениысьтыз цехлэсь кивалтӥсьсэ; Юшков Аркадий Семёновичез - Вавож ёросысь "Удмуртия" кооперативлэсь кивалтӥсьсэ; Ярко Олег Анатольевичез - милициысь прапорщикез, Удмурт Республикаысь МВД-лэн ПППСМ-ысьтыз 1-тӥ батальонлэн 3-тӥ ротаысьтыз отделенилэсь командирзэ. Удмурт Республикаысь Кун Кенешлэн Тӧроез А. А. Волков. Удмурт Республикаысь Правительстволэн Тӧроез Н. А. Ганза. Наталь "Егит семья туннэ но ӵуказе" конкурсэ Сяська пӧлын сяська вань Кыӵе сюлмаськонъёсын, малпанъёсын та нуналъёсы улэ егит семья? Алнаш ёросысь егитъёсын ужанъя отдел "Егит семья" клубен ӵош соос понна пӧртэм пумиськонъёс, вераськонъёс ортчытъяло семьяосын ужась специалистъёсын, походъёсы ветло, мукет пӧртэм ужрадъёс ортчытъяло. Ёросысьтымы егит семьяос пӧлын тулыс ортчытӥм конкурс. Вормисе потӥз Плотниковъёслэн семьязы. Соос ик пыриськизы республикаямы ортчись "Под крышей дома своего" конкурсэ. Шаерысьтымы егит семьяослэн ӵошатсконазы Плотниковъёс куинетӥ инты басьтӥзы. Тулыс ик ялӥм вал мукет конкурс. Анай-атайёссылэсь нимазы улӥсь егит семьяос нюръяськизы, тужгес ӟеч сад-бакча возись нимез басьтон понна. Ёросъя йылпумъянъёс лэсьтэмын вал августэ, нош Алнашын - сентябре. Конкурслэн нырысетӥ люкетэз ортчиз интыосын. Колхозъёсысь егитъёсын ужась специалистъёс гурт администрациен ӵош эскеризы гуртъёсысьтызы тужгес ӟеч сад- бакчаосты. Собере вал устоосыз пӧлысь устооссэ эскерон. Ёросъя нырысетӥ интыез басьтӥзы Улын-Сырьез гуртысь Людмила Но Леонид Андреевъёс. Кыкетӥ луизы Шадрасак- Кибьяысь Елена но Игорь Медведевъёс. Куинетӥ интые потӥзы Чем.Куюкысь Алевтина но Сергей Поповъёс. Райцентръя вормисен лыдъямын Алевтина но Андрей Макаровъёс, кыкетӥ инты сётэмын Людмила но Николай Пудовъёслы. Вормисе потэмъёс ваньзы ик пусъемын луозы "Егит семья" клублэн кузьымъёсыныз. Пусйыны кулэ, сад-бакча возисьёс пӧлын таӵе конкурс ортчытыса, ми матысь тодматским егит семьяосын. Анай-атайёссылэсь нимаз улыса, ваньзэ ас кужыменызы лэсьтоно луэ ке но, егитъёслэн бакчаоссы утялтэмын, чылкытатэмын, туж аспӧртэмлыкоесь. Тросэз сяська будэтэ. Укно ултӥ ортчыса, синъёс ик палёмо со чеберлыклэсь, бакчае пыриськод - тонэ нош пумитало йӧно георгинъёс. Егитъёс уг чӧлтӥсько дырзы тырмымтэ вылэ, сяськаен вырон соослы шумпотон кузьма. Зэмзэ но, сяськаос улонмес шулдырто, нош бакча сиёнъёс ӝӧк вылэз узырмыто. Малпасько, егит семьяос азьланяз но ужъёсынызы, быгатонлыкъёсынызы данъяськыны быгатозы. Н. БУДРИНА. НАТАЛЬ Семьялы - адямилыко кусыпъёс Ижевскысь "Шуныт юрт" центрысь специалистъёслэн дэмланъёсынызы, валэктонъёсынызы газет лыдӟисьёс одӥг пол гинэ ӧз тодматскылэ ни. Туннэ вераськон ужпуммы - семьяын зӥбетэз алон, шуг-секытъёсты палэнтон, ог-огеныд огкыл шедьтон. Удмурт кун университетысь студентка Елена КИТОВА пумиськылӥз та центрысь "Семьяын эриктэманлы - пумит" проектлэн кивалтӥсеныз Ольга ЗАКИРОВАЕН. - Огъя верано ке, 65 процентаз семьяосын кинэ ке но эриктэмало - куанер-а, узыр-а со семья, городын я гуртын улэ, асьме странаын я кытын ке мукетаз. Одно ик киез вуттон, жугон, кужмысь яратыны косон гинэ ӧвӧл со. Эриктэман пӧртэм пумо луэ. Нырысь ик, мугорлы, тазалыклы изъян ваись физической эриктэман. Котькуд куатетӥ кышномурт таин пумиське. Нош 80 процентэзлэсь ятырез вераны уг дӥсьто: жугон учыръёс семьяямы уг луо. Озьы ке но, жугон, вӧсь карон шергес пумиськылэ мылкыдэз ултӥясь (психологической) но коньдонэн зӥбон (экономической) эриктэман сярысь. Мылкыдэз эриктэман дыръя пиосмурт кышнозэ кылъёсын ултӥя, ачиз валэктэ кинэн эшъяськоно, нош кинлэсь палэнсконо. Мукет та выллем косонъёсын зӥбе. Коньдонэн эриктэман учыръёсы нылкышноез ужаны, дышетскыны уг лэзё, уксё быдтэмез понна кыл кутыто. Кылсярысь, одӥг тодмое картэзлы гожъяса ик сётэ вал, ку, кӧня но мар понна коньдон быдтэмзэ. Нош ма луэ пиналэн? Уксёез ӧвӧлысь, анаез конфет гинэ но басьтыны уг быгаты, нош атаез маке быдӟа шудонъёс кузьма. Семьяосын пумиськылэ на кужмысь яратыны косыса (сексуальной) эриктэман. Тросаз семьяосын эриктэман учыръёс нырысь лябгес шӧдӥсько, собере юнгес но юнгес. Мылкыдэз ултӥян но коньдонэн зӥбон куке но одно ик жугонозь вуо. Эскеронъёс возьмато: 70-80 процентэз адями виёнъёс семья пушкын луо. Эриктэманэ ӵемгес шедё нылкышноос но нылпиос. Куд-ог дыръя пиосмурт но тае ас вылаз чидано луэ. Но со ӵемгес пумиське мылкыдэз эриктэман учыръёсын. Шуом, кышноез чик дугдылытэк сизьдэ: тон сыӵе азьтэм, номыр но уд ужаськы, семьяе пичи но коньдон уд ваиськы. Малпало, озьы ик луыны кулэ, дыр. Жугиське, юэ ке картсы, визь-кенеш курыны уноез анайзы доры мынэ. Соиз валэктэ: тон гинэ озьы уд улӥськы, ми но со пыр потӥм, чида. Мар бордысь со потэ? Калыкын кылдэмын малпан: коркан кузё луыны кулэ пиосмурт, нош кышномурт косонъёссэ быдэсъясь. Бен, тросэз воргоронъёс асьсэос но уг шӧдо кышнооссэс зӥбыса воземзэс, соос но малпало: озьы луыны кулэ. Но милям центрамы вал ни сыӵе учыръёс, пиосмуртъёс лыкто но шуо: "Мон эриктэмась, кышноме, пиналъёсме жугыса возисько. Йӧнатэ монэ та сямылэсь". Семьяын эриктэман учыръёс зол шӧдӥсько пиналлэн мылкыдаз. Дорамы ваё атайзы жугиськемысь моганы кутскем пиналъёсты, я соос ас дуннеязы выё. Таӵе нылпиосын трос ужано луэ психологлы. Кызьы шуо, эриктэманлэсь ик эриктэман потэ: пинал адӟе анай- атаезлэсь улэмзэ, соосъя ик дышетске. Кызьы атаез возе ассэ семьяяз, быдэ вуэмез бере пияш но ассэ озьы ик возёз кышноеныз. Со туж кышкыт маке. Та бордын ик ми ужаськом. Семья пушкы тэргаськон-керетон кизьыны ми ум турттӥське, сое юнматон борды басьтӥським. Семья кусыпъёс адямилыкоесь мед луозы. Нылъёсты но пиосты пичиысен ик дышетоно асьсэды семья улонлы, асьсэды кызьы возёнлы. ШОНЕРТОН Кызьы ивортӥз Кун Кенешлэн пресс-службаез, "Удмурт Республикалэн Данъян пул вылаз пыртон сярысь" Удмурт Республикаысь Кун Кенешлэн президиумезлэн но Правительстволэн постановленизы кун изданиосын мыдланьтыса печатламын. Отчы янгыш шедем Кизнер райпоысь нянь пыжон комбинатлэн бригадирез луэ Прилукова Валентина Петровна, нош газетъёсын мукет сямен верамын. Ӟечкылан 70 арес тырмонэныз ӟечкыласькомы Можга ёросысь Вуж Юбера гуртын улӥсь анаймес Екатерина Исаковна Ветроваез. Сӥзиськом юн тазалык, ӟеч мылкыд но бадӟым шуд. Гажаса нылпиосыд но нылпиосыдлэн нылпиосыз. Наталь Шуныт-а улон коркамы? Амалы луысал ке, воргоронъёсты-кивалтӥсьёсты кӧня ке арнялы яке толэзьёслы адямиостэм шормуӵе келясал. Мед ӧжытак малпаськысалзы, мар со семья, нылпиос, сютэм улон, кӧттыр сярысь сюлмаськон. Ас чыртызы вылын ёрмонэз шӧдыса, оло, кивалтон уж шоры соос мукетгес синмын учкысалзы соку. Нылкышноослэсь, нылпиослэсь, семьялэсь курадӟонзэс но валасалзы. Туала улонамы, политикаын со тужгес но кулэез ужпум ӧвӧл шат? Ноку быдэстыны луонтэм таӵе визьтэм малпан йыре лыктӥз шаерысьтымы нылкышноосын октябре ортчытэм кык ужрадъёс бере. Вашкала сямъёслы - туала тусбуй "Туала общество: калыклэн аспӧртэмлыкез но семья" - сыӵе темая вераськон мынӥз шаерысьтымы Удмурт нылкышно огазеяськонэн радъям "котырес ӝӧк" сьӧрын. Пӧртэм ужпумъёсъя вераськон ӝутэмын вал та пумиськонын: туала шуг-секытъёсты вормон понна кыӵе луыны кулэ удмурт семья; кыӵе инты висъяське семьяын нылкышнолы но воргоронлы; семья пыр калыкмылы вордскем кылэз , культураез яратон но гажан, асваланэз будэтон мылкыд пыӵатон. Вераськон мынӥз шаерысьтымы нылкышноослэн, нылпиослэн, удмурт калыклэн тазалыксы сярысь, кыӵе кун политика нуиське туала семьяослы юрттонъя. Пусйыны кулэ: Удмурт нылкышно огазеяськон кылдэм ужпумъёсты паськытгес ӧръяно кариськиз. Удмурт учёнойёс, специалистъёс сяна, ужрадэ пыриськизы Ижевскысь семья ужпумъёсъя пӧртэм центръёсын ужасьёс. Малпасько, огъя ужпумъёсты сэрттонын-пертчонын со азьлане бадӟым вамыш. Ас пуртыямы пӧзьыса кыдёке ум мынэ, вӧзамы улӥсь мукет калыкъёс но мед валалозы но сюлэм пыртӥзы поттозы сюлмаськонъёсмес. Бен, кулэ вал, дыр, та вераськонэ ёрос администрациосысь, нылкышноослэн ёрос огазеяськонъёсысьтызы но ӧтьыны. Но коньдон ужпумъёс кекато. Соин ик вераськемын, нимаз-нимаз улосъёсы потаса, та выллем ужрадъёс ортчытъяны. Гурт калык понна со туж кулэ но пайдаё уж. Малпасько: "Удмурт кенеш" огазеяськон нылкышноосын уртче мылысь-кыдысь басьтӥськозы та борды. Тодӥсь-валась психологъёс, юристъёс, наркологъёс, врачъёс, интыосы потаса, озьы ик калыклы юрттэт сётысалзы. "Котырес ӝӧк" сьӧры люкаськемъёс Удмурт Республикаысь Кун Кенешлы но Правительстволы вазиськон кутӥзы. Отын шуэмын, республикамылэсь экономиказэ азинтэмен ӵош, бадӟым саклык висъяно семья ужпумъёсын герӟаськем законъёсты быдэсъянлы. Дышетон, тазалык, культура удысъёсты азинтэмен ӵош, коньдон висъяно удмурт кылэз, культураез азинтонэ но удмурт калыклэсь тазалыксэ эскеронэ. Кутоно "Кун кылъёс сярысь" Законэз. Калык сямъёсты улонэ пыӵатон понна городъёсын но ёросъёсын усьтоно удмурт сиён-юонъёсын кафеос, удмурт дӥськут вуронъя ательеос, специалистъёсты дасянэз радъяно. Нылкышноосты но нылпиосты утён понна золгес басьтӥськоно йыружъёсты алон борды, пӧртэм эриктэман учыръёсты палэнтоно. Шуг-секытэ усем семьяослы, нылкышноослы, нылпиослы юрттон бордын трос тыршо ёросъёсысь семья ооделъёс, "Семья" центръёс, мукет та выллем учреждениос. Удмурт Правительствоысь семья отделэз быдтэмен, уката ум выйытӥське меда калыкмес мургес коже. "Котырес ӝӧк" сьӧры люкаськемъёс та пумысен но ас кылзэс веразы вазиськонын. Озьы ик дыр вуэмын ини Удмурт Республикаын "Семьяя, анайлыкъя, атайлыкъя но нылпиосъя" Закон кутыны. Но кылозы меда нылкышноослэсь бӧрдонзэс йырынызы политикае выем воргоронъёс? Шудонъёслы дасясько Гурт спортсменъёслэсь гужем шудонъёссэс кытын ортчытон сярысь тодмо ӧвӧл на. Но Юкаменск ёросын со ужрадлы дасяськыны кутскизы ни. Али селоысь школа вӧзы стадион лэсьтыны ӧдъязы. Сое паськытатон понна кесяно луиз вужзэ спортзалэз. Стадион огазеялоз футболэн шудон бусыез, бызьылон сюресъёсты, 6 ярусэн трибунаосты. Н. СЕМЁНОВ. Юртто школаослы Юкаменск ёросысь Вылӥ Уни гуртысь школалы физкультураез но спортэз азинтонын бадӟым юрттэт сёто "Шеп" крестьян хозяйство, "Верх-Уни" но "Авангард" эштосъёс. Соос спортъя инвентарь асьсэос басьто яке коньдон висъяло. Хозяйствоос озьы ик юртто пӧртэм ӵошатсконъёсты ортчытыны, сёто асьсэлэсь транспортсэс. Н. ПЕТРОВ. Наталь Егит семья туннэ но ӵуказе Шудоесь робинзонъёс Паськыт лыз Кам, пӧсь шунды, вож нюлэс... Огаз кушын кӧня ке дасо палаткаос. Тылскем вылын бульыртэ чорыг лым. Лӧптэм мылкыдын экскурсиысь вуо та "нюлэс городын" улӥсьёс. Кинъёс бен соос? Шаерысьтымы инкуазен эшъяськись, солэсь законъёссэ валаны тыршись тунсыко егит семьяос. Куинь гужем радъялляз ни республикаысьтымы "Егит семья" центр экологияя "Берегиня" лагерь. Туэ гужем но шаермылэн пӧртэм сэрегъёсысьтыз ньыльдонлэсь ятыр семьяос шутэтскизы, пӧртэм удысъёсъя толон-валанзэс будэтӥзы Нечкиноысь национальной паркын. Со вакытэ ик асьсэос но паркез чылкытатыны, тупатъяны юрттӥзы. Семьяос арня ӵоже инкуазьын уло. Нокыӵе чибинь но, лемтэй но уг кышкаты соосты. Дышетско таза улыны: урод сямъёслэсь куштӥськыны, мугорзэс кыдатыны, чылкыт сиськыны. Та ласянь юртто центрысь специалистъёс: врач, сиён пӧрась, психолог. Пусйыны кулэ созэ - татын семья ваньзэ уртче лэсьтэ. Гуртын асьмеос дышемынгес ужез куспамы люкыны, нош пиналъёсмес куддыр "люкетэмысьтызы" воксё палэнтӥськом. Нош татын - пиналъёс но анай-атайёс выльысен ог-огенызы тодматско, ог-огзэс валаны кутско. Тани пичи Витя ымзэ ик усьтыса учке атаезлэсь быгатыса байдарка валтэмзэ, ачиз но мыло-кыдо юрттӥськыны выре, мукетыз нылаш тэтчаса чабе анаезлэн эктэмезлы, серемес мадёс верамезлы - со татчыозь ӧз но тодылы, анаез сыӵе мастак шуыса! Собере ачиз но кӧбератэк калык азе потэ, аслаз малпам такмакъёсыныз паймытэ. Ӝомал усем бере но уг чалмо нюлэс кушысь куараос. Бадӟым тылскем дуре люкаськыса, гитара шудэм улсын кырӟало яратон но эшъяськон сярысь кырӟанъёс. Синъёссы кыниськытозь пуко анай-атайёссы вӧзын покчиос но. Собере атайзы кужмо киосыз вылэ кутыса нуэ палаткае. Нокыӵе небыт валес уз вошты нюлэскын ын улын кӧлонэз. Тылобурдоослэн турлы гуръёссы сайкато "куноосты", ӵук лысву марӟанэн кисьтаськыса гочатэ - я, пылат ымнырдэ, басьты мынэсьтым кужымме. Туннэ эшшо маке тунсыкозэ тодозы шутэтскисьёс асьме инкуазьмы сярысь. Солэсь ватосъёссэ усьтозы университетысь биологъёс. Оло нош кин ке ачиз инкуазь шоры выль синмын учкоз но татчыозь нокинлы тодмотэмзэ усьтоз! Туэ "Берегиня" лагерь Россия Федерациысь Егитъёслэн политиказыя кун комитетэзлэсь грандзэ басьтӥз. Егит семьяослы юрттонъя программаос пӧлысь та устоез луиз. "Берегиня". Талэсь тупамонгес но чебергес ним уд малпа, дыр. Уте Инкуазез, Яратондэс, та Гужемез! З. РЯБИНИНА. Быдэс улон сюресэз Тодмо пыӵал тӥрлык кылдытӥсьлэн Михаил Калашниковлэн Ижевскысь огдырлы усьтэм музеез ужаны кутскиз ар но ӝыны талэсь азьло. Соиз паймытэ. Та адями уго алигес гинэ быдэс дуннелэсь "ватэмын" вал. Табере Удмуртилэн шоркараз лэсьтӥське бадӟым музейно-выставочной комплекс. Нош Михаил Тимофеевич ачиз та нуналъёсы дасяське вордскемез дырысен 80 ар тырмонзэ пусйыны. Бен, ачиз гинэ уг дасяськы. Дасяське Удмуртия, дасяське Россилэн Правительствоез, Москваысь мэрия, улосъёслэн кивалтӥсьёссы. Асьме доры вуыны кулэ мукет кунъёсысь делегациос но. Москваын тани-тани кыкетӥзэ потыны кулэ конструкторлэн "От чужого порога до Спасских ворот" книгаез. Нош Санкт-Петербургын Калашниковлэн али гинэ гожтэм тодэ ваёнъёсыз печатласько. Со нимаське: "Я с вами шел одной дорогой". Отын вераськон мынэ "ватэм" предприятиослэн директоръёссы сярысь, кинъёс армилы пыӵал-тӥрлык поттӥзы. Казаньын конструкторлэн улоназ нырысьсэ печатламын фотоальбом. Одӥгез жаль: музейно-выставочной комплекс юбилейлы дась уз луы на. Но со понна ӧсъёссэ усьтоз выставкаен центр-галерея. Отын возьматӥськозы М. Т. Калашниковлэн кылдытэм ужъёсыз. Ӝыны даур ӵоже соос ог сю пала люкаськизы ни. Татын ик интыямын луоз туспуктонъя кибашлы мастерлэн Ахат Хисамутдиновлэн экспозициез. Та адями Михаил Тимофеевичен "ӝуаны" кутскиз ни. Сое шарае поттыны лэзёнтэм вакытысен ик. Но улон-вылон со пиршетъёсты ачиз тупатӥз, шуыны луоз. Калашников пусъемын нырысетӥ номеро "За заслуги перед Отечеством" орденэн. Россиын солы сётэмын кыкетӥ номеро Святой Андрей Первозванной орден. Социалистической Ужысь кык пол Герой, Кун, Ленин но Россилэн премиоссылэн лауреатсы. Ижевсклэн но Удмуртилэн сӥё-дано улӥсез аслаз квартираысьтыз музейно-выставочной комплекслэн фондаз сётӥз ни ог ньыль сюрс пала эскпонатъёссэ: документъёссэ, туспуктэмъёсты, газетъёсы но журналъёсы поттэм материалъёсты, кузьым пыӵал- тӥрлыкъёсты. Куд-огез арбериос галереяын возьматӥськозы юбилеез пусъён нуналъёсы. Со 50-тӥ аръёсы Сталинской кун премиен басьтэм мебель, радиола, посуда. Депутат луэмез сярысь значокъёс. Автомат кылдэм дырысен 100 ар тырмонлы сӥзем капсулаысь гожтэтлы копиез. "Михаил Тимофеевич толэзьлы быдэ милемлы ӝикытак гинэ вуттэ выль но выль экспонатъёссэ, - вера фондъёсты возёнъя валтӥсь специалист Татьяна Хамитова. - Ачиз ик ӝот-ӝот валэктон сётэ". Фондлэн огдырлы ужась экспозициеныз тодматскизы ни ог сюрс пала адямиос. Вуылӥзы Германиысь, Австриысь, Польшаысь куноос. Табере ожгар конструкторлэн улэм но ужам сюресэз сярысь тодыны быгатозы дасо сюрсъёсын адямиос. Та выставка кык арня пала ужалоз. Нош вуоно арлэн пумаз та бадӟым но аспӧртэмлыко ӧсъёссэ усьтоз адӟытонъя бадӟым комплекс. Отчы интыяськозы Ижевскысь пыӵал тӥрлык кылдытӥсьёслэн ужъёссы, луоз ыбылӥськон тир, одӥг кылын вераса, Калашниковлэн быдэс улон сюресэз. А. Артамонов. Ижысь Механической завод вӧзысь огдырлы усьтэм Музейлэн оглюкетэз. Вуоно музей комплекслэн вылтусыз. Туспуктэмъёсыз В. КАМАШЕВЛЭН. Быдэстымтэ суред Кызетӥ коньывуонэ Ижысь изоискусствоосъя музейын Игорь Бехтеревлэн суредъёсыныз адӟытон усьтӥськиз. Выставка суредасьлэн вордӥськемез дырысен 60 ар тырмонлы сӥземын. Игорь Сергеевич вордӥськиз 1939-тӥ арын Сарапул ёросысь Ершовка черкогуртын. Школаын дышетскыкуз ик суредан удысэ кыстӥськиз. Нош школазэ йылпумъямез бере, Удмурт кун университетысь чеберлыкъя но графикая факультетэ пыриз. Отӥяз вуиз Суредасьёслэн огазеяськемазы. Удмурт усточилэн ужъёсыз шаермылэн сьӧраз улӥсьёслы но тодмо. 1987-тӥ арын Игорь Бехтерев Москваысь "Советская Россия" нимо выставкае пыриськиз. Нош солэсь азьвыл суредъёсыз вуылӥзы Казань но Горький городъёсысь адӟытонъёсы. Тросэз ужъёсыз кельтэмын Удмуртилэн зарни фондаз. Ижысь изоискусствоосъя музейын витьтон пала тодмотэм суред возьматӥське: тусбуй, инкуазь, натюрморт. Автор ӟеч быгатыса суреда ошмесо удмурт шаерзэ. Уноез ужъёсыз Кам шурен, солэн улонэныз тодмато. Игорь Бехтерев озьы ик тунсыкъяськылӥз тусбуй лэсьтонэн но. Пӧртэм аръёсы улӥсьёсты суредам автор. Ымныр туссы пыр пуш улонзэс но возьматыны тыршем. Котырысьтыз дуннеез мургес тодон вылысь, Игорь Сергеевич натюрморт кылдытъян удысын но кужымзэ эскерылэм. Быгатӥсь киос татын но пыр-поч, валаса ужаллям. Сюлэме кылиз "Лесная боль" нимо суред. Шӧдӥське авторлэн инкуазез саптасьёслы пумит луэмез. Соку ик таӵе малпан но кылдэ: оло, азьпал адӟонзэ шӧдӥз? Котьма ке но, ньыльдон сизьым суред пӧлысь одӥгаз гинэ вир кисьтӥськон возьматэмын. 1990-тӥ арын усточи тылпуэ шеде. Сутӥськемъёсызлы чидатэк быре. Нош берпуметӥез ужез,"Черемуха" суредэз, куд-ог малпанъёсыз сямен ик быдэсмытэк кылиз. Оксана МОСКОВА, Удмурт кун университетын дышетскись. Петр СКОБЕЛЕВ Ӵукна ик лыкто (кылбур-кырӟан) Толон ӝыт пал тонэ келяй, Капка азяд огпол чупай. Номыр ӧд вазь, ӵыж-горд луид, Ымдуръёсме быдэс сутӥд. Припев:Тылын ӝуа, копак гома Мынам лӧптэм егит сюлмы. Уез умой ӧй кӧлы мон - Сюлмам пыриз пӧсь яратон. Вордскем гуртысь уг пот кошкем, Иське, нуо тонэ лушкем. Припев. Уг ни возьма ӝыт вуэмез - Ӵукна ик дорады мыно. Ӝог валалод лыктэм мугме, Дэмчи уг утча ноку но. Припев. Россия Федерацилэн кун наградаосыныз пусъён сярысь Россия Федерацилэн Президентэзлэн указэз Кун азьын вормонъёссы, калыкъёс куспын эшъяськонэз но огкылысь ужанэз азинтонын бадӟымесь азинсконъёссы но кема аръёс ӵоже пайдаё тыршемзы понна пусъёно: Данъян орденэн Сысоев Вячеслав Николаевичез - акциосын "Ижмаш-Мото" огазеяськонысь слесарь- ремонтникез, Удмурт Республика; Эшъяськон орденэн Заварзин Вячеслав Григорьевичез - "Ижевский электромеханический завод "Купол" кун предприятилэн валтӥсь директорезлэсь нырысетӥ воштӥсьсэ, Удмурт Республика; "За заслуги перед Отечеством" орденлэн ИИ степенё медаленыз Губин Владимир Тимофеевичез - акциосын "Ижмаш-Мото" огазеяськонысь старшой мастерез, Удмурт Республика; Резвых Николай Дмитриевичез - акциосын "Ижмаш-Мото" огазеяськонысь двигательёсты эскерисез, Удмурт Республика; Машина поттон удысын пусйымон ужъёссы но трос аръёс ӵоже сюлмысь тыршемзы понна "Россия Федерациысь дано машиностроитель" сӥлы карон ним сётоно: Абашев Амир Габду Ахатовичлы - акциосын "Ижмаш-Мото" огазеяськонысь станочниклы, Удмурт Республика, Глушков Вячеслав Германовичлы - акциосын "Ижмаш-Мото" огазеяськонысь слесарьлы, Удмурт Республика, Завгородний Владимир Алексеевичлы - акциосын "Сарапульский радиозавод-холдинг" огазеяськонлэн валтӥсь директорезлэн воштӥсезлы, Удмурт Республика. Россия Федерацилэн Президентэз Б. Ельцин. Огазьын луом - ӵуказе улом Кыӵе мылкыдын пумитаськом асьмеос Удмурт Республикалы 79 ар тырмон нуналэз? Та пумысен малпанъёссэ вера тодмо учёной история наукаосъя доктор Кузьма Иванович КУЛИКОВ. - Тау инмарлы, 4-тӥ ноябрез пусйыны ум вунэтӥське на шуыса. Озьы асьмелы арлы огпол ке но тодэ вайыто: Ленинлэн декретэзъя, удмурт калыклэсь ас понназ улыны правозэ быдэстыса, дунне вылын кылдӥз нимаз государство. Но туннэ нуналлэсь пӧртэмлыксэ чакласа валаськод, Удмуртия удмуртъёслэн кунзы ӧвӧл ни шуыса. Малы? Асьмеос пумен ыштӥськом правоосмес. Басьтом тани кивалтон удысэз ик. ЦИК-лэн, Совнаркомлэн, компартилэн погонъёсаз пусъемын вал, удмурт калык государствоен кивалтонэ одно ик пыриськыны кулэ шуыса. Уго кунлык но асьмелы 1920-тӥ арын сётэмын вал, солэсь азьло аръёсы-дауръёсы эксэй властен удмуртъёс ласянь лэсьтэм янгышъёсты тупатон вылысь. Мар ватонэз, калыкмы со дырозь зӥбемын вал ук, ӧз азинске экономика, наука, культура, литература. Жаляса верано луэ: кунлыкмы туннэ удмуртэз уг утьы ни. Уго вакыт ӵоже люкам ваньбур киысьтымы чальтчиз. Тани куд-огез ялан вераны выре, Ижевск ӟуч город вал шуыса. Но малы ке но уг поттыло. Сое ӝутонэ, завод лэсьтонэ котырысь туж трос удмурт крестьянъёс пыриськизы. Соос вань секыт ужъёсты быдэсъязы. Ма луиз табере? Кин киын туннэ огъя ваньбур? Одӥг ке но удмурт пыриське-а бадӟым предприятиен кивалтонэ? Мукет АО-осъя но со выллем ик югдур. Нош кытчы кошке инкуазь узырлыкмы? Дауръёс ӵоже удмурт калык улӥз та музъем вылын, нош туннэ со уг ни быгаты кузёяськыны нюлэсэн, вуэн, му вӧйен но мукет ваньбурен. Озьы ӧвӧл шат? Шуг-секытъёс йылӥзы дышетон удысын но. Вазен но асьме пӧлын, мукет калыкъёсын ӵошатыса, трос ӧй вал дышетскем муртъёс. Нош азьланьын сыӵеос эшшо но ичигес луозы. Уго институтэ пырон ӧс табере узыръёслыгес усьтӥське. Котькыӵе калык азинске соку, куке быдэсъясько таӵе куронъёс: луыны кулэ солэн аслаз территориез, инкуазь котырез, чидамон улыны тырмыт экономикаез, правоосты быдэсъяны амалъёсыз, огазеяськыса улыны быгатэмез, идеологиез. Валамон, тросэз та куронъёс али асьмелы уг тупало. Ярам коть, музъеммы вань на. Но сое вузаны-басьтыны лэзизы ке (сыӵе кышкытлык туж матын ни), калыкмы ваньзэ ыштоз. Яке, шуом, Россиын кутскозы губерниос кылдытъяны. Таиз но асьмелы ӟечсэ уз вайы. Бен, эксэй кивалтон вакытэ калык шуг улӥз. Но историез тодэ вайыса, тани ма верам потэ. Удмуртъёс вашкала дыръя огазьын вал ук. Соос уно сю кузя люкськылӥзы вӧсьёсы. Сыӵе нуналъёсы шӧдылӥзы ог-огзылэсь пельпумзэс, виразы пыӵалляз азьланезлы оскон. Выжыосмы тыршизы огыр-бугыр улонын интызэс шедьтыны. Демократия шуонмы али сямен ик гылыт сюрестӥ азинскиз ке, РОссиысь ичи лыдъем калыкъёслэн ӵуказе нуналзы сайкыт уз луы. Улон озьы медам ышы шуыса, ваньмылы ик, удмуртъёслы но, ӟучъёслы но, мукет выжыысь потэмъёслы но, умой-умой малпаськоно азьланез сярысь. Янгышъёсмы вылын дышетскыны быгатоно ни. Уго быръён дыръя пӧлысьтымы котькудӥзлэн луонлыкез вань куаразэ соиз яке таиз адями понна сётыны но озьы коть кунэн кивалтонэ пыриськыны. Мынам юн оскемея, шуом, странамылэн парламентаз быръем мурт шӧдыны кулэ быдэс улон понна ответсвенностьсэ. Коть удмурт, коть ӟуч медло со, котьмалэсь кулэез - депутат вань кужымзэ сётыны кулэ аслаз музъемез понна, республикаезлэсь интересъёссэ утён понна. Таӵе условиосын, куке Москва тырше вань улосъёсты котыраз биньыны, вань коньдонэз, ваньбурез ас кияз огазеяны, Удмуртиын улӥсьёс огазеяськыны мед быгатысалзы шаермес тус-тас каронлы пумит малпан котыре. Мон шуисько, луыны кулэ региональной патриотизм. Мукет амалэз уг адӟиськы. Кин ке но шуоз: мар-о ай та тодосчимы праздник нуналэ но кӧшкемыт суред кылдытэ? Юнме шорысь ӧвӧл. Мон ӵем потасько калыке, вуылӥсько кыдёкысь гуртъёсы, адӟисько туала воштӥськонъёсты, соосты ӵошатӥсько азьлоеныз. Бен, мылкыд эктымон ӧвӧл. Озьы ке но, котьку верасько: ӵуказе нуналмылэн кыӵе луонэз меӵак герӟаськемын котькудмылэн тыршеменыз. Сюлмаським ке асьме сярысь - шунды пиштоз. Уродэзлы сётским ке, сюрес пытсаськоз. Ойдолэ утёме осконмес! Дыртэлэ пус чӧлтонэ! Россия Федерациысь Федеральной Собранилэн Кун Думаяз депутатэ кандидатъёслы, улосысь кандидатъёслэн группаоссылы, быръёнъя огазеяськонъёслэн но блокъёслэн оскем муртъёссылы ивортон. Тодады вайытӥськом: Россия Федерациысь Федеральной Собранилэн Кун Думаяз быръёнъя одӥг мандатэн округъя депутатэ кандидатъёслы но улосысь кандидатъёслэн группаоссылы печатьын инты дунтэк но дунэн висъянъя пус чӧлтон ортчоз 1999-тӥ арын 5-тӥ ноябре 11 часын Удмурт Республикаысь Кун Кенешлэн люкаськылон залэзлэн фойеаз. Пус чӧлтонэ пыриськон понна, куриськон гожтоно кудаз ке газетлэн редакцияз. Гажано эшъёс! Вань сюлмысьтымы но шуныт мылкыдын ӟечкыласьком тӥледыз Удмурт Республикалэн кунлыкезлы 79 ар тырмонэн! Удмуртиысь трос нацием калыклэн улоназ та нунал туж бадӟым инты басьтэ. Малы ке шуоно, соин герӟаськемын асьме республикалэн быдэс кунмес утёнын бадӟым вамышъёс лэсьтыны кутскемез, туннэ но оборонамес утёнын мытэм сюрессэ со ялан азьланьтэ. Солэн кужымез быдэс дуннеын югдурез огсыр возьыны юрттэ, со возьматэ, Россиез озьы гинэ лябӟытыны уз луы. Автономной областьысен Удмурт Республика кылдытозь шӧдскымон вормонъёс басьтэмын промышленностез, гурт удысэз, наукаез, калыкез дышетон но солэсь тазалыксэ утён удысэз азинтонын. Данъяськыны быгатӥськом: асьмеос республикаямы улӥсь вашкала калыкмылэсь кылзэ но культуразэ ӧм ыштэ, сое ялан азинтӥм, озьы ик луиз одӥг семьяен кадь улӥсь мукет калыкъёслэн улон-вылоназы но. Соин но туннэ Удмурт Республика трос нацием калыкъёс куспын тупаса улонэз но ог-огдэ валанэз возьматонын адӟем карымон. Россиен бадӟым но секыт сюресэз ӵош ортчыса, мукет республикаосын, улосъёсын но крайёсын одӥг курадӟонэз чидаса, вормонъёсты но чигнанъёсты ас выламы адӟыса, нош ик валамы, асьмеос шонер сюресэтӥ мынӥськомы шуыса. Удмурт Республикалэсь кунлыксэ азинтон но юнматон, экономиказэ ӝутон юрттӥзы но юрттозы Россилэсь огъя кужымзэ огазеяны. Ӵошен гинэ, огъя огазеям кужымен гинэ туннэ асьмеос быгатомы кылдэм шуг- секытъёсты палэнтыны, Удмуртиез но Россиез выльысь ӝутыны, вуоно дауре мед выжомы кужмо страна луыса, югыт но шудо улонмылы оскыса. Эшшо одӥг пол праздникен тӥледыз. Ӟечезлы вань осконъёсты мед быдэсмозы, котырады мед луоз тупаса улон но ог-огдэ валан. Удмурт Республикаысь Кун Кенешлэн Тӧроез А. А. Волков Удмурт Республикаысь Правительстволэн Кивалтӥсез Н. А. Ганза СӤЗЕМЫН "УДМУРТАВТОДОРЛЫ" Александр СОЛОВЬЕВ Сюресъёс - со улон вирсэръёс Шаерамы Александр Васильевичез тодӥсьтэмез ӧвӧл, дыр. Ужан сюресэз кутскиз Ижысь бадӟымесь заводъёсын ("Ижсталь", ЭМЗ). Но Алнаш черкогуртын вордскем пиез кыскиз мукет удыс - сюрес лэсьтон. 1979-тӥ арын солы оско Алнашысь 5 номеро сюрес лэсьтон управлениез. Ньыль ар ужамез бере, Александр Васильевичез выжто Глазове, татысь управлениен кивалтэ. Нош 1987-тӥ арын сёто Ижысь сюрес лэсьтонъя 1 номеро управлениез. Котькытын со ассэ усто кивалтӥсен возьматӥз. Ватсаса тодон-валанъёс басьтӥз Ижысь гурт хозяйствоя институтын: огдыре ужаз но, дышетскиз но, инженер-механик луиз. Собере Александр Соловьевез пукто "Удмуртавтодор" кун предприятилы кивалтӥсе. Секыт, выльдӥськон вакытэ со та удысэз ас вылаз басьтӥз, кужымезлы, быгатонэзлы оскиз. Озьы берло дыре шаерамы город сьӧрысь сюресъёс воляло, чеберско но. Ялан кузёмо. Сюрес лэсьтӥсьёс арлы быдэ профессиональной праздниксэс пусъё сӥзьыл, туэ со тупаз 31-тӥ октябре. Тӥни соин валче Александр СОЛОВЬЕВЕН пумиськылӥз "Удмурт дунне" газетлэн корреспондентэз Геннадий РОМАНОВ. - Александр Васильевич, сюресъёсты улон вирсэръёсын ӵошато. Со пумысен мар верасалды? - Юнме шорысь озьы уг шуо. Быдэс дуннеын улон сюресъёсын герӟаськемын. Сюрес - со улон, сюрес - со производство, сюрес - со котькуд республикалэн экономикаез. Улонмы огинтыяз уг сылы: воштӥсько кивалтӥсьёс но правительствоос, нош сюресъёс кылё. Та ёзэз зэмзэ калыклэн удысэз, шуыны луоз. Со вылтӥ ветлэм понна вашкала дырысен дун тыриське, сюрес выт шуыса нимаське. Со чотын кылдытӥське интыысь сюрес фонд. Отысь уксё кутӥське сюресъёс, выжъёс лэсьтыны, соосты тупатъяны но возьыны. - Мар бен со туннэ "Удмуртавтодор" кун предприятие? - Ми туннэ чакласа возиськом 5288 иськем сюресъёсты, со пӧлысь 5 сюрс палаез асфальтэн шобыртэмын. Выжъёсмы 360, кузьдалазы 10,3 иськем, чугун сюрес вамен 5 выж лэсьтэмын. Ву лэзьыны 4360 гумы понэмын, кузьдалазы 72,5 иськем кыстӥське.Огъя вераса, сюресъёс, выжъёс лэсьтонын, соосты выльдонын 28 предприятие ужа. Но берло дас ар ӵоже ужъёсмы данаклы, 50 процентлы кулэсмизы. Соин ик 3-ез гинэ подрядной организацимы пайда басьтэ. Ваньзэ сое лыдэ басьтыса, улэп кылён вылысь, шуг-секытысь потыны котькыӵе амалъёс утчаськом. Палэнским коммерческой банкъёсын ужамлэсь. Табере коньдонмы берга Сбербанкын. Удысамы ужа 3700 мурт. Соос котькыӵе куазен сюрес вылын - пӧсь гужем, кезьыт толэ но зорыку. Тӥни озьы берло 9 ар ӵоже шаерамы вуттэмын 1100 иськем сюресъёс. Та уже кутэмын 1,2 миллиард манет коньдон. Шуг-секытъёс шоры учкытэк, планъёсмес арлы быдэ быдэсъяськом. Туэ заданиея 73 иськем интые 75 иськем сюрес лэсьтом. Вуттэмын ни 9 выж. - Александр Васильевич, кызьы мынэ сюресъёсты возён но утён? - Та уж капчи ӧвӧл, секытэн сётӥське. Ньыль ар талэсь азьло сюресъёсты, выжъёсты радиосвязь пыр чакланы ӧдъям. Арлы быдэ 150-200 иськем сюресъёсты но уно выжъёсты тупатъяськом. Син азьын умояло сюресъёс: усьтӥсько выль автобус дугдылон интыос, йыло сюрес пусъёс но кенеръёс. Ваньмыз со юрттэ сюрес вылын шудтэм учыръёсты кулэстыны. Татын нимысьтыз пусъем потэ "Дорснаблэсь" тыршемзэ. Отын лэсьто сюрес пусъёс, кенеръёс но автопавильонъёс. Нош выжъёсты выльдон но чаклан оскемын можгаысь нимаз лэсьтӥськон предприятилы. Татын ик лэсьто кортлэсь но бетонлэсь выж ёзъёс. - Кызьы быдэсъяське "ЪЪИ дауре Россиысь сюресъёс" программа? - Татын нимысьтыз инты висъямын гуртын сюресъёсты лэсьтонлы но возёнлы. 1996-тӥ- 1999-тӥ аръёсы "Удмуртавтодор" ас вылаз басьтӥз 955 иськем гурт сюресъёсты. Соосты табере тупатъяно но умой возёно. Озьы ке но, 2000-тӥ арын автодор эшшо 600 иськем сюресъёсты ас вылаз кутыны чакла на. Со понна федеральной сюрес фондысь 24,6 миллион манет коньдон вуыны кулэ. Интыысь фонд висъялоз ичизэ 20 миллион манет. - Нош азьланезлы кыӵе малпанъёсты? - Бадӟымесь. Вуттыны чакласьком Сибире нуись сюресэз. Со понна эшшо 69 иськем сюрес лэсьтоно на. Со кыстӥськоз Селтаысь Играозь, мыноз нюлэсъёс пыр. Нош Гослесфондэн вераськыны секыт. Но та сюрес туж кулэ 50 гурт хозяйстволы. 2000-тӥ арын лэсьтыны кутском Иж котыртӥ сюрес. Со мыноз Иж тымет вӧзтӥ Шаберды черкогурт дортӥ но потоз Можга сюрес вылэ. Иж котыртӥ кыкетӥез сюрес лэсьтӥське ни. Со герӟалоз Як.-Бодья, Сарапул но Можга сюресъёсты. Кошкоз Аэропорт дортӥ но потоз Воткинск сюрес вылэ. Соку веранэз ӧвӧл, Ижевске данакез грузовой автомашинаос уз пыралэ но город чылкытгес луоз. Водительёслы но каньылгес луоз - светофоръёс уз луэ ни. - Александр Васильевич, материальной базадэс юнматытэк азьлане вамышъёс уд лэсьты. Тӥляд та ласянь кыӵе югдур? - Шонер юан. Кызьы бен азинскод, базадэ ке ӧд кужмояты. Тани ӟеч сюрес лэсьтыны туж трос кулэ усто кӧльы. Шаерамы со ӧвӧл. Соин ик, "Удмуртавтодор" возе Екатеринбург дорысь кӧльы пырдытон заводэз. 1997-тӥ арын со луиз предприятилэн "Ревдинский камнедробильный завод" пичи ёзэз. Отысь 78 нимаз вагонъёсын арлы быдэ ичизэ 300-400 сюрс тонна кӧльы ворттӥськом. Ӟечлыкез туж вылӥын. ревдаысь заводмес ялан выльдӥськом. Вуоно арын ньыль сэрего векчи кӧльы изыны кутском. Али сыӵе агрегат пуктӥське ни. Мукетыз бадӟым ужпум - техникаез выльдон. Миым тани 61 сюрес лэсьтон, тупатъян нимаз машинаос басьтӥм. Соос пӧлын: Т-170 кужмо трактор бульдозеръёс - 9, МТЗ-82 тракторъёс - 5, асфальт тырон машинаос - 2, автокранъёс - 6 но ДЗ-180 автогрейдеръёс - 2. Газ вуттэмын Можга но Глазов городъёсысь, Пичи Пурга, Грах, Карсногорск, Яр, Селта, Кизнер но Воткинск районъёсысь сюрес лэсьтон управлениосы. Чагыр эстӥськон кутӥське шуныт сётыны, асфальт но бетон лэсьтыны. Шуныт гаражъёс вуттэмын Алнаш, Кизнер, Красногорск, Пичи Пурга сюрес лэсьтон управлениосын. Сыӵе ик гаражъёс ӝуто Каракулиноысь Дэбесысь но Ижысь управлениос. Глазовысь сюрес лэсьтӥсьёс ӝоген вуттозы минеральной порошок поттонъя комплекс лэсьтонзэс. Нош Пирогово черкогурт дорын ужаны кутскиз машинаосты мертан М-7 "волга" пункт. Вань та ужъёсты быдэстыны 16,7 миллион манет коньдон вуттэмын. - Мар верасалды нефтебитум поттонды сярысь? - Таӵе заводмы ужа Ижын гинэ. Кылем арын сое быдэсак сямен выльдӥм но, 120 тонна интые, нуналлы быдэ 180-200 тонна битум лэсьтӥськом ни. Но милемлы али кулэ 300 тонна. Битум поттӥськом нефтьысь но гудронысь. Сутка ӵоже му вӧйысь 80 тонна битум лэсьтӥськом, нош гудронысь - 120 тонна. Со мынэ милемлы но, корка лэсьтӥсьёслы но. Тӥни соин ик заводлэсь кужымзэ пумен будэтӥськом. 1. "Удмуртавтодор" предприятиысь отделлэн кивалтӥсез Ревмира Смыщук (шорысез) туннэ ужъёссы сярысь кенеше валтӥсь экономистъёсын Маслова но Фофонова Валентинаосын. 2. Сюрес пус лэсьтӥсьёс Маслов (бригадир) но Архипов Сергейёс. 3. Сюрес вылын гожъёс лэсьтӥсь слесарь Сергей Иванов. 4. Сварщикъёс Михаил Хохлов но Петр Байкузин. 5. Устоез столяр Вячеслав Лагунов. 6. "Дорожник" магазинын. Туспуктэмъёсыз В.КАМАШЕВЛЭН. Международный восточно-европе йский университет Спортивный колледж (лицензия МНО УР � 305) объявляет набор студентов, закончивших 9 классов, для получения среднего профессионального образования по специальности Физическая культура (квалификация "Преподаватель-организатор физической культуры"). Срок обучения - 2 года 10 месяцев. Форма обучения - очно-заочная (без отрыва от учебы в средней школе). Успешно закончившие обучение в Спортивном колледже МВЕУ зачисляются без вступительных экзаменов на ИИ курс Чайковского государственного института физкультуры (заочное отделение). Справки по телефонам: 71-34-92, 22-37-29. Уральский государственный педагогический университет Международный Восточно-европейский университет (лицензия Госкомвуза РФ � 16Г-211) приглашают получить высшее образование по специальностям: психология (на базе общего среднего, среднего профессионального или высшего образования). Форма обучения - очная. Сроки обучения - от 2-х до 5-тӥ лет. По окончании выдается диплом государственного образца. Наш адрес: г. Ижевск, ул. Пушкинская, 268. Телефоны для справок: 22-37-29, 43-34-43. НАТАЛЬ "НУНЫ-2000" Сюлэмтэм картъёс пумысен малпанъёс Секытэн дыръям мон шӧдӥ кузпалылэсь воштӥськемзэ. Кызьы но ӧй выры азьло кадь ик синмаськымон улыны, уката яратыны - ваньмыз токма. Нокыӵе кариськытэк ужысь бертылӥз, мугорылэн быгыльскемез шоры син ултӥз учкылӥз. "Ма, мар та таӵе, мон солэн кышноез ӧвӧл шат?" - чигиськылӥ мон. Тодмоелэн картэз тӥни нылкышно консультацие но кышноеныз ӵош ветлэ, пӧртэм книгаос-журналъёс лыдӟе, вордсконо нунылы арбериос утчаса магазинъёстӥ бызьылэ, нош мынам... Жаляса верано луэ, та тунсыко вакытазы тросэз нылкышноос мынам кадь югдуре шедё. Малы? Яратэмысь дугдӥзы? Ӧз. Та пумысен мынам таӵе малпанъёсы кылдӥзы. Бызем нылкышно секытомемзэ тодыса шумпотэ. Сое ик со возьма картэзлэсь. Нош соиз пайме кышноезлэн лӧптэмезлы: кӧня ке возьманы но луысал на - улон инты йӧскадь ӧвӧл, коньдон уг тырмы... Ну, табере луоз ни урод кышномурт кадь: сое сиеме потэ, тазэ - уг, нош кӧня ке улыса ӵӧж сямен ветлыны кутскоз, ымнырыз шушектоз. Кышномурт вала но кадь картэзлэсь сыӵе малпанъёссэ: выль помада басьтэ, йырсизэ тупатъя, дӥсь вурытэ, но куке-соку со ваньмыз акыльтэ. Кышномурт жаде. Вылаз ик, картэзлэн маяллямъёсыз сое керӟегъятыны кутско, нош со юри сямен тросгес но тросгес яратэмез куре. Но кызьы мылкыдтэк мусояськод, тынад та вие иземед гинэ потэ ке! Картъёсты тужгес керӟегъяськыто вордсконо нуны сярысь вераськонъёс. "Учкы: али нунымы та суредын кадь. Солэн сюлэмыз вань ини, врач шуиз: со минутаз сю витьтон пол жугиське. Но мон малы ке каллен зӧкомисько..." Кызьы уг вала картэз, та вие кышнозэ ӟыгыртыса чупаны, будӥсь кӧтызлы шумпотыны кулэ шуыса. Нош со йырыныз гинэ сэзъя но телевизорез лэзе. Со пайме нылпиослы гожтэм выжыкылъёсты лыдӟемелы, лекъяське уйшор бере кыӵе ке валантэм муген сайкатэмелы. Но малы уг паймы пушкысьтым лулкомокмылэн туж шаплы ӵыжаськемезлы? Уже кошкыкуз, анаезлы жингыртэ, монэ эскерылыны косэ, нош ӝытазе вуыса пайме: кызьы лумбыт ӵоже сиёнэд пӧзьыса ӧз вуы? Сиськемез бере диван вылэ пуксе но нырулыны кутске. Мынэсьтым мӧзмемме уг ик вала. "Мон жади, ачид тодӥськод ук - табере тросгес ужано луэ..." Малы со нуналлы быдэ дэремъёссэ вошъя? Мычиськыны но ӵемгес кутскиз... Ваньзэ тае мон вылам шӧдӥ, туж куректӥ, секытэн ветлыкум. Малпалляй, со монэ ноку но уз вала, уз яраты ни. Но янгышаськем. Нылпи ваеме бере со сазьтӥськиз. Зэм, куинетӥ нуналаз гинэ мыным нош ик яратэмзэ вераз, воштӥськемме синйылтӥз, жаляз. Со валаз! Эх, валасал ке со монэ соку ик, секытомеме бере, ортчем укмыс толэзьёс чидантэм ӧй потысалзы, бадӟым праздникез - нуны вордӥськонэз возьманлы пӧрмысалзы. Оло нош, акушерка интые, нырысь ик со, пизэ, кияз кутысал. Лыдӟысал ке со та тунсыко вакыт сярысь одӥг ке но книга... Мон оскисько, тӥляд картъёсты чылкак мукетэсь, но шӧдымтэ улсын ке но кельтэ та газетэз сиськон ӝӧк вылаз. А.Леонтьева. Сю арлы огпол Драмая удмурт кун театр 5-тӥ-6-тӥ ноябре катанчизэ усьтэ тодмо драматурглэн Егор Загребинлэн Куӟебай Гердлы сӥзем "Кикы нош силе но силе..." пьесаезъя спектаклен. Выль ужез сярысь тазьы вераз гожтӥсь: - Быдӟым удмурт пиез ичи тодӥськом. Ум тодӥське адямилэсь мылкыдзэ но, визьзэ но, сюлэмзэ но, озьы ик - улон сюресэз вылысь пусйымон учыръёссэ но. Мон ӟеч-ӟеч тодматски солэн улэм-вылэменыз но гожъямъёсыныз. Пушкам кыӵе ке тылгизьы кенжиз. Герд сярысь уката тросгес тодэме потыны кутскиз. Таӵе адямиос дунне вылэ сю арлы одӥг пол вордӥсько. Ӟучъёслэн Александр Пушкинзы вань, немецъёслэн - Вольфганг Амадей Моцартсы, еврейёслэн - Шолом Алейхемзы. Соос сярысь книгаос, пьесаос, киноос кылдытъяло. Таӵе малпан монэ но ӝутӥз асьмелэн дуно удмурт пимылы, Куӟебайлы, сӥзьыса, пьеса гожтыны. Со дасямын вал вордӥськемез дырысен 100 ар тырмонлы но дырыз дыръя пуктыны ӧз луы. Драмая удмурт кун театрмы ужа та пьесае бордын. Малпасько: Куӟебай Гердлы сӥзем пьесаос, книгаос, кырӟанъёс ноку уз ыштэ кулэлыксэс. Удмурт калыклэн азьпал улонэз сярысь сюлмаськисьёс пӧлын со тужгес яркыт кизили вал. Сыӵе ик кылёз. Азьланяз, малпасько, Гердлы сӥзем ужме азьланьто: дыр но кужым мед луоз. Та ужме мытон азьын тодмо тодосчиосмылэсь Фома Ермаковлэсь, Кузьма Куликовлэсь, Александр Шкляевлэсь но Зоя Богомоловалэсь ужъёссэс лыдӟи. Озьы ик трос пол пумиськылӥ но вераськи Куӟебай Гердлэн ӵыжы-выжыосыныз - Роза Андреевна Кувшиноваен, Юрий Андреевич Чайниковен но Куӟебаез тодӥсь адямиосын. Ветлӥ вордӥськем гуртаз - Покчивукое, Малиновкае, адӟи улэм корказэ. Али отын музей лэсьтэмын. Лёгаськи яратоно интыостӥз: Вало шур дуртӥ, пужымо ягетӥ но возьёс кузя. Удмурт гуртъёсын кылзылӥ калык кырӟанъёссэ. Малпасько: та уж туж кулэ. Ӧтиськом тӥледыз 5-тӥ-6-тӥ ноябре премьерамес учкыны. Спектакльын шудо театрысь вань артистъёс. Пуктӥз режиссёр Александр Вершинин, сюлэме пыӵамон крезьгур гожтӥз Удмурт Элькунысь искусство удысысь дано ужась Евгения Копысова, артистъёсын ужаз балетмейстер Виктор Мингалёв. Суредасез - Удмурт Элькунысь искусство удысысь дано ужась Валентин Белых. Иван Селюгин, Драмая удмурт кун театрысь актёр. Кизнере но "удмуртъёс" вуизы 1-тӥ ноябрьысен Кизнерын ужаны кутскиз телевиденилэн выль передатчикез. Татчыозь Удмуртиысь иворъёсын соослэн тодматскыны луонлыксы ӧй вал на. Табере , кизнеръёслэн гинэ ӧвӧл, вавожъёслэн, можгаослэн, алнашъёслэн, грахъёслэн но, бускель шаерын улӥсьёслэн но чагыр экранзы ӟечгес возьматоз. Нош кун телерадиокомпания лымшор ёросын улӥсьёслы кузьым лэсьтӥз. Нырысетӥ возьматонзэс сӥзизы Кизнер ёросын улӥсьёслы. Со сяна, шаерысьтымы радио- телевизионной центрлэн кивалтӥсезлэн Виктор Жидковлэн верамезъя, татын чаклало на эшшо кык телевизионной радиопередатчик усьтыны. В. АНДРЕЕВА. Нырысетӥез Витьтон арес тырмиз тодмо тодосчилы, кылтодон наукаосъя докторлы, Удмурт Элькунысь но Россиысь Писательёслэн огазеяськонысьтызы адямилы Анна Сергеевна Зуева- Измайловалы. Вордӥськиз но будӥз со Сьӧлта (Селта) ёросысь Иткулат гуртын. Школаын дышетскыкуз ик ёзъёсыз пӧлын висъяськылӥз паймымон чырмытлыкеныз, лэчыт визьмыныз. Можга педучилищеез, отӥяз - Удмурт кун университетэз йылпумъяса, тодон-валанзэ йылэтӥз Дунне литературая А. М. Горький нимо институтлэн аспирантураяз. Али Анна Сергеевна Зуева-Измайлова кивалтэ Удмурт кун университетысь ӟуч кылтодонъя кафедраен. Наука удысын кызь вить ар ужатозяз, котьку паймытъяз но паймытъя мур пуштросъем, вылӥ ӟечлыко ужъёсыныз. Тодосчилы, витьтон арес тырмемен валче, юанъёсын вазиськиз кылбурчи но кырӟась Илья Пельтемов. - Анна Сергеевна, тӥ, удмурт кышномурт, кылтодон наукаосъя доктор, та удысын нырысетӥез. Мукет тодосчиос пӧлын кыӵегес интые пуктысалды асьтэды? - Со сярысь ноку ӧй малпаськылы. Татын инты сярысь вераськыны кулэ ӧвӧл, дыр. Малы ке шуоно, котькуд тодосчи аслаз уженыз выре, солы аслэсьтыз визьзэ, быгатонлыксэ сётэ. Инты сярысь малпаськыса улӥд ке, нокыӵе ужед уз пӧрмы, кужмыд юнме гинэ быроз. Нош зэмзэ вераса, мон азьмынӥсез но, берпуметӥез но ӧвӧл. Али удмурт калыкысь потэм профессоръёс ньыльдон сизьым мурт ни. Соос пӧлын ог дасоез гинэ - нылкышноос. - Нош кызьы ужа кышномурт-тодосчи? - Воргоронъёсын ӵошатыса, солы татын но секытгес йӧтэ. Малы? Вань кивалтӥсьёс - воргоронъёс. Соослэн йыразы кылемын на таӵе вашкала валан: кышномурт гур азь палан берганы, нылпи вордыны кулэ. Соин ик нылкышно шоры, сое кивалтӥсе дэмлаку, кырыжгес учко, пыдзэс но пуктыны уг кепырало. - Кивалтӥсь луыса нош наукаез бергатыны ӧжытгес дыр уг кыльы-а? - Тодосчиос но, гожъяськисьёс но доразыгес ужало. Тани мон университетын лекциос лыдӟисько, семинаръёс нуисько, наукаен вырыны дыр уг кыльы ни. Нош вань ке со, библиотекае, архиве мынӥськод. Соку ини быгатэмедъя ужез бергатӥськод. - Анна Сергеевна, кунгож сьӧры но трос пол вуылӥды ни. Кызьы учко отын тодосчиосмы шоры? - Россиысь наука котькыӵе секыт вакытъёсы но туж вылӥын возиське. Соин ик кунгож сьӧрын асьме шоры гажаса учко. Нош мукет ласянь, улэм-вылэммылы паймо но жаляло. Соослэн тодосчиоссы нимаз чебер юртъёсын уло, машиназы, Интернетэн герӟаськем компьютерзы вань. Нош асьмелэн?! Тани асме Виктор Леонидович Шибановен ӵошато. Мынам квартирае вань, нош Виктор Леонидовичлэн - ӧвӧл. Но солэн компьютерез вань, мынам - ӧвӧл. Коньдон сярысь ке - соин оло нянь басьтод, оло - компьютер. Басьтӥд ке но, солы но коньдон тыроно на. Нош туала вакытэ Интернеттэк кылчи - китэм-пыдтэм кадь. - Улонмы сыӵе умойтэм ке, ужаны кызьы быгатӥськоды на? - Шуген-секытэн ке но, быгатӥськом на. Али пӧртэм фондъёс усьтылэмын. Кылсярысь, Сорослэн фондэз, Президентлэн фондэз... Соос арлы быдэ конкурс яло. Отчы наукаен вырисьёс, писательёс, журналистъёс, пӧртэм удысъёсын ужасьёс пыриськыны быгато. Проектэд сярысь вераса, трос документация Москвае келяно. Малпам ужзэс быдэстон вылысь, вормисьёслы грант сётӥське. Со грант понна коньдон сётон азьын проектэз учко-эскеро. Али мон вуоно арлы дасясько ини. Улон секыт, шуиськом, коньдон уг тырмы, нош Анна Сергеевна кадь удмурт кышномуртъёс, номыр шоры учкытэк, азьлань вамышъяло. Али ӵемысь кылоно луэ таӵе вераськонъёсты: удмурт кылын нокыӵе наука но, литература но, мукетыз но уз луы. Малы ке шуоно, удмурт кылэз тодӥсьёс ӧжыт, удмуртъёс пӧлын узыр адямиос но ӧвӧл. Соин ик ӟуч кылын, пе, гожъяськоно, ӟучъёслэсь коньдон но курыны луоз. Таӵе малпан туннэ вакытлы, оло, тупа но. Но малпаськоно ук азьланез сярысь но. Малы соку Куӟебай Гердэз, удмурт кылын ке но гожъяськиз, быдэс дунне тодэ?! Зэм, тросэз тодмо, визьмо адямиос политикае кошко. Яке, кивалтӥсь луыса, воксё ышо. Анна Сергеевна нокыӵе бадӟым кивалтӥсь но ӧвӧл, политикае но уг пыриськы. Быдэс улонэз сӥземын удмурт но ӟуч литератураосты эскеронлы, соосты узырмытонлы. Кулэ-а меда та уж? Удмурт кыл ӝогшен воксё уз быры-а? Ваньмыз уз укша-а Сизифлэн ужезлы? Уз, дыр. Малы ке шуоно, дунне, дуно изъёслэсь сузьем чыртывесь кадь, трос пӧртэм кылъёслэсь кылдэмын. Одӥгез ышиз ке, дунтэмгес луоз.дунтэмгес луоз. - Анна Сергеевна, инмарлы оскиськоды-а? - Черке нимысьтыз уг ветлӥськы. Мынам инмаре ас сюлэмам. Аслам малпанэ-шӧдонэ, аслам дуннее. - Азьланяз улон тупатскоз-а? - Ӟечезлы оскыса улӥсько. Ӧд ке оскы, малы улод, ма понна ужалод? Собере весь тазьы луыны уз быгаты. Калыклэн чиданэз быре ини кадь. Югдур ӝоген воштӥськоз, дыр. Кышномурт котьку но улон сётӥсь, умойзэ лэсьтӥсь вал. Тазьы вераськыса, таӵе кылъёсты кылыса, осконзэ ыштэм адями малпалоз: "Вань на али шуг-секытэз пырпотыны быгатӥсь адямиос. Секыт ке но, соос азьлань вамышъяло". Нош мон маин пӧртэм? Мынам но осконэ улӟиз, выль инвисъёс сьӧры, яркыт кизилиос доры вуэм потыны кутскиз. * Анна Сергеевна ЗУЕВА-ИЗМАЙЛОВА кенеше университетысь кылтодонъя факультетысь дышетӥсен Галина Витальевна ГОРБУШИНАЕН. Тусбуйзэс пуктӥз Владимир БЕЛОМОРСКИХ. ЛЭЧЫТ УЖПУМ Синву коньдонлы уг пӧрмы 1985-тӥ аръёсы государствомы калыклы вож сюрес усьтӥз: вордэ тросгес нылпи - юрттэт луоз. Зэмзэ но, со вакытэ трос пиналъёс вордскизы, нырысетӥ классэ мынӥсьёслы школаосын интыос но уг тырмо вал. Куке но ӝуатэм вож тыл али но пиштэмъяське, но со уг шунты, уг югдыты ни анай-атайёслэсь сюрессэс. Азьло аръёсын ӵошатыса, нылпиос ӧжыт ке но вордӥсько, соослэн озьы ик кӧтсы сюма, шудэмзы, лыдӟиськемзы, чебер дӥсяськемзы потэ. Нош анай-атайёс уждун дыраз уг басьто ке? Нуналысь нуналэ дунъёс будо ке? Сыӵе дыръя нылпи пособие но юрттэт луысал. Кытын бен со? Берга, бызьылы, берпум кужымдэ но луонлыктэ сётыса, нылпидэ быдэ вутты. Нош государство кизэ вӧлъяса ик возьма ни: пидэ армие келяно. Вуоно солдатлэн тазалыкез сярысь но юасьлуоз-а, уз-а. Я, таиз мукет ужпум. Нош мынам туннэ вераськон ӝутэме потэ нылпи пособиос сярысь. Лыдӟисьёсмылэсь трос гинэ гожтэтъёс вуо редакцие. Юало: "Ку сётозы нылпи пособие? Кин сое басьтэ? Кытчы вазиськыны кулэ?" Ваньмыз сямен ик ӝожтӥсько секыт улон-вылонзылы. Тани Кизнер ёросысь Н.Муравьева гожтэ: "Куинь нылпиосты огнам будэтӥсько - бадӟымезлы дас ньыль арес, пичиезлы одӥг арес но тямыс толэзь. Нылпи пособие берлозэ басьтӥ 1998-тӥ арын январе. Собере сиён-юонэн но, мукет вузэн но пособие ӧз сётъялэ ни. Бадӟымез нылы школазэ йылпумъя, коньдонмы но, дӥськутмы но ӧвӧл. Кулэмлэсь гинэ улӥськом на". Нош кӧня вазиськисез Калыкез улон-вылонын утёнъя министерствое? Малы ке но оскыса, куд-огез анайёс нылпиосынызы ик берпум коньдонэнызы сюрес вылэ пото, собере часэн- часэн пуко министр, министрлэн воштӥсез, валтӥсь специалистъёс доры пырон понна. Котькӧня синвудэ кисьты, коньдонлы со уз пӧрмы. Ӧвӧлтэмзэ но вань уд кары. Юрттэмзы потыса но Калыкез улон-вылонын утёнъя министерствоын ужасьёслэн луонлыкъёссы ӧвӧл вазиськисьёсты буйгатыны. Визь-кенешен, кыӵе ке дэмланъёсын ке шат. Нош мукет ласянь учконо ке, нылпи пособиосъя кылдэм ужпумъёсты, юанъёсты сэрттыны-пертчыны кулэ ёросъёсысь калыкез улон-вылонын утёнъя отделъёс пыр. Со отделъёслэн калык пӧлын валэктон ужез кулэезъя радъямтэенызы яке, мар ватонэз, куд-ог дыръя кылзыны- валэктыны мылкыдтэк басьтӥськеменызы, анайёс амалтэк шонтоно луо Ижевск пала. Озьы, 1999-тӥ арын укмыс толэзь ӵоже гинэ нылпи пособие пумысен министерствое вазиськиз 1833 мурт. Та югдурез лыдэ басьтыса, ёросъёсысь калыкез улон-вылонын утёнъя отделъёсын ужасьёслы министерствоын ортчытэм берлояз коллегиын индылэмын вал, калык пӧлын валэктон ужез ӟечгес радъян сярысь. Уг, пыкылон понна уг вераськы та кылъёсты. Мыным туж жаль пото со быдӟа ужпумъёс пӧлы выйытэм ужасьёс. 1998-тӥ арын тани пенсиос но пособиос басьтӥсьёс шаерамы 388 сюрс вал. Ар ӵоже гинэ 28 сюрсэз вазиськиз нырысьсэ пенсия басьтон пумысен. Улон секыт, коньдон уг тырмы, адямиос керӟегъясько, собере вань со шуг-секытъёссэс ӧръяло калыкез улон-вылонын утён удысын ужасьёс вылэ. Нош соос асьсэос но сыӵе ик шуг-секытъёс пӧлы выемын. Югдур уката но секытомиз, толэзьлы быдэ сётӥськись нылпи пособие тыронэз вань семьяосъя Калыкез улон-вылонын утёнъя министерство вылэ выжтэмен. Со пособиез туннэ нуналлы тырыны кулэ 312 381 нылпилы, соос пӧлын: огнын анайёслэн нылпиоссы - 27 981; пегаса улӥсь, ышем-бырем анайёслэн - 367; срочной службаысь военнослужащийёслэн - 43; ужасьтэм анай-атайёслэн - 48 442; ужась анай-атайёслэн - 229 370; сюдӥсьсэс ыштэм, инвалид нылпиос - 6 278. Ярам, республикамы коньдонэн бусьтыр улысал ке, утчаськон-берганэз но ӧжытгес луысал - Россия Федерациен тупатэм законъя ваньмыз шугъяськытэк басьтысалзы чаклам пособиез. Нылпи пособилэн быдӟалаез сярысь юанъёс редакцие вуо бере, нялтас тодады вайытӥсько: толэзьлы быдэ сётӥськись пособилэн быдӟалаез 1998-тӥ арын 1-тӥ январьысен - 67 манет 21 копейка (тужгес пичи уждунлэн 70 процентэз); пегаса улӥсь, ышем-бырем анай-атайёслэн но срочной службаысь военнослужащийёслэн нылпиоссылы пособилэн быдӟалаез - 100 манет 82 копейка (нылпилы толэзьлы быдэ сётӥськись огъя пособилэн быдӟалаезлэн 150 процентэз); огнын анайёслэн нылпиоссылы толэзьлы быдэ чакламын 134 манет 42 копейка (нылпилы толэзьлы быдэ сётӥськись огъя пособилэн быдӟалаезлэн 200 процентэз). Кытысь шедьтоно шаерысьтымы сомында нылпилы вань та коньдонэз? Туннэ нуналэ со ӧвӧл, матысь дыре но луоз-а, уз-а. Тужгес но ёрмись семьяослы улон-вылонын юрттон вылысь но Россия Федерациысь Президентлэн "Нылпилы толэзьлы быдэ сётӥськись пособие тыронэз ӝегатскытэк радъян сярысь" Указзэ быдэстон понна Удмурт республикаысь Правительствоен 1998-тӥ арын 30-тӥ апреле кутэмын "Нылпилы толэзьлы быдэ сётӥськись пособиез 1998-тӥ арын тырон сярысь" Постановление. Семьялэн огъя доходэз адямилы быдэ кӧня усемъя нылпи пособие тыронын кылдытэмын черод - пособие басьтӥсьёс люкемын куинь категорилы. Огъя доходъёс сярысь ивортон республикаямы сётэмын 259 608 нылпилы (учётын сылӥсь вань нылпи пӧлысь 83,1 процентэз). Нырысетӥ категорие пыртэмын 172707 нылпи, кыкетӥ категорие - 26 538, куинетӥ категорие - 60 363. Кун юрттэт нырысь ик сётыны чакламын нырысетӥ категорие пырись семьяослы, кудъёсызлэн огъя доходзы 1998-тӥ арын адямилы быдэ усе ке 402 манет 30 копейкалэсь ӧжыт. Вераны кулэ, тросэз семьяос, нырысетӥ категорие шедё ке но, кулэ документъёссы ӧвӧлэн шуг-секытъёсын пумиськоно луизы. Лыдэ басьтэмын 3 446 сыӵе семья. Котькуд учыр эскеремын вал Калыкез улон-вылонын утёнъя министерство пыр. Вань мукет но тырмымтэос. 100 сюрслэсь ятырез пиналъёс палэнэ кылемын, калыкез улон-вылонын утён ёзъёсы анай-атайёс вазиськымтэен, та уж предприятиос но организациос пыр лэсьтӥськиз ке но. Тросэз валатэк-тодытэк но кылизы пособилы черодэ султон сярысь. Нырысетӥ категорие пыремъёсыз но басьто-а бен нылпи пособие? Республикаысьтымы бюджет коньдонэн начар луэмен но нылпи пособиосъя пунэм тыронъёсты семьяослы берыктон вылысь, 1998-тӥ арын июле Удмурт Республикаысь Правительство кутӥз "Нылпилы толэзьлы быдэ сётӥськись кун пособиез тырон сярысь" Постановление. Соя, коньдон интые, анай-атайёслы ӵектэмын пособиез басьтыны сиён-юонэн, мукет вузъёсын, квартиралы, коммунальной но мукет пӧртэм юрттэтлы тыронъёс чотын. Озьы бюджетэ пунэм тыронъёссэс предприятиос но организациос взаимозачёт амалэн берыктыны быгато. Эскеронъёс возьмато, ёрос кивалтӥсьёс нылпи пособиосты тырон шоры валаса учко ке, озьы ик вань ке ёросын бюджетэ налог тырись предприятиос, отын 1998-тӥ арлы нылпи пособиосъя тыронъёс трослы ӧжыт кылемын. Умоен пусйыны луоз Можга городэз, укмыс толэзьлы 90,4 процентэз пособие тыремын ни; Глазовын - 66,8 процентэз; Воткинскын - 56,2 процентэз, сомындаез ик Селта ёросын; Вавож ёросын - 57,3 процентэз; Красногорскын - 54,1 процентэз; Шарканын - 49,1 процентэз; Балезиноын - 46,9 процентэз. Кылпи пособиосъя пунэм тыронъёссы трос Пичи Пурга, Завьялово, Дэбес, Камбарка, Юкаменск ёросъёсын, ёрос администрациос но калыкез улон-вылонын утён отделъёс пӧртэм амалъёс утчало ке но. Бере кылемзэс валэктыны луоз соин но, та ёросъёсын ӧвӧл бюджетэ налог тырись предприятиоссы, вузъёс но уг тырмо. Югдур тужгес но секыт Ижевскын, нылпи пособиос татын 20 процентэз но тырымтэ на вал, нош юрттэтлы кулэяське 150 сюрс нылпи. Быдэс республикая верано ке, вузъёс, сиён-юон, пӧртэм юрттэт, коньдон чотын нылпи пособие укмыс толэзь ӵоже тыремын 68045,6 сюрс манет тыр - 43,2 процентэз. 1998-тӥ ар понна нырысетӥ категорие пырись семьяослы тырыны кулэ на 89344,87 миллион манет. 1999-тӥ арлы тырыны ик кутскемын ӧвӧл ай. Озьы ик Калыкез улон-вылонын утён, министерство пыр нылпи пособие басьтӥсьёслы 1997-тӥ ар понна тросэзлы коньдон тырымтэ на (17,4 миллион манет тыр). Нош вань категориосъя верано ке, республикамылы та вакытэ 700 миллион манет пала коньдон кулэ. Верай ни, ёросъёсысь калыкез улон-вылонын утён отделъёсын ужасьёс та вие кураськисьёс чотэ вуттэмын. Пособие интые вузъёс, сиён-юон тучан, собере сое кулэяськисьёсызлы люкылон - ваньмыз соос пыр лэсьтӥське. Пенсионеръёс кыкетӥ интые кылё ни. Ужасьёсты асьсэды но таӵе югдур шугъяськытэ, мултэс киос ӧвӧл угось. Шуг- секытэ усем семяосты, нылпиосты утён понна асьсэос пӧртэм амалъёс утчало ни. Шаркан администрациын, кылсярысь, вань предприятиосты экономической совет пыр потто, эскеро предприятиослэсь югдурзэс - кинлэн кӧня пунэм тыронъёсыз кылемын. Ужало налоговой инспекциен, потребительёслэн правооссыя комиссиен, калыкез дышетон но семья отделъёсын ӵош. Нырысетӥ категорие пырись семьяос пӧлысь тужгес шугъяськисьёсызлы нырысь ик юрттыны тыршо - кинлы коньдонэн, кинлы вузъёсын. Пособие тыронын шуг- секытъёс кылдо люкиськем кузпалъёсъя. Картъёссы кытын ке ышыса уло, уждун сярысь справкаоссы ӧвӧл, алимент уг тыро. Приставлы вазиськыса, шарканъёс та учыре почтаысь справкаосты уже кутӥзы - сыӵе- сыӵе семья алимент уг басьты. Юись анай-атайёсъя но ужрадъёс кутӥзы. Нылпи пособиез анай басьтэ социальной педагоген ӵош, таиз син азяз возе ни коньдонлэсь, вузлэсь кутӥськемзэ. Нош Селта ёросын юись семьяослы пособие сётӥське нылпи садъёс но школаос пыр. Озьы пиналъёс сютэм коть уз луэ. Ӧвӧлтэмысь мае ке но поттыны турттэмзы сярысь трос вераны луысал пӧртэм ёросъёсъя. Но таӵе югдур пумтэм-йылтэм кыстӥськыны уз быгаты. Кутоно кыӵе ке но ужрадъёс. Мукет регионъёс нылпи пособиез вузъёсын, сиён-юонэн тыронэ ӧз выже. Коньдон вань ке - пособие но луоз. Ӧйтӧд, шонер-а со? Сютэм муртлы пичи юрттэт но шумпотонэн берытске угось. Россия Федерациын али вераськонъёс мыно тужгес но шуге-леке усем семьяослы гинэ нылпи пособие тыронъя, пӧртэм законопроектъёс дасясько. Соиз но ныпъет секыт уз йӧты меда куанер странамылы? Вань та огыр-бугыр улонмы шоры учкыса оскон но бырыны кутске. Нылпи пособиосъя туннэ нуналлы кылдэм ужпум эскеремын вал Удмурт Республикаысь Кун Кенешлэн берло сессияз но. Ужпум туж секыт. Ар пумозь югдур кӧнялы ке умоялоз шуыса оскыто ик, вераськон мынэ нырысетӥ категорие пырись семьяос сярысь. Нылпи пособиосъя республикаямы кылдэм югдур пумысен нылкышно форумын юанъёс сётэмын вал Россия Федерациысь Кун Думалэн депутатэзлы Екатерина Лаховалы но. Люкаськемъёсты со номырин буйгатыны ӧз быгаты. Та ужпумез республика ас вылаз басьтыны кулэ, Россиысь юрттэтлы осконэз ӧвӧл. Нылпи пособиосъя Кун Думаен дасямын законопроект, соя бюджетысь 30 миллиард манет висъяны кулэ. Но со ужпумез эскерозы ни выль быръем депутатъёс. Л.Малых. Россия Федерацилэн кун наградаосыныз пусъён сярысь Россия Федерацилэн Президентэзлэн указэз Кун азьын вормонъёссы, калыкъёс куспын эшъяськонэз но огкылысь ужанэз азинтонын бадӟымесь азинсконъёссы но кема аръёс ӵоже пайдаё тыршемзы понна пусъёно: Данъян орденэн Жебровский Валентин Витальевичез - акциосын "Буммаш" огазеяськонлэсь президентсэ - валтӥсь директорзэ, Удмурт Республика; "За заслуги перед Отечеством" орденлэн ИИ степенё медаленыз Бобылев Николай Фёдоровичез - акциосын "Буммаш" огазеяськонысь валтӥсь юристэз, Удмурт Республика, Мамаев Геннадий Геннадьевичез - акциосын "Буммаш" огазеяськонысь пул вӧлӥсез, Удмурт Республика. Эйдинзон Давид Абрамовичез - акциосын "Буммаш" огазеяськонысь валтӥсь металлурглэсь воштӥсьсэ, Удмурт Республика; Конструкциос кылдытон удысын пусйымон ужъёсыз понна "Россия Федерациысь дано конструктор" сӥлы карон ним сётоно: Дерябин Анатолий Константиновичлы - акциосын "Буммаш" огазеяськонысь валтӥсь конструкторлэн воштӥсезлы, Удмурт Республика; Экономика удысын пусйымон ужъёсыз но трос аръёс ӵоже сюлмысь тыршемез понна "Россия Федерациысь дано экономист" сӥлы крон ним сётоно: Матюков Николай Ивановичлы - акциосын "Буммаш" огазеясконысь управленилэн начальникезлы, Удмурт Республика. Россия Федерацилэн Президентэз Б. Ельцин. Нырысетӥ толсурозь Шаерысьтымы калык киужъёсъя юртын усьтӥськиз выль адӟытон - нырысетӥ шуркынмонэ (ноябре) асьсэлэсь устолыксэс возьматыны мылкыд каризы кызьпу туйлэсь пӧртэм тӥрлык пӧрмытъясьёс. Та ужрадэ пырисько шаерысьтымы вань ёросъёсысь киужъёсъя юртъёс, озьы ик - та удысэн ас кожазы вырисьёс. Адӟытон ужалоз нырысетӥ толсурозь (декабрёзь). Вуылэ калык киужъёсъя юртэ! Куанеръёс йыло Кылемаз покчи арня нуналэ Ижлэн йырыз Анатолий Салтыков пумиськылӥз городысь арлыдо адямиосын. Люкаськемъёс кенешизы пӧртэм ужпумъёсъя. Мӧйыосты тужгес сюлмаськыто туала улон-вылонысьтымы пӧртэм шугадӟонъёс. Тросэз соос герӟаськемын нуналмысь кулэяськонъёсын: городысь данаказ юртъёсын тыро-пыдо уг ужало лифтъёс, ӧвӧл пӧсь ву, кезьыт ву, гумыос кузя уг лыкты газ, йылэ улон инты понна дун. Данак лушкаськисьёс. Соосын сэрен но кылдо уно кайгуос. Пумиськонэ люккаськемъёсты шулдыртӥзы Ижысь Устинов ёросысь кырӟаны-вераны яратӥсь арлыдоос, 27-тӥ школаын дышетскись пиналъёс. Ижлэсь йырзэ Анатолий Салтыковез ӟечкылазы вордӥськем нуналэныз. Пумиськонэ лыктэмъёс ог-огзэс - комсомоллэн вордӥськем нуналэныз. Е. РОМАШОВА. Дарт Ӟечбур, выль даур! Вуоз ай мынам но аре. Туспуктэмез Э. ЛЬВОВЛЭН. Можга район. Потӥсько мон кырӟаны... Марий Элысь удмуртъёс ӧтемъя, туннэ Ижевскысь Юлия но Виталий Кузьминъёслэн ансамбльзы потэ Марий Эл Республикаысь удмуртъёсын, поръёсын пумиськыны. Оскиськом, та кырӟась семья данъямон, вылӥ возьматоз аслэсьтыз творчествозэ, творчествозэс, сюлэме пыӵась кырӟанъёссэ, вералоз кылбуръёссэ, возьматоз эктонъёссэ. Шудо сюрес тӥледлы! Л. СОСНОВА. Пуштытон арбериос шедьтэмын Россия Федерациысь ФСБ-лэн Удмурт Республикая управлениез "Вихрь-антитеррор" ужрадэз ортчытыку шараяз пуштытӥсь арбериосты дасян ужен вырисьёсты. Бӧрысь сое соос вузаллязы йыртэмасьёслы. Ижевсклэн пумысьтыз одӥгаз юртысь утчаськон дыръя таламын кык тол шашкаос (огъя секталазы 700 грамм), кык детонаторъёс, озьы ик пуштытонэн палэнысен кивалтонъя арбериос. Та пумысен ӝутэмын уголовной уж. Россия Федерациысь ФСБ-лэн Удмурт Республикая управлениезлэн пресс-службаез. Театр Аспӧртэм нюръяськон Операя но балетъя кун театр ужан вакытсэ усьтӥз В. Гюголэн "Собор Парижской Богоматери" произведениезъя балетэн. Дасяз сое Санкт-Петербургысь постановщик Олег Игнатьев, нош оркестрен кивалтӥз Санкт-Петербургысь дирижер Аркадий Штейнлухт. Та спектакль нырысьсэ возьматэмын вал. Озьы ке но, театр калыкен тырмемын вал: тужгес трос кузя лыктӥллям пиналъёс. ...Жингыртэ куинетӥ гырлы. Залын тыл кысӥз, оркестр шудыны кутскиз. Сое кылзыса соку ик вуиськод гожъясьлэн улэм вакытаз. Катанчи усьтӥськем бере жингыртэ вить гырлы, син шоры йӧто аспӧртэм лыко декорация но паймымон тылъёс. Ваньзэ тае лыдэ басьтыса шӧдыны луэ балетлэсь мур пуштроссэ. Нош мар со сыӵе, гырлы? Кыӵе мылкыд сётэ со? Оло, секыт адӟон вите, оло, азьпалан югыт сюрес чильпыра? Гырлыос, тыл, крезьгур - аспӧртэмлыко нюръяськон. Пумисько бадӟымесь кужымъёс, бадӟымесь "гурезьёс" - кин вормоз, кудӥз вуттоз кулонэ, нош кудӥз - улонэ? Гюголэсь ужъёссэ чаклано ке, шӧдӥське нюръяськонлэн шӧмыз. Адями ваче вуэ секыт, пеймыт улонэн, нюръяське асэныз ачиз. Квазимодо - шӧтэм воргорон. Но! чебер но дуно солэн лулыз, пуш малпанъёсыз, яратонэз... Номыр шоры учкытэк, Квазимодолы синмаське Эсмиральда. Квазимодолэн (та ролез шудӥз Иван Такманов) выросъёсызъя валаны луэ: солы ма ке но уг тырмы. Нош мар?.. Кин со сыӵе, Эсмиральда? Пинал, чебер чиган ныл. Эрикез со яратэ котькуд ласянь. Синмаське но пӧртэм воргоронъёслы. Эсмиральдаез шудӥз Удмуртиысь дано артистка Марина Кузнецова. Та балет возьматэ нылмуртлэсь кайгуоссэ но шумпотонъёссэ. Учкелэ асьтэос, мар пӧрме: Эсмиральда синмаське огезлы, мукетызлы, куинетӥезлы - аслэсьтыз шудзэ уг шедьты. Яке - уг адӟы. Марина Николаевналэн верамезъя, Клодэн но Эсмиральдаен кылдытэм партия тужгес секытэз луэ.Туж умой но зол юрттӥзы солы дӥсь но мукет атрибутика. Балет - секыт жанр. Балетын эктӥсь - артист. Отын эктон пыр возьматоно луэ пӧртэм учыръёсыз. Эктон пыр асьмеос валаськом солэсь пуштроссэ. Эктон кыл - балетлэн вераськон кылыз. Луоз котькуд партиез лулэз понытэк лэсьтыны. Но соку нокыӵе сюлэмшунытэз уз шӧдӥськы. Нош лулдэ понӥськод ке, чебер но яркыт образъёс пӧрмо. Кемалась ик ӧвӧл балетэ лыктӥз егит гинэ эктӥсь - Максим Мельников. Татын со Феп нимо героез шудӥз. Адӟыса али ик шӧдыны луэ ини: талэсь пӧрмоз зол эктӥсь. Максим! Кужымдэ но яратондэ поныса гинэ вормод! Йырдэ эн ош, учкы азьпала! Балетын эктӥз на Удмуртиысь дано артист Владимир Васильевич Морозков. Со шуиз: "Котькуд адями пичи ке но лыдӟиськыны кулэ. Тодыны кулэ Гюголэсь ужъёссэ". Мыным туж яраз на тазьы верамез: "Балетысь артист - театрын художник". Театрын кызьы луэ? Режиссёр лыдӟе пьесаез, сётэ роль, возьматэ, кытчы султоно, кылдытэ ансамбль, нош артист ини ас сяменыз пӧрмытэ аслэсьтыз рользэ. Сётэ солы ним, дунъет, малпа ортчем улонэз сярысь. Учкись адӟе, мар пӧрмиз. Нош кызьы ужаз со бордын актёр - уг тоды. Художник ноку но уз потты калыке ыль, пӧрмымтэ киужзэ! Иван Селюгин, Драмая удмурт кун театрысь актёр. Дасьсэ сиись-а, сюлмо ужась-а? Россиын ог вить ар ӵоже ини шӧдӥське регионъёслэн но Москвалэн ваче пумит сылэмзы. Зэм, соослэн кусыпъёссы азьвыл но укыр ик шунытэсь ӧй вал. Москвичъёс котьку но вылтӥяськысагес учкылӥзы кыдёкын улӥсьёс шоры, соосыз нош ӵем дыръя вожъяськылӥзы столицаын улӥсьлы, кытӥяз сое дасьсэ сиисен лыдъязы. Реформаос азинскемъя, та вожвылъяськон уката но лэчытомиз. Москва угось Европаысь городъёсын ӵошатымон чебер, узыр, йӧн-йӧн луиз. Нош республикаос но областьёс, азьвыл но ушъяськымон уг ке уло вал, берло аръёсы уката но пашмизы, начармизы. Россилэн пыдлось сэрегъёсаз улӥсьёс Москваез пыкыло вань страналэсь кужымзэ, ваньбурзэ капыръямез понна, кытӥяз меӵак адӟемпотостэм каро. Валамон, та лек мылкыд амалтэк пальккиське столицалэн кивалтӥсьёсыз вылэ, нырысь ик, Юрий Лужков вылэ. Быръёнъёс азьын солэн тушмонъёсыз таӵе мылкыдъёсты уката но пуромытыны тыршо. Жаляса верано луэ: огшоры калык Москвалэсь кузёоссэ ӵем дыръя сура государстволэн кивалтӥсьёсыныз. Кремль яке правительство мар ке умойтэмзэ лэсьто ке, соку ик янгыш луэ Москва, вань уродэз, пе, отысь потэ. Но ӧвӧл вунэтоно: вань Москва город, Федерацилэн субъектэз, вань мукетыз но Москва - Россилэн столицаез, государстволэн шорсюлмыз, йырвизез но тусбуез. Ваньзэ, мар лэсьто вылӥ кивалтӥсьёс, уг яра погыльтыны Москва вылэ. Таиз нырысетӥез шонертон. Табере эскером, зэмзэ ик-а Москва страна чотын "кӧй люка". Нырысь ик, государстволэн бюджетаз 40 процентэз коньдон налог чотын Москваысь вуэ. Кылемез - 60 процентэз - регионъёсысь. Со дыре ик, москваын ӧвӧл му вӧй, музъем эгыр, газ, корт, нюлэс, зарни но мукет инкуазь узырлыкъёс. Озьыен, Москваын быгато ужаны, коньдон поттыны. Соиз зэм, Москваын коньдон поттыны луонлыкъёс уногес, странаысь данакез коньдон но татын люкаськемын. Но городлэн правительствоез, Г.Поповез яке Ю.Лужковез вератэк ини, со понна янгыш ӧвӧл. Революцилэсь азьвыл ик Москваын, Санкт-Петербургын сямен ик, коньдон, мукет интыосын сярысь, тросгес бергаз. Советской власть аръёсы но югдур ӧз воштӥськы. Столица угось со столица ик вань ни. Вылаз ик, кызьы верамын ини, татын ужбергатон понна луонлыкъёс шӧдскымон тросгес. Сое лыдэ басьто Западысь ужбергатӥсьёс но. Соин ик кунгож сьӧрысь вуэм коньдон (инвестициос) 60 процентэз Москвае кылё. Вераны кулэ, москвае ке но, солэн правительствоезлы уг. Со - быдэс страналэн коньдонэз. Тани странаысь 80 процентэз коньдон Москваын люкаськемын, данакез - коммерческой банкъёсын. Но со банкъёс Москвалэн ӧвӧл ук, соос ас понназы ужало. Соослэсь коньдонзэс уже кутыны котькуд областьлэн но городлэн луонлыкъёссы огкадесь. Со гинэ ӧвӧл ай, москва аслаз бюджетысьтыз 80 процентсэ коньдонзэ Россиын уже кутэ: басьтэ техника, материалъёс, сиён-юон но трос мукет ваньбур. Озьыен, со вань странаын ужан инты утьыны юрттэ, пыдлон улӥсьёслы пайда вае. Пусъём, Европаын, Америкаын, яке Украинаын уг басьяськы, отысь вузъёс, оло, ӟечгес ке но. Тани басьтом ЗИЛ огазеяськонэз. Огдыре со мырдэм шока вал ини. Москвалэн правительствоез та предприятиез азьвыл кузёосызлэсь басьтӥз но пыд вылаз ӝутӥз. Соин чош ик улӟизы Россиысь сюрс но ӝыны предприятиос, ЗИЛ-лэн смежникъёсыз. Таӵе выллем ужрад одӥг гинэ ӧвӧл. Москвалэн регионъёсын сярысь ӟечгес улонэз пичи ужбергатон бордысь но потэ. Та удыслэн пайда поттыны быгатэмез быдэс дуннеын кулэезъя дунъямын ини. Тросаз азьмынӥсь странаослэн бюджетъёссы со чотынгес тырмо. Москва но 30 процентсэ коньдонзэ отысь люка. Россиын 600 сюрс пичи но шоро-куспо предприятиос лыдъясько ке, со пӧлысь 240 сюрсэз Москваын ужало. Мар люкетэ регионъёсын та удысэз азинтыны? Интыосысь кивалтӥсьёс, калыклы Москвалы вожъяськон мылкыд пыӵатон интые, сэзьгес басьтӥськоно, дыр, асьсэлэн улосъёсазы улонэз умоятон борды, со понна утчано пӧртэм амалъёсты. Нош асьмеос огдышемъя нырулӥськом но луонлыкъёс интые мугъёс утчаськом. Тани Москваысь властьёс приватизациез но ас сяменызы ортчытӥзы. Заводъёсты, магазинъёсты, гостиницаосты но мукет ваньбурез "басьтӥ-вузай" амалэн узырмисьёслы дунтэм дунын ӧз вузалэ. Вузазы вылӥ дунъёсын но оскымон адямиослы, кудъёсыз асьсэлы но, городлы но пайда потто ини табере. Столицалэн но провинцилэн "сӥялэс" кусыпъёссы Россиын гинэ ӧвӧл. Тросаз азьмынӥсь странаосын но сыӵегес ик суред. Котькуд столица угось ас бордаз кыске самой ӟечсэ - коть ваньбурез, коть коньдонэз, коть адямиосты. Но со вожвылъяськон медам поты вал ӧрысьтыз, медаз шӧдӥськы страналэн улоназ, политикаяз кырыж-мерыж сюресэн, умойтэм вамышъёсын. Г.Корепанов. Огкылысь, мылысь-кыдысь Асьмеос котьку но шумпотыса учкиськом но кылзӥськом яратоно кырӟасьёсмес. Озьы ик витиськом выльёссэ, егитъёссэ артистъёсты. Туэ "Металлург" культура дворецын октябрь толэзьысен тодмо но тодмотэм артистъёсын концертъёс чакламын. Собере полуфинальной пумиськон но гала-концерт луыны кулэ. Та ужрадэз дасяло республикаысьтымы Культурая но Нациосын ужанъя министерствоос, юртто "Мылысь-кыдысь", "Хэерле кич" передачаос бордын ужасьёс. Эстрада кырӟяанъя фестиваль сярысь рос-просгес вера Николай Эскандеров, "Мылысь- кыдысь" передачалэн режиссёрез. - Николай Максимович, ма бордысен, кытысен потӥз фестивалез ортчытон сярысь малпанды? - "Мылысь-кыдысь" передачаез лэсьтыкум уггес тырмо вал эстрада кырӟанъёс. Соин ик мон артистъёсты ӧтьылыны кутски, соослэсь кырӟанъёссэс гожъялляй. Трос материал люканы быгатӥм 19-тӥ феврале, "Мылысь-кыдысьлэн" ӝытэз дыръя. Но со тырмыт ӧвӧл. Артистъёсын ужакум, соослэсь трос шуг-секытъёссэс адӟи. Кылсярысь, коньдонзы ӧвӧлэн, фестивальёсы потамзы уг луы. Асьме дорын, Удмуртиын, эстрада кырӟанъя фестивальёс уг ортчытъясько. Татарстанын, Коми республикаын, Мари Элын соос вань. Малы ми ортчытыны ум быгатӥське? Зэмзэ верано ке, асьмеос эстрадамылэсь макем тубатын луэмзэ но дунъяны ум быгатӥське, уката ик - огшоры учкись. Со сяна, нокыӵе луонлыкъёс ӧвӧл ӟуч, бигер но удмурт эстрадаез ӵошатыны - ужаськом пӧртэм сценаос вылын, пӧртэм учкисьёсмы. Ми ум тодӥське учкисьёсмес: арлы кӧня пол соос ветло бадӟым концертъёсы, нырысьсэ-а, кыкетӥзэ-а лыкто... Котьма ке но, таӵе трос калыко ужрадъёс, ӟеч югдытэм но ӟеч куараё кароно ке, одӥг группалы, одӥг кырӟасьлы туж дуно усё, кужымзы уг тырмы. Эстрадамес ӝутон понна, туж кулэ бадӟым праздникъёс, фестивальёс. Малпасько, умой аранжировкаен асьме эстрадамылэн но данэз кулэс уз луы. - Бадӟым ужрадъёс ортчытыку, спонсоръёс утчано луэ. Шедё-а юрттӥсьёс? - Тросэз уггес валало фестивальлэсь кулэлыксэ, но со вакытэ рекламалэсь пайда ваемзэ шӧдо. Туж шумпотыса вераме потэ: "Би-лайн" в Удмуртии" организацилэн кивалтӥсез, американец, туж ӝог соглаш луиз фестивальмылы юрттыны. Со учыр паймытӥз но. "Металлурглэн" администрациез аренда ласянь юрттоз, соин билетъёс кӧнялы ке дунтэмгес луозы. "Валм" фирмалэн кивалтӥсез оборудованиен быдэсак юрттоз. Югдытон луоз сомында, кудмында уг луы городысь самой золъёсаз дискотекаосын. "Республика" юридической агентство фестивалез ортчытыны кулэ луись документъёсты лэсьтӥз. Юрттӥсьёс вань. Но соос ичи на ай. Пӧртэм ласянь юрттэт кулэ луоз: чебер декорациослы стройматериал но, артистъёслы рос-прос премиос но... Фестиваль вылӥ ӟечлыко, чеберлыко мед луоз. - Та бадӟым ужрадэ жюри но нимысьтыз чакласькоды, дыр? - Бен. Но жюрие пырисьёслэсь нимзэс мынам али вераме уг поты ай. Соос луозы крезьгур но кырӟан удысысь профессионалъёс, лыктозы пӧртэм улосъёсысь. Али вераськиськом "Культура", ОРТ, РТР каналъёсысь ужасьёсын. Дас одӥг пумо номинациос чакламын, жюрилэн правоез луоз мукет номинациосты но усьтыны. Одно ик луоз учкисьёслэн премизы. Соос яратоно кырӟан но яратоно артист понна куаразэс сётыны быгатозы. - Ма чакламын на фестивале лыктэм учкисьёс понна? - Одӥг минут но тэк уз пуке. Трос пӧртэм конкурсъёс, сюрпризъёс луозы. Одно ик - лотерея, но призъёсыз огшорыесь ӧвӧл. Тужгес но зол ассэ возьматыны быгатӥсь учкисьёслы нимысьтыз кузьымъёс луозы. - Нош луысал-а таӵе ик фестиваль ортчытыны, шуом, удмуртъёс пӧлын гинэ? - Луысал, дыр, но чылкак удмурт фестиваль ортчытон понна спонсоръёсты шедьтыны дас пол секытгес. Удмуртъёс пӧлын ужбергатӥсьёс ӧжыт. Бен, "Удмурт коммерческой компания" милемлы котьку но юрттылӥз. Озьыен, ивортыны быгатӥськом: 20-тӥ ноябре ӟуч, бигер 21-тӥ ноябре удмурт эстрадаен тодматскон луоз "Металлург2 дворецын. Нош 10-тӥ, 11-тӥ но 12-тӥ декабре йылпумъян концертъёс луозы. Светлана ПЕТРОВА. Егитъёсын узыр театр Сарапулысь драмая туатре арлы быдэ сямен даслэсь уно егитъёсыз куто. Городысь гинэ ӧвӧл, ёросысь но лыкто татчы. Валамон, ваньмызлэсь уг пӧрмы йӧн-йӧн артист, но куд- огез, Свердловскысь театръя институтэз йылпумъяса, профессионал луо. Та вакытэ заочно дышетско Артур Казберов, Михаил Солодкин но Наталья Кисенко. Студие кутэм егитъёсты дышето кыл бордын ужаны, сцена вылын асьсэды возьыны, эктыны, кырӟаны, дӥськут бырйыны, шпагаен "жугиськыны". Та дышемзы юрттоз соослы В. Шекспирлэн пьесаезъя "Двенадцатая ночь" спектакльын шудыны. Та постановкае быдэс труппа пыриське, соос пӧлын - артистъёс Исай Афремов, Евгений Потапов, Галина Есырева, Любовь Кочурова. Нош валтӥсь ролез шудэ егит артистка Зинаида Лапина, со дышетскемын озьы ик татысь студиын но театръя институтын. Спектаклез пуктӥз режиссёр Юрий Синин. Таяз пятницае сое нырысьсэ адӟозы учкисьёс. Нылпиослы дасямын "Финист - ясный сокол" выжыкыл. Сое возьматозы "Театр - нылпиослы" фестиваль дыръя. Соку ик луозы артистъёсын пумиськонъёс, нылпи суредъёслы конкурс. Бадӟым классъёсын дышетскисьёс понна озьы ик возьматэмын луозы А. Островскийлэн, Н. Гогольлэн, В. Шекспирлэн пьесаоссыя спектакльёс. 19-тӥ шуркынмонэ театр пусъёз Удмуртиысь дано артистлэсь И. Афремовлэсь юбилейзэ. Выль арлы дасяны малпало туала вакытлы тупась спектакль, нылпиослы - выжыкыл, пӧртэм шулдыръяськонъёс. - Малпанъёсмы бадӟымесь, но коньдон уг тырмы, - ӝожтӥське туатрлэн директорез Т. Кулакова. В. ЛАГУНОВ. Арня ӵоже Ижевскысь 56 номеро гимназиысь ӧсъёс арня ӵоже вӧлак усьтэмын вал. Татын ужасьёс мукет школаосысь лыктэмъёс азьын тодон-валанзэс возьматӥзы, семинаръёс, "котырес ӝӧк" сьӧрын вераськонъёс ортчытъязы. Дышетӥсьёс тодматскизы гимназиысь суреданъя мастерскоен, калык инструментъёсъя оркестрен, "Сударушка" фольклор ансамблен. Пусйыны но данъяськыны кулэ, шаерысьтымы та школа-гимназиез синйылтӥзы ни Россиысь мукет городъёсысь дышетон удысын ужась кивалтӥсьёс но. В. ПЕТРОВА. Азьвыл вице-премьер - Ижысь автозаводын Толэзьлэн кутсконаз Россилэн азьвыл Правительствоезлэн Тӧроезлэн нырысетӥ воштӥсез Юрий Маслюков Ижысь автозаводэ вуылӥз. Инженер луыса ужан сюресэз солэн ӵапак та предприятиысен кутскиз. Собере валтӥсь инженерозь будӥз. - Татчы вуыса мон нош ик егитоми кадь, кыӵе вал 40 ар талэсь азьло, - шуныт кылъёсын вазиськиз азьвыл вице-премьер люкаськем калыклы. Ю. Д. Маслюков удмурт "Москвич" кылдытонын нырысьёсыз пӧлын вал. Нош али гажаса тодматскиз машинаез выльдон амалъёсын. Москваын ужаса но со тунсыкъяське заводлэн азинскемъёсыныз, шуг-секытъёсыныз, быгатэмезъя юрттыны тырше. Л. КНЯЗЕВА. Инкуазез чакламлы но - лицензия 90-тӥ аръёсы Россиын пичи ужбергатон азинскемен, солэсь ужзэ радъян но эскерон вылысь, лицензиос сётъяны кутскемын. Со дырысен та амал пӧртэм удысъёсы вӧлме. Тужгес но бер, 1997-тӥ арын феврале, инкуазез утисьёс но лицензия басьтӥзы. Удмурт Республикаысь Инкуазез утёнъя комитетысь валтӥсь специалист Габдулхак ЗИНАТУЛИН ивортэ комитетлэн кык ар ӵоже та удысын тыршемез сярысь. - Маин пӧртэм инкуазез утён удысын ужаны лэзён мукет азьын лицензия сётъянлэсь? - Лицензиос сётон - кыӵе ке уж нуыны лэзем сярысь документ. Татын вераськон мынэ предприятилэн яке организацилэн ужез пумысен, кудӥз инкуазьлы кышкытлык вайыны быгатоз. Басьтом тани Ижевскысь механической заводын кухнялы "Югдон" комбайн поттонэз. Комбайнэз лэсьтыку, кылем-мылемъёс трос люкасько. Соосты кытчы ке интыяно, нуллоно луэ. Та ужен вырон понна лицензия кулэ. Ужаны лэзён документ басьтонлэн но аспӧртэмлыкез вань. Шуом, кылем-мылемъёсын вырон понна, предприятилы документаз валэктоно, кызьы соос кылдӥзы. Шонерзэ вераса, продукция поттонлэсь технологизэ возьматоно. Инкуазез утён ласянь ужлэсь кулэлыксэ возьматон сое луэ. Сыӵе документ кун ласянь эскеремез ортче: ужлы дунъет сётӥське, котырысь улослы кышкытлык лэсьтон чаклаське. Сыӵе документ сётӥське куинь арлы. Со дыр ӵоже одӥг пол ми эскериськом лицензиын верам югдурлэсь быдэсъяськемзэ. - Инкуазез утён удысысь кыӵе ужъёсты быдэсъян понна басьтыны кулэ лицензия? - Россия Федерациысь Правительствоен пусъемын 22 пӧртэм удыс. Нырысь ик ми ужаськом котырысь улослы тужгес но кышкыт луисьёсыныз. "Инкуазез утёнъя тӥрлык поттонэз радъян но уже кутон, производство но транспорт ласянь кышкытлыкез чаклан ужпумез" 011 кодэн пусйим. Асьме бадӟым городмы понна котырысь инкуазез автотранспортлэн кырсь омыреныз согон нырысетӥ интые потыны быгатоз. Кылем арын Ижевскысь омырез транспортлэн кырсёмытэмез, огъя мукетъёсыз пӧлысь, 63 процент луиз. Вань на мукетъёсыз но удысъёс, кудъёсыныз ум выриське. Тани Удмуртиысь тодосчиос выль эстӥськон - газохол - кылдытон бордын ужало. Азьланяз ми но сыӵе удыслы лицензия сётон борды басьтӥськом. - Кыӵе удыс понна тужгес но трос лицензиос сётӥды? - 1997-тӥ арын Удмурт Правительство автомашиналэн сурымезлы талон сётон сярысь постановление кутӥз. Со постановлениея 157 лицензия сётэмын. Соин сэрен организациос инкуазез утёнъя тӥрлыкъёс басьтоно но соосын ужаны быгатӥсь адямиосты дасяно луизы. - Вералэ инкуазез утён удысын сертификат сётъян сярысь. - Быдэс 1998-тӥ ар ӵоже инкуазез эскеронъя отдел сертификат сётон сярысь документ лэсьтонъя уж нуиз. Ужасьёсмы та удысъя тодон-валанзэс будэтӥзы но инкуазез утёнъя аудиторъёс луизы. Та дыре ми Удмурт Республикалэн улосвылаз инкуазез утёнъя сертификат сётон сярысь федеральной системаез радъян ужпумен выриськом. Таӵе ужез быдэсъяны быгатэ кулэ документъёс дасясь орган гинэ. Инкуазез утёнъя сертификат сётон сярысь уж нуиське кӧня ке бадӟым городъёсын - Москваын, Санкт-Петербургын - но асьмелэн бускельёсмы дорын - Пермь областьын но Татарстанын. Малпаськом, арлэн пумаз инкуазез утёнъя нырысьёссэ сертификатъёсты сётъяны кутском. Вераськиз Н. ЩЕГОЛЕВА. Коньдон тӧлъя-буръя тӧлӟе Кировын но улосысь ваньмаз ик ёросъёсын кылем арняе туж аспӧртэм ужрад ортчиз. Учкисьёс пӧлын кичӧлтон вӧлмытэмын вал: ОРТ каналын Сергей Доренко кырсь кылъёс кисьтон вакытэ телевизоръёсты кысоно. Та акцилы дурбасьтӥсьёслэн малпамзыя, калыкен тырем вытъёс чотын улӥсь кун канал - ОРТ - гажано адямиосты, быръёнъя огазеяськонлэсь кивалтӥсьёссэ сьӧдма. Ӵапак та огазеяськонлэсь Кремльысь администрация туж юн кышка. Ужаса улӥсьёслы ӵектэмын вал на передача мынон вакытэ телевизорен ӵош квартираысь тылэз но ӝыны минутлы кысыны. Озьы адӟиськоз, "телекиллерлы" но солэн кузёосызлы дурбасьтӥсьёс трос-а. Вераны луэ, данакез кичӧлтонэз умоен лыдъязы - унояз квартираосын пусъем дыре тыл кысӥз. Но берлогес шараяськиз, тросэз телевизоръёссэс кысӥллямтэ, мукет каналъёёсы гинэ выжиллям. Нош Доренколэн программаез бырон азьын нош ик ОРТ-ез ӝуатӥллям но туж тунсыко суредэз адӟиллям - Доренко вадьсын быръёнъя Центральной комиссилэн кивалтӥсез Вешняков пуке но "Березовскийлэн вераськись юлтошезлы" валэктэ, малы ЦИК Иворъёсъя министерствое вазиськиз, ОРТ телекомпаниез но солэсь кивалтӥсьёссэ кыл кутон улэ кыскыны курыса. Шонерзэ вераса, Доренко шоры учкыны ик жаль вал. Солы, мӧйыослэсь кылзӥськисьтэм пичи пияшлы сямен, валэктӥзы угось, кин со сыӵе законэз дунъясь гражданин но зэмлыкъя ужась журналист. Ма гинэ ӧз даурты Доренко, Вешняковез могӟытыны, куараеныз зӥбыны выриз. Но туж оскымон вераськиз Вешняков - "законъя уг луы", "тазьы уг яра" но мукет. Огкылын вераса, акция пӧрмиз, бускельёсмы верало, ми, пе, ОРТ-ын кыл вӧлдӥсьёслэсь уно коньдонзэс тӧлъя-буръя лэзьыны быгатӥм. Кин тодэ, оло, зэмзэ но, озьы? С. Михайлов. Вал ук, вал сыӵе нунал... "7-тӥ ноябрь. Мар нунал со?" Таӵе юанэн вазиськи тодмо но тодмотэм адямиослы. соос пӧртэм мылкыдъёссэс веразы. И.Гришкина, 30 арес, эмъясь: - Мон понна 7-тӥ ноябрь, шутэтскон нунал сяна, номыр ӧвӧл ни. К.Волкова, 46 арес, диспетчер: - Мӧзмыса тодам ваисько со праздникез. Неужто ми улон дыръя даурын вал сыӵе революция, кудӥныз сокем зол данъяськылӥм, нош собере озьы ик зол саптамы? В.Кожевников, 21 арес, 5-тӥ курсысь студент: - Кык праздникъёсты сяна уг гажаськы: вордскем нуналэз но Выль арез. Нош мар вал 7-тӥ ноябре, тодэме ик уг поты. М.Заречнева, 22 арес, ужтэк кылем мурт: - Куке-соку та нуналэ монэ пионере кутӥзы. Со вал туж вазь ӵукна, нюлэскын, тылскем котырын. Вожатоймы Ленин но большевикъёс сярысь мадиз. Кыӵе шумпотӥ горд галстукелы! Но со нуналэ ик огаз урокын дышетӥсь (нимзэ вераме уг поты) мынэсьтым но эшъёсылэсь галстукъёсмес адӟыса шуиз: "А тӥ тодӥськоды-а, кыӵе урод адями вал Ленин?" Соку мон нырысьсэ сыӵе кылъёсты кылӥ. Мон понна со шуккет вал. Со дырысен дышетӥсьме гажамысь дугдӥ. Нош Ленинэз али но бадӟым адямиен лыдъясько, революция сярысь троссэ умойзэ но, уродзэ но тодӥсько ке но. Пӧртэм адямиос, пӧртэм малпанъёс. Таизлэсь нылашлэсь верамзэ кылзыса малпай: тӥни озьы шукке странамылэн шонаськемез егит адямиосты. Оскисько, кӧня ке дыр ортчыса, асьмелэн ортчем сюресмылы шонер дунъет сётэмын луоз. Нош сое али но азьло аръёсы сямен ик огласянь гинэ дунъяло, дунъяло. дунъяло озьы, кызьы кулэ валтӥсь партилы яке властьлы. Мар бен вал 1917-тӥ арын 7-тӥ (25-тӥ октябре) ноябре? Петроград, "Аврора", Смольный, - таӵе кылъёсын Россиын кутскиз революция - социализме выжон сюрес. Нош ӵуказеяз 25-тӥ октябре 10 часын властез кияз кутӥз Петроград Советлэн военно-революционной комитетэз. 26-тӥ октябре басьтэмын вал Зимний дворец, буржуазной правительстволэн адямиосыз кивалтонлэсь палэнтэмын. Озьы куинь нунал ӵоже Ленинлэн кивалтэмез улсын Россиын ортчиз социалистической революция. Озьы ик гожъямын вал историяя учебникъёсын. Озьы дышетылӥзы асьмеды. Нош кин со сыӵе, шуом, Керенский? Со сярысь тазьы гинэ тодӥськомы вал ук: Зимний дворецысь, пе, со нылкышно дэремен дӥсяськыса пегӟиз. Солэсь улэмзэ но кин луэмзэ асьмелы ӧз шараяллялэ. Александр Федорович Керенский Россилэн огез визьмо пиез вылэм шуыса али гинэ гожъяны кутскизы. Владимир Ульянов сямен ик со вордӥськем Симбирск городын. Та кык адямиослэн улонзы бӧрысь ялан кызьы ке но герӟаськыса мынӥз. Володя Ульянов дышетскем со гимназиын, кытын директор луыса ужам Керенскийлэн бубиз. Бӧрысь со ик утем визьмо дышетскисез Владимир Ульяновез гимназиысь уллямлэсь, куке солэн агаез Александр Ульянов эксэйлэн улонэз вылэ урдскиз... Александр Керенский луиз тодмо адвокат, трос пол утьылӥз огшоры адямиосты пытсэт улэ сюронлэсь. Бӧрысь вал Государственной Думалэн депутатэз. Юн курлалляз эксэй властез. А.Керенский бӧрысьгес луиз юстицияя министр, нош 1917-тӥ арын Временной правительствоен кивалтыны ӧдъяз. Быдӟым Октябрь та кык адямиослэсь сюрессэс люкиз. Соослэсь гинэ-а бен? Кӧня адямиослэсь улонзэс со чутрак мукет пала воштӥз. Али но куд-ог партиос ог-огзылэсь уг-а меда висъясько ортчем революция шоры учконъёссыя? Котькызьы луэ, вылды, туннэ учкыны азьлоез шоры. Но вал ук, вал асьме историын со нунал. Соин ӵош - ӟечез но уродэз. Ойдолэ али ум утчалэ ни тушмонъёсыз. Та вакытэ котьмалэсь кулэез - ог-огдэ валаны тыршон. Юнме шорысь шат та нунал выль сямен нимамын - Тупан но ӵош улон нунал. Т.Банникова. ЖУРНАЛИСТЪЁСЫН ПУМИСЬКОНЪЁС Калык архиве вазиське Алигес журналистъёсын пумиськылӥз Правительствоысь Архивъёсын ужанъя комитетлэн тӧроез Надежда КОРОБЕЙНИКОВА. Люкаськемъёс солы трос юанъёс сётъязы. Улон воштӥськемъя, архивъёс азе но бадӟымесь куронъёс султо. Кун архивын али кык миллион ёрос документъёс возисько. Со сяна, пӧртэм удысъёсын, предприятиосын, организациосын эшшо 4 миллион вань на. Трос документъёс ыштэмын калыклы бытовой юрттэт сётон но вузкарон удысъёсын. Та удысъёсты быдтыку-вузаку архивын ужасьёс 100 сюрс документъёс кутыны быгатӥзы на. Миым 70 сюрс адями пӧртэм куронъёсын архивъёсы вазиськиз. Али уго ваньмыз сямен документъёс шарае поттэмын ни. Архивын ужасьёс трос эскеронъёс ортчытъяло. Туэ соос ужазы ни судъёсын, калыкез дышетон, ивор вӧлмытӥсь удысъёсын но мукет интыосын. Бадӟым уж ортчытэмын наукая- техникая документъёсты утён пумысен. Со понна чакламын промышленной предприятиосысь конструктор бюроос, научно-исследовательской институтъёс но лабораториос. Ноябре та ужпумез учкозы комитетлэн коллегияз. Вераны кулэ, архивъёслэн ужан условиоссы уродэсь на. Удмуртской урамысь Центральной архивлэн юртэз куашканы кутскем (мултэс секталаен-а, мар-а). Со вӧзы 9 этажен ватсаса юрт пуктонъя проект 10 ар кылле ни. Соин ик Правительство туэ 15 апреле Комитетлы Камбарской ульчае выль инты сётӥз, Удмуртской урамысез сярысь 3 поллы бадӟым. Берло вужзэ тупатъяно луоз. Архивъёслы умоесь ужан условиос кылдытэмын Сарапул, Можга, Глазов городъёсын, Як.- Бодья, Сарапул, Глазов районъёсын. Та ласянь ушъяськыны уг быгато Ижевск город, Каракулино, Кизнер, Красногорск, Камбарка районъёс. Татысь архивъёс урод интыосын ужало. Озьы ик шуыны луоз Ижысь медакадемия, кожно-венерической но туберкулёзной диспансеръёс сярысь. Документъёссэс урод возё "Удмуртнефть", "Ижмаш", "Ижлесмаш" но музонэз. Татын уноез утиськоно кагазъёссы йылаз-пумаз вуттымтэ, та уже коньдон уг висъяло. Архивъёслэн ужазы сюлэмшугъяськытӥсез трос на. Кылдытоно вылэм архивъёсъя страховой фонд. Со юрттысал юн дуно бумагаосты уката ӟечгес утьыны. Уг тырмы туала техника - компьютеръёс но микроплёнка. Асьмеос та ласянь туж бере кылиськом, уката ик азинскем странаослэсь. Архивъёс Венгриен тупанкыл кутӥзы ни. Та ласянь вераськонъёс мыно Финляндиен. Со юрттоз асьме архивъёслэсь ужзэс умоятыны. Туэ архивын тыршисьёс Кун Думае парламент кылзӥськонъёсы ветлӥзы. Соос озьы ик пырисько научно-практической конференциосы. Вуоно арын комитет чакла гурт хозяйствоя но коньдон ужпумъёсъя удысъёсты эскерыны. Г.Романов. (1) <Ц:\Общая папка\Удмурт дунне\Калык архиве вазиське.wри> 16.10.99 1:24 Цлов: 315 Цимволов: 2185 Республикаямы улӥсьёс, предприятиослэн но огазеяськонъёслэн кивалтӥсьёссы! Удмурт Республикаысь Граждан обороная но кышкыт учыръёслэсь утиськонъя комитет вазиське тӥледлы, Чечняын ожъёсын йырин курадӟись дагестан калыклы юрттыны курыса. Ми оскиськом, тӥ та секыт вакытэ югдурез валаны тыршоды но быгатэмдыя асьме калыклы юрттоды шуыса. Дорзэс кельтэм адямиос пыдйылчиос интые кылемын, ёрмоно луо. Соос туж кулэясько сиён-юонлы, шуныт дӥсьлы, медтехникалы, коньдонлы, щитъёслэсь коркаослы, андан прокатлы. Юрттэт сётыны быгатоды таӵе счётъя: р/с 40 603 810 408 362 000 026 "Евразия" ОАО-лэн Октябрьской филиалаз. БИК 049 401 836 к/с 30 101 810 000 000 000 836. Гуманитарной юрттэт люканы луоз предприятиосысь складъёсы. Калыклэсь юрттэт (шуныт дӥсь) бичало Ижысь Устинов ёросысь "Семья" центрын (Молодёжной урам, 34 номеро юрт, телефонъёс: 30-62-28, 30-59-89); Ленин ёросысь "Семья" центрын (Клубной урам, 33 номеро юрт, телефонъёс: 71-13-85, 71-33-47); Первомай ёросысь "Семья" центрын (Пушкинской урам, 157 номеро юрт, телефонъёс: 52-29-73, 52-28-98). "Юж-Пургалы" йӧлзы пайда вае Пичи-Пурга ёросысь "Юж-Пурга" эштосын туэ ю тысь ваньзэ-ӧвӧлзэ 1671 тонна люказы. Миым 1037 гинэ вал. Хозяйство пунэм тыронъёссэ юэн берыктӥз. Со понна 425 тонна висъямын вал. 1998-тӥ арын йӧл поттонын ыштонъёс басьтыса ужазы, туэ ке, йӧлзэс вузаса, 30 процент пайда потто. Та вакытэ скаллы быдэ, шорлыдын вераса, 2300 литр йӧл кыско. А. Андриянов. Кусыпъёсты юнматоно Удмурт Республикаысь Правительстволэн Тӧроез Николай Ганза пумиськылӥз Калык куспо огазеяськонлэн исполкомезлэн вань бигеръёслэн конгрессылэн тӧроеныз Индус Тагировен. Со пыриськиз "Удмуртиысь татаръёс" научно-практической конференцилэн ужаз. Лыктэм куно мадиз Татарстанын улӥсь удмуртъёслэсь но поръёслэсь культуразэс, кылзэс азинтонлы бадӟым саклык висъямзы сярысь. Ас малпанъёссэ вераз бускель республикаосын улӥсь калыкъёс куспын национально-культурной огазеяськонъёс кылдытон пумысен. Туэ Татарстан но Удмуртия куспын тупанкыл гожтыны чакламын. Солэн инъетэныз люкаськемъёсты тодматӥз Николай Ганза. Удмурт Республикаысь Правительстволэн Тӧроезлэн пресс-службаез. Лёгем сюресэз уз кыль пытьытэк Ӝыны даурлэсь ятыр пыӵал тӥрлык поттонын тырше ни асьмелэн синмаськымон конструктормы Михаил Тимофеевич Калашников. Алтай музъем вылын вордскем-будэм пияш удмурт шаерын данэ потӥз. АК-47 автомат но со вылын кылдытэм ог сю пумо пыӵал тӥрлык дуннеын самой трос вӧлмемын. Сое адӟоно Бейрутысь но Иранысь луоё пустыняосын, Эль- Сальвадорлэн джунглиосысьтыз но Афганистанысь гурезьёсын. Пыӵал тӥрлык - со трактор но комбайн ӧвӧл, кизён агрегат но геры ӧвӧл. Соин музъемез уд гыры, нянь но уд будэты. Но сотэк Атай музъемдэ, Родинадэ, калыктэ тушмонлэсь уд утьы. Бен, асьме дано землякмылэн ужъёсыз быдэс дуннелы тодмо. Калашниковлэн автоматэз огласянь огшоры, мукет ласянь туж оскымон арбери. Солы вылӥ дунъет сёто афган оже пыриськемъёс но. Валерий Алехин, афган ожысь ветеранъёслэн кенешсылэн тӧроез: - Ожмаськи мон 84-тӥ-86-тӥ аръёсы Джелалабад городын бронемашиналэн водителез луыса. Котькуд солдатлэн кияз АК-47 автоматэз вал. Йыре малпан но ӧз лыктылы, куке- соку та кужмо арбери секыт югдуре вуттоз шуыса. Кылэме ӧвӧл тушмонэн ваче вуыку, со кыӵе ке муген шуак "гуньдӥз" шуыса верамзэс. Зэм, огпол сыӵе юмоке ӧжыт гинэ ӧм сюре. Ми вылэ моджахедъёс омырскизы. Чигнакумы пазьгиським пичи группаослы. Эшеным ӝабыръяськиськом меӵ гурезе. Одӥгаз вырйылэ тубыку солэн автоматэз, йылсо из борды шедьыса, киысьтыз палдӥз. Кема питыраз корт пыӵал, одӥг из бордысь мукетаз шуккиськылыса. Вот тӥни соку улэп кылёнлы оскон пыд улысь вольтчиз. Сьӧрамы уго лякиськем кадь ог дасо душманъёс уисько. Эше куажгам тӥрлыкезлы лэзиськиз. Сюлэм чигыса, поннам соин люкиськи, автоматме юнгес кырми. Быроно ке, тушмонэн ваче син кылё, малпай, унозэгес сопал дуннее келяло. Малпамтэ шорысь улӥысь тачыртэм кылӥськиз. Куараезъя - эшелэн автоматэз. "Сӧсырмем" пыӵал кузёзэ ӧз кушты - быронлэсь утиз. Соин ӵош, дыр, ачим но улэп кыли. Александр Лепешкин, Ижысь 85 номеро школаысь военрук: - Мон десантник вал, ожмаськи Кабул вӧзын. Автомат туж оскымон, кӧльы кадь, из кадь юн. Вал учыръёс, луоен но согиськылӥз, сэзъялтӥськод но нош азьлань. Пӧсь куазен лек ожын ӟырда, киез сутэ, шуре-вуэ куштӥськод, самовар кадь пышкетэ. Выльысь сэзъялтӥськод но нош ыбылӥськиськод. Ма, ма веранэз ини "калашник" сярысь. Ляб арбери ке луысал, быдэс дуннее ӧз вӧлмысал. Тушмон адямиосмы но киязы таӵе автоматэн ожмаськизы, зэм, уногес Китайын лэсьтэменыз. Ӧжытэз моджахедъёс синмаськылӥзы Америкаысь винтовкаослы, автоматъёслы. 82-тӥ арын М. Т. Калашниковез ӧтчай Ижысь 61-тӥ школае (соку отын ужасько вал). Пиналъёс туж паймыса кылзӥзы дано конструкторлэсь верамзэ, ма бордын ужамзэ- тыршемзэ. Ож пыр потэм сюресэ сярысь мон но мади: Михаил Тимофеевич туж сак кылзӥз автоматэз сярысь верамме. Калашников нимез поттылыса, дуннелэн пӧртэм сэрегъёсаз валало, ма сярысь вераськон мынэ. Бен, автомат сярысь, ожмаськон тӥрлык сярысь. Но Михаил Тимофеевичлэн трос мукет пусйымон ужъёсыз но. Ойдолэ пыралом Ижысь пӧйшурасьёслэн магазиназы. Син шоры соку ик йӧтозы радэн-радэн интыям пыӵалъёс, карабинъёс, винтовкаос. Паймытэ соиз: ог 35 пумо пыӵал тӥрлык пӧлысь ӝыныез герӟаськемын Калашниковлэн нимыныз. Татчы пырасьёс тужгес тунсыкъясько "Сайга" карабинэн. Пӧртэм адямиослы со чакламын: кылсярысь, кузь гумыенэз пӧйшурасьёслы, вакчи гумыен но октӥськись прикладэнэз (нуллыны-утялтыны лякыт), фермеръёслы, пудо возьмасьёслы но мукет. Константин Соловьев вузкарисьлэн верамезъя, 27-28 пумоез татысь пыӵал тӥрлык "Ижмашын" но механической заводын дасямын, солы синмасько, басьтыны Россилэн пӧртэм улосвылъёсысьтыз ветло. Пыӵал тӥрлыкез адӟыса, амалтэк юан но кылдэ, кышкыт ӧвӧл-а туала, огыр-бугыр вакытэ, сое котырак сётъяны. Константин валэктӥз, тырмыт уксёед ке но луиз, пыӵалэз озьы гинэ уд басьты, тазалыкед сярысь пӧртэм справкаос дасяно, собере милициысь лицензиед, пе, мед луоз. Бен, пыӵал шудон ӧвӧл, огпол, со ас кожаз но ыбе, шуо. Берло аръёсы Калашниковлэн нимыз эшшо одӥг арбери борды лякиськиз. Со тылпу кысонъя аппарат (установка импульсного пожаротушения). Тае лэсьтыны Ижысь конструкторъёслы заказ вуиз 1998-тӥ арын июль толэзьлэн пумаз Москваысь. Ар ортчыса, нырысетӥ эскеронъёс ортчизы ни. Та ужрадэ но мукетъёсаз мылысь-кыдысь пыриськиз тылпу кысонъя 8-тӥ частьысь кивалтӥсьлэн воштӥсез А. В. Корнилов. Солэн но эшъёсызлэн ӵектэмзыя, конструкторъёс выль аппаратэз ялан волятӥзы, ӟечгес, умойгес каризы. - Нырысьсэ адӟыкумы ик кельшиз аппарат, - вера Алексей Владимирович. - Пичи тылпуэз кысонын со туж кемлы. Малпалэ ай асьтэос. Шуом, кытын ке 15-тӥ-16-тӥ этажын мебельзы гомӟиз. Сое кысон вылысь кузь шлангъёс кысконо, кема дыр ортче, собере кулэ азяз но, кулэтэм интыяз но уно кубометр ву пазяське. Нош самой уродэз та югдурын - улӥысь квартираос вуэн котмо. Ӵемысь озьы луэ, тылпулэсь сярысь тросгес ваньбур изъянме вулэсь. Соин ик Москваысь тылпуэн нюръяськисьёс, городлэн мэрез Юрий Лужков, вуэн ыбылӥськись "автоматэз" адӟыса, солы синмаськизы. Германиын лэсьтэм та выллем аппаратлэсь асьмелэнэз трос поллы дунтэм. Соиз пачкатэм омырен ыбылэ, Ижевскысез - порох газлэн кужыменыз. Озьы баллонысь омыр шыръяське, сое ӵынлэсь-сурымлэсь утись маскае кутыны луэ. Умоез со бордын но: тылпуэз ӝог вормем сяна, аппарат адямилы кышкыт ӧвӧл, тупатэмын-лэсьтэмын озьы, патронэн турттӥд ке но, уз ыбылы. Таяз ужрадэ Михаил Тимофеевич ачиз меӵак ӧз пыриськы. Солэн АК-103 автоматэзлэн инъетэз вылын тылпу кысӥсьёслы аппарат кылдытӥз кибашлы конструкторлэн сыӵе ик кибашлы пиез. Озьыен, Калашниковлэн мытэм ужез азьланьске. Г. ЮСАЕВ. Удмурт Элькунысь му вӧй продуктъёсты поттон, возён, келян, уже кутон но вузан удысын тыршись предприятиосын экологиен герӟаськем но техногенной кышкытлыкез палэнтонъя ужрадъёс сярысь Удмурт Элькунысь Правительстволэн Постановлениез Котырысьтымы инкуазьлэсь му вӧй продуктъёсын кырсёмемзэ лыдэ басьтыса, "Калыкез но улосвылэз техногенной но инкуазен герӟаськем кышкыт учыръёслэсь утён сярысь" Федеральной законэз, Россия Федерациысь Кивалтэтлэсь 1996-тӥ арын 10-тӥ ноябре кутэм "Инкуазен герӟаськем но техногенной кышкытлыкез палэнтыны кулэ луись ваньбур дасянъя но сое кутонъя радлык сярысь" 1340 номеро постановленизэ быдэсъяса, Удмурт Элькун Кивалтэт пуктэ: 1. Му вӧй продуктъёслэн котырысь инкуазе шедемзылэсь утиськон вылысь, му вӧй продуктъёсты поттон, возён, келян, уже кутон но вузан удысын тыршись предприятиослы но организациослы, кинлэн асваньбур луэмзы шоры учкытэк, асьсэлэн объектъёсазы, шуге-леке шедьыку, му вӧез пушказы кыскись материалъёс (сорбентъёс) дасяса возёно. 2. Му вӧй продуктъёсты поттон, возён, келян, уже кутон но вузан объектъёсын "Сорбойл" выллем сорбентъёсты возёнъя "Удмуртгражданпроект" институтэн дасям огдырлы чаклам нормаос юнматоно. 3. Та постановленилэсь быдэсъяськемзэ эскерыса возёз Удмурт Элькун Кивалтэтысь Граждан обороная но кышкыт учыръёслэсь утиськонъя комитет. 4. Та постановлениез печатлано иворъёсты вӧлмытон ёзъёсын. Удмурт Элькун Кивалтэтлэн Тӧроезлэн воштӥсез Н. И. Хохлов. Ижевск город, 1999-тӥ арын 11-тӥ октябре. � 989. ИНМАРЛЫ ОСКИСЬЁСЛЫ Улон кулэм бере уг быры Адямиос туж тросэз уг тодо, мар со сыӵе кулон. Малпало, кин ке кулэ ке, со понна улон быре. Но со озьы ӧвӧл. Библиын гожтэмын, котькудмы асьмеос кулон часмы сярысь малпаса улыны, сьӧлык лэсьтэммы понна ӧпкельыны кулэ. Нош кулонлэсь кышкаса улӥм ке, асьмелэн лулмы Инмарлэсь люкиськоз но пырак адэ кошкоз. Адями валаса улыны кулэ, кинлы со оске лулзэ: Инмарлы яке шайтанлы, сётоз сое кулэмез бере. Христослы оскись муртлэн лулыз, инбаме тубыку, трос курадӟонъёс пыр потоно луэ. Сое отын бесъёс пумитало, сьӧлыкъёссэ тодаз вайытыса курадӟыто. Утись (ангел- хранитель) дурбасьтыны выре, адямилэсь ӟеч ужъёссэ, сьӧлыкез понна ӧпкельемзэ, вӧсяськемзэ, черке ветлэмъёссэ, адямиослы юрттэмзэ вера. Кулэм бӧрсьы куинь нунал лул музъем вылын ик, асьме пӧлын улэ на. Со ваньзэ кылэ, адӟе, азьвыл ветлэм интыосаз вуылэ. Куинетӥ уяз лул курадӟонъёс пыр инэ ӝутӥське. Нырысетӥез курадӟон - супыльтылэмъёсыз, кыл вӧлдэмез понна кыл кутон. Со сяна, курадӟыто лек, оскисьтэм, вожъяськись, пӧяськись, азьтэм, анай-атайзэ гажамтэ, адями вием, вӧсяськымтэ но трос мукет сьӧлыкъёс понна - ваньмыз кызь курадӟон. Улыкуз ӧпкельымтэ та сьӧлыкъёсыз понна адямиез бесъёс жугыса Сатана доры улляло. Тужгес но ӵем лул курадӟе калгем понна (али сое малы ке сьӧлык шуыса вунэто). Меӵак адэ сюро ведӥнъёс, лушкаськисьёс, юисьёс, асьсэды быдтӥсьёс. Сыӵеосты Черк отпевать но уг кары, поминать карыны но уг лэзьы. Нош адями ассэ умой возиз, Инмарлэсь куронъёссэ быдэсъяз, вӧсяськылӥз ке, Утисез сое инбаме тубтоз - Инмар солы пыраклы улон кузьмалоз. Кулэм муртлэн лулыз понна вӧсяськыны кулэ ӵыжы-выжыосыз, малы ке шуоно, солэн аслаз мугорыз ӧвӧл ни, соин ик вӧсяськыны, сьӧлыкъёсыз понна ӧпкельыны уг быгаты. Укмысэтӥ уёзь лулэз (вань курадӟонъёсты ортчыны быгатӥз ке), Ин цартсовен тодмато, святойёсты возьмато. Укмысэтӥысен ньыльдонэтӥ уёзь адэтӥ нулло, сьӧлыко муртъёслэсь курадӟемзэс возьмато. Ньыльдонэтӥ уе лулэз нош ик Инмар доры тубто. Соку ини Инмар вера, кытчы кошкоз лул: рае яке адэ. Соин ик кулэм муртлэн ӵыжы-выжыосыз куинетӥ, укмысэтӥ но ньыльдонэтӥ уяз поминать карыны кулэ. Кулэмъёслэн лулъёссы асьме пӧлтӥ уг ветло ни, но Инбаме сюремъёс адӟо асьмеды, улэпъёс понна вӧсясько. Адэ сюремъёс, асьме сярысь номыр но уг тодо, тыл вылын пыжо. - Сояз дуннее кошкыны дасяськись ӵыжы-выжыды Инмар доры мед сюроз шуыса, тырше дораз священникез ӧтьыны, мед вуттоз со сьӧлыкъёсыз понна ӧпкельыны, лулзэ чылкытатыны. Со юрттоз луллы курадӟонъёс пыр каньылгес потыны. Со сяна, кулэм мурт понна нуналлы быдэ Псалтырь лыдӟоно, арня нуналъёсы Черкын поминать кароно. Молитватэк пуктэм сюсьтыллэн кужымез ӧвӧл, соин ик молитваез ӟеч тодыны кулэ, солэсь пуштроссэ валано. Одӥгмы но асьмеос кулытэк ум кыле. Дырыз вуиз ке, кулон уз но юа, уз но вера, вуоз. Соин ик со дырлы азьло ик дасяськоно - сьӧлыкатэк улыны тыршоно, лулэз чылкытатоно, соку Кулон кышкыт уз поты, Утисьты тӥ понна Инмар азьын дурбасьтыны быгатоз. Константино-Еленинской храмысь Иерей Роман. Ӟечкылан! Шаркан районысь Богданово гуртысь Зинаида Васильевна Караваева 11-тӥ ноябре вордӥськем нуналзэ пусъе. Мусо бабаме праздникеныз ӟечкыласа тазалык но кема-кема улон, пачыл шуд но шумпотон сӥзисько. Света внучкаед. Бен, туж ик шулдыр мылкыдын ӧз пумиталэ Октябрь праздникез Ижевскысь дышетӥсьёс но калыклэсь тазалыксэ утисьёс. Витетӥ ноябре соос городысь мэрилэн юртэз азьын пумитъяськон ужрад ортчытӥзы. Мугез валамон: соос берыктыны куро уждун понна пунэмъёссэс, нылпиослы висъяны пособиос. Кылсярысь, куд-ог школаосын уждунзы басьтэмын ӧвӧл ни май толэзь понна. Азьпалан Россия Федерациысь Кун Думае быръёнъёс. Нош кыӵе мылкыдын меда мыноз отчы сютэм дышетӥсь но врач? Кивалтӥсьёс оскытӥзы, матысь дыре коньдонзы берыктэмын луоз шуыса. Шуг оскыны солы. Радъяськоз ик-а меда Россей музъем выламы улон-вылонмы? Потомы ик-а меда куке-соку та вуберганысь? Ӧйтӧд, ӧйтӧд... * Оскон ӧвӧл ни нокинлы. В. КАМАШЕВЛЭН туспуктэмъёсыз. "ПРЕССА-2000" Буёлэз - яркытгес, лыдӟисез - ӧжытгес Октябрьлэн пумаз Москваысь Всероссийской выставочной центрын (ВДНХ-ын) ортчиз газетъёслы но журналъёслы сӥзем "Пресса-2000" адӟытон. Отын ас ужъёссэс возьматӥзы Россиысь но СНГ-е пырись странаосысь полиграфияя комбинатъёс но редакциос. Журналистъёс пыриськизы пресс-ассамблеялэн кенешонъёсаз, ужазы "котырес ӝӧк" сьӧрын, секциосъя люкиськыса, вуылӥзы центральной изданиослэн редакциосазы. Огъя вераса, выставка-ярмаркалэн программаез котыр ласянь узыр вал. Кызьы пусйиз Россиысь журналистъёслэн союззылэн кивалтӥсез В.Л.Богданов, Москваын радъям адӟытон азинтӥз Ижевскын туэ гужем ортчем прессалы сӥзем фестивалез. Маин бордазы кыско таӵе пумиськонъёс-кенешонъёс? Нырысь ик, ог-огедлэсь дышетскон, ужад выль творческой кужым басьтон; кыкетӥез - пӧртэм регионъёсын кусыпъёс тупатон. Выставкаосты ортчытонъя центрлэн валтӥсь павильонэз куинь нунал ӵоже калыкен тырмемын вал. Куноос сяна, татчы нуналлы быдэ люкаськылӥзы Москваын улӥсьёс, "Пресса-2000" огинэ вуттӥз Белоруссиысь но Ямалысь, Уралысь но Дальний Востокысь, Сибирьысь но Балтика палась журналистъёсты но полиграфъёсты. Кин кызьы ужа, кыӵе продукция поттэ - ваньмыз син азьын. Арлы огпол гинэ лыдӟисьлы шуд усе ваньзэ яратоно изданиостэ дун тырытэк яке туж дунтэмен басьтыны. Тӥни малы москвичъёс вазь ӵукнаысен ик ВДНХ пала кыстӥськизы. "Работница" журнал, кылсярысь, туэ потэм номеръёссэ 1 манетэн сётэ, вӧзаз кузьма "Пӧраськон" книга. "Красная звезда" газет шумпотэ пӧртэм пумо чебер календарьёсын. "Сельская жизнь" ыштэм лыдӟисьёссэ берыктыны тырше четвергъёсы потӥсь "Пятница" приложениеныз. Со быдэсак сӥземын Подмосковьеысь дачникъёслы, сад-бакча котырын вырисьёслы. "Московский комсомолец" паймытыны выре политикалэн "кырсь сэрегъёсыныз". Та газет, зэмен но, шарае поттэ мукет изданиослы "сузёнтэм" интыосты, Кремль котырын куиськись "пӧртмаськонъёсты". Нялтас верало на: Москваын потӥсь газетъёс пӧлысь лыдӟисез понна тужгес но зол ожмаське "Московский комсомолец". Солэн киоскъёсыз пуктылэмын метро станциос вӧзын, ӵуказе потоно номеръёссэ вузало ни "пӧсь дыръяз ик" - бер ӝытазе, пырак печатной цехысь поттыса. (Самой та газетлэн редакцияз корреспондент луыса ужа асьмелэн землякмы журналист Валерий Батуев). Выставкаын нимысьтыз инты басьто Беларусь, Татарстан, Ямал но куд-ог мукет регионъёс. Белоруссиысь эшъёсмы котьку сямен трос калыкез бордазы кыско. Ӟуч но белорус кылын поттэм изданиосты басьтӥсез вань гинэ. Москвичъёс но куноос тужгес но ӝог бушатӥзы "Советская Белоруссия" газетлэн но "Беларусь" журналлэн юбилеезлы сӥзем яркыт календарьёсын ӝажыосты. Адӟытонэ ваемын куролэсь, етӥнлэсь дасям киужъёс, ӵушконъёс. Синмаськымон продукциез Татарстан Республикалэн. Бускельёсмы сьӧразы тросгес ваиллям рекламаен ужанъя изданиоссэс, озьы ик висъясько соослэн вылӥ ӟечлыко печатен журналъёссы, трос буёлэн печатласькись газетъёссы. Огъя вераса, выставка-ярмарка нырысетӥ нуналаз ике возьматӥз прессалэсь котыр ласянь будэмзэ но азинскемзэ, пӧртэм амалъёс пыр лыдӟисез бордаз кыскыны тыршемзэ. Но... со сярысь ассамблеялэн сессияз сюлэмыз вӧсь луыса вераз В.Л.Богданов, асьмеос берло аръёссэ гинэ туж троссэ лыдӟисьёсмес ыштӥм. - Таиз выставкамы - сизьыметӥез. Мон тодам ваисько нырысетӥоссэ. Соку, оло, быдэс Москва ВДНХ-лэн прессалы висъям повильоназ ветлӥз! Калык туж рос вал, туннэ усьтӥськем ужрадмы возьматэ: адямиос пумен кыдёке но кыдёке палэнско газет- журналлэсь. Соос дышо ни "духовной сиёнтэк" улыны. Куд-огез уг оскы туала прессалы, журналистъёслэн кырсь гожъямъёссылы, мукетъёсызлэн газетлы коньдонзы ӧвӧл. Мон алигес гинэ бертӥ Венаысь, отын воксё абдрай, кызьы Западысь "эшъёсмы" дунъяло вылэм эрико амалэн ужась прессаез. "Быдӟым дышетӥсьёсмы" туннэ азьвыл индылонъёссэс чылкак мукет сямен, мыддорин палыныз берыктыса верало. Уката но висъяськизы та ласянь англичанъёс. Соослы туж уг кельшы журналистъёслэн НАТО-ез пыкылэмзы но Югославия сярысь зэмлыкез возьматӥсь статьяос гожъямзы. Ма вераны луоз Россиысь журналистика ласянь? Асьмелэн журналистикамы но пропагандамы азьвыл аръёсы пуктэмын вал государстволэн куронъёсызъя. Али, мон сое уг ватӥськы, та удысэ вуизы кырсь киын адямиос. Сыӵеос вузаськемын коньдоно кисыослы но ужало коньдон вылэ. Тӥни малы журналистика шедиз политикалэн но обществолэн тужгес но лэчыт шиосыз вискы - со быдэсъя аспӧртэмлыко эксперлэсь рользэ. Зэмос журналистика сӥсъяны-сэстыны кулэ улонлэсь вань ёзъёссэ. Таӵе мылкыдын люкаськемъёс азьын вераськизы Алексей Симонов, Олег Попцов, Игорь Яковенко но мукет тодмо журналистъёс но политикъёс. Со бордысен кутскиз "Пресса-2000" выставкаын ӝутскем огез бадӟым кенешон. Кыллэн эрикез Россиын кортнамын Таӵе йылпумъян лэсьтӥз Россиысь 87 регионын ортчытэм социально-психологической эскеронъёсъя "Общественная экспертиза" проектлэн кивалтӥсез Игорь Яковенко. Та пректэз дасян бордын ужазы Россиысь Журналистъёслэн союззы, Гласностез утёнъя фонд, "Интерньюс" организация, "Право и СМИ" центр но социально-психологической исследованиосъя Национальной институт. Кызьы шуиз И.А.Яковенко, паймод (!), но Россиысь улосвылъёсын огаз но эрико ужась СМИ ӧвӧл. Иворъёсты люканы ӟечгес луонлык сётэмын Ярославль, Иркутск, Мурманск, Иваново областьёсын, Владимирын, Смоленскын, Бурятиын, Татарстанын, Корякской но Ямало-Ненецкой автономной округъёсын, газет- журнал поттонъя умоесь условиос Москваын, но огаз но регионын та кык условиос закон но политика ласянь "вож сюрес" уг усьто. Игорь Александрович пыр-поч вераз "Общественной эксперизалэн" ужпумъёсыз но азьланезлы малпанъёсыз сярысь. Солэн проектэз вордскиз 1998-тӥ арын. Самой соку Россиысь Журналистъёслэн огазеяськонзы быдэс ар ӵоже нюръяськиз газетъёсты но журналъёсты поттӥсьёслы государство ласянь юрттэт басьтон понна. Та нюръяськонын малпанъёс люкиськизы: огъёсыз дотация висъяны куризы правительственной луись изданиослы гинэ, мукетъёсыз - ваньмызлы огкадь, тоно-моно карытэк. Кыкетӥез малпан вормиз. Нош туэ май толэзе виемын вал "Советская Калмыкия - сегодня" независимой газетлэн валтӥсь редакторез Лариса Юдина. Та учыръя туж ӟеч адске макем кыдёкын на асьмеос зэмос демократилэсь. "Общественной экспертизаен ортчытэм эскеронъёс возьмато, журналистъёслы тужгес но секыт ужаны Москваын, иворез калык доры вуттытозь, татын "77 ӧс пыр потоно". Удмурт Республика огъя юан-веранъёсъя шедиз 31-тӥ интые, асьмемын огкадьгес югдур Алтайской крайын. Эскеронъёсы пыриськизы пӧртэм изданиосын ужась журналистъёс. Юанъёс ыстэмын вал "Новая газета" редакция пыр. Юанъёслы сётэм валэктонъёс пыр тодмо луиз: СМИ сярысь федеральной законэз тӥян учыръёс тужгес но вӧлмемын Башкортостанын но Адыгеяын. Нош Омск "данэ" потӥз газет-журнал вузанъя киоск усьтон амалъёсыныз - одӥг киоскез пуктон понна, 34 ӧсэ йыгаськоно. 27-тӥ октябре, "Пресса-2000" выставкаез усьтон нуналэ, иворез вӧлмытон удысэз нуисьёс тодматскизы на "Общественной экспертизалэн" эшшо одӥг проектэныз, таиз "мерталоз" коррупцилэсь выжыоссэ, солэсь пушъён мугъёссэ. - Вераськон мынэ туннэ нуналлэн лек но кышкыт висёнэз сярысь, - пусйиз проектлэн кивалтӥсез, Россиысь Журналистъёслэн союззылэн секретарез И.А.Яковенко. - Журналистъёс коньдон вылэ ужало, чиновникъёс дышетэмъя. Прессаез сяна, экспертъёс таяз учыре бугыръялозы милициез, налогъя инспекциез, медицинаез, военкоматъёсты но куд-ог музон "шуныт" каръёсты" - мурт коньдон чотын улыны дышемъёсты (взятка басьтӥсьёсты). Юалляськон-эскерон ортчоз котькуд регионын ньыль пумо индексъя. Солы йылпумъянъёсъя дасямын луоз Россиын коррупцилэн вӧлмемез сярысь карта. Отысь ик адскоз асьмелэн, журналистъёслэн, кыӵе киосын ужаммы но газет-журнал бамын кинэ тросгес данъяммы. А.К.Симонов нимысьтыз саклык висъяз редакциослэн запросъёс бордын ужамзылы. - Берло дыре та амал ышиз-быриз, малы ке шуоно, криминал вуиз ни котькуд удысэ, нош солы пумит султыны кужым кулэ, - шуиз со. - Асьмеос пумен дышиськом кураськись нылпиослы но жуммем пересьёслы, эмъяны луонтэм висисьёслы, тюрьмаысь потэмъёслэн йылэмзылы. Та ужпумъёсты адӟемысь дугдӥм. Котькудаз изданиын валтӥсь журналистъёс "думемын" интыосысь администрациос борды. Соос "кузёоссэс" ноку но лек кылын уз ӵушкалэ, отысь тырмымтэосты газет баме уз вуттэ, малы ке шуоно, аккредитация басьтыкузы кыл сётӥзы, номыр "сыӵезэ-таӵезэ" уз гожъялэ шуыса. Тӥни кытын ватэмын кыллэн эрикез но журналистлэн власть борды думиськемез. Иворъёс вӧлмытон но парламентэ быръён Кун Думае депутатъёсты быръён нунал тупатэмын 19 декабрьлы. Таин валче "Пресса- 2000" бадӟым саклык висъяз политикаен герӟаськем ужпумъёслы. Выставкаен тодматскыны вуылӥз Россиысь Кун Думалэн председателез Геннадий Селезнев. Журналистъёсын пумиськылӥзы центральной прессаысь валтӥсь журналистъёс, политикъёс, Конституционной судын но Центризбиркомын ужасьёс. Кенешонъёсты радъяз но нуиз Прессалэн Национальной институтэз (кивалтӥсез В.Светозаров) но Быръёнъёсты радъянъя Дуннеысь фондлэн директорез Кристиан Надо. Соос ваньмыз сямен пусйизы: быръёнъёс сярысь закон умой-умой дасямын ӧвӧл, отын туж трос "небыт" интыосыз. "Котырес ӝӧк" сьӧры люкаськемъёс пӧлысь котькудӥз сямен журналистъёсты индылӥз янгышъёс ласянь. Кылем быръёнъёсын соосын сэрен СМИ-ын ужасьёс пӧлысь куд-огез ас интыысьтызы мозмытэмын вал. - Калык пӧлы ивор вӧлмытӥсьёслы туж сак луоно. Нокыӵе политической шудонъёсы пыриськытэк, чылкыт киосын лэсьтоно котькуд материалэз, законэн тупатэм гож сьӧры потатэк, - шуиз прессаын ужасьёслы быръёнъёслы дасяськонъя эксперт Ф.Кравченко. - Телевидение но радио котькуд кандидатлы огкадь дыр висъяны кулэ, газетъёс вылэ та курон уг вӧлмы. Ньыль ар талэсь азьло ортчем быръёнъёсъя луэм умойтэм учыръёсты Москваысь судъёс али но эскеро на. Со сярысь вераз Президент бордын ужась Информационной споръяськонъёсты эскеронъя Судебной палаталэн кивалтӥсезлэн воштӥсез В.Монахов. - Тросэзлы тодмо, дыр, ОРТ-ысь дикторен Арина Шараповаен кылдэм югдур. Информационной передачаез нуонлэсь со палэнтэмын вал, эфире пӧяса дасям иворез лыдӟемез бере. Дикторлы текст сёто, куд-ог кужымъёс быръёнъёсты куашкатыны выро шуыса. Бӧрысь та газетлэн номерез чиптэм-чаптэм ыше, Шараповаез ужан интыысьтыз палэнто. Туннэ ке но тодмо ӧвӧл, кин пӧраз та иворез но кин со понна кыл кутыны кулэ. Озьы ик судъёсын пумаз-йылаз вуттытэк кыллё ЛДПР-ен, "Отечествоен", "сталинской блокен" герӟаськем материалъёс. 4 ар куспын соос сэрттэмын-пертчемын ӧй вал бере, озьы ик архиве кылёзы. Табере вуизы ни выль быръёнъёс. Малпасько, судъёслы нош ик уж тырмыт вуоз, сое али ик шӧдоно ни. Центризбиркомлэн членэз С.Большаков люкаськемъёслы кушаса сямен сётӥз быръёнъёсъя законлэсь куронъёссэ но тупатэм нормаоссэ. - Асьмелэн огмылэн но правомы ӧвӧл адями вылэ пож ву киськаны, солэн улоназ пыриськыны, нациезъя дунъет сётыны, - шуиз со. - Данакез политической реклама быръёнъёс азьын кошке, дун тырыса. Озьыен, кин узыргес, со тросгес коньдон сётоз но ассэ ӵемгес возьматыны быгатоз - газетын таӵе луонлык сётэмын. Но таин ӵош эсэспсэ чаклано: пуштросэзъя со законэз медаз ортчы, мукет кандидатъёсты зӥбонлы медам пӧрмы. "Котырес ӝӧк" сьӧрын кенешонэз нуисьёслы журналистъёс вазиськизы пӧртэм юанъёсын. Кылсярысь, троссэ шугъяськытэ интыосысь администрациослэн кивалтӥсьёссылэн быръёнъёс азьын асьсэды умойтэм воземзы. Вань-а соослэн правозы кыӵе ке кандидат понна агитация нуыны но прессаез та уже кыскыны? - Губернаторлэн но, республикаен кивалтӥсьлэн но сыӵе правоез ӧвӧл, - валэктӥз С.Большаков, - Таӵе учыръёс сярысь ӝегатскытэк ивортыны кулэ Центризбиркоме. - Быръёнъёс азьын журналистъёс калык пӧлын юалляськон (опрос) отчыто. Кызьы сое газет баме сётоно? - Курон одӥг: валэктонъёс агитацилы медаз пӧрме, мукет сямен вераса, одӥг кандидат понна гинэ ужам медаз луы. Юалляськон амалэз паськыт куто вань странаосын, но куд-огез, шуом, Люксембург, Литва, быръён нуналозь быдэс толэзьлы вазь дугдо газет баме сётъямысь, Словакиын, Франциын но Словениын - 7 нуналлы, Румыниын - 2, Польшаын - 12, нош Бельгиын, Великобританиын, Германиын, Швейцариын нокыӵе алонъёс ӧвӧл. Россия Федерациын 3 нунал ӵоже "чалмыт" улоно. Но, кызьы пусйиз Прессая Национальной институтлэн директорез В.Светозаров, азьвыл СССР-лэн территорияз быръёнъёс сярысь зконлэн куронъёсыз пумозяз уг быдэсъясько. Та ласянь 1996-тӥ арын тужгес но зол висъяськиз Россия. Президент луон понна соку нюръяськизы кык тодмо адямиос - Геннадий Зюганов (Коммунистической партия) но Борис Ельцин (Россилэн Президентэз). Президентлэн стратегиез - бырйисьёсты коммунизмен кышкатон. Тӥни малы ӵапак быръён нунал азьын ОРТ-лэн экранэз вылын та каналлэн 51 процент акциез - государство киын), возьматэмын вал "Утомленный солнцем" фильм. Валтӥсь темаез - сталинский террор. Нош НТВ-лэн частной каналэз возьматэ 1992-тӥ арын поттэм триллерез, таизлэн темаез - компартия но огазеяськем преступность. РТР- лэн быдэсак государственной луись каналэз возьматэ Булгаковлэн романъёсызъя кылдытэм революция но граждан ож аръёсы калыкез быдтэм сярысь фильмез. Тӥни озьы, телевиденилэн куинез ик общенациональной каналъёсыз, законэз палэнтыса, бырйисьёслы тодазы вайытӥзы коммунистической обществолэсь "пеймыт но кышкыт сэрегъёссэ". Киноез нокызьы но политической агитация радэ уд пырты, но валаса но дыраз сётэм "духовной сиён" ас интызэ шедьтэ, бырйисьлэсь йырвизьзэ сура. Быръёнъёс сярысь вераськон азинскиз на дискуссионной клублэн кенешаз. - Прессаез ньылетӥ власть шуо ке, та ӟырдыт вакытэ асьмелэн интымы - политической нюръяськонлэн нырысетӥ радъёсаз, - пусйиз Всеволод Богданов. - Мон оскисько, "Пресса-2000" выставка кутскон сётоз Россиысь журналистикалэсь данзэ ӝутыны, ыштэм тиражъёссэ берыктыны но котькуд семьяе вутскыны. Семинаръёсын ӝутэмын вал газет-журналъёсты вӧлмытонъя, рекламаен ужанъя, налог тыронъя но мукет ужпумъёс. Озьы ик люкаськемъёс тодматскизы 2000-тӥ арысен потыны кутскись "Журналист" выль журналлэн проектэныз. Россиысь журналистъёслэн вуоноез бадӟым пумиськонзы табере ортчоз ХХИ даурлэн кутсконаз. Людмила МЕДВЕДЕВА. Москва-Ижевск. Буре-а, паллянэ-а? Котькытчы мын, куанерез вите кайгу Асьмеос дышимы ини коммунистъёсты но демократъёсты ваче пумит пуктыны. Шонер-а со? Вылтӥз учкыса, со шонер кадь. Нош ужпумез пыдлогес эскерыса валаськод, со шонер ӧвӧл. Кинъёс со демократъёс? Ваньзы сямен соос азьвыл коммунистъёс. Ваньзы сямен ик кивалтэт радъёсысь потэмын яке соос пӧлын будэмын-дышетскемын. Ваньзы ик марксизм- ленинизм вылын кыдамын. Бен, тямыстонэтӥ аръёсы ваньмызлы тодмо луиз, коммунизмлэн идеяосыз асьсэлэсь данзэс ыштӥзы шуыса. Соин ик ас эрказ куашказы КПСС, СССР, солы тужгес но юрттӥзы соосын кылдытэм ёзъёс - КГБ но партилэн интыосысь быръем ёзъёсыз. Советъёс нимъёссэс воштӥзы. Кожаськоды, выль власте сюризы выль адямиос? Ӧз, партилэн обкомъёсызлэн секретаръёссы луизы губернаторъёс, мэръёс но интыосысь администрацилэн мукет кивалтӥсьёсыз. Басьты котькудзэ банкез - отын кивалтӥсь интыосты ас киязы басьтӥзы азьвыл коммунистъёс но КГБ-лэн ёзъёсаз ужамъёс. Нырысь-вылысь соос тусбуйзэс воштӥзы ик, вераськоназы выль кылъёсты (демократия, плюрализм, рынок, менеджер) пыртӥзы. Нош бӧрысь соос ик демократия вылэ пож ву киськаны ӧдъязы. Угос магазинъёсысь ӝажыос вузъёсын тырмизы ке но, соос пумен дуноязы, нош уждун ӧз буды. Вылаз ик, бадӟым предприятилэн (ваньмыз сямен соос пыӵал тӥрлык потто вал) кивалтӥсьёссы ялан витизы планъя ужанлэсь берытскемзэ. Соос луонозэ но номыр ӧз лэсьтэ. Калыклы кулэ вузъёс поттыны ӧз кутске. Коммунистъёслы со ик кулэ: странаын улон-вылон уродмиз ке, властез соос выльысь ас киязы шара басьтыны быгатозы. Туала югдур ӵапак сое возьматэ ини. Демократъёс сярысь вераськон потэ ке, нырысь ик, верало Борис Немцовлэсь, Егор Гайдарлэсь, Сергей Кириенколэсь, Ирина Хакамадалэсь, Анатолий Чубайслэсь нимъёссэс. Бен, соос асьмелы тодмо луизы КПСС, СССР куашкам бере аръёсы. Тани Сергей Кириенко Правительствоен куинь но ӝыны толэзь гинэ кивалтыны вуиз. Нош табере со вылэ погыльто улонмылэсь вань сьӧд виштыоссэ. Нокинлэн кылэмез-адӟемез но уг поты со толэзьёсы ик Думаысь депутатъёслэсь асьсэды кызьы воземзэс. Соос чельыенызы но ӧз выретэ, асьмелэн улонмы мед умоялоз шуыса, ваньзэ лэсьтӥзы, правительстволы пайдаё ужаны люкетон понна. Туала депутат уроболэн витетӥ питранэзлы пӧрмизы. Табере соос ик асьсэды котькызьы ушъяло, куано. Угось ваньзылэн ик выльысь депутат луэмзы потэ. Депутатын майбыр, уждун бадӟым, вӧл-вӧл квартира Москваын сётӥське, нош уж ласянь соослэсь юась-марась ӧвӧл. Соос асьсэос кызьы ужаны закон кылдытӥсьёс ук. Быръён нуналозь кема ай. Отчыозь малпаськыны но дыр вань. Малпасько, бырйисьёс валалозы кыӵе партилы, кыӵе огазеяськонлы (блоклы, движенилы) дурбасьтыны, депутатэ кыӵе кандидат понна куаразэс сётыны. Выжыкылын сямен ик, али калык азе юан пуктэмын: буре-а, паллянэ-а? Кинлы ке дурбасьтыкуды малпаське на, кудпала вамыштоды. Котьку сямен ик, берло мар луыса медам кошкы. Николай МАЛИКОВ. Ӝоген-а вуоз ӟеч улон? Адямиос котьку но сюлмасько та сярысь. Тужгес ик али. Тужгес но - Россия шаерын. Павел Глобалэн - азьпал улонэз тодытӥсьлэн - чакламезъя, дуннелэн ӟеч улонэ выжон сюресэз кутскоз 2003-тӥ ар бере Урал улосвылысен. Асьмелэнэзлэсь азьло ЪИИ сюрс ар вадесын дуннеын улон-вылонлэн азинсконэз, умоянэз сярысь тазьыгес ик верам вылэм Заратустра - Кам шур выжыын вордскем, азьпал улонэз тодытӥсь но Иисус Христослы укшамон инмаръям адями. "Мынам дышетэме, - шуэм со, - бертоз отчы ик, кытын кылдӥз". Азьпал улонэз асьме вакытысез тодытӥсь, быдэс дуннеын сӥё-дано нылкышно - Ванга - но кулон азяз та выллем ик малпанзэ вераса кельтэм, пе. Та сярысь тодыны мыным юрттӥз Татьяна Дубровиналэн но Елена Ласкаревалэн "Заратустра" книгазы. Со печатламын туэ Москваысь "Олимп" книгапоттоннилэн "Великие пророки" нимо серияз. Кинлы кызьы, вылды, но та книгаысь тодэм таӵе ивор мынэсьтым сюлэмме буйгатӥз но, капчиятӥз но, азьланьын ӟечез ваньлы осконме вӧлак ӝутыса бурдъяз но. Калыкын зэм верало: ӟечезлы осконтэк улыны туж шуг. П. ПОЗДЕЕВ. "Шундыысь" ивор "Даур кыл" Сыӵе нимо выль программа дасяз егитъёслэн дэменлыксы. Татын чакламын шаерез тодон- валан ужпумъёс. Со сяна, лыдэ бастэмын пӧртэм выжыысь егитъёслэн тунсыкъяськонъёссы. Программалэн кичӧлтӥсез луиз пиналъёслэн "Родники" огазеяськонзы. Соос "Шундылы" рос-прос выль программа дасяло. Солэн инъетэз вылын дасямын выль "Даур кыл" программа. "Шунды" ужа на "Лулчеберет", "Вож тулкым" программаосъя. Дасяське эшшо огез - "Егит азьветлӥсь" нимаськоз таиз. А.Андриянов. Адӟон пыд улысь потэ Странаямы мынэ йыружъёсын, пуштытонъёсын но мукет сьӧсь ужъёсын нюръяськонъя "Вихрь-антитеррор" операция. Солэсь палэнэ кылемын ӧвӧл Удмуртиын улӥсьёс но. Кызьы со мынэ Пичи Пурга ёросын - со сярысь вераськон та мадёсын. Пичи Пургаез кемалась ни городэн ӵошатыны луоно. Ӝутскемын но пуктӥсько трос этажъем юртъёс, чебересь коттеджъёс. Сюресъёс шобыртӥсько асфальтэн, ужало уно предприятиос. Ассэ районэз но республикаын пичиосыз пӧлы уд пырты. Татӥ ортчо му вӧй но чагыр эстӥськон сётӥсь ёзвиос, Россилэн шорсюлмаз нуись бадӟым тракт, правительствоен кусып возёнъя телефон кабель. Ужа нефть кыскон-сётонъя станция. - "Вихрь" операция кутскем бере ик ми рос-прос басьтӥським та уж борды,- вера ёросысь югдурез утёнъя ёзлэн тӧроез, милициысь подполковник Анатолий Михайлович Рысьев.- Нырысь ик интыысь радио но газет пыр калыклы ивортӥм пуктэм куронъёс сярысь. Озьы ик кенешим районысь предприятиосын но организациосын улосын югдурез эскерисьёсын. Кылдытӥм нимысьтыз штаб. Вуылӥм ваньмаз коллективъёсы, ортчытӥм но ортчытылӥськом отын ужасьёсын пумиськонъёс... Бен, нырысь учкыса, кык толэзь дыр куспын трос лэсьтэмын ни кадь. Сюресъёс вылын али одно эскеро ваньбур нуись-ваись машинаосты. Милициын ужасьёс нуналлы быдэ ортчытъяло паспорт басьтон-возёнъя куронъёсты эскеронъя рейдъёс. Соосты тӥямзы понна тямыстонлэсь трос адямиос шараямын. Соос пӧлын вань Кавказ котырысь вуэмъёс но. Ваньзы кыл кутытэмын. Ялан чакласа возё ужбергатыса коньдон поттӥсьёслэсь кызьы но ма лэсьтэмзэс, складъёсазы ма воземзэс. Тодмо луиз, куд-огез ыбылӥськон тӥрлык возисьёс азязы пуктэм куронъёсты тӥяло шуыса. Нош одӥгезлэн пыӵалэз нокытын пусйымтэ вылэм. Озьыен, со "гумызэ" лушкем возиз. Нимысьтыз саклык висъямын милициен эскерыса возён адямиослы. Районысь котькуд предприятилы но организацилы косэмын штабе нуналлы быдэ ивортылыны кышкыт учыръёслэсь утиськонъя возьматӥсь отчётъёс. Соосты районысь администрацилэн кенешонъёсаз арнялы быдэ эскеро. Таӵе ик уж радъямын ёросысь сельсоветъёсын. Ваньмаз административной юртъёсын, школаосын но мукетъёсаз чакламын уен-нуналэн возьмаськон радъяны. Мукетыз ужпум - ваньмыз-а та куронъёс быдэсъясько уж вылын? Пумитамы шедем кӧня ке адямиослы одӥг юанэн вазиськиськом: "Тодӥськоды-а тӥ, странаын но республикаын "Вихрь" операция ортчытӥське шуыса?" - Коркасьтымы ӧс борды со пумысен кыӵе ке но кагаз лякемын вал кадь. Нунал но ӧз возиськы, кесизы... - Бен, радио но телевизор пыр вералляло. Но милемын та пумысен нокыӵе уж нуись ӧйлась кадь... - Шонер, югдур шимес. Но ми татын, дунне пыдсын улӥсьёс, кинлы кулэ. Ма муген дорамы йӧнтэмъяськисьёс шедёзы... Куд-огезлэн югдур шоры тазьы чиньы пыртӥ учкемез чылкак паймытэ. Таӵеослэн тодазы уг лыкты, шӧдске, адӟон пыд улысь потэ шуыса. Уката ик та дыре, куке Буйнакскысь, Москваысь, Волгодонскысь но мукет интыосысь уно сю адямиослэн синвуоссы али но куасьмемын ӧвӧл. Куректон кудаз корка йыгаськоно - бырйыса уг улы. Ӵашъем сямен, витьымтэ шорысь вуэ. Нош гудыртэм бере кирос тырыны бер ни. Мынӥськом 1 номеро школае. Пырон дорын нокин пумитась-эскерись ӧвӧл. Паськыт коридор шалтрак буш. Паллян киысь котыртэмын ошылэмын пиналъёслэн дӥсьсы. Татын но нокин уг адскы. Куд-ог классъёсысь гинэ кылӥсько дышетӥсьёслэн, нылпиослэн куараоссы. Йырын витьымтэ шорысь чилектӥз: нош таӵе дыре татчы, ми интые, кин ке мукетъёс, сьӧсь малпанэн адямиос вуизы ке? Кин соосты дугдытоз, сюрессэс ваментоз? Сюлэме венен бышкалтӥзы кадь. Одӥгаз комнатаын крезьгуръёс кылзыса пукись егит нылкышнолэсь, ассэ воспитатель шуиз, ӧс дорын ӝожмыт сылӥсь ӝӧк шоры возьматыса юаськом: - Малы татын пукисьты, пырись-потӥсьёсты эскерисьты ӧвӧл? - Выж миськыны кошкиз,- киыныз кытчы ке палэнэ возьматӥз нылкышно. - Нош кин возьма пиналъёслэсь дӥсьсэс? - Со ик... Завуч Любовь Сергеевна Степанова валэктэ: "Вихрь" кутскем бере ик, пе, ваньзэ дышетӥсьёсты люкам. Чаклам, кин ма понна кыл кутыны кулэ. Ӧс дорын возьмаськыны вахтёръёсты юнматӥм. Директорлэн приказэзъя школае палэнысь адямиослы, вузкарисьёслы пыраны лэземын ӧвӧл. Нимысьтыз дасям графикъя одӥгез дышетӥсь уй но нунал школаын луыны кулэ. Кошкыкуз вахтазэ эшезлы сётэм сярысь со журналэ гожтӥське. - Тӥ тани,- вазиське кытысь ке вуэм ужасьсылы, директорлэн хозяйственной ёзъя воштӥсезлы, Сергей Миронович Пестеревлы,- субботаосы татын луыны кулэ шуыса тодӥсько. - Озьы вал кадь... - Собере ӝог йыбыртъя.- Бен, бен, озьы. Куриськом возьматыны вахтаысь журналзэс. Отын одӥг-кык яке солэсь но трос нунал ортчыса сяна пусъетъёс ӧвӧл. Шӧдске, директорлэсь ас киыныз гожтэм приказзэ кызьы быдэсъямзэс эскерыны дырыз ӧвӧл. Секыт мылкыдын кошкиськом школаысь. Ӧз тупатскы со Пионерской ульчаысь 40 номеро вить этажъем юртэз адӟыса но. Выж улэ пырон укноос пасесь, кӧняез ке гинэ огшоры пулъёсын шуккемын. Пыриськом одӥгаз подъездэ. Выж улэ нуись ӧс борддореныз валче куашкатэмын. Шимес пась пыр адӟисько шуныт, ву сётӥсь гумыос. - Кыкетӥ арзэ ни озьы улэ,- вера подъездъя кыл кутӥсь Альбина Андреевна Тихонова.- Кытчы гинэ ӧм вазиськылэ ни. Гожъямы "Маяк" газетэ. Тодэ сюлмаськонмы сярысь юртъёсты утись-возись объединенилэн тӧроез Дедов господин но. Нокин кылэм-адӟем уг кары. "Вихрь" операция пумысен но дорамы нокин ӧз ветлы на, кызьы ма лэсьтоно - верась-валэктӥсь ӧвӧл. Унолы пӧртэм ӧвӧл югдур Пургалась мукет улон юртъёсын но. Та пумысен вазиськиськом сельсоветлэн тӧроезлы Ю. П. Петровлы. - Коньдон тырмымтэ милемды копак кекатэ,- лулске Юрий Павлович.- Туэ выльдон- тупатъян ужъёслы бюджетъя висъям коньдон милям огъя кулэяськонмылэн одӥг процентэз но уг луы. Ӧвӧл со бетон, цемент, нюлэс басьтыны. Ма карыны ёрмыса, мон улӥсьёслы вазиськисько ни: асьтэос, пӧй, коньдон люкалэ но кулэ арбериос шедьтэ. Коньдонлы ёрмонэн герӟало юртъёссэс уйёсы но шутэтскон нуналъёсы нокин возьматэк, огшоры пуньет ошыса воземзэс судын но прокуратураын ужасьёс. Тодазы уг лыкты, операция ортчыку, коть асьсэ ужасьёслэсь ик возьмаськон радъяны. Чаклан-эскерон кулэезъя радъямын ӧвӧл районысь администрацилэн юртаз но. Кин татчы пыре-потэ, мар вае сьӧраз - юась-верась ӧвӧл. Ум, ми ум вераське, таӵе юртъёсты жильыен ворсаса возёно, огшоры адямиосты ӧс куспозь но лэзёно ӧвӧл яке котькудӥзлэсь кисызэ берыкъяно шуыса. Но кинлэсь кыӵе малпанэн лыктэмзэ тодыны кулэ, дыр. Та ласянь шумпоттытэ райбольницаын но кизер эстӥськон кысконъя станциын ужамзы. Больницаын ваньмаз отделениосын ӧсъёсы пуктӥзы пуньетъёс, лыктӥсь муртэ учкон пасьёс. Азбаре пырыны лэземын ӧвӧл палэнысь машинаослы. Котькуд ӝыт но ӵук эскеро гулбечъёсты, та сярысь нуналлы быдэ пусйыло журналын. Корка сиге пырон ӧсъёс кортӵогамын яке замокамын. Уйёсы юртъёсты но со котыръёсты чаклало возьмаськисьёс. Станциын котыр пуктылэмын телекамераос. Ма лэсьтӥське азбарын яке со сьӧрын - ваньмыз адӟиське монитор вылын. Районын "Вихрен" герӟаськем данакез ужрадъёс погыльтэмын милиция вылэ. Ӵапак со нуоно луэ тужгес секыт ныпъетэз. Татысь адямиос нуналаз 12 часозь ужано луо. Югдур уката но ӟырдаз, РОВД-ын калыкез данаклы кулэстэм бере. Уг тырмо ГИБДД-ын инспекторъёс, следовательёс, постъёсын сылӥсьёс но мукет ужасьёс. Соин сэрен но, дыр, районын йыртэманъёс кылем арен ӵошатыса йылӥзы. Озьы ке но, туэ укмыс толэзьскын лушкаськонэн, ваньбурез кужмысь таланэн, калыкез пӧянэн но мукетэныз герӟаськем 154 уж сэрттэмын-пертчемын но судозь вуттэмын. Берыктэмын 186 сюрс манет талам-лушкам коньдон. Районын данаклы йылӥзы йыр быдтон учыръёс. Азьвыл аръёсы татын наркотикъёс сярысь ӧз но тодылэ. Туэ кык мурт ӝегатэмын таӵе "эмъюм" поттыны дасям мак люкамзы-воземзы понна. Йыртэмасьёс валто колхозъёсысь, совхозъёсысь но нимаз адямиослэсь пудозэс, качало магазинъёсты. Яке тани Бажаново гуртысь дас аресъем нылъёс столовой вылэ гожто: "Юртын - мина. Ваньмызлы отысь кошконо". Горд погонэн адямиос, вань ужзэс куштыса, нош ик дырто отчы. Юнме быдтэмын ужан дыр, уно коньдон. Ваньзэ тае чакласа, кулэстэм калыкен ужась милицилэн уно-а кужымез кыле на "Вихрь" операциез кулэезъя радъяны. Соин ик районысь тӧроос, предприятиослэн но организациослэн кивалтӥсьёссы, асьсэос улӥсьёс ӟеч валаны кулэ, шимес учыръёслэсь утиськонъя котькудзы соос огкадь кыл куто шуыса. Кызьы адӟиськом, таӵе мылкыд котькытын ик уг шӧдӥськы на. Уката но кышкыт соиз. Пургаос гинэ ӧвӧл, республикаысьтымы куд-ог мукет ёросъёсын но операцилэсь куронъёссэ кагаз вылын тросгес быдэсъяло на. Тае чиданы уг луы. В. АФАНАСЬЕВ, милициысь полковник. Н. ДОЛГОВ, журналист. "Кенеш" журналлэн выль номерез Эш луоз "Калыкез вуэз выллем полыстыса, Светлана адӟиз: сыӵе жоб кылъёсын Саваез бускель кышнозы тышкаське вылэм, нош мукетыз сое музъем вылтӥ гыж кыскаса нуллэ. Пиезлэн куараез бӧрдыса пуксьыны шӧтам ни, ымныраз учкон кал ӧвӧл: синкылиеныз сураськыса, тузон норем. Светланалы кышноосын куашетыса вырыны маза ӧй вал ни - пизэ гыж нуллӥсезлэсь ишкалтӥз, гадь бордаз ӝиптӥз но бызьыса гидкуазязы пыриз". Шаерысьтымы калык писательлэн Петр Черновлэн "Тэрегбадь" нимо выль повестьысьтыз туж вакчи люкетсэ лыдӟыса уд вала на, марлы сӥземын та произведение, кыӵе вакыт возьматэмын отын. "Кенеш" журналэз таяз аре басьтӥсьёс гинэ рос-прос тодматскыны быгатозы кык номерын поттыны чаклам повестен. Куарусён толэзе потэмаз нырысетӥ люкетэз печатламын. Удмурт прозаиклэн но публицистлэн Леонид Емельяновлэн нимыз лыдӟисьёслы кемалась тодмо. Берло аръёсы гожтэм произведениосыз соос доры вуизы "Кенеш" пыр. 1993-тӥ- 1998-тӥ аръёсы журналамы вис карытэк печатласькиз "Кудпала берга дунне питран?" повестез. Туэ куарусён толэзе, Леонид Петровичлы 70 арес тырмиз. Таяз номерамы юбилярлэн выль ужез потӥз, Со сӥземын удмурт калыклэн одӥгезлы тужгес но синмаськымон, гажамон, адӟем карымон пиезлы Павел Николаевич Вершининлы. Та нуналъёсы со ӝыны даур тырмонзэ пусйиз. Кун Кенешмылэн Тӧроезлэсь нырысетӥ воштӥсьсэ П. Н. Вершининэз эшшо огпол ӟечкыласьком вордскем нуналэныз. Шаерысьтымы писательёс туэ дас витетӥ ӧтчамазы (съездазы) люкаськылӥзы. Солэн кызьы ортчемез но литераторъёслэн кыӵе ужпумъёсъя кенешемзы сярысь гожтэ кылбурчи Людмила Кутянова. "Берло дыре эпос бордын ужасько бере, ӵем гинэ вашкалае "зымылӥсько", - шуэ кылбурчи Анатолий Перевозчиков. - Валамон ни, вань тодэмез эпосэ пыртыны уг луы. Со куриське мукет жанре но". Верамезъя, озьы кылдэмын солэн та номерысь ик "Инмар но Керемет" ньыль суредэн пьесаез. Телевидениын ужасьёс сярысь гожтэмъёсты сокем ӵем уд пумитаськылэ, луоз. Таяз учыре номермес узырмытӥз удмуртъёс пӧлысь нырысетӥ киноператорлы Олег Чирковлы сӥзем тодэ ваён. Телевидениын куамын куать ар ужатозяз синйылтэм фотосуредъёсыз пӧлысь кӧнязэ ке лыдӟисьёсмылы ӵектӥськом. Улонысь кылем арын кошкем картэз сярысь гожтэ кузпалыз "Удмуртия" кун телерадиокомпаниысь оператор, Юлия Чиркова. "Шаермылэн историысьтыз", "Критика но библиография", "Оло зэм, оло даур" но мукет сэрегъёс одно ик бордазы кыскозы. Тодосчиос, кылбурчиос тунсыко гожъямъёссэс "Кенешез" басьтӥсьёслы ӵекто угось. Таяз номерамы нош ик тодады вайытӥськом журналлы гожтӥськонлэн азьланьтӥськемез сярысь. Кызьы ке почтаын (быдэс арлы 53 манет но 20 коньы тырыса), озьы ик "Кенешлэн" редакцияз (36 манет тырыса) тӥледыз чидатэк витё. Басьтэлэ, лыдӟелэ журналмес, со тӥледлы эш луоз. П. Сергеев, редакторлэн воштӥсез. Ӟеч кӧл, Лёня... Уг, нокызьы но йыре уг тэры та ивор. Ма, неужто уз кылды ни солэсь выль суредъёссэ адӟыны, чебер куаразэ кылыны, артэ вамышъяны?.. 5-тӥ ноябре улонысь воксё малпамтэ шорысь кошкиз Леонид Алексеевич Прозоров. Ми сое Лёня гинэ шуылӥм, сӥё-дано нимъёсыз ичи ӧй вал ке но: Удмурт Элькунысь госпремилэн лауреатэз, Удмурт Элькунысь искусствоосъя дано ужась, Россия Федерациысь Художникъёслэн союзазы пыртэм мурт. 1997-тӥ арын февраль толэзе Пушкинской урамысь выставкаос ортчытъян залын усьтӥськиз Л. А. Прозоровлэн нимысьтыз адӟытонэз. Со сӥземын вал художниклэн 50 арес тырмонэзлы. Бӧрысьгес сыӵе ик выставка возьматэмын вал Леонид Алексеевичлэн вордӥськем палъёсаз - Селталась культура юртын. Берло дыре эшмы, оло, котькулэсь но трос ужаз. Кылем арын 11-тӥ декабре газетамы усьтӥськиз выль сэрег. "Удмурт кизилиос" рубрика улын печатланы кутским Лёнялэн быгатӥсь киосыныз лэсьтэм портретъёсты. Озьы котькуд пятница номерысь лыдӟисьёс адӟыны быгатылӥзы тодмо удмурт адямиослэсь тусбуйёссэс. Малпан вал, суредам кизилиосты та ар пумын редакцие люканы, нош бӧрысьгес - открыткаосын сузьет поттыны. Кин азинтоз табере Прозоровлэсь ужзэ?.. Сентябре, Калмез кузя экспедициысь вуыса, Леонид суредаз шаерысьтымы тужгес тодмо адямилэсь тусбуйзэ. Соиз больницаын эмъяське вал. Дано конструктор Прозоровлэсь ужзэ дунъяса шуэм: "Монэ суредась художникъёс кема уг уло..." Озьы верамлы Лёня ӧз оскы кадь. Та секыт кылъёсын артэ печатласьком Леонид Алексеевичлэсь автопортретсэ. Со лэсьтэм сое кулонэзлэсь дас нуналлы вазьгес. Но малы ке но толэзь пуссэ янгышаса пусъем. Секыт кайгу вуиз коллективамы. Ми, редакциын ужасьёс, ваньмы янгыш, дыр, эшмес утьыны ӧм быгатэ шуыса. Со вакытэ ик ми пӧлысь нокин но янгыш ӧвӧл, вылды - берпуметӥ сюрессэ Леонид Алексеевич ачиз бырйиз. Ӵош ужась эшъёсыз. АТЫКАЙ МУЗЪЕМЛЭН КУЖЫМЕЗ Ортчем сӥзьыл Киров улосысь Кильмезь черкогурт ульчаетӥ вамышъясько. Пумитам вамышъя маке туж тодмо тусбуё адями. Со огназ ӧвӧл, эшеныз лабыртыса мынэ. Нош ик шораз учкисько. Воргорон маке туж тодмо йӧтӥз. Аспӧртэмлыко чылкыт дӥсяськемын. Йырыз ӧжытак пилеш ни, вакчияк туш лэзем. Тусбуез ӧжытак мӧзмылэс ке но, синъёсаз шумпотон чилекъя кадь. Йырвизьмам токен йӧтскизы, оло: "Ма, та аспал адямимы, Москваын улӥсь но ужась ӟуч писатель Владимир Крупин ӧвӧлтэ?" Чик но янгышаськымтэ. Ӵуказеяз ик та сярысь ёросамы потӥсь "Сельская трибуна" газет ас лыдӟисьёсызлы шумпотыса ивортӥз. Ма, кызьы-о шумпотытэк но данъяськытэк?! Уго Владимир Николаевич та газетлэн редакцияз ас творческой сюрессэ мытӥз вал. Малы-о ӵемгес вуылыны кутскиз Кильмезь музъеме тодмо гожъясь? Мугтэк ӧвӧл вылэм. Азьвыл вуылыкуз ик сое мӧзмылэс пумитам ни вордскем, пичи дырзэ ортчытэм атыкай юртэз. Та юрт вӧзтӥ ортчыку, синме шарак йӧтэ куашканы кутскем корка, пилиськем укно пиялаос, азбарысьтыз куасьмем эмезь пудъёс... Таӵе мӧзмылэс суредэз син азяз пуктыса ик тодмоосызлы гожтэтъёс ысъялляз Владимир Николаевич: "...Макем бадӟым шудбур со ас вордскем юртад улон-вылон, та юртын мон куно ӧвӧл. Кильмезьын мон вордски, быдэ вуи, нырысь яратонме пумитай. Тодӥськоды-а, кыӵе малпанэн кутске но йылпумъяське мынам югыт нуналэ? Зэм, шонер, Кильмезь сярысь соос. Ас малпанъёсам ӵемтылӥсько тодмо кужен сюресъёсы, адӟисько котырысь тодмо инкуазез. Мынам вордскем, улэм юртэ ас интыяз ик, адресэз но воштэмын ӧвӧл на: Советской ульча, 61-тӥ корка. Укно улысь арлыдо кызьпу вӧзы мерттэме потэ ненег палэзьпуосты..." Таяз учыре аслэсьтыз малпанъёссэ быдэстон вылысь бертылӥз Владимир Крупин. Ёросысь администрацилэн тӧроез Ю.Гулин валаз солэсь мылкыдзэ - писательлы аслэсьтыз вордӥськем юртсэ берыктӥз. Табере Москваысь Духовной Академиысь преподаватель, "Благодатный огонь". журналлэн редакторез ас палаз ӵемгес шутэтскыны, выль кужым басьтыны бертылоз. Н.Никифоров. Азьланезлы шуом Бен! Туннэ Ижевске вуэ "Бен!" акцие пыриськемъёсын поезд. Эстрадаысь, театрысь, киноысь кизилиос та поездэн ортчизы ни 14 сюрс километрлэсь ятыр, вуылӥзы Россиысь куамынлэсь трос городъёсы. Ужрадэз дасясьёс ас азязы валтӥсь ужпум пукто - Россиысь егитъёслы юрттоно куашкам мылкыдхзэс вормыны. Ог-огзылэсь палэнын уло ке но, Россилэн пӧртэм улосъёсысьтыз егитъёслэн сюлмаськонъёссы но осконъёссы одӥг кадесь. Ӵош кариськыса гинэ вормыны луоз шуг-секытъёсты. Малпанъёстэс быдэстонын нырысетӥез вамыш - ваньды огазе кариськыса вералэ Бен! Акцие пыроиськемъёс вазисько Россиысь пӧртэм арлыдо адямиослы, яратоно артистъёсмылэн концертъёсазы пыриськыса, озьы ик берло соосын ӵош азьлань улонмылы шуом Ген! Ирина Мирошниченко но Никита Джигурда, "Агата Кирсти" но "Ляпис Трубецкой" рок-группаос, Влад Сташевский, Диана, Натали но акцие пыриськем мукет аратоно артистъёсмы кык нунал ӵоже 10-тӥ но 11-тӥ ноябре концертъёс возьматыны Ижевскысь "Металлург" но "Аксион" культурая дворецъёсын. Со сяна, егитъёслэн ужпумъёссыя телевидение пыр луозы пӧртэм пумиськонъёс, ток-шоу шуон передачаос, журналистъёс но студентъёс озьы ик пумиськылозы "Бен!" акцие пыриськемъёсын. "Бен!" ужрад ортчемен валче шаерысьтымы Егитъёслэн но нылпиослэн крезьгуръя но эктонъя кошлективъёссы пӧлын ялэмын конкурс. Тужгес но усточиез коллектив пыриськоз Москваын ортчоно гала-концертэ. "Бен!" акциез радъясьёс - "Московский комсомолец" газет, "ТВЦ" телеканал" "Европа плюс" радиостанция. Л.Кимова. Кинлы куарамес сётом? Кинлэн уробояз пукиськод, солэсь ик кырӟаськод Кун Думае быръёнъёс азьын одӥгез но партия, огазеяськон но движение тэк уг улы, ваньмыз нюръяськонэ мылысь-кыдысь пырисько. Соос пӧлын тужгес но адскымонъёсыз - "Отечество - Вся Россия, "Союз правых сил", "Яблоко", "Наш дом - Россия", КПРФ, ЛДПР но мукетъёсыз. Маин та политической кужымъёс ог-огзылэсь пӧртэмесь? Тросэз огшоры бырйисьёс рос-прос уг но тодматско, дыр, соослэн программаосынызы. Вылаз ик, огъя кылъёсын со гожъямъёс ӵем дыръя меӵак уг возьмато партиослэсь но соослэн кивалтӥсьёссылэсь зэмос малпанъёссэс но ужпумъёссэс. Одӥгтэмак ваньзы кыл сёто странамес кужмогес но узыргес карыны, калыклэсь улонзэ умоятыны. Кинлы меда осконо, кинлы куараез сётоно? Таӵе юанъёслы валэктон шедьтон вылысь, ӧжытак коть валаны кулэ странаын быръёнъёс азьын кылдэм югдурез. Туала быръёнъёс, пусйыны кулэ, азьвылъёсыз сярысь пӧртэмгес. Ӝыны ар ортчыса, асьмеос быръём выль Президентэз. Зэм, азьвыл парламентэ но быръёнъёс озьы ик ортчизы вал. Но соку тодмо вал Президентэ кандидатъёс, нош таяз учыре - ӧвӧл. Малпан кылдэ, бырйисьёс куараоссэс сётозы сыӵе партия понна, кудӥзлэсь азьмуртсэ Президентэн адӟо. Озьыен, туэ быръёнъёс бордысь потоз, кызьы улоз страна, кыӵе сюресэтӥ мыноз азьланяз. Мукетыз аспӧртэмлык. Туэ быръёнъёс ортчо экономикаын секыт югдур вакытэ. Озьыен, отчы пыриськем кужымъёс коньдонэн туж ик бусьтыръяськыны уз быгатэ. Куинетӥез. Туж лэчыт нюръяськон пуромоз одӥг мандатэн округъёсын, малы ке шуоно, "паллянъёс" но, "буръёс" но, центристъёс но ляб огазеяськемын, соос солань-талань пазьгиськемын. Вылаз ик, тросэз политикъёс, Думае шедьымтэзылэсь курдаса, списокъёсын но, округъёсын но "шудозы". Туэ быръёнъёслэн мукет тодметсы - кырсь амалъёсты паськыт уже кутон. Сое асьмеос али адӟиськом ини нуналлы быдэ. Витетӥез. Политической партиос тачак но лябесь бере, соос тыршозы блокъёсы огазеяськыны. Та вакытэ 30-лэсь уно блокъёс но огазеяськонъёс Центриз биркоме сётӥзы ини кандидатъёссылэсь списокъёссэс. Специалистъёслэн малпамзыя, Думае 6-7 огазеяськонлэсь тросэз шедьыны уз быгаты. Туала вакытлы странаын политической югдур огсыргес, шуыны луоз. Выжы лэзизы политикаын но экономикаын эрикрадъёс, властьлэсь пӧртэм вайёссэ люкон, эрико но ӵошатскыса отчись быръёнъёс, иворъёсты эрико вӧлмытон, правовой государство, ужаны лэземын пӧртэм партиослы. Со дыре ик быдэстымтэез но тачак на. Быръёнъёсы пыриськемъёс та лэсьтымтэез чотын ик асьсэлы куараос люканы тыршозы. Тросэз вераськозы калыклэсь улон-вылонзэ умоятон, ӵуказе нуналлы оскон, ваньбур поттӥсьёслы дурбасьтон, государствоез юнматон но гажан сярысь. Соос одно ик лыдэ басьтозы тани мае но: - воштӥськонъёс странаын йылаз-пумаз вуттымтэ на; - социальной но политической азинскон сюресъёс но амалъёс пумысен огъя кыл ӧвӧл шедьтэмын; - Россиын котьку сямен бадӟым саклык висъяське, кин луоз вылӥ кивалтӥсь. Веранэз ӧвӧл, нюръяськонлэн шорсюлэмтӥз ортчозы реформаос. Лыдпусъёсты ке учконо, 39 процентэз калык воштӥськонъёсты азинтон понна, 27 процентэз - соосты дугдытон понна, 34 процентэз солань-талань шонасько. Валамон, та берлоосыз понна ик нюръяськон но луоз. Бырйисьёс, куараоссэс сётыкузы, одно ик лыдэ басьтозы Б. Ельцинлэсь но солэн котырысьтыз адямиослэсь политикаын туала интызэс но кужымзэс. Кыӵе мылкыдын улэ та виын Кремль? Умой адӟиське, Б. Ельцинлэн администрациез выль Президент быръем бере но кужымзэ утьыны малпа шуыса. Сыӵе мылкыдлэн мугъёсыз тодмо. Администрацилы Президент тупасьтэм адями луиз ке, со пыр-поч эскероз Б. Ельцинлэн но "семьяезлэн" кунгож сьӧрысь банкъёсын коньдонзы пумысен ченгешонэз. Кызьы со берытскоз Кремльын али пукисьёс понна - тодыны шуг ӧвӧл. Кыкетӥез. Ельцинэз Запад али но туж ик уг дунъя ни, отӥяз воксё но кулэ уз кары. США-лэн Конгрессаз угось меӵак верасько ини Россиысь "лушкаськись власть но лушкаськисьёслэн режимзы" сярысь. Ас понназ кышкытлыкез палэнтон понна, "семья" солы дурбасьтӥсь правительство утчаны но юнматыны турттэ, нырысь ик, премьер- министрез. С. Кириенко ӧз тупа, 17-тӥ августэ вуттӥз. Е. Примаков кема уз возиськы шуыса, азьвыл ик тодмо вал. Сое угось данакез калык гажа, нош Ельцин понна со лэчыт пурт кадь. Примаковез ӝутӥзы экономикаез пумозяз куашканлэсь утён вылысь гинэ. Кремль соку туж кышказ кризислэсь, соин котькыӵе вамышлы дась вал. Премьер ужпумзэ быдэстӥз но сое куштӥзы. Со интые пуктӥзы С. Степашинэз. Министр дыръяз со Кремльлэсь вань косэмъёссэ пал кылтэк быдэсъяз, котьма ласянь кылзӥськись вал. Нош Премьер-министр луэмез бере, сямзэ возьматыны ӧдъяз, аслаз визьмыныз ужаны кутскиз. Валамон, Кремльлы сыӵе "етӥз" кивалтӥсь кулэ ӧз луы. Вылаз ик, Администрациын со пумысен ченгешонъёс ӧз бырылэ. Со сяна, Степашин ӧз пыриськы Кремльлэн Ю. Лужковлы пумит нюръяськоназ. В. Путин юн мылкыдо кивалтӥсь, со дыре ик ваньзэ лэсьтэ Ельцинлэн косъяськемезъя. Чечняын война кутскем дырысен солэн данэз ялан ӝутске. Кавказын со вормисе потӥз ке, странаын самой гажано кивалтӥсь луыны быгатоз. Нош чидалоз-а меда таӵе югдурез Б. Ельцин? Вылаз ик, Путин аслэсьтыз кужымзэ шӧдыны но уката но возьматъяны кутскиз ке? Озьыен, Б. Ельцинлы нош ик утчано луоз выльзэ оскымон кивоштӥсь. Шедьтоз на ке. Малы ке шуоно, куд-ог политологъёслэн лыдъямзыя, вылӥ эшелонын Кремльлы дурбасьтӥсь кужмо кивалтӥсьёслы ёрмон шӧдӥське ини. Со понна тушмонъёс азьлоосыз но тырмыт, выльёсыз но йыло. Б. Ельцинлы но "семьяезлы" тужгес но кужмоез пумитъяськись - Юрий Лужков. Президентлы Москвалэн мэрез кемаласьгес ини кӧт вамен луиз. Нырысь ик, В. Черномырдинэз Премьер-министре юнматыны люкетӥз. Собере Федерацилэн Советаз ӟырдыт дурбасьтӥз Ю. Скуратов понна. Соин ик Кремльлэн али нырысетӥ ужпумез - "Отечество- Вся Россия" блокез лябомытон но солы пумит кужмо ёзэт кылдытон. Сое быдэстонын Администрация пыкиське А. Чубайс но Р. Абрамовичен Б. Березовский вылэ. А. Чубайс "бур" кужымъёсты Ю. Лужковлы пумит огазеяны турттэ. Березовский но Абрамович тросгес ужрадъёс чаклало. Соос Б. Немцовен но Е. Гайдарен огазеяськыны дӥсьтӥсьтэм (бырйисьёссылэсь дурбасьтэмзэс ыштозы шуыса) губернаторъёслэсь блок кылдыто но солы кивалтӥсе оскымон но со дыре ик выль, политикаен саптаськымтэ адямиез шедьто. Ю. Лужковлэсь - кужмо кивалтӥсьлэсь - хозяйственниклэсь - данзэ куашкатыны туртто. Со понна паськытато ивор вӧлмытон удысын луонлыкъёссэс, нош Лужковлы та ласянь люкето. Котькыӵе амалъёсты уже куто Ю. Лужковлэсь Е. Примаковен кусыпъёссэс суран-пожан вылысь. "Вся Россия" огазеяськонэ пырись губернаторъёсты я алдаса, я кышкатыса (трансфертъёс уз луэ), "Отечестволэсь" люкыны туртто. Та кык юлтошъёслэн индылэмзыя, Кремль аслаз бурд улаз кыскыны тырше одӥг мандатэн округъёсысь кандидатъёсты. Кремльлэн данэз калык пӧлын та вие улӥын ке но, солэсь кужымзэ лябен лыдъяны уг яра. Со али туж зол ужа, азьлане мерске. Со киын - туж бадӟым коньдон, данакез ивор вӧлмытӥсь ёзэтъёс, - со палан - государствоысь вылӥ кивалтӥсьёс. Соин ик Администрацилэн вормон понна луонлыкъёсыз ичи ӧвӧл. Но кызьы югдур берытскоз, соиз мукет блокъёслэн ужамзы бордысь потоз. Г. КОРЕПАНОВ. УСТОЕЗ ХОЗЯЙСТВО Кивалтӥсь ке ӟеч, улон но майбыр Ӟеч кивалтӥсен улыны но капчигес. Соин ик кивалтӥсьлэсь ужамзэ, нырысь ик, дунъяно, дыр, калыклэн улэмезъя. Солэн ужасьёсыз курадӟыса ке уло-ужало - со быдӟа ик кивалтӥсьлэн данэз но. Гуртын тыршисьёслэн нуналзы азьын Ижевскысь "Металлург" культура двореце туэ азьло аръёсы сямен ик данак калык люкаськылӥз. Татын данъязы, шуныт кылъёс веразы устоосыз пӧлысь устоосызлы. Соос пӧлын вал Глазов ёросысь "Луч" хозйстволэн кивалтӥсез Петр Николаевич Манашев но. Солы сётэмын Удмурт Республикаысь гурт хозяйство удысын дано ужась ним. Та кивалтӥсен но солэн хозяйствоеныз матэгес тодматскем потӥз. Глазове командировкае потон сямен нялтас со доры но кожано кариським. Гылёгурт - "Луч" хозяйстволэн центральной усадьбаез. Глазкарлэсь сокем ик кыдёкын ӧвӧл вылэм. Асфальтэн шобыртэм сюрес чаляк гинэ Гулёково гуртэ вуттӥз - озьы со нимаське ӟуч кылын. Гуртэ пырон азьысь ик синйылтӥм выжыкылысь кадь чебер коркаез. Бадӟым букваосын гожтэмын "Кемпинг". Фотокормы соку ик тодаз ваиз ар талэсь азьло татчы вуылэмзэ - сое усьтонэ пыриськизы вал республикамылэн вылӥ кивалтӥсьёсыз но. "Кемпинг" пуктэмын удмурт архитекторлэн Николай Волковлэн малпамезъя. Гуртын улӥсьлы та чебер юрт кулэ но ӧвӧл кадь. Со чакламын водительёслэсь но кыдёке мынӥсь-ветлӥсьёслэсь сюрессэс капчиятон понна: татын луэ сиськыны, шутэтскыны, кӧлыны. Но, кызьы бӧрысь валамы, гурт калык но солэсь пайдазэ шӧдыны кутскем: пумен дышиллям татын асьсэлэсь праздникъёссэс ортчытъяны. Пӧрало но татын туж ческыт, уката но усто пӧрмо удмурт сиёнъёс. Тӥни озьы тодматским татын ужасьёсын Галина Вячеславовна Савиноваен но Ольга Васильевна Юфереваен. Конторае пырыса, предэз ӧм шедьтэ - кыӵе ке ужъёсызъя Глазове кошкем. Но со берытскытозь, Гылёгуртэн но отын ужасьёсын тодматскыны вуим. Валтӥсь экономист Галина Александровна Юферева хозяйствозылэсь азинскемзэ тупен-тупен лыдпусъёсын возьматӥз. Кылем арын сярысь, та дырен ӵошатыса, тросгес йӧл кыскемын - одӥг скаллэсь 2 840 килограмм басьто. Уногес луиллям кунянъёслэн, парсьпиослэн лыдзы. Валтӥсь зоотехникен Валентина Витальевна Шишмаковаен фермае вуылӥм. Татын 19 скал кыскисьлэн бригадазы куинь дворъёсы (звеноосы) люкиськыса ужа. Соос куспын ӵошатскон радъямын. Чылк-чылк утялтэм горд сэреглэн борддораз котькуд пудо утисьлэн ужамез возьматэмын. Туэ укмыс толэзь ӵоже куинь сюрс килограммлэсь тросгес йӧл кыскиллям И.Ларионова, Н.Семенова, А.Невоструева, Е.Караваева, Н.Трефилова. Скалъёслэн лыдзы "Луч" хозяйствоын уг кулэсмы, кылем арын сярысь, кӧнялы ке йылэмын но. - Лейкозэн висисьёссэ соку ик быдтӥськом, - шуэ Валентина Витальевна. - Тау шуэм потэ кузёмылы. Эмъюмъёс басьтыны коньдон шедьтэ. Кышкыт висёнъёсты умой эмъюмъёстэк нокызьы но уд вормы. Валтӥсь зоотехник верамъя, пудо быронзы хозяйствоын ӧжыт. Пудоез ӟеч утялтыса возисьёслы, вань санитарной куронъёсты быдэсъясьёслы татын уждунзы вӧзы кӧня ке процент ватсаса коньдон тырыны туртто на. Скаллэн йӧлыз кыл вылаз, шуо. Соин ик тросэз потэ пудо возьмасьёс бордысь но. Та уже оскымон адямиос пуктэмын Марьин Леонид Владимирович но Корепанов Виктор Геннадьевич. Ужан интыязы пумитамы азьмынӥсь механизаторъёсты но. Казаков Владимир Николаевич кызь ар ужа ини, нош "корт валзэ" кык пол гинэ воштылэм, али Т-150 тракторен ужа. Нош Шишмаков Александр Анатольевичлы туэ шуд усем выль ДТ-75 тракторе пуксьыны. Выль техника басьтон - туэ колхоз понна бадӟым шумпотон ини. Дуно машинаез устоосызлы гинэ оско. Районысь комбайнеръёслэн ӵошатсконазы Александр Анатольевич туэ куинетӥ инты басьтэм - со 3 390 центнер ю тысь кутсам. Данъясько татын механизаторъёслэн Дьяконовъёслэн семьяенызы но. Атайзы сямен ик мылысь-кыдысь ужало Александр но Олег Дьяконовъёс. Пырамы школае. Со 1962-тӥ арын пуктэмын ке но, арлыдыз сокем ик уг шӧдӥськы - умой утялтэмын, тупатъямын, буямын. Лэсьтӥськон материалъёсын, транспортэн котьку но колхоз юрттэ, шуэ школалэн директорез Михаил Васильевич Князев, нош тупатъян ужъёсы мумы-бубыосты но бадӟым классъёсын дышетскисьёсты кыскиськом. 9 классэз йылпумъясьёс школаез тупатъяса кельто. Мар карод, улон косэ таӵе амалэз но уже кутыны. Школалэн мастерскойысьтыз адӟим киужен вырись пиосты, милесьтым пыреммес ӧз но шӧдэ кадь - сокем зол выро вал пу вӧлон ужен. Малпамы, марлы али дышетэ соосты егит дышетӥсь Евгений Петрович Манашев, соос ваньзэ уже кутыны быгатозы. Будозы, асьсэлы корка пуктозы, сое синмаськымон укно пужыосын чебермалозы. Гылёгуртын сыӵе коркаос трос гинэ адӟисько. Егит семьяос юртъёссэс ӵошатскыса сямен олокызьы но чеберманы туртто. Гуртлэн паськытэсь урамъёстӥз ортчыса, йӧн-йӧн сылӥсь выль коркаосты адӟыса, ужась магазинъёсы, школае пыраса, амалтэк малпанэ вуиськод: адямиос та гуртысь нокытчы но уз пегӟе, егитъёс но ас шудзэс палэнтӥ утчаса уз ветлэ. Мар бен кытӥ ке ветлонэз, умой улон понна татын ваньмыз вань бере! Ужез гинэ быгатыса радъяно. Зэмзэ но, нокыӵе мудрон кивалтон амалъёсты ми татысь ӧм адӟе. Но одӥгзэ туж умой шӧдӥмы: гурт калыклы пумен выльысь берыктӥське сыӵе улон, кудзэ 30-тӥ аръёсы выжыен быдтыны турттылӥзы. Крестьян калыкез татын дышето колхоз музъемлы, фермалы, ас сад- бакчаедлы кузё луыны. Нош кузё луыны уд ке быгатӥськы - кылдэ юало. Тӥни со бордын возиське, кызьы азьло шуысалмы, хозрасчёт. ... Ӝыт пал пумиським "Луч" хозяйстволэн кивалтӥсеныз Петр Николаевич Манашевен. Бигеръёс пӧлын вордӥськем но будэм мурт кема аръёс ӵоже ужа ини Глаз ёросын. Казаньысь гурт хозяйствоя институтэз йылпумъямез бере удмурт пияш агроном луыса ужаз Понино гуртын. Нош 1990-тӥ арысен кивалтэ "Луч" хозяйствоен. Со ӟечен тодаз вае та хозяйстволэсь азьвыл кивалтӥсьсэ Иван Андреевич Селезневез. Соин ӝутэм хозяйство "выльдӥськонлэн" тулкымъёсызлы ӧз сётскы. Гужем туэ кӧс улӥз. Музъем ужасьлэсь инмар нош ик палэнскиз кадь. Тросэз хозяйствоос республикаямы бадӟым ыштонъёс адӟизы. "Лучын" но туэ 6,9 центнер гинэ ю тысь октэмын. Соин ик 500 тонна пала фураж басьтоно луоз, шуэ Петр Николаевич. Сое нимаз крестьянъёслы но висъяны кулэ на. Но пудо сиён окмымон дасямын, турын но тырмоз. - Ачид ке ӧд тыршы, нокин уз юртты, - шуэ воргорон. Аслыз сяна, колхозлэн кузёез туж зол оске валтӥсь специалистъёсызлы - соос ваньмыз бадӟым опытэн, оске скал кыскисьёслы, пудо вордӥсьёслы, механизаторъёслы - мукет сямен вераса вань гурт калыклы. Макем золгес берло аръёсы государство палэнске гурт калыклэсь, сокем золгес юнма калыклэн ас музъемезлы кузё луон мылкыдыз. Тумошо кадь со - но озьы. Соин ик, кытын быгатыса радъямын гурт улон, отын курадӟонъёс но уггес шӧдӥсько. Т.Банникова. Туспуктэмъёсыз В.Камашевлэн. 1. Петр Николаевич Манашев - "Луч" хозяйстволэн кивалтӥсез. 2. Александр Анатольевич Шишмаков - устоез механизатор. 3. "Кемпингысь" пӧраськисьёс. 4. "Кемпинг" 5. Азьмынӥсь скал кыскисьёс. 6. Механизатор Владимир Николаевич Казаков. 7. Пудо возьмасьёс - Л.В.Марьин но В.Г.Корепанов. 8. Пиос дышетско пу вӧлон ужлы. Медам сётске выльысь пӧямлы 87 арес ӝоген тырмоз ни Августа Васильевна Конюховалы. Но со зол "нинэн керттэмын". Политикалэн нокыӵе кожонъёсыз но уг шонтыло сое солань-талань. Ми туж оскылӥм Сталинлы, компартилы, Правительстволы. Отечественной война дыръя атайёсмы, братъёсмы, пиосмы, "За Родину!", "За Сталина!" кеськыса, фашистъёслы, танкъёслы пумит ож тылӝуэ ӝутскылӥзы. Ожын бырем куинь братъёсы пӧлысь одӥгез - Будин Николай Васильевич, дышетӥсь, связист - Курской дуга дорысен апаелы но мыным гожтэт ыстӥз, партие пырыны рекомендациос курыса. Берлогес кыӵе шумпотыса ивортӥз, сое кандидатэ кутӥзы шуыса. "Бырыны ке кылдэмын, коммунист луыса мед быро!" - гожтӥз со. Сыӵе солдатъёс-патриотъёс трос сю сюрсъёсын, миллионъёсын лыдъяськизы. Ельцин но солэн юрттӥсьёсыз нуналысь нуналэ Сталинэз но компартиез курлало. Соос вунэтӥллям, Сталинлэн кивалтэмез улсын Родинамылэн юнмаменыз гинэ соос дунтэк вылӥ образование, учёной степеньёс басьтӥзы, лякыт но шуныт ужан интыосы выжыяськизы шуыса. "Господаос-демократъёс" Россиын капитализм кылдытыны кужмысь тыршо, шаермес берлань чигнато, эрико улонысь рабствое, зӥбет улэ кыско. Советской республикаосысь калыкъёсын вераськытэк, шӧдтэк шорысь СССР-ез пазьгизы. Коммунистъёсты сантэмазы, котькуд республикалы нимазы улыны, котькуд адямилы аслыз ваньбур поттыны, вузкарыны эрик ялӥзы. Республикаослэсь кусыпсэс быдтэмен, кун предприятиос ворсаськизы, ваньбур поттон чутрак кулэсмиз; колхозъёс куашказы; пудо вордон фермаос быризы яке лябӟизы, колхоз бусыосты жаг турын басьтӥз, калык ужтэк кылиз, начармиз. Ельцин калыкмес сюдыны ӧдъяз кунгож сьӧрысь дуно дунын, соослэсь ик пунэмен коньдон курыса басьтэм нянен, чай-сакырен, сӥль-вӧен. Магазинъёс сьӧрлось ваем, калыклы басьтыны луонтэм дуно вузъёсын тырмизы. Калык сютэм кылиз. Ваньбурез калык кие сётон - приватизация ортчытон улсын кипырмес адямиос валтӥсь заводъёсты, узырлык (нефть, газ, музъем эгыр, электрокужым, дуно изъёс, зарни) поттон интыосты дунтэм дунын асэстӥзы, вормымтэзэ кунгож сьӧрысь эшъёссылы- капиталистъёслы кузьмазы. Кӧня пол Ельцин музъеммес эркын вузан сярысь закон кутыны турттӥз! Музъем ужасьёс-крестьянъёс - молодцы! - уг сёто сюдӥсь-вордӥсь музъемзэс пыд улысьтызы вольтчытыны. Ельцинлэн кивалтэмез кекатӥз наукаез, культураез, литератураез, куашкатӥз нылпиосты дышетонэз, дауръёс ӵоже кылдытэм улон радъёсты, сямъёсты, калыкъёс куспын эшлыко улонэз. Таӵе "эрик" вуттӥз ужтэк кылёнэ, лушкаськонэ, наркомание, возьытэз ыштонэ, юонэ, эрказъяськонэ, адямиез быдтонэ... Закон луиз: ул, кин кызьы быгатэ, сюлмаськы ачид понна гинэ. Сталин вордскем музъеммес юнматон, тушмонлы вормонтэм карон, эрикмес утён понна миллион калыкез быдтӥз ке, Ельцин ма понна быдэсак хозяйствомес куашкатӥз, калыкез начармытӥз, трос миллион пересьёсты - социализм лэсьтӥсьёсты, эрикмес утисьёсты чидантэм секыт но сютэм улонэн сэрен сопал дуннее келяз. Вордэм пиосмес сюрсъёсын быдтӥз но быдтэ, сӧсыртэ Афганистанын но Чечняын, Дагестанын - кулэтэм, нодтэм ожмаськонъёсын. Кӧня калыкез номыртэм, гольык кельтэ со ожмаськон; кӧня егитъёс ог- огзэс виыло, асьсэдыз быдто. Нош кӧня миллион нылпиос, урод улэмен, ӧлексы, висись вордско. Кӧня адямиос бырон калэ вуттэмын тюрьмаосын, бекчеын кадь туйнаськыса, сютэм улэменызы - тросэз соос пӧлысь улонэз адӟылымтэ егитъёс яке сютэм нылпиоссэс сюдыны пичи лушкаськемзы понна гинэ пукисьёс. Нош зэмос бандитъёсты, миллионэн коньдон лушкасьёсты, кузёосмы сайяло, утё - соос кырын ветло, кыдёкысь музъемъёсын асьсэлы шукырес виллаос, замокъёс лэсьто. Ельцинлэн кунамы капитализм лэсьтон политикаез ӵошатонтэм трос калыкез быдтӥз но быдтоз на, яратоно Родинамес империалистъёслэн колонизылы, нош ужась калыкмес соослэн ляльчиоссылы пӧрмытыса. Америка но доллар кузёясько асьме дорын. Правительствомы ас калыкезлы но кунгож сьӧрысь кузёослы пумтэм трос тыронъёсыныз ӝокатэмын. Кыӵе шумпото со узыръёс СССР куашкамлы, соослэн дэмламзыя ужамлы. Кузёосмы асьсэ понна гинэ сюлмасько на. Вазен партмаксимум юнматэмын вал: огшоры адями ужамезъя котькӧня мед басьтоз, коммунист тупатэм уждунэзлэсь трос курыны уг быгаты. Нош али, ужась адями 400-1000 манет басьтыку, депутатъёслы 6000 манет уг тырмы, толэзяз дас сюрс манет тырыны куро. Ярано, коммунистъёс соослы эрик уг сёто. Шаермы выль быръёнъёслы дасяське. Калыкез пӧян но качан вылын узырмем "демократъёс" властез ас киязы возьыны туртто, огазеясько, люкисько, огаз, мукетаз партие выжо, пазьырско - асьсэ адямиоссэс вань сэрегъёсы чуртнаса, калыкез кызьы ке но выльысь пӧян понна. Ортчем быръёнъёс дыръя Ельцин алдаса, кузьымъёс, премиос ӵектыса, самой кыдёкысь гуртъёсын но куараос бичаса гинэ Президент луиз вал. Малы ке шат ог 400 бырйись мындаен гуртлы быръёнъёс ортчытыны быдэс миллион манет сётылӥзы. Неужто калык, нош ик пӧянъёслы, кузьымъёслы оскыса, Ельцинлэн гыжкалъёсызлы куаразэ сётоз? Оскисько, ужась калык янгышъёсыз вылын визьмаськиз, огъя ваньбурен куаем, узырмем "господаослы" кузёяськыны уз сёты ни, ас пӧлысьтыз визьмо пиоссэ, вордскем шаермы понна, ужась калыкъёс понна зэмос сюлмаськись адямиоссэ гинэ кивалтон уже быръёз. Августа КОНЮХОВА, калыкез дышетон удысысь отличник, Удмурт Республикаысь школалэн дано дышетӥсез. Гажано Михаил Тимофеевич! Удмурт Республикаысь Кун Кенешлэн но Правительстволэн нимыныз ӟечкыласьком Тӥледыз дано юбилееныды - 80 арес тырмемен. Тӥляд вань улонды герӟаськемын Атыкай музъеммес утёнэн. Трос нылпиё крестьян семьяын вордскыса, шуг-секытъёсты, курадӟонъёсты вормыса, Тӥ луиды быдэс дуннелы тодмо конструктор. Музъем вылын нокин ӧз кылдыты на сыӵе кужмо пыӵал тӥрлык. Тӥляд ужды герӟаськемын огшоры солдат сярысь сюлмаськонэн. Странамес утьыны солэн кияз оскымон ожгар тӥрлык мед луоз. Родина вылӥ дунъяз Тӥлесьтыд номырин ӵошатонтэм быгатонлыктэс. Тӥ пусъемын Андрей Первозванный Святой апостоллэн орденэныз, Тӥ луиськоды Социалистической Ужысь кык пол Герой, Ленин но Кун премиослэн лауреатсы, технической наукаосъя доктор, пусъемын уно орденъёсын но медальёсын, трос пол бырйылэмын вылӥ кивалтон ёзъёсы депутатэ. Тӥляд дуннелы тодмо луэмды, данды, Михаил Тимофеевич, эшшо огпол возьмато на, адями вань кужымзэ, мылкыдзэ сётыса, лулысь-сюлмысь тыршыса гинэ быгатоз вылӥ азинсконъёс басьтыны, малпанзэ быдэстыны, шаерзэ, ас калыксэ шудо карыны. Тӥляд Вордскем нуналды ошмесо шаерын котькуд улӥсь понна - бадӟым праздник. Тӥ Удмуртилэн данъяськонэз. Калашниковлэн лул кужымез бугыртэ, югдытэ ветеранъёслэсь но, егитъёслэсь но сюлэмъёссэс. Бадӟым тау Тӥледлы, Михаил Тимофеевич, Россилэсь но Удмуртилэсь кужымзэ юнматонын вылӥ вормонъёсты понна, юн тазалык но шудо-буро улон. Удмурт Республикаысь Кун Кенешлэн Удмурт Республикаысь Правительстволэн Тӧроез А. А. Волков. Тӧроез Н. А. Ганза. 13-тӥ ноябре - ляб адӟисьёслэн нуналзы Кыӵе меда тон, шунды? Тазьы луыны кулэ ӧй вал! Та адӟон - инкуазьлэн одӥгез бадӟым янгышез. Ма, азьвыл ӧжыт-а секытэн нылкышноос бусыын ужазы, культо ӝутказы, со улэ сюрыса шуккиськылӥзы? Но таяз учыре нуны синтэм вордӥськиз. Мискинь, кӧня выриз, кутэтъёсыз пӧлысь потыса, шунды шоры учкыны, солэсь югытсэ адӟыны - озьы ик ӧз кылды. 68 ар ӵоже син азяз пуктыны выре Кирилл Иванович Воронцов шундыез, югытэз, чибори возь вылэз - уг луы. Но со, оло, асьмелэсь ӟечгес шӧдэ-вала та дуннеез - солэн лэчытгес визьмыз, шӧдӥсьгес киосыз. Мумы-бубыез, синтэмъёслы нимысьтыз интернатъёс вань шуыса тодылӥзы ке но, пизэс сьӧрло келяны жалязы. Ма, Кирилл мукет таза пиналъёсын ӵош конькиен, куасэн нискыланы, лудэ вал келяны но быгатылӥз. Тямыс арескысен атаеныз ӵош пу но вандылӥз - ӧлексы шуыса ватскыса, бӧрдыса ӧз пукылы. Но эшъёсыз школае мынэм бере, Кирилл мылкыдтэм луиз - туж но туж вожъяськиз дышетскемзылы. Келязы Глазове. Отын пияш мылысь-кыдысь дышетскиз, туж ӝог дышиз Брайльлэн амалэзъя лыдӟиськыны, гожъяськыны. Школазэ усто йылпумъяса, Казань университетысь историко-филологической факультетэ пыриз. Тодонъёсыз мукет (адӟись) студентъёслэсь, оло, вылынгес но вал. Кириллэз соос туж гажазы - экзаменъёслы, зачётъёслы дасяськыны юрттылӥзы. Университетэз йылпумъяса, Кирилл Иванович Ижысь синтэмъёслэн предприятизылэн ӝыт ужась школаяз 27 ар ӵоже историлы но обществоведенилы дышетӥз. Но 1989-тӥ арысен странаямы воштӥськонъёс бугырскемен, тросэз историлы дышетӥсьёс ӟудӥзы, мукет сямен вераськемзы ӧз поты ни. Кирилл Иванович но - Калыкез дышетонысь отличник - ужзэ кельтӥз. Заводын кӧня ке ужаса кошкиз пенсие. Но визьмо муртлы шутэтскыны кылдымтэ, шӧдске. Кылем арын Кирилл Ивановичез ӧтизы Ижевскысь ляб адӟись пиналъёслэн сад- школаязы Брайльлэн системаезъя дышетыны. Ӝыны городэз ортчоно луэ со, ужаз вуытозь. Туж ӝож соиз - сюресэз бодыен выжыны турттӥсь муртэ нокин уг синйылты - донгаса лэзё. Туж уг кельшо Кирилл Ивановичлы туала егитъёс - укыр асьсэды яратӥсь будо. Соин йырин куддыр аслаз нылыныз но ченгешонъёс потало. Асьмелэсь сыӵе кас луэммес керпотытэк возьматӥськом висись муртъёслы. Соинтэк-а куддыр анай возьдаське очки нуллӥсь яке бинем синмын ветлӥсь пиналызлэсь - нылпи садысь шымырскыса, чиньыен возьматэмзылэсь кышкаса потэ. Со понна сад-школаын таӵе пиналъёсты нокин уг серекъя. Соосты татын ярато, дышето, эмъяло. Соос татын вунэто висёнзы сярысь - вань мукет таза пиналъёс сямен ик шудо-серекъяло, лыдӟисько-гожъясько, асьмелэсь уро сямъёсмес валаны, чиданы дышетско. ... 256-тӥ нылпи садэз соку ик ӧм шедьтэ. Юам пумитамы шедем кышномуртлэсь. - Со синтэмъёслэн-а? Уг тодӥськы, татын ваньмыз нормальноесь,- кушетскиз со. - Ӧвӧл, шӧдске. Асьмеос - ненормальноесь. Кылӥськоды-а? З. РЯБИНИНА. Шӧкыч Валэктонъёс Адями - калыке потыны быгатэм обезьян. Аракы - ю-нянез утялтон дыръя юон ву. Пельнянез но гылтыны луоно. Арбери - вашкала арийёслэн кельтэм бервылзы. Биарм - Премь карлэн вунэтэм нимыз. Болван - Болва шур дурын улӥсь мурт. Варяг - асьмелэн трос вуо ягын улэм выжыосмы, ӟучъёс али но сое уг валало на. Ву - кудӟытӥсь градустэк лэсьтэм юон (кизерэзь). Инмар - история кылдэмлэсь азьвыл кылдэм синпӧэт. Каламбур - кылам бур (кыл бур) Кортӵог - арлэн пумаз дыртыса лэсьтэм шуруп. Куала Лумпур - удмурт сямен нимам кар (Малайзилэн шоркарез). Микроб - атомез но очкитэк адӟыны быгатӥсь лул. Мыдор - святойёслы почёт доска. Пар - йыркурен ас пушкысьтыз потэм ву. Реклама - маке ӧвӧл со. Сарапул - шур пул (сарматъёслэн кельтэм чорыган арберизы). Су - ӵынэз суредан буёл (бигеръёс малы ке озьы шуо). Сябась - ым дась (ым пась но шуыны луоз). Хирург - пуртэн эмъяны дышем туно-пелё. Черк - инмарлы вӧсяськем понна дун тырон инты. Шурали - палэсмуртлэн шур сьӧры йыромем юлтошез. Эзь - маке но со. Эмеспи - егит мурт, кудӥз кышно вайытозяз ӧз но тодылы, кӧня солэн окмымтэосыз. Валэктӥз Альмакей Ади. Кун Дума бюджетэз эскере Толэзь ортчыса, Кун Дума ужзэ йылпумъялоз ни. Соин ик али депутатъёс 2000-тӥ арлы бюджетэз дыртыса эскеро. Уго кутытэк кельтӥзы ке, вуоно арез кык толэзьзэ бюджеттэк улом. Кун Дума кыкетӥзэ гинэ ай валтӥсь коньдон документэз лякытэн эскере. Примаков Правительствоен кивалтыку, бюджет нокыӵе могӟетъёстэк кутэмын вал. Евгений Максимович угось депутатъёслы меӵак вераз: мон премьер-министрын ужаны соку гинэ соглаш, куке Кун Дума мыным дурбасьтоз. Собере политика ласянь но, Примаковлэсь бюджетсэ кутытэк кельтыны уг луы вал. Туэ нырысетӥ лыдӟонъёс дыръя депутатъёс коньдон документэз выльысь Правительствое тупатъяны берыкъязы. Но кема ӝегатскыса ӧз улэ - выльысь со борды берытскизы. Калыкен быръем адямиослы ужзылэн берпуметӥ нуналъёсаз асьсэзыз чеберен возьматыны кулэ. Озьы котькудӥз комитет аслаз удысэзлы тросгес коньдон висъяны турттӥз. Собере бюджетэз мукетэзлы Думалы кельтӥзы ке, эскерон кема кыстӥськоз: выль депутатъёс ужзэс радъяны далай вырозы на. Соин валтӥсь коньдон документэз депутатъёслы одно ик кутоно луоз. Та вакытэ кыкетӥ лыдӟонъёсын Кун Дума 2000-тӥ арлы бюджетэз инъет карыса кутӥз. Тунсыко соиз: депутатъёс бюджетэз берпуметӥзэ эскерозы берпуметӥ ужан нуналазы. Тырмоз-а кужымзы, сётозы-а куаразэс коммунистъёс - улыса адӟом. Али Кун Дума дасо мында законопроектъёсты эскериз. Со пӧлын - уждунысь выт тырон но. Татчыозь вить шкалая выт тырим, табере куинья гинэ луоз на. Ар куспын 50 сюрс манетозь уждун басьтӥды ке - 12 процентсэ сётоды, 150 сюрс манетозь - 20-зэ, нош солэсь но трос ке - 30 процентсэ. Огъя учкыса, выт тыронлэн быдӟалаез кулэсмемын. Та закон кужыме пыроз 2000-тӥ арын 1-тӥ январе. А. ФРОЛОВ. Удмурт Республикаысь Кун Кенешлэсь куатетӥ (азьло чакламтэ) сессизэ люкан сярысь Удмурт Республикаысь Кун Кенешлэн ПОСТАНОВЛЕНИЕЗ Удмурт Республикаысь Кун Кенешлэн Президиумез пуктэ: Удмурт Республикаысь Кун Кенешлэсь куатетӥ (азьло чакламтэ) сессизэ люкано 1999-тӥ арын 16-тӥ ноябре 10 часын Ижевск городын. Удмурт Республикаысь Кун Кенешлэн Тӧроез А.А.Волков. Ижевск город, 1999-тӥ арын 9 ноябере. � 76-ИИ. *** Сессиын эскерыны чакламын таӵе ужпумъёс: - Удмурт Республикаысь Кун Кенешлэн "Удмурт Республикалэн Конституцияз воштонъёс но ватсанъёс пыртон пумысен дэмланъёс дасянъя ужась группа сярысь" постановлениезлэн инъетэз; - Удмурт Республикалэн "Удмурт Республикаысь калыклэсь юалляськон сярысь" законэзлэн инъетэз; - Удмурт Республикаысь Кун Кенешлэн "Удмурт Республикаен кивалтӥсез кызьы ниман пумысен калык пӧлын юалляськон ортчытон сярысь" постановлениезлэн инъетэз. НИМЫЗ - ДАНЪЯН ПУЛ ВЫЛЫН Нянь будэтӥсь Туала вакытэ адямиос пӧртэм сямен данэ пото: кин дворец пуктэ, кин машиназэ арлы быдэ вошъя, кин кунгож сьӧрысь йӧскадь уг бертылы... Нош Каракулино районысь ЪЪИИ партсъезд нимо колхозысь Павел Васильевич Самарин шаерамы тодмо луиз усто ужаменыз. Со нянь будэтӥсь. Тани 25 ар ӵоже гыре-кизе ни аслэсьтыз вордскем бусыоссэ. Лыдъя вал: кӧня пол меда котыръяз ни та воргорон кесэген-кесэген кыллись муосты! Сюрс иськемъёсын лыдъяськоз, дыр. Котькуд тулыс шумпотонэн пачылмем сюлэмыз дырк! луыса пуксе Самарин огдышем тракторезлэн рычагез сьӧры, пеймытозь кизе солы оскем бусыосты. Син азяз ӝужа, кужым люка небыт сюе согем кидыс. Аран ке вуэ, тракторзэ воштэ комбайнэн. Сыӵе ини нянь будэтӥсьлэн ужез - котьмалы киыд мед мыноз. - Туэ 8 сюрс 600 центнер ю кутсай, ю-нянь удалтон аре 10 сюрсозь но вуылэме вань, - шуэ Павел Васильевич. - Гектарезлы быдэ 21 центнер люкам. Районъя ке верано, самой ӟечез урожай. - Техникады чидаз на-а? - Чидаз. Тупатъяськом-кышъяськом но - нош ик азьлань. Миым арен ӵошатыса, туэ ятыргес ю-нянь люкам. П. В. Самарин армиысь бертыса гинэ умой-умой валаз, солэн интыез вордскем гуртаз, ас музъем вылаз шуыса. Школаез йылпумъяса, со но, трос мукет егитъёс сямен, кошкиз вал Ижевскысь ас шудзэ-бурзэ утчаны. Ӧз шедьты. Али серемез потыса вера городын улэмез сярысь. Нош нылпиосыз кыкез но дышетско Ижевскын: пиез - Гурт удысъя академиын, нылыз - Технической университетын. Кин тодэ, кытчы мынозы, кытын ужалозы соос диплом басьтэмзы бере. Бубызы огезлы оске: быръем удысазы соос йыг-йыг специалист луозы, ужлы пичиысен дышемын. Павел Васильевич Самаринлэн но тыршемез калык син шорын. Табере тусбуйзэ но быдэс шаермы адӟыны быгатоз - азьмынӥсь механизаторлэн нимыз пыртэмын Удмурт Республикалэн Данъян пул вылаз. Л. МЕДВЕДЕВА. Фотоез В. Камашевлэн. Валэктэ юрист Ужысь мозмытӥзы ке Монэ ужысь мозмытӥзы. Валэктэ вал, кыӵе учыръёсы адямиез ужысьтыз куштыны луэ. Н. ТИМОФЕЕВ, Ижевскын улӥсь. Уж сярысь законъя Кодекслэн 34-тӥ ёзэтаз тазьы валэктэмын: Ужасьёслэсь яке штатлэсь лыдзэ кулэстыку, ужазы кыльыны бадӟымгес право сётӥське тужгес вылӥ азинлыкен но тодон-валанъёсын (квалификациен) адямиослы. Огкадь азинлыкен но квалификациен адямиос пӧлын уже кыльыны бадӟымгес луонлыкъёс сётӥсько: семьяен улӥсьёслы - кык яке солэсь тросгес сюдоно-утялтоно муртъёссы (иждивенец) вань ке; ужасьлы, кинлэн семьяяз со сяна ӧвӧл ас понназы уждун басьтӥсьёс; та предприятиын, учреждениын, организациын вис карытэк кема дыр ӵоже тыршисьёслы; та предприятиын, учреждениын, организациын вӧсь луыны шедем яке профессиенызы герӟаськем висёнэн курадӟисьёслы; ужазы вис карытэк вылӥ но шор ёзо дышетон заведениосын тодон-валанзэс будэтӥсьёслы; ожысь сӧсыръёслы но СССР-ез утьыкузы бырыны шедем но ивортэк ышем военнослужащийёслэн но партизанъёслэн семьяосысьтызы адямиослы; изобретательёслы; военнослужащийёслэн кышнооссылы (картъёссылы); запасэ келям военнойёслы; Чернобыльын пуштон дыръя радиация пыӵаса (лучевой) висёнэн черлам муртъёслы, сӧсыръёслы, кинъёслэн сӧсыр луэмзы герӟаськемын Чернобыльын пуштонэн, 1986-1990 аръёсы Чернобыльын луэм шудтэм учырлэсь бервылъёссэ быдтон-утялтонэ пыриськемъёслы, озьы ик та зонаысь поттэм муртъёслы но мукет интые келямъёслы, соосын оградэ пыртэмъёслы. 1. КЗоТ-лэн 34-тӥ ёзэтаз валэктэмын ужасьёслэсь яке штатлэсь лыдзэ кулэстыку котькуд адямилы нимысьтыз дунъет сётон пумысен. 2. Статьялэн 1-тӥ люкетаз нырысь интые пуктэмын таӵе куронъёс: тужгес но вылӥ азинлыкен ужан но квалификация, мукет сямен вераса, ужын вылӥ быгатонлыкъёс. Адямилэсь быатонлыкъёссэ дунъяны правоез вань уж сётӥсьлэн гинэ. Дунъет котькуд ласянь шонер мед луоз шуыса, одно ик лыдэ басьтоно пӧртэм куронъёсты: ужез кызьы быдэсъямез, дышетскемез, тодон-валанэз но мукет. 3. Ужысь мозмытыны чаклам адямиослэн быгатонлыкъёссы огкадесьгес ке, быръёнэз соку ортчытоно КЗоТ-лэн 34-тӥ статьяезлэн 2-тӥ люкетэз вылэ чӧлскыса но адямилэсь пӧртэм ласянь быгатонлыкъёссэ лыдэ басьтыса; 4. 33-тӥ ёзэтлэн 2-тӥ люкетаз висъямын ӧвӧл ужасьлэн кыӵе ке нимысьтыз пусйымон быгатонлыкъёсыз, соин ик соос огкадесь луо. Соин ӵош ик, ужась адямилэн луонлыкез вань ас ужаз ик кыльыны, солэн со понна куд-ог правоосыз ке вань. 5. Ужасьлэн семьяяз сюдоно-утялтоно муртъёс (нош сыӵеос вань ке, уже кыльыны тросгес луонлыкъёс) пӧлы пыро сыӵеос, кудъёссэ ужась мурт быдэсак ачиз возе яке солэн юрттэмез чотын гинэ уло. 6. Штатэз кулэстыку уж сётӥсь уг быдэсъя ке 34-тӥ ёзэтлэсь куронъёссэ, ужысь мозмытэм мурт быгатэ сое ужан интыяз ик кельтон сярысь курыны. Сямъёс но йылолъёс Ма со сыӵе сутка пус? Али сутка пусъёс ӧвӧл ни. Ми пиналгес дыръя, войналэс азьло, гуртын сутка пус возё вал. Кин дорын сутка пус луэ, со доры кӧлыны пыро вал кураськисьёс, сюресчиос, чиганъёс. Сутка пус возисьёс, ӝытазе чай пӧзьтыса дасяло. Кытӥ кӧлӥсьёс трос кузя но люкасько, нош кытӥ нокин но уг луы. Ӵуказеяз ӵукна сутка пусэз вӧзысь корка нуо. Озьы со быдэс гуртэз котыртэ тол но, гужем но. В. Мошкин. Завьял ёрос. ЮБИЛЕЙ АЗЬЫН АДӞЫТОН Лыкты, адӟы тусбуйдэ Удмуртиысь Художникъёслэн союззылы 60 ар тырмонлы но суредасьёслэн вуоно съездзылы сӥзьыса, Иж карысь Пушкин ульчаысь адӟытон залын бадӟым выставка ужа. Татчы 90 пала киужъёс поттэмын. Отын ик Петр Ёлкинлэн, Борис Постниковлэн но мукет тодмо суредасьёслэн ужъёссы. Суредъёсын ӵош скульптураос но возьматэмын. Синмаськымон пӧрмемын Александр Суворовлэн но Дмитрий Постниковлэн пулэсь "Начало" киужзы. Шаерысьтымы Художникъёслэн союззылэн тӧроезлэн Петр Ёлкинлэн верамезъя, татын пинал суредасьёслэн но ужъёссы возьматэмын. Ошмесо шаермылэн чебер но шулдыр интыосаз, пӧртэм сэрегъёсаз вутто соос. Адӟытонын трос портретъёс. Кылсярысь, Леонид Прозоров графика амалэн кагаз вылэ кельтэм тодмо конструкторлэсь Михаил Калашниковлэсь тусбуйзэ. Адӟытонэ Михаил Тимофеевич но вуылӥз. Портретъёссэ туж вылӥ дунъяз со. Нош тон, лыдӟись, вуылӥд-а ни та выставкае? Ӧд ке - дырты. Оло, тон но ас тусбуйдэ шедьтод отысь? 20-тӥ ноябре адӟытон ужзэ йылпумъя. О.Москова. Улонлэн поглянъёсыз Кыква пиос Валерий Телицын но Анатолий Булдаков сярысь "Удмурт дуннее" гожъякум, мон амалтэк син азям пуктылӥ соослэсь эшсэс Анатолий Ивановез но. Куиньназы ик туж лякытэсь, асьсэды возьыны быгатӥсесь, котьмае тодыны тыршисесь, куиньназылэн ик калык понна тыршон - нырысетӥ интыын. Огъёзоос, одӥг школаын, сельхозинститутын дышетскемын, музъемен юн герӟаськемын, кивалтӥсьёс луо. Пиналъёссы но соослэн, вераськем кадь, огмындаен: кык ныл но одӥг пи. Одӥг выжыысь писпу вайёс кадесь та эшъёс, но пӧртэм пала шонало-полысало... Туэ шуныт август нуналъёс вунонтэмесь луизы Анатолий Михайлович понна: со вуылӥз Венгер Республикае. Вить нунал куспын трос тунсыкозэ адӟиз, тужгес но паймиз Будапештлы. Ог 120 иськем со вӧзын йӧл кыскон комплекс. Котькуд скаллэсь татын араз 6400 килограмм йӧл басьто. Валамон, солы юрттэ зол механизация, скалъёсыз умой сюдон, чылкыт возён, ачиз инкуазь. Собере... нылкышноос пудооссы шоры чик уг черекъяло, лад-лад, лякыт ужало. - Ми шоры мадьяръёс нимысьтыз гажаса учкылӥзы, - шуэ А. М. Иванов. - Тодо уго, соослэн вашкала музъем вылысьтызы лыктэмын шуыса. Анатолий Михайлович дас ар ужаз "Ижевское" опытно-производственной хозяйствоын валтӥсь агроном луыса. Республикаямы устоез картофка будэтӥсь луиз. (Сое возьматылӥзы Удмурт телевидение пыр, со сярысь радиопередачаос дасязы В. Ивашкин но И. Аркашев.) Али та хозяйство "Элита. Корма" научно-производственной огазеяськон луэ, Гурт хозяйствоя Удмурт кун научно-исследовательской институтлэн эскеремез улсын ужа. Нош кивалтэ соин Анатолий Иванов, Удмуртиын гурт хозяйство удысысь дано ужась. Тусбуйзэ солэсь адӟыны луэ Завьял ёрослэн Данъян пул вылысьтыз но. Музъем ужан, агрономия ласянь вылӥ тодон-валанъёс сётэмзы понна Анатолий Михайлович тау каре Гурт хозяйствоя институтысь (али академиысь) дышетӥсьёсызлы Игорь Иванович Вараксинлы но Михаил Григорьевич Концевойлы. Нош дась тэркы вылын номыр уг сётӥськы. Ачиз пӧсятэк-тыршытэк ӧй луысал со отличник но, ӧй лэсьтысал докладъёс студентъёслэн научной конференциосазы. Анатолий Ивановлы наукае сюрессэ волятыны юрттӥз, шуыны луэ, Перме творческой студентъёслэн форумазы ветлэмез. Вить ар шӧдылытэк ортчиз, отличиен диплом басьтӥз но, егит специалист Як.-Бодья ёросысь "Забегаловский" совхозын валтӥсь агроном луиз. Ӝыны ар ортчыса, сое армие келязы... Идӟи шурлэн тулкымъёсыныз, эркын бусы тӧлъёсын эркиям-вешам пияш пичиысен ик малпаз вал агроном луыны, яке... танкист. Кыкез но малпанэз быдэсмиз. Нош ноку ӧз малпалля, пинал дыръяз лыдӟем книгаысьтыз геройлэн, Дерсу Узала пӧйшурасьлэн ветлэм пытьыетӥз танкен ортчылыны кылдоз шуыса. - Мыным шуд усиз Владивосток дорысь Уссурийской тайгаын танковой батальонын служить карыны, - шуэ Анатолий Михайлович. - Огпол гинэ ӧй адӟылы тигр пытьыосты. Боецъёслы мон соку ӵем гинэ мадьылӥ пӧртэм пӧйшуръёслэн улон-вылон сямъёссы, озьы ик турын-куаръёс сярысь. Дыр ке луэ, командиръёс но куро ни вал: "Иванов, мадь ай милемлы маке..." Уно кидысъёсын бертӥз со вордскем палъёсаз. Опытной станциын ужаны кутскыса, тулыс ини лӧптымон шумпотыса учкылӥз Приморьеысь ваем кидысъёсызлэсь удамзэс. Укыр ческытэсь но бадӟымесь будӥзы дыняос, арбузъёс. Гуртоосыз -кыквиос юнме уг шуо вал сое чупрес Толик. Мӧйыос борды, дышетӥсьёс котыре но биняськылӥз. Школаын - питран-бугор кадь, котькытчы вуттӥськылӥз. Быдэ вуэмез бере ини, таӵе сямызлы луыса, уно лекциосын калык пӧлы потамез понна ВЛКСМ- лэн ЦК-езлэсь Почёт грамотазэ басьтӥз. 1977-тӥ арын тулыспал Анатолий паръяськиз сельхозинститутлэсь экономикая факультетсэ йылпумъям нылашен Тамараен. Табере ини пизы Олег медициная академилэн берпум курсаз дышетске, нылзы Елена - татын ик куинетӥ курсаз, Люда - Первомайский посёлокысьтызы А. Сабуров нимо школаын 9-тӥ классын. Анатолий Иванов мушъёсыз яратэ на. Ачиз но соос кадь ик тыршись. Сыӵе муртлы оскизы ёрос Думалэн депутатэз луыны. Солы сётэмын Удмурт Республикалэн Правительствоезлэн Данъян грамотаез но. Таӵе муртъёс - улонмылэн поглянъёсыз кадесь. Оло нош улонмы тып-тып пуксемын луысал ни... В. Поздеев. Гурт хозяйство удысысь дано ужась Анатолий ИВАНОВ. ТОДМАТӤСЬКОМ КУН ДУМАЕ ДЕПУТАТЭ ӴЕКТЭМ МУРТЪЁСЫН Владимир ПОДОПРИГОРА Кылӥськоз-а асбме куара? Удмурт Республикая кинэ бырйыны кулэ Россия Федерациысь Кун Думае? Кин ке, оло, шуоз: одно ик мед вордӥськемын луоз шаерамы. Нош ужпум со бордын меда? Владимир Николаевич Подопригора улонэ вамыштӥз Казахстанысь Балхаш городын. Школаез йылпумъяса, чугун сюрес вылын ужасьлэн пиез аслэсьтыз шудзэ утчаны потӥз. Поезд сое вуттӥз Ижевске. Владимир валаз - солэн интыез татын, удмурт шаерын. Дышетскыны пыриз механической институтэ. Татысен ик пумитаз яратоно кузпалзэ Раяез. Кызь ньыль арзэ ини соос шумпотонъёссэс но куректонъёссэс шори люко, кык нылпизэс будэто. Институтэз йылпумъяса, егит кузпалъёс ужаны интыясько Можгае. Та город соосты кема аръёслы бордаз бурмытӥз, вордӥськизы нылпиоссы. Можгаысен ик Владимир Николаевичлэн будон сюресэз кутске. Нырысь вал инженер-конструктор, собере инженер-технолог. Ужзэ вис карытэк, вить ар ӵоже кивалтӥз пинал картингистъёслэн секциенызы. Ваменэс сямзэ лапкатон понна огвакытэ кивалтӥсе пуктӥзы заводысь одӥгаз тужгес бере кылись цехе. Ӝыны ар ортчыса, югдур отын тупатскиз - юон учыръёс кулэсмизы, план быдэсмыны ӧдъяз. Нош ар ортчыса, цехысь коллектив городысь Данъян пул вылэ интыямын вал. 1988-тӥ арын Владимир Николаевич луэ Можга городысь исполкомлэн кивалтӥсезлэн нырысетӥ воштӥсез. Нош кык ар ортчыса, вормисе потэ Россиысь Вылӥ Кенеше быръёнъёсын. Со дырысен депутат Владимир Подопригора Удмуртилэсь но кулэяськонъёссэ уте Россиысь кивалтон ёзъёсын. Вылӥ Кенешын депутат луыса, 34 законопроектэз дасянэ пыриськиз. Выль быръёнъёс нош ик ваё вормон. Табере со Удмурт Республикалы дурбасьтэ Федерация Кенешын, кивалтэ Международной ужъёсъя комитетэн. Выль удыс, калыклэн оскемез кулэ каро трос тодон-валанэз. Владимир Николаевич нош зыме дышетскон дуннее. Депутат дыръяз со йылпумъяз Калык хозяйствоя академиез но Дипломатической академиез. Озьы со басьтэ куинь вылӥ образование. Удмуртиын улыкуз но Россиысь вылӥ кивалтон ёзъёсы депутатэ быръемзы бере но Владимир Николаевичлэн сюлмыз висиз шаермы понна. Муг тупаку, котьку кыл-куара поттылӥз бырйисьёсызлэсь куронъёссэс быдэстон понна, юрттылӥз заводъёслы, городъёслы, республикалы. Экспертъёс-политологъёс депутат Владимир Подопригора сярысь вераллязы, Россия Федерацилэн кивалтон ёзъёсаз Удмуртияя со одӥгез тужгес кужмоез но быгатӥсез, со пыртэмын вал Россиысь 100 валтӥсь политикъёс пӧлы. Удмуртиысь потэмъёс пӧлын со огназ, кинлы кыл сётъязы ООН-лэн трибунаяз. Но улон кожъёслэсь кудпала бергамзэс уд вала, политика ваменъяськись маке угось. Владимир Николаевичлэсь тодон-валанъёссэ, быгатонлыкъёссэ, бадӟым адямиосын кусыпъёссэ Удмурт республикаын адӟымтэ улсы кельтӥзы. Со понна Подопригораез синйылтӥз Новгород областьысь губернатор Михаил Михайлович Прусак, ӧтиз аслыз кивоштӥсе. Визьмо политик но экономист аслэсьтыз со быгатонлыкъёссэ Удмурт Республикае но пыӵытыны дась. Со тодэ, кызьы туннэ пыд йылаз ӝутоно асьме экономикаез. Россия Федерациысь Кун Думае шедён со понна трос луонлыкъёс усьтысал. Кулэ-а шаермылы сайкыт визьмо адямиос? Кулэ ке, малпаське ни асьтэос. Л.Широбокова. Печатлаське дунтэк. Инты висъямын В.Подопригоралы. Чебершурын вордско чуръёс Глазкаре вуэм бере ёрос библиотекае пыри ке, отын ваньмыз ужасьёс ӟучъёс луозы шуыса малпай вал. Янгышаськем. Ваньзы сямен вирсэрлы, лач-лач удмурт кылын верасько. Ужзэс яратӥсь нылкышноос туж тунсыко ужрадъёс ортчытъяны малпаллям. Ёросын гожъясьёсын нимысьтыз кружокъёс-пумиськонъёс уг ортчытъяло бере, соос библиотекаязы "Муза" клуб усьтӥллям. Табере котькуд гожъяськись - кылбур-а, верос-а со пӧра - сюлэмзэ усьтыны быгатоз татысь эшъёсыз азьын. Трос гинэ ни сыӵеос люкасько ёросын, соос мыло-кыдо лыкто сьӧрлось гуртъёсысь но. Шумпотоно соизлы, татын асьсэ кужымен поттыны быгатӥзы "Ваньмызлы уд усьты сюлэмдэ" - кӧня ке авторъёслэсь огазеям кылбур сборниксэс. Уже кутымон пӧрмем со. Книгаез усьтэм бере ик син азе йӧто Галина Баженовалэн тусбуез но сюлмысьтыз кисьтэм чуръёсыз. Октябрь толэзьлэн берпуметӥ нуналъёсаз Чебершур (В. Парзи) гуртыс библиотекаын туж шуныт пумиськон ортчиз. Со быдэсак сӥземын вал Галина Баженовалэн творчествоезлы. Кылбурчи вакчияк мадиз вордскем гуртэз, анай-атаез, дышетскем аръёсыз но егит дырыз сярысь. Вордӥськем со 1957-тӥ арын синмаськымон чебер гуртын. Школаез йылпумъямез бере кема гинэ ужам Глазовысь вуриськон фабрикаын. Но сюлэмыз уг тупа городын, берен куриське вордӥськем палъёсаз. Нош кылбур чуръёс Галина доры шӧдтэк шорысь вуиллям, кема-кема ватӥськыса улэмзы бере шарае потоно ик кариськиллям, луоз. Одӥг пол, шуэ, больницаысь бурмыса потон азям, эмъясьёслы мар ке но ӟеч лэсьтэме потэ. Нош кызьы? Соку ик йыре малпан лыктӥз, вай, пе, тау карыса эскеро ай кылбур чуръёсын гожтыны, оло, мар ке но пӧрмоз. Бумага вылэ ӟечкылан чуръёс вуэм тысь кадь жиляк киськизы. Собере Галиналэн эшшо но мылкыдыз пуромиз, кылбур чуръёс солэсь, оло, йырзэ ик берыктӥзы. Озьы тӥни чур бӧрсьы чур вордске, гожъямъя гожтэм потыны кутске. Али почтальон луыса ужа бере, ялан со сюрес вылын, огназ ветлонъяз кырӟан но нёжъя, кылбур чуръёссэ но малпа. Нош со сюлэмез вырӟытӥсь кылъёс вордскем палъёс но яратон сярысь, пичи дыр но анай, ӵош шудэм эшъёс, ӵыдыны луонтэм инкуазь сярысь. Анай кылыныз сяна, Галиналэн умой пӧрмо ӟуч сямен чуръёсыз. Галялэсь пичи дырзэ синву пыр тодаз ваиз Васса апай (Пономарёва). "Артэ улӥмы бере, весь син азям будӥз нылаш, - шуэ кышномурт. Нош кинлэсь, кытысь солэн сыӵе быгатонлыкез? Ужез яратэмез бордысь, дыр". Галиналы сӥзем кылбурзэ лыдӟиз Клавдия Андреевна Баженова но. Асьсэлэсь ик малпам частушкаоссэс кузпалэныз ӵош балалайкаен шудыса кырӟазы. Ӵош дышетскем аръёссэс тодаз вайыса вераськиз Глаз карысь библиотекарь Н. А. Сустаева. Галиналэн кык пиосыз, соослы но сӥзем чуръёсыз вань, Алёшаез армиысь бертӥз ни, нош пичиез, Андрей, школае ветлэ на. Та ӝытэ со анаезлэн кылъёсызъя гожтэм кырӟанзэ кырӟаз. Улонлэсь чеберзэ адӟыса, вӧзысь ӟеч калыктэ шӧдыса, кыкназы но пиос анайзылэсь адӟем каро - кылбурало. Озьы ик Галиналэн кылъёсызъя чебер крезьгуръёс кылдытъя Глазовысь Леонид Васильевич Лихачёв. Аслаз балалайкаен шудэменыз паймытӥз со калыкез. Мынам но кылъёсыя чебер кырӟан пӧрмытэм. Нылкышнолэсь ужзэ, кылбур удысын вамышъямзэ дунъяса вераськиз гурт администрацилэн тӧроез Н. В. Жуйков. "Ку гинэ эн пумита та мусо нылкышноез, со котьку пальпотэ, журнал-газетъёссэ адямиослы шумпотыса люкылэ. Солэн сюлэм шунытэз пыр ӧръясько, дыр, сыӵе чебересь гуръёс, сотэк со нокызьы уз пӧрмы!.. Быгатыса но валаса, тыро-пыдо, шуыны луоз, ӝытэз нуиз Глазкарысь ик библиотекаын ужась Ольга Геннадьевна Воробьева, Чебершурысь библиотекаын ужасьлы Эльза Дементьевна Барышниковалы но тау карыны, шуныт кылъёс вераны кулэ. Озьы ик тау шуыны луоз та ужрадэз ортчытыны юрттӥсь адямиослы: культура отделын ужась С. Н. Захаровалы, Глаз ёрос библиотекалэн кивалтӥсезлы И. В. Кутявиналы, отын ик ужасьёслы - Н. А. Сусловалы, И. В. но Е. Г. Ворончихинаослы. Мытэм ужды мед азинскоз, мусо нылкышноос. Любовь Тихонова, кылбурчи. ШӦКЫЧ Городысь транспортэн дунтэк ветлӥсьёс али ог 50 пумо категориослы люкисько. Бадӟым уждун басьтӥсьёс но "луд кеч" чотын ветло. Нош берло дыре трос луизы "фальшивой" билетъёсын ветлӥсьёс. Соос документъёсты ксерокс пыр потто но дунтэмен вузало. Озьы кун казна уно сюрс манетъёслы ыштонъёс адӟе... (Газетъёсысь). Билет эскерись: - Тӥляд билетты пӧяськыса лэсьтэмын, гражданин. Пассажир: - Мон сое, гажано эше, киоскысь басьтӥ. Суредэз Л.Прозоровлэн. "Бен!" - асьме дорын Ижевске вуиз егитъёслы сӥзем "Бен!" ("Да!") акцилэн поездэз. Кызьы ивортӥмы вал ини, отчы пырисько киноысь, театрысь но эстрадаысь кизилиос - Ирина Мирошниченко, Никита Джигурда, Натали, Влад Сташевский, Диана, "Агата Кристи" но "Ляпис Трубецкой" рок-группаос. Кызьы соос асьсэос верало, ужрад малпамын егитъёслэсь мылкыдзэс бугыртон, соосты одӥг радэ огазеян понна, страна азьын сылӥсь ужпумъёсты быдэстонэ ӝутон понна. Со пумысен яркыт вераз Россиысь калык артистка Ирина Мирошниченко: - Мед юнгес жугиськозы егитъёслэн сюлэмъёссы, мед яратозы соос та бадӟым, номырин ӵошатонтэм странамес, мед сайкалозы адямиослэн мылкыдзы но визьзы, котькудӥзлы мед пыӵалоз азьланезлы но аслаз кужымезлы осконэз. Куноос шулдыр яркыт концертъёс возьматӥзы, егитъёсын тодэ кыльымон пумиськонъёс ортчытъязы. Соослэн кузь сюрес вылазы - Ижевск 32-тӥез город. Ӟеч ужрад малпаллям сое ортчытӥсьёс - ТВЦ телеканал, "Московский комсомолец" газет но быръёнъёсъя "Отечество - Вся Россия" огазеяськон. Г. ПАВЛОВ. Быдӟым конструкторез Путин но ӟечкылаз Толон Ижевскысь Операя но балетъя театрын ортчиз Россилэсь но Удмуртилэсь дано пизэ М. Т. Калашниковез 80 ар тырмонэныз данъян. Быдэс дуннелы тодмо конструкторез ӟечкыланы вуылӥзы Россиысь Правительстволэн кивалтӥсез В. Путин, обороная министр И. Сергеев но Москвалэн мэрез Ю. Лужков. Та нуналэ ик В. Путин военнослужащийёслы улон интылы сертификатъёс сётъяз. Михаил Калашниковлэн юбилееныз валче республикаямы кунгож сьӧрысь но уно куноос вуылӥзы. Трос аръёс ӵоже Калашниковлэн ватыса возем нимыз табере вань дуннелы шараямын, соин ик кыдёкысь адямиослы но "улэп легендаез" адӟыны, соин тодматскыны луонлык усьтӥськиз. Сӥё-дано конструкторез данъян республикамы понна бадӟым праздниклы пӧрмиз. Пичи Удмуртилэн данэз уката но вылӥе ӝутскиз кадь. Т. МИРОНОВА. КУН КЕНЕШЫН Азьло пусйымтэ сессия Кун Кенешлэн Президиумезлэн заседанияз ивортон лэсьтӥз Правоя управленилэн кивалтӥсез Константин Глухов. Кызьы со пусйиз, та ужпум нырысь ик герӟаськемын "Удмурт Республикалы Вылӥ кивалтӥсь (глава яке президент) быръёнэн валче юалляськон ортчытонэн. Та пумысен шаерысьтымы улӥсьёс ас мылкыдзэс вераны кулэ. Собере гинэ яке вуоно арын май толэзе Удмурт Республикалэн Конституцияз воштонъёс но ватсанъёс пыртоно луоз. Кенешын озьы ик рос-прос вераськон мынӥз юалляськонлы кӧня коньдон быдтон ласянь. Президиуме ӧтёно луизы Быръёнъёсъя кун комиссилэсь тӧрозэ Афанасий Тубыловез. Со шуиз: - Быръёнъёсты но юалляськонъёсты ортчы тонлы висъям коньдонмы быдтымтэ на, 2 миллионэз кылемын. Нош калыкен юалляськонлы нырысь чакламын вал одӥг миллион манет пала но со лыдпус 670 сюрс манет кельтэмын. Заседаниын мукет но вераськон вал. Кылсярысь, Удмурт Республикаысь прокурорлэн нырысетӥ воштӥсез Г. Ахметов та юалляськон референдумлы тупа шуыса пусйиз. Кун Кенешысь Бюджетъя но экономикая ялан ужась комиссилэн тӧроез Софья Широбокова люкаськемъёслы ивортӥз 2000-тӥ арлы социально-экономической азинсконъя программалы но Кун бюджетлы инъетъёс сярысь. Г.Романов. Пыӵал, автомат но патронъёс Россия Федерациысь ФСБ-лэн Удмурт Республикая управлениез "Вихрь-антитеррор" ужардэз ортчытыкуз, шараяз пыӵал поттӥсь заводъёсын ужасьёслэсь лушкаськон учыръёсты. Озьы эскерон-утчан дыръя шедьтэмын Калашниковлэн 2 автоматэз, Макаров системая 3 пислолет но соослы патронъёс. Та пумысен ӝутэмын нимысьтыз уж. 1-тӥ ноябре - Куӟебай Гердэз буре ваён нунал Одно ик утёно - Кыӵе уло ни та вакытэ вавожъёс? Культура удысэз малпаса сётэм юанэлы ёросысь культурая ёзэн кивалтӥсь В. Г. Шутов шуиз: - Али милям бадӟым сюлмаськонмы - ёрос культура юртэз лэсьтон. Туэ солэн инъетэз, улӥыз (цоколез) вуттэмын луоз. 2001-тӥ аре быдэсмоз, кыкетӥ этажаз искусствоосъя школа интыяськоз - али со черкмылэн юртаз ик ужа на. - Куӟебай Гердлэн юбилеез ортчиз. Соин валче ужъёс ӧз дугдэ-а? - Ӧз. Ваньмыз азьвыл чакламъя мынэ. Райбиблиотека азьын луоз Гердлы памятник (бюст). Со котыртӥ утялтэмен-шулдыртэмен ӵош тупатъямы библиотекалэсь липетсэ, выль борддоръёссэ. Пушласянь но выльдытэк ӧм чидалэ. Зол тыршо лэсьтӥськисьёсмы, кивалтӥсьсы Владимир Неустроев. Бызьылоно луоз на Гурезь-Пудгаысь Гердлэн музеезлэсь статуссэ ӝутон пумысен. Мед луоз со Национальной миузейлэн филиалэз. Собереяз адӟом, оло, ми палтӥ туризмъя маршрут усьтыны быгатом. Тани Варӟиын черкмы 1826-тӥ арысен сылэ ни, сыӵе ик вуж Тыловыл-Пельгаын но. Нош тужгес бадӟым данъяськонмы - Куӟебай Гердэн герӟаськем интыос. Зэмзэ ик, асьмелэн быдӟым Гердмы - со нырысь ик вавожъёслэн. Нош со котыре, одӥг бугоре кыстӥсько библиотекаос, культура юртъёс, искусствоосъя школаос, озьы ик черкъёс сярысь сюлмаськонъёс. Вавожын та комплекс (заповедник) - экологияя, этнографияя но литературая - ваньмызлы, быдэс дуннелы адӟем карымон мед луоз. Таӵе ик бадӟым малпанэн-сюлмаськонэн улэ Куӟебай Гердлэн вынызлэн пиез Юрий Андреевич Чайников: - Ваньзэ, мар герӟаськемын Гердлэн нимыныз, одно ик утёно. Вавож черкын со пылатэмын, татын со дышетскиз. Вавож шайвылэ ватэмын солэн туж матысь адямиосыз: мумиз-аиз, агайёсыз, вынызлэн нылпиосыз. Али тодмо ӧвӧл ни ке но ватэм интызы, шайвылэ пырон азе коть буре ваён из пононо. Одно ик утёно вордскем гуртэз котырысь туж чебер инкуазез: тэльёсыз - арысь аре корамлэсь, коньыосыз, кыр парсьёсыз, бобръёсыз, дукъяосыз - ыбылэмлэсь, италмасъёсыз, ву сяськаосыз - ишкаса быдтэмлэсь. Кинлэн ке но жалясьтэм киыз кораз-вандӥз Малиновка бамалысь вить туж бадӟымесь олокӧня дауръем пужымъёсты. Соос эшшо ог кык сю ар сылыны быгатысалзы на. Зэм, сыӵе батыр пужымъёс асьме улосын но, оло нош быдэс Россиын но вылымтэ ни. Озьы ик, кызьы ӧвӧл ни мукетыз быдӟым Герд. Т. ПЕТРОВА. Театр Гажаны ӧте Театр туэ 69-тӥ сезонзэ усьтӥз драматурглэн Егор Загребинлэн Куӟебай Гердлы сӥзем "Кикы нош силе но силе..." эпической драмаеныз. Кузьма Павлович Чайников сярысь трос гожъяз ни кылтодон наукаосъя доктор Фома Кузьмич Ермаков. УдНИИ-ын ужакуз, 1966-тӥ арын поттэм "Удмурт литература" книгаын но 1988-тӥ арын печатлам "Удмуртский поэт и ученый" бадӟым очерказ тупен-тупен мадиз со со Гердлэн будон сюресэз сярысь. Театрын выль спектаклез учкыса, батырмылэн улэмысьтыз куд-ог учыръёс выльысь тодэ лыкто. Театр шонер лэсьтэм, Гердлэсь рользэ артистлы но кырӟасьлы Геннадий Бекмановлы шудыны оскыса. Со чылкыт удмурт кылын умой лыдӟе но кытӥяз кырӟаса вера Куӟебай Гердлэсь кылбуръёссэ. Пьесаын озьы ик усто возьматэмын Ашальчи Окилэн (шудӥз артистка Ольга Зорина) но Гердлэн ог-огенызы шуныт кусып воземзы. Тужгес но шӧдӥськиз со драмалэн кыкетӥ люкетаз, Куӟебаез ултӥяны вырись гожъяськисьёслы пумит нылкышно лэчытэсь кылъёс вераку. Калык тушмон луэ шуыса, Куӟебай Гердэз 1932-тӥ арын пытсазы. 1941-тӥ арын 1-тӥ ноябре со быриз. Спектакль туала интеллигенцилы ог-огдэ гажаса улыны вазиське. В. ЧЕРНОВ. Секыт ныпъетэн Павел Куляшов Удмуртиын одӥгез кужмоез, нош ӟучъёс пӧлын валтӥсез писатель, шуыны луэ. 1952-тӥ арысен кутскыса, со 24 книгаен романъёссэ, повестьёссэ, веросъёссэ, очеркъёссэ печатлаз ини. Соос пӧлын - "Камская оратория", "Солдатки", "Трудный год", "Сухолетье", "Вятские - мужички хватские", "Камские зори", "Шалые люди" но мукетъёсыз. Геройёссэ со инмысь уг басьты, уг чеберъя - асьме улонысь быръе но зыме-вые соослэн сюлмаськонъёсазы, соосын одӥг омырен шока, шумпотон- куректонъёсынызы улэ. Озьы нырысяз повестяз ик оскымон образъёссэс кылдытӥз Воткинск ГЭС-эз лэсьтӥсьёс пӧлын арматурщик луыса ужан куспаз. Улонлэн нокыӵе сильтӧлъёсыз-берганъёсыз шоры учкытэк, Павел Федорович кылдытӥз роман бӧрсьы роман, повесть бӧрсьы повесть... 70 аресаз вуиз бадӟым, секыт ныпъетэн. Бен, туэ 22-тӥ июне ӵапак сомында тырмиз ни гажано прозаикмылы. Нош 28-тӥ коньывуонэ, комсомоллэн вордскем нуналэз азьын, солэсь юбилейзэ пусйизы Ф.Дзержинский нимо культура юртын. Милициын ужасьёс пӧлын П.Куляшовлэн трос гинэ эшъёсыз. Чекистъёслэн ужамзылы сӥземын, кылсярысь, "В чужой шинели" повестез, кудзэ гожтӥз А.Мерзляковен ӵош. Куноос пӧлын вал МУР-ысь полковник Юрий Николаевич Богомолов но кузпалэныз Клавдия Ивановнаен. Клавдия Ижевских (азьвыл фамилиез) 50-тӥ аръёсы ужам "Комсомолец Удмуртии" газетын Павел Куляшовен, Юрий Перевощиковен (али экономика наукаосъя доктор), Леонид Даниловен, Виталий Корепановен, Валентина Быстроваен но мукетъёсыныз ӵош. Ваньзы та эшъёс егит сюлэм ӟырдытсэс сётӥзы комсомол газетлы, нош али тодазы ваизы ортчем аръёссэс, фотое пуксизы. Клавдия Ивановна мадиз, кызьы Павел Куляшов сое Красногорскын кынмемлэсь утиз... "Вань сюлмысь" шуыны луоз та ӝытэз. 45 ар ортчыса, Зорина, ог-огзэс шедьтӥзы куке быронлэсь утем нылаш но солэн утисез. Со Надежда Иосифовна Зорина, кыкетӥ республиканской больницаысь азьвыл старшой медсестра. Тодмо луиз: Чупчи шурын выемлэсь сое утем вылэм Павел Куляшов, соку егит журналист... Павел Федорович одӥг чӧльыеныз кык пудэз ӝутыны быгатэ, шуо. Таӵе тазалык зэмзэ но кулэ, сомында книгаез гожтыны вормон понна. Йыгмыт возиськон понна - туала вакытэ уго писателез сильтӧл уката но жуге, улон пыдсы ик лёгыны турттэ. Дунъямын ӧвӧл на Павел Куляшов зэмос мертэтэн, кӧня тыр кыске солэн тыршемез-гожъямез. Соин ик быдэс зал кичабонэн пуштыса пумитаз солы Удмуртиысь калык писатель дано ним сётыны дэмланэз. Т.Петрова. Дас ар талэсь азьвыл. павел Куляшовен вераське егит писатель, журналист Александр ЛАПТЕВ. Гурт улон Гужемзэ ужад ке, ӟеч толъёд Аксакшур гурт Пичи Пурга ёрослэн сэрегаз ик интыяськемын. Тросэзлэн пургаослэн тапала вуылэмзы ик ӧвӧл, дыр. Нош киясаос сюрес вылэ котькуд потылэмзылы "йыромем" гурт палтӥ ортчо. Уго Аксакшур пургаос борды итэмын ке но, Кияса черкогуртэ мыныны матынгес. Пичи Пургаозь 35 иськемез вамышъяно, нош бускель ёрос центрозь - 12 гинэ. Котьма шу но, гурт хозяйстволы но огшоры адямиослы таӵе сюрес шугъяськонъёс кылдытэ. Асьсэос аксакшуръёс дышимы ини, пе. Гуртлэн палэнэ интыяськемез солэн ужъёсыз сярысь уг вера. Татысь хозяйство, нимаське со "Дружба" гурт кооператив, пыд йылаз йыгмыт сылэ. Кылем аре котькыӵе удысын ыштонъёс вайыса ужазы, туэ ке пайда но вайыны быгатӥзы. Гурт кооперативлэн инъетэз луэ йӧл-сӥль поттон но ю тысь будэтон. Гужем кӧс улӥз ке но, сю-няньзы шедиз. Туэ "Дружбаын" одӥг гектарысь 12 центнер тысь басьтӥзы. Кылем арын 8,8 гинэ вал. Лыдпус гуртын ужасьёсты шумпоттӥз ке но, со бадӟым вормон ӧвӧл на. Аксакшур бусыос 18 центнерозь сётыны быгато. Ю тысь тырмыт ӧвӧлэн ужасьёслы чабеез 50 килоен гинэ люкизы. Эшшо йыдыен сётӥзы на. "Дружбалэн" 8 комбайнэз вань. Кызьы шуиз кооперативлэн тӧроез Владимир Марков, соос ар-кык сяна уз чидалэ. Музъемен ужан техниказы 90 процентэз ярантэмен лыдъямын ни. Соос "шокало" на адямиослэн тыршеменызы. Туэ басьтыны быгатӥзы пресс амалэн турынэз утялтон машина. Вераны кулэ, жалем сиёнзы 3500 тонна гинэ люкаськиз. Гурт ужасьлэн уго азинлыкез куазь бордысь потэ. Силос тырмоз южтолэзёзь, нош собере ог 200 тонна басьтыны кулэ луоз на. Озьы ик кулэ на 400 тонна фураж. Со понна кыкетӥ няньзы шумпоттӥз. Одӥг гектарысь 100 центнер картофка басьтӥзы, районын солэсь вылӥ урожай ӧвӧл. Сомындагес ик бакча сиён но октӥзы. Турынзы но тырмыт дасямын. "Дружбаын" туэ пудозэс гужем лагерьёсысь бер пыртӥзы. Скаллы быдэ али 6,5 литр йӧл кыско. Ёросъя шор лыдын тросгес усе. Укмыс толэзь куспын государстволы 830 тонна йӧл вузаны чакламын вал, вузазы 866. Али йӧл дунтэмен кошке. Вить ар талэсь азьло "Удмуртавтодор" Аксакшуре йӧл поттон цех пуктӥз. Уго "Дружба" асвакытаз солэн подсобной хозяйствоез луыны кулэ вал. Улон воштӥськемен, малпанъёс ӧз пӧрме, нош цех ужа. Кооператив автодорлэн цехеныз огкыл гожтӥз но, ар бырытозь 2,90 манетэн йӧлзэ солы вуза. Ӵошатон понна: Можгаын но Уваын йӧлэз литрзэ 4 манетэн басьто. Аксакшур вӧзын ик интыяськемын Яжбахтино черкогурт. Кияса ёросэ пыре со. Татын йӧлэз 3 манет но 40 коньыен басьто. Нуллонэз но кыдёкын ӧвӧл. Но огкылэз быдэстыны кулэ. Йӧлзы понна "Дружбалы" 185 сюрс пунэм тыронъёссы вань. Со одӥг толэзьлы уждун тырон быдӟа. Кооперативын уждунзэс кык толэзьлы ӝегато. Толэзяз со 626 манет. Дыраз тырысалзы, вылды, но пунэм тыронъёссэс быдтыны уг вормо. Пунэм тыронэз вань "Восточный" совхозлэн, Ижысь мясокомбинатлэн. Ачиз кооператив электротыл понна 150 сюрс манет тыр пунэме кылиз. "Дружба" кооперативе кык гурт пыре. Аксакшур но Куюк. Берпуметӥез азьвыл аръёсы быриз вал ини. Али нош ик выльдӥське: куинь семья улӟытӥз бырем гуртэз. Электротыл кыскемын ни, телефонзы ӧвӧл на. Ёрос администрацие вазиськизы вал, телефон пуктыны юрттэт курыса. Коньдон ӧвӧл, пе. Марков верамъя, Куюкын улыны секыт луиз ке, кооператив котьку но соослы юрттыны дась. Яна потэм семьяослэн Аксакшурын квартираоссы вань. Марысь мар ке, толйыны татчы лыктэмзы луоз. Та вакытэ Аксакшурын адямиос гинэ лэсьтӥсько - улыно-вылыно коркаос пукто. Кооперативлы али дыре выль лэсьтӥськон ӝутыны секыт йӧтэ. Соин вужмем юртъеръёсты рос-прос тупатъяло. "Дружба" гурт кооперативлэн тӧроез азьпалан тысь складэз кунян гидлы тупатыны чакла. Сотэк уг луы. Таизлы но кужым кулэ. А. АНДРИЯНОВ. Ӟеч ужлы пум ӧвӧл 10-тӥ ноябре Ижевскын кутскизы М. Т. Калашниковлэн 80 арез тырмонэзлы сӥзем ужрадъёс. Ӵукна 9 часэ Национальной музейын (Арсеналын) усьтӥськиз пыӵал тӥрлыкез возьматон. Сое усьтӥз ачиз дано конструктор. Нырысетӥ учкисьёс пӧлын - Удмуртиысь Кун Кенешлэн Тӧроез Александр Волков, Правительстволэн Тӧроез Николай Ганза, республикаысь но шоркарысь мукет тодмо адямиос. Собере Александр Невскийлэн собораз ортчиз М. Т. Калашниковлы сӥзем вӧсяськон. Отын шаермес данъясьлы сӥзизы шудбур но тазалык, кема аръёс ӵоже улон но азьланяз вормонъёс, озьы ик сётӥзы Николай Чудотворецлэсь мудорзэ. Нош лымшоре кутскиз мукетыз ужрад - Удмуртиысь Кун Кенешлэн но Правительстволэн сӥлы каремзы (приёмзы). Сое усьтыса, ӟечкылан кылъёсын вераськиз Николай Ганза. Собере дано конструктормы нош ик пусъемын вал пӧртэм наградаосын. Научной но инженерной огазеяськонъёслэн калык куспо союззылэн президентэз Ю. Гуляев Михаил Тимофеевичлы наукаез но техникаез азинтонын бадӟым вормонъёсыз понна сётӥз В. Т. Шухов нимо Зарни медаль, Россиысь инженерной академилэн президентэз Б. Гусев. Бадӟым азвесь медаль но академилэсь дипломзэ. Татысен ик Михаил Тимофеевич луиз Югдурез утёнъя министерствоысь дано ужась но. Солы со сярысь сӥлы карон пус сётыкуз, Удмурт Республикаысь югдурез утёнъя азьвыл министр А. Никитин ивортӥз, Якутиын шедьтэм 60 каратъем алмазлы "Конструктор Михаил Калашников" ним сётэмын шуыса. Михаил Тимофеевичлэн нимыз быдэс дуннелы тодмо бере, паймонэз ӧвӧл, сое Болгарилэн Россиысь посольствоезлэн советникезлэн Г. Мариновлэн но ӟечкыламезлы. Собере Михаил Тимофеевич ачиз ӟечкылась луиз. Пыӵал тӥрлык кылдытонын но поттонын бадӟым азинсконъёс басьтэмзы понна "Конструктор стрелкового оружия М. Т. Калашников" пус сётэмын вал "Ижмаш" но "Ижевский механический завод" огазеяськонъёсысь конструкторъёслы, инженеръёслы, рабочийёслы но. Тросэз соос пӧлысь - дано конструкторлэн матысь юрттӥсьёсыз но эшъёсыз. "Ижмашысь", Прикладной механикая институтысь но "Удмуртия" ГТРК-ысь коллективъёслы сётэмын вал М. Т. Калашников нимо премиос. Сӥё-дано ужрад йылпумъяськиз вакчияк пресс-конференциен. Отысен Михаил Тимофеевич шуиз: - Ӟеч ужъёслы пум ӧвӧл. Котькыӵе усто пыӵал лэсьты но солэсь устозэ кылдытыны луоно. Мон малпамъя, мынам самой ӟечез уже азьпалан ай. Кин ке монэ азьпалтӥз, мон шумпото гинэ, со адямиез ӟечкыланы котьку дась. Г. МАРКОВ. Ӟечбур, Федорыч! Озьы сётэмын ни инмарен. Кин ке но, кыӵе ке но ужлы ассэ сӥзе. Озьы быдэс даурез ӵоже. Бен, кудӥзлэн оскем ужез лябгес пӧрме, кудӥз зэмзэ но со ужез бергатон понна гинэ вордскемын кожалод. Та берпумъёсыз пӧлы ик пыре Ижысь старшой участковой инспектор, милициысь подполковник Анатолий Федорович Керимов. Шундыё Азербайджанын вордскыса, удмурт музъем вылэ вуыса, со ассэ татын шедьтӥз. Автозаводын кӧня ке тыршемез бере, 1973-тӥ арын милицилэсь погонъёссэ дӥсяз со. Нош 1981-тӥ арысен - старшой участковой иинспектор. Ялан одӥг интыын - Труд ульчаысь микрорайонын - 21 номеро опорной пунктын. Ужзэ яратӥсь адями сярысь милям газетмы вазьынгес гожъяз вал ини. Табере со милициысь подполковник луиз. Чебер вераськыны дышиз удмурт сямен. Солы нырысьёсыз пӧлын сётэмын "Заслуженный участковый СССР" ним. Нош кылем арын Анатолий Керимов пусъемын "За заслуги перед Отечеством" медален. Н. Байтеряков. В. Камашев (фото). Милициысь подполковник А. Ф. Керимов. Галина РОМАНОВА Визьмылы паймисько Серемес верос Усёнме ке тодысал, куро вӧлдысал, шуо. Мон но азьвыл синтэм коӵышпи кадь улӥ. Ваньмыз ӟечлы берытскиз ӟуч кылын "Сонник" нимо зӧк книга басьтэме бере. Табере иземысь сайкасько ке, соку ик уйвӧтъёсме тодам вайыны кутскисько. Собере учкисько "Сонник" книгаысьтым. Озьы азьпалан мар луонозэ кырымпыдэскысь кадь адӟисько. Аслэсьтым гинэ уг, мукетъёслэсь но. Озьы мон гуртысьтымы котькудӥзлэсь, чипыен-куреген шуэм сямен, улон-вылонзэс, лушкем малпанъёссэс-ужъёссэс тодӥсько. Одӥг кылын вераса, туно-пелёлэсь но, ведӥнлэсь но вылӥын луи. Огласянь умой со, нош мукет ласянь - гань-гань, вез-вез кыллён вунӥз. Мар карод на - вань ӟечез понна маин ке но курбон сётоно. Вазь ӵукна ик тазьы малпаськыса кыллёнме ӝыныё кариз пырись муртлэн ӧс усьтэмез. Кӧня пол со пересь писпу кадь ӟукыртӥсь, тордэм ӧслэсь ӟирыоссэ вошъяно, янакъёссэ вӧлоно шуи ини - киы уг сузьы. Ма, собере со кышномурт уж шат? Вӧзысьтымы Микол бускеле пыре вылэм. Пуксьытэк гинэ дыртыса вераны кутскиз кылем уе адӟем вӧтсэ: - Кыӵе ке буш, номырин кизьымтэ бусыетӥ мынӥсько кадь. Собере музъем кутскиз ук зурканы, бадӟымесь, муресь кыретъёс, гуос азям кылдӥзы. Кытчы вамыштыны уг тодӥськы ни. Сайкай но - быдэс мугоры дырекъя, пӧсям вуэн котмемын. Марлы медам со, Веруш. - Пуксьы, эн дырты, мар тылэ пырем мурт сямен пӧсекъяськод? - Турнаны мыноно. А то лысву тӧлӟоз. - Пуксьы, пуксьы. Тыныд туннэ нокытчы мыныны кулэ ӧвӧл, - зӧк книгаме поттыса шуисько. - Тани татын гожтэмын: музъем зуркан - со вань лэсьтэм ужедлэн куашкамез, быремез. Юнме гинэ кужымдэ быдтод - пайдаез уз луы. - Ма, туннэ быдэс гурт турнаны потэ ук. - Быдэс гуртлы ик вера, туннэ турнаны медаз потэ. Ӵуказе но нунал вань на ай. - Ярам, озьы ик каром, - кошкыны дасяськиз Микол. - Дугды ай, дугды. Нуналэд юнме бырытозь, тӥни со ӟукыртӥсь ӧсме тупатоно вал. Микол кыл но ӧз вера - уж борды пуксиз. Кӧня ке улыса, Миколлэн кышноез вуэ, картме, пе, ыштӥ. Ваньзэ вераммы бере буйгаз, гурт кузя кошкиз, калыкез турнаны потэмлэсь алӥз. Калык тани турназ но ини, толалтэлы кабанъёс ӝутӥз. Мынам нош одӥг чырым но ӧвӧл на. Ойдо, малпасько, кӧтме сокем вӧсь уг кары али. Гужем ас гурзэ кырӟа на, мон но ас гурея улонме лэсьто. Ӵап дорам тӧро йырмы пыре. Дасяськы, шуисько аслым - ваньмыз луоз. - Веруш, - кӧтсэ кырмаса шуэ тӧромы, - мар-о та? - Питырес, котырес бадӟым ӝуш. - Вот, вот. Нерад луи ини, котькуд уй вӧтасько та кӧтме. Я со кабан быдӟа пульдэ, я корка ӝужда будэ. Шоканме ик пытса кадь. - Ӧз пилиськы-а? - юасько. - Ӧз, ӧз пилиськы. - Ӧз пилиськы ке, умойлы. Ма быдӟаен адӟид кӧттэ, сомындалы ик узырмод, байкод. - Ой, Веруш, тау тыныд, - капчияк шокчиз тӧро йырмы. - А то тодӥськод ведь, ужмы милям кыӵе керӟег... Кытысь-о, малэсь-о медам нош коньдон вуоз? - шара малпаське со. - Списать карем техникамес туж пайдаё вузаны амал шедьтӥ вал - солы ке шат? Оло, кӧня ке кабан турынмес вузаны быгато?... Ой, Веруш, та кӧттырмостэм ӝушелы луыса, калыклэн синмаз пень пазясько но - кытчы медам вуо? - Эн кышка, - буйгатӥсько, - вӧтад ӝушед ӧз пилиськы ук. Пилиськысал ке, соку мукет сямен кырӟано луысалыд... Турын шуэмысь, ачим но та керӟег уженым сое дасяса ӧй вутты на, оло, ог-кык кабанзэ сётод? - Мар вераськонэз - ӵуказе ик капка азяд вуттозы. Тӧро йырмы кошкиз гинэ, кусказ кутӥськыса, шӧм-пал шонаськыса кудӟем Онька пыре. Мыжыкъёсыз кырмемын, ымныры вожпотонэн кырыжамын. - Мар луиз? - юасько. - Тон... тон, Веруш, алдад монэ... Пичи муртэ сямен пӧяд но куштӥд. - Юись муртлэн, - ушисько, - кышноез но дас кык, усем интыез но - тӧдьы сюй. - Тӧдьы сюй ке луысал... - бӧрдыны кутскиз Онька. Ужпум зэмзэ но умойтэм, малпасько, рос-прос выжыятоно. - Оньки, - быгатэмея небыт вазисько, - радызъя эшшо мадь на мыным вӧтамдэ. - Кӧня верано на: асме юэмен адӟи. Тон шуид со, пе, мыным байлы но тазалыклы луоз. Учкод ке - воксё мукет пала кошкиз: кускам шуккиз - одӥг, парсе кулӥз - кык, кышно дорысьтым кошкиз - куинь. - Тон бон вӧтад вина юыса кудӟид вал-а яке вина юытэк-а? Онька йырберзэ кормаса малпаськыны кутскиз. - Син шорам вина уг адӟиськы. Сотэк гинэ кудӟи кадь... Вот ведь, улонын но вӧтын кадь луысал ке... - Ваньмыз валамон, - шуисько, - соку ик мыным тазьы верано вал. Астэ вина юытэк кудӟемен адӟиськод ке, азьвыл лэсьтэм вань урод ужъёсыд понна кыл кутон вакыт вуэ. Ачид азьын кыл кутон вакыт. Сокем эн куректы, вина юондэ кушты но вӧтъёстэ чакла. Азьпиньёстэ, урдлыостэ чеберен, тӧдьыен, паськытэн адӟид ке, кышноед одно вуоз. Нош йырад сюръёс будэмен ке адӟид, эн кышка - вӧтын ваньмыз йырчукин. Иське, тазалыкед берытскоз, гидад пудо-животэд тыраз ляльӟоз. Онька дорысьтым буйгаса кошкиз кадь. Инмар гинэ мед утёз ини - ӟеч вӧтъёс мед адӟоз. ШӦКЫЧ Капканэ эн сюре Чиганъёс сярысь асьмеос тодӥськом, соос лушкаськыны но калыкез эрекчаны ярато шуыса. Зэмзэ вераса, соос пӧлын но вань сӥё-дано кырӟасьёс но мукет удысын тыршисьёс. Пусйыны кулэ, рынокен экономикае выжемен валче йылӥзы капчи улонэз утчась чиганъёс но. Ижевскысь шор базар дорысь али адӟыны луэ ог дасоосын люкаськем чиган нылкышноосты. Соос пӧлысь самой чеберез нылаш тӥ доры лыктоз но туж небыт кылъёсын вазиськоз: "Гажано пияш, тодэмды потэ-а, ма возьма азьланяз тӥледыз. Дас копейка сётӥд ке, ваньзэ верало". Ма, пияш, мазэ-созэ валатэк, солы сётэ дас копейка. Нылаш уӵы кадь тыныд чирдэ, тонэ возьма туж шудо улон, но тынад та улонад пумиськозы тушмонъёс. Соосыз суран понна мон али тынэсьтыд йырсиысьтыд одӥг выжызэ басьтӥсько но сое янчикысьтыд коньдонэныд сурало. Озьы инмар вань тушмонъёстэ тон бордысь уллялоз". Тон, янчиктэ усьтыса, йырсидэ отчы поныны шедьтӥд ке, одно ик со куспын нылаш отысь самой бадӟымзэ коньдонэз кырналтоз но ватоз. Солэсь эрекчамзэ шӧдыса кесяськыны кутскид ке, соку ик мукет чиган нылкышноос эшсылы юрттон понна тон вылэ пумит султозы. Гажано эшъёс, юлтошъёс, чиган кышноослэн капканазы эн сюрелэ. В.Володин. Быдӟым Вормонлы 55 ар тырмон азьын Советской Союзлэн Героезлы З.И.Макаровлы туэ 31 октябре 80 арес тырмысалыз САЙКЫТ ОМЫР ПОННА 1944-тӥ арын 23-тӥ феврале штурмовой авиационной часте авиациысь маршал Новиков лыктӥз. Берло ожъёсын данэ потэм лётчикъёслы со наградаос сётъяз. Та ӝытэ гвардиысь капитанлэн Зосим Макаровлэн мылазяз маршал бырттӥз Зарни Кизили но Ленин орден. Кепырасагес пуксиз лётчик президиумысь ӝӧк сьӧры. Каманин генераллэсь шунытэсь кылъёссэ но зал тыр пукись лётчикъёслэсь, техникъёслэсь ӟырдыт кичабемъёссэс Макаров султыса кылзӥз. "Война сое ӵушказ, пӧсь тылыныз сутӥз... Макаров звенолэн усто камандирез вал, штурмовой шуккетъёс лэсьтылонъя быдэс семья мында мастеръёсты будэтыса, со эскадрилилэн командирез луиз. Туж урод куазен но дас тямыс штурмовикъёслы азьветлӥсь луыса музъем вылысь цельёсыз шедьтылӥз, тушмон зениткаос лек ыбылыку но курссэ ноку ӧз воштылы". Озьы шуиз Советской Союзлэн Героез авиациысь генерал-полковник Н.П.Каманин. Удмурт шаерысьтымы Кам шурлэн кутсконаз пичи гинэ Ломы гуртын вордскиз со. Геройлэн ожмаськемез сярысь куд-огзэ учыръёсты гинэ вераломы. Фронт вуиз столицамы доры. Шурдыт вакытэ улӥз странамы. Фронтлы матысь аэродромын вис карытэк гуретӥзы моторъёс. Омыре жутскылӥзы бомбардировщикъёс, истребительёс. Разведкаысь лётчикъёслы уин но, нуназе но лобано луылӥз. Зосим Макаров ӵемгес уин лобалляз. Чилектылэмъёсъя но пичиесь гинэ тылъёсъя нюлэскысь но, сюрес вылысь но шедьтыны кулэ вал тушмонлэсь люкаськем танковой частьёссэ, артиллеризэ. Сое быдэстыны быгатылӥз умоез лётчик гинэ. Сыӵе вал ини Макаров войналэн нырысетӥ толэзьёсаз ик. Солэн аэродроме берытскылэмез бере ик омыре ӝутскылӥзы штурмовикъёс но бомбардировщикъёс. Волоколамской но Минской шоссеос вылын но, бусыосын но, нюлэсъёсын но ӝуаллязы столицамы вылэ урдӥськем тушмон танкъёс. Калининской фронтын контрнаступление кутскем бере, разведчикъёслы, пехотамылы юрттон вылысь, бомбардировщикъёсмылы выльёссэ цельёсты шедьтылоно луылӥз. Та ужпумез но Макаров усто быдэстылӥз. Асьме войскоосмы Москва дорын вормемзы берегес ик авиацимылы тросгес кулэ луизы штурмовикъёс. Пехотамылы азьлань мыныны омырысен юрттыны тупась самолётъёс вал со. Промышленностьмы со вакытэ фронтлы тырмыт сётыны кутскиз Ил-2 штурмовой самолётъёсты. Та самолёт ик тушмон танкъёсын но ожмаськыны зол гинэ юрттӥз. Зосим Макаров дышетскемез бере штурмовике пуксиз. Быдэс ар пала со нырысь ик лётчик луыса лобаз, нош собере звенолэн командирез луиз. Берлогес усто лётчиклы командиръёсыз, тодмо лётчикъёсмы Геройёсмы Байдуков но Каманин, оскизы эскадрилиен кивалтыны. Ржев но Великие Луки палан тушмонлэсь поизициоссэ штурмовать карыкуз, командованилэсь заданиоссэ дано быдэстэмез понна Зосим Макаров нырысетӥзэ данъямын вал Горд Знамя орденэн. Та нуналъёсы ожмаськемез сярысь тодаз вайылыкуз, со одно ик син азяз пуктэ одӥгзэ нуналэз - 2-тӥ августэ луэм учырез. Штурмовикъёслэн группазы Ржев пала лобиз. Улӥын, самолётъёслэн бурдъёссы улын, гурт адске. Макаров планшетысьтыз картаез учке - Лобня гурт. Отын тушмонлэн опорной пунктэз. Самолётъёс командирзы сьӧры уллань лэзиськизы. Одӥгез, кыкез куштӥзы ини бомбаоссэс. Макаров но бамбаоссэ куштӥз. Тӥни соку пилемъёс сьӧрысь потӥзы "мессершмиттъёс". Макаров нырысь ӧз адӟы тушмонэз. Солы радио пыр ивортӥзы: "Мышкад "мессер", чакласькы... Берад "мессер"... "Мессерлэн" пуляосыз Макаровлэн самолётаз йӧтӥзы. Сое Макаров соку ик ӧз вала. Со эшшо гурт вылэ лэзиськыны ӧдъя на вал. Снарядъёссэ быдтытозяз ыбылоно ук. Нош "Мессер" сярысь номыр уг кылӥськы ни. Лётчиклэн кабинаяз ӵын пырыны ӧдъяз. Самолёт ӝуа. Тыл матэ но матэ вуэ. Макаров гурт вылэ уг ни лэзиськы. Самолётсэ со асьме пала берыктэ. Табере ӵын пыр адӟисько ини тушмонлэн истребительёсыз. Нош Макаровлэн штурмовикез из сямен уллань но уллань ваське, бӧрсяз ӵын быжзэ кельтэ. Фронтлэн гожез но матэ вуэ ини. Музъем дорозь сю витьтон метр ёрос. Парашютэн тэтчыны кулэ, нош отын тушмон. Кабинаысьтыз потыны туж шуг. Лётчиклэн йырвизьмыз сэзь ужа: "мёртвой петля" лэсьто, оло тылэз кысыны быгато. Ӧз ке быгаты, соку ик парашютэн тэтчоз. Фронтлы матэгес кариськыны тыршоз. Мотор золгес ужа. Самолёт мыркгес нырзэ выллань ӝутӥз. Лётчик йырчукинь лобе ини. Нош тыл уг кысы. Ялан гома, ӵындэ. Тыл лётчик доры ик матэ вуэ ни. Макаровлэн курткаез гомӟиз, собере шлемез. Со кабиназэ мырдэм гинэ усьтӥз но уллане уськытскиз. Ӵындӥсь самолётэз но бӧрсяз ик музъем пала васькыны ӧдъяз. Макаровлэн парашютэз шуркак усьтӥськиз. Омырысен ик со адӟиз ӝуась самолётэзлэсь тушмон пала усьыса пуштэмзэ. Вӧзтӥз ик туж матэтӥ лобыса "мессер" ортчиз.Котыртӥз пуляос шулало. Одӥгез пельпумзэ кормыштӥз. Киосыз но туж висё, ымнырыз но. Музъем вылысен но шораз ыбылӥсьёс вань. Тушмон автоматчикъёс ыбыло. Висись киосыныз стропаоссэ кужмысьтыз солань-талань кыскылыса, Макаров асьме пала лэзиськыны турттэ. "Мессер" эшшо лётчиклэн вӧзтӥз ик ортчиз на. Таяз радэ пуляос палэнэ лобизы, Макаров музъемлы матын ни вал. Сӧсырмем но сутскем лётчик нейтральной полосае лэзиськиз. Пехотинецъёсмы нюжтӥськыса асьсэ окопъёсазы поттӥзы сое. Лётчиклэн ымнырыз но, киосыз но, дӥсез но сутскемын вал. Ӝоген сое медпунктэ келязы, нош отысен госпитале. Эмъяськемез бере Макаров капитан штурмовикъёслэн эскадрилизылэн командирез, со нош ик фронт вадьсысь омырын. Самолётэз табере выль, кык муртэн - стрелокен лобаны чакламын. 1943-тӥ арын гужем штур мовой авиационной полк ожмаськиз воронеж фронтын. Одӥг пол Макаров паськыт шурез адӟиз. Днепр со. Шурлэн ярдуръёсаз но, ву вылын но ожмаськон мынэ. Лётчикъёслы нырысь-валысь шуггес луиз валаны, кытын асьмелэнъёс, нош кытын тушмон. Штабысен юрттӥзы: музъем вылысен радио пыр командаос сётылыны кутскизы. Асьме танкъёсмес Макаров кыдёкысен адӟиз. Куазь умой вал. Шур дуре но люкаськемын, паромъёсын но выжо. Тани дасо пала танкъёс бусыын чурен кариськыса тушмон вылэ мыно. Макаров соку ик лэзиськиз танкъёсмылэн сюрессы вылысь тушмон артиллерилэн огневой позициез вылэ. Таяз учыре омыре ӝутскизы дасэз "илъёс", азьпалазы лобиз эскадрилилэн командирез Макаров капитан. Азьветлӥсьлы ноку но янгышаны уг яра - лётчикъёс котьку но солэсь адӟем карыса лобо. Соин ик Макаров чаклаське, картаезъя эскере, тушмонэз умой-умой утча. Тушмонлэсь кӧнязэ ке танкъёссэ, орудиоссэ пазьгыса берытскизы лётчикъёс аэродромазы. Киев. Та вашкала городэз омырысен тодмасьтэм лётчикъёс ӧй вал, дыр. Днепр вамен выжъёс пуштытъямын. Владимирской гурезьысь памятник омырысен но туж умой адӟиське. Та памятникез но, Киево-Печерской лавраосыз но, мукетъёссэ но городысь тодмо интыосты Макаров одно ик возьматылӥз лётчикъёсызлы. - Одӥг бомбамы но, снарядъёсмы но, отчы медаз усе. Нош кӧня ке нунал ортчыса, лётчикъёс тодӥзы: фашистъёс пуштытӥллям лавраысь вашкала соборез. Разведкае лобам лётчик вераз на Крещатикез но пуштытыса куашкатэмзы сярысь. - Ӝоггес мозмытоно городэз. Ӝоггес! Лётчикъёслэн-штурмовикъёслэн мылкыдзы та нуналэ вал Ново-Петровское село дорысь плацдарм вылэ люкаськем пехотинецъёсмылы но танкистъёслы юрттон сярысь. Вазь ӵукна гудыртӥз артиллерия. Омыре ӝутскиз штурмовой авиация. Дас тямыс "илъёслэн" азьпалазы лобе Макаров. Танкистъёслэн командирзы музъем вылысен штабысен рация пыр Макаровен кусып возе. Одӥг пол лэзиськыса куштылӥзы ини штурмовикъёс бомбаоссэс, капитан выльысь эскадрилиезлы возьматэ: "Лэсьтэ мон сямен". Со нош ик берытске тушмон пала но лэзиське позициоссы вылэ. 1943-тӥ арын 7-тӥ ноябре асьме войскоос мозмытӥзы Украиналэсь шоркарзэ, вашкала Киевез. Нош штрумовикъёс выльысь но выльысь ӝутскылӥзы на омыре. Озьы городысь потон сюресэз кортназы. Гвардиысь капитанлэн Макаровлэн командирез генерал Каманин быгатыса ожмаськись лётчикез куинь пол ӵектылӥз наградалы. Кык Горд Знамя орденъёсын но кыкетӥ степенё Отечественной война орденэн данъямын вал Макаровлэн подвигъёсыз. Фронтын дыръяз ик Макаровлы пумиськоно луиз на мукетыныз но ӟырдыт сюлэмо адямиен - Николай Артемьевич Жаданэн. Та нуналъёсы егит лётчик но колхозник куспын бадӟым эшъяськон юнмаз. Харьков областьысь колхозник Н.А.Жадан обороная фондэ 100 сюрс манет коньдон сётӥз но самолёт лэсьтыны куриз. Солэн куронэз быдэстэмын вал. Ил-2 штурмовик лётной часте вуиз. Авиациысь генерал-майор Н.Каманин соку Жаданлы гожтэт ыстӥз! "Николай Артемьевич! Ужаса люкам коньдонэныды басьтэм боевой самолётэз милям частямы ыстӥзы. Нош ми сое сётӥм асьмелэн усто боевой лётчикмылы Советской Союзлэн Героезлы, куинь пол орденэн пусъем адямилы Зосим Исаакович Макаровлы. Тӥлесьтыд самолёттэс басьтыса шумпотэммес но ӧрӟиосмылэсь ӝутскем мылкыдзэс вераса гожтыны капчи ӧвӧл. Тӥляд кузьымды юрттоз адӟемпотостэм тушмонэз быдэсак пазьгыны... Ми тӥледыз оскытӥськомы, Николай Артемьевич, Советской Отчизнамы понна ми данлыко ожмаськомы". Жаданлэн штурмовикеныз Макаров дасо пол лобаз тушмон пала. Аслаз ожмаськемез сярысь ӵем гожъялляз со колхозникъёслы. Ивортылӥз боевой ужъёсыз сярысь: Львовез, Карпат гурезьёсты мозмытон дыръя, Сандомирской плацдарм понна ожмаськыку но трос мукет ожъёсы лобаллямез сярысь. Ньыльдон ньылетӥ арлэн пумаз гвардиысь майорез Макаровез ыстӥзы академие дышетскыны. Советской Союзлэн Героез авиациысь генерал-майор З.И.Макаров кема аръёс ӵоже вань тодэмзэ но боевой опытсэ егит лётчикъёслы сётыса служить кариз, соосыз ачиз кадь ик быгатыса но усто лобаны дышетылӥз. Отставкае потэмез бере со улӥз Ростов-на-Дону городын. Кулӥз 1994-тӥ арын. В.Голубев. Россия Федерациысь Федеральной Собранилэн Кун Думаяз одӥг мандатэн 28 номеро Ижевск округъя депутатэ пусъем кандидатъёс Алексеев Владимир Александрович, вордскемын 1947-тӥ арын 17-тӥ мае, Россиысь наукаосъя академилэн Урал отделениезлэн физико-технической институтысьтыз лабораториен кивалтӥсь, улэ Ижевскын, ӵектэмын быръёнъя "Экологическая прартия России "Кедр" огазеяськонэн. Баранов Анатолий Юрьевич, вордскемын 1959-тӥ арын 18-тӥ декабре, калыкен кусыпъёсъя "ВПК" "МАПО" ФГУП-лэн директорез, улэ Москваын, ӵектэмын округысь бырйисьёсын. Баранов Николай Витальевич, вордскемын 1950-тӥ арын 8-тӥ сентябре, Удмурт Республикаысь Вылӥ судысь судья, улэ Ижевскын, ӵектэмын быръёнъя "Коммунисты, трудящиеся России - за Советский Союз" блокен. Баранов Сергей Васильевич, вордскемын 1957-тӥ арын 21-тӥ сентябре, "Общественный комитет за Законность и Народовластие" огазеяськонысь валтӥсь эксперт, улэ Ижевскын, ачиз ӵектӥськемын. Гурина Ольга Юрьевна, вордскемын 1955-тӥ арын 22-тӥ октябре, Ижевскысь медициная кун академиысь гистологияя кафедраысь профессор, улэ Ижевскын, ӵектэмын бырхъёнъя "Женщины России" огазеяськонэн. Забильский Владимир Викторович, вордскемын 1948-тӥ арын, 25-тӥ декабре, Россиысь наукаосъя академилэн Урал отделениезлэн физико-технической институтысьтыз валтӥсь сотрудник, улэ Ижевскын, ӵектэмын быръёнъя "Медведь" блокен. Макаров Николай Иванович, вордскемын 1952-тӥ арын 11-тӥ декабре, "Медико- социальный центр" организацилэн директорезолэсь ужзэ быдэсъясь, улэ Ижевскын, ӵектэмын быръёнъя "Блок генерала Андрея Николаева, академика Святослава Федорова" блокен. Маслюков Юрий Дмитриевич, вордскемын 1937-тӥ арын 30-тӥ сентябре, автоматической аппаратура лэсьтонъя В.С.Семенихин нимо НИИ-лэн валтӥсь директорезлэн советникез, улэ Москваын, ӵектэмын округысь бырйисьёсын. Синицын Ирина Евгеньевна, вордскемын 1953-тӥ арын 9-тӥ мае, Уралысь калык куспо инженерной университетлэн ректорез, улэ Ижевскын, ӵектэмын "Духовное наследие" общественно-политической движениен. Соловьев Виталий Александрович, вордскемын 1933-тӥ арын 5-тӥ январе, Удмурт Республикаысь Кун Кенешлэн депуататэз, улэ Ижевскын, ӵектэмын округысь бырйисьёсын. Солуянов Андрей Владимирович, вордскемын 1959-тӥ арын 8-тӥ ноябре, Россия Федерациысь Кун Думалэн депутатэз, улэ Ижевскын, ӵектэмын округысь бырйисьёсын. Сямин Владимир Борисович, вордскемын 1953-тӥ арын 1-тӥ июле, "Роспинтерпром" ПКП ЗАО-ысь юридической отделэн кивалтӥсь, улэ Ижевскын, ӵектэмын округысь бырйисьёсын. Чуйков Игорь Вячеславович, вордскемын 1969-тӥ арын 24-тӥ августэ, "Синтез" муниципальной учрежденилэн нылпиослы "Заря" клубезлэн кивалтӥсез, улэ Ижевскын, ӵектэмын округысь бырйисьёсын. Жирова Людмила Петровна, вордскемын 1938-тӥ арын 27-тӥ августэ, Россиысь циркъя кун компанилэн тӧроез, улэ Москваын, ӵектэмын быръёнъя "ВОПД "Наш дом - Россия" огазеяськонэн. Быръёнъя окружной комиссия. Ивортон 17 ноябре 11 часысен 13 часозь телефон пыр меӵак вераськыны луоз Удмурт Республикаысь МВД-лэн быдэ вуымтэос пӧлын йыружъёсты алонъя ёзэзлэн начальникеныз Светлана Юрьевна Селёваен но Ижевскысь РОВД-лэн ёзъёсызлэн кивалтӥсьёсыныз. Быдэ вуымтэосын герӟаськем ужпумъёсъя жингыртэмды луоз 55-78-93, 55-79-22 но 55-77-54 телефонъёсъя. Журналистъёсын пумиськонъёс Николай МУСАЛИМОВ: "Кусыпъёсмес юнматыса" Туэ мае республикаямы кылдытэмын Калыкъёсын ужанъя министерство. Азьло со вал Правительствоысь кун комитет гинэ. Сыӵе ёз юнме шорысь ӧз вордскы - со улонлэн куронэз. Таӵе аспӧртэмлыко удыс оскемын Николай Мусалимовлы. Алигес со пумиськылӥз журналистъёсын. Люкаськемъёс пӧртэм юанъёс сётъязы. Берло дыре, кызь одӥгетӥ дауре потон азьын, калыкъёслэн куспазы, тупаса улоназы уно ченгешонъёс, валантэмъёс пото, ог-огзы вылэ урдскылонъёс шараясько. Со бен одӥгзэ но калыкез (нациез) пичи-а со, бадӟым-а, чеберен уг возьматы. Нош куке сыӵе улон кусыпъёс муромо, со туж уродэн берытске, трос ыштонъёс луо. Удмурт шаермес бадӟым уд шуы, озьы ке но, татын трос пӧртэм калыкъёс уло, тужгес но уно ӟучъёс, удмуртъёс, бигеръёс но мукетъёсыз. Та калыкъёс куспын ноку бадӟымесь керетонъёс, ог-огзэсты вӧсь карон учыръёс уг потало. Ог-огмес валаса кадь улӥськом. Та ласянь, веранэз ӧвӧл, бадӟым уж лэсьтэ Национальной политикая министерство. Солэн коллегияз пыртэмын пӧртэм удысъёсысь кивалтӥсьёс. Тӥни соин ик Николай Николаевич шуэ: - Данак удысъёсын кусыпъёсмес юнматыса ужаськом. Со понна ик Правительствоын кылдытэмын нимысьтыз Кенеш (Совет). Со чакла калыкъёсын ужанъя огъя политикаез, ӵектонъёс сётъя но мукетсэ радъя. Алигес министерствоын кылдытӥм эскеронъёс, ӵектонъёс сётъянъя кенеш. Отчы пыризы данак учёнойёс, юристъёс, экономистъёс но музонэз. Одӥг пол со люкаськылӥз ни. Министерство азьын бадӟым ужпум сылэ вань калыкъёслэсь интересъёссэс утён ласянь. Со понна кутыны кулэ ни "Удмурт Республикаын кылъёс сярысь" Законэз. Та бордын 1990-тӥ арысен ужало ни. Удмуртилэн Конституцияз ӟуч но удмурт кыл кун кылэн лыдъямын, нош татын улӥсь мукет калыкъёслэн кылъёссы сярысь номыр поттылымтэ. Али озьы ик дасяське "Национально-культурной огазеяськонъёс сярысь" Закон. Шараерамы 21 сыӵе огазеяськон кылдытэмын. Соослэн ужазы кун органъёс пыриськыны уг быгато, коньдонэн герӟаськем ёзъёс сяна. Министерство юрттэ но пыриське пӧртэм калыкъёслэсь ужрадъёссэс праздникъёссэс ("Гербер", "Сабантуй", "Русская береза") ортчытъяны но кун программаос дасяны. Кылсярысь, национальной ужпумъёсъя кун программа 2000-тӥ-2003-тӥ аръёслы чакламын. Татчы пырисько Калыкез дышетон, Культурая, Иворъёсъя министерствоос, Егитъёсын ужанъя комитет но мукетъёсыз. Кӧня бен удмуртъёслэн лыдзы? Ваньмыз 714 сюрслэсь уно. Со пӧлысь ог 500 сюрсэз республикаямы улэ, кылемез, 31 процентэз, палэнын, бускель областьъёсын но республикаосын. Министерство отын улӥсь удмуртъёсты но уг вунэты, соосын ужа. Виктор ДОЛГОВ: "Россия уг тыры" - Туэ промышленной предприятиос ӝутскон сюрес вылэ потӥзы, - журналистъёсын пумиськыкуз шуиз промышленностья но транспортъя министр Виктор Долгов. - Но сое гурезе тубонэн уд ӵошаты на, озьы ке но, умоесь воштӥськонъёс шумпотто. Тани шаерамы шӧдскымон йылӥз кунгож сьӧрысь странаосын вузкарон. Берло дыре палэнэ пумен тросгес келяськом му вӧй станокъёс, подшипникъёс, электроинструмент, медициная оборудование но мукетсэ. Тӥни соин ик будэ пайда басьтӥсь предприятиослэн лыдзы. Ваньмыз со умой. Асьмеос азьло сямен ик усто ож тӥрлык поттӥськом, нош Россия продукцимес басьтэмез понна коньдон уг сёты. Солэн тыронэз, трос-а, ӧжыт-а шуод, 1 миллиард манетлэсь уно люкаськемын ни. Ваньмыз со герӟаськемын военнойёслэн куронъёсынызы. Республикалэн бюджетаз туэ 280 миллион манет уксё пыртымтэ. Со пӧлысь 205 миллионэз "Ижмашлэн", 28-эз - "Аксионлэн", кылемез - музон предприятиослэн. Со дыре ик "Ижмаш" огазеяськонлы мукетъёсызлэн 145 миллион манет тыронъёссы. Огъя вераса, предприятиослэн вань бюджетъёсы 1 миллиард манетлэсь уно тыронъёссы, нош кун бюджетэ - 100 миллион. Отчы пыро на пениос но штрафъёс. Тыронъёссы тужгес но трос "Ижмаш" но "Аксион" огазеяськонъёслэн. Кылсярысь, нырысез предприятие туэ поттыны кулэ вал 16 сюрс автомашина но 32,5 сюрс мотоцикл, нош 10 толэзьскын та лыдпусъёс 10,8 но 19,8 сюрс гинэ. Азьло сямен ик секыт югдур татын комплектациен (30 процентэз гинэ ёзъёс дорамы бичасько), кылемзэ (двигательёс, металл но музонзэ) палэнысь басьтоно. Автозаводын али ке но йылаз-пумаз вуттымтэ машинаосты буян. Со одӥгез сюбег инты, мукетъёссэ вератэк. Япония юрттыны басьтӥське, но ку со кредит вуоз ай - шуг вераны. Но туннэ одӥгез тодмо, 70 процентэз промышленной оборудование вуттэмын ни. Демократъёс 70-тӥ-80-тӥ аръёсты юнме пыкылӥзы сыръяса улон дырен. Али зэмос сыӵе вакытэ улӥськом. Я, бен, ваньзэ ум сьӧдмалэ, утчаськисьёс вань на. Тани "Метеор" завод дасяське трос эмъюмъёс поттыны. Озьы ик улонэ пыӵало Москваысь Правительство но Беларусь Республика куспын гожтэм тупанкылъёсмы. Россилэн шоркараз лэсьтӥське вузкарон юрт. Отын луозы республикаямы поттэм вузъёс. Г. РОМАНОВ. Выльысь вордскиз "Золото-Платина-Банк" Акциосын "Золото-Платина-Банк" (ЗПБ) кылдӥз 1993-тӥ арын 29-тӥ октябре. Но солэсь историзэ мукет лыдпусэн но герӟаны луэ. 1745-тӥ арын Уралысь Екатеринбург город дорын нырысьсэ шедьтэмын вал зарни, бератазгес платина но алмаз. Сю арлэсь кема Урал быдэс Россиез зарниен возиз. Зарни но мукет дуно металлъёс поттонэз азинто "Драгоценности Урала" финансово- промышленной группа но банкез кылдытӥсьёс: "Екатеринбургский завод по обработке цветных металлов", "Ювелиры Урала" но "Уральская Золото-Платиная компания". Тӥни соин ик банклы но сыӵе ним сётэмын. Та банк кылдыку, Россиын югдур секыт но валантэм вал. Али уноез банкъёс быремын ни. Миым 17-тӥ август бере нырысетӥ интые потӥзы интыосысь (регионъёсысь) банкъёс. Соос бадӟым саклык висъяло татысь экономикаез азинтонлы. Азьланьын та банкъёс уката юнмалозы. Соин ик "Золото-Платина-Банклэн" правлениез туэ банкез выльдон борды басьтӥськиз. Али нырысетӥ вамышъёсыз адӟисько ни. Берло дыре ЗПБ тупанкылъёс гожтӥз ни Уралэ пырись областьёсын но республикаосын. Со юрттоз ужбергатонэз азинтыны. Асьме Удмуртиын сямен ик банклэн ёзъёсыз умой ужало Курганын но Челябинскын. Алигес усьтӥськизы Пермьын но Тюменьын. Таӵе ёз кылдытыны документъёс дасямын ни Оренбургын но Челябинск областьысь Трехгорной городын. Таӵе уж нуыса, "Золото-Платина-Банк" Уралын одӥгез кужмоез но оскымонэз банк луоз. Со шӧдскымон юрттоз интыосын экономикаез юнматыны но Уралысь коньдонэз огазеяны. Со туж умой луоз татысь областьёслы но республикаослы, малы ке шуоно, табере Москвае уксё уз кошкы ни. Банк туж пайдаё луоз Уралысь предприятиослы. Со кусыпъёссэс юнматоз сырьё сётӥсьёслэсь, ваньбур поттӥсьёслэсь но сое басьтӥсьёслэсь. Ураллы таӵе банк, зэмзэ но, юн кулэ. ЗПБ пумен кужмоя. Туэ май толэзе со Россиын 43-тӥ интыын ке вал, 1-тӥ августэ 38- тӥе потӥз. Та дырлы солэн 425 миллион манет аслаз капиталэз вал но 160 миллион манет пала пайда басьтӥз. Вуоно арын со уката паськыталоз, выль ёзъёссэ усьтоз Екатеринбург областьын но быдэс Уралын. Удмуртиысь люкетэз сярысь верано ке, со 5 ар ужаз но собере "СБС-АГРО" банкен огазеяськылӥз вал. Табере со выльысь "Золото-Платина-Банк" луиз. Ижын банклэн 17 банкоматэз ужа ни. Алигес нош ик 2-ез усьтӥськиз: одӥгез "ХХИ век" магазинын, мукетыз - 4-тӥ микрорайонын. Ӝоген тодмо луоз 100-тӥзэ пластик карта басьтӥсьлэн нимыз. Кылем арын банкоматъёс пыр 180 миллион манет уждун тыремын, нош туэ 10 толэзьскын - 200 миллион ни. Та дыр ӵоже ик 100 миллион манет тыр кредит висъямын, эшшо 60-70 миллион манет басьтӥсьёс луозы. Ӝоген ссудая коньдон сётъяны ӧдъялозы нимаз адямиослы. Процентэз пичигес луоз, нош кӧня дырлы сётэмез быдӟалаез бордысь потоз. - Туннэ одӥгез тодмо но валамон,- шуэ банклэн кивалтӥсез Игорь Останин.- Кредит сётъялом, юрттом гуртъёслы, татысь хозяйствоослы, переработчикъёслы, етӥн заводъёслы. Азьланьын интыысь интые вошъяно адӟытонъёс (выставкаос) ортчытъялом. Г. РОМАНОВ. Николай Ганза: "Ваньзэ йылаз-пумаз вуттоно" Алигес Правительстволэн Тӧроез Николай Ганза пумиськон ортчытӥз. Отчы ветлӥзы Воткинске чурыт эстӥськонэн ужась ракета двигательёсты быдтонъя завод пуктон пумысен кылдытэм комиссие пыртэм эшъёс, тодосчиос но журналистъёс. Вераськон пайдаё мынӥз. Премьер-министр та ужпумъя ӟеч тодэмзэ возьматӥз но специалистъёслы трос юанъёс сётъяз. Люкаськемъёслы ракета двигательёсты быдтонъя установка лэсьтыны дасяськон сярысь ивортӥз комиссилэн кивалтӥсез Алексей Липанов. Со шуиз: - Ми комиссие вуэм вань документъёсты рос-прос учким. Но Америкаысь специалистъёс лыдъям-чотамъёссэс ӧз сётэ на. Соослэн установказы лыдъямын 50 килограмм секталаен двигательёсты гинэ сутыны. Со туж пичи. Малы ке шуоно, асьмелэн ракета двигательёсмы тоннаосын кыско. Экспертъёс трос шекъёссэ шараязы. Воткинск доры ӝутоно заводын 915 двигатель сутыны чаклаське. Соку омыре пото йырез усыкмытӥсь газ но диоксинъёс. Соос инкуазез кырсёмыто, адямилэсь тазалыксэ уродмыто. Та ласянь нокыӵе эскеронъёс ортчытымтэ на. Нош со сярысь быдэс ар вераськон мынэ ни. Жаляса верано луэ, та уж али но быдэстымтэ. Нош диоксин - со туж кышкыт маке. Та ужпумлы уката ик бадӟым инты висъяз химия наукаосъя кандидат Вадим Петров. Американецъёс вань расчётъёссэс ӧз вуттэ на бере, Николай Алексеевич тодосчиослы вазиськиз, малы, пе, асьмеос та ужез лэсьтыны ум быгатӥське? Куд-огезлэн шуэмез потӥз, со уж, пе, капчи ӧвӧл, но лэсьтыны луоно. Тӥни соин ик премьер-министр меӵак ватсаз: али ваньзэ йылаз-пумаз вуттоно, тодоно, кыӵе со изъян ваёз. Собере гинэ решение кутэмын луоз. Кенешын озьы ик вераськон потӥз Камбаркаысь но Кизнерысь химической ож тӥрлыкез быдтон сярысь. Кылсярысь, Николай Алексеевич шуиз: "Али мышъякез, люизитэз быдтэм бере кылем-мылемзэ кытчы вузаны ӧм шедьтэ на, соин Камбаркаын завод ум пуктэ на. Нош Кизнерын уродэз тани мар бордын. Химической снарядъёс 15 пу складын возисько. Соос уродэсь, пыкетъёс тыремын ни. Соин ик ӝегатскытэк ужрадъёс кутоно". Г. РОМАНОВ. Нош-а шузие кылём? Таӵе но мукет юанъёс, шугъяськонъёс муш палэп кадь гужгето али котырын. Госдумае быръёнъёсты ялэм бере ик телевидение но радио, газетъёс но журналъёс та темаез ӝутыны дыртӥзы. Нош ик син шоры йӧто тодмо ымныръёс, тодмо нимтулъёс... Жириновский, Черномырдин, Чубайс, Кириенко... Быръёнъёс, быръёнъёс! Тӥ нош ик оскон шундыез ӝужатӥськоды кадь. Малпаськод: "Табере ум янгышалэ ни. Улон тупатӥськоз. Кӧня ёрмыса улыны кулэ? Чиданлэн но чиданэз чиге ук! Дун зэрпал быдӟа луиз ини. Дораз матэктыны уд дӥсьты". Озьы алигес висён кутӥз. Эмъяськонние мынытэк ӧйлась. Нош отын ваньмыз сямен юрттэт дунын луэм. Врачлы шуисько: "Оло, шунтӥськыса (физиолечениен) гинэ ортчоз?" Тазэ эмъяськонэз кызьы ке дунэн кариллямтэ на. Уз, уз ортчы, пе. Озьы гинэ уд бурме. Нош тани кандидатъёс выльысь калыклы ӟеч улон сӥзё! Котькудӥз сямен вера: "мыным оскоды ке, мон улондэс тупато. Мон тодӥсько, кызьы сое ӟечгес карыны, мон тодӥсько, кызьы ёрмонысь потыны но трос мукет. Мон, мон, мон!.. Табере тодады вае ай талэсь азьло ортчем быръёнъёсты, солэсь но азьлооссэ. Соку но ведь кандидатъёс зарни гурезьёс сӥзизы. Нош мар луиз? Югдур воштӥськиз-а? Ӧз! Со уката секытоме. Озьы ке но, вылӥе ум тэтчалэ ни, быръёнъёс азьын Кун Кенешлэн но Правительстволэн Тӧрооссы, ужамзылы йылпумъянъёс лэсьтыкузы, асьсэ "тыршемзэс" умоен гинэ дунъяллязы. Кызьы со озьы? Калыклэн улонэз уродме. Нош кивалтӥсьёслэн докладазы - ваньмыз умой. Калыкез нуналлы быдэ сямен "сюдӥзы" эрекчан шуон ӝукен. Ческыт-а вал? Бен, ческыт потылӥз. Озьы луэ, вылды, куке тон тодытэк сииськод пуны сӥлен шыдэз. Нош мар сиемдэ тодэмед бере ӧскемед потэ. Мар бен, мар соку кароно, медад ни пӧяськы шуыса? Кытын, кызьы шуо ӟучъёс (та кыл ӟуч ӧвӧл ке но) гарантия? Ӧвӧл ук, ӧвӧл со! Тани али нуналлы быдэ кандидат уӵыос выльысь чирдо ини, ӟучъёс шуэмъя, "лапшу вешают", нош асьмеос кылзӥськом, усем мылкыдмы бурдзэ ӝутэ, лопырске... Но кемалы меда? Куарамес сётытозямы гинэ соос "зарни гурезь" сӥзьыса чирдозы, яке - "вузаськытозямы"... Кызьы ӵектӥз Лукашенко, асьме кунэ вуылыкуз? Маке сётӥзы ке, пумит, пе, эн луэ, басьтэ, басьтэ. Но кабинае пыриды ке, асьтэ сямен лэсьтэ. Эн вузаське, асьтэ кандидатты понна куарадэс сётэ. Кило сахарен яке бутылка винаен гинэ эн буйгатске. Тӥ али сахар, яке вина басьтоды, но кемалы-а со? Куарадэс "вузамды" бере ик депутатэ сюрем муртты вунэтоз тӥледыз. Солы тӥ кулэ уд луэ ни... Иське, асьмелы, огшоры бырйисьёслы, сак луоно, куарамес "вузанэн" но туж капчи янгышаны. Яке чылкак мукет сямен лэсьтыны йӧндыриськом, шуиськом: "Мон быръёнъёсазы ик уг ветлы. Сё одно асьсэ сямен лэсьтозы. Мынам куарае уз юртты". Тазьы малпасьёс медаз вунэтэ вылэм: соос куаразэс сётытэк но юртто сыӵе муртъёслы, кин кивалтӥсе чуртнаське, кин кисызэ зӧкомытон сярысь гинэ сюлмаське. Кызьы озьы? - оло, паймоды. Тӥни озьы. Та кандидатъёс пала вузаськем муртъёс (лыдынызы ичи луыса но!) тӥледыз вормо. Вормо соин гинэ: тӥ но уго быръёнъёсы ветлымтэеныды юрттӥды солы. Валантэм? Но со озьы ик вань уго. Улон таӵе (тужгес но туалаез) пирамидалэсь кылдэмын. Куашкано кадь гинэ со. Но... возиське. Возиське - уг куашка. Кема-а со озьы улоз, нокин уг вера. Шӧдонмы но бабе. Но сюлмынымы но, визьмынымы но валаськом: весяклы ӧвӧл со. Бен, ӧвӧл! Куке но соку куашкалоз... Нош кӧня отчыозь синву киськоз, кӧня улон уретӥськоз, кӧня пол куректон кайгу куртчиськоз на?.. Малы асьмеос чиданы кулэ тае? Шат уг луы мукет сямен лэсьтэммы? Малы одно ик янгышаськом? Умойтэм, кырыж, нокытчы вуттӥсьтэм сюресэтӥ мынӥськом? Юан бӧрсьы юан огезлэсь секыт мукетыз. Зэм, вань ӵектӥсьёс-юрттӥсьёс, визь-кенеш сётӥсьёс. Узыръёс (дерьмократъёс шуиськом ни соосты) кышкато коммунистъёсын, фашистъёсын ӵошато соосты, "Красно-коричневой чума" шуо, КПРФ-лы власть, пе, сётӥд ке, выльысь "репрессия, диктатура, гонение ведьм" кутскоз. Бен та выллем но мукет веранъёслы (кудъёсыз шимесатэмын на вал) осконо ке, йырси пежырске. Но ведь со тросэз пӧян... Гордъёслэсь сьӧлыкъёссэс шараянын ваньзэсты азьпалтӥз кадь Солженицын. Соя берло быдӟым ожын асьме быремъёслэн лыдзы 40 миллионлэсь ятыр... Нош Совето власть 20 миллион шуэ вал. Собере та "выльдӥськонэн" валче Быдӟым оже ветлэмъёслэсь, пыриськемъёслэсь данзэс дэрие лёганы кутскизы. Сомында калыкез быдтытозь, пе, фашистъёслы сётӥськыны кулэ вал. Тӥни кытчыозь вуимы, ява. Президентмес Б. Н. Ельцинэз ужысьтыз дырызлэсь вазь кошкыны курыса уно вераськон мынэ но "Конструкцилэн гарантэз" пельтэм, шӧдске. Со калыклэсь куаразэ уг кылы, кылэмез но уг поты. Шуныт но небыт пуконысьтыз кошкыны уг лэзё но со пала дурбасьто угось "зӧк песьтэръёс". Та югдур тужгес но шӧдӥськиз, президентлы пумит импичмент ялэм бере. Кун Дума кулэ 300 куара ӧз люка. Малы? Кызьы озьы луиз? Ведь вератэк, "кушатэк" но валамон ни кадь: Б. Н. Ельцин но солэн юрттӥсьёсыз странамес быронэ нуо. Ма калэ вуиз Россия, котькин адӟе. Но выльысь сьӧдэз тӧдьы каризы. Кинъёс президентэз утизы? Соослэн нимтулъёссы сётэмын вал "Советская Россия" но куд-ог мукет изданиосын. Та дурваисьёсты печатланы кулэ вылэм "Удмурт дунне" газетын но. Асьме калык но мед тодоз (тужгес но али быръёнъёс кутскон азьын), кин понна куарамес сётыны уг яра. Импичментэз "куашкатэмъёс" пӧлын ЛДПР но "Яблоко" фракциосы пырись депутатъёс. Соос, кинъёс калыклэсь улонзэ умоятон сярысь сюлмаськемзэс кыл вылын гинэ возьмато. Соослэсь кылпӧет ӝуксэс сиыса вукылмиськиз ини... Ельцин но солэн дурваисьёсыз майбыр, ӟеч улон асьмелы дасо аръёс пала сӥзё ини. Нош мар луэ? Демократъёслэн вормонзы син азяды. Со СССР-ез куашкатон, война, ужтэк кылён, наркоманъёс, бомжъёс, бандитъёс но трос мукетыз. Табере Совето власть вакытэ уждун дыраз басьтэммы, дунтэк дышетскеммы, эмъяськеммы, путёвкаен санаторийёсын шутэтскеммы ческыт вӧт кадь гинэ пото на. Тӥни ваньзэ сое берыктон понна ик асьмеос быръёнъёсы мыныны но тодманы кулэ, кин понна куарамес сётыны. А. ПЕРЕВОЗЧИКОВ, кылбурчи. Редакциын пумиськон Сӥземын экономика удыслы Му вӧй - со шур ӧвӧл Николай Граханцев - шаерамы тодмо кивалтӥсь, тужгес но му вӧй но газ поттӥсьёс пӧлын. Со быдэс улонзэ сӥзиз та удыслы. Вордскиз 1947-тӥ арын бускель Татарстанысь Вуж Маврино гуртысь бадӟым крестьян семьяын. Ужан сюресэз кутскиз 1964-тӥ арын, 17 аресъем егит пи луиз му вӧй поттӥсь операторлэн дышетскисез. Собере мастере пуктӥзы. Тодон-валан басьтӥз Москваысь му вӧй но газ поттон промышленностья Губкин нимо институтын. Огдыре ужаз но, дышетскиз но. Николай Михайлович республикаямы лыктӥз 1973-тӥ арын, Играысь НГДУ-ын му вӧй гумыосты тупатъянъя цехлэн кивалтӥсез луиз. Ужаз Ижысь НГДУ-ын, собере 13 ар кивалтӥз Сарапулысь нефть но газ кыскон удысэн. 1995-тӥ арын Николай Михайловичез басьто "Удмуртнефть" огазеяськонлэн валтӥсь тӧроезлы воштӥсе. Кык ар талэсь азьло, нефтяникъёслы секыт вакытэ, Граханцев выль му вӧй поттонъя выль ёз кылдытэ. Сое Удмурт нефтяной компания (УНК) нимало но акционер огазеяськон луэ. Тӥни таӵе адямиен туннэ пумиськонмы. Журналистъёслы Граханцев мадиз выль ёзлэн пыд йылаз султэмез, нырысетӥ вамышъёсыз, ӵуказе нуналэз сярысь но улонысьтымы куд- ог мукет ужпумъёсты ӝутӥз. Россиез утиз му вӧй но газ. Озьы ик шуыны луоз "Удмуртнефть" огазеяськон сярысь но. Нефть поттӥсь та кужмо предприятие куашкан калэ вуэмын ни вал. Кин солы оскиз, кин - ӧз. Но нефтяникъёс четлыке кадь сюризы: дугдӥзы дыраз уждун басьтэмысь, налогъёс тыремысь. "Удмуртнефть" угось "Сиданко" му вӧй компание пыре ни вал. Отысь пумен ӧжыт но ӧжыт уксё вуылӥз. Секыт улонысь потон амалъёс утчаса, Николай Граханцев кылдытэ му вӧй поттонъя выль ёз. Со вал 1997-тӥ арын сентябре. Му вӧй поттон интыосты вузанъя конкурсын УНК вормисе потэ. Солы сёто Патраково (Як.-Бодья), Центральной (Шаркан) но Турецкое (Балезино) нефть поттон интыосты. Нырысетӥез скважина ӝутскиз Патракиын, ар талэсь азьло выль интыын "сьӧд зарни" пызйиз. Али отын ньылетӥ скважина порто ни. - Николай Михайлович, кызьы но малы выль ёз вордскиз? Кыӵе солэн мугез? - Кӧня ке ортчемзэ тодамы ваём 70-тӥ аръёсы "Удмуртнефть" шукы вылын кадь будӥз, азинскиз. Отын 18 сюрс адями ужаз но республикаысьтымы 16 районъёсын му вӧй кыскиз, арлы быдэ 10 миллион тонна пала. Нош выльдӥськон, ваньбурез вузан кутскем бере, кун предприятие луиз акциосын огазеяськон. Со вакытэгес ик Удмуртия но Россия ваньбурез куспазы люконъя Огкыл куто но "Удмуртнефть" АО-ез пырто федеральной ваньбуре. Со шеде "Сиданко" (Сибирско-дальневосточной нефть компания) огазеяськонэ. Кузёос пуко Москваын, нош татын...? Ӵапак соку малпан кылдӥз Удмурт нефть компания усьтон сярысь. Татын ватсаны кулэ: кӧня ке му вӧй поттон интыос республикалы сётэмын вал. Тӥни озьы вордскыны ӧдъязы пичиесь нефть поттон ёзъёс. Али Удмуртиын 9 ни соос. Одӥгез УНК огазеяськон. Ми тэтэ карисьёс на, шуыны луоз, нош "Удмуртнефтьлы" миым 25 ар тырмиз. Ужаны кутским кылем арын апреле. Валтӥсь геолог луиз туж визьмо специалист Михаил..., валтӥсь инженер - Александр Головин, лэсьтӥськонъя воштӥсе - Анатолий Лесных. Но выль ёзлы ортчем арын туж секыт вал. Куд-ог журналистъёс но мукетъёсыз УНК вылэ урдскизы, конкурс, пе, умойтэм ортчытэмын вал, со вормисе ӧз поты. Компания котырын трос ӵашетӥзы, нош "Уралнефтегаз" огазеяськон УНК вылэ ӝожтӥськон гожтӥз, Патраки, пе, солы юнме сётэмын. Но туннэ ваньмыз интыяз пуктэмын: Екатеринбургысь Федеральной Арбитраж суд УНК-ез конкурсын зэмос вормисен лыдъяз. Сыӵе решение кутэмын туэ 6-тӥ октябре. Кыӵе бен со огазеяськон? 15 процент акциосыз сётэмын Удмурт Правительстволы, 5-ез - "Удмуртнефтьлы", нош кылемез - Москваысь Логвиненко ужбергатӥсьлы. Со компаниез усьтыны быдэсак сямен коньдон висъяз, инвестор луиз. Нош миым 31-тӥ июле Удмурт Правительство компанилы му вӧй поттыны лэзиз, лицензия сётӥз. Со 25 ар ӵоже кужымзэ уз ышты но УНК 10 миллион тонна му вӧй кыскыны быгатоз. Сыӵе луонлыкъёс вань. Солэн али куинь интыосаз 13 миллион тонна нефть шедьтэмын ни. - Туэ нош кызьы ужаськоды? - Урод шуыны уг луы. Укмыс толэзьскын 13 сюрс тонна кыским. Али 10 скважинаез ужастӥськом. Патракиысь кыказ скважинаын музъемлы валлин гумыос лэземын ни. Интыез узыр, сутка ӵоже 60 тонна сётэ. Ар пумын вуттом но ужаны ӧдъялоз Центральнойын одӥг скважинамы, нош Турецкойын - вуоно арын сентябре гинэ. Бен, скважина портон капчиен уг сётӥськы: сюрес но лэсьтоно, электротыл но кысконо, инкуазез но чаклано-утёно. Али УНК поттэм нефтьсэ автомашинаосын нуллэ на, гумыостӥ уг кошкы. Патракиын со понна ичизэ 20 иськем ёрос ватсаса выль гумыос кысконо. Соку гинэ огъя гумыосын герӟаськыны луоз. Огазеяськон нуналмысь юнма, будэ, лэсьтӥсько проектъёс. Но куиняз нефть интыосын быдэсак му вӧй поттонэз радъян вылысь, УНК-лы ичизэ 85 миллион доллар коньдон кулэ. Каллен со шеде. Миым тани 8-тӥ октябре нырысьсэ му вӧйзы пызйиз ке, табере дасо сюрс тоннаосын со люкаське ни. Ведь котькинлы валамон: му вӧй - со шур ӧвӧл, ву кадь уг бызьы, пичиен-пичиен, шапыкен-шапыкен музъем пыдсысь потэ но огазе люкаське. Мар веранэз, УНК каллен пыд йылаз йыг-йыг султэ. Поттэм "сьӧд зарни пӧлысь" одӥг ньыльмоссэ кунгож сьӧры вуза, кылемез асьме рыноке - нефтеперегонной заводъёсы кошке. Огазеяськонын али 40 мурт ужа. Со кун бюджетэ гинэ 20,5 миллион манет коньдон (налог) пыртӥм ни. Азьланьын вамышъёсмы уката юнмалозы. Матысь куинь ар ӵоже куинез ик му вӧй поттон интыос быдэсак вуттэмын луозы, ужаны ӧдъялозы. Кызьы верай ни, "Удмуртнефть" будон вакытаз арлы быдэ дас миллион тонна ёрос му вӧй кыске вал, туэ 5 миллион 400 сюрс тонна гинэ чакла, яке арлы быдэ 300-400 сюрс тонна ичигес кыске, уллань гылӟе. - Николай Михайлович, тӥ мукет нефть компаниос пӧлын кыӵе адӟиськиськоды? - Шоро-куспо шуод, дыр. Тани "Белкамнефть" араз 1250 сюрс тонна му вӧй кыске, нош "Удмуртторф", "Уральская нефть", "Удмуртгеология", УННК (Удмурт национальной нефтяной компания) - быдэн 150-180 сюрс тонна. Чепца НГДУ трос уг лэсьты на. Милям таӵе малпанъёсмы: 2003-тӥ арозь 400-лэсь уно скважина портом но арлы быдэ 700-750 сюрс тонна нефть кыском. Со быдэстымон ужпум. Но али одӥг скважинаез портыны ӧжытсэ 5,5 миллион манет уксё кулэ, сомында ик сое йылаз-пумаз вуттон ужлы кошке яке 10-11 миллион манет быдтоно. Нош со пайда сётыны кутске 4,5 ар ужамез бере гинэ. Огазеяськон али 3 миллион доллар коньдон быдтӥз ни. Азьланьын ужъёссы уката кужмоялозы но УНК-ын ичизэ 400 мурт ужалоз. Специалистъёслэн лыдъямзыя, одӥг нефтяник вӧзы эшшо ватсаса одӥг выль ужан инты усьтӥське на. Умой со. Шаермы му вӧен узыр. Али эшшо 60 интыын "сьӧд зарни" ватскемын. Но отын нефть поттон каньылэн уз сётӥськы: сюресъёс кыскымтэ. Озьы ке но, республикаямы та удыслы берло дыре бадӟым саклык висъяське. Туэ инкуазь узырлыкъёсъя нырысьсэ министерство кылдытэмын. Пӧртэм ужпумъёсты быдэсъяны капчигес луоз. - Удмуртилы нефтеперегонной завод кулэ-а, пуктоно-а сое? - Нокин кулэ ӧвӧл уг шуы. Но та ужез 10-12 ар талэсь азьло быдэстоно вал, дырмес ыштӥм, нош али луонлыкъёсмы пичиесь. Тани басьтом Башкортостанэз. Солэн 3 заводэз. Со араз 30 миллион тонна нефтез переработать карыны быгатэ, нош республика араз 12 миллион тонна гинэ му вӧй кыске. Быдэс Россиын таӵе суред. Азьло Россия 600 миллион тонна гинэ кыске вал ке, али - 250-260 миллион тонна. Огъя вераса, ӝыныезлы заводъёслы сырьё, уг тырмы. Нош Удмуртилы пичи завод пуктон пайда уз сёты. - Николай Михайлович, быдэс дуннеын нефтьлы дун ке ӧй будысал, мар луысал? - Адӟон вань, лэся. США му вӧй дунэн асьмеды кекатыны чакла вал, но ӧз пӧрмы. Россия сӥньыс пумын возиське ни вал. Асьмеос ведь нефть но газ гинэ трос вузаськом, но отысь казнае уксё вуэ. Туэ нырысетӥ кварталэ нефтьлы дун ӧй ке будысал, ваньмы, "Удмуртнефть" но, Россия но, Удмуртия но куашкасалмы, бырон калэ вуысалмы. Инмар ӧз кушты, лэся. - Эшшо одӥг юанэ вань на. Николай Михайлович, кызьы тӥ, гуртын вордӥськем но будэм пияш, нефтяник луиды? - Семьяямы 7 нылпи будӥм. Гуртын улон капчи ӧй вал. Шор ёзо школаез быдтыкум ик тракторист-машинист луи но ӝыны ар колхозын ужай. Анай-атайлы туж секыт йӧтылӥз, уждун тыро-пыдо ӧз сётъялэ. Нош мыным 15-20 иськемысь му вӧй кыскон вышкаос ӵем гинэ син азям пуксьылӥзы. 17 аресам мыныкум, нефтяникъёс доры лыктӥ, операторлы дышетскисе кутӥзы. Со вал 1964-тӥ аре. Тӥни озьы та удысэн быдэс улонме герӟай: ужай но, дышетски но. Тае быръемме уг жаляськы. Уже кельше, со юрттэ экономикаез юнматыны но калыклэсь улон-вылонзэ умоятыны. Гожтӥз Геннадий Романов. Удмурт нефть компания (УНК) кылдӥз кык ар талэсь азьло. Туэ 9 толэзьскын 13 сюрс тонна му вӧй кыскиз ни. *** УНК акционер огазеяськон усьтэм амалэн ужа. Солэн куинь интыын 13 миллион тонна му вӧйез шедьтэмын. 25 арлы лицензия сётэмын. Со дыр ӵоже 10 миллион тонна "сьӧд зарни" поттоз. *** ОАО-лэн 400-лэсь ятыр скважинаосыз луозы но 2003-тӥ арын 700-750 сюрс тонна му вӧй кыскыны быгатоз. Лыктэлэ, учкисьёс! Вань гурт калыклы но городын улӥсь удмуртъёслы вазиськем потэ: ойдолэ ветломе Элькунысьтымы национальной театрлэн спектакльёсаз. Ведь дасо ар талэсь азьло Максим Горький ульчаысь сад дорын, котькуд спектакль ортчыку, гуртъёсысь татчы лыктэм автобусъёсты адӟылӥмы. Нош али, таӵе вакыт вуэмен, туж шер адӟод автобусъёсты. Зэм, бензинлы дунэз, азьвыл сярысь, туж трослы дуно каризы. Вань монополистъёс ашкынӥзы ини ук, бензинлы гинэ ӧвӧл, мукет вузъёслы но дунъёс будо. Депутатъёс но мукет вылӥ кивалтӥсьёс та удысын нокыӵе ужрадъёс уг куто. Узыр улӥсь кивалтӥсьёс туннэ нуналэн гинэ уло. Соос уг валало, начар улӥсь калыкез, али сямен, ялан зӥбыса возизы ке, азьланяз номыр умойзэ уз адӟе. Таӵе улон вуэмен, интеллигенцимы пӧлысь но тужгес сӥё-дано адямиос асьсэды быдто. Тужгес но кужмоосыз кунгож сьӧры кошко. Нош начар улӥсьёс, тырмыт сиськымтэен, дырызлэсь вазь куло. Соин ик узыръёслы вазиськем потэ: начаръёслы юрттэлэ! Ӧжытгес уждун басьтыса, кӧнязэ ке соослы сётэлэ! Азьвыл дырысен асьме писательёс но журналистъёс асьмемыз дышетӥзы ог-огдэ гажаны, улонэз яратыса со понна уката но ӟеч ужъёс лэсьтыны. Улонлы но яратонлы сӥзиллям Тамара Ивановна Ардашева но Егор Егорович Загребин "Тӧдьы льӧмпу улын" кык ёзэн лирической пьесазэс. Ӝож: сое учкись ӧжыт люкаськиз. Та спектаклез пуктӥзы режиссёр - Удмурт Элькунысь но Россия Федерациысь калык артистка Вероника Садаева, суредась Ника Чепонис, крезьгурзэ бырйиз но кырӟаз Удмурт Элькунысь дано артист Геннадий Бекманов. Рольёссэс усто шудӥзы Удмурт Элькунысь калык артистка Раиса Нефёдова, Валентина Бекманова, артистка Римма Николаева, артист Кадим Галиханов но мукетъёс. Учкисьёслы выльысь вазиськем потэ: эн буйгатскелэ асьтэлэн телевизоръёсыныды гинэ. Театре лыктыса, оло нош пумиськоды асьтэлэн тодмоосыныды? Яке - кинэн ке тодматскоды. Юнме уг верало ук: сю манет интые, сю эш дуногес. Соин ик калыкез ӧтисько театре! В. ЧЕРНОВ. Туэ - арлыдоослэн арзы Ньыль полэс песянай Туэ асьмеос ӵемгес тодамы вайылӥськом котырысьтымы арлыдо муртъёсты. Можгаын но, соосты сӥлы карыса, октябрь толэзе ӝытъёс, пумиськонъёс ортчылӥзы. Татысь арлыдоос туж синмаськымонэсь. Вань пӧлазы тужгес паймымонэз. Со - Анна Ивановна Маратканова. Туэ гужем песянай 100 арессэ пусйиз! Арлыдыз шоры учкытэк, со туж сэзь ай - валаса, радызъя вераське. Сютэм, секыт пичи дыр, война, ожӝуэ кузпалзэ ыштон зол шуккизы сое, но ӧз погыртэ. Синвузэ ӵушалтыса, азьлань вамышъяз, ужаз, бубытэк кылем куать нылпиоссэ пыд йылазы ӝутыны выриз. Мултэс эркияны дырыз бен ӧй вал - я колхоз фермае бызьыса мыноно, я аслэсьтыз пудозэ утялтоно. Но пиналъёсыз сое огпол но ӧз возьдаськытэ, гажамон адямиос луизы. Бадӟымез нылыз али ачиз но арлыдо ни - 73 арес. Солэн верамезъя, Анна песянайлэн 100 арес улытозяз огпол но больницае ветлэмез ӧвӧл, пинал дыръяз пыдзэ чигтылӥз ик, но кызьы ке ас понназ ик бурмем. Ма, со али но калыкез паймытъя ай: 98 аресаз пу пильылэм на, али но тэк пукыны уг вала - Яна прапраправнучказэ уте. Вот тыныд ньыль полэс песянай. Ваньмыз Анна песянайлэн 42 внукъёсыз, пра- но праправнукъёсыз. В. КИБАРДИНА, Удмурт кун университетын дышетскись. А. Маратканова ньыль полэс внучкаеныз. УВА ПАЛАСЬ ИВОРЪЁС Кык поллы кулэсмиз Шыр (геморрогической) висён сярысь азьло кылыны ик уг луы вал. Нош берло аръёсы та черен уно калык висьыны ӧдъяз. Зэм, туэ сое ӧжытак зӥбломытӥзы ик. Кылсярысь, 1998- тӥ арын 9 толэзь ӵоже 43 висись шараямын ке вал, туэ та лыдпус 24-озь кулэсмиз. Умой соиз но, та висёнэн туэ одӥг нылпи но ӧз черла. Удалтӥз Уваысь кыкетӥ номеро школаысь 7-тӥ классын дышетскись Екатерина Туйматова алигес пыриськиз Муром городын ортчем Всероссийской конкурсэ. Сизьымдон пала егит кырӟасьёс пӧлын аспал эшмы вормисе потӥз. Со сяна, та ужрадэ пыриськиз на солэн эшез Алена Вылегжанина. Ас эшъёсыз пӧлын Уваысь покчи кырӟась лауреат ним басьтӥз. Золгес удалтӥз Катялы. Эстрада кырӟанъя конкурсын со "Гран-при" басьтӥз но дунтэк мыныны Словакие путёвка утӥз. Отын со пыриськоз ини егит кырӟасьёс пӧлын ортчоно международной конкурсэ. Пусйыны кулэ на: Катя усто кырӟам-эктэм сяна, дышетскон удысын но "витьёсын" гинэ эшъяське. Вылӥ дунъязы Октябрь толэзьлэн пумаз Углич городын "Вӧй-99" нырысетӥ Всероссийской конкурс ортчиз. Отчы пыриськизы "Увамолоко" ОАО-ысь вӧй поттӥсьёс. Удмурт вӧез вылӥ дунъязы. Нош отын ужась А.Г.Рычин, вӧй лэсьтӥсь мастеръёс пӧлын радъям конкурсэ пыриськыса, дипломен пусъемын. В.Николаева. ГРАФИК предоставления бесплатного эфирного времени на каналах Гостелерадиокомпании "Удмуртия" региональным группам кандидатов в депутаты Государственной Думы Федерального Собрания и кандидатам, зарегистрированным по одномандатным избирательным округам. (на основании жеребьевки, проведенной 5 ноября 1999 года). Региональные группы кандидатов, кандидаты, зарегистрированные по одномандатным избирательным округам Дата и время выхода в эфир 10-й телевизионный канал ГТРК Канал ГТРК "Радио России" 1 2 3 1. Региональные группы кандидатов Совместные агитационные выступления 22.11.99 г. 18.30-19.00 ч.; 23.11.99 г. 18.30- 19.00 ч.; 24.11.99 г. 18.30-19.00 ч.; 25.11.99 г. 18.30-19.00 ч. 19.11.99 г. 18.00-18.30 ч.; 03.12.99 г. 18.00-18.30 ч.; 16.12.99 г. 18.00-18.30 ч.; 17.12.99 г. 18.00-18.30 ч. Избирательный блок "Отечество - Вся Россия" 09.12.99 г. 18.45-19.00 ч. 24.11.99 г. 18.00-18.17 ч. Избирательное объединение "Коммунистическая партия Российской Федерации" 15.12.99 г. 18.45-19.00 ч. 30.11.99 г. 18.00-18.17 ч. Избирательное объединение "Объединения Яблоко" 19.11.99 г. 18.45-19.00 ч. 26.11.99 г. 18.00-18.17 ч. Избирательное объединение "ВОПД "Наш дом - Россия" 17.12.99 г. 18.45-19.00 ч. 23.11.99 г. 18.00-18.17 ч. Избирательный блок "Союз правых сил" 02.12.99 г. 18.45-19.00 ч. 22.11.99 г. 18.00-18.17 ч. Избирательный блок "Конгресс Русских Общин и движение Юрия Болдырева" 03.12.99 г. 18.45-19.00 ч. 29.11.99 г. 18.00-18.17 ч. Избирательное объединение "ВОПД "Духовное наследие" 06.12.99 г. 18.45-19.00 ч. 01.12.99 г. 18.00-18.17 ч. Избирательное объединение "Женщины России" 08.12.99 г. 18.45-19.00 ч. 07.12.99 г. 18.00-18.17 ч. Избирательное объединение "Общероссийское политическое движение "В поддержку армии" 01.12.99 г. 18.45-19.00 ч. 09.12.99 г. 18.00-18.17 ч. Избирательный блок "Блок Жириновского" 16.12.99 г. 18.45-19.00 ч. 08.12.99 г. 18.00-18.17 ч. Избирательный блок "Блок генерала Л.Николаева, академика С.Федорова" 07.12.99 г. 18.45-19.00 ч. 15.12.99 г. 18.00-18.17 ч. Избирательный блок "Медведь" 30.11.99 г. 18.45-19.00 ч. 25.11.99 г. 18.00- 18.17 ч. Избирательный блок "Сталинский блок - за СССР" 10.12.99 г. 18.45-19.00 ч. 14.12.99 г. 18.00-18.17 ч. Избирательный блок "Коммунисты, трудящиеся России - за Советский Союз" 14.12.99 г. 18.45-19.00 ч. 06.12.99 г. 18.00-18.17 ч. Избирательное объединение "Экологическая партия России "Кедр" (зеленые)" 30.11.99 г. 18.30-18.45 ч. 02.12.99 г. 18.00-18.17 ч. 2. Кандидаты, зарегистрированные по одномандатным избирательным округам: Совместные агитационные выступления Округ � : 26.11.99 г. 18.30-19.00 ч. Округ �: 29.11.99 г. 18.30-19.00 ч. Округ �: 17.12.99 г. 12.30-13.00 ч. Округ �: 16.12.99 г. 12.30-13.00 ч. Алексеев Владимир Александрович (Ижевский избирательный округ �28) 16.12.99 г. 18.30-18.37.30 ч. 26.11.99 г. 07.44-07.52 ч. Баранов Анатолий Юрьевич (Ижевский избирательный округ �28) 08.12.99 г. 18.37.30- 18.45 ч. 06.12.99 г. 07.52-08.00 ч. Баранов Николай Витальевич (Ижевский избирательный округ �28) 10.12.99 г. 18.37.30- 18.45 ч. 26.11.99 г. 07.52-08.00 ч. Баранов Сергей Васильевич (Ижевский избирательный округ �28) 09.12.99 Г7 18.30- 18.37.30 ч. 10.12.99 г. 07.44-07.52 ч. Гурина Ольга Юрьевна (Ижевский избирательный округ �28) 03.12.99 г. 18.37.30-18.45 ч. 01.12.99 г. 07.52-08.00 ч. Забильский Владимир Викторович (Ижевский избирательный округ �28) 14.12.99 г. 18.37.30-18.45 ч. 22.11.99 г. 07.52-08.00 ч. Макаров Николай Иванович (Ижевский избирательный округ �28) 14.12.99 г. 18.30- 18.37.30 ч. 15.12.99 г. 07.44-07.52 ч. Маслюков Юрий Дмитриевич (Ижевский избирательный округ �28) 06.12.99 г. 18.30- 18.37.30 ч. 02.12.99 г. 07.52-08.00 ч. Синицына Ирина Евгеньевна (Ижевский избирательный округ �28) 08.12.99 г. 18.30- 18.37.30 ч. 22.11.99 г. 07.44-07.52 ч. Соловьев Виталий Александрович (Ижевский избирательный округ �28) 16.12.99 г. 18.37.30-18.45 ч. 15.12.99 г. 07.52-08.00 ч. Солуянов Яндрей Владимирович (Ижевский избирательный округ �28) 07.12.99 г. 18.37.30-18.45 ч. 10.12.99 г. 07.52-08.00 ч. Сямин Владимир Борисович (Ижевский избирательный округ �28) 03.12.99 г. 18.30- 18.37.30 ч. 17.12.99 г. 07.44-07.52 ч. Чуйков Игорь Вячеславович (Ижевский избирательный округ �28) 09.12.99 г. 18.37.30- 18.45 ч. 02.12.99 г. 07.44-07.52 ч. Яирова Людмила Петровна (Ижевский избирательный округ �28) 15.12.99 г.18.37.30- 18.45 ч. 24.11.99 г. 07.44-07.52 ч. Благинина Серафима Петровна (Удмуртский избирательный округ � 29) 15.12.99 г. 18.30-18.37.30 ч. 08.12.99 г. 07.44-07.52 ч. Кошкин Михаил Петрович (Удмуртский избирательный округ �29) 17.12.99 г. 18.30- 18.37.30 ч. 01.12.99 г. 07.44-07.52 ч. Никулин Валерий Александрович (Удмуртский избирательный округ �29) 17.12.99 г. 18.37.30-18.45 ч. 24.11.99 г. 07.52-08.00 ч. Подопригора Владимир Николаевич (Удмуртский избирательный округ � 29) 06.12.99 г. 18.37.30-18.45 ч. 17.12.99 г. 07.52-08.00 ч. Роговец Клементий Антонович(Удмуртский избирательный округ �29) 07.12.99 г. 18.30-18.37.30 ч. 08.12.99 г. 07.52-08.00 ч. Смирнова Светлана Константиновна (Удмуртский избирательный округ �29) 10.12.99 г. 18.30-18.37.30 ч. 06.12.99 г. 07.44-07.52 ч. Избирательная комиссия Удмуртской Республики, ГТРК "Удмуртия". ГУРТ УЛОН Байлык ачид бордысь потэ Ноябрьлэн кутсконаз Пичи Пурга ёрос 70 ар тырмонзэ пусйиз. Республикамылэн улоназ та район шӧдскымон инты басьтэ. Котькыӵе удысэз нуо пургаос, но валтӥсь интыын - пудо вордон но нянь будэтон. Ёросысь одӥгез бадӟым хозяйство - "Юж-Пурга" эштос. Солэн укмыс толэзь ӵоже ужаменыз тодматэ эштослэн тӧроез, Пичи Пурга ёрос Кенешлэн депутатэз Николай Михайлович РУСИНОВ: - Нырысь ик, вань сюлмысьтым ӟечкыламе потэ Пичи Пурга ёросын улӥсь калыкез. Ваньмызлы сӥзисько тазалык, шудбур но ӟеч малпанъёсты мед быдэсмозы. Туннэ тужгес но гажаса верасько "Юж-Пурга" хозяйствоын тыршисьёс сярысь. 18 ар ӵоже мон ужасько соосын артэ. Али ваньмызлы секыт, нош гурт удыс ялан сыръясь нюре вые кадь. Оскисько, история куке но дунъялоз ай крестьян калыклэсь туннэ чидамзэ. Курадӟытӥсь улонлэн, оло, пумыз-йылыз но уг адскы на. Нуналлы быдэ сямен кыӵе ке но шуккет сюре. Кылем арын августэ манетлэн дуныз усемен валче, машинно-тракторной паркмес выльдон пумысен малпанъёсмы тӧлӟизы. Техника дунояз. Со вакытэ ик гурт продукцилы дунъёс будӥзы, хозяйствоез возьыны уксёмы люкаськиз. Но ваньзэ "сииз" туалаез август. Музъем ужасьлэн улон-вылонэз музъем бодын. Миымен ӵошатыса, таяз аре гектарысь 6 центнерлы тросгес ю тысь басьтӥм - 16,2. Удалтӥзы бакча сиёнъёс - гектарысь 300 центнерлэсь трос бичам. Ватонэз ӧвӧл, выльдӥськон шуонзы вакытэ машинаослэн но тракторъёслэн лыдзы куинь поллы кулэсмиз. Нош кылемезлэн ужан дырыз кемалась ортчемын. Но - "шокало" на. Тыршись киос тупато-кышъяло, ӧвӧллэсь вань карыны туртто. соин, вылды, берло вить арзэ юж-пургаос техникаез утёнъя нырысетӥ интыез басьяло. Тулыс гырон-кизён кутскытозь, тракторъёсмы ог 80 процентэз дась луо. Самой со ик бусы ужъёсты вакчи дыр куспын быдэстыны юрттэ. Шугъяськытӥз аранлы дасяськон. Комбайнъёс но ю тысь шертон техника ярантэмен лыдъямын. Юослэсь сыръямзэс учкыса, сюлэм шымырскылӥз: кызьы тае утялтод? Ужмес быдэстӥм кадь. Укмыс комбайн пӧлысь рос-прос куатез гинэ ужазы. Николай Борисов 438 гектар вылысь юэз араз, нош кутсамез котькинлэсь тросгес Михаил Николаевлэн - 393 тонна. Гужем ужъёслы йылпумъянъёс шумпотто ке но, эшшо но ӟечгес быдэстыны луысал. Комбайнъёс вужесь, соин ик ыштонъёслэсь палэнскыны ӧм быгатэ. Юослэн удалтэмзы 20 центнер ёрос вал, нош басьтӥм 16-сэ гинэ. Техника ӧвӧлэн но гектар вылысь кукуруза утялтытэк кылиз. Эштосын туэ выль амалъя ужамы, котькуд адямиен огкыл гожтэмын вал. Соя ужамзы понна ю тысен но бакча сиёнэн тырим. Таӵе амал пайдаё вылэм. Калыклэн мылкыдыз ӝутске: ужамезъя дунзэ басьтэ. Пунэмъёсты тырымтэен, гужемлэн кысык вакытаз эштосысь электротылэз кысӥзы. Кӧня ке нунал ӵоже "Юж-Пурга" трос ыштонъёс адӟиз. Кылсярысь, Вылӥ ӟечлыко ю кидыс дасятэк кылиз. Юэз миымлэсь тросгес ке но октӥм, пудоез толйытыны со уз тырмы. Соин ик куд-ог шугъяськонъёс кылдо. Азямы ужпум пуктӥм: пудо сиён дасян кутскытозь, кык силос комбайн басьтоно. Одӥгзэ - лизинъя, мукетсэ - "Промстройкомплект" ЗАО пыр. Та акциосын огазеяськонэн огкыл гожтэмын, картофкамес но бкча сиёнмес соослы вузаськом. Ӟеч кылъёс вераны кулэ пудо вордонын тыршисьёслы. Ортчем арен ӵошатыса, туэ 24 процентлы йӧл тросгес кыскиськом. Умой ужало кузпалъёс Любовь но Асхат Исхаковъёс. Укмыс толэзь ӵоже соос быдэн 3517 но 3037 литрен йӧл кыскизы. Та удысын кузпалъёс 20 ар пала тыршо ни. Котькуд аре кадь сюро таза пудоез куайытонын но азинсконъёсмы луо. Курчум-Норья фермаын, шорлыдын вераса, пудо нунал куспын 629 граммлы куае. Сизьым-тямыс ар талэсь азьло хозяйствоын скаллы быдэ 3000 литрлэсь ятыр йӧл кыско вал. Отчыозь вуыны кулэ али но. Со понна умой-умой басьтӥськоно ӟеч выжы уськытон борды, техникаез выльдоно, дисциплинаез юнматоно. Скалъёслэсь лыдзэс будэтон пумысен но сюлмаськытэк уг луы. Таяз аре 80-лэсь трос скалъёслэн лейкоз висёнзы шараяськиз. Шуныт кылъёс вераны кулэ Нина Кибардина, Екатерина Гафарова но Светлана Панфилова сярысь. Тыршись кышномурт киосын возисько "Юж-Пурга" эштослэн фермаосыз. Пусйыны кулэ, дыр, специалистъёслэсь но шор звеноысь кивалтӥсьёслэсь ужзэс. Государство али гурт хозяйствоез уг "маялля". Улӟом-а, ум-а - табере ваньмыз гурт вылын. Озьыен, ваньмыз понна аслыд кыл кутоно, аслыд бызьылоно. Николай Михайлович Русинов. Кузпалъёс Любовь но Асхат Исхаковъёс. Курчум-Норья фермалэн кивалтӥсез Нина Кибардина. Шофёр Владимир Данилов туэ комбайнъёс дорысь 636 тонна ю тысь вуттӥз. Слесарь- наладчик Михаил Зянкулов машинаосты но тракторъёсты котьку дыраз тупатъяз. Туспуктэмъёсыз В. Камашевлэн. ПӦРТЭМ ДУННЕ - ПӦРТЭМ УЧКОН Удмурт кун университетысь студентъёс доры вуылӥз немец журналист Йозеф Ридмиллер. Али со кивалтэ Германиысь тужгес бадӟым "Южно-баварской газетэн" Кунгож сьӧрысь куно мадиз улосысьтызы журналистика сярысь. 50-тӥ аръёсы, Йозефлэн верамезъя, пичиесь газетъёссы быриллям, бадӟымъёсыз гинэ кылиллям на. Соослэн зӧкталазы 8-10 сантиметр луэ. Амалтэк син азе пуксё асьме газетъёсмы. Макем куанер асьмеос - кужыммы уг тырмы ньыль бамъем газетэз гинэ но поттыны. Мар веранэз ини сыӵе зӧкталаенэз сярысь! Журналистэ отын дышето кык ар. Регионъёсын ужась журналистъёс уксё уногес басьто, соин отынгес ужаны тыршо. Студентъёс немец журналистлы юанъёс сётъязы. - Быръёнъёс матэктыку, милям пото одӥг нуналъем газетъёс, соос кыӵе ке политиклэн яке партилэн ужамез сярысь гожъяло. Вань-а сыӵе газетъёс Германиын? - Ӧвӧл, но котькуд газетлэн вань аслаз политикез яке партиез, соос сярысь со одно гожъя. - Нош яра-а соосты вошъяны? - Уг, уг яра. - Кызьы вуиды журналистикае? - Со туж кузь но секыт сюрес. Нырысь дышетски Мюнхенысь университетын, практикае ортчиз пичи газетын. Но сое вузазы, отысь кошконо луи. Вуи бадӟым газетэ. Фашизм но эмиграция пыр потэм журналистъёс усьтӥзы сое. - Кыӵе тӥляд улон шоры учконды? - Оскымон адями луыны быгатоно, зэмлыко гожъяськоно. Туж гажасько кышкасьтэм журналистъёсты. - Трос-а Германиын журналистъёсты виылон учыръёс? - Виылэмзэс уг тодӥськы, но жугыло. - Тунсыкъясько-а немецъёс Россиен? - Туж тунсыкъясько. Быръёнъёс, огшоры калык сярысь тодэмзы потэ. - Вань-а "вузаськись" журналистъёсты? - Вань. Кин пумитъяськоз, 50 сюрс доллар ӵектӥзы ке. - Кыӵе ужпум али Германиын нырысетӥ интыын сылэ? - Ужтэк кылён. - Тодэм потэ вылэм, трос-а редакцияды ужасьёсты? Луэ-а гонорар чотын гинэ улыны? - Ужасьёсмы 400 пала. Гонорарен улыны луоно - со пичи ӧвӧл. - Вакчияк вералэ вал телевидениды сярысь. - Туннэ со бадӟым искусстволы пӧрмемын. Учкисьёс ярато иворъёсты, архивысь материалъёсъя дасям передачаосты. - Мар муген вуиды Россие? - Россия мыным туж кельше. Тодматскисько татысь пӧртэм улосъёсын, Москваен ӵошатыса, соос чылкак мукетэсь, трослы тунсыкогес. О.Никитина, Удмурт университетысь студентка. Пулы дунъёс Удмурт Республикаысь Тарифъёсъя но дунъёсъя кун комитет нимысьтыз постановление кутӥз. Отын вераськон мынэ эстӥськон пулы дунъёс сярысь. Льготаосын адямиос сое 15 ноябрьысен басьтыны быгатозы таӵе дунын: кызьпулэсь эстӥськон пуэз (2-4 метръем) одӥг кубометрзэ 45 манетэн, нош мукет пуэз (2-4 метръем) - одӥг кубометрзэ 40 манетэн. Е.Николаева. Удмурт Республикаысь Кун Кенешлэн пресс-службаезлэн ивортонэз Туэ 6-тӥ ноябре ОРТ канал пыр ("Время" аналитической программа) возьматэмын вал "Ижевский электромеханический завод "Купол" кун предприятиын "Тор-М1" зенитно- ракетной комплексъёсты поттонэн герӟаськем югдур сярысь сюжет. Отын сётэмын вал Удмурт Республикаысь Кун Кенешлэн Тӧроеныз Александр Волковен интервьюлэн люкетэз. Кивалтӥсь сое сётӥз вал ОРТ-ысь корреспондентъёслы. Соослэн тодэмзы потӥз, зэмзэ ик-а, пе, "Тор-М1" комплексъёсты бичанъя заказлэн кӧня ке люкетэз Марий Эл Республикалы сётӥськоз. Военной заказъёсты быдэсъян шоры кун ласянь дунъет сётоно, пусйиз, ОРТ-ысь журналистъёслэн юанъёссылы валэктыкуз А. А. Волков Удмурт Республикаысь Госсоветлэн Председателез. Ю. Д. Маслюков пумысен шуиз: со тодмо политик но государственной деятель, оборона удысын усто специалист. Соин ик котьку юрттылӥз но азьланяз юрттыны чакла Удмуртиысь промышленной предприятиослы, озьы ик трос лэсьтӥз "Ижевскысь электромеханический завод" кун предприятилы заказъёс басьтон ласянь. Удмурт Республикаысь Кун Кенешлэн Тӧроеныз интервьюлэн люкетэз но телесюжетлы валэктон юромо лэсьтэмын вал, республикаысьтымы кивалтӥсьёс но Ю. Д. Маслюков "Купол" кун предприятие шоры умойтэм учко шуыса. Пуштросэзъя эфирын сётэм сюжет югдурез шонер уг возьматы. Татын со быдэсак герӟаськемын политикаен. ОРТ аслаз каналъёсаз берло дыре шара война нуэ, шуыны луоз. Таяз учыре но со бырйисьёс азьын куашкатыны малпаз Россия Федерациысь Кун Думае депутатэ одӥгезлэсь кандидатлэсь но общественно-политической огазеяськонлэн кивалтӥсьёслэсь данзэс. ОРТ-ысь журналистъёсты быръён азьын кырсь уж нуэмзы пумысен сокем пыкылоно ӧвӧл, дыр. Соос быдэсъязы но быдэсъялозы заказъёссэс. Соин ик Удмуртиын улӥсьёс шонер валаны кулэ ОРТ-лэн каналъёсыз пыр ортчись сюжетъёсты, кулэ соослы кулэезъя дунъет сётыны. Удмурт Республикаысь Кун Кенешлэн пресс-службаез. Вуоно абитуриентъёслы дэмланъёс Али шутэтскыны уг яра! Котькуд дышетскон заведение капчиен уд пыры ни али. Ужпум коньдон бордын но. Тросаз душетсконтӥосын дун куро. Дунтэк интыос кулэсмемен, конкурсъёс бадӟым луо. Визез номырин но воштыны уг луы. Со веран вужмемын ни, малпасько. Туала арын котьмае коньдон ворме. Ӟепыд тыро ке - сюрес но котькытчы усьтӥськоз. Нош шула ке - визьмо мурт но номыртэм кыле. Дышетскыны пырон понна экзаменъёс пыр ортчоно луэ. Мынам таӵе ӵектонме вераме потэ вуоно абитуриентъёслы. Каникулъёсы ик ветлэ ни экзаменъёс сярысь тодыны, гожтӥське абитуриентъёсты дасян курсъёсы. Но уката умой луысал, шугъяськоно предметъя репетитор ке шедьтысалды. Та амал пыр мон ачим но потӥ. Репетитор трос тодон-валан сётэ. Экзаменъёслы дася вузлэн куронъёсызъя. Зэм, шедьыло уксё понна гинэ вырисьёсыз - сыӵеосыз трос тодон-валан уз сётэ. Тае шӧдӥды ке, дышетӥсьтэс одно ик воштыны тырше, мукетсэ утчалэ. Умойгес луысал, репетиторез дышетсконтӥысь бадӟым адямиос ӵектысалзы ке. Мон сямен, репетиторен дышетскон огъя курсъёслэсь умойгес. Малы шуиськоды-а? Репетиторлэн дышетскисьёсыз трос уг луо. Соин ик вань кылдэм юанъёстэс возьдаськытэк сётыны быгатоды, ӵош сэрттоды-пертчоды. Мыным университетэ пырыны репетиторъёслэн сётэм тодон-валанзы туж юрттӥз. Л. ЯКУНИНА, Удмурт кун университетын дышетскись. Законъёсты тӥяло ке Россия Федерациысь Федеральной Собранилэн Кун Думаяз депутатъёсты быръёнэн герӟаськем кампания ортчытон вакытэ законъёсты тӥян учыръёсты алон вылысь, Удмурт Республикалэн прокуратураезлэн аппаратаз но городъёсысь, ёросъёсысь прокуратураосаз шутэтскон нуналъёсы дежурство радъяське. Быръёнъёс сярысь законодательствоез тӥян учыръёс пумысен вазиськоно Удмурт Республикаысь прокуратурая дежурнойёслы таӵе адресъёсъя: Ижевск город, В. Сивков ульча, 154, телефонэз 78-45-78, Ижевскысь прокуратурая дежурнойёслы - К. Маркс ульча, 393. Телефонэз 22-55-40. Удмурт Республикаысь Прокуратуралэн пресс-службаез. Ӟечкыласьком! Та арлы Куӟебай Герд нимо премиез сётоно тодмо учёнойлы Роза Яшиналы но писательлы Кирилл Ломагинлы. Таӵе решение кутӥз "Удмурт кенеш" огазеяськонлэн исполкомез кылем пятницае. Нош Ашальчи Оки нимо премия шедиз Воткинскысь Альбина Вахрушевалы, удмуртлык понна уно аръёс ӵоже ни нюръяськись адямилы. Ӟечкыласьком! Та нуналэ ик исполком эскериз трос мукет ужпумъёсты. Кылсярысь, юнматэмын "Герд" газетлы редактор. Та секыт ужез эшъёс оскизы калык писательлы Петр Черновлы. Озьы ик быръемын выль изданилэн коллективез. Вице-президент Нина Малых ивортӥз калык пӧлын валэктон уж нуись группаос кылдытон пумысен. Со ик вераз кнылкышноослэн матэктӥсь ӧтчамзы сярысь. Рос-прос кенешон вал кылъёс сярысь законлэн инъетэзъя но Кун Думае быръён азьын кылдэм югдуръя. Та ласянь ас мылкыдъёсыныз тодматӥз "Удмурт кенешлэн" тӧроез Валентин Тубылов. И.Кричев. Бускельёс дорын ИНСТИТУТ ИНТЫЕ АКАДЕМИЯ Кировысь медициная кун институт арысь аре бадӟымесь азинсконъёс басьтэ но Россиысь азьветлӥсь вузъёсын артэ вамышъя. Сое возьматӥз туэ апрель толэзе ортчытэм аттестация но. Нош та вакытэ соос кык полэс шумпото: асьсэлэн басьтэм вылӥ тодон- валанъёссылы но мединститутлэсь статуссэ воштэмзылы. Табере Кировысь медициная институт луиз медициная академия. Таӵе шумпотон ивор вуттӥз институтлэн ректорез В.А.Журавлев, Москваысь Тазалыкез утёнъя министерстволэн коллегилэн заседаниысьтыз вуыса. Нылпиослы шудонъёс Котькыӵе ужан удыслэн аслыз гинэ тупась инструментэз вань. Кылсярысь, фотографлы кулэ фотоаппарат, журналистлы - ручка, гу гудӥсьлы - лопата, нош покчи пиналъёслы - шудон. Жаляса верано, нылпи садэ ветлӥсьёслэн шумпотонзы та вакытэ туж ичи. Уго тросэз шудонъёссы вужмемын, тӥяськемын-сӧриськемын. Соин ик нылпи садын ужасьёс анай-атайёслэсь, кивалтӥсьёслэсь кураськоно луо. Алигес Кильмезьысь нылпи садъёсы, выль шудонъёс басьтыны шуыса, ёрос администрация коньдон висъяз. "Солнышко" садлы 1197 манет, "Родничоклы" - 921 манет, "Колосоклы" - 882 манет. Нош Чернушкиысь гурт администрацие пырись нылпи садъёслы ёросысь леспромхоз 6000 манет висъяз. Со-а шумпотон ӧвӧл нылпиос понна?! "Мак-99" нимо операция алигес быдэс Россиын ортчиз. Та "ческыт" турынэн тросэз визьтэммо, усыкмытозязы кудӟо. Жаляса верано, тросэз сое бакчаосазы юри будэто на вылэм. Озьы, Кильмезь ёросысь внутренней ужъёсъя отделын ужасьёс 23 муртэ ӝегатӥзы но 30 килограмм пала максэс талазы. Табере соос закон азьын кыл кутоно луозы. Нырысетӥ интыын - кильмезьёс Инвалидъёслэн спортъя "Надежда" фестивальзы куатетӥ ползэ ортче ни. Таяз радэ солэн ужрадаз пыриськиз 300 адями. Ӵошатсконъёсын кыкетӥ группая вормисе потӥз Кильмезь ёросысь команда. Пусйыны кулэ: секыт нюръяськонын соос азьпалтӥзы Кирово-Чепецк, Советской но Светлинской ёросъёсысь кужмо командаосты. "Ерофеичен" секыт нюръяськыны Кудӟытӥсь юонъёсын вузкарон интыос нуналлы быдэ йыло. Алигес Кильмезьын усьтӥськиз акциосын "Слободский спиртоводочный завод" огазеяськонлэн "Ерофеич" магазинэз. Туннэ нуналлы ерофеичлэн дунъёсыз трослы пӧртэмесьгес, со сяна, мылкыд каремъя бырйыны но луэ. Кылсярысь, дунтэмез водка сылэ 24 манет но 70 копейка. Та кутсконэз гинэ ай, пе. Вузкарисьёслэн верамзыя, курыт виналэн ассортиментэз трос пӧртэм пумо луоз на.Та магазинын ик куто на буш бутылкаосты. Одӥгзэ, кылсярысь, ӝыны литръем буш ӟенеликез манетэн басьто. Жаляса верано, солэсь дунзэ "улэп" коньдонэн уг сёто, кыӵе ке вуз басьтоно, пе. Н.Турин. Конкурс йылпумъяськиз Кез ёросын печатласькись газетын потӥсь "Кам син" бам кылем арын лыдӟисьёсыз пӧлын "Мынам гуртэ" конкурс ялӥз вал. Гуртлэн кызьы кылдэмез, малы сыӵе ним сётэмын, маин гурт калык данъяське но кыӵе дано адямиос гуртазы будэмын шуыса гожтэмъёссэс редакцие ыстылӥзы. Та ужрадэ мылысь-кыдысь пыриськизы егитъёс но, мӧйыос но, нош "Кам синэз" лыдӟисьёс сое дунъязы. Нимысьтыз вормисез ӧз висъялэ ке но, куд-ог ужъёсты висъяны луоно. Вордскем Изошур гуртэз сярысь шуныт кылъёсын гожтэм Гыяысь Нина Арсентьевна Максимова, Стеньгуртын улэм дано адямиос сярысь лыдӟисьёслы тупен-тупен мадем та гуртысь дышетӥсь Тамара Семеновна Наговицына, асьсэлэн дано но мусо вордскем гуртъёссы - Гулейшур но Верх-Уди - сярысь гожтӥллям Светлана Родионова но Эвелина Жигалова. Малпаськом, вылӥ верам эшъёс азьланяз но газетлэн матысь эшъёсыз луозы шуыса. В. АНДРЕЕВА. Быръёнъёс азьын Котькудӥз малпа азьпала потыны Кин меда вормоз? Кызьы тодмо луиз 5-тӥ ноябре Кун Думае быръёнъёсы пыриськыны мылкыд кариз 28 огазеяськон. Шуг оскыны, ваньмыз ик соос кивалтон ёзэ сюрозы шуыса. Куд-огез уго сыӵе ужпум ас азяз уг но пукты. Соос кылдытэмын мукетъёсызлы, кужмоосызлы люкетон понна, кӧня ке коть бырйисьёсты ас палазы кыскон вылысь. Валамон, та чыры-пыры партиос но движениос быръёнъёсын азьветлӥсь кужым уз луэ. Соин ик туннэ эскером сыӵеоссэ гинэ блокъёсты, кудъёсызлэн Думае шедьыны луонлыкъёссы бадӟымесь. "Отечество - быдэс Россия" блоклэсь кужымзэ, обществоын интызэ пичиёмытон понна, Президентлэн Администрациез кылдытӥз "Единство" движение. Кызьы лыдъяло политологъёс, сое кылдытон сярысь ӵектон сётӥз Б. Березовский. Нош солэсь малпанзэ улонэ пыӵатӥз Н. Аксененко "Единстволэн" азьветлӥсез луиз С. Шойгу, Б. Ельцинлэн матысь но оскымон адямиез (Президент солы алигес гинэ сётӥз Россилэн Героезлэсь Кизилизэ). С. Шойгу кивалтэ тужгес но кужмо удысэн - Кышкыт учыръёслэсь утиськонъя министерствоен. Солы 44 арес, йылпумъяз Красноярскысь лэсьтӥськонъя институтэз. Ужаз Сибирьын но уй палан лэсьтӥськонын, вал КПСС-лэн Абакан горкомезлэн секретарез. 1993-тӥ арысен Б. Ельцинлэн ӟырдыт дурбасьтӥсез. "Единство" малпамын вал, губернаторъёслэн командазы луоз шуыса. Отчы пыризы 21 республикаослэн но областьёслэн кивалтӥсьёссы. Соос пӧлын - тужгес но начар улосвылъёслэн кузёоссы, кудъёсызлэн улонзы гогыен кадь герӟаськемын Москваысь коньдонэн. Мукетъёсыз Кремлен кусыпъёссэс сӧрыны уг дӥсьто, губернаторе быръёнъёссы матэктэмен сэрен. Нош кин ке но Б. Березовскийлы "пунэме" кылемын ортчем быръёнъёсаз таизлэн юрттэмез понна. Кин ке мылкыд уг кары ОВР-ын огшоры адскисьтэм инты басьтыны. Вань сыӵеосыз, кинлы уг кельшы Е. Примаковлэн губернаторе быръёнъя амалэз. Солэн дэмламезъя, интыосысь законэз дасясь ёзъёс бырйыны кулэ губернаторе Президентэн ӵектэм адямиосты. Состы мозмытон но озьы ик ортчыны кулэ. Нош С. Шойгу дурбасьтэ регионъёслы тужгес но трос правоос но луонлыкъёс сётон понна, сотэк, пе, странаын порядок уз луы. Валамон, солэн таӵе ӵектонэзлы туж синмасько интыосысь ачимъяськись кузёос. Но таӵе мылкыдъёс Россиез люконэ вуттозы шуыса, малпаськись ӧвӧл. Тӥни сыӵе губернаторъёс люкаськемын "Единствое". Та огазеяськонэз юн, огъя мылкыдо командаен лыдъяны уг луы. Котькуд губернатор угось, та огазеяськонэ пырыса, аслэсьтыз гинэ пайдазэ утча, аслэсьтыз гинэ малпанъёссэ быдэстыны тырше. "Буръёслэн огазеяськонзы" блок кылдытэмын 1999-тӥ арын 29 августэ. Отчы пыро "Правое дело", "Новая сила", "Голос России" но "Общее дело" огазеяськонъёс. Кивалтӥсьёссы - Б. Ельцинлэн дурбасьтӥсьёсыз но юрттӥсьёсыз. Соослэн ӧтёнзы - "Макем пичигес государстволэн улонын интыез, сокем умойгес". Соослэн малпанъёссы люконтэм герӟаськемын эрказмем капитализмен, соос пичиятыны туртто госудастволэсь экономикаын, рынокез радъянын интызэ, санэ уг басьто калыкез улон-вылонын утёнэз. Блоклэн азьветлӥсьёсыз - С. Кириенко, Б. Немцов но И. Хакамада. Отчы ик пыро Е. Гайдар но А. Чубайс. Ваньмыз та политикъёс калыклы умой тодмо, тросэз ласянь, ӟечен ӧвӧл. Е. Гайдар вань коньдон системаез куашкатӥз, манетэз дунтэматӥз, Россиын ӝоггес капитализм пыӵатон понна. Б. Немцов А. Чубайсэн ӵош дасязы пенсиосъя, улон интыосъя но коммунальной удысъя реформаослы инъет. Та ӵектонъёсты пыӵатыса, Пенсиосъя фондэ тросгес коньдон вуысал, улон инты понна дунъёс кык пол будысалзы. С. Кириенколэн егит эшъёсыныз "реформаторъёсын" В. Черномырдинлэн правительствоеныз кылдытэм секыт югдурез тупатыны кулэ вал. Нош соос, экономикаез йӧнатон интые, трос миллиардъем кредитъёсты быдтӥзы банкиръёслэсь коньдонзэс утён понна. Собере ялӥзы девальвация но дефолт, мукет сямен вераса, манетлэсь кужымзэ ӧвӧлтэм каризы но государстволэсь пунэмен тыронэзлэсь палэнскизы. "Бур пал политикъёс" али но экономика удысын номыр ӟечсэ ӵектыны уг быгато. Блоклэн программаез калыклы синмаськымон ӧвӧл ке но, солэн луонлыкъёсыз ичи ӧвӧл. Со палан - А. Чубайслэн пӧртэм ужрадъёсты "пӧраны" бадӟым быгатонлыкез, Б. Ельцинлэн дурбасьтэмез но лыдъянтэм коньдон. Блоклэн федеральной списоказ Удмуртиысь пыро: Виталий Скрынник, "Демократический выбор России" партилэн Удмурт ёзэзлэн тӧроез, Владимир Чирков, Россиысь социальной демократилэн партиезлэн Удмурт ёзэзлэн тӧроез, но Иван Зайцев, "Проект" группалэн кивалтӥсез. "Наш дом - Россия" котьку но вал "ӟеч улӥсьёслэн" партизы, малы ке шуоно, со пыкиське чиновникъёс, губернаторъёс но промышленностен кивалтӥсьёс вылэ. В. Черномырдинлэн правительствоез отставкае кошкемез бере, НДР бадӟым шуг-секытъёсын пумиськиз, лябомиз. Солы дурбасьтӥсьёс пӧлысь кӧняез ке С. Беляевлэн "Российский прогрессивный союз" палаз кариськизы, кӧняез ке мынӥзы "Яблоко", КПРФ но "Россия молодая" сьӧры. НДР, кызьы со ялӥз аслаз программаяз, нюръяське демократичесой эриклыкъёс, законность но порядок, экономикаез ӝутон понна. Кудӥз меда партия, огазеяськон со понна уг нюръяськы? Котькыӵе чебер программа дася, но В. Черномырдинлэсь одно ик юалозы: кин бен ӧз сёты со ужпумъёсты быдэстыны премьер-министр дыръяд? В. Черномырдин 6 ар ӵоже вал премьер-министр. Со куспын Россиын экономика куашкан калэ вуиз, 75 процентсэ уксё берганэз воштӥзы ваньбурен меӵак вошъяськон (бартер) но коньдон воштосъёс (вексельёс). Экономикаын кузёяськыны кутскизы законэз гажасьтэм кужымъёс. 40 процентэз коньдон бергатон выт тыронлэсь палэнэ кылиз. Ӵапак та вакытэ Россия азьпала потӥз кузьмаськонъя (коррупция). Кызьы тодмо, миым 17-тӥ августэ вордскем кризис потӥз ТКО нимо "гурезь" куашкамысь. Нош та "гурезез" ӝутӥз вал В. Черномырдин. Солэн правительствоез тыро-пыдо ӧз ужа странаысь промышленностез ӝутон бордын. Пайда ваисьтэм предприятиослэн лыдзы промышленностьын будӥз 54 процентозь, гурт хозяйствоын - 80 процентозь. В. Черномырдин турттӥз вал инфляциез "шымыртыны". Но кыӵе амалъёсын? Уждунэз, пенсиосты но пособиосты ӝегатон чотын. Экономикалэсь висёнъёссэ ӧз эмъялэ, зӥбыны гинэ турттӥзы. Соин ик В. Черномырдинлы ӧз удалты выльысь премьер-министр луыны. Али шуг оскыны, НДР бырйисьёслэсь вить процентсэ куараоссэс люкалоз шуыса. Азьвыл кылдэм демократической партиос пӧлысь "Яблоко" гинэ выль Думае шедьыны быгатоз, дыр. Но та огазеяськонлы валтӥсен ӧзгес удалты, шуыны луоз. Паймоно, ява: бырйисьёс Явлинскийлы дурбасьто, синмасько кадь, нош куараоссэс уг сёто. Григорий Алексеевич тодмо котьку но котькинлы пумит луэменыз. Котькудзэ правительствоез со котыр ласянь умойтэмен лыдъя, нош ачиз номыр борды но уг басьтӥськы. Вылаз ик, тушмонъёсын нюръяськоназ кырсь амалъёсын но сьӧлыка. Тани миым со шара вераз, Е. Прмаковлэн правительствояз кузьмаськон алямын шуыса. (Нялтас вераса, Г. Явлинский ик ӵектӥз вал Евгений Максимовичез премьер-министре.) Нош меӵак кузьмаськон учыръёс сярысь юазы но Г. Явлинский спецслужбаос вылэ чӧлскиз: соослэн, пе, ужзы йыртэманэз шараяны, нош мон обществолы синзэ усьтыны гинэ кулэ. Г. Явлинскийлэн экономикаын пусъем сюресъёсыз сярысь верано ке, тодэ ваёно солэсь "Нижегородской прологзэ". Со Б. Немцовен ӵош басьтӥськиз вал Нижний Новгород областьын "адями тусо" капитализм лэсьтыны. Малпанэз быдэсак куашказ. Та областьын ваньбур поттон быдэс Россиын сямен ик аналмиз. Президентлэн Администрациез "Яблоколы" юрттыны дась отын, кытын со нюръяськоз ОВР-лэн кандидатъёсызлы пумит. Г. КОРЕПАНОВ. Владимир Путин - Ижевскын Дано конструкторез Михаил Калашниковез ӟечкыласьёс пӧлын вал Россиысь Правительстволэн Тӧроез Владимир Путин. Калык азьын вераськыкуз, со пусйиз автоматлэсь ӟеч луэмзэ, тодматӥз военно-промышленной удысын кылдэм югдурен. Премьер-министр юбилярлы час кузьмаз, озьы ик ивортӥз Борис Ельцинлэн Михаил Калашниковлы генерал-лейтенант звание тупатон пумысен Указэз сярысь. Выль погонъёсты сётӥз обороная министр Россия Федерациысь маршал Игорь Сергеев - Калашниковлэн кизилиез ӝуатскиз кемалась, со туж яркыт пиштэ, асьмелы гинэ уг - быдэс дуннелы, - шуиз сӥё-дано ӝыт бере Владимир Путин. - Михаил Тимофеевич шонер пусйиз туннэ, аслэсьтыз автоматсэ со Родинамес утён понна кылдытӥз шуыса. Табере Калашников юрттэ бӧрсяз лыктӥсьёслы. Асьмелэн сюлмаськонмы - та ужез радъян. - АК автоматлы патент алигес гинэ сётэмын ай. Мар табере со сётэ Россилы? - юазы журналистъёс. - Котьку, котькуд странаын, соизлы яке таизлы изобретенилы патент сётӥське ке, со понна тыриське коньдон. Но - та ужез дыраз лэсьтоно. Нялтас ивортом: дуннеысь 52 государствоын солдатъёс уже куто Клашниковлэсь автоматсэ, ваньмыз та ож тӥрлык ог 8 миллион поттэмын ни. Владимир Путин Ижевскын ог куинь час гинэ вал ке но, солэн лыктэмез праздниклэсь данзэ шӧдскымон ӝутӥз. Со сяна, Владимир Владимирович асьме экономикамес ӝутонъя куд-ог решениос кутыны юрттӥз. Огъя вераса, юбилейлы сӥзем ужрадъёс зол ортчизы. Удмуртие люкаськем уно куноослы концерт возьматӥз "Италмас" ансамбльмы. Ярам коть, отысь артистъёс удмурт шӧм пыӵатӥзы ик та нуналэ. Уго сӥё-дано ужрадлэн нырысетӥ люкетаз со чик но ӧз шӧдӥськы. Ма, ог 25 муртъем президиумын асьме выжыысь потэм одӥг муртлы но инты ӧз шедьы бере, мукет сямен луыны но уг быгаты ни вал. Тӥни озьы. И.Лебедев. Сюлэмыз кырӟа Кияса ёросысь Вуж Салья гуртын одӥг ужрад но та шаплы кышномурттэк уг ортчы - Александра Ефимовна Беспалова гуртазы али арлыдоос сярысь сюлмаське. Нош кырӟа пичи дырысеныз. Та вакытэ вань быгатонлыксэ но тодон-валанзэ егитъёслы сётэ. Мылысь- кыдысь ветлэ "Кубо" фольклор ансамбле. Куать ар талэсь азьло Вуж Сальялась дышетӥсь Надежда Витальевна Бочкарёва классысьтыз нылпиосыныз ӵош "Кубо" нимо ансамбль кылдытӥз. Отын пиналъёс но соослэн анай-атайёссы но песянай-песятайёссы пӧртэм калык кырӟанъёсты но эктонъёсты калык азьын возьматылӥзы. Кылем дышетскон арын "Кубоысь" егитъёс школазэс йылпумъязы, нош дышетӥсьсы туэ "Кубо" ансамбльлэсь улонзэ азинтэ мукет классэн ӵош. Шумпотыса тодаз вае Александра Ефимовна Иже нырысьсэ ветлэмзэ - школаын дышетскыкуз вал со. Ижын ортчись фестивале соос быдэс школаен мынӥллям. Сюрессы секыт, сулеп вылэм. Озьы ке но, Вуж Сальялась коллектив соку, кыкетӥ инты басьтыса, гуртаз выль баян ваем. Кыӵе шумпотон вал, дыр, со секыт аръёсы. Со дырысен та кышномурт ялан сцена вылын: кырӟа но, эктэ но. С. ПЕТРОВА. Люкасько кизнеръёс Кылем арын кылдӥз Кизнер ёросын вордӥськем, отын куке но ужам но али Ижын улӥсь муртъёслэн огазеяськонзы. Филармонилэн бадӟым зал тыраз люкаськылӥзы соос нырысетӥ ӧтчамазы. Нош туэ куатьтон ар тырмиз вордскем ёроссылы. Соин валче Ижысь кизнеръёс нош ик бадӟым ӧтчам ортчыто. Таяз учыре соос куное ӧтизы дор палъёссэс но. Кизнер ёросысь ог сизьымдон адями лыктыны дасяське. Вуоно арня нуналэ, 21-тӥ шуркынмонэ, Ижысь Егитъёслэн юртазы (Коммунаръёслэн ульчазы, 363) нуназе шорын ик усьтӥськоз ёросазы поттӥськись арбериосты но чебересь киужъёссэс возьматон. Нош нуназе бере куинь часын, ёрос кивалтӥсьёслэн вераськемзы бере кутскоз Кизнер палась усточиослэн бадӟым концертсы. Кизнер палась адями та ӧтчаме лыктытэк чидалоз меда?! Василий ВАНЮШЕВ. Москвае люкаськизы Россиысь писательёс Берло дасо аръёсы Россиысь писательёслэн улон-вылон югдурзы тужгес но начармиз. Сое чиданы уг луы ни, кыӵе ке но ужрадъёс кутоно. Таин валче Россиысь писательёслэн правленизы (кивалтӥсез Валерий Ганичев) ӧтчамзэ люказ. 16-тӥ-17-тӥ ноябре Москваын ортчем съездлэн ужаз делегат луыса пыриськиз Удмуртиысь Писательёслэн огазеяськонзылэн тӧроезлэн воштӥсез Никвлад Самсонов. Ас мылкыд каремзыя ветлӥзы Зоя Богомолова но Владислав Кириллов. Т. НИКОЛАЕВА. 1. Кырӟанэз шыкысэ уд пытса Уно ужрадъёс ортчизы, удмурт калыклэн сӥё-дано пиезлы Геннадий Михайлович Корепанов-Камскийлы 70 арес тырмемен валче. Ми соин огъёзъёс. Тодматским витьтонэтӥ аръёсы, "Удмуртиысь Комсомолец" газетын ужан вакытам. Нош кусыпъёсмы юнмазы куатьтонэтӥ аръёсы. Соку мон ужай Удмурт радиоын. Крезьгуръя редакторен Борис Бакулевен но хормылэн кивалтӥсеныз Геннадий Прокопенкоен ӵош люкаськылыса, композиторен ӵемысь кенешылӥм радиоен умоесь кусыпъёс тупатон сярысь. Геннадий Михайловичлэн но мукет композиторъёслэн уноез кырӟанъёссы калык доры сюрес шедьтӥзы Удмурт радио пыр. Лыдӟисьёслы мадеме потэ композиторлэн улоназ луылэм куд-ог тунсыко но кытӥяз аслыз кайгырон ваем учыръёс сярысь. Кыкнамес ик милемыз секыт висёнъёс туэ вуттылӥзы шаерысьтымы кык номеро эмъяськонние. Толэзь ӵоже йӧнатскимы отын: одӥг мында - южтолэзе, одӥг мында - гудырикошконэ. Эмъяськон процедураосмес ортчыса, ӝытъёсы ӵем пукылӥмы, оломар сярысь но кенешылыса. Мон висьыкум но выроно луи сӥё-дано землякмылы авиациысь маршаллы Ф. Я. Фалалеевлы 100 ар тырмон юбилеез дасянэн. Геннадий Михайлович но, вуись юбилеез сярысь малпаса, выль бадӟым крезьгуро ужез бордын пукиз. Ф. Я. Фалалеевлэн юбилеезлы дасяськонэн герӟаськем ужъёсы сярысь мадеме бере, огпол солы вазиськи: - Тон туж бадӟым уж борды басьтӥськид ке но, уд быгаты-а Фалалеев сярысь кырӟан пӧрмытыны? - Малпаськыны кулэ. - Оло, мадёд маршаллэн улон сюресэз сярысь? - Мадем гинэ ӧвӧл, книгаосме но, Фёдор Яковлевич сярысь вань гожъямъёсме но возьмато. Озьы кутским ми Ф. Я. Фалалеев сярысь кырӟан кылдытон бордын ужаны. Арня пала Геннадий Михайлович вуоно кырӟанэзлэн кылъёсыз бордын выриз. Милемын ӵош соку эмъяськизы ожез ортчем ветеранъёс, вань улонзэс газет ужлы сётэм адямиос - кык Васяос: Никитин но Смирнов. Ӵош люкаськылыса, ог вить пол сэртттӥм-пертчим вуоно кырӟанлэсь кылъёссэ. Нуналъёс ортчемъя, Геннадий Михайлович крезьгурзэ но кылдытъяз, кырӟалляз но. Нырысьсэ чузъяськиз кырӟан Ижысь ветеранъёслэн клубазы. Отын вераськон мынӥз Ф. Я. Фалалеевлэн улэм-вылэмез сярысь. Кужмо кичабконъёсын пумитазы люкаськемъёс Геннадий Михайловичлэсь фортепьяно сьӧрын выль кырӟанзэ усто быдэстэмзэ. Нош 31-тӥ мае со выльысь чузъяськиз маршаллы сю ар тырмонлы сӥзем бадӟым люкаськонын. Москваысь но элькунысьтымы ӵыжы-выжыосыз тау каризы композиторлы но кырӟасьлы, сыӵе усто произведение кылдытэмез понна. 2. ...Обкомлэн пленумаз, отчы быръем адямиосты сяна, культура но искусство удысъёсын унозэ тыршисьёсты но ӧтизы. Партилэн вылӥ кивалтэтаз культурая ужпумъёсты туж шер эскерыло вал. Кытӥ но отӥ бюролэн, ӵемгес - секретариатлэн люкаськемъёсазы гинэ эскеремъёсынызы буйгатскылӥзы. Обкомлэн кивалтӥсьёсызлэсь сюлэмъёссэс юнгес бугыръяллязы элькунлэн экономикаез но калыклэн улон-вылонэз сярысь сюлмаськонъёс. Соин но, дыр, обкоме уногес бырйылӥзы бадӟымесь заводъёслэсь, партийной но хозяйственной органъёслэсь кивалтӥсьёссэс. Культура удысысь ог кык-куинь тодмо адямиосты ньӧмыз понна бырйылӥзы ик. Соос пӧлын вал Геннадий Михайлович но. Таяз пленумын бадӟым кивалтӥсьёс докладэз но прениосын вераськисьёсты ӧз кылзэ, шуыны луоз, куспазы вераськыса пукизы. Но тани кыл сётӥзы Геннадий Михайловичлы. Ӧжытак вераськемез бере, артист кырӟаны кутскиз. Залын чусак шыпыт луиз. Вань люкаськемъёс паймыса учко я кырӟась, я обкомлэн бюроезлэн президиумын пукись членъёсыз шоры. Озьы ик паймыса учкиз артист шоры обкомлэн нырысетӥ секретарез Петр Семенович Грищенко но. Нош собере буйгатскиз но пальпотыса кырӟанэз кылзыса пукиз. Кужмо кичабконъёсын келязы Геннадий Михайловичез трибуна сьӧрысь. Пленум йылпумъяськем бере, со мон доры лыктӥз но шуэрскыса юаз: - Мон тонэ, Леонид Петрович, пленумын кырӟаменым шуге-леке ӧй вутты меда? Марысь мар ке, ваньзэ вылам погыльты. Мон уго, нокинэн чик вераськытэк, озьы лэсьтӥ. Эн куректы, ява. - Азьвылэз кивалтӥсьмы дыръя кырӟамед понна, одно ик пыкылысалзы монэ. Нош Грищенколы демократ шӧм уногес пыӵам ни. Уз пыкылы кадь потэ, кырӟакуд солэн мылкыдыз ӧз куашка, серекъяса пукиз. Та учыр сярысь ужпум обкомын ӧз ӝутскылы огпол но. Мынам малпамея, Геннадий Михайловичлэн данэз кивалтӥсьёс азьын эшшо но вылэ ӝутскиз. 3. Обкомын культурая отделын ужакум, мыным ӵем пумиськылоно луылӥз Геннадий Михайловичен. Со угось кема аръёс ӵоже кивалтэ вал ини элькунысьтымы композиторъёслэн огазеяськонэнызы. Творческой ужпумъёсын ӵош ик эскероно луылӥз ужасьёссы куспын кылдылӥсь учыръёсты но. Мар ватонэз: творчество удысын тыршисьёс пӧлысь котькудӥз сямен аспӧртэмлыко адями луэ. Яке, ӟуч сямен вераса, личность. Кивалтӥсьлы татын туж валаса, дыртытэк но чидаса ужано луылӥз композиторъёсын. Озьы ке но, кинлэн ке сюлэмъяз ӧз луылэ кивалтӥсьсылэн ужан амалъёсыз. Куд-огезлэн вожъяськон сямыз вылэгес ӝутскылӥз. Мукетыз малпалляз: сое татын валаны уг тыршо. Вал сыӵеосыз но таосыз тӧрозылы пумит лушкем уж нуизы, эшъёссэс узатылӥзы кивалтӥсьсы вылэ. Пенсие потон дырозяз кык ар но ӧй вал ни. Нош сыӵе "юлтошъёсыз" ваньзэ лэсьтӥзы, тӧрозэс воштон вылысь. Мон но со вакытэ радиое ик, азьвыл ужам, берытски. Хорысьтымы кивалтӥсен кенешыса, Геннадий Михайловичез ӧтимы отчы солист луыса ужаны. Композитор выль ужез борды шумпотыса, мылысь-кыдысь басьтӥськиз. Бадӟым кивалтон удысын тыршыкуз, аслаз ужъёсыз бордын вырыны дырыз туж ӧжыт кыльылӥз. Татын со ласянь усто но пайдаё ужаны вань луонлыкъёс вал. 4. ...Тазэ учырез Геннадий Михайлович мыным ачиз мадиз эмъяськонниын дыръям. Сое ас вакытаз огпол гинэ ӧз бырйылэ элькунмылэн Вылӥ Кенешаз депутатэ. Обкомын малпазы: дыр вуиз ни Г. М. Корепанов-Камскиез вылӥегес ӝутыны. Ӵап со вакытэ РСФСР-ысь Вылӥ Кенеше быръёнъёслы дасяськон кутскиз. Шонерак вералом: со дыръёсы депутатъёсыз калык "бырйылӥз" ке но, вань кандидатъёсты ӵектылӥзы партийной органъёсын. Туэ, шуом, одӥг округъя дасо пала кандидатъёс луо ке, соку одӥг адями вал. Сое ик депутатэ бырйылӥзы. Геннадий Михайловичлэсь кандидатуразэ эскерыку, обкомлэн бюрояз быръем огез адями шуэм: со, Казаньысь консерваториын дышетскыкуз, черкысь хорын кырӟаллям. - Кызьы озьы? Коммунист, партилэсь Уставзэ тӥяса, черкын ужам? - чутрак верам обкомлэн нырысетӥ секретарез. - Ӧте Корепановез обкоме, мон соин ачим кенешо. Обкоме мыныкуз, ас понназ малпаське: "Малы меда нырысетӥ секретарьлы В. К. Марисовлы кулэ луи?" Вераськонзы кема гинэ кыстӥськиз. Секретарь шонерак юаз: - Казаньын дышетскыкуды, черке ветлӥд-а, Геннадий Михайлович? - Мон соку ужаны кутски "Россиянка" операе бордын. Сценарийя отын вань черкын вӧсяськон сцена. Консерваториысь парторганизацилэн секретареныз вераськи: луоз-а мыным черке ветлыны но ваньзэ ас синмыным адӟыны, хоразы но аслым кырӟаны? Парторг пумит ӧз луы. - Эх, Геннадий Михайлович, ми ведь тонэ РСФСР-ысь Вылӥ Кенеше дэмланы малпаськом вал. Нош черке ветлылӥд бере, депутатэ ӵектыны ум быгатӥське. Уставез тӥяны ум быгатӥське... - Ма, мон Уставез ӧй тӥя. Мыным тырмоз асьме элькунамы но, кык ӧтчамез депутатын ужаса. Малы весяк монэ бырйылод? Писательёс пӧлын но усто адямиос трос. Тани Геннадий Красильников туж визьмо писатель... - Пожалуй, тон усто ӵектон сётӥськод милемлы. Нош черке ветлэмдэ ум курлалэ. Усто опера кылдытӥд... Леонид ЕМЕЛЬЯНОВ. Удмуртия - Дагестан Туэ 18-тӥ октябре Удмурт Республикаысь Правительстволэн Тӧроезлэн кивалтэмез улсын министерствоослэн, ведомствоослэн, мукет бадӟымесь объектъёслэн кивалтӥсьёсынызы кенеш ортчиз. Отын вераськон мынӥз Дагестан но Ингушетия Республикаослы гуманитарий юрттэт сётон сярысь. Нош 5-тӥ ноябре та пумысен кутэмын постановление. УР-ысь Правительстволэн Граждан ужпумъёсъя но кышкыт учыръёслэсь утиськонъя комитетаз усьтэмын вал нимысьтыз счёт. Туннэ нуналлы отчы вуэмын ни 545 сюрс манет коньдон. Тужгес но уно уксё висъязы "Ижевский электромеханический завод "Купол" кун предприятие, "Удмуртторф" огазеяськон, "Удмуртнефть" акционер огазеяськон, Глазовысь Чепецкой механической завод. Юрттэт вуиз ни Воткинскысь администрацилэсь, "Буммаш" но "Ижсталь" акционер огазеяськонъёслэсь, "Ижевский мотозавод "Аксион- Холдинг" но "Сактон" акционер огазеяськонъёслэсь. "Удмуртавтодор" но "Воткинский завод" кун предприятиослэсь, "Металлист" заводлэсь. Нош 13-тӥ ноябре гуманитарной юрттэтлэн нырысетӥ люкетэз Дагестанэ келямын. Вынлыко республикае 261 сюрс манетлы нуэмын шуныт дӥсь, эстӥськон гуръёс, эмъюм. Со сярысь журналистъёслы пресс-конференциын ивортӥз шаерысьтымы граждан ужпумъёсъя но кышкыт учыръёслэсь утиськонъя комитетлэн кивалтӥсез полковник Тамази Габричидзе. Со пусйиз: - Дагестанын милемыз шуныт пумитазы. Бадӟым тау каремзэс веразы юрттэт ваеммы понна. Азьланяз та республикае вуттэмын луоз на корт, лэсьтӥськон материалъёс, мукет арбериос. Озьы ик юрттэт келялом Владикавказэ, Волгодонске. Та вакытэ татысь боевикъёс уллямын ни ке но, шӧдӥське на кыӵе ке секыт мылкыд, город котыртэмын солдатъёсын. Вераны кулэ соиз сярысь но: гуманитарий юрттэтмес келяны луонлык кылдӥз "Газовик-Газпром" футбол клублы нимысьтыз висъям самолётэн. Тау командалы. Но одӥгез жаль: асьмелэн футболистъёсмы Махачкалаысь "Анжи" командалы 0:2 лыдын келязы но таяз сезонэ шудонзэс йылпумъязы. Т.Г.Габричидзе озьы ик вераськон ӝутӥз Воткинскын чурыт эстӥськонэн ужась ракетаослэсь двигательёссэс быдтонъя завод лэсьтон сярысь. Та пумысен вераськонъёс кемалась мыно ни. Кутэмын уно документъёс. Со бордын трос ужало учёнойёс, экологъёс, военнойёс. Законлэн инъетэз кылзэмын Пентагонын. Туэ но та документ бордын рос-прос ужано луиз на. Отчы уно ватсанъёс пыртэмын. Озьы ватсаса 1 миллион доллар кулэ луоз на. Кызьы тодмо, быдэс Россиын возиськись химической ож тӥрлык Удмуртие интыямын - Камбаркае но Кизнере. Тужгес но кышкытэз лыдъяське Кизнерысез. Туэ татын бадӟымесь дышетсконъёс ортчытэмын. Соин кивалтӥз Удмуртиысь граждан обороналэн начальникез, Правительстволэн Тӧроез Николай Ганза. Дышетсконъёслы йылпумъянъёсъя уно ужрадъёс кутыны чакламын. Нимысьтыз вазиськон ыстэмын странаысьтымы обороная министрлы. - Асьмелы нырысь ик адямиосты кышкытлыклэсь утёно, - шуиз Тамази Георгиевич. - Со понна кылдытыны кулэ нимысьтыз диспетчерской служба. Кылсярысь, сыӵе служба оскымон ужа ни Воткинскын. Городлэн мэрез Валерий Фридрих со удыслы тырмыт коньдон висъя, службалэсь ужамзэ ялан эскерыса возе. Котькуд городын чакласьком сыӵе службаос усьтыны. Бен, улон возьматэ: буйгатскыса улыны асьмелы вазь на. Кышкытэсь учыръёс малпамтэ шорысь кылдытыны быгатозы. Инкуазь но кытӥяз аслэсьтыз сямъёссэ возьматэ. Но уномы асьмеос ӵем дыръя куалектӥськом, шуге-леке вуиськом. Огкылын вераса, кышкыт учыръёслы дасесь ӧвӧл. Соин ик туэ Россиысь МВД-лэн юридической институтэзлэн Ижевскысь ёзаз но Удмурт университетын нимысьтыз кык факультетъёс усьтэмын. Отын дасялозы та удысъя специалистъёсты. Н.Байтеряков. Сюресэд ӟеч медло... Удмурт сямъёс-йылолъёс сярысь Удмуртъёслэн киужъёссы пӧлын ӵушконъёсмы-чалмаосмы дано инты басьто. Соос сярысь уно пол гожъязы ни трос тодосчиос. Одӥг пол гинэ ӧз данъя ни Ленинградысь Татьяна Александровна Крюкова удмурт дӥськутлы сӥзем монографияз. Озьы ик ӧз вунэты ӵушконъёсмес Вера Николаевна Белицер. Мукет тодосчиослэн но ужъёсазы удмурт киужъёс сярысь трос гожъямын. Вератэк кельтэм уг поты Г. Е. Верещагинэз, Н. Г. Первухинэз, А. Ф. Риттихез, П. М. Богаевскиез, В. А. Семеновез, Н. С. Королеваез, К. М. Климовез, М. А. Некрасоваез, Л. И. Савельеваез но мукетъёссэ. Огпол мыным шуд усиз Эстоние вуылыны. Эстонъёс паймытӥзы монэ ас калык культуразэс утьыны быгатэменызы. Тарту городысь этнографияя музеязы пыри но абдрай, шуоно, дыр. Музейзы бадӟым, но музъем улын солэсь но бадӟымесь залъёс, пумтэм-йылтэм ӝажыос. Ваньмыз тырмытэмын усто, чебер лэсьтэм киужъёсын, пӧртэм дӥськутэн. Но солэсь но паймымон вал соиз: котьмарзы сярысь нимаз-нимаз книгазы-альбомзы вань. Чебер пужыё керттэм чулкаос, сур юон сюмыкъёс, вандылэм пужыос. Кеноссы сярысь - книга, корказы сярысь - книга... Асьмелэн но быгатыса лэсьтэм туж чебересь арбериосмы ӧжыт ӧвӧл. Азьло аръёсы нош туж трос вал соос. Нош тодосчиосмы ӧжытэн но искусствоведъёсмы чик ӧвӧлэн, асьме калык но солэн ужъёсыз сярысь туж ӧжыт книга поттӥмы на. Та вуттӥськымтэмес кызьы ке но тупатон понна, асьмелы мукет калыкъёслэн нимаз книгаен поттэм ужпумъёссыя асьме калык сярысь, чырыен-пырыен ке но, мар но со гожъялляно, дыр. Таӵе малпанъёсын басьтӥськи мон тодмо писательлэн Геннадий Дмитриевич Красильниковлэн сузэрезлэсь Мария Дмитриевна Ишматовалэсь куронзэ быдэстон борды. Соос Дэриын (Завьяловоын) ӵушконлы сӥзем шулдыръяськон ортчытыны малпаллям. Соин монэ "Удмурт дуннее" газетэ ӵушкон сярысь гожтыны косӥзы-куризы. Та огвыллемесь арбериосмес-ӵушконъёсмес, чалмаосмес - ваньзэ ӵушкон шуомы та статьяям, соосты одӥг кылын гинэ вераны уггес тупа ке но. Чалма ӵемгес пумиськылэ бигер выжыысь калыкъёс пӧлын. Соос бен йыр котыразы бинялляло чалмазэс. Нулло сое пиосъёссы. Нош удмурт ӵушконэз-чалмаез - кышномуртъёс. Соослэсь тыбырзэс шобыртэ со. Йыразы такъя кадь карыса изьяло кузь, паськыт ӵушконэз, собере паськыт ӵушконэз, сюбег мед кылёз шуыса, шортӥз куасалто быдэс кузьдалаезъя. Такъя выллем вурӟем вадесыз ӵушконлэн шор вадесаз ӝиме. Йыр борды шедьытэм бере, пумъёсыз тыбыре ошисько. Соосыз котькудзэ кузяз куасалто но вурӟо. Кыксылэсь ик артэ луэм дуръёссэс, мукет палдуртӥз васькись, сюбегатыса артэ луэм дуръёссэ, ваче йӧттыса, уллань лэзё но айшет кал улэ пачкато. Та ӵушконъёсыз-чалмаосыз калыкын чалма гинэ шуо. Отчы уг ӵушисько уга. Со корка пушез юондыръёсы шулдыръяны чакламын. Ошо укно йылэ. Пумъёссы мыд-мыд пала, укно янакъёс кузя уллань лэзисько. Чебер пужъятэмын, ӝуткаса яке бичаса куэмын луо. Тыбыре ошыку, ӝуткам пужыез улэ туж медаз лэзиськы. Чеберез валась кышномуртъёс, азьвыл, тыбыразы ӵушкон-чалма ошыкузы, азькышет кал уллане куинь-ньыль чиньы пасьта гинэ лэзьылӥзы ӵушконлэсь пужыё интызэ. Пелькышет но ӵушкон выллемгес вылэм кадь азьло, нош табере солэн пумыз котыртэмын- пепертэмын. Сое мӧйы кышномуртъёс гинэ нулло (нылпи ваемысь дугдэмзы бере). Уй палан луэ на паськыт ӵушконзы. Солэн пумыз пужъятэмын. Уй пал удмуртъёс паськыт ӵушконзэс, кышет интые, йыразы керттыса нулло вылэм азьло. Соин соос сое дьыркышет шуо. Вань на ӵушкон-бамкышет. Таиз ӵогъёсын ошиськыса улэ. Ӵушконлэсь ик лэсьто на кикышет. Таиз мисьтӥськем бере ки ӵушылыны тупатэмын. Соин ик со мисьтӥськон палан ошиськыса улэ. Будӟым нуналлы сӥзем бадӟым шулдыръяськонъёс ортчылозы вал азьло. Со бадӟым праздникъёс дыръя вал вылын ворттылонъёс но луылӥзы. Вормисьёслы кузьман вылысь, вылькенъёслы котькуд ар вазиськылӥзы, ӵушкон-чалма курыса. Сюан дыръя чук шуыса лэзё вал чебересь, ӝуткам пумо ӵушконъёсты. Соосыз сюан бере берен кузьмась доры берыктоно, четушка аракы но шекера яке пряник-печенья вайыса. Чын дано интыын, Будӟым куаын, пырем бере паллян палаз, сюрыын, няньёс тырон ӝажылэсь вылэгес ошылэмын вал чебер ӵушконъёс-чалмаос. Соосыз котькуд корка сямен кузьмалляз, вӧсяськон инты шулдыр мед луоз, инмаръёс ӟеч мед карозы шуыса. Удмуртъёс ӵушконъёсыз-чалмаосыз нимысьтыз тодмет но карылӥзы. Соослэсь со чебер кутсконо но чебер пумо сюрес сярысь малпанзэс возьматэ вал. Тае адӟыны луэ, армие яке оже келякузы, кошкись пилы ӵушкон кузьмаллямысьтызы. Солэн сюресэз та чебер ӝуткам пумо ӵушкон кадь чебер, чылкыт но каньыл мед луоз шуыса верало кадь кузьмаськись гуртоосыз. Кулэм муртсэс но удмуртъёс утялто, солы но кузьмасько. Кузьымзы огез - ӵушкон. Куеда пал удмуртъёс кулэм муртсылы "корка" лэсьто - кык рад бугро но со вылэ - решёткаен котыртэт. Йылаз поно вамен боды. Со, пе, луэ кулэм муртлэн выль коркаезлэн мумыкорез. Отчы мукет кузьымъёсын ӵош ӵушкон но кертто. Та адями ватон огвакыт ик луэ выль корка пырон но. Сопал дуннее кошкись ӵыжы-выжызылы ӟеч сюрес сӥзьыса кузьмало ӵушкон. Со выллемгес ик малпанэн Дэбес палъёс кулэм мурт ватыны юри туж кузь ӵушкон куо. Кулэм муртэн короссэс кык сыӵе кузь ӵушконэн гуаз лэзё-васькыто. Озьы ик сюресэз ӟеч мед луоз, сопал дуннеяз каньыл мед луоз, вылаз усем сюез зарни-азвесь мед луоз шуыса. Туала аръёсы гу гудӥсьёслы, миськисьёслы, корос лэсьтӥсьёслы ӵушкон яке басма кузьмало. Ӵушконъёслэн-чалмаослэн пужыоссы но туж паймымонэсь. Соос вань удмурт осконъёсыз, вӧсяськонъёсыз дуннеез куиньлы люкыса возьмато. Вылысь чур пужыос инлы-космослы сӥземын, шор чурысь пужыос - куазьлы - югыт дуннелы, улэп адямилэн улон вадесэзлы, нош улӥысь чурез - Мукылчинлы (музъеммылы - анаймылы) сӥземын. Соос вискысь векчи пужыосыз уар пужы шуыса нимало. Уар раб шуэм луэ. Со бадӟым пужыослы юрттӥсь луэ бере, соин, лэся, уар пужы шуо соосыз. Буёл ласянь ке учкиськод, ӝуткаса куэм ӵушконпумъёсы люкамын удмурт адямилэн вань лулчеберлыкезлэн тусыз. Удмуртлэн лулызлэн ворпо тусыз со, мукет сямен вераса, буёлъёсын возьматэм мылкыдыз. Отчы Удмурт кышномуртъёс кутаса кадь тыро, сӥньыслы быдэ кись улэ бинялто дуннеез кызьы валамзэс, чеберлыкез шӧдэмзэс но гажамзэс. Соос куэм ӵушконъёссы вамен ог-огзылы но, быдэс дунне калыклы но возьмато инкуазьмылэсь чеберзэ, калыкмылэсь чеберзэ, со чеберез валамзэс но асьсэлэсь устолыксэс. Та ӵушконъёсмы, чалмаосмы вань удмурт калыклэсь данзэ туж вылӥын возё. Жаляса вераме потэ: туала егитъёс сое уггес валало на. Сокем тыршыса лэсьтэм чеберлыксы огшоры медаз быры шуыса, пересьёс-мӧйыос пуконъёс вылэ чебересь, ӝуткаса куэм-пужъятэм ӵушкон-чалма пумъёслэсь пичиесь шобыръёс вуро. Азьло сое шулдыръяськон дыръёсы гинэ потталозы вал. Возизы сандыкъёсын-шыкысъёсын, куръёс вискы пачкатыса. Миськыса бездоно медаз луы шуыса, саптаны ӧз турттылэ. Туссэ медаз ышты шуыса, шунды йӧтӥсь интыосы ӧз ошылэ. Миськоно луэ ке, миськылӥзы майталтэк-порошоктэк гужем шуныт шур вуын курегпуз ӵужен (майтал интые). Озьы солэн буёлэз уг безды уго. Берло аръёсы чеберлыкъя удысъёсыз улӟытӥсьёс ӵушконъёсмес-чалмаосмес но выльдыны кутско ни, но соослэн ужъёссы вашкалаосмылэн кадь чебересь ӧвӧл на, эшшо ӧжытак дышетскыны кулэ на песяйёсмылэсь. Соку соос кадь ик усто куиськыны но, пужъятӥськыны но дышомы. Семен ВИНОГРАДОВ, Удмурт Элькунысь калык суредась. Футбол Чемпионат йылпумъяськиз Командаос тазьы радъяськизы Ш В Н К Т О 1. Анжи 42 26 8 8 55-20 86 2. Факел 42 26 7 9 65-31 85 3. Сокол 42 25 7 10 74-39 82 4. Торпедо-ЗИЛ 42 23 13 6 67-27 82 5. Балтика 42 22 8 12 60-37 74 6. Амкар 42 20 10 12 65-49 70 7. Рубин 42 18 12 12 56-49 66 8. Газовик- Газпром 42 20 4 18 50-47 64 9. Арсенал 42 19 7 16 61-51 64 10. Локомотив (Чита) 42 19 5 18 48-50 62 11. Кристалл 42 17 7 18 44-49 58 12. Томь 42 17 7 18 48-54 58 13. Спартак 42 17 5 20 49-61 56 14. Металлург (Красноярск) 42 14 12 16 38-43 54 15. Металлург (Липецк) 42 15 8 19 51-53 53 16. Локомотив (Санкт-Петербург) 42 14 9 19 35-51 51 17. Волгарь-Газпром 42 14 8 20 41-49 50 18. Тюмень 42 13 9 20 43-59 48 19. Торпедо-Виктория 42 11 10 21 47-67 43 20. Лада-Симбирск 42 12 4 26 37-69 40 21. Динамо 42 10 9 23 31-50 39 22. Спартак-Орехово 42 2 7 33 25-85 13 Нырысетӥ лигаысь командаос чемпионатын котькудӥз 42 пол шудӥз. Вылӥ лигае потӥзы Махачкалаысь "Анжи" но Воронежысь "Факел". Нош вить лябъёсыз: "Тюмень", "Торпедо-Виктория", "Лада-Симбирск", "Динамо" но "Спартак-Орехово" кыкетӥ лигае лэзисько. Ижевскысь "Газовик-Газпром" тямысэтӥ интые кылиз. 20 пумиськонын со вормиз, 4-ез нокин вормытэк йылпумъяськиз, 18-аз келяз. Мурт капкае асьме футболистъёс тупез 50 пол пыртӥзы, асьсэлэназ 47 пол лэзизы. "Газовик" 64 очко люказ, нырысетӥ интые потэм "Анжилэсь" 22 очколы ӧжытгес. Вылӥ лигае ӝутскон сярысь кылпум "Газовик" клубысь кивалтӥсьёс туэ ӧз ик потталэ: кужмо футболистъёстэк бадӟым ужпумъёсты уд быдэсты. Уно коньдон кошкиз стадионэз выльдонэ. Вылӥ лигаысь командаосы кошкем футболистъёс интые вуизы тодмотэм егит спортсменъёс. Шумпотоно соиз понна, али командаын уно ни асьме дорын будэм-кыдам пиосмы. Тренеръёс оско, азьланьын коньдонэн шуг-секытъёс ӧз ке кылдэ, "Газовик" матысь дыре, оло, вуоно сезонэ ик, вылӥ лигае потон вылысь нюръяськоз. Нош туэ берпуметӥ шудонъёссэ "Газовик" тазьы ортчытӥз: Пермьысь "Амкарен" 1:1, Казаньысь "Рубинлы" 1:2, Нижний Новгородысь "Торпедо-Викториялы" 2:3 лыдын келяз. Жаляса верано, Россилэн кубокез понна нюръяськонын но "Газовиклы" 13-тӥ ноябре ӧз удалты. "Анжилы" со 0:2 лыдын келяз. М. КУЗЬМИН. Нимыз - Данъян пул вылын Шумпотон синкылиос Таӵе бадӟым пумиськонъёсы ветлыны огшоры дояркалы сокем ӵем уг кылдылы. Соин но, дыр, Любовь Григорьевна Пономарева ӵыж-горд луыса кылзӥз ушъян кылъёсты, Удмурт Республикаысь Данъян пул вылэ нимзэ пыртон сярысь иворез. Ужа та кышномурт Сарапул районысь огаз азьмынӥсь хозяйствоын - "Родина" колхозын. Кызь ар ӵоже скал кыске ни. Фермае пиналысен лёгем сюресэз сярысь уг жаля: солэн сюлмаз али но, та залын пукыкуз но, отын, ӵош ужась эшъёсыз пӧлын. Кызьы-о меда яратоно коллективедлэсь люкиськод? - Пинал вордэмея мон пенсиын ни, арлыды отчыозь ӧз ке но вуы на. Гуртын пукеме уг поты,- шуэ Любовь Григорьевна.- Ужмы сярысь ке верано, туэ, кылем арен ӵошатыса, йӧл тросгес кыскиськом. Мон скаллы быдэ 3700 килограмм басьтӥ. Со понна нырысь ик тау карыны кулэ зоотехникмылы Владимир Васильевич Федотовлы, фермалэн кивалтӥсезлы Тамара Кирилловна Алабужевалы, председательлы Владимир Валентинович Пастуховлы. Соослэн сюлмаськемзы бордысь потэ ук ӟеч продукция поттон, ӟеч мылкыдын ужан но азинскон. Нош милям колхозмы районамы котькуд ласянь - адӟем карымон. Туэ котькинлэсь трос ю тысь кутсам, йӧл кысконъя но озьы ик мынӥськом. Ӝыны улонзэ фермалы сӥзем кышномурт ӵош ужась эшъёсыз сярысь трос гинэ шуныт кылъёс вераз. Сое кылзыса, зэмен но осконо: татын ваньмыз умой. Нош шуг-секытъёс? Кытын меда соос ӧвӧл - вормыны быгатоно. "Родинаын" ӟечез тросгес. Малы ке-а арлы быдэ сямен куспазы ӵошатскыса ужало, рекорд вылэ рекорд пукто (туала вакытэ но!) пудо утисьёс Галина Дмитриевна Мельникова, Галина Анатольевна Самарина, Нина Яковлевна Алексеевна но мукетъёсыз. - Соослэн корпуссы милемын артэ. 3 сюрсэз кемалась ортчизы ни,- данъяськыса шуэ Л. Г. Пономарева.- Ӝоген 4 сюрс килограммозь вуом. Оскон вань, озьыен, уж мыноз. Фермае лыктозы егитъёс. Скал кыскисьёслэн арлыдзы али, нялтас вераса, 35-40 арес. Та вакытэ калыкез тужгес но шугъяськытэ уждун басьтон. "Родинаын" коньдон дыраз тыро. Дояркалэн толэзь ӵоже тыршемез усе ог 1000-1200 манетлы. - Гужем ӧжытгес басьтӥм вал, али расценкаосты ӝутӥзы. Трос-а со, ӧжыт-а - коньдонлэн дуныз мертантэм. Нош скал кыскисьлэсь тыршемзэ, жадемзэ ке учконо, со - ӧжыт. Жаляса верано, тросаз хозяйствоосын ай тамында но уг басьто. Нош "Родинаысь" дояркаос понна шумпотоно: соос азьвыл басьтэм азинсконъёссэс арысь аре выльдо, тросгес но тросгес йӧл кыскыса. Тӥни малы огез устоез доярказы Л. Г. Пономарева шедиз шаерысьтымы дано адямиос радэ. ... Ӟечкылан кылъёсты кылыса, со ачиз но шӧдытэк синвуаськиз. Кимышкыныз ӝогак ӵушалтӥз бам вылтӥз питырскись шапыкъёсты, шумпотон синкылиосты. Зэмен но, адямилы трос-а кулэ? Ӵемысь бурдъятэ огшоры верам шуныт кыл но. Эшшо - ужедлы дыраз сётэм вылӥ дунъет. Л. МЕДВЕДЕВА. * Любовь Григорьевна ПОНОМАРЕВА Удмурт Республикалэн Данъян пулэз дорын. Туспуктэмез В. КАМАШЕВЛЭН. Шуд ваись кузьым Элькунысьтымы Национальной музейын алигес ортчиз кыкетӥез научно-практической конференция. Сӥземын вал со туала этнография удысысь ужпумъёслы. Та ужрадэз радъянэ пыриськизы на Удмурт кун университет но Историяя, кылъя но литературая Удмурт институт. Та выллем лыдӟонъёс азьвыл но ортчылӥзы, но чакламын вал музейын ужасьёслэсь гинэ тодон-валанзэс муромытон но ужзылэсь ӟечлыксэ будэтон вылысь. Тодмо тодосчиез- этнографез В. Е. Владыкинэз та ужрадэ кыскем бере, югдур воштӥськиз - арлы быдэ ортчылӥсь лыдӟонъёс амалтэк ӟечгес луизы. Озьы музейысь методистлэн Т. Н. Ураковалэн но Владимир Емельяновичлэн мылкыд каремзыя, кылем арын татын ортчиз нырысетӥез научно-практическо й конференция. Лыдӟонъёслы Удмурт шаерысь тодмо этнографлэн, фольклористлэн Дмитрий Зеленинлэн нимыз сётэмын вал. Со юнме шорысь ӧвӧл. Дмитрий Константиновичлэн данэз быдэс дуннее вӧлмемын, нош асьме шаер сярысь ке верано, Ватка котырын улӥсь калыкъёслэсь сямъёссэс-нергеоссэс эскерон ужлы вань улонзэ сӥзем тодосчимес вордскем Люк гуртаз (Завьял ёрос) гинэ ке шат рос-прос тодо. Кылем арын та лыдӟонъёс тодосчилэн вордскемез дырысен 100 ар тырмон нуналэз пусъён ужрадлы но пӧрмизы. Табере Зеленинлы сӥзем лыдӟонъёсты арлы быдэ ортчытъяны кенешемын. Таиз, кыкетӥез, конференция, ужрадэз радъясьёслэн чакламзыя, пуштросэзъя трослы мургес но узыргес вал. Вашкала удмуртъёслэн, бигеръёслэн, ӟучъёслэн, бесерманъёслэн улон-вылон сямъёссылы, котырысь дуннеен, инсьӧрен кусыпъёс возён нергеоссылы сӥзем эскеронъёсынызы люкаськемъёсты тодматӥзы Историяя, кылъя но литературая Удмурт институтысь тодосчиос Ирина Нуриева но Елена Попова, музейын ужасьёс Людмила Кузнецова, Резеда Ахматвалиева, Елена Шемякина но В. Е. Владыкинлэн аспирантъёсыз Елена Воронцова но Мария Ившина. Чузъяськизы наукалэн выль удысаз - валеологиын (адямилэн тазалыкез, висёнъёслэсь утиськон сярысь наука) - лэсьтэм чакланъёс но. Аспирантураын дышетскись Алексей Грязнов люкаськемъёслы мадиз, кыӵе вуэз юоно луо Ижын улӥсьёс. Чаклам бере тодмо луиз: улон юртъёсы лыктӥсь ву юыны ярантэм. Кранысь басьтэм хлор ву быректыса но ӟечгес уг луы, отын лек пыктослы ӝужаны юрттӥсь люкетъёс кылдо. Соин ик вуэз, сиён-юон дасямлэсь азьло, одӥг час ке но пукетоно, хлорез мед пуксёз шуыса. Жаляса верано луэ: асьме дорын сяна, нокыӵе шаерын но вуэз таӵе шимес амалэн уг чылкытато ни. Нош огъя инкуазез ке учконо, шуръёсамы ву кӧня ке сайкытгес луиз. Отчы берытскизы азьвыл ышем чорыгъёс. Кылсярысь, чуке (стерлядь). Нош шудоосыз Иж тыметысь шальккоез (налимез) но кутӥзы ни. Со понна "тау кароно", дыр, экономикамылэн куашкамезлы. Конференцие люкаськемъёс но, ужрадэз ортчытӥсьёс но, докладъёсты кылзэм бере, одӥг малпанэ вуизы: музейлэн юртэз та тунсыко вераськонъёслы ӟоскыт луиз ни. Татын ужасьёсты сяна, лыдӟонъёс котыразы мукет удысъёсын ужась калыкез но люканы кулэ. Тужгес но - шаермылэн вашкалаеныз тунсыкъяськись студентъёсты. 1994-тӥ арын музейын усьтӥськиз шудонъёслы сӥзем выль ёз. Оскизы сое татын ужасьлы Л. С. Кузнецовалы. Со дырысен ортчытэмын ни нылпи шудонъёслы сӥзем кӧня ке пумо адӟытонъёс. Возьматэм узырлык, адӟытон йылпумъяськем бере, выльысь берыктӥське кузёослы - усточиослы. Музейлэн фондаз номыр уг кыльы ни. Соин ик горд сюйлэсь мунёосъя усточилэн А. П. Степановлэн ньыльдон ньыль пумо шудонзэ кузьмамез туж вылӥ дунъямын вал. Усточилэн малпамезъя, нырысетӥ нылпи шудонъёс ӵапак горд сюйлэсь лэсьтэмын вал. Ачиз мунё кыл но, пе, му но нёпаны (нелькыны) кылъёслэсь пӧрмемын. Асьме палъёсын горд сюйлэсь тужгес вашкалаосыз шудонъёс Сарапул ёросысь шедьтэмын. Анатолий Петрович, вашкалаез вылэ пыкъяськыса, али улӟытыны тырше та паймымон удысэз. Солэн лэсьтэм ужъёсыз пӧлын - шуланъёс, крезьгуро инструментъёс, пӧртэм пумо мунёос. Нылпиосын ужась усточи шудон кылэз но шуд кылэн герӟа: шудӥсь пинал шудо, пе. Озьыен, музейлы таӵе кузьым кельтыса, Анатолий Степанов татын ужасьёсты но, татчы адӟытонъёсы ветлӥсь нылпиосты но кӧнялы ке шудо кариз. Ольга БОРОДИНА. * Лыдӟонъёсы люкаськемъёс пӧлын - Татьяна Николаевна УРАКОВА, лыдӟонъёслэн кузёзы (нырысетӥ радын бур паласен нырысетӥез). * Анатолий Петрович СТЕПАНОВ музейлы горд сюйлэсь шудонъёссэ кузьма. * Люкаськемъёс азьын вераське Владимир Емельянович ВЛАДЫКИНЛЭН аспирантэз Мария ИВШИНА. Буре ваизы Удмурт лулчеберлыкъя дэменлыклэн кивалтэтаз быръем адямиос люкаськемзылы быдэ кенешо пӧртэм сюлэмшугъяськытӥсь ужпумъёс сярысь. Берлоосыз кенешъёс аспӧртэмлыкоесь вал. Кыкетӥ шуркынмонэ (ноябре) дэменчиос оглулысь буре ваизы куамынэтӥ аръёсы нокыӵе янгыштэк бырем удмурт визьлюкъёсмес. Быдӟым удмуртлэн Куӟебай Гердлэн аспӧртэмлыко улон-вылонэз но секыт адӟонэз сярысь веразы кылтодон наукаосъя доктор, тодосчи Фома Ермаков, Кузьма Павлович Чайниковлэн вынмуртэз Юрий Чайников, тодмо гожъясь, Россиысь Писательёслэн огазеяськонзылэн адямиез Николай Кузнецов. Куӟебай Герд сярысь тросгес тодэмзы потыса, люкаськемъёс соослы трос юанъёс сётъязы. Татысен ик адӟыны луиз Кузьма Павловичлэсь туж яркыт тусбуйзэ. Сое усто суредам Удмурт Элькунысь калык художник Семен Виноградов. Берлоез но кенеш ӝож вал: дэменлыке лыктэмъёс лулысь-сюлмысь буре ваизы улонысь дырызлэсь вазь кошкем тодмо суредасез, Удмурт Элькунлэн Кун премиезлэсь лауреатсэ, Удмурт Элькунысь искусствоосъя дано ужасез Леонид Прозоровез. Е. РОМАШОВА. Быръелэ кизилидэс! Шаерамы нырысьсэ ортче эстрада кырӟанъя "Камали" фестиваль. 21-тӥ ноябре ӝытазе куать но ӝыны часын "Металлург" культура дворецын луоз удмурт концерт. Отчы пыриськозы тодмо но тодмотэм кырӟасьёс - Надежда Уткина, Иван Григорьевых, Ольга Зорина, Валентина Моисеева, Татьяна Ишматова, Алексей Ложкин. Концертэз нуозы Татьяна Денисова но Алексей Ложкин. Фестивальлэн генеральной спонсорез - светотехникая компания. Спонсоръёсыз: "Удмуртиысь Билайн", "Республика" юридической агентство, "АРС" студия-дизайн, "Инфо-панорама". Билетъёс вузасько "Металлург" культура дворецлэн кассаяз. Лыктэлэ но быръелэ асьтэлэсь кизилидэс! Кин азьпалан? Йӧл кыскон (15-тӥ ноябрьлы) Районъёс Кӧня йӧл кыскемын Пудолэн йырыз 1999 1998 1999 1998 1. Игра 6,7 6,1 5227 5383 2. Воткинск 6,7 6,5 7531 7847 3. Вавож 6,5 5,9 5034 5067 4. Можга 6,5 6,5 8762 8724 5. Завьялово 6,4 6,9 3756 3729 6. Ува 6,3 6,5 5478 5497 7. Пичи Пурга 5,8 5,8 4825 4977 8. Глазов 5,6 5,5 3894 3834 9. Алнаш 5,3 5,0 2434 2320 10. Шаркан 4,9 5,3 6146 6112 11. Балезино 4,7 5,2 3667 3608 12. Дэбес 4,5 4,7 1792 1701 13. Кез 4,3 4,7 7763 7415 14. Грахово 4,2 3,9 5186 5245 15. Як.-Бодья 4,0 4,2 6654 6705 16. Сарапул 3,8 4,4 4106 4117 17. Юкаменск 3,8 4,5 9275 9191 18. Яр 3,5 3,7 3065 3141 19. Красногорск 3,5 4,0 6463 6353 20. Селта 3,4 4,1 4603 4669 21. Киясово 3,2 4,1 3585 3484 22. Кизнер 3,0 3,5 7050 7338 23. Каракулино 2,5 3,1 6375 6642 24. Сюмси 2,2 2,6 7864 7860 25. Камбарка 2,1 3,1 723 702 Республикая 5,0 5,2 131828 131731 Пиналъёс ярато, гуртоос гажало Глазовысь пединститутэз йылпумъяса, Валентина Алексеевна Петрова 14-тӥ арзэ ужа ини Можга ёросысь Кватчи школаын. Задор мылкыдо кышномурт дышетон удысаз ялан выль амалъёс утча, сое улонэ пыӵатэ. Нырысетӥ категориен дышетӥсь, пӧртэм курсъёсы ветлыса, аслэсьтыз но тодон-валанъёссэ будэтэ. Ярато но гажало Валентина Алексеевнаез школаысь пиналъёс. Нош дышетӥсь сюлме лякиське ке, солэсь нуоно преметсэ нылъёс но пиос мургес тодыны тыршо ини. Сое возьмато лыдпусъёс но. Кылсярысь, кылем арын 70 процентэз дышетскисьёс та предметъя школаез "4"-ен но "5"-ен йылпумъязы. Пӧлысьтызы тросэз дышетскыны пыризы шаерысьтымы вылӥ дышетскон заведениосы. Математика предметэз умой тодэмзы татын но соослы ӟеч юрттӥз. Вормонъёс капчиен гинэ уг сётско. Со понна ортчытъяно луэ пӧртэм кружокъёс. Валентина Петровалы юрттэт курыса вазисько ке пиналъёс, котькудӥныз нимаз кенешыны, визь-кенеш сётыны дыр шедьтэ.Тыршись, лякыт сямо, ас удыссэ ӟеч тодӥсь-валась, котьку юрттыны дась луэмез понна Валентина Алексеевнаез гуртоос но гажало. А.Сергеев. * Лена Табакарь яратоно дышетӥсеныз В.А.Петроваен. Туспуктэмез В.Беломорскихлэн. ВЕТЕРАН Перепеч Милям Петровмы - час кадь. Уже лыктэ ӵап укмысэн, нуназеяны ваське дас минуттэк дас кыкен, дораз кошке дас витьтэк дас тямысэн. Одӥг секундлы но мултэссэ уз ӝегатскы. Туж дыртӥсь со. Шаплы выременыз, курег ӵабъям кадь гожъяське. Д, З, П, Б, И, П,Н, К букваосты ваньзэс огвыллем нюртыса куштэ. Номырзэ уд вала, котькуд чурез - ребус. Самой лэчыт синмоез машинисткамы, Нинамы, гинэ вала Петровлэсь иероглифъёсцэ. Праздник азьын вал со. Петровез гожтыны косӥллям садын ужасьёс сярысь 30 чуръем ивортон. Информацизэ со лэсьтӥз кык минутскын. Машбюрое сётыса, ӝогак кошкиз: сиеме, пе, потэ. Нинамы шутэтске вал со нуналэ. Петровлэн "пӧрамез" сюриз выль машинистка азе. Час пала выриз со пичи гинэ ивортонэз печатланы. Буамагазэ ӝогак пыртӥз секретариатэ. Ваньзэ туннэ кадь тодам уг ватиськы ни. Но информациын вал таӵегес чуръёс: "Улмо бичасьёс праздниклы вазисько ӟеч ужъёсын..." Секретарь соку ик шӧдӥз: та предложениез трос пол кулэстыны луоно. Ваньзэ кылъёсты ӵушиз, кельтӥз на таӵеоссэ гинэ: "Сюлмо ужало". Зол ньыръяз на мукет чуръёссэ. Машинистка сиськыны кошке вал ни. - Перепеч! - шуэ секретарь, бумагаез ӝӧк вылаз зӥртыса. Мар со перепеч, тодӥськоды. Выль машинистка сиськытэк ваньзэ выльысь печатлаз. Трос интыоссэ ӧз вала ни. Петровмы со виын "Камае" зэмос перепеч сиыны кошкем. Галя кызьы валаз, озьы ик печатлаз. Вылаз ик, машинкаез вуж ни, куд-ог букваосыз чик уг пото. Оглом вераса, ивортонлэн шораз пуксизы таӵеесьгес кылъёс: "улмо, бичасьёс, ӟеч, пазьгисько..." Бумагаез чаль гинэ васькытӥзы улӥе. Корректоръёс, конечно, таяз учыре янгышъёсты шедьтӥзы. "Улмо" интые "сюлмо" каризы, "бичасьёс" кылзэ ӵушизы вал но, бӧрысь нош ик малы ке ултӥз вакчиесь гожъёсын пусйизы: кельтоно, пе. Наборщицамы кытӥысь ке Пышкет палась. Ӟучсэ но, удмуртсэ но аслаз кылыныз уг лыдъя. Ребусэз валаз ас сяменыз. Предложениез лэсьтӥз тазьыгес: "Ӟуч ужасьёс... верасько сюлэмез бичатымон". Егитэз корректормы, гранкаез лыдӟыкуз, кема тунаськиз. Мар та таӵе? Сюлэмез бичато шат? Бич потэ пыд пыдэсысь, кӧт урдэсысь. "Сюлэм" кылэз воштӥз "кӧт урдэсэн" . Мукет янгышъёссэ но палэнтӥз. Сурам чур интыяз пуксиз. Улмо бичасьёс ӟеч ужъёсын, пе, вазисько. Дежурной редакторлы та предложение ӧз яра: штамп. Полосаын ваньзэ ньыръяз, гожмаз. Петров дыртэменыз, аслэсьтыз гожъямъёссэ мур-мур малпаськытэк лыдӟиз. Корректоръёс линза пыр но ваньзэ ватсанъёсты, кулэстонъёсы ӧз адӟе ни. Выпускающий йыромиз-сураськиз, ревизионной корректор тазьы ик гожъяны кулэ, дыр, шуыса малпаз. Отӥяз мар вал - тодыны шуг. Барабан берганы кутскиз. Газет шур кадь кыстӥське машинаетӥ. Дежурной шокчиз капчи мылкыдын: "Арня ӵоже графике уг сюрылы ни!" Дӥсяськиз но кошкиз. Нош ӝыны час ортчыса, редакторлы квартираяз жингырто. Кин кожаськоды? Типографиысь одӥгез газет поттӥсь, асьмелэн нырысетӥ лыдӟисьмы. "Лыктэ ӝоггес дорамы, - шуэ со. - Газетмы янгышен потэ кадь..." Редактор вуиз но ас синъёсызлы уг оскы. Петровлэн ивортоназ ваньмыз йырчукин луэмын. Ребус но - тӥни. - Дугдытэ машинаез чальгес! - типографиысь рабочийёслы вазиськиз редактор. - Перепеч!.. Жаль! Ӝыныез тираж дась вал ни. Таяз учыре Петровлы зол перепеч сюдозы, дыр. К. ЛОМАГИН. Пумиськон бере малпанъёс Толэзьлы быдэ филармонилэн бадӟым залаз мӧйыос люкасько "Ветеран" клублэн кенешаз. Туж трос калык вуылӥз Ижевск городлэн мэреныз А. И. Салтыковен пумиськонэ. Республикамылэн столицаез данъяське Быдӟым Отечественной война дыръя фронтлы бадӟым юрттэт сётэменыз. Татчы люкаськемъёс пӧлысь уноез, ожын киязы пыӵал тӥрлык кутыса, тушмонэз ас гуаз уллязы. Соос ик фронтлэн мышказ армилы пыӵал тӥрлык лэсьтӥзы. 1941- тӥ арын толсуре, жугиськонлэн нырысетӥ толэзьёсаз сярысь, Удмуртия куинь поллы тросгес винтовкаос лэсьтыны ӧдъязы, сое нуналлы быдэ быдэс стрелковой дивизилы тырмымон дасяны быгатылӥзы ни. Ижевскысь машина лэсьтон заводын ужасьёс 1941-тӥ арлэн пумаз гинэ оже 17 сюрс 700 танкез быдтӥсь пыӵал келязы, нош 1942 арын ини 6 поллы уногес. 1942-тӥ арын кылдытэм эштосъёс пӧлын, нырысь ик Ижевскысь машина лэсьтон заводын, кутскиз "фронтовой" ним басьтон понна ӵошатскон. Собере та нюръяськон выжиз мукет предприятиосы. Та нимез басьтыны капчи ӧй вал. Со понна быдэсъяно вал планъёсты, продукциез вылӥ ӟечлыкен келяно, юн чаклано ужан дисциплинаез, котьмае шыръяны тыршоно вал. Та заводын 17 аресысен ужаны кутскиз Зоя Веприкова. 1942-тӥ арын со 40 номеро цехын егит комсомолецъёслэсь бригада кылдытӥз. Соос карабинъёс бичазы. Котькудӥз адями быгатэ вал кык-куинь пӧртэм ужез быдэсъяны. Умой ужамез понна Зоялы сётӥзы УАССР-ысь Вылӥ Советлэн Президиумезлэсь Данъян грамотазэ. Татысь ик бригадир А. Исаева 1944-тӥ арлэн кутсконаз республикаысьтымы егитъёслы вазиськиз нокыӵе шекъёстэк, ӧжыт кужымен но вылӥ ӟечлыкен ужаны ӧтёнэн. Солэсь кичӧлтонзэ котькытын умоен лыдъязы. Ӵошатсконэ 900-лэсь трос бригадаос пыриськиз. Война аръёсы шоркарысьтымы ож бусые келямын 11.145 сюрслэсь трос винтовка но карабин, 7130 авиапушка, 213440 пулемёт, 131310 танк быдтон пыӵал, 961500 "ТТ" пистолет. Ужын басьтэм азинсконъёссы понна Ижевскысь кык но ӝыны сюрслэсь уноез ужчиос пусъемын орденъёсын но медальёсын. Татчы люкаськемъёс пӧлысь куд-огез мӧйыос сюлмо тыршизы колхозлэн лудъёсаз. Соос пересьёсын ӵош ю-нянез утялтыса фронтэ келязы. Бусыосын гырыны но кизьыны юрттӥзы. Нош табере Россиысь ветеранъёслэн законзыя фронт мышкын ужасьёслы фронтовикъёсын огкадь льготаос сётыны кулэ. Коньдон уг тырмы шуыса, ялан уг быдэсъяло на та куронэз. Соин ик кенеше лыктэмъёс Анатолий Иванович Салтыковлы туж трос юанъёс сётӥзы. Нырысь ик, соослэн тодэмзы потӥз, малы республикаысьтымы туж трос коньдон кошке Москвае. Соин но отын, асьме сярысь, тырмыт уждун басьто но самой ӧжытсэ 570 манет пенсия тыро. Уноез мӧйыос ӝожтӥськизы сиён-юонлы дунъёс будэмен. "Милям пенсимы квартира но телефон понна тырыса уг тырмы ни кӧт тырымон сиён басьтыны", - шуизы тросэз. Анатолий Ивановичлэсь озьы ик юазы, малы Ижевскын лушкаськон но мукет йыружъёслэн лыдзы уг кулэсмы. Мэр шуиз таӵе калэ вуимы городысь нимысьтыз кылдытэм милициез быдтэмен. Городлэн мэрез вань юанъёслы валэктонъёс сётоз нимысьтыз гожтэтъёсын, яке газетъёс пыр. Пумиськонэ люкаськемъёслы шулдыр концерт возьматӥз Устинов районысь ветеранъёслэн хорзы. В. Чернов, ужысь ветеран. Данъяськымон Софиез пичи дырысеныз тдӥсько. Та паймымон нылаш удмуртлыкмес сюлмысь ӝутӥсь удмуртъёслэн Юлия Николаевна но Альберт Алексеевич Разинъёслэн нылзы луэ. Солэн пушказ туж пичиысен пыӵамын кылмес, кырӟанъёсмес, эктонъёсмес, шудонъёсмес, йылолъёсмес яратон мылкыд. Угось Софи мумы-бубыосызлэсь уг люкиськы, соос весь вань удмурт ужрадъёсы ветлыку но. Гужем ӵемысь шутэтскылэ Алнаш, Можга ёросъёсын - вордӥськемын та палъёсын Юлия Николаевна но Альберт Алексеевич. Котькинлы тодмо: тапалан удмурт кыл, кырӟанъёс эктонъёс ӟеч утисько. Алигес вуылӥ кемалась тодмо эшъёсы доры. Улон интыязы пырыса, нырысь ик нокыӵе воштӥськонъёс уг шӧдӥсько кадь. Кӧня ке вамыш лэсьтыса ини адӟиськод пианиноез, аккордеонэз но крезьгур кылдытъясь мукет арбериосты. Кӧня ке минут улыса тодӥ: со ваньмыз Софилэн шуыса. Нылаш пианино азе пуксиз но нэнэеныз-дядиеныз ӵош ӧтиз клавишъёс вылтӥ шудэмзэ кылзыны. Ныллэн чиньыосыз чупрес эктыны-тэтчаны кутскизы. Корка тырмиз вашкала, удмурт но ӟуч гуръёсын. Куд-огзэ мон нырысьсэ кылӥ - Софи соосты ачиз кылдытэм. Котькудаз шӧдӥське удмурт шӧмыз. Одӥгезъя валаны луэ инкуазьмылэсь чеберлыксэ, кыкетӥезъя - пичи ныллэсь малпанъёссэ - сюлмаськонъёссэ, куинетӥезъя - мумы-бубыоссэ яратэмзэ. Мон кӧня ке абдрай, сюан гурез кылыса. Софи, Мендельсонлэсь адӟем карыса-а мар-а, гожтэм сюан марш. Солы дас арес гинэ ай, дышетске пинал усточиослэн школа- интернатысьтызы куинетӥ классын. Дядиез Альберт Алексеевич шуэ: "Аслаз сюанэз дорозь солы сӥзем дас тямыс гур гожтоз ай". Софи соин соглаш. Али чебер, мусо нылаш ог кызьы пала гур кылдытэм ини. Ми азьын со быдэс концерт сётӥз, ачиз шудыса- кырӟаса. Одӥг пол-кык пол мумиз-бубиз но юрттылӥзы. Асьсэлэн верамзыя, нылзы бадӟым концертъёсы но пыриськылэ. Тани Геннадий Корепанов-Камскийлэн сизьымдон аресэзлы сӥзем концертаз но шудэм. Геннадий Михайлович Софилы ӟеч кылъёс верам. Зэмзэ вераса, мон пайми такем шаплы нылашлы. Собыдӟа адямилэсь сыӵе шудэмзэ матысен ӧй адӟылы на вал. Али Софилы саклык висъяны кутскем Ижысь крезьгурчи Евгения Владимировна Копысова но. Нылашлэн азинсконъёсыз туннэ кадь ик луизы ке, матысь аръёсы, оло, калыкмы соин, зэмзэ но, данъяськыны кутскоз. Софи Разинаез ӵемгес адӟыломы сцена вылысь. Н.Возисов. (2) <Ц:\Общая папка\Удмурт дунне\Данъяськымон Н.wри> 15.11.99 14:12 Цлов: 298 Цимволов: 1905 Финалэ шедизы Ижевскын алигес йылпумъяськизы Урал улосвылысь 14 аресозь нылъёс но пиос куспын шахматэн шудонъя ӵошатсконъёс. Отчы пыриськизы Екатеринбургысь, Челябинскысь но мукет городъёсысь покчи спортсменъёс. Жаляса верано, асьме шаерысь 13 шахматист пӧлысь кыкез гинэ - Анастасия Банникова но Дмитрий Кочуров - финалэ шедизы. Кыкетӥ но куинетӥ интые потыса, соос пыриськозы табере Россиын ортчоно ӵошатсконъёсы. И.Вельтмандер. Тодматӥськом Кун Думае депутатэ ӵектэм муртъёсын Кӧня кужым нылкышнолэн кияз!.. Инкуазь бадӟым быгатонлык сётэм та нылкышнолы. Тужгес вылӥ малпанэз: выльдоно Россиез, солэсь Йӧнлыксэ, Лулчеберлыксэ. Ӝутоно сое пыдесъяськемысь. Со понна сётоно вань кужымдэ. Улӥськод бере, лэсьты, мар быгатӥськод. "Вань быгатэмме лэсьтӥсько - озьыен, улӥсько!" Россиысь кун цирк компанилэн президентэз, культура удысысь сӥё-дано ужась, профессор Людмила Петровна Яирова быдэс улонзэ сӥзиз культура, искусство удысын выльдӥськон-лэсьтӥськонлы. Москваысь культурая кун институтэз но Общественной наукаосъя академиез йылпумъяса, кема ужаз СССР-ысь Культурая министерствоын. Солэн тыршемез улсын странамылэн кыдёкысь сэрегъёсаз но усьтылэмын вал театръёс, симфонической оркестръёс, дворецъёс, крезьгуръя ужъюртъёс. Зэмлыкез гажась, ас кылызлы кузё, котькытчы вутскись, сюлмо но рос-прос луэмез понна сое вылӥ дунъязы. 1990-тӥ арын Юрий Никулин ас эшъёсыныз Николай Губенко министрлы вазиськизы, Людмила Яироваез "Союзгосцирклы" кивалтӥсе пуктыны курыса. Цирк луиз солэн улонэз, шокан омырез. Уез-нуналэз чаклатэк ужа. "Семьяез" бадӟымлэсь но бадӟым: 9 сюрс адями, 4500 пала ньыль пыдо эшъёссы. 3500 мында артистъёс котьку дыраз басьто уждун, дунтэк быгато эмъяськыны, шутэтскыны. Берло аръёсы "Росгосцирк" соослы 23 выль квартира кузьманы быгатӥз. "Нюръяськоно ке, чигнано ӧвӧл". СССР куашкаса, рыноке выжем бере, циркез но солэсь ваньбурзэ капыртыны дась луисьёс соку ик шедизы. Кышкатыса, кужмысь зӥбыса но выризы. Но Людмила Петровна ӧз сётӥськы, ӧз чигна. Мар люкамын Совето власть аръёссы - дуно огъя ваньбур, сое тус-тас кароно ӧвӧл. "Росгосцирк" - огъя сӧзнэт, система, сое нимаз люкылыны уг луы. Сое куашкатӥд ке, бырозы ӟуч цирклэн даурен люкам ӟеч сямъёсыз но. Озьы огкылысь кариськыса утемын вал Владивостокысь, Сочиысь, Ниж. Новгородысь цирк юртъёс. "Внешэкономбанк" куашкамен валче, "Росгосцирклэн" 2 миллион манет коньдонэз шупчыны шӧта вал. Яирова ветлӥз Гайдар доры, ветлӥз Минфинэ - озьы но, тазьы но куриз, мадиз, сюлэмзэс небӟытыны быгатӥз. Уксёзы берыктэмын вал - таослы гинэ. Берло дасо аръёсы асьме цирк азьлань гинэ вамышъяз. Л. П. Яирова кичӧлтэмъя, Красной площадьын ортчытэмын Дуннеын нырысетӥез цирк искусствоя фестиваль, Ярославльын но Саратовын Россилэн фестивальёсыз. Людмила Петровна озьы ик утьыса возе циркез ог 6 сюрс кузя циркез яратӥсьёслэсь огазеяськонзэс. "Кышномурт шедьтыны быгатэ сое но, мае уг быгаты пиосмурт". Кивалтон юрт пушкын тросгес луизы ке нылкышноос, огъя улосвылын но со шӧдӥськоз. Нылкышно золгес кырмиське улон борды, юнгес вала кыл кутонэз. Пыр-поч тыршеменыз, чырмытлыкеныз со быгатоз кивалтонэз умойгес радъяны.Тазьы лыдъя Л. П. Яирова. Али асьме Думалэн культураез туж улын, шуэ со. Со кулэ законопроектъёсын вырыны, соосты (законъёслэсь быдэсъяськемзэс) эскерыны. Малы нылпиослы сиён-юон Удмуртие уг вуы? Малы та статья утемын ӧвӧл? Малы дышетӥсьёс дыраз уждун уг басьто? Федерация ласянь висъямын вал ук. Депутат ке луоно, мон мынысал Салтыков доры, Волков доры, Калыкез улон-вылонын утёнъя министерствое - кызьы, кытӥ бергамын уксё - ваньзэ эскерысал йырысеныз пыдозяз. Сыӵе ӝабрес сямыз Людмила Петровналэн. Ӟырдытлыкез но тырмыт. Чебер, визьмо но быгатӥсь кышномурт. Артистка луыны малпанэз ӧз быдэсмы. Оло, со ик умой. Пӧрмиз умой кивалтӥсь, быдэс кун пасьтана сюлмаськонъёсын... Нош гуртаз - сыӵе ик кышномурт, пӧраськыны, куноосты пумитаны яратэ - дыр ке шеде. 27 аресъем пиез вань, академиын ужа. Кузпалыз, военной, вазь быриз-кошкиз улонысь... Улон интыез огшоры, ӧвӧл дачаез но, машинаез но. Ужын тыршемез дунъямын "Знак Почёта" орденэн, "За заслуги перед Отечеством" орденлэн ИВ степенё медаленыз. Людмила Петровна Яировалэн девизэз: "Утёно адямиез, котькудӥзлэсь ас чылкыт ымнырзэ. Утёно культураез, семьяез, нылпиосты, егитъёсты, экологиез. Озьы гинэ луоз утьыны Россиез!" Утёно но ӝутоно. Россиез со адӟе кужмо государствоен - отын мед луоз котькудӥзлэн ужан интыез, правоен утем социальной гарантиосыз, юн мед утиськоз тазалыкез. Нылпиос, ужтэк кылемъёс, пересьёс, сӧсыр адямиос сярысь - нимысьтыз сюлмаськон. Таза но шудо семья - государстволэн инъетэз. Сюдӥсь-вордӥсьтэк кылем нылпиос медаз ветлэ ураметӥ кураськыса, медаз палаське соослы наркотикъёс, урод висёнъёс. Кивоштӥсьёсмы юн тазалыко луыны кулэ. Ваньзэ лэсьтоно, выжыосмес, генофондэз чылкыт утён понна. Тазалыклы бадӟым изъян ваё кырсь омыр, ӵашетэм куараос. Ижевскын экологиез умоятон ласянь трос лэсьтоно луоз, "Кедр" огазеяськонэн но мукетъёсыныз валче ужаса. Ижевскын цирк луоз. Л. П. Яировалэн та сётэм кылыз ог куинь ар ортчыса быдэсмоз шуыса оскыны луэ. Со сюлмаськемен, 2000-тӥ арлы федеральной бюджетын нимысьтыз чурен пусъемын циркез лэсьтыны коньдон висъян сярысь. Выль проектъя цирк луыны кулэ ваньмон дырез пайдаё ортчытон центр. Татын одно ик луыны кулэ нылпиослэн циркъя студизы, пӧртэм кружокъёс, аттракционъёс. "Росгосцирклэн" кивалтӥсез Людмила Петровна Яирова ӵектэмын Ижевскысь, Завьял ёросысь, Воткинскысь но та ёросысь бырйисьёслэн 28 номеро округзыя Кун Думае депутатэ кандидатэ. В. КИРИЛЛОВА. Редакциын пумиськонъёс "Удмурт дунне" газетлэн редакциез город пуме интыяськемын ке но, дорамы вуылӥсьёс ичи ӧвӧл. Та арня куспын кык ӟеч пумиськон ортчиз. Редакциысь коллективен нырысьсэ пумиськиз Удмурт Республикаысь печатья но иворъёсъя министр Сергей Флорович Васильев. Нош валлян дорамы куное ветлӥз Правительстволэн Аппаратэныз кивалтӥсь Александр Павлович Горяинов. Вераськон мынӥз газетлэсь пуштроссэ умоятон, выль лыдӟисьёсты кыскон, коньдон поттыны амал утчан но мукет ужпумъёс сярысь. И. КРИЧЕВ. Вундеркиндъёс... Кинъёс соос? Вундеркинд, кызьы тодмо, немец кылысь берыктӥське тужгес визьмо пинал шуыса. Сыӵе муртъёслэн аспӧртэмлыксы сярысь ивортӥз алигес "На грани невозможного" газет. Со ик тодматэ Россиын тодмо луэм егит талантъёсын. Кызетӥ даурлэн 80-тӥ-90-тӥ аръёсаз вордскем нылпиос висъясько анай-атайёссылэсь но бадӟым агай-вынъёссылэсь. Соослэн бадӟымгес шӧдонзы (экстрасенсориказы), пӧртэм ужлы дышонзы. Тодосчиослэн эскеремзыя, таӵе нылпиос асьсэлэн будэмзыя 5 но солэсь трос арлы бадӟымгес огъёзъёссылэсь, чалякгес "йыръё" компьютерлэсь ужан манерзэ но мукет со выллем паймымон машинаослэсь пуштроссэс. Тросэзлэн соослэн бадӟымесь азинсконъёссы искусство, сьӧрлось кылъёсты дышетон но крезьгур удысын. Алигес "ЭКСТРА-пресс" агентство ивортӥз одӥг паймымон адями сярысь. 14 аресъем Александр Фалуди дышетске Кембридж университетлэн кӧня ке факультетъёсаз. Эшъёссэ абдратъя туж трос иворъёсты йыраз воземеныз. Озьы ке но, егит гений, ӟеч тазалыко но нокыӵе висёнъёсын курадӟисьтэм мурт, секытэн лыдӟиське но гожъяське. Учёнойёслэн малпамзыя, со выллем пиналъёслэн пӧртэмлыксы со бордын: соослэн йырвиымзылэн сыӵе сэрегез уже кутӥське, кудӥз уг "ужа" огшоры адямиослэн. Озьы вундеркиндъёс тросгес тодон-валанъёсты асьсэ "пыртӥ потто" кадь. Россиын но тужгес визьмо пиналъёс вань. Огез соос пӧлысь - Ваня Шульженко. Бадӟым оркестрлэн пичи солистэз Та пияшлэн ӵушъял выллем пежырскись йырсиосаз амалтэк йӧтскем потэ. Ваня ноку вожзэ уг потты йырсиоссэ тугам понна. Со паськыт пальпотэ гинэ. Музыкантъёслэн калык куспо ӵошатсконазы тыныд чебер пальпотэмед понна нырысь инты сётӥзы, вылды, шуыса юамелы но серекъяса шуиз: - Конечно, со понна. Ма понна эшшо? - нош ачиз тыбыр сьӧрысьтыз балалайказэ - "пролетариатлэсь тӥрлыксэ" - поттӥз. "Пролетариатэн" Ваняез герӟа сюрмем чиньы йылъёсыз. - Нырысь-валысь туж висё вал, уин но кӧлэме ӧз луылы,- вера пияш инструментэн шудэмезлэн "емышъёсыз" сярысь. - Али вӧсь ӧвӧл ни, нярӟемъёсы быдэс улытозямлы тырмозы. - Медиатор уг луы-а кутыны? - Кин-о балалайкаен медиаторен шудэ? Солэн сиосыз чиньыослэсь шунытсэс шӧдыны кулэ. Соку инструмент ачиз жингыртыса лэзёз. Балалайкаен нырысь пумиськемез сярысь Ваня тазьы маде: - Инструментэн шудӥсьёс пӧлы шеди малпамтэ шорысь. Вить арес тырмем бере, анае монэ крезьгуръя школае сётыны малпаз. Солы яра вал Нейгауз. Мон но, пе, мед дышом фортепианоен шудыны. та инструментозь мон "ӧй буды" - крезьгурлэсь тональностьсэ, пе, уг валаськы. Со вискын одӥгысьтыз кабинетысь балалайкаен туж шаплы шудэм кылӥськиз. Озьы вуоно дышетӥселэн Елена Дмитриевна Трухиналэн чебер шудэмез монэ палёмытӥз но, мон со доры дышетскыны кыли. - Тыныд та инструмент вашкала уг поты-а? Соин "секыт рокез" уд шуды. Гитараен но саксофонэн уд ӵошаты. - Мон тӥледлы али ик балалайкаен "хевиметалл" шудо, "металлистъёс" гитараоссэс ик вунэтозы. Кылзӥське... Калык кырӟанъёсты сяна, куинь сиен шудыны луэ классикаез но, джазэз но. Михаил Рожковлэсь шудэмзэ кылзыса, тӥ сое валалоды. Ванялэн яратоно инструментэз балалайка ке но, ӝӧк вылаз интыямын флейта. - Али мон фортепианоен но быгатӥсько ни,- вера пияш.- Котыр ласянь азинсконлы со но кулэ. Флейтаен нош шудӥсько, берло гобоен дышон понна: туж яра солэн куараез. - Вера ай, адями-оркестр: балалайкаен шудӥсь муртъёс пӧлысь кин тыныд яра? Кин кадь шудыны дышемед потэ? Таӵе юанлы Ваня нод-нод бадӟым муртъёс сямен валэктӥз: - Михаил Рожков сярысь верай ини. Концертысен со монэ кылзӥськиз но дораз куное ӧтиз. Нош кинлэн ке инструментэн шудэмезлы кельшытыны уг турттӥськы. Малы со кулэ? Соиз нокинлы но тунсыко уз луы ни. Пиналъёс пӧлын ортчем "Рождественские каникулы" калык куспо фестиваль-конкурсын нырысетӥ инты басьтыса, Ваня Шульженко луиз Калык инструментъёсъя Осипов нимо оркестрлэн тужгес егит шудӥсез. Сыӵе со, дас аресъем вундеркинд Ваня Шульженко. Кӧня час дырыз быре балалайкаен шудыны шуыса юамелы, лулскыса вераз: - Нуналаз ичизэ 4-5 час. Со сяна, школаын урокъёс но вань на ук. Калык инструментъёсъя Андреев нимо кыкетӥ московской конкурсын вормыны ӧй быгаты бере, табере тросгес пуконо луоз балалайкае сьӧрын. Озьы ке но, вутскисько футболэн шудыны но математикаен лыдъяськыны. Вундеркинд-а со, вал кадь ужаны дышем пичи "пересь-а"? Азьпала улонэз адӟись Часы всё знают наперёд: Что будет, что произойдёт. Когда-нибудь пробьет наш час. Часы решат судьбу за нас. Тазьы гожъя, малпаське мукетыз вундеркинд - Наташа Макуни. Соин пумиськон ортчиз аспӧртэмлыко. Туж чырмыт нылаш дыртыса вера ачиз сярысь. Со вискын ик юалляське журналистлэсь, вутске чай юыны но кылбуръёссэ лыдӟыны. - Но мон соосты кырӟаны яратӥсько,- шуэ со. - Соос кырӟанъёс-а? - Ӧвӧл ке но, мон кырӟасько-лыдӟисько. Чуръёс дорам космосысь вуо кадь. Со сыӵе шулдыр мылкыд, чилектэм, кыӵе ке зарни си выллем дорам лыктэ. Нош мон ас поннам шудӥсько. Со кылбур уг сёты мыным ас уженым вырыны. Шӧдӥсько: мугоры пӧсектэ, йыры висьыны кутске... Мон мынӥсько тетраделы но ручкаелы. Пуксьыса гожъяй но, висёнэ быриз. Выльысь шудӥсько. - Нош мар сярысь кылбуръёсыд? - Яратон, лул-сюлэм, улон но кулон сярысь. - Тынад яратоно пиед вань-а? - Вань. Но со мынам мылкыды сярысь уг тоды. Озьы ке но, мон солы кылбуръёсме сӥзисько. Эшшо мон кылдытӥ на "Мылкыдъёсын таблица". Со луэ точкаосын возьматэм амал (методика). Та таблицаен мон люкасько умой энергиез но сэрпалтӥсько уродзэ. Татын бадӟым инты басьто буёлъёс. Таблица пыр вераськисько духъёсын, адямиослэн лулъёсынызы, кыӵе ке кулэ ужпумез быдэсъясько... Сое одно ик лэсьтоно ас киосыныд, тынад аураеныд со мед герӟаськоз. Нош яратон сярысь ке, со - улон, шумпотон... Адями пумиське ке яратонэн, быдэсак воштӥське. Эшшо одӥг кылбуре: Между ангелом и дьяволом Колеблется душа. То смеюсь от сердца чистого, То вдруг зла полна... Наташа Макунилэн кылбуръёсыз потылӥзы Москваын печатласькись газетъёсын. Умой дунъет сётӥзы соослы Сергей Михалков но Андрей Вознесенский. Сыӵе аспӧртэм нылаш Наташа. Дунне вылын кузь улон сюресэз ортчем мӧйы муртлэн кадь малпанъёсыз но валанъёсыз. Штангаен мунёен сямен шудэ Озьы шуо Химкиын улӥсь 9 аресъем Юля Борисова сярысь. Спортъя куд-ог комментаторъёслэн чакламзыя, кӧня ке ар ортчыса, та дыды секыт атлетикая олимпийской чемпионэн Алексей Чемеркинэн нюръяськыны быгатоз. Юлялэн атаез Николай Борисов, ачиз азьвыл штангист, али пауэрлифтингъя (секыт жутъянъя) секциен кивалтэ. Аиз доры спортзалэ лыктэм нылашлы (соку солы 5 арес вал) мӧзмыт луиз мӧйыослэсь нюръяськемзэс учкыны. Со ачиз бырйиз но штангае интыяз секыт диск но капчиен ӝутӥз йыр вадьсаз. Секциысь воргоронъёс чылкак паймизы та учырлы. Со дырысен Юлялэн аиз луиз солы тренер но. Нош али Юля капчиен ӝутэ 55 килограмм кыскись штангаез. Аслаз нылашлэн секталаез кык поллы ӧжыт. - Юляен тренировкаос ортчытъянын пӧртэмлыкез ӧвӧл,- шуэ Николай Борисов.- Солэн али ик ини шӧдӥське бадӟым кужымез но чиданлыкез. Секыт ӝутъян нылылы капчиен сётске бере, нокыӵе сӧсырмонъёс ӧй вал на. Со сяна, мукет нокыӵе пӧртэмлыкез ӧвӧл. Армреслингын Юля капчиен ворме бадӟым пиосты. Озьы бере, чик но огшоры ӧвӧл та нылаш. - Мынам туж потэ калык куспо ӵошатсконъёсы пыриськеме,- вера Юля. - Бадӟым муртъёс сямен разрядъёс басьтылэме потэ. Но мон кадь адямиос ӧвӧл, пе. Соин ик нокинэн нюръяськыны. Мон оскисько, дунне вылын тужгес кужмоез кышномурт луо шуыса. Вить аресъем кылбурчи Нылпи садэ ветлӥсь вить аресъем Катя Шемякиналэн вань ини аслаз кылбуръёсыныз сборникез. Ӵок, книгаез гожъямын ке ручкаен, вылбамыз суредамын фломастеръёсын. "Мынам куарае тӧдьы, нош тынадэз - ӵуж. Со яркыт ке но, мынамез чылкытгес",- вера пичи нылаш мумизлы, нылпи садысь бертыкузы. Анаез нылызлэсь верамъёссэ гожъяса вуттэ ке, соос шедё киын гожтэм сборнике, кык пол пусйыны Катя уг яраты. Вераськыны нылаш кутскиз 1 арескын. Нош арес но 3 толэзьскын "Евгений Онагеинысь" нырысетӥ главазэ ас понназ вераса ветлӥз ни. Нырысьёсыз пӧлысь таӵе верамез: "Унябейлэн (одуванчиклэн) йырыз - со тӧдьы изнэсо пельскон". Мумиз Елена Борисовна берло трос книгаосысь утчаськыса но ӧз шедьты сыӵе тунсыко образэз. Катялэн дунне шоры учконэз мӧйы муртъёслэсь туж аспӧртэм. Буёло пиялаос пыртӥ кадь адӟе со котырмес. Соин ик огшорыез но пӧрме "унябейлэн раезлы" но "улмопуослэн сюанзылы". - Одӥг пол,- вера нылашлэн воспитателез Татьяна Лузина,- со мыным шуиз: "Вадьсытӥмы ортчем машина ас понназ инкуазьлэсь улонзэ дугдытӥз". "Малы?" - юай мон. "Бадӟым куараен кошкиз..." Та нылашез Екатеринбургын тросэз тодмало ни. Аслаз вераськеменыз со троссэ паймытэ. Малпаны луэ, сое шонер будэто, трос валэкто шуыса. Но кылбуръёслы кызьы дышетод? Колокольная церковь Мир любви летит над нами, А на небе Бог живёт, В чистой маленькой церквушке Собирается народ. Песни тихие поёт. Купол вижу на церквушке - Средний, маленький, большой, Мне понравились иконы - Не хочу идти домой. Я хочу смотреть на свечи, Как они трещат, горят. В чистой белой комнатушке Колокольчики звенят. Таӵе пичи нылашлэн кужмыз тырме "бадӟымъёслэн" юанъёссылы но валэктыны. Мар со сыӵе яратон шуыса юамелы йӧн-йӧн валэктӥз: "Куке кык адямиос ог-огзэс ӟыгыръяло. Нош сюлэмзы соослэн одӥг, туж бадӟым. Шунды кадь ик пӧсь". Катя ветлэ крезьгуръя школае, яратэ филармониын мынӥсь концертъёсты учкыны. Солы тужгес кельше орган. "Русалочка" фильмез учкемез бере, нылаш шумпотыса вераз: "Татын органлэн токкатаез кык пол жингыртӥз". Ӝытазе нылыз анайзэ гожъятэ "ӵуж" диктант: "Инбам кужымъёс чагыресь. Соос пал суесь. Озьы ке но, соослэн киоссы зарниен пишто. Синдэ кыниськод ке, инбам кужымъёс адскыны кутско. Матысь адямилы "Мынам анае яратонлэсь, небытлэсь но шунытлэсь кылдэмын" шуэм сямен..." Пичи философысен - бадӟымозь 1980-тӥ арын Евгений Евтушенко поэт доры мукетыз кылбурчи, Евгений Глушаков, ваиз Омскын улӥсь Саша Селезнёвлэсь афоризмъёсын верам гожтэмзэ. Евтушенко туж шумпотӥз но паймиз таӵе визьмо но аспӧртэмлыко кылъёслы. Кӧня ке улыса "Литературная газетае" гожтӥз Омскысь вундеркинд сярысь. Редакцие вуылыны кутскизы психологъёслэн, педагогъёслэн но мукет муртъёслэн трос гожтэтъёссы. Егит философлэн верамъёсыз, Евгений Глушаковлэн очеркез но психологлэн Диана Богоявленскаялэн очерклы ватсанъёсыз номырлы оскисьтэм адямиослэсь но сюлэмзэс вырӟытӥз. Кызьы-о малпалод, 6 аресъем пиёк кылъёслэсь пуштроссэс сыӵе мур вералоз шуыса: "Акробат - киё-пыдо пропеллер", "Пась - омырысь гоп", "Амал - солдатлэн визьмыз" но мукет со выллем визьпогъёс. Вераны кулэ, таӵе мудрон малпанъёс ӧй вал басьтэмын книгаосысь. Со дыре Саша лыдӟиськыны умой-умой уг быгаты на вал. Тодмо статья бере "Литературка" но мукетъёсыз газетъёс вундеркиндъёс сярысь гожъяны кутскизы. Советской Союз вакытэ вань умойзэ пиналъёслы сӥзиськом шуэмлэн емышез вал вундеркиндъёсты будэтон. Шуныт зор бере губиос кадь йыло, пе, генийёс. - Нош мон аслэсьтым пӧртэмлыкме ӧй валалля,- вера табере Саша Селезнёв.- Малпасько вал, ваньмыз сыӵеесь шуыса. Омскысь Москвае вуттэм пияшез шоркаре интыяны кыл сётӥз вал горкомлэн кивалтӥсезлэн Гришинлэн юрттӥсез. Со понна, пе, Педагогикая академилэн президентэз Кондаков куронэн мед вазиськоз. Академик соглаш луиз ке но, гожтэтэз таки ӧз вуы. Пиёк выльысь берытскиз Омске. Берлогес семьяез интыяськиз Волгоградэ. Москвае вуылыкуз, солэсь юалляськизы олокыӵе но кылъёслэсь пуштроссэс вераны курыса: - Вера тужгес урод адями сярысь. - Тужгес урод сыӵе мурт, кин трос косъяське. - Мар тон малпаськод ожгар сярысь? - Войнаос дугдозы соку гинэ, куке адямиос кутскозы ог-огзылы оскыны. - Нош ваньмызлэн луиз ке йыр вадьсазы липет, тырмымон сиёнзы но эриксы? - Бадӟым эрик ик вуттэ ожмаськонэ... Таӵе мур валанэ котькудӥз быдэ вуэм мурт но уз вуы. Нош татын куать аресъем пияш! Мар луысал соин азьланяз, тодмо ӧвӧл, но азбаре вамыштӥз "выльдӥськон"... Кунлы нокыӵе вундеркиндъёс кулэ ӧз луэ ни. Солэн ванез сярысь вунэтӥзы. "Мон пичи философ, аслам кузьыли карам гинэ тодмо",- малпаз пияш. Кузьыли карен лыдъяз аслэсьтыз ӵыжы-выжыоссэ. Нош государстволы солэн ванез яке ӧвӧлэз нокыӵе но ӧй вал. Сое Саша пичиысен валаз. Соин ик али вакыт шоры солэн учконэз кузь улонэз ортчем мудрон песяйлэн выллем. Школаез йылпумъяса пыриз Волгоградысь университетэ. Филфакез пырпотыса, Европаын тужгес кутӥськись куинь кылэз аслэсьтыз вить чиньызэ кадь тодӥз. Волгоградэ лыктэм туристъёслы Саша дэмла городэз возьматыны. Коньдон со понна тужгес дуноез ӧвӧл. Вань ке - умой, ӧвӧл ке - озьы но яралоз. Мар бордын ужамез Саша понна бадӟым инты уг басьты. Озьы ке но, солэн диссертациез дась ни... Кинъёс пӧрмо соослэсь? Улон возьматэ, вундеркиндъёслэсь генийёс уг пӧрмо шуыса. Солэсь но ортчыт, 20 арес бере тужгес визьмо нылпиос асьсэ огъёзъёссылэсь уг ни висъясько. Вераны кулэ, огшоры пиналъёслэн сярысь, тросэзлэн соослэн психикаязы шӧдӥсько сураськемъёс. Кӧня ке дыр ӵоже соос ваньзылэн син азязы, калык соосын данъяське... Собере нылпилэн "туж визьмо луэмез" ортче. Адямиос дугдо сое данъямысь. Нош пинал дышиз ини азьпалан луыны. Сыӵе дыръя секыт чигиськытэк кыльыны. Психологъёслэн верамзыя, азьвыл вундеркинъёс пӧлын асьсэды быдтыны турттӥсьёс туж трос. Соос ӧвӧл дышемын огшоры улонэн улыны. Соос оско асьсэлэн пӧртэмлыксылы. Соин ик уг валало котыразы улӥсьёслэсь соос шоры учконзылэсь мугзэ. Таӵе пиналъёслэн мумы-бубыоссылы сюлмысь ӵектэм потэ нылпиоссэс пичиысен ик ужлы дышетыны. Куке соослы ваньмыз сётске капчиен, пиналъёс тодон-валан басьтон бордын тыршемысь дугдо. Озьы "огшоры" пиналъёс соосты суто но, азьпалто но. Мукетыз дэмлан - эн вералэ пиналдылы, со аслаз ёзъёсызлэсь визьмогес но пӧртэмгес шуыса. Озьы тӥ сое трос янгышъёслэсь утёды. Тужгес тодмоосыз Вольфганг Амадей Моцарт - нырысетӥ крезьгурзэ гожтӥз 5 арес дыръяз. Аркадий Гайдар 14 арес дыръяз ик ини полкен кивалтӥз. Сузэръёс Жужа, Софи но Юдит Полгаръёс - тодмо пичи шахматисткаос. Джоди Фостер - "Молчание янгят" кинофильмысь кизили. Соку солы вал 8 арес. Земфира - алигес тодмо луэм асьмелэн кырӟасьмы пусъе, крезьгур, пе, гожъяны кутски 4 аресысен. Басьтэмын "На грани невозможного" газетысь. Берыктӥз Е. ПАХОМОВА. Вуоно даурысь юрт Городмы нуналлы быдэ чеберске шуи ке, уг янгыша, вылды. Синэз палёмыто вӧл-вӧл пуктэм юртъёс-банкъёс. Соос шоры учкыса, кунгож сьӧры вуылэм кадь потоно. Амалтэк сыӵе коркаосын улэм потыны кутске. Но... куд-ог шудоослы удалтӥз, шуыны луоз. Город шорысь ик Карл Маркс урамысь 208-тӥ юртлэсь ӝынызэ пыр-поч тупатъязы-выльдӥзы ни. Талэсь азьвыл кӧня ӝоштӥськоно, сюлвороно луизы вал, огшоры улӥсьёс. Уго 1937-тӥ арын пуктэм корка та дырозь векаса кадь мырдэм пыд йылаз сылӥз. Куд-огез, оло, шуоз но, вуж макеез тупатъятозь, выльзэ пуктон дунтэмгес усёз шуыса. Кин тодэ?! Уго дунъёс сярысь туннэ шуг вераны. Кинлэн вань коньдонэз, со аслыз коттедж пуктыны дыртэ, нош асьме государствомылэн бюджетэзлэн пыдэсыз ялан "пась", лэся. Городысь вуж юртъёсыз выльдыны коньдон уг окмы. Та коркаез куинь ар выльдӥзы, нош улӥсьёссэ огъя улонниосы выжтӥзы. Мылзы потытэк ик шуныт коркаосысьтызы кошконо луизы. Тросэз ӧз но малпалэ ни куке-соку татчы ик улыны берытскозы на шуыса, законын озьы гожтэмын ке но. Оло, соин но, дыр, артысь юртын улӥсьёслэн верамзыя, выльдэм-тупатъям коркаез учкыны ветло ни пӧртэм машинаосын дуно дӥсен дӥсяськемъёс. Тупатъям-выльдэм юртэз учкыса шумпотоно лэсьтӥськисьёслы. Асьмелэн но быгато вылэм кунгож сьӧрысь пӧртэм сериалъёсын выллем юртъёс пуктыны. Борддоръёсыз тузӥ но дуно шпалеръёсын лякемын, пластик укноостӥ кезьыт но уг пельты, шуныт но кыре уг тӧлӟы. Со сяна, урамысь трамвай-машина куара но уг кылӥськы. Нош корка пушкысь шуныт сётӥсь гумыос пӧсьгес потӥзы ке, юртъёсын улӥсьёслэн соосты пичиятэмзы но луоз. Котькуд комнатаосысь гумыосы терморегуляторъёс пуктылэмын. Ул но ул таӵе юртын. Табере вакчияк коньдон ужпум сярысь. Туннэ нуналлы та юртэз выльдонлы 14 миллион манет кошкемын ни, со сяна, эшшо кык подъездзэ йылаз-пумаз вуттоно на. Ваньмыз- ӧвӧлэз, горжилуправлениын но та проект бордын ужасьёслэн, лэсьтӥськисьёслэн верамзыя, 20 миллион манет, пе, кошкоз. Мукет сямен вераса, одӥг квадратной метрзэ выльдон 4 сюрс манет котыр усе. Тупатъям понна улӥсьёс 25 процентсэ асьсэос тыризы. Табере малпаське ини, кӧня тыр усиз соослэн евроремонтсы. Но одӥгзэ ӟеч тодыны луэ, та юрт пыд вылаз йыг-йыг сылоз на эшшо одӥг даурзэ. Городамы куашкан калэ вуэм юртъёслэн лыдзы трос гинэ - 64 корка (лыдпус басьтэмын 1997-тӥ аръя). Со пӧлысь кызьзэ выльдыны уз луы ни. Азьланяз таӵе амалэн тупатъяны малпало Советской урамысь 34-тӥ, 16-тӥ улон юртъёсыз но 50-тӥ-60-тӥ аръёсы пуктэм коркаосты, калыкын соосты "хрущёвкаен" тодо. Туннэ нуналлы вань шуг-секытъёс пыкъясько коньдон вылэ. Соин ик, шуг вераны, ЪЪИ даурлэн нырысетӥ аръёсаз та уж азьланьтэмын луоз шуыса. В.Кутузова. * Тани со - выльдэм юрт. В.Камашев (фото). КЫЛЁД СЮЛЭМАМ, АНАЕ Крезьгурез Пантелей Кузнецовлэн Кылъёсыз Яков Майковлэн Бусы кыръёсын эрико тӧл шудэ но, Солэсь тугаське йырсие... Оло нош аръёс ортчемъя но тазьы тон Монэ вешаськод, анае. Тодмо тусбуйдэ син азям пуктӥсько мон, Лыктэ кадь пелям куараед... Нош тон кыдёкын, тон уд ву ни ноку но, Уд лу ни, вордэм анае. Ужлэн ӧй но вал кадь пумыз но, йылыз но, Нунал пырылӥз, дыр, уе... Чебер дуннеез милемлы тон усьтӥд но Утид улонмес, анае. Юнме куректон но тыныд вайылӥ мон, Оло, ӧй но шӧды сое. Туннэ ӝожомон синвудэ ӵушысал но, Бере кылиськем, анае. Выль кылбуръёс чузъяськозы Вуоно вордӥськонэ, 22-тӥ шуркынмонэ (ноябре), Удмурт Элькунысь национальной библиотекалэн шаертодонъя но финн-угор литературая ёзаз луоз егит кылбурчилэн, Удмурт радиоысь журналистлэн Ольга Ведровалэн ӝытэз. Чузъяськозы выль кылбуръёсыз. Соос пумысь ас малпанъёссэс вералозы эшъёсыз. Ӝыт кутскоз 17 часын. Кылбуретэз яратӥсьёс татын бадӟым чеберлыкен пумиськозы. ЛЫДӞИСЬЛЭН МАЛПАНЭЗ Кыӵе со - пенсионеръёслэн партизы? Телевидение пыр ӵем гинэ возьматыло пенсионеръёслэн партизы сярысь реклама суредъёсты. Но отысь валаны уг луы: кыӵе мар со партия, кин кылдытӥз сое, кинъёсты огазея? Мон юалляськи ветеранъёслэн советъёсысьтызы но, быръёнъёсъя республиканской комиссиысь но. Кылэммы, пе, вань, нош рос-прос вераны ум быгатӥське. Валэктон шедьтӥ "Советская Россия" газетысь. Статья гожтэм одӥг пенсионер, вылӥ верам партие пырам мурт. Отысь со берен потэм, кытчы сюремзэ валаса. Тӥни со автор пыр-поч маде, ку но кин кылдытӥз партиез. Кылем арлэн кутсконаз нырысьсэ люкаськиллям пичигес гинэ кинотеатрын, Ветлэ ог 20 мурт. Съездзылэсь данзэ ӝутон вылысь ӧтиллям тодмо адямиосты-пенсионеръёсты, азьвыл советской министръёсты Афанасьевез, Бальмонтэз, Братченкоез, КПСС-лэн Свердловск обкомезъя Б. Н. Ельцинлэн визьнодасез, бӧрысь СССР-ысь правительстволэн кивалтӥсезлэн воштӥсез - Рябовез... Партиез кылдытӥсьёс визьнод басьтыны ветлӥллям Америкае, мӧйыослэн ассоциацизылэн ужаменыз тодматскыны. Нош кин со понна коньдон висъям? Пенсионерлэн юанэзлы партилэн кивалтӥсез С. П. Атрошенко верам: "Соиз понна, песятай, тон эн сюлмаськы". Нош кин со Атрошенко? Пенсионеръёслэн тодэмзы потэ ук, кин кивалтэ соослэн нимынызы кылдытэм партиен. Вордскемын, пе, 1958 арын. Аслаз "Партия пенсионеров" брошюраяз маде ортчем сюресэз сярысь: школа, армия, спорт (хоккеист), институт. 1979 арын Москваысь кошкем Тюмень областе "кузь коньдонлы". Странаямы выльдӥськон кутскем бере, луэ предприниматель, банкир. Собере турттэ вылэм Тюмень областьлы губернаторе пуксьыны. Солы дурбасьтэм "Десятка" нимаськись криминальной группа. Таиз сярысь со ачиз уг гожты ни, гожтэ огез центральной газет. Я, бен, кылдэм ке кылдэм выль партия, нош кыӵе ужпумъёс пуктэ ас азяз? Та пумысен лыдӟиськом "Ветеран" газетлэн корреспондентэзлэсь Иван Дынинлэсь та партилэн куинетӥ съездэз сярысь статьязэ. Таиз съездзы ортчем Кремлёвской дворецын. Со понна Атрошенко тау каре президентлэн администрациезлэсь кивалтӥсезлы Волошинлы но президентлэн ужъёсыныз кивалтӥсьлы Бородинлы. Отӥяз со туала киватӥсьёсты тышкаськиз, пе, мӧйыосты пӧямзы, секыт улонэ вуттэмзы понна. Нош кызьы таӵе югдурысь потоно? Оло, кивалтэтэз воштоно, яке странаез мукет сюрестӥ азинтоно? Соиз сярысь партилэн председателез номыр верамтэ ни. "Бадӟым кужымлы пӧрмиз пенсионеръёслэн партизы, - шуэ со. - Асьмеос возьматом, кин странаын кузё..." Ньыльдон миллион пенсионеръёслэн нимынызы вераськыны турттэ та партия. Нош кытчы-о пыризы ветеранъёслэн огазеяськонъёссы? Соос но пенсионеръёслэн партиязы пыризы ни шат? Ветеранъёслэн комитетъёсысьтызы но советъёсысьтызы ыстэм адямиос та партилэн съездъёсазы одӥг но ӧй вал. Пенсионеръёслэн партизы нимаз кужымен али мынэ Кун Думае быръёнъёсы. Бюллетене со пыртэмын луоз 27-тӥ интыын. Кинэ бен ӵектӥз съезд депутатэ кандидатэ? Тани куд-ог нимъёс: пӧртэм компаниослэн директоръёссы Г. В. Жирнов - 41 арес, В. Н. Крюк - 42 арес, Лепешкин С. В. - 38 арес, Топорков А. Н. - 32 арес, Аладин Е. Н. - 24 арес, Гусев Ю. М. - 43 арес но мукетъёсыз. Одӥг рабочий но, крестьянин но, дышетӥсь но, врач но ӧвӧл, пенсионеръёс сярысь вератэк ини. Малы-о соку партия пенсионеръёслэн шуыса нимаське? Валэктон одӥг: ветеранъёслэсь радъёссэс люкылон, соослэсь йырвизьзэс суран-пожан но соослэн нимынызы Россиысь Думае асьсэ адямиоссэс пыртон. Соос ноку но уз малпаське мӧйыослэсь улон-вылонзэс умоятон сярысь, сюлмаськозы асьсэ понна гинэ. Вераны кулэ на тани ма сярысь. Ветеранъёслэн кенешъёсысьтызы куд-ог кивалтӥсьёс (озьы ик асьме республикаысьтымы ветеранъёслэн Советсылэн кивалтӥсьёсыз но) шуо: "Асьмеос политикалэсь палэнын луыны кулэ". Кызьы-о 40 миллион ветеранъёсты политикалэсь, мукет сямен вераса, быдэс улон-вылонлэсь палэнтод? Со луэ мӧйыослэсь радъёссэ суран-пожан, соосты пӧян, странамес куашкан сюрестӥ нуыны тыршон. Та понна ик кылдытэмын ӧвӧл-а меда пенсионеръёслэн партизы? В. Михайлов, ожысь но ужысь ветеран. ЮАН - ВАЛЭКТОН Юрий Лужков но компартия Мон ужысь ветеран Валентин Александрович Горбунов. Улӥсько Воткаын. Тодэме потэ: кызьы меда Москвалэн мэрез Юрий Михайлович Лужков учке компартия шоры? Алигес "Московский комсомолец" газет ортчытӥз аспӧртэм ӵошатскон. Кин, пе, Юрий Лужковлы ӟечгес юан сётоз. Уно сюрс юан пӧлысь ӟечъёсыз пӧлы сюриз Воткаын улӥсьлэн Валентин Горбуновлэнэз но. Тани кыӵе валэктон вуиз солы Москвалэн мэрезлэсь. Мон каньыл мылкыдын учкисько Геннадий Андреевич Зюганов шоры, сое гажасько. Геннадий Андреевичен дырын-дырын пумиськылӥськом, ог-огенымы кенешиськом. Мон номыр умойтэмзэ уг адӟиськы, Россиысь ог люкетэз калык Зюгановлы дурбасьтэ ке. Власть медаз лэсьты кыӵе ке шукырес ужрадъёс. Малы ке но дырын-дырын пуромыло КПРФ-ез алон сярысь супыльтонъёс. Компартия - парламентэ сюрем партия. Сое озьы-а, тазьы-а умоен лыдъяло уноез. Компартиез алон уг тупа Конституцилы но, демократилы но. Возьытэз валаса, озьы лэсьтыны уг яра. Котькуд партия ассэ возьматэ но дурбасьтӥсьёс шедьтыны турттэ. Коммунистъёс но калык пӧлысь асьсэлы матысь адямиоссэс мед утчалозы. Мон уг малпаськы - Россиысь укыр тросэз адямиос соос пала кариськозы шуыса. Калык кусыпъёс чакласа возиськозы Асьме республикаын тупаса уло данак калыкъёс, утисько но азинско соослэн аспӧртэмлыксы, кылъёссы, сямъёссы но культуразы. Кызьы уже кутоно котькуд калыклэсь визьзэ, быгатонлыксэ, кызьы шонер амалъёс шедьтоно кун национальной плитикаез улонэ пыӵатон, наци кусыпъёсты радъян но азинтон понна - та ужпумъёс бордын табере ужалоз Удмурт Республикаысь Национальной политикая министерсвоын кылдытэм экспертно-консультативной совет, кудӥз огазеялоз Удмуртиысь валтӥсь учёнойёсты но специалистъёсты. Выль ёзэ пырем муртъёс нырысетӥ кенешазы эскеризы матысь дыре быдэстоно ужпумъёсты. Кылсярысь, эскеремын, кызьы умоятоно ваче ужан кусыпъёссэс кивалтон ёзъёслэсь но национально-культурной огазеяськонъёслэсь национальной политикаез нуон, кун властьлэн ёзъёсаз но ас коже кивалтонын национальной представительствоез азинтон пумысен но мукет. Чакламын Удмурт Республикаын этнополитической но этносоциальной югдур сярысь арлы быдэ доклад лэсьтылыны. Экспертно-консультативной советэн кивалтыны юнматэмын В. В. Владыкин, Удмурт кун университетысь этнологияя но регионоведенияя кафедралэн кивалтӥсез, профессор, исторической наукаосъя доктор. С. Дмитриев, Национальной политикая министерствоысь информационно-аналитической но правовой ужъёсъя отделлэн кивалтӥсез. Карлсон сямен Ижевскын но ёросъёсысь ӝужыт юртъёслэн лыдзы ялан йылэ. Куд-огез, оло, соос йылэ тубыны ик уз дӥсьтэ, нош лушкаськыны яратӥсьёс коть "инме" тубаны дась. Озьы Ижевскысь Ворошилов урамысь ӝужыт юрт йылысь алигес куинь егит пиос кырмемын вал. Та "карлсонъёс" лушкало вылэм телеантеннаосыз. Ма карыны малпало вылэм, соиз шараяськоз ини Устинов ёросысь милициын. В. Петрова. ШӦКЫЧ Кытын векчи, отӥ ик чиге Адямиез ву котьку но ас бордаз кыске - гужем но, толалтэ но. Шуре-а, тыметэ-а мынэ со, тодэ ини - ву юзматоз но, чорыген но утялтоз, мугордэ но кыдатоз. Берло дыре ялан тросгес но тросгес луо йӧ вылын чорыганэз яратӥсьёс. Ма, ас киыныд кутэм чорыг лым трослы дунтэмгес усе уго. Тани Иж тымет вылын ву йӧэн векчи гинэ шобырскыса вуиз но... Отчы чорыгасьёс сьӧд куакаос музэн вуизы, ява. Бен, чорыг лым со умой, дыр, но. Мукетсэ вунэтоно вылымтэ. Та нуналъёсы гинэ тымет "ньылӥз" ни куиньзэ чорыгасьёсты. Ӧз быгатэ юрттыны спасательёс но. Зэм, асьме дорын вань ву вылын утиськонъя служба. Отын штатъя 24 мурт луыны кулэ. Нош ужа чылкак 8 адями гинэ. Соос но нуналэн-нуналэн вошъясько. Та службае ужаны лыктӥсь ӧвӧл. Кин меда 300 манет тыршоз со кышкыт ужын? Югдур ӧз ке воштӥськы, оло, гужемозь татчы одӥг мурт но уз кыльы ни? Ох и кӧня адями меда соку эзельзэ вуын шедьтоз! Инмар гинэ мед утёз ини соизлэсь. Б. Никитин. ШӦКЫЧ Ялонъёс Коньдон пуйыме ыштӥ. Кин шедьтӥз, ивортыны курисько Ӧркишурысь Петыр Сенькалы. Коньдон пуйыелэн тодметъёсыз: курень, парсь кулэсь вуремын, пушказ куинь висъетъёсыз, коньдонэз ӧвӧл. *** Скалме вузасько. Лекаське, ӵыжаське, кеч мында сиське. Ачиз вышкы ӝужда, йӧлыз - быдэс ведра. *** Педоре, кытын тон?! Сёт ивордэ! Нылпиосмы будӥзы, лобӟизы. Огнам кыли. Мыным туж мӧзмыт. *** Вина пукон коммуна усьтӥсько. Ӧтисько ужтэк кылем егит нылъёсты но пиосты. Ӵош ужалом, вузкаром, сиём-юом, шутэтском... кӧлалом. *** Узырмыны дэмланъёс сётӥсько. Дунзэ берло тыроды, пайда поттэмдылэсь ӝынызэ. Галина Романова. Шӧкыч Тест Яратӥськоды-а тӥ крезьгурез? Тодэмды потэ ке, эшъяськиськоды-а тӥ крезьгурен, тырше та юанъёслы шонересь валэктонъёс сётыны. 1. Барабанэ йыгаськод ке, таӵе куара потэ: а) биб-биб б) тра-та-та в) ту-ту-ту г) хрю-хрю 2. Удмуртиын вордӥськиз тодмо крезьгурчи: а) Людвиг Бетховен б) Александр Пушкин в) Михаил Горбачев г) Петр Чайковский 3. Атас чоръя тазьы: а) нурс-нурс б) кот-кот-коток в) бе-е-е г) ку-ка-ре-ку 4. Геннадий Ганьков со а) кырӟась б) эктӥсь в) ужбергатӥсь г) тодосчи 5. Тӥ кырӟаськоды а) Шаляпин кадь б) Паворотти кадь в) Кырӟаны уг быгатӥськы г) Куддыръя ыж кадь, куддыръя солэсь но умой. Берпуметӥ юанлы В яке Г валэктонъёсты бырйиды ке, малпаське: оло, пинал дыръяды кытын ке но гондырен пумиськылӥды? Пельдэс кутылыса утчалэ ай. Мон дэмласько тӥледлы коргидады потыса кырӟаны дышетскыны. Курегъёстэс гинэ эн кышкатэ - пузамысь дугдозы. Нош вань юанъёслы шонересь валэктонъёс сётӥды ке, озьыен, крезьгурен тӥ эшъёс. Магазинэ мыныса асьтэлы таӵе кузьым басьтыны быгатӥськоды: а) арган б) крезь в) гитара г) барабан Кузьым басьтыны ыстӥз Фёдор МИННИГАРАЕВ. Шӧкыч Любовь Тихонова Коть гуртэз, коть городэз, Одӥг, дыр, калыкез. Толя ӧз басьты гурт нылэз, Городысез, пе, чебергес. Зэмзэ мунё вуиз гуртэ, Мальдод, усёд, уд султы ни. Музей кариз Толя юртсэ, Калык учке йӧн кышнозэ. Сьӧрлось гуртъёс пыро-пото, Казакпиос, ой, синмасько. Ас куспазы лек сипырто, Лушкан сярысь, дыр, верасько. Мунё пуке, пуке, пуке, Ялан бамзэ буям каре. Нунал пӧрат Толя каре Мискинь ветлэ. Со басьяське. Вылез нунал вордскон азьын Мукет дӥськут кышно вылын. Чильк-вальк киське азвесь-зарни, Юртъер куанер кыле ини. Озьы тӥни даур ортчиз. Толя, зэмзэ но, туж жадиз. Пырскиз, ужаз, ваньзэ тыршиз - Буш юртъераз огназ кылиз. Маркаосын - "Ижъёс" но Та нуналъёсы издательствоя Марка центр но Россиысь связья министерство куать маркаен сузьет поттӥз. Нимаське - "Мотоцикл - со ӝоглык, романтика, спорт но шутэтскон". Со сӥземын Россиын поттэм мотоциклъёслы. Кыказ марка вылын "Иж-1" (1929), "Иж-Планета-5" (1987) мотоос возьматэмын. В.Рогалев. Адӟытонъёс, адӟытонъёс Туэ 31-тӥ октябрьысен 7-тӥ ноябрёзь Гаванаын автотехникаез возьматонъя калык куспо ярмарка ортчиз. Удмуртиысь отчы ветлӥз "Ижмаш-Мото" акционер огазеяськонысь коммерцияя директор Виктор Копытцев. Кубаын возьматэмын грузъёсты нуон-ваён "Иж-Ю- 5" мотоцикл, мотопомпа, пассажиръёсты нуллон коляска, "Планеталы" но "Юпитерлы" двигательёс. 16-тӥ-19-тӥ ноябре Кипрын (Египет) радъямын вал нырысетӥез калык куспо автовыставка. Предприятиысь маркетингъя но сбытъя директорлэн воштӥсез Александр Рудаков отын возьматӥз грузъёсты нуон мотоциклъёсты, "Иж-П-5", "Иж-Ю-5" моторикшаез, мотопомпаез, тылпу кысонъя мотоприцепез.Нош Уфаын та нуналъёсы ортчись "Пожаробезопасность-99" адӟытонын "Ижмаш-Мото" калык азе поттӥз мотопомпазэ но тылпу кысон мотоциклзэ. Н.Лялин. ШӦКЫЧ Уж вань! Ужа гинэ! Ох и шуг луиз демократия вакытэ уж шедьтыны. Ох и шуг луиз! Уж уг шедьы но тӥни, котьма даурты. Лушкаськисьёс трос ке но, ваньмыз уг лушкаськы на ай-ко, ужаса кӧтсэ тырыны дышем адями уждун поттон сярысь ик сюлмаське. Огдыре жаг куянын но копаськоно, буш ӟенелик бичаса ветлоно яке черк дорын кураськыса сылоно луэ ке но. Уж ласянь туж шуг вал берло аръёсы, нокыӵеез но уж ӧз шедьтылы, тужгес но адямилэн йӧнала специальностез ӧвӧл ке. Берло дыре югдур кӧнялы ке воштӥськиз. Умой пала. Уж шедьтон сярысь верано ке. Но ведь кыӵе уж сёто? Но ведь кӧня уждун тыро? Соиз но вань на. Тани сиён-юонэн вузкаронъя магазинъёс котырысь лымыез но жуг-жагез октыны тол вылтӥ толэзяз 300-400 манет тыро. Но шутэтскон нуналъёстэк отчы нуналаз ньыль пол, пе, потано. Сыӵе нунал тупато, кылсярысь, Петрова ульчаысь 21 номеро магазинлэнлэн кивалтӥсьёсыз. Металлургъёслэн городокысьтызы 15 номеро магазин дворниксэ нуналаз куинь пол гинэ уже ӧтьылоз, но тыроз ӝыны ставка гинэ - 170 манет. Нылпи садъёслы но улон коркаосты тупатъясьёслы но дворникъёс кулэ. Нырысяз уждунзы воксё 110-150 манет гинэ, ЖРП-ослэн тросгес - 400 манетозь. Но со понна адями вазь ӵукнаысен бер ӝытозь утялтӥськон бордын нырыныз гырыса ужаны кулэ. Музейёс сторожезлы но, дворникезлы но быдэн 150 манет тыро. Уж вань! Вань уж! Ужа гинэ. Только вот со уждунэныд пась кӧттэ нуналаз тырыны, отчы-татчы мынэмез лыдъяса, ичизэ 90 манет кулэ. Амалтэк ӵошатоно луэ али пичи уждунэз азьло пичи уждунэн. Азьло 70 манетлы 350 буханка нянь шеде вал, али 150 манетлы - 30 гинэ. Озьыен коть ужа, коть кӧттэ кормаса кылльы, сиемед ичигес потоз. Нош правительстволы со нокыӵе но уз поты. П. СКОБЕЛЕВ. Вуоно пуксёнэ, 23-тӥ ноябре, Удмурт филармонилэн юртаз луоз калык писательлэн Пётр Черновлэн творчествоезлы сӥзем ӝыт. Солэн "Кион кар", "Кузьыт шеп", "Вылга палъёсын сӥзьыл", "Дор", "Тулысысен сӥзьылозь", "Егит дыр кырӟанъёс" но мукет книгаосызъя вераськон сяна, луоз писательлэн аслаз лыдӟисьёсынызы сюлмысь кенешонэз, произведениосысьтыз геройёсын пумиськон. Ӝытэ пыриськозы тодмо удмурт артистъёс. М. ИВАНОВА. Шӧкыч Гажано иськавынъёс но туклячиос! Туннэ шуркынмонлэн 19-тӥ нуналэз. Бен, бен. Нош ӵапак толэзь ортчыса, тодӥськоды, луоз, бадӟым праздник вите шуыса. 19-тӥ декабре асьмеос ӝутскем мылкыдын вамыштом быръён участокъёсамы. Россия Федерациысь Кун Думае депутатэ кандидатъёслэн нимъёссы тодмо ни. Пӧртэм огазеяськонъёс, движениос ӵекто отчы асьсэлэсь адямиоссэс. Табере тани телевидение, радио но газетъёс пыр кутскиз соосын тодматскон. Кандидатъёс пӧлын вань олокинъёсыз но - тодмоос но тодмотэмъёс, воргоронъёс но нылкышноос, тодосчиос но кивалтӥсьёс, республикаямы но солэн палэназ улӥсьёс. Соин ик, гажано бырйисьёс, кандидатъёслэн программаосынызы ӟеч-ӟеч тодматске. 19-тӥ декабре медад янгышалэ. Дыр кема ӧз кыльы ни. Пока. Шӧкыч. Гожтӥськон - 2000 Гажано лыдӟисьёс, республикаысьтымы Почта кусыпъёсъя управление ивортэ: валтӥсь центральной газет-журналъёсты 2000-тӥ арын 1-тӥ январьысен басьтэмды потэ ке, дыртэ. Гожтӥськон йылпумъяське 25-тӥ ноябре. Нош шаерамы потӥсь газет-журналъёслы вуоно ар понна гожтӥськыны луоз 20-тӥ декабрёзь. Дыр трос ӧз кыльы ни. Почтаосын тӥледды возьмало. Бӧрысь эн куректы, нылы верос Нина, перронэ васькыса, огинтыяз кӧня ке сылӥз, солань-талань учкылӥз. Тодмооссэ адӟытэк, чемоданзэ кутӥз но сюрес вылэ потӥз. Малпа вал: оло, машина вадьсаськоз? Вить ар куспын со кужен ветлон сюресэзлэсь вань нырко-гопо интыоссэ, будӥсь пужымъёсты но кызьпуосты тодманы вуиз ни. Нош туннэ мылкыдыз котькулэсь но капчи - кисыяз угось университетэз йылпумъямез сярысь диплом. Сюлэмызъя куазь но - туж шулдыр. Кемалась малпанэз быдэсмиз - табере со ас гуртаз нылпиосты дышетоз. Шадра гуртэ нуись сюрес дурын будэ бадӟым пужым. Пересьёс но уг тодо, кӧня арес солы. Вордскем палысьтыз кин ке палэнэ-а кошке яке дораз-а бертэ - одно ик пужым улэ пуксьылэ. Нина но озьы ик кариз. Малпамтэ шорысь кытысь ке вуиз чиган кышно. Егит нылаш вӧзы бинетсэ поныса, вакчияк вазиз: - Мон нюке ошмес вулы васькало - эскеры тае. Со куспын олокытысь сьӧд пилем вуиз но, зорыны ӧдъяз. Ярам коть, зонтиклы укшась пужым котмемлэсь кӧня ке но уте. Чиган кышноез витён куспын бинет вырӟылыны кутскиз. Нина учкиз но - отын вож нуны. Оло час, оло кык возьмаз солэсь анайзэ - ӧз вуы. Бур кияз чемоданэн, палляназ чиган "пирданэн" гурезь уллань гуртэ васькиз. Азбаре пырыса, сюлэмыз юнгес жугиськыны кутскиз. Малпаз, вылды, кызьы пумиталозы дорын. Корка ӧсэз каллен гинэ усьтыса вазиз: - Ӟечбур, атай! Филимон Николаевич интыысьтыз султӥз но абдраса сямен учке нылыз шоры. - Нина, тон-а? Нош малы таӵе куазен пыдын? Жингырты вал станциысен - ачим валэн пумитасал. - Ӵукна кыӵе шулдыр вал - кин тодӥз, зороз шуыса, - пальпотӥз Нина. - Я, эн сюлмаськы, атай: мон дорам ни. Атаез пальпотыса учке нылыз шоры. Вить ар куспын кыӵе воштӥськем со, мугорын но таза луэм. Табере казакпиосыд синзэс вошъятэк учкозы шораз. Со куспын бинетысь нуны куара кылӥськиз. - Нош со, Нина,... тынад-а? Малы та дырозь номыр но ӧд поттылы? Нина атаеныз трос вераськыны ӧз вуы - ӧсэз усьтыса, корка пыриз анаез, Евдокия Платоновна. Солэн пеляз кытысь ке кылӥськем ни "ӟеч" ивор. - Вуид-а, гыдыке? Нош малы тон сое кияд кутӥд? Малы тыныд со кулэ? - Зор улэ-а кельтоно вал? - пумитаз вазиз Нина. Евдокия Платоновна, нокин шоры вазьылытэк, висъет сьӧры потӥз. Отын укно вадьсысь борддоре ошемын кык мудор. Инмарлы оскеменыз, ас понназ сипыртыса, нуналаз уно пол вӧсяське со. Али но озьы кирос тыриз. - Дӥсьтэ ӝоггес вошты - учкы, дэремысьтыд кӧня зор ву вияз ни, - вера атаез. - Висьыны усёд эшшо ке. - Анай, вань-а шуныт йӧлы д? Буйгатоно вал чиган пиез: сиемез потэ ни, лэся. - Ой, Нина, Нина! Кинлы кулэ со куштэм чиган выжыед?! Кытчы табере сое карод?! Ӧжыт-а вал сюлмаськонэ? Мыным йыр висёнэн бертӥд ук. - Одоть, дугды ни нукыртэмысь! - лек вазиз кузпалыз шоры Филимон Николаевич. - Луло ук со - куштод шат? Нина интыын мукетыз но озьы ик лэсьтысал. ... Куазь ӝомыт луыны ӧдъяз. Нош зор ялан кыдыра но кыдыра. Азбаре потыса, номыр уд лэсьты. Соин но, вылды, кӧлыны вазь выдӥзы. Нина "пирданзэ" ӝик-ӝик биниз но бордаз выдтӥз. Нош ачиз ялан малпа: "Вуоз-а, уз-а пиналэз понна чиган кышно? Оло, нылпиез но солы жаль уг поты?" - Нина, тон кӧлӥськод ни-а? - каллен гинэ вазиз анаез. - мар луиз? Умме уг лыкты, - шуиз нылыз. - Кытын ужалод? Асьме гуртысь школаын-а - нылпиосты дышетод? - Выль школа пуктӥллям, лэся, - вазиз Нина. - Кӧня ке нунал ортчыса, учкыны ветло ай. - Озьы ке, туж умой. Кӧня возьмай та шудо нуналэз... Табере ваньмы огазьын, шулдыргес но луоз. Зор, уйбыт дугдылытэк, музъемез коттӥз. Ӵукна пал гинэ сьӧд пилемъёс шунды пала гылӟизы. Инбам чылк-чылк адӟиське. Бусыосысь, возьёс вылысь тӧдьы бус ӝутске. Инкуазьлэн чеберез аслаз. Тӥни сыӵе дыръя соос доры малпамтэ шорысь пыриз сельсоветлэн председателез. Филимон Николаевичен ужъёс сярысь кӧня ке вераскьемзы бере, сельисполкомлэн тӧроез шуиз: - Кылӥ мон, Николаевич, чиган пиды вань шуыса. Оло, умой луысал, сое нылпи юртэ келяса? - Ачим но со пумысен Ниналы огпол гинэ ӧй поттылы ни. Нош со чутрак пумит луиз. Аслэсьтыз нылпизэ сямен утялтэ. Оло, ачид соин кенешод на? Кин тодэ, берытскоз-а солэн анаез - шуг вераны. Кӧня толэзь ортчиз ни... Нина чиган пиезлы дэрем вурыны магазинысь материал басьтӥз. Кызьы быгатӥз - дӥсяз. Нокинлы но юрттэт курыса ӧз вазиськылы. Одӥгез понна гинэ сюлмыз висе: берло дыре анаез вераськемысь ик дугдӥз. Корка пушкытӥ ӵуш-паш ветлэ. Со "пирданэныд" сэрен юрт куспын чик уд юрттӥськы ни, весь со котырын бергаськод шуыса пыкылэ. - Кызьы тынад нимыд? Малы уд вазьылӥськы? Оло Вася, оло Веня? Оло Семон, оло Сидор? Чиганъёслэн нимъёссы асьсэлэн, дыр, - дӥсьсэ воштыкуз вераське Нина. - Тон Онтон луод, валад-а? Онтон! Кыӵе чебер кылӥське! Со куспын корка пыриз атаез. - Алигес гинэ дорамы ветлӥз сельсоветлэн кивалтӥсез, - Нина доры кариськыса вераз со. - Та сьӧд комоктэ нылпи юртэ сётыса, пе, умой луысал. Бен, мади солы малпанъёстэ. Табере аслым но жаль потэ ни кадь. Учкы - син азьын воштӥське ук ерпечка. Вордыны ке малпаськод, сельсоветэ ветлыса гожтоно вылэм ни. - Кӧня ке нунал ортчыса ветло, - вераз Нина. - Нош кин али отын секретарь? - Ма, уд тодӥськы шат - Лёгор Паша, - шуиз Филимон Николаевич. ... Поликарпов Паша но Нина одӥг классын дышетскизы. Дас классэз но ӵош йылпумъязы. Нина пыриз университетэ, нош со малпаз агроном луыны. Ар но дышетскыны ӧз вуы - малпамтэ шорысь анаез кулӥз. Соин ик заочной отделение выжоно луиз. Бордаз пичи выныз кылиз. Ог дасо ар талэсь азьло атаез шудтэм учыре шедьыса быриз. Колхозын пӧртэм ужъёсты быдэсъяз. Бӧрысь сельсоветэ секретаре юнматӥзы. Гужем ӝытъёсы Нинаен гурт сьӧрысь бадӟым пужым улын огпол гинэ ӧз пукылэ. Соку ик шӧдӥськиз ог-огзэс яратэмзы но. Тӥни со азьло учыръёсты тодаз вайыса, Нина малпаськонэ выиз. Соин но, лэся, сельсоветэ чиган пизэ гожтыны мынонэн сокем ик ӧз дырты. - Тон кытчы озьы празднике сямен дӥсяськид? - лек синмын учкыса вазиз Евдокия Платоновна. - Бӧрдӥз ке та "сьӧд коӵышпиед" - дораз но уг ветлы. - Эн ик сюлмаськы, анай - Антонэз тыныд уг кельты. Нылпиосты дышетыны ветлыкум но сьӧрам басьтыло. Нина, Антонзэ шуныт дӥсяса, ураме потӥз. Сельсоветлэн юртэз кыдёкын ке но ӧвӧл, дышымтэ вылысь, лэся, жадиз. Тани одӥгез ӧс борды гожтэмын: секретарь. Нина каллен гинэ йыгаськиз но, мусо куараез кылыса, отчы пыриз. - Кызьы татчы сюрес шедьтӥд, Нина Филимоновна? - ӝӧк сьӧрысь султыса, дораз вамыштӥз Паша. - Паша, малы озьы вазиськод? Мыным возьыт потэ. - Табере тон дышетӥсь ук, - пальпотыса шуиз Поликарпов. - Я, пертчы ай - ерпечкадэ учкомы. Оло, мон тусо таид? - Ой, Паша, тыныд серекъян, нош мыынм... - Я, сокем эн куректы, вордом, - берло верам кылызлэсь Паша ӵыжектӥз кадь. - Кызьы шуид? Тынад пиед ӧвӧл ук со. - Эх, Нинуш, уд валаськы тон мынэсьтым сюлэмме. Оло, вунэтӥд ни бадӟым пужым улын пукыкумы верам кылъёсты? Мон кемалась возьмай та нуналэз, - укно доры султыса шуиз Паша. - Бен мон марым... Азьло тае гожтоно. Со сярысь вераськыны вуом ай. Азьпалан кӧня нуналъёс... Секретарь ӝӧкысь бумагаосты эскериз, шкафысь папкаосты бугыръяз. Нош ачиз Нина шорысь синъёссэ но уг вошъя. Дырез кузёмытон понна, юри тяпайтэ озьы. - Гожтыны вуом сое, - Нина вӧзы пуксьыса шуиз Поликарпов. - Малпаськоно улонмы сярысь. Тани сӥзьыл мон но диплом басьто - агроном луо. Курисько кыӵе ке мукет районэ. - Малы озьы вераськиськод? Гуртын улон уг яра шат тыныд? ... Сӥзьыл ке но, туннэ гужем кадь шуныт. Инмын одӥг пилем юдэс но уг адскы. Нинаен Паша кенешизы арня нуналэ Бисар палась нюлэскы ветлыны. Оло, пе, пӧзьтымон ке но губи утчалом? ... Ӵукна шунды ӝужаку ик куазь сӧриськиз. Лыз инбамез возъязы пурысь пилемъёс. Собере каллен гинэ кыдыраны кутскиз. Нуназе котырын инбам чылкытаз, шунды потӥз. Нина но Паша дыртытэк вамышъяло. Нюлэскы пырыса, соос чебер но чылкыт интыез бырйизы. - Кыӵе умой татын! - киоссэ вӧлъяса вераз нылаш. - Вунэтӥ ни вал нюлэскы ветлэмме но. Тыбыр вылаз выдыса, киоссэ йыр улаз понӥз. Маке но малпаське. Писпуос куаръёсынызы сипырто. Егитъёслы дэмлало кадь: "Улонды таӵе ик чебер мед луоз". Паша вӧзаз пуксиз. Шораз учкыса, дырын-дырын пальпотылэ. - Таӵе мусоен мон тонэ ӧй адӟылы на вал, - Ниналэсь кизэ кутыса вазиз Паша. - Чеберъяськон кылъёс ӧвӧл-а со? Оло, юнме гинэ бордам лякиськиськод? Тодӥськод ук: мынам "пирданэ" вань. Табере кинлы мон кулэ на? - Нина, малы сыӵе секыт кылъёс вераськод? Ог-огмес ӟеч тодӥськом. Яратон котьмае ворме, ачид ке... - Нош малы асьмеос татчы лыктӥмы вал? - вераськонзэ мукет ӧре выжтыса юаз нылаш. Нюк бамалэ потыса, син шоразы йӧтӥз нингуби, сусыпу котырысь октӥзы сылалтымон чарс-чарс коньыгуби. Доразы бер гинэ вуизы. - Кытын калгиськод, оло, аслыд дусым но шедьтӥд ни? - корка пырыкуз ик ӵушкась кылын пумитаз сое анаез. Нина номыр ӧз вазьылы - тырттэм ведраосты кутыса, ошмес вулы потӥз. Евдокия Платоновна гурысьтыз пӧзьтэм картофказэ ведрае кисьтӥз. Киоссэ азькышетаз ӵушылыкуз, нош ик лек кылзэ поттӥз: - Бускельёслэсь возьыт! Верасько: одӥг нылзы вань, со но чиган пиез вордэ. Бӧрысь эн куректы, нылы. - Дугды ни, анай! - ӧз чида ни Нина но. ... Арлэн пумаз быг-быг лымыяз. Музъем тӧдьы мамыкен шобырскиз. Арня нуналэ ӝытазе Паша Нинаос доры пыриз. Коркалэн кузёез секретарез шуныт пумитаз. - Кемалась ни вал дорамы вуылэмед, - куноез пуксьыны косыса вазиз Филимон Николаевич. - Мар бен муг усиз ай арня нуналэ? Паша трос котыръяса ӧз улы, меӵак шуиз: - Мугез одӥг - улон сярысь. Тазьы ведь ялан огнад уд улы. Дӥсь миськись но, сиён пӧрась но кулэ. Нинаен ми кузпалъяськыны кенешимы. - Нош "пирданзэ" кытчы кароды? Оло, базаре нуыса вузалоды яке мыным-а будэтыны кельтоды? - соку ик ымзэ усьтыса кеськиз Евдокия Платоновна. Пукон вылысь султыса, Филимон Николаевич кузпалыз доры матэктӥз но вазьытэк ӧз чида: - Со паськыт ымдэ, оло, вуроно ни - пӧзись ӝук сямен, весь вуӵыртӥськод. - Эн сюлмаськы, Платоновна: пыд йылаз ӵошен султытом, - пальпотыса шуиз Паша. Корка пушкын кӧня ке чалмыт луиз. Филимон Николаевич, нылыз доры кариськыса, вакчияк шуиз: - Ми пумит ӧвӧл. Ма шуоз ачиз Нина? Нина Паша доры мынӥз но бордаз ӟыгырскиз. - Ӵуказе ик сельсоветын Антонэз ас вылам гожтӥсько - табере со луоз Антон Павлович! МИТРОФАН МОСОВ. "Бурд улаз" басьтӥз Глазовысь сӥльлэсь сиёнъёс поттӥсь комбинат нуналмысь лябӟыны кутскиз ни вал. Иж карысь "Сайгас" акционер огазеяськон солэсь 51 процент акциоссэ басьтэмез бере, югдур тупатскизгес. Туннэ комбинат тырмымон сӥль басьтыны быгатэ. Татысь колбаса 8-10 процентлы дунтэмаз. Ӝоген комбинатын пудолы пызь суретъёс поттӥсь машинаос ужаны кутскозы. Таиз но продукцизы дунтэмгес луоз. Озьы "Сайгас" акционер огазеяськон Глаз комбинатэз выльысь пыд йылаз ӝутэ. О. МОСКОВА, Удмурт кун университетын дышетскись. БЫРЪЁНЪЁС АЗЬЫН Верасько огвыллем но осконтэм Завьялово черкогуртын алигес ортчиз 28 номеро Ижевск округъя депутатэ пусъем кандидатъёслэн бырйисьёсын пумиськонзы. Татчы люкаськылӥзы быдэс районысь интыосысь администрациослэн тӧрооссы, ваньмысьтыз сямен предприятиосысь, возёсъёсысь но учреждениосысь специалистъёс но кивалтӥсьёс. Округысь 14 кандидат пӧлысь, Завьяловое ветлӥзы 11-ез яке асьсэос, яке оскем адямиоссы, со сяна, куинь блокъёслэн оскем адямиоссы. Котькудӥзлы вераськисьлы висъямын вал 7 минут. Оло, дыр ӧжытэн, кандидатъёс ӧз быгатэ рос-прос возьматыны"ымнырзэс". Соослэн вераськемазы чылкак огвыллем кылъёс вал: - ӝутоно (Россиез, экономикаез, калыклэсь улон-вылонзэ); - юнматоно (властез, порядокез но дисциплинаез, кыл кутонэз, армиез, страналэсь кужымзэ); - утёно (инкуазез, культураез, калыкез дышетонэз, тазалыкез утёнэз); - лыдэ басьтоно (нылпиослэсь, егитъёслэсь, мӧйыослэсь, нылкышноослэсь, ёрмыса улӥсьёслэсь кулэяськонъёссэс). Отӥяз мыно сыӵе выллем ик - нюръяськоно, саклык висъяно, будэтоно, кулэстоно, чутрак быдтоно, кылдытоно, азинтоно, дугдытоно, палэнтоно... Бырйисьёс ваньзэ сое, трибунаысь кылытэк но, ӟеч тодо но валало. Нош кызьы югдурез тупатоно, пусъем ужпумъёсты быдэстоно - калык уг тоды, вуоно депутатъёс тодо шуыса оске. Меӵак вераса, уг ик тодо, дыр. Со гинэ ӧвӧл, валало меда, кызьы соос депутатын ужалозы. Со понна ӟеч тодо, луоз: кыӵе уждун, улон инты, дунтэк мынон- ветлон, законлэн дурбасьтэмез но со дыре ик со шоры вылӥысен учкон, пайдаё кусыпъёс но трос мукетыз умоез вите депутатэз. Котькыӵе, котьмае но котькинэ быръён - улон сюрес-а, выль костюм-а, - секыт ужпум. Депутат но бырйыны капчи ӧвӧл. Уката ик кандидатъёсыд кыктоос кадь ог-огзылы укшало ке, огъя кылъёсын супыльто ке. Юнме шорысь ӧз шуы ук одӥгез кандидат: милям, пе, программаосмы одӥг гурын пыжемын. Мын но вала, кудӥз кандидат умойгес. Соос одӥгез коть рос-прос верасалзы ке кызьы программазэс быдэсъян сярысь, соку бырйисьлы капчигес луысал. Сыӵеез номыр ӧвӧл бере, нош ик сюлэменымы быръём, йырвизен ум. Собере нош ик паймыса улом: ӟеч адямиосты кадь бырйимы вал, но малы меда улонмы уг умоя? Я, берытском Завьяловое. Кандидатъёс огвыллемесь бере, соосты шуг висъяны ог- огзылэсь. Меӵак вераны кулэ: данаксэ соосты калык уг тоды, пумиськон бере но нимзэс- тулзэс тодаз вайыны уз быгаты. Тодмоосыз пӧлысь - Андрей Солуянов, алиез депутат, Юрий маслюков но Виталий Соловьёв. Солуянов ачиз но пумиськонэ ӧз ветлы, оскем адямизэ но малы ке ыстымтэ. Но районын Андрей Владимирович сотэк но тодмо лякыт сямъёсыныз, "котькинэ мур гажаменыз" (аслаз кылъёсыз), вольыт вераськеменыз. Но кызьы валаны луиз пумиськонэ ветлэмъёслэн мылкыдзыя, ваньмыз со депутат луон понна тырмыт ӧвӧлгес, котькыӵе вольыт эн вераськы но. Вольыт кылъёс угось котьку ик вольыт ужъёслы уг пӧрмо. Но кызьы возьматӥз пумиськон, калыкен вераськыны быгатонлык но кулэ вылэм. Ю. Маслюков интые ветлӥз солэн ыстэм адямиез, кыӵе ке Ю. Бычков. Мискинь воргорон дыго-мого вераськеменыз, пумтэм янгышъёсыныз ачиз но шугъяськиз, калыклэсь но керӟегзэ поттӥз, Юрий Дмитриевичлы пайда ваиз шуыса оскыны шуг. Вылаз ик со, мон сямен, таӵе янгыш но лэсьтӥз: Примаков, пе, премьер луиз ке, Маслюков Удмуртилы лыдъянтэм пайда ваёз. Озьыен, Маслюковлэн дуныз Примаковтэк туж ик вылӥын ӧвӧл? Туж ик бадӟым оскон ӧз пыӵатэ Ю. Маслюковлэн автозаводын басьтэм вормонъёсыз сярысь мадён. Нырысь ик, со кемалась вал ини, мӧйыослэн тодэ вайёнъёсазы гинэ кылиз на. Кыкетӥез, туала бырйисьёс понна автозавод герӟаськемын куашканэн, ужлы ёрмонэн но урод машинаосын. Огвыллем мылкыд уг пыӵаты В. Соловьев но. Со 70-80-тӥ аръёсы ужаз вылӥ партийной органъёсын, вал Министръёслэн Советсылэн тӧроезлэн воштӥсез. Озьыен, егитъёсыз бырйисьёс сое герӟалозы коммунистъёслэн властенызы. Мукет ласянь, данакез арлыдоос азьвыл улонэз табере ӟечен гинэ тодазы ваё на. Соин В. Соловьевлэн нимыз соос понна - огсыр улонлэн, оскымон кивалтонлэн пусэз. Вылаз ик, Виталий Александровичлэн вормонъёсыз но, янгышъёсыз но соослэн син азязы басьтэмын но лэсьтэмын, Удмуртиен герӟаськемын. Бадӟым опытэн кивалтӥсь улонысьтыз та палзэ быгатыса уже кутӥз: пыр-поч мадиз, мар со лэсьтӥз республика понна но нимысьтыз Завьялово район понна. Мар бен, котькудӥз аслэсьтыз ӟеч ужъёссэ нырысь ик возьматыны тырше. Пумиськон акыльытмон кема но огвыллем кыстӥськиз. Ярам коть, пумаз калыкез шулдыртӥз "Коммунисты, трудящиеся России - за Советский Союз" блоклэн оскем адямиез, Октябрьской посёлокын улӥсь. В. Фефилов пырак Ульянов-Ленин сямен киосыныз шонаса, дырекъясь куараен, ӟырдыт каргаз туала властез но аслаз блокезлэн нимыныз кыл сётӥз калыкез "пиштӥсь вуоно улонэ" вуттыны. Жаляса верано луэ, залын пукисьёс пӧлысь кыӵе ке укылтэмез ӟырдыт трибунэз канжатӥз: тӥ, пе, талэсь азьло коммунистъёсын вал, собере "Яблокое" вуиды, собере крестьян партие шедиды, табере нош ик мукет блокын, кызьы сое валано? Кибашлы политик данзэ ӧз ышты, йӧн-йӧн валэктӥз: - Мон КПСС-ын ноку но ӧй вал, уг но луы! Крестьянской партия быриз. Нош "Яблоко" движение ачиз мон борды лякиськыны турттэ вал но, мон ӧй сётскы. Мынам али блоке самой умоез но кужмоез! Озьы йылпумъяськиз Завьялово районын вуоно быръёнъёслы сӥзем ужрад. В. Фефиловлы луыса, люкаськемъёс шулдыр мылкыдын залысь кошкизы. Зэм но, кызьы ӟучъёс шуо, уродэн ӵош умоез но луэ вылэм. Г. КОРЕПАНОВ. ДАРТ Шугъяськонъёс огкадесь, кыл кутытон - пӧртэм 1995-тӥ арын Россия Федерациысь Егитъёсын ужанъя комитет "Дуннеысь егитъёсын валче ужан" программа дасяз. Та программая егитъёсын ужась специалистъёсын вошъяськон сярысь огкыл кутэмын. Удмуртиысь но Германиысь Югдурез утёнъя министерствоос куспын умой кусыпъёс кылдӥзы ни. 1996-тӥ арын июле Удмуртие вуылӥзы Германиысь калыкез улон-вылонын утён удысысь специалистъёс. ФРГ-ын егитъёс пӧлын йыружъёсты алонэн правоосты утён ёзъёс гинэ уг выро уго, тыршо трос пӧртэм службаос. Туэ Германие вуылӥзы шаерысьтымы Югдурез утёнъя министерствоын ужасьёс, нош октябрь толэзе асьме дорын нош ик вал Оберхаузен городысь пиналъёс пӧлын алон уж нуисьёс. Немец полицейскойёс тунсыкъяськизы асьме милиционеръёслэн уженызы, мадизы асьсэ сярысь, пыразы МВД-лэн дежурной частяз, мемориал залэ. Кунгож сьӧрысь куноос пусйизы, Германиын но Россиын шугъяськонъёс огкадесь, но пиналъёсты кыл кутытон пӧртэмгес. Кылсярысь, отын быдэ вуымтэосты пытсэт сьӧры туж шер келяло - туж но туж кышкыт йыруж лэсьтэм понна гинэ. Июль толэзе Россиын но быдэ вуымтэос пӧлын йыртэманъёсты алон сярысь выль федеральной закон кутэмын. Табере асьмеос но жалясьгес луимы. И.Кириллова. Бырйисьёссэс уг вунэто Ижевскысь Индустриальной районысь администрацилэн кивалтӥсез Владимир Клюкин Кун Кенешлэн Тӧроезлы Александр Волковлы, депутатъёслы Рустем Авзаловлы, Валентин Жебровскийлы, Наталья Хариналы, Сергей Молчановлы, Михаил Кокоринлы но Александр Лопатинлы арлыдоослэн арзылы сӥзем ужрадъёс ортчытъяны юрттэмзы понна тау карыны курыса вазиськиз. Оскиськом, депутатъёс азьланяз но бырйисьёссэс уз вунэтэ, арлыдоослы юрттыны тыршозы, шуэмын гожтэтын. ВАЛЭКТЭ ЮРИСТ СЭРЕГЕЗ НУЭ АДВОКАТ ЛИЛИЯ ШКЛЯЕВА Пиналы - ӧлексы Нылпие ӧлексы (инвалид). Закон чакла мыным толэзяз ватсаса ньыль шутэтскон нунал. Нош отпуске дыръя со висъяське-а? Н. Сидорова. Таӵе югдур сярысь верамын Россия Федерацилэн Уж сярысь кодексысьтыз 163 - 1-тӥ ёзэтаз. Отын верамын ужась мумы-бубыослы ӧлексы нылпизэс утялтыны висъяно нуналъёс сярысь - ужантэм нуналъёс сярысь. Нош отпускез дыръя адями уг ужа бере, солы ватсаса шутэтскон нуналъёс уг висъясько ни. Огъя улонниын вордскиз нылпи Мон улӥсько огъя юртын (общежитиын), кышное пусъемын (регистрировать каремын) мукет азьын. Нылпимы вань. Луэ-а сое пусйыны общежитиын? И. Шутов. Нылпидэс одно ик общежитиын регистрировать каремды потэ ке, нырысь ик татын пусйыны кулэ кышнодэс. Общежитилэн администрациез лэземъя, соосты общежитиын регистрировать карозы сыӵе дырлы, кӧня дырлы тӥ лэземын огкылъя (договоръя) общежитиын улыны. Мон пыриськи Чернобылен герӟаськем ужъёсы. Кунгож сьӧры потыкум, дунтэмгес машина шедьтӥ. Нош таможняын со понна бадӟым дун тупатӥзы. Чернобыльын тыршемъёслы пичигес тырон тупатэмын ӧвӧл шат? В. Привалов. Чернобыльын шуге-леке шедемъёслы трос льготаос вань. Жаляса верано луэ: таможня пыр потонъя соос ӧвӧл. Покчи гужем Мыным шуд усиз быдэс нунал ӵоже пукыны Евгений Примаковен герӟаськем ужрадын. Со вераськиз Россилэн пӧртэм сэрегъёсысьтыз Москвае лыктэмъёс азьын, ортчытӥз пресс- конференция, пыриськиз юондыре - фуршет шуонэ. Татын Евгений Максимович сылӥз тодмо кырӟасен Борис Штоколовен артэ. Таизлэн выжыосыз Воткаысь: песятаез - бигер воргорон Юрасов. Штоколовен вераськон сямыным кӧня ке юан сётыны амал шедьтӥ Примаковлы но. Та кузь нунал ӵоже кенешим на Евгений Максимовичез ӟеч тодӥсьёсын. Озьы пырыен- пырыен люкаськиз Примаков сярысь мадёнэ. Нырысь ик абдрай Евгений Максимовичлэн азьлозэ вуоноеныз герӟаны быгатэмезлы. Со шуэ: - Тодосчиос (учёнойёс) ӵошатӥллям кызетӥ дауре Россиысь ваньзэ вылӥ кивалтӥсьёсты, Ленинэз но Сталинэз басьтыса. Тодӥськоды-а, кин золгес кылем калыклэн сюлэмаз? - Андропов. Со нюръяськиз законэн юнматэм порядок понна, адямиосты вӧсь карытэк улон понна. Кыкетӥ интыын - оскоды, оло, уд - Брежнев. Сое гажало на огсыр улон кылдытэмез понна. Учкисько Примаков шоры но паймисько: вылтусыныз маин ке но кельше Брежневлы. Мыным гинэ озьы уг поты. Москваысь "Аргументы и факты" газет одӥг бамаз печатлаз тунсыко суред. Дӥсь вылын - генсеклэн вить зарни кизилиез. Нош ымныр - Евгений Максимовичлэн. Озьы одӥг муртлы пӧрмытэмын Брежнев но Примаков. Нош сямыз ласянь Примаков матынгес, пе, Андроповлы. Кыксы ик бадӟым кивалтӥсьёс луизы мӧйы арлыдазы. Сыӵе вакытаз вуэм инкуазез покчи гужем шуо, сыӵе адямиез - базарысь бертӥсь. Кыксы ик вылӥын вал кӧня ке толэзь гинэ. Нош калыклэн йырвизьмаз кемалы кылизы. Малы - кылизы? Оло, Евгений Максимовичлэн покчи гужемез кематэк уз ортчы ай. Тани сцена вылэ но лӧбырак тубе. Нош пож ву кисьтасьлы Сергей Доренколы осконо ке, солы киоссэ кечат карыса выдоно ни. Примаков азьланьтэ: - Милям но Андроповъя но Брежневъя лэсьтэммы потэ: мед улоз огсыр улон - но огинтыын лёгаськонтэк - весь азинскись огсыр улон. Милям шуыса, Евгений Максимович уг малпа кыӵе ке одӥг партия яке блок сярысь гинэ. Сыӵе кылыз матынгес, вылды, асьмелэн шуэмлы. Солэн осконэз - асьмеос, калык. Тодады ваелэ ай миым сентябрь бере кылдэм югдурез. Россия пушкын - бугыръяськонъёс, поезд азе люкаськонъёс, уж уретонъёс (забастовкаос). Кунгож сьӧрысен курдато дефолт шуонэн. Мар со сыӵе? Сьӧрлось пунэмамъёссэ Россия ӧз берыкты ке, солэн кунгож сьӧрысь ваньбурез (посольствоослэн но музон организацослэн юртъёссы) вузамын луозы, кунлэсь музон банкъёсы понэм коньдонзэ "кынтозы". Президент шӧдӥз: югдурез утьыны уз быгатэ Черномырдин но, Гайдар но (Кириенкоез вератэк ни). Правительствоен кивалтыны куриз азьвыл журналистэз, экономикая тодосчиез, дипломатэз, разведчикез Евгений Примаковез. Таиз, кема малпаськыса, соглаш кариськиз но чурыт курон пуктӥз: министръёсты быръёз ачиз. Озьы коммунист Юрий Маслюков луиз Примаковлэн бур киыз. Анатолий Собчак, Борис Березовский но мукетъёс Россиысь пегӟизы. Сергей Кириенко пиньзэ шериз: - Правительстволэн программа шуонэз - ог-огезлы ваче пумит сылӥсь ялонъёс. Отысь, библиысь сямен ик, котькудӥз шедьтоз аслыз кулэ мае ке. Вожомем калыклэсь кӧтсэ ялонэн гинэ уд буйгаты. Со вӧзы эшшо маке-маке кулэ на - пенсия, уждун, нылпилы юрттэт. Кириенко дыръя эгыр гудӥсьёс курдато вал: ваелэ пилемлы пыӵал, отӥзэ ми асьмеос шедьтом. Табере соос рельса вылысь султӥзы. Шӧдӥзы огшоры калык сярысь пичи ке но сюлмаськемез. Кин но со Примаковез ӵошатыны ӧдъяз Дэн Сяопинэн. Мургес чаклано ке, соосты герӟа бадӟым арлыдзы гинэ. Дэнэз уно пол вӧсь карылӥзы калыклы дурбасьтэмез понна. Примаков котьку вал КПСС-лэн вылӥяз. Сяопинлы зол юрттӥз но юрттэ компартия - Евгений Максимовичлэн сыӵе кужымез ӧвӧл. Соин ик асьме премьерлы удыссэ мытыны чидантэм секыт вал. Озьы ке но, Примаков басьтӥськиз кунэз юнматон борды. Со син азяз возьыны турттӥз бадӟым бизнесэз но паськыт коньдон "шуръёсты". Дугдытӥз приватизация нимаськись лушкаськонэз. Алӥз предприятиосты пыдйыл кельтэмлэсь - банкрот каремлэсь. Огазеяны выриз му вӧй (нефь) кыскись компаниосты. Валамон ини, зӧк кисыос юн пумитъяськизы сыӵе ужрадъёслы. Туннэ но паймисько: кызьы премьерез виёнэн ӧз курдатэ меда (оло, уг тодӥськы-а)? Узыръёс гинэ ӵыжаськизы шат? Ельцинлы дурбасьтӥсь Конституция Россиысь кивалтон ёзъёсты люкетэн-люкетэн юдылӥз. Правительстволэсь косонъёссэ ог люкетэз губернаторъёс но президентъёс пелязы уг поно: ("Милемды бырйиз интыысь калык, Москва милемын медаз косъяськы"). Интыосысь аскивалтонъя ёзъёс уг пыро кун власте, соос - асьсэлы асьсэос кузёос. Малы ке-а сокем тушмонъяськизы Приморьелэн губернаторез Евгений Наздратенко но Владивостоклэн мэрез Виктор Черепков, асьме Кун Кенешлэн Тӧроез Александр Волков но Ижлэн мэрез Анатолий Салтыков? Кунэз одӥг сӥньысэн герӟан вылысь, Евгений Максимович дэмлаз: губернаторъёсты интыосын быръёно ӧвӧл - Москваын юнматоно. Губернаторъёсты лэзёно городъёсын мэръёсты юнматыны. Туннэ шуг вераны, кытчы вуттысал сыӵе дэмлан. Уродэсь-а, ӟечесь-а Кремльысен кутскыса гурт администрациозь кивалтӥсьёсмы - соосты асьмеос бырйим. Нош вылӥысен юнматэм муртъёслэсь мар дауртэмзэс адӟим ни компартия огназ кузёяськон вакытэ. Азьвыл журналист, "Правда" газетлэн Египетысь корреспондентэз Евгений Примаков озьы ик кырыжгес учке пресса шоры. Куддыръя вожзэ вае: пӧсь учыръёсты утчаськоды, югдурез палдурес суредаськоды, шузи юанъёс сётъяськоды. Россиын пресса эриксэ ӧз шедьты бере, Евгений Максимовичен амалтэк соглаш кариськод. Данакез журналистъёс али узатэм пуныос кадесь. Нош куд-огзэ чепыллямъёсты пель сьӧртӥ но лэзёно вылэм. Пуны утэ, слон вамышъя. Примаковлэн пресса шоры учконэз берло дыре воштӥськиз. Сое юнгес гажаны ӧз кутскы. Но камераослэсь, микрофонъёслэсь, диктофонъёслэсь уг пега ни. Ӵемгес пота Россиысь пӧртэм интыосы. Тӥни сыӵе адямилэсь курдазы вылӥос. Борис Березовский Примаковез кивалтонысь куштӥз но дорамы берытскиз. Но калыклэн сюлмысьтыз улляны ӧз быгаты. Вӧсь карем муртэ Россиын ярато. Калык понна дурбасьтэмзэ шӧдо ке - кык-куинь полэс гажало. *** Закон уг лэзьы туннэ рос-прос мадьыны Евгений Максимовичлэсь азьланезлы малпанъёссэ шараяны. Но нокин алыны уг быгаты солэсь адями сямъёссэ шараяны. Киевын вордскем Примаков кема улӥз Грузиын. Лаура кышноез грузин выжыысь вал. Усто шудӥз фортепианоен. Ӟеч валалляз искусстволэсь пӧртэм удысъёссэ. Нош дышетскиз инженере-химике. Со чик ӧз сюлмаськылы, Евгений Максимовичез выллане мед ӝутозы шуыса. Малы радиоысь "Правдае" выжиськод? Малы журналистикаысь Наукаосъя академие мынӥськод? Лаура кулэм бере, Евгений Максимович кышнояськиз, сизьым ар ортчыса. Ирина Борисовнаез юн гажало Примаковлэн нылпиосыз. Тужгес ик Нана нылыз сюлмаськиз, соос мед кузпалъяськозы шуыса. *** Инмар но уз вера Евгений Максимовичлэсь азьланьын улонзэ. Но со юн шӧдэ туннэ нуналлэсь куинь лэчыт куронзэ. Юнматоно кунэз. Улӟытоно ваньбур поттонэз. Кортнано йыртэманэз. Куинетӥез ужпум сюлмаськытэ ни музон кунъёсты но. Примаков верамъя, йыртэмасьёс улэ сюремын экономикалэн 40 процентэз. Соин сэрен Россия арлы быдэ ыштэ 20 миллиард долларзэ - ӵапак арлы чаклам бюджетсэ. Сыӵе югдур шӧдӥське политикаын но. Коньдоно муртъёс сюлмасько: азьланьын Россиен мед кивалтозы асьмелы матысь муртъёс ик. Тӥни малы калык уг оскы ни кивалтӥсьлы. Тӥни малы будэ диктатуралэн кышкытлыкез. Йыртэманэн нюръяськем ньӧмын со пачкатоз калыклэсь эриксэ. Зӧк кисыос эшшо баймозы, куанеръёс уката начармозы. Малы бен сокем паськытаз йыртэман? Евгений Максимович висъя кӧня ке мугез. Соос таӵеесь. Экономика куашка, политика шонаське, властьлэн данэз усе, законъёс уг ужало. Мар лэсьтоно? Нырысетӥез. Бюджетэз "чильпырась" (калыклы адскись) кароно, выт басьтонэз радъяно, власте ёзъёслэсь ужъёссэс шонер люкылоно. Кыкетӥез. Законъёсты озьы лэсьтоно: соос медаз кельтэ йыртэманлы луонлыкъёс. Куинетӥез. Быръем ёзъёсты но правоез утись ёзъёсты сузяно йыртэмасьёслэсь. Быдэстоно ужпумъёс пумтэм-йылтэм. Примаков ӟеч шӧдэ: кудзэ нырысь ик быдэстоно, кудзэ берлань но кельтыны луоно. Покчи гужемъёс пӧртэмесь луо. Куддыръя чик уг шӧдӥсько, кытӥяз толэзьёсын кыстӥсько. Евгений Примаковлэн покчи гужемез кемагес мед возиськысал. Алексей Шкляев. Ӟечкыласьком! Сӥзьылысь толэ выжон вакытэ вордскем нуналзэ пусъе Завьялово черкогуртын улӥсь Раиса Константиновна Моторина. Бен, бен, ӵапак со - пӧртэм ужрадъёсы вутскись, ӟеч мылкыдзэ мукетъёсызлы кузьманы быгатӥсь, калыкез яратӥсь, газетэ гожъясь шырыт сямо кышномурт. Юбилеен ӟечкыласа, "Удмурт дуннеын" ужасьёс тау карон кылзэс верало, юн тазалык сӥзё, азьланьын но ӵош луыны малпанзэс юнмато. Ми тӥледын, Раиса Константиновна! Газетын ужасьёс. Героин, коньдон но иномарка Россия Федерациысь ФСБ-лэн Удмурт Республикая управленияз ужасьёс туэ ноябрьлэн кутсконаз наркотикъёсын вузкарисьёсты кырмизы но 1 кило пала героинэз талазы. Кулон ваись вуз шедьтэмын вал Глазовысь Ижевске лыктэм курьерлэн сумкаысьтыз. Утчаськон дыръя наркотик шараямын Глазовысь одӥгысьтыз квартиарысь, соку ик кырмемын "вузлэн" кузёез но - Таджикистанын улӥсь. Ӝегатон дыръя со пичиесь дозаослы люкылэм 50 грамм героинэз укноетӥ сэрпалтыны медэ вал. Малпан кылдэ, наркотик вузаны дасямын вал шуыса. "Ужтэк" кылем иностранецлэн, кызьы со ассэ нимаз, арбериосыз пӧлысь шедьтэмын 20 сюрс манет коньдонэз. Дунын машинаосты возён интыын сылэ вал Япониын поттэм иномаркаез. УФСБ-лэн следствиосъя отделэз пумысен Россия Федерациысь Уголовной Кодекслэн 188- тӥ ("Контрабанда") но 228-тӥ ("Законэз тӥяса наркотикъёсын вузкарон") статьяосызъя уголовной уж ӝутӥз. Россия Федерациысь ФСБ-лэн Удмурт Республикая Управленилэн пресс-службаез. Автобусты ужтэк сылэ ке Калыкез автобусъёсын нуон-вайнын берло дыре шуг-секытъёс кылдӥзы техника вужмемен. Но со дыре ик куд-ог организациослэн, предприятиослэн, нимаз адямиослэн машинаоссы юнме сыло. Та автоубсъёсты калыкез нуон-ваёнэ кыскон вылысь республикаямы кылдытэмын нимысьтыз комиссия. Соин валче ялэмын нимысьтыз конкурс, со кутске туэ 20-тӥ декабрьысен. Отчы пыриськыны быгато ваньмыз мылкыд карисьёс. Н.Сергеев. "Инвожоез" усьтӥды ке... Та турлы буёло журналмы калык доры дас ар пала ини вуэ. Со дыр ӵоже журналэз лыдӟисьёс тодматскизы трос повестьёсын, веросъёсын, пьесаосын, кылбуръёсын, озьы ик - художникъёсын, артистъёсын, композиторъёсын, тодосчиосын, уженызы чебер огшоры адямиосын. Нош туала но ортчем вакытъёсысь тужгес шугъяськытӥсь югдуръёс, учыръёс сярысь гожъямъёс троссэ малпаськытӥзы но, ӝоже но уськытӥзы, луоз, малы ке шуоно, ыштэмзэ берыктыны уг луы ни, нош лэсьтэм янгышъёсмы асьмемыз сюлоен пумен золгес но золгес жуго ини. "Инвожомы" озьы ик бадӟым саклык висъя калыкмылэн лулпуш чеберлыкезлы, сабырлыкезлы, котькыӵе удысын быгатонлыкезлы. Журналмы егитъёслы бере, тросгес возьматыны тыршиськом соослэн улонысьтызы ужпумъёсты. Нош соос пумтэм. Еж мугор вылэ усизы Чечня но, ужтэк кылён но, наркомания но, проституция но... Егитъёсын ужась комсомол быриз, инты буш кылиз. Нош мӧйыослэн вӧзысьтызы йыромем егитъёслы саклык висъяны дырзы но, мылкыдзы но уг тырмы ни. Асьсэос но угось юдэс нянь понна сизьым полэс пӧсям вузэс поттымон бызьылоно луо. Соингес но журналмы тросгес гожъяны тырше шуг-секытысь потыны амал шедьтӥсь егитъёс, адямиос сярысьгес. Улон - нюръяськон, шуо. сое шӧдӥськом-валаськом тужгес но али, государствомы калыклэсь палэнтӥськыса улон вакытэ. Али тужгес но курадӟо культура, дышетскон, эмъяськон удысъёс. Вылӥысь чиновникъёс чик уг сюлмасько адямилэн лулпуш чеберлыкез, сюлэм куронъёсыз, тазалыкез сярысь. Чеберлыко удмурт книгаос арысь аре ӧжытгес пото, культура юртъёс аналтэмын, библиотекаос мырдэм векаса уло. Озьы ке но, гуртъёсысь тросэз дышетӥсьёс, клубъёсын ужасьёс, библиотекарьёс коньдон шоры учкытэк, дырзэс жалятэк тыршо егит сюлэмез улӟытыны, узырмытыны. Татын бадӟым юрттӥсь луэ "Инвожо" журналмы но. Азьланяз клубъёсын, школаосын ужасьёслы поттыны чакласьком вакчиесь сценкаос. Азьвыл сямен ик котькуд номераз - выль кырӟанъёс, серемес веросъёс. Гажано лыдӟисьмы, кусыпмы эшшо юнгес, нош журналмы эшшо узыргес, тунсыкогес мед луоз шуыса, гожъялэ милемлы, сюлэмшугъёстэс, вормонъёстэс вералэ. Нош кин ӧз гожтӥськы на "Инвожомылы", тани солэн индексэз - 73973, дуныз - 46 манет но 32 коньы. Редакциямы лыктыса ке гожтӥськиды, дуныз 36 манет гинэ луоз. Басьтэлэ "Инвожоез" - уд жалялэ! Галина Романова. Кинэ меда быръём? Ӟечбуресь, гажано "Удмурт дунне" редакция! Котьку но "Удмурт дунне" газеттэс чидатэк витисько. Со мынам эше-сюлмаськисе но, визьмасе-удмуртлыкме утисе но. Тани нош ик 112 номеро газетысь тужгес но мур сюлэмам пыӵазы "Герд" бамысь статьяос. Соос малпаськонэ уськытӥзы. Ум быре ум, ми - удмуртъёс, зарни шунды асьмелы но ӝужалоз, ваньмы ваче ки кариськыса, ас выжыысьтымы визьмо но гажано адямиосмылы дурбасьтӥмы ке. Соослы осконмес вераса, ужамзэс чакласа, сётэм кылзэс юаны-вераны быгатӥмы ке. Ялан висе сюлэм, шугъяське. Удмурт Кун Кенешмылэн вылӥ тубатаз ӧвӧл ук выжы калыклэн аслаз азьветлӥсез, сюлмаськисез. Кылем тулыс бадӟым осконэн улӥмы П. Вершининлы. Ӧз пӧрмы, ӧм быгатэ гажано адямимылы юрттыны. Республикамылэн нимыз понна гинэ вань на чиньыен лыдъямон удмурт депутатъёсмы. Валамон, секыт соослы йӧтэ. Соин ик кык палатаен парламент кылдытон сярысь вераськонэз одно ик ӝутоно вылэм. Тани нош ик быръёнъёс матэкто. Кинлы таяз учыре оскоз калыкмы? Матысь эшезлы-а, яке кыдёкысь бадӟым кунолы-а? Газет бамысь "Кенеш" укша ни кенешлы" статьяен тодматскеме бере, Роза Яшиналэн, А. Красильниковлэсь кандидатуразэ Кун Думае ӵектэмез мыным яраз. Та кышкасьтэм, визьмо кышномуртэз туж гажасько, кылъёсызлы, адӟонлыкезлы юн оскисько. Бен, Светлана Смирнова но гажано, ӝужась адями. Туж шумпотӥ, куке со аслаз вордскем Дэбес районаз депутат луиз. Али нош "Удмурт кенеш" солы осконзэ вера Кун Думаын депутат луыны. Вормоз меда сыӵе ныпъетэз егит кышномурт? Луонлыкез, аслыз осконэз вань бере, мед нюръяськоз. Медаз гинэ быгатэ палэнысь ки мычисьёсыз сое ас уробоязы кыткыны. Светлана ФЕДУЛОВА, Ижын улӥсь. Кизнеръёс шулдыртозы 20-тӥ ноябре Ижевскысь Егитъёслэн юртсы ужалоз кизнеръёс понна. Лымшор палась калыкез огазеяны, ваньмон дырзэс валче ортчытыны мылкыд кариз ёросысь землячество. Та нуналэ Кизнерын улӥсьёс ас быгатонлыкъёссэс шараялозы, сиён-юонъёссэс но мукет арбериоссэс вузалозы-возьматозы. Нош люкаськемъёслы капчи мылкыд кузьмалозы ёросысь кырӟаны-вераны яратӥсь самодеятельной коллективъёс, "Родники" калык театре ветлӥсь артистъёс. В. Андреева. ТОДМАТӤСЬКОМ КУН ДУМАЕ ДЕПУТАТЭ ӴЕКТЭМ МУРТЪЁСЫН Клементий РОГОВЕЦ Кыл сётӥд - быдэсты Удмурт шаерамы та шоро-куспо мугоро воргоронэз - Клементий Роговецез тодӥсьтэмез ӧвӧл, дыр. Со быдэс улонзэ сӥзиз чугун сюреслы, та удысэз азинтонлы но умоятонлы. Клементий Роговец вордскиз 1938-тӥ арын Белрус крестьян семьяын. Пинал дырыз ватсаськиз война вакытэ. 7 арескысен арлыдоослы юрттӥз куашкатэм гуртсэс выльдыны. Ӵапак соку валаз чабей шеплэсь дунзэ. Москваысь чугун сюрес транспортъя институтэз горд дипломен йылпумъямез бере, Клементий Роговецез ысто Ижысь чугун сюрес ёзэ. Станциын дежурное пуктӥзы. Отӥяз луэ диспетчер, валтӥсь инженер, станцилэн кивалтӥсезлэн воштӥсез, станцилэн тӧроез, нош 1992-тӥ арысен Ижысь чугун сюрес ёзэн кивалтэ. Солы сётэмын Россиысь но Удмуртиысь транспортъя дано ужась ним, " Пусъемын Кун Кенешлэн Почёт грамотаеныз. Выльдӥськон, кун ваньбурез вузан вакытэ со секыт ныпъетэз ас вылаз басьтӥз. Солэн сюлмаськонэз одӥг - калыклэсь улонзэ умоятон. Со понна Клементий Роговец кужымзэ но, дырзэ но уг жаля. Со кыкетӥзэ быръемын ни Кун Кенеше депутатэ. Алигес Клементий РОГОВЕЦЕН пумиськылӥз "Удмурт Дунне" газетлэн корреспондентэз Геннадий РОМАНОВ. - Клементий Антонович, кызьы шуо, ошез сюртӥз кутом. Малы Тӥ Кун Думае мынӥськоды? Кужымды тырмоз-а? - Меӵак ивортӥсько: кужымелы ке ӧй оскысал, малы со уж борды басьтӥськонэз. Соин герӟаськемын бадӟымез сюлмаськонэ - чугун сюресэз утён но калыклэсь улонзэ умоятон. Берло дыре Россиысь егит реформаторъёс чугун сюрес вылэ урдскылыны ӧдъязы, та удысэз но куашкатэмзы потэ. Сое лыдэ басьтыса, Кун Думаын та удысысь депутатъёс луыны кулэ. Огъя кужымен сюресэз утёнъя, экономикаез юнматонъя законъёс кутыны быгатысалмы. Нош ачим улӥсько но ужасько одӥг амалъя: "Кыл сётӥд - быдэсты". Сое улонэ пыӵатон ӵем дыръя капчиен уг сётӥськы, но бырйисьёсме, ужасьёсме ноку уг пӧяськы. Кызьы шуо, мынам со валтӥсь сямы. Собере калыклэсь оскемзэ юн гажасько. Со бордысь потэ депутатлэн данэз но, бырйисьёслэн осконзы но. - Амалтэк асьмеос вуим Кун Кенешын ужамды борды. Та ласянь мар ватсасалды? - Удмуртиысь вылӥ быръем ёзын ужаме ӟечен берытске. Кун Кенешын, валамон, кулэ хрозяйственникъёс но, юристъёс но, экономистъёс но. Сотэк ӟеч законъёс уд куты, соос быдэстонтэмесь луозы. Сое уката ӟечгес валаны кутски, Кун Кенеше кыкетӥзэ быръемзы бере. Таӵе секыт улон вакытэ адямиос трос куронъёсын вазисько. Быгатэмея ваньмызлы юрттыны тыршисько. Соин ик Кун Думае шедьыса, калык понна ужаны паськыт сюрес усьтӥське, умоесь условиос кылдо. - Удмуртиын Тӥ чугун сюресъя министр кадь луиськоды. Кызьы ужа кивалтоно ёзды? - Котькыӵе аръёс вал. Но берло дыре огсыр умой ужаськом. Железнодорожникъёс дыраз уждун басьто, выльдӥсько чугун сюрес станциос. Сое тужгес но яркыт возьмато лыдпусъёс. Тани туэ 10 толэзьскын планлэсь вылтӥ ӝыны миллион тоннокилометр грузъёс ( 4 процент) нуэмын-ваемын. Озьы ик быдэстэмын калыкез нуллон задание. Нош берло дыре производствое выльзэ пыӵатыса, ӟеч амалъёс (технологиос) кутыса, утемын Амзя- Нефтекамск, Ижевск-Воткинск, Армязь-Сайгатка, Люкшудья-Кильмезь чугун сюресъёс. Азьло соос изъян гинэ вайылӥзы, табере пыд йылазы султӥзы, пайда сёто ни. - Клементий Антонович, мар тӥледды герӟа "Увадрев" акционер огазеяськонэн? Со сярысь данак интыосын, вылӥ трибунаысен но кылӥське. - Шонер юан. Чугун сюрес уно предприятиослы юрттэ. Нош та усьтэм амалэн ужась акционер огазеяськонэн кусыпмы потӥз татын смолаос поттон завод пуктон бордысь. ОАО-лэн кивалтӥсьёсызлы та ӵектонэ кельшиз. Табере "Увадревын" смолаос потто ни. Мар бен со сётэ? Трос. Кылдӥзы ватсаса выль ужан интыос, районысь бюджетэ коньдон пыре, адямиос дыраз уждун басьто. Нош туала вакытэ смолаостэк ӟеч лэсьтӥськон арбериос (фанера, ДВП, ДСП) уд лэсьты. Таӵе ӟеч клеез палэнысь басьтылӥзы, табере уваос асьсэос дасяло. Шат со урод? Умой гинэ. Дыраз пенсия вуэ, нош бюджетникъёслы - уждун. Предприятилы юрттӥм миым 17 август бере но. Табере со пыд йылаз султӥз ни. Но самой кулэез герӟаськемын чугун сюресэз утёнэн. Поезд ке Увае ӧй ветлысал, зэмзэ но, секыт вераны, "Увадрев" улэп кыльысал на меда. Автомашинаосын нуон-ваён юн секыт луысал. Ми озьы ик умоесь кусыпъёс тупатӥм Уваысь йӧл заводэн, сӥль комбинатэн, Ува санаториен но нюлэс дасясьёсын. - Нош быръёнёсъя программады кыӵе? - Нырысь ик, бадӟым инты висъясько огсыр ужанлы. Со понна мар кароно? Дугдоно дунъёсты будэтэмысь. Дыраз сётъяно уждун, пенсия но пособиос. Удысъёсъя ялан будэтоно уждунэз. Кыкетӥез, ужасьёсты но ужасьтэмъёсты улон-вылонын утёно: уж сётӥсьёс, профсоюз но государство куспазы тупан кылъёс кутоно; школаослы, нылпи учреждениослы, больницаослы, черкъёслы но калыкез улон-вылонын утись удыслы юрттыны уксё шедьтоно. Россиысь чугун сюрес транспорт огсыр ужа но социально утемын. Куинетӥез, калык дыраз уждун, пенсия, пособие басьтӥз ке, со вузъёс октоз. Озьыен, азинскоз промышленность. Та удысын басьтэм пайдаез кӧнязэ ке висъяно промышленной комплексэз азинтонлы, бюджет удыслы но калыкез утёнлы. Ньылетӥез, государствоын порядок мед луоз. Со понна: Армилы но правоосты утись ёзъёслы государство юрттыны кулэ. Медаз луэ кузьым октӥсь чиновникъёс. Кивалтонысь вань ёзъёслэсь ужамзэс калык мед адӟоз-тодоз. Чиновник решение кутэмез понна калык азьын кыл мед возёз. Витетӥез, чугун сюрес вылын военной службае закон кутоно. Со туж кулэ. - Клементий Антонович, кызьы тодмо, тӥ юн яратӥды удмурт дуннеез, удмурт инкуазез. Шонер-а со? - Туж шонер. Котькыӵе куазен чорыганы яратӥсько. Ачим муш вордӥсько. Но ваньмыз со ужелы уг люкеты, юрттэ гинэ. Мыным туж яра удмурт шаер (шуръёс, нюлэсъёс). - Азьланезлы кыӵе малпанъёсты? - Туэ Уваозь чугун сюресэз выльдыса, вуоно арын Кильмезь сюрес борды басьтӥськом. Вуттоно вал Алнашын спирт пӧзьтон заводэз. Чугун сюрес сое ӝутыны юрттэ. Собере гурт хозяйствоослэсь ю тысь басьтонэз радъяны кулэ. - Спорт шоры кызьы учкиськоды? - Умой. Институтын комсомолын но ужай, спортъя мастер но луи. Самбо кельше вал. Егитъёс одно ик спортэ пыриськыны кулэ. Со адямиез кыдатэ, юнматэ но ӟеч, лякыт сямо каре. Егитъёс паськыт шоналско Выльдӥськонъёс кутскемен йырин дас ар талэсь азьло куашказ комсомол. Реформаос зол шуккизы егитъёсты - котькудӥз ас вакытаз, сюрес коже кылиз. Егит азьветлӥсьёс, огинтыын сылэмзэс валаса, пӧртэм огазеяськонъёс кылдытъязы. Но ваньмыз соос ужазы асьсэ понна, мукетъёсыныз кусып возьытэк, соин ик пайдазы уно ӧй вал. Ог-огенызы, кивалтӥсьёсын кенешыса, валче ужаны кутскизы берло аръёсы гинэ. Табере асьме егитъёс кунгож сьӧрысь огъёзъёсынызы но кусып возьыны быгато ни. Республикаысьтымы вылӥ дышетсконтӥосын ваньмаз вань мукет странаосын кусып возись огазеяськонъёс. Соос ужало нимысьтыз программаосъя. 15-тӥ ноябре национальной библиотекаын вал пумиськон Кунгож сьӧрысь ёзъёсынызы валче ужан программаосынызы но проектъёсынызы тодматӥзы Иж карысь студентъёс но калык куспо огазеяськонъёслэн кивалтӥсьёссы. Нырысь ик егитъёс азьын вераськизы мукет странаосын кусып возёнъя министр Виктор Викулов но республикаысьтымы Егитъёсын ужанъя кун комитетлэн кивалтӥсезлэн воштӥсез Андрей Лещинский. Тужгес ӟеч кусыпъёс возё кунгож сьӧрысь ёзъёсынызы Удмурт кун университетысь студентъёс. Татын трос пӧртэм программаосъя ужало. Асьме студентъёслэн вань луонлыксы кунгож сьӧрын кӧня ке дыр ӵоже дышетскыны. Шаерамы но мыло-кыдо лыкто мукет кунъёсысь дышетскисьёс. Уксётэк кусыпъёс возьыны уз луы, соин ик татысь студентъёслэн огазеяськонзы умой ужа Наукая фондэн. Со сярысь вераз УдГУ-ысь та удысэн кивалтӥсь Анастасия Ознобихина. Гурт хозяйствоя академиысь наукая проректор Ильдус Фаттахов ивортӥз студентъёссылэн Германиын практика ортчытэмзы сярысь. Академиын тросгес дышетско гуртъёсысь лыктэм егитъёс. Нош гурт школаосын кунсьӧр кылэз лябгес дышето, соин ик шугъяськонъёс кылдо кинэ кунгож сьӧры келяны. Озьы ке но, таяз аре но Германие ветлӥзы дас студентъёс. Азьланяз золгес ужано луоз немец яке англи кылэз дышетон ласянь. "Открытое общество" институтлэн проектэныз но программаеныз тодматӥз солэн Удмуртиысь кивалтӥсез Александр Сташенко. Сорос фондлэн юрттэмезъя республикаямы интернетъя дас одӥг класс усьтэмын. Будапештысь Калык куспо университетын дышетскыны дасяло Удмуртиысь егитъёсты. Умоесь кусыпъёссы кунгож сьӧрысь ёзъёсынызы Медициная академиысь студентъёслэн но. Татысь дышетскисьёс тодон-валанзэс дас вить странаосын будэтӥзы ини. Таосызлы озьы ик шуг йӧтэ кунгож кылъёсты ляб тодэменызы. "Санта Лингва" огазеяськонлэн президентэз Андрей Недобух вераз: - Ми кунгож сьӧры егитъёсты трос ум ыстӥське. Со понна отысь тодосчисоты ӵемгес ӧтьылӥськом. Соос татын быгатыса но азинлыко дышето асьме пиналъёсты. тазьы ужаса, сюлмаськонъёс но кулэсмогес, уксё но ӧжытгес кошке. Асьсэлэн ужан амалъёсынызы тодматӥзы на Ижевскысь экономика удысъя кивалтӥсьёсты дасясь "Айсек" но немец егитъёслэн "Югендхайм" огазеяськонъёссы. Жаляса верано, удмурт егитъёслэн "Шунды" дэменлыксы малы ке мылкыд ӧз кары финн- угор калыкъёсын усто кусыпъёс воземзэс, выль амалъёс утчамзэс шараяны. Со дыре ик, удмурт егитъёс туж ӧжытэз дышетско валтӥсь кунъёсын. Табере республикаямы кылдытэмын луоз кунгож сьӧрысь егитъёсын кусып возёнъя нимысьтыз огазеяськон. Со юрттоз шаерысьтымы тросгес егитъёслы кун сьӧры потаны, отысь бастэм тодон-валанзэс пайдалы берыктыны. Н. ВОЗИСОВ. Удмурт кун университетысь искусствоосъя факультетын усьтӥськиз пинал скульпторъёслэн ужъёссылы сӥзем адӟытон. Соослэсь устолыксэс калык син азе вуттон сярысь трос сюлмаськиз шаерысьтымы тодмо скульптор, Удмурт кун университетысь дышетӥсь, профессор Анатолий Егорович Аникин. Адӟытонэ ужъёссэ ваем кӧня ке адями. Излэсь, пулэсь мугоръёс возьмато пӧртэм выло- тыро адямиосты. Одӥгъёсыз суредало чебер мугоро егит нылэз, мукетъёсыз - арлыдо песянаез. Куд-огез сӥземын удмурт улосысьтымы чебер инкуазьмылы. Адӟытонэ ветлӥсь адямиос тужгес синмасько Алнаш ёросысь Актэмыр гуртын вордӥськем но будэм удмурт пилэн Геннадий Кутлыбаевлэн быгатонлыкезлы. Та адямилэн тодон- валанэз но устолыкез арысь аре кужмоя. Анатолий Аникинлэн дышетскисьёсыз пӧлысь одӥгез кужмоез луэ со. Вуылэ адӟытонэ! Яратэлэ чеберлыкез! Борисов Михаил Алексеевичез но Борисов Борис Аркадьевичез азьветлӥсь механизаторъёс шуыны луоз. Михаил слесарь но, тракторен но ужа. Гуртын пӧсь ужъёс дыръя турынэз но куроез прессовать каре. Туэ 300 тонна дасяз. Борис "МТЗ-82" трактореныз ортчем гужеме 630 тонна турын люказ. Кыксы но соос Пичи Пурга ёросысь "Юж-Пурга" эштосын тыршо. Туспуктэмез В.Камашевлэн. БЫРЪЁН АЗЬЫН Пож ву Учкиськом Кун Думае депутатэ кандидатъёслэсь сӥзёнъёссэс. Огкадесьгес соос: ӝутоно, юнматоно, лэсьтоно, юрттоно. Пӧртэмлыкез вань мукет люкетаз - вожвылъяськисьёслы (конкурентъёслы) сӥземаз. Таиз гинэ кандидат ошмес ву кадь чылкыт. Мукетъёсыз, пе, коньдон капыръяло, юо, калго, калык сярысь чик уг малпасько. Сыӵе кышкыт висён выжыоссэ пумен мур лэзе ни Удмурт шаере. Озьы пож ву киськаны асьмеды нырысь ик дышетэ Москва. Чагыр экран пыр мон уг учкылӥськы "Опасная зона" но "Криминал" выллем мадёнъёсты. Уката ик ӵукна. Нуналлэн кутсконаз ик визьмад-сюлмад урод зарад басьтӥд ке, лумбыт ӵоже котырад сьӧд буёл пазялод. Янгыштэм муртэ вӧсь карод. Тодмоосы туннэ но куалекъяса мадё Сергей Доренколэсь Евгенй Примаковлы сӥзем верамъёссэ. Ноябрьлэн кутсконаз, Москвае вуылыкум, Евгений Максимовичлэсь юамы та сярысь но. Огшоры гинэ шуиз: - Милям нерваосмы золэсь. Чидалом. Рязаньысь лыктэм адями лӧптӥз: - Туж шонер. Ми, вань рязаньёс, Доренколэн пал кылызлы но ум оскиське. Москвалэн мэрезлэн воштӥсез Сергей Ястржембский ӧжытак басылтӥз сое: - Ми туж шумпотӥськом, "Отечество - быдэс Россия" блоклы Рязань огмылкыдын дурбасьтэ шуыса. Жаляса верано луэ: котькытын ик озьы ӧвӧл. Доренко кырсь ву киськаны ӧдъям бере, ми шоры кырыжгес учкисьёс вань ни. Бен, куд-огез оске Сергей Доренколы. Кызьы со алданы быгатэ? Примаковлы лэсьтэм операциез вераса, пичияк гинэ малпанзэ пусъе: солэн огез ёзэз шальтраз бере, кыкетӥезлы но пум вуэ. Отӥяз - выль буёл: президентэ потыса гинэ Евгений Максимович быгатоз ньыль ар ӵоже каньылак эмъяськыны. Озьы асьме йырвизьме пыӵатэмын таӵе иворъёсын жильы: президентэ быръён дыръя Борис Ельцин висемзэ ватӥз - собере шуге-леке шедиз - малы асьмелы выльысь кулэ на мырдэм векась кузё? Тӧдьы-тӧдьы борддоро больницаын - сӥль юдэсъёс, лыос, вир. Журналистика-а со? Ӧвӧл. Россиез дас ар ӵоже куашкатон вуттӥз паймымон югдуре. РСФСР-лэн Вылӥ Советысьтыз "Коммунистъёс демократия понна" фракцилэн кивалтӥсез, собере - Ельцин президентлэн воштӥсез, отӥяз - тушмонэз, Александр Руцкой асьмеды абдратъяз: тани- тани чемоданъёсме усьто но вань йыртэмасьёсты кыре потто. Берлогес сыӵе ик ивор вӧлмытъяз Россилэн азьвыл валтӥсь прокурорез Александр Скуратов. Ӵушкась документъёсты, кунгож сьӧрысь банкъёсы понэм коньдонэн счётъёсты, капыртэм алмаз чотын басьтэм виллаосты али воштӥзы валесын погылляськемлы сӥзем суредъёс, сюлэмысь вирсэръёс, сюлъёс, тыос, пекляос, быгытъёс. Одӥг газетчи гожъямъя, ӵуказе экран вылэ потозы, вылды, пӧртэм анализъёс но Вассерманлэн реакциез. Котьма вералэ, нош мыным "Отечество быдэс Россия" блоклэн тӧроез жаль потӥз. Нерваосмы золэсь шуиз ке но, Доренко лекос сьӧраз ортчем бере, Евгений Максимович ӧз чида ни, НТВ каналэ жингыртӥз. Доренкоез ӧтиз бассейнын ӵошатскыны: кин сэзьгес уялоз? Азьыл разведчик озьы вазиськыса ӧз янгыша меда? НТВ-ын "Итоги" передачаез нуись Евгений Киселев уно пол пусйылӥз: ми мукет телеканалъёслы ноку но дунъет ум сётӥське. Таяз учыре со амалтэк пыриськиз ОРТ-ен ченгешонэ. Кыкетӥез. НТВ-е жингыртыкуз, Примаков возьматӥз: арня ӝытазе со НТВ-ез ӧвӧл, ОРТ- ез учкем. Кин тодэ, оло, та нуналэ гинэ озьы вал. Нош адямиос малпалозы: ОРТ НТВ- лэсь вылӥынгес. Куинетӥез. Пӧртэм адямиос пӧлын котькыӵеез вань. Ог люкетэз, оло, тазьы лыдъялозы: Евгений Максимович тазалыкеныз ушъяське бере, кыӵе ке висёнэз вань, шӧдске. Табере югдур шоры учком паськытгес усьтэм синмын. Чагыр экранысь пож ву киськам понна Сергей Доренко гинэ-а ягыш? Ӧвӧл. Со интые туннэ ик шедьтыны луоз мукетсэ. Мынам куд-ог тодмоосы, журналистъёс, лулӟыло: - Асьмеос ум тодӥське, кӧня басьто Доренко кадьёс. Сомында доллар сётысалзы ке, ми но шумпотыса со интые пуксьысалмы. Нош асьмеды нокин но уг ӧтьы на. Шонер, дыр. Кӧня ке ар талэсь азьвыл данакез тодмоосы ужазы Борис Ельцин понна, берлогес - "Милям юртмы - Россия" понна. Туннэ соосты ик адӟисько "Отечествоысь". Пыдйыл кельтэм газетчиос пичияк нянь юдэс сӥзем понна номедъясько. Вань-а югдурез тупатон амалъёс? Вань. Мон кыксэ адӟисько. Огез таӵе. Россиез котькӧня мед таркалозы, мед лёгалозы, мед сапталозы, ваньзэ долларен уд вормы. Философия ласянь учкыса, кун со - сыӵе ик адями. Кудӥз ке ёз висе ке, мугор вань кужымзэ сётэ сое йӧнатонлы. Учкиськод котырак но астэ буйгатӥськод. Ӟуч, удмурт но музон калыкъёс таӵе шуккетэз гинэ ӧз чидалэ ни. Тылож (война) ӧз пуромы ке, асьмеос чатырском ай. Ма кулэ со понна? Татын вераны кулэ ни кыкетӥ амалэз. Россиын улон-вылон котьку герӟаськемын вал йырен. Петр И, Екатерина ИИ, Ленин, Горбачев - соос но мукетъёсыз кӧня ке арскын тодматэм вошъязы кунмес. Валатэк-а, юри-а, но Борис Ельцин кылдытӥз Россиез таркась кузёяськон ёзнэт (система). Огзэ капыръясез воштэ мукетыз. Озьы лушкаськон пӧрмиз данак кивалтӥсьёслэн улон сямзылы. Сыӵе сӧзнэтэз куашкатон понна, нырысь ик кортнано Семья шуонэз - президентлы матысь адямиосты. Паськыт вӧлмем вораськонэз зӥбоз выль президент гинэ. Калык солы дурбасьтӥз ке, музонъёссэ кивалтӥсьёсты шымыртыны секыт уз луы. Президентэз асьмеос быръём вуоно гужем гинэ. Нош солы туннэ ик дасяськоно. Чылкыт муртэ йыре бырйыны нырысь ик мед юрттоз вылез Кун Дума. Тазэ асьмеос кылдытом декабре. Депутатэ мед шедёзы Россия понна зэмен ик сюлмаськись муртъёс. Та нуналъёсы паймымон ивор кылӥськиз. Башкириысь парламент кутэм туж аспӧртэм решение: республикаын возьматоно ӧвӧл Сергей Доренколэсь но Николай Сванидзелэсь телепередачаоссэс. Борис Ельцинлэн медоосыз, нырысь ик ивор вӧлмытонъя министр Михаил Лесин, куашетон ӝутӥзы: Башкириын таламын адямиослэн ивор басьтон правозы. Бен, таламын, Доренкоез но Сванидзеез ивор вӧлмытӥсьёс шуыны луэ ке. Нош соос яд пазясьёс ке, Россиез коньдон понна юри зуркатӥсьёс но куашкатӥсьёс ке? Жаляса верано луэ: асьмеос котькыӵе алдаськонлы юн оскиськом. Башкириын но сюрозы, вылды, "ивор басьтыны правозы понна" нюръяськисьёс. Кылзозы меда соослэсь? Выльысь олокӧняетӥзэ лулӟоно луэ: нош малы асьмеос, удмуртъёс, сокем лябесь? Ку визьмаськом? Ку зэмос нацилы пӧрмом? Алексей Шкляев. Правительствоын Алигес Правительстволэн Тӧроез Николай Ганза пумиськылӥз социальной удысысь профсоюз ужасьёсын. Дышетӥсьёсты, врачъёсты но культура удысысь тыршисьёсты нош ик сюлэмшугъяськытэ соослы уждун тырон но пунэм тыронъёсты берыктон. Кытысь бен тыронъёс вордскизы? Соос потӥзы, туэ апрельысен ЕТС-я разрядъёсты будэтэм бере. Угось со чакламтэ вал кун но интыысь бюджетъёсын. Тужгес но секыт югдур кылдэмын Ижевскын. Тӥни соин ик сӥзьыл каникулъёс бере 7 школа уг ужа на, нош дышетскон заведениос премьерен пумиськон нуналэ уже ӧз потэ. Югдур пӧртэм ӧвӧл тазалыкез утён удысын. Татын, дышетӥсьёсын ӵошатыса, уката бергес уждун тыро. Пыкылыны кулэ интыысь кивалтӥсьёсты. Районъёс но городъёс Правительствоен гожтэм тупанкылъёссэс урод быдэсъяло. Интыысь бюджетъёс уждунды 60 процент висъяны кулэ. Озьы ке но, Сарапул городын, Балезино, Грах, Кизнер, Сюмси, Яр, Вавож но Дэбес ёросъёс та куронэз кылэм-адӟем уг каро. Николай Ганза пумиськонлы таӵе йылпумъян лэсьтӥз: социальной удыслы Федеральной Правительство юрттытэк, тыронъёсты берыктыны ум быгатэ. Соин ик Николай Алексеевич, Владимир Путин Ижевске ветлыкуз, 17-тӥ ноябре соин пумиськыны вераськиз. х х х Мукет нуналаз, 16-тӥ ноябре, Николай Ганза журналистъёсын пумиськылӥз. Со аспӧртэмлыко пресс-конференция ортчытӥз. Нокыӵе азькыл вератэк, люкаськемъёслэн юанъёссылы рос-прос валэктонъёс сётъяз. Нырысь вераз профсоюз активен кенешемез но Владимир Путинэн Ижевскын пумиськылэмез сярысь. Россилэн премьер-министреныз вераськон мынӥз республикалы, автозаводлы юрттон но вуоно арлы бюджетын юрттэт сётонэз туэ мында ик кельтон сярысь. Зэм, Москва юрттытэк, автопроизводствоез выльдыны, пыд йылаз пуктыны ум быгатэ. "Гермесъя" уно сю миллионъёсын тыронъёсмы люкаськемын ни. Нош автозаводлы буян цех но кӧня ке выль оборудование гинэ басьтыны ичизэ 100 миллион доллар коньдон кулэ. Воткинскын чурыт эстӥськонэн ужась ракета двигательёсты быдтонъя завод пуктонъя мылкыдзэ вераса, Николай Ганза пусйиз, та ужпумез, пе, котыр ласянь эшшо эскероно на. - Нош кыӵе луоз республикалэн 2000-тӥ арлы бюджетэз? - Со секытэн дасяське.Отын али 7 процентэз коньдон уг тырмы. Пумиськонын озьы ик вераськон вал 12 му вӧй поттон интыосты вузанъя, конкурс ортчытонъя. Отчы акциосын трос огазеяськонъёс пырисько ни. Нош "Удмуртнефть", "Белкамнефть" но "АСПЭК" огазе кариськыны малпало, консорциум кылдыто. Сое лыдэ басьтыны кулэ "Лукойл" но "Сэмсон" компаниослы. - Юрий Маслюковен кыӵе кусыпъёсты? - Мон сое кемалась, 1984-тӥ арысен, тодӥсько. Котькыӵе секыт вакытэ юрттэ. Солэн командаез зол. Республикаез матысь 5 ар ӵоже азинтонъя нимысьтыз программа дасяз ни. Со 15-16 страница вылэ гожтэмын но Правительствоысь специалистъёслэн малпанъёссылы быдэсак тупа, шуыны луоз. Юрий Маслюков - усто инженер но экономист. Ваньбур поттонэз ӟеч тодэ. Солэн дасям программаяз эскеремын му вӧй поттон, машиностроениез но нюлэс хозяйствоез азинтон. - Николай Алексеевич, мар верасалды ЭМЗ сярысь? - Тумошо луыса кошке. Предприятие кӧтурдэсаз сылыку, сое вузан (приватизировать карон) сярысь нокин пал кыл но ӧз поттылы. Али нош ӟеч ужаны кутскиз но сое акциосын огазеяськон карыны, кужмысь зӥбыны ӧдъязы. Та ужпумъя дорамы лыктоз В. Путинлэн воштӥсез И. Клебанов. ЭМЗ-лэн куинь кузёез луыны кулэ - Россия, Удмуртия но ужась коллектив. - Кун Думае быръёнъёс матэкто. Со пумысен кыӵе малпанъёсты? - Правительство со уже, валэктонэ уг пыриськы. Но кыл кутӥсь адямиосты юнматӥм ни. Ваньзэ лэсьтоно законъя. Мынам сыӵе малпанэ. Кыкетӥез, асьмеос 9 ар сыр куалекъяса кадь улӥськом ни. Вуоно арын Россилы усто, визьмо, быгатӥсь президент быръёно. Со сярысь али ик сюлмаськоно ни. Г. РОМАНОВ. ГУРТ УЛОН Пудо эмъясь Пудо эмъясьлэн данэз гурт калык пӧлын шӧдскымон будӥз. Соин но, дыр, 1500 манет тыроно ке но ветколледже пырон понна, та лыдпус уг кышкаты егитъёслэсь мылкыдзэс. Тани туэ но конкурсъя одӥг интые 5 адями вал. Маин сыӵе юн кыске ас бордаз та удыс? Та юанэн вазиськи Кизнер ёросысь пудо эмъясьлы Иван Михайлович Кузнецовлы. Кык ар талэсь азьло со йылпумъяз Можгаысь веттехникумез, со дырысен ужа вордскем Безменшур гуртаз эпизоотолог луыса. - Куд-ог лыдӟисьёслы "эпизоотолог" кыл валантэмгес кылӥське, дыр. - Мынам уже: чакланы кыӵе ке висёнлэсь (эпидемилэсь) кутсконзэ но сое эмъян. Мукет сямен вераса, эпизоотолог - со инфекционной висёнъёсты чаклась. - Малы тӥ одно ик та ужез бырйиды? - Атае но анае ас вакытазы йылпумъязы веттехникумез. Соослэсь адӟем кари. Собере, мон туж яратӥсько пудо-животэз, коӵышъёсыз, пуныосыз. Дипломад ӵыж "витьёс" ке но сылӥзы, уждэ гажатэк быръем сюресад шудо уд луы. Нырысь ик мон кышкай вал, номыр уз пӧрмы шуыса, адямиос уз оске, "пинал" шуэмзылэсь курдай. Пумен кышканэ осконлы пӧрмиз. Али сереме потэ, нырысь ужан нуналъёсме тодам вайыса. Уд оске, но шуг- секытэн пумиськыны мыным ӧз кылды на. Сьӧрло гуртъёсы потаны машинамы вань. Вераны кулэ, матысь гуртмы 3 иськемын сылэ, нош кыдёкысез - 30 иськемын. Нуналаз 3-4 пол но котыръяськоно луэ. Юрттэт ӵемгес курыло скалъёссы но парсьёссы висемысь. Берло аръёссэ лыдзы будӥз лейкозэн висись скалъёслэн. Ӵем дыръя адямиос жаляса возё сыӵе пудозэс, уг валало, асьсэлэн тазалыксылы урод каро шуыса. Ужась адямиез гуртын котьку но гажало. Тӥни малы пудо эмъясьлэн данэз вылӥын. Анна Кузнецова. Журналистъёсын пумиськонъёс Та шуг-секыт вакытъёсы шаерысьтымы тросэз семьяос пенсия басьтӥсьёссылы гинэ оскыса уло, уката ик гуртъёсын. Быдӟалаез трос ӧвӧл ке но, одӥгез шумпоттэ - берло дыре пенсиез ӝегатэмысь дугдӥзы. котькуд толэзе вутто. Октябре 50 манет компенсация сётӥзы, ноябре пенсилэсь быдӟалазэ кӧня ке процентлы йылэтӥзы. Сояз арня вискын журналистъёсын пумиськылӥзы Россиысь Пенсиосъя фондлэн Удмурт ёзаз ужасьёс. Фондлэн кивалтӥсез Владимир Моряков пенсионеръёс понна шумпотымон ивор вераз. Россия Федерациысь Правительстволэн кивалтӥсез Владимир Путин сётэм кылзэ уже вылын быдэстыны малпа. Декабре но январе пенсионеръёслы сётӥськоз 50 манет тыр компенсация (вӧзаз йылтӥськоз на уральской коэффициент), нош февральысен пенсилэн быдӟалаез йылоз 12 процентлы. Мар чотын со лэсьтӥське? Макем тросгес но дыраз вуоз Пенсиосъя фондэ предприятиослэсь но организациослэсь выт, сокем ӟечгес улозы пенсионеръёс. Нош али ушъяськыны номырин, пенсилэн быдӟалаез вань ужасьёс понна сокем ик трос уг висъяськы. Озьы ке но, азьлане вамышъёс шӧдӥсько ни. Кылем арын август бере пенсиос тыронын югдур туж секыт вал. 1998-тӥ арын 1-тӥ октябрьлы пенсиосъя пунэм тыронъёс 376 миллион манетлэсь ятыр вал - кык но ӝыны толэзьлы ӝегаса сётӥськиз пенсия. Россия Федерациысь Правительство ужпум пуктиӥз: пунэм тыронъёсты быдтоно 1999-тӥ арын 1-тӥ октябрьлы. Удмурт Республикаысь Правительство но Пенсиосъя фонд пӧртэм ужрадъёс кутӥзы. Озьы таяз арын 24-тӥ августлы республикаямы пунэм тыронъёс быдэсак палэнтэмын. Мар юрттӥз секыт югдурысь потыны? Владимир Моряковлэн верамезъя, выт тыронын предприятиослы но организациослы пезьгытгес ужаны муг луизы пениосты палэнтонъя кутэм ужрадъёс. Соя ик гурт хозяйствоослы пунэм тыронъёссэс вить ар куспын палэнтыны дыр сётэмын вал. Удмурт Республикае Владимир Путин вуылыку, шаерысьтымы Пенсиосъя фонд солы вазиськиз куронэн - гурт хозяйствоосъя азьло аръёслы пунэм тыронъёсты вунэтоно, туэлы тыронъёссэс гинэ кельтыса. Озьы хозяйствоос пыд йылазы ӝоггес султысалзы, выт тырон но капчигес радъяськысал. Владимир Путин та куронэз эскерыны пумит луымтэ. Югдурез умоятыны озьы ик луиз, выт бичась полиция но судебной приставъёс юрттэмен. Пенсиосъя фондэ пунэм тыронъёс чотын ваньбур таламын 1 милдлиард 200 миллион манет тыр. Тужгес но кылзӥськисьтэм кивалтӥсьс пумит 32 уголовной уж ӝутэмын. Куд-огез 1-2 арлы условно пуктэмын. Пунэм тыронъёсты палэнтыны кутӥсько вексельёс, мукет амалъёс. Пенсиосъя фондын ужасьёслэсь ужзэс мукет сямен радъян но пацда сётӥз - кылдытэмын нимаз-нимаз ужпумъёсъя кыл кутӥсь ёзъёс. Владимир Михайлович пусйиз пенсионеръёс сярысь ӟеч сюлмаськись предприятиосты. Соос пӧлын "Ижсталь", "Чепецкий механический завод", "Удмуртэнерго", "Удмурттелеком", "Гарант", Кез районысь "Гулейшур" крестьян хозяйство но "Маяк" ТОО. Ӟеч ужамзэс пусйиз нимаз кивалтӥсьёслэсь, со - И. Н. Семёнов (Можга город), Г. П. Чеченин (Глазов район), В. С. Усков (Игра район), В. А. Полев (Кез район), С. Г. Иконников (Ува район), А. А. Прохоров (Шаркан район), В. А. Фридрих (Воткинск город). Пресс-конференциын вераськон мынӥз пенсионной страхование сярысь. Котькуд ужасьлы, 1999-тӥ арысен кутскыса, нимаз счёт усьтӥськоз. Али со уж мынэ ни. 2000-тӥ арын нырысетӥ кварталэ шаерамы вань ужасьёсъя ивор (база данных) люкамын луоз. Та дырлы пусъемын ни 160 мурт, кулэ на 500 сюрс пала анкетаез эскерыны. Уж сётӥсьёссы пыр 50 сюрсэз басьтӥзы ни свидетельствоос-карточкаос. Азьланяз котькуд ужась мурт тодыны но эскерыны быгатоз, кӧня уждун мынэ солэн счётаз. Умойтэм лыдпусъёс уг сёто-а ужан интыысьтыз? Макем тросгес коньдон люкаськоз счётад, со бордысь ик потоз пенсилэн быдӟалаез. Шуом, егит дыръя трос уждун басьтод, нош мӧйымыса висьыны усёд я ужтэк кылёд. Егит дыръя басьтэм уждунэд ик пересьмон нуналъёстэ утёз. Документъёс ышон, сутскон учыръёсы но, нмимаз счёт усьтыса, адямилэн ужан аръёсыз, нуналъёсыз пусъемын луозы. Котькытчы мын, котькытын ужа - ваньмыз люкаськоз одӥг счётэ. Асьсэ понна ужасьёс, ужбергатӥсьёс свидетельство понна нимаз вазиськоно луозы, нош предприятиосын, организациосын ужасьёс сярысь сюлмаськыны кулэ уж сётӥсьёс. Л. МАЛЫХ. Удмурт Республикаын дуно но сьӧд кортъёсты вузан-басьтонэз радъян сярысь Удмурт Республикаысь Кун Кенешлэн Постановлениез Удмурт Республикалэн улосвылаз дуно но сьӧд кортъёсты вузан-басьтонэз радъян, огъя, экономикалы кышкытлык ваёнэз палэнтон вылысь, Удмурт Республикаысь Кун Кенеш пуктэ: 1. Организациослы но нимысьтыз ужбергатӥсьёслы, тупатэм порядокъя лицензиос басьтытозязы дуно но сьӧд кортъёсты дасяны но вузаны-басьтыны лэзёно ӧвӧл. 2. Дугдытоно дуно но сьӧд кортъёсты дасянъя, вузан-басьтонъя та вакытэ ужась пунктъёсты. Соосты усьтыны быгато хозяйствоез нуись ёзъёс гинэ, вань ке соослэн лицензиоссы. Соос лыдэ басьтыны кулэ Удмурт Республикалэн улосвылаз дуно но сьӧд кортъёсты вузан-басьтонъя пунктъёс усьтонъя правилоосты. 3. Удмурт Республикалэн Правительствоезлы, дуно но сьӧд кортъёсты вузан-басьтонэз эскерон вылысь, ведомствоос куспын ужась комиссия кылдытоно, кытчы пырыны кулэ правоосты утёнысь но мукет органъёсысь кивалтӥсьёс, со понна юнматоно положение. Удмурт Республикаысь городъёслэн но ёросъёслэн администрациоссылы, та ласянь ӵош ужанэз умойгес радъян вылысь, таӵеесь ик комиссиос кылдытыны ӵектоно. 4. Дуно но сьӧд кортъёсты вузан-басьтонъя лицензиослэсь куронъёссэс, озьы ик пунктъёсты усьтон но соослэсь ужзэс умойтэм радъям, мукет косонъёсты быдэстымтэ понна лицензиос таламын луозы. Лицензиослэсь куронъёссэс быдэстымтэ но законэз тӥяса ужамзы понна организациослэн но нимысьтыз ужбергатӥсьёслэн ужзы дугдытӥське но, лицензиоссы кужымзэс ыштэмен лыдъясько. Правоосты утёнъя, эскеронъя органъёслы но судъёслы умойтэм учыръёс сярысь тодмо луиз яке со пумысен уголовной уж ӝутэмын ке, кулэ ужрадъёс кутон пумысен вазиськоно ведомствоос куспын ужась комиссие. 5. Удмурт Республикаысь Правительстволы дуно но сьӧд кортъёсты вузан-басьтон пунктъёсты усьтон сярысь правилоосты юнматыку лыдэ басьтоно таӵе куронъёсты: дуно но сьӧд кортъёсты вузан-басьтон пунктъёсты усьтыны уг луы улон юртъёсын, гараж кооперативъёсын, калык шутэтскон интыосын, улон юртъёслы, школаослы, больницаослы, администрацияя юртъёслы, электрокужым сётон ёзъёслы, химия суретъёсын ядъёс но нефтьлэсь вузъёс возён базаослы но складъёслы, вокзалъёслы матын, соос уг ке тупало санитарияя, инкуазез утёнъя, тылпулэсь, радиацилэсь утиськонъя куронъёслы, озьы ик соос адямилы но солэн ваньбурезлы кышкытлык медаз кылдытэ. 6. Удмурт Республикаысь Правительстволы городъёслэн но ёросъёслэн администрациосынызы ӵош арлы быдэ лыдэ басьтоно, кӧня дуно но сьӧд кортъёс вузаськозы-басьтӥськозы кутэм огкылъёсъя, озьы ик кӧня корт вуоз палэнысь. Вань лыдпусъёсты лыдэ басьтыса, Удмурт Республикаысь городъёсын но ёросъёсын кортъёсты кутон пунктъёсты усьтыны лимитъёс тупатоно. 7. Калыклэсь басьтыны лэзёно ӧвӧл дуно но сьӧд кортъёсты, соос производственно- технической удысэн герӟаськемын ке. Юдэсъёсын (слиток) дасям дуно корт (ӵыжатэм, пыргытэм, пачкатэм) яке векчиятэмез куштӥськемен уг лыдъяськы, соин ик организациос яке нимысьтыз ужбергатӥсьёс, огшоры адямиос сое вузаны уг быгато. Сыӵе кортэз вузан учыръёс сярысь басьяськись ӝегатскытэк югдурез утён органъёсы ивортыны кулэ. 8. Удмурт Республикаысь Правительстволы кортэз республикамылэн палэназ келян сярысь порядок дасяно. Кортэз соя поттыны луэ, Удмурт Республикаысь Правительстволэн лэземезъя, нош Удмурт Республикаысь Югдурез утёнъя министерство кортлэн кытысь вуэмезлы дунъет сётыны кулэ. 9. Дугдытоно дуно но сьӧд кортъёсты басьтонэз нимысьтыз но пусйымтэ интыосын. 10. Удмурт Республикалэн улосвылаз дуно но сьӧд кортъёсты басьтонэз умойгес луысал оскыны Удмурт Республикаысь нимысьтыз яке корт ӵыжатон удысэн герӟаськем предприятиослы, со понна Удмурт Республикаысь Правительствоен яке кун органлэн исполнительной властеныз юнматэм огкылъёс луыны кулэ. 11. Организациослэсь дуно но сьӧд кортъёсты басьтыны лэзёно чаклам радлыкъя, кудӥз юнматэмын Удмурт Республикаысь Правительствоен. 12. Предприятиослэн но организациослэн кивалтӥсьёссы кыл куто дуно но сьӧд кортъёслэсь лэсьтэм промышленной оборудованиез, кабельёсты, аппаратураез, технической но технологической объектъёсыз утён понна. Кун Кенешлэн Президиумезлы дасяно Удмурт Республикалэсь "Дуно но сьӧд кортъёслэсь лэсьтэм оборудованиез, кабельёсты, аппаратураез, технической но технологической объектъёсты утёнэз радъямтэ понна кыл кутытон сярысь" Законэзлы инъет. 13. Лыдэ басьтоно Россия Федерациысь Федеральной Собранилэн Кун Думаяз но Россия Федерациысь Правительствоез, кун властьлэн закон кылдытӥсь ёзъёсызлы вазиськонэз. 14. 1999-тӥ арын ноябрь толэзьлэн кыкетӥ ӝыныяз ортчытоно Удмурт Республикаысь судьяослэсь но правоосты утёнъя ёзъёсын ужасьёслэсь кенешсэс. Удмурт Республикаысь Кун Кенешлэн Тӧроез А. А. Волков. Ижевск город, 1999-тӥ арын 20-тӥ октябре. � 114-ИИ Ошмесъёс мед чылкыталозы Шуръёс дурысь ошмесъёс асьме калыкез ас бордазы котьку кыскылӥзы. Соин но, дыр, ваньмыз сямен удмурт гуртъёс пуксьылэмын ошмесъёс доры. Ижетӥ, Оӵ но Позимь сяна, бызё синмаськымон но паймымон Ягул (Подборенка) но Карлуд пичигес шуръёс. Соослэн ӧръёссы ог ньыльдон-витьтон ар талэсь азьло туж чылкытэсь, трос вуо но чорыго вал. Карлуд шурен тодматски 1960-тӥ арын, Гурт улон-вылонъя институтэ пыреме бере. Солэн кутсконаз соку Удмурт Карлуд (Кечтака) но Зеленхоз пуксемын вал. Кечтака, Ярушки, Чемошур, Тонково, Смирново, Старки, Октябри но Пятилетка гуртъёсын ӵош дышетскон хозяйствоямы пыре вал. Та гуртъёслэн музъемъёссы вылын дышетским луд вылын но фермаосын пайдалыко ужаны. Ӵемысь тыршылӥм Кечтака гурт дорысь лудъёсын. Татын, Карлуд шурлэн кутсконаз, туж ческыт потылӥз ошмес вузы. Пересьёслэсь юалляськи гуртсылэн ку кылдэмез сярысь. Трос сю аръёс талэсь азьло ини, дыр, шуыса веразы. Нош нимыз сярысь тазьы мадизы. Сӥзьыл пал праздниказы (Вильлы, луоз) вань бӧлякъёс кечтака вандылӥллям. Тулыс, возь вылэ поттыку, гурт уллёе сюлэсь трос кеч люкаськылэм. Малы ке шуоно, та пайдалыко, тунсыко пудоез котькуд семья вордылэм. Азбар тыр кечъёссы вылӥллям Шор Кечтакаын (Ӟуч Карлудын) но, Вужгуртын но. Тапалась калык сярысь мон трос тодӥ Восточный посёлокын улӥсь Ефросинья Степановалэсь. Ӟуч кышномуртлэн кузпалыз Шор Кечтакаысь ӟучомыны кутскем, но ас кылзэ тодӥсь удмурт воргорон вылэм. Оӵ шур дуре корт ӵыжатон завод лэсьтыку, та музъемъёсы уно ӟучъёс вуиллям. соос нимаз гуртъёс туж шер пуктылӥллям. Гурт нимзы но озьы ик кылем. Сюмси ёросысь Лекшур, Гуртлуд, Юбери, Уйвай, Кечгурт, Бадӟымшур, ачиз Сюмси ӟуч гуртъёс лыдъясько, нош нимъёссы удмурт. Озьы ик завод котырысь гуртъёс но ас нимъёссэс кельтӥллям. Бӧрысьгес гинэ ини Кечтака луэм Удмурт Карлуд, Шор Кечтака - Ӟуч Карлуд, нош Вужгурт кемалась бырем. Берлоез уно сю аръёс талэсь азьло кылдэм. Али отын "Химмаш" завод, "Металлург" санаторий, "Металлист" стадион но шай. Гуртлэсь бервылзэ возьмато на шай сьӧрысь пужымъёс пӧлысь кузесь гопъёс-выръёс гинэ. Куинез ик гурт пуксемын Карлуд шур дурысь чылкыт ошмесъёслы матысь вырйылэ. Котькуд гуртлэн кызо, пужымо, кызьпуо но мукет писпуо шулдыр арамаосаз вылэм вӧсяськон лудзы - Кереметсы. Али вань гуртъёслэн музъемзы Иже пыре. Удмурт Карлудлэн бервылаз автозавод лэсьтэмын, Ӟуч Карлуд дорын - радиозавод, Вужгурт дорын - "Химмаш" Карлуд шурлэн кутсконэз но отысь ошмес согемын, автозавод лэсьтыку. Ӟуч Карлуд (татын вашкала дыръя удмуртъёс гинэ улӥллям) дорысь ошмес Ижын улӥсьёсты али но шумпоттэ чылкыт, юзмыт, ческыт вуэныз. со пӧзе радиозавод вӧзысь кызьпу арама шуон интылэн уллапалаз. Куинь ар талэсь азьло татчы чакламын вал Удмурт культурая центр лэсьтыны. Отын луыны кулэ вӧсяськон, шулдыръяськон, концерт возьматон, музей, ӧтчамъёс ортчытъян юрт, сиськон, дышетскон юртъёс, кунокуа... "Удмурт вӧсь" огазеяськонлэн (кивалтӥсез Владислав Якупов) кичӧлтэмезъя-сюлмаськемезъя, куинь пол ортчытэмын ини вашкала удмурт Гербер. Ог сю ар вис карем бере, калыкмылэн вӧсяськон интыез улӟиз. Инкуазьлэн шулдыр сяськаяськон вакытаз со чебер арамаысь ошмес доры шумпотыса лыктэ. Нош сюлэмшугъяськытэ соиз: куинь арскын татын, праздникъёс ортчытэм сяна, нокыӵе пытьы кельтэмын ӧвӧл. Культурая "Дэмен" огазеяськонлэн ӧтчамаз кызьы шуиз тодмо тодосчи Адольф Широбоков, со дырысен отын вал но ӧз погылляськы на. Кызь одӥгетӥ даурлэн кутсконаз та ужез вань удмуртъёслэн сюлмаськемзыя вырӟытыны кулэ. Мон малпамъя, Ижез паськытатыку, бырем удмурт гуртъёс бервылэ кыӵе ке но адӟиськымон, синмаськымон синпелет-пус пуктоно. Отын шутэтскон-пукон интыез но мед луоз. Бырем гуртъёсысь коркаослэсь лыдзэс тодыса, удмуртъёслэсь яратоно писпуоссэс мерттоно. Угось бырем гуртъёс пуксемын вал чебер, чылкыт ошмесо интыосы, нош артэ ик яг шаугетылӥз. Быдэс шурез сузяны-чеберъяны али шуг бере, одӥг интызэ ке но адӟымон карыны луоз. Берло аръёсы пиналъёс Карлуд шурлэсь кутсконзэ гужемлы огпол сузяло ик, но бӧрысь уг учко ни. Ижысьтымы шуръёсты вашкала дыръя кадь ик синмаськымон кароно. Н.Возисов. Эн аналскы мыкырскыны Азям сыло кык пиос. Вылтусызъя одӥгез туж чупамон, но лапег. Мукетыз таш-таш шунды пужыё. Ӝуждалаезъя нош вӧлдэтэз ӝутыны турттэ, кожалод. Ветлӥсько соос котыртӥ - заметкалы сюжет утчасько. Одӥгез вера: - ... Тӥни озьы фотоаппаратъёсын нюлэскы мынӥмы. Учкиськом - тумошо но тодмотэм, инопланитянинъёслэн кадь пытьыос. Туспуктӥмы соосты, азьлань вамыштӥмы. Хоп - нош ик пытьыос, нош ик туспуктӥм. Озьы соос сьӧры ветлыса йыромим... Серем, но ӧз кельшы. Кошки мукет студентъёс доры. О-о-о, таосыз туж рос-прос верасько. ... Мон со понна басьтӥ сю кызь манет. Тон но али ик отчы мын. Ой, номыр тыныд уг яра, азьтэм... Мын ачид утча... Соку ик валай, таосызлэн кыл йылазы бергало уксё сярысь вераськонъёс. Бен, тросэз туала егитъёс али одно ик кытчы ке "нырзэс чуртнаны" тыршо, угось кытысь ке уксё поттоно. Кин мар каре. Одӥгез выж миське, мукетыз урамъёсты ӵуже. - Кинлы уксё кулэ, ваньзы уж шедьто, - шуэ одӥгез студент. - Милям ньылетӥ курсын дышетскисьёс ваньзы ужало ини. Тӥни сыӵе йӧноесь. Утыр визьзэс но будэто, коньдон но потто. Нош дышетсконлы озьы секыт уг йӧты-а шуыса юамелы вакчияк вераз: - Ваньмыз ачид бордысь потэ. Мон тыршисько отчы но, татчы но вутскыны. Бабля йырсиос, питрес ӵыжыт бамъёс пуксё бумага вылэ. Озьы суреда монэ худграфысь одӥгез студент Толя. Визьмо - озьы со уксё поттэ. Кизэ но волятэ, кисыез но зӧка. - Тук-тук! Комнатаямы пыриз егит пиосмурт. Кинюртэмъёсты бичась. Уго быръёнъёс матэкто ини. Юасько: - Кӧня тыр луэ та курадӟемед? - Куддыр кызьы. Кӧня гожтӥськем бичалод, сомында ик. Алигес мон басьтӥ 70 манет. Со понна но Инмарлы тау ини... Ма, зэм но уксё пыд улын кыстаське ук. Мыкырскыны гинэ эн аналскы. О. Никитина, Удмурт университетысь студентка. ЗАКОН УДМУРТСКОЙ РЕСПУБЛИКИ Об административной ответственности за правонарушения в области заготовки, переработки и реализации лома цветных и черных металлов, утилизации, складирования, перемещения, размещения промышленных и иных отходов Статья 1. Деятельность юридического лица или индивидуального предпринимателя по заготовке, переработке и реализации лома цветных и черных металлов, утилизации, складированию, перемещению, размещению промышленных и иных отходов, осуществляемая: а) без соответствующей лицензии, - влечет наложение административного штрафа на индивидуальных предпринимателей в размере от десяти до ста минимальных размеров оплаты труда, на юридических лиц - от двухсот до пятисот минимальных размеров оплаты труда с конфискацией лома цветных и черных металлов, промышленных и иных отходов или без таковой; б) в период приостановления действия лицензии лицензирующим органом, - влечет наложение административного штрафа на индивидуальных предпринимателей в размере от десяти до ста минимальных размеров оплаты труда, на юридических лиц - от двухсот до четырехсот минимальных размеров оплаты труда с конфискацией лома цветных и черных металлов, промышленных и иных отходов или без таковой; в) с нарушением условий соответствующей лицензии, если это действие (бездействие) не образует состава иного административного правонарушения, предусмотренного настоящим Законом, - влечет наложение административного штрафа на индивидуальных предпринимателей в размере от десяти до ста минимальных размеров оплаты труда, на юридических лиц - от пятидесяти до трехсот минимальных размеров оплаты труда с конфискацией лома цветных и черных металлов, промышленных и иных отходов или без таковой; г) без необходимого весового, погрузочно-разгрузочного и иного оборудования, радиационного контроля, ведения учета сдатчиков отходов черных и цветных металлов, предоставления отчетов об осуществлении деятельности по установленным формам государственной отчетности, осуществления расчетов с оформлением накладных и- кассовых ордеров и выполнения иных требований по порядку заготовки, переработки, реализации лома цветных и черных металлов, утилизации, складированию, размещению, перемещению промышленных и иных отходов , установленных законодательством Российской Федерации и Удмуртской Республики, и отнесенным к числу обязательных лицензионных требований и условий, - влечет наложение административного штрафа на индивидуальных предпринимателей в размере от десяти до ста минимальных размеров оплаты труда, да. юридических лиц - от двадцати до трехсот минимальных размеров оплаты труда с конфискацией лома цветных и черных металлов, промышленных и иных отходов или без таковой; д) с нарушением установленного в Удмуртской Республике порядка открытия пунктов приема лома цветных и черных металлов, промышленных и иных отходов - влечет наложение административного штрафа на индивидуальных предпринимателей в размере от десяти до ста минимальных размеров оплаты труда, на юридических лиц - от двадцати до ста минимальных размеров оплаты труда с конфискацией лома цветных и черных металлов, промышленных и иных отходов или без таковой; е) в случае преобразования' юридического лица, изменения его наименования или местонахождения или изменения имени или местожительства индивидуального предпринимателя без переоформления документа, подтверждающего наличие лицензии, либо в случае утраты лицензии без ее переоформления, а также передачи лицензии другому юридическому лицу или физическому лицу - влечет наложение административного штрафа на индивидуальных предпринимателей в размере от десяти до ста минимальных размеров оплаты труда, на юридических лиц - от двадцати до ста минимальных размеров оплаты труда с конфискацией лома цветных и черных металлов, промышленных и иных отходов или без таковой. Статья 2. Деятельность юридического лица или индивидуального предпринимателя по заготовке, переработке и реализации по поддельным документам разукомплектованного и бесхозяйного лома цветных и черных металлов, утилизации, складированию, перемещению, размещению по поддельным документам, разукомплектованного и бесхозяйного имуществав качестве промышленных и иных отходов, если в ней не содержится состав уголовного преступления,- влечет наложение административного штрафа на индивидуальных предпринимателей в размере от десяти до ста минимальных размеров оплаты труда, на юридических лиц - до двухсот минимальных размеров оплаты труда с конфискацией лома цветных и черных металлов, промышленных и иных отходов или без таковой. Статья 2. Деятельность юридического лица или индивидуального предпринимателя по заготовке, переработке и реализации по поддельным документам разукомплектованного и бесхозяйного лома цветных и черных металлов, утилизации, складированию, перемещению, размещению по поддельным документам, разукомплектованногои бесхозяйного имущества в качестве промышленных и иных отходов, если в ней не содержится состав уголовного преступления, - влечет наложение административного штрафа на индивидуальных предпринимателей в размере от десяти до ста минимальных размеров оплаты труда, на юридических лиц - до двухсот минимальных размеров оплаты труда с конфискацией лома цветных и черных металлов, промышленных и иных отходов или без таковой. Статья 3. Деятельность юридического лица или индивидуального предпринимателя по представлению в лицензионный орган недостоверных или искаженных сведений для получения или продления лицензии по заготовке, переработке и реализации лома цветных и черных металлов, утилизации, складированию, перемещению, размещению промышленных и иных отходов, если это нарушение не содержит состава уголовного преступления ,- влечет наложение административного штрафа в размере от десяти до ста минимальных размеров оплаты труда. Статья 4. Действия юридического лица или индивидуального предпринимателя по уклонению от предоставления условий для проведения лицензирующими органами проверок, либо представления необходимой информации и документов о деятельности по заготовке, переработке и реализации лома цветных и черных металлов, утилизации, складированию, перемещению, размещению промышленных и иных отходов, либо выполнения решений лицензионного органа, обязывающего устранить выявленные нарушения, если эти нарушения не содержит состава уголовного преступления , - влекут наложение административного штрафа в размере от десяти до ста минимальных размеров оплаты труда. . В Статья 5. Руководители и иные должностные лица юридических лиц и представители индивидуальных предпринимателей, осуществляющие заготовку, переработку и реализацию лома цветных и черных металлов с нарушениями, установленными статьями 1-4 настоящего Закона, несут административную ответственность в виде штрафа в размере до ста минимальных размеров оплаты труда. Примечание. Под представителем индивидуального предпринимателя в настоящем Законе понимается гражданин, действующий от имени индивидуального предпринимателя на основании доверенности, договора-поручения или иного гражданско-правового договора. Статья 6. Предпринимательская деятельность физического лица по заготовке, переработке и реализации лома цветных и черных металлов, утилизации, складированию, перемещению, размещению промышленных и иных отходов, осуществляемая без регистрации в качестве предпринимателя без образования юридического лица, если это не влечет уголовную ответственность, - влечет наложение административного штрафа в размере до ста минимальных размеров оплаты труда. Статья 7. Должностные лица органов, уполномоченных на осуществление лицензирования деятельности по заготовке, переработке и реализации лома цветных и черных металлов, утилизации, складированию, перемещению, размещению промышленных и иных отходов, выдавшие лицензию: а) без истребования документов, сведений и данных, представление которых для получения ^.лицензии предусмотрено законодательством Российской Федерации и принятым в соответствии с ним законодательством Удмуртской Республики, - несут административную ответственность в виде административного штрафа в размере от десяти до пятидесяти минимальных размеров оплаты труда; б) без проведения обязательных экспертиз либо при наличии отрицательного экспертного заключения, с нарушением порядка лицензирования, установленного для продления срока действия лицензии ,- несут административную ответственность в виде административного штрафа в размере до двадцати минимальных размеров оплаты труда. Статья 8. Составлять протоколы об административных правонарушениях, предусмотренных настоящим Законом, применять меры обеспечения производства по делам об ' административных правонарушениях, совершать иные процессуальные действия, предусмотренные настоящим Законом и Кодексом РСФСР об административных правонарушениях, вправе уполномоченные должностные лица органов внутренних дел, налоговых органов, государственных органов санитарно- эпидемиологического надзора, по охране окружающей среды и природных ресурсов. Право принимать решение об изъятии лома цветных и черных металлов, промышленных и иных отходов для обеспечения конфискации принадлежит лицу, составившему протокол. Хранение изъятого лома цветных и черных металлов, промышленных и иных отходов осуществляется в местах, определенных решением органов, которыми произведено их изъятие. Дела об административных правонарушениях, предусмотренных настоящим Законом, рассматриваются судами. Статья 9. Порядок производства по делам об административных правонарушениях, предусмотренных настоящим Законом, определяется Кодексом РСФСР об административных правонарушениях. Статья 10. Конфискация лома цветных и черных металлов, промышленных и иных отходов осуществляется в порядке применения административного взыскания за совершенное правонарушение в соответствии с законодательством Российской Федерации. Изъятый из незаконного оборота и признанный бесхозяйным лом цветных и черных металлов подлежит использованию в соответствии с нормативным актом Правительства Удмуртской Республики. Статья 11. Настоящий Закон вступает в силу со дня его официального опубликования. Со дня вступления настоящего Закона в силу Законы Удмуртской Республики "Об административной ответственности за незаконное предпринимательство" и "Об административной ответственности за незаконное лицензирование и незаконную регистрацию действуют в части, не противоречащей настоящему Закону. Председатель Государственного Совета Удмуртской Республики А.А.Волков. г. Ижевск, 19 октября 1999 года. � 106-ИИ. Фестиваль ӝоген йылпумъяськоз Таяз арняе ортчись тросэз ужрадъёс герӟаськемын культура удысэн. 24-тӥ ноябре Драмая удмурт кун театрын данъялозы Ижевск цирклэсь директорзэ, Удмурт Элькунысь культура удысысь дано ужасез Самуил Малихович Гринбаумез, ужаны кутскемез дырысен витьтон ар тырмемен валче. 23-тӥ ноябрьысен 30-тӥ ноябрёзь шаерысьтымы Мунё театрын ортчоз покчиослы но быдэ вуись пиналъёслы сӥзем арня. 24-тӥ ноябрьысен 25-тӥ ноябрёзь Удмурт Элькунысь Национальной библиотекалэн юртаз кенешозы финн-угор улосвылъёсысь библиотекарьёс. 25-тӥ ноябре татын ик луоз "Удмурт шаерлэн йырсазьыз" нимо программаен тодматскон. 26-тӥ-27-тӥ ноябре шаерысьтымы крезьгуръя училищеын радъяськоз крезьгур удысэз азинтыны быгатӥсь адямиосты дасян пумысь кенеш. 26-тӥ ноябре ик Драмая удмурт кун театрлэн юртаз йылпумъяськоз тодмо удмурт крезьгурчилэн, Удмурт Элькунысь искусствоосъя дано ужасьлэн, Россия Федерациысь искусствоосъя дано ужасьлэн, Удмурт Элькунысь Кун премилэн лауреатэзлэн Герман Корепановлэн вордӥськемез дырысен сизьымдон вить ар тырмонлы сиӟем фестиваль. Е. РОМАШОВА. Ыштэмзэ берыктоно Ортчем арня вискын шаерамы вуылӥз тодмо кинорежиссёр Григорий Маркович Амнуэль. Со бадӟым саклык висъя асьмелэн лулчеберлыкмылы. Политика но культура котьку артэ вамышъяло, шуэ со. Григорий Марковичез сюлэмшугъяськытэ на мукетыз но. Асьмеос, пе, юнгес данъяськиськомы тодмо конструкторенымы Михаил Калашниковен, нош культура удысысь дано адямиосты вужере кельтӥськом. Соин ик Григорий Амнуэль Удмуртиын дыръяз вуылӥз Глазов но Воткинск городъёсы, пыраз П. И. Чайковскийлэн музей-юртаз. - Жаляса верано, - шуэ Г. Амнуэль, - Удмурт шаерез тросэзлэн кылэм-адӟемзы но ӧвӧл. Тужгес но юн шӧдӥське со Москваын. П. И. Чайковский Удмуртиын вордскемын шуыса уг тодо. Уго солы Москва улосвылысь Клин городын музей-юрт усьтӥзы солы но табере композиторез асьсэлэн каремзы потэ ни. Тӥ понна со, мынам малпамея, бадӟым ыштон луэ. Бен, Удмуртия сярысь азьло вераськыны ӧз лэзьылэ, республикамы "ватэмын" вал. Ма веранэз ини отын Воткинск сярысь. Соин но, дыр, трос тодмо адямиосынымы данъяськыны ӧм быгатылэ, соосты ыштӥм но. Та уж борды ик Григорий Маркович басьтӥськыны ӧдъя, со сяна, П. И. Чайковскийлэн крезьгуръёсыз улсын фильм кылдытыны малпа. В. АНДРЕЕВА. ЗАКОН УДМУРТСКОЙ РЕСПУБЛИКИ О порядке определения органа, осуществляющего лицензирование деятельности по заготовке" переработке и реализации лома цветных и черных металлов на территории Удмуртской Республики Настоящий Закон в соответствии с Федеральным законом от 25.09.98 � 158-ФЗ "О лицензировании отдельных видов деятельности" и Положением "О лицензировании деятельности по заготовке, переработке и реализации лома цветных и черных металлов", утвержденным постановлением Правительства Российской Федерации от 15.07.99 � 822, устанавливает порядок определения органа, осуществляющего лицензирование деятельности по заготовке, переработке и реализации лома цветных и черных металлов на территории Удмуртской Республики (далее - лицензирующий орган). Статья 1. Полномочия органов государственной власти Удмуртской Республики по определению лицензирующего органа Лицензирование деятельности по заготовке, переработке и реализации лома цветных и черных металлов осуществляет орган, специально уполномоченный на ее осуществление. Лицензирующий орган определяется в порядке, установленном настоящим Законом. Статья 2. Основные требования для определения лицензирующего органа Лицензирующий орган определяется из числа государственных органов исполнительной власти, располагающих условиями для осуществления лицензионной деятельности и надзора за соблюдением лицензионных требований и условий. Лицензирующий орган определяется для исполнения полномочий, установленных статьей 6 Федерального закона "О лицензировании отдельных видов деятельности". Лицензирующий орган в пределах своей компетенции имеет право: проводить проверки соответствия осуществляемой лицензиатом деятельности лицензионным требованиям и условиям; запрашивать у лицензиата необходимые объяснения и справки по вопросам, возникающим при проведении проверок; составлять на основании результатов проверок акты (протоколы) с указанием конкретных нарушений; выносить решения, обязывающие лицензиата устранить выявленные нарушения , и установить сроки их устранения; выносить предупреждение лицензиату; осуществлять иные предусмотренные законодательством Российской Федерации полномочия. Определение лицензирующего органа с ограничением или превышением его полномочий не допускается. Лицензирующий орган определяется в соответствии с основами конституционного строя и установленными федеральным законом общими принципами организации представительных и исполнительных органов государственной власти. Статья 3. Порядок определения органа, уполномоченного на осуществление лицензионной деятельности Лицензирующий орган определяется Правительством Удмуртской Республики в течение 30 дней со дня официального опубликования настоящего Закона. Статья 4. Лицензирование деятельности по заготовке, переработке и реализации лома цветных и черных металлов Деятельность по заготовке, переработке и реализации лома цветных и черных металлов на территории Удмуртской Республики подлежит обязательному лицензированию в соответствии с законодательством. Государственные надзорные и контрольные органы, иные органы государственной власти и органы местного самоуправления при выявлении в пределах своей компетенции нарушений лицензионных требований и условий обязаны сообщать в лицензирующий орган о выявленных нарушениях и принятых мерах. Статья 5. Вступление в силу настоящего Закона Настоящий Закон вступает в силу со дня его официального опубликования. Со дня вступления в силу настоящего Закона запрещается деятельность по заготовке, переработке и реализации лома цветных и черных металлов на территории Удмуртской Республики без лицензии, выданной лицензирующим органом. Нарушение указанного требования влечет ответственность в соответствии с действующим законодательством. Правительству Удмуртской Республики: - разработать и принять положение о лицензирующем органе, правила открытия и работы приемных пунктов по заготовке лома цветных и черных металлов, а также правила приема лома цветных и черных металлов на территории Удмуртской Республики; - привести ранее принятые нормативные правовые акты в соответствие с настоящим Законом. Председатель Государственного Совета Удмуртской Республики А.А.Волков г. Ижевск, 19 октября 1999 года � 108-ИИ Ӟеч толъёз Дэри ёросысь Ягул но Вожой гуртъёсын воштӥськонъёс сярысь гожъямы ини. Холмогоров нимо ОАО-ын, "Промстройкомплект" предприятиен огазеяськемез бере, ваньмыз сямен кивалтӥсьёс но воштэмын вал. Соин но, дыр, азинсконъёс, луд ужъёсын сяна, шӧдӥсько ини фермаосын но. Берло аръёсы пудо вордон аналтэмын вал. Скалъёслэн лыдзы арысь аре кулэсмиз. Урод сюдэмен-утялтэмен йырин, соос йӧл но ар куспын быдэн ог кык сюрс килограмм сяна ӧз сётылэ. Нош али та удысын югдур кыӵе? Со сярысь мон кенеши гуртысь зоотехникен Наталья Овчинниковаен. Чылкыт, чебер шаплы егит нылкышно будӥз Эгралан (Игралан). Туэ, Гурт улон-вылонъя академиез йылпумъяса, ньыль толэзь ини ужа Ягулын. Кема уг тыршы ай ке но, умой тодэ ни хозяйствоысь азьлозэ но, ализэ но югдурез. Али татын 252 кысконо скал, нош Ягулаз - 85 гинэ. Туннэ соос нуналаз сёто быдэн сизьым килограмм йӧл, нош ар куспын чакламын одӥг скаллэсь куинь сюрс килограмм кыскыны. Ортчем арен ӵошатыса, со унолы трос. Укмыс толэзь куспын одӥг пудо 2700 килограммлэсь уногес сётӥз, соин оскон вань: арлэн пумозяз малпанъёс быдэсмозы. Тужгес вылӥ азинсконъёссы Серафима Ореховалэн, Ольга Холмогоровалэн но Татьяна Абрамовалэн. Арлэн пумозяз йӧл сётыны кутскоз эшшо ог кызь пала ветыл. Тае но азьлань вамышен лыдъяны луоз. Вуоно аре ОАО ӟеч выжыысь витьтон куӵо скал басьтоз. Озьы арысь аре "ыштыны" кутскем гурт удыс ӧраз пыроз но гурт хозяйстволы пайда сётыны кутскоз. Лудъёс утялтэмын, пудо гидэ пыртэмын ке но, гуртысь кивалтӥсьёслэн, уката ик - директорлэн Василий Никифоровлэн но валтӥсь зоотехниклэн Василий Горбуновлэн сюлмаськонъёссы уно. Гуртъёсын силос гинэ тырмымон дасямын, нош турын, куро, фураж узгес окмы, соосты мукет азьысь утчано луоз. Соин ӵош оскем потэ: пудолы сиён шедёз, туэ со ӟеч толъёз. Н. ВОЗИСОВ. Лэчыт ужпум Висисьёс-а быриллям? Ижысь механической заводлэн больницаезлэн выль корпусаз ваньмыз вылӥ куронъёсъя лэсьтэмын: эмъян тӥрлык, кабинетъёс, палатаос, усто врачъёс... Но больница пушкын уг шӧдӥськы эмъюм зын, палатаосын койкаос буш сыло. Малпаськоды, висисьёс ӧвӧлэн? Кытын, пе, со. Соку малы та вӧл-вӧл, усто больницаын эмъяськон интые, висисьёс ёркыт палатаосын ӝокаса уло, усто аппаратураен эскериськон понна, больницаысь больницае бызьыло? Мугез огшоры - кун комиссия учкытэк, корпусэз усьтыны уг яра. Нош со кык ар ӵоже ини люкаськыны уг быгаты кивалтӥсьёслэн яке мылзы потымтэен, яке ваменъяськеменызы. Больница вӧзысь выль корпусэз "быдэс дуннеен" ӝутӥзы. Туж юрттӥзы Пенсиосъя, Медицинской страхованиея фондъёс, республика, город. Бадӟым люкетсэ, валамон, завод ас вылаз басьтӥз. Лыдпусэн вераса, корпус ӝутыны 70 миллион манет быдтэмын, 50-зэ со пӧлысь завод висъяз. Но отын асьсэлэн ужасьёссы пӧлысь 20 процент пала гинэ эмъяськисез луоз, мукетъёсыз - городысь, быдэс республикаысь. Соин ик заводлэн администрациез куре али городлы тыроно вытъёссэ со чотын "кысыны". Мэр пыкиське. Сотэк но дышетӥсьёслы но, врачъёслы но уждун тырыны коньдон ӧвӧл, пе. Кык ар ини тэк сылэ сюрс долларъёсын басьтэм эндоскопической аппаратура. Врачъёс уг лыдъяло, кӧня сюрс коньдон поттыны луысал та дыр ӵоже. Но ӟеч тодо, со сюрс вить сю муртлэн ыштэм тазалыкез шуыса. Сомында мурт быгатысал та дыр ӵоже усто больницан операциез капчиенгес лэсьтыны. Учке асьтэос: яке вись кузьда кӧттэ кырозы, яке чиньы йыл быдӟа. Со сяна, татын чакламын на мӧля вылын но операциос лэсьтыны геронтологияя (арлыдоослы) нимысьтыз отделение усьтыны. Али корпусын ужа гинекологияя отделение гинэ - татчы выжтӥзы 14-тӥ медсанчастьысь висисьёсты, 2-тӥ медсанчасть тупатъяны пытсаськем бере, выжтозы отысь хирургиез. Койкаослэн лыдзы даслы сяна уз буды, но эмъянлэн ӟечлыкез трослы умоялоз. Куке но городлы мэр быръён дыръя медсанчастьысь врачъёс лулысь-сюлмысь куаразэс сётӥзы гажано Анатолий Иванович понна - со туж усто вераськиз уго калыклэн сюлмаськонъёсыз сярысь. Табере тани со адӟиське. Дышетӥсьёс понна "сюлмаськыса" ӝега выль эмъяськонниез усьтон. Но дышетӥсьёс но та кык ар ӵоже ӧз узырме на - котькуд пумитъяськон ужрадэ троллейбусэн мынон понна пунэмаськоно луо. З. РЯБИНИНА. Куарамес сётом Быдӟым Россия понна Удмурт шаерлэн одӥгез дано нылыз - технической наукаосъя доктор, академик Ирина Евгеньевна Синицына. Россиысь "Духовное наследие" общественно-политической движение туннэ солы оскиз Россиысь Кун Думае быръёнъёсъя Урал регионын федеральной списокъя нырысетӥ луыны. Малы "Духовное наследие" движение валтӥсь интые пуктӥз нылкышноез? Культуралэсь но лулчеберлыклэсь азинскемзэ вань дауръёсы герӟаллязы нылкышно шоры учконэн, кыӵе солэн интыез но кулэлыкез та улонын. История вера, вашкала дырысен кышномуртъёс пыриськылӥзы Россилэсь кунлыксэ юнматонэ но азинтонэ. Тодамы ваём Ольга княгиняез, вашкала Русьын христианствоез вӧлмытон ужъёсы пыриськемзэ. Тросэз сярысь вера Россиысь Наукаосъя академилэн президентэзлэн Екатерина Дашковалэн нимыз - солы луыса, ӟуч наукалы дуннее паськыт сюрес усьтӥськиз. Нош ӧжыт-а азинтӥзы Россиез кунгож сьӧрысь вуэм нылкышноос? Кылсярысь, Екатерина ИИ эксэйлы со кыкетӥ дорез луиз. Тодады вае нырысетӥ нылкышно-космонавтъёсты В.Терешковаез но С.Савицкаяез. Советской наука, техника, культура но образование озьы ик нылкышно кужымтэк сокем ӧй азинскысалзы. Со - врачъёслэн, педагогъёслэн, учёнойёслэн, поэтъёслэн, писательёслэн жадёнэз валатэк ужамзы. Нош туннэ мар луэ странаямы? Быдӟым Отечественной война пыр потэм нылкышноослы вӧсь ӧвӧл шат кураськись калэ вуэм Россия понна? Куинь сюрсэтӥ дауре выжон вакытэ кунгож сьӧрысь юрттэт куриськом странаямы кылдэм шуг-секытъёсты палэнтыны. Вӧсь ӧвӧл шат нылкышноослы тус-тас луэм инкуазь узырлыкъёсмы понна но, кураськись, жуг-жаг пӧлын бугыръяськись арлыдо адямиос понна но? Ваньмыз со потэ, вылӥ но улӥ кивалтон ёзъёс бордысен кутскыса. Странамес секыт югдурысь поттон понна ик кылдӥз "Духовное наследие" общественно- политической движение. Кивалтэ соин Алексей Иванович Подберезкин, Россия Федерациысь Федеральной Собранилэн Кун Думаысьтыз депутат, академик, история наукаосъя доктор. Вордӥськиз со Москваысь рабочийёслэн семьяязы 1953-тӥ арын. 15 арескысен ужаз заводын слесарь-электрик луыса. Ветлӥз армие, собере нош ик берытскиз заводэ. ужзэ уретытэк дышетскиз МГИМО-ын. Институтэз дырызлэсь вазь йылпумъяса, отчы ик ужаны кельтӥзы. Собере вал наука удысын мукет ужъёс. 1982-тӥ арын кандидатскойзэ утиз, нош 1990-тӥ арын - калык кусыпъёсъя но военно-политической ужпумъёсъя докторской диссертацизэ. Экономикая, кунгож странаосын кусыпъёсъя но военной политикая 200-лэсь ятыр ужъёс гожтӥз. Кышнояськемын, куинь нылпиосыз будо. "Духовное наследие" общественно-политической движение но солэн азьветлӥсез Алексей Подберезкин вазисько странамылэн ӟеч улонэзлы дурбасьтӥсь нылкышноослы: "Духовное наследие" движенилы, кудӥз ас азяз пуктэ асьме культураез, наукаез, дышетонэз, тазалыкез но ужбергатонэз утён ужпумъёсты, матын но валамон котькуд семьялэн но адямилэн сюлмаськонъёсыз. Декабре ваньмылы асьмелы быръёно луоз. Буш оскытонъёслэсь палэнскыса, котыр ласянь малпаськыса, лыдъяса-чотаса гинэ вамыш лэсьтоно". Россия Федерациысь Кун Думае быръёнъёс меӵак герӟаськемын Быдӟым Россиез улӟытонэн, азьвыл данзэ ӝутонэн. Кин понна туннэ куарамес сётом, со бордысь ик потоз странамылэн улонэз. Мукетыз вамыш - президентэз быръён. Дуннеын валтӥсь дерисава луыны, Россилэн ваньмыз вань - инкуазь узырлыкъёсыз, ужез яратӥсь калыкез, лулчеберлыкез, историез. Играос - азьпалан Пудо возись хозяйствоос пӧлын туннэ котькинлэсь умой ужало играос. Йӧл кысконъя кылем ар лыдпусъёссэ соос ортчо: скаллы быдэ 6,7 килограмм кыско. (Миым - 6,1 кг). Озьыен, ӟечгес сюдо, пудо выжы быгатыса быръё. Синмаськымон ужало Чемошурысь дояркаос. Соос арысь аре азьпал радъёсын ветло. Кыкетӥ интыын мынэ Воткинск район. Татысь фермаос играосын огкадь йӧл кыско. Миым арен ӵошатыса, 200 граммлы ятыргес. Озьы ик азинсконъёсын туала арез йылпумъяло вавожъёс но можгаос, алнашъёс. Соослэсь трослы ик бере уг кылё Завьялово районысь скал кыскисьёс. Нош республикая оглом верано ке, йӧл кыскон та нуналъёсы синӥз. Районъёс пӧлысь тужгес но секыт югдур кылдэмын Камбаркаын, Сюмсиын но Каракулиноын. Татын скаллы быдэ чылкак 2-2,5 килограмм сяна уг кыско. Нош ма луоз тол вылтӥ? Л. ДМИТРИЕВА. Усьтӥськиз выль маршрут Туннэ Ижевскын вордскиз выль автобус маршрут. 33 номеро автобус калыкез нуоз-ваёз М. Гора микрорайонысь чугун сюрес вокзалозь. Со ветлоз котькуд 15 мурт ортчыса. ИПОПАТ таӵе автобус сюресъёс ӵем уг усьтылы. Со шумпотымон, уката ик поездэ дыртӥсьёслы. Г. ВАСИЛЬЕВ. Мэре - куать мурт 19-тӥ декабре пӧсь нюръяськон луоз, шӧдске, Глазов городын. Туннэ нуналлы городлэн мэрез луыны мылкыд каре куать мурт. Со пӧлысь кыкез - предприятиослэн кивалтӥсьёссы. Пӧлазы вань на кивалтӥсьёслэн воштӥсез, банкын ужась, дышетӥсь. кин вормоз, адӟом ни, улыса. Эшъясько, дышетско, шутэтско Сарапулысь нылпи санаториын кыкетӥ арзэ ужа покчи классъёсын дышетскись пиналъёс понна группаос. Соос татын тазалыксэс юнматэм сяна, визь-кенеш но люкало. Озьы витьтон нылпиос выль дышетскон арзэс санаториын мытӥзы. Санаторие лыктэм пиналъёс шутэтскон нуналъёссэс гуртазы но ортчытыны быгато. Ноябрь толэзьысен татын шутэтскыны но эмъяськыны быгатозы ни нырысетӥ классын дышетскисьёс но. В. Андреева. Журналистъёсын пумиськонъёс Ужасьтэм адямиез эмъяло 24 манетлы Кун Кенешысь комиссиос али ужало вуоно арын бюджет дасян бордын. Мар возьма социальной удысэз 2000-тӥ арын? Со сярысь вераськиз Улон-вылонэз радъян политикая, ужъя, тазалыкез но инкуазез утёнъя ялан ужась комиссилэн тӧроез Наталья Алексеевна ХАРИНА. Бюджетысь кӧня уксё висъяськоз та удыслы, со бордысь потоз, кыӵе улонзы луоз дышетӥсьёслэн, эмъясьёслэн, нылпиослэн но анайёслэн. Тазалыкез утёнлы учкемын 37 процент висъяны. Со тырмыт ӧвӧл, шуиз Наталья Алексеевна. Арысь аре асьме республикаын эмъяськон дуногес но дуногес усе. Кылсярысь, одӥг ужасьтэм адямилы (нылпилы, пересьлы, нылпи вайыны дасяськись анайлы) дунтэк эмъяськыны юрттон понна кылем арын бюджетын чакламын вылэм 24 манет гинэ. Мукет улосъёсын ӵошатыса, та лыдпусэз вераны ик возьыт: Татарстанын 300 манет усе, Башкортостанын - 400, Россиын - 220 манет. - Ужасьтэм адямиослэн тазалыксы сярысь сюлмаськыса, милям комиссимы со понна бюджетысь куре 174 миллион манет висъяны, - шуиз Н. Харина. - Соку котькуд ужасьтэм адямилы быдэ 180 манет усёз. Та куронмы улонэ пыӵаз ке, дун тырыса эмъяськон ӧжытгес луоз. Но татын вераськон уг мыны куд-ог ужъёсты дунтэматон сярысь, шуом искусственной пекляос, сюлэм пуктонэз. Сыӵе секыт ужъёсты асьме хирургъёс кемалась быдэсъяло ни. Азьло аръёсы со понна бюджетын нимысьтыз статья учкемын ке вал, табере со ӧвӧл ни. Мар луоз нылпи пособиосын? Та пумысен Н. Харина ивортӥз, ар йылпумъяськытозь, вань тыронъёсты быдэстыны уз луы шуыса. нылпи пособиосты тырон лекос трос люкаськемын: 688 миллион манет. Ярам коть, курадӟись семьяос 1997-тӥ ар понна пособиосты басьтыны быгатозы ик. Пособиосты тыронэ вузкаронысь бичам вытъёс кошкозы. Жаляса верано, шуиз Наталья Алексеевна, бюджетын нимысьтыз коньдон уз висъяськы СПИД-ъя программалы. Со эскеремын Правительствоын, но юнматымтэ на Кун Кенешлэн сессияз. Сахарной диабетэн курадӟисьёслы бюджетысь 7 процентсэ коньдонэз висъяны чакламын. Со но туж ӧжыт. Но та программа. Россиын но, Удмуртиын но кутэмын ни бере, висисьёслы юрттэт вуэ Москваысь но озьы ик кунгож сьӧрысь. Мумы-бубыосты туж сюлмаськытэ таӵе ужпум: воштӥськозы-а дунъёс нылпи садлы тырон понна? Вераны кулэ, та пумысен республикамылэн но Ижевск городлэн кивалтӥсьёссы пӧртэм сямен малпасько. Городлэн администрациез ӵектэ нылпи сад понна тырон дунъёсты ас эрказы лэзьыны. - Талы милям комиссимы чутрак пумит, - шуиз Наталья Алексеевна. - Озьы ке луиз, тросэз анайёс пиналъёссэс нылпи садэ нуллыны уз быгатэ ни. Собере пумен ворсаськозы сыӵе нылпи садъёс, кытчы дун тырытэк али ветло висись нылпиос, кылсярысь, туберкулёзэн висисьёс. Тросэз соос начар семьяосысь. Соин ик комиссиысьтымы депутатъёс ӵекто нылпи сад понна тырон дунэз азьвыл сямен ик кельтыны, али мумы- бубыос пиналзэс нылпи садын воземзы понна 20 процентсэ гинэ тыро. Берло дыре ӵемгес но ӵемгес таӵе юанъёс ӝутскыло: уз-а, пе, луы куд-ог школаосты, больницаосты, нылпи садъёсты выльысь республикалэн бюджетаз берыктыны, Мукет сямен вераса, ас коже кивалтон ёзъёслэн ки улысьтызы басьтыны. Та ужпумез туннэ уногес ӝутыло дышетӥсьёс но эмъясьёс, дыраз уждун басьтымтэенызы сэрен. Зэмзэ ик, куд-ог администрациос уждун тыронлы туж шуген коньдон шедьто, шуиз Н. Харина. Тани Ижевск городлэн бюджетаз но республикамылэн бюджетысьтыз алигес 85 миллион коньдон келямын вал. Озьы ке но, вань куриськисьёсты республикалэн бюджетэз чотын возьыны уз луы. Тӥни озьы: республикаын улӥсьёс али люкемын республикалэн но муниципальной улосъёслэн адямиоссы. Соин ик пӧртэм школаосын ужась дышетӥсьёс но кытын дыраз, кытын туж ӝегаса уждун басьто. Президентлэн Указэзъя 28-тӥ ноябре Россиын пусъёзы Анайлэсь нуналзэ. Республикаямы но солы сӥзьыса пӧртэм ужрадъёс радъяны чакламын. Ортчозы "котырес ӝӧк" сьӧрын вераськонъёс, чай юонъёс. Сётэмын луозы дунтэк консультациос. Шуныт кылъёс вералозы трос нылпи будэтӥсь анайёслы. Но макем бадӟым шумпотон луысал, дыр, та нуналэ вань анайёс шуак уждун яке нылпи пособиос басьтысалзы ке. Но чаклам ужрадъёсын со учкемын ӧвӧл. Т. БАННИКОВА. Ивортон Городысь улон юртъёсын кезьыт улэмен, адямиос дугдылытэк жингыръяло улон интыосъя управлениосы, пӧртэм службаосы, редакциосы, юало, ку луоз шуныт. Соин валче 25-тӥ ноябре радиоын мэриысь, "Удмуртэнерго", "Ижгаз", "Пермгаз" огазеяськонъёсысь, улон интыосъя управлениосысь кивалтӥсьёсын меӵак эфир радъямын луоз. Городын улӥсьёс асьсэлэсь юанъёссэс сётыны быгатозы 512-512 телефонъя. "Акцент" передача кутске 8 час 15 минутэ. ГЕРД Воргоронъёс но нылкышноос ог-огзы сярысь Мар меда малпало туала воргоронъёс но нылкышноос ог-огзы сярысь? Таӵе юанэн мон вазиськи кӧня ке муртлы. Ойдолэ бен кылзэ куд-огезлэсь малпанъёссэс. Зоя Витальевна, 54 арес: - Воргоронъёс-а? Туж тросэз туала пиосъёс зын ву пӧлы выемын. Малы? Яке соос, кузпал шедьтытэк, огназы уло, яке нокин соосты кулэ уг кары. Висё яке эшшо кыӵе ке мукет муген. Кузпалыным трос аръёс улыса, пӧртэм ужъёсты быдэсъяны весяк ачим юрттӥськи. Одӥгзэ но лэсьтоно ужъёсмес монтэк ӧз быдэсъя. Сыӵе-а пиосмурт луыны кулэ? Туала егит пиосты ке верано, мыным тужгес но уг кельшы соослэн чурыт сямзы. Тросэз соос урод сямо будо, нош кыӵе мытылыны ярато. Оло нош милемын гинэ, пересьёсын, озьы выро? Николай: - Нылкышноос - соос возь вылысь сяськаос выллем. Чеберенызы но, аспӧртэмлыкенызы но висъясько. Но малы ке но соос ваньзы идеалзэс гинэ утчало. Уг яра со вылэ гинэ пыкиськыны. Котькуд адямилэн, пиосмурт-а со, кышномурт-а, одно ик кыӵе ке но тырмымтэез вань. Ӧвӧл дунне вылын идеальной адями! Татьяна Валентиновна: - Асьмелэн ӧвӧл рос-прос воргоронъёсмы, "штан пӧськытӥсьёс" соос. Зэмос посмурт луыны кулэ визьмо, интеллигентной, сюлмо, котьмае чаклась. Андрей Владимирович: - Туала кышномурт котьку но аслэсьтыз лэсьтыны тырше. Нош ми, пиосъёс, соослэсь кылзэмъяськиськом ке но, одно ик асьмелэсь кариськом. Кытӥяз мыным соос жаль но пото. Нош мар карод, улон сыӵе. Елена, 21 арес: - "Пиосмурт" кыллэсь ик вань чагыр малпанъёсы сьӧд пилемъёсын вотсасько кадь. Нош мургес малпаськоно ке: вань ук зэмос воргоронъёс но! Жаляса верано луэ - туж ӧжыт. Ӵемгес пумиськыло юись, калгись, уродъяськись, азьтэм пиосъёс. Тани мон быземын но ӧвӧл ай, нош пиослы осконэ быриз ини. Троссэ пиосты мон воксё уг валаськы. Оло, мыным гинэ со секытэн сётӥське. Азьын соос одӥг верало, мышкад - мукетсэ. Кык-куинь чебер кылъёс верало ке, асьмеос шунаськом ини, вань йыркурмес вунэтӥськом. Соин рос- прос малпаськытэк уг луы: герӟано-а улонме сыӵе пиосмуртэн, оло, нош огнам умойгес луоз? Е. МЕЛЬНИКОВА, Удмурт кун университетысь студентка. Калык будэ, асьмелэн кулэсме Туэ 12-тӥ октябре ООН-лэн Генеральной секретарез Кофе Аннан Сараевоын ӟечкылаз Музъем вылысь куать миллиардэтӥ адямиез. Дунне вылын адямиос туж уно вордско - нуналлы быдэ 260 сюрс. Нош Россиын калыклэн лыдыз ялан кулэсме. Росстатлэн ивортэмезъя, 1999-тӥ арын 1-тӥ августлы асьмеос 145 миллион 900 сюрс лыдъяськиськом вал. Туэ ӝыны арскын 616 сюрс нуны вордскизы. Кулӥз 1 миллион 79 сюрс мурт. Кызьы адӟиськом, та дыр ӵоже калык 462 сюрс 500 адямилы кулэсмиз. Россиын уноез уло городъёсын - 107 миллион мурт. Странаямы шоро-куспо улон дыр 66,6 ар лыдъяське. Нылкышноос уло ог 73 аресозь, воргоронъёс - 61,4 аресозь. Гуртоос, городысь адямиос сярысь, пичигес уло. Инкуазь суредъёс Венё бугор Сӥзьыл нюлэс аспӧртэмлыко чебер. Ширъянэз бергаса усё зарнивуам куаръёс. Ворпо "выжлёгет" валемын музъем вылэ. Нюлэс куараосты кылзыса, котырысь инкуазьлы синмаськыса лёгаськонъям ик вӧзтӥм ӵаштыртыса ортчиз ӵушъял. Йылсо нырыныз зынъяськыса, лэчыт синъёсыныз утчалляськыса, кытчы ке дыртэ. Син азям соку ик пуксе пинал дырысь, книга бамысь адӟем но вунэтонтэм суред. Толлы дасяськись ӵушъял, мугорысьтыз веньёсаз бышкалтыса, ас караз улмо, губи нуэ. Нош инкуазез трос эскерыса, пӧйшуръёслэн улэм-вылэменызы тунсыкъяськыса, мынам ноку но таӵезэ адӟеме ӧвӧл на. Амалтэк юан кылдэ: "Яратэ-а ӵушъял улмоез?" Уг, дыр. Инкуазез эскерись биологъёслэн верамзыя, ӵушъялъёс турынэз, пӧртэм выжыосты уг исало. Гажано сиёнзы - нымы-кибы, нумыръёс, куалялюльыос. Уг курдало кыйёсын нюръяськыны, вормо ке, соосын кӧтсэс тыро. Озьы ик сиё эбекъёсты, шырпиосты, тылобурдо пузъёсты, ӵемысь таркало дуринчи, майсы пузкаръёсты. Оло, ӵушъялъёс тэй-пыӵъёслэсь улмоен утисько. Угось чырс улмолэсь соксэ, азьло йырысь тэйёсты уллян вылысь но кутылӥллям. Куд-ог пӧйшуръёс кузьыли карын погылляськыса пыӵъёссэс быдто ук. Но толлы губи я улмо дасямез сярысь мадёс воксё осконтэм. Уго ӵушъялъёс та дыре кӧло. Толлы аспӧртэмлыко дасяське со. Кельшымон кӧс инты шедьтыса, отчы турын, усем куаръёс, ӝуйы нуллэ. Ас валессэ котыртэ сюй комокъёсын. Шораз выдэ но, тулысозьлы умме усе. Солы та дыре сиён кулэ ӧвӧл. Кӧлыны выдо соос октябрь-ноябрь толэзьёсы. Тулыс сайкаса, нырысь ик кӧттыр утчаны кутске "венё" бугор. Кӧттыр утчало уин, нош нуназе куакъёс улын, мырк гуркъёсын ватскыса шутэтско. Кӧттыр шедьтытэк, ӵушъялъёс бырыло но. Нош мугоразы сӥльвир ке ватсаське, сюан шудон сярысь но тодазы усе. Та паймымон пӧйшуръёс ваньзы огӵош сюанзэс уг шудо. Соин ик куартолэзьысен куарусён толэзёзь нюлэскысь, сад-бакчаысь ӵушъялпиосты пумитаны луэ. Атай ас юртаз улэ нылпиосыз югыт дуннее вордӥськытозь гинэ. Собере палэнске, будэтонэ, сюдонэ уг чуртнаськы ни. Ӵушъялпиос синтэм вордско. Нырысь соосты анайзы сюдэ-утялтэ ас йӧлыныз. Берлогес ни, ас вӧзысьтызы инкуазен тодматыны поттэ. Сак эскере нылпиоссэ, медаз кыле, ярантэм сиён медаз веръялэ. Анайзы возьматымтэ, косымтэ сиёнэз чик, пе, уг веръяло. Толэзь ӵоже сьӧраз нуллэмез бере, ӵушъял-анай ас нылпиоссэ быдэ вуэмен лыдъя ни - соос люкисько. Ӵушъялъёс трос пайда ваё, сад-бакчаосысь нымы-кибыосты, нумыръёсты быдтыса. Со дыре ик асьсэлэн но тушмонъёссы тырмыт. Тужгес кышкыт луо соос понна кучыранъёс - соос уг кышкало йылсо нырынызы но гижыосынызы венё бугорез кокчаны. Адями та пӧйшурлы изъян уг вайы кадь. Одӥг тунаськись-эмъяськисьлэсь гинэ кылэме вань - ас ужам, пе, кутӥсько ӵушъял куэз но сӥлез. Николай ТУРИН. Кун Кенешлэн Президиумаз Удмурт Республикаысь Кун Кенеше люкаськемъёс йылпумъянъёс лэсьтӥзы Сарапул ёрос администрацилэн ужамезлы. Дунъет сётӥзы татысь кивалтӥсьёслэн калыклэсь улон-вылонзэ умоятонъя но экономикаез азинтонъя ужрадъёссылы. Ӟечен пусъемын администрацилэн коньдонэн герӟаськем ужпумъёсты ёросысь депутатъёслэн Кенешенызы ӵош сэрттэмез-пертчемез. Соин валче туэ ёрос бюджетэ вытъёс чотын кык поллы уногес коньдон вуиз. Пунэм тыронъёс куамын процентлы кулэсмизы. Бюджетлэн йылэмез луонлык сётӥз гурт хозяйствоын, дышетон, культура, калыклэсь тазалыксэ утён удысъёсын коньдонэн герӟаськем югдурез трослы умоятыны. Нырысетӥ паларен, кылем арын та вакытэн ӵошатыса, ас кужымен лэсьтӥськон йылӥз 139 процентлы, улон интыосты кутон - 2,1 поллы, промышленной предприятиос арлы чакламлэсь 76,3 процентлы быдэстӥзы продукция поттонэз. Бадӟым саклык висъяське ужбергатӥсьёслы но калыкез уже интыянлы. Али гурт удысын тырше 16 эштос, соос пӧлысь ньылез ыштонъёстэк, табыш поттыса ужа. Соин ӵош шараямын тырмымтэос но. Ёрос администрация кулэезъя уг куты югдурез тупатыны вань луонлыкъёсты. Кылемын пунэм тыронъёс республикалэн, интыысь но федеральной бюджетъёсы. Банкъёслэсь пунэмен басьтэмын 628 сюрс манет коньдон. Со сяна, республикаысь Коньдонъя министерстволы берыктоно пунэмен басьтэм 4120 сюрс манет коньдонэз. Арысь аре ёросын ӧжытгес мерттыны кутскизы картошка, ю-нянь, вылӥын поттэм йӧллэн асдуныз. Эскерем ужпумъя Кун Кенешлэн президиумез постановление кутӥз. Ёрос администрацилэн огъя ужамез, куд-ог тырмымтэосты лыдэ басьтыса, умоен лыдъямын. Та постановлениын ик пусъемын: Сарапул ёросын пудолэсь лыдзэ йылэтон но сое бруцеллёз висёнлэсь утён понна, 1 миллион манет коньдон шедьтыны амалъёс утчано. Озьы ик администрацилы ӵектэмын ужаны быгатӥсьтэм, куанер улӥсьёслы юрттонъя 2000- тӥ арлы нимысьтыз программа дасяны. Та кенешын ик юнматэмын вуоно сессиын ужан радлыкезлэн инъетэз. Сессия кутскоз 30-тӥ ноябре. Отын эскерыны чакламын таӵе ужпумъёс: "Республикалэн 2000-тӥ арлы бюджетэз сярысь" законлэн инъетэз но Кун Кенешлэн "Удмурт Республикалэн калыклы улон-вылонын юрттонъя но экономикаез азинтонъя 2000-тӥ арлы программаез сярысь" постановлениезлэн инъетэз. Президиумез нуиз Кун Кенешлэн Тӧроезлэн нырысетӥ воштӥсез Владимир Агашин. Удмурт Республикаысь Кун Кенешлэн пресс-службаез. Тодматӥськом Кун Думае депутатэ ӵектэм муртъёсын Михаил Кошкин: "Москва юрттэ но юрттоз" Кун Думалэн али депутатэз Михаил Кошкин - удмурт шаерамы тодмо адями. Вордскиз Красногорск районын. отын ик кутскиз ужан сюресэз. Глазовысь совхоз-техникумез йылпумъямез бере, "Селеговский" совхозын техник-электрик луиз. Собере быдтӥз Ижысь гурт улонъя институтэз. Ужаз "Июльское" учхозын, кивалтӥз Воткинск районысь Фрунзе нимо колхозэн. Михаил Петрович вал партилэн Воткинск райкомезлэн нырысетӥ секретарез, райисполкомлэн тӧроез, 1993-тӥ арын луиз гурт улонъя министр, нош 1996-тӥ арын Кун Думае депутатэ быръемын. Со радъя Аграрной комитетлэсь бюджетно-кредитной политикая подкомитетэзлэсь ужзэ. Туннэ меӵак вераны кулэ, Россиысь вылӥ быръем ёзын ужан каньылэн уг сётӥськы. Куд- огез со ныпъетэз уг вормо, но данакез депутатъёс ваньзэ лэсьто, бырйисьёссылэсь улон-вылонзэс умоятон, соослы юрттон вылысь. Сыӵеосыз пӧлы пыре асьмелэн депутатмы Михаил Кошкин. Со сюлмаське Удмуртиысь ю-нянь будэтӥсьёс, пудо вордӥсьёс но быдэс республикаын улӥсьёс сярысь. Кызьы бен Михаил Петрович ужаз законъёс дасян бордын? Нош соос ваньмыз герӟаськемын гурт улонэз выльдонэн-азинтонэн. Тӥни соин ик Михаил Петрович быръемын Россиысь Аграрной партилэн Валтӥсь (Центральной) кенешаз. Валамон, со юрттэ депутатлэсь ужзэ умойгес быдэсъяны. Аграрной партиын пӧртэм мылкыдъёс вань ке но, данакез ог-огзэс ӟеч валало, гурт понна ваньзэ лэсьтыны тыршо. Нош огъя кужымен, дэмен котькыӵе секыт ужпумез быдэстыны луэ. Кун Думаын но огназ депутат трос уз лэсьты. Тани, кылсярысь, гуртысь депутатъёс гурт удыслы 5,5 миллиард манет уксё висъяны куризы. Вуоно арлы бюджетэ сыӵе лыдпус пыртэм бере гинэ со умоен лыдъямын вал. Ватсаны кулэ, Михаил Петровичлы огшоры депутатэн ӵошатыса, капчигес йӧтэ вал социальной удысысь ужпумъёсты улонэ пыӵатыны. Кылсярысь, Дума ӟеч закон, программа кутӥз. Но сое быдэстыны Коньдонъя министерство уксё "висъяны" вунэтэ, уката ик гуртэн герӟаськемъёсызлы. Соин ик депутатлы ваньзэ син азьын возёно луэ: закон дасянэз но, сое быдэстонэз но. Тани Кун Дума учкиз "етӥн" програмамез. Та дуно культура будэтонэз умоятон вылысь, Правительство уно коньдон висъяны чаклаз. Но кызьы сое басьтоно? Михаил Кошкин дырзэ но, кужымзэ ӧз жаля: уно пол ветлӥз Гурт хозяйствоя но сиёнъя, Коньдон ужпумъя но Экономикая министерствоосы. Федеральной программае пыртоно вал Удмуртиез но. Депутатлэн бызьылэмез юнме ӧз луы, республикамы со программае шедиз но, Зураысь етӥн шуккон заводлы 2,5 миллион манетлэсь уно коньдон висъямын ни. Тае бен вераны гинэ капчи. Нош пуктэм ужпумез йылаз-пумаз вуттон вылысь, депутатлы министерствоосын уйшорозь пукылоно луылӥз, питранэ кыӵе гинэ пыкетъёс ӧз пуктылэ. Но Михаил Кошкин ваньзэ вормиз, гурт улонэз ӟеч тодэмзэ возьматылӥз но Москваысь чиновникъёс соин соглаш луылӥзы. Депутатлэсь ӟеч ужъёссэ вераса но уд быдты. Михаил Петрович юрттэ гурт хозяйствоослы кысык бусы ужъёсты быдэсъяны, переработчикъёслы выль оборудование басьтыны, трос кужымзэ сётэ гуртын нимаз лэсьтӥськонэз радъянлы (куто "Ипотека сярысь" Закон). Со син азяз возе Ижысь кардиоцентрез, "Ува" санаторий лэсьтонэз, шаерысьтымы вылӥ дышетскон заведениосты, Як-Бодьяысь ӧлексы нылпиослэсь санаторийзэс. Нош кыӵе шуныт, тау карон кылъёс верамын вал Вавож районын гурт удысын ужасьёслэн праздниксылы сӥзем сӥё-дано кенешын. Михаил Кошкин угось пленысь мозмытыны юрттӥз вавож пиез. Солэн анаез шумпотон синвуосын шуиз: "Асьмелы таӵе депутат кулэ". Бен, Михаил Петрович ас азяз сылӥсь вань ужпумъёсты ӧз быдэсты на. Но со выльысь Кун Думае шедиз ке, лэсьтымтэзэ одно ик улонэ пыӵатоз. Тани гуртын нимаз лэсьтӥськонэз кужмоятон вылысь, шаермылы коньдон висъянэз радъяны быгатоз. "Ипотека сярысь" Законъя гуртын улон инты ӝутыны 20 арлы кредит сётӥськоз (процентэз бадӟым уз луы). Тужгес но со кельшоз егит специалистъёслы. Озьы гурт пала берытскозы мукет егит семьяос но. Михаил Кошкинэз Думае бырйизы ке, со юрттоз АПК-ен герӟаськем вань программаосты улонэ пыӵатыны. Озьы ӝоггес азинскозы пичи городъёс но райцентръёс. Гурт калык дыраз басьтоз уждун, коньдон вуоз Пенсиосъя фондэ, вань бюджетъёсы. Озьыен, умойгес луоз дышетӥсьёслы, врачъёслы но социальной удысысь вань ужасьёслы. Огъя вераса, Михаил Петрович Кун Думаын депутат луиз ке, со одно ик сюлмаськоз Удмурт шаермес азинтон но экономикамес юнматон сярысь. Тӥни соин ик герӟаськемын депутатлэн пргограммаез. Со чакла калыклы тырмыт но ӟеч сиён-юон сётыны, инкуазез умоятыны но ВПК-ез юнматыны. Сотэк кунмес, калыкез утьыны ум быгатэ. Михаил Петрович таӵе малпанэ юнме шорысь ӧз вуы. Со гурт удысын быдэсъясь но быръем ёзъёсын 25 ар ужаз, нош 1995-тӥ арысен - Кун Думаын депутат луыса. Кызьы бен со малпа сиён-юонъя ужпумез быдэстыны? Нырысь ик, воштоно луоз выльдӥськон сюресэз, кутоно мукет ужрадъёс, утёно гурт удысэз, кылдытоно нормативно-правовой инъет. Михаил Кошкин оске, эшъёсыныз ӵош со быгатоз таӵе ужпумъёсты улонэ пыӵатыны. Депутатлэн программаяз бадӟым инты басьтэ инкуазез утён. малы ке шуоно, Россилэн химической ож тӥрлыкез пӧлысь 30 процентэз Удмуртиын кылле. Асьмеос трос кыскиськом му вӧй, 80 процентэз предприятиос ож тӥрлык потто. Ваньмыз со омырез, музъемез кырсёмытэ но калыклэсь тазалыксэ уродмытэ. Соин ик тая нимысьтыз законъёс кутоно но адямиосты утёно. Куинетӥез, странаез утён вылысь, армиез юнматоно но военно-помышленной комплексэз (ВПК-ез) улӟытоно. Со понна та удысэн герӟаськем программаосты быдэсъяно. Со понна Михаил Петрович юнэсь кусыпъёс возе министерствоослэн но ведомствоослэн кивалтӥсьёсыныз. Максим Исаев. Печатланы дунтэк инты сётэмын М. П. Кошкинлы. Лушкало... чагыр эстӥськонэз Кызьы гожтэ "Ставропольская правда" газет, правоосты утён ёзъёслэн сюлмаськонъёссы эшшо йылӥзы. Берло дыре ышылыны кутскизы газ сётӥсь трубаосысь конденсатъёс. Та толэзь ӵоже гинэ, "Вихрь-антитеррор" операция мыныку, куинь таӵе учыр шараямын. Лушкаськисьёс туж капчи амал шедьтӥллям: трубаосты портыса, чагыр эстӥськонэз огшоры баллонъёсы кыско. Нош соосты капчиен вузало калыклы. Уго та баллонъёс тупало коркаосысь газ плитаослы но. Иворъёсъя национальной служба. Николай НИКИФОРОВ Нылйыр кускерттон Верос Капка борды юнматэм почта ящикез дышем сяменым синйылтӥ но огназ мӧзмылэс кыллись сяськаё открыткаез учыртӥ. Чебересь льӧльмыт роза сяськаослэн улӥязы огазеям кык зарни зундэсъёсты адӟыса валатски: сюанэ ӧтён гожтэт ук та! "Выжы-кумамы кин-о кузъяське меда?" - ыстӥсезлэсь адрессэ учкыны дыртӥсько. Син азям соку ик Каксялась ӵужапаезлэн нылыз пуксе. Огпол адӟыса-пумитаса но сыӵе муспотон нылмуртлэсь тусбуйзэ уд вунэты ни. Удмуртъёс сыӵеосты чеберай нимало. Такъян ӵужапае шудонысен шедьтэм нылзэ огназ будэтӥз. Шонерзэ ке верано, ас гуртоосызлы, ӵыжы-выжыосызлы гинэ но ӧз шарая нылызлэсь атай луоно адямизэ. Сельсоветэ вордӥськем гожтэтэзлы (свидетельствоезлы) ветлыкуз но "атай" пусъетсэ буш кельтыны ӵектӥз. Соин ик, аръёс ортчемъя, Анок нылызлы кинэ но атай ӧз карылэ ни?! Пинал мурт будэмъяз уго тусбуйзэ воштэ. Такъянэн ӵош валъёсты сюдӥсь Педор Максимез но сьӧлыказы, пудо першаллэсь Косьтэй Петырлэсь тусбуйзэ но шедьтылӥзы кадь пичи нылаш бордысь, бускель гуртысь бигер воргоронэз, колхозазы зоотехник луыса ужась Табрисэз но кыл вукоязы трос "изӥзы-нажгатъязы" Какся кышноос. Супыльтонъёслэсь курдатэк, исась-ултӥясь кылъёслы ӧчкарыса музэн, арысь аре чеберскыса быдэ вуыны тыршиз Галаш Анок. Оломар муген ас эшъёсызлэсь пӧртэмгес вал нылаш. Огъёзъёсыз кильтыро дӥсяськыса ветлыку но анайзэ чебер дӥськутъёс басьтыны ӧз курылы. Пиналысен ик вуриськон машинаен ужаны дышиз. Аслыз кельшымон дэрем но, юбка но вуроз, ыжгонлэсь чебер кофта но керттоз. Ваньмыз ас сюлэмызъя, эшъёсызлэсь пӧртэмгес. Какся нылъёс кышет нуллыку но Анок аспӧртэм берет вурыса нуллӥз. Вылӥ классъёсы вуыса ни, эшъёсыз ӝыт шудонъёсы потаку, Анок дораз книгаос лыдӟыса пукылӥз, керттӥськылӥз-пужъятскылӥз. Ай эшшо, школаез азвесь медален йылпумъям вылысь, вань калыкез паймытыса, гуртаз кылиз но колхозысь скалъёсты кыскыны басьтӥськиз. Тусбуен чебер вал со. Веськрес палэзьпу кадь мугорыз, сюсь кадь суй-пыдъёсыз. Ӵужпыръем йырсиез бидыръяськыса* улэ, лызмыт синъёсыз валантэм тылсиос пазяса кырмышъяло. Гуртын улӥсь адямиез трос синъёс лушкем эскерыса-чакласа будэто. Со синъёс, ӟечезлы шумпотыку, шунды сиос музэн, шӧдонтэм улсын гинэ вешалозы-мусоялозы тонэ; со синъёс ик, рентгент сиос музэн, ӝогак шараялозы "висёндэ" - урод сямъёстэ. Нокытчы ватскыны. Уй-нунал сак эскеро, сӥсъяло, порто гуртоослэн сак синъёссы. Куке но янгышаса лэсьтэм вамыштэ но уз вунэтэ, ӟеч ужъёссэ но, трослы мултэстыса, ымысь ыме, пельысь пеле выжыятыса возёзы. Ма, тани Галаш Такъянэз ик басьтом. Ужез гажась, колхозын азьмынӥсь скал кыскись луэмзэ чаклатэк, юртъерзэ воргоронтэк но йыг-йыг возьыны быгатэмез шоры учкытэк, Какся кышноос ушъян кылъёс вераны ӧз дыртэлэ. Тодазы на уго шудонысен сюты анай** кариськемез. Йыркурзы уг тӧлӟы на. Кин-о тодэм Такъянлэсь кинэн кыштыртэмзэ? Оло, кудзылэсь ке картсэс небыт валесаз мусояз? Вожъяськылӥзы кышноос Такъянлы, лушкем вожъяськылӥзы. Кышномурт чебереныз но палёмытылӥз соосты, йӧн-йӧн ужаны быгатэмез но кыл йылзэс чепылляз, пиосмуртъёсын огкыл шедьтэмез но могӟытылӥз. Соин ик, муг шедьыку, уж дуразы керетон пуромылыку, Такъянэз "ӟеч" кылъёсын "данъяны" тыршылӥзы. Кушем ним лякыны сюлмаськонэз ӧй вал - тырмыт гинэ: сюты анай но, бызьыылӥсь коӵыш но, быжтэм ӟичы но... Ваньмыз одӥг мурт, мискинь кышномурт - Галаш Такъян. Ваче керетонъёсы туж ик ӧз пыриськылы Такъян. Сюлэмзэ адскисьтэм коӵыш гижыос вирӟектымон ӵабъяло ке но, кунэрес пальпотоз, скал кыскон ведразэ капчияк ӝутоз но, кышноосты "пӧсьвуаса", ӟуч кырӟанэз мытоз. Ведра борды шуныт йӧл чызйиськемен валче, чебер куараез пельёсазы шуккиське ни: Огней так много золотых На улицах Сарато-ва. Парней так много холостых, А я люблю же-на-то-го-о. Анаезлы юрттӥськыны лыктэм Анок но кылытэк-адӟытэк ӧз улы таӵе керетонъёсты. Анайзэ жаляса, секыт лулӟылоз, мурт синъёслэсь ватскыса, бам кузяз бычырась синкылиоссэ ӵушылоз вал. Бератаз ас азяз бадӟымос ужпум пуктӥз кадь: "Синчеберез кадь утё ас ныл данме. Кузпаллы бызьытозям, нокин исаны медаз дӥсьты нылдыр кускерттонме***. Гуртооссы азьын ас сабырлыкеным, йӧно вуриськеменым, ужез гажась луэменым огӵош анаелэсь яратонэн сэрен куке но киргам данзэ вылӥе ӝутыны мед быгатом. Юг кизили музэн, выльысь мед воректоз Галаш Такъянлэн данэз но". Егит нылмурт али мытэ ук улон сюрессэ. Ваньмыз азьпалан на: шумпотон но, дан но, яратон но. Палэнэ уз кыле курыт синвуос, сюлэмез ӵушкась куректонъёс но. 2. Луэ сыӵе вакыт: сад-бакчаысь вань емышъёс октэмын ни. Выль тулысозь шал-шал буш, син чебертэк кылемын. Нош синмаськыса учкыку, синъёсты палёмытыса, ӵужо-гордо куаръёс пӧлысь воректэ сакырӟем улмо. Шунды сиос улын котыр ласянь пыжыны-кисьманы вутскем ни со, пушказ шербет вуэзлэн, пукетэм мусурлэн сямен, лушкемен кужгетэмез- чыпыртэмез ик кылӥське кадь. Ваньмызлы шуд уг усьылы сыӵе ческытэн гусъяськыны. Шерак гинэ шудоосызлы, вылды, пумиськылэ инсьӧр кузёлэн саламез - узьмагысь**** улмо. Таӵе емышен ӵошатыны луысал, дыр, Галаш Анокез но. Эшъёсыз, огъёзъёсыз, кузпаллы бызьыса, чеберлыксы сяськаослэн музэн тӧлӟыса, емышъёсын быгыльскыны вутскизы ни. Еж чебер нылъёслэн мугорзы йыг-йыг пуксьыса ӧз ву на. Вань Какся воргорон, ӟыгыт***** синъёсты шумпоттӥсез Галаш Анок гинэ кылиз, кожалод. Бадӟым зарезен ӵошатыны дӥсьтысал мон нылмуртэ. Сыӵе ик эрико, котькинлы муспотымон, со дыре ик матэктыны но курдалод: бугырес, кышкытлык кузьманы дась луэмез шӧдӥське кадь. Кутоз но ас вуберганаз кыскоз. Казакпиос ӧжыт ӧз бергалэ Анок котырын. Шудон пӧлысен келясьёсыз, кизэс но сюлэмзэс ӵектӥсьёсыз тырмыт вал. Нош Анок вӧзаз матэктыны ӧз лэзьылы, ӵушъял музэн пештырскылӥз. Уго солэн син азяз, анаезлэсь ыштэм ныл данзэ малпаса, вань пиос кырсь, кас сюлэмоесь йӧтылӥзы. Кожалод: соос Аноклы ваньзы урод лэсьтыны турттылӥзы. Пиослэсь палэнскон мугзэ огсямен гинэ валэктылӥз: "Анае висьыса улэ. Уг бызьы". Озьы шара вералляз ке но, нылмурт сюлэмез лушкемен чепылляз ик: "Ма, неужто, кинэ ке сюлмысь яратыса, семья кылдытыны уг быгаты? Тусын-буйын но шуш ӧвӧл, ужаны но йӧндырисько кадь. Нош анайме кадь, сантэмаса, кулэтэм арбериез музэн палэнтӥзы ке?" - кышкыт юанлэсь вань пигонъёсыз ик пештырскылӥзы... Шумотэ****** мунчое котьку огназ ветлыны тыршылӥз Анок. Тыр мугорзэ кызьпу веникен лыч-лыч пароз но, сарачае потыса, юзмыт омырен шокалоз. Мунчое берытскыса, кускызлэсь улӥе лэзиськем йырсизэ сыналоз, кияз синучкон басьтыса, кема мусояса сылоз ас мугорзэ. Со-а чебер ӧвӧл? Вуныл кадь мусо адске ук. Сяртчы кадь тыр мугорыз, ток-торокесь гадьёсыз сокен пачыласа токторскемын, макес-кукъёсыз вольытэсь но буй-буй небытэсь, Венераен - яратонлэн инмареныз - кузьмам лычсузён гопез но баблес гонъёсыз киез бичато. Ай эшшо но дуноез калык синъёслэсь ватэмын: нылдырзэ уте, нылйыр кускерттонэз исамын ӧвӧл на. Нош дыртӥсь аръёс нокинэ витьыса, возьмаса уг сыло. Лобӟо-ширто соос, ыр тӧлъёсын ӵошатскыса, уй-нуналъёсын вошъяськылыса. Аноклэн но яратон висёнэз сюлэмаз выжыяськиз кадь. Озьы уго: яратон висёнлы укша - макем кема уд шараяськы сое, сокем кышкытгес кариське со, эмъяны но кема дыр кулэ. Удмурт кырӟанъёсын егит ныл даурез сяськаен юнме уг ӵошатыло, луоз. Сяськалэн чеберлыкез сямен, адями чеберлык но лушкемак тӧлӟе ук. Сое шумпотыса учкись но мусоясь но уг шедьылы ни. Зэм, сюлэм чеберлык гинэ гумырлы кыле. Галаш Анок зарезьысь шормуӵе огназ шедиз, кожалод. Ӧвӧл ни кадь шораз "сиёно" кадь учкись ӟыгыт синъёс, мусо кылъёс уг шыпыртыло ни ӝытъёсы. Котыраз шалак буш кариськиз. Огназ кылиз Галаш Анок ас нылдан кускерттонэныз валче. 3. Луыло сыӵе дыръёс - адями кыклы-куиньлы люкиськыны курадӟе. Быгатысал ке, ньыль киё но, ньыль пыдо но кариськысал, вылды. Ас мылкыдызъя таӵе пӧрмытсконэз радъяны ке но быгатӥз, сюлэм лул-кужым пумитъяське та секыт адӟонлы. Турнан дыр вуыса, Галаш Анок но унё-ванё кариськиз. Дорысьтыз ужъёссэ ӝогак быдэстэ но фермае дыртэ. Кыскем скалъёсты кутьылыке келяса, кусозэ чаляк гинэ кутэ но тэль дурысь нёжалэ дыртэ. Отын соослэн колхоз висъяса сётэм турнан интызы. Анаеныз ӵошен дыртытэк турнало соос. Одӥгез арлыдо ни кусоен йӧн-йӧн шонаськыны, мукетыз уж дурысь вазь ӵукна ик жадьыса вуэмын. Ма, сокем дыртонэз но ӧвӧл кадь. Куазь шундыё, чебер возиське на. Кускозь ик ӝужамын туэ турын. Мукетыз гинэ сюлэмшугъяськытэ кышноосты: турнан интыязы арысь аре виртурын тросгес аля. Нош сое, адями понна эмъюм ке но луэ, пудоос уг сиё: ядо турын. Ез кадь чурыт модосо будосэз лэчыт эголам-шуккем кусо но ӟеч уг ванды - ӝог ныжоме. Соин ик Такъянлы кусоосты ӵемгес шукконо луэ, Аноклы - вань кужмысь шонаськоно. Кыкетӥ нуналаз ни, мытэм удыссэс пырпотон азьын, нылмурт, ӵемысь дугдылыса, куссэ кутылыны, кӧтсэ маялляны кутскиз. - Жадемдэ шӧдӥд-а, нылы? - вӧзаз матэктӥз анаез. - Озьы уго: турнан уж нюлэс коран кадь ик секыт, трос кужымез кулэ каре. Скалэз эн ворды вылэм - йыр кур. Карын улӥсьёс музэн дауртомы шат? Ай кужыммы вань дыръя каллен-каллен ӵабъяськомы. Курег гинэ но ӵабъяськытэк кӧттыр уг шедьты. - Жадёнлы гинэ чидатскысал, анай. Кышкатски ай тани: маке-маке висён чер уг йӧты меда? Воксё ӟигартэм******* кыли, кӧт урдэскам маке лекос бышкалля. - Остэ-э! Синтэм сюлыд********, оло? - кушетскиз Такъян но. - Инмаред мед утёз. - Ойдо ай, дор паламы вамыштом. Медпунктэ ветлыса утчало. Фермаен кивалтӥсьмылы но ивортытэк уз луы. Воштӥсь мед утчалоз. Галаш Такъян арлыдо чиган кышно музэн тунам: нылзэ ӝегатскытэк Сюмсиысь больницае келязы, нош ӝытазе ни, операция лэсьтыса, синтэм сюлзэ вандӥзы. Куасьмем турынзэс люканы-мажсаны, сенике ӝутъяны юрттӥзы бускельёсыз, Аноклэн ӵош ужась эшъёсыз. Шуг югдуре шедем адямилы кызьы-о юрттӥсь кидэ мычытэк? Угось котькинлэн но адӟонэз пыд азяз поръяса берга, ӵуказе мар луонэз, инсьӧр кузё сяна, тодӥсь ӧвӧл. Сыӵе югдуре кин ке шедёз но(тьфу, тьфу: инмаред мед утёз), аслыз но юрттыны лыктозы ук Галаш Такъянэн Анок. Анок, пыд йылаз султыса, каллен-каллен лёгаськыса коридоре потэмен валче, гуртоеныз, Зылка Сергеен, ваче син луиз. Врачъёс сюлэмысьтыз шексэ, пе, шедьтӥллям. Эмъяськыны койкае кельтӥллям вылэм. - Чебер нуналъёсты, уж вакытэз чаклатэк, четлыке пытсазы тани, - ӝожскиз со Аноклы. - Чер ужез, кысык вакытэз юа шат? - укно вӧзы вамыштӥз Анок. - Ачим но бурдъёстэк дорам лобӟысал, дыр. Пудо сиён дасяса вуттӥды-а, Сергей? - тунсыкъяськытэк ӧз чида нылмурт. Озьы ни со адямиен: висе ке но, ӵуказе нунал, азьпал улонэз сярысь сюлмаськонэн биниськыса улэ-вылэ. - Агай-кенакъёсы юрттозы, дыр. Соослы оскисько. - Озьы, озьы. Ӵыжы-выжыосыд трос бере, юрттӥсьёс шедёзы. Та сярысь тынад сюлмаськонэд ӧвӧл. - Сюлмаськонтэк адями улыны быгатэ шат? - пумит кариськиз воргорон. - Нылы но пие сярысь уй-нунал кайгырисько тани. Селталась гужем лагере келяса вуттӥ вал. Доразы ветлӥсьёс но уз луэ ни. Мӧзмо, дыр, мискиньёс. Воргоронлэн бурмисьтэм яраяз янгышен "йӧтскыны" шедьтэмзэ валатскыса, могак кариськиз Анок. Кин-о малпаз вал, вераськонзы Сергейлэн кузпалэз вылэ выжоз шуыса? Зылка Сергей колхоз мастерскойын токарь луыса тырше. Киоссэ котьма ужлы устоен лыдъяло. Тӥр-а кутэ, корт арбериез-а бергатэ-лусъе - одно ик йӧнлы берыктэ-пӧрмытэ. Тусбуен сокем ик чебер уд шуы воргоронэз. Таза, паськыт пельпумо. Йырсиез гордпыръем ке но, мыйыксэ чиль сьӧд нуллэ. Курень синъёсыз чылкытэсь, шораз учкыса, янгышен пыдэстэм дуннее выйыны шедьтод. Бадӟым но ӧжытак купырскем нырыз шунды ӝужан палась калыкез тодэ уськытэ. Кыллы но ужлы сямен ик шаплы Сергей. Арлыдоеныз но, егитэныз но огъя кыл шедьтоз. Семья улонэз гинэ пилиськыса-таркаськыса кошкиз тани. Аля кузпалэз Ижысь гурт улонъя академиын дышетске ке вал, ас курсысьтыз егит пилы синмаськыны вутскем, йӧнтэм. Кык эгызо********* нылпиоссэ картэзлы кельтыса, сюан шудыны но дӥсьтӥз, шакшы лул. "Яратымтэ, гажамтэ бере, малы-о бызёно вал Сергейлы? Малы нылпиос вордоно но соосты шудтэм кароно?" - огымысь куарето гуртоосыз. Арлэсь ятыр кузпалтэк улэ ни Зылка Сергей. Гуртысьтыз но, палэнысь но утчам- курамез уг кылӥськылы. Зэм, ас понназ малпаське, лушкемен чакла, луоз. Ӵемысь уго адями ас лушкем малпанъёссэ бурдъяны, шараяны уг дырты. Зылка Сергей ӵемгес но ӵемгес вуылыны кутскиз Аноклэн палатаез вӧзы. Я сиськонниысен вӧзаз пуксьыны тырше, я больница азбарысен пумиськыны муг утча. Кыл бордысь кыл потэ, кабан улысь шыр потэ шуэм сямен вераськыса, кенешыса, Зылка Сергей нылмуртлэн сюлэм крезьгур сӥяз но йӧтскыны дӥсьтӥз. Лушкемен дзинь! жингыраз кадь Аноклэн вирсэрез. Ма, воксё юанэз ик мугорез сутӥсь, тылтэк ӵушкась вал. - Анок, паймисько мон тыныд: малы-о кузпаллы уд бызиськы? Угось, сяськаослэн музэн, ӵапак емышъёсын быгыльскон вакытэд. - Курасьёс ӧвӧл, Сергей, - кильтыро серектӥз вал нылмурт. Бӧрысь ватсаз на: - Югыт дунне вылэ нокинлы ярантэм вордӥськиськем, лэся. Сяськаос пӧлы янгышен ӝужам кыйбоды выллем ӝутскиськем. - Э-э, озьы эн шу, Анок. Мон синтэм-пельтэм ӧвӧл. Котырад ӧжыт казакпиос бергазы шат? - Шонерзэ вераса, аслам яратонэ монэ ӧз басьты, курасезлы сюлэм ӧз бурдъяськы. Кымысам инмарен гожтэмез сыӵе, вылды, анае сямен ик огнам улыны, веканы. - Жаль, ӧжытак вазьгес вордӥськиськем. Мон ёз ке луысалыд, одно ик курасьёс ыстысал. - Пересьмид ни шат? - кильтыро серектыса, интыысьтыз ӝогак султӥз но палатаез пала вамыштӥз нылмурт. Та вераськонэз Зылка Сергей юнме шорысь ӧз мыты вал. Ныл сюлэм - зарезе визнанзэ куштыса эскероно кариз. Зыгатоз-а, уз-а? Солэн угось чебер вӧтъёсыз но шудоесь малпанъёсыз кемалась ни Анок сярысь. Нылпиосыз вань вылысь гинэ кышкаса-курдаса улӥз. Тюрагай - инбамын, уӵы - писпу вай вылын шуэм сямен, котькуд бурдо кадь ик адями но ас интызэ тодыны кулэ. Кӧлыны выдыса, валес вылаз кема малпаськыса кыллиз Сергей. Ас понназ шудо мынектӥз на: "Уть ай, сизьым ареслы арлыдогем ке но, мӧйыэн уг лыдъя". Таӵе валатскон солы дӥсьтонлык но осконлык кузьмаз кадь. Нунал пӧрат, усто гитарист музэн, Аноклэсь сюлэм сиоссэ капчиен жонтылӥз-бичалляз Зылка Сергей. Арня ортчыса, соос кузъяськон сярысь чылкыт но жингырес гурзэс кык куараен мытӥзы ни. Анок кык нылпиослы анай кариськыны, сое воштыны соглаш луэмзэ вераса лулскиз гинэ: "Адӟонэ, инмарен гожтэмез сыӵе, дыр, Сергей. Ог-огмес валаса ке улӥмы, вань шуг- секытъёсты вормыны быгатом". *** Сюаназы трос калык ӧй вал. Кыкласянь ӵыжы-выжыоссы, ӵош ужась эшъёссы. Шулдыръяськон йылпумъяськон азьын ни Галаш Такъян ачиз но кырӟан мытыны дӥсьтӥз: Васькод ук али, васькод ук али, Ӵукна султыса, вуэдлы, ай-кай. Малпаськод али, малпаськод али, Анаед дорын улэмдэ, ай-кай. Аноклэн синдуръёсаз лысву кадь дун синкылиос кугӟазы. Шумпотон синкылиос-а, куректон синкылиос-а вал со - тодмо ӧвӧл. Оло, туннэ уин Зылка Сергейлы "вузано" нылдыр кускерттонэз сярысь тодаз ваиз?.. *Бидыръяськыса - бабыльскыса. **Сюты анай - шудонысен нылпи шедьтэм анай. ***Нылдыр кускерттон - нылйыр, пояс верности. ****Узьмаг - рай. *****Ӟыгыт - егит пи. ******Шумот - кӧс нунал, суббота. *******Ӟигартэм - кужымтэм, катьтэм. ********Синтэм сюл - аппендикс. *********Эгызо - парен, ӵошен вордскем нылпиос. "Улэп коньдон" жильдо Азьло аръёсы Балезиноысь "Агропромхимия" огазеяськонын ужасьёслэн толалтэ но ужзы тырмыт вал. Ваньмыз сямен техника бусыосы торф но кыед ворттӥз. Но улонын ортчись выльдӥськонъёс та удысын но шӧдӥськытэк ӧз кыле. Табере "Балезиноагропромхимия" огазеяськон ужтэк кылиз. Унозэ машинаосты луо но кӧльы ворттонын ужато Глазовысь но Балезиноысь сюрес лэсьтӥсьёс. Нош куд-огез "улэп коньдон" лэсьтэ, калыклы кыед нуллыса. Сое вортто Мичурин но Ленин нимо колхозъёсысь. Одӥг КамАЗ машинаен ваем кыедлэн дуныз 250 манет сылэ, нош посёлоклэн палэназгес нуэм понна - 300 манет. Озьы ке но, сад-бакчаосазы музъемзэс кыедэн узырмытыны мылкыд карисьёс уно. Е. ПЕТРОВА. Удмуртлык, удмурт культура сярысь туж трос вераськиськом. Но малы ке но анай кылын потӥсь газет-жрналъёсты ум синйылтӥське. Со тужгес но шӧдӥське интеллигенция пӧлын. Басьтом Ижевскез ик. Кӧня визьмо удмурт калык улэ городын, нош газетмылы гожтӥськисез таяз арын 176 мурт гинэ. Нош удмурт изданиос пыр ик трос ужпумъёсты быдэстыны луысал. Газет-журналъёс вылын туннэ кӧня ке манетмес шыръялом, нош ӵуказе номыре луоз удмурт кылын лыдӟыны. Гожтӥськон - 2000 Дыртэ, эшъёс, почтае! Газетъёслы но журналъёслы гожтӥськон азьланьтӥське, но ӝоген со йылпумъяськоз. Кин тунаса пуке на, дыртэлэ почтаосы. быдэс арлы ке гожтӥськыны шугъяськиськоды, басьтэ газетмес ӝыны арлы. Азьланезлы нош ик кыӵе ке инвис ӟаректоз. Кин тодэ, 20-тӥ декабрёзь гожтӥськыса вуттӥды ке, оло, шудо лыдӟисьёс пӧлы но шедёды. Сяме пыриз ини, газетмылы гожтӥськисьёс пӧлын лотереяен шудон ортчытъяны. Таяз арын но шудозэ лыдӟисьмес возьма оштрак - Пичи Пурга но Кизнер ёросэ кыкез йыромыса кылизы ни. Таяз арын лотереяен шудон радъяломы газетмес тужгес трос вӧлмытӥсь почтальонъёс пӧлын. Шудытэмын луозы мотоцикллы прицеп но мукет кузьымъёс. Лыдӟисьёсмес шумпоттэммы потэ эшшо одӥг ӟеч иворен. 2000-тӥ арын газетмес тужгес но трос басьтӥсь ёросъёс пӧлын радъямын луоз ӵошатскон. Вормисе потэм ёросысь лыдӟисьёс пӧлын лотереяен шудон ортчоз, кузьым - мотопомпа (ву кыскись насос). Та кузьым понна нюръяськыны луонлыкъёссы вань: Алнаш ёрослэн - таяз арлы газетмылы гожтӥськиз 1870 мурт; Пичи Пургалэн - 1867 мурт; Можгалэн - 1327 мурт; Шарканлэн - 1543 мурт. Соослэсь пыдберзэс лёгало балезиноос - 705 мурт но играос - 606 мурт. Мукет ёросъёсын гожтӥськон лябгес мынэ. Кудпала кошкоз кузьым, соиз сярысь лыдӟисьёс асьсэос но сюлмаськыны кулэ. Котькудӥзлэн вань бускелез, тодмоез, ӵыжы-выжыез. Тросэз соос пӧлысь газетэнымы, оло, тодмо но ӧвӧл. Юрттэ соослы удмурт газетэн эшъяськыны. Нош таиз ивор Ижевскын улӥсьёс понна. 6-тӥ декабре ӝытазе 5 часысен удмурт драмтеатрын ортчоз "Удмурт дунне" газетэз лыдӟисьёсын пумиськон. Шаерысьтымы Почта кусыпъёсъя управлениен ӵош городын улӥсьёс понна 4-тӥ-5-тӥ декабре ялӥськом "Гожтӥськисьлэсь нуналъёссэ". Соос пӧлын 6-тӥ декабре шудытэмын луозы дуно кузьымъёс, ӝытэз шулдыртозы артистъёс, ортчоз викторина. Гожтӥськемъёсты возьмало трос пӧртэм кузьымъёс. Л. МАЛЫХ. Сюресъёс выльдӥсько Алигес Граховоысь Порыме автомашинаослы ветлон сюрес лэсьтыса вуттэмын. Сюрес лэсьтонъя управленилэн начальникезлэн В. А. Балобановлэн верамезъя, коллективезлы али капчи уг йӧты. Вылаз ик, кизер эстӥськонлы дунъёс будӥзы. Но юрттӥзы "Удмуртавтодор" но бускельёссы (кизнеръёс, алнашъёс, можгаос). Пусйыны кулэ, берло дыре умояз уждун тыронзы. Грахысь сюрес лэсьтӥсьёс вуоно арын чаклало куинь бадӟымесь выжъёс лэсьтыны но Лолошур-Возжиозь сюресэз вуттыны. П. Николаев. Ӵуказе Ижевскын ортчоз удмурт нылкышноослэн кенешонзы. Отын эскеремын луозы пӧртэм ужпумъёс. Таиз "Герд" бам сӥземын асьме кышномуртъёслэн сюлмаськонъёссылы. "Удмурт дунне" газетын ужасьёс, "Герд" но "Наталь" бамъёсты поттӥсьёс, конференцилэн делегатъёсызлы сӥзё ӟеч мылкыд но азьланезлы оскон. ПЕРЕЧЕНЬ ПОДЛЕЖАЩИХ ОПУБЛИКОВАНИЮ СВЕДЕНИЙ 0 ДОХОДАХ ЗА 1998 ГОД И ОБ ИМУЩЕСТВЕ ЗАРЕГИСТРИРОВАННЫХ КАНДИДАТАТОВ ПО ИЖЕВСКОМУ ОДНОМАНДАТНОМУ ИЗБИРАТЕЛЬНОМУ ОКРУГУ � 28 � п/п Фамилия, Совокупный Источники имя, годовой выплаты отчество доход дохода (руб.) Вид и наименование имущества, принадлежащего на праве собственности место нахождения имущества (субъект РФ, город (район), либо иностранное государство) автомобили другие транспортные (марки, количество) средства (вид, марка, количество) земельные жилые Дачи квартиры Гаражи и иные здания, участки (га) дома (кв. м) (кв.м) (кв. м) строения сооружения (кв.м) 1. Алексеев 52387,45 Физико- г.Ижевск, пос. г.Ижевск Владимир технический Воложка (0,06) Воложка (15) Александрович институт Уральского отделения РАН, Ижевский государственный технический универстет, Администрация Кизнерского района УР 2. Баранов за 1998 г. г.Ижевск (0,326) г.Ижевск(65,3) г.Ижевск, ГСК Сергей заработная "Жигули" гараж (24) Мотоцикл ("Урал") Васильевич плата не выплачивалась 3. Баранов 98067,41 Верховный Завьяловский г. Ижевск, ГСК Николай Суд УР район "Кристал-М" 2 автомобиля (ЗАЗ-968-М Витальевич д. Старый Культем (20) гараж (24); "Запорожец" ГСК "Маршал" гараж (24) Иж-2126 "Орбита") 4. Баранов 17500 АОЗТ "Правда Московская г. Москва ? Анатолий Интернэшнл" область Юрьевич Волоколамский район, дер. Любятино (0,12) 5. Гурина 24053,39 Ассоциация г. Ижевск, Ленинский район Ольга "СРК" женский центр", некоммерческое товарищество Юрьевна Ижевская "Южный" государственная сельскохозяйственная академия, Ижевская государственная медицинская академия, администрация г. Ижевска 6. Завильский Физико- г. Ижевск (74,0) Владимир технический Викторович институт Уральского отделения РАН, Удмуртский государственный университет 7. Макаров ШО "Медико- г. Ижевск (0,29), Автомобиль Николай социальный село Новая (Ауди-80), Иванович центр", ИЧП Казмаска 0,15) автобус (КАВЗ) "ШИКО" 8. Маслюков Аппарат ГД ФСДомодедовский г. Москва (192) г. Москва, Юрий РФ, Управление район, ГСК "Матвеевское" автомобиль Дмитриевич делами д. Сосенки (0,118) гараж (18) ("Волво - 760") Президента РФ 9. Синицина Уральский г. Ижевск (86,3) г. Ижевск, ГСК автомобили Ирина Международный "Гигант" гараж (23), 2 шт. (Датсун, Евгеньевна Инженерный г. Ижевск ГСК Форд) университет, "Салют-3" (17) Высший гуманитарно- инженерный колледж 10. Соловьев Аппарат Красногорский г. Ижевск (78,6) г. Ижевск Виталий Государственного район автокооператив � 5автомобиль Александрович Совета УР, с. Кокман (30) гараж (24) ь (ВАЗ- пенсия 2107 "Жигули") 11. Солуянов Аппарат ГД ФС РФ Андрей Владимирович 12. Сямин ЗАО Владимир Производственно- автомобиль (ГАӞ110) Борисович коммерческое предприятие "РОСИНТЕРПОИ" 13. Чуйков Ижмаш ЖКУ- г. Ижевск (30,6) Игорь 313 ДОНО, Вячеславович Муниципальное внешкольное учреждение "Синтез", ЦБ Устиновского РОНО Администрации г. Ижевска 14. Яирова 91066,95 Российская дер. Таганьково (0,13) Людмила государственная Петровна цирковая академия Информационное сообщение Окружной избирательной комиссией по Ижевскому одномандатному избирательному округу � 28 была рассмотрена информация Министерства по налогам и сборам УР, касающаяся сведений о совокупном годовом доходе кандидатов, установлено, что в комиссию были представлены недостоверные сведения кандидатами Чуйковым И. В. (на сумму 307 руб. 78 коп.) и Забильским В. В. (на сумму 241 руб. 50 коп.). Постановлением комиссии кандидатам вынесены предупреждения. Окружная избирательная комиссия по Ижевскому одномандатному избирательному округу � 28. БЫДӞЫМ ВОРМОНЛЫ 55 АР ТЫРМОН АЗЬЫН Ӧрӟимы вуылӥз Америкаозь "Ижсталь" огазеяськонысь дуриськон цехлэн борддораз мемориал пул вылын гожтэмын: "Татын ужаз Советской Союзлэн Героез Василий Михайлович Обухов". Бен, со вордскиз 90 ар талэсь азьло декабрь толэзе. 1918-тӥ арын тӧдьыосын ожмаськонын быриз солэн семьяез. Начальной школаез йылпумъяса, Вася пыриз Ижысь ФЗУ школае. Отын дурисьлы дышетскиз но ужаны кутскиз заводын. Кык арлэсь кема авиашколаын дышетскемез бере сое татчы ик кельтӥзы лётчике-инструкторе. Ар ортчыса, Обухов луэ звенолэн командирез. Отӥяз мылкыд каремезъя выже гражданской авиацие. Лобаз Таджикистанэ, Новосибирске, Иркутске. 1941-тӥ арын феврале Василий Михайловичез басьто Горд Армие. Дышетскиз командиръёсты дасян курсъёсын. Куинь толэзь ӵоже тушмонлэн мышказ 16 пол лобаз. Экипажысьтыз одӥг муртсэ но ӧз ышты. 1941-тӥ арын октябре солы Горд Знамя орден сётӥзы. И.Г.Кулемин "Героев наших имена" книгаяз гожтэ: "1942-тӥ арын авиацие бадӟым задание вуэ. СССР-ысь Иностранной ужъёсъя министрлэн В.М.Молотовлэн косэмезъя, СССР- Англия-США-Англия-СССР маршрут усьтоно вал. Быдэстоно сое экипажлэн кыкетӥ лётчик- капитанэз Василий Обухов. Та лобӟонлы арнялэсь кема дасяськизы. 1942-тӥ арын 18-тӥ мае корабльлэн командирез дась луэмзэ ивортӥз, нош 19-тӥ мае самолёт омыре ӝутскиз. Куазь урод ке но вал, со нуналэ асьме лётчикъёс заданизэс умой быдэстӥзы. 60 час лобамзы бере, самолёт асьме аэродроме ик пуксиз. Азязы пуктэм ужзэс ӟеч быдэстэмзы понна, В.М.Обуховез Ленин орденэн пусъё. Укмыс пӧртэм самолётэн лобаз асьме землякмы. 1944-тӥ арын июле со кыдёке лобась авиацилэн нырысетӥ классъя лётчикез луиз. Огпол ПО-2 самолётэн лобыкуз одӥг моторез ужамысь дугдӥз ке но, бомбаоссэ фрицъёс вылэ шонер куяса лётчик машиназэ аэродроме вуттӥз. Витебск станция дорын Обухов огпол немецъёслэсь 6 эшелонзэс пазьгиз. Соку быдэс уй станциын тушмонлэн техникаез ӝуаз. 1944-тӥ арын 13-тӥ мартэ тушмонэн ожмаськыны омыре 156 пол ӝутскылэмез понна гвардиысь майорлы Обухов Василий Михайловичлы Советской Союзлэн Героез дано ним сётӥзы. Фронтын со ваньзэ 72 пол лобаз. Усто ожмаськемез понна солэн гадяз бырттӥзы куинь орден но "Зарни Кизили" медаль. Со сяна "За оборону Москвы", "За оборону Сталинграда", "За оборону Ленинграда" но мукет медальёс. 1945-тӥ арын Василий Михайлович Обухов улонысь кошкиз, нош ватӥзы сое Ростов областьысь Балашов городэ. В.Чернов. ТАЗА КУЖЫМ Куать ар пала улӥськом ни Россилэн выль Конституциезъя. Кун Думае депутатъёсты бырйиськом выль сямен - одӥг мандатэн округъёсъя но партиослэн списокъёссыя. Демократ шуонъёс (Сергей Шахрай, Егор Гайдар, Михаил Полторанин) сыӵе кык полэс амалэз малпазы вал тросгес асьсэ адямиоссэс депутат карон вылысь. Малпазы выль партия но - "Выбор России". Калык сое "выброс" нимаз но Думае ӧз лэзьы. "ДемократическИй выбор России" туннэ вань оло ӧвӧл - куараез куинь-куань гинэ. Думаын политика лэсьто коммунистъёс "Милям юртмы - Россия", либеральной демократъёс но "Яблок". Соос куспы лобась кизили кадь пыре выль блок. Кылемаз Думаын "Отечество" ӧй вал. Таяз учыре со но нюръяське отчы шедён понна. Инкуазьын выль пушЪетэз арлыдо куакъёс котьку ӝокатыны выризы. Озьы ик политикаын но. Думаын огез но фракция "Отечестволы" дурбасьтэмзэ ӧз возьматы на. Солы пумит урдскылонын Кремль (президент но Борис Березовский) но депутатъёс ог-огенызы ӵошатско кадь. Валтӥсь коммунист Геннадий Зюганов но нырысетӥ каналысь журналист Сергей Доренко одӥг кырӟанэз нёжъяло, кожалод. Гуръёссы огкадесь, кылъёссы гинэ пӧртэмесьгес. Коммунистъёс но президент ог-огзылы матынэсь шуыса верамлы оскыны шуг. Борис Ельцин тросэзлы инмар мактал луиз, партбилетсэ сэрпалтыса. Вань кужымзэ сётӥз парторганизациосты предприятиосысь но организациосысь уллянлы. Парторгъёс кушетскизы: парткомтэм завод - выжытэм писпу. Ельцин пыдлогес пыриз. 1991-тӥ арын ГКЧП шуон бере КПСС-эз Россилэн улосвылаз (территориеяз) ужамысь дугдытӥз. Озьы ке но, компартия улӟиз, шонерскиз, кужмояз. Али Думаын коммунистъёс котькинлэсь уно - 22,30 процент. Соос пӧлысь быръемын Думалэн тӧроез Геннадий Селезнев но тӧроез воштӥсь Светлана Горячева. Собере копак абдрамон югдур кылдӥз. Компартия (соин кивалтӥськись Дума) но Кремль (соин кивалтӥсь Бороисъёс - Березовский но Ельцин) ог-огзы пала арысь аре матэктӥзы. Оскоды, ол,о уд: йӧ но тыл, пеймыт но югыт, шайтан но инмар одӥг кыткетэз кыско. Шонер пусъё, вылды: яратон но синазькылян артэ сыло. 1996-тӥ арын, президент бырйыку, нырысетӥ тур бере Ельцинэз пери (инфаркт) шуккиз. Малпан вань: Зюганов сое тодытэк ӧз кыльы. Законъя та кандидатъёс куспын телевизор пыр ваче нюръяськон (дебат) луыны кулэ вал. Ельцин отчы пыриськыны ӧз быгаты. Зюгановлэн президент луэмез укыр потысал ке, висись Ельцинэз олокызьы но уродэ уськытысал. Компартилэн тӧроез мар кариз? Нырысетӥ но кыкетӥ туръёс вискын Россиысь одӥг городэ но ӧз ветлы. Телевизор пыр возьматӥзы волейболэн шудэмзэ гинэ. Озьы шат президентэ ӝутскод? Али, Думае быръён азьын, Зюганов пӧсекъя: сояз президент быръёнын закон юн тӥямын Татарстанын нырысетӥ турын Ельцин 30 процент люказ, кыкетӥяз - 70, малы ке шуоно, 300 сюрс куара юри будэтэмын вал. Со зэм ке (мон малпасько: зэм), малы Зюганов 1996- тӥ арын ик судэ ӧз вазиськы? Музон интыосын но озьы мыдланьяськизы ук. Валэктон одӥг: компартилэн кивалтӥсезлы Кремльын президентлэн пуконэз кулэ ӧвӧл, солы Пӧйшуран радын (Охотный рядын) - Думаын - шунытгес. Геннадий Зюгановез пыкылэммес меӵак ас вылазы медаз басьтэ огшоры коммунистъёс. Пӧсез-кезьытэз, жоб кылъёсты, курдатонъёсты чидаса, соос уй но нунал ужазы калыкен. Нош мар карод? Огшоры партиецъёсты 90-тӥ аръёслэн кутсконазы вузаз Горбачев, 90-тӥ аръёслэн шоразы - Зюганов. Озьы Кремльын кузё луизы демократ шуонъёс, Думаын - коммунистъёс. Политикаысь ведра карнан озьы шонерскыны кулэ кадь. Ельцин калыклы пумит ужрад пусйиз ке, Дума сое быгатэмезъя тупатоз. Дума сьӧраз ортчиз ке, президент ас кылзэ вералоз. Зэм, Конституцияя президентлэн кужымез, депутатъёслэн сярысь, уно пол бадӟымгес. Нош ву шапык изэз пася шуэм сямен, соос но маке-маке лэсьтыны быгатысалзы. Нош депутатъёс ма дауртӥзы? Калык синмысь кемалась усем Анатолий Чубайс сыӵе бюджет лэсьтэ - огшоры адямилэн няньлы но коньдонэз ӧвӧл. "Ужаса улӥсьёслы дурбасьтӥсьёс" - коммунистъёс - Думаын 1996-тӥ но 1997-тӥ аръёсы бюджетэз юнматӥзы. Россиез копак начармытэм Черномырдин интые Ельцин дэмла солэсь но шукырмыт муртэ - Кириенкоез. Кӧня ӵашетӥзы депутатъёс таизлы пумит - нош Правительстволы тӧроез пуктӥзы. Мугзэ туж капчиен валэктӥзы. Ельцинлы пумит кариськимы ке, со Думаез пазьгоз, нош Россиын, Дума сяна, югдурез огсыр возись ёз ӧвӧл ни. Шонер-а со? Оскыны шуг ке но, шуом, президент Думаез ужамысь дугдытысал. Кунмы копак утись-вордӥсьтэм кыльысал шат? Федеральной Собраниын, улӥ палата - Дума сяна, вань ук вылӥ палата - Федерацилэн Советэз - губернаторъёслэн, президентъёслэн но премьер-министръёслэн ёззы. Соос - ваньзы сямен ик гажано адямиос - Россиез зуркатыны ӧй лэзьысалзы. Озьыен, Дума Кириенкоез но, Степашинэз но, Путинэз но премьер-министре юнматыны соглаш луиз мукет муген. Отысь депутатъёс курдазы небыт пуконъёссэс но бадӟым уждунзэс дырызлэсь вазь ыштонлэсь. Соин сэрен ик ваньмыз депутатъёс киоссэс ӧз ӝутэ Ельцинэз президентысь куштон (импичмент) понна. Ваньмыз со возьматэ: Кремль но коммунистъёс ог-огзытэк улыны уг быгато. Пушнер но эмезьпу музэн. Парсь но дэри сямен. Дума: ми кутом бюджет сярысь закон. Кремль: ми ӝутом депутатъёслэсь уждунзэс. Сыӵе аспӧртэм эшъяськонлэн емышез адске ни. Кремль туж кема ужаз Россия но Украина куспын эшъяськонъя но ӵош ужанъя огкыл (договор) бордын. Со кужыме пыре Дума юнматэм бере гинэ. Думаысь коммунистъёс ӧтизы: тырмоз Украинаен тушмонъяськыны. Шонер верамын. Огкыллэн нимыз но умой. Кин-о пумит ӟуч но украин калыклэн эшъяськонзылы? Бускелен ӟеч кусып возьытэк, каньыл улонэз уд адӟы. Сыӵе кылъёс шӧлкы ватскыса, ар талэсь азьвыл, 1998-тӥ арын декабре, Дума юнматӥз огкылэз. Зэмзэ вераса, мар сётӥз асьмелы со? Россия Украиналы кыл вератэк кузьмаз Крымез - инмаръёслэсь улон интызэс. Севастополь табере ӟуч порт но база ӧвӧл ни. Александр Пушкинлы "Бахчисарай фонтанзэ" гожтон понна туннэ гривна люкано луысал. Россиез Сьӧд зарезьысь улляса, Украина матэктэ НАТО-лы. Зэм, оскыто, со отчы уз пыры шуыса. Нош Кучма интые куке-соку пуксиз ке выль вордскем Бендера яке Черновил? Кин-о дугдытоз? Валамон ини, огшоры коммунистъёс но, ог люкетэз депутатъёс но компартилэн кузёосызлэсь берло вамышъёссэс умоен уг лыдъяло. КПРФ-лэсь люкиськизы "Духовное наследие" (Алексей Подберезкин), аграрийёс, тодмо политикъёс Альберт Макашов, Виктор Илюхин, Аман Тулеев но мукетъёсыз (кин буре, кин паллянэ). Нош йыръёс мар каро? Эшъёссэ ыштыкуз, котькуд адями утча тушмонзэ. Компартиысь кивалтӥсьёс но мукетэсь ӧвӧл. Азьло аръёсы жалятэк сизьдӥзы демократъёсты, "Яблокез", Кремлез - ваньзэ-ваньзэ, асьсэды сяна. Табере шедьтӥзы выль тушмпонэз - "Отечествоез". *** Кызетӥ аръёслэн кутсконазы "Детская болезнь левизны в коммунизме" ужаз Владимир Ленин пусйиз: Европаын тужгес бадӟым кышкытлык сыӵе вал: отын ӧвӧл зэмос марксистской партия. Туннэ вераны луоз: Россиын тужгес бадӟым кышкытлык сыӵе: татын ӧвӧл зэмос центристской партия. Сыӵе ныпъетэз ас вылаз басьтыны турттӥз "Отечество". Мукетъёсызлэсь бергес кылдыса, со ваньмызлэн сюрес ваментӥзы выжиз кадь. "Отечествоез" бур паласен кокчало президентлы дурбасьтӥсьёс, паллянысен - коммунистъёс. Чубайс, Волошин, Немцов, Гайдар кадьёс тышкасько ке - валамон. Огъя ваньбурез капыръянлы "Отечество" пум поноз. Малы-о Доренко, Шеремет, Леонтьев чагыр экранэз тырмыто сьӧд виро буёлэн? Кинлы со кулэ? Ваньмыз со кулэ нырысетӥ каналлэн (ОРТ-лэн) кузёезлы Борис Березовскийлы но Семья шуонлы. Ельцинлы матысь адямиос курдало сьӧсьяськемзы понна кыл кутонлэсь. Пумен кужмоясь "Отечестволы" пумит соос усьтыр-табыр инъязы выль кужым. Сокем дыртӥзы - нимзэ но йылаз-пумаз ӧз вуттэ. Я "Единство" шуо, я "Медведь". Отчы ӧз пыре тодмо политикъёс но, губернаторъёс но. Таоссэ Правительство Москвае ӧтьылӥз кескич амалэн - "толлы дасяськонэн герӟаськем кенеше". Лыктӥзы куд-ог улосвылъёсысь адямиос гинэ - Тверьысь, Якутиысь, Калмыкиысь, Чукоткаысь кузёос. Быдэсъясь (исполнительной) власть озьы законэз тӥяса пыриськиз быръён уже. Мискиньёс ас палазы кыскыны туртто Владимир Путинэз. Таиз шӧдэ: президент луон понна нюръяськонэ отӥяз мыноно луиз ке, "Медведен" эшъяськемез изъян гинэ ваёз. "Гондырлы" дурбасьтӥсьёс оскытыны выро: ми палан, пе, 7 процентэз бырйисьёс. Москваын та пумысен маскаръясько ни: со понна, пе, куаразэс сётозы та блоклэн списоказ пыртэмъёс пӧлысь 7 процентэз. Ма кыле на Семьялы? Коньдон, чагыр экран но данак газетъёс кияз бере, дэриен саптано "Отечествоез - быдэс Россиез". Нош малы "Отечество" сокем синазькыл луиз коммунистъёслы? Бадӟыматӥсь очки пияла кутыса лыдӟисько КПРФ-лэсь уставзэ, программазэ, быръёнлы сӥзем бумагаоссэ. Котькуд кыл тырмемын калык сярысь сюлмаськонэн. Котькыӵе удысэз басьты - коммунистъёслэн вань сое ӝутонъя умоесь ӵектонъёссы. Шӧдӥське: соослы рос- прос юрттӥллям туала югдурез ӟеч валась тодосчиос (учёнойёс). Табере лыдӟисько "Отечестволэсь" документъёссэ. Кылъёс мукетэсьгес ке но, пуштроссы коммунистъёслэн выллем: ӝутоно экономикаез, улӟытоно Россиез, утёно калыкез. Син шоры йӧтэ одӥг пӧртэмлык. Коммунистъёс ваньзэ дэмлало бумага вылын гинэ. "Отечество" куд-ог ӵектонъёссэ Москваын уже пыӵатӥз ни. Тӥни малы Россиын ужтэк кылемын 12 процентэз калык, Москваын - 0,9 процентэз. Шоркарын (столицаын) тыршо Россиысь пичи ужбергатӥсьёс (предпринимательёс) пӧлысь 30 процентэз - 240 сюрсэз. Москва тырмытэ Россилэн бюджетысьтыз 40 процентсэ. Кин но со меӵкытоз: отын берга быдэс Россилэн коньдонэз, соин ик экономика удысысь йыртэмасьёс тачак, кузьмаськытэк одӥг вамыш но уд лэсьты. Шонер. Москва огшоры калыклы зэмен ик сюрмумы выллем: узыр, чебер, кыдёкын. Нош весяк озьы ӧй вал ук. Борис Ельцин Россиын президент луэм но Гавриил Попов шоркаразы кузёе пуксем бере, та городлэсь кырсез ӧй вал кадь. Ас синмыным адӟылӥ ульчаостӥ но метроетӥ комакъёслэсь бызьылэмзэс. Кремль дорын ик, депутатъёслэн сюрес вылазы - ултӥям муртъёслэн палаткаоссы. Таӵе кӧшкемыт уйвӧтлэсь Москва вазьгес мозмиз. Кыл вылын гинэ ужасез Гавриил Поповез улляса, калык мэре бырйиз Юрий Лужковез. Санкт-Петербург алдаськись Анатолий Собчакез сэрпалтӥз но интыяз пуктӥз Владимир Яковлевез. Россия гинэ весь бабиз но Ельцинэз Кремле кыкетӥзэ лэзиз. Солы дурбасьтӥсь Чубайс, Кох но Бойко кунмес вузазы - Лужков тус-тас карисьприватизацилы пумит султӥз. Россиысь данакез заводъёс нимаз муртъёслы кузьмамын но таркамын. Москваын пумен улӟо бадӟым предприятиос но, пичи мастерскойёс но. Нош асьмеос, Салтыков-Щедринлэн Глупов городаз улӥсьёс музэн, весь абдраськом: малы сыӵе курадӟонлы пум уг вуы? Кин бен пум поноз, асьмеос узыръёсты асьме киын депутат кариськомы ке? Ёрмонэ кекаммы понна йыркуръяськиськом Москвалы. Нош со, асьмеды серекъяса сямен, весь улӟе но сяськая. Учкисько "Отечестволэсь" программазэ. Экономикаын чакламын бырйыса юрттыны 500 предприятилы. Соос потто, кызьы вера Евгений Примаков, финише вуэм ваньбур: питран гинэ ӧвӧл - машина, нефть гинэ ӧвӧл - бензин, экран гинэ ӧвӧл - телевизор. Сыӵе заводъёс герӟаськемын уно сюрс мукетъёсыныз: машина бичасьёс - мотор лэсьтӥсьёсын, бензин парисьёс - чугун сюресчиосын, телевизор инъясьёс - электротӥрлык дасясьёсын. Озьы ёзэн-ёзэн улӟытыны луысал быдэс жильыез - Россиез. Тодон-валан сётонын "Отечество - быдэс Россия" сюлмаськоз СССР-ын сямен ик дунтэк дышетыны. 1998-тӥ арын Сергей Кириенко кизэ нюртыны медэ ни вал таӵе документ вылэ: ваньзэ вылӥ дышетон ёзъёсты выжтоно коммерцие - дунын дышетонэ. Озьы соос ужасалзы узыръёс понна гинэ. Вузъёслэн ректоръёссы Москваысь Ломоносов нимо университетэ люкаськизы но талы пумит луэмзэс веразы. Евгений Примаков, Правительствое лыктыса, сыӵе бумагалэсь сюрессэ ворсаз. Со туннэ но шуэ: вылӥ образование басьтыны ваньмызлы огкадь луонлык кылдытоно. Озьы ик тупен-тупен мадьыны луысал компартилэн но "Отечестволэн" мукет удысъёс шоры но огкадь учкемзэс. Мон соослэсь пӧртэмлыксэс адӟи приватизациысь гинэ. Коммунистъёс лыдъяло: солэсь бервылъёссэ выльысь учконо но лушкам ваньбурез калыклы ик берыктоно. "Отечество" оскытэ: озьы лэсьтон вуттоз вир кисьтонэ, соин ик усто ужась акционер огазеяськонъёсты исатэк кельтоно, законэз тӥяса киултэмъёссэ но гуньдэмъёссэ выльысь чаклано. Компартиез но "Отечествоез" огазея калыклэн огъя мылкыдыз. Мым кӧня ке сюрс муртлы сётэмын вал куинь юан. Валэктонъёс тазьы люкиськизы (процентэн) Совето власть Демократия власть Тӥляд асьтэлэн-а? 30 3 Законэн кивалтӥськись-а? 32 12 Калыклэн-а? 36 2 Мукетъёсыз нокыӵе валэктон ӧз сётэ. Озьыен, азьлоезлы но, алиезлы но властьлы уг оско. Тӥни малы дыр вуэмын коммунистъёслэсь азьло данзэс герӟаны "Отечестволэн" вуонозэ адӟыны быгатэменыз. Жаляса верано луэ: сыӵе огазеяськонлы оскон сокем бадӟым ӧвӧл. Коммунистъёс "Отечествоез" куддыръя пыжо демократъёсты сярысь золгес. Малы? Нырысетӥ муг таӵе. "Отечестволэсь"коммунистъёс уг кышкало, малы ке шуоно, мышказы Кремль - ултӥяны уз сёты. Кыкетӥез. "Отечество" - со центризм, нош шоръёсты котьку но котькытын пачкато кык пал ласянь. Тужгес ик Россиын, татын котьма яркыт буёло: сьӧд яке тӧдьы, горд яке чагыр. Куинетӥез. Лыдъяса тодэмын: Думае быръёнын "Отечество - быдэс Россия" таланы быгатоз вуж блокъёслэсь трос куараоссэс: буръёслэсь - 1 процентсэ, "Милям юртмы - Россия" шуонлэсь - 2, "Яблоклэсь" - 2, компартилэсь - 6-7, нокыӵе блоке пыриськемъёс пӧлысь - 18 процентсэ. Коммунистъёслэн ыштонзы тужгес бадӟым бере, соос нырысетӥ тушмон каро "Отечествоез". Компартия вала: "Отечество" вормиз ке, Кремлен ӵош шуге-леке сюрозы коммунистъёс но. Соос яке чутрак воштӥськоно луозы, яке вужере кылёзы. *** Кыӵе бен пумыз та кузь вераськонлэн? Туж оскем потэ вал компартилэн но "Отечестволэн" ваче ки кутсконзылы. Москваысь вылӥ адямиос пӧлын озьы шуак уз пӧрмы, вылды. Политика нимаз улосвылъёсы выже шуиськомы ке, та ласянь Удмурт кун быдэс Россилы сюрес возьматэ. Иж округысь депутатэ кандидатлы Юрий Маслюков коммунистлы зол юрттэ "Отечество". Удмурт округъя кандидатлы Светлана Смирновалы дурбасьтэмзэс веразы коммунистъёс но, "Отечество" но. Ку меда озьы тупаны кутскозы Москваын но быдэс Россиын? Сю ар пала Россия улэ, аслаз куназ тушмон утчаса. Оло, окмоз ни? Тырмоз тужгес визьмо пиосмес но нылъёсмес вӧсь карыны! Дас укмысэтӥ дауре Европаын вордскиз таӵе ӧтён: вань кунъёсысь пролетарийёс, огазеяське! Оло, табере сое тазьы кароно: быдэс Россиысь таза кужымъёс, огазеяське! Алексей ШКЛЯЕВ. Кун Думае депутатэ кандидат Тырмоз курадӟыса улыны! Ирина Евгеньевна Синицына вордӥськемын 1953-тӥ арын 9-тӥ мае Алатырь городын. 1975-тӥ арын йылпумъяз Казаньысь инженерно-строительной институтэз. Егит специалистэз ужаны ысто Ижевскысь "Удмуртсельстройпроект" институтэ (1975-тӥ-1981- тӥ аръёсы). 1981-тӥ арын выже Ижевскысь механической институтлэн "Гидравлика но теплотехника" кафедраяз преподаватель луыса. Та аръёсы Ирина Евгеньевна уте кандидатской диссертацизэ, нош 1993-тӥ арын - докторскойзэ. Берло куать арзэ кивалтэ Уралысь Международной инженерной университетэн. Солы сётэмын "Удмурт Республикаысь дышетон удысысь отличник" ним. Быземын. Семьяязы одӥг ныл будэто. Асьмелэн нылкышноосмы вашкала дырысен висъясько улонэз валаменызы, котькыӵе шуг- секытэз чидаменызы, визьмынызы, инкуазен сётэм чеберенызы, кутскем ужзэс пумозяз нуэменызы. Ӵапак сыӵе сямъем кышномуртъёс пӧлы мон пыртысал Ирина Евгеньевна Синицынаез. Сое ӟеч тодо кунгож сьӧрысь учёнойёс но. Экология удысын дасям научной ужъёсыз Ижевскысь учёнойлы дуннее потыны бадӟым луонлык сётӥзы: 1993-тӥ арын, докторской диссерацизэ утемез бере, Ирина Евгеньевна Удмуртиысь нылкышноос пӧлын нырысетӥез технической наукаосъя доктор ним басьтӥз. Соку ик Синицына кичӧлтонэн потэ Вылӥ гуманитарно-инженерной колледж усьтон сярысь. Бӧрысьгес та колледж эшшо но вылӥ статус басьтэ, луэ Уралысь Международной инженерной университет. Ирина Евгеньевна "вордскем пиналэзлы" вань сюлэмзэ, быгатонлыксэ сётэ. Сое, анаез но нылкышноез, тужгес но шугъяськытэ туала егитъёслэн улӥ культуразы, урод сямъёссы, улон борды ӝабырскыны быгатымтэзы. Тӥни малы, технической профессизэ быдэсак палэнтыса, та кышномурт ӟырдыт басьтӥське егит нылъёсты Бестужевъёслэн курссыя дышетон борды, радъя гурт котырысь ужъёсъя занятиосты. Со ачиз туж яратэ литератураез, музыкаез, вань музыкальной образованиез. Ректор, научной но общественной ужась, та дыре ик - ӟеч кузпал но анай - ваньмызлы дыр но кужым шедьтэ. Нимысьтыз пусъеме потэ ужаны быгатэмзэ, честной луэмзэ, одӥг муртэ но вӧсь уз кары, юнме шорысь ӝоже уз уськыты. Учёной но педагог, И. В Синицына сюлэмыныз шӧдэ страналэсь, ӟуч нацилэсь кудпала мынэмзэ. Кызьы та вакытэ чидалод шып пукыны? Депутат луыса, со нюръяськоз Конституциен сётэм ужаны, пенсия басьтыны, шутэтскыны правоос понна, утёз дышетӥсьёслэсь но медицинской ужасьёслэсь, инженеръёслэсь но учёнойёслэсь, рабочийёслэсь но пенсионеръёслэсь, егитъёслэсь интересъёссэс. Ирина Евгеньевна Синицына Россия Федерациысь Кун Думае депутатэ ӵектэмын 28 номеро округъя "Духовное наследие" (ВОПД) огазеяськонэн. Кин жадиз ни туала шуг-секытъёслэсь, кинлэн Россиез мукет синмын адӟемез потэ, сётэ куарадэс Ирина Евгеньевна Синицына понна. Е. ЛЯЛИН, Удмурт Республикаысь Инженерной академилэн вице-президентэз, СССР-ысь Кун премилэн лауреатэз, Россия Федерациысь сӥё-дано машиностроитель, ожысь ветеран. Тысь люкыло Селта ёросысь "Серп и молот" эштосын туэ ю-няньзы лябгес удалтӥз, котькуд гектар луоё муысь со быдэн 7,2 центнерен гинэ басьтэмын. Озьы ке но, эштосэн кивалтӥсьёс ужасьёссылы пудозэс сюдыны тысь висъяло. Вазен котькудӥзлы быдэн 200 килограмм сётъязы ке, али люкылыны висъязы на эшшо 100 тонназэ. П. НИКОЛАЕВ. Герд Психотерапевтэн кенешон Анай, атай но мон - шудо семья Ижевскысь шугъяськись семьяослы "Шуныт юрт" центрысь психотерапевтэн Ольга ПЧЕЛЬНИКОВАЕН семья кусыпъёс сярысь вераське Удмурт кун университетысь студентка Елена КИТОВА. - Ольга Александровна, кызьы учкиськоды туала вакытысь семья шоры? - Россиысь Социально-демографической институтлэн чакламезъя, туала вакытэ тросгес нуклеарной (яке ядерной) семьяос. Мукет сямен вераса, таӵе семьяез герӟало кышноен карт но соослэн нылпиоссы. Песянай-песятайёс но ӵыжы-выжыоссы палэнын. Семья туала вакытэ - со кык аспӧртэм адямиослэн огазеяськонзы, котькудӥзлэн аслаз адӟонэз, валанэз. Кышномурт ассэ адӟе анай интыын, нош пиосмурт - атай интыын. Совето аръёсты тодэ ваёно ке, семья соку патриархальной шӧмо вал. Мукет сямен таӵе семьяез детоцентрализованной шуо на - семьяос возиськизы пиналзылы луыса гинэ. Патриархальной семьяын бадӟым инты басьто вал пересьёс, тужгес но нылпи утён- чакланын, нош али югдур мукетгес. Трос мугъёсты вераны луысал, огез соос пӧлысь: туала песянай-песятайёс укыр пиналэсь. Соос внукъёссэс уг утё, пӧлысьтызы тросэз ужало на угось. Али дыре соос семьялы, экономика ласянь, тросгес пайда сёто. Семьяын таӵе воштӥськонъёс луэмен, огласянь, пинал кыле юрттэттэк, утисьтэк. Нош мукет ласянь, туала пинал вазьгес тодматске зэмос улонэн. Азьвыл семьяосын нылпиос номыр сярысь ӧз малпаськылэ, соос сярысь сюлмаськылӥзы анай-атайёссы. Россиысь туала семья сярысь верано ке, пусйыны луоз таӵе паймымон аспӧртэмлыкез. Быдэс дуннеын озьы луэ: анай уже ветлэмысь дугдэ, карьераез сярысь уг сюлмаськы, юртэз, нылпиез котырын гинэ берга на ке - сыӵе семья эшшо но юнма. Нош Россиысь семья кужмогес - анай семьяе тросгес коньдон вае ке, вылӥгес тубат вылын сылэ ке. - Кызьы малпаськоды, шунды ӝужан палан сямен трос кышноё семья асьме палан луыны быгатоз-а? - Удмурт семьяосын куке вал шат трос кышно возён сям? Ноку но ӧй вал, уз но луы. Семья улонын сыӵе воштӥськонъёс ортчыку, лыдэ басьтыны кулэ калык сямъёсты. Удмурт сямъёс, йылолъёс сярысь верано ке, вань таӵе удмурт калык выжыкыл. Одӥг пиосмурт, пе, кышно басьтыны дасяське. Мынэм атаез доры но юа: - Атай, кин семьяын кузё луыны кулэ: кышномурт-а, пиосмурт-а? Атаез солы шуэм: - Юа калыклэсь. (Та валэктон туж тупа удмурт сямлы. Удмурт культура калыкен огкылысь луонэз пыӵатэ, со туж анайлыко культура. Татын бадӟым инты басьто возьытлык, калыкез кылзӥськон, солэсь верамзэ лыдэ басьтон). Эшшо атаез косэм на пиезлы: - Басьты сьӧрад сю курег но кык вал. Кышномурт кузё шуисьёслы курегдэ сёт, нош пиосмурт кузё шуизы ке, валдэ эн жаля. Быдэс гуртэз ортчем пиосмурт, кияз одӥг курег но кык вал сяна кылиллямтэ. Пырем со берпуметӥ корка но юа, пе: - Кин тӥляд кузё? Нош картэз шуэ: - Мон. Пиосмурт туж паймем: - Я, тон кузё бере, бырйы аслыд вал. Юрт кузё туж шумпотэм: - Тани таиз вал мыным кельше. Со дыре кышноез лыктэм но пеляз маке сипыртэм. - Кельше но, кышно шуэмъя, мукетыз вал гурт котырын пайдаёгес луоз. Басьто тазэ. Валамон ни, кылиз со куреген. Удмурт семьяын валтӥсь инты басьтэ кышномурт. Пиосъёс лябен ӧвӧл со. Кызьы верай вал ни, удмурт культура туж анайлыко. Вашкала дырысен удмурт семьяын кузё - анай. Воршуд нимъёс но нылмурт нимъёс бордысь потэмын ук. Соин трос кышноем семья удмурт шаерын психология ласянь ик уз тупа. - Али туж вӧлмемын гражданской шуон бракъёс. Та пумысен ма верасалды? - Таӵе семьялы дурбасьтӥсьёс котьку шуо: печать, пе, номыр сярысь уг вера на, нырысь интыын сылэ яратон. Нош мон сямен, кин кусыпъёссэ печатен уг юнматы, соос ог- огзылэсь палэнскон сюрес кельто. Люкиськыны секыт уго, трос бызьылоно, судэ уксё кисьтоно. Нош гражданской бракен улӥсьёс азьло ик чаклало ни люкиськон шуг- секытъёсты. Но нылпиос понна одно ик зэмос кузпалъяськон кулэ. Мед будозы соос юн семьяын. Экономика ласянь но, право ласянь но кузпалъяськон пиналэз но, кышномуртэз но уте. Собере, нылпилы шуг валэктыны, малы атаезлэн фамилиез мукет. - "Брак" но "семья" кылъёс одӥг мае ке валэкто-а? - Та пӧртэм валатонъёс. Адямиос гожтӥськемын ке но, куддыр семья уг пӧрмы. Семья - со котьку ик яратон, шуныт, ог-огдэ валан. Ӵемысь тазьы луэ: семья кемалась ӧвӧл ни, нош кыӵе ке бумага адямиосты артэ возе на. - Верало, коркалэн шунытэз, тупаса улон кышномурт бордын возиське. Озьы-а со? - Бен, семья улонын тросэз нылкышно бордысь потэ. Но туала улонэз эскерыку чаклатэк, лыдэ басьтытэк кельтыны уг луы тае но: кышномурт туж трос ужа. Солэн ӟигарыз уг тырмы ваньмыныз вырыны, ассэ быдэсак семьяезлы сӥзьыны. - Тросаз фантастика книгаосын семья улон сярысь чик уг вераськы. Отын суредало выжызэс азьланьтон понна гинэ огдырлы герӟаськем паръёсты. Луозы на меда семьяос азьпалан, яке книгаын сямен луоз? - Семья котькыӵе вакытъёсы улоз, малпасько. Зэмос шудо, юн семьяын гинэ кышномурт но воргорон асьсэды возьматыны быгато. Психология ласянь но учконо ке, быдэ вуэм нылмурт юрттэтлы кулэяськыса уг бызьы ук. Со ассэ адӟе анай, кышно интыын. Нош анай но кышно луон понна туж троссэ быгатыны кулэ. Котькуд зэмос пиосмурт озьы ик атай но карт луон быгатонлыкъёссэ шараяны кулэ. Мон сямен, семья - туж кулэ луись маке. Нылпиос быдэ вуо, бурдъясько ке, анай-атайёс асьсэды огнын луэмзэс шӧдыны кутско. Таӵе вакыт ик возьматэ, макем юн, кужмо вылэм та семья. - Шуом, семья вань. Нош кышноен карт вискын кусыпъёс ушъямонэсь ик ӧвӧл. Кулэ-а та учыре семья понна нюръяськыны, яке люкиськыса умойгес луоз? - Учконо ай, кыӵе амалъёсын нюръяськод. Нырысь ик валаны тыршоно, малы кезьытомизы кусыпъёс. Собере ини шедьтыны кулэ лул-пуш кужым - ог-огды вӧзын тӥледлы тунсыкогес, шулдыргес мед луоз. Шедьтоно кыкнадылы но тупась кыӵе ке точкаос. Котькуд семьяын нырысь-валысь вань ог-огдэ валан, яратон. Ӝуась тылпу медаз кысы шуыса, сое ялан чакласа возёно, пис тыроно. Озьы ик семьяез но ялан утьыса-чакласа возёно. Уг шуиськы, люкиськыны уг яра. Люкиськон - со куддыр шуг-секытысь потон амал. Но со дыре ик тодады вайытэме потэ: кылдытон сярысь, куашкатыны котьку капчигес. Соин ик тырше нырысь кыӵе ке вамышъёс лэсьтыны, нош куашкатыны котьку вуоды. ГЕРД Кӧня нылкышно - сомында сюлмаськон Удмурт нылкышно кенеш Ижын ортчытӥз туала улонын калык сямъёс но семья ужпумъёс сярысь "котырес ӝӧк". Ёросъёсын но со ужпумъёсъя кенеш ортчытыны мылкыд каризы. Со пумысен Удмурт нылкышно кенеше юрттэт курыса вазиськизы. 17-тӥ шуркынмонэ сыӵе вераськон ортчиз Селталан. Отчы люкаськылӥзы Селта но Сюмси ёросысь нылкышноос. Удмурт нылкышно кенешлэсь отчы ветлӥзы З. В. Суворова, В. П. Осотова но Л. С. Христолюбова. Кенешез кутскыса, Селта ёросысь нылкышно кенешлэн роноысь кивалтӥсез методист Г. Н. Конышева вераз люкаськемлэсь мугзэ но пусъем ужпумъёсты. Анайлэн нуналэныз нылкышносты ӟечкылаз Селта ёросысь депутатъёслэн кенешсылэн кивалтӥсез М. В. Вязников, люкаськемъёслы со ужазы ӟеч мылкыд сӥзиз. Вераськон радъяськиз куинь ужпум котыртӥ: нылкышно огазеяськонъёс но политика; туала секыт вакытэ нылпиосты улонлы дасян, соослы аслыд оскон, астэ гажан мылкыд пыӵатон; нылкышноослэн но нылпиослэн уродмись тазалыксы но соослы юрттон. Лыктэм тодосчиосты кылзыса, вераськонэ пыриськизы Селта ёросысь акушер-гинеколог Т. В. Шиляева, ёрос администрациысь семья ужпумъёсъя отделэн кивалтӥсь Е. П. Телицына, Сюмсиысь семья улонэз радъян кабинетын ужась Л. И. Климова, Селталась "Союз- Чернобыль" огазеяськонысь В. И. Иванова но мукетъёс. Специалистъёс трос юанъёслы валэктонъёс сётӥзы. Люкаськемъёс озьы ик трос визь-кенеш басьтӥзы кытчы, ку, кинлы вазиськоно пӧртэм учыръёсъя. Тужгес но бадӟым сюлмаськонъёс герӟаськемын тазалыкез утёнэн, уката но нылкышнолэсь но вуоно анайёслэсь-нылъёслэсь. Висись нылкышнолэсь таза нылпи уз вордскы. Нош туала нылкышно аслэсьтыз тазалыксэ утьыны дырзэ но, уксёзэ но жаля, со дыре ик трос коньдон быре кудӟытӥсь юонъёслы. Юонэн йырин шудтэм учыръёсы шедьыса, йыруж лэсьтыса улонлэн шуг-секытэзлэсь соос ӝоггес чигисько, трос адями бырыны шеде. Но уката шугъяськыто асьсэды быдтон учыръёс, яке суицид. Сюмси ёрос элькунамы кыкетӥ, Селта - ньылетӥ интыын, пе. Сюлэмез вӧсь каре арлыдо ужась воргоронъёслэн асьсэды быдтэмзы. "Сильный пол" шуо ке но, семьязы сярысь сюлмаськытэк, улонысь кошко. Нылпиоссэс будэтон понна нылкышнолы сое но чидано луэ на. Но соослэн но чиданзы чигиське ни: кӧня нылкышноос юонлы сётскемын, соослы нылпизы но кулэ ӧвӧл ни. Трос нылпиё семьяос ӧжытгес но ӧжытгес луо, Селта ёросын соослэн лыдзы ар ӵоже 100-лы кулэсмем, вить но солэсь трос нылпиё семьяос али 21 гинэ кылиллям на. Ньыль пол кулэсмем ньыль нылпиё семьяослэн лыдзы. Данаказ семьяосын одӥг нылпи вордо, умой ни, кыксэ ваё ке, куиньметӥзэ вайыны тросэз пумит луэ. Ваньмыз со государстволэн семья сярысь сюлмаськонэзлэсь палэнскемез бордысь потэ, кивалтӥсь бадӟым дядяйёс табере уг кепырало но "выись мурт ассэ утён сярысь ачиз мед сюлмаськоз" шуыны. Таӵе югдурлы пумитъяськыны огазе кариськыса, ог-огедлы юрттыса гинэ луоно. Ог- огмылы йыркуръяськытэк, керетытэк-ченгешытэк, валаса, юрттыса улыны мед быгатом вал. Политикае, кивалтон уже тросгес нылкышноос пыриськытэк тупатыны уз лу. Улон возьматэ, улон радэз нылкышноос ӟечгес валало, соос уго улон сёто но сое утьыны тыршо. Люкаськемъёслэн нимынызы югдурез Удмурт Республикаысь Кун Кенешлы но Правительстволы вазиськон кутэмын. Сюмси нылкышноос селтаослэн ужан амалъёсынызы тодматскизы, видеофильмъёссэс учкизы. Нылкышноослэн верамзыя, кенешон пайдаё пӧрмиз. Л. Христолюбова. Конференцилэн делегатъёсызлы вазиськон "Советской Удмуртия", "Удмурт дунне" газет котьку но бадӟым саклык висъяллязы нылкышно ужпумъёслы, семья улонлы. Кӧня ке аръёс ӵоже газетын потэ ини "Наталь" бам. Огвакытэ сое поттыны юрттӥз Удмурт Правительствоысь семьяя но демографической политикая отдел (соку со озьы нимаськиз, кивалтӥз соин Г. И. Климантова). "Наталь" соку кык бамен потӥз, али сыӵе луонлыкъёсмы ӧвӧл ни. Озьы ке но, нылкышноослы, семьялы сӥзем ужпумъёслы азьланяз но бадӟым саклык висъялом. "Удмурт дунне" газет шаермылэн пӧртэм сэрегъёсаз вуэ бере, Удмурт нылкышноослэн огазеяськонзы "Наталь" бам пыр тросаз семьяосы йыгаськыны быгатысалзы, лыдӟисьёсын ӵошен сэрттысалзы-пертчысалзы пӧртэм ужпумъёсты. Огазеяськонлэн ёрос ёзъёсыз озьы ик газет пыр тодматскысалзы ог-огзылэн ужъёсынызы. "Наталь" бамын ӝутэм ужпумъёсъя но кылэм потэ вылэм гуртъёсысь азьветлӥсь нылкышноослэсь куаразэс. Таяз арын лыдӟисьёс пӧлын ялӥмы "Чигымтэ чидан" но "Егит семья - туннэ но ӵуказе" конкурсъёс. Кызь одӥгетӥ дауре выжонэз пумитаса, ЗАГС ужпумъёсъя кун управлениен ӵош ялӥмы на "Нуны- 2000" ужрад. Выль аре вордӥськем нырысетӥез нунылы редакция дася кузьымъёс, но солэн анаез газетмылы гожтӥськемын медло. Кыӵе ке ужрадъёсты уртче ортчытыны луысал Удмурт нылкышно огазеяськонэн ӵош но. ГЕРД "Вожпотыса яратӥсько удмурт калыкме" Милям Завьял ёросамы, котькытын сямен ик, дыр, удмурт нылкышно огазеяськонмы ужа удмурт культурая обществоен ӵош. Нокызьы но люкыны уг луы та кык огазеяськонъёслэсь ужзэс - бадӟым инты отын басьто нылкышноос. Вашкала дыръя но нылкышно удмурт семьяын, удмурт улонын бадӟым инты басьтоз вылэм - со котыртӥ бергалляз удмурт выжылэн (родлэн) улонэз. Улон воштӥськемъя (тани социализмысь капитализме но выжим, лэся, ини) адямилэн отын интыез но воштӥське. Нош асьмелэн, удмурт нылкышноослэн, интымы воштӥськоз-а улонын? Ӧзгес, кадь, потэ мыным Республикаысьтымы удмурт нылкышно огазеяськон нырысетӥ конференцизэ ортчытыку. Туж шулдыр но, капчи мылкыдын кошкимы вал гуртамы. Кема иземысь сайкамы кадь соку. Ну, пӧй, киосмес зол-зол пужалъяса ужалом ини удмурт нылкышноосын - кыдёке азьпала вамыштозы соос, возьматозы мукет нылкышноослы кыӵе луыны кулэ зэмос кышномурт! Но... гуртамы бертӥм но, ёросъёсын туж ик зол уж ӧз мыны. Удмурт культурая обществолы сяна, нылкышноослэн со огазеяськемзы нокинлы но кулэ ӧз луы, лэся. Нош удмурт культурая обществолэн моӵез фольклор котыртӥ берганы сяна уг тырмы. Бен, кылдылӥзы ёросын пӧртэм ансамбльёс - Завьялын - "Вуюись", Шор Постолын - "Пинал даур", Изгуртын - "Марӟан гуръёс", Пироггуртын - "Пироггурт кильтырнаос" но мукет. Ветлылӥмы куное огмы доры огмы, удмуртъёслэсь пӧртэм сямъёссэс улӟытъямы, пумиськылӥм кунгож сьӧрысь но асьме республикаысь пӧртэм тодосчиосын, суредасьёсын, писательёсын, поэтъёсын, артистъёсын. Ортчытъямы семьялы сӥзем конкурсъёс, пыриськимы "Чеберина-95", "Чеберина - 98" конкурсъёсы. Туж шулдыр ортчизы аръёс Завьялын ортчытӥм удмурт сюан, ваньзэ аспӧртэмлыксэ чакласа. Казмаска гуртысь Завьялэ выль кен ваимы. Ог 80 адями пыриськиз та сюанэ. Мылкыд лӧптэмын, лобаса кадь ветлӥзы ваньмыз. Федосья Николаевна Базуева, Ленин орденлэн кык пол кавалерез, Пычанка гуртын вордскем но будэм адями, сюан гуръёсты, вань сямъёсты вераз. Сюан ортчытыкумы учкыны но ветлӥз, вылӥ дунъет сётӥз. - Табере кулӥ ке но, жаль ӧвӧл ни, - шуиз со, - сюан сямъёсты егитъёслы сётыса кельтэмелы шумпотӥсько. Собере Раиса Прокопьевна Ореховамы дорын ортчытӥмы "Солдат пи келянэз". Со ик вал режиссёрез но, сценаристэз но, солдат пилэн анаез но. Таиз но туж яраз асьмелы но, учкисьёслы но. Мукет араз "Нуны сюан" ортчытӥм, собере - удмурт пукон ӝыт. Со пуконо ӝытъёсты табере араз куать-тямыс пол ортчытъяськом. Отчы ӧтьылӥськом асьме землякъёсмес но шаерысьтымы дано адямиосты. Семьяослы конкурс ортчытыку, ёросамы вормисе потӥз Антоновъёслэн семьязы. Республикаямы "Семейной карусель" ӵошатсконын та удмурт семьялы дурбасьтыны ветлӥз удмурт культурая общество но. Таяз арын ортчытӥськом удмурт ӵушконлы сӥзем праздник. Татын ини "зарни кио" нылкышноослэсь ужаны быгатэмзэс возьматомы будӥсь нылпиослы. Мед тодозы соос - кыӵе кибашлыесь вылӥллям песянайёссы. Удмурт культурая обществолэн президиумаз, 90 процентэз нылкышноос, отчы ик пыро нылкышноос огазеяськонлэн тӧроез Августа Алексеевна Шкляева удмурт кылъя но литературая дышетӥсьёслэн секцизылэн кивалтӥсез Ангелина Алексеевна Байсарова, ёросысь радиоорганизатор Вера Павловна Богданова, нылпи садысь воспитательёс Людмила Андреевна Тепина но Евдокия Анатольевна Антонова, улон-вылонын юрттэт сётонъя центрысь специалист Раиса Константиновна Моторина но мукетъёсыз. Та нылкышноос туж бадӟым уж нуо удмурт культураез калык пӧлы пыӵатонын. Елизавета Ивановна Камашева удмурт газет-журналъёсты пырак Ижысь редакциосысь дунтэм дунын нуллэ милемлы. Улон воштӥскемен, вань та уж райцентрын гинэ нуиське на. Гуртэ потаны транспорт ӧвӧл, гуртъёсысь но ми доры ӝытлы кин-о лыктоз? Валасько, удмурт нылкышнолы юрттэт кулэ. Гуртъёсын берло дыре трос юыны кутскизы. Мар кароно со юонэн, кызьы, кыӵе юрттэт асьмеос сётыны быгатӥськом та ласянь кышномуртлы? Школаосын дышетӥсьёс (оло, янгышасько но) нылпиослы тодон-валан гинэ сётыны тыршо, нош ӟеч сямъёс мед пыӵатоз семья. Та ласянь кызьы юрттӥськом семьялы? Городын вань психологъёс, телефон пыр юрттэт сёто, пӧртэм кружокъёсы, театръёсы, музейёсы, ветлыны луонлык вань, компьютер классъёс усьтӥськемын. Нош гуртын со ӧвӧл. Институтъёсы пырыны тросэз гуртысь нылпиос уг быгато. Та ласянь маин юрттомы семьялы? Удмурт нылкышнолэн улӥын на экономической, политической, юридической тодон- валанэз. Сое мон туж валай Кун Кенеше берлояз быръёнъёс дыръя. Завьял но Пичи Пурга ёросъёсысь кӧня ке гуртъёстӥ коркась корка пыраса ветлӥ, удмурт кандидат понна куаразэс сётыны курыса. Ой-ёй-ёй, кӧня ужано на асьмелы удмурт нылкышнолэсь лул- пушсэ йӧнатон понна!!! Быръёнъёсын удмурт калык зӧк кисыос понна куаразэ сётэмысь, туж сюлэмын вӧсь луиз. Куӟебай Гердлэсь верамзэ тодам ваи: "Воже потыса яратӥсько удмурт калыкме!" Нош кышкан сяммес кызьы меда быдтоно? Ачим но мон вань улытозям ялан марлэсь ке но кышкаса возьдаськыса, кепыраса улӥ но улӥсько. Мон сое адямиослы уг возьматӥськы, но пыдлон, лул пушкам весь сюлэмы дырекъяса улэ. Уго пичи дыръям кышкатозы вал: "Эн бӧрды, тани бигер пыроз но пельдэ вандоз!" (милям гурт вӧзамы бигер гурт вал уго). Республикаямы (городэз вератэк) трос-а меда кышномуртъёс-ужбергатӥсьёс? Трос ке, со туж умой, озьыен, соос кышкасьтэм нылкышноос! Ӟечкылано соосты! Вуоно конференциямы вераскьон мыноз, дыр, кыӵе ӟеч сямъёсты вашкала улонысь нылпиосмылы пыӵатоно, нош кыӵеосызлэсь куштӥськоно, кызьы сое лэсьтоно. Ми шумпотыса мыномы та конференцие, малы ке шуоно, оскиськом: татын мур но пайдалыко вераськон ӝутскоз. М. Ишматова, Завьял ёросысь удмурт культурая обществолэн тӧроез. Фотоын: 1. "Солдат пи келян". 2. Ёросысь етӥз нылкышноос, удмурт культурая обществолэн президиумезлэн членъёсыз - Л. А. Тепина, Е. И. Камашева, М. Д. Ишматова, Р. К. Моторина. Ӟечкылан 27 ноябре 65 арессэ пусъе Можга ёросысь Камышлы гуртын улӥсь Антонида Ивановна Камашева Солэн вить нылпиосыз мусо анайзылы сӥзё юн тазалык, яркыт пиштӥсь шундылэсь пальпотонзэ, кема аръёс ӵоже шудо-буро улон. Тынад яратӥсь нылпиосыд. Гожтӥськон - 2000 Кӧня ке манетлы - бадӟым утон Шаерысьтымы Почта кусыпъёсъя управлениен ӵош "Удмурт дунне" газет Ижевскын улӥсьёс понна 2-тӥ, 3-тӥ, 4-тӥ декабре ялэ "Гожтӥськисьлэсь нуналъёссэ". Гожтӥськыны луоз быдэс арлы, ӝыны арлы яке телепрограммаен пятница номерлы, вазиськоно городысь почта ёзъёсы. Та нуналъёсы газетлы гожтӥськемъёс пӧлын 6-тӥ декабре шудытэмын луозы дуно кузьымъёс, соос пӧлын: центрифуга, "Универсал" лэсьтӥськон инструментъёс, утюг. Котькуд 25-тӥез лыдӟись озьы ик мар ке но утоз. Гожтӥськемъёс пӧлын радъямын луозы пӧртэм конкурсъёс, викторина. Ӝытэз шулдыртозы артистъёс, радъямын луоз книгаен но дӥськутэн вузкарон. Газетэз лыдӟисьёслы но солэн эшъёсызлы шутэтскон ӝыт ортчоз удмурт драмтеатрын 6- тӥ декабре 17 часысен. Кузьымъёсты шудытонэ пыриськозы ӝытэ лыктыны быгатымтэос но. Гожтӥськисьлы кузьым - парсьпи Глазов ёросын улӥсь лыдӟисьёсмы понна но шумпотымон ивормы вань. "Удмурт дунне" газетлы 2000-тӥ арлы вань гожтӥськемъёс пыриськозы ёросазы радъям лотереяен шудонэ. Аспалъёсызлы кузьым ӵектэ "Луч" колхоз, кивалтӥсез Петр Николаевич Малашев. Гожтӥськисьёслы кузьым - парсьпи. Лотереяен шудон ортчоз сояз арлэн кутсконаз Гулёково гуртын. Л. МАЛЫХ. Конгресслы дасясько Глазовын ортчиз Удмурт Республикаын улӥсь бесермян калыклэн конференциез. Солэн ужаз пыриськизы Россия Федерациысь Президентэзлэн оскем адямиезлэн юрттӥсез В. С. Лебедев, нациосын ужан политикая министр Н. Н. Мусалимов, та министерстоысь ик секторлэн кивалтӥсез Ю. В. Александров, Юкаменск ёрос администрацилэн кивалтӥсезлэн юрттӥсез Р. А. Черватюк, Глазов городлэн администрациезлэн кивалтӥсезлэн воштӥсез Т. П. Баталова, бесермян калыклэн огазеяськонэзлэн кивалтӥсез В. Ф. Сабреков, огазеяськонлэн правленияз ужасьёс. Конференциын эскеремын бесермян калык азьын сылӥсь туала ужпумъёс, та калыклэсь культуразэ но кылзэ улӟытонэн герӟаськем юанъёс. Ужрадэ ветлэмъёс тодматскизы "Россия Федерациын улӥсь ичи лыдо калыкъёслэн правоя гарантиоссы сярысь" Федеральной Законэн. Эскеремын 2000-тӥ арын Удмурт Республикаын бесермянъёслэсь национально-культурной автономизэс кылдытон сярысь но вуоно арлы чаклам ужпумъёс. Конференция Россиысь ичи калыкъёслэн ортчоно конгресазы 10 муртлэсь делегат бырйиз. Та ужрад ортчоз Москваын 3-5 деабре. РОССИЯ-БЕЛОРУССИЯ Асьмелэн выжымы одӥг Александр Лушкашенко президент луэм дырысен, Беларусь Республика ялан Россия пала кыстӥське. Кремльлэсь пумитъяськон политиказэ шӧдыса, бускель кунлэн кивалтӥсез ачиз вуылӥз ни пӧртэм улосвылъёсы, ыштэм кусыпъёсты выльысь тупатон вылысь. Удмуртия но А.Г.Лукашенкоез туж шуныт пумитаз. Ӵош ужан понна, асьмелэн но делегацимы Минске ветлӥз, Белоруссия но Удмуртия куспын огкыл гожтӥз. Озьы ке но, ог-огедлы матэктон сюрес шуген сётске. Кин яке ма солы люкетэ? Та юан сэрттэмын-пертчемын вал Москваын алигес ортчем "Пресса-2000" выставкалэн дискуссионной клубаз. Солэн кенешоназ мыло-кыдо пыриськизы Россиысь но Белоруссиысь журналисъёс, валтӥсь политикъёс, закон бордын ужасьёс. Белоруссиысь эшъёсмы мылкыдзыя но малпанъёссыя - асьмемын ӵош, азьпал сюрессэс Росситэк уг адӟо. Тӥни малы лыктӥзы Москвае но, российской прессалы сӥзем адӟытонэ. Ваем изданиоссы пӧлысь тужгес но ӝог басьтӥзы "Советская Белоруссия" газетэз. Шӧдӥське, лыдӟисьёс, москвичъёс но пӧртэм регионъёсысь вуэмъёс, мӧзмиллям ни солэсь, куке но самой матысь, гажано эшсылэсь кадь, таин ӵош - вань белорус калыклэсь. Пусйыны кулэ: газет туала вакытэ но аслэсьтыз нимзэ ӧз вошты, 1927-тӥ арысен. Тиражез - 2 но ӝыны миллион пала. Клубын пӧртэм ужпумъёс ӝутэмын вал: политика но экономика, газет-журнал поттон но референдуме пыриськон, калыкез дышетон но егитъёсын ужан. Люкаськемъёс котькудӥзъя валэктон шедьтыны, ог-огзэс валаны тыршизы. Но нимысьтыз инты басьтӥзы Беларусь Республика но Россия Федерация куспын Союз кылдытон, солэн инъетэзъя кенешон. Огкыллэн инъетэз дасямын вал кылем арын. Со эскеремын но воштонъёс, ватсанъёс пыртэмын кыказ но парламентын, калыкез тодматон вылысь печатламын газетъёсын. Дискуссионной клубе люкаськемъёс пӧлысь данакез пусйиз: референдум дыръя кыказ но странаын улӥсьёс вералозы огазеяськон сярысь мылкыдзэс. Та ужпумен беромыны уг яра, малы ке шуоно, макем кыдёке асьмеос ог-огмылэсь палэнском, сокем секытгес луоз чигылэм нюжаосты выльысь кутскыса герӟаны. Куд-ог политикъёс самой тае ик витё. Союзной государстволэн кылдэмез паськыт луонлык сётоз экономикаез ӝутыны, таможнялэсь куштӥськыны, одӥг валютае выжыны, налогъёсъя огъя политика нуыны но мукет. Кивалтӥсьёс чакламъя, Белоруссиез но Россиез огазеян аръёсын кыстӥськоз, ог- огзэ зӥбытэк, дыртытэк. Куашкатыны котьмае капчи ук, ӝутыны кужым кулэ. Дуннелэсь историзэ учконо ке, одӥг государство но интыяз тып-тып, огпалась- огпала шонаськытэк уг сылы, дыр ортчемъя, ялан воштӥське. Тани син азьын огазеяське Западной Европа, кылдӥз Европарламент, евро валюта. Вераськон мынэ ни границаосты усьтон сярысь. Нош асьмеос ваньзэ тае куашкатӥм, нимаз-нимаз люкиськыса усьтэм ӧсъёсмес сизьымдон сизьым полэс замокъёсын ворсаны выриськом. Белоруссилы таӵе политика уг кельшы. Ӵуказе нуналзэ со адӟе ӟуч калыкен уртче улон но ужан бордысь. Мукет республикаос ас мылкыдзэс, белорусъёс сямен, ӧз вералэ на. Дискуссиез нуисьёс пусйизы мукетсэ но. Зэм, дунне интыяз уг сылы, со ялан берга, азинске. Новейшей история но тани воштӥськиз ни: Европаын куашказ огъя социалистической лагерь, СЭВ. Соин ӵош НАТО-лэн радъёсыз будо, шори люкемын Чехословакия, вир кисьтыса юдылэмын Югославия... Нош маин мерталод СССР-лэсь быремзэ? Та трагедилэн бервылыз зол шуккоз на асьмеды ваньместы, кин валаз ни сое но кин туннэ нуналозь валаса ӧз вуы на. Но улон вазь-а, бер-а - люкем калыкъёсты одно ик огинэ вуттоз. - Нош белорус но ӟуч калык сярысь ке верано, - шуизы Белоруссиысь журналистъёс, - асьмеос кылдэммы дырысен ог-огмы борды кыстӥськиськом, асьмелы люкыны номыре. Пусъём на тани мае. 1996-тӥ арын 2-тӥ апреле кык государствоос куспын гожтэмын вал Огазеяськон (Сообщество) кылдытон сярысь договор. Толэзь ортчыса, парламентъёс огкылэ вуизы огъям Парламентской Собрание кылдытонъя. Солэн нырысетӥ кенешез ортчытэмын вал 1996-тӥ арын сӥзьыл Смоленскын. Огазеям парламентэ кык ласянь но огмында депутат быръемын. Соос али ужало выль союзлы законопроект бордын. Котькуд вамышсы каллен сётске, малы ке шуоно, Россилэн но Белоруссилэн законодательствозы ог-огезлэсь висъяське. Тупамтэос медаз кылдэ шуыса, кутӥсько нормативной актъёс. Таиз амал союз кылдонлы вакчигес сюрес сётэ. Сыӵе малпанэ вуизы кык парламентъёс. Ма вераны луоз огъя бюджет сярысь? Огазеям парламент сое лыдъя-чота ни. Таин ӵош эскерисько оборонаен, правоез утёнэн, социальной политикаен, инкуазез утёнэн герӟаськем удысъёс. Огъя вераса, выль государствое выжыны выж пичиен- пичиен лэсьтӥське. Ку со пӧрмоз? Огазеям парламентын ужась депутат П.А.Сажин журналистъёслы шуиз: - Россия Федерация но Беларусь Республика куспын кутэм Договоръя пусъемын 2005-тӥ ар. Отчыозь вань докуменъёс пумаз-йылаз вуттэмын луыны кулэ. Ватонэз ӧвӧл, выль союзлы огазеяськыны люкетӥсьёс шедёзы но шедё кыказ но государствоын. Минскын огпол гинэ бугыръяськон ӧз ортчы ни. Оппозицилы дурбасьто ОРТ но Россиысь телевиденилэн куд-ог музон каналъёсыз. Огъя вераса, нюръяськон мынэ. Дискуссионной клубе пыриськемъёсъя но со шӧдӥськиз. Одӥгъёсыз кышкало Лукашенко ки улэ сюремлэсь, мукетъёсыз палэнскыны выро Россилэн шуг- секытъёсызлэсь. Нош улон аслэсьтыз басьтоз: дыр ортчемъя, ваньзэ интыяз пуктоз. Референдумозь кема ӧз кыльы ни. Людмила МЕДВЕДЕВА. Валэктэ юрист Сэрегез дася адвокат Лилия Шкляева Егит дыръям шӧдтэк кыльыса пыриськи жугиськонэ. Кӧня ке пуки. Визьмаськи, семья кылдытӥ, уже пыри. Вуз дуре кунгож сьӧры потано вал. Нош монэ курдато: пукем муртлы со понна паспорт уз сётэ. Шонер-а со? Кыкетӥ юанэ таӵе. Европаын, пе, асьме машинаос ик дунтэмгес сыло. Нош сое Россие ваем понна, таможня куд-огезлэсь тросгес пошлина басьтэ, мукетъёсызлэсь - ӧжытгес. Маин герӟаськемын сыӵе дунъёс? В. ПАНТЕЛЕЕВ. Можга город. Кунгож сьӧры потаны уг лэзё сыӵе адямиосты, кинъёс: тодо кун тайна лыдъяськись иворъёсты; армие басьтэмын - отысь бертытозязы; ӝегатэмын йыртэмамзы понна янгыш шуыса - ужъя решение кутытозь; пуктэмын йыртэмамзы понна - наказаниез бырытозь яке солэсь мозмытозязы; палэнско судэн тупатэм куронъёсты быдэсъянлэсь; умойтэм иворъёс сётӥзы, Россия Федерациысь кошкон сярысь документъёс лэсьтыкузы. Тӥляд гожтэмдыя валан кылдэ: тӥ пытсэт сьӧры кемалась сюрылӥды но судлэн приговорез кужымзэ ыштӥз ни. Кызьы адӟиськоды, Пантелеев эш, пукем муртъёсты кунгож сьӧры потан ласянь нокызьы уг шымырто. Кунгож сьӧры потыны алон - со паспорт сётыны пумитъяськон ӧвӧл. Визаосъя но пусъёнъя отделэ (ОВИР-е) бумага ваиды ке, паспорт одно дасяны кулэ. Нош сое кияды уз сётэ. Паспорттэс отделын возёзы, тӥляд кунгож сьӧры потыны люкетӥсь мугъёсты бырытозь. Машина басьтон пумысен валэктон сётыны шуггес. Кунгож сьӧрын 6 толэзьлэсь кемагес улэм мурт одӥг гинэ машина басьтыса вае ке аслыз - вузантэм вылысь, со зэмен ик ичигес пошлина тыре. Озьы верамын Россия Федерациысь Таможняя кун комитетлэн приказаз. Сыӵе право сётӥське ичизэ 18 аресъем муртлы, 1599 куб-сантиметрозь двигателен автомобиль вайыкуз. Мукетъёсызлы тупатӥське огъя тырон. Отчы пыро НДС, акциз но пошлина. Машиналэн дуныз озьы будэ 100-200 процентлы. Кезьыт уг люкеты Матысь дыре Ижевскын ортчозы уянъя Россилэн кубокез понна ӵошатсконъёс. Татчы лыктыны мылкыд каризы странаысь ваньмыз сямен кужмоосыз спортсменъёс. Нюръяськыны дасясько асьме нылъёс-пиос но. Та нуналъёсы соос пыриськизы Кировын ортчем ӵошатсконъёсы. Огъя зачётын вормисе потӥз "Ижпланетаысь" 13 аресъем Светлана Беляева. Со ваньмызлэсь шаплы вал брасс амалэн уянъя 50, 100 но 200 метръёсы. Та клубысь ик Альбина Сулейманова кужмо луэмзэ возьматӥз эрико амалэн уяса. Огъя зачётын со куинетӥ интые потӥз. М. КУЗЬМИН. ШӦКЫЧ Николай Никифоров Выль удмурт Юмореска Уж пыр визьмаськемез но обезян уллёысь палэнскемез дырысен адями аслыз ачиз секыт но бурмонтэм висён чер шедьтӥз. Дугдытэк малпаське со. Малпанъёсыз котьку но чагыресь пилемъёс кадесь - туж чебересь, нош соос ӝог сылмо-ышо. Куддыр инвожо толэзьысь турнамтэ возьвыл мактал ворпо сяськаё. Озьы малпаськыса пуконъяд ик кин ке вӧзад кусозэ шукке ини. Тани ӝогак ланьыралозы, кильтыро буёлэз ыштозы синэз мальдытӥсь будосъёс. Пӧрмозы пудо сиёнлы. Туннэ Заляй Геня вазь сайказ. Алигес уж дураз кылэм выль ивор синъёссэ выльысь кыньыны ӧз лэзьы ни. Ма, кызьы-о паймытэк, йырвизьдэ тӥятэк? Кытысь ке ӧвӧлтэм, школаез "2" но "3" отметкаосын пырпотэм Садэй Коля, пе, выль удмурт кариськем. Узыр, пе, албасты люкет! Ижкарын аслэсьтыз лавказэ усьтэм шуыса лабырто гуртоос. Атаез, Садэй Петыр верамъя, пиезлэсь люкам уксёзэ быдэс гуртысь шыр-комакъёс но гуосазы нуллыса уз быдтэ. Бен паймонэз ӧвӧл кадь: али уго лачак ни выль ӟучъёс, выль бигеръёс.... "Кызьы-о меда вуж улонысь выляз выжоно?" - йырвизьзэ тӥя Зяля Геня. Соин ик тросгес газетъёсты учкылыны кутскиз, нимаз тетраде йӧн-йӧн пусйылэ аслыз кулэ луонозэ. Олома шуг но ӧвӧл кадь выль удмурт кариськыны. Ма, конечно, нырысь-валысь пӧсятэк уз луы. Кылсярысь, котькуд выль ӟучлэн, пе, вань сотовой телефонэз. Огзэ валаны уг быгаты егит воргорон: малы "сотовой" нимаське? Яке со муш карасэн-а герӟаськемын меда, яке фон фермаязы телефонзы вань. Кельше, мылкыдъяз со Генялы. Горд тусо, жингрес куараё. Уйшоре ветлыса, лушкемак ма, ялыны но секытэз уз луы. Нош бордаз муш карасэз герӟаса, "сотовой" ниманы кема уз луы ни. "Малиновый пиджак" сярысь но сокем куректонэз ӧвӧл. Брежнев бабай кивалтон аръёсы басьтэм костюмез ӟеч возиське на. Юондырлы гинэ дӥсялля сое. Вылаз эмезь варенья кисьты но, наӵ-наӵ нашта. Эмез-юмез со луоз. "Крутой автомобиль" пумысен варматаез юрттоз. Ожысь инвалид луэмысьтыз сётэм "Запорожец" машинаез лулӟылэ на. Гаражаз тэк сылэ. Нюк-гопъёсты но ворме, дэри сюресэтӥ но бызе, ӵапак - "крутой". Нош секретарь сярысь кайгыронэз ӧвӧл. Муры Дарья соку ик соглаш кариськоз. Юнме шорысь пальпотыса синъёсыныз уг кырмышъя луоз. Ай, Геняен ваче син пумиськыкуз, берпалъёссэ кӧй ӵӧж музэн бекыръяса кошке. Сыӵе дыръя егит воргорон зубектыса ик кыле. "Телохранитель", "оружие" - тетрадьысьтыз гожъямзэ синйылтэ Зяляй Геня. Астэ возьмасьёсты лавка дорысь шедьтыны луоз. Ог ӟенелик кабак аракы басьтӥд ке, дас воргоронъёс, ас лулзэс кадь утёзы. Эсьмаса, пигонзэ исась но уз луы. Пыӵал эшезлэсь куроз. Толалтэ гинэ соин кечъёс но ӟичыос сьӧрын уйылӥське. Мукетъят быдэс ар ӵоже кеносаз ошиськыса улэ. Сётоз, пумит уз кариськы. - Ма, чатран люкет! - воргоронэз зурак карыса, сьӧрпаласен вазиз кузпалыз. - Уже кошкытозяд гидысь кыедэз коть куяса кельты вал. Нош ик тетраден, ручкаен ӝӧк сьӧрын пукиськод ни ук. Некудышной писарь! - Я, я, шып ул! Кыед но но поттыло, ву но тырмыт нулло, - сӥялэс мылкыдын ӝӧк сьӧрысьтыз султӥз Зяляй Геня. Секытак лулскиз: "Кема курадӟоно луоз ай та выль удмурт кариськытозь. Кузпал но уг вала, гуртын дыр но уг окмы. Эх, кемалась городэ пегӟоно ни вал! Выль выж Кияса ёросысь Тузалчик шур вамен выль выжез лэсьтон али йылпумъяське ни. Со Уддяди гуртлэс кыдёкын ик ӧвӧл. Отын улӥсьёслы но "Мужаковской" сельхозпредприятилы табере тулыс ву тудӟон вакыт, но кышкыт уз ни луы. Ужез быдэсъяло Можгаысь сюрес лэсьтӥсьёс, соослы юртто асьсэос киясаос, нош асфальтсэ вӧлдо Ижысь сюрес лэсьтӥсьёс. Выль выж ӝутон озьы ик мынэ Шихос-танка шур вамен, таиз Сабанчино гурт вӧзын. Со шумпотон ваёз колошуръёслы. Таиз выж вуоз вуоно арын. Выж лэсьтэмын луоз Ермолаевоысь ӵыпет вамен но. Озьы ёросын берло дыре арлы быдэ выль выж вуттӥське. П. НИКОЛАЕВ. 28-тӥ ноябре - Анайлэн нуналэз Нылкышно вордӥське улон кузьманы Бен, ми ӧм алдаське. Тямысэтӥ Март вӧзы ватсаськиз эшшо одӥг шуныт праздник - 1998-тӥ арысен Президентлэн Указэныз асьме дорын пусйиське Анайлэн нуналэз. Соин валче Кун Кенешысь "Единство" фракцие пыриськись муртъёс - Удмурт Республикаысь Нылкышноослэн союззылэн кивалтӥсез З. И. Степнова но Калыкез улон- вылонын утён политикая ялан ужась комиссиезлэн кивалтӥсез Н. Я. Харина журналистъёсын пумиськылӥзы. - Праздник кылдӥз секыт но валантэм вакытэ - соин, лэся, синйылтытэк кылиз. Тросэз асьсэос но анайёс уг тодо со сярысь - сюлмаськонъёссы пӧлы выйыса, дырзы чик уг кыльы ни асьсэ сярысь малпаськыны. Асьмелэн вань шуг-секытъёсты кышномурт ас вылаз басьтыны тырше уго, уката ик со анай ке - семьязэ сюдон-утялтонэз, нылпиоссэ дышетонэз со нырысь интые пуктэ. Шонер ӧвӧл куд-огезлэн нылкышноослэн азьпал радэ потыны, политикае пыриськемзы понна пыкылэмъёссы. Улон умой луысал ке, нылкышно ноку но пиосмуртъёсын ӧй ӵошатскысал,- шуиз Зоя Степнова.- Кышномуртлэн чидаменыз гинэ возиське на государствомы. - Туннэ "семья - обществолэн инъетэз" шуонъёсты серем каро,- йылтӥз Наталья Харина.- Но со зэмзэ но озьы. Умой семья, умой анай гинэ ӟеч адями будэтыны быгатоз. Нош со ӧвӧл ке... Жаляса верано луэ, берло аръёсы тросэз нуныос вордскемзы бере роддоме кылё. Азьвыл соосты басьтон понна черодъёс ке вал, табере ваньмыз сямен нылпи юртъёсы сюро. Куд-огезлы шуд усе ик - ӟеч адямиос асьсэ пиналъёссы вӧзы соосты басьто - шунытсэс но яратонзэс сёто. Шаерамы али тямыс семьяын сыӵе нылпи юртъёс. Котькуд сӥзьыл но тулыс, армие келян дыр вуэмен, асьмеос куалектӥськом - пиосмы ӝыныез но армие ярамон ӧвӧл! Пӧртэм лулсэр висёнъёсын курадӟем сяна, егит пиослэн секталазы гинэ но уг тырмы. Кытысь бен таза пиналъёс луозы, егит кышномуртъёс секытэн ветлыкузы но сиемзы потэмысь йырсазьзэс ыштыло ке? Нылпи ваёнэз чакланы дышетэммылэн пайдаез шӧдӥськыны кутскиз кадь - абортъёс 30 процентлы кулэсмизы, но чутрак ӧжытомиз кык, куинь пинал ваисьёслэн лыдзы но. Амалтэк малпаськыны кутскиськод: эшшо кӧня ке ар ортчыса, нылкышноос уз вунэтэ-а, соос та дуннее Анай луон понна вордскемын шуыса? Анай луон - со дунне вылысь самой бадӟым шуд но дан. Йыбырттэ солы туннэ! З. РЯБИНИНА. Удалтымтэ вузкарись Монэ тодӥськоды, дыр, Грд Семон шуыса тышкасько, Куреггуртын улӥсько. Усто комбайнёр луисько бере, "Вормон" райгазетамы куинь пол гожъяллязы ни мон сярысь. Коммунизм дыръя (зэм со!) дипломъёсын но коньдон премиосын пусйылӥзы. Конторамылэн липет йылаз, монэ данъяса, Горд флаг лопыръяськылӥз. Уждун дыраз тырылӥзы, ю тысь но сётъяллязы. Умой улӥмы. Но, жаляса верасько, умоезлы пум вуз. Выльдӥськон, рынок шуон бодыен сямен шуккиз. Уждун уг тыро, нош пиналъёсты дышетоно, кышно тышкаське, - ма кароно? Кузпалы шуэ: тон, пе, коркалэн кузёез, семьяед сярысь сюлмаськыны кулэ. Ма карод, йырам "кеньырез" вань, Глазкар рыноке мыноно кариськи. Сылалтэм коньыгуби, ыж макес вузало, собере, пӧй, огреч но сьӧрам басьто ай. Вузало но узырмо. Нош предмылы шу: "Колхозысь кошкисько, ачид ужа". Сӥль макесме поттӥ гинэ, санэпидемстанциысь эскерисьёс вуизы. Ӟечлыкез, пе, умой- а, справкадэ возьматы. Ма вераны уг тодӥськы. Уг вузаськы, пӧй, мон, али гинэ тодмое вуттӥз. "Ачим сиё" шуыса чальгес котомкаям ватӥ. Сылон интыме воштӥ но, коньыгубиме ӵектӥсько. Дотово со чебер адске, но ушъясез трос, басьтӥсез ӧвӧл. Алкашъёс мерскыны кутскизы. Куртчыны ӧд ке, пе, сёты, лыз-вож каром. Ну, бен, ческыт шуыса сиизы ни. Огречме но куризы. Кышкан сямы быдтӥз. Тачак люкаськизы. Монэ но емышъёсме ушъяло, одеколонэн куноятыны выро. Кема сылӥ базарын, 25 манетлы гинэ вузай. Макесэным котомкаме кутыса, тодмоосы доры пыри. Ӵекто ай, пӧй, соослы. Пырем берам ик кумышкаен куноятӥзы. Кудӟем йырыным шашлыклы сӥль сётӥ. Уйшорозь юим, сим но кырӟам. Вазь ӵукна йыр пилиськымон висе. Ӟепам коньдонэ ӧвӧл, толон водка басьтыны сётӥськем. Сӥльме коть, пӧй, басьтэ. Тодмое серектӥз но, ӝӧк вылысь тӧдь-тӧдь лыосты возьматӥз. Вань сӥлез сииськеммы, лыосты йырйиськеммы. Мур лулӟиськыса, сюрес вылэ пыдын потӥ. Эх, улон, ӧз узырмыты вузкарон. Нош колхозэ ужаны потоно. Горд Семон, Куреггурт. Чечылэн табышез ческыт Кин кызьы улэ та вакытэ: огез шумпотэ ваньбурез тус-тас карисьёс понна, мукетыз нош дышем сямлэсь уг куштӥськы, азьвыл сямен ик йыг-йыг кузё кариськыны тырше. Вотка ёросысь "Двигатель" эштосын туж чакласькыса ужало, ваньбурзэс тус-тас карыны уг сёто. Тани, кылсярысь, татын быгатыса муш вордо, удысэз быдэсак оскизы Иван Яковлевич Колупаевлы. Тодо, Иван Яковлевич ас сярысьтыз гинэ уз сюлмаськы, ужзэ тыро-пыдо азинтоз. Мушкась киын али 130 уморто лыдъяське, ӧжыт ик ӧвӧл ке но, аслыз одӥг гинэ умой-умой юрттӥсь басьтӥз - Александр Гильматдиновез. Кык мушкасьёс огкылысь ужаны быгатэмзэс туж умой возьматӥзы ортчем гужем. Котькуд умортоысь 20 килограммлэсь уно чечы кыскизы. "Двигатель" эштос понна, валамон ини, со ӟеч табыш. Нош мушкасьёс ужзэс азинто, тол вакыт но сюлмаськон тырме, умортоосты тупатъяно, сюсь дасяно - ма ӧжыт-а сюлмаськонэз ужась муртлэн. А. АНДРЕЕВ. Гижло Котькин лушкаське. Озьы оскыто газетъёс, журналъёс, телевидение, радио. Борис Ельцинлэн нылыз Татьяна Дьяченко коньдонзэ возе, пе, кунгож сьӧрын. Борис Березовский кыпыртэм "Арофлотлэсь" долларъёссэ. Ижлэн мэрез басья квартира бӧрсьы квартира. Завьялово ёросысь администрацилэн йырыз улон интыос возе ас ёросаз но, Ижын но. Осконо-а сыӵе иворъёслы? Янгыше уськытэм муртъёс чылкыт нимзэс утён вылысь судэ уг вазисько бере - осконо. Соос ик суд пыр пытсамын ӧвӧл бере - осконо ӧвӧл. Та дыре ик ваньмыз тодо: кивалтӥсьёс ласянь лушкаськон Россиын но Удмуртиын туннэ кадь ноку но ӧз пушъе. Вера Евгений Примаков: - Куд-огез ог лыдпусъёс возьмато: йыртэмасьёс ас киязы возё экономикалэсь 40 процентсэ но банкъёслэсь ӝынызэ узырлыксэс. Озьы Россия ыштэ туж уно ваньбурзэ - ар куспын ӧжытсэ 20 миллиард долларзэ (ӵапак сомында люкаське бюджетлэн пайда ваись люкетаз). Кин но со оскытыны выре: Россиын котьку капыръязы но котьку нюръяськизы та кылен. Бен, Уралысь тодмо заводчи Демидов ӝожтӥськылӥз: барышысь одӥг куиньмосэз кошке эксэйлэн медоосызлы кузьым сётканы. Мугзэ но валэктылӥз. Соослы, пе, уждун туж пичи тупатэмын, кӧтсэс тырыны асьсэос амал мед шедьтозы шуыса. Подъясь (писарь) басьяз ӟазег, урядник - кучапи, воевода - пӧйшур ку. Ачиз Демидов Екатерина ИИ эксэйлы ваиз быдэс корзина азвесь коньдон. Кузьмаськонлы нырысь ик пум поныны турттӥз Петр И. Со адӟытэк ӧз кыльы приказъёстӥ (туала сямен вераса - министерствоостӥ) бызьылӥсь курегъёсты, ӵӧжъёсты, ыжъёсты. Швециен ожмаськыны коньдон кулэ луиз но - вытъёсты (налогъёсты) кык-ньыль пол будэтӥз. Казна чик ӧз узырмы. Эксэй ятвылтӥз мугзэ - капыръян. 1713-тӥ арын поттӥз указ. Нимыз туж аспӧртэм: "Государьлэсь казназэ кескичъёс лушкам сярысь". Котькуд губерниын кылдӥз "иворчи". Со доры ветлӥзы кузьым октӥсь вылэ ӝожтӥськисьёс. Чагиськонзы зэма ке, соослы сёто капыръясьлэсь ваньбурзэ. Уг зэме ке, юнме урттылӥськисез шымырто лушкаськисез музэн ик - курадӟыто, узырлыктэк кельто, виё. Москваын печатласькись "Вся Россия" газет алигес гожъяз иворчиос пӧлысь одӥгез сярысь. Куанеръёс радысь потэм Алексей Нестеров, выллане ӝутскон сярысь малпаса, аслаз юрттӥсьёсыныз ӵош чиновникъёс вылэ котькыӵе чагиськонъёс люказ: бадӟым пайдаен вузкарон, кунлэсь куронъёссэ (заказъёссэ) алдаськыса басьтон, налог тыронлэсь но армие мынонлэсь палэнскон. Кӧня ке муртэ быдтонэ вуттыса, Нестеров ӝабырскиз Сибирьлэн губернаторез Матвей Гагарин борды. Таиз Россиысен Китае мынӥз, вузъёсты учкылӥз, кельшисьёссэ асэстылӥз, музон амалъёсын узырмиз. Гагаринлэсь ужъёссэ укмыс ар сэрттӥзы-пертчизы. Сое сайяны выризы тачак эшъёсыз - узыръёс. Эксэйлы Нестеров гожтӥз: губернаторез утьыны туртто князь Меншиков но вице- канцлер Шафиров, таосызлы но Сенатысь эскерисьёслы Гагарин сётъяз дуно кузьымъёс, коньдон но валъёс. Эксэй азьлооссэ эскерисьёсты улляз но мукетъёссэ юнматӥз, соослы кузёе пуктӥз Нестеровез. Пум вуонэз шӧдыса, Гагарин эксэез куриз: ворсалэ монэ черке. Сое ошизы. Мугорыз ӝыны ар ӵоже шонаськиз ульча шорысь кыӵесын. Ар ортчыса, та интые ик ошизы ассэ Нестеровез. Таиз но басьтэм кузьым - жингыртӥсь час но ӟичы кулэсь вурем шобрет. *** Улон возьматӥз: Россиын кузьмаськонэн нюръяськыны шуг. Уката ик туэ - сыӵе лек гижло улӥысен вылӥозь азэм бере. Туж трос коньдон возьма Борис Березовскиез но Александр Руцкоез, азьло валтӥсь прокуроръёсты Алексей Ильюшенкоез но Юрий Скуратовез, СБС-Агро банкез но "Мабетекс" фирмаез. Тӥни малы калык уг оскы рыноклы но, кун властьлы но, политикъёслы но. Малы ке-а Евгений Примаков оскытэ: - Кивалтӥсьёс ласянь кузьмаськон (коррупция) Россиын пӧрмиз кунэз кышкытэ вуттӥсь ужпумлы. Со бордысь потэ Россилэн азьланьын улон-вылонэз но, дунне вылэ кылёнэз- кылёнтэмез но. Кин бен нюръяське таӵе лек пыктосэн? Милиция? Прокуратура? ФСБ? Вань соослэсь но вылӥ ёз - Лыдъян (Счётной) палата. Отчы пыро президентлы, Правительстволы но Федеральной Собранилы матысь адямиос. Берло куинь ар ӵоже палата Россилэн валтӥсь (генеральной) прокуратураяз келяз ог 150 уж. Судозь вуиз... куинез. Огезъя но приговор яке решение кутымтэ. Ӟучъёс сыӵе дыръя шуо: гурезь вордскытӥз шырез. Калык вера: кырныж кырныжез уг кокча. Сыӵе кылъёс шонересь но, шонертэмесь но. Бен, узыръёс куспазы думиськемын адскисьтэм гозыосын. Огез шуге-леке шеде ке, мукетъёссэ сьӧраз кыске. Быдэс лушкаськись уллё, усемлэсь курдаса, юлтошезлы выйыны уг сёты. Нош куддыръя, али ӝужась капитализм ваньзэ огъя узырлыкез ӧз люкы на бере, аксым муртъёс куспын пуромо тыложъёс (войнаос). Кык полэс кизилиос музэн, адямиос нюръясько кыкен-кыкен. Москваын - Березовский но Гусинский, Владивостокын - Наздратенко но Черепков, асьме дорын - кун власть но аскивалтон. Зэм, асьсэос вылӥ кузёос шер пырисько ожмаськонэ. Нушыоссэс сёто улӥегес - ивор вӧлмытӥсьёслы. Озьы кылдо музон кузъёс: Москваын - ОРТ но НТВ, Ижын - кун пресса но коммерцие выжем газетъёс но телевидение. Кыӵе ужез но ум быдэсъяське ми, журналистъёс! Кинэ ке выйтоно? Ми дасесь! Тодмотэм муртэ депутатэ ӝутоно? Лэсьтом! Кельшисьтэм адямиез дэриен саптано? Тырелэ коньдон! Мар луэ, милемды судэ ӧтё ке? Яке асьмеос кинъёсты ке судэ сётӥськом ке? Со: ӵоксам синмо кескич Фемида, олокӧня толэзь ӵоже бумагаос люкатэ, отчы-татчы вазиськылэ, уръяськыны-тупаны куре, адвокатъёсын кенешытэ. Акыляк потӥд ке - сялӟод, чидад ке - куинь манет кылялод яке утод. Асьме кунын шальтыр-шальтыр келямын куинез ик власть - закон кылдытӥсез но, сое быдэсъясез но, судъясез но. Нош ньылетӥ власть (ми, куанеръёс - ивор вӧлмытӥсьёс) укша узатэм пунылы. Кин куштоз лы, со азьын быжмес шонаськом. Кин ӵыжоз, со вӧзын быжмес купыртӥськом. *** Котьма ке но, вань-а лек гижлоез йӧнатон амал? Мукет кунъёс шоры учконо ке - вань. Киноослы осконо ке, тачакез йыртэмасьёс ярато кадь казиноез. Отын юо, олмаин но шудо, уто, келяло, жугисько, ыбылӥсько, ог-огзэс виыло. Улонысь вань лекез но кырсез татчы люкаське кадь. Мафиялы пумит нюръяськонын Америкаысь полиция син азяз нырысь ик басьтӥз казиноосты. Ваче пумит шимес нюръяськонын улонзэс сётӥзы тачак шырмачъёс, ог люкетэз полицейскоос. Табере отын мар? Шуылӥзы: Америкаын тужгес юн зӥбемын индеецъёс. Куке-соку озьы вал, вылды. Туннэ США-ысь калык пӧлын соос - 13 процентэз. Нош кузёясько вань казиноос пӧлысь 14 процентэныз. Озьы мафия удысэн-удысэн шымыртэмын вал. Валамон ини, Америкаын шедьтэм амалъёс ваньмыз ик асьмелы уз тупалэ. Экономикаын солэсь пышкылэммы асьмеды пыдйыл кельтӥз. Ӟучлэн капыръянэзлы ӟуч пезьдэтъёс кулэ. Тани, кылсярысь, кызьы соосты адӟе Евгений Примаков. Со понна нырысь ик огазеяно кунысь вань таза кужымъёсты - возьытэз валась ужбергатӥсьёсты, ивор вӧлмытӥсьёсты, калыклэсь огазеяськонъёссэ. Соос центрын но интыосын огкылысь мед султозы йыртэманлы пумит. Бюджетысь коньдон мед бергалоз бырйисьёслэн син азязы. Озьы ик нокытчы медаз ыше вытъёс (налогъёс). Закон кылдытӥсь, сое быдэсъясь но судъясь властьёс пӧлын нимысьтыз инты мед басьтоз нырысетӥез. Али парламент кылдытъя лушкаськисьёсты шараясь комиссиос, омырез зуркатэ кышкыт кылъёсын. Сыӵе ужрадъёс кельшо чилектэм бере гудыртонэз алонлы. Басьтӥськоно секытгес но дантэмгес уж борды - нуналмысь пырсконо мыдланьяськонэз кекатӥсь законъёс бордын. Капыръясьёс суд улэ уг сюро, малы ке шуоно, соос вольтчо ог-огенызы герӟамтэ законъёс вискытӥ. Пасё-пасё калтонысь тэтчась чипейёс выллем. Евгений Максимович нимысьтыз саклык висъя йыртэмасьёслэсь политикае сюрессэс ворсанлы. Собере дыр вуоз соосты правоез утисьёс пӧлысь но туздыртыны. Мукет кунъёсын ужанъя министерствоен но разведкаен кивалтыкуз, Примаков адӟытэк ӧз кыльы кугож сьӧрын люкам опытэз. Россия огазеяськыны кулэ дунне вылын йыртэманэн нюръяськонъя тупанкылъёс (соглашениос) борды. Санэ басьтоно музон кунъёсысь бухгалтериослэсь стандартъёссэс, ог-огедлы юрттоно тодмо лушкаськисьёсты ӝегатонын, капыртэм коньдонэз пӧртэм банкъёсысь утчанын. Лушкаськонэн ожмаськон медаз пӧрмы капыръянэн нюръяськыны ӧтёнлы гинэ. Россилэн ӵуказе нуналэз - асьме киын. Алексей Шкляев. Поръёс огазеясько Октябрь толэзе Ижевскын ортчиз Удмурт шаерын улӥсь поръёслэн огазеяськонзылэн паськытатэм пленумез. Нимаське та огазеяськон "Одо марий ушем". Та ужрадэ ӧтемын вал пӧртэм министерствоосын, газетъёсын, общественной организациосын ужасьёс, озьы ик ёрос администрациослэн кивалтӥсьёссы, эштосъёслэн председательёссы. 2000-тӥ арын поръёслэн Вятка но Кам котырын улыны кутскемзы дырысен тырмоз 400 ар. Соос интыяськемын 46 гуртъёсы. Соин валче республикаын пӧртэм ужрадъёс ортчытыны чакламын. Удмуртиысь вань ёросъёсын, кытын тросгес улэ пор калык, радъямын луозы солэн культураезлы сӥзем нуналъёс. Отчы ӧтемын Марий Эл Республикаысь но Башкортостанысь фольклор но мукет коллективъёс. Соку ик гуртъёсы келямын луозы альбом-эстафетаос. Отын верамын луоз гуртъёслэн кылдэмзы но али улэмзы, ожысь но ужысь ветеранъёс сярысь, возьматӥськозы туспуктэмъёс, документъёс. Альбомез одӥгысьтыз гуртысь мукетаз сӥё-дано сётон дыръя возматӥськозы концертъёс. Вуоно арын апреле Ижевскын ортчоз пор кырӟанъя но эктонъя фестиваль. Отчы лыктозы республикаысь устоосыз коллективъёс но Марий Элысь ансамбль. Тулыс каникулъёс дыръя Каракулино ёросысь Ныргында шор ёзо школаын ортчытыны чакламын пор кылъя но литературая дышетӥсьёсын семинар. Нош июнь толэзьлэн кутсконаз Татарстанысь Менделее ёросысь Ильнеть гуртын радъямын луоз "Кам но Вятка улосысь поръёс" научно-практической конференция. Конференция бере ӵуказеяз Грах ёросысь Бадӟым Ерыкса гуртын "Семык" пор праздник ортчоз. Марий Эл Республикаысь культурая министерствоен вераськон мынэ тодмо пор писательлэсь, дано педагоглэсь но общественной ужасьлэсь Илья Ломбергскийлэсь бюстсэ дасян но сое вордскем гуртаз Ныргындае пуктон сярысь. Марий Эл Республикалэн Президентэзлэн Указэзъя 14-тӥ декабрь ялэмын пор письменностьлэн кылдэм нуналэныз. Соку вань школаосын ортчозы пор кылъя но литературая нуналъёс. Пленуме ветлэмъёсты шулдыртӥзы Ижевскысь "Ош пеледыш" ("Тӧдьы сяська") но "Инвожо" ансамбльёс, нимаз кырӟась-верасьёс. Р.Токмурзин. Дарызы кӧс на Пумен ӧжытгес но ӧжытгес кылё пӧламы Быдӟым оже ветлэмъёс. Трос ӧвӧл ни соос Каракулино ёросын но. Арзамасовоын улӥсьёс ӟеч тодо бускельёссэс Ш. В. Валеевез, Н. А. Теккелез, соос ӵемысь пумиськыло пиналъёсын, мадё секытэсь ож сюресъёсты ортчемзы сярысь. Кыкназылэн гадь вылазы медальёссы, орденъёссы вань, нош алигес фронтовикъёслы тодазы вайытӥзы на кышкатэк ожмаськемзэс. Тамында ар ӵоже утчаллям соосты солдатлы самой дано луись "За отвагу" медальёс. Мӧйыослы сӥзем нуналэз пусйыкузы, таӵе синву пыр шумпотон ивор веразы соослы, гадь вылазы бырттӥзы вунонтэм синпель. Тазьы ик секыт ож ас сярысьтыз тодэ вайытӥз Чегандаысь А. Б. Дулесовез, Р. И. Шивырталовез, Сухарево гуртысь П. Д. Ласковез, А. П. Клюевез но П. П. Наговицынэз. Кызьы шуо, ожгарчиослэн "дарызы кӧс на". Соос огазьын хоре люкаськыса тодэ ваё ож дыр кырӟанъёсты. А. Андреев. Тодматӥськом быръёнъя огазеяськонъёсын Огкылысь! Берло аръёссэ весь нюръяськисько кышкыт учыръёслэн бервылъёсынызы. Ӵем дыръя - туж секыт вакытэ. Зэм, арысь аре чидантэм луэ со. Соин валче аслым ачим сётӥсько таӵе юан: кызьы но малы вуимы та калэ? Валэктонэз синвуо: даур йылпумъяськыку, Россиысь вань адямиослэн улонзы туж шуг луиз, нош ачиз Россия пӧрмиз вылысьтыз вылаз ортчылӥсь кышкыт учыръёслэн улоссылы. Чидантэм секыт вакытэз палэнтон амал вань. Адямиослэсь улон-вылонзэс тупатон вылысь, кивалтонэ вуттоно тужгес устооссэ. Соос лулысь-сюлмысь мед ужалозы ас шаерзы, ас калыксы понна. Солэсь кайгуоссэ мед тодозы но мед адӟозы, пыдлось гуртын улыса. Мед валалозы адямилэсь кулэяськонъёссэ. Огазеяськонмылэн нимыз - "Огкылысь". Милемыз валчеязы, нырысь ик, Россиын туннэ кылдэм секыт югдур но отысь быдӟым калык. Ми ас синмынымы адӟиськом: огшоры адямиосты туж ултӥяло соослэсь улон- вылонзэс чылкак мыдланьтӥсь кулэтэм воштӥськонъёс. Милемыз йыркуръяськытэ кивалтӥсьёслэн туж кӧберсыз (кӧбертэм) луэмзы. Огазеяськонысьтымы адямиос тодо Россиысь секыт югдурлэсь мугъёссэ но соосты палэнтон сюресъёсты. Чакламмыя кызь одӥгетӥ дауре выжоно валчеяськыса. Туж кышкыт учыръёс дыръя, сӧсырмемъёсты утьыку, огпол гинэ ини ӧй адӟы: вань чыры- пырыез та вакытэ одӥгтэмак вунэ. Адямиез нырысь ик эмъяно, сюдоно-вордоно, солы улон инты шедьтоно, уж сётоно, йырвандӥсьёслэсь утёно. Тужгес кулэез - солэн пушказ шокчоно ас кужымезлы но ӵуказе нуналлы оскон. Сюрс аръем сюресмы, олокӧня дауръёс ӵоже артэ улӥсь пӧртэм выжыосысь адямиос, музъеммы пушкысь омыръяса быдтонтэм узырлыкъёсмы верало: Россия - паймымон шаер. Вань ыштэмзэ туннэ берыктыны луоно. "Огкылысь" малпа: яратоно ас улостэ, сюлмаськоно будӥсь егитъёс сярысь. Калыкмы нош туж аспӧртэмлыко: со бордын - асьмелэн кужыммы. Эшшо огпол верасько: ми ужаломы, адямилэсь кулэяськонъёссэ лыдэ басьтыса. Пӧламы мед луозы кужмо, быгатӥсь но вылӥ тодон-валанэн, ужаны турттӥсь но пӧрмытӥсь адямиос. Берло ортчем учыръёс возьмато: нимазъяськыса улон ӟече уг вутты. Азьлань мыныны быгатомы огазьын гинэ. Туала Россиен кивалтэ президент. Со озьы ик луыны кулэ. Нош вӧзаз мед луозы законъёс кылдытъясь но соосты ӟеч быдэсъясь адямиос. Зэм, нуналмысь тымиськись сюлэмшугъёсты соос палэнтыны уг быгато. Соин ик та удысэз ас кияз басьтыны кулэ интыысь кужмо аскивалтэт. Экономикамес тупатон понна, нырысь ик, дугдоно кун ваньбурез тус-тас каремысь. Йыркуръяськытӥсь учыръёс но кузьмаськон тужгес зол сяськаяло ичи уждун басьтӥсь кивалтӥсьёс пӧлын. Соослэсь лыдзэс чутрак кулэстоно. Кылемъёсыз (ас интызы сярысь сюлмаськыны кулэ вылӥ тодон-валанэн но нокыӵе кузьмаськонлы, пӧяськонлы сётскисьтэм, нокыӵе дунын басьтыны луонтэм адямиос мед дунъялозы ас удыссэс. Мед луоз вылӥ уждунзы. Зэм, кун ваньбурмес утьыса но экономикамес озьы гинэ уд тупаты, ялан ӵошатскимы ке пӧсь улосысь шаеръёсын. Югдурез тупатон амал одӥг гинэ: данаклы бадӟыматоно поттэм табышлэсь быдӟалазэ. Со понна чик йылэтоно ӧвӧл вытъёсты - соосты трослы пичиятоно. Ужбергатӥсьёслы пыд йылазы султыны юрттэм сяна, со ӝогак палэнтоз ужазинлыкез ӝутон сюрес вылысь котькыӵе кулэтэм могӟетъёсты. Меӵак будоз предприятиослэн но отын ужасьёслэн барышсы. "Огкылысь" уг пумитъяськы экономикаез кунэн радъянлы. Зэм, ваньзэ лэсьтоно визьмо йырын. Экономикамы озьы мед азинскоз - вузкаронын-басьяськонын мед кузёяськоз манет. Тырмоз ини долларлэсь зӥбетсэ чиданы. Асьмелэн данъяськонмы - манет. Мукетыз кулэ ӧвӧл. Зэм, туннэ Россиын улӥсьёс но, кунгож сьӧрысь "ужбергатӥсьёс" но ужазинлыкмес ӝутонлы коньдонзэс уг висъяло. Соизлы паймонэз ӧвӧл: азьзэс-берзэс чакласьтэм, ӝикытлыкез валасьтэм кивалтӥсьёсын но калык ваньбурез тус-тас карисьёсын сэрен, Россиын нокинлы оскон ӧвӧл ни. Озьы ке но, кылдытоно котькыӵе луонлыкъёс - коньдон выльысь мед берытскоз Россие. Та сюрес вылын нырысетӥ вамыш луыны кулэ кунгож сьӧры келям туж уно ваньбурмес (нош утё сое отын бадӟымесь ужбергатӥсьёсмы) ас мылкыд каремъя берыктон. Валамон ни: кызь одӥгетӥ дауре выжон вакытэ тужгес бадӟым пайда ваё вылӥ технологиос. Соосын узыр кунъёс дуннеын валтӥсь инты басьто. Вылӥ технологиосты азинтон вылысь, ялан сюлмаськоно калыкез дышетон, наука, ваньбур поттон удысъёслы коньдон висъян сярысь. Россилэн кужымез туж трос али. Зэм, ӝожомыса верано луэ: асьмеос сое уже кулэезъя кутыны ум пӧрмытӥське. Соин ик вылӥ технологиос кылё капка сьӧры. Вань на эшшо одӥг кайгу. Россиысь ужез но улонэз радъяны юрттӥсь ёзъёс вуизы кышкыт югдуре. Ас ужамы ми пумиськылӥськом котькыӵе учыръёсын. Троссэ луэмезъя алыны турттӥськом. Ваньмыз туннэ но тодазы возё на Чернобыльлэсь бервылъёссэ. Таӵе шимес нуналъёс медаз ни луылэ шуыса, али ик чаклано ни бырон ваись учыръёсты кортнанъя ужрадъёс. Та ужпумез быдэстонэ мед пыриськозы кызьы ке кивалтӥсьёс, озьы ик - огшоры адямиос. Луоно кышкытлыкез палэнтон - "Огкылысь" огазеяськонлэн тужгес бадӟымез сюлмаськонэз. "Огкылысь" валчея пӧртэм улосвылъёсысь адямиосты. Ас азямы пуктӥмы таӵе ужпум: быръёнъёсын вормемен гинэ буйгатсконо ӧвӧл, Россиысь выль парламент нош ик медаз пӧрмы вылэм Москвалэн маскаръяськон юртэзлы. Зэм, огазеяськонамы лыктӥсь тросэз адямиос политикаен ноку ӧз герӟаськылэ. Но шумпоттэ соиз: соос пӧлысь котькудӥз быгатэ туж ӟеч ужаны. Ужея огпол гинэ ини ӧй вуылы Уйпал Кавказэ. Али отын выльысь гомало ожъёс. Чечняысь дасо сюрсъёсын улӥсьёс кулэясько юрттэтлы. Соосты утьыны кулэ йырвандӥсьёслэсь. Кышкытлыкез палэнтоно, йырвандӥсьёсты кутоно, нош соослэсь уллёзэс быдэсак кельтоно пыӵал тӥрлыктэк. Собере гинэ выжыны луоз та шаерын тупаса улон кылдытон сярысь вераськонъёсы. Мынам пельпумъёсы вылын - генераллэн погонъёсыз. Соин ик оскытыса верасько: "Огкылысь" котьку дурбасьтоз Россиысь армилы, пыӵал тӥрлык поттӥсь предприятиослы. Асьмелэн кунмы пунэме ноку медаз кыльы ас ужзэс чылкыт сюлэмын быдэсъясь адямиос азьын. Ялан утьыны турттомы кунмес возьмасьёсты, нош таосызлы мед тырозы ӟеч уждун. "Огкылысь" политикаен герӟаськем нокыӵе партия ӧвӧл. Быръёнъёсы мынӥськом одӥг малпанэн: сюлмаськоно котькуд адямилэсь но Россия кунлэсь малпанъёссэс валчеян сярысь. "Огкылысь" оглулысь быдӟым Россиез яратӥсь калыкен. "Огкылысь" оглулысь кужмо, огсыр азинтӥськись кунын улыны малпась адямиосын. Сергей Шойгу, огазеяськонэз валтӥсь. Лэчыт ужпум Э-эбыляськом! Ноябрь январь ӧвӧл ке но, муръёосысь ӵын меӵак валлань ӝутске. Вот ку вожъясько, дыр, городысь квартираосын майбыр улыны дышемъёс пу коркаосын улӥсь бускельёссылы, квартираосы кортгур уд пукты уго. Озьы ик уло - кырын но, коркан но шубаен. Та кезьытъёсы улон коркаосын температура туж улын уго 16 градус ке, шуныт лыдъяське ни. Буммаш, Металлург, Зарека палъёсын куд-огезлэн квартираосазы 12-13 градус сяна уг луы. "Малы? Пу коркаосын улӥсьёс толлы пу ке дасяло, ми гуныт понна арбыт коньдон тыриськом ук!" Сыӵе юанъёсын дугдылытэк улон интыя управлениосы жингыръяло эбылям муртъёс. Отын валэктыны выро, со понна янгыш луо шуныт сётон понна ваньмыз кыл кутӥсь управлениос - министерствоысен кутскыса котельнойёзь. Городысь улон интыосъя управленилэн кивалтӥсезлэн С. А. Трухинлэн верамезъя, таӵе чидантэм югдур кылдӥз куазь уродъяськемен - азьвыл аръёсы ноябрь толэзе возиське ке вал, туэ со 27-озь усиз. Соин ик та вакытлы чаклам эстӥськонэз шыръяно луэ, малы ке шуоно лимитлэсь ортчыны уг яра. Тани кылем арын 2 номеро ТЭЦ-ын шуныт сётонын 108 градус ке вал, туэ со 80 котыр гинэ возиське. Но таяз арня пумын квартираосын шунытгес луын кулэ. "Шунытгес луоз куазь басылкемен-а, кивалтӥсьёс ласянь кыӵе ке ужрадъёс кутэмен-а? Соиз но, таиз но, пе. Правительство запасысь эстӥськонэз уже кутыны косэм, али газ интые суто эгырез, солэн дуныз куинь поллы уногес ке но. ТОл ӵоже таӵе кезьыт луыны кулэ ӧвӧл ни - "Удмуртэнергионгаз" но оскыто, республикаямы шуны луоз шуыса. ... Толон лыдъяй, кӧня мон тыроно луо тыл дун. 57 манет луиз. Лумбытэн электрогурез ужатытыса, трос ӧвӧл, озьы-а? Куинь поллы гинэ тросгес. Со понна мон табере быгатӥсько улон интые управлениысь шуныт понна тырем коньдонме берыктыны. Но берыктоз-а со ыштэм тазалыкез? Кер-кор! кызо пиналъёс нылпи садъёсын, школаосын, ӵаж-ӵаж роддомъёсын вордӥсько нуныос. Ой, кема ик на тулысозь. З. РЯБИНИНА. "Сяськабей" выльдэ кырӟанъёссэ Финн-угор калыкъёслэн гужем ортчем фольклор фестивалязы кырӟан-веранъёсынызы паймытӥзы Камбаркаысь нылкышноос. Ялан ӟуч шуэм городамы но данак выжыосмы уло вылэм. Туж бадӟым тау карем потэ со понна "Сяськабей" фольклор коллективлэн кивалтӥсьёсызлы Р. Г. Гильмановлы, Е. Т. Коротковалы но Н. М. Шабликиналы, соос сюлмаськизы возьматыны удмурт калык йылолъёсты - "Нуны сюанэз", "Солдатэ келянэз", "Кышно куранэз". Армязь гуртысь кенакъёс Ф. Антабаева, М. Юлкубаева, Т. Меньшатова но мукетъёсыз котьку дась калык азе потыны, удмурт дӥсьёссы, чеберъяськонъёссы возьмаса гинэ уло. Алигес камбаркаос пусйизы районзылэсь 75 ар тырмонзэ, отын но "Сяськабей" куноосты шулдыртӥз. Туж синмаськымон чебермаллям соос культура юртысь люкаськон интызэс но: Армязьысь артистъёс мыло-кыдо огазе люкасько, выльдо кырӟан-веранъёссэс, возьмало, оло, шуд усёз азьланяз Венгрие, финн-угор калыкъёс пӧлысь фольклор коллективъёслэн ВИИИ фестивалязы но ветлыны. А. Анатольев. Соослы - быдэн 95 ни Кияса ёросысь Аксарино гуртын уло та пересьёс _ Елизавета Афанасьевна но Иван Степанович Верховцевъёс. Кемалась ик ӧвӧл Лиза песянайлэсь вордскем нуналзэ пусйизы ужысь но ожысь ветеранъёслэн Первомайской советсы но "Рябинушка" ансамбль. Сое сюлмысьтыз ӟечкылаз интыысь администрацилэн кивалтӥсез Н. А. Беляева. Ожысь но ужысь ветеранъёслэн ортчем сюрессы - гуртысьтызы но ёросысь вань калыклы адӟем карымон. Нылпиоссы будӥзы, котыр пазьгиськизы, но шофёрын ужась Александр пизы пересьёсынызы ӵош улэ. Верховцевъёслэн ньылетӥ поколенизы будэ ни. П. Кузнецов. Самой ческытэз, пе Углич городын ортчиз вӧйлэсь ӟечлыксэ эскеронъя всероссийской смотр-конкурс. Отчы быдэс Россиысь ваемын вал 119 пумо вӧй. Та возьматонэ пыриськиз Уваысь акциосын огазеяськон но. Отын со возьматӥз шоколад, нӧкы но бутерброд вӧйёссэ. Кыӵе дунъет бен сётӥзы соослы? Туж умой. Вӧйзылэн ӟечлыкез понна басьтӥзы диплом. Нош А. Г. Рычина пусъемын "Устоезлы вӧй поттӥсь мастерлы" медален. Тунсыко соиз: та мастерлэн поттэм вӧез лэсьтэмын ввавожъёслэн йӧлвылзылэсь. П. Николаев. Суредаськон - бадӟым кужым 19-тӥ шуркынмонэ Ижевскысь Выставочной залын ортчиз Удмуртиысь художникъёслэн ХИ ӧтчамзы Суредасьёс, гожъяськисьёс, крезьгурчиос но артистъёс та вакытэ одӥг ныркосэ кадь сюремын: ненег сюлэмоослы куасалскыны кема ик ӧвӧл. Соин ик кун ласянь утет, юрттэт кулэ. Творческой союзъёс сярысь закон кутоно. Кун Думаын нырысь лыдӟемен со ортчиз ни, асьме республикаын но кужымзэ шӧдытӥсь документлы ӝоггес мед пӧрмысал. Шаерысьтымы суредасьёслэн югдурзы пӧртэм ик ӧвӧл. 1994-тӥ арын кӧня ке муртлы правительство ласянь стипендия тыриськиз ке, собереяз таӵе луонлык ӧй вал ни. Ярам, берло кык-куинь аръёссэ тужгес ёрмисьёслы юрттэт вуыны кутскиз Художественной фондысь. Солэн кивалтӥсез Вячеслав Журавлёв, ужбергатонэз умой радъяса (автозапчастьёсын вузкарон магазин усьтыса), Художникъёслэн огазеяськонзылэсь вытъёссэ, тыл, телефон но мукетыз понна уно люкаськем тыронъёссэ быдтӥз, табере эркын уксёзэс правление быгатэ кулэезъя кутыны. Али Удмуртиысь художникъёс ужало 13 адресъя интыяськем 63 мастерскойын. Та интыосы синзэс чӧлтӥзы шаплы бергасьёс. Коммунаръёслэн ульчаысьтызы сизьым мастерскоез утён понна, зол гинэ нюръяськоно луизы "Маяк" кооперативен. Толэзьёсын архивъёсын пукыса, арбитраж судъёс пыр потыса, правооссэс утизы. Асьсэлы кельтыны быгатӥзы вань мукет мастерскойёсыз, Выставочной залэз но. Но таосыз тупатъяны, тӥрлык басьтыны кулэ луоз ай трос коньдон. ЦУМ-лэн улӥяз лэсьтӥське галерея (али отын М. Т. Калашниковлы сӥзем адӟытон) - азьпалан отчы ас ужъёсынызы пыриськыны быгатозы суредасьёсмы. Шумпоттэ Удмурт кун университетлэн искусствоосъя юртаз выставкаос ортчытъян зал но - таӵеез мукет нокытын ӧвӧл на. Художниклэсь макем будэмзэ возьматэ пӧртэм адӟытонъёсы пыриськемез. Пушкинской урамысь залын выставкаослэн виссы ик уг луы: ог-огзэс вошъяса, араз 20 котыре но вуо,- котькудӥзлэн луэ отчы шедемез. Нош кылем арын Нижний Новгородын ортчем "Бадӟым Волга" зональной выставкае 91 уж быръемын вал. Тужгес устоосыз - Анатолий Русскихлэн, Валерий Кононовлэн, Вячеслав Михайловлэн, Пётр Ёлкинлэн, Вячеслав Костылевлэн но мукетъёсызлэн суредъёссы - али возьматӥсько Москваын, Манежын. Та вакытэ ик куд-ог художникъёсмы пырисько "Болдиноын сӥзьыл" адӟытонэ. Гурт ёросъёс дорысен Англиозь вуизы Валентин Белых, Виктор Котляров. Финляндие но асьме суредасьёслэн ужъёссы вуттэмын. Россиысь Художникъёслэн союзазы али лыдъяське 86 асьме усточи. Тросэз дано нимо, пӧлазы лауреатъёс, профессоръёс вань. Али гинэ, та ӧтчамын, "Удмурт Республикаысь искусствоосъя дано ужась" знакез басьтӥзы Валентина Юшкова но Юрий Наговицын. Художниклэн ужез, шуом, быдэсмиз, пӧртэм выставкаосы вуылӥз, кыӵе ке дунъет басьтӥз (зэм, таиз ласянь искусствоведъёсмы бере кылё на шуыса пусъемын вал съездын но). Нош собере - кытын, кин соосты утёз? Фондохранилищеос подвалын я мукет кот сюроно интыын луэмен, куд-ог чеберлыко ужъёс изъянмыны шедизы ни. Та ласянь городлэн мэриез юнгес сюлмаськыны кулэ вылэм. Суредъёс тузонӟыса медаз кылле. Библиотекаосын, школаосын, больницаосын но мукет трос калыко интыосын возён вылысь, огкылъёс тупатоно. Озьы но ӵемысь луэ: ёрмеменыз йырин художник дуно ужзэ кинлы ке сюрем вуза но син азьысьтыз ыштэ, куректонэ усе. Яке басьтӥсь шедьтытэк курадӟе. Нош со дыре ик базарын вузало ог кабен шуккем суредъёсыз, чеберлык-дунлыкез уськытыса. Дыр вуэмын узыр адямиосын, ужбергатӥсьёсын огкылысь кариськыса ужаны, соос пӧлын вань искусствоез зэмос дунъяны быгатӥсьёс, ас юрттэтсэс ӵектӥсьёс. Художникъёслэн огазеяськонзылэн выль быръем правлениез одно ик умоесь кусыпъёс возьыны кулэ интыысь администрациосын городъёслэсь, гуртъёслэсь аспӧртэм тусбуйзэс кылдытон ласянь. Суредасьёс ас быгатонэнызы буш киын кылё, нош пӧртэм интерьер, реклама щитъёс лэсьтонэ ӝогак гинэ кырмисько укыр котькытчы вутскись "Ремас" выллем фирмаос, соос ик ӝабырто уксёез. Художникъёсын ӵошатыса, архитекторъёс быгатогес улыны. Кылын гожъяськонлэн сямен ик, суредаськон искусстволэн бадӟым кужымез. Оло нош республикаямы экономикалэн выльдӥськонэз кутскоз ӵапак творчество удысын ужасьёс бордысен. Тазьы пусйиз Кун Кенешлэн Тӧроезлэн нырысетӥ воштӥсез Павел Вершинин. Художник котьку но кыл кутэ ас калыкез, вакытэз азьын. Тани басьтом геральдикаез ик. Кунпус, куншет но кунгур калыклэн сюлэмаз ӧз ке лякиськы, озьыен, бадӟым янгыш лэсьтэмын... Творческой интеллигенцилэн калыкез югдытонын бадӟым кужымез сярысь пусйыса, нимысьтыз ӵектонъёссэс веразы Удмурт Правительстволэн Тӧроезлэн воштӥсез Виктор Шудегов, культурая министр Николай Бессогонов но. Правленилэн тӧроезлэсь Пётр Ёлкинлэсь ортчем дырлы йылпумъянъёс лэсьтэмзэ кылзыса, пӧртэм ужпумъёсъя ас малпанъёссэс веразы суредасьёс Вячеслав Костылев, Сергей Орлов, Василий Морозов, Виктор Котляров, Владимир Коркин, Анатолий Русских, Валерий Кононов, Виталий Окунь, Виктор Чувашов но мукетъёсыз. Бугыръяськон мылкыдъёс ӝутскылӥзы ке но, оглом пусъемын вал, правление ас азяз пуктэм ужпумъёсты быдэсъяз шуыса. Тӧро ас ӟырдыт мылкыдыныз нюръяськиз художникъёслэсь данзэс вылӥын возён понна, утемын вал огазеяськонзылэн огъя ваньбурез, мастерскойёс, нимаз суредасьёслы юрттыны луонлык кылдӥз. Тужгес бадӟым уж нуиськиз выставкаос ортчытъян ласянь. Со дыре ик ӧтчаме люкаськемъёс огкылысь кадь шуизы: правленилэн членъёсыз кир-пазь луэмен, вань сюлмаськонъёс усизы кык-куинь мурт вылэ, соос ик ас тодэмзыя кузёяськизы котьмаин - демократилэн принципъёсыз сӧремын вал. Выль быръем правленилы туала шуг вакытэ тужгес тупаса, огкылысь ужано луоз. Выль правленилы тӧрое нош ик быръемын Пётр Ёлкин. Правленилэн членъёсыз луизы Борис Постников, Василий Морозов, Виталий Окунь, Сергей Орлов, Александр Золотарев но Александр Пилин. Ревизионной комиссие пыризы Михаил Король, Владимир Лузин но Константин Резницкий. Т. ПЕТРОВА. Ӟуч пинал - бигер семьяын Та учыр вал Пенза областьысь одӥгаз нылпи вордон юртын. Кызь куинь ар талэсь азьло кык нуныосты акушер янгышаса сётэм. Ӟуч пинал шедиз бигер семьяе, нимазы сое Дамир, нош бигер пияшез басьтӥзы Плотниковъёс, нимазы сое Андрей. Та учыр шараяськиз ар талэсь азьло гинэ. (Басьтэмын Интернет пыр). ШӦКЫЧ Зынъялод - кӧтыд тыроз Эх, майбыр ик улӥськиз азьвыл! Кӧттыр сииськод но, юиськод но, нош ӝӧк вылысь ваньзэ ке уд бушатӥськы - пудолы кисьтӥськод. Ческыт сиёнэн "пыласькизы" соку парсьёсмы но. Шурысь чорыг кутылыса ӧм курадӟылэ, лавкае мыныса, камбала гинэ басьтылӥм. Асьмелы сиыны ке - ӵынатэмзэ учкылӥм. Чорыглэсь дунтэмзэ шӧдыса ик, вылды, Степан Широбоков серемес чуръёс гожъялляз: Со пала но тапала - Чудо-юдо камбала! Камбала малы ческыт? - Камбала - морской чорыг. Тыбыр - сьӧд, Кӧтыз - тӧдьы, Кымесаз синмыз одӥг! Ваньмыз умой кадь, но... Жаляса верано, табере чудо-юдо чорыгъёсыз пудоос гинэ ӧвӧл, адямиос но ӵем дыръя зынъятэк ик кылё. Уго туала вакытэ сое магазинысь басьтон туж дуно усе, вылаз ик, кыӵе чорыг басьтэмдэ но уд тодӥськы ке. Оло со сиыны ярамон, оло пудоез сюдыны но ярантэм. Туннэ нуналлы басьяськисьёс доры чорыг вутто 58 организациос но нимаз ужбергатӥсьёс. Та сиёнлы тужгес трос кулэясько толалтэ. Сое ог 400 тонна пала вузало, нош гужем - 250 тонна гинэ. Асьме пала тужгес трос чорыг вутто Калининград, Владивосток, Москва но Мурманск городъёсысь. Куинь оптовой предприятиысь 68,5 тонна чорыгез эскерон дыръя ярантэмен лыдъямын 12 тоннаез, яке 16 процентэз. Соос ГОСТ-лэн куронъёсызлы уг тупало. Кынтэм чорыгъёсты 10 градусъем кезьыт камераосын возёно ке, Госторгиспекциын ужасьёс эскерон ортчытыку, соосты возё вылэм 2 градус кезьытын гинэ. Изъянмыны шедем чорыг шараямын Ижевскысь "Атлантида" ООО-ын, "Компас" ЗАО- ын, "АСПЭК" ЗАО-лэн 5 номеро складаз, озьы ик Бруско, Торсунова нимаз вузкарисьёслэн. Та вие шаерысьтымы городъёсысь магазинъёсын 12 пумо, нош гуртъёсын 2-3 пумо кынтэм чорыген вузкаро. 17 вузкарон интые эскерыса, 16-яз уродмыны шедем чорыг шараямын. Мукет сямен вераса, 4,9 тонна пӧлысь 28,6 процентэз изъянмыны кутскемын. Жаляса верано, куд-ог магазинъёсын чорыген ӵош холодильникъёсазы возё на нӧкы вӧй, сыр, маргарин. Чорыг мур интыез яратэ пе, нош магазинысез - кезьыт интыез. Таӵе лыдпусъёсын тодматскыса, вуын уясез басьтэмдылэсь азьло амалтэк малпаськоно луоды, кудзэ сиёно: ӵынатэмзэ-а, кынтэмзэ-а, сылалтэмзэ-а? Нош одӥгзэ ӟеч тодод ини: камбала ческыт морской чорыг ке но, мултэссэ уд басьты. Веръямон луиз ке, яралоз, нош пудоедлы лыэз но мыноз. В.Кутузова. Кин маин узыр Астэ ачид ӧд ке сюды, тон сярысь туннэ туж ик нокин уз сюлмаськы: сое лыдэ басьтыса ик гуртъёсысь школаосын гужем ӵоже паймымон ужъёсты бергато. Алигес Кез районысь пиналъёс возьматӥзы, кин маин узыр луэм гужем куспын. Кубиста, огреч, картофка но мукет емышъёс будэтэм сяна, дасяллям эмезь, сутэр варенняос, Пажманысь пиналъёслэн нош асьсэлэн йӧлзы, йӧлпыдзы вань на вылэм. Гурт удысэз ӟеч тодыны тыршо Сыга школаысь пиналъёс. Соослэн 60 гектарлэсь уно музъемзы вань, со вылын будэтӥллям ӟеч йыды, чабей, сезьы. Узыр емышен данъясько поломъёс - гектар музъем вылысь соос 180 центнер кушман, 200 центнер кубиста октӥллям. Озьы бере, Кез ёросысь пиналъёслэн толалтэ столовоязы ӝӧк вылзы но узыр луоз. А. Анатольев. 2000-тӥ арысь ужпумъёс Правительстволэн Тӧроезлэн воштӥсез Н. И. Хохлов ортчытӥз "Ужпум-2000" программая кенеш. Отчы люкаськемъёс эскеризы та ужпумез "Водоканал" предприятиын но электрокужым сётӥсь организациосын кызьы быдэсъямзэс. Югдурез утёнъя но Калыклы улон-вылонын юрттонъя министерствоослэн кивалтӥсьёссы ивортӥзы "Ужпум-2000" программаез быдэстонлы висъям коньдонлэсь кытчы но кӧня кутӥськемзэ. Вуоно кенешын соос мадёзы та программая иворъёсъя ёзнэт (система) бордын ужамзы сярысь. Кызьы пусйизы Промышленностья министерствоын тыршисьёс, "Ужпум-2000" республикалэсь бюджетсэ кылдытӥсь предприятиослэн ужазы сокем юн уз шӧдӥськы. А. ХАЙДАРОВ. Журналистъёсын пумиськонъёс Кошке-а палэнэ выт? Кинэ уг сюлмаськыты выт (налог) бичан? Соин уго люконтэм герӟаськемын дышетӥсьёслэн, врачъёслэн но социальной удысысь музон ужасьёслэн улон-вылонзы. Кызьы бен республикаямы та удыс мынэ? Журналистъёслэн та но мукет юанъёссылы валэктонъёс сётӥз шаерысьтымы Выт бичанъя управленилэн кивалтӥсез Владимир ОРЕХОВ. - Туэ выт октонъя ужез умой быдэсъяськом,- мадёнзэ кутскиз Владимир Викторович.- Со возьматэ республикаысьтымы налог инспекциослэсь сюлмо тыршемзэс. Нош ми али ужаськом выт бичан законодательствоез выльдон вакытэ. Озьы ке но, вань бюджетъёсы уно коньдон вуэ эстӥськон но электрокужым сётӥсь предприятиослэсь, аракы пӧзьтӥсь заводъёслэсь но ож тӥрлык поттӥсьёслэсь. Кӧня бен выт бичамын? Туэ 10 толэзь ӵоже вань бюджетъёсы 5 миллиард 890 миллион манет уксё пыртэмын, яке, кылем арын та дырен ӵошатыса, 82 процентлы тросгес. Со пӧлысь федеральной бюджетэ 2,5 миллиард манет келямын, миым сярысь кык пол уно. Пусйыны кулэ, туэ данакез предприятиос "улэп" коньдонэн выт тыро. Тани ортчем арын со лыдпус 59 процент ке вал, туэ 70 процентозь вуттэмын. Кун бюджетэ 10 толэзьскын 1 миллиард 24 миллион манет уксё пыртэмын, интыысь бюджетъёсы - 2 миллиард 368 миллион. Огъя вераса, Удмурт Республикалэн бюджетаз толэзьлы быдэ 102 миллион манет коньдон вуэмын, нош федеральной бюджетэ - 250 миллион, яке миым сярысь 1,8 поллы уно. Тӥни озьы федеральной бюджетэ выт бичан план туэ дас толэзьскын 135 процентлы тырмытэмын, нош кун бюджетэ - 148 процентлы. Мукет сямен вераса, республикалэн бюджетаз туэ ватсаса 334 миллион манет уксё пыртэмын ни. Туэ шаерамы кутэмын ужбергатӥсьёслэсь огъя выт бичан сярысь закон. Соя 14 сюрс ужбергатӥсьёс выт тырыны кулэ вал, нош лыдэ басьтэмын 10,6 сюрсэз гинэ. Соос бюджетэ 77 миллион манет коньдон вуттӥзы, яке котькуд ужбергатӥсьлы кварталлы быдэ 720 манет усе, кылем арын сярысь, 1,8 поллы тросгес. Али 9,4 сюрс ужбергатӥсь выт тыре. Ньылетӥ кварталэ вузкарон удысысь ужбергатӥсь шорлыдын 767 манет бюджетэ уксё пыртоз, нош йыр ӵышкисьёс - 607 манет. Республикаямы умоя вузаськемлэсь выт октон. Озьы кун бюджетэ 38,7 миллион манет коньдон вуиз, нош интыысь бюджетъёсы - 63,3 миллион, яке миым сярысь 5 пол уно. Туэ укмыс толэзьскын выт бичасьёс, трос эскеронъёс ортчытыса, вань бюджетъёсы ватсаса 732 миллион манет уксё пыртэмын, яке ваньмыз пӧлысь со 13 процент луэ. Та дыр ӵоже потаса эскеремын 4050 выт тырись, яке ваньмыз пӧлысь 17 процентэз. Районъёсын эскеронъёс 10 сюрс манет пайда сётӥзы, нош быдэс республикая - 30 сюрс манет. Тужгес но пайдаё эскеронъёс ортчытэмын Воткинск, Ува, Як.-Бодья, Ижысь Октябрь районъёсын но Глазов городын. Выт бичась инспекциос туэ правоосты утись ёзъёсын но налог полициен ӵош, интыосы потаса, 54 эскерон ортчытӥзы. Озьы бюджетъёсы ватсаса 54 миллион манет уксё ваемын, яке котькуд эскеронлы быдэ - 965 сюрс манет. Республикаямы выт бичанэз умоятон понна кылдытэмын "Оскон сертификат". Со сётӥське кызьы ке предприятиослы, озьы ик нимаз адямиослы. Али сыӵе сертификат басьтӥз ни "Воткинский завод" кун предприятие. Выт бичанъя управление эшшо 5 курон вуэмын ни. Со пӧлысь одӥгез - "Удмуртнефть" огазеяськон. Эскерон вылысь Ижысь 7 классысь дышетскисьёс "Выт" предметэз дышето ни. Отӥяз Владимир Орехов пусйиз, али, пе, ми выль юрт пуктӥськом. Сое ӝутыны юрттэ Москва но. Ужасьёсмы та вакытэ ньыль интыын пуко. Владимир Ореховлэн ивортэмезъя, выт бичасьёс предприятиосты вытъёсын пачкатыны уг туртто, югдурез валаса ужало. Тани Сарапулысь электрогенераторной завод ваньбур поттонзэ 4,5 поллы будэтӥз. Юрттӥзы выт бичасьёс. Нош кошке меда выт палэнэ? Валамон, кошке. Кӧня, нокин уг тоды. Верало пӧртэм лыдпусъёс, но со эскерымтэ. Куд-огез шуэ, шаерысьтымы базаръёсысь гинэ, пе, 20 миллиард манет выт бичаны луонлыкъёс вань. Кин солы оскоз? Куке быдэс Россиын сомында налог уг люкало. Выль арлы кун бюджетын подоходной выт бичан 30 процентлы йылэтэмын. Со лэсьтэмын, налог октӥсьёсын кенешытэк. Г. РОМАНОВ. 1-тӥ декабре - СПИД-эн нюръяськон нунал Каллен кулон Котьку минут дуннеын куать муртлы ВИЧ-инфекция палаське. Кылем арын куинь миллион егитъёслэн но пиналъёслэн сыӵе вируссы шараямын вал. Туэ эшшо тросгес. Россиын данакез инфекциез нуллӥсь Москваын уло. Висисьёслэн шоро-куспо арлыдзы - 25 арес. Со валамон - угось егитъёс, быдэ вуымтэос малпаськытэк матысь кусыпъёс тупато, йырез усыкмытӥсь суретъёсын эшъясько. Нош одӥг наркоман висёнзэ 100 пала муртлы палатыны быгатэ. Кылсярысь, Свердловск улосысь Вылӥ Салдаысь сыӵе "бышкиськись" ар но ӝыны ӵоже гинэ 90 муртлы висёнзэ "кузьмаз". Асьме республикаын туннэ нуналлы 12 мурт шараямын. Куинез соос пӧлысь Санкт- Петербургысь, Свердловск улосысь но Украинаысь лыктэмъёс. Ньылез уло Воткинскын, куинез - Ижевскын. Тямысэзлы вирус паласькемын пиосмуртлэн кышномуртэн яке пиосмуртлэн пиосмуртэн ик матысь кусыпъёссы, ньылезлы - наркотик пыр. Быдэн одӥг муртшараямын Глазовын, Сарапулын, Завьял, Ува, Як.-Бодья ёросъёсын. Одӥгез СПИД-эн висе наркотикен эшъяське. Туж жаль, егитъёс пелязы уг поно алэмъёсты. Али Ижевскын гинэ 390 сыӵе мурт ини. Палэнэ уг кылё гуртъёс но - отын 12 процентэз егитъёс но пиналъёс "бышкисько". Эшшо куать ВИЧ-ен паласькем муртъёс асьмелэн огаз колониямы "пуко". Соос пӧлын тросгес ужтэк кылемъёс. Та улонын маке ӟечез борды ӝабырскем интые, соос асьсэос гуэ уськытско. Шаерамы кылдэм югдур ӝегаткытэк СПИД-лы пумит радъям ужпумъёс кутыны косэ. Жаляса верано луэ, али ӧвӧл на кылдытэмын ВИЧ-инфекцилы но СПИД-лы пумит эмъюм. Матысь дыре уз но кылды, дыр. Соин ик тросгес валэктон, алон уж нуоно. Удмурт Республикаысь Правительство умоен лыдъяз шаерамы ВИЧ-инфекциез алон сярысь комплексной программаез, Кун Кенеш сое юнматыны кулэ. 1-тӥ декабре - СПИД-эн нюръяськон нуналэ - ООН ваньмызлы вазиське: "Кылзэ, дышетске, улэ!" Кылзэ, мар шугъяськытэ туала пиналъёсты, тырше соослы юрттыны. Дышетске ог-огдэс гажаны, висёнлэсь утиськыны. Улэ чакласькыса, тупаса. Эн ултӥялэ СПИД-эн висисьёсты. Л. Кузелин, республикаысьтымы СПИД-нюръяськонъя центрысь врач. ВАЗИСЬКОН Берло дыре "Удмурт кенеше" иворъёс вуыло, Россия Федерациысь Кун Думае депутатэ кандидатлэн С.П.Пушина-Благининалэн оскем муртъёсыз бырйисьёсты юромо пӧяны выро шуыса. Соос верало удмурт огазеяськонлэн кивалтӥсьёсызлэн та адямилы дурбасьтэмзы сярысь. Исполкомлэн нимыныз ивортӥсько: Пичи кенеше быръем эшъёс, вуоно быръёнъёсын герӟаськем ужпумъя люкаськылыкузы, С.П.Благининалэсь кандидатуразэ ӧз но эскере, озьыен, солы дурбасьтыны мылкыдзэс ӧз возьматэ. "Удмурт кенеш" умоен лыдъяз Светлана Смирновалэсь но Юрий Маслюковлэсь кандидатураоссэс. Соос понна ик ӧтиз удмуртъёсты 19-тӥ декабре куараоссэс сётыны. Валентин Тубылов, "Удмурт кенеш" ассоциацилэн тӧроез, Кун Кенешлэн депутатэз. Вавожын но луоз РДК Глазовысь лэсьтӥськонъя Чепецкой управление Вавож черкогуртэ культура юрт ӝутоз. Туэ гинэ ини 450 сюрс манетлы ужъёс быдэстэмын луозы. Но Чупчи палась лэсьтӥськисьёс уногес ужъёсты быдэстыны чаклало. Ёрос культура юрт вуыны кулэ 2001-тӥ арын. Ёрос администрация хозяйствоослэн кивалтӥсьёссылы техникаен юрттыны курыса вазиськиз. Н. КОЛЗИН. Ватсаса профессия басьтоды Коньдонэн югдур секыт бере, егитъёслы тодон-валан сётон удыс но шуге-леке вуэмын. Но нимысьтыз шор ёзо дышетскон заведениосты йылпумъямъёс ватсаса вакчи дыр куспын выль образование басьтыны быгатозы. Вераськон мынэ республикаямы вис карытэк дышетскыса профессия басьтонэз радъян сярысь. Та ужез ас вылаз басьтӥз Ижевскысь кун технической университет. Отын асьсэлы специальность басьтозы техникумъёсты, колледжъёсты, лицейёсты, училищеосты но школаосты йылпумъямъёс. Та ужпумез туэ 29-тӥ ноябре огъя кенешазы эскеризы ИжГТУ-ысь учёнойёслэн советсы, Удмурт Республикаысь Наукая, вылӥ но шор ёзо профессиональной тодон-валан сётонъя комитетлэн коллегиез но УР-ысь шор ёзо дышетскон заведениослэн директоръёссылэн кенешсы. Пумиськон ортчиз технической университетын. Куноез кунояллямтэ Туэ 1-тӥ ноябре Глаз каре Тюмень областьысь куно вуэм аслаз машинаеныз. Машиназэ пуктэм кунокуаезлэн корка вӧзаз, Пехтина ульчаысь 4-а номеро корка вӧзы. Отчы вунэтэм на 61 сюрс манет коньдонзэ, куинь зарни зундэсъёссэ, паспортсэ но сберкнижказэ. Но жаляса верано луэ, ваньзэ та кельтэм арбериосты машинаысь лушкаллям. Озьы Тюменьысь куно асьме элькунын 68500 манет тыр изъян адӟем. П. НИКОЛАЕВ. Кудлань валтӥз валтӥсь закон? Быдӟым Британия (Англия) улэ нокыӵе валтӥсь законтэк-конституцитэк. Отын вань законъёс ортчемын-волямын дауръёс пыр. Тӥни малы корольёссэс уг виыло, кунпус (герб) вылысьтызы француз кылъёсты уг ӵушыло. Америка 200 арлэсь кема улэ одӥг валтӥсь законэн. Асьмеос кызетӥ дауре гинэ ньыль Конституция гожтӥмы. Вераськон мынэ ини берлояз бадӟымесь воштонъёс пыртон сярысь. Бере уг кыльы Удмурт кун но. Нимысьтыз кылдытэм комиссия ужа валтӥсь законамы бадӟымесь выльдонъёс лэсьтон бордын. Ӟечлы-а, уродлы-а со - конституциез вошъян? Быдэс дуннелэн азинскем сюресэз возьматэ: вошъяськись закон - умойтэм маке. Тодады ваелэ ай, макем дыртӥд-вуттӥд кутэмын вал берпуметӥ Конституция. Борис Ельцин лӧптыса ивортӥз: Россиысь данакез адямиос солы дурбасьтэмзэс веразы. Озьы-а со вал? 1993-тӥ арын Вылӥ Советэз пазьгем бере, калык мазэ-созэ валаса ӧз вутты. Выль демократъёс, азьвыл большевикъёс сямен ик, калыкез кужмысь валтӥзы "шудо улонэ". Кытчы вуттӥзы соос? Валтӥсь законмы косэ дунтэк дышетыны но тазалыкмес утьыны. Нош Конституцилэн данэз ӧвӧл бере, сое вамыштэмлы быдэ тӥянлэсь нокин уг кепыра. Тужгес ик - вылӥос, законэз утьыны пуктэмъёс. Дунтэк эмъяськыны уд быгаты. Коньдонтэк университетэ уд пыры. Ми гожъям ни Сергей Кириенколэн вылӥ дышетон ёзъёсты коммерцие выжтыны выремез сярысь. Россиысь ректоръёс борддор кадь юн султыса, студентъёсты дунын дышетон сярысь Россиысь Правительстволэн ӵектонэз улонэ ӧз пыӵа. Конституциез выльдоно шуыса, Россиын туннэ ваньмыз валало. Ваньмыз, Ельцин сянаез. Олокӧня пол меӵкытъяз ни: сое исаны нокинэ но уг лэзьы! Со ӧз выды рельсаос вылэ - выдӥз историлэн сюресэз вылэ. Одӥг ласянь умой, президент сюлмаське ке валтӥсь законэз ӵем вошъянтэм сярысь. Котькуд ньыль арлы быдэ Россилы йыр бырйим но выль Конституция гожтӥм ке, кин асьмеды зэмос кунэн лыдъялоз? Мукет ласянь, суп-сап пӧрам валтӥсь закон Борис Николаевич сярысь вазьгес пересьмиз но висьыны усиз. Тани мар вера Евгений Примаков: - Президентлэсь быдэсъяно ужъёссэ (полномочиоссэ) шымыртон ужпум туннэ понна тужгес лэчытэз ӧвӧл. Политикаын вожвылъяськонъёсын сэрен сыӵе мылкыдъёс кылдо ке но. Россиын улосвылъёс но калык выжыос уно. Кунлэн историез но психологиез аслаз. Соин ик президентлэн властез юн медло. Вераськон нуоно ӧвӧл властьлэсь кыӵе ке ёззэ лябомытон ярысь. Кенешон медло ёзъёслэсь кужымъёссэс шонер радъян пумысен. Озьы парламентлэсь удыссэ ӝутыны луысал. Правительстволэн кивалтӥсезлы бадӟымгес эрик сётоно кивалтӥсьёсты быръён ласянь. Туннэ со аслыз воштӥсьёс пуктыны но, соосты мозмытыны но уг быгаты. Политикъёс кемалась дэмлало ни: Правительствое ӝутоно Кун Думаын трос куара басьтэм фракциослэсь дэмлам адямиоссэс. Нош соос уг ке кельшо премьер-министрлы? - Со кышкыт ӧвӧл, - лыдъя Евгений Максимович. - Мынам Правительствоям ужазы пӧртэм партиосысь но движениосысь адямиос. Вераме потэ: соос данмес чутрак ӝутӥзы асьме дорын но, кунгож сьӧрын но. Парламентысь тросэзлы матын луись Правительство ӟечгес берга. Али мар пӧрме? Кун Думаен кивалто коммунистъёс. Президент но Правительство соосты уггес ярато. Куспазы пуроме вожвылъяськон. Керетыса тачак кужым но дыр быре. Огшоры калык сярысь сюлмаськыны ноку луэ. Кун Дума но министръёс тупасалзы ке, одӥг ласянь - депутатъёс юнгес эскерысалзы Правительствоез, мукет ласянь - парламент кӧня ке кыл кутысал Правительстволэн ужамез понна. Туннэ Кун Дума но министръёс копак нимазы висъяськемын. Соин сэрен Правительство парламентмы пыртӥ аръёсын поттыны уг быгаты кунлы туж кулэ документъёсты - выт, музъем но мукетыз сярысь законъёсты. Дума озьы ик аръёсын пыкылэ быдэсъясь властез, шуом, Чечняын югдур понна. Шонер курла кадь. Нош ачиз малы ке уг юнматы сое тупатонъя решениос. Примаков уг дэмла Конституциез копак воштыны. Отчы кельтоно аръёсын но дауръёсын юнмам дунлыкъёсты - адямилэсь правооссэ но эрикъёссэ, кунлэсь быдэслыксэ утён инъетъёсты, тупаса улонэз но огсыр политикаез, властъёслэсь ужъёссэ люкылонэз. Сыӵе валанъёс ас кожазы уз быдтэ ёрмонэз, уз кортналэ йыртэманэз. Нош луэ ук нимаз удысъёс понна кыл кутӥсьёс азе чурытэсьгес куронъёс пуктыны. Югдурез утись министерствоос но ведомствоос али президент киын. Таиз ваньзэсты чакласа уггес вуы. Выльдэм Конституция сое санэ мед басьтоз. "АиФ" газетлэн валтӥсь редакторез Владислав Старков но мукет журналистъёс Евгений Максимовичлэсь ӵем юало, вице-президент асьмелы кулэ-а шуыса. Со лыдъя: вице-президент асьмелы кулэ. Президентлы мед юрттоз куд-ог ужпумъёсты быдэсъяны, таиз ӧвӧл дыръя вылӥ ёзъёсын, кылсярысь, Кышкытлыклэсь утиськонъя советын кенешон нуыны. - Мукет кунъёсын ужанъя министр дыръям мон адӟылӥ таӵе суредэз, - вера Примаков. - Ог куамын кунысь посолъёс президент азе радэн султо. Дипломатиын со йӧспӧртэм адӟиське. Та ужез ас вылаз басьтыны быгатысал вице-президент. Вице-президентлэсь постсэ тупатон юнматоз властез. Президентэз дырызлэсь вазь быръёнэз радъяны но ортчытыны туала Конституция сётэ куинь толэзь гинэ. Вице- президент сыӵе дырез кузёмытыны амал шедьтысал. Алиез Конституция оглом ӟеч пусъе Россия Федерацилэсь тодметъёссэ. Нош центрлэн но улосвыллэн кусыпъёссы рос-прос радъямтэ. Асьмеос юн шумпотӥм вал кун властьлэн Россиысь но Удмуртиысь ёзъёсыз куспын огкыл (договор) гожтэмлы. Мар со сётӥз? Туннэ нокин но ӟеч-ӟеч уг тоды. Евгений Максимович дэмла Россилэсь историзэ тодэ вайыны. 19-тӥ дауре Россия империын вал одӥг экономика, одӥг коньдон. Нош кунлэн пӧртэм палъёсаз пӧртэм политика нуиськиз. Финляндия, кылсярысь, Россилэн люкетэз лыдъяськылӥз. Нош законэз, полициез, судэз аслаз вал. Малы ке-а революция дасясьёс кенешъёссэс отын радъяллязы? Оскизы: Финляндиысь полиция соосты Россилы уз сёты. Аспӧртэм правоосыз вал Польшалэн. Туала Федерация озьы ик трос пумо медло. Россилы уг тупало шовинизм но, национализм но. Одӥг ласянь одно утёно пӧртэм калыкъёслэсь правооссэс но кун выллем кылдосъёссэс (образованиоссэс), мукет ласянь чаклано Россиысь субъектъёслэсь огкадь правооссэс но стандартъёссэс. Асьме республикаын но музон интыосын кылдэм югдур кемалась куре ни быдэсъясь властьлэсь вылӥысен улӥе васькись ёзъёссэ юнматыны. Сотэк ог люкетэз губернаторъёс но президентъёс асьсэды эксэй радэ пуктыны выро. Интыосысь быръем кивалтӥсьёс калык азьын кыл кутонэз но мед шӧдозы. Россилэсь Конституцизэ но законъёссэ тӥясьёсты президент куштыны мед быгатоз - Россиысь Вылӥ судлэн решениезъя. Удмурт кунын озьы ик кутскиз Конституцимес выльдон уж. Россия Федерациысь законъёс меӵак куро: субъектъёсын вылӥ кивалтӥсь кароно быдэсъясь властьлэсь йырзэ. Удмуртиысь валтӥсь закон сыӵе муртэн лыдъя Кун Кенешлэсь Тӧрозэ. Малпамын вал озьы: парламентлэн кузёез диктатор луыны медаз быгаты. Табере асьмелы но кулэ йыр яке президент. Кун Думае быръён дыръя, 19-тӥ декабре, мылкыдмес вералом. Мон озьы малпасько: кунгож сьӧрысь вуэм президент кыллэсь данзэ Борис Ельцин юн саптаз. Сое удмуртэ но берыктыны уг луы. Глава кылэз - луэ: йыр яке кузё. Таиз ини асьмелы тупагес кадь. Алексей Шкляев. Кык нунал ӵоже Балезино ёросын ортчизы удмурт культуралы сӥзем нуналъёс. Кык нунал ӵоже вал пӧртэм ужрадъёс. Балезино черкогуртысь лулчеберетъя юртэ люкаськылӥзы ёросысь библиотекарьёс, удмурт кыллы дышетӥсьёс. Соос азьын вераськизы нылкышно кылбурчиос Галина Романова, Любовь Тихонова, Лидия Нянькина. Люкаськемъёс пумиськылӥзы татысь аспӧртэмлыко суредасен Владимир Наговицинэн. Культура юртын солэн адӟытонэз усьтэмын вал. Лулчеберет удысмес азинтӥсьёсты шулдыртӥз фольклор кырӟанъя "Егит мылкыд" ансамбль. Собере ужрадэз ёрос библиотекаын азинтӥзы Балезино палъёсысь кылбурчиос. Посёлок школаысь дышетскисьёс но дышетӥсьёс, кылбурет дуннеен тунсыкъяськисьёс пумиськылӥзы дас вить ёрос гожъясен. Жытазе Ижысь куноос Юнда черкогуртэ лыктӥзы. Татын ортчиз бесерман гожъясьлы Михаил Федотовлы сӥзем ӝыт. Буре ваён ужрадэз бесерман культурая музейын ортчытӥз солэн кивалтӥсез Ангелина Урасинова. Со луэ кылбурчилэн дышетӥсез. Поэтлэн вордӥськем Яр ёросысьтыз эшъёсыз, кузпалыз но мукет ӵыжы-выжыосыз, сое тодӥсьёс вуылӥзы. Татын ик, Геннадий Корепанов-Камскийлэн юбилеезлы сӥзьыса, солэн творчествоез сярысь малпанъёссэс веразы. Ӵуказеяз нылкышно кылбурчиос пумиськылӥзы Исак черкогуртын улӥсьёсын. Соосын ӵош Балезино ёросысь егит поэтъёс но вал. Исакын лулчеберетъя кык нуналъем ёрос ужрадъёслы йылпумъянъёс лэсьтэмын. Люкаськемъёсты шулдыртӥзы татысь культура юртысь кырӟасьёс но эктӥсьёс. Оксана МОСКОВА, Удмурт кун университетын дышетскись. Кыкетӥ дор Кемалась ик ӧвӧл Глазов пединститут кылдэмез дырысен куатьтон ар тырмонзэ пусйиз. Пӧртэм ужрадъёс ортчытэмын арня ӵоже. Юбилейлы сӥзьыса, 16-тӥ шуркынмонэ усьтӥськиз научно-практической конференция. Институтысь дышетӥсьёс асьсэ малпанъёссэ шараязы, сюлэмшугъёссэс ивортӥзы. Ӵуказеяз конференция ужзэ йылпумъяз. Собере сӥё-дано ӝыт ортчиз. Пединститутысь дышетскисьёсты, дышетӥсьёсты но ужасьёсты ӟечкыланы вуылӥзы Кун Кенешысь, Удмурт Кивалтэтысь Калыкез дышетонъя министерствоысь адямиос. Шуныт кылъёссэс веразы Удмурт Кивалтэтлэн тӧроезлэн воштӥсез Виктор Шудегов, Кун Кенешлэн Тӧроезлэн воштӥсез Светлана Смирнова но калыкез дышетонъя министр Любовь Захарова. Ваньзы ик соос пединститутлэсь пайдаё тыршемзэ пусйизы. 1939-тӥ арын та вуз учительский институт шуыса нимаськиз. Нош 1952-тӥ арын педагогической институт шуизы. Татын дышетскизы кылбурчиос Флор Васильев, Олег Поскрёбышев но мукет тодмо адямиос. Институтын лулысь-сюлмысь дышето элькунысьтымы наука удысысь сӥё-дано ужась Валентин Майер но искусство удысысь сӥё-дано ужась Валентин Касимов. Туннэ тямыс факультетын ньыль сюрслэсь ятыр вуоно дышетӥсьёс тодон-валан басьто. Визь-нод сёто кыксюлэсь трос дышетӥсьёс. Нош туэ институтын нырысьсэ усьтӥськиз педагогикая аспирантура. Со сяна, кыкетӥ арзэ ужало кыкетӥ вылӥ тодон-валан басьтонъя факультет (татын коньдон тырыса дышетско) но иворъёсъя но ог-огеныд кусып кылдытыны юрттонъя колледж. Институтлэн ёзъёсыз озьы ик вань Ижын но Игра посёлокын, ялан ужась ёзэз - Сарапул городын. Али ӝутӥське вузлэн ньылетӥ юртэз. Со чакламын гуманитарной факультетлы. Институтлэн валтӥсь сюлмаськонэз туэ ваньмызлэн кадь ик - коньдон шедьтон. Татын ужасьёслы уксё федеральной бюджетысь лыктэ. Озьы ке но, Кун Кенешлэн Тӧроез Александр Волков юрттыны кыл сётонлэсь ӧз палэнтӥськы. Но улон азьланьтӥське. Соин ик шуг-секытъёс шоры учкытэк, Глазысь кар кузёос культура сярысь сюлмаськемысь уг дугдо: егитъёсты дышетон удыссэз паськытатыны чаклало. Таӵеесь ик малпанъёс кылдо менеджмент пумысен но. Оксана Москова, Удмурт кун университетын дышетскись. Выль школа усьтӥз ӧсъёссэ Алнаш ёросысь Муважи гуртысь пиналъёс выль школае дышетскыны потӥзы. Та дырозь соос куашканы кутскем юртын тодон-валанъёс басьтӥзы. Коньдон тырмымтэен, выль школаез пуктон вить арлы ӝегаз. Ужез азьланьтӥз Удмурт Правительство. Со ньыль миллион манет висъяз. Школаын вань мастерской, вуриськон цех, сиськонни. Матысь дыре чаклало компьютер класс усьтыны. Али йылпумъяло ни спортзал лэсьтонэз. Пиналъёслы татын тол кезьытъёс но кышкыт ӧвӧл. Кивалтӥсьёс эстӥськонэз тырмыт ваён сярысь но сюлмаськиллям. О. МОСКОВА. Гажано эшъёс! Туэ 19-тӥ декабре ортчоно быръёнъёс чутрак воштыны кулэ Кун Думаын кузёяськись кужымъёсты. Россиын котькудӥз улӥсь оске: калыкен быръем депутатъёс гинэ быгатозы странамес секыт югдурысь поттыны, азьвыл данзэ ӝутыны. Малы асьмеос Кун Думае бырйыны кулэ сыӵе адямиосты но партиосты, кудъёсыз киултӥзы закон кылдытӥсь (законодательной) властез но сое дас ар ӵоже асьсэлы гинэ ужато. Туннэ соос шуо: "Россия куашкатэмын". Россия ӧвӧл, власть куашкатэмын. Со бордысь потэ вань уродэз, кырсез. Федерацилэн бюджетаз 21 миллиард доллар коньдон, нош Россия арлы быдэ кунгож сьӧры 30 миллиард доллар уксё келя. "Ваньмыз со законъя лэсьтӥське",- шуо "калыкен быръемъёс" пӧлысь сыӵеосыз, кинъёс кыл вылын гинэ сӥзизы чебер улон. Кун Думае быръёнъёсы мон ӵектэмын "Блок генерала Андрея Николаева и академика Святослава Федорова" огазеяськонэн. Бадӟым политикае мынӥсько валаса, туннэ нуналлы тупась программаен, калык понна ужась законъёс кылдытонлы вань тодон-валанме, быгатонлыкме, кужымме сётыны мылкыд карыса. Югославиын, Чечняын пуромем ожъёс возьмато: Россиын кулэ выльдэм, законэн юнматэм военной политика, армилы - выль пыӵал тӥрлык. Нош армиез техникаен юнматыны луоз, со сярысь государство рос-прос сюлмаськиз ке. Соку Удмуртиысь обороная промышленность но пыд йылаз султоз. Кун Думалы тырмоз ини музъем сярысь ченгешыны. Дугдоно сое коммерцияя банкъёс пыр вузамысь. Озьы музъем ужась син куспын "гольык" кылёз, бусыос но бакчаос банкъёслы "выжозы". Кыдёке ветлонэз ӧвӧл. Тани Завьялово ёрослэн гинэ банкъёслы 15 миллион манет пунэм тыронэз. Син азяды пуктэ ай, маиз кылёз на ёрослэн, со миллионъёс интые музъемен ке тыриськиз! Городъёсысь но гуртъёсысь акциосын ужась предприятиосын тыршисьёс асьсэос отын кузё луыны но поттэм ваньбуренызы ас тодэмзыя кивалтӥськыны кулэ. Одно ик воштоно вытъя ёзнэтэз. Солэн туннэ пайдаез чик уг шӧдӥськы. Калыклэн коньдонэз, выт чотын бичамез но, кошке кунгож сьӧры. Калык тодэ, кин туннэ луыны кулэ кивалтон ёзъёсын: оскымон, сётэм кылзэ быдэсъясь, вань калыкен быръем но Россиын ӟеч улон понна нюръяськись. Николай МАКАРОВ, Ижевскысь быръёнъя одӥг мандатэн 28 номеро округъя депутатэ кандидат. Кыӵе выжыысь асьмеос? "Мон - бесермян, мон - адями" Бесермянъёс. Кыӵе калык со? Кемалась ик ӧвӧл вуылыны кылдӥз Юкаменск ёросысь Палагай черкогуртэ. Кинэн гинэ ӧм пумиськылэ, ваньзы удмурт кылын верасько. Но удмурт газетъёсты, журналъёсты уг лыдӟо. Почтае пыраса тодӥм, "Удмурт дунне" газетмес басьтӥсь одӥг мурт но ӧвӧл шуыса. Со дыре ик тросэз басьто бигеръёслэсь "Янарыш" газетсэс. Бӧрысь валамы: удмурт сямен вераськисьёс озьы ик ӟеч верасько вылэм бигер но ӟуч кылын. Нош куд-огез возьдаськысагес веразы, соос бесермянъёс шуыса. Вань та калыкъёс - ӟучъёс, бигеръёс, удмуртъёс но бесермянъёс - Палагайын кема дырысен ӵош уло ни. Асьме шаерын сыӵе гуртъёс трос ӧвӧл кадь. Ӵемгес пумиськыло яке ӟуч, яке удмурт, яке бигер гуртъёс. Удмурт учёнойлэн М.В.Гришкиналэн "Удмурты" книгаысьтыз таӵе чуръёс шедьтӥ: 1850-тӥ арын Вятской губерниын 1335 удмурт, 189 бигер, 153 пор, 6 бесермян гуртъёс вылӥллям. Нош 155 гуртын суро-пожо калык улэм. Оло со дырысен Палагай гуртын ньыль выжыысь потэм калыкъёс уло. Кызьы луэ ни табере валаны, тросэз семьяос но татын суро-пожоесь. Татысь калыкъёс ог-огзэс валаса но гажаса улыны туртто. Куспазы керетонъёс уг кылдыло. Озьы ке но, нокыӵе шуг-секытъёс ӧвӧл шуыны шонер уз луы. Басьтомы тани нылпиосты дышетонэз. Котькытын сямен ик Палагай шор ёзо школаын дышетон ӟуч кылын радъямын. Но директорлэн Маргарита Романовна Гусевалэн тыршеменыз татын удмурт но бигер нылпиос ас вордскем кылзэс дышето, калыксылэн культураеныз тодматско. Кема аръёс ӵоже ини пиналъёслы гинэ ӧвӧл, соослэн анай-атайёссылы но удмурт но бесермян культураез татын пыӵатэ удмурт кыллы дышетӥсь бесермян нылкышно Тамара Павловна Абашева. Мон шуысал туж дӥсьтӥсь кышномурт! Оло, солэсь адӟем карыса, табере егит бесермян дышетӥсьёс но кин луэмзэс уг вато. Но Тамара Павловна туж умой тодэ на мукет дыръёсты, куке солы бесермян луэмез понна, ой, кӧня чидано луиз! - Удмурт кылэз 5-тӥ-6-тӥ классъёсын гинэ дышетӥ. Озьы ке но, Можга педучилищее пырыкум, удмурт кылъя экзаменме ӟеч, "ньыльлы", сётӥ. Туж яратӥсько вал удмурт кылэз! Монэ удмурт отделение басьтӥзы. Общежитиын улыкумы, - мадёнзэ азьланьтэ Тамара Павловна, - Игралась эше огпол юаз: "Тамара, тон бесермян, лэся, ук?" Ӧвӧл, ӧвӧл, шуисько. Собере милемыз Дэбес училищее дышетскыны выжтӥзы. Отын удмурт кылъя но литературая "витьёс" гинэ басьтылӥ. Но туж кепыралляй бесермян улэмысьтыз. Бесермянъёсты ултӥямез нырысьсэ ас вылам шӧдӥ 5-тӥ классэ мукет гуртэ дышетскыны мынэме бере. Милемыз, бесермян нылпиосты адӟыса, пиналъёс соку ик исаны кутскизы: "О, бесермянъёс лыктӥллям..." Училищеез йылпумъямез бере егит дышетӥсез Красногорск ёросэ ужаны ыстӥллям. Сюлмысь ке но ужаны тыршиз, ӧз чида - бесермян ныллы школаысь кошконо луиз: - Огпол монэ егит пи кураны лыктэ вылэм. Но мон сярысь юалляськыны со малы ке историен дышетӥсь доры пырем. Со ик алэм монэ кураны. Бен, семьяе вань, картлы бигерлы бызи. Но кин тодэ, оло, мон шудогес но, умойгес но улысал... Кытчы гинэ уд мынӥськы, "бесермян" шуон ултӥян кыл вал. Тӥни соин ик, дыр, кышномурт огпол аслыз юн-юн шуиз: "Озьы луыны кулэ ӧвӧл! Бесермянъёслэсь данзэс вылӥегес ӝутоно!" Бесермянъёслэсь ужпумъёссэс туж умой вала школалэн директорез, угось ачиз удмурто- бесермян семьяысь потэмын. Солэн кичӧлтэмезъя, Палагай школаын венгръёслэн но бесермянъёслэн культуразылы сӥзем музей кылдытэмын. Кыдёкысь куноос татчы кӧня ке пол вуылӥллям ини. Бесермян культурая огазеяськонлэн ёзэз табере Палагай гуртын но вань. - Нош ваньмыз кутскиз куинь ар талэсь азьло удмурт кырӟанъёс бордысен, - шуэ Тамара Павловна. - Одӥг дышетӥсен удмурт фольклор ансамбль кылдытӥм. Ачим мон мандолинаен но шудӥсько. Бадӟым классъёсын дышетскисьёсты но сьӧрамы кыским. Гуртысь гуртэ концертъёсын ветлӥмы. Собере 5-тӥ-6-тӥ классъёсын дышетскисьёсты фольклорен тодматыны кутски. Нош али, удмурт кыллы дышетэм сяна, фольклор кружок нуисько покчи классъёсысь нылпиос понна. Декабрь толэзе районамы ортчоз бадӟым фольклор праздник - али солы дасяськиськомы. Дышетӥсьлэсь кема мадемзэ кылзыса, дырын-дырын паймонэ но вуылӥ: макем трос лэсьто та школаысь бигер, ӟуч, удмурт но бесермян дышетӥсьёс ас ылзэс, культуразэс пыраклы кельтон понна. Тӥни кызьы радъяське нациосын ужан политика республикамылэн пыдлось сэрегаз, пичи школаын, кытын 22 гинэ дышетӥсь ужа. - Шумпотӥсько, табере пиналъёсмы удмурт калыклэсь но дано пиоссэ-нылъёссэ тодо ни шуыса, - вера Тамара Павловна. - Ашальчи Окилы сӥзем ужрадын дышетскисьмы Саша Мышкин районын нырысетӥ инты басьтэмъёс пӧлын вал. Мон но кылбур гожтӥ вал Ашальчиез буре вайыса (куддыръя йырам лыкто кылбур чуръёс). Ӟуч но удмурт кылын пусйим Кузебай Гердлэсь вордскем нуналзэ. Матысь гуртъёсысь калыкез но ӧтьылӥм. Шамарданын ортчиз берсермянъёслэн нырысетӥ ӧтчамзы. Отын ми Гулекшурысь бесермянъёсын возьматӥм ныл келян обрядэз. Умой пӧрмиз. Отчы лыктэм финнъёслы но, венгръёслы но туж кельшиз. - Егитъёсты туж тодматэм потэ бесермян культураен. Мон кадь кылъёсты тӥяса медаз вераське, бесермян кылын но, ӟуч кылын но йӧскадь вераськыны уг быгатӥськы, - куректонзэ вера Тамара Павловна. - Кык бесермян пересьёсмы вань: Тамара Федотовна Невоструева но Ксения Алексеевна Невоструева. Туж ӟеч тодо асьме сямъёсты- йылолъёсты. Соослэсь тодон-валанзэс гожтыса кельтыны тыршоно вал. Школаысь дышетӥсьёсын вераськыса валамы, бесермян пиналъёслы вылӥ дышетскон заведениосы пырыны секытгес йӧтэ шуыса. Кызьы юрттоно сооослы? Та пумысен Тамара Павловна тазьы вера: - Бесермян кыл удмурт кыллэсь сокем зол уг висъяськы. Ми нёжтысагес, небытгес вераськиськомы. Мынам малпамея, бесермян пиналъёсты пыр-поч удмурт кыллы дышетоно, соку соос удмурт факультетъёсы коть пырыны быгатысалзы. Но дышетыны али туж секыт. Тани 3-тӥ-4-тӥ классъёсын дышетскисьёслы уг тырмо удмурт учебникъёс. Тросэз нылпиос бесермянуг тодо, кызьы шонер верано "вал" "скал" кылъёсты уг тодо. - Тамара Павловна, кызь ар талэсь азьло школаяды удмурт кыллы дышетон туж умой радъямын вылэм. Мар бен воштӥськиз со дыр куспын? - Зэмзэ но, удмурт кылэз дышетон умой пуктэмын вал. Со вакытэ вань удмурт журналъёс, газетъёс басьтӥськомы вал. Но удмурт кылъя дышетӥсьмы пенсие кошкем бере, капчиен та ужлэсь куштӥським. Ӵапак со дыре бигер кылын дышетӥсьмы но ӧй вал. Мон но вить арлы колхозэ парторге ужаны кошкылӥ. Сыӵе вамыше сярысь али но туж жалясько, школаысь ӧй ке кошкылысал, оло, аслэсьтым ужме нуыса, нылпиосты 11-тӥ классозь ик удмурт кыллы дышетысал. Ма, со дыре вузъёсы пырисьёсмы но вал ини. Тани Галя Юферевалэн кылбуръёсыз "Советской Удмуртие" но поталлязы, со Глазовысь пединститутэ пыриз. Тӥни озьы удмурт кылэз тодыса, со вылӥ образование басьтӥз. - Табере куашкатэм ужмес выльысь ӝутыны туж секыт йӧтэ. Тросэз анайёс но пиналъёссэс удмурт кыллы дышетыны пумит луо, - шуэ Тамара Павловна. Ярам, директормы туж валась. Пичи классъёсысь пиналъёс урокъёсын арняяз кык пол вордскем кылзэс дышетыны быгато. Кинлэн мылыз потэ, бигер кылъя урокъёсы ветлэ, кин - удмурт кылъя. Вань одӥг дышетскисе: анаез - ӟуч, атаез - бесермян, песятаез - бигер. Нош ачиз нылаш мылкыд каремезъя бигер фольклоръя кружоке ветлэ. Тӥни сыӵе пиналъёсмы но вань. Нокинэ национальной кыллы кужмысь ум дышетӥське, мылкыдзэс лыдэ басьтыса ужаськом. Тамара Павловна Абашева лякыт кышномурт. Соин, вылды, нокинэ янгыш уг кары, малы ог вакытэ тросэз школаос вордскем кыллы дышетонлэсь куштӥськылӥзы. Но асьмелы тодмо ук, ӵапак со аръёсы ӟуч политикалэсь кылзӥськыса ужаз республикаысьтымы Калыкез дышетонъя министерство. Со политикалэсь бервылъёссэ али но туж секыт вормыны йӧтэ уй пал районъёсысь ӟучомем школаослы. "Удмурт дунне" газет вань шуыса Палагай школаысь дышетӥсьёс тодо. Но шуизы, газеттылы, пе, вуоно дышетскон арысен гинэ гожтӥськыны быгатомы, соку пиналъёсмы, пе, удмурт грамматикаез валалозы ни. Зэм, валасесь татын дышетӥсьёс. Школаын пӧртэм выжыысь потэм нылпиос дышетско бере, огкадь синмын учко вань калыкъёслэн культураоссы шоры. Таяз дышетскон арын шор ёзо школаез 10 адями йылпумъялоз. Огез жаль - со пӧлысь одӥгез но ас вордскем кылзэс пумозяз ӧз дышеты. Со ласянь, оло, шудогес луозы туэ нырысетӥ классэ 10 кузя дышетскыны мынэм нылпиос? Солы туж оскем потэ. Но асьме пиналъёс удмурт, бигер, бесермян кылзэс йӧн-йӧн мед тодозы шуыса, дышетӥсьёслэсь гинэ кылзэс ӧвӧл юано, дыр. Со шоры учконзэс воштоно гурт кивалтӥсьёслэсь но. Ӵем-а меда сюлмасько гурт кивалтӥсьёс ӧжыт лыдъем калыкъёслэсь культуразэс ӝутон понна? Палагай гуртэ ми юнме шорысь ӧм вуылэ. Гурт удысъя министерствоысь адямиослэн ӵектэмзыя: вань, пе, Юкаменск ёросын кужмо хозяйство. Кивалтэ соин егит адями Виссарион Александрович Неустроев. Тӥни озьы "Трактор" хозяйствое сюрес возьыса сюримы солэн центральной усадьбаяз - Палагай гуртэ. Но егит кивалтӥсен кылмы ӧз тупа. Дунтэк но, дунын но (газетъёсы но али вуиз реклама шуон) со усто хозяйствоез сярысь вераны-возьматыны пумит луиз. Ми сое валамы кадь: кыкетӥ арзэ гинэ ай кивалтэ, ушъяськемез ӧз поты. Но мар бен уродэз ӟеч ужасьёсты газет пыр данъяны луонлык ке вань? "Кинлы бен со удмурт газет кулэ, нокин сое уз лыдӟы" шуэмез бере, зэмзэ ик, вераськыны номар сярысь вал ини. Почтаын бигер кышномурт лад-лад удмурт кылын вераз, кыӵе газетъёс басьто солэн гуртоосыз. Нырысетӥ интыын бигер "Янарыш" газет, "Комсомольская правда" но "Удмуртская правда" ӟуч газетъёс, собере ӟучо-удмурто "Иднакар" газет. Дышетӥсьёс дорысь потыса ас поннам малпай: "Кӧня аръёс ӵоже ӵакмыса улоз на меда татын удмурт кыл?" Нош пель сьӧрын али но Тамара Павловналэн верамъёсыз: - "Бесермян" али но ултӥян кыл. Али но со сэрен семья кусыпъёс сӧриськыло. Али но куд-ог кивалтӥсьёсмылэсь кылоно луэ: "Бесермянъёс кадь эн дӥсяське". Огпол ӧй чида, одӥг сыӵе кивалтӥсьмылы вераны дӥсьтӥ: "Малы ялан ултӥяськоды бесермян калыкез? Ми шат мукет калыкъёслэсь урод ужаськом? Валтӥсь зоотехникед - бесермян, инженеред - бесермян. Гаражен но али бесермян кивалтэ. Нош кин колхозмес ӝутӥз? Бесермян Невоструев Владимир Петрович. Али сое Юкаменск ёросэн кивалтыны басьтӥзы" Шара бен ултӥяны али уг дӥсьто ни, но... Сыӵеос сюрыло. Собере тазьы но верасал: макем дышетскемын адями, сокем валаса со учке бесермян калык шоры. Тамара Павловна Абашева - Калыкез дышетон удысысь отличник. Олокыӵе но почёт грамотаосыз вань. Кык ар пионервожатой луыса но ужаны вуттэм, ӵапак соку мылысь- кыдысь вӧлмытэ вылэм "Дась лу!" газетэз, со понна но грамотаез вань. - Котьку ужалляй, тыршылӥ, - шуэ кышномурт, - али куд-ог дышетӥсьёс аналско, хозяйствомы вань, шуо. Соос бен со понна янгыш ӧвӧл. Нош мыным хозяйство но, мар но кулэ ӧвӧл. Яратоно уже гинэ медло. Одӥгзэ та дырозь уг валаськы, малы сокем урод учко бесермянъёс шоры. Зэм, мон - бесермян. Но мон адями ук. Бесермян ке но, мукет калыклэсь пӧртэм ӧвӧл. Вылӥ образование но басьтӥ, общественной ужъёсы но ялан пыриськисько. Тӥни сыӵеен син азе пуксиз та мыло-кыдо, дӥсьтӥсь бесермян дышетӥсь, кудӥз юн тырше бесермян нылпиосты югыт улонэ удмурт кыл пыр вуттыны. Но малы меда татчы уг вуо удмурт учебникъёс, малы уг тырмы "Анай кыл" - пичиослы тужгес но кулэ книга? Та ужпумъёсты ӵемгес эскерыны кулэ, дыр, роноын, Калыкез дышетонъя министерствоын. Янгышмы вань, вылды, милям но, удмурт газетъёсын но журналъёсын ужасьёслэн. Дышем сяммыя ялан одӥг районъёсыгес потаськом, кыдёкынъёсаз ӧжытгес вуылӥськом. Эскерон вылысь, та статьяен газетмес келяломы Палагай гуртэ. Мон уг оскиськы, удмурт кылын вераськись адямиос удмурт газетмес лыдӟыны уз быгатэ шуыса. Татьяна Банникова. Туспуктэмез Владмир Камашевлэн. Люкаськылозы егит семьяос Кияса ёросысь культура юртын алигес выль общественной клуб кылдӥз. Нимаське со "Выль семья". Выль огазеяськонлэн нырысетӥ ӧтчамез ортчиз ни. Радъяз сое клублэн кивалтӥсез Елена Кожевникова, культурая отделысь координацоонно-методической центрлэн директорез. Со нырысь вуылӥз республиканской семинаре. Огъя кенешазы кутэмын ни ужан план. Семья кылдытонъя кабинетлэн заведующиез Н. Л. Платонова люкаськемъёсын дискуссия ортчытӥз. Та ужрад Киясаын оыртчылоз толэзьлы быдэ. Отчы мур пыриськемъёс пӧлысь кыкезлы бӧрысьгес сётэмын луозы шутэтскон путёвкаос - "Егит семья" республиканской центрлэн "Берегиня" семейной экологической лагеряз. П. Николаев. Малы асьмеос сокем урод улӥськом? Вордскиз 1948-тӥ арын 25-тӥ декабре. Йылпумъяз 30 номеро школаез, собере - Ижевскысь механической институтлэсь машина лэсьтонъя факультетсэ. Ньыль ар ӵоже тыршиз "Ижмаш" огазеяськонын пыӵал тӥрлык поттон удысын. 1976-1979-тӥ аръёсы дышетскиз Москваысь сьӧд металлургияя научно-исследовательской институтлэн аспирантураяз. 1980-тӥ арысен ужа Ижевскысь физико-технической институтын. Технической наукаосъя доктор. Кун Думае быръёнъёсы мон ӵектэмын "Единство" блокен, кудӥныз кивалтэ Россилэн Героез, кышкыт учыръёсъя министр Сергей Шойгу. Маиныз бордаз кыске та движение? Нырысьсэ кылдӥз сыӵе кужым, кудӥз огазеяны тырше Россиез выльысь улӟытон, пыд йылаз ӝутон понна нюръяськисьёсты. Асьтэос адӟиськоды, кызьы ужа туала Кун Дума. Со тросгес кельше политикая клублы, кытын котькудӥз ас палаз кыскыны турттэ шобретэз. Тодамы ваём историез - котьку но секыт вакытъёсы калык курадӟонэз вормылӥз огазеяськыса гинэ. Со бордын - вань кужым. Эшшо маин пӧртэм милям блокмы? Ми политикае кыскыны турттӥськом чылкак выль адямиосты: улон югдурез валась, визьмо, чылкыт сюлэмо, кырсь ужъёсын герӟаськымтэ муртъёсты. Милям кивалтӥсьмы меӵак шуиз: быръёнъёслы дасяськыку милям кандидатъёсмы, отын вормон понна, кырсь амалъёсты уже уз кутэ. Нош сыӵе учыръёс пумиськыло, трос соос асьме республикаын но. Милям блокмы, озьы ик мон но, пумит луиськом быръёнъёс сярысь законлы. Соя Кун Думае депутатъёс (225 адями) пӧлысь ӝыныез(!) бырйиське партийной списокъёсъя. Троссэ соос пӧлысь ми ум но тодӥське. Со сяна, таӵе ёзнэт (система) луонлык кылдытэ партиосъя списокысь интыосты туж дуно дунын вузаны. Серемес адӟисько кандидатлэн ваньбурез (имущество) но уждунэз (доход) сярысь декларацилэн куронъёсыз но. Адямиос ворттыло мерседесъёсын, нош декларациосазы тӧдьы виштыос гинэ - уксёзы но, дачаоссы но, йыр вылазы липетсы но ӧвӧл кадь соослэн. Амалтэк юам потэ: малы сокем куанересь асьмелэн узыръёсмы? Валамон: кулэ сыӵе закон, кудӥзъя асьсэлэн котырзы сярысь декларация гожтыны кулэ кандидатлэн матысь вань ӵыжы-выжыосыз. Со сяна, кандидатъёсты мед ӵектозы ужан яке улон интызыя, кытын соосты тужгес но ӟеч тодо. Дунне вылэ медаз "вордске" Березовский "чечено-ингуш", кудӥз ӵектэмын Чечено- Ингушетиын, Кобзон "чукча" но мукет. Кыдёкысь пичи городъёсы соос мыно одӥг муген: тодо, кытын соос уло но ужало, ноку но быръемын уз луэ шуыса. Но та выллем ужпумъёс нырысь интыын уг сыло. Нырысь интыын одӥг гинэ юан, кудӥзлы валэктытэк азьлань мыныны уг луы. Нош юан таӵе: малы асьмеос сокем урод улӥськом? Малы узырлэсь но узыр страна ялан уллань гылӟе, оградэ султэ ляб азинскись государствоосын? Малы ке шуоно, асьмеос одӥг ёзнэтэз куашкатӥм, нош мукетсэ, рынокен экономикаез, ӧм кылдытэ. Огъя вераса, али ӧвӧл планмы но, рынокмы но. Дас ар ӵоже огинтыямы лёгаськиськом, азьлане одӥг вамыш но лэсьтытэк. Странамылэсь бюджетсэ, кудзэ сокем кема эскеро ини Кун Думаын, ӵошатыны луоз банан будэтӥсь республикаослэн бюджетэнызы гинэ. Соин ик котькӧня мед сӥзёзы депутатэ кандидатъёс чебер улон, бадӟым уждун, тырмыт эстӥськон, вольыт сюресъёс, югыт коркаос - ваньмыз со выжыкыл. Уго со понна кулэ коньдон. Нош бюджетмы - буш. Одӥгезлы гинэ уд лэсьты рай, сое мукетызлэсь басьтытэк. Уд капчияты пенсионеръёслэсь улонзэс, вань калыклэсь улонзэ умоятытэк. Кылдэм югдурысь потыны амал вань-а? Вань, одӥг гинэ. Сурам-пожам рынок интые, мед кутскоз ужаны зэмос рынокен экономика. Куштӥськоно ог-огеныд зачёт но бартер амалъёсын ужанлэсь. Нош зэмос рынок кылдытон понна кулэ законъёс бордын рос-прос, дыртытэк, валаса ужаны. Быръёнъя "Единство" блоклэн вань Россиын узыр общество кылдытонъя но экономикаез азинтонъя нимысьтыз программаосыз. Та ласянь мынам но вань малпанъёсы, матысь дыре соосын тӥледыз тодмато. Йылпумъяса вераме потэ: мон умой тодӥсько но гажасько удмурт калыклэсь сямъёссэ, йылолъёссэ. Трос аръёс ӵоже ми ӵош улӥм варматаеным Пантелей Григорьевич Каштановен. Со вордскемын Шаркан ёросысь Кушто-Ключ гуртын. Война пыр ортчыса, вуиз Данцигаозь, ужаз Рокоссовский маршаллэн штабаз картограф луыса. Пусъемын уно орденъёсын но медальёсын. Со туж кужмо, чидась адями вал, ноку но улонэз вылэ ӧз ӝожтӥськылы. Сыӵе, лэся, асьме калыкмылэн сямыз, дышемын вань ултӥянъёсты чиданы, шып улыны. Но аръёс ортчо. Туала вакыт кулэ каре дӥсьтӥсь, чурыт сямо но со дыре ик котьма ласянь адӟем карымон адямиосты. Сыӵе луэ Парвительстволэн Тӧроез Владимир Путин. Со вераз ини "Единство" понна куаразэ сётон пумысен. Котьма ке но, асьмелы валаны кулэ: политикае лыктэм выль адямиос гинэ быгатозы странамес шонер сюрес вылэ поттыны. Владимир Забильский, Ижевскысь быръёнъя одӥг мандатэн 28 номеро округъя депутатэ кандидат. Удмурт Элькунысь Национальной театр 28,29 декабре, 9 январе ӧте Выль арлы сӥзем "Капчи мылкыдын вамыштомы выль дауре" бадӟым концертъёсы. Тӥ пумиськоды театрысь туж тодмо но егит артистъёсын; адӟоды пӧртэм спектакльёсысь маскара люкетъёсты, кылоды кырӟась артистъёслэсь выль кырӟанъёссэс но уно тунсыкозэ. Концерт бырем бере - эктонъёс, кырӟанъёс, шудонъёс но вормисьёслы - кузьымъёс. Концертъёс кутско 18 часэ. Юалляськоно 78-79-81 номеро телефонъя. Удмурт Элькунысь Национальной театр декабрь толэзе таӵе спектакльёс возьматоз: 2 - Е. Загребин "Кикы нош силе но силе..." (Кык ёзэн эпической драма) Сӥземын К. Гердлы 4 - Л. Романов "Яратон уг пересьмы" (Кык ёзэн комедия) 5, 15 - Т. Ардашева, Е. Загребин "Тӧдьы льӧмпу улын" (Кык ёзэн лирической пьеса) 9 - А. Григорьев "Парсьпи но эмеспи" (Кык ёзэн комедия) 25-30 - П. Маляревский Нылпиослы "Чудесный горшок" (Кык ёзэн выжыкыл) Ӝыт спектакльёс кутско 18 часэ. Юалляськоно 78-79-81 номеро телефонъя. Ӵошатско семьяос Алнаш районын трос нылпиё семьяос куспын конкурс ортчиз. Со радъямын семьяын нылпиосты визьмо будэтон амалэз возьматон, трос нылпиё семьяын анай-атайёс но нылпиос куспын ог-огдэ гажанэз, ог-огедлы юрттыса улыны быгатонэз возьматон вылысь. Конкурс ортчиз кык турен. Семьяос нырысь ик асьсэды возьматӥзы гурт администрациосъя. Кыкетӥ тур ортчиз Варзи-Ятчи курортын. Ужрадэз радъяны юрттӥзы Алнаш ёрос администрация, Варзи-Ятчи курорт, Межрегиональной страховой компания, "Росгосстрах-Удмуртия", "Иж-Астро" страховой компания. Конкурсэ пыриськемъёслы сётэмын синпель кузьымъёс. Нош нырысетӥ интые потэм анайлы но нылпилы Варзи-Ятчи курортэ 2 путёвка висъяськоз. Б. НИКИТИН. Чаклаське - гондыръёс! Красногорск районын гондыръёс ичи ӧвӧл. Куддыръя соос адями вылэ но урдско. Кык ар талэсь азьло нюлэс корасьёс писпузэс погыртӥллям пӧйшурлэн гуэз вылэ. Сьӧсь, гуысьтыз потыса, нюлэс корасез кесям. Нош туэ сӥзьыл Красногорскысь вить кузя нюрмульы бичасьёс, гондырлэсь кышкаса, писпуэ тубиллям но тямыс час ӵоже отын пукиллям. П. Николаев. АРЪЁС НО АДЯМИОС Шудзэ дуриз ас киосыныз Кема улӥсь адямиос шоры ӵемысь жалясагес учкылӥсько вал. Али выльысь но выльысь абдрасько: соослэн улонзы - энциклопедия. Курытэз но, конялэз но, кезьытэз но, пӧсез но, шумпотонэз но, куректонэз но вань. Алигес нырысьсэ пумиськылӥ песятаелэн сузэреныз, солэн пальпотӥсь ымнырызлы пайми. Малы, пе, куректод? Нош улонэз капчи вылымтэ. Вордӥськиз Сандӥ Шаркан ёросысь Бадяро гуртын тямыстон ньыль ар талэсь азьло огшоры крестьян семьяын. Бубиз колхозэ соку ик пырымтэ, соин вань пудозэс басьтӥллям. Мушъёссэс гинэ но. Атаез зол мушкась вылэм, ас ужзэ туж яратылэм. Мушъёсыныз люкиськыны быгатытэк, кема аръёс ӵоже колхозын ужам. Туж тыршись но инмарлы оскись вылэм атаез. Со сямъёс ик выжиллям Сандӥлы но. Кыӵе шумпотыса тодаз вае со егитъёсын ӵош колхозын ужамзэ. Зэм, война дыръя туж зол йӧтӥз вань кышномуртъёслы. "Лумбыт тыршимы, фронтлы уйбыт шуныт носки, пӧзь керттылӥмы, - маде Сандӥ апай. - Ю-нянез сю иськеме, Воткала, зор-кот шоры учкытэк нуллӥмы. Скалъёслэн мынэмзы нош уг поты. Кезьыт, дӥськут ӧвӧл. Пыд кынмемен, йыр но пинь висе. Нош адями ӝужда будэм ӟегез (али сыӵе уг буды ни) турнаса, суй зубектэ, тӧрна, уй ӵоже пыктэ но висе..." Сандӥ котьку быдэсъялляз пиосмурт ужез - тужгес секытсэ. Зурод пуктоно ке, турын ӝутъя. Нош мышказ уж шудиез яратэ шуылӥсьёсыз но шедьылӥллям. Ньыль нылпизэ кышномурт пыд йылазы огназ султытӥз. Картэн улонэз ӧз адӟы, шуыны луоз - война дыръя таиз колхоз председатель вылэм, гуртаз чик вуылымтэ. Сандӥ апайлэн сюлэмаз али но улэ на таӵе учыр. Война дыръя туж ёрмоно вылэм дӥськутлы но. Мырдэм но кызьы басьтэм кутэтъёсты картэз воштэм самоварен. Кызьы адӟемпотостэм уд кары, нылпиосыз сярысь сюлмаськыны одӥг но уг вала ке. Война бере со пиосмуртэз Ессентукие улыны кошкем но отын выль семья кылдытэм. Эшшо но уродгес луэм колхоз улон. Вытлэн быдӟалаез йылэмен, сое тырон вылысь, коркась тӥрлыксэс вузаса, коркапушез чылкак гольык кылем. Государство арлы быдэ октылэм кык сю литр йӧл, вӧй, ыж гон, курег пуз, одӥг ветыл, парсь, ыж. Тырыны быгатымтэ дыръя, коньдон курылӥллям. Шоро-куспо улӥсьёсыз но со дыръёсы куашканы ӧдъяллям, кузёоссы городъёсы кошкылоно луылӥллям, гуртъёс чылкак бырылӥллям. Погылляськыса-погылляськыса, азбар шорысьтыз гуждор вылын бӧрдӥз Сандӥ, гуртысь кошкемез потымтэен. Кин бен аналтоз аслэсьтыз корказэ, эшшо со чебер но йоно ке? Кин дӥсьтоз, юртсэ кельтыса, тодмотэм азе кошкыны? Кызьы воштэмед потоз улыно-вылыно коркадэ кыӵе ке баракен? Городэ лыктыса, ужаны яратон сямыз Сандӥлы нош ик юрттӥз. Мотозаводысь кивалтӥсьёслэн син азязы йӧтэм тыршемез. Соослэн тодэмзы потэм: кыӵе азьын улэ кышномурт? Адӟемзы бере ваньзэ валаллям но Сандӥлы корка пуктыны черод сётӥллям. Заводын кык смена ужаллямез бере, аслыз юрт пуктыны дыртылэм кышномурт. Нылпиосыз солы юрттылӥллям. С.Петрова. Бусыосы гыбед поттозы Улонмы туэ котькудӥзлы "пыдзэ пуктылэ". Капчи ӧвӧл гурт хозяйствоослы но. Кылсярысь, арысь аре кулэсме бусыосы удобрениос пазян. Ярам, кыед коть вань на. Нош удалтытӥсь сылаллы трос гинэ коньдон кулэ. Озьы Ува палъёсын кык ар пала гыбед ӧз поттылэ ни. Ёросын сьӧд сюй поттӥсь "Вишур" но "Рябовское" кык предприятиос ужало. Но уксё тырмымтэен, гурт бусыос гыбедэз ӧз адӟылэ. Туэ гинэ, кылдэм югдурез "сӥятон" понна, районлэн бюджетысьтыз солы коньдон висъямын. 8 сюрс тонна гыбед басьтозы. Толалтэ сюресъёс волязы ке, гыбедэз бусыосы поттозы. Оксана Москова. УдГУ-ысь студентка. Быдэс ӝыт ӵоже Куинетӥ толсуре (декабре) Драмая удмурт кун театрын луоз калык кылос кырӟанъя "Айкай" театрысь валтӥсь кырӟасьлэн Светлана Смагиналэн концертэз. Ӝытын чузъяськозы Николай Постниковлэн, Михаил Оськинлэн, Николай Уткинлэн гуръёссыя, Флор Васильевлэн, Гильман Касимовлэн, Иосиф Бобровлэн, Татьяна Черновалэн кылъёссыя кылдытэм кырӟанъёс. Быдэс ӝыт ӵоже калыкез шулдыртоз "Айкай". Бызьылӥз Тузалчик кузя Туж чебер, шаплы но ужез яратӥсь калык улэ Кияса ёросысь Карамас-Пельга гуртын. Киужъёсъя усточиоссэс, Мазитоваоссэс, тодо ӝыны Европаын. Крезьгурчизылэн Николай Уткинлэн кырӟанъёсыз вӧлмемын быдэс кунамы. Трос артысь улосъёсы вуылӥзы ини татысь артистъёссы но. Ма, Бубякинъёслэн но выжызы котыр ласянь ушъямон. Нянь будэтыны но, пудо вордыны но, суреданы-кылбураны но шаплыесь. Пӧлазы вань Калыкъёслэн эшъяськонзы орденэн пусъемъёсыз но. Нош удмурт кылбурет удысэ мур выжы лэзем пизэс Владимир Бубякинэз, ужаз ачиз андан ӵыжатон, музъем эгыр поттонын, эсьмаса, +ыдӟам кунамы тодо вал. Со сярысь 1972-тӥ арын 7-тӥ июле гожъяз "Литературная Россия" газет но. Ёросазы, гуртазы улӥсьёс дасясько вал поэтлэсь 70 арессэ сӥё-дано пусйыны. Туж жаль: сьӧд эзель сое дырызлэсь вазь погыртӥз. Нош гуртоосыз, эшъёсыз Владимир Ильичез ялан сюлмазы возё. Рабочиез-кылбурчиез данъяны, буре вайыны школае алигес люкаськылӥз уно калык: ӵыжы-выжыосыз, дышетӥсьёсыз, яратоно эшъёсыз. Милемды но Семён Перевощиковен кыкнамес ӧтчазы та пумиськонэ. Синкыли но бӧрдон гинэ ӧй вал татын - пумтэм чузъяськизы тодмо пиенызы данъяськон кылъёс. Пиналъёс но, мӧйыос но лыдӟизы Владимир Бубякинлэсь жингрес чуръёссэ. Солэн кылбуръёсызъя ӵыжак выль (крезьгуръёсыз Н. Уткинлэн) кырӟанъёс но чузъяськизы. Писатель-кылбурчи С. Перевощиков уддядиослы пыр-поч мадиз Володяен эшъяськемез сярысь. Кылбуран удысъя дышетӥсе-начальнике шуэ вылэм В. Бубякин Семён Андреевичез. Книгаоссэ но гожтӥськыса кузьмалляз. Семен Перевощиков соку ужа вал угось "Советской Удмуртия" газетлэн редакцияз. Яратоно кылбурчизэс буре вайыса, ӵукна палозь коркась корка ветлӥзы Владимир Бубякинлэн ӵыжы-выжыосыз. Нош милемлы кузьмазы чебересь ӵушконъёс но "Тузалчик кузя" книга. Сое поттӥллям витьтон гинэ. Кылбуръёсын бичетэз дасязы но калык пӧлы вуттӥзы Киясаысь центральной библиоткаын тыршисьёс Г. Н. Бубякина, Н. С- Куштанаева. Редакторез Н. Г. Красноперова, корректорез Т. В. Новоселова. Та пичильтык книгаез лыдӟыса, Владимир Бубякин улэп кадь пуксе син азе. Мынам нимысьтыз тау кареме потэ Кияса ёросысь кивалтӥсьёслы, ёрос кивалтэтын, культура отделын, ёрос библиотекаын, Карамас-Пельга школаын ужасьёслы, Удмурт культурая "Дэмен" ёрос ёзэзлы, Карамас-Пельгалась вань калыклы, данъян ӝытэз усто ортчытэмзы, асьсэлэсь кылбурчизэс ялан сюлмазы воземзы понна. Кылбурчи сярысь лулысь-сюлмысь вераськыкузы школаысь удмурт кыллы но литературалы дышетӥсь Римма Васильевна Мазитова, поэтлэн кузпалыз Валентина Арсентьевна, Марья апаез, агаезлэн нылыз, Удмурт кун университетысь дышетӥсь Роза Аркадьевна Бубякина, кылбурчилэн нылъёсыз. Та нуналъёсы пусъёзы Владимир Бубякинлэсь ньыльдон уйзэ - 17-тӥ ноябре ӵапак толэзь тырмиз кулэмез дырысен. К. ЛОМАГИН. ИВОРЪЁС: СНГ Самолётлы - корка Львов. Украинаысь министръёслэн кабинетсы Обороная министерствоез куриз одӥг толэзь куспын "Львовские авиалинии" кун предприятилы кык Ил-76МД самолёт но ньыль авиационной двигатель висъяны. Правительстволэн распоряжениез герӟаськемын "Львов" аэродромез возёнэн-утёнэн. Документын пусъемын, авиапредприятие со понна Обороная министерстволы ар йылпумъяськытозь кык 3 комнатаем, вить 2 комнатаем но дас куинь 1 комнатаем квартираос сётоз шуыса. Кинлэсь соосты талалозы но кинэ улон интытэк кельтозы - тӥни ма бордын ужпум. Самолётэз корка интыын уд возьы. Трактор интые - танк Днепропетровск. Хмельницкой областьысь огаз сельхозкооперативын берло аръёссэ муосты гыро Т-55 танкен. Гуртоос военной техникаез арендае басьтӥзы Западной оперативной командованилэсь. Кооперативлэн кивалтӥсез Михаил Микшанский шумпотонзэ уг ваты: танк суткаяз 40 гектар муосты гыре! Тракторен тамында уд лэсьты. Огез урод - солярка тросгес "сие". Башня интые пуктӥзы кабина. Боршиковцы селоын улӥсьёс танкенызы данъясько. Огъя кенешазы озьы ик шуизы: котькӧня эстӥськон мед быдтоз - тракторен ум воштэ. Боевой машина ассэ возьыны амал ӝог шедьтӥз: бусы ужъёсты доразы быдтыса, бускельёссылы юрттыны вутске на. Трактор-комбайнъёс сярысь верано ке, Украиная соослэн лыдзы 30 поллы кулэсмиз. Выльзэ басьтыны коньдон ӧвӧл, вужез арысь аре куашка. Со понна танкъёс лыдъянтэм. "Ми шумпотыса гуртлы юрттом, вазиськись гинэ медло", - шуэ Хмельницкой АПК-ысь, техникая валтӥсь специалист Виктор Грицюк. Инмез ум люке ни Минск. Белоруссиез но Россиез огазеянъя дасяськон уж мынэ. Алигес Минскын кенешизы авиация удысэз нуисьёс. Кутэмын кулэ документъёс, чакламын пӧртэм ужрадъёс. Нырысьёсыз пӧлын - Белоруссия но Россия куспын гражданской авиацияя министерство кылдытон, самолётъёсты кышкытлыкъёслэсь утёнъя системаез выльдон, нормативно- правовой базаез юнматон но авиакомпаниослэсь коммерческой луонлыкъёссэс огазеян но мукет. Экспертъёс верамъя, инбамын радлык тупатыны, музъем вылын сярысь, шӧдскымон капчигес. Франциысь юрттэт Чернобыльлэн бервылыз юн шуккиз калыклэн тазалыкез вылэ. Адямиосты быремлэсь утён понна, туж трос коньдон но эмъюм кошке. Францилэн посолэз Белоруссиысь радиационной медициная НИИ-лэн клиникаезлы алигес гинэ 5 тонна медикамент сётӥз. Со мыноз щитовидной железаез кышкыт пыктосъёслэсь эмъяны. Гуманитарной юрттэтэз висъяз "Электросети Франции" компания. Пусйыны кулэ, французъёс, Лифо но Лео лаборатория нимысьтыз саклык висъяло "чернобыль" республикалы. Берло дыр ӵоже гинэ куинь та выллем "посылка" вуиз ни белорус музъем вылэ, ваньзэ - 260 сюрс долларлы. Соин кык ар ӵоже 2000 висисез эмъяны луоз. "Ӵын" узырмытоз Алма-Ата. "Казахстанлэн бюджетэз тамак кыскисьёс чотын арлы быдэ 1,3 миллион долларлы узырмыны быгатысал", - шуэ "Филипп Морри" американской табачной компанилэн Алма-Атаысь представителез Роберт Мэй. - Лушкем поттэм продукция, таможняын ӝегатэмзы бере, нош ик вуэ магазинъёсы. Законъя сое быдэсак быдтыны кулэ". Та муген ик "Филипп Моррис" компания Казахстанысь таможенникъёс пӧлын аспӧртэмлыко ӵошатскон ортчытэ: кин тросгес контрабанда шараялоз, американецъёс кузьмалозы спецаппаратура. Старшинаез гольык киын уд кырмы Тбилиси. Грузиысь МВД-лэн Огазеяськем преступностья управленияз но угрозыскын ужась азьвыл старшиналэн квартираысьтыз трос пыӵал тӥрлык поттӥзы. Собыдӟа ватосэз дасям вылэм Г. Имедашвили. Адямиосты утьыны пуктэм мурт дораз нуэм 30 килограмм тротил, 2 РТД граната, 3 Ф-2 граната, патронъёс, АКС автоматлэсь рожокъёссэ, 4 мина утчан, 700 механической но 400 электрической детонатор но мукет. Ваньмыз та "узырлык", кузёез верамъя, ужакуз ваемын вал. Декабре: 70 ар талэсь азьвыл (1929) РСФСР-ысь Таджик автономной республика пӧрмытэмын союзной республикалы но пыртэмын СССР-е. 65 ар талэсь азьвыл, 1934-тӥ арын 1-тӥ декабре, Ленинградын виемын ВКП(б)-лэн ЦК- езлэн, Ленинград обкомезлэн но Ленинград горкомезлэн секретарьзы С. М. Киров. Со понна янгыше уськытэмын партилэн членэз, Кировлэн туганэз лыдъяськись кышномуртлэн картэз Л. Николаев. СССР-ысь ЦИК-лэн Президиумез кутӥз следствиез но судэз ӝог ортчытонъя постановление. 18-тӥ декабре Ленинградысь парторганизацилы кивалтӥсе быръемын А. А. Жданов. Та нуналэ ик Л. Б. Каменев но Г. Е. Зиновьев келямын пытсэт сьӧры. Соосты судэ вуттозы 1934-тӥ арын. 60 ар талэсь азьвыл, 1939-тӥ арын 14-тӥ декабре, СССР Нациослэн лигаысьтызы куштэмын, 1939-тӥ арын 2-тӥ ноябре Финляндия вылэ урдскемез понна. 55 ар талэсь азьвыл, 1944-тӥ арын 10-тӥ декабре, СССР но Франция гожтӥзы кусып возён (союз) но ог-огзылы юрттон сярысь огкыл (договор). 40 ар талэсь азьвыл (1959) КПСС-лэн ЦК-езлэн пленумез юнматӥз гуртэ городын выллем коркаос пуктон сярысь, пичи гуртъёсты быдтон сярысь, нимаз адямиослэсь пудозэс кулэстон сярысь программа. 20 ар талэс азьвыл, 1979-тӥ арын 26-тӥ декабре, СССР-ысь войскоос пыризы Афганистанэ, виизы солэсь кивалтӥсьсэ Х. Аминэз. 10 ар талэсь азьвыл (1989) кылдӥз "Демократиез быръён" движение. 12-тӥ-24-тӥ декабре ужаз СССР-ысь калык депутатъёслэн кыкетӥ ӧтчамзы (съездзы). Со умойтэмен лыдъяз Молотов но Риббентроп куспын 1939-тӥ арын 23-тӥ августэ гожтэм пактэз. 13-тӥ декабре кылдӥз Россиысь либерально-демократической партия (кивалтӥсез В. В. Жириновский). 5 ар талэсь азьвыл, 1994-тӥ арын 10-тӥ декабре, Чечняе пыртэмын Россиысь войскоос. Выль ар уе соос урдскоз Грозный вылэ. Декабрь: тодмо нимъёс но нуналъёс 7. - 5 ар талэсь азьвыл Вылӥ Советлэн 25-тӥ сессияз кутэмын Удмурт Республикалэн выль Конституциез. 9 - 65 арес тырмоз Петр Садофьевич Семеновлы (1934), РСФСР-ысь дано суредасьлы, УАССР-ысь калык суредасьлы, УАССР-ысь кун премилэн лауреатэзлы, профессорлы; - 45 ар талэсь азьвыл РСФСР-ысь Вылӥ Советлэн Президиумезлэн указэзъя Игра ёросысь чугун сюрес лэсьтӥсьёслэн Игра станция ужась посёлокъёслэн радазы пыртэмын. 10. - Николай Дмитриевич Соболевлэн вордскемез дырысен 95 ар тырме (1904-1985), геолого-минералогической наукаосъя докторлы, профессорлы. Вордскемын Селта ёросысь Жайгуртын. 14. - 70 арес тырмоз Геннадий Семенович Жуйковлы (1929), историяя наукаосъя докторлы, Ленинград университетысь профессорлы. Вордскемын Ижевск городын; - 30 ар талэсь азьвыл Глазов городын усьтӥськиз спортъя Йӧ дворец; - 5 ар талэсь азьвыл Вылӥ Советлэн 25-тӥ сессияз кутэмын Удмурт Республикаысь Кун Кенешлэн ("Элькун Кенешлэн") законэз. 15 - Даниил Афиногенович Майоровлэн (1889-1923), вордскемез дырысен 110 ар тырме удмурт поэтлы, драматурглы. Вордскемын Грах ёросысь Вылӥ Эгра гуртын. 16. - 65 арес тырмоз Анатолий Григорьевич Волковлы (1934), удмурт поэтлы, журналистлы. Вордскемын Красногорск ёросысь Дёбы гуртын. 19. Советской Союзлэн Героезлэн Татьяна Николаевна Барамзиналэн вордскемез дырысен 80 ар тырме (1919-1944), Вордскемын Глазов городын. Дано ним сётэмын кулэмез бере, бырыны шедиз тушмонъёслэн курадӟытэмзы улсын. 23. - Иван Федорович Белобородовлэн вордскемез дырысен 90 ар тырме (1909-1985), Социалистической Ужысь кык пол Героезлы, "Ижмаш" производственной объединенилэн азьвыл генеральной директорезлы. 24. - Василий Фомич Машагатовлэн вордскемез дырысен 75 ар тырме (1924-1996), медицина наукаосъя докторлы, профессорлы, РСФСР-ысь но Удмуртиысь дано врачлы. Вордскемын Пичи Пурга ёросысь Вуж Постол гуртын (азьвыл Нылга ёросэ пыре вал). - Даниил Александрович Яшинлэн вордскемез дырысен 70 ар тырме (1929-1988), тодмо удмурт поэтлы, филология наукаосъя кандидатлы, педагоглы. Вордскемын Можга ёросысь Чурайгуртын. 26. - Александр Васильевич Волковлэн вордскемез дырысен 90 ар тырме (1909-1987), удмурт журналистлы, поэтлы. Вордскемын Балезино ёросысь Москвашур гуртын; - 80 ар талэсь азьвыл Удмуртиын кылдӥз нырысетӥ совхоз - Кияса ёросысь В. И. Ленин нимо совхоз. 26-27. - 70 ар талэсь азьвыл "Долой неграмотность" обществолэн нырысетӥ областной съездэз ортчиз. 27. - 65 арес тырмоз Георгий Александрович Репинлы (1934), живописецлы, УАССР-ысь Кун премилэн лауреатэзлы. 28. Василий Андриянович Максимовлэн вордскемез дырысен 100 ар тырме (1899-1971), удмурт публицистлы, историклы. Вордскемын Глазов ёросысь Адам гуртын; - 65 ар талэсь азьвыл Удмурт автономной область Удмурт Автономной Советской Социалистической Республика луиз. 30 - Советской Союзлэн Героезлэн Василий Михайлович Обуховлэн вордскемез дырысен 90 ар тырме (1909-1945). Вордскемын Ижевск городын. Война дыръя кышкасьтэм лётчик 172 пол инбаме ӝутскылӥз. Декабре 55 ар талэсь азьло ужаны кутскиз Сарапулысь ТЭЦ. 40 ар талэсь азьло Ижевскын йылпумъямын вал керамической блокъёсъя заводлэн нырысетӥ люкет лэсьтонэз. 30 ар талэсь азьло Удмуртиысь 13 суредась пыриськиз Ульяновскын ортчем "Бадӟым Волга" куинетӥ зональной выставкае. Адӟытэмын вал суредасьёслэн 24 ужзы. Е. Ушакова. "Фармаимпекс" бурдъя Кинлы меда капчиен сётске та улон асьме вакытэ? Шуг вераны. Якшур-Бодья ёросысь колхозъёс но совхозъёс гинэ ӧз лябӟе, предприятиос но шуге-леке вуизы. Электрокужым, ужан тӥрлык дуноямен, куд-огез "банкрот" луизы, яке, асьме сямен вераса, пунэм тыронэн кеказы. Таӵе адӟонэ вуиз ни вал нюлэс дасясь комбинат но. Ярам коть, ас вакытаз солы юрттӥсь шедиз - "Фармаимпекс" тодмо фирма ас вылаз басьтӥз пунэм тыронъёссэ. - Нырысь ик ми кутским ужан амалъёсты умоятон бордын, басьтӥмы пуэз сузясь-бичась, чылкытатӥсь-волятӥсь станокъёс,- вера комбинатэн али кивалтӥсез Дмитрий Феоктистов.- Собере лэсьтэм арбериос - шуккон пулъёс, ӧсъёс, укно янакъёс - юнэсь, чебересь мед луозы шуыса, соосты умой-умой куасьтыса дасяны кутскимы. Соку ик солэн пайдаез но шӧдӥськиз: али, кылсярысь, вагонкамес, ӝӧк-пукон-шкаф лэсьтонэ мынӥсь пулмес пичиен вузаськомы ни Италиысь, Финляндиысь фирмаослы, Россиысь мукет шаеръёсын но кулэ каро. "Фармаимпекс" нюлэс дасян борды ӝот-ӝот басьтӥськемысь шумпото асьсэос бодьяос но: соку ик сюлэсь уно адями рос-прос ужаны ӧдъяз, ас дыраз басьто уждун, ӝоген, пе, выльысь ужаны кутскоз сиськоннизы. Табере уж дуре ньӧмыз понна ветлӥсь, "курытсэ" яратӥсь муртъёсты татысь уд пумита ни: сиемед потэ ке, йӧн-йӧн ужа, шуо комбинатын. "Фармаимпекс" ужез умой радъямысь пайдаез шӧдске быдэс районлы: ватсаса басьтэм барыш бюджетэз узырмытэ угось. А. ПЕТРОВ. 30 ноября 1999 г. в 10.00 часов в музее ИжГТУ (3-й корпус) будет проведен заключительный Федеральный тур ИИ Всероссийского конкурса студенческих работ по специальности 121200 "Технология художественной обработки материалов". Конкурс проводится по следующим разделам: - рисунок, живопись; - мастерство; - новые технологические процессы и их исследования; - история искусств; - дизайн, композиция. Заявки об участии в конкурсе уже прислали вузы из Москвы, Санкт-Петербурга, Великого Новгорода, Челябинска, Златоуста, Костромы и др. Победители будут награждены Дипломами Минобразования РФ и памятными подарками. По результатам конкурса будет выпущен каталог. Председатель оргкомитета конкурса ректор ИжГТУ, профессор И. В. Абрамов. Одновременно с проведением конкурса состоится Всероссийская научно-методическая конференция по этой же специальности "Технология художественной обработки материалов. По ее результатам будет выпущен сборник трудов. Семинар ортчиз Ижысь Международной Восточно-Европейской университетын быръёнъя кампаниез эскерись-чакласьёсты дасянъя семинар ортчиз. Татчы люкаськылӥзы депутатэ кандидатъёс, партиослэн но огазеяськонъёслэн адямиоссы, журналистъёс. Вань вераськонъёс бергазы одӥг валтӥсь ужпум котырын: таосыз быръёнъёс ортчыны кулэ чылкыт, зэмлыко. Со понна Россиысь но кунгож сьӧрысь эскеронэ уно адямиос пыриськозы. Семинарез нуисьёс Президентлэн Администрацияз азьвыл ужам тодмо политик Георгий Сатаров, Россиысь журналистъёслэн огазеяськонзылэн секретарез Михаил Федотов но мукетъёс мадизы-валэктӥзы малпам ужрадзылэсь кулэлыксэ, со азьын сылӥсь ужпумъёсты, эскерисьёслэн правооссы сярысь, быръёнъёс азьын кызьы журналистъёс ужаны кулэ. (Таин валче верамын вал ОРТ телеканалын Сергей Доренколэн передачаез пумысен. Со, пе, политикъёслы али вузаськем агитатор. Журналистъёс одӥг партилы но дурбасьтыса вераськыны кулэ ӧвӧл). Кызьы веразы семинарез нуисьёс, эскерисьёслэн нимъёссы пыртэмын луозы компьютере, соосты ваньзэс огазеялоз Интернет. М. КУЗЬМИН. Трос ужпумъёсты эскеризы Кылем пятницае ортчиз Кун Кенешлэн президиумезлэн но Правительстволэн огазеям кенешсы. Праительстволэн Тӧроез Николай Ганза ивортӥз Удмурт Республикаын улон-вылон но экономика удысъёсты азинтонъя программалэн укмыс толэзь ӵоже быдэсъяськемез сярысь. Кызьы пусйиз Николай Ганза, республикаысь предприятиос та дыр ӵоже 21 миллиард 546 миллион манет тыр продукция поттӥзы, кылем арен ӵошатыса со 105,4 процент луэ. Бюджетлэн доход люкетаз 22 процент тросгес коньдон вуэмын. Кык поллы кулэсмиз (6,0 процентысен 3,1 процентозь) ужтэк кылемъёслэн лыдзы. Таӵе азинсконъёслэсь мугзэс Николай Ганза герӟа асьме доры кунгож сьӧрысь вузъёслэн ӧжытгес вуэменызы. Но мукет ласянь, 17 процентлы кулэсмиз калыклэн доходэз. Озьы лыдъя Кун Кенешысь улон-вылон политикая комиссилэн кивалтӥсез Наталья Харина. Республикаын улӥсьёс пӧлысь ӝыныезлэн доходэз улыны тырмымон коньдонлэсь (прожиточный минимум) трослы пичигес. Сюлэмшугъяськытэ йыружъёслэн йылэмзы но, кылем арын сярысь соослэн лыдзы 20 поцентлы будӥз. Та ужпумъя асьсэлэсь малпанъёссэс озьы ик веразы президиумысь адямиос Павел Вершинин, Леонид Фролов, Раиль Галиахметов, Геннадий Абросимов. Йылпумъянъёс лэсьтӥз Кун Кенешлэн Тӧроез Александр Волков. Со бадӟымгес саклык висъяны куриз му вӧй поттон, машина но мотоцикл лэсьтон удысъёслы. Соосты азинтон республикалы юрттоз дотация басьтонлэсь куштӥськыны. Кун Кенешлэн Тӧроез палэнэ ӧз кельты "Етӥн" программаен но ас кожазы лэсьтӥськисьёслы коньдон висъянэн герӟаськем ужпумъёсты. Президиуме люкаськемъёс решение кутӥзы та выллем кенешъёсты кварталлы одӥг пол ортчытъяны. Удмурт Республикаысь Кун Кенешлэн пресс-службаез. Зарни сюан Алигес ӵошен 50 ар ӵоже улэмзэс пусйизы Глаз карысь Ахтариевъёс. Мукарам Исхаковнаез но Фаат Гафазовичез тодэ, луоз, ӝыны город. Соос вань улытозязы ужазы ЧМЗ-лэн пӧсь цехъёсаз, будэтӥзы адӟем карымонэсь ньыль нылпиоссэс. Нош табере соослэн дас одӥг внуксы но кык правнуксы ни. Глаз карын зарни сюан ортчиз шуркынмон толэзе, кыдёкысь кунооссэс кузпалъёс витё толсур толэзе. П. НИКОЛАЕВ. АСЬСЭ КУЖЫМЕН Гуртын ужасьёслы одӥгез но удыс капчиен уг сётскы, дыр. Секыт та вакытэ ветеринарияя удысын но. Пудоез катьяны эмъюмъёс уг тырмо, ӵемысь асьсэлы пудо эмъясьёслы та сярысь сюлмаськоно луэ. Гужем вылтӥ пӧртэм турын-куар бичало, куасьто, озьы толзэс но капчиен ортчыто. Ас ужзэс ӟеч тодо, шуыны луоз Балезино ёросысь Вӧёгуртысь пудо эмъясьёс. Кивалтэ соосын Виктор Всеволодович Корепанов. Пусйыны кулэ, гурт удысын ужасьёсты "Металлург" культура юртын сӥлы карон нуналэ, Виктор Всеволодовичлы сётӥзы "Удмурт Республикаысь гурт удысын дано ужась" дано ним. - Можгаысь ветеринарной училищеез йылпумъяса, 22-тӥ арзэ огинтыям ужасько ни, - шуэ Виктор Корепанов. - Шуг-секытъёсты ас кужымен вормыны тыршиськомы, шуг-секытъёс кылдо вож кунянъёсын. Жаляса верано, куддыръя соос кулыны но шедё, но туж ӧжытэз. Араз сю скаллэсь 99-104 кунян вордске. Со-а ми понна шумпотон ӧвӧл?! В.Кутузова. В.Камашев (фото). Кизилиос воректӥзы 20-тӥ-21-тӥ ноябре Ижын эстрада кырӟанъя "Камали" нырысетӥ фестиваль ортчиз. Сое туж шумпотыса пумитазы асьсэос артистъёс но, учкисьёс но. Соин ик "Металлург" культура дворецлэн зал тыраз ик люкаськылӥз калык. Пӧлазы вал удмурт дӥсен, камалиен чеберскем дыдыос-апайёс но. Концертэ пыриськизы Пичи Пурга, Кияса, Грах ёросъёсысь но Ижын улӥсь артистъёс, тужгес тодмоосыз но, али гинэ ӝуатскись кизилиос но. Асьсэды нырысь ик возьматӥзы сцена вылэ потаны вуымтэ ӟуч кырӟасьёс. Нош 20-тӥ ноябре учкись азе потазы бигер но ӟуч кырӟасьёс. Ваньзэс калык шуныт пумитаз. Озьы ке но, адямиос чидатэк возьмазы удмурт кырӟасьёсты. Пичи Пурга ёросысь Любовь Васильева, Анатолий Эркишев, Владимир Гущин, Кияса ёросысь Марина Галичанина, Ижысь Ирина Габитова люкаськемъёслы яразы выросъёсынызы но, жингрес куараосынызы но. Ижысь Сергей Сава, Валериан Исламгареев, Ольга Зорина, Алефтина Корепанова, Алексей Ложкин, Надежда Уткина, Иван Григорьевых, Владимир Возняков, Валентина но Игорь Моисеевъёс, Татьяна Ишматова городын улӥсьёслы золгес тодмо. Соос адямилы ярало, сцена вылын тунсыко возиськемзы, кырӟанлэсь пуштроссэ быдэс мугорынызы, выросъёсынызы возьматэмзы понна. Ваньзылэн таослэн куараоссы но туж чебересь: сюлэм пушкы пыро. Вань артистъёс быдэн кык кырӟан кырӟазы. Мон сямен, тросэз туж умой лэсьтӥзы, туж тодмо но выль кырӟанзэс возьматыса. Сыӵеоссэ калык сцена вылысь кема ӧз лэзьылы. Угось вуж кырӟанъёссы, радио пыр но чузъяськыса, пушке зол пыремын ини. Бӧрысьгес озьы ик луоз выль кырӟанъёсынызы но. Концертын артэ пуки Шаркан ёросысь Мувыр гуртын будэм дас куать аресъем но дас укмыс аресъем Лия но Надежда Медведева апай-сузэръёсын. Кыкназы ик Ижын куинетӥ толэзьзэ гинэ уло ай. Лия дышетске медициная колледжын, Надя - Удмурт кун университетын. Соос удмурт ужрадъёслэсь палэнэ ноку уг кылё, ӵем ветло Драмая удмурт кун театре спектакльёсты учкыны. Та концертэ но шумпотыса, капчи мылкыдын лыктӥллям. Котькуд артистэз ӟырдыт кичабонъёсын пумиталлязы но келяллязы. Ваньмыз яраллям ке но, кизилиос кариллям Ольга Зоринаез но Иван Григорьевыхез. Нош мыным матын пукись, Ижысь тодмо арганчи Юрий Николаев но солэн кузпалыз Алевтина тужгес синмаськиллям Любовь Васильевалы но Валериан Исламгареевлы. Якшур-Бодья ёросын улӥсьлы Николай Рябовлы но мыным яразы Надежда Уткина но Ирина Габитова. Чакламея куд-ог артистъёс бырйиллям асьсэлы тупасьтэм кырӟанъёс. Сцена вылын но мукетъёсызлэсь адӟем карем выросъёсын шудо. Мыным но, артэ пукись эшъёсылы но ӧз яра сцена вылэ туж ӵем, туж уно ӵын лэзьян. Балконын пукисьёслы шоканы но шуггес луэ. Котьмае валаса, кемзэ тодыса лэсьтыны кулэ. Калыклы "Камали" фестиваль яраз. Ижын улӥсьёс котькуд аре таӵе праздникез шумпотыса пумиталозы. "Удмуртиысь Билайн", "Республика" юридической агентство выллем спонсоръёс мед йылозы. Нош фестиваль сярысь иворъёсты "АРС" дизайн-студия, "Удмурт дунне", "Рынок недвижимости" но "Инфо-Панорама" газетъёс сяна, мед вӧлмытозы мукетъёсыз но. Н. ВОЗИСОВ. Водкалы - Глазове Сакырлы но, тамаклы Глазкаре ветлоно луо ёросысь гуртъёсын улӥсьёс. Мугез одӥг - райполэн вузкаронниосаз та вузъёс, городын сярысь, дуногес, кылсярысь, водка гинэ - 5-6 манетлы. Бен, сиён-юон ваён али дуно усе, тужгес но кыдёкысь гуртъёсы. Тае ӟеч валало райпоын ужасьёс, со понна утчало пӧртэм амалъёс, вузкарисьёссэс но ӧжытгес кельтыны выро, нош пайдаез уг шӧдскы. Со понна коммерсантъёс узырмо - вуззы дунтэмгес бере, калык соос доры дыртэ. Татысь потэ мукетыз шуг-секыт, вуздэ басьтӥсь ӧвӧл ке, бюджетэ кытысь-о коньдон висъялод. Бюджет ке начар, дышетӥсьлы, эмъясьлы уждун висъяны шуг. Тӥни сыӵе ву берган луыса кошке: огзэ ке выйтэ, мукетыз но сьӧраз кыстӥське. Ужрадэз тупатон - вузкарисьёс киын, визьмогес, сэзьгес ужаны коммерсантъёслэсь дышетсконо. Мукет ласянь, город но быгатысал, дыр, водказэ райполы дунтэмгес вузаны. Райпоез огъя кужымен район ӧз ке пыкъя, со зэмзэ банкрот луоз, пунэм тырон кыӵесысь мозмыны шуг угось. А. АНДРЕЕВ. Россия Федерацилэн кун наградаосыныз пусъён сярысь Россия Федерацилэн Президентэзлэн указэз Кун азьын вормонъёсыз, калыкъёс куспын эшъяськонэз но ӵош ужанэз юнматонын бадӟымесь азинсконъёсыз понна пусъёно: Эшъяськон орденэн Липанов Алексей Матвеевичез - член-корреспондентэз, Россиысь Наукаосъя академилэн Урал ёзысьтыз прикладной механикая институтлэсь директорзэ, Удмурт Республика. Россия Федерацилэн Президентэз Б. Ельцин. Москва, Кремль, 1999-тӥ арын 22-тӥ ноябре. � 1563 Россия Федерацилэн кун наградаосыныз пусъён сярысь Россия Федерацилэн Президентэзлэн указэз Кун азьын вормонъёсыз, калыкъёс куспын эшъяськонэз но ӵош ужанэз юнматонын бадӟымесь азинсконъёсыз но уно аръёс ӵоже сюлмысь тыршемез понна пусъёно: Эшъяськон орденэн Моисеев Валерий Васильевичез - акциосын "Ижсталь" огазеяськонлэсь валтӥсь директорзэ, Удмурт Республика. Россия Федерацилэн Президентэз Б. Ельцин. Москва, Кремль, 1999-тӥ арын 22-тӥ ноябре, �1562. Аслыз памятник басьтӥз Ижевскысь бакча сиён возён базалэн кузёез Анатолий Жуйков 7-тӥ ноябрьлы городэ пролетариатлэн вождезлы памятник пуктӥз. Музъем понна коньдон тыроно медаз луы шуыса, сое базаезлэн азбараз ӝутӥз. Со нуналэ куазь кезьыт улӥз ке но, памятникез усьтонэ куинь сю пала адями ветлӥз. Городысь культура отделын ужасьёс гинэ но вал. Куинь ар талэсь азьло утиз со скульптураез Анатолий Жуйков. Сое 30 миллион манетэн басьтӥз Вавож районэ интыяськем шутэтскон юртысь. Басьтӥз, вашкалазэ гажаса. Вождьлэн скульптураез татчыозь базаын кыллиз. Памятникез но Ленинлы сӥзем аллеяез тупатъяны-выльдыны ас мылкыд каремзыя басьтӥськизы Удмурт кун университетысь студентъёс. Ильичлы памятниклэн кузёез сое КПРФ-ен уг герӟа. "Ваньмыз со история понна, - шуэ со. - Малы нош Ленин? Асьтэлы памятник пуктэ ай. Адӟоды, кытчы тросгес сяськаос тырозы". "Общая газета" гожтэмъя. Вордӥськиз нылпи - пумита Татьяна Васильевна Терехова - врач-гинеколог, ужа Завьялово ёрос больницаын, кивалтэ гинекологияя отделениен. Лякыт сямо, ас ужзэ тодӥсь-валась врач котькинэн вераськыны кыл шедьтэ, удмуртъёсызлы удмурт сямен вазе. Кулэ дыръяз висисьёс азе но, медсестраос азе но чурытэсь куронъёс пуктэ. Туала вакытэ сотэк уг луы уга. Семья улонэз радъян кабинет кылдытэмен, ёросын куинь поллы кулэсмизы нылпи куштон учыръёс но. Ог тямыс-дас ар талэсь азьло врачъёс нуналаз куать-сизьым аборт лэсьто вал - араз ог 1500 пала луылӥзЁрос школаысь егитъёс пӧлын врач-гинеколог валэктон уж нуэ, та уж пайдатэм уг кыльы. Нылкышноосты эмъянын, тазалыксэс утёнын Татьяна Васильевна уже кутыны тырше туала эмъяськон амалъёсты. Трос саклык висъяське нылпи ваёно кышномуртлы - нылпилэсь но анайлэсь тазалыксэ эскеро ультразвукен. Вить ар ӵоже ини та отделениын вир поттытэк операциос лэсьто. Татьяна Васильевналэн отделенияз медсестраослэн категориоссы вань, нош ачиз вылӥ категория басьтӥз. Завьяловоысь гинекологияя отделение сярысь трос шуныт кылъёс вера республикаысьтымы валтӥсь врач-гинеколог, Кун Кенешысь Калыкез улон вылонын утён политикая ялан ужась комиссилэн кивалтӥсез Наталья Алексеевна Харина но. Нош 1996-тӥ арын ужаменызы тодматскыны ветлӥзы Америкаысь куноос. Жаляса верано луэ, коньдон ӧвӧлэн, берло дыре ужаны секыт луиз. Нылкышноос али ваньмыз сямен висё, нош эмъюмъёс дуноесь. Больницае вазиськытэк но кылё. Утчано луэ пӧртэм амалъёс. Та дырлы ёросын 8 аресысен 40 аресозь 14000 пала нылъёс но нылкышноос лыдъясько. Ваньзы сямен соос ортчо яке ортчозы та лякыт но чырткем врачлэн киосыз пыр. - Соос мыным оскон, кужым но шумпотон пыӵато, котькуд кышномурт дунне вылэ тазалыко нылпи мед вордоз, - шуэ со. Татьяна Васильевна удмурт культурая обществоен но эшъяське: котькуд удмурт пукон ӝытъёсы ветлыны тырше, аслаз коллективаз но удмурт культура сярысь вера. Тодматӥз ни Куӟебай Гердлэн, Ашальчи Окилэн но Геннадий Красильниковлэн творчествоенызы. В. Никитин, "Удмурт кенешлэн" Завьялово ёросысь ёзэзлэн кивалтӥсез. Туспуктэмез В. Васильевлэн. Кун Кенеш ивортэ 27 ноябре Оренбурге люкаськылӥзы Урал улосвылъёсысь республикаослэн но областьёслэн кивалтӥсьёссы. Вераськон мынӥз экономика удысын ог-огенызы валче ужан сярысь. Кенешлэн ужаз пыриськизы Россия Федерациысь Правительстволэн Тӧроез Владимир Путин, солэн воштӥсез Виктор Христенко, гурт хозяйствоя но сиён-юонъя министр Александр Гордеев. Асьме республикаысь та ужрадэ ветлӥзы Кун Кенешлэн Тӧроез Александр Волков, Правительстволэн Тӧроез Николай Ганза, солэн воштӥсез Николай Хохлов но гурт хозяйствоя но сиён-юонъя министр Петр Першин. Кенешез усьтӥз Владимир Путин. Со пусйиз: огазеяськонэ (ассоциацие) пырись 9 улосвылъёс кылдыто Россиысь быдэс промышленностьлэсь инъетсэ. Берло 14 толэзьёссэ экономикаын шӧдӥськизы умой пала воштӥськонъёс. Со герӟаськемын улосвылъёсысь промышленностьлэн азинскеменыз. Асьме дорын поттэм ваньбур арлэн пумаз йылоз 2 процентлы. Владимир Путин вераськон ӝутӥз гурт хозяйствоын кылдэм югдуръя но. Правительство ас азяз ужпум пуктэ: та удысэз пыд йылаз йыг-йыг султытон понна луонлыкъёс кылдытыны но гуртын тыршисьёслы кун ласянь юрттыны. Правительстволэн Тӧроез умоен лыдъяз Ассоциацилэн Кенешезлэсь Россельхозбанк кылдытонъя ӵектонзэ. Урал улосвылъёсын но быдэс Россиын сиён-юон поттон удысысь ужпумъёсын тодматӥзы Россия Федерациысь гурт хозяйствоя но сиён-юонъя министр Александр Гордеев, Оренбург областьлэн губернаторез Владимир Елагин, Башкортостанлэн Президентэз Муртаза Рахимов, Тюмень областьлэн губернаторез Леонид Рокецкий. Паськыт вераськон мынӥз экономикая политика сярысь. Кытын кутэмын ини промышленностьын политика сярысь закон (Башкортостан, Удмурт Республика, Пермь, Челябинск, Тюмень областьёс), отын югдур тупатске, ужъёс огсыр мыно. Со сярысь ивортӥзы та улосвылъёслэн кивалтӥсьёссы. Люкаськемъёс ӟеч мылкыдын пумитазы но сак кылзӥзы Удмурт Республикаысь Кун Кенешлэсь Тӧрозэ Александр Волковез. Со вераськон ӝутӥз обороная комплексэз ӝутонъя, асьме дорын машинаос поттонъя, химической ож тӥрлыкез быдтонъя но мукет ужпумъёсъя. Кенешлэн ужамезлы йылпумъянъёс лэсьтыса, Владимир Путин пусйиз Урал улосвылъёсысь республикаослэн но областьёслэн быдэс Россиысь экономикаез ӝутонын но юнматонын бадӟым юрттэтсэс но пайдаё тыршемзэс. Кун Кенешлэн пресс-службаез. Куанер улэмлэсь Юкаменскысь "Березка" нылпи сад, толлы сюлмаськыса, ас дораз бакча сиёнъёс но картофка дасяз. Тонналэсь уно картофка но куать сю кило кубиста со басьтӥз Выль Елово школалэсь, "Юкаменское" СП-лэсь но "Юкаменский МСО" ПК-лэсь. Районной бюджет чотын взаимозачёт амалэн. Картофка но бакча сиёнъёс возён гузы асьсэлэн. Табере тол вылтӥ нылпиослы маин шыд пӧзтыны уз ёрме. Но нылпи садлэн аслаз но сад-бакчаез вань. Отын будэтӥзы куинь сю кило ӵужкушман, дас сотка вылын тонна пала картофка но бичазы кӧня ке сутэр, таиныз нылпиослы компот пӧзьтылӥзы. Ваньмыз со умой кадь, но лэсьтӥське озьы куанер улэмлэсь. Бадӟымесь агайёс пичиесь нылпиослы пал кыл вератэк котьма мед сётозы вылэм. П.Николаев. Кызьы вузкаро ужбергатӥсьёс? Шаркан ёросысь покчи ужбергатӥсьёслэсь вузкаремзэс алигес эскеризы санитарияя но ветеринарияя удысын ужасьёс. Соку трос тырмымтэос шараяськизы. "Атэй" закусочнойын утялтӥськемзы бере но кырсь кыле. Отын но татын лошъясько буш ӟенеликъёс. Огпол сиськыны чаклам пуньыос но вилкаос уже трос пол кутӥсько, нош соосты миськыны хлорказы гинэ но ӧвӧл. Куать ужасьёссы пӧлысь куинез гинэ возьматыны быгатӥзы медицинской книжкаосэс. Пӧрасе кутӥллям медосмотр ортчымтэ адямиез. "Сокол" закусочнойын нылкышноос гольык йыр ужало, кытчы шедем пӧсь чай лэзьяло. "Севан" закусочнойын одӥг ӝӧк вылын дасяло ваньзэ сиёнзэс, азьло верам тырмымтэосты уг палэнто. П.Скобелев. ЮАЛЭ - ВАЛЭКТОМ Курорт яке коньдон Редакцие, Калыкез улон-вылонын утёнъя министерствое трос ветеранъёс вазисько, санаторийёсын эмъяськон сярысь юалляськыса. Со пумысен пыр-поч валэктон сёто Калыкез улон-вылонын утёнъя министерствоысь специалистъёс Н.Г.ПИВОВАРОВА но Л.А.МЕШКОВА. Быдӟым оже пыриськемъёслы "Ветеранъёс сярысь" Федеральной Законъя Быдӟым оже ветлэмъёслэн но отын сӧсыр луэмъёслэн санаторийёсын но курортъёсын эмъяськыны правозы вань. Путёвка басьтон понна, соослы улон интызыя калыкез улон-вылонын утёнъя ёзъёсы куриськонэн (заявлениен) но санаториын яке курортын эмъяськыны кулэяськемзы сярысь справкаен вазиськоно. Путёвкаос люкылӥсько черодъя. Ветеранлэн мылкыд каремезъя санаторие путёвка интые коньдон юрттэт (компенсация) сётӥськыны быгатэ. 1995-тӥ арын 9-тӥ январе Удмурт Республикаысь Правительстволэн пуктэмезъя, санаторие путёвка интые коньдонэн юрттэт басьтыны быгато: Быдӟым ожын но мукет кунъёсын ожмаськонъёс дыръя сӧсыр луэмъёс; Быдӟым оже пыриськемъёс, огъя висёнъя яке уж дурын шуккиськыса сӧсыр луэмын ке. Законлы пумит ужакузы, йыртэмакузы сӧсыр кылемъёс лыдэ уг басьтӥсько; кунпуш ужъёсъя органъёсысь военнослужащийёслы, кивалтӥсьёслы но рядовойёслы, ужзэс быдэсъякузы сӧсыр луэмын ке; санаториын-курортын эмъяськем интые коньдонэн юрттэт сётӥське кык арскын огпол ньыль пичиез пенсия мында (1999-тӥ арын со 387 манет). Пуштэм бервылэз утялтэмъёслы "Чернобыльын пуштон дыръя радиация пыӵамен висисьёслы улон-вылонын юрттон сярысь" 179 номеро Федеральной Законъя таӵе адямиослы арлы быдэ дунтэк санаторие-курортэ путёвка висъяськыны кулэ. Со сётӥське: - радиация пыӵамен висисьёслы; - 1986-тӥ-1987-тӥ аръёсы Чернобыльын пуштэм бервылэз утлятонэ пыриськемъёслы; - 1956-тӥ-1958-тӥ аръёсы "Маяк" ПО-ын шудтэм учырлэсь бервылъёссэ утялтэмъёслы; - бадӟым кышкытлык улын ужась подразделениосысь ветеранъёслы; - радиация пыӵам интыысь поттэмъёслы. Санаторийёсы-курортъёсы яке тазалыкез юнматонъя мукет интыосы путёвка яке коньдонэн юрттэт сётӥське ужась муртъёслы - ужан (дышетскон, служба ортчон) интызыя, ужтэк кылемъёслы, пенсионеръёслы - улон интызыя калыкез улон-вылонын утёнъя ёзъёсын. Путёвка басьтон понна ужан интыя яке улон интыя калыкез улон-вылонын утёнъя ёзъёсы куриськонэн (заявлениен) но тазалыкез юнматыны кулэяськем сярысь справкаен вазиськоно. Путёвка висъяны луонлык ӧвӧл ке, кулэяськись муртлы сётӥське одӥг путёвкалэн шоро- куспо дуныз мында коньдон. Ветеран путёвкалы уг вазиськылы, кулэ документъёсын куриськонэз ӧвӧл ке, коньдонэн компенсация солы уг висъяськы. Кулон учыръёсы тупатэм компенсация наследникъёсызлы уг тыриськы. Кытчы тон, пичи эке? Городъёсын огыр-бугыр улон кузьыли карлы укша. Калык дыртэ отчы-татчы, машинаос пумтэм: огкадь юртъёс пӧлын йыромыны но кема ӧвӧл, тужгес пичи муртлы. Кемалась ик ӧвӧл Чайковский городысь милиционеръёс 6 аресъем пияшез синйылтӥзы. Дымбыр огназ, мӧйыостэк калге пичи эке. Кытысь но кин луэмзэ юаса, тодмо луиз - Вотка городысь вылэм. Дорысьтыз потэм но анайзэ утчаны кошкем. Автобусэн ворттылӥсез шофёр сое артысь городэ ваем. Ярам, коть пияш анаезлэсь нимтулзэ ӟеч вераны шедьтӥз, куанерез ыштӥллям вылэм ини. Таиз учыр синву пыр шумпотыса пумиськонэн ортчиз, нош ваньмыз озьы гинэ уг лу угось. Воткаысь милиционеръёс али чиптэм-чаптэм ышемъёсты тямыс муртэ утчало. С. АНДРЕЕВ. Над кем смеётесь?.. Туэ тулыс "Удмурт кенеш" ортчытӥз Правительствоысь выль кивалтӥсен Николай Ганзаен пумиськон. Вераськон пӧрмиз лэчыт но пайдаё. Николай Алексеевич нырысьсэ шӧдӥз кадь: удмуртъёслэн вань асьсэлы гинэ тупась сюлмаськонъёссы, соосты лыдэ басьтытэк, Правительствоен кивалтыны секыт йӧтоз. Зэм, ог люкетэзлы удмуртъёслы югдурез озьы валаса сэрттон-пертчон ӧз кельшы. Дырын-дырын чузъяськизы Ганзаез ултӥясь юанъёс но веранъёс. Соку Николай Алексеевич поттӥз козырь туззэ: - Тӥ адӟелэ вал Глазовысь Чепецкой механической заводэз. Отын ми ужез ӟеч радъяны быгатӥм кадь. Мылкыдды вань ке, нимысьтыз автобусъёс шедьтом но тӥледды Глазове нуллом. Зал тырмиз кужмо чабонэн. Зэм, кӧняез ке адямиос гуньдӥзы. Али гинэ пуштыны дасяськем муртъёс син азьын шуназы ук. Шат асьмелы одно ик кулэ атом кужымен герӟаськем удыс? Шат одӥг нунал но цирконийтэк улэммы уг луы ни? Глазове дун тырытэк ветлон вылысь, соку ик вунэтӥмы Павел Вершининлы но Антонина Лисиналы дурбасьтонмес. Макем дунтэмен басьтыны луэ асьмеды! Нош татчы люкаськизы ук тужгес визьмоосыз пиосмы но нылъёсмы. Удмуртъёс, сайкалэ! Озьы ӧтьылӥзы асьмеды Кузебай Герд но мукетъёсыз. Со понна улонзэс ӧз жалялэ. Нош асьмеос? Школаын но университетын дышетскисьёсын пумиськон дыръя мон ӵем юасько: Максим Горькийлэн Данко героез калыклы пеймыт сикын сюрес возьматӥз но, ма каризы солэн ӝуась сюлэменыз? Уноез уг тодо. Сак йырсазьёс но валэктыны уг быгато, малы адямиос тэлясь сюлэмез лёгаса кельтӥзы. Нош отын возьматэмын ук асьме сям. Ёрмыкумы ми вӧсяськыны дась амало муртлы, инмарлы, шайтанлы - мед гинэ юрттоз. Югдурмы умоя ке, вань сётэм кылъёсмес вунэтӥськом, черке ум пыраське, утисьмылы сюсьтыл ум пуктӥське. Оло, соин но улон-вылонмы сокем шукырмыт. Коммунизм дыръя ӵем кылӥськизы таӵе кылъёс: кызьы ужаськом, озьы улӥськом. Туннэ, уноез ужтэк кылем бере, ужасез но арняен-арняен шутэтскон дыръя, шонергес луоз, вылды, тазьы верам: кыӵе депутат яке президент бырйиськом, сыӵе улӥськом. Котькызьы мед каргалом Борис Ельцинэз, сое сьӧлыке уськытыны ум быгатэ, властез киултӥз шуыса. Россилэсь нырысетӥ президентсэ асьме киын асьмеос кык пол бырйим. Геннадий Зюганов оскытэ: 1996-тӥ арын солы лушкемак кӧня ке миллион куара ватсазы. Озьы вал, дыр. Нош музон миллионъёс люкаськизы ук бырйисьёс зэмен ик дурбасьтэмен. Дышетӥсьёс туннэ кайгыро: ми - тужгес зӥбем муртъёс. Шонер. Нош 90-тӥ аръёслэн кутсконазы соос ик ӧз лӧптылэ-а? Нырысетӥ президентмы, пе, 1 номеро Уаззэ сӥзиз дышетӥсьёслэсь уждунзэс будэтонлы. Ура! Музъем эгыр гудӥсьёс дырын-дырын выдыло чугун сюрес вамен. 90-тӥ аръёсы бугыръяськыса соос ик ӧз куашкатэ-а коммунизмез но Совето Союзэз? Борис Ельцин огаз митингын ялӥз: тӥ азьын указ гожтӥсько - СССР-лэн РСФСР-ысь шахтаосыз выжо Россилэн юрисдикцияз. Мон ачим тӥледды утё! Ура! Рос-прос малпаськись муртъёс та аръёсы ик шӧдӥзы ни: Борис Николаевичлы оскыны шуг. СССР-ысь Вылӥ Советэ сюрыса но Лэсьтӥськонъя комиссилы тӧро луыса, со асьме журналистъёсты вералляз: мон вань кужымме сёто, 2000-тӥ арозь котькуд советской семья нимаз улон инты мед басьтоз шуыса. Кунгож сьӧрысь газетчиослы шуылӥз: "Улон инты-2000" программа - Михаил Горбачевлэн аслыз дан люкан амалэз, со ноку но уз быдэсмы. Бен, ӧз быдэсмы сыӵе ӟеч программа. Бен, куашказ СССР. Бен, Горбачев ыштӥз кивалтонзэ. Нош тужгес юн курадӟонэ усизы эгыр поттӥсьёс, дышетӥсьёс, нянь будэтӥсьёс, мукет адямиос. Борис Ельцинлы дурбасьтэмез понна туннэ кинэ ке пыкылӥськод ке, аспӧртэм валэктонъёс кылӥськод. Туж ӧжытэз гинэ йырберзэс кормало: чебер кылъёслы оски. Ваньмыз сямен пештырско: со понна мон куараме ӧй сёты. Копак абдраськод: ваньмыз Ельцинлы пумит вылӥллям, нош со кызьы ке президентэ сюрем. Табере тани Борис Ельцин ас интыяз кельтыны турттэ Владимир Путинэз. Соослы дурбасьтӥсь телевидение, радио, газетъёс огкылысь оскыто: кыӵе кышкасьтэм асьме Правительстволэн йырыз! Чечняез Россие берыктэ. Кыӵе визьмо со - ваньбур поттонэз ӝутэ. Бен, экономика оглом тыбырзэ чатыртэ кадь. Нош солы инъет кылдытӥз ук Евгений Примаков. Россиез куашкамлэсь утиз тужгес секыт вакытэ - миым августэ кризис бере. Нош кыӵе меда экономист со - Путин? Асьме азьын, огъя кылъёссэ сяна, одӥг визьмо ӵектонзэ но ӧз усьты на. Со понна шараяз музон малпанзэ. Огъя ваньбурез вузан, пе, туж трос янгышъёсты ортчытэмын ке но, солы йылпумъянъёсты выльысь сэрттоно-пертчоно ӧвӧл ни. 30-40-50 ар ӵоже машина лэсьтэм но нянь будэтэм адямиос пыдйыл кылизы. Борис Березовский но Роман Абрамович кадьёс тужгес пайдаё удысъёсты киултӥзы. Озьы луыны кулэ шат? Ӧвӧл, господинъёс, вузан-басьтонын огшоры янгышъёс гинэ ӧй вал. Вал йыртэман но капыръян. Сое озьы кельтыны уг яра. Соя ик учконо ни, кин асьмелы матынгес - Путин-а, Примаков-а. Демократиез котькызьы пыкылы, но солэн вань мертантэм дуныз - бырйыны эрикез. Туала Россиын али тужгес трос люкасько мадиськыса ужасьёс. Заводын, колхозын, институтын - котькытын соос - асьмеос. Тӥни малы нырысь ик ас бордысьтымы потэ вуоно Дума, вуоно президент, вуоно улон-вылон. Ужаса улӥсьёслы туннэ йыбырттыны дась - коммунистъёсты вератэк ни - буръёс но, НДР но, "Яблок" но. Мар бен даурто соос Думаын? "Калыклы пумит чаклам реформаосты" ӵушкало но сыӵе бюджетэз юнмато. Профсоюзъёс трос аръёс ӵоже куро ни пичи уждунэз огӵош карыны улыны-вылыны ичизэ кулэ луись дунын - прожиточной минимум шуонэн. Депутатъёс озьы ӧз лэсьтэ. Со понна асьсэлы вылӥ верам лыдпуслэсь 70 пол бадӟымгес уждун тупатӥзы. Юнме шорысь уг оскыто, Россиын ужась кужым дунтэм шуыса. Америкаын машина, шуом, 4 сюрс доллар сылэ ке, вузам дунлэн ӝыныез, 2 сюрс долларез, сое лэсьтӥсьлы уждунэ кошке. Асьме дорын - 7 процентэз. Барыш мынэ кивалтӥсьёслы но вузасьёслы. Сыӵе со - мыдланьтэм экономика. Одӥг ласянь, Россиысь 12 процентэз адямиос ужтэк кылемын. Мукет ласянь, копак аналтэмын ульчаос, нюлэсъёс, бусыос. Соин ик Евгений Примаков дэмла Конституцие выльысь берыктыны адямилы ужаны право сётон сярысь куронэз. Ужтэк кылён - секыт но кескич сюло. Москваын со 0,9 процент гинэ, Удмуртиын - 13, азьвыл нюлэс дасясь гуртъёсын - 100 процентлы матын. Тӥни кытын ӝутоно пичи мастерскойёс, азинтоно вузкаронэз. Алигес НТВ каналын возьматӥзы чукча кышномуртэз. Ӟуч сямен уг вала, берыктӥсь пыр вераське. Юан. Быръёнэз витиськоды-а? Валэктон. Туж витисько. Соку милемлы кузьымъёс вутто. Юан. Кин понна куарадэс сётоды? Валэктон. Бырйыны мынӥм ке, валэктозы, вылды, кинлы дурбасьтыны. Анекдот ӧвӧл та - зэмос учыр. Отын, Чукоткаын, Кун Думае бырйиськыны турттэ Борис Ельцинлы туж матысь адями - Роман Абрамович. Но... Тодады вайыто тодмо спектакльысь геройлэсь кылъёссэ: - Над кем смеётесь? Над собой смеётесь. Алигес ортчиз удмурт нылкышноослэн ӧтчамзы. Кыл куре Кун Думае депутатэ кандидат, удмурт калыкез но "Удмурт кенешез" трос аръёс ӵоже кырсь кылъёсын саптась кышномурт. Талэсь азьвыл гинэ огаз ӟуч газетын ялӥз: власте луиз ке, мон быдто удмурт организациосты - Удмурт культурая дэменлыкез, удмурт нылкышноослэсь огазеяськонзэс но мукетъёссэ. Сыӵе муртлы удмурт нылкышноослэн кенешазы кыл сёто. Сыӵе муртэ трибунаысь келяло кужмо чабонэн. Нош залын пуко тужгес чеберъёсыз но визьмоосыз кенакъёсмы. Над кем смеётесь? Алексей Шкляев. . УТЬ АСТЭ АЧИД Лушкаськись ӧсэтӥ пыре Туннэ ӝутэм вераськонмес улонысь кошкем песятайёсмы-песянайёсмы кылысалзы ке - абдрасалзы. Соос дыръя уго пытсам ӧсэз устьыса пырисьёс туж ӧжыт вал: калык кураськыса ке но ветлӥз - ӧз лушкаськы. Лушкаськись муртлы гуртоос ас сяменызы "визь тырылӥзы". Нош туала вакытэ укылтэмъёс эшшо но эрказмизы - нуназе шорын гольык кельто, квартираосты сузяло. Тӥни малы ӧсъёсамы тунгон вылэ тунгон пуктӥськом, ог-огмылэсь кечат-вамат шуккем кортъёс сьӧры ватскиськом. Мукет амал ӧвӧл. Ассэ утись муртэ, пе, инмар но уте. Табере - дэмланъёс. Соосты сётэ милициысь подполковник С.П.КЛИМОК. - Лушкаськисьёслы мурт квартирае пырыны куд-ог дыръя асьсэос адямиос юртто. Кылсярысь, ӧс висказы записка кельто, газетъёссэс почта ящикысь нуналъёсын уг басьяло, ӧссэс одӥг полэс гинэ ӵогало, подъездзэс пеймыт возё. Ваньмыз со ужа тӥледлы пумит. Кызьы ӧсъёсты оскымонгес кароно? Кинлэн луонлыкез вань, пуктэ корт ӧс. Бускельёсыныды вераськыса, ватсаса ӧс пуктэ на лесничной площадкае, подъездэ. Ӧс коробкаез юнматоно корт штырен. Одно ик тырше пуктыны кык пумо замок. (накладной но врезной), ог-огзылэсь - 15 сантиметре. Вискыз солэсь пичи ке луиз, ӧс полотно лябӟоз. Врезной замок басьтыку, одно ик зӧкталазэ учконо - ӧслэсь зӧк медаз луы. Замокез юнматоно кортлэсь дасям накладкаосын но болтъёсын. Пуктоно озьы - педласянь соосты лябӟытыны но басьтыны медаз луы. Коньдонлы ёрмемен, тросэз адямиос дунтэмзэгес замок басьтыны выро. Туж урод со. Тодады возе: макем секыт, аспӧртэмлыко усьтонэз - сокем ӟеч тунгонэз! Магазинъёсын али котькыӵе пытсэтъёс вузало, соин ик бырйыны луонлык вань. Оскымон луо трос пумо пытсэтъёсын замокъёс. Соослы усьтон лэсьтыны туж шуг, тӥяны но огкутскемен уд быгаты. Эшшо одӥг дэмлан. Замокез 5-7 арлэсь кема возьыны уг яра - ужан дырыз ортчыса, со тӥяське яке лябӟе. Юмоке яке шуге-леке шедёнтэм вылысь, умойгес луоз выльзэ пуктыны. Тодады вайытэме потэ на тани мае: выль квартирае яке корка улыны выжыса, тунгонъёссэ соку ик вошъялэ. Озьы ик эскере укноостэс но балконъёстэс, уката но - нырысетӥ но берпуметӥ этажъёсын улӥсьёс. Умойгес но оскымон луоз кортлэсь решётка, жалюзи пуктыны. Тыршемды юнме уз луы - туала вакытэ котькыӵе амалэн астэ ачид утьыны сюлмаськоно. Дасяз Л.Дмитриева. КУН КЕНЕШЛЭН СЕССИЯЗ Мынэ бюджетэз эскерон Кык нунал ӵоже ужаз Кун Кенешлэн сизьыметӥ сессиез. Депутатъёс азе пуктэмын вал 12 ужпум. Соос пӧлысь валтӥсьёсыз луо Удмурт Республикалэн 2000-тӥ арын социально- экономической азинсконэз сярысь программаезлы инъетэз юнматон но республикалэсь вуоно арлы бюджетсэ эскерон. Та документъёсын люкаськемъёсты тодматӥзы Правительстволэн Тӧроезлэн воштӥсез Сергей Чикуров, коньдон ужпумъёсъя министр Владимир Бельтюков, Кун Кенешысь ялан ужась комиссилэн кивалтӥсез Софья Широбокова. Бюджетэз кутон ноку но каньылэн, огкутскемен уг ортчы. Котькуд удыс коньдон пуйыез ас палазгес кыскыны тырше, нош казнамы буш. Маин сое тырмытоно? Кыӵе луонлыкъёс утчано на, калыкмылэсь улон-вылонзэ капчиятон понна? Та пумысен ас малпанъёссэс веразы депутатъёс Олег Кузьменко, Алексей Красильников, Павел Вершинин но мукетъёсыз. Соослэсь выступленизэс пыр-почгес лыдӟоды газетмылэн вуоно номерысьтыз. Отын ик ивортом депутатъёслэн музон ужпумъёс бордын ужамзы сярысь. Л.Медведева. Чипы сюдӥсь Будӥз Валентина Кез палъёсын. Школаез йылпумъяса, лэсьтӥськон удысэ мынӥз. Егитъёслэн бригадаязы каменщица луыса ужаз. Ваньмыкуз ӵемысь вуылӥз Ижевскысь тылобурдо вордон фабрикаын ужась Алевтина сузэрез доры. Со ик ӵектӥз чипыосты будэтонъя операторлэсь ужзэ бырйыны. Озьы нылаш Октябрьский посёлоке улыны выжиз. - Сузэре тодэ вал уго, мон пичиысен пудоосты но бурдоосты яратӥсько шуыса, - вера В.И.Иванова. - Мон соку ик соглаш луи. Фабрикаын шуныт пумитазы. Коллектив но соку ик яраз. Кызь укмыс ар талэсь азьло "эшъяськиз" Валентина Ивановна тылобурдо вордон удысэн. Операторлэн ужезлы мылысь-кыдысь дышетӥз Раиса Филипповна Максимова. Со али ачиз шутэтскыны потэмын ни. Та дыр ӵоже Валентина Ивановна ужа куинетӥ бригадаын. Али соин кивалтэ бригадир- зоотехник Тамара Крестьянникова. Валентина Ивановналэн звенояз тыршо оператор Анна Буторина но слесарь Владимир Терехов. Ӵапак та адямиос доры ик вуо инкубаторын али гинэ вордскем чипыос. Соосты 110 нунал ӵоже сюдо-вордо. Зэмос курегъёс луытозязы бурдоослы бадӟым саклык висъяны кулэ. Одно ик лыдэ басьтоно зооветеринарилэсь но санитарилэсь куронъёссэ. Соин ик ваньмыз сямен ӵуж комокъёс улэп кылё. Тужгес но сюлмаськоно сиён ласянь. Со котьку но витаминъёсын узыр мед луоз. Яратэ ас ужзэ Валентина Ивановна. Зэмос кибашлы адями. Алигес та сюлмо кышномуртлы сётэмын Удмурт Республикаысь гурт удысъя но сиён-юон поттонъя министерстволэн данъян грамотаез. Н.Иванов. 11-29-2 Гожтӥське "Ӟечбур!" газетлы Гажано анай-атайёс, песянай-песятайёс, дышетӥсьёс но ваньмыз, кин лыдӟе "Удмурт дунне" газетэз! Вазисько тӥледлы "Ӟечбур!" газетлэн редакцияз ужасьёс: ӧд вунэтэ-а нылпиосты сярысь? Гожтӥськиды-а соослэн яратоно "Ӟечбурзылы!"? Оло, куд-огезлэн газетмес кияз кутылэмез но ӧвӧл? Озьы ке, ойдолэ кӧня ке тодматскоме. "Ӟечбур!" � покчиослэн эшсы. Соос понна пото "Чингыли", "Буёлшапык", "Мар? Куака кар" сэрегъёсмы, йыртӥянъёс, кылбуръёс, выжыкылъёс но веросъёс. "Ӟечбур!" � бадӟымгес пиналъёслэн но эшсы. Соос понна пото "Мон ачим но усточи", "Мон малпасько", "Яратэ, уг яраты", "Пӧртмаськон. Ишан. НЛО", "Чагыр тылы", "Кин луоно?", озьы ик тодмо адямиос но школа улон сярысь ужъёс. "Ӟечбур!" � дышетӥсьёслэн, мумы-бубыослэн, песянай-песятайёслэн эшсы. Соослы тунсыко потоз нылпиосты утялтон-будэтон, ӟеч сямъёслы дышетон, ваньмон дырзэс ортчытон сярысь гожъямъёсмы. Озьыен, эн ӝегатске, гожтӥське "Ӟечбур!" газетмылы. Арлы дуныз 29 манет 28 копейка. Роно, школа яке редакция пыр гожтӥськыса - 10 манет. САКТЭЛЭ! "Ӟечбур!" газетмы ялӥз: "ВЫЛЬ АР" КОНКУРС Малпалэ Выль ар маскаръяськонлы дӥсь. Суредаса но геройдылы тупась выжыкыл, кылбур яке маке мукет малпаса ыстэ редакциямы. (Адресмы: Воткинской шоссе, 10-тӥ км, "Ӟечбур!"). Тужгес умой ужъёсты потозы газет бамъёсамы. Вормисьёс ческыт кузьымъёс басьтозы. Конкурс кыстӥськоз 31 толсурозь. "ВЫЖЫКЫЛ ДУННЕ" КОНКУРС Тӥ яратӥськоды выжыкыл лыдӟыны? Нош асьтэос малпаса ӧд утчалэ на-а? Эскере, тужгес но тунсыкозэ вуоно сӥзьылозь ыстэ редакцие. Вормисьёслы - синпель кузьымъёс. "ВОРПО ТУГОКО" КОНКУРС Таяз конкурсэ ыстыны быгатоды заметкаостэс но кылбуръёстэс, интервьюостэс но веросъёстэс, зарисовкаостэс но выжыкылъёстэс, очеркъёстэс но сценкаостэс, суредъёстэс но туспуктэмъёстэс. 2000-тӥ арын толшоре "Ӟечбур!" ("Дась лу!") газет потыны кутскем дырысен 70 ар тырме. Озьыен, конкурсэ ыстэм ужъёстэс та юбилеен но герӟаны луэ. Кылсярысь, оло, тӥляд гуртады пӧртэм аръёсысь пинал иворчиосмы вань. Кенеше соосын. Вормисьёслы кузьым дасяз егитъёслэн "Шунды" дэменлыксы. Устоосызлы гожъясьёслы но суредасьёслы со вуоно гужем "Шундыкар" лагере шутэтскыны путёвка висъялоз. Озьыен, гажано эшъёс, уж борды! Эскере асьтэлэсь быгатонлыктэс. Оло, ӵапак тӥледлы удалтоз. Со сяна, тӥ доры быдэс арзэ тунсыко газет вуоз, эш сямен ӟечбуръяськоз. Учке ай, мар гожто газетмы сярысь пинал лыдӟисьёсмы. Юнме уг верало ук со сярысь гожтэтъёсысь чуръёсазы: "...Мынам вань эшшо одӥг шумпотонэ: мамае вуоно арлы "Ӟечбурлы!" гожтӥськиз". (Лена Шкляева, Зар.Вишур гурт, Шаркан). "...Мон туж яратыса лыдӟисько "Ӟечбур!" газетэз. Азьланяз но мед потоз та газет". (Валерия Чиркова, Быдыпи гурт, Балезино). "...Газеттэс ми шумпотыса быдэс классэн лыдӟиськом, йыртӥянъёссэ лэсьтӥськом, шудӥськом". (Наташа Худякова, Камыж гурт, Кез). Тӥни озьы, "Удмурт дунне" вӧзын уз люкеты "Ӟечбур!" но. Н.ШКЛЯЕВА. Быръёнъя 7 номеро блок Кун Думае быръёнъя 28 номеро Ижевск округъя депутатэ кандидат коммунист - Баранов Николай Витальевич Вылӥ судысь судья Социализм Совето власть Николай Витальевич Баранов вордскиз Шаркан черкогуртын 1950-тӥ арын. Школаез йылпумъяса ужаз ёросысь коньдон ужпумъёсъя отделын инспектор луыса. 1968-тӥ-1970-тӥ аръёсы вал Советской Армиын, 1970-тӥ-1973-тӥ аръёсы - Мурманск флотысь матрос. 1979- тӥ арын йылпумъяз Удмурт кун университетысь юридической факультетэз. Со дырысен Н. В. Баранов ужа респуюликаысь правоосты утёнъя ёзъёсын, нырысь следовательын, собере Глазов ёросысь прокуратураын, отысен сое басьто республикаысь прокуратурае следствиосъя управлениен кивалтӥсьлы воштӥсе. 1985-тӥ арын быръемын Ижевскысь Индустриальной ёросысь калык судэ. Н. В. Баранов кышнояськемын. Кузпалыз - врач, нылыз школаын дышетске. Улэ Ижевскын. ГОЖТӤСЬКОН - 2000 Ойдолэ эшъяськом! Ивортылӥм ни, Ижевскын улӥсьёс понна 2-тӥ-4-тӥ декабре ялэмын "Гожтӥськисьлэн нуналъёсыз". Нош 6-тӥ декабре Удмурт драмтеатрын соос понна радъямын луоз лотереяен шудытон. Азьылгес гожтӥськемъёс, "Информпечатьлэн" киоскъёсыз пыр но редакциын гожтӥськемъёс ӝоже медаз усе шуыса, лотереяен шудыны озьы ик дасямын дуно кузьым. Но таосызлы сьӧразы ваёно луоз гожтӥськем квитанциоссэс. Тодмоостылы, эшъёстылы, ӵыжы- выжыостылы но ивортэ таӵе ужрад сярысь. Ӵок, газетмылы гожтӥськыса ӧз вуттэ ке, оло, ӝытысен мылкыдзы воштӥськоз. Соос понна но кузьымъёс дасямын угось. Со сяна, газетлэсь эшъёссэ шулдыртозы драмтеатрысь артистъёс Валентина но Игорь Моисеевъёс, Алексей Ложкин, Алефтина Корепанова но Ольга Зорина. Юанъёслы валэктоз юрист. Ижевсклэн палэназ улӥсь эшъёсмылэн, оло, юанзы кылдоз: малы городын гожтӥськемъёс понна гинэ лотереяен таӵе шудытон ортче? Иземысь сайкатэммы потӥз Ижевскысь удмуртъёсты. Паймымон ӧвӧл-а со - "Удмурт дуннеез" городын 200 мурт пала гинэ басьтэ. Шулдыръяськон ӝыт, оло, лыдӟисен матысь эшъяськонлы пӧрмоз. Огез кандидат алэмын, мукетыз - палэнтэмын Та нуналъёсы нош люкаськылӥз Кун Думае быръёнъя 28 номеро Ижевск округысь комиссия. Депутатэ кандидат Андрей Солуянов алэмын ваньбурзэ умойтэм возьматэ понна. 29 номеро Удмурт округысь быръёнъя комиссия Серафима Благининаез депутатэ кандидатэ пусъён (регистрировать карон) сярысь азьвыл кутэм решенизэ воштӥз. Пушина нюръяськонлэсь палэнтэмын, быръён сярысь законъёсты тӥямез понна. Толсур Асьме палан тол декабрь толэзьлэсь вазьгес кутске. Туэ 20-тӥ ноябре ик куас вылэ султыны луэ вал ини. Тымет вылысь йӧ но та дыре адямиез возе ни вал. Та веранмы мултэс уз луы: йӧ адямиез соку чида, куке солэн зӧкталаез 12 сантиметрозь вуэ. Соин ик чорыгасьёслы, конькиен нискыланы дыртӥсьёслы чиданы-возьманы кулэ йӧлэсь юнмамзэ. Туэ Иж тыметын нырысь ик зэмос кезьыт нуналэ куинь чорыгасьёс бырыны шедизы. Кезьыт вуын адями 10-15 минут гинэ чида - быгытъёсыз зубекто но, адями вые. Котькуд ар декабрь толэзе шунытэсь нуналъёс но берытско на. Куд-ог аръёсы лымы чылкак шунаса но бырылӥз. Туэ сокем ик шуныт уз луы, шуо. Метеорологъёс куазьлэсь азьпалан кыӵе луонозэ сокем ик дӥсьтытэк, меӵак вераны уггес ярато, малы ке шуоно, адями куазез но мукетгес карыны быгатэ, соин ик инкуазь законъёс тӥясько. Таин валче метеорология (куазез тодон) уг ни быгаты пырыны сокем ик "шонер" тодон удысъёс радэ. Декабре югыт нунал пумен кулэсме но кулэсме. Толэзьлэн 22-тӥ нуналаз нунал тужгес но вакчи, нош уй укыр кузь кыстӥськозы. Оло, та нунал бере ини кутске зэмос выль ар? Азьло удмурт пересьёс выль арез герӟало вал 22-тӥ мартэн. Соку уго нуналлэн но уйлэн кузьдалазы огкадь луо. Та дыр гож но туж валаса басьтэмын, малы ке шуоно, куазьлэн воштӥськонъёсыз астрономилэн календареныз юн герӟаськемын. Декабрь толэзьлэсь ортчемзэ ум ик шӧдӥське кадь, ваньмы дасяськиськомы Выль арез пумитаны. Нош инкуазь улэ ас эсэпеныз. Нымы-кибыос ватскемын небыт музъеме яке куаро музъем сӥе, куд-огъёсыз пегӟемын кар висъёсы яке вуж лӥял пушкы. Тросэз кезьыт дырез ярато сул улын ортчытыны, вань сыӵеосыз но, куд-огъёсыз ӝуйы пушкын кӧлыны ярато. Балян (рысь), луд кечез возьмаса, ватскыса улэ писпуослэн вайёссы пушкын. Койык (лось), кузё кариськыса, дыртытэк ветлэ нюлэсъёстӥ, кӧтсэ тыре, бадьёсты, лулпуосты, кызьпуосты но палэзьпуосты йырйыса. Нош тужгес но яратэ пинал писпуосты. Лымы сокем зӧк ӧвӧл на, соин ик кионъёс уггес быгато койык сьӧры уиськыны. Озьы ке но, та бадӟым пӧйшур котырын пурысь изьверъёс ӵемгес но ӵемгес берганы кутско ини. Койыкез ог 8-10 кионъёс котырто ке, солэн та кульчо пушкысь потэмез уггес луы ни. Нош пурысьёс ӧжытгес ке, лымы но сокем ик мур ӧвӧл ке, сюро нюлэс кузё кионъёслэсь пегӟыны быгатоз. Лымы вылысь адӟыны луэ пӧртэм-пӧртэм пытьыосты. Инкуазез яратӥсь но валась адямиос пытьыосъя умой сэртто-пертчо пӧйшуръёслэсь амалъёссэс но улон выросъёссэс. Тани та вакчи пытьыос шыръёслэн. Соос вӧзтӥ кыстӥське ӟичылэн мынэм сюресэз. Тае асьмеос умой валаськомы - та кескич пӧйшур тужгес но яратэ шыръёсты кутылыны. Ӵем пунӥсько луд кечъёслэн пытьыоссы. Кионлэсь но ветлэмзэ адӟиськомы пытьыезъя. Со кытчы ке но дыртыса кошкем. Нуналаз та изьвер ог 70-80 иськемез ортчыны быгатэ. Чорыгъёс ватскемын мур интыосы, нош куд-огъёсыз сиён утчамысь уг дугдо. Таосыз ӵем сюро чорыгасьёслэн курикъёсазы. Омыр, вуэн ӵошатыса, кезьытгес. Вулэн тужгес ик уно аспӧртэмлыкез уга. Ноль градусысен ву йӧлы пӧрме. Йӧ вулэсь капчи бере, со шуръёсты но тыметъёсты вылласянь шобыртэ. Ву озьы ик мукет чурыт макеослы но пӧрмыны быгатэ. Кылсярысь, кезьыт куазен кылдо пӧртэм яке куать сэрего, яке куать сӥо лымы пырыос. Вылӥысен лобаса васькись лымы пырыос кылдо векчи ву пырыослэсь ог 41 градус кезьытын. Та кезьытэн ву пырыос чилектэм кадь ӝог пуштыса пӧрмо чебер лымы пырыослы. Йӧ кылдыны быгатэ будосъёслэн но лулосъёслэн клетка яке мугор пушказы. Соку улэп макеос уг чидало - быро. Соин ик соос пӧртэм амалъёсын тыршо таӵе йӧ кылдэмлэсь утялскыны. Кылсярысь, будосъёслэн кезьытлы чиданлыксы юнгес луэ, крахмал, сакыр выллем тырметлы берытско ке. Соин ик кынмыны шедем картошка сиыны ярантэм ческыт (конял) луэ. Лулосъёслы кезьытлэсь утиськыны юртто нап но кузь гоно куоссы. Тылобурдоослэн тылыоссы толлы ӵемгес но небытгес луо. Тужгес но бусьтыр будэ мамык выллем векчи гонзы. Толалтэлы уноез пӧйшуръёс кӧй сӥен шобырско. Кӧй тужгес но шуныт сётӥсь тырмет луэ уга. Соин ик пӧйшурасьёс солэсь калориен узыр сиён лэсьто. Басьто шпиг (кӧй) но чеснок, соосты ӵош мясорубка пыр ортчытыса но сураса, вӧй выллем арбери кылдыто но сое нянь вылэ зырыса сиё. Кӧня ке улыса ӟигарзэ ыштэм мурт но кужмо но шаплы луэ. Уй пал изьверъёс но пӧйшуръёс, лымшор палась ӵыжы-выжыоссылы ӵошатыса, бадӟымгес адӟисько. Уй пал кионъёс, тӧдьы гондыр, ӟичыос но мукетъёсыз бадӟым мугоро но кужмо луо, шунытгес интыын пукисьёсын ӵошатыса. Шунытэз мугорын умойгес возён понна, уй пал лулосъёслэн пыдъёссы, пельёссы но ымнырзы вакчигес луо. Пӧйшуръёслэсь кезьыт дырез ортчон амалъёссэс чакласькод ке, чылкак паймоно инкуазьлэн быгатонлыкезлы. Кыӵе но амал уг шедьты лулосъёсты но будосъёсты утён понна. Соин ик тужгес но кезьыт интыосын но улон вань. Асьме палан йӧ даур вакытэ туж кезьыт вылэм. Толалтэ куазь ог 70 градусозь но вуэ вал (таӵе кезьыт туала вакыт Оймякон но Верхоянск палан гинэ пумиське). Озьы ке но Кам но Ватка пал шаерын пумисько вал мамонтъёс, бадӟым сюро койыкъёс, уй пал кионъёс, пӧртэм будосъёс. Адями улэ пӧртэм куазё интыосын. Удмуртъёс вӧлмемын степь палан но, тайга нюлэс география зонаын но. Нош тужгес но асьме калыклы тупа кезьыто но шуныто инкуазь. Толалтэ кезьыт, гужем шуныт удмуртэз уг кышкаты. Азьпалан ог 4 толэзь кезьыт луоз. Со кема ке но, ужась-тыршись адями уз шӧды та кузь дырлэсь ортчемзэ. В.Туганаев, биология наукаосъя доктор, профессор. БЫДӞЫМ ВОРМОНЛЫ 55 АР ТЫРМОН АЗЬЫН Тодмоосын пумиськон Сюрес вылэ поттӥськод ке, кинэн гинэ но уд пумиськиськы. Тодмоосын но, тодмотэмъёсын но вераськон мытӥськод. Кытчы мынӥськод, кытчы ветлӥд, кыӵе муген сюрес вылэ потӥд? Собере ини кутске нянь сярысь юан-веран. Удалтӥзы-а юосты Вало вылын яке Чупчи тупалан? Кам сьӧры но, нюлэсъёстӥ бызись Кильмезь шур дуре но вутто юан-веранъёс. Ма нянь сярысь гинэ-а вераськон кутске? Кинлэн мар сюлмаськонэз вань, со сярысь ик маде. Тани мыным но алигес Кез ёросэ ветлыны муг усиз. Одӥгезлы тодмоелы шуисько: тӥляд ёросады но, котькытын сямен ик, туж умоесь адямиос уло. Огеныз ке но пумиськыны мултэс ӧй луысал вылэм. - Тодӥськод-а, - кутскиз тодмое, - вань сыӵе адямиос, коть чугун сюрес вылын ужасьёс доры мын, коть торф поттӥсьёс доры кож, синмаськымон адямиос шедёзы. Гуртъёс сярысь веранэз ӧвӧл ни, - пичияз но, бадӟымаз но кибашлыосын пумиськыны-вераськыны дэмлалозы. Нош кутсконэз понна одӥг адрес сёто. Полом черко гуртын улэ партизан отрядлэн азьвыл комиссарез Александр Васильевич Поздеев. Али со школалэн директорез. Со вералоз секытэсь ож сюресъёсыз сярысь. Ӵош ветлэм эшъёссэ но уз вунэты, нимын- тулын мадёз соос сярысь. Сюрес вуттӥз Поломе. Уй шорозь пуким Александр Васильевичен. Нырысь монэ, тодмотэм муртэ, оскытэкгес пумитаз ке но, бӧрысь кылыз сэраз, я огез сярысь, мукетыз сярысь вера. Со дэмла Глазове, Сарапулэ, Пычасэ, гуртъёсы ветлыны. Ож дугдэм бере, пе, азьвыл партизанъёс кӧжы сямен пазьгиськизы. Соосыз шедьтод городъёсысь но гуртъёсысь. Отрядлэн комиссарез тодытэк уг вера вылэм, пумиськи соосын. Кемалась вал ини со, куатьтонэтӥ аръёслэн пумазы. Пумиськонъёс, ваче син учкыса вераськонъёс, азьвыл партизанъёслэн тодэ ваёнъёссы юрттӥзы "Погонтэм солдатъёс" книга гожтыны. Со потӥз 1968-тӥ арын. Соку война бере тросэз погонтэм солдатъёс пыӵалзэс воштӥзы я тӥрен, я молотэн, кин ке станок вӧзы султӥз, кин ке выльысь парта сьӧры пуксиз. Тани отрядысь штаблэн начальникез Петр Алексеевич Воронов, пединститутэз быдтыса, дышетӥсьын ужаз (али со кулэмын ни). Апполон Петрович Лаврентьев колхозлэн тӧроез вал, Василий Иванович Машковцев Пычасысь огаз комбинатын ужаз. Бен, ваньмызлы удыс шедиз. Ленингард, Новгород, Псков котырысь нюлэсъёстӥ, сыръясь нюръёсты коласа ветлэм партизанъёс ужын но интызэс шедьтӥзы. Соос трос аръёс ӵоже ай мытэм удысазы сылӥзы. Ӵем пумиськылыны ӧз кылды ке но, одӥг пуртыын пӧзьтэм ӝукез сием эшъёс вынзэс- сузэрзэс пумитам кадь ӟыгырско, синпумъёссэс ватытэк ӵушыло. Бен, тыл но ву пыртӥ потон сюлэмез бугыртэ лэся. Пычасысь Машковцев эшъёсыныз пумиськылэмезлы быдэ тушмон вылэ юриськылӥз. Солы уго улонысь кошкытозяз протэзэн "эшъяськоно" луиз. Кулон-бырон котыртӥз бергаз Апполон Петрович Лаврентьевлэн но. Карельской перешеекын ожмаськыкуз сӧсырмыны шедиз. Госпитальысь потыса, солы тушмонэн ваче пумит вуылоно луиз на Эстониын, Польшаын, Германиын. Куд-огезлы партизанъёслы-солдатъёслы вордскем палъёсазы бертыны ӧз кылды ни. Соос пырак азелы кылизы ожмаськон бусыосы, нюлэсъёсы. Соосты тодэ ваён сюлэмъёсты бугыртылӥз. Малы мон ортчем дырын гожтӥсько та чуръёсты. Аръёс! Кӧняез ини соос берытсконтэм вылысь кошкизы. Волхово-Ленинград партизан бригадаысь Удмуртиысь комсомол нимо отрядлэн Ленинградэ потэмез дырысен 56 ар тырме ини. Ӵап соку Нева дурысь город тушмонлэн "кульчоез" улысь мозмытэмын вал. Партизанъёслы, бӧрысь солдатъёслы но офицеръёслы, вань мар сярысь вераны. Соос асьсэ синмын адӟизы, быдэс мугорынызы шӧдылӥзы ожлэсь шӧгзэ-кузьытсэ. Книгаез гожтыку амалтэк юан кылдӥз: кытын тӥ табере азьвыл партизанъёс? Нюлэсъёсысь потэмзы дырысен трос аръёс ортчыны вуизы уго. Данаксэ тодыны, шедьтыны луиз. Со дырысен нош ик аръёс ортчизы. Тани секытэсь ожъёслэн дугдэмзы дырысен ӝоген 55 ар тырмоз. Луэ на-а азьвыл сётэм юанэз выльысь ӝутыны? Юамлэсь азьло малпаны кулэ, дыр. Нош ик ортчем аръёсты тодэ ваёно. Соос котькыӵеез вал. Сӧсырмыса бурмем вурысъёс, сыръясь нюръёстӥ "ымзэс усьтэм" ботинкаосын ветлон, чугун сюресъёсты, выжъёсты пуштытон, тушмон поездъёсты пазьгон дыръя пелез жонгетӥсь куараос котькуд мугоре сылмисьтэм вужерзэс кельтӥзы. Туннэ удмурт шаерысьтымы но Ленинград палась егитъёс чотын кылдытэм партизан ортядысь боецъёс но командиръёс пӧлысь кык мурт гинэ кылемын на. Соос пӧлын тани В.А.Усов но Г.С.Манаков. Усов улэ Сарапулын. Со уно аръёс ӵоже егитъёсты дышетӥз. Нош Геннадий Степанович Манаков Ижевскын улэ, али со пенсиын. Шутэтскыны потытозяз ужаз мотозаводын. Геннадий Степановичен пумиськылэме вал ини. Собере ог-огмес ыштӥм, ветлон сюресъёсмы огазе ӧз вуттэ. Ма веранэз, ортчем дыр солэсь но бамъёссэ гожманы вуэм, но мылкыдыз егит на. Ожын бырем эшъёссэ уг вунэты, соослы сӥзьыса сюлмысь потэм чуръёсын кылбуръёс гожъя. Алигес тани Геннадий Степановичен пумиськыны тупаз. Кыл бӧрсьы кыл кошкиз, кема пуким ӝӧк сьорын. Геннадий Степанович тодаз вае заданиосы ветлэмзэ, тушмон мышкы парашютэн лэзькемзэ. Огез, шуэ, ваське, мукетыз. Ӧжыт гинэ парашют писпуос йылэ уг дэмӟы. Бен, вал дэмӟисьёсыз но. Шоромылӥз Манаков но. Солэн "бурдыз" шедиз ӝужыт но кӧс писпулэн йылаз. Мозмыны быгатӥз, ялан ӟечырамен но парашютлэсь калъёссэ пуртэн вандылэмен. Партизанлы усьыны вайёс ӧз сётэ. Мукетъёссэ дэмӟем эшъёссэ мозмытӥзы васькыны вуэм боецъёс. Геннадий Степанович уг вунэты отрядлэсь нырысетӥ задание ветлэмзэ. Бригадалэн штабысьтыз ивортӥзы: "Чугун сюрес вылтӥ фашистъёс трос техника ваё". Со вакытэ Ленинград-Псков, Ленинград-Дно, Ленинград-Новгород, Ленинград-Благое но мукет сюресъёс вылтӥ трос груз ворттӥзы. Партизанъёс тэк пукыны ӧз быгатэ, тушмонэз канжатон понна, пыдзэс пуктоно луизы. Кутскиз "рельсовой война" шуон. Тушмонэз кекатон, Ленинградэз "кульчоысь" мозмытон понна, фашистъёслы уй но нунал шокчыны сётоно ӧй вал. Нош кызьы уйжомытоно тушмонэз? Сое туж умой валазы партизанъёс нырысетӥ задание ветлэмзы бере ик. Уно пол отрядысь боецъёслы пумиськоно луылӥз ӧтьымтэ "куноосын". Но таиз нырысетӥез вунонтэм кылиз тросэзлы партизанъёслы. Сюрес вылэ потон азьын отрядлэн командирез но комиссарез веразы, капчи уж сётэмын ӧвӧл шуыса. Асьтэды но утёно, заданиез но быдэстоно. Инмын кизилиос сяна ӧвӧл ке но, "гудыртоз", дыр, кышкано ӧвӧл. Геннадий Степанович Манаковлэн туннэ ке но син азяз на оккупантъёслы "капкан" пуктэмзы. Кӧня ке дырлы ке но дугдытоно поездъёслэсь ветлонзэс. Отряд шып потӥз сюрес дуре. Гитлеровецъёс уг кӧло. Полотно вылтӥ оген-кыкен ветло. Соос ортчем бере рельсаос пуме пуштӥсь шашкаос тыремын вал. Соку чугун сюреслэн ог кык километрез палдӥз, поездъёс ӧз ветлэ ни. Азьвыл партизан уг вунэты шур вамен выжез куашкатыны ветлэмзэс но. Со вылтӥ но уго поездъёс дугдылытэк солань-талань ветло. Отрядлэн командирез вераз В.Д.Глуховлэсь, В.А.Усовлэсь, Е.И.Зворыгинлэсь, С.И.Ждакинлэсь, А.М.Габдиковлэсь нимъёссэс, соосын ик вал Г.С.Манаков но. Тӥ, пе, мыноды выжез пазьгыны. - Милям группамы туж лушкем мынӥз выжлы матэ, - тодаз вае Манаков. - Азьпаламы вамышто разведчикъёс, соос ик гуньдытӥзы часовойёсты, подрывникъёс выж улэ пуштӥсь шашкаос тыризы. Витьымтэ шорысь шурлэн мукет палысьтыз поездлэн куараез кылӥськиз. Дуринчиос сямен карауллэн юртысьтыз потӥзы гитлеровецъёс. Со куспын выж инме ӝутскиз, поезд дугдӥз, сюрес пыдсаськиз уго. Ма, тодӥськом вал, гитлеровецъёс уз буйгатске, милемыз утчалозы. Пырим нюлэсэ, сюреслы валлин мынӥськом. Шоссе вылтӥ ми сьӧры немецъёс уисько. Кылӥське пуныослэн утэмзы, автоматъёслэн тачыртэмзы. Уин сюресэз возьмась тушмон солдатъёс нюлэсэ пырыны кышказы лэся. Ми соослэсь мозмытским но лагерямы вамыштӥм, нокыӵе ыштонъёс ӧй вал. Геннадий Степанович пуке но ас киыныз гожтэм брошюраезлэсь бамъёссэ берыкъя. Со нокинэ но вунэтымтэ. Нимын-тулын гожъям боецъёслэсь но командиръёслэсь батыр ужзэс. ... Аръёс нош ик ортчозы. Тани Быдӟым Отечественной войналэн кутскемез дырысен куатьтон ар тырмоз. История понна со, оло, шапыклэсь но пичи. Нош адямилэсь улонзэ басьтоно ке, ой, со ӧжыт ӧвӧл. Геня Манаковлы гитлеровецъёс асьме музъем вылэ урдскыку дас куать арес но тырмыны ӧз вуы. Со ай егитъёслэн пӧртэм шудонъёсазы пыриськылӥз. Ӵапак война кутскон уе но Ижысь трос егитъёс люкаськизы. С.М.Киров нимо шутэтскон парк сьӧрысь нюлэсэ мыном но "ожаськонэн" шудом, пе. Уйбыт ӧз кӧлэ "солдатъёс", "тушмонэн" пумиськон утчазы. Нош ӵукна кӧлытэк ортчытэм уй ачиз сярысь вераз. Озьы но егитъёс шуяны ӧз сётске. Строе султыса, городлэн ульчаостӥз кырӟанъёсын вамышъязы "Если завтра война, если завтра в поход - будь сегодня к походу готов", - чузъяське кырӟан вазь сайкам город вылэ. Ульчаосы потэм нылкышноос но воргоронъёс егитъёсты пыкылыса сямен верало: "Малы ӵуказе, война туннэ гудыръя ини, нош тӥ ӵуказеез витиськоды". Манаковлы но солэн трос ёзъёсызлы дырыз вуиз киязы пыӵал кутыны. Соослы ортчоно луиз нюлэсъёс но нюръёс вамен, гуртъёс но городъёс, пӧртэм странаос пыр, Германиез пыдес вылаз пуктытозь. В.Смирнов. * Удмуртиысь егитъёс партизан сюресъёс вылэ потон азьын. * Г.С.Манаков кузпалэныз З.П.Манаковаен. * В.А.Усов. * А.П.Жуйков. СВЕДЕНИЯ об общей сумме средств, поступивших в избирательные фонды кандидатов, зарегистрированый кандидатов, избирательных объединений, избирательных блоков и израсходованных из них (на основании данных Сберегательного банка Российской Федерации) По состоянию на 25 ноября 1999 года. Ижевский одномандатный избирательный округ � 28. Удмуртская Республика. � Ф.И.О. кандидата, зарегистрированного В рублях п/п кандидата (наименование изибирательного Поступило средств Израсходован Остаток объединения, избирательного блока) всего от всего 1 2 3 4 5 1. Алексеев Владимир Александрович 7110 7100 10 2. Баранов Анатолий Юрьевич 15800 14900 900 3. Баранов Николай Витальевич (коммунист) 4070 4060 10 4. Баранов Сергей Васильевич 845 42 803 5. Гурина Ольга Юрьевна 1639,4 830 809,4 6. Забильский Владимир Викторович 114300 83490 30810 7. Макаров Николай Иванович 20810 20000 810 8. Маслюков Юрий Дмитриевич 1362680 919640,93 443038,07 9. Синицына Ирина Евгеньевна 84400 40300 44100 10. Соловьев Виталий Александрович 10450 2450 8000 11. Солуянов Андрей Владимирович 385300 352592,44 32707,56 12. Сямин Владимир Борисович 165290 116140 49150 13. Чуйков Игорь Вячеславович 258300 219975 38325 14. Яирова Людмила Петровна 257240 192210 65030 ИТОГО: 2855214,4 2140710,37 714504,03 ИНФОРМАЦИОННОЕ СООБЩЕНИЕ 25 ноября 1999 года Окружной избирательный комиссией по Ижевскому одномандатному избирательному округу � 28 в средства массовой информации были представлены сведения о доходах за 1998 год и об имуществе зарегистрированных кандидатов в депутаты Государственной Думы Федерального Собрания Российской Федерации, в которых ошибочно указаны большие площади земельных участков (по сравнению с фактическими), принадлежащих на праве собственности следующим зарегистрированным кандидатам Государственной Думы Федерального Собрания Российской Федерации по Ижевскому одномандатному изибирательному округу � 28: Ф.И.О зарегистрованного сведения о земельных участках сведения о фактической площади кандидата (га), опубликованные в СМИ земельных участков (га) Баранов С.В. 0,326 0,0326 Макаров Н.И. 0,29 0,029 Соловьев В.А. 1,5 0,15 Тодматӥськом быръёнъя огазеяськонъёсын: "За победу патриотов России" КПРФ Геннадий ЗЮГАНОВ: "Странаын порядок луыны кулэ". - Геннадий Андреевич, таяз быръёнъёсын Россиысь компартия кӧня мандат басьтоз но кыӵе солэн огъя"секталаез" луоз Кун Думаын? - Юандылы кык пӧртэм валэктон сётыны тыршо. Нырысетӥез: шуом, таяз арня нуналэ ик быръёнъёс ортчысалзы ке, кин милемлы тросгес дурбасьтысал? Социологической эскеронъёслы осконо ке, КПРФ 25-30 процент куара басьтоз, партийной списокъёсъя - ог 50 процент. Кыкетӥез: парламентэ шедьыны кулэ 300 коммунистъёс но ми пала дурбасьтӥсьёс. Соос нюръяськозы Россилэсь национальной но государственной интересъёссэ утён понна. - Кыӵеен тӥ адӟиськоды выль парламентэз? Кыӵе фракциослэн куаразы юнгес кылӥськоз? - Мон сямен, вуоно Думаын валтӥсь интыын луозы КПРФ но "Отечество - Вся Россия" огазеяськон. Соос вискын аслэсьтыз "пуконзэ" возьыны выроз "Яблоко". Валамон таиз но: валтӥсь партиос ялан куспазы нюръяськозы, котькудӥз тыршоз ӟечгес законопроектъёс дасяны, визьмогес дэмланъёс, ӵектонъёс сётыны, оскымонгес вераськыны. Компартилы но патриотической кужымъёслы сыӵе вожвылъяськон кельше. - Тӥ чакламъя, парламентэ одӥг малпанэн вуэм депутатъёс кужымзэс огазеяны быгатозы-а? - Быгатозы. Тӥни малы ми 300 инты басьтыны выриськом. - Мукетыз юан. Тӥ малпамъя, политической партиос, движениос, огазеяськонъёс пӧлысь кудӥз КПРФ-ен оградэ султоз, нош кудӥз - пумит? - Стратегия ласянь ке учконо, КПРФ-ен ӵош луозы народно-патриотической кужымъёс. Уг ваты: соосын но ми куд-ог ужпумъёсъя огъя кылэ ум вуиське. Кылсярысь, пӧртэм сямен дунъяськом социально-экономической югдурез, валантэмъёс кылдо идейной но политической ужпумъёсъя. Нош мукет ласянь ке чаклано, ми тупаськом но ӵош нюръяськиськом странаын порядок тупатон понна, утьыны тыршиськом парламент амалэн кивалтонэз, нюръяськиськом терроризмлы, криминаллы пумит. Ми - Россиез юнматон но солэсь экономиказэ азинтон понна. Вераны кулэ, та кужымъёс коммунистъёслэн огазеяськоназы уг пыро, соос берло дыре гинэ висъяськизы ай "кивалтӥсь партия" бордысь - куашканы кутскем ельцинской курслэсь. КПРФ мукет сюресъёстӥ "бергасьёсты" туннэ уг пыкылы, янгышъёссэс уг лыдъя - соос нюръясько радлыкез утён понна. Озьы бере, оло, куке но соку кужымъёсмы огинэ вуозы на. КПРФ-лэн тушмонъёсыз сярысь ке верано, сыӵеос радэ пыро, дыр, партимес быдтыны вырисьёс. Кулэ меда соосты нимысьтыз пусйыны? Коммунистъёс нокин вылэ йыркурзэс уг возё, ми дась ваньмыныз огкыл кенешыны но ужаны. Тырмоз ини ог-огед вылэ урдскылыны, кусыпъёсты сӧрыны. Калык жадемын, странамы жуммемын ни пӧртэм пумо вожвылъяськонъёслэсь но ченгешонъёслэсь. Дыр вуэмын огъя кужымен солэн ӵуказе нуналэз понна нюръяськыны. - Кызьы тӥ малпаськоды: парламентэ но президентэ быръёнъёс вискын кулэ-а меда туала правительствоез отставкае улляны? - Сыӵе ужпумез азямы ми ноку но ӧм пуктылэ. Туала правительство сярысь ке верано, со быдэсак нуэ Ельцинлэсь курссэ. Нош быгатӥз ке кыдёке вамыштыны, шуом, Чечняысь вир кисьтонэз дугдытыны, КПРФ-лэн учконэз мукетгес луоз: соку вераськон мыноз ни ӵош ужан сярысь. - Шуом, выль президент бырйытозь, Россия шедиз ке кыӵе ке но кышкыт югдуре (Кавказ ласянь яке мукет интыын-а), туала президентмы ӧтиз ке вань политической кужымъёсты огазеяськыны но выль правительство кылдытыны, КПРФ кыӵе решение кутысал но ассэ кызьы возьысал? - Шонерзэ верано ке, ми акыльтӥм ни Ельцинлэн огазеяськон сярысь огпӧртэм вераськонъёсызлэсь. Солэн "эшъёсыз" номыр та ласянь уг лэсьто: уг ужало оппозициен но, асьсэ пала дурбасьтӥсьёсын но. Огкылэ вуон "амалзы" одӥг: отын яке татын керетон-жугиськон ӝутон. Кемалась тодмо ни туала Кремльлэн политикаез но: макем юн со кесяське "огазеяськон" сярысь, президент сокем зол тышка мукет сямен малпаськыны дӥсьтӥсьёсты, Конституцилэсь куронъёссэ таркаса-быдтыса. Дас ар ӵоже Ельцин кивалтэм улсын ужаса, ас выламы шӧдӥм ни солэсь вань "демократизэ", тупике нуись политиказэ. Солэн командаез странаез куашкатӥз, нокин азьын но кыл ӧз куты, уз но куты. Кемалась валамон: асьмелы таӵе президент кулэ ӧвӧл. Солы дыр вуэмын отставкае потыны но кошкыны, таӵе малпанзэс верало Россиын улӥсьёс пӧлысь 60-80 процентэз. Ельцинлэн "семьяез" кивалтытозь, Россиын номыр уз воштӥськы, уз дугды вир кисьтон но. Та политикалы КПРФ чутрак пумит. Ми вань быгатонозэ лэсьтом, странаын порядок но калыкъёс куспын тупаса улонэз тупатон понна. Вераськиз Т.Дмитриева. "Чигымтэ чидан" конкурсэ Аныкай Кӧня пӧртэм адямиос уло дунне вылын! Котькудӥзлэн сюресэз но, адӟонэз но, улонэз но аслаз. Куд-огзэ улон эркея, вордӥськыкуз ик котырто сое матысь адямиосыз. Сыӵе шудо нылпи сэзь но капчи вамыштэ азьпала, анай-атаезлэсь юн пыкет луэмзэс шӧдыса. Зэм, куд-огез вордӥськемзы дырысен ик курадӟоно луо, улонлэн шуг-секытъёсызлы пумит ас кожазы султо но котькуд вамышсэс синвуаськыса лэсьто, но уг чигисько. Секыт улон соосыз кыдатэ, кужмо каре. Сыӵе луэ милям песянаймы, Калмияр гуртын улӥсь Нафиза Шафикова. Улон ноку ӧз эркея песянаймес - секыт адӟон вылэ секыт адӟон гинэ сётъяз, эскериз кадь солэсь пумтэм чиданлыксэ. Атаез но ньыль сузэръёсыз улонысь кошкем бере, секыт висьыса кулӥз анаез. Вить аресъем Нафиза кылиз копак огназ. Мар меда карысал со, атаезлэн куинь сузэръёсыз но агаез ке ӧй юрттысалзы?.. Дас куинь аресозяз ветлӥз солань-талань - огез апаез дорысь мукетыз доры. Пичи нылпиоссэс утьыса но юрт котыразы ужаса. Секыт пичи дырзэ тодаз вайыса, песянае вера: - Нокинлэн но улонэз со дыре капчи ӧй вал. Тырмыт сиськытэк, уен-нуналэн секыт ужаса, адямиос кужымтэм луылӥзы, кулылӥзы. Нылпиослы но туж секыт вал та дыре. Туж тросэз доразы быдэс нуналлы асьсэ коже кыльылӥзы. Тросэз, олокыӵе но чер йӧтыса, солэсь кулылӥзы. Туж секыт улӥмы соку. Мыным, бадӟым муртлы сямен, апаелэсь кык нылпизэ утялтоно луиз. Зыбка (кӧкы) вӧзысь нокытчы кошкылытэк, уен-нуналэн нылпи утьыса улоно вал. Юрт котырысь ужъёсыз но быдэстыны вуттӥськоно. Шулдыр пичи дыр, анай-атай бурд улын эркеяськыса гинэ будон пичи Нафизалэн уйвӧтаз но ӧз лыктылэ. Кӧттырымон сиськымтэеныз, восьтэт но пичи гинэ ныллы нуналысь нуналэ нюръяськоно луиз секыт улонэныз. Нош та солэн кутсконэз гинэ вылэм ай, азьпалан талэсь но секытгес улон вите вылэм. Кӧня ке ар ортчыса, Калмияре бертэ Нафизалэн атаезлэн Уфаын улӥсь агаез. Со туж жаляса учке нылаш шоры. Кошкыкуз доразы, Уфае, ӧтьыса кельтэ, ужаны но интыяло шуыса оскытэ. Нафизалэн мылкыдыз ӝутске ке но, агайзы доры ӝог гинэ уг вуы. Торф поттонын кӧня ке ужамез бере гинэ мыноно кариське. Отын солы нош ик капчи уг луы: ар мында агайёсыныз ӵош улыса, тулыс но сӥзьыл город садъёсты утялтэ. Но толалтэлы ужтэк кылемез бере, сюлмыз нош ик кыске вордӥськем Калмияр гуртаз, анаез кадь мусо Гадиль апаез доры. Туж мӧзмыса но шумпотыса бертэ со. Нош гуртын улон воштӥськымтэ - озьы ик секыт но курадӟыса улэ калык. Табере ӟуч кылэз но дышетэм, городысь улонэн но тодматскем Нафиза, гуртын кӧня ке улэмез бере, нош ик кошке ужан инты утчаны. Вуэ Пермь городэ. Штукатуре-маляре дышетскыса, мылысь-кыдысь кутске уж борды. Татын тодматске Буздяк районысь егит, таза, чебер но лякыт бигер пиен Амирьянэн. Вакчи дыр куспын соос ог-огзэс ярато но огазеясько. Ог-огзэс гажаса уло. Пичи нылзы, Камилла, вордӥське. Но улонзэ куспетӥ каре война. Со аръёссэ тодаз вайыкуз, песянае синъёссэ ӵушылэ, синвуаськыса вера: - Амирьянэн тодматскеммы но огазьын улыны кутскеммы бере, асме котькинлэсь шудоен лыдъяй вал. Та дырозь нокинлэсь но сомында лякыт кылъёс кылыны ӧз кылды, нокин но монэ сыӵе юн ӧз яраты. Амирьян вӧзам дыръя, асме анаезлэн бурд улаз кыллись тютюпи кожалляй. Нош пичи нылмы вордӥськем бере, шумпотонлэн пумыз ӧй вал. Та шудэ пумтэм-йылтэм луоз, дыр, кожасько вал. Нош со туж вакчи вылэм - кутскиз жугиськон (ож)... Кулытозямлы вунонтэм кылиз огазьын берлозэ ортчытэм ӝытмы. Соку Амирьян, нылынымы ӵош выж вылэ выдыса, погылляськыса шудыны кутскиз. Собере нылмес ки йылаз шуак ӝутӥз но шуиз: "Ой-ёй-ёй, нылы, туж жаль потӥськод: уг адӟы ни мон тонэ ноку но, уг ӝуты ни та киосы йылэ!" Сыӵе чупа, ӟыгыръя нылмес, нош аслаз синкылиосыз вияло... Пичи Камилла нош ӟалыксэ (кышетсэ) кутэм но, атайзэ валаса сямен, синъёссэ ӵушылэ... Амирьянэз фронтэ нырысетӥ нуналъёсаз ик басьтӥзы, Нафиза кияз арес но ӝыны нылыныз кылиз. Кошкыкуз кузпалзэ аслаз вордӥськем палъёсаз, Кылатаяк гуртаз, бертыны косӥз. "Анай-атае, сузэръёсы но вынъёсы мынам туж лякытэсь, соос тонэ мурт уз каре, аслад семьяяд кадь улод соосын", - шуэ со люкиськыкузы. Амирьянэзлэсь куронзэ песянаймы быдэстэ - картэзлэн семьяяз вуэ. Но кузь сюресэз ортчыны чидамтэ, сюрес вылын туж зол кынмем пичи Камилла висьыны усе но кык толэзьскын кулэ. "Кайгу ноку но огназ уг ветлы", - шуо калыкын. Нылыз кулэм бере, Нафизалы вуэ мукетыз секыт ивор - Амирьянэз ож бусыын бырыны шеде. Песянаймы нош ик аслэсьтыз тужгес дуно адямиоссэ ыштэ. 1942-тӥ арын гуртысь нылъёсын ӵош Нафизаез палэнэ ужаны лэзё. Кытчы мынэмзэс но тодытэк, соос Ленинградэ вуо. Кыӵе гинэ ужъёсыз быдэсъяны уг кылды отын! Лэсьтӥськонын но, заводын но, чугун сюрес вылын но ужало соос, сӧсыръёсыз но эмъяло. Блокадае кылем Ленинградын курадӟоно луо... 1945-тӥ арын апрель толэзе гинэ берто гуртазы. Нош песянаймес нокин но уг ни пумита: анай луонэз но, Амирьянлэн сузэръёсыз но, вынъёсыз но сютэм кулыса быриллям. Атайзы ивортэк ышем. Скал кыскись луыса кӧня ке ужамез бере, Вормон нуналэз пумитаса, Нафиза выльысь берытске аслаз вордӥськем палъёсаз - Калмияр гуртаз... Вордӥськем палъёсаз бертыса, песянаймылэн улонэз чутрак воштӥське. Аслэсьтыз улонзэ малпамтэ шорысь герӟа со Майск гуртын улӥсь, аслэсьтыз дас куать ареслы бадӟымгес воргоронэн, милям песятаенымы, Хуснимарданэн. Зӥбыт, лякыт сямо, тэк пукыны ноку чидасьтэм, ужась но тыршись песятаенымы ог-огзэс кема аръёс ӵоже валаса уло соос. Песятаймылэн быдэ вуэм но семья кылдытэм ньыль нылпиосызлы - Анфисалы, Катималы, Шаймарданлы но Сабирлы - песянаймы кулэм анкайзэс воштэ, соослы вань лякытлыксэ но сюлэм шунытсэ сётыса, ас нылпиоссэ кадь будэтэ. Кенъёсызлы, Надеждалы но Федосиялы, юрттыны котьку дась, визь-кенеш сётӥсь, валась анаймурт луэ. Эмеспиосызлы, Зарифьянлы но Сахиплы - гажамон инэй, нош нылъёсызлэн пиоссылы - яратоно ӵужанай но песянай... Песятаеным песянае котькыӵе шуг-секытэз ӵошен чидало вылэм. Корка пушсы котьку но нылпиоссылэн, нунокъёссылэн куараосынызы тырмылэм, асьсэлэн тыршеменызы, юрт котыразы котьку ӝикыт вылэм, бакчаязы трос муш умортоос сылӥллям, гид тросазы пудо вордылӥллям. Песятаймы тямыстон вить арес тырмыса кулэм, нош песянаймы нош ик Калмияре, Сабир пизылэн бадӟым пиез, Виталий, доры вань юрт котыреныз ӵош улыны лыктэм. - Секыт пичи дыры та гуртын ортчиз. Вань туганъёсы (ӵыжы-выжыосы) татын. Палэнысь котькыӵе эле вуылыса но та гуртэ котьку мӧзмыса но шумпотыса бертылӥ. Татчы ватэмын анае-атае, татчы ик, небыт сюе, мыным но пырыны мед кылдоз, - шуэ песянаймы. Алигес солы тямыстон тямыс арес тырмиз. Секыт но данъяськымон улон сюресэз ортчем песянаймы ас улоназ кытчы гинэ вуымтэ, мае гинэ адӟымтэ. Озьы ке но, лякыт сямо, зӥбыт, визьмо, нокыӵе ужлэсь кышкасьтэм, туганъёсызлы, нунокъёсызлы но мукет адямиослы котьку гажамон но дуно адями луэм. Сыӵе муртлы музъемозь ик йыбырттэм, юн тазалык сӥзем потэ. Ирина Самигулова. Башкортостан, Татышлы ёрос, Калмияр гурт. За народовластие, свободный труд и безопасность, за лучшую жизнь для россиян выступает единым фронтом левоцентристский избирательный "Блок генерала Андрея Николаева, академика Святослава Федорова". Кандидат в депутаты по федеральному списку блока от Удмуртской региональной группы академик, доктор технических наук, президент Инженерной академии Удмуртской Республики Валерий Александрович НИКУЛИН. 1. На политической сцене России действует множество различных партий и движений. Некоторые из них уже около 10 лет находятся во власти. Результаты их деятельности хорошо известны: непрерывное обнищание абсолютного большинства народа, непрекращающееся разрушение всех сфер жизни общества и государства. Эти итоги - следствие того, что партия власти решает лишь свои узкопартийные эгоистические интересы. На первом плане у ее представителей личные амбиции и свои интересы, а не интересы народа и государства. Именно поэтому у них нет обоснованной концепции возрождения и развития российского государства. Именно поэтому жизнь нашего народа каждый день становится все хуже и горше. Подлинные патриоты не могут равнодушно смотреть на все эти разрушительные процессы, не могут быть пассивными, не могут стоять в стороне от жизни своего народа и государства. Именно поэтому генерал А. Николаев и его единомышленники создали движение "Союз народовластия и труда". Мы знаем, что нужно делать и как, чтобы в короткий срок поднять Россию с колен, превратить ее в процветающее демократическое государство с высоким уровнем жизни и действенными гарантиями экономических, политических, гражданских прав и свобод каждого человека. Накануне выборов в Государственную Думу, по инициативе СНТ было создано избирательное объединение "Блок генерала Андрея Николаева, академика Святослава Федорова". 2. Среди участников "Блока генерала Андрея Николаева, академика Святослава Федорова" ведущие Российские политические партии и движения: "Союз народовластия и труда", Партия самоуправления трудящихся, "Инженерный прогресс России", "Союз реалистов", "Социалистическая партия трудящихся", "Надежда России", члены движения "Держава" и около 60 других авторитетных общественных объединений, представляющих рабочих и крестьян, военнослужащих, инженерно-технических работников и управленцев, деятелей науки, культуры и образования, тружеников просвещения и здравоохранения, производственные малые и средние предприятия. Наши идеалы, наши лозунги, наши дела и поступки просты и понятны всем. Мы - за благополучие каждого человека, каждой семьи и общества в целом. Мы - за народовластие, как политическую систему, обеспечивающую социальную справедливость. Главная наша цель � сделать человека труда настоящим хозяином своей жизни, своей страны. Мы - за возрождение и строительство России, подъем ее экономики, поддержку отечественного товаропроизводителя. Мы против: тех, кто предал, разграбил и унизил великую страну - СССР, кто сегодня предает Россию; терроризма и преступности, коррупции и сепаратизма, национализма и экстремизма. 3. Сегодня в большинстве развитых стран мира идет активный процесс перехода на постиндустриальные рельсы, обусловленный научным прогрессом. Человечество вышло на новый уровень своего развития, который требует более высокого уровня демократии в управлении общества, то есть подлинного народовластия в политической сфере и более ответственного, заинтересованного труда в экономической сфере. Идет активный процесс поиска и создания более эффективных общественных отношений, более эффективной, чем капиталистическая, общественной системы. Россия сегодня намного отстала в своем развитии от стран, возглавляющих мировые рейтинги жизненного благополучия своих граждан, и поэтому, чтобы догнать их, нам необходимо заложить в основы развития государства и общества, самые передовые, самые эффективные общественные отношения, а не повторять прошлое, которое внедряют наши псевдореформаторы. Реальное народовластие в политической сфере, эффективный труд, эффективные отношения собственности, высокий уровень социальной защищенности народа - это суть идеологии нашего движения, это путь, предлагаемый нами России, и это знамя нашего Движения. 4. Наше движение обращается лицом к молодежи, приглашаем ее поддержать нас по ряду причин: во-первых, будущее любого государства во многом зависит от того, каково сегодня молодое поколение, обладает ли оно необходимыми качествами вхождения в новую жизнь. во-вторых, молодежь в политике является не только целью, объектом приложения разных сил, искренне заинтересованных в подготовке достойной смены для себя и страны в целом, но и средством политики. в-третьих, сегодня молодежь фактически лишена возможности прогнозировать и планово строить свою жизнь, что оказывает безусловное влияние на ее моральное состояние. 5. В стране - кризис. Прежде всего, кризис власти. Власти исполнительной, законодательной, судебной, то есть кризис всей политической системы в целом. Сегодня нам ясно, что никто из власти предержащих не намерен ничего делать для народа. Кроме совета потуже затянуть пояса, мы от них ничего не услышим. Задача власти состоит в том, чтобы создать условия, когда каждый работающий должен получить все, что он заработал. Но когда даже такую не самую сложную задачу власть не может решить, ее надо менять. Оппозиция существующей власти в лице правых: "Яблока", НДР и иже с ними; левых из КПРФ, и центристов в лице "Соотечественников со Всей России" вполне довольна существующим раскладом политических сил и не ставит перед собой стратегических целей развития России. Их цель - сохранение существующего положения, при котором избирателю навязывается псевдовыбор между якобы белыми и красными. Как и на выборах 1996 года, обществу в конечном итоге будет предложен взаимоисключающий вариант выбора. Третьего, якобы, не дано. Сейчас развертывается тот же сценарий, организуемый запасной ельцинской командой блоком "Отечество - вся Россия"" и блоком губернаторов "Единство". Они будут "наезжать" на коммунистов и опять разыгрывать тезис: "Вы - за старое, мы - за новое" (причем невозможно будет обсудить, что является старым, а что новым), и на этом "умиротворить" избирателей. На самом деле выбор есть. Надо только не попадаться на удочку телевизионной рекламе, подсовывающей нам под новым соусом тех, кто уже превратил Россию в нищую, просящую подаяние. Совет простой: возьмите ручку и запишите имена политиков и названия партий, которые часами не сходят с телеэкранов. За них голосовать нельзя! 6. Наше сельское хозяйство в состоянии обеспечить продовольствием страну. Для этого нужно перейти от споров о купле-продаже земли к целенаправленной государственной аграрной политике, под которой мы понимаем систему мер по созданию правовых и экономических условий эффективного функционирования хозяйств с разными формами собственности. Производителей сельскохозяйственной продукции нужно освободить от засилья посредников, создать и расширить сельхозкооперацию по переработке и реализации собственной продукции. Мы выступаем за развитие всех форм кооперации на селе, в том числе и производственной, по типу "народных предприятий". Не менее важная задача - обеспечить государственную поддержку социального развития села (жилье, дороги, транспорт, газификация, школы, медицинские учреждения, сфера услуг и т.п.). Должны быть ликвидированы ножницы цен между сельскохозяйственной продукцией и промышленными товарами для села. Необходимо наладить производство недорогой и качественной сельскохозяйственной техники, особенно средств малой механизации, восстановить плодородие земли. Земли сельскохозяйственного назначения необходимо передать коллективным хозяйствам в бессрочное пользование, крестьянам в гарантированное пожизненное пользование и наследуемое владение. Покупаться и продаваться вместе с постройками должны только приусадебные, дачные и садовые земельные участки. Мы глубоко убеждены в правильности изложенного пути. Но мы также понимаем, что для достижния изложенных целей всем здоровым силам нашего народа необходимо объединиться. Только вместе мы сможем возродить нашу Родину. Ӟег нянь Тодэ ваёнъёс Ярысь "Сельская правда" газетын ӵемгес печатланы кутскизы кылбуръёсме, веросъёсме но мукет гожъямъёсме. Нош кин сокем сюлмаське соосты калык син азе поттыны - со сярысь малпаны тодам но ӧз лыктылы. Тодӥсько вал одӥгзэ: ваньзэ сое учке-лэсьтэ гажано редакция. Нош кинъёс, кыӵе адямиос ужало редакциын - пумиськыны дыр ӧй шедьтылы. Нырысетӥез кылбуре югыт дуннеез адӟиз бордгазет бамысен, Юрысь семилеткаын дышетскыкум. Возьыт-а ӧй вал? Сьӧркам но, син азям но серекъяллязы: "Потош Олёш - поэт Олёш!" Кыӵе ке муген школаямы вуылэм газетлэн кыл кутӥсь секретарез Василий Семёнович Ярославцев. Маинызы яраллям кылбуръёсы? Соосты Василий Семёнович синйылтэм но сьӧраз басьтэм. Удмуртиысь писательёслэн ньылетӥ ӧтчамазы пыриськыны мыным но шуд усиз. Соку пумиськи дано но егит гожъясьёсынымы. Ас ёзъёсыным кусып тупатэме но эшласькеме пыраклы вунонтэм кылиз. Пужым кадь веськрес но ӝужыт, йыг-йыг батыръёсты адӟись мурт малпасал: "Таосыд вынъёс ӧвӧл-тэ?! Кисьтэм кадь, огвыллемесь..." Соос вал Удмурт пединститутысь студентъёс Семён Перевощиков но Георгий Архипов. Али но шумпотӥсько: монэным, тодмотэм гурт пияшен, туж ӝог шедьтӥзы эшлыко кыл. Мыным, гуртэлэсь палэнэ поталлямтэ муртлы, сыӵе адямиосын пумиськонлэсь бадӟым шуд ӧй вал ни... Георгий Архипович Архиповен ӵош ужамы "Сельская правда" ёрос газетамы. Со вал удмурт газетъя редакторез воштӥсь, мон - гурт улон-вылонъя отделын ужась. Тӥни соку эшъяськонмес пертчонтэм герӟаз ужмы. Георгий Архипович ӧз но тодылы, ӧз но валалля тонъяськон-монъяськон сямез. Егит журналистлы котьку юрттылӥз. Туж зӥбыт, лякыт, синмаськымон адями вал. Таӵе муртъёсты Яр палан шер пумиталод шуи ке, уг янгыша, дыр. Георгий Архиповичез быдэс район тодылӥз но гажалляз, ас ӵыжы-выжызэ кадь. Угось ӵем ветлылӥз гуртъёсы, пумиськылыкуз выжыятыса-выжыятыса вераськылӥз нимаз-нимаз адямиосын. Таосыз бадӟым юрттэт сётылӥзы, инты нимъёс сярысь веранъёсты утчан удысын ужакуз. Партилэн Яр райкомезлэн кыкетӥ секретарез Геннадий Александрович Булдаков, удмуртъёс пӧлын будэм но дышетскем адями, олокинлэсь адӟем карыса, лулаз-сюлэмаз кас, керӟег но монъяськон сям пыӵатэм. Районын улӥсьёс али но ӟеч кыл вераны уз быгатэ солы. Трос синву кисьтоно луиз угось ужась калык. Соос пӧлын ик вал Георгий Архипович но. - Что за безобразие, Георгий Архипович? - вожпотонзэ кытчы карыны уг тоды Булдаков.- Ты ведь макулатурщик. В макулатуре точно утонешь! Не видно твоей головы, покрыла бумажная тина! Не стыдно ли, безобразие?! Через два дня не приведёшь в порядок кабинет - знай, всю эту дребедень вывезут куда следует. Редакторез воштӥсьлэн, поэтлэн но тодосчилэн ужано кабинетэз кык пуны улон карлэсь ӧжытак бадӟымгес вал шат. Пуктэмын одӥг гинэ ӝӧк. Инты сюбег но вакчи, ӟоскыт. Георгий Архипович пӧртэм газетъёс-журналъёс басьтылӥз, вуылӥзы ёросъёсысь но бускель улосъёсысь газетъёс. Ваньзэ интыяны нимысьтыз висъет ӧй вал. Кытчы кароно? Ваньмыз со, зэмзэ но, вӧлдэтозь ик люкен-люкен ӝутскемын, пыд улын лошъяськисьёсыз но вал. Пырись-потӥсьлы берытскон инты ик ӧз шедьылы. Таӵе югдурез адӟыса, райкомлэн кыкетӥ секретарезлэн йыркурез гыбдаз. Архиповез ултӥян понна, олокыӵе но кулэтэм, ыме тэронтэм кылъёс шедьтӥз. Нош Георгий Архипович, пал кылын пумитъяськытэк, ваньзэ ас вылаз басьтыса чидаз. Мон, егит мурт, дась ни вал пуштыны: собыдӟа ултӥямез чидась адями тупыттэм жаль потӥз. Зэм, дурбасьтыса юрттыны ӧй тырмысал кужыме но, быгатонлыке но. Георгий Архипович вань "макулатуразэ" дырыз дыръя нуыса ӧз вутты улон корказ. Тау: котырзэ октыны-калтыны бӧрысь юрттӥзы Яр педучилищеысь студентъёс. Вератэк кельтэме уг поты тазэ но: редакциын ужасьёс пӧлын но вал районэн кивалтӥсьлы дурбасьтӥсьёс. "Та варгас айы ӟазеглэн йыраз коть пис тулъя - выж но, вӧлдэт но - сё одӥг!" - Архиповез тазьы исамес карыса серекъяллязы ӵош ужась эшъёсыз. Соинтэк-а, вылды, Ярын сокема ужаса-улыса но йӧскадь улон инты басьтыны ӧз быгаты. Оло, ачиз но ӧз сюлмаськы... Улӥз ас даурзэ ортчем, куашкан калэ вуэм коркан. Интыысьтыз вырӟыны бакчаез-а жаль потӥз?.. Ассэ но, кроликъёссэ но сюдӥз угось со. Туж амало кроликовод вал Георгий Архипович. Кӧня меда кроликпиоссэ кузьмаз посёлокын улӥсьёслы?! Мон но кема аръёс ӵоже вози солэсь выжызэ. Гуртын улыкумы, эшшо пиелы кузьмам вылэм. Сыӵе вал солэн сямыз: адямилы ӟеч лэсьтон! Ми палан улӥз но ужаз бадӟым, дано адями, нокинэ канжатъятэк, нокинэн тэргаськытэк. Сыӵеен тодо яръёс али но. Георгий Архипович куноосты но пумитаны ӧз возьдаськылы вуж корказ. Шырыт но лякыт сямыз тырмылӥз дышетскись нылпиослы но, зэмос кузё мылкыдын улӥсь воргоронъёслы но. Дораз пыратэк ӧз кошкылэ удмурт литератураез но культураез гажась-тодӥсь адямиос. Куноосыз ӵемысь луо вал поэтъёс но писательёс. Монэ но тросэныз тодматӥз Георгий Архипович. Тодам лыктэ одӥг учыр. ... Уйбыт йӧскадь ӧй кӧлы. Ӵапак кысык дыр - ӟегез октон-калтон. Ю-нянь будэтӥсь но утялтӥсь сярысь очерк гожтоно, пе. Нош сое "пӧран" - шыд пӧзьтон ӧвӧл. Колхозэ потон азям Георгий Архипович доры кенешыны пыри. Ас малпанъёсме ӝоктыса, пӧй, визь-кенеш басьто. Вольыт сюрес но ужам азинсконъёс сӥзьыса келякуз, мыньыштык юаз: "Кӧлыса уд ветлы, дыр? Колхозэд но кипыдэскад кадь матын. Ӧд ке ӝегатскы, бадӟым куноеным пумиськод туннэ ӝыт. Уждэ но тыро-пыдо лэсьты, верамме но эн вунэты, Алексей". Ужме быдэстыса бертӥ. Нош Ленин нимо ульчаын улӥсе доры пырыны возьытэ ӧз лэзьы со ӝытэ. Гажано куноез лыктэмын бере, тузонэсь вылдӥськутэн туж ик умой ӧвӧл тодмотэм адямиен пумиськыны. Ӵуказе шутэтскон нунал - арня, кунояны ӵапак кемыз. Георгий Архипович эмезё бакчаяз пуке мыным тодмотэм но тодмо, котырес, тыр ымныро, бадяр кадь тып-тып мугоро егит воргоронэн. Таизлэн вылаз сюрсо дэрем. Галстуктэк, гарамурес. Сьӧдмыт-пурысь костюмен. Пиджакез вӧзаз, пукон вылын. Куспазы туж мыло- кыдо вераськемзы кылӥське. Тулыс тӧл выллем, дорам лыкто небыт, шуныт кылъёс. Егит адями кемалась тодмое кадь потӥз: кин-о меда со? Капкаетӥ кепырасагес пырыкум, аслэсьтым ачим юасько: "Ӟуч сямен-а, удмурт сямен-а ӟечбуръяськоно?" Нырысь ик вазьылӥ Георгий Архиповичлы. Нош со шуиз: "Кыдёкысь лыктэм куноен азьло ӟечбуръясько, Алексей. Тон пинал ӧвӧл ни, гажанэз валаны кулэ..." - Ничего, ничего, Георгий Архипович, ваньмыз интыяз пуксёз. Пырысаяз ик ӵыжектытыны кулэ меда? Алексей Иванович вал кадь, озьы-а, Георгий Архипович? Пуксьы вӧзамы, эн мурта, - мылкыдэз лӧпкытӥсь но возьдаськонэз уллясь мынектонэн дорам лыктӥз кыдёкысь куно. - Веретенников Алексей Иванович,- валэктӥз юртъер кузё. Соку ик юаз: "Тодмаськод- а, Алексей, та куномес?" Тодмо ук, тодмо тусбуй! Нош кин со, тодмо адями - нокызьы но тодам уг лыкты. Кыкназы чус, ас малпанъёсазы выем музэн пуко но дырын-дырын ог-огзы шоры учкылыса мыньыштыло. - О, кин, пӧй, вылэм... таре тодмай... Владимир Романович! Газет но журнал бамъёсысь тусыд-буйыд пӧяны уз сёты,- тодмаменым шумпотон лӧптосэ кыре потӥз. - Бен, бен, шонер. Только Васильевич... - нокыӵе кариськытэк, каньылак серектӥз Ижевскысь гажано куно. - Романов. Асьмелэн удмурт поэтмы,- валэктыса тупатӥз Георгий Архипович. Сиёнэн-юонэн тыро ӝӧк сьӧрын озьы тодматски мон Удмуртиысь Ленин комсомоллэн премиезлэн вуоно лауреатэныз, поэтэн Владимир Васильевич Романовен. Сыӵе дуно но шудо нунал сюлэмысь ноку уз кошкы. Сӥё-дано, ӟеч адямиосын пумиськон котьку йыгмыт инъет сётыса кельтэ вуоно аръёслы, адямилэн кошкись даурезлы. Озьы шуисько чик ушъяськытэк, ас улонме чакласа но лыдэ басьтыса. Владимир Васильевич нырысьсэ адӟем но пумиськем муртэн (монэным), соку ик, шуныт кылъёссэ жалятэк, эшъяськон нюжазэ герӟаны ӧз чурытъяськы. Соинтэк-а, вылды, эш мылкыдын кузьмаз "Мынам тулысэ" кылбур сборниксэ. Синпельлы шуыса гожтӥз: "Ярысь эше, йыгмыт вамышъя асэныд шедьтэм сюрестӥд!" Георгий Архипович но палэнэ ӧз кыльы - кузьмаз "Вай бур кидэ" сборниксэ. Флор Иванович Васильевлэн "Тон сярысь" кылбур сборникез вӧзы интыяськиз эшшо кык дуно синпель кузьым. Со-а ӧвӧл ог-огдэ гажан но шумпотонэз пыраклы сюлэме пыӵатон?! Эшез пала берытскыса, Владимир Васильевич шуиз: "Тадэ, Георгий Архипович, асьме классикмы, Михаил Петрович Петров но, синйылтэм. Со гожтэм: "Алексей Веретенниковлэн кылбуръёс гожъяны мылкыдыз но быгатонлыкез вань". Во-от, ушъям кадь медаз поты. Созэ адӟом ини, улыса-вылыса: оло, зэм но, классикмылэн верамез зэмалоз? Алексей, оло, маке сьӧрад но-а ваид? Лобась ваёбыжлэн выллем лӧптэм-бурдъяськем шумпотонме ватытэк но чик кӧбератэк, быдэс блокнот кылбуръёсме мычи. Эшъёсы соосты лыдӟизы-эскеризы кунояськон ӝӧк сьӧрын. Ӟеч верамъёссэс кылыса, шумпотонэлэн пумыз но ӧй вал, дыр, ни соку! Соку ик, кельшымонъёссэ бырйыса, сьӧраз басьтӥз Романов. Шорам чылкыт синъёсын учкыса, оскытӥсь кылъёссэ жалятэк шуиз оло мыным, оло Архиповлы: - Нимаз кылбур липет улэ курисько: мон сямен, кыре поттымонэсь. Али вераны шуг ини, кинъёслэн сюлмаськемзыя но юрттэмзыя, кылбуръёсы потӥзы "Советской Удмуртия" газетын. Бӧрысь но тросэз печатласькылӥзы шаерысьтымы газетъёсамы. Нош соосты люкаса но огазеяса, сборникен поттыны чик но ӧй малпалля. Кылбуръёсам ӧй вал кадь ӟырдытлыкез: сыӵе юзмыт чуръёсты-а, пӧй, калык радэ поттод? Али но соос уло, одӥг липет улэ пырытэк. Со ортчем шудо нунал дырысен Чупчи улосысь кызьпуослэсь, пипуослэсь но топольёслэсь вож буртчин кышетсэс уно пол бездытъяз ини сӥзьыл куазь. Озьы ке но, со шудо, ноку вунонтэм нуналэ сопал дуннее кошкытозям улоз сюлэм пыдэскам: угось ӟеч но визьмо адямиосын одӥг нуналэз-ӝытэз ортчытон но гужасьтэм пытьы кельтэ. Алексей ВЕРЕТЕННИКОВ. * Одӥгез ужан нунал. Георгий Архипович АРХИПОВ - бур паласен кыкетӥез. Емышез син азьын Киясовоын алигес ортчиз "Удмурт кенеш" огазеяськонлэн ёросысь ёзэзлэн конференциез. Ёросысь азьветлӥсь Надежда Викторовна Пахомова люкаськемъёсты пыр-поч тодматӥз ортчытэм ужрадъёсын. Тужгес но тунсыко вал быдӟым нуналэз вашкала сямен пусъён - со ми палан ньыль пол ини ортчытӥськиз. Котькуд гуртлэн аслаз манерез, бӧлякъёслэн асьсэлэн вӧсь гуръёссы. Ар куспын трос гинэ вал шулдыресь пумиськонъёс. "Ашальчи" калык коллективлы тырмиз дас ар. Ожысь но ужысь ветеранъёс но палэнэ кельтэмын ӧй вал. Оштолэзе Кирилл Ломагинлы сӥзем ӝытэ быдэс ёросысь коллективъёс люкаськылӥзы. Нош кылбурет удысэз яратӥсьёс понна шуныт пумиськон вал ёрос библиотекаын но Лутоха школаын, вуылӥзы Галина Романова, Татьяна Чернова но Лидия Нянькина. Шуныт мылкыд кельтӥз финн-угор калыкъёслэн фестивальзы но. Вератэк кельтэм уг поты будӥсь кивоштӥсьёсмы сярысь но. Киясаысь "Чылкыт ошмес" нылпи фольклор коллектив вуылӥз Ханты-Манси округе "Звездный чум" лагере. Вунэтэмын ӧвӧл ёросысь кылбурчимылэн Геннадий Камашевлэн нимыз, сое буре ваён ӝыт ортчиз. Гуртъёс но бере уг кылё ортчытэм ужрадъёсынызы. Надежда Викторовна котькудаз ик отчы вуылыны сюлмаське. Тыршемезлэн емышез син азьын. Кылсярысь, Вуж Салья школаын кылдытэмын анай-атайёсын, песянайёсын ужанъя, удмуртлыкмес утёнъя огазеяськон, пӧртэм ужрадъёс ортчытъя татысь нылкышно кенеш. Сӥзем потэ Н.В.Пахомовалы: котыраз юрттӥсьёс тросгес мед луозы, кутскем ужзэ пумозяз вуттыны мед быгатоз. Н.Михайлова. КУН КЕНЕШЛЭН СЕССИЯЗ Выжыкылысь ковёр ке луысал Кызетӥ даур йылпумъяськытозь кыле на куинь арня яке 28 нунал. Ма ваёз вылез даур? Кыӵе луоз вуоноез, 2000-тӥез ар? Кудпала воштӥськоз Удмурт Республикалэн улонэз? Та сярысь кык нунал ӵоже пыр-поч вераськон мынӥз Кун Кенешлэн сизьыметӥ сессияз. Депутатъёс азьын республикалэн бюджетысьтыз коньдонэз кутэм пумысен отчёт лэсьтӥз коньдон ужпумъёсъя министр Владимир Бельтюков. Солэн вераськемез борды ватсанъёс пыртӥз Кун Кенешысь Бюджетъя, налогъёсъя но финансъёсъя ялан ужась комиссилэн кивалтӥсез депутат Софья Широбокова. Кызьы ужаз республикамы 10 толэзь ӵоже? Промышленностья ке верано, кылем арынлэсь ӟечгес, 108 процент продукция поттэмын. Соин ӵош кулэсмизы ыштон адӟыса ужась предприятиос. Миым та вакытэ соос 51 процент ке вал, туэ - 42. Предприятиослэн но организациослэн барышсы (прибыльзы) будӥз 8,1 поллы. Экономикалэн азинскемез соку ик шӧдӥськиз налогъёс вылын, соос ӝегатскытэк шаермылэн казнаяз вуизы. Со луонлык сётӥз пунэмаськем коньдонлэсь бадӟым люкетсэ уждунэн но пособиосын берыктыны. 1999-тӥ арлэн бюджетэз Кун Кенешен кутэмын вал туэ 22-тӥ феврале, доходъёсъя статьяез - 1542,9 миллион манет, расходэз - 2306,9 миллион (бюджетэ пырисьтэм фондъёсты вератэк). Бюджетлэн дефицитэз (доход но расход куспын тырмымтэез) луиз 764,0 миллион манет яке 33,1 процент 10 толэзь ӵоже бюджетлэн доходъя люкетэз 103,3 процентлы быдэстэмын. Со умой. Озьы ик выт октонъя арлы чаклам план быдэсмиз ини 229,6 процентлы. Федеральной бюджетысь трансфертъёс басьтэмын 399,5 миллион манет, чакламъя - 115,7 процентэз. Со сяна, пӧртэм амалэн ватсаса вуиз на эшшо 122,1 миллион манет. Огъя учконо ке, шаермылэн коньдон пуйыез, азьвыл аръёсын ӵошатыса, сокем начармыны ӧз сётскы. Расходъёсъя статьяе чаклам план 67,8 процентлы гинэ быдэстэмын. Министр валэктэмъя, коньдон ӧжытгес кутэмын, бюджетлэсь дефицитсэ пытсаны быгатымтэенымы сэрен. Туэ умойгес коньдон висъяське социально-культурной ужрадъёслы. Дышетон удысэ чакламлэн 87,3 процентэз вуиз, дышетӥсьёслы уждунлы - 123,1 процент, тазалыкез утёнэ - 97,6, уждунлы - 102,6 процент. Секытгес югдур социальной удысын, чакламысь 46,6 процентэз гинэ быдэстэмын. Номыр но лэсьтэмын ӧвӧл, шуыны луоз, 1997-тӥ ар понна нылпи пособиосты берыктон ласянь, пунэмаськемлэн быдӟалаез - 117,4 миллион манет. Гурт удыслы висъямын 60,5 процент, нош коммунальной хозяйстволы - чылкак 10,5 процент. Ма возьма асьмеды 2000-тӥ арын? Бюджетлэн доходъя статьяез ӝутскыны кулэ 1904,6 миллион манетозь, туалаеныз ӵошатыса, со 123,4 процент. Та коньдон вуыны кулэ экономикаез азинтон чотын но вытъёсты октонлэсь. Но та дыре ик Москва кык поллы кулэстыны чакла федеральной бюджетысь Удмуртилы коньдон висъянэз. 1999-тӥ арын асьмелы отысь вуыны кулэ ке 345,2 миллион манет, 2000-тӥ арын - 148 миллион. Быгатоз-а республика ас кужыменыз улыны, шуг-секытысь потыны? Данакез депутатъёс солы уг оско, малы ке шоуно, берло 10 ар ӵоже экономикамы туж зол лябӟиз. Валтӥсь заводъёсмы ужлы ёрмыса сыло, музъем ужасьёс техникалы, эстӥськонлы ёрмо, арысь аре начармо бусыос, фермаос, машинно-тракторной паркъёс. Коньдонтэк одӥг удысэз но уд ӝуты - таиз котькинлы валамон. Тӥни малы вуоно арлы чаклам бюджетъя парламент огкылэ вуиз: сое эшшо огпол кутскыса эскероно на согласительной комиссиын, вань ӵектонъёсты но ватсанъёсты лыдэ басьтыса! Нош соос трос гинэ. Бюджетэз кутонъя ас малпанзэ вераз 17 мурт. Депутат Олег Кузьменко шуиз: - Выль бюджетлэн инъетэз миымезлэсь пӧртэм ӧвӧл. Тырмымтэос таяз но трос гинэ. Кыӵе туннэ асьмелэн казнамы? Со буш, шуыны луоз, нош пунэмен тыронъёсмы миллиардъёсын люкаськемын. Туннэ нош ик вераськиськом бюджетэз дефицитэн кутыны. Мон дэмласько умой-умой учкыны расходъя люкетэз, солэн котькуд статьяезъя пусъёно: кытчы но кӧня коньдон висъямын, кин со понна кыл кутэ. Алексей Красильников: - Огшоры депутатлы бюджетлэн пуштросэз сьӧд ящик кадь валантэм. Мар ватэмын солэн чуръёсыз вискын - таиз тодмо, дыр, дасясьёсызлы гинэ. Амалтэк юан кылдэ: будоз-а вуоно арын бюджет чотын улӥсьёслэн уждунзы? Ку берыктом соослы ӝыны ар ӵоже выль тарификацияя берыктымтэ уждунзэс? Павел Вершинин: - 2000-тӥ арлы чаклам бюджетын туж ӧжыт коньдон висъямын гурт удыслы. Нош туннэ уг тырмы фермаослы фураж, тулыс кизьыны кидыс, ӟег гинэ но тырмыт кисьтыны ӧм быгатэ. Соосты басьтыны трос коньдон кулэ луоз, дунъёс бадӟымесь. Гуртын кылдэм югдуръя сюлэмшугъяськонзэс озьы ик веразы депутатъёс Леонид Кириллов но Валерьян Никитин. Зэмен но, кин меда туала вакытэ коньдонлы уг ёрмы? Асьмеос вожъяськыса учкылӥськом электрокужым сётӥсь удысэз нуисьёс шоры, соос ӟеч уждун басьто шуыса. Но депута Юрий Боровик, "Удмуртэнерго" ОАО-лэн генеральной директорез, озьы ик пӧсекъяса вераз 285 миллион манетлы пунэме пыремзы сярысь. Отысь 15 миллионэз - республикалэн бюджетаз, 75 миллионэз - федеральнояз, 205 миллионэз - интыосысь бюджетэ. Тыронъёс люкаськемын, предприятиос, нимаз адямиос дыраз коньдон тырымтэен. - Азьланяз но тазьы ик луиз ке, городъёсын кынмозы, дунтэк нокин но асьмелы электрокужым уз сёты, - пусйиз депутат. Со куриз ас удысэзлы бюджетын нимысьтыз чурен коньдон висъяны. Сыӵе ик югдур му вӧй поттонын. Кызьы луиз депутат Валентин Кудинов, та вакытэ ог 100 пала скважинаос уг ужало, нош соос республикалэн казнаяз шӧдскымон коньдон сётысалзы. Кык ар со сярысь вераськиськом ни, нош номыр уг лэсьтӥськы. Огъя вераса, бюджетэз эскерон вань удысъёсмес сэзъянлы-сӥсъянлы пӧрмиз. Со озьы ик луыны но кулэ. Угось коньдон курисьёс туж трос, - казнамес тырмытыны вырисьёсыз ӧжытгес. Луысал ке бюджетмы выжыкылысь ковёр выллем, соку ваньмы азвесь-зарни пӧлын пыласькысалмы ни. Нош али, эшшо но начаргес улонтэм вылысь, котькудӥзлы ужано, тросгес продукция поттоно но ас удысад пайда ваёно. Бюджетлэсь инъетсэ, депутатъёс кенешемъя, матысь дыре учкоз на огъя кылэ вуонъя (согласительной) комиссия. Бюджетэз эскерон табере ортчоз 23-24 декабре Кун Кенешлэн сессияз. Л.Медведева. Быръёнъёс азьын Мон ноку но ӧй пӧялля калыкез Виталий Александрович Соловьев вордскемын 1933-тӥ арын. Дышетскемезъя - теплоэнергетик. Ужаз Ижевскысь механической заводын. Вал партилэн Первомайской райкомезлэн нырысетӥ секретарез, Удмурт обкомезлэн отделэзлэн кивалтӥсез, 1979-тӥ арын сое юнмато Министръёслэн Советсылэн Председателезлы воштӥсе, собере - нырысетӥ воштӥсе. 1990-тӥ арын Виталий Александрович луэ РСФСР-ысь Верховной Советлэн депутатэз. 1995-тӥ арын Вавож районын улӥсьёс сое сизьым кандидат пӧлысь быръё Кун Кенеше. Отын со кивалтӥз промышленностья, инфраструктураез азинтонъя, вузъёсын но юрттэтъёсын рынокез кылдытонъя ялан ужась комиссиен. 1999-тӥ арын со округын ик быръёнъёсын вормыса, со нош ик луиз Кун Кенешлэн депутатэз, пыриз Наукая, дышетонъя, культурая но егитъёсын ужан политикая ялан ужась комиссие. В. А. Соловьев пусъемын Трудовой Горд знамя орденэн но куать медален. Кузпалыз, Тамара Евгеньевна, ужа механической заводын лабораторилэн валтӥсь специалистэз луыса. Нылыз, Елена, дышетӥсь. Пиез, Дмитрий, инженер. Депутатэ кандидатэ ӵектэмын округысь бырйисьёсын. Бырйисьёсты туала вакытэ уд паймыты ни синмаськымон программаен, уд алда зарни гурезь сӥземен. Калык тодэ ини солэсь дунзэ. Чебер кылъёс вераны, ӟечсэ гинэ сӥзьыны капчи, нош быдэстыны котькудӥз ик яке уг быгаты, яке уг но тыршы. Огезлэн кужымез, мылкыдыз, тодон-валанэз уг тырмы, мукетыз сое депутатэ ыстэм кузёосыз вылэ ужа, калык сярысь чик малпаськытэк. Соин ик, мон малпамъя, бырйисьлы куаразэ сётэмезлэсь азьло, пыр-поч чаклано, мар лэсьтӥз ини но марлы кужымез, луонлыкъёсыз тырмозы кандидатэзлэн, лыдэ басьтоно, кин, кыӵе партия яке огазеяськон сое депутатэ ӵекто. Ваньмызлэн сямен кандидатъёслэн программаоссы огвыллемесьгес. Уг ваты, мон но калыклэсь мудрон уг выриськы. Мукет сямен уз но луы, малы ке шуоно, али вань калык, котькуд адями одӥг малпанэн улэ угось - кызьы Россимес улӟытоно, ӝутоно, радызъя улыны кутсконо. Ваньмыз сямен ик, мон со сярысь котьмалэсь трос малпаськисько. Куд-огез шуо, ваньмыз, пе, политика бордысь потэ. Мон соглаш ӧвӧл, Мон сямен, экономика котьку но нырысетӥ интыын луыны кулэ, со бордысь угось улонмылэн ӟечлыкез потэ (оло, данаксэ дырме хозяйственной ужын ортчытэме шӧдӥське). Соин ик, депутат луи ке, малпасько тросгес экономикаен герӟаськем ужпумъёсын вырыны. Кыӵе со ужпумъёс? Али ваньмыз ваньбур поттӥсьёс одӥг мертэтъя выт тыро. Со умойтэм. Выт тупатыку, котькуд предприятилэсь но удыслэсь луонлыкъёссэ, кужымзэ но аспӧртэмлыксэ лыдэ басьтоно. Шуом, мӧйыослы, ӧлексыослы, туж ёрмыса улӥсьёслы но нылпиослы вузъёс поттӥсьёслы пичигес но выт тупатыны луысал. Асьме республикаын эскеремын вал ини бадӟым кужымен му вӧй поттӥсьёслэсь вытсэс кулэстон. Та ужрад пайдаё луэмзэ возьматӥз. Соин ик сое лыдэ басьтыса, федеральной закон кутоно. Му вӧй пумысен тани мае но вераны кулэ. Та узырлык чотын поттэм коньдон тросэз гинэ сьӧрло кошке. Кулэ вылэм му вӧй поттонэз, коть али уже кутымтэ месторождениосты, одӥг кие сётыны, пӧртэм кузёослы люкылытэк, уката но - палэнысьёсызлы. Дыр вуэмын ни республикаямы му вӧйлэсь эстӥськон поттон завод пуктыны. Му вӧймы асьмелэн, нош бензинлы, соляркалы ялан шугъяськиськом. Советской власть бырем бере, быриз экономикаез азьвыл чаклам планъёсъя радъян. Монэ, оло, толло нуналэн улӥсь шуозы но, планъёслэсь юнме куштӥським шуыса малпасько. Кызьы бен ӵуказе нуналэз чик чаклатэк улод? Азьвыл сямен ик дасяно планъёс. Озьы ик юнматоно кивалтӥсьёслэсь кыл кутонзэс. Учке ай, макем йыртэман аляз предприяиосын. Соос эксэйёс кадь кузёясько калык ваньбурен, ужасьёссэс адями интыын уг лыдъяло. Оло, калык контролез но улӟытыса умой луоз. Вужез котьку ик урод уг луы, малпаськытэк, шуак-дуак ӧвӧл куштӥськоно ӟечезлэсь. Туж сюлэмшугъяськытэ монэ музъем котырын ченгешон, солань-талань сэрпалляськон. Та пумысен мынам юн мылкыды - гыроно-кизёно музъемен уг яра вузкарыны, со государстволэн ик ваньбурез мед луоз, бакчаосты, садъёсты вератэк. Кӧня ке кыл вераме потэ политика сярысь но. Калык туж уг синмаськы депутатъёслэн бусьтыр улэмзылы. Зэм но, уждун но пенсиос соос министръёсын огбыдӟа басьто, улон инты (кытын ке ӧвӧл, Москваын) соослы дунтэк сёто, закон азьын кыл кутонлэсь утемын. Ваньзэ сое быдтыны кулэ, депутатъёс бырйисьёссы кадь ик мед улозы, ас вылазы мед но шӧдозы калыклэсь курадӟемзэ. Соку учком, сомында ик-а луозы калыклы "медое" мерскисьёс. Уг кельшы мыным мукетыз но. Депутатъёс Москвае кошко но бырйисьёссы сярысь вунэто. Асьсэды шонере поттыны тыршо: Кун Думаын, пе, уж тачак, пумтэм законъёс дасяно. Соиз озьы, законъёс пумтэм, мултэс трос, куд-огез сокем чыры-пыры ужпумъёсъя, закон шуыны ик серемес. Вылаз ик, тросэз соос уг ужало. Озьыен, яке кулэзы ӧвӧл, яке сыӵе дасямын, улонлэсь кулэяськонъёссэ лыдэ басьтытэк. Озьы медам луы шуыса, ялан кусып возёно бырйисьёсын, калык пӧлын бергано. Соку гинэ депутатъёслэсь пайдаез луоз. Бырйисьёс азьын отчётъёс но ӵемгес лэсьтоно, оскем адямизы соос азьын ялан кыл мед кутоз. Осконзэс уг быдэсты, депутатысь куштоно. Та сярысь Законэз чурытгес но капчигес быдэсъямон кароно. Мынэсьтым ӵем юало, малы, пе, Кун Думае мынӥськод? Куд-огез, малпа, дыр, мон Москвае шедьыны турттӥсько шуыса яке мыным кулэ законлэн утемез. Москва мыным ӧвӧл кулэ. Мон отчы кошкыны кемалась быгатысал, правительствоын ужакум ик майбыр ӵектонъёс вал. Закон азьын кыл кутонлэсь но уг кышкаськы. Нырысь ик, номыр понна, кыкетӥез, куинетӥез, мон верай ини, кызьы учкисько депутатъёслэн льготаоссы шоры. Нош мынӥсько мон Думае, улонмес ӧжытак коть тупатон понна. Кытчы гинэ эн учкы, вылӥысен улӥозь ваньмыз куашказ, котькытын йыртэман, пӧяськон, ваньбурез капыртон, малпаськытэк улон. Кин ке но куке но кулэ ук пум поныны таӵе мекалъяськонъёслы. Азьланезлы мынам трос малпанъёсы. Но соосты быдэстыны, улонэ пыӵатыны луоз властьлэн Федерация ёзъёсаз гинэ. Соин ик Думае но мынӥсько. Шуозы, дыр: ваньмыз кандидатъёс ӟеч малпанъёсын уло, пайдаё воштӥськонъёс лэсьтыны сӥзё, нош верамзэс берло уг быдэсто. Соиз озьы. Но мон ноку но ӧй пӧялля калыкез но, нимаз адямиез но. Нокыӵе кивалтӥсьёслэн но кузязы ӧй ветлы. Бырйисьёслы сётэм кылме быдэстыны мылкыды но, кужыме но, опытэ но тырмоз. Калыкен огазьын улӥд ке, ваньмыз пӧрмоз. Виталий Соловьев. ШӦКЫЧ Мынӥд базаре - сьӧрад кут гирьдэ Вазен верало вал, советской адями, пе, Германие яке Америкае шеде ке, одно ик магазинъёстӥ ортчыны тырше. Зарезь сьӧрысь кунъёсын соосты супермаркет шуыса нимало. Вот пыре, шуом, асьме адями капиталистъёслэн магазиназы, учке вузъёс шоры но палёме - ма но ӧвӧл! Верало, кулыса усьылон учыръёс но вылэм шуыса. Капиталист со капиталист ини! Вузэзлэн ӟечлыкез сярысь но сюлмаське, реклама сярысь но уг вунэты. Зэм, дунъёс но со понна вылӥын. Нош асьме куанер калык нырысь ик дунтэм товар утчаса поръя. Собере ини ӝожтӥськон-чагиськонъёс вуо. Тужгес но кудӟытӥсь юонъёслэн, няньлэн, чорыглэн, йӧллэсь сиёнъёслэн улӥ ӟечлыксы пумысен. Тани кӧня ке учыръёс. Алигес "Продторг" акционер огазеяськонлэн 15 номеро магазиназ вузкариллям "сыномем" кын килькаен. Холодильникысь уно пол пыртаса-поттаса со тӧланы но вуэм вылэм ини. Сыӵе чорыгез парсь гинэ но уз сиы. Тодӥськоды на, луоз, кӧня ке ар талэсь азьло сур басьтон понна черодъёсын часъёсын-часъёсын сылоно луылӥз. Табере со зарезь ву кадь пальккаське. Но куд-ог вузкарисьёс сурен вашкала сямен вузкаро на вылэм. Ижевскысь Сарапулэ мынон сюрес вылын паллян кие кыле "Металлург" совхозлэн отделениез. Калыкын сое "Костина мельница" шуыса нимало. Отын ик таӵе нимын ик ужа вузкаронъя акционер огазеяськон. Отысь магазинын капчи сюрес шедьтӥллям. Отчы пиво вутто йӧл флягаосын. Отысь ик лэзьяло банкаосы, бокалъёсы. Сур ӵаж-ӵаж мед луоз шуыса ватсаны кулэ углеродлэсь двуокисьсэ. Сотэк та юон ӝог чырса. Соиз но, таиз но ӧвӧл. Собере отысь сурез вуэн сураны но шугез ӧвӧл. Кӧня вераськонъёс мыно ни басяськисьёсты пӧян пумысен. Магазинын но, базарын но син куспын тудым-сюдым карозы, ява. Берло дыре вузкарисьёс гиряоссэс капчиятыны дышизы. Кызьы шуиськоды-а? Туж огшоры. Гиряез портонэн улӥетӥз пась лэсьто но тӥни тыныд кулэстэм граммъёс. Сыӵе учыръёс шараямын "Корона" акционер огазеяськонлэн 2- тӥ магазиназ, "Военторг" вӧзысь ужбергатӥсьлэн И. П. Северюхинлэн магазиназ. Нош "Кольцо" огазеяськонысь вузкарисьлэн М. И. Гаязовалэн 1000 грамм гиряез "капчиям" 870-озь, 500 граммъемез 380-озь. Соин ик, гажано басьяськисьёс, базаре мыныкуды асьтэлэсь гирьёстэс кутыса мынэ. Ноку уд янгышалэ. Вузкаронэз эскеронъя кун инспекцилэн департаментэзлэн Удмурт Республикая управлениезлэн ивортонэнызы тодматӥз Н. Лялин. Туннэ -Инвалидъёслэн калык куспо нуналзы Нылпиос - усточиос Короленко нимо ӟуч драмтеатрын толон ортчиз шаерысьтымы кылӥсьтэм, адӟисьтэм но огъя висёнъёсын инвалид нылпиослэн творчествоя кыкетӥ фестивальзы. Йылпумъян концертэн но киужъёсын адӟытонэ пыриськизы Алнашысь, Вавожысь, Глазов городысь но ёросысь, Дэбесысь, Завьяловоысь, Играысь, Кезысь, Каракулиноысь, Пичи Пургаысь, Уваысь, Шарканысь, Ярысь, Як.-Бодьяысь, Воткинскысь, Можга городысь но ёросысь, Сарапулысь, Ижевскысь вормисе потэм коллективъёс. Огъя вераса, фестивале пыриськиз 144 нылпи. Шуге-леке сюрем нылпиос понна таӵе бадӟым ужрад ортчытонэ пыриськизы Калыкез улон- вылонын утёнъя но Культурая министерствоос, огъя висёнъёсын инвалидъёслэн (ВОИ), синтэмъёслэн (ВОС), кылӥсьтэмъёслэн (ВОГ) шаерысьтымы огазеяськонъёссы. Нылпи фестивалез ортчытонэ Удмурт Правительство висъяз 15 сюрс манет. Нылпиослэн киужъёсын адӟытонзы но кырӟаны-вераны быгатэмзы нимысьтыз видеокассетае гожтэмын. Со келямын луоз Москвае. Шаерысьтымы устоосыз пӧлысь устоосызлы нылпиослы шуд усёз Россиысь инвалид пиналъёслэн творчествоя кыкетӥ фестивалязы пыриськыны. Со ортчоз 2000-тӥ арын Москваын. Театр усьтӥз ӧсъёссэ Инвалидъёслэн калык куспо нуналзылы сӥзьыса, Ижевскысь калыкез улон-вылонын утёнъя комиссия но ВОИ, ВОС но ВОГ огазеяськонъёс пӧртэм ужрадъёс дасязы. Операя но балетъя театрын туннэ 11 часын инвалидъёслы выль концерт программазэ возьматоз "Италмас" ансамбль. Гуртъёсысь ёрос огазеяськонъёсын инвалидъёслы сӥзем ужрадъёс кыстӥськозы дасэтӥ декабрёзь. Л. МАЛЫХ. Туннэ - Инвалидъёслэн калык куспо нуналзы Улонзы пӧзе Берло дыре нуналаз одӥг пол гинэ уд адӟы губрес кышномуртлэсь Ува кузя сопала- тапала дыртыса ветлэмзэ. Светлана Николаевна Глебова со, куинетӥ группаысь инвалид, ёросысь инвалидъёслэн огазеяськонзылэн кивалтӥсез. Та уж оскемын вал 48 аресъем кышномуртлы 1998-тӥ арын инвожо толэзе. Соку ик ужез борды ӝабыр-ӝабыр басьтӥськиз. Вакчи дыр куспын азьло 4 номеро нылпи садлэсь юртсэ ужаны ярамон кариз. Валамон ни: кытын соослэн уксёзы? Ялан вазиськоно луылӥз ёрос администрацие. С. Г. Иконниковлы, администрацилэн тӧроезлы, бадӟым тау каре кышномурт. Со, пе, ноку куронзылы пумит ӧз луы на. Котькытын али кезьытлы ӝожтӥсько, нош инвалидъёслэн юртазы пӧсь. Шунтонэз, ву но тыл возёнэз вылаз басьтӥз коммунальной хозяйстволэн кивалтӥсез К. А. Коняров. Та юрт кылдытэмын, сӧсыр-лебыръёслы дунтэмгес дунын пӧртэм юрттэт сётон вылысь. Али ужало час тупатъясь мастер, телемастер, фотограф, бытовой техникаез но пыдкутчанэз тупатъян мастерской. Та нуналъёсы вайыны ӧдъяло вуриськон машина. Ваньмыз юрттэт сётон татын 20 процентлы дунтэмгес. Кылсярысь, йырси ӵышкон мукет парикмахерскойёсын сылэ 15 манет, нош татын - 8 манет, инвалидъёслы эшшо дунтэмгес - 6 манет но 40 копейка. - Со сяна, усьтэмын комиссионной магазин,- шуэ Светлана Николаевна.- Татысь ик басьтыны луэ телевизоръёсты. Калыклэсь вуж телевизорзэ басьтӥськом, тупатъяськом но вузаськом 400-350 манетэн. Огъя лыдъяса, районамы 2230 арлыдо ӧлексыос но 195 нылпиос-инвалидъёс. Егитъёсын нимысьтыз ужаны тыршиськом. Пыриським нылпи творчествоя кыкетӥ фестивале. Асьме зонаын (ньыль район пӧлын) вормисе потӥзы Надя Головина но Никита Годяев. Кыкетӥ декабре соос пыриськизы Ижевскысь гала-концертэ. 30-тӥ декабре ёросысьтымы инвалидъёс понна радъяськом киужъёсъя выставка. Ӧтиськом пыриськыны ваньзэ инвалидъёсты. Нош куинетӥ декабре 10 часын "Юность" культура дворецын концерт радъямын луоз. Сцена вылын быгатонлыксэс возьматозы асьме пӧлысь артистъёс. Со сяна, ӧтемын Удмуртиысь калык артистка Татьяна Привалова (со но инвалид). Концерт бере ортчоз чай юон но шахматно-шашечной турнир. Е. ИЗМАЙЛОВА. ШӦКЫЧ Шротэн сюдод - курегдэ быдтод Шумпотӥськом, куке асьмелы на халяву гуманитарной юрттэт вуэ. Шунды ӝужан палась капиталистъёс номырзэс уг жаляло. Я нуллэм дӥсьсэс ысто, я сиён-юонэн юртто. Тани алигес США-ысь но Канадаысь ог куать сю тонна пала соялэсь шрот вуиз. Мукет сямен вераса, со комбикормлы укша. Та сиёнэз висъязы Завьял ёросысь Ижевск но "Вараксино" тылобурдо вордон фабрикаосы. Шротэн сюдӥзы но... курегъёслэн кӧтазы йӧтӥз, куд-огез тылобрудоос чоньдӥзы. Кызьы тодмо луиз, та сиён 10 арлэсь кема кыллем вылэм ни. Американецъёс тодо, мае асьме доры келяны. Фабрикаос 200 тонназэ гинэ сюдыса вуттӥзы вал. Кылиз на 400 тоннаез. Кытчы кароно табере сое? Соин ик газетэз лыдӟисьёслы вазиськеммы потэ куронэн. Таӵе урод комбикорм перекупщикъёс кие вуыны быгатоз. Сое дунтэмен вузаны тыршозы. Чаклаське. Эн басьтэ. Та нуналъёсы асьме пала Германиысь скал сӥль вуэм на. Таиз но 10-15 ар кыллем ни, пе. Со сӥлез висъяллям колбаса лэсьтыны. Кытчы со шедиз - азьланяз одно ик ивортын тыршом. Н. ИВАНОВ. "ШӦКЫЧ" Оло зэм, оло даур Уйшор уин, чебер уйвӧт адӟон куспаз, Онтон Микол дыр-р-р! куалекъяны ӧдъяз. Ӧз чида ни, султӥз. Кышнозэ сайкатыны малпаз вал но, соизлэсь олокӧня полэс шобретъёс улын соргетэмзэ кылыса, киыныз гинэ шонтӥз. Кухняяз мыныса, тылэз ӝуатӥз, чай пуктӥз: куалекъясь мугорез кызьы ке но шунтоно ук. Нош мар-о ай та коркан таӵе салкым луиз. Шунтӥсь батареяосты киосыныз маялляз но паймиз: огез но уг шунты ни. Чай юыса но мар мугорыз кӧня ке шуназ. Берен шобрет улэ пыриз. Но ӵукнаозь ӟеч- ӟеч кӧлыны ӧз быгаты ни. Тямыс часын ик жингыртоно кариськиз ЖРП-е (озьы вакчияк шуо улон коркаосты возись но тупатъясь ёзъетъёсты), мар-о, пе, улонниямы таӵе кезьыт луиз. - Тӥляд гинэ ӧвӧл, - валэктӥзы отысь, - быдэс городын кезьыт. Газ понна тырыны коньдон ӧвӧл шуо. Уд ке оскиське, вазиське горжилуправление. Микол жингыртӥз горжилуправление. - Ми асьмеос но кынмыса пукиськом, - жингырак вазиз нылмурт куара. - Выл дӥсьмес но ум кылиське. - Бен ми шуныт понна арбыт коньдон тыриськом ук, кытчы-о кариськоды сое? - юаз на вал Микол, но нылмурт вакчияк вераз: "Мон соизэ уг тодӥськы, юалэ шуныт но газ сётӥсьёслэсь". Микол буйгатскыны ӧз но малпа. Со юалляськоно кариськиз газ сётӥсьёслэсь. - "Газпром" кулэстӥз газ сётонэз, - валэктӥзы диспетчерскойысь, - кунгож сьӧры, пе, али дуно дунын вузаны тросгес кулэ. - Нош татын улӥсьёс мед чонгралозы-а?! - трубкае кеськемзэ ик ӧз шӧды Микол. - Тон ми шоры эн кесяськы, - вожзы потӥз диспетчеръёслэн. - Ми янгыш ӧвӧл. Юа Элькун Кивалтэтысь яке Салтыковлэсь, малы соос коньдон ичи тыро. Микол таӵе ӵектонлэсь ӧз кӧбера, юн-юн кариськиз но Элькун Кивалтэтэ жингыртоно кариськиз. - Милям асьмелэн но 15 градус гинэ, - шуизы Кивалтэтын пукисьёс. - Кивалтӥсьёсмы Москвае но ветлӥзы ини, пайдаез ӧвӧл. - Телевидение пыр веразы вал, Ганза Москваын "Газпромлэн" кивалтӥсеныз Вяхиревен пумиськылоз шуыса, ӧз ветлы шат? - Ма, со туннэ гинэ кошкиз ай. Тон, оло, ачид жингыртод со кузёлы, - дэмлазы Миколлы. Микол трубказэ интыяз куштӥз но мур малпаськонэ усиз. Ма, кызьы луыса кошке ай та югдур шаерамы? Газ но нефть странаямы трос шуо, нош сое палэнэ келяло, асьмелы уг тырмы ни. Ми кадь пересьёсты но пичи пиналъёсты сютэм возьыса уг тырмы ни, табере кынтыса быдтыны туртто, лэся. Кинлы чагиськод! Элькун Кивалтэтын но таӵе югдурысь потыны амал уг шедьто бере, оло, зэмзэ но "Газпроме" вазиськоно? Миколлэсь озьы шара малпаськемзэ кышноез шӧдэм но аслэсьтыз кылъёссэ верано кариськем. - Президентлы вазиськид ке но, номыр уз пишмы. Отысь тонэ ыстозы эшшо вылӥе. - Ма, солэсь вылӥын кин-о вань на? - юа Микол кышноезлэсь. - Кин-о, кин-о... Клинтон вань ай. Со асьмемын косъяське, шуо ук. Табере угось шаерамы ваньмыз ӟок кӧтъёс киын. Соос асьме кивалтӥсьёслэсь уг кылзӥсько ни... - Мар вераськиськод? - вожез потӥз Миколлэн. - Кытысь тон сомында тодӥськод? - Юнме шат мон ветлӥсько нылкышноослэн ӧтчамазы, - мынектыса вера кышноез. - Тани газэз гинэ ӧвӧл, тылэз но кысозы ай. - Мар понна? - Тани шуо, Чубайслы ярамтэ одӥг городысь адямиосын пумиськыкуз кинэн ке "Ильичлэн лампочкаез" шуэмез но электрозэс кысыса кельтэм. Собере тани мар но верало ай. Асьме шаерамы газ сётонэз кулэстӥллям, пе, кивалтӥсьёсмы Лужков пала кариськемен. Оло зэм, оло даур. Кин тодэ на. В. МИХАЙЛОВ. ВАЛЭКТЭ ЮРИСТ Сэрегез дася адвокат Лилия Шкляева Депутатэ кандидат сьӧлтаськиз Вералэ: мар луиз Серафима Пушинаен? Ма понна сое алӥзы Кун Думае депутат луон понна нюръяськонлэсь? Телефонэн жингыртӥсь. Кун Думае быръёнъя 29 номеро Удмурт округъя депутатэ кандидатъёс пӧлын вал Серафима Петровна Благинина (документъёсызъя Пушина ӧвӧл). Сое пусйыкуз (регистрация ортчытыкуз) ик окружной комиссилэн юанъёсыз кылдӥзы вал. Бырйисьёслэсь кинюртэмъёссэс (гожтӥськемъёссэс) ӧз люка бере, Благинина тыроно луиз залог шуон - 83 сюрс 490 манет. 1998-тӥ арын басьтэм барышез (доходэз) сярысь декларацияз кызьы сомында коньдон люкамез сярысь верамын ӧй вал. Кытысь залоглы дун шедьтӥды? - тунсыкъяськизы солэсь. Валэктон паймымон кылӥськиз: азьвыл люкам коньдонме кема дыр ӵоже дорам вози. Оскизы. Берлогес шараяськиз музон лыдпус. Серафима Петровна ваньбур сярысь декларацияз пыртыны "вунэтэм" 5 сюрс манетсэ. Тазэ кыре поттӥзы выт (налог) бичасьёс. Котьма ке но, вылӥ верам учыръёсты комиссия сокем бадӟым сьӧлыкен ӧз лыдъя но кандидатэз нюръяськонысь ӧз палэнты. Отӥяз кылдӥзы мукет юанъёс. Россия Федерациын вань сыӵе закон: "Россия Федерациысь Федеральной Собранилэн Кун Думаяз депутатъёс быръён сярысь". Солэн 48-тӥ ёзэтысьтыз 6-тӥ пункт куре: "Теле- но радиоверанъёсы пыриськем организациосысь, ивор вӧлмытӥсь редакциосысь кивалтӥсь должностен адямиослы, журналистъёслы но творчество ужен вырисьёслы, соос луо ке пусъем кандидатъёс, яке пусъем кандидатъёслэн, быръёнъя огазеяськонъёслэн, быръёнъя блокъёслэн дурбасьтӥсьёссы (доверенной лицооссы), яке быръёнъя огазеяськонъёслэн, быръёнъя блокъёслэн полномочиосын представительёссы, алэмын быръён ужез ивор вӧлмытон ёзъёсын возьматыны. Серафима Благинина, депутатэ кандидат, та нуналъёсы калык пӧлы вӧлмытъяз "Лӧпшо Педунь" но "Газета Серафимы Благининой" газетъёссэ, гожъяз аслаз депутат луыны турттэмез но быръемзы бере мар лэсьтыны малпамез сярысь. 29 номеро округъя комиссиын солэсь юазы: тӥляд материалъёсады шӧдӥське-а кинэ ке бырйыны ӧтён (агитация)? Кандидат валэктӥз: бен, соос ӧтё бырйыны, газетъёсы мынам бере, кызьы мылы потэ, озьы возьматӥсько быръёнэз, со - мынам правое. Вылӥ верам учырез комиссия лыдъяз законэз юн тӥянэн. 48-тӥ ёзэтысь 3-тӥ пункт косэ: пусъем кандидатъёс - кун яке муниципальной службаын яке ивор вӧлмытон ёзъёсын ужъя яке гражданско-правовой огкылъя (договоръя) ужасьёс - быръён уже пыриськон вакытэ мозмытӥсько ужъёссылэсь, со сярысь приказлэсь (распоряженилэсь) юнматэм копизэ быръёнъя комиссилы возьмато, кандидатэз пусъем бере куинь нуналлэсь бере кыльытэк. Благининалэсь сыӵе бумагазэ комиссия витиз кык арня ӵоже. Ӧз вуы. Мугзэ берло юазы но, кандидат янгыше уськытӥз комиссиез ик: малы мыным ӧд сётэ законъёсты? Кандидат азе сыӵегес ик куронъёс пуктэ федерациысь мукет закон. Тазьы нимаське: "Россия Федерациысь гражданъёслэн быръён правооссылы но референдуме пыриськон правозылы огъя гарантиос сярысь". Отысь 36-тӥ ёзэт валэктэ: ивор вӧлмытонын ужась кандидатъёс быръён дыръя мед мозмытскозы ужысьтызы, ивор вӧлмытӥсь ёзъёс пыр медаз пыриське быръён ужез возьматонэ. Тӥни сыӵе законъёсты тӥямез понна 29 номеро Удмурт округысь быръёнъя комиссия Серафима Благининаез Кун Думае депутатэ кандидатэ пусъён (регистрировать карон) сярысь азьвыл кутэм решенизэ воштӥз. Тае кылыса, Серафима Петровналэн нырысетӥ юанэз таӵе вал: - Берыктозы-а мыным залогме? Озьы огез удмурт адями нюръяськонысь палэнтэмын. Жаль... Сталинской блок: "Трудовая Россия", Офицеръёслэн Союззы - СССР понна Гажано эшъёс! Сталинской блоклэн азьветлӥсьёсыз луо "Трудовая Россия" движенилэн кивалтӥсез В. И. Анпилов, Офицеръёслэн Союззылэн кивалтӥсез С. Н. Терехов но И. В. Сталинлэн пиезлэн пиез - Е. Я. Джугашвили. "Трудовая Россия" кылдытэмын коммунистъёсын но беспартийной ветеранъёсын 1991-тӥ арын. Ӵап соку коммунистъёс вылэ ӧдъязы "пож ву киськаны". Таӵе сьӧд кампания вакытэ выль огазеяськонэз валтыны басьтӥськиз журналист В. И. Анпилов. Кык ар улыса гинэ реформаез радъясьёс луонлык сётӥзы КПРФ-лы вордскыны. Малыез тодмо. Озьы коммунистъёслэн огъя радзы тэшкаса, кужымзы лябомыны кулэ вал. Туннэ яркыт адӟиське КПРФ но реформа кылдытӥсьёс куспын валче ужамзы. Шонаськон сямез ик возьматэ КПРФ-ысь кивалтӥсьёслэн Лужковлэн огазеяськонысьтыз Маслюков господинлы дурбасьтэмзы сярысь. Та партилэн фракциез тыро-пыдо уг ужа Кун Думаын, огшоры калыкез утьыны со ноку но уз сюлмаськы. Али пӧртэм компартиос кылдытэмын. Но "Трудовая Россия" но Офицеръёслэн Союззы гинэ ужась калыклэн правоосыз понна нюръясько, пумитъяськон ужрадъёс пыр Москваез но зуркато. Аръёс ортчыса гинэ, дыр, калык валатскоз, кинъёс зэмос коммунистъёс, страналэн патриотъёсыз. Гажано эшъёс! Сталинской блоке огазеяськемъёс ас азязы таӵе ужпум пукто: сайкатоно калыкез, возьматоно-валэктоно кин луэ кин, Ельцинлэн реформаосыныз кураськон калэ вуттэмъёсты но быръёнъёсы ӝутоно, калыклэсь мылкыд возьматэмзэ алдаськыса сётыны ӧвӧл лэзёно. Тыршоно Кун Думае огъя списокъя шедён вылысь. Озьы эшшо одӥг луонлык кылдоз ужаса улӥсьёслэн правооссы понна нюръяськыны. Пӧртэм амалъёсты уже кутоно, быръёнъёсты но, калык ваньбурез тус-тас каронлы пум понон вылысь, странаез капитал сюресэ кужмысь валтӥсьёсты палэнтон вылысь. Туала кивалтӥсьёс реформаосын вырон аръёсы ваньзэ быдтӥзы, маин азьло данъяськылӥмы, странамес дасо аръёслы берлань чигнатӥзы. Калленэн-калленэн куашка ӟуч калыклэн генофондэз, культураез, сямъёсыз-осконъёсыз. Кивалтӥсьёсмы ӧтё тупаса улыны. Но калыклэн тушмонъёсыныз сталинецъёс одӥг сюрестӥ уз вамыштэ, котьку но нюръяськозы. Бырйисьёслы ми вазиськиськом таӵе куронэн: эн оске сталинской репрессиос сярысь эрекчаськонъёслы. Буржуазной газетъёс озьы юри пӧяло. Нош калык ваньбурез лушкасьёсты, кунгож сьӧры капиталэз келясьёсты кыл кутытоно. Кивалтон удысъёсы ужаса улӥсьёс-коммунистъёс вуизы ке, соку гинэ правоез утись ёзъёс "чылкыталозы" пӧртэм гыжкалъёслэсь, вузаськем адямиослэсь. Соку гинэ радъям йыружъёслы пум вуоз. Россиысь вань предприятиосты но банкъёсты нимаз кузёослэсь таласа гинэ ӝутскоз промышленность, котькудӥз аслыз кельшымон уж шедьтоз. Социализме берытскыса, странаямы уз луэ ни ожмаськонъёс, терактъёс, уз кисьтэ ни анайёс синкылиоссэс. Пенсионеръёс, висисьёс, сӧсыр кылемъёс ӟеч юрттэт басьтозы, нош егитъёслэн ӵуказе нуналлы осконзы кылдоз. Бырйисьёс Сталинской блоклэн списокезлы дурбасьтӥзы ке, ми одно ик тыршом: Политикаын. Совето властез но социализмез берыктон вылысь. Со понна Россиын президентлэсь постсэ вань вакытъёслы палэнтоно. Дуннеысь кыкетӥ тыложын вормисьёслэн Потсдамын кутэм (1945-тӥ ар) Тупанкылзыя но Европаын ог-огедлы юрттонъя Хельсинкиын ортчем (1975-тӥ ар) Совещаниын юнматэм кунгожъёсын Совето Союзэз берыктыны. Экономикаын. Кунсьӧр банкъёсын герӟаськытэк Россиез ас эрказ азинтыны, кунгож сьӧры нуэм капиталэз берыктыны. Нимаз кузёослы вузам ваньбурез выльысь калыклы берыктыны, кунсьӧрен вузкаронэз государство кие басьтыны. Калык хозяйствоез ӝутонъя ӝегатскытэк ужрадъёс чакланы но сое улонэ пыӵатыны, город но гурт куспысь кусыпъёсты умоятыны. Та планэз быдэстонъя государство ласянь вань амалъёсты, артель производствоез, семья но огенлэсь подрядэз но басьтыса, юрттыны. Нырысь инты висъяны нылпиосты ужлы дышетонлы, вылӥ школалы, наукалы, бадӟымгес саклык висъяны асьме наукалэсь азинсконъёссэ производствое пыӵатонлы. Сталин вакытэ сиён-юонэз, мукет вузъёсты ялан дунтэматон политикаез асьме улонэ пыӵатыны, азьло уждунлэсь, пенсилэсь но стипендилэсь басьяськыны луонлыксэ берыктыны. Право удысын. Ужлы, улон интылы, дунтэк дышетсконлы, эмъяськонлы правоосты берыктыны, нылпиосты утьыны но пересьёслы саклык висъяны. Пролетарской интернационализмлэсь куронъёссэ быдэсъяны, нациослэсь нимаз кариськыны, озьы ик мылкыд каремзыя огъя кунэ огазеяськыны правооссэс чакланы. СССР-ез куашкатэмзы понна, вылӥ государственной но политической чиновникъёсты, озьы ик Россиысь калыкез гольык кельтӥсьёсты, сое быдтӥсьёсты суд улэ кыскыны. 1991-тӥ ар бере ужтэк но коньдонтэк кылемен сэрен пытсэтэ сюремъёсты эрике поттыны. Вань калыкез уже интыяны, дась сиисьёсты, мукетъёс чотын улӥсьёсты эриклэсь люкыны. Чиновникъёслэсь но бюрократъёслэсь (озьы ик депутатъёслэсь) льготаоссэс быдтыны. Россилэн национальной интересъёсыз. Страналэсь быдэслыксэ, солэсь кунгожъёссэ юн утьыны, Вооружённой Кужымъёсты туала ож тӥрлыкен кужмоятыны, дуннелэн пӧртэм сэрегъёсысьтыз гражданъёсмылэсь данзэс, эриксэс утьыны. Гажано бырйисьёс! Странаез кризисысь поттонъя социально-экономической программаен мургес тодматскемды луоз, "Трудовая Россия" движенилэн Удмурт ёзэзлэн кивалтӥсезлы В. Е. Исуповлы 36-90-65 телефон пыр жингыртыса. Ми дорын тӥ пӧртэм юанъёстылы валэктонъёс басьтоды. Кылсярысь, кызьы улон инты понна дунэз кулэстоно, малы Ижысь улон юртъёсты тупатъян-выльдонлы Горжилуправлениен юнматэм тарифъёс понна коньдон тырытэк но луоно. Юристъёс тӥледлы валэктозы, квартиралы но коммунальной услугаослы чаклам пени законлэн куронъёсызлы пумит луэ шуыса. Малпаськом, улон интылы дунъёс вань бырйисьёсты сюлэмшугъяськыто. Туннэ туж тросэз быръёнъёслы уг оско. Со шонер малпан, малы ке шуоно, та ужрад ортче кивалтоно ёзъёслэн коньдон пуйызы валлин, соослэн эскеремзы улсын. Соин ик властез ужась адямиослы сётыны мукет амал шедьтоно. Озьы ке но, эшъёс-бырйисьёс, эн шуэ: "Быръёнъёс номыр уз сётэ", "Мон бордысь номыр уг поты". Тон бордысь ваньмыз потэ! Демократъёс но Ельцин ӧй вал - ужазы заводъёс, уждун но огсыр сётъязы. Вуиз Ельцин - кысӥзы заводъёс, нош уждун басьтон бадӟым праздниклы пӧрмиз. Ӧй вал господаос, улон юртъёс но ӧз пуштылэ, асьме кунысь калыкъёс куспын война но ӧз пуромылы. Эн вералэ, нокинлы но уд оскиське шуыса. Оскыны кулэ но ӧвӧл, нош валано тазэ - тынад одӥг малпанъёсыд, буржуйёслэн - чылкак мукет. Мын быръёнъёсы но куарадэ сёт Сталинской блокысь депутатэ кандидатъёслы. Ми нош тыршом-сюлмаськом няньлы но йӧллы, транспортлы но квартиралы, эмъюмлы но бензинлы дунъёсты кулэстыны. Милесьтым кышканэз ӧвӧл, нош странаын порядок лэсьтоно - кызьы лэсьтылӥз Сталин. "Шуо, Сталин - сатана, шуо, Сталин - йырвандӥсь... Кулӥз Сталин - котькудӥз бӧрдӥз, бӧрдӥзы Москва но сьӧр калык! Шуо, Ельцин - демократ, шуо, Ельцин - калыкез утись. Верало, со ваньмызлы эш, Ельцин, пе, быдэс Россия. Быгатэ ик пресса алданы, чик возьыттэк пӧяны. Шуом, Ельцин ӵуказе кулоз, кин Россиын синвузэ кисьтоз?" "Трудовая Россия" общественно-политической движенилэн Удмурт ёзэзлэн кивалтӥсез В. Е. ИСУПОВ. Героин вуэ лымшорысь Россия Федерациысь ФСБ-лэн Удмурт Республикая управлениез асьме шаере наркотикъёс келян эшшо одӥг "сюресэз" кортназ. Кызьы ивортылэмын вал ини азьвылгес, 3-тӥ ноябре ФСБ-ын ужасьёс Ижевскысен 1 кило наркотикен ӝегатӥзы Глазовысь вуэм "куноез". Солэн Глазовысь улон интыяз утчаськон дыръя таламын на эшшо 50 грамм наркотик, ӝегатэмын Таджикистанын улӥсь. Соку ик тодмо луиз героинлэн кытысь вуэмез. Ноябрьлэн пумаз Глазове нош ик шундыё шаерысь "куноос" вуизы. Асьсэды соос отын туж эркын возизы, интыысь йыртэмасьёсын кусыпъёс тупатӥзы. Ӝоген Глазове Набережные Челны городысь курьер но вуиз. Городысь потыкуз, сое ГИБДД-ын ужасьёс кутӥзы. Машиназэ эскерыку, солэн ӵыж-выль басьтэм магнитофонлэн ватэгысьтыз одӥг кило пала героин шедьтэмын. Курьер но Таджикистанысь эшшо мукет вуэм муртъёс гостиницаысен ӝегатэмын вал. Соослэн верам адресъёссыя утчаськон ортчытэмын, соку Глазовысь одӥгысьтыз квартираысь эшшо 1,4 кило пала героин сюриз на. Наркотикъёсын контрабандаен выремзы понна УФСБ-лэн следствиосъя отделэз куать муртлы пумит уж ӝутӥз. Со Удмуртиын, Татарстанын, Таджикистанын но Челябинск областьын улӥсьёс. Пусйыны кулэ: Россиысь ФСБ-лэн Удмурт Республикая управлениез туэ республикаямы наркотикъёсын вуись 10 сюресъёсты кортназ. Таламын 16 килолэсь уно героин. ФСБ-лэн Уралысь но Поволжьеысь мукет управлениосыныз ӵош 35 килолэсь уно усыкмытӥсь суретъёс таламын. РФ-ысь ФСБ-лэн Удмурт Республикая управлениезлэн пресс-службаез. Журналистъёсын пумиськонъёс "Асьмелы одӥг музъем вылын улоно",- шуиз Виктор Хорошавцев, Кун Кенешысь промышленникъёслэн но предпринимательёслэн "Единство" огазеяськонзылэн кивалтӥсез, со ик быръёнъёсъя "Единство" ("Медведь") межрегиональной блоклэн Удмурт Республикая адямиез. Кызьы пусйиз Виктор Геннадьевич, выль должносте со юнматэмын быръёнъёсъя штабен огдырлы гинэ, 19- тӥ декабрёзь. Ужа ас понназ, мукет сямен вераса, депутатъёслэн фракцизы татын номырин герӟамтэ. Депутатъёс-промышленникъёс но предпринимательёс кенешизы Ю. Д. Маслюков пала дурбасьтыны. Журналистъёслы В. Г. Хорошавцевлэн мылкыдыз валантэмгес потӥз, малы ке шуоно, кивалтоно огазеяськонзэ палэнтыса, ужаны кутскиз мукетыз понна. Кызьы сое валэктод? - Республикалэн кивалтӥсьёсыз ласянь нокыӵе могӟетъёс ӧй вал. Штабмы ужа, юрттӥсьёс вань. Соосты туннэ нимын-нимын уг вера на, тодматом берлогес. Огзэ верало, "Единстволэн" рекламаен вырыны коньдонэз ӧжыт, агитация нуом газетъёс пыр. - Кивалтӥсеныды, Сергей Шойгуэн, ӵем-а пумиськылӥськоды? Ку со Ижевске лыктыны малпа? - Мон туннэ ӵапак мынӥсько Шойгуэн пумиськонэ, Перме. Отысен ик кенешом Ижевск пумысен. - Выль блоклы кивалтӥсе малы одно ик тӥледыз бырйизы? - Санэ басьтӥзы, дыр, политика удысын люкам быгатонлыкме. Мон озьы малпасько. - Виктор Геннадьевич, калык "Единство" сярысь туж ӧжыт тодэ. Куараосты ас палазы кыскозы КПРФ но "Отечество". Тӥ малы оскиськоды на? - Эскерон-чакланъёс возьмато, 40 процентэз бырйисьёс туннэ уг тодо на кин пала дурбасьтыны. Соосын ик ми ужалом. - Тӥ уд малпаськиське-а Удмурт Республикалы йыр яке президент луон сярысь? - Уг. Котькудӥз ас ужзэ нуыны кулэ. Мон кема аръёс ӵоже вырисько ни производственной бизнесэн. Удысэ паськыт, луонлыкъёс трос, ужа но ужа гинэ. - Кинэ тӥ адӟиськоды Россилэн Президентэз интыын? - Мынам кык кандидатэ: Владимир Путин но Евгений Примаков. Но берлоез арлыдызъя уг тупа ни. Президент егит, чупрес мед луоз, суткаяз 14-16 час ужалоз. - Тӥледлы кельше-а быръёнъёс азьын пуромем нюръяськон? - Кельше чылкыт амалэн нюръяськон, кырсезлы мон пумит. "Ожмаськонъёс" бере ог- огмылэн синмамы учкыны мед быгатом, ог-огмес мед гажалом. Асьмелэн ведь музъеммы одӥг, нокин нокытчы татысь уз кошкы - тӥни ма сярысь но вунэтыны уг яра. Л. МЕДВЕДЕВА. Ӟечкылан Инмар сётэм тӥледлы сайкыт визь, чылкыт тусбуй - кызьпу кадь ик югыт, пилемъёсыз сэрттӥсь-уллясь капчи мылкыд, азьлань вамыштыны паськыт инвис. Нош со сяна, луиз ке тазалык, ваньзэ ик вормыны шедьтод кужым, эркын полысалод улон шурын-пыжын, шорад туж оскыса учкоз калык. Светлана Константиновна СМИРНОВАЕЗ вордскем нуналэныз ӟечкыла "Байгурезь" огазеяськон. Вамыш бӧрсьы вамыш, медам лэсьтэ янгыш Шаерамы Юрий Дмитриевич Маслюковлэн данэз туж бадӟым. Примаковлэн Правительствояз вице-премьер дыръяз висъяськылӥз зэмос кивалтӥсь луэменыз, аппаратлэсь ужзэ тодэменыз но мукетъёссэ ӝутыны быгатэменыз. Асьмелы со зэмляк, шуыны луоз. Юрий Дмитриевичлэн уно аръёсыз ортчизы Ижевскын. Нырысь-валысь НИИ-ын инженер вал. Собере автозаводэз лэсьтонэ пыриськиз. Ӵапак татын ик будӥз, зэмос кивалтӥсь луиз. Азьвыл валтӥсь инженер али но предприятилэн ӵуказе нуналэз сярысь сюлмаське. Куке журналистъёс юазы, кызьы шутэтскылӥз, вал-а хоббиез, Маслюков валэктӥз, уг тодӥськы, пе, пӧйшураны яке чорыганы ветлэмзэс, завод вань дырзэс кыскылӥз. "Ижмашысь" югдурез тупатыны Маслюков ӵектэ огшоры амал: "Гермесэн" герӟаськем пунэм тыронъёсъя акциос поттоно но ваньзэ сое государстволы сётоно. Мед чакласа возёз. Нош лакокраская цехын выль технологиез пыӵатон пумысен Юрий Дмитриевич ивортӥз: японецъёсын рос-прос кенешемын, оборудование дась, возьматэмын но ни. Бюджетэз юнматэм бере, ваньмыз ӝоггес мыноз. Маслюков шаермылэсь ужпумъёссэ ӟеч тодэ но вала. Республикалэн экономика ласянь кужмыз туж бадӟым, но со уг ужа, пайда уг вайы, озьы ыштонъёс будо. Ваньбур поттон тужгес но шӧдскымон синӥз машина лэсьтон но сьӧд металлургия удысъёсын. Со пыӵал тӥрлык поттонэз кулэстонэн гинэ герӟаськемын ӧвӧл. Шонерзэ верано ке, ВПК-лэн поттэм продукциез 60 процентэз калыклы (гражданской) продукция вал. Ӝог узырмыны вырисьёс азьпалскизы, пайда ваись удысъёсты киултӥзы. Вакчи дыр куспын люкам капитал шӧлкын пушйиз кузьмаськон, коррупция. Выль кузёос ваньбурзылэсь ог люкетсэ государстволы висъяно луо, нош ужаса улӥсьёслы тыро улон, уж сётыны, шуг-секытъёслэсь утьыны уг быгато. Туннэ валамон ни, шонер сюрес ӧм шедьтэ. Югдурез тупатон вылысь, Маслюков лыдъямъя, быръёно сыӵе власть, кудӥз сюлмаськоз дорамы Россиын ваньбур поттонэз азинтон понна. Музъем вылын ваньмыз тырмыт лэсьтӥське, соин ик асьмелэн поттэм продукцимы асьмелы сяна нокинлы но кулэ ӧвӧл. Дуннеысь экономикалы та дыре кулэ сырьёмы но инкуазь узырлыкъёсмы. Озьы ке но, асьмеос ужаны кулэ. Янгышъёсмес тупатъяса, вамыш бӧрсьы вамыш лэсьтоно. Зэм, поттэм продукцимы дуннеысь рынокын та вакытэ уг дунъяськы, но асьмеос но ӟеч ужаны дышом. Нош ӧм тырше ке, ноку но номыр но ум пӧрмытэ. Соку лушкаськисьёс гинэ умой улозы. Асьмелэн тужгес бадӟымесь предприятиосмы Ижевскын но Воткинскын интыяськемын. Та городъёсысь ужаса улӥсьёс быръёнъя 28 номеро Ижевск округе пыро. Ӵапак татын Кун Думая депутатэ кандидатэ мынэ Юрий Дмитриевич Маслюков. Солэн программаез улон но ужан опытэз, странамылэн хозяйствоез шоры кун синмын учкемез, быгатӥсь рос-прос кивалтӥсь луэмез оскон кылдыто. Маслюков понна куаразэс сётыса, бырйисьёс депутатэнызы данъяськыны быгатозы. Солэн малпанъёсыз асьмелэн малпанъёсынымы люконтэм герӟаськемын. Л. ПЕТРОВА. Калык ке огазе - государство но кужмогес Властьлэсь но калык огазеяськонъёслэсь кусыпъёссэс радъян вылысь, ар талэсь азьло Удмурт Республикаын кылдытэмын вал общественной палата. Кызьы быдэсъя со ас азяз пуктэм ужпумзэ? Со сярысь журналистъёслы ивортон лэсьтӥз Кун Кенешысь общественно- политической анализъя отделлэн кивалтӥсез Л. П. Порцева. Ваньзэ, мар чакламын вал лэсьтыны, ӧз на удалты, шуиз Любовь Павловна. Властен кыӵе ке решение кутэмлэсь азьло ик калык организациослы быгатоно со азе куронъёс пуктыны. Но озьы уггес пӧрмы на. Тае валэктыны луоз соин но: общественной палата ас бурд улаз ӧз на кыскы вань организациосты. Туннэ нуналлы республикаямы 480 огазеяськон лыдъяське, со пӧлысь общественной палатае 140-эз гинэ пыремын. Кызьы шуиз Л. Порцева, вань огазеяськонъёслэн улон шоры учконзы пӧртэм, сое огкадь карыны но, дыр, ӧвӧл турттоно, озьы ке но, валтӥсь решениос кутыку, соос валче ужаны кулэ. Нош кулэ-а меда властьлы калык огазеяськонъёсын кусыпъёс возён? Кулэ. Угось власть калыклэсь интересъёссэ лыдэ басьтытэк ке ужаз, кема уз возиськы. Туэ 4-тӥ декабре Ижын ортчоз общественной палаталэн ИИ-тӥ конгрессэз. "Калык ке огазе - государство но кужмогес" - таӵе ужпумез эскерыны чакламын вуоно ужрадын. Т. МИРОНОВА. Пусъемын устоосыз Вавож ёросын пудо вордон фермаос куспын конкурс ортчытэмын. Кык комиссиос соосты алигес эскеризы. Толлы тужгес но умой дасяськиллям Березек но Тыловыл-Пельга фермаосын (кивалтӥсьёссы В. А. Лапин но Л. И. Колзина). Озьы ик умоен пусъемын Зямбайысь, Брызгаловоысь, Уе-Докъяысь но Котьяысь пудо утисьёслэн тол азелы ӟеч тыршемзы. Азьмынӥсьёс коньдон премиосын пусъемын. П. НИКОЛАЕВ. Шӧкыч Кузпалъёс но нылкышноос сярысь - Митрей, мар-о мылкыдыд куашкамын кадь? - Толон кышное кошкиз. - Мар быдӟа куректон... - Бен, куректон. Эшшо кыӵе куректон! Толон кошкиз, нош туннэ бертӥз ни. х х х Пӧртэм странаосысь кышноос, картъёссы соосты мурт пиосмуртъёсын кутыкузы, тазьы шуысалзы. Испанка: "Родриго, ви сое, монэ гинэ эн!" Англичанка: "Милорд, тӥ дыраз ӧд вуэ". Француженка: "Мар бен, Жан, тон но выд..." Еврейка: "Абрам, тон-а со? Нош кин соку монэн артэ?" Ӟуч: "Иван, инмар понна, берпуметӥзэ. Йырам гинэ эн мыжга". х х х Кышноез кузпалэзлы вазиське: - Мукет воргорон доры кошки ке, жалялод-а? - Малы мон мурт воргоронэз жаляны кулэ? х х х Кышноен картъёс магазинысь пото. - Тодӥськод-а, малы мон бӧрдӥ? - Тодӥсько, но мынам сомында коньдонэ ӧвӧл. х х х Кык нылкышноос-эшъёс пумисько. Одӥгез мукетызлы шуэ: - Мынам картэ сыӵе калгись, сыӵе калгись, ачим но уг тодӥськы ни, кинлэсь мынам пиналы. х х х Нылкышно - картэзлы: - Бырйы! Яке - мон, яке - аракы! - Нош аракы кӧня? х х х Маин нылкышно ас бордаз возе кузпалзэ? Немка - кужыменыз, испанка - ӟырдыт мылкыдыныз, кубинка - эктонэныз, полячка - нуныяськеменыз, китаянка - ушъяны быгатэменыз, мексиканка - пунэмзэ берыктыны быгатэменыз, гвинейка - кырӟаменыз, грузинка - чидаменыз, гречанка - чебереныз, армянка - таза мугорыныз, француженка - веськрес мугорыныз, американка - уженыз, еврейка - кесяськеменыз, ӟуч - судэн но парторганизациен. Гажано редакция! Мон тӥледлы вазиськисько туж бадӟым куронэн: мынам дышетскеме потэ милиционеръёсты дасясь школаын. Анай-атае монэ лэзё, но мон уг тодӥськы, вань-а асьме республикаын сыӵе училище яке институт. Огпол кылӥ вал кыӵе ке милицейской школа сярысь. Ӧд быгатысалды-а тӥ мыным со сярысь гожтыны? Мынам тодэме потэ, кыӵе экзаменъёс сётоно. Кыӵе специальность басьто отын дышетскисьёс? Кылӥ на, отын 9-тӥ класс бере 4 ар дышетсконо шуыса. Озьы-а со? Юанъёсылы валэктонъёс сётысалды ке, мон али ик отчы пырыны дасяськысал. Аня Егорова, Пичи Пурга ёрос, Абдэс-Урдэс гурт. Та вылем юанъёс редакцие кылем дышетскон ар азьын но вуылӥзы. Куронъёсты лыдэ басьтыса, туэ тодматоно кариським милиционеръёсты дасясь дышетсконниен. Республикаямы сыӵе институт вань. Со тазьы нимаське: Россия Федерациысь МВД-лэн Юридической институтэзлэн Ижевскысь филиалэз. Вакчи веран вылысь, лэся, адямиос сое милиционеръёслэн школазы шуо. Нош куд-огезлэсь таӵе веранзэ но кылэм вань: Антоновлэн школаез (озьы шуо кивалтӥсезлэн нимызъя). Министерство внутренних дел России Юридический институт, Ижевский филиал Из истории. 1983 год - для осуществления подготовки квалифицированных специалистов для органов внутренних дел по инициативе Правительства и МВД Удмуртской Республики в Ижевске был открыт учебно-консультационный пункт Горьковской высшей школы МВД СССР; 1990 год - учебно-консультационный пункт преобразован в отделение Высшей юридической заочной школы МВД СССР; 1993 год - на базе отделения создан Ижевский факультет Юридического института МВД России; 1999 год - Ижевский факультет реорганизован в филиал Юридического института МВД России. В этом учебном заведении трудится квалифицированный профессорско-преподавательский коллектив. Из 79 педагогов учёную степень имеют 27 преподавателей. Среди сотрудников, курсантов и слушателей филиала 19 мастеров и кандидатов в мастера спорта, из них 4 мастера спорта международного класса. Гордостью Ижевского филиала Юридического института МВД России являются его выпускники. Они трудятся во всех подразделениях нашей республики. С 1990 года выпущено 1434 специалиста с высшим юридическим образованием. Филиал расположен в г. Ижевске п. Машиностроителей. Он имеет 2 учебных корпуса, несколько специализированных кабинетов, 2 лаборатории, спортзал, учебный полигон, стрелковый тир. В 1998 г. филиалу передан республиканский лыжный спорткомплекс им. Г. А. Кулаковой. С момента основания учебного заведения руководителем является полковник милиции кандидат юридических наук Ю. В. Антонов Кандидат палэнтэмын Кун Думае депутатъёсты быръёнъя 29-тӥ округе депутатэ ӵектэмзы сярысь 11 кандидатлэсь документъёс вуизы. Пусйиськон понна тырмыт документъёс люкаллям сизьым мурт. Куатез кандидат пусъемын (регистрациез ортчиз). Одӥгез кандидат - Першин Александр Васильевич кинюртэмъёсты люканъя быръёнъя чаклам радлыкез тӥямез понна регистрацилэсь палэнтэмын. Ӧз юртты кандидатлэн Центризбиркоме вазиськемез но. Окружной комиссилэн решениез шонерен лыдъямын. Кузёлы - 20 арес Алнаш ёросысь "Кама" колхозлы кивалтӥсе быръемын 20 аресъем Владимир Сергеев. Выль кузё эштосэз вакчи дыр куспын бере кылисьёс радысь поттыны чакла. Нош та колхозэ пырись Чумали гуртын улӥсьёс "Камалэсь" люкиськыны малпало. Соослэн мылкыдзы вань Асаново совхоз-техникумен огазеяськыны. Н. СЕРГЕЕВ. Лудпусъёс уг шумпотто Туэ октябре Алнаш ёросын 18 нуны вордӥськиз, кулӥз 29 адями. Нош дас толэзь ӵоже дунне вылэ 255 пинал вордскиз, улонысь кошкиз 233 мурт. Октябре ёросын 9 сюан шудэмын, 4 семья люкиськемын. Озьы ар кутскем дырысен 117 выль семья кылдӥз, куашказ 23-ез. Е. СЕРГЕЕВ. Быръёнъёс азьын Кузэс воштӥзы Ӝыныез пала калыкмы уг оскы ни, быръёнъёс улонамы умоесь воштӥськонъёс ваёзы шуыса. Дас арлэсь кема ини демократъёс кунмес курадӟыто пӧртэм воштӥськонъёсын, нош улон ялан уллань но уллань ваське, воштӥськонъёслэн пайдазы нокытын уг шӧдӥськы. Депутатэ кандидатъёс пӧлысь котькудӥз пӧртэм сямен учке улон шоры. Нырысетӥосыз, отчы пыро тросэз демократъёс, кенешъёсты сьӧдмало. Уноез коммунистъёс, кивалтӥсьёс вал ке но, азьло улонэз чик керпотытэк курлало. Соос кузэс ӝог воштӥзы. Паймоно соизлы: та адямиос уг валало, огшоры адямилэн улонэз шуг но шуг луэ шуыса. Азьло странамы азьмынӥсь кунъёс пӧлы пыре вал, нош али котькыӵе удысын бере кылиськом. Депутат луыны малпась адямиос пӧлын ӧжыт ӧвӧл улон шоры валаса учкисьёс но. Соос пырак уг палэнтӥсько кенешъёс дыръя басьтэм бадӟымесь азинсконъёслэсь, уг возьдасько соку, коммунист луыса, пӧртэм удысъёсын кивалтэмзылэсь. Таӵе адямиослы шумпотоно. Бырйисьёс но, малпасько, таӵе муртъёслы золгес синмасько, куаразэс но соос понна сётозы. Та чылкыт адямиос угось азьвыл улонысь уродзэ но адӟо, соос сярысь шонерак верало. Асьсэлэсь янгышъёссэс но нокинлэсь уг вато. Бырйисьёс но депутатэ кандидатъёс пӧртэм сямен учко Чечняысь ожъёс шоры но. Уноез та войнаез умоен лыдъяло. Соос вунэто, отчы Россилэн трос миллиард уксёез, лыдъянтэм уно ваньбурез юнме кошке шуыса. Нош калык куанерме, уждун, пенси уг басьты. Со дыре ик мамында калык быре! Асьме армия буш кельтымон пуштытъя быдэс Чечня шаерез, нош бӧрысь быдэс страна сое ӝутэ. Отын пуктӥсько выль заводъёс, фабрикаос, улон юртъёс но мукетыз. Озьы вал 1994-тӥ-1996-тӥ аръёсы. Али нош ик быдэс гурезё шаер куашкатэмын. Сое улӟытыны табере озьы ик миллиардъёс но ваньбур кулэ луозы. Уноез валало, террористъёслэсь трос, татын огшоры калык быре шуыса. Соиз но валамон: йырвандӥсьёсты озьы гинэ уд быдты, кӧня ке улыса, соос йырзэс нош ик ӝутозы. Таӵе югдурысь вераськыса-кенешыса гинэ потыны луоз. Сое ик ӵекто кунгож сьӧрысь сэзь визьмо политикъёс. Соос шонер лэсьто, дыр, странамылы кредит сётонэз ӝегатыса. Угось валамон: шунды пуксён палась уноез уксё Чечняын быроз. Калыкмы нош ик куанермоз, уксё дыраз уз басьты. Мон малпамъя, чечен ожъёслы "шумпотӥсь" кандидатъёс янгышало, та войнаез ӟеч мылкыдын дунъяса. Со угось уксёез, калыкез но ваньбурез быдтон гинэ. Оло, мон ужъюгдурез уг валаськы? Озьы ке но, тазьы малпаськисьёс пӧлын уно тодмоосы но. Н. ВОЗИСОВ. Удмурт Республикалэсь 1998-тӥ арлы бюджетсэ быдэстэм пумысен ивортонэз юнматон сярысь Удмурт рРеспубликалэн Законэз 1-тӥ ёзэт. Юнматоно Удмурт Республикалэсь 1998-тӥ ар понна бюджетэзлэсь доход люкетсэ 1752201 сюрс манетлы, расход люкетсэ 1831459 сюрс манетлы быдэстэм сярысь отчетэз, расход люкетэз доход люкетэзлэсь 79258 сюрс манетлы ятыргес но кассаосын коньдон - 14527 сюрс манет. 2-тӥ ёзэт. Та Закон кужыме пыре сое печатлам нуналысен. Удмурт Республикаысь Кун Кенешлэн Тӧроезлэн Нырысетӥ воштӥсез П.Н.Вершинин. Ижевск город, 1999-тӥ арын 1-тӥ декабре. � 123-ИИ. Ми - Голливудысь! Тазьы нимаське Санкт-Петербургысь вуэм выль адӟытон. Таиз тужгес но висъяське азьло возьматэм сюсь мунёослэсь. Малы ке шуоно, адӟытон сӥземын одӥгезлы тужгес кӧшкемыт жанрлы. Адями быдэс улонзэ малэсь ке но кышкаса улэ. Нош малы кышка - ачиз но валэкытыны уг быгаты. Соин но, дыр, пӧртэм амалъёс утча, валаны турттэ. Кунгож сьӧрын ужась тросэз азьмынӥсь режиссёръёс басьтӥсько таӵе жанръя кинокартинаос дасян борды. Малы ке шуоно, отын та жанр туж тодмо луэ. Та жанръя кинокартинаос пуктэмын вал ини кинематография кылдон вакытэ ик. Нырысетӥез таӵе киносуред кунгож сьӧрын экран вылэ потӥз 1896-тӥ арын. Куд-ог валантэм учыръёсты адями валэктыны ӧз быгатылы. Озьы кылдылыны кутскизы та выллем кинофильмъёс. Голливуд - быдэс дуннеысь кинематографилэн столицаез. Татчы асьсэлэсь устолыксэс возьматыны вуыло мукет шаеръёсысь уно гинэ артистъёс. Соос пӧлысь тужгес но тодмо луэ Арнольд Шварценеггер. Вордскемын Австриын, Граце карын. Мукетыз шудӥсь, Мишель Пфайффер, Голливудысь трос нылкышноос пӧлысь тужгес чеберез. Джек Николсон адӟисьёслы тодмо "Бэтмен" фильмын Джокерез шудэменыз. Учкисьёс озьы ик адӟыны быгатозы Вэл Кимлерез, Бэтменэз шудӥсез. Со сяна, "Адысь султэмъёс", "Дракула", "Мумия" кинокартинаосысь геройёсты. Асьме актёръёсты тодмалоды Н. В. Гогольлэн произведениосызъя пуктэм "Вий" нимо кинофильмъя. Музейын ужа видеосалон. Татын учкыны луоз кинофильмъёсысь люкетъёсты. Мылкыд карисьёсты ӧтиськом музее таӵе адресъя: Иж кар, Коммунаръёслэн ульчазы, 287-тӥ юрт. Адӟытон ужа 10 часысен 19 часозь. Вуылэ! Е. Кудрявцева. Тодматӥськом быръёнъя огазеяськонъёсын Милям юртмы - Россия Страналэсь кужымзэ возьматэ калык. Асьме калык ӧз "ӝуа" выльдӥськонлэн ӝуаз, куд-огез возьмазы ке но палэнысь юрттэт куреммес. Но та аръёс возьматӥзы одӥг нуналэн улэммес, азьмес, бермес чаклатэк историе вамыштэммес. Дыр вуиз "изъёсты бичаны": йыртэмасьёслы, калык чотын улыны дышемъёслы кыл кутыны, ужась адямиослы асьсэ тыршеменызы ӟеч улыны луонлык сётыны. Тӥни сыӵе ужпумъёс ас азяз пуктэ "Милям юртмы - Россия" (НДР). Милям программамы инмысь басьтэмын ӧвӧл. НДР-лэн фракциез Россия Федерациысь Кун Думаын пайдаё ужаны тыршиз, "ваньзэс но ваньзэ" курласа ӧз улы. Дасямын 300 пала закон кылдытӥсь акт, 50-эз соос пӧлысь Думаен кутэмын. Котькудӥзлэн туннэ нуналлы кулэлыкез туж бадӟым. Обороная комитетлэн кивалтӥсез Роман Попкович луонлык шедьтӥз законъёсты уже кутыса странаысь бюджетэ ватсаса коньдон кыскыны. Со коньдон военнойёслы уждунлы, отставкае кошкись офицеръёслы улон инты басьтыны сертификатъёслы висъямын. Озьы кемалась ик ӧвӧл, Удмуртиысь 30 военнойёслэн семьяоссы квартира басьтӥзы. Огкылысь кутэмын Думаын Валерий Язевлэн "Гаспромез" утёнъя законэз. Ӟеч ужаз фракция егит, оскымон политиклэн Владимир Рыжковлэн кивалтэмез улсын. НДР-лэн ВИИ-тӥ съездэз Россиысь Конституцие президентлэсь полномочиоссэ кулэстон, государстволы экономика но калыкез улон-вылонын утёнъя ужпумъёсты сэрттон-пертчонын тросгес эрик сётон сярысь воштонъёс пыртыны ӵектӥз: пичи уждунэз но социальной юрттэтъёсты (пособиосты) улыны тырмымон коньдонэн (прожиточной минимумен) огмында тупатоно, пенсиос адямилэсь уждунзэ но шаермы понна ӟеч ужъёс лэсьтэмзэ чакласа тыроно. Движение умоен лыдъя музъемен пӧртэм амалъёсын кузёяськонэз. Гурт хозяйстволы юрттонэз государство быдэсак ас вылаз басьтыны кулэ - одно висъялляно кредит. Музъем ужасез сюлмаськонъёсыз пӧлы ас кожаз кельтыса, асьмеды асьмеос "вотэсэ" донгиськом - юрттэт курыса кимес Шунды пуксён пала мычиськом. Мар кылиз на туннэ азьвыл ӝыны дуннеез вӧйын-нянен сюдӥсь Россилэсь? Музъемез пайдаё уже кутон понна, ми огъя выт тупатыны но музъемез нимаз адямиослы сётъяны ӵектӥськом. Но государство сое одно юн чакласа возьыны кулэ. Экономика куашкамысь, улон уродмемысь, йыружъёс йылэмысь куд-огез милесьтым движенимес ӵемысь янгыш каро. Но ми асьме сярысь верам ай - 1995-тӥ арын июне гинэ. Со вакыт кризис шукыръяське ни вал. Милям азьветлӥсьмы, со вакытэ Россиысь Правительстволэн тӧроез Виктор Степанович Черномырдин Россиез куашкатыны ӧз выры, ас пельпумъёсыз вылэ басьтӥз таркам государствоез. Мыжыксэ юн кырмыса сое улӟытон борды кутскиз, та уже общественностез, Кун Думаысь фракциез кыскиз. Озьы 1997-тӥ арын промышленностьын югдур тупатскыны кутскиз. Юнмаз манет. Улӟиз ужбергатон. Умояз пенсиос но бюджет чотын улӥсьёслы уждун тырон. Адямиос пичиен-пичиен нош ик кутскизы коньдонзэс банке тырыны. Ӵошатон понна: 1997-тӥ арын сӥзьыл вылӥ дышетсконниосысь студентъёс долларе берыктыса 20-40 доллар стипендия басьязы, нош С. Кириенко кивалтыны кутскем бере - 7-14 доллар. Черномырдинэз ужысьтыз палэнтэм бере, экономика нош ик шальтраны кутскиз. Ышиз "шоро-куспо класс". 80 процентэз калык нош ик ёрмон калэ вуиз - дунъёс куинь поллы будӥзы уго. Бадӟым шуккет луиз со банкъёслы но. "Милям юртмы - Россия" огазеяськон номыр шоры учкытэк азинскон сюрес вылэ султӥз. Милемын ӵош - тросэз губернаторъёс. Соос оско Виктор Степановичлы - улонэз валась визьмо политиклы. Али ивор вӧлмытонъя ёзъёс тросгес гожъяло, возьмато войнаос, шудтэм учыръёс, политикъёслэн шаянъяськемъёссы сярысь. Но странаын вань трос умоез но, страна улэ! Малы ӟечсэ асэстонтэм? Россиын ӧжыт ӧвӧл быгатӥсь, ас кужымзылы оскись улосъёс. Соос Москваысь юрттэт возьматэк, асьсэос шуг-секытысь потыны, улонзэс умоятыны тыршо. Тӥни мар сярысь гожъяны кулэ! Одӥгез сыӵе азьветлӥсьсы но визьмо политик - Саратов улослэн губернаторез Дмитрий Аяцков. Татын дырыз дыръя тыриське дышетӥсьёслы но мукет удысъёсын ужасьёслы уждун, пособиос, умой азинско авиация, нюлэс промышленность, гурт хозяйство. Улосын Обороная министерстволэн частьёсыз но подразделениосыз интыяськемын - соослы регион ялан юрттэт сётъяны тырше. Озьы ик Черноморской флотлэсь кӧня ке военно-морской корабльёссэ возе. Свердловск улосэн кивалтӥсь Эдуард Россель нырысетӥез НДР-лэсь "Калык губернатор" ним басьтӥз. Туэ ӝыны ар ӵоже улосвылысь экономика коньдонэн вераса 170 процентлы ӝутӥськиз. Быдэсак сямен областьын утемын ВПК. Новгород улос паймытэ инвестициосызлэн быдӟалаенызы. Регионын 553 миллион доллар тыр проектъёс уже пыӵатэмын, али эшшо 1,5 миллиард тыр дасяське. Улосын 200 пала предприятиос кунгож сьӧрысь уксёен ужа. Отын 20 сюрс адями тырше. Шоро-куспо уждунзы областья кык поллы тросгес. Промышленной производстволэн огъя быдӟалаысьтыз 62 процентэз вуз та предприятиосын поттэ. Улосысь Пенсиосъя фондэз ӝынызэ тырмыто кунгож сьӧрысь инвесторъёс. Татын улӥсьёс быгато губернаторзылэсь Михаил Прусаковлэсь ужзэ дунъяны - 1999-тӥ арын со понна выльысь куаразэс сётӥзы 92 процентэз бырйисьёс. Асьмеос ум ик тодӥське бускельёсмылэн-пересьёслэн улэм-вылэмзы сярысь. Нош соослэн трос ушъяськымонэз. Отын быгатыса кивалтэ Геннадий Игуленов. Трос умойзэ вераны луысал мукет губернаторъёс сярысь но. Омск улосысь Полежаев, Оренбургысь Елагин, Тюменьысь Рокецкий, Томскысь Кресс адӟем карымон ужало. Губернаторъёслэн но огазеяськонлэн азьветлӥсьёсызлэн Виктор Черномырдинлэн но Владимир Рыжковлэн ужам опытсы вылын тодмо экономист, академик Павел Бунич НДР-лы Программа дасяз. Движенилэсь документъёссэ дасянын трос тыршиз НДР-лэн Удмурт ёзысьтыз азьветлӥсь Виктор Кочетов но. Со асьмелы тодмо усто хозяйственник луэменыз. Туннэ городын улӥсьёс шумпотыса басьяло играослэсь йӧлзэс но вӧйзэс, колбасазэс. Сиён-юонэз поттон предприятиосты ӝутонэ Виктор Михайлович трос кужымзэ сётӥз Удмуртиысь министръёслэн кенешсылэн кивалтӥсезлэн воштӥсез луыса 10 ар ужамез шӧдӥськытэк ӧз кыльы огазеяськонлэн программаяз но: гурт хозяйстволы, лэсьтӥськонлы бадӟым саклык висъяське. Трос ӟеч ӵектонъёссы "Милям юртмы - Россия" огазеяськонысь егитъёслэн но. Со возьматэ мӧйыослэсь но егитъёслэсь, атайёслэсь но пиналъёслэсь куспазы тупаса кенешыса улэмзэс. Вань одӥг ляб интымы - уг тырмы визьмо нылкышноослэн индылэмъёссы, малпанъёссы. Огласянь со озьы ик луыны кулэ кадь - нылкышно анай луон понна вордӥське ук. Англиысь парламентын Маргарет Тэтчер одӥг гинэ нылкышно вал. Одӥг сыӵе юн нылкышномы вань милям но - Ижевскысь 77 номеро школалэн директорез Елизавета Люкина аслэсьтыз кужмо политик луэмзэ возьматӥз дышетонэз выль сямен радъян, егитъёслы улон инты висъян, уже интыян пумысен сюлмаськемъёсыныз. Виктор Кочетов но Елизавета Люкина Россия Федерациысь Кун Думае депутатэ ӵектэмын НДР-лэн Удмурт Республикаысь ёзэзъя. Быръёнъя бюллетеньын "Милям юртмы - Россия" 25-тӥ сылэ. Тодӥськоды-а та лыдпуслэсь пуштроссэ? Лыдпусъёс сярысь наукаен тунсыкъяськисьёс тодо, 2 вылэ 5 ватсаса 7 луэ. Нош 7 - Утисьлэн лыдпусэз. Печатлаське дунтэк. Инты висъямын "Милям юртмы - Россия" огазеяськонлы. Кун Думае ӵектэм муртъёс Михаил КОШКИН: "Бырйисьёсме ноку уг вунэтӥськы" 29 номеро округъя ӵектэм муртъёс пӧлын - Михаил Кошкин, Кун Думалэн али депутатэз. Солы 45 арес. Вордскемын Красногорск районысь Виноградово гуртын, бадӟым крестьян семьяын. Дышетскиз Глазовысь школа-интернатын, отысь ик совхоз-техникумын. Электрик луыса ужа "Селеговский" совхозын. Отӥяз - Ижысь гурт улонъя институт. Кошкинлы сёто горд диплом но ӵекто институтэ кыльыны - аспирантурае пырыны. Но со быръе гурт хозяйствоез, мынэ "Июльское" учхозэ. Собере кивалтӥз Воткинск районысь Фрунзе нимо колхозэн. 1993-тӥ арын луэ гурт удысъя министр, нош 1996-тӥ арын - Кун Думалэн депутатэз. Солы оско Аграрной комитетлэсь бюджетно-кредитной политикая подкомитетэзлэсь ужзэ. Михаил Петрович нош ик дэмаламын Кун Думае депутатэ кандидатэ. Туннэ соин кенеше "Удмурт дунне" газетлэн корреспондентэз Геннадий РОМАНОВ. - Михаил Петрович, малы Тӥ кыкетӥзэ мылкыд кариды Кун Думае шедьыны? Маин со герӟаськемын? - Россилэн вылӥ быръем ёзаз ужан капчиен уг сётӥськы. Солы дышоно, трос тодэм- валам кулэ. Ньыль ар юнме ӧз ортчы, люкай опыт, трос сётӥз гурт удысъя подкомитетлэсь ужзэ радъян но странаысь кивалтӥсьёсын тодматскон. Со одӥг мугез. Кыкетӥез, йылаз-пумаз вуттэме потэ кутскем ужъёсме, республика азьын сылӥсь ужпумъёсты улонэ пыӵатэме но гурт удысэз куашкатэмысь дугдытэме. Со понна, нырысь ик ӟечесь законъёс кутоно. - Нош мар малпа али депутат туала улонмы сярысь, кызьы ужаны чакла гурт хозяйствоез азинтон бордын? - Кышкатэк пусйисько: гурт лябӟе, куашка. Югдур быдэс Россиын сыӵе, но удмурт крестьян калык умойгес возиське на, куд-ог интыосын уд ӵошаты. Кун Думаысь Аграрной фракция ӧз быгаты гуртысь ваньбур поттӥсьёсты секыт адӟонлэсь утьыны. Малы со озьы луиз? Мон сямен, парламентэ музъем ужасьёсты умой-умой валась адямиос ичи шедемен. Ӵапак таӵе югдурез лыдэ басьтыса, котыр ласянь пачкатэм крестьян калыклы юрттыны мылкыд карыса, мон малпай кыкетӥзэ депутат луон понна нюръяськыны. Бырйисьёс оскизы ке, мон соосты ноку уг вунэты, уно аръёс ӵоже гурт хозяйствоын люкам тодон-валанме, Кун Думаын басьтэм опытме куто ӟеч законъёс дасян понна. - Михаил Петрович, Кун думаын мар лэсьтыны-быдэстыны быгатӥды, мар ӧд вуэ, мар тужгес сюлэмшугъяськытэ? - Нырысь ик ӧм быгатэ гуртын выльдӥськонлэсь (реформалэсь) ӧрзэ воштыны, калык пала берыктыны. Али ке но радъямтэ промышленной вузъёслы но сиён-юонъёслы дунъёс. Нош мар лэсьтэме сярысь верано ке, ӟеч ужъёсы трос гинэ люкасько. Кӧнязэ ке умой- умой верало. Тани Кун Думалэн берло кенешъёсаз гуртысь депутатъёсын огъя кужымен быгатӥм 2000-тӥ арлы бюджетэ та удыслы 5,5 миллиард манет висъяны. Нырысь со лыдпус кык пол ёрослы пичи вал. Мукетыз. Дума кутӥз "Етӥн" программа. Ӟеч культураез будэтонэз умоятон вылысь, уно уксё висъяське. Но кызьы ке отчы Удмуртиез пыртоно вал. Валамон, трос бызьылоно луиз пӧртэм министерствоосы но ведомствоосы. Озьы шедим отчы. Зураысь етӥн шуккон заводлы 2,5 миллион манетлэсь трос коньдон висъямын ни. Республикалы эшшо сомында ик уксё вуоз на, яке ваньмыз - 5 миллион. Озьы ик быгатӥ "Туг" федеральной программае пыртыны Пичи Пурга районысь "Мир" колхозэз. Солы 10 миллион манет коньдон висъямын луоз. Табере шаерысьтымы сур пӧзьтӥсьёс палэнысь туг утчаса уз ветлэ, асьме музъем вылын будэтэмез луоз. Зэм, трос ужпумъёсты син азям возисько. Со понна министерствоосын уйшорозь но пукылоно луэ. Озьы ке но кутскем ужме котьку йылаз-пумаз вуттӥсько. Тани юрттыны быгатӥ Ижысь кардиоцентрез, "Ува" санаториез, Як.-Бодьяысь ӧлексы нылпиослы юрт лэсьтыны. Ваньзэ уд но вера. - Валамон, Михаил Петрович, юрттэмды умой адӟиське, нош кыкетӥзэ депутат луиды ке, мар бордысен ужаны кутскоды, но мар Удмуртилы сётоды? - Выль быръем депутатъёсын монэ уд ӵошаты ни. Нырысь нуналъёсысен ик басьтӥсько быдэстымтэ ужъёсты быдэстон но умоесь законъёс дасян борды. Нош выльёсызлы депутатъёслы быдэс ар пала дышоно, чакласьконо но тодматсконо луозы на. Нош кыӵе уж сётозы, Аграрной комитет-а яке солэсь подкомитетсэ? - али шуг вераны. Республикалы мар сётон ласянь тазьы шуысал. Ваньзэ кун программаосты, тужгес но АПК-я, улонэ пыӵатыны юртто, котькыӵе ужрадъёс куто. Озьы пыд йылазы султозы шаерысь пичи городъёс но, райцентръёс но, гурт хозяйствоос но. Гурт удысэз улӟытӥм ке, отын ужасьёслы дыраз вуоз уждун, пенсиосъя но мукет фондъёсы коньдон. Озьыен, кун бюджетысь интыос ичигес уксё курозы но дышетӥсьёслы, врачъёслы но быдэс социальной удыслы дыраз уждун сётъялозы. Оглом пусйыса, Кун думае выльысь шеди, бырйисьёсы оскизы на ке, ваньзэ лэсьто, шаерамы экономикаез ӝутон, калыклэсь улонзэ умоятон но странаез утён понна. - Лыдӟисьёсмы ваньмыз уг тодо на быръён программадэс. Вачияк вералэ вал. - Со сярысь кӧня ке поттылӥ ни. Россиын но Удмуртиын сиён-юон программаез быдэстон вылысь, воштоно выльдӥськон сюресэз, кутоно музон ужрадъёс, утёно гурт удысэз, дасяно ӟеч законъёс. - Михаил Петрович, кӧня ке ар талэсь азьло хирурглэн пурт улаз сюрылӥды, секыт операция вал тӥляд. Ӟеч малпанъёстэк быдэстыны тазалыкты, кужымды тырмоз-а? - Ӧй ке оскысал тазалыкелы, та уж борды ӧй басьтӥськысал. Операция умой лэсьтӥзы Россиысь врачъёс. США-е, Германие ӧй ветлы. Мон оскисько асьме специалистъёслы, соос кунгож сьӧрысь эшъёсылэсь урод уг ужало. - Нырысь Кун Думае мыныкуды кыӵе сётэм кылдэс, программадэс ӧд быдэстэ? - Та юан мыным тужгес кельше. Малы ке шуоно, соку но, али но программаям быдэстонтэм ужпумъёс уг пуктӥськы. Соос бырйисьёслы кельшо. Ушъяськемлы медаз пӧрмы, но азьвыл сётэм кылме но солэсь вылтӥзэ но улонэ пыӵатэмын. Со понна дырме, но кужымме но уг жаляськы. Правила приема На очное обучение принимаются граждане России, проживающие в Удмуртской республике, в возрасте до 25 лет, независимо от пола, национальности, отношения к религии, членства в общественных организациях, имеющие среднее полное общее (среднее специальное) образование, способные по своим личным и деловым качествам, физической подготовке и состоянию здоровья к службе в органах внутренних дел и учебе (как служившие так и не служившие в армии), успешно сдавшие конкурсные вступительные экзамены. Очное обучение осуществляется в двух формах:4-х летнее и 2-х уровневое. По 4-х летнему обучению выдаётся диплом о высшем юридическом образовании и присваивается звание "лейтенант милиции". По 2-х уровневой форме курсанты обучаются два года очно, после чего получают диплом о среднем специальном (незаконченном высшем) образовании и в звании "лейтенант милиции", выходят на практическую работу, продолжая обучаться заочно на 3 курсе. По окончании учебы им выдается диплом о высшем образовании. На обучение без отрыва от службы (заочно) принимаются сотрудники органов внутренних дел в возрасте до 35 лет. Срок обучения - 5 лет. Возраст кандидатов, поступающих на учебу, исчисляется по состоянию на год поступления в вуз. По сокращенному (3 года) сроку заочного обучения в филиал принимаются сотрудники ОВД в возрасте до 35 лет, ранее окончившие средние специальные учебные заведения МВД СССР, РСФСР, МВД России, других республик бывшего СССР. Порядок зачисления Лица, награжденные по окончании средней общеобразовательной школы "золотой" ("серебряной") медалью или получившие диплом с отличием об окончании среднего специального учебного заведения, при поступлении на очное обучение сдают экзамен по физической подготовке и отечественной истории. При получении положительной оценки по физической подготовке и оценки "отлично" на экзамене по отечественной истории они освобождаются от других экзаменов и зачисляются в филиал, а при получении другой положительной оценки, сдают все экзамены на общих основаниях. Лица, окончившие средние специальные заведения МВД РФ с отличием, принимаются на учебу по сокращенной форме обучения без экзаменов. Вне конкурса при получении положительных оценок на вступительных экзаменах в филиал зачисляются: сотрудники ОВД, уволенные в запас военнослужащие (в течение 3 лет после увольнения), дети - круглые сироты и дети, оставшиеся без попечения родителей, дети сотрудников ОВД и военнослужащих внутренних войск, погибших или получивших инвалидность при исполнении служебных обязанностей. Выпускники специализированных юридических классов имеют преимущественное право на зачисление при равенстве общего количества баллов. До начала вступительных экзаменов кандидаты на учебу проходят профессиональное психологическое обследование. Рекомендации обследования подлежат обязательному учету при принятии решения приемной комиссии о допуске кандидата к вступительным экзаменам. Курсанты, зачисленные на очное обучение, находятся на полном государственном обеспечении, пользуются всеми видами довольствия: денежным, вещевым, имеют право на 50% скидку при оплате коммунальных услуг, бесплатный проезд в общественном транспорте, а также пользуются и другими льготами в соответствии с действующим законодательством и нормативными актами МВД Российской Федерации. Курсантам очного обучения, успешно сдавшим экзамены и зачеты, ежегодно предоставляется каникулярный отпуск 14 суток зимой и 30 суток летом с правом бесплатного проезда железнодорожным транспортом раз в год. Лица, отчисленные из военных высших учебных заведений, а также лица, окончившие средние юридические профессиональные учебные заведения, зачисляются на факультет на общих основаниях. В филиале функционируют подготовительные курсы, ежегодно проводятся дни открытых дверей. Для получения более подробной информации и оформления документов на учебу лицам из числа гражданской молодежи следует обращаться в отдел внутренних дел по месту жительства, а сотрудникам органов внутренних дел в отдел кадров по месту службы. ВСТУПИТЕЛЬНЫЕ ЭКЗАМЕНЫ НА ОЧНОЕ ОБУЧЕНИЕ (4-Х ЛЕТНЕЕ) � РУССКИЙ ЯЗЫК И ЛИТЕРАТУРА (ПИСЬМЕННО); � ОТЕЧЕСТВЕННАЯ ИСТОРИЯ (УСТНО); � ОБЩЕСТВОЗНАНИЕ (УСТНО); � ФИЗИЧЕСКАЯ ПОДГОТОВКА. НА 2-Х УРОВНЕВОЕ РУССКИЙ ЯЗЫК И ЛИТЕРАТУРА (письменно) ОТЕЧЕСТВЕННАЯ ИСТОРИЯ (устно) ФИЗИЧЕСКАЯ ПОДГОТОВКА. НА ЗАОЧНОЕ 5-ТИ ЛЕТНЕЕ ОБУЧЕНИЕ � РУССКИЙ ЯЗЫК И ЛИТЕРАТУРА (ПИСЬМЕННО); � ОТЕЧЕСТВЕННАЯ ИСТОРИЯ (УСТНО); � ОБЩЕСТВОЗНАНИЕ (УСТНО). � НА ЗАОЧНОЕ 3-Х ЛЕТНЕЕ ОБУЧЕНИЕ � ОБЩЕЮРИДИЧЕСКИЕ ДИСЦИПЛИНЫ (УСТНО); � СПЕЦИАЛЬНЫЕ ДИСЦИПЛИНЫ (УСТНО). ВРЕМЯ ПРОВЕДЕНИЯ ВСТУПИТЕЛЬНЫХ ЭКЗАМЕНОВ: На заочное отделение - июнь, на очное - июль. Экзамен по физической подготовке мужчины 1 бег (100 м (сек.) 13,6 14,2 14,8 2 Подтягивание на перекладине 12 10 8 3 Бег (кросс 3000 м., мин., сек.) 11,55 12,20 12,45 4 Плавание (дистанция, метры) 100 75 50 женщины 1 Бег 100 м (сек.) 16,5 17,1 17,5 2 Комплексное силовое упражнение 30 26 24 3 БС! (кросс 1000 м, мин., сек.) 4,25 4,45 5,00 4 Плавание (дистанция, метры) 75 50 25 Гуртлы кулэ егит киос Макем чаляк воштӥське улон! Кызё ар "Советской Удмуртия"-"Удмурт дунне" газетын возиськиз та огъя йыръян (рубрика). Компартия косэмъя, кыӵе гинэ амалъёсын ӧз гочатылэ егитъёсты. Отын кылдэмын комсомольско-молодёжной бригада. Татын лэсьтэмын егитъёслэн посёлоксы. Тыршоме асьме понна но ожын бырем пи понна! Табере меӵак оскытыны луэ: гуртлы кулэ ӧвӧл егит киос. Кулэ ӧвӧл городлы но. Нокинлы кулэ ӧвӧл. Малы ке-а ужлы ёрмон сокем вылӥын школаез но институтэз йылпумъямъёс пӧлын. Кытысь потэ гурт калыклэн курадӟонэз? "Милям юртмы - Россия" кемалась уг адӟы ни ас коркасьтыз нянь будэтӥсез. Владимир Жириновскийлэн демократъёсыз-ӧрӟиосыз учко Инди океан пала гинэ. "Яблок" уг будэты улмо - курда сюйын гудӥськыны - ненег тӧдьы киосыз наштаськозы. Туннэ, Кун Думае быръён азьын, гуртлы юрттыны мылкыд карисьёс тросгес луизы. Зэм, алияз но Думаын соос ӧжыт ӧй вал. Парламентын тужгес но трос коммунистъёс - фракциязы 147 мурт (22.30 процент). Со сяна, компартиысь 13 адями пыре аграрийёслэн депутат группаязы, 5-ез - "Калыклэн властез" группае. 3 коммунист быръемын "Россиысь кышномуртъёс", "Властез - калыклы" но "Промышленникъёс но профсоюзъёс - ужъя союз" блокъёс пыр. Бадӟымесь ужпумъёсты эскерыку, коммунистъёс но юрттӥсьёссы Думаын люкало 240 куара (450 пӧлысь). Сыӵе кужым юн-юн султыны быгатысал президентлы пумит, чурытэсь куронъёс пуктысал Правительство азе. Думаысь паллянъёс огпол гинэ пиньзэс возьматылӥзы кадь - Виктор Черномырдинэз кыкетӥзэ ӧз лэзе Правительстволы йыре. Мукет учыръёсы сюсь кадьгес небытэсь вал. Соослы юнгес кельшиз кадь парламентын пуконъёсты люкылыны. Тӧро, сое воштӥсь, экономикаын политикая но музон комитетъёс медло милям. НДР-лы кузьмалом Обороная комитетэз, "Яблоклы" - бюджетэн выронэз, либеральной демократъёслы - геополитика шуонэз. Аграрийёслэн группазы мед басьтоз Музъем ужпумъёсъя комитетэз но Кун Думалэсь ужзэ радъянэз. Отӥяз ӧръяськизы мукет шудонъёс. Мар луэ Косовоын? Кызьы юрттоно Юрий Скуратовлы? Та удысъёс меӵак Думаен эскероно ужпумъёс пӧлы уг пыро ке но, депутатъёс нуналэн- нуналэн гульымзэс кесяло. Закон кылдытӥсь ёз озьы пӧрме политика пумысен вожвылъяськон трибуналы. Аграрийёслэн группаенызы кивалтӥсь Николай Харитонов лыдъя: депутатъёс - политикаын черекъян-куашетон пуромытонъя мастеръёс. Ог-огед вылэ урдскылыны муг котьку шедёз - Югославиын ожмаськон, Белоруссиен огазеяськон, Чубайсэн каргаськон, президентлэсь тазалыксэ эскерон но мукет. Малы гуртлэсь куронъёссэ депутатъёс уг кыло? Мугез туж огшоры: отысь адямилы Кун Думае сюрыны секыт. 450 пӧлысь 225 депутат бырйиське партиослэн списокъёссыя. Отчы шедё Москваысь, ӵемгес Садовой кульчо шуонысь, чебер вераськисьёс. Учкелэ ай одӥг мандатэн округъёсысь кандидатъёсты. Чиновникъёс но ужбергатӥсьёс. Бакчазы вань ке но, ӟегез чабейлэсь висъяны быгато меда? Нош нянь сиё нуналлы быдэ. Тӧдь-тӧдьзэ. Ярам. Шуом, депутат луизы музъем бордысь потэмъёс, гурт хозяйствоя азьвыл министр Михаил Кошкин выллемъёс. Азьло сыӵеос огазеяськылӥзы коммунистъёсын. Таосыз огшоры адямиез ӵемгес утё ӟырдыт кылын гинэ. Тӥни малы аграрийёс туннэ висъяськемын. Ог люкетэз весь юлтошъясько компартиен. Мукетъёсыз матэкто "Отечество - быдэс Россия" пала. Татын озьы висъяськисьёсты сизьдыны дыртонэз ӧвӧл. Югдурез нырысь ик чаклано философия ласянь. Гуртысь адями - йырвим кадь - кык висъетэн. Со ик - ужась, со ик - ваньбур кузё. Огласянь, кемалась дышемын пӧсьсэ-кезьытсэ чидаса тыршыны. Мукет ласянь, кин ке вылэ медъяськыса ужано ке, амалтэк дӥся азьтэм дэремзэ. Со ужась но ӧвӧл ни, кузё но ӧвӧл ни. Малы ке-а Россиын музъем сярысь ужпум тужгес секытэз. Удмурт парламент урод-а, ӟеч-а, но кодекс кутӥз ик. Кун Дума сое но ӧз пӧрмыты. Эсеръёс но большевикъёс бордысен кутскыса мынэ даллашон: лэзёно-а, ӧвӧл-а музъемез вузаны? Кинъёс сюдозы калыкез - кунгож сьӧръёс-а, асьме колхозникъёс-а, фермеръёс-а? Тани кӧня ке лыдпус. Россиысь агропромышленность киын али ог 25 процентэз фондъёс. Огъя ваньбурлэсь 14 процентсэ сётэ гурт удыс. Экономикалэн куиньмосэз герӟаськемын соин. Выль демократъёс сыӵе инъетэз копак куашкатӥзы. 1990-тӥ-1998-тӥ аръёсы ваньбур поттон кулэсмиз 44 процентлы, сӥль сётон - 54-лы, йӧл но курег пуз келян - 40-лы. Отысь пуромо вань кайгуос: сютэм улон, кураськон, висён, йыртэман, вазь кулон. 1991-тӥ арын бюджетысь 17 процентэз коньдон кошкиз гурт удысэ. Туэ - 1(одӥг) процентэз. Табере учкелэ: кыӵе сюлмаськон вал, парламентын демократъёс кузёяськыку, кыӵе луиз бюджет коммунистъёсын кивалтӥськись Думаын. Лыдӟисьёслы табере сёто йыртӥян. Та чуръёсме гожъякум, мон тодматски данак партиослэн но движениослэн гурт удысэз азинтонъя ӵектонъёсынызы. Висъяй аслым кельшисьёссэ. Быръёнъя законъёсты тӥясько шуыса монэ медаз пыкылэ. Соин ик программалэсь кузёзэ уг вераськы. Лыдӟелэ но валаны тыршелэ, кин со. Гурт удысэз азитонын нырысетӥ ужпум - кунэз сиён-юонлы ёрмон ласянь кышкытлыклэсь утён. Россия ассэ ачиз мед сюдоз. 2000-тӥ-2001-тӥ аръёсы дугдытоно гуртлэсь куашканзэ, 2002-тӥ-2005-тӥ аръёсы сое азинтыны ӧдъяно. Со понна кун нырысь ик мед юрттоз асьме (отечественной) сиён-юон поттӥсьлы. Крестьян адями ачиз мед быръёз хозяйствозэ кыӵе ваньбурен нуонзэ. Пичи но шор бизнесэз азинтонын йыртэманы турттӥсьёслы юн пезьдэт сётозы. Одно юнматоно музъем сярысь кодексэз. Тӥни сыӵе но музон ужпумъёсты быдэсъян вылысь кылдытэмын быдэс программа. Кин солэн авторез? Вакчияк вераса, гуртлы нош ик кулэ луозы егит киос. Россиен кивалтӥсьёсты визьмын бырйимы ке. Алексей Шкляев. Журналистъёсын пумиськонъёс Чильпырась пуйыысь коньдон уз ышы Кун Кенешлэн сизьыметӥ сессиез ужзэ йылпумъяз. Солы дасяськон но, сессиын ужан но туж секытэн йӧтӥз Бюджетъя, вытъёсъя но коньдон ужпумъёсъя комиссилы. Бюджетэн герӟаськем ужпумъёс сярысь журналистъёс азьын вераськиз комиссилэн кивалтӥсез Софья Эльфатовна ШИРОБОКОВА. Бюджетэз дасянэ мон витетӥзэ пыриськисько ни, шуиз С. Широбокова. 2000-тӥ арлы бюджет сярысь верано ке, со, азьвылъёсыныз ӵошатыса, сокем урод ӧвӧл. Умоен пусъёно созэ но: вуоно бюджетэз эскерон туэ дырызлэсь вазьгес кутскиз. Туала бюджетлэн быдэсъяськемезлы йылпумъянъёс лэсьтыса, комиссия таӵе тырмымтэосты шараяз. Правительство, Кун Кенешен вераськытэк, бюджетысь куд-ог статьяосты ас сяменыз тупатъям, мукет сямен вераса, "секвестр" ортчытэм. Со луэ Конституциез тӥян. Озьы ик Кун Кенешен эскерытэк, куд-ог ватсанъёс пыртэмын вылэм сюрес лэсьтонъя фондэ. Вуоно арлэн бюджетэз йылаз-пумаз эскеремын луоз на одӥг кыл шедьтонъя комиссиын. Софья Широбокова верамъя, арысь аре бюджетэ выжо пунэмъёсъя но нылпи пособиосъя ӝегатэм тыронъёс. Республикамылэн кредитъёсъя тыронэз 2 миллиард манет люкаськемын ини. Лэчыт ужпум сылэ ёросъёсы дотациос висъян пумысен. Солы тырмыт коньдон ӧвӧл, дотацилэн бадӟым люкетэз, 80 процентэз, уждун тыронлы кошкоз, ёросэз азинтонлы номыр уз ни кыльы. Вылаз ик, куд-ог ёросъёс интыысь бюджетэ коньдон туж ляб тыро. Сыӵеос пӧлын али Алнаш, Балезино, Вавож, Вотка ёросъёс. Та ласянь умой ужзы мынэ Глазов, Дэбес, Завьялово, Игра, Красногорск, Сарапул, Як.-Бодья, Яр ёросъёсын. Нош республикалэн бюджетаз 135 миллион манет пала тыронъёс вуымтэ на. Ӵем дыръя куд-ог удысъёс бюджетысь коньдонэз ас палазы кыскыны туртто. Соин сэрен коньдон одӥг статьяысь мукетъёсаз тэтчаса ветлыны кутске. Кин меда со понна кыл кутыны кулэ? Та юанлы С. Широбокова тазьы валэктӥз: - 2000-тӥ арысен ужаны кутскоз Бюджетъя выль кодекс. Отын чакламын кыл кутытон учыръёс но. Кылсярысь, бюджетысь коньдонэз солань-талань кыскам понна кыл кутэ коньдон ужпумъёсъя министр. Но мон уг малпаськы, азьланяз та удысын законэз тӥян учыръёс луылозы шуыса. Али сыӵе учыръёс луыло ке но, соос юри малпамын ӧвӧл. Со герӟаськемын экономикаын кылдэм шуг-секытъёсын. Бюджетъя, вытъёсъя но коньдон ужпумъёсъя комиссия азьланяз пыр-поч ужаны малпа бюджетлэсь вань статьяоссэ чильпыро возьматон понна. Соку котькуд адями бюджетысь лыдпусъёсты ас синмыныз адӟыны быгатоз: кӧня, кытчы коньдон кошкоз - ваньмызлы тодмо луоз. Кылсярысь, вань калыклы лыдпусъёсты шараяса лэсьтӥське ини Санкт-Петербурглэн бюджетэз. Таиз ар йылпумъяське ини. Коньдонэз лыдъянлы-чотанлы "Ужпум-2000" уз-а люкеты меда? Софья Широбокова верамъя, та ласянь Центробанк ваньзэ, пе, чаклаз ни. Т. БАННИКОВА. Умой адямиос Мон шудо Нырысетӥ республиканской больницаын трос гинэ удмурт врачъёс но медсестраос ужало, одӥгез соос пӧлысь - Галина Андреевна Яковлева. Со пульмонологияя отделысь валтӥсь врач, ноябре Г. А. Яковлева пусйиз бадӟым юбилейзэ. Та данъямон адями сярысь нокызьы вератэк кельтэме уг поты. Солэн шуныт мылкыдыз, быгатонлыкъёсыз кӧня висисьёслы азьлань улонлы оскон пыӵатӥзы ни. Галина Андреевналэн ӟеч ужъёсыз дунъямын трос гинэ данъян грамотаосын, солы сётэмын "Тазалыкез утён удысысь отличник" ним. Йӧно, веськрес, чырмыт мылкыдо та удмурт нылкышно сярысь мынам тросгес тодэме потӥз. Шаркан палась лыктӥсь висисьёс но кузпалъёс Яковлевъёс сярысь трос гинэ шуныт кылъёс верало угось. Галина Андреевна вордскемын Яр районысь Н.-Укан гуртысь удмурт крестьян семьяын. Атаез пичи дыръяз ик шуоз вылэм, Галие одно врач луоз. - Оло сое жалям потӥз, оло аслам но мылкыды кыскиз, зэмзэ но, быдэ вуэме бере мединститутэ пыри,- маде со.- Мон бере кык выны но сузэре дышетскыны пыризы на. Капчи ӧй вал, дыр, анай-атайлы но, асьмелы но. Мур тодон-валан басьтон мылкыдмы вань секытъёсты вормылӥз. Озьы семьяямы куинь врач, одӥг дышетӥсь но инженер пӧрмиз. Берло курсын дышетскыкуз, нылмурт семья кылдытӥз ӵош дышетскем эшеныз. Институтэз йылпумъяса, егитъёсты ужаны лэзизы Шарканэ. - Шаркан сярысь тодэ вайыкум, али ке но сюлэмы кытчы ке лӧпырске кадь. Ноку вунонтэм кылизы со аръёс. Отчы угось кылизы матысь эшъёсмы, тодмоосмы, чебер дырмы. Калыклэсь тазалыксэ утён понна ми, егит специалистъёс, ужамы, жадёнэз тодытэк. Кузпалы валтӥсь врач луыса ужаз бере, пельпумаз секыт ныпъетэз ныпъяз. Лэсьтоно вал выль больница. Со малпан быдэсмиз - выль больница ӝутскиз. Шарканын ужамы дас тямыс ар. Кузпалме тазалыкез утёнъя министрлы юрттӥсе басьтӥзы, озьы Иже улыны выжимы. Кузпалъёс Яковлевъёс быдэ вуттӥзы нылзэс но пизэс. Пизы Москваын дышетскиз, отчы ик ужаны но кылиз. Но анай-атаезлы мӧзмыны уг сёты, арнялы быдэ сямен жингыртэ, улэм-вылэмзэс юа. Нылзы, Ижевскысь медакадемиез йылпумъяса, Москваын ортчиз клинической ординатураез. Аллерголог луыса али ужа анаез вӧзын. - Шутэтскон дырмес гужемзэ сад-бакчаын ортчытӥськом. Картэ туж яратэ мушъёсын вырыны, нош ачим быгатэмъям солы юрттӥсько. Бакчаын бергаса, йырысь вань секыт малпанъёс тӧлӟо, сюлэм гань-гань интыяз пуксе. Дыр сюре ке, соку ик нюлэскы вамыштӥсько. Туж яратӥсько губи бичаны, улонам со котьмалэсь бадӟым инты басьтэ, дыр. Тодэме потӥз на, дано врач, удмурт нылкышно, кузпал но анай мар малпа шуд сярысь. - Шудэз кин кызьы вала, дыр. Трос дыръя со коньдонэн герӟаськемын. Нош мон понна шуд - со кузпалы, семьяе, уже. Мон шудо котырысьтым ӟеч эшъёсын, шудо - висисьёслэн шунытэсь, оскись синъёсын учкеменызы, шудо сузэр-вынъёсы ваньысь. Дуно анаймес берпум сюресаз келякумы, туэ ваньмы ӵош атай юртамы люкаським. Музъемозь йыбырттӥм анай-атайлы, милемды таза, чебер, калыклы адӟем карымон вордэмзы понна. Бадӟым тау карисько кузпалэлы. Куамын ар ӵоже ми соин артэ вамыштӥм улон сюрестӥ, ог-огмес валаса но гажаса. Оскыса верасько, мон шудо адями. Но сюлэм висе, туала медицинаын кылдэм югдур шоры учкыса. Коньдон ӧвӧлэн, висисьёс асьсэос эмъюм басьтоно луо. Нош калык начар улэ. Висисьёс азьын таӵе югдур понна туж кепырано. Секыт, туж секыт луиз ужаны. Озьы ке но, мон бадӟым осконэн улӥсько. Улонмы одно ӧраз пырыны кулэ. В. ВАСИЛЬЕВА. Пичи Пурга черкогурт. Бускельёсмы дорын Татарстан. Балтась ёрос. Лыдпусъёс шумпотто Ёросысь пудо утисьёс шумпотыса ӵошато газетъёсысь лыдпусъёсты. Тодэмзы потэ уго кытын но кинъёс умойгес ужа. Тани "Кама", "Бурбаш", Ленин нимо но "Алга" эштосъёс, миым сярысь, туэ данаклы уногес йӧл кыскизы. Нырысетӥяз хозяйствоын - 107 процентлы уногес. Сӥль поттонъя умойгес ужало "Алан", "Труд" но "Бурбаш" эштосъёс. Вуоно выль 2000-тӥ арез котькуд скалзылэсь 5000 килолэсь уно йӧл кыскыса пумитаны чаклало Ленин нимо, "Татарстан", "Кама", "Алга", "Якты тол" эштосъёсын. Сӥль поттонын самой умой азинсконъёссы Рахимов нимо, "Труд" но "Бурбаш" хозяйствоосын. Выжтэк шурез уд выжы Ёросын куамын пала кортлэсь но бетонлэсь юнэсь выжъёс ӝутэмын ни. Самой ӝужытэз - Кушкетбаш гуртын. Солэн ӝуждалаез 13 метр, кузьдалаез 58 метр. Выж ӟеч мед лэсьтӥськоз шуыса, администрацилэн кивалтӥсез М. Х. Зарипов но солэн воштӥсез Р. М. Ильясов ужъёслэсь кызьы мынэмзэс ялан син азязы возизы. Выль выжез ӝутӥзы Казаньысь "Гидромонтажлэн" участокезлэн директорез Н. Г. Шайдуллин кивалтэм улсын. Солы юрттӥзы на "Гермиз" кооператив (председателез Г. Я. Шепилов) но районысь монтажникъёслэн коллективзы. Выжез кутӥсь комиссия, кудӥныз кивалтӥз И. В. Ермаков, ужзылы вылӥ дунъет сётӥз. Ёросысь сюрес лэсьтӥсьёс но ӧз кӧлэ, соос выж доры вуттӥсь сюресэз лэсьтонэ сюй гинэ но 80 сюрс кубометрлэсь уногес ворттӥзы. Удмурт культураез ӝуто Алигес ортчиз удмурт национальной культурая автономилэн правлениезлэн кенешез. Отын эскеремын данак ужпумъёс. Кылсярысь, ёросысь удмуртъёслэн ИИИ-тӥ ӧтчамазы (съездазы) кутэм резолюциын возьматэм ужпумъёслэн быдэсъяськемзы сярысь. Туэ тол вылтӥ удмурт гуртъёсысь самодеятельной коллективъёс пӧлын "Жингырты, удмурт кырӟан!" фестиваль-конкурс ортчытон сярысь. "Азьлане", ёросысь удмурт газетэ, лыдӟисьёс пӧлын самой усто гожъямъёслы "Зарни перо" конкурс ортчытон сярысь. Ёросын улӥсь удмуртъёслэн улэм-вылэмзы сярысь книга поттон вылысь материалъёс люканлэн кызьы мынэмез сярысь. Та кенеш ортчиз удмурт культурая ужанлэн тӧроез Л. Д. Сапожников кивалтэм улсын Уж понна зарни медаль Москваын алигес ортчиз гурт хозяйстволы чаклам выль техникаез возьматон. Отын ёросын поттэм КРН-28 сенокосилка отын пусъемын зарни медален но почёт дипломен. Выль машина лэсьтэмын "Балтасьсельхозтехника" акциосын огызеяськонын. Ушъямон коллективез вылӥ азинсконъёсыныз сюлмысьтызы ӟечкылазы ёросысь гуртооссы. Турын турнанъя выль машинаез басьтыны малпало ёросысь но республикаысь эштосъёс но, фермеръёс но. Тодон-валанзэс будэтӥзы Кемалась ик ӧвӧл Балтась ёрослэн дышетскон базаяз быдэс Татарстанысь удмурт кылэз но литератураез дышетӥсьёс понна дышетскон ортчиз. Та курсъёслэн бадӟым люкетэз вал Ципья шор ёзо школаын. Дышетсконэз радъязы Татарстанысь Калыкез дышетонъя министерство, дышетӥсьёслэсь тодон-валанзэс будэтонъя институт, Удмурт кун университет. Тодон-валанзэс будэтӥзы витьтон пала дышетӥсьёс, нош соос уно сю нылпиосты анай кылзылы дышетозы, ужазы выльзэ кутыса. Дышетскон кыстӥськиз арня ӵоже. Йылпумъян ортчиз Балтась гимназиын. Люкаськемъёс тодматскизы на Балтась ёросысь трос адӟем карымонэныз. Песяйлэн 62 внукез Татарстанысь Социальной юрттэт сётонъя министерство но "Выбор" газет самой трос внукъёссы луэм песяйёс пӧлын конкурс ортчытӥз. Отын вормисе потӥзы Балтась ёросысь Кускем гуртысь Фекла Степановна Тургенева но Набережные Челны карысь Наталья Костылева. 88 аресъем Фекла песяйлэн 62 внукъёсыз но соослэн нылпиоссы люкаськиллям ни. Соослы дуно кузьым сётэмын. Шараяськиз на, эшшо кык песяйёслэн быдэн 33 внукъёссы. Таосыз но кузьымтэк ӧз кыле. Экто быдэс семьяен Зеленодольск карын ортчытэмын быдэс семьяен кырӟаны но эктыны яратӥсьёслы конкурс. Отчы пыриськизы 7 карысь но 22 ёросысь семья ансамбльёс. Та бадӟым конкурсын Балтас ёросысь Субаш гуртысь Васильевъёслэн семьязы но пыриськиз: анай-атайёс Райфа но Илья, пиоссы Ильгиз но Ильхам. Соос тужгес но усто быдэстӥзы бигер но пор эктонъёсты. Соослы конкурсын но кузьым сётэмын, ёрослэн администрациез но кузьым сётӥз на. Озьы данъясько ӟеч ужасьёс но эктыны-кырӟаны быгатӥсьёс. П. НИКОЛАЕВ. "Шкодалы" тунгонъёс Та нуналъёс "Шкода-Авто-Удмуртия" программаез быдэстонъя бадӟым вамыш лэсьтэмын. Ижевскысь "Редуктор" заводлэн одӥгаз цехаз усьтӥськиз Россиен но Чехиен ӵош ужась "С.Б.А." огазеяськон. Ӟуч сямен вераса, со луэ "Системы безопасности автомобилей". Та предприятие луэ тодмо "Дефенд-Лоцк" фирмалэн ёзэз. Со азьвылгес ик ини быдэс дунне вылын данэ потӥз автомашинаослы ёзъёс дасяменыз. Соосты уже куто "Шкода" но "Фиат", "Фольсваген" но "Ауди", "Тойота" но "Хонда", "Форд" но "Лада" автомобильёсын. Табере соос кулэ луозы асьме дорын поттыны дасяськись "Октавия" но "Филиция" машинаослы. Удмуртилэн столицаяз ӝоген бичаны кутскозы автомбильёсты лушкан учыръёсын нюръяськон тунгонъёсты. Соосты машиналэн пӧртэм интыосаз пуктыны луоз. Предприятилэн ёзъёсыз та удысъя ужало ни Венгриын, Польшаын, Тайваньын. Нош Россиын та ласянь быръемын Ижевск. Асьме дорын усто пыӵал тӥрлык лэсьто бере, уз быгатэ шат кибашлыосмы "кескич" замокъёс бичаны? Чехъёс "Редуктор" огазеяськонын арендае 600 квадрат метр инты басьтӥзы. Ужаны нимысьтыз участок дасязы. Солы директоре бырйизы заводысь одӥгзэ кибашлы специалистэз Владимир Сухоруковез. Москвае усьтӥзы вузкарон центр. Та нуналъёсы "Дефенд-Лоцк" фирмалэсь ёззэ усьтон ортчиз. Кызьы вераз солэн генеральной директорез Павел Войтек, выль вуз поттыны татын ваньмыз дась ни. Корт тырмыт. Сое келяны дась Урал котырысь мукет заводъёс но. Автомашинаосты лушканэз палэнтонъя тунгон (противоугонной система) дуно сылэ. Нош ӵош предприятие соосты поттыны кутскиз ке, замоклэн дуныз 50 процентлы кулэсмоз. Но со понна кулэ луоз туж вылӥ ӟечлык. Чехиысь эшъёслэн верамзыя, Ижевскын нырысетӥез автомобиль конвейерысь васькыны кулэ вуоно арын июль толэзе гинэ. Уго трос ужано луиз документъёс дасян бордын, вал мукет тырмымтэос но. Нош автомобильлы тунгонъёсты асьме дорын поттыны кутскозы ни таяз толэзе ик. Ми оскиськом, пусйиз Павел Войтек, Удмуртиын поттэм вузъёс быдэс Европае вӧлмозы. Мар бен, озьы мед луоз вылэм. А.Артамонов. Шуныт пумитало Завьяловоын улӥсьёс но, та черкогуртэ ветлӥсьёс но котьку шуныт кылъёс верало "Россия" эштослэн столовояз ужасьёс сярысь. Татын котьку но пӧртэм сиёнъёс дасяны быгато. Соос ог кызь пумо лыдъясько. Вань салатъёс, юзматӥсь юонъёс. Соинтэк-а татысь пӧрасьёслы пӧртэм ужрадъёсы лыктэмъёсты сюдыны. Туэ Завьяловоын ортчизы гурт спортсменъёслэн гужем шудонъёссы. Соослы но туж кельшиз столовойын ужасьёслэн пӧрамзы. Котькин шуоз - Завьяловоын сиськонниос пӧлысь самой устоез "Россия" эштослэнэз луэ. Милям корреспондентмылэн Николай Ивановлэн юанъёсызлы столовойлэн кивалтӥсез Л. С. Степанова вераз. - Любовь Степановна, али гинэ тӥ дорын сиськи. Туж ческыт. Тау. Но монэ паймытӥзы улӥ дунъёс. Оло, тӥ янгыш-а лыдъяды-чотады?? - Малы, ваньмыз шонер. Макаронъёс но кеньыр сяна, ваньмыз мукетыз поттэмын "Россия" эштослэн бусыосаз но фермаосаз, кылсярысь, сӥль, йӧл, картофка, кубиста, ӵуж но горд кушман. - Тӥ ведь нырысь ик сюдӥськоды бусыосын тыршисьёсты? - Бен, милемлы "пӧсь" йӧтэ вазь тулысысен бер сӥзьылозь. Соку нуналаз кык пол сюдӥськом. Нокыӵе вискаронъёстэк сюлмаськиськом ческыт пӧраны. Сиёнэд ке ческыт, механизаторъёслэн но мылкыдзы умойгес. - Кинэ пӧрасьёсты пӧлысь пусйысалды? - Мон быдэс коллективмес пусйысал. Егитъёссэ но, арлыдооссэ но ужасьёсты. Со пӧрасьёс Татьяна Григорьевна Батуева, Людмила Михайловна Мышкина, Екатерина Евгеньевна Баженова. Бусые пӧсь сиён вортто Зинаида Леонидовна Четкарева но Наталья Сергеевна Симонова. Соосын ӵош котьку ик луд вылэ дыртэ водитель Александр Владимирович Виноградов. - Калыкез сюдэм сяна, ма ужаськоды на? - Ужаськом заказъёсъя но. Юбилейёс, сюанъёс ортчытъяськом. Куремзыя пӧртэм пыжиськемъёс пӧраськом. Н. Иванов. Лыдӟись вера малпанзэ Быръён ӧр куашетэ Быръёнъёслы дасяськонлэн али самой бугрес дырыз. Газетъёс, телевидение но радио та вакытэ тырмемын трос пӧртэм партиослэн но огазеяськонъёслэн, данак кандидатъёслэн верамъёсынызы но оскытонъёсынызы. Та тӧлперилэн шораз ӝимем муртлы шуг ваньзэ сое сэрттыны-пертчыны но валаны, пуж пыртӥ сямен сӥсъяса, кудӥз пала кариськыны. Тани партиос но огазеяськонъёс сярысь верано ке, Кун Думае быръёнъёсы пырисько кызь тямысэз. Али вераськемъёссыя гинэ дунъяно ке, ваньзы соос оскыто, ми калыклэн ӟеч улон-вылонэз понна луиськом шуыса, ваньзэ, пе, лэсьтом, странамес куашканлэсь утён, экономикаез азинтон понна. Вань та партиосты но огазеяськонъёсты мон люкысал кык люкетлы: одӥгъёсыз - кивалтэтын азьвыл ужам но али ужась муртъёс, туала йӧспӧртэм реформаез нуисьёс но соин валче калыкез курадӟыса улонэ вуттэмъёс; кыкетӥосыз - странамес выльысь ӝутыны, экономикаез азинтыны, калыклэсь ужаны, дунтэк дышетскыны но эмъяськыны, мӧйыослы майбыр улыны правооссэс берыктон вылысь сюлмаськисьёс. Нырысьёсыз пӧлы мон пыртысал таӵе партиосты но огазеяськонъёсты: "Наш дом - Россия" (НДР), "Яблоко", ЛДПР, "Отечество - вся Россия", "Союз правых сил" но куд-ог мукетъёссэ. Али соос котькыӵе чебересь кылъёс мед вералозы, но ваньзы ик луо азьланьын но странамес куашкан сюрестӥ нуон понна, калыклэн киосыныз кылдытэм ваньбурез, озьы ик музъемез, нимаз адямиослы (кунгож сьӧрысьёсызлы но) вузан понна. Али ужась Кун Думалэн та партиосы пырись депутатъёсыз ваньзы сямен Б. Н. Ельцин палан, соос пумит луизы сое кивалтонлэсь палэнтонлы (импичментлы). Татчы ик мон пыртысал президентлэн администрациеныз кылдытэм "Единство" движениез. Соин кивалтэ С. Шойгу, тросаз правительствоосын ужам министр. Зэм, солэн данэз калык азьын вань, ас удысаз умой ужа. Соин ик, вылды, сое ӵектӥзы та движениен кивалтыны. Но котькинлы валамон ук, та движение кылдытэмын, выль Думае президентлы но правительстволы дурбасьтӥсь адямиосты быръён понна, бырйисьёсты зэмос патриотъёслэсь висъян понна. Соинтэк-а али С. Шойгулэсь но солэн эшъёсызлэсь пӧртэм областьёсы, городъёсы ветлэмзэс, отын вераськемзэс телевидение пыр нуналлы быдэ олокӧня пол возьмато. Соин гинэ уг тырмы ай, министрез ялан ушъяса вераське правительстволэн кивалтӥсез В. Путин. Экран вылын озьы ик ӵем гинэ "ворекъяло" Г. Явлинский, В. Жириновский, С. Кириенко, И. Хакамада но соослэн радъёсысьтызы мукетъёсыз адямиос. Калыкен ӵем гинэ пумиськыло Г. Зюганов, Г. Селезнев, В. Стародубцев, Н. Рыжков, Н. Харитонов но мукетъёсыз - паллян палась партиослэн кивалтӥсьёссы. Но соос сярысь телевидение но радио уг поттыло. Тӥни озьы: кин киын власть, коньдон, телевидение, радио, соос ик быръёнъёслы дасяськонэз но нуозы ас тодэмзыя, кызьы соослы кулэ. Быръёнъёсы пыриськем партиослэн кыкетӥ люкетазы пыртыны луысал Российской Федерациысь Коммунистической партиез но соин ӵош "Вормон понна!" огазеяськонэ пырись патриотъёсты, "Коммунистъёс, Россиысь ужаса улӥсьёс - Советской Союз понна" партиез, "В поддержку армии", "Партия мира и единства", "Мир. Труд. Май" но куд-ог мукет огазеяськонъёсты. Тросэзлэн соослэн малпанъёссы калыклэсь улон-вылонзэ умоятонэн герӟаськемын. Но странамылэсь экономиказэ азинтонъя, сое ужась калыклэсь, пересьёслэсь но нылпиослэсь улонзэс ялан умоятон сюрестӥ ӧръянъя пыр-поч дасям программаез вань Коммунистической партилэн гинэ. Умой луысал мукетъёсызлы но патриотической кужымъёслы та партия котыре огазеяськыны. Но малы ке котькудӥз нимаз кариськыны турттэ, солэсь но ортчыт, ог- огзы вылэ урттылӥсько. Тани туэ 7 ноябре Быдӟым Октябрьской социалистической революцилы 82 ар тырмонлы сӥзем митингын, кудзэ ортчытӥз КПРФ-лэн республикаысь комитетэз, Россиысь коммунистической рабочей партилэн (кудӥныз кивалтэ Анпилов) одӥгез членэз митингын вераськиз КПРФ-лы пумит. Люкаськемъёс сыӵе урдскылонэз вожпотонэн пумитазы. Зэм но, та учыр тросэзлы паймымон вал. Со угось коммунистъёслы пумит сылӥсь кужымъёслы дуно кузьым луиз. Коммунистъёслэсь но патриотъёслэсь радъёссэс сотэк но котькызьы лябомытыны туртто, нош тӥни соос асьсэос юртто сыӵеослы. Я бен, таиз партиослэн но огазеяськонъёслэн кин палан но мар понна луэмзы сярысь вакчияк. Со сяна, асьмеос Кун Думае быръёмы на нимаз кандидатъёсты. Республикаямы со понна кылдытэмын кык округ - 28-тӥ Ижевск округ но 29-тӥ Удмурт округ. Нырысяз округъя - 11 кандидат, кыкетӥяз - куать. Кинэ асьме калыклэсь ыстоно Кун Думае? Валамон ини, кинъёс быръемын луозы вуонояз, куинетӥ думае, соин герӟаськоз асьмелэн азьланьын улонмы: яке странамы, кылям уробо сямен, гурезь уллань нюк пыдсы бекмыльскоз, яке та нырко-гопо сюрес вылысь кожоз шонер, паськыт сюрес вылэ но, азьло сямен ик, йыгмыт азинскоз выль улонэ. Тӥни ма сярысь малпаськоно котькуд бырйисьлы. Татын адямиез тусбуйызъя гинэ, чебер кылъёсызъя гинэ дунъяно ӧвӧл, учконо сюлэм пыдэсаз, адӟоно солэсь отысь мур малпанъёссэ: кыӵе мылкыдын со куриське депутатэ, кыӵе пытьы кельтӥз со та улонын ортчем сюрес вылаз. Тӥни озьы, гажано бырйисьёс. Та бадӟым ужлэсь нокин но палэнэ медаз кыльы. Куд- огезлы акыльтӥз ни ялан пӧямзы, ултӥямзы, со нокинлы но уг оскы ни. Соин ик быръёнъёсы но ветлэмзы уг поты. Сыӵеослы мар вераме потэ: нокин но медаз сылы палэнын, ас визьмыныз, ас куараеныз мед быръёз депутатэ оскымон адямизэ. Ачид ке ӧд бырйы, тынэсьтыд куарадэ сётозы мукет муртлы. 1996-тӥ арын президент быръён дыръя сыӵе учыръёс вал ини. Тани Татарстанын гинэ соку 600 сюрс муртлэсь Зюганов понна сётэм куараоссэс гожтӥллям Ельцинлы. Али тросэз сыӵе умойтэм ужъёс шараямын но, янгыш луись адямиос вылэ уголовной ужъёс ӝутэмын. Но, кызьы шуо, берло мар на, асьмелы тани соин сэрен кӧня курадӟонъёсты адӟоно луэ. Вуоно быръёнъёсын сыӵе учыръёс уз ке но луэ, шуо, солы оскыны шуг. Дас куинетӥ дауре улэм итальянской поэт А. Данте вераз вал: "Адын тужгес но ӟырдатэм инты висъямын сыӵе адямиослы, кинъёс улонын секытэсь адӟонъёс вакытэ палэнысен учкыса сылӥзы". Тырмоз умой улонлэсь инмысь васькемзэ учкыса пукыны, сое асьме киосын лэсьтоно. Нош али... Али телевидение но радио уй но нунал ушъяса верало Путин но Шойгу сярысь, уй но нунал пож ву кисьтало коммунистъёс но мукет патриотъёс вылэ. Азьпалан улонзы сярысь малпаса, марлэсь ке кышкало шат? Оло, соосты кин ке узатэ. В. МИХАЙЛОВ, ожысь но ужысь ветеран. "Полисмены удачи" Команду КВН под таким названием уже хорошо знают в Перми и Нижнем Новгороде. На межрегиональных фестивалях КВН курсанты Ижевского филиала постоянно занимают призовые места. Не случайно, что в конце этого года такой фестиваль запланировано провести в Ижевске. А вдохновителем многих интересных дел и начинаний среди курсантов является начальник отдела по воспитательной работе Никонов Петр Семенович. Перспективы "В движении - жизнь". Этим мудрым философским изречением руководствуется коллектив Ижевского филиала в определении ближайших и стратегических задач своего развития. Начальник филиала Ю. В. Антонов серьезно мечтает о создании юридического института с финно-угорским направлением. В ведение филиала недавно передан республиканский лыжный спорткомплекс им. Г. А. Кулаковой. Его содержание тоже потребует огромного труда и средств. Поэтому начальник филиала Ю. В. Антонов приглашает всех заинтересованных лиц и организации к сотрудничеству. Необходимо продолжить строительство учебных корпусов, казарм. Нынче открылся свой стрелковый тир, спортзал. Мечта всего коллектива создать - центр воспитательной работы с музеем, комнатами психологической разгрузки, профориентации, помещением для художественной самодеятельности. Адрес: Удмуртская Республика, г. Ижевск, пос. Машиностроителей,116. Тел.: 71-49- 89. За предоставленную информацию редакция благодарит начальника отдела кадров Петрова Александра Андреевича и инспектора отдела кадров Волкова Александра Геннадьевича. Материалы подготовили Татьяна Банникова, Владимир Камашев (фото). Правительствоысь иворъёс Правительстволэн Президиумезлэн туэ понна берпуметӥ кенешаз эскеремын Ватка но Кам улосвылэ поръёслэн вуэмзы дырысен 400 ар тырмонлы сӥзем ужрадъёсты ортчытонъя программа. Ужрадъёсы пыриськозы Нациосын ужан политикая, Культурая, Калыкез дышетонъя министерствоос, Егитъёсын ужанъя кун комитет, Ижевск, Сарапул, Воткинск городъёсысь, Алнаш, Грах, Завьялово, Камбарка, Каракулино, Кизнер, Киясово, Пичи Пурга ёросъёсысь администрациос, Удмуртиысь поръёслэн "Одо Мари Ушем" огазеяськонзы. Чакламын пор культурая нуналъёс, научно-практической конференциос, семинаръёс но конкурсъёс, фестивальёс ортчытыны. *** Кутэмын "Удмурт Республикаысь театральной искусстволы государство ласянь юрттон сярысь" постановление. Та документэн юнматэмын театръёс сярысь положение но соослы коньдон висъян ужпумъёс. Культурая министерстволы ӵектэмын искусствоя вылӥ учреждениосы дышетскисьёсты ысъяны, творческой ужасьёслэсь тодон-валанзэс но быгатонлыксэс будэтон сярысь сюлмаськыны. 2000-тӥ арын медицинской страхованея удмурт фондысь 10 миллион манет висъямын луоз онкологической центрлэсь кыкетӥ корпуссэ пуктонлы. Республикалэн бюджетысьтыз та уже 1 миллион манет коньдон висъямын луоз. Удмурт Республикаысь Правительстволэн пресс-службаез. Журналистъёсын пумиськонъёс Чагыр эстӥськон кулэсме Шуныт сётон пумысен журналистъёсты тодматӥз республикаысьтымы эстӥськонъя, энергетикая но связья министр Виктор САВЕЛЬЕВ. Берло дыре предприятиослы но калыклы шуныт сётон умоя ни. Туннэ ваньмызлы сямен шуныт сётӥсь предприятиослы эстӥськон тырмыт висъямын. Но малы бен Ижевскысь данак квартираосын ноябрьлэн пумаз адямиос кынмыса улӥзы? Министр сое тазьы валэктэ, энергетикъёслэн, пе, быдэсъян дисциплиназы улӥын вал, гуръёсты ялан газэн эстӥзы, чурыт эстӥськонэ выжтыны ӧз дыртэ. Нош соос тодо вал, шаерамы чагыр эстӥськон ичи сётэмын шуыса. Декабре республикалы газ тросгес висъяське ни. Со юрттоз 2 номеро ТЭЦ-лэсь кык гурзэ газэн эстонэ выжтыны. Ноябре соос чурыт эстӥськонэн ужазы. Кылем арын Россиысь "Газпром" нуналскын газ сутонъя лимит-норма тупатӥз. Тӥни самой со люкетэ огсыр ужаны. Сыӵе йылпумъян лэсьтӥз Виктор Алексеевич. Но шаерамы азьланьын газ сётонэз умоятыны юрттоз Можга районысь Карашурын газ возён гу (хранилище) лэсьтон. Али отчы "чагыр эстӥськон" вуэ ни. Со дась луиз ке, луонлык кылдоз газ кутонъя шуг-секытысь потыны. Ялан будэ эстӥськон басьтӥсьёслэн тыронъёссы, уката ик бадӟымесь промышленной предприятиослэн. Тани федеральной но интыысь бюджетъёсы шуныт понна 800 миллион манет тыронъёс люкаськемын, нош газъя - 80 миллион манет. Туннэ озьы ик умояз пачкатэм газ сётон. Ижысь газ возись станцие со 423 тонна вуэмын, Сарапулысь - ГНС-е - 80 тонна. Урод югдур адямиослы баллонэн газ вузанъя. Республикаямы газ вань, но дуныз тупатэм тарифлэсь кык пол трос. Бюджетэ пырись организациос сое басьтыны уг быгато, коньдонзы ӧвӧл. Соин ик тарифез воштон сярысь ужпум али эскериське шаерысьтымы Дунъёсъя кун комитетын. Россиын газ поттон арлы быдэ 3-5 процентлы кулэсме. Вылаз ик, асьмелэн со трос кошке кунгож сьӧры. Соин ик амалтэк асьмеос шуныт сётӥсь гуръёсты чурыт эстӥськонэ выжтоно луом. Странаямы музъем эгыр газлэсь данаклы трос. Валамон, мукет кунъёсын гуръёсты эсто нюлэс хозяйствоослэн, леспромхозъёслэн кылем-мылемъёсынызы. Куке-соку, оло, асьмеос но отчы вуом. Но туннэ асьме азьын сыӵе ужпум уг сылы на. Г. РОМАНОВ. Честь офицера - честь России Под таким девизом работает здесь каждый сотрудник и педагог. Много добрых слов заслуживают преподаватели, за плечами которых многолетний практический опыт работы. это полковник милиции Серебренникова Тамара Борисовна, доцент кафедры государственно-правовых, гражданско-правовых и общеюридических дисциплин; полковник милиции Наймушин Владимир Григорьевич, начальник кафедры административного права; подполковник милиции Ворончихина Клара Ярославовна, старший преподаватель кафедры уголовного процесса и криминалистики. Ныров Владимир Алексеевич - полковник запаса, кандидат философских наук, доцент, один из достойных и уважаемых преподавателей. Окончив Оренбургское зенитно- ракетное училище, служил в войсках противовоздушной обороны командиром взвода, старшим офицером, заместителем командира дивизиона по политической части. Закончил Военно-политическую академию. С 1975 года Владимир Алексеевич на преподавательской работе. Его жизненный опыт и знания так необходимы молодым курсантам этого учебного заведения, куда он пришел в 1993 году. Владимир Алексеевич 15 лет преподавал в Таллинском высшем военно-политическом чилище, 3 года был на преподавательской работе в Мозамбике. Он не остается в стороне и от общественных дел. В настоящее время активно помогает ассоциации "Удмурт кенеш", являясь руководителем его правления в Ленинском районе города Ижевска. Юрий Викторович Антонов - начальник Ижевского филиала Юридического института МВД России, заслуженный юрист Удмуртской республики, кандидат юридических наук, Почетный работник высшего образования, президент федерации лыжного спорта Удмуртии, полковник милиции. Комиссаров Владимир Александрович - начальник курса, подполковник милиции. Родом из Алнашского района. Служил в ракетных войсках. Его курс, который он выпустил в 1999 году, считался одним из лучших. Для поступления в Ижевский филиал Юридического института все абитуриенты проходят строгий отбор. Но многих преподавателей беспокоит то, что сельские абитуриенты хоть и укладываются в физические нормативы, но очень слабо сдают экзаменационные предметы, особенно по отечественной истории и обществознанию. Это обстоятельство должно выдвигать более высокие требования к сельским учителям. На сегодняшний день среди сельских сотрудников правоохранительных органов только 20-30 процентов имеют высшее образование, а среди участковых милиционеров - 10 процентов. *** Спорт Вэтом учебном заведении огромное внимание уделяется здесь физической подготовке курсантов. В обязательную программу входит изучение боевого и спортивнового разделов самбо и дзюдо. Занятия ведут заслуженный тренер Удмуртской Республики по дзюдо В. П. Тимченко и мастер международного класса по самбо, чемпион Европы и 2-х кратный обладатель кубка Мира А. В. Хачатрян Многие спортсмены филиала входят в сборные команды Удмуртии. Гордостью всего коллектива являются прославленная лыжница И. Баженова, биатлонист, чемпион олимпийских игр, мастер спорта международного класса А. Кобелев, а так же мастер спорта, участник олимпийских игр С. Крянин. Сотрудники и курсанты ежегодно принимают участие первенствах вузов МВД РФ, и республиканского общества "Динамо", других республиканских и районных соревнованиях. В 1999 году на многих соревнованиях занимали призовые места. *** Курсанты филиала централизованно обеспечиваются учебно-методической литературой. Здесь создан обширный, постоянно пополняемый библиотечный фонд, насчитывающий около 54 тысяч единиц хранения и 8309 специзданий. Заведующая библиотечным фондом - Никифорова Ирина Сергеевна. *** Подготовка специалистов в системе МВД осуществляется не только на лекциях, но и на практических занятиях. Курсанты обучаются навыкам владения боевым оружием. Кибашлы Анатолий Боталов - Пичи Пурга ёросысь "Юж-Пурга" эштосын устоез токарь. 27 ар ӵоже ни тырше та удысын. Котькыӵе пичи корт арбериез лэсьтыны быгатэ. Тол но, гужем но адямиос лыкто со доры асьсэлэн куронъёсынызы - ваньмызлы юрттэ. Калык Анатолий сярысь шуныт кылъёсын гинэ вазиське. Пӧсь йӧтэ кизён-аран вакыт. Токарьлэн верамезъя, 82-тӥ арын поттэм машина кузёзэ ноку но ӧз пӧя на. Вал кадь ужа. Туспуктэмез В.Камашевлэн. Арганчи вуиз Удмурт гуртэз арганчитэк малпаны ик уг луы. Нош Пичи Пурга ёросысь Аксакшур гуртын дасо аръёс ӵоже одӥг арганчизы но ӧй вал. Туэ гинэ аксакшуръёслы бадӟым шумпотон вуиз. Культурая училищеез йылпумъямез бере, татчы ужаны ыстӥзы Владимир Арекеевез. Ачиз егит арганчи вордскемын Ува ёросысь Косоево гуртын. Табере Аксакшурын но чузъяське арганлэн шулдыр куараез. Нош эктыны- кырӟаны мылкыд карисьёс бускель гуртъёстӥ концертэн ветлыны дасесь ни. А.Андриянов. Инмаред сюлэмад медло Котькытын сямен ик, Кезысь инмарлы оскисьёс но вожъясько черко интыын улӥсьёслы. Но асьсэлэн черксы ӧвӧлысь, суйзы-пыдзы уг юскиськы. Вить ар талэсь азьло соос огазе кариськизы но спортъя залэ люкаськылыса вӧсяськыны ӧдъязы. Табере тани люкаськыло пытсаськем столовое, сое выльдо, тупатъяло, шуныт мед луоз шуыса сюлмасько. Отец Сергий вань мылкыдзэ сётыса, калыклы валэктэ: вӧсяськон инты пӧртэм интыын луыны быгатэ, со понна инмаред сюлэмад медло. Ачиз со трос кужымзэ сётӥз Тортымысь черкез тупатон-выльдонлы, табере тани Кезын но ас котыраз люка инмарлы оскисьёсты. Калык юрттэмен ик шедьто вашкала обросъёсты, мукет вӧсяськон арбериосты. А. АНДРЕЕВ. Коркаосазы шуныт Воткинскысь му вӧй поттӥсьёслэн посёлоксы самой егитэз луэ. Со арысь аре чеберске. НГДУ-лэн кивалтӥсьёсыз ужась адямиоссы сярысь ӟеч сюлмасько. Туэ толлы улон коркаоссэс ӟеч дасязы. Басьтом Луначарский урамысь 18,32 но 34 номеро юртъёсты. Соосты тупатъянъя бригадаен кивалтӥз А.В.Говязин. ЖЭУ-лэн выль кивалтӥсез А.И.Малых но ужзэ быгатыса радъя. Юртъёслэсь котырзэс утялтонэ но тупатъян ужъёсты быдэсъянэ улӥсьёсты но кыскиз. П.Николаев. Кӧня сылэ чагыр эстӥськон? Сюмси ёросысь ужаса улӥсьёс огдыре баллонэн чагыр эстӥськонлы ёрмыса улӥзы вал. Но тани газ вуттӥзы. Дуныз - 100 манет. Дуно-а, дунтэм-а со? Ӵошатом: Пермь областьысь Очераын 50 литръем баллонэн газ вузаське 125 манетэн, Ижевскын - 136 манетэн, нош солэн асдуныз 140 манет, пе. Мар шуод, калык ваньбурен кузёяськисьёс эстӥськонлэсь дунзэ будэто но будэто. П.Николаев. Газетлы - усто кузьым Игра ёросысь "Светлый путь" газетлы алигес 60 ар тырмиз. Мукет райгазетъёсын ӵошатоно ке, со ог дас ареслы егитгес. Газетэз потто ёрос администрация но Депутатъёслэн Кенешсы. Юбилей вакытэ редакцилы но типографилы ӟеч кузьым сётэмын - 1,5 миллион манетэн сылӥсь ньыль буёлэн печатья офсет машина. Табере "Светлый путь" газетэз чебер туспуктэмъёсын но пӧртэм буёлъёсын печатланы луоз ни. П.Николаев. Юзматоз Чурысь ву но Якшур-Бодья ёросысь Чур посёлокын усьтэмын выль цех. Отын поттыны кутско газэн ву. Цехез кун комиссия кутӥз ни. Бӧрысьгес цех поттоз на майонез но кетчуп. Цехлэн кузёез "Проксервис" ООО. Солы юрттэт сётӥллям кунгож сьӧрысь инвесторъёс но. П.Николаев. Ӟечлыкен ужалод - байлык люкалод Сюмси ёросысь пудо утисьёс пӧлын шуркынмон толэзь сӥземын вал йӧллэн ӟечлыкез понна нюръяськонлы, угось солэн дуныз юн герӟаськемын ӟечлыкеныз. Сельхозпродуктъёсты басьтонъя но солэн ӟечлыкезъя ёросысь инспекторлэн Л.В.Альматовалэн верамезъя, шуркынмонэ 80 процентэз йӧлзы келямын луыны кулэ нырысетӥ сортэн. Нош шуркынмонлэн кыкетӥ декадаяз ваньмыз сямен йӧлзы келямын вал нырысетӥ сортэн. Со шумпотымон. П.Скобелев. Котькинлэн пытьыез аслаз 1977-тӥ ар, август толэзь. Быдэс Удмурт шаерысь егит нылъёс но пиос пӧлысь дас кыкез, сцена вылын асьсэлэсь быгатонлыксэс адӟытэмзы бере, Уфаысь искусствоосъя институтэ дышетскыны мынон понна, эшшо мукет но тодон-валанзэс возьмато. Ӟуч кылын изложение гожтон понна, Удмурт кун университетлэн одӥгаз аудиторияз люкаськимы. Вӧзам чебер сьӧд костюмен, юг-юг тӧдьы дэремен, аслаз синъёсыз выллем ик чагыр галстукен, мертчан йырсиё пияш пуксиз. Выросъёсыз но дӥсез выллемесь ик: нод-нод юалляське, пальпотыса гинэ вераське. "Кыӵе ӟеч сямъёс вылын будэтэмын та пияш..." - малпай ас поннам. Озьы тодматски Геннадий Венедиктовен. Уфаысен ни, сессия дыръя, ми йыръёсмы визьтэммымон дасяськиськом экзаменъёслы - Геннадиймы кылбуръёс гожъяса пуке. Мыным вазиськиз: - Риммусь, кылзы али, кыӵе чебер чуръёс пӧрмизы! Зэм, куд-ог интыосаз рифмаос ӧй шедьты на: оло, тон юрттод? Бен, Геналэн кылбуръёсыз туж уно вал. Гожъяз малпаськытӥсь чуръёс: соос вал инкуазь, кизилиос, тылобурдоос, жильыртыса кошкись вуос сярысь... Со уг кышка вал "урод студент" луыны, соин, вылды, Геннадийлы котьку удалтылӥз. Сое яратӥзы ӵош дышетскись эшъёсыз, дышетӥсьёс. Соин валче но, дыр, Гена стипендитэк ноку ӧз кыльылы. Мустай Каримлэсь "Толэзь ышон уе" спектакльзэ дасякумы (Уфаысен ай), пиосмы ӧз тырмылэ. Даурзы ортчем, пинал визьмазы берытскем аксакалъёслэсь рольёссэс дасязы Александр Баймурзин, Геннадий Венедиктов но та чуръёсты гожтӥсь. Нырысь ӧм ик валаллялэ: кызьы возьматод сыӵе мудрон пересьёсты? Рольмылэн ӧраз пырыны юрттӥз Геннадий. Егит ныл, Шафак, киосмес миськыны шуыса, сцена вылэ ыргон тусьтыен ву поттэ. Ми Сашаен киосмес миськыку, Гена чиньы йылъёссэ гинэ вуэн коттӥз, соосты ӵушконэн ӵушиз. Кокырмем губрес пересьмы со куспын егит Зубаржатэз маялтыны вуттэ, милемлы синъёссэ кырмышъя, быгатэмезлы пичи пинал кадь шумпотэ, горе! Аслэсьтыз бӧрысь юасько: - Гена, кызьы озьы тодад лыктӥз егит нылашез маялляны? - Улэп пиосмурт котьку малпаське чебер нылкышно сярысь. Паймымон, но кызь арескын сыӵе ӟеч валаны быгатӥз со улонэз! Эшмес буре вайыса, али но шуо: "Геннадиен вераськыны туж тунсыко вал". Со быгатэ вал адямиослэсь, соосты сюлмаськонъёссылэсь бӧльыса, мылкыдзэс лӧпкытыны. Ас кужымзэ, быгатонлыксэ эшмы котьку шӧдэ вал. Дышетскыны пырыкуз ик ассэ артистэн лыдъялляз ни. Удмурт театрын ужаны кутскеммы бере ик, гуртын ужасьёслэн праздниксы дыръя, милемды куинь нуналлы келязы Шаркан ёросэ. Пӧламы вал Геннадий Венедиктов но. Кыӵе кырӟаз со "Нэнӥелы" кырӟанэз! Сцена вылысь васькыса, залысь мӧйы нылкышноос пӧлысь я огезлэсь, я мукетызлэсь киоссэс кутыса, синмазы ик учкыса кырӟа. Соосыз нош синвуасько. Ми но паймеменымы, кулисаос сьӧрысь потыса, сцена вылын огшоры учкисьёс сямен сылӥськом. Малы ке шуоно, Гена сценаез, интыысьтыз воштыса, сьӧраз, залэ нуиз. Егор Егорович Загребин соку шуиз: - Гениальной, гениальной артист! Туж чебер тенор куараез ӵем гинэ чузъяськылӥз - туж яратэ вал кырӟаны. Нош кӧня чебер, вунонтэм образъёс кылдытъяз сцена вылын! "Кезьыт ошмес" трагедиын возьматӥз Сельпонэз, "Сюан" комедиын - Макарез, "Сюлэм куара" спектакльын - Синцовез, "Сьӧлыктэм сьӧлык" спектакльын - сержантэз, "Эмезь кисьмаку" комедиын - Шуркаез, "Яратэ - уг яраты" спектакльын - Матай Петырез, "Юсьёс ке кошко" спектакльын - Веняез, "Эш-Тэрек" трагедиын - Вежэез. Ноку ӧз возьдаськылы серемесэ кылёнлэсь. Кузесь векчиесь пыдъёсыз но образъёссэ кылдытъяны юрттылӥзы. Нош кыӵе шумпоттылӥз со пиналъёсты пӧртэм выжыкылъёсын! "Жили-были две лисички" выжыкылын шудӥз Рыжиклэсь но Сморчоклэсь рольёссэс, "Тайны лесного царства" выжыкылын - Шариклэсь но Котлэсь, "Кызьы Табышен Анника Вумуртэз вормизы" - Вумуртлэсь, "Кто царевну поцелует", "Анчутка" выжыкылъёсын - Султанлэсь, Лешийлэсь... Шат ваньзэ вераса быдтод? Геннадий котькуд героез пушкы йырпыдэскысеныз пыдтышкозяз пырыны быгатылӥз. Геннадийлэн сюлэмыз но, малпанъёсыз но чебересь вал. Сое ӧз "курадӟытылэ" мукетъёсызлэн ваньбурзы яке куанерлыксы, быгатонлыксы яке быгатымтэзы, дӥсьсы яке сямзы. Мукет адямиослэсь шексэс ӧз утчалля, ассэ нокинэн ӧз ӵошатылы. Макем яратӥз анайзэ, Елизавета Петровнаез! Шораз матушка шуыса вазиськылӥз. Ноку ӧз куректылы, коньдон ӧвӧлысь: я телефон, я час тупатъяны пуксьылӥз. Ас киосыныз будэтэм, сылалтэм огречен, картошкаен вузкарылӥз. Сиён-юонэз нош со ым вырытон шуоз вал. Тодам ваисько: нырысьсэ одӥг комнатаен квартира сётӥзы. Ӵапак вордскем нуналы тупаз. Гена шуэ: - Риммусь, мынам туж лыктэме потэ вордӥськем нуналад. - Лыкты, - шуисько, - но мынам калык радъя ӝӧке но ӧвӧл на. Тахта вылын пуконо луоз, нош ӝӧкмы луозы пичиесь пуконъёс. - Куноянэд ке но ӧз луы, ӵок, мон лыкто. Женяеныд лабыртом. Нош ваем со мыным туж дуно кузьым - электроплитка. Паймыса юасько: - Гена, ма, кызьы тодӥд мынэсьтым малпанме? - Э-э, мон тодӥсько угось, мар кулэ актрисалы. Туж бадӟым но дуно вал со кузьым мон понна. Тани дас вить арлэсь ятыр ини сюдэ, секта, нош кезьыт дыръя шунтэ. Быдӟым Инмар-Куазь нокинэ но, номыре но юнме уг кылдыты. Дунне вылын котькуд будослэн, нымы-кибылэн, пӧйшурлэн, адямилэн интыез но, пытьыез но аслаз. Геннадий Венедиктов но туж паймымон, нокинэн ӵошатонтэм пытьызэ кельтӥз музъем вылэ, учкись калык пӧлы, театре. Кыӵе валантэм вал котырысьтыз калыклы, озьы ик валантэм пальпотонэн кошкиз дорысьтымы. Мае асьмеос ӧм валалэ?!. Римма НИКОЛАЕВА, Драмая удмурт кун театрысь актриса. * "Яратэ - уг яраты" спектакльысь суред. Матай Петыр - артист Геннадий ВЕНЕДИКТОВ, Васёна - артистка Валентина БЕКМАНОВА. Удмурт Республикалэсь вылӥ кивалтӥсьсэ кызьы ниман пумысен калык пӧлын юалляськонлы йылпумъянъёс сярысь Удмурт Республикаысь Кун Кенешлэн постановлениез Республикалэсь вылӥ кивалтӥсьсэ кызьы ниман сярысь калык пӧлын 1999-тӥ арын 19-тӥ декабре юалляськон ортчытэмен валче, Удмурт Республикалэн Законэзлэсь 1-тӥ ёзэтсэ но 3-тӥ ёзэтысьтыз 4-тӥ люкетсэ лыдэ басьтыса, Удмурт Республикаысь Кун Кенеш пуктэ: 1. Удмурт Республикаысь Быръёнъя комиссилэн тӧроезлэсь республикалэсь вылӥ кивалтӥсьсэ кызьы ниман пумысен юалляськонлы йылпумъянъёс сярысь ивортонзэ лыдэ басьтоно. 2. Конституциез дасясь комиссилы Удмурт Республикалэн Конституцияз воштонъёс но ватсанъёс пыртон бордын ужакуз лыдэ басьтоно республикалэсь вылӥ кивалтӥсьсэ "Удмурт Республикалэн Президентэз" шуыса ниманэз. 3. Та постановление кужыме пыре сое кутэм дырысен. Удмурт Республикаысь Кун Кенешлэн Тӧроез А. А. Волков. Куке-соку берло кырӟалод ни... Котькуд сӥзьыл сямен ик 1972-тӥ арын но городъёсты ыстӥзы гуртлы юрттыны. "Советской Удмуртия" газетысь, пе, одӥг муртэ кык арнялы ыстоно Дэри (Завьялово) ёросысь Диньтэме. Туала вакытэ валасько ни: городысь организациос бусые келяллязы кулэтэмъёссэгес адямиосты. Кинтэк луэ урок нуыны, спектакль пуктыны, газет печатланы. Нош соку Ижысь кошкиськод вал лӧптыса: кытын ке тонэ витё, кулэ каро, дунъяло. Печатья юртысен Диньтэме ми вуим кык кузя - мон но "Удмуртиысь комсомолец" газетысь суредась Леонид Прозоров. Кызё муртэ, пиосты но кышноосты, улыны каръязы одӥгаз кузётэм корка. Выж вылын - вӧлдэм куро. Шобрет - аслад ужан дӥсед. Ярам, соку куазь шуныт вал. Ӵуказеяз милемды азбаре строе сямен султытӥзы. Унтер выллем бригадир черектӥз: - Кин гуртын будэмын? - Малы? - Мон! - азьпала тэтчиз Лёня. Мон бордаз кариськи. - Валэн ужалоды! - вуиз приказ. Сиес тӥрлык утчамы нуназеёзь. Собере дас кирпичез уробое понӥм но склад дорысен васькытӥм фермае. Татын воргоронъёс из юбоосты вошъяло. Выж улысь цемент люкез утялтоно, пе. Сое ломен но кырыжтыны уг луы ни. Лёня кыӵе ке муг шедьтыса чальтчиз. Мон, йӧнтэм солдат Иван Чонкин музэн, гурт кузя ӝытозь ворттылӥ ачим кадь ик дыг коблаен. Сое озьы дышетӥллям: уд ке матькетӥськы, интыысьтыз уг вырӟы. Мынам кыл тӥрлыкам йӧнтэм кылъёс ӧвӧл, сюлое ӧвӧл. Портысь грузчик кадь жуммыса бертӥ кӧлонни шуонамы. Учкисько - тымет дурын сылӥсь юртмы борды бадӟымос пул шуккемын. Вылаз гожтэмын: отель "Бристоль". Лёня берга юртъер котыртӥ. Юасько: - Мар со сыӵе "Бристоль"? - Ӧйтӧд. Туннэ но, Стивенсонлэсь "Узырлыкен шормуӵ" повестьсэ олокӧня пол лыдӟыса, отысь "Бристоль" нимо отель сярысь тодыса, мон уг ятвылтӥськы: кин суредаз вал со пулэз. Лёнялэсь весь юаны малпаса улӥ. Куамын ар ӵоже дас секунд ӧй шедьты. Озьы ик быдэсмытэк кылиз мукетыз малпан. Селталан потӥсь газетысь лыдӟи дано кышномуртлы сӥзем кӧня ке чурез. 20-тӥ-30-тӥ аръёсы партия сое ысъялляз пӧртэм ёросъёсы (районъёсы). Нылкышно ветлэм Москвае, пумиськылэм Надежда Крупскаяен. Сыӵе тодмо адями - Леонид Прозоровлэн анаез. Кӧня пол Лёняез чортылӥ: ойдо ветлом Селтала, туж гожтэме потэ анаед сярысь. Ӵошен потанмес ялан берлолы кельтылӥз. Нош огнам мыныны малы ке ӧз лэзьы: тон отын анайме кышкатод, пе. Кемалась ӧвӧл ни югыт дуннеын Крупскаяез адӟылэм кышномурт. Ӧвӧл ни Лёня Прозоров. Редакциын суредась - аспӧртэм адями. Компьютеръёс ӧвӧл дыръя сотэк одӥг газет но ӧз вордскылы. Одӥг отдел но, одӥг гожъясь но сотэк улыны ӧз быгаты. Асьсэлэсь сыӵе пӧртэмлыксэс шӧдыса, вылды, "Удмурт дуннеын" мон дыръя ужам ньыль суредасьёс нимазыгес улӥзы. Коӵышъёс пӧлын балян выллем шуод-а, мар-а? Верано кылзэс но куддыръя пушказы кельтылӥзы. Огпол, сюлэмыз шуг дыръя, Лёня мыным шуэ: - Мон адӟисько ук, кызьы тӥ учкиськоды мон кадьёс шоры. - Кинъёс - ми? Кызьы учкиськом? - Тӥ - кивалтӥсьёс, вобщем - журналистъёс. Юмша, пе, татӥ кыӵе ке художник, нокинлы кулэтэм адями. Со янгыша шуыса, кызьы гинэ валэкытын ӧй выры - падиез ӧйлась. Шонер-а лыдъяз, умойтэм-а - ас гожез вылысь ӧз кожа. Одӥгзэ Лёня шонер пусйиз: ми соин ноку но матын ӧй вал. Огъёзъёсгес, кызь вить арлэсь кема артэ ужам, но... Кыкмылэн ик огкадь сяммы вал: муртъёс борды секытэн дышиськом. Солы куддыръя ачиз инкуазь но люкетылӥз кадь. Огпол, редакциысь кышноосты 8-тӥ мартэн ӟечкылакумы, Лёня шӧдтэк шорысь огназ кырӟаны ӧдъяз. Куараез укно пиялаосты ик зуркатэ. Нырысь ваньмы бакомим. Собере, киосмес чабыса, вӧлдэтэз ӧжыт ӧм куашкатэ. Макем ичи тодӥськомы вылэм эшмес. Удмурт пединститутын суредасе дышетскыкуз, со ветлэм Удмурт телевиденилэн но радиолэн хоразы. Музыкая яке культурая училище бере но отчы шедьыны шуг. Нош нотаосты чик валасьтэм Прозоров ӵем "сӥс" пыр кызьы ке потэм но хоре интыяськем. Репетициын бускельёссэ кылзэ но соосъя ик нёжъя. Эн паймелэ: огез пельыз секытгес вал. Дано адями вӧзын мукетызлэн но ворекъямез потэ. Арлы огпол мон баян кутылӥсько бере, огпол дэмласько: - Ойдо лыдӟисьёсын пумиськонын сцена вылэ ӵошен потом. Мон шудо, тон кырӟалод. Мылкыдтэк ке но, соглаш кариськиз. Репетици нерге радъям. Огзэ кырӟанэз эскериськом, мукетсэ, куинетӥзэ - верблюдэз но слонэз одӥг кыткетэ думем кадь пӧрме. Мон асме тышкаськисько, Лёня ассэ пыкылэ. Оло, огмылы огмы матысь эшъёс луымтэенымы номыр уг пӧрмы? Шахматэн но тани кыкнамылэн кыкетӥ разряд, кыкнамы быгатом, дыр, редакцилэн чемпионэз луыны, нош куспамы ноку но ум шӧдӥське. Озьы ик кырӟанэн но одӥг гердэ ӧм биниське. Огпол дорамы ӧтим Геннадий Бекмановез. Лёня нёръям улсын со но баянзэ золтэ. Абдраз: - Тынад чебер кырӟамедлы тупась куараос баянын ӧвӧл. Тӥни малы Прозоров котьку огназ кырӟалляз. Баян но, гитара но, музон адями но бордаз ӧз итӥськылы (Леонид Данилов сяна). Котькин тодылӥз: таӵе куара огназ, нимаз, номырин ӵошатонтэм но сурантэм маке. 1998-тӥ арын октябре "Удмурт дунне" пусйиз 80 ар тырмемзэ. Солы дасяськыкумы, тодмо режиссёрен Валерий Митрофановен кенешим: палэнысь трос артистъёсты ум ӧте но возьматом: редакциын талантъёсмы ужало. Вань ук эктӥсьёсмы, верос но кылбур лыдӟисьёсмы. Нош кырӟан ласянь Прозоровмы ваньзэс абдратоз ай. Быдэс ӝыт ӵоже Лёня сылӥз сцена урдсын. Киоссэ посэ, солань-талань ветлэ. Ымнырыз я ӟаректэ, я ӵыжектэ. Нош ӟечкыласьёслэн пумзы но йылзы ӧвӧл. Куинь час курадӟеммы бере Лёнялы вази: - Номыр уг пӧрмы, Алексеич. Куке-соку берло кырӟалод ни... Трос пол кырӟалод на... Улон кузь ай... Берло куинь кылэз оло верай, оло ӧй. Оло, али гинэ озьы потэ: верай. Кин тодэ... Трос пол кырӟалод ай... Улон кузь ай... Нош кырӟаны со зэмен ик малпаса улӥз берло толэзёзяз. Огпол мынэсьтым юа: - Мар со секунда? Ма, сазь-а, ӧвӧл-а та? - Мар со секста?- ас гозызэ пунэ. Учкисько но - нотаосты дышетэ. Малы? Али малпаськисько: йырыз соку тэк улыны маза ӧз сёты. Суредан удысын люкыт ке, бакчаяз дыртэ. Кыӵе со суредась но бакча кузё вал - эшъёсыз мадёзы. Ас вакытаз ассэ возьматӥз: шахматын но, волейболын но, велосипедэн ворттылонын но. Олокӧня пол пумиськылӥм куас сюрес вылын. Я синтэм-пельтэм ворттылэ, я, ышыг интые кариськыса, часъёсын чакла инкуазез. Куддыръя суреда. Уже потэ ке, милемлы часъёсын маде стадионын бызьылэмез сярысь, секыт макеосты ӝутъямез сярысь, кезьыт вуэн гылъяськемез сярысь. Берло толэзьёсы дышетскиз пыргытэм пияла вылын эктыны. Жаляса верано луэ: дырын-дырын пуромылӥсь висёнзэ Лёнямы таки пумозяз вормыны ӧз быгаты. Ачиз но сое валатэк ӧз кыльы. Часъёсын кенешылӥм асэныз но кышноеныз. Вераку эмъяськыны соглаш кариське, отӥяз... Кулон азяз кельтэм гожтэтаз нырысь ик пусъем вылэм висёнэз сярысь. Лёнялэсь ӵош ужам эшъёссэ но, кивалтӥсьёссэ но, семьяоссэ но куд-огез пыкылыны выре: тӥ солы тырмыт саклык ӧд висъялэ но ужаны-улыны осконзэ быдтӥды. Сыӵе лек кылъёсын пичияк зэмез вань, вылды. Озьы кошке ни бугырес даурмы - малпаськом: асьмеос но, мукетъёсыз но весяк улозы. Жаляськом шуныт кылмес. Берлолы кельтӥськом кырӟамтэ кырӟанмес. Укыр трос ласянь Леонид Прозоров таланто вал. Нош сыӵе узырлык уг вайы, пе, буйгатскон мылкыд. Оло, инмарлэн жалятэк сётэм кузьымез зэмен ик шуд уг сёты? Туэ сӥзьыл Леонид Прозоров ветлӥз больницае, койкаын кыллись Михаил Калашников доры. Туж усто суред лэсьтӥз. Вера Михаил Тимофеевичез эмъясь врач Лариса Тройникова: - Адӟылӥ тӥлесьтыд суредасьтэс. Огезлы врачмылы шуэм: дано адямиосты суредан художниклэсь сомында кужымзэ кыске - со кулыны но быгатоз. Та учыр вал сентябрьлэн пумаз. Леонид Прозоров кык толэзь но ӧз улы ни. АЛЕКСЕЙ ШКЛЯЕВ. Кык музалэн ляльчиез Дышем сямъя уже вуисько вазьгес. Редакциын чал-чал. Кабинет ӧсэз усьтыку, син азям султэ Лёня Прозоров. Умой-умой учкисько, нокин ӧвӧл. Собере тодэ лыктэ: Лёня бергес вуоз ай (ӵукнаосы со ӧз дыртылы, нош ужалляз бер ӝытозь). Укно вадьсын буш ӝӧк но пукон. Буш но уд шуы, ӝӧк вылын пӧртэм кагаз, суредаськон арбери, буёлъёс. Ваньмыз Лёнялэн бервылыз возиське исатэк. Тани пукси интыям, выльысь учкисько ӝӧк пала. Валатски, кӧняетӥзэ ни, уз лыкты ни татчы Лёня, уг кылы ни солэсь гудыртэм куаразэ, уг шӧдылы ни чиньыосыз пызьыртӥсь кужмо ки кырмемзэ. Озьы кылдӥз, берло кык арзэ Леонид Алексеевичен огазьын пуким. Ӧм даллашылэ кадь. Кылмы тупа вал. Мар кельше вал мыным, Лёня ӧз бадӟымъяськылы, ассэ дано художникен ӧз лыдъялля, лэсьтэм ужзэ, мукетъёс сярысь, ачиз улӥгес дунъялляз. Суредэз лябгес пӧрмыку, со туж куректылӥз, весь юалоз вал, мар веразы планёркаын соиз яке таиз ужез пумысен. Ушъякузы йырыз ӧз поромылы, мукет дыръя эшшо ӟечгес лэсьтыны тыршылӥз. Лёня яратэ вал кырӟаны, тужгес но классикае пырем гуръёсты. Солэн кужмо куараеныз редакциысь укноос ик жингыр-р! вазьылӥзы. Таӵе дыре ми тодӥськом ни вал, Лёнялэн ваньмыз умой, милям но мылкыдмы ӝутскылӥз. Одӥг пол со чылкак паймытӥз. Кабинетамы пыриз тодмо мӧйы журналист Леонид Данилов. Прозоров сое суредано кариськиз. Леонид Никандрович интыяськиз, художник но кияз ватман бумага но карандаш басьтӥз. Мон ас ужъёсыным вырисько, соос маке куспазы лабырто. Но тани мӧйыез воргорон кыӵе ке гур нёжтӥз. Солэн куараез вӧзы ватсаськиз Прозоровлэн басэз. Кыӵе гур, валаны уг быгатӥськы, но кылылэме вань. Кык кужмо чебер куараос, ог-огзылэсь пӧртэмесь, ваче огазеяськыса, зарезьысь тулкым кадь кабинет борддоръёсы шуккисько. Учкисько шоразы. Кыксылэн но синъёссы ӝуало, ӵыжектӥллям, бам чокориоссы солань-талань бызьыло. Пушказы шуак омырез кыскыса, я лек ош кадь бурсо, я куаразы жильыртӥсь ошмес ву кадь каллен веттаське. Суредаськонзэ вунэтыса, Лёня вань мылкыдыныз кырӟанлэн ӧраз выиз. Мон, чылкак паймыса, синъёсме вошъятэк шоразы учки, кылзӥ та мудрон чебер гурез. Бератаз юатэк ӧй чида, кызьы озьы мӧйы журналист кырӟаны быгатэ. Тодӥ, консерваториын, пе, дышетскем. Операосысь кырӟан люкетъёсты Лёнялэсь кылылэме вал ини. Но кык ӵошен кырӟамзы тужгес но сюлмам биниськиз. Табере Римский-Корсаковлэн "Садко" операезлэсь гурзэ мон улытозям уг вунэты. Весь пель сьӧрам чузъяське. Г. ЮСАЕВ. 2000-тӥ арозь кылиз 23 нунал Выль ар. Кузьымъёс, бадӟым-бадӟым вож кыз, мандаринлэн вӧлскем зыныз... Мон та выль арме самой шулдыр ортчытыны тыршо. Эсьмаса, пичияк сценарий но дасяй ини. Ӧтё матысь эшъёсме. Пӧртэм пумо тумошо дӥсьёсын дӥсяськомы, шампанской юомы, шулдыръяськомы, дискотекае потомы. Мынам таиз арлы туж бадӟым малпанъёсы, но Тол Бабай соосты ӧз ке быдэсты кӧтме ӝож каро. Эшъёсы нош кызьы Выль арез пумитаны дасясько меда? Кин огшоры. Юалляськыса тодӥ: кин гажанэныз, кин юыса, кин кӧлыса. Огез эше малпа Выль арез москваын пумитаны. Мукетызлэн шулдыръяськон сярысь малпаськыны дырыз ӧвӧл ай - сессия. Огез вань тодмоосызлы кузьым дасям ини, мукетыз кисыосыз борды кырмиськыса улэ на. Нош тӥ малпады ни-а, кызьы дано 200-тӥ арез пумитаны? Оло, вань туж но туж тунсыко малпанъёсты. Озьы ке, ивортэ милемлы али ик. Тужгес тунсыко малпанлы - редакцилэсь кузьым. О.Никитина. ДАРТ ЕГИТ КУАРАОС Выль даурлэсь кышкан Нош ныр вылын - ХХИ даур. Мар вите асьмемыз азьланяз? Оло 2000-тӥ ар - улонмылэн пумыз? Ма умойзэ выль дауре выжтоно, нош мае вужаз кельтоно? Трос юанъёс йырын бергало. Куддыръя кышкано но вуоноезлэсь, кутысал но дугдытысал кадь дырез. Нош куд- огъёсыз та ужпумез мукет сямен сэртто-пертчо. Куто но асьсэлэсь йырзэс быдто. Зэм, зэм. Психологъёс валэкто, ЪЪИ даур вуэмъя, куд-ог адямиос ӵемысь асьсэдыс быдтон сярысь малпаськыло. Та ласянь тужгес но паймытэ Америка. Шуркынмонлэн берпуметӥ арняосаз отын уно гинэ йырбыдтон ужъёс шараямын вал. "Тросэзлэн таӵе учыръёслэн мугзы одӥг, - валэкто пӧртэм удысысь специалистъёс. - Ар пумын радио, телевидение но газетъёс пыр бадӟым саклык висъяське вуись даурлы. Котькуд адями тае пӧртэм сямен вала. Кин выль вакытын улыны кылдоз шуыса шумпотэ, нош мукетыз солэсь кышка, куддыр улонлэсь люкиськон сярысь малпаськыны кутске. Тодады вае ай, оло, тӥ но асьтэдыз быдтон сярысь малпаськиды, угось котькуд адямилэн йыраз таӵе малпанъёс чилектыло. 5 процентэз малпанзэс быдэсто. Вераны кулэ, пиосмуртъёс, кышномуртъёсын ӵошатыса, ньыль поллы тросгес асьсэды быдто. Кышномуртъёс пӧлын асьсэды быдтон сярысь малпанэн улӥсьёс сизьым поллы тросгес ке но, малпанзэс зэмато 5 процентэз. Специалистъёслэн чакламзыя, йырбыдтон ужъёсъя быдэс дуннеын нырысь интыын сылэ Германия. Татын ар куспын 100 000 адями пӧлысь 60-эз улонзылэсь таӵе "амалэн" люкиськыны мылкыд каре. Осконтэм, угось немецъёс асьмелэсь умойгес уло. Ул но ул гинэ кадь. Россиын шуркынмон толэзе таӵе муген одӥг адями сопал дуннее кошкон калэ вуэм. Л.Никитина. Удмурт университетысь студентка. ЭСКЕРОМ КАЛЫКЕН Йыр яке президент - кинлы оском? Та ужпум сярысь малпаськыса, нош но нош тодэ лыкто мудрон законъёс. Огез соос пӧлысь таӵе: история, пе, спираль сямен котыръяськыса азинске. Зэмзэ ик, вить ар талэсь азьло республикаямы президентлэсь постсэ юнматон сярысь вераськон ӝутскылӥз ни. Со понна дасямын вал Конституцилэн выль инъетэз но. Но Вылӥ Кенешысь депутатъёс солы пумит луизы. Озьы калыклы эскерыны ӵектэмын вал мукет инъет, кудӥзъя Удмуртиын тупатӥське вал парламентэн республика. Тӥни озьы 1994-тӥ арын 7-тӥ декабре Удмуртия выль Конституциезъя улыны кутскиз. Малы бен вить ар ортчыса, республикамы выльысь та ужпум борды берытске? Кызьы тодмо ини, туэ 19-тӥ декабре, Кун Думае быръёнъёсын ӵош асьме калык таӵе юанлы валэктон сётыны кулэ: "Кызьы нимано республикамылэсь вылӥ должностен адямизэ: республикамылэн йырыз яке президентэз?" Та ужпумъя югдурез валэктыны мылкыд кариз Кун Кенешысь Правоя управленилэн кивалтӥсез юрист К.А.ГЛУХИХ. - Константин Андреевич, кыӵе муген калык пӧлын сыӵе юалляськон ортчытоно? - Туэ 19-тӥ октябре Президентлэн юнматэм законэзъя Россилэн вань улосвылъёсаз огкадь кивалтон амал тупатӥськыны кулэ. Мукет сямен вераса, законъёсты быдэсъясь ёзэн (правительствоен) табере котькытын одӥг мурт - вылӥ должностен адями кивалтыны кулэ. Жаляса верано, Удмуртилэн Конституциезъя вылӥ должностен адями асьмелэн кивалтэ Законъёсты кутӥсь ёзэн (Кун Кенешен). Собере асьме Законын верамын но ӧвӧл, кин со сыӵе вылӥ должностен адями, республикаямы нимаз адями кивалтэ Кун Кенешен, нимаз адями - Правительствоен. Тӥни озьы Президентлэн законэзъя Удмуртилэн но Россилэн Конституциоссы ог-огзылы тупамон луыны кулэ. Нырысь ик али Конституцие ватсан пыртоно вылӥ должностен адямилэн нимыз сярысь. - Кӧня дыр кулэ луоз Удмуртилэн Конституциез бордын ужан понна? - Законлэн потэмез дырысен (1999-тӥ арын 19-тӥ октябрьысен) кык ар учкемын. Озьыен, 2001-тӥ арын 19-тӥ октябрёзь республикмылэн Вылӥ Законэз воштэмын луыны кулэ. Нош со дырозь калыклэсь мылкыдзэ тодоно вылӥ кивалтӥсез кызьы ниман пумысен но Конституция бордын ужась комиссия кылдытоно. Комиссия ватсанъёс но воштонъёс пыртон бордын ужа ини, та ужез йылпумъяно 2000-тӥ арын нырысетӥ маёзь. - Шуом, калык мылкыдзэ вералоз. Нош кызьы Конституцие юнматэмын луоз вылӥ должностен адямилэн нимыз? - Со понна кык сюрес вань: Конституцие пыртыны чаклам воштонъёсты, нимез вераса но, юнматыны луэ яке референдумын, яке Кун Кенешлэн сессияз. - Тӥ кыӵе сюрес понна? - Мыным умойгес потэ калыкен кенешыса, мукет сямен вераса, референдум ортчытыса. - Нош асьтэос тӥ кызьы нимасалды республикамылэсь вылӥ кивалтӥсьсэ? - Мон президент шуон понна. Таӵе малпанэ вуисько, мукет республикаос шоры учкыса но. Туннэ Россия Федерацие 21 республика пыре. Со пӧлысь 13-яз президентъёс кивалто. Отчы пыро Бурятия, Ингушетия, Кабардино-Балкария, Калмыкия, Северной Осетия - Алания, Татарстан, Адыгея, Башкортостан, Марий Эл, Саха (Якутия), Тыва, Чечня, Чувашия. Куиняз республикаосын - Коми, Мордовия, Карачаево-Черкесия но Алтай улосын - йыр кивалтэ, кыказ - Карелиын но Хакассиын - правительствоослэн тӧрооссы, эшшо кыказ - Удмуртиын но Дагестанын - Кун Кенешлэн тӧрооссы. Собере тазьы но малпасько: президентлэн нимыныз капчигес кусыпъёс тупатыны Россиен, уката ик кыӵе ке огкылъёс гожтыку, бюджет ужпумъёсты эскерыку. Президентъёс Москва азьын но асьсэды кышкасьтэмгес, эрикогес возё. Озьы, кылсярысь, вераны луэ Татарстан, Башкортостан сярысь. Я бен, аслэсьтым малпанме мон нокинлы кужмысь уг чуртнаськы. 19-тӥ декабре вылӥ кивалтӥсьмылэсь нимзэ ачиз калык быръёз. - Мон тазьы валай: адямиос котькызьы мед нималозы вылӥ кивалтӥсез (йыр яке президент), берлань, парламент республикае, асьмеос ум ни берытске? - Зэм, Президентлэн аконэзъя быдэс Россиын одӥг кивалтон амал тупатӥськоз - правительствоен кивалтыны кулэ вылӥ должностен адями. Тросэз республикаос та сюрестӥ мыно. Кивалтон амалэз воштон - со туж секыт уж. Со бӧрсьы пумен воштоно луоз кивалтон ёзъёслэсь полномочиоссэс но. - Зэмзэ ке верано, асьме калыклы пыӵатэмын ни вал валан, со парламент республикаын улэ шуыса. Маин бен ӟечгес луоз калыклы, республикаен одӥг вылӥ адями кивалтӥз ке? - Куке быдэс странаын секыт югдур, куашкамын экономика, уг ужало улон-вылонэз утись удысъёс, соку туж кулэ кужмо быдэсъясь власть (правительство). Парламент амалэн кивалтон тупа соку, куке странаын ваньмыз радъямын ини, куке адямилэсь кивалтэмзэ нокин уг но шӧды ни кадь. Кылсярысь, Италия - парламент республика, отын туж ӵем вошъяськыло премьер-министръёс, но страналэн улонэзлы со нокыӵе кышкытлык уг кылдыты. - Тӥ луиськоды на Конституцие воштонъёс пыртонъя комиссилэн секретарез. Кыӵе воштонъёс пыртэмын луозы на асьме Конституцие сое Россилэн Конституциезлы матэ карон понна? - Федеральной Законлы тупамтэос асьме Конституциын туж трос. Кылсярысь, Удмуртилэн Конституциезъя кун власте судъёс но пыртэмын. Нош Россилэн Конституциезъя соос пырыны кулэ федеральной судъёсы. Соин ик котькуд судьяез Президент гинэ юнматыны кулэ. - Удмуртилэн Конституциез трос тупатъямын луиз ке, уз сюбега-а республикамылэн суверенитетэз? Воштӥськозы-а адямиослэн правооссы? - Удмуртия суверенной государство ӧвӧл, со пыре Россия Федерацие. Соин ик ми но улыны кулэ Россилэн Конституциезъя. Но со уг вера, республикамы зӥбемын луоз шуыса. Правоос сярысь ке верано, Федерацилэн субъектъёсыз асьсэос быгато гражданъёссылэсь правооссэс паськытатыны. Озьыен, адямиослэн правоосы утемын луозы. Комиссилэн нокыӵе кужымез ӧвӧл Конституциын ялэм правоосты сюбегатыны, нош соосты быдэстон понна паськытгес луонлыкъёс (гарантиос) ӵектыны комиссия быгатэ. Россилэн улоназ Конституциос трос гинэ кутылэмын ни вал. Ваньзы соос страналэн ортчем вакытъёсызлы кыӵе ке но йылпумъянъёс лэсьтылӥзы. Сталинлэн Конституциезъя социализм лэсьтӥм, Брежневлэнэзъя - азинлыко социализм тупатӥм, нош берлоезъя, 1994- тӥ арын 12-тӥ декабре кутэмезъя, рынокен экономикае выжим. Али вераськонъёс ветло ни Россилэсь Конституцизэ выльысь воштон сярысь. Со, пе, юри одӥг адями понна гинэ гожтэмын вал, соин ик Президентлы укыр трос власть сётэмын. Зэмзэ ик, улон воштӥськемъя, кык ар куспын, Удмуртилэн гинэ уз, Россилэн но Вылӥ Законэз выльдӥськыны быгатоз. Кыӵе улонлы соку сюрес усьтӥськоз? Берлань социализмлы? Озьы уз луы ни, дыр. Капитализмлы? Яке эшшо кыӵе ке выль сюреслы кутскон сётоз Россия? Кин тодэ. Нош осконо ке историлэн котыръяськыса азинскемезлы, оло, асьмелы, зэмзэ ик, капитализме выжоно, выльысь социализме берытскон понна? Тӥни сыӵе малпанъёс лыкто йыре Россилэсь берло Конституцизэ кутон нунал азьын. Т.Банникова. Журналистъёсын пумиськонъёс Николай Сапожников: "Парламент ужаз калык понна" Кылем понедельнике журналистъёсын пумиськылӥз Россия Федерациысь Кун Думалэн кыкетӥ созывезлэн депутатэз Н. И. САПОЖНИКОВ. Николай Ивановичлэн веранэз пӧрмиз аспӧртэмлыко отчётлы. Вакчияк. Н. И. Сапожников вордскемын 1949-тӥ арын. Ужан сюрессэ мытӥз 1968-тӥ арын. Кызь арзэ сӥзиз обороная промышленностьлы: Ижевскысь радиозаводын технологысен кутскыса, Воткинскысь РТО-лэн директорез дорозь. 1990-тӥ арын Николай Ивановичез быръё партилэн Удмурт обкомезлы нырысетӥ секретаре. КПСС-эз пытсамзы бере, нырысетӥ секретарьлэсь ужзэ нуэ общественной амалэн. Кун Думае бырйытозь ужаз Россиысь Наукаосъя академилэн Уралысь экономикая институтаз. Отличиен йылпумъяз куинь дышетскон заведениез: Ижевскысь индустриальной техникумез, Ижевскысь механической институтэз но Общественной наукаосъя академиез. Экономической наукаосъя кандидат, ньыльдонлэсь ятыр научной ужъёслэн авторзы. Соос сӥземын промышленной политикалы, военно-промышленной комплексысь конверсилы, химия ож тӥрлыклэсь куштӥськонлы но хозяйство удысысь экономикаез радъянлы. Пусъемын Калыкъёслэн эшъяськонзы орденэн но кык медален. Н. И. Сапожников - Удмурт Республикаысь сӥё-дано экономист. - Кылем пятницае, 3-тӥ декабре, ортчиз Кун Думалэн берпуметӥ заседаниез, но депутатъёс ньыль ар ӵоже ужамзылы йылпумъянъёс лэсьтыны люкаськылозы на 24-тӥ декабре, быръёнъёс ортчем бере. Нош 17-тӥ январе нырысьсэ кенешозы ни Кун Думалэн куинетӥ созываз быръем депутатъёс. Берло куинь арнязэ тужгес но секыт вал: уен- нуналэн мынӥз вуоно арлы бюджетэз эскерон. Ньыль толэзь куспын гинэ отчы пыртэмын вал 4 сюрс пала тупатонъёс но ватсанъёс. Мон сётӥ 11 ӵектон, соос пӧлысь 8-эз кутэмын. Кун Думаен берло нуналъёсаз юнматэмын на 150 закон, огез герӟаськемын самой ичи уждунэз 200 манетозь будэтонэн. Депутат нимысьтыз вераз иворъёсты вӧлмытонъя куд-ог ёзъёслэн Кун Думалэсь ужзэ юри мыдланьтыса возьматыны выремзы сярысь. - Та уж малпаса нуиське, парламентэз быдтон понна,- пусйиз со.- Депутатъёсты котькыӵе амалэн уродэн гинэ возьматыны тыршо. Огласянь, со зэм но. Жириновский, Явлинский яке Боровой кадьёсты Думае бырйим ке, ӧм ке воштэ Президентлэсь туала Конституциен сётэм полномочиоссэ, парламентлэн данэз уз ӝутскы. Но таин ӵош калык мед тодоз: "демократической" Россиын Кун Дума гинэ возьыны тырше на странамылэсь интересъёссэ, нюръяське сое куашкатыны вырисьёслы пумит. Кӧня "ӟечсэ" асьмелы лэсьтыны выризы ни Чубайс, Черномырдин, Кириенко, Немцов, Кох, Степашин но мукетъёсыз. Коммунистъёс-депутатъёс ӧз быгатэ одӥгзэ - Ельцинэз ас ужезлэсь палэнтыны. Милемыз ӵемысь пыкыло, коммунистъёс политикаен выро, законъёсты эскеронлэсь палэнско шуыса. Со шонер ӧвӧл. Данакез валтӥсь законопроектъёс ӵапак кутэмын вал компартилэн депутатъёсыныз. Мон ужай Кун Думалэн экономической политикая комитетаз, ваньзэ лэсьтӥм инвестициосты кысконъя программаез азинтон ласянь. Со быдэсак ужалоз но ужа ни экономикалэсь стратегизэ юнматон бордын. Нимысьтыз инты басьтэ азинсконлэн бюджетэз сярысь закон, отын бадӟым инты висъямын экономикаез ӝутонлы. Таин валче кутэмын на "Лизинг сярысь", "Кунгож сьӧрысь инвестициос сярысь", "Россия Федерациын инвестиция амалэн радъям капитальной вложениос сярысь" Законъёс. Комитетлэн ужаз эскеремын кудӟытӥсь юонъёсты поттонъя но вузанъя законлэн инъетэз. Специалистъёс верамъя, солэн 40-50 процентэз кошке палэнэ, казнае шеде ӝыныез гинэ. Ми ужпум пуктӥм та производствоез быдэсак государство ки улэ выжтон сярысь. Историын сыӵе амал кутӥськиз ни азьвыл но, 16-тӥ даурысен. "Демократъёслэн" эрик сётэмзы узырмытӥз нимаз кузёосты но криминалэз гинэ. Ми талы чутрак пумит, соин ик алкоголен герӟаськем удысъя дасямы пӧртэм пумо законопроектъёс. Соос пӧлысь огез улонэ пыӵа ни: мынэ юон поттӥсь производстволы лицензиос сётон, радъяське винаен вузкарон, выт но акцизъёсты басьтон. Удмуртиысь мукет депутатъёсын ӵош Н. И. Сапожников ужаз "Химической оружиез быдтон сярысь" Федеральной закон бордын. Республикамы понна солэн кулэлыкез уката но бадӟым, малы ке шуоно, Удмуртие интыямын дуннеысь самой кышкыт оружилэн 12 процентэз, Россие люкамезлэн - 30 процентэз. Закон вань луонозэ лэсьтыны кулэ, асьмелэсь калыкмес утён понна. Вакчияк 2000-тӥ арлы бюджет сярысь. Кызьы пусйиз Кун Думалэн депутатэз, КПРФ-лэн фракцияз пырисьёс огкылысь ужазы военнослужащийёслэсь, мӧйыослэсь, нылпиослэсь, вуз поттӥсьёслэсь интересъёссэс утён понна, быгатӥзы ватсаса коньдон висъяны социальной политикаез, наукаез но дышетон удысэз, промышленностез но гуртэз, оборонаез юнматонэ. Шӧдскымон будэтэмын обороная госзаказ, чакламын та удысын люкаськем пунэмаськонъёсты быдтонъя статья. Удмуртия понна со ӟечен берытскыны кулэ. - Депутатлэн ужез законъёсты кутонэн гинэ уг йылпумъяськы,- шуиз Николай Иванович. - Ньыль ар ӵоже ог 400 пол пумиськылӥ аслам бырйисьёсыным, пӧртэм коллективъёсын. 500 пала адями дорам приёме вуылӥз, ог 400 вазиськон басьтӥ гожтэтъёс пыр. Соослы юрттон вылысь, федеральной но республиканской ёзысь кивалтӥсьёслы ыстэмын 600 пала депутатской запрос но вазиськон. Жаляса верано, пӧлысьтызы туж ӧжытэз быдэсмиз. Ми малпамъя, чиновникъёслэн тазьы ужамзылы пум поныны кулэ "Гражданъёслэн вазиськонъёссы сярысь" Федеральной Закон, со сётэмын КПРФ ӵектэмъя. Депутатлы ужаны туж юрттэ Россилэн улосвылъёсысьтыз югдурез тодон. Фракцилэн но комитетлэн ужъёссыя мон вуылӥ Башкортостанэ, Карачаево-Черкессие, Чувашие, Архангельск, Ленинград, Нижний Новгород, Пермь, Свердловск областьёсы. Улон-вылон котькытын одӥг кадь, калык жуммемын ни туала "воштӥськонъёслэсь-выльдонъёслэсь". Данакез адямиос ӟечсэ витё президентэз воштон бордысь, оско, парламентэ визьмо депутатъёс шедёзы шуыса. Н. И. Сапожников, вераськонзэ йылпумъяса, валэктонъёс сётӥз журналистъёслэн юанъёссылы. - Тӥ малпамъя, быгатозы-а огкылэ вуыны но кужымзэс огазеяны КПРФ, "Отечество" но "Единство"? - Али тросэз политической блокъёс но партиос огазеяськыны выро, сыӵе луонлыксы вань куинь вылӥ верам огазеяськонъёслэн но. Отысь мон номыр умойтэмзэ уг адӟиськы. - Калык синмаськыса учке Владимир Путинлэн ужамез шоры. Тӥ чакламъя, кема-а кыстӥськоз солэн политической карьераез, яке сое уретӥсьёс шедёзы-а? - Быръёнъёс азьын кыл вӧлдэмын вал, куд-ог кужымъёс, пе, соос радэ пыртӥзы КПРФ-ез но, Путинэз куштыны малпало шуыса. Таӵе вераськонъёс юнме шорысь уг кылдо: "Отечество" но Кремль куспын "ожмаськон" пуромемен, компартия тросгес куара люканы быгатӥз. Тӥни ма кышкатӥз куд-огзэ. Но ми табере котьмалы дышемын ни - 1996- тӥ ар коммунистъёслы ӟеч урок сётӥз. Путин ас удыссэ нуэ, уката но Чечняын югдурез тупатон ласянь. Кун Думаен кылыз тупа. Ма луоз азьланяз - соизэ улон возьматоз. Л. МЕДВЕДЕВА. ДАРТ Мар сюлмаськытэ егит муртэ? Ноябре республикаысьтымы но котыр улосъёсысь, егитъёсын ужанъя специалистъёс "Туала югдурын пиналъёслы но егитъёслы улон-вылонын юрттэт сётонын сюлмаськонъёс" конференцие люкаськылӥзы. Куинь нунал ӵоже та удысысь тужгес но секыт ужпумъёс ӝутэмын вал. Туала обществоын кышкытлык кылдӥз - асьмеос ыштыны быгатом быдэс поколениез. Кызьы солы юрттоно, визьмо но оскымон кивоштӥсьёс будэтоно? Туала пиналъёс уг быгато дырзэс пайдаё ортчытыны, уг валало дышетсконлэсь кулэлыксэ, соин ик аля эрказъяськон, йыртэман, юон но наркотикъёс. Будэмзы бере уг быгато уже интыяськыны, ӟеч семья кылдытыны, сое утьыны. Егитъёслы юрттыны басьтӥсько психологъёс, социологъёс, врачъёс, юристъёс, ваньмон дырез радъясьёс. Но соос сярысь но асьмеос ум тодӥське, яке тодыса но ум вазиськиське - кызьы-озьы тодмотэм муртлы сюлмаськонъёстэ вералод? Сыӵе центръёсы калыклэн мынымтэезлэн кыкетӥ мугез но вань - специалистъёслы асьсэлы дышетсконо на адямиез валаны, котькудӥзлэсь сямэ, пушкужымзэ синйылтыса валче кенешыны. Егитъёсын но быдэ вуымтэосын ужанын куд-ог сюлмаськонъёс сярысь туннэ верало асьсэос специалистъёс. Чебер улэм потонлэсь уд алы Маин тунсыкъясько туала егитъёс, быдэ вуымтэос, улонысь кыӵе дунъетъёсты тужгес но кулэен лыдъяло? Тупало-а соос обществолэн куронъёсызлы? Сыӵе эскеронъёс ортчытӥз Егитъёсын ужанъя кун комитетысь "аналитической бюро". Азьвыл асьмелы шаермес гажан, мукетъёсызлы юрттыны дась луон мылкыд пыӵатъязы ке, али дунъетъёс чылкак воштӥськемын. Егитъёс тросгес малпасько майбыр узыр улон сярысь. Мугез валамон, али туж тросэз ёрмыса уло уго. Вераськон кӧттыр сярысь гинэ уг мыны, табере аслэсьтыд быгатонлыкъёстэ азинтон, дышетскон понна но коньдон кулэ. Тани кызьы люкиськизы юалляськемъёслэн валэктонъёссы: 1. Ӟеч, узыр улон - 30,2 процентэз; 2. Тупаса, войнатэк улон - 29,2 процентэз; 3. Ог-огдэ валаны тыршон - 22 процентэз; 4. Уж - 14,6 процентэз; 5. Ӟеч сюлэмо, жалясь, вазиськись луон - 13,7 процентэз. 6. Калыкен уртче улон - 4,5 процентэз. Валамон туала егитъёслэн войнаостэк улэм потэмзы. Соос ас синмынызы адӟо, ас вылазы шӧдо Чечняез, кышкыт учыръёслэсь бервылъёссэс. Та лыдпус ортчысал, дыр, узыр улэм потонэз, юалляськон туэ сӥзьыл терактъёс ортчем бере ортчытэмын луысал ке. Умоен пусйыны кулэ егитъёслэсь ог-огзэс валаны тыршемзэс, но запад амалъя азинскеммы шӧдӥськытэк уг кыльы коллективын улыны быгатымтэмы вылын. Али котькудӥз нырысь интые ассэ пуктэ - ассэ возьматыны, ассэ ӵектыны, аслыз кыскыны... Куд-огезлэн егитъёсты курламзы потэ: шаермес уг гажало, уг шӧдӥськы со понна нюръяськон мылкыдзы. Со чик но озьы ӧвӧл. Егитъёс туж тунсыкъясько Россиысь югдурен, солэн мукет странаосын кусыпъёсыныз, тросэз верало атай музъемзэс утьыны дась луэмзэс. 49 процентэз данъясько Россилэн историеныз, культураеныз. 37 процентэз чутрак пумит луо Россиысь кошкыны (луонлык кылдыса ке, мукет шаере кошкыны), 36 процентэз егитъёс умоен лыдъяло пӧртэм калыкъёслэсь культуразэс азинтонэз, данъясько асьсэлэн выжыосынызы. Но туж тросэз верало асьсэлэсь государстволы оскымтэзэс. "Россия Федерациысь но Удмурт Республикаысь кивалтӥсьёс уг гажало асьсэлэсь гражданъёссэс, шуизыы 52 процентэз юалляськемъёс. Кызьы адӟиськом, берло 3-5 аръёссэ кызьы ке оглом обществолэн, озьы ик егитъёслэн но улон шоры учконъёссы, дунъетъёссы воштӥськизы. Кризисъёс адямиосты "кыдатӥзы" шуыны луоз - табере соос, государстволэсь юрттэт возьматэк, ас кужымзылы гинэ оско на, ялан пӧсь ӝу вылын кадь улон - тани ӧвӧл, маке луоз. Соин ик егитъёс тыршо асьсэлэсь быгатонлыкъёссэс азинтыны, пӧртэм луонлыкъёсты уже кутыса чаклам ужпумъёссэс быдэсъяны. Но чылкак ыштэмын шуыны уг луы атайёсынымы кусыпъёс, выжыосмес гажан но мукет ӟеч сямъёс. Сётэ милемлы уж! Егитъёслэн ужтэк кылемзы туннэ тужгес но зол сюлмаськытэ. Адямиос коньдонлы ёрмемысьтызы, ваньмон дырзэс кытчы карыны паймемысьтызы йыртэманы кутско, асьсэды быдто. Статистикалэн верамезъя, арысь аре кулэсме калык хозяйствоын ужась егитъёслэн лыдзы. Но государственной луисьтэм интыосын ужась быдэ вуымтэослэн лыдзы йылэ. Сыӵе ЧП-осты возисьёс дунтэм ужась кужымез кыско, пичияк коньдон ӵектыса. Семьяосазы ёрмыса улэмысьтызы, пиналъёс соглаш карисько, секыт ужъёсты быдэсъяло, ултӥямез чидало. Сыӵе ужын, валамон, быгатонлыкъёсты шараян, азинтон, тодон-валанэз будэтон сярысь веранэз ик ӧвӧл ни - тросаз учыръёсы пиналъёс "сьӧд" ужъёсты быдэсъяно луо уго. Югдурез тупатон вылысь, республикаямы кутэмын "Удмурт Республикаысь егитъёсын ужан политика сярысь" Закон. Со вылэ пыкъяськыса, али тыршиськом быдэ вуымтэосты но егитъёсты уже интыяны. Одно ик лыдэ басьтӥсько егит муртлэн правоосыз, гарантиосыз. "Егитъёслэсь ваньмон дырзэс радъян" программая шаерамы кылдытэмын уже интыяськонъя биржаос. Соос пыр егитъёс быгато кыӵе ке специальность басьтыны, уж шедьтыны. Пиналъёс но быдэ вуымтэос ужлы тросгес кулэясько гужем. Но медосмотрлы, транспортлы трос коньдон быремен интыяськыны шуггес луэ. Мултэс кыл кутонлэсь кышкаса, пиналъёсты уже кутэмзы уг поты предприятиослэн. Пиналъёсты но егитъёсты уже интыянэз радъян понна, огкылысь ужаны кулэ государствоен кивалтӥсьёс, уж сётӥсьёс, профсоюзъёс но общественной огазеяськонъёс. Соин ик кулэ: * быдэ вуымтэослэсь ужан доразы правооссэс тӥян, улонзылы кышкытлык кылдытӥсь, законэз тӥяса ужась интыосын ужатэм понна кыл кутытонэз кужмоятыны; * егитъёслы но быдэ вуымтэослы уж ӵектӥсь предприятиослы льготаос тупатыны; * егитъёслы экономика ужпумъёсты асьсэлы сэрттыны-пертчыны луонлык сётонъя нимысьтыз программа дасяно; * будэтоно егитъёсты но быдэ вуымтэосты уже интыянъя нимысьтыз службаослэсь лыдзэс. Кылем арын уже интыянъя службаосы 20320 14-17 аресъем пиналъёс вазиськылӥллям. Я, кин шуоз, туала пиналъёс азьтэм будо? Визьлюк Улонысь кошкиз мынам зэмос эше - Леонид Прозоров. Тросэз герӟалляз милемыз пичи дыръямы ик. Анайёсмы но эшъяськылӥзы. Нош бадӟым агае но солэн бадӟым апаез ог-огзэс сюлмысь яратылӥзы. Лёняен ӟечгес тодматски, пионеръёслэн юртазы суреданы дышетскыны ветлыкумы. Тодӥсько на: тямысэтӥ классэ ваньзэ ӧз басьтэ. Секыт адӟонлэсь кышкаса, ми но эшеным кайгырыны кутскимы. Зэм, сокем ӧм куасалтӥське: ӝытъёсы велосипедэн ворттылӥмы, кӧня ке кыскыны курадӟылӥмы. Но та ужлы таки ӧм дышелэ. Нырысетӥ куарусён азьын мон ӧти сое Копкие - милемды ӟеч пумитазы. Огпол шедьтӥ искусствоосъя Н. К. Крупская нимо Москваысь калык университетлэсь адрессэ. Лёнялы но дэмлай отчы сюрес лёгыны. Ӵош дышетскимы отын, азьвыл удысмылэсь чик палэнтӥськытэк. Удмурт кун пединститутын солы дышетскыны капчи ӧй вал. Куддыр ӧз басьтылы стипендия но. Соин валче кузпалъяськоно луиз. Зэм, быръем адямиеныз ӵош кема улыны ӧз кылды. Пединститутэ дышетскыны пырыны выреммы али ке но тодам ай. Анай-атайёсмылэн коньдонзы трос ӧй вал бере, милемлы, чылкак сютэм улонтэм понна, пӧртэм амалъёс кутылоно луылӥз. Сиськонниын нуназеян понна тырмылӥз кызь вить коньы но: солы басьтылӥмы дунтэм шыд, гарнир. Ньылетӥ курсысен эше цирке ветлыны мылкыд кариз. Отын сурдалляз валъёсыз. Дышетӥсьмылы Р. К. Тагировлы та суредъёс туж яраллязы. Дэмлаз та удыслы диплом ужзэ сӥзьыны. Лёня дышетӥсьмылэсь кызӥськиз - диплом ужзэ "витьлы" дунъязы. Дышетсконмы йылпумъяськем бере, мыным ӵектӥзы "Удмуртиысь комсомолец" газетын ужаны. Азьвылгес пыриськылӥ Ижлы сӥзем альбом кылдытонъя ӵошатсконэ - отын басьтӥ ньылетӥ инты. Ваньмызлэсь азьло дасяй ӝог ветлӥсь кутъёслы сӥзем книгаме, со понна сётӥзы туж ӟеч гонорар. Зэм, тодмо суредась А. П. Холмогоров но анай-атае (тужгес - муми) газетэ мыныны ӧз лэзе: улон инты ӧвӧл, уждун ичи. Алексей Павлович ватсаз на: редакциын туспуктэмъёсты чеберъяса пукон сӧре суредасез. Мон Алма-Атае кошконо кариськи (татчы лэзьылӥзы дышетсконзэс "витьлы" гинэ йылпумъямъёсты). Нош Лёня мон интые мынӥз "Удмуртиысь комсомолец" газетлэн редакцияз. Озьы ог-огмылэсь туж кемалы люкиськимы. Школаын кык ар ужаса, дышетскыны пырыны малпай Художествоосъя академие. Зэм, экзаменъёс дыръя ӧз удалты. Лёня со вакытэ ӟеч-ӟеч тодматскиз ни А. П. Холмогоровен, зол-зол басьтӥськиз суредан уж борды. Гужем шутэтскылыкумы пумиськылӥмы Сьӧлталан. Ӵош ветлылӥмы нюлэскы эмезь бичаны. Лёня кырӟалляз, нош мон арганэн шудылӥ. Огпол эше ивортӥз: - Ужме басьтӥзы пинал суредасьёслэн адӟытоназы. Та верамез йырам кылиз. Ас поннам малпай: нош мон лябгес шат? Со дырысен сюлмысь дасяськыны кутски Суредасьёслэн огазеяськоназы пырыны. Эше нош со вакытэ вал ини СССР-ысь Суредасьёслэн огазеяськоназы. Лёня ялан ужаз газетлэн редакцияз. Нош суредан ужын ӟеч азинсконъёсыз понна сётӥзы "Удмурт Элькунысь искусствоосъя дано ужась" вылӥ ним. 1997-тӥ арын луиз Удмурт Элькунлэн Кун премиезлэн лауреатэз. Эше ӵемысь нималляз монэ бадӟым агай. Кылем арын кудымульылы ветлӥмы асьме палась тэльёсы. Нюлэскысен мынэсьтым юаз: - Кыӵе кырӟанъёсты яратӥськод? Мон верай. Кудымульы бичатозямы, Лёня весь кырӟаз. Куараез мыным туж яралляз. Табере кытысь кылод на сыӵезэ? Азьвыл малпалляй: кулӥ ке, Лёня мон доры лыктоз. Нош луиз чылкак мукет сямен: эшеным люкиськыны аслым мынонолась. Инкуазь - валантэм маке. Визьлюкъёсты ачиз ик вордэ, ачиз ик быдтэ. Куддыр туж чакласькытэк вераськиськомы таӵе адямиосын. Ум но малпаське: соос туж шер вордско ук. Нош берло кыле на туж пичи гинэ тодэ ваён. Улон вакчи - устолык весяклы! Леонид Алексеевич Прозоровлэн нимыз ноку уз вуны. В. Зворыгин. Нефть кыскись предприятиослэн поттэм му вӧйзылы Удмурт Республикаысь Правительстволэн куремезъя квотаос тупатон вылысь, аукционъёс радъянъя комиссия кылдытон сярысь Удмурт Республикаысь Правительстволэн ПОСТАНОВЛЕНИЕЗ Россия Федерацилэн Президентэзлэсь 1992-тӥ арын 17-тӥ феврале кутэм "Россия Федерацие пырись республикаосысь, крайёсысь, областьёсысь но автономной кылдэтъёсысь (образования) быдэсъясь властьёслэн ёзъёссылы кузёяськыны сётэм му вӧез, газэз но соослэсь дасям продуктъёсты уже кутонъя радлык сярысь" 151 номеро Указзэ быдэсъяса но Удмурт Республикалэн бюджетаз тросгес пайда ваён вылысь, Удмурт Республикаысь Правительство пуктэ: 1.Нефть кыскись предприятиослэн поттэм му вӧйзылы Удмурт Республикаысь Правительстволэн куремезъя квотаос тупатон вылысь, аукционъёс радъянъя комиссия кылдытоно. Отчы пыро: Чикуров С.В. - Удмурт Республикаысь Правительстволэн Тӧроезлэн воштӥсез, комиссилэн тӧроез; Захваткин В.Н. - Удмурт Республикаысь экономикая министр, комиссилэн тӧроезлэн воштӥсез; Комиссие ӵектэм муртъёс: Савельев В.А. - Удмурт Республикаысь эстӥськонъя, электрокужымъя но связья министр; Щекалев А.А. - Удмурт Республикаысь коньдонъя министрлэн воштӥсез; Осипанов И.Ю. - Удмурт Республикаысь Кивалтэтлэн Аппаратысьтыз Правоосъя управленилэн кивалтӥсез; Юшков А.С. - Россия Федерациысь Вытъёсъя но тыриськонъёсъя министерстволэн Удмурт Республикаысь Управлениысьтыз отделлэн кивалтӥсез. 2. Комиссилы косоно аукционъёс ортчытъянлэсь условиоссэ дасяны но юнматыны. 3. Нефть кыскись предприятиослэн поттэм му вӧйзылы, аукционъёсты радъянэз осконо Удмурт Республикаысь Экономикая министерстволы. 4. Нефть кыскись предприятиослэн поттэм му вӧйзылы Удмурт Республикаысь Правительстволэн куремезъя квотаос тупатон вылысь, аукционъёс радъянъя тупанкылэ Удмурт Республикаысь Правительство ласянь гожтӥськыны осконо Удмурт Республикаысь Правительстволэн Тӧроезлэн воштӥсезлы С. В. Чикуровлы. Удмурт Республикаысь Правительстволэн Тӧроезлэн нырысетӥ воштӥсез Ю.С.Питкевич. Ижевск город, 1999-тӥ арын 15-тӥ ноябре. � 1111. Учкы но - серекты! Огвакытэ мылкыды урод вал. Малпаськись тусо пукемме адӟыса, Леонид Алексеевич капчияк гинэ пельпумам йӧтӥськиз, мар, пе, нырдэ ошыса пукиськод. Серекъяса шуи, борддорын кыӵе ке серемес суред ошемын луысал ке, котькуд нунал пальышаса ветлысал. Кӧня ке дыр ортчыса, Леонид Алексеевич дорам суредэн пыре. Пужыё удмурт эке учке шорам, ымыз пель дорозяз. Кызьы бен серемдэ кутод на. Ӝӧкелы пумит борддоре интыяз со суредзэ художникмы, учкы но эн мӧзмы, пе. Кема гинэ палёмыса улӥз эке. Мон но шораз учкыса амалтэк пальышасько. Али но дырын-дырын тодам лыктылэ Леонид Алексеевичлэн со ужез. Аслэсьтыз тани мылкыдзэ лӧпкытӥсь шедьымтэ. Л. МАЛЫХ. ДАРТ Пинал куараос Тӧлмурт Сук адями дунне вылын улӥз, Калык ваньбур пӧлын со пыласькиз. Ӧз сёты чик пайда калыкезлы, Но кельшылӥз токма бергась тӧллы. Улӥз-улӥз ӝужыт ккенер сьӧраз, Моӵез чигиськытозь, ваньбур люказ. Номыр ӟечез ӧз кыль музъем вылэ. Кузётэм юрт гинэ мӧзмыт сылэ... Т. Семенова. Можга ветеринарной колледж. ДАРТ Ӵук кизили Мынам тӥледлы ӧй на вал гожъяме, но сюлмы ӧз чида. 28 шуркынмонэ ми пичи нылыным ветлӥм "Утренняя звезда" концерт учкыны. Концерт туж умой вал. Мылкыдэз уката ик ӝутӥз Сережа Галкин. Концертын ваньмыз ӟуч кылын кырӟазы, со гинэ йыромыса кадь сюрем отчы. Пырак огназ кырӟаз удмурт кылын. Мон пайми но туж шумпотӥ солэн кышкатэк ӟуч концертэ удмурт кырӟанэн потэмезлы. Сыӵе дӥсьтӥсь пияшлы тау кареме потӥз. К. СИМОНОВА, Ижын улӥсь. КУН ДУМАЕ ДЕПУТАТЭ ӴЕКТЭМ МУРТЪЁС Шаермылэсь данлыксэ ӵош утёмы Туала законъя нокин уг косы депутатэз бырйисьёсыз азьын вераськыны. Но Андрей Владимирович Солуянов бырйисьёссэ ноку уг вунэты - Ижевске вуылыкуз, котьку ик калыкен пумиськылэ. Со сяна, республикаын ужа А.Солуяновлэн благотворительной фондэз. Кун Думалэн ужамез сярысь гожъяло вань газетъёс, иворто радио но телевидение. Но калыклы котьку но тунсыко потэ депутатлэсь малпанъёссэ меӵак аслэсьтыз кылыны. Президентлы оскымтэзэс веран (импичмент) пумысен депутатлы нош но нош юанъёс сётъяло. Кун Думалэн ужаз туэ со огез бадӟымез ужрад вал. Андрей Владимировичлэн малпамезъя, импичментэз нырысь ик куашкатӥзы паллян кужымъёс: коммунистъёс, аграрийёс но "Народовластие" блоке пыремъёс. Б.Н.Ельцинэз властьлэсь палэнтон понна ӧз тырмы 19 куара. Верам депутатъёс асьсэ понна гинэ сюлмаськизы, бырйисьёссылэсь мылкыдзэс чик но лыдэ ӧз басьтэ. Кышказы, лэся, Думаез дырызлэсь вазь улляса, шуныт пуконъёссэс ыштоно луоз шуыса. Нош кызьы та ужрадын ассэ возиз Андрей Солуянов? - Вить юанъёсъя ик мон импичмент понна куараме сётӥ, угось сыӵе вал мылкыдзы мынам 90 процентэзлэн бырйисьёсылэн, - шуэ Андрей Владимирович. Матэкто Думае выль быръёнъёс. Кызьы радъяське политикъёслэн та бадӟым "шудонзы". Та лэчыт ужпумез но депутат А.Солуянов адямиослы пыр-поч валэктыны тырше. Мар ватонэз, Россилэн 80-85 процент уксёез Москвае кошке, экономикалэн валтӥсь ёзъёсыныз кивалто озьы ик Москваын, быдэсъясь власть - Правительство но Президент - Москваын. Мар бен кыле на Россилэн улосвылъёсызлы, Удмуртилы? Законъёсты кутон власть гинэ, кудӥзлэн депутатъёсыз ужало Кун Думалэн улӥ палатаяз. Вылӥ палатаын - сенаторъёс, кудъёсыз кивалто яке краен, яке областен, яке республикаен. Соослэн, валамон ини, законъёс бордын ужаны дырзы уг тырмы ни. Но туннэ югдур таӵе: улӥ палатаын ужась депутатъёс пӧлын но ӝыныез - Москваын улӥсьёс. Соин ик Андрей Солуянов лыдъя: отын ужаны кулэ Россилэн улосвылъёсысьтыз быръем адямиос гинэ. Соос шаерзылэсь кулэяськонъёссэ ӟечгес тодо. Нош мар лэсьто али Москваысь политикъёс Думае шедён понна? Соос медъям адямиоссэс депутатэ кандидат луыса регионъёсы ысто. Сыӵе амалэн Россилэсь вань округъёссэ Москва ас ки улаз возьыны турттэ. Тӥни озьы И.Кобзон бурятъёслэн дано адямизы луиз. Бурбулис - новгородец, господин Черномырдин Северын улӥсь калыкъёслэсь интересъёссэс утьыны дась, Ю.Маслюков, кемалась Москваын улыса ини, шӧдтэк шорысь Удмуртиез тодаз ваиз. Туэ гужем А.Солуянов журналистъёслы ивортылӥз, Кун Думае быръёнъёсы уз пыриськы шуыса. Мар бен воштӥськоз со дыр ӵоже? - Зэмзэ но, со сярысь уг малпаськиськы вал, - шуэ Андрей Владимирович. - Меӵак вераса жади но ини. Учке асьтэос: ар ӵоже мыным 100 пол Москваысь Ижевске но татысь Москвае лобано луэ. Улон-вылонэ шуг, семьяе кыдёкын, улӥсько гостиницаын. Квартира басьтонлэсь палэнски, "москвич" луэме ӧз поты, асме Удмуртилэн улӥсез лыдъясько. Но квартиралэсь дунзэ коньдонэн басьтӥ, сое сётӥ благотворительной фондэ. Туж умой тодӥсько, кыӵе курадӟыса уло нимаз адямиос, студентъёс - соослы юрттыны быгатӥсько ке, шумпотӥсько. Бырйисьёс медаз оске вылэм "кесяськись" плакатъёслы, кытын верамын, Удмуртиысь депутатлэн Думаын интыез басьтэмын ни шуыса. Со озьы ӧвӧл ай. Депутатэз калык гинэ бырйыны быгатоз. Со ӧз ке янгыша, быръемын луоз асьме музъем вылын улӥсь адями. Визьмо, быгатӥсь муртъёсын шаермы узыр. Оскисько Удмуртиын улӥсьёслэн юрттэмзылы. Малпасько, та быръёнъёсын калык возьматоз будэм асваланзэ но данлыксэ. Россилэн Кун Думаяз одӥг мандато Ижевск округысь депутатэ кандидат А.В.Солуянов аслыз сюрес бырйиз - Удмуртилэн кулэяськонъёсыз понна со парламентын нюръяськыны дась! Нош асьмеос, бырйисьёс, сыӵе нюръяськонлы дасесь-а? Печатламын дунтэк. Инты сётэмын А.В.Солуяновлы. ДАРТ Бускельмы кырӟась вылэм Алигес университетысь егит журналистъёсын пумиськылӥз Владимир Патрин. Та пинал бардлэн кырӟанъёсыз радио но телевидение пыр чузъяськыло ке но, со сярысь уг тодо ай - творческой адями калыке потыны шугъяськегес уго. Ужъёсты шараяны трос коньдон кулэ. Тани ми но ӧм тодылэ, нош Володя милемын артэ - филфакын дышетске вылэм. Нырысь учкыса, солэн номыр ас бордаз кыскисез ӧвӧл кадь - лапег, чиед мугоро. Но кырӟанъёссэ кылзыса, малпанъёс соку ик воштӥсько. Владимир аслаз кылбуръёсыныз но кырӟанъёсыныз "Радуга семиструнная" сборник но поттэм ини. Азьланезлы туж бадӟым малпанъёсыз. Со сюлмаське культурамес ӝутон но сое вӧлмытон сярысь. О.Семенова, Удмурт университетысь студентка. Леонид Прозоровлэн ньыльдон уезлы сӥзьыса Поръялоз, поръялоз... Лёняен тодматски дас вить ар талэсь азьло Рашит Хайдаров дорын, сӥзьыл праздник дыръя. Пыреме бере син азям нырысь ик йӧтӥз йыг-йыг, сьӧд тушо воргорон. Мон бергес вуи, калык ӝӧк сьӧрын вал ини. Нош Леонид Алексеевич кужмо, чебер куараеныз кырӟа "Поръялоз, поръялоз..." удмурт кырӟанэз. Соку ик султыса кырӟаз "Анае гурзэ эстэм, дыр, но..." удмурт кырӟанэз но эшшо кык ӟуч кырӟан. Нырысьсэ адӟеме бере малпай, со артист, дыр, шуыса - сыӵе синмаськымон кырӟаз. Бӧрысь ини тодӥ, Лёня "Советской Удмуртия" газетысь суредась шуыса. Ми палан но Прозоровъёс вань, соин ик юай кытын вордскемзэ. Зэм ик, вордскем дорелэсь кыдёкын ӧвӧл, чылкыт Калмез шурлэн нёжалаз ик, Сюмси ёросэн артэ Сьӧлта музъемын. Кыкетӥзэ паймытӥз монэ Прозоров туэ, август толэзьлэн пумаз, Сюмси ёросэтӥ, Калмез дурысь гуртъёстӥ ветлыкумы. Кӧня ке минутскын суредаз чебер интыосты, тунсыко адямиосты, нош милемды Георгий Юсаевен - эшъёс тамак кыскон куспетӥ. Соку солы одӥг блокнот гинэ ӧз тырмы. Бадӟым быгатонлыко адямилэн киыз но зол волямын вал. Одӥг суредзэ но мукет адямилэн уженыз уд сура. Солэсь ужъёссэ тодӥсь адями соку ик шуоз: тае суредаз Леонид Прозоров. Сюлэм бӧрдэ: сыӵе вазь кошкиз со асьме дорысь. Н. ВОЗИСОВ. Пенсия азьпалтоз Выль арез Та толэзь понна пенсия 7-тӥ декабрьлы тыремын ни 70 процентэз. Россиысь Пенсиосъя фонд ужпум пуктӥз - 16-тӥ декабрёзь йылпумъяны декабрьлы пенсия тыронэз. Пенсия вӧзы котькуд пенсионерлы сётӥське на 57 манет 50 копейка тыр компенсация. Чакламын на, январе сётоно пенсиез 30 процентсэ 24-тӥ декабрёзь тырыны. Выль арлэн кутсконаз трос шутэтскон нуналъёс кемдо угось. Ужпум капчи ӧвӧл, но быдэстыны луоно. Россиысь Пенсиосъя фондлэн Удмурт ёзэз выт басьтонэз пумен йылэтэ. Ноябре вуэм коньдон тырмиз бадӟыматэм пенсия сётыны но кӧня ке люкетсэ декабрьлы пенсиез тырыны. Л. КИМОВА. Правительствоын Удмурт Республикаысь Правительствое люкаськылӥзы администрациослэн кивалтӥсьёссы. Правительстволэн Тӧроез Николай Ганза ӟечкылаз но дипломъёс сётӥз "Россиысь 100 устоосыз вузъёс" конкурсын вормисьёслы. Кенешын бадӟым вераськон мынӥз бюджет удысысь учреждениосын ужасьёслы уждунъя пунэм тыронъёсты берыктон, шуныт сётонэз радъян, милицилэсь ужзэ пайдалыко карон сярысь. Коньдон ужпумъёсъя министр Владимир Белтюков пусйиз: унояз ёросъёсын бюджет удысын ужасьёслы уждун тыремын ини ноябрь понна. Югдур уродгес Камбарка но Кез ёросъёсын, отын уждун ӧз басьтэ на октябрь толэзь понна. Нош Ижевскын сентябрьлы но ог люкетэз гинэ тыремын ай. Уждун тырыны ёросъёслы дас одӥг толэзь ӵоже бюджетысь 23 миллион манет ссуда висъямын, нош Ижевскын - 110 миллион манет. Озьыен, Правительство быдэсъя сётэм кылзэ. Табышъя план быдэстэмын 142 процентлы. Со дыре ик, пусйиз министр, ноябрь толэзьлы йылпумъянъёсъя, бюджетэ коньдон ӧжытгес вуиз. Та пумысен Правительстволэн Тӧроез ивортӥз, Россиысь кассаосы коньдон кулэез мында уг вуы шуыса, со тырмытэмын 72 процентлы гинэ Кенеше люкаськемъёс мукет ужпумъёсты но эскеризы. Удмурт Республикаысь Правительстволэн пресс-службаез. Пусъемын ӟеч вузъёс Россиысь Правительство бадӟым инты висъя калыклы вузъёслэсь ӟечлыксэс ӝутонлы. Соин ик туэ но ортчытэмын вал "Россиысь 100 усто вузъёс" конкурс. Со кык люкетэн вал: нырысез улосвылъёсын (регионъёсын), кыкетӥез - быдэс странаын. Отчы пыриськизы 1000 предприятиос, нош асьмелэн - 10. Куатез вормизы но конкурслэн лауреатъёсыз луизы. Соос пӧлын - Ижысь оружейной завод, "Аксион-холдинг", Можгаысь сырзавод но "Красная звезда" АО, Сарапулысь радиозавод но "Сарапульская кондитерская фабрика" АО. Озьы ик пусъемын "Сактон", "Ижмебель", Сарапулысь электрогенераторной завод, 1 хлебозавод, "Любовь гусара", "Калашников", "Удмуртия" водкаос но мукетъёсыз. Вузэз чылкытатыны быгатэмзы понна сертификат сётэмын Чепецкой механической заводлы, Сарапулысь "Водоканал" муниципальной предприятилы но Варзи-Ятчи" санаторийлы. Вормисьёслы дипломъёсно свидетельствоос сётъяз Правительстволэн Тӧроез Николай Ганза. Г.Романов. ДАРТ Егит куараос Доре вуттоз-а сюрес? Берло дыре ӵем адӟыны луэ сюрес дурысь машина дугдытъяса сылӥсьёсты. Бензин дуноямен, автобусъёсы билетъёс но дуноязы. Соин ик попуткае тросгес пото гуртысь начар улӥсь студентъёс. Мон ачим но соос пӧлысь. Пурга, Алнаш, Можга пала нуись сюрес вылтӥ трос машинаос кошко. Сюрес урдсын - трос егит калык. Куазь кезьытэн кудӥз но соиз тэтчаса но сылэ ни. Кизэс ӝутъяло ке но, ваньмыз шофёръёс уг дугдо. Вӧзам сылӥсь нылъёсын вераськон мытӥ. (Бадӟым сумкаоссыя валай - студентъёс). - Тӥ кытчы-о мынӥськоды? - Дорамы бертыны потӥм ай но, мар ке машинаос уг дугдо. - Малы бен попуткае потӥды, автобусъёс уг ветло шат? - Билетъёс дуно ук - уксё уг тырмы. Стипендимы пичи, толэзяз 196 манет басьтӥськом, кудӥз созэ но уг басьты. Гуртысь ыстэмзы уг луы - колхозын уждун бадӟым ӧвӧл, сое но дыраз уг сёто. Соин сэрен тазьы выриськом ини, бертэм потэ ук! - Кышкыт ӧвӧл-а? - Кышкыт. Уд тоды, кыӵе адями шоры ӝымод. Трос алама учыръёсты кылэммы вань. Тани бускель гуртысьтымы эшмы, милесьтым кык арлы бадӟымгес со, алама учыре шедьылэм. Университетын занятиоссы бырем бере Света эшеныз попуткае потэм. Ӝомал усем бере гинэ соос вӧзы машина дугдэм. Шофёр кытчы мынонзэс юам но пуктэм. Нылъёслы кыдёке бертоно шуыса, туж ӟеч кариськем. Нылъёс номыр уродзэ малпатэк, ӟеч адями сюриз кожаса, шумпотӥллям. Пурга районэз ортчем бере шофёр бусые нуись сюрес вылэ кожем. Кӧня ке мыныса дугдэм. Пуртэн кышкатыса, Светалэсь эшсэ потыны косэм, нош Светаез кабинае кельтэм. Нылъёс туж кышкаллям, но сётскиллямтэ. Пыдысьтыз туфлизэ куштыса, Света шофёрлэн йыраз сётэм. Соиз сазьяськытозь пегӟиллям. Ми ӵошенгес бертыны вераськиськом, машинае чакласькыса пуксиськом. Вадьсамы горд "Жигули" дугдӥз. Шофёр нылъёслэсь кытчы мынэмзэс юаз. Выль тодмоосы пуксизы но кишкизы. Ӟеч мед бертозы ни. Палэнынгес пинал пияш сылэ. Солэн начар дӥсяськемезъя но востэм тусызъя валаны луэ, гуртысь шуыса. Зэм но, Саня гуртаз бертэ, дышетске Ижысь культурая училищеын. - Кема сылӥськод-а ни? - Кема. Пиосыз басьтэмзы туж уг поты, нылъёсызгес пукто. Ма, шофёръёс кышкало но, дыр, пиослэсь. Куазь ӝома ни, нош сюрес урдсысь калык уг быры. Удалтоз ик-а соослы туннэ умоен шуныт атай коркаязы вуыны? О. Семёнова, Удмурт университетысь студентка. Оскем уг поты Оскем но уг пот, Прозоров ӧвӧл ни шуыса. Шор арлыдо пиосмуртлы улоно но улоно вал, самой корт куртчон дырыз вал. Яратӥсько вал мон солэсь суредам ужъёссэ учкыны, инкуазь-а со, портрет-а яке карикатура, ужан манерзэ сак эскерылӥ, адӟем карыны тыршылӥ. Дышетскеме ке но ӧвӧл, кызьы шуо, инмар адӟытэк монэ кельтымтэ. Быгатонлыкъёсы вань суреданы но, скульптуралы но, нош ӧз кылды соосты улонэ пыӵатыны. Гуртоос но шуо, сыӵе быгатонлыкъёсыд вань тынад уд, пе, выриськы соин. Озьыен, гондырез сямен изьытыса возисько. Лӧптылӥ ик вал огдыре Кедра Митрейлы памятник лэсьтыны, нош эскизэ конкурсэз ӧз ортчы. Ма, сыӵе маститой адямиосын ӵошатскод шат? Али со бюстэ Игралан покчиослэн книга юртазы сылэ. Кемалась вал ни со, выставкае районэ поталляй гуртоосылэн скульптураосынызы. Кык барельеф мудоръёсты Кабачигурт культура юртэ нуллӥзы, калыклы ужъёсы яразы. Кабачигуртын ик художник-оформитель луыса ужаме вань. Эн гинэ серекъялэ, алиен англи кыллы дышетскыны кутски, ЕШКО пыр. Мар шуод, секыт улыны луиз. Озьы ке но возиськыны тыршоно. В.Пантелеев. Игра ёрос, Зянтемошур гурт. Эшмес буре вайыса 1999-тӥ арын 6-тӥ декабре кема но секыт висемез бере улонысь кошкиз Удмурт Республикаысь азьло военком Юрий Александрович Савченко. Ю.А.Савченко вордскиз 1927-тӥ арын Курск областьысь Суджанск ёросысь Замостье слободаын. 1944-тӥ арын декабре - со Воронеж округысь снайперъёсты дасясь школалэн курсантэз. 1947-тӥ арын йылпумъяз пехотая училищеез, нош 1960-тӥ арын - Фрунзе нимо военной академиез. 1974-тӥ арысен 1983 арозь кивалтӥз Удмурт Республикаысь военной комиссариатэн, 1984-тӥ арысен 1996-тӥ арозь ужаз "Ижмаш" ОАО-лэн граждан обороная штабезлэн кивалтӥсез луыса. Ю.А.Савченко ужзэ валаса но быгатыса радъямен, та удысын бадӟым воштӥськонъёс луизы. Со бордаз люканы быгатӥз ужзэс ӟеч валась, дышетскем муртъёсты. Кунлэсь обороназэ юнматонын бадӟым вормонъёсыз понна, Юрий Александрович Савченко пусъемын Горд Кизили орденэн но дас одӥг медальёсын. Ӵош ужам эшъёсыз Ю.А.Савченкоез гажало вал юн мылкыдыз, ӟырдыт сямыз, вӧзысь адямиосты гажаны но ас азяз куронъёс пуктыны быгатэмез понна. Юрий Александрович Савченколэн сайкыт тусбуйыз ялан улоз сюлэмъёсамы. Удмурт Республикаысь Кун Кенеш но Правительство, Удмурт Республикаысь военной комиссариат, Правительствоысь Граждан обороная но кышкыт учыръёсъя комитет, "Ижмаш" ОАО. ДАРТ Табань сиём - эмъяськом Толэзьлы быдэ Удмурт кун университетысь финн-угор кылэз дышетӥсьёс ортчытъяло туж аспӧртэмлыко шулдыръяськонъёс. Кылсярысь, куарусён толэзе соос лэсьтӥзы табань сиён ӝыт. Котькуд курсысь студентъёс сьӧразы ваё ческыт пӧрамъёссэс. Ӝытсы эшшо но шулдыр, капчи мылкыдын мед ортчоз шуыса, со вӧзы дасяло на я кырӟан, я кыӵе ке тумошо сценка. Таӵе ӝытъёсын студентъёс ог-огенызы матысьгес но рос-просгес тодматско, асьсэлэсь визьзэс но быгатонлыксэс возьматыны тыршо. Соин но, дыр, соос туж йӧноесь, шаплыесь но мыло-кыдоесь. Ӧй люкетысал, дыр, та шӧртчиослэсь мукет факультетъёслы но адӟем карыны. О. Никитина. ДАРТ Сьӧрлось муртъёс-а дуногес? Удмуртъёс сярысь вераськон потыку, малы ке но куд-огезлэн "вотякъёс" шуэмзы потэ. Малы али ке но асьмеды куанер, шымырскем пичи адямиен адӟо? Малы удмурт пинал, школае мынэмез бере, ассэ ӟуч шуэ, вань кужмысьтыз соослы кельшыны турттэ. Удмурт луэмысьтыз со уг данъяськы - куректэ. Училищеын дышетскыкум, трос сыӵе учыръёсын пумиськылоно луылӥ. Удмурт группалы староста быръён дыръя дышетӥсь мылкыд карисьёсты юаз. Удмурт нылъёс-пиос шып пукизы, ӟучомем ныл гинэ кизэ ӝутӥз. Мукетыз учыр. Удмурто-ӟучо группа ньыль ар ӵош дышетскыса но ӧз сураськы. Ӟучъёс ялан висъяськылӥзы. Малы асьтэды озьы возиськоды шуыса юамелы, нырзэс чатыртӥзы, удмуртъёс, пе, ми сярысь ас кылынызы супыльто, дыр. Нош гужем лагерьын луэм учыр мынам сюлэмам туж вӧсь мертчиськиз. Кыӵе ке праздник дыръя пиналъёс сцена вылын удмурт выжыкылэз шудӥзы. Вӧзам пукись пияш юаз вожатойлэсь: - Кыӵе кылын верасько соос? - Удмуртэн, - валэктӥз соиз. - Нош кинъёс соос - удмуртъёс? Туж ӝож, дас кык аресъем пияш али ке но уг тоды на кытын но кинэн артэ улэмзэ. Самой паймымонэз соиз - тросэз мӧйыос но уг быгато егитъёслы валэктыны удмуртлык, удмурт кыл сярысь. Мынам сыӵе малпанэ но кылдэ: сьӧрлось лыктэм калыкъёсты татысь улӥсьёсызлэсь юнгес гажало. Со дыре ик, удмуртхъёсты быдэс Дуннеын дунъяло, Доразы гинэ соосты уг валало. В.Кибардина, Удмурт кун университетын дышетскись. Нимыз - Данъян пул вылын Адями ужаны вордскемын Озьы лыдъя но аслыз ачиз дунъет сётэ Николай Владимирович Булдаков. Ужа со Яр районысь "Чепца" сельхозкооперативын, механизатор луыса. 30 ар пӧлысь 20-ез герӟаськемын та хозяйствоен. Ма шуод шоро-куспо арлыдъем воргорон сярысь? Чебер кылъёс утчатэк, огзэ вералом: Николай Владимирович уженыз кужмо, котыр ласянь оскымон адями. Тӥни малы солэсь тусбуйзэ асьмеос адӟиськом республикамылэн Данъян пулэз вылысь. Сыӵе дан котькудӥзлы уг сётӥськы. Л. Дмитриева. Туспуктэмез В. Камашевлэн. Ӟуч Общинаослэн Конгрессы но Юрий Болдыревлэн Движениез: "Калыкез ултӥянлы - пумит!" Гажано аспалъёсы! Туэ ортчизы ини Кун Кенеше быръёнъёс. Отчы шедизы Ӟуч Общинаослэн Конгрессыстызы но адямиос. Кун Кенеш выль сямен басьтӥськиз экономикаез ӝутон, кылдэм шуг-секытъёсты палэнтон ужрадъёс борды. Но лэсьтэмын ай нырысетӥ вамышъёс гинэ, тужгес секытэз - азьпалан. Соин ӵош, асьмелэн котькудмылэн азьпал улонмы, тыршеммылэн пайдалыкез, озьы ик Кун Кенешын но, потоз со бордысь, кин шедёз Кун Думае. Депутатэ кандидатъёс пӧлын, жаляса верано, адӟем карымонъёсыз трос ик ӧвӧл. Кин Зюганов яке Примаков понна, соос ас мылкыдзэс вералозы - кыкез ик та быръён огазеяськонъёс пусъемын ини. Нош кин утёз, сюлмаськоз ӟучъёслэсь но Россиын соослы матын луись мукет калыкъёслэсь кулэяськонъёссэс но правооссэс? Кун Думае депутатъёсты но Россилы Президент быръёнын та ужпум нырысетӥ интыын сылэ. Ум оскиське соослы, кинъёс возьыттэк капыръяса но странаез куашкатыса, асьсэды выль кужымен лыдъяло но шонере поттыны выро. Врачъёс, дышетӥсьёс, инженеръёс сю поллы ичигес уждун басьто предприятиослэн администрациосазы ужасьёс но чиновникъёс сярысь. Нокыӵе экономика тае чиданы уз быгаты. Озьы ке но, Кун Думаысь одӥгез но фракция номыр ӧз лэсьты на, доходъёсты висъянэз кулэезъя радъян но та уже профсоюзъёсты кыскон ласянь. Милям малпаммыя, бырйыны кулэ сыӵе кандидатъёсты, кин дасьсэ гинэ возьмаса уг улы, ачиз дась луэ адямиослы юрттыны но соослэсь правооссэс утьыны. Уг яра вунэтыны - власть муртъёс киын. Соос жалятэк вузкаро асьме страналэн улосвылъёсыныз, музъем узырлыкъёсынымы, куашкато азьлань мынон сюресмес. Тросэз потэ ӟуч калыклэн но шып улэмысьтыз. Ӟуч калык юн кылзэ вераны кулэ странамес куашкатыны турттӥсьёслы. Нош асьмеос быръёнъёс дыръя сыӵеослы ик куарамес сётӥськом, соослэн чебер кылъёссылы оскыса но пичияк кузьымзылы шумпотыса. Ми бырйим Ӟуч Общинаослэсь Конгрессэс, кудӥз Санкт-Петербургысь Юрий Болдыревлэн движениеныз ӵош кылдытӥз быръёнъя блок. Ӟуч Общинаослэн Конгрессы понна куаразэс, ӟучъёс сяна, сётыны кулэ родинамылэн вань патриотъёсыз. Та блок ас азяз пуктэм ужпумъёсъя тужгес но матын луэ Россиысь калыкъёслы. Со утёз ӟучъёслэсь, россиянъёслэсь программаоссэс. Ӟуч Общинаослэн Конгрессылэн кивалтӥсез Д. О. Рогозин нырысьёсыз пӧлын ваньмызлы кылымон ивортӥз: ӟуч государствоын валтӥсь калык луыны кулэ ӟуч калык, кызьы ке немецъёс Германиын, англичанъёс Англиын, японецъёс Япониын но мукет. Ӵапак та принцип ик лыдэ басьтэмын вал, нациосын ужан политикая ужпумез вылӥ кивалтон органъёсын эскерыку. Но бӧрысь со вунӥз. Нациен герӟаськем ужпумъёсты валамтэмы бордысь ик пото асьмелэн вань шуг- секытъёсмы, курадӟонъёсмы, тупамтэосмы. Политика шоры чиньы пыр учкеммы асьмелы ик пумит берыктӥське. Асьмеос ыштӥськом зэмос улон интымес, юртмес, вашкала сямъёсмес, кылмес. Школаосын ӟуч кылы арняяз висъяське одӥг час гинэ, нош англи но немец кылъёслы - куинь час. Телевиденилэн кун каналъёсаз возьматӥсько англи кылын рекламаос, кытын асьме манет интые верамын долларъёс сярысь. Озьыен, ужпум пуктэмын ӟуч егитъёсты Америкалы матэ карыны но пыраклы ас выжыоссылэсь люкыны. Но луозы талы пумит верасьёс. Шуозы: ӟуч кылэз мургес дышетонлы нокин уг пумитъяськы. Зэм но, ӟуч кылъя занятиосты лэземын тросгес но орчытъяны, но урокъёс бере но коньдон тырыса гинэ. Поттэ но сётэ коньдондэс, ӟуч но удмурт анай-атайёс, ӟуч кыллы понна, нош со дыре ик чик коньдон тырытэк но одно дышетон предметъёс пӧлы пыртэмын секс тренингъя урокъёс. Запад понна со бадӟым вормон. Ум пайме, дыр, огнуналэ нылпиосмес ӟечкыланы Тол Бабай интые Санта Клаус вуиз ке. Республикаысь азьвыл правительствоен малпамын вал дышетӥсьёслэсь но бюджет чотын мукет ужасьёслэсь кыӵе нацие пыремзэс эскерон но язычникъёслы черк пуктон. Воткинскысь кивалтӥсьёс ӟечен лыдъяса, американецъёс городэ пырон доры ик ӝутӥзы асьсэлы туж бадӟым черк. Татчы ик мерско ини Юта штатысь вуэмъёс но. Нош та город кылдэм дырысеныз ӟуч городэн лыдъяське ук, луэ православной. Асьмелэн черкъёсмы ӧвӧл, соос быдтэмын, куашкатэмын, со понна муртлэнъёсыз ӝутско шуныт зор бере губиос кадь. Со дыре ик, учке ай, мар лэсьтӥське асьме музъем вылын. Кыӵе ултӥянъёсты чидано луо кылдэм югдурен сэрен улон интыоссэс куштыса кошкем муртъёс, тросэз соос пӧлын ӟучъёс. Соос государствоен вунэтэм, куштэм адямиос. Кунэн Кивалтысалзы ке зэмос ӟуч адямиос, Россилэн зэмос патриотъёсыз, таӵеез луысал шат? Ноку но ӧй. Ӟуч Общинаослэн Конгрессы нырысь ик быдэстоно ужпумен лыдъя бускель кунъёсын улӥсь ас выжы калыксэс утёнэз, кужмысь пегӟем, улон интыоссэс куштыса кошкем муртъёслы юрттонэз. Ӟуч Общинаослэн Конгрессылэн кивалтӥсез вуылӥз Ижевске, Удмурт Республикаысь ӟуч культурая огазеяськонэ. Асьме шаерын но кылдытэмын Ӟуч Общинаослэн Конгрессыллэн ёзэз. Ми дурбасьтӥськом Ӟуч Общинаослэн Конгрессылы но солэн кивалтӥсезлы Рогозинлы. Та одӥг гинэ блок, кудӥзлэн нимаз пыӵамын ӟуч шӧм, нош программаяз - ӟуч калыклэсь правооссэ утён. Юнме шат та огазеяськон пумысен шып уло кызьы ке кун, озьы ик коммерциен герӟаськем иворъёсты вӧлмытӥсь ёъёс. Уго соос ужало милям тушмонъёсмы понна. Ӟучъёс, Россилэн патриотъёсыз, вынъёс но сузэръёс, малы озьы луэ, малы котьку власть нырысь ик со кие шеде, кин тала асьмелэсь, Россимылэсь - дауръёсын кыдам сямъёсмес, йылолъёсмес, школаосмес, нылпи садъёсмес, заводъёсмес, соин ӵош экономической, социальной но политической правоосмес. Кык сюрсэтӥ аре выжон вакытэ Россиын тросэз улӥсьёс, национальностьсы шоры учкытэк, улонысь кошко медицина ласянь юрттэт, эмъюмъёс ӧвӧлэн, пыдазы поныны пыдкутчанлы ёрмыса, пиналъёс школае уг ветло, анай-атайёс толэзьёсын, аръёсын уждун уг басьто. Асьмеос пумен ляльчиослы пӧрмиськом. Ӟуч Общинаослэн Конгрессы Россиын улӥсьёслы луонлык сётэ асьсэлэн правооссы, кулэяськонъёссы, сюлмаськонъёссы сярысь ваньмызлы кылымон шара вераны, дугдытыны Россилы пумит политика нуонэз. Асьме странамес пушласянь но, палэнысен но зӥбыны туртто. Та сьӧд кужымъёсты вормыны луоз, вань ӟуч калыкез, вань ӟуч патриотъёсты люкаса, Кун Думае быръёнъёсы огкылысь пыриськыса гинэ. Быръёнъя "Конгресс Русских Общин и Движение Юрия Болдырева" блок асьме шаерын кылдытӥз "Удмуртская Республика" улосъя группа. Соин кивалто Михаил Константинович Кокорин но Михаил Павлович Безуглов. Соос азьын сылӥсь ужпумъёс: вуоно быръёнъёсын Ӟуч Общинаослэн Конгрессэзлы дурбасьтон, тросгес бырйисьёсты ас палазы кыскон но Россиын нациен герӟаськем ужпумъёслы саклык висъянэз кужмоятон. Кокорин быдэс республикаын тодмо мурт, со кивалтэ Кун Кенешысь комиссиен. Котьмалэсь бадӟым кулэлыкен лыдъя ас азяз пуктэм ужпумъёсты мылысь-кыдысь, сюлмысь быдэсъянэз. Странамылэн, семьяосмылэн, нылпиосмылэн азьпал улонзы асьме киосын. Азьланяз шудо-буро улонмы понна асьмеос ик кулэ тыршыны. Странамылы Президент быръён дыръя ми алӥм вал Ельцинлы куара сётонлэсь. Тӥ ӧд кылзэ милемыз, ас сяменыды лэсьтӥды. Медаз луы вал озьы вуоно быръёнъёс дыръя но. Малы ми мынӥськом Кун Думае? - Вылӥ кивалтӥсьёсыз ми кыл кутытом калык азьын! Россилы - ӟуч власть! Огазеялом странаез, огазеялом нациез, огазеялом Россиысь калыкез! Нациез быдтонлы - пумит! Милемлы вань мае ыштыны но вань мае утьыны. Туннэ валтӥсь ужпум - луоз яке уз странамы, луом яке ум котькудмы асьмеос. Милям быдэстоно ужпумъёсмы: огазеяськон но странамылэсь улосвылъёссэ утён, нациен герӟаськем ужпумъёсты сэрттон-пертчон, калыклы ӟеч улон кылдытон. Та асьмелэн странамы, мукетыз ӧвӧл. Соин ик асьмелы кулэ сыӵе власть, кудӥз калык пала берытскоз, быгатоз странамес куашкатонлэсь утьыны. Быръёнъя "Конгресс Русских Общин и Движение Юрия Болдырева" блок, "Удмуртская Республика" регионъя группа. Кандидатъёслэн кысык дырзы Нуналысь нуналэ кужмоя бырйисьёслэн куараоссы понна ӟырдыт нюръяськон. Кандидатъёс асьсэлы но, калыклы но огсыр улыны уг сёто. Тани берло нуналъёсы Воткинске вуылӥз 28 номеро округъя депутатэ кандидат Виталий Соловьев. Со пумиськылӥз машзаводысь, телеательеысь, йӧл поттон но нянь пыжон заводъёсысь ужась коллективъёсын, ГТС-ысь связистъёсын но уличкомъёслэн кивалтӥсьёсынызы. Та районысь ик гуртъёстӥ ортчиз Юрий Маслюков. Москваысь мукетыз куно, Людмила Яирова, ассэ возьматӥз Завьялово районын. Г. КОРЕПАНОВ. ДАРТ Кайгуэз люкисьёс Куке но гань-гань, номыре шӧдытэк кӧлыны быгато меда спасательёс? Уг, дыр. 19 сентябре уйшор бере 3 часэ сайкатэмзылы но Игорь Градобоев уг куалекты (со вакыт Ижевскысь спасатель Нагинскысь Центрспасын тодон-валанъёссэ будэтэ вал). Дышем сямызъя тэтчыса султӥз. Оп! шуытозь эшъёсыныз ӵош со но машинаын вал ини. Сюрес вылысен веразы: Москваысь Каширской шоссеын бадӟым улон юрт пуштэм. Ӧз пайме - вакытэз сыӵе. Корка бервылэ вуыкузы ужало ни вал Москваысь спасательёс. Из пырылэсь гурезьысь улэп адямиосты шедьтон сярысь вераськон ик ӧй вал. Артысь коркаос но кырыжскемын, езаллямын вал уго. Котырысь писпуосын уг дырекъя ни одӥг куар но - соос чол-чол сыло гольык сутскем модос кожысь. Пичиен-пичиен гудыса, поттылӥзы адями шӧйёсты: диван вылын артэ кӧлӥсь кузпалъёсты, ымазы соскаен нуныосты. Кызьы ке татчы сюрем кышномурт (котыртэм пыр нокинэ ӧз лэзьылэ) бӧрдыса куре спасательёсты шор вадестӥз гудыны: "Оло, улэп на...". Жаль, солэн малпанъёсыз, трос мукетъёсызлэн сямен ик, ӧз зэмалэ. Одӥг адями но улэп кылемын ӧй вал. Кыкетӥзэ Москваысь юртэз пуштытыкузы кӧня ке муртэ улэпен шедьтӥзы: кудзэ пуштэм тулкым укное-тӥ сэрпалтыса лэзем, кудӥз блокъёс вискы шедем. Таяз учыре тротилэз ӧжытгес вал, шуизы специалистъёс. Куашкам корка улысь юрттэт курыса кесяськись адями куараосты кылон понна гинэ огшап вис карыло спасательёс. Собере нош тыбыртӥзы ву кошкытозь ужало, ужало... Уй но нунал лопатаен "шонаськемзы" бере но мур-мур умме уськытскыны уг дӥсьто утисьёс. Озьы ик Игорь но: кин тодэ, йырвандӥсьёс оло, эшшо маке малпалозы на, дась луоно. Кин табере шуоз, туала егитъёс лябесь, асьсэды гинэ тодӥсесь? Туала егитъёс туж кужмоесь! "Со кыӵе ке но туж но туж ужзэс яратӥсь адямиос. Соос зэмос пиосмуртъёс - асьсэлэсь уонзэс жалятэк мукетъёсызлы юрттыны мыно" - шуэ аслаз спастельёсыз сярысь Россиысь МЧС-лэн Удмуртиысь поисково-спасательной службаеныз кивалтӥсь Фирденат Хузин. - Тулӝу-а, ву-а, шудтэм учыр-а - спасательёс котьку отын. Зэм, тросэз тодазы ваё соосты кайгуэ сюрыкузы гинэ. Куддыр тау карыны вунэто ке но, кӧтсэс ӝож уг каро. Туэ дас одӥг толэзь ӵоже гинэ 940 пол потазы ни спасательёс шуге-леке сюремъёс доры. Соослэсь ужзэс дунъяны быгатозы кайгуэз адӟем адямиос гинэ, мукетъёсыз тросгес телевизор пыр тодо Москваысь 911 службаез. Кемалась кулэ ни вылэм асьмелэн службамылы но куинь лыдпусэн номер тупатыны, но со пыкиське коньдон вылэ. Кин тодаз возёз 71-13-07 номерез? Умой луысал, сыӵе телефонъя жингыръян мугъёсты чик ӧй луысалзы ке, но улон - кышкыт маке. З. РЯБИНИНА. Валентиналы - ...арес. Ӟечкыласьком! Вордскемзэ та нуналъёсы пусъе вань даурзэ "Удмурт дуннеын" ужам кышномурт Варвара (Валентина) Еремеевна Аронова. Песянайёс ас арлыдзэс шараяны уг кепырало ни, пе. Нош Валентинамылэсь кыӵе арын вордӥськемзэ гожтыны перо таки уг мыны, бумагае мертче. Та лыз-чагыр инбаммес сьӧд киросо самолётъёслэсь утем зенитчик, "Советской Удмуртиысь" комсомолецъёсты ӟырдыт ужъёсы ӝутэм коммунист, газетысь котькуд чурмес крезь си кадь жингыртӥсь карем техредактор, "Удмурт дуннеын" туала ужасьёслэн анайзы. "Удмурт дуннеысь" нылъёсыд но пиосыд. ШӦКЫЧ Юрттӥз Машка Верало, ас вакытаз, пе, Римез быронлэсь ӟазегъёс утиллям. Зэм-а со, ӧвӧл-а - умой- умой тодӥсь ӧвӧл ни. Но тани Машка нимо кеч сад-бакчаез тылпулэсь утиз. Сельхозвыставкае интыяськем сад-бакчалэн кузёез, пенсие потэм нылкышно Черепанова, али но тау каре на кечезлы со понна. Вал со учыр вазь ӵукна ноябрь толэзе. Одӥгаз сарайын пенсионерка кечсэ возе уго. Нош солы кезьыт медаз луы шуыса, отчы "буржуйка" гур пуктӥз. Озьы быдэс толзэ шунтыны чакла вал кечлэн кузёез. Одӥг нуналэ буржуйка кечез тачыртыса шунтэ вал. Кузё кышнолы пудо-животэз укыр жаль потӥз, лэся. Эшшо кӧня ке пуклё пу ватсаз на. Нош корт гур азьын кыллись пул пызь сое гинэ возмаса улэ вылэм. Песяй ас ужзэ лэсьтыса корка пыриз. Пул пызь пумен ӟырдаз. "Буржуйка" но гордэктӥз ини. Омырын тыл гизьыос лобаны ӧдъязы. Ӵапак соку быдэс бакча тыр куара кылӥськиз: "Ме-е-е! Ме-е-е!" Черепанова малпаз, кин ке кечсэ вандэ шуыса. Сараяз потӥз но кулыса усе вал ини. Тыл тани-тани кеч доры вуоз ини. Тылпу! Ярам коть, пересь шуге-леке ӧз усьы. Ведра вуэн "горд атасэз" гуньдытӥз. Озьы Машка юрттӥз тылпулэсь утиськыны. Соиз гинэ умойтэм: кечлэн сарае пыремез уг пот ни - ваменъяське. А.Атасов. "Аръёсы-вужеръёсы" - 1971-тӥ арын, Куйбышев (али Самара) улосын армиын служить каронме йылпумъякум, уйвӧт адӟи: клуб урам, нырккос, топольёс... Бертӥ Шарканэ. Культурая отделын мынэсьтым юазы: "Мынод-а Быгие?" - "Ӧйтӧд, ӧйтӧд", - шуисько. Соглаш луи ик. Быгие мыныкум йыроми: лымы пелля, сюрес уг адскы. Трактор сутыса пуктӥз. Ог витьтон метр мынӥм но - тани, пе, Быги. Учкисько: ӵапак сыӵе ик урам, нырккос но, топольёс но... Озьы уйвӧтам мон вуоно ужан интыме адӟиськем. Вылӥысь ыстэмын, дыр, вал Анатолий Протопоповлы уйвӧтсэ зэматыса сыӵе адӟон. Инмар тылгизьызэ кузьма ке, адямилэн котыр ласянь шӧдон-валанэз, быгатонэз но бадӟымгес луэ. Протопопов сярысь ке верано, со ик музыкант, композитор, со ик концертмейстер, калык хорен кивалтӥсь. Одӥг кылын - крезьгурчи. Кыкви палась Пислэглуд гуртын вордскем пияш пичи дырысен ик арган борды кыстӥськиз. Собере сое воштӥз баян.Та эшезлэсь куараоссэ кылзыса-кылзыса (тужгес но зоро-кото, пурысь нуналъёсы часэн- часэн пукылэ), сизьымдон пала кырӟанъёс кылдытӥз ни. Куазез но, инкуазез но юртто солы, шӧдон визылзэ муромыто. Яратоно вакытэз - сӥзьыл, оло, соин но: коньывуон толэзьлэн пурысез-бусэз пыр нырысьсэ югыт дунне шоры учкиз, улонлэсь шулдырзэ адӟиз. Шудо адямиос, дыр, 50 арессэс тырмытыса, вуоно дауре выжо. Мыным озьы потэ. Таослэн сюрлызы юнгес, кык вакытлэсь ныпъетсэ чидась. Кӧня улӥд, сомында ик улыны луоно на. Анатолий Протопопов но ачиз сярысь шуэ: - Мон ӝынызэ книгаме гожтӥ ни. Туж секыт дыръёсы вал, ас улонме ас киыным тӥялляй кадь. Но котьку вӧзам кемдылӥзы ӟеч адямиос, тужгес но - нылкышноос. Нэнэе паймымон кышномурт вал, избач, вить арзэ - фронтын, немец фашистъёсын но, япон самурайёсын но ожмаськиз... Оло, сюрс пол шуге-леке вуылӥ. Кышное, Надежда Анатольевна, ӧз кушты. Сизьым иськеме но, больницае, мон доры тэль пыртӥ ветлӥз. Кык мусо нылъёсмес вордӥз... Эшшо одӥг нылкышнолы нимысьтыз ик тау каре Анатолий Валентинович. Со Быги культура юртлэн кивалтӥсез, республикаысьтымы культура удысысь дано ужась Нина Григорьевна Беляева. Аслаз задорлыкеныз, вырӟытыны, лӧпкытыны быгатэменыз со югыт тылсиен кадь кенжытылэ мӧзмытчилэсь сюлэмзэ. "Сотэк кырӟанъёсы но ӧз кылдысалзы, дыр",- шуэ Анатолий Валентинович. Нина Григорьевналэн сюлмаськемез улсын ик Быги культура юртын туэ коньывуонлэн аумаз ортчытӥзы Анатолий Протопоповлэн зарни юбилеезлы сӥзем ӝыт. Сцена вылын тылъёсын ворекъяса улӥз "50" лыдпус. Отын ик - "Аръёсы-вужеръёсы" гожтэмез. Бен, кытын ке югыт, отын ик улэ вужер но. Макем яркыт тыл, сокем золгес вужеръёс кылё со бӧрсьы. Таӵе шулдыресь ӝытъёс Ижевскын но шер луыло. Быгатӥзы ик быгиос данъяны ас крезьгурчизэс. Пукиськод залын но паймиськод: кытын, малы та дырозь "ватскыса" улэм та адями? Тодӥськом: азьвылгес со ас кыоӟанъёсыныз пыриськылӥз Алнашын ортчылэм конкурсъёсы, Ижын - куд-ог ӝытъёсы. Но со шуак пиштыса кысэм мактал. Таяз ӝытэ, дуно излэн пӧртэм палъёсыныз ворекъяса улэмез сямен, котыр ласянь югдытскылӥз Анатолий Протопоповлэн талантэз. Огезлэсь ортчыт мукетыз устоесь, шулдыресь кырӟанъёсыз та крезьгурчилэн. Со устолыкез усьтыны юрттӥзы асьсэ культура юртазы кылдытэм "Премьера" квартетысь нылъёс Жанна Ермакова, Людмила Яркина, Ирина но Оксана Бурановаос, озьы ик Шаркан РДК-ысь дуэт - Алевтина Туданова но Ангелина Алчинова. Удмурт сяна, ӟуч кылзанъёсыз но трос Анатолий Валентиновичлэн. Тужгес синмаське вылэм со нылкышно кылбурчиослэн гожъямъёссылы. "Инвис" ёрос газетазы ужась Ольга Сидоровалэн сюлэмыз ик нёркак луиз, дыр, аслаз кылъёсызъя кылдытэм кырӟанъёсыз нырысьсэ татын кылыса. Тау карыны, ӟечкыланы дыртӥз сцена вылэ... Нош ӟечкыласьёс та ӝытэ трос гинэ шедизы. Ас гуртоосыз но, ёрос кивалтӥсьёс но, Ижысь куноос но. Тужгес маскараез вал, кызьы пыдэстэм чемоданысьтызы "кузьымъёссэс" поттылӥзы райбольницаысь усточиос (соослэн коллективенызы но ужа А. Протопопов). "Ачиз Ельцин" но вуиз, ява, удмурт крезьгурчиез ӟечкыланы: Кремле, пе, басьто, отын шудод... Быдэс зал, озьыен, гурт калык, шумпотыса бугырскиз, куке Анатолий Протопоповлэн гадь вылаз бырттӥзы "Удмурт Республикаысь культура удысысь дано ужась" знак. Геройлэн кизилиез но, орден но ӧвӧл со. Но югдытэ адямилэсь ымнырзэ. Уката ик - шумпотон тудвуэн кадь пачылмытэ быдэс мылкыдзэ. Нош сюлэмысьтыз пичи ошмесысь музэн потыса жильыртозы ай выль но выль кырӟанъёс. Татьяна ЧЕРНОВА. ШӦКЫЧ Кӧёмем Америка Сентябре редактормы Америкае вуылӥз. Ма меда паймытӥз сое? - Америкаын паймымонэз трос: чильк-вальк кисьтаськись вольыт сюресъёс, выжыкылын кадь чебересь коркаос, аспӧртэмлыко но тунсыко техника... Но монэ уката ик паймытӥзы Америкаысь бекче кадь зӧкесь кышномуртъёс. Туж шӧтэмесь адско, куайытэм парсьёс кадь, шоразы учкем но уг поты. Валамон, мугорзэс ватон вылысь, дыр, паськыт дӥсьёсын ветло, пуйы нулло, кожалод. Трос но ческыт сисько, ичи ветло, ваньзэ автоматика быдэстэ - соин адямиос кӧёмо. Шоразы учкыса, амалтэк малпасько: та кышномуртъёсты Удмуртие вуттоно вылэм. Выжъёсты ӵужысалзы, дӥськут киын миськысалзы, нуналлы быдэ куинь пол пудоез сюдысалзы, картофка копасалзы... сюсьтыл кадь веськресэсь луысалзы. Таӵе кӧёмем кышномуртъёс жалесь потӥзы. Американецъёслэн ваньмыз вань. Соос уг тодо, ма со уждунтэк улон, курадӟон. Котькуд нунал, праздник дыръя сямен, ӝӧксы тыр. Нош асьмеос понна улон - со нюръяськон. Нюръяськыса-нюръяськыса Россия но калык радэ потоз, дыр. Огез гинэ кышкыт: умой улон луиз ке, Америкаысь кышномуртъёс сямен ум куаёме меда? С. Мериканов. "Кенеш" журналлэн выль номерез Ваньмыз ыштэмын ӧвӧл на Игра ёросысь Лонки-Ворцы гуртысь механизаторлэн Константин Емельяновлэн нимыз удмурт лыдӟисьёслы тодмо ни 1965-тӥ арысен. Та дыр ӵоже пӧртэм изданиосын печатласькыны вуттӥз со. Повестьёсыз но веросъёсыз вить нимаз книгаен потӥзы. Константин Васильевич, ваньмон дыр шедьтыкуз, али но тэк уг пукы. Озьы тӥни нош но нош выль ужъёсыз вордско. Берло гожтэмъёсыз пӧлысь одӥгез журналмылэн та нуналъёсы потэм номераз печатламын. Выжыкыллы матын луись вероссэ автор "Шӧдон дунне" нимам. 1989-тӥ арын ортчем лыдъянъя тодмо луиз: бускель шаерын, Башкортостанын, 27918 удмуртъёс уло. Валамон ни, соослэн но мукетъёсызлы адӟем карымон пиоссы но нылъёссы ӧжыт ӧвӧл, таосыз ас удыссэс но быгатыса нуо, общественной ужъёсы но мылысь-кыдысь пырисько, синмаськымонэсь кивоштӥсьёс но будэто. Мукет сямен ке, соос сярысь азьветлӥсь шуыны луоно. Тани Татышлы ёросысь "Дэмен" колхозэн ӵапак кивалтэ сыӵе воргорон - Ренат Биктимирович Галямшин. "Россия Федерациысь гурт удысъя сӥё-дано ужасьлэн" быдэстэм но лэсьтоно ужъёсыныз тодматэ Андрей Гильмаев. Шаерысьтымы тодмо критиклы но литературоведлы Анна Сергеевна Зуева-Измайловалы туэ, шуркынмон толэзе, тырмиз... Ум вералэ ни, кӧня. Синмаськымон но вожъяськымон тодосчи сярысь гожтэ Зоя Богомолова. Нош юбилярмылэн нылыныз но пиеныз туспуктэмез журналмес уката чебергес кариз кадь. Дасэтӥ номерын азьланьтӥське шаерысьтымы калык писательлэн Петр Черновлэн "Тэрегбадь" повестез. Кылем люкетсэ лыдӟыны быгатоды ини вуоноысьтыз. Лыдӟисьёслы выль чуръёссэ ӵектыса, кылбурчи Людмила Кутянова шуэ: "... Нош кылбуръёс малы ке но вордско зоро вакытэгес". Озьыен, тӥ солэсь сӥзьыл куазьлы сӥзем выль чуръёссэ лыдӟоды, дунъялоды. Туала дыре кинлы ке, малы ке оскытэк улыны одӥгезлы но капчи ӧвӧл. Вакытлэсь шуг- секытъёссэ кин ке аслаз кужымезлы оскыса ворме, мукетъёсыз матысь адямиоссылэн юрттэтсылы оскисько, куинетӥосыз, номыр ӟечсэ шедьтыны быгатымтэенызы, быдэсак сямен вӧсяськонэ выё. Нош кинлы гинэ уг вӧсясько! Трос пӧртэм вӧсьдӥньёс (религиос) пӧлысь одӥгез - Кришна. Кинъёс меда соос, кришнаитъёс? Маин валче кылдӥз оскон? Таӵе но мукет юанъёслы валэктонъёс шедьтоды "Кинъёс ми? Малы ми?" нимам кылужысь (статьяысь). Журналэз лыдӟисьёс асьсэлэн яратоно изданизы сярысь чурытак вераны малы ке кепырало. Та ласянь, мон сямен, адӟем карымон пӧрмем Глазов пединститутысь дышетскисьёслэн "Кенешын" берло аръёсы потэм материалъёс пумысен малпанъёсынызы бичет. Куд-ог тырмымтэоссэ, шекъёссэ вераса, соос оглулысь вазисько тӥледлы, гажано удмуртъёс, кинъёс татчыозь та журнал сярысь туж ӧжыт тодо вал: "Басьтэлэ, лыдӟелэ "Кенешез", со тӥледлы луоз эш". Колхозъёс, совхозъёс сярысь вераськон потэ ке, син азе соку ик пуксё куашкам хозяйствоос. Жалесь отын тыршись огшоры адямиос. Соослэн куанермемзы, начармемзы мылкыдтэк ужаменызы чик но герӟаськемын ӧвӧл угось. Со понна кивалтӥсьёслэсь кылзэс юаны кулэ. Озьы ке но, ваньмыз быремын, куашкамын, ыштэмын, кылямын ӧвӧл на. Пыд йылазы йыг-йыг сылӥсьёсыз но пумиськыло. Басьтом тани Вавож ёросысь "Колос" хозяйствоез. Солэн туннэ улэменыз но ужаменыз тодматэ "Кенеш" журнал. Кылбурчи николай Байтеряков 1997-тӥ арын улонысь кошкиз. Солэсь нимзэ удмурт лыдӟись ноку уз вунэты. Макем тросгес тодӥськод та адями сярысь, сокем уката золгес гажаны кутскиськод сое. Николай Семеновичез эшшо мургес шӧдыны-валаны-дунъяны юрттозы матысь эшезлы Фома Кузьмич Ермаковлы пӧртэм аръёсы ысъям гожтэтъёсыз. Профессор Ф. К. Ермаков соосты чик тупатъятэк но воштонъёс пыртылытэк поттыны дэмлаз журналын. "Кенеш" журналлэн дасэтӥ номераз печатлам мукет материалъёс но сюлэмдыя, мылкыддыя мед луозы вал. Сыӵе сюлмаськонъёсын ик дасямы таиз ар понна берпуметӥ номермес. Тазэ ини басьтоды толсур (декабрь) толэзе. Гажано эшъёс! Веранмылэн пумаз котьку сямен тодады вайытӥськом гожтӥськон дырлэсь ӝоген йылпумъяськонзэ. Кыӵе ке мугъёсын сэрен, асьтэлэсь мылкыддэс "Кенеш" пала берыктыны ӧз кылды на ке, дыртэлэ: почтаосын тӥледыз возьмало. Быдэс арлы дуныз 53 манет но 20 коньы. Нош ми оскытыса вераны быгатӥськом одӥгез сярысь: журнал мӧзмыт уз луы. Петр Сергеев, журналлэн валтӥсь редакторезлэн воштӥсез. Ми - Смирнова понна Удмуртъёслэн, пе, политикъёссы ӧжыт. Нош политикаын валтӥсь кышномуртъёссы чик но ӧвӧл. Озьы, дыр. Мугез пумысен нимысьтыз вераськыны кулэ. Али шумпоттэ соиз: та огыр-бугыр вакытэ мандат понна нюръяськонэ рос-прос пыриськыны ӧдъяз чебер, синмаськымон, етӥз адями - Светлана Константиновна Смирнова. Солэн нимыз асьме дорын гинэ ӧвӧл, Москваын, озьы ик Венгриын, Финляндиын, США-ын но тодмо ни. Егит на ке но, дышетскемез, быгатонлыкез тырмыт ни. С. К. Смирнова - огшоры калыклы туж матын луись адями. Улонэз со пушкысеныз тодэ. Светлана котьку дась юрттэт сётыны, курись муртлы маке но ӟечсэ лэсьтыны. Кун Думаын ужаны со дась. Владимир ВЛАДЫКИН, история наукаосъя доктор, писатель. х х х Мыным кельше Светлана Константиновналэн пӧртэм адямиосын огкыл шедьтыны быгатэмез. Визьмыныз, каньыл кылыныз со мукетъёссэ шунтыны сюлмаське. Трос тодыны-валаны тырше. Соин ик выль ужын но ассэ ӝог шедьтэ. Смирноваез тылобурдоен ӵошатыны луоно. Нош солы эрик кулэ. Ойдолэ туннэ Светлана пала кариськом. Озьы лэсьтыса ум янгышалэ. Юрий ЛОБАНОВ, Удмуртилэсь флагзэ но гербзэ кылдытэм суредась. х х х Кызьы уд синмаськы Смирновалы? Со туж юрттэ искусство удысын ужасьёслы. Мар ватонэз, куд-ог удмуртъёс, вылэгес ӝутско ке, толло эшъёссэс тодмамысь дугдо. Нош Светлана Константиновна быгатэ уно аръёс ӵоже ӵошкыт кусыпъёсьы утьыны. Сыӵе адямиос пӧламы тросгес луысалзы ке, малпасько, асьме калыклэн сюлмаськонъёсыз туннэ мында ӧй луысалзы. Нокыӵе шуг-секытлы эн сётскы, Светлана! Валентина ПУДОВА, Удмурт Элькунысь калык артистка. ШӦКЫЧ Монмон Мон та мон, эшъёс, иськавынъёс, туннэ аслам нимы ик луиз Монмон, малы ке шуод, али мон нош ик азьвыл аръёсы выллем - гегемон! Мар со сыӵе, ӧд вунэтэ на, ло: заводын, колхоз лудын ужась муртэ азьвыл озьы шуо вал. Бӧрысь со гегемонэз, рабочиез, колхозникез шуисько, гулбеч сьӧры но лапча улэ донгизы. Гегемон луиз - коньдон. Тани сизьым ар кузёяське ни доллар. Ужысь но со улля, сютэм но кельтэ, калыкез но дурыстэм быдтэ: таӵеез ӧй вал на угось - кулӥсез вордӥськисезлэсь тросгес луиз. Аля СПИД, мукет висён, вузкаронын кузёяське юон, берыктӥськыны уг лу, котыр ваньмыз, лэся, ни наркоман. Но мон туннэ понна - Монмон, азьвыл сямен ик гегемон. Мугез одӥг, валаськоды луоз, Кун Думае быръён. Толон учки чагыр экранысь, ӵукна кылзӥ радио пыр, али лыдӟисько газетысь - ма, мон зэмзэ ик Монмон. Ваньмыз мон понна сюлмасько: огез шуэ, ужтэк уг кельты, мукетыз ӟеч уждун, пе, тупато. Соиз шуэ, дунтэк йӧнато, нылпиед но, пе, дун тырытэк ик дышетскоз. Коркам шуо, шуныт луоз, магазинын сиён дунтэмалоз. Уд ветлы, пе, кураськыса черкъёс азьтӥ, ӵуклы быдэ уд бугыръя, пе, куяськем интыосты. Кунгож сьӧрысь берыктомы миллиардэн кайпалтэм ваньбурез, коньдонэз. Зӧк кисыез, пе, шымыртом, заводъёсты ужатомы, гурт калыкез бурдъяломы, дышетӥсез, врачез либатомы... Олошай та улон, оло, йыр поромон, оло, мон - гегемон. Зарниям гурезьёс син азьын мальдыло, дыльдые ик шыр-р! вия кылӥсько ке, ма сӥзё соос мыным - демократъёс, либералъёс, вылез, вужез коммунистъёс, "выль кужымъёс", "буръёс" но "паллянъёс". Отын-татын пелям жондо вераськемзы, супыльтэмзы: тон, пе, - гегемон, соин ик мон, соос понна, пе, мед султо, инме йыры йӧтымон. Ныр чатырске, йыр урдӥське, мӧля буко кадь куасалске - Монмон. Ачим ик монмиськем, лэся, ини, вань мугоры юзыр луэ, ӧкӧ: туж кынмиськем, сапеге гынмем, катае пасяськем, та толэд но медаз лу вал воксё. Атай юртлы гинэ кылиз на ай оскон. А.Кайсин. Шӧкыч "Мынам телевизоре" Алигес Кизнер ёросысь Чукырча гурт вадьсытӥ, оло, сильтӧл ортчем, кожалод. Тодады вайытӥськом: карта вылысь сыӵе нимез уд шедьтэлэ. Официально верано ке, сое Васильево село шуыса нимало. Озьыен, азьланьтӥськом мадёнмес. Сильтӧл ортчем ик-а, ӧвӧл-а, но... Чукырчаысь уноез юбооссы чукыр-бекыресь луиллям. Чукыр-бекыр гуртлэн кыкетӥ нимыз, пе, озьы луэ. Юбоос кырыжамын. Электроезъёсты сузьтӥськыса гинэ но кутыны луоно. Соиз кышкыт: шудтэм учыр медаз луы вылэм. Уго та вакытэ езъёсты но лушкало. Нош алюминий дуно кортъёс пӧлы пыре... Чукырча урамъёстӥ поръязы Чукырӟем Очей но Бекырам Лади. "Удмурттторфысь" му вӧй но газ кыскон удыслы - 15 ар Владимир Тернавцев: "Кужыммы будэ" Владимир Тернавцев - республикаямы тодмо кивалтӥсь, тужгес но му вӧй но газ поттӥсьёс пӧлын. 1965-тӥ арын йылпумъяз Уфаысь му вӧй институтэз, собере тодон- валанзэ будэтӥз Москваысь Г. Плеханов нимо калык удысъя академиын. Ужан сюрессэ мытӥз Башкириын но Тюмень областьын. Вал му вӧй поттонъя оператор, мастер, участоклэн, промыселлэн но валтӥсь инженерно-технологической службалэн кивалтӥсьсы. 1973-тӥ арын Владимир Иванович лыктӥз Удмуртие. 1991-тӥ арысен ужа "Удмуртторф" кун предприятилэн валтӥсь тӧроезлэн воштӥсез но татысь НГДУ-лэн кивалтӥсез луыса. Солы сётэмын "Удмурт Республикаысь дано нефтяник" ним. "Удмуртторф" му вӧй но газ поттыны кутскем дырысен та нуналъёсы 15 ар тырме. Соин валче Владимир Тернавцевен пумиськылӥз газетлэн корреспондентэз Генадий Романов. - Владимир Иванович, кызьы вордскиз тӥляд та удысты? - Нырысь ик пусъеме потэ, та ужлы кутскон сётӥз, кичӧлтӥсь луиз предприятилэн валтӥсь директорез Анатолий Владимирович Марченко. Со соку ик адӟиз ни туннэ улонмес, торф поттӥсьёслэсь ӝутскон сюрессэс. Юнме шат солы сётэмын "Россиысь дано экономист" но "Удмуртиысь дано нефтяник" ним. Анатолий Марченколэн ӵектэмезъя, Удмурт Республикаысь Министръёслэн Советсы 1984-тӥ арын 10-тӥ декабре нимысьтыз постановление кутӥз. Сое умоен лыдъяз РСФСР-ысь Эстӥськон промышленностья министерство. Озьы "Удмуртторф" огазеяськонлы лэземын вал му вӧй но газ поттонъя ёз(НГДУ) кылдытыны. Мугез тодмо: шаерамы уг тырмы вал сюрес лэсьтыны битум но шуныт сётӥсь гуръёслы эстӥськон. Озьы вордскиз чылкак выль удыс. Милемлы висъямын вал кӧня ке му вӧй но газ поттон интыос, нош выль ужез радъяны но котыр ласянь юрттыны косӥзы "Удмуртнефть" предприятиез. Али но со му вӧймес чылкытатэ но вузаны юрттэ. Сое первичной обработка шуо, сотэк одӥг нефтеперегонной завод но му вӧез уг басьты. Кун предприятилы али сётэмын куинь му вӧй поттон интыос: Якшур-Бодьинской, Южно- Лиственской но Черновской. 1985-тӥ арын нефть портыны ӧдъям Як.-Бодья интыын. Али отын но Южно-Лиственской интыын ваньмыз му вӧй портэмын но скважинаос ужало ни. Арысь аре ужъёсмы кужмояло Черновской интыын. Административно-бытовой юрт дась ни. Таиз сярысь улӥяз эшшо верало на. - Али ужъёсты кызьы мыно? - Ми арлы быдэ вамышъёсмес кузёмытӥськом, будӥськом но кужмояськом. Али шумпотыса ивортӥсько, Черновской му вӧй поттон интыын нефть чылкытатонъя (первичной обработка) бадӟым станция пуктонмес йылпумъяськом, 85 процентэз ужъёс быдэстэмын ни. Выль арын сое вуттом, соку "Удмуртнефть" огазеяськонлы ум йыбыртъялэ, асьмеос му вӧймес чылкытатом но вузалом. Дорамы ужаны ветло Ижевскысь Як.-Бодья, Воткинск но Шаркан районъёсысь адямиос. Соос дышетскемын учебно-курсовой комбинатын, шуккиськон учыръёстэк ужан вылысь аттестация ортчемын инженерно-технической ужасьёсмы му вӧй техникумъёсты но институтъёсты быдтэмын. Данакез быгато гурезь ужъёсты радъяны. Му вӧй поттон интыосамы ужало 12 групповой мертан установкаос (ГЗУ), 4 дожимной насосной станциос, нефтез лыдъянъя 2 система, нош Южно-Лиственской интыын - 2 кустовой насосной станция. 75 иськем кыскемын му вӧй гумыос, уно иськем электроез юбоос, пуктэмын подстанциос, басьтэмын пӧртэм кужмо электродвигательёс, лэсьтӥсько сюресъёс. Му вӧй скважинаосы мурысь нефть кысконъя насосъёс пуктэмын. Му вӧй поттонэз радъян вылысь участокъёсын кылдытъямын технологической бригадаос. Соослы сётэмын машинаос, механизмъёс, нимаз агрегатъёс, кулэ приборъёс но мукет оборудование. Но куд-ог ужъёсты му вӧй портон, сое чылкытатон огкылъя быдэсъяло подрядчикъёсмы. Али 90 скважинамы му вӧй кыске, нош 5-ез нагнетательной скважина лыдъяське. Берло дыре одӥг сутка ӵоже 850 тонна му вӧй кыскиськом. Кионгопе сое ворттӥськом автоцистернаосын, нош Як.-Бодья интыысь нефть гумыос кузя бызе. Туэ 270 сюрс тонна "сьӧд зарни" поттом, нош вуоно арын 300 сюрс тоннаозь вуттом. 15 ар ӵоже, туэ ноябрёзь, 1 миллион 700 сюрс тонна нефть поттӥм но 1500 сюрс тонназэ заводъёсы келям ни. - Владимир Иванович, тӥляд ваньмыз вӧй вылтӥ кадь мынэ. Шонер-а со? - Быдэсак озьы шуыны уг луы. Ужъёсмы бен урод уг мыно. Арлы быдэ 25-30 сюрс тонналы тросгес му вӧй кыскиськом. Но уката ӟечгес ужаны луонлыкъёсмы вань на. Юнматоно ужан дисциплинаез, котькудӥз ужась кыл кутыны мед дышетскоз. - Нош ужан условиосты сярысь мар верасалды? - Та ужпумлы бадӟым саклык висъяськом. Умоесь ужан условиос кылдытытэк, адямиос азе куронъёс но уд пукты. Ужасьёсмес нуналлы быдэ шуныт автобусъёсын уже нуиськом- ваиськом. НГДУ-лэн му вӧй поттон интыосаз ужало столовойёс, отын ческыт пӧрало. Як.-Бодьяысь промышленной базаын выльдэмын бытовой юртъёс, кабинетэ ӟеч обрудование басьтэмын. Му вӧй кыскисьёс отын нырысетӥ медицинской юрттэт, прививкаос басьто, соослы массаж лэсьто. Котькуд ужасьлы столовойын сиськемез понна юрттэт сётӥське. НГДУ арлы быдэ огкыл кутэ медицинской юрттэт басьтыны "Астра" фирмаен, нош ужын но семьяын шудтэм учыръёслэсь утиськыны - "Росгосстрахлэн" Октябрь ёзэныз. Нимаз корка пуктӥсьёслы ӝыны дунын сётӥськом лэсьтӥськон материалъёс но транспорт. Странаямы коньдон лябӟемен, туэ гинэ 3 пол будэтэмын ужасьёслы уждун. Быдэс НГДУ-я шоро-куспо уждун толэзяз 4 сюрс манет пала усе. - Владимир Иванович, юрттӥськоды-а музон предприятиослы, организациослы но учреждениослы? - Одно ик. Тани туэ 9 толэзьскын гинэ 1 миллион 730 сюрс манет тыр юрттэт сётэмын. Кин бен юрттэт басьтӥз? Соос пӧлын - Вавож, Грах но Кизнер администрациос, Ижысь гурт улонъя академия, УдГУ, Грахысь ӧлексыослэн огазеяськонзы, Воткинск районысь Вылӥ Талица гурт администрация, ожысь но ужысь ветеранъёслэн кенешсы, Удмуртиысь Туристъёслэн союззы, "Танок" кун ансамбль но мукетъёсыз. - Валля арын тӥледды эскеризы госгеолконтролья специалистъёс? - Комиссия ужмес умоен лыдъяз, му вӧй кыскон амалъёсты (технологиосты) ум тӥяське. Сыӵе йылпумъян лэсьтэмын. - Кызьы тодмо, Владимир Иванович, тӥляд будон но азинскон сюресты вадьсаськиз (10 ар пала) выльдӥськон вакытэн. Кызьы шуг-секытъёсты чидады но пыд йылады йыг-йыг сылӥськоды? - Та юанэз возьмай. 15 ар НГДУ ужа, нош со пӧлысь дасэз секыт улон, выльдӥськон, кыӵе ке реформаос ортчытон дырлы тупаз. Но ми чидам гинэ ӧвӧл, ялан гурезе тубиськом. Россиысь но Удмуртиысь куд-огез предприятиос гаӵоло кыллё ни. "Удмуртнефть" но ӧжыт гинэ банкрот ӧз луы. Нош ми ялан азинскиськом, шуг-секытъёс шоры учкытэк пумен тросгес му вӧй поттӥськом. Милям вамышъёсмы пумен юнмало. Тани Черновской му вӧй поттон интыез азинтонын 1997-тӥ арысен туэ 9 толэзьскын 90 миллионлэсь уно уксё висъямын. Но выт бичан амалъёс ӟеч ужаны люкето. Ми ваньзэ сямен пайдамес кутӥськом лэсьтӥськонэ, му вӧй кысконъя выль оборудование но транспорт басьтыны. Ваньмыз со юрттэ уногес продукция поттыны. - Кызьы учкиськоды инкуазь узырлыкъёсты кутонлы? - Ми котьку огкылысь ужаськом интыысь калыкен, кивалтӥсьёсын. Но берло дыре бадӟым янгыш лэсьтэмын музъем узырлыкъёсты вузаса, акциосын огазеяськонъёс кылдытыса. Инмарен сётэм узырлык вань калыклэн ваньбурез мед луоз. Сое калык вала ни. Озьыен, му вӧй кыскон, энергетика, металлургия, музъем эгыр поттон государство киын луыны кулэ. Со пайда гинэ ваёз. Ми кун предприятие. - Владимир Иванович, 15 ар му вӧй кыскеменыды валче мар верасалды? - Ваньзэ ужасьёсмес - му вӧй кыскисьёсты, ремонтникъёсты, транспортникъёсты - ӟечкыласько та нуналэн но мылкыд карисько шудбур но тазалык. Азьланьын уката ӟечгес ужаны луонлыкъёсмы вань. Йыбыртто музъемлы Му вӧй поттӥсьёс доры мынэммылэсь азьло, "Удмуртторф" кун предприятиын пумиським Якшур-Бодья нефть кыскон интыысь мастерен. Николай Панков ас ужъёсыныз городэ лыктэм. Кӧня ке вераськеммы бере, чик малпаськытэк, вань ужъёссэ куштыса (ӵуказе, пе, выльысь лыкто) сьӧрамы кошкиз. Сюрес кузь-а, ӧвӧл-а, но Николай Петровичлэсь троссэ тодӥм. Районысь Азин нимо колхозын шофёр луыса ужам. Собере вал жилищно-коммунальной хозяйствоын валтӥсь инженер, лесхозын - механик. Му вӧй кыскон удысын 11 ар тырше ни. Нырысь вал му вӧй но газ поттонъя оператор, 1995-тӥ арын мастер луиз. Солэн участоказ 16 скважинаос уй-нунал нефть кыско. Бригадаяз 26 мурт ужа. Заданизэс толэзьлы быдэ мултэсэн быдэсъяло но араз 100 сюрс тонна нефть кыско. Солэн 15 иськем му вӧй гумыосыз. Отӥ "сьӧд зарни" Кионгопе бызе. Николай Панковлэн му вӧй поттон интыяз ваньмыз йылаз-пумаз вуттэмын. Вис карытэк ужа доживной станциез, му вӧй шунтон гурез, нефть уго юн лякиськись, гумые пуксе. Вераськонъямы Николай Панковлэн Як.-Бодья му вӧй но газ поттон интыяз вуэммес но ӧм шӧдылэ. Син шоры йӧто шахмат амалэн пуктылэм нефть кыскон качалкаос (скважинаос). Соос горд буёлэн буямын, огсыр, дыртытэк веттасько: музъемлы йыбыртъяса кадь я лэзисько, я йырзэс ӝуто. Туж чебер суред. Юанъёсмылы тупен-тупен валэктэ Владимир Тернавцев. Та удысын со зэмос профессор, хозяйствозэ вить чиньызэ кадь тодэ. Промбазаын нырысь ик пумиським татысь медпунктлэн кузёеныз Валентина Якимоваен. Му вӧй поттӥсьёслы, ремонтникъёслы, водительёслы нырысетӥ медицинской юрттэт сётэ, ӵукна но ӝытазе шофёръёслэсь но механизаторъёслэсь тазалыксэс эскере. Сотэк одӥгез но сюрес вылэ уг поты, руль сьӧры уг пуксьы. Валентина Михайловна Глазовысь медучилищеез йылпумъяса, пӧртэм интыосын ужаз. Ачиз вордӥськемын Яр районын, нош бызиз Кекоран черкогуртэ. 20 ар тыршиз, нылпи садын валтӥсь медсестра луыса. Селычкаысь нылпи санаториын но шудзэ утчаз. Но тужгес но шумпотэ татчы шедеменыз. Му вӧй поттӥсьёс дорын 3 ар ужа ни. - Администрация трос юрттэ, - шумпотыса вера Валентина Михайловна. - Медпунктам вань УВЧ, кварц, электрофорез, магнитотерапия (МАК), витафон, массаж лэсьтыны "Бархат" устройство но мукетыз. Ужасьёсмы сӥзьыл но тулыс ӵемгес курадӟо кус висёнъёсын (радикулитэн но остеохондрозэн). Алигес татын вуттэмын производственно-административной юрт. Отчы интыяськемын столовой, лэсьтэмын кылиськон но мисьтаськон (душ) интыос. Му вӧй поттӥсьёсты ческыт но дунтэм сюдо. Месторождениын котыр чылкыт. Котькудӥз ас ужзэ сюлмысь быдэсъя. Тани транспортной цехын 11-тӥ арзэ тырше ни Валентина Тратканова, нош кладовщица Валентина Перевощикова - 7 ар. Кык Валентинаос туж тупаса ужало. Одӥгез куронъёс (заявкаос) бича, мукетыз уже пыӵатэ. Чылкыт столовоязы нуназеяса мукет интыосы вырӟим. Пумитамы огез бӧрсьы мукетыз бадӟым бекчеен КамАЗъёс сюро. Ваньмыз, пе, со милям машинаосмы, Кионгопе нефть вортто, шуэ Владимир Иванович. Южно Лиственской но Черновской интыосысь "сьӧд зарни" вуэ но вуэ. Тани нырысяз 17 качалкаос веттасько. Черновской интыын 33 скважина ужа ни, одӥгаз гумыос лэзьяло, артэ буровикъёс музъемез порто. Куазь кезьыт ке но вал, адямиос корт гумыосын чырмыт тыршо. Артэ ик музъем портӥсьёслэн (подрядчикъёслэн) дизельзы ужа. "Удмуртторф" предприятилэн му вӧй поттон удысаз усто специалистъёс лыктэмын. Тани кызьы уд вера Анатолий Хрущевез. Со - валтӥсь геолог. 1970-тӥ арын йылпумъяз Казань университетысь геологияя факультетэз. Собере 5 ар ужаз "Удмуртгеологиын", 10 ар - "Удмуртнефтьын", предприятиын - 15 ар, НГДУ кылдэм дырысен. Солы юрттэ геолог Екатерина Невмянова. Москваысь му вӧй институтэз йылпумъяса, Удмуртие лыктӥз, нош татын 13 ар тырше ни. НГДУ-ын кылдытэмын геологияя быдэс служба. Геологъёс Венера Ахмадуллина но Нина му вӧй поттон амалъёсты (технологиосты) но проектъёсты быдэсъямез. Лыдъян-чотан удысын быгатыса ужало валтӥсь экономист Любовь Котова, бухгалтеръёс Ольга Кудрина но Марина Злобина. Му вӧй поттӥсьёс алигес кылдытӥзы диспетчерской служба. Отын вошъяськыса ньыль мурт ужа. Алексей Сидоров быдтӥз Грозныйысь му вӧй институтэз. Со отысь дорамы лыктӥз. НГДУ-ын шуныт кылъёс верало валтӥсь технолог Федор Кольцов сярысь. "Удмуртторфысь" му вӧй поттӥсьёс асьсэлэсь праздниксэс выль вормонъёсын но капчи мылкыдын пумитало-пусъё. Бамез дасязы Геннадий Романов но Владимир Камашев. Цирк луз! Ӝыны даур ӵоже шумпоттӥз калыкез Ижысь цирк. Городлэн шораз война аръёсы пуктэм юртэз али кесяло. Чакламъя, толэзь мар ортчыса, та интые ик выль цирклы фундамент дасяны кутскозы. Президент яке Йыр? Кун Думае депутатъёсты быръён нуналэ ик элькунысь калыклэсь юалляськон ортчоз. "Кызьы тӥ нимасалды Удмурт Республикаысь вылӥ быдэсъясь органлэсь кивалтӥсьсэ: Президент-а яке Йыр-а (Глава)?" Зэм но, таӵе юан троссэ ик шугъяськытэ, вылды. Уноезлы Россилэн Президентэз чырты выжыёзязы вуиз ни, дыр. Соин ик "президент" кылэз синазькыль карисез но вань. Нош мукетъёсызлы, ог дышем сямен, таиз но яра: мар-о выль велосипед малпаса улод на? Та пумысен ас мылкыдзэ вераны курыса, пӧртэм адямиослы вазиськи, Удмурт кун университетысь студентъёслы но тодосчиослы, ужаса улӥсьёслы но пенсионеръёслы. М. В. Киреева, журналистикая факультетлэн деканэз: - Йыр ке, со вуж кыл ни - чебер ӧвӧл кадь. Туала улонлы "президент" тупа. Йыр - "староста" шуэм выллемгес, статуссэ пичиятэ. Шонерзэ ке верано, мон "губернатор" шуысал. Но асьмелэн шаермы республика луэ. Соин "президент" палагес дурбасьтӥсько. Лена, журналистикая факультетысь студентка (курссэ вераны пумит луиз): - Йыр мед луоз кадь. Одӥг президентмы вань ни, тырмоз. Вообще-то, уг тодӥськы. Нош "президентлэн" статусэз но вылӥын кадь. Историяя факультетысь студентка, куинетӥ курс (нимзэ ӧз вера): Нокыӵе но пӧртэмлыксэ уг шӧдӥськы. Но одӥг странаын кык президент - со умойлы ӧвӧл. Соин - таӵе ужпум яке юан пуктэмзы - политика ласянь визьмо уд шуы. Котькыӵе улосвылын президент быръемзы странаез зӥр-зар пазянэ вуттоз. Александр Волковез ке басьтоно, со али валэз уробо бӧрсьы кыткиз. Мон пумит "президентлы" но, "Йырлы" но. Экономикая факультетысь студентка, 5-тӥ курс ( нимзэ ӧз вера): - Йыр. Озьы дунтэмгес усёз. Л. Н. Иванюта, философияя кафедраысь доцент: - Мон "Йыр" понна. Малы удмурт-ӟуч кылэз кунгож сьӧрысь кылъёсын саптаны кулэ? Ельцинэз но озьы ик нимано вал. Ксения, филологияя факультетысь студентка, 2-тӥ курс: - "Йыр-а", мар-а. Одӥг президентмы вань ни, мукетыз кулэ ӧвӧл. Одӥгезлэн факультетлэн деканэз (аслэсьтыз но факультетлэсь нимзэ вераны пумит луиз): - "Президент" ярагес. Но сое одно ик республикаысь быдэс калык мед быръёз. Дуно усёз-а со, уз-а - шугъяськонэз ӧвӧл. Али ваньмыз понна тырыны кулэ. Налог тырись ласянь учконо ке, мон дась со ныпъетэз нуыны. Но трос ужпумъёсты шаплы быдэстыны кулэ луэ, нош кун Кенешын состы ӵемысь ӝегато. В. Е. Владыкин, история наукаосъя доктор, профессор: - Уг тодӥськы. Но одӥгзэ верасал: со адями йыро президент мед луоз вылэм. Социальной коммуникациосъя институтысь студентка, ИИ курс (нимзэ ӧз вера): - "Президент". Статусэз бадӟымгес. Экономикая факультетысь студент. И курс (нимзэ ӧз вера): - Президент" - со Россия Федерацилэн улосвылэз понна зол верамын кадь. Соин ик "Йыр" тупагес. Петр, шофёр, 46 арес: - Мыным огез но кулэ ӧвӧл. Сотэк но улыны луэ. Малы-о эшшо чиновникъёсын одӥг аппарат кылдытод на? Валентина Георгиевна, пенсиын ни, 57 арес: - Уг тодӥськы. Мон ведь университъёсты быдтэмын ӧвӧл. Мар мынэсьтым юанэз. "Йыр" ке "Йыр". Президентмы вань ини. Мултэсэз кулэ ӧвӧл ни кадь. Виктор, "Удмурт дунне" газетысь шофёр: - Уг тодӥськы. "Йырлэн" но, "Президентлэн" но полномочиоссы одӥг кадесь луозы. Соин ик йырыз гинэ мед ужалоз. Калыкен вераськыку, ӵемгес кылоно "президент" кылэз. Солы ваньмыз дышемын. Но куд-огезлэн юанэз но кылдэ: "Кулэ-а меда сыӵе адями республикамылы?" Зэм, табере та ужпумлэсь палэнскыны уз луы ни. Дагестанын но асьме дорын гинэ президент (глава) ӧвӧл на. Кыкезлэн но полномочиоссы одӥг кадесь луозы, нош кызьы сое ниманы - калык ачиз быръёз. Кудӥз кыл сюлмаз кельше, солы ик куаразэ сётоз. Валэз уробо бере кыткем кадь гинэ медам луы вал... А. АНДРИЯНОВ. Ӧте "Инвожо" Вуоно вордӥськонэ, 13-тӥ толсуре (декабре), Удмурт Элькунысь Национальной библиотекалэн шаертодонъя но финн-угор литературая ёзаз луоз "Инвожо" журналлэн редакцияз ужасьёсын пумиськон. Вераськон сӥземын луоз туннэ нуналэн герӟаськем ужпумъёслы. Люкаськемъёс озьы ик кенешозы редакцилэн вуоно ужъёсыз-сюлмаськонъёсыз сярысь. Пумиськон кутскоз ӝытазе вить часын. Сое радъясьёс ӧтё татчы вань мылкыд карисьёсты. 12 декабре Россилэн Конституциезлэн нуналыз 1993-тӥ арын 12-тӥ декабре референдум ортчытыса юнматэмын вал Россия Федерацилэн выль вакытлы сӥзем Конституциез. Со юнматӥз Президентлэсь властьсэ но сюбегатӥз парламентлэсь кужымзэ, тужгес но Федерацияя Кенешлэсь луонлыкъёссэ. Федерацияя Совет кылдытэмын вал кунмылэсь политикаын ёззэ юнгес карон, улосъёслэсь интересъёссэс лыдэ басьтыса ужан понна. Но улон возьматӥз, законъёсты кутонын валтӥсь инты басьтэ парламентлэн одӥг люкетэз, Кун Дума гинэ шуыса. Нош Федерацияя Советлэн решениосыз быдэсъяськытэк кылё. Валамон ини, таӵе югдур туннэ туж сюлмаськытэ улосъёслэсь кивалтӥсьёссэс но. Соин ик берло дыре ӵемгес но ӵемгес вераськонъёс ӝутскыло Россиен кивалтонэз кызьы ке но выльдон сярысь, мукет сямен вераса, Президентлэсь, Федерацияя Кенешлэсь но Россиысь Правительстволэсь полномочиоссэс выль сямен люкылон сярысь. Озьыен, Россилэн куать ар талэсь азьло кутэм Конституциез но воштӥськытэк уз улы. Берло Конституцимылэсь умоен пусйыны луоз гражданъёслэн эрикъёссылы но правооссылы висъям люкетсэ. Зэм, ваньмыз соос кулэезъя уг быдэсъясько. Экономикаын кылдэм югдур люкетэ. Нош соин сэрен гинэ-а меда? Оло правоосмес тодымтэмы но асьмелы люкетэ соос понна нюръяськыны но улонэ пыӵатыны. Та сярысь асьмеос ӵем дыръя вунэтӥськомы. Т. БАННИКОВА. Лидия Чернова Дуринчи дунне та... Дуринчи дунне та, Я шайтан пузкар? Абдрамын планета: Мар Россия вал... Ярдурын сыло ни, Витьыса юрттэт. Сютэм мурт кулэ но - Ӧвӧл, пе, жалед. Дуричи дунне та, Чукинскем улон. Союзмы куашказ но, Эрказме кулон. Киосмес мычим ни Ымтыр сиёнлы. Нырулмес ӵушо ук "Вылез" ӟучъёсмы. "Мерседес", "Тойота" - Иномарка, я... Кожаськод, уйвӧт та Яке - ултӥян? Инбанкъёс но фирма - Ваньмыз казна чот. Ымныразы - ширма... Кин кырмоз?! Ӧйтӧд! Куайытэм ошъёс кадь - Котьмазы тырмыт. Пушсы канӟем ты кадь Жобӟемын - пеймыт. Дуринчи дунне та, Я шайтан пузкар? Пӧям калыкмес нош Уте на Инмар... Игра ёросысь Зянтемошур гуртын улӥсь анаймес Феоктистова Алевтина Андреевнаез сюлмысьтымы ӟечкылкаськом вордӥськем нуналэныз! Сӥзиськом кема аръёс ӵоже юн тазалыко луыны. Сюлэмад ноку медаз каръяськылы куректон, ымнырад котьку мед пиштоз шумпотон но пальпотон. Гажаса нылпиосыд, картэд, эмеспиед, но ӵыжы-выжыосыд. Шӧкыч Гажано Шӧкыч уром! Тани ма пумысен гожтоно кариським тыныд. Берло нуналъёсы воксё кӧлонмес ыштӥм ини. Куазь ӟардэ гинэ, городысь ульчаосын "война" кутскем кожалод. Котькытын кылӥське ыбылӥськем-пуштылэм куара. Озьы бер уёзь тачыр! вазе. Нырысь-валысь асьме доры но чечен боевикъёс вуиллям кожамы вал. Бӧрысь тодӥмы ини: озьы быдэ вуымтэос пуштытонъёсын укылъясько вылэм. Китайысь ваем пиротехникаез (озьы шуо со пуштылӥсь арбериосты) котькуд сэргын сямен вузало. Нош лицензизэс юась-верась вань меда? Та пумысен вазиськылӥм милицие но. Отын пельпумъёссэс гинэ ӝутъяло - та ласянь, пе, нокыӵе закон ӧвӧл. Шӧкыч уром, оло, республикаысьтымы Югдурез утёнъя министерствое вазиськод ини? Ведь со пуштытонъёсын сэрен умме усьыны уг быгато мӧйы адямиос, секыт висисьёс, солэсь кышкатско вож нуныос. Юртты, пожалуйста! Ижевск городысь пенсионеръёс. Гажано эшъёс! Вань сюлмысьтымы ӟечкыласьком Россия Федерацилэсь Конституцизэ кутэм дырысен куать ар тырмон нуналэн! Дас кыкетӥ декабрь Россиын улӥсь трос нациен калыклэн историяз вунонтэм нунал луыса кылёз. Ортчем куать аръёс ӵоже странаын бадӟым воштӥськонъёс луизы. Луонлык кылдӥз вань калыкъёслэсь кылзэс, культуразэс азинтыны, узырмытыны. Воштӥськизы социально- экономической кусыпъёс, соин валче странамы быдэс дунне вылын аслэсьтыз интызэ шедьтӥз. Выль Конституция луонлык сётӥз странамес демократической амалэн азинтонъя сюрес бырйыны, калыкъёс куспын тупаса но огкылысь улонэз юнматыны, инъет кылдытӥз Россия Федерацилэсь быдэслыксэ утьыны. Удмурт Республика но бадӟым кужымзэ сётэ Россиез выльдонлы, демократиез азинтонлы. Сӥзиськом юн тазалык, шудо-буро улоон, ӵуказе нуналлы оскон. Удмурт Республикаысь Кун Кенешлэн Тӧроез А. А. Волков. Удмурт Республикаысь Правительстволэн Тӧроез Н. А. Ганза. ТОДМАТӤСЬКОМ КУН ДУМАЕ ДЕПУТАТЭ ӴЕКТЭМ МУРТЪЁСЫН Левоцентристский избирательный "Блок генерала Андрея Николаева, академика Святослава Федорова" СТРАНАЕН УЖАСЬ КАЛЫК МЕД КИВАЛТОЗ Гажано бырйисьёс, удмурт музъем вылын улӥсь калык! Странамес таркаса, юдылыса кельтэм "выльдӥськонлэн" вакытэзлы пум вуэ ни. Солэн бервылыз кӧшкемыт: куашкатэмын промышленность, выжытӥз ик уретэмын гурт удыс, лёгамын-куажгатэмын наука, трос миллион адямилэн таламын ӵуказе нуналлы осконэз, духовной культураез. Берло аръёссэ котькудӥз правительство кыл вылын "ужаз" наукаез азинтон бордын, экономикаез ӝутонын со валтӥсь инъет луэ шуыса. Нош ма лэсьтэмын уж вылын? Номыр но. Кунмылэн политикаез быдэсак пыӵатэмын вал одӥг бублэн: асьмелэн инженеръёсмы, учёнойёсмы но производственникъёсмы лябесь, соослы оскыны уг луы. Тӥни малы коньдон воксё ӧз висъяськылы Россиысь наукалы, промышленностьлы, конструкторъёслы, профессиональной образование сётонъя удыслы. Кытчы ваньмыз со вуттӥз - тодмо: быризы тросэз научной но конструкторской коллективъёс, шӧдскымон бере кылизы машина поттон удыс, вычислительный техника лэсьтон, строительной технологиез азинтон, бытовой электроникая бордын но химической производствоын ужан. Выльдӥськон шуонзы улсын куашкатэмын армия, солэн вооруженной кужымъёсыз. Пиосмес туннэ ум быгатӥське кӧттырымон сюдыны, кулэезъя дӥсяны но кутчаны. Нош кыӵе тазалыкен келяськом соосты службае? Та дыре ик НАТО пумен матэ но матэ вуэ асьмелэн границаосмы доры. Америкалэн Соединённой Штатъёсыз туннэ кӧбертэк асьмелэсь Кавказмес пырто ни "асьсэлэн экономической интерессылэн зонаяз". Ватонэз ӧвӧл: Россия дуннеын самой ӟеч пыӵал тӥрлык поттэ но вуза сое кунгож сьӧры, мурт армилы, асьмелэнъёслы вожъяськыны гинэ кыле на. Россия ас коньдонэныз (яке НАТО юрттэмен) арысь аре быдтэ арсеналъёссэ, нош со дыре ик США но НАТО-е пырись государствоос кемалась палэнскизы ни военной доктриназылэсь но люкам пыӵал тӥрлыксылэсь куштӥськыны уг дырты. Табере - Воткинске пуктыны чаклам выль завод сярысь. Со пумысен кема гинэ вераськонъёс мыно ни: ма ваёз калыклы чурыт эстӥськонэн ужась ракетаослэсь двигательёссэс татын сутон? Та вакытэ США но НАТО асьсэлэсь ракетаоссэс "быгатыса" лэзё Ирак но Югославия вылэ, быдэс дунне азьын военной кужыменызы но армиенызы ушъяськыса, мукетъёссэ кышкатыса. Россиез утеммы ке потэ, тазьы улыны уг яра ни. Тӥни малы данакез инженеръёсмы, учёнойёсмы но производственникъёсмы вуизы одӥг малпанэ: странаямы кылдэм туала югдурез чутрак воштон вылысь, парламентэ шедьыны кулэ чылкыт сюлэмо ас удыссэс ӟеч, валаса нуись адямис, зэмос профессионалъёс. Соос гинэ вормозы рыноклэсь куронъёссэ улонэ пыӵатыны но кулэ ӧре выжтыны - калык вылэ ужатыны, кунмылэсь экономиказэ ӝутыны но обороназэ юнматыны. Гажано эшъёс! Туннэ асьме азьын сылэ одӥг гинэ ужпум - Россиен кивалтонэ быръёно оскымон адямиосты. Милям огазеяськонмы вань луонозэ лэсьтоз властез калык кие сётон понна, Россиын улӥсь мурт котькудӥз аслыз уж мед шедьтоз но ӵуказе нуналэз сярысь медаз шугъяськы. Валерий Никулин, технической наукаосъя доктор, Удмурт Республикаысь Инженерной академилэн президентэз. Печатлаське дунтэк. Инты висъямын Кун Думае депутатлы Валерий Александрович Никулинлы. ШӦКЫЧ А.КОНЮХОВА: серемес веросъёс ТӦРО Одӥг ёросын туж чырткем удмурт пияшез исполкомлы тӧроез бырйиллям. Мугорын пичи гинэ. Ымнырыз питырес, йырыз быгылес, йырсиез гордпыръем-ӵуж, ӝикыт ӵышкемын. Сӥё- дано адями. Огпол со доры ӝужыт, таза мугоро удмурт кенак пырем. Ӧсэз усьтыса тӧро доры пырем но шуэм: - Мыным исполкомлэн тӧроез кулэ вал. - Мон тӧро! - сэрак ӝӧк сьӧрысьтыз пумитаз потыса шуэм тӧро. Нылкышно со шоры йырысеныз пыдозяз, пыдъёсысеныз йырозяз учкем-учкем но оскытэк шуэм: - Айда, не квастай! - киыныз зӥрак шонтэм но тӧро дорысь кошкем. БУЙГАТСКИЗ Одӥг удмурт кенак дораз тури-пари пырем но корка висъеттӥ поръяны кутскем. Маке туж нервничать карисько, - лад-лад бӧтьыртэм понназ. - Маке сӧроно-а, мар-а?! Тусьты-пуньы возён ӝажы доры матэктэм но огзэ бӧрсьы мукетсэ тэркыосты выж вылэ сальылэм. Сое кылыса, нылпиосыз юаллям: - Ма дауртӥськод озьы, анай? - Нерваосме йӧнатӥ ай! ДАТАЗЭ ВУНЭТЭМ Профсоюзъёслы тӧрое бигер воргоронэз юнматӥллям. Сэзь кутскем со выль ужез борды. Кыкетӥ нуналаз ик машинисткалы печатланы уж сётэм. Чебер, чырткем нылаш сое ӝегатскытэк печатлам но, ӝог но умой печатламезлы шумпотыса, тӧролы нуэм. Соиз печатламзэ лыдӟем но, машинисткалы берыктыса, бигер манер шуэм: - Биз даты! Машинистка, солэсь кылъёссэ умойтэм валаса, ӵыж-ӵыж гордэктэм, зӥрак берытскем но кабинетысь бызьыса потэм. Чидантэм ӝоже усеменыз, зар-зар бӧрдыса пукем но вылӥ кивалтӥсьёслы гожтэт лэзем, выль тӧро монэ интэмъяз, мыскыл кариз шуыса. Профсоюзъёслэсь тӧрозэс вылӥ кивалтӥсьёс доразы ӧтиллям. Мазэ-созэ валаса, гор-гор серекъяса пукиллям. Азьланяз пумиськылыкузы котьку вазьылӥллям: - А-а! Биз даты! Чырткем! Озьы огпол умойтэм верам кылъёсыз кемалы наӵ-наӵ лякиськизы, пе, тӧро борды. Куинетӥ сюрес - аслаз Школаын англи кыллы дышетӥсен ассэ адӟылӥз, мумиз косылӥз агрономе дышетскыны, нош улон бырйытӥз куинетӥзэ. Городэ мынӥз агроном луыны малпанэн, нош пыриз культпросветучилищее. Али шуг вераны, кызьы со луиз, нош быдэс улонзэ культураен герӟаны ӧз малпалля. Сыӵе дыръя кудъёсыз вераны шедьтыло: йыраз тӧл шула. Ӧз, дыр! Маке но, кыӵе ке но мугъёс азьпалзэ шӧдытӥзы, луоз. Пичи дырысеныз ик со трос сюлмаськоно луылӥз - ачиз сярысь гинэ ӧвӧл, выныз но, гурт куспын ужъёс сярысь но. Мумиз Екатерина Ильинична, коммунистической ужысь ударник, уй но нунал колхозысь ӧз ваньмылы. Токма шорысь уг шуо вал Валяез "андан ныл". Гужемзэ но, толзэ но, шуэм сямен, укноез ӧслэсь ӧз висъялля. Одӥг пол, ньыль арес дыръяз, ньыльдон градус кезьытэн лымы вылтӥ бызьылӥз. Нош гужем скал возьмасьёс гинэ, дыр, солэсь вазь султылӥзы. Бызьыса потоз вал бакча сьӧры, возь вылэ, тубоз гурезе, отын сяськаос, шудоз соосын но кускозяз лысвуэн пыласькыса вуоз гуртэ. Кема уг кыстӥськы пинал дыр. Школа, училище, сцена вылын шудон, кырӟан, эктон. Со но кема вылымтэ. Дышетсконзэ быдтӥз но Валентина Николаевна луыса ужаны лыктӥз Алнаш ёросэ, культура ласянь "пӧзись" интые. Соку татын ас удысазы туж тодмоесь луизы Людмила Посадова, Анатолий Ушаков, Екатерина Колпакова, Анна Ушакова, Юрий Медведев. Туж вылӥын вал художественной самодеятельностьсы, ортчытъязы пӧртэм конкурсъёс, смотръёс. Калык театрзы быгатэмзэ возьматӥз Москваын, басьтӥз нырысетӥ инты, быдэс чемодан дипломъёсын бертӥзы. Нош Валентина Николаевна татын ужатозяз 15 данъян грамота басьтӥз. Алнаше лыктэмезлэсь азьло малпаськылӥз ке, оло, ужзэ воштоно шуыса, табере ӟеч валаз: татын, культура удысын, солэн интыез. Валаз тодон-валанэзлэсь тырмымтэзэ но. Дышетскыны пыриз Москваысь культурая институтэ. Культурая министерство В.Бочкарева понна ужаны дышетсконъя университет луиз. Ужаз А.Ф.Завойских, Е.П.Ильиных, А.П.Сидорова кивалтэм улсын. Элькун ужъёс юн герӟаськемын вал общественной ужъёсын. Та вакытэ ик семья кылдытӥз, мусо нылъёссэ вордӥз. В.Н.Бочкаревалэсь вордскем нуналзэ алигес пусйыку, профессор К.И.Куликов сое Пассионария нимаз (со Долорес Ибаррурилэн псевдонимез). Кызьы ке Пассионария вӧлмытӥз калык куспо движенилэсь идеяоссэ, озьы ик Валентина нуэ калыке культураез. Зэм но, профсоюзэ ужаны выжемез бере, со культуралэсь ӧз куштӥськы - паськытатӥз гинэ ас удыссэ. Валентина Бочкарева луиз культурно-методической центрлэн директорез. Аслаз тодон-валанэз, быгатэмез борды йылтӥз на вӧзаз ужасьёслэсь амалъёссэс. Соос пӧлын вал Нина Малых, Валерий Гуща, Виктор Кузнецов, Владимир Красноперов, Александр Орехов, Валентина Перерва, Любовь но Алексей Мурзинъёс. Котькудӥз соос быгато Валентина сярысь тунсыкозэ вераны: кызьы соос ветлӥзы Румыние, отын ожмаськонъёс мыныку; кызьы вуылӥзы Германие но паймизы отысь ужъёслы. Нош мон вераны быгатӥсько Москваысь национальной галереяын но Венгер культурая, наукая центрын калык сямъёсты, киужъёсты возьматэмзы сярысь. Таиз Бочкаревалэн улоназ мукет тубат ини. Али нокин но уг паймы ни Советской (зэмзэ ке, Сивков) урамысь Чебер киужъёсъя устолык удысысь быгатӥсьёслэн удмурт юртсылы. Со 1992-тӥ арысен ужа. Та дырысен ик отын ужа В.Н.Бочкарева но. Солэн юрттэмезъя, ёросъёсын кылдытэмын 24 творчествоя юрт, 88 мастерскойын ужа 237 адями, 140 кружокын 968 дышетскись. Ёросъёсысь кибашлыосын ӵош та юрт туж уно адӟытонъёс ортчытъяз ни артысь городъёсын, кунгож сьӧрын но Москваын. Тунсыко пумиськон но адӟытон вал Набережные Челны городын. Отысь бертыкумы... Таӵе бусэз улытозям ӧй на адӟылы вал. Сыӵе пурысь но нап. Киосын палэнтэм потэ, нош со уг сётскы. Азьпалан - бус, автобуслэн урдэсъёсаз - бус, уг адӟисько писпуос, уг адӟиськы сюрес. Ньыль час интые, бертӥськомы ни быдэс уй. - Ма, ку вуомы ни Иже, - кинлэн ке чиданэз пӧсьтэ. - Эн сюлмаське, вуомы ай, - чурыт вера В.Н.Бочкарева. Со ӧтиз вал Играысь киужъёсъя юртысь ужасьёсты Набережные Челные адӟытонэн ветлыны. Отын со нуналэ удмуртъёслэсь культурая центрзэс кылдытӥзы. Шулдыр пумиськон ортчиз. Валентина Николаевна мадиз Ижысь шор юртсы, отын ужъёссы сярысь. Тодматӥз играосын. Ваньмыз умой вал, нош бертыку бус возъяськиз, кожон сюресэз шофёр адӟытэк кылиз но йыромиз. Сыӵе дыръя котьку но вӧзын луыны кулэ ӧжыт ке но чурыт вераны быгатӥсь адями - калык медам тулкымъяськы. Озьы ик вал Москваын но, удмурт калыклэсь устолыксэ возьматыку. Киужъёсты возьматонэз ӟеч радъян, калыкез ӧтён-люкан понна, ассэ жалятэк ужаз Валентина Николаевна. Артистъёсты сьӧразы басьтыны уксё тырмымтэен, асьсэлы ик кырӟано но луиз. Мар бен карод, улон олокыӵе но витьымтэ югдуре пуктылэ. Валентиналэн яратоно дырыз - тулыс. Инкуазен ӵош со ачиз но сайка-ӝутске кадь, вормонтэмзэ но пельпум вылаз ӝутэ. Сыӵе мылкыдын ужаменыз ик бакчаяз но солэн, ой, кыӵе шулдыр. Киыз капчи мынэ сяськазэ но, бакча сиёнзэ но мерттыны-будэтыны. Весь мед улысал тулыс гинэ сюлэмаз, нош со вордӥськыны шедьтэм сӥзьыл. Вордскем нуналаз, сӥзьылэз ӟечкыласа, сое но ушъяло ни. Нош туэ вордскем нуналэзлы Света нылыз солы кузьмаз пичи пизэ. Мар-о карод, табере сӥзьыл но луоз ни, дыр, та нылкышно лыдъялоз ни, дыр, яратоно вакытэнызыз. М.Гаврилова. Академилы - 45 ар 45 ар тырме туэ Ижын гурт хозяйство я институт кылдытэм дырысен. Кызьы тодмо, со вордскиз Москваысь вал вордонъя институтлэн инъетэз вылын. Та учырлы сӥзьыса, Гурт хозяйствоя кун академиын (тазьы нимаське табере та дышетскон заведение) туннэ ортчоз конференция. Вузысь тодосчиос кенешозы ортчем дыр ӵоже лэсьтэм ужъёссы, али быдэстоно ужпумъёссы сярысь. Пумиськонэ озьы ик лыктозы институтэз йылпумъямъёс - та вакытэ шаерысьтымы валтӥсь хозяйствоын но предприятиосын кивалтӥсьёс. Студентъёс люкаськемъёслы возьматозы шулдыръяськыны быгатэмзэс. О.Марков. - Али вераськоз кандидат Петров, со ик Шампунь, со ик Кондиционер, со ик Флакон! Суредэз В. Богорадлэн. Кун Думае депутатэ кандидатэ олокыӵе но адямиос чуртнаськыны тыршо. Пӧлазы вань, дыр, тюрьмаын пукемъёс но... (Гожтэтысь). Сюлэм косэмъя улоно Геннадий Анатольевич Галкин арлыдызъя пыре на егитъёс пӧлы, нош ужаны быгатэмезъя - бадӟым опытэн механизаторъёс радэ. Колхоз правлениын пукисьёс азьвыл ик алӥзы: "Ачиз сярысь со вераны уг яраты, огъя кылэ ӧд ке вуэ - пегӟоз". Кыллы но, ужлы но чупрес сямо воргоронэн кылмы тупаз. Зэм, уж сярысь ӧжытгес вераським. Мылкыдызъя, соку ик валано: гуртын улӥсь муртлэн, нянь будэтӥсьлэн сюлмыз пӧзе туннэ огыр-бугыр улонмы понна. Йӧнтэм нуиськись политика, армиез ултӥян, музъемез аналтон, коньдонтэк пукон - ваньмыз со адямилэсь кужымзэ сюпсе, мылкыдзэ быдтэ. "Удмуртия" колхозысь азьмынӥсь механизаторен кенешонмы но та йӧспӧртэм улон-вылонмы вылтӥгес кошкиз. Зэмен но, гуртын улӥсь пичиысен котькыӵе ужлы дыше, берпуметӥ нуналозяз музъем бордын тырше. Нош мар солэн сюлэмаз, кыӵе малпанэн иземысь султэ но кӧлыны выдэ? Кыӵе мертэт пыр учке дунне шоры? Тӥни ма сярысь тодэме потӥз, Геннадий Галкинэн пумиськыса. Армия. Службае мынытозям, йылпумъяй 2 номеро СПТУ-ез. Служить кари Свердловск областьын, МВД-лэн войскоосаз. Со вакытысь армия сярысь номыр уродзэ вераме уг поты, мон понна со ӟеч школа вал. Соку мынӥз ни "афган", отчы пӧлысьтымы кошкизы кык доброволецъёс - таджик кылэз тодӥсьёс, дембеле потэмъёс, шуыны луоз ни. Туннэ кызьы учкисько армия шоры? Аслэсьтым вордэм пиналме мон Кавказэ ӧй лэзьысал, аслам частям ке - лэзьысал. Но кин тодэ, кытчы отысен шедёз, юаса-вераса уз улэ. Мон сямен, адямиез армиын жугон, ултӥян кутске командование бордысен. Командир ӟеч ке - отын порядок, ӧвӧл ке - кузёяське "дедовщина". Колхозын но озьы ук: кытын предзы начар - отысь радлыкез уд шедьты. Тани али ӵапак мынэ армие келян. Но гуртын чалмыт, тодыны-валаны но уг луы - кинэ армие басьто. Пиосмес лушкем, кинлэсь ке ватскыса кадь службае ыстӥськом. Нош ми дыръя быдэс гуртэн келяллязы, кырӟаса, арган шудыса, коркась корка юмшаса. Командиръёсме мон туннэ но ӟечен гинэ тодам ваисько, соос уен-нуналэн солдатэн артэ вал. Ог-огдэ жугон, виён учырез уг тодӥськы. Ожмаськонэ туннэ кинэ басьто? Тросгес шедё гуртысь пиос, соос понна дурбасьтыны уго нокинлы. Пленэ шедемъёслэн анайёссы уксё бичаса отӥ-татӥ бызьыло, нош кытысь сомында шедьтод? Одӥг ласянь, мон шумпотӥсько, семьяямы нылъёс гинэ будо шуыса, мукет ласянь - кин ке но странаез утьыны кулэ. Со - воргоронлэн ужез, обязанностез. Юалляськон но быръёнъёс. Али трос верасько республикалы кивалтӥсь пуктон, президент яке йыр быръён сярысь. Милемлы валантэм: маин соос ог-огзылэсь пӧртэм луо, кинлэн кыӵе полномочиез? Бигеръёс президенттэк уло. Асьме сярысь, отын порядоксы вылӥынгес потэ кадь мыным. Соос сӥль но, картофка но татысь басьтыса нуо. Нош малы Удмурт Правительство закупез уг радъя, городын улӥсьёслы сиён-юон кулэ ӧвӧл ни шат? Интыосын али вӧлмемын самоуправление, шонерзэ ке верано, со кемалась пӧрмиз ни самоуправстволы. Мукет сямен кызьы валэктод дышетӥсьёслэсь уждунтэк пукемзэс но куд- ог мукет учыръёсты. Быгатоз-а президент тае кияз кутыны яке нош ик диктатура луоз-а? Калыклы огез валамон: кулэ одӥг власть, со гинэ порядок тупатыны быгатоз. Гуртлэн висёнэз. Ма уг тырмы гуртлы туннэ? Мон вордски та районысь огаз пичи гуртын. Отын али 30 хозяйство кылемын на. Колхоззы не вань, не ӧвӧл, шуыны луоз. Музъемъёсты аналтӥзы, луо вылын, пе, номыр уг удалты. Фермаез быдтӥзы. Калык ужтэк кылиз. Озьыен, уксёзы но ӧвӧл. Кӧтсэс тырыны выро, пудо-живот вордыса. Мынам сузэре, кылсярысь, муш возе, чечыен вузкаре, пудоен. Озьы ик уло-выло Гуртлэн туала висёнэз, мон сямен, ляб кивалтӥсь бордын. Со ачиз сярысь гинэ сюлмаське. Юон сярысь. Ӵемысь кылод: гурт калык, пе, юон вылэ чӧлскемын. Мон озьы ӧй шуысал. Тани милям ураммы Молодёжной нимаське, нокин но озьы юыса уг улы, ваньмыз мар ке но гурт котыразы ужало. Пичи дыръям мӧйыос гурт кузя юмшаса ветлозы вал, крезен - быдэс компаниен. Соку кудӟемъёс тросгес вал. Али кинэ-о адӟод юыса, черекъяса, кышнозэ жугыса бызыьлэмзэ? Сыӵеосты мон уг тодӥськы. Юо кинъёс-о? Ужтэк кылемъёс, колхозысь лобатэмъёс. Кин кызьы улыны дышемын ни. Семьяез чида - кытчы пырод. Азьло аръёсы ведь колхозысь юэм понна уг улляло вал, шӧмаськыса но уже поталлязы, малы ке шуоно, тунеядство понна пытсэт сьӧры келяллязы яке эмъяськыны, ЛТП-е. Али тон сьӧры нокин уз бызьылы, аслыд ачид кузё. Улэмед потэ - уен-нуналэн ужа, юэмед ке потэ - ю, нылпиостэ сютэм кельты. Сыӵеос ик кутско лушкаськыны, калыклэсь ваньбурзэ поттаны. Тани милям но Березек фермаысь кык ветылэз лобатӥзы, ӧз шедьтэ ни. Асьмелэнъёс вератэк, палэнысь лыктэм мурт кытысь мае тодэ? Юисьёслэн ик ужзы шуыса малпаськом. Колхоз. Хозяйствомы котькыӵе ӟеч мед луоз, солэн но тырмымтэосыз трос. Техника вужме, выльдыны уксё кулэ. Трактор, комбайн басьтоно ке, со нош ик шӧдӥське колхозниклэн кисыез вылын. Мар-о ватонэз: уждунэн гинэ нокызьы но уд улы. Гуртын созэ но, тазэ но выльдоно, нылпиосты но дышетоно, дӥсяно-кутчано. Пудо вордытэк, нокытысь ватсаса уксё поттыны. Семьяе сярысь ке верано, кышное дышетӥсь. Асьтэос тодӥськоды, кызьы соос уждунзэс басьто. Мынам гусеничной тракторе 11-тӥ арзэ чида ни, берло 2-3 арзэ ремонтысь уг потаськы. Отын часэз понна 1,50-1,80 манет тыро. Быдэс толэзь озьыгес ортче. Уксё ӟечгес басьтӥськом уборка дыръя, комбайнэд мынэ ке. Соин ик калык тросгес скал но парсь вордыны выре. Колхоз турын турнаны участок висъя, ю тысь сётэ. Ужаны луонлык вань, огез урод - вужмем техникаен котькӧня выр - пайдаез ӧвӧл. Нош мыным, киосыд мыно шуыса, ялан кинлэсь ке но кушкатэмзэ сёто. Кин быдтӥз-пӧськытӥз - ачиз ик мед лэсьтоз! Тӥни малы куддыръя ӝож мылкыд поталля. Асьмеос - удмуртъёс... Нош ик быръёнъёслы дасяськиськом. Одӥг арын ми Кун Кенеше бырйим вал Лопатинэз, куке но - Подопригораез. Бӧрысь соосты ӧм адӟылэ ни. Удмуртъёс ми палан ӧз шедьылэ кадь. Мон, огшоры механизатор, куддыръя паймыса но серекъяса кылзӥсько кунгож сьӧры потам удмуртъёслэсь вераськемъёссэс. Тани "Италмас" ансамбльмы Францие потаз. Отысь бертэм беразы артистъёс ушъясько: французъёсты, пе, воксё паймытыса кельтӥм кырӟан-веранъёсынымы. Неужто Удмуртие ветлэм американецъёс "удмуртъёсты воксё абдратыса кельтӥм ай" шуыса верасько меда? Куке но Зямбае Германиысь делегация вуылӥз. Ой, азязы ушъяськиськом ук: милям ваньмыз асьмелэн - няньмы но, сӥльмы но, картофкамы но, вӧймы но. Немец серекъяса юаз: "Майтал но-а асьтэос лэсьтӥськоды?" Шонер, калыкмы ужась. Но, дуннелэн азинскеменыз ӵошатоно ке, астэ амалтэк пуктод пещераын улӥсь адямиен артэ. Цивилизацилэсь укыр бере кылиськом! Соин-а ушъяськод меда Европа азьын? *** Сыӵе пӧрмиз вераськонмы Геннадий Галкинэн. Солэн котьма шоры - аслаз учконэз, аслаз мертэтэз. Озьы ик луыны кулэ, дыр. Улоно сюлмыд косэмъя, со асьмеды ноку но уз пӧя. Л. МЕДВЕДЕВА. Журналистъёсын пумиськонъёс Анатолий Марченко: "Вамышъёсмы юнмало" Анатолий Марченко - шаерамы тодмо адями, со Кун Кенешлэн депутатэз. "Удмуртторф" кун предприятиен 17 ар кивалтэ ни. Та удыс республикаямы одӥгез усто но огсыр ужасез. Секыт выльдӥськон вакытэ но со ялан ӝутске но азинске, тужгес но му вӧй поттонъя. Алигес А. Марченко пумиськиз журналистъёсын но рос-прос мадиз туннэ ужъёссы, азьлане вамышъёссы но малпанъёссы сярысь. - Ужъёсмы, зэмзэ но, умой мыно,- мадёнзэ кутскиз Анатолий Владимирович.- Туэ 326 миллион манет тыр продукция поттом, яке 10 процентлы тросгес. Кыкез гинэ предприятимы кӧня ке "чутэ". 183 сюрс тонна гыбед (торф) поттэмын. Со пӧлысь ӝыныез келямын Киров областьысь ТЭЦ-е, кылемзэ гуртъёс басьтӥзы. Азьло торфмы кошке вал Шатура, Ленинград, Ярославль но Владимир ТЭЦ-ёсы. Ижысь 1 номеро ТЭЦ но торфен эстӥськиз. Табере югдур воштӥськиз. Гыбед басьтыны уг быгато ни гурт хозяйствоос. Выльдӥськон вакытэ предприятилы но капчи уг йӧты. Со вань ужасьёссэ утиз но шуг- секытысь потыны котькыӵе амалъёс утча. Берло дыре калыклы торф сурет лэсьтэ но полиэтилен плёнкае тырыса вуза. Адямиос сое шумпотыса басьто. Таӵе удобрение кошке Оренбург областе, Хабаровск улосэ, Башкортостанэ но музон интыосы. Буёло плёнка дуно ке но, коньдонзэс уг жаляло. Со бен бадӟым пайда уг сёты, но кулэ ужлэсь уг палэнско. Та продукцизылы - гыбедлы - кулэясько Голландия, Швеция, Финляндия, Греция но мукет кунъёс. Но соослы уг кельшы 5-10 килограммъем грузэз тырон-ӝоктон уж. Сое, пе, механизировать карыны кулэ. Али предприятие бизнес-план дасяз ни. Таиз но ужзы интыысьтыз вырӟоз. Кун предприятие ялан паськытатэ му вӧй поттонзэ. Та удысын со 15 ар ужа ни. Али 100 пала скважинаосыз уй-нунал нефть кыско. Выль арын вуттозы арлы быдэ 1 миллион тонна му вӧез чылкытатонъя цехсэс. Со туж бадӟым вормон луоз. Али соос нефтьсэс чылкытато "Удмуртнефтьлэн" Киенгоп му вӧй поттон интыяз. Туэ НГДУ 270 сюрс тонна му вӧй кыскоз, али 250 сюрс тоннаез лэсьтэмын ни. Нош выль арын 300 сюрсэз ортчыны чакла. Му вӧй поттӥсьёс асьсэос кыско му вӧй гумыос, электроюбоос. Предприятилы юртто подрядчикъёс - Лэсьтӥськонъя 3 номеро управление, "Металлургмонтаж", "Удмуртгеология" но мукетъёсыз. "Удмуртторф" ноку уг утча кредитъёс, лэсьтӥське, азинске аслаз кужыменыз, поттэм пайдаеныз. Туэ асьме коньдонэнымы 17 качалка пуктом, 2000-тӥ арын - 25. Сыӵе луонлыкъёс вань. Предприятие 10 толэзьскын федеральной бюджетэ 52 миллион манет выт тыриз, кун бюджетэ - 33, нош интыысь (Як.-Бодья, Воткинск, Шаркан) бюджетъёсы - 21 миллион манет. Предприятие туэ уно пайда басьтоз. Со дыраз тыре уждун но сётэ мукет юрттэт. Туэ кык пол будэтӥз уждунзэс. Утиз вань ужась посёлокъёссэ. Озьы шуыны уг луы нюлэс корасьёс сярысь. Соос мырдэм "шокало". Тани Вавож районысь Нюрдор-Котья торф поттӥсь предприятие металлообработкаен выре. "Ижмаш" АО-лы юрттэ, мотоцикл ёзъёс лэсьтэ. Предприятилэн али 680 сюрс тонна поттэм торфез кылле, басьтӥсь уг шедьы. Озьы ке но, со умой возе соцкультбытэз, улон инты лэсьтэ. Тани Сюмси районысь Орлово торфопредприятие кык сменаен ужа но пумен тросгес поттэ гыбед. Анатолий Марченко Кун Кенешлэн депутатэз луыса бырйисьёсызлы трос лэсьтэ. Грах районын газ кыскыны юрттэ. Чагыр эстӥськон вуэ ни "Родина" колхозэ. Ёросысь вань школаосты, больницаосты тупатъяз. Кизнерысь РДК-лы пичи автобус басьтӥз. Кизнер районын химической ож тӥрлыкез быдтон программая Бемыж черкогуртын больница ӝутӥське. Нош егит специалистъёс кытын улозы? Анатолий Владимирович 6 квартира пуктыны басьтӥськиз. Ижын цирк лэсьтыны 1 миллион манет уксё висъяз. Огъя вераса, со туэ гинэ мукет предприятиослы, организациослы но учреждениослы, интыысь кивалтон ёзъёслы 2 миллион манет ёрос юрттэт сётӥз ни. - Азьланезлы малпанъёсмы бадӟымесь,- мадёнзэ азинтэ Анатолий Владимирович.- Му вӧй поттонмес 2003-тӥ арозь 500 сюрс тоннаозь вуттыны чакласьком. Но торфъя секытгес. Азьло арлы быдэ 1300 сюрс тонна гыбед поттӥськом ке вал, али араз - 200 сюрс тонна пала. Грах районысь Покровское му вӧй поттон инты борды басьтӥськом. Нефть отын трос ӧвӧл ке но, араз 20-30 сюрс тонна сётоз. Ведь скважинаез портыны ичизэ 3,5 миллион манет коньдон кулэ. Секыт ке но, ужамы пыӵатӥськом выльзэ, кутӥськом компьютеръёсты но музонзэ. - Анатолий Владимирович, тӥ малпаськоды вал республикаямы нефтеперегонной завод пуктыны. Кызьы со улонэ пыӵа? - Секытэн. Россилэн делегацияз ветлӥ США-е, тодматски сыӵе заводъёсын. Араз 500 сюрс тонна му вӧез переработать каронъя завод ӝутыны документация лэсьтӥм, 200 сюрс доллар уксё тыри, нош шаермы сое пуктыны коньдон ӧз шедьты, кулэ вал ӧжытсэ 40 миллион доллар. Альметьевскын сыӵе завод ужа ни, бигеръёс уксё шедьтӥзы. Анатолий Марченко - сюлмаськись адями. Кун Кенешлэн берло сессияз со кӧтӝожзэ вераз, мынам, пе, сю сюрс тоннаосын дасям торфе кылле, нош тӥ гурт удыслы сое басьтыны бюджетын коньдон уд висъяське. Предприятие ог интыяз уг сылы. Тани Сюрек леспромхоз "кӧтурдэсаз" кылле, нош Дзякино торф поттон предприятилы кивалтӥсе пуктӥзы 26 аресъем специалистэз. Вуоно арын со ужасьёсызлы 18 квартира дунтэк сётыны чакла. "Удмуртторф" кун предприятие али 1700 адямилы уж сётэ, со пӧлысь НГДУ-ын 240 мурт тырше. Калыклы 8 пумо торф дасяло. Сокол торфопредприятиын (Завьялово район) 2000-тӥ арын гидрошлангъёс но амезъёс лэсьтыны кутскозы. Г. РОМАНОВ. Журналистъёсын пумиськонъёс Валтӥсез почтальон вераське оскымон Арня ортчыса йылпумъяське газетъёслы но журналъёслы гожтӥськон. Кызьы со ортче туэ? Та сярысь алигес журналистъёслы мадиз Почта кусыпъёсъя федеральной службалэн Удмуртиысь управлениезлэн кивалтӥсез Юрий Кайгородов. Куатетӥ декабрьлы вераса, "Удмуртская правда" газетлы гожтӥськиз 21,3 сюрс мурт, "Удмурт дуннелы" - 8,7 сюрс, "Известия Удмуртской Республики" газетэз басьтыны мылкыд кариз 5,3 сюрс адями. Москваын потӥсь изданиосты учконо ке, асьме шаерын тужгес но ярато "Спид-инфо" газетэз. Сое кайта басьтоз 7 сюрс мурт. Кыкетӥ интыын - "Аргументы и факты" (3 сюрс). "Трудэз" яратэ 2,1 сюрс мурт. Трос лыдӟисьёсыз Удмуртиын "Комсомольская правда" газетлэн но. Ог дас - дас вить ар талэсь азьло центральной газетъёслэн тиражзы бадӟым вал ке, берло дыре югдур воштӥськиз. Вань басьтоно изданиос пӧлын 61 процентэз табере усе интыын потӥсь газетъёс вылэ. Мугез валамон: Москваысь газетъёс дуноесьгес, собере соос асьме доры нуналлы-кыклы ӝегаса вуо, озьыен, иворъёс со дырлы вужмо ни. Юрий Михайлович мадиз кивалтоно предприятиезлэн ужамез сярысь но. Шуг-секытъёс шоры учкытэк, почтовикъёсмы пайда поттыса тыршо. Со понна пӧртэм луонлыкъёсты уже кутыны выро. Кылсярысь, связья 500 отделениос пӧлысь котькудӥз али магазинлы укша. Отысь олома но басьтыны луэ. Ньыль ар талэсь азьло, вузкаронэз радъян борды кутскыкумы, милемыз олокызьы но пыкылӥзы. Табере чалмизы. Уго куиньмос люкетэз доход удысамы ӵапак вузкарон чотын люкаське, пусйиз Кайгородов. Пайдаё луэ пенсиос нуллон но. Бен, гуртын та уж изъян вае, но ыштонъёс город чотын берыктӥсько. Али почтаын ужасьёс фото печатланэн но, пыдкутчан тупатъянэн но, усьтон лэсьтонэн но, трос мукетыныз но выро. Ужпум одӥг - кызьы ке но пайда поттоно но почта ёзъёсты утёно. Кунгож сьӧрын но таӵе сюрестӥ ик мыно, вераз Юрий Михайлович. Отысь связья предприятиосын олокыӵе но услугаос басьтыны луэ. Мылкыд карисьёс отын ик шутэтскыны но быгато. Ми шӧдӥськом, шуиз почталэн кивалтӥсез, уже кутымтэ луонлыкъёсмы трос на. Тани Башкириын одӥг семья шорлыдын 1,5-2 газет-журнал басьтэ, Удмуртиын - 0,3. Дорамы потӥсь изданиослэсь лыдзэс йылэтыны луоно, со понна редакциос но почтаын ужасьёслы уртче кариськыса ужано. Ю. М. Кайгородов - Кун Кенешлэн депутатэз. Со пыре "Единство" огазеяськонэ. Юрий Михайлович озьы ик кивалтэ на Удмуртиысь хоккейя федерациен, луэ "Удмурт Телеком" огазеяськонлэн советэзлэн членэз. Отын со уте государстволэсь интересъёссэ. И. ЛЕБЕДЕВ. СПОРТ Италиысь - бадӟым вормонэн Италиын та нуналъёсы йылпумъяськиз кикбоксингъя дуннелэн чемпионатэз. Отын кужымзэс мертазы 52 странаысь 1200 пала спортсменъёс. Россилэн огазеям командаяз пыртэмын вал асьме республикаысь но кикбоксингъёс. Ижевскысь "Защита" клубысь Роман Аглуллин но Калык куспо восточно-европейской университетлэн спортъя клубысьтыз Андрей Рукавишников огъя зачётын вормисе потӥзы. Воткинскысь Алексей Пищиков но Ижевскысь Константин Пушкарев тямыс кужмоосыз пӧлы шедизы. Россилэн огазеям командаез дуннелэн чемпионатаз вормисе потӥз. Ӟечкыласьком! Е. Елизарова. Макаровоысь кизили Шаерамы одӥг хозяйстволы гинэ "Удмуртия" ним сётэмын. Со кемалась дырысен зол колхоз, арысь аре трос сӥль-йӧл поттэ, удалтэм ю-нянь, бакча сиёнъёс будэтэ. Азинсконъёссы герӟаськемын татысь муш кадь тыршись калыкен, лулысь-сюлмысь ужаменызы. Одӥгез соос пӧлысь - Ольга Курбатова, Макаровоысь устоез доярка. Ольга ас ужзэ туж яратэ. Хозяйствое ӝегатскыса вуэменымы, сое кема утчано луиз. Колхозысь кадровик-секретарь ивортӥз, алигес, пе, контораысь кошкиз, дораз яке клубын луыны кулэ. Фермаяз кожатэк гуртаз кошким. Милемды пумитаз 6 аресъем Алёша пиез. Чик кепыратэк пумитамы потӥз но нэнэез кытын юаммылы меӵак шуиз, фермаын, пе. Оло оским, оло ӧм, но клубын, пе, уждун сётъяны кулэ. Отчы донгиським, но тунгонэн гинэ пумиським. Озьыен, Ольга фермаын. Гидъёсын чалмыт, куӵо скалъёс гинэ ӝоместо. Ольга Петровнаез, зэмзэ но, фермаысь ик шедьтӥм. Со туннэ дежурной но вылымтэ, но кунянъёссэ чакланы лыктэм. Ольга - егит доярка, 1991-тӥ арын фермае лыктӥз, анаезлэн сюрестӥз мынӥз. Бадӟым сузэрез но татын ик скал кыске. - Мамае пенсие потытозь солы юрттыны фермае ветлӥ,- маде Ольга Курбатова.- Витетӥ классысен скал кыскыны ӧдъяй. Но азьло асме эскери вуриськонын-керттӥськонын. Ижысь 27 номеро училищеын вуриськисе дышетски. Вавожын кӧня ке машинаен керттӥськи. Бызи Можга районысь бускель Бадӟым Уча черкогуртэ. Отын но дояркаын ужай, кык сменаен скал кыским. Скотникъёс пудоосты сюдо вал, молокопроводэн йӧл кыским. Кӧня ке малпаськемез бере, Ольга Петровна веранзэ азьланьтӥз: - Туэ быдэс группаме выльдӥ, мӧйы скалъёсме ветылъёсын воштӥ. 25 пӧлысь 23-ез кунян ваизы, йӧл сёто ни. Азьло арлы быдэ котькуд скалэлэсь 4000 килограмм йӧл кыскылӥ, туэ ичигес луоз. Нош кызьы тӥ мукетъёсызлэсь тросгес йӧл кыскиськоды юамелы, со огшоры валэктӥз: пудоез, пе, яратоно, ӟеч учконо, фермаысь уг потаськы. Сиён ведь ваньмызлы огкадь сёто. Али куроез вандыса силосэн сурало, одӥг килограмм йӧллы 200 грамм пызь висъяло но чебер возь турын шеде. Пыкмемын ӧвӧл. Фермаын егитъёс ужало. Вужаз гидын 8 доярка, выляз - 4 (отын молокопровод вань ни). Гужем нылы юрттыны ветлэ, кунян люкта, соскаен нонтэ. Аслыз 10 арес гинэ ай, нош нылпи садын воспитатель луыса ужаны малпа. Колхоз трос пудо вордэ. Соосты сюдо-утялто Курбатова Ольга кадь ужзэс яратӥсьёс. Скалъёссы 1000-лэсь уно. Туэ 10 толэзьскын скаллы быдэ 3170 килограмм йӧл басьтӥзы ни, нош макаровоос - 3365. Соосты азьпалто чужъяловоос, таосызлэн 3485 килограмм ни. Берегес кылё Волковоысь эшъёссы. Татчы уго 372 скалъёс интыямын. Бадӟым фермаын трос йӧл кыскыны секытгес. Скалъёссэс искусственной амалэн бызьылыто ке но, ош возё на. Зэм, татын ӟеч ужъёссы трос. Тани Макарово фермаын ик Татьяна Овчинникова туэ 10 толэзьскын скалэзлы быдэ 3625 килограмм йӧл кыскиз ни, нош эшъёссы Ольга Рычкова но Екатерина Чайникова - быдэн 3200-3300 килограмм. Кызьы верай ни, котькинлэсь усто тыршо Чужъяловоысь дояркаос. Соос быдэс бригадаен пудооссэс сюдо-утялто но туэ 10 толэзьскын котькуд скаллэсь 3490 килограмм йӧл люказы ни. Бригадаязы пыро Ольга Кабанова, Лидия Соловьева, Логинова но Карпова Татьянаос. Нош Березекысь звено - Римма Зайцева но Ольга Самарова - дас толэзьскын скаллы быдэ 3260 килограмм йӧл басьтӥз ни. Дояркаослэсь адӟем каро мукетъёсыз пудо утисьёс. Парсьёссэс куайыто Волково но Березек фермаосын. Колхозысь экономистлэн Неля Ложкиналэн ивортэмезъя, пудооссы ӝог будо: парсьёссы нуналаз шорлыдын 400 грамм, нош кунянъёссы - 740 грамм. Колхоз фермаосын огсыр уж мынэ. Хозяйство тырмыт пудо сиён дасяз. Со вуоно гужемозь окмоз. Озьыен, ӝӧк выламы йӧл-вӧй но, сӥль но вуоз. Г. РОМАНОВ. * Ольга КУРБАТОВА. Туспуктӥз В. КАМАШЕВ. Музейын - нылпиослэн ужъёссы Кызьы гожъямы вал ини, Калык куспо Восточно-Европейской университетлэн "Грифон" галереяяз кылдытыны чакламын нылпи творчествоя музей. Та дырлы отчы люкамын ни куинь сюрс пала нылпи ужъёс. Асьсэлэсь суредъёссэс отчы ыстӥллям Ижевскысь нылпи садъёсысь, искусствоосъя вань школаосысь, егитъёслэн творчествозыя дворецысь "ЭСТ" студиысь пиналъёс. Усто ужъёсынызы озьы ик шумпоттӥзы Воткинскысь, Сарапулысь, Можгаысь, Кизнерысь, Игра ёросысь но бускель Нефтекамск но Набережные Челны городъёсысь егит суредасьёс. Нырысетӥез адӟытон сӥземын луоз нылпи суредъёслы. Со усьтӥськоз декабрь толэзьлэн пумаз. Адӟытонэз радъяны юртто Ижевскысь администрация, культурая но туризмъя управление, Культурая министерство. "Азьланезлы малпанъёсмы бадӟымесь",- шуэ "Грифон" галереялэн кивалтӥсез но нылпи творчествоя музейлэсь проектсэ дасясь Борис Жутовский.- Нылпиослэн татчы люкам ужъёссы шулдыртозы адӟытонъя пӧртэм залъёсты, соосты возьматом мукет городъёсын но ёросъёсын". Е. НИКОЛАЕВА. Азьмынӥсь хозяйствоосын Удмуртия "Удмуртиен" данъяське Вавож районысь "Удмуртия" колхоз туэ басьтэм азинсконъёсыз понна пыртэмын Удмурт Республикалэн Данъян пул вылаз. Хозяйствоен дас витетӥ арзэ кивалтэ Аркадий Семенович ЮШКОВ. Газет баммы туннэ быдэсак сӥземын та азьмынӥсь коллективлы. Историысь чуръёс Туала "Удмуртия" колхозлы кутскон сётӥзы "Выль улон", "Итчи", "Азьлань", "Чемошур", "Лумпо", "Равенство", "Шунды", "Выжы", "Броневик", "Победа", "Удмурт"... Озьы нимаськизы нырысетӥ кылдэм коллективной хозяйствоос. 1928-тӥ- 1930-тӥ аръёсы кужымзэс огазеязы Б. Волково, Александрово, Акмарово, Буд-Утча, Н. Березек, Ст. Березек, Чемошур-Докъя гуртъёсысь крестьянъёс. Отысен кутско "Удмуртилэн" выжыосыз. 1950-тӥ арын 27-тӥ июне "Выль улон", "Итчи", "Азьлань" но "Чемошур" колхозъёс огазеясько но кылдыто одӥг - "Выль улон" нимаськись хозяйство. Центральной усадьбаез - Волково гурт. Нош "Броневик" но "Победа" интые 1951-тӥ арын кыле огазеям "Победа". Центрез - Ст. Березек гурт. 1957-тӥ арын соос борды итӥське "Удмурт". Куинь колхозъёс асьсэлы басьто "Родина" ним. 1950-тӥ арын 16-тӥ июле кылдэ на эшшо одӥг коллективной хозяйство - "Равенство". Татчы пыро "Лумпо", "Равенство", "Шунды" но "Выжы". Таизлэн шорсюлмыз луэ Макарово гурт. 1959-тӥ арын 23-тӥ мартэ огазеясько "Равенство" но "Выль улон". Озьы кылдэ "Удмуртия" колхоз. Огазеям кенешын та нуналэ ик быръё 15 муртлэсь правление но 7 муртлэсь ревизионной комиссия. Председателе пукто Павел Севастьянович Карповез, Волипельга РТС-лэсь директорзэ. 1960-тӥ ар. "Удмуртия" борды огазеяське "Родина" колхоз (ваньмыз 8 гурт но 6 комплексной бригада). П. С. Карпов "Удмуртия" колхозэн кивалтӥз 1959-тӥ-1969-тӥ аръёсы. Ужын азинсконъёс басьтэмез понна пусъемын Горд Знамя орденэн но Данъян грамотаосын. 1974-тӥ-1975-тӥ аръёсы председатель луыса ужа Анатолий Владимирович Байков. 1976-тӥ ар. Колхозникъёслэн куремзыя, нош ик председателе пукто П. С. Карповез. 1979-тӥ арысен 1988-тӥ арозь "Удмуртиен" кивалтэ П. А. Артемьев. 1988-тӥ ар. Колхозлы председателе быръемын А. С. Юшков. Азьветлӥсьёс Пудо вордонъя, нянь, картофка будэтонъя "Удмуртия" колхоз республикаын нырысетӥосыз радын мынэ. Ваньмыз со - колхозлэн тыршемез. Правительство вылӥ дунъяз ӟеч ужаны быгатӥсьёсты. Ленин орденэн пусъемын парсь сюдӥсь Анна Константиновна Волкова, Горд Знамя но Октябрь революция орденъёсын - бригадир Иван Григорьевич Ложкин. Орден нуллӥсьёс пӧлын - Нина Михайловна Бушмакина, Василий Михайлович Бушмакин, Мин Михайлович Кудрявцев, Илья Ильич Лебедев, Анна Петровна Дорофеева, Клавдия Ивановна Мальцева, Зоя Петровна Ельцова, Николай Матвеевич но Мария Петровна Бушмакинъёс, Антонида Ивановна Обухова но трос мукетъёсыз. Соослэн нимъёссы пыраклы кылёзы колхозлэн историяз. Лыдпусъёс Куинь ар ӵоже колхоз тазьы ужаз: 1997 1998 1999 Гектарлы быдэ ю тысь кутсамын 32 ц 19 25,3 картофка басьтэмын 157 ц 169 140 Сюро таза пудө102 3210 3200 кысконо скалъёс 900 1050 1050 парсьёс 1621 1547 1600 1 скаллы йӧл кыскемын (кг) 3695 3741 3750 привес басьтэмын (КРС) г 763 810 800 парсь куайытонын (г) 344 394 400 Пайда басьтэмын (рентабельность) % скал сӥль 22 7 36 парсь сӥль - 1 23 йӧл (дотацитэк) 17,5 22 26 Толэзьем уждун адямилы быдэ 589 701 935 1 ц продукцилэн асдуныз скал сӥль 376 505 800 парсь сӥль 700 755 1200 йӧл 92 108 180 ю тысь 51 63 90 Пеляд пон! Шырыт но ческыт Али гуртын улӥсьёслэн асьсэлэн нянь пыжемзылы паймись ӧвӧл ни. Нош городын адямиос куанер улэмзылы ӝожтӥсько ке но, нянь пыжыны азьтэмъясько. Соин сэрен кисыысьтызы 300 манетсэс толэзьлы быдэ тӧлъя-буръя лэзё. Тани магазинысь кык сукыри сьӧд нянь басьтоно ке, нуналаз 7 манет 10 копейка кулэ (одӥг сукыриез - 600 грамм). Нош ачид пыжиськод ке, 2,7 поллы дунтэмгес усе. Лыдъялэ асьтэос: 1 килограмм няньлы 600 грамм пызь мынэ. Со 4 манет тыр сяна уг луы - секталаезъя кык сукыри мындагес ик луэ. Уд оскиське? Эскере пыжыса - няньды дунтэмгес но усёз, ческытгес но кошкоз. Нянь котыны уд быгатӥське-а? Дышето. 1 килограмм няньлы кулэ 400 грамм кыкетӥ сортъем чабей пызь, 500 грамм ву. Соосты сурано, маял ватсано, собере шуныт азе пуктоно. 5-6 час чырсатыса, эшшо 200 грамм пызь йылтыса нырконо. Ыльнянь ӝутскем бере пыжыны пуктэ. Ческыт мед кошкоз! В. ИВАНОВ, Ижын улӥсь. Светлана СМИРНОВА: Политикаын радыз ӧвӧл, отын кышномуртъёс тырмымтэен... Кун думае быръёнлы дасяськонлэн берпуметӥ вакытэз кутскиз. Тросэз лыдӟисьёс, малпаськом, туннэ ик тодо ни, кин понна сётозы куаразэс. Кызьы возьмато эскеронъёс, 29-тӥ округъя ньыль ёӧно воргоронъёсын артэ тужгес синмаськымон адӟиське удмурт кышномурт - Светлана Смирнова, Кун Кенешлэн Тӧроезлэн воштӥсез. Малыез валамон, Светлана Конситантиновна шаерамы вазен но тодо ни вал ӟеч ужъёсызъя. Нош табере, вань ёросъёстӥ но городъёстӥ ортчыса, уно дасо пумиськон ортчытыса, калыкмылэн етӥз нылыз уката тодмо луиз. - Мон паймисько Светланалэн чидамезлы, - вера солэн эшез Лариса Бурнова. - Сизьым часын ӵукна со колзозэ уэ ни, ӝыт сизьымын - весь сюрес вылын на. Укмысэн-дасэн юрттысьёссэ люкаса, кенеш ортчытэ, азьланезлы план дася. Озьы нуналлы быдэ. Котькудӥз воргорон но сыӵе секытэз уз вормы. - Ай ярам, оло, озьы гинэ ветлысал ке, - вераськонэ итӥське мукетыз эшез - генерал-майор Геннадий Климентов. - Котьмалэсь шугез - калык азьын кыл кутон, адямиослэн юанъёссылы валэктыны быгатон. Куд-ог юлтошъёс юромо пышкылыны но туртто ук ай. Сыӵеос сюлмаськонзы одӥг - политикае пырыны турттӥсь муртэ вӧсь карон. Озьы ке но, Светлана Константиновна йырзэ уг ошы. Со шӧдэ огшоры ужась адямиослэсь дурбасьтыны дась луэмзэс. "Удмурт дунне" газетын висъям интые ми тужгес ӵе пумиськылӥсь юанъёсты сётыны кенешим. Вакчияк печатласьком соослы валэктонэз. - Светлана Константиновна, малы тӥ, кышномурт, Кун Думае мыноно кариськиды? - Шуак-дуак вуэм малпан ӧвӧл со. Ачим но кема малпаськи, трос дасо эшъёсын но рос- прос кенеши. Кӧня ке ар ӵоже калыкен ужаса, тани мае умой валай: ыммес усьтыса гинэ улонлэсь умоямзэ возьмам ке, пайдаез уз луы. Быгатэмезъя котькудӥз со понна пичи ке но вамыш лэсьтыны кулэ. Комсомаолын, сельхозинститутын, китвалтон удысын люкам опытэ, ученой луэме, кык академиын дышетскеме, малпасько, юрттоз мыным Россилэн парламентаз но ужаны. Собере мукетыз но вань на - политикаын кышномуртъёс туж ичи, оло, соин но отын радыз ӧвӧл. Пиосъёсмы весь куспазы керето, олома понна но вожвылъясько. Семьяын но кышномурттэк номыр уг пӧрмы, озьы ик - Думаын. - Нош асьтэлэн семьяды пумит ӧвӧл-а? - Та ласянь мон шудо адями. Матысьёсы монэ валало, юртто. Улӥськом ньыль кузя. Анае мӧйы ини, со туж умой адями, улонын ӧз удалты солы - бак вордскиз. Аслаз дышетскемез ӧвӧл ке но, монэ огназ будэтӥз, ваньзэ сётыны сюлмаськиз. Кузпалэным - Володяен - сельхозинститутын тодматским. Ачиз со Сюмси ёросысь Орловское посёлокын будэмын, нош анай-атаез Селта палъёсысь потэмын. Пимы Антон школаын дышетске, компьютерез яратэ. Отметкаосыныз шумпоттэ. Кандидат луыны мулкыдме валаса пумитазы. Ваньзэ быгатэмзыя юрттыны выро. - Тӥледлы дурбасьто коммунистъёс но "Единство" депутат фракцие огазеяськем ужбергатӥсьёс, ветеранъёс но "Уджмурт кенеш", нылкышноослэн кенешсы но промышленникъёс... Нош соос ог-огенызы куд-ог ужпумъёсъя воксё уг тэро ук. - Мон тазьы шуисько: котькуд партиын, котькуд огазеяськонын вань умой адямиос, кин вань кужмыныз тырше та эликеби луэм улонмес тупатыны. Соин ик та вакытэ асьмелы быгатоно ӵош кариськыны, керетонъёсты вунэтыны. Сотэк азьлань сюресмы паськыт уз луы. - Округады валантэм югдур кылдӥз. Кык мурт палэнтэмын мандат понна нюръяськонлэсь. Малы меда? - Мо жалясько, озьы луиз шуыса. Нош мугез огшоры - законэз чакламтэмы. Глазовысь ужбергатӥсь Александр Першин подпись люканэз мыдлань радъям, нош журналист Серафима Благинина кандидат понна ӝуткан уже аслэсьтыз газетсэ уже кутэм, озьы лэсьтыны законъя уг яра вал ке но. - Светлана Константиновна, нош ӧд ворме ке, куректонэ усёды ук... - Бен, тамында ужам-бызьылэм бере пайдаез ед ик луысал ини. Нош ӧз пӧрмы ке, улон соин уз йылпумъяськы. Та кык толэзь ӵоже мон туж трос выльзэ тдӥ, уно сю адямиосын эшъяськи. Ваньмыз со азьланьын одно ик яралоз. Татьяна Мазитова. Парсьпиос... Якубовичлэсь ОРТ-лэсь "Поле чудес" передачазэ котькудӥз телевизор учкись ӟеч тодэ. Алигес Леонид Якубович Шаркан ёросысь Сосновка больницаын ужась медсестралы Светлана Перевозчиковалы сое Москвае ӧтьыса гожтэт ыстэм. Светлана кылем выль ар азьын кык парсьпи курыса Москвае гожтэт ыстӥз вал. Якубович сётэм кылзэ быдэстӥз. Маин берытскиз Перевозчикова столицаысьтымы - тодмо луоз матысь дыре возьматоно передачаысь. Б. НИКИТИН. Президент ик йӧногес кадь Кун Думае депутат быръёнэн ӵош асьмеос вуоно арняе малпанмес вераны кулэ республикамылэсь вуоно кивалтӥсьсэ кызьы ниман сярысь. Но таиз пумысен малы газетын- телевидениын ичигес верасько. Котькудӥзлэн аслаз малпанэз, вылды. Мон тазьы лыдъясько: Удмуртилэсь вылӥ муртсэ "президент" шуоно. Республикамы туала дыре ассэ сюдыны уггес быгаты бере, кузёосмылы отӥ-татӥ, тужгес но Москваысь бадӟым кабинетъёстӥ киез мычыса бызьылоно луэ. Нырысетӥ "ымнырмы" отчы президент нимын пыриз ке, соин, малпасько, ӟечгес вераськозы, ужпумез ӝоггес эскерозы. Озьы ӧвӧл шат? Юнме уг шуо ук ӟучъёс: "Встречают по одежке, провожают по уму". В. ЗАЙЦЕВ, Ижын улӥсь. Смольников ке - оскымон! Вань ук дунне вылын воштыны луонтэм адямиос: соос кошко ке, интызы шалтрак буш кыле. Таос радэ пыртыны луоз, дыр, "Удмуртия" колхозлэсь валтӥсь зоотехниксэ Кирилл Кузьмич Смольниковез но. 30 арлэсь кема нуналлы быдэ вамыштэ тодмо сюрестӥз пудо вордон фермае. Кӧня иськем ортчемын, кӧня дэри коламын меда жадёнэз валасьтэм пыдъёсын? Нош кӧня тонна йӧл кыскемын, кӧня сӥль будэтэмын визьмо, быгатонлыко специалистлэн кивалтэмез улсын? Та лыдпусъёсты Кирилл Кузьмич ачиз но уг тоды, со понна кулэ нимысьтыз арифметика - быдэс улонзэ мертась-чотась наука. Ужась адями огзэ тодэ: тыныд оскем удысэз озьы нуыны, калык шоры учкыны возьыт медам луы. Красногорск районысь Смольники гуртын вордскем воргоронлы гуртоосыз азьын ӵыжектыны номыр понна - соин данъяське быдэс удмурт шаермы, тужгес но вавожъёс. Татын уго мытӥз со аслэсьтыз ужан сюрессэ. - Крестьян семьяын будӥсь мурт кӧкыын кылльыкуз ик шӧдэ ни, дыр, музъем ужасьлэсь кузьыт нюлам вузэ. Со ачиз но пичиысен дышиз гырыны но усыяны, кебитын корт дурыны. Школаын но Смольниковъёслэн пизы котьку ушъяно дышетскисьёс пӧлын вал: Кирилл "витьёс" гинэ басьяз. Но школаез йылпумъяса, азьланяз кытчы ке мынон сярысь малпанзэ уретӥз война - атаез ожын быриз. Воргоронтэк кызьы-о гуртэз кельтод? Улонэз мургес валанын, тодон-валан люканын гуртысь пияш понна зэмос академия луиз Советской Армиын служить карон. Нош воинской службазэ йылпумъяса, сержант Смольников лыктэ Ижысь сельхозинститутэ. Дышетскон аръёс ӝог ортчо. Дипломен специалистэз ужаны ысто Вавож районэ, "Удмуртия" колхозэ. Куд-огез серекъяз на: "Куинь ар ужад ке, вордскем палъёсад бертод ай". Колхозникъёс егит зоотехниксэс умой пумитазы. Смольниковлы но Вавож палъёс тодмо вал ни, татын со ортчиз практиказэ. Самой соку ик синмаськыса учкылӥз ни пыд вылаз юн сылӥсь хозяйство шоры, синмаськиз ужась калыклы. Вало шур но ас ӧраз кыскиз кадь та учкымон, зӥб-зӥб сямо воргоронэз. Нош Смольниковлэн пушказ соку ик каръяськиз одӥг малпан: малы та азьветлӥсь хозяйствоын пудо вордон удыс ыштонъёс вае, урожайзы но вань вылысь? Мугез ӟеч выжы скалъёсты будэтон бордын вылэм. Та уж хозяйствоын аналтэмын. Самой со бордысен кутскиз удыссэ егит зоотехник. Огкутскемен пудо йырез уд вошты. Нуналмысь нуналэ, толэзьысь толэзе, арысь аре нуэ 30 ар талэсь азьло кутскем гожъямъёссэ Кирилл Кузьмич. Отын ваньмыз пусъемын: кыӵе скал ку пияз, кӧня кунян басьтэмын, кудӥз скал кӧня йӧл сётэ, радызъя мынэ зоотехнической учёт. Озьы колхоз потӥз ӟеч сюро таза пудо выжы вылэ. Туннэ нуналэз ке верано, "Удмуртия" районын котькинлэсь трос йӧл кыске. Скаллы быдэ та лыдпус вуиз ни 3653 килограммозь. Ошпиоссы 500 килограммозь будо. Нош соос ӧжыт ӧвӧл, Волково фермаын гинэ 600 йырлэсь ятыр. Колхозлэн ваньмыз ньыль фермаез. Скал уллёзэс 1050-озь вуттӥзы ни, 1997-тӥ арын 900 йыр вал. Пусъём на: тросэз хозяйствоос, шуг-секытлэсь кышкаса, кысконо скалъёссэс кулэстӥзы. - Нош ми - ваменэсэсь, ваньзэ ас сяменымы лэсьтӥськом, - серем пыр шуэ Кирилл Кузьмич. - Калыкъёс кулэсто ке, ми будэтӥськом, йылтыны ке косӥзы, ми кулэстом. Ас йырыныд улоно но ужано, луонлыкъёстэ чакласа. Соку ноку но юмоке уд сюры. "Удмуртилэн" 92 процент доходэз люкаське пудо вордонысь. Йӧллэн пайдаез - 50,8, парсь сӥльлэн - 12, скалъёслэн - 29 процент. Смольников кадь специалистэн ужаны каньыл председательлы но. Аркадий Семенович Юшковлы та ласянь удалтӥз, шуыны луоз. Малы ке-а колхозлэн правлениез Кирилл Кузьмичез, 60 арессэ тырмытӥз ке но, пенсие келяны уг дырто. Кызьы сыӵе адямиез ужезлэсь куспетӥ карод? К. К. Смольников улонысьтыз 32 арзэ "Удмуртилы" сӥзиз. Солэн уськытэм пудо выжыез арысь аре юнмалоз но азинсконъёсын шумпоттоз на. Со ик луоз Россия Федерациысь гурт удысын сӥё-дано ужасьлэн самой ӝужыт гурезь йылэ тубонэз но вормонэз. Президентлэсь ӟечкылан Россия Федерациын Конституцилэсь нуналзэ пусъемен валче, Удмурт Республикаысь Кун Кенешлэн Тӧроезлы Александр Волковлы Россилэн Президентэзлэсь Борис Николаевич Ельцинлэсь гожтэт вуиз. "1993-тӥ арын кутэм Конституция, - верамын отын, - Россиын демократиез азинтонын бадӟым вамыш луиз. Выль дауре выжон азьын асьмелэн валтӥсь Законмы бадӟым оскон кылдытэ - со Россилы выль вакытэ выжыны оскымон сюресъёс усьтэ. Оскисько, Тӥляд кичӧлтонды но опытты ЪЪИ дауре юрттозы Россиез уката но чебергес, узыргес карыны", - шуэмын гожтэтын. Россия Федерацилэн Президентэз Александр Волковез праздникен шуныт ӟечкылаз но республикалэн кивалтӥсезлы ужаз азинсконъёс сӥзиз. Удмурт Республикаысь Кун Кенешлэн пресс-службаез. Пурысь луысал улонмы... Таиз ар туж узыр вал культура удысын ортчем бадӟымесь ужрадъёсын. П.Чайковскийлы, Г.Корепановлы, Г.Корепанов-Камскийлы сӥзем крезьгуро фестивальёс, Финн-угор калыкъёслэн фольклорзыя ВИИ калык куспо фестиваль, пинал крезьгурчиослэн калык куспо конкурссы, эстрадаын кырӟась егитъёслэн региональной фестивальзы... Бадӟым ӧтчамъёсазы люкаськылыса, азьпала сюрес "ӵогизы" композиторъёс, писательёс, художникъёс. Лэсьтӥське выставкаос ортчытъян бадӟым комплекс-галерея. Вырӟытэмын выль циркез лэсьтон ужпум. Вить библиотекаын усьтэмын интернет классъёс. Национальной библиотека бадӟым уж нуэ "Память Удмуртии" программаез быдэсъянъя. Библиография удысын азинсконъёсыз понна солы туэ сётэмын республикамылэн Кун премиез. Нош Удмурт национальной театрмы шедиз шаермылэн Данъян пул вылаз. Нырысьсэ татысь сцена вылын пуктэмын Куӟебай Гердлы сӥзем спектакль. Паськыт пусъемын А.Пушкинлэн вордскемез дырысен 200 ар тырмон юбилей но... Ваньмыз та ужрадъёс калейдоскоп кадь син азьтӥ ортчизы, Операя но балетъя кун театрын республикаысьтымы культура но искусство удысын ужасьёслэсь нуналзэс пусйыку. Залэ люкаськем эшъёсты ӟечкыласа вераськизы культурая министр Н.М.Бессогонов, Кун Кенешлэн Тӧроезлэн нырысетӥ воштӥсез П.Н.Вершинин но Правительстволэн аппартэныз кивалтӥсь А.П.Горяинов. "Лулчеберлык пушйытэк, кыӵе пурысь луысал асьмелэн улонмы". Павел Николаевичлэсь тазьы верамзэ асьсэлэн туж усто концертэнызы зэматӥзы на пиналъёс, пӧртэм конкурсъёслэн лауреатъёссы, дипломантъёссы. Т.Николаева. Тылӝуэн ӵушкам яратон Дыртыса гинэ пальто вылысьтым лымызэ куртки но шуныт квартирае пыри. - Ӟечбуресь Валентина Еремеевна. Ой, толэд туэ лек ке лек. Лы дорозям ик кынтэ ни вал, ява... - Ойдо татчыгес, Леночка, труба бордын шунтӥськы, - ӧтиз мӧйы кышномурт. - Мон али ик пӧсь чай пукто. Пыдыд но кынмиз дыр, тапочки кутча. Отчы-татчы бызьылэ Валентина Еремеевна. "Эн сюлмаське" шуэмме кылэм-адӟем уг кары. Мон нош ик паймыса учкисько та пичи гинэ мугоро шаплы песянай шоры. Аронова Валентина Еремеевналы арлыдо ни. Быдӟым ож пыр потэмын. Нош мылкыдын туж егит. Телевизор очкитэк учке, радио кылзэ, туннэ нуналлы дунне вылын мар луиз, ваньзэ тодэ, дыр. "Удмурт дунне" газетэз но быдэсак лыдӟыса потоз. "Таиз гожтэм лябгес кадь, таиз туж кельшиз", - дунъялоз. Соин котьма сярысь вераськыны капчи: улон, уж, шаерамы экономика но политика ласянь кылдэм югрдур, яратон... Бен, бен, яратон. - Валентина Еремеевна, нош война дыръя яратон вал-а? - лыктэм мугме усьтоно кариськб& - Соку со сярысь малпаны кышкано вал. Милям ротамылэн командирез шуиз: "Кин ке егит ныл война вылтӥ кышномурт луиз шуыса тодӥ ке, соку ик штрафной батальонэ келяло!" Но яратон лыктэ - уг юа вал. Ӵемысь со синкылиен-куректонэн йылпумъяськылӥз... - Нош тӥляд? - пӧсь чайме ӟузёнъям юасько. Пересь кышномурт огдырлы чусомиз. Кемалась ортчем суредъёсты син азяз улӟытыны выриз кадь... - Мынам туж бадӟым яратонэ вал. Сыӵе яратон ваньмызлы уг сётӥськы, дыр... 1942-тӥ ар. Валя педучилищеез йылпумъя. Кӧня ке гинэ школаын ужаса вуттэ но, ӝоген, ноябрь толэзе, 17 аресъем нылаш фронтэ кошке, связист луэ. Ӟар кезьыт тол нуналъёсы ожмаськон дырья кытӥ ке телефон ез тӥяське ке, Валя, куас вылэ султыса, отчы дыртэ ни. Чалякгес, чалякгес! Ӝеганы уг яра, тонэ возьмало. Тани со чигиськем инты. Бышкись лымы вылтӥ нюжтӥськыса, Вали ез доры вуэ, кезьытэн пумем киосыныз мырдэм-мырдэм ез пумъёсты шедьтэ. Ӝоггес, ӝоггес! Киос уг ни кылзӥсько. Соку егит ныл кезьытэн вандӥсь ез пумъёсты пиньыныз сузя но ваче юнматэ. Кыдёкын ик ӧвӧл омырез зуркатыса пуштэ мина, лымыен суро сьӧд сюй пазьгиське. Таӵе дыръёсы Валялэн сюлэмыз шымырске... Секыт ортче ожмаськон. Сюрсъёсын-сюрсъёсын пиос быро, танкьёс улэ выдо, сутӥсь пуляослэсь пограло... Ваньмызлэн сюлэмазы одӥг веран: "Сталин понна! Родина понна!" Та кылъёсын ик Валя но ожмаськонэ мынӥз. Комсомолка юн оскиз: Гитлерез пазьгозы но выль чебер улон лэсьтозы. Со сярысь ик гожъяз гуртын ӵош будэм эшез Асинкрит но. Та йӧспӧртэм нимо егит пи кӧня ке толэзьзэ Москваын офицере дышетскиз. Табере ожмаське. Солэн шуныт гожтэтъёсыз Валилэсь мылкыдзэ лӧпкытъязы. Векчи шинель пыр сӥсъясь кезьыт тӧл но, пеймыт уин пуштылӥсь минаос но сокем кӧшкемыт ӧз потэ ни. "Бен, советской войскоос одно ик вормозы", - ас понназ шыпыртылӥз егит ныл. - Соку Асинкритэн ӵош луомы. Ог-огмес валаса уломы. Ма, кызьы сотэк, ож пыр потыса... Нош марлы ай берло гожтэтэз сокем секыт вал: "Валенька, туж кышкыт ожмаськон луыны кулэ. Малы ке сюлмы шуг, улэпкын пото меда..." Арня бӧрсьы арня ортче. Эшезлэсь ивор ӧвӧл. Соку 45-тӥ зенитной полк Белоруссиын ожмаськиз. 19 аресъем Валентина, младшой сержант, отделенилэн командирез луиз ни... Белорус музъем вылын фашистъёслэсь сьӧсьяськем бервылзэс адӟыса, солэн сюлмыз сьӧд вирен кисьтӥськылӥз. Нокызьы вунэтыны ӧз быгаты дӥськутъёсын туйылэм куинь этажъем коркаез... Кинлэн? Мар дӥськут со? Бӧрысь тодӥз: та дӥсь кузёос, нимысьтыз коркаосы пыртыса, одӥгтэм сутыса быдтэмын... Ӝоген Валялы куинь сэрго гожтэт вуиз. Асинкрит ӧвӧл, гуртысь апаез лэзем... Синвуэн нюромем кагаз ивортӥз: "Асинкрит Белорус шаерын Гродно котырын геройлыко бырем. Похоронка басьтӥм..." Жо-он, жо-он, - вазиз егит ныллэн пель дӥняз. Оло, пушкаослэн ыбылэмзы озьы шуккиське? Ӝо-он... Кызьы быриз? Белорус шаерын, Гродно котырын... Кыӵе город пыр толон гинэ потӥм? Гродно ик вал, лэся, ук?.. Озьыен, артэ вылӥськеммы?" - Валялэн суй-пыдъёсыз юскиськизы, мӧляяз ныж пуртэн бышкалтӥзы, кадь... Валентина Еремеевна кымысаз усем пурысьтам йырсизэ палэнтӥз. -Тӥни озьы, война мынэсьтым нырысетӥ яратонме нуиз, - мур лулӟиз со. - Али но туж жаляса малпасько на. Чылкак улонэз адӟытэк но быриз ук... - Собере шорам пальпотыса вазиз: - Леночка, котькӧня шунтӥськы но, сюлэм уг ке шуна, весь кынмоно. Вай мон тыныд эшшо чай поно на. - Шат озьы ик быриз яратонды? - эшшо маке поттыны вырисько. - Ӧз, нылы. Адӟон ни со. Та куректонэ ик мыным мукет бадӟым яратонэлы сюрес усьтӥз, дыр... Сӥзьыл. Сульпам лымы дэриен сураськемын. Кот тӧллэн пельтэмезъя, йӧкурам шинель улын мугор юзырак луэ. Таӵеен землянкаысь потам ик уг поты. Фронтын но шыпыт кариськиз. Кӧнязэ ке телефонисткаосты сьӧраз басьтыса, Валентина пекарняе няньлы ветлоно кариськиз. Сьӧразы роталэн комсоргез Николай Семенов но потӥз. Мешокъёсын ас вылазы арня ӵоже роталы тырмымон нянь вайыны кулэ. Пичигес гинэ коркан бадӟым тусьёсын пыдынызы лёгаса ыльнянь нырко. Ма, туала арын сое нянь шуыны кыл но уз берытскы. Нош война вакыт берпуметӥ оскон та сьӧд суралтэм вылын возиськиз. Тыро мешокъёсын лыктэмзы бере, Лиза телефонистка Валиез палэнэгес чортӥз но лушкем пальпотӥз: - Тодӥськод-а мар, Валя, пекарняын нянь возьмаса сылыкумы, комсоргмы тон сярысь юалляськиз. Валентинады, пе, котьку но капчи мылкыдо вал, нош берло вакытэ малы ке ас тусыз ик ӧвӧл, жуммемын, ас вактаз малпаськыса ветлэ... Мон шуи - туганэзлэсь похоронка басьтӥз. Ой, Вали, синмаськемын со тыныд... Валя номыр ӧз вазьы. Нош роталэн комсоргез, зэм но, ӵемгес но ӵемгес телефонисткаос доры ветлыны ӧдъяз. Егит нылъёсын вераське, шудэ, нош ачиз лушкемак Валентина шоры учкылэ. Младшой сержантлы ӧз кельшылы сыӵе гольтыръяськон. Со пезь-пезь шуоз вал: "Товарищ комсорг роты, ас интыяды тӥ асьтэос кузё, нош татын мон командир. Соин ик дисциплинаез эн тӥялэ!" Егит связистка туж кышка вал угось, отделениез сярысь юнме кыл вӧлдон потоз шуыса. Озьы ке но, улон соосты весь ог-огзылы матэ кариз. Телефон ез тӥяськем интые потоно ке, Валя сьӧры одно ик Николай но калъяське... Ӵошен политзанятиосы ветлӥзы, ожъёс вискын шыпыт дыръёсы ваче кенешыса пукылӥзы. Яратон... Ӧвӧл, та сярысь малпан но ӧй вал. Кенешизы улон-вылон сярысь, тодазы вайылӥзы эшъёссэс. Оскизы: ӝоген война быроз. Ма отчыозь кема но ӧвӧл ни ук! 1945 ар. Каргам тушмон кый лябӟем мугорыныз позыръяськыса берен аслаз караз пегӟе... Нош собере? Мар собере? Николай - Ивановской областьысь, Валентина - Удмуртиысь. Шат пыраклы люкиськозы? Валяез батальонлэн командирез ӧтиз. Вань нылкышносты татчы ик, Польшае, кельтыны малпаськом, шуиз. Но ӝоген, пе, вордӥськем интыосады бертоды. Нош ми тушмонэз пырак карозяз вуытозь тышкалом на. - Семёновен вераськод-а? Егит нылашлэн ымнырыз льӧлектӥз. - Малы... Семёновен? Командир, кескич пальпотыса, чиньызэ сэзъяз: - Э-тэ-тэ, ваньзэ тодӥсько ук. Я, мын, келя... Люкиськон азязы егитъёс пичи лавкае пыризы. Николай яратонзэ конфетэн кунояз, татысь ик басьтыса, пичи гинэ чагыр синучкон кузьмаз. "Эн вунэты вераськеммес. Бертӥ ке, одно ик ӵош луом...". Е. ПАНФИЛОВА. - Ноку эн кузьмалэ яратондылы синучкон! Уг яра! - ӝотрак уретӥз мадёнзэ Валентина Еремеевна. Собере небытак вазиз: - Кузьмазы ке но, Леночка, эн басьты. Ми соку номыре ум тодӥське вал. Пересьёс юнме уг шуо вылэм: синучкон - люкиськонлы. Со ик милемыз пыраклы ог-огмылэсь висъяз... Малы, малы одно ик синучкон кузьманы кулэ вал? Кӧня пол меда та юанэз сюлмыз вӧсь луыса аслыз ачиз сётъяз Валентина Еремеевна. - Нош собере мар луиз? - сюлмы шуген уг чидаськы ни мон... 1945 арын августэ Валя Иже бертӥз. Соку ик "Советской Удмуртия" газетэ корректоре ужаны интыяськиз. Улӥз пичи гинэ коммунальной квартираын. Арнялы быдэ Коляезлэсь шуныт гожтэтъёссэ басьяз: "Валентина, туж курисько тонэ, мын вал анае доры - Казаъстанэ. Возьмалэ монэ отын. Милемыз эшшо куинь арлы шаермес возьманы кельтозы на. Туж курисько, мын анае доры..." Нош востэм удмурт нылэз китӥз но, пыдтӥз но возьдаськон думылӥз: ма, кызьы со отчы... огназ мыноз? Ӧвӧл, Валя кызьы ке огназ ик улоз на, куинь арзэ возьманы чидалоз... Кема возьмам демобилизация!.. Гожтэт. Табере соос ӵош луозы! Нош малы меда чылкыт осконлэн сяськаосыз лек тӧлэн кынтэмын луо? Со берпум гожтэт дырысен толэзь ортчиз, кык... Нокыӵе ивор ӧвӧл. Егит ныллэн сюлэмыз шымырскиз. Кин ке сое туж вӧсь карыса алдаз кадь... Шат Коля, дор палъёсаз бертыса, мукетсэ шедьтӥз? Азьвыл Таня нимо яратонэз сярысь вералля вал ук... Кезьыт толэз лякыт киыныз маялляса, тулыс но вуиз. Городысь ульчаос жильыртӥсь тудвуосын тырмизы. Котыр динь-тинь! вазе. Таӵе дыръя яратон тылпу эшшо но юнгес гоманы ӧдъя. Нош Николай? Шат солэн яратонэз кысӥз? "Мар луиз? Мар луиз?" Кӧтыз ӝожен уйёссэ бӧрдыса потылӥз Валя. Нош одӥг пол... Пинь висемезлы чидатэк, кытчы пырон инты уг шедьты Валя. Сӥньысэн думылыса ишкалты вал но, война вылтӥ сӥньыс но шедьтоно ӧвӧл. Шинельлэсь вурем пальтозэ дӥсяса, сузэрезлэсь кылем шляпазэ понӥз но "кильтрес" дӥсеныз базаре сӥньыс басьтыны потӥз. Вузкарись кышноос дортӥ ортчыкуз, кин ке вазись луиз: - Ӟечбуресь, мон тӥледыз тодӥсько, тӥ Танялэн сузэрез... Валя оскытэкгес учкиз нычыр-начыр гинэ дӥсяськем пиосмурт шоры. - Нош мон тӥледыз уг тодӥськы! - ӝотак вазиз но базарысь потыны дыртӥз. Пиосмурт сьӧраз сюлъяськиз. - Возьмалэ ай, мынам тӥледын вераськеме потэ... - Нош мынам уг! - Мынам тодэме гинэ потэ, кыӵе улэ ни сузэрды. - Вот солэсь ик юалэ! - пинь висеменыз керӟегьяське Валя. Озьы ке но, пиосмурт ӧз палэнскы, ялан аслэсьтыз нуйтӥз. Ульча шортӥ бызись тудву вамен пуллэсь выж лэсьтэмын. Валя отӥ потыку, пиосмурт выжлэн пумаз лёгиськыны шедьтӥз, лэся. Нылмурт йырысеныз пыдозяз дэри вуэн пазьгиськиз. Татын ини солэн чиданэз пӧсьтӥз: - Мар тӥледлы кулэ? Али ик вералэ! Тани милициез ӧтё! - Вождэс эн вае, - посӥськиз янгыше сюрем мурт - мон ведь юромо ӧй... Тӥни озьы Валентина Григориен тодматскиз. Гриша нуназе заводын ужаз, нош ӝытъёсы Валилы маза ӧз сётъя: "Ойдо киное ветлом..." "Уг поты, уг..." - пыкиськыны выриз нылмурт. Нош аслэсьтыз сюлэмзэ кин ке кискачен чепылляз кадь: "Малы, малы Николай уг гожты? Оло, зэм но, вунэтӥз со монэ, мукет кышно ваиз?.." Одӥг пол Григорий шуиз: "Валя, мон егит ӧвӧл ни. Огнам улӥсько. Тон но огнад. Семья кылдытон сярысь малпаськоно ук. Туганэдлэсь нокыӵе ивор уд басьтӥськы. Ялан возьмаса улод шат? Бызь мыным..." Та кылъёсты малпаса, уез уйбыт ӧз кӧлы Валя... Бен дыр ортче. Нош кызьы яратонтэм адямиен улод? Нуналъёс пумтэм гозы кадь кыстӥсько. Колялэсь гожтэт ӧвӧл. Воксё чусомиз Вали. Мар солы кыле на? Гришалы быземзэ Валентина валаса но ӧз вутты. Со сюан озьы ик бус пыртӥ кадь ортчысал но... тём пеймыт син азьзэ возъяз. Та нуналэз Валентина Еремеевна вань улытозяз сюлэмыз пилиськымон вӧсь луыса тодаз вае... Та нуналэ ик ӝыт выль кен вылысьтыз вылаз ньыль гожтэт басьтӥз! Конвертъёс вылысь тодмо кинюртэмез адӟыса, быдэс дунне чукинскиз кадь потӥз. "Коля! Николай! Ой, мар мон дауртӥ! Мар дауртӥ!" - кӧтӝожезлы, сюлэм вӧсезлы чидатэк бӧрдӥз Валя... Нош Гриша гожтэтъёсыз лыдӟыны ӧз сёты, гурын сутӥз. Берпуметӥзэ гинэ часталы адӟытӥз... - Тӥни озьы, нылы, адӟонлэсь уд пегӟы, кызьы мукет сямен валэктод на сыӵе-сыӵе тупамъёсты... Коля демобилизацие кошкыса вуттымтэ, киосыз сӧсырмыны сюрыса, кӧня ке толэзь госпитальын кыллем. Мынам гожтэтъёсы госпитале вуиллямтэ, частяз ик кыллиллям. Колялэн но гожтэтъёсыз кытын ке чукаса улӥллям. Эъ, сюан одӥг нуналлы бергес карысалмы ке... Валентина кема буйганы ӧз быгаты. Гожтэт гожтыны пуксе но, киысьтыз ручкаез усе, азьысьтыз чылкыт бумага синкыли шапыкъёсын нюроме. Мар гожтод? Кызьы Николайлы ваньзэ валэктод?.. Ӝоген Николай Алексеевичлэсь пичи конверт вуиз. Туж вакчи но лек гожтэтын со вань сюлэм вӧсьсэ но йыркурзэ кисьтэм. Кызьы, пе, тон озьы яратонмес лёганы дӥсьтӥд? Шат ноку ӧд яратылы, огшоры шудыса гинэ вераськид... Колялэн кылъёсыз ныж пуртэн зырӟем кадь луизы ке но, Валя чидаз: "Мед, ойдо. Оло, вунэтыны капчигес луоз!.." Эъ, ваньзэ куштыса, яратонэд доры мын вал, бордаз ӟыгырскы! Уг лу... Валентина партийной адями. Уз, со ноку озьы уз кары. Пичи Валерикез вордскем бере, егит анай шумпотонзэ ивортыса Николайлы гожтӥз. Огшоры гинэ, эшезлы кадь. Толэзь пала ортчыса, редакцие Колялэсь ивор вуиз (та гожтэтэз Валентина Еремеевна учкытэк но вераны быгатысал ни, дыр). "Валентина,ӟечбуресь! Бадӟым саламен тӥ доры Николай. Нырысь ик дыртӥсько ивортыны: гожтэттэс басьтӥ, кудӥз понна сюлмысьтым тау карисько. Валя, тӥ шуиськоды, яратонды ноку уз кысы, монэ вань улытозяды тодады ваёды. Мар бен, со умой... Одӥгзэ гинэ жалясько, ноку но ум адӟиське ни... Нош озьы бере, малы юнме ортчемзэ тодэ вайыны на. Соин сэрен вӧзысьтымы адямиосмес вӧсь кариськом... Гожтӥсько тӥледлы но вань сюлэмме усьтыса шуисько: тӥ бере мон ноку но сыӵе нылъёсын ӧй пумиськылы ни. Зэм, вал чеберъёсызгес но. Озьы ке но, ялан малпалляй но малпасько тӥ сярысь гинэ... Нош ма карод: вискамы сомында иськемъёс. Валя, монэ бугыртӥзы тӥляд кылъёсты: "Мон кышномурт ни, нуные вань. Нош тӥ егит на..." Эъ, Валя, Валя, тӥ соглаш луысалды ке, мон номыр шоры но ӧй учкысал. Тӥ вӧзын гинэ, тӥледын ӵош гинэ луыны... ...Мар ке умойтэм ке, вождэс эн вае. Ӟеч луэ. Гожъялэ, возьмасько. 3.06.50. Н.Семёнов". Но та бӧрсьы Валя яратонэзлы ӧз гожъя ни. Угось уж дураз супыльтонъёс вӧлдӥськизы: "Кызьы озьы бызем кышномурт кыӵе ке пиосмуртлэсь гожтэт басья на..." - Тӥни сыӵе вал со, мынам бадӟым яратонэ. Чебер яратонэ, кудӥзлы кылдымтэ улыны - ӵужектэм куасаллям интыостӥз чигиськем кагазэз маялтӥз Валентина Ере-меевна. - Тани, берпуметӥ гожтэтэз гинэ кылиз на. Татчыозь мон сое нокинлы но ӧй адӟытъя... Сылӥськом ми Валентина Еремеевнаен укно дурын, пурӟись лымы шоры учкиськом. Со пыр мӧйы кышномуртлэн син азяз пуксе, дыр, быдэс огыр-бугыр улонэз, дасо аръёс ӵоже бездымтэ яратонэз... Нош мынам син азям... Ӧвӧл, ӧвӧл, мон улонэз чик но уг тодӥськы на. Улонэз, кудӥз понна ожмаськиз Валентина Еремеевна. Сыло укно дурын пересь кышномурт но егит нылаш. Висказы - ӝыны даур. Котькудӥзлэн аслаз адӟонэз. Адӟемез но адӟоноез. Яркыт ӝужаз но кема кысытэк гомаз яратон кизили. Нош туннэ соин артэ синъёссэ кыньыръя ини мукетыз - пичи инӟы... Елена Панфилова. (Печатламын "Ашальчи" журналысь.) Зарниен пусъемын Туэ декабрьлэн кутсконаз Москваысь одӥгаз бадӟымаз выставкаос радъянын, "Экспоцентрын", ортчиз "Россиысь рынокъёсын устоосыз вузъёс но услугаос сётон" кыкетӥез адӟытон. "Ижмаш-Мото" огазеяськон отчы нуллӥз тылпу кысон но грузъёс нуон-ваён мотоциклъёс, мотопомпа но куинь пумо велосипед. Экспертъёс ижмашъёслэн вузъёссылы вылӥ дунъет сётӥзы но соосты зарни медален пусйизы. Н.Сергеев. Асьмеды музъем вордэ Улон кутске музъем бордысен: макем юн сое яратод - сокем ӟеч улод. Федор Ложкин, Вавож районысь "Удмуртия" колхозысь валтӥсь агроном, тае школа парта сьӧрысен ик валаз ини. Туннэ но уг жаля быръем улон сюресэз сярысь. Дас вить ар ужа ни та колхозын, ю-нянь басьтонъя соос котьку азьпалан. Туэ но урожайзы вылӥын. - Федор Валентинович, секыт арын но умой толъён понна, кӧня ю тысь кутсаны кулэ? - Гектарезлы быдэ 26 центнер, туэ ми сомында басьтӥм. Тырмыт кисьтӥм фуражлы но, колхозникъёслы но люким. Вуоно арын но талэсь улӥын луыны кулэ ӧвӧл. Вылӥ урожай чотын ми пумен кулэстӥськом ю кизён бусыосмес, али соос басьто ог 2 сюрс гектар, азьвыл аръёсы 3 сюрс ёрос кизьылӥм. Бушам муос вылэ пудо сиён культураос, турын кизиськом. Кысконо скалъёсмес ялан йылэтӥськом. Ми ас азямы ужпум пуктӥм тысё культураослэсь удалтонлыксэс арлы быдэ 26 центнерозь вуттыны, азьло 16 центнерен тырме вал. - Пудо сиёнлы палэнэ вазиськоно уг луылы-а? - 1985-тӥ арозь куролы олокытӥ но ветлон дыръёс вылӥллям, лэся, мон сыӵе учыръёсын ӧй пумиськылы ни. Ваньмыз сиёнмы асьмелэнэз тырме. Гужемлы быдэ толбытлы дасяськом сенаж, турын-куро. Туннэ ми быдэсак сямен выжим пуртэсо культураос вылэ, кизиськом клевер, донник. Куштӥським кукурузаез силослы будэтонлэсь, шундыберганлэсь, кушманъёслэсь. Соос дуногес усё. - Тысё культураос пӧлысь тӥ дорын кудӥз ӟечгес удалтэ? - Йыды. Арлы быдэ со умой урожай сётэ. Туэ но шумпоттӥз - гектарысьтыз 30 центнер кутсам. Колхоз пудолы но, ужасьёсмылы но толбытлы тырмоз. Ӟег быдэн 28 центнер усиз, сезьы но чабей - 21, кӧжы - 16,5 центнер. Районъя нырысетӥ интые потӥм, республикая озьы ик шедим нырысетӥосыз пӧлы. Ми ялан син азямы возиськом Удмуртиысь тужгес но ӟеч хозяйствоосты. Соос пӧлын бускельёсмы - "Колос" но Мичурин нимо колхозъёс, Пичи Пурга районысь "Родина" колхоз. Азьвыл аръёсы адӟем карылӥм ОПХ-ослэсь, туэ соос милесьтым берегес кылё ни. - Федор Валентинович, тросэз хозяйствоос улӥ урожай басьтэмзэс валэкто удобрениос тырмымтэен. Тӥ кызьы та югдурысь потӥськоды? - Кыдёкысь бусыосы, зэмен но, удобрение ӧжытгес шеде. Но музъемлэсь ӟечлыксэ отын сюлмаськиськом ӝутыны куро, трос аръем турынъёс пыр. Юрттэ. Кыед поттӥськом матысь бусыосы, картофка муос вылэ. Вань на азьвыл аръёсы дасям торфмы. Ум ёрмиське минерал сылалъёслы но. Нормая гектараз 8-10 тонна поттоно ке, милям 5-6 тонна котырын луэ. Туала вакытэ сокем урод ӧвӧл ни. Удобрениос ласянь сюлмаське Аркадий Семенович, колхозлэн председателез. Ваиськом уксёен но, бартер амалэн но. - "Удмуртия" пумен дӥсьтысагес басьтӥське картофка будэтон борды но. Озьыен, пайдаез вань? - "Кыкетӥ нянез" мерттӥськом Макаровской но Волковской бригадаосы, ваньзэ 130 гектар. Нырысетӥяз гектарезлы быдэ 210 центнер люкаськиз, нош Волковоын - 300 центнер. Та удысэз арысь аре быгатыса нуэ звеньевой Василий Поликарпович Зарецких. Мерттӥськом "невский" выжыез, но малпан вань ни вуоно арысен быдэсак элитной кидысэн воштыны. Со чотын удалтонлыксэ ӝутыны, тросгес пайда басьтыны. Туэ та культура ӟеч коньдон ваиз, басьтӥсьёс сӥзьыл ик шедизы. Утялтӥськом комбайнъёсын. Огез урод: ӧвӧл на сортировкамы. - Уд но шӧдылы, кызьы тол ортчоз, нош ик кизён дыр вуоз. Тӥ солы дась-а? - Кидыс сярысь ке верано, коть туннэ ик бусые пот. Техникамес тупатӥськом, быгатэммыя выльдӥськом. Ю тысьмы мукет хозяйствоослы но кидыслы вузаны шедёз, юасьёс вань, воштом эстӥськонлы но. Комбайнъёсъя югдур чидамон, шуыны луоз. Кылем арын кык "Дон" басьтӥм, "Ниваосмы" - 6, 2 немецкой "Доминаторъёс" юрттӥзы. Та комбайнъёс кык ар дорамы ужазы, умой, синмаськымон техника. Асьмелэнэныз ӵошатыса, чылкытгес кутса, тысез куро пӧлы ӧжытгес кыле. "Дон" но солэсь урод ӧвӧл. Пӧртэмлыксы дунъёссы бордын, дыр. Комбайнлы быдэ 180 гектар усе, ӟеч куазен ю кутсанмес 7-8 нуналскын йылпумъяськом. Кылем уборка сярысь ке верано, со шугенгес ортчиз. Бусые потэммы бере ик, эстӥськонлы чутрак дунъёс будэмен, техника сылӥз. Отӥяз ужмы радъяськиз ке но, дыр ыштэмын вал. Вуоноез ар, мон сямен, хозяйствомы понна туалаезлэсь секыт уз луы. Кизён умой ортчыны кулэ. Удобрениосмы тырмыт. Механизаторъёсмы ӟечесь, техника чидалоз. Озьыен, ферма но пудо сиёнлы уз ёрмы. Бамез дасязы Людмила Медведева, Геннадий Романов, Владимир Камашев (фото). Кион понна сюрс манет Коми Республикаын берло аръёсы кионъёслэн лыдзы унолы йылӥз. Дас ар ӵоже "пурысь" йыртэмасьёс 400-ысен 2 сюрсозь вуизы. Соосын нюръяськонлы бадӟым саклык висъяны кутскиз республикалэн Правительствоез. Пӧйшуръёслы висъямын 96 сюрс манет. Азьвыл изьверъёсты быдтылӥзы капканъёсын, ядъёсын, соосты ыбылӥзы вертолётъёсысен. Коньдонэн шугъяськонъёс кылдэмен валче, табере вань оскон пӧйшурасьёслы гинэ. Озьы кион быж ваисьёслэн лыдзы куинь поллы йылӥз. Табере мумы кионэз вием понна висъяське ичизэ 12 уждун, со сюрс манет пала луэ. Айы кион дунъяське 10, кионпи 5 уждун тыр. ТОДМАТӤСЬКОМ БЫРЪЁНЪЯ ОГАЗЕЯСЬКОНЪЁСЫН Россиысь Социалистической партия � 26 Кивалтӥсез Иван Петрович Рыбкин Гажано эшъёс! Россиысь Социалистической партия Кун Думае быръёнъёсы нырысьсэ мынэ. Депутатэ кандидатэ ми ӵектӥмы быдӟым опытэн, ужзэс валась, визьмо адямиосты, Россилэсь зэмос патриотъёссэ. Ваньзы соос, одӥг команда луыса, берло дас аръёсы странаен одӥг секыт сюресэз ортчизы. Милям кандидатъёсмылэн ужан опытсы вань Кун Думаын, Россилэн Кышкытлыклэсь утиськонъя кенешаз, "пӧсь интыын", Чечняын, дипломат ужын - Содружествоысь кунъёсын. Соос ӟеч тодо улонэз. Тросэз кивалто предприятиосын, учреждениосын, районъёсын, городъёсын, регионъёсын. Куд-огезлэн странаен кивалтон опытсы но вань. Ми сюлмаськомы: * шор ёзо образование дунтэк сётон но вань егитъёслы вылӥ образование басьтыны огкадь луонлыкъёс кылдытон сярысь. Дышетӥсьлы, визь-кенеш сётӥсьлы берыктоно ас гажанмес, солы умой улон условиос кылдытоно - ваньмыз со обществомылэн пунэм тыронэз. Санаторийёсын но курортъёсын эмъяськонэз выльысь азинтон, шутэтскон юртъёсты, физкультурая но спортъя базаосты ӝутон сярысь; * анай но нылпи дырез утён сярысь; * калыкъёслэсь культуразэс азинтонлы, дышетонлы, улон-вылонэз умоятонлы коньдон висъянэз валтӥсь интые пуктон сярысь. Ми пумит луиськомы творчестволэн, прессалэн эриксы вылэ котькыӵе урдскылонъёслы. Россиысь Социалистической партия нюръяське ужась адямилэсь интересъёссэ, сюлмаськонъёссэ быдэстон, вань воштӥськонъёсын но реформаосын калыкез утён понна. Россиысь Социалистической партия вань пумо собственностьлы дурбасьтэ, рынокен хозяйствоез вераса но, но со дыре ик со пумит луэ рынокен обществолы. Ваньбурен луыны уг быгато адямилэн возьытлыкез, данэз но данлыкез. Ми Россиын порядок но зэмлык тупатон понна. Европаысь вань странаосын туннэ кивалто социалистъёс но соослэн социалистической партиоссы. Кызьы тодмо, адямиос отын сокем урод уг уло. Уло ваньбуро, ӵуказе нуналлы оскыса. Тазалыкез утён, дышетон калык понна радъямын. Россилэсь аспӧртэмлыксэ лыдэ басьтыса, ми но асьме калыклэсь улонзэ озьыгес ик радъяны малпаськом, ортчемзэ вунэтытэк но отысь вань ӟечсэ басьтыса. Калык понна лэсьтэм умой ужъёс ноку мултэс уг луо. Думае сюрыса, депутатъёсмы нырысь ик зол законъёс кутозы уждунэз, пенсиосты но пособиосты дыраз тырон ласянь но калыклэсь банкъёсы понэм вкладъёссэ но взносъёссэ утён понна. Одно ик чакланы кулэ вань тыронъёсъя индексация ортчытонэз, дыраз уждун но пособиос сётонэз. Вань пунэм тыронъёсты калыклы берыктоно. Ми ужрадъёс кутомы законъёслэсь быдэсъяськемзэс юн чакласа возён но компаниослэсь, нимаз адямиослэсь доходъёссэс эскерон понна. Ми тодӥськом но быгатӥськом кун ужез нуыны. Милемлы тӥляд юрттэмды кулэ. Социалистической партиын - Россилэн патриотъёсыз. Кытын гинэ соос медаз улэ но ужалэ - котькытын юн утё солэсь интересъёссэ. Со дыре ик Россиысь социалистической партия лыдэ басьтэ дуннеысь вань адямиослэсь куронъёссэс. Ми - тупаса улонлэн юн возиськись кусыпъёсыз понна. Россиысь вань гражданъёсын, Православной черкен но мукет конфессиосын ӵош ми малпаськом выльысь огазе герӟаны пӧртэм вакытъёслэсь но поколениослэсь ыштэм кусыпъёссэс, улӟытыны калыклэсь ӟеч сямъёссэ но шонер валанъёссэ, ӝутыны ыштэм дунъетъёсты. Огкылэ вуыса, ужаса, зэмлыклы оскыса, сюрес усьтомы сяськаяськись Россилы! Куарадэс сётэ Россиысь социалистической партилэн кандидатъёсызлы! Милем тӥляд юрттэмды кулэ! Владимир Забильский "Единство" ("Медведь") блоклэн кандидатэз Йылпумъяз Ижысь 30 номеро школаез, собере механической институтысь машина лэсьтон факультетэз, ньыль ар ужаз "Ижмашын", пыӵал тӥрлык поттон удысын. Сьӧд металлургияя министерстволэн аспирантураяз дышетскемез бере, туннэ нуналозь тырше Ижысь Физико-технической институтын. Технической наукаосъя доктор. Депутатэ кандидатэ "Единство" ("Медведь") блокен ӵектэмын. Быръёнъя "Единство" огазеяськонлэн (кивалтӥсез С. Шойгу) программаяз пусъемын: со оске выль адямиослы, политика удысысь кырсь шудонъёсын наштаськымтэ профессионалъёслы. Со шонер, угось Россиысь политикъёслэн выль поколенизы гинэ югдурез чутрак воштыны быгатоз. Странамылы кулэ выль, рос-прос ужась Дума. Чылкыт сямо но быгатӥсь, со дыре ик юн мылкыдо но дӥсьтӥсь муртъёслэн дырзы вуэ. Сыӵе адямиос гинэ асьмеды бугрес вакытлэн гуысьтыз кыскыны быгатозы. Отысь дас ар ӵоже потыны ум быгатӥське ни ук. Коньдонзэс ыштэм вкладчикъёслэн ужпумъёсынызы вырыкум ини мон валай, странаямы ужпумъёсты быдэстыны луэ соку гинэ, куке политика удысын тынад кужымед вань. Сотэк нош малпанъёсыд, пумитъяськон ужрадъёс вылэ, митинг-а со, пикет-а, сялало гинэ, нош ӝожтӥськонъёсты кылем-мылемъёсын корзинаосы зӥрто. Вакчи гожтэмам мон уг вера программае сярысь. Матысь нуналъёсы бырйисьёс басьтозы (нош куд-огез басьтӥзы ни) "Калыкез пӧян технология но кызьы солы пумит султоно" нимысьтыз газет. Отын сётэмын программаелэн инъетъёсыз, озьы ик трос лэчыт ужпумъёслы валэктонъёс, кылсярысь, кызьы бырйисьёсты алдало, Кун Думалэн компетенцияз пырисьтэмзэ сӥзьыса. Шӧдӥсько, гожтэмме лыдӟыны капчи уз луы, угось вераськон мынэ бадӟым ужпум сярысь - кивалтонэз кылдытон радлык сярысь. Эшшо одӥгзэ ужпумез мон пусйысал на. Округамы, мон сяна, эшшо 13 кандидат ӵектэмын. Быръёнъёс понна закон ваньмыз понна одӥг луыны кулэ. Озьы ке но, ваньмыз адӟо, одӥгзэ кандидатэз (москвичез Ю. Маслюковез) республикамылэн кивалтӥсьёсыз укыргес гажало. Малпасько, кивалтӥсьёс понна со бадӟым политической янгыш. Со сяна, асьсэлэсь кадръёссэс сантэман. Асьмелэн трос визьмо, быгатӥсь, пыр-поч адямиосмы, соос но депутатлэсь ужзэ урод уз быдэсъялэ. Малпан кылдэ, республикалэн кивалтӥсез но Ю. Маслюков одӥг кылэ вуэмын: мон тыныд - Кун Думае мандат, тон мыным - Удмурт Республикалэсь Президентсэ быръёнын юрттэт. Тодады вайыто, Кун Думаын Ю. Маслюков Экономикаын политикая комитетэн кивалтӥз. Нош кыӵе асьмелэн экономикаын политика, кин ке тодэ-а? Москваысь сэзь имиджмейкеръёслэн командазы уже кутэ кырсь технологиосты. Кылсярысь, "Новый регион" телекомпания алигес ивортӥз, выль Кун Думаын, пе, Ю. Маслюковлы дасямын ини военно-технической сотрудничествоя комитетэн кивалтӥсьлэн интыез. Вазь ӧвӧл меда? Учыр тупаз бере, вазиськем потэ егитъёслы. Вань бырйисьёс пӧлын егитъёс - 29 процентэз, нош куаразэс сёто 3-5 процентэз гинэ. Данакез быръёнъёсы уг мыно, угось кужымзэс уг валало, политика милям ужмы ӧвӧл, шуо, буйгатскыса уло. Соглаш кариськисько таӵе малпанэн, ваньзы егитъёс быръёнъёсы лыктысалзы ке, асьмелэн мукет Кун Дума, мукет власть, оло нош мукет страна но луысал. Берпуметӥез. Туннэ асьмеос быгатӥськом бырйыны депутатэз, кудӥз Кун Думаысь "Единство" фракцие пыроз. Со фракциен кивалтоз шугадӟонъёслэсь утиськонъя туала министр С. Шойгу. Озьыен, Кун Думаын республикалэн кужмо депутатэз, Путинлэн - Шойгулэн командаязы пырем мурт, ужалоз. В. Путин Президент луиз ке, Удмуртиысь депутатлэн быгатонлыкъёсыз уката будозы. Валамон, озьы шаермылэсь уно ужпумъёссэ быдэстыны ӟечесь луонлыкъёс кылдозы. Мон, гражданин но бырйись, лыдъясько, таӵе луонлыкез асьмеос нокызьы но ыштыны ум быгатӥське. Кун Думае ӵектэм муртъёс Клементий РОГОВЕЦ: Калык понна ужало Тодэ лыктэ но син азям пуксе туэ Ижысь радиозаводын пумиськон. Татчы ветлӥзы Горьковской чугун сюреслэн кивалтӥсьёсыз, тодатскизы предприятилэн усто но выль приборъёсыныз. Соос юн утё но юртто локомотивлэн машинистэзлы. Куноос пӧлын вал Клементий Роговец. Ваньмыз сямен чебер формаен, погонъёсын, шоро-куспо мугоро юн кыдам адями соос пӧлысь висъяське, уката ик но тодэм-валаменыз. Журналистъёс со доры лыкто пӧртэм юанъёсын, Клементий Антонович рос-прос кушаса кадь валэктэ. Котькуд адямиез магнитэн кадь ас бордаз кыске, огшоры вераське, ассэ вылӥе ноку уг пукты. Клементий Антоновичез Кун Кенешын ужамезъя кемалась тодӥсько ни вал. Нырысь-валысь юн востэм, возьдаськись сямо кадь потэ вал, нош котькыӵе лэчыт ужпумъёсты эскерыку ас кылзэ зол возе, малпанэзлэсь уг куштӥськы. Коьку сямен мылкыдзэ вера, выль бюджетэз учкыку. Дыртытэк потэ трибуна сьӧры, дас минутскын малпанъёссэ но ӵектонъёссэ шарая, нош депутатъёс гажано эшсэс сак кылзо, котькудӥз ас понна чакла, дыр, Роговец соос азе юнме ӧз поты. Тужгес но со мылысь-кыдысь пыриське Кун Кенешлэн ялан ужась комиссиезлэн ужаз. Юнме шорысь со Удмуртилэн вылӥ законодательной ёзаз кыкетӥзэ бырйымтэ ук. Ас ужаз но бадӟым кивалтӥсьлэн сюлмаськонъёсыз ичи ӧвӧл, но Кун Кенешын ужаны дырзэ но, кужымзэ но уг жаля. Соин ик, вылды, Клементий Роговецлы бырйисьёсыз юн оско. Быдэс улонзэ Клементий Антонович сӥзиз Горький чугун сюреслэн Ижысь ёзэзлы. Кыдёкысь Белоруссиын 1938-тӥ арын, война кутскон азьын, вордӥськыса, пичиысен веръяз шӧгзэ но, кузьытсэ но, пыриськиз тушмонэн куашкатэм гуртъёсты выльдонэ. Ӝог валаз чабей шеплэсь дунзэ, кызьы ӝӧк вылэ вуэ сукыри нянь, кӧня кужым сётоно. Нош удмурт шаерамы сое ыстӥзы 1965-тӥ арын, Москваысь чугун сюрес транспортъя институтэз быдтэмез бере. Солэсь азьвыл йылпумъяз таӵе нимо ик техникумез. Отын но, татын но горд диплом басьтӥз. Ужан сюресэз кутскиз туж огшоры, станцилэн дежурноез луиз, собере - диспетчер. Пичиен-пичиен вылэ тубиз, кызьы шуо ваньзэ "ӝажыосты" ортчиз. Кытчы гинэ сое ӧз пуктылэ, оскем ужзэ котьку усто, лулысь-сюлмысь быдэсъяз, калык сярысь сюлмаськиз. Тани 1974-тӥ арын Клементий Антоновичлэн кичӧлтэмезъя, Ува районын Подмой станция пуктэмын. Кыӵе калык шумпотӥз! Со дырысен кутскиз районэн эшъяськонзы. Странаямы секыт выльдӥськон кутскем бере, Клементий Роговецлы оско Горький чугун сюреслэсь Ижысь ёззэ. Таӵе бадӟым ныпъетлэсь ӧз кышка, шуг-секытъёсты вормыны дышем кивалтӥсь сюресэз утён борды гижысь-пиньысь басьтӥськиз. Мугез тодмо вал. Москва но Горький косӥзы, изъян ваись пичи сюресъёсты, пе, пытсано. Асьмелэн отчы шедиз Ижевск-Ува-Кильмезь сюрес. Трос кужымзэ сётӥз сое утён вылысь. Табере сюресэз пытсам гинэ ӧвӧл, сое пайдаё ужась кариз. Пуктӥзы ужасьёссылы устоесь улон коркаос, Уваозь сюресэз выльдӥзы, вуоно арын Кильмезёзь тупатъялозы. Клементий Антонович кыӵе гинэ уж борды уг басьтӥськы, ваньзэ йылаз-пумаз вуттэ. Тани чугун сюрес юрттэ Алнашын спирт завод пуктыны, "Увадрев" огазеяськонлы ӟеч смолаос поттонъя цех лэсьтыны. Кыказ ик ужъёс азинско, уката ик ӝог мыно Уваын. Со умоесь кусыпъёс тупатӥз ни нюлэс корасьёсын, торф поттӥсьёсын но музон ужасьёсын. Чугун сюрес нокинэ уг пӧя. Малы ке шуоно, солэн кивалтӥсез одӥг амалъя улэ но ужа: "Кыл сётӥд - быдэсты". Быдэс улонэз пыр со горд гожен кадь кошке. Роговец оске калыклы, калык - солы. Со огкылъя ужа ни Уваысь йӧл заводэн, сӥль комбинатэн, "Ува" санаториен но нюлэс корасьёсын. Солэсь эшшо одӥг ӟеч сямзэ пусъеме потэ. Институтын дышетскытозяз ужаз комсомоллэн комитетаз, лулысь-сюлмысь пыриськиз спортэ но самбо амалэн нюръяськонъя СССР-лэн спортъя мастерез луиз. Ноку уг палэнскы общественной ужлэсь. Тыршемез адӟемын. Мӧляяз пиштэ "Дано железнодорожник" знак. Солы сётэмын Россия Федерациысь но Удмурт Республикаысь транспорт удысысь дано ним Кун Кенешлэн Почёт грамотаез. - Наградаос вань. Но мон соосын сокем уг данъяськиськы, - пальпотыса шуэ Клементий Антонович. - Мынам самой бадӟым наградае - калыклэсь улонзэ умоятон, адямиос сярысь сюлмаськон. Удысам со быдэсъяське. Веранэз ӧвӧл, берло дыре улонмы уродмиз, асьмеос куанермиськом. Соин ик Кун Думаысен кутскыса, улонэз умоятон борды ӝабырскыса басьтӥськоно. Отчы монэ калык бырйиз ке, ваньзэ лэсьто, улонмес ӧжыт ке но капчигес, шулдыргес, ӝӧк вылмес бусьтыргес карон понна. Нош со капчиен уз сётӥськы, со понна зол нюръяськоно луоз. Думаын монэ валасьёс шедёзы, дэмен гурезез но берыктом, чигнамысь дугдоно, азьлане вольыт сюрес лёгоно-усьтоно. Зэм но, Клементий Антоновичлэн малпанъёсыз туж умоесь. Ваньмыз со бордысен кутске, солэн быръён программаез но быдэсак соин герӟаськемын, калык сярысь сюлмаськонлы сӥземын. Кӧнязэ ке вакчияк гожто: - огсыр ужан; - дугдоно дунъёсты будэтэмысь; - сётъяно ваньмызлы дыраз уждун, пенсия но пособиос; - удысъёсъя будэтоно уждунэз; - социально утёно ужасьёсты но ужтэк кылемъёсты; - государствоын тупатоно порядок, юнматоно армиез, правоосты утёнэз. Клементий Антоновичен юн каньыл кенешыны. Со одӥг кылзэ но малпаськытэк уг вера. Кылсярысь, со дэмла, кун службаын, пе, медаз луэ кузьым басьтӥсьёс, чиновник кыл мед кутоз котькуд решениез понна но соослэсь кызьы ужамзэс вань калык мед тодоз. Кин бен соин соглаш уз луы. Сыӵе малпанэз улонэ гинэ пыӵатоно, со пайда мед ваёз. Клементий Роговец - усто кузпал, атай но песятай. Пи но ныл будэтӥз, кыкез атайзылэсь адӟем каризы, чугун сюрес вылын ужало. Кенэз удмурт. Пиналъёссылэн куинь нылпиоссы ни. Яратэ со внукъёссэ. Ӝӧк вылазы котьку вуттэ ческыт зыно беризь сяська чечы. Клементий Антонович угось ачиз муш вордэ, пасека возе. Дыр шедьтэ на чорыганы. Вань эшъёссэ паймытэ чорыганы быгатэменыз. Котькуд ужезлы уго сюлэмзэ сётэ. Отысь ик пото емышъёсыз, номыриз тур-пар уг лэсьтӥськы. Матэ вуэ 19-тӥ толсур, быръён нунал. Кин куаразэ сётоз Клементий Антонович Роговец понна, со уз янгыша. Со бырйисьёссэ уг пӧя. Клементий Роговец - усто хозяйственник но кивалтӥсь, улон песьтэрез бадӟым, Россилэн Кун думаяз быгатоз бырйисьёсыз сярысь сюлмаськыны, калык понна ужаны. Геннадий РОМАНОВ. * Клементий Роговец анаеныз Валентина Павловнаен. Печатламын дунэн. Газет узырме эшъёсын Совето власть ӝужан вакытэ кылдылӥзы уно удмурт огазеяськонъёс. Тани али Горький нимо (азьвыл Базар) урамын Гужем сад вӧзысь Крестьянинлэн коркаяз (Дом крестьянина) люкаськылӥзы удмурт клубе ветлӥсьёс. Отын соос кырӟазы-эктӥзы, удмурт кылын спектакльёс пуктылӥзы. Отчы ветлӥсьёс ик луизы Удмурт кун театрлы кутскон сётӥсьёс. Али театрен кивалтэ Анатолий Андреевич Митрофанов. Берло дыре артистъёс, спектальёсын шудэм сяна, мукет амалъёс но утчало калыке потыны. Пыриськыло кырӟан фестивальёсы, концертъёсы, конкурсъёсы. Нош уката шумпотоно, куке артистъёс пырисько удмурт огазеяськонъёслэн но организациослэн ужрадъёсазы. Алигес драмтеатрын ортчиз "Удмурт дунне" газетлэн праздникез. Газетлэсь эшъёссэ будэтон сярысь вераськон сяна, люкаськемъёслы бадӟым концерт пуктэмын вал. Асьсэлэсь быгатонлыксэс возьматӥзы газетын ужасьёс но драмтеатрысь артистъёс. Люкаськем калыкез шумпоттӥзы кузпалъёс Валентина но Игорь Моисеевъёс Никита пиенызы, Алексей Ложкин, Ольга Зорина, Алефтина Корепанова. Празднике лыктэмъёс кема ӧз лэзьылэ сцена вылысь яратоно артистъёссэс. Чебер, яркыт асьсэды возьматӥзы, газетэн кемалась эшласькисьёс, Юлия но Виктор Кузьминъёс кык нылъёсынызы. Ӝытлэн кутсконаз фойеын газетлы гожтӥськон мынӥз. Бӧрысь газетэз яратӥсьёс пӧлын лоторея ортчиз. Шудоосыз лыдӟисьёс доразы нуизы дуно кузьымъёс, соос пӧлын "Фея" центрифуга, лэсьтӥськон инструментъёсын"Универсал", "Филипс" утюг. Мон тодэмъя, таӵе праздник нырысетӥез вал, соин но, дыр, калык зал тыр ӧз люкаськы, но лыктэмъёслы ужрад яраз. Малпасько, газетлэсь праздниксэ ӵемгес ортчытъяно, соку солэн эшъёсыз уката тросгес луозы. Тодӥсько на ай, огдыръя уно гожъязы но веразы Франциысь "Юманите" , Италиысь "Унита", Германиысь Нойес Дойчланд" газетъёслэн праздникъёссы сярысь. Соос ортчылӥзы 2-3 нунал но куддыр люкаллязы ог миллион пала эшъёссэс. Асьмеос сомында ум люкаське, но кутскем ужез азьланьтыны кулэ. Н. ВОЗИСОВ. Утюгез утыны шуд усиз Н.Г.Даниловлы. Газетлэн кемала дырысь эшез - М.А.Камашева. Кырӟа драмтеатрысь артист Игорь Моисеев. НАТАЛЬ Мар бугыртэ сюлэмез Удмурт нылкышноос кенеше люкаськылыса вераськизы сюлэмзэс вӧсь карись ужпумъёсъя. Троссэ бугыртӥз Воткинскысь делегатлэн Т.И.Бочкаревалэн ӟырдыт вераськемез. Асьме калык йырсазьзэ ыштэ ни, кунгож сьӧрысь лыктэм евангелистъёслэн но мукет конфессиослэн сектаосазы сюрыса, шуиз со. Малы сыӵе сектаосты чакласа уг возьы Юстицияя министерство? Солэсь малпанъёссэ азинтӥз Р.И.Яшина. Зэм ик, евангелистъёс калыклэсь визьзэ гинэ уг, ваньбурзэс но талало. Удмуртъёслэн ас вӧсьсы вань. Со сяна, адямиос православной черклы но кемалась гинэ оско ни. "Мон сямен, - шуиз Роза Ивановна,- ӟеч мылкыдо черкъёслы осконо". Люкаськеме лыктэмъёс ялан выжылӥзы удмурт нылпиослы вылӥ образование сётон ужпуме. Кызьы соослы юрттоно вузъёсы пырыны? Сюмси ёросысь нылкышно Е.М.Ильиных ӵектӥз: вузъёсы, пе, нылпиосты дунтэк мед кутозы. Сыӵе ӵектонлы тазьы шуыны луоз: визьмо нылпиос асьме республикаын коньдон тырытэк дышетскыны пыро на ай. Татын мукет сяменгес, дыр, юан пуктоно: кызьы удмурт нылпиослы школаын дышетскыкузы ик мургес тодон-валан сётоно. Со сярысь куд-ог валэктонъёс сётӥз Удмурт кун университетысь профессор А.С.Измайлова. Кылсярысь, удмурт факультетэ пырон понна гуртысь нылпиослы Выль ар бере, 3-7 январе нимысьтыз курсъёс радъямын луозы. Удмурт нылкышноосты, вань анайёсты сямен ик, туж кышкатэ Чечняын ожмаськон. Дэбес ёросысь делегат А.А.Хохрякова шуиз: "Мон куинь пиослэн анайзы. Удмурт пиналъёс армие кошкыса медаз шеде вылэм "пӧсь" интыосы". Нылкышноосын ӝутэм ужпумъёс пыртэмын вал кенешын кутэм Резолюцие. Т.Банникова. Кин Россиез йыромемысь поттоз Толон журналистъёсын пумиськылӥз Кун Кенешлэн Тӧроез, "Отечество" огазеяськонлэн шаерысьтымы ёзэзлэн кивалтӥсез Александр ВОЛКОВ. Валамон ини, отын вераськон ӧръяськиз одӥг ужпумъя - матэктӥсь быръёнъёсъя, Александр Александрович люкаськемъёсын "чимамен ӧз шуды", мылкыдзэ чик ватытэк, шара усьтӥз, уно юанъёслы мур валэктон сётӥз. - Александр Александрович, та вакытэ кужымзы тужгес зол шӧдӥське ОВР-лэн но "Единстволэн". Нош кызьы дунъяськоды мукет блокъёсты, огазеяськонъёсты, партиосты? - Мон малпасько, та юанлы валэктон сётыку, чаклано, кыӵе луиз странамы берло дас ар куспын. Кин тодэ, оло вылӥын, Президентлэн Администрацияз яке Россия Федерациысь Правительствоын, кинлы ке уз но кельшы мынам веранэ, но Россия лябӟиз котыр ласянь, военной кужым, сиён-юон, нуналлы быдэ кулэ луись вузъёс ласянь. Соин ик та вакытэ асьмеос ваньмы ик улонмы шоры сазь учкыны кулэ, шонер сюрес быръёно. Сотэк Россия быдӟым держава уз луы ни. Соин ик шонер луоз, дыр, мон веранме мытӥ ке КПРФ бордысен. Та партия уно дасо аръёс ӵоже странаенымы кивалтӥз. Бен, солэн вань янгышъёсыз, паллянэ шонаськонъёсыз, но ӟечез но ӧжыт ӧвӧл, уката ик ужаса улӥсьёслы улон-вылонын юрттон ласянь. Берло дыре нокин но сомында ӧз лэсьты на, ма мында лэсьтӥзы коммунистъёс. Бен, дас ар ӵоже ялан куашкам гинэ. Нош кинъёс куашкатӥзы? Немцовъёс, кириенкоос, хакамадаос. Ас вакытаз асьмеос оским егитъёслы. Соослэн улон опытсы университетъёс сяна чик ӧй вал. Озьы вуим валантэм рыноке. "Правое дело" блоклы мон уг синмаськиськы. Тодам ваисько кӧня ке ар талэсь азьло луэм учырез. Господин Кох со вакытэ Правительстволэн Тӧроезлэн воштӥсез вал, гурт удысэз син шораз возиз. Мон дораз пыри, юрттэт курыса. Куронэлы тазьы вазиськиз, тынад крестьянъёсыдлы, пе, ужтэк кылемъёслы сямен пособие тыроно, мед, пе, соос юонэ копак выёзы. "Яблоко" сярысь верано ке, со вить процент куараос люкалоз, дыр. Нош ортчемзэ тодэ ваёно ке, Явлинский ӵапак Немцовен ӵош "500 нунал" программа бордын ужаз. Сазь малпаськись мурт нокызьы но уз оскы, быдэс страналэсь улонзэ 500 нунал куспын чутрак воштыны луоз шуыса. Шонерзэ верано ке, Явлинский туж ӟеч интыяськиз, аслыз партия кылдытӥз. Со ваньзэ сьӧдманы выре, нош аслыз кыӵе ке уж ӵекто ке, соглаш уг кариськы, уг дӥсьты. Жириновский но солэн ЛДПР-ез котькыӵе закон понна куаразэс сётозы, со понна трос коньдон гинэ мед тырозы. "Единстволэн", нимыз, Шойгулэн но Путинлэн данзы сяна, номыриз ӧвӧл. Программаез гинэ но. Мон сое ӧй адӟылы. Нош кин "Единство" пала дурбасьтэ? Соос ик - березовскийёс, немцовъёс... "Отечество - Вся Россия" блокез котыр ласянь сьӧдманы выро, угось кышкало, со вормиз ке, странамылэсь азинскон сюрессэ чутрак воштоз, нош государстволэн "тусез" вӧзын пукисьёс асьсэлэсь шуныт интыоссэс ыштозы. Соин ик сыӵе кисьто Примаков, Лужков вылэ. Нош "Отечество - Вся Россия", КПРФ сямен ик, Атыкай музъеммы сярысь сюлмаське. Со программаяз пусъе, кун властьлэн вань ёзъёсыз калык азьын кыл кутыны кулэ. Соин ик быръён участоке мынон азяз котькудӥз мур-мур малпаськыны кулэ, кин понна со куаразэ сётоз, янгыш медаз лэсьты шуыса. Нош мон "Отечество - Вся Россия" блоклы дурбасьто. - Тӥ али ӟеч кылъёс верады Владимир Путин сярысь, но умой ик ӧд дунъялэ "Единствоез". Нош Путин "Единстволы" дурбасьтэ ук. Юнме шорысь та движениез "властьлэн партиез" шуыса уг нимало, дыр. - Мон малпасько, ваньмыз со юри лэсьтӥське, пӧртэм быръён технологиос уже кутӥсько. Путинлэн Правительствоез сярысь верано ке, со пайдаё тырше, малпасько, та Правительство Россилэсь Президентсэ бырйытозь ужаны кулэ. Но Владимир Владимировичлэн ОВР-ез сьӧдманы турттонъёсыз уг кельшо. Котькуд бырйисьлэн аслаз малпанэз, со вылэ зӥбыны уг яра. - "Отечество - Вся Россия" блокез янгыш уськытыны туртто, солэн кивалтӥсьсыз, пе, коммунистъёсын лушкем кенешемын, огкылэ вуэмын. Нош кыӵе зэмзэ югдур? - Мон "Отечестволэн" одӥгеныз ёзэныз кивалтӥсько, но нокыӵе но лушкем кенешонъёс сярысь ӧй кылылы. Ваньмыз та тодэ вайытэ 1995-тӥ арез, куке асьмеос Россилэсь Президентсэ бырйим. Тодӥськоды на, луоз, со вакытэ потэ вал "Не дай бог" газет. Со бырйисьёсты ялан кышкатъялляз, инмар, пе, мед утёз властез Зюганов басьтэмлэсь. Али но тазьыгес ик бырйисез кышкатыны выро. Соин ик мон верасько: нокыӵе кенешемъёс ӧвӧл. Бен, КПРФ-лэн но ОВР-лэн программаосазы трос одӥг кадез. Со урод шат?! Урод шат, куке шуиськом, тырмоз ини Валютая фондлэн ымаз учкыса ужаны. Чидано ӧвӧл тае. Россия аслыз ачиз кузё луыны кулэ. - Азьвылаз Кун Думае быръёнъёс дыръя тӥ Солуяновлы дурбасьтӥды. Таяз учыре солы уд юрттӥське ни, дурбасьтӥськоды Маслюковлы. Малы? - Бен, ньыль ар талэсь азьло азямы ужпум пуксиз вал, кинлы юрттоно - Солуяновлы яке Подопргоралы. Подопригора азьвылгес Вылӥ Кенешлэн депутатэз вал. Кунсьӧр кусыпъёсъя комитетэн кивалтӥз. Витьтонлэсь ятыр пол гинэ кунгож сьӧры потаз. Бен, республикамылы юрттыны быгатысал. Нош пайдаез - нуль. Соин ик ньыль ар талэсь азьло ми малпам, таяз учыре дурбасьтом Солуяновлы. Со егит, задор мылкыдо, сюлмогес тыршоз шаермы понна. Али нош ик быръёно луим - Маслюков яке Солуянов. Дэмен кенешыса, огкылэ вуим: Маслюков Удмуртилы тросгес пайда ваёз. Со дорамы улэмын, республикамес умой тодэ, Правительствоын ужамын. Пусйыны кулэ, кыӵе гинэ бадӟымесь проектъёсты улонэ ӧм пыӵатэ, ваньзы ик Юрий Дмитриевичлэн ки пыртӥз потӥз. Озьы ик быръёно луим Смирнова но Кошкин куспын. Малпам Смирнова шаермылы но, Россилы но пайдаёгес луоз. *** Пумиськонын озьы ик вераськон мынӥз республикаысьтымы югдур сярысь. А. А. Волков ивортӥз: туэ экономика удысын азьпала вамышъёс лэсьтэмын, кылсярысь, ваньбур поттон 10 процентлы будӥз, налогъёс кылем арен ӵошатыса, тросгес люкамын. Александр Александрович оске: автомобиль, станок поттон но мукет бадӟым удысъёслэн азинскемзы юрттыны кулэ Россиез дотациос басьтӥсь улосъёс пӧлысь поттыны. Республикалы Президент быръён сярысь веракуз, Александр Александрович пусйиз: вылӥ должностен мурт - Президент - одно ик быръём, солэн чакламезъя - 2001-тӥ арын март-апрель толэзьёсы. Пусйыны кулэ, А. А. Волков та нуналъёсы отпуск басьтӥз. Со бырйисьёсын пумиськылыны чакла. Бен, кужмо кивалтон гинэ юрттоз Россилы йыромемысь потыны. Пайдаё тыршись Кун Дума, ужаны быгатӥсь, таза Президент государстволэн инъетэз выллем луо. Ваньмыз со асьмеос, бырйисьёс, киын. Нош ик медам янгышалэ вал. Ю. МИХАЙЛОВА. Вашкала городэн тодматскизы Удмурт Республикаысь егитъёсын ужанъя кун комитет но Россия Федерациысь Юстицияя министерстволэн Удмурт Республикаысь кылкутытонэз быдэсъясь управлениез 10-тӥ декабре Можгаысь воспитательной колониысь пиналъёс понна Сарапул городэ экскурсие ветлӥзы. Соос вуылӥзы Прикамье (Камдор) музее, Башенин купецлэн дачаяз но мукет тодмо интыосы. Колониысь быдэ вуымтэос Ижын но Сарапулын улӥсь ӵыжы-выжыосынызы пумиськылӥзы. Та выллем экскурсиосы мынон понна, колониысь быдэ вуымтэос пӧлын ӵошатскон радъямын луэ. Асьсэды умой ласянь гинэ возьматӥсьёсыз сыӵе луонлык сётӥське. С.Петрова. Тӥляд куремдыя - "Сьӧд мыйык" "Ингур" радио эфире потэмез бере ик калык сое яратӥз. Данэз будэ арысь аре. Нош кылзӥськисьёсыз тужгес трос жингыръяло "Тӥляд куремдыя" передачае. Куро Валентина Пудовалэсь, "Айкайлэсь", Любовь Быковалэсь но Александр Катковлэсь кырӟанъёссэс. Али хит шуыны луоз Любовь Васильевалэсь "Лобӟы, лобӟы, ӟазеге", Валентина Пудовалэсь "Гажанэ", "Сьӧд мыйык", "Айкайлэсь" "Шудо аръёс" кырӟанъёссэс. Николай Вахрушевлэсь яратыса кылӟо анай сярысь кырӟанзэ. Ӵем курыло "Капи-капез, "Ортчись аръёсты". С.Петрова. Кытын будэ, кытын кулэсме Республикаысьтымы гурт удысъя но сиён-юонъёс поттонъя министерстволэн ивортэмезъя, уноез эштосъёс миымлэсь ичигес пудо сиён дасязы. Ӵошатон вылысь: кылем арын ю тысь фураж 56 процент ке дасямын вал, туэ - 47 гинэ. Куд-ог хозяйствоосын со тырмыт кадь, нош ӟечлыкезъя сокем ушъямон ӧвӧл. Шуом, кӧс турын миымлэсь 25 процентлы ятыргес ке но люкамын, со пӧлысь ӝыныез но куронъёслы уг тупа. Соин но вылды, йӧл синыны ӧдъяз. Кылсярысь, Сюмси ёросын ортчем арын та вакытэн ӵошатыса быдэс килограммлы уногес йӧл кыскылӥзы. Югдур умойгес Вавож ёросын. Али татын скаллы быдэ 7 кило но 200 грамм кыско. Йӧлзы одӥг но ӝыны килограммлы будэм. Озьы ик азинлыко ужало Игра ёросын но. О.Москова. Эмъюмъёсты возьматӥзы Шоркарысь азьвыл "Ижмаш" культура дворецын "Медицина и здоровье-99" нимо кыкетӥез калыккуспо адӟытон ужаз. Эмъюмъёссэс возьматыны но вузаны ваиллям Москва, Казань, Волгоград, Бийск но мукет городъёсысь. Со ужрадэ пыриськизы Ижевскысь аптекаос но. Адӟытон усьтӥськон нуналэ отчы лыктэмъёсты ӟечкылазы Ижкарысь мэрлэн нырысетӥ воштӥсез Сергей Протазанов, республикаысьтымы калыклэсь тазалыксэ утёнъя министрлэн воштӥсез Владислав Яковлев, Ижевскысь медициная академилэн ректорез Николай Стрелков. Адӟытон дыръя ужазы пӧртэм семинаръёс. О.Москова. Лыдӟись вера малпанзэ Кызьы быръёмы, озьы ик уломы Пумен матэктэ Кун Думае быръён нунал. 19-тӥ декабре быръёмы асьмелэсь депутатъёсмес. Солэн матэктэмез али ик туж юн шӧдӥське. Пӧртэм партиос но огазеяськонъёс асьсэды олокызьы но ушъяло, калыклэсь улонзэ умоятон понна, ваньзэ лэсьтыны тыршозы шуыса оскыто, адямиосты ӧтё асьсэлэн адямиоссы понна куаразэс сётыны. Ваньмызлы соослы оскыны туж шуг. Кун Думае депутатъёсты кык пол бырйылӥмы ини. Соку но депутатэ кандидатъёсмы котькызьы ушъяськылӥзы, чебер кылъёсын вераськылӥзы, бырйисьёсты асьсэ пала кыскон понна. Нош мае адӟиськомы туннэ? Вить-куать ар талэсь азьло дырен ӵошатыса, номыр ӟечез ӧвӧл кадь. Азьло сямен ик уждунтэк пуко дышетӥсьёс, врачъёс, бюджет чотын улӥсь мукет ужасьёс, заводъёсын тыршисьёс. Соин ӵош ик калыкен быръем депутатъёс (улӥысен вылӥозь) бадӟым уждунзэс дыраз басьтыло. Со дыре ик соос асьсэлэсь уждунзэс уката будэтыны тыршо. Соос асьсэос ук асьсэлы уждун, пӧртэм льготаос тупато. Мынам малпамея, туж умой но шонер луысал вань ёзъёсысь депутатъёслэсь, районысен но городысен республикаозь, вылӥ кивалтӥсьёслэсь но мукет чиновникъёслэсь уждунзэс ог 10 процентлы кулэстысал ке. Солы кичӧлтон мед сётысалзы соос асьсэос. Соку соосты калык гажасал, соку, оло, коньдон тырмысал врачъёслы, дышетӥсьёслы, бюджет чотын улӥсь мукет ужасьёслы уждун тырыны. Кун Думае депутатэ кандидатъёс куспын али юн мынэ мандат понна нюръяськон. Соос пӧлын ӧвӧл меда сыӵеосыз но, кудъёсыз, нырысетӥ созывысь депутатъёсмы сямен ик, асьсэлэсь бырйисьёссэс берло вунэтозы. Малпалэ ай, Кун Думалэн нырысетӥ созываз быръем депутатъёсмы пӧлысь кудӥз ке берытскиз-а аслаз бырйисьёсыз доры? Ӧз ведь, ваньзы ик Москвае шуныт интыосы каръяськизы. Туалаосыз но кандидатъёсмы сыӵе ик малпанъёсын уг уло меда? Табере вераськонъёс мыно ини республикамылы президент яке йыр быръён сярысь но. Таин валче паймисько "АиФ Удмуртии" газетлы. Одӥгаз номераз со кылпум поттылэ ини республикамылы вылӥ кивалтӥсе туж палэнысь адямиез шедьтон сярысь. Вераськон мынэ Кун Думалэн председателезлэн воштӥсез Сергей Бабурин сярысь. Солэн, пе, узыр ужан опытэз вань, соин ик, пе, Удмуртиын улӥсьёс солы дурбасьтозы шуыса малпаны луэ. Ӧйтӧд, мон солы уг оскиськы. Асьме республикаын ӧвӧл ни шат визьмо, калыкез сьӧразы валтыны, ужез ӟеч радъяны быгатӥсь адямиос? Утчад ке, малпад ке, сыӵе адямиос шедёзы. Сыӵе адямиосты асьме пӧлысь ик будэтоно. Урамъёсын адскыло ини пӧртэм партиослэн, движениослэн ӧтёнъёссы. Соос пӧлысь одӥгез паймытӥз - "Отечество Калашниковым непобедимо". Таиз валантэм потӥз: яке со Калашниковлэн автоматэныз яке асэныз конструкторен Калашниковен ӵош ассэ вормонтэмен лыдъя. Оскем потэ вылэм, таяз быръёнъёсын адямиос азьвыл янгышъёссэс валалозы но сюлэм косэмзыя, визьмо, оскымон адямиосты Кун Думае депутатэ быръёзы шуыса. Г. ВАХРУШЕВ. НАТАЛЬ Нонтӥсь анай котьмар ласянь дуно Кытын гинэ мед тыршозы, кыӵе гинэ партие мед пырозы кышномуртъёс - нырысь ик соос анайёс. Кышномурт гинэ адямилы улон сётэ. Нылпи ваён - со нылкышнолэн самой бадӟым ужез. Озьы ке но, берло лыдпусъёс мур малпаськонэ уськыто. Дас ар талэсь азьло республикаямы 31.445 сюрслэсь ятыр нылпи вордӥськемын, кулэмын - 15 сюрс адямиос. Нош 1997-тӥ арын ини кык поллы ӧжыт нылпи вордӥськиз - 15.368 сюрс, кулӥз 19.800 сюрс адямиос. Ӧжытгес пиналъёс вордӥсько Алнаш, Завьял, Кияса, Можга, Як.- Бодья, Юкаменск ёросъёсын, кӧнялы ке тросгес - Дэбес, Пичи Пурга, Шаркан ёросъёсын (1997-тӥ арен ӵошатыса). Малы бен кулэсме пиналъёслэн лыдзы? Кышномурт аслыз оскемысь дугдӥз. Со уг тоды тырмоз-а солэн кужмыз пиналзэ сюдыны, дӥсяны, кутчаны. Вордӥськем пиналъёс пӧлын 1-2 процентэз гинэ ӟеч тазалыко, отӥосызлэн вордӥськыкузы ик кыӵе ке висёнъёссы вань ини. Со ини кышномуртлэн тазалыкез бордысь потэ. Учёнойёслэн эскеремзыя, кышномурт мугорлэн секталаез ӧжыт ке, солэн пиналъёсыз но лябесь вордӥсько, сыӵе анайёс пӧлысь котькуд ньылетӥез висись пинал вае. Пусъёно ик, дыр: Россиын сярысь, асьме республикаын нылпиос ӧжытгес куло. Кулон учыръёс ӵемгес луо одӥг арескозь нуныос пӧлын. Нош одӥг арескысен 14 аресозь нылпиос ӵемгес быро шудтэм учыръёсы сюрыса (62 процентэз). Кылем арын республикаямы 8 пинал виемын, 4-ез асьсэдыс быдтӥзы, нош 7-ез кекаса быриз. Туннэ республикаямы 6.569 сӧсыр нылпи лыдъяське, соослэн лыдзы ар куспын 277 муртлы йылӥз. Бырем нылпиос пӧлысь 42 процентэз шугъяськытӥсь семьяосысь. Берло аръёсы тросэз анайёс пинал ваё кузпалъяськытэк, али 19 процент пала пиналъёс сыӵе семьяосын будо. Таза пинал мумылы но, семьялы но, быдэс государстволы но шумпотон вал. Висись пиналэз будэтыны трос уксё но, чидан но кулэ. Сыӵе пинал трос сюлмаськонъёс кылдытэ нылпи садын но, школаын но, ужан интыяз но. Анайёслы туж утьыса возёно ныллэсь тазалыксэ. Ныл - со нацилэн зарни узырлыкез. Нош туннэ нылъёс пӧлын пӧртэм висёнъёс вӧлмемын: куртчанги, хламедиоз но мукет. Котькуд пиналэз мылкыд каремъя ваёно. Ӧжытгес мед луозы вылэм шӧдтэк шорысь ваем пиналъёс. Соос анайлэн кӧт пушказ ик кулэтэм луэмзэс шӧдо ни. Соин ик сыӵе пиналъёс пӧлын ӵемгес пумиськыло асьсэдыс быдтон учыръёс но. Туннэ трос амалъёс вань ини секыто луэмлэсь утиськыны. Соин ик нылпилэсь куштӥськон трослы синӥз. Но со дыре ик 30 процентлы йылӥз пинал нылъёслэн абортэ ветлэмзы, 14-19 аресъемъёс пинал ваё. Анайёслэн но нылпиослэн тазалыксы сярысь сюлмаськыса, Тазалыкез утёнъя министерство уно гинэ программаос кутӥз ини. Но эмъясьёс гинэ югдурез уз тупатэ. Ваньмылы ӵош ужано. Пинал ваёно кышноез хрусталь вазаез сямен утёно. Малпаськоно солэн мылкыдыз, улон но ужан условиосыз, сиськонэз сярысь. Ӝӧк вылын сӥль но, йӧл но, сыр но, бакча будосъёс но мед луозы. Удмурт кышномурт котьку но пиналзэ ас йӧлыныз кема сюдылӥз. Оло, соин но со, пиналзэ кӧкые поныса, луд вылэ но сьӧраз басьтылӥз. Но туннэ нуналлы югдур чылкак мукет: гуртын 52 процентэз гинэ кышномуртъёс нунызэс кема нонто. Анай йӧлэз номырин но воштыны уг луы: нонӥсь нылпиос тазагес луо, аллергия шуон но уг кутскы, пинал визьмогес но будэ. Учёнойёслэн эскеремзыя, йыртэмасьёс пӧлын тросгес, пе, луо анай йӧлэз ӧжыт шӧмъямъёс. Соин ик пиналзэ нонтӥсь кышномуртэз азьло аръёсы но гуртын горд сэреге пуктыса сямен возьылӥзы. Пинало кышномурт сярысь нырысь ик сюлмаськыны кулэ семьяез, картэз, ӵыжы-выжыосыз. Ижевскысь медициная академиын усьтэмын нимысьтыз лаборатория финн-угор калыкъёслэсь тазалыксэс эскеронъя. Отын эскериськом пиналлэсь тазалыксэ но солэсь дышетскыны дась луэмзэ. В. ОСОТОВА, Ижевскысь медициная академиысь преподаватель. Наталь Удмурт нылкышноослэн огазеяськонзы ноябрь пумын ортчытӥз йылпумъянъёслы но быръёнъёслы сӥзем конференция. Шаермылэн пӧртэм сэрегъёсысьтыз вуэм нылкышно делегатъёс сэрттӥзы-пертчизы туала вакытэ кылдэм ужпумъёсты. Трос саклык висъямын вал Россиысь Кун Думае быръён ужпумъёслы. "Нылкышно кенешен" кивалтыны нош ик оскемын Галина Аркадьевна Никитиналы. Огазеяськонлэсь ужзэ ӟечгес радъян понна "Нылкышно кенеше" котькуд ёросысь быръемын юрттӥсьёс. Нош пичи кенеше пыртэмын Ижевскын улӥсь нылкышноос. "Нылкышно кенешлэн" куинь ар ӵоже ужамез но азьпала дырлы со азьын сылӥсь ужпумъёс сярысь Нылкышноослэн нырысетӥ конференцизы бере 99 ар ортчиз ини, нош удмурт нылкышноос азьын весь одӥг выллем юанъёс сыло на, - соос котьку но артэ вамыштозы, дыр. Туннэ нуналэз басьтоно ке, нылкышноослэн улонзы, оло, эшшо но секытгес луиз на, соос азьын сылӥсь шуг-секытъёс, оло, эшшо но лэчытомизы. Вань ортчем сюресэз, историез, вормонъёсты но ӟеч ужъёсты саптаса, пыд улэ лёгаса кошкеме уг поты. Вал удмурт нылкышноослэн но капчигес улон вакытъёссы, куд-ог удысъёсын вормонъёссы, азьлань вамышъёссы. Государство но нылкышнолэн, анайлэн улонэныз, солэн правоосыныз герӟаськем ужпумъёс шоры сакгес учкылӥз. Но тани ог дасо ар ини радъям улонмы весь куашка, улонысьтымы трос ӟечез ыше-быре, котькудӥз нунал секытгес луэ, ӵуказеезлы осконмы лябоме, мылкыдмы сӥялске. Нош вылӥ кивалтӥсьёсмы, нылкышноос сярысь гинэ ӧвӧл, быдэс калыкъёс сярысь но вунэтӥзы ини, лэся. Асьсэ куспын коньдон но кивалтон креслооссы понна нюръясько, нош чебер пуштросо пӧртэм законъёс, постановлениос, концепциос уг ужало, бумага вылэ гинэ кылё. Табере ойдолэ учкоме, быгатӥз-а меда, тыршиз-а "Нылкышно кенеш" сузэръёсызлэсь улонзэс кӧня ке ке но капчигес карыны, соослы юрттэт сётыны, сюлэмзэс шунтыны? Котькуд общественной движение, блок, фракция нырысетӥ интые пуктэ политикае пыриськонэн герӟаськем юанъёсты, кивалтон удысэ ас адямиоссэ пуктон ужрадъёсты. Удмурт нылкышно кенешлэн политикае пыриськон мугез туж бадӟым, малы ке шуоно, вылӥ кивалтэт удысын удмурт нылкышнолэн интыез весь сюбега. Туэ элькунысьтымы Кун Кенешез кыкез гинэ асьме пӧлысь пыро: Н.А.Образцова но С.К.Смирнова. Нош соослэсь азьло Кун Кенешын воксё 1 адями гинэ вал: Балезиноысь врач Г.И.Чиркова. Москвае быръем депутатъёс пӧлын удмуртэз чик но ӧвӧл. Кивалтон уже пыриськиськом ке но, басьтӥськиськом пичигес но шоро-куспо удысъёсы гинэ: роноен, школаен, больницаысь отделениен, институтысь кафедраен, факультетэн, фермаен, колхозэн кивалтонэ. Бадӟым уж ӵектыкузы но пыкиськиськом, ум дӥсьтӥське, кышкаськом. Собере воргоронъёс но малы ке уг оско нылкышноослы, уг поты соосты лэземзы кивалтон удысэ, весь вашкала малпанэн уло кадь: кышномуртлэн интыез гуртаз, гур азьын, пиналъёсыз вӧзын, садын, бакчаын. Кивалтӥсьёслы мултэс оскыса улыны уг луы ни, дыр. Нош удмурт воргоронъёслы тазьы вазиськем потэ: эн палэнтэ политика удысын, кивалтон ужын артэ сылӥсь нылкышноосты. Соостэк тӥ пал бурдо тылобурдоос кадь, лобан гинэ ӧвӧл, омыре но ӝутскыны уд быгатэ. Быдэс удмурт движенилэн но суредэз со сярысь тӥляд тодады вайытыны кулэ: тросэз ужпумъёс нылкышноослэн кужыменызы интыысьтызы вырӟо. Тани туэ тулыс быръёнъёс азьын "Нылкышно кенешлэн" активаз ужась адямиос городысь пӧртэм организациосын юалляськизы: кинэ удмурт нылкышноос пӧлысь городэ тӥ депутатэ кандидатэ ӵектысалды. Ог кызё ним люкаськиз. Одӥгез коть соглаш луиз кожаськоды-а? Ӧз. Ӧз дӥсьтэ. Арлыдзы вылэ, коньдонзы, мылкыдзы ӧвӧлэ чӧлскизы, куд-огез депутат луонзылэн пайдаезлы ӧз оске. Ёрос округъёсты ке басьтоно, "Нылкышно кенеш" нырысь нуналысен ик юрттӥз С.К.Смирновалы, кудӥз милям активамы пыре. 19-тӥ декабре, Кун Думае депутатъёсты быръён нуналэ, "Нылкышно кенеш" "Удмурт кенешен" ӵош удмуртъёсыз ӧте С.Смирнова но Ю.Маслюков понна куараоссэс сётыны. Быръёнъёсын герӟаськем ужпумъёс пӧлысь тани мар сярысь вераме потэ на. Партийной списокъёсын бюллетеньёс пӧлысь сакгес учке "Россиысь нылкышноослэн движенизы" огазеяськон шоры. Та движенилэн списоказ нырысетӥ интыын асьме шаермыя сылэ Л.И.Пескишевалэн фамилиез. Та огазеяськон вормиз ке, Л.И.Пескишева Кун Думаысь депутат луоз. Ар но ӝыны пала удмурт "Нылкышно кенеш" трос кужымзэ сётӥз ёросъёсын улӥсь нылкышноосын кусып тупатонлы. Али ми тодӥськомы: котькуд ёросын вань нылкышно ужпумъёсын вырисьёс. Куд-огъёсыз соос ёрос женсоветъёсын, нош тросэз "Удмурт кенешлэн" ёзъёсаз нылкышноосын ужан понна юнматэмын. Табере кутскем ужез муромытоно, котькуд удмурт гуртэ вуоно, отысь шедьтоно удмурт нылкышно огазеяськонэн ӵош ужаны мылкыд карисез. "Нылкышно кенешлэсь" ужзэ паськытатон понна, пӧртэмесь ужрадъёс но ортчытъяны турттылӥм. Озьы, 1998-тӥ арын сӥзьыл ортчытӥм семинар-пумиськон гуртысь валтӥсь специалистъёсын, фермеръёсын, хозяйственной объединениослэн кивалтӥсьёсынызы. Отчы ӧтьылӥм гурт хозяйствоя министрез, Правительствоысь валтӥсь специалистэз, Гурт хозяйствоя министерствоысь юристэз, мукет тодмо но дано адямиосты. Мылкыдмы вал сыӵе: мед нылкышноос асьсэ куспазы но тодматскозы, ми но соосын ог-огмес тодом. Мукетыз ужрадмы 8-тӥ Мартлы сӥземын вал, ӧтимы отчы кылбурчиосты, крезьгурчиосты. Асьмелэн но адӟеммы потӥз, городысь удмуртъёслы но возьматӥмы, кыӵе узыресь асьме гуртъёс нылкышно кылбурчиосын но крезьгурчиосын. Элькун национальной библиотекаен ӵош ортчытъям ужрадъёсамы - поэтической гостиное, выль книгаосын тодматскон ӝытъёсамы - ӵемгес вуылӥзы городын улӥсь удмуртъёс. Национальной библиотекаен ӵош ик ортчытӥм "Ашальчи" нимо удмурт нылкышно журналлэн нырысетӥ номереныз тодматскон ӝыт. Кӧня чебер ушъян кылъёс верамын вал журнал сярысь, солэн кулэлыкез сярысь, нош журналмылэн улонэз озьы ик ӧз бурдъяськы. Вераны кулэ, ортчем куинь ар ӵоже "Нылкышно кенеш" семьяен герӟаськем ужпумъёс борды ӝот-ӝот басьтӥськыса ӧз ужа. Но нырысь вамыш лэсьтэмын. Туэ октябрь толэзе медакадемиын ортчытӥм "Туала общество: удмурт калыклэн аспӧртэмлыкез но семья" ужпумъёсъя "котырес ӝӧк". Ужрадэ пыриськемъёс вылӥ кивалтӥсьёслы А. А. Волковлы но Н. А. Ганзалы Вазиськон кутӥзы. Вазиськонмылы нокыӵе валэктон ми ӧм басьтэ, нош кивалтӥсьёсмылэсь юам вал, малы таӵе секыт югдуре семьяен ужась отделъёс быдтэмын. "Котырес ӝӧк" ужалоз на ёросъёсын но. Ортчиз ини со Селта, Сюмси ёросъёсысь нылкышноослэн ӵош пумиськоназы. Ортчытомы на таӵе зонаосъя: Сарапул, Можга, Глазов, Игра. Нылкышно но семья ужпумъёсты вырӟытон понна "Нылкышно кенеш" нимысьтыз программа дасяз. Со нимаське "Удмуртская женщина в условиях системного кризиса общества: поиски путей адаптации". Та программая малпаськом вал Балезино, Завьялово но Алнаш ёросъёсысь нылкышноосын ужаны. Ортчизы лекциос, пумиськонъёс, семинаръёс, тренингъёс, психодиагностика. Уже кутыны малпамын вал врачъёс, психологъёс, тодосчиос но мукет специалистъёс. Программаез Сорослэн фондаз конкурсэ келям. Ӧм ворме, но киосмес ум лэзиське, программаез юнматыса, муромытыса нош ик ыстом мукет фондэ, мукет ӧсэ йыгаськом. Семьялэн сюлмаськонъёсыз пӧлын бадӟым инты басьтэ пиналъёсыз дышетон, ӟеч тодон- валанъёс сётон, вордскем кылдэ яратон но удмуртлыкеныд, калыкедлэн историеныз но культураеныз данъяськон мылкыд пыӵатон. Та бордын ужаны луонлыкез вань "Нылкышно кенешлэн" но. Тани ортчем дыр ӵоже "Нылкышно кенешлэн" активез телевидениын ужасъёсын, тодосчиосын, артистъёсын ӵош Яре потазы. Отын ми пумиськонъёс ортчытӥм педучилищеын дышетскисьёсын, библиотекае кружоке ветлӥсь пиналъёсын, Ярын улӥсь калыкен. "Нылкышно кенешлэн" ужамез сярысь мадим, трос лекциос лыдӟим. Шумпоттэ, "Удмурт кенеш" вӧзын лекторской группа кылдытон. Со группа пыр бадӟым уж нуыны луоз школаосын, библиотекаосын, анай-атайёсын. Ортчем дыр куспын "Нылкышно кенешлэн" азьветлӥсьёсыз озьы ик потазы Татарстанысь но Башкортостанысь куд-ог удмурт школаосы. Ӟеч кусып герӟамы Ижевскысь 7-тӥ училищеысь дышетӥсьёсын но дышетскисьёсын. Тросэз тодо, дыр, та училищеын ёросъёсысь нылъёсты куиськыны, пужыятӥськыны, национальной дӥськут вурыны дышето. Училищелэн коллективезлы ужзэ азинтыны юрттӥм: отын кылдытэмын национально-региональной аспӧртэмлыкез уже пыӵатон сярысь выль концепция. Берло дыре туж секытэн потыны кутскизы удмурт кылын выль учебникъёс но учебной пособиос, нош соослэн кулэлыксы, тужгес но гуртысь школаосын, вераны луонтэм бадӟым. "Та пумысь сюлэмшугъяськонъёссэс вераса, "Удмурт кенеш" но Нылкышно кенеш Правительствое но Калыкез дышетонъя министерствое гожтэт ыстӥзы вал. Кивалтӥсьёсмы но воштӥськыса вуизы ини, валэктон таки ми ӧм басьтэ. Табере кӧня ке кыл Ашальчи Оки нимо нылкышно премия сярысь. Ортчем аръёс ӵоже та премиез сётон куронъёсмы кӧня ке воштӥськизы. Со сётӥське ини пӧртэм удысъёсын ужась нылкышноослы, азьло нош премиез басьтыны быгато вал гожъяськон удысысь ужасьёс гинэ. Собере, туэ арысен Ашальчи Оки нимо премилэн дуныз Куӟебай Герд ним премиен огкадь каремын. Туэ та премиез басьтоз тазалыкез утён удысысь А. Н. Вахрушева. Премиосын ик герӟаськемын на эшшо одӥг ӟеч ивор. "Нылкышно кенешлэн" куремезъя но ӵектэмезъя, туэ ар понна Куӟебай Герд нимо премпез сётыны чакламын Р.И.Яшиналы, нош М.В.Решитько-Гавриловалэн нимыз "Удмурт кенешлэн" Данъян книгаяз пыртэмын. "Нылкышно кенешлэн" малпамезъя, одно ик золгес кусыпъёс герӟано элькунысьтымы мукет нылкышно огазеяськонъёсын. Соос туннэ нуналлы шаерамы трос лыдъясько ини. Юасьёс но вань: малы, пе, меда "Нылкышно кенеш" кулэ на, "Удмуртиысь нылкышно кенеш" огазеяськон вань бере? Шонер, тросэз нылкышно сюлэмшугъяськонъёс, ужпумъёс, коть удмурт, коть ӟуч, коть бигер тон, одӥг кадесь. Соин ик та удысын мукет огазеяськонъёсын ӵош ужано. Нош мукет ласянь ке учконо, удмурт нылкышнолэн вань сое гинэ висьытӥсь, сюлмаськытӥсь ужпумъёсыз: вордскем кылыз, калыкезлэн ортчем сюресэз, калык йылолъёсыз но сямъёсыз, удмурт музъемез, кудӥз туннэ сое сюдэ на. Нош кыӵе меда луоз ӵуказе югдур? Та юанын ик ӧвӧл меда "Нылкышно кенешлэн" кулэлыкез сярысь валэктон? Тодамы возёно на тани мае но: огазеяськонъёс кылдытыны быгато профессияя, улон интыя, ужъя. Малы уг луы меда этнослэн пӧртэмлыкезъя огазеяськыны? Удмурт этнос улэп на ке, нылкышнолэн улонэз пыр калыкмылэн тросэз чигыны луонтэм нюжаосыз кыстӥсько на ке, "Нылкышно кенеш" но кулэ луоз. Г.Никитина. Доклад сётэмын вакчиятыса. Уртче ужано Туэ 6-тӥ-7-тӥ декабре администрациослэн кивалтӥсьёссылэн социальной удысъя воштӥсьёссы тодматскизы та ужпумъёсъя Воткинск ёросысь учреждениослэн ужаменызы. Соос адӟизы, кызьы пиналъёсты сюдо школаосын но больницаосын, кызьы мынэ Быдӟым Отечественной ожын вормонлы 55 ар тырмон нуналэз пусъёнлы дасяськон. Лыктэмъёс вуылӥзы пӧртэм учреждениосы. Ёросысь администрация та ужпумъёсты быдэсъя соосты котыр ласянь сэрттыса-пертчыса, соослы котьку бадӟым саклык висъяса. Арлы быдэ лэсьтӥсько выль школаос, нылпи юртъёс, культура юртъёс, спортъя учреждениос. Татын сюлмасько егитъёсты уже интыян но дышетон сярысь, трос лэсьто улон интыос висъян ласянь. Пумиськонэ ветлэмъёс азьын вераськизы правительстволэн кивалтӥсезлэн воштӥсез Виктор Шудегов, калыкез дышетонъя министр Любовь Захарова, калыкез улон-вылонын утёнъя министр Светлана Андреева, егитъёсын ужанъя кун комитетлэн кивалтӥсез Андрей Гальцин, правительствоысь Дышетон удысын лицензиосъя, аттестацияя но аккредитацияя комитетлэн кивалтӥсез Алла Еременко, тазалыкез утёнъя министрлэн воштӥсез Элен Тыцкая, Россия Федерациысь социальной страхованиея фондлэн Удмурт Республикая отделениезлэн управляющиез Иван Морозов. Совещание пыриськемъёс тодматскизы правительстволэн социальной удысъя быдэстоно ужпумъёсыныз. Та ласянь ёросъёслэн но городъёслэн администрациоссы уртче ужаны кулэ. Удмурт Республикаысь Правительстволэн пресс-службаез. Чебер малпан мед быдэсмоз Быдӟым ож вакытэ пулэсь лэсьтэм 1850 интыен цирк 1990 арозь ужаз Ижевскын. 1991 арын Совминлэн постановлениеныз малпало ни вал выль юрт пуктыны. Но выльдӥськон тӧлъёс ӧз сётэ чебер малпанлы быдэсмыны. Ог куинь ар талэсь азьвыл Россиысь кун циркъёслэн компаниенызы кивалтӥсь Л. П. Яирова быгатӥз та ужпумез вырӟытыны. Россилэн федеральной бюджетысьтыз вуоно аре коньдон висъямын луоз, озьы ог куинь арзэ, цирк быдэсмытозь. Алигес Людмила Петровналы нюръяськоно луиз на мэриысь градостроительной советэн, цирк азьвыл интыяз ик мед сылоз шуыса. "Кыл сётӥсько ке, пумозяз вуттӥсько". Та кылъёс огшоры верамын ӧвӧл. Л. П. Яирова вань улытозяз культураын лэсьтӥськон понна кужымзэ сётэ. Али со тужгес сюлмаське, творческой союзъёс сярысь закон мед кутэмын луоз но ас кужымзэ мед шӧдытоз шуыса. Писательёслэн огазеяськонзылы, Литфондлэн Удмурт ёзэзлы, озьы ик Удмурт театрлы но юрттыны дась луэмзэ вера. Владислав КИРИЛЛОВ. Гожтӥськон - 2000 20-тӥ декабрёзь кылиз на 3 нунал Сояз дуннее но сьӧрам нуысал Милям гуртамы тросэз гожтӥсько "Удмурт дунне" газетлы. Али трос гожъяськоды: лотереяен шудытэмын луозы ошак но мотоприцеп. Тодэм потэ вал, кызьы со ортчоз. Марлы ке но лотереяен шудонэ сюро газетлы трос гожтӥськем районъёс, нош газетэз трос вӧлмытэм почтаос пӧлын шудон уг ортчы. Валэктэ вал, кызьы туэ ортчоз лотереяен шудон. Тани милям почтаын 84 мурт гожтӥськиз ни газетлы. Неужто одӥгез но лотереяен шудонэ уз пыриськы? Г. Ларионова, почтаын ужась. Можга район, Пазял гурт. Лыдӟисьёсмылэн но почтаын ужасьёслэн сюлмаськонъёссы валамон. Кузьымъёс дуноесь: ошак, мотоприцеп, мотопомпа. Котькудӥзлэн аслэсьтыз шудзэ эскеремез потэ. Тани туэ 1-тӥ январьлы газетлы гожтӥськисьёс 13 сюрслэсь ятыр вал. Лыдӟисьёс пӧлын шудытӥмы ошак, мотоцикл но электротылэн ужась бычкы. Ошак сюриз Кизнер районэ, мотоцикл - Игра пала, бычкы - пургаослы. Кызьы тодӥськоды на, газетлы гожтӥськемъёслэн лыдзыя округ шуонъёс кылдытэмын вал. Одӥг район но, озьыен, одӥг гожтӥськись но палэнэ ӧз кыле. Алнашъёс газетмес тужгес но трос лыдӟо шуыса (со вакытлы 1870 мурт), соос пӧлын гинэ лотерея уд ортчыты ук. Каракулиноысь (3 мурт) но Камбаркаысь (5 мурт) лыдӟисьёсмы ми понна озьы ик дуноесь. Соин ик газетмылы ӧжытгес гожтӥськем районъёсты огазеямы - одӥг округе пыртӥмы. Кылсярысь, кизнеръёс огазеямын вал Кез, Красногорск но Юкаменск районъёсын 8 номеро округе. Кылдытӥмы на лотерея шудонэз радъянъя нимысьтыз комиссия. Шудонлэн нырысетӥ люкетаз тодмо луизы куинь валтӥсь кузьымъёсты утӥсь округъёс. Татын нош ик вераны кулэ: валля арын оштрак Пичи Пургае кошкиз шуыса, соосты лотереяен шудонлэсь нокызьы палэнтыны уг луы. Вань лыдӟисьёслы одӥг кадь луонлыкъёс сётоно. Округъёсты тодэм бере, лыдпусъёсын шаръёс районъёсысь яке кыӵе ке одӥг районысь почта ёзъёсты шараяло. Озьы пумен-пумен матэгес вуиськом ни шудо лыдӟисьёсмы доры. Почта ёзэз тодыса, лотерея шудонлэн куинетӥ люкетэз кутске. Тазэ ини гуртэ потыса ортчытӥськом. Лыдӟисьёслэсь газетлы гожтӥськем квитанциоссэс почтаысь куриськом. Озьыен, сюлмаськонэз ӧвӧл лотереяен шудонэ пыриськытэк кылён пумысен. Можга районэ кузьым ӧз сюры на шуыса, мылкыдэз куашкатыны уг яра, дыр. Шудон - со шудон. Газетмылы 2000-тӥ ар понна гожтӥськемъёс пӧлын но лотеряен шудытонэз та амалэн ик ортчытом. Кузьым - ошак. Вуоно арлэн кутсконаз нимысьтыз кузьымен пусйыны чакласьком газетмылы тужгес но трос гожтӥськем районэз. Лыдӟисьёс пӧлын шудытэмын луоз мотопомпа. Мар со сыӵе? Мотопомпа кутӥське тылпуэз кысонэ, люкаськем вуэз кысконэ бакча сиёнъёсты, будосъёсты ву пызйыса кисьтанэ. Дуныз - 7 сюрс 50 манет. Лыдӟисьёсмылы таӵе дуно кузьым ӵектэ "Ижмаш-Мото" завод. Лотереяен шудон озьы ик ортчоз почта ёзъёся, собере ини тодом кузьым утӥсьлэсь нимзэ. Палэнэ кельтэммы ӧз поты газетмылэсь матысь эшъёссэ - почтальонъёсты. 2000-тӥ арын соос пӧлын но ортчытэмын луоз лотереяен шудытон. Тужгес шудоез утоз мотоцикллы прицеп. Таизлэн но дуныз ӧжыт ӧвӧл - 3 сюрс манет пала. Шудон ортчоз арлэн кутсконаз. Районъёсысь почта кусыпъёсъя ёзъёс пыр тодомы газетмес тужгес но трос вӧлмытэм почтальонъёслэсь нимъёссэс. Куд-ог районъёсын со лыдпус сюлэсь но ятыр луоз, оло, нош куд-огаз (кытын удмурт лыдӟисьёс ӧжыт) - дасозь но уз люкаськы. Со пӧртэмлыкез лыдэ басьтытэк уг луы. Тросгес районъёсысь почтальонъёсты ӵошатсконэ кыскон понна, тужгес ӧжытсэ 35 муртэ гожтӥськытоно. Тодады вайытэм потэ на эшшо одӥг кузьым сярысь. Глазов районысь лыдӟисьёс пӧлын шудытэмын луоз парсьпи. Газетмылы гожтӥськемъёс понна сое ӵектэ "Луч" хозяйство. Малпаськом: тазэ амалэз азьланяз паськытгес кутыны луоз. Шуом, кыӵе ке но колхоз яке огазеяськон "Удмурт дунне" газетлы гожтӥськем гуртооссы пӧлын лотереяен шудон ортчытоз. Одӥг кыл шедьтыса, сояз яке таяз хозяйствоын бадӟым праздник ортчытыны луысал. Но таиз - малпаськон понна. Кинлэн ке та пумысен ӵектонъёсыз луизы ке, вазиське редакцие. Алигес Ижевскын улӥсь лыдӟисьёсмы понна шутэтскон ӝыт ортчытӥм. Шумпоттэ, отчы лыктӥзы газетмылэн тужгес но матысь эшъёсыз. "Удмурт дуннелы" соос гожтӥсько сюлэм косэмзыя, кузьым утон понна ӧвӧл. Трос шуныт кылъёс веразы ӝыт люкаськемъёс. Та пумиськонэ вуылӥз Завьялово районысь Ожмос гуртын улӥсь лыдӟисьмы Марина Александровна Камашева но. 52-тӥ арзэ гожтӥськем ни удмурт газетлы. - Яратоно газетме сояз дуннее но нуысал сьӧрам, - шуэ со. Ижевскын улӥсь Анна Георгиевна Иванова газетэнымы эшъяське ни 1941-тӥ арысен. Тазэ но газет ас бордаз пыраклы бинялтӥз. Шумпотоно, таӵе адямиос вань дыръя удмуртлык но, "Удмурт дунне" но уз быре. Л. МАЛЫХ. Батыръёсмес данъяса Ижысь 73 номеро школае та нуналъёсы Москваысь ӟеч ивор вуиз: татысь "Советской Союзлэн но Россия Федерацилэн Геройёссы - асьмелэн землякъёсмы" Калык музейлы Россиын нырысетӥ инты сётэмын. Данъямын "Поиск" штабзы но музейлэн директорез, Удмурт Республикаысь культура удысысь дано ужась, ожысь ветеран Раиса Михайловна Сонина. Со пусъемын асьме шаерысь геройёслэсь подвигъёссэс данъяны быгатэмез но соосты калык пӧлын вӧлмытонын ӟеч ужамез понна. Р. М. Сониналы сётэмын РФ-ысь Вооружённой Кужымъёслэн Центральной военно-исторической музейзылэн "За активный поиск" знак-медалез. Вераны кулэ: таяз дышетскон аре 73-тӥ школалэн тросэз ужрадъёсыз сӥземын Быдӟым Вормонлэн 55 ар тырмонэзлы. Калык музей 1999-тӥ-2000-тӥ дышетскон арлы ужан планзэ но лэсьтӥз, юбилеез лыдэ басьтыса. Нырысь ик, Быдӟым Вормон нуналлы сӥзьыса, классъёсын ортчыло нылпиосты визьнодан часъёс. Тодмо ини, татын, мукет школаосын сярысь, котьку но золгес чаклало но быдэсъяло кемалась дышем сямъёсты. Пиналъёс ялан тыршо геройёсмы сярысь тросгес тодыны. Вормон нунал азьын та удысын ӟечгес ужась класслы одӥгезлэн геройлэн нимыз сётӥське. Али витез классъёс П. Н. Кирьяновлэсь, Н. С. Павловлэсь, Л. В. Рыковлэсь, Г. С. Томиловскийлэсь, С. С. Фионинлэсь нимъёссэс нулло. Кылсярысь, Ф. Ф. Башировалэн кивалтоно 9-тӥ "н" классэзлы Удмуртиысь нырысетӥ Геройлэн Павел Николаевич Кирьяновлэн нимыз сётэмын, И. И. Шевченколэн 8-тӥ "г" классэзлы - Сергей Семёнович Фионинлэн. Музейлы висъямын одӥг гинэ нимысьтыз класс-комната. Татчы черодэн-черодэн вуыло пӧртэм предметъёсъя урокъёссэс ортчытъяны. Нош экскурсиос, ӟуч кылын сяна, ортчыло удмурт, бигер, немец но англи кылъёсын. Та школаын уго вань та кылъёсты дышетӥсь пиналъёс. Музее люкам арбериосъя но документъёсъя валэктонъёс сётыны кивалтӥсезлы Р. М. Сониналы юртто пиналъёс - экскурсия нуисьёс. Соос котькуд классын вань. Туэ музее данак выльёсыз арбериос (экспонатъёс) вуизы. Шӧдскымон узырмиз партизанъёслэсь ожмаськемзэс возьматӥсь люкетэз. Талы нимысьтыз мугъёс кылдӥзы. Нырысез - партизанъёслэн командирзылэн А. Н. Сабуровлэн кузпалыз Инна Марковна Москваын берло аръёссэ огназ улӥз, тазалыкез лябӟиз, нош Ижысь музеен кусыпъёссэ ӧз ыштылы. Александр Николаевичлэсь данак арбериоссэ но партизан соединение сярысь куд- ог документъёсты "Поиск" штабысь утчаськисьёслы келяз. Жаляса верано луэ, командирлэн матысь эшез но юрттӥсез туэ улонэн пыраклы люкиськоз шуыса шӧдӥз, луоз. Нош 73-тӥ школаысь ик 10-тӥ классын дышетскись, Раиса Михайловналэн внукез Андрей Сонин, эшъёсыныз ӵош музее партизанъёслэн землянказылы макет лэсьтӥз но отчы выль экспонатъёсты интыяз. Та музейлэн ик кичӧлтэмезъя, 73-тӥ школаын ортчыло Ижысь ветеранъёслэн-ожын эшъяськемъёслэн пумиськонъёссы. Туэ коньывуон толэзе ож пыр потэм нылкышноослэн пумиськонзы мӧйыослэн арзылы сӥземын вал. Отчы ветлӥзы городысь тужгес сӥлы кароно нылкышноос-мӧйыос: Советской Союзлэн Героез Нина Захаровна Ульяненко, ожысь ветеранъёс Варвара Кузьминична Денисова, Мария Семёновна Каргашина, Анна Александровна Бутусова, Наталья Алексеевна Микрюкова но мукетъёсыз. Та пумиськонэз радъяны юрттӥзы Удмурт Республикаысь Кун Кенешлэн депутатэз В. С. Суркин но военкоматын ужась, военкомлэн воштӥсез Ф. З. Хузин. Вуоноосыз пумиськонъёс луыны кулэ вуоно арын бадӟымесь праздникъёс азьын. Советской Союзлэн улэп Геройёсыз арысь аре ӧжыт но ӧжыт кылё. Вормонлы 50 ар тырмыку, соослэн радъёсазы 17 мурт вал на, соос но данакез улӥзы удмурт шаерлэн палэназ: Украинаыысь Бердянск, Киев, Белая Церковь городъёсын, Ригаын, Москваын. Али соос 11 кузя. Удмурт шаерамы кыкез гинэ: Ижевскын - Н. З. Ульяненко, Глазкарын - А. Д. Торопов. Отӥосыз аспалъёсмы пӧртэм улосвылъёсын: Советской Союзлэн кык пол Героез Е. М. Кунгурцев - Бердянскын, Г. В. Коротков - Белая Церковь городын, И. П. Репин - Киевын. Г. П. Евдокимов - Санкт-Петербургын, У. Шакиров - Башкортостанын, И. А. Щипакин - Ставропольын, Москваын - М. Н. Тюлькин, М. П. Одинцов, В. Ф. Попков. 105 геройёсмы пӧлысь котькудӥз сярысь музейысь уно тунсыкозэ тодыны но адӟыны луэ, нош люкам материалъёсты возьматон инты ӟоскыт, экспонатъёс интыямын одӥг комнатаын. Тросэз документъёс, снимокъёс, гожтэтъёс но мукетыз геройёслэн "личной делоосазы", папкаосын кыллё. Утчаськисьёс - музейысь активистъёс та вакытэ тыршо шедьтэмзэс возьматыны коридорын но учительскойын, али но та удысын мылысь-кыдысь ужало суредасьёс, фотографъёс, мукет активистъёс. Нош чыры-пыры басьяны коньдон шедьтыны шуг, ваньзэ октоно аслад уксёеныд. Леонид ФЁДОРОВ. Снимок вылын: пумиськизы фронтын ожмаськем эшъёс. Туспуктэмез Сергей СОНИНЛЭН. Наталь Чаклам ужпумъёс Делегатъёс "Нылкышно кенеш" огазеяськонлэсь ужзэ умоен лыдъязы. Озьы ке но, азьланяз трос ужано на нылкышноослэсь политика, право, экономика удысын тодон- валанзэс будэтонын, соосты кысконо дӥсьтыса но быгатыса кивалтон уже, общественно- политической улонэ. Делегатъёс азьланезлы таӵе ужпумъёс пусйизы: 1. Кун Кивалтэтлы но Кун Кенешлы вазиськоно, котькуд семья, анай-атай пиналъёссэс будэтыны мед быгатозы шуыса, уждун но пиналъёслы висъям пособиос дырыз дыръя вуыны кулэ. Государстволэн нылпи пособиосъя семья азьын куинь ар ӵоже люкаськем пунэмез котькуд анай кие вуыны кулэ коньдонэн яке сиён-юонэн, дӥськутэн. 2. Кун Кенешлы вазиськоно, элькунысьтымы "Кун кылъёс сярысь" законэз ӝоггес кутыны, озьы ик "Анайлык, атайлык но нылпилык сярысь" ("О материнстве, отцовстве и детстве") закон кылдытыны курыса. 3. Национальной кадръёсты дасянъя пӧртэм кенешъёсын уно пол сэрттэм-пертчем ужез ӝот-ӝот радъяно. Мур-мур азьланьтоно гуртысь пиналъёсты институтъёсы пырыны дасянэз, утчано со понна пӧртэм амалъёс. Радъяно гуртысь школаосын дышетонын кылдэм югдурез, юрттыны тыршоно ӟеч дасям кадръёсын, коньдонэн, книгаосын. Мукет кунъёсын дышетскись пиналъёс коньдонэн секыт югдуре сюремен, стипендия тыронэз эскерыса возёно, дышетсконзэс быдтэмъёсызлы уж инты чаклано. 4. Калыклэсь асшӧдонзэ будэтон понна, удмурт кылэз, калыклэсь историзэ, культуразэ, психологизэ школаын дышетонэз ӟечгес радъяно, та удысъёсъя туала куронлы тупась выль учебникъёс но пособиос кылдытыса. 5. Кун Кивалтэтлы, Культурая министерстволы вазиськоно, элькунысь вань библиотекаосы 2000-тӥ арлы удмурт газет-журналъёсты, кун издательствоын поттэм книгаосты одно ик вуттыны курыса. 6. Радио, телевидение, "Тодос" ("Знание") огазеяськон, газетъёс но журналъёс пыр удмурт нылкышноослэсь политика, право, экономика удысъёсъя тодон-валанзэс будэтон вылысь уж нуоно. 7. Калыклэсь асваланзэ ӝутон, улонлы осконзэ юнматон вылысь уже умойгес кутоно чеберлыко литератураез, искусствоез, калык пӧлы паськыт вӧлмытоно тодосчиослэсь тодон-валанъёссэс, соослэсь вашкала сюресмы, сямъёсмы, йылолъёсмы сярысь ужъёссэс. Тужгес ик та ужез муромытоно будӥсь пиналъёс пӧлын. 8. Асьмелэн выжымы гуртын бере, отын улӥсь, музъем вылын ужась калыклы государство одно ик юрттыны кулэ кредитъёсын, инвестициосын, льготной ссудаосын, сиён-юон продукцилэсь дунзэ радъянэн. 9. Удмурт нылкышно огазеяськонлэн ёрос ёзъёсызлы военкоматлэн ужаз ӟеч-ӟеч пыриськоно, удмурт пиосты ожгар интыосы лэзёнтэм вылысь. 10. Делегатъёс умоен лыдъяло нылкышно кенешлэсь "Удмурт кенешен" ӵош ужамзэ но дэмлало элькунысь мукет огазеяськонъёсын ужзэс сэзьгес радъяны. 11. Будӥсь ныллэсь, пинал ваёно, нонтӥсь кышномуртъёслэсь тазалыксэс утён понна, Кун Кенеше вазиськонэн потоно, висъяса коньдон шедьтон вылысь. Семья, кышномурт, пинал будэтон ужпумъёсты сэрттӥсь-пертчись отделъёсты но кабинетъёсты элькунын но ёросъёсын юнматоно кадръёсын, социологической но психологической службаосын. 12. Кун Кивалтэтэз но Кун Кенешез куроно, пӧртэм конфессиосын герӟаськем общинаослэсь ужзэс законъя эскерыса возьыны. 13. Конференцилэн делегатъёсыз умоен лыдъязы Смирнова Светлана Константиновналэсь кандидатуразэ Россия Федерациысь Кун Думае депутатэ. Та кандидатураез дэмла "Удмурт кенеш" но. 14. Та но мукет ужпумъёсты сэрттон-пертчон, гуртын улӥсь нылкышноосты огазеян вылысь, "Нылкышно кенешлэсь" активзэ паськытатоно, котькуд районысь кышномуртъёсты пыртыса. Удмурт Республикаысь Кун Кенеш но Правительство кайгыро лэсьтӥськонъя Чепецкой управленилэн азьвыл кивалтӥсез Жданов Виктор Лукъянович улонысь кошкемен валче но ӵыжы-выжыосызлы но матысь адямиосызлы мур куректэмзэс верало. Дано ним басьтӥзы Республикаысьтымы 1500-лэсь уно культурая но искусствоя ужъюртъёсын (учреждениосын) ужа 10 сюрслэсь ятыр адями. Тросэз соос ас ужзэс умой тодӥсь-валась вылӥ дышетскем ӧнерчиос (специалистъёс) луо. Тужгес устоосызлы сётэмын культура удысысь дано ужась ним. Туэ культура но искусство удысын ужасьёслэн нуналазы та нимез басьтӥзы Елена Павловна Виноградова - изобразительной искусствоосъя музейысь суредъёсты утись, Римма Абрамовна Левантовская - крезьгуръя училищеысь дышетӥсь, Людмила Степановна Зеленина - Гагарин нимо библиотекалэн кивалтӥсез, Лидия Ивановна Веретенникова - Яр библиотечной системаен кивалтӥсь, Николай Матвеевич Тубылов - "Зарни шеп" калык ансамбльлэн крезьгуръя кивалтӥсез, Татьяна Сергеевна Зыкова - Кияса ёросысь Подгорное селоысь искусствоосъя нылпи школаен кивалтӥсь... Куд-ог усто ужасьёслы сётэмын Правительстволэн данъян грамотаез, соос пӧлын - Ижысь Азин нимо библиотекаысь валтӥсь библиотекарь Тамара Михайловна Лямина, Пичи Пурга ёросысь Вуж Монья гуртысь кибашлыослэн юртэнызы кивалтӥсь Николай Михайлович Тарасов но мукетъёсыз. Т.Николаева. "Дыртыны кулэ" "Дыр вуттэ пересьмонэ, соин ик мыным табере дыртыны кулэ",- гожтэ Анатолий Волков но чуръёс бӧрсьы чуръёс ыстэ редакциямы. Лыдъямезъя, со выль сборник дасяны кулэ ни, но, котькинлэн сямен ик, коньдон борды "уж пыкиське". Анатолий Григорьевич вордскиз 1934-тӥ арын 16-тӥ декабре Красногорск ёросысь Дёбы гуртын. Дышетскиз Глазов педучилищеын, Удмурт пединститутын. Лыдӟисьлы тодмо луиз азвесь лысву кадь чильпырась мылкыдо кылбуръёсыныз, соос печатласькизы кӧня ке сборникъёсаз. "Кыдёкысь выльвылъёсы" поэма гожтӥз. 24 аресысен Завьял ёрос газетын ужаны кутскыса, вань шудо но шуг-секыто адӟонъёссэ герӟаз журналистика удысэн. Анатолий Волковлы туннэ тырме 65 арес. Ӟечкыласьком! Шуд но бур, юн тазалык сӥзиськом. Анатолий ВОЛКОВ Тӧдьы Кам - удмурт шур Вань шуръёс - нимъёссы Тросэзлы тодмоесь. Нош асьме улосын Кин уг тод Кам шурез? Со паськыт но визыл, Со вылтӥ лэйкаса, Весь, гужем но сӥзьыл, Мон пыжен уясал. Пароход куараос Ӧтьыса доразы Чузъясько юн, боз-боз, Чебересь бортъёссы. Кам вулэн тулкымез Паймытэ чеберен. Удмуртлэн со шурез, Кызьы Волга - ӟучлэн. Тӧдьы Кам, Тӧдьы Кам, Гажано вӧлмыт шур! Тон мынам сюлэмам Пыӵамын ини мур. Ортчись дыр Я ӵук шунды учке укноосам, Я ӝыт вуэ, шунды уллань лэзьке. Весь паймытэ монэ шунды бергам, Туж тунсыко потэ со малы ке. Учке шунды шорам пальпотыса, Дырлэн ортчемезъя ӧпкелисько. Ялан монэ киосыныз иса Со Ортчись дыр. "Эн иса!" - шуисько. Эн иса на, улонэлэн пумыз Кема уз вуы на, жалясьтэм дыр! Мед на шунтоз шунды тылсиеныз, Та улонэ ӧй вал ке но шулдыр. Ортче вапум, часъёс но толэзьёс Ог-огзэсты вошто, бере кылё. Мед ӟеч тодэ ваёнъёссэ гинэ кельтоз Ортчем дыры, мае шуо Улон. Кытчы пегӟод?.. Тӧдьы-тӧдь пилемъёс зыл-л уяло Вӧлмыт инбаметӥ. Кытчы кошко? Кема мон учкыса шып сылӥсько, Улон-вылон сярысь малпаськисько. Дунне бадӟым, адямилы инты Тырмыт та дуннеын - котькытчы мын. Чеберлыкъёс ӧжыт ӧвӧл, вылды, Уно соос мукет интыосын. Нош сётэмын ни ке бадӟым ужед Аслад мусо, чебер интыедлы, Кызьы потоз сое аналтэмед? Сюлэмыдлэсь кытчы пегӟод, малы? Даллашон ... Тон нош ик вормисе потӥд, шедьтӥд Лек кылъёстэ шакрес шыкысысьтыд. Нискетыса мон, кучапи, вӧзтӥд Ортчи висъет сьӧры, ӧй вазь пумит. Нош котькуд лек кылыд быдтӥз, кысӥз Тодэ ваёнъёсысь одӥг чебер, Ӟеч нуналэз. Тыл кадь дуак ньылӥз, Но утьыны сое... вал ини бер. Сое ик малпаса, мон чидасько, Ӵын-пень уг поттӥськы сэрегпумысь. Ваньмыз нош тупатскоз, мон малпасько, Луоз на ай ӟечез, улӟоз выльысь. Мон оскисько, зоринчалэн югыт Чеберлыкез уз кысы култозям. Вуюисьлэн вӧл капкаез ӝужыт - Со но турлы югыт мыным пазя. Мынам удысэ Ӵук ӟардон гинэ Инвисэз шунтэ, Сюлэмы монэ Ини дыртытэ: "Эй, кӧня ужъёс, Ӵук ни - со кӧлэ!" Ужъёстэ вӧтъёс Уз, уз воштэлэ!" Уз, уз воштэлэ Ульчалэсь ӵашсэ, Уж дуре кулэ - Уж сюдэ ваньзэ. Адӟиськод, шофёр Автозэ сузя. Тракторист провор - Сюресъёс дася. Мон - соос радысь. Трос уг изьы, уг. Шуг ке но удыс, Тэк уг пукы, уг. .......................... Йырвизьме выльысь Корт сынэн сына Кылбуран удыс. Ыштытэк утё... Бен, мон шудо: Та дуннеысь троссэ Адӟи ас синмыным - Дунне бадӟым. Нош ик монэ Вуттэ вал сюресэ Удмуртие. Со туж Дуно мыным. Кам палъёсын Улэм вань аръёсме Мон одӥгзэ но Ыштытэк утё. Вордскем гуртэ Весь сӧзулме кырме, Нош мон сюлмысь тонэ, Камдор, мадё. Мадё Дормы, Дуно Удмурт музъем, Тынад чеберлыкед, Ӟечед сярысь. Тонэ яратонэн Ӝуа сюлэм. Тон ӝужамын Юн, зол выжыосысь. Бускель калыкъёслэсь Сюресъёссэс Вамен уд пытсаськы. Соин но, дыр, Эшъёс обидёзы-а Удмуртэз - Коть лу со пор, Бигер, чуваш, башкир. * Телевидениын - котырес ӝӧк сьӧрын. Паллянысен буре: Илья ЗОРИН, Аркадий КЛАБУКОВ, Анатолий ВОЛКОВ но Афанасий ЛУЖАНИН. СОВЕТСКОЙ СОЮЗЛЭН ГЕРОЕЗЛЫ Т.Н.БАРАМЗИНАЛЫ 19 ДЕКАБРЕ ВОРДСКЕМ ДЫРЫСЕНЫЗ 80 АРЕС ТЫРМЫСАЛ Асьмелэн Танямы Минск котырысь Смолевичской ёросын интыяськемын пичи гинэ Калита гурт. Гурт сьӧрын куинь сюресъёслэн вожзылы матын вань вынлыко шайгу. Тӧдьы модосо веськрес кызьпуослэн саулазы ик ватэмын 1944-тӥ арын ожын бырем воинъёс. Соос пӧлын ик Советской Союзлэн Героез Т.Н.Барамзина. Та гуртын улӥсь Сержанович кемалась луэм учырез тодаз вайыса, дыртытэк гинэ маде: - Мон валэн нюлэскысь потӥсько. Отчы ватскимы вал ож кутскем бере. Быремъёс-шӧйёс бусыын но, сюрес дурын но нюлэскын сильтӧл ортчем мында ик кыллё. Соос пӧлын тросгес фрицъёс, ма, асьмелэнъёсыз но ӧжыт ик ӧвӧл. Малпай вал лулоосызлы маин ке юрттыны. Волма бамалын адӟисько: пилоткаен нылмурт кылле, егит на, чебер тусо. Вырӟиз но кадь потӥз мыным. Сюлмы ик дыректӥз. Повозкаеным дораз дыртӥсько. Вуи но дол-дол сылӥсько. Бордаз йӧтскыны кышкасько. Со быдэсак сӧсырмемын, шораз учкыны ик кышкыт... Пересь мурт фашистъёслэсь сьӧсьяськемзэс тодаз вайыса бӧрдыны кутскиз. - Гитлеровецъёсыз пазьгеммы бере, землянка доры лыктӥмы но отысь адӟимы йырзэ уллань лэзьыса сылӥсь пиосмуртэ. Со чалмыт сылӥз, мыжыкъёссэ кырмыса, синкылиосыз Танямы вылэ усьылӥзы. Со вӧзын ик кыллиз на дас сизьым боец, - тодаз ваиз 70-тӥ стрелковой дивизиысь огез ветеран А.Дементьев. Волма гурт дорын стройын сылӥзы куинетӥ стрелковой батальонысь боецъёс но командиръёс. Соослэн азязы берло ожын бырем эшъёссы. Палэнынгес плащпалатка вылын ваньзылы ик тодмо нылаш - снайпер но телефонистка - Таня Барамзина. Куинь толэзь улӥз соосын ӵош одӥг улонэн: ветлӥз окопъёстӥ аслыз умойгес позиция бырйыса, снайпер винтовкаеныз ыбиз со дас куать фашистэз. Табере солэн котыраз сяська керттэтъёс, вож кыз вайёс. Татын ик вӧзаз сыло нылъёс, Танялэн эшъёсыз, батальонысь снайперъёс. Соос ялан синкылиоссэс ӵушыло. Туннэ соос вато нырысетӥ бырем эшсэс, пыраклы люкисько асьсэлэн Таняенызы. Батальонлэн командирез майор Филимонов митингез усьтӥз. Вераськиз на батальонысь комсорг младший лейтенант Касимов: - Эшъёс, командиръёс но боецъёс, тӥ тодӥськоды ини Барамзина Танялэн подвигез сярысь, - младший лейтенант строй азьын гольык йыр сылэ, куараез дырекъя. - Берло ожын со утиз уно сӧсырмем боецъёсмылэсь улонзэс. Сьӧсь гитлеровецъёс землянкамес котыртэмзы бере, Таня кияз автомат кутӥз. Ачиз но со сӧсырмемын, гимнастеркаез пыр вир пыӵамын, нош автоматсэ киысьтыз ӧз кушты. Быдэс дисксэ бушатӥз Таня пумитаз лыктӥсь тушмон солдатъёс шоры. Сӧсырмем нылашлэн патронъёсыз быризы, сюриз фашистъёс кие. Комсомолка герой сямен быриз. Солэн подвигез асьмемыз пунэмзэ берыктыны ӧте. Май толэзьлэн пумаз вал таӵе учыр. Таня Барамзина взводзылэн командирезлы ӝожтӥськиз, синмыз висьыны кутскиз шуыса. Сое медсанбатэ ыстӥзы. Батальонысь со кык арня ортчыса берытскиз. Снайперъёслэн улон землянкаязы ӵапак соку дневальной кылемын вал надя. Мукетъёсыз нылъёс ваньзы ик передовойын "пӧйшуразы". Таня пуксиз Надя вӧзы но йырзэ уллань лэзиз. - Уг валаськы, номыре но уг валаськы. Малы озьы луиз? Малы озьы луиз? Ведь мон шедьтӥ вал ини фронтын аслэсьтым интыме но, усто эшъёсме но. - Мар-о луиз, Танюша? Мон малпасько вал, тон йыг-йыг берытскод медсанбатысь, нош ик ӵошен мыномы чакласькыны но усто ыбылыны, позиция бырйыны, - Надя ӟыгыртӥз викышъясь эшсэ. - Ӧз быгатэ эмъяны, Надя. Бумага сётӥзы, снайпер луэме уг луы ни шуыса. Таня борддор пала берытскиз но аслаз кӧлон интыез вадьсысьтыз Зоя Космодемьянскаялэсь портретсэ адӟиз. Таӵе открыткаосыз кык вал солэн: огзэ ыстӥз Пермьысь детсадысь пиналъёслы, кыкетӥез кылиз ас кияз. - Тодӥськод на-а, Надя, фашистъёс киулэ сюрыса, Зоя ас нимзэ Таня шуиз вал ук. Соин но, дыр, мон та открыткаез возисько. табере винтовкаме татчы кельто, нош та портретэз сьӧрам басьто. - Мон синмаськисько Зоялы тушмонъёс шоры кышкатэ учкемезылы. Таня куриз командирзэс сое батальоназы ик кельтыны. Куинетӥ батальонысь штаблэн землянкаяз Таня луиз телефонистка. Со Соколово гуртлы кыдёкын ик интыяськемын ӧй вал. Соин ик Таня вуылӥз эшъёсыз доры, Надяен Сима но передовойысь берытскылыкузы кожылӥзы Таня доры. 22-тӥ июне выжон уе (война кутскем дырысен куинь ар ортчиз вал ини) ньыль часын ӵукна батальон тушмон вылэ атакаен потӥз но нырысетӥ траншеязэ басьтӥз. Таня Барамзина но батальонлэн командной пунктэныз ӵош татчы вуиз. Телефонэныз со интыяськиз траншеяе но ӝоген ивортӥз ини полклэн штабаз: "Береза", "Береза", мон тушмон траншеяын ни. Ротаос азьлань мыно..." Но "Береза" шӧдтэк шорысь ышиз. Тушмон минаос но снарядъёс ӵем чигтылӥзы телефон езэз. Соку Таня кельтӥз аппаратсэ, трубказэ сётӥз мукетызлы связистлы, бызиз ез кузя. Котыраз пуштылӥзы снарядъёс, омырын шулазы пуляос, нош нылаш бызе. Кема ик дыр уг ортчы, нош ик штабен кусып вань. Нош кылӥське Танялэн куараез: - "Береза", ми потӥмы тушмонлэн кыкетӥ траншеяез доры... Час но ӝыны ортчыса тушмон контратакае выжиз. Батальон вылэ фашистъёс урдскизы. Чигем езэз тупатыса Таня командной пунктэ вуиз но Филимонов майорлы вераз: - Майор эш, "Берёзаен" кусып вань! - Туж умой, Таня, дыраз вуид. Куромы артиллериен юрттыны, - майор Танялэсь киысьтыз телефон трубкаез басьтӥз. Озьы кутскиз Белоруссиез мозмытон понна бадӟым ожмаськон. Таня Барамзина батальонэныз азьлань мынӥз. Тушмонлэн лек ыбылэмез но солы ӧз люкеты ас ужзэ, батальонэн но полкен кусып возёнэз быдэстыны. 3-тӥ июле асьмелэнъёс мозмытӥзы Минскез. Нош шоркарлэн шунды ӝужан палаз котыртэме сюриз тушмонлэн бадӟым кужымез. 4-тӥ июле куинетӥ стрелковой батальон машинаосы пуксьыса, противотанковой артиллерийской полкен ӵош Пекалин гурт пала кошкиз. Батальонлы кулэ вал пытсаны тушмонлэсь чигнан сюрессэ но отын возиськыны, полкысьтызы мукетъёсыз подразделениос вуытозь. Ожмаськон ӵукна кутскиз. Батальон вылэ тушмон танкъёс потӥзы. Кужымъёс огкадь ӧй вал, асьмелэн подразделениосмылы чигнано луиз. Озьы, сӧсыремъёслы юрттэт сётыкуз, одӥгаз землянкаын тушмон кие сюриз Таня Барамзина. Тушмон офицер лекъяськиз, солэн косэмезъя нылашез курадӟытӥзы, сьӧсьяськизы. Таня пал кыл но ӧз вера. "Кыӵе частьысь? Кудмында кужымды частяды? Кӧня артиллериды? Кытын танкъёсты?.." Юан бере юан сётыло лекомем фашистъёс. Нош Таня сылэ шоразы лек тусын учкыса, кылымтэ улэ аналскыса. Солэн йыраз Зоя Космодемьянскаялэн берло верам кылъёсыз гинэ: "Ми кык сю миллион, ваньмес уд быдтэ. Мон понна тӥледлы пунэмзэ берыктозы..." В.Голубев. Тазалыклы кышкыт луо Адямиослэн тазалыксылы тужгес но кышкыт луись ядохимикатъёсты быдтон сярысь кемалась вераськон мынэ. Озьы ке но, шаерысьтымы унояз хозяйствоосын соос али но тросэн кыллё. Солэн мугез коньдон бордын. Удмурт Республикаысь Правительство 1996-тӥ арын юнматӥз вал ини та ужрадлы 1 миллиард манет коньдон висъян сярысь постановление. Соку ик огкылысь кенешизы пестицидъёсты Санкт-Петербурглы матысь Красный Бор полигонын быдтон сярысь. Но коньдон шедьтымтэен, малпан быдэсмытэк кылиз. Табере та проектлы кулэ ини 3 миллион манет. Мар веранэз экологияя фонд сярысь, сыӵе коньдон ӧвӧл республикалэн бюджетаз но. Котьма ке но, трос малпаськыса улыны дыр ӧвӧл. Гурт хозяйствоя академиысь тодосчиослэн эскеронъёссы возьматӥзы: макем кемагес возиськод ядохимикатъёсты, сокем соос кышкытгес луо. Тае лыдэ басьтыса, Котырысь инкуазез утёнъя комитет но санэпиднадзоръя центр огазеям кенеш ортчытӥзы. Вераськон мынӥз ядохимикатъёсты кытын но кызьы утён-возён сярысь. Ӵектэмын соосты котькуд ёросысь одӥгаз-кыказ хозяйствоосы гинэ кельтыны, со понна нимысьтыз складъёс дасяны. Нош улон интыослы но шуръёслы матысьёссэ чакламын быдтыны. Ваньзэ та ужъёсты кулэезъя радъялоз Гурт хозяйствоя но сиён-юонъя министерство. Н. ЩЕГОЛЕВА. СВЕДЕНИЯ о поступлении и расходовании средств избирательных фондов кандидатов, зарегистрированных кандидатов, подлежащие обязательному опубликованию (на основании данных Сбербанка России) Ижевский одномандатный избирательный округ � 28 Удмуртская Республика По состоянию на 2 декабря 1999 года (руб.) � Поступило средств Израсходовано средств Возвращено средств п/ из них из них в том числе ФИО кандидата, всего юридическое лицо, о количестве граждан, всего зарегистрированного внесшее пожертвование внесшее пожертвования на кандидата на сумму, более чем в 250 раз сумму, более чем 50 раз минимальный размер оплаты труда превышающую минимальный размер оплаты труда о финансовой операции всего наименование сумма основания по расходованию средств в жертвователя возврата на сумму, более чем 500 раз превышающую - минимальный размер оплаты труда превышающую сумма наименование сумма количество дата сумма юридического лица граждан сумма снятия со спец счета 1 2 3 4 5 6 7 8 9 10 11 12 13 14 1 Алексеев 7110 7100 Владимир Александрович 2 Баранов 95800 80000 5 95330,6 Анатолий Юрьевич 5 Баранов 4070 4060 (Коммунист) Николай Витальевич 4 Баранов 845 67 Сергей Васильевич 5 Гурина 639,4 830 Ольга Юрьевна 6 Забильский 164300 50000 ЗАО "Объединение 105000 7 Владимир 85145,98 20.10.99 83490 содействие Викторович предпринимательству 7 Макаров 20810 20000 Николай Иванович 8 Маслюков 136268 333960 ЗАО "Московскиь066872, 53 Юрий 21.10.99 250000 чай" Дмитриевич 0 333960 ЗАО " Востоканешторг" 21.10.99 72000 333960 ЗАО "Руслан-003" 27.10.99 230000 300000 Произведетвенно- 2.11.99 78000 экономическая ассоциация "АСПЭК" 16.11.99 64200 26.11.99 55800 26.11.99 50000 9 Синицына 167890 152659 23.10.99 83490 Ирина Евгеньевна 10 Соловьев 4605 18000 2 36036 ЗАО"Удмуртмол- 1000 нарушение Виталий пром" порядка внесения пожертвования Александрович 11 Солуянов 468790 84000 000 "Внеш- 108500 8 Андрей 466282,4 4 15.10.99 83490 Владимирович терминалкомплекс- А" 29.10.99 150000 19.11.99 55000 22.11.99 44415 12 Сямин 173639 83490 ЗАО "ПКП 8349 1 116459 Владимир 19.10.99 83490 ЧП Соловьев 7165 "Росинтер- излишне Борисович 1 пром" перечисленная сумма 80000 000 "Контакт" 13 Чуйков 25830 174000 20 257975 21.10.99 83490 Игорь 17.11.99 47685 Вячеславович 14 Яирова 329032 52440 вопд "Наш 111792 8 327010 Людмила дом - "Россия" 11.11.99 70000 Петровна 12.11.99 622775 25.11799 100000 Председатель окружной избирательной комиссии М. Ю. ВАВИЛОВ. Журналистъёсын пумиськонъёс Судьяос пӧлын но судьяос вань Кун Кенешысь Законъёсты быдэсъямез чакланъя, калыкез кышкытлыклэсь утёнъя но гражданъёслэн правооссыя ялан ужась комиссилэн кивалтӥсез Михаил Кокорин пумиськонын бадӟым саклык висъяз буёло металлъёсты лушкан-вузан учыръёслы. Зэмзэ ик та ужпум асьме республикаын секыт югдурлы пӧрмемын: юисьёсын но наркоманъёсын герӟаськем ужъёс бере мыно буёло металлъёсты лушкасьёслэн ужъёссы. Газетъёсын ялан потыло металл бичанъя фирмаослэн ялонъёссы. Туэ октябрь толэзе Удмурт Республикалэн Правительствоез нимысьтыз постановление кутӥз сыӵе фирмаослэсь ужзэс дугдытон сярысь. Постановлениез быдэстон понна куамын нунал чакламын вал. Со дыр ӵоже лицензиостэк ужась фирмаосты ворсаны кулэ вал ни. Но кызьы асьмелэн ӵем дыръя луылэ, постановлениын пуктэм куронъёс меӵак уг быдэсъясько. Совето власть дыръя озьы ӧй луысал, пусйиз М. Кокорин. Постановленилэн потэмез шоры учкытэк озьы ик ужало металлъёсты бичась контораос. Шара ужало. Соин ик юан кылдэ: нош кытчы меда учке милиция? Сыӵе предприятиослэн одно ик луыны кулэ Удмурт Республикаысь Промышленностья министерствоен сётэм лицензизы. Мукет документъёс лыдэ уг басьтӥсько. Кызьы шуиз М. Кокорин, постановление кутэм бере буёло металлъёсын герӟаськем ужъёсъя кык муртлы гинэ наказание сётэмын. Суд улэ кыскемын Игра районысь фирмалэн кивалтӥсез (со государстволы изъян лэсьтэм 1 миллион 300 сюрс манет тыр) но Завьяловоысь одӥг пичи предприятилэн металлъёсты бичасез. Металлъёсты лушкан тужгес но зол вӧлмемын юисьёс, бомжъёс пӧлын. Аракыен ӟенелик понна соос лушкало ыргонлэсь, сьӧд узвесьлэсь, никельлэсь лэсьтэм арбериосты. Нош кӧня коньдон со понна басьто фирмаослэн кузёоссы, уг но тодо, вылды. М. Кокорин таӵе лыдпусэз шараяз. Одӥг тонна металлэз кунгож сьӧры вузам понна соослэн кисыязы 1300 доллар тыр коньдон пыре. Пумиськонын пусъемын вал телефон террористъёслэн "ужамзы" но. Кутэмын Ижевскысь 52 номеро школаысь дышетскись. Ачиз 2-тӥ классын гинэ дышетске ай, нош терактъёс пумысен телефонъя вить пол ивортылэм ни. Табере мусо пизылэн сыӵе шудонъёсыз понна туж трос коньдон мумы-бубыосыз тыроно луозы. Йыртэмасьёслэн лыдзы республикаямы уг кулэсмы, соин ик судьяос вылэ туж трос ужъёс усё. Кылсярысь, Ижевскысь Первомай ёросысь судья Т. Скрябина ар ӵоже 800-лэсь трос ужъёс эскерем. Зэм, судьяос пӧлын но котькыӵеосыз вань. Судебной ужъёсты эскерыку, туж трос янгышъёс лэсьто гуртъёсысь судьяос, шуиз М. Кокорин. Одӥг сыӵе судьялэсь ужамзэ эскерыку, 14 уголовной ужъя тырмымтэос шараямын. Судьояслэсь ужамзэс капчиятон понна азьланяз выльысь чакламын мировой судьяосты юнматыны. Михаил Кокоринлэн верамезъя, республикаямы соку 84 мировой судьяос ужасалзы. Комиссилэн кивалтӥсезлы М. Кокоринлы журналистъёс таӵе юан сётӥзы на: "Мар луоз юнматымтэ судьяосын?" Кызьы тодмо, Удмуртиын судьяосты юнматэ Кун Кенешлэн сессиез. Но берлояз сессиын куд-огез та уже юнматэмын ӧй вал. Кокоринлэн валэктэмезъя, соос судьялэсь ужзэ нуыны табере уг ни быгато, соин ик соос отставкае кошкозы. Озьы, пе, соослэн вань льготаоссы кылё, пособиос басьтыса улыны быгатозы. Нош судьяос трос уждун басьтӥсь категорие пыро (толэзяз 6-7 сюрс манет уждун басьто). Комиссилэн ӝыны ар ӵоже ужамезлы йылпумъянъёс лэсьтыса, М. Кокорин таӵе лыдпусъёсты вераз: 9 кенеш ортчытэмын но 35 ужпумъёс эскеремын. Азьланяз комиссия чакла тямыс пала законопроектъёс дасяны. Депутатъёслэн малпамзыя, Югдурез утёнъя министерстволы республикалэн бюджетысьтыз уксё туж ӧжыт висъяське. Та удыслы коньдон Россилэн бюджетысьтыз ке но вуэ, со тырмыт ӧвӧл. Соин но, вылды, кылем арын МВД ёзъёсысь 800 пала адями ужысьтыз кошкиз. Т. БАННИКОВА. Азьмынӥсьёслэн балзы Гурт ужын, промышленностьын, лэсьтӥськонын, транспортын, связьын но социально- культурной удысын устооссэ тыршисьёсты пусъён вылысь, Яр ёрос администрация аспӧртэмлыко ужрад ялӥз. Удысэзъя котькудӥз азьмынӥсь нимысьтыз данъямын луоз но дуно кузьымен пусйиськоз. Профессизыя устоосызлэн нимъёссы тодмо луозы туэ 23-тӥ декабре, ёросысь азмынӥсьёслэн ортчоно балазы. Н.Никитин. Гуртазы дышетскозы Матысь дыре Шаркан районысь Быги шор ёзо школаын механизаторъёсты дасянъя класс усьтӥськыны кулэ. "Восход" эштосысь валтӥсь бухгалтерлэн А.В.Протопоповалэн верамезъя, колхоз берло дыре ужась киослы тужгес кулэяське уго. Татын али машинаосты дышетонъя класс усьтыны ваньмыз дась ни шуыны луоз. Кулэ на луоз калыкез дышетнъя отделлэсь лицензия гинэ. Б.Сергеев. Огазеясько кырӟанэз яратӥсьёс Шарканысь историлы но вордскем шаерлы сӥзем музейын усьтӥськиз удмурт кырӟанэз яратӥсьёслэн клубзы. Соин кивалтэ директрез М.Д.Кожевникова. Отчы ветлӥсьёс эскерозы ёрослэсь фольклорзэ, пумиськылозы тодмо крезьгурчиосын но артистъёсын, дасялозы концертъёс. Н.Никитин. Ӟеч толйыны кулэ "Можга иворъёс" газетын ёросысь гурт удысъя управлениысь валтӥсь агроном П.Васильев вера узьымъёслэн толъёнзы пумысен. Кызьы со пусъе: туэ куазь умой тупаз, музъем ӟеч кынтӥз, йӧкур отын ӧз кылды. Трос аръем турынъёслэн но ӟеглэн выжызы умой пушйиз. Собере лымы шобрет но будосъёсты дыраз вализ. Озьыен, соос умой шокалозы но ӟеч толъёзы. С.Петров. Избирательный блок � 20 "За победу патриотов России". КПРФ Асьмеос вормыны кулэ Гажано эшъёс, Россиын улӥсьёс! Тӥ асьтэос шӧдӥськоды: странамы шедемын туж секыт югдуре. Пӧяськыса, вузаськыса, чеберъяськыса властез киултӥзы лушкаськисьёс но йыруж пӧлы выемъёс. Россиез гуэ донгисьёс пумен мургес но мургес киулто асьмелэсь узырлыкмес, быдтыны выро азьланезлы осконмес, культурамес. Та югдурысь потыны кылемын на одӥг гинэ амал: кин зэмен но яратэ ас страназэ - огазеяськоно, одӥг кужымен султоно Россимес вузасьёслы пумит. Сыӵе луонлык сёто быръёнъёс. Макем тросгес шедёзы Кун Думае оскымон, калык понна ужась депутатъёс, сокем ӝоггес радъяськоз улонмы. Со понна нюръяське "За Победу!" огазеяськон. Отчы пыро рабочийёс но крестьянъёс, инженеръёс но учёнойёс, арлыдоос но егитъёс, инмарлы оскисьёс но оскисьтэмъёс, коммунистъёс, аграрникъёс но патриотической кужымъёс. Милемыз огазея Россия понна нюръяськон. Странаямы порядок луиз ке, котькуд семьялэн улон-вылонэз умой пала воштӥськоз. "За Победу!" огазеяськон азяз куинь ужпум пуктэ: 1. Россиысь калыкез быронлэсь утён. 2. Государстволэсь кужымзэ юнматон но странаез куашканлэсь утён. 3. Экономикаез ӝутон но азинтон. "За Победу!" патриотической огазеяськон вормиз ке: 1. Ми воштом туала Конституциез, солэн валтӥсь куронэз - власть калык азьын кыл мед кутоз. Конституция оскымон мед утёз адямилэсь правооссэ но эриксэ, азьланезлы оскон пыӵатоз. 2. Берыктом уждунъя, пенсиосъя, пособиосъя но стипендиосъя пунэмен тыронъёсты. Котькуд квартирае, котькуд корка вуттом шуныт но югыт, котькуд школьниклы - дунтэк учебник но пӧсь сиён, котькуд больницалы - тырмыт эмъюм. 3. Кулэстом эстӥськонлы, электрокужымлы но транспортлы пуктэм туала дунъёсты. Кулэстом выт тыронэз. Луонлык сётом асьме дорын продукция поттыны но производствоез паськытатыны. Ужтэк кылемъёс уз луэ. Уждун будоз. Дунъёс интыяз пуксёзы. 4. Дугдытом гурт удысэз тарканэз. Дунъёсты воштом. Туала куронъёслы тупась техника поттонэз радъялом. Музъемен мед кузёяськоз сое дунъяны но ужатыны быгатӥсь мурт. Ум сётэ тус-тас карыны но вузлы пӧрмытыны. 5. Пум поном правительстволэн "чималиен" шудонъёсызлы. Странаен кивалтонэ кыском чылкыт сюлэмо, визьмо, быгатонлыко адямиосты. Нимысьтыз саклык висъялом егитъёсты будэтонлы но дышетонлы. 6. Выльысь берыктом калык контролез, госаппаратлэсь ужзэ чакласа возён понна. Кулэстом чиновникъёслэсь лыдзэс.Урод ужась депутатъёсты но министръёсты дырызлэсь вазь интыысьтызы мозмытон ласянь закон кутом. 7. Политика урдсы уллялом вань экстремистъёсты, улон радэз тӥяны турттӥсьёсты. 8. Ум сётэ странамес юдэсэн-юдэсэн люкылыны. 9. Дэмен султом преступностьлы пумит. 10. Судозь вуттом кивалтӥсьёслэсь-жуликъёслэсь вань кырсь ужъёссэс. 11. Выльысь ӝутом семьялэсь данзэ; кышномурт-анай но ужась кышномурт обществоын тужгес но гажамон адями луозы. Ми утём нылпиосмылэсь шудо вакытсэс, юрттом ожысь но ужысь ветеранъёслы, государство нимысьтыз саклык висъялоз мумы-бубытэк кылем пиналъёслы но сӧсыръёслы. 12. Пӧртэм выжыысь калыкъёслы азинскыны одӥг кадь право сётом. Утём соослэсь культуразэс, кылзэс но сямъёссэс. 13. Ӝутом ӟуч калыклэсь данзэ. 14. Россия но Белоруссия, Украина одӥг государство луыны кулэ. Ми - вань калыкез огазеян понна. 15. Ӝутом странамылэсь оборонной кужымзэ. Армимы нош ик гажано но яратоно луоз. Куашкам странамес ӝутонэ ми ӧтиськом вань ужась калыкез, интеллигенциез, егитъёсты но арлыдоосты. Утёме сое будӥсь нылпиосмы понна, мед соос тупаса, огкылысь улозы, курадӟонэз, ожмаськонэз тодытэк-адӟытэк. Ӵош султӥм ке, асьмеос вормом! Ӧтён улэ гожтӥсько Россиысь компартилэн Центральной Комитетэзлэн кивалтӥсез Г. А. Зюганов, Кун Думалэн Председателез Г. Н. Селезнев, Агропромышленной союзлэн кивалтӥсез В. А. Стародубцев, Кемеровской областьлэн губернаторез А. М. Тулеев, армиысь генерал В. И. Варенников, Кун Думалэн председателезлэн воштӥсез С. П. Горячева, писатель В. Г. Распутин, лётчикъёс-космонавтъёс С. Е. Савицкая но В. И. Севастьянов но мукетъёсыз. Гажано бырйисьёс, дуно эшъёс! Арня нуналэ асьмеос быръём Россия Федерациысь Кун Думае депутатъёсты. Ваньмы - кандидатъёс но, бырйисьёс но - жадизы ни. Кандидатъёс - ёросысь ёросэ, городысь городэ ветлонъёслэсь, уно пумиськонъёслэсь, лэчыт ужпумъёслэсь, шуг юанъёслэсь. Бырйисьёс - ӝутканъёслэсь, ӧтёнъёслэсь, супыльтонъёслэсь. 19-тӥ декабре тӥ пӧлысь котькудӥз куаразэ сётоз. Со понна, кин пала кариськоз сюлмыз, кинлы дурбасьтоз визьмыз. Быръёнлы йылпумъян котькыӵе медло, мон ваньдылы шуисько: "Бадӟым тау!" Тау, монэ пумитады, кылзӥды, мынэсьтым юалляськиды шуыса. Тау, монэн шумпотонъёсыныды, сюлмаськонъёсыныды но куректонъёсыныды люкиськиды шуыса. Тросэз, мае адӟи уно пумиськонъёс дыръя, мыным тодмо вал ни. Но мылкыдъёстэс сокем мур шӧдыны али гинэ быгатӥ. Тау, тӥледын ӵош кӧня ке коть улыны кылдӥз шуыса. Ваньмыз, мае мон тодӥ, мар мон кылӥ, тӥлесьтыд куронъёстэс, ӵектонъёстэс, одно ик лыдэ басьто, котькызьы мед йылпумъяськоз быръён. 19-тӥ декабрь бере луо-а мон Кун Думалэн депутатэз яке кылё-а Удмурт Республикаысь Кун Кенешлэн Тӧроезлэн воштӥсез луыса - тыршо тӥлесьтыд улондэс ӧжыт ке но капчигес карыны. Анайёс ичигес мед сюлмаськоно луозы нылпиоссы понна. Ветеранъёс медам малпалэ, соосыз государство вунэтӥз шуыса. Асьме странаын мед быроз ожмаськон. Асьмеос мед вунэтом, ма со радъям преступность, коррупция, ужтэк кылён, сютэм улон. Ойдолэ уломе но ужаломе, Удмуртимес но татысь калыкез яратыса, Россилы но азьланезлы оскыса. Мур гажаса но сюлмысьтым тау карыса- Светлана СМИРНОВА. Ува но Селта ёросъёсысь бырйисьёслы Вазиськон Туэ апрель толэзе Кун Кенеше депутатэ тӥ кыкетӥзэ бырйиды вал Валерий Загайновез. Нош сое, кызьы тӥ тодӥськоды, министре пуктӥзы. Соин ик Законъя со депутат луыны уг быгаты ни. Бушам интые выльысь депутат быръёно луоз. Селта ёросысь председательёс ӵектӥзы "Совет" эштослэсь кивалтӥсьсэ Виктор Андреевич Полянскихез. Та кандидатураез ми умоен лыдъяськом но ӧтиськом тӥледыз Виктор Андреевич Полянских понна куарадэс сётыны. Мон тодӥсько: депутат луиз ке, со тӥледыз уз пӧя. Солэн выжыосыз будо Селта музъемысь, удмурт калыкысь. Со пустыняысь "перекати-поле" будос кадь ӧвӧл. Карьера понна яке шуг-секытъёслэсь кышкаса, со нокытчы уг пегӟы. Шумпотон вакытады но, куректон адӟыкуды но со тӥледын ӵош луоз. Соин ик вань бырйисьёслы мон вазиськисько: 19 декабре сётэ куарадэс удмурт воргорон Виктор Полянских понна! "Удмурт кенеш" огазеяськонлэн тӧроез В. К. ТУБЫЛОВ. Кун Кенешын Кун Кенешын эскеризы куд-ог федеральной законъёсы воштонъёс но ватсанъёс пыртонэн герӟаськем ужпумъёсты. Соос пӧлын "Ветеранъёс сярысь" закон но. Отчы воштонъёсты лыдэ басьтыса, ветеранъёс пӧлы пыртыны ӵектэмын но соослы кадесь ик льготаос чакламын Россия Федерацилэн улосвылаз ож вожвылъяськонъёсы пыриськемъёслы но. Службазэс тужгес секыт но кышкыт интыосын ортчисьёс понна со бадӟым вормон луысал. Президиумын озьы ик вераськон мынӥз куд-ог законъёс бордын ужанэз ӝогомытон пумысен но Кун Кенешлэн сизьыметӥ сессияз эскерыны чаклам ужпумъёс сярысь. Соос пӧлы пыртыны ӵектэмын на таӵеосыз: "Балезино но Завьялово ёросъёсын выль кылдэм гуртъёсты ниман сярысь" но "Республикалэн улосвылысьтыз музъем узырлыкъёсты кутыса поттэм продукциез люкылон". Кенеше люкаськемъёс музон ужпумъёсты но эскеризы. Удмурт Республикаысь Кун Кенешлэн пресс-службаез. Шӧкыч Шӧкычлэн кырӟан кружокез Куноын Крезьгурез Пантелей Кузнецовлэн, Александр Белоноговлэсь кылъёссэ тупатъяз Фёдор Миннигараев. Сюанчи, мыным тон лэзь ай Чаркаям пӧсятэмзэ! Ӧй ке кудӟы, мар понна мон Куное лыктӥ гуртэ. Курытэз ӧжыт ӧвӧл, дыр, Уд жалялэ сектаны. Ма, тӥни ук Митрей но Кемалась ни пограмын. Кырӟалэ, кидэс но чабе Ваньды котыр султыса. Сюанчи, туннэ тон чида, Лэзь на ай эшшо одӥг чарка. Кин ке но, оло, шуоз, дыр: "Ох, юись та куноды!.." Только нокин но уз тоды, Кӧня мыным кулэ пограны. Выль арлы - ческыт кузьымъёс Быдэс шаерамы ӟеч тодо "Кезысь пищекомбинатлэсь преникъёссэ. Татын соосты трос пумо потто. Вылаз ик, преникъёслэн дунъёссы но кулэсэсьгес. Басьяськись уго али котькуд копейказэ лыдъя-чота. Выль ар азьын татын поттыны кутскизы "Лакомка" но "Фантазия" нимо ческыт сиён. Отчы шоколад сяна ватсамын на какао но пашпу мульы. Н. СЕРГЕЕВ. ШӦКЫЧ Кызьы кивалтоно кунэн? Сюлоен но преникен. Нырысь сюлоен, нош собере преникен, сюлоен, преникен, сюлоен, преникен... Нош собере сюлоен, сюлоен, сюлоен, соку преник кылёз аслыд но, ӵыжы- выжыосыдлы но. *** Кызьы вералляз Ильич, ваньмыз зэмлыкъя луыны кулэ. Бакчаосты - бакча возисьёслы, ӟенеликъёсты - бомжъёслы, кунэз - госаппаратлы... Нош музъемез - луэмезъя калыклы сётоно адямиосты ватонъя бюро пыр. *** Кивалтонын нырысь ик кулэ коньдон, ӧвӧл ке, сое узыръёслэсь талано... Мар тӥ вераськоды? Мар тӥ, со кылъёс понна монэ, тодӥськоды-а? Ой, монэ умойтэм валады, лэся. Мон шуыны турттӥсько вал: узыръёслэсь талано ӧвӧл.. куанеръёслэсь но... Удмурт Республикаысь кышкытлыклэсь утиськонъя кенешлэн РЕШЕНИЕЗ Россия Федерациысь Кун Думае быръёнъёслы дасяськон но соосты ортчытон дыръя республикаын законъёсты тӥян учыръёсты но экстремизм мылкыдъёсты алонъя ужрадъёс сярысь ужпумез эскерыса, кенеш пуктэ: 1. Удмурт Республикаысь югдурез утёнъя министрлэсь, милициысь генерал- лейтенантлэсь В.Ф.Щербаковлэсь, Россия Федерациысь кышкытлыклэсь утиськонъя федеральной службалэн Удмурт Республикая управлениезлэн начальникезлэсь, генерал- майорлэсь Н.Е.Арзамасцевлэсь, Удмурт Республикаысь Быръёнъя комиссилэн тӧроезлэсь А.И.Тубыловлэсь асьме республикаын быръёнъёслы дасяськонлэн кызьы мынэмзы сярысь ивортонъёссэс лыдэ басьтоно. 2. Удмурт Республикаысь правоосты утись органъёслы дэмлано асьме улосвылын лыдэ басьтэм (зарегистрированный) огазеяськонъёсты чакласа возьыны но Россия Федерациысь Кун Думае депутатэ кандидатъёсын но соослэн оскем адямиосынызы законъёсты тӥян учыръёсты алонъя ужез азинтыны. 3. 2000-тӥ арын Россия Федерацилы Президент быръёнэз лыдэ басьтыса но валэктон ужез законлэн куронъёсызъя ортчытон понна, Удмурт Республикаысь правоосты утись ёзъёслэн огаз кенешазы эскерыны ӵектоно быръёнъёсъя нимысьтыз ужась группа кылдытон сярысь ужпумез. 4. Кышкытлыклэсь утиськонъя кенешлы эскерем ужпумъя дасяно республикаысь бырйисьёслы заявление. Ижевск город. 1999-тӥ арын 14-тӥ декабре. Ми тодӥськом пайдаё ужась Думалэсь формулазэ: 19.12.99+�19= {ӟеч законъёс, ӟеч улон "Отечество - Вся Россия" - зэмос ужъёсты огазеян ОВР блок люказ сыӵе муртъёсты, кинъёс уж вылын возьматӥзы - туала кивалтӥсьёс экономикаын но социальной удысын пайдатэм политика нуон вакытэ но ужаны луэ. Соос пӧлын космонавт Кондакова, экономист Жуков, полярник Чилингаров, пыӵал тӥрлык поттӥсь Калашников, генерал Громов но трос мукетъёсыз. Выльдэм Кун Думаын ужаны милям нимысьтыз программамы вань. Документ данак россиянъёслэсь мылкыдзэс возьматэ но умой улонлы оскон сётэ. Со законопроектъёсын "Россия понна законъёс" сузьет. Сое ми ялан выльдом но тупатъялом, адямиослэсь быръён кампания вакытэ сётэм ӵектонъёссэс лыдэ басьтом. Быръёнъёс азьын "Россия понна законъёс" платформа Юрттэт - кулэяськисьёслы, эрик - чырмыт но сюлмо муртъёслы Ми ужпум пуктӥськом: государство адями, солэн нуналмысь кулэяськонъёсыз сярысь мед сюлмаськоз, гражданъёслы улон-вылонын, ужын но экономикаын гарантиос сётонъя пайдаё ужась радлык мед кылдытоз. Угось калыклэн тыро улонэз странамылэн азинсконэзлэн валтӥсь тодметэз. Таза общество - таза но шудо семья, ӟеч улон понна солы кулэ нимаз улон инты, дунтэк эмъяськыны но дышетскыны право, ужбергатонэн вырыны луонлык. Милям куронъёсмы: - калыклэсь, уката ик бюджет чотын ужасьёслэсь, доходъёссэс будэтоно; - Россиысь семьялы юрттонъя ужрадъёсты улонэ пыӵатоно; - нылпи будэтӥсь нылкышноослы льготаос сётоно; - пенсионеръёслы юрттоно; - 2000-тӥ ар пумозь улон инты понна дунъёсты будэтытэк возёно; - дунтэк эмъяськон стандартъёсты ӝутоно; - льготаен кредит сётон радлыкез азинтоно, ужаса улӥсьёслы дунтэм улон инты но вылӥ ӟечлыкен вузъёс басьтыны луонлыкъёс кыдытоно; - семьяын нылпилэсь правооссэ утёно; - обществолэн ужъёсаз пыриськыны воргоронъёслы но нылкышноослы огкадь правоос сётонэз законъёсын юнматоно; - пал кылем, трос нылпиё, ӧлексы пиналэн яке анай-атаен семьяослы, студентъёслэн, мукет интыосысь пегӟем яке кошконо луэм муртъёслэн семьяоссылы юрттоно. Таза обществолэн лулпуш узырлыкез ОВР гражданъёслэсь обществомылэн лулпуш узырлыкез сярысь сюлмаськонзэс умой вала. Ми тодӥськом, та ласянь югдурез тупатыны ӧм быгатэ ке, кужмо, цивилизованной но узыр Россия сярысь малпаны гинэ кылёз на. Обществоын культура куашка, дауръёсын юнмам дышетон радлык лябӟыны кутске, огшоры адями сямъёс вуно ке, ӟеч но тыро улыны условиос кыдытыны уз луы. Азьпалан улонмы герӟаськемын государстволэн культура, наука, дышетон, егитъёсын ужан удысъёсысь тырмымтэосты палэнтыны быгатэменыз. Милям куронъёсмы: - фундаментальной исследованиосты радъяны юрттоно; - туала технологиосты улонэ пыӵатоно но азинтоно; - Россиысь тодосчиослэсь социальной статуссэс будэтоно. Асьмелы "зарни киос" гинэ ӧвӧл, "зарни йыръёс" но кулэ; - котькуд адямилы ӟеч дышетскыны луонлыкъёс кыдытоно; - странаысьтымы культура удысысь ужасьёслы юрттоно; - Россиысь калыкъёслэсь кыл ласянь аспӧртэмлыкъёссэс утёно. Кужмо государство - пайдаё ужась власть - чырмыт граждан общество Берло аръёс туж умой возьматӥзы, кужмо государство гинэ адямилэсь валтӥсь правооссэ но эрикъёссэ утьыны быгатэ. Ми шуиськом - Россиысь власть общество азьын кыл кутыны, аслэсьтыз янгышъёссэ валаны, шара но пайдаёгес ужаны кулэ. Центрысь властьлэн визьмо ужамезлы оскон ӧвӧл ке, улосъёс шуг-секытысь потон амалъёс асьсэ коже утчаны кутско. Кужмо но юн государство луыса гинэ Россия кризисысь потыны быгатоз. Милям куронъёсмы: - странаысьтымы ваньмызлы ик таза кужымъёслы одӥг кыл шедьтоно но ӵош ужано; - кун властьлэсь радлыксэ тупатоно, конституциез выльдонъя уж нуоно; - законъёс быдэсъяськемез но правопорядокез чакласа возёно; - Россия Федерацилэсь обороноспособностьсэ но шугадӟонъёслэсь утиськыны быгатонзэ юнматоно; - военнослужащийёслэсь социальной статуссэс будэтоно, пумен-пумен Вооружённой Кужымъёсы егитъёсты ас мылкыд каремзыя кутон радлыке выжоно; - "оборонкалэсь" бюджетлы пунэм тыронъёссэ берлолы кельтоно; - ВПК-ысь предприятиослы кун заказ висъяно, вытъёсъя льготаос сётоно но таможняын пошлинаосты кулэстоно; - СНГ-ысь кунъёсысь обороная предприятиослэсь ӵош ужанзэс радъяно. Экономика ласянь будон Государство экономикаын валтӥсь интыез ӧз басьты ке, Россиын кризис азинтӥськоз. Калыкезлэн азьпал улонэз понна кыл кутыны быгатӥсь, вылӥ технологиосын производствоосты азинтонъя программаосты дунъясь государство гинэ Россиез выльысь берыктоз дуннеысь экономика ласянь тужгес кужмоосыз державаос пӧлы. Кыл вылын сяна, уж вылын но власть возьматыны кулэ патриотизм мылкыдзэ. Государство котыр ласянь юрттыны кулэ асьме вуз поттӥсьлы. Соку гинэ производство зэмос улӟоз, продукцизэ асьмелы гинэ ӧвӧл, дуннеысь рынокын но ӵектоз. Милям куронъёсмы: - асьме вуз поттӥсьлы юрттоно, странаысьтымы рынокез утёно; - ваньбур поттӥсь удысъёсты азинтоно, государстволэсь чаклась-эскерись кужымзэ будэтоно; - гурт удыслы юрттоно, страналы тырмымон сиён-юон поттоно; - вытъёсын радлыкез выльдоно; - экономикаын эрик сётоно но ужбергатонэз азинтоно; - вылӥ технологиосын, вожвылъяськыны быгатӥсь российской корпорациос кылдытонэз умоен лыдъяно; - законэз тӥяса кузёослы вузам предприятиосты выльысь государстволы берыктоно; - экономикаысь стратегической удысъёсты но естественной монополиосты чакласа возёно. Одӥг кадь быгатонлыкъёсын федерация Россилэн политической азинсконысьтыз туала вакытэзлэн одӥгез бадӟымез тырмымтэез - федеральной центрлэн но улосъёслэн радъямтэ кусыпъёссы. Россия огкылысь луэменыз гинэ ӧвӧл, нимаз люкетъёсызлэн огкадь луымтэенызы но кужмо. Та узырлыкез асьмелы утёно. Федеральной центр азьвыл сямен ик кужмо луыны кулэ. Но демократической государствоын со кужым улосъёслэн кужыменызы пӧлэстӥськыны кулэ. Россилэн кужмыз но сяськаяськонэз - улосъёслэн огкылысь ужамзы бордын. Дэмен промышленностьын но гурт удысын валче тыршыса гинэ, асьмеос выль ужан интыос кылдытом, ужаса улӥсьёслэсь доходъёссэс будэтом врачъёслы, дышетӥсьёслы, тодосчиослы, культура удысын ужасьёслы юрттыны быгатом. Милям куронъёсмы: - федеральной центрлэсь но улосъёслэсь быдэсъяно удысъёссэс люкылоно; - котькуд улосвыллэсь аспӧртэмлыксэ утёно но азинтоно; - улослэсь социально-экономической, географической но мукет аспӧртэмлыкъёссэ лыдэ басьтӥсь программаослы коньдон висъянъя ӟеч радлык кылдытоно; - улосъёсты огкадьгес азинтоно, Родинамылэн котькуд сэрегаз улон уровень огвыллем медло. "Россия понна законъёс" - Россиысь калыкен огкылмы, со понна "Отечество Россия" блок кыл кутыны дась. Ми - выль, кыл кутыны быгатӥсь Кун Дума понна! Ми лыдъяськом: Депутатъёс, асьсэлы уждун будэтэм но кун квартираос басьтэм интые, бырйисьёслэсь ужпумъёссэс быдэсъяны кулэ. Депутатъёс, кенешонъёсын изем интые, законъёс кутыны кулэ. Депутатъёс, телекамераос азьын ог-огзэс пазям интые, ужаны кулэ. Пайдаё но визьмо законъёс - Кун Думалэн ужез! Но... ваньмыз ик депутатъёс тазьы уг ужало но ваньмыз ик тазьы уг лэсьто. Ужъёслы гинэ оске! Милям номермы быръён бюллетеньын - 19! Лэчыт ужпум Мурт юртысь сюрпи "Театр возьматэ нацилэн быдэ вуэмезлэсь тодметсэ. Котькуд калыклэн, котькыӵе выжыысь мед луоз, котькыӵе кылын мед вераськоз со - театр воземез но соин данъяськемез потэ",- озьы гожъя вылэм быдӟым ӟуч драматург А. Н. Островский, вань улонзэ театрлы сӥзем мурт. Зэмос данъяськонмы - Драмая удмурт кун театрмы - асьмелэн но вань. Синмаськымон солэн ортчем сюресэз. Визьмо удмуртъёс элькунмы пыдйылаз ӝутскыку ик ини сое кылдытон сярысь малпаськылӥллям. Туннэ асьмеос мур гажаса буре ваиськом театр искусствоез кылдытӥсьёслэсь нимъёссэс. Соос пӧлын - А. В. Сугатов, И. Г. Гаврилов, К. А. Ложкин... Витьтонэтӥ аръёсы Иж педучилищеын но Удмурт пединститутын дышетски. Со дырозь спектакльёс учкылэме ӧй вал на. Нош студентъёслэн театре дэмен ветлон ӝытъёссы праздникъёслы пӧрмылӥзы. Театрез яратӥсьёс тодо: али солэн труппаяз пӧртэм вакытъёсы дышетскем артистъёс тыршо. Учкись котькуд ужзэс гажаса но шумпотыса пумита. Трос артистъёслэсь нимъёссэс данъяськыса вераськом. Соосты сюлмысь гажало, удмуртъёс сяна, ӟучъёс но, мукетъёс но. Вераны кулэ: писательёсмы но журналистъёсмы яратоно удмурт театрмы сярысь данъяськыса, шумпотыса гинэ уг гожъяло. Одӥгъёссэ сюлмаськытэ солэн репертуарез, мукетъёссэ - театрлэн юртэз, солы ӟеч ужаны юрттӥсь луонлыкъёс кылдытон. Тодам возисько Никвлад Самсоновлэсь гожъямъёссэ. Солэн "Удмурт театрлы - выль юрт" нимо статьяез потӥз 1987-тӥ арын "Молот" (табере - "Кенеш") журналлэн 12-тӥ номераз. Та ужпум борды со юнме ӧз кутскы. Со аръёсы дышетскиз Москваын, Литературая институтын, кужымзэ эскерылӥз драматургия удысын. Сцена вылын мынӥз "Вунэтэм шундыберган" пьесаезъя спектакль. Театр сярысь гожтэменыз писатель бадӟым кенешонлы кутскон сётӥз. Куке но вал-а Удмурт театрмылэн аслаз ужан юртэз? Тодӥсь муртъёс одӥг ымысь кадь верало: ӧй вал. Малы озьы луиз? Малы сизьымдон ар ӵоже та сярысь нокин ӧз сюлмаськы? Нырысь аръёсаз югдур таӵе вылэм: спектакль возьматылӥллям Шоретӥ удмурт клубын. Собере коллектив ужам КОР (Октябрь революция нимо) нимо клубын. Удмурт артистъёс сюрпиос кадесь вал, дыр. Ӧз тырмылэ, шуо, репетициос ортчытъян комнатаос, соин валче уйёсы но ужано луылӥллям. Ялан гуртъёсы поталлям. Война кутскем бере, театр ворсаськылӥз но, артистъёс фронтэ кошкемен яке - заводъёсын, гуртъёсын тыршемен. Сцена вылын выльысь ужаны луонлык кылдэм бере, спектакль возьматъяса улӥзы Алнашын, собере - Можгалан. Война йылпумъяськем бере, удмурт спектакльёс возьматъязы "Динамо" (собере со луиз Дзержинский нимо) клубын. Ми, 50-тӥ аръёсысь студентъёс, данаксэ отын учкылӥмы на. Ӝожомыса верано луэ: югдур ӧз воштӥськы трос аръёс ортчыса но. Нош искусствоысь усточиос ялан ужазы выль, чебер юртэ пырон сярысь малпанъёсын. Ньыльдон ар пала ини тыршо соос Правительствомылэн Максим Горький ульчаысь вуж юртысьтыз кенешъёс ортчытъян залын. Татын азьло кык коллектив артэ ужаз - крезьгуръя но драмая театрысь артистъёс. Удмурт спектакльёс сцена вылын сокем ӵем ӧз мынылэ ке но, быдэс зал калыкен тырмылӥз. "Удмурт театрлы - выль юрт" статьялэн авторез котькуд ласянь эскериз вал кадь отысь югдурез. Бускель республикаосын но ӵошатылӥз. Театрысь режиссёр, актёр Леонид Романов солы тазьы верам: "Бигеръёслэн театрзы умой вал. Камал нимо академической театрзы миым гинэ выль юртэ пыриз (эн вунэтэлэ: вераськон мынӥз 1987-тӥ арын - Л. Ф.). Чувашиын туж ӟеч юрт пуктӥзы. Алигес. Вужез начар ӧй вал ке но. Поръёслэн асьсэлэн усто юртсы. Башкиръёс сярысь веранэз ик ӧвӧл ни - сокем шукрес! Таосын ӵошатоно ке, асьмеос бере кылиськом"(туж бере кылиськом - Л. Ф.). Со вакытэ элькунамы ялэмын вал культурая 2000-тӥ арозь чаклам программа. Кунэнымы кивалтӥз на М. С. Горбачев. Б. Н. Ельцин кузёяськыны кутскиз бӧрысьгес, либерализация но приватизация шуонъёсын шудыса, калыклэсь но бадӟым кунмылэсь трос миллиард манетъёс но долларъёс тыр ваньбурзэс таласа. Нош бадӟым лэсьтӥськон сярысь вераськон ӝутске ке, властьёс котьку ик чӧлско коньдон тырмымтэ вылэ. Ар ортчыса, писатель Никвлад Самсонов удмурт калыклэн висёнэз-пӧськыез доры выльысь берытскиз. "Удмурт театрлы - выль юрт" статьяезлы вазиськизы пӧртэм адямиос. Бадӟым вераськон ӝутскиз Удмурт театрлэн юртэзлы инты сярысь но. Табере ини писатель та ужпумъя ваче кенешиз культурая министрен А. П. Сидороваен. Соку ик вераськон мынӥз на, Удмурт театрлы сяна, цирклы но филармонилы выль юртъёс ӝутон сярысь но. Анетта Петровна мадиз, макем трос сюлмаськоно луиз театрлы выль юрт пуктон пумысен. Писательлэн меӵак юанэзлы соку тазьы валэктӥз: "Театрлы юрт лэсьтыны кутскозы 1993-тӥ арын, нош 1995-тӥ арын солэн сцена вылаз артистъёс потыны быгатозы ни". Ӝожомыса верано луэ: чаклам ужъёс туннэ но уг быдэсъясько. Та ужлы республикалэн бюджетаз коньдон ӧвӧл, шуо. Театрен дас ньыль ар ӵоже кивалтэм адями Б. Е. Саушкин ортчем вакыт сярысь тазьы вера: - Юрт сярысь вераськон кемалась ини кыл йылын вал. Нырысь тазэ ик тупатъяны- выльдыны чаклазы. Москва документация но дасяз. Но таӵе ужрадлэсь куштӥськоно луиз. Малы ке шуоно, тодын вал на ӟуч театрез тазьыгес выльдон учыр. Вить ар кыстӥськиз со. Отысь труппа ужан интылы ӟудыса улӥз, репертуарзы куашказ. Удмуртэныз но озьы ик луиз ке, воксё пумаз вуод ук, малпазы. Нош ку луоз выль юрт? Операя но балетъя кун театр пуктӥзы, лэсьтэмын Мунё театрлы юрт, выльдэмын В. Г. Короленко нимо Ӟуч драмтеатр. Нош быдэс дуннеысь одӥг гинэ зэмос удмурт театрлэн аслаз йӧно юртэз ӧвӧл! Дирекция меӵак ӝутоно кариськиз та ужпумез. Выль юрт лэсьтон пумысь куронэн вазиськиз Удмурт Республикаысь Министръёслэн Советазы. Москвае но, РСФСР-ысь Министръёслэн Советазы, гожтэт ыстӥзы. Данаказ газетъёсын но та ужпумъя ик кенешонъёс, вераськонъёс вал. Уж интыысьтыз вырӟиз кадь. Москва удмуртъёслэсь куронзэс пеляз понӥз - театрлы проект лэсьтонэз планэ пыртӥзы. Ижысь кивалтӥсьёс инты но висъязы. Зэм, со городлэн ӵук палаз, мынон-ветлонлэсь палэнын вал. Выль юртлы инты утчан но проектлы конкурс ортчытон мултэс кема кыстӥськизы. Ӵошатсконэ пыриськизы Москваысь, Ленинградысь, Прибалтикаысь адямиос. Удмурт архитектор Касим Галиханов нырысетӥ интыез утӥз. Солэн малпанъёсыз бадӟымесь вылӥллям. Ижын удмурт культурая центр кылдытыны ӵектэм. Архитекторлэн малпамезъя, отын луыны кулэ Удмурт театр, музей но кунокуа. Ваньмыз соос лэсьтэмын луыны кулэ, удмурт сямъёсты но йылолъёсты чакласа. Собере "Удмуртгражданпроектлы" театрлы эскериз-проект дасяны ӵектӥзы. Таиз удыс йылаз-пумаз вуттэмын ӧй вал, шӧдске. Малы меда чутрак дугдӥзы? Архитектор валэктэмъя, удмуртъёслэн азьветлӥсьёссы ляб ужамен. Элькун Кивалтэтмылэн тӧроосыз Москваын Россиысь вылӥ кивалтӥсьёс азе юн-юн куронъёс пуктыны ӧз быгатэлэ, пе. Нош отысь юрттэттэк ӧй луысал Драмая но крезьгуръя театръёс трос аръёс ӵоже, курадӟыса ке но, ӵош ужазы. Табере Операя но балетъя кун театр Карлудмылэн тужгес адӟиськымон интыяз ик туж яркыт пиштыса сылэ. Нош удмуртъёслы инты ӧз сюры. Культурая выль министр Н. М. Бессогонов югдурез ӟеч тодэ. Азьвылзэ тодаз вайыса вера: - Ӝутэмын вал Операя но балетъя кун театр. Кутским спектакльёс пуктылыны. Зэм, театрлэн сценаез но залэз туала куронъёслы уггес тупало. Оркестрлы шудон инты пичи. Сценаез паськытатоно ке, залэз сюбегатоно луысал. Нош драмая театрез но выль юртэ ик интыяно ке, эшшо одӥг зал яке вӧзаз ик выль юрт ӝутоно луысал. Проект соизлы но, таизлы но ӧз тупа. Ортчизы аръёс. Элькунамы культураен кивалтонын но трос гинэ воштӥськонъёс луизы. Воштӥськонъёс луизы Удмурт театрын но. Соин ньыль ар ини кивалтэ Удмурт Элькунысь искусствоосъя сӥё-дано ужась А. А. Митрофанов. Вань кивалтӥсьёслэн мылкыдзы одӥг: театрлы, ӟеч ужан вылысь, выль юрт кулэ - учкись отчы йырзэ мыкыртыса медаз пыры. Анатолий Андреевич кылдэм югдур сярысь тазьы вера: - Азьлоосыз кивалтӥсьёс трос аръёс ӵоже тазэ ик, та юртэз тупатъян-выльдон мылкыдын улӥзы. Зэм, та уж борды кутсконо ке, сценаез, солэсь тӥрлыксэ выль сямен лэсьтоно. Вуж проектъя театре пыран ӧсъёсты Максим Горький нимо сад ласянь усьяны чакламын вылэм. Куинь-ньыль ар талэсь азьло тупатъямын вал юртэз шунтон. Батареяосты соку ӧжытгес кельтӥллям. Учкисьёс тодо на, луоз: залын азьвыл ӝокыт луэ вал. Табере, шуныт сётонэз шыръямен, юртын кезьыт луэ. Артистъёс куро вылэм театрез ватсам электрокужымен шунтыны - тылпулэсь утисьёс алӥллям. Вылез министр вуж проектлэсь куштӥськиз, выль юрт понна нюръяськыны ӵектӥз. 2001-тӥ арын Драмая удмурт кун театрлы сизьымдон ар тырмоз. Со сярысь но малпаса, театрлэн кивалтӥсьёсыз дас ар талэсь азьло сямен ик выльысь ысъяло вылӥ кивалтӥсьёслы гожтэтъёс. Выль юрт пуктыны проект дасян вылысь, Удмурт Кивалтэтмылэсь одӥг миллион манет коньдон куро. Азьвылъёсыз кивалтӥсьёс удмурт калыклэсь куронъёссэ ӧз быдэстэлэ, кутскем вамышъёсты но аналтӥзы. Оло, юри возьмазы секыт дыръёслэсь вуэмзэс? Нош та аръёсы ик город котырын губиос выллем ӝужазы коттеджъёс. Кинлэн ваньбуреныз ӝутэмын соос? Мэрия вадьсы но та вакытэ ик шукрес бадӟым но узыр улон корка ӝутскиз. Отын но кивалтӥсьёс улозы, шуо кадь. Кытысь ке но трос коньдон висъяське черкъёсты выльдонлы. Нош культурамылэн, ужась калыклэн кулэяськонъёсыз малы вуно?!. Одӥгез сюлмаськон борды Кун Кенеш кутске ни кадь: цирклы выль юрт пуктозы. Та ужез вырӟытыны юрттэ "Росгосцирклэн" президентэз Л. П. Яирова.но. Культурая министрмы киын - цирк лэсьтон сярысь документъёс. Вужзэ но юртэз сэртто ини. Николай Михайловичлэсь мон юай: - Оскиськоды-а, удмурт калыклэн но туж кемалась малпанэз куке но быдэсмоз шуыса? - Оскисько! - шуиз министр. - Элькунмылэн кивалтӥсьёсызлы сяна, Россия Федерациысь кивалтӥсьёслы но та сярысь ивортоно. Зэм, Москваысь юрттэт басьтытэк, Удмурт театрлы выль юрт пуктыны кужыммы уз тырмы. Нош али азьпалан - цирклы выль юрт лэсьтон. Туннэ югдурез валало ни Удмурт Кивалтэтысьтымы выль адямиос но. Кун Думалэн депутатэз пыр гожтэтъёс нош ик ыстэмын Россиысь культурая но калыкез улон-вылонын утёнъя министръёслы. Удмурт Элькун Кивалтэтлэн Тӧроезлэн воштӥсез В. Е. Шудегов но удмурт культураысьтымы та туж кулэ ужпумъя "котырес ӝӧк" сьӧрын вераськон ортчытыны чакла. Отчы пыриськозы пӧртэм удысъёсын ужасьёс. Озьы ик - писательёс, журналистъёс. Леонид ФЁДОРОВ. "Таиз бюджет ӟечгес луоз", - шуиз С. Э. Широбокова, Кун Кенешысь ялан ужась комиссилэн кивалтӥсез. Софья Эльфатовна витетӥ арзэ эскере ни шаермылэсь бюджетсэ, йылысеныз пумозяз чурен-чурен чота солэсь котькуд манетсэ, соин ик тужгес но шонер дунъет сётыны быгатэ. Депутатлэн верам кылыз одно ик зэмалоз, уж вылын быдэсмоз. - Кылем арын кутэм бюджетэн эскерыса, 2000-тӥ арезлы чакламез котыр ласянь умойгес, - пусйиз со. - Нырысь ик, дефицитэз 8 процент сяна ӧвӧл. Озьыен, трослы кулэсмизы пунэмен тыриськонъёсмы, таин ӵош будӥз доход ваись люкетэз - казнае выт октон чотын ятыргес вуиз коньдон. Со ик юрттӥз та секыт вакытэ ӧжытак капчигес шокчыны, тыронъёсты берыктыны. Кылем арын юнматэм бюджетын "пасез" 764 миллион манетлы ке вал, али со кык поллы кулэсмиз, огъя дефицитмы 300 миллион котыр луоз. Со луонлык сётоз бюджетлэн вань социальной статьяосызъя юрттэт сётыны. Та нуналъёсы ужзэ азинтэ согласительной комиссия. Со пыр-поч эскере бюджетэз кутон ласянь вуэм ватсанъёсты но тупатонъёсты, соос ог 300 пала. Котькудзэ умой-умой чаклано но интыяз пуктоно, малы ке шуоно, огез но депутат ас удыссэ казна урдсы кельтыны уз сёты. Шумпотымон соиз: кылем арен ӵошатыса, "тӧдьы виштыосыз" туала бюджетмылэн уз луэ, мукет сямен вераса, пичиен- пичиен ке но, огез но ӝажымы шалтрак буш уз кыльы. Зэмен но, бюджет борды выль Правительство ӝот-ӝот басьтӥськиз. Чурыт куронъёс со пуктэ монополистъёс азе. Али вераськон мынэ "Сиданко" компаниез Ижевскын регистрировать карон сярысь, со чотын гинэ республикалэн казнаяз 200 миллион манетлэсь ятыр уксё пырысал. Валамон ини, ма быдӟа юрттэт вуысал бюджет удысын ужасьёслы. Котьма ке но, мон туж оскисько, вуоно арысен улонмы умой пала воштӥськыны кутскоз шуыса, выльысь ӧз ке луэ ни "сьӧд" август нуналъёс но ӧз ке усьы му вӧйлэн дуныз. - Озьыен, нылпиё семьяос но басьтозы, дыр, ни кема витем пособиоссэс? - Бюджетэ пыртэмын 1997-тӥ но 1998-тӥ аръёсы люкаськем тыронъёсты берыктыны. Таин ӵош тыремын луозы уждунъя пунэме кылемъёс но. Эшшо огзэ пусъеме потэ: выль арысен школаын дышетскись пиналъёсмылы но пӧсь сиёнлы чаклам коньдон вуоз ни, миым со сярысь вераськон ик ӧй вал. Озьы ик юрттэт висъямын книга поттон удыслы. Бюджет чотын улӥсьёслы но пунэмаськонъёсмы шӧдскымон кулэсмозы. - Софья Эльфатовна, бюджетэз кутыку, вераськон мынӥз, Москва асьмелы коньдон висъянзэ кык поллы кулэстэ шуыса. - Нырысетӥ вариантын пусъемын вал 145 миллион манет Удмуртилы келяны, али та лыдпус вуиз 345 миллионозь. Туэ асьмеос сомында ик басьтӥм. Москваен огъя кыл шедьтон бордын ужазы ваньмыз: Правительство, Кун Кенеш, Кун Думалэн депутатэз Николай Сапожников, асьмелэн вуоно кандидатмы Юрий Маслюков. Софья Эльфатовна, кызьы улоз вуоно арын гурт калыкмы? - Шонерзэ вераса, мынам аслам но со понна сюлэмы юн висе. Огзэ пусъё: татын но воштӥськонъёс ӟеч пала луозы. Л. МЕДВЕДЕВА. Туннэ бырйиськом ӵуказе нуналмес Выль, 2000-тӥ арозь, трос ӧз кыльы ни, кык арня гинэ. Нош макем бадӟым воштӥськон вите асьмеды матысь дыре. 19-тӥ декабре бырйиськом выль Кун Дума, бырйиськом асьмелэсь ӵуказе нуналмес. Котькудмы пичи гинэ кинюртэменымы бадӟым ужез быдэстом: пусъём ас мылкыдмес, кинлы ке оском ас улонмес. Нош со дурбасьтэм муртъёсмы ини чаклалозы, кыӵе сюрестӥ странамы вамыштоз. Шуо, котькудмылы шуд, пе, сётӥське, шуг- секытъёсты чидаммыя. Бен, Россиысь калык троссэ чидаз ини. Нош шудо-а со?!. Шуд ас кожаз уг лыкты вылэм, со понна нюръяськоно. Асьмеос тае умой валам ни. Палэнысь узыр дядяйёслэсь но ялан кураськыса уд улы. Толон - юрттӥзы, ӵуказе - акыльтозы... Ваньмыз - асьме киын. Буйгатскыса улыны дыр ӧвӧл ни. Россилы кулэ визьмо, кужмо, Атай музъемзэс юн гажась кивалтӥсьёс. Сыӵе муртъёс пӧламы вань. Ойдолэ соослы оскеммес вералом. Бӧрысь медам ӧпкеле шуыса, ваньмы дэмен вамыштом быръён участокъёсы. Суд санэ ӧз басьты 15-тӥ декабре суд эскериз Серафима Благининалэсь 29 номеро Удмурт округысь быръёнъя комиссия вылэ ӝожтӥськонзэ. Кызьы тодмо, быръёнъёс сярысь законэз тӥямез понна, комиссия та кандидатэз палэнтӥз пусъёнлэсь (регитрацилэсь). Удмурт Республикаысь Вылӥ Суд, материалъёсты эскерыса, С. П. Благининалэсь ӝожтӥськонзэ санэ ӧз басьты. Та ласянь судын ужасьёс пусйизы быръёнъя комиссилэсь законъёсты юн чакласа ужамзэ. Мукет кандидатъёс пумысен но тырмымтэос шараяськизы. Та нуналъёсы контрольно- ревизионной комиссия кыкетӥзэ эскериз депутатэ кандидатъёслэсь коньдонэз кызьы кутмэзэс. Кыре потӥз Михаил Кошкинлэн законэз тӥяса 60 сюрс манет коньдонэз уже кутэмез. Сое возьматӥзы люкам документъёс, кандидат ачиз но ӧз ваты янгышсэ. Та выллем тырмымтэос понна чакламын депутатэ кандидатэз пусъёнлэсь палэнтыны. Но комиссия таяз учыре М. П. Кошкинэз алӥз гинэ. Удмурт Республикаысь кышкытлыклэсь утиськонъя кенешлэн Заявлениез 19-тӥ декабре ортчозы Россия Федерациысь Кун Думае но кун властьлэн мукет вылӥ органъёсаз быръёнъёс. Соос бадӟым инты басьтозы кызьы ке страналэн, озьы ик республикамылэн улоназ, азинскон сюрес вылаз. Быръёнъёсты чылкыт, законэз тӥятэк ортчытон - сыӵе ужпум пукто ас азязы кун но правоосты утись органъёс, сыӵе ик куронзы республикаысь вань бырйисьёслэн. Жаляса верано луэ, быръёнъёс матэктэмъя, ӵемгес но ӵемгес пумиськыло эсэпсэ валатэк ӝуткан-валэктон уж нуонъёс, шараясько кандидатъёс куспын ог-огдэ "кырсь" амалъёсын ултӥянъёс, юнме шорысь кыл вӧлдонъёс. Удмурт Республикаысь кышкытлыклэсь утиськонъя кенеш, прокуратура, Югдурез утёнъя министерство, Кышкытлыклэсь утиськонъя федеральной службалэн управлениез вань луонозэ лэсьтозы, шаерысьтымы гражданъёс быръёсъёсын ас малпанъёссэс эркын вераны мед быгатозы шуыса, законэз тӥяса валэктон уж нуисьёслы пумит кулэ ужрадъёс кутозы. Тодады вайытӥськом: быръён правоосты тӥям, кандидат сярысь урод кыл вӧлдэм, солэсь данзэ саптам, бырйисьёсты кужмысь но кышкатыса соизлы яке таизлы кандидатлы дурбасьтыны ӧтёнъёс понна чакламын уголовной уж ӝутыны. Гажано бырйисьёс! 19-тӥ декабре одно ик лыктэ быръёнъёсы, вералэ ас малпандэс, мылкыддэс. Оскиськом: югдурез шонер валаса, сюлэмды косэмъя, тӥ быръёды асьтэлы кельшымонзэ, тупасьсэ адямиез. 1999-тӥ арын 14-тӥ декабре. Зэмлык пӧяськемлы пумит Мыноно-а быръёнъёсы ӧвӧл-а, мынӥд ке, кин понна куарадэ сётод - со котькудӥзлэн аслаз ужез. Асьмеос тае ӟеч валаськом ни. Верам потэ мукетыз сярысь. Таосыз быръёнъёс азьын туж трос кырсь кисьтӥськиз - ваньзэ тае адӟылӥм телевизор пыр, лыдӟылӥм газетъёсысь. осконо яке ӧвӧл ОРТ-лэн яке РТР-лэн передачаоссылы - озьы ик котькудӥзлэн аслаз ужез. Но валаны кулэ, дыр, кырсь амалъёсын ӟеч ужпумъёсты нокызьы но уд быдэсты. Озьы бере, тодамы ваим ке, кин кызьы но ма вералляз, соку оло валалом - кин палан зэмлык. Тани огшоры пример - Доренко арнялы быдэ Москвалэн мэрез Юрий Лужков вылэ пож ву киськаз. Суд югдурез эскериз но приговор ялӥз: Доренко - пӧяськись. Ваньмыз, ма со вераз телеэкран вылысь, зэм ӧвӧл. Валамон, куддыръя адями шӧдтэк шорысь но янгыша. Но таяз учыре тазьы вераны уг луы. Туннэ ваньмыз тодо но валало ни, дыр, Доренко дунын эрекчаськиз. Трос пӧртэмез ӧвӧл, Березовскийлэн-а со коньдонэз яке Чубайслэн-а. Но нырысь пусъёно: со - кырсь уксё. Мукет ласянь, синмаськоно соослы, кинъёсты Доренко но юлтошъёсыз "сьӧлыкоесь" шуылӥз. Соос керетыса ӧз улэ. Шедьтӥзы ӟеч но зэмлыко амал - вазиськизы судэ. Сизьымез одӥгзэ "жуго" ке - со шонер ӧвӧл. Кышкало, иське. Политикаысь но озьы ик, ваньзэ одӥгез вылэ урдӥсько ке, озьыен, курдало - вуоз но уллялоз шеныт интыосысьтызы, дышем ужъёссы дурысь, соку ыштозы ук гань-гань улонзэс куке возьматыны но тыршиськод, тон калыклэн правоосыз понна нюръяськиськод шуыса, нош зэмзэ номыр но уд лэсьтӥськы. Тӥни сыӵе малпанъёс йыре лыкто. Е. ВАСИЛЬЕВ. Ин вӧлмытлык солы - кем Суредась, усточи, кибашлы. Карандашен-гуашен, вӧё буёлэн но суредаське. Паллянэныз но, бурыныз но киынызы огкадь усто быгатэ. Юртъерзэ но пуктӥз - сандык кадь, кызьы шуо удмуртъёс... Нош тужгес но зол устолыксэ Геннадий Сидоров возьматыны вуттӥз ни пуэз вӧлыса-чеберъяса скульптураос кылдытон ласянь. Та ужъёсыныз кӧня ке пол пумиськылӥз пӧртэм выставкаосы. Тани кылем арня вискын но солэсь творчествозэ адӟытон усьтӥськиз Ижевскын Устолык удысысь быгатӥсьёслэн шор юртазы (декоративно-прикладной искусствоя центрын). "Вашкала выжыосмылэн куаразы" нимаське со. Быдэсак со герӟаськемын удмуртъёслэн дунне, ӟечлык, чеберлык сярысь валанэнызы, мифологиен. Тани югыт дуннеез возись ошъёс, соос вадьсысь вӧлмытлык, инме кыстӥськись бурдъёс... Инмарезлы-кылчинэзлы йыбыртъясь пичи адями... Муш утись... Лянэсэн гондыр... Нюлэслэн кузёез - лось. Котырес сюрыныз-чашаеныз... Толэзь шоры вузӥсь кионъёс... Скал ымныро пичи бекчеос, кружкаос... кобыос... Татын ик - К. Гердлэн кызьпу туйлэсь лэсьтэм портретэз, вӧё буёлэн суредам инкуазь... Ваньмыз со - Геннадий Сидоровлэн кибервылыз. Та адямилэн киосыз ик пӧртэмесьгес, дыр, - сотэк быгатысал-а сокем вольыт, чебер гожъёс кылдытыны. Со скульптураос киын ик лэсьтэмын ӧвӧл кадь - ачиз инкуазь, солэн тӧлъёсыз эркынласа волятӥллям кожалод. Геннадий Евгеньевич Ува ёросысь Узей-Тукля гуртын кибашлыослэн юртэнызы кивлатэ. Та выставкае ваемын солэн дышетскисьёсызлэн Андрей Конышевлэн, Евгений Батуевлэн, Евгения Петуховалэн, Константин Спиридоновлэн, Андрей Жуйковлэн но ужъёссы - шкатулкаос, подносъёс. Озьы ик син шоры йӧто кузпалызлэн Надеждалэн куиськем арбериосыз. Аслыз пар но Геннадий тупасьсэ бырйиз - кузэзъя палыз луэм. Нош вордскиз, будӥз со бадӟым семьяын, сизьым нылпиос пӧлын. Атайзы, Евгений Павлович, улэп ӧвӧл ни - солэн кибашлы сямыз пыӵаса кылиз пиналъёсызлы, уката ик - Геннадийлы, Михаиллы. Таиз выныз выставкаез усьтонэ вуылӥз, со улэ но ужа (фермер луыса) Сюмси ёросысь Лялино гуртын. Одӥгез жаль: таӵе-таӵе чеберлык одӥг борддор кузяна гинэ интыямын, со но кулэезъя югдытэмын ӧвӧл. Геннадий Сидоров кадь быгатӥсь адямиослэсь ужзэс-пӧрзэ возьматоно вылэм югыт, вӧлмыт, трос калыко интыын. Т. ПЕТРОВА. Геннадий СИДОРОВ но солэн пулэсь скульптураосыз. Туспуктэмез В. КАМАШЕВЛЭН. ШӦКЫЧ Конервайысь артист серемес верос Выль арган басьтӥ. "Ижевчанка". Туж кӧтъям. Кнопкаоссэ зӥбылӥсько ке, виры вань мугортӥм 40 градусъем кабак кадь бызьылэ. Вылаз ик, Гири бускеле "Наполеонэн" вуиз на. Выль магнитофон, пе, басьтӥ. Ойдо, "Ижевчанкадэ" заодним "Наполеонэн" миськом. А мар соослы? Уз сыноме ук? Милям гульым гинэ вӧяськоз. Миським. Соку Гири шуэ: - Мишки, ойдо, кырӟамдэ магнитофонам гожтыса эскером. "Ижевчанкаедлэсь" куаразэ но япон магнитофон пыр кылзӥськом. Ойдо, шуисько. Мон пумит ӧвӧл. Только шуэ, кырӟанэд ӧз ке яра, мукетсэ кутскы, ява. Ярам, пӧй. "Саенара". Япон сямен со "ӟеч" шуэм луэ. Япон магнитофонэн япон сямен ик вераськыса умой луоз. И кутски: Эх, арганэ, Кылзы монэ... - Ма, тон арганэдлы гинэ уд кырӟаськы ук, вань япон калыклы. Давай мукетсэ. Пӧртэм городъёсы но гуртъёсы вуи, Нош вордӥськем гуртме ӧй вунэты, эше... - Эн пӧяськы. Кенервай гуртысьтыд палэнэ потамед ик ӧвӧл. Асьмелэсь но гуртъёсмес Шур гинэ люке... - А-а-а. Ну, смотри, Катиед ке кылӥз... Ортчозы аръёсы, Укное учкыса... - Отын бусы сяна нома ӧвӧл, ма учконэз. Тон Левитан-а, мар-а? Сюрес дурын Баблес кызьпу... - Кемалась тодмо. Кышноос "Рюмочноез" кирпичен-кирпичен сэрттӥзы но со интые кызьпу арама каризы. Куке курид тон мынэсьтым... - Я, я, сёто со дас манеттэ. Ниноке ӵуказе коньдон басьтӥз ке, соку ик сёто. Тани мынам вордӥськем дорпалэ... - Тодмад на ке, умой. "Наполеон" бере тросэз гуртазы уг вуо. Кунгож сьӧрысь нылъёс доры ышыло... Ой сюлэм, сюлэмы, Мар бен тон кариськод?.. - Ӵуштаське-а? Макмыр, веськатон вите. Вай, ошмесэ, я вай юо... - Витёд Катиедлэсь. Арня кыллемзэ но уз сёт таӵе дыръяд. Паймисько, Кызьы ӝужа турын... - Паймы, паймы. Таиз ма гинэ ай. Ӵуказе вот паймод ке, паймод. Соиз озьы. Ӵукна кӧтурдэсам донгась луиз. Катие: - Кылзы астэ, артист! Радио доры мынӥз но золгес кариз. Колхоз радиомы вераське. Сое милям Гири нуэ. Солэн со общественной ужез. Олома но серемессэ малпа. Калыкез серекъятэ. Но, ма та таӵе? Мон кырӟасько лэся ук? Нош Гири монэ серекъя, мон кырӟасько, со серекъя... Синъёсы синкаш йылам тэтчаны ӧдъязы, пельёсы горд пӧсьтурын кадь луизы, ымысьтым шукы потыны кутскиз, бурсыны ӧдъяй... Гири пумаз шуэ на: - Гажано, эшъёс! Тӥ кылзӥды "Тӥляд куремдыя" концерт. Тӥледыз гажаса сое сётӥз Кенервай Миша... - Ну, Ушаков, ну, артист... Шедь гинэ пумитам, со япон магнитофондэ "дамаре" каро. "Ымдэ пытса", значит! Гириез пумитаса ӧй вуы, юонэ ӧтисьёс азьпалтӥзы. Туж, пе, умой кырӟаськод, вылэм, арганэд нош Ганьков-Бекмановъёслэсь зол шудэ... Табере мон котькинлы кулэ адями. Сюан-а, армие келян-а, пенсие потон-а, вордскем нунал-а... - мон отын. Калык шуэ: - Ма, Микалез гинэ ӧтёно. Со огназ вань артистъёсты воштэ... Озьы шуо ке, ну асме олокин кожасько. Улонэ быдэс воштӥськиз. Выль костюм басьтӥ, чыртыям - бубыли. Уже мынон азями куинь гоно курегмылэсь куинь курег пуззэ юисько. Куаралы зумыт кулэ. Мон табере, кызьы шуо колхозын, Кенервайысь дано артист. Нош юон сярысь ке... Ужын уг юиськы, одӥг шапык но. Ужме ыштэме уг пот. Колхозамы ӝыныез пиосъёс ужтэк пуко: картошен нянь сиё. Сылалзы гинэ но ӧвӧл. Нош мон кӧй-вӧй улӥсько. Ай кылэм вал, куд-огез коркась мазэс-созэс вузаса арган басьтӥллям. Шудыны, пе, уйёсы мунчоосазы дышетско. Мед ойдо. Соос дышетскытозь, мон пенсие пото ини. А улон мынам майбыр. Катие дотово шумпотэ. Азьло куасалскем карнан кадь вал, ымнырыз пызьыртэм мучоло. Табере артист кышно! Чеберина! Гуртэ коньдонэн бертӥсько, кӧтме пульдытыса ваисько. Кытысь таӵе капчи уж шедьтод на? Пук - кырӟа, сыл - кырӟа. Эх, улэм ик та артистъёслэн. Тау Гирилы артистэ поттэмез понна. Нош со, мынэсьтым кышкаса, арня сениказ ватскыса улэм. Арган куараме кылыса гинэ васькем. Ой, шузи, тон шузи... Эмма Загребина. Быръёнъёс азьын Кандидатлы берпуметӥ юанъёс Кызьы ивортылӥмы вал ини, Виталий Александрович Соловьев Кун Думае депутат луыны малпа 28 номеро округъя. Со газетамы мадиз вал ини ачиз сярысь, тодматӥз программаеныз. Но милям малпаммыя, куд-ог ужпумъёс палэнэ кылизы. Соин ик туннэ, быръёнъёслэсь кык нунал азьвыл тужгес но лэчыт юанъёсты кандидатлы сётом на. - Виталий Александрович, милям лыдӟисьёсмы пӧлысь данакез гуртын улӥсьёс бере, соосты нырысь ик сюлмаськыто гурт улонэн герӟаськем ужпумъёс. Кызьы тӥ малпаськоды соосты быдэсъяны, кызьы гурт хозяйствоез ӝутоно? - Нимазы ужасьёслэн но, огазеяськем хозяйствоослэн но тужгес бадӟым шугъяськонзы - коньдонлы ёрмон. Мугъёсыз тодмо: вормонтэм но лыдъянтэм выт тырон, музъем ужын но пудо вордонын кулэ луись тӥрлыклы но ваньбурлы бадӟымесь дунъёс, но сиён-юонлы соос пичиесь. Котькызьы берга но кредитъёстэк улыны уд быгаты. Соин ик государство кылдытыны кулэ гурт хозяйствоя нимысьтыз банк. Со пичи процентэн, шуом, араз 6-7 процент, кредитъёс мед сётъялоз. Та ужпум быдэсмиз ке, тросэз шуг-секытъёс палэнтэмын луозы. Бусыосты но векчи куак уз согы, гидъёс но буш уз сылэ. Али калык аслаз гидкуазяз тачак пудо вордэ. Нош сӥльзэс-йӧлзэс вузанэн курадӟоно луо. Тӥляд ӵектонды со пумысен? - Зэм но, огназ адямилы поттэм вуззэ нуыны но вузаны ӵемысь луонлык но, дыр но уг шедьы. Та ужен мукет ёз вырыны кулэ. Сое нимысьтыз кылдытонэз но ӧвӧл, со вань ини - потребкооперация. Сое чырмытгес ужатыны амалъёс но шедьтыны луоно. - Мукетыз лэчыт ужпум - гуртъёсты возён. Возёсъёс начаресь, гуртъёсын сюресъёсты, ву но газ (кытын со вань) возёнэз соос уг вормо. Мар кароно? - Амал одӥг гинэ - та удысэз районысь власть ас вылаз басьтыны кулэ. Малпасько, радъясез луиз ке, асьсэос но гуртоос ӧжыт лэсьтыны уз быгатэ. - Кӧня ке кыл асьтэ сярысь. Тӥледды Вавож районын улӥсьёс кыкетӥзэ бырйизы ини Удмуртилэн Кун Кенешаз. Озьыен, ӟеч сюлмаськиськоды бырйисьёсты сярысь. Озьы ик ужалэ вал Кун Кенешын, вавожъёс понна малы Кун Дума кулэ луиз? - Соиз озьы, Вавож район понна мон ӧжыт ӧй лэсьты, ваньзэ лыдъяса, ушъяськыса уг улы. Но одӥг район понна гинэ ужаса, огъя югдурез уд тупаты. Тодӥськоды ук, макем чидантэм улон Удмуртиын но, быдэс Россиын но. Кун Думаын ужаса, тросгес но, бадӟымгес но ужпумъёсты быдэстоно луоно. Малпасько, кужыме но, мылкыды но, уката ик люкам опытэ тырмыт со понна. - Калык пӧлын кандидатъёс сяысь одӥг-ог вераськонъёс потало: таиз но, пе, Москвае каръяськыны турттэ. Тӥ нош кызьы? - Мон трос вералляй ини, Москва мыным воксё кулэ ӧвӧл шуыса. Мылкыды луысал ке, мон кемалась ини отын улысал: ас дыраз ӵекто вал Россиысь министр луыны. Кызьы адӟиськоды, мон али ке но татын, ас калыкеным ӵош, ас калыке пӧлын. - Меӵак вералэ, кызьы учкиськоды депутатъёслэн улон-вылонзы шоры: закон азьын кыл кутонлэсь утиськон, министръёслэн быдӟа окладъёс, эмъяськыны-шутэтскыны нимысьтыз юрттэт но со выллем майбыр ватсэтъёс шоры? - Меӵак верасько: чутрак пумит! Депутат аслаз бырйисьёсыныз огкадь улыны кулэ, ас вылаз мед шӧдоз соослэн улонзылэсь чырссэ но, кузьытсэ но. - Вождэс эн вае, но куд-огзэ малпаськытэ тӥляд арлыдды. - Соиз зэм, мон казак пи ӧвӧл ни. Но тазалыке но, мылкыды вылэ но уг ӝожтӥськы ай, тау инмарлы. Кышное дышиз ини, уже вазь ӵукна кошкыса, бер ӝыт гинэ вуэмелы. Со сяна, егит, задор мылкыд но кужым ас кожаз котьку ик пайда интые янгыш вае. Кун ужъёсты пинал визен уд вормы, одно ик тодон-валан, улонын но кивалтон ужын люкам опыт кулэ. - Тӥ Удмуртиысь Кун Кенешлэн депутатэз. Кыӵе отын ужаськоды, кызьы тупало кусыпъёсты вылӥ кивалтӥсьёсын? - Жаляса верано луэ, туж ик уг тупало. Азьвыл ӧтемын вал мон промышленностья ялан ужась комиссилэн тӧроезлы, али огшоры депутат. Со вера-а мар ке сярысь? Мон соглаш ӧвӧл вылӥ кивалтӥсьёслэн шаермылы изъян ваись вамышъёсынызы. - Тау, Виталий Александрович. Мед удалтоз тӥледлы ӵуказе улыса, куараосты тырмыт мед луозы. - Тау ӟеч кылдылы. Г. КОРЕПАНОВ. 2000-тӥ арын нылпиослэсь тол каникулъёссэс, Выль ар но Толсур праздникъёсты радъян сярысь Удмурт Республикаысь Правительстволэн Постановлениез Пиналъёсыз улон-вылонын утён вылысь, Президентлэн "Россилэн нылпиосыз" программаезлэсь "Нылпиослэсь но быдэ вуымтэослэсь шутэтсконзэс но ваньмон дырзэс радъян сярысь" люкетсэ быдэсъяса, 2000-тӥ арын Удмурт Республикаын нылпиослэсь тол каникулъёссэс, Выль ар но Толсур шулдыръяськонъёсты ӟеч радъян вылысь, Удмурт Республикаысь Правительство пуктэ: 1. Удмурт Республикаысь Правительстволэн Тӧроезлэн воштӥсезлы В. Е. Шудеговлы Удмурт Республикаысь Калыкез дышетонъя министерствоен (Л. Г. Захарова), Культурая министерствоен (Н. М. Бессогонов), Калыкез улон-вылонын утёнъя министерствоен (С. И. Андреева), Тазалыкез утёнъя министерствоен (С. Г. Шадрин), Югдурез утёнъя министерствоен (В. Ф. Щербаков), Егитъёсын ужанъя кун комитетэн ( А. И. Гальцин), Калыкез уже интыянъя федеральной кун службалэн Удмурт Республикаысь департаментэныз (Ю. М. Брусянский) ӵош косоно: вань луонозэ лэсьтыны, нылпиослэсь тол каникулъёссэс но Выль ар праздникъёсты ӟеч радъян понна: нимысьтыз сюлмаськыны сирота нылпиос, ӧлексыос, кун юрттэм улсын улӥсь пиналъёс, трос нылпиё, куанер улӥсь, ужтэк кылем семьяосысь нылпиос сярысь. 2. Россия Федерациысь социальной страхованиея фондлэн Удмурт Республикая ёзэтэзлы, Россия Федерациысь социальной страхованиея фондлэсь 1999-тӥ арын 29-тӥ октябре кутэм 02-10/04 - 5593 номеро постановленизэ лыдэ басьтыса, ужась адямиослэн семьяосысьтызы 14 аресозь пиналъёслы (14 арес тырмемъёсты но вераса), озьы ик кун сюлмаськем улсын улӥсь но нылпи юртъёсысь, школа-интернатъёсысь пиналъёслы, ӧлексы но быдэ вуымтэос понна нимысьтыз учреждениосысь пиналъёслы, министерствоослэн ӵектэм документъёссы вылэ пыкиськыса, Выль ар кузьымъёс басьтон понна коньдон висъяно, одӥг кузьымлэсь дунзэ 45 манет лыдъяса. Быдэс ар ӵоже ужась "Варзи-Ятчи" санаторно-оздоровительной лагерьын сирота нылпиослэсь но хронической висёнъёсын курадӟись пиналъёслэсь тазалыксэс юнматыны коньдон висъяно. 3. Калыкез уже интыянъя федеральной кун службалэн Удмурт Республикаысь департаментэзлы эскероно ужтэк кылемъёслэн начар семьяосысьтызы нылпиослы Выль ар кузьымъёс сётъян ужпумез. 4. Удмурт Республикаысь Культурая министерстволы (Н. М. Бессогонов) тол шулдыръяськонъёсты элькунысьтымы театръёсын но концерт возьматон учреждениосын ортчытыны, гуртъёсы потаса радъяны. 5. Городъёсысь но ёросъёсысь администрациослэн тӧрооссылы ӵектоно: Выль ар праздникъёсты но тол каникулъёсты ортчытонэз ӟеч радъяны, нимысьтыз сюлмаськыны сирота нылпиос, ӧлексыос, трос нылпиё, начар семьяосысь нылпиос, озьы ик ужтэк кылемъёслэн семьяосысьтызы нылпиос сярысь; чакласа возьыны, ёросысь (городысь) одӥгез но пинал Выль ар кузьымтэк медаз кыльы шуыса; тол каникулъёсы Выль ар но Толсур праздникъёс дыръя пиналъёслэсь тазалыксэс но соосты шудтэм учыръёслэсь утьыны. 6. Ижевск городысь администрацилы дэмлано: азьло аръёсы сямен ик, Ижкарлэн шор площадяз выжыкыл городок лэсьтыны но тол каникулъёс дыръя нылпиос понна шулдыръяськонъёс радъяны; тол вакытэ "Динамо" стадионын егитъёс понна конькиен дэмен нискыланъёс радъяны. 7. Удмурт Республикаысь Коньдон ужпумъёсъя министерстволы шулдыръяськонъёсты ортчытыны но тол каникулъёс дыръя пиналъёслэсь тазалыксэс юнматыны уксё висъяно. 8. Удмурт Республикаысь Тазалыкез утёнъя министерстволы стационаръёсын кема дыр ӵоже эмъяськись пиналъёсты ӟечкыланэз радъяно. 9. Тол каникулъёсты но Выль ар шулдыръяськонъёсты ортчытон уже кыскем вань министерствоослы но ведомствоослы пиналъёсты шудтэм учыръёслэсь утьыны сюлмаськоно. 10. Та постановленилэсь быдэсъяськемзэ эскероз Удмурт Республикаысь Правительстволэн Тӧроезлэн воштӥсез В. Е. Шудегов. 11. Та постановлениез печатлано "Удмуртская правда", "Удмурт дунне", "Известия Удмуртской Республики" газетъёсын. Удмурт Республикаысь Правительстволэн Тӧроез Н. А. Ганза. Редакцие вуиз гожтэт Веднаськытэк уд берты Гажано редакция! Мынам вераме потэ со сярысь, макем умой "пумитало но келяло" Ижевскысь Южной автостанциын. Городэ ӵем уг вуылӥськы, но огпол ветлэмдэ аръёсын тодад ваёд. Пичи Пургала мынӥсь автобусъёсы пуксьыны туж шуг. Мырдэм но кызьы донгаськыса билет басьтыны быгатӥ ик (коть нуныен, коть кык нуныен лу - черодтэк билет уг сёто), но автобусэ потытозям, кытчы ке уськытӥськем. Билет эскерись нокызьы но ӧз пукты, автобусысь нуныен нылме но донгаса поттӥз. Шораз куаретэмысьтым милициез ӧтиз. Милиция монэ олокыӵе но урод кылъёсын тышкаськиз. Автостанциысь ӝожтӥськон книгазэс кури но, ӧз сётэ, донгаса поттӥзы. Куазь кезьыт, ми мукет автобусэз эшшо кык час возьмано луимы. Нылпи комнатаез усьтӥзы ик, но отын вуэз гинэ но ӧвӧл. Ку луоз ини адями сямен автобусэ пуксьыны, ӟеч мылкыдын сюрес вылэ потыны? Г. КИРИЛЛОВА, кыкетӥ группаен инвалид. Пичи Пурга село. Та учыръя валэктон сёто Южной автостанциысь валтӥсь диспетчер Н. Безносова но контролёр Л. Стерхова. Н. Б: - Праздникъёсы, шутэтскон нуналъёсы автобусъёсы пуксьыны, зэмзэ но, шуг, калык туж трос луэ. Та учыр сярысь мыным ӧз ивортылэ. Но малпасько, Кириллова эш ачиз янгыш - билеттэк ми автобусэ нокинэ ум пуктӥське. Кытысь ми тодӥськом, басьяз- а со, ӧз-а? Собере, басьяз ке но, кияз ӧвӧл, кызьы ми сое пуктом? Ӝожтӥське, нуныен мынӥсь-ветлӥсьёслы черодтэк билет уг сёто шуыса. Сёто, черод ке лэзе. Нош черодысь адямиос сюлэмтэмесь ке, ми-а со понна янгыш? Нуныосын анайёслы комнатамес соослэн куремзыя ми котьку усьтӥськом, но вуэз отын, зэмзэ но, ӧвӧл. Л. С: - Со автобусэн мон калыкез келяй. Та кышномуртлэсь уродъяськемзэ туж ӟеч тодӥсько на. Нуныен нылзэ автобусэ лэзи, билетме, пе, анае возьматоз. Но соиз пенсионной удостоверенизэ гинэ возьматэ. Билетэз ӧй вал, соин ик нылзэ но автобусысь поттоно луи. Урод кылъёсын тышкаськон, донгаськон сярысь со юнме малпам. Кышкатъянъёс вал Кириллова ласянь. Кышкатъяз монэ веднанэн, тышканэн (мынэсьтым, пе, кылме уз юалэ, "ӵуж билетэ" вань). Собере зэмзэ но, мыжыкъёсыныз сэзъяськыны кутскиз. Мон милициез ӧтёно луи... Жаляса верано луэ, таӵе учыръёс луыло гинэ. Ваньмыз со потэ асьмелэн чидасьтэм луэменымы, муртлы юрттэммы потымтэен. Со быдӟа черодын ӧвӧл шедем нуныен кышномуртлы одӥг но дурбасьтӥсь мурт. Малпаськом, мынӥсь-ветлӥсьёс куддыр, зэмзэ но, асьсэос туж валасьтэм луо, соин ик керӟегъясько автобусэ пуктӥсьёс но, водительёс но. Ойдолэ дышетском ог-огмес гажаны. Нош автостанциын ӟечгес условиос кылдытон ласянь кивалтӥсьёслы малпаськоно ик вылэм. З. ВАХРУШЕВА. НАТАЛЬ "ЧИГЫМТЭ ЧИДАН" Куноын но котьку уг утялто Гуртмы дорысь шайвылэ тройча нуналэ трос калык люкаськылэ. Кулэм-бырем ӵыжы- выжыоссэс буре вайыны вуо пӧртэм интыосысь. Берло дыре тросгес адскыны кутскизы егитысен татчы вуэм адямиослэн шайгуоссы. Вань асьсэды быдтэмъёс но. Тани одӥгез шайгу дорын куректыса пуке горд кысъем кышномурт. Сюлмыз вӧсь луыса учке памятник вылысь пиезлэн тусбуез шоры. Нокызьы но валаны уг быгаты, малы пиез ассэ быдтӥз. Тодысал ке Катя, ваньмыз тазьы луоз шуыса... Педучилищеез йылпумъямез бере Катяез Шаркан ёросэ ыстӥзы. Туж уг поты вал анай- атаезлэсь палэнэ кошкемез. Но номыр каремез ӧз луы. Катя бызиз, вордскиз пичи пизы. Нылпи вордскемен ӵош та егит семьяе куректон но пыриз. Югыт дуннеез адӟемез дырысен пинал ялан бӧрдылӥз, ӵужектэм тусо улӥз. Врачъёс шуизы: церебральной паралич. Уйёссэс кӧлатэк потазы Катя, кузпалыз но анайзы: черодэн возьмазы висись нылпиез. Собере кутскиз больницаостӥ ветлон. Нырысь кыллизы Шарканын, собере Ижын. Катя ужаны ветлӥз сьӧрлось гуртэ. Нуналлы быдэ ӝыт но ӵук пиезлы массаж лэсьтылӥз, ужаз бызьыса кошкылӥз. Пиезлэн пыд йылаз султонэзлы осконэз ӧз кысылы. Аръёс азьлань но азьлань дыртӥзы. Катялэн атаез кулӥз но, анайзэ гуртазы ваизы. Басьтӥзы солы корка, ӝикатӥзы. Но анайзылы отын кема улыны ӧз кылды. Одӥг уй "горд атас"! юртэз гомӟытӥз. Пизы ӵапак соку песянаез дорын вал, мырдэм улэп кылиз. Пересь мурт пияшез укноетӥ сулеп лымые куштӥз. Пизы висись ке но вал, визьмо будӥз. Катя сое эмъяны Москвае но олокӧня пол нуллӥз. Черодзы ӝоггес мед вуоз шуыса, картэныз Москвае ужаны но ветлӥзы. Пизы умой гинэ ветлыны кутскиз. Гурт котырын но анаезлы юрттэ ни вал. Кин малпалоз, сомында курадӟонэз чидам 23 аресъем пиосмурт, та дуннеен ас мылкыдызъя люкиськоз шуыса? Та учыр нылкышноез пыд йылысьтыз ӧжыт гинэ ӧз погырты. Тазалыкез уродмыса (воксё пыдтэм луылӥз), олокӧня толэзьёсын больницаын кыльылӥз, собере сюлэмыз но ассэ шӧдытыны кутскиз. Озьы ик сюлэмыз висемен, картэз но колхозын ужаны уг ни быгаты (инфаркт луыса, ӧжыт улэп кылиз). Куректонэз-бӧрдонэз Катя адӟоно луиз кыкетӥ пиеныз но. Армиысен со ӧжыт пыдтэк ӧз кыльы. Ярам коть, анаез бызьылэмен, пияш службазэ Удмуртиын ортчытӥз ини. Табере кышнояськы ни вал, гуртазы нылъёс ӧвӧл. Со но сюлмаськытэ анай сюлэмез. Адямилэн улонэз вакчи, куноын улэм мында гинэ. Озьы ке но, улон малы ке адямиез ӵемысь куноятыса уг возьы. Я, пиналъёсыныд ке куроектонэд трос, коть ужад мед удалтысал ни. Кӧня пол ужтэк кыльылӥз дышетӥсь - я огысьтыз, я мукетысьтыз гуртысь начальной школа ворсаське. Берлозэ ас гуртаз ик ужаны шуд усиз ни вал, но дышетскись нылпиос кулэсмемен, дырызлэсь вазь пенсие потыны куризы. Уж бен гурт котырын но тырме, но куректон калык пӧлын чальгес тӧлӟе, сюлэмез сокем уг ванды. А. НИКИТИНА. Шаркан ёрос, Зюзя гурт. Вылӥ ним Драмая удмурт кун театрын ортчем одӥгез концерт быдэсак сӥземын вал "Айкай" театрысь кырӟасьлы Светлана Смагиналы. Ӝытын чузъяськизы калыклэн тужгес яратоно кырӟанъёсыз. Соос пӧлысь данаксэ кырӟаз ачиз Светлана Николаевна Смагина. Со сяна, концертэ мылысь-кыдысь пыриськизы театрысь кырӟасьёс Михаил Ворончихин, Геннадий Кузнецов, Валентина Серебренникова, Евгений Серебренников, мукетъёс. Учкись но кылзӥсь калыкез трос аръёс ӵоже шумпоттэмез понна, Светлана Николаевна Смагиналы сётэмын "Удмурт Элькунысь дано артистка" вылӥ ним. Таӵе дуно кузьымен ӟечкылаз кырӟасез Удмурт Элькунысь Кун Кенешлэн Тӧроезлэн нырысетӥ воштӥсез Павел Вершинин. Е. РОМАШОВА. Сизьым ар ӵоже Алнаш ёросысь Усо гуртын усьтӥськиз выль школа. Сое йылаз-пумаз вуттон кыстӥськиз ог сизьым ар. Дышетскись пиналъёслы выль юрт пуктон бордын лулысь-сюлмысь тыршизы "Туймы" но "Монтажник" эштосъёс (кивалтӥсьёссы - Юрий Ишматов но Сергей Кириллов). Школаез усьтонлы сӥзем пумиськонэ лыктэмъёслы ӟырдыт ӟечкыланъёсын вазиськизы "Удмурт кенеш" огазеяськонлэн тӧроез Валентин Тубылов, Удмурт Элькунысь Кун Кенешысь Наукая, культурая, егитъёсын ужанъя но калыкез дышетонъя ёзлэн кивалтӥсез Алексей Красильников, Россия Федерациысь Федерацияя Кенешлэн Кун Думаезлэн депутатэз Михаил Кошкин, Алнаш ёрос кивалтэтлэн тӧроезлэн воштӥсез Нина Образцова, ёрос кивалтэтысь калыкез дышетонъя ёзлэн кивалтӥсез Илья Ильин. Дано ужрадэ лыктэмъёсты сюлмысь шулдыртӥзы ёросысь но гуртысь кырӟась-верасьёс. Е. РОМАШОВА. Кызьы малпало кезъёс Быръён азьын сюрес вуттӥз Кез палъёсы. Соку ик шӧдӥське вал ини калыклэн мылкыдыз - кин понна со сётоз куаразэ. Малпанъёс пӧртэмесь, кандидатъёс пӧртэмесь, огазеяськонъёс но туж-туж пӧртэмесь. Тани 13-тӥ декабре "Мир. Май. Труд" огазеяськонысь агитаторъёс Кезысь пенсионеръёс доры вуылӥзы, соосты культура юртэ люкаськыны ӧтьыса. Паймымон соиз: котькуд мӧйы адямилы соос та нуналэ ик пенсизылэсь быдӟалазэ будэтыны кыл сётӥзы вал. Но та блокысь адямиос пумиськонэ ӧз вуэ. Пӧязы. Ӵуказеяз радъямын вал Клементий Роговецен пумиськон. Со быръёнъя 29-тӥ округъя кандидат. Калык отчы уно ӧз люкаськы ни. Кызьы пусйиз Клементий Антонович, улонэз ӟечгес карон понна, пе, асьмелы та вакытэ экономикаын люкетӥсь адямиосты палэнтыны кулэ. "Ужасьтэм" манетлэсь данзэ ӝутоно. Депутат луыны мылкыд карисьёс туэ но ичи ӧй вал. Но пӧртэм коллективъёсын пумиськылыса, одӥг малпан кылдӥз: вормоз Светлана Смирнова но "Единство" огазеяськон. Озьы ик луиз. Бырйисьёс тужгес но сюлэмшугъяськемзэс верало уждун но нылпиослы пособиосты тыронэн ӝеганъёс ласянь. Уго ёросын коньдон интые сёто тазъёс, ӟег пызь но пурысьтам кеньыр. Дунъёссы трослы вылӥын. Райполы бен со ӟечен гинэ берытске. Нош огшоры улӥсьлы? Тани Дэбес районын таӵе амалэн ужаны кивалтӥсьёс пумит луизы. Пайдаез соку ик шӧдӥськиз. Озьы ужало алнашъёс Быръён нуналэ юромо вуылӥ ёросысь Казаково гуртысь 6 номеро участоке. Интыяськемын со культура юртэ. Дас кык часлы куаразэс сётӥллям вылэм ни 35 процентэз бырйисьёс. Калык лыктэ одӥген-кыкен гинэ. Мон кенешыны кутски мӧйы адямиен. Кин понна, пӧй, куарадэс сётӥськоды ай? - Э, пие, пие, мон та бюллетеньёсын воксё сураськи ни... Кылӥ вал, Светлана Смирновазы пе, визьмо шуыса. Со понна ик голосоватьто ни. Только крестьянъёс сярысь мед сюлмаськоз вылэм. Со понна ик лэзисько та кагазъёсме... Ӵапак со вакытэ ик клубын кутскиз концерт. Сцена вылэ потӥзы мӧйыос но, егитъёс но. Шулдыр концертсы вал. Пинал калык "Гондыр" огазеяськонэз кельыштырем. Мӧйыос но со пала дурбасьтӥзы. Огкылысь бырйизы Смирноваез но. Шӧдӥське, та радэ удмуртъёсмы ужаны быгатӥллям шуыса. Нош Казакгуртэ ми вуылӥм вал ӵыжы-выжыосмылэсь, Николаевъёслэсь, корка пыронзэс пусйыны. Жингыр-жингыр юрт ӝутыны быгатӥллям. Чебер, шуныт. Вань газ, лыктэ ву. Нош ӝӧк вылзы кыӵе узыр - нингуби, коньыгуби, пыжем ӟазег но ӵӧж, йӧлпыд но мусур... Ӧвӧл, секыт ке но, гуртоос чебер улонлы оско на ай, оско, тыршо, чидало. Кун Думае быръем депутатъёсмы но мед синйытысалзы вылэм гурт калыкез. Соослэн кужымзы но, мылкыдзы но вань на. Ужаны, ас шаердэ гажаны, зэмлык понна нюръяськыны. Н. БАЙТЕРЯКОВ. КЫЗЬЫ СО ВАНЬМЫЗ ВАЛ, 1953-тӥ арын Сталинэз берпум сюрес вылэ келяку. 5-тӥ мартэ со кулӥз, 9-тӥ мартэ ватӥзы. Нош туннэ "калыкъёслэн вождьзы" вордскем дырысен 120 ар тырме. Россилэн Президентэз Борис Ельцин но солэн адямиосыз пумтэм курлало, ултӥяло Сталинэз но компартиез. Соослы юрттыса, пож ву киська ОРТ. Сталинэз ватон сярысь "Кызьы со вал" передачаын югдурез пӧяса, мыдлань возьматэмзы бере ӧй чида, гожтоно кариськи. Мон соку Москваын СССР-ысь вань книжной издательствоосысь валтӥсь редакторъёслэн кык арняем семинаразы вал. Семинармес Молотов йылпумъяз Сталинлэн кулон нуналэз азьын. Мыным пумиськылоно на вал Москваысь поэтъёсын удмурт кылбурчиосты ӟуч кылэ берыктон пумысен. Соин ик ӝытме Панферова Века Федоровна дорын ортчытоно кариськи. Со милям переводчикмы вал ини. Мынам йыразям репродуктор ошемын. Ог ньыль час ёросын радио ивортӥз Сталинлэн кулэмез сярысь. Ми Века Федоровнаен секыт мылкыдын дыртӥм Писательёслэн союзазы. Ульчаосы калык люкаське но люкаське, метроысь, автобусъёсысь, трамвайёсысь тулкымен- тулкымен ӧръяське. Бадӟым урамъёс пытсамын на. Час ӵоже котыръямы таксиен 3-тӥ Мещанскойысен Гоголь ульчаез - Союзэ вуон понна. Отын милемын ӧз вераське ни - ваньзы митинге дыртӥзы. Писательёслэн юртсы вадьсысь киностудилэн бусы пасьта залаз сюрслэсь трос писательёс, журналистъёс, репортёръёс люкаськемын. Митинген Александр Фадеев кивалтэ. Панферовалэн куремезъя, монэ но отчы пырыны лэзизы. Трибунае огез бӧрсьы мукетыз писательёс ӝутскыло, синкылиенызы воньдылыса, соос ваньзы Сталинэз жаляло, ушъяло, быременыз курекъясько. Анна Караваева викышъяменыз кема кыл но вераны ӧз быгаты. Ваньмыз люкаськемъёс но бӧрдо. Фадеев синъёссэ ялан ныркышетэныз ӵушылэ. Та нуналэ мон нокытын но одӥг муртэ но ӧй адӟы бӧрдымтэзэ. Вис дыръя кылӥ писательёслэсь Родинамы понна сюлэмшугъяськемзэс: табере, пе, ӧвӧл Сталинэз воштыны быгатӥсь адями. Маленков шат? Со, пе, Ленинлэн племянникез луэ кадь. Митинглэсь йылпумъяськемзэ возьмаса ӧй улы ни. Мынам одно ик вуэме потэ вал Союзъёслэн Колонной Залазы, Сталин доры, солы йыбырттыны. Нош ульчаостӥ мыныны сюрес пытсамын кык рад грузовой машинаосын, урдэсъёстӥзы вал вылын но огшоры гинэ сылӥсь милициен. Москваен ӧжытак тодмо вал бере, азбаръёстӥ, коркаос вискытӥ, скверъёстӥ, кенеръёс но из бордъёс вамен потаса, ялан бызи Садовой Кольцо пала, кытӥ трос миллион калык пасьтана кыстӥське Сталин доры. Со калык пӧлы Трубной урамлэн пумаз гинэ чуртнаськыны быгатӥ. Райком дорысен Трубной уллане ваське. Вылласянь калык пумен зӥбе, вырӟыны но, берытскыны но уг луы ни. Шубае гылыт гоно луэмен, монэ выллань лӧпкыто, пыдъёс ог эсэп музъеме но уг сузё. Котыр бӧрдэм, черекъям куараос гинэ кылӥськыло. Тӥни адӟиське ни Бадӟым театр, соин артэ Союзъёслэн юртсы. Нош Трубной ульча кык рад лач пуктэм грузовой машинаосын ворсамын. Калык бур пала, сюбег ульчае кожон луэ. Татын ини сокем кекыт луиз: кин ӝоказ, кин усиз - султыны ӧз быгаты. Милиция но калык тулкымез дугдытыны ӧз вормы ни. Монэ грузовой машинаос борды пачкатӥзы. Пыдъёсы чидантэм вӧсь луо. Малпай: быриськиз! Кызьы но озьы одӥгзэ пыдме, сбере кыкетӥзэ кык машинаослэн поглянъёссы вискы воштыны быгатӥ. Мырдэм грузовик вылэ туби. Милиционер шорам черетскиз - мон сое ӧй ик кылы кадь, мукетаз грузовике нюжтӥськи, отысен музъем вылэ лэзьки. Ӝутскыны быгатытэк, катьтэммыса но куалекъяса, кема кылли музъем вылын. Театральной площадь буш. Бадӟым театр, Союзъёслэн Юртсы вӧзын трос милиционеръёс люкаськыса но оген-оген сыло. Монэ адӟыса, соос "Проходи!" гинэ шуылӥзы но "Москва" гостиница дорозь келязы. Ульча вамен кема учкыса сылӥ, кызьы делегациос огез бӧрсьы мукетыз венокъёсын, сяськаосын Союзъёслэн юртазы урдэс ӧсэтӥз пыро. Соос борды итӥськыны быгатысал ке, мон но Сталинэз адӟысал, нош милиция зол возьмаз ульчаез. Малпанме быдэстыны осконэ быриз. Мон поездэ пукси но Сталинэз ватон нуналэ Иже вуи. Ваньмыз заводъёс асьсэлэсь юнлыко "атайзэс" но яратоно дышетӥсьсэс кема кыстӥськись, дырекъясь, мӧзмыт гудокъёсын келязы - со ужась калыкмылэн секыт лулӟемез кадь кылӥськиз. Арня-кык улыса, ужмес эскерыны лыктӥз Книга поттонъя управлениысь кышномурт. Со мадиз кызьы Сталинэз ватэм бере арня ӵоже. Москвалэсь ульчаоссэ сузязы, ыштэм, киргатэм арбериосты возэн-возэн нуллӥзы. Ма но вылымтэ отын: нылкышно но пиосмурт изьыос, кышетъёс, часъёс, чыртывесьёс, галошъёс, ботинкаос, туфлиос, пальтоос, плащъёс... Милиционеръёс ог 200 шӧйёсты ӝутӥллям. - Тодӥськоды на-а? - вазиз со. - Редакторъёс пӧлын вал 35-40 аресъем, веськыт мугоро, пурысь костюмен грузин. Ваньмыз редакторъёс кошкизы, нош со ӧвӧл но ӧвӧл. Сюлэмшугъяськыны кутским, моргъёсысь утчаськом. Документъёсызъя гинэ мырдэм шедьтӥм: быдэсак тодмантэм луэм. Син азям яркыт пуксиз веськрес, таза, чебер грузинлэн пальышась тусыз - сюлэм дыректӥз но вӧсь луымон тэтчаны кутскиз. Сомында калык пӧлын сотэк ӧз луы, дыр. Ачим но ӧжытак ӧй быры. Сталин доры трос миллион калык одно ик адӟыны, келяны кыстӥськиз уго. ОРТ-лэн "адӟисьёсыз" верамъя, Сталин - бандит, калык сое адӟонтэм каре, солэн зӥбетэз улысь мозмемезлы шумпотэ. ОРТ-лэн верамезъя, люкаськем калык - со визьтэм, кытчы, малы люкаськемзэ валасьтэм "толпа", ОРТ "адӟисьёслэсь" кышкамзэс гинэ возьматыны тырше. Со одӥг кыл но уг поттылы, ма кыскиз Сталин доры трос миллион калыкез, малы соос одно ик "тушмонзы" доры вуыны тыршизы. Сталинэз келяны потэмъёс вал арлыдо муртъёс, быдэ вуэм пиосмуртъёс но нылкышноос, дышетскись но ужась егитъёс - улонэз, валась, визьмо адямиос. Соослы лыктӥзы асьсэлэсь кивалтӥсьсэс, дышетӥсьсэс берпумзэ адӟыны - сюлэмзы косэмъя, пумтэм яратэменызы, гажаменызы, оло нош солы йыбыртыны, сое оскытыны, солэсь ужзэ азинтозы, Родинаез уката юнматозы, улон радэз, дисциплинаез тӥяны уз сётэ шуыса. Ваньзэ сое чур васькись пӧсь синкылиенызы но берпум сюресаз келяны огкылысь лыктэменызы возьматӥзы... Августа КОНЮХОВА, республикаысьтымы школалэн дано дышетӥсез. Усто эмъясько, ӟеч шутэтско Акциосын "Буммаш" огазеяськон ужась адямиосыз сярысь ялан сюлмаське. Котькуд праздник нуналъёсы ужысь вань ветеранъёссэс огазе люкало но кузьымъёс сётъяло. Заводын ик вордо чорыг, будэто сяська. Нош туннэ мадём предприятилэн санаториез-профилакториез сярысь. 1961-тӥ арын нюлэсэз сайкизы, завод улон юртъёс пуктыны кутскиз. Нош 1983-тӥ арын 7 номеро медсанчасть сьӧрын, веськрес писпуос пӧлын, ӝутскиз ньыль этажен санаторий- профилакторий. Тани ма веразы санаторий-профилакторийысь валтӥсь врач А. А. Фадеев но валтӥсь медсестра С. Н. Шайхова. - Санаторий-профилакториез усьтон вакытэ улон воксё мукетгес вал,- тодаз вае Савия Низамовна.- Эмъяськон оборудованиез но, мебелез но троссэ тодмоос пыр утчано луиз. Но кивалтӥсьёсмы сётэм кылзэс быдэстӥзы. Со дырысен огпол гинэ ай рос-прос тупатъямы профилакториймес. Экономикаын секыт аръёсы но шутэтскисьёсмы-эмъяськисьёсмы ӧз бырылэ. Уго путёвкалэсь дунзэ завод данаксэ ачиз тыре. Андрей Анатольевич егит но задор. Со маде: - Ми огдыре кутыны быгатӥськом 100 шутэтскисез. Пумен паськытатӥськом эмъян амалъёсмес. Тани алигес пыӵатыны кутским электромассажез. Ӝоген кутском веньёсын терапия ортчытъяны... Эмъян процедураос санаторий-профилакторийын сотэк но тырмыт вал кадь. Ма гинэ уг кутӥськы татын тазалыкез юнматыны! Ойдолэ, тодматскоме. 1. Электроэмъяськон: лазер, вакуумной массаж, солярий. 2. Озокиритоэмъян (парафинэн шуныт сётыса). 3. Дэриен эмъян. 4. Кислород коктейль. 5. Аэроионотерапия (ингаляция). 6. Ужа процедурной кабинет (инъекциос, уколъёс). 7. Вуэн эмъян (ванна, душ - циркулярной, восходящой). 8. Гидромассаж (ву пушкын). 9. Галокамера (сылал шахта). 10. Киын лэсьтӥськись массаж (сое 10 пол басьто ваньмыз). 11. Эмъясь физкультура. 12. Пинь эмъян. 13. Сауна (кӧс пӧсь мунчо). 14. Пӧртэм турынъёслэсь юонъёс. 15. Минерал ву. 16. Ужа бассейн (вань инструкторез). 17. Вань куас сётъян базазы. Валамон, бадӟым инты висъяське шуэтсконлы. Вань татын бильярд, бадӟым но огшоры шахматъёс, шашкиос, библиотека, телевизоръёс. Библиотеказэс кылдытӥзы асьсэ ужасьёс но шутэтскисьёс чотын. Тани сиён пӧрасьсы Татьяна Степановна гинэ ваиз 50 книга. Пӧрась шуэмысь: санаторийын шутэтскисьёсты туж ӟеч сюдо, сӥльлэсь дасям сиёнъёс луо ӵукна но, нуназе но, ӝыт но. Шутэтскыны кутон амалъёс ялан выльдӥсько: путёвка басьтыны луэ 21 нуналлы но, кӧня ке нуналлы но. Анай-атайёс шутэтскыны но эмъяськыны быгато нылпиосынызы ӵош, шутэтскон нуналъёсы но, тол каникулъёс дыръя но (шуом, одӥг арня ӵоже яке солэсь кемагес). Лыктэ, гажано эшъёс, "Буммаш" АО-лэн санаторий-профилакторияз, шутэтске но эмъяське отын. Солы сётэмын нырысетӥ классъем сертификат. Отын ужало устоесь сиён пӧрасьёс но эмъясьёс. Луэ татын вордскем нуналэз пусйыны яке сюан ортчытыны, луэ шутэтскыны но эмъяськыны, уже ветлыса ("Буммашын" ужасьёс ӵапак озьы лэсьто). Таосыз путёвка понна асьсэ киысь 200 манет гинэ тыро, кылемзэ сётэ завод. Соин ик заводысь шутэтскисьёс Лилия Ипатова, Людмила Алексеева но кузпалъёс Князьковъёс вань шутэтскисьёслэн нимынызы тау каремзэс вераны куризы санаторий- профилакторийын ужасьёслы но заводзылэн директорезлы Жебровскийлы. П. СКОБЕЛЕВ Туспуктэмъёсыз В. КАМАШЕВЛЭН. Бусые потыса кесяськем кадь Россиысь печатья комитетлэн Удмурт улосвылысь управленияз туэ сю куамын газет но дас тямыс журнал пусъемын. Нош кӧняез гинэ соос пӧлын удмурт кылын потэ? Ньыль журнал но кык газет - "Удмурт дунне" но "Ӟечбур". Собере, кызь вить ёрос пӧлысь дас ньыляз гинэ ёрос газет удмурт кылын потэ. Валамон, со ичи. Нош малы со озьы луэ? Газетлэн данэз быремысь. Гожтэмед бусые потыса кесяськем кадь луэ. С. ПЕТРОВА. Удмурт Республикаысь Кун Кенеше депутатъёсты ватсаса быръёнъёслы йылпумъянъёс. Бырйисьёслэсь тужгес но трос куараоссэс люказы: Быръёнъя 18 номеро Студенческой округ - Скрипченко Владимир Андреевич, вордӥськемын 1947-тӥ арын, "Ижсталь" ОАО-ысь 20 номеро цехлэн кивалтӥсез, улэ Ижевскын. Быръёнъя 40 номеро Молодежной округ - Федорова Фания Марваретдинова, вордӥськемын 1949-тӥ арын, Удмурт Республикаысь Югдурез утёнъя министерствоысь управленилэн кивалтӥсез. Глазов районысь быръёнъя 71 номеро округ - Галимуллин Валентин Хакимзянович, вордӥськемын 1941-тӥ арын, Глазовысь электросетьёсъя "Удмуртэнерго" ОАО-лэн директорез. Селта районысь быръёнъя 93 номеро округ - Полянских Виктор Андреевич, вордӥськемын 1960-тӥ арын, Селта районысь "Совет" сельхозкооперативлэн кивалтӥсез. Юкаменск районысь быръёнъя 98 номеро округ - Повышев Николай Михайлович, вордӥськемын 1944-тӥ арын, Нырысетӥ республиканской клинической больницаысь валтӥсь врач. *** Интыысь аскивалтон ёзъёсы депутатъёсты ватсаса быръёнъёс ортчизы Ижевск городын (быръёнъя 2 округъёсын) но Удмурт Республикаысь 15 районъёсын (быръёнъя 32 округъёсын) *** Глазов администрацилы кивалтӥсь быръёнэ пыриськизы 51720 мурт (67, 2 процент). Кандидатъёс понна сётэм куараослэн лыдзы: - Дерендяева Людмила Викентьевна - 3871; - Перешеин Владимир Юрьевич - 28014; - Щенин Петр Николаевич - 10810; - вань кандидатъёслы пумит люкаськем куара - 8047. Городын улӥсь бырйисьёслэсь тужгес но трос куара басьтӥз Перешеин Владимир Юрьевич, вордӥськемын 1952-тӥ арын, "ЧУС" СПАО-лэн генеральной директорез, улэ Глазов городын. Удмурт Республикаысь быръёнъя комиссия, Округъёсысь быръёнъя комиссиос, Улосъёсысь быръёнъя комиссиос. Пиос но кошко но, пиос но берто но... Егит пиосты армие басьтон туэ понна йылпумъяське. Кытчы соос сюрозы? Ӟеч интыын яке "пӧсь" азьын-а кык арзэ ортчытозы? Удмурт шаерын будэм пиос котьку но оскымонэсь вал: ӵемысь кунгожъёсты возьманы басьтылӥзы. Али но пӧртэм ӧвӧл. Соин но, дыр, Кавказ пала но келяло. Кинлэн ке но сюресэз вӧй вылтӥ кадь ортче, кинлэн ке но нюко-гопо луэ... Огъёсыз туннэ ку сапег дӥсяло, мукетъёсыз берто. Кык ар погон нуллыса, пиос кыдало, улон-вылон шоры мукет сямен учкыны кутско. Аръёс ортчемъя воштӥське-а меда армия? Кыӵе со туннэ? Мар возьма 17-18 аресъем пиосты? Пичи Пурга ёросысь Ыбдэс гуртысь Андрей Афанасьев алигес армиысь бертӥз ай. Вань сюлэм висёнъёсыз йыраз на. - Андрей, армие мылыд потыса-а мынӥд вал? - Мынам агайёсы вань. Соос буйгатӥзы, валэктӥзы, службаез одно ик ортчыны кулэ шуыса. Пиосмурт солдат луыны вордскемын. Аслэсьтыд долгдэ быыдэстӥськод ке, ваньмыз умой луэ. - Армия тон понна кыӵе потӥз? - Кызьы кулэ вал, мон озьы ик аслэсьтым долгме быдэстӥ. Маиз кельшиз - со пиослэн коллективзы. Кыӵе ке но аспӧртэм школа, умой кыдато. Секыт кутсконаз: мӧзмытгес, гурт палъёсты малпаськод... Собере ӧраз пыриськод. "Пӧсь" интыос медам луэ. Кулэтэм маке со. Мон ачим но отын вал. Адӟи, мар со сыӵе. Вир кисьтӥське. Умой, ӟеч сямо пиос вина юыны кутско, кенэмез кыско. - Чечняе ветлӥ шуиськод, кызьы тон отчы сюрид? - Армиысь бертытозям толэзь кылиз на вал. 24-тӥ октябре, арня нуналэ, командире лыктӥз мон доры но шуэ: "Чечняе группа люкаськом. Мынод-а? Приказ потэмын". Мон пумит ӧй луы. Приказ - со приказ. Но отчы мыныны туж бадӟым мылкыды ӧй вал. Собере дембелёзь толэзь кылиз на, нош монэ вир кисьтон пала лэзё. - Пумит луысалыд ке, нуысалзы-а, ӧз-а? - Кинлэн ӧз поты - соос ӧз мынэ. Мон ожъёсы ӧй пыриськы. Армия кошкем бӧрсьы, ми коркаостӥ кылем боевикъёсты утчаса ветлӥм. - Шедьылӥзы-а сыӵе адямиос? - Шедьылӥзы. Серноводскысь куиньзэ кутӥзы. Ма каризы соосын - уг тодӥськы. Гу гудэмын вал, отчы пуктыса кельтӥзы. - Эшъёсыд ӧз бырылэ-а? - Мынамъёсыз - ӧз. Телевидение пыр армавирской полкез возьматӥзы (спецназ). Соослэн трос калыксы быриз. Нырысь соос милемын вал, нош собере Армавире воштӥзы. Берлогес ни отысь тодмо пияш вераса улӥз. Вырйылэз мозмытон вылысь, приказ сётӥллям. Уйшор бере Армавирысь полкез самолётэн вырйылэ куштӥзы. Васькыса гинэ вуо, соосты вертолётъёсысь ыбылыны кутско. Асьме вертолётъёс... Соку ог 60 солдат быриз. Нош телевидение воксё мукет сямен возьматӥз. Одӥг адями быриз, ваньмыз умой, пе. - Телевидение, радио, газетъёс - ваньзы чечен война сярысь верало. Соослэн возьматэмазы но аслад адӟемад вань-а пӧртэмлыкез? - Отын номыр ӧвӧл: телевидениез но, радиоез но, газетъёсыз но. Вераны кулэ, ми экранысь выль военной техникаез адӟиськом, нош Чечняе вуж ожмаськем тӥрлык лэземын, "Т-34" но вераса. Контрактникъёс вал. Юэм дыръя олома но луэ. Адямилэн психикаез сӧриське. Ротая дежурной луыса сылыкум, одӥгез контрактник интыысьтыз тэтчыса султӥз но автоматсэ басьтӥз. "Мар луиз?" - юасько. "Чехи нападают, чехи", - кесяське. Боевикъёсты асьме солдатъёс "чех" шуо. Малызэ уг тодӥськы... Отын мисьтӥськыны но мычиськыны луонлыкъёс ӧвӧл. Тушо-мыйыко луыса, ачид боевиклы кельшыны кутскиськод. Арбериос басьтыны нокытысь, уксё ӧвӧл. Ву шедьтӥськод ке, тыл вылын шунтыса мисьтӥськиськод... Гаубицаос, "градъёс" городэз ыбыло. Шонерзэгес вераса, городэз но уг, гурезьёсты. - Чечен калык солдатъёс шоры кызьы учке? - Олокыӵеез но вань. Кудӥз умой учке: солдат ке солдат. Мукетъёсыз синазькыль каризы: "Идите в Грозный, вас там ждут, вас там поубивают". - Кыӵе мылкыдын отысь бертӥд? - Мылкыды?.. Ву ӧвӧл, пу ӧвӧл, электротыл ӧвӧл. Кукуруза бусыын сылӥм, палаткаосын улӥм. Зоре, дэри, кезьыт... Бусыын ик техника тӥяськыса сылэ: КамАЗ-ёс БТР-ёс, ЗИЛ- ёс. Ваньзэ лэсьтыны кулэ. Воштос ёзъёс ӧвӧл. Палаткаысь потыку сёто бронежилет, автомат, 4 магазин. - Ӵапак одӥг толэзь Чечняын улӥ шуиськод. Кӧня уксё сётӥзы со понна? - Вить нуналлы 107 манет тыризы, кылемзэ, пе, почта пыр келялом. Нош гуртэ мон аслам уксёеным бертӥ. 9 адямилы требование сётӥзы. Соя Пензаозь билет басьтӥм. Эшшо шуизы на: "Извините, билетов нет, только купейные. А если возьмёте, то вам придётся доплачивать". Озьы 200 манет ватсано луиз на. Ижевске вуытозь, билетъёслы 400 манетлэсь трос быдтӥ. - Андрей, вуоно солдатъёслы мар сӥзьысал? - "Пӧсь" интые гинэ медам келялэ. Кавказ пала сюроно луиз ке, кыкетӥ араз гинэ. Малы ке шуоно, нырысетӥ араз "дедовщина" вань. Полкъёсын со ӧвӧл, нош ожмаськон интыос палан юн вӧлмемын. Котькудӥзлэн аслаз сюресэз. Кин ке но сое чида, эшшо армие кыле на... Трос-а меда сыӵеос? Ӧвӧл, дыр. Советская Армия туннэ тодманы луонтэм таркамын. Ӟеч аръёсы пиос армие ветлэменызы данъяськизы, нош али армие басьтэмзы ултӥямлы пӧрме ни кадь. Быгатом на меда армилэсь данзэ азьвыл кадь ик ӝутыны? Вылӥ главнокомандующий рос- прос луиз ке, генералъёслэн "ӝуксы пӧзиз" ке, ваньмыз радъяськоз. Одӥгзэ вераме потэ: Андрей Афанасьев кадь ӟечен службадэс ортчытыса, ӟечен бертыны мед кылдоз, пиос. А. АНДРИЯНОВ. Туспуктэмез В. КАМАШЕВЛЭН. Пумиськонэ ӧтё Ижевскысь ожысь но ужысь ветеранъёс ӧтё "Ветеран" клубе. Пумиськон ортчоз туэ 21- тӥ декабре кун филармонилэн бадӟым залаз. Кутскоз 11 часын. Ветеранъёсын кенешозы Удмурт Республикаысь Калыкез улон-вылонын утёнъя министерствоысь специалистъёс. Собере луоз концерт. Пырыны луэ дунтэк. Скал кыскись воргорон Пинал дыръяз ик солы верасалзы ке, со скал кыскись луоз шуыса, ачиз но серекъясал, дыр. Но малпамтэ шорысь озьы луиз: Владимир Александрович Москвин - скал кысконъя оператор. Анаез но скал кыскись вал. Соин ик ваньмон дыръёсаз Володя анаезлы юрттыны фермае дыртылӥз. Огпол ачиз но скал кыскыны оскалтӥз. Пӧрмытӥз! Шумпотэменыз инбаме ик тэтчыны дась вал. Пумен анаез сое ас интыяз но ужаны кельтылылӥз. Школаез йылпумъямез бере Володя ветеринарлы дышетскиз. Собере армие кошкиз. Отысь вордскем палъёсаз, Як.-Бодья ёросысь Малые Ошворцы гуртэ бертыса, солы пудо фермаен кивалтыны ӵектӥзы. Кӧня ке ужаса валаз: солэн со ужез ӧвӧл, уз быгаты. Ӵапак со дыре огез скал кыскись ӝожтӥськыны кутскиз, солы ӧжыт йӧл сётӥсь скалъёс сюремын шуыса. Солэсь куд-огзэ скалъёссэ воштӥзы но. Та югдур шоры учкыса, егит воргорон возьматыны малпаз, скаллэн йӧлыз кыл вылаз гинэ ӧвӧл шуыса. Трос йӧл кыскон понна пудоез туж умой утялтыса возёно, зоотехникая вань куронъёсты быдэсъяно. Озьы Владимир Москвин скал кыскись луиз. 2-3 толэзь куспын аналтэм скалъёс тырмыт йӧл сётыны кутскизы, фермая гинэ ӧз, быдэс совхозъя но. Тӥни озьы нуналысь нуналэ со ас ужаз мае ке но выльзэ пыртыны ӧдъяз. Семья кылдытэмез бере, Москвае улыны выжиз Завьял ёросэ. Скал кысконъя операторез ужаны басьтӥзы шор фермае. Зэм, выль ужась шоры нырысь оскытэкгес учкизы, нош ачиз Владимир Александрович востэм сяменыз вераны ӧз дӥсьты, Як.-Бодья ёросын со огез азьмынӥсез пудо вордӥсь вал шуыса. Со вакытэ воргоронлэн нимыз комсомоллэн обкомезлэн Почёт книгаяз но пыртэмын вал ини. Выль ужан интыяз но Владимир Москвин ассэ вакчи дыр куспын ӟечен гинэ возьматӥз. Ужез яратӥсь воргорон ваньмызлы кельшиз. Котькуд скалэз нылпиез сямен ик со веша, лӥятэ, ческытгес сюдыны выре. Со понна кышноезлэсь но куд-ог дыръя йӧтылэ - нош картэз дышем сямызъя ялан сакыр но нянь кылемъёсты ӟепаз поныса уже кошке. Соин ик, вылды, яратоно кузёзэс пудоос кыдёкысен ик шӧдо - бӧксыса пумитало. Туннэ В. А. Москвин - ас ужзэ ӟеч тодӥсь-валась мастер. Ялан сюлмаське пудо выжыез выльдон сярысь. Соин ик, куке Пермь областьысь куӵо скалъёсты ваизы, кема малпаськытэк Москвинлэн уллёяз пыртӥзы. Нырысь араз со котькуд скалэзлэсь 4000 килограммлэсь ятыр йӧл басьтыны кутскиз. Туэ котькытын сямен ик фермаын ужасьёслы секыт йӧтэ. Кулэсме пудолэн йырыз. Соин сэрен скал кыскисьёс но мултэс луо. Нош Владимир Александрович ужа, тырше. Солэн нимыз пыртэмын хозяйствозылэн Данъян пул вылаз. Сюлмысь ужамез пусъемын Удмурт Республикаысь Гурт хозяйствоя но сиён-юонъя министерстволэн Почёт грамотаеныз. В. ЛАГУНОВ. 2000-тӥ арын нылпиос понна толэзьлы быдэ кун пособие тырон сярысь Удмурт Республикаысь Правительстволэн Постановлениез Удмурт Республикаысь Правительство пуктэ: 1. Удмурт Республикаысь Калыкез улон-вылонын утёнъя министерстволы 1997-тӥ но 1998-тӥ аръёс понна нылпиослы толэзьлы быдэ сётӥськись кун пособииез тыронэз азьланьтоно, "Республикалэн 2000-тӥ арлы бюджетэз сярысь" Удмурт Республикалэн Законэныз чаклам коньдонэз лыдэ басьтыса. 1998-тӥ ар понна нылпиослы толэзьлы быдэ сётӥськись кун пособиосты нырысь ик тыроно сыӵе семьяослы, кудъёсаз котькуд улӥсьлэн доходэз 402 манет 30 копейкалэсь ӧжыт луэ. 2. Нылпиос понна толэзьлы быдэ сётӥськись кун пособиосты Воткинск, Якшур-Бодья, Каракулино но Игра ёросъёсын тыроно, интыысь бюджетын чаклам коньдон чотын но "Республикалэн 2000-тӥ арлы бюджетэз сярысь" Удмурт Республикалэсь Законзэ лыдэ басьтыса. 3. Удмурт Республикаысь Коньдон ужпумъёсъя министерстволы но Калыкез улон-вылонын утёнъя министерстволы вань амалъёсты кутоно, нылпиос понна сётӥськись кун пособиосъя пунэмъёсты коньдонэн, вузъёсын но юрттэтъёсын тырыса быдтон вылысь. 4. 1999-тӥ-2000-тӥ аръёсы нылпиос понна толэзьлы быдэ сётӥськись кун пособиосъя пунэмъёсты бюджетэ коньдон вуэмъя тыроно. 5. Та постановленилэсь быдэсъяськемзэ эскероз Удмурт Республикаысь калыкез улон- вылонын утёнъя министр С. И. Андреева. Удмурт Республикаысь Правительстволэн Тӧроез Н. А. ГАНЗА. 1999-тӥ арын 29- тӥ ноябре Ижевск город � 1179 АДЯМИ НО ЗАКОН Пурысь шырлэн куараез Ми понна та шимес учыр вал 1998-тӥ арын 20-тӥ ноябре 19 час 30 минутэ. Эмеспие но внуке, Ижевскын "Север" магазинысь нянь басьтыса, Киров нимо ульча вамен выжо вылэм. Трамвай сюресэз потыкузы, соос вылтӥ кошкем ширтыса лобись БМВ машина. Андрей эмеспиелэн кык пыдыз ик тӥяськем, нош пичи пизэ (солы 2 арес но 10 толэзь гинэ вал на), Сашенькаез... машина ог 70 метръёс бӧрсяз нуэм на, собере мугорзэ пеймыт проулкае, сюрес урдсы, сэрпалтӥллям ини. Берло, санитарной машинаос вуыса, кыкназэсты ик интыяллям: эмеспиме - больницае, внукме - морге. Сашикмес ватӥмы 23-тӥ ноябре. Нош эмеспие али ке но валес вылын кылле на. Одӥгез пыдыз йӧназ шуыны луоз ини, нош мукетыз, врачъёс верамъя, 2-3 артэк уз на, пе, бурмы. Нылы Лена дышетске Ижевскысь медициная академилэн 6-тӥ курсаз. Коньдон тырмымтэен, уйёсы ужа, нош ӵукна 8 часлы дышетскыны мынэ. Отысь бертыса, сӧсыр картэзлы перевязкаос лэсьтэ, эмъюм утчаса, аптекаостӥ бызьылэ. Толэзяз одӥг пол врач доры нуллон понна, урамысь такси утча-шедьтэ. Таксистлы 60 манет тыре, снимок лэсьтэмзы понна - 100 манет. Нош кузпалэзлы больничной 400 манет тыриське. Тӥни озьы: коть ул, коть кул! Соиз гинэ мар ай. Табере та егит семьяын ноку но пинал куара уз ни кылӥськы, дыр: нылы висе диабетэн. Нырысь пиналзэс ик врачъёс вайыны уг лэзё вылэм, но эмъюмъёсын юрттӥзы ик соку. Нош али, вордсконо пинал анай пушкын медаз кул шуыса (диабетэн висисьёслэн сыӵе луылэ), одӥг ампула эмъюм басьтоно ке, со 500 доллар сылэ. Нош кӧня со бызьылӥз ини следовательёс но прокуроръёс дортӥ! Сафаров Рафаил следователь доры мынэ но нош ик бӧрдыса вуэ: со, пе, пӧртэм сямен ултӥяны, сантэманы турттэ. Та пумысен следователез воштыны курыса, прокурор доры но ветлӥз - нокин юрттӥсез ӧвӧл. Суд дырозь весь веразы, адями лёгасьёслэн машиназы, пе, милициен таламын. Нош судысен тодмо луиз: машина берыктэмын кузёезлы, нош соиз машиназэ толалтэен ик вузам ни. Октябрь ёрос прокуратурае заявлениен мыныкуз ик нылылы отын вераллям ни: "Мы на суде справедливость не восстанавливаем, чей адвокат сможет доказать невиновность и правоту своего подзащитного, тот и выиграет". Зэмзэ ик озьы но, дыр. Ведь туннэ ваньзэ коньдон лэсьтэ. Кинлэн коньдон, со ик шонер. Нош милям марзэс тырозы. Сӧсыр эмеспие - больничной коньдонзэ яке нылы - стипендизэ? Ярам, ми, Леналэн анай-атаез, адвокатлы 1000 манет тырыны юрттӥмы. Судзы вал 9-тӥ сентябре. Лёгась водительлы 25 сюрс манет тырон тупатӥллям. Озьыен, внукме но эмеспиелэсь тазалыксэ со быдӟа коньдонэн дунъяллям! Нош кӧня коньдон тырон-быдтон лэсьтӥм ини? Нош пиез виемзы?! Преступникъёсты жаляса, вылды, созэ но тыронзэс куинь толэзьлы люкиллям: сентябре 10 сюрс, собере 10 но 5 сюрс. Сентябрь ортчиз ини, нош коньдон ӧз вуы на. Уз но тыре, дыр. Судья шуэм ук: "Кунгож сьӧрын сыӵе тырон тупатэм адямиослэн коньдонзы ӧвӧл ке, соосты пытсэт сьӧры келяны быгато, нош асьмелэн сыӵе законмы ӧвӧл на". Озьыен, тыремзы потӥз ке - тырозы, ӧз ке - соослы номыр но уз луы ни. Али лёгасез воксё бомж кариськем ни (кемалась-а иномаркаен ворттылӥз): будьто ке табере ужез но, машинаез но, квартираез но ӧвӧл ни. Соин ик тырыны, пе, номырин. Тӥни озьы, ми кадь "пурысь шыръёсты", лёгаса виыны но, сӧсыр кельтыны но луэ. Кытын зэмлык? Кин валэктоз? Кин юрттоз?! Е.Соловьева. Вавож район, Б.Волково гурт. Туж огшоры гурт Вавож ёросысь Бадӟым Можга гурт чугун сюрес но Ува-Вавож тракт вылэ интыяськемын, соин но, дыр, ортчись калык татчы пыратэк уг кошкылы вылэм. Коркаос шоры учкыса адӟиське: узыр уг уло. Тросэз пу коркаоссы нюлэс буба кадь курен-куренесь ни. Кӧня ке кирпич коркаоссы вань ик. Оглом вераса, мукет гуртъёслэсь номырин но уг висъяськы кадь: котькытын сямен ик татын но вань ӝикыт но ӝикыттэм, узыр но куанер улӥсьёссы. Сюресъёссы - дэри. Шумпотон вае, дыр, Бадӟым Можгалан кык инты: школазы но клуб. Школаысьтызы дышетӥсьёс ваньзы сямен егитэсь. Дасэтӥ классэ пиналъёс Увае яке Вавоже дышетскыны мыно. Арняяз огпол - кӧс нуналэ - клубын егитъёс понна дискотека ортчытӥське. Пырон дуныз - одӥг манет. Валамон, ӝыныез отчы дунтэк пыро. Гуртын трос ужтэк кылемъёс. Соос пудо вордо, трос картошка будэто. Воргоронъёс коньдон поттыны ветло нефтебазае, чугун сюрес вылэ яке бускель колхозъёсы. Асьсэлэн колхоз правленизы дас иськемын, Вавоже интыяськемын. Кышномуртъёссы школаын, клубын, медпунктын, почтаын ужало. Гуртын трос пенсионеркаос. Соос клубе ветлыны туж ярато. Зинапайлэн кичӧлтэмезъя дас ар талэсь азьло татын кылдытэмын вал "Вуюись" ансамбль. Табере со республикаямы но тодмо луэмын ини. Кылем арня вискын доразы Пичи Пургалась эктӥсь- кырӟасьёс вуылӥзы, паймытыса кельтӥзы. Куспазы удмурт сямен вераськыны возьдасько. Ма, мӧйыос асьсэос быгато-а, уг-а, соосын ӟуч сямен верасько, озьы пиналъёссэс сӧро. Трос мукет гуртъёсын сямен ик, татын но ичи ӧвӧл варгаз воргоронъёс. Адӟонзы-а соослэн сыӵе яке асьсэлэн-а шудзэс утчамзы уг поты. С.Петрова. ГУРТ УЛОН Гуртэз пыд улэ лёганы уг яра Улонлэн секытэзлы табере нокин но уг паймы ни. Котькудӥз ас сяменыз гинэ сое валэктэ. Кин ке но Ельцинэз янгыш каре, кин ке - Правительствоез яке Америкаез. Йыркуръяськонлы асьмеос дышим ни, нош улон уг воштӥськы. Возьманы кулэ на-а меда "зӧк кисыослэсь" улонэз умоятэмзэс? Ӧвӧл. Вӧез веръям адями солэсь уз куштӥськы ни. Тырмоз изьыны. Пукон вылысь секыт ке но султыны, ӝутскыны кулэ. Улонмы асьме киын. Алигес Алнаше вуылыкум, "Мир" колхозлэн председателеныз вераськи. Николай Васильевич Кудрявцев но, малпасько, секыт улонлы ӝожтӥськыны кутскоз. Зэм но, колхозлэн ужъёсыз ушъямон вылымтэ. Туннэ нуналлы "Мир" ыштонъёс адӟе. Хозяйствое кык гуртэ пыре: Варзино-Алексеево но Варзибаш. Берпуметӥзэ удмуртъёс Варзийыл шуо. Куке-соку кыксы но соос одӥг бадӟым колхозэ пыро вал. Нош собере бадӟым хозяйствоос люкиськылыны кутскизы. Татын но улонлэсь бере ӧз кыле. "1 Мая" колхозлэсь висъяськыса, та кык гуртъёс "Мир" колхоз кылдытӥзы. Кызьы шуиз тӧро, люкиськыса нырысь умойгес вал. Уго центральной усадьбае азьвыл 10 иськемез лёгоно вал. Со дырысен укмыс ар ортчиз ни. Та дыр ӵоже "Мирен" кивалтэ Н. В. Кудрявцев. Солэсь азьвыл фермалэн заведующиез луыса тыршиз. Мукет кивалтон удысын ӧз ужалля. Гуртоосыз али но нимын-тулын уг вазисько, "Колягай" гинэ шуо. Ваньмыз умой мынэ вал кадь. Колхозлэн ужъёсыз азинскизы. Качиян (високосной) арез секыт шуо. Тӧролы но со трос шуг-секытъёс ваиз. Озьы 1996-тӥ арын колхозын 80 кунян кулӥз, мукет аре - 62 йырез. Та нырысетӥ шуккет вал. Николай Васильевичлэн ужаны мылкыдыз ик быриз. Собере ужасьёссэ но киултыса возьыны секыт луиз. Калык юон вылэ чӧлскиз. Колхоз каллен куашканы шӧтаз. Варзино-Алексеево гуртын ошпиосты будэто вал. Татын улӥсь бигеръёс ужзэс аналтӥзы. Ошпи нунал куспын 180 граммлы гинэ куае вал. Та бригадаысь одӥгез ужасьсы, Варзийылэ мыныса, ветылъёслэн таза луэмзылы воксё паймем. Кызьы, пе, озьы тӥляд ветылъёсты милям ошпиосмылэсь тазагес? Тӧро тазэ учырез одӥг муген гинэ валэктэ: бигер гуртын мултэс трос чыртыязы лэзьыны кутскизы. Ошпиосты будэтонэз удмурт гуртэ выжтэмзы бере, ужпум чутрак мукет пала воштӥськиз. Укмыс ар талэсь азьло Варзийыл фермаын одӥг скаллэсь 1,8 килограмм йӧл кыскылӥзы. Нош бератаз 2800-озь вуттыны быгатӥзы. Туннэ скаллы быдэ 4,5 килограмм йӧл кыско. Туэ пудозылэсь лыдзэ но будэтӥзы. Ачиз Николай Васильевич йӧл ӧвӧл шуэ. Матысь дыре йӧл поттонэз но пудо сюдонэз рос-прос радъяны турттэ. Колхозлэн тӧроез чылкак абдрамын ни скал кыскисьёслэн ваче кусыпъёссылы. Ялан ченгешыса, куашетыса уло. Ог-огзылы вожъяськыса улэмзы таӵе калэ вуттэ, дыр. Ма карыны ёрмем бераз, Николай Васильевич фермаез вӧсяны священникез но ӧтчаз ни. Со бӧрсьы куашетонъёс быризы. Юон улон вирсэрез чигтэ. Адямилэсь гинэ ӧвӧл, ужез но сура-пожа. Тросэз колхозын ӟенеликен "эшъяськизы". Куддыръя пудо но сюдытэк кыльылэ. Пудо сюдӥсь (тӧролэн солэсь нимтулэ верамез ӧз поты) ӝытазеяз фермае сиён ке уг пырты, куинь часын ӵукна Николай Васильевич сое сайкатэ ни. Ачиз но уг изьы, ужасезлы но маза уг сёты. Вераны кулэ, таӵе амал туж пайдаё вылэм. Эшшо одӥг сэрттымтэ-пертчымтэ лэчыт ужпум вань на. Пудо гидысь кыед поттыны слесарьзы ӧвӧл. Нокинлэн но со уже мынэмез уг поты. Уждун уд сётӥське, шуо. Одӥг кылын вераса, ужасьёсыз тӧролэсь уг кылзӥсько. Соин сэрен слесарьлэсь ужзэ черодэн механизаторъёслы быдэсъяно луэ. Нош куд-огез ужезлэсь пуштроссэ но уг вала. Тани парсь будэтон удысын. - Милям соос трос ик ӧвӧл, - вера Николай Васильевич. - Но палэнэ но вузаны турттӥськом. Котькуд парсьлэсь дас парсьпи басьтыны луоно, нош ми сое ум быгатӥське на. Собере ужасьёслэн валанзы ӧжыт-а, мар-а - парсьёсты колхоз понна гинэ будэтӥськом кожало. Туэ 38 йырзэ вандӥм. Ужасьёслэн малпамзыя, со бадӟым лыдпус, нош быдэс колхоз понна со ичи. 50 мумы парсьлэсь быдэн дасэн пизэс вордӥм ке, араз 500 йырозь вандыны луоно. Мукетыз ляб интымы - специалистъёсмылэн тодон-валанзы лябгес. Асме но отчы пыртысал. Али вакытэ удобрение секыт басьтыны. Муосты небӟытыны техника уг тырмы. Медъя вал РТП-ысь тракторъёсты но машинаосты - улытозяд тыриськондэ уд быдты. Соин колхозъёс ас кужымзылы гинэ оско на. Татысь ик потэ гуртлэн куанер улэмез, бусыослэн ю тысь ляб сётэмзы. Туэ "Мир" колхозлэн 400 гектар пала юосыз арам луизы - сыӵе ляб ӝужаз няньзы. Одӥг гектарысьтыз 15,7 центнер сяна ӧз усьы. Нош куинь ар талэсь азьло 33 центнер басьтӥзы вал. Соку няньзы тырмытлэсь но тырмыт потӥз. Механизаторъёслэн азбаразы машинаен ик кисьтазы. Колхоз лизингъя комбайн басьтӥз. Со понна куинь ар ю тысен тырисько ни, эшшо кык арлы пунэмзы кылиз на. Вуоно аре юзэс тросгес кизьыны чаклало. Нош али колхозлэн 41 процент музъем вылаз трос аръем турынъёс будо. Лэсьтӥськонзэс ке басьтоно, таяз аре 120 йырлы кирпичлэсь выль пудо гид пуктӥзы. Озьы ик 50 мумы парсьёслы но выль гид ӝутӥзы на. Ю тысь возьыны кык лапас пуктэмын. Нош ю складъёс 1936-тӥ арысен сыло ни. Соосты воштыны кужымзы уггес тырмы на. Николай Васильевич татын но ассэ янгыш каре. Таӵе секыт аръёсы но лэсьтӥськыны, пе, турттӥ на. Калык сярысь сюлмаськоно вылэм: уждун ичи тыриськод, шуо. Колхозын берлозэ уждунзэс сентябрь понна кӧня ке люкетсэ сётӥзы. Нош шоро-куспо уждунзы - 350 манет. Лыдпус бадӟым ик ӧвӧл. Но ужась калык понна сюлмаськон таин гинэ уг быры. Валамон, адямилэн али уксёез ӧвӧл. Соин ик ас гуртсэс ке но возьыны мед быгатозы шуыса, колхозын мукет амал шедьтӥзы. Ужасьёссылы ю тысьсэс кылем ар дунъёсын вузазы: йыдызэс - 80 коньыен, чабейзэс - 1 манетэн. Нош республикая со дунъёс 2 но 2,5 манет вал. Озьы ке но, колхозын тыршисьёслэн ужаны мылкыдзы ӧвӧл. Но ведь республикаын эшшо но куанер улӥсьёсыз вань на. Николай Васильевич Кудрявцев люкиськыкумы шуиз на: - Тӥляд газетты пыр гурт удысын вань ужась калыклы вазиськеме потэ: эн чӧлске вина юыны. Ужамтэысь пото шугъяськонъёс. Правительство гинэ-а янгыш, тазьы улӥськом шуыса? Ужаса гинэ байлык потэ. Уг яра пыд улэ лёганы гуртлэсь ваньбурзэ. А.Андриянов. * Николай Васильевич Кудрявцев. Туспуктэмез В.Камашевлэн. Асьсэ киосын Дышетскисьёслэсь ӝӧк вылъёссэс тыргес карон понна, Яр ёросысь калыкез дышетонъя отдел туэ тулыс ик школаос куспын конкурс ялӥз. Та ужрад чакламын, школаосысь столовойёсын асьсэлэн сӥльзы но бакча сиёнъёссы мед луозы шуыса. Ӵошатсконын вормисе потӥзы Укан, Зюино, Никольск шор ёзо но Бозино школаос. Тани Укан школа 56,3 гектар музъем басьтӥз, отын, бакча сиёнъёс сяна, турын но емышъёс будэтӥзы на. Витяз школаосын парсьпиос вордӥзы, Уканын но Ярын скалзы но кунянзы вань, нош Ярысь 2 номеро школаын муш но возё. Озьы Еловоын 50 центнер кубиста, Бозиноын 15 центнер ӵуж кушман но 5 центнер кабачок, Ворциноын 15 центнер горд кушман, Никольскын 3 центнер помидор, Уканын 1,5 центнер пала сугон, Байдалиноын 1 центнер огреч будэтӥзы. П.Николаев. Юртто куанеръёслы Юкаменск ёросысь уноез дышетскись пиналъёс школае уг ветло тол дӥськутсы ӧвӧлэн. Но шырыт но ӟеч сюлэмо адямиос ӧз быре на. Ёросысь калыклы юрттэт улон-вылонын сётонъя отдел ужаса улӥсьлэсь люказ нылпиоссылэсь пичи кылем тол дӥсьёссэс но пыдкутчанзэс, сое ёрмись пиналъёслы сётъяз. Куанеръёслы юрттон азьланьтӥське. П.Кузнецов. Кин лыктэ дымбыр-дамбыр? Валамон ини - "Гондыр" 9 час 13 минут. Можга город. Татысь "Тӧдьы юртлэн" ньылетӥ этажаз интыяськемын ёросысь быръёнъя комиссилэн ужан кабинетъёсыз. Ижысь вуэм журналистъёсты умой пумитазы. - Милям та дырлы ик котькудӥз куинетӥез бырйись куаразэ сётӥз ни, - умой мылкыдзэс уг вато комиссие быръем эшъёс. Игорь Семенов, Можга городлэн администрациезлэн кивалтӥсез, тып-тып удмурт воргорон. - Милям туннэ ортчо куасэн бызьылонъя республиканской ӵошатсконъёс. Соин ик сюлэм висе соос понна - город но, район но бере медам кыле вал. Нош быръён, шӧдӥське, умой ортчоз - калык одно ик мылкыдзэ возьматоз. Игорь Николаевич ӧз вера мукет шугъясьонзэ - солэн уго толон вордскем нуналыз вал. Данакез эшъёсыз дырзэ возьматэк ӝыт но уин жингыртозы. Сыӵе уго вакытэз. 12 час 17 минут. Кизнер посёлок. Ёросысь депутатъёслэн кенешсылэн тӧроезлэн кабинетэз. Татчы ог дасо мурт люкаськемын. Ваньзэсты сюлмаськытэ бырйисьёслэн лыдзы. - Таяз участокын 40 процент, нош татын 32 гинэ ай, - кабинетлэн кузёез Надежда Жихарева компьютерысь али гинэ поттэм сводкаез сак учке. - Я-я, законъя учконо ке, быръёнэз котькытын ик ортчемен лыдъяны луоно ни, - буйгатэ сое администрацилэн кивалтӥсез Владимир Ушаков. Кенешиськом шор урамтӥ ортчись калыкен. Ваньмыз сямен адямиос быръёнэ ветлӥллям ни. - Я, табере юаны луэ ни, вылды, кин понна кариськемды сярысь. - Мон ке дак "Отечество" пала кариськи, укыр сое саптаны ӧдъязы уго, - ог 70 аресъем воргорон мылкыдзэ уг ваты ни. - Малпасько вал Зюгановлы "кирос" пуктыны. Маке ӧз кельшы та вакытэ шып улэмез. Оло, шонер верало, солэн вылӥ кивалтӥсь луэмез уг поты шуыса. Мар-о, урод шат? Пуке Думаын, ваньзэ курла, нош ачиз номыр понна но кыл уг куты. Данэз вань, уждун люкаське. Мон малпасько, коммунистъёслэн кивалтӥсьёссы ужась калыклэсь азьло аръёсы кадь ик кыдёке палэнскизы ни. 14 час 27 минут. Грахово ёросысь кивалтӥсьёс ужан итыосазы. Быръён комиссия но адяминистрацилэн юртаз ик. Юрий Рожин кабинетаз телефон пыр кенеше. "Удмурт дуннеосты" адӟыса кутскиз Даниил Майоров кылбурчилэн юбилеезлы сӥзем ужрад сярысь мадьыны. - Умойтэм тупаз уго та быръёнмы, - кутске Юрий Константинович. - Соин сэрен Ижысь Дуно куноос лыктыны ӧз быгатэ. Но ог 120 мурт люкаськиз. Сӥё-дано пусйим. Премия но тупатӥм. Райсоветлэн тӧроез доры пыре быръёнъя ёрос комиссилэн секретарез Валентина Стерхова. Юасько солэн туала быръёнъёслэсь аспӧртэмлыксы сярысь. - Та ужен кемалась вырисько ни, - шуэ Валентина Стрижова. - Туэ туж урод радъямын вал валэктон уж. Смирновалэн но "Отечестволэн" штабъёссы ӧй ужасалзы ке, калык номыре тодытэк кыльысал. Нош адямиослэн кандидатъёс сярысь тодэмзы потэ. Кӧня соос дорамы но вазиськылӥзы: вералэ, пе, кызьы-озьы Новгородысь адямиос списоке шедемын, малы арлыдо Роговец депутат луыны турттэ... Калык телевизоръя чаклаз кадь. Кинэ адӟо, со сярысь ик верасько. Нош тросэз партиос калык понна тодмотэм кылизы. - Нош кызьы адямиос вераськизы юалляськон пумысен? - Мынам малпамея, та ласянь но тырмыт валэктон ӧй вал. Уго нокин ӧз вера, маин пӧртэм луо глава но президент. 17 час 04 минут. Грахово ёросысь Новогорское черкогуртысь быръёнъя комиссия. Любовь Батырева, секретарь: - 60 процентлэсь ятырез бырйисьёс татчы вуылӥзы ни. Ог 200-300 мурт дораз куаразэ сётоз. Азьло аръёсы кыдёкысь гуртъёсы автобус ысъяськом вал, туэ вераським урнаен ортчыны. Тани кабинаысь потэ ужан дӥськутэн егит воргорон. Сергей Опарин вылэм со, гуртысь механизатор. Кин понна кариськем егит воргорон? - КПРФ понна, - шуэ Сергей. - Мукетъёсызлы оскон ӧвӧл. Нош кандидатъёсъя верано ке, Кошкин пала кариськи. - Малы меда со ас палаз кыскиз? - выжыятӥсько воргоронлэсь. - Ну, Смирнова но кельшиз кадь. Озьы ке но, малпасько Думаын пиосмурт луыны кулэ. 17 час 15 минут. Алнаш ёросысь Удмурт Гондырево гурт. Ёмыраны кутскем школае интыяськем комиссилэн тӧроез Елена Кабышева: - Та дырлы ог 60 процентэз бырйисьёс куаразэс сётӥзы. Тулыс вылтӥ Госсоветэ быръёнэн ӵошатыса, со уногес. Адямиос шугъясько федеральной списокъя. Сомында партиос, огазеяськонъёс - соку ик уд вала. Пиос тамакаса сыло. Маке но ченгешо. - Кин пала, юлтошъёс, кариськиды? Юанмес кемалась витиллям, кожалод. Огзэс огзы азьпалтыса вераны туртто: - Ма, мар юанэз? Неужто гондыръёс "Гондырлэсь" палэнскозы? Ми ваньмы "Единство" понна куарамес сётӥм. Выльдоно ни властез. Кӧня чидано на та пересьёсыз? - Нош, пиос, "Единство" ("Медведь") шуонды Путин палан ук. Нош соиз Ельцинлэн кивоштӥсез. Озьыен, тӥ туала властез утён понна луиськоды? - Ма... Ӧйтӧд, Путин ас кожаз ужа кадь потэ милемлы. Мар шуод на? Милемлы, журналистъёслы, оло, шумпотымон но, Россиысь валтӥсь телеканалъёс толэзь ӵоже уно миллион калыклэсь йырзэ берыктыны быгатӥзы шуыса. Нош мукет ласянь паймоно ук: кызьы-озьы асьмеос сётскиськом Москвалэн чебер кылъёсызлы? Шат огпол но ӧм ӝуалэ на? Ой-ой-ой. 20 час 1 минут. Алнаш черкогуртысь Центральной участок. Ёросысь бадӟымез. Татын куаразэс сётыны быгатысалзы ог 2300 мурт. Валамон, куд-огез ӧз лыкты. Юрий Николаевлы, комиссилэн тӧроезлы, та дыре милемын вераськыны дырыз ӧвӧл. Лыдъяно уже кутымтэ бюллетеньёсты (соос 500-лэсь ятыр), соосты изъянтоно. Сьӧд -кысъем дядяй, ножовка кутыса, бумага сэрегез вандыса куштэ. Озьыен, та листъёсты нокин но уже кутыны уз быгаты ни. Ми, журналистъёс но кандидатъёслэн но партиослэн ыстэм муртъёссы (наблюдательёс), сак учкиськом комиссилэн ужамез шоры. Отчы пыртэм эшъёс нырысь-валысь быръё партиослэн списоксыя дасям бюллетеньёсты. Тани син азьын йылэ "Единстволэн" 14 номеро пусэз вадьсы тырем бумагаос. Ма, коммунистъёслэн но сомында ӧвӧл ук. "Отечестволэн" гурезез воксё начар адӟиське. Трос гинэ люкасько Пенсионеръёслэн партизы вадьсы тырем бюллетеньёс. Эк-ке-эк! - Та адямиос чик но валаса вуттӥллямтэ, лэся, та партиез Кремль ас чакламезъя, Зюгановлэсь но Лужковлэсь куараоссэс кыскон понна кылдытӥз шуыса,- лулӟе Елизавета Петрова, депутатэ кандидатлэн Светлана Смирновалэн штабезлэн кивалтӥсезлэн воштӥсез. 21 час 32 минут. Алнаш ёросысь быръёнъёсъя комиссия. Иван Колесников, тодмо адями, врач, Вылӥ Кенешлэн азьло депутатэз жадем нылкышноосты серемес учыръёсын буйгатэ. Соосыз оло оскыса, оло ньӧмыз понна гор-гор серекъяло. Комиссие отысь-татысь вуись эшъёс люкаськемъёслы верало ни: - "Гондыр" ваньзэ лёгаз, Смирнова азьпалан, "президент" шуон вормиз. 00 час 12 минут. Депутатэ кандидатлэн С. Смирновалэн М. Горький ураме интыяськем штабаз. Татьяна Прокопьева, берло кык-куинь толэзьзэ уйвӧтэз адӟылымтэ нылаш, шумпотонзэ ватытэк вера: - Туж шугъяським Глазов но Сарапул понна. Вормиз ук, вормиз Светлана Константиновна. Значит, отын но валазы, милесьтымлэсь ӟечез адями списокын ӧй вал шуыса. Ай монэ соиз паймытӥз: музон кандидатъёслэн штабъёсысьтызы жингыръяны ӧдъязы та уй вылтӥ. Ма, пе, уртче ужано вал ук... 2 час 30 минут. Кун Кенеш. С. Смирновалэн ужан кабинетэз. Александр Волков шумпотэ: - Асьмеос валамы, ӵош кутскиськом ке, ӟеч ужез быдэстыны луэ. Светлана Константиновна Кун Думаын ассэ умоен возьматоз шуыса уг но шугъяськиськы. Оскымон мурт. 4 час 12 минут. "Известия Удмуртской Республики" газетысь удмурт репортёр Алексей Васильев жингыртэ мобильной телефонэ: - Слушай, Селтаын Полянских вормиз. Озьыен, "Удмурт кенешлэн" кужымез вань ик... Шумпотыны но кужым ӧвӧл ни. 8 час 21 минут. Редакциысь кылкутӥсь секретарь Е. Виноградоваез дыртытэ "Единстволэн" пресс-конференияз. "Гондыръёс", пе, мадёзы кызьы вормемзы сярысь. Нош мынэсьтым материал куре. Тани со... И. ЛЕБЕДЕВ. Котькудӥз ас интыяз Шаерамы умой ужась предприятиосмы чиньыен лыдъямон, оло, луозы. Соос пӧлы пыре акциосын "Глазовский завод "Металлист" огазеяськон. Со шоро-куспо предприятие, ужасьёсыз одӥг сюрс но ӧвӧл. Но котькудӥз ас интыяз, лулысь-сюлмысь тырше, ас ужзэ рос-прос быдэсъя. Вуриськисьёсты но керттӥськисьёсты ас бордаз басьтэмез бере, предприятие данаклы паськытаз, ужасьёсыз кык сюлэсь унолы йылӥзы. Огазеяськонэ ветлон нуналамы одӥгаз цехын Россиысь Кун Думае депутатэ кандидатэн пумиськон вал. Калык тыраз люкаськем, кӧняез ке воргоронъёс ӧс куспын ик сыло. Ӟеч ужаменызы ӵош, соос политикае но мылысь-кыдысь пырисько, ваньзэ тодэмзы потэ. Нош кин понна Кун Думае куаразэс сётозы, туннэ котькудзэ сюлэмшугъяськытэ. Со бордысь уго потэ вылӥ быръем ёзлэн ӟеч законъёс кутыны но калыклэсь улон-вылонзэ умоятыны быгатэмез. Нош "Металлистысь" ужасьёс нокинэ шуге-леке уз вуттэ, котькудӥз ас удысаз синмаськымон тырше. Тани кызьы уд ушъя литейно-механической участокысь Сергей Баженовез. Солэн ваньмыз усто пӧрме, быдэсак та ужлы кадь вордӥськемын. Татын ваньмыз куспазы вожмаськыса сямен ужало. Кылсярысь, тунгонъёсъя усто фрезеровщик луэ Татьяна Катаева. Воргоронъёслэсь но бере уг кыльы, адӟем карымон тунгон усьтонъёс лэсьтэ. Нош тискъёс дасян удысын зэмос кибашлы мастер луэ Леонид Порохов. Юнме шат бен солэн ки пыртӥз арбериос кунгож сьӧры кошко, шумпотыса басьто. Огазеяськонын воргоронъёсын артэ пиосмурт ужъёсты быдэсъяло кышномуртъёс. Тани кызьы уд вера Галина Кропачеваез. Со одӥгез усто сверловщица, кибервылыз чебер, ваньзэ лулысь-сюлмысь лэсьтэ. Соин ик Галина Аркадьевна коллективын гажано адями. 1991-тӥ арын заводын басьтӥськизы художественной промыселъёс борды. Шедизы мастеръёс-художникъёс. Азьло соос леспромхозын ужазы. Усто кибашлыос асьсэос малпазы пужыятӥськон амал. Солы "Глазовский" ним понӥзы. Кыӵе соос быгатыса чеберъяло самоварез, чайникез, фарфор но керамика посудаез, пу арбериосты но музонзэ. Сое адӟыса котькинлэн сюлэмыз бугырске, мылкыдыз ӝутске. Таӵе чебер вузъёсты вожмаськыса басьтылӥзы Москваын, Ленинградын но Росссилэн музон интыосаз. Нош 1996-тӥ арын быдэс контейнер чебер арбериос Тунисэ кошкизы. Али улонмы секыт ке но луиз, вузъёссы кошко Сибире, Башкортостанэ, Москвае но музон улосвылэ. Татын нырысетӥез мастер вал И. К. Макарова. Али синмаськымон тыршо С. Н. Агафонова, Т.В.Солодянкина, деревообработчик С.В.Данилов. Участокен кивалтэ О.С.Кузьменко. Нош кузьымъёс лэсьтон участокын пу вылэ чебер пужыос пукто Людмила Ведерникова но Ираида Ившина. Нош та уж нырысь ик кутске пу вандӥсьёс бордысен. Та ужез мылысь-кыдысь быдэсъяло кык Евгенийёс - Логинов но Поздеев. Кузьымъёсты, посудаез кыдатэ Сахина Дмитриева, нош дась продукцилэсь ӟечлыксэ эскере контролёр Наталья Григорьева. Огазеяськонын озьы ик данэ потэмын токарьёс Сергей Данилов но Дмитрий Логинов. Мар веранэз, "Металлист" юнма, будэ, нош ӟеч ужасьёслэсь нимъёссэс гожтыса уд быдты. Котькудӥз ас интыяз, оскем ужзэ гижысь-пиньысь быдэсъя. Предприятиын трос сюлмасько ужасьёссы сярысь. Куинь улон корка пуктэмзы но 115 квартираос сётэмзы бере, улон интылы кулэяськисьёслэн лыдзы данаклы кулэсмиз. Нош выль административно-бытовой юртсэс вуттэмзы бере, уката умоязы ужан интыоссы, лэсьтӥзы кылиськон, дӥсь воштон интыос, душевой кабина но музонзэ. Выль юртэ интыяськиз здравпункт. Котькудӥз быгатэ тазалыксэ юнматыны, эмъяськыны физиокабинетын, стоматолог дорын но массаж лэсьтыны. Здравпунктэ басьтэмын туала усто оборудование. Со сяна, кин мылкыд каре, эмъяське "Металлург" но "Нижне- Ивкино" санаторийёсын. Ужасьёслэн нылпиоссы гужем шутэтско город сьӧрысь лагерьёсын. Быгато татын шулдыр ужрадъёс ортчытъяны пиналъёслы. Луыло шутэтскон ӝытъёс, спортъя ӵошатсконъёс, ӵош ветло концертъёсы но спектакльёсы. Дыр ортче, улон воштӥське. Предприятилэн кыкетӥ даурез кутскиз. Коллектив егитоме, нош Чухлов выжыос (асьсэос, нылпиоссы) заводын 108 ар ужазы, быдэн 60 арлэсь кема тыршизы Поздеев, Куртеев семьяос, кузпалъёс Кандаловъёс но Чирковъёс. Материалъёс дасязы Г.Романов но В.Камашев (фото). ВОЗЬМАТӤСЬКОМ АЗЬМЫНӤСЬЁСТЫ КАРИМ КАСИМОВ: "Металлист" юнма, азинске Акциосын "Глазовский завод "Металлист" огазеяськонэн 10 ар кивалтэ ни Карим Касимов. Со та городын гинэ ӧвӧл, республикаямы но данэ потэмын ни. Туэ быръемын Кун Кенеше, азьло вал Вылӥ Кенешлэн депутатэз. Туннэ со республикаысьтымы одӥгез устоез кивалтӥсь. Туж секыт выльдӥськон, рынокен экономикае выжон вакытэ Карим Касимов предприятиез пыд йылаз возе, азьлане вамыштэ. - Карим Фаттахуддинович, туэ сентябре сӥё-дано пусйиды предприятидылэсь бадӟым юбилейзэ - 100 ар тырмонзэ. Соин ик вералэ вал заводдылэн ортчем сюресэз сярысь? - Пусйыны кулэ, Россиын но, Удмуртиын но милям кадь предприятиосмы туж ичи. Шат Балезиноысь литейно-механической завод кӧня ке тупа. Зэмзэ но, огазеяськонмес егит уд шуы, туэ тани предприятимылы 100 ар тырмиз. Юбилеймес сӥзьыл сӥё-дано пусйим. Ужрадмы ваньмызлы кельшиз: пенсионеръёслы-ветеранъёслы но, егит ужасьёслы но. Со шумпотымон. Кызьы бен заводмы вордскиз? Ваньмыз сямен ик пичиысен кутскиз. Кызетӥ даур ӵогиськон азьын ужаз ремеслолы (ужлы) дышетонъя куинь кассъёсын городской училище. Со интые 1899-тӥ арын усьтӥськиз ремонтно-механической мастерской, нош куамынэтӥ аръёсы со луиз "Металлопром" артель. Война бере со кужымзэ будэтэ но металлоизделиос поттонъя завод луэ, нош али усьтэм амалэн ужась акциосын "Глазовский завод "Металлист" огазеяськонлы пӧрмиз. Предприятиез кылдытонын но азинтонын трос кужымзэс, визьзэс но быгатонзэс сётӥзы усто ремесленникъёс, мастеръёс но кивалтӥсьёс. Тужгес но трос сюлмаськиз "Металлопром" артельлэн кивалтӥсез Иван Андреевич Богданов. Со 1929-тӥ арысен ужаз. Озьы ик синмаськымон, ваньмызлы адӟем карымон тыршизы токарь Алексей Ильич Рудаков, слесарь Александр Семенович Адиатулин но трос мукетъёсыз. Нимысьтыз пусъеме потэ Михаил Ефимович Нудельманэз. Со вал токарь, технической отделлэн кивалтӥсез, валтӥсь инженер но 1956-тӥ арысен предприятиен кивалтӥз. Солы сётэмын "Удмурт Республикаысь дано рационализатор" ним. Ортчем сюресмес чакласа, йылпумъянъёс лэсьтыса, верам потэ предприятилы ноку капчи ӧй вал. Озьы ке но, шуг-секытысь потыны амалъёс шедьтылӥзы но шедьтӥськом. Рынокен экономикае выжон но ваньмызлы сямен ик милемлы но вӧй вылтӥ кадь ӧз сётӥськы. Инженеръёс но техникъёс ялан выль вузъёс кылдыто. Сое уже пыӵато усто токарьёс, фрезеровщикъёс, слесарьёс, литейщикъёс но музонэз. Уката умоя продукцимылэн ӟечлыкез, дуннеысь куронъёслы тупась луэ. - Нош али кызьы ужаськоды? - Ушъяськемлы медаз пӧрмы, но берло дыре огсыр умой ужаськом паськытаськом но уката кужмогес луиськом. Бен, ми ракетаос, зенитной но космической комплексъёс ум поттӥське. Но лэсьтӥськом кулэ арбериос. Тани басьтом слесарной тискъёсмес. Сотэк предприятиысь, колхоз-совхозысь одӥг мастерской но уг ужа. Нош пуньыостэк, вилкаостэк кин ӝӧк сьӧры пуксе. Озьы ик туж кулэ тунгонъёс но. Азьло вань вузъёсмы туж дунтэмен кошкылӥзы. Выльдӥськон кутскем бере, со возьматӥз, бадӟым предприятиос сярысь, шоро-куспоосыз но пичиосыз рынокен экономикае каньылэнгес пото. Дорамы лыктӥзы усто специалистъёс. Уждун бадӟым ӧвӧл ке но, дыраз сётъяськом, ужаськом чик дугдылытэк. Адямиослы со кельше. Нош продукцимылэн ассортиментэз сярысь верано ке, со милям матысь аръёсы трос уг вошъяськы. Совето власть дыръя алюминий пуньыос, вилкаос трос поттӥм. Сое басьто вал ваньмыз столовойёс, тюрьмаос но армия. Нош берло дыре та продукцимы кулэ ӧвӧл ни воинской частьёслы но, пытсам учреждениослы но. Маин соос калыксэс, солдатъёсты сюдо - тодмо ӧвӧл. Нош мукет ласянь соослэн вузъёсмес басьтыны коньдонзы уг тырмы. Но "Металлист" азьло но, али но котьку возиське слесарной тискъёс вылын. Продукцимы умой кошке. Вазен ваньзэ планъя келям, табере сотэк но предприятиос басьто. Ми 50 ар пала тискъёс поттӥськом, ялан выльдӥськом. Кылсярысь, азьло огдышемъя чугунлэсь гинэ лэсьтылӥм, табере басьяськисьёслы тужгес ярало анданлэсь (стальлэсь) лэсьтэмъёсыз. Соос кык пол капчиесь но кык пумо луо: слесарной но станочной. Выль тискъёс лэсьтон предприятиез куашкамлэсь утиз, пумен тросгес коньдон поттыны но пайда басьтыны ӧдъям. Али ужъёсмы огсыр умой мыно. Туэ дас толэзьскын, миым та дырен ӵошатыса, 28 процентлы уногес продукция поттӥм, вузам - 85 процентлы трос, нош пайда басьтӥм 4 поллы уногес. Огазеяськон вань бюджетъёсы но фондъёсы дыраз выт (налог) тыре. Уждун но озьы ик АО-лэн тырме коньдонэз выль оборудование, материалъёс басьтыны но лэсьтӥськыны. Ужасьёсмес ум улляське, 90 процентлы ужан интыос пытсамын. Берло дыре предприятие пумен уногес поттэ калориферъёс. Со вань лэсьтэм вузъёсмы пӧлысь ӝыныез пала луэ, нош инструмент (слесарной но станочной тискъёс, сандалъёс) 25 процент басьтэ, вурем дӥсь (нимаз ужан дӥсь), кӧлан дӥсь, дэремъёс - 11, тунгонъёс - 7, нош алюминий пуньыос, вилкаос, самоваръёс, пужыятэм посуда, мотоцикллы тормозной колодкаос - 9 процент. - Карим Фаттахуддинович, предприятидэс бадӟым уд шуы, шоро-куспо, 850 ёрос ужасьёсты. Нош продукциды кунгож сьӧры кошке-а? - Верай ни вал, кин кортэн ужа, солы одно ик тискъёс кулэ. Асьме предприятиос, гурт хозяйствоос сяна, сое басьто кунгож сьӧрысь странаос. Та продукцимес 25 ар пала вузаськом ни. Со кошке Япониысен кутскыса Южной Кореяозь, Италиысен Египетозь. Но алигес, валютаен вузкаронэз пачкатэмзы бере, кунгож сьӧры вузмес келян изъян гинэ сётэ вал. Али югдур тупатске, умойгес луэ ни. - Тӥ утчаськись, выльзэ пыӵатӥсь кивалтӥсь луиськоды. Мар со сярысь верасалды? - Кызьы бен огинтыяд сыръяса кадь улод. Озьы ужад ке, ваньмызлэсь бере кылёд, тонэ лёгаса кошкозы но азьпалтозы. Соин ик утчаськытэк уг луы. Тани дас ар талэсь азьло художественной промыселъя цех усьтӥм. Уже кутӥм куашкан калэ вуэм леспромхозысь кошкем кибашлыосты. Нырысь отын 15 мурт вал, табере данаклы паськытаз. Соос чебермало, пужыято самоваръёсты, чайникъёсты, кофейникъёсты, пулэсь лэсьтэм кузьымъёсты но музонзэ. Но жаляса верано луэ, берло дыре та вузъёсмес басьтӥсьёс кулэсмо, улонмы секытгес но уродгес луэ. Нош 1996-тӥ арын аспӧртэмлыко решение кутӥм. Эскерон вылысь бордамы басьтӥм городысь вуриськон-керттӥськон фабрикаез. Со ӝыны ар уг ужа ни, кык сюлэсь уно нылкышноос ужтэк кылемын вал. Фабрикалэн кивалтӥсьёсыз выльдӥськон, рынокен экономикае выжон вакытэ ас интызэс ӧз шедьтэ. Нош ми солэсь ужзэ выльдӥм, простыняос, пододеяльникъёс вурем сяна, ужан дӥсь вурон борды басьтӥським. Нырысь халатъёс, пӧзьёс вурим, собере кутским - курткаос, брюкиос, костюмъёс борды. Продукцимес табере басьто му вӧй, газ поттӥсьёс, андан пӧзьтӥсьёс, химической промышленностьын ужасьёс но мукетъёсыз. Огъя вераса, 50-лэсь уно ужан дӥсь вуриськом. Со кошке Сибире, Урал улосвылэ но мукет интыосы. Андан ӵыжатӥсьёслэсь дӥсьсэс уката юнгес кариськом, зол растворен пыӵатӥськом. Вуриськисьёслэсь ужзэс али радъя Т.Ушакова. - Нош мырдэм векась предприятиосты тӥляд амалэныды пыд йылазы вуттыны луоз-а? - Малы уз луы, луоз. Но со валтӥсь предприятие понна сокем ӟеч уж ӧвӧл. Огазеяськон быдтэ трос коньдон, нош выт тыронъя льготаос юн пичиесь. Соин ик умоесь законъёс кутоно. Сотэк номыр уз пӧрмы, ӟеч малпанэд омыре ошиськоз. - Карим Фаттахуддинович, малы тӥляд Кун Кенешлэн депутатэз луэмды потӥз? - Удмурт Республика жаль потэ, сое куашкатыны, лябомытыны выро. Ӧз кельшы мыным Кун Кенешлэн нырысетӥ созывезлэн ужамез. Солэсь азьло мон ужай Вылӥ Кенешын, 200 депутатъёс пӧлысь одӥгез вал. Соку решениос, законопроектъёс кутон юн секытэн мынӥз. Сое чакласа, Вылӥ Кенеш депутатъёслэсь лыдзэс кык поллы кулэстӥз, 100 кельтӥз. Ми али куспамы ӝоггес одӥг кыл шедьтӥськом, чалякгес кенешиськом. Но мон азьвыл но, али но одӥг сямен малпасько, республикаысьтымы вылӥ быръён ёзын - парламентын - 25-30 депутат ужысь мозмытыса законопроктъёс дасяны кулэ. Кун Кенешлэн ужамез али кельше, толэзьлы быдэ сямен люкаськылӥськом. Умойгес ужасько ни бырйисьёсын, арнялы быдэ соосты огпол кутӥсько, котьку дорам 10-15 мурт лыктэ. - Улон сюресты кыӵе? - Вордски Глазов районысь Пичи Парзи гуртын. 1978-тӥ арын йылпумъяй Ижысь механической институтлэсь машиностроительной факультетсэ. Собере куинь ар ужай Ижысь механической заводын, 5 ар - татысь ик "Металлист" заводын. Берлояз вал валтӥсь инженерлэн воштӥсез. 1986-тӥ арын кошки вордскем палъёсам, Глазове. Татысь "Металлист" заводлы валтӥсь инженере пуктӥзы, нош 1989-тӥ аре директоре бырйизы. - Кызьы шутэтскиськоды, ваньмон дыръяды мар кариськоды? - Арняяз одӥг пол ке но куасэн бызьылӥсько но волейболэн шудӥсько. Милям городысь директоръёслэн клубзы кылдытэмын, Лэсьтӥськонъя Чепечкой управленилэн спортзалаз ветлӥськом. Туж яра. Гужем сад-бакчаын дыры ортче, музъем ужез яратӥсько, кышноеным ваньзэ ӵош лэсьтӥськом, бакча сиёнъёс, картофка сяна, сяська будэтӥськом.7507 Удмурт Республикаысь Кун Кенеш но Правительство мур куректыса иворто КПСС-лэн Удмурт обкомезлэн промышленностья азьвыл секретарез Кардаполов Виктор Александрович 67-тӥ аресаз мыныку улонысь кошкем сярысь но ӵыжы-выжыосызлы но матысь адямиосызлы мур куректэмзэс верало. Удмурт Республикаысь калыклы баллонъёсын вузаськись газлэн дуныз сярысь Удмурт Республикаысь Тарифъёсъя но дунъёсъя кун комитетлэн Постановлениез Россия Федерациысь Экономикая министерстволэн 1999-тӥ арын 15-тӥ ноябре юнматэм "Калыклэн кулэяськонъёсызлы газлэн дуныз сярысь" 492 номеро приказэз но Удмурт Республикаысь Правительстволэсь 1998-тӥ арын 20-тӥ мартэ кутэм "Дунъёсты (тарифъёсты) кун ласянь радъянъя ужрадъёс сярысь" 176 номеро постановленизэ лыдэ басьтыса, Удмурт Республикаысь Дунъёсъя но тарифъёсъя кун комитет пуктэ: 1. Удмурт Республикаын калыклы вузаськись баллонъёсын газлэсь дунзэ тупатоно 4 манет килограммез понна, НДС-эз но лыдэ басьтыса. 2. Кужымзэ ыштэмен лыдъяно Удмурт Республикаысь Тарифъёсъя но дунъёсъя кун комитетлэсь 1998-тӥ арын 26-тӥ мае кутэм "Калыклы вузаськись газлэн дуныз сярысь" 3/1-Р2 номеро решенизэ. 3. Та постановление кужыме пыре 1999-тӥ арын 10-тӥ декабрьысен. Ужмурт Республикаысь Тарифъёсъя но дунъёсъя кун комитетлэн тӧроез О. М. Белобоков. Йӧлвыл шурын пыласьком Быръён нунал матэ вуыку, улонлэн огыр-бугырез уката но кужмоя. Таӵе учыр нырысетӥез ӧвӧл ни, соин ик адямиез уд паймыты. Газетъёслэн бамъёссы, телевизорлэн экранэз тырмытэмын огвыллем осконтэм вераськонъёсын. Депутатэ кандидатъёс ваньзы "тыршо" калыклэсь улонзэ майбыр, узыр карыны, Россилэсь данзэ, экономиказэ "вылӥе" ӝутыны. Валтӥсь партиос, "бур" но "паллян" нимаськыса, ог-огзы вылэ пож ву кисьтаны но уг кепырало. Тужгес телеэкран азьысь уг кошкыло "бур" партиысь кандидатъёс, кудъёсыз дасо аръёс ӵоже калыклы туж яркыт возьматӥзы ини асьсэлэсь "быгатонзэс", Россиез куашкатыса, калыкез чидантэм ултӥяса, демократической государство лэсьтон амал шедьтыса. Али нош ик соос тэльмыро, асьсэды шонерен лыдъяса, милемлы гинэ, пе, осконо улонэз "тупатыны". Ваньзылэн супыльтэмзы туж укша Ельцинлэн чугун рельса вылэ выдонэзлы, шурысь чипейлэн вуэз пожаса каньылэн чорыг кутэмезлы но басняысь ӟичылэн куакалэсь сырзэ сиемезлы. Мукетыз "паллян" шуон партия оскытыны тырше социализмез берен берыктыны. Таизлы но шуг оскыны, малы ке шуоно, та кык партиосысь депутатъёс, ньыль ар ӵоже ужаса, калыклэсь улонзэ пичи но ӧз умоятэ. Кытӥяз умой решение куто ке но, ачимъяськись президент палэнтэ. Озьы шуыны луоз, музъем ужез, пенсиос тыронэз радъян, уждун тыронэз тупатон но мукет решениос, калыклы кулэ луись ужрадъёс сярысь. Азьвыл быръем депутатъёсмы ньыль ар ӵоже дырзэс ортчытӥзы, шобретэз "бур" пала но "паллян" пала кыскаса. Огез кыске капитализме, мукетыз социализме. Быръем депутатъёсмы куспазы кенешыса, огкыл шедьтыса решение кутӥзы, асьсэлэсь гинэ улонзэс узырмытӥзы: коньдонэн, машинаосын, квартираосын, котеджъёсын, олокыӵе но льготаосын, тужгес ик "неприкосновенность" шуон кескич амалэн. Та амалэн лушкаськись депутатэз кыл кутонлэсь мозмытыны луэ. Соин ик трос миллиардъёсын узырмись олигархъёс, кивалтӥсьёс одно ик сюрыны тыршо депутатэ. Соос дасесь нырзэс тӥяны, чиньызэс вандыны, кышнозэс но огдырлы сётыны, ӵыжы-выжызэс, братсэс, калыкез вузаны, ултӥяны. Ужатэк, пӧсятэк поттэм кырсь коньдонэнызы кузьмаськыса, олокыӵе но кӧшкемыт амалъёсты куто. Чылкыт сюлэмо сьӧлыктэм адямиез сьӧдманы тыршо. Мынам малпамея, таӵе абыршак, акылес улонлы сюрес усьтыны, луонлык кылдытыны асьмеос юрттӥмы кадь, тужгес но - пенсионеръёс, дышетон, эмъян ужын ужасьёс. Пӧяса, кырсь, кескич вераськонлы мултэс осконэнымы, чик чакласькытэк туала визнаназ быръён дыръя куарамес сётыса. Самой со ик кулэ вал Президентлы. Америкаысь дядяйёслэн дышетэмзыя, Конституциез но тужгес кулэ луись законъёсыз сураса-пожаса, Президентлэн матысь эшъёсыз асьсэлы гинэ тупамон каризы, Россиысь калыкез палэнэ кельтӥзы. Тӥни озьы, асьмеос сак кариськытэк куарамес сётыса, асьмелэсь сылон улваймес ӵогимы но чорыг сямен президентлэн визнаназ сюримы. Выль депутатъёсмылэсь огвыллем верамзэс кылзоно ке, выль 2000-тӥ арысен Россиысь огшоры ултӥям калык "Зарни ярдуро, коньдон пыдэсо, йӧлвыл шурын" пыласькоз. Огез гинэ валантэм, кудаз шурын пыласьком - социализмлэназ-а яке капитализмлэназ-а? С. Савельев, ужысь ветеран. Удмурт Республикаысь Кун Кенеше депутатъёсты ватсаса быръёнлы йылпумъянъёс сярысь Удмурт Республикаысь Быръёнъя комиссилэн Постановлениез 1999-тӥ арын 19-тӥ декабре ортчизы Удмурт Республикаысь Кун Кенеше депутатъёсты ватсаса быръёнъёс 18 номеро Студенческой, 40 номеро Молодёжной, Глазов ёросысь 71 номеро, Селта ёросысь 93 номеро, Юкаменск ёросысь 98 номеро округъёсын. Ижевск городысь, Глазов, Селта, Юкаменск ёросъёсысь быръёнъя комиссиослэн Удмурт Республикаысь Кун Кенеше депутатъёсты ватсаса быръёнлы йылпумъянъёсъя протоколъёссэс но "Удмурт Республикаысь Кун Кенеше депутатъёсты быръён сярысь" Удмурт Республикалэн Законэзлэсь 80-тӥ, 81-тӥ ёзэтъёссэ лыдэ басьтыса, Удмурт Республикаысь Быръёнъя комиссия пуктэ: 1. Удмурт Республикаысь Кун Кенеше вить округъёсъя депутатъёсты ватсаса быръёнэз ортчемен лыдъяно. 2. Та постановлениез печатлано иворъёс вӧлмытӥсь ёзъёсын. Удмурт Республикаысь Быръёнъя комиссилэн тӧроез А. И. Тубылов. Удмурт Республикаысь Быръёнъя комиссилэн секретарез Г. С. Пчельников. Кун Кенешын Кылем арня вискын Кун Кенешлэн Тӧроез Александр Волков Москваын пумиськылӥз куд-ог министерствоослэн но ведомствоослэн кивалтӥсьёсынызы. Пумиськонъёс дыръя огкыл гожтэмын вал Ижевсклы 20 миллион манет коньдон висъян пумысен. Со чакламын бюджет чотын улӥсьёслы уждун тырыны. Та нуналъёсы коньдон вуиз ини, со ыстэмын городысь администрацие. Чехилэн Россиысь посолэзлэн Лубоша Добровскилэн ӧтемезъя, Александр Волков Москваысь кошкиз Прагае. Отын вераськон мыноз Удмуртиын "Шкода" автомобильёсты поттонэз радъян сярысь. Удмурт Республикаысь Кун Кенешлэн пресс-службаез. УДМУРТ РЕСПУБЛИКАЛЭН ПРОКУРАТУРАЯЗ Выт бичан ляб мынэ Выт бичанъя законъёсты тӥян учыръёс пумысен Удмурт Республикаысь Прокуратуралэн коллегиез йылпумъянъёс лэсьтӥз. Пусъемын, вытъёсты бичан сокем ик ӟеч уг мыны шуыса. Выт бичась ёзъёс тырмыт уг ужало законъёсты тӥясьёсын нюръяськон понна, соин ик куд-ог коньдоно удысъёс бюджетэ налогъёс тыронлэсь палэнскыны туртто. Налогъёсъя полицие кылем арын сярысь кык поллы ӧжытгес постановлениос вуэмын выт тырымтэослэсь ваньбурзэс талан сярысь. Нокыӵе мугъёстэк 16 сыӵе вазиськонъёс дугдытэмын, куд-огъёсызъя бюджетэ 50 миллион манет тыр коньдн пыртыны луысал. Пунэме кылем предприятиослэсь тыронъёссэс берыктон озьы ик пумозяз уг быдэсъяськы. Туннэ нуналлы ӝыныез гинэ сыӵе предприятиос ас тыронъёссылэсь мозмытскизы. Бере кылись предприятиос пумысен одӥг постановление но лэземын ӧвӧл Ижевскысь Индустриальной ёросысь, Кияса, Каракулино, Воткинск, Сарапул, Кизнер, Грах, Можга, Вавож ёросъёсысь выт бичанъя инспекциосы. Вераны кулэ: туэ ар ӵоже выт бичась ёзъёслэн судъёсы вазиськемзыя, ужамысь дугдытэмын 300 предприятиос но организациос, документъёссы эскеремын 318 налог тырисьёслэн. Берло куинь ар ӵоже судъёсы 50 вазиськон ыстэмын ляб выт тырисьёсты банкротэн ялон сярысь. Но со туж ӧжыт, угось республикаямы 25,5 сюрс лыдэ басьтэм предприятиос пӧлысь ньыльмос люкетэз выт бичась ёзъёсы нокыӵе отчётъёс уг лэсьто. Со сяна, сюрслэсь тросэз предприятиос барышсэс ватыса возё, нош 600-лэсь тросэз предприятиос но нимаз ужбергатӥсьёс лыдэ басьтымтэ но ышем паспортъёсъя ужало. Озьыен, выт бичан удысын законэз тӥян учыръёс данак ке но, кыл кутытон уж кулэезъя пуктэмын ӧвӧл. Кылсярысь, налогъёсъя законэз тӥям понна трос аръёс ӵоже ини туж ляб кылзэс юало должностен адямиослэсь, соосты штраф тырытон улэ кыскон 74 процентлы гинэ быдэсъяське. Выт тыронэн герӟаськем ужъёсты ляб чакласа возё республикаысь эскерись но правоосты утись ёзъёс но. Соин ик али сомында кылдэмын ни пӧрам бумагаосъя ужась предприятиос но адямиос. Соос олокызьы но выт тыронлэсь пегӟыны выро, законэз тӥяса асьсэлы льготаос басьтынв таршо. Выт бичан удысын йыружъёс но йыло. Кылем арын Вытъя полиция 79 уголовной уж ӝутӥз ке, туэ укмыс толэзь ӵоже со лыдпус 187-озь вуиз ни. Государстволы изъян 22 миллион манет тыр ваемын. Вытъя полицилэн ёзъёсаз трос гинэ пумиськыло законэз тӥян но ужез быгатытэк нуон учыръёс. Дыраз лыдэ уг басьтӥсько йыружъёс сярысь вазиськонъёс но ивортонъёс, туж трос дугдытэмын уголовной ужъёс, следствиез нуон но ляб радъямын. Йыружъёс сярысь лэсьтэм вазиськонъёс куд-ог учыръёсы вылтӥз-вылтӥз гинэ эскеремын, нош уголовной ужъёсты ӝутон сярысь решениос ӵем дыръя юри малпам мугъёсъя кутэмын. Йылпумъянъёс лэсьтыса, Удмурт Республикаысь Прокурор В.М.Походин пусйиз: городъёсысь но районъёсысь прокуроръёс выт бичан удысэз кулэезъя чакласа уг возё, чурытэсь куронъёс уг пукто. Законэз тӥян учыръёс шараяськем бере но прокуроръёс выт бичась ёзъёслы уг юртто йыруж лэсьтэм муртъёсты кутыны но кылзэс юаны. Таяз арын Ижевскысь Октябрь ёросысь но Глазов ёросысь прокуроръёс гинэ бадӟым уж нуизы выт тырисьтэм адямиосын нюръяськон понна. Коллегиын меӵак ужрадъёс чакламын выт бичанъя законодательстволэсь быдэсъяськемзэ прокуроръёс ласянь юнгес эскерыса возён сярысь. Прокуроръёслэн та удысъя ужамзылы йылпумъянъёс лэсьтӥськозы бюджетэ но бюджетэ пырисьтэм фондъёсы вытъёс люкаськемъя. Со сяна, решение кутэмын Россия Федерациысь Вытъя службалэн министерствоезлэн Удмурт Республикая управленияз выт бичанъя законодательствоез тӥян учыръёс пумысен ивортыны но Удмурт Республикалэн Кун Кенешаз но Правительствое со сярысь гожтэтъёс лэзьыны. Л.Хохрякова, Удмурт Республикаысь Прокурорлэн юрттӥсез. МУКЕТЪЁС МЕД ЛОБӞОЗЫ МАРСЭ, яке - Д.А. Яшинлэн лирикаез пумысен эссе-малпаськон Толсурлэн 24-тӥ нуналаз 70 арес тырмысал дано удмурт поэтлы, тодосчилы но дышетӥсьлы-доцентлы Даниил Александрович Яшинлы. Ӝожомыса верано луэ: тросэз кужмо усточиосмы сямен ик со но пичи дырысен атайтэк кылиз но улонысь дырызлэсь вазь кошкиз. Сыӵе вал, шуыны луоз, ХХ даурысь быдэс удмурт литературалэн адӟонэз. Трос пӧртэм удысъёсын азинлыко ужаз Даниил Александрович. Доцент луыса дышетӥз пединститутысь но университетысь студентъёсты, пыриськылӥз пӧртэм калык куспо конгрессъёсы; тодосчи луыса эскерылӥз удмурт калык кылбуретэз но арлы быдэ поталляз фольклор экспедициосы; кылбурчи луыса гожтӥз дас одӥг кылбур книга но кема дыр ӵоже кивалтӥз литературно-творческой кружокен. Татысь берло потӥзы синмаськымон кужмо гожъяськисьёсмы. Эшшо но трос мукет удысъёссэ висъяны луысал на: критик, ӟеч атай, маскарчи... Берлоез пумысен огъёзъёсыз эшлыко шаржъёс но гожъяллязы. Мынам но, та чуръёсты гожтӥсьлэн, улонэ, егит дыры трос ласянь герӟаськемын Д.А.Яшинэн. Даниил Александрович сюлмаськемен, кызь арес дыръям ик печатламын вал кылбур книгае (литкружокмы понна со бадӟым вормон луиз) . Быгатыса кивалтӥз диплом уженымы. Со сӥземын вал Н.А. Некрасовлэн удмурт кылэ берыктэмъёсызлы (азьвыл соос профессорен Б.О.Корманэн ӵош вал, но собере огназ кылёно луиз); Д.А.Яшин тырше вал монэ Венгриын, Петер Домокош профессор дорын , дышетыны, но тоталитаризмен сэрен, секыт могӟетъёс кылдӥзы. Озьы ке но, Ленинград кун университетысь аспирантурае пыреме кыкмы понна но бадӟым вормон луиз. Сыӵе яркыт улон сюресысь (биографиысь) учыръёс сярысь мон кӧня ке гожъяй ни, азьланяз но уг вунэты, дыр. Но туннэ мынам мукетыз сярысь вераськеме потэ. Угось ӝоген йылпумъяськоз ХХ даурмы - дунне калыклэн историысьтыз одӥгез тужгес но шимес вакыт. 70 аръем юбилей сярысь вунэтытэк, меӵак юам но малпаськем потэ: кыӵе инты басьтӥз та даурын Д.А.Яшинлэн лирикаез? Соин валче азьпал радэ потозы 1950-тӥ1970-тӥ аръёс, кытын, мон сямен, Д.А.Яшин но аспӧртэмлыко инты басьтэ. Зэмос лулчеберетлэн куронъёсыз туж бадӟымесь но туж вылӥесь - литературалэсь историзэ гожъясь тодосчиос сое умой тодо. Мынам но та куронъёсты лазегомытэме уг поты. Озьы ке но, удмурт литературамылэсь кык томъем "Историзэ..." гожтӥсь авторъёсын ченгешеме потэ ик, уката ик - отын Д.А.Яшинлэн лирикаезлы укыр пичи инты висъямзы пумысен... ХХ даур удмурт поэзиысь ньыль нимез азьпал радэ ӝутӥз: Куӟебай Гердэз, Ашальчи Окиез, Михаил Петровез но Флор Васильевез. Та - зэмлык. Кин ке понна � курыт зэмлык: солэсь палэнэ уд ватскы. Лыдӟисьёсмы, мыным мытылыса, юаны быгатозы: нош кытын С.Широбоков, Н.Байтеряков, В.Романов, А.Белоногов, М.Федотов но трос мукетъёсыз? Шат ӧй луысал умойгес, ньыль нимез интые, ог дас кыксэ висъясалмы ке (угось 12 - трос ласянь умой лыдпус, арын но 12 толэзь!) Соку со нимъёс пӧлы Д.А.Яшин но пырысал. Бен, нырысь-валысь мон но таӵе тодмо сюрестӥ мыныны дасяськисько вал. Но берло юай: та амал ӵапак зэмлыклэсь пегӟон ӧвӧл меда? Аслэсьтым ачим но ӧй юа кадь � мынэсьтым асьсэос дышетӥсьёсы юазы. Соос пӧлын - Даниил Александрович но. Мон мур малпаськонэ уси. Асьмеос малы ке но юбилейёсты ушъяны но данъяны дышетэмын. Нош уг луы шат адямиос сямен малпаськыны, югдурез лачмыт сэрттыны-пертчыны? Озьыен, кыӵе инты басьтэ Д.А.Яшинлэн лирикаез ХХ даурысь удмурт кылбуретын? Йылпумъянъёс берлогес лэсьтомы, нош али та пумысен кӧня ке малпаськытӥсь "котыръянъёс". Нырысь ик, Д.А.Яшинлэн гожъяськыны кутсконэз тупаз сяськаяськись даурмес данъян вакытэн. Таӵе чуръёс вылын егитъёсты но дышетылӥзы.Кылсярысь: "Сквозь века на века, навсегда, до конца: - Коммунисты, вперед! Коммунисты, вперед!" (А.Межиров, 1947), "Если бы парни всей земли" (Л.Ошанин), "Убейте войну, прокляните войну, люди земли! Мечту пронесите через года!.." (Р.Рождественский, 1951), "Вамышты партиен ӵош!" (М.Петров) но трос таӵе выллем. Мон уг вераськы, та поэзия урод маке луэ шуыса. Чик но уг. Пусъеме потэ: та вакытэ кылдӥз мукетыз но литература (тодады вае Б.Пастернаклы Нобель коньдон кузьымез сётонэн сэрен кылдэм югдурез). Но егитъёсты сыӵе гожъямъёслы пумит узатылӥзы, гожъяськыны музон штампъёс-кабъёс вылын дышетылӥзы. Соин ик кышкано, Д.А.Яшинлэн кылбур книгаосаз партиез, политикаез, коммунизме сюресэз данъясь чуръёс ӵем гинэ пумиськыло шуыса. Шонерзэ верано ке, сыӵе кылбуръёсын ай социализм идеология сокем зол уг но кузёяськы, макем � вашкала дауръёсы кылдэм фольклорно- утопической дунневалан но дуннешӧдон (со сярысь ми гожъямы ни вал С.Ф. Васильевен ӵош "Под тенью Зэрпала" книгаямы). Кыкетӥез. Д.А.Яшин кылбурчи ӧй луысал ке, али удмурт поэзиын тросэз синмаськымон текстъёс озьы ик кылдэмын ӧй луысалзы, шӧдске. Кылсярысь, В.Романовлэн "Уг тодӥськы, ку синмаськи тыныд..." кылбурез вань. Отын пияш- студент нылмуртлы конспектсэ валэктыны тырше - ньыль пол но, вить пол но: "Нылмурт сюлмын соку валад тон ваньзэ, Нош мон - философ - номырзэ ӧй вала". Тае лыдӟыса, Д.А.Яшинлэсь "Ортчисьтэм егит дыр" (1959) книгазэ тодӥсьёс соку ик шедьтозы таӵе чуръёсты: Учебникез мон лыдӟисько шара, Секыт интыоссэ валэктӥсько. Нош тон, ялан пальпотыса шорам, Пал кыл но юатэк кылзӥськиськод. ...Нырысь экзаменлы дасяськыны Сётысалзы на ке эшшо нунал! ("Нырысь экзамен азьын") Д.А.Яшинлэн та кылбурез ӧй луысал ке, кызьы пӧрмысал меда В.Романовлэнэз? Одӥг гинэ учыр Ф. Васильевлэн лирикаезъя. Куке Флор Иванович вера кык пӧртэм дыр сярысь ("Сонет" но мукет кылбуръёсъя), - огласянь, туала техникалэн ӝоглыкез, мукет ласянь, лымы вылтӥ гылӟись дӧдьы � соку, мон сямен, поэт споръяське Е.Евтушенколэн "Телега и ракета", Д.Яшинлэн "Бадӟым вамышъёсын", мукетъёсызлэн таӵеесьгес кылбуръёсынызы. Споръяськонзылэн мугез таӵе: 50-тӥ аръёслэн пумазы "эстрадной" лирикалэн куронъёсызъя Д.Яшин, Е.Евтушенко но соослэн огъёзъёссы выль техникалы сюлмысьтызы паймо. Нош Флор Васильев 60-тӥ аръёслэн пумазы, куке азьпал радэ "шыпыт" ("тихая") лирика потэ, данъяны кутске мукет ӝоглыкез, мукет мертэтъёсты. Кин ке шуоз: оло нош, Ф.Васильев но В.Романов, кылбуръёссэс гожтыкузы, Д.Яшинлэн чуръёсыз сярысь чик но ӧз малпаське? Озьы луыны быгатэ кадь, но ум вунэтэ: кыксы ик � Ф.Васильев но, В.Романов но � егит дыръязы Яшинлэн литературно-творческой кружокез пыр потӥзы, дышетӥсьсылэсь поэзия сярысь малпанъёссэ соос умой тодо но шӧдо вал. Мукет ласянь, наукаын али бадӟым инты басьтыны кутске "интертекст" валатон. Солы луыса, вылӥын верам примеръёсты артэ пуктыны луэ соку но, ку авторъёс ог- огзылэсь гожъямъёссэс ноку но ӧз на адӟылэ. Куинетӥез. Вакытъёс ортчемъя, литература шоры учконъёс но зол воштӥськыны быгато. Туннэ нуналлэн синмыныз мон висъяй Куӟебай Гердэз, Ашальчи Окиез, Михаил Петровез но Флор Васильевез. Нош кин тодэ: уз быгаты меда матэктӥсь ХХИ даур ваньзэ йырчукин берыктыны? Соку мукет нимъёс шуак висъяськыны быгатозы. Одӥг гинэ чакласькон, яке - гипотеза. Шуом, ХХИ даурысь "выль" адямилэн пушдуннеяз бадӟым инты басьтыны ӧдъялоз юмор (компьютеризацилы ӧчкарыса сямен, компьютер ас кожаз юмор кылдытыны уг быгаты). Озьы луиз ке, сыӵе аспӧртэмлыко юмор-дауре Д.Яшинлэн кылбуретэз, котьма шу но, серекъян ласянь вормоз ваньзэс ик - вылӥын висъям ньыль классикъёсмес. Дунне историлэсь кожъёссэ но кожонъёссэ тодыны уг луы. Ньылетӥез. Гипотезаё дауръёсты утчатэк но удмурт лирикалэн сюрес вылаз кылдэмын сыӵе инты, кытын Д.А.Яшин, мон сямен, котькинлэсь зол висъяськыны кутскылэ. Со - сыӵе дыр: улонысь кошкиз Михаил Покчи-Петров, нош Флор Васильевлэсь гожъямъёссэ дунъятозь, кӧня ке ар вал на. Иське, со луэ 1960-тӥ- 1966-тӥ аръёсы, шонергес вераса, 60-тӥ аръёслэн кутсконысенызы шорозязы (поэзия шонер лыдпусъёсты уг чида!). Та вакчи дырез ик "Яшинлэн вакытэз" ниманы луэ. Мар бордын-о солэн пӧртэмлыкез? Россиысь литератураын 50-тӥ аръёслэн пумазы зол чузъяськыны кутско егит Е.Евтушенколэн, А.Вознесенскийлэн, Р.Рождественскийлэн гожъямъёссы... Соосты ӝоген шара (громкая) яке эстрадной лирика шуыса нимало. Таӵе кылбуретлэн аслаз изъянъёсыз вал. Вал аслаз кыскись кужымез но. Ваньмыз со шӧдӥськиз Д.А.Яшинлэн творчествояз но. Удмурт литературае шара лирикалэсь шӧмзэ но чузъяськемзэ умой вуттӥз Михаил Покчи-Петров. Таиз выль улонлэсь шокамзэ "Дор", "Тубат", "Кык сяськаос", "Значок" но со выллемесь кылбуръёсаз пыӵатӥз. Но Михаил Покчи- Петров шуак бырыны шеде, трос бадӟымесь малпанъёсыз быдэсмытэк кылё. Соосты азинто С.Широбоков, А.Бутолин, А.Клабуков, Д.Яшин но мукетъёсыз. Али, музон нимъёсты ултӥятэк, мынам возьматэме потэ, Даниил Яшинлэсь лириказэ асьмеос тырмыт ӧм дунъялэ на шуыса. Угось ӵапак со кужмо азинтэ шара литературалэсь куронъёссэ но лирикалэсь "ӝуась тылзэ" берло Флор Васильевлы сётэ. "Эстрадалэн" тодметъёсыз критикаын тырмыт но умой гожъямын ни. Со тодметъёс егит Яшинлэн кылбуретаз но чебер адӟисько. Тани кӧняез ке. Кылбуръёсын бадӟым инты басьтэ вазиськон - кылзӥсьёслы. Озьыен, кылдэ огазеясь ми (мон валатонлы пумит): Вай, утчатэк шыпыт интыосты... ("Вамыштоно ке � мед кылёз пытьы"). Нош соосыз, Кинъёс ӧвӧл ни асьмемын туннэ? (татын юан пус - ? - кылзӥсьёслы) ("Адямиос пӧлы кылён понна"). Со сярысь юаськод бере тон, Кутскиськод ни, вылды, гажаны. ("Ку кутске яратон"). "Эстрада" лирикаын нимысьтыз саклык висъямын кылбурлэн пумызлы, солэн эффектэз мед луоз: Вамыштоно ке -- мед кылёз пытьы, Вазиськоно ке � мед кылёз куара. ("Вамыштоно ке � мед кылёз пытьы") Бен! Кулыны но быгатэм кулэ, Адямиос пӧлы кылён понна. ("Адямиос пӧлы кылён понна") Ужасько бере калык понна, Космосэ шат лобӟозы монтэк? ("Мынэсьтым ӧз пӧрмы космонавт") "Пичи родинаез" но "бадӟым родинаез" артэ пуктоно ке, эстрадникъёс, "шыпыт" лирикъёс сярысь, вылӥгес дунъяло кыкетӥзэ; быдэс СССР-ез басьтэм сяна, соос кунгожсьӧр дуннелэсь но уг муртало (тодамы ваём Михаил Покчи-Петровлэсь "Дор"- зэ). Та пумысен тунсыко луо Д.Яшинлэн кылбуръёсысьтыз гидронимъёс но: Нева, Урал, Волга, Ока, но со дыре ик: Дунай, Миссисипи, Ганг, Нил (мукетгес синмын учкыса, та сярысь гожъяз ни Л.Е.Кириллова). Географилэн быдэс дуннеозь но космос-инсьӧрозь паськытамез Д.А.Яшинлэн кылбуръёсаз музон тодметъёсъя но адӟиське. Но "эстрадалэн" кужымез сыӵе поэтической амалъёс бордын гинэ ӧвӧл. "Шара" лирикаысь умойёсыз текстъёс ас вакытсылэсь тодметъёссэ, сюлмаськонъёссэ, огшоры адямиослэсь пуш улонзэс чебер но мур возьматӥзы. Ӵапак соиз понна мон тужгес но вылӥ дунъясько Д.А.Яшинлэсь 60-тӥ аръёсысь лириказэ. Отын возьматэмын "лыз косынкаен" крановщица но колхозысь егит ныл , бригадир Зина. Со ю-няньлэсь кисьмамзэ эскерыны потӥз ("Со таӵе ик ныл", "Музъемлэн кузёез"), Иж заводысь сменалэн воштӥськемез, танклэн война бере бусыын гырыса ветлэмез, Ижкар шоры ӝутскем телемачта. Татын ик - удмурт студентъёслэн институтэ пырыны курадӟемзы но экзаменъёс азьын сюлмаськонъёссы ("Сюрес вожын", "Экзамен азьын"). Таӵе чуръёсын, мон сямен, 60-тӥ аръёслэн "лулзы" трослы мургес адӟиськиз, шуом, С.Широбоковлэн "Россия" сузьетаз яке Г.Сабитовлэн "Нош вуиз тулыс" кырӟаназ сярысь. Бен, татыназ монэным споръяськисьёс шедёзы, дыр, мон - дась. Нош мар луиз 60-тӥ аръёслэн кыкетӥ ӝыныязы, малы Д.Яшин, вылӥын вераммыя, поэзилэсь "ӝуась тылзэ" Флор Васильев кие кельтӥз но соин ӵошатскыны ӧз ни тыршы, ас лёгем сюрестӥз ик лачмыт вамыштӥз? Таӵе юанлы ачиз Даниил Александрович пальпотыса тазьыгес верасал, дыр: "Мукетъёс мед лобӟозы Марсэ!" Тазьы со шуиз ни вал "Мынэсьтым ӧз пӧрмы космонавт" кылбураз. Отын пусйиз: котькин ас удысаз тыршыны кулэ. Ужпум со бордын гинэ ӧвӧл, шаерамы, шара лирика интые, шыпытэз лыктыны кутскиз, вормиз нырысетӥзэ. Ужпум та бордын но: Д.А.Яшин трос дырзэ но кужымзэ сётыны кутске наукалы. Ӵошатэ:1963-тӥ-1964-тӥ аръёс куспын со куинь кылбур книга печатла. Собере мукет ӧре выже: 1965-тӥ арын печатлаське "Удмуртская народная сказка" монографиез, 1967-тӥ арын кылтодон наукаосъя кандидат луэ, диссертацизэ Эстониын, Тартуын, уте. Флор Васильев но Даниил Яшин куспысь верано югдур тодэ вайытэ аслэсьтым но улонсюресысьтым одӥг учырез - таиз ӵапак озьыгес ик ортчиз. 80-тӥ аръёслэн шорозязы ми аспӧртэмлыко ӵошатским уйпалась эшеным Михаил Федотовен. Уг тодӥськы, но мыным потэ вал, Мишалы мон уг сётскиськы шуыса. Но собере мон кутски кандидат диссертациме гожтыны-радъяны но ӧй шӧдылы, макем зол но ӝог ортчем монэ лирика удысын М.Федотов. Аслэсьтым юасько: нош мон наукае ӧй мынысал ке, кыӵе меда югдур луысал? Таӵе ик юан сылӥз, дыр, Даниил Александрович азьын но. Бырйиз но шуиз: огвакытэ кыкез ик та ӧръёстӥ кошкыны кулэ. Ужпум - ас калыкедлы пайда лэсьтон бордын, кин ке сьӧры уиськон яке кинэн ке тэргаськон бордын ӧвӧл. Озьыен, Д.Яшин ас лирикаяз но аслаз лирикаеныз поэзилэсь кык тулкымзэ (шара - шыпыт) герӟаз. Но гожъямъёсаз нырысетӥезлэн тодметъёсыз, котьма ке но, валтӥсь луизы ("Зэрпал лёгет", "Странамылэсь данзэ бурдъязы" - Т.Тихоновалы но В.Медведцевлы сӥземын, "Мон Уралысь", "Маке но со порма" но мукет), озьы выжыосыныз поэт 60-тӥ аръёслэн кутсконысьтызы эрико вакытэ егит, чебер дуннеяз кылиз кадь. Но шуиськом ке, 60-тӥ аръёслэн кутсконзы"Яшинлэн вакытэз луэ, лыдэ басьтыны кулэ мукетсэ но. Та вакытэ удмурт поэт кылдытэ сыӵе юморез но сатираез - таиз удмурт лирикаез (быдэс литератураез ӧвӧл, лирикаез!) азинтонын верантэм бадӟым пайда вае. Юморлэн кулэлыкез тани мар бордын вал. Юморлы но сатиралы трос валэктонъёс сётъямын ни вал, мынам али соос пӧлысь одӥгзэ (выльзэгес но валамонзэгес) висъяме потэ. Кин ке укыр вылэ тубыны, лобӟыны турттэ ке, юмор сое музъем вылэ васькытэ; озьы ик кин ке но укыр муре, мурдалае васькыны тырше ке, юмор сое ӝутэ но музъем вылэ серекъяса пуктэ. Иське, Серекъян (музъем выл) - со вылӥ ӝуждала но улӥ мурдала куспын. Лирикаын 50-тӥ аръёс - со вылӥе ӝутскыны тыршон, улонмылэсь чеберзэ данъяны вырон, коммунизме ӝужаса "тубон". Нош 60-тӥ аръёслэн пумысьтызы шыпыт лирика - адямилэн лул- сюлэмаз пырыны тыршон, отысь вашкала инъетъёсты утчан, философилэн валатонъёсызлы нимысьтыз саклык висъян. Вакчияк верано ке, кылбурчи азьло вылэтӥ, инметӥ, лобаса ветлэ вал, табере пыдло, мурдалае, пырыны кутске. Соос вискын (ӵап 60-тӥ аръёслэн шоразы) одно ик "музъем вылэ" лэзькыны кулэ вал � соку тунсыко луо ӟеч сиськонэн, кӧланэн, азьтэмъяськонэн, юмоке сюронэн герӟаськем ужпумъёс. Та удысын - мукетъёсыныз артэ - трос лэсьтӥз Даниил Яшин но. Солэн "Эшъёс ке вань" (1963) книгаяз вань нимысьтыз сузьет - со удмурт писательёслы, соосты "музъем вылэ" васькытонлы сӥземын: А.Волковлы, А.Клабуковлы, А.Лужанинлы, М.Воронцовлы, Г. Сабитовлы, Н. Васильевлы, С..Перевощиковлы но мукетъёсызлы. Кылсярысь, Лужанинлы сӥзем чуръёсаз Д.Яшин шуэ, геройёсты ортчем вакытъёсысь шедьтыны секыт ӧвӧл, малы-о уд утчаськы сыӵе геройёсты туала улонысь, туннала нуналысь? Андан пӧзьтӥсь но скал кыскись - Выль геройёс ӧвӧл ичи. Эн вунэты та эшъёсыз Юнгес кырӟа, кылбурчи! (Афанасий Лужанинлы) Кызьы адӟиськом, Д.Яшин юромо тодэ вайытэ Лужанинлэсь "Осотовецъёс" поэмазэ, озьы верамезлэн индылон пуштросэз шудон-серекъян амал сьӧры ватске. "Ыркыт тӧл" (1964) сборникын инбамысь музъем вылэ васькытон ужпумлы сӥземын "Кылбур эскерон дыръя" но "Егит критиклы" серемес кылбуръёс. Таосаз "визьмо" критик егит гожъяськисез кылбурзэ эшшо но вакчиятыны косэ тодытэк: соизлэн гожтэмез � кык чур гинэ (!); мукетаз, "марым" кыл сьӧры ватскыса, критик аслэсьтыз куронъёссэ но валэктыны уг быгаты. Пумен-пумен Д.Яшин серекъян удысэ выжытэ кышномурт - пиосмурт кусыпъёсты но ("Улон � колёса...", "Огпол кильтрес нылмурт вераз мыным..."), кӧт тыронэз суреданэ но ("Студентъёс колхозын", "Кин кызьы гожтысал"). Тани кызьы "мурдала" (визьмо луон) но "ӝуждала" (чебер луон) вуттэмын "музъем вылэ" Д.Яшинлэн "Огпол кильтрес нылмурт вераз мыным..." юморескаяз: Огпол кильтрес нылмурт вераз мыным: - Басьты монэ кышно: ӧвӧл на бер. Луоз, - шуиз, - вордскиз ке пиналмы, Тон кадь визьмо но мон кадь ик чебер. Но "визьмолыклэн" но "чеберлыклэн" артэ вуэмзы мукет герӟет но кылдытыны быгатэ, шуэ Яшинлэн героез. -Тонэ уг быгатӥськы басьтыны, - Лушкем гинэ солэн пеляз вази. � Вордскиз ик ке, луоз, дыр, пиналмы Ачим кадь шуш но тон кадь ик шузи. Озьыен, Яшин-юморист та но мукет кылбуръёсаз "вылэтӥ лобисько" кожасьёсты музъем вылысен кукъёстӥзы кырме но возьматэ: бурдъёсыныд тӧлвуко кадь гинэ уд шонаськиськы меда? Озьы ик "муре пыри" кожасьёсты сильсьӧртӥзы музъем вылэ ӝутэ но возьматэ, мурдалае чик но пырымтэ ай, нош берпалыд воксё кыре мычиськемын кадь! Соин ик валамон, малы Д.Яшинлэн син шораз нырысь ик кылбурчиос мертчо, угось солэн юморез 60-тӥ аръёсысь литератураын выль ӧръёсты утчанлы но вуж кабъёсты куашкатонлы сӥземын. Йылпумъяса тазьы вераны луоз. Д.А.Яшинлэн лирикаез тырмыт эскеремын ӧвӧл на. Туала выль амалъёсын гинэ ӧвӧл - тодмо луэм азьвылъёсыныз но. Марзэ выльзэ- бадӟымзэ лэсьтӥз со лирика-кылбурет удысын? 60-тӥ аръёслэн кутсконазы эстрадной (шара) лирикаысен выль тулкымозь герӟет-выж лэсьтӥз: выль малпаськон амалэн кылбурасьёсты дасяз, ачиз гожъяськиз, вуж кабъёсъя ужасьёсты серекъян амалэн ӵушказ. Михаил Покчи-Петров бырем бере, удмурт кылбуретын кылдылэ сыӵе дыр - сое али меӵак Яшинлэн вакытэз ниманы луэ ни кадь. Даниил Александрович аслыз дан понна ноку ӧз уиськы, солы трос пол дуногес потэ вал вӧзаз мукетъёсызлэн ӝужамзы но азьлане мынэмзы. В.Шибанов, Удмурт кун университетысь доцент, кылбурчи. БЫРЪЁН АЗЬЫН Малы кулэ асьмелэнэз? Мон тазьы малпасько: Кун Думае коть зарни адямиез бырйы, со огназ асьмелы умойзэ лэсьтыны уз быгаты. Маке со пӧрмытоз соку гинэ, куке кужымзэ огазеялоз ӧжытсэ 10-20 со кадь ик малпась мукет депутатъёсын. Россиын ӟучъёслэсь ичи лыдъем калыкъёслэн кызё пала республикаоссы. Ваньмыз сямен отысь выжы (коренной) калыкъёс депутатэ быръё асьсэ муртэ. Удмуртъёс гинэ, возьыт вераны, йырчукин лэсьто кадь. Ӟучез, эшшо Москваын улӥсез, бырйыны туртто. Татарстан, Башкортостан быдэн 4-5 бигер, башкир депутат быръёзы. Со сяна, кӧня ке ӟучтэм депутатъёс сюрозы областьёсысь. Ӟуч депутатъёс пӧлын но сюрозы на пичи калыкъёслэсь кулэяськонъёссэс валасьёс. Тыршизы ке, сыӵе депутатъёс огазеяськыса быгатозы пичи калыкъёслэсь правооссэс тӥянлы, шымыртонлы пумитъяськыны. Сыӵе ужлэн кулэез туж бадӟым. Пичи лыдъем выжы калыкъёс вадьсын уго ӝужа бадӟым кышкытлык. Юристлэн пиез, кызьы нимало одӥг политикез, кадь малпасез Кун Думаын ӧжыт ӧвӧл. Пусъём тани кӧнязэ ке ичи лыдъем калыкъёслэсь правооссэс тӥян амалъёсты но учыръёсты. Думаын пумен золгес верасько губернизация сярысь. Озьы каризы ке, али огазьынгес улӥсь калыкъёс сюрозы бадӟым губерниосы яке люкиськозы. Собере каллен удмуртъёс, поръёс, бигеръёс сярысь кыл поттылыны мугез но уз луы ни, соосты воксё вунэтозы. Удмуртъёсты тазьы эксэй дыръя "ватӥзы, быдтӥзы" ни вал ук. Тау Луппов тодосчилы - со удмуртъёсты выльысь "усьтӥз" дуннелы. Ум вунэтэ, кызьы кокчало, быдто чечен калыкез. Куд-огез сьӧсь мылкыдзэ меӵак вера: чеченъёсты быдтыны луоз эмъяськон (здравоохранение) пыр но. Таиз амал атомной бомбалэсь но шимесгес ук. Бигер, якут, чечен, удмурт музъемез "русские земли" шуо. Нош кытчы пыриз меда та калыкъёслэн музъемзы? Выжы калыкъёсты сылмытон, быдтон вылысь ик кутскемын национальностез возьматӥсьтэм паспортъёс сётъян. Озьы ик, мон малпамъя, музъемез товар карыса вузан-басьтон но удмуртъёс понна ваучер кадь луоз. Музъеммы пыд улысьтымы гылӟоз - удмуртъёс пӧлын узыръёс трос ӧвӧл ук. Россилэн парламентаз быдтэмын Национальностьёслэн Советсы, СССР дыръя со вал. Сыӵе ёзэз ӝегатскытэк кылдытоно, отчы вань калыкъёс пӧлысь депутат быръёно. Со пыр гинэ ичи лыдъем калыкъёс быгатозы правооссэс утьыны. Асьме Кун Кенешын но югдурез воштоно вал. Макем трос луозы отын зэмос удмурт депутатъёс, сокем соос зӥбетлы, ултӥянлы (ум ни алдалэ асьмеды асьмеос, со ӧвӧл шуыса) пумит пайдаёгес нюръяськыны быгатозы. Бырйысалмы ке таяз Кун Кенеше ог 6-7 зэмос удмуртъёсты, (луонлыкмы вал тросгес но), П. Вершинин мукет интыын луыны быгатысал. Илья Кабанов, Ижевскын улӥсь. ТАУ КАРОН Паймытӥзы Таиз ар милемлы, арлыдоослы, кузьым кадь вал - со ялэмын вал угось арлыдоослэн аренызы. Таин валче трос ужрадъёс но ортчылӥзы кадь. Тани одӥгаз пумиськонэ ми доры вуылӥзы Юлия но Виталий Кузьминъёс чебересь но сэзесь нылъёсынызы. Люкаськемъёс пӧлын арлыдоос гинэ вал бере, соос та семьяен нырысьсэ пумиськизы. Бубылилэн кадь чебер костюмъёсынызы, уӵылэн кадь кырӟанъёсынызы Кузьминъёс калыкез паймытӥзы. Табере мон ураметӥ ортчыкум, арлыдоос ӵемысь юало: "Малы, пе, соосты уг возьмато телевизор пыр? Малы шер кылыны луэ соослэсь кырӟамзэс радиоысь но?". Калыклэсь куронзэ быдэстыса, Кузьминъёслэн семьязылы газет пыр тау каремзэс вераме потэ. Азьланяз но мед быгатозы калыкез паймытыны, мальдытыны, сюлэмазы тылгизьы пыртыны. Оло, куке-соку та семья сярысь телевизор пыр ӟеч-ӟеч передача возьматозы. Р.Моторина. Завьялово черкогурт. Жаг нуны кема улэ Та чуръёсме сӥземе потэ яратоно атаелы Первушин Анатолий Александровичлы. Кӧня чидан, куректон-шумпотон пыр потэмын 75 аресаз вуытозь. Вордэм пиналъёссэ тодаз вайыса, песянае синвуаськыса мадьылӥз: - Мынам пинал вордон шумпотонэ кема ӧз кыстӥськылы. Оломалы нуныосы лябесь вордскылӥзы, висьыса кулылӥзы. Укмыс пи вордӥ, соос пӧлысь куинез гинэ пыдъяськизы, та бугрес улонлэн ӧраз вамыштӥзы. Атаед - жаге куштэм нуны, озьы шуо вал кураськись пырыку, пыд азяз понэм нуныез. Кулонлэсь, пе, мед утиськоз, таза мед будоз. Кураськисез вань сюлмысь утялтыса, сиён, коньдон сётыса келяло вылэм. Зэм но, оло кураськись, оло инмар утиз тонэ, атай. Тани куинь вынъёс пӧлысь но чоркак огнад кылид ини. Капчи ӧй вал ортчем улон сюресэд. Пичи дырысен ик гырид но арад. Граждан войнаын сӧсырмем атайдэ но вазь келяд. Собере нош война. Пинал пияшез Воткинск заводэ келязы. Ож вакытэ жадёнэз валатэк, тырмыт сиськытэк,заводын тыршид. Синмыд лябомыса, берытскид гуртад. Кык пол операция лэсьтӥзы. Ужась, сюлмаськись сямыныд али но шутэтскыны уд чидаськы. Быдэс нунал пудо-живот, юртъер котырын бергаськод. Огнад но скал, мушъёс вордыны выриськод. Анаймытэк ческыт пӧраськыны дышемед ини. Ас киосыныд пуктэм гурад пыжем нянен, шаньгиен милемыз утялтыны дыртӥськод. Огпол бускель кышномурт шуиз: сю пӧлысь одӥг таӵе пиосмурт луэ. С. ФЕДУЛОВА. Пиос кошко Чечняе Правительстволэн Тӧроез Николай Ганза пумиськылӥз МВД-лэн Кировысь дивизиезлэн командиреныз генерал-лейтенантэн Александр Кобдевен но та дивизилэн Ижевскысь частезлэн командиреныз полковникен Валерий Колбеневен. Кызьы тодмо, та частьын службазэс нуисьёс пӧлын тросгес Удмуртись егитъёс. Нош та нуналъёсы кык сюэз асьме солдатъёс кошкозы Чечняе. Правительство юрттӥз лэсьтӥськон материал, дӥськут висъяны. Озьы ик бадӟым юрттэт сётӥзы Ижевскысь электромеханикая "Купол" завод, городысь но Ленин ёросысь администрациос, Югдурез утёнъя министерство. Александр Кобдев тау кариз Николай Ганзалы но оскемзэ вераз, ожгарчиос ваньзы ик таза но сӧсырмытэк берытскозы шуыса. Удмурт Республикаысь Правительстволэн пресс-службаез. Пургаослэн дано нылъёссы Сыӵе нимын праздник радъяз Пичи Пурга ёросысь нылкышноослэн огазеяськонзы. Соку тодмо луизы зэмос анайёслэн, апайёслэн, семьяез утьыны быгатӥсь 13 адямиослэн нимъёссы. Дано нылкышноослы сётэмын значокъёс но дуно кузьымъёс. Соос пӧлы шедизы О. П. Акбаева (Миндэр), Л. А. Андриянова (Норья), Е. М. Бочкарева (Шор Кечево), А. И. Васильева (Пичи Пурга), К. Ф. Васильева (Вуж Монья), И. И. Иванова (Улын Юри), Г. К. Николаева (Бураново), М. Н. Марьина (Пугачево), В. П. Михайлова (Иваново-Самарск), А. П. Опарина (Пичи Пурга), А. И. Семёнова (Бобья-Уча), В. И. Титова (Байситово) но З. Л. Тойкина (Яган). Н. ПОЙКИН. Та нимез тодыны кулэ Малпасько, газет туж шонер лэсьтэ, асьме удмурт шаерысь дано нимъёсын тодматыса но историе пырем нуналъёсты пусйылыса. Декабре сыӵе нимъёс но нуналъёс трос гинэ. Кылсярысь, верамын тодосчиослэн нимъёссы. Удмурт публицистлэн, историклэн Василий Андриянович Максимовлэн вордскемез дырысен 100 ар тырме (1899-1971). Нош та арын ик вордскемын вал ук мукетыз но тодосчи, дышетӥсь, партийной, советской, профсоюзной ужась Николай Андреевич Андреев (1899-1968). Со вордскемын вылэм 30-тӥ ноябре. Тазэ буре ваись ӧз луы кадь. Зэм, сыӵе "вунэтонлэн" аслаз мугъёсыз вылӥллям. Визьмо дышетӥсьлэн, общественной ужасьлэн, юн но чылкыт мылкыдо коммунистлэн сюрес вылаз данак могӟетъёс пуктылӥллям угось. Со вакытэ ужам удмурт тодосчиос ик, озьы ик партийной ужасьёс. Николай Андреевич вордскемын Татарстанысь Кукмор ёросысь Вуж Уча гуртын, бадӟым удмурт крестьян семьяын. Дышетскиз 1913-тӥ-1919-тӥ аръёсы Карлыганысь Шор удмурт училищеын но Казаньысь дышетӥсьёсты дасясь инородческой семинариын. Пумиськылӥз И. Н. Волковен, М. П. Прокопьевен но Т. К. Борисовен, дышетскыкуз ик общественной уже пыриськиз. 1918-тӥ арысен - комсомолын, 1925-тӥ арысен - большевикъёслэн партиязы вал. Ужан сюресэз кутскиз 1919-тӥ-1920-тӥ аръёсы Улын Юраши гуртысь школаын, со гуртын ик волисполкомлэн тӧроез вылэм. Удмуртиын ужаны сое 1922-тӥ арын Т. К. Борисов ӧтем. Дышетон удысын кызь арлэсь кема тыршем. Можгаысь уонолэн тӧроезлы воштӥсе пуктӥзы. Вылӥ образование басьтӥз Нижний Новгородын, марксизмъя-ленинизмъя университетэз быдтӥз. Нош Ижевске берытскемез бере, нырысь солэн улон сюрес вылаз уно шуг-секытъёс кылдылӥзы. Кык ар пала уж сётытэк но возизы, партиысь но куштылӥзы. Янгыше уськытӥзы, К. Гердлы дурбасьтылӥз шуыса. Собере, Гердэз сямен, кузпалыз купец выжыысь шуыса. Нош Н. А. Андреев аслэсьтыз калыксэ яратэ вал, шаермылэсь историзэ мур тодыны тыршылӥз, публицист-исследователь луыса Удмуртилэн историез сярысь гожъяз. Нош гожъяськыны, зэмлык понна нюръяськыны юн тырше вылэм. Чылкыт мылкыдын ужамез понна ик куд-ог чиновникъёс гажаллямтэ сое. Трос аръёс ӵоже со дышетӥз партилэн историезлы но мукет наукаослы Ижысь медициная институтын, заочно дышетскиз аспирантураын, дасямын ни вал диссертациез, но наукаын азьлань вамышъяны ӧз сётэ. Берло аръёссэ кивалтӥз Удмурт шаермес тодонъя музеен. Кузпалыз Анна Ивановна верамъя, тазэ ужзэ Николай Андреевич тужгес но яратыса быдэсъяз. Со удмуртлык понна нюръяськисьёс пӧлысь одӥгез кужмо дышетӥсь-югдытӥсь луэ. Л. ФЁДОРОВ. Пусйиськон, кыл кутон но паспорт Россиысь котькуд адямилы огкадь право но эрик сётэмын, котькудӥз кун но общество азьын одӥг кадь кыл кутэ. Со понна ик Россия Федерацие вуэм котькуд адямилы нимысьтыз пусйиськон радлык тупатэмын. Котькуд ёросысь югдурез утёнъя отделын ужа паспортъя но визаосъя служба. Россилэн палэназ улӥсьёс асьме кунэ огдырлы 10 нуналлэсь кемагес улыны ке вуо, соос 3 нуналскын (шутэтскон но праздник нуналъёсты вераса) вазиськыны кулэ та службае. Соку одно луыны кулэ: кин луэмзэ возьматӥсь документ; вуэмзэ пусъён сярысь куриськон; кыӵе муген вуэмзэ возьматӥсь документъёс - огдырлы улыны интыяськемез сярысь огкыл яке улон инты сётӥсьлэсь куриськон. Документэз вуэм дырысеныз 3 нуналскын пусъё но со пумысен свидительство сёто. Адями улон интызэ ке воштэ, 7 нуналлэсь ӝегатскытэк вазиське выль улон интыезъя службае. Пусйиськон понна кулэ таӵе документъёс: кин луэмзэ возьматӥсь документ; военной билет яке военной службае басьтон сярысь (военной учётын сылӥсьёслы) возьматӥсь удостоверение; улон интыяз пусйиськон сярысь куриськон; улыны интыяськыны лэзем сярысь документ. Улон интыезъя пусйиськем понна адямилэсь кун пошлина басьтӥське. Со ичи уждунлэн быдӟалаезлэн 0,1 процентэз луэ. Туэ Ижевскысь Первомай ёрослэн югдурез утёнъя отделысьтыз паспортъя но визаосъя службаяз пусъемын 675 вуэм адямиос, нош улон интыоссыя - 1045 мурт. Зэм, ваньмыз ик адямиос пусйиськыны уг дырто. Озьы 10 толэзь ӵоже пусйиськытэк улэмзы понна кыл кутоно луиз Россия Федерациысь 2037 адями СНГ-е пырись странаосысь 885 мурт но мукет кунъёсысь 266 гражданъёс. Асьме доры лыктэмъёс пусйиськытэк улыны интыясько ке, кыл куто улон инты висъясьёс. Туэ ар кутскем дырысен со понна администрация азьын кыл кутоно луиз 606 мурт. *** Кызьы тодӥськоды, 1997-тӥ арын 1-тӥ октябрьысен Россия Федерациын выль паспортъёс сётъяло. Но, жаляса верано луэ, та дыре Первомай ёросысь паспортъя но визаосъя службаяз паспортлы бланкъёс ӧвӧл. Соин ик паспортъёс интые сётӥсько кин луэмез возьматӥсь огдырлы удостоверениос. Соос чакламын 6 толэзьлы, та дыр ортчем бере, соосты эшшо 6 толэзьлы йылэтыны луэ на. 1974-тӥ арысен "ужась" паспорт Россия Федерациын кутӥськоз 2005-тӥ арозь. Таин валче тодады вайытӥськом: кинлы тырмиз 25 яке 45 арес, учкелэ паспорттэс, оло, дыр вуиз ини туспуктэмдэс выльдыны? Отын номыр шугез ӧвӧл: 2 фотографиен мыноно улон интыдыя управление. Созэ но вунэтоно ӧвӧл: 25 яке 45 арес тырмем бере, туспуктэмез воштоно толэзь ӵоже. Кин улэ Ижевскысь Первомай ёросын, тодады вайытӥськом паспортъя но визаосъя службалэсь кытчы интыяськемзэ: Ижевск, Ухтомский ульча, 23; телефонъёсыз 37-95-64, 37-97-76. Ужа 9 часысен 18 часозь. Нуназе вис карон дырыз 13 часысен 14 часозь. Среда нуналъёсы ужаса улӥсьёсты уг куты. Ф. ПЕТРОВА, Первомай ёросысь югдурез утёнъя отделлэн паспортъя но визаосъя службалэн кивалтӥсез. Котьма сярысь Жуг-жаген... юыны Йошкар-Олаысь одӥгез пенсионер ведраен жуг-жагзэ ӝытлы быдэ поттылыны дышиз. Со ӝыныез ке но тырмытэмын луэ, воргорон одно ик ведраеныз ульчае дыртэ. Татын маке но умойтэм кадь, малпаны кутскиз кышноез. Уката ик бускелез мылкыдзэ пуромытӥз на. Картэд, пе, сарайлэн гулбечаз васька, нош отын музыка но нылкышно кырӟам куара кылӥське! Нылкышно эскероно кариськиз кузпалзэ. Соиз буш ведра вылын пуке но ӟенеликысь водказэ сюпсе вал. Нош приёмникын чузъяське романс. Ортчытӥз на со ревизия но. Паймем кышномурт подвалысь буш ӟенеликъёсын дас кык ящик поттӥз. Со сярысь гожъязы "Марийская правда" газетын. ЖУРНАЛИСТЪЁСЫН ПУМИСЬКОНЪЁС Малы школаысь кошке дышетӥсь Берлояз сессиын Кун Кенешлэн депутатъёсыз бюджетлэсь инъетсэ выльысь эскерыны келязы на огкылэ вуонъя комиссие. Солэн куд-ог ёзэтъёсыныз соглаш ӧй вал Улон- вылонэз радъян политикая но Наукая, дышетонъя комиссиосысь депутатъёс (кивалтӥсьёссы Н.Харина но А.Красильников). Кун Кенешлэн вуоно сессияз 23-тӥ декабре тупатъям бюджетэз депутатъёс юнматыны кулэ. Кыӵе воштонъёс пыртэмын луозы табере бюджетэ? Со сярысь журналистъёслы пыр-поч мадиз А.КРАСИЛЬНИКОВ - Наукая, дышетонъя, культурая но егитъёсын ужан политикая комиссилэн кивалтӥсез. - Тросэз депутатъёс соглаш ӧй вал бюджетлэн доходъя люкетэныз, - шуиз А.Красильников. - Но берло дыре со 1,5 миллиард манетлы узырмиз. Кытысь сюриз со коньдон? Нырысь ик выль сямен учкемын вал нефтьлэн вузан дуныз. Собере шӧдтэк шорысь 400 миллион пала коньдон трансфертъёс чотын Москва келяз. Нош нырысь учкемъя малпамын вал отысь 145 миллион манет гинэ басьтыны. Со коньдон вуэм понна бадӟым тау шуоно Кун Думаын ужам депутатмылы Н.Сапожниковлы.Тӥни озьы бюджетлэсь доходзэ пичиен-пичиен пӧртэм удысъёслы люкылыны луонлык кылдӥз. Табере "СПИД" программаез улонэ пыӵатон понна но кӧня ке коньдон висъяськоз. Озьы ик бюджетын лад-лад учкемын 1997-тӥ-1998-тӥ аръёслы но 2001-тӥ арозь нылпи пособиосты тырон. Бюджетысь ватсаса коньдон "кыскемын" нылпиос понна. Кылсярысь, гужем каникулъёсты радъян, школаын сюдон понна. Со сяна, азьыл чакламлэсь тросгес коньдон висъяськоз гурт нылпиослы, тямыс интернат классъёс усьтон понна. Юрттэт сётэмын луоз сирота кылем нылпиослэн Ижевскысь юртсылы. А.Красильников верамъя, гуртысь нылпиос али улонэ компьютерез тодытэк пото. Соин ик комиссилэн ӵектэмезъя, ёрос центръёсысь школаосын туала компьютеръёсын дас классъёс усьтэмын луозы. Бюджетын солы коньдон учкемын. Бюджет нырысь ик дасямын луыны кулэ бюджет удысын ужасьёс понна. Соин ик со бюджет нимаське. Но кызьы шуиз А.Красильников, дышетӥсьёслэн, нылпи садъёсын, больницаосын ужасьёслэн куронъёссы ӵем дыръя быдэсмытэк кылё. Жаляса верано, вуоно арын но соослэн улонзы сокем ик умой пала уз воштӥськы. Озьы ке но, котькуд воспитатель понна нуналаз одӥг пол пӧсь сиён сиыны бюджетысь висъяны учкемын быдэн 3,5 манет. Валамон, со туж ӧжыт. Но воспитательлэн пичи уждуныз вӧзы (218 манет усе) со кӧнялы ке но юрттэт луоз. Дышетӥсьёс сярысь ке верано, вуоно арын но соос асьсэлы книгаос, журналъёс басьтыны уз быгатэ. Асьме бюджетын со понна номыр учкемын ӧвӧл. Нош федеральной бюджетын коньдон учкемын ке но, шуг оскыны, республикаысь дышетӥсьёс сое басьтыны быгатозы шуыса. Кызьы вераз А.Красильников, та дырозь книгаослы коньдон Москваысь одӥг пол но ӧз вуылы на. Туэ дышетӥсьёслэн уждунзы будыны кулэ вал. Но республикалэн бюджетэз со тыронэз вормыны ӧз быгаты. Вуоно арын но дышетӥсьёслы люкаськем пунэм тыронъёс быдэсак учкемын ӧвӧл. Со понна луонлыкъёс утчаны кулэ ас коже кивалтон ёзъёс. Кызьы валэктӥз А.Красильников, туэ дышетӥсьёслы ватсаса уждун тырыны быгатӥзы му вӧй поттӥсь районъёс но Можга район гинэ. Та ласянь тужгес но секыт югдур Ижевскын но Сарапулын. Туж жаль, вуоно арын но дышетӥсьёслэн улонзы уз тупатскы: бюджет уг оскыты. Соин ик, вылды, дышетӥсьёс школаосысь кошко, кошко тужгес но визьмоосыз. Т.Банникова. Сузёд-а гырпумдэ куртчыны? Тодэ лыктэ 1937-тӥ ар. Советской калык дасяське СССР-ысь Вылӥ Советэ депутатъёс бырйыны. Нуналлы быдэ сямен агитаторъёс бырйисьёсын пумиськыло. Депутатэ бырйыны ӵектэм кандидатъёслэн тусбуенызы, улэм-вылэмзы сярысь текстъёсын ӧтёнъёс кенер, коркаос борды лякылэмын. Соос пӧлын - Можга ёросысь Бадӟым Сибы гуртысь Елена Васильевалэн портретэз. Сое вавожъёс тодо вал ини: бырйисьёсын пумиськыны ветлӥз. Етӥн будэтӥсез, сэстӥсез бадӟым государствомылэн самой вылӥ ёзаз бырйыны мылкыд каремзы сярысь веразы тросэз нянь будэтӥсьёс, нюлэс дасясьёс но мукетъёсыз. Быръён нунал азьын радио пыр вераськиз И.В.Сталин. Со вераз, кыӵе луыны кулэ калыкен быръем депутат. Мар шуод, умоесь дэмланъёс сётэмын вал. Уноез мӧйыос тодо на ай со аре быръёнъёслы дасяськемез но Сталинлэсь вераськемзэ. Вуиз нуналыз но. Газетъёслэн, радиолэн но агитаторъёслэн дасяськон вакытэ ужамзы емыштэм ӧз луы. Ӵукна быръён участокъёс усьтӥськемлэсь трослы вазь калыкен тырмизы. Кин котькинлэсь азьвыл куаразэ сётоз? Черодлэн кутсконаз сылэмлы шумпотонэз вылымтэ, пыльтчыто мышкын сылӥсьёс. Мыным со аре дас тямыс арес тырмиз. Нимы гожтэмын бырйисьёслэн списоказы, эскерыны ветлӥ вал ини. Улӥ соку комсомоллэн Вавож райкомезлэн нырысетӥ секретарез Павел Шумихин дорын. Ӝытазе ик вераським ӵукна вазь султыны. Кӧлэме ӧм кыле. Озьы но Вавож ульчаосын мынӥсь-ветлӥсьёс данак вал ини. Нош школаы (отын быръён участок) калыкен тырмемын. Паша Шумихин чупресгес вал, лэся, нырысетӥ бырйисьёсын ӵош куаразэ сётыны быгатӥз. Мон но, быръён нуналлы быдэ вуэм мурт, куараме сётонэн ӧй ӝегатскы. Вало вылъёс, Тыло палъёс, Лыстем котырын улӥсьёс бырйизы асьсэлы депутат. Со вал Елена Васильевна Васильева, ӵуказеяз ик со сярысь тодмо луиз. Уно, туж уно аръёс ортчемын со дырысен. Со аре вордскем нылкышноос но воргоронъёс пенсие потыса шутэтско ини. Огзэ пусъем потэ: быръёнэ мыныны нокин кужмысь ӧз косы, маин ке кышкатӥсь но ӧй вал. Калык ачиз дыртӥз быръён участокъёсы мыныны. Али, асьме вакытэ, со быръёнъёсты кызьы ке ултӥяса вераны турттӥсьёс вань ке но, ваньмыз урод ӧй вал. Бен, шекъёстэк ӧй вал, дыр. Нырысь ик бюллетеньын одӥг мурт, соиз-а, таиз-а умойгес, бырйыны нокинэ, сёт куарадэ бюллетене гожтэм мурт понна. Зэм, депутатэ кандидатэн тодматскыны дыр тырмылӥз. Табере одӥг округе ӵектэмын дасоосын кандидатъёс. Ма, зэм ӧвӧл шат? Тани 28 номеро Ижевской избирательной округъя дас ньыль мурт кандидатэ дэмламын вал. Быръёнъёслы дасяськон дыръя городын но гуртын улӥсь озьы но тазьы кандидатъёслэсь нимъёссэс тодэ (вуэ ке тодыны). Умой-умой тодматскыны дырыз уг тырмы-а, оло нош кулэен но уг лыдъя. Быръён нунал избирательной участоке лыктэ но меӵ ярдуре вуэм кадь луэ. Кин понна куараез сётоно? Ӵапак таӵе учырен пумиськи президент быръён нуналэ Ижевскысь 64 номеро школаысь одӥгаз участокын. Кабинаысь потыса, бюллетеньёсме урнае лэзи. Пумитам лыктэ егит кышномурт. - Э, гажано эш, уд дэмлалэ-а кин понна куараме сётыны? - вазиз со, кияз кутэм бюллетеньёсты бергатыса. Быръён нуналэ избирательной сюлэмыз, йырыз вань. Аслэсьтыд кыӵе вамыш лэсьтондэ азьвыл малпа вал. - Шонер, оло, ӧвӧл, котьмар медло, куараме сёто Ельцин понна. Со мынам анаелы пенсизэ будэтӥз, - дыртыса кабинае пыриз кышномурт. Нош таиз чылкак мукет суред. Кыӵе ке картина ӧвӧл, улонысь учыр. Быдэс кун дасяськиз президент бырйыны. Одӥгаз гужем нуналэ шеди Ижевскысь Металлургъёслэн городоказы. Витисько трамвайёслэн дугдылонзылы матысь кузь магазинлэсь усьтӥськемзэ. Нуназе карыны пытсамын вал со. Трос ӧвӧл ке но, черод вань. Кин ма сярысь маде. Быръёнъёс матэ вуэмен, вылды, со сярысь уногес вераськон ӝутскылэ. Котькудӥзлэн аслаз малпанэз, валанэз, югдур шоры учконэз. Огез ӵашетыса вера, мон, пе, политикаен уг эшъяськиськы, кин шоры синъёсме чӧлто, со понна ик куараме сёто. Ма со сярысь малпаськыса йырез висетод? Мукетыз кин ке вылэ чӧлске, дэмлась, пе, луоз ай кинэ президентэ бырйыны. Ӧслы матысь кышномурт, вераськонэ пыриськытэк, калыкез синйылтылэ. Сылэ со аслэсьтыз ӝужыт, веськрес мугорзэ юри возьматыса кадь. Ӧз чида, лэся, со но вераськонэ пыриськытэк - шара вазиз: - Тӥ коть чёрт понна куарадэс сётэ, мон Борислы гинэ оскисько. Со понна кык киосме ик ӝутыны дась. Со визьмо, чылкыт, ӝужыт, ӟуч. - Ӝужыт мурт ӝужытсэ ик адӟе, дыр, - вазиз кин ке черодын сылӥсьёс пӧлысь. Кызьы улэ бырйисьлэн анаез пенсизэ будэтэмзы бере? Тырме-а со одӥг пумзэ мукетыныз герӟаны? Таӵе юан сётысал мон туннэ быръён участокын юанэн вазиськем кышномуртлы. Мумизлэн улонэз капчиянлы оскыса, быръён кабинае пыриз вал ук со. Мед пумиськысал Металлург городокысь магазин дорын ӵош сылэм кышномуртэн но. Одӥг гинэ юанэ луысал: "Кыӵе улӥськод, адямилэн тусбуез гинэ-а мукетызлэсь улонзэ умоятыны юрттэ?" Та гожтэтам кышномуртъёслэсь нимтулзэс вераны ӧй быгаты. Соку юаны умой ӧй вал. Та дырозь, оло, вунысал но ини. Ельцинэз нырысьсэ президентэ быръён аре вал ук со. Депутатэ-а, президентэ-а яке мукет кивалтон уже-а быръёно адямиез, со мед луоз сётэм кылызлы кузё. Рельса вылэ ик выдыса оскытыны выриськод ке, куашкан калэ медам вуэ. Озьы ӧз луы шат, рельса вылэ нокин ӧз выды, экономика куашказ. Выльысь ӝутыны ой! кӧня аръёс кулэ луозы меда? В.Смирнов. Журналистъёсын пумиськонъёс Геннадий Бурдов: "Пудо но, адями но висе" Шаерамы кыӵе югдур пудоосты утён но эмъян ласянь? Та ужпумлы сӥземын вал Правительствоын берлоез пресс-конференция. Журналистъёсын пумиськиз республикаысьтымы валтӥсь ветеринарной врач, Пудоез эмъянъя ёзлэн кивалтӥсез Геннадий БУРДОВ. Геннадий Николаевич пусйиз, республикаямы, пе, бускельёсын но музон кунъёсын ӵошатыса, пудоосмы данаклы ӧжытгес висё, ичигес аляло кышкыт но кема курадӟытӥсь висёнъёс. Берло куинь ар ӵоже кулэсмизы туберкулёзэн но лейкозэн висись пудоос, нош куд-ог интыосын со 0,18 процентозь вуттэмын. Но туннэ, жаляса верано луэ, шаермы котыртэмын пудо висись республикаосын. Тани Татарстанын, Башкортостанын но Пермь областьын уно пудозы висе туберкулёзэн но бруцеллёзэн. Али дугдытэмын Турциысь сӥль ваён (отын ящур кышкыт висён шараямын). Сибирской язва вӧлмемын Курган областьын, Казахстанын но Башкортостанын. Китайысь (парсь сӥль), США-ысь (курег сӥль) вайыны лэзьымтэ. Алямын чума. Америкаысь 39 фирмаослы курег макесъёссэс вузаны лэзьымтэ. Кема ӵашетон мынӥз Ирландиысь но Англиысь кунян сӥль сярысь. Та продукциез но ум басьтӥське ни. Нош Бельгиысь ваем сӥльысь шедьтэмын диоксинъёс. Соос адямилэсь тазалыксэ лябӟыто-быдто. Али дорамы кылле 40 тонна сӥль. Эскерисьёс диоксинзэ ӧз ке но шедьтэ, сое мукет интые келялом, оскытӥз Бурдов. Малы бен пудо висе, кытысь висёнъёс аляло? Мугъёсыз трос. Тани туэ пудолы фураж ӝыныез гинэ дасямын. Ю тысь басьтыны кутскемын Оренбург, Курган областьёсысь, Ставрополь, Краснодар крайёсысь, Узбекистанысь но Казахстанысь. Нош пудооссы висё ящурен, туберкулёзэн но бруцеллёзэн. Кылсярысь, Курганысь 40 фермаосын пудооссы туберкулёзэн курадӟо, витяз - бруцеллёзэн. Сыӵе ик югдур Ростов но Саратов областьёсын. Асьмелэн Сарапул но Юкаменск районъёсын гинэ туберкулёз алялляз. Со ичизэ 3 миллион манет изъян ваиз. Чидантэм урод радъямын ку бичан. Азьло та ужен выризы кооператоръёс. Ваньмыз умой вал. Табере кин гинэ со ужез уг бергаты. Озьы кӧня висёнъёс вӧлмыны быгатозы. Ветслужба миым 790 тонна продукциез брак кариз, нош туэ - 560 тонна. Чидантэм урод мынэ пудоез вандон. Данак эштосъёсын та ужез быдэсъяло фермаосын, пудо вандон интыоссы чик ӧвӧл. Тӥни соин ик пудо висёнъёс аляло. Берло дыре сибирской язва но сайка (Алнаш район). Солэн вирусэз музъемын 100-120 ар улэ, уг быры. Висёнъёсты вӧлмыто пӧйшуръёс но, соос адямиос вылэ урдскыло. Сыӵе учыръёс вань ни Кизнер но Грах районъёсын. Со герӟаськемын бешенство (шузимон) висёнэн. Адямилы ке со палаське, со югыт дуннеысь кошке. Озьы ик сюлэмшугъяськытэ эскерымтэ сӥль но йӧл урамъёсын вузан. Кин тодэ, калык, оло, висись сӥлен но вузкаре. Нош ветеринарной ужасьёс сое ваньзэ син азязы возьыны уг быгато. Котькуд интые ветврачез уд пукты уга. Ӵапак сыӵе югдур Можгае нуись сюрес вылын. Адямиос автобусъёс дугдылон интыосы парсь, кунян сӥльзэс но тулобурдозэс потто но вузало. Нош сӥльзы ветеринаръёсын чакламтэ. Соин ик, кин со сӥлез басьтэ, висён но шедьтыны быгатоз. Та ужез кулэезъя радъяно. Со сярысь сюлмаськыны кулэ ёросёсысь кивалтӥсьёс но, депутатъёс но. Палэнын медаз улы ветслужба но. Г. РОМАНОВ. Герман Скурыгин - кык улосъёслэн ляльчизы Сиднейын зарни олимпийской медаль утыны асьмелэн осконмы вань 50 иськеме спортивной амалэн ӝог ветлонъя. Берлоосаз куиняз Олипиадаосын та удысын вылӥ награда шедиз вал Россиысь спортсменъёслы. Таӵе оскон эшшо юнмаз Севильяын дуннелэн 1999-тӥ арын ортчем чемпионатаз. Отын Ижевскысь 36 аресъем ӝог ветлӥсь Герман Скурыгин витетӥ интыез басьтӥз. Вераны кулэ, таӵе азинсконлы нокин ик ӧз оскылы вал. Соку, 40 градус пӧсь нуналэ, финише нырысь ик "Россиысь биатлонлэн столицаысьтыз" спортсмен вуоз шуыса нокин ӧй верасал. - Герман, Севильяын усто вормонды бере улонады кыӵе ке воштӥськонъёсты вань-а? - Оло маке воштӥськиз но, нош мон сое уг шӧдӥськы. - Дорады чемпионэз кызьы пумитазы? - Мыным ӵошатыны номырин: таӵе вормон лыктӥз нырысьсэ. Но официальной пумиськонъёс вал ик. Нырысь - Ижевсклэн мэрез дорын, собере - Удмуртиысь Кивалтэтын. - Тӥ Ижевскын вордскемын-а? - Ӧвӧл, мон вордски но будӥ солы 130 иськемлы палэнын. Вутно гуртын. (Селта ёрос). - Зэм-а со, али Скурыгин-спортсмен кык элькунъёслэн, Удмуртилэн но Мордовилэн, луэ шуэмзы? - Бен, малы ке шуоно, одӥгез тренере - Виктор Чегин - Саранскысь. Шонергес вераса, монэ утё кык республикаос. Шуом, тренировкаос ортчытыны люкаським - сюрес понна дун тыре Удмуртия, нош сиськон но кӧлан понна - Мордовия... - Виктор Владимирович алигес ивортӥз паймымон учыр сярысь: Россилэн тулыс чемпионатаз, дуннелэн кубокез понна ӵошатскыны команда дасякузы, тӥ сюрес вылтӥ чигем пыдын ортчиллямды, пе. Со мае ке ӧз сура-а? - Вал сыӵе учыр. Ӵошатсконъёс дыръя лодӥга котырам вӧсь луыны кутскиз. Финиш бере врачлы вазиськи, солэн синъёсыз паськытазы. "Тӥляд, - шуэ, - со лыды кемаласен тэшкам вылэм ни, куажым кыскыны вуэм ини..." - Севильяын вормондэс гуртады кызьы дунъязы? - Милемлы тренерен быдэн чибориё телевизор кузьмазы. Со сяна, республикалэн спорт сярысь законэзъя сётӥзы 250 ичи уждун (налогъёсын луиз 19 сюрс манет), ӵектӥзы на квартира но "Орбита-Москвич-2126" автомобиль. Тазэ али "Ижмашамы" дасяло... - Кызьы озьы "дасяло"? Вормондэс пумитаны дась вылӥллямтэ шат? - Шуизы, кыӵе ке ёзъёсыз уг тырмо. - - Герман, нош малы тӥледлы, ӝог ветлӥсь профессионаллы, машина кулэ? - Умой пыдъёслы умой машина уз люкеты, зэмос спортсмен ноку но мултэс вамыш уз лэсьты. - Нош тӥ "Орбитаез" умой машинаен лыдъяськоды-а? 1995-тӥ арын Ирина Станкина таӵе ик вормон понна "Мерседеслэсь" берло модельзэ басьтӥз вал. - Малы мон ӝожтӥськом? Соку сое вань чемпионъёслы кузьмаллязы, со понна 60 сюрс доллар приз ӧй вал. Туала чемпионатын вормисьёс сое басьтӥзы. - Севильяын тӥ паймытӥды, дас кык нылпиё семьяын будӥды шуыса. Тӥ, пе, дас одӥгетӥез вал? - Али куатез сяна улэп ӧвӧл ни - куинь сузэръёсы но куинь вынъёсы. Атае кулӥз мыным кык арес дыръя, ар талэсь азьло ватӥ анайме - раклэсь кулӥз. Толэзь но ӝыны гуртысьтым ӧй кошкылы - возьмано луиз... - Валаны шуг ӧвӧл, гуртысь трос нылпиё семьяын, уката ик атайдэс ыштыса, пинал дырды капчи ӧй вал шуыса. Кытысен-о тӥледыз спорт ас бордаз зол кыскиз? - Та удыс борды бер басьтӥськи, Удмурт кун университетлэн физкультурая люкетаз дышетскыкум. Нырысь кык арзэ биатлонэн выри, 1986-тӥ арын факультетын ӵошатсконъёс дыръя кужымме мертаны ӵектӥзы ӝог ветлонъя. Со дырысен дугдыны уг быгатӥськы ни... - Лыдъяны ӧз турттэ-а, 13 ар ӵоже кӧня вамышъяды ини? - Берло дыре ар ӵоже ортчисько сизьым сюрс километр пала, ӵошатсконъёс азьын нуналаз 40-50 иськем луэ. - Олимпиадалэн чемпионэз Владимир Голубничий 41 аресказ странамылэн чемпионатаз азвесь приз басьтӥз. Нош тӥ макем кема ӝог ветлыны дасяськиськоды? - Шонерак вераса, ачим но уг тодӥськы. Дуннелэн туала чемпионэз луыса, монэ бырйытэк но нимаз ӧтёзы дуннелэн Эдмонтонын 2001-тӥ арын ортчоно чемпионатаз. Валамон, сыӵе ӧтёнлы мон пумит уг луы. Кин тодэ, оло, Канадаын но мыным удалтоз?.. - Севильяын, тӥ верады вал, вормондэс эшъёсыныды ӵош пусйиды ӟуч сямъёсъя. Гуртады азьланьтӥды, дыр, трос ӵыжы-выжыосыныды ӵош? - Вормонэз пусйимы. Малпай вал, чемпионат бере одӥг толэзьзэ шутэтско шуыса. Зэмзэ верано ке, со дыр ӵоже мон уката жади, куинь 50 иськем дистанциез ортчи кадь. Олокыӵе но пумиськонъёсы ӧтчаллязы. Одӥг пайдаё уж лэсьтӥ ик - гуртам семьяосылы картошка копаны юрттӥ. Собере ёросысь администрацилэн кивалтӥсез мыным кузьым интые 50 кубометр лэсьтӥськыны ярано нюлэс висъяз. Сое мон ӵыжы-выжыосылы сётӥ - асьсэос мед тодозы, кинлы кӧня кулэ. - Нош сузэръёсты но вынъёсты вормонды понна 60 сюрс доллар басьтонды пӧлысь кузьымдэс уг возьмало-а? - Кин тодэ, оло, малпало но, но сыӵе малпанъёссэс шара ӧз вераллялэ на. - Кузпалды вань-а? - Елена кузпалэным вить ар ӵош улӥськом. Нылпи будэтӥськом. Но асьмелэн пиналмы ӧвӧл на. - Тӥледлы 36 арес, оло, со сярысь но малпаны кулэ ни? - Соглаш, табере ваньбур ласянь кӧня ке капчигес луоз, дыр. Оло, Сиднейын олимпиада вуытозь, семьямы будоз но... - Нош азьланяз спорт удысын кыӵе малпанъёсты? - Нырысь ик вань малпанъёсы Олимпийской шудонъёс сярысь. Нырысетӥ январьысен соослы дасяськон умой-умой кутскоз ини. ("Советский спорт" газетысь). КЕНЕШОНЪЁС Гурт вылын возиське улон-вылонмы Нянь будэтӥсьлы ма кулэ? Ӟеч кидыс, тырмыт удобрение, ужаны луымон техника, нош кылемзэ со ваньзэ ачиз лэсьтоз, уйзэ-нуналзэ, кужымзэ жалятэк тыршиз ке. Та борды мед ватсаськоз на вылэм мылкыдзэ валась но дыраз пельпумзэ пуктӥсь. Берло ортчем бадӟым кенешонын аграрийёс но республикмылэн кивалтӥсьёсыз ог-огенызы матысьгес кусыпъёс тупатыны луонлык утчазы кадь, кызьы со пӧрмоз - возьматоз вуись ар. Нош вераськон гурт удыслэсь вань шугъяськонъёссэ бугыртӥз. Соос пӧлысь валтӥсез - кӧня коньдон вуоз удысэ, тырмоз-а со ӟеч урожай будэтыны, йӧл, сӥль поттыны, воштос ёзъёс но техникалы эстӥськон басьтыны. Правительстволэн кивалтӥсез Н.А.Ганза кенешонэ люкаськемъёсты пыр-поч тодматӥз вуоно арлы чаклам бюджетэн. Соя гуртэ вуыны кулэ 220 миллион манет. Туала вакытэ трос-а со, ӧжыт-а - уд вала, малы ке шуоно, дунъёс одӥг нунал но интыязы уг сыло. Машинно-технологической станциослы техника басьтыны чакламын 16 миллион манет. Нимысьтыз юрттэт басьтоз "Восточный" совхоз. Республикаысьтымы та парсь вордонъя комплекс шедемын тужгес но секыт югдуре - пудоез сюыдыны номырин. Нош та хозяйствотэк Удмуртия ас калыксэ сӥльын утялтыны уз вормы. Тӥни малы Кун Кенеш но Правительство вань луонозэ лэсьтыны тыршо огзэ бадӟым предприятимес утён но азинтон вылысь. Со понна чакламын пӧртэм ужрадъёс. Пусйыны кулэ, гурт удыс берло 10 аръёссэ туж юн жуммиз, лябӟем колхозъёс пыд йылазы пото. Кызьы шуиз гурт удысъя но сиён-юонъя выль министрмы П.А.Першин, хозяйствоос пӧлысь 49 процентэз туэ ыштонъёсын ужазы. Экономика понна со туж бадӟым шуккет. Озьыен, ӝыныез эштосъёс но гурт кооперативъёс, колхозъёс нош ик пунэмаськозы, кураськыны потоно луозы. Тӥни ма тужгес но шугъяськытэ. Соосын валлин 1 миллиард 46 миллион манетлы ыштон адӟемын. Арлы лэсьтэм йылпумъянъёс мур малпаськонэ вутто: 20 ар ӵоже ужаммес басьтоно ке, ю-няньлэн удалтонлыкез 13 процентлы кулэсмиз, етӥнлэн - 10,9 процентлы. Озьыгес ик шуыны луоз бакча сиёнъёс но картофка сярысь. Урод ужаммылэн мугез коньдонлы ёрмон бордын, пусйиз министр. Соин валлин начармо гыроно-кизёно муос, сылэ техника самой кысык вакытэ, ГСМ-лы ёрмыса, бусые потыны уг быгато тракторъёс но комбайнъёс. Тросэз хозяйствоос, кужымзы тырмымтэен, пумен ӧжыт но ӧжыт кизё тысё культураос, мертто бакча сиён но картофка. Соосты утялтыны кулэ техника, нош со ӧвӧл. Республикаямы туннэ нуналлы кылемын на, шонергес вераса, улэп на машинно-тракторной парклэн 86 процентэз, ю-нянь арась комбайнъёс - 78 процент, картофка октоноосыз - 28 процент. Тракторъёсты ке басьтоно, ӝыныезлэсь ятырзэ коть туннэ ик "шутэтскыны" келя. Тӥни сыӵе югдур кылдэмын техника ласянь. Нош туала производствоез улонлэн куронъёсызъя азинтыса, кӧня меда пайда поттыны луысал! Хозяйствоын одӥг интыез ляб ке, со одно бӧрсяз мукетсэ кыскоз. Та бордысь потэ, дыр, тырмыт пудо сиён дасямтэмы (чакламлэн 49 процентэз гинэ), фуражтэк, кидыстэк кылён но. Балезино но Сюмси районъёсын, кылсярысь, пудолы изыны асьсэлэн тысьсы ӧвӧл. Республикая ке оглом верано, данакез хозяйствоос 20-30 процент сяна фураж дасяны ӧз быгатэ, вань солэсь но ӧжытэз. Парсь вордон комплексъёсын сиёнзы кылемын 1-2 суткалы, суралтэт вутто "питранъёс" вылысь. Кызьы пусйиз П.А.Першин, секыт югдур кылдэмын кидысэн но. Тужгес ик - уй пал районъёсын, Сюмси, Кизнер, Камбарка палъёсын но. Ӟегъя планзэс быдэстӥзы Красногорск, Игра, Якшур-Бодья районъёс гинэ. Республикая переходящей фондэ кисьтэмын 682 процент, нош Кизнерын но Киясовоын - ог 20 процент. Малпамъя уг ужа пудо вордон удыс но. Удмуртиын улӥсьёсты сюдон понна ар ӵоже самой ӧжытсэ кысконо 343 сюрс тонна. Асьмелэн продукцимы сомында уг люкаськы. Нош йӧлмы магазинъёсысь уг бырылы, калыкмы уксёлы ёрмемен гинэ. Ватонэз ӧвӧл ук: котькудӥз семья одӥг литр йӧлэз гинэ но нуналлы быдэ басьтыны уг вормы ни. Сыӵе ик югдур сӥльын но вӧйын. Уждун будӥз ке, ӝажыос туж ӝог бушалозы. Ватсалом на: вань будэтэм сӥльлэн ӝыныез - нимаз хозяйствоос чотын. Гуртын улӥсьлэн со - валтӥсь "валютаез". Ар ӵоже республикалы самой ӧжытсэ кулэ 149 сюрс тонна. Парсь вордон комплексъёстэк тамында продукция нокызьы но уд потты. Докладчик верамъя, туала вакытэ соос пӧлысь огез но пайдаен уг ужа, ыштонъёссы - миллионъёс, тужгес но - "Восточный" совхозын. Татын трос коньдон кутӥське калыклэсь улонзэ умоятонлы, лэсьтӥськонлы, нош продукциез ӧжытэн кошке. Умоен пусъемын "Вараксино" но "Глазовский" тылобурдо вордӥсь фермаослэн ужамзы. Курег пузэн но курег сӥльын соос быдэс шаермес сюдо. Оглом верано ке, гурт удыс котыр ласянь лябӟемын но лябӟе. Котькудӥз хозяйство оске Парвительство ласянь юрттэмлы, малы ке шуоно, ас кужыменыз гинэ улыны-вылыны но азинскыны азьмынӥсь коллективлы но секыт. Со ласянь ас малпанъёссэ веразы Вавож районысь "Колос" колхозлэн председателез В.А.Красильников, Кезысь гурт удысъя управленилэн кивалтӥсез В.И.Максимов, Красногорск администрацилэн кивалтӥсез М.И.Матушкин но мукетъёсыз. Кенешын вераськон ӝутскиз гуртлы кивалтӥсьёсты будэтон ласянь но. Зэмен но, трос интыосын али сыӵе югдур кылдэмын - нокинэ председателе пуктыны. Озьы-а ӝутод пыд йылысьтыз пограны кутскем ёзэз? Пӧртэм мылкыдын потӥзы люкаськемъёс "Металлург" культура дворецысь: кинлэн та кенешон сюлэмаз йӧтӥз, кинлэн - ӧз, вылды. Выль Правительстволэсь но выль министрлэсь, оло, ятыргес но возьмазы вал. Ма карод - вакытэз сыӵе. Нош музъем ужасьлэн законэз одӥг: дыр шоры учкытэк дася герыдэ. Геры бордысен уго кутске улонмылэн дэлетэз. *** Вис дыръя кенеше вуэм председательёсын вераськи. Кызьы соос шуизы, вуоно арлы бюджетэз таиз арен ӵошатоно вал. Соку гинэ рос-прос ваньмыз валамон луысал. Гурт удысъя но сиён поттонъя министр П.А.Першин тодматӥз гурт хозяйстволэн туннэ луонлыкъёсыз сярысь. Секыт югдур сярысь ваньмыз тодо, нош тӧроос пумысен веранэз ик ӧвӧл. Соос воксё ёрмемын ни та улонэн. Нюрысь потон сюрес но ӧвӧл ни кадь. Петр Александровичлэн верамаз гурт удысъя огъя лыдпусъёс гинэ выль на вал шат? Соин кивалтӥсьёслэн министрлэсь ӝот-ӝот ӵектонъёссэ, мылкыдзэ кылэмзы потэ вал. Зэм, трибуна сьӧрысь чузъяськем лыдпусъёс мур малпаськыны косо. Ӵуказе государство гуртлы гижысь-пиньысь ӧз юртты ке, колхозъёслэн шокан пасьсы воксё пытсаськоз. Алнаш ёросысь колхозлэн председателез (фамилизэ вераны ӧз лэзьы) выль министрзы пумысен малпанъёссэ мыным вераз. Ёрос центрын пумиськон дыръя, пе, Першинлы пыдлось гуртъёсы потыны ӵектӥм - ӧз мыны. Удысэз йылозяз-пумозяз тодон вылысь кыдёке "ватскем" хозяйствоосы вуылыны, пе, кулэ. Вань, дыр, шонерез та ӝожтӥськонын. Но министрез но валаны луэ. Толон колхозлэн председателез туннэ сыӵе вылӥ кивалтон интые пуксиз. Малпасько вал, кенешын тӧроос пӧсь вераськон ӝутозы. "Сӥямынгес" вал со. Вавож ёросысь "Колос" эштослэн тӧроез В.Красильников меӵак юан сётӥз: газ кыскон но "Доминаторъёсты" нуэмзы пумысен. Тӧро но сыӵе ик меӵак валэктон сётӥз: газ ум пыртэ, "Доминаторъёс" одӥг но ӝыны ар ӵоже ужатозязы, оло, шайтанлы кельшыны кутскизы. Бусыын ӧз ужалэ, дыр, соос, нош Чечня пала, пе, вуылӥллям кадь. Ужаны ум быгатӥське техникаен, Правительстволы со комбайнъёс кулэ ӧвӧл. Уй пал колхозъёсысь тӧроослэн лымшор палъёслы ӝожтӥськемзы потэ. Малы, пе, Москваысь вуэм уксёез "Доминаторъёс" понна пунэмдэс тыриськоды. Со коньдон республикаысь колхозъёслы одӥг мындаен люкиськыны кулэ. Соос понна ми-а шугъяськыны кулэ? Кадръёслэн тырмымтэзы но нылпиослы пособие чотын пызез дуноятыса сётэмзы - таӵе юанъёс котькуд кыкетӥ председательлэсь йырзэ висьыто, дыр. Луоз-а пайдаез ортчем кенешлэн? Кызьы шуиз Пичи Пурга ёросысь "Мир" эштослэн тӧроез А.Ешкеев, татын вераськемзы зал сьӧры уз поты. Вераськизы - сюлэмзы буйгаз, "галочка" пуктӥзы. Нош мукетыз председатель, Кез ёросысь "Мир" эштослэн тӧроез, шуиз, та кенеше люкаськемъёс, пе, асьсэлэсь шуг-секытъёссэс гинэ верало. Нош нырысетӥ интыын дунъёслэн быдӟалазы луыны кулэ. Эстӥськонлэн дуныз гурт продукцилэсь кык поллы йылтэмын. Тулыс бусы ужъёс кутскыку, тросэз колхозъёс гырыны-кизьыны потыны уз быгатэ. Оскем потэ вал, гурт ужасьлэн улонэз умоялоз шуыса. Уго музъемысь, ӟеч-а, урод-а со, ваньмыз сямен потэ. Кылсярысь, промышленностьлэн ӝыныез сямен. Кызьы улоз гурт, озьы ик ужалозы переработка но промышленность. Людмила Перевозчикова, Алексей Андриянов. НАТАЛЬ "Егит семья: туннэ но ӵуказе" конкурсэ Асме жалян Вера одӥг ӝытазе дорамы потӥз. Тэк телевизор учкыса пуке, но малы ке ымдуръёссэ куртчылэ. - Мар луиз? Эше сыӵе юанэз ик возьмаса пукем, шӧдске, кузпалы палэнскем бере сюлэмшугзэ усьтӥз. - Мон... нуныме куштӥ. - Шузи! - А кытчы мон сое поном? Маин сюдом? Ачим школаын ньыль толэзен уждун уг басьяськы. Володялэнэз сиськыны сяна уг тырмы. Квартира ёркыт, со но асьмелэн ӧвӧл... - кисьтэ ук, кисьтэ вӧсьсэ эше. - Нош ачид, нош Ольга? Вордскем нуналад ветлыкум, кык-куинь пиналын куноостэ ӧй синйылты кадь. Вера мынэсьтым но сюлэмме ӵушканы вуттӥз ни. А ведь зэм вера. Кӧня тодам вайыны выри эшъёсылэсь семьяоссэс - огаз гинэ кык нылпизы. Мукетъёсыз огзэ быдэстыны инмар мед юрттоз шуыса уло. Валамон, улон умойскысал ке, дасэз пӧлысь укмысэз шумпотыса возьмасал на одӥг ке но нуны. Оглом шаермыя сыӵе семьяос 70 процент пала. Мукетъёсаз - яке быдэн кык пинал, яке чик ӧвӧл на. Мугъёсыз валамон - улон интылы, коньдонлы ёрмон. Оскоды оло уд, но чылкак кӧняез ке гинэ семьяос кыкетӥзэ нылпи уг ваё ог- огзылы оскымтэысь: картсы юылэмысь, палэнын дырзэ ортчытъяны яратэмысьтыз. Ӵемысь таиз но муг нырысетӥез бордысь потэ. Туала егит картъёс секыт ныпъетэз нуыны вормымтэысьтызы нылкышноослэсь чальгес сӧрисько. Тросэз уго уж гинэ но шедьтыны уг быгато. Россиын 78 сюрс егит семьяос сиёнлы гинэ но ёрмо. Ваньмыз та шӧдӥськытэк уг кыльы семья кусыпъёс вылын. Егит кузпалъёс ог-огзэс яратэмысь, гажамысь дугдо, нылпиоссэс аналто. ... Али одӥгез эшмы Чечняын. Дораз берытскыны кулэ феврале гинэ. Со нокыӵе кариськытэк кельтӥз кышнозэ но ньыль аресъем пизэ. Нокин но кужмысь ӧз ысты, ачиз куриськиз. Оло, пе, кӧня ке дыр ӵоже коть ёрмытэк улом. Со малпа отысь узырмыса вуыны. Нош Галя ӝытлы быдэ телевизор шоры долкаса учке, Чечняысь югдурез котькинлэсь ӟеч тодэ. Картсэ кошконлэсь со туж ӧз алы: пӧсь таба вылын кадь улӥськом, оло, зэмзэ но, ёрмонысь потом, ог-огмылэсь но мӧзмом. Пичи Егор гинэ уг вала, малы атаез соосты куштӥз, малы сое садикысь котькуд нунал жуммем анаез басьтэ но, гуртазы бертэм интые, кыӵе ке конторае выж миськонназ нуэ. Семьяез обществолэн инъетэныз лыдъямысь, коммунистъёсты тросэз серем карыло. Но со озьы. Туала егит семьяос, кӧня ке ар ортчыса, Россиын валтӥсь кужым луыны кулэ. Кытчы валтоз со лекомем, сютэм кужым? Государство сое валатэк уг улы, тырше кыӵе ке программаос кутыны, семьяез Конституцияя утьыны. Тодӥськоды-а тӥ, егит семьяос, кин но тӥ сярысь уг сюлмаськы? Россия Федерациысь, солэн субъектъёсысьтызы городъёсысь яке гуртъёсысь кивалтӥсьёс! Государство законъя сюлмаське семьялы, анайлыклы но нылпиослы юрттон понна. Жаль, сое ас вылад шӧдыны уг луы. Семьяос аръёсын уг басьяло нылпиоссылы пособие. Трос нылпиё семьяос юрттэт, гажаса верам кылъёс интые пыкылон кыло: "Кинлы оскыса пинал люкады?" Тодӥськоды-а, нош мон соослы вожъяськисько. 30-40 ар ортчыса пуком ми Вераосын, Галяосын мӧзмыса-кайгырыса: одӥг пинал будэтӥм уга, али шумпоттӥсьёсмы тросгес луысалзы... Нош егит дыръяз ёрмылэм Таня доры я огез лыктоз, я мукетыз куное ӧтёз, куинетӥез гожтэт ке но ыстоз. Ваньмыз та малпанъёс городысь егит семьяос сярысь. Гуртын ӧжыт мукетгес югдур. Номыр шоры учкытэк соос нылпи ваё, пудо вордыса, бакча утьыса уксё поттыны выро. Но... асьсэды шудоен уг лыдъяло. Вожъясько городъёслэн ваньмон дырзэс тунсыко ортчытыны, творчествоен вырыны, нылпиоссэс дышетыны быгатэмзылы. Гуртъёсысь семьяосын ужанъя ёзъёс, центръёс тыршо егит семьяослэсь ваньмон дырзэс тунсыко радъяны, нылпиез утёнъя, ваче кусыпъёс возёнъя дунтэк валэктон сётъяны. Трос юанъёс кылдо юристлы но. Та ласянь умоен пусйыны луысал республикаысьтымы "Егит семья" центрез. Солэн филиалъёсыз али ужало ни тросаз районъёсын. Центрысь специалистъёс лекциосын гуртъёсы потало, тунсыко, шулдыр ужрадъёс дасяло. Арлы быдэ шаерамы ортче егит семьяос куспын ӵошатскон, турслёт, экологической лагерь. Отчы пыриськись семьяос туж умоен вазисько, тау каремзэс верало специалистъёслы. Но нош ик палэнэ кылё райентрлэн палэназ улӥсьёс. Та сярысь малпаськоно вылэм центръёсысь ужасьёслы но, асьсэлы но, пичи гуртъёсын улӥсьёслы. Но вань шуг-секытъёс шоры учкытэк, арнялы быдэ загсъёсын чузъяське Мендельсонлэн маршез. Ӝыныез паръёс одно ик шудзэс шедьтозы, ӝыныезлэн ӝыныез шуд понна нюръяськоно луозы на, кӧняез ке гинэ янгышалозы, сотэк уг луы. З.Рябинина. Книгаосты люкало егитъёс Республикаямы нырысетӥ декабрьысен мынэ ни "Отечествомылы - выль Ломоносовъёс" ужрад. Сое радъяло: "Удмуртиысь егитъёс" огазеяськон но шаерысьтымы Калыкез дышетонъя министерство. Быдэс толэзь ӵоже люканы чакламын калыклэсь кулэ луисьтэм книгаоссэ, учебникъёсты. Соосты бӧрысь келялозы гуртъёсысь школаосы но библиотекаосы. Ужрад мыноз 2000-тӥ арын 1-тӥ январёзь. Н. СЕРГЕЕВ. "ЧИГЫМТЭ ЧИДАН" КОНКУРСЭ Кирос понэмедлэсь азьло - малпаськы Пичи комоксэ кияз кутыса, кыӵе шуд сӥзиз меда анай нылызлы. Ӧз-а шуы, тон мыным кулэ ӧвӧл? Кышномурт нылзэ вордӥз ӟырт кезьыт толэзе, кузпалтэк. Солэсь азьло будэ ни вал пиез. Озьы-а, тазьы-а, но пиналъёс будӥзы, вамыштӥзы школае. Бен, ӧй вал мынам анаелэн кузпалыз: юисез но, жугисез но, яратӥсез но. Матысь эшез но юрттӥсез вал анаез, мынам песянае. Нош одӥг пол анаймы "бызисько" шуиз но кошкиз. Со мукет гуртын, нош ми пересь анаенымы - мукетаз. Уг тодӥськы, анай-а золгес мӧзмиз нылпиосызлэсь яке пиез но нылыз. Анай сюлэм воштӥз нылпиоссэ пиосмуртэн. Но со кемалы ӧй вал, анаймы берен гуртэ бертӥз. Карттэк улэм мурт ӧз вала, вылды, кузпалзэ. Озьыен, семьямы нош ик огазеяськиз. Улон ас ӧраз пыриз кадь, анаймы ужаны кутскиз. Озьы ортчизы аръёс, милям эшшо одӥг вынмы вордӥськиз. Кызьы шуо калыкын: узыр муртлы - кунян, куанер муртлы - пинал. Атайтэк ке но, ми будӥмы шудоесь: ӧз жуге, ӧз тышкаське, кырсь кылъёсын ӧз ултӥялэ. Уг тодӥськы, анаймылы, оло, секыт но, мӧзмыт но вал. Бускель кышноос, кузпалъёссылэсь пегаса, дорамы кӧлало вал. Кыӵеез но ӧй вал гуртын. Озьы гыж но кал будӥмы. Но тани анаймы нош ик бызьыны малпаз. Шуиз, дыр: оло, таиныз "ӝукез пӧзёз". Но кылдымтэ вылэм солы таиныз но улыны, кӧня ке толэзь ортчыса, выльысь гуртэ берытскиз. Вань мылкыдзэ сётыса ужаз - азьмынӥсь скал кыскись вал. Трос кузьымъёс сётъязы, орденэн но медальёсын пусйизы ӟеч тыршемзэ. Уно пол ветлӥз курортэ, санаторие, шутэтскон юртъёсы. Солы нокин ӧз люкеты, ӧз алы. Бадӟымъёсыз нылпиосыз будӥзы, семья кылдытӥзы, асьсэлэн пиналъёссы вордскизы. Ул но ул вал, но анаймы нош ик бызён сярысь поттылыны ӧдъяз. Куатьтон арес ни, малы кулэ на сыӵе вамыш лэсьтыны. Анаймес соку алӥм. Нош солы ӧз кельшы индылэммы, нылыз вылэ юриськиз - кирос понӥз. Мумылэн серекъямез но, бӧрдэмез но усе, шуо. Озьы тӥни, ар но ӧз ортчы, картэ кулӥз. Кызьы ачиз будэтӥз огназ куинь нылпиоссэ, озьы ик мон но огнам кыли, пал кышно луи. Мар меда малпа али анае, оло, гырпумзэ куртчылэ? Бер ӧвӧл ни меда? Аръёс ортчизы, лул висёнэ зӥбломиз. Одӥг пол сюанысен сузэреным тодматским пияшен. Оло мӧзмон вылам, оло куректон-бӧрдон вылам, мон сое яратӥ. Пиналгес шуыса но ӧй учкы, азьланяз мар луоз шуыса но ӧй малпаськы. Со мыным нуналлы быдэ жингыртылӥз, нош городэ вуылыкум, котьку пумиталляз, келялляз. Мон улӟи тулыс кызьпу сямен, тудву кадь ӧръяськиз сюлэмы. Мон кадь шудоез ӧй вал, дыр, соку. Но кемалы вылымтэ со - сузэре талаз шумпотонме, яратонме. Бен, со чебер, пинал, бызьылымтэ, улэ городын. Сузэре тодэ вал кусыпъёсмес, озьы ке но, ӧз возьдаськы сое валесаз выдтыны. Озьы тӥни, яратонэ ӟыгыръяз-чупаз монэ, нош кышно басьтӥз сузэрме. Ветлӥ сюаназы, кырӟай, верай, эктӥ. Нош нокин но ӧз тоды мар вал сюлэмам. Бен маин пӧртэм пал кышно, маин? Асме мон урод адямиен уг лыдъяськы. Али тросэз пинал нылъёс, карто кышноос юо, кыско, калго. Нош мынам озьы ветлыны дыры но ӧвӧл, уг но поты. Улытозям ватӥ кык яратонме: одӥгез кулӥз, кыкетӥез монэ мукетыныз воштӥз. Мар карод, улон со улон. Туннэ шунды пиштэ, ӵуказеяз сое сьӧд пилем вотса. Одӥг арын кунянэ шӧй вордскиз, скалэ кулӥз, парсьпиосы но быризы. Мон вадьсын, оло, сьӧд чер поръя? Озьы ке но, улӥсько осконэн: оло, ӵуказе инмар ваёз мыным умой улон. Нокинэн уг даллашиськы, нокинэ уг лекатӥськы, одӥгзэ уг валаськы - кытчы йыромиз мынам шудэ? Мон али кырӟаны, серекъяны но кышкасько - сьӧраз ик куректон- бӧрдон вуэ. Юнме уг шуо вылэм: из но, му но пилиське но, адямилы чидано. Куддыр йырез кыӵесэ донгоно кадь ик луисько, но со бадӟым сьӧлык. Пичи гинэ осконэ вань на: нош быриз таиз нунал, ӵуказеез, оло, мыным но пальыштоз. В.Дорофеева. (Авторлэн куремезъя нимыз воштэмын). Сяськаяське хризантема... Толшорын пальма, кипарис, туя пӧлтӥ кинлэн меда юмшамез уз поты? Со понна трос сюрс исЬкемъёсты ортчыса лымшор пала яке кунгож сьӧры мынонэз ӧвӧл, таӵе субтропической сад будэ "Буммашын". Мае но уд адӟы, мае но уд пумита вылэм стекло улэ интыям сад-бакчаысь! Чурен-чурен выжыяськемын кактусъёс, нап-вож веньёсын пушъе аспарагус, йӧн-йӧн ӝутске монстера, туннэ-ӵуказе "синъёссэ" усьтоз циклмен... Кӧня пумо соос татын - озьы гинэ уд вера. Шоразы ик, выль кен сямен, буй-буй сяськаяське лимон. Нош артэ будӥсь эшезлэн емышез кисьмаз ини. - Мандаринмес алигес гинэ октыса вуим, - шуэ та субтропиклэн оез кузёез бригадир Ирина Козлова. - Дорамы тулыс пал вуылэ на, соку эшшо но шулдыргес луоз. Нош милям, тол куазьысь шуак гужеме шедемъёслэн, гадь тыр шокчеммы потэ ни ӵуж, льӧль, тӧдьы сяськаосын шобырскем убоослэсь омырзэс. Хризантемаос... Соослэн зынзы туж аспӧртэмлыко. Огласянь - пыштурын кадь ческыт, мукет ласянь - тӧдьы пот кадь курыт. Нош толшорын солэсь ӟечез, дуноез кузьым ӧвӧл, дыр. Табере ойдолэ тодматскоме: кин меда сюлмаське, утялтэ та шулдыр сэрегез? - Елена Аркадьевна Чистякова, "Буммаш" заводлэн агрономез. Лыктӥ татчы Ижевскысь сельхозинститут бере 1966-тӥ арын. Куамын куинь ар - одӥг интыын, одӥг коллективын, одӥг ужын. Тӥни кытын паймымон садлэн кутсконэз но пушъёнэз! Кидысысь собыдӟа писпуэз будэтоно ук. Егит агроном вуэм араз ик мыло-кыдо басьтӥськиз азбарез шулдыртон борды. Нырысетӥ писпуос, куакъёс - ваньмыз соку гинэ ужаны кутскем рабочийёсын мерттэмын. Писпуос выжыяськизы, тып-тып интыяськизы заводлэн корпусъёсыныз артэ. Туала егитъёс понна - улэп памятник. Нош Елена Аркадьевна, быдэс улонзэ "Буммашлы" сӥзем мурт, ноку но ӧз малпалля заводын ужалоз шуыса. Со - агроном, сюлмыз кыске вӧл-вӧл бусыосы, ю-нянен веттаськись тулкымъёс пӧлы... Бусыез воштӥз теплица, шепаськись ю тысез - огезлэсь чебер но ӵыдыны луонтэм сяськаос. Озьы ик кылиз "Буммаше" пыраклы. Трос егит нылъёсты дышетӥз ни яратоно ужезлы. - Бригадаямы - 9 мурт. Кивалтэ соин бадӟым опытэн специалист Ирина Козлова. Нылъёс дорамы ӟеч тодон-валанъёсын лыкто, кошкисез ӧвӧл. Озьы вакчияк, но туж шуныт мылкыдын вера ӵош ужась эшъёсыз сярысь Елена Аркадьевна. Сое шӧдоно, адӟоно кибревылзыя но. Сыӵе чебер сяськаосты будэтод шат кезьыт мылкыдын но сӥялэс сюлэмын? Ватсалом на. Та мусо, ужез гажась нылъёс но нылкышноос тулыслы быдэ вань заводлы будэто трос пумо рассада, вузало сое вань мылкыд карисьёслы. Нош кинлэн аслэсьтыз корка пушсэ вож-вож садлы пӧрмытэмез потэ, эн кепыралэ, вазиське - одно ик юрттозы. Кизы соослэн капчи. Тол шорын ас будэтэм лимонэныды, оло, чай но юыны кылдоз. ... Тэлеӟе форель "Буммаш" заводэз но Печатья юртэз одӥг забор гинэ висъя кожаськом вал. Бускельёсмылэн "улосвылэнызы" тодматскыса валано: соос кемалась "уяло" ни кыдёкысь муртшуръёсын, будэто адӟылымтэ чорыгъёсты, выро туж кулэ но калык хозяйство понна пайдаё удысэн. Кин ас синмыныз ӧз учкы на, киыныз ӧз кутылы вуэтӥ жомбыльтыса уясь чорыг уллёез - уз оскы, ваньмыз со заводлэн "корт зарезяз" будэ шуыса. "Буммашлэн" чорыг хозяйствоеныз трос аръёс ӵоже кивалтэ ни Андрей Сергеевич Мосечкин. Заводлэн генеральной директореныз ӵош соос йылпумъязы Астраханьысь технической институлэсь чорыг вордон но будэтонъя факультетсэ. Асьме палан - шер пумиськылӥсь профессия. Чорыг вордӥсьёс ньылетӥ арзэ ас кожазы люкиськыса ужало ни, будэто осетр, африканской сом, форель, стерлядь, карп пиосты. Та удыслы кутскон сётэмын вал 15 ар талэсь азьло. Соку выризы карпен гинэ. - Осетр ар но ӝыны ӵоже 2 килограммозь будэ, - шуэ Андрей Сергеевич. - Ӝог тэлеӟе сом но. Нош карпез, форелез но стерлядез возиськом республикаосысьтымы хозяйствоос понна. Пичи чорыгъёсты басьто нимаз кузёос но. Тыметэ лэзьыны шуыса ик будэтӥськом тӧдьы амурез но тӧдьы толстлобикез. Луонлыкмы вань тросгес но пӧртэмгес чорыг будэтыны - но ӧжыт кулэяськисьёс, чорыг вордӥсь предприятиос, организациос. Соин ик кусып тупатӥськом мукет регионъёсын. Кылсярысь, Москвае нуозы осетрез, Оренбург областе туэ нырысьсэ келям карп пиосты. Курон вуэмын ни Свердловск областьысь. Нош "Буммаш" осетр мызь вае Краснодарысь. Карп выжы уськытӥзы Пихтовка тыметысь. Ар ӵоже заводлэн "корт зарезяз" 7 тонна осетр будэто, быгатысалзы 12-14 тонна но лэсьтыны. Огез люкетэ. Та шер пумиськылӥсь чорыг дуно, калыклэн туала уждунэзъя ӧвӧлгес. 2 тонна сом араз "кыско" ог 200 сюрс карп пиосты тыметэ лэзё. Басьтӥсь ке шедиз, кык поллы ятыргес но будэтыны мылкыдзы вань. Маин сюдо собыдӟа уллёез? Сиён ваё Белгородысь но Даниысь. Кунгож сьӧрысь комбикормен ӝоггес тэлеӟо, тыметысеныз ӵошатыса, толэзьлэсь ятырлы вазьгес вуо. Шӧдӥське-а пайдаез та аспӧртэмлыко ужлэн? - Пайдамы но, ыштонмы но туннэ нуналлы ӧвӧл, 0 котырын бергаськом. Прибыль басьтон понна, тосгес чорыг вордоно. Тыметмес паськытатоно, солы кужыммы но, быгатонмы но тырмоз. Пайдаез вань ик. Котькуд бадӟым празднике ӝӧк вылэ пукто асьсэ чорыгзылэсь дасям сиёнъёс. Осетрен утялто сӥё-дано куноосты, юбиляръёсты. Эшъёстэ, семьядэ ке утялтэмед потэ, коть улэпсэ, коть ӵынатэмзэ чорыг басьты, татын ик асьсэос ӵынато. Огпол эскерид пке, базарысь яке магазинысь басьтэмед уз поты ни. Л.Медведева. Французъёсты паймытӥзы Толсуре Санкт-Петербургын инвалидъёслэн творчествозылы сӥзем "Спешл-Арт" фестиваль ортчиз. Отчы пыриськизы быдэс Россиысь инвалидъёс. Удмуртиысь фестивале пыриськизы Сентег психоневрологической интернатысь 6 инвалид, воспитательёс но киужъёслы дышетӥсь. Соос паймытӥзы эктыны быгатэменызы, чебер киужъёсынызы. Пужыятм ӝӧккышетъёссэс но ковёръёссэс нырысетӥ нуналаз ик Францие басьтӥзы. Ковёр пужыятӥсьёс Лариса Бородулина но Петр Перевощиков фестивальлэн лауреатъёсыз луизы, нош Елена Останина, Галина Кашменских но Елена Матвеева - дипломантъёс. Фестивале пыриськемъёс тунсыкъяськизы Санкт-Петерьбургысь Олимпийской комитетлэн уженыз. Туэ июнь толэзе асьме дорын инвалидъёслэн "Удмуртиысь йӧспӧртэм Олимпиадазы" общественной огазеяськонзы кылдӥз. Со юрттыны тыршоз ляб визьем муртъёслы асьсэды физкультураын но спортын возьматыны. Республикаямы 5 ар ӵоже ини таӵе нимысьтыз программая спортъя ӵошатсконъёс но киужъёсын выставкаос радъясько. Азьланяз сыӵе ужрадъёс котькуд интернатын ортчытъяны чакламын. Малпан вань республикаямы инвалидъёслэн творчествозылы сӥзем фестиваль но люканы. С. ЗАКИРОВА. Шӧкыч Николай Никифоров Чеберай Серемес верос Туэ гужем анайзэ шайвылэ келяса, чорок огназ кылемез бере, Шача Вася кема ӧз малпаськы: кутӥз но вузаз пуж-пуж йӧл сётӥсь скалзэ, куайытэм парсьсэ. Зӧк кисыосын кӧня ке нуналлы чиптэм-чаптэм гуртысьтыз ышиз. Берытскиз со пӧсь толэзьысь шунды музэн мыняса, кияз - бадӟымос коробкаен. Ма басьтэмез-вуттэмез сярысь гинэ ӧз поттылы. Ымнырыз ик сяськаяськиз, ява, Шача Васялэн! Олокыӵе мудрон вераськыны, кырӟан гуръёс нёжъяса ветлыны кутскиз. Чылк, чебер дӥськутэн пӧрмытскыса, ульчаетӥ юмша, мугтэк шорысь пальпотэ. - Оло, кузпалъяськыны дасяськиськод, Васи? - тунсыкъясько арлыдоос.- Чылкак эмеспи кадь адскиськод. - Малы мыным кузь йырсиё вупериосты кулэ? - валантэм пальпотэ казак воргорон.- Кулэ ке луиз, аслэсьтым вордымтэ нылме кузпаллы сётыны быгато. Сыӵе кылъёсты удмурт сямен вералляз ке но, гуртоосыз пуштроссэ валатэк йырзэс гинэ шоналлязы. Куд-огез жаляса лулӟылӥз но: "Эх, мискинь! Оген улыса-вылыса, визьмыз сураськыны кутскем ни, лэся". Бератаз ужпум воксё мыдланес азинскыны кутскиз. Акшан лэзиське ке, гуртысь воргоронъёс, егит пиос Шача Васялэн юртэз пала дыртылӥзы. Киосазы бинетъёсын мыно. Уд вала, кин мар нуэ. Ма, кышноос но шузиос ӧвӧл - ӝог валатскизы. Я сӥльзы ӧвӧллы потэ, я черык аракызы ыше, яке уксёзы "шупче"... Ог арня ваче супыльтэмзы, тунаськемзы бере, участковойзылы вазиськытэк ӧз чидалэ ни. - Шача Васялэн дораз эскериськон ортчытэ ай, Василий Потапыч. Маке йӧнтэм ужен выре кадь со. Вань пиосъёс, кутъёслэн чечы вӧзы люкаськемзы музэн, со юртэ дырто. - Эскеро, юаллясько,- кышноосты оскытӥз участковой инспектор. Милициысь капитан Шача Васялэн корказ пыремен валче, казак воргоронлэсь гольтырес серектэмзэ кылӥз. Кинэн ке лӧпшаса лабыртэ. "Ой, муспотонэ тон мынам, чеберае. Сюдӥськод-вордӥськод ук монэ. Кисыосам но тӧл уг ни шула. Узырмом ай асьмеос, узырмом. Тонэ но буртчин пуш дӥськутэн дӥсяло". Милиционер катанчилэсь висъет сьӧры синйылтэменыз валче бакомиз. Эсьмаса, кимышкыныз дыртылыса ӵушылэ син котыръёссэ. Паймод но, ява! Кузпалъяськымтэ казак воргоронлэн валес вылаз, юг нуналэ, чебер нылмурт кылле. Гольык мугорзэ, гадьёссэ но мултэс синъёслэсь ватоно интызэ буртчин ноны пуйыен турсикъёс гинэ вато ке. Нош Шача Вася музьыезлэсь мугорзэ маялля, чупа, пумен сяськаё дэремзэ дӥсяны курадӟе. Нылмурт уг но вераськы, уг но пумитъяськы. Чус кылле. Тусбуен но кылчин выллем адске: ӵуж мертчан йырсиез - бабля, синъёсыз лыз-чагыресь ке но, сьӧд синкашо-синлысо, бам чокчороосыз - сӥзьыл садысь кисьмам улмоос, кожалод. Участковой амалтэк кызйиз. Уката ик паймеменыз чырты выжыез кӧсаз, сюлэмыз гиз-з! каре, макес кусыпъёсыз лыдыны кутскизы. Воргоронэз палэнэ ӧтьыса, лекак юаз: - Шачаев эш, кин со сыӵе? Тӥ кузпалъяськемын ӧвӧл на кадь. - Э-э, сюанам юмшаны беромиды тӥ, Василий Потапыч,- серектӥз Шача Вася.- Кыдёкысь Мускоысь, "Шоп-секс" лавкаысь вуттӥ мон та чеберайме. - Иське, резиналэсь мунё? - Бен, озьы. Малы-о гуртысь пиосты, воргоронъёсты тэльмыртонэз? Мед яратозы, ваньзылы тырмоз. Скалме, парсьме вузаса басьтӥ ук. Дуно сылэ вылэм, албасты люкет! Нош мон оскисько: дунзэ ӝог берыкто, барышез но шедёз. Рыноке выжи уго. - Мон... мон... тӥледлы эрик уг сёты гуртады притон усьтыны,- моганы кутскиз участковой. - Тӥ та сямен законэз тӥяськоды, кышноос но ӝожтӥсько. - Кызьы-о мон законэз тӥясько? - пальпотӥз Шача Вася.- Чеберае дун тырыса басьтэмын. Гуртоосы дун тырыса мусоясько. Чеберае со понна ик лэсьтэмын-кисьтэмын ук. Сотэк гуртамы егит нылъёсты, кышноосты эриктэман учыръёс но пумиськысалзы ай. Нош ализэ ваньмызлы умой: изьы нуллӥсь гуртоосылы но, мынам чебераелы но. Рынок, Василий Потапыч, рынок. Милициысь капитан, вераськон ӧрзэ ыштыса, сяськаё катанчиез палэнтӥз но резиналэсь чеберай шоры долказ. Удмурт наукаын - выль нимъёс Выль ар азьын Удмурт кун университетысь аспирантъёс М. А. Самарова, П. И. Воронцов но Кудымкарысь О. А. Гагарина быгатыса кандидатской диссертацизэс утизы. М. Самарова аслаз ужаз эскерем выллапал Чупчи шур котырысь инты нимъёсты, нош П. Воронцов - удмурт вераськетъёсысь гласнойёслэсь сӧзнэтсэс. Егит учёнойёс кыкназы огъя но финн-угор кылтодонъя кафедраысь. Соос ӟеч кусып возё ӵыжы-выжы луись калыкъёсын. Тани Кудымкарысь коми эшсы Ольга Гагарина диссертацизэ утён азьын толэзь пала асьме дорын улӥз. Та дыр ӵоже со удмурт сямен но чылкыт вераськыны дышиз. Диссертациез утён, наукае мар ке но выльзэ пыртон - секыт но бадӟым уж. Аспирантъёслэн кивалтӥсьёссы В. К. Кельмаков но И. В. Тараканов егит тодосчиослы ужзэс азьланьтыны, докторскоёзь вуттыны ӵектӥзы. Ӟечкыласьком! Л. Петрова. Соос вал нырысетӥосыз пӧлын: Туала "Буммашлэн" историяз весяклы кылёз Николай Александрович Коротков, Социалистической Ужысь Герой, Ленин орденлэн кавалерез. Со кивалтэм улсын ӝутскиз табыдӟа завод, нош собере - автозавод. Ефросинья Кирилловна Сергеева, крановщица. Борис Шакирович Нигматуллин, валтӥсь механик. Павел Александрович Косолапов, бригадир. Леонид Петрович Барбашев, бригадир. Лев Викторович Торбеев, бригадир. ШӦКЫЧ Г. Ларионова "Покчи предприятие" Монолог "Куриные окорочка, куриные окорочка..." Кӧс нянез ке луиз... Олокӧня пукод ай эшшо отын, ньыль сэрего ин шоры учкыса. Ой, лулы-сюлмы. Кураськись каризы ук. Тани вить сюрс манетэ сяна номыри но ӧз кыльы ни. Ачим но виноват. Толон вина пӧзьтоно кариськи. Куазь ӟеч, гуртын чус. Дорын Вание гинэ, пиелэн пиез. Вина котькытчы но кулэ: пу вайыны, турнаны, базарын вузаны. Закон али пӧзьтыны но, вузаны но лэзе. Ӵукна ик суретме пуртые лэзи но тылски. Ӝоген быдэс четверть вити ни. Пӧзьтэм льӧм пыр лэзьыны кариськи. Льӧль, чебер луыса вия. Брагаме пуртыысь воштыны кутски но, кин ке пырись луиз. Оскалтӥ но интыям ик шулӟектӥ: милицаос. Асме ачим буйгатӥсько ке но, кышкыт. Ӟечбуръяськизы но меӵак ӝӧк сьӧры пуксизы. Бумагаоссэс поттӥзы. Мон трос юаса-вераса ӧй улы, ӝогак ӝӧк вылэ люкай. Нош соос юисьтэм кариськизы, патент куро. Мон шулӟектӥ. Эн обиде пересь муртэз, шуисько, законэз мыдлань валай шуыса. Мон, пӧй, "Малое предприятие по производству самогона" луоз та шуыса малпай вал. Закон но лэзе. Нош соос патенттэк ужамед понна, пе, "предприятидэ" ликвидировать кароно. Кышкаменым льӧмлэсь сӥсъетме азбаре поттыса кисьтӥ. Пӧзьтымтэ брагаме, юнме медаз быры шуыса, скаллы сётӥ, нош напсэ парсь тусе понӥ. Милиционеръёс пӧзьтэм но льӧмам четвертьме сьӧразы нуыса кошкизы. Конфисковать, пе, кариськом. Ӝӧк вылысь сылалтэм кияре но конфисковаться кариськиз. Корка шорам султӥ но долкаса сылӥсько. Витьымтэ шорысь туж зол ыбем кылӥськиз. Мон интыям ик пукси. Пиелэн пиез, мусо Вовике пыре, кияз пистолет, ассэ комиссар Каттани кожа. Мафиозникез, пе, ыби. Учкисько но пистолетэз шудон ӧвӧл, зэмос маке. Бызьыса потӥ но, Шарикмы гань-гань азбар шорын кылле. Кылем арняе бускельлэсь одӥг макес парсь сӥль ваиз вал. Со тырысен Вовике сое мафиозник гинэ шуэ. Пиелэсь пыӵалзэ талай но мунчое ватӥ. Мунчоысь потыкум ӵемтыса ӧжыт гинэ ӧй усьы, кулэм курег пыд улам сюриз. Азбаре потӥ - отын но, татын но кулэм курегъёс лошъясько, азбар шорын ик атас кыле. Э, быри, быри! Мар чер та. Гонзэс ке но ишконо. Ӝытозь кулэм курег гон ишки, собере парсез шур дурысь гуртэ ваи, гидэ пытсай. Скал но лудысь вуиз. Скал кыскыны потӥ, пукси но скалэ ӵыжыса лэзиз ук, гидысь лобыса ик потӥ. Парсе чир-р! кесяське, шайтанлэн кӧтыз-а, мар-а ӧвӧл тырем. Выльысь скалэ доры пыри но - мар та? Скалэ пограм но бурсыса кылле. Ма, мар таӵе та пудоен луэ? Табере скалэ но уродмем ук. Бызьыса мынӥ Епифан бускеле доры, кулэмезлэсь азьло вандоно коть. Епифан етӥз воргорон, бадӟым пуртсэ кутыса скалме ӝог гинэ вандӥз. Со скалэн вырытозь, парсьме ке но сюдо ай, шуисько. Гид ӧсэз гинэ усьтӥ но, парсь лобыса ик потӥз, ведра тяпняме вылам пальккиз. Азбар шорын бергаз, бергаз но отчы ик усиз. "Епифан, Епифан! - кесяськисько. - парсьме бышкалты". Азбарын буш кылиз: Шарик ыбемын, скал, парсь вандэмын, гольык курегъёс бакча ӟезьы сьӧрын кыллё... Нош мар та таӵе ишан? Гольык атасэ бакча ӟезьы вылын чоръя ук. Епифан сылӥз - сылӥз но гор-гор серекъяны кутскиз, кӧтсэ воземез уг луы ни. Мар та таӵе, табере бускеле но уродмиз, лэся, ук... Инфекция. Епифан, серекъямысь дугдэмез бере, маин, пе, пудодэ сюдӥд, шуыса, юа. Пудоед, пе, кулымтэ, кудӟемын вылэм. Э, кӧты-сюлмы. Мар та таӵе!? Вань пудоме ас киыным быдтӥ ук. Вание, муспотонэ, бызьыса вуиз. "Баб", - шуэ, - гурезь бамын милицонеръёс изё. Мар чер, пӧй, табере таоссэ кутэм? Бызьыса мынӥ. Шайтан басьтонъёс, конфисковать карем четвертьме ликвидировать кариллям. Соку ик соослэсь Вовике пистолетсэс но басьтэм. Сайказы ке, берыкто, пе. Нош ачим ӵукна ик базаре сӥль вузаны кошки. Басьтӥсьёс вань. Коньдонэ сумка тыр ини. Обедозь 2-3 килограмм тыр гинэ кылиз на. НАТАЛЬ "ЕГИТ СЕМЬЯ - ТУННЭ НО ӴУКАЗЕ" КОНКУРСЭ Парзэ пар шедьтэ Ой, берга, берга, берга, Визыла кырӟан. Куашетэ котькуд арня Сю но сюрс сюан. Дунне вылын кӧня семьяос пиналъёсыз но арлыдоосыз, али гинэ кылдэмъёсыз. Котькуд арняе кылдо выльёсыз. Соос ваньзы маин ке но пӧртэмесь, котькудӥзлэн аслыз гинэ тупась сямъёсыз, йылолъёсыз вань. Гурла, кылбура лыз дыдык, Гадьзэ ӝуткаса гожеръя, Шунды кадь лемлет мылкыдын Чагыр кузпалзэ мусоя. Мон туж шудоен лыдъясько Лариса но Виктор Дулесовъёслэсь семьязэс. Соос пиналэсь на, но асьсэ киынызы пуктӥзы ини жон-жон юрт, басьтӥзы машина. Со ваньмыз тыршемзы бордысь потэ. Огзы но ужлэсь уг кышкало: трос пудо вордо, бакча-емыш будэто. Парзэ пар шедьтэ, - шуо калыкын. Киоссы но кыкназылэн зарниесь. Виктор Петрович ачиз пукон но ӝӧк, шкаф но диван лэсьтэ. Котькудӥз синмез мальдытэ. Соос заводынлэсь но устоесь пӧрмемын. Школаын киужъя кружок нуыкуз, пиналъёс асьсэос бызьыса дораз вуыло вал: "Туннэ ортчытомы-а кружок? Кӧня часлы люкаськомы?" Со уго либыт гинэ вераське, ваньзэ пыр-поч валэктэ. Лариса но киужъёсыныз паймытъя гинэ: я кофта керттоз, я кыӵе ке дэрем вуроз, я маке чильпалоз. Семьяязы куинь нылпи будэто. Ириназы витьлы гинэ дышетске, мылысь-кыдысь школаысь ортчись ужрадъёсы пыриське. Анаез но пичи дыръяз тыпак сыӵе ик вал, фотографиез ноку но ӧз усьылы школаысь "Устоез дышетскись" пул вылысь. Надя апаезлэсь бере уг кыльы, солэн пытьытӥз вамышъя. Нош Никитазы кыӵе луоз ини? Со пичи ке но, али ик ассэ йӧно воргорон кадь возьыны быгатэ. Тӥни сыӵе калыклы адӟем карымон адямиос уло асьме пӧлын. Шуд но тазалык та егит семьялы. Ноку медаз кысы яратон кизилизы. Е. СОРОКИНА. Можга район, Вужгурт. Объявление о проведении конкурса инвестиционных проектов Для публикации в газетах "Известия Удмуртской Республики", "Удмуртская правда", "Удмурт дунне". Публикация _______ г. Правительство Удмуртской Республики, руководствуясь действующим инвестиционным законодательством Российской Федерации и Удмуртской Республики, а также во исполнение Постановления Правительства Удмуртской Республики � 926 от 27 сентября 1999 года объявляет Конкурс инвестиционных проектов на размещение инвестиционных ресурсов Удмуртской Республики в виде гарантий (поручительств) Удмуртской Республики. В конкурсе участвуют претенденты, зарегистрированные в порядке, установленном Положением о Государственном Реестре инвестиционных проектов Удмуртской Республики, утвержденным Постановлением Правительства Удмуртской Республики� 451 от 28.04.98 года. Объем гарантий - 10,39 млн. (десять миллионов триста девяносто тысяч) рублей. Условия конкурсного размещения ресурсов Удмуртской Республики по инвестиционным проектам, критерии и порядок оценки проектов осуществляется согласно "Положению о предоставления гарантий (поручительств) Удмуртской Республики по займам и кредитам на конкурсной основе", утвержденного постановлением Правительства Удмуртской Республики от 29 декабря 1997 года �1187. К участию в конкурсе допускаются лица, своевременно подавшие заявки при наличии положительной экспертизы проекта. Конкурс будет проводиться 25 ноября 1999 года по адресу: г. Ижевск, ул. Пушкинская, 214. Заявки на участие в конкурсе принимаются ОАО "Агентство по инвестициям и лизингу" по адресу: г. Ижевск, ул. Горького 92, в помещении "ИМПЭКС - банк", ш0 до 12 часов и с 15 до 17 часов ежедневно, кроме выходных. Последний срок подачи документов - 15 ноября 1999 года. Список документов, представляемых на конкурс, и консультации по вопросам организации проведения конкурсов проводятся специалистами ОАО "Агентство по инвестициям и лизингу" в соответствии с Постановлением Правительства Удмуртской Республики � 396 от 16.04.99 года. Прием заявок по телефону: 56-04-44. Оскемзэс веразы Выль Кун Думалэн "тусыз" сярысь та вакытэ вераськыны вазь на. Угось одӥг мандатэн округъёсын вормем депутатъёслэн малпанъёссы туннэлы тодмо ӧвӧл. Озьы ик дыртоно ӧвӧл вормемъёс но келямъёс сярысь дунъетъёсын. Дума нырысьсэ люкаськем но фракциос кылдытэм бере гинэ вераны луоз, кыӵе инты басьтӥз соиз яке таиз политической кужым. Озьы ке но, та вакытэ обществоысь центристской мылкыдъёсты лыдэ басьтыса шуыны луоз, бырйисьёслэн ӵектэмзыя депутатэ кандидатэ данакез мынэмъёс центр но бур пала учкись фракциос доры кыстӥськозы. Соку "Отечество - Вся Россия" блоклэн фракциез но кужмоялоз, оло, "Единство" быдӟа ик луоз. Озьы яке тазьы, но Думаысь фракциос ОВР-ез лыдэ басьтоно, соин кусып тупатоно луозы. Мукетсэ но вератэк кельтыны уг луы: блоклэн азьветлӥсьёсыз ялан пусйыны тыршо, "Отечество - Вся Россия" вань пайдаё кужымъёсын ӵош пайдаё ужалоз шуыса. Нош быръёнъёслы йылпумъянъёс сярысь верано ке, ӵуказеяз ик ини "Отечество" ОПОО- лэн Удмурт люкетэзлэн штабаз уно жингыртӥсьёс вал. Адямиос мылкыдзэс вераллязы, быръён кампания вакыктэ ОВР-лы пумит кырсь уж нуэмын вал шуыса. Озьы ке но, блок уно куара люказ, данак бырйисьёс солы оскемзэс веразы. "Отечество" огазеяськонлэн Удмурт люкетэзлэн пресс-службаез. Ястржембский быръёнъёслы йылпумъянъёс сярысь Москваын "Отечество - Вся Россия" блоклэн штабеныз кивалтӥсьлэн воштӥсез Сергей Ястржембский брифинг ортчытӥз. Со тау каремзэ вераз бырйисьёслы, кин куаразэ ОВР понна сётӥз. Кун Думае быръхёнлы йылпумъянъёсты пусйыкуз, С. Ястржембский вераз: азьвыл чаклам кадь ик блоклы дурбасьтэмзэс веразы Москва, Москва улос, Татарстан, Башкортостан, Мордовия, Удмуртия. Малпамлэсь ӧжыт куара люкаськиз Санкт-Петербургын. Брифингын пусъемын вал: блоклэн азьветлӥсьёсыз мылкыдзэс веразы, журналистъёс но политологъёс нырысетӥ лыдпусъёсъя йылпумъянъёс лэсьтыны медаз дыртэ шуыса. Озьы ик луиз, югдур воштӥськиз, блок куинетӥ интые потӥз. Одӥг мандатэн округъёсын вормемъёсты лыдэ басьтоно ке, "Отечество - Вся Россия" Думаын кужмо фракция кылдытыны быгатоз. Выль политической огазеяськонъёс нырысьсэ таӵе бадӟым вормон басьтӥзы, тодмо партиосты но азьпалтыны быгатӥзы, вераз С. Ястржембский. Озьыен, бырйисьёс, азьвыл Кун Думалэсь ужзэ умоен уг лыдъяло, соос оско, выль кужымъёс пайдаёгес ужалозы шуыса. Правительствоын Ёрмыса улӥсьёслы юрттэт Удммуртиын котькудӥз ньылетӥез улӥсь пенсия басьтэ. Нош уноез чылкак со чотын гинэ улэ. 96 процентэзлэн пенсиез улыны-вылыны ичизэ кулэ луись коньдонлэсь но ӧжыт. Шорлыдын пенсилэн быдӟалаез улыны кулэ луись коньдонлэн 62 процентэз гинэ луэ. Тужгес но ёрмыса улӥсь пенсионеръёслы юрттон вылысь, Правительстволэн постановлениеныз чакламын висъяны 1 миллион манет коньдон. Нырысь ик коньдонэн юрттэт басьтозы огназы улӥсь пенсионеръёс, быдэ вуымтэосты утялтӥсь пенсионеръёс, пичиысен сӧсыр кылемъёс, дас куать аресозь сӧсыр нылпиос но мукетъёс. Но таӵе юрттэт сётӥськоз соку, куке пенсилэн быдӟалаез яке семьялэн огъя доходэз улыны-вылыны тырмымон коньдонлэсь но пичи. Та ужез радъялоз но эскерыса возёз Ужъя кун комитет. Чернобыле ветлэмъёслы Одӥг миллион манетлы йылтэмын улон интыосты вузан-басьтон заёмъя облигациосты кутон лимит. Та уже кутэмын вытъёс чотын вуэм коньдон. Республикаысь Лэсьтӥськонъя, архитектурая но улон инты политикая министерство та коньдонэз висъяны чакла Чернобыле ветлэмъёслы. Соослы сётэмын луозы кык комнатаен куинь квартира, огъя площадез - 160 квадратной метр. Кызьы верамын Правительстволэн постановленияз, квартираос висъямын луозы "Союз "Чернобыль" огазеяськонлэн огъя списокезъя. Гуртоослы - улон инты Правительстволэн Президиумез умоен лыдъяз "Ас юртэд" федеральной программаез асьме республикаын но ортчытыса эскеронэз. Та проектэз улонэ пыӵатыны чакламын 2004- тӥ арозь, "Нечерноземагропромстрой" корпорациен огкыл тупатыса. Кызьы пусъемын программаын, гуртъёсын улон коркаос лэсьтыны коньдон пунэмен басьтыны луоз бюджетысь. Но со пунэмъёсты гуртоос берыктозы поттэм сиён-юонэнызы. Улон интыос лэсьтонэз радъяны оскемын корпорацилэн Удмуртиысь ёзъёсызлы. Удмурт Республикаысь Правительстволэн пресс-службаез. Шӧкыч Армян но луиськиз... Мар бен, Кун Думае депутатъёсты быръён ортчиз, лэся. Отчы шедён понна нюръяськон зол гинэ ортчиз. Кӧня блокъёс, огазеяськонъёс, партиос кужымзэс мертазы отын. Вал законэз тӥян учыръёс но, пӧяськонъёс но. Тани 19-тӥ декабрь азьын Москваысь мыным но гожтэт вуиз. Уг вера ни кыӵе со блоклэсь. Но со улэ гожтӥськемъёс, Россиын тодмо адямиос, тау кариллям соослэн союззылы дурбасьтэме понна. Шонерзэ ке верано, мон нокыӵе бумага вылэ ӧй гожтӥськы вал. Собере мукетыз паймытӥз. Адресме бен шонер ик гожтӥллям. Но фамилиме армян кариллям, атай нимме сураллям... Ӵапак со конвертлэсь вылтуссэ Шӧкычлы сётоно кариськи. Гажаса, бырйись Николай Никитич БАЙТЕРЯКОВ. Зэмос удмурт шӧмо "Зарни шепо ю-няньлэсь кырымен-кырымен бадӟым культо люкаськем сямен ик, ансамбль но пумен пӧрмиз кужмо, ужаны быгатӥсь коллективлы. Туннэ со асьме республикаысь валтӥсь фольклор коллективъёс пӧлысь одӥгез". Та кылъёс верамын Пичи пургалась "Зарни шеп" калык фольклор ансамбль сярысь. Солэн кылдэмез дырысен тырме ни кызь ар. Нош кутскиз со ваньмыз "Маяк" ёрос газетсылэн редакцияз люкаськонъёс бордысен. Нырысетӥ концертсы вал Аксакшурын. Со дырысен кытын гинэ ӧй вал ни "зарни шепъёс!" Шаермылэн пӧртэм сэрегъёсаз, матысь улосъёсы но тросаз вуылэмын. 1987-тӥ арысен кутскыса, та ансамбль луэ калык творчествоя пӧртэм фестивальёслэн лауреатсы: Ижевскын, Сыктывкарын, Омскын, Екатеринбургын... Венгрия, Финляндия но ӟыгыртыса пумитаз та удмурт кенакъёсыз, кема ӧз поты лэземзы ас дорысьтызы. "Зарни шеп" кырӟа-вера ке уго, удмурт калыклэсь вань чебер лул пуштроссэ, выл ласянь пиштӥсь йӧнлыксэ но усьтэ. Зэмос удмурт шӧмынызы учкисьёс доры вуттэ калык йылолъёсты, сямъёсты - "Куно пумитан", "Кубо дусым", "Гурт пумын арамаын", "Трочин дыръя возь вылын", "Ӟечкын кен ваён" но мукет композициоссэ. Республикамылэн палэназ потаса, со интыосысь кырӟанъёсыз- эктионъёсыз уже кутыса пӧрмиз "Кузь сюресъёс, ваем кузьымъёс" сузьетсы. Зэм, "зарни шепъёслэн" устолыксы ваньзэ паймытэ.Со пиштымон кыдатэмын ни ансамбле ветлӥсь усточиослэн тыршеменызы, соос пӧлын - Н. Ерохина, В. Громов, Л. Громов, Н. Васильев, Н. Тубылов, Г. Тубылова, З. Боталова но мукетъёсыз. "Вань улытозям Федосья Михайловналы тау каро секыт нуналъёсам куректонме чиданы, бӧрдӥсь сюлэмме буйгатыны юрттэмез понна. Монэ со ансамбляз кыскиз, кырӟанъёс мылкылдме ӝутӥзы," - таиз кылъёс верамын ансамблез кылдытӥсьсы, кивалтӥсьсы, культура удысын сӥё-дано ужась Ф. М. Тубылова сярысь. Кӧня калык крезьгуръёслы со сётӥз ни бурд но кужым, куддыръя ачиз ик кылъёссэ но малпаса. Со кырӟанъёсты нимысьтыз книгаен печатлаз "Удмуртия" издательство. Вань, шуыны луэ, "Зарни шеплэн" аслаз музеез но. Со Федосья Михайловна но Валентин Кузьмич Тубыловъёслэн улон коркаязы ик. Та сэрегысь адӟыны луэ ансамбльлэсь быдэс ортчем сюрессэ. Отын трос гинэ синпель кузьымъёс - республикаямы но солэн палэназ концертъёс дыръя кузьмам арбериос. Шуныт пумиськонъёс сярысь тодэ вайыто альбомысь туспуктэмъёс но. Ярато "шепъёс" (тазьы гинэ шуо ни соосыз) музеязы пыраны, ортчеменыз пумиськыны. "Зарни шеп" туннэ пусъе кызь аръем юбилейзэ. Быдэ вуон аресыз таза тысен мед быгыльскоз. Т. ПЕТРОВА. * "Зарни шеп" азьвыл аръёсы. Александр КУЗНЕЦОВЛЭН туспуктэмез. "Буммашлы" - 40 Валентин Жебровский: "Син азьын пуксиз, будӥз но юнмаз" Валентин Жебровский - шаерамы одӥгез усто кивалтӥсь. Сое тодӥсьтэмез ӧвӧл, дыр. Дас арлэсь кема кивалтэ ни та огазеяськонэн. Рынокен экономикае выжон вакытэ но предприятие гурезь уллань ӧз гылӟылы, ялан юнмаз, кужмояз но данзэ ӝутӥз. Валентин Жебровский пусъемын Почёт орденэн. Солы сётэмын Россиысь дано машиностроитель, устоез кивалтӥсь (менеджер) ним, Удмурт Республикалэн Кун премиез но Правительстволэн премиез. Кыкетӥзэ быръемын ни Кун Кенеше депутатэ, солэсь азьло 5 ар ужаз Вылӥ Кенешын. Акциосын "Буммаш" огазеяськонлэн тӧроеныз Валентин ЖЕБРОВСКИЕН алигес пумиськылӥз "Удмурт дунне" газетлэн корреспондентэз Геннадий РОМАНОВ. - Валентин Витальевич, заводлэсь ортчем сюрессэ вералэ вал. Маин со висъяське? - Туж ӝог ӝутскеменыз. 1959-тӥ арын 28 декабре, ӵапак выль ар азьын, СССР-ысь Министръёслэн Кенешсы Ижевскын бумага поттон оборудование лэсьтонъя завод пуктон сярысь постановление кутӥз. Со вал странаямы бумага поттон машинаос лэсьтонъя нырысез предприятие. 1956-тӥ арын лэсьтӥськонэз радъяз Иван Иванович Логунов. Со ик луиз "Буммашлэн" нырысетӥ директорез. Вакчи дыр куспын кылдытэмын вал лэсьтӥськисьёслэн коллективъёссы. Валтӥсь подрядчик луиз лэсьтӥськонъя 13 номеро управление. Со пыриз Ижевскысь 17 номеро промышленно-строительной трестэ. Кылдӥз лэсьтӥськон комплексъя штаб. Со вань ужъёсты быгатыса радъяз. 1960-тӥ арын 12-тӥ мартэ заводлэн кивалтӥсез луиз чебер, ӝужыт мугоро воргорон Александр Андреевич Олейник. Со котьку вазь ӵукна ик вуэ вал лэсьтӥськисьёс доры. Котыр гурето экскаваторъёс, бульдозеръёс, автомашинаос, тракторъёс но музон техника. Вордскизы лэсьтӥськисьёслэн нырысетӥ вагончикъёссы. Соос нюлэсэз коразы, куакъёсты чылкытатӥзы но... Воткинске нуись сюрес огпала поттылӥзы. Та вал нюр, улыг инты. Тулыс котыр ву пуке, нош лэсьтӥськисьёс мертасько, пичи юбоос пуктыло. Нырысь ик лэсьтэмын вал инженерной юртлы инъет. Лэсьтӥськон ялэмын вал комсомольской шуыса. Заводоуправлениын - пулъёслэсь лэсьтэм коркан соосты пумиталлязы, нош борддораз бадӟымесь чебер букваосын гожтэмын: "Сётӥськод завод"? Ас мылкыд карыса лыктэм лэсьтӥськисьёс пӧлын вал Леонид Петрович Барбашев. Со эшъёсыныз ӵош таӵе бадӟым предприятиез лэсьтон борды кутскиз. Вордскиз солэн йыраз малпан - валтӥсь корпусэз пуктэм бере кутсконо бумага лэсьтӥсь машинаосты бичан борды. Вазь ӵукнаысен бер ӝытозь Леонид - лэсьтӥськонын. Солы но, эшъёсызлы но капчи ӧй вал. Егит пи восьмиз. Кышноез Елена сюлмаськыны кутскиз, картэ, оло, висьыны ӧдъя. Сое жаляса, вылды, сюлвориз: "Кушты со "Буммаштэ". Ӧз кылзӥськы Леонид кузпалэзлэсь, заводын одӥгез гажано специалист луиз. 021 номеро механосборочной ужъёсъя цехын слесарь луыса ужа. Мӧляяз пишто ИИ степенен Трудовой Слава орденъёс но "За трудовую доблесть" медаль. Тӥни таӵе Леонид Барбашев кадь адямиос ӝутӥзы заводэз. 1960-тӥ арын 19 октябре татчы ужаны лыктӥз Риф Багаутдинов. Али со - машиностроениея конструкторско- технологической управлениысь отделлэн кивалтӥсезлэн воштӥсез. 1964-тӥ арын заводын 300 мурт пала ужаз. Та дыре предприятие лыктӥзы Дмитрий Гурков, али валтӥсь директорлэн нырысетӥ воштӥсез - маркетингъя но производствоя директор, Алексей Митрофанов, механической цехлэн нырысетӥ кивалтӥсез, инженер-технолог Олимпиада Кошкарова но трос мукетъёсыз. Син азьын ӝог ӝутскиз "Буммаш". 1961-тӥ арын вуиз инженерной корпус. 1965-тӥ арын 26-тӥ декабре нырысьсэ ӵыжатэмын чугун. Вуттэмын коировой но гальванической участокъёс, банно-прачечной комбинат, 8800 квадратной метр улон инты но мукет юртъёс. Кыскемын нырысетӥ трамвай сюрес. 1967-тӥ ар. Пуктэмын валтӥсь корпус, нош 4-тӥ ноябре Пермьысь целлюлозно-бумажной комбинатын "Буммашлэн" Б-21 бумага лэсьтон машинаеныз нырысетӥ бумага поттэмын. 1971-тӥ арын Архангельскысь комбинатын К-09 машинаен нырысьсэ картон лэсьтэмын. Предприятиен 22 ар кивалтӥз Глеб Акубов. Со пусъемын СССР-лэн Кун премиеныз. - Зэмзэ но, таӵе бадӟым завод-гигант асьмелэн син азямы ӝутскиз. Нош кыӵе вал ужасьёс сярысь сюлмаськон? - Ватонэз ӧвӧл, азьло завод пукто, собере улон интыос но мукетсэ ӝуто вал. Нош та предприятие лэсьтӥськиз огдыре: завод но, квартираос но. Город сьӧры, нюлэс интые пуксиз Буммаш посёлок. Соин ӵош ик пуксизы 490 интыен больница, поликлиника (нуналаз 400 муртэ куто, санаторий-профилакторий, спортивной база (вуын уян интыен), "Красная гвоздика" пионерской лагерь (280 интыен), 10 нылпи учреждение но мукетыз. Ужаны кутскизы техникумлэн ӝыт дышетскон ёзэз, подсобной хозяйство но сиськонниос (столовойёс). Завод ялан вормисе потылӥз кызьы ке министерствоын, озьы ик городын. Трос пол пыртылэмын республикалэн но Ижлэн Данъян пул вылаз. Ӵем пыриськылӥз странаысь но дуннеысь бадӟым адӟытонъёсы (выставкаосы). Заводлэн азьвыл Глеб Акубов тодаз вае: кивалтӥсез "Яратӥсько мон "Буммаше" ветлыны тулыс. Котыр сяськаяське улмо, быдэс завод писпуос пӧлы ышемын кадь. Сюлэм шумпотэ, кырӟа". Валамон, ваньмыз со адями киосын лэсьтэмын. Зэм, ми будэтӥськом сяська но, чорыг но. Ваньмыз со кулэ ужась калыклы. - Валентин Витальевич, кызьы но маин пумитаськоды юбилейдэс? Мае тужгес пусъемды потэ? - Оглом, умой. Та секыт вакытэз, рынокен экономикае выжонэз чидам-вормим, азинскыны но быгатӥм. Шаерамы котькинлэсь азьло, дыр, акциосын огазеяськон (1993-тӥ ар) луим, соку ик дугдӥм ож тӥрлык поттэмысь но шедьтӥм асьмелэсь рынокмес. Тазьы учконо ке, 40 ар завод понна ичи дыр ӧвӧл! Луэ ни лэсьтэмлы йылпумъянъёс лэсьтыны но ӵуказезэ чакланы. Берло дас ар ӵоже ми огсыр ужаськом, вань бюджетъёсы выт (налог) но дыраз уждун тыриськом. Арысь аре тросгес поттӥськом продукция но выльдӥськом производствоез. Ужасьёсты кулэстэм интые, ялан ватсаса выль ужан интыос кылдытъяськом. Туэ тани 185 мурт кутӥм ни. Берло дыре кык пол будэтӥм выль продукция поттонмес. Радъям линолеум поттонэз. Со тупа дуннеысь куронъёслы, куддыръя ортче но, тужгес пӧсьтымтэезъя. Завод озьы ик лэсьтэ лэсьтӥськон но мебель тӥрлык (фурнитура) но калыклы мукет кулэ вузъёс. Нош бергась амалэн (центробежной) ӵыжатэм корт поттонъя "Буммаш" быдэс Россиын монополист луэ. - Нош кызьы ужало металлургъёсты? - Тазэ но производствоез ялан выльдӥськом. Али радъяськом анданэз выль автоматизрованной амалэн ӵыжатонэз. Сое вакчияк АКВОС шуиськом. Озьы ик умоя металлэз кыдатон. Та ужъёсы 20 миллион доллар пала коньдон кутэмын ни. Со пӧлысь 90 процентэз заводлэн аслаз уксёез луэ. АКВОС-лэсь нырысетӥ черодзэ вуттон луонлык сётӥз анданлэсь ӟечлыксэ шӧдскымон умоятыны но дуннеысь куронъёслы тупамон карыны. Анданмылы кыкетӥзэ сётэмын ни "Регистр Ллойда" англи фирмалэн сертификатэз. Буммаш кортэз шумпотыса басьто США-ысь фирмаос, Великобритания, Нидерланды, Германия, Италия, Израиль но трос музон кунъёс. "Миым республикаысьтымы Кун кусыпъёсъя министерство мукетсьӧр кунъёсын вузкаронъя конкурс ялӥз вал. Татын нош ик вормисе потӥз "Буммаш". Солы "Арлэн устоез экспортёр" ним сётэмын. Нош АКВОС кылдытонын ужасьмы туэ Удмурт Правительстволэн премиеныз пусъемын. - Валентин Витальевич, азьланезлы кыӵе малпанъёсты? - Умоесь, шуыны луоз. 2000-тӥ арын но продукция поттонмес будэтом. Туэ 14 процентлы йылэтӥм, уждунмес ар ӵоже куинь пол будэтъям. Выль арын но ужасьёсмылы урод уз луы, пумен тросгес уксё тыром. Кужмояло машина лэсьтӥсьёсмы. Сюрес техника, шуныт сётӥсь агрегатъёс келям ни Москваысь нефтеперерабатывающей заводэ, Орскысь гумы но Павловоысь автобус поттӥсь заводъёслы оборудование. Та ёзын тыршо зарни киос - слесарь Леонид Барабашев, электросварщик Александр Густ, фрезеровщик Иван Скакунов, токарь Вячеслав Вицин но уно мукетъёсыз. Соослэн ӵуказе нуналзы сайкыт, ӟеч малпанъёсын уло но ужало. Та производствоез быгатыса радъя Геннадий Гущин, нош металлургической предприятиен - Николай Асямолов. СССР-ысь Министръёслэн Кенешсылэн премиеныз пусъемын 145 номеро цехлэн кивалтӥсезлэн воштӥсез Евгений Григорьев. - Нош линолеум поттонды кызьы азинске? - Таиз но продукцимы музон кунъёсы потыны ярамон потэ. Со ӝог уг пӧсьты, буёлэз чебер но зол возиське. Заводмы линолеум поттонъя 23 линия вуттӥз ни. Одӥгез тӥни дорамы инъямын. Лыдпусэн вераса, арлы быдэ 3 миллион квадратной метр линолеум поттӥськом ни. Линолеум поттонъя предприятиен кивалтэ Михаил Иванус, нош валтӥсь инженер луэ заводлэн ветеранэз Анатолий Пономарев. Соос но мукетъёсыз инженеръёс, технической ужасьёс та ужлы уно кужымзэс но быгатонлыксэс сётӥзы. Туэ 23-тӥ октябрьысен 10 ар линолеум поттӥськом ни. Ӟечлыкез сертификатъёсын пусъемын, со, кызьы шуо, барабанысен кошке. Предприятие арлы быдэ планзэ мултэсэн быдэсъя но 1 метр 55 сантиметр но 2 метр пасьталаен линолеум поттыны дась ни. Татын шуныт кылъёс верало директорлэн воштӥсьёсыз Иван Вахрушев но Анатолий Чайка, производстволэн кивалтӥсез Вера Терехова, снабжениея отделлэн кивалтӥсез Вячеслав Маслов, оператор Зоя Трефилова, слесарь-ремонтник Николай Варламов но трос мукетъёсыз сярысь. - Валентин Витальевич, вань удысъёстэс вераса но уд быдты. Озьы ик усто ужало шуныт сётӥсьёсты, инструментъёс, калыклы вузъёс лэсьтӥсьёсты, энергетикъёс, механикъёс но музонэз. Нош асьтэос кызьы шутэтскиськоды, дырды кыле на ке. - Туж яратӥсько чорыганы. Заводмы но юнме чорыг уг будэты, дыр. Выль арлы сузьет Сценарий Заллэн шораз кузь ӝӧк сылэ, со вылын - ческыт пӧрамъёс. Пырон азьын - плакат: "Выль арен!" Зал быдэсак чебер шудонъёсын, гирляндаосын чебермамын. Ужрадлы дасям арбериос, реквизитъёс но ки улын ик луыны кулэ. Капчи крезьгур чузъяськемъя, ӝытэз нуисьёс пото. Соос куноосты кылбурен пумитало. Котькуд пырись мурт кылбур, кырӟан яке анекдот вера. Дэмен вуись куноослы ӵош кырӟаса маскаосын пырыны тунсыкогес луысал. Нырысетӥез ӝытэз нуись. Эшъёс, ӧтиськом ваньдэс Шулдыръяськыны татын. Шумпотон, эктон, крезьгур Бугыртоз ваньмес котыр! Карнавал! Эх, карнавал! Выль арез возьма ни зал! Кыкетӥез ӝытэз нуись. Та чебер фойеямы Выль армы ӝоген вуоз. Нош капчи луоз солы, Кин сюлмысь шулдыръяськоз. Нырысетӥез. Гажано эшъёс, ми ӟечкыласьком тӥледыз вуоно Выль арен! Шудбур, тазалык, яратон но сэзь мылкыд сӥзиськом. Кыкетӥез. Ӝытмес дэмласьком усьтыны Выль ар сярысь кырӟанэн. Кырӟало. Нырысетӥез. Ӝӧк сьӧрын мӧзмыт медам луы шуыса, ми ӧжытак йырвизьдэс сынаса утчалом. Тӥ соглаш-а милемын? Конкурс-шудон - "Выль арлэн гороскопез"! (Юанъёс сётъяло.) 1. Кӧня знакъёсыз зодиаклэн. (12.) 2. Вералэ ваньзэ. (Козерог, Водолей, Рыба, Овен, Телец, Близнецы, Рак, Лев, Дева, Весы, Скорпион, Стрелец.) 3. Вералэ удмурт сямен. (Кудзэ быгато, верало.) 4. Кӧня пӧйшуръёслэн нимынызы пусъемын аръёс? (12.) 5. Кин кыӵе пӧйшурлэн араз вордӥськемын? (Пӧлысьтызы чаклало.) 6. Кыӵе пӧйшурлэн арез 2000-тӥез ар? (Драконлэн.) Нырысетӥез. Курисько саклык висъяны. Туннэ асьме пӧлын - тодмо артистъёс, выжкылысь геройёс, пӧртмаськисьёс, экстрасенсъёс - ваньзэ вераса уд быдты. Ойдолэ соосты пумиталоме кичабонъёсын! (Кичабонъёс.) Кыкетӥез. Асьме дорын куноын - Россиысь сӥё-дано артист Михаил Ворончихин! (Потэ со тусъем, сыӵе ик куараен кырӟаны дауртӥсь.) Нырысетӥез. Аслаз группаеныз Надежда Бабкина! Ансамбленыз ӵош шулдыръясько куноос но. Кыкетӥез. Удмурт театрысь калык артист... Тодмалэ асьтэос! Выжыкылысь герой потэ но рользэ шудэ. Яралоз, кык кузя луизы ке но. Нырысетӥез. Россиысь дано артист Александр Перевозчиков! (Мунёеныз.) Сӥё-дано куноос кырӟам-эктэм бере, ӝытэз нуисьёс, Выль арен ӟечкыласа, соослы кубиста, кешыр, горд кушман порма серемес кузьымъёс сётъяло. Нырысетӥез. Концерт бере геройёсмы жадизы, луоз. Табере, эшъёс, ойдолэ тодматскоме ог-огенымы. Ялӥсько усто ӟечкыланлы конкурс. Усто тост понна одӥг паймымон кузьым дасямын. (Ӝытэз нуисьёс асьсэос малпало кузьым.) Кыкетӥез. Эшъёс, маке ӝегатско ни, лэся, Тол Бабай но Лымыныл. Мыно ай, пумитало соосты. Кошке. Чузъяське крезьгур. Кырӟаса потэ Лымыныл. Нош вуиз ни тол. Выль лымы пурӟе. Вань котыр улос Мӧзмонэн тудӟе. Припев: Изьыны уг лу, Юг лымы поръя. Мон но со сьӧры Бергасько тӧлъя. Ой, кезьыт лымы, Нош сюлмын шуныт. Ой, кырӟа мылкыд, Дан тыныд, толмы! Припев: Лымыныл. Ӟечбуресь, дуно эшъёс! Лыктӥсько туж дыртыса. Ваи пӧртэм кузьымъёс, Выль арен ӟечкыласа. Кин быгатэ кырӟаны, Кылбуръёс но вераны. Ӧтисько весь ваньдэсты Конкурсэ пыриськыны. Конкурс. Ӝӧк сьӧрын пукисьёсыз кык командалы люконо. Тодмо кырӟанъёсысь одӥг кылзэ верано, кылсярысь, "ёлочка" ("Маленькой ёлочке..."), "снегопад" ("Такого снегопада..."), "егит дыр" ("Ой, шудо егит дыр"). Кин тодэ, со кырӟа одӥг куплетсэ. Лымыныл. Гажано эшъёс, уд тодӥське-а? Малы ке Тол Бабай кема ӝегатске ни. Кытын меда Тӧл выны? Мед вайысал сое бурдъёсыз вылын. Тӧл пельтэм кылӥське. Потэ Тол Бабай. Тол Бабай. Ой, ой, мӧйымиськем, мешокме мырдэм вормисько. Тау тыныд, Тӧл пиёке, кызьы шедьтысал ай мон та сюресэз. Шумпоттыны ваньдэсты Мон ваи кузьымъёсты. Выль арен ӟечкыласько, Кема улон сӥзисько. Лымыез лапкатоме, Ойдо, тыпыр эктоме! Чузъяське калык эктон гур. Ваньзы ӵош экто. Собере Тол Бабай кузьымъёссэ сётъя. Тол Бабай. Туж чебер эктӥськоды, Мылкыдме лӧпкытӥды. Мон, эшъёс, ини пересь, Ортчи туж бадӟым сюрес. Тӥ но, вылды, тододы, Кыӵе "Паймытӥсь бусы" ("Поле чудес"). Борддорын суред - букваослы клеткаос. Соосты пуктыло, мадиськонъёсты тодыса. Пӧрме "Выль ар" (яке мукет малпаны луоз). Вормисьёслы - кузьым. Лымыныл. Мынам но шудонэ вань, эктыса шудон. Нимаське со "Яр-Шур". Ваньдэс курисько круге султыны. Крезьгур шудэмъя эктӥськомы. Мон шуисько ке, Яр - эктэмысь дугдӥськоды, нош Шур ке, - эктӥськоды. Кин янгыша, со шудонысь потэ. Вормисьлы - кузьым. Тол Бабай. Яратоно эшъёсы, милям уг луы на тазьы гинэ люкиськеммы. Курисько тӥледыз кык командалы люкиськыны. Синмес кышетэн думылыса чеберъяно кызъёсыз. Борддорын кык кызъёс суредамын. Шудӥсьёс огзы бӧрсьы огзы адӟытэк чеберъяло соосты (котькудӥзлы кияз картонлэсь шудон сётӥське. Со куспын пӧртэм кырӟанъёс чузъясько. Ужзэс быдэстэмзы бере, юано, кыӵе крезьгуръёс чузъяськизы. Кин тросгес вералоз, со ик вормисе потоз. Тол Бабай. Туж усто тӥ шудӥды, Кызъёсмес чеберъяды. Вормисьёслы - бадӟым приз, Выль арлэсь дуно сюрприз! (Кузьым сётэ.) Лымыныл. Кошкон дыр вуиз ини, Шулдыръяське, куноос. Милемыз эшшо витё Мукет интысь эшъёс. Ӟеч луэ! Выль арен! Тол Бабай. Ӟеч луэ, вуись Выль арен! Кошко. Пото ӝытэз нуисьёс. Нырысетӥез. Нош али ми ӧтиськом Выль ар вальсэз эктыны. Чузъяське крезьгур, ваньзы бергало вальсын. Кыкетӥез. Калык эктонъёс дэмласькомы. Арган шудэ, экто. Нырысетӥез. Эшъёс, шулдыръяськонмес азьланьтыса, "Усточи" конкурс ялӥськом. Таяз кузьымъёс луозы туж дуноесь. Котькуд шудӥсьлы кырӟаны, эктыны но кылбур вераны быгатоно. Кыӵе ке крезьгуръя инструментэн шудӥды ке, эшшо но умой луоз. Тӥни озьы асьмеос асьмелы концерт возьматом но ӝытмес шулдыртом. (Вормисьёсты кузьымен ӟечкылало.) Кыкетӥез. Гажано куноос, туж бадӟым тау капчи мылкыдын шудонъёсы пыриськемды понна. Улонды но Выль аре туннэ кадь ик шулдыр мед луоз! Нош али кырӟалэ, эктэлэ асьтэлэн мылкыддыя. Эктонъёс бере тужгес но етӥзъёсыз басьто на кузьымъёс. Нырысетӥез. Эктонъёсын валче выль арлы сӥзем ӝытэ ми люкиськиськом тӥледын. Ӵош. Выль арен! Выль шудбурен! Дасяз Юлия Кузьмина. ВАЛЭКТЭ ЮРИСТ Сэрегез дася Лилия Шкляева Мар со ИНН? Бадӟым черодэз адӟи налогъёсъя инспекция азьысь. Кыӵе ке дефицит люкыло кожай. Юай. Сёто, пе, кыӵе ке ИНН шуонзэс. Выль арозь одно бастыны кулэ. Малы со мыным, пенсионерлы? В.Иванов. Та выллем юанлы валэктон "Удмурт дунне" сётъяз ни. Нош В.Иванов но музон эшъёс сое адӟиллямтэ бере, выльысь тодады вайытом. ИНН - ӟуч сямен - идентификационный номер налогоплательщика. Сое Россилэн котькуд гражданинэзлы сётэ улон интыысьтыз вытъёсъя ёз (налогъя орган). Сыӵе радлык ( порядок) тупатэмын пенсинеръёс понна но. Таӵе номерез 2000-тӥ арын 1-тӥ январёзь басьтымтэ понна кылэз уз юалэ. Нош адями соин валче ачиз шуге-леке медаз шедьы вал. Шуом, уждун яке пенсия сётыкузы. Та ужез пересьёс понна капчиятон вылысь, Россиысь Вытъёсъя министерстволэн Удмурт Республикаысь управлениез но Удмурт Республикаысь Калыкез улон-вылонын утёнъя министерство нимысьтыз ужрадъёс кутозы. Зарни вае-а "сьӧд зарни"? Та вакытэ Россиын му вӧй поттон каллен кулэсме. Удмуртиын со эшшо но зол шӧдӥське. Уго шаерысь музъем пушкын нефтен тырмем интыос пичиесь. Соин ик бадӟым компаниос та удыслы уксёзэс мылкыдтэк висъяло. Али "Удмурт Республикаын музъем узырлкыъёсты уже кутыса поттэм ваньбурез люкон сярысь" Законлэн проектэз дасямын. Сое эскеронлы ик сӥземын вал вордӥськонэ ортчем кенеш. Отчыпыриськизы Кун Кенешысь депутатъёс, нефть но газ поттӥсь предприятиослэн кивалтӥсьёссы, музъем узырлыкъёсты уже кутонъя комитетысь тыршисьёс. Законын чакламын асьме предприятиосын ӵош ужась кунгож сьӧрысь компаниосты куд-ог вытъёслэсь мозмытыны, нош выт бичаськоз барыш поттэмысь. Озьы ик выт тыриськоз му узырлыкъёсты уже кутэм понна но. Документэз дасясьёслэн малпамзыя, туала вытъёс уно могӟетъёс кылдыто. Нош выль законэз уже кутӥзы ке, элькунысь нефть поттон удысэ тросгес коньдон лыктоз. Озьыен, му вӧй кыскон радъяськоз, нош собере уногес но луоз. Соин валче бюджетэ ватсаса уксё вуоз, выль ужан интыос но кылдозы. А.Андриянов. Кун Кенешын Мынэ бюджетэз юнматон Ужзэ азинтэ Кун Кенешлэн сизьыметӥ сессиез. Кӧня ке вис карем бере, депутатъёс нош ик эскеро 2000-тӥ арлы чаклам бюджетлэсь инъетсэ. Отчы трос гинэ ватсанъёс но дэмланъёс пыртэмын вал. Со бордын куинь арня ӵоже ужаз на согласительной комиссия. Вераны кулэ, сессие вуэм депутатъёсты пумитаз пикет. Кун Кенеш азе потӥзы оборона удысын ужасьёс, бюджет чотын улӥсьёс. Соосты площаде поттӥз улон-вылонлэн уродмемез, дунъёслэн ялан будэмзы. Та сярысь гожтэмез лыдӟоды газетлэн вуоно номерысьтыз. Л. МЕДВЕДЕВА. Удмурт Республикаысь Правительстволэсь 1998-тӥ арын 2-тӥ ноябре кутэм 998 номеро постановленизэ 2000-тӥ арын кужыме кельтон сярысь Удмурт Республикаысь Правительстволэн ПОСТАНОВЛЕНИЕЗ Улон интыос, дачаос, гаражъёс лэсьтонъя кооперативъёсысь, сад-бакча возёнъя но пудо-живот вордонъя дэменлыкъёсысь ёзчиослэсь (члены) музъем понна выт чаклам мында но дыраз тыронзэс радъян вылысь, Удмурт Республикаысь Правительство пуктэ: 1. Удмурт Республикаысь Правительстволэсь 1998-тӥ арын 2-тӥ ноябре кутэм "Удмурт Республикаын 1999-тӥ арын музъем понна вытлэсь быдӟалазэ лыдъянъя но сое тыронъя огдырлы радлык туупатон сярысь" 998 номеро постановленизэ 2000-тӥ арын кужыме кельтоно. 2. 2000-тӥ арлы бюджетэз кылдытыку, республикаысь ёрос но город администрациослы ӵектоно коопертивъёслэсь но дэменлыкъёслэсь казначейёссэс коньдонэн пусъёнэз лыдэ басьтыны. 3. Та постановленилэсь быдэсъяськемзэ эскероз Россия Федерациысь Вытъёсъя но тыриськонъёсъя министерстволэн Удмурт Республикаысь управлениез. Удмурт Элькун Кивалтэтлэн Тӧроез Н.А.Ганза. 1999-тӥ арын 6-тӥ декабре � 1188. "ЕГИТ СЕМЬЯ - ТУННЭ НО ӴУКАЗЕ" КОНКУРСЭ Вормы астэ ачид Быземезлэсь азьло Таня ӧз ик малпалля, улонэз такем секыт луоз шуыса. Жаляса учкылӥз гуртысьтызы тупатэк улӥсь семьяос шоры. Куддыр паймылӥз но, кызьы соос семья кылдытӥллям ог-огзэс яратытэк. - Эн паймы, нылы, - шуылӥз анаез, - кин тодэ, аслад но ваньмыз ву вылэ саникен гожтэмын. Туж сюлмаськиз кышномурт одӥг гинэ нылыз сярысь. Кузпалыз дас ар талэсь азьло кулӥз. Малпамтэ шорысь. Ноку куспазы керетэмзы ӧй вал, тупаса, кенешыса, ог-огзылы юрттыса улӥзы. Одӥгез гинэ сюлэмшугъяськытӥз: инмар одӥг гинэ ныл сётӥз. Шудэз гинэ мед луоз, - лушкем лулӟылӥз анай. Таня Игореныз 8-тӥ классысен эшъясько ини. Школае ӵош мыно, ӵош берто, одӥг ульчаын уло. Пияш сумказэ нуэ. Нырысь бӧрсязы пырскетылӥзы, исаллязы, нош бӧрысь дышизы, вожъяськыса учкылӥзы. Дорысь ужзэс но ӵош лэсьтылӥзы егитъёс. Эшъяськонзы чылкыт но чебер яратонлы пӧрмиз. Йырзы поромымон бергазы школаез йылпумъян балын. Кыӵе шумпотӥз Таня, ӟеч дышетскемез понна азвесь медаль сётэмзылы. Игорь но "куиньёстэк" йылпумъяз школаез. Ӵош мынӥзы Ижысь мединститутэ пырыны. Танялы удалтӥз, нош Игорь конкурс пыр ӧз ортчы. Сюресъёссы вайяськизы: Таня - городын, Игорь - гуртын. Чидатэк возьмаллязы пумиськонзэс. Школаез йылпумъям пияшлы туж секыт вал нырысь-валысь: гуртын клубзы гинэ но бадӟым тунгонэн ворсамын, библиотека ӧвӧл. Уж но ӧз сюры, гуртоос тросэз ужтэк пукизы. Скал гид бушамын, ыжъёс гинэ кӧня ке вань на. Гуртэ кылем казакпиос ӝытъёсы ӵындытэм котельнойын тамак пурккето, картаен шудо, вина юо. Гуртазы ог витьтон пала гинэ корка. Нылъёс ӧвӧл, кин кытчы кошкемын, сьӧр гуртэ но потыса уг вутто. Игорь городэ кошкыны турттэ вал, анаез ӧз лэзьы, арзэ, пе, дорын улод, институтэ пырыны дасяськод. Нош верамъя гинэ уг луы: баллэз нош ик ӧз тырмы. Суйёсыз-пыдъёсыз юскиськыса, дораз бертӥз. Коньдон тырыса дышетскон сярысь веранэз ӧвӧл, кытын, пе, колхозын ужась анай-атаез ӝыны ар уксё уг басьто ни. Куинь сузэр-вынъёссэ но сюдыны- дӥсяны кулэ. Таня буйгатыны вырылӥз яратонзэ. Пияш дышетскиз шофёре. Таизлы но кыӵе шумпотӥз. "Мон кадьёслы институт ӧсъёс ворсамын", - лулскыса ас понназ малпаз со. Ярам, шальтрам машина ке но сётӥзы. Нунал ужа, кык-куиньзэ ремонтын сылэ. Сюлмаз пыдло каръяськиз врач-хирург луон сярысь малпанэз. Одӥг ӝыт аслэсьтыз бадӟымгес Федя котыраз ериз. Ойдо, пе, сьӧр гуртэ ветлом. Кылзӥськиз, мынӥзы, нош бертыкузы юлтошез кисыысьтыз курытсэ поттӥз. Ойдо, пе, одӥген лэзём, Таняед татын ӧвӧл. Игорь нырысь пумитъяськиз, собере одӥгез, кыкез кошкиз. Мукет нуналаз ужаны ик потыны ӧз быгаты, анаезлэн тышкаськем пумитаз номыр ӧз вазьылы. Возьыт ик вал бен, нош "буйгатӥсьёсыз" трос гинэ луизы. Котельное люкаськем воргорон уллё мукет ӝытаз нош кытысь ке шӧмъяськон шедьтэм ни. Куд-огез Игорьлы но бутылка пыдэссэс мылето, мар-о, пе, сыӵе выриськод, пичи на-а, мар-а - кион уллёе сюрид ке, кион сямен ик вуз. Мукетъёсыз будэто на, астэ олокин эн кожа, пе, умой дышетскид ке но, милесьтым пӧртэмед ӧвӧл, колхозын ик бугыръяськиськод. Берпуметӥ кылъёс пияшлэсь сюлэмзэ ик чепыльтӥзы кадь. Киыныз шонтӥз но, ӧз пумитъяськы ни. Таня дышетсконзэ йылпумъяса, егитъёс шулдыр сюан ортчытӥзы. Соослэсь шудоез ик ӧй вал ни кадь. Ёрос больницае ӵапак ужась но кулэ вылэм, егит специалистлы сётӥзы квартира. Толэзьзэ юытэк чидаз пинал кузпал, бӧрысь олокыӵе но мугъёс сюрылыны кутскизы: кинлы ке пу ваиз, мукетызлы - кирпич. Ӟеч лэсьтӥ но, пичи кунояськи, шуылӥз. Тышкаськытэк гинэ визьманы выриз Таня, нош соиз эшшо но зол юыны кутскиз. Оло, нылпимы луиз ке дугдоз, малпалляз ас понна кышномурт. Ассэ ачиз гинэ буйгатыны выриз со озьы. Пизы вордӥськем бере но улонзы ӧз воштӥськы. Оломаиз но вал ини та дыр куспын: керетон, бӧрдон, сюлмысь вераськон, кыл сётон. "Шат люкиськоно? - Танялэн йыраз чилектылӥз таӵе но малпан. - Уг, уг кушты, кинлы со кулэ луоз на. Собере, яратӥсько ук мон сое. Игорь но монтэк, пиезтэк улыны уг быгаты". Танялэсь улонзэ пыдлон каръяськем оскон гинэ бурдъяз на кадь. Игорез куке но визьмаськоз, одно визьмаськоз. *** Таня тэтчыса сямен султӥз иземысь, бере, пе, ӧй кыльы-а уже. Димаез садике нуоно. Учке, Игорез ӧвӧл, дӥськутэз но уг адӥськы. Ӝӧк вылысь гожтэтэз адӟыса, ӝогак лыдӟиз: "Вождэ эн вайы, мусое, кӧня куректон мон ваи ни тӥледлы. Валасько: шудды мон киын. Шат вормыны уг быгаты асме? Одно вормо. Дорады вуо йӧнатскыса". О.Никитина. Удмурт Республикаысь Кун Кенеш но Правительство мур куректэмзэс верало, "Ижевский электромеханический завод "Купол" кун предприятилэн техникая директорез Ваганов Борис Георгиевич улонысь кошкемен валче, но ӵыжы-выжыосызлы но матысь адямиосызлы кайгыремзэс верало. Куштӥськем корт бичало Таиз дышетскон ар кутскем бере, республикаысьтымы дышетскись нылпиос пӧлын ялэмын вал куштӥськем корт но кагаз бичанъя месячник. Ӵошатсконын нырысетӥ интые потӥз Можгаысь 9 номеро школа. Дышетскисьёс бичаллям 36 тонналэсь уно куштӥськем корт. Кыкетӥ интыын - Пычас шор ёзо школа. Умоесь азинсконъёссы Бадӟым Учаысь пиналъёслэн. Рудаен ӵошатыса, бичам кортлэсь андан ӵыжатон дунтэмгес усе. Соин но, лэся, дун тырем сяна, "Удмуртвтормет" АО вормисьёслы 10000 манет премия сётӥз на. П. Скобелев. Выль арлы "кузьым" Таяз учыре сое нош ик дасяз Тарифъёсъя но дунъёсъя кун комитет. Солэн решениезъя, 2000-тӥ арлэн нырысетӥ нуналаз ик городысь автотранспортэн ветлон кык манетозь будоз. Нош одӥг толэзьлы билетъёс 100-180 манет сылозы. Городлы матысь маршрутын ветлон одӥг иськемез табере 30 копейка луоз. Дуноятэмзылэн одӥг мугез: 80 процентэз автобусъёс воксё вужмемын ни. Нош городъёслэн администрациоссы но Правительство дотация уг висъяло. Со сяна, таиз ик комитет 15-тӥ декабре кутӥз на мукет решение - калыклы кыкетӥез "кузьым". Электрокужымлы дун 20 процентлы йылэ, баллонъёсын кизертэм газлы - 70 процентлы, пӧсь сётонлы - 35-лы, кизертэм ёмкостной газлэн дуныз куинь пол будэ. Элькунысь данаказ гуртъёсын пуэн эстӥсько ай. Со но дунтэм уг усьы. Вылаз ик, эшшо эстӥськон (бензин) кулэ на, пу ваем понна тракторлы тыроно. Нош табере комитет пулы дунэз 40 процентлы будэтӥз. Толэзьёсын уждунзэ адӟисьтэм гурт ужасьлы со юн шуккет луоз. Таӵе ужпумлы пумит луизы республикаысь профсоюзъёс. Соин валче, Кун Кенешлэн сессиезлэсь азьло, Удмурт Республикаысь обороная промышленностьын ужасьёслэн профсоюззылэн кенешезлэн тӧроез Валерий Коротков журналистъёсын пумиськон ортчытӥз. Со ивортӥз, Правительстволэсь таӵе вамышъёссэ алыны курыса, профсоюзъёс депутатъёслы вазиськизы шуыса. Уго соосты калык бырйиз, калык азьын кыл кутоно. Профсоюзъёс мылкыдзэс санэ мед басьтозы шуыса, кылем четверге Кун Кенешлэн юртэз азьын пумитъяськон ужрад ортчиз. Ӵапак соку депутатъёс 2000-тӥ арлы бюджетэз эскеризы. Правительство улон инты но коммунальной юрттэтъя дунъёсты 10 процентлы будэтыны чакла. Нош калыклэн доходъёсыз туэ 10 толэзь ӵоже 18 процентлы кулэсмизы. Жаляса верано, нылпи пособиосъя но тыронъёс ёз быдэсме. Туэ бюджетэ пыртэмын вал 1997-тӥ-1998-тӥ аръёслы пунэм тырон. Нош 1999-тӥ арлы нылпи пособиосты тырыны правительство чакла 2001-тӥ арын. Секыт юнгдуре сюремын дышетӥсьёс, тужгес но шугъясько Ижысь школаосын ужасьёс. Соослэн уждунзы сентябрь-ноябрь понна тырымтэ на. Али Удмурт Республикаын улӥсьёс пӧлысь 52 процентэз туж куанерен лыдъясько. Улыны самой ичизэ (прожиточной минимум) ноябрь толэзе 907 манет вал. Пенсионеръёс но ветеранъёс ӧвӧлтэмлэсь пенсия басьто. Таӵе югдур ик калыкез бугыръяськонэ вуттэ. Республикаысь профсоюзъёслы пумен секытгес луэ вожомем мылкыдъёсты зӥбломытыны. А. АНДРИЯНОВ. КУН КЕНЕШЛЭН СЕССИЯЗ Выль арлы - выль коньдон пуйы Удмурт парламент 2000-тӥ арез ӟеч сямъя пумита - депутатъёс таяз учыре Выль арозь ик "вурыны" вуизы шаермылэсь коньдон возён "пуйызэ" - бюджетэз. Туалазэ юнматӥзы вал 1999-тӥ арын феврале гинэ. Озьыен, калык чакламъя, ваньмыз умой луыны кулэ. Нош сессилэн таиз кенешонэз сокем вольыт ӧз кутскы. Депутатъёсты вазь ӵукна ик пумитаз Кун Кенеш азе люкаськем калык - пыӵал тӥрлык поттон удысын ужасьёс, Ижевскысь дышетӥсьёс но врачъёс. Кезьыт, мугорез сисъясь тӧл шорын соос быдэс час ӵоже сылӥзы, асьсэлэсь куронъёссэс, секыт мылкыдзэс веран понна. Калыкез кышкатэ 1- тӥ январьысен дунъёсты шуак будэтон. Электрокужым, газ, автотранспортэн мынон-ветлон эшшо но дуноязы ке, кызьы улозы ёрмон калэ вуэм семьяос? Кин соосты утёз, Кун Кенеш но Правительство дыраз кулэ ужрадъёс ӧз ке кутэ? Сессия ужзэ кутскиз 19-тӥ декабре ортчем быръёнъёслы йылпумъянъёс бордысен. Соосын депутатъёсты тодматӥз Удмурт Республикаысь Быръёнъёсъя комиссилэн кивалтӥсез А.И.Тубылов. Афанасий Ильич верамъя, таяз учыре быръён участокъёсы шӧдскымон тросгес калык вуылӥз. Данакез соос оскемзэс веразы Ю.Д.Маслюковлы но С.К.Смирновалы. Та нуналэ ик Кун Кенеше депутатэ быръемын вал Владимир Скрипченко, Фаина Федорова, Валентин Галимуллин, Николай Повышев но Виктор Полянских, Глазов городлы мэре - Владимир Перешеин. А.И.Тубылов озьы ик вераз калык пӧлын ортчытэм юалляськонлы йылпумъянъёсты. Данакез шаерамы улӥсьёс мылкыд каризы Удмуртилы Президент бырйыны. Отӥяз депутатъёс азинтӥзы 2000-тӥ арлы чаклам бюджетэз эскеронэз. Нырысетӥ кутскемен со юнматэмын ӧй вал. 394 ватсанъёс но воштонъёс пыртэм бере, куинь арня ӵоже ужаз на огкылэ вуонъя комиссия. Таяз учыре но бюджетэз эскерон сокем ӝог ӧз ортчы. Депутатъёс ёзэн-ёзэн учкизы на котькуд люкетсэ. Ас малпамзэс веразы но куд-ог воштонъёс пыртыны куризы на депутатъёс Н.А.Образцова, А.Г.Красильников, В.Л.Фридрих, Н.С.Сычев, А.В.Марченко. Со бере документъёс нош ик берыктэмын вал одӥг кыл шедьтон комиссие. Бер ӝытазе гинэ парламент юнматӥз "Удмурт Республикалэн 2000-тӥ арын социально-экономической азинсконъя программаез сярысь" но "2000-тӥ арлы республикалэн бюджетэз сярысь" Законъёсты. Отын нимаз-нимаз пусъемын, кӧня коньдон вайыны кулэ асьмелы му вӧй поттон удыс, промышленность но мукетыз. Республикалэн бюджетаз доход ваись люкетэз вуыны кулэ 3 986 473 сюрс манетозь, расходэз - 4 298 108 сюрс манетозь. Соос вискын "пась" интыез - тырмымтэез (дефицитэз) люкаськоз 311 миллион 635 сюрс манет. 1999-тӥ арлэн дефицитэныз ӵошатыса, 40 процент. Туала вакытэ сокем урод ӧвӧл ни. Ватсаса коньдон висъямын МВД-лы, чугун сюреслы, гурт удыслы, бусыосы торф поттонлы. Таиз ласянь тужгес но нюръяськиз "Удмуртторфлэн" кивалтӥсез депутат А.Марченко. Ма чотын тырмоз республикалэн бюджетэз? Чакламъя промышленность сётоз 41050 миллион манет, 7 750 сюрс тонна кыскемын луоз му вӧй, гурт удыс сиён-юон поттоз 10 418 миллион манетлы, вузкарон удыс 15 200 миллион манет пайда ваёз. Кудӟытӥсь юонъёсты пӧзьтон вуоз 2 350 сюрс декалитрозь. Сессиын кылзэмын профсоюзъёслэн вазиськонзы. Депутатъёс азьын вераськиз Удмурт Республикаысь профсоюзъёслэн кивалтӥсьсылэн воштӥсез Виктор Еговкин. Пикетэ потэмъёслы куронъёссылы валэктон сётыса вераськиз республикаысьтымы Тарифъёсъя но дунъёсъя кун комитетлэн председателез Олег Белобоков. Со меӵак шуиз, электрокужымлы, газлы дунъёсты ӧм ке ӝутэ, Удмуртия кылёз югыттэк но, шуныттэк но, малы ке шуоно, соиз но, таиз но республикаямы тырмыт ӧвӧл. Дунъёсты ӝутэ Москва, асьмеос татын номыр лэсьтыны ум быгатэ. Парламент решение кутӥз Россиысь Правительстволы вазиськон ыстыны, электрокужым удысэз государство ас кияз мед кутоз но дунъёсъя политикаез чакласа мед возёз шуыса. Кун Думае быръемен валче, сессия мӧзмытоз С.К.Смирноваез Кун Кенешын депутатлэсь ужзэ быдэсъямлэсь. Л.Медведева. Выль ар синпӧртманъёс Выль ар азьын пиналъёс понна ӧсъёссэс вӧлак усьтӥзы культурая юртъёс (учреждениос). Узыр программа дасязы Егитъёслэн юртазы ужасьёс. 28-тӥ декабрьысен 6- тӥ январёзь (Выль ар ӝытэ но со бере кык нунал вис карыса котькуд )ӝытэ калыкез возьма шулдыр ёлка. Нылпиос понна нуназе 10 но 13 часысен возьматӥське "Баба Яга пумита выль арез" спектакль. Ӵукна, нуназе бере но ӝыт бадӟым шулдыръяськонъёсы ӧте В. Г. Короленко нимо ӟуч театр. 10, 13 но 16 часысен представлениос кутско Мунё театрын, дасямын "По щучьему велению" выжыкыл. Операя но балетъя театр пинал учкисьёсызлы дэмла "Новогодние забавы кота Леопольда" спектакльзэ. 4-тӥ январе луоз старшеклассникъёслэн балзы, бӧрысь нуналъёсы "Белоснежка и семь гномов" но "Золушка" спектакльёс. Удмурт национальной театрмы ӟуч кылын дасяз "Чудесный горшок" выжыкыл. Представлениос кутско 10 но 13 яке 11 но 14 часъёсы. Со вакытэ ик тӥледыз возьмало кык чеберъям кызъёс, кык пӧртэм Тол Бабайёс но Лымы нылъёс, ёлкаос котырын шудонъёс, кузьымъёс. 2-тӥ, 3-тӥ но 4-тӥ январе ӵыдонтэм шулдыр луоз Удмурт кун филармониын но 10 часысен кутско Выль ар синпӧртманъёс, нош 15 часысен быгатэмзэс возьматозы Ижевскысь пинал кизилиос. Т. НИКОЛАЕВА. КПРФ-лэн пресс-службаез ивортэ Кун Думае ортчем быръёнъёсъя КПРФ пала дурбасьтӥзы 24,9 процентэз бырйисьёс. Та лыдпус самой бадӟымез луэ. 1995-тӥ арен ӵошатыса, компартия пала дурбасьтӥсьёслэн лыдзы 3 процентлы йылӥз. Удмурт Республикая ке верано, та лыдпус будӥз 5 процентлы (19,1 %), 1995 арын, - (14,9 %). Шаерысьтымы коммунистъёслэн нимынызы КПРФ-лэн региональной списокезъя Кун Думае депутатэ мынӥз рескомлэн нырысетӥ секретарез Николай Иванович Сапожников. Со сяна, одӥг мандатэн 28 номеро Ижевск округъя бырйисьёс оскемзэс веразы Юрий Дмитриевич Маслюковлы, КПРФ-лэн ЦК-езлэн членэзлы. Тужгес но трос куара сётэмын, Ижевскысь Октябрь, Ленин, Первомай районъёсъя, Воткинск городъя 28-тӥ округысь 84 сюрслэсь трос адямиос оскемзэс веразы коммунистлы Ю. Д. Маслюковлы. 29-тӥ округысь коммунистъёс куаразэс сётӥзы С. К. Смирнова понна. Пусйыны кулэ, быръёнъёслы дасяськыку, Удмуртиысь коммунистъёслэн радъёссы будӥзы - вуиз егит кужым. Быръёнъёслы берпуметӥ йылпумъянъёс реском лэсьтоз январе ортчоно партконференцияз. *** Кызьы ивортӥз КПРФ-лэн ЦК-езлэн председателез Геннадий Андреевич Зюганов, Россиысь компартия Кун Думалы председателе ӵектоз аслэсьтыз кандидатсэ. "Мон лыдъясько, парламентэн кивалтонэ пуктыны кулэ самой бадӟым фракцилэсь ӵектэм муртсэ", - пусйиз со. Зюганов малпамъя, быдӟалаезъя кыкетӥ интые потэм фракцилэн представителез луыны кулэ председательлэн нырысетӥ воштӥсез, нош куинетӥ но со бӧрсьы басьтэм интыосысь депутатъёс - председательлэн воштӥсьёсыз но комитетъёслэн кивалтӥсьёссы. Зюганов быръён бере нырысетӥ нуналъёсы ик пумиськылӥз "Отечество - Вся Россия" блоклэн кивалтӥсеныз Евгений Примаковен но "Единство" блоклэн кивалтӥсеныз Сергей Шойгуэн. Вераськон мынӥз Кун Думалы председатель быръён ласянь. Г. А. Зюганов малпамъя, выль Дума нырысетӥ сессизэ ортчытоз 2000-тӥ арын 18-тӥ январе. Компартилэн кивалтӥсез лыдъя, 1-тӥ январьысен "пенсионеръёс но Россиын улӥсьёс самой ичизэ толэзяз 1000 манет басьтыны кулэ, сотэк улыны-вылыны уд быгаты ни". *** Россиысь коммунистической партия кылем понедельнике, 20-тӥ декабре, Центризбиркоме но Генеральной прокуратурае вазиськон ыстӥз. Отын вераськон мынэ Татарстанын, Башкортостанын, Самара, Саратов но Тула областьёсын быръёнъёсъя законэз тӥямзы сярысь. Та пумысен журналистъёслы ивортон лэсьтӥз КПРФ-лэн кивалтӥсез Геннадий Зюганов. - Быръёнъёслы йылпумъянъёсъя нырысетӥез верамъёсын коммунистъёс пала 43 процентэз калык куаразэ сётӥз, али та лыдпус 18-озь вуиз ни, - шуиз со. - Но милемды алдаськонъёсын уд паймыты ни, паймоно кивалтӥсьёслэн возьытсэс ыштэмзылы. Ми одно ик ваньзэ эскером, валантэм учыръёсты йылаз-пумаз вуттом, - пусйиз Зюганов, вераськонзэ йылпумъяса. *** Николай Харитонов, Кун Думаысь аграрийёслэн огазеяськонзылэн кивлатӥсез, быръёнъёслы лэсьтэм йылпумъянъёсты умоен лыдъя, оске, гуртысь вуэм депутатъёс выляз Кун Думаын ас интызэс шедьтозы шуыса. Со верамъя, "КПРФ-лэн вормемез улсын Думае вуоз ог 20 депутат, аграрийёс пӧлын вань сояз созывын ужамъёсыз но". Кызьы шуиз Харитонов, валтӥсь кужымзы гуртысь депутатъёслэн утемын. Ачиз со ньылетӥзэ басьтэ ни Кун Думалэсь мандатсэ, таяз учыре ортчиз КПРФ-лэн списокезъя. Новосибирск областьысь 124 номеро округъя Харитоновлы 53 процентэз бырйисьёс куаразэс сётӥзы. УДМУРТ ПИСАТЕЛЬЛЭН Д.А.ЯШИНЛЭН ВОРДСКЕМЕЗ ДЫРЫСЕН - 70 АР Литературалэн чечы дузаз Туннэ кадь ик тодам лыкто Москваын 1981-тӥ арын тулыс пал ортчем удмурт литературалы но искусстволы сӥзем нуналъёс. Шаерысьтымы тодмо суредасьёсын, крезьгурчиосын, кырӟасьёсын но артистъёсын ӵош отчы ветлӥзы ог дасо писательёсмы: кылбурчиос, веросчиос, критикъёс-литературоведъёс. Одӥгаз пичигес ӝытын милемды, куноосты, пумитаса, асьме литература сярысь шуныт вераськизы тодмо ӟуч писательёс Сергей Залыгин, Виктор Боков, Михаил Шевченко, Николай Доризо. Даниил Александровичен соку артэгес, ог-огмылы матын пуким. Синйылтӥ: со кытӥяз дарали кадь ӵыжектылэ, кытӥяз - вень йылын кадь берга, йырзэ огпалась огпала кычылля. Шораз учкыса, мон но шугъяськыны кутски. Мылкыдзэ тазьы валай: ӟуч эшъёсмы ошмес кадь кисьто ук, кисьто ук, нош асьмеос кулэезъя быгатомы-а москвичъёслы творчествомес возьматыны, валалозы-а асьмеды европейской мертэтъёсъя улӥсь лыдӟисьёс? Ужамы, кык ёзлы люкиськыса. Одӥгез пумиськонмы ортчиз Москваысь 88 номеро ПТУ-ын. Тодӥсько на: удмурт литературалэн кылдэм но ӝужам сюресэз сярысь вакчияк но тунсыко кыл вераз отын Александр Григорьевич Шкляев. Собере - кылбуръёс: Г.Ходырев, В.Ившин, О.Поскребышев... Ваньзы ик ас сяменызы тыршизы, ваньзы ик - сюлмысь. Нош залын егитъёс пуко. Уггес тырмы на кадь соос понна одӥгез - пальпоттӥсез. Даниил Александрович та лушкем мылкыдме ыртӧл кадь пельтыса лэзиз. Нырысетӥ веранзэ ик кутскиз югак мынектон бордысен: - Ӧтён билетъёсты вылэ А.Яшин интые Д.Яшин пусйиллям. Д. - со мон, Даниил; А. - Александр, ӟуч гожъясь, мынам паньтэме гинэ луэ со. Озьыен, мон но сурамын ӧвӧл, мон но - зэмос Яшин! Удмурт кылбурчи собере капчи мылкыдо чуръёссэ лыдӟиз. Одӥгез вал "Без букета к девушке пойдешь ли...". Егитъёс тае гинэ витьыса улӥллям кадь - шумпотыса кужмо чабизы. Соку мон ӟечгес валай: Даниил Александровичлэн поэзияз аслыз гинэ укшась, пӧртмась-егитомытӥсь дуно визылэз вань - пальпотыны но пальпоттыны быгатон. Со юнматэмын калык визьнодэн, кылан-буран манерен, мактаськонэн. Студентъёслэсь улонзэс-а возьматэ, адямилэн гумырез пумысен-а кыла-бура кылбурчи - малпанъёсты сайкыт но югыт шундыя-толэзя. Сюлмыныз шӧдыса, ӝикыт кутэ со улонысь турлы пужыосты, куараосты, быдэс учыръёсты: "тулыс куазен ӝытлы быдэ огез укно ялан усьтӥськылэ" ("Инкуазь воштӥськемъя, куке чаклад-а тон..."); "льӧль-горд ымдур суредаськем бамам" ("Юмшан паркысь мон бертӥсько огнам..."); "котькудӥз ассэ визьмо кожа, нош кытысь-о шузиос кылдо?" ("Адями кельше ог-огезлы"). Шулдыр пальыштонэн югдытӥз Даниил Александрович нылпиослы поэзиез. "Чыртывесь" (1964-тӥ ар) но "Быгатӥсь киос" (1986-тӥ ар) книгаосыз пыризы удмурт нылпи литературалэн чечы дузаз. Выльысь учкелэ ай "Шедьто дэри" кылбурзэ ик: - Марлы кутчад сапегдэ? Педлон кӧс ук - зорымтэ. Нош Натӥ шуэ: - Юри. Кӧс ке но - шедьто дэри. Кылбур юн герӟаськемын покчи пиналлэн мылкыдэныз. Шӧдӥське ӧчкарон сямыз но - арлыдоослэсь адӟем каре, дыр. Кутскем ужзэ пумозяз вуттыны тыршемез но - син азьын. Психологической кожон вакчи кылбурез яркыт суредлы пӧрмытэ, шуныт пальпоттэ. Та выллем шедьтосъёс Д.Яшинлэн поэзияз кизьыса кадь кельтэмын. Ӵем дыръя автор кужмоятыны быгатэ кылбуръёсызлэсь берпуметӥ кык-ньыль чуръёссэс. Отчы ватэмын мылкыд но, малпан но. Озьы кылбурчилэн перо улаз вордӥськыло вунонтэм чуръёс - афоризмъёс, соосты ымысь ыме вераны но уд жадьы: Вамыштоно ке, мед кылёз пытьы, Вазиськоно ке, мед кылёз куара... Таӵе яркыт чуръёс но быдэс кылбуръёс бордын туннэ но возиське, мынам малпамея, удмурт поэзилэн яшинлыкез. Куд-огез кылбурчиос, мӧйымемзы бере, калыке кылё егит дыръязы поттэм книгаосынызы. Даниил Яшинлэн устоосыз гожтэм ужъёсыз пыризы пӧртэм книгаосаз. Нимысьтыз кыӵе ке одӥгзэ гинэ кылбур бичетсэ уд висъя. Со угось ялан вал утчаськон, будон сюрес вылын. Та мылкыдэз шӧдыны луэ "Ортчисьтэм егит дыр" (1959-тӥ ар) нырысетӥ кылбур сборникысьтыз но, "Мынам сюлмаськонэ" (1980-тӥ ар) книгаысьтыз но. Сое ялан сюлмаськытылӥз кылъёсты быгатыса кутон, оскымонэсь кылсуредъёс кылдытон уж. Нош ик пичильтык тодэ ваён. Огпол гожтӥ таӵе чуръёсын кылбур: Вормонэд кадь, Ялан буд, Октябрь. Тон эн луы памятник, Октябрь... Сое дышетӥселы учкыны сётӥ. Та учыр вал ини 1986-тӥ арын, "Кизили" журналын ужакум. Даниил Александрович - журналмылэн редколлегиезлэн членэз. Кылбурме пырак редакциын эскериз. Публицистической ужъёс борды кутскемед, шуиз со, туж умой. Та удыс секыт. Азьло гожъясьёсмы - ма, туалаосыз но! - янгышаллязы: туннэлы тупась лэчыт гожтэм чуръёс интые, "актуальной темая упражнениос гинэ лэсьтылӥзы". Юри ӧз, конечно. Оло, пыр-поч ӧз малпаськылэ, оло, быгатон но со ёросгес вал, дыр. Сыӵе азькыл вераса, умоен пусйиз кылбурысьтым гурзэ-интонацизэ: вань, пе, йыг-йыг кужмыз но, дыртытэк малпаськонэз но. Ярамон, пе, нырысетӥ строфаед. Октябрь (коньывуон) толэзьлэсь, пе, яркыт тодметъёссэ возьматӥськод. Но малы ай ваньзэ ик кызьы ке палэнысен гинэ учкиськод? Тон ведь гуртын будӥд. Малы уд учкиськы музъем ужасьлэн синмыныз? Асьсэос курисько ни кадь юанъёс но: ичигес ӧй гыры-а пар бусы? Бырыны уз шедьы-а вож узьым, лымы улэ пырыса? Тырмоз-а люкам нянь тулысозь? Та мылкыдъёсты пичи ке но шӧдытоно вылэм. Гожтэмед соку матынгес луысал лыдӟисьлы. Со сяна, кылбуред, пе, пумен каньылак выжысал социальной улонэ. Нош тон нокыӵе герӟеттэк инкуазь суредэз социальной ужпумен ваче син пуктӥськод. Соин ик кылбуредлэн кужмыз лябомем. Ичи возьматэмын авторлэн сюлэмвисёнэз. Нош "тон эн луы памятник, Октябрь..." чуред яраз. Уждэ йылаз-пумаз вутты ик вал... Кылбуре бӧрысьгес ини потӥз "Молот" журналлэн одӥг номераз. Та вал Удмурт пединститутэз йылпумъяме бере Д.Яшинэн нырысьсэ но берпуметӥзэ выль уже пумысь ӵош кенешеме. 1988-тӥ арын улонысь со витьымтэ шорысь кошкиз... Куке но "кин тӥляд дышетӥсьты удмурт литератураын?" юамелы Даниил Александрович кӧня ке писательёслэсь нимъёссэс поттылӥз но йылпумъяса шуиз: "Дышетӥсе - калык фольклор, удмурт литература". Зэм, котьку сыӵе вал со - шаермылэн, калыкмылэн сюлмаськонъёсыныз улӥсь, мыло-кыдо тыршись,востэм но сабыр адями. В.Ившин, Удмурт Элькунысь но Россия Федерациысь культура удысысь сӥё-дано ужась. Удмурт Республикалэн улосвылаз Россия Федерациысь Федеральной Собранилэн Кун Думаезлэн куинетӥ ӧтчамаз депутатъёсты быръёнлы йылпумъянъёс сярысь ивортон Быръёнъя окружной комиссиос улосвылъёсысь но участокъёсысь комиссиослэн протоколъёссыя но "Россия Федерациысь Федеральной Собранилэн Кун Думаяз депутатъёсты быръён сярысь" федеральной законлэн 79-тӥ ёзэтэныз тупатэм радлыкъя йылпумъянъёс лэсьтӥзы Удмурт Республикалэн улосвылаз Россия Федерациысь Федеральной Собранилэн Кун Думаяз одӥг мандатэн округъёсъя депутатъёсты быръёнлы но федеральной округъёсъя куара сётонлы. 1. Быръёнъя 28 номеро Ижевск округ. Быръёнъёсы пыриськизы 377957 бырйисьёс (куара сётыны пыриськемъёслэн 60,7 процентэз). Депутатэ быръемын Маслюков Юрий Дмитриевич, вордскемын 1937-тӥ арын, В. С. Семенихин академик нимо НИИ-лэн валтӥсь директорезлэн советникез, улэ Москваын, люказ котькинлэсь трос куара - 84.323 (22,36 процент); Мукет кандидатъёс понна сётэм куараос: - Солуянов Андрей Владимирович - 76641 (20,32 процент); - Забильский Владимир Викторович - 55102 (14,61 процент); - Соловьев Виталий Александрович - 23125 (6,13 процент); - Баранов (Коммунист) Николай Витальевич - 23095 (6,12 процент); - Гурина Ольга Юрьевна - 22882 (6,07 процент); - Яирова Людмила Петровна - 15066 (3,99 процент); - Синицына Ирина Евгеньевна - 6305 (1,67 процент); - Алексеев Владимир Александрович - 5885 (1,56 процент); - Макаров Николай Иванович - 3831 (1,02 процент); - Баранов Сергей Васильевич - 3562 (0,94 процент); - Сямин Владимир Борисович - 3553 (0,94 процент); - Баранов Анатолий Юрьевич - 1030 (0,27 процент). Вань кандидатъёслы пумит - 44899 (11,90 процент). 2. Быръёнъя 29 номеро Удмурт округ. Быръёнъёсы пыриськизы 352.992 бырйисьёс (62,9 процент). Депутатэ быръемын Смирнова Светлана Константиновна, вордскемын 1962-тӥ арын, Удмурт Республикаысь Кун Кенешлэн Тӧроезлэн воштӥсез, улэ Ижевскын, люказ котькинлэсь трос куара - 226807 (64,31 процент). Мукет кандидатъёс понна сётэм куараос: - Кошкин Михаил Петрович - 33751 (9,57 процент); - Роговец Клементий Антонович - 23953 (6,79 процент); - Подопригора Владимир Николаевич - 14942 (4,24 процент); - Никулин Валерий Александрович - 10837 (3,07 процент). Вань кандидатъёслы пумит - 34978 (9,92 процент). 3. Быръёнъя федеральной округ. Быръёнъёсы пыриськизы 731866 бырйисьёс (61,8 процент). Кандидатъёслэн федеральной списоксы понна сётэм куараослэн лыдзы: - � 14. "Межрегиональное движение "Единство" ("Медведь") - 267420 (36,60 процент); - � 20. "Коммунистическая партия Российской Федерации" - 136994 (18,75 процент); - � 17. " Блок Жириновского" - 62511 (8,55 процент); - � 19. "Отечество - Вся Россия" - 58329 (7,98 процент); - � 23. "Союз Правых Сил" - 50820 (6,95 процент); - � 3. "Женщины России" - 22899 (3,13 процент); - � 6. "Объединение "Яблоко" - 19796 (2,71 процент); - � 7. "Коммунисты, трудящиеся России - За Советский Союз" - 16803 (2,30 процент); - � 27. "Партия Пенсионеров" - 12236 (1,67 процент); - � 8. "Мир. Труд. Май" - 9789 (1,34 процент); - � 13. "Российская партия защиты женщин" - 6270 (0,86 процент); - � 25. "ВОПД "Наш дом - Россия" - 4929 (0,67 процент); - � 18. "За гражданское достоинство" - 4871 (0,67 процент); - � 5. "Сталинский блок - за СССР" - 3742 (0,51 процент); - � 9. "Блок генерала А. Николаева, академика С. Федорова" - 3543 (0,48 процент); - � 12. "Партия Мира и Единства" - 3200 (0,44 процент); - � 11. "Конгресс Русских Общин и Движение Юрия Болдырева" - 3000 (0,41 процент); - � 16. "В поддержку Армии" - 1787 (0,24 процент); - � 2. "Российский общенародный союз" - 1191 (0,16 процент); - � 28. "Русская социалистическая партия" - 1094 (0,15 процент); - � 21. "Движение патриотических сил - Русское дело" - 939 (0,13 процент); - � 10. "Духовное наследие" - 866 (0,12 процент); - � 1. "Консервативное движение России" - 865 (0,12 процент); - � 22. "Всероссийская политическая партия народа" - 636 (0,09 процент); - � 26. "Социалистическая партия России" - 571 (0,08 процент); - � 15. " Социал - Демократы" - 521 (0,07 процент). Кандидатъёсын вань списокъёслы пумит - 19117 (2,62 процент). Удмурт Республикаысь Быръёнъя комиссия Быръёнъя окружной комиссиос. Ужъёсмы - син азьын Россия Федерациысь ФСБ-лэн Удмурт Республикая управлениез туэ ужамезлы йылпумъянъёс лэсьтӥз. Оглом вераса, арлы чаклам ужрадъёс ваньмыз сямен быдэстэмын. Трос пусйымонэз лэсьтэмын республикаямы социально-политической югдурез огсыр возёнъя, уката ик быръёнъёслы дасяськон но сое ортчытон вакытъёсы. Дыраз палэнтэмын вал калык пӧлын терроризм но экстремизм мылкыдъёс, ӧй вал малпамтэ шорысь кылдэм кышкыт учыръёс, кивалтон ёзъёсы ӧз шеде йыружъёсын герӟаськем адямиос. Пайдаё уж нуиське наркотикъёсты лушкемен вузась-вӧлмытӥсьёслы но пыӵал тӥрлыкен законэз тӥяса вузкарисьёслы пумит. Ӝегатэмын асьме республикаысь экономика, политика, наука но техника удысъёсъя ивор люканы кунгож сьӧрысь нимысьтыз ыстэм адямиос. Соос ласянь ӝегатскытэк ужрадъёс кутэмын вал. Тужгес но бадӟым саклык висъяське кунгож сьӧрысь вуэм адямиосын шаерамы кылдытэм пӧртэм огазеяськонъёсты но соосын кивалтэм улсын ортчылӥсь ужрадъёсты син азьын возёнлы. Сьӧрлось куноос ӵемысь вато асьме доры зэмос лыктэм мугзэс. Кемалась ик ӧвӧл, ФСБ-ын ужасьёс кыре поттӥзы обороная одӥг заводлэн продукциез сярысь сведениосты сьӧрлось муртъёслы вузаны турттон учырез. Таин сэрен, та заводын но ВПК- лэн мукет предприятиосаз ужрадъёс кутэмын лушкем возиськись удысъёсты сак утёнъя. МВД-лэн ёзъёсаз ужасьёс Россилэн палэназ берен келязы кунгож сьӧрысь вуэм дас одӥг адямиез, Удмуртиын улыны соослэн ӧй вал законэн чаклам луонлыкъёссы. ФСБ-ын ужасьёс трос кужымзэс сёто секыт йыружъёсын вырись группаосты шараянлы. Озьы, закон азьын кыл кутоно луизы Удмуртиын улӥсьёсты алдаса лэсьтэм документъёсъя Турцие келянэн вырись адямиос. Кырмемын но уголовной уж ӝутэмын Армениысь кык гражданъёс пумысен. Соос пӧяса лэсьтэм долларъёсты асьме доры вутто но калык пӧлы вӧлмыто вылэм. ФСБ-лэн ужаз бадӟым инты басьтэ коррупциен нюръяськон. Кылсярысь, трос тырмымтэос шараяськизы, Культурая министерствоын эскеронъёс ортчытыку. Отысь кивалтӥсьёс, коньдонэн ас тодэмзыя, нокыӵе эсэпсэ валатэк кузёяськыны кутскиллям. 46,5 миллион манет тыр дуно луись вузъёсты киултыны малпаллям. Янгыше уськытэм муртъёслы пумит ӝутэм уголовной уж али эскериське республикаысь Вылӥ судын. Россия Федерациысь Уголовной кодекслэн 285-тӥ но 290-тӥ ёзэтъёсызъя озьы ик закон азьын кыл кутоз Котырысь инкуазез утёнъя комитетлэн тӧроез. Коммерциен вырись ёзъёсын герӟаськыса, со республикалэн экономикаезлы 5,5 миллион манет тыр изъян ваиз. Быгатыса радъямын но пайдаё ортчытэмын вал Таджикистанысь йыружъёсын герӟаськем группировкаез шараянъя нимысьтыз дасям ужрад. Россиысь юрттӥсьёссы пыр соос Афганистанысь тросэн поттылӥзы героин. Ар ӵоже пытсамын шаерамы та усыкмытӥсь вузэз вуттонъя 8 сюрес (каналъёс). Удмуртиын гинэ наркотикъёсты вӧлмытӥсьёслэсь таламын 16 килограмм героин, нош ФСБ-лэн Уралысь но Поволжьеысь управлениосыныз ӵош - 35 килограмм кужмо наркотикъёс, ваньмыз 40 миллион манетлэсь но ятыр. Юн чакласа возисько республикаысь ож тӥрлык поттӥсь предприятиос. Огъя 1999-тӥ арын ФСБ-лэн управленияз ужасьёс лушкемен ож тӥрлык лэсьтӥсьёслэсь талазы 2000-лэсь ятыр боеприпасъёсты, 22 пуштытӥсь арбериосты но 48 пыӵал. Россия Федерациысь ФСБ-лэн Удмурт Республикаысь Управлениез. Гожтӥськон - 2000 Газетлы шуом: "Ӟечбур!" Гажано лыдӟись эшъёсмы! 2000-тӥ арын одӥгеныз но тӥледын уг пот вал люкиськем. Выль дауре выжон ар но ог-огенымы эшъяськыса, ог-огмес валаса мед уломы. Тросэз тӥпӧлысь газетлы гожтӥськиз ни. Озьыен, январьлэн нырысетӥ нуналъёсаз нош ик пумиськон. Нош куд-огез газетмылэсь берло номеръёссэ лыдӟо ни "Ӟеч лу" шуон мылкыдын. Малпаське но, оло, кыӵе ке луонлыкъёс шедьтоды ик. 20-тӥ январёзь гожтӥськыса вуиды ке, газетмес басьтоды февральысен, нош 20-тӥ февралёзь гожтӥськемъёслы газет вуоз ни мартэ. Гожтӥськыны луоз кык, куинь толэзьлы, ӝыны арлы, ар пумозь. Но беромыса кылемъёс лотерея шудонэ уз пыриське ни. Л. МАЛЫХ. Удмурт Республикалэсь вылӥ кивалтӥсьсэ кызьы ниман пумысен калык пӧлын юалляськонлы йылпумъянъёс сярысь ивортон Удмурт Республикаысь быръёнъя комиссиос улосвылъёсысь быръёнъя комиссиослэсь протоколъёссэс, "Удмурт Республикаысь калык пӧлын юалляськон сярысь" Удмурт Республикалэн законэзлэсь 34-тӥ ёзэтсэ лыдэ басьтыса, йылпумъянъёс лэсьтӥзы Удмурт Республикалэсь вылӥ кивалтӥсьсэ кызьы ниман пумысен калык пӧлын юалляськонлы. Юалляськонэ пыриськизы 730552 ужаса улӥсьёс - (61,7 процент). Юалляськонъя куара сётонын 33527 бюллетеньёс умойтэмен лыдъямын (4,9 процент). Куара сётонъя бюллетене пыртэм юанъя валэктонлэн вариантъёсыз понна сётэм куараослэн лыдзы: "Удмурт Республикалэн Йырыз" - 317874 (43,5 процент). "Удмурт Республикалэн Президентэз" - 376777 (51,6 процент), со пӧлын республикаысь городъёсъя но ёросъёсъя: Удмурт Республикалэн Йырыз Удмурт Республикалэн Президентэз 1. Индустриальной ёрос 25721 (50,7 процент) 22097 (43,5 процент) 2. Ленин ёрос 23686 (48,9 процент) 21915 (45,2 процент) 3. Октябрь ёрос 38627 (53,2 процент) 29731 (40,9 процент) 4. Первомай ёрос 29794 (52,0 процент) 24211 (42,3 процент) 5. Устинов ёрос 33654 (51,2 процент) 28777 (43,7 процент) Ижевск город 151482 (51,4 процент) 126731 (43,0 процент) 6. Воткинск город 24443 (51,0 процент 21656 (45,2 процент) 7. Воткинск ёрос 4537 (42,0 процент) 5969 (55,2 процент) 8. Завьял ёрос 9489 (42,9 процент) 11578 (52,3 процент) 9. Глазов город 23989 (46,4 процент) 25504 (49,3 процент) 10. Можга город 7731 (35,5 процент) 13394 (61,4 процент) 11. Сарапул город 18922 (37,5 процент) 29696 (58,9 процент) 12. Алнаш ёрос 2910 (31,0 процент) 6197 (66,1 процент) 13. Балезино ёрос 6849 (38,4 процент) 10253 (57,5 процент) 14. Вавож ёрос 2418 (30,3 процент) 5298 (66,4 процент) 15. Глазов ёрос 3010 (31,0 процент) 6263 (64,4 процент) 16. Грах ёрос 1667 (29,5 процент) 3802 (67,3 процент) 17. Дэбес ёрос 2013 (29,3 процент) 4623 (67,2 процент) 18. Игра ёрос 6162 (35,1 процент) 10633 (60,5 процент) 19. Камбарка ёрос 4104 (42,1 процент) 5131 ( 52,6 процент) 20. Каракулино ёрос 2225 (36,7 процент) 3558 (58,7 процент) 21. Кез ёрос 4129 (32,5 процент) 8116 (63,9 процент) 22. Кизнер ёрос 2986 (27,2 процент) 7653 (69,7 процент) 23. Киясово ёрос 1982 (33,9 процент) 3630 (62,2процент) 24. Красногорск ёрос 2109 (34,6 процент) 3820 (62,7 процент) 25. Пичи Пурга ёрос 4695 (37,1 поцент) 7465 (59,0 процент) 26. Можга ёрос (4729 (31,7 процент) 9826 (65,9 процент) 27. Сарапул ёрос 3479 (32,5 процент) 6721 (62,8 процент) 28. Селта ёрос 2247 (38,6 процент) 3314 (56,9 процент) 29. Сюмси ёрос 2234 (29,0 процент) 5184 (67,1 процент) 30. Ува ёрос 6316 (37,4 процент) 10082 (59,7 процент) 31. Шаркан ёрос 2901 (29,5 процент) 6635 (67,4 процент) 32. Юкаменск ёрос 1052 (18,6 процент) 4412 (78,0 процент) 33. Якшур Бодья ёрос 3848 (42,6 процент) 4546 (50,3 процент) 34. Яр ёрос 3216 (36,7 процент) 5087 (58,0 процент) Удмурт Республикаысь Быръёнъя комиссия. "Шундыкар" толалтэ но уз чалмы 14-16 толшоре егитъёслэн "Шунды" дэменлыксы "Шундыкар" лагерьлэн ужаз тужгес но мыло-кыдо пыриськись усточиосты тол лагере люка. Соос пӧртэм удысъёсъя тодон-валан басьтонзэс азинтозы, ог-огзылэн выль ужан амалъёсынызы тодматскозы. Ужрад ортчоз "Дзержинец" лагерьын. А. АЙМАНОВА. Вазиськоно ке - мед кылёз куара... Даниил Александрович Яшин 70-тӥ аръёсы Удмурт кун университетын студентъёсты удмурт литературалы дышетӥз (мон дышетсконме йылпумъяй 1976-тӥ арын). Троссэ писательёсты улэп дыръязы адӟыса вуэм мурт, кылбурчи-веросчи сярысь мадёнзэ со котьку сямен тодэ ваёнъёсыз бордысен кутскылӥз... Тани табере милемлы но, солэн дышетскисьёсызлы, ачиз сярысь веранъёсмес тодэ ваёнъёсын мытоно луэ ини. Паймоно кадь: тодэ ваёнъёсам бугыръяськисько но шедьтыны уг быгатӥськы сыӵе интызэ, кытчы кылемын дышетӥсьме нырысьсэ адӟеме бере кылдэм малпанъёсы но мылкыдъёсы. Ноку но ӧй вал кадь "нырысьсэ" шуон; толон но, туннэ но, ӵуказе но, ӧжытак пальпотыса, тупен-тупен валэктыса вера кадь со данэ потэм яке сокем ик вылӥе ӝутскыса вуымтэ писательёсмылэн улон сюрессы, гожъяськон манерзы но кылдытэм ужъёссы сярысь. Мукетъёсыз дышетӥсьёс нош малы ке но тодэ лыкто ӵапак со "нырысьсэ" кылын герӟаськем тодметъёсынызы: я соослэн тусбуязы маиз ке но вунонтэмез вань, я вераськон радлыксылэн пужыез аспӧртэмлыко пуксе, я мадёнзылэн пуштросэз кыӵе ке но палыныз сюлэмез но йырвизез ӵабыштэ. Даниил Александрович Яшин, мон малпасько, аслаз востэм сямыныз но лулпушезъя зэмос интеллигент луэменыз веранъёсызлэн (озьы ик ужъёсызлэн) ышыгазы ассэ туж ӟеч "ватыны" быгатылӥз. Паллян киын гожъяськемез гинэ но син шоры соку ик ӧз йӧтылы. Йыре кылемын лекциосызлэн пуштроссы, верам кылъёсыз, тунсыко малпанъёсыз но чеберлыко гожтослы сыӵе яке таӵе дунъет сётон мугъёсызлэн оскытон кужымзы. Кылсярысь, али ке но тодам Игнатий Гавриловлэн кылъёсызъя кылдытэм кырӟанъёс сярысь ("Ӵыдонтэм тулыс уй", "Уй пеймыт вал соку", "Гожтэт" но мукетъёсыз) шуныт-шуныт верамъёсыз. Милям но, студентъёслэн, сюлэмъёсамы пыӵазы кадь сокем ӟеч быгатыса кылдытэм чуръёслы, крезьгурлэн ӵапак кылбурлы тупатскыса чебер жингыртэмезлы но кырӟасьёслэн (Васса Виноградовалэн но Клавдия Гавриловалэн) вань сюлэмзэс поныса усто кырӟамзылы дышетӥсьмылэн синмаськемез, паймемез, данъяськемез. Таин ӵош ик Даниил Александрович малпаськыны косыса мадиз тунсыко югдур сярысь. Со озьы ик И.Гавриловлэн кылъёсызъя кылдытэм кырӟанэн герӟаськемын вал. Нимаське "Ӵукна" шуыса. Крезьгурзэ гожтэм Михаил Коробов. Кырӟанэз калык доры вуттӥз Кузьма Ложкин. Кырӟанлэн крезьгурез, пе, чеберлэсь чебер, уй но нунал кылзыны уз акыльты. Озьы ик Кузьма Ложкинлэн но чылкак удмурт манеро, сюлэмез бугыртӥсь куараеныз кырӟамез калыклы, пе, туж но туж яраз. Но кырӟан калыке ӧз вӧлмы, калык сое, аслаз карыса, улоназ ӧз пыӵаты. Малы? Кылъёсыз, пе, туж огшорыесь. Чеберлык ласянь И.Гавриловлэн ик мукет кылбуръёсыныз ӵошатонтэм бездытэсь: "Толэзь пуксе. Шунды ӝужа. Вазь ӵукна калык сайка. Тӧдьы ӟазег вуэз пожа, Яр йылын душес берга..." - озьы, кылбур йылпумъяськытозь. Мукет сямен вераса, крезьгурчи аслаз кырӟанэзлэн азьлапалыз сярысь туж ик сюлмаськымтэ, ярамон чуръёс утчамтэ. Жаль, пе, сыӵе чебер крезьгур табере радиолэн "шыкысаз" кылльыны кулэ. Даниил Александровичлэн кырӟан пумысь такем ӧпкелемез валамон: угось со вакытэ выль кырӟанъёслы удмурт адями туж кулэяське вал. Соин ик котькуд кылдэм кырӟан ӝегатскытэк калык сюлэме каръяськыны тыршылӥз, нош калык сое шумпотыса аслаз карылӥз. Чакласькытэк, суп-сап ужам уж, кырым пыдэсын выллем, соку ик син азе потылӥз, вылӥ верам кадь югдуръёс бадӟым ӝожомонэ вуттылӥзы. Туэ тани асьмеос майбыр улӥськом. Оло, нуналлы быдэ сямен, кылбурчиосмы но крезьгурчиосмы калыкмес выль кырӟанэн шумпоттыло. Тросэз соос, зэмзэ но, кырӟанлэн ӟечлыкез сярысь сюлмаськыса пӧрмытэмын. Но вань шакресъёсыз но. Котькуд кырӟанмес Даниил Александровичлэн вылӥ куронъёсызъя мертаны быгатысалмы ке, таӵе, дыртыса лэсьтэм ужъёс, оло, ӧй но пумиськылысалзы. Но дыр соосыз сӥсъялоз ай. Только берло ӧпкелёно медаз луы вал, суп-сап гожтэм кылъёсыз понна чебер крезьгуро кырӟан калык улонлэн палэнтӥз ортчиз шуыса. Даниил Александрович Яшинлэн кылбурлэн ӟечлыкез, чеберлыкез сярысь сюлмаськемез аслаз творчествоез вылын но яркыт адӟиське. Котькуд кылбурез солэн туж ӝикыт, вольыт, мур-мур малпаса быдэстэмын. Одӥг ӵемтоно интызэ но уд шедьты, одӥг акылес яке валантэм кылсуредзэ но уд пумита. Зӥб-зӥб, визьмо верамъёсыз лачмытак интыямын пельёсты шумпоттӥсь куара радъяськон но куара тупан, сюлэмлы кельшымон кылбургур ӧръяськон кабъёс пушкы. Бен, мугоры мынам ӧвӧл ӝужыт, Бамы но кузялэс ӧвӧл - Питрес. Выросъёсме но куд-огзэ ӧжыт Умой-умой, вылды, чакланогес. Куддыр, оло, сямы мултэс востэм, Куддыр, оло, мултэс пӧсекъясько... ("Мон Уралысь"). Чаклалэ ай, макем ӟеч герӟасько татын ог-огенызы кылъёс но кылсуредъёс, макем соос чурысь чуре валаса радъямын. Зэмен но, адямиез нырысь ик быдэсак адӟиськод ук - чалякгес со син шоры мугорыныз пуксе, берло ымныр туссэ но выросъёссэ адӟыны кутскиськод. Нош выросъёссэ но сямъёссэ пумен тодматскемъя ини валаськод. Автор, лирической героезлэсь (аслэсьтыз) тусбуйзэ суредаса сётэмез бере, возьдаськыса сямен, веранзэ пальпотон пыр азьланьтэ. Пальпотэмез шараяське кылъёслэн аспӧртэмлыко радъяськемзы вылын: "востэм" кыл вӧзы "мултэс" кыл пуктэмын. Адями ассэ востэм шуэ ке, озьы но ымдурад пальпотон усьтӥське ини, угось та сям, удмурт борды юн лякиськемын ке но, ушъяськымон ик ӧвӧл. Кылбурын ай нош "мултэс востэм" шуэмын. Иське, зэмзэ но, лирической геройлэн сямыз сярысь шулдыр пальпотон пыр верамын. Озьы ик "мултэс пӧсекъясько" кылгерӟетэз но учким ке. "Пӧсекъяны" кыл пушкын так но вань ини серемесэз. Ӵошатом "ӟырданы" кылэн. Мар ке но пумысен пӧсекъяны но луэ, ӟырданы но. Но пӧсекъясез огшоры адямилы матынгес, валамонгес. Ӟырдасьсэ дартъёс валто, соизлэсь палэнскемед но потэ. "Мултэс пӧсекъясько" шуонын ачид шоры шулдыр пальпотыса учкон (самоирония) уката но кужмоя. Кылсуредэз но та кылбурын вожъяськымон малпаса лэсьтэмын. Кылбур сярысь "лэсьтэмын" шуыны уггес тупа ке но (кылбурын угось мылкыд но, малпан но ас астусэнызы вордӥсько), таяз учырын та кыл пуштросэзлэн ӟеч палыныз кутэмын: кылбурлэн котыр ласянь ӟечлыко луэмез сярысь сюлмаськемез возьматэ. Чаклалэ ай. Кылбур вить стопаё ямбъя радъямын. Та ямб ӵемгес туж ӝутскем мылкыдо, вӧлмыто веранэз суредаку кутӥське. Тани та кылбурын но со шӧдӥське. Йӧн-йӧн, оскытӥсь кужым валтэ чурысь чуре. Талы юрттэ ямбъёс вискысь дугдонъёслэн кылъёс вискысь дугдонъёсын ӵош тупамзы (тупамтэосыз котькуд чурын быдэн одӥг гинэ). Талы луыса, кылбурлэн крезьгурез уката но чырмытгес кылӥське. Собере кылбурлэсь таӵе оскытӥсь чырмыт гурзэ анафора амал небӟытэ: кык чурез одӥг кылъёсын ик ("куддыр, оло") кутскон паръя. Оглом вераса, Даниил Яшинлэн кылбуран пӧртэмлыказ но туж юн шӧдӥське сюлмаськон сям. Ӵапак со сям, кудӥз солы котькуд ужан удысаз ӟеч пытьы кельтыны юрттӥз: дышетонын но, наукаын но, кылбуранын но. Кин гинэ тодылӥз удмурт калыклэсь та синмаськымон пизэ, фольклор тодосчиез, кылбурчиез но дышетӥсез, данъяськыса но вожъяськыса вераны быгатоз: Даниил Александровичлэн вань улон но творческой сюресэз радъямын вал тодмо кылбурысьтыз тодмо веранъя: Калык пӧлын эн вераськы токма, Кутскид ке уж борды - быдэстоно... ... Вамыштоно ке - мед кылёз пытьы, Вазиськоно ке - мед кылёз куара. Людмила Кутянова, кылбурчи, Ашальчи Оки нимо премилэн лауреатэз. Ӧтиськом шахматэн шудонъёсы 3-тӥ-7-тӥ январе Завьялово ёросысь Первомайский посёлокын (Опытной станция) ортчозы гуртъёсысь спортсменъёс пӧлын шахматэн шудонъя "Тол каникулъёс - ӟечбур ЪЪИ даур!" фестиваль. Гуртоос кужымзэс эскерыны быгатозы вить пӧртэм ӵошатсконъёсын: спортъя мастере кандидат луон понна, 1-тӥ, 2-тӥ, 3-тӥ но 4-тӥ разрядъёсты басьтон понна. Фестивале лыктэмъёсын пумиськозы шахматэн шудонъя международной классэн спортъя мастерен Александр Филиппенкоен но спортъя мастерен Владимир Гребёнкинэн. Соос куноослы тунсыко лекциос лыдӟозы. Ӵошатсконъёс кутскозы 3-тӥ январе 13 часын. Витиськом вань ёросъёсысь та бадӟым ужрадэ пыриськыны мылкыд карисьёсты, пиналъёсты но, мӧйыосты но. В.Кельмурзин. Сюлмаськонды медаз лу Иворъёсты вӧлмытӥсь ёзъёс туэ ӵем кенешылӥзы компьютерлэн выль дауре выжонэныз герӟаськем ужпум сярысь. Калык сое тазьы нимаз: "2000-тӥ арысь сюлмаськон". Зэмзэ ик-а со сокем кышкыт, вуттоз ик-а куашканэ? Кӧня ке кыл пуштросэз сярысь. Куд-ог компьютеръёслэн (тужгес но - вужъёсызлэн) валтӥсь ёзъёсазы нуналлы, толэзьлы, арлы висъямын йырсазез кык дунъясь. Тае ик синйылтыны луоз мукет программаосысь. Ар отын ньыль лыдпусэн уг, кык берло лыдпусэн возьматӥське (1999 ӧвӧл - 99 гинэ). Нырысетӥ куз - 19 - азьвыл ик тодмо ни. Озьыен, 2000-тӥ аре выжем бере, таӵе компьютеръёсын огыр-бугыр луоз. Тужгес но - лыдпусъёсты радъясь программаосын. Малы ке шуоно, компьютер понна ваньмыз одӥг кадь: 1900-тӥ ар-а, 2000-тӥ ар-а... Зэм, тужгес курадӟытӥсь шуг-секытъёс луыны быгатозы сетьын. Компьютеръёс кылдон вакытэ луонлыкъёс соку туж дуно сылӥзы. Соин валче дырез шыръяно луиз, ЭВМ-лэсь дунзэ кулэстон понна! Зэм, "2000-тӥ арысь ужпум" котырын югдур юнме ӟырда кадь. Компьютеръёс поттӥсьёслы коньдон дурыны умойгес. Шунды пуксён палан визьмо техникаез сюдӥсь ёзъёс гинэ но тодмостӥськыло "2000 реады" пусэн, та ужпумен соос нокызьы герӟаськемын ӧвӧл ке но. Печать ивортылэ: 1997-тӥ арозь поттэм компьютеръёс пӧлысь укмыстон куинь процентэзлэн но машинаос пӧлысь ньыльдон сизьым процентэзлэн янгышъёссы вань. Ваньмыз со герӟаськемын 2000-тӥ арысь ужпумен. Берлогес поттэм ЭВМ-ёс та сюлмаськонлэсь утемын. Тӥрлыклэсь 2000-тӥ арез пумитаны дась луэмзэ тодыны секыт ӧвӧл. Со понна компьютерады пуктэлэ 1999-тӥ арысь 31-тӥ толсурез (денкабрез) но 23 час но 59 минут дырез. Одӥг минут возьмалэ но компьютердэс выльысь ужатэлэ. Табере эскерелэ дырзэ. 2000-тӥ ар адӟиськиз ке, озьыен, ваньмыз умой. 1900-тӥ ар ке яке мукетыз - тӥ азьын кылдэ али ик быдэстоно ужпум. Кызьы сэрттоно-пертчоно сое? Али дасямын но вузасько ини дырез возьматӥсь таймеръёс. Соос та сюлмаськонлэсь палэнтыны быгато. Нош малы меда юнме куштод 40-60 доллардэ, выль БЙОС версия пуктыны луэ ке? Со понна луоз тӥляд туж кужмо, 2000-тӥ арысь нокыӵе ужпумез-сюлмаськонэз тодӥсьтэм компьютерды. С.Акбаев. Сюлэмъёс небӟо шуныт коркан 17-тӥ толсуре Ижысь нылпи приютлы 5 ар тырмиз. Чеберъям борддоръёс, пиналъёслэн быгатыса лэсьтэм киужъёсынызы выставка, жингрес куараос - ваньмыз со шумпотон мылкыд кылдытэ. Празднике лыктӥллям пиналъёслэн бадӟым эшъёссы, юрттӥсьёссы, сюлмаськисьёссы. Шуныт кылъёсын, дуно кузьымъёсын ӟечкылазы Ижысь Первомай, Устинов, Ленин, Октябрь районъёсысь "Семья" центръёсын ужасьёс. Малпасько, пиналъёслы туж дуно кузьым луиз 38 томен "Я познаю мир" сериысь книгаос. Таӵе кузьым лэсьтӥз Йыружъёсын нюръяськонъя управление. Нош Калыклы улон-вылонын юрттэт сётонъя министерство приютлы микроавтобус сётӥз. Таӵе бадӟым кузьымлы пиналъёс туж шумпотӥзы. Ижысь администрацилэн кивалтӥсезлэн воштӥсез Г.А.Ахророва мэрлэн нимыныз татын ужасьёслы тау каремзэ вераз. Вить ар ӵоже коллективен туж сюлмо кивалтэ Э.З.Газизова. Праздникез шулдыртӥзы 8-тӥ школаысь нылпиос. Отын дышетскись Таня Шкляева, "Утренняя звезда" фестивальлэн лауреатэз, возьматӥз ас быгатонлыксэ. Приютысь азьвыл воспитанникъёс но ӧз вунэтэ лыктыны та нуналэ. Сюлэмзэс усьтыса вераськизы соос. Тани нош но нош чузъяське шулдыр крезьгур. Пичиос экто, кырӟало. Соосты вошто бадӟымъёсызгес пиналъёс. Каньыл, шудо-буро мылкыд вӧлске та чебер корка. Секыт семьяосысь, урамысь пиналъёслэн сюлэмъёссы каллен небӟыны ӧдъяло. С.Федулова. "Сизьым арес мон луи но..." Та толэзе арессэ пусйиз тодмо журналист, редактор Клавдия Николаевна Дзюина. Дано юбилееныз валче соин кенеше "Удмуртия" издательствоысь редактор Валентина Уразаева. Книга поттон удысын ньыльдон арлэсь кема ини тырше Клавдия Николаевна Дзюина - Удмурт Республикаысь культура удысысь сӥё-дано ужась, печатьысь азьмынӥсь, "Удмуртия" издательствоысь редактор. Поттыны дасям книгаосыз сюэн-сюэн лыдъясько. Дораз быдэс шкаф - удмурт писательёслэн тау карыса кузьмам книгаоссы. Соос пӧлын - Г.Д. Красильниковлэн, З. А. Богомоловалэн, С. А. Самсоновлэн, В. М. Ванюшевлэн, Г. А. Ходыревлэн, А. С. Зуевалэн но мукетъёсызлэн. Аслэсьтыззэ - "Удмурт фразеологической словарьзэ", "Удмурт книгазэ" (кык пол поттэмын), альбомъёссэ но ас визьмыныз дасям книгаоссэ юри возьматыны малпад ке, одӥг кабинет уз тырмы. - Удмуртъёс, кинлэсь ке улон сюрессэ тодыны туртто ке, одно юало: кыӵе выжыысь? - Мон туж визьмо, сӥё-дано крестьян семьяын вордски. Тодмо священник М. Н. Елабужский аслаз дневниказ огпол гожтэм: "Яголудын, Четкерын, Покчивукоын туж чылкыт уло". Со ми доры но дугдылэ вылэм. Ялан жалясько: мыным, черкын пылатыкуз, асьсэ календарья Клавдия ним сётэм. Нош анае туж куре вылэм Люба шуыны. Сузэръёсылэн нимъёссы угось Вера, Надежда... "Сизьым арес мон луи но..." Та кырӟанэз "Айкай" кырӟа али, нош кызетӥ аръёсы гожтэм сое Куӟебай Герд ас палаз, Вавож ёросэ, экспедициен вуылыкуз. Юалляськем мынам песятаелэсь, Елизар Матвеевичлэсь. Ми соку Яголудын улӥськом вал. Малиновкалы но Покчивуколы ог кык иськем со. Муми-буби умой тодо вылэм Чайниковъёсты. Но мон соос сярысь вераськемъёссэс ноку ӧй кылылы. Али валасько ини, кызьы улӥллям соос: уен-нуналэн ужаса, ялан кышкаса-куалекъяса. "Удмурт коммуна" газетын огпол статья потэм. Нимаське вылэм тазьы: "Кулакъёс". Кутске тазьы: "Милям гуртын кулакъёс уло, узырмон понна уен-нуналэн валъёс кадь ужало..." Гожтӥсез ассэ шуэм Ӟольгыри. Милесьтым бускельмес озьы нимало вал. Со статья бере дядяймес кулаке поттӥллям. Ужам со Областнойын - нюлэс корам. Отысь палсуй берытскем. Тӥни озьы, ми кулак выжыос луим. Кулак карыкузы, ваньзэ - ведраосмес, гын сапегъёсмес гинэ но - нуиллям. Кык-куинь пуд пызьмес, ю тысьмес ӵужыса ик кошкиллям. Зэм, таӵе югдурез чидатэк, гуртысь кызь укмыс адями Москвае М. И. Калининлы гожтэт ыстэм. Михаил Иванович ивортэм: "Зэм но, Николай Елизарович нокыӵе кулак ӧвӧл". Нош атайме янгыштэмен лыдъязы 1991-тӥ арын гинэ. Дышетскон книгаос гинэ но агаелы но сузэръёсылы уг сёто вылэм. Но ми "ньыльлы" но "витьлы" гинэ дышетским. Институтъёсын но - "витьлы" гинэ. Шуо ук: улмо улмопулэн выжыяз ик усе. Агае, мединститутын дышетскыкуз, Сталин стипендия басьтылӥз. Мон - будэтэмзэ. Сузэре, фронтысь бертыса, Казаньысь финансовой институтэз йылпумъяз на (ужаса). "Сизьым арес мон луи но, геры кутоно, шуизы" - тазьы кырӟало удмуртъёс. Нош мыным пудо возьмано, шуизы. Сизьым арескысен. Трудоденьёсы мӧйыослэн мында луо вал. Дас арес тырмем бере, (1948-тӥ) арын, мыным мӧйыосын ӵош "За доблестный труд в Великой Отечественной войне 1941-1945 гг.." медаль сётӥзы. Таиз понна партилэн Вавож райкомезлэн нырысетӥ секретарезлы А. Бакиевлы тау: гуртамы ветлыкуз, Горд пул вылысь Клава Ананьева гожтэмез но пастухамысь бертэмме адӟем но вунэтымтэ ни. Уже бӧрдыса мынэмысьтым шуэ вал: асьмелы уен-нуналэн ужаны кылдэмын... - Можга педучилищеез, Удмурт пединститутэз йылпумъяса, кызьы вуиды печать удысэ? - Педучилищеез йылпумъяса, пионервожатойын ужалод, шуизы вал. Аттестатме учкыса, пединститутэ дышетскыны келязы. Собере ньыльнамес - Семен Самсоновез, Аркадий Кузнецовез, Галина Баженоваез, монэ - национальной кадръёс - журналистъёс - кулэ шуыса, печать удысэ келязы. Озьы мон книжной издательствое вуи. 1938-тӥ-1939-тӥ аръёслэн бервылзы шӧдӥське на вал: ог-огедлы вожъяськон, чагиськон, осконтэм мылкыд... Августа Васильевна Конюховаез, соку валтӥсь редактормес, туж секыт адӟонэ вуттӥзы. Типографие келяны дасям рукописез производственной отделын юромо ватӥллям. Собере партилэн обкомаз чагиськон гожтӥллям: валтӥсь редактор рукописез ыштӥз, планъёсты быдэстон понна нюръяськем интые. Кошконо луиз адями. Туж жалямы ми. Таӵеез но тодэ лыктэ: комсомол субботник дыръя издательстволэн складысьтыз шедьтӥмы янгыше юнме уськытэм гожъясьлэн Григорий Медведевлэн трилогиезлэсь куинетӥ люкетсэ - "Быдӟым нунал" повестьсэ. Со олокӧня полэс кагазэн, газетэн бинямын вылэм. Таӵе дуно арбериез малы ке сэрпалтӥллям кулэтэм тӥрлык пӧлы. Издательствоын ужакум ыстӥзы Москвае, Вылӥ партшколае, татысь издательской отделение. Отын ик аспирантураез йылпумъяй. Диссертациме но журналистикая кафедраын эскеризы. Зэм, кулэ вал УдНИИ-ын эскерем сярысь ивортон. Диссертацие издательстволэн историеныз герӟаськемын бере, Куӟебай Гердтэк нокызьы уг луы. Институтэ вазиськыны кышкай. "Дась лу!" газетын редактор луыса но партилэн обкомаз ужакум, Общественной наукаосъя академиысь но, ВПГШ-ысь но вазиськылӥзы на, ужме йылаз-пумаз вуттыны курыса. Ачим янгыш... Издательствоын но, "Дась лу!"-ын но туж чылкыт сюлэмо адямиосын артэ ужай. Трос ӟечсэ лэсьтӥзы мон понна Валентина Тимофеевна Кузнецова но Лидия Васильевна Перевозчикова - издательствоысь редакторъёс. Нимысьтыз верасал партилэн Удмурт обкомаз ужаме сярысь. Нокыӵе институт но, аспирантура но адямиез сомында тодон-валан, кыл кутыны дась луон ӧз сётэлэ, кӧня басьтӥ, печатья секторен кивалтыкум. Обкомын азьвыл ужам куд-ог адямиос олокызьы но сьӧдманы выро отысь азьло кивалтӥсьёсты. Вал, дыр, ужын котькыӵе дыръёс. Но Валерий Константинович Марисов, Надежда Ивановна Смирнова, Геннадий Семенович Шишов кадь кивалтӥсьёс котьку котькытын луысалзы ке, улон чылкытгес луысал. Удмуртъёсыз ялан ултӥяло шуыса верамъёс но чылкак паймыто. Малы астэ ачид весь ултӥялод? Мон ноку но ӧй шӧдылы нырк каремзэс. Кивалтӥсьёсмылэн мылкыдъёссы тросэтӥ герӟаськемын асэныд. - Берло куатетӥ арзэ Тӥ нош ик ужаськоды ини издательствоын. Кыӵе пӧртэмлык шӧдӥське, азьло дыръёсын ӵошатыса? - Кызьлэсь уно книга поттыны дасяй. Котькудӥзлы сюлэм, кужым, визь сётэмын Тужгес верамонъёсыз - тямыс томен "Буре ваён" книга, Куӟебай Гердлы сӥзем "О ней я песнь пою" бичет, Никифор Павловлэн Трофим Борисов сярысь книгаез... Озьы ик туж дуно пото Удмурт радиолы но телевиденилы сӥзем книгаос. Али дасяськом "Удмуртская Республика" нимо энциклопедимес. Та бадӟым книгаын ньыль сюлэсь уно автор. Огъя монографической статьяос сяна, ньыль сюрс вить сюлэсь уно мукет статьяос алфавитъя радъямын. Ог сюрс кык сю туспуктэм, сизьымдон вить карта, уно таблицаос, схемаос. Таӵе книга сярысь азьло малпаны ик ӧй быгатысалмы. Таӵеоссэ дасяны быгатӥськомы бере, со ик луэ али издательстволэн пӧртэмлыкез. - Уж но уж... Тӥляд куинь нылпиды. Кытын дышетскизы? Кинъёс луизысоос? - Ольга, Сергей, Светлана... Ма веранэз, ӧзгес тырмы соослы мынам саклыке. Нош кузпалы котьку валалляз ужме, анаез но туж юрттӥз пиналъёсмес будэтыны. Пие Ижысь механической институтын дышетскиз, огез нылы - Москваысь кыкетӥ мединститутын, пичиез - Удмурт кун университетын. Куиньназы ик вузъёссэс горд дипломен йылпумъязы. Дышетскем интыязы ик кельтӥзы вал. Но кошкизы... Москваын дышетскем нылы биология наукаосъя кандидат луиз. Аслыз но, сузэрезлы но дэмлало аспирантураез йылпумъяны - оло, визьмаськозы ай. Покчиез нылы одӥг ар ӵоже Америкаысь Флорида штатын дышетскиз. Туж ӟеч вераське англи кылын. Агаелэн но кыкез ик пиосыз школазэс зарни медален йылпумъязы. Зеленоградысь приборостроительной институтэз - горд дипломен. Нылылэн нылыз дышетске Москваын. Агаелэн ньыль внукъёсыз - Барнаулын но Москваын. Ваньзы "витьлы" гинэ дышетско. Удмуртъёс сыӵеесь-таӵеесь шуэмлы кӧт уг веська, сюлэм ӟырда. Милям семьяосамы (агаелэсь но вераса) - удмуртъёс, ӟучъёс, башкиръёс, еврейёс... Агаелэн кузпалыз ӟуч. Огез кенэз удмурт, мукетыз - еврейка. Вань нылпиосмы Ананьевъёс выжые мынэмын, шуо. Верай ни ук - ми котькыӵе ужез быдэсъяны быгатӥсь крестьян семьяын вордскемын: дуриськыны но, куиськыны но, нянь будэтыны но, муш вордыны но пӧрмытӥськом. Зэм, муми-буби кадь ик уг быгатӥськы ке но, тыршисько... Сизьым аресысен... Валентина УРАЗАЕВА. Тодмо кылбурчилэн тодмотэм ужъёсыз Чеберлыко литератураез яратӥсьёс Владимир Бубякинэз "Бычыяло куаръёс" (1966) но "Ӧръяське андан" (1971) кылбур книгаосыз потэм бере ини умой-умой тодӥзы. Кыкез ик та книгаос ӟечкын пумитамын вал. 1972-тӥ арын соос сярысь сыӵе мылкыдын ик вазиськиз "Литературная Россия" газет но. Удмуртиысь Писательёслэн огазеяськоназы соин ик кык пол но, куинь пол но кылбурчимылэн тодаз нимысьтыз уськытылӥз, тыныд Россиысь Писательёслэн огазеяськоназы пырон пумысь куриськон гожтыны кулэ вылэм ини шуыса. Таӵе учыръёсы ачиз Владимир Ильич, востэм пальпотыса, тазьы вералляз: - Мылкыд каремдылы тау. Но сыӵе ним курыны мон али дась ӧвӧл на ук. Мынам дышетскеме туж пичи. Мыным дышетсконо на, дышетсконо... Тӥни со муген ик, Писательёслэн огазеяськоназы пырытэк, туэ, 70 арессэ пусъён азяз, со асьме пӧлысь весяк ӵожелы кошкиз. Кылбуръёссэ арысь аре рос-прос эскерыса ортчоно ке, Владимир Бубякин, укыр секыт висьыны кутскытозяз, эркын дыръёсыз луылыку, весь дышетскиз но дышетскиз. Гожъяськон быгатонлыксэ будэтыны солы тужгес трос юрттӥз лыдӟиськемез. Та ласянь, аслаз верамезъя, туж трос выльзэ но кулэзэ сётӥзы Игнатий Гавриловлэн, Михаил Петровлэн но соос вакытысь мукет удмурт поэтъёслэн кылбуръёссы. Ӟуч кылбурчиос пӧлысь аслаз дышетӥсьёсыныз лыдъялляз Александр Твардовскиез но Михаил Исаковскиез. Кызьы ке бератазгес, 70-тӥ аръёслэн шор вадесазы, Александр Невскийлы сӥзем собор дорын пумиськыкумы, малы ке но лушкемак уж сярысь выллем гинэ ивортӥз мыным: - Тодӥськод-а, ма? Туж секыт уж борды кутски ук мон. Тужгес ярасьёссэ ӟуч калык кырӟанъёсыз но кылбурчиослэсь кырӟанъёссэс берыкъяны басьтӥськи. Кырӟаны луымонэсь мед луозы шуыса. Та уж мыным кылбур гожъян ужлэсь визьзэ мургес тодыны но валаны юрттэ. Кытӥяз пӧрме но кадь. Веранэз ӧвӧл, туж секыт. Но со шугез-секытэз вормиськод ке, кыӵе зол шумпотоно вылэм! Зэмос-зэмос берыктӥсь-кылбурчи кадь ик тыршем вылэм Владимир Ильич. Трос кырӟанъёсты-кылбуръёсты кырӟаны мед яралозы шуыса берыктэм. Ӧнерлыкезлэсь макем ӟеч вылэмзэ возьматон понна, лыдӟисьёслэн син азязы тани поттӥсько "За дальнею околицей" кырӟанлэсь нырысетӥ строфазэ. Ӟуч кылын таӵе со: За дальнею околицей, за молодыми вязами, мы с милым, расставаяся, клялись в любви своей. И были три свидетеля - река голубоглазая, березонька пушистая да звонкий соловей. Владимир Бубякинлэн берыктэмезъя, со пӧрмем тани тазьы: Палэнынгес, гуртлэн сьӧраз, пинал сирпуос сьӧрын, ми люкиським гажан пиен, сётӥм оскон кылмес. Милям вал куинь адӟисьёсмы - лыз шур чагыр инбам улын, пуштрес куаро тӧдьы кызьпу, уӵы кырӟаз жингрес. Ӧйтӧд, кин ке мукетыз быгатоз на меда та строфаез талэсь но чебер, талэсь но яркыт берыктыны? Уз, дыр. Кылбуран ужлэсь визьзэ тодыны но валаны кулэ шуыса, юнме верамтэ вылэм мыным Владимир Ильич. Берыктэмъёссэ со, печатланы шуыса, ноку но ӧз ӵектылы журналмылы. Ачиз кулэм бере ини ӟуч кылысь берыктэм кырӟанъёсыныз тетрадьзэ "Кенешамы" вуттӥз кылбурчилэн матысь ӵыжы-выжыез Роза Бубякина.Соос пӧлысь пичияк люкетэз журналамы печатласькоз вуоно арлэн кутсконаз. Лыдӟисьёсмылы, малпаськомы, та кырӟанъёс юрттозы репертуарзэс шӧдскымон узырмытыны. П. ПОЗДЕЕВ, "Кенеш" журналын ужась. Быдӟым Вормонлы - 55 ар тырмон азьын Книгады понна бадӟым тау Быдӟым Отечественной войнаын Герой ним басьтэмъёсты котьку гажаллязы, туж сӥлы карылӥзы. Тужгес но война ортчем аръёсы. Подвигъёссы сярысь ваньзэ, ма тодыны луэ, тодыны тыршизы. Зэм, вераны кулэ, куд-огез сярысь ожъёс мыныку ик калык доры иворъёс вуылӥзы, нош куд-огез сярысь али ке но пыр-поч мадьыны, ӟеч тодыны-валаны ум быгатӥське. Умойтодӥськом сыӵеоссэ, кинъёс сярысь журналистъёс но писательёс дыраз гожъязы, книгаос кылдытӥзы. Кудӥз улэп кылем геройёс асьсэос но адӟемзэс-чидамзэс мадьыны, гожъяны, книгаос но кылдытыны быгатӥзы. Нош сыӵеос трос ик ӧвӧл. Ижысь 73 номеро школаын, Российской Федерацилэн но Удмурт Элькунлэн калык музеязы, люкамын ваньмыз, та дырозь ма шедьтыны луиз асьме аспалъёсмы Советской Союзлэн Геройёсыз но Россия Федерацилэн ньыль Геройёсыз сярысь. Утчаськон ужлэн пумыз ӧвӧл. Музейлэн кивалтӥсез Раиса Михайловна Сонина но солэн активистъёсыз - 73- тӥ школаысь дышетскисьёс но дышетӥсьёс - бадӟым ужзэс дугдытыны уг малпало. Подвигъёс уг бездо, дунзэс уг ышто дауръёс ортчыса но. Соос озьы лыдъяло. Геройёс котькыӵе дыръёсы вал. Тужгес но калыкъёс асьсэды мурт музъем вылэ мерскись тушмонъёслэсь утён дыръя. Россилэн историяз сыӵе примеръёс трос гинэ. Калык котьку аслаз геройёсызлэсь адӟем карыса улыны тырше. Аслэсьтыз геройёссэ уг тоды ке, муртъёс сярысь тодэмез потэ. Нош туала вакытэ, реформаос шуон но сьӧрлось кузёослы йыбыртъян дыръя, куд-ог политикъёс туртто, асьме калык геройёсмес мед вунэтоз шуыса. Туннэ улонамы тросэз дунзэ ыштӥз. Кунмылэсь историзэ мыдланьтыса валэктыны турттӥсьёс вань. Нош кызьы ӵушылод калыклэн йырсазьысьтыз героизмез - ортчем ожъёсын басьтэмъёссэ. Ожъёслэн вӧсь каремзы та дырозь шӧдӥське котькуд коркан, котькуд семьяын. Геройёслэсь - огшоры пиослэсь но нылъёслэсь - подвигъёссэс нокызьы ӵушылыны уг луы, соослэн соку дышетскемзы но тырмыт ӧй вал, нош лулчеберлыксы туж вылӥын. Озьы гожъяз Р. М. Сонина Быдӟым Вормонлы 50 ар тырмон аре поттэм книгаяз. Отын со 73-тӥ школаысь калык музейлэн трос аръёс ӵоже ужамез сярысь гожтэ, аслэсьтыз но школаезлэн коллективезлэсь опытсэ вань калыклы, егитъёслы, мукет школаослы но дышетӥсьёслы возьматыны тырше. Книгалэн тиражез бадӟым ӧвӧл ке но, 5 сюрс гинэ, сое лыдӟыны шедьтӥллям ини пӧртэм интыосын. Вуэм со Москвае, Кун Думалэн Тӧроез Геннадий Николаевич Селезнев кие но. Тани мар гожтӥз со туэ авторезлы: "Гажано Раиса Михайловна! "Атайёслэн-геройёслэн сюрестӥзы" книгады понна Тӥледлы бадӟым тау! Ӵапак туннэ, ваньмылы секыт вакытэ солэн потэмез туж дыраз. 54 ар талэсь азьло рейстаглэн колоннаез вылэ гожтӥськыса, Тӥ кыл сётӥды, оскытӥды, шимес ожмаськон вакытэ адӟемдэс-чидамдэс ноку уд вунэтэ шуыса. Тани та книга, озьы ик Тӥляд вань секыт улэм-вылэмды возьматэ: "сётэм кылдэс" Тӥ юн быдэстӥды. Книгады маде асьмелэн воинъёсмылэн, Родинамылэн патриотъёсызлэн кышкасьтэм но геройлыко луэмзы сярысь, дышетэ Атай музъеммес яратыны, историмес гажаны. Талэсь кулэез мар вань на меда? Книгалэн бамъёсаз шӧдӥське сюлэм шунытты, нылпиосты юн яратэмды, ведь Тӥ вань улондэс сӥзиды соосты визьноданлы. Куд-ог визьнодам муртъёсты Россия Федерацилэн Героез ним басьтӥзы ке, отын Тӥляд но тыршемды адӟиське. Тӥледлы вань сюлмысьтым мылкыд карисько, гажано Раиса Михайловна, секыт удысады - утчаськон ужъёсады - бадӟымесь азинсконъёс, творчествояды вормонъёс басьтыны! Г. Н. Селезнев". Нош Татарстанлэн Президентэзлы Раиса Михайловна книгазэ кузьмаз вал, пумиськыны туж ӟеч учыр тупаку. Бигер калык туэ Агрыз городлэсь юбилейзэ пусйиз. Нош Р. М. Сонина вордскиз но будӥз Агрызын. Тӥни соку пумиськизы ожысь ветеран но Президент. Нош Ижысь школае таӵе гожтэт вуиз: "Гажано Раиса Хабибрахмановна! (бигер сямен - Л. Ф.) Туж тунсыкъяськыса тодматски Тӥляд "Атайёслэн-геройёслэн сюрестӥзы" книгаеныды. Тужгес дуно соиз: книгады луэ кема дыр ӵоже, юн тыршыса, чидаса ужамдылэн емышез. Ужды туж дано: Тӥ тыршиськоды будӥсь поколениез патриот луон мылкыдын будэтыны, визьноданы, пинал кунмуртъёслы (гражданъёслы) Атай музъеммес яратон пыӵатыны, секыт аръёсы Родинамес утисьёслэн примерзы вылын дышетыны. Та ласянь Тӥляд ужды туж дуно. Мон оскисько: обществомы кыӵе гинэ воштӥськонъёсты, секыт адӟонъёсты ӧз чида, адямилэн вордскем шаерыныз люконтэм луон мылкыдыз котьку луыны кулэ. Сотэк улонлэн пуштросэз, чеберез, кулэлыкез трос ласянь быре, дунтэма, туала вакытэ уката но дуно егитъёслы ӟеч сямъёс, чылкыт луон мылкыд сётыны тыршон, мораль быръён ласянь ориентиръёс утчаны юрттон. Книгаез лыдӟыса валано: Тӥ ваньзэ сое лулысь-сюлмысь ик быдэсъяськоды. Тау Тӥледлы! Мылкыд карисько Тӥледлы, Раиса Хабибрахмановна, озьы ик Тӥледлы матын луись муртъёслы но шудбур, тазалыко, тыр улыны! Гажаса - Минтимер Шаймиев". Нош таиз гожтэт Санкт-Петербургысь вуэмын. Гожтэ Вавож ёросысь Русские Ожги гуртын вордскем мурт, Советской Союзлэн Героез, аслаз улэмез но подвигъёсыз сярысь "300 вылетов за линию фронта" книгалэн авторез Григорий Петрович Евдокимов. "Та книга - сюлэмез бугыръясь документальной повесть, со вазиське будӥсь нылпиослы, егитъёслы но озьы ик, соосты визьнодась муртъёслы но. Отын кутсконысеныз пумозяз возьматэмын вакытъёслэн висъянтэм, люконтэм луонзы, сотэк егит адямиосты ӟеч сямъёсын будэтыны-визьманы странамылы но калыкмылы оскымон луись карыны уг луы. Таӵе уж тужгес но кулэ туннэ, куке дышетсконниосын визьнодан уж лябӟемын, нош военно- патриотической уж дугдытэмын шуыны луэ. Книгадэс азьланьтыны мед быгатысалды. Тиражез табере бадӟымгес мед луысал, сое шедьтыны мед быгатозы мукет республикаосысь лыдӟисьёс но". Г. П. Евдокимов. Санкт-Петербург. Озьыен, аспалмы - героймы Минтимир Шаймиевен огмылкыдын малпаське, Татарстанысь Тӧролэсь малпанъёссэ тодэм кадь, та книгаез выльдыса, выльысь поттыны кулэен лыдъя. Сое Раиса Михайловна кемалась валаса ужаз ни. Книгазэ кыкетӥзэ поттыны дасяз. Трос ватсанъёс пыртӥз. Отчы али верам гожтэтъёс но пырозы. Гожтэтъёс вуо на геройёслэн ӵыжы-выжыоссылэсь, калыкез дышетонын ужасьёслэсь. Сюлмысь потэм кылъёссэ верам А. Н. Сабуровлэн племянникез Григорий Иванович, со но улонзэ Родинамес утёнлы сӥзиз, генерал-майор. Тау карон кылъёссэ гожтэм Советской Союзлэн Героезлэн Иван Данилович Юдинлэн нылыз Раиса Ивановна... Озьы тӥни, "Атайёслэн-геройёслэн сюрестӥзы" книгаез выльёсыз лыдӟисьёс возьмало. Татын угось быдэс Россилы адӟем карымон опыт возьматэмын, музей патриотъёсты будэтон ласянь Россиын нырысетӥ интые потӥз. Нош книгаез печатланы, лыдӟись доры вуттыны коньдон ӧвӧл. Вазиськыны гинэ кыле на: кытын тӥ, спонсоръёс? Леонид ФЕДОРОВ, Удмурт Элькунысь дано журналист. ЖУРНАЛИСТЪЁСЫН ПУМИСЬКОНЪЁС Коммунистъёс интызэс ӧз ыштэ Николай Иванович Сапожников, Удмуртиысь республиканской партийной организацилэн нырысетӥ секретарез, таизэ пумиськонзэ сӥзиз быръёнъёсъя лэсьтэм йылпумъянъёслы. Со меӵак пусйиз, куд-ог интыосын кырсь амалъёсын ужазы шуыса. Кылсярысь, Татарстанын КПРФ-лэсь адямизэ избиркомлэсь члензэ ӧз лэзе информационной материал люкан борды. Башкортостанын, кызьы ивортӥз отысь республиканской парторганизацилэн нырысетӥ секретарез, кытын но отын протоколъёссэс карандашен гожъязы. Ваньмыз со быръёнъёсъя законэз тӥян луэ, пусйиз Н.И.Сапожников. Николай Иванович аслэсьтыз мылкыдзэ вераз Удмурт Республикаын ортчытэм юалляськонъя но. Президент быръёнэз со умоен уг лыдъя. - Россиын луыны кулэ одӥг Президент, нош интыосын котькуд регионлы нимаз-нимаз пуктӥм ке, странамы юдэсэн-юдэсэн куашкалоз. СССР-ез быдтэм бере огез но солэн азьвыл улосвылэз умой улыны ӧз кутскы, Белоруссия мырдэм но кызьы промышленной продукция поттонзэ 82 процентозь вуттӥз, нош Киргизия куашказ ни феодализмозь. Берло ортчем быръёнъёс сярысь ке верано, лыдпусъёс возьмато: Россиын улӥсь калык КПРФ-лы дурбасьтэ. Коммунистъёс понна таиз Кун Думае быръён умой ортчиз. Ми одӥг интымес но ӧм ыштэ, люкетӥсьёс но могӟонъёс туж трос ке но вал. 19 декабре КПРФ понна куаразэ сётӥз 138,7 сюрс мурт. 1995-тӥ арын - 52 сюрс (Удмуртиысь соку одӥг коммунист но Думае ӧз шедьы). Малпамъя ваньмыз ӧз ке но пӧрмы, мынам тау карон кылъёс вераме потэ районъёсысь партийной организацоислы. Ӟечгес ке ужасалмы на, ӧжытгес куараос кыльысалзы Жириновскийлэн огазеяськонэзлы но "Единстволы" ("Медведьлы"). Жаляса верано, Удмуртия малы ке но туж ӝог синмаськиз Кремльлэн партиезлы. Со КПРФ-лы шӧдскымон ыштон ваиз. Кыкетӥез, кытын ми бырйисьёсты ыштӥм, центральной телевидение пыр Маслюковез саптаны выризы сюжетъёс. 6 ноябрьысен кутскыса, соос 5 пол экран пыр возьматэмын вал, Юрий Дмитриевич Кун Думае медаз шедьы шуыса. Кремльлы таӵе адямиос кулэ ӧвӧл. Мукетыз учыр. Ижевскысь огез кандидат аслыз "Коммунист" ним басьтэ. Со вакытэ ик дорамы потӥсь куд-ог газетъёс "шедьто" 1944-тӥ арын партие пырем муртлэсь Маслюковез сьӧдмась гожтэтсэ. Солэн авторезлы осконо ке, Юрий Дмитриевич, пе, КПРФ- ез кемалась вузаз но "Отечествое" кӧчиз ни. Калыкез уд пӧя. Озьы ке но, милемлы трос гинэ кужыммес быдтоно луиз, кандидатмес утён понна. Ю.Д.Маслюков ноку но компартилэн радъёсысьтыз ӧз пота, со - коммунист, быръемын КПРФ-лэн ЦК-езлы членэ. Нош Ижевскысь ассэ "Коммунист" шуись депутатэ кандидат компартилэсь 6 процент куаразэ таланы быгатӥз. Газет лыдӟисьёс понна мон нимысьтыз верасько: та адями одӥг партие но пыремын ӧвӧл, вылаз ик, Вылӥ судын ужась судьялы туала законъя партийной луыны право сётымтэ. Амалтэк юан кылдэ: малы кулэ вал сыӵе "пӧртмаськон"? Валэктонэз туж огшоры: мандат понна нюръяськонын котькыӵе кырсь амал но кутыны луэ, кужмыдлы, быгатонлыкедлы осконэд ичи ке. Самой таӵе пӧялляськонэн-зулёнэн пумиськыны кылдӥз Воткинскын но Ижевскын пумиськылонъёс дыръя. Бырйисьёс огкылысь пыкылыны ӧдъязы, Ю.Д.Маслюков косэмъя, пе, дорамы ракетаослэсь двигательёссэс быдтонъя завод пуктыны выро. Юрий Дмитриевич ачиз но та выль объект сярысь тодӥз быръён ужен герӟаськемез бере гинэ. Соку ик кыл сётӥз ваньзэ пыр-поч эскерыны но вань луонозэ лэсьтыны, калыкез, инкуазез кышкытлыклэсь утён вылысь. Сётэм кылзэ быдэстӥз, бырйисьёслы, нимысьтыз быръем комиссилы со меӵак шуиз: Воткинск сяна но Россиын вань 2-3 инты, кытын двигательёсты сутон нокинлы но изъян уз вайы. Монэ тужгес но шугъяськыто вуоно быръёнъёс. Президентэз быръёнын уката но шукрес пӧяськон амалъёс кутӥськозы, нырысь ик - телевидениын. ХХ даурлэн самой дуно но дано "машинаез" пумен юнгес но юнгес ужа огшоры бырйисьёслы пумит, адямилэсь визьзэ сураса-пожаса. Асьмеос сое туж умой шӧдӥм, "Медведь" огазеяськонлэн политической аренае потэмезъя. Н.И.Сапожников, быръёнъёслы вакчияк йылпумъянъёс лэсьтыса, валэктон сётӥз журналистъёслэн юанъёссылы. - Николай Иванович, 1995-тӥ арен ӵошатыса, туэ КПРФ-лы тужгес но ӧжыт, 160 куара гинэ сётэмын Камбарка районын. Неужто компартилэн ужамез отын воксё уг шӧдӥськы? - Мон озьы ӧй шуысал. Районной парторганизация отын вань. Нош пыр-почгес вераськон та пумысен мыноз январе ортчоно республиканской партконференциын. Вераны кулэ, городъёсын арысь аре будэ но юнма коммунистъёслэн кужымзы, гуртын со уггес шӧдӥськы. Районъёсы асьмеос но шергес вутскиськом на. Данаксэ адямиосты йыромытӥз Лапшинлэн, аграрной партилэн кивалтӥсезлэн, "Отечествое" шонскемез. КПРФ-ын но аграрникъёс, "Отечествоын" но аграрникъёс - кудӥз понна султно? Тӥни со но сураз-пожаз бырйисьлэсь йырвизьзэ. Нош тае валэктыны милям луонлыкмы ӧй вал. Удмурт телевидение ваньзэ-ӧвӧлзэ КПРФ-лы вераськыны висъяз 240 (!) секунд. - Кыӵе инты таяз созывын Кун Думаын басьтозы коммунистъёс? - Радъёсмы ӧжытаклы йылӥзы: 70 мурт ортчемын федеральной списокъёсъя, 70 мурт - одӥг мандатъем округъёсъя. Озьыен, Кун Думае шедемын 140 коммунист, сояз ми 134 вал. КПРФ-лэн фракциез трослы бадӟымгес луысал, быръёнъёс законъя мынысалзы ке. Мон верай ини кин вылэ ужаз Центральной телевидение, кызьы кылдӥзы партиос но огазеяськонъёс. Огшоры калык номыре валаса ӧз вутты, кинлы со куаразэ сётӥз. Кин дурбасьтӥз "Медведьлы", бырйиз Кремльлэсь партизэ - туала кивалтӥсьёсмес. Кин куаразэ сётӥз "Союз правых сил" огазеяськонлы, бырйиз Гайдарез, Чубайсэз, Кириенкоез, Немцовез но мукетъёссэ, соосты, кин асьмеды таӵе улонэ вуттӥз. Нош ма луоз президентэз бырйыку? Соку ведь калыкез эшшо но золгес пӧяны вырозы. Тӥни ма тужгес но кышкыт. - Газетъёс гожъямъя, Россиысь коммунистъёс, пе, туала кивалтӥсьёссэс воштыны дасясько. Шонер-а со яке нош ик пӧяськон-а? - Пӧяськон. Кинлэн ке, туж потэ, дыр, Зюгановез палэнтэмез. Коммунистъёс пӧлын таӵе мылкыдъёс уг шӧдӥско. - Николай Иванович, кин сылэ "Медведь" сьӧрын? - Мон тодӥсько огзэ гинэ: та огазеяськон кылдытэмын Кремлен, списокез туннэ дырозь быдэсак шараямын ӧвӧл. Но сотэк но валамон ни - люкаськемын отчы сьӧд кужым, Кремль ас бордаз кыскиз губернаторъёсты но. Кун Думалэсь 19 декабрь азьын берло сессизэ учкиды ке, кылӥды, луоз: МВД-лэн министрез "Медведь" пала дурбасьтыны косӥз ваньзэ ас удысаз ужасьёсты, озьы ик налоговой полициез, МЧС-эз, чугун сюрес вылын ужасьёсты, пытсэт сьӧрын пукисьёсты, огъя вераса, вань федеральной ёзъёсты. Мон одӥг районысь но ӧй адӟы "Медведьлэсь" первичной организацизэ. Бырйисьёс пӧлын "валэктон" нуизы госслужащийёс. - Кин туннэ оскытӥз, Россилы президентэ асьмеос ум быръе Березовскиез яке Абрамовичез, Чубайсэз яке Гайдарез шуыса? - Со ик кышкыт: калык быръёз Жириновскиез но, Шойгуэз но, мукетсэ но. Сыӵеос понна нош ик ужалозы вань телеканалъёс, коньдонзы тырмыт. Таяз учыре Зюгановлы шуд усиз одӥг пол гинэ ОРТ-ын вераськыны, господин Шеремет ӧтемен валче. - Туннэ ик президентэз бырйысалмы ке, данакез адямиос куаразэ сётысалзы, дыр, Владимир Путин понна? - Мон мукет сяменгес малпасько.Полтикалэн аренаяз ӝог ӝутскем мурт озьы ик ӝог усе. Тодады вае Кириенкоез, Немцовез яке Степашинэз. Ельцин верамъя, Степашинэз но со дася вал ини аслыз воштӥсе. Ӧз яра - 82 нунал ортчыса куштӥз. Путинлэн но азьпал сюресэз сярысь али вераны шуг. Али ма но со лэсьтэ Чечняын, нош отын ӧз ке пӧрмы ни? Таин ик уз йылпумъяськы-а кивалтон удысэ вуылэмез? - Маин валэктыны луоз Егор Лигачевлэсь нош ик политикае берытскемзэ? - Таиз сярысь юано Томскысь коммунистъёслэсь. Кызьы тодмо, Лигачев ас вакытаз кивалтӥз Томскысь партилэн областной комитетэныз. Озьыен, солы осконзы бадӟым. Верало на, Егор Кузьмичлы матысь дыре тырме ни 80 арес. Солы, самой мӧйы депутатлы, оскемын усьтыны выль Кун Думалэсь нырысетӥ кенешсэ. Людмила Медведева. Удмурт Республикаысь Кун Кенешлэн Тӧроезлэн А. А. Волковлэн Россия Федерациысь Федеральной Собранилэн Федерацияя Кенешаз вераськемез (1999-тӥ арын 22-тӥ декабре) Гажано Егор Семенович, гажано эшъёс! Мон малпасько, асьмеос умоен лыдъяны кулэ Коньдон ужпумъёсъя министерстволы, Экономикая министерстволы огкылэ вуонъя комиссилы туннэ эскерыны дэмлам бюджетлэн инъетсэ. Мынам вераме потэ кык сюлэмшугъяськытӥсь ужпумъёс сярысь, кудъёсыз бюджетын санэ басьтӥсько, но кудъёссэ нокызьы но палэнэ кельтыны уг луы. Нырысетӥез ужпум - нылпи пособиос. Унояз улосъёсын (регионъёсын) нылпи пособиос аръёсын уг тырисько, югдурлэн азьланьын тупатсконэзлы но оскон ичи. та кыӵе ке пичи удыслэн гинэ ӧвӧл, быдэс кунлэн ужпумез луэ. Кун ласянь тырмыт юрттэт ӧз луы ке, нылкышноос чылкак дугдозы пинал ваемысь, нылпиос эшшо но ӧжытгес вордскозы. Таяз арын быгатом уждунъя пунэмъёсты тырыны, нош 2001-тӥ арын - нылпи пособиосты тырыны. Кыкетӥе ужпум, нырысь учкыса, герӟаськемын сыӵе улосъёсын, кытын вань химической ож тӥрлык возён интыос. Но, гажано эшъёс, та асьмелэн огъя сюлмаськонмы. Ужпум химической ож тӥрлыкез быдтонъя Конвенциез быдэстон бордын гинэ ӧвӧл. Малпалэ ай асьтэос: сое быдтыны коньдон ӧз висъяськы ке, Кама дуре интыяськем хранилищеосысь люизит ӵапак отчы ик бызёз. Соку люизитэз быдтонъя ужпум Россия азе гинэ уз, быдэс дуннеысь сообщество азе султоз. Россилэн Правительствоез кыл сётӥз химической ож тӥрлыкез быдтонъя ужрадъёслы бюджетын 3,9 миллиард манет коньдон чакланы. Нош туннэ эскерыны дэмлам бюджетын мукет лыдпус - 500 миллион манет. Но оскон вань, вуоно арын федеральной бюджетлэсь доходъя но расходъя люкетъёссэ мултэсэн быдэстом шуыса. Соин ик мон туннэ кенешлэн протоколаз пусйыны курисько со лыдпусэз 1,5 миллиардозь ке вуттон сярысь ужпумез. Соку гинэ вераськон ӝутыны луоз Удмуртиын люизитэз уже кутонъя кык заводъёс лэсьтон сярысь. Малпасько, туннэ асьмелэн луонлыкъёсмы вань 2000-тӥ арлы бюджетэз юнматыны но сое быдэстон бордын ӟеч тыршыны. Тау кылзэмды понна. Югдытӥсьёс Кестым волостьыць Юнда гурт (али Балезино ёросэ пыре) кужмояса пушйыны, будыны ӧдъяз, черкогурт луэмез бере. 1859-тӥ арын Ягошурысь пу черкез Юндае ваизы но - татын церковно-приходской школа усьтӥськиз. Ас вакытаз калыкез югдытонын туж бадӟым кужымез вал солэн. Ӵапак татын, Юнда черкогуртын, 1918-тӥ арын 2-тӥ августэ Удмурт шаерамы нырысьсэ пуктэмын вал удмурт кылын спектакль (та сярысь гожъяз "Гудыри" газет но). Л. Толстойлэсь "Ваньмыз со бордысь потэ" пьесазэ удмурт кылэ берыктӥз но калыклы возьматыны дасяз асьсэ гуртысь ик дышетӥсь Анисия Николаевна Урасинова. Туэ 17-тӥ декабре солэн вордскемез дырысен 105 ар тырмиз ни. Вить ар талэсь азьвыл та дано нылзылэсь юбилейзэ юндаос паськыт пусйизы. Со уго зэмзэ но дано: 1917-тӥ арын Волга котырысь пичи калыкъёслэн съездазы, нош 1918-тӥ арын вань удмуртъёслэн Нырысетӥ ӧтчамазы ветлӥз, 42 арзэ сӥзиз школалы, 15 арзэ - кивалтон удыслы, пусъемын Ленин орденэн. Юндаослэн соку, 1994-тӥ арын толсуре, дуно кунозы вал А. Н. Урасиновалэн Барнаулын улӥсь нылыз Тамара Ивановна Сунцова, озьы ик дышетон ужлы улонзэ сӥзем адями, мумиз сярысь со трос тунсыкозэ мадиз. Юндае 1646-тӥ арын нырысьсэ лыктӥллям Урасин выжыысь бесермянъёс. Со бордысь ик потэм Урасиновъёслэн фамилизы. 350 аръёслэсь бадӟым ни та гурт. Бесермянъёслэн выжызы паськыта, кужмоя. Варсанофий Михайлович Урасинов Совето власть аръёсы татын тужгес йыгмытэз адями вал, огазеям, бадӟыматэм колхозлы председателе сое бырйизы. Варсанофий Михайловичлэн пиезлэн пиез Владимир Гаевич асьсэ гурт администрацизылэн тӧроез луэ. Нош кенэз Ангелина Петровна сярысь нимысьтыз вератэк уг луы. "Ваньмыз со бордысь потэ" шуыса но ум янгышалэ. Яке "гуртлэн кизилиез" шуим ке, адӟом, макем югдытыса вӧлдӥсько со котырысь тылсиос. Удмурт кыллы но литературалы дышетӥсь, ачиз удмурт, ог 13 ар талэсь азьло со ӝабыр-ӝабыр басьтӥськиз бесермян фольклор ансамбль кылдытон борды. Варсанофий Михайлович дорын ик нырысьсэ люкаськизы мӧйы нылкышноос. Тодазы ваизы, люказы вашкала крезьёсыз (кырӟанъёсыз), пӧртэм обрядъёсыз. Пумен данэ потӥзы республикаямы но, шедизы Удмурт телевидение, радиолэн фондаз. Тодмо бесермян кылбурчи Михаил Федотов вить ар талэсь азьвыл Юнда культура юртын ӝыт та кенакъёс кырӟам бере шуиз вал: "Туннэ мон бӧрдыса кылзӥ бесермян крезез. Пичи дыръям ай валатэк малпалляй: ма сярысь меда соос кырӟало?.. Туннэ мон нош ик вуи Юндала, аслам гуртам кадь. Туж шумпотӥсько: удмурт театрлэсь ӝужъёнзэ татын пусйиськом. Анисия Николаевналэн туннэ бадӟым нуналэз. Солэн гинэ ӧвӧл - удмурт калыклэн но. Удмурт калыклэн гинэ ӧвӧл - оло нош, бесермян калыклэн но..." Сыӵе вылэ пуктӥз ас калыксэ кылбурчи. М. Федотов юнда калык шоры учке музейзылэн борддорысьтыз. Со сярысь чуръёс, туспуктэмъёс татчы ватсасько но ватсаськозы ай... Нош со ӝыт берегес, Михаил Федотов ӵектэмен но Петр Поздеев сюлмаськемен, Ангелина Петровна Урасиновалы сётэмын вал республикаысьтымы культура удысын дано ужась ним. Юнме шорысь ӧй вал таӵе дэмлан. Огез ӟеч уж герӟаськыса кошкиз мукетэныз. Фольклор ансамбле ветлӥсь песянайёс пиналъёслы мадизы азьвыл улэм-вылэмзы сярысь. Таосызлэн мылкыдзы ӝутскиз коркась корка ветлыса вашкала арбериосыз бичаны... Музейзы интыяськиз сельсоветлэн вуж пу юртаз. Вуоно арын 8-тӥ мае сое усьтэмзылы дас ар тырмоз ни. Та дыр куспын кин гинэ татчы пыраз, ваньмыз синмаськыса кошкылӥзы. Вуылӥзы кунгожсьӧр куноос но (Агнеш Керекси, Мария Картано), асьме тодмо адямиос но. Удмурт но бесермян юртъер котырысь тӥрлыкъёс вашкала дуннее кадь вутто, нош борддорысь туспуктэмъёс, гожъямъёс гуртлэсь, калыклэсь ортчем сюрессэ возьмато. Нош Ангелина Петровна кезьытысь пырем муртэ пӧсь чаен, пыжиськемъёсын куноятэ. Вераны кулэ: асьсэлэн корка пушказы но, азь шорын ик бадӟым инты басьтэ ӝӧк. Соку ик адӟиське: куно пумитаны татын ярато. Туэ 24-тӥ ноябре но Юндаысь краеведческой музейын, культура юртын, озьы ик Урасиновъёслэн семьяязы дуно куноос луизы Ижысь лыктэмъёс: Ар-Серги, Г. Романова, Т. Чернова, Л. Тихонова, Л. Нянькина но мукетъёсыз. Таиз ужрад сӥземын вал Балезино ёросэн герӟаськем кык тодмо адямиослы: Герман Корепановлы (крезьгурчилы) но Михаил Федотовлы. Кылбурчиез сӥ-бур карыса вуылӥзы вордскем Ворцаысьтыз (Яр ёрос) ӵыжы- выжыосыз но. Татын ик вӧйгуртъёс гурт калыклы шулдыр концерт возьматӥзы. 1964-тӥ арын Юнда черкогуртэз югдытӥз электротыл. Нош Анисия Николаевна но Ангелина Петровна кадь дышетӥсьёс гурт калыклэсь улонзэ, пуш ласянь югдытӥсьёс луо. Татьяна ЧЕРНОВА. "Таӵе черыкен куноосты пумитало вылэм вашкалаосмы", - шуэ А. П. УРАСИНОВА. Туспуктэмез В. БЕЛОМОРСКИХЛЭН. Асьсэ коньдонэн Юкаменск ёрослэн Ертемысь гурт администрацияз пыро кык эштосъёс - "Восход" но "Родина". Администрацилэн кивалтӥсезлэн Маргарита Владимировна Сысоевалэн верамезъя, ортчись аре бадӟым саклык висъяськиз социально-культурной удыслы. Ӟеч тупатъямын Ертемысь культура юрт, куинь гуртысь медпунктъёс, одӥг начальной школа. Вань ужъёс быдэстэмын интыосын коньдон люкам чотын. Озьыен, гуртоос толзэс шулдыр но шуныт потозы. Люция ИПАТОВА. Шудбур понна Со вал 1944-тӥ арлэн берпуметӥ нуналъёсаз, Восточной Пруссилэсь карзэ - Кенигсбергез - басьтыны дасяськон дыръя. 51-тӥ гвардейской стрелковой полк фронтлэн мышказ поттэмын вал, солдатъёсты та ожъёслы дасян понна. Туннэ кадь ик тодам лыктэ разведчикъёслэн кык этажъем пу корка интыяськемзы. Выль 1945-тӥ аре выжон ӝытэ соосты люказы юртлэн бадӟымгес залаз. Малпазы: командирзы вакчияк вералоз ожъёслы дасяськон сярысь. - Султэлэ! - Шабалин офицерлэн командаезъя солдатъёс тэтчыса султӥзы пукон интыосысьтызы. Ӧс усьтӥськиз но... Тол Бабай адӟиськиз. Тушез - бунлэсь, шубаез - берыктэм бадӟым бушлат. - Тол Бабай эш! Тӥледын пумиськыны разведчикъёс люкамын, - рапорт сётӥз офицер. Люкаськемъёс соку гинэ валазы, взводзылэн командирезлэсь но старшиналэсь аспӧртэм пумиськон дасямзэс. Тол Бабайзэс но тодмазы - Худолей. Капчи мылкыдо, шудыны- серекъяны яратӥсь. "Милям Василий Теркинмы", - шуо вал со сярысь эшъёсыз. Ачиз со украинец. Матысь эшъяськиз ачиз кадь ик маскаръяськыны яратӥсь удмурт сержантэн Дмитрий Скворцовен. Кема шулдыръяськизы солдатъёс та ӝытэ. Татын вордскем серемес чуръёс, маскара мадёнъёс берлогес печатласькизы дивизиын потӥсь "Защита Родины" газетын. Отын "Гвардеецъёс серекъяло" нимысьтыз сэрег вал. "Удмурт дунне" газетэз лыдӟисьёсты Выль ар азьын тодматэме потэ тушмон солдатъёс но "Катюша" артиллерийской установка сярысь 55 ар талэсь азьло "вордскем" серемес чуръёсын. Соос пӧлын вань Шарканысь удмурт пияшлэн Иван Федуловлэн но мадёсэз. Пауль. Азьвыл ротамылэн унтер-офицерез Смоленскын ӟуч нылэн Катюшаен тодматскем, пе. Фридрих. Зэм. Ӟучъёслэн "Катюшазы" Смоленск дорын ыбылыны кутскем бере ик унтер- офицермы быдэс ротаеныз ӵош быдтэмын вылэм. Со ик луэм Катюшаен тодматскон. *** Немец солдат. Унтер-офицер, кыӵе ӟуч кылъёсты тодӥды ини фронтын? Унтер-офицер. Москва дорын ожмаськыкумы, "кезьыт" кыллэсь дырекъяськом вал. Нош табере курдаськом "Сталинград", "котыртэм", "партизан" кылъёслэсь. Нош "Катюшалэсь" - визьтэммиськом . Тӥни озьы пумиталлям гвардейской полкысь разведчикъёс тушмон музъем вылын Выль арез. В.Никитин, ожысь ветеран. Кӧня ке гожъёс-тодметъёс... Тӧлӟиз, лобӟиз, кошкиз эшшо одӥгез армы, со пыраклы историе кылиз - аслаз ӟуго- ӟуго гердъёсыныз, гожъёсыныз, тодметъёсыныз. Нош тужгес но узыр вал со аслаз ужъёсыныз. Басьтом культура, литература, искусство, наука удысэз гинэ. Кӧня юбилейёс вал та аре, кӧня ӝытъёс, калыклэсь мылкыдзэ ӝутӥсь ужрадъёс. Нимаз-нимаз адямиос понна но туж шудо вал, дыр, та ар. Кылсярысь, наукая докторъёс луизы Татьяна Владыкина, Галина Никитина, Риф Насибуллин. 70 арес тырмонзэ туж паськыт пусйиз Геннадий Корепанов-Камский. Нырысьсэ нимысьтыз бадӟым крезьгуро фестиваль ортчытэмын Герман Корепановлы сӥзьыса. Солэн пиез Александр Корепанов туэ Удмуртиысь композиторъёслэн бадӟым кенашазы быръемын огазеяськонзылы тӧрое. Бадӟым ӧтчамъёссэс ортчытӥзы художникъёс, писательёс но. Суредасьёсслы тӧрое выльысь быръемын Петр Елкин (солэн ужъёсыныз бадӟым выставка али ужа Финляндиын). Писательёслэн тӧрозы луиз Егор Загребин. Удмурт кун национальной театрлэн сцена вылаз нырысьсэ пуктэмын та авторлэн пьесаезъя Куӟебай Гердлы сӥзем спектакль. Шугенгес ке но, печатламын выль книгаос, соос лыдӟись доры сюрессэс шедьтозы выль дауре. Нош таяз дауре кылдэмъёсыз син азямы, пель сьӧрамы. Тани туннэ потэм материалъёсмылэн нимъёссы но малпамын тодмо писательёсмылэн ужъёссыя. Выль, шудо, шудбуро Нош ик вуэ Выль ар - музъем вылысь одӥгез тужгес но шулдырез, одӥгез тужгес но вашкалаез праздник. 1-тӥ январь Выль арлэн кутсконэз луиз кык сюрс ар талэсь азьвыл - асьме вакытлэсь азьло ньыльдон витетӥ арын, Римысь быдӟыммурт Юлий Цезарь воштӥськон ортчытэмен валче. Со кылдытӥз шунды календарь - таиз берло нимаськыны кутскиз Юлиан календарь. 1-тӥ январь быръемын соин - та нуналэ ас ужзэс быдэсъяны кутскизы Вашкала Римысь выль консулъёс. Та толэзьлэн нимыз вера: январь сӥземын инбамлэн кузёезлы - вашкала Янус инмарлы. Янус шундылы капкаосты нунал вордӥськыку усьтылӥз но нунал йылпумъяськыку ворсалляз. 1-тӥ январе Римын ог-огзылы кузьмаллязы горд сюйлэсь яке туйлэсь югдытӥсьёс. Соос вылын одно ик возьматэмын луылӥз Вормонлэн инмарезлэн - Викториялэн - тусбуез. Одно ик гожтылӥзы: "Выль, шудо, удалтӥсь ар тӥледлы!" Ог-огзылы кузьмаллязы ческыт сиён-юон, тыкмыли, уксё - иське, та вашкала ӟеч йылолъёс кемалась кылдӥллям. Та календарь отӥяз выжиз Европаысь вань калыкъёс кие. Византия пыр вуиз Русе но. Зэм, Пётр Первыйлэн воштӥськонъёсыз дырозь Выль ар пусйиськылӥз 1-тӥ мартэ яке - 1- тӥ сентябре. Пётр Первый ивортылӥз: 1728-тӥ арысь 31-тӥ декабрь бере нуналэз, 1-тӥ январез, лыдъяно Выль арысь нуналэн... Та дырысен Россиын юнмаз Выль арез 31-тӥ декабрьысен 1-тӥ январе выжон вакытэ пусъён. Со сяна, Пётр Первый визьнодалляз: "Та ӟеч кичӧлтонэн но выль даур кутскемен валче, ог-огдэ ӟечкылано Выль арен. Ульчаосысь юртъёс но капкаос вадьсы юнматылоно пужымлэн, кызлэн но сусыпулэн вайёссылэсь чеберъянъёс. Ыбылоно пичи пушкаосысь но пыӵалъёсысь, лэзьяно ракетаос, ӝуатъяно тылъёс..." Дас куатетӥ дауре Римско-католической черклэн йырыз Папа Григорий ЪИИИ кылдытӥз аслэсьтыз календарьзэ - таиз берло нимаськыны кутскиз Григориан календарь. Шунды пуксён пал Европаысь уноез кунъёс выль амалэ выжемен валче, Петербургысь Наукаосъя академия 1983-тӥ арын ай дэмлалляз выль амалэ выжыны. Зэм, та ужез 1918- тӥ арын 24-тӥ январе быдэстӥз В. И. Ленин гинэ - постановление озьы ик нимаськылӥз: "Шунды пуксён пал Европаысь (Григориан) календарез яке выль амалэз ужатон сярысь". В. И. Ленинэн юнматэм постановление ивортылӥз: Россиын одӥг кадь дыр тупатэмен валче, 31-тӥ январь бере дырез лыдъяны кутсконо 1918-тӥ арысь 14-тӥ февральысен". Бадӟым асьмелэн Россимы. Выль арез нырысь ик - 31-тӥ декабре москва дыръя 14 часын - пумитало Чукоткаын улӥсьёс. 15 часын пумиталозы сое Камчаткаын. Отӥяз часлы быдэ - Магаданын, Владивостокын, Якутскын, Иркутскын, Новосибирскын, Тобольскын, Свердловскын, Ижевскын, отӥяз - Москваын. *** 1922-тӥ арысен кутскыса, ялан выльдӥське Григориан календарь. Выльзэ малпало вал ни 1939-тӥ арын кылдытыны - люкетӥз Кыкетӥ дунне ож. Зэм, уж ялан азьланьтӥське. Та вакытэ вань иеи кык сюлэсь трос выль календарь. Соос пӧлын ик - Ижын улӥсьлэн В. В. Рогалёвлэн календарез. Озьы ке но, паймымон: малы меда Выль ар кутске кезьыт вакытэ? Ӟечгес ӧй луысал-а югыт но сайкыт тулыс нуналэ пусйыны? (та сярысь лушкем малпаськылӥз вашкала грек поэт Овидий но). *** Бен, асьмеос али туж куанересь. Улонмы но шыпыт ӧвӧл. Озьы ке но, йырез чылкак ошыны уг яра: дырыз дыръя шутэтсконо, шулдыръяськоно. Вашкалаосмы но туала мӧйыос (арлыдоос) одӥг пол гинэ ӧз чидалэ ни "сьӧд нуналъёсты". Зэм, ӟеч сямъёссэс, ӟеч улонлы осконзэс ӧз ыштылэ, лыдэ басьтылӥзы азьвыл аръёсы кылдэм турлы праздникъёсты но йылолъёсты. Озьыен, асьмелы но утёно вашкала сямъёсты. Выль арен! Выль шудбурен! Н. Веприков, ожысь но ужысь ветеран. Йыромем тури Йыромиз ук, йыромиз милям корреспондентмы Георгий Юсаев. Кытчы шуоды? Кыдёкысь Африкае, Египет кунлэн ӟырдам луо букосъёсыз пӧлы. Вакытэз нош кыӵе?! 2000-тӥ аре выжиськом ук. Георгий Александровичмы сое пумита олокытын, мурт шаерын, вашкала пирамидаос пӧлын, кӧшкемыт крокодилъёслэн-драконъёслэн дуннеязы, 28 градус пӧсь куазен. Жалезлы но уд чида, ява. Кыӵе со Выль ар - чеберъям кызтэк но ӟырт кезьыттэк. Озьы ке но, оскиськом, Выль ар уйзэ эшмы шулдыр ортчытоз, кыдёкысь Египетын чарказэ ӝутоз асьмеос, удмуртъёс, понна. Татьяна ЧЕРНОВА Я, ӟеч луэ Та дауре кылем эшъёс, Я, ӟеч луэ - пумиськытозь... Тӥ син азям - радэн-радэн Кошкылӥды ни черодэн... Кинлы - вакчи улон эсэп, Кинлы - кузьгес даур-кесэг Инмар сётэм. Ваньмызлы нош Пуктэм аръёс куспы кузь гож. Эшъёс, эшъёс... Ӧвӧл ни тӥ - Часты дугдэм кадь куспетӥ. Огсыр улон нош погыля, Даур ас вапумзэ келя. Эшъёс, эшъёс... Вакыт сьӧрысь Тусбуйёсты ышо бусэ. Нош малпаса кин ке сярысь, Сюлэм али ке но вузэ... Улэм потэ Тани-тани вуоз со. Ыркыт тӧлэн, улмо зынэн, Тол Бабайлы шумпотонэн, ворпо тылъёсын, пальпотӥсь ымныръёсын... Но котьмалэсь умоез - Выль ар котькудмылы ваёз пичильтык ке но оскон. Сотэк уг луы ук! Малпаськоно ке, ваньмы асьмеос - нылпиос. Котьма ке но, ӟечсэ витиськом. Кин ке оске, вуонояз аре одно ик узырмоз шуыса. Мукетыз вӧсяське, азьланьын аслэсьтыз но матысь адямиосызлэсь тазалыксэс утьыны курыса. Куинетӥез турттэ кемалась лэсьтыны кутскем юртсэ йылаз-пумаз вуттыны но корка пыронэ вань эшъёссэ ӧтьыны. Ньылетӥез уйвӧтаз но адӟе ни алилэсь небытгес пуконэз. Витетӥез... Но выльзэ арез пумитаммылэсь азьло асьмеос син азямы пуктом тазэ. Ма сётӥз со? Кыӵе малпанъёс-мылкыдъёс поръязы омырын? Арлэн нырысетӥ ӝыныез быдэсак сямен ортчиз шаерысьтымы властез выльдон сярысь ӧтён улсын. Ӧд вунэтэ на-а, макем ӟырдыт нюръяськон мынӥз Кун Кенеше шедён понна? Яке берло быръёнэн ваньмыз сураськиз-а? Вал ук, вал калыкмы понна секыт тулыс, куке удмуртъёслэн осконзы кивалтон гурезь йылэ тубыны ӧз быгаты. Оло мукетъёсыз кужмогес вылӥллям, оло асьмеос кулэезъя огазеяськыны ӧм быгатэ, оло инмысь кизилиос озьы радъязы улонмес... Июнь толэзе Ижын ортчиз Вань удмуртъёслэн азьло чакламтэ ӧтчамзы. Солы пӧртэм дунъет сётыны луоно. Кин ке шуиз но, шуэ но: жугиськон бырем бере кины шонамлэн пайдаез ӧвӧл ни. Озьы но, дыр. Соин ӵош адӟытэк кельтыны быгатӥськом шат удмурт калыклэсь политикае йыг-йыг пыриськыны мылкыдзэ? Съездлэн ваньмыз сямен делегатъёсыз шӧдӥзы ук, ӵош кариськоно ке, трос лэсьтыны луоно шуыса. Со бордын ик, вылды, азьло пусйымтэ ӧтчамлэн кулэез. Ӧз, юнме ӧз луэ тулыс вылтӥ шугъяськонъёс. Кун Думае быръён пумысен ужпумез Пичи кенешлэн заседанияз эскерыку, отчы люкаськемъёс ӝог гинэ вуизы огкылэ: ойдолэ, шуизы, кужыммес кир-пазь ум каре, ваньмы ӵош ужаломе, Россиысь парламентэ егит удмурт кышномуртэз Светлана Смирноваез быръён вылысь. Пӧрмиз ук! Светлана Константиновна пала кариськизы куаразэс сётэмъёс пӧлысь 62 процентэз - 260 сюрс адями. Со-а кужым ӧвӧл, со-а уг возьматы огазеяськыны быгатэммес? Вормиз Юрий Маслюков но. Таиз понна но дурбасьтӥз "Удмурт кенеш", компартия, мукет огазеяськонъёс. Шумпоттӥз Виктор Полянских. Оло, селта палъёс зэм ик валатскизы ни, мурт вылэ оскиськыса улыны уг луы, вордӥськем музъем вылтӥ ветлӥсь адями ик калыкез сярысь ӟечгес сюлмаськоз шуыса. Озьы медло вал. Вот улон. Огъя быръёнъёс. Вуоноез но ар пӧртэм луоно ӧвӧл кадь. Асьмеос быръём Россилы президент. Кин тодэ, оло, кызьы шуиськомы, ошмесо шаермы но кайта йыръяськоз. Уго Удмуртилы кузё луыны тыршисьёслэн ымныръёссы пумен ӟечгес адӟисько ни телеэкранысь но газет бамысь. Я ини, ойдолэ ог арнязэ ке но йырмес мозмытом политика сярысь малпанъёслэсь. Выль ар - со, нырысь ик, семьялэн, эшъёслэн праздниксы. Ӝӧк сьӧры пуксьыса вунэтом йыркурмес, буре ваём вӧзысьтымы пыраклы кошкем матысь адямиосмес, ог-огмылы сӥзём ӟечсэ гинэ. Котьма шу но, вуоно арын, вуоно даурын улэм потэ ай. Туж потэ. Иван Лебедев. Удмуртиысь - Чечняе Чечняын война быдэс дуннелы секыт потос кадь потэ ни. Отысь югдурез тодӥсьтэмез ӧвӧл. Адӟиськомы, кызьы нюръясько асьмелэн солдатъёсмы, кызьы курадӟе отысь калык. Ижевскысь "Новый регион" телекомпания, "Адам" радио но "Перекресток" газет кичӧлтонэн потӥзы "Выль ар кузьым" ужрад ортчытонэн. Ваньмыз люкам кузьым келямын луоз Чечняын ожмаськись солдатъёслы, милициын ужасьёслы. Вераны кулэ, республикаысьтымы Югдурез утёнъя министерствоысь адямиос кӧня ке ар ӵоже ини отын солдатъёсын ӵош быдэсъяло секыт ужез. Кичӧлтонлы республикаямы соку ик уно предприятиос, организациос, нимаз адямиос вазиськизы. Кутскиз кузьымъёс дасян. Кин юрттӥз поттэм вузэныз, сиён-юонэн, пӧртэм арбериосын, коньдонэн. Пусйыны кулэ "Удмуртнефть", "Ижсталь", "Буммаш" акционер огазеяськонъёсты, "Продторгез", Удмуртпотребсоюзэз, "Удмуртия" ГТРК-ез, солдат анайёслэсь комитетсэс, городысь школаосты но мукетъёссэ. Кузьымъёс тырмыт люкаськизы. Выль ар азьын соос Чечняе келямын. Та дано уж оскемын вал Удмурт Республикаысь югдурез утёнъя министрлэн воштӥсезлы Г. Л. Фалалеевлы, Кун Кенешысь Законъёсты быдэсъямез чакланъя, калыкез кышкытлыклэсь утёнъя но гражданъёслэн правооссыя ялан ужась комиссиезлэн тӧроезлы М. К. Кокоринлы, мукет адямиослы. Выль ар кузьымъёс сётъямын. Чечняын служить карисьёс шуныт пумитазы асьсэ палась вуэм адямиосты. Ваньмызлы тау каремзэс вераны куризы. Озьы ик ӟечкыланы куризы Выль арен. Н. БАЙТЕРЯКОВ. Шулдыръяськонды мед удалтоз Выль арез асьмеос ваньмы шумпотыса возьмаськом. Но та шулдыръяськон медаз пӧрмы вал куректон-бӧрдонлы. Со понна, гажано эшъёс, ойдолэ чакланы тыршом котькуд вамышмес. Нырысь ик, тэльысь ваем кызэз одно ик юнматоно кечат-вамат шуккем пулъёсын, яке пуктоно луоен тырмытэм ведаре. Кызлэн вайёсыз медаз йӧтэ электросветильникъёс но мукет шунтон арбериос борды, сое чеберъяны кутоно заводын дасям электрогирляндаез гинэ. Уг яра ёлка котырын бенгальской тылъёсты ӝуатъяны, хлопушкаосын шудыны, кызэ сюсьтыл пуктылыны, нылпиосты ӝог кенжись материалъёслэсь вурем дӥсьёсын пӧрмытыны, соосты кема дырлы огназэс келяны. Тылпулэсь утиськон удысын ужасьёслэсь вань куронъёссэс быдэстӥзы ке, праздникез кема дыр ӵоже тодады возёды. Нош трос калык люкаськылон интыосын ёлка пуктыны яра тылпулэсь утиськонъя ёзъёсын ужасьёслэн лэземзыя гинэ. Со юртын одно ик мед луоз ьелефон, тылпу кысыны чаклам арбериос. Юртэз тырмытыны уг яра чакламлэсь трос калыкен. Шулдыръяськонъёс дыръя одно ик радъяно дежурство. Ижевскысь Октябрь ёросысь тылпуэн нюръяськонъя 2 номеро часть республикаын улӥсьёсты ӟечкыла Выль арен, сизе ӟеч мылкыд но тазалык. И. А. Бочкарев Удмурт Республикаысь МВД-лэн тылпуэн нюръяськонъя управлениысьтыз капитан. Шуд но бур Выль аре! Удмурт Республикаысь Кун Кенешлэн но Правительстволэн нимынызы ошмесо шаерын вань улӥсьёсты сюлмысьтымы ӟечкыласьком вуись Выль арен! Кошкись арез келяса но выльзэ пумитаса, асьмеос тодамы ваём ортчемзэ, отысь ӟечсэ, югытсэ, сэрттом-пертчом янгышъёсмес, дунъет сётом котькуд вамышмылы, азьланьын янгышъёстэк ужан понна. 1999-тӥ ар кызьы ке Россия, быдэс странамы понна капчи ӧй вал. Но со ваиз азьланезлы бадӟым оскон но. Берло аръёс ӵоже нырысьсэ умой пала воштӥськонъёс шӧдӥськизы промышленностьын, Удмуртиын продукция поттон вить процентлы йылӥз. Со ик пыртӥз республикалэн бюджетаз ватсаса коньдон, юрттӥз улон-вылонын трос ужпумъёсты быдэстыны. Урод куазь шоры учкытэк, гурт ужасьёс ӟеч ю-нянь но бакча сиён будэтӥзы. Республикаын сиён-юон тырмыт дасямын. Кивалтон ёзъёс рос-прос басьтӥськыны кулэ Россиын но улосъёсын экономикаез ӝутон борды. Россия Федерациысь Федеральной Собранилэн Кун Думаяз алигес ортчем быръёнъёс оскон кылдыто, парламентэ вуэм адямиос зэмзэ но странамес секыт югдурысь поттыны быгатозы шуыса. 1999-тӥ ар пусйымон луэ соин но, ӵапак туэ ортчизы республикаысьтымы Кун Кенеше быръёнъёс. Оскиськом: шаерысьтымы калык хозяйство 2000-тӥ арын но шӧдскымон азинскоз, юнмалоз. Со понна луонлыкъёс вань. Шаерысьтымы уноез предприятиос, экономикаын выль кусыпъёс тупатыса быгатӥзы унозэ поттэм вузъёссэс калык доры вуттыны. Сыӵе вормонъёс басьтэмын, кивалтӥсьёслэн ужзэс быгатыса, валаса радъяменызы. Тӥледыз но тӥлесьтыд семьяостэс палэнтӥ мед ортчозы шуг-секытъёс, курадӟон но куректон, коркаосады мед кузёяськозы шулдыр мылкыд, яратон но тупаса улон. Шудбур но тазалык тӥледлы, ӟеч малпанъёсты мед быдэсмозы. Удмурт Республикаысь Кун Кенешлэн Тӧроез А.А.Волков. Удмурт Республикаысь Правительстволэн Тӧроез Н.А.Ганза. ӞЕЧКЫЛАЛО КУН КЕНЕШЛЭН ДЕПУТАТЪЁСЫЗ 2000-тӥ аре выжыса Анатолий Марченко, "Удмуртторф" кун предприятилэн валтӥсь тӧроез: - Алигес ми пусйим му вӧй но газ поттӥсьёсмылэсь праздниксэс. НГДУ-мылы тырмиз 15 ар. Трос-а, ӧжыт-а сое шуод, но му вӧй но газ поттон интыосмы (Як.-Бодья, Южно- Лиственское но Черновское) син азьын чеберско, кужмояло. Выль арын вуттом му вӧй чылкытатон цехмес. Со бадӟым вормон луоз. Ӝутӥськом сое но мукетъёссэ асьме кужымен. Вуоно арын чакласьком 300 сюрс тонна "сьӧд зарни" кыскыны, туэ 270 сюрс пала луиз. Сое бен, музон огазеяськонъёсын ӵошатыса, трос уд шуы. Но милям вамышъёсмы арысь аре кузёмо. Али НГДУ-ын 250 мурт ужа. Огинтыязы уг сыло гыбед (торф) поттӥсьёсмы. Полиэтилен плёнкаосын сьӧд сюймы кошке ни кунгож сьӧрысь странаосы. Та ужез но ялан умоятӥськом. Калык продукцимес шумпотыса мед басьтоз но тросгес сиён-юон дасяны мед быгатоз. Ми тыршиськомы адямиослы юрттыны, соослэсь улон-вылонзэс капчиятыны. Предприятиысь ужасьёсты но округысьтым бырйисьёсме 2000-тӥ выль арен, выль даурен ӟечкыласа, мылкыд карисько ваньдылы капчи мылкыд, шудо улон но тазалык. Валентин Жебровский, акциосын "Буммаш"" огазеяськонлэн валтӥсь директорез: - Заводмы юнма, будэ но воштӥське. Тани ӵапак та нуналъёсы сӥё-дано пусйим предприятилэсь 40 ар ортчем сюрессэ. Огазеяськон вис карытэк огсыр ужа, выльдӥське, уно пумо выль вузъёс поттэ. Ас интызэс шедьтӥзы ни машина лэсьтӥсьёс, андан ӵыжатӥсьёс, линолеум поттӥсьёс но мукетъёсыз. Ваньмыз со рос-прос, тупен-тупен верамын вал предприятилэн вордскем нуналэзлы сӥзем ӝытын. Нош туннэ сюлмысьтым ӟечкыласько уно сюрсъем коллективме но бырйисьёсме Выль арен но сӥзисько 2000-тӥ арын уката бадӟымесь вормонъёс басьтыны. Ваньдылы шудбур но тазалык. Карим Касимов, акциосын "Глазовский завод "Металлист" огазеяськонлэн валтӥсь тӧроез: - Туэ гужем предприятимылы 100 ар тырмиз. Сое быдэс коллектив сӥё-дано пусйиз. Юбилей ужасьёслэсь мылкыдзэс ӝутӥз уката азинлыко тыршыны. Тазэ арез, зэмзэ но, выль вормонъёсын пумитаськом. Вань ёзъёсмы заданилэсь вылтӥ вузъёс поттӥзы но огсыр ужаськом. Предприятимы берло дыре данаклы паськытаз, ватсаса уно ужасьёс кутӥм. Керттӥськон фабрикаез бордамы басьтэммы урод ӧз луы: асьмелы но, вуриськисьёслы но. Предприятилэн кыкетӥ даураз выжыса, быдэс коллективме но округысьтымы бырйисьёсме газетты пыр лулысь-сюлмысь ӟечкыласько 2000-тӥ арен но сӥзисько юн тазалык но бадӟым шудбур. Вераськиз Г. РОМАНОВ. Парадын - Тол Бабайёс Выль ар азьын Иж карлэн Шор площадяз пиналъёсын пумиськизы пӧртэм выжыкылъёсысь геройёс. Алёша Попович, Василиса Премудрая, ӟичы но мукетъёсыз Йӧ городокез усьтыны лыктӥллям. Нош валтӥсь герой вал Дракоша. Мӧйыос но "синпӧртманэз" учкыны ветлӥзы. Но Йӧ городоклы тужгес но шумпото покчиос. Зол кичабонэн пумитазы дас вить Тол Бабайёсты но сомында ик Лымы Нылъёсты. Одӥг интыысь тамында яратоно куноосмес ку адӟод на? Йӧ карез усьтыны Ижлэн мэрез А. И. Салтыков ветлӥз. Выль арен ӟечкыламез бере, Дракоша городлэн кузёезлы меч-кладенец, выжыкыл плащ но берет, мунё кузьмаз. Нош собере Тол Бабайёсын но Лымы Нылъёсын ӵош пичиос но бадӟымъёс кыз котыртӥ бергазы, эктӥзы, кырӟазы, шудӥзы. Ваньмыз пиналъёс ческыт кузьым басьтӥзы. Собере Тол Бабайёс шаерысьтымы пыдлось гуртъёсы пиналъёс доры кошкизы. А. Андриянов. Пыртэмын лауреатъёс пӧлы Экспертъя калык куспо кенеш ивортӥз "Бизнес-олимп" национальной премилэсь экономика удысысь 25 лауреатъёссэ. Соос пӧлын акциосын "Ижевский оружейный завод" огазеяськон но. Та аспӧртэм кенеш кылдытэмын вал 1994-тӥ арын журналистъёслэн "АСМО-пресс" огазеяськонэнызы. Вить ар ӵоже "Бизнес-олимп" премилэн лауреатъёсыз луизы Россиысь 220 предприятиос но пӧртэм фирмаос. Соос сярысь пыр-поч верамын луоз "Россилэн зарни книгаез. 2000-тӥ ар" альманахын. Лыдӟисьёс доры со вуоз выль аре. В. РОГАЛЕВ. Дракон ньыль полэс шуд, пе, вае Дракон - выжыкылысь басьтэм маке. Сое тазьы суредало: кӧшкемыт, бурдо, ымысьтыз тыл пазя. Сыӵе кышкыт маке адямилы бен шуд вайыны быгатэ-а меда? Шунды пуксён палан улӥсьёс ноку но сое ӧз гажаляллэ, 1520-тӥ арын (Драконлэн араз) Европаын уно шимес учыръёс вылӥллям. 2000-тӥ ар но, кызьы шуо астрологъёс, кизили тодметъёсъя ӵапак сыӵе шимес арлы тупа. Нош Китайын, Шунды ӝужан палан, Драконэз котьку сӥлы карылӥзы, сое визьмоен, йӧноен лыдъяллязы. Кыӵе бен та Драконлэн сямыз? Ӟечсэ-а, уродзэ-а возьмано солэсь? Тазалыкез, кужмыз, мылкыдыз тырмыт. Малпанъёссэ ватытэк, шара улыны яратэ. Соин ик, вылды, сое алданы капчи. Чеберъяськыны, пыриськыны уг быгаты. Вань улытозяз Дракон тырше ассэ визьмогес, быгатӥсьгес карыны. Ас азяз вылӥ куронъёс пуктэ, мукетъёслэсь но сыӵе луэмзэс ик возьма. Куд-ог дыръя керӟег, ваменэс луэ, кылыз малпаськемезлэсь азьпал мынэ. Озьы ке но, Драконлэсь кылзӥськыны кулэ, со котьку но ӟеч визь-кенеш сётэ, ачиз но котькыӵе уже капчи ӝутске. Дракон ноку но номырлы но уг кулэяськы. Вань ужъёсты ворме. Котькин медло - артист, врач, политик - ваньзэсты азьпалтыны быгатэ. Но пусйытэк уг луы: Дракон сьӧд ужын но вормисе потыны быгатэ. Яратонын уг курадӟы, угось уг тоды, мар со сыӵе мур яратон. Сое ярато ке но, ачиз туж шер яратэ. Соин ик вазь уг кузпалъяськы. Нош куд-огезлы оген улон кельше но. Драконлы семья кылдытыны Комакен умойгес. Яратӥсь комак ваньзэ чида, Драконлэсь мылкыдзэ шӧдытэк но улыны быгатэ. Озьыгес ик кусыпсы луыны быгатэ кыен. Атасэн но кылзы тупалоз. Драконлэн умой ужъёсыз мынозы кескич Обезьянэн, но Драконлы солэсь чакласькыса улоно, вань пудоос пӧлысь Обезьян гинэ сое сереме уськытыны быгатэ. Но Драконлы тужгес но чакласьконо Тигрлэсь но Пунылэсь. Пуны ноку Драконлы уз оскы. Драконлэн улон сюресэз капчигес луоз егит дыръяз. Солы туж трос кужымзэс сётозы ӵыжы-выжыосыз. Бурдъяськем Дракон бӧрысь но вормонъёсыз пӧлы выйыса улоз. Та вакытэ но быдэс улон со понна - праздник. Улонэзлэн берпум люкетаз но Дракон шудо луоз: ваньмыз вань, номырлы уг кулэяськы. Сямыз гинэ секытгес луоз. Но шудо Дракон сое уг шӧды. Мар солы со, ачиз ньыль полэс шудо ни ке! Шудо кизили улын вордскем адямилы Дракон вае ваньбур, ӟеч сям, тупаса но кема улон. Но сокем шудо луыны выжыкылын гинэ, дыр, тупа. Собере ачиз но Дракон зэмос мар ке ӧвӧл ук. Соин ик шулдыръяськонлы гинэ кылдытэм выжыкыл пудолы быдэсак осконо ӧвӧл, дыр. Астрологъёс оскыто: 2000-тӥ арын бадӟым вормонъёс луозы политика яке соин герӟаськем кыӵе ке мукет удысын. Оло, зэмзэ ик, улонмы умой радъяськоз, азьпалан Россилы выль президент быръём. Собере али ужась премьермы В. Путин но Драконлэн араз вордӥськемын. Шудо луозы 2000-тӥ арын вордӥськем пичи драконъёс но. Но медаз со вордӥськы вылэм чилекъян-гудыръян нуналэ - озьы ало кизилиосты тодӥсь-валасьёс. Комак (1924, 1936, 1948, 1960, 1972, 1984, 1996) Дракон солы уз люкеты. Улонэз каньыл ортчоз. Комак ас удысъёсыныз выроз. Ваньзы шулдыръяськыку, аслыз лушкемак ваньбур люкалоз. Яратонзэ пушказ ке но возе, татын но ваньмыз умой луоз. Ош (1925, 1937, 1949, 1961, 1973, 1985, 1997) Ӟеч, узыр улонэз адӟыса малпалоз, азьвыл вашкала аръёс берытскизы шуыса. Но медаз шумпоты, Ошлы озьы ик трос ужано луоз. Но ужамезлэн пайдаез вуоно арын гинэ шӧдӥськоз. Соин ик Ошлы туэ умойгес луоз семья ужъёсын вырыны. Тигр (1926, 1938, 1950, 1962, 1974, 1986, 1998) Дракон сямен ик Тигр туж яратэ шулдыръяськонэз, праздникез, соин ик Драконэн огкыл шедьтыса со аслыз но пайда поттоз. Коӵыш (1927, 1939, 1951, 1963, 1975, 1987, 1999). Ас кожаз улоз. Котыр улон уз сюлмаськыты. Дракон (1928, 1940, 1952, 1964, 1976, 1988, 2000) Вуын уясь чорыг кадь шудо луоз. Но вань Драконъёс ог-огенызы уз тупалэ. Тылысь но пуысь вордскем Драконъёс "оппозициын" луозы. Кый (1929, 1941, 1953, 1965, 1977, 1989) Ваньмыз тырмоз Драконлэн шугекъяськонъёсаз пыриськытэк улыны. Соин ик таяз арын ваньмыз умой луоз. Вал (1930, 1942, 1954, 1966, 1978, 1990) Ужын но, яратонын но шудо ар. Но Драконэз азьпалтыны турттоно ӧвӧл. Кеч (1931, 1943, 1955, 1967, 1979, 1991) Драконлэн саюлаз кариськыса улӥз ке, 2000-тӥ ар шумпотымон луоз. Драконлэн ужрадъёсаз валтӥсь инты басьтыны уг яра, ӝӧк сьӧрын но кема кунояськыса пуконо ӧвӧл, умойгес дырызлэсь вазь кошкыны. Обезьян (1932, 1944, 1956, 1968, 1980, 1992) Обезьянъёс ваньзэ умой адӟо - Драконлэн праздниказ соос туж кулэ луозы. Атас (1933, 1945, 1957, 1969, 1981, 1993) Туж умой ар. Кузпалъяськыны тупа. Пуны (1934, 1946, 1958, 1970, 1982, 1994) Шулдыръяськон Пунылы уг кельшы, соин ик Драконэн кусыпъёссы умоесь уз луэ. Пунылэн улонэз та аре, зэмзэ ик, пунылэн кадь луоз. Уката ик Драконэн нюръяськыны ке кутскиз. Парсь (1935, 1947, 1959, 1971, 1983, 1995) Улонэз райын кадь луоз. Угось котькыӵе праздник дыръя трос сиён шеде. Бусьтыр улонзы луоз парсьпиослэн. Астрологлэсь А. Рязановлэсь верамъёссэ лыдӟисьёслы вуттӥз Т. Банникова. "Удмурт дунне" газетысь "Драконъёс" лыдӟисьёсмылы сӥзё... Николай Байтеряков. Россилы ӟеч президент мед быръёмы, ю-няньмы мед удалтоз но туж витисько ни пиосылэсь кышнояськемзэс, э-ке-ке, песятай луэме потэ. Людмила Юртеева. Медаз луэ ожмаськонъёс, кышкыт висёнъёс. Адями медаз ышты адямилыксэ. Мед вормоз ог-огдэ яратон. Людмила Стерхова. Котькуд семьялы тупаса улон. Пиналъёс, соослэн нылпиоссы ӵемгес мед шумпоттозы. Ӵуказе нуналлы осконмес медам ыштэ. Алевтина Вахрушева. Дунъёс медаз ни будэ вал. Начар семьяослэн но улонзы мед тупатскоз. Со понна 2000-тӥ арын ойдолэ зол президент быръёмы. 80-тӥ арзэ вожден Уноез колхозъёс но совхозъёс нимъёссэс кемалась воштӥзы. Нош Киясово ёросысь Ленин нимо совхозын вождьлэн нимыныз 80 ар уг люкисько ни. Совхоз Удмуртиын нырысетӥ совхозъёс пӧлын кылдӥз. Та нуналъёсы со дано юбилейзэ пусйиз. Г. ВАСИЛЬЕВ. Флор Васильев Усе лымы. Берга каллен. Педлон берга кадь вань омыр. Педлон шулдыр. Клубын выллем, Вальсын кадь бергалля лымы. Усе лымы. Берга каллен. Ини тылъёс но бергало. Соос но, Егитъёс выллем, Шудо вальсын кадь поръяло. Усе лымы. Поръя каллен. Соин ӵошен вань коркаос Вальсын бергалляло пумен. Соос но шумпото, луоз. Лымы усе. Берга лымы... Тол Бабайлэн нимыз - Василий Вашкала Русьын кемалась дырысен 1-тӥ январе пусйылӥзы святой Василийлэсь нуналзэ, уго та святоез калык пӧлын туж сӥлы каризы. Соин ик Тол Бабайлы но солэсь нимзэ сётӥзы. Нырысетӥ январе вазь ӵукна ик пиналъёс коркаостӥ ветлӥзы, выж вылэ ю тысь пазяса, маскаръяськыса: "Кизисько, кизисько, Выль арен ӟечкыласько!" Озьы соос сӥзизы вуоно арын ю-няньлы удалтон, котькуд семьялы - тыр улон. Нош туала вакытэ Василийлэсь нуналзэ пусъё 13-тӥ январе, вуж Выль аре выжон азьын. В. РОГАЛЕВ. Сюрес усьтӥське мынӥсьлы Тодматске: Алексей Ложкин, Удмурт национальной театрысь артист, 1997-тӥ арын Москваысь Щепкин нимо театральной училищеез йылпумъяз. Вордӥськемын Дэбес ёросысь Тольён гуртын. Ӝужыт, чебер Водолей. - Алексей, тон удмурт культурае югак воректыса пырид. Тросэзлы со возьмамтэ шорысь луиз. Секыт-а вал аслыд? - Секыт но, кышкыт но. Нырысьсэ калык азе потэмме тодам ваисько ке, али но пыдессинъёсы куалекъяло. Но мыным огласянь капчи - валтӥсь рольёсты шудылӥсько. - Уката ик Ольга Александровалэн "Тристан но Изольда" спектакляз Тристанэз шудэмед бере калыкез паймытӥд кадь. - О, со маке но верантэм вал. Спектакль бере учкисьёс котыртӥзы, автограф куро. - Театр, телевидение, "Венец" ансамбль... Нуналаз 24 час ужаськод шат? - Уг, но бергано луэ ик. Артист шуыса, ӵукна кема кӧлыны уг кылды. Телевидение сюрон кема кыстӥськиз. Нырысь ӵектыкузы, малы со мыным кулэ шуи. Но Татьяна Денисова туж усто курась вылэм. Со ик индылэ-дышетэ но. Нырысь пал эфирын ужаны туж шугъяськи: солы юри дышетскеме но ӧвӧл, учкисез но уд адӟиськы. Сцена вылын кырӟан сярысь но ноку ӧй малпаськылы - монтэк но кырӟасьёс трос. Но Эдуард Князев быгатӥз мылкыдме лӧпкытыны, табере ачим шумпотӥсько. Кырӟанъёсы трос ӧвӧл на ке но, оскисько, соос ӝоген хит луозы. - Дэбесъёс асьсэды тужгес но чеберен лыдъяло. - Мон но озьы ик малпасько: дэбесъёс туж чебересь но визьмоесь. - Шорад учкыса, эркиям муртлы кельшиськод. - Озьы ке потэ, туж умой. - Кызьы шутэтскиськод? - Диван вылын кылльыса, улон сярысь малпаськыса. Куддыр туж потэ малпанъёслэсь мозмытскем, но уг луы. - Мар бен сокем шугъяськытэ? - Пазяськеме - олокӧня кеч сьӧры уиськисько. Но озьы шулдыргес. - Алёша, нылъёс возьмало ни, дыр, тунсыкогес юанмес. Валатскид-а? - Хм, валатски, конечно. Кузпалы - Светлана, театрысь артистка, кык аресъем Сережа пимы, вуоно артист. Со милям москвич, дышетскыкумы вордӥськиз. Туж шаплы, нюръяськыны, туала крезьгур кылзыны яратэ. - Иське, лулӟылӥсьёсыдлэсь мылкыдзэс куашкатод ни. - Чик но медаз чигиське. Мон туж яратӥсько лулӟылӥсьёсме. - Ульчаын тодмало ни-а? - Куддыр луылэ. Но мон, данъяськем интые, возьдаськисько. Огпол трамвайысь потыса кошки, билет ӧй басьты вал, кондуктор тодмаз. - Улонысьтыд кыӵе учырез ялан тодад возиськод? - Огвакыт шаерысьтымы усточи пиналъёслэн школа-интернатазы дышетсконме аналтыны малпасько вал. Мӧзмемысьтым доре бертӥ, анайме отысь документъёсме курыны косӥ. Анай туж ӧз пумитъяськы, городэ кошкиз. Нош отысь воспитателеным вуиз. Ольга Васильевна Иванова монэ берен сьӧраз нуиз. Туж бадӟым тау солы. Сотэк мон али искусство удысын ужасал меда? - Берло дыре вормонэд? - Пумаз верало. - Мае тужгес но дунъяськод? - Анай-атаез, семьяез. - Кыӵе бен Алексей Ложкин семьяяз? - Ӧйтӧд, созэ семьяосылэсь юано. Диван вылын кылльыны яратэм сяна, быгатӥсько мильым пыжыны, курег пуз пуштытыны - со мынам яратоно сиёнэ. Гуртэ бертылыкумы чорыганы ветлӥсько. Аслым ачим туж быгатӥсь чорыгась кадь потӥсько, нош агайёсы "тынэсьтыд ёршъёс но кышкало" шуо. Уг яратӥськы сериалъёсты - коркась потыса кошкисько. - Шӧдӥськод-а даурлэсь воштӥськемзэ? - Уг. - Азьланезлы малпанъёсыд сярысь, конечно, уд вера. - Верало. Мон туж но туж вожъяськисько узбекъёслы, таджикъёслы - соослэн асьсэлэн кинозы вань! Асьмелэн со уж уг азинскы. Туж потэ удмурт киноын шудэме, сое лэсьтэме. - Тынэсьтыд - Выль ар сябась. - Ӧй на малпаськы. Но ӵуказеяз "кыӵе вал толон праздник" шуыса медам юалляське. - Вормонэд сярысь ӧд вера на. - Туннэ нырысьсэ газетэ интервью сётӥ! Туж кышкай вал. - Тау. З. РЯБИНИНА. Выль ар номере Адямилэн чеберез Со пумиськон дырысен кык толэзьлэсь ятыр луоз ни, нош мынам сюлэмы нокызьы но буйганы уг вала. Улятозям трос гинэ адямиосын пумиськоно луылӥз, но Пичи Пурга ёросысь Алексеев кузалъёс азьын йыбырттэме ик потэ. Уг тодӥськы, оло, кинлы ке валантэм но паймымон потоз та учыр, нош мынам син азям усьтӥськиз адямилэн чеберез. Анна Трофимовна но Николай Игнатьевич, вождэс эн поттэ, асьтэлэсь юатэк улон кусыпъёстэс калык син азе поттэмысьтым. *** Кылем арын одӥгаз "Наталь" бамын печатламы шуге-леке усем кышномуртлэсь гожтэтсэ. Отын со ӝожтӥськиз картэзлэн йӧнтэмъяськемезлы, секыт улон-вылонэзлы. Кӧня ке улыса, реадкцие вуиз арлыдо воргоронлэсь гожтэт. Кышное, пе, ракен висе, гожтӥсько солэн косэмезъя. Тодматыны курем со кышномуртэн. Озьы, Ижевскын улӥсь нылкышнолэн адресэзъя гуртын улӥсь воргоронлэсь кык гожтэтсэ келяй. Собере та учыр сярысь вунэтӥ, тодэ вайытӥсь но ӧй вал ни. Редакцие вуэм гожтэтъя туэ сӥзьыл Пурга палъёсы командировкае потаны кылдӥз. Гуртоослэн нимынызы газетэ вазиськем ужысь ветеран Алексеев. Тани солэн гожтэтысьтыз кӧня ке чуръёс: "Дунне вылын улытозь котьмае чидано, адӟоно луэ. Улонлэн секытэз тужгес но шӧдӥське арлыд вуэмъя. Вылаз ик, азьлань оскиськонэ нокин ӧвӧл ке. Ми пересеным тани ӝыны даур пала улӥськом ини, но пинал вордыны милемлы кылдымтэ, лэся. Гуртамы сыӵе семьяос вить-куать пала. Азьло, Совето власть дыръя, огназы улӥсьёслы яке нылпитэм семьяослы колхоз пуэн юрттэ вал. 1998-тӥ арын апрель толэзе милям гуртысь пересьёслэсь бичазы вал уксё, котыр машина пу ваём шуыса. Ваньмыз дас кык хозяйство, куатез - нылпитэм пересьёс. Со дырысен кык пол кизён дыр ортчиз ни, милемыз весь буйгато - тани турнан дыр ортчоз, ӝоген араса быдтомы ни... Табере шуо - ми, пе, асьмеос кулэ вандыны, машинае тырыны. Ачид уд ке быгатӥськы - кинэ ке медъя. Туж валантэм ук та улон, вань ужзэ медъяса лэсьтон понна, кытысь уксё шедьтоз пересь мурт. Улон но весь дуноя. Пинал ёзвиосмы юнман вакытэ сиёнмы но турын-куар сяна ӧй вал, дӥськут но етӥн кужлэсь куэмез сяна ӧз шедьылы. Тузон пӧлын гольык пыдын шудон-бызьылон арлыдамы ик кыткизы усы-геры борды. Шунды ӝужанэз но, шунды пуксёнэз но бусыын пумиталлямы. Ми понна ож бусы вал фронтлэн мышказ... Капчи мылкыдын сётӥм вал уксёмес, юрттэтлы оским. Табере уг но берыкто, пу но уг ваё. Мон со уксёез ачим бичай, ветеранъёслэн советсылэн кивалтӥсез вал соку. Эшъёсы табере монэ ёрто ни, нош мон мар карыны быгато, кужымы ӧвӧл ке..." Гуртэ вуылыкумы, югдур тупаны кутскем. Алексеевъёслы но куд-ог мукет хозяйствоосы пу ваиллям ни вылэм. Вераны кулэ, дуно усиз сыӵе юрттэт шуге-леке сюрем адямиос понна уксё ласянь но, лул кужымзэс сэстон ласянь но. Озьы ке но, Николай Игнатьевич али но дась кулэ дыръяз кивалтӥсьёслы кыл-куара вераны. Юнме ӧз оске вал солы ветеранъёслэн советэнызы кивалтыны. Кышноез секыт висьыны усемен палэнсконо луиз та ужлэсь. Нянь пыжон но, пӧраськон но, юрт котырын берган но - ваьмыз усиз воргорон киос вылэ. Утялтыны-эскерыны кулэ на лек эзель улэ сюрем кузпалзэ. Ӵапак со нылкышно ик картсэ ӝуткам вылэм юртазы мукет пӧрась пыртыны. Пумиськеммы бере Николай Игнатьевич ачиз кылпум поттӥз гожтэт ыстэмез пумысен. Висись кышноезлы котькуд газет номермес шара лыдӟылэ вылэм(Кузпалъёс кема аръёс ӵоже эшъясько ини газетэнымы). Тӥни озьы одӥг пол "Наталь" бамысь гожтэт борды ӝимиллям. Маза ӧз сёты ни нылкышно картэзлы. Гожты но гожты, аслыд но, пе, капчи луоз юрт котырын берганы, секыт югдуре шедем адямилы но юрттод. Ӧз быдэсмы малпанэз Анна апайлэн. Со нылкышно машинаен ик нылпиосыныз ӵош вуылӥз гуртазы, эскериськиз но кошкиз. Нош гужем вылтӥ Алексеевъёс доры - мукетыз куно лыктӥз, тодмооссы пыр сюрес шедьтэм. Таиз кӧня ке улӥз ик, картофказэс но ваньзэ уриз-утялтӥз. Лыкто на шуыса кошкиз вал, выльысь ӧз берытскы ни. - Бен кин мон вылэ лыктоз, - картсэ жаляса, сюлмысьтыз ик ӧпкеле Анна апай. Вераськыны но шуген йӧтэ нылкышнолы. Солэн пичи гинэ мугорыз кыӵе но шуг- секытъёсты чидамтэ. Вордӥськемын со 1926-тӥ арын. Ӟырт кезьыт куазен нюлэс коранэз но, чугун сюрес лэсьтонэз но, гырон-кизёнэз но пыр потӥз. Вань со курадӟонъёсыз вылэ инмар нылпиен ке но шумпотты вал, со шуд но палэнтӥ ортчиз. Ярам ай, сокем сюлмо картэз вӧзаз вань: эмъюм но сётоз, висись интызэ но зыралоз - маялтоз. - Кылем толалтэ ик улонэзлы уг оскы ни вал, - вера Николай Игнатьевич, - туннэ нуналэн гинэ улэ. Аслыз ёрмыса, куд-ог дыръя шуэ но, ну, пе, монэ интернат юртэ, умойгес улод, тонэ утись но луоз. Нош мыным жаль потэ, сое отын йӧназ утись ик уз луы. Асме но сюлмаськыто азьлань улон-пересьмон нуналъёсы. Малпасько, тани мон кышноме утялтӥсько, нош монэ кин утёз. Пересе но со сярысь весь куректэ, соин ик кышнояськыны косэ. Сизьымдон ар ӵоже улытозяз Николай Игнатьевич пӧртэм гурт ужъёсты быдэсъяз, автомашинаез гинэ, пе, нуллыны ӧй дышы. Кужмыз егит дыръяз кадь ӧвӧл ке но, нокыӵе уж сое уш кышкаты. Адямиослэсь чиданлыксэс, адямилыко луэмзэс эскерон понна, лэся, инмар соос вылэ пӧртэм шуг-секытъёс, курадӟонъёс лэзе. Аръёсын ваче син пумиськыса, кузпалъёс Алексеевъёс адямилэсь дано нимзэ ӧз ыштэ. Таиз ар ялэмын вал арлыдоослэн аренызы. Со тӥляд но арды, гажано Алексей Игнатьевич но Анна Трофимовна. Нош азьланяз мед луозы мукет вормонъёс. Л. МАЛЫХ. Ӟечкылан Шаркан ёросысь Сосновка гуртысь Зинаида Герасимовна но Василий Иванович Петровъёсты мылысь-кыдысь ӟечкыласьком азвесь сюанэнызы! Шудо-буро шумпотыса улон, егит дыръя кадь ик пӧсь яратон но корка тыр внукъёс тӥледлы. Александр, Светлана но Андрей. "Ӟечбур!" люка эшъёссэ 5-тӥ толшоре "Ӟечбур!" газет пусъе 70 ар тырмонзэ. Соин валче со 6 часын ӝытазе Удмурт университетлэн актовой залаз люка аслэсьтыз эшъёссэ: лыдӟисьёссэ, азьвыл но али юнкоръёссэ, газетчиосты но вань мылкыд карисьёсты. Куноос понна шулдыр концерт луоз. Ӵуказеяз пинал гожъяськисьёслэн слётсы люкаськоз. Ӧтиськом ваньдэс празднике!